အည > သင်္ဂါယန-ပုစ္ဆ ဝိဿဇ္ဇနာ > အဘိဓမ္မပိဋက (ပု-ဝိ)

ပုစ္ဆာ – ပဌမမဟာသံဂီတိကာလေ ¶ အာဝုသော ဓမ္မသံဂါဟကာ မဟာကဿပါဒယော မဟာထေရဝရာ ပေါရာဏသံဂီတိကာရာ ပဌမံ ဝိနယပိဋကံ သံဂါယိတွာ သုတ္တန္တပိဋကေ စ ဒီဃမဇ္ဈိမသံယုတ္တအင်္ဂုတ္တရသံခါတေ စတ္တာရော မဟာနိကာယေ သံဂါယိတွာ တဒနန္တရံ ကိံ နာမ ပါဝစနံ သံဂါယိံသု။

ဝိဿဇ္ဇနာ – ပဌမမဟာသံဂီတိကာလေ ဘန္တေ ဓမ္မသံဂါဟကာ မဟာကဿပါဒယော မဟာထေရဝရာ ပေါရာဏသံဂီတိကာရာ ပဌမံ ဝိနယပိဋကံ သံဂါယိတွာ သုတ္တန္တပိဋကေ စ ဒီဃမဇ္ဈိမသံယုတ္တအင်္ဂုတ္တရသံခါတေ စတ္တာရော နိကာယေ သံဂါယိတွာ တဒနန္တရံ အဘိဓမ္မပိဋကံ နာမ ပါဝစနံ သံဂါယိံသု။

ပုစ္ဆာ – ဣမိဿမ္ပိ ¶ အာဝုသော ဆဋ္ဌသံဂီတိယံ သကလဉ္စေဝ ဝိနယပိဋကံ သံဂီတံ၊ တေ စ စတ္တာရော မဟာနိကာယာ။ ကာလော ဒါနိ အာဝုသော သမ္ပတ္တော အဘိဓမ္မပိဋကံ သံဂါယိတုံ၊ တသ္မာဟံ တံ တတ္ထ ပုစ္ဆိတဗ္ဗာနိ ပုစ္ဆိဿာမိ။ အဘိဓမ္မော နာမေသ အာဝုသော ကေနဋ္ဌေန အဘိဓမ္မောတိ ဝုစ္စတိ။

ဝိဿဇ္ဇနာ – ဓမ္မာတိရေက ဓမ္မဝိသေသဋ္ဌေန ဘန္တေ အဘိဓမ္မောတိ ဝုစ္စတိ။

ပုစ္ဆာ – သော ¶ ပနေသ အာဝုသော အဘိဓမ္မော ကေန ကတ္ထ ကဒါ စ အဓိဂတော။

ဝိဿဇ္ဇနာ – သော ခေါ ဘန္တေ အဘိဓမ္မော သဗ္ဗညုဗုဒ္ဓေန မဟာဗောဓိမဏ္ဍမူလေ ဝေသာခပုဏ္ဏမိယံ ယထာဘူတံ အဓိဂတော။

ပုစ္ဆာ – ကတ္ထ ပနေသ အာဝုသော အဘိဓမ္မော ဘဂဝတာ ကဒါ စ ဝိစိတော။

ဝိဿဇ္ဇနာ – သော ခေါ ဘန္တေ အဘိဓမ္မော ဘဂဝတာ မဟာဗောဓိမဏ္ဍေ ရတနဃရသတ္တာဟေ ဝိစိတော။

ပုစ္ဆာ – ကတ္ထ ¶ ပနေသ အာဝုသော အဘိဓမ္မော ဘဂဝတာ ကဒါ ကဿတ္ထာယ စ ဒေသိတော။

ဝိဿဇ္ဇနာ – သော ခေါ ဘန္တေ အဘိဓမ္မော ဘဂဝတာ ဒေဝေသု တာဝတိံသေသု ပါရိစ္ဆတ္တကမူလမှိ ပဏ္ဍုကမ္ဗလသိလာယံ အဘိသမ္ဗောဓိတော သတ္တမေ ဝဿေ မာတရံ ပမုခံ ကတွာ ဒသဟိ စက္ကဝါဠသဟဿေဟိ အာဂမ္မ သန္နိသိန္နာနံ ဒေဝတာနံ စတုရောဃနိတ္ထရဏတ္ထာယ အန္တော ဝဿံ ဒေသိတော။

ပုစ္ဆာ – ကေနေသ ¶ အာဝုသော အဘိဓမ္မော ပဌမံ မနုဿလောကေ ပတိဂ္ဂဟိတော၊ ကဿ စ ပုန တေန ဒေသိတော။

ဝိဿဇ္ဇနာ – အာယသ္မတာ ဘန္တေ သာရိပုတ္တတ္ထေရေန ဓမ္မသေနာပတိနာ ဧသ အဘိဓမ္မော ပဌမံ မနုဿလောကေ ပတိဂ္ဂဟိတော၊ တေနေဝ ဘန္တေ အာယသ္မတာ သာရိပုတ္တတ္ထေရေန အတ္တနော သဒ္ဓိဝိဟာရိကာနံ ပဉ္စန္နံ ဘိက္ခုသတာနံ ဒေသိတော။

ပုစ္ဆာ – ကေ ¶ အာဝုသော သိက္ခန္တိ။

ဝိဿဇ္ဇနာ – သေခါ စ ဘန္တေ ပုထုဇ္ဇနာ ကလျာဏကာ စ သိက္ခန္တိ။

ပုစ္ဆာ – ကေ အာဝုသော သိက္ခိတသိက္ခာ။

ဝိဿဇ္ဇနာ – အရဟန္တော ဘန္တေ သိက္ခိတသိက္ခာ။

ပုစ္ဆာ – ကေ ¶ အာဝုသော ဓာရေန္တိ။

ဝိဿဇ္ဇနာ – ယေသံ ဘန္တေ ဝတ္တတိ၊ တေ ဓာရေန္တိ။

ဝိဿဇ္ဇနာ – ဘဂဝတော ဘန္တေ ဝစနံ အရဟတော သမ္မာသမ္ဗုဒ္ဓဿ။

ဝိဿဇ္ဇနာ – ပရံပရာယ ဘန္တေ အာဘတံ။

ပုစ္ဆာ – သော ¶ ပနေသ အာဝုသော အဘိဓမ္မော ဓမ္မသင်္ဂဏိဝိဘင်္ဂါဒိပကရဏပရိစ္ဆေဒဝသေန သတ္တဝိဓော။ တေသု ပဌမံ ဘဂဝတာ ကတရံ ပကရဏံ ဒေသိတံ။

ဝိဿဇ္ဇနာ – ပဌမံ ဘန္တေ ဓမ္မသင်္ဂဏိပကရဏံ ဘဂဝတာ ဒေသိတံ။

ပုစ္ဆာ – ဓမ္မသင်္ဂဏိယံ အာဝုသော အတ္ထိ မာတိကာ၊ အတ္ထိ ပဒဘာဇနီယံ။ တေသု မာတိကံ နိက္ခိပန္တေန ဘဂဝတာ ကတံ နိက္ခိတ္တာ။

ဝိဿဇ္ဇနာ – မာတိကံ ဘန္တေ နိက္ခိပန္တေန ဘဂဝတာ ‘‘ကုသလာ ဓမ္မာ အကုသလာ ဓမ္မာ အဗျာကတာ ဓမ္မာ။ သုခါယ ဝေဒနာယ သမ္ပယုတ္တာ ဓမ္မာ ဒုက္ခာယ ဝေဒနာယ သမ္ပယုတ္တာ ဓမ္မာ အဒုက္ခမသုခါယ ဝေဒနာယ သမ္ပယုတ္တာ ဓမ္မာ။ ဝိပါကာ ဓမ္မာ ဝိပါကဓမ္မဓမ္မာ နေဝဝိပါကနဝိပါကဓမ္မဓမ္မာ’’တိ ဧဝမာဒိနာ ဒွါဝီသတိယာ တိကာနံ ဝသေန။ ‘‘ဟေတူ ဓမ္မာ န ဟေတူ ဓမ္မာ။ သဟေတုကာ ဓမ္မာ အဟေတုကာ ဓမ္မာ။

ဟေတုသမ္ပယုတ္တာ ¶ ဓမ္မာ ဟေတုဝိပ္ပယုတ္တာ ဓမ္မာ။ ဟေတူ စေဝ ဓမ္မာ သဟေတုကာ စ သဟေတုကာ စေဝ ဓမ္မာ န စ ဟေတူ။ ဟေတူ စေဝ ဓမ္မာ ဟေတုသမ္ပယုတ္တာ စ ဟေတုသမ္ပယုတ္တာ စေဝ ဓမ္မာ န စ ဟေတူ။ န ဟေတူ ခေါ ပန ဓမ္မာ သဟေတုကာပိ အဟေတုကာပီ’’တိ ဧဝမာဒိနာ ဒုကသတာနဉ္စ ဝသေန မာတိကာ နိက္ခိတ္တာ။

ပုစ္ဆာ – အဘိဓမ္မပိဋကေ ¶ အာဝုသော ဓမ္မသင်္ဂဏိယံ ပဒဘာဇနီယေ စိတ္တုပ္ပာဒကဏ္ဍေ ကုသလာ ဓမ္မာတိပဒဿ အတ္ထံ ဝိဘဇန္တေန ဘဂဝတာ ကထံ ကာမာဝစရကုသလံ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – အဘိဓမ္မပိဋကေ ဘန္တေ ဓမ္မသင်္ဂဏိပကရဏေ စိတ္တုပ္ပာဒကဏ္ဍေ ကုသလာ ဓမ္မာတိ ပဒဿ အတ္ထံ ဝိဘဇန္တေန ဘဂဝတာ ‘‘ကတမေ ဓမ္မာ ကုသလာ။ ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနဿသဟဂတံ ဉာဏသမ္ပယုတ္တံ ရူပါရမ္မဏံ ဝါ သဒ္ဒါရမ္မဏံ ဝါ ဂန္ဓာရမ္မဏံ ဝါ ရသာရမ္မဏံ ဝါ ဖောဋ္ဌဗ္ဗာရမ္မဏံ ဝါ ဓမ္မာရမ္မဏံ ဝါ ယံ ယံ ဝါ ပနာရဗ္ဘ။ တသ္မိံ သမယေ ဖဿော ဟောတိ ဝေဒနာ ဟောတိ သညာ ဟောတိ စေတနာ ဟောတိ စိတ္တံ ဟောတိ ဝိတက္ကော ဟောတိ ဝိစာရော ဟောတိ ပီတိ ဟောတိ သုခံ ဟောတိ စိတ္တဿေကဂ္ဂတာ ဟောတီ’’တိ ဧဝမာဒိနာ ကာမာဝစရကုသလံ တီဟိ မဟာဝါရေဟိ ဝိဘဇိတွာ ဒေသိတံ။

ပုစ္ဆာ – အဘိဓမ္မပိဋကေ ¶ အာဝုသော ဓမ္မသင်္ဂဏီပါဠိယံ စိတ္တုပ္ပာဒကဏ္ဍေ ကုသလာ ဓမ္မာတိ ပဒဿ အတ္ထံ ဝိဘဇန္တေန ဘဂဝတာ ကထံ ရူပါဝစရကုသလဉ္စ အရူပါဝစရကုသလဉ္စ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – ရူပါဝစရကုသလဉ္စ အရူပါဝစရကုသလဉ္စ ဘန္တေ ‘‘ကတမေ ဓမ္မာ ကုသလာ။ ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိဝိစ္စေဝ ကာမေဟိ ဝိဝိစ္စ အကုသလေဟိ ဓမ္မေဟိ သဝိတက္ကံ သဝိတက္ကံ ဝိဝေကဇံ ပီတိသုခံ ပဌမံ ဈာနံ ဥပသမ္ပဇ္ဇ ဝိဟရတိ ပထဝီကသိဏ’’န္တိ ဧဝမာဒိနာ ဘဂဝတာ ဝိတ္ထာရတော ဒေသိတံ။

ပုစ္ဆာ – အဘိဓမ္မပိဋကေ ¶ အာဝုသော ဓမ္မသင်္ဂဏီပါဠိယံ စိတ္တုပ္ပာဒကဏ္ဍေ ကုသလာ ဓမ္မာတိ ပဒဿ အတ္ထံ ဝိဘဇန္တေန ဘဂဝတာ ကထံ လောကုတ္တရကုသလံ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – အဘိဓမ္မပိဋကေ ဘန္တေ ဓမ္မသင်္ဂဏိယံ စိတ္တုပ္ပာဒကဏ္ဍေ ကုသလာ ဓမ္မာတိ ပဒဿ အတ္ထံ ဝိဘဇန္တေန ဘဂဝတာ ‘‘ကတမေ ဓမ္မာ ကုသလာ။ ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ ဝိဝိစ္စေဝ ကာမေဟိ…ပေ… ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိည’’န္တိ ဧဝမာဒိနာ ဘဂဝတာ လောကုတ္တရကုသလံ ဝိတ္ထာရတော ဝိဘဇိတွာ ဒေသိတံ။

ပုစ္ဆာ – တတ္ထေဝ ¶ အာဝုသော အကုသလာ ဓမ္မာတိ မာတိကာပဒဿ အတ္ထံ ဝိဘဇန္တေန ဘဂဝတာ ကထံ အကုသလံ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – တတ္ထေဝ ဘန္တေ အကုသလာ ဓမ္မာတိ မာတိကာပဒဿ အတ္ထံ ဝိဘဇန္တေန ဘဂဝတာ ‘‘ကတမေ ဓမ္မာ အကုသလာ။ ယသ္မိံ သမယေ အကုသလံ စိတ္တံ ဥပ္ပန္နံ ဟောတိ သောမနဿသဟဂတံ ဒိဋ္ဌိဂတသမ္ပယုတ္တံ ရူပါရမ္မဏံ ဝါ သဒ္ဓါရမ္မဏံ ဝါ ဂန္ဓာရမ္မဏံ ဝါ ရသာရမ္မဏံ ဝါ ဖောဋ္ဌဗ္ဗာရမ္မဏံ ဝါ ဓမ္မာရမ္မဏံ ဝါ ယံ ယံ ဝါ ပနာရဗ္ဘ။ တသ္မိံ သမယေ ဖဿော ဟောတိ ဝေဒနာ ဟောတိ သညာ ဟောတိ စေတနာ ဟောတိ စိတ္တံ ဟောတီ’’တိ ဧဝမာဒိနာ အကုသလံ ဝိတ္ထာရတော ဝိဘဇိတွာ ဒေသိတံ။

ပုစ္ဆာ – အဘိဓမ္မပိဋကေ အာဝုသော ဓမ္မသင်္ဂဏီပါဠိယံ စိတ္တုပ္ပာဒကဏ္ဍရူပကဏ္ဍေသု အဗျာကတာ ဓမ္မာတိ မာတိကာပဒဿ အတ္ထံ ဝိဘဇန္တေန ¶ ဘဂဝတာ ကထံ အဗျာကတာ ဓမ္မာ ဝိတ္ထာရတော ဝိဘဇိတွာ ဒေသိတာ။

ဝိဿဇ္ဇနာ – အဘိဓမ္မပိဋကေ ဘန္တေ ဓမ္မသင်္ဂဏိယံ အဗျာကတာ ဓမ္မာတိ ပဒဿ အတ္ထံ ဝိဘဇန္တေန ဘဂဝတာ ‘‘ကတမေ ဓမ္မာ အဗျာကတာ။ ယသ္မိံ သမယေ ကာမာဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ စက္ခုဝိညာဏံ ဥပ္ပန္နံ ဟောတိ ဥပေက္ခာသဟဂတံ ရူပါရမ္မဏံ။ တသ္မိံ သမယေ ဖဿော ဟောတိ ဝေဒနာ ဟောတိ သညာ ဟောတိ စေတနာ ဟောတိ စိတ္တံ ဟောတီ’’တိ ဧဝမာဒိနာ စ စိတ္တုပ္ပာဒကဏ္ဍေ၊ ရူပကဏ္ဍေ စ ‘‘ကတမေ ဓမ္မာ အဗျာကတာ။ ကုသလာကုသလာနံ ဓမ္မာနံ ဝိပါကာ ကာမာဝစရာ ရူပါဝစရာ အရူပါဝစရာ အပရိယာပန္နာ ဝေဒနာက္ခန္ဓော သညာက္ခန္ဓော သင်္ခါရက္ခန္ဓော ဝိညာဏက္ခန္ဓော။ ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ။ သဗ္ဗဉ္စ ရူပံ အသင်္ခတာ စ ဓာတု။ ဣမေ ဓမ္မာ အဗျာကတာ’’တိ ဧဝမာဒိနာ စ အဗျာကတာ ဓမ္မာ ဝိတ္ထာရတော ဝိဘဇိတွာ ဒေသိတာ။

ပုစ္ဆာ – သတ္တသု ¶ အာဝုသော အဘိဓမ္မပ္ပကရဏေသု ဝိဘင်္ဂပ္ပကရဏေ ဘဂဝတာ ကတိ ဝိဘင်္ဂါ ဒေသိတာ။

ဝိဿဇ္ဇနာ – အဘိဓမ္မပိဋကေ ဘန္တေ သတ္တသု ပကရဏေသု ဒုတိယေ ဝိဘင်္ဂပ္ပကရဏေ ခန္ဓဝိဘင်္ဂေါ အာယတနဝိဘင်္ဂေါ ဓာတုဝိဘင်္ဂေါ သစ္စဝိဘင်္ဂေါ ဣန္ဒြိယဝိဘင်္ဂေါ ပဋိစ္စသမုပ္ပာဒဝိဘင်္ဂေါ သတိပဋ္ဌာနဝိဘင်္ဂေါ သမ္မပ္ပဓာနဝိဘင်္ဂေါ ဣဒ္ဓိပါဒဝိဘင်္ဂေါ ဗောဇ္ဈင်္ဂဝိဘင်္ဂေါ မဂ္ဂင်္ဂဝိဘင်္ဂေါ ဈာနဝိဘင်္ဂေါ အပ္ပမညာဝိဘင်္ဂေါ သိက္ခာပဒဝိဘင်္ဂေါ ပဋိသမ္ဘိဒါဝိဘင်္ဂေါ ဉာဏဝိဘင်္ဂေါ ခုဒ္ဒကဝတ္ထုဝိဘင်္ဂေါ ဓမ္မဟဒယဝိဘင်္ဂေါတိ ဘဂဝတာ အဋ္ဌာရသ ဝိဘင်္ဂါ ဒေသိတာ။

ပုစ္ဆာ – တေသု အာဝုသော အဋ္ဌာရသသု ဝိဘင်္ဂေသု ပဌမေ ခန္ဓဝိဘင်္ဂေ ဘဂဝတာ ကထံ ခန္ဓာ ဝိတ္ထာရတော ဝိဘဇိတွာ ဒေသိတာ။

