📜
နမော တဿ ဘဂဝတော အရဟတော သမ္မာသမ္ဗုဒ္ဓဿ
လောကနီတိ
၁။ ပဏ္ဍိတကဏ္ဍော
လောကနီတိံ ¶ ပဝက္ခာမိ၊
နာနာသတ္ထသမုဒ္ဓဋံ၊
မာဂဓေနေဝ သင်္ခေပံ၊
ဝန္ဒိတွာ ရတနတ္ထယံ။
နီတိလောကေ ပုရိသဿ သာရော၊
မာတာ ပိတာ အာစရိယောစ မိတ္တော၊
တသ္မာ ဟိ နီတိံ ပုရိသော ဝိဇညာ၊
ဉာဏီ မဟာ ဟောတိ ဗဟုဿုတောစ။
အလသဿ ကုတော သိပ္ပံ၊
အသိပ္ပဿ ကုတော ဓနံ၊
အဓနဿ ကုတော မိတ္တံ၊
အမိတ္တဿ ကုတော သုခံ၊
အသုခဿ ¶ ကုတော ပုညံ၊
အပုညဿ ကုတော ဝရံ။
သိပ္ပာ သမံ ဓနံ နတ္ထိ၊
သိပ္ပံ စောရာ နဂဏှရေ၊
ဣဓ လောကေ သိပ္ပံ မိတ္တံ၊
ပရလောကေ သုခါဝဟံ။
အပ္ပကံ နာတိမညေယျ၊
စိတ္တေ သုတံ နိဓာပယေ၊
ဝမ္မိကောဒကဗိန္ဒူဝ၊
စိရေန ပရိပူရတိ။
ခုဒ္ဒေါတိ နာတိမညေယျ၊
ဝိဇ္ဇံ ဝါ သိပ္ပမေဝ ဝါ၊
ဧကမ္ပိ ပရိယောဒါတံ၊
ဇီဝိတကပ္ပကာရဏံ။
သေလေ သေလေ န မာဏိကံ၊
ဂဇေ ဂဇေ န မုတ္တိကံ၊
ဝနေ ဝနေ န စန္ဒနံ၊
ဌာနေ ဌာနေ န ပဏ္ဍိတံ။
ပဏ္ဍိတော သုတသမ္ပန္နော၊
ယတ္ထ အတ္ထီတိ စေ သုတော၊
မဟုဿာဟေန ¶ တံ ဌာနံ၊
ဂန္တဗ္ဗံဝ သုတေသိနာ။
သိနေ သိပ္ပံ သိနေ ဓနံ၊
သိနေ ပဗ္ဗတမာရုဟံ၊
သိနေ ကာမဿ ကောဓဿ၊
ဣမေ ပဉ္စ သိနေ သိနေ။
သုတိ သမ္မုတိ သင်္ချာစ၊
ယောဂါ နီတိ ဝိသေသကာ၊
ဂန္ဓဗ္ဗာ ဂဏိကာ စေဝ၊
ဓနု ဗေဒါ စ ပူရဏာ။
တိကိစ္ဆာ ဣတိဟာသာ စ၊
ဇောတိ မာယာ စ ဆန္ဒတိ၊
ကေတု မန္တာ စ သဒ္ဒါ စ၊
သိပ္ပာဋ္ဌာရသကာ ဣမေ။
အပုဋ္ဌော ပဏ္ဍိတော ဘေရီ၊
ပဇ္ဇုန္နော မေ ဟောတိ ပုစ္ဆိတော၊
ဗာလော ပုဋ္ဌော အပုဋ္ဌောပိ၊
ဗဟုမ္ပိ ဘဏတေ သဒါ။
ပေါတ္ထကေသု စ ယံ သိပ္ပံ၊
ပရဟတ္ထေသု ယံ ဓနံ၊
ယထာကိစ္စေ ¶ သမုပ္ပန္နေ၊
န တံ သိပ္ပံ န တံ ဓနံ။
ဇလပ္ပမာဏံ ကုမုဒ္ဒနာလံ၊
ကုလပ္ပမာဏံ ဝိနယော ပမာဏံ၊
ဗျတ္တိပ္ပမာဏံ ကထီတဝါကျံ၊
