အည > သင်္ဂါယန-ပုစ္ဆ ဝိဿဇ္ဇနာ > မဇ္ဈိမနိကာယ (ပု-ဝိ)

ဝိဿဇ္ဇနာ – ဥက္ကဋ္ဌာယံ ဘန္တေ ပဉ္စသတေ ဗြာဟ္မဏကုလာ ပဗ္ဗဇိတေ အာရဗ္ဘ ဘာသိတံ၊ ပဉ္စသတာ ဘန္တေ ဗြာဟ္မဏကုလာ ပဗ္ဗဇိတာ ¶ ဘိက္ခူ ပရိယတ္တိံ နိဿာယ မာနံ ဥပ္ပာဒေသုံ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – တံ ပနာဝုသော သုတ္တံ ဘဂဝတာ ကတိဟိ ဝါရေဟိ ကတိဟိ စ အန္တောဂဓပဒေဟိ ဝိဘဇိတွာ ဘာသိတံ။

ဝိဿဇ္ဇနာ – တံ ¶ ပန ဘန္တေ မူလပရိယာယသုတ္တံ ဘဂဝတာ အဋ္ဌဟိ စ ဝါရေဟိ စတုဝီသတိယာ စ အန္တောဂဓပဒေဟိ ဝိဘဇိတွာ ဒေသိတံ။

ပုစ္ဆာ – ဒုတိယံ ပနာဝုသော သဗ္ဗာသဝသုတ္တံ ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သဗ္ဗာသဝသုတ္တံ ပန ဘန္တေ ဘဂဝတာ သာဝတ္ထိယံ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – တတ္ထာဝုသော ¶ ဘဂဝတာ အာသဝါ ကတိဟိ ပကာရေဟိ ဝိဘဇိတွာ ဒဿိတာ။

ဝိဿဇ္ဇနာ – သတ္တဟိ ဘန္တေ ပကာရေဟိ ဝိဘဇိတွာ အာသဝါ ဘဂဝတာ ပကာသိတာ။

ပုစ္ဆာ – ဓမ္မဒါယာဒသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ၊ ဘဂဝတော စ ဘန္တေ ဘိက္ခုသင်္ဃဿ စ တဒါ မဟာလာဘသက္ကာရော ဥဒပါဒိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – တတ္ထာဝုသော ¶ ဒွေ အနုသန္ဓယော၊ တေသု ပဌမေ အနုသန္ဓိမှိ ကထံ ဘဂဝတာ ဘိက္ခူနံ ဩဝါဒေါ ဒိန္နော။

ဝိဿဇ္ဇနာ – ပဌမေ ဘန္တေ အနုသန္ဓိမှိ ဓမ္မဒါယာဒါ မေ ဘိက္ခဝေ ဘဝထ မာ အာမိသဒါယာဒါ၊ အတ္ထိ မေ တုမှေသု အနုကမ္ပာ၊ ကိန္တိ မေ သာဝကာ ဓမ္မဒါယာဒါ ဘဝေယျုံ နော အာမိသဒါယာဒါတိ ဧဝမာဒိနာ ဘဂဝတာ ဘိက္ခူနံ ဩဝါဒေါ ဒိန္နော။

ဓမ္မဒါယာဒါ ¶ မေ ဘိက္ခဝေ ဘဝထ မာ အာမိသဒါယာဒါ၊ အတ္ထိ မေ တုမှေသု အနုကမ္ပာ ကိန္တိ မေ သာဝကာ ဓမ္မဒါယာဒါ ဘဝေယျုံ၊ နော အာမိသဒါယာဒါ။

ပုစ္ဆာ – ဒုတိယေ ¶ ပနာဝုသော အနုသန္ဓိမှိ အာယသ္မတာ သာရိပုတ္တတ္ထေရေန ဓမ္မသေနာပတိနာ ကီဒိသီ ဓမ္မဒေသနာ ဝိဘဇိတွာ ပကာသိတာ။

ဝိဿဇ္ဇနာ – ဒုတိယေ ပန ဘန္တေ အနုသန္ဓိမှိ အာယသ္မတာ သာရိပုတ္တတ္ထေရေန ဓမ္မသေနာပတိနာ သတ္ထု ပဝိဝိတ္တဿ ဝိဟရတော သာဝကာနံ ဝိဝေကံ အနနုသိက္ခတံ တီဟိ ဌာနေဟိ ဂါရယုတံ၊ အနုသိက္ခန္တာနဉ္စ တီဟိ ဌာနေဟိ ပါသံသတံ၊ သောဠသ စ ပါပကေ ဓမ္မေ တေသဉ္စ ပဟာနာယ မဇ္ဈိမာ ပဋိပဒါ ဝိဘဇိတွာ ပကာသိတာ။

ပုစ္ဆာ – ဘယဘေရဝသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ ဇာဏုဿောဏိံ ဗြာဟ္မဏံ အာရဗ္ဘ ဘာသိတံ၊ ဇာဏုဿောဏိ ဘန္တေ ဗြာဟ္မဏော ဘဂဝန္တံ ဥပသင်္ကမိတွာ ဧတဒဝေါစ ‘‘ယေ မေ ဘော ဂေါတမ ကုလပုတ္တာ ဘဝန္တံ ဂေါတမံ ဥဒ္ဒိဿ သဒ္ဓါ အဂါရသ္မာ အနဂါရိယံ ပဗ္ဗဇိတာ၊ ဘဝံ တေသံ ဂေါတမော ပုဗ္ဗင်္ဂမော၊ ဘဝံ

တေသံ ¶ ဂေါတမော ဗဟုကာရော၊ ဘဝံ တေသံ ဂေါတမော သမာဒပေတာ၊ ဘောတော စ ပန ဂေါတမဿ သာ ဇနတာ ဒိဋ္ဌာနုဂတိံ အာပဇ္ဇတီ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – အနင်္ဂဏသုတ္တံ ¶ ပနာဝုသော ကတ္ထ ကံ အာရဗ္ဘ ကေန ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ အာယသ္မတာ သာရိပုတ္တတ္ထေရေန ဓမ္မသေနာပတိနာ ဘာသိတံ။

ပုစ္ဆာ – အာကင်္ခေယျသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – ဝတ္ထသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – သလ္လေခသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ မဟာစုန္ဒံ အာရဗ္ဘ ဘာသိတံ၊ အာယသ္မာ မဟာစုန္ဒော ဘန္တေ ဘဂဝန္တံ ဥပသင်္ကမိတွာ ဧတဒဝေါစ ‘‘ယာ ဣမာ ဘန္တေ အနေကဝိဟိတာ ဒိဋ္ဌိယော လောကေ ဥပ္ပဇ္ဇန္တိ၊ အတ္တဝါဒပဋိသံယုတ္တာ ဝါ လောကဝါဒပဋိသံယုတ္တာ ဝါ၊ အာဒိမေဝ နု ခေါ ဘန္တေ ဘိက္ခုနော မနသိကရောတော ဧဝမေတာသံ ဒိဋ္ဌီနံ ပဟာနံ ဟောတိ၊ ဧဝမေတာသံ ဒိဋ္ဌီနံ ပဋိနိဿဂ္ဂေါ ဟောတီ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – တတ္ထ ¶ စ အာဝုသော ကတိ ပရိယာယာ ကတိ စ အန္တောဂဓပဒါနိ ဘဂဝတာ ဝိဘဇိတွာ ပကာသိတာနိ။

ဝိဿဇ္ဇနာ – တတ္ထ ဘန္တေ ပဉ္စ ပရိယာယာ စတုစတ္တာလီသ စ အန္တောဂဓပဒါနိ ဘဂဝတာ ဝိတ္ထာရေန ဘာသိတာနိ။

ပုစ္ဆာ – သမ္မာဒိဋ္ဌိသုတ္တံ ¶ ပနာဝုသော ကတ္ထ ကံ အာရဗ္ဘ ကေန ဘာသိတံ။

ဝိဿဇ္ဇနာ – ဘဂဝတော ဘန္တေ ဝစနံ အရဟတော သမ္မာသမ္ဗုဒ္ဓဿ။

ဝိဿဇ္ဇနာ – ပရမ္ပရာယ ဘန္တေ အာဘတံ။

ပုစ္ဆာ – မဟာသတိပဋ္ဌာနသုတ္တံ ¶ ပနာဝုသော ယောဂါဝစရာနံ ဗဟုပကာရတ္တာ ဒီဃနိကာယေ စ ဣဓ စာတိ ဒွီသု နိကာယေသု ပေါရာဏကေဟိ သံဂီတိကာရေဟိ ဒွိက္ခတ္တုံ သံဂါယိတွာ ဝိတ္ထာရေန ပတိဋ္ဌာပိတံ၊ တံ အမှေဟိ ဒီဃနိကာယေ ယထာနုပ္ပတ္တဝသေန ပုစ္ဆိတဉ္စ ဝိဿဇ္ဇိတဉ္စ။ တထာပိ ယောဂါဝစရာနံ ဗဟုပကာရတ္တာယေဝ တံ ¶ ဣဒါနိပိ ယထာနုပ္ပတ္တဝသေန ပုန ပုစ္ဆိဿာမိ၊ တံ ပနေတံ အာဝုသော မဟာသတိပဋ္ဌာနသုတ္တံ ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – ကုရူသု ဘန္တေ ကမ္မာသဓမ္မေ နာမ ကုရူနံ နိဂမေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – ကထဉ္စာဝုသော ¶ တတ္ထ အာနာပါနဿတိ ကာယာနုပဿနာ ဘဂဝတာ ဝိဘဇိတွာ ပကာသိတာ။

ဝိဿဇ္ဇနာ – ဣဓ ဘိက္ခဝေ ဘိက္ခု အရညဂတော ဝါ ရုက္ခမူလဂတော ဝါ သုညာဂါရဂတော ဝါ နိသီဒတိ ပလ္လင်္ကံ အာဘုဇိတွာ ဥဇုံ ကာယံ ပဏိဓာယ ပရိမုခံ သတိံ ဥပဋ္ဌပေတွာ သော သတောဝ အဿသတိ၊ သတောဝ ပဿသတိ၊ ဒီဃံ ဝါ အဿသန္တော ‘ဒီဃံ အဿသာမီ’တိ ပဇာနာတိ၊ ဒီဃံ ဝါ ပဿသန္တော ‘ဒီဃံ ပဿသာမီ’တိ ပဇာနာတိ၊ ဧဝမာဒိနာ ဘန္တေ တတ္ထ အာနာပါနဿတိ ကာယာနုပဿနာ ဘဂဝတာ ဝိဘဇိတွာ ပကာသိတာ။

ပုစ္ဆာ – ကထဉ္စာဝုသော ¶ တတ္ထ ဣရိယာပထကာယာနုပဿနာ ဘဂဝတာ ဝိဘဇိတွာ ပကာသိတာ။

ဝိဿဇ္ဇနာ – ပုန စပရံ ဘိက္ခဝေ ဘိက္ခု ဂစ္ဆန္တော ဝါ ဂစ္ဆာမီတိ ပဇာနာတိ၊ ဌိတော ဝါ ဌိတောမှီတိ ပဇာနာတိ၊ နိသိန္နော ဝါ နိသိန္နောမှီတိ ပဇာနာတိ၊ သယာနော ဝါ သယာနောမှီတိ ပဇာနာတိ၊ ဧဝမာဒိနာ ဘန္တေ ဘဂဝတာ ဣရိယာပထကာယာနုပဿနာ ဘာဝနာ ဝိဘဇိတွာ ပကာသိတာ။

ပုစ္ဆာ – ကထဉ္စာဝုသော ¶ တတ္ထ သမ္ပဇညကာယာနုပဿနာ ဘဂဝတာ ဝိဘဇိတွာ ပကာသိတာ။

ဝိဿဇ္ဇနာ – ပုန စပရံ ဘိက္ခဝေ ဘိက္ခု အဘိက္ကန္တေ ပဋိက္ကန္တေ သမ္ပဇာနကာရီ ဟောတိ၊ အာလောကိတေ ဝိလောကိတေ သမ္ပဇာနကာရီ ဟောတိ၊ သမိဉ္ဇိတေ ပသာရိတေ သမ္ပဇာနကာရီ ဟောတိ၊ သင်္ဃာဋိပတ္တစီဝရဓာရဏေ သမ္ပဇာနကာရီ ဟောတိ၊ အသိတေ ပီတေ ခါယိတေ သာယိတေ သမ္ပဇာနကာရီ ဟောတိ၊ ဥစ္စာရပဿာဝကမ္မေ သမ္ပဇာနကာရီ ဟောတိ၊ ဂတေ ဌိတေ နိသိန္နေ သုတ္တေ ဇာဂရိတေ ဘာသိတေ တုဏှီဘာဝေ သမ္ပဇာနကာရီ ဟောတိ၊ ဧဝမာဒိနာ ဘန္တေ ဘဂဝတာ တတ္ထ သမ္ပဇညကာယာနုပဿနာ ဝိဘဇိတွာ ပကာသိတာ။

ပုစ္ဆာ – ကထဉ္စာဝုသော ¶ တတ္ထ ပဋိကူလမနသိကာရကာယာနုပဿနာ ဘဂဝတာ ဝိဘဇိတွာ ပကာသိတာ။

ဝိဿဇ္ဇနာ – ပုန စပရံ ဘိက္ခဝေ ဘိက္ခု ဣမမေဝ ကာယံ ဥဒ္ဓံ ပါဒတလာ အဓော ကေသမတ္ထကာ တစပရိယန္တံ ပူရံ နာနပ္ပကာရဿ အသုစိနော ပစ္စဝေက္ခတိ အတ္ထိ ဣမသ္မိံ ကာယေ ကေသာလောမာ နခါ ဒန္တာ တစော ဧဝမာဒိနာ ဘန္တေ တတ္ထ ဘဂဝတာ ပဋိကူလမနသိကာရကာယာနုပဿနာ ဝိဘဇိတွာ ပကာသိတာ။

ပုစ္ဆာ – ကထဉ္စာဝုသော ¶ တတ္ထ ဓာတုမနသိကာရကာယာနုပဿနာ ဘဂဝတာ ဝိဘဇိတွာ ပကာသိတာ။

ဝိဿဇ္ဇနာ – ပုန စပရံ ဘိက္ခဝေ ဘိက္ခု ဣမမေဝ ကာယံ ယထာဌိတံ ယထာပဏိဟိတံ ဓာတုသော ပစ္စဝေက္ခတိ အတ္ထိ ဣမသ္မိံ ကာယေ ပထဝီဓာတု အာပေါဓာတု တေဇောဓာတု ဝါယောဓာတု ဧဝမာဒိနာ ဘန္တေ ဘဂဝတာ ဓာတုမနသိကာရကာယာနုပဿနာ ဝိဘဇိတွာ ပကာသိတာ။

ပုစ္ဆာ – ကထဉ္စာဝုသော ¶ တတ္ထ နဝ သိဝထိကကာယာနုပဿနာ ဘဂဝတာ ဝိဘဇိတွာ ပကာသိတာ။

ဝိဿဇ္ဇနာ – ပုန စပရံ ဘိက္ခဝေ ဘိက္ခု သေယျထာပိ ပဿေယျ သရီရံ သိဝထိကာယ ဆဍ္ဍိတံ ဧကာဟမတံ ဝါ ဒွီဟမတံ ဝါ တီဟမတံ ဝါ ဥဒ္ဓုမာတကံ ဝိနီလကံ ဝိပုဗ္ဗကဇာတံ သော ဣမမေဝ ကာယံ ဥပသံဟရတိ ‘‘အယမ္ပိ ခေါ ကာယော ဧဝံဓမ္မော ဧဝံဘာဝီ ဧဝံအနတီတော’’တိ ဧဝမာဒိနာ ဘန္တေ တတ္ထ ဘဂဝတာ နဝ သိဝထိကကာယာနုပဿနာ ဘာဝနာ ဝိဘဇိတွာ ပကာသိတာ။

ပုစ္ဆာ – ကထဉ္စာဝုသော ¶ တတ္ထ ဝေဒနာနုပဿနာ ဘဂဝတာ ဝိဘဇိတွာ ဒေသိတာ။

ဝိဿဇ္ဇနာ – ဣဓ ဘိက္ခဝေ ဘိက္ခု သုခံ ဝါ ဝေဒနံ ဝေဒယမာနော ‘‘သုခံ ဝေဒနံ ဝေဒယာမီ’’တိ ပဇာနာတိ၊ ဒုက္ခံ ဝါ ဝေဒနံ ဝေဒယမာနော ‘‘ဒုက္ခ ဝေဒနံ ဝေဒယာမီ’’တိ ပဇာနာတိ၊ အဒုက္ခမသုခံ ဝါ ဝေဒနံ ဝေဒယမာနော ‘‘အဒုက္ခမသုခံ ဝေဒနံ ဝေဒယာမီ’’တိ ပဇာနာတိ၊ ဧဝမာဒိနာ ဘန္တေ တတ္ထ ဘဂဝတာ ဝေဒနာနုပဿနာ ဝိဘဇိတွာ ပကာသိတာ။

ပုစ္ဆာ – ကထဉ္စာဝုသော ¶ တတ္ထ စိတ္တာနုပဿနာ ဘဂဝတာ ဝိဘဇိတွာ ဒေသိတာ။

ဝိဿဇ္ဇနာ – ဣဓ ဘိက္ခဝေ ဘိက္ခု သရာဂံ ဝါ စိတ္တံ ‘‘သရာဂံ စိတ္တ’’န္တိ ပဇာနာတိ၊ ဝီတရာဂံ ဝါ စိတ္တံ ‘‘ဝီတရာဂံ စိတ္တ’’န္တိ ပဇာနာတိ၊ သဒေါသံ ဝါ ဝီတဒေါသံ ဝါ သမောဟံ ဝါ ဝီတမောဟံ ဝါ သံခိတ္တံ ဝါ စိတ္တံ ‘‘သံခိတ္တံ စိတ္တ’’န္တိ ပဇာနာတိ၊ ဝိက္ခိတ္တံ ဝါ စိတ္တံ ‘‘ဝိက္ခိတ္တံ စိတ္တ’’န္တိ ပဇာနာတိ၊ ဧဝမာဒိနာ တတ္ထ ဘဂဝတာ စိတ္တာနုပဿနာ ဝိဘဇိတွာ ပကာသိတာ။

ပုစ္ဆာ – ကထဉ္စာဝုသော ¶ တတ္ထ ဓမ္မာနုပဿနာ ဘဂဝတာ ဝိဘဇိတွာ ဒေသိတာ၊ တံ သင်္ခေပမတ္တေနေဝ ဝိဿဇ္ဇေဟိ။

ဝိဿဇ္ဇနာ – ဣဓ ဘိက္ခဝေ ဘိက္ခု ဓမ္မေသု ဓမ္မာနုပဿီ ဝိဟရတိ၊ ပဉ္စသု နီဝရဏေသု ဧဝမာဒိနာ ဘန္တေ တတ္ထ ဘဂဝတာ ပဉ္စဟိ ပဗ္ဗေဟိ ဓမ္မာနုပဿနာ ဝိဘဇိတွာ ပကာသိတာ။

ပုစ္ဆာ – စူဠနသီဟနာဒသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ ပရိဟီနလာဘသက္ကာရေ နာနာတိတ္ထိယေ အာရဗ္ဘ ဘာသိတံ၊ နာနာတိတ္ထိယာ ဘန္တေ ပရိဟီနလာဘသက္ကာရာ တေသု တေသု ဌာနေသု ပရိဒေဝိံသု၊ စတဿော စ ဘန္တေ ပရိသာ ဘဂဝတော ဧကမတ္ထံ အာရောစေသုံ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – တေနာဝုသော ¶ ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန မဟာသီဟနာဒသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ဝေသာလိယံ ဘန္တေ သုနက္ခတ္တံ လိစ္ဆဝိပုတ္တံ အာရဗ္ဘ ဘာသိတံ၊ သနုက္ခတ္တော ဘန္တေ လိစ္ဆဝိပုတ္တော အစိရပက္ကန္တော ဟောတိ ဣမသ္မာ ဓမ္မဝိနယာ၊ သော ဝေသာလိယံ ပရိသတိ ဧဝံ ဝါစံ ဘာသတိ ¶ ‘‘နတ္ထိ သမဏဿ ဂေါတမဿ ဥတ္တရိမနုဿဓမ္မာ အလမရိယဉာဏဒဿနဝိသေသော၊ တက္ကပရိယာဟတံ သမဏော ဂေါတမော ဓမ္မံ ဒေသေတိ ဝီမံသာနုစရိတံ သယံ ပဋိဘာနံ။ ယဿ စ ခွာဿ အတ္ထာယ ဓမ္မော ဒေသိတော၊ သော နိယျာတိ တက္ကရဿ သမ္မာ ဒုက္ခက္ခယာယာ’’တိ၊ ဧတမတ္ထံ ဘန္တေ အာယသ္မာ သာရိပုတ္တော ဘဂဝတော အာရောစေသိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ကတိ ¶ ပနာဝုသော တတ္ထ ဘဂဝတာ တထာဂတဿ တထာဂတဗလာနိ ဝိဘဇိတွာ ပကာသိတာနိ၊ ယေဟိ ဗလေဟိ သမန္နာဂတော တထာဂတော အာသဘံ ဌာနံ ပဋိဇာနာတိ၊ ပရိသာသု သီဟနာဒံ နဒတိ၊ ဗြဟ္မစက္ကံ ပဝတ္တေတိ။

ဝိဿဇ္ဇနာ – ဒသ ဘန္တေ တထာဂတဿ တထာဂတဗလာနိ ဘဂဝတာ ဝိဘဇိတွာ ပကာသိတာနိ၊ ယေဟိ ဗလေဟိ သမန္နာဂတော တထာဂတော အာသဘံ ဌာနံ ပဋိဇာနာတိ၊ ပရိသာသု သီဟနာဒံ နဒတိ၊ ဗြဟ္မစက္ကံ ပဝတ္တေတိ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ စတုဝေရဇ္ဇဉာဏာနိ ဝိဘဇိတွာ ပကာသိတာနိ၊ ယေဟိ ဝေသာရဇ္ဇေဟိ သမန္နာဂတော တထာဂတော အာသဘံ ဌာနံ ပဋိဇာနာတိ၊ ပရိသာသု သီဟနာဒံ နဒတိ၊ ဗြဟ္မစက္ကံ ပဝတ္တေတိ။

ဝိဿဇ္ဇနာ – ခီဏာသဝဿ တေ ပဋိဇာနတော ဣမေ အာသဝါ အပရိက္ခီဏာတိ တတြ ဝတ မံ သမဏော ဝါ ဗြာဟ္မဏော ဝါ ဒေဝေါ ဝါ မာရော ဝါ ဗြဟ္မာ ဝါ ကောစိ ဝါ လောကသ္မိံ သဟဓမ္မေန ပဋိစောဒေဿတီတိ နိမိတ္တမေတံ သာရိပုတ္တ န သမနုပဿာမိ၊ ဧတမဟံ သာရိပုတ္တ နိမိတ္တံ အသမနုပဿန္တော ခေမပ္ပတ္တော အဘယပ္ပတ္တော ဝေသာရဇ္ဇပ္ပတ္တော ဝိဟရာမိ။ ဧဝမာဒိနာ ဘန္တေ တတ္ထ စတုဝေသာရဇ္ဇဉာဏာနိ ဘဂဝတာ ဝိတ္ထာရေန ဝိဘဇိတွာ ပကာသိတာနိ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ ပဉ္စဂတိပရိစ္ဆေဒဉာဏံ ဝိဘဇိတွာ ပကာသိတံ။

ဝိဿဇ္ဇနာ – ပဉ္စ ခေါ ဣမာ သာရိပုတ္တ ဂတိယော၊ ကတမာ ပဉ္စ၊ နိရယော တိရစ္ဆာနယောနိ ပေတ္တိဝိသယော မနုဿာ ဒေဝါ၊ ဧဝမာဒိနာ ဘန္တေ ဘဂဝတာ တတ္ထ ပဉ္စဂတိပရိစ္ဆေဒကဉာဏံ ဝိဘဇိတွာ ပကာသိတံ။

ပုစ္ဆာ – ကထဉ္စာဝုသော ¶ တတ္ထ တထာဂတော အတ္တနော ပညာဝေယျတ္တိယာ အပရိဟာနိံ ပကာသေသိ။

ဝိဿဇ္ဇနာ – သန္တိ ခေါ ပန သာရိပုတ္တ ဧကေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော ယာဝဒေဝါယံ ဘဝံ ပုရိသော ဒဟရော ဟောတိ၊ ဧဝမာဒိနာ ဘန္တေ တတ္ထ တထာဂတော အတ္တနော ပညာဝေယျတ္တိယာ အပရိဟာနိံ ပကာသေသိ။

ပုစ္ဆာ – မဟာဒုက္ခက္ခန္ဓသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ အညတိတ္ထိယေ အာရဗ္ဘ ဘာသိတံ၊ သမ္ဗဟုလာ ဘန္တေ အညတိတ္ထိယာ ဘိက္ခူ ဧတဒဝေါစုံ ‘‘သမဏော အာဝုသော ဂေါတမော ကာမာနံ ပရိညံ ပညပေတိ၊ မယမ္ပိ ကာမာနံ ပရိညံ ပညပေမ၊ သမဏော အာဝုသော ဂေါတမော ရူပါနံ ¶ ဝေဒနာနံ ပရိညံ ပညပေတိ၊ မယမ္ပိ ရူပါနံ ဝေဒနာနံ ပရိညံ ပညပေမ၊ ဣဓ နော အာဝုသော ကော ဝိသေသော၊ ကော အဓိပ္ပယာသော၊ ကိံ နာနာကရဏံ သမဏဿ ဝါ ဂေါတမဿ အမှာကံ ဝါ ယဒိဒံ ဓမ္မဒေသနာယ ဝါ ဓမ္မဒေသနံ အနုသာသနိယာ ဝါ အနုသာသနိ’’န္တိ၊ ဧတမတ္ထံ ဘိက္ခူ ဘဂဝတော အာရောစေသုံ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – စူဠဒုက္ခက္ခန္ဓသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သက္ကေသု ဘန္တေ ကပိလဝတ္ထုသ္မိံ မဟာနာမံ သက္ကံ အာရဗ္ဘ ဘာသိတံ၊ မဟာနာမော ဘန္တေ သက္ကော ဘဂဝန္တံ ဥပသင်္ကမိတွာ ဧတဒဝေါစ ‘‘ဒီဃရတ္တာဟံ ဘန္တေ ဘဂဝတာ ဧဝံ ဓမ္မံ ဒေသိတံ အာဇာနာမိ ‘လောဘော စိတ္တဿ ဥပက္ကိလေသော၊ ဒေါသော စိတ္တဿ ဥပက္ကိလေသော၊ မောဟော စိတ္တဿ ဥပက္ကိလေသော’တိ၊ ဧဝဉ္စာဟံ ဘန္တေ ဘဂဝတာ ဓမ္မံ ဒေသိတံ အာဇာနာမိ ‘လောဘော စိတ္တဿ ဥပက္ကိလေသော၊ ဒေါသော စိတ္တဿ ဥပက္ကိလေသော၊ မောဟော စိတ္တဿ ဥပက္ကိလေသော’တိ။ အထ စ ပန မေ ဧကဒါ လောဘဓမ္မာပိ စိတ္တံ ပရိယာဒါယ တိဋ္ဌန္တိ၊ ဒေါသဓမ္မာပိ စိတ္တံ ပရိယာဒါယ တိဋ္ဌန္တိ၊ မောဟဓမ္မာပိ စိတ္တံ ပရိယာဒါယ တိဋ္ဌန္တိ၊ တဿ မယှံ ဘန္တေ ဧဝံ ဟောတိ ‘ကော သု နာမ မေ ဓမ္မော အဇ္ဈတ္တံ အပ္ပဟိနော ¶ ၊ ယေန မေ ဧကဒါ လောဘဓမ္မာပိ စိတ္တံ ပရိယာဒါယ တိဋ္ဌန္တိ၊ ဒေါသဓမ္မာပိ စိတ္တံ ပရိယာဒါယ တိဋ္ဌန္တိ၊ မောဟဓမ္မာပိ စိတ္တံ ပရိယာဒါယ တိဋ္ဌန္တီ’တိ’’၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – အနုမာနသုတ္တံ ¶ ပနာဝုသော ကတ္ထ ကံ အာရဗ္ဘ ကေန ဘာသိတံ။

