📜
နမော တဿ ဘဂဝတော အရဟတော သမ္မာသမ္ဗုဒ္ဓဿ
ဓမ္မနီတိ
ဝန္ဒိတွာ ရတနံ သေဋ္ဌံ ¶ ၊ နိဿာယ ပုဗ္ဗကေ ဂရုံ၊
နိတိဓမ္မံပဝက္ခာမိ၊ သဗ္ဗလောကသုခါဝဟံ။
အာစရိယောစသိပ္ပဉ္စ၊ ပညာသုတံကထာဓနံ၊
ဒေသောစနိဿယောမိတ္တံ၊ ဒုဇ္ဇနောသုဇနောဗလံ။
ဣတ္ထီပုတ္တောစဒါသောစ ¶ ၊ ဃရာဝါသောကတာကတော၊
ဉာတဗ္ဗောစအလင်္ကာရော၊ ရာဇဓမ္မောပသေဝကော၊
ဒုကာဒိမိဿကောစေဝ၊ ပကိဏ္ဏကောတိမာတိကာ။
ကိန္တေဟိပါဒသုဿသာ ¶ ၊ ယေသံနတ္ထိဂရူနိဟ၊
ယေတပ္ပာဒရဇောကိဏ္ဏာ၊ တေဝသာဓူဝိဝေကိနော။
ဝိနာဂရူပဒေသန္တံ၊ ဗာလောလင်္ကတ္တုမိစ္ဆတိ၊
သမ္ပာပုဏေနဝိညူဟိ၊ ဟသဘာဝံကထံနုသော။
ဥဋ္ဌာနာဥပဋ္ဌာနာစ၊ သုဿုသာပရိစာရိကာ၊
သက္ကစ္စံသိပ္ပုဂ္ဂဟဏံ၊ ဂရုံအာရာဓယေဗုဓော။
ဥပဇ္ဈာစရိယာနဉ္စ ¶ ၊ မာတာပိတူနမေဝစ၊
သက္ကစ္စံယောနုပဋ္ဌာတိ၊ သုတောပိတဿတာဒိသော။
ဥပဇ္ဈာစရိယာနဉ္စ၊ မာတာပိတူနမေဝစ၊
သက္ကစ္စံယောဥပဋ္ဌာတိ၊ သုတောပိတဿတာဒိသော၊
သမ္မာဥပပရိက္ခိတွာ၊
အက္ခရေသုပဒေသုစ၊
စောရဃာတောသိဿောသိယာ၊
ဂရုစောရဋ္ဋကာရကော။
ပဏ္ဍိတောသုတသမ္ပန္နော ¶ ၊ ယတ္ထအတ္ထီတိ စေသုတော၊
မဟုဿာဟေနတံဌာနံ၊ ဂန္တဗ္ဗံဝသုတေသိနာ။
သုခံရုက္ခဿဆာယာဝ၊ တတောဉာတိမာတာပိတု၊
တတောအာစရိယောရညော၊ တတောဇိနဿသာသနံ။
ပါသာဏဆတ္တံဂရုကံ၊ တတောဒေဝါနစိက္ခနံ၊
တတောဝုဍ္ဎာနမောဝါဒေါ၊ တတောဇိနဿသာသနံ။
တုလံသလ္လဟုကံလောကေ ¶ ၊ တတောစပလဇာတိကော၊
တတောဝုဍ္ဎာနနောဝါဒေါ၊ ယတိဓမ္မေပမာဒကော။
သုတိသမ္မုတိသင်္ချာစ၊ ယောဂါနိတိဝိသေသကာ၊
ဂန္ဓဗ္ဗာဂဏိကာစေဝ၊ ဓနုဗေဒါစပူရဏာ။
တိကိစ္ဆာဣတိဟာသာစ ¶ ၊ ဇောတိမာယာစဆန္ဒတိ၊
ကေတုမန္တာစသဒ္ဒါစ၊ သိပ္ပာဋ္ဌာရသကာဣမေ။
အလသဿကုတောသိပ္ပံ၊ အသိပ္ပဿကုတောဓနံ၊
အဓနဿကုတောမိတ္တံ၊ အမိတ္တဿကုတောသုခံ၊
အသုခဿကုတောပုညံ၊ အပုညဿကုတောနိဗ္ဗာနံ။
သိပ္ပံသမံဓနံနတ္ထိ၊ သိပ္ပံစောရာနဂဏှန္တိ၊
ဣဓလောကေသိပ္ပံမိတ္တံ၊ ပရလောကေသုခါဝဟံ။
ဗောဓပုတြသဒါဝိတျံ ¶ ၊ မာခေဒါစရိယံဂရုံ၊
သဒေသေပူဇိတောရာဇာ၊ ဗုဓောသဗ္ဗတ္ထပူဇိတော။
ဗောဓပုတြကိမာလဿေ၊ အဗောဓောဘာရဝါဟကော၊
ဗောဓကောပူဇိတော လောကေ၊ ဗောဓပုတြဒိနေဒိနေ။
ရူပယောဗ္ဗန္နသမ္ပန္နာ၊ ဝိသာလကုလသမ္ဘဝါ၊
ဝိတျာဟီနာနသောဘန္တိ၊ နိဂန္ဓာဣဝကိံသုကာ။
မာတာသတြုရုပိတာစ ¶ ၊ ဗာလကာလေနသိက္ခိတ၊
န သောဘတိသဘာမဇ္ဈေ၊ ဟံသမဇ္ဈေဗကောယထာ။
ဂုဏောသေဋ္ဌင်္ဂတံယာတိ၊ နဥစ္စေသယနေဝသေ၊
ပါသာဒသီခရေဝါသော၊ ကာကောကိံဂရုဠောသိယာ။
သဗ္ဗသုတမဓိယတေ၊ ဟီနမုက္ကဋ္ဌမဇ္ဈိမေ၊
သဗ္ဗဿအတ္ထံဇာနေယျ၊ နစသဗ္ဗံပယောဇယေ။
နလောကေသောဘတေမုဠှော ¶ ၊
ကေဝလတ္တပသံသကော၊
အပိသမ္ပိဟိတောကူပေ၊
ကတဝိဇ္ဇောပကာသိတော။
မဒန္တဒမနံသတ္ထံ၊ ခလာနံကုရုတေမဒံ၊
စက္ခုသင်္ခါရကံတေဇံ၊ ဥလူကာနမိဝန္ဓကံ။
ဘောဇနံမေထုနံနိဒ္ဒါ၊
ဂဝေပေါသေစဝိဇ္ဇတိ၊
ဝိဇ္ဇာဝိသေသောပေါသဿ၊
တံဟီနောဂေါသမောဘဝေ။
ယောသိဿောသိပ္ပလောဘေန ¶ ၊ ဗဟုံဗဟုံဝဂဏှာတိ၊
မုဂေါဝသုပိနံပဿံ၊ နသက္ကာကထိတုံ ပရံ။
သုဿုသာသုတဝဍ္ဎနာ၊ ပညာယဝဍ္ဎနံသုတံ၊
ပညာယအတ္ထံဇာနန္တိ၊ ဉာတောအတ္ထောသုခါဝဟော။
အနာဂတံဘယံဒိသွာ ¶ ၊ ဒူရတောပရိဝဇ္ဇယေ၊
အာဂတဉ္စဘယံဒိသွာ၊ အဘိတောဟောတိပဏ္ဍိတော။
လောဘံကောဓံမဒံမာနံ၊ တန္ဒိံဣဿံပမတ္တကံ၊
သောဏ္ဍံနိဒ္ဒါလုကံမက္ခံ၊ မစ္ဆေရဉ္စဇဟေဗုဓော။
သဒ္ဓါဟိရိစဩတ္တပ္ပံ၊ ဗာဟုသစ္စံဝိရံသတိ၊
ပညာစသတ္တဓမ္မေဟိ၊ သမ္ပန္နောပဏ္ဍိတောမတော။
ဒိဋ္ဌေဓမ္မေစယောအတ္ထော ¶ ၊
ယောစတ္ထောသမ္ပရာယိကော၊
အတ္ထာဘိသမယာဓီရော၊
ပဏ္ဍိတောတိပဝုစ္စတိ။
သဘာဝသဒိသံဝါကျံ၊ သဘာဝသဒိသံပိယံ၊
သဘာဝသဒိသံကောဓံ၊ ယောဇာနာတိသပဏ္ဍိတော။
ဘူပါလောပဏ္ဍိတောနိစ္စံ၊ နေဝတုလျောကုဒါစနံ၊
သဒေသေပူဇိတောရာဇာ၊ ဗုဓောသဗ္ဗတ္ထပူဇိတော။
ပဏ္ဍိတဿပသံသာယ ¶ ၊ ဒဏ္ဍောဗာလေနဒိယျတေ၊
ပဏ္ဍိတောပဏ္ဍိတေနေဝ၊ ဝဏ္ဏိတောဝသုဝဏ္ဏိတော။
အတ္တနာယဒိဧကေန၊ ဝိနိထေနမဟာဇနာ၊
ဝိနယံယန္တိသဗ္ဗေပိ၊ ကောဓံနာသေယျပဏ္ဍိတော။
သရီရဿဂုဏာနဉ္စ၊ ဒူရမစ္စန္တမန္တရံ၊
သရီရံခဏဝိဒ္ဓံသိ၊ ဂုဏာတုကပ္ပဌာယိနော။
အတ္ထံမဟန္တမာပဇ္ဇံ၊ ဝိဇ္ဇံသမ္ပတ္တိမေဝစ၊
ဝိစရေယျာမာနထဒ္ဓါ၊ ပဏ္ဍိတောသောပဝုစ္စတိ။
နာလဗ္ဘမတိပတ္ထေန္တိ ¶ ၊ နဋ္ဌမ္ပိနစသောစရေ၊
ဝိပ္ပတျဉ္စနမုယှန္တိ၊ ယေနရာတေဝပဏ္ဍိတာ။
ဂဏ္ဌိဌာနေဧကပဒေ၊ နာတိမညေယျပဏ္ဍိတော၊
ကိမက္ကောဝေဠုပဗ္ဘာရော၊ တိမဟာဒီပဘာနုဒေါ။
ဂုဏဒေါသေသုနေကေန၊ အတ္ထိကောစိဝိဝဇ္ဇိတော၊
သုခုမာလပဒုမဿ၊ နဠံဘဝတိကက္ခဠံ။
သုမဟန္တာနိသတ္ထာနိ၊ ဓာရယန္တာဗဟုဿုတာ၊
ဆေဒါယောသံသယာနန္တု၊ က္လိဿန္တိလောဘမောဟိတာ။
ဒေါသံပိသဂုဏေဒိသွာ ¶ ၊ ဂုဏဝါဒီဝဒန္တိန၊
နလောကောဝိဇ္ဇမာနမ္ပိစန္ဒေပဿတိလဉ္ဇနံ။
သကိံပိဝိညူဓီရေန၊ ကရောတိသဟသင်္ဂမံ၊
အတ္တတ္ထဉ္စပရတ္ထဉ္စ၊ နိဗ္ဗာနန္တံသုခံလဘေ။
နဒီတီရေဋ္ဌိတေကူပေ၊ အရဏိတာလဝဏ္ဍကေ၊
နဝဒါပါဒိနတ္ထီတိ၊ နမုခေဝစနံတထာ။
ပဏ္ဍိတောအပုဋ္ဌောဘေရီ ¶ ၊ ပဇ္ဇုန္နောဟောတိပုစ္ဆိတော၊
ဗာလောပုဋ္ဌောအပုဋ္ဌောပိ၊ ဗဟုံဝိကတ္ထတေသဒါ။
ဂုဏသမ္ပန္နလင်္ကာရော၊ သဗ္ဗသတ္တဟိတာဝဟော၊
ပရတ္တတ္ထံနစရေယျ၊ ကုတောသောပဏ္ဍိတောဘဝေ။
သပရတ္ထံစရေဓီရော၊ အသက္ကောန္တောသကံစရေ၊
တမ္ပိစေဝအသက္ကောန္တော၊ ပါပါတ္တာနံဝိယောဇယေ။
သဗ္ဗံသုဏာတိသောတေန ¶ ၊ သဗ္ဗံပဿတိစက္ခုနာ၊
နစဒိဋ္ဌံသုတံဓီရော၊ သဗ္ဗိစ္ဆိတုမရဟတိ။
စက္ခုမာဿယထာအန္ဓော၊ သောတဝါဗဓိရောယထာ၊
ပညာဝါပိယထာမုဂေါ၊ ဗလဝါဒုဗ္ဗလောရိဝ၊
အထအတ္ထေသမုပ္ပန္နေ၊ သယေယျမတသာယိတံ။
အတိဇာတံမနုဇာတံ၊ ပုတ္တမိစ္ဆန္တိပဏ္ဍိတာ၊