ပထဝိယာ ပမာဏံ တိဏ မိလာတံ။
အပ္ပဿုတော သုတံ အပ္ပံ၊
ဗဟုံ မညတိ မာနဝါ၊
သိန္ဓူဒကံ အပဿန္တော၊
ကူပေ တောယံဝ မဏ္ဍုကော။
ပထမံ ပရာဇယေ သိပ္ပံ၊
ဒုတိယံ ပရာဇယေ ဓနံ၊
တတိယံ ပရာဇယေ ဓမ္မံ၊
စတုတ္ထံ ကိံ ကရိဿတိ။
ဗျတ္တ ပုတြ ကိမလသော၊
အဗျတ္တော ဘာရဟာရကော၊
ဗျတ္တကော ပူဇိတော လောကေ၊
ဗျတ္တ ပုတြ ဒိနေ ဒိနေ။
မာတာ ဝေရီ ပိတာ သတြု၊
ကေန ဗာလေ န သိက္ခိတာ၊
သဘာမဇ္ဈေ ¶ န သောဘန္တိ၊
ဟံသမဇ္ဈေ ဗကောယထာ။
ကဏ္ဋကံ ဂိရိ ကော တိက္ခတိ၊
ကော အဉ္ဇနံ မိဂက္ခိကံ၊
ဥပ္ပထံ ပလ္လလေ ကော သုဂန္ဓံ၊
ကုလ-ပုတ္တ-ရူပေါ ကော ပဝတ္တတိ၊
သာမံ-ဘာဝေါ။
န ရသံ အကောတမ္ဗုလံ၊
အဓနဿ၊ လင်္ကတမ္ပိ၊
အလောနကန္တု ဗျဉ္ဇနံ၊
ဗျာကရဏံ အသိပ္ပဿ။
သုဿုသာ သုတသမ္ပန္နော၊
သုတာပညာယ ပဝဍ္ဎတိ၊
ပညာယ အတ္ထံ ဇာနာတိ၊
ဉာတော အတ္ထော သုခါဝဟော။
ဘောဇနံ မေထုနံ နိဒ္ဒါ၊
ဂေါဏေ ပေါသေပိ ဝိဇ္ဇတိ၊
ဝိဇ္ဇာ ဝိသေသော ပေါသဿ၊
တံ ဟီနော ဂေါသမော ဘဝေ။
နတ္ထိ ဝိဇ္ဇာသမံမိတ္တံ၊
နစ ဗျာဓိသမော ရိပု၊
နစ ¶ အတ္တသမံ ပေမံ၊
နစ ကမ္မသမံ ဗလံ။
ဟံသော မဇ္ဈေ န ကာကာနံ၊
သီဟော ဂုန္နံ န သောဘတေ၊
ဂဒြဘမဇ္ဈေ တုရင်္ဂေါ၊
ဗာလမဇ္ဈေ စ ပဏ္ဍိတော။
ယာဝဇီဝမ္ပိ စေ ဗာလော၊
ပဏ္ဍိတံ ပယိရုပါသတိ၊
န သော ဓမ္မံ ဝိဇာနာတိ၊
ဒဗ္ဗိ သူပရသံ ယထာ။
မုဟုတ္တမပိ စေ ဝိညူ၊
ပဏ္ဍိတံ ပယိရုပါသတိ၊
ခိပ္ပံ ဓမ္မံ ဝိဇာနာတိ၊
ဇိဝှာ သူပရသံ ယထာ။
ဝိနာ သတ္ထံ န ဂစ္ဆေယျ၊
သူရော သင်္ဂါမဘူမိယံ၊
ပဏ္ဍိတွာဒ္ဓဂူ ဝါဏိဇော၊
ဝိဒေသဂမနော တထာ။
ဓနနာသံ မနောတာပံ၊
ဃရေ ဒုစ္စရိတာနိ စ၊
ဝဉ္စနဉ္စ ¶ အဝမာနံ၊
ပဏ္ဍိတော န ပကာသယေ။
ပတ္တာနုရူပကံ ဝါကျံ၊
သဘာဝရူပကံ ပိယံ၊
အတ္တာနုရူပကံ ကောဓံ၊
ယော ဇာနာတိ သ ပဏ္ဍိတော။