ဝိဿဇ္ဇနာ – တေသု ¶ ဘန္တေ အဋ္ဌာရသသု ဝိဘင်္ဂေသု ပဌမေ ခန္ဓဝိဘင်္ဂေ ‘‘ပဉ္စက္ခန္ဓာ ရူပက္ခန္ဓော ဝေဒနာက္ခန္ဓော သညာက္ခန္ဓော သင်္ခါရက္ခန္ဓော ဝိညာဏက္ခန္ဓော။ တတ္ထ ကတမော ရူပက္ခန္ဓော၊ ယံကိဉ္စိ ရူပံ အတီတာနာဂတပစ္စုပ္ပန္နံ အဇ္ဈတ္တံ ဝါ ဗဟိဒ္ဓါ ဝါ ဩဠာရိကံ ဝါ သုခုမံ ဝါ ဟီနံ ဝါ ပဏီတံ ဝါ ယံ ဒူရေ သန္တိကေ ဝါ၊ တဒေကဇ္ဈံ အဘိသညူဟိတွာ အဘိသင်္ခိပိတွာ အယံ ဝုစ္စတိ ရူပက္ခန္ဓော’’တိ ဧဝမာဒိနာ သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟိ မဟာနယေဟိ ဘဂဝတာ ခန္ဓာ ဝိတ္ထာရတော ဝိဘဇိတွာ ဒေသိတာ။

ပုစ္ဆာ – ဒုတိယေ ¶ ပန အာဝုသော အာယတနဝိဘင်္ဂေ ဘဂဝတာ ကထံ အာယတနာနိ ဝိတ္ထာရတော ဝိဘဇိတွာ ဒေသိတာနိ။

ဝိဿဇ္ဇနာ – ဒုတိယေ ဘန္တေ အာယတနဝိဘင်္ဂေ ‘‘ဒွါဒသာယတနာနိ စက္ခာယတနံ ရူပါယတနံ သောတာယတနံ သဒ္ဒါယတနံ ဃာနာယတနံ ဂန္ဓာယတနံ ဇိဝှာယတနံ ရသာယတနံ ကာယာယတနံ ဖောဋ္ဌဗ္ဗာယတနံ မနာယတနံ ဓမ္မာယတနံ။ စက္ခုံ အနိစ္စံ ဒုက္ခံ အနတ္တာ ဝိပရိဏာမဓမ္မံ၊ ရူပါ အနိစ္စာ ဒုက္ခာ အနတ္တာ ဝိပရိဏာမဓမ္မာ’’တိ ဧဝမာဒိနာ ဘဂဝတာ သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟေဝ အာယတနာနိ ဝိတ္ထာရတော ဝိဘဇိတွာ ဒေသိတာနိ။

ပုစ္ဆာ – အဘိဓမ္မပိဋကေ ¶ အာဝုသော ဝိဘင်္ဂပ္ပကရဏေ တတိယေ ဓာတုဝိဘင်္ဂေ ဘဂဝတာ ကထံ ဓာတုယော ဝိတ္ထာရေန ဝိဘဇိတွာ ဒေသိတာ။

ဝိဿဇ္ဇနာ – တတိယေ ဘန္တေ ဓာတုဝိဘင်္ဂေ ‘‘ဆ ဓာတုယော ပထဝီဓာတု အာပေါဓာတု တေဇောဓာတု ဝါယောဓာတု အာကာသဓာတု ဝိညာဏဓာတူ’’တိ ဘန္တေ သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟိ မဟာနယေဟိ ဘဂဝတာ ဓာတုယော ဝိတ္ထာရတော ဝိဘဇိတွာ ဒေသိတာ။

ပုစ္ဆာ – စတုတ္ထေ ¶ ပန အာဝုသော သစ္စဝိဘင်္ဂေ ဘဂဝတာ ကထံ သစ္စာနိ ဝိတ္ထာရတော ဝိဘဇိတွာ ဒေသိတာနိ။

ဝိဿဇ္ဇနာ – စတုတ္ထေ ဘန္တေ သစ္စဝိဘင်္ဂေ ‘‘စတ္တာရိ အရိယသစ္စာနိ ဒုက္ခံ အရိယသစ္စံ၊ ဒုက္ခသမုဒယံ အရိယသစ္စံ၊ ဒုက္ခနိရောဓံ အရိယသစ္စံ၊ ဒုက္ခနိရောဓဂါမိနီ ပဋိပဒါ အရိယသစ္စံ။ တတ္ထ ကတမံ ဒုက္ခံ အရိယသစ္စံ၊ ဇာတိပိ ဒုက္ခာ၊ ဇရာပိ ဒုက္ခာ၊ မရဏမ္ပိ ဒုက္ခံ၊ သောကပရိဒေဝဒုက္ခဒေါမနဿုပါယာသာပိ ဒုက္ခာ၊ အပ္ပိယေဟိ သမ္ပယောဂေါ ဒုက္ခော၊ ပိယေဟိ ဝိပ္ပယောဂေါ ဒုက္ခော၊ ယမ္ပိစ္ဆံ န လဘတိ၊ တမ္ပိ ဒုက္ခံ၊ သံခိတ္တေန ပဉ္စုပါဒါနက္ခန္ဓာ ဒုက္ခာ’’တိ ဧဝမာဒိနာ သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟိ မဟာနယေဟိ ဘဂဝတာ သစ္စာနိ ဝိတ္ထာရတော ဝိဘဇိတွာ ဒေသိတာနိ။

ပုစ္ဆာ – ပဉ္စမေ ¶ ပန အာဝုသော ဣန္ဒြိယဝိဘင်္ဂေ ဘဂဝတာ ကထံ ဣန္ဒြိယာနိ ဝိတ္ထာရတော ဝိဘဇိတွာ ဒေသိတာနိ။

ဝိဿဇ္ဇနာ – ပဉ္စမေ ပန ဘန္တေ ဣန္ဒြိယဝိဘင်္ဂေ ‘‘ဗာဝီသတိန္ဒြိယာနိ စက္ခုန္ဒြိယံ သောတိန္ဒြိယံ ဃာနိန္ဒြိယံ ဇိဝှိန္ဒြိယံ ကာယိန္ဒြိယံ မနိန္ဒြိယံ…ပေ… အညာတာဝိန္ဒြိယ’’န္တိ ဧဝမာဒိနာ အဘိဓမ္မဘာဇနီယပဉှာပုစ္ဆကသင်္ခါတေဟိ ဒွီဟိ မဟာနယေဟိ ဘဂဝတာ ဣန္ဒြိယာနိ ဝိတ္ထာရတော ဝိဘဇိတွာ ဒေသိတာနိ။

ပုစ္ဆာ – အဘိဓမ္မပိဋကေ ¶ အာဝုသော ဝိဘင်္ဂပ္ပကရဏေ ဆဋ္ဌေ ပဋိစ္စသမုပ္ပာဒဝိဘင်္ဂေ ဘဂဝတာ ကထံ ပဋိစ္စသမုပ္ပာဒေါ ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – ဆဋ္ဌေ ဘန္တေ ပဋိစ္စသမုပ္ပာဒဝိဘင်္ဂေ ‘‘အဝိဇ္ဇာပစ္စယာ သင်္ခါရာ…ပေ… သမုဒယော ဟောတီ’’တိ ဧဝမာဒိနာ ဘဂဝတာ ပဋိစ္စသမုပ္ပာဒေါ သုတ္တန္တဘာဇနီယအဘိဓမ္မဘာဇနီယသင်္ခါတေဟိ ဒွီဟိ မဟာနယေဟိ ဝိတ္ထာရတော ဝိဘဇိတွာ ဒေသိတော။

ပုစ္ဆာ – သတ္တမေ ¶ ပန အာဝုသော သတိပဋ္ဌာနဝိဘင်္ဂေ ဘဂဝတာ ကထံ သတိပဋ္ဌာနာ ဝိတ္ထာရတော ဝိဘဇိတွာ ဒေသိတာ။

ဝိဿဇ္ဇနာ – သတ္တမေ ဘန္တေ သတိပဋ္ဌာနဝိဘင်္ဂေ ‘‘စတ္တာရော သတိပဋ္ဌာနာ ဣဓ ဘိက္ခု အဇ္ဈတ္တံ ကာယေ ကာယာနုပဿီ ဝိဟရတိ၊ ဗဟိဒ္ဓါ ကာယေ ကာယာနုပဿီ ဝိဟရတိ၊ အဇ္ဈတ္တဗဟိဒ္ဓါ ကာယေ ကာယာနုပဿီ ဝိဟရတိ အာတာပီ သမ္ပဇာနော သတိမာ ဝိနေယျ လောကေ အဘိဇ္ဈာဒေါမနဿ’’န္တိ ဧဝမာဒိနာ သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟိ မဟာနယေဟိ ဘဂဝတာ သတိပဋ္ဌာနာ ဝိတ္ထာရတော ဝိဘဇိတွာ ဒေသိတာ။

ပုစ္ဆာ – အဋ္ဌမေ ¶ ပန အာဝုသော သမ္မပ္ပဓာနဝိဘင်္ဂေ ဘဂဝတာ ကထံ သမ္မပ္ပဓာနာ ဝိတ္ထာရတော ဝိဘဇိတွာ ဒေသိတာ။

ဝိဿဇ္ဇနာ – အဋ္ဌမေ ဘန္တေ သမ္မပ္ပဓာနဝိဘင်္ဂေ ‘‘စတ္တာရော သမ္မပ္ပဓာနာ ဣဓ ဘိက္ခု အနုပ္ပန္နာနံ ပါပကာနံ အကုသလာနံ ဓမ္မာနံ အနုပ္ပာဒါယ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ၊ ဥပ္ပန္နာနံ ပါပကာနံ အကုသလာနံ ဓမ္မာနံ ပဟာနာယ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ၊ အနုပ္ပန္နာနံ ကုသလာနံ ဓမ္မာနံ ဥပ္ပာဒါယ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ၊ ဥပ္ပန္နာနံ ကုသလာနံ ဓမ္မာနံ ဌိတိယာ အသမ္မောသာယ ဘိယျောဘာဝါယ ဝေပုလ္လာယ ဘာဝနာယ ပါရိပူရိယာ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတီ’’တိ ဧဝမာဒိနာ ဘဂဝတာ သမ္မပ္ပဓာနာ ဝိတ္ထာရတော ဝိဘဇိတွာ ဒေသိတာ။

ပုစ္ဆာ – နဝမေ ¶ ပန အာဝုသော ဣဒ္ဓိပါဒဝိဘင်္ဂေ ဘဂဝတာ ကထံ ဣဒ္ဓိပါဒါ ဝိတ္ထာရတော ဝိဘဇိတွာ ဒေသိတာ။

ဝိဿဇ္ဇနာ – နဝမေ ဘန္တေ ဣဒ္ဓိပါဒဝိဘင်္ဂေ ‘‘စတ္တာရော ဣဒ္ဓိပါဒါ ဣဓ ဘိက္ခု ဆန္ဒသမာဓိပဓာနသင်္ခါရသမန္နာဂတံ ဣဒ္ဓိပါဒံ ဘာဝေတိ…ပေ… ဝီမံသာသမာဓိပဓာနသင်္ခါရသမန္နာဂတံ ဣဒ္ဓိပါဒံ ဘာဝေတီ’’တိ ဧဝမာဒိနာ တီဟိ မဟာနယေဟိ ဘဂဝတာ ဣဒ္ဓိပါဒါ ဝိတ္ထာရတော ဝိဘဇိတွာ ဒေသိတာ။

ပုစ္ဆာ – အဘိဓမ္မပိဋကေ ¶ အာဝုသော ဝိဘင်္ဂပ္ပကရဏေ ဒသမေ ဗောဇ္ဈင်္ဂဝိဘင်္ဂေ ဘဂဝတာ ကထံ ဗောဇ္ဈင်္ဂါ ဝိတ္ထာရတော ဝိဘဇိတွာ ဒေသိတာ။

ဝိဿဇ္ဇနာ – ဒသမေ ဘန္တေ ဗောဇ္ဈင်္ဂဝိဘင်္ဂေ ‘‘သတ္တ ဗောဇ္ဈင်္ဂါ သတိသမ္ဗောဇ္ဈင်္ဂေါ ဓမ္မဝိစယသမ္ဗောဇ္ဈင်္ဂေါ ဝီရိယသမ္ဗောဇ္ဈင်္ဂေါ ပီတိသမ္ဗောဇ္ဈင်္ဂေါ ပဿဒ္ဓိသမ္ဗောဇ္ဈင်္ဂေါ သမာဓိသမ္ဗောဇ္ဈင်္ဂေါ ဥပေက္ခာသမ္ဗောဇ္ဈင်္ဂေါ။ တတ္ထ ကတမော သတိသမ္ဗောဇ္ဈင်္ဂေါ၊ ဣဓ ဘိက္ခု သတိမာ ဟောတိ ပရမေန သတိနေပက္ကေန သမန္နာဂတော စိရကတမ္ပိ စိရဘာသိတမ္ပိ သရိတာ ဟောတိ အနုဿရိတာ၊ အယံ ဝုစ္စတိ သတိသမ္ဗောဇ္ဈင်္ဂေါ’’တိ ဧဝမာဒိနာ ဘဂဝတာ သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟိ နယေဟိ ဗောဇ္ဈင်္ဂါ ဝိတ္ထာရတော ဝိဘဇိတွာ ဒေသိတာ။

ပုစ္ဆာ – ဧကာဒသမေ ¶ ပန အာဝုသော မဂ္ဂင်္ဂဝိဘင်္ဂေ ဘဂဝတာ ကထံ မဂ္ဂင်္ဂါ ဝိတ္ထာရတော ဝိဘဇိတွာ ဒေသိတာ။

ဝိဿဇ္ဇနာ – ဧကာဒသမေ ¶ ဘန္တေ မဂ္ဂင်္ဂဝိဘင်္ဂေ ‘‘အရိယော အဋ္ဌင်္ဂိကော မဂ္ဂေါ။ သေယျထိဒံ၊ သမ္မာဒိဋ္ဌိ သမ္မာသင်္ကပ္ပော သမ္မာဝါစာ သမ္မာကမ္မန္တော သမ္မာအာဇီဝေါ သမ္မာဝါယာမော သမ္မာသတိ သမ္မာသမာဓီ’’တိ ဧဝမာဒိနာ ဘဂဝတာ သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟိ မဟာနယေဟိ မဂ္ဂင်္ဂါ ဝိတ္ထာရတော ဝိဘဇိတွာ ဒေသိတာ။

ပုစ္ဆာ – ဒွါဒသမော ¶ ပန အာဝုသော ဈာနဝိဘင်္ဂေါ ဘဂဝတာ ကထံ ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – ဒွါဒသမော ဘန္တေ ဈာနဝိဘင်္ဂေါ ‘‘ဣဓ ဘိက္ခု ပါတိမောက္ခသံဝရသံဝုတော ဝိဟရတိ အာစာရဂေါစရသမ္ပန္နော အဏုမတ္တေသု ဝဇ္ဇေသု ဘယဒဿာဝီ သမာဒါယ သိက္ခတိ သိက္ခာပဒေသု ဣန္ဒြိယေသု ဂုတ္တဒွါရော ဘောဇနေ မတ္တညူ ပုဗ္ဗရတ္တာပရရတ္တံ ဇာဂရိယာနုယောဂမနုယုတ္တော’’တိ ဧဝမာဒိနာ ဘဂဝတာ ဝိတ္ထာရတော ဝိဘဇိတွာ ဒေသိတော။

ပုစ္ဆာ – တေရသမေ ¶ ပန အာဝုသော အပ္ပမညာဝိဘင်္ဂေ ဘဂဝတာ ကထံ အပ္ပမညာယော ဝိတ္ထာရတော ဝိဘဇိတွာ ဒေသိတာ။

ဝိဿဇ္ဇနာ – တေရသမေ ဘန္တေ အပ္ပမညာဝိဘင်္ဂေ ‘‘စတဿော အပ္ပမညာယော ဣဓ ဘိက္ခု မေတ္တာသဟဂတေန စေတသာ ဧကံ ဒိသံ ဖရိတွာ ဝိဟရတိ၊ တထာ ဒုတိယံ။ တထာ တတိယံ။ တထာ စတုတ္ထံ။ ဣတိ ဥဒ္ဓမဓော တိရိယံ သဗ္ဗဓိ သဗ္ဗတ္တတာယ သဗ္ဗာဝန္တံ လောကံ မေတ္တာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန ဖရိတွာ ဝိဟရတီ’’တိ ဧဝမာဒိနာ ဘဂဝတာ သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ တီဟိ မဟာနယေဟိ အပ္ပမညာယော ဝိတ္ထာရတော ဝိဘဇိတွာ ဒေသိတာ။

ပုစ္ဆာ – အဘိဓမ္မပိဋကေ ¶ အာဝုသော ဝိဘင်္ဂပ္ပကရဏေ စုဒ္ဒသမေ သိက္ခာပဒဝိဘင်္ဂေ ဘဂဝတာ ကထံ သိက္ခာပဒါနိ ဝိတ္ထာရတော ဝိဘဇိတွာ ဒေသိတာနိ။

ဝိဿဇ္ဇနာ – စုဒ္ဒသမေ ဘန္တေ သိက္ခာပဒဝိဘင်္ဂေ ‘‘ပဉ္စ သိက္ခာပဒါနိ ပါဏာတိပါတာ ဝေရမဏီ သိက္ခာပဒံ၊ အဒိန္နာဒါနာ ဝေရမဏီ သိက္ခာပဒံ၊ ကာမေသုမိစ္ဆာစာရာ ဝေရမဏီ သိက္ခာပဒံ၊ မုသာဝါဒါ ဝေရမဏီ သိက္ခာပဒံ၊ သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ။ တတ္ထ ကတမံ ပါဏာတိပါတာ ဝေရမဏီ သိက္ခာပဒံ၊ ယသ္မိံ သမယေ ကာမာဝစရံ ကုသလံ စိတ္တံ ဥပ္ပန္နံ ဟောတိ သောမနဿသဟဂတံ ဉာဏသမ္ပယုတ္တံ ပါဏာတိပါတာ ဝိရမန္တဿာ’’တိ ဧဝမာဒိနာ အဘိဓမ္မဘာဇနီယပဉှာပုစ္ဆကသင်္ခါတေဟိ ဒွီဟိ မဟာနယေဟိ ဘဂဝတာ သိက္ခာပဒါနိ ဝိတ္ထာရတော ဝိဘဇိတွာ ဒေသိတာနိ။

ပုစ္ဆာ – ပန္နရသမေ ¶ ပန အာဝုသော ပဋိသမ္ဘိဒါဝိဘင်္ဂေ ဘဂဝတာ ကထံ ပဋိသမ္ဘိဒါယော ဝိတ္ထာရတော ဝိဘဇိတွာ ဒေသိတာ။

ဝိဿဇ္ဇနာ – ပန္နရသမေ ဘန္တေ ပဋိသမ္ဘိဒါဝိဘင်္ဂေ ‘‘စတဿော ပဋိသမ္ဘိဒါ အတ္ထပဋိသမ္ဘိဒါ ဓမ္မပဋိသမ္ဘိဒါ နိရုတ္တိပဋိသမ္ဘိဒါ ပဋိဘာနပဋိသမ္ဘိဒါ။ အတ္ထေ ဉာဏံ အတ္ထပဋိသမ္ဘိဒါ၊ ဓမ္မေ ဉာဏံ ဓမ္မပဋိသမ္ဘိဒါ၊ တတြ ဓမ္မနိရုတ္တာဘိလာပေ ဉာဏံ နိရုတ္တိပဋိသမ္ဘိဒါ၊ ဉာဏေသု ဉာဏံ ပဋိဘာနပဋိသမ္ဘိဒါ’’တိ ဧဝမာဒိနာ ဘဂဝတာ စတဿော ပဋိသမ္ဘိဒါယော သုတ္တန္တဘာဇနီယအဘိဓမ္မဘာဇနီယပဉှာပုစ္ဆကသင်္ခါတေဟိ ¶ တီဟိ မဟာနယေဟိ ဝိတ္ထာရတော ဝိဘဇိတွာ ဒေသိတာ။