အဝဇာတံနဣစ္ဆန္တိ၊ ယောဟောတိကုလဆိန္နကော။
တယောဝပဏ္ဍိတာသတ္ထေ ¶ ၊ အဟမေဝါတိဝါဒိစ၊
အဟမပိတိဝါဒီစ၊ နာဟန္တိစဣမေတယော၊
နသာသဘာယတ္ထနသန္တိသန္တော၊
နတေသန္တောယေနဝဒန္တိဓမ္မံ၊
ရာဂဉ္စဒေါသဉ္စပဟာယမောဟံ၊
ဓမ္မံဘဏန္တာဝဘဝန္တိသန္တော။
ဗာလေစုမ္မတ္တကေဘူပေ၊ ဂုရုမာတာပိတူသွပိ၊
သင်္ဃေဇေဌေစဘာတရိ၊ နဒေါသာကရိယာဗုဓာ။
အတ္တနာမနောတာပဉ္စ ¶ ၊ ဃရေဒုစ္စရိတာနိစ၊
ဝဉ္စနဉ္စအဝမာနံ၊ မတိမာနပကာသယေ။
ပရဒါရံဇနေတ္တိံဝ၊ လေဍ္ဍုံဝပရသန္တကံ၊
အတ္တာဝသဗ္ဗသတ္တာနံ၊ ယောပဿတိသပဏ္ဍိတော။
သဌေနမိတ္တံကလုသေနဓမ္မံ၊
ပရောပတာပေနသမိဒ္ဓိဘာဝံ၊
သုခေနဝိဇ္ဇံဖရုသေနနာရိံ၊
ဣစ္ဆန္တိယေတေနစေဝပဏ္ဍိတာ။
နိပုဏေသုဟမေသေယျ ¶ ၊ ဝိစိနိတွာသုတတ္ထိကော၊
သတ္တံဟုက္ခလိယံပက္ကံ၊ ဘာဇနေပိတထာဘဝေ။
ဝသုံဂဏှန္တိဒူရဋ္ဌာ၊ ပဗ္ဗတေရတနောစိတေ၊
နမိလက္ခာသမီပဋ္ဌာ၊ ဧဝံဗာလာဗဟုဿုတေ။
ဟိရညေနမိဂါနံဝ ¶ ၊ သုသီလေနအသီလိနော၊
အဓမ္မိကဿဓမေန၊ ဗာလာနမ္ပိသုတေနကိံ။
အပ္ပဿုတာယံပုရိသော၊ ဗလိဗဒ္ဓါဝဇီဝတိ၊
မံသာနိတဿဝဍ္ဎန္တိ၊ ပညာတဿနဝဍ္ဎတိ။
အပ္ပဿုတောသုတံအပ္ပံ၊ ဗဟုမညတိမာနိကော၊
သိန္ဓူဒကံအပဿန္တော၊ ကူပေသောယံဝမဏ္ဍုကော။
တဒမိနာပိဇာနာထ ¶ ၊ သောဗ္ဘေသုပတီရေသုစ၊
သဏန္တာယန္တိကုသောဗ္ဘာ၊ တုဏှီယန္တိမဟောဒဓီ။
သုဘာသိတံဥတ္တမမာဟုသန္တော၊
ဓမ္မံဘဏေနာဓမ္မံ၊ တံဒုတိယံ၊
ပိယံဘဏေနာပိယံတံတတိယံ၊
သစ္စံဘဏေနာလိကံတံစတုတ္ထံ။
သီဟမေဒါသုဝဏ္ဏေဝ ¶ ၊ နစတိဋ္ဌန္တိရစတေ၊
ပဏ္ဍိတာနံကထာဝါကျံ နစတိဋ္ဌတိဒုဇ္ဇနေ။
မဟာတေဇောပိတေဇောယံ၊ မတ္တိကံနမုဒုံကရေ၊
အာပေါပါပေတိမုဒုကံ၊ သာဓုဝါစာစကက္ခဠံ၊
မုဒုနာဝရိပုံဇေတိ၊ မုဒုနာဇေတိဒါရုဏံ၊
နာသိဒ္ဓိမုဒုနာကိဉ္စိ၊ ယတောတောမုဒုနာဇယေ။
စန္ဒနံ ¶ သီတလံ လောကေ၊ တတော စန္ဒံဝ သီတလံ၊
စန္ဒန စန္ဒ သီတမှာ၊ သာဓုဝါကျံ သုဘာသိတံ။
သီတဝါစော ဗဟုမိတ္တော၊ ဖရုသောတု အမိတ္တကော၊
ဥပမံ ဧတ္ထ ဉာတဗ္ဗာ၊ စန္ဒသူရိယရာဇုနံ။
ပတ္တကလ္လောဒိတံအပ္ပံ၊ ဝါကျံသုဘာသိတံဘဝေ၊
ခုဒ္ဒိတဿကဒန္နမ္ပိ၊ ဘုတ္တံသာဒုရသောဘဝေ။
သတ္ထကာပိဗဟုဝါစာ ¶ ၊ နာဒရာဗဟုဘာဏိနော၊
သောပကာရမ္ပျုဒါသီနံ၊ နနုဒိဋ္ဌံနဒီဇလံ။
နာတိဝေလံပဘာသေယျ၊ နတုဏှိသဗ္ဗဒါသိယာ၊
အဝိကိဏ္ဏံမိတံဝါကျံ၊ ပတ္တကာလေဥဒီရယေ။
ဣစ္ဆိတဗ္ဗေသုကမ္မေသု၊ ဝါစာယကုသလံမူလံ၊
ဝါစာယကုသလေနဋ္ဌေ၊ ဣစ္ဆိတဗ္ဗံနသိဇ္ဈတိ။
ဟတ္ထပါဒါသိရောပိဋ္ဌိ၊ ကုစ္ဆိပဉ္စဣမေဇနာ၊
မုခမေဝူပသေဝန္တိ၊ သဒါဝအနုသာသိတာ။
သဒ္ဓါဓနံသီလဓနံ ¶ ၊ ဟိရိဩတ္တပ္ပိယံဓနံ၊
သုတဓနဉ္စစာဂေါစ၊ ပညာဝေသတ္တမံဓနံ။
ဣတ္ထီနဉ္စဓနံရူပံ၊ ပုရိသာနံဓနံကုလံ၊
ဥရဂါနံဓနံဝိသံ၊ ဘူပါလာနံဓနံဗလံ၊
ဘိက္ခူနဉ္စဓနံသီလံ၊ ဗြဟ္မဏာနံဓနံဝိဇ္ဇာ။
နရူပံနစပညာဏံ ¶ ၊ နစကုလဉ္စသမ္ဘဝေါ၊
ကာလဝိပ္ပတ္တိသမ္ပတ္တေ၊ ဓနမေဝဝိသေသကံ။
ဓနဟီနံစဇေမိတ္တာ၊ ပုတ္တဒါရာသဟောဒရာ၊
ဓနဝန္တံဝသေဝန္တိ၊ ဓနံလောကေမဟာသခါ။
သတ္တာသဒူပသေဝန္တိ၊ သောဒကံဝါပိအာဒိကံ၊
သဘောဂံသဓနဉ္စေဝ၊ တုစ္ဆာတေစေဇဟန္တိတေ။
အတ္တနာဝကတာလက္ခီ ¶ ၊ အလက္ခီအတ္တနာကတာ၊
နဟိလက္ခိံအလက္ခိဉ္စ၊ အညောအညဿကာရိတော။
ဓနဝါဇောတိယောရာဇာ၊ နဒီဝေဇ္ဇောတထာဣမေ၊
ပဉ္စယတ္ထနဝိဇ္ဇန္တိ၊ နတတ္ထဒိဝသံဝသေ။
ယတ္ထဒေသေနသမာနော ¶ ၊ နပီတိနစဗန္ဓဝေါ၊
နစဝိဇ္ဇာဂမောကောစိ၊ နတတ္ထဒိဝသံဝသေ။
အမာနနာယတ္ထသိယာ၊ သန္တာနံအဝမာနနံ၊
ဟီနသမာနနာဝါပိ၊ နတတ္ထဒိဝသံဝသေ။
ဒေသမောသဇ္ဇဂစ္ဆန္တိ၊ သီဟာသပ္ပုရိသာဂဇာ၊
တတ္တေဝနိဓနံယန္တိ၊ ကာကာကာပုရိသာမိဂါ။
ယတ္ထာလသောစဒက္ခောစ ¶ ၊ သူရောဘိရုသမပူဇာ၊
နသန္တောတတ္ထဝသန္တိ၊ အဝိသေသကရေနကော။
စလတျေကေနပါဒေန၊ တိဋ္ဌတျေကေနပဏ္ဍိတော၊
နာသမိက္ချပရံဌာနံ၊ ပုဗ္ဗမာယတနံစဇေ။
ဌာနဘဋ္ဌာနသောဘန္တေ၊ ဒန္တာကေသာနခါနရာ၊
ဣတိဝိညာယမတိမာ၊ သဌာနံနလဟုံစဇေ။
ဂုဏောသဗ္ဗညုတုလျောပိ၊ သီဒတျေကောအနိဿယော၊
အနဂ္ဃံရတနံမဏိ၊ ဟေမံနိဿာယသောဘတေ။
နသေဝေဖရုသံသာမိံ၊ တံပိသေဝေနမစ္ဆရိံ၊
တတောနိဂ္ဂဏှိကံသာမိံ၊ နေဝါပဂ္ဂဏှိကံတတော။
ပရောက္ခေဂုဏဟန္တာရံ ¶ ၊ ပစ္စက္ခေပိယဘာဏိနံ၊
တာဒိသံနောပသေဝေယျ၊ ဝိသကုမ္ဘံပလောဘိတံ။
ပိဋ္ဌိတောက္ကံနိသေဝေယျ၊ နိသေဝေအဂ္ဂိကုစ္ဆိနာ၊
သာမီနံသဗ္ဗကာယေန၊ ပရလောကံအမုဠှကော။
နသေဝေကတပါပမှိ၊ န သေဝါလိကဝါဒနေ၊
နသေဝေအတ္တဒတ္ထမှိ၊ နသေဝေအတိသန္တကေ။
မဟန္တံနိဿယံကတွာ ¶ ၊ ခုဒ္ဒကောပိမဟာဘဝေ၊
ဟေမပဗ္ဗတံနိဿာယ၊ ဟေမပက္ခီဘဝန္တိတေ။
အသဟာယောသမတ္တောပိ၊ တေဇသီကိံကရိဿတိ၊
နိဝါတသဏ္ဌိတောအဂ္ဂိ၊ သယမေဝူပသမ္မတိ။
ရုက္ခာသုဘူမိနိဿာယ၊ ပုပ္ဖဖလံပဝဍ္ဎတိ၊
သပ္ပူရိသူပနိဿာယ၊ မဟာပုညံပဝဍ္ဎတိ။
အနလသောအစဏ္ဍိက္ကော ¶ ၊ အသဋ္ဌောသုစိသစ္စဝါ၊
အလုဒ္ဓါအတ္ထကာမောစ၊ တမုတ္တံဥတ္တမောနရော။
အဟိတေပဋိသေဓောစ၊ ဟိတေသုစနိယောဇကော၊
ဗျသနေစာပရိစ္စာဂေါ၊ သင်္ခေပံမိတ္တလက္ခဏံ။
အာတုရေဗျသနေသစေ ¶ ၊ ဒုဗ္ဘိက္ခေပရဝိဂ္ဂဟေ၊
ရာဇဒွါရေသုသာနေစ၊ သင်္ခေပံမိတ္တလက္ခိဏံ။
ဟိတေသနောသုမိတ္တောစ၊ ဝိညူစဒုလ္လဘောဇနော၊
ယထောသဓဉ္စသာဒုဉ္စ၊ ရောဂဟာရီစသဇ္ဇနော။
ယောဓုဝါနိပရိစဇ္ဇ၊ အဓုဝါနောပသေဝတိ၊
ဓုဝါနိတဿနဿန္တိ၊ အဓုဝေသုကထာဝကာ။
လုဒ္ဓမတ္ထေနဂဏှေယျ ¶ ၊ ထဒ္ဓမဉ္ဇထိကမ္မုနာ၊
ဆန္ဒာနုဝတ္တိယာမုဠှံ၊ ယထာဘူတေနပဏ္ဍိတံ။
သစ္စာဘိက္ခဏသံသဂ္ဂါ၊ အသမောသရဏေနစ၊
ဧတေနမိတ္တာဇိရန္တိ၊ အကာလေယာစနေနစ။
တသ္မာနာဘိက္ခဏံဂစ္ဆေ၊ နစဂစ္ဆေစိရာစိရံ၊
ကာလေနယာစံယာစေယျ၊ ဧဝံမိတ္တာနဇီယရေ။
ယေနမိတ္တေနသံသဂ္ဂါ ¶ ၊ ယောဂက္ခေမောဝိဟီယတိ၊
ပုဗ္ဗေဝဇ္ဈဘဝံတဿ၊ ရက္ခေယျဂ္ဂိံဝပဏ္ဍိတော။