အ-ဓနဿ ရသံ ခါဒါ၊
အ-ဗလဿ ဟထာ နရာ၊
အ-ပညဿ ဝါကျ-ကထာ၊
ဥမ္မတ္တက-သမာ ဣမေ။
အနဝှာယံ ဂမယန္တော၊
အ-ပုစ္ဆာ ဗဟု-ဘာသကော၊
အတ္တ-ဂုဏံ ပကာသေန္တော၊
တိ-ဝိဓံ ဟီန-လက္ခဏံ။
အပ္ပ-ရူပေါ ဗဟုံ ဘာသော၊
အပ္ပ-ပညော ပကာသိတော၊
အပ္ပ-ပူရော ဃဋော ခေါဘေ၊
အပ္ပ-ခီရာ ဂါဝီ စထေ။
မဏ္ဍူကေပိ ဥကြေ သီဟေ၊
ကာကဂ္ဂဟေ ပိယေ ပိယေ၊
အ-ပဏ္ဍီပိ ¶ ပဏ္ဍီ ဟုတွာ၊
ဓီရာ ပုစ္ဆေ ဝယေ ဝယေ။
မဏ္ဍူကေပိ ဥကြေ သီဟေ၊
သူကရေပိ ဥဟေ ဒီပေ၊
ဗိဠာရေ သဒိသေ ဗျဂ္ဃေ၊
သဗ္ဗ ဓီရေ သိပ္ပ-သမေ။
န တိတ္တိ ရာဇာ ဓနမှိ၊
ပဏ္ဍိတောပိ သု-ဘာသိတေ၊
စက္ခုံပိ ပိယ-ဒဿနေ၊
ဇလေ သာဂရော န တိတ္တိ။
ရူပ-ယောဗ္ဗန-သမ္ပန္နာ၊
ဝိသာထ-ကုထ-သမ္ဘဝါ၊
ဝိဇ္ဇာ-ဟီနာ န သောဘန္တိ၊
နိဂန္ဓာ ဣဝ ကိံသုကာ။
ဟီနေ ပုတ္တော ရာဇာမစ္စော၊
ဗာလ-ပုတ္တော စ ပဏ္ဍိတော၊
အ-ဓနဿ ဓနံ ဗဟု၊
ပုရိသာနံ န မညထ။
ယော သိပ္ပ-လောဘေန၊
ဗဟုံ ဂဏှာတိ တံ သိပ္ပံ၊
မူဂေါဝ ¶ သုပိနံ ပဿံ၊
ကထေတုမ္ပိ န ဥဿဟေ။
ဘိဇ္ဇေတုံ ကုမ္ဘကာရော၊
သောဘေတုံ ကုမ္ဘ ဃဋ္ဋတိ၊
န ခိပိတုံ အပါယေသု၊
သိဿာနံ ဝုဍ္ဎိ-ကာရဏာ။
တဂ္ဂရဉ္စ ပလာသေန၊
ယော နရော ဥပနယှတိ၊
ပတ္တာပိ သုရဘိ ဝါယန္တိ၊
ဧဝံ ဓီရူပသေဝနာ။
ပဏ္ဍိတကဏ္ဍော နိဋ္ဌိတော။
သုဇနကဏ္ဍော
သဗ္ဘိရေဝ သမာသေထ၊
သဗ္ဘိ ကုဗ္ဗေထ သန္ထဝံ၊
သတံ သဒ္ဓမ္မမညာယ၊
သေယျော ဟောတိ န ပါပိယော။
စဇ ဒုဇ္ဇန သံသဂ္ဂံ၊
ဘဇ သာဓု သမာဂမံ၊
ကရ ပုညမဟောရတ္တိံ၊
သရ နိစ္စမနိစ္စတံ။
ယထာ ¶ ဥဒုမ္ဗရပက္ကာ၊
ဗဟိရတ္တကမေဝစ၊
အန္တော ကိမီဟိ သမ္ပုဏ္ဏာ၊
ဧဝံ ဒုဇ္ဇနဟဒ္ဒယာ။
ယထာပိ ပနသာပက္ကာ၊
ဗဟိ ကဏ္ဍကမေဝ စ၊
အန္တော အမတသမ္ပန္နာ၊
ဧဝံ သုဇနဟဒယာ။
သုက္ခောပိ စန္ဒနတရု န ဇဟာတိ ဂန္ဓံ၊
နာဂေါ ဂတော နရမုခေ န ဇဟာတိ လီဠံ၊