ဝိဿဇ္ဇနာ – ဘဂ္ဂေသု ဘန္တေ သုသုမာရဂိရေ ဘေသကဠာဝနေ အာယသ္မတာ မဟာမောဂ္ဂလ္လာနတ္ထေရေန သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – စေတောခိလသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – ဝနပတ္ထသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – မဓုပိဏ္ဍိကသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သက္ကေသု ဘန္တေ ဒဏ္ဍပါဏိံ သက္ကံ အာရဗ္ဘ ဘာသိတံ၊ ဒဏ္ဍပါဏိ ဘန္တေ သက္ကော ဘဂဝန္တံ ဥပသင်္ကမိတွာ ဧတဒဝေါစ ‘‘ကိံ ဝါဒီ သမဏော ကိမက္ခာယီ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဒွေဓာဝိတက္ကသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – ဝိတက္ကသဏ္ဌာနသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – တေနာဝုသော ¶ ဘဂဝတာ…ပေ… သမ္မာသမ္ဗုဒ္ဓေန ကကစူပမသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ မောဠိယဖဂ္ဂုနံ အာရဗ္ဘ ဘာသိတံ၊ အာယသ္မာ ဘန္တေ မောဠိယဖဂ္ဂုနော ဘိက္ခုနီဟိ သဒ္ဓိံ ¶ အတိဝေလံ သံသဋ္ဌော ဝိဟရတိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – အထ ¶ ခေါ အာဝုသော အာယသ္မတော မောဠိယဖဂ္ဂုနဿ တံ ဘဂဝတော ဩဝါဒံ သုတွာ ကထံ စိတ္တံ ဥပ္ပန္နံ၊ ကထဉ္ဇ ဘဂဝါ ဥတ္တရိ ဘိက္ခူန ဩဝါဒမဒါသိ။

ဝိဿဇ္ဇနာ – အထ ခေါ ဘန္တေ မောဠိယဖဂ္ဂုနဿ ဘဂဝတော ဣမံ ဩဝါဒံ သုတွာ ဘိက္ခုနိသံသဂ္ဂတော ဩရမိဿာမိ ဝိရမိဿာမီတိပိ စိတ္တံ န ဥပ္ပန္နံ၊ အသံဝရမေဝ ဘန္တေ စိတ္တံ ဥပ္ပန္နံ၊ ဘဂဝါ စ ဘန္တေ အာရာဓယိံသု ဝတ မေ ဘိက္ခဝေ ဘိက္ခူ ဧကံ သမယံ စိတ္တံ၊ ဧဝမာဒိနာ ဥတ္တရိ ဘိက္ခူနံ ဩဝါဒမဒါသိ။

ဥဘတော ¶ ဒဏ္ဍကေန စေပိ ဘိက္ခဝေ ကကစေန စောရာ ဩစရကာ အင်္ဂမင်္ဂါနိ ဩကန္တေယျုံ။

ပုစ္ဆာ – အလဂဒ္ဒူပမသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ အရိဋ္ဌံ ဘိက္ခုံ ဂဒ္ဓဗာဓိပုဗ္ဗံ အာရဗ္ဘ ဘာသိတံ၊ အရိဋ္ဌဿ ဘန္တေ ဘိက္ခုနော ဂဒ္ဓဗာဓိပုဗ္ဗဿ ဧဝရူပံ ပါပကံ ဒိဋ္ဌိဂတံ ဥပ္ပန္နံ ‘‘တထာဟံ ဘဂဝတာ ဓမ္မံ ဒေသိတံ အာဇာဒါမိ၊ ယထာ ယေမေ အန္တရာယိကာ ဓမ္မာ ဝုတ္တာ ဘဂဝတာ၊ တေ ပဋိသေဝတော နာလံ အန္တရာယာယာ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – အထ ¶ ခေါ အာဝုသော အာယသ္မတော အရိဋ္ဌဿ ဂဒ္ဓဗာဓိပုဗ္ဗဿ ကထံ စေတသော ပရိဝိတက္ကော ဥဒပါဒိ၊ ကထဉ္စ ဘဂဝါ ဥတ္တရိ ဘိက္ခုနံ ဓမ္မဒေသနံ ပဝတ္တေသိ။

ဝိဿဇ္ဇနာ – အထ ခေါ ဘန္တေ အရိဋ္ဌဿ ဘိက္ခုနော ဂဒ္ဓဗာဓိပုဗ္ဗဿ ‘‘ကိဉ္စာပိ မံ ဘဂဝါ မောဃပုရိသဝါဒေန ဝဒေသိ၊ န ခေါ ပန မေ မဂ္ဂဖလာနံ ဥပနိဿယော န ဟောတိ၊ သွာဟံ အာရဘိတွာ ဃဋ္ဋေတွာ မဂ္ဂဖလာနိ နိဗ္ဗတ္တေဿာမီ’’တိ၊ ဧဝံ ခေါ ဘန္တေ စေတသော ပရိဝိတက္ကော ဥဒပါဒိ၊ ဘဂဝါ စ ဘန္တေ ဒုပ္ပညဿ အလဂဒ္ဒူပမံ ဒဿေတွာ အလဂဒ္ဒူပမံ ပရိယတ္တိဉ္စ ဒဿေတွာ ပညဝတော အလဂဒ္ဒူပမာယ စ ကုလ္လူပမာယ စ ပညဝတော နိဿရဏပရိယတ္တိံ ဒဿေတွာ ဆ စ ဒိဋ္ဌိဋ္ဌာနာနိ၊ တေသဉ္စ ဆန္နံ ဒိဋ္ဌိဋ္ဌာနာနံ ဝိနိဝေဌနာကာရံ ဒဿေတွာ ပရိယောသာနေ စ ခန္ဓကမ္မဋ္ဌာနံ အရဟတ္တနိကူဋေန ဒဿေတွာ ဥတ္တရိ ဘိက္ခူနံ ဓမ္မကထံ ပဝတ္တေသိ။

ပုစ္ဆာ – ဓမ္မိကသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ ကုမာရကဿပံ အာရဗ္ဘ ဘာသိတံ။ အာယသ္မာ ဘန္တေ ကုမာရကဿပေါ ဘဂဝန္တံ ဥပသင်္ကမိတွာ ဝမ္မိကပဉှံ ပုစ္ဆိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ရထဝိနီတသုတ္တံ ¶ ပနာဝုသော ကတ္ထ ကေန ဘာသိတံ။

ဝိဿဇ္ဇနာ – သာဝတ္ထိယံ ဘန္တေ အာယသ္မတာ စ သာရိပုတ္တတ္ထေရေန ဓမ္မသေနာပတိနာ အာယသ္မတာ စ ပုဏ္ဏေန မန္တာဏိပုတ္တေန အညမညံ ပုစ္ဆာဝိဿဇ္ဇနဝသေန ဘာသိတံ။

ပုစ္ဆာ – နိဝါပသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – ဣမသ္မိံ ¶ အာဝုသော သုတ္တေ ကော နိဝါပေါ ကော နေဝါပိကော ကာ နေဝါပိကပရိသာ ကာ မိဂဇာတာ ကထဉ္စေတိဿာ ဥပမာယ အတ္ထော ဒဋ္ဌဗ္ဗော။

ဝိဿဇ္ဇနာ – ဣမသ္မိံ ဘန္တေ သုတ္တေ နိဝါပေါတိ ခေါ ဘန္တေ ပဉ္စန္နေတံ ကာမဂုဏာနံ အဓိဝစနံ၊ နေဝါပိကောတိ ခေါ ဘန္တေ မာရဿေတံ ပါပိမတော အဓိဝစနံ၊ နေဝါပိကပရိသာတိ ခေါ ဘန္တေ မာရပရိသာယေတံ အဓိဝစနံ၊ မိဂဇာတာတိ ခေါ ဘန္တေ သမဏဗြာဟ္မဏာနမေတံ အဓိဝစနံ၊ ဣမသ္မိံ ဘန္တေ သုတ္တေ ဧတဿ အတ္ထော ဧဝံ ဒဋ္ဌဗ္ဗော။

ပုစ္ဆာ – ကေနာဝုသော ¶ ဘဂဝတာ…ပေ… သမ္မာသမ္ဗုဒ္ဓေန ပါသရာသိသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ၊ သမ္ဗဟုလာ ဘန္တေ ဘိက္ခူ ရမ္မကဿ ဗြာဟ္မဏဿ အဿမေ ဘဂဝန္တံ အာရဗ္ဘ ဓမ္မိယာ ကထာယ သန္နိသီဒိံသု၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – အထ ¶ ခေါ အာဝုသော တေသံ သမ္ဗဟုလာနံ ဘိက္ခူနံ ဓမ္မိယာ ကထာယ သန္နိသိန္နာနံ ကီဒိသံ ဓမ္မကထံ ကထေသိ။

ဝိဿဇ္ဇနာ – သာဓု ဘိက္ခဝေ ဧတံ ခေါ ဘိက္ခဝေ တုမှာကံ ပတိရူပံ ကုလပုတ္တာနံ သဒ္ဓါ အဂါရသ္မာ အနဂါရိယံ ပဗ္ဗဇိတာနံ၊ ယံ တုမှေ ဓမ္မိယာ ကထာယ သန္နိသီဒေယျာထ၊ သန္နိပတိတာနံ ဝေါ ဘိက္ခဝေ ဒွယံ ကရဏီယံ ဓမ္မီ ဝါ ကထာ အရိယော ဝါ တုဏှီဘာဝေါ။ ဒွေမာ ဘိက္ခဝေ ပရိယေသနာ အရိယာ စ ပရိယေသနာ အနရိယာ စ ပရိယေသနာ။ ဧဝမာဒိနာ ဘန္တေ ဘဂဝါ သန္နိပတိတာနံ တေသံ ဘိက္ခူနံ အရိယပရိယေသနဉ္စ အနရိယပရိယေသနဉ္စ ဝိဘဇိတွာ ဒေသေသိ။

ပုစ္ဆာ – ကထဉ္စာဝုသော ¶ ဘဂဝါ အတ္တနာပိ အနရိယပရိယေသနံ ပဟာယ အရိယပရိယေသနာယ ပရိယေသိတဘာဝံ ပကာသေသိ။

ဝိဿဇ္ဇနာ – အဟမ္ပိ သုဒံ ဘိက္ခဝေ ပုဗ္ဗေဝ သမ္ဗောဓာ အနဘိသမ္ဗုဒ္ဓါ ဗောဓိသတ္တောဝ သမာနော အတ္တနာ ဇာတိဓမ္မော သမာနော ဇာတိဓမ္မံယေဝ ပရိယေသာမိ၊ အတ္တနာ ဇရာဓမ္မော ဗျာဓိဓမ္မော မရဏဓမ္မော သောကဓမ္မော သံကိလေသဓမ္မော သမာနော သံကိလေသဓမ္မံယေဝ ပရိယေသာမိ။ ဧဝမာဒိနာ ဘန္တေ ဘဂဝါ အတ္တနာပိ အနရိယပရိယေသနံ ပဟာယ အရိယပရိယေသနာယ ပရိယေသိတဘာဝံ ပကာသေသိ။

ပုစ္ဆာ – ဧဝံ ¶ ပဌမာဘိသမ္ဗုဒ္ဓဿ အာဝုသော ဘဂဝတော အဇပါလနိဂြောဓရုက္ခမူလေ နိသိန္နဿ ဓမ္မဒေသနာယ ကတသန္နိဋ္ဌာနဿ ကီဒိသော

စေတသော ¶ ပရိဝိတက္ကော ဥဒပါဒိ၊ ကထဉ္စ ဓမ္မဒေသနာယ စာရိကာ အဟောသိ၊ ကထဉ္စ ပဌမာ ဓမ္မဒေသနာ အဟောသိ။

ဝိဿဇ္ဇနာ – ‘‘ကဿ နု ခေါ အဟံ ပဌမံ ဓမ္မံ ဒေသေယျံ၊ ကော ဣမံ ဓမ္မံ ခိပ္ပမေဝ အာဇာနိဿတီ’’တိ ဧဝံ ခေါ ဘန္တေ ဘဂဝတော ပဌမာဘိသမ္ဗုဒ္ဓဿ အဇပါလနိဂြောဓမူလေ ဓမ္မဒေသနာယ ကတသန္နိဋ္ဌာနဿ ပရိဝိတက္ကော ဥဒပါဒိ၊ အထ ဘန္တေ ဘဂဝါ ဥရုဝေလာယံ ယထာဘိရန္တံ ဝိဟရိတွာ ယေန ဗာရာဏသီ၊ တေန ပဒသာယေဝ စာရိကံ ပက္ကာမိ ဓမ္မဒေသနာယ၊ ဒွေမေ ဘိက္ခဝေ အန္တာ ပဗ္ဗဇိတေန န သေဝိတဗ္ဗာ၊ ကတမေ ဒွေ၊ ယော စာယံ ကာမေသု ကာမသုခလ္လိကာနုယောဂေါ ဟီနော ဂါမ္မော ပေါထုဇ္ဇနိကော အနရိယော အနတ္တသံဟိတော၊ ဧဝမာဒိနာ ဘန္တေ ဘဂဝတော ပဌမာ ဓမ္မဒေသနာ အဟောသိ။

သဗ္ဗဉ္ဇဟော တဏှာက္ခယေ ဝိမုတ္တော၊

ပုစ္ဆာ – ကထဉ္စာဝုသော ¶ ဘဂဝါ ပါသရာသိဥပမာယ တံ ဒေသနံ ပရိနိဋ္ဌာပေသိ။

ဝိဿဇ္ဇနာ – ပဉ္စိမေ ဘိက္ခဝေ ကာမဂုဏာ၊ ကတမေ ပဉ္စ၊ စက္ခုဝိညေယျာ ရူပါ ဣဋ္ဌာ ကန္တာ မနာပါ ပိယရူပါ ကာမူပသံဟိတာ ရဇနီယာ။ သောတဝိညေယျာ သဒ္ဒါ။ ဃာနဝိညေယျာ ဂန္ဓာ။ ဇိဝှာဝိညေယျာ ရသာ။ ကာယဝိညေယျာ ဖောဋ္ဌဗ္ဗာ ဣဋ္ဌာ ကန္တာ မနာပါ ပိယရူပါ ကာမူပသံဟိတာ ရဇနီယာ။ ဣမေ ခေါ ဘိက္ခဝေ ပဉ္စ ကာမဂုဏာ။ ယေ ဟိ ကေစိ ဘိက္ခဝေ သမဏာ ဝါ ဗြာဟ္မဏာ ဝါ ဣမေ ကာမဂုဏေ ဂထိတာ မုစ္ဆိတာ အဇ္ဈောပန္နာ အနာဒီနဝဒဿာဝိနော အနိဿရဏပညာ ပရိဘုဉ္ဇန္တိ၊ တေ ဧဝမဿု ဝေဒိတဗ္ဗာ ‘‘အနယမာပန္နာ ဗျာသနမာပန္နာ ယထာကာမကရဏီယာ ပါပိမတော’’၊ ဧဝမာဒိနာ ဘန္တေ ဘဂဝါ ပါသရာသိဥပမာယ ဓမ္မဒေသနံ ပရိနိဋ္ဌာပေသိ။

ပုစ္ဆာ – တေနာဝုသော ¶ ဇာနတာ…ပေ… သမ္မာသမ္ဗုဒ္ဓေန စူဠဟတ္ထိပဒေါပမသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ ဇာဏုဿောဏိံ ဗြာဟ္မဏံ အာရဗ္ဘ ဘာသိတံ။ ဇာဏုဿောဏိ ဘန္တေ ဗြာဟ္မဏော ဘဂဝန္တံ ဥပသင်္ကမိတွာ ယာဝတကော အဟောသိ ပိလောတိကေန ပရိဗ္ဗာဇကေန သဒ္ဓိံ ကထာသလ္လာပေါ၊ တံ သဗ္ဗံ ဘဂဝတော အာရောစေသိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ကထဉ္စာဝုသော ¶ ဘဂဝါ ဟတ္ထိပဒေါပမံ ဝိတ္ထာရေန ပရိပူရေတွာ ဒေသေသိ။

ဝိဿဇ္ဇနာ – ‘‘န ခေါ ဗြာဟ္မဏ ဧတ္တာဝတာ ဟတ္ထိပဒေါပမော ဝိတ္ထာရေန ပရိပူရော ဟောတိ၊ အပိ စ ဗြာဟ္မဏ ယထာ ဟတ္ထိပဒေါပမော ဝိတ္ထာရေန ပရိပူရော ဟောတိ၊ တံ သုဏာဟိ သာဓုကံ မနသိကရောဟိ ဘာသိဿာမီ’’တိ၊ ဧဝမာဒိနာ ဘန္တေ ဘဂဝါ ဟတ္ထိပဒေါပမံ ပရိပူရေတွာ ဗြာဟ္မဏဿ ဇာဏုဿောဏိဿ ဒေသေသိ။

ပုစ္ဆာ – မဟာဟတ္ထိပဒေါပမသုတ္တံ ¶ ပနာဝုသော ကတ္ထ ကံ အာရဗ္ဘ ကေန ဘာသိတံ။

ပုစ္ဆာ – မဟာသာရောပမသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ရာဇဂဟေ ဘန္တေ ဒေဝဒတ္တံ အာရဗ္ဘ ဘာသိတံ၊ ဒေဝဒတ္တော ဘန္တေ သင်္ဃံ ဘိန္ဒိတွာ ရုဟိရုပ္ပာဒကမ္မံ ကတွာ အစိရပက္ကန္တော ဟောတိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – စူဠသာရောပမသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ ပိင်္ဂလကောစ္ဆံ ဗြာဟ္မဏံ အာရဗ္ဘ ဘာသိတံ၊ ပိင်္ဂလကောစ္ဆော ဘန္တေ ဗြာဟ္မဏော ဘဂဝန္တံ ဥပသင်္ကမိတွာ ပဉှံ ပုစ္ဆိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – စူဠဂေါသိင်္ဂသုတ္တံ ¶ ပနာဝုသော ဘဂဝတာ ကတ္ထ ကေန သဒ္ဓိံ ဘာသိတံ။

ဝိဿဇ္ဇနာ – နာဘိကေ ဘန္တေ ဂေါသိင်္ဂသာလဝနဒါယေ အာယသ္မတာ အနုရုဒ္ဓတ္ထေရေန သဒ္ဓိံ ဘာသိတံ။

ပုစ္ဆာ – မဟာဂေါသိင်္ဂသုတ္တံ ပနာဝုသော ဘဂဝတာ ကတ္ထ ကေန သဒ္ဓိံ ဘာသိတံ။

ဝိဿဇ္ဇနာ – ဂေါသိင်္ဂသာလဝနဒါယေ ဘန္တေ အာယသ္မတာ စ သာရိပုတ္တတ္ထေရေန ဓမ္မသေနာပတိနာ အာယသ္မတာ စ မဟာမောဂ္ဂလ္လာနတ္ထေရေန သဒ္ဓိံ ဘာသိတံ။

ပုစ္ဆာ – မဟာဂေါပါလကသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – စူဠဂေါပါလကသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – ဝဇ္ဇီသု ဘန္တေ ဥက္ကစေလာယံ ဂင်္ဂါယ နဒိယာ တီရေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – တေနာဝုသော ¶ ဇာနတာ…ပေ… သမ္မာသမ္ဗုဒ္ဓေန စူဠသစ္စကသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ဝေသာလိယံ ဘန္တေ သစ္စကံ နိဂဏ္ဌပုတ္တံ အာရဗ္ဘ ဘာသိတံ၊ သစ္စကော နိဂဏ္ဌပုတ္တော မဟတိယာ လိစ္ဆဝိပရိသာယ သဒ္ဓိံ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ ဧတဒဝေါစ ‘‘ကထံ ပန ဘဝံ ဂေါတမော သာဝကေ ဝိနေတိ၊ ကထံ ဘာဂါ စ ပန ဘောတော ဂေါတမဿ သာဝကေသု အနုသာသနီ ဗဟုလာ ပဝတ္တတီ’’တိ၊ အထ ဘန္တေ ဘဂဝတာ အနိစ္စဝါဒေ စ အနတ္တဝါဒေ စ ပကာသိတေ သစ္စကော နိဂဏ္ဌပုတ္တော ပထဝီဥပမံ ဒဿေတွာ အတ္တနော အတ္တဝါဒံ ပကာသေသိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဧဝံ ¶ အာဝုသော သစ္စကေန နိဂဏ္ဌပုတ္တေန မဟာပထဝီဥပမံ ဒဿေတွာ အတ္တဝါဒေ ပကာသိတေ ကထံ ဘဂဝါ တံ အတ္တဝါဒံ ပုန ပတိဋ္ဌာပေတွာ သမနုယုဉ္ဇိ သမနုဂါဟိ သမနုဘာသိ။

ဝိဿဇ္ဇနာ – ‘‘နနု တွံ အဂ္ဂိဝေဿန ဧဝံ ဝဒေသိ၊ ရူပံ မေ အတ္တာ၊ ဝေဒနာ မေ အတ္တာ၊ သညာ မေ အတ္တာ၊ သင်္ခါရာ မေ အတ္တာ၊ ဝိညာဏံ မေ အတ္တာ’’တိ၊ ဧဝံ ခေါ ဘန္တေ ဘဂဝါ သစ္စကံ နိဂဏ္ဌပုတ္တံ တံ အတ္တဝါဒံ ပတိဋ္ဌာပေသိ။ ပတိဋ္ဌာပေတွာ စ ပန ဘန္တေ ဘဂဝါ ‘‘တေန ဟိ အဂ္ဂိဝေဿန တညေဝေတ္ထ ပဋိပုစ္ဆိဿာမိ၊ ယထာ တေ ခမေယျ၊ တထာ တံ ဗျာကရေယျာသီ’’တိ ဧဝမာဒိနာ ဘန္တေ ဘဂဝါ သစ္စကံ နိဂဏ္ဌပုတ္တံ သမနုယုဉ္ဇိ သမနုဂါဟိ သမနုဘာသိ။

ပုစ္ဆာ – ဧဝံ ¶ ခေါ အာဝုသော သစ္စကေ နိဂဏ္ဌပုတ္တေ တုဏှီဘူတေ အဓောမုခေ ပဇ္ဈာယန္တေ အပ္ပဋိဘာနေ နိသိန္နေ ဒုမ္မုခေါ နာမ လိစ္ဆဝိပုတ္တော ဘဂဝန္တံ ကိံ ဝစနံ အဝေါစ။

ဝိဿဇ္ဇနာ – ဧဝံ ဘန္တေ သစ္စကေ နိဂဏ္ဌပုတ္တေ တုဏှီဘူတေ မင်္ကုဘူတေ ပတ္တက္ခန္ဓေ အဓောမုခေ ပဇ္ဈာယန္တေ အပ္ပဋိဘာနေ ဒုမ္မုခေါ လိစ္ဆဝိပုတ္တော ¶ ဘဂဝန္တံ ဧတဒဝေါစ ‘‘ဥပမာ မံ ဘဂဝါ ပဋိဘာတီ’’တိ။

ပုစ္ဆာ – အထ ¶ ခေါ အာဝုသော သစ္စကော နိဂဏ္ဌပုတ္တော ဘဂဝန္တံ ကီဒိသံ ပဉှံ ပုစ္ဆိ၊ ကထဉ္စ တံ ဘဂဝါ ဗျာကာသိ။

ဝိဿဇ္ဇနာ – အထ ခေါ ဘန္တေ သစ္စကော နိဂဏ္ဌပုတ္တော ဒုမ္မုခံ လိစ္ဆဝိံ အပသာဒေတွာ ဘဂဝန္တံ သေခဉ္စ အသေခဉ္စ ပဉှံ ပုစ္ဆိ၊ ဘဂဝါ စ ဘန္တေ ‘‘ဣဓ အဂ္ဂိဝေဿန မမ သာဝကော ယံ ကိဉ္စိ ရူပံ အတီတာနာဂတပစ္စုပ္ပန္နံ အဇ္ဈတ္တံ ဝါ ဗဟိဒ္ဓါ ဝါ ဩဠာရိကံ ဝါ သုခုမံ ဝါ ဟီနံ ဝါ ပဏီတံ ဝါ ယံ ဒူရေ သန္တိကေ ဝါ’’ ဧဝမာဒိနာ သေခဉ္စ အသေခဉ္စ ပုဂ္ဂလံ ဝိဘဇိတွာ ဗျာကာသိ။

ဗုဒ္ဓါ ¶ သော ဘဂဝါ ဗောဓာယ ဓမ္မံ ဒေသေတိ။

ဒန္တော သော ဘဂဝါ ဒမထာယ ဓမ္မံ ဒေသေတိ။

သန္တော သော ဘဂဝါ သမထာယ ဓမ္မံ ဒေသေတိ။

တိဏ္ဏော သော ဘဂဝါ တရဏာယ ဓမ္မံ ဒေသေတိ။

ပရိနိဗ္ဗုတော သော ဘဂဝါ ပရိနိဗ္ဗာနာယ ဓမ္မံ ဒေသေတိ။

ပုစ္ဆာ – မဟာသစ္စကသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ဝေသာလိယံ ဘန္တေ သစ္စကံယေဝ နိဂဏ္ဌပုတ္တံ အာရဗ္ဘ ဘာသိတံ။ သစ္စကော ဘန္တေ နိဂဏ္ဌပုတ္တော အပရဒိဝသေ ဘဂဝန္တံ ဥပသင်္ကမိတွာ ဘဂဝတော သာဝကေ အာသဇ္ဇ ဘာဝနာဒွယပဋိသံယုတ္တံ ဝါစံ ဘာသတိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ကထဉ္စာဝုသော ¶ ဘဂဝါ သစ္စကံ နိဂဏ္ဌပုတ္တံ ပဋိပုစ္ဆိတွာ ဘာဝနာဒွယံ ဝိဘဇ္ဇ ကထေသိ။

ဝိဿဇ္ဇနာ – အထ ခေါ ဘန္တေ ဘဂဝါ ‘‘ကိန္တိ ပန တေ အဂ္ဂိဝေဿန ကာယဘာဝနာ သုတာ’’တိ ဧဝမာဒိနာ သစ္စကံ နိဂဏ္ဌပုတ္တံ ပဋိပုစ္ဆိတွာ၊ ကထဉ္စ အဂ္ဂိဝေဿန အဘာဝိတကာယော စ ဟောတိ အဘာဝိတစိတ္တော စ ဧဝမာဒိနာ ဘာဝနာဒွယံ ဝိဘဇိတွာ ဗျာကာသိ။

ပုစ္ဆာ – အထ ¶ ခေါ အာဝုသော သစ္စကော နိဂဏ္ဌပုတ္တော ဘဂဝန္တံ ကိံ ဝစနံ အဝေါစ၊ ကထဉ္စ ဘဂဝါ ပဓာနကာလေ အတ္တနာအနုဘူတပုဗ္ဗာ ပရမုက္ကံသဂတာ သုခဒုက္ခဝေဒနာယော ပကာသေသိ၊ ယာပိ ဘဂဝတော စိတ္တံ န ပရိယာဒါယ အဋ္ဌံသု။

ဝိဿဇ္ဇနာ – အထ ခေါ ဘန္တေ သစ္စကော နိဂဏ္ဌပုတ္တော ဘဂဝန္တံ ဧတဒဝေါစ ‘‘န ဟိ နူန ဘောတော ဂေါတမဿ ဥပ္ပဇ္ဇတိ၊ တထာ ရူပါ သုခါဝေဒနာ၊ ယထာရူပါ ဥပ္ပန္နာ သုခါဝေဒနာ စိတ္တံ ပရိယာဒါယ တိဋ္ဌေယျ၊ န ဟိ နူန ဘောတော ဂေါတမဿ ဥပ္ပဇ္ဇတိ တထာရူပါ ဒုက္ခာ ဝေဒနာ၊ ယထာရူပါ ဥပ္ပန္နာ ဒုက္ခာ ဝေဒနာ စိတ္တံ ပရိယာဒါယ တိဋ္ဌေယျာ’’တိ အထ ခေါ ဘဂဝါ ‘‘ကိဉှိ နော သိယာ အဂ္ဂိဝေဿန၊ ဣဓ မေ ¶ အဂ္ဂိဝေဿေန ပုဗ္ဗေဝ သမ္ဗောဓာ အနဘိသမ္ဗုဒ္ဓဿ ဗောဓိသတ္တဿေဝ သတော ဧတဒဟောသိ၊ ဧဝမာဒိနာ ဘန္တေ ဘဂဝါ ပဓာနကာလေ အတ္တနာနုဘူတပုဗ္ဗာ ပရမုက္ကံသဂတာ သုခဒုက္ခဝေဒနာယော ဝိတ္ထာရေန၊ ယာပိ ဘဂဝတော စိတ္တံ န ပရိယာဒါယ အဋ္ဌံသု။