ယေနမိတ္တေနသံသဂ္ဂါ၊ ယောဂက္ခေမောပဝဍ္ဎတိ၊
ကရေယျတ္တသမံဝုတ္တိံ၊ သဗ္ဗကိစ္စေသုပဏ္ဍိတော။
ပဗ္ဗေပဗ္ဗေကမေနုစ္ဆု၊ ဝိသေသရသဝါဂ္ဂတော၊
တထာသုမေတ္တိကောသာဓု၊ ဝိပရိတ္တောဝဒုဇ္ဇနော။
တေနေဝမုနိနာဝုတ္တံ ¶ ၊ ဓမ္မာယေကေစိလောကိယာ၊
တတာလောကုတ္တရာစေဝ၊ ဓမ္မာနိဗ္ဗာနဂါမိနော။
ကလျာဏမိတ္တမာဂမ္မ၊ သဗ္ဗေတေဟောန္တိပါဏိနံ၊
တသ္မာကလျာဏမိတ္တေသု၊ ကာတဗ္ဗံဟိသဒါဒရံ။
ယောဟဝေကတညူကတဝေဒိဓီရော၊
ကလျာဏမိတ္တေဒဠှဘတ္တိစဟောတိ၊
ဒုက္ခိတဿသက္ကစ္စံကရောတိကိစ္စံ၊
တဗ္ဘာဝံသပ္ပုရိသံဝဒန္တိလောကေ။
ဟိတကာရောပရောဗန္ဓု ¶ ၊ ဗန္ဓူပိအဟိတောပရော၊
အဟိတောဒေဟဇောဗျာဓိ၊ ဟိတမာရညမောသဓံ။
ပဒုမံဝမုခယဿ၊ ဝါစာစန္ဒနသီတလံ၊
မဓုတိဋ္ဌတိဇိဝှဂ္ဂေ၊ ဟဒယေသုဟလာဟလံ၊
တာဒိသံနောပသေဝေယျ၊ တံမိတ္တံပရိဝဇ္ဇယေ။
ကတွာနကုသလံကမ္မံ ¶ ၊ ကတွာန၊ ကုသလံပုရေ၊
သုခိတံဒုက္ခိတံဟောန္တံ၊ သောဗာလောယောနပဿတိ။
ကာလက္ခေပေနဟာပေတိ၊ ဒါနသီလာဒိကံဇဠော၊
အထိရံပိထိရံမညေ၊ အတ္တာနံသဿတီသမံ။
ဗာလောဓပါပကံကတွာ၊ နတံဆဋ္ဋိတုမုဿဟေ၊
ကိံဗျဂ္ဃအာဒိဂစ္ဆန္တော၊ ပဒံမက္ခေတုမုဿဟေ။
နိဒ္ဓနောပိစကာမေတိ ¶ ၊ ဒုဗ္ဗလောဝေရိကံကရော၊
မန္ဒသတ္ထောဝိဝါဒတ္ထီ၊ တိဝိဓံမုဠှလက္ခဏံ။
အနဝှာယံဂမယန္တော၊ အပုစ္ဆာဗဟုဘာသကော၊
အတ္တဂ္ဂုဏံပသံသန္တိ၊ တိဝိဓံဟီနလက္ခဏံ။
ယထာစုဋ္ဋမ္ပရာပက္ကာ၊ ဗဟိရတ္တကမေဝစ၊
အန္တောကိမိလပူရဏော၊ ဧဝံဒုဇ္ဇနဓမ္မတာ။
ယဒူနကံသဏတိတံ၊ ယံပူရံသန္တမေဝတံ၊
အဍ္ဎကုမ္ဘုပမောဗာလော၊ ယံပူရကုမ္ဘောဝပဏ္ဍိတော။
ဗုဓေဟိသာသမာနောပိ ¶ ၊ ခလောဗဟုတကေတဝေါ၊
ဃံသိယမာနောပင်္ဂါရော၊ နိလမတ္တံနိဂစ္ဆတိ။
မုဠှသိဿောပဒေသေန၊ ကုနာရီဘရဏေနစ၊
ခလသတ္တူဟိသံယောဂါ၊ ပဏ္ဍိတောပျဝသီဒတိ။
စာရုတာပရဒါရာယ၊ ဓနံလောကတပတ္တိယာ၊
ပသုတံသာဓုနာသာယ၊ ခလေခလတရာဂုဏာ။
ဣတောဟာသတရံလောကေ ¶ ၊ ကိဉ္စိတဿနဝိဇ္ဇတိ၊
ဒုဇ္ဇနောတိစယံအာဟ၊ သုဇနံဒုဇ္ဇနောသယံ။
နဝိနာပရဝါဒေန၊ ရမန္တိဒုဇ္ဇနာခလု၊
နသာသဗ္ဗရသေဘုတွာ၊ ဝိနာသုဒ္ဓေနတုဿတိ။
တပ္ပတေယာတိသမ္ဗန္ဓံ၊ ဒြဝံဘဝတျဝနတံ၊
မုဒုဒုဇ္ဇနစိတ္တံန ကိံလောဟေနပမီယတေ။
တသ္မာဒုဇ္ဇနသံသဂ္ဂံ ¶ ၊ အာသိဝီသမိဝေါရဂံ၊
အာရကာပရိဝဇ္ဇေယျ၊ ဘူတကာမောဝိစက္ခဏော။
ဒုဇ္ဇနေနဟိသံသဂ္ဂံ၊ သတ္တုတာပိနယုဇ္ဇတိ၊
တတ္တောဝဍယှတျင်္ဂါရော၊ သန္တောကာဠာယတံကရော၊
ဒုဇ္ဇနောဝဇ္ဇနီယောဝ၊ ဝိဇ္ဇာယာလင်္ကတောပိစေ၊
မဏိနာလင်္ကတောသန္တော၊ သဗ္ဗောကိံနုဘယံကရော။
အဂ္ဂိနောဒဟတောဒါယံ၊ သခါဘဝတိမာလုတော၊
သောဧဝဒီပံနာသေတိ၊ ခလေနတ္ထေဝမိတ္တတာ။
သဗ္ဗောဒုဋ္ဌောခလောဒုဋ္ဌော ¶ ၊ သဗ္ဗာဒုဋ္ဌတရောခလော၊
မန္တောသဓေဟိသောသဗ္ဗော၊ ခလောကေနုပသမ္မတိ။
ဟဒယဋ္ဌေနသုတေန၊ ခလောနေဝသုသီလဝါ၊
မဓုနာကောဋရဋ္ဌေန၊ နိမ္ဗောကိံမဓုရောဘဝေ။
အသတံသမ္ပယောဂေန၊ သန္တောပိအသန္တောဘဝေ၊
မဂ္ဂေါကစဝရယုတ္တော၊ ဥဇုမ္ပိအသာဓုဘဝေ။
ပုတိမစ္ဆံကုသဂ္ဂေန ¶ ၊ ယောနရောဥပနယှတိ၊
ကုသာပိပုတိံဝါယန္တိ၊ ဧဝံဗာလုပသေဝနာ။
ဗာလံနပဿေနသုဏေ၊ နစဗာသေနသံဝသေ၊
ဗာလေနာလာပသလ္လာပံ၊ နကရေနစရောစယေ။
အနယံနေတိဒုမ္မေဓော၊ အဓုရာယနိယုဉ္ဇတိ၊
ဒုန္နယောသေယျသောဟောတိ၊ သမ္မာဝုတ္တောပိကုပ္ပတိ၊
ဝိနယံသောနဇာနာတိ၊ သာဓုသေနအဒဿနံ။
ယာဝဇီဝံပိစေဗာလော ¶ ၊ ပဏ္ဍိတံပယိရူပါသိ၊
နသောဓမ္မံဝိဇာနာတိ၊ ဒဗ္ဗိသူပရသံယထာ။
ဖလံဝေကဒလိံဟန္တိ၊ ဟန္တိဝေဠုနဠံဖလံ၊
သက္ကာရောကာပုရိသံဟန္တိ၊ ဂဗ္ဘောအဿတရိံယထာ။
သုနခေါသုနခံဒိသွာ၊ ဒန္တံဒဿေတိဟိံသိတုံ၊
ဒုဇ္ဇနောဒုဇ္ဇနံဒိသွာ၊ ရောသယံဟိံသမိစ္ဆတိ။
မဏ္ဍူကောပိနုက္ကောသီဟော ¶ ၊ သုကရောပိနုက္ကောဒီပိ၊
ဗိလာရောသဒိသောဗျဂ္ဃော၊ ဒုပ္ပညောပိနပညဝါ။
မဏ္ဍူကောပိသီဟောဝိယ၊
ကာကောဂဏှေပိညေပိညေ၊
ဗာလောစပဏ္ဍိတောဝိယ၊
ဓီရောပုစ္ဆေဝယေဝယေ။
ကာကောဒုဋ္ဌောသကုဏေသု၊ ဃရေဒုဋ္ဌောစမူသိကော၊
ဝါနရောစဝနေဒုဋ္ဌော၊ မနုဿေသုစဗြဟ္မဏော။
တိဏာနိဘူမိစောဒကံ ¶ ၊ စတုတ္ထံဝါကျသုဋ္ဌုတံ၊
ဧတာနိဟိသတံဂေဟေ၊ နောဆိဇ္ဇန္တေကဒါစိပိ။
အမ္ဗုံပိဝန္တိနောနဇ္ဇော၊ ရုက္ခာခါဒန္တိနောဖလံ၊
မေဃောကဒါစိနောသဿံ၊ ပရတ္ထာယသတံဓနံ။
ဂုဏာကုဗ္ဗန္တိဒူတတ္တံ ¶ ၊ ဒူရေပိဝသတံသတံ၊
ကေဋကေဂန္ဓမာဃာယ၊ ဂစ္ဆန္တိဘမရာသယံ။
အာကိဏ္ဏောပိအသဗ္ဘီဓ၊ အသံသဋ္ဌောဝဘဒ္ဒကော၊
ဗဟုနာသန္နဇာတေန၊ ဂစ္ဆေ နဥမ္မတ္တကေန။
ပါပမိတ္တေဝိဝဇ္ဇေတွာ၊ ဘဇေယျုတ္တမပုဂ္ဂလံ၊
ဩဝါဒေစဿတိဋ္ဌေယျ၊ ပတ္ထန္တောအစလံသုခံ။
ယထာစပနသာပက္ကာ၊ ဗဟိသဏ္ဍကမေဝစ၊
အန္တောအမတပူရဏော၊ ဧဝံ သုဇနဓမ္မတာ။
တဂ္ဂရဉ္ဇပလာသေန ¶ ၊ ယောနရောဥပနယှတိ၊
ပတ္တာပိဂန္ဓံဝါယန္တိ၊ ဧဝံဓီရုပသေဝနာ။
ဓီရံပဿေသုဏေဓီရံ၊ ဓီရေနသဟသံဝသေ၊
ဓီရေနာလာပသလ္လာပံ၊ တံကရေတဉ္စရောစယေ။
နယံနယတိ မေဓာဝီ၊ အဓုရာယနယုဇ္ဇတိ၊
သုနယောသေယျသောဟောတိ၊ သမ္မာဝုတ္တောနကုပ္ပတိ၊
ဝိနယံသောပဇာနာတိ၊ သာဓုတေနသမာဂမော။
အပ္ပကေနပိစေဝိညူ ¶ ၊ ပဏ္ဍိတံပယိရူပါသိ၊
ခိပ္ပံဓမ္မံဝိဇာနာတိ၊ ဇိဝှာသူပရသံယထာ။
ဗာဟုဗလဉ္စအမစ္စံ၊ ဘောဂံအဘိဇစ္စံဗလံ၊
ဣမေဟိစတုဗလေဟိ၊ ပညာဝေသေဌတံဗလံ။
ဗလံပက္ခီနမာကာသော ¶ ၊ မစ္ဆာနံဥဒကံဗလံ၊
ဒုဗ္ဗလဿဗလံရာဇာ၊ ကုမာရာနံရုဒံဗလံ။
ဗလံစန္ဒောဗလံသူရော၊ ဗလံသမဏဗြဟ္မဏာ၊
ဗလံဝေလံသမုဒ္ဒဿ၊ ဗလံတိဗလမိတ္ထိယာ။
သပါဒါနံဗလံသီဟော၊ တတောပုဠုဝကောဗလံ၊
တတောကိပ္ပိလိကောနရော၊ ရာဇာသဗ္ဗေသမန္တတော။
ဂတိမိဂါနံပဝနံ၊ အာကာသောပက္ခိနံဂတိ၊
ဝိရာဂေါဂတိဓမ္မာနံ၊ နိဗ္ဗာနာရဟတံဂတိ။
စရေယျကုလဇံပညော ¶ ၊ ဝိရူပမဝိကညကံ၊