ယန္တာဂတော မဓုရသံ န ဇဟာတိ ဥစ္ဆု၊
ဒုက္ခောပိ ပဏ္ဍိတဇနော န ဇဟာတိ ဓမ္မံ။
သီဟော နာမ ဇိဃစ္ဆာပိ၊
ပဏ္ဏာဒီနိ န ခါဒတိ၊
သီဟော နာမ ကိသောစာပိ၊
နာဂမံသံ န ခါဒတိ။
ကုလ-ဇာတော ကုလ-ပုတ္တော၊
ကုလ-ဝံသ-သုရက္ခတော၊
အတ္တနာ ဒုက္ခ-ပတ္တောပိ၊
ဟီန-ကမ္မံ န ကာရယေ။
စန္ဒနံ ¶ သီတလံ လောကေ၊
တတော စန္ဒံဝ သီတလံ၊
စန္ဒ-စန္ဒနသီတမှာ၊
သာဓု ဝါကျံ သုဘာသိတံ။
ဥဒေယျ ဘာဏု ပစ္ဆိမေ၊
မေရုရာဇာ နမေယျပိ၊
သီတလာ နရကဂ္ဂိပိ၊
ပဗ္ဗတဂ္ဂေ စ ဥပ္ပလံ။
ဝိကသေ န ဝိပရီတံ၊
သာဓုဝါယျံ ကုဒါစနံ။
သုခါ ရုက္ခဿ ဆာယာဝ၊
တတော ဉာတိ မာတာ ပိတု၊
တတော အာစရိယော ရညော၊
တတော ဗုဒ္ဓဿနေကဓာ။
ဘမရာ ပုပ္ဖမိစ္ဆန္တိ၊
ဂုဏမိစ္ဆန္တိ သုဇနာ၊
မက္ခိကာ ပူတိမိစ္ဆန္တိ၊
ဒေါသမိစ္ဆန္တိ ဒုဇ္ဇနာ။
မာတာဟီနဿ ဒုဗ္ဘာသာ၊
ပိတာဟီနဿ ဒုကြိယာ၊
ဥဘော ¶ မာတာ ပိတာ ဟီနာ၊
ဒုဗ္ဘသာစ ဒုကီရိယာ။
မာတာ သေဋ္ဌဿ သုဘာသာ၊
ပိတာ သေဋ္ဌဿ သုကြိယာ၊
ဥဘော မာတာ ပိတာ သေဋ္ဌာ၊
သုဘာသာစ သုကီရိယာ။
သင်္ဂါမေ သူရ-မိစ္ဆန္တိ၊
မန္တီသု အကူတူဟလံ၊
ပိယဉ္စ အန္နပါနေသု၊
အတ္ထေ ဇာတေ စ ပဏ္ဍိတံ။
သုနခေါ သုနခံ ဒိသွာ၊
ဒန္တံ ဒဿေတိ ဟိံသိတုံ၊
ဒုဇ္ဇနော သုဇနံ ဒိသွာ၊
ရောသယံ ဟိံသမိစ္ဆတိ။
မာ စ ဝေဂေန ကိစ္စာနိ၊
ကရောသိ ကာရာပေသိ ဝါ၊
သဟသာ ကာရိတံ ကမ္မံ၊
မန္ဒော ပစ္ဆာနုတပ္ပတိ။
ကောဓံ ဝိဟိတွာ န ကဒါစိနသောစေ၊
မက္ခပ္ပဟာနံ ဣသယော အဝဏ္ဏယုံ၊
သဗ္ဗေသ ¶ ဖာရုသ-ဝစံ ခမေထ၊
ဧတံ ခန္တိံ ဥတ္တမမာဟု သန္တော။
ဒုက္ခော နိဝါသော သမ္ဗာဓေ၊
ဌာနေ အသုစိသင်္ကတေ၊
တတော အရိမှိ အပ္ပိယေ၊
တတောပိ အကတညုနာ။
ဩဝါဒေယျာနုသာသေယျ၊
ဂါပကာ စ နိဝါရယေ၊
သတဉှိ သော ပိယော ဟောတိ၊
အသတံ ဟောတိ အပ္ပိယော။