ပုစ္ဆာ – တေနာဝုသော ¶ ဘဂဝတာ ဇာနတာ…ပေ… သမ္မာသမ္ဗုဒ္ဓေန စူဠတဏှာသင်္ခယသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သက္ကံ ဒေဝါနမိန္ဒံ အာရဗ္ဘ ဘာသိတံ။ သက္ကော ဘန္တေ ဒေဝါနမိန္ဒော ဘဂဝန္တံ ဥပသင်္ကမိတွာ ဧတဒဝေါစ ‘‘ကိတ္တာဝတာနုခေါ ဘန္တေ ဘိက္ခု သံခိတ္တေန တဏှာသင်္ခယဝိမုတ္တော ဟောတိ အစ္စန္တနိဋ္ဌော အစ္စန္တယောဂက္ခေမိ ¶ အစ္စန္တဗြဟ္မစာရီ အစ္စန္တပရိယောသာနော သေဋ္ဌော ဒေဝမနုဿာန’’န္တိ။ တသ္မိံ ဘန္တေ ဝတ္ထုသ္မိံ ဘာသိတံ။

ကိတ္တာဝတာ ¶ နု ခေါ ဘန္တေ ဘိက္ခု သံခိတ္တေန တဏှာသင်္ခယဝိမုတ္တော ဟောတိ အစ္စန္တနိဋ္ဌော အစ္စန္တယောဂက္ခေမီ အစ္စန္တဗြဟ္မစာရီ အစ္စန္တပရိယာသာနော သေဋ္ဌော ဒေဝမနုဿာနံ –

ပုစ္ဆာ – မဟာတဏှာသင်္ခယသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သာတိံ ဘိက္ခုံ ကေဝဋ္ဋပုတ္တံ အာရဗ္ဘ ဘာသိတံ။ သာတိဿ ဘန္တေ ဘိက္ခုနော ကေဝဋ္ဋပုတ္တဿ ဧဝရူပံ ပါပကံ ဒိဋ္ဌိဂတံ ဥပ္ပန္နံ ဟောတိ ‘‘တထာဟံ ဘဂဝတာ ဓမ္မံ ဒေသိတံ အာဇာနာမိ၊ ယထာ တဒေဝိဒံ ဝိညာဏံ သန္ဓာဝတိ ¶ သံသရတိ အနည’’န္တိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – အထ ¶ ခေါ အာဝုသော ဘဂဝါ ကထံ ဘိက္ခူ အာမန္တေတွာ စ ပဋိပုစ္ဆိတွာ စ အနတ္တဘာဝဒီပိကံ ဓမ္မကထံ ကထေသိ။

ဝိဿဇ္ဇနာ – အထ ဘန္တေ ဘဂဝါ ဘိက္ခူ ‘‘တံ ကိံ မညထ ဘိက္ခဝေ၊ အပိနာယံ သာတိ ဘိက္ခု ကေဝဋ္ဋပုတ္တော ဥသ္မီကတောပိ ဣသ္မိံ ဓမ္မဝိနယေ’’တိ အာမန္တေတွာ၊ တုမှေပိ မေ ဘိက္ခဝေ ဧဝံ ဓမ္မံ ဒေသိတံ အာဇာနာထတျာဒိနာ ဘိက္ခူ ပဋိပုစ္ဆိတွာ စ ယံ ယဒေဝ ဘိက္ခဝေ ပစ္စယံ ပဋိစ္စ ဥပ္ပဇ္ဇတိ ဝိညာဏံ၊ တေန တေနေဝ ဝိညာဏံ တွေဝ သင်္ချံ ဂစ္ဆတိ၊ စက္ခုဉ္စ ပဋိစ္စ ရူပေ ¶ စ ဥပ္ပဇ္ဇတိ ဝိညာဏံ စက္ခုဝိညာဏံ တွေဝ သင်္ချံ ဂစ္ဆတိ၊ ဧဝမာဒိနာ ဘန္တေ အနတ္တတာဒီပိကံ ဓမ္မိံ ကထံ ကထေသိ။

ပုစ္ဆာ – မဟာအဿပုရသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – အင်္ဂေသု ဘန္တေ အဿပုရေ နာမ အင်္ဂါနံ နိဂမေ ဗဟူ မနုဿေ သဒ္ဓေ ပသန္နေ အာရဗ္ဗ္ဘ ဘာသိတံ။ ဗဟူ ဘန္တေ မနုဿာ သဒ္ဓါ ပသန္နာ ဘိက္ခုသင်္ဃံ သက္ကစ္စံ ဥပဋ္ဌဟိံသု၊ သဗ္ဗကာလဉ္စ ရတနတ္တယပဋိသံယုတ္တံ ဝဏ္ဏကထံယေဝ ကထယိံသု။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ကတမေ ¶ အာဝုသော တတ္ထ ဘဂဝတာ ဓမ္မာ သမဏကရဏာ စ ဗြာဟ္မဏကရဏာ စ ဥတ္တရုတ္တရိ ပဏီတပဏီတာ ဒေသိတာ။

ဝိဿဇ္ဇနာ – ဟိရောတ္တပ္ပာ ¶ ပရိသုဒ္ဓကာယသမာစာရော ပရိသုဒ္ဓဝစီသမာစာရော ပရိသုဒ္ဓမနောသမာစာရော ပရိသုဒ္ဓါဇီဝေါ ဣန္ဒြိယေသု ဂုတ္တဒွါရတာ ဘောဇနေမတ္တညုတာ ဇာဂရိယာနုယောဂေါ သတိသမ္ပဇညံ နီဝရဏပ္ပဟာနံ စတ္တာရိ စ ဈာနာနိ တိဿော စ ဝိဇ္ဇာ ဣမေ ခေါ ဘန္တေ တတ္ထ ဘဂဝတာ သမဏကရဏာ စ ဗြာဟ္မဏကရဏာ စ ဥတ္တရုတ္တရိ ပဏီတပဏီတာ ဓမ္မာ ဒေသိတာ။

ပုစ္ဆာ – စူဠအဿပုရသုတ္တံ ¶ ပနာဝုသော ဘဂဝတာ ကတ္တ ကံ အာရဗ္ဘ ဘာသိတံ။

ဝိဿဇ္ဇနာ – တသ္မိံယေဝ ဘန္တေ အဿပုရေ နိဂမေ တေယေဝ မနုဿေ သဒ္ဓေ ပသန္နေ အာရဗ္ဘ ဘာသိတံ၊ တသ္မိံယေဝ ဘန္တေ ဝတ္ထုသ္မိံ ဘာသိတံ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ သမဏသာမီစိပ္ပဋိပဒါ စ အဿမဏသာမီစိပ္ပဋိပဒါ စ ဝိဘဇိတွာ ဒေသိတာ။

ဝိဿဇ္ဇနာ – ‘‘ကထဉ္စ ဘိက္ခဝေ ဘိက္ခု န သမဏသာမီစိပ္ပဋိပဒံ ပဋိပန္နော ဟောတိ၊ ယဿ ကဿစိ ဘိက္ခဝေ ဘိက္ခုနော အဘိဇ္ဈာလုဿ အဘိဇ္ဈာ အပ္ပဟီနာ ဟောတိ၊ ဗျာပန္နစိတ္တဿ ဗျာပါဒေါ အပ္ပဟီနော ဟောတီ’’တိ ဧဝမာဒိနာ စ။ ကထဉ္စ ဘိက္ခဝေ ဘိက္ခု သမဏသာမီစိပ္ပဋိပဒံ ပဋိပန္နော ဟောတိ၊ ယဿ ကဿစိ ဘိက္ခဝေ ဘိက္ခုနော အဘိဇ္ဈာလုဿ အဘိဇ္ဈာ ပဟီနာ ဟောတိ၊ ဗျာပန္နစိတ္တဿ ဗျာပါဒေါ ပဟီနော ဟောတိ ဧဝမာဒိနာ စ ဘန္တေ ဘဂဝတာ တတ္ထ သမဏသာမီစိပ္ပဋိပဒါ စ အဿမဏသာမီစိပ္ပဋိပဒါ စ ဝိတ္ထာရေန ဝိဘဇိတွာ ဒေသိတာ။

ပုစ္ဆာ – သာလေယျကသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ကောသလေသု ဘန္တေ သာလာယံ နာမ ဗြာဟ္မဏဂါမေ သာလေယျကေ ဗြာဟ္မဏဂဟပတိကေ အာရဗ္ဘ ဘာသိတံ။ သာလေယျကာ ဘန္တေ ဗြာဟ္မဏဂဟပတိကာ ဘဂဝန္တံ ဥပသင်္ကမိတွာ ဧတဒဝေါစုံ ‘‘ကော နု ခေါ ဘော ဂေါတမ ဟေတု ကော ပစ္စယော၊ ယေန မိဓေကစ္စေ သတ္တာ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇန္တိ၊ ကော ပန ဘော ဂေါတမ ဟေတု ကော ပစ္စယော၊ ယေန မိဓေကစ္စေ သတ္တာ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇန္တီ’’တိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဝေရဉ္ဇကသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ ဝေရဉ္ဇကေ ဗြာဟ္မဏဂဟပတိကေ အာရဗ္ဘ ဘာသိတံ။ ဝေရဉ္ဇကာ ဘန္တေ ဗြာဟ္မဏဂဟပတိကာ ဘဂဝန္တံ ဥပသင်္ကမိတွာ ဧတဒဝေါစုံ ‘‘ကော နု ခေါ ဘော ဂေါတမ ဟေတု ကော ပစ္စယော၊ ယေန မိဓေကစ္စေ သတ္တာ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇန္တိ၊ ကော ပန ဘော ဂေါတမ ဟေတု ကော ပစ္စယော၊ ယေန မိဓေကစ္စေ သတ္တာ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇန္တီ’’တိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – မဟာဝေဒလ္လသုတ္တံ ပနာဝုသော ကတ္ထ ကေန ဘာသိတံ။

ဝိဿဇ္ဇနာ – သာဝတ္ထိယံ ဘန္တေ အာယသ္မတာ မဟာကောဋ္ဌိကေန ပုဋ္ဌေန အာယသ္မတာ သာရိပုတ္တတ္ထေရေန ဓမ္မသေနာပတိနာ ဘာသိတံ။

ပုစ္ဆာ – စူဠဝေဒလ္လသုတ္တံ ¶ ပနာဝုသော ကတ္ထ ကေန ဘာသိတံ။

ဝိဿဇ္ဇနာ – ရာဇဂဟေ ဘန္တေ ဝိသာခေန ဥပါသကေန ပုဋ္ဌာယ ဓမ္မဒိန္နာယ ထေရိယာ ဘာသိတံ။

ပုစ္ဆာ – စူဠဓမ္မသမာဒါနသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – မဟာဓမ္မသမာဒါနသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – ဝီမံသကသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – ကောသမ္ဗိယသုတ္တံ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ကောသမ္ဗိယံ ဘန္တေ ကောသမ္ဗိကေ ဘိက္ခူ အာရဗ္ဘ ဘာသိတံ။ ကောသမ္ဗိကာ ဘန္တေ ဘိက္ခူ ဘဏ္ဍနဇာတာ ကလဟဇာတာ ဝိဝါဒါပန္နာ ¶ အညမညံ မုခသတ္တီဟိ ဝိတုဒန္တာ ဝိဟရန္တိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဗြဟ္မနိမန္တနိကသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – မာရတဇ္ဇနီယသုတ္တံ ¶ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ဘာသိတံ။

ဝိဿဇ္ဇနာ – သက္ကေသု ဘန္တေ သုသုမာရဂိရေ ဘေသကဠာဝနေ မိဂဒါယေ အာယသ္မတာ မဟာမောဂ္ဂလ္လာနေန မာရံ ပါပိမန္တံ အာရဗ္ဘ ဘာသိတံ။ မာရော ဘန္တေ ပါပိမာ အာယသ္မတော မဟာမောဂ္ဂလ္လာနဿ ကုစ္ဆိဂတော ဟောတိ ကောဋ္ဌမနုပဝိဋ္ဌော။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – တေနာဝုသော ¶ ဇာနတာ…ပေ… သမ္မာသမ္ဗုဒ္ဓေန ကန္ဒရကသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – စမ္ပာယံ ဘန္တေ ဂဂ္ဂရာယ ပေါက္ခရဏိယာ တီရေ ပေဿဉ္စ ဟတ္ထာရောဟပုတ္တံ ကန္ဒရကဉ္စ ပရိဗ္ဗာဇကံ အာရဗ္ဘ ဘာသိတံ၊ ကန္ဒရကော ဘန္တေ ပရိဗ္ဗာဇကော ဘဂဝတော စ ဘိက္ခုသင်္ဃဿ စ ဝဏ္ဏံ အဘာသိ၊ ပေဿော စ ဘန္တေ ဟတ္ထာရောဟပုတ္တော ဘဂဝတော စ ဓမ္မဒေသနာယ စ ဝဏ္ဏံ အဘာသိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဧဝံ ¶ ခေါ အာဝုသော ကန္ဒရကေန ပရိဗ္ဗာဇကေန ဘဂဝတော စ ဘိက္ခုသင်္ဃဿ စ အဘိပ္ပသန္နေန ဝဏ္ဏေ ဘာသိတေ ကထံ ဘဂဝါ တံ သမနုဇာနိတွာ ဓမ္မဒေသနာရမ္ဘံ အာရဘိ၊ ကထဉ္စ ပေဿော ဟတ္ထာရောဟပုတ္တော ဘဂဝတော စ ဓမ္မဒေသနာယ စ ဝဏ္ဏံ အဘာသိ ¶ ၊ ကထဉ္စ ပေဿဿ ဟတ္ထာရောဟပုတ္တဿ အဇ္ဈာသယာနုရူပံ ဓမ္မံ ဒေသေသိ။

ဝိဿဇ္ဇနာ – ဧဝံ ခေါ ဘန္တေ ကန္ဒရကေန ပရိဗ္ဗာဇကေန ဘဂဝတော စ ဘိက္ခုသင်္ဃဿ စ အဘိပ္ပသန္နေန ဝဏ္ဏေ ဘာသိတေ ‘‘ဧဝမေတံ ကန္ဒရက ဧဝမေတံ ကန္ဒရက’’ ဧဝမာဒိနာ ဘဂဝါ တံ သမနုဇာနိတွာ ‘‘သန္တိ ဟိ ကန္ဒရက ဘိက္ခူ ဣမသ္မိံ ဘိက္ခုသင်္ဃေ အရဟန္တော ခီဏာသဝါ ဝုသိတဝန္တော ကတကရဏီယာ ဩဟိတဘာရာ အနုပ္ပတ္တသဒတ္ထာ ပရိက္ခီဏဘဝသံယောဇနာ သမ္မဒညာ ဝိမုတ္တာ’’တိ ဧဝမာဒိနာ ဓမ္မဒေသနံ သမာရဘိ။ အထ ခေါ ဘန္တေ ပေဿော ဟတ္ထာရောဟပုတ္တော ‘‘အစ္ဆရိယံ ဘန္တေ အဗ္ဘုတံ ဘန္တေ ယာဝ သုပညတ္တာ စိမေ ဘန္တေ ဘဂဝတာ စတ္တာရော သတိပဋ္ဌာနာ သတ္တာနံ ဝိသုဒ္ဓိယာ သောကပရိဒေဝါနံ သမတိက္ကမာယ ဒုက္ခဒေါမနဿာနံ အတ္ထင်္ဂမာယ ဉာယဿ အဓိဂမာယ နိဗ္ဗာနဿ သစ္ဆိကိရိယာယာ’’တိ ဧဝမာဒိနာ ဘဂဝတော စ ဓမ္မဒေသနာယ ဝဏ္ဏံ အဘာသိ၊ ဘဂဝါပိ ဘန္တေ ‘‘ဂဟနဉှေတံ ပေဿ ယဒိဒံ မနုဿာ၊ ဥတ္တာနကဉှေတံ ပေဿ ယဒိဒံ ပသဝေါ’’တိအာဒိနာ ပေဿဿ ဟတ္ထာရောဟပုတ္တဿ အဇ္ဈာသယာနုရူပံ ဓမ္မကထံ ဒေသေသိ။

ပုစ္ဆာ – တံ ¶ ပနာဝုသော ဓမ္မဒေသနံ သုတွာ ပေဿဿ ဟတ္ထာရောဟပုတ္တဿ ကီဒိသော အာနိသံသော အဓိဂတော၊ ကထဉ္စ ဘဂဝါ တံ ပုဂ္ဂလစတုက္ကဒေသနံ သံခိတ္တေန ဘာသိတံ၊ ဘိက္ခူနံ ဝိတ္ထာရေန ဝိဘဇိတွာ ဒေသေသိ။

ဝိဿဇ္ဇနာ – တံ ခေါ ပန ဘန္တေ ဓမ္မံ သုတွာ ပေဿဿ ဟတ္ထာရောဟပုတ္တဿ ဒွေ အာနိသံသာ အဓိဂတာ သင်္ဃေ စ ပသာဒေါ သတိပဋ္ဌာနပရိဂ္ဂဟဏူပါယော ¶ စ အဘိနဝေါ။ ဘဂဝါ စ ဘန္တေ တံ ပုဂ္ဂလစတုက္ကဒေသနံ ဘိက္ခူဟိ ယာစိတော ‘‘ကတမော စ ဘိက္ခဝေ ပုဂ္ဂလော အတ္တပရိတာပနာနုယောဂမနုယုတ္တော’’တိအာဒိနာ သံခိတ္တေန ဘာသိတံ၊ ဝိတ္ထာရေန အတ္ထံ အဝိဘတ္တံ။ ဝိတ္ထာရေန ဝိဘဇိတွာ ဒေသေသိ။

ပုစ္ဆာ – အဋ္ဌကနာဂရသုတ္တံ ¶ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ဘာသိတံ။

ဝိဿဇ္ဇနာ – ဝေသာလိယံ ဘန္တေ ဝေဠုဝဂါမကေ ဂဟပတိံ အဋ္ဌကနာဂရံ အာရဗ္ဘ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန ဘာသိတံ။ ဒသမော ဘန္တေ ဂဟပတိ အဋ္ဌကနာဂရော အာယသ္မန္တံ အာနန္ဒံ ဥပသင်္ကမိတွာ ဧတဒဝေါစ ‘‘အတ္ထိ နု ခေါ ဘန္တေ အာနန္ဒ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဧကဓမ္မော အက္ခာတော၊ ယတ္ထ ဘိက္ခုနော အပ္ပမတ္တဿ အာတာပိနော ပဟိတတ္တဿ ဝိဟရတော အဝိမုတ္တဉ္စေဝ စိတ္တံ ဝိမုစ္စတိ၊ အပရိက္ခိဏာ စ အာသဝါ ပရိက္ခယံ ဂစ္ဆန္တိ၊ အနနုပ္ပတ္တဉ္စ အနုတ္တရံ ယောဂက္ခေမံ အနုပါပုဏာတီ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – သေခသုတ္တံ ¶ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ဘာသိတံ။

ဝိဿဇ္ဇနာ – သက္ကေသု ဘန္တေ ကပိလဝတ္ထုသ္မိံ သန္ထာဂါရေ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန ကာပိလဝတ္ထဝေ သကျေ အာရဗ္ဘ ဘာသိတံ။ ဘဂဝါ ဘန္တေ ကာပိလဝတ္ထဝေ သကျေ ဗဟုဒေဝရတ္တိံ ဓမ္မိယာ ကထာယ သန္ဒဿေတွာ သမာဒပေတွာ သမုတ္တေဇေတွာ သမ္ပဟံသေတွာ အာယသ္မန္တံ အာနန္ဒံ အာမန္တေသိ ‘‘ပဋိဘာတု တံ အာနန္ဒ ကာပိလဝတ္ထဝါနံ သကျာနံ သေခေါ ပါဋိပဒေါ၊ ပိဋ္ဌိ မေ အာဂိလာယတိ၊ တမဟံ အာယမိဿာမီ’’တိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ပေါတလိယသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – အင်္ဂုတ္တရာပေသု ဘန္တေ အာပဏေ နာမ အင်္ဂုတ္တရာပါနံ နိဂမေ ပေါတလိယံ ဂဟပတိံ ပဋိက္ခိတ္တသဗ္ဗကမ္မန္တံ အာရဗ္ဘ ဘာသိတံ။ ပေါတလိယော ဘန္တေ ဂဟပတိ ပဋိက္ခိတ္တသဗ္ဗကမ္မန္တော ယေန ဘဂဝါ တေနုပသင်္ကမိ၊ ဥပသင်္ကမန္တော ဘဂဝတာ ဂဟပတိဝါဒေန သမုဒါစရိယမာနော ကုပိတော အနတ္တမနော ဘဂဝန္တံ ဧတဒဝေါစ ‘‘တယိဒံ ဘော ဂေါတမ နစ္ဆန္နံ တယိဒံ နပ္ပတိရူပံ၊ ယံ မံ တွံ ဂဟပတိဝါဒေန သမုဒါစရသီ’’တိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ကထဉ္စာဝုသော ¶ ဘဂဝါ ကာမာနံ အာဒီနဝံ ဝိတ္ထာရေန ပကာသေတွာ အရိယဿ ဝိနယေ ဝေါဟာရသမုစ္ဆေဒံ ဒဿေသိ။

ဝိဿဇ္ဇနာ – အထ ဘန္တေ ဘဂဝါ အရိယဿ ဝိနယေ ဝေါဟာရသမုစ္ဆေဒါယ အဋ္ဌ ဓမ္မေ ဝိဘဇိတွာ ‘‘သေယျထာပိ ဂဟပတိ ကုက္ကုရော ဇိဃစ္ဆာဒုဗ္ဗလျပရေတော ဂေါဃာတကသူနံ ပစ္စုပဋ္ဌိတော အဿ’’ ဧဝမာဒိနာ ကာမေသု အာဒီနဝံ ဒဿေတွာ ပရိယောသာနေ တီဟိ ဝိဇ္ဇာဟိ အရိယဿ ဝိနယေ ဝေါဟာရသမုစ္ဆေဒံ သဗ္ဗေနသဗ္ဗံ သဗ္ဗထာသဗ္ဗံ ဝေါဟာရသမုစ္ဆေဒံ ဝိတ္ထာရေန ဝိဘဇိတွာ ဒေသေသိ။

ပုစ္ဆာ – တေနာဝုသော ¶ ဘဂဝတာ…ပေ… သမ္မာသမ္ဗုဒ္ဓေန ဇီဝကသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ရာဇဂဟေ ¶ ဘန္တေ ဇီဝကံ ကောမာရဘစ္စံ အာရဗ္ဘ ဘာသိတံ။ ဇီဝကော ဘန္တေ ကောမာရဘစ္စော ဘဂဝန္တံ ဥပသင်္ကမိတွာ ဧတဒဝေါစ ‘‘သုတံ မေတံ ဘန္တေ သမဏံ ဂေါတမံ ဥဒ္ဒိဿ ပါဏံ အာရဘန္တိ၊ တံ သမဏော ဂေါတမော ဇာနံ ဥဒ္ဒိဿ ကတံ မံသံ ပရိဘုဉ္ဇတိ ပဋိစ္စ ကမ္မန္တိ။ ယေ တေ ဘန္တေ ဧဝမာဟံသု ‘သမဏံ ဂေါတမံ ဥဒ္ဒိဿ ပါဏံ အာရဘန္တိ၊ တံ သမဏော ဂေါတမော ဇာနံ ဥဒ္ဒိဿ ကတံ မံသံ ပရိဘုဉ္ဇတိ ပဋိစ္စ ကမ္မ’န္တိ၊ ကစ္စိ တေ ဘန္တေ ဘဂဝတော ဝုတ္တဝါဒိနော န စ ဘဂဝန္တံ အဘူတေန အဗ္ဘာစိက္ခန္တိ၊ ဓမ္မဿ စာနုဓမ္မံ ဗျာကရောန္တိ၊ န စ ကောစိ သဟဓမ္မိကော ဝါဒါနုဝါဒေါ ဂါရယှံ ဌာနံ အာဂစ္ဆတီ’’တိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဥပါလိသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – နာဠန္ဒာယံ ဘန္တေ ဥပါလိံ ဂဟပတိံ အာရဗ္ဘ ဘာသိတံ။ ဥပါလိ ဘန္တေ ဂဟပတိ ဘဂဝန္တံ ဥပသင်္ကမိတွာ ဧတဒဝေါစ ‘‘အာဂမာ နုခွိဓ ဘန္တေ ဒီဃတပဿီ နိဂဏ္ဌော’’တိ၊ ဧဝမာဒိနာ စ ဘန္တေ ဥပါလိ ဂဟပတိ ဘဂဝတော ပဋိသန္ဓာရံ ကတွာ အတ္တနော အာစရိယဿ နိဂဏ္ဌဿ နာဋပုတ္တဿ ဝါဒံ ပကာသေသိ၊ ဝါဒံ ဝဏ္ဏေသိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – အထ ¶ ခေါ အာဝုသော ဘဂဝါ ဥပါလိံ ဂဟပတိံ တသ္မိံ ဝါဒေ ကထံ သမနုယုဉ္ဇီ သမနုဂါဟီ သမနုဘာသီ၊ ကထဉ္စဿ ဥပါယံ ဒဿေတွာ ယထာဘူတံ အတ္ထံ ဉာပေသိ။

ဝိဿဇ္ဇနာ – အထ ခေါ ဘန္တေ ဘဂဝါ ဥပါလိံ ဂဟပတိံ ‘‘သစေ ခေါ တွံ ဂဟပတိ သစ္စေ ပတိဋ္ဌာယ မန္တေယျာသိ၊ သိယာ နော ဧတ္ထ ကထာသလ္လာပေါ’’တိ ဥပါလိံ ဂဟပတိံ ကထံ သမုဋ္ဌာပေတွာ ‘‘တံ ¶ ကိံမညသိ ဂဟပတိ၊ ဣဓဿ နိဂဏ္ဌော အာဗာဓိကော ဒုက္ခိတော ဗာဉှဂိလာနော သီတောဒကပရိက္ခိတ္တော ဥဏှောဒကပဋိသေဝီ၊ သော သီတောဒကံ အလဘမာနော ကာလင်္ကရေယျာ’’တိ ဧဝမာဒိနာ ဘန္တေ ဘဂဝါ စတ္တာရော ဥပါယေ ဒဿေတွာ ဥပါလိံ ဂဟပတိံ ယထာဘူတမတ္ထံ ဉာပေသိ။

ပုစ္ဆာ – ဧဝံ ¶ ခေါ အာဝုသော ဥပါလိ ဂဟပတိ ဘဂဝတာ သညာပိတော ဣမသ္မိံ ဓမ္မဝိနယေ ပသန္နော ကီဒိသံ ပသန္နာကာရံ အကာသိ၊ ကထဉ္စ ဘဂဝါ တံ ပုန အနုသာသိတွာ ဥတ္တရိ ဝိနေသိ။

ဝိဿဇ္ဇနာ – ‘‘ပုရိမေနေဝါဟံ ဘန္တေ ဩပမ္မေန ဘဂဝတော အတ္တမနော အဘိရဒ္ဓါ၊ အပိစာဟံ ဣမာနိ ဘဂဝတော ဝိစိတြာနိ ပဉှပဋိဘာနာနိ သောတုကာမော၊ ဧဝါဟံ ဘဂဝန္တံ ပစ္စနီကံ ကာတဗ္ဗံ အမညိဿ’’န္တိ၊ ဧဝမာဒိနာ ဘန္တေ ဥပါလိ ဂဟပတိ ဘဂဝတာ ဝိညာပိတော ဣမသ္မိံ ဓမ္မဝိနယေ ပသန္နော ပသန္နာကာရံ အကာသိ။ တတ္ထ ဘဂဝါ စ ဘန္တေ ‘‘အနုဝိစ္စကာရံ ခေါ ဂဟပတိ ကရောဟိ၊ အနုဝိစ္စကာရော တုမှာဒိသာနံ ဉာတမနုဿာနံ သာဓု ဟောတီ’’တိ ဧဝမာဒိနာ ပုန အနုသာသိတွာ ဥတ္တရိ ယာဝ ဓမ္မစက္ခုပဋိလာဘာ ဝိနေသိ။