ဟီနာယပိသုရူပါယ၊ ဝိဝါဟသဒိသံကရေ။
သာမာမိဂက္ခီသုကေသီ၊ တနုမဇ္ဈိမဒန္တဝါ၊
ဒဿနီယာမုခဝဏ္ဏာ၊ ဂမ္ဘီရနာဘိဝါစကာ၊
သုသီလာဝါယမတိစ၊ ဟီနကုလံပိဝါဟယေ။
သုတ္တောမာတာဝဘောဇေသိ ¶ ၊ ဘရဏေသုစဓာတိယော၊
ကမ္မေသုသကပန္တိ စ၊ ကတကမ္မေသုဓာတိနံ။
ဓမ္မေသုပတိဋ္ဌာနိစ္စံ၊ သယနေသုစဝဏ္ဏိဘာ၊
ကုလေသုဘာတရံဝါစီ၊ ယာနာရီသေဋ္ဌသမ္မတာ။
ယောနံဘရတိသဗ္ဗဒါ ¶ ၊ နိစ္စံအာတာပိဥဿုကော၊
သဗ္ဗကာမဟရံပေါသံ၊ ဘတ္တာရံနာတိမညတိ။
နစာပိသွတ္ထိဘတ္တာရံ၊ ဣစ္ဆာစာရေနရောသယေ၊
ဘတ္တုစဂရုနောသဗ္ဗေ၊ ပတိပူဇေတိပဏ္ဍိတာ။
ဥဋ္ဌာဟိကာအနလဿာ၊ သင်္ဂါဟိကာပရိဇနေ၊
ဘတ္တုမနာပံစရတိ၊ သမ္ဘတမနုရက္ခတိ။
ဧဝံဝတ္တတိယာနာရီ၊ ဘတ္တုဆန္ဒဝသာနုဂါ၊
မနာပါနာမတေဒေဝါ၊ ယတ္ထသာဥပပဇ္ဇတိ။
ဣတ္ထိယေကစ္စိယောဝါပိ ¶ ၊ သေယျာဝုတ္တာဝမုနိနာ၊
ဘဏ္ဍာနံဥတ္တမာဣတ္ထီ၊ အဂ္ဂုပဋ္ဌာယိကာတိပိ။
မာတရာဓီတရာဝါပိ၊ ဘဂိနိယာဝိစက္ခဏော၊
နဝိဝိတ္တာသနေမန္တေ၊ နာရီမာယာဝိနီနနု။
ဝိဇ္ဇုတာနဉ္စလောလတ္တံ၊ သတ္ထာနဉ္စာတိတိက္ခဏံ၊
သိင်္ဃတံဝါယုတေဇာနံ၊ အနုကုဗ္ဗန္တိနာရိယော။
ဒိဂုဏောထီနမာဟာရော ¶ ၊
ဗုဒ္ဓိစာပိစတုဂ္ဂုဏော၊
ဆဂုဏောဟောတိဝါယာမော၊
ကာမောတွဋ္ဌဂုဏောဘဝေ။
ဧကမေကာယဣတ္ထိယာ၊ အဋ္ဌအဋ္ဌပတိနောသိယုံ၊
သူရောစပလဝန္တောစ၊ သဗ္ဗကာမရသာဟရာ၊
ကရေယျနဝမေဆန္ဒံ၊ ဥန္နတ္တာဟိနပူရတိ။
ဝိဝါဒသီလီဥဿုယာ ¶ ၊ ပဿန္တတဏှိကာဂတာ၊
အမိတာဘုဉ္ဇနာနိဒ္ဒါ၊ သတံပုတ္တံပိတံဇဟေ။
လပန္တီသဒ္ဓိမညေန၊ ပဿန္တညံသဝိဗ္ဘမာ၊
စိတ္တကံစိန္တယန္တညံ၊ နာရီနံနာမကောပိယော။
ဂဏှေယျဝါတံဇာလေန၊ သာဂရမေကပါဏိနာ၊
ဩသိဉ္စေယျစတာဠေန၊ သကေနဇနယေရဝံ၊
ပမာဒါသုဝိသဇ္ဇေယျ၊ ဣတ္ထိယေသာဝဓမ္မတာ။
ဇိဝှာသဟဿိကောယောဟိ ¶ ၊ ဇီဝေဝဿသတံနရော၊
တေနနိကမ္မုနာဝုတ္တော၊ ထိဒေါသောကိံခယံဂတော။
ပဉ္စဌာနာနိသမ္ပဿံ ¶ ၊ ပုတ္တမိစ္ဆန္တိပဏ္ဍိတာ၊
ဘတောဝါနောဘရိဿတိ၊ ကိစ္စံဝါနောကရိဿတိ။
ကုလဝံသောစိရံတိဋ္ဌေ၊ ဒါယဇ္ဇံပတိပဇ္ဇတိ၊
အထဝါပနပေတာနံ၊ ဒက္ခိဏာနုပဒဿတိ။
အတိဇာတမနုဇာတံ၊ ပုတ္တမိစ္ဆန္တိပဏ္ဍိတာ၊
အဝဇာတံနဣစ္ဆန္တိ၊ ယောဟောတိကုလဆိန္နကော။
ဧကူဒရသမုပ္ပန္နာ၊ နဘဝန္တိသမဿမာ၊
နာနာဝဏ္ဏာနာနာစရာ၊ ယထာဗဒရကဏ္ဍကာ။
အဒမ္မေဗဟဝေါဒေါသေ ¶ ၊ ဒမ္မေတုဗဟဝေါဂုဏေ၊
တသ္မာပုတ္တဉ္စသိဿဉ္စ၊ ဒမ္မကာလေဝဒမ္မယေ။
ဩဝါဒေယျာနုသာသေယျ၊
အသပ္ပာယာနိဝါရယေ၊
ဒန္တောဟိယောပိယောဟောတိ၊
အဒန္တောဟောတိအပ္ပိယော။
ပုတ္တံဝါဘာတရံဒုဋ္ဌံ၊ အနုသာသေယျနောဇဟေ၊
ကိံနုဆေဇ္ဇံဟတ္ထပါဒံ၊ လိတ္တအသုစိနာသိယာ။
အန္တောဇာတောဓနက္ကိတော ¶ ၊ ဒါသဗျောပဂတောသယံ၊
ဒါသာကရမရာနိတော၊ ဣစ္စေဝံစတုဓာသိယုံ။
ဒါသာပဉ္စေဝစောရယျ၊ သခဉာတတ္တသဒိသာ၊
တထာဝိညူဟိဝိညေယျ၊ မိတ္တာဒါရာစဗန္ဓဝါ။
ဒုဋ္ဌဒါရေနအမိတျာ ¶ ၊ ဒါသောစုတ္တရဝါစကော၊
သသပ္ပေစဃရေဝါသော၊ မစ္စုမေဝနသံသယော။
ယသံလာဘံပတ္ထယန္တံ၊ နရံဝဇ္ဇန္တိဒူရတော၊
တသ္မာအနပေက္ခိတွာန၊ တံမဂ္ဂံမဂ္ဂယေဗုဓော။
ခလံသာလံပသုံခေတ္တံ ¶ ၊ ဂန္တာစဿအဘိက္ခဏံ၊
မိတံဓညံနိဓာပေယျ၊ မိတဉ္စပါစယေဃရေ။
အဉ္ဇနာနံခယံဒိသွာ၊ ဝမ္မိကာနဉ္စသဉ္စယံ၊
မဓူနဉ္စသမာဟာရံ၊ ပဏ္ဍိတောဃရမာဝသေ။
သယံအာယံဝယံဇညာ၊ သယံဇညာကတာကတံ၊
နိဂ္ဂဏှေနိဂ္ဂဏှာရဟံ၊ ပဂ္ဂဏှေပဂ္ဂဏှာရဟံ။
ဧကယာမောနရာဓိပ္ပော ¶ ၊
ဒွိယာမောပဏ္ဍိတောနရော၊
တယောယာမောဃရာဝါသောစ၊
စတုယာမောစဒုဂ္ဂတော။
ယောစဗန္ဓုဟိတေယုတ္တော၊
သောပိတာယောစပေါသကော၊
တံမိတ္တံယတ္ထဝိသာသော၊
ဘရိယာယတ္ထနိဗ္ဗုတိ။
သဒ္ဓါပေမေသုသန္တေသု၊ နဂဏေမာသကံသတံ၊
သဒ္ဓါပေမေအသန္တေသု၊ မာသကံပိသတံဂဏေ။
ယာစကောအပိယောဟောတိ ¶ ၊ ယာစံအဒဒမပ္ပိယံ၊
တသ္မာသေဋ္ဌနရောလောကေ၊ ဓနံသိပ္ပံပရိဂ္ဂဟေ။
သဗ္ဗဒါပိဓနံရက္ခေ၊ ဒါရံရက္ခေဓနံပိစ၊
ဒါရံဓနဉ္စအတ္တာနံ၊ ရက္ခာယေဝသဒါဘဝေ။
နသာဓာရဏဒါရဿ၊ နဘုဉ္ဇေသာဒုမေကကော၊
နသေဝေလောကာယတိကံ၊ နေတံပညာယဝဍ္ဎနံ။
သီလဝါဝတ္တသမ္ပန္နော ¶ ၊ အပ္ပမတ္တောဝိစက္ခဏော၊
နိဝါတဝုတ္တိအထဒ္ဓါ၊ သူရတောသခိလောမုဒု။
သင်္ဂဟေတာဝမိတ္တာနံ၊ သံဝိဘာဂီဝိဇာနဝါ၊
တပ္ပေယျအန္နပါနေန၊ သဒါသမဏဗြဟ္မဏာ။
ဓမ္မကာမောသုတဒ္ဓရော၊ ဘဝေယျပရိပုစ္ဆာကော၊
သက္ကစ္စံပယိရူပါသေ၊ သီလဝန္တေဗဟုဿုတေ။
ပုဗ္ဗသိရောသိမေဓာဝီ ¶ ၊ ဒီဃာယုဒက္ခိဏံသိရော၊
ပစ္ဆိမောစိတ္တသန္တောသိ၊ မရဏံဥတ္တရောဘဝေ။
အာယုမာပါစိနံမူခံ၊ ဓနဝါဒက္ခိဏံဘဝေ၊
ပစ္ဆိမံယသသီဘုဉ္ဇေ၊ နောဘုဉ္ဇေဥတ္တရံမုခံ၊
ဘုတွာနိသီဒနံထူလံ၊ တိဋ္ဌန္တောဗလဝဍ္ဎနော၊
အာယုမာစင်္ကမောသိယာ၊ ဓာဝန္တောရောဂဝဇ္ဇိတော။
ယောစသိတဉ္စဥဏှဉ္စ ¶ ၊ တိဏာဘိယျောနမညတိ၊
ကရံပုရိသကိစ္စာနိ၊ သောသုခါနဝိဟာယတိ။
ဝိသမှာမတမာဒေယျ၊ အသုဒ္ဓမှာပိကဉ္စနံ၊
နီစမှာပျုတ္တမောဝိဇ္ဇံ၊ ရတနထိံပိဒုက္ကုလာ။
ဂုယှမတ္ထမသမ္ဗုဒ္ဓံ၊ သမ္ဗောဓယတိယောနရော၊
မန္တဘေဒဘယာတဿ၊ ဒါသဘူတောတိတိက္ခတိ။
အညာတဝါသဝသတာ၊ ဇာတဝေဒသမေနပိ၊
ခမိတဗ္ဗံသပညေန၊ အပိဒါသဿတဇ္ဇိတံ။
ဓနဓညပယောဂေသု ¶ ၊ တထာဝိဇ္ဇာဂမေသုစ၊
ဒူတေစဗျာဟာရေသု၊ စတ္တောလဇ္ဇံသဒါဘဝေ။
နဟိကောစိကတေကိစ္စေ၊ ကတ္တာရံသမပေက္ခတေ၊
တသ္မာသဗ္ဗာနိကမ္မာနိ၊ သာဝသေသာနိကာရယေ။
ဥပကာရံဟိတေနေဝ၊ သတ္တုနာသတ္တုမုဒ္ဓရေ၊
ပါဒလဂ္ဂံကရဋ္ဌေန၊ ကဏ္ဍကေနေဝကဏ္ဍကံ။
နမေနမန္တဿဘဇေဘဇန္တံ ¶ ၊
ကိစ္စာနိကုဗ္ဗဿကရေယျကိစ္စံ၊
နာနတ္ထကာမဿကရေယျအတ္ထံ၊
အသမ္ဘဇန္တံပိနသမ္ဘဇေယျ။
ဝဇေစဇန္တိသိနေဟာကိရိယာ၊
အပေမစိတ္တေန နသမ္ဘဇေယျ၊
ဒိဇောဝဒုမံခိဏဖလံဉတွာ၊
အညံအပေက္ခေယျမဟာဟိလောကော။
စဇေဧကံကုလဿတ္ထံ၊ ဂါမဿတ္ထံကုလံစဇေ၊