ပုစ္ဆာ – သောဠသမေ ပန အာဝုသော ဉာဏဝိဘင်္ဂေ ဘဂဝတာ ကထံ ဉာဏာနိ ဝိတ္ထာရတော ဝိဘဇိတွာ ဒေသိတာနိ။

ဝိဿဇ္ဇနာ – သောဠသမေ ဘန္တေ ဉာဏဝိဘင်္ဂေ ‘‘ဧကဝိဓေန ဉာဏဝတ္ထု ပဉ္စဝိညာဏာ န ဟေတူ၊ အဟေတုကာ၊ ဟေတုဝိပ္ပယုတ္တာ၊ သပ္ပစ္စယာ ¶ ၊ သင်္ခတာ၊ အရူပါ၊ လောကိယာ၊ သာသဝါ’’တိ ဧဝမာဒိနာ ဧကကတော ပဋ္ဌာယ ယာဝ ဒသကာ ဘဂဝတာ ဉာဏာနိ ဝိတ္ထာရတော ဝိဘဇိတွာ ဒေသိတာနိ။

ပုစ္ဆာ – အဘိဓမ္မပိဋကေ အာဝုသော ဝိဘင်္ဂပ္ပကရဏေ သတ္တရသမော ခုဒ္ဒကဝတ္ထုဝိဘင်္ဂေါ ဘဂဝတာ ကထံ ဒေသိတော။

ဝိဿဇ္ဇနာ – အဘိဓမ္မပိဋကေ ဘန္တေ ဒုတိယေ ဝိဘင်္ဂပ္ပကရဏေ သတ္တရသမော ခုဒ္ဒကဝတ္ထုဝိဘင်္ဂေါ ‘‘ဇာတိမဒေါ၊ ဂေါတ္တမဒေါ၊ အာရောဂျမဒေါ၊ ယောဗ္ဗနမဒေါ၊ ဇီဝိတမဒေါ’’တိ ဧဝမာဒိနာ ဧကကတော ပဋ္ဌာယ ယာဝ အဋ္ဌသတတဏှာဝိစရိတံ ဘဂဝတာ ဝိတ္ထာရတော ဝိဘဇိတွာ ဒေသိတော။

ပုစ္ဆာ – တတ္ထ ¶ အာဝုသော အဋ္ဌာရသမော ဓမ္မဟဒယဝိဘင်္ဂေါ ဘဂဝတာ ကထံ ဝိဘဇိတွာ ဒေသိတော။

ဝိဿဇ္ဇနာ – အဋ္ဌာရသမော ¶ ဘန္တေ ဓမ္မဟဒယဝိဘင်္ဂေါ ‘‘ကတိ ခန္ဓာ၊ ကတိ အာယတနာနိ၊ ကတိ ဓာတုယော၊ ကတိ သစ္စာနိ၊ ကတိ ဣန္ဒြိယာနိ၊ ကတိ ဟေတူ၊ ကတိ အာဟာရာ၊ ကတိ ဖဿာ၊ ကတိ ဝေဒနာ၊ ကတိ သညာ၊ ကတိ စေတနာ၊ ကတိ စိတ္တာနိ။ ပဉ္စက္ခန္ဓာ၊ ဒွါဒသာယတနာနိ၊ အဋ္ဌာရသ ဓာတုယော၊ စတ္တာရိ သစ္စာနိ၊ ဗာဝီသတိန္ဒြိယာနိ၊ နဝ ဟေတူ၊ စတ္တာရော အာဟာရာ၊ သတ္တ ဖဿာ၊ သတ္တ ဝေဒနာ၊ သတ္တ သညာ၊ သတ္တ စေတနာ၊ သတ္တ စိတ္တာနီ’’တိ ဧဝမာဒိနာ သဗ္ဗသင်္ဂါဟကာဒီဟိ ဒသဟိ ဝါရေဟိ ဘဂဝတာ ဝိတ္ထာရေန ဝိဘဇိတွာ ဒေသိတော။

ပုစ္ဆာ – ကထဉ္စာဝုသော တတ္ထ ဘဂဝတာ ဥပ္ပာဒကကမ္မအာယုပ္ပမာဏဝါရော ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ ကတ္ထ ဥပပဇ္ဇန္တိ။ ဒါနံ ဒတွာ၊ သီလံ သမာဒိယိတွာ ဥပေါသထကမ္မံ ကတွာ ¶ အပ္ပေကစ္စေ ခတ္တိယမဟာသာလာနံ သဟဗျတံ ဥပပဇ္ဇန္တိ၊ အပ္ပေကစ္စေ ဗြာဟ္မဏမဟာသာလာနံ၊ အပ္ပေကစ္စေ ဂဟပတိမဟာသာလာနံ၊ အပ္ပေကစ္စေ စာတုမဟာရာဇိကာနံ ဒေဝါနံ၊ အပ္ပေကစ္စေ တာဝတိံသာနံ ဒေဝါနံ၊ အပ္ပေကစ္စေ ယာမာနံ ဒေဝါနံ၊ အပ္ပေကစ္စေ တုသိတာနံ ဒေဝါနံ သဟဗျတံ ဥပပဇ္ဇန္တီတိ ဧဝမာဒိနာ ဘန္တေ တတ္ထ ဘဂဝတာ ဥပ္ပာဒကကမ္မအာယုပ္ပမာဏဝါရော ဝိတ္ထာရေန ဝိဘဇိတွာ ဒေသိတော။

ဥက္ခိတ္တာ ¶ ပုညတေဇေန၊ ကာမရူပဂတိံ ဂတာ၊

ဘဝဂ္ဂတမ္ပိ သမ္ပတ္တာ၊ ပုနာဂစ္ဆန္တိ ဒုဂ္ဂတိံ –

ပုစ္ဆာ – တေနာဝုသော ¶ ဘဂဝတာ အဋ္ဌာရသဟိ ဗုဒ္ဓဓမ္မေဟိ သမန္နာဂတေန အဘိဓမ္မေ အဋ္ဌာရသဟိ ဝိဘင်္ဂေဟိ ပဋိမဏ္ဍိတံ ဒုတိယံ ဝိဘင်္ဂပ္ပကရဏံ ဒေသေတွာ တဒနန္တရံ ဓာတုကထံ နာမ တတိယံ ပကရဏံ ကထံ ဝိဘဇိတွာ ဒေသိတံ။

ဝိဿဇ္ဇနာ – တတိယံ ဘန္တေ ဓာတုကထံ နာမ အဘိဓမ္မပိဋကံ ‘‘သင်္ဂဟော အသင်္ဂဟော၊ သင်္ဂဟိတေန အသင်္ဂဟိတံ၊ အသင်္ဂဟိတေန သင်္ဂဟိတံ၊ သင်္ဂဟိတေန သင်္ဂဟိတံ၊ အသင်္ဂဟိတေန အသင်္ဂဟိတံ။ သမ္ပယောဂေါ ဝိပ္ပယောဂေါ၊ သမ္ပယုတ္တေန ဝိပ္ပယုတ္တံ၊ ဝိပ္ပယုတ္တေန သမ္ပယုတ္တံ၊ သမ္ပယုတ္တေန သမ္ပယုတ္တံ၊ ဝိပ္ပယုတ္တေန ဝိပ္ပယုတ္တံ။ သင်္ဂဟိတေန သမ္ပယုတ္တံ ဝိပ္ပယုတ္တံ၊ သမ္ပယုတ္တေန သင်္ဂဟိတံ အသင်္ဂဟိတံ၊ အသင်္ဂဟိတေန သမ္ပယုတ္တံ ဝိပ္ပယုတ္တံ၊ ဝိပ္ပယုတ္တေန သင်္ဂဟိတံ အသင်္ဂဟိတ’’န္တိ ဧဝမာဒိနာ ပဉ္စ မာတိကာယော ပဌမံ နိက္ခိပိတွာ သင်္ဂဟာသင်္ဂဟာဒီဟိ စုဒ္ဒသဟိ နယေဟိ ဘဂဝတာ ဝိတ္ထာရတော ဝိဘဇိတွာ ဒေသိတံ။

ပုစ္ဆာ – တေနာဝုသော ¶ ဘဂဝတာ သဗ္ဗဓာတုကုသလေန အဘိဓမ္မပိဋကေ တတိယံ ဓာတုကထာပကရဏံ ဒေသေတွာ တဒနန္တရံ စတုတ္ထံ ပုဂ္ဂလပညတ္တိပ္ပကရဏံ ကထံ ဝိဘဇိတွာ ဒေသိတံ။

ဝိဿဇ္ဇနာ – အဘိဓမ္မပိဋကေ ဘန္တေ စတုတ္ထံ ပုဂ္ဂလပညတ္တိပ္ပကရဏံ ‘‘ဆ ပညတ္တိယော ခန္ဓပညတ္တိ အာယတနပညတ္တိ ဓာတုပညတ္တိ သစ္စပညတ္တိ ဣန္ဒြိယပညတ္တိ ပုဂ္ဂလပညတ္တိ။ ကိတ္တာဝတာ ခန္ဓာနံ ခန္ဓပညတ္တိ၊ ယာဝတာ ပဉ္စက္ခန္ဓာ၊ ရူပက္ခန္ဓော ဝေဒနာက္ခန္ဓော သညာက္ခန္ဓော သင်္ခါရက္ခန္ဓော ဝိညာဏက္ခန္ဓော။ ဧတ္တာဝတာ ခန္ဓာနံ ခန္ဓပညတ္တီ’’တိ ဧဝမာဒိနာ ခန္ဓာယတနဓာတုသစ္စဣန္ဒြိယပညတ္တိယော သံခိတ္တေန ဥဒ္ဒိသိတွာ ပုဂ္ဂလပညတ္တိံ စ ဧကကဒုကတိကစတုက္ကပဉ္စကဆက္ကသတ္တကအဋ္ဌကနဝကဒသကဝသေန ဝိတ္ထာရတော ဝိဘဇိတွာ ဘဂဝတာ ဒေသိတာ။

ပုစ္ဆာ – တေနာဝုသော ¶ ဘဂဝတာ သဗ္ဗပရမတ္ထပညတ္တိဓမ္မကုသလေန အဘိဓမ္မပိဋကေ စတုတ္ထံ ပုဂ္ဂလပညတ္တိပ္ပကရဏံ ဒေသေတွာ တဒနန္တရံ ပဉ္စမံ ကထာဝတ္ထုပ္ပကရဏံ ကထံ ဒေသိတံ။

ဝိဿဇ္ဇနာ – သဗ္ဗပရမတ္ထပညတ္တိဓမ္မကုသလေန ဘန္တေ ဘဂဝတာ လောကေ အဂ္ဂပုဂ္ဂလေန အဘိဓမ္မပိဋကေ စတုတ္ထံ ပုဂ္ဂလပညတ္တိပ္ပကရဏံ ဒေသေတွာ တဒနန္တရံ ကထာဝတ္ထုဒေသနာယ ဝါရေ သမ္ပတ္တေ ‘‘အနာဂတေ မမ သာဝကော မောဂ္ဂလိပုတ္တတိဿတ္ထေရော နာမ ဥပ္ပန္နံ သာသနမလံ သောဓေတွာ တတိယသင်္ဂီတိံ ကရောန္တော ဘိက္ခုသင်္ဃဿ မဇ္ဈေ နိသိန္နော သကဝါဒေ ပဉ္စ သုတ္တသတာနိ ပရဝါဒေ ပဉ္စာတိ သုတ္တသဟဿံ သမောဓာနေတွာ၊ ဣမံ ပကရဏံ ဘာဇေဿတီ’’တိ တဿောကာသံ ကရောန္တေန ပုဂ္ဂလဝါရေ အဋ္ဌမုခါ ဝါဒယုတ္တိံ အာဒိံ ကတွာ သဗ္ဗကထာမဂ္ဂေသု အသမ္ပုဏ္ဏဘာဏဝါရတ္ထာယ တန္တိယာ မာတိကာ နိက္ခေပမတ္တေန ပဉ္စမံ ကထာဝတ္ထုပ္ပကရဏံ သံခေပတော ဒေသိတံ။

ပုစ္ဆာ – အဓုနာ ¶ ပါကဋံ ပနာဝုသော ဝိတ္ထာရံ ကထာဝတ္ထုပ္ပကရဏံ ကဒါ ကေန ကတ္ထ ကထဉ္စ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – တံ ခေါ ဘန္တေ ဘဂဝတော နယမုခံ နိဿာယ အာယသ္မတာ မဟာမောဂ္ဂလိပုတ္တတိဿတ္ထေရေန တတိယသံဂီတိကာလေ ပါဋလိပုတ္တေ အသောကာရာမေ သဋ္ဌိဘိက္ခုသတသဟဿာနံ သမာဂမေ ဘဂဝတာ ဒိန္နနယဝသေန တထာဂတေန ဌပိတမာတိကံ ဝိဘဇန္တေန သကဝါဒေ ပဉ္စသုတ္တသတာနိ ပရဝါဒေ ပဉ္စာတိ သုတ္တသဟဿံ အာဟရိတွာ ဣဒံ ပရဝါဒမထနံ အဓုနာ ပါကဋံ ကထာဝတ္ထုပ္ပကရဏံ ဝိတ္ထာရတော ဝိဘဇိတွာ ဒေသိတံ။

ပုစ္ဆာ – ကတိ ¶ အာဝုသော တတ္ထ ကထာယော တေန အာယသ္မတာ မဟာမောဂ္ဂလိပုတ္တတိဿတ္ထေရေန ဝိတ္ထာရတော ဝိဘဇိတွာ ကထိတာ။

ဝိဿဇ္ဇနာ – တတ္ထ ဘန္တေ ဝါစနာမဂ္ဂတော ဒွေ စ သတာနိ သတ္တဝီသတိ စ ကထာယော အာယသ္မတာ မဟာမောဂ္ဂလိပုတ္တတိဿတ္ထေရေန ဝိတ္ထာရတော ဝိဘဇိတွာ ကထိတာ။

ပုစ္ဆာ – ကထဉ္စာဝုသော ¶ တတ္ထ ပဌမာ ပုဂ္ဂလကထာ အာယသ္မတာ မဟာမောဂ္ဂလိပုတ္တတိဿတ္ထေရေန ဝိတ္ထာရတော ဝိဘဇိတွာ ကထိတာ။

ဝိဿဇ္ဇနာ – ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ၊ အာမန္တာ။ ယော သစ္စိကဋ္ဌော ပရမတ္ထော၊ တတော သော ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ၊ န ဟေဝံ ဝတ္တဗ္ဗေ။ အာဇာနာဟိ နိဂ္ဂဟံ ဟဉ္စိ ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ တေန ဝတ ရေ ဝတ္တဗ္ဗေ ‘‘ယော သစ္စိကဋ္ဌော ပရမတ္ထော၊ တတော သော ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ။ ယံ တတ္ထ ဝဒေသိ ‘‘ဝတ္တဗ္ဗေ ခေါ ‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန’၊ နော စ ဝတ္တဗ္ဗေ ‘ယော သစ္စိကဋ္ဌော ပရမတ္ထော၊ တတော သော ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ၊ မိစ္ဆာတိ ဧဝမာဒိနာ ဘန္တေ တတ္ထ ပဌမာ ပုဂ္ဂလကထာ ပဉ္စ ဘာဏဝါရမတ္တာယ တန္တိယာ အာယသ္မတာ မဟာမောဂ္ဂလိပုတ္တတိဿတ္ထေရေန ဝိတ္ထာရတော ဝိဘဇိတွာ ကထိတာ။

ပုစ္ဆာ – အဘိဓမ္မပိဋကေ ¶ အာဝုသော ကထာဝတ္ထုပ္ပကရဏေ ဒုတိယဝဂ္ဂေ ဒုတိယာ အညာဏကထာ အာယသ္မတာ မဟာမောဂ္ဂလိပုတ္တတိဿတ္ထေရေန ကထံ ဝိတ္ထာရတော ဝိဘဇိတွာ ကထိတာ။

ဝိဿဇ္ဇနာ – အဘိဓမ္မပိဋကေ ဘန္တေ ပဉ္စမေ ကထာဝတ္ထုပ္ပကရဏေ ဒုတိယဝဂ္ဂေ ဒုတိယာ အညာဏကထာ ‘‘အတ္ထိ အရဟတော အညာဏန္တိ၊ အာမန္တာ။ အတ္ထိ အရဟတော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏန္တိ၊ န ဟေဝံ ဝတ္တဗ္ဗေ။ နတ္ထိ အရဟတော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနိဝရဏန္တိ၊ အာမန္တာ။ ဟဉ္စိ နတ္ထိ အရဟတော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏံ၊ နော စ ဝတ ရေ ဝတ္တဗ္ဗေ ‘‘အတ္ထိ အရဟတော အညာဏ’’န္တိ ဧဝမာဒိနာ အာယသ္မတာ မဟာမောဂ္ဂလိပုတ္တတိဿတ္ထေရေန ဝိတ္ထာရတော ဝိဘဇိတွာ ဘာသိတာ။

ပုစ္ဆာ – အဘိဓမ္မပိဋကေ ¶ အာဝုသော ပဉ္စမေ ကထာဝတ္ထုပ္ပကရဏေ တတိယဝဂ္ဂေ ဧကာဒသမာ အသညကထာ အာယသ္မတာ မဟာမောဂ္ဂလိပုတ္တတိဿတ္ထေရေန ကထံ ဝိတ္ထာရတော ဝိဘဇိတွာ ကထိတာ။

ဝိဿဇ္ဇနာ – အဘိဓမ္မပိဋကေ ဘန္တေ ပဉ္စမေ ကထာဝတ္ထုပ္ပကရဏေ တတိယဝဂ္ဂေ ဧကာဒသမာ အသညကထာ ‘‘အသညသတ္တေသု သညာ အတ္ထီတိ၊ အာမန္တာ။ သညာဘဝေါ သညာဂတိ သညာသတ္တာဝါသော သညာသံသာရော သညာယောနိ သညတ္တဘာဝပဋိလာဘောတိ၊ န ဟေဝံ ဝတ္တဗ္ဗေ’’တိ ဧဝမာဒိနာ အာယသ္မတာ မဟာမောဂ္ဂလိပုတ္တတိဿတ္ထေရေန ဝိတ္ထာရတော ဝိဘဇိတွာ ကထိတာ။

သညာဘဝေါ ¶ သညာဂတိ သညာသတ္တာဝါသော သညာသံသာရော သညာယောနိ သညတ္တဘာဝပဋိလာဘော။

နနု အသညဘဝေါ အသညဂတိ အသညသတ္တာဝါသော အသညသံသာရော အသညယောနိ အသညတ္တဘာဝပဋိလာဘော။

ဟဉ္စိ ¶ အသညဘဝေါ အသညဂတိ အသညသတ္တာဝါသော အသညသံသာရော အသညယောနိ အသညတ္တဘာဝပဋိလာဘော၊ နော စ ဝတ ရေ ဝတ္တဗ္ဗေ အသညသတ္တေသု သညာ အတ္ထိ။

ပဉ္စဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘော။

နနု ¶ ဧကဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘော။

ဟဉ္စိ ဧကဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘော၊ နော စ ဝတ ရေ ဝတ္တဗ္ဗေ အသညသတ္တေသု သညာ အတ္ထိ။