ပုစ္ဆာ – ကထဉ္စာဝုသော ¶ နိဂဏ္ဌဿ နာဋပုတ္တဿ ဥပါလိဿ ဂဟပတိဿ နိဝေသနံ ဂန္တွာ အာဝီမံသနာ စ ဥပါလိဿ ဂဟပတိဿ ပစ္စုတ္တရာ ကထာ စ အဟောသိ။

ဝိဿဇ္ဇနာ – ‘‘ဥမ္မတ္တောသိ တွံ ဂဟပတိ ဒတ္တောသိ တွံ ဂဟပတီ’’တိ ဧဝမာဒိနာ ဘန္တေ နိဂဏ္ဌဿ နာဋပုတ္တဿ ဥပါလိဿ ဂဟပတိဿ နိဝေသနံ ဂန္တွာ ဝီမံသာ စ ‘‘ဘဒ္ဒိကာ ဘန္တေ အာဝဋ္ဋနီမာယာ ကလျာဏီ ဘန္တေ အာဝဋ္ဋနီမာယာတိ’’ ဧဝမာဒိနာ ဥပါလိဿ ဂဟပတိဿ ပစ္စုတ္တရကထာ စ အဟောသိ။

ပုစ္ဆာ – ကုက္ကုရဝတိကသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ကောလိယေသု ဘန္တေ ဟလိဒ္ဒဝသနေ နာမ ကောလိယာနံ နိဂမေ ပုဏ္ဏဉ္စ ကောလိယပုတ္တံ ဂေါဝတိကံ အစေလဉ္စ သေနိယံ ကုက္ကုရဝတိကံ အာရဗ္ဘ ဘာသိတံ။ ပုဏ္ဏော ဘန္တေ ကောလိယ ပုတ္တော ဂေါဝတိကော ဘဂဝန္တံ ဧတဒဝေါစ ‘‘အယံ ဘန္တေ အစေလော သေနိယော ကုက္ကုရဝတိကော ဒုက္ကရကာရကော ဆမာနိက္ခိတ္တံ ဘောဇနံ ဘုဉ္ဇတိ၊ တဿ တံ ကုက္ကုရဝတံ ဒီဃရတ္တံ သမတ္တံ သမာဒိန္နံ၊ တဿ ကာ ဂတိ၊ ကော အဘိသမ္ပရာယော’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – တေနာဝုသော ¶ ဇာနတာ…ပေ… သမ္မာသမ္ဗုဒ္ဓေန အဘယရာဇကုမာရသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ရာဇဂဟေ မေ ဘန္တေ အဘယံ ရာဇကုမာရံ အာရဗ္ဘ ဘာသိတံ။ အဘယော ဘန္တေ ရာဇကုမာရော ဘဂဝန္တံ ဥပသင်္ကမိတွာ ဧတဒဝေါစ ‘‘ဘာသေယျ နု ခေါ ဘန္တေ တထာဂတော တံ ဝါစံ၊ ယာ သာ ဝါစာ ပရေသံ အပ္ပိယာ အမနာပါ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဗဟုဝေဒနီယသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ အာယသ္မန္တဉ္စ ဥဒါယိံ ပဉ္စကင်္ဂဉ္စ ထပတိံ အာရဗ္ဘ ဘာသိတံ၊ ပဉ္စကင်္ဂေါ ဘန္တေ ထပတိ အာယသ္မန္တံ ဥဒါယိံ ဥပသင်္ကမိတွာ ဝေဒနံ ပုစ္ဆိ၊ အာယသ္မာ ဘန္တေ ဥဒါယီ ပဉ္စကင်္ဂံ ထပတိံ ဧတဒဝေါစ ‘‘တိဿော ခေါ ထပတိ ဝေဒနာ ဝုတ္တာ ဘဂဝတာ သုခါ ဝေဒနာ ဒုက္ခာ ဝေဒနာ အဒုက္ခမသုခါ ဝေဒနာ’’တိ။ ဧဝံ ဝုတ္တေ ဘန္တေ ပဉ္စကင်္ဂေါ ထပတိ အာယသ္မန္တံ ဥဒါယိံ ဧတဒဝေါစ ‘‘န ခေါ ဘန္တေ ဥဒါယိ တိဿော ဝေဒနာ ဝုတ္တာ ဘဂဝတာ၊ ဒွေ ဝေဒနာ ဝုတ္တာ ဘဂဝတာ သုခါ ဝေဒနာ ဒုက္ခာ ဝေဒနာ၊ ယာယံ ဘန္တေ အဒုက္ခမသုခါ ဝေဒနာ၊ သန္တသ္မိံ ဧသာ ပဏီတေ သုခေ ဝုတ္တာ ဘဂဝတာ’’တိ။ နေဝ အသက္ခိ ခေါ ဘန္တေ အာယသ္မာ ဥဒါယီ ပဉ္စကင်္ဂံ ထပတိံ သညာပေတုံ၊ န ပန အသက္ခိ ပဉ္စကင်္ဂေါ ထပတိ အာယသ္မန္တံ ဥဒါယိံ သညာပေတုံ။ အဿောသိ ခေါ အာယသ္မာ အာနန္ဒော အာယသ္မတော ဥဒါယိဿ ပဉ္စကင်္ဂေန ထပတိနာ သဒ္ဓိံ ဣမံ ကထာသလ္လာပံ၊ အထ ခေါ ဘန္တေ အာယသ္မာ အာနန္ဒော ယာဝတကော အဟောသိ ¶ အာယသ္မတော ဥဒါယိဿ ပဉ္စကင်္ဂေန ထပတိနာ သဒ္ဓိံ ကထာသလ္လာပေါ၊ တံ သဗ္ဗံ ဘဂဝတော အာရောစေသိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – အပဏ္ဏကသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ကောသလေသု ဘန္တေ သာလာယံ နာမ ကောသလာနံ ဗြာဟ္မဏဂါမေ သာလေယျကေ ဗြာဟ္မဏဂဟပတိကေ အာရဗ္ဘ ဘာသိတံ။ သမ္ဗဟုလာ ဘန္တေ အညတိတ္ထိယာ သာလေယျကာနံ ¶ ဗြာဟ္မဏဂဟပတိကာနံ အတ္တနော အတ္တနော မိစ္ဆာဒိဋ္ဌိယော ပဋိဂ္ဂဏှာပေသုံ ဥဂ္ဂဏှာပေသုံ။ တေ ပန ဘန္တေ သာလေယျကာ ဗြာဟ္မဏဂဟပတိကာ ဧကဒိဋ္ဌိယမ္ပိ ပတိဋ္ဌာတုံ န သက္ခိံသု။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – တတြ ¶ အာဝုသော ဘဂဝတာ ပဌမံ မိစ္ဆာဝါဒေါ စ သမ္မာဝါဒေါ စ ကထံ ဝိဘဇိတွာ ပကာသိတော။

ဝိဿဇ္ဇနာ – တတြ ဘန္တေ ဘဂဝတာ ‘‘သန္တိ ဂဟပတယော ဧကေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော နတ္ထိ ဒိန္နံ နတ္ထိ ယိဋ္ဌံ နတ္ထိ ဟုတံ နတ္ထိ သုကတဒုက္ကဋာနံ ကမ္မာနံ ဖလံ ဝိပါကော’’တိ ဧဝမာဒိနာ ပဌမံ မိစ္ဆာဝါဒေါ စ သမ္မာဝါဒေါ စ ဝိဘဇိတွာ ပကာသိတော။

ပုစ္ဆာ – တတ္ထ ¶ အာဝုသော ဘဂဝတာ မိစ္ဆာဝါဒီနဉ္စ ဒေါသော သမ္မာဝါဒီနဉ္စ ဂုဏော ကထံ ဝိစာရေတွာ ပကာသိတော။

ဝိဿဇ္ဇနာ – တတ္ထ ဘန္တေ ဘဂဝတာ ‘‘တတြ ဂဟပတယော ယေတေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော နတ္ထိ ဒိန္နံ နတ္ထိ ယိဋ္ဌံ နတ္ထိ ဟုတံ နတ္ထိ သုကတဒုက္ကဋာနံ ကမ္မာနံ ဖလံ ဝိပါကော’’တိ ဧဝမာဒိနာ ဘန္တေ မိစ္ဆာဝါဒီနဉ္စ ဒေါသော သမ္မာဝါဒီနဉ္စ ဂုဏော ဘဂဝတာ ဝိစာရေတွာ ပကာသိတော။

ပုစ္ဆာ – ကထဉ္စာဝုသော ¶ တတ္ထ ဘဂဝတာ ဝိညုနော ပုရိသပုဂ္ဂလဿ ပဋိသဉ္စိက္ခဏာ ပကာသိတာ။

ဝိဿဇ္ဇနာ – တတြ ¶ ဂဟပတယော ဝိညူ ပုရိသော ဣတိ ပဋိသဉ္စိက္ခတီတိ ဧဝမာဒိနာ ဘန္တေ တတ္ထ ဘဂဝတာ ဝိညုနော ပုရိသပုဂ္ဂလဿ ပဋိသဉ္စိက္ခဏာ ပကာသိတာ။

ပုစ္ဆာ – ကထဉ္စာဝုသော ¶ ဘဂဝတာ အညေသုပိ မိစ္ဆာဝါဒသမ္မာဝါဒေသု အပဏ္ဏကပဋိပဒါ ဝိစာရေတွာ ပကာသိတာ၊ တံ သင်္ခေပတော ကထေသိ။

ဝိဿဇ္ဇနာ – ယထေဝ ဘန္တေ ပဌမေ ဝါဒေ၊ ဧဝမေဝ ခေါ ဘန္တေ အကိရိယဝါဒါဒီသု စတူသု စ မိစ္ဆာဝါဒေသု ဒေါသံ ကိရိယဝါဒါဒီသု စ စတူသု သမ္မာဝါဒေသု ဂုဏံ၊ တတ္ထ စ ဝိညုနော ပုရိသဿ ပဋိသဉ္စိက္ခဏာကာရံ ဒဿေတွာ ဘဂဝတာ အပဏ္ဏကပဋိပဒါ ပကာသိတာ။

ပုစ္ဆာ – အမ္ဗလဋ္ဌိကရာဟုလောဝါဒသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – ရာဇဂဟေ ဘန္တေ အာယသ္မန္တံ ရာဟုလံ အာရဗ္ဘ ဘာသိတံ။

ပုစ္ဆာ – မဟာရာဟုလောဝါဒသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ ရာဟုလံ အာရဗ္ဘ ဘာသိတံ။ အာယသ္မာ ဘန္တေ ရာဟုလော ဘဂဝတော စေဝ အတ္တနော စ အတ္တဘာဝသမ္ပတ္တိံ နိဿာယ ဂေဟဿိတံ ဆန္ဒရာဂံ ဥပ္ပာဒေသိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – စူဠမာလုကျသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ မာလုကျပုတ္တံ အာရဗ္ဘ ဘာသိတံ။ အာယသ္မာ ဘန္တေ မာလုကျပုတ္တော အတ္တနော ပဝိဝိတ္တဿ ရဟောဂတဿ ပဋိသလ္လီနဿ စေတသော ပရိဝိတက္ကံ ဘဂဝတော အာရောစေသိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – မဟာမာလုကျသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – တသ္မိံယေဝ ဘန္တေ သာဝတ္ထိယံ အာယသ္မန္တံ မဟာမာလုကျပုတ္တံ အာရဗ္ဘ ဘာသိတံ။

ပုစ္ဆာ – တေနာဝုသော ¶ ဘဂဝတာ…ပေ… သမ္မာသမ္ဗုဒ္ဓေန ဘဒ္ဒါလိသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ ဘဒ္ဒါလိံ အာရဗ္ဘ ဘာသိတံ။ အာယသ္မာ ဘန္တေ ဘဒ္ဒါလိ ဘဂဝတာ သိက္ခာပဒေ ပညာပိယမာနေ ဘိက္ခုသင်္ဃေ သိက္ခံ သမာဒိယမာနေ အနုဿာဟံ ပဝေဒေသိ။ တသ္မိံ ဘန္တေ ဝတ္ထုသ္မိံ ဘာသိတံ။

အစ္စယော ¶ မံ ဘန္တေ အစ္စဂမာ ယထာဗာလံ ယထာမူဠှံ ယထာအကုသလံ၊ ယောဟံ ဘဂဝတာ သိက္ခာပဒေ ပညာပိယမာနေ ဘိက္ခုသင်္ဃေ သိက္ခံ သမာဒိယမာနေ အနုဿာဟံ ပဝေဒေသိံ၊ တဿ မေ ဘန္တေ ဘဂဝါ အစ္စယံ အစ္စယတော ပဋိဂ္ဂဏှာတု အာယတိံ သံဝရာယ –

ပုစ္ဆာ – အထ ¶ ခေါ အာဝုသော အာယသ္မာ ဘဒ္ဒါလိ ဘဂဝန္တံ ကီဒိသံ ပဉှံ ပုစ္ဆိ၊ ကထဉ္စဿ ဘဂဝါ တံ ဝိဘဇိတွာ ဗျာကာသိ။

ဝိဿဇ္ဇနာ – အထ ခေါ ဘန္တေ အာယသ္မာ ဘဒ္ဒါလိ ‘‘ကော နု ခေါ ဘန္တေ ဟေတု၊ ကော ပစ္စယော၊ ယေန မိဓေကစ္စံ ဘိက္ခုံ ပသယု ပသယု ကာရဏံ ကရောန္တီ’’တိ ဧဝမာဒိနာ ဘဂဝန္တံ ပဉှံ အပုစ္ဆိ။ ဘဂဝါ စ ဘန္တေ ‘‘ဣဓ ဘဒ္ဒါလိ ဧကစ္စော ဘိက္ခု အဘိဏှာပတ္တိကော ဟောတိ၊ အာပတ္တိဗဟုလော’’ ဧဝမာဒိနာ အာယသ္မတော ဘဒ္ဒါလိဿ ဝိဘဇိတွာ ဗျာကာသိ။

ပုစ္ဆာ – တဒါပိ ¶ ခေါ အာဝုသော အာယသ္မာ ဘဒ္ဒါလိ ပုနပိ ဘဂဝန္တံ ကီဒိသံ ပဉှံ ပုစ္ဆိ၊ ကထဉ္စဿ ဘဂဝါ တမ္ပိ ဝိဘဇိတွာ ဗျာကာသိ။

ဝိဿဇ္ဇနာ – တဒါပိ ဘန္တေ အာယသ္မာ ဘဒ္ဒါလိ ‘‘ကော နု ခေါ ဘန္တေ ဟေတု၊ ကော ပစ္စယော၊ ယေန ပုဗ္ဗေ အပ္ပတရာနိ စေဝ သိက္ခာပဒါနိ အဟေသုံ၊ ဗဟုတရာ စ ဘိက္ခူ အညာယ သဏ္ဍဟိံသု။ ကော ပန ဘန္တေ ဟေတု၊ ကော ပစ္စယော ယေန ဧတရဟိ ဗဟုတရာနိ စေဝ သိက္ခာပဒါနိ ဟောန္တိ အပ္ပတရာ စ ဘိက္ခူ အညာယ သဏ္ဍဟန္တီ’’တိ ဘဂဝန္တံ ပုနပိ ပဉှံ အပုစ္ဆိ။ ဘဂဝါ စ ဘန္တေ ‘‘ဧဝမေတံ ဘဒ္ဒါလိ ဟောတိ၊ သတ္တေသု ဟာယမာနေသု သဒ္ဓမ္မေ အန္တရဓာယမာနေ ဗဟုတရာနိ ဟောန္တိ အပ္ပတရာ စ ဘိက္ခူ အညာယ သဏ္ဍဟန္တီ’’တိ၊ ဧဝမာဒိနာ အာယသ္မတော ဘဒ္ဒါလိဿ ဝိဘဇိတွာ ဝိဘဇိတွာ ဗျာကတာ။

ပုစ္ဆာ – လဋုကိကောပမသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – အင်္ဂုတ္တရာပေသု ဘန္တေ အာပဏေ နာမ အင်္ဂုတ္တရာပါနံ နိဂမေ အာယသ္မန္တံ ဥဒါယိံ အာရဗ္ဘ ဘာသိတံ။ အာယသ္မာ ဘန္တေ ဥဒါယီ ဘဂဝန္တံ ဥပသင်္ကမိတွာ ဧတဒဝေါစ ‘‘ဣဓ မယှံ ဘန္တေ ရဟောဂတဿ ပဋိသလ္လီနဿ ဧဝံ စေတသော ပရိဝိတက္ကော ဥဒပါဒိ ‘‘ဗဟူနံ ဝတ နော ဘဂဝါ ဒုက္ခဓမ္မာနံ အပဟတ္တာ၊ ဗဟူနံ ဝတ နော ဘဂဝါ သုခဓမ္မာနံ ဥပဟတ္တာ၊ ဗဟူနံ ဝတ နော ဘဂဝါ အကုသလာနံ ဓမ္မာနံ အပဟတ္တာ၊ ဗဟူနံ ဝတ နော ဘဂဝါ ကုသလာနံ ဓမ္မာနံ ဥပဟတ္တာ’တိ’’။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – အထ ¶ ခေါ အာဝုသော ဘဂဝါ ကီဒိသီ ဥပမာယော ဒဿေတွာ ဘိက္ခူနံ ဩဝါဒံ အဒါသိ။

ဝိဿဇ္ဇနာ – အထ ခေါ ဘန္တေ ဘဂဝါ လဋုကိကောပမံ ဟတ္ထိနာဂေါပမံ ဒလိဒ္ဒပုရိသောပမံ ဂဟပတိကောပမန္တိ စတဿော ဥပမာယော ဒဿေတွာ ဘိက္ခူနံ ဩဝါဒမဒါသိ။

ပုစ္ဆာ – ဧဝဉ္စာဝုသော ¶ ဘဂဝါ စတူဟိ ဥပမာဟိ ဘိက္ခူနံ ဩဝါဒံ ဒတွာ ကထံ ဥတ္တရိ ဓမ္မဒေသနံ ပဝဍ္ဎေသိ။

ဝိဿဇ္ဇနာ – ဧဝံ ခေါ ဘန္တေ ဘဂဝါ စတူဟိ ဥပမာဟိ ဘိက္ခူနံ ဩဝါဒံ ဒတွာ ‘‘စတ္တာရော မေ ဥဒါယိ ပုဂ္ဂလာ သန္တော သံဝိဇ္ဇမာနာ လောကသ္မိံ’’န္တိ ဧဝမာဒိနာ ဥတ္တရိ ဘိက္ခူနံ ဓမ္မကထံ ပဝဍ္ဎေသိ။

ပုစ္ဆာ – စာတုမသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – စာတုမာယံ ဘန္တေ အာယသ္မန္တာနံ သာရိပုတ္တမောဂ္ဂလာနတ္ထေရာနံ သဒ္ဓိဝိဟာရိကေ အဓုနာ ပဗ္ဗဇိတေ သမ္ဗဟုလေ ဘိက္ခူ အာရဗ္ဘ ဘာသိတံ။ သာရိပုတ္တမောဂ္ဂလ္လာနပ္ပမုခါနိ ဘန္တေ ပဉ္စမတ္တာနိ ဘိက္ခုသတာနိ စာတုမံ အနုပ္ပတ္တာနိ ဟောန္တိ ဘဂဝန္တံ ဒဿနာယ၊ တေ စ အာဂန္တုကာ ဘိက္ခူ နေဝါသိကေဟိ ဘိက္ခူဟိ သဒ္ဓိံ ပဋိသမ္မောဒမာနာ သေနာသနာနိ ပညာပယမာနာ ပတ္တစီဝရာနိ ပဋိသာမယမာနာ ဥစ္စာသဒ္ဒါ မဟာသဒ္ဒါ အဟေသုံ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ကထဉ္စာဝုသော ¶ တတ္ထ ဘဂဝါ ဘိက္ခူနံ ဩဝါဒံ အဒါသိ။

ဝိဿဇ္ဇနာ – စတ္တာရိမာနိ ဘိက္ခဝေ ဘယာနိ ဥဒကောရောဟန္တေ ပါတိကင်္ခိတဗ္ဗာနီတိ ဧဝမာဒိနာ ဘန္တေ ဘဂဝါ တတ္ထ ဘိက္ခူနံ ဩဝါဒံ အဒါသိ။

ပုစ္ဆာ – နဠကပါနသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – နဠကပါနေ ဘန္တေ အနုရုဒ္ဓတ္ထေရပ္ပမုခေ သမ္ဗဟုလေ အဘိညာတေ အဘိညာတေ ကုလပုတ္တေ အာရဗ္ဘ ဘာသိတံ။

ပုစ္ဆာ – ဂေါလိယာနိသုတ္တံ ¶ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ဘာသိတံ။

ဝိဿဇ္ဇနာ – ရာဇဂဟေ ဘန္တေ အာယသ္မန္တံ ဂေါလိယာနိံ အာရဗ္ဘ အာယသ္မတာ သာရိပုတ္တတ္ထေရေန ဓမ္မသေနာပတိနာ ဘာသိတံ။ အာယသ္မာ ဘန္တေ ဂေါလိယာနိ အာရညိကော ပဒသမာစာရော သင်္ဃမဇ္ဈေ ဩသဋော ဟောတိ ကေနစိဒေဝ ကရဏီယေန၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – တေနာဝုသော ¶ ဘဂဝတာ…ပေ… သမ္မာသမ္ဗုဒ္ဓေန ကီဋာဂိရိသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ကာသီသု ဘန္တေ ကီဋာဂိရိသ္မိံ ကာသီနံ နိဂမေ အဿဇိပုနဗ္ဗသုကေ ဘိက္ခူ အာရဗ္ဘ ဘာသိတံ။ အဿဇိပုနဗ္ဗသုကာ ဘန္တေ ဘိက္ခူ ဘိက္ခူဟိ သဟဓမ္မိကံ ဝုစ္စမာနာ ဧဝမာဟံသု ‘‘မယံ ခေါ အာဝုသော သာယဉ္စေဝ ဘုဉ္ဇာမ ပါတော စ ဒိဝါ စ ဝိကာလေ၊ တေ မယံ သာယဉ္စေဝ ဘုဉ္ဇမာနာ ပါတော စ ဒိဝါ စ ဝိကာလေ အပ္ပာဗာဓတဉ္စ သဉ္ဇာနာမ အပ္ပာတင်္ကတဉ္စ လဟုဋ္ဌာနဉ္စ ဗလဉ္စ ဖာသုဝိဟာရဉ္စ၊ တေ မယံ ကိံ သန္ဒိဋ္ဌိကံ ဟိတွာ ကာလိကံ အနုဓာဝိဿာမ၊ သာယဉ္စေဝ မယံ ဘုဉ္ဇိဿာမ ပါတော စ ဒိဝါ စ ဝိကာလေ’’တိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – တေဝိဇ္ဇဝစ္ဆသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ဝေသာလိယံ ဘန္တေ ဝစ္ဆဂေါတ္တံ ပရိဗ္ဗာဇကံ အာရဗ္ဘ ဘာသိတံ။ ဝစ္ဆဂေါတ္တော ဘန္တေ ပရိဗ္ဗာဇကော ဘဂဝန္တံ ဧတဒဝေါစ ‘‘သုတံ မေ ဘန္တေ သမဏော ဂေါတမော သဗ္ဗညူ သဗ္ဗဒဿာဝီ အပရိသေသံ ဉာဏဒဿနံ ပဋိဇာနာတိ၊ စရတော စ မေ တိဋ္ဌတော စ သုတ္တဿ စ ဇာဂရဿ စ သတတံ သမိတံ ဉာဏဒဿနံ ပစ္စုပဋ္ဌိတ’’န္တိ။ ယေ တေ ဘန္တေ ဧဝမာဟံသု ‘‘သမဏော ဂေါတမော သဗ္ဗညူ သဗ္ဗဒဿာဝီ အပရိသေသံ ဉာဏဒဿနံ ပဋိဇာနာတိ၊ စရတော စ မေ တိဋ္ဌတော စ သုတ္တဿ စ ဇာဂရဿ စ သတတံ သမိတံ ဉာဏဒဿနံ ပစ္စုပဋ္ဌိတ’’န္တိ။ ကစ္စိ တေ ဘန္တေ ဘဂဝတော ဝုတ္တဝါဒိနော၊ န စ ဘဂဝန္တံ အဘူတေန အဗ္ဘာစိက္ခန္တိ၊ ဓမ္မဿ စာနုဓမ္မံ ဗျာကရောန္တိ၊ န စ ကောစိ သဟဓမ္မိကော ဝါဒါနုဝါဒေါ ဂါရယှံ ဌာနံ အာဂစ္ဆတီ’’တိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – အဂ္ဂိဝစ္ဆသုတ္တံ ¶ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ ဝစ္ဆဂေါတ္တံ ပရိဗ္ဗာဇကံ ဘာသိတံ။ ဝစ္ဆဂေါတ္တော ဘန္တေ ပရိဗ္ဗာဇကော ဘဂဝန္တံ ဥပသင်္ကမိတွာ ‘‘ကိံ နု ခေါ ဘော ဂေါတမ ‘သဿတော လောကော ဣဒမေဝ သစ္စံ မောဃမည’န္တိ ဧဝံဒိဋ္ဌိ ဘဝံ ဂေါတမော’’တိ ဧဝမာဒိကံ ပဉှံ အပုစ္ဆိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – မဟာဝစ္ဆသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ရာဇဂဟေ ဘန္တေ ဝစ္ဆဂေါတ္တံယေဝ ပရိဗ္ဗာဇကံ အာရဗ္ဘ ဘာသိတံ။ ဝစ္ဆဂေါတ္တော ဘန္တေ ပရိဗ္ဗာဇကော ဘဂဝန္တံ ဥပသင်္ကမိတွာ ¶ ဧတဒဝေါစ ‘‘ဒီဃရတ္တာဟံ ဘောတာ ဂေါတမေန သဟကထီ၊ သာဓု မေ ဘဝံ ဂေါတမော သံခိတ္တေန ကုသလာကုသလံ ဒေသေတူ’’တိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဧဝံ ¶ ဝုတ္တေ ခေါ အာဝုသော ဝစ္ဆဂေါတ္တော ပရိဗ္ဗာဇကော ဣမသ္မိံ ဓမ္မဝိနယေ ပသန္နော ဟုတွာ ကီဒိသံ ပသန္နာကာရံ အကာသိ၊ ကထဉ္စဿ ဓမ္မာဘိသမယော အဟောသိ။

ဝိဿဇ္ဇနာ – ဧဝံ ဝုတ္တေ ဘန္တေ ဝစ္ဆဂေါတ္တော ပရိဗ္ဗာဇကော ‘‘သစေ ဟိ ဘော ဂေါတမ ဣမံ ဓမ္မံ ဘဝံယေဝ ဂေါတမော အာရာဓကော အဘဝိဿ၊ နော စ ခေါ ဘိက္ခူ အာရာဓကာ အဘဝိဿံသု၊ ဧဝမိဒံ ဗြဟ္မစရိယံ အပရိပူရံ အဘဝိဿ တေနင်္ဂေနာ’’တိ ဧဝမာဒိနာ ဣမသ္မိံ ဓမ္မဝိနယေ ပသန္နော ပသန္နာကာရမကာသိ။ ယာဝ အရဟတ္တဉ္စဿ ဓမ္မာဘိသမယော အဟောသိ။

ပုစ္ဆာ – ဒီဃနခသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ရာဇဂဟေ ဘန္တေ ဒီဃနခံ ပရိဗ္ဗာဇကံ အာရဗ္ဘ ဘာသိတံ။ ဒီဃနခေါ ဘန္တေ ပရိဗ္ဗာဇကော ဘဂဝန္တံ ဥပသင်္ကမိတွာ ဧတဒဝေါစ ‘‘အဟဉှိ ဘော ဂေါတမ ဧဝံဝါဒီ ဧဝံဒိဋ္ဌိ သဗ္ဗံ မေ နက္ခမတီ’’တိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဣမသ္မိံ ¶ စ ပနာဝုသော ဝေယျာကရဏသ္မိံ ဘညမာနေ ကေသံ ပုဂ္ဂလာနံ ဝိသေသာဓိဂမော အဟောသိ။

ဝိဿဇ္ဇနာ – ဣမသ္မိဉ္စ ပန ဘန္တေ ဝေယျာကရဏသ္မိံ ဘညမာနေ အာယသ္မတော သာရိပုတ္တဿ အနုပါဒါယ အာသဝေဟိ စိတ္တံ ဝိမုစ္စိ၊ ဒီဃနခဿ ပန ပရိဗ္ဗာဇကဿ တသ္မိံယေဝ အာသနေ ဝိရဇံ ဝီတမလံ ဓမ္မစက္ခုံ ဥဒပါဒိ ယံကိဉ္စိ သမုဒယဓမ္မံ၊ သဗ္ဗံ တံ နိရောဓဓမ္မ’’န္တိ။