ဂါမံဇနပဒဿတ္ထံ၊ အတ္တတ္ထံပထဝိံစဇေ။
ဓနံစဇေအင်္ဂံဝရဿဟေတု ¶ ၊
အင်္ဂံစဇေဇီဝိတံရက္ခမာနော၊
ဓနံအင်္ဂံဇီဝိတဉ္စာပိသဗ္ဗံ၊
စဇေနရောဓမ္မမနုဿရန္တော။
အဟာဂစ္ဆန္တိဟာယန္တာ၊ သတ္တာနမိဟဇီဝိတံ၊
တသ္မာဟိမာပမတ္တတံ၊ ဂစ္ဆန္တုဇိနသာသနေ။
ဧတေသိယျောသမာယန္တိ ¶ ၊ သန္တိတေသံနဇီရတိ၊
ယောအဓိပ္ပန္နံသဟတိ၊ ယောစဇာနာတိဒေသနံ။
အဂ္ဂိအာပေါဣတ္ထီမုဠှော၊ သပ္ပောရာဇကုလာနိစ၊
ပယတနောဝဂန္တဗ္ဗော၊ မစ္စုပါဏဟရာနိတိ။
သတ္ထံသုနိစ္ဆိတမပီတိဝိစိန္တနီယံ၊
သာရာဓိတောပျဝနိပေါပရိသင်္ကနီယော၊
ဟတ္ထင်္ဂတာပိယုဝတီပရိရက္ခနီယာ၊
သတ္ထာဝနီပယုဝတီသုကုတောဝသီတံ။
ဥဿာဟောရိပုဝမိတ္တံ ¶ ၊ အလသောမိတ္တံဝရိပု၊
ဝိသံဝိယာမတံဝိဇ္ဇာ၊ ပမာဒေါအမတံဝိသံ။
ဝဟေအမိတ္တံခန္ဓေန၊ ယာဝကာလေအနာဂတေ၊
တမေဝအာဂတေကာလေ၊ ဘိန္ဒေကုမ္ဘံဝသိလာယံ။
သိင်္ဂိံပညာသဟတ္ထေန ¶ ၊ သတေနဝါဟနံစဇေ၊
ဟတ္ထီနန္တုသဟဿေန၊ ဒေသစဇ္ဇေနဒုဇ္ဇနံ။
ပစ္စက္ခေဂရဝေါသံသေ၊ ပရောက္ခေမိတ္တဗန္ဓဝေ၊
ကမ္မန္တေစဒါသဘစ္စေ၊ ပုတ္တဒါရေသံသေမတေ။
သိနေသိပ္ပံသိနေဓနံ၊ သိနေပဗ္ဗတမာရုဟေ၊
သိနေကာမောစကောဓောစ၊ ဣမေပဉ္စသိနေသိနေ။
သတံစက္ခုသတံကဏ္ဏာ ¶ ၊ နာယကဿသုတောသဒါ၊
တထာပိအန္ဓဗဓိရော၊ ဧသာနာယကဓမ္မတာ။
ဗဟူနံအပ္ပသာရာနံ၊ သာမဂ္ဂိယာတိဒုဇ္ဇယော၊
တိဏေနဝဋ္ဋတေရဇ္ဇု၊ တေနနာဂေါပိဗန္ဓတေ။
ဥပ္ပဇ္ဇတေသစေကောဓော၊ အာဝဇ္ဇေကကစူပမံ၊
ဥပ္ပဇ္ဇတေရသေတဏှာ၊ ပုတ္တမံသူပမံသရေ။
ဒါနံသိနေဟဘေသဇ္ဇံ၊ မစ္ဆေရံဒေါသနောသဓံ၊
ဒါနံယသဿိဘေသဇ္ဇံ၊ မစ္ဆေရံကပ္ပနောသဓံ။
ဓနမိစ္ဆေဝဏိဇ္ဇေယျ ¶ ၊ သိပ္ပမိစ္ဆေဗဟုဿုတေ၊
ပုတ္တမိစ္ဆေနာရိကညေ၊ ရာဇာမစ္စံဣစ္ဆာဂတေ။
မဟန္တံဝဋ္ဋရုက္ခာဒိံ၊ ခုဒ္ဒဗီဇံဗဟုပ္ဖလံ၊
သက္ခိံကတွာဥဒိက္ခေယျ၊ ပုညပါပံကရောနရော။
ဂရုကာတဗ္ဗပေါသေသု၊ နီစဝုတ္တိံကရောတိယော၊
နီစတ္တံသောပဟန္တွာန၊ ဥတ္တမတ္ထေပတိဋ္ဌတိ။
ဥတ္တမံပဏိပါတေန ¶ ၊ သူရံဘေဒေနဝိဇယေ၊
ဟီနမပ္ပပဒါနေန၊ ဝိက္ကမေနသမံဇယေ။
နတ္တဒေါသံပရေဇညာ၊ ဇညာဒေါသံပရဿတု၊
ကုမ္မောဂုယှာဣဝင်္ဂါနိ၊ ပရဘာဝဉ္စလက္ခယေ။
ဥဿူရသေယျံအာလသျံ ¶ ၊ စဏ္ဍိက္ကံဒီဃသုတ္တိယံ၊
ဧကဿဒ္ဓါနဂမနံ၊ ပရဒါရုပသေဝနံ၊
ဧတံဗြဟ္မဏဿေဝဿု၊ အနတ္ထာယဘဝိဿတိ။
သုရာယောဂေါဝိကာလောစ၊ သမဇ္ဇာနဃရင်္ဂတော၊
ခိဍ္ဍဓုတ္တောပါပမိတ္တော၊ အလသောသောဣမေဇနာ၊
မဟာဘောဂါဝိနဿန္တိ၊ ဟီနဘာဝဿိဒံဖလံ။
အတိသီတံအတိဥဏှံ၊ အတိသာယမိဒံအဟု၊
ဣတိဝိဿဋ္ဌကမ္မန္တေ၊ ခဏာအစ္စန္တိမာဏဝေ။
ပရနာသနတောနဋ္ဌော ¶ ၊ ပုရေဝပရနာသကော၊
သိင်္ဃံဝအာနသံယာတိ၊ တိဏောပါသာဒဈာပကော။
နဝိသာသေအမိတ္တဿ၊ မိတ္တဉ္စာပိနဝိသာသေ၊
ကဒါစိကုပ္ပိတောမိတ္တော၊ သဗ္ဗဒေါသပကာသကော။
ကုဒေသဉ္စကုမိတ္တဉ္စ၊ ကုသမ္ဗန္ဓံကုဗန္ဓဝံ၊
ကုဒါရဉ္စကုရာဇာနံ၊ ဒူရတောပရိဝဇ္ဇယေ။
ကက္ကဋောအသီသောယာတိ ¶ ၊ သဗ္ဗာပဒေါဝဂစ္ဆတိ၊
အထနီကုက္ကုဋီပုတ္တာ၊ ပုရိသေနာဝမညရေ။
ဟီနပုတ္တောရာဇာမစ္စော၊ ဗာလပုတ္တောပိပဏ္ဍိတော၊
အဓနဿပုတ္တောသေဋ္ဌိ၊ ပုရိသေနာဝမညရေ။
ယေနမိစ္ဆတိသမ္ဗန္ဓံ၊ တေနတီဏိနကာရယေ၊
ဝိဝါဒမတ္ထသမ္ဗန္ဓံ၊ ပရောက္ခေဒါရဒဿနံ။
ဣဏသေသောအဂ္ဂိသေသော ¶ ၊
သတြုသေသောတထေဝစ၊
ပုနပ္ပုနမ္ပိဝဍ္ဎန္တိ၊
တသ္မာသေသံနကာရယေ။
ကုလဇာတောကုလပုတ္တော၊ ကုလဝံသသုရက္ခိတော၊
အတ္တနာဒုက္ခပတ္တောပိ၊ ဟီနကမ္မံနကာရယေ။
သမိဒ္ဓါဓနဓညေန၊ နကဋ္ဌောဒတိဏဂ္ဂိဟိ၊
သဗ္ဗတောဒုဂ္ဂတောနဋ္ဌော၊ တသ္မာနဒုက္ကဋံကရေ။
နဂဏဿဂ္ဂထောဂစ္ဆေ ¶ ၊ သိဒ္ဓေကမ္မေသမံဖလံ၊
ကမ္မဝိပ္ပတ္တိစေဟောတိ၊ ဖရုသံတဿဘာသယေ။
ဗာလက္ကောပေတဓူမောစ၊ ဝုဍ္ဎိတ္ထိပလ္လလောဒကံ၊
အာယုက္ခယကရံနိစ္စံ၊ ရတ္တောစဒဓိဘောဇနံ။
ဣတ္ထီနံဒုဇ္ဇနာနဉ္စ၊ ဝိသာသောနောပပဇ္ဇတေ၊
ဝိသေသိဂိမှိနဒိယံ၊ ရောဂေရာဇကုလမှိစ။
အယုတ္တကမ္မာရဘနံဝိရောဓော ¶ ၊
သင်္ဃဿယုဒ္ဓဉ္စမဟာဗလေဟိ၊
ဝိသာသကမ္မံပမဒါသုနိစ္စံ၊
ဒွါရာနိမစ္စုဿဝဒန္တိဝိဒွါ။
ထိယောသေဝေယျနစ္စန္တံ၊ သာဒုဘုဉ္ဇေယျနာဟိတံ၊
ပူဇယေမာနယေဝုဍ္ဎေ၊ ဂရုံမာယာယနောဘဇေ။
ဝိနာသတ္ထံနဂစ္ဆေယျ၊ သူရောသင်္ဂါမဘူမိယံ၊
ပဏ္ဍိတွဒ္ဓဂူဝါဏိဇ္ဇော၊ ဝိဒေသဂမနောတထာ။
ဒေဟီတိဝစနဒွါရာ ¶ ၊ ဒေဟဋ္ဌာပဉ္စဒေဝတာ၊
သဇ္ဇနိယျန္တိဓိကိတ္တိ၊ မတိဟီရိသိရီပိစ။
နတ္ထီတိဝစနံဒုက္ခံ၊ ဒေဟီတိဝစနံတထာ၊
ဝါကျနတ္ထီတိဒေဟီတိ၊ မာဘဝေယျဘဝါဘဝေ။
ယတ္ထဝေါသံနဇာနန္တိ၊ ဇာတိယာဝိနယေနဝါ၊
နတတ္ထမာနံကိရိယာ၊ ဇနေဝသမညာတကေ။
မာတာဟီနဿဒုဗ္ဘာသာ ¶ ၊ ပိတာဟီနဿဒုကြိယာ၊
ဥဘောမာတာပိတာဟီနာ၊ ဒုဗ္ဘာသာစဒုက္ကိရိယာ။
မာတာသေဋ္ဌဿသုဘာသာ၊
ပိတာသေဋ္ဌဿသုကိရိယာ၊
ဥဘောမာတာပိတာသေဋ္ဌာ၊
သုဘာသာစသုကိရိယာ။
အတိဒီဃောမဟာမုဠှော ¶ ၊ မဇ္ဈိမောစဝိစက္ခဏော၊
ဝါသုဒေဝံပုရေက္ခိတွာ၊ သဗ္ဗေဝါမနကာသဌာ။
အာစာရောကုလမက္ခာတိ၊ ဒေသမက္ခတိဘာသိတံ၊
သမ္ဘဝေါပေမမက္ခာတိ၊ ဒေဟမက္ခာတိဘောဇနံ။
ဇလပ္ပမာဏံကုမုဒနာဠံ၊
ကုလပ္ပမာဏံကရဏကမ္မံ၊
ပညာပမာဏံကထိတဝါကျံ၊
ဘူမိပ္ပမာဏံဘဇ္ဇလတိဏံ။
ဇဝေနဘဒြံဇာနန္တိ ¶ ၊ ဝဟေနစဗလိဗဒ္ဓံ၊
ဒုဟေနဓေနုဇာနန္တိ၊ ဘာသမာနေနပဏ္ဍိတံ။
ဇာနေယျပေသနေဘစ္စံ ဗန္ဓဝံပိဘယာဂမေ၊
ဗျသနေစတထာမိတ္တံ၊ ဒါရဉ္စဝိဘဝက္ခယေ။
ဝိနာသတ္ထံနဇာနန္တိ၊ ကာလံသဗ္ဗေပိဇောတိကာ၊
ကုက္ကုဋာပနဇာနန္တိ၊ တတောရုက္ခာတတောဘွာပါ။
ပထဝီဘူသနံမေရု ¶ ၊ ရတ္တိယာဘူသနံသသီ၊
ဇနာနံဘူသနံရာဇာ၊ သေနာနံဘူသနံဂဇော။
သီလတာသောဘတေရူပံ၊
စာရိတာသောဘတေကုလံ၊
သပုပ္ဖာသောဘတေရညံ၊
သဂဇာသောဘတေဗလံ။
ကောကိလာနံသဒ္ဒံရူပံ ¶ ၊ နာရီရူပံပတိဗ္ဗတံ၊
ဝိဇ္ဇာရူပံအရူပါနံ၊ ခမာရူပံတပဿိနံ။