ပုစ္ဆာ – ဆဋ္ဌဝဂ္ဂေ ¶ ပန အာဝုသော အဋ္ဌမာ ပထဝီဓာတု သနိဒဿနာတိအာဒိကထာ အာယသ္မတာ မဟာမောဂ္ဂလိပုတ္တတိဿတ္ထေရေန ကထံ ဝိတ္ထာရတော ဝိဘဇိတွာ ကထိတာ။

ဝိဿဇ္ဇနာ – ဆဋ္ဌဝဂ္ဂေ ဘန္တေ အဋ္ဌမာ ပထဝီဓာတု သနိဒဿနာတိအာဒိကထာ ‘‘ပထဝီဓာတု သနိဒဿနာတိ အာမန္တာ။ ရူပံ ရူပါယတနံ ရူပဓာတု နီလံ ပီတကံ လောဟိတကံ ဩဒါတံ စက္ခုဝိညေယျံ စက္ခုသ္မိံ ပဋိဟညတိ စက္ခုဿ အာပါထံ အာဂစ္ဆတီတိ၊ န ဟေဝံ ဝတ္တဗ္ဗေ’’တိ ဧဝမာဒိနာ အာယသ္မတာ မဟာမောဂ္ဂလိ ပုတ္တတိဿတ္ထေရေန ဝိတ္ထာရတော ဝိဘဇိတွာ ကထိတာ။

စက္ခုဉ္စ ¶ ပဋိစ္စ ပထဝီဓာတုဉ္စ ဥပ္ပဇ္ဇတိ စက္ခုဝိညာဏံ။

တေန ¶ ဟိ န ဝတ္တဗ္ဗံ စက္ခုဉ္စ ပဋိစ္စ ပထဝီဓာတုဉ္စ ဥပ္ပဇ္ဇတိ စက္ခုဝိညာဏံ။

ပုစ္ဆာ – အဘိဓမ္မပိဋကေ အာဝုသော ပဉ္စမေ ကထာဝတ္ထုပ္ပကရဏေ အဋ္ဌမဝဂ္ဂေ ဒုတိယာ အန္တရာဘဝကထာ အာယသ္မတာ မဟာမောဂ္ဂလိပုတ္တတိဿတ္ထေရေန ¶ ကထံ ဝိတ္ထာရတော ဝိဘဇိတွာ ကထိတာ။

ဝိဿဇ္ဇနာ – အဘိဓမ္မပိဋကေ ဘန္တေ ပဉ္စမေ ကထာဝတ္ထုပ္ပကရဏေ အဋ္ဌမဝဂ္ဂေ ဒုတိယာ အန္တရာဘဝကထာ ‘‘အတ္ထိ အန္တရာဘဝေါတိ၊ အာမန္တာ။ ကာမဘဝေါတိ၊ န ဟေဝံ ဝတ္တဗ္ဗေ…ပေ… အတ္ထိ အန္တရာဘဝေါတိ၊ အာမန္တာ။ ရူပဘဝေါတိ၊ န ဟေဝံ ဝတ္တဗ္ဗေ…ပေ… အတ္ထိ အန္တရာဘဝေါတိ၊ အာမန္တာ။ အရူပဘဝေါတိ၊ န ဟေဝံ ဝတ္တဗ္ဗေ’’တိ ဧဝမာဒိနာ အာယသ္မတာ မဟာမောဂ္ဂလိပုတ္တတိဿတ္ထေရေန ဝိတ္ထာရတော ဝိဘဇိတွာ ကထိတာ။

ကာမဘဝဿ ¶ စ ရူပဘဝဿ စ အန္တရေ အတ္ထိ အန္တရာဘဝေါ။

ရူပဘဝဿ စ အရူပဘဝဿ စ အန္တရေ အတ္ထိ အန္တရာဘဝေါ။

ကာမဘဝဿ စ ရူပဘဝဿ စ အန္တရေ နတ္ထိ အန္တရာဘဝေါ။

ဟဉ္စိ ¶ ကာမဘဝဿ စ ရူပဘဝဿ စ အန္တရေ နတ္ထိ အန္တရာဘဝေါ၊ နော စ ဝတ ရေ ဝတ္တဗ္ဗေ အတ္ထိ အန္တရာဘဝေါ။

ပုစ္ဆာ – အဘိဓမ္မပိဋကေ အာဝုသော ပဉ္စမေ ကထာဝတ္ထုပ္ပကရဏေ စုဒ္ဒသမဝဂ္ဂေ ဒုတိယာ သဠာယတနုပ္ပတ္တိကထာ အာယသ္မတာ မဟာမောဂ္ဂလိပုတ္တတိဿတ္ထေရေန ကထံ ဝိတ္ထာရတော ဝိဘဇိတွာ ဒေသိတာ။

ဝိဿဇ္ဇနာ – အဘိဓမ္မပိဋကေ ဘန္တေ ပဉ္စမေ ကထာဝတ္ထုပ္ပကရဏေ စုဒ္ဒသမေဝဂ္ဂေ ဒုတိယာ သဠာယတနုပ္ပတ္တိကထာ ‘‘သဠာယတနံ အပုဗ္ဗံ အစရိမံ မာတုကုစ္ဆိသ္မိံ သဏ္ဌာတီတိ၊ အာမန္တာ။ သဗ္ဗင်္ဂပစ္စင်္ဂီ အဟီနိန္ဒြိယော မာတုကုစ္ဆိသ္မိံ ဩက္ကမတီတိ၊ န ဟေဝံ ဝတ္တဗ္ဗေ’’တိ ဧဝမာဒိနာ ¶ အာယသ္မတာ မဟာမောဂ္ဂလိပုတ္တတိဿတ္ထေရေန ဝိတ္ထာရတော ဝိဘဇိတွာ ကထိတာ။

သဠာယတနံ ¶ အပုဗ္ဗံ အစရိမံ မာတုကုစ္ဆိသ္မိံ သဏ္ဌာတိ။

သဗ္ဗင်္ဂပ္ပစ္စင်္ဂီ အဟီနိန္ဒြိယော မာတုကုစ္ဆိသ္မိံ ဩက္ကမတိ။

ဥပပတ္တေသိယေန စိတ္တေန စက္ခာယတနံ သဏ္ဌာတိ။

ဥပပတ္တေသိယေန စိတ္တေန ဟတ္ထာ သဏ္ဌန္တိ၊ ပါဒါ သဏ္ဌန္တိ၊ သီသံ သဏ္ဌာတိ၊ ကဏ္ဏော သဏ္ဌာတိ၊ နာသိကာ သဏ္ဌာတိ၊ မုခံ သဏ္ဌာတိ၊ ဒန္တာ သဏ္ဌန္တိ။

ပုစ္ဆာ – တေနာဝုသော ¶ ဘဂဝတာ ယမကပါဋိဟီရာဝသာနေ တာဝတိံသဒေဝလောကံ ဂန္တွာ ဒသသဟဿလောကဓာတူဟိ အာဂမ္မ သန္နိသိန္နာနံ ဒေဝါနံ အဘိဓမ္မဒေသနံ ဒေသေန္တေန ပဌမံ အဘိဓမ္မပိဋကေ ပဉ္စပ္ပကရဏာနိ ဒေသေတွာ တဒနန္တရံ ဆဋ္ဌံ ယမကပ္ပကရဏံ ဒေသေန္တေန ကတိ ယမကပ္ပကရဏာနိ ဝိဘဇိတွာ ဒေသိတာနိ။

ဝိဿဇ္ဇနာ – ဘဂဝတာ ဘန္တေ ယမဿ ဝိသယာတီတေန ယမကပါဋိဟီရာဝသာနေ တာဝတိံသဒေဝလောကံ ဂန္တွာ တတ္ထ ဒသသဟဿလောကဓာတူဟိ အာဂမ္မ သန္နိသိန္နာနံ ဒေဝတာနံ အဘိဓမ္မပိဋကံ ဒေသေန္တေန အဘိဓမ္မပိဋကေ ပူရိမာနိ ပဉ္စပ္ပကရဏာနိ ဒေသေတွာ တဒနန္တရံ ဆဋ္ဌံ ယမကပ္ပကရဏံ မူလယမကံ ခန္ဓယမကံ အာယတနယမကံ ဓာတုယမကံ သစ္စယမကံ သင်္ခါရယမကံ အနုသယယမကံ စိတ္တယမကံ ဓမ္မယမကံ ဣန္ဒြိယယမကန္တိ ဒသ ယမကပ္ပကရဏာနိ ဝိတ္ထာရတော ဝိဘဇိတွာ ဒေသိတာနိ။

ပုစ္ဆာ – ကထဉ္စာဝုသော ¶ တတ္ထ ဘဂဝတာ ပဌမံ မူလယမကံ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – ယေ ကေစိ ကုသလာ ဓမ္မာ၊ သဗ္ဗေ တေ ကုသလမူလာ။ ယေ ဝါ ပန ကုသလမူလာ၊ သဗ္ဗေ တေ ဓမ္မာ ကုသလာ။ ယေ ကေစိ ကုသလာ ဓမ္မာ၊ သဗ္ဗေ တေ ကုသလမူလေန ဧကမူလာ။ ယေ ဝါ ¶ ပန ကုသလမူလေန ဧကမူလာ၊ သဗ္ဗေ တေ ဓမ္မာ ကုသလာ။ ယေ ကေစိ ကုသလမူလေန ဧကမူလာ ဓမ္မာ၊ သဗ္ဗေ တေ ဓမ္မာ ကုသလမူလေန အညမညမူလာ။ ယေ ဝါ ပန ကုသလမူလေန အညမညမူလာ၊ သဗ္ဗေ တေ ဓမ္မာ ကုသလာတိ ဧဝမာဒိနာ ဘန္တေ တတ္ထ ဘဂဝတာ ပဌမံ မူလယမကံ ဗာဝီသတိယာ စ တိကေဟိ ဒုကသတေန စ ဝိတ္ထာရတော ဝိဘဇိတွာ ဒေသိတံ။

ယေ ကေစိ ကုသလာ ဓမ္မာ၊ သဗ္ဗေ တေ ကုသလမူလာ။

ယေ ကေစိ ကုသလာ ဓမ္မာ၊ သဗ္ဗေ တေ ကုသလမူလာတိ၊ တီဏေဝ ကုသလမူလာနိ အဝသေသာ ကုသလာ ဓမ္မာ၊ န ကုသလမူလာ၊ ယေ ဝါ ပန ကုသလမူလာ၊ သဗ္ဗေ တေ ဓမ္မာ ကုသလာတိ၊ အာမန္တာ –

ပုစ္ဆာ – အဘိဓမ္မပိဋကေ ¶ အာဝုသော ဆဋ္ဌေ ယမကပ္ပကရဏေ ဒုတိယံ ခန္ဓယမကံ ဘဂဝတာ ကထံ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – အဘိဓမ္မပိဋကေ ဘန္တေ ဆဋ္ဌေ ယမကပ္ပကရဏေ ဒုတိယံ ခန္ဓယမကံ ‘‘ပဉ္စက္ခန္ဓာ – ရူပက္ခန္ဓော ဝေဒနာက္ခန္ဓော သညာက္ခန္ဓော သင်္ခါရက္ခန္ဓော ဝိညာဏက္ခန္ဓော။ ရူပံ ရူပက္ခန္ဓော၊ ရူပက္ခန္ဓော ရူပံ။ ဝေဒနာ ဝေဒနာက္ခန္ဓော၊ ဝေဒနာက္ခန္ဓော ဝေဒနာ။ သညာ သညာက္ခန္ဓော၊ သညာက္ခန္ဓော သညာ။ သင်္ခါရာ သင်္ခါရက္ခန္ဓော၊ သင်္ခါရက္ခန္ဓော သင်္ခါရာ။ ဝိညာဏံ ဝိညာဏက္ခန္ဓော၊ ဝိညာဏက္ခန္ဓော ဝိညာဏ’’န္တိ ဧဝမာဒိနာ ဘဂဝတာ ပဏ္ဏတ္တိဝါရပဝတ္တိဝါရပရိညာဝါရသင်္ခါတေဟိ တီဟိ ဝါရေဟိ ဝိတ္ထာရတော ဝိဘဇိတွာ ဒေသိတံ။

ပုစ္ဆာ – အဘိဓမ္မပိဋကေ ¶ အာဝုသော ဆဋ္ဌေ ယမကပ္ပကရဏေ တတိယံ အာယတနယမကံ ဘဂဝတာ ကထံ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – အဘိဓမ္မပိဋကေ ဘန္တေ ဆဋ္ဌေ ယမကပ္ပကရဏေ တတိယံ အာယတနယမကံ ‘‘ဒွါဒသာယတနာနိ – စက္ခာယတနံ သောတာယတနံ ဃာနာယတနံ ဇိဝှာယတနံ ကာယာယတနံ ရူပါယတနံ သဒ္ဒါယတနံ ဂန္ဓာယတနံ ရသာယတနံ ဖောဋ္ဌဗ္ဗာယတနံ မနာယတနံ ဓမ္မာယတနံ။ စက္ခု စက္ခာယတနံ၊ စက္ခာယတနံ စက္ခု။ သောတံ သောတာယတနံ၊ သောတာယတနံ သောတ’’န္တိ ဧဝမာဒိနာ ပဏ္ဏတ္တိဝါရပဝတ္တိဝါရပရိညာဝါရသင်္ခါတေဟိ တီဟိ ဝါရေဟိ ဘဂဝတာ ဝိတ္ထာရတော ဝိဘဇိတွာ ဒေသိတံ။

ပုစ္ဆာ – အဘိဓမ္မပိဋကေ ¶ အာဝုသော ဆဋ္ဌေ ယမကပ္ပကရဏေ ဒသသု ယမကေသု စတုတ္ထံ ဓာတုယမကံ ဘဂဝတာ ကထံ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – အဘိဓမ္မပိဋကေ ¶ ဘန္တေ ဆဋ္ဌေ ယမကပ္ပကရဏေ ဒသသု ယမကေသု စတုတ္ထံ ဓာတုယမကံ ‘‘အဋ္ဌာရသ ဓာတုယော – စက္ခုဓာတု သောတဓာတု ဃာနဓာတု ဇိဝှာဓာတု ကာယဓာတု ရူပဓာတု သဒ္ဒဓာတု ဂန္ဓဓာတု ရသဓာတု ဖောဋ္ဌဗ္ဗဓာတု စက္ခုဝိညာဏဓာတု သောတဝိညာဏဓာတု ဃာနဝိညာဏဓာတု ဇိဝှာဝိညာဏဓာတု ကာယဝိညာဏဓာတု မနောဓာတု မနောဝိညာဏဓာတု ဓမ္မဓာတူ’’တိ ဧဝမာဒိနာ ဘဂဝတာ ပဏ္ဏတ္တိဝါရပဝတ္တိဝါရပရိညာဝါရသင်္ခါတေဟိ တီဟိ မဟာဝါရေဟိ ဝိတ္ထာရတော ဝိဘဇိတွာ ဒေသိတံ။

ပုစ္ဆာ – အဘိဓမ္မပိဋကေ ¶ အာဝုသော ဆဋ္ဌေ ယမကပ္ပကရဏေ ဒသသု ယမကေသု ပဉ္စမံ သစ္စယမကံ ဘဂဝတာ ကထံ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – အဘိဓမ္မပိဋကေ ဘန္တေ ဆဋ္ဌေ ယမကပ္ပကရဏေ ဒသသု ယမကေသု ပဉ္စမံ သစ္စယမကံ ‘‘စတ္တာရိ သစ္စာနိ – ဒုက္ခသစ္စံ သမုဒယသစ္စံ နိရောဓသစ္စံ မဂ္ဂသစ္စံ။ ဒုက္ခံ ဒုက္ခသစ္စံ၊ ဒုက္ခသစ္စံ ဒုက္ခံ။ သမုဒယော သမုဒယသစ္စံ၊ သမုဒယသစ္စံ သမုဒယော။ နိရောဓော နိရောဓသစ္စံ၊ နိရောဓသစ္စံ နိရောဓော။ မဂ္ဂေါ မဂ္ဂသစ္စံ၊ မဂ္ဂသစ္စံ မဂ္ဂေါ’’တိ ဧဝမာဒိနာ ဘဂဝတာ ဝိတ္ထာရတော ဝိဘဇိတွာ ဒေသိတံ။

ပုစ္ဆာ – အဘိဓမ္မပိဋကေ ¶ အာဝုသော ဆဋ္ဌေ ယမကပ္ပကရဏေ ဒသသု ယမကေသု ဆဋ္ဌံ သင်္ခါရယမကံ ဘဂဝတာ ကထံ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – အဘိဓမ္မပိဋကေ ဘန္တေ ဆဋ္ဌေ ယမကပ္ပကရဏေ ဒသသု ယမကေသု ဆဋ္ဌံ သင်္ခါရယမကံ ‘‘တယော သင်္ခါရာ – ကာယသင်္ခါရော ဝစီသင်္ခါရော ¶ ၊ စိတ္တသင်္ခါရော။ အဿာသပဿာသာ ကာယသင်္ခါရော၊ ဝိတက္ကဝိစာရာ ဝစီသင်္ခါရာ၊ သညာ စ ဝေဒနာ စ စိတ္တသင်္ခါရော ဌပေတွာ ဝိတက္ကဝိစာရေ သဗ္ဗေပိ စိတ္တသမ္ပယုတ္တကာ ဓမ္မာ စိတ္တသင်္ခါရော’’တိ ဧဝမာဒိနာ ဘဂဝတာ ပဏ္ဏတ္တိဝါရပဝတ္တိဝါရပရိညာဝါရသင်္ခါတေဟိ တီဟိ မဟာဝါရေဟိ ဝိတ္ထာရတော ဝိဘဇိတွာ ဒေသိတံ။

ပုစ္ဆာ – အဘိဓမ္မပိဋကေ ¶ အာဝုသော ဆဋ္ဌေ ယမကပ္ပကရဏေ ဒသသု ယမကေသု သတ္တမံ အနုသယယမကံ ဘဂဝတာ ကထံ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – အဘိဓမ္မပိဋကေ ဘန္တေ ဆဋ္ဌေ ယမကပ္ပကရဏေ ဒသသု ယမကေသု သတ္တမံ အနုသယယမကံ ‘‘သတ္တ အနုသယာ – ကာမရာဂါနုသယော ပဋိဃာနုသယော မာနာနုသယော ဒိဋ္ဌာနုသယော ဝိစိကိစ္ဆာနုသယော ဘဝရာဂါနုသယော အဝိဇ္ဇာနုသယော။ ကတ္ထ ကာမရာဂါနုသယော အနုသေတိ၊ ကာမဓာတုယာ ဒွီသု ဝေဒနာသု ဧတ္ထ ကာမရာဂါနုသယော အနုသေတီ’’တိ ဧဝမာဒိနာ ဘဂဝတာ ဥပ္ပတ္တိဋ္ဌာနဝါရ အနုသယဝါရ သာနုသယဝါရ ပဇဟနဝါရ ပရိညာဝါရ ပဟီနဝါရ ဥပ္ပဇ္ဇနဝါရ ဓာတုဝါရသင်္ခါတေဟိ အဋ္ဌဟိ မဟာဝါရေဟိ ဝိတ္ထာရတော ဝိဘဇိတွာ ဒေသိတံ။