ပုစ္ဆာ – မာဂဏ္ဍိယသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ကုရူသု ဘန္တေ ကမ္မာသဓမ္မေ နာမ ကုရူနံ နိဂမေ ဘာရဒွါဇ ဂေါတ္တဿ ဗြာဟ္မဏဿ အဂျာဂါရေ တိဏသန္ထာရကေ မာဂဏ္ဍိယံ ပရိဗ္ဗာဇကံ အာရဗ္ဘ ဘာသိတံ။ မာဂဏ္ဍိယော ဘန္တေ ပရိဗ္ဗာဇကော ဘဂဝန္တံ ‘‘ဘူနဟု သမဏော ဂေါတမော’’တိ ဝဒေသိ၊ တသ္မိံ ဘန္တေ ဝဋ္ဌုသ္မိံ ဘာသိတံ။

ပုစ္ဆာ – ကထဉ္စာဝုသော ¶ ဘဂဝါ တတ္ထ မာဂဏ္ဍိယဿ ပရိဗ္ဗာဇကဿ သမနုယုဉ္ဇိတွာ သမနုယုဉ္ဇိတွာ ဓမ္မံ ဒေသေသိ။

ဝိဿဇ္ဇနာ – ‘‘စက္ခုံ ခေါ မာဂဏ္ဍိယ ရူပါရတံ ရူပသမ္မုဒိတံ၊ တံ တထာဂတဿ ဒန္တံ ဂုတ္တံ ရက္ခိတံ သံဝုတံ၊ တဿ စ သံဝရာယ ဓမ္မံ ဒေသေတီ’’တိ ဧဝမာဒိနာ ဘန္တေ တတ္ထ ဘဂဝါ မာဂဏ္ဍိယဿ ပရိဗ္ဗာဇကဿ သမနုယုဉ္ဇိတွာ သမနုယုဉ္ဇိတွာ ဓမ္မံ ဒေသေသိ။

ပုစ္ဆာ – ဧဝံ ¶ ခေါ အာဝုသော မာဂဏ္ဍိယေန ပရိဗ္ဗာဇကေန ‘‘နကိဉ္စိ ဘော ဂေါတမာ’’တိ ယထာဘူတံ ပဋိဿုတေ ကထံ ဘဂဝါ အတ္တနောပိ န ကိဉ္စိ ကေနစိပိ ဝတ္တဗ္ဗတံ ပကာသေသိ။

ဝိဿဇ္ဇနာ – ဧဝံ ခေါ ဘန္တေ မာဂဏ္ဍိယေန ပရိဗ္ဗာဇကေန နကိဉ္စိ ဘောဂေါတမာတိ ယထာဘူတံ ပဋိဿုတေ ‘‘အဟံ ခေါ ပန မာဂဏ္ဍိယ ပုဗ္ဗေ အဂါရိယဘူတော သမာနော ပဉ္စဟိ ကာမဂုဏေဟိ သမပ္ပိတော သမင်္ဂီဘူတော ပရိစာရေသိံ စက္ခုဝိညေယျဟိ ရူပေဟိ ဣဋ္ဌေဟိ မနာပေဟိ ပိယရူပေဟိ ကာမူပသံဟိတေဟိ ရဇနီယေဟီ’’တိ ဧဝမာဒိနာ ဘဂဝါ အတ္တနောပိ န ကိဉ္စိ ကေနစိပိ ဝတ္တဗ္ဗတံ ပကာသေသိ။

ပုစ္ဆာ – ဣမသ္မိံ ¶ သုတ္တေ ပရိယောသာနပုစ္ဆံ ပုစ္ဆိဿာမိ ဣမဉ္စ ပနာဝုသော ဓမ္မဒေသနံ သုတွာ မာဂဏ္ဍိယော ပရိဗ္ဗာဇကော ဣမသ္မိံ ဓမ္မဝိနယေ ပသန္နော ဟုတွာ ကီဒိသံ ပသန္နာကာရမကာသိ။

ဝိဿဇ္ဇနာ – ဣမံ ¶ စ ပန ဘန္တေ ဓမ္မဒေသနံ သုတွာ မာဂဏ္ဍိယော ပရိဗ္ဗာဇကော ‘အဘိက္ကန္တံ ဘော ဂေါတမ အဘိက္ကန္တံ ဘော ဂေါတမာ’’တိ ဧဝမာဒိနာ ဣမသ္မိံ ဓမ္မဝိနယေ ပသန္နော ပသန္နာကာရမကာသိ။

ပုစ္ဆာ – သန္ဒကသုတ္တံ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ဘာသိတံ။

ဝိဿဇ္ဇနာ – ကောသမ္ဗိယံ ¶ ဘန္တေ သန္ဒကံ ပရိဗ္ဗာဇကံ အာရဗ္ဘ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန ဘာသိတံ။ သန္ဒကော ဘန္တေ ပရိဗ္ဗာဇကော အာယသ္မန္တံ အာနန္ဒံ ဧတဒဝေါစ ‘‘သာဓုဝတ ဘဝန္တံယေဝ အာနန္ဒံ ပဋိဘာတု သကေ အာစရိယ ကေ ဓမ္မိကထာ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ကထဉ္စာဝုသော ¶ တတ္ထ စတ္တာရော အဗြဟ္မစရိယဝါသာ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန ဝိစာရေတွာ ပကာသိတာ။

ဝိဿဇ္ဇနာ – ဣဓ သန္ဒက ဧကစ္စော သတ္ထာ ဧဝံဝါဒီ ဟောတိ ဧဝံဒိဋ္ဌိ နတ္ထိ ဒိန္နံ၊ နတ္ထိ ယိဋ္ဌံ၊ နတ္ထိ ဟုတံ၊ နတ္ထိ သုကတဒုက္ကဋာနံ ကမ္မာနံ ဖလံဝိပါကော၊ နတ္ထိ အယံလောကော၊ နတ္ထိ ပရောလောကော၊ နတ္ထိ မာတာ၊ နတ္ထိ ပိတာ၊ နတ္ထိ သတ္တာ ဩပပါတိကာတိ

ဧဝမာဒိနာ ¶ ဘန္တေ တတ္ထ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန စတ္တာရော အဗြဟ္မစရိယဝါသာ ဝိစာရေတွာ ပကာသိတာ။

ပုစ္ဆာ – ကထဉ္စာဝုသော ¶ တတ္ထ စတ္တာရိ အနဿာသိကာနိ ဗြဟ္မစရိယာနိ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန ဝိစာရေတွာ ပကာသိတာနိ။

ဝိဿဇ္ဇနာ – ဣဓ ¶ သန္ဒက ဧကစ္စော သတ္ထာ သဗ္ဗညူ သဗ္ဗဒဿာဝီ အပရိသေသံ ဉာဏဒဿနံ ပဋိဇာနာတိ ‘‘စရတော စ မေ တိဋ္ဌတော စ သုတ္တဿ စ ဇာဂရဿ စ သတတံ သမိတံ ဉာဏဒဿနံ ပစ္စုပဋ္ဌိတ’’န္တိ ဧဝမာဒိနာ ဘန္တေ တတ္ထ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန စတ္တာရိ အနဿာသိကာနိ ဗြဟ္မစရိယာနိ ဝိဘဇိတွာ ပကာသိတာနိ။

¶ ခေါ အာဝုသော သန္ဒကော ပရိဗ္ဗာဇကော အာယသ္မန္တံ အာနန္ဒတ္ထေရံ ကထံ ပုစ္ဆိ၊ တထဉ္စဿာယသ္မာနန္ဒတ္ထေရော ဗျာကာသိ။

ဝိဿဇ္ဇနာ – အထ ခေါ ဘန္တေ သန္ဒကော ပရိဗ္ဗာဇကော ‘‘သော ပန ဘော အာနန္ဒ သတ္ထာ ကိံဝါဒီ ကိံ အက္ခာယီ’’တိ ဧဝမာဒိနာ အာယသ္မန္တံ အာနန္ဒတ္ထေရံ ပုစ္ဆိ၊ အာယသ္မာ စ ဘန္တေ အာနန္ဒတ္ထေရော ‘‘ဣဓ သန္ဒက တထာဂတော လောကေ ဥပ္ပဇ္ဇတိ အရဟံ သမ္မာသမ္ဗုဒ္ဓါ ဝိဇ္ဇာစရဏသမ္ပန္နော’’တိ ဧဝမာဒိနာ သန္ဒကဿ ပရိဗ္ဗာဇကဿ ဝိဘဇိတွာ ဝိဘဇိတွာ ဗျာကာသိ။

ပုစ္ဆာ – ဣမဉ္စ ¶ ပနာဝုသော ဓမ္မဒေသနံ သုတွာ သန္ဒကော ပရိဗ္ဗာဇကော ဣမသ္မိံ ဓမ္မဝိနယေ ပသန္နော ကီဒိသံ ပသန္နာကာရမကာသိ။

ဝိဿဇ္ဇနာ – ဣမဉ္စ ¶ ဘန္တေ ဓမ္မဒေသနံ သုတွာ သန္ဒကော ပရိဗ္ဗာဇကော ‘‘အစ္ဆရိယံ ဘော အာနန္ဒ၊ အဗ္ဘုတံ ဘော အာနန္ဒ၊ န စ နာမ သဓမ္မောက္ကံသနာ ဘဝိဿတိ၊ န ပရဓမ္မဝမ္ဘနာ၊ အာယတနေ စ ဓမ္မဒေသနာ၊ တာဝ ဗဟုကာ စ နိယျာတာရော ပညာယိဿန္တီ’’တိ ဧဝမာဒိနာ ဣမသ္မိံ ဓမ္မဝိနယေ ပသန္နော ပသန္နာကာရမကာသိ။

ပုစ္ဆာ – မဟာသကုလုဒါယိသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ရာဇဂဟေ ဘန္တေ သကုလုဒါယိံ ပရိဗ္ဗာဇကံ အာရဗ္ဘ ဘာသိတံ။ သကုလုဒါယီ ဘန္တေ ပရိဗ္ဗာဇကော ပုရိမာနိ ဒိဝသာနိ ပုရိမတရာနိ ကောတူဟလသာလာယံ နာနာတိတ္ထိယာနံ သမဏဗြာဟ္မဏာနံ ယာဝတကော အဟောသိ ဘဂဝန္တဉ္စ ဆ စ သတ္ထာရော အာရဗ္ဘ ကထာသလ္လာပေါ၊ တံ သဗ္ဗံ ဘဂဝတော အာရောစေသိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – သမဏမုဏ္ဍိကသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ ဥဂ္ဂါဟမာန ပရိဗ္ဗာဇကံ သမဏမုဏ္ဍိကာပုတ္တံ အာရဗ္ဘ ဘာသိတံ။ ဥဂ္ဂါဟမာနော ဘန္တေ ပရိဗ္ဗာဇကော သမဏမုဏ္ဍိကာပုတ္တော ပဉ္စကင်္ဂံ တပတိံ ဧတဒဝေါစ ‘‘စတူဟိ ခေါ အဟံ ဂဟပတိ ဓမ္မေဟိ သမန္နာဂတံ ပုရိသပုဂ္ဂလံ ပညပေမိ သမ္ပန္နကုသလံ ပရမကုသလံ ဥတ္တမပတ္တိပတ္တံ သမဏံ အယောဇ္ဈ’’န္တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – စူဠသကုလုဒါယီသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ရာဇဂဟေ ¶ ဘန္တေ သကုလုဒါယိံ ပရိဗ္ဗာဇကံ အာရဗ္ဘ ဘာသိတံ၊ သကုလုဒါယီ ဘန္တေ ပရိဗ္ဗာဇကော ဘဂဝန္တံ ဧတဒဝေါစ ‘‘ယဒါဟံ ဘန္တေ ဣမံ ပရိသံ အနုပသင်္ကန္တော ဟောမိ၊ အထာယံ ပရိသာ အနေကဝိဟိတံ တိရစ္ဆာနကထံ ကထေန္တိ နိသိန္နာ ဟောတိ။ ယဒါ စ ခေါ အဟံ ဘန္တေ ဣမံ ပရိသံ ဥပသင်္ကမန္တော ဟောမိ၊ အထာယံ ပရိသာ မမညေဝ မုခံ ဥလ္လောကေန္တီ နိသိန္နာ ဟောတိ ‘ယံ နော သမဏော ဥဒါယီ ဓမ္မံ ဘာသိဿတိ၊ တံ သောဿာမာ’တိ၊ ယဒါ ပန ဘန္တေ ဘဂဝါ ဣမံ ပရိသံ ဥပသင်္ကန္တော ဟောတိ၊ အထာဟဉ္စေဝ အယဉ္စ ပရိသာ ဘဂဝတော မုခံ ဥလ္လောကေန္တာ နိသိန္နာ ဟောမ ယံ နော ဘဂဝါ ဓမ္မံ ဘာသိဿတိ၊ တံ သောဿာမာ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဝေခနသသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ ဝေခနသံ ပရိဗ္ဗာဇကံ အာရဗ္ဘ ဘာသိတံ၊ ဝေခနသော ဘန္တေ ပရိဗ္ဗာဇကော ဘဂဝတော သန္တိကေ ဥဒါနံ ဥဒါနေသိ ‘‘အယံ ပရမော ဝဏ္ဏော အယံ ပရမော ဝဏ္ဏော’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဃဋိကာရသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ကောသလေသု ဘန္တေ ဃဋိကာရဿ ကုမ္ဘကာရဿ ဃရဝတ္ထုပဒေသေ အာယသ္မန္တံ အာနန္ဒံ အာရဗ္ဘ ဘာသိတံ။ ဘဂဝါ ဘန္တေ တသ္မိံ ဘူမိပဒေသေ သိတံ ပါတွာကာသိ၊ အာယသ္မာ စ အာနန္ဒော ဘဂဝန္တံ ဧတဒဝေါစ ‘‘ကော နု ခေါ ဘန္တေ ဟေတု ကော ပစ္စယော ဘဂဝတော သိတဿ ပါတုကမ္မာယ၊ န အကာရဏေန တထာဂတာ သိတံ ပါတုကရောန္တီ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ရဋ္ဌပါလသုတ္တံ ¶ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ဘာသိတံ။

ဝိဿဇ္ဇနာ – ကုရူသု ဘန္တေ ရာဇာနံ ကောရဗျံ အာရဗ္ဘ အာယသ္မတာ ရဋ္ဌပါလတ္ထေရေန ဘာသိတံ။ ရာဇာ ဘန္တေ ကောရဗျော အာယသ္မန္တံ ရဋ္ဌပါလံ ဧတဒဝေါစ ‘‘စတ္တာရိမာနိ ဘော ရဋ္ဌပါလ ပါရိဇုညာနိ၊ ယေဟိ ပါရိဇုညေဟိ သမန္နာဂတာ ဣဓေကစ္စေ ကေသမဿုံ ဩဟာရေတွာ ကာသာယာနိ ဝတ္ထာနိ အစ္ဆာဒေတွာ အဂါရသ္မာ အနာဂါရိယံ ပဗ္ဗဇန္တီ’’တိ ဧဝမာဒိကံ ဝစနံ အဝေါစ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – အထ ¶ ခေါ အာဝုသော အာယသ္မာ ရဋ္ဌပါလတ္ထေရော ရညော ကောရဗျဿ ကထံ ပဌမံ ဓမ္မုဒ္ဒေသံ ဝိတ္ထာရေတွာ ပကာသေသိ။

ဝိဿဇ္ဇနာ – အထ ခေါ ဘန္တေ အာယသ္မာ ရဋ္ဌပါလတ္ထေရော ‘‘တံ ကိံ မညသိ မဟာရာဇ တွံ ဝီသတိဝဿုဒ္ဒေသိကောပိ ပဏ္ဏဝီသတိဝဿုဒ္ဒေသိကောပိ ဟတ္ထိသ္မိမ္ပိ ကတာဝီ အဿသ္မိမ္ပိ ကတာဝီ ရထသ္မိမ္ပိ ကတာဝီ ဓနုသ္မိမ္ပိ ကတာဝီ ထရုသ္မိမ္ပိ ကတာဝီ ဦရုဗလီ ဗာဟုဗလီ အလမတ္တော သင်္ဂါမာဝစရော’’တိ ဧဝမာဒိနာ ပဌမံ ဓမ္မုဒ္ဒေသံ ဝိတ္ထာရေတွာ ပကာသေသိ။

ပုစ္ဆာ – ကထံ ¶ ပနာဝုသော အာယသ္မာ ရဋ္ဌပါလတ္ထေရော ရညော ကောရဗျဿ ဒုတိယမ္ပိ ဓမ္မုဒ္ဒေသံ ဝိတ္ထာရေတွာ ပကာသေသိ။

ဝိဿဇ္ဇနာ – ‘‘တံ ¶ ကိံ မညသိ မဟာရာဇ၊ အတ္ထိ တေ ကောစိ အနုသာယိကော အာဗာဓော’’တိ ဧဝမာဒိနာ ဘန္တေ အာယသ္မာ ရဋ္ဌပါလော ရညော ကောရဗျဿ ဒုတိယံ ဓမ္မုဒ္ဒေသံ ဝိတ္ထာရေတွာ ပကာသေသိ။

ပုစ္ဆာ – ကထံ ¶ ပနာဝုသော အာယသ္မာ ရဋ္ဌပါလတ္ထေရော ရညော ကောရဗျဿ တတိယမ္ပိ ဓမ္မုဒ္ဒေသံ ဝိတ္ထာရေတွာ ပကာသေသိ။

ဝိဿဇ္ဇနာ – ‘‘တံ ¶ ကိံ မညသိ မဟာရာဇ၊ ယထာ တွံ ဧတရဟိ ပဉ္စဟိ ကာမဂုဏေဟိ သမပ္ပိတော သမင်္ဂီဘူတော ပရိစာရေသိ၊ လစ္ဆသိ တွံ ပရတ္ထာပိ ဧဝမေဝါဟံ ဣမေဟေဝ ပဉ္စဟိ ကာမဂုဏေဟိ သမပ္ပိတော သမင်္ဂီဘူတော ပရိစာရေမီ’’တိ ဧဝမာဒိနာ ဘန္တေ အာယသ္မာ ရဋ္ဌပါလော ရညော ကောရဗျဿ တတိယံ ဓမ္မုဒ္ဒေသံ ဝိတ္ထာရေတွာ ပကာသေသိ။

ပုစ္ဆာ – စတုတ္ထမ္ပိ ¶ ခေါ အာဝုသော ဓမ္မုဒ္ဒေသံ အာယသ္မာ ရဋ္ဌပါလတ္ထေရော ရညော ကောရဗျဿ ကထံ ဝိတ္ထာရေတွာ ပကာသေသိ။

ဝိဿဇ္ဇနာ – ‘‘တံ ကိံ မညသိ မဟာရာဇ၊ ဖီတံ ကုရုံ အဇ္ဈာဝသသီ’’တိ ဧဝမာဒိနာ ဘန္တေ အာယသ္မာ ရဋ္ဌပါလတ္ထေရော ရညော ကောရဗျဿ စတုတ္ထံ ဓမ္မုဒ္ဒေသံ ဝိတ္ထာရေတွာ ပကာသေသိ။

ပုစ္ဆာ – မဃဒေဝသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – မိထိလာယံ ဘန္တေ မဃဒေဝအမ္ဗဝနေ အာယသ္မန္တံ အာနန္ဒံ အာရဗ္ဘ ဘာသိတံ။ ဘဂဝါ ဘန္တေ အညတရသ္မိံ ပဒေသေ သိတံ ပါတွာကာသိ၊ အာယသ္မာ အာနန္ဒော ဘဂဝန္တံ ဧတဒဝေါစ ‘‘ကော နု ခေါ ဘန္တေ ကော ပစ္စယော ဘဂဝတော သိတဿ ပါတုကမ္မာယ၊ န အကာရဏေန တထာဂတာ သိတံ ပါတုကရောန္တီ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – မဓုရသုတ္တံ ¶ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ဘာသိတံ။

ဝိဿဇ္ဇနာ – မဓုရာယံ ဘန္တေ ရာဇာနံ မာဓုရံ အဝန္တိပုတ္တံ အာရဗ္ဘ အာယသ္မတာ မဟာကစ္စာနတ္ထေရေန ဘာသိတံ၊ ရာဇာ ဘန္တေ မာဓုရော အဝန္တိပုတ္တော အာယသ္မန္တံ မဟာကစ္စာနံ ဧတဒဝေါစ ‘‘ဗြဟ္မဏာ ဘော ကစ္စာန ဧဝမာဟံသု ဗြာဟ္မဏောဝ သေဋ္ဌော ဝဏ္ဏော၊ ဟီနော အညော ဝဏ္ဏော။ ဗြာဟ္မဏောဝ သုက္ကော ဝဏ္ဏော၊ ကဏှော အညော ဝဏ္ဏော။ ဗြာဟ္မဏာဝ သုဇ္ဈန္တိ ¶ ၊ နော အဗြာဟ္မဏာ။ ဗြာဟ္မဏာဝ ဗြဟ္မုနော ပုတ္တာ ဩရသာ မုခတော ဇာတာ ဗြဟ္မဇာ ဗြဟ္မနိမ္မိတာ ဗြဟ္မဒါယာဒါတိ။ ဣဓ ဘဝံ ကစ္စာနော ကိမက္ခာယီ’’တိ။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဗောဓိရာဇကုမာရသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ဘဂ္ဂေသု ဘန္တေ သုသုမာရဂိရေ ဗောဓိံ ရာဇကုမာရံ အာရဗ္ဘ ဘာသိတံ။ ဗောဓိ ဘန္တေ ရာဇကုမာရော ဘဂဝန္တံ ဧတဒဝေါစ ‘‘မယံ ခေါ ဘန္တေ ဧဝံ ဟောတိ။ န ခေါ သုခေန သုခံ အဓိဂန္တဗ္ဗံ၊ ဒုက္ခေန ခေါ သုခံ အဓိဂန္တဗ္ဗ’’န္တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဧဝံ ¶ ဝုတ္တေ ခေါ အာဝုသော ဗောဓိ ရာဇကုမာရော ဘဂဝန္တံ ကထံ ပုစ္ဆိ၊ ကထဉ္စဿ ဘဂဝါ ဗျာကာသိ။

ဝိဿဇ္ဇနာ – ဧဝံ ဝုတ္တေ ဘန္တေ ဗောဓိရာဇကုမာရော ဘဂဝန္တံ ဧတဒဝေါစ ‘‘ကီဝ စိရေန နု ခေါ ဘန္တေ ဘိက္ခု တထာဂတံ ဝိနာယကံ လဘမာနော ယဿတ္ထာယ ကုလပုတ္တာ သမ္မဒေဝ အဂါရသ္မာ အနဂါရိယံ ပဗ္ဗဇန္တိ၊ တဒနုတ္တရံ ဗြဟ္မစရိယပရိယောသာနံ ဒိဋ္ဌေဝ ဓမ္မေ သယံ အဘိညာ သစ္ဆိကတွာ ဥပသမ္ပဇ္ဇ ဝိဟရေယျာ’’တိ၊ ဘဂဝါ စ ဘန္တေ ‘‘တေန ဟိ ရာဇကုမာရ တံယေဝေတ္ထ ပဋိပုစ္ဆိဿာမိ၊ ယထာ တေ ခမေယျ၊ တထာ နံ ဗျာကရေယျာသီ’’တိ၊ ဧဝမာဒိနာ ဝိဘဇိတွာ ဗျာကာသိ။

ပုစ္ဆာ – ဣမဉ္စ ¶ ပနာဝုသော ဓမ္မဒေသနံ သုတွာ ဗောဓိရာဇကုမာရော ဣမိဿံ ဓမ္မဒေသနာယံ ပသန္နော ကီဒိသံ ပသန္နာကာရမကာသိ။

ဝိဿဇ္ဇနာ – ဣမဉ္စ ပန ဘန္တေ ဓမ္မဒေသနံ သုတွာ ဗောဓိရာဇကုမာရော ‘‘အဟော ဗုဒ္ဓါ အဟော ဓမ္မော အဟော ဓမ္မဿ သွာက္ခာတတာ၊ ယတြ ဟိ နာမ သာယမနုသိဋ္ဌော၊ ပါတော ဝိသေသံ အဓိဂမိဿတိ၊ ပါတမနုသိဋ္ဌော သာယံ ဝိသေသံ အဓိဂမိဿတီ’’တိ ဧဝမာဒိနာ ဣမိဿံ ဓမ္မဒေသနာယံ ပသန္နော ပသန္နာကာရမကာသိ။

ပုစ္ဆာ – အင်္ဂုလိမာလသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ အင်္ဂုလိမာလတ္ထေရံ အာရဗ္ဘ ဘာသိတံ။ အာယသ္မာ ဘန္တေ အင်္ဂုလိမာလတ္ထေရော ဘဂဝန္တံ ဧတဒဝေါစ ‘‘ဣဓာဟံ ဘန္တေ ပုဗ္ဗဏှသမယံ နိဝါသေတွာ ပတ္တစီဝရမာဒါယ သာဝတ္ထိံ ပိဏ္ဍာယ ပါဝိသိံ၊ အဒ္ဒသံ ခေါ အဟံ ဘန္တေ သာဝတ္ထိယံ သပဒါနံ ပိဏ္ဍာယ စရမာနော အညတရံ ဣတ္ထိံ မူဠှဂဗ္ဘံ ဝိဃာတဂဗ္ဘံ ဒိသွာန မယှံ ဧတဒဟောသိ ‘‘ကိလိဿန္တိ ဝတ ဘော သတ္တာ၊ ကိလိဿန္တိ ဝတ ဘော သတ္တာ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ပိယဇာတိကသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ အညတရံ ဂဟပတိံ အာရဗ္ဘ ဘာသိတံ၊ သာဝတ္ထိယံ ဘန္တေ အညတရဿ ဂဟပတိဿ ဧကပုတ္တကော ပိယော မနာပေါ ကာလင်္ကတော ဟောတိ၊ တဿ ကာလံ ကိရိယာယ နေဝ ကမ္မန္တာ ပဋိဘန္တိ၊ န ဘတ္တံ ပဋိဘာတိ၊ သော အာဠာဟနံ ဂန္တွာ ကန္ဒတိ ‘‘ကဟံ ဧကပုတ္တက ကဟံ ဧကပုတ္တကာ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဗာဟိတိက ¶ သုတ္တံ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ဘာသိတံ။

ဝိဿဇ္ဇနာ – သာဝတ္ထိယံ ဘန္တေ ရာဇာနံ ပသေနဒိံ ကောသလံ အာရဗ္ဘ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန ဘာသိတံ။ ရာဇာ ဘန္တေ ပသေနဒိ ကောသလော အာယသ္မန္တံ အာနန္ဒံ ဧတဒဝေါစ ‘‘ကိံ နု ခေါ ဘန္တေ အာနန္ဒ သောဘဂဝါ တထာရူပံ ကာယသမာစာရံ သမာစရေယျ၊ ယွဿ ကာယသမာစာရော ဩပါရမ္ဘော သမဏေဟိ ဗြာဟ္မဏေဟီ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဓမ္မစေတိယသုတ္တံ ¶ ပနာဝုသော ဘဂဝတာ ကတ္ထ ကေန သဒ္ဓိံ ဘာသိတံ။

ဝိဿဇ္ဇနာ – သက္ကေသု ဘန္တေ မေဒါဠုပေ နာမ သကျာနံ နိဂမေ ရညာ ပသေနဒိနာ ကောသလေန သဒ္ဓိံ ဘာသိတံ။