ကိသာသောဘာတပဿီစ၊
ထူလာသောဘာစတုပ္ပဒါ၊
ဝိဇ္ဇာသောဘာမနုဿာစ၊
ဣတ္ထီသောဘာစသာမိကာ။
ရတ္တိဟီနောနစန္ဒရော၊ ဦမိဟီနောနသာဂရော၊
ဟံသဟီနောနသံဖုလ္လော၊ ဣတ္ထိဟီနောနပုရိသော။
ဝတ္ထဟီနံနလင်္ကာရံ ¶ ၊ ပတိဟီနာနနာရိကာ၊
သိပ္ပဟီနောနပုရိသော၊ ဓေနုဟီနံနဘောဇနံ။
ဒီပကေဒီပကောစန္ဒော၊ နာရိကေဒီပကောပတိ၊
တိလောကေဒီပကောဓမ္မော၊ သုပုတ္တောကုလဒီပကော။
အပုတ္တကံဃရံသုညံ၊ ဒေသံသုညံအရာဇိကံ၊
အပညဿမုခံသုညံ၊ သဗ္ဗသုညံဒလိဒ္ဒကံ။
သောတံသုတေနေဝနကုဏ္ဍလေန ¶ ၊
ဒါနေနပါဏီနတုကင်္ကဏေန၊
အာဘာတိကာယောပုရိသုတ္တမဿ၊
ပရောပကာရေနနစန္ဒနေန။
ဒါနံသီလံပရိစ္စာဂံ ¶ ၊ အဇ္ဇဝံမဒ္ဒဝံတပံ၊
အကောဓံအဝိဟိံသဉ္စ၊ ခန္တီစအဝိရောဓနံ၊
ဒသေတေဓမ္မေရာဇာနော၊ အပ္ပမတ္တေနဓာရေယျုံ။
ဒါနံအတ္ထစရိယာပိယ၊ ဝါစာအတ္တသမံပိစ၊
သင်္ဂဟာစတုရောဣမေ၊ မုနိန္ဒေနပကာသိတာ။
ဝနေမိဂါနလဘန္တိ၊ မတာဘယာနိဒ္ဒသုခံ၊
ရာဇာနောပိနလဘန္တိ၊ ဥတ္တရထာမဘီတတော၊
သံသာရဘယဘိတေန၊ နရမန္တိယေပဏ္ဍိတာ။
ခမာဇာဂရိယုဋ္ဌာနံ ¶ ၊ သံဝိဘာဂေါဒယိက္ခနာ၊
နာယကဿဂုဏာဧတေ၊ ဣစ္ဆိတဗ္ဗာဟိတတ္ထိနော။
ပရိဘူတောမုဒုဟောတိ၊ အတိတိက္ခဉ္စဝေရဝါ၊
ဧတဉ္စဥဘယံဉတွာ၊ အနုမဇ္ဈံသမာစရေ။
နေကန္တမုဒုနာသက္ကာ၊ ဧကန္တတိခိဏေနဝါ၊
မဟတ္တေဋ္ဌပိတုအတ္တံ၊ တသ္မာဥဘယမာစရေ။
ကဿကောဝါဏိဇောမစ္စော ¶ ၊ သမဏောသုတသီလဝါ၊
တေသုဝိပုလဇာတေသု၊ ရဋ္ဌံပိဝိပုလံသိယာ။
တေသုဒုဗ္ဗလဇာတေသု၊ ရဋ္ဌံပိဒုဗ္ဗလံသိယာ၊
သရဋ္ဌံဝိပုလံတသ္မာ၊ ဓာရေယျရဋ္ဌဘာရဝါ။
မဟာရုက္ခဿဖလိနော၊ အာမံဆိန္ဒတိယောဖလံ၊
ရသဉ္စဿနဇာနာတိ၊ ဗီဇဉ္စဿဝိနဿတိ။
မဟာရုက္ခူပမံရဋ္ဌံ၊ အဓမ္မေနပသာသတိ၊
ရသဉ္စဿနဇာနာတိ၊ ရဋ္ဌဉ္စာပိဝိနဿတိ။
မဟာရုက္ခဿဖလိနော ¶ ၊ ပက္ကံဆိန္ဒတိယောဖလံ၊
ရသဉ္စဿဝိဇာနာတိ၊ ဗီဇဉ္စဿနနဿတိ။
မဟာရုက္ခူပမံရဋ္ဌံ၊ ဓမ္မေန ယောပသာသတိ၊
ရသဉ္စဿဝိဇာနာတိ၊ ရဋ္ဌဉ္စာပိနနဿတိ။
ယောစရာဇာဇနပဒံ၊ အဓမ္မေနပသာသတိ၊
သဗ္ဗောသဓီဟိသောရာဇာ၊ ဝိရုဒ္ဓါဟောတိခတ္တိယော။
တထေဝနေဂမေဟိံသံ ¶ ၊ ယေယုတ္တာကယဝိက္ကယေ၊
ဩဇာဒါနဗလိကာရေ၊ သကောသေနဝိရုဇ္ဈတိ။
ပဟာရဝရခေတ္တညူ၊ သင်္ဂါမေကတနိဿမေ၊
ဥဿိတေဟိံသယံရာဇာ၊ သဗလေနဝိရုဇ္ဈတိ။
တထေဝဣသယောဟိံသံ၊ သံယမေဗြဟ္မစာရိယော၊
အဓမ္မစာရိခတ္တိယော၊ သသဂ္ဂေနဝိရုဇ္ဈတိ။
သယံကတာနပရေန ¶ ၊ မဟာနဇ္ဇောဇုဝင်္ကတာ၊
ဣဿရေနတထာရညာ၊ သရဋ္ဌေအဓိပစ္စတ္တာ။
ပုတ္တောပါပံကတောမာတာ၊
သိဿောပါပံကတောဂရု၊
နာဂရေဟိကတောရာဇာ၊
ရာဇာပါပံပုရောဟိတော။
ပုညာပုညံကရောန္တေသု၊ ဆဘာဂေါဧကဒေသကံ၊
ရာဇာလဘတိသဗ္ဗေဟိ၊ တသ္မာပါပါနိဝါရယေ၊
ပုညမေဝပဝဍ္ဎေန္တော၊ ဇနကာယံပသာသယေ။
ဗာလဿဇီဝိတံအပ္ပံ ¶ ၊ ပဏ္ဍိတဿဗဟုတရံ၊
ဇနကာယဿရာဇာဝ၊ ရာဇဓမ္မောဝရာဇုနံ။
အနာယကာဝိနဿန္တိ၊ နဿန္တိဗဟုနာယကာ၊
ထိနာယကာဝိနဿန္တိ၊ နဿန္တိသုသုနာယကာ။
ကစ္ဆပီနဉ္စမစ္ဆီနံ၊ ကုက္ကုဋီနဉ္စဓေနုနံ၊
ပုတ္တပေါသောယထာဟောတိ၊ တထာမစ္စေသုရာဇုနံ။
နဟိရာဇကုလံပတ္တော ¶ ၊ အညာတောလဘတေယသံ၊
နာသူရောနာတိဒုမ္မေဓော၊ နပမတ္တောကုဒါစနံ။
ယဒါသီလဉ္စပညဉ္စ ¶ ၊ သောစေယျဉ္စာဓိဂစ္ဆတိ၊
အထဝိသာသိတောတမှိ၊ ဂုယှဉ္စဿနရက္ခတိ။
ဒိဝါဝါယဒိဝါရတ္တိံ၊ ရာဇကိစ္စေသုပဏ္ဍိတော၊
အဇ္ဈိဋ္ဌောနဝိကပ္ပေယျ၊ သရာဇဝသတိံဝသေ။
နရညာသမကံဝတ္ထံ၊ နမာလံနဝိလေပနံ၊
အာကပ္ပံသရကုတ္တိံဝါ၊ နရညာသဒိသမာစရေ။
ကိဠေရာဇာအမစ္စေဟိ ¶ ၊ ဘရိယာပရိဝါရိတော၊
နာမစ္စောရာဇဘရိယာ၊ ဘာဝံကုဗ္ဗေထပဏ္ဍိတော။
အနုဒ္ဓတောအစပလော၊ နိပကောသံဝုတိန္ဒြိယော၊
မနောပဏိဓိသမ္ပန္နော၊ သရာဇဝသတိံဝသေ။
နာဿဘရိယာကိဠေယျ၊ နမန္တေယျရဟောဂတော၊
နာဿကောသေဓနံဂဏှေ၊ သရာဇဝသတိံဝသေ။
န ¶ နိဒ္ဒံဗဟုံမညေယျ၊ နမဒါယသုရံပိဝေ၊
နာသဒါယေမိဂေဟညေ၊ သရာဇဝသတိံဝသေ။
နာဿပိဋ္ဌံနပလ္လင်္ကံ၊ နကောစ္ဆံနနာဝံရထံ၊
သမ္မတောမှီတိအာရုဠှေ၊ သရာဇဝသတိံဝသေ။
နာတိဒူရေဘဇေရညော၊ နစ္စာသန္နေဝိစက္ခဏော၊
သမုခါစဿတိဋ္ဌေယျ၊ သန္တသန္တောသဘတ္တုနော။
နမေရာဇာသခါဟောတိ ¶ ၆၊ နရာဇာဟောတိမေထုနော၊
ခိပ္ပံကုဇ္ဈန္တိရာဇာနော၊ သုလေနက္ခိဝဃဋ္ဋိတံ။
နပူဇိတောမညမာနော၊ မေဓာဝီပဏ္ဍိတောနရော၊
ဖရုသံပတိမန္တေယျ၊ ရာဇာနံပရိသံဂတံ။
လဒ္ဓဒွါရောလဘေဒွါရံ၊ နေဝရာဇူသုဝီသယေ၊
အဂ္ဂိံဝသံယတောတိဋ္ဌေ၊ သရာဇဝသတိံဝသေ။
ပုတ္တံဝါဘာတရံဝါပိ ¶ ၊ သမ္ပဂ္ဂဏှာတိခတ္တိယော၊
ဂါမေဟိနိဂမေဟိဝါ၊ ရဋ္ဌေဟိဇနပဒေဟိ၊
တုဏှိဘူတောဝုဒိက္ခေယျ၊ နဘဏေဆေကပါပကံ။
ဟတ္ထာရောဟေအနိကဋ္ဌေ၊ ရထိကေပတ္တိကာရကေ၊
တေသံကမ္မာဝဓာနေန၊ ရာဇာဝဍ္ဎေတိဝေတ္တနံ၊
နတေသံအန္တရာဂစ္ဆေ၊ သရာဇဝသတိံဝသေ။
စာပေါဝူနူဒရောစဿ ¶ ၊ ဝံသောဝါပိပကမ္ပယျေ၊
ပဋိလောမံနဝတ္တေယျ၊ သရာဇဝသတိံဝသေ။
စာပေါဝူနူဒရောစဿ၊ မစ္ဆောဝဿအဇိဝှကော၊
အဘာသံနိပကောသူရော၊ သရာဇဝသတိံဝသေ။
နဗာဠှံဣတ္ထိံဂစ္ဆေယျ၊ သမ္ပဿံ တေဇသင်္ခယံ၊
ကာသံသာသံထဒ္ဓါဗလံ၊ ခီဏမေဓောနိဂစ္ဆတိ။
နာတိဝေလံပဘာသေယျ ¶ ၊ နတုဏှိသဗ္ဗဒါသိယာ၊
အဝိတိဏ္ဏံမိတံဝါစံ၊ ပတ္ထကာလေဥဒီရယေ။
အကောဓနောအသင်္ဃဋ္ဋော၊
သစ္စောသဏှောအပေသုဏော၊
သမ္ဖံဂိရံနဘာသေယျ၊
သရာဇဝသတိံဝသေ။
မာတာပိတုဘရောအဿ ¶ ၊ ကုလေဇေဋ္ဌာပစာယိကော၊
ဟိရိဩတ္တပ္ပသမ္ပန္နော၊ သရာဇဝသတိံဝသေ။
ဝိနိတောသိပ္ပဝါဒန္တော၊ ယတတ္တောနိယတောမုဒု၊
အပ္ပမတ္တောသုစိဒက္ခော၊ သရာဇဝသတိံဝသေ။
နိဝါတဝုတ္တိဝုဍ္ဎေသု ¶ ၊ သပ္ပတိဿောသဂါရဝေါ၊
သူရတောသုခသံဝါသော၊ သရာဇဝသတိံဝသေ။
အာရကာပရိဝဇ္ဇေယျ၊ သညိတုံပဟိတံဇနံ၊
ဘတ္တာရမေဝုဒိက္ခေယျ၊ နစအညဿရာဇိနော။
သမဏေဗြဟ္မဏေစာပိ၊ သီလဝန္တေဗဟုဿုတေ၊