ပုစ္ဆာ – အဘိဓမ္မပိဋကေ ¶ အာဝုသော ဆဋ္ဌေ ယမကပ္ပကရဏေ ဒသသု ယမကေသု အဋ္ဌမံ စိတ္တယမကံ ဘဂဝတာ ကထံ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – အဘိဓမ္မပိဋကေ ဘန္တေ ဆဋ္ဌေ ယမကပ္ပကရဏေ ဒသသု ယမကေသု အဋ္ဌမံ စိတ္တယမကံ ‘‘ယဿ စိတ္တံ ဥပ္ပဇ္ဇတိ န နိရုဇ္ဈတိ၊ တဿ စိတ္တံ နိရုဇ္ဈိဿတိ န ဥပ္ပဇ္ဇိဿတိ။ ယဿ ဝါ ပန စိတ္တံ နိရုဇ္ဈိဿတိ န ဥပ္ပဇ္ဇိဿတိ၊ တဿ စိတ္တံ ဥပ္ပဇ္ဇတိ န နိရုဇ္ဈတီ’’တိ ဧဝမာဒိနာ ဘဂဝတာ သုဒ္ဓစိတ္တသာမညသုတ္တန္တစိတ္တမိဿကဝိသေသအဘိဓမ္မစိတ္တမိဿကဝိသေသ- သင်္ခါတေဟိ တီဟိ မဟာနယေတိ ဝိတ္ထာရတော ဝိဘဇိတွာ ဒေသိတံ။

ပုစ္ဆာ – အဘိဓမ္မပိဋကေ ¶ အာဝုသော ဆဋ္ဌေ ယမကပ္ပကရဏေ ဒသသု ယမကေသု နဝမံ ဓမ္မယမကံ ဘဂဝတာ ကထံ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – အဘိဓမ္မပိဋကေ ဘန္တေ ဆဋ္ဌေ ယမကပ္ပကရဏေ ဒသသု ယမကေသု နဝမံ ဓမ္မယမကံ ‘‘ကုသလာ ကုသလာ ဓမ္မာ၊ ကုသလာ ဓမ္မာ ကုသလာ။ အကုသလာ အကုသလာ ဓမ္မာ၊ အကုသလာ ဓမ္မာ အကုသလာ။ အဗျာကတာ အဗျာကတာ ဓမ္မာ၊ အဗျာကတာ ဓမ္မာ အဗျာကတာ’’တိ ဧဝမာဒိနာ ဘဂဝတာ ပဏ္ဏတ္တိဝါရပဝတ္တိဝါရပရိညာဝါရသင်္ခါတေဟိ တီဟိ မဟာဝါရေဟိ ဝိတ္ထာရတော ဝိဘဇိတွာ ဒေသိတံ။

ပုစ္ဆာ – အဘိဓမ္မပိဋကေ ¶ အာဝုသော ဆဋ္ဌေ ယမကပ္ပကရဏေ ဒသသု ယမကေသု ဒသမံ ဣန္ဒြိယယမကံ ဘဂဝတာ ကထံ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – အဘိဓမ္မပိဋကေ ဘန္တေ ဆဋ္ဌေ ယမကပ္ပကရဏေ ဒသသု ယမကေသု ဒသမံ ဣန္ဒြိယယမကံ ‘‘ဗာဝီသတိန္ဒြိယာနိ – စက္ခုန္ဒြိယံ သောတိန္ဒြိယံ ဃာနိန္ဒြိယံ ဇိဝှိန္ဒြိယံ ကာယိန္ဒြိယံ ဣတ္ထိန္ဒြိယံ ပုရိသိန္ဒြိယံ ဇီဝိတိန္ဒြိယံ မနိန္ဒြိယံ သုခိန္ဒြိယံ ဒုက္ခိန္ဒြိယံ သောမနဿိန္ဒြိယံ ဒေါမနဿိန္ဒြိယံ ဥပေက္ခိန္ဒြိယံ သဒ္ဓိန္ဒြိယံ ဝီရိယိန္ဒြိယံ သမာဓိန္ဒြိယံ ပညိန္ဒြိယံ အနညာတညဿာမီတိန္ဒြိယံ အညိန္ဒြိယံ အညာတာဝိန္ဒြိယ’’န္တိ ဧဝမာဒိနာ ဘဂဝတာ ပဏ္ဏတ္တိဝါရ ပဝတ္တိဝါရ ပရိညာဝါရသင်္ခါတေဟိ တီဟိ မဟာဝါရေဟိ ဝိတ္ထာရတော ဝိဘဇိတွာ ဒေသိတံ။

ပုစ္ဆာ – အဘိဓမ္မပိဋကေ ¶ အာဝုသော ဣန္ဒြိယယမကေ တီသု မဟာဝါရေသု ပဝတ္တိဝါရေ ဥပ္ပာဒအတီတဝါရော ဘဂဝတာ ကထံ ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – အဘိဓမ္မပိဋကေ ¶ ဘန္တေ ဣန္ဒြိယယမကေ တီသု မဟာဝါရေသု ပဝတ္တိဝါရေ ဥပ္ပာဒအတီတဝါရော ‘‘ယဿ စက္ခုန္ဒြိယံ ဥပ္ပဇ္ဇိတ္တ၊ တဿ သောတိန္ဒြိယံ၊ ဃာနိန္ဒြိယံ၊ ဇိဝှိန္ဒြိယံ၊ ကာယိန္ဒြိယံ၊ ဣတ္ထိန္ဒြိယံ၊ ပုရိသိန္ဒြိယံ၊ ဇီဝိတိန္ဒြိယံ၊ သောမနဿိန္ဒြိယံ၊ ဥပေက္ခိန္ဒြိယံ၊ သဒ္ဓိန္ဒြိယံ၊ ဝီရိယိန္ဒြိယံ၊ သတိန္ဒြိယံ၊ သမာဓိန္ဒြိယံ၊ ပညိန္ဒြိယံ၊ မနိန္ဒြိယံ၊ ဥပ္ပဇ္ဇိတ္ထာတိ၊ အာမန္တာ။ ယဿ ဝါ ပန မနိန္ဒြိယံ ဥပ္ပဇ္ဇိတ္ထ၊ တဿ စက္ခုန္ဒြိယံ ဥပ္ပဇ္ဇိတ္ထာတိ၊ အာမန္တာ’’တိ ဧဝမာဒိနာ ဘဂဝတာ ဝိဘဇိတွာ ဒေသိတော။

ပုစ္ဆာ – အဘိဓမ္မပိဋကေ ¶ အာဝုသော ဣန္ဒြိယယမကေ တီသု မဟာဝါရေသု ပဝတ္တိဝါရေ ဥပ္ပာဒအနာဂတဝါရော ဘဂဝတာ ကထံ ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – အဘိဓမ္မပိဋကေ ဘန္တေ ဣန္ဒြိယယမကေ တီသု မဟာဝါရေသု ပဝတ္တိဝါရေ ဥပ္ပာဒအနာဂတဝါရော ‘‘ယဿ စက္ခုန္ဒြိယံ ဥပ္ပဇ္ဇိဿတိ၊ တဿ သောတိန္ဒြိယံ ဥပ္ပဇ္ဇိဿတီတိ၊ အာမန္တာ။ ယဿ ဝါ ပန သောတိန္ဒြိယံ ဥပ္ပဇ္ဇိဿတိ၊ တဿ စက္ခုန္ဒြိယံ ဥပ္ပဇ္ဇိဿတီ’’တိ အာမန္တာ။ ယဿ စက္ခုန္ဒြိယံ ဥပ္ပဇ္ဇိဿတိ၊ တဿ ဃာနိန္ဒြိယံ၊ ဇိဝှိန္ဒြိယံ၊ ကာယိန္ဒြိယံ ဥပ္ပဇ္ဇိဿတီတိ၊ ယေ ရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ၊ တေသံ စက္ခုန္ဒြိယံ ဥပ္ပဇ္ဇိဿတိ၊ နော စ တေသံ ကာယိန္ဒြိယံ ဥပ္ပဇ္ဇိဿတိ၊ ဣတရေသံ တေသံ စက္ခုန္ဒြိယဉ္စ ဥပ္ပဇ္ဇိဿတိ ကာယိန္ဒြိယဉ္စ ဥပ္ပဇ္ဇိဿတီ’’တိ ဧဝမာဒိနာ ဘဂဝတာ ဝိတ္ထာရတော ဝိဘဇိတွာ ဒေသိတော။

ယဿ ¶ စက္ခုန္ဒြိယံ ဥပ္ပဇ္ဇိဿတိ၊ တဿ ဣတ္ထိန္ဒြိယံ ဥပ္ပဇ္ဇိဿတီတိ။ ယေ ရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ၊ ယေ စ ပုရိသာ ဧတေနေဝ ဘာဝေန ကတိစိ ဘဝေ ဒဿေတွာ ပရိနိဗ္ဗာယိဿန္တိ တေသံ စက္ခုန္ဒြိယံ ဥပ္ပဇ္ဇိဿတိ၊ နော စ တေသံ ဣတ္ထိန္ဒြိယံ ဥပ္ပဇ္ဇိဿတိ၊ ဣတရေသံ တေသံ စက္ခုန္ဒြိယဉ္စ ဥပ္ပဇ္ဇိဿတိ ဣတ္ထိန္ဒြိယဉ္စ ဥပ္ပဇ္ဇိဿတိ။

ယဿ ¶ စက္ခုန္ဒြိယံ ဥပ္ပဇ္ဇိဿတိ၊ တဿ ပုရိသိန္ဒြိယံ ဥပ္ပဇ္ဇိဿတီတိ၊ ယေ ရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ၊ ယာ စ ဣတ္ထိယော ဧတေနေဝ ဘာဝေန ကတိစိ ဘဝေ ဒဿေတွာ ပရိနိဗ္ဗာယိဿန္တိ၊ တေသံ စက္ခုန္ဒြိယံ ဥပ္ပဇ္ဇိဿတိ၊ နော စ တေသံ ပုရိသိန္ဒြိယံ ဥပ္ပဇ္ဇိဿတိ။ ဣတရေသံ တေသံ စက္ခုန္ဒြိယဉ္စ ဥပ္ပဇ္ဇိဿတိ ပုရိသိန္ဒြိယဉ္စ ဥပ္ပဇ္ဇိဿတိ။

ယဿ ဣတ္ထိန္ဒြိယံ ဥပ္ပဇ္ဇိဿတိ၊ တဿ ပုရိသိန္ဒြိယံ ဥပ္ပဇ္ဇိဿတီတိ၊ ယာ ဣတ္ထိယော ဧတေနေဝ ဘာဝေန ကတိစိ ဘဝေ ဒဿေတွာ ပရိနိဗ္ဗာယိဿန္တိ၊ တာသံ ¶ ဣတ္ထိန္ဒြိယံ ဥပ္ပဇ္ဇိဿတိ၊ နော စ တာသံ ပုရိသိန္ဒြိယံ ဥပ္ပဇ္ဇိဿတိ။ ဣတရေသံ တေသံ ဣတ္ထိန္ဒြိယဉ္စ ဥပ္ပဇ္ဇိဿတိ ပုရိသိန္ဒြိယဉ္စ ဥပ္ပဇ္ဇိဿတိ။

ပုစ္ဆာ – တေနာဝုသော ¶ ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန အဘိသမ္ဗုဒ္ဓကာလတော သတ္တမဝဿေ မနုဿလောကေ ယမကပါဋိဟီရံ ဒဿေတွာ တဒနန္တရံ တာဝတိံသဒေဝလောကံ ဂန္တွာ တတ္ထ ပဏ္ဍုကမ္ဗလသိလာယံ သန္နိသီဒိတွာ ဒသဟိ စက္ကဝါဠသဟဿေဟိ အာဂမ္မ သန္နိသိန္နာနံ ဒေဝါနံ အဘိဓမ္မဒေသနံ ဒေသေန္တေန ယာဝ ယမကပ္ပကရဏာ ပုရိမာနိ ဆ အဘိဓမ္မပ္ပကရဏာနိ ဒေသေတွာ တဒနန္တရံ ကိံနာမ ပကရဏံ ဒေသိတံ။

ဝိဿဇ္ဇနာ – တေန ဘန္တေ ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန အဘိသမ္ဗုဒ္ဓကာလတော သတ္တမေ ဝဿေ မနုဿလောကေ သာဝတ္ထိယံ ကဏ္ဍမ္ဗမူလေ ယမကပါဋိဟီရံ ဒဿေတွာ တဒနန္တရံ တာဝတိံသဒေဝလောကံ ဂန္တွာ တတ္ထ ပဏ္ဍုကမ္ဗလသိလာယံ သန္နိပတိတွာ ဒသဟိ စက္ကဝါဠသဟဿေဟိ အာဂမ္မ သန္နိသိန္နာနံ ဒေဝါနံ အဘိဓမ္မဒေသနံ ဒေသေန္တေန ပုရိမာနိ ဆ အဘိဓမ္မပ္ပကရဏာနိ ဒေသေတွာ တဒနန္တရံ အနန္တနယသမန္တပဋ္ဌာနံ နာမ သတ္တမံ မဟာပကရဏံ ဒေသိတံ။

ပုစ္ဆာ – တံ ¶ ပနေတံ အာဝုသော ပဋ္ဌာနံ ကေနဋ္ဌေန ပဋ္ဌာနန္တိ ဝုစ္စတိ။

ဝိဿဇ္ဇနာ – တံ ပနေတံ ဘန္တေ ပဋ္ဌာနံ နာနပ္ပကာရပစ္စယဋ္ဌေန ဝိဘဇနဋ္ဌေန ပဋ္ဌိတဋ္ဌေန စ ပဋ္ဌာနန္တိ ဝုစ္စတိ။

ပုစ္ဆာ – တဉ္စာဝုသော ¶ ဘဂဝတာ ပဋ္ဌာနမဟာပကရဏံ ဒေသေန္တေန ကတိဟိ ဝါရေဟိ ဝိဘဇိတွာ ဒေသိတံ။

ဝိဿဇ္ဇနာ – တံ ခေါ ဘန္တေ ဘဂဝတာ ပဋ္ဌာနမဟာပကရဏံ ဒေသေန္တေန မာတိကာနိက္ခေပဝါရသင်္ခါတော ပစ္စယုဒ္ဒေသော ပစ္စယနိဒ္ဒေသော မဟာဝါရေတိ ဒွီဟိ ပရိစ္ဆေဒဝါရေဟိ ဝိဘဇိတွာ ဒေသိတံ။

ပုစ္ဆာ – တေသု ¶ အာဝုသော ဝါရေသု ပဌမေ မာတိကာနိက္ခေပဝါရေ ပစ္စယုဒ္ဒေသဝါရော ဘဂဝတာ ကထံ ဒေသိတော။

ဝိဿဇ္ဇနာ – တေသု ဘန္တေ ဒွီသု ပရိစ္ဆေဒဝါရေသု ပဌမေ မာတိကာနိက္ခေပဝါရေ ပစ္စယုဒ္ဒေသေ ဟေတုပစ္စယော အာရမ္မဏပစ္စယော အဓိပတိပစ္စယော အနန္တရပစ္စယော သမနန္တရပစ္စယော သဟဇာတပစ္စယော အညမညပစ္စယော နိဿယပစ္စယော…ပေ… အဝိဂတပစ္စယော’’တိ။ ဧဝံ ခေါ ဘန္တေ ဘဂဝတာ ဝိဘဇိတွာ ဒေသိတော။

ပုစ္ဆာ – တဒနန္တရံ ¶ ပန အာဝုသော ပစ္စယနိဒ္ဒေသဝါရော ဘဂဝတာ ကထံ ဝိဘဇိတွာ ဒေသိတော။

ဝိဿဇ္ဇနာ – တဒနန္တရံ ပန ဘန္တေ ပစ္စယနိဒ္ဒေသဝါရော ‘‘ဟေတုပစ္စယောတိ – ဟေတူ ဟေတုသမ္ပယုတ္တကာနံ ဓမ္မာနံ တံသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။ အာရမ္မဏပစ္စယောတိ – ရူပါရမ္မဏံ စက္ခုဝိညာဏဓာတုယာ တံသမ္ပယုတ္တကာနဉ္စ ဓမ္မာနံ အာရမ္မဏပစ္စယေန ပစ္စယော။ သဒ္ဓါယတနံ သောတဝိညာဏဓာတုယာ…။ ဂန္ဓာယတနံ ဃာနဝိညာဏဓာတုယာ…။ ရသာယတနံ ဇိဝှာဝိညာဏဓာတုယာ…။ ဖောဋ္ဌဗ္ဗာယတနံ ကာယဝိညာဏဓာတုယာ တံသမ္ပယုတ္တကာနဉ္စ ဓမ္မာနံ အာရမ္မဏပစ္စယေန ပစ္စယော။ ရူပါယတနံ သဒ္ဒါယတနံ ဂန္ဓာယတနံ ရသာယတနံ ဖောဋ္ဌဗ္ဗာယတနံ မနောဓာတုယာ တံသမ္ပယုတ္တကာနဉ္စ ဓမ္မာနံ အာရမ္မဏပစ္စယေန ပစ္စယော။ သဗ္ဗေ ဓမ္မာ မနောဝိညာဏဓာတုယာ တံသမ္ပယုတ္တကာနဉ္စ ဓမ္မာနံ အာရမ္မဏပစ္စယေန ပစ္စယော။ ယံ ယံ ဓမ္မံ အာရဗ္ဘ ယေ ယေ ဓမ္မာ ဥပ္ပဇ္ဇန္တိ စိတ္တစေတသိကာ ဓမ္မာ၊ တေ တေ ဓမ္မာ တေသံ တေသံ ဓမ္မာနံ အာရမ္မဏပစ္စယေန ပစ္စယော’’တိ ဧဝမာဒိနာ ဘဂဝတာ ဝိဘဇိတွာ ဒေသိတော။

ပုစ္ဆာ – တေနာဝုသော…ပေ… ¶ သမ္မာသမ္ဗုဒ္ဓေန အဘိဓမ္မပိဋကေ သတ္တမေ မဟာပကရဏေ ဒွီသု ပဓာနဝါရေသု ဒုတိယေ မဟာဝါရေ ကတိ ဌာနာနိ ဝိဘဇိတွာ ဒေသိတာနိ။

ဝိဿဇ္ဇနာ – အဘိဓမ္မပိဋကေ ဘန္တေ သတ္တသု ပကရဏေသု သတ္တမေ အနန္တနယသမန္တပဋ္ဌာနေ မဟာပကရဏေ ဒွီသု ပဓာနပရိစ္ဆေဒဝါရေသု ဒုတိယေ မဟာဝါရေ ဓမ္မာနုလောမေ ဆ ပဋ္ဌာနာနိ၊ တထာ ဓမ္မပစ္စနီယေ ဓမ္မာနုလောမပစ္စနီယေ ဓမ္မပစ္စနီယာနုလောမေတိ စတုဝီသတိ ပဋ္ဌာနာနိ ဘဂဝတာ ဝိဘဇိတွာ ဒေသိတာနိ။

ပုစ္ဆာ – တေသုပိ ¶ အာဝုသော စတုဝီသတိယာ ပဋ္ဌာနေသု ပဌမေ ဓမ္မာနုလောမတိကပဋ္ဌာနေ ဒွါဝီသတိတိကာ ဘဂဝတာ ကတိဟိ ဝါရေဟိ ဝိဘဇိတွာ ဒေသိတာ။