ပုစ္ဆာ – ကဏ္ဏကတ္ထလသုတ္တံ ¶ ပနာဝုသော ဘဂဝတာ ကတ္ထ ကေန သဒ္ဓိံ ဘာသိတံ။

ဝိဿဇ္ဇနာ – ဥရုညာယံ ဘန္တေ ကဏ္ဏကတ္ထလေ မိဂဒါယေ ရညာ ပသေနဒိနာ ကောသလေန သဒ္ဓိံ ဘာသိတံ။

ပုစ္ဆာ – တေနာဝုသော ဘဂဝတာ…ပေ… သမ္မာသမ္ဗုဒ္ဓေန ဗြဟ္မာယုသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ဝိဒေဟေသု ¶ ဘန္တေ မိထိလာယံ မဃဒေဝအမ္ဗဝနေ ဗြဟ္မာယုံ ဗြာဟ္မဏံ အာရဗ္ဘ ဘာသိတံ။ ဗြဟ္မာယု ဘန္တေ ဗြာဟ္မဏော ဘဂဝန္တံ ဥပသင်္ကမိတွာ အဋ္ဌပဉှာနိ ပုစ္ဆိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – တတ္ထ ¶ အာဝုသော ဥတ္တရော မာဏဝေါ ကထံ ဘဂဝတော ဒွတ္တိံသမဟာပုရိသလက္ခဏေဟိ သမန္နာဂတတံ အတ္တနော အာစရိယဿ ဗြဟ္မာယုဿ ဗြာဟ္မဏဿ သမ္ပဋိဝေဒေသိ။

ဝိဿဇ္ဇနာ – တတ္ထ ဘန္တေ ဥတ္တရော မာဏဝေါ ‘‘သုပ္ပတိဋ္ဌိတပါဒေါ ခေါ ပန သော ဘဝံ ဂေါတမော၊ ဣဒမ္ပိ တဿ ဘောတော ဂေါတမဿ မဟာပုရိသဿ မဟာပုရိသလက္ခဏံ ဘဝတီ’’တိ ဧဝမာဒိနာ ဘဂဝတော ဒွတ္တိံသမဟာပုရိသလက္ခဏေဟိ သမန္နာဂတတံ အတ္တနော အာစရိယဿ ဗြဟ္မာယုဿ ဗြာဟ္မဏဿ သမ္ပဋိဝေဒေသိ။

ပုစ္ဆာ – အပရမ္ပိ ¶ အာဝုသော ဥတ္တရော မာဏဝေါ ဘဂဝတော ဂမနကာလေ ကီဒိသံ ပါသာဒိကံ အာကာရံ ဒိသွာ စ သလ္လက္ခေတွာ စ အတ္တနော အာစရိယဿ ဗြဟ္မာယုဿ ဗြာဟ္မဏဿ သမ္ပဋိဝေဒေသိ။

ဝိဿဇ္ဇနာ – အပရမ္ပိ ဘန္တေ ဥတ္တရော မာဏဝေါ ဘဂဝတော ဂမနကာလေ ပဌမံ ဒက္ခိဏံ ပါဒုဒ္ဓရဏာဒိကံ အာကာရံ ဒိသွာ စ သလ္လက္ခေတွာ စ အတ္တနော အာစရိယဿ ဗြဟ္မာယုဿ ဗြာဟ္မဏဿ သမ္ပဋိဝေဒေသိ။

ပုစ္ဆာ – အပရမ္ပိ ¶ အာဝုသော ဥတ္တရော မာဏဝေါ ဘဂဝတော အန္တရဃရံ ပဝိသနကာလေ ကီဒိသံ ပါသာဒိကံ အာကာရံ ဒိသွာ စ သလ္လက္ခေတွာ စ အတ္တနော အာစရိယဿ ဗြဟ္မာယုဿ ဗြာဟ္မဏဿ သမ္ပဋိဝေဒေသိ။

ဝိဿဇ္ဇနာ – အပရမ္ပိ ဘန္တေ ဥတ္တရော မာဏဝေါ ဘဂဝတော အန္တရဃရံ ပဝိသနကာလေ န ကာယဿ ဥန္နမနာဒိကံ ပါသာဒိကံ ဒိသွာ စ သလ္လက္ခေတွာ စ အတ္တနော အာစရိယဿ ဗြဟ္မာယုဿ ဗြာဟ္မဏဿ သမ္ပဋိဝေဒေသိ။

ပုစ္ဆာ – အပရမ္ပိ ¶ အာဝုသော ဥတ္တရော မာဏဝေါ ဘဂဝတော ဘောဇနကာလေ ကီဒိသံ ပါသာဒိကံ အာကာရံ ဒိသွာ စ သလ္လက္ခေတွာ စ အတ္တနော အာစရိယဿ ဗြဟ္မာယုဿ ဗြာဟ္မဏဿ သမ္ပဋိဝေဒေသိ။

ဝိဿဇ္ဇနာ – အပရမ္ပိ ဘန္တေ ဥတ္တရော မာဏဝေါ ဘဂဝတော ဘောဇနကာလေ ပတ္တောဒကာဒိကံ ပဋိဂ္ဂဟဏာဒိကာလေ န ပတ္တဿ ဥန္နမနာဒိကံ ဘဂဝတော ပါသာဒိကံ အာကာရံ ဒိသွာ စ သလ္လက္ခေတွာ စ အတ္တနော အာစရိယဿ ဗြဟ္မာယုဿ ဗြာဟ္မဏဿ သမ္ပဋိဝေဒေသိ။

ပုစ္ဆာ – အပရမ္ပိ ¶ အာဝုသော ဥတ္တရော မာဏဝေါ ဘဂဝတော ဘုတ္တာဝိကာလေ ကီဒိသံ ပါသာဒိကံ အာကာရံ ဒိသွာ စ သလ္လက္ခေတွာ စ အတ္တနော အာစရိယဿ ဗြဟ္မာယုဿ ဗြာဟ္မဏဿ သမ္ပဋိဝေဒေသိ။

ဝိဿဇ္ဇနာ – အပရမ္ပိ ဘန္တေ ဥတ္တရော မာဏဝေါ ဘဂဝတော ဘုတ္တာဝိကာလေ ပတ္တောဒနာဒိကံ ပဋိဂ္ဂဏှာဒိကာလေ န ပတ္တဿ ဥန္နမနာဒိကံ ပါသာဒိကံ အာကာရံ ဒိသွာ စ သလ္လက္ခေတွာ စ အတ္တနော အာစရိယဿ ဗြဟ္မာယုဿ ဗြာဟ္မဏဿ သမ္ပဋိဝေဒေသိ။

ပုစ္ဆာ – အပရမ္ပိ ¶ အာဝုသော ဥတ္တရော မာဏဝေါ ဘဂဝတော စီဝရဓာရဏေ စ အာရာမဂတကာလေ စ ဓမ္မဒေသနာကာလေ စ သဗ္ဗဣရိယာပထေသု စ ကီဒိသံ ပါသာဒိကံ အာကာရံ ဒိသွာ စ သလ္လက္ခေတွာ စ အတ္တနော အာစရိယဿ ဗြဟ္မာယုဿ ဗြာဟ္မဏဿ သမ္ပဋိဝေဒေသိ။

ဝိဿဇ္ဇနာ – အပရမ္ပိ ¶ ဘန္တေ ဥတ္တရော မာဏဝေါ ဘဂဝတော စီဝရဓာရဏကာလေ စ အာရာမဂတကာလေ စ သဗ္ဗေသု စ ဣရိယာပထေသု န အစ္စုက္ကဋ္ဌာဒိကံ ပါသာဒိကံ အာကာရံ ဒိသွာ စ သလ္လက္ခေတွာ စ အတ္တနော အာစရိယဿ ဗြဟ္မာယုဿ ဗြာဟ္မဏဿ သမ္ပဋိဝေဒေသိ။

ပုစ္ဆာ – ကထဉ္စာဝုသော ¶ ဗြဟ္မာယု ဗြဟ္မဏော ဘဂဝန္တံ ပုစ္ဆိ၊ ကထဉ္စဿ ဘဂဝါ ဗျာကာသိ။

ဝိဿဇ္ဇနာ – ‘‘ကထံ ခေါ ဗြာဟ္မဏော ဟောတိ၊ ကထံ ဘဝတိ ဝေဒဂူ။ တေဝိဇ္ဇော ဘော ကထံ ဟောတိ၊ သောတ္တိယော ကိန္တိ ဝုစ္စတိ။ အရဟံ ဘော ကထံ ဟောတိ၊ ကထံ ဘဝတိ ကေဝလီ။ မုနိ စ ဘော ကထံ ဟောတိ၊ ဗုဒ္ဓါ ကိန္တိ ပဝုစ္စတီ’’တိ – ဧဝံ ခေါ ဘန္တေ ဗြဟ္မာယု ဗြာဟ္မဏော ဘဂဝန္တံ ပဉှံ အပုစ္ဆိ။ ဘဂဝါ ဘန္တေ–

‘‘ပုဗ္ဗေနိဝါသံ ယော ဝေဒိ၊ သဂ္ဂါပါယဉ္စ ပဿတိ၊

အထော ဇာတိက္ခယံ ပတ္တော၊ အဘိညာဝေါသိတော မုနိ၊

စိတ္တံ ဝိသုဒ္ဓံ ဇာနာတိ၊ မုတ္တံ ရာဂေဟိ သဗ္ဗသော၊

ပဟီနဇာတိမရဏော၊ ဗြဟ္မစရိယဿ ကေဝလီ၊

ပါရဂူ သဗ္ဗဓမ္မာနံ၊ ဗုဒ္ဓါ တာဒီ ပဝုစ္စတီ’’တိ –

ဧဝံ ခေါ ဘန္တေ ဘဂဝါ ဗြဟ္မာယုဿ ဗြာဟ္မဏဿ ဝိဘဇိတွာ ဗျာကာသိ။

ပုစ္ဆာ – ဣမဉ္စ ¶ ပနာဝုသော ဘဂဝတော ဗျာကရဏံ သုတွာ ဗြဟ္မာယု ဗြာဟ္မဏော ဘဂဝတိ ကီဒိသံ နိပစ္စကာရံ အကာသိ၊ ကထဉ္စဿ ဘဂဝါ ပုနပိ အနုပုဗ္ဗိံ ဓမ္မကထံ ကထေသိ။

ဝိဿဇ္ဇနာ – ဣမဉ္စ ¶ ပန ဘန္တေ ဘဂဝတော ဗျာကရဏံ သုတွာ ဗြဟ္မာယု ဗြာဟ္မဏော ဥဋ္ဌာယာသနာ ဧကံသံ ဥတ္တရာသင်္ဂံ ကရိတွာ ဘဂဝတော ပါဒေသု သိရသာ နိပတိတွာ ဘဂဝတော ပါဒါနိ မုခေန စ ပရိစုမ္ဗတိ၊ ပါဏီဟိ စ ပရိသမ္ဗာဟတိ၊ နာမဉ္စ သာဝေတိ ‘‘ဗြဟ္မာယု အဟံ ဘော ဂေါတမ ဗြာဟ္မဏော၊ ဗြဟ္မာယု အဟံ ဘော ဂေါတမ ဗြာဟ္မဏော’’တိ၊ ဧဝံ ပရမနိပစ္စကာရံ အကာသိ၊ ဘဂဝါ စ ဘန္တေ ဒါနကထံ သီလကထံ သဂ္ဂကထံ ကာမာနံ အာဒီနဝံ ဩကာရံ သံကိလေသံ နေက္ခမ္မေ အာနိသံသံ ပကာသေသိ၊ ဧဝံ ခေါ ဘန္တေ ဗြဟ္မာယုဿ ဗြာဟ္မဏဿ ဘဂဝါ အနုပုဗ္ဗိံ ကထံ ကထေသိ။

ပုစ္ဆာ – ဣမဉ္စ ¶ ပနာဝုသော ဒမ္မဒေသနံ သုတွာ ဗြဟ္မာယုဿ ဗြာဟ္မဏဿ ကီဒိသော ဓမ္မာဘိသမယော အဟောသိ။

ဝိဿဇ္ဇနာ – ဣမဉ္စ ¶ ပန ဘန္တေ ဓမ္မဒေသနံ သုတွာ ဗြဟ္မာယုဿ ဗြာဟ္မဏဿ တသ္မိံယေဝ အာသနေ ဝိရဇံ ဝီတမလံ ဓမ္မစက္ခုံ ဥဒပါဒိ ‘‘ယံကိဉ္စိ သမုဒယဓမ္မံ သဗ္ဗံ တံ နိရောဓဓမ္မ’’န္တိ။

ပုစ္ဆာ – သေလသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – အင်္ဂုတ္တရာပေသု ဘန္တေ အာပဏေ နာမ အင်္ဂုတ္တရာပါနံ နိဂမေသေလံ ဗြာဟ္မဏံ အာရဗ္ဘ ဘာသိတံ။ သေလော ဘန္တေ ဗြာဟ္မဏော သပရိသော ဘဂဝန္တံ ဥပသင်္ကမိတွာ ဘဂဝန္တံ သမ္မုခါ သာရုပ္ပာဟိ ဂါထာဟိ အဘိတ္ထဝိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပရိပုဏ္ဏကာယော ¶ သုရုစိ၊ သုဇာတော စာရုဒဿနော၊

သုဝဏ္ဏဝဏ္ဏောသိ ဘဂဝါ၊ သုသုက္ကဒါဌောသိ ဝီရိယဝါ၊

နရဿ ဟိ သုဇာတဿ၊ ယေ ဘဝန္တိ ဝိယဉ္စနာ၊

သဗ္ဗေ တေ တဝ ကာယသ္မိံ၊ မဟာပုရိသလက္ခဏာ။

ပုစ္ဆာ – အဿလာယနသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ အဿလာယနံ မာဏဝံ အာရဗ္ဘ ဘာသိတံ၊ အဿလာယနော ဘန္တေ မာဏဝေါ မဟတာ ဗြာဟ္မဏဂဏေန သဒ္ဓိံ ဘဂဝန္တံ ဥပသင်္ကမိတွာ ဧတဒဝေါစ ‘‘ဗြာဟ္မဏာ ဘော ဂေါတမ ဧဝမာဟံသု ‘ဗြာဟ္မဏောဝ သေဋ္ဌော ဝဏ္ဏော၊ ဟီနော အညော ဝဏ္ဏော။ ဗြာဟ္မဏောဝ သုက္ကော ဝဏ္ဏော၊ ကဏှော ¶ အညော ဝဏ္ဏော။ ဗြာဟ္မဏာဝ သုဇ္ဈန္တိ၊ နော အဗြာဟ္မဏာ။ ဗြာဟ္မဏာဝ ဗြဟ္မုနော ပုတ္တာ ဩရသာ မုခတော ဇာတာ ဗြဟ္မဇာ ဗြဟ္မနိမ္မိတာ ဗြဟ္မဒါယာဒါ’တိ၊ ဣဓ ဘဝံ ဂေါတမော ကိမာဟာ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဃောဋမုခသုတ္တံ ¶ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ဘာသိတံ။

ဝိဿဇ္ဇနာ – ဗာရာဏသိယံ ဘန္တေ ခေမိယမ္ဗဝနေ ဃောဋမုခံ ဗြာဟ္မဏံ အာရဗ္ဘ အာယသ္မတာ ဥဒေနေန ဘာသိတံ။ ဃောဋမုခေါ ဘန္တေ ဗြာဟ္မဏော အာယသ္မန္တံ ဥဒေနံ စင်္ကမန္တံ အနုစင်္ကမမာနော ဧဝမာဟ ‘‘အမ္ဘော သမဏ နတ္ထိ ဓမ္မိကော ပရိဗ္ဗဇော၊ ဧဝံ မေ ဧတ္ထ ဟောတိ၊ တဉ္စ ခေါ ဘဝန္တရူပါနံ ဝါ အဒဿနာ၊ ယော ဝါ ပနေတ္ထ ဓမ္မာ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – တေနာဝုသော ¶ ဘဂဝတာ…ပေ… သမ္မာသမ္ဗုဒ္ဓေန စင်္ကီသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ကောသလေသု ဘန္တေ ဩပါသာဒေ နာမ ကောသလာနံ နိဂမေ ကာပဋိကံ မာဏဝံ အာရဗ္ဘ ဘာသိတံ၊ ကာပဋိကော ဘန္တေ မာဏဝေါ ဘဂဝန္တံ ဧတဒဝေါစ ‘‘ယဒိဒံ ဘော ဂေါတမ ဗြာဟ္မဏာနံ ပေါရာဏံ မန္တပဒံ ဣတိဟိတိဟပရမ္ပရာယ ပိဋကသမ္ပဒါယ၊ တတ္ထ စ ဗြာဟ္မဏာ ဧကံသေန နိဋ္ဌံ ဂစ္ဆန္တိ ‘ဣဒမေဝ သစ္စံ မောဃမည’န္တိ၊ ဣဓ ဘဝံ ဂေါတမော ကိမာဟာ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဧသုကာရီသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ ဧသုကာရိံ ဗြာဟ္မဏံ အာရဗ္ဘ ဘာသိတံ၊ ဧသုကာရီ ဘန္တေ ဗြာဟ္မဏော ဘဂဝန္တံ ဥပသင်္ကမိတွာ ဧတဒဝေါစ ‘‘ဗြာဟ္မဏာ ဘော ဂေါတမ စတဿော ပါရိစရိယာ ပညပေန္တိ၊ ဗြာဟ္မဏဿ ပါရိစရိယံ ပညပေန္တိ၊ ခတ္တိယဿ ပါရိစရိယံ ပညပေန္တိ၊ ဝေဿဿ ပါရိစရိယံ ပညပေန္တိ၊ သုဒ္ဒဿ ပါရိစရိယံ ပညပေန္တီ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဓနဉ္ဇာနိသုတ္တံ ¶ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ဘာသိတံ။

ဝိဿဇ္ဇနာ – ရာဇဂဟေ ဘန္တေ ဓနဉ္ဇာနိံ ဗြာဟ္မဏံ အာရဗ္ဘ အာယသ္မတာ သာရိပုတ္တတ္ထေရေန ဓမ္မသေနာပတိနာ ဘာသိတံ၊ ဓနဉ္ဇာနိ ဘန္တေ ဗြာဟ္မဏော ပမာဒဝိဟာရံ ဝိဟာသိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – အထ ¶ ခေါ အာဝုသော အာယသ္မာ သာရိပုတ္တတ္ထေရော ဓမ္မသေနာပတိ ကထံ ဓနဉ္ဇာနိံ ဗြာဟ္မဏံ ပုစ္ဆိ၊ ကထဉ္စ သော အာယသ္မတော သာရိပုတ္တတ္ထေရဿ ဓမ္မသေနာပတိဿ အာရောစေသိ။

ဝိဿဇ္ဇနာ – ‘‘ကစ္စာသိ ဓနဉ္ဇာနိ အပ္ပမတ္တော’’တိ၊ ဧဝံ ခေါ ဘန္တေ အာယသ္မာ သာရိပုတ္တတ္ထေရော ဓမ္မသေနာပတိ ဓနဉ္ဇာနိံ ဗြာဟ္မဏံ ပုစ္ဆိ၊ ဓနဉ္ဇာနိ စ ဘန္တေ ဗြာဟ္မဏော ‘‘ကုတော ဘော သာရိပုတ္တ အမှာကံ အပ္ပမာဒေါ၊ ယေသံ နော မာတာပိတရော ပေါသေတဗ္ဗာ’’တိ၊ ဧဝမာဒိနာ အာယသ္မတော သာရိပုတ္တဿ ဓမ္မသေနာပတိဿ အာရောစေသိ။

ပုစ္ဆာ – ဧဝံ ¶ ဝုတ္တေ ခေါ အာဝုသော အာယသ္မာ သာရိပုတ္တတ္ထေရော ဓမ္မသေနာပတိ ဓနဉ္ဇာနိဿ ဗြာဟ္မဏဿ ကီဒိသံ ဓမ္မကထံ ကထေသိ။

ဝိဿဇ္ဇနာ – ဧဝံ ဝုတ္တေ ဘန္တေ အာယသ္မာ သာရိပုတ္တတ္ထေရော ဓမ္မသေနာပတိ ‘‘တံ ကိံ မညသိ ဓနဉ္ဇာနိ၊ ဣဓေကစ္စော မာတာပိတူနံ ဟေတု အဓမ္မစာရီ ဝိသမစာရီ အဿ၊ တမေနံ အဓမ္မစရိယာ ဝိသမစရိယာဟေတု နိရယံ နိရယပါလာ ဥပကဍ္ဎေယျု’’န္တိ၊ ဧဝမာဒိနာ ဓနဉ္ဇာနိဿ ဗြာဟ္မဏဿ ဓမ္မကထံ ကထေသိ။

ပုစ္ဆာ – ပုန ¶ ပိ အာဝုသော အာယသ္မာ သာရိပုတ္တတ္ထေရော ဓမ္မသေနာပတိ ကထံ ဓနဉ္ဇာနိဿ ဗြာဟ္မဏဿ အပရေနပိ ပရိယာယေန အနုသာသနိံ အဒါသိ။

ဝိဿဇ္ဇနာ – ပုနပိ ဘန္တေ အာယသ္မာ သာရိပုတ္တတ္ထေရော ဓမ္မသေနာပတိ ‘‘တံ ကိံ မညသိ ဓနဉ္ဇာနိ၊ ယော ဝါ မာတာပိတူနံ ဟေတု အဓမ္မစာရီ ဝိသမစာရီ အဿ၊ ယော ဝါ မာတာပိတူနံ ဟေတု ဓမ္မစာရီ သမစာရီ အဿ၊ ကတမံ သေယျော’’တိ၊ ဧဝမာဒိနာ ဓနဉ္ဇာနိဿ ဗြာဟ္မဏဿ အပရေနပိ ပရိယာယေန ဩဝါဒမဒါသိ။

ပုစ္ဆာ – အပရဘာဂေ ¶ ပိ အာဝုသော အာယသ္မာ သာရိပုတ္တတ္ထေရော ဓမ္မသေနာပတိ ကထံ ဓနဉ္ဇာနိဿ ဗြာဟ္မဏဿ မရဏသမယေ ဓမ္မကထံ ကထေသိ၊ ကထဉ္စဿ အဘိသမ္ပရာယော အဟောသိ။

ဝိဿဇ္ဇနာ – အပရဘာဂေ ¶ ပိ ဘန္တေ အာယသ္မာ သာရိပုတ္တတ္ထေရော ဓမ္မသေနာပတိ ဓနဉ္ဇာနိဿ ဗြာဟ္မဏဿ မရဏသမယေပိ စတ္တာရော ဗြဟ္မဝိဟာရေ ဒေသေသိ၊ ဓနဉ္ဇာနိ စ ဘန္တေ ဗြာဟ္မဏော ကာယဿ ဘေဒါ ပရံ မရဏာ ဗြဟ္မလောကူပဂေါ အဟောသိ။

ပုစ္ဆာ – ဝါသေဋ္ဌသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ဣစ္ဆာနင်္ဂလေ ဘန္တေ ဝါသေဋ္ဌံ မာဏဝံ အာရဗ္ဘ ဘာသိတံ။ ဝါသေဋ္ဌော ဘန္တေ မာဏဝေါ ဘဂဝန္တံ ဂါထာဟိ အဇ္ဈဘာသိ –

‘‘အနုညာတပဋိညာတာ၊ တေဝိဇ္ဇာ မယမသ္မုဘော၊

အဟံ ပေါက္ခရသာတိဿ၊ တာရုက္ခဿာယံ မာဏဝေါ။

တေဝိဇ္ဇာနံ ယဒက္ခာတံ၊ တတြ ကေဝလိနေသ္မသေ၊

ပဒကသ္မာ ဝေယျာကရဏာ၊ ဇပ္ပေ အာစရိယသာဒိသာ၊

တေသံ နော ဇာတိဝါဒသ္မိံ၊ ဝိဝါဒေါ အတ္ထိ ဂေါတမ။

ဇာတိယာ ဗြာဟ္မဏော ဟောတိ၊ ဘာရဒွါဇော ဣတိ ဘာသတိ၊

အဟဉ္စ ကမ္မုနာ ဗြူမိ၊ ဧဝံ ဇာနာဟိ စက္ခုမ။

တေန သက္ကောမ ဉာပေတုံ၊ အညံမညံ မယံ ဥဘော၊

ဘဝန္တံ ပုဋ္ဌုမာဂမာ၊ သမ္ဗုဒ္ဓံ ဣတိ ဝိဿုတံ။

စန္ဒံ ယထာ ခယာတီတံ၊ ပေစ္စ ပဉ္ဇလိကာ ဇနာ၊

ဝန္ဒနာ နမဿန္တိ၊ ဧဝံ လောကသ္မိံ ဂေါတမံ။

စက္ခုံ ¶ လောကေ သမုပ္ပန္နံ၊ မယံ ပုစ္ဆာမ ဂေါတမံ၊

ဇာတိယာ ဗြာဟ္မဏော ဟောတိ၊ ဥဒါဟု ဘဝတိ ကမ္မုနာ၊

အဇာနတံ နော ပဗြူဟိ၊ ယထာ ဇာနေမု ဗြာဟ္မဏန္တိ။

တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – သုဘသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သုဘံ မာဏဝံ တောဒေယျပုတ္တံ အာရဗ္ဘ ဘာသိတံ။ သုဘော ဘန္တေ မာဏဝေါ တောဒေယျပုတ္တော ဘဂဝန္တံ ဥပသင်္ကမိတွာ ဧတဒဝေါစ ‘‘ဗြာဟ္မဏာ ဘော ဂေါတမ ဧဝမာဟံသု’ ဂဟဋ္ဌော အာရာဓကော ဟောတိ ဉာယံ ဓမ္မံ ကုသလံ၊ န ပဗ္ဗဇိတော အာရာဓကော ဟောတိ ဉာယံ ဓမ္မံ ကုသလန္တိ၊ ဣဓ ဘဝံ ဂေါတမော ကိမာဟာ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ပုန ¶ ပိ အာဝုသော သုဘော မာဏဝေါ တောဒေယျပုတ္တော ကထံ ဘဂဝန္တံ ပုစ္ဆိ၊ ကထဉ္စ ဘဂဝါ ဝိဘဇ္ဇ ဗျာကာသိ။

ဝိဿဇ္ဇနာ – ‘‘ဗြာဟ္မဏာ ဘော ဂေါတမ ဧဝမာဟံသု ‘မဟဋ္ဌမိဒံ မဟာကိစ္စံ မဟာဓိကရဏံ မဟာသမာရမ္ဘံ၊ ဃရာဝါသကမ္မဋ္ဌာနံ မဟပ္ဖလံ ဟောတိ။ အပ္ပဋ္ဌမိဒံ အပ္ပကိစ္စံ အပ္ပာဓိကရဏံ အပ္ပသမာရမ္ဘံ၊ ပဗ္ဗဇ္ဇာ ကမ္မဋ္ဌာနံ အပ္ပဖလံ ဟောတီ’တိ။ ဣဓ ဘဝံ ဂေါတမော ကိမာဟာ’’တိ။ ဧဝံ ခေါ ဘန္တေ သုဘော မာဏဝေါ တောဒေယျပုတ္တော ပုနပိ ဘဂဝန္တံ ပုစ္ဆိ။ ဘဂဝါ စ ဘန္တေ ‘‘ဧတ္ထာပိ ခေါ အဟံ မာဏဝ ဝိဘဇ္ဇဝါဒါ၊ နာဟမေတ္ထ ဧကံသဝါဒေါတိ’’ ဧဝမာဒိနာ ဝိဘဇ္ဇ ဗျာကာသိ။

ပုစ္ဆာ – သင်္ဂါရဝသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ကောသလေသု ဘန္တေ စဉ္စလိကပ္ပေ နာမ ဂါမေ သင်္ဂါရဝံ မာဏဝံ အာရဗ္ဘ ဘာသိတံ၊ သင်္ဂါရဝေါ ဘန္တေ မာဏဝေါ ဘဂဝန္တံ ဧတဒဝေါစ ‘‘သန္တိ ခေါ ဘော ဂေါတမ ဧကေ သမဏဗြာဟ္မဏာ ဒိဋ္ဌဓမ္မာဘိညာဝေါသာနပါရမိပ္ပတ္တာ အာဒိဗြဟ္မစရိယံ ပဋိဇာနန္တိ။ တတြ ဘော ဂေါတမ ယေ တေ သမဏဗြာဟ္မဏာ ဒိဋ္ဌဓမ္မာဘိညာဝေါသာနပါရမိပ္ပတ္တာ အာဒိဗြဟ္မစရိယံ ပဋိဇာနန္တိ၊ တေသံ ဘဝံ ဂေါတမော ကတမော’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – တေနာဝုသော ¶ ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဒေဝဒဟသုတ္တံ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သက္ကေသု ဘန္တေ ဒေဝဒဟေ နာမ သကျာနံ နိဂမေ သမ္မ ဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – ပဉ္စတ္တယသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – ကိန္တိသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – ပိသိနာရာယံ ဘန္တေ ဗလိဟရဏေ နာမ ဝနသဏ္ဍေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – တတ္ထ ¶ အာဝုသော ဘဂဝါ ကထံ ပဌမံ ဘိက္ခူ ပဋိပုစ္ဆိတွာ ဩဝါဒမဒါသိ၊ ယော ဗဟုဇနဿ အတ္ထာယ ဟိတာယ သုခါယ သံဝတ္တတိ။