သက္ကစ္စံပယိရူပါသေ၊ အန္နပါနေနတပ္ပယျေ၊
အာသဇ္ဇပဉှေပုစ္ဆေယျ၊ အာကင်္ခံဝုဍ္ဎိမတ္တနော။
ဒိန္နပုဗ္ဗံနဟာပေယျ ¶ ၊ ဒါနံသမဏဗြဟ္မဏေ၊
နစကိဉ္စိနိဝါရေယျ၊ ဒါနကာလေဝဏိဗ္ဗကေ။
ပညာဝါဝုဍ္ဎိသမ္ပန္နော၊ ဝိဓာနဝိဓိကောဝိဒေါ၊
ကာလညူသမယညူစ၊ သရာဇဝသတိံဝသေ။
ဥဋ္ဌာတာကမ္မစေရေသု၊ အပ္ပမတ္တောဝိစက္ခဏော၊
သုသံဝိဟိတကမ္မန္တော၊ သရာဇဝသတိံဝသေ။
ခလံသာလံပသုံခေတ္တံ ¶ ၊ ဂန္တာစဿအဘိက္ခဏံ၊
မိတံဓညံနိဓာပေယျ၊ မိတဉ္စပါစယေဃရေ။
ပုတ္တံဝါဘာတရံဝါပိ၊ သီလေသုအသမာဟိတံ၊
အနင်္ဂဝါဟိတေဗာလာ၊ ယထာပေတာတထေဝတေ၊
စောဠဉ္စနေသံပိဏ္ဍဉ္စ၊ အာသနဉ္စပဒါပရေ။
ဒါသေကမ္မကရေပေါသေ ¶ ၊ သီလေသုသုသမာဟိတေ၊
ဒက္ခေဥဋ္ဌာနသမ္ပန္နေ၊ အဓိပစ္စမှိဌာပယေ။
သီလဝါစအလောဘောစ၊ အနုရုတ္တောစရာဇိနော၊
အာဝီရဟောဟိတောစဿ၊ သရာဇဝသတိံဝသေ။
ဆန္ဒညူရာဇိနောအဿ၊ စိတ္တဋ္ဌောစဿရာဇိနော၊
အသင်္ကုသကဝုတ္တိဿ၊ သရာဇဝသတိံဝသေ။
ဥစ္ဆာဒနေနှာပနေစ ¶ ၊ ဓောတေပါဒေအဒေါသိရံ၊
အာဟတောပိနကုပ္ပေယျ၊ သရာဇဝသတိံဝသေ။
ကုမ္ဘိဉှိပဉ္ဇလိံကြိယာ၊ စာတဉ္စာပိပဒက္ခိဏံ၊
ကိမေဝသဗ္ဗကာမာနံ၊ နဒါဒံဓီရမုတ္တမံ။
ယောဒေတိသယနံဝတ္ထံ၊ ယာနံအာဝသတံဃရံ၊
ပဇ္ဇုန္နောရိဝဘူတာနံ၊ ဘောဂေဟိအဘိဝဿတိ။
ဒွေဝိမေကဏ္ဍကာတိက္ခာ ¶ ၊ သရီရပရိသောသိတာ၊
ကာမေတိနိဒ္ဓနောယောစ၊ ယောစကုပ္ပတျနိဿရော။
အဓနဿရသံခါဒါ၊ အဗလဿဟတာဟတာ၊
အပညဿကထာဝါကျာ၊ တိဝိဓံဟီနလက္ခဏံ။
ပထဗျာမဓုရာတီဏိ ¶ ၊ ဥစ္ဆုနာရီသုဘာသိတံ၊
ဥစ္ဆုနာရီသုတပ္ပန္တိ၊ နတပ္ပန္တိသုဘာသိတံ။
ပထဗျာတီဏိရတနာနိ၊ သင်္ဂဟာနိမဟီတလေ၊
သိပ္ပံဓညဉ္စမိတ္တဉ္စ၊ ဘဝန္တိရတနာဣမေ။
ကလျာဏမိတ္တံကန္တာရံ၊ ယုဒ္ဓံသဘာယဘာသိတုံ၊
အသတ္ထာဂန္တုမိစ္ဆန္တိ၊ မုဠှာတေစတုရောဇနာ။
ဇီဝန္တောပိမတာပဉ္စ ¶ ၊ ဗျာသေနပရိကိတ္တိတာ၊
ဒုက္ခိတောဗျာဓိတောပက္ခော၊ ဣဏဝါနိတျသေဝကော။
စက္ခုဒွါရာဒိကံဆက္ကံ၊ သံဝုတောသပညောနရော၊
ဆဗ္ဗိဓောဟောတိသီလေန၊ အသီလေနာပိဆဗ္ဗိဓော။
နိဒ္ဒါလုကောပမာဒေါစ၊ သုခိတောရောဂဝါလသော၊
နိစ္ဆန္ဒောစကမ္မာရာမော၊ သတ္တေတေသတ္ထဝဇ္ဇိတာ။
ကုလဇောပညဝါဆန္ဒော ¶ ၊ ဟိရောတ္တပ္ပောသုတဒ္ဓရော၊
အတ္ထကာမောသုရက္ခောစ၊ အဋ္ဌေတေသတ္ထယုဇ္ဇိတာ။
ကုလသေဋ္ဌောသပညောစ၊ ဝုဍ္ဎိသူရောစသီလဝါ၊
ဗဟုဿုတောဝုဋ္ဌာနောစ၊ မီရောသုဂတိဂါမိကော၊
နဝေတေသုဇနာသေဋ္ဌာ၊ ပါပါတ္တာနံနိဝါရယေ။
ဗုဒ္ဓါပစ္စေကဗုဒ္ဓါစ၊ အရဟာအဂ္ဂသာဝကော၊
မာတာပိတာဂရုသတ္ထာ၊ ဒါယကောဓမ္မဒေသကော၊
ပဏ္ဍိတေဟိဣမေဒသ၊ န ဒုဗ္ဘန္တီတိဇာနိယာ။
ဓမ္မတ္ထကာမမောက္ခာနံ ¶ ၊ ပါဏောသံသိဒ္ဓိကာရဏံ၊
တံနိဃာတောကိံနိဟတော၊ ရက္ခိတောကိံနရက္ခတိ။
သထံဒီဃာယုကောသဗ္ဗ ¶ ၊ သတ္တာနံသုခကာရဏံ၊
အသထံပနသဗ္ဗေသံ၊ ဒုက္ခဟေတုနသံသယော။
ယန္တဂတောဥစ္ဆုရသံ၊ နဇဟာတိဂဇောတထာ၊
သင်္ဂါမေသုဂတောလိဠံ၊ သုဿုတေနာပိစန္ဒနံ။
သာရဂန္ဓံနဇဟာတိ၊ ဒုက္ခပတ္တောပိပဏ္ဍိတော၊
နဇဟာတိသတံဓမ္မံ၊ သုခကာလေကထာဝကာ။
အတ္တာဗန္ဓုမနုဿာနံ၊ ရိပုအတ္တာဝဇန္တုနံ၊
အတ္တာဝနိယတောဉာတိ၊ အတ္တာဝနိယတောရိပု။
အတ္တာနံပရိစ္စာဂေန ¶ ၊ ယံနိဿိတာနုရက္ခနံ၊
ကရောန္တိသဇ္ဇနာယေဝ၊ နတံနိတိမာတာမတံ။
သတ္ထကဗ္ဗဝိစာရေန၊ ကာလောဂစ္ဆတိဓီမတံ၊
ဗျသနေနအသာဓူနံ၊ နိဒ္ဒါယကလဟေနဝါ။
ဘမရာပုပ္ဖမိစ္ဆန္တိ၊ ပုတိမိစ္ဆန္တိမက္ခိကာ၊
သုဇာနာဂုဏမိစ္ဆန္တိ၊ ဒေါသမိစ္ဆန္တိဒုဇ္ဇနာ။
နမန္တိဖလိနောရုက္ခာ ¶ ၊ နမတေဝဗုဓာဇနာ၊
သုက္ခကဋ္ဌဉ္စမုဠှောစ၊ နေဝနမန္တိဘိဇ္ဇတေ။
သစေသန္တောဝိဝါဒတိ၊ ခိပ္ပသန္ဓိယရေပုန၊
ဗာလောပတ္တာဝဘိဇ္ဇန္တိ၊ နတေသမတမာဂမုံ။
အပ္ပမ္ပိသာဓူနံဓနံ၊ ကူပါဝါရိဝနိဿယော၊
ဗဟုကံပိအသာဓူနံ၊ နစဝါရိဝအဏ္ဏဝေ။
သောကဌာနသဟဿာနိ ¶ ၊ ဘယဌာနသတာနိစ၊
ဒိဝသေဒိဝသေမုဠှံ၊ အာဝီသန္တိနပဏ္ဍိတံ။
ဒုဋ္ဌစိတ္တောပနာဟိဿ၊ ကောဓောပါသာဏလေခိတော၊
ကုစ္ဆိတဗ္ဗောသုဇနဿ၊ ဇလေလေခါစိရဋ္ဌိတာ။
နိဒုလုကောအသန္တုဋ္ဌော၊ အကတညူစဘိရုကော၊
သက္ကောန္တိနသမာစာရံ၊ သိက္ခိတုံတေကဒါစိပိ။
သာဓုတ္တံသုဇနသမာဂမာခလာနံ ¶ ၊
သာဓူနံနခလသမာဂမာခလတ္တံ၊
အာမောဒံကုသုမဘဝံဒဓာတိဘူမိ၊
ဘူဂန္ဓံနစကုသုမာနိဓာရယန္တိ။
ဂုဏမဒ္ဓိသမံမက္ခေ၊ ပရေနကလဟေသတိ၊
အဒ္ဓိသမံပကာသေန္တံ၊ အနုမတ္တံပိဒေါသကံ။
ဒေါသံပရဿပဿန္တိ၊ အတ္တဒေါသံနပဿတိ၊
တိလမတ္တံပရဒေါသံ၊ နာဠိကေရံနပဿတိ။
ကောဓောအတ္ထံနဇာနာတိ ¶ ၊ ကောဓောဓမ္မံနပဿတိ၊
အန္ဓတမံတဒါဟောတိ၊ ယံကောဓောသဟတေနရံ။
ကောဓောအဗ္ဘန္တရေဇာတော၊ ဓုဝံနာသေတိကောဓနံ၊
ဝတ္ထာလင်္ကာရပုဏ္ဏာယံ၊ မဉ္ဇုသာယံသိခီယထာ။
ရာဂေါနာမမနောသလ္လံ၊ ဂုဏဝရတ္တစောရကော၊
ရာဟုဝိဇ္ဇာသသင်္ကိဿ၊ တပေါဓနဟုတာသနော။
နတိတ္တိရာဇာဓနေန ¶ ၊ ပဏ္ဍိတောပိသုဘာသိတေ၊
စက္ခူပိပိယဒဿနေ၊ သာဂရောပိမဟာဇလေ။
အသန္တုဋ္ဌောယတိနဋ္ဌော၊ သန္တုဋ္ဌောပိမဟီပတိ၊
သသဇ္ဇာဂဏိကာနဋ္ဌာ၊ နိလဇ္ဇာသုကုလဂတာ။
ဘူပါဏ္ဏဝဂ္ဂိထီသိပ္ပီ၊ အဘိဇ္ဈာလုစပုဂ္ဂလော၊
ဧတေသံမဟိစ္ဆန္တာနံ၊ မဟိစ္ဆတာအနိစ္ဆိတာ။
အာရောဂျံပရမံလာဘံ ¶ ၊ သန္တုဋ္ဌီပရမံဓနံ၊
ဝိသာသောပရမံဉာတိ၊ နိဗ္ဗာနံပရမံသုခံ။
ဒုဂ္ဂတံဂစ္ဆဘောလာဘ၊ လာဘောလာဘေနပူရတိ၊
ထလေပဝုဋ္ဌပဇ္ဇုန္န၊ အာပေါအာပေနပူရတိ။
ဗောဓယန္တိနယာစန္တိ၊ ဒေဟီတိပစ္ဆိမာဇနာ၊
ပဿဝတ္ထုံအဒါနဿ၊ မာဘဝတူတိဤဒိသော။
သေလေသေလေနမာဏိကံ ¶ ၊ ဂဇေဂဇေနမုတ္တိကံ၊
ဝနေဝနေနစန္ဒနံ၊ ဌာနေဌာနေနပဏ္ဍိတံ။
သတေသုဇာယတေသူရော၊ သဟဿေသုစပဏ္ဍိတော၊
ဝါကျံသတသဟဿေသု၊ စာဂေါဘဝတိဝါနဝါ။
ဇိနေနအာဂတံသူရံ၊ ဓနဉ္စဂေဟမာဂတံ၊
ဇိဏ္ဏအန္နံပသံသေယျ၊ ဒါရဉ္စဂတယောဗ္ဗနံ။