ဝိဿဇ္ဇနာ – တေသု ဘန္တေ စတုဝီသတိယာ မဟာပဋ္ဌာနေသု ပဌမေ ဓမ္မာနုလောမတိကပဋ္ဌာနေ ဒွါဝီသတိတိကာ ပဋိစ္စဝါရော သဟဇာတဝါရော ပစ္စယဝါရော နိဿယဝါရော သံသဋ္ဌဝါရော သမ္ပယုတ္တဝါရော ပဉှာဝါရောတိ သတ္တဟိ သတ္တဟိ ဝါရေဟိ ဝိဘဇိတွာ ဘဂဝတာ ဒေသိတာ။

ပုစ္ဆာ – တေသု ¶ စာဝုသော ဒွါဝီသတိယာ တိကေသု ပဌမေ ကုသလတ္တိကေ သတ္တသု မဟာဝါရေသု ပဌမော ပဋိစ္စမဟာဝါရော ဘဂဝတာ ကထံ ဝိဘဇိတွာ ဒေသိတော။

ဝိဿဇ္ဇနာ – တေသု ဘန္တေ ဒွါဝီသတိယာ တိကေသု ပဌမေ ကုသလတ္တိကေ သတ္တသု မဟာဝါရေသု ပဌမော ပဋိစ္စမဟာဝါရော သိယာ ကုသလံ ဓမ္မံ ပဋိစ္စ ကုသလော ဓမ္မော ဥပ္ပဇ္ဇေယျ ဟေတုပစ္စယာ။ သိယာ ကုသလံ ဓမ္မံ ပဋိစ္စ အကုသလော ဓမ္မော ဥပ္ပဇ္ဇေယျ ဟေတုပစ္စယာ။ သိယာ ကုသလံ ဓမ္မံ ပဋိစ္စ အဗျာကတော ဓမ္မော ဥပ္ပဇ္ဇေယျ ဟေတုပစ္စယာ။ သိယာ ကုသလံ ဓမ္မံ ပဋိစ္စ ကုသလာ စ အဗျာကတာ စ ဓမ္မာ ဥပ္ပဇ္ဇေယျုံ ဟေတုပစ္စယာ။ သိယာ ကုသလံ ဓမ္မံ ပဋိစ္စ အကုသလော စ အဗျာကတော စ ဓမ္မာ ဥပ္ပဇ္ဇေယျုံ ဟေတုပစ္စယာ။ သိယာ ကုသလံ ဓမ္မံ ပဋိစ္စ ကုသလော စ အကုသလော စ ဓမ္မာ ဥပ္ပဇ္ဇေယျုံ ဟေတုပစ္စယာ။ သိယာ ကုသလံ ဓမ္မံ ပဋိစ္စ ကုသလော စ အကုသလော စ အဗျာကတော စ ဓမ္မာ ဥပ္ပဇ္ဇေယျုံ ဟေတုပစ္စယာ’’တိ ဧဝမာဒိနာ ပုစ္ဆာဝါရေန စ။ ‘‘ကုသလံ ဓမ္မံ ပဋိစ္စ ကုသလော ဓမ္မော ဥပ္ပဇ္ဇတိ ဟေတုပစ္စယာ။ ကုသလံ ဧကံ ခန္ဓံ ပဋိစ္စ တယော ခန္ဓာ၊ တယော ခန္ဓေ ပဋိစ္စ ဧကော ခန္ဓော၊ ဒွေ ခန္ဓေ ပဋိစ္စ ဒွေ ခန္ဓာ။ ကုသလံ ဓမ္မံ ပဋိစ္စ အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ ကုသလေ ခန္ဓေ ပဋိစ္စ စိတ္တသမုဋ္ဌာနံ ရူပံ။ ကုသလံ ဓမ္မံ ပဋိစ္စ ကုသလော စ အဗျာကတော စ ဓမ္မာ ဥပ္ပဇ္ဇန္တိ ဟေတုပစ္စယာ။ ကုသလံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ၊ တယော ခန္ဓေ ပဋိစ္စ ဧကော ခန္ဓော စိတ္တသမုဋ္ဌာနဉ္စ ရူပံ၊ ဒွေ ခန္ဓေ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပ’’န္တိ ဧဝမာဒိနာ ဝိဿဇ္ဇနာ ဝိဿဇ္ဇနာဝါရေန စ။ ‘‘ဟေတုယာ နဝ၊ အာရမ္မဏေ တီဏိ၊ အဓိပတိယာ နဝ၊ အနန္တရေ သမနန္တရေ တီဏိ၊ သဟဇာတေ နဝ၊ အညမညေ တီဏိ၊ နိဿယေ နဝ၊ ဥပနိဿယေ တီဏိ၊ ပုရေဇာတေ တီဏိ၊ အာသေဝနေ တီဏိ၊ ကမ္မေ နဝ၊ ဝိပါကေ ဧကံ၊ အာဟာရေ ဈာနေ ဣန္ဒြိယေ ¶ မဂ္ဂေ နဝ၊ သမ္ပယုတ္တေ တီဏိ၊ ဝိပ္ပယုတ္တေ အတ္ထိယာ နဝ၊ နတ္ထိယာ ဝိဂတေ တီဏိ၊ အဝိဂတေ နဝါ’’တိ ဧဝမာဒိနာ သင်္ချာဝါရေန စ ဘဂဝတာ ဝိတ္ထာရတော ဝိဘဇိတွာ ဒေသိတော။

သိယာ ကုသလံ ဓမ္မံ ပဋိစ္စ ကုသလော ဓမ္မော ဥပ္ပဇ္ဇေယျ ဟေတုပစ္စယာ။

ပုစ္ဆာ – တေနာဝုသော ¶ ဘဂဝတာ…ပေ… သမ္မာသမ္ဗုဒ္ဓေန အဘိဓမ္မပိဋကေ မဟာပကရဏေ စတုဝီသတိယာ ပဋ္ဌာနေသု ပဌမေ ဓမ္မာနုလောမတိကပဋ္ဌာနေ ဒွါဝီသတိယာ တိကေသု ပဌမေ ကုသလတ္တိကေ သတ္တသု မဟာဝါရေသု ဒုတိယော သဟဇာတဝါရော ကထံ ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – အဘိဓမ္မပိဋကေ ဘန္တေ အနန္တနယပဋ္ဌာနေ မဟာပကရဏေ စတုဝီသတိယာ ပဋ္ဌာနေသု ပဌမေ ဓမ္မာနုလောမတိကပဋ္ဌာနေ ဒွါဝီသတိယာ တိကေသု ပဌမေ ကုသလတ္တိကေ သတ္တသု မဟာဝါရေသု ဒုတိယော သဟဇာတာဝါရော ‘‘ကုသလံ ဓမ္မံ သဟဇာတော ကုသလော ဓမ္မော ဥပ္ပဇ္ဇတိ ဟေတုပစ္စယာ၊ ကုသလံ ဧကံ ခန္ဓံ သဟဇာတာ တယော ခန္ဓာ၊ တယော ခန္ဓေ သဟဇာတော ဧကော ခန္ဓော၊ ဒွေ ခန္ဓေ သဟဇာတာ ဒွေ ခန္ဓာ။ ကုသလံ ဓမ္မံ သဟဇာတော အဗျာကတော ဓမ္မော ဥပ္ပဇ္ဇတိ ဟေတုပစ္စယာ၊ ကုသလေ ခန္ဓေ သဟဇာတံ စိတ္တသမုဋ္ဌာနံ ရူပံ။ ကုသလံ ဓမ္မံ သဟဇာတော ကုသလော စ အဗျာကတော စ ဓမ္မာ ဥပ္ပဇ္ဇန္တိ ဟေတုပစ္စယာ၊ ကုသလံ ဧကံ ခန္ဓံ သဟဇာတာ တယော ခန္ဓာ စိတ္တသမုဋ္ဌာနဉ္စ ရူပံ၊ တယော ခန္ဓေ သဟဇာတော ဧကော ခန္ဓော စိတ္တသမုဋ္ဌာနဉ္စ ရူပံ၊ ဒွေ ခန္ဓေ စိတ္တသမုဋ္ဌာနဉ္စ ရူပ’’န္တိ ဧဝမာဒိနာ ဝိဿဇ္ဇနာဝါရေန စ။ ဟေတုယာ နဝ၊ အာရမ္မဏေ တီဏိ၊ အဓိပတိယာ နဝ၊ အနန္တရေ သမနန္တရေ တီဏီ’’တိ ဧဝမာဒိနာ သင်္ချာဝါရေန စ ဝါစနာမဂ္ဂတော ဒွီဟိ ဝါရေဟိ ပဋိမဏ္ဍိတွာ ဘဂဝတာ ဝိတ္ထာရတော ဝိဘဇိတွာ ဒေသိတော။

ပုစ္ဆာ – တေနာဝုသော ¶ ဘဂဝတာ…ပေ… သမ္မာသမ္ဗုဒ္ဓေန ပဋ္ဌာနမဟာပကရဏေ စတုဝီသတိယာ ပဋ္ဌာနေသု ပဌမေ ဓမ္မာနုလောမတိကပဋ္ဌာနေ ဒွါဝီသတိယာ တိကေသု ပဌမေ ကုသလတ္တိကေ သတ္တသု မဟာဝါရေသု တတိယော ပစ္စယဝါရော ကထံ ဝိဘဇိတွာ ဝိတ္ထာရေန ဒေသိတော။

ဝိဿဇ္ဇနာ – အဘိဓမ္မပိဋကေ ဘန္တေ သတ္တသု ပကရဏေသု သတ္တမေ အနန္တနယသမန္တပဋ္ဌာနေ မဟာပကရဏေ စတုဝီသတိယာ ပဋ္ဌာနေသု ပဌမေ ဓမ္မာနုလောမတိကပဋ္ဌာနေ ဗာဝီသတိယာ တိကေသု ပဌမေ ကုသလတ္တိကေ သတ္တသု မဟာဝါရေသု တတိယော ပစ္စယဝါရော ‘‘သိယာ ကုသလံ ဓမ္မံ ပစ္စယာ ကုသလော ဓမ္မော ဥပ္ပဇ္ဇေယျ ဟေတုပစ္စယာ၊ သိယာ ကုသလံ ဓမ္မံ ပစ္စယာ အကုသလော ဓမ္မော ဥပ္ပဇ္ဇေယျ ဟေတုပစ္စယာ၊ သိယာ ကုသလံ ဓမ္မံ ပစ္စယာ အဗျာကတော ဓမ္မော ဥပ္ပဇ္ဇေယျ ဟေတုပစ္စယာ’’တိ ဧဝမာဒိနာ ပုစ္ဆာဝါရေန စ။ ‘‘ကုသလံ ဓမ္မံ ပစ္စယာ ကုသလော ဓမ္မော ဥပ္ပဇ္ဇတိ ဟေတုပစ္စယာ၊ ကုသလံ ဧကံ ခန္ဓံ ပစ္စယာ တယော ခန္ဓာ၊ တယော ခန္ဓေ ပစ္စယာ ဧကော ခန္ဓော၊ ဒွေ ခန္ဓေ ပစ္စယာ ဒွေ ခန္ဓာ’’တိ ဧဝမာဒိနာ ဝိဿဇ္ဇနာဝါရေန စ။ ‘‘ဟေတုယာ သတ္တရသ၊ အာရမ္မဏေ သတ္တ၊ အဓိပတိယာ သတ္တရသ၊ အနန္တရေ သမနန္တရေ သတ္တ၊ သဟဇာတေ သတ္တရသ။ အညမညေ သတ္တာ’’တိ ဧဝမာဒိနာ သင်္ချာဝါရေန စ။ ပစ္စယာနုလောမ ပစ္စယ ပစ္စနိယ ပစ္စယာနုလောမ ပစ္စနီယ ပစ္စယ ပစ္စနီယာနုလောမသင်္ခါတေဟိ ¶ စတူဟိ နယေဟိ ဝိဘဇိတွာ ဘဂဝတာ ဒေသိတော။

ကုသလံ ဓမ္မံ ပစ္စယာ ကုသလော ဓမ္မော ဥပ္ပဇ္ဇတိ ဟေတုပစ္စယာ။ ကုသလံ ဧကံ ခန္ဓံ ပစ္စယာ တယော ခန္ဓာ၊ တယော ခန္ဓေ ပစ္စယာ ဧကော ခန္ဓော၊ ဒွေ ခန္ဓေ ပစ္စယာ ဒွေ ခန္ဓာ- …။

ပုစ္ဆာ – တေနာဝုသော ¶ ဘဂဝတာ…ပေ… သမ္မာသမ္ဗုဒ္ဓေန အဘိဓမ္မပိဋကေ သတ္တသု မဟာပကရဏေသု သတ္တမေ ပဋ္ဌာနမဟာပကရဏေ စတုဝီသတိယာ ပဋ္ဌာနေသု ပဌမေ ဓမ္မာနုလောမတိကပဋ္ဌာနေ ဒွါဝီသတိယာ တိကေသု ပဌမေ ကုသလတ္တိကေ သတ္တသု မဟာဝါရေသု သတ္တမော ပဉှာဝါရော ကထံ ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – အဘိဓမ္မပိဋကေ ဘန္တေ သတ္တသု ပကရဏေသု သတ္တမေ အနန္တနယသမန္တပဋ္ဌာနေ မဟာပကရဏေ စတုဝီသတိယာ ပဋ္ဌာနေသု ပဌမေ ဓမ္မာနုလောမတိကပဋ္ဌာနေ ဒွါဝီသတိယာ တိကေသု ပဌမေ ကုသလတ္တိကေ သတ္တသု မဟာဝါရေသု သတ္တမော ပဉှာဝါရော ‘‘သိယာ ကုသလော ဓမ္မော ကုသလဿ ဓမ္မဿ ဟေတုပစ္စယေန ပစ္စယော။ သိယာ ကုသလော ဓမ္မော အကုသလဿ ဓမ္မဿ ဟေတုပစ္စယေန ပစ္စယော။ သိယာ ကုသလော ဓမ္မော အဗျာကတဿ ¶ ဓမ္မဿ ဟေတုပစ္စယေန ပစ္စယော’’တိ ဧဝမာဒိနာ ပုစ္ဆာဝါရေန စ။ ‘‘ကုသလော ဓမ္မော ကုသလဿ ဓမ္မဿ ဟေတုပစ္စယေန ပစ္စယော၊ ကုသလာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော။ ကုသလော ဓမ္မော အဗျာကတဿ ဓမ္မဿ ဟေတုပစ္စယေန ပစ္စယော၊ ကုသလာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော’’တိ ဧဝမာဒိနာ ဝိဿဇ္ဇနာဝါရေန စ ‘‘ဟေတုယာ သတ္တ၊ အာရမ္မဏေ နဝ၊ အဓိပတိယာ ဒသ၊ အနန္တရေ သမနန္တရေ သတ္တ၊ သဟဇာတေ နဝ၊ အညမညေ တီဏိ၊ နိဿယေ တေရသ၊ ဥပနိဿယေ နဝ၊ ပုရေဇာတေ ပစ္ဆာဇာတေ အာသေဝနေ တီဏိ၊ ကမ္မေ သတ္တ၊ ဝိပါကေ ဧကံ။ အာဟာရေ ဣန္ဒြိယေ ဈာနေ မဂ္ဂေ သတ္တ၊ သမ္ပယုတ္တေ တီဏိ၊ ဝိပ္ပယုတ္တေ ပဉ္စ၊ အတ္ထိယာ တေရသ၊ နတ္ထိယာ ဝိဂတေ သတ္တ၊ အဝိဂတေ တေရသာ’’တိ ဧဝမာဒိနာ သင်္ချာဝါရေန စ ပစ္စယာနုလောမပစ္စယပစ္စနီယပစ္စယာနုလောမပစ္စနီယပစ္စယပစ္စနီယာနုလောမသင်္ခါတေဟိ စတူဟိ နယေဟိ ဘဂဝတာ ဝိတ္ထာရတော ဝိဘဇိတွာ ဒေသိတော။

ကုသလော ¶ ဓမ္မော ကုသလဿ ဓမ္မဿ ဟေတုပစ္စယေန ပစ္စယော၊ ကုသလာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော။ ကုသလော ဓမ္မော အဗျာကတဿ ဓမ္မဿ ဟေတုပစ္စယေန ပစ္စယော၊ ကုသလာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော။ ကုသလော ဓမ္မော ကုသလဿ စ အဗျာကတဿ စ ဓမ္မဿ ဟေတုပစ္စယေန ပစ္စယော၊ ကုသလာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော …။

ပုစ္ဆာ – တေနာဝုသော ¶ ဘဂဝတာ…ပေ… သမ္မာသမ္ဗုဒ္ဓေန အဘိဓမ္မပိဋကေ သတ္တသု ပကရဏေသု သတ္တမေ ပဋ္ဌာနမဟာပကရဏေ စတုဝီသတိယာ ပဋ္ဌာနေသု ပဌမေ ဓမ္မာနုလောမတိကပဋ္ဌာနေ ဒွါဝီသတိယာ တိကေသု ပဌမေ ကုသလတ္တိကေ သတ္တသု မဟာဝါရေသု သတ္တမေ ပဉှာဝါရေ ပုစ္ဆာဝိဿဇ္ဇနာသင်္ချာဝါရသင်္ခါတေသု တီသု ဝါရေသု ဝိဿဇ္ဇနာဝါရေ ဟေတုပစ္စယဝိဘင်္ဂေါ ကထံ ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – အဘိဓမ္မပိဋကေ ဘန္တေ သတ္တသု ပကရဏေသု သတ္တမေ အနန္တနယသမန္တပဋ္ဌာနေ မဟာပကရဏေ စတုဝီသတိယာ ပဋ္ဌာနေသု ပဌမေ ဓမ္မာနုလောမတိကပဋ္ဌာနေ ဒွါဝီသတိယာ တိကေသု ပဌမေ ကုသလတ္တိကေ သတ္တသု မဟာဝါရေသု သတ္တမေ ပဉှာဝါရေ ပစ္စယာနုလောမပစ္စယပစ္စနီယ ပစ္စယာနုလောမ ပစ္စနီယပစ္စယ ပစ္စယနီယာနုလောမသင်္ခါတေသု စတူသု နယေသု ပဌမေ ပစ္စယာနုလောမနယေ ပုစ္ဆာဝါရဝိဿဇ္ဇနာဝါရသင်္ချာဝါရသင်္ခါတေသု တီသုပိ ဝါရေသု ဒုတိယေ ဝိဿဇ္ဇနာဝါရေ ဟေတုပစ္စယဝိဘင်္ဂေါ ‘‘ကုသလော ဓမ္မော ကုသလဿ ဓမ္မဿ ဟေတုပစ္စယေန ပစ္စယော၊ ကုသလာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော။ ကုသလော ဓမ္မော အဗျာကတဿ ဓမ္မဿ ဟေတုပစ္စယေန ပစ္စယော။ ကုသလာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ¶ ပစ္စယော။ ကုသလော ဓမ္မော ကုသလဿ စ အဗျာကတဿ စ ဓမ္မဿ ဟေတုပစ္စယေန ပစ္စယော၊ ကုသလာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော’’တိ ဧဝမာဒိနာ ဘဂဝတာ ဝိတ္ထာရတော ဝိဘဇိတွာ ဒေသိတော။