ဝိဿဇ္ဇနာ – တတ္ထ ဘန္တေ ဘဂဝါ ‘‘ကိန္တိ ဝေါ ဘိက္ခဝေ မယိ ဟောတိ၊ စီဝရဟေတု ဝါ သမဏော ဂေါတမော ဓမ္မံ ဒေသေတိ၊ ပိဏ္ဍပါတဟေတု ဝါ၊ သေနာသနဟေတု ဝါ၊ ဣတိဘဝါဘဝဟေတု ဝါ သမဏော ဂေါတမော ဓမ္မံ ဒေသေတီ’’တိ ဘိက္ခူ ပုစ္ဆိတွာ ‘‘တသ္မာတိဟ ဘိက္ခဝေ ယေ ဝေါ မယာ ဓမ္မာ အဘိညာ ဒေသိတာ။ သေယျထိဒံ၊ စတ္တာရော သတိပဋ္ဌာနာ စတ္တာရော သမ္မပ္ပဓာနာ စတ္တာရော ဣဒ္ဓိပါဒါ ပဉ္စိန္ဒြိယာနိ ပဉ္စ ဗလာနိ သတ္တ ဗောဇ္ဈင်္ဂါ အရိယော အဋ္ဌင်္ဂိကော မဂ္ဂေါ။ တတ္ထ သဗ္ဗေဟေဝ သမဂ္ဂေဟိ သမ္မောဒမာနေဟိ အဝိဝဒမာနေဟိ သိက္ခိတဗ္ဗံ’’ ဧဝမာဒိနာ ဘန္တေ ဘိက္ခူနံ ဩဝါဒမဒါသိ။

ပုစ္ဆာ – ကထဉ္စာဝုသော ¶ ဘဂဝါ တတ္ထ ဒုတိယမ္ပိ ဘိက္ခူနံ ဩဝါဒံ အဒါသိ။ ယော ဗဟုဇနဿ အတ္ထာယ ဟိတာယ သုခါယ သံဝတ္တတိ။

ဝိဿဇ္ဇနာ – တတ္ထ ဘန္တေ ဘဂဝါ ‘‘တေသဉ္စ ဝေါ ဘိက္ခဝေ သမဂ္ဂါနံ သမ္မောဒမာနာနံ အဝိဝဒမာနာနံ သိက္ခတံ သိယာ အညတရဿ ဘိက္ခုနော အာပတ္တိ၊ သိယာ ဝီတိက္ကမော။ တတြ ဘိက္ခဝေ န စောဒနာယ တရိတဗ္ဗံ ပုဂ္ဂလော ဥပပရိက္ခိတဗ္ဗော’’တိ ဧဝမာဒိနာ ဘိက္ခူနံ ဒုတိယမ္ပိ ဩဝါဒမဒါသိ။

ပုစ္ဆာ – ကထဉ္စာဝုသော ¶ ဘဂဝါ တတ္ထ တတိယမ္ပိ ဘိက္ခူနံ ဩဝါဒံ အဒါသိ၊ ယော ဗဟုဇနဿ အတ္ထာယ ဟိတာယ သုခါယ သံဝတ္တတိ။

ဝိဿဇ္ဇနာ – ‘‘တေသဉ္စ ဝေါ ဘိက္ခဝေ သမဂ္ဂါနံ သမ္မောဒမာနာနံ အဝိဝဒမာနာနံ သိက္ခတံ အညမညဿ ဝစီသံဟာရော ဥပ္ပဇ္ဇေယျ ဒိဋ္ဌိပဠာသော စေတသော အာဃာတော အပ္ပစ္စယော အနဘိရဒ္ဓီ’’တိ ဧဝမာဒိနာ ဘန္တေ ဘဂဝါ တတ္ထ တတိယမ္ပိ ဘိက္ခူနံ ဩဝါဒမဒါသိ။

ပုစ္ဆာ – တေနာဝုသော ¶ ဘိက္ခုနာ ဧဝံ သတ္ထု ဩဝါဒါနုသာသနိကာရိနာ အာယသ္မာ နု တေ ဘိက္ခု အကုသလာ ဝုဋ္ဌာပေတွာ ကုသလေ ပတိဋ္ဌာပေတီတိ ပရေဟိ ပုဋ္ဌေန ကထံ သမ္မာ ဗျာကရမာနေန ဗျာကာတဗ္ဗံ။

ဝိဿဇ္ဇနာ – ‘‘ဣဓာဟံ အာဝုသော ယေန ဘဂဝါ တေနုပသင်္ကမိံ၊ တဿ မေ ဘဂဝါ ဓမ္မံ ဒေသေသိ၊ တာဟံ ဓမ္မံ သုတွာ တေသံ ဘိက္ခူနံ အဘာသိံ၊ တံ တေ ဘိက္ခူ ဓမ္မံ သုတွာ အကုသလာ ဝုဋ္ဌဟိံသု ကုသလေ ပတိဋ္ဌဟိံသူ’’တိ။ ဧဝံ ခေါ ဘန္တေ တေန ဘိက္ခုနာ ဧဝံ သတ္ထု ဩဝါဒါနုသာသနိကာရိနာ ပရေဟိ ပုဋ္ဌေန သမ္မာ ဗျာကရမာနေန ဗျာကာတဗ္ဗံ။

ပုစ္ဆာ – သာမဂါမသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သက္ကေသု ဘန္တေ သာမဂါမေ နာမ သကျာနံ နိဂမေ အာယသ္မန္တဉ္စ အာနန္ဒံ အာယသ္မန္တဉ္စ စုန္ဒံ အာရဗ္ဘ ဘာသိတံ၊ အာယသ္မာ စ ဘန္တေ အာနန္ဒော အာယသ္မာ စ စုန္ဒော ယေန ဘဂဝါ တေနုပသင်္ကမိသု၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိံသု၊ ဧကမန္တံ နိသိန္နော ခေါ အာယသ္မာ အာနန္ဒော ဘဂဝန္တံ ဧတဒဝေါစ ‘‘အယံ ဘန္တေ စုန္ဒော သမဏုဒ္ဒေသော ဧဝမာဟ ‘နိဂဏ္ဌော ဘန္တေ နာဋပုတ္တော ပါဝါယံ အဓုနာ ကာလင်္ကတော၊ တဿ ကာလင်္ကိရိယာယ ဘိန္နာ နိဂဏ္ဌာ ဒွေဓိကဇာတာ ဘဏ္ဍနဇာတာ ကလဟဇာတာ ဝိဝါဒါပန္နာ အညမညံ မုခသတ္တီဟိ ဝိတုဒန္တာ ဝိဟရန္တိ…ပေ… ¶ ဘိန္နထူပေ အပ္ပဋိသရဏေ’တိ။ တဿ မယှံ ဘန္တေ ဧဝံ ဟောတိ ‘မာဟေဝ ဘဂဝတော အစ္စယေန သင်္ဃေ ဝိဝါဒေါ ဥပ္ပဇ္ဇိ၊ သွာဿ ဝိဝါဒေါ ဗဟုဇနအဟိတာယ ဗဟုဇနအသုခါယ ဗဟုနော ဇနဿ အနတ္ထာယ အဟိတာယ ဒုက္ခာယ ဒေဝမနုဿာန’န္တိ’’။ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – သုနက္ခတ္တသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ဝေသာလိယံ ဘန္တေ သုနက္ခတ္တံ လိစ္ဆဝိပုတ္တံ အာရဗ္ဘ ဘာသိတံ၊ သုနက္ခတ္တော ဘန္တေ လိစ္ဆဝိပုတ္တော ဘဂဝန္တံ ဥပသင်္ကမိတွာ ဧတဒဝေါစ ‘‘သုတံ မေတံ ဘန္တေ သမ္ဗဟုလေဟိ ကိရ ဘိက္ခူဟိ ဘဂဝတော သန္တိကေ အညာ ဗျာကတာ ခီဏာ ဇာတိ၊ ဝုသိတံ ဗြဟ္မစရိယံ၊ ကတံ ကရဏီယံ၊ နာပရံ ဣတ္ထတ္တာယာတိ ပဇာနာမာတိ။ ကစ္စိ တေ ဘန္တေ ဘိက္ခူ သမ္မဒေဝ အညံ ဗျာကံသု၊ ဥဒါဟု သန္တေတ္ထေကစ္စေ ဘိက္ခူ အဓိမာနေန အညံ ဗျာကံသူ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – အာနေဉ္ဇသပ္ပာယသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ပုစ္ဆာ – ဂဏကမောဂ္ဂလ္လာနသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ ဂဏကမောဂ္ဂလ္လာနံ ဗြာဟ္မဏံ အာရဗ္ဘ ဘာသိတံ၊ ဂဏကမောဂ္ဂလ္လာနော ဘန္တေ ဗြာဟ္မဏော ဘဂဝန္တံ ဥပသင်္ကမိတွာ ဧတဒဝေါစ ‘‘သေယျာထာပိ ဘော ဂေါတမ ဣမဿ မိဂါရမာတုပါသာဒဿ ဒိဿတိ အနုပုဗ္ဗသိက္ခာ အနုပုဗ္ဗကိရိယာ အနုပုဗ္ဗပဋိပဒါ ယဒိဒံ ယာဝ ပစ္ဆိမသောပါနကဠေဝရာ…ပေ… သက္ကာ နုခေါ ဘော ဂေါတမ ဣမသ္မိမ္ပိ ဓမ္မဝိနယေ ဧဝမေဝ အနုပုဗ္ဗသိက္ခာ အနုပုဗ္ဗကိရိယာ အနုပုဗ္ဗပဋိပဒါ ပညပေတု’’န္တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဧဝံ ¶ ဝုတ္တေ ခေါ အာဝုသော ဂဏကမောဂ္ဂလ္လာနော ဗြာဟ္မဏော ဘဂဝန္တံ ကိံ အဝေါစ၊ ကထဉ္စဿ ဘဂဝါ ဗျာကာသိ။

ဝိဿဇ္ဇနာ – ဧဝံ ဝုတ္တေ ဘန္တေ ဂဏကမောဂ္ဂလ္လာနော ဗြာဟ္မဏော ဘဂဝန္တံ ဧတဒဝေါစ ‘‘ကိံ နု ခေါ ဘောတော ဂေါတမဿ သာဝကာ ဘောတာ ဂေါတမေန ဧဝံ ဩဝဒီယမာနာ ဧဝံ အနုသာသီယမာနာ သဗ္ဗေ အစ္စန္တံ နိဋ္ဌံ နိဗ္ဗာနံ အာရောဓေန္တိ၊ ဥဒါဟု ဧကစ္စေ နာရာဓေန္တီ’’တိ၊ ဘဂဝါ စ ဘန္တေ ‘‘အပ္ပေကစ္စေ ခေါ ဗြာဟ္မဏ မမ သာဝကာ မယာ ဧဝံ ဩဝဒီယမာနာ ဧဝံ အနုသာသီယမာနာ အစ္စန္တံ နိဋ္ဌံ နိဗ္ဗာနံ အာရာဓေန္တိ၊ ဧကစ္စေ နာရာဓေန္တီ’’တိ ဧဝမာဒိနာ ဂဏကမောဂ္ဂလ္လာနဿ ဗြာဟ္မဏဿ ဗျာကာသိ။

ပုစ္ဆာ – ဣမဉ္စ ¶ ပနာဝုသော ဓမ္မဒေသနံ သုတွာ ဂဏကော မောဂ္ဂလ္လာနော ဣမသ္မိံ ဓမ္မဝိနယေ ပသန္နော ကီဒိသံ ပသန္နာကာရမကာသိ။

ဝိဿဇ္ဇနာ – ဣမဉ္စ ပန ဘန္တေ ဓမ္မဒေသနံ သုတွာ ဂဏကမောဂ္ဂလ္လာနော ဗြာဟ္မဏော ‘‘ယေ မေ ဘော ဂေါတမ ပုဂ္ဂလာ အသဒ္ဓါ ဇီဝိကတ္ထာ န သဒ္ဓါ အဂါရသ္မာ အနဂါရိယံ ပဗ္ဗဇိတာ’’တိ ဧဝမာဒိနာ ဣမသ္မိံ ဓမ္မဝိနယေ ပသန္နော ပသန္နာကာရမကာသိ။

ပုစ္ဆာ – ဂေါပကမောဂ္ဂလ္လာနသုတ္တံ ¶ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ဘာသိတံ။

ဝိဿဇ္ဇနာ – ရာဇဂဟေ ဘန္တေ ဂေါပကမောဂ္ဂလ္လာနံ ဗြာဟ္မဏံ အာရဗ္ဘ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန ဘာသိတံ၊ ဂေါပကမောဂ္ဂလ္လာနော ဘန္တေ ဗြာဟ္မဏော အာယသ္မန္တံ အာနန္ဒံ ဧတဒဝေါစ ‘‘အတ္ထိ နု ခေါ ဘော အာနန္ဒ ဧကဘိက္ခုပိ တေဟိ ဓမ္မေဟိ သဗ္ဗေန သဗ္ဗံ သဗ္ဗထာ သဗ္ဗံ သမန္နာဂတော၊ ယေဟိ ဓမ္မေဟိ သမန္နာဂတော သော ဘဝံ ဂေါတမော အဟောသိ အရဟံ သမ္မာသမ္ဗုဒ္ဓါ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ကထဉ္စာဝုသော ¶ တတ္ထ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန ဘိက္ခုနော ပသာဒနီယာ ဓမ္မာ ပကာသိတာ၊ ယေ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန အက္ခာတာ။ ယေဟိ စ သမန္နာဂတံ ဘိက္ခုံ အညေ ဘိက္ခူ သက္ကရေယျုံ ဂရုံ ကရေယျုံ မာနေယျုံ ပူဇေယျုံ သက္ကတွာ ဂရုံ ကတွာ ဥပနိဿာယ ဝိဟရေယျုံ။

ဝိဿဇ္ဇနာ – ဣဓ ဗြာဟ္မဏ ဘိက္ခု သီလဝါ ဟောတိ၊ ပါတိမောက္ခသံဝရသံဝုတော ဝိဟရတိ အာစာရဂေါစရသမ္ပန္နော အဏုမတ္တေသု ဝဇ္ဇေသု ဘယဒဿာဝီ၊ သမာဒါယ သိက္ခတိ သိက္ခာပဒေသု၊ ဗဟုဿုတော ဟောတိ သုတဓရော သုတသန္နိစယော၊ ယေမေ ဓမ္မာ အာဒိကလျာဏာ မဇ္ဈေကလျာဏာ ပရိယောသာနကလျာဏာ သာတ္ထံ သဗျဉ္ဇနံ ကေဝလပရိပုဏ္ဏံ ပရိသုဒ္ဓံ ဗြဟ္မစရိယံ အဘိဝဒန္တိ၊ တထာရူပဿ ဓမ္မာ ဗဟုဿုတာ ဟောန္တိ ဓာတာ ဝစသာ ပရိစိတာ မနသာနုပေက္ခိတာ ဒိဋ္ဌိယာ သုပ္ပဋိဝိဒ္ဓါတိ ဧဝမာဒိနာ ဘန္တေ တတ္ထ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန ဒသ ပသာဒနီယာ ဓမ္မာ ပကာသိတာ။ ယေ တေန ဘဂတာ ဇာနတာ ပဿတာ အရဟတာ သမ္မာသမ္ဗုဒ္ဓေန အက္ခာတာ၊ ယေဟိ သမန္နာဂတံ ဘိက္ခုံ ဧတရဟိ ဘိက္ခူ သက္ကရေယျုံ ဂရုံ ကရေယျုံ မာနေယျုံ ပူဇေယျုံ သက္ကတွာ ဂရုံ ကတွာ ဥပနိဿာယ ဝိဟရေယျုံ။

ပုစ္ဆာ – ဧဝံ ¶ ဝုတ္တေ ခေါ အာဝုသော ဝဿကာရော ဗြာဟ္မဏော မဂဓမဟာမတ္တော ကီဒိသံ ပသံသာဝစနံ ကထေသိ၊ ကထဉ္စဿ အာယသ္မာ အာနန္ဒတ္ထေရော ဓမ္မဘဏ္ဍာဂါရိကော တံ ဝစနံ ပဋိသောဓေတွာ ပကာသေသိ။

ဝိဿဇ္ဇနာ – ဧဝံ ¶ ဝုတ္တေ ဝဿကာရော ဗြာဟ္မဏော မဂဓမဟာမတ္တော ဥပနန္ဒံ သေနာပတိံ အာမန္တေသိ ‘‘တံ ကိံ မညသိ ဘဝံ သေနာပတိ၊ ယဒိ မေ ဘောန္တော သက္ကာတဗ္ဗံ သက္ကရောန္တိ၊ ဂရုံ ကာတဗ္ဗံ ဂရုံ ကရောန္တိ၊ မာနေတဗ္ဗံ မာနေန္တိ၊ ပူဇေတဗ္ဗံ ပူဇေန္တီ’’တိ ဧဝမာဒိကံ ပသံသာဝစနံ ကထေသိ၊ အာယသ္မာ စ ဘန္တေ အာနန္ဒော ‘‘န စ ခေါ ဗြာဟ္မဏ သော ဘဂဝါ သဗ္ဗံ ဈာနံ ဝဏ္ဏေသိ၊ နပိ သော ဘဂဝါ သဗ္ဗံ ဈာနံ န ဝဏ္ဏေသီ’’တိ ဧဝမာဒိနာ တံ ဝစနံ ပဋိသောဓေတွာ ပကာသေသိ။

ပုစ္ဆာ – မဟာပုဏ္ဏမသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ အညတရံ သဋ္ဌိမတ္တာနံ ပဓာနီယဘိက္ခူနံ သင်္ဃတ္ထေရံ ဘိက္ခုံ အာရဗ္ဘ ဘာသိတံ၊ အညတရော ဘန္တေ

သဋ္ဌိမတ္တာနံ ¶ ပဓာနီယဘိက္ခူနံ သင်္ဃတ္ထေရော ဘိက္ခု ဥဋ္ဌာယာသနာ ဧကံသံ စီဝရံ ကတွာ ယေန ဘဂဝါ တေနဉ္ဇလိံ ပဏာမေတွာ ဘဂဝန္တံ ဧတဒဝေါစ ‘‘ပုစ္ဆေယျာဟံ ဘန္တေ ဘဂဝန္တံ ကိဉ္စိဒေဝ ဒေသံ၊ သစေ မေ ဘဂဝါ ဩကာသံ ကရောတိ ပဉှဿ ဝေယျာကရဏာယာ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – စူဠပုဏ္ဏမသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ အသပ္ပုရိသအင်္ဂါနိ ဝိဘဇိတွာ ပကာသိတာနိ။

ဝိဿဇ္ဇနာ – အသပ္ပုရိသော ဘိက္ခဝေ အဿဒ္ဓမ္မသမန္နာဂတော ဟောတိ၊ အသပ္ပုရိသဘတ္တိ ဟောတိ၊ အသပ္ပုရိသစိန္တီ ဟောတိ၊ အသပ္ပုရိသမန္တီ ဟောတိ၊ အသပ္ပုရိသဝါစော ဟောတိ၊ အသပ္ပုရိသကမ္မန္တော ဟောတိ၊ အသပ္ပုရိသဒိဋ္ဌိ ဟောတိ၊ အသပ္ပုရိသဒါနံ ဒေတီတိ ဧဝမာဒိနာ ဘန္တေ တတ္ထ ဘဂဝတာ အဋ္ဌ အသပ္ပုရိသအင်္ဂါနိ ဝိဘဇိတွာ ပကာသိတာနိ။

ပုစ္ဆာ – ကထံ ¶ ပနာဝုသော ဘဂဝတာ တတ္ထ သပ္ပုရိသအင်္ဂါနိ ဝိဘဇိတွာ ပကာသိတာနိ။

ဝိဿဇ္ဇနာ – သပ္ပုရိသော ဘိက္ခဝေ သဒ္ဓမ္မသမန္နာဂတော ဟောတိ၊ သပ္ပုရိသဘတ္တိ ဟောတိ၊ သပ္ပုရိသစိန္တီ ဟောတိ၊ သပ္ပုရိသမန္တီ ဟောတိ၊ သပ္ပုရိသဝါစော ဟောတိ၊ သပ္ပုရိသကမ္မန္တော ဟောတိ၊ သပ္ပုရိသဒိဋ္ဌိ ဟောတိ၊ သပ္ပုရိသဒါနံ ဒေတီတိ ဧဝမာဒိနာ ဘန္တေ ဘဂဝတာ တတ္ထ အဋ္ဌဝိဓာနိ သပ္ပုရိသင်္ဂါနိ ဝိဘဇိတွာ ပကာသိတာနိ။

ပုစ္ဆာ – အနုပဒသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ၊ သမ္ဗဟုလာ ဘန္တေ ဘိက္ခူ အာယသ္မတော သာရိပုတ္တဿ ဓမ္မသေနာပတိဿ သဘာဂါ တသ္မိံ သမယေ သန္နိပတိံသု၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ အာယသ္မတော သာရိပုတ္တဿ ဓမ္မသေနာပတိဿ အနုပဒဓမ္မဝိပဿနာ ဝိတ္ထာရေန ဝိဘဇိတွာ ပကာသိတာ။

ဝိဿဇ္ဇနာ – ပဏ္ဍိတော ဘိက္ခဝေ သာရိပုတ္တော မဟာပညော ဘိက္ခဝေ သာရိပုတ္တော ပုထုပညော ဘိက္ခဝေ သာရိပုတ္တော ဟာသပညော ¶ ဘိက္ခဝေ သာရိပုတ္တော တိက္ခပညော ဘိက္ခဝေ သာရိပုတ္တော ဇဝနပညော ဘိက္ခဝေ သာရိပုတ္တော နိဗ္ဗေဓိကပညော ဘိက္ခဝေ သာရိပုတ္တော သာရိပုတ္တော ဘိက္ခဝေ အဍ္ဎမာသံ အနုပဒဓမ္မဝိပဿနံ ဝိပဿတီတိ ဧဝမာဒိနာ ဘန္တေ တတ္ထ ဘဂဝတာ အာယသ္မတော သာရိပုတ္တဿ ဓမ္မသေနာပတိဿ အနုပဒဓမ္မဝိပဿနာ ဝိတ္ထာရေန ပကာသိတာ။

ပုစ္ဆာ – တေနာဝုသော…ပေ… ¶ သမ္မာသမ္ဗုဒ္ဓေန ဆဗ္ဗိသောဓနသုတ္တံ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – သပ္ပုရိသသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – သေဝိတဗ္ဗာသေဝိတဗ္ဗသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကေန သဒ္ဓိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ အာယသ္မတာ သာရိပုတ္တတ္ထေရေန ဓမ္မသေနာပတိနာ သဒ္ဓိံ ဘာသိတံ။

ပုစ္ဆာ – ဗဟုဓာတုကသုတ္တံ ¶ ပနာဝုသော ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – ဣသိဂိလိသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – ရာဇဂဟေ ဘန္တေ ဣသိဂိလိသ္မိံ ပဗ္ဗတေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – မဟာစတ္တာရီသကသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – အာနာပါနဿတိသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ၊ ထေရာ ဘန္တေ ဘိက္ခူ နဝေ ဘိက္ခူ ဩဝဒန္တိ အနုသာသန္တိ၊ အပ္ပေကစ္စေ ထေရာ ဘိက္ခူ ဒသပိ ဘိက္ခူ ဩဝဒန္တိ အနုသာသန္တိ၊ အပ္ပေကစ္စေ ထေရာ ဘိက္ခူ ဝီသမ္ပိ ဘိက္ခူ ဩဝဒန္တိ အနုသာသန္တိ၊ အပ္ပေကစ္စေ ထေရာ ဘိက္ခူ တိံသမ္ပိ ဘိက္ခူ ဩဝဒန္တိ အနုသာသန္တိ၊ အပ္ပေကစ္စေ ထေရာ ဘိက္ခူ စတ္တာရီသမ္ပိ ဘိက္ခူ ဩဝဒန္တိ အနုသာသန္တိ၊ တေ စ ဘန္တေ နဝါ ဘိက္ခူ ထေရေဟိ ဘိက္ခူဟိ ဩဝဒိယမာနာ အနုသာသိယမာနာ ဥဠာရံ ပုဗ္ဗေနာပရံ ဝိသေသံ ဇာနန္တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ကာယဂတာသတိသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ၊ သမ္ဗဟုလာနံ ဘန္တေ ဘိက္ခူနံ ပစ္ဆာဘတ္တံ ပိဏ္ဍပါတပဋိက္ကန္တာနံ ဥပဋ္ဌာနသာလာယံ သန္နိသိန္နာနံ သန္နိပတိတာနံ အယမန္တရကထာ ဥဒပါဒိ ‘‘အစ္ဆရိယံ အာဝုသော၊ အဗ္ဘုတံ အာဝုသော၊ ယာဝဉ္စိဒံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ကာယဂတာသတိ ဘာဝိတာ ဗဟုလီကတာ မဟပ္ဖလာ ဝုတ္တာ မဟာနိသံသာ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – သင်္ခါရူပပတ္တိသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – ကထဉ္စာဝုသော တတ္ထ ဘဂဝတာ သင်္ခါရူပပတ္တိယော ဝိဘဇိတွာ ပကာသိတာ။

ဝိဿဇ္ဇနာ – ဣဓ ဘိက္ခဝေ ဘိက္ခု သဒ္ဓါယ သမန္နာဂတော ဟောတိ၊ သီလေန သမန္နာဂတော ဟောတိ၊ သုတေန သမန္နာဂတော ဟောတိ၊ စာဂေန သမန္နာဂတော ဟောတိ၊ ပညာယ သမန္နာဂတော ဟောတိ၊ တဿ ဧဝံ ဟောတိ ‘‘အဟော ဝတာဟံ ကာယဿ ဘေဒါ ပရံ မရဏာ ခတ္တိယမဟာသာလာနံ သဟဗျတံ ဥပပဇ္ဇေယျ’’န္တိ ဧဝမာဒိနာ ဘန္တေ တတ္ထ ဘဂဝတာ သင်္ခါရူပပတ္တိယော ဝိဘဇိတွာ ပကာသိတာ။

ပုစ္ဆာ – စူဠသုညတသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ အာနန္ဒံ အာရဗ္ဘ ဘာသိတံ၊ အာယသ္မာ ဘန္တေ အာနန္ဒော သာယနှသမယံ ပဋိသလ္လာနာ ဝုဋ္ဌိတော ဘဂဝန္တံ ဧတဒဝေါစ ‘‘ဧကမိဒံ ဘန္တေ သမယံ ဘဂဝါ သက္ကေသု ဝိဟရတိ နဂရကံ နာမ သကျာနံ နိဂမော၊ တတ္ထ မေ ဘန္တေ ဘဂဝတော သမ္မုခါ သုတံ၊ သမ္မုခါ ပဋိဂ္ဂဟိတံ၊ သုညတာဝိဟာရေနာဟံ အာနန္ဒ ဧတရဟိ ဗဟုလံ ဝိဟရာမီတိ ကစ္စိ မေတံ ဘန္တေ သုဿုတံ သုဂ္ဂဟိတံ သုမနသိကတံ သူပဓာရိတ’’န္တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – မဟာသုညတသုတ္တံ ¶ ပနာဝုတော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သက္ကေသု ဘန္တေ ကပိလဝတ္ထုသ္မိံ အာယသ္မန္တံ အာနန္ဒံ အာရဗ္ဘ ဘာသိတံ၊ အာယသ္မာ ဘန္တေ အာနန္ဒော သမ္ဗဟုလေဟိ ဘိက္ခူဟိ သဒ္ဓိံ ဃဋာယ သက္ကဿ ဝိဟာရေ စီဝရကမ္မံ ကရောတိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – အစ္ဆရိယအဗ္ဘုတသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန သဒ္ဓိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ အာယသ္မတာ အာနန္ဒတ္ထေရေန ဓမ္မဘဏ္ဍာဂါရိကေန သဒ္ဓိံ ဘာသိတံ။ သမ္ဗဟုလာနံ ဘန္တေ ဘိက္ခူနံ ပစ္ဆာဘတ္တံ ပိဏ္ဍပါတပဋိက္ကန္တာနံ ဥပဋ္ဌာနသာလာယံ သန္နိသိန္နာနံ သန္နိပတိတာနံ အယမန္တရကထာ ဥဒပါဒိ ‘‘အစ္ဆရိယံ အာဝုသော၊ အဗ္ဘုတံ အာဝုသော တထာဂတဿ မဟိဒ္ဓိကတာ မဟာနုဘာဝတာ။ ယတြ ဟိ နာမ တထာဂတော အတီတေ ဗုဒ္ဓေ ပရိနိဗ္ဗုတေ ဆိန္နပပဉ္စေ ဆိန္နဝဋုမေ ပရိယာဒိန္နဝဋ္ဋေ သဗ္ဗဒုက္ခဝီတိဝတ္တေ ဇာနိဿတိ။ ဧဝံဇစ္စာ တေ ဘဂဝန္တော အဟေသုံ ဣတိပိ၊ ဧဝံနာမာ တေ ဘဂဝန္တော အဟေသုံ ဣတိပိ၊ ဧဝံဂေါတ္တာ တေ ဘဂဝန္တော အဟေသုံ ဣတိပိ၊ ဧဝံသီလာ တေ ဘဂဝန္တော အဟေသုံ ဣတိပိ၊ ဧဝံဓမ္မာ တေ ဘဂဝန္တော အဟေသုံ ဣတိပိ၊ ဧဝံပညာ ¶ တေ ဘဂဝန္တော အဟေသုံ ဣတိပိ၊ ဧဝံဝိဟာရီ တေ ဘဂဝန္တော အဟေသုံ ဣတိပိ၊ ဧဝံဝိမုတ္တာ တေ ဘဂဝန္တော အဟေသုံ ဣတိပီ’’တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဗာကုလသုတ္တံ ¶ ပနာဝုသော ကတ္ထ ကံ အာရဗ္ဘ ကေန ဘာသိတံ။