ပေါတ္ထကေသုစယံသိပ္ပံ ¶ ၊ ပရဟတ္ထေသုယံဓနံ၊
ယဒါဣစ္ဆေသမုပ္ပန္နေ၊ နတံသိပ္ပံနတံဓနံ။
ဝါစာဝုဓာစရာဇာနော၊ သစ္စာဝုဓာစသမဏာ၊
ဓနာဝုဓာသေဋ္ဌိနောစ၊ ဂေါဏာဝုဓာဒလိဒ္ဒကာ။
ဥက္ကဋ္ဌေသူရမိစ္ဆန္တိ၊ ကောလာဟလေသုဘာသိတံ၊
ပိယံအန္နဉ္စပါနဉ္စ၊ အတ္ထကိစ္စေသုပဏ္ဍိတံ။
ကပဏေတာရယေမိတ္တံ ¶ ၊ ဒုဗ္ဘိက္ခေဓညံဓာရယေ၊
သဘာယံဓာရယေသိပ္ပံ၊ သင်္ဂဟာနိမဟီတလေ။
ဒုဗ္ဘိက္ခေအန္နဒါနဉ္စ၊ သုဘိက္ခေစဟိရညဒံ၊
ဘယေစဘယဓာတာရံ၊ သဗ္ဗေသံဝရမံဝရံ။
ဟံသောမဇ္ဈေနကာကာနံ၊ သီဟောဂုန္နံနသောဘတေ၊
ဂဒြဘာနံနတုရင်္ဂေါ၊ ဗာလာနဉ္စနပဏ္ဍိတော။
နသောရာဇာယောအဇေယျံ ¶ ၊ ဇိနာတိနသောသခါရံ၊
ယောအယုတ္တေနဇိနာတိ၊ နသာဘရိယာပတိနော၊
ဝိရောဓတိနတေပုတ္တာ၊ ယေနဘရန္တိ ဇိဏ္ဏ။
နတ္ထိဝိဇ္ဇာသမံမိတ္တံ၊ နတ္ထိဗျာဓိသမောရိပု၊
နတ္ထိအတ္တသမံပေမံ၊ နတ္ထိကမ္မပရံဗလံ။
ဣတ္ထိမိဿောကုတောသီလံ၊
မံသဘက္ခောကုတောဒယံ၊
သုရာပါနောကုတောသစ္စံ၊
မဟာကောဓောကုတောတပံ။
ကွာတိဘာရောသမတ္ထာနံ ¶ ၊ ကိံဒူရောဗျဝဟာရိနံ၊
ကောဝိဒေသောသဝိဇ္ဇာနံ၊ ကောပရောပိယဝါဒိနံ။
ဒုဗ္ဘိက္ခောကသိနောနတ္ထိ၊ သန္တာနံနတ္ထိပါပကော၊
မုဂဿကလဟောနတ္ထိ၊ နတ္ထိဇာဂရတောဘယံ။
ဗာလိတ္ထီမက္ခိကာတုဏ္ဍိ၊ ဣသီနဉ္စကမဏ္ဍလု၊
သေတမ္ဗုဖလံတမ္ဗုလံ၊ နောဇ္ဈိဋ္ဌမုပဇာယတော။
ပဉ္စရတျာသုဂန္ဓဗ္ဗာ ¶ ၊ သတ္တရတျာဓနုဂ္ဂဟာ၊
ဧကမာသာသုဘရိယာ၊ အဍ္ဎမာသာသိဿာမလာ။
မလိတ္ထိယာဒုစ္စရိတံ၊ မစ္ဆေရံဒဒတောမလံ၊
မလာဝေလာမကာဓမ္မာ၊ အသ္မိံလောကေပရမှိစ၊
မလံမလတရံတတော၊ အဝိဇ္ဇာပရမံမလံ။
သုတဿရက္ခာသဗ္ဗဒါဘိယောဂေါ၊
ကုလဿဝတ္ထံပုရိသဿဝိဇ္ဇာ၊
ရညောပမာဒေါပသမောဓနဿ၊
ဣတ္ထီနန္တုနတ္ထေဝဇာတုရက္ခာ။
သတ္တာနံဇရတာဟန္တိ ¶ ၊ တဏှာဟန္တိသဗ္ဗသုခံ၊
သဗ္ဗဗလံစိန္တာဟန္တိ၊ ဒယာဟန္တိသကံဓနံ။
နီစေဝါသောသိရိံဟန္တိ၊ ဟန္တိဂရုံစယာစကော၊
ပသံသာသုဂုဏံဟန္တိ၊ ဟန္တိစိတ္တံအသညတာ။
အသနံဘယမန္တာနံ ¶ ၊ မစ္စာနံမရဏံဘယံ၊
ဥတ္တမာနန္တုသဗ္ဗေသံ၊ အဝမာနံပရံဘယံ။
သူရိယောတပနံတပေါ၊ နသန္တိပရိဝါရိတာ၊
စန္ဒရံသီတလံဇာတံ၊ တာရကာပရိဝါရိတာ၊
ဥပမာဧတ္ထဉာတဗ္ဗာ၊ သူရိယစန္ဒရာဇုနံ။
အလသောမန္ဒဗုဒ္ဓိစ၊ သုခိတောရောဂပီဠိတော၊
နိဒ္ဒါရောမံသဝဍ္ဎနော၊ သုဘက္ခောစဝိလုဒ္ဓကော။
ပမာဒေါဇာယတေမဒါ၊ ပမာဒါဇာယတေခယော၊
ခယာဒေါသာပဝဍ္ဎန္တိ၊ မဒံကိံနဇဟေဗုဓော။
ယာဒိသံဝပ္ပတေဗီဇံ ¶ ၊ တာဒိသံဖလံသမ္ပတ္တော၊
ကလျာဏကာရိကလျာဏံ၊ ပါပကာရီစပါပကံ။
ပုညာပါပဖလံယောစေ၊ နသဒ္ဒဟတိသစ္စတော၊
သောဝေသကာနနံခိပ္ပံ၊ အာဒါသတလမာနယေ။
သမ္ပရာယိကတ္ထေယော ¶ ၊ နသဒ္ဒဟတိစေပိသော၊
အာဝါသေသပ္ပဂါမီနံ၊ မောက္ခဘေကိံနပဿတိ။
သဒ္ဓါဟိရိစဩတ္တပ္ပံ၊ ဗာဟုသစ္စံဝိရံသတိ၊
ပညာစသတ္တဓမ္မေဟိ၊ သမ္ပန္နောပဏ္ဍိတောမတော။
ရဝိမူလံသသီခန္ဓံ၊ သောရိအင်္ဂါစပတ္တိကံ၊
ဗုဒ္ဓံပုပ္ဖံဂရုဗီဇံ၊ ဘရဂုဖလမေဝစ။
ပေါတ္ထကာဒီနိခေတ္တံဝ ¶ ၊ လေခါနိယုဂနင်္ဂလံ၊
အက္ခရာနိဗီဇံကတွာ၊ စရန္တောပဏ္ဍိတောဘဝေ။
အက္ခရံဧကမေကဉ္စ၊ ဗုဒ္ဓရူပံသမံသိယာ၊
တသ္မာဟိပဏ္ဍိတောပေါသော၊ လိခေယျပိဋကတ္တယံ။
ဒုဂ္ဂတိံနာဘိဇာယေယျ၊ ပိဋကတ္တယကာရကော၊
ဗဟုက္ခတ္တုံစက္ကဝတ္တိ၊ ရာဇာစတုဒီပါဓိပေါ။
ပဒေသရဇ္ဇံဝိပုလံ၊ ဂဏနာတောအသင်္ချေယော၊
ဆကာမာဝစရောဒေဝ၊ ရာဇာဟောတိဗဟုက္ခတ္တုံ။
ဒါနာဒီနိစပုညာနိ ¶ ၊ ကရောန္တောဗောဓိအင်္ကုရော၊
ဘဝါသဗ္ဗင်္ဂသမ္ပန္နော၊ တိလောကပူဇိတောဘဝေ။
အဒ္ဓေမဟဒ္ဓနေဖိတေ၊ ဇာယရေကုလမုတ္တမေ၊
ဥတ္တမေနေဝသံဝါသော၊ ပိဋကတ္တယဝါစကော။
ဧကက္ခရဖလေနဟိ၊ ပိဋကတ္တယကာရကော၊
စတုရာသီတိသဟဿံ၊ လဘန္တိပဝရံသုခံ။
အပ္ပကေနာပိမေဓာဝီ၊ ပါဘတေနဝိစက္ခဏော၊
သမုဋ္ဌာပေတိအတ္တာနံ၊ အနုမဂ္ဂိဝသန္ဓမံ။
ဒုက္ခံပါပဿပုညဿ ¶ ၊ သုခံမိဿဿမိဿကံ၊
သဗ္ဗံသဒိသကံယာတိ၊ ဉာတဗ္ဗံကမ္မုနောဖလံ။
စောဒေန္တောစတုဘာဂါစ၊ ကမ္မကာရာတယောဘာဂါ၊
သာမိနောသမဘာဂါစ၊ ဧကဘာဂါနုမောဒနာ။
အနတ္တဿဝါကျာပရမံတုဏှိ ¶ ၊
အသန္တမိတ္တာပရမံဧကံ၊
သုရူပဒါရာဝရမန္ဓာ၊
ဒူရေကလာဘာဝရမဿသုက္ခံ။
ဟီနစဇ္ဇောပိစေ ဟောတိ၊ ဥဋ္ဌာတာဓီတိမာနရော၊
သီလအာစာရသမ္ပန္နော၊ နိသေအဂ္ဂိဝဘာသတိ။
နစဇ္ဇဝသလောဟောတိ၊
နစဇ္ဇဟောတိဗြဟ္မဏော၊
ကမ္မုနာဝသလောဟောတိ၊
ကမ္မုနာဟောတိဗြဟ္မဏော။
ပထဝီဝေဠုကံပတ္တံ ¶ ၊ စက္ကဝါဠံသုစိပ္ဖလံ၊
သိနေရုဝမ္မိကံခုဒ္ဒံ၊ သမုဒ္ဒေါပါတိတံယထာ။
ဧကေနေဝစကပ္ပေန၊ မာတုခီရံနသဉ္စယံ၊
တတောတုသမုဒ္ဒေါစာပိ၊ အတိရေကတရံဗဟုံ။
ဗြဟ္မာတိမာတာပီတရော၊ ပုဗ္ဗာစရိယာဝုစ္စတေ၊
အာဟုနေယျာစပုတ္တာနံ၊ ပဇာနမနုကမ္ပကာ။
တသ္မာဟိနေနမဿေယျ ¶ ၊ သက္ကရေယျစပဏ္ဍိတော၊
အန္နေနအထောပါနေန၊ ဝတ္ထေနသယနေနစ။
ဥစ္ဆာဒနေနနှာပေန၊ ပါဒါနံဓောဝနေနစ၊
ဥဋ္ဌာယပါဒစရိယာ၊ ဥပဋ္ဌာပေယျပဏ္ဍိတော၊
ဣဓေဝနံပသံသန္တိ၊ ပစ္စသဂ္ဂေပမောဒတိ။
ဧကဿေကေနကပ္ပေန ¶ ၊ ပုဂ္ဂလဿဋ္ဌိသဉ္စယော၊
သမံပဗ္ဗတရာသိမှိ၊ ဣတိဝုတ္တံမဟေသိနာ။
သဗ္ဗဒါနံဓမ္မဒါနံဇိနာတိ၊
သဗ္ဗရသံဓမ္မရသောဇိနာတိ၊
သဗ္ဗရတိံဓမ္မရတိဇိနာတိ၊
သဗ္ဗဒုက္ခံတဏှက္ခယောဇိနာတိ။
အပ္ပမာဒရတာဟောထ၊ သစိတ္တမနုရက္ခထ၊
ဒုက္ခာဥဒ္ဓရထတ္တာနံ၊ ပင်္ကေသန္နံဝကုဉ္ဇရံ။
စဇဒုဇ္ဇနသံသဂ္ဂံ ¶ ၊ ဘဇသာဓုသမာဂမံ၊
ကရပုညမဟောရတ္တိံ၊ သရနိစ္စမနိစ္စတံ။
အနိစ္စာဝတသင်္ခါရာ၊ ဥပ္ပာဒဝယဓမ္မိနော၊
ဥပ္ပဇ္ဇိတွာနိရုဇ္ဈန္တိ၊ တေသံဝူပသမောသုခေါ။
နဟိဓမ္မောအဓမ္မောစ၊ ဥဘောသမဝိပါကိနော၊
အဓမ္မောနိရယံနေတိ၊ ဓမ္မောပါပေတိသုဂ္ဂတိံ။
သမသီသံသမပါဒံ ¶ ၊ အန္တရဉ္စသမံသမံ၊
ဣဒံမနသိနိဓာယ၊ လိခေယျပိဋကတ္တယန္တိ။