… ‘‘ကုသလော ¶ ဓမ္မော ကုသလဿ ဓမ္မဿ ဟေတုပစ္စယေန ပစ္စယော၊ ကုသလာ ဟေတူ သမ္ပယတ္တကာနံ ခန္ဓာနံ ဟေတုပစ္စယေန ပစ္စယော။ ကုသလော ဓမ္မော အဗျာကတဿ ဓမ္မဿ ဟေတုပစ္စယေန ပစ္စယော၊ ကုသလာ ဟေတူ စိတ္တသမုဋ္ဌာနံ ရူပါနံ ဟေတုပစ္စယေန ပစ္စယော။ ကုသလော ဓမ္မော ကုသလဿ စ အဗျာကတဿ စ ဓမ္မဿ ဟေတုပစ္စယေန ပစ္စယော၊ ကုသလာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော’’။

ပုစ္ဆာ – တေနာဝုသော…ပေ… သမ္မာသမ္ဗုဒ္ဓေန အဘိဓမ္မပိဋကေ သတ္တသု ပကရဏေသု သတ္တမေ ပဋ္ဌာနမဟာပကရဏေ စတုဝီသတိယာ ပဋ္ဌာနေသု ပဌမေ ဓမ္မာနုလောမတိကပဋ္ဌာနေ ဒွါဝီသတိယာ တိကေသု ပဌမေ ကုသလတ္တိကေ သတ္တသု မဟာဝါရေသု သတ္တမေ ပဉှာဝါရေ စတူသု နယေသု ပဌမေ ပစ္စယာနုလောမနယေ ပုစ္ဆာဝိဿဇ္ဇနာသင်္ချာဝါရသင်္ခါတေသု တီသု ဝါရေသု ဒုတိယေ ဝိဿဇ္ဇနာဝါရေ ဟေတုပစ္စယဝိဘင်္ဂါဒီသု စတုဝီသတိယာ ဝိဘင်္ဂေသု ဒုတိယော အာရမ္မဏပစ္စယဝိဘင်္ဂေါ ကထံ ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – အဘိဓမ္မပိဋကေ ¶ ဘန္တေ သတ္တသု ပကရဏေသု သတ္တမေ အနန္တနယသမန္တပဋ္ဌာနေ မဟာပကရဏေ စတုဝီသတိယာ ပဋ္ဌာနေသု ပဌမေ ဓမ္မာနုလောမတိကပဋ္ဌာနေ ဒွါဝီသတိယာ တိကေသု ပဌမေ ကုသလတ္တိကေ သတ္တသု မဟာဝါရေသု သတ္တမေ ပဉှာဝါရေ စတူသု နယေသု ပဌမေ ပစ္စယာနုလောမနယေ တီသု စ ဝါရေသု ဒုတိယေ ဝိဘင်္ဂဝါရေ ဟေတုပစ္စယဝိဘင်္ဂါဒီသု စတုဝီသတိယာ ဝိဘင်္ဂေသု ဒုတိယော အာရမ္မဏပစ္စယဝိဘင်္ဂေါ ‘‘ကုသလော ဓမ္မော ကုသလဿ ဓမ္မဿ အာရမ္မဏပစ္စယေန ပစ္စယော၊ ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ပစ္စဝေက္ခတိ၊ ပုဗ္ဗေ သုစိဏ္ဏာနိ ပစ္စဝေက္ခတိ၊ ဈာနာ ဝုဋ္ဌဟိတွာ ဈာနံ ပစ္စဝေက္ခတိ၊ သေက္ခာ ဂေါတြဘုံ ပစ္စဝေက္ခန္တိ၊ ဝေါဒါနံ ပစ္စဝေက္ခန္တိ၊ သေက္ခာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ သေက္ခာ ဝါ ပုထုဇ္ဇနာ ဝါ ကုသလံ အနိစ္စတော ဒုက္ခတော အနတ္တတော ဝိပဿန္တိ၊ စေတောပရိယဉာဏေန ကုသလစိတ္တသမင်္ဂိဿ စိတ္တံ ဇာနန္တိ၊ အာကာသာနဉ္စာယတနကုသလံ ဝိညာဏဉ္စာယတနကုသလဿ အာရမ္မဏပစ္စယေန ပစ္စယော။ အာကိဉ္စညာယတနကုသလံ နေဝသညာနာသညာယတနကုသလဿ အာရမ္မဏပစ္စယေန ပစ္စယော။ ကုသလာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မုပဂဉာဏဿ၊ အနာဂတံသဉာဏဿ အာရမ္မဏပစ္စယေန ပစ္စယော’’တိ ဧဝမာဒိနာ ဘဂဝတာ ဝိတ္ထာရတော ဝိဘဇိတွာ ဒေသိတော။

ပုစ္ဆာ – အဘိဓမ္မပိဋကေ ¶ အာဝုသော သတ္တသု ပကရဏေသု သတ္တမေ ပဋ္ဌာနမဟာပကရဏေ စတုဝီသတိယာ ပဋ္ဌာနေသု ပဌမေ ဓမ္မာနုလောမတိကပဋ္ဌာနေသု ဗာဝီသတိယာ တိကေသု ပဌမေ ကုသလတ္တိကေ သတ္တသု မဟာဝါရေသု သတ္တမေ ပဉှာဝါရေ စတူသု နယေသု ပဌမေ ပစ္စယာနုလောမနယေ ပုစ္ဆာဝိဿဇ္ဇနာသင်္ချာသင်္ခါတေသု တီသု ဝါရေသု ဒုတိယေ ဝိဿဇ္ဇနာသင်္ခါတေ ဝိဘင်္ဂဝါရေ ဟေတုပစ္စယဝိဘင်္ဂါဒီသု စတုဝီသတိယာ ဝိဘင်္ဂေသု တတိယော အဓိပတိပစ္စယဝိဘင်္ဂေါ ကထံ ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – အဘိဓမ္မပိဋကေ ဘန္တေ သတ္တသု ပကရဏေသု သတ္တမေ အနန္တနယသမန္တပဋ္ဌာနေ မဟာပကရဏေ စတုဝီသတိယာ ပဋ္ဌာနေသု ပဌမေ ဓမ္မာနုလောမတိကပဋ္ဌာနေ ဗာဝီသတိယာ တိကေသု ပဌမေ ကုသလတ္တိကေ သတ္တသု မဟာဝါရေသု သတ္တမေ ပဉှာဝါရေ စတူသု နယေသု ပဌမေ ပစ္စယာနုလောမနယေ ပုစ္ဆာဝိဿဇ္ဇနာသင်္ချာသင်္ခါတေသု တီသု ဝါရေသု ဒုတိယေ ဝိဿဇ္ဇနာသင်္ခါတေ ဝိဘင်္ဂဝါရေ ဟေတုပစ္စယဝိဘင်္ဂါဒီသု စတုဝီသတိယာ ဝိဘင်္ဂေသု တတိယော အဓိပတိပစ္စယဝိဘင်္ဂေါ ‘‘ကုသလော ဓမ္မော ကုသလဿ ဓမ္မဿ အဓိပတိပစ္စယေန ပစ္စယော။ အာရမ္မဏာဓိပတိ၊ သဟဇာတာဓိပတိ။ အာရမ္မဏာဓိပတိ–ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ဂရုံ ကတွာ ပစ္စဝေက္ခတိ။ ပုဗ္ဗေ သုစိဏ္ဏာနိ ဂရုံ ကတွာ ပစ္စဝေက္ခတိ၊ ဈာနာ ဝုဋ္ဌဟိတွာ ဈာနံ ဂရုံ ကတွာ ပစ္စဝေက္ခတိ၊ သေက္ခာ ဂေါတြဘုံ ဂရုံ ကတွာ ပစ္စဝေက္ခန္တိ၊ ဝေါဒါနံ ဂရုံ ကတွာ ပစ္စဝေက္ခန္တိ၊ သေက္ခာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ ပစ္စဝေက္ခန္တိ။ သဟဇာတာဓိပတိ–ကုသလာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော’’တိ ဧဝမာဒိနာ ဘဂဝတာ ဝိတ္ထာရတော ဝိဘဇိတွာ ဒေသိတော။

ပုစ္ဆာ – တေနာဝုသော ¶ ဘဂဝတာ…ပေ… စတုတ္ထော အနန္တရပစ္စယဝိဘင်္ဂေါ ကထံ ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – အဘိဓမ္မပိဋကေ ဘန္တေ…ပေ… စတုတ္ထော အနန္တရပစ္စယဝိဘင်္ဂေါ ‘‘ကုသလော ဓမ္မော ကုသလဿ ဓမ္မဿ အနန္တရပစ္စယေန ပစ္စယော၊ ပုရိမာ ပုရိမာ ကုသလာ ခန္ဓာ ပစ္ဆိမာနံ ပစ္ဆိမာနံ ကုသလာနံ ခန္ဓာနံ အနန္တရပစ္စယေန ပစ္စယော။ အနုလောမံ ဂေါတြဘုဿ၊ အနုလောမံ ဝေါဒါနဿ၊ ဂေါတြဘု မဂ္ဂဿ၊ ဝေါဒါနံ မဂ္ဂဿ အနန္တရပစ္စယေန ပစ္စယော’’တိ ဧဝမာဒိနာ ဘဂဝတာ ဝိတ္ထာရတော ဝိဘဇိတွာ ဒေသိတော။

ပုစ္ဆာ – တေနာဝုသော…ပေ… ¶ ဆဋ္ဌော သဟဇာတပစ္စယဝိဘင်္ဂေါ ကထံ ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – အဘိဓမ္မပိဋကေ ¶ ဘန္တေ…ပေ… ဆဋ္ဌော သဟဇာတပစ္စယဝိဘင်္ဂေါ ‘‘ကုသလော ဓမ္မော ကုသလဿ ဓမ္မဿ သဟဇာတပစ္စယေန ပစ္စယော၊ ကုသလော ဧကော ခန္ဓော တိဏ္ဏန္နံ ခန္ဓာနံ သဟဇာတပစ္စယေန ပစ္စယော၊ တယော ခန္ဓာ ဧကဿ ခန္ဓဿ သဟဇာတပစ္စယေန ပစ္စယော၊ ဒွေ ဒွိန္နံ ခန္ဓာနံ သဟဇာတပစ္စယေန ပစ္စယော။ ကုသလော ဓမ္မော အဗျာကတဿ ဓမ္မဿ သဟဇာတပစ္စယေန ပစ္စယော၊ ကုသလာ ခန္ဓာ စိတ္တသမုဋ္ဌာနာနံ ရူပါနံ သဟဇာတပစ္စယေန ပစ္စယော’’တိ ဧဝမာဒိနာ ဘဂဝတာ ဝိတ္ထာရတော ဝိဘဇိတွာ ဒေသိတော။

ပုစ္ဆာ – တေနာဝုသော ¶ ဘဂဝတာ…ပေ… နဝမော ဥပနိဿယပစ္စယဝိဘင်္ဂေါ ကထံ ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – အဘိဓမ္မပိဋကေ ဘန္တေ…ပေ… နဝမော ဥပနိဿယပစ္စယဝိဘင်္ဂေါ ‘‘ကုသလော ဓမ္မော ကုသလဿ ဓမ္မဿ ဥပနိဿယပစ္စယေန ပစ္စယော။ အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ အာရမ္မဏူပနိဿယော–ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ ကံ ဂရုံ ကတွာ ပစ္စဝေက္ခတိ…ပေ…

ပကတူပနိဿယော – သဒ္ဓံ ¶ ဥပနိဿာယ ဒါနံ ဒေတိ သီလံ သမာဒိယတိ ဥပေါသထကမ္မံ ကရောတိ၊ ဈာနံ ဥပ္ပာဒေတိ၊ ဝိပဿနံ ဥပ္ပာဒေတိ၊ မဂ္ဂံ ဥပ္ပာဒေတိ၊ အဘိညံ ဥပ္ပာဒေတိ၊ သမာပတ္တိံ ဥပ္ပာဒေတီ’’တိ ဧဝမာဒိနာ ဘဂဝတာ ဝိတ္ထာရတော ဝိဘဇိတွာ ဒေသိတော။

ပုစ္ဆာ – တေနာဝုသော…ပေ… ¶ ဒသမော ပုရေဇာတပစ္စယဝိဘင်္ဂေါ ကထံ ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – အဘိဓမ္မပိဋကေ ဘန္တေ…ပေ… ဒသမော ပုရေဇာတပစ္စယဝိဘင်္ဂေါ ‘‘အဗျာကတော ဓမ္မော အဗျာကတဿ ဓမ္မဿ ပုရေဇာတပစ္စယေန ပစ္စယော။ အာရမ္မဏပုရေဇာတံ၊ ဝတ္ထုပုရေဇာတံ။ အာရမ္မဏပုရေဇာတံ–အရဟာ စက္ခုံ အနိစ္စတော ဒုက္ခတော အနတ္တတော ဝိပဿတိ။ ဃာနံ၊ ဇိဝှံ၊ ကာယံ၊ ရူပေ၊ သဒ္ဒေ၊ ဂန္ဓေ၊ ရသေ၊ ဖောဋ္ဌဗ္ဗေ၊ ဝတ္ထုံ အနိစ္စတော ဒုက္ခတော အနတ္တတော ဝိပဿတိ။ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ ရူပါယတနံ စက္ခုဝိညာဏဿ၊ သဒ္ဒါယတနံ သောတဝိညာဏဿ၊ ဂန္ဓာယတနံ ဃာနဝိညာဏဿ၊ ရသာယတနံ ဇိဝှာဝိညာဏဿ၊ ဖောဋ္ဌဗ္ဗာယတနံ ကာယဝိညာဏဿ ပုရေဇာတပစ္စယေန ပစ္စယော။ ဝတ္ထုပုရေဇာတံ–စက္ခာယတနံ စက္ခုဝိညာဏဿ၊ သောတာယတနံ သောတဝိညာဏဿ၊ ဃာနာယတနံ ဃာနဝိညာဏဿ၊ ဇိဝှာယတနံ ဇိဝှာဝိညာဏဿ၊ ကာယာယတနံ ကာယဝိညာဏဿ၊ ဝတ္ထု ဝိပါကာဗျာကတာနံ ကြိယာဗျာကတာနံ ခန္ဓာနံ ပုရေဇာတပစ္စယေန ပစ္စယော’’တိ ဧဝမာဒိနာ ဘဂဝတာ ဝိတ္ထာရတော ဝိဘဇိတွာ ဒေသိတော။

ပုစ္ဆာ – တေနာဝုသော ¶ ဘဂဝတာ…ပေ… တေရသမော ကမ္မပစ္စယဝိဘင်္ဂေါ ကထံ ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – အဘိဓမ္မပိဋကေ ဘန္တေ…ပေ… တေရသမော ကမ္မပစ္စယဝိဘင်္ဂေါ ‘‘ကုသလော ဓမ္မော ကုသလဿ ဓမ္မဿ ကမ္မပစ္စယေန ပစ္စယော၊ ကုသလာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော။ ကုသလော ဓမ္မော အဗျာကတဿ ဓမ္မဿ ကမ္မပစ္စယေန ပစ္စယော။ သဟဇာတာ၊ နာနာက္ခဏိကာ။ သဟဇာတာ–ကုသလာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော။ နာနာက္ခဏိကာ–ကုသလာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော။ ကုသလော ဓမ္မော ကုသလဿ စ အဗျာကတဿ စ ဓမ္မဿ ကမ္မပစ္စယေန ပစ္စယော။ ကုသလာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော’’တိ ဧဝမာဒိနာ ဘဂဝတာ ဝိတ္ထာရတော ဝိဘဇိတွာ ဒေသိတော။

ပုစ္ဆာ – တေနာဝုသော…ပေ… ¶ ပန္နရသမော အာဟာရပစ္စယဝိဘင်္ဂေါ ကထံ ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – အဘိဓမ္မပိဋကေ ဘန္တေ…ပေ… ပန္နရသမော အာဟာရပစ္စယဝိဘင်္ဂေါ ‘‘ကုသလော ဓမ္မော ကုသလဿ ဓမ္မဿ အာဟာရပစ္စယေန ပစ္စယော။ ကုသလာ အာဟာရာ သမ္ပယုတ္တကာနံ ခန္ဓာနံ အာဟာရပစ္စယေန ပစ္စယော။ ကုသလော ဓမ္မော အဗျာကတဿ ဓမ္မဿ အာဟာရပစ္စယေန ပစ္စယော။ ကုသလာ အာဟာရာ စိတ္တသမုဋ္ဌာနာနံ ရူပါနံ အာဟာရပစ္စယေန ပစ္စယော’’တိ ဧဝမာဒိနာ ဘဂဝတာ ဝိတ္ထာရတော ဝိဘဇိတွာ ဒေသိတော။

ပုစ္ဆာ – တေနာဝုသော ¶ ဘဂဝတာ…ပေ… သောဠသမော ဣန္ဒြိယပစ္စယဝိဘင်္ဂေါ ကထံ ဝိတ္ထာရေန ဝိဘဇိတွာ ဒေသိတော။

ဝိဿဇ္ဇနာ – အဘိဓမ္မပိဋကေ ဘန္တေ…ပေ… သောဠသမော ဣန္ဒြိယပစ္စယဝိဘင်္ဂေါ ‘‘ကုသလော ဓမ္မော ကုသလဿ ဓမ္မဿ ဣန္ဒြိယပစ္စယေန ပစ္စယော၊ ကုသလော ဣန္ဒြိယာ သမ္ပယုတ္တကာနံ ခန္ဓာနံ ဣန္ဒြိယပစ္စယေန ပစ္စယော။ ကုသလော ဓမ္မော အဗျာကတဿ ဓမ္မဿ ဣန္ဒြိယပစ္စယေန ပစ္စယော၊ ကုသလာ ဣန္ဒြိယာ စိတ္တသမုဋ္ဌာနာနံ ¶ ရူပါနံ ဣန္ဒြိယပစ္စယေန ပစ္စယော’’တိ ဧဝမာဒိနာ ဘဂဝတာ ဝိတ္ထာရတော ဝိဘဇိတွာ ဒေသိတော။

ပုစ္ဆာ – တေနာဝုသော…ပေ… ¶ ပုစ္ဆာဝိဿဇ္ဇနာသင်္ချာဝါရသင်္ခါတေသု တီသု ဝါရေသု တတိယော သင်္ချာဝါရော ကထံ ဝိတ္ထာရတော ဝိဘဇိတွာ ဒေသိတော။

ဝိဿဇ္ဇနာ – အဘိဓမ္မပိဋကေ ဘန္တေ…ပေ… တတိယော သင်္ချာဝါရော ‘‘ဟေတုယာ သတ္တ၊ အာရမ္မဏေ နဝ၊ အဓိပတိယာ ဒသ၊ အနန္တရ သမနန္တရေ သတ္တ၊ သဟဇာတေ နဝ၊ အညမညေ တီဏိ၊ နိဿယေ တေရသ၊ ဥပနိဿယေ နဝ၊ ပုရေဇာတေ ပစ္ဆာဇာတေ အာသေဝနေ တီဏိ ¶ ၊ ကမ္မေ သတ္တ၊ ဝိပါကေ ဧကံ၊ အာဟာရေ ဣန္ဒြိယေ ဈာနေ မဂ္ဂေ သတ္တ၊ သမ္ပယုတ္တေ တီဏိ၊ ဝိပ္ပယုတ္တေ ပဉ္စ၊ အတ္ထိယာ တေရသ၊ နတ္ထိယာ ဝိဂတေ သတ္တ၊ အဝိဂတေ တေရသာ’’တိ ဧဝမာဒိနာ ဘဂဝတာ ဝိတ္ထာရတော ဝိဘဇိတွာ ဒေသိတော။