ဝိဿဇ္ဇနာ – ရာဇဂဟေ ဘန္တေ အစေလံ ကဿပံ အာရဗ္ဘ အာယသ္မတာ ဗာကုလတ္ထေရေန ဘာသိတံ။

ပုစ္ဆာ – ဒန္တဘူမိသုတ္တံ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ရာဇဂဟေ ဘန္တေ ဇယသေနံ ရာဇကုမာရံ အာရဗ္ဘ ဘာသိတံ။ ဇယသေနော ဘန္တေ ရာဇကုမာရော အစိရဝတံ သမဏုဒ္ဒေသံ ဥပသင်္ကမိတွာ ဧတဒဝေါစ ‘‘သုတံ မေတံ ဘော အဂ္ဂိဝေဿန ဣဓ ဘိက္ခု အပ္ပမတ္တော အာတာပီ ပဟိတတ္တော ဝိဟရန္တော ဖုသေယျ ¶ စိတ္တဿ ဧကဂ္ဂတ’’န္တိ၊ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ အစိရဝတဿ သမဏုဒ္ဒေသဿ သမဿာသေတွာ ဓမ္မဒေသနာနယော ပကာသိတော။

ဝိဿဇ္ဇနာ – တံ ကုတေတ္ထ အဂ္ဂိဝေဿန လဗ္ဘာ၊ ယံ တံ နေက္ခမ္မေန ဉာတဗ္ဗံ နေက္ခမ္မေန ဒဋ္ဌဗ္ဗံ နေက္ခမ္မေန ပတ္တဗ္ဗံ နေက္ခမ္မေန သစ္ဆိကာတဗ္ဗံ၊ တံ ဝတ ဇယသေနော ရာဇကုမာရော ကာမမဇ္ဈေ ဝသန္တော ကာမေ ပရိဘုဉ္ဇန္တော ကာမဝိတက္ကေဟိ ခဇ္ဇမာနော ကာမပရိဠာဟေန ပရိဍယှမာနော ကာမပရိယောသနာယ ဥဿုကော ဥဿတိ ဝါ ဒက္ခတိ ဝါ သစ္ဆိ ဝါ ကရိဿတီတိ နေတံ ဌာနံ ဝိဇ္ဇတီတိ ဧဝံ ခေါ ဘန္တေ ဘဂဝတော အစိရဝတဿ သမဏုဒ္ဒေသဿ သမဿာသေတွာ၊ သေယျထာပိဿု အဂ္ဂိဝေဿန ဒွေ ဟတ္ထိဒမ္မာ ဝါ အဿဒမ္မာဝါ ဂေါဒမ္မာ ဝါ သုဒန္တာ သုဝိနီတာတိ ဧဝမာဒိနာ ဘန္တေ ဘဂဝတာ အစိရဝတဿ သမဏုဒ္ဒေသဿ ဒေသနာနယော ပကာသိတော။

ပုစ္ဆာ – ကထဉ္စာဝုသော ¶ တတ္ထ ဘဂဝါ ဒွေ ဥပမာယော ဒဿေတွာ တတုတ္တရိ ဓမ္မဒေသနံ ပဝဍ္ဎေတိ။

ဝိဿဇ္ဇနာ – သေယျထာပိ အဂ္ဂိဝေဿန ရာဇာခတ္တိယော မုဒ္ဓါဝသိတ္တော နာဂဝနိကံ အာမန္တေတီတိ ဧဝမာဒိနာ ဘန္တေ ဘဂဝါ ဥတ္တရိပိ ဓမ္မဒေသနံ ပဝဍ္ဎေသိ။

ပုစ္ဆာ – တေနာဝုသော…ပေ… ¶ သမ္မာသမ္ဗုဒ္ဓေန ဘူမိဇသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ရာဇဂဟေ ဘန္တေ ဇယသေနံ ရာဇကုမာရံ အာရဗ္ဘ ဘာသိတံ၊ ဇယသေနော ဘန္တေ ရာဇကုမာရော အာယသ္မန္တံ ဘူမိဇံ ဧတဒဝေါစ ‘‘သန္တိ ဘော ဘူမိဇ ဧကေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော ‘အာသဉ္စေပိ ကရိတွာ ဗြဟ္မစရိယံ စရန္တိ၊ အဘဗ္ဗာ ဖလဿ အဓိဂမာယ။ အနာသဉ္စေပိ ကရိတွာ ဗြဟ္မစရိယံ စရန္တိ၊ အဘဗ္ဗာ ဖလဿ အဓိဂမာယ။ အာသဉ္စ အနာသဉ္စေပိ ကရိတွာ ဗြဟ္မစရိယံ စရန္တိ၊ အဘဗ္ဗာ ဖလဿ အဓိဂမာယ ¶ ။ နေဝါသံ နာနာသဉ္စေပိ ကရိတွာ ဗြဟ္မစရိယံ စရန္တိ၊ အာဘဗ္ဗာ ဖလဿ အဓိဂမာယာ’တိ။ ဣဓ ဘောတော ဘူမိဇဿ သတ္ထာ ကိံဝါဒီ ကိမက္ခာယီ’’တိ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ အာယသ္မတော ဘူမိဇတ္ထေရဿ တံ ဗျာကရဏံ သမနုဇာနိတွာ တတုတ္တရိ ဓမ္မဒေသနာနယော ပရိပူရေတွာ ပကာသိတော။

ဝိဿဇ္ဇနာ – တဂ္ဃ တွံ ဘူမိဇ ဧဝံ ပုဋ္ဌော ဧဝံ ဗျာကရမာနော ဝုတ္တဝါဒီ စေဝ မေ ဟောသိ၊ န စ မံ အဘူတေန အဗ္ဘာစိက္ခသိ၊ ဧဝမာဒိနာ ဘန္တေ ဘဂဝတာ အာယသ္မတော ဘူမိဇဿ တံ ဝစနံ သမနုဇာနိတွာ ‘‘ယေဟိ ကေဟိစိ ဘူမိဇ သမဏာ ဝါ ဗြာဟ္မဏာ ဝါ မိစ္ဆာဒိဋ္ဌိနော မိစ္ဆာသင်္ကပ္ပာ မိစ္ဆာဝါစာ မိစ္ဆာကမ္မန္တာ မိစ္ဆာအာဇီဝါ မိစ္ဆာဝါယာမာ မိစ္ဆာသတီ မိစ္ဆာသမာဓိနော၊ တေ အာသဉ္စေပိ ကရိတွာ ဗြဟ္မစရိယံ စရန္တိ၊ အဘဗ္ဗာ ဖလဿ အဓိဂမာယာ’’တိ ဧဝမာဒိနာ ဘန္တေ ဘဂဝတာ အာယသ္မတော ဘူမိဇဿ ဥတ္တရိ ဒေသနာနယော ပရိပူရေတွာ ပကာသိတော။

ပုစ္ဆာ – အနုရုဒ္ဓသုတ္တံ ¶ ပနာဝုသော ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ကေန ဘာသိတံ။

ဝိဿဇ္ဇနာ – သာဝတ္ထိယံ ဘန္တေ ပဉ္စကင်္ဂံ ထပတိံ အာရဗ္ဘ အာယသ္မတာ အနုရုဒ္ဓတ္ထေရေန ဘာသိတံ၊ ပဉ္စကင်္ဂေါ ဘန္တေ ထပတိ အာယသ္မန္တံ အနုရုဒ္ဓံ ဧတဒဝေါစ ‘‘ဣဓ မံ ဘန္တေ ထေရာ ဘိက္ခူ ဥပသင်္ကမိတွာ ဧဝမာဟံသု ‘အပ္ပမာဏံ ဂဟပတိ စေတောဝိမုတ္တိံ ဘာဝေဟီ’တိ၊ ဧကစ္စေ ထေရာ ဧဝမာဟံသု ‘မဟဂ္ဂတံ ဂဟပတိ စေတောဝိမုတ္တိံ ဘာဝေဟီ’’တိ၊ ယာ စာယံ ဘန္တေ အပ္ပမာဏာ စေတောဝိမုတ္တိ ယာ စ မဟဂ္ဂတာ စေတောဝိမုတ္တိ၊ ဣမေ ဓမ္မာ နာနတ္ထာ စေဝ နာနာဗျဉ္ဇနာ စ၊ ဥဒါဟု ဧကတ္ထာ ဗျဉ္ဇနမေဝ နာနန္တိ’’ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ဥပက္ကိလေသသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – ပါစီနဝံသဒါယေ ဘန္တေ အာယသ္မန္တံ အနုရုဒ္ဓတ္ထေရံ အာရဗ္ဘ ဘာသိတံ။

ပုစ္ဆာ – ဗာလပဏ္ဍိတသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ဘာသိတံ။

ပုစ္ဆာ – ကထဉ္စာဝုသော တတ္ထ ဘဂဝတာ ဗာလဿ ဗာလလက္ခဏာနိ စ ဗာလဿ ဒိဋ္ဌေဝ ဓမ္မေ ဒုက္ခဒေါမနဿပ္ပဋိသံဝေဒနာ စ ပကာသိတာ။

ဝိဿဇ္ဇနာ – တီဏိမာနိ ဘိက္ခဝေ ဗာလဿ ဗာလလက္ခဏာနိ ဗာလနိမိတ္တာနိ ဗာလာပဒါနာနိ။ ကတမာနိ တီဏိ။ ဣဓ ဘိက္ခဝေ ဗာလော ဒုစ္စိန္တိတစိန္တီ ¶ စ ဟောတိ ဒုဗ္ဘာသိတဘာသီ စ ဒုက္ကဋကမ္မကာရီ စာတိ ဧဝမာဒိနာ ဘန္တေ တတ္ထ ဘဂဝတာ ဗာလဿ ဗာလလက္ခဏာနိ စ ဗာလဿ ဒိဋ္ဌေဝ ဓမ္မေ ဒုက္ခဒေါမနဿပ္ပဋိသံဝေဒနာ စ ပကာသိတာ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ ဗာလဿ သမ္ပရာယော စ တတ္ထ နိရယေ ဗာလဿ ဒုက္ခဒေါမနဿပဋိသံဝေဒနာ စ ပကာသိတာ။

ဝိဿဇ္ဇနာ – သ ခေါ သော ဘိက္ခဝေ ဗာလော ကာယေန ဒုစ္စရိတံ စရိတွာ ဝါစာယ ဒုစ္စရိတံ စရိတွာ မနသာ ဒုစ္စရိတံ စရိတွာ ကာယဿ ဘေဒါပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတီတိ ဧဝမာဒိနာ ဘန္တေ တတ္ထ ဘဂဝတာ ဗာလဿ သမ္ပရာယော စ တတ္ထ စ ဗာလဿ နိရယေ ဒုက္ခဒေါမနဿပ္ပဋိသံဝေဒနာ ပကာသိတာ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ ဗာလဿ တိရစ္ဆာနယောနိယံ ဒုက္ခဒေါမနဿပဋိသံဝေဒနာ ပကာသိတာ။

ဝိဿဇ္ဇနာ – သန္တိ ဘိက္ခဝေ တိရစ္ဆာနဂတာ ပါဏာ တိဏဘက္ခာ တေ အလ္လာနိပိ တိဏာနိ သုက္ခာနိပိ တိဏာနိ ဒန္တုလ္လေဟကံ ခါဒန္တီတိ ဧဝမာဒိနာ ဘန္တေ တတ္ထ ဘဂဝတာ ဗာလဿ တိရစ္ဆာနယောနိယံ ဒုက္ခဒေါမနဿပ္ပဋိသံဝေဒနာ ပကာသိတာ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ ဗာလေန သကိံ ဝိနိပါတဂတေန ပုန မနုဿတ္တဒုလ္လဘတာ ပကာသိတာ။

ဝိဿဇ္ဇနာ – သေယျထာပိ ဘိက္ခဝေ ပုရိသော ဧကစ္ဆိဂ္ဂလံ ယုဂံ မဟာသမုဒ္ဒေ ပက္ခိပေယျ၊ တမေနံ ပုရတ္ထိမော ဝါတော ပစ္ဆိမေန သံဟရေယျာတိ ဧဝမာဒိနာ ဘန္တေ တတ္ထ ဘဂဝတာ ဗာလေန သကိံ ဝိနိပါတဂတေန ပုန မနုဿတ္တဿ ဒုလ္လဘတာ ပကာသိတာ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ ဗာလဿ ကဒါစိ ကရဟစိ ဒီဃဿ အဒ္ဓုနော အစ္စယေန မနုဿတ္တံ အာဂတဿပိ ဒုက္ခဗဟုလတာ ပကာသိတာ။

ဝိဿဇ္ဇနာ – သ ခေါ သော ဘိက္ခဝေ ဗာလော သစေ ကဒါစိ ကရဟစိ ဒီဃဿ အဒ္ဓုနော အစ္စယေန မနုဿတ္တံ အာဂစ္ဆတီတိ ဧဝမာဒိနာ ဘန္တေ တတ္ထ ဘဂဝတာ ဗာလဿ ကဒါစိ ကရဟစိ ဒီဃဿ အဒ္ဓုနော အစ္စယေန မနုဿတ္တံ အာဂတဿပိ ဒုက္ခဗဟုလတာ ပကာသိတာ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ ပဏ္ဍိတဿ ပဏ္ဍိတလက္ခဏာနိ စ ပဏ္ဍိတဿ ဒိဋ္ဌေဝ ဓမ္မေ သုခသောမနဿပ္ပဋိသံဝေဒနာ စ ပကာသိတာ။

ဝိဿဇ္ဇနာ – တီဏိမာနိ ဘိက္ခဝေ ပဏ္ဍိတဿ ပဏ္ဍိတလက္ခဏာနိ ပဏ္ဍိတနိမိတ္တာနိ ပဏ္ဍိတာပဒါနာနိ။ ကတမာနိ တီဏိ။ ဣဓ ဘိက္ခဝေ ပဏ္ဍိတော သုစိန္တိတစိန္တီ စ ဟောတိ သုဘာသိတဘာသီ စ သုကတကမ္မကာရီ စာတိ ဧဝမာဒိနာ ဘန္တေ တတ္ထ ဘဂဝတာ

ပဏ္ဍိတဿ ¶ ပဏ္ဍိတလက္ခဏာနိ စ ဒိဋ္ဌေဝ ဓမ္မေ ပဏ္ဍိတဿ သုခသောမနဿပဋိသံဝေဒနာ စ ပကာသိတာ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ ပဏ္ဍိတဿ သမ္ပရာယော စ တတ္ထ သဂ္ဂေ သုခသောမနဿပ္ပဋိသံဝေဒနာ စ ပကာသိတာ။

ဝိဿဇ္ဇနာ – သ ခေါ သော ဘိက္ခဝေ ပဏ္ဍိတော ကာယေန သုစရိတံ စရိတွာ ဝါစာယ မနသာ သုစရိတံ စရိတွာ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတီတိ ဧဝမာဒိနာ ဘန္တေ တတ္ထ ဘဂဝတာ ပဏ္ဍိတဿ သမ္ပရာယော စ သဂ္ဂေ စ ပဏ္ဍိတဿ သုခသောမနဿပ္ပနိသံဝေဒနာ ပကာသိတာ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ ပဏ္ဍိတဿ ကဒါစိ ကရဟစိ ဒီဃဿ အဒ္ဓုနော အစ္စယေန မနုဿတ္တံ အာဂတဿပိ သုခဗဟုလတာ ပကာသိတာ။

ဝိဿဇ္ဇနာ – သ ခေါ သော ဘိက္ခဝေ ပဏ္ဍိတော သစေ ကဒါစိ ကရဟစိ ဒီဃဿ အဒ္ဓုနော အစ္စယေန မနုဿတ္တံ အာဂစ္ဆတိ၊ ယာနိ တာနိ ဥစ္စာကုလာနိ ခတ္တိယမဟာသာလကုလံ ဝါ ဗြာဟ္မဏမဟာသာလကုလံ ဝါ ဂဟပတိမဟာသာလကုလံ ဝါ တထာရူပေ ကုလေ ပစ္စာဇာယတီတိ ဧဝမာဒိနာ ဘန္တေ တတ္ထ ဘဂဝတာ ပဏ္ဍိတဿ ကဒါစိ ကရဟစိ ဒီဃဿ အဒ္ဓုနော အစ္စယေန မနုဿတ္တံ အာဂတဿပိ သုခဗဟုလတာ ပကာသိတာ။

ပုစ္ဆာ – တေနာဝုသော ¶ ဇာနတာ ပဿတာ…ပေ… သမ္မာသမ္ဗုဒ္ဓေန စူဠကမ္မဝိဘင်္ဂသုတ္တံ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – သာဝတ္ထိယံ ဘန္တေ သုဘံ မာဏဝံ တောဒေယျပုတ္တံ အာရဗ္ဘ ဘာသိတံ။ သုဘော ဘန္တေ မာဏဝေါ တောဒေယျပုတ္တော ဘဂဝန္တံ ဥပသင်္ကမိတွာ ဧတဒဝေါစ ‘‘ကော နု ခေါ ဘော ဂေါတမ ဟေတု ကော ပစ္စယော၊ ယေန မနုဿာနံယေဝ သတံ မနုဿဘူတာနံ ဒိဿန္တိ ဟီနပ္ပဏီတတာ။ ဒိဿန္တိ ဟိ ဘော ဂေါတမ မနုဿာ အပ္ပာယုကာ၊ ဒိဿန္တိ ဒီဃာယုကာ။ ဒိဿန္တိ ဗဝှာဗာဓာ၊ ဒိဿန္တိ အပ္ပာဗာဓာ။ ဒိဿန္တိ ဒုဗ္ဗဏ္ဏာ၊ ဒိဿန္တိ ဝဏ္ဏဝန္တော။ ဒိဿန္တိ အပ္ပေသက္ခာ၊ ဒိဿန္တိ မဟေသက္ခာ။ ဒိဿန္တိ အပ္ပဘောဂါ၊ ဒိဿန္တိ မဟာဘောဂါ။ ဒိဿန္တိ နီစကုလီနာ၊ ဒိဿန္တိ ဥစ္စာကုလီနာ။ ဒိဿန္တိ ဒုပ္ပညာ၊ ဒိဿန္တိ ပညဝန္တော။ ကော နု ခေါ ဘော ဂေါတမ ဟေတု ကော ပစ္စယော၊ ယေန မနုဿာနံယေဝ သတံ မနုဿဘူတာနံ ဒိဿန္တိ ဟီနပ္ပဏီတတာ’’တိ တသ္မိံ ဘန္တေ ဝတ္ထုသ္မိံ ဘာသိတံ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ သတ္တာနံ ဒီဃာယုကအပ္ပာယုကသံဝတ္တနကကမ္မာနိ ဝိဘဇိတွာ ပကာသိတာနိ။

ဝိဿဇ္ဇနာ – ဣဓ မာဏဝ ဧကစ္စော ဣတ္ထီ ဝါ ပုရိသော ဝါ ပါဏာတိပါတီ ဟောတိ၊ လုဒ္ဒေါ လောဟိတပါဏိ ဟတပဟတေ နိဝိဋ္ဌော အဒယာပန္နော ပါဏဘူတေသူတိ ဧဝမာဒိနာ ဘန္တေ တတ္ထ ဘဂဝတာ အပ္ပာယုကဒီဃာယုကသံဝတ္တနကာနိ ကမ္မာနိ ဝိဘဇိတွာ ပကာသိတာနိ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ သတ္တာနံ အပ္ပာဗာဓဗဝှာဗာဓသံဝတ္တနကကမ္မာနိ ဝိဘဇိတွာ ပကာသိတာနိ။

ဝိဿဇ္ဇနာ – ဣဓ ¶ မာဏဝ ဧကစ္စော ဣတ္ထီ ဝါ ပုရိသော ဝါ သတ္တာနံ ဝိဟေဋ္ဌကဇာတိကော ဟောတိ ပါဏိနာ ဝါ လေဍ္ဍုနာဝါ ဒဏ္ဍေနဝါ သတ္ထေန ဝါတိ ဧဝမာဒိနာ ဘန္တေ တတ္ထ ဘဂဝတာ သတ္တာနံ အပ္ပာဗာဓဗဝှာဗာဓသံဝတ္တနကကမ္မာနိ ဝိဘဇိတွာ ပကာသိတာနိ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ သတ္တာနံ သုဝဏ္ဏဒုဗ္ဗဏ္ဏသံဝတ္တနကကမ္မာနိ ဝိဘဇိတွာ ပကာသိတာနိ။

ဝိဿဇ္ဇနာ – ဣဓ မာဏဝ ဧကစ္စော ဣတ္ထီ ဝါ ပုရိသော ဝါ ကောဓနော ဟောတိ ဥပါယာသဗဟုလော၊ အပ္ပမ္ပိ ဝုတ္တော သမာနော အဘိသဇ္ဇတိ ကုပ္ပတိ ဗျာပဇ္ဇတိ ပတိဋ္ဌိယတိ၊ ကောပဉ္စ ဒေါသဉ္စ အပ္ပစ္စယဉ္စ ပါတုကရောတီတိ ဧဝမာဒိနာ ဘန္တေ တတ္ထ ဘဂဝတာ သတ္တာနံ သုဝဏ္ဏဒုဗ္ဗဏ္ဏသံဝတ္တနကကမ္မာနိ ဝိဘဇိတွာ ပကာသိတာနိ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ သတ္တာနံ မဟေသက္ခ အပ္ပေသက္ခသံဝတ္တနကကမ္မာနိ ဝိဘဇိတွာ ပကာသိတာနိ။

ဝိဿဇ္ဇနာ – ဣဓ မာဏဝ ဧကစ္စော ဣတ္ထီ ဝါ ပုရိသော ဝါ ဣဿာမနကော ဟောတိ၊ ပရလာဘသက္ကာရ ဂရုကာရ မာနနဝန္ဒန ပူဇာသု ဣဿတိ ဥပဒုဿတိ ဣဿံ ဗန္ဓတီတိ ဧဝမာဒိနာ ဘန္တေ တတ္ထ ဘဂဝတာ သတ္တာနံ အပ္ပေသက္ခမဟေသက္ခသံဝတ္တနကာနိ ကမ္မာနိ ဝိဘဇိတွာ ပကာသိတာနိ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ မဟာဘောဂအပ္ပဘောဂသံဝတ္တနကကမ္မာနိ ဝိဘဇိတွာ ပကာသိတာနိ။

ဝိဿဇ္ဇနာ – ဣဓ မာဏဝ ဧကစ္စော ဣတ္ထီ ဝါ ပုရိသော ဝါ န ဒါတာ ဟောတိ၊ သမဏဿ ဝါ ဗြာဟ္မဏဿ ဝါ အန္နံ ပါနံ ဝတ္တံ ယာနံ မာလာဂန္ဓ ဝိလေပနံ သေယျဝသထပဒီပေယျန္တိ ဧဝမာဒိနာ ဘန္တေ တတ္ထ ဘဂဝတာ မဟာဘောဂအပ္ပဘောဂသံဝတ္တနကကမ္မာနိ ဝိဘဇိတွာ ပကာသိတာနိ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ သတ္တာနံ ဥစ္စာကုလီန နီစကုလီနသံဝတ္တနကကမ္မာနိ ဝိဘဇိတွာ ပကာသိတာနိ။

ဝိဿဇ္ဇနာ – ဣဓ မာဏဝ ဧကစ္စော ဣတ္ထီ ဝါ ပုရိသော ဝါ ထဒ္ဓါ ဟောတိ အတိမာနိ အဘိဝါဒေတဗ္ဗံ န အဘိဝါဒေတိ၊ ပစ္စုဋ္ဌာတဗ္ဗံ န ပစ္စုဋ္ဌေတိ၊ အာသနာရဟဿ န အာသနံ ဒေတိ၊ မဂ္ဂါရဟဿ န မဂ္ဂံ ဒေတိ၊ သက္ကာတဗ္ဗံ န သက္ကရောတိ၊ ဂရုကာတဗ္ဗံ န ဂရုကရောတိ၊ မာနေတဗ္ဗံ မာနေတိ၊ ပူဇေတဗ္ဗံ န ပူဇေတီတိ ဧဝမာဒိနာ ဘန္တေ တတ္ထ ဘဂဝတာ သတ္တာနံ ဥစ္စာကုလီန နီစကုလီနသံဝတ္တနကကမ္မာနိ ဝိဘဇိတွာ ပကာသိတာနိ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ သတ္တာနံ မဟာပညဒုပ္ပညသံဝတ္တနကကမ္မာနိ ဝိဘဇိတွာ ပကာသိတာနိ။

ဝိဿဇ္ဇနာ – ဣဓ မာဏဝ ဧကစ္စော ဣတ္ထီ ဝါ ပုရိသော ဝါ သမဏံ ဝါ ဗြာဟ္မဏံ ဝါ ဥပသင်္ကမိတွာ န ပရိပုစ္ဆိတာ ဟောတိ ‘‘ကိံ ဘန္တေ ကုသလံ၊ ကိံ အကုသလံ။ ကိံ သာဝဇ္ဇံ၊ ကိံ အနဝဇ္ဇံ။ ကိံ သေဝိတဗ္ဗံ၊ ကိံ န သေဝိတဗ္ဗံ။ ကိံ မေ ကရီယမာနံ ဒီဃရတ္တံ အဟိတာယ ဒုက္ခာယ ဟောတိ၊ ကိံ ဝါ ပန မေ ကရီယမာနံ ¶ ဒီဃရတ္တံ ဟိတာယ သုခါယ ဟောတီ’’တိ ဧဝမာဒိနာ ဘန္တေ တတ္ထ ဘဂဝတာ သတ္တာနံ မဟာပညဒုပ္ပညသံဝတ္တနကကမ္မာနိ ဝိဘဇိတွာ ပကာသိတာနိ။

ပုစ္ဆာ – ဣန္ဒြိယဘာဝနာသုတ္တံ ¶ ပနာဝုသော ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ဘာသိတံ။

ဝိဿဇ္ဇနာ – ဂဇင်္ဂလာယံ ဘန္တေ ဥတ္တရံ နာမ မာဏဝံ ပါရာသိဝိယန္တေဝါသိံ အာရဗ္ဘ ဘာသိတံ၊ ဥတ္တရော ဘန္တေ မာဏဝေါ ပါရာသိဝိယန္တေဝါသီ ဘဂဝတာ ပုဋ္ဌော ဘဂဝန္တံ ဧတဒဝေါစ ‘‘ဣဓ ဘော ဂေါတမ စက္ခုနာ ရူပံ န ပဿတိ၊ သောတေန သဒ္ဒံ န သုဏာတိ။ ဧဝံ ခေါ ဘော ဂေါတမ ဒေသေတိ ပါရာသိဝိယော ဗြာဟ္မဏော သာဝကာနံ ဣန္ဒြိယဘာဝန’’န္တိ။ တသ္မိံ ဘန္တေ ဝတ္ထုသ္မိံ ဘာသိတံ။