ဟေတု ¶ သဟဇာတ နိဿယ အတ္ထိ အဝိဂတန္တိ သတ္တ၊ ဟေတု သဟဇာတ အညမည နိဿယ အတ္ထိ အဝိဂတန္တိ တီဏိ၊ ဟေတု သဟဇာတ အညမည နိဿယ သမ္ပယုတ္တ အတ္ထိ အဝိဂတန္တိ တီဏိ …

ပုစ္ဆာ – တေနာဝုသော ဘဂဝတာ…ပေ… ပဌမံ ကုသလတ္တိကံ ဝိတ္ထာရတော ဝိဘဇိတွာ တဒနန္တရံ အဝသေသာ ဝေဒနာတ္တိကာဒယော ဧကဝီသတိတိကာ ကထံ ဝိတ္ထာရတော ဝိဘဇိတွာ ဒေသိတာ။

ဝိဿဇ္ဇနာ – အဘိဓမ္မပိဋကေ ဘန္တေ…ပေ… ပဌမံ ကုသလတ္တိကံ ဝိတ္ထာရတော ဝိဘဇိတွာ တဒနန္တရံ အဝသေသာ ဝေဒနာတ္တိကာဒယော ဧကဝီသတိတိကာ ¶ ‘‘သုခါယ ဝေဒနာယ သမ္ပယုတ္တံ ဓမ္မံ ပဋိစ္စ သုခါယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ။ သုခါယ ဝေဒနာယ သမ္ပယုတ္တံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော၊ ပဋိသန္ဓိက္ခဏေ သုခါယ ဝေဒနာယ သမ္ပယုတ္တံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော’’တိ ဧဝမာဒိနာ စ။ ဝိပါကံ ဓမ္မံ ပဋိစ္စ ဝိပါကော ဓမ္မော ဥပ္ပဇ္ဇတိ ဟေတုပစ္စယာ။ ဝိပါကံ ဧကံ ခန္ဓံ ပဋိစ္စ တယော ခန္ဓာ၊ တယော ခန္ဓေ ပဋိစ္စ ဧကော ခန္ဓော၊ ဒွေ ခန္ဓေ ပဋိစ္စ ဒွေ ခန္ဓာ၊ ပဋိသန္ဓိက္ခဏေ ဝိပါကံ ဧကံ ခန္ဓံ ပဋိစ္စ တယော ခန္ဓာ၊ တယော ခန္ဓေ ပဋိစ္စ ဧကော ခန္ဓော၊ ဒွေ ခန္ဓေ ပဋိစ္စ ဒွေ ခန္ဓာ။ ဝိပါကံ ဓမ္မံ ပဋိစ္စ နေဝဝိပါကနဝိပါကဓမ္မဓမ္မော ဥပ္ပဇ္ဇတိ ဟေတုပစ္စယာ၊ ဝိပါကေ ခန္ဓေ ပဋိစ္စ စိတ္တသမုဋ္ဌာနရူပံ၊ ပဋိသန္ဓိက္ခဏေ ဝိပါကေ ခန္ဓေ ပဋိစ္စ ကဋတ္တာရူပံ၊ ခန္ဓေ ပဋိစ္စ ဝတ္ထူ’’တိ ဧဝမာဒိနာ စ ဧကေကသ္မိံ တိကေ သတ္တဟိ သတ္တဟိ မဟာဝါရေဟိ ဧကေကသ္မိဉ္စ မဟာဝါရေ စတူဟိ စတူဟိ နယေဟိ ဘဂဝတာ ဝိတ္ထာရတော ဝိဘဇိတွာ ဒေသိတာ။

ပုစ္ဆာ – တေနာဝုသော…ပေ… ¶ တိကပဋ္ဌာနာဒီသု ဆသု အန္တောဂဓပဋ္ဌာနာဒီသု ပဌမံ တိကပဋ္ဌာနံ ဒေသေတွာ တဒနန္တရံ ဒုကပဋ္ဌာနံ ကထံ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – အဘိဓမ္မပိဋကေ ဘန္တေ…ပေ… တိကပဋ္ဌာနာဒီသု ဆသု အန္တောဂဓပဋ္ဌာနာဒီသု ပဌမံ တိကပဋ္ဌာနံ ဝိဘဇိတွာ တဒနန္တရံ ဒုကပဋ္ဌာနံ ‘‘ဟေတုံ ဓမ္မံ ပဋိစ္စ ဟေတု ဓမ္မော ဥပ္ပဇ္ဇတိ ဟေတုပစ္စယာ၊ အလောဘံ ပဋိစ္စ အဒေါသော အမောဟော၊ အဒေါသံ ပဋိစ္စ အလောဘော အမောဟော၊ အမောဟံ ပဋိစ္စ အလောဘော အဒေါသော။ လောဘံ ပဋိစ္စ မောဟော၊ မောဟံ ပဋိစ္စ လောဘော၊ ဒေါသံ ပဋိစ္စ မောဟော၊ မောဟံ ပဋိစ္စ ဒေါသော’’တိ ဧဝမာဒိနာ စ။ သရဏံ ဓမ္မံ ပဋိစ္စ သရဏော ဒမ္မော ဥပ္ပဇ္ဇတိ ဟေတုပစ္စယာ၊ သရဏံ ဧကံ ခန္ဓံ ပဋိစ္စ တယော ခန္ဓာ၊ တယော ခန္ဓေ ပဋိစ္စ ဧကော ခန္ဓော၊ ဒွေ ခန္ဓေ ပဋိစ္စ ဒွေ ခန္ဓာ။ သရဏံ ဓမ္မံ ပဋိစ္စ အရဏော ဓမ္မော ဥပ္ပဇ္ဇတိ ဟေတုပစ္စယာ၊ သရဏော ခန္ဓေ ပဋိစ္စ စိတ္တသမုဋ္ဌာနံ ရူပံ။ သရဏံ ဓမ္မံ ပဋိစ္စ သရဏော စ အရဏော စ ဓမ္မာ ဥပ္ပဇ္ဇန္တိ ဟေတုပစ္စယာ။ သရဏံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ၊ တယော ခန္ဓေ ပဋိစ္စ ဧကော ခန္ဓော စိတ္တသမုဋ္ဌာနဉ္စ ရူပံ၊ ဒွေ ခန္ဓေ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ¶ ရူပ’’န္တိ ဧဝမာဒိနာ စ။ ဧကေကသ္မိံ ဒုကေ သတ္တဟိ သတ္တဟိ မဟာဝါရေဟိ ဧကေကသ္မိဉ္စ မဟာဝါရေ စတူဟိ စတူဟိ နယေဟိ ဘဂဝတာ ဝိတ္ထာရတော ဝိဘဇိတွာ ဒေသိတံ။

သရဏံ ဓမ္မံ ပဋိစ္စ သရဏော ဓမ္မော ဥပ္ပဇ္ဇတိ ဟေတုပစ္စယာ၊ သရဏံ ဧကံ ခန္ဓံ ပဋိစ္စ တယော ခန္ဓာ၊ တယော ခန္ဓေ ပဋိစ္စ ဧကော ခန္ဓော၊ ဒွေ

ပုစ္ဆာ – တေနာဝုသော…ပေ… တိကပဋ္ဌာနာဒီသု ဆသု အန္တောဂဓပဋ္ဌာနေသု ပဌမံ တိကပဋ္ဌာနဉ္စ ဒုတိယံ ဒုကပဋ္ဌာနဉ္စ ဝိဘဇိတွာ တဒဝသေသာနိ ဒုကတိကပဋ္ဌာနာဒီနိ စတ္တာရော ပဋ္ဌာနာနိ ကထံ ဝိဘဇိတွာ ဒေသိတာနိ။

ဝိဿဇ္ဇနာ – အဘိဓမ္မပိဋကေ ဘန္တေ…ပေ… တိကပဋ္ဌာနာဒီသု ဆသု အန္တောဂဓပဋ္ဌာနေသု ပဌမံ တိကပဋ္ဌာနဉ္စ ဒုတိယံ ဒုကပဋ္ဌာနဉ္စ ဝိဘဇိတွာ တဒဝသေသာ ¶ ဒုကတိကပဋ္ဌာနာဒယော ‘‘ဟေတုံ ကုသလံ ဓမ္မံ ပဋိစ္စ ဟေတု ကုသလော ဓမ္မော ဥပ္ပဇ္ဇတိ ဟေတုပစ္စယာ။ ဟေတုံ ကုသလံ ဓမ္မံ ပဋိစ္စ နဟေတု ကုသလော ဓမ္မော ဥပ္ပဇ္ဇတိ ဟေတုပစ္စယာ။ ဟေတုံ ကုသလံ ဓမ္မံ ပဋိစ္စ ဟေတု ကုသလော စ နဟေတု ကုသလော စ ဓမ္မာ ဥပ္ပဇ္ဇန္တိ ဟေတုပစ္စယာ၊ နဟေတုံ ကုသလံ ဓမ္မံ ပဋိစ္စ နဟေတု ကုသလော ဓမ္မော ဥပ္ပဇ္ဇတိ ဟေတုပစ္စယာ၊ နဟေတုံ ကုသလံ ဓမ္မံ ပဋိစ္စ ဟေတု ကုသလော ဓမ္မော ဥပ္ပဇ္ဇတိ ဟေတုပစ္စယာ၊ နဟေတုံ ကုသလံ ဓမ္မံ ပဋိစ္စ ဟေတု ကုသလော စ နဟေတု ကုသလော စ ဓမ္မာ ဥပ္ပဇ္ဇန္တိ ဟေတုပစ္စယာ’’တိ ဧဝမာဒိနာ ဝိတ္ထာရတော ဝိဘဇိတွာ ဒေသိတာနိ။

ပုစ္ဆာ – တေနာဝုသော ¶ ဘဂဝတာ…ပေ… ပဌမံ ဓမ္မာနုလောမပဋ္ဌာနံ ဝိဘဇိတွာ တဒနန္တရံ ဒုတိယံ ဓမ္မပစ္စနီယပဋ္ဌာနံ ကထံ ဝိဘဇိတွာ ဒေသိတံ။

ဝိဿဇ္ဇနာ – အဘိဓမ္မပိဋကေ ဘန္တေ…ပေ… ပဌမံ ဓမ္မာနုလောမပဋ္ဌာနံ ဝိဘဇိတွာ တဒနန္တရံ ဒုတိယံ ဓမ္မပစ္စနီယပဋ္ဌာနံ ‘‘နကုသလံ ဓမ္မံ ပဋိစ္စ နကုသလော ဓမ္မော ဥပ္ပဇ္ဇတိ ဟေတုပစ္စယာ။ အကုသလာဗျာကတံ ဧကံ ခန္ဓံ ပဋိစ္စ အကုသလာဗျာကတာ တယော ခန္ဓာ စိတ္တသမုဋ္ဌာနဉ္စ ရူပံ။ တယော ခန္ဓေ ပဋိစ္စ ဧကော ခန္ဓော စိတ္တသမုဋ္ဌာနဉ္စ ရူပံ။ ဒွေ ခန္ဓေ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ။ နကုသလံ ဓမ္မံ ပဋိစ္စ နအကုသလော ဓမ္မော ဥပ္ပဇ္ဇတိ ဟေတု ပစ္စယာ။ ဝိပါကာဗျာကတံ ကိရိယာဗျာကတံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ တယော ခန္ဓေ ပဋိစ္စ ဧကော ခန္ဓော စိတ္တသမုဋ္ဌာနဉ္စ ရူပံ။ ဒွေ ခန္ဓေ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ¶ ရူပံ။ ပဋိသန္ဓိက္ခဏေ…ပေ… နကုသလံ ဓမ္မံ ပဋိစ္စ နအဗျာကတော ဓမ္မော ဥပ္ပဇ္ဇတိ ဟေတုပစ္စယာ။ အကုသလံ ဧကံ ခန္ဓံ ပဋိစ္စ တယော ခန္ဓာ၊ တယော ခန္ဓေ ပဋိစ္စ ဧကော ခန္ဓော၊ ဒွေ ခန္ဓေ ပဋိစ္စ ဒွေ ခန္ဓာ’’တိ ဧဝမာဒိနာ တိကပဋ္ဌာနာဒီဟိ ဆဟိ အန္တောဂဓပဋ္ဌာနေဟိ ဧကေကသ္မိဉ္စ တိကပဋ္ဌာနေ ဒုကပဋ္ဌာနေ ဒုကတိကပဋ္ဌာနေ တိကဒုကပဋ္ဌာနေ တိကတိကပဋ္ဌာနေ ဒုကဒုကပဋ္ဌာနေ သတ္တဟိ သတ္တဟိ မဟာဝါရေဟိ ဧကေကသ္မိဉ္စ မဟာဝါရေ စတူဟိ စတူဟိ နယေဟိ ဘဂဝတာ ဝိတ္ထာရတော ဝိဘဇိတွာ ဒေသိတံ။

ပုစ္ဆာ – တေနာဝုသော ¶ ဘဂဝတာ…ပေ… တတိယံ ဓမ္မာနုလောမပစ္စနီယပဋ္ဌာနံ ကထံ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – အဘိဓမ္မပိဋကေ…ပေ… တတိယံ ဓမ္မာနုလောမပစ္စနီယပဋ္ဌာနံ ‘‘ကုသလံ ဓမ္မံ ပဋိစ္စ နကုသလော ဓမ္မော ဥပ္ပဇ္ဇတိ ဟေတုပစ္စယာ။ ကုသလေ ခန္ဓေ ပဋိစ္စ စိတ္တသမုဋ္ဌာနရူပံ။ ကုသလံ ဓမ္မံ ပဋိစ္စ နအကုသလော ဓမ္မော ဥပ္ပဇ္ဇတိ ဟေတုပစ္စယာ။ ကုသလံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ တယော ခန္ဓေ ပဋိစ္စ ဧကော ခန္ဓော စိတ္တသမုဋ္ဌာနဉ္စ ရူပံ။ ဒွေ ခန္ဓေ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ။ ကုသလံ ဓမ္မံ ပဋိစ္စ နအဗျာကတော ဓမ္မော ဥပ္ပဇ္ဇတိ ဟေတုပစ္စယာ။ ကုသလံ ဧကံ ခန္ဓံ ပဋိစ္စ တယော ခန္ဓာ၊ တယော ခန္ဓေ ပဋိစ္စ ဧကော ခန္ဓော၊ ဒွေ ခန္ဓေ ပဋိစ္စ ဒွေ ခန္ဓာ။ ကုသလံ ဓမ္မံ ပဋိစ္စ နအကုသလော စ နအဗျာကတော စ ဓမ္မာ ဥပ္ပဇ္ဇန္တိ ဟေတုပစ္စယာ။ ကုသလံ ဧကံ ခန္ဓံ ပဋိစ္စ ¶ တယော ခန္ဓာ…ပေ… ဒွေ ခန္ဓေ ပဋိစ္စ ဒွေ ခန္ဓာ။ ကုသလံ ဓမ္မံ ပဋိစ္စ နကုသလော စ နအကုသလော စ ဓမ္မာ ဥပ္ပဇ္ဇန္တိ ဟေတုပစ္စယာ။ ကုသလေ ခန္ဓေ ပဋိစ္စ စိတ္တသမုဋ္ဌာနရူပ’’န္တိ ဧဝမာဒိနာ ဘန္တေ တိကပဋ္ဌာနာဒီဟိ ဆဟိ အန္တောဂဓပဋ္ဌာနေဟိ ဧကေကသ္မိဉ္စ တိကပဋ္ဌာနေ ဒုကပဋ္ဌာနေ တိကဒုကပဋ္ဌာနေ ဒုကတိကပဋ္ဌာနေ တိကတိကပဋ္ဌာနေ ဒုကဒုကပဋ္ဌာနေ သတ္တဟိ သတ္တဟိ မဟာဝါရေဟိ ဧကေကသ္မိဉ္စ မဟာဝါရေ စတူဟိ စတူဟိ နယေဟိ ဘဂဝတာ ဝိတ္ထာရတော ဝိဘဇိတွာ ဒေသိတံ။

ပုစ္ဆာ – တေနာဝုသော ¶ ဘဂဝတာ…ပေ… ဓမ္မာနုလောမာဒီသု ပဓာနဘူတေသု စတူသု ပဋ္ဌာနေသု စတုတ္ထံ ပရိယောသာနဘူတံ ဓမ္မပစ္စနီယာနုလောမပဋ္ဌာနံ ကထံ ဝိတ္ထာရတော ဝိဘဇိတွာ ဒေသိတံ။

ဝိဿဇ္ဇနာ – အဘိဓမ္မပိဋကေ ဘန္တေ…ပေ… ဓမ္မာနုလောမပဋ္ဌာနာဒီသု စတူသု ပဓာနဘူတေသု မဟာပဋ္ဌာနေသု စတုတ္ထံ ပရိယောသာနဘူတံ ဓမ္မပစ္စနီယာနုလောမပဋ္ဌာနံ ‘‘နကုသလံ ဓမ္မံ ပဋိစ္စ အကုသလော ဓမ္မော ဥပ္ပဇ္ဇတိ ဟေတုပစ္စယာ၊ အကုသလံ ဧကံ ခန္ဓံ ပဋိစ္စ တယော ခန္ဓာ၊ တယော ခန္ဓေ ပဋိစ္စ ဧကော ခန္ဓော၊ ဒွေ ခန္ဓေ ပဋိစ္စ ဒွေ ခန္ဓာ။ နကုသလံ ဓမ္မံ ပဋိစ္စ နအကုသလော ဓမ္မော ဥပ္ပဇ္ဇတိ ဟေတုပစ္စယာ။ အကုသလေ ခန္ဓေ ပဋိစ္စ စိတ္တသမုဋ္ဌာနရူပံ၊ ဝိပါကာဗျာကတံ ကြိယာဗျာကတံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ…ပေ… ဒွေ ခန္ဓေ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ။ နကုသလံ ဓမ္မံ ပဋိစ္စ နအဗျာကတော ဓမ္မော ဥပ္ပဇ္ဇတိ ဟေတုပစ္စယာ၊ အကုသလံ ဧကံ ခန္ဓံ ပဋိစ္စ တယော ခန္ဓာ၊ တယော ခန္ဓေ ပဋိစ္စ ဧကော ခန္ဓော၊ ဒွေ ခန္ဓေ ပဋိစ္စ ဒွေ ခန္ဓာ’’တိ ဧဝမာဒိနာ တိကပဋ္ဌာနာဒီဟိ စာတိ အန္တောဂဓပဘေဒပဋ္ဌာနေဟိ ဧကေကသ္မိဉ္စ တိကပဋ္ဌာနေ ဒုကပဋ္ဌာနေ ဒုကတိကတိကဒုကတိကတိကဒုကဒုကပဋ္ဌာနေ ပဋိစ္စဝါရာဒီဟိ သတ္တဟိ မဟာဝါရေဟိ ဧကေကသ္မိဉ္စ မဟာဝါရေ ပစ္စယာနုလောမာဒီဟိ စတူဟိ စတူဟိ နယေဟိ ဘဂဝတာ ဝိတ္ထာရတော ဝိဘဇိတွာ ဒေသိတံ။