ဥတ္တမတ္တနိဝါတေန၊
သူရံ ဘေဒေန နိဇ္ဇယေ၊
နီစံ အပ္ပက ဒါနေန၊
ဝီရိယေန သမံ ဇယေ။
န ဝိသံ ဝိသမိစ္စာဟု၊
ဓနံ သင်္ဃဿ ဥစ္စတေ၊
ဝိသံ ဧကံဝ ဟနတိ၊
သဗ္ဗံ သင်္ဃဿ သန္တကံ။
ဇဝနေ ဘဒြံ ဇာနန္တိ၊
ဗလိဒ္ဒဉ္စ ဝါဟေနာ၊
ဒုဟေန ¶ ဓေနုံ ဇာနန္တိ၊
ဘာသမာနေန ပဏ္ဍိတံ။
ဓနမပ္ပမ္ပိ သာဓူနံ၊
ကူပေ ဝါရိဝ နိဿယော၊
ဗဟုံ အပိ အသာဓူနံ၊
နစ ဝါရီဝ အဏ္ဏဝေ။
နဇ္ဇော ပိဝန္တိ နော အာပံ၊
ရုက္ခာ ခါဒန္တိ နော ဖလံ၊
ဝဿန္တိ ကွစိ နော မေဃာ၊
ပရတ္ထာယ သတံ ဓနံ။
အပတ္ထေယျံ န ပတ္ထေယျ၊
အ စိန္တေယျံ န စိန္တယေ၊
ဓမ္မမေဝ သုစိန္တေယျ၊
ကာလံ မောဃံ န အစ္စယေ။
အစိန္တိတမ္ပိ ဘဝတိ၊
စိန္တိတမ္ပိ ဝိနဿတိ၊
န ဟိ စိန္တာမယာ ဘောဂါ၊
ဣတ္ထိယာ ပုရိသဿဝါ။
အသန္တဿ ပိယော ဟောတိ၊
သန္တေ န ကုရုတေ ပိယံ၊
အသတံ ¶ ဓမ္မံ ရောစေတိ၊
တံ ပရာဘဝတော မုခံ။
သုဇနကဏ္ဍော နိဋ္ဌိတော။
၄။ ဗာလဒုဇ္ဇနကဏ္ဍော
အတိပ္ပိယော န ကာတဗ္ဗော၊
ခလော ကောတူဟလံ ကရော၊
သိရသာ ဝဟျမာနောပိ၊
အဍ္ဎပူရော ဃဋော ယထာ။
သပ္ပော ဒုဋ္ဌော ခလော ဒုဋ္ဌော၊
သပ္ပော ဒုဋ္ဌတရော ခလော၊
မန္တောသဓေဟိ သော သပ္ပော၊
ခလော ကေနုပသမ္မတိ။
ယော ဗာလော မညတိ ဗာလျံ၊
ပဏ္ဍိတော ဝါပိ တေန သော၊
ဗာလောဝ ပဏ္ဍိတမာနီ၊
သော ဝေ ဗာလောတိ ဝုစ္စတိ။
မဓုံဝ မညတီ ဗာလော၊
ယာဝ ပါပံ န ပစ္စတိ၊
ယဒါစ ¶ ပစ္စတီ ပါပံ၊
အထ ဒုက္ခံ နိဂစ္ဆတိ။
န သာဓု ဗလဝါ ဗာလော၊
သဟသာ ဝိန္ဒတေ ဓနံ၊
ကာယဿ ဘေဒါ ဒုပ္ပညော၊
နိရယံ သောပပဇ္ဇတိ။
ဃရေ ဒုဋ္ဌော စ မူသီကော စ၊
ဝနေ ဒုဋ္ဌော စ ဝါနရော၊
သကုဏေ စ ဒုဋ္ဌော ကာကော၊
နရေ ဒုဋ္ဌောစ ဗြာဟ္မဏော။
ဒီဃာ ဇာဂရတော ရတ္တိ၊
ဒီဃံ သန္တဿ ယောဇနံ၊
ဒီဃော ဗာလာန သံသာရော၊
သဒ္ဓမ္မံ အ-ဝိဇာနတံ။
တိလ မတ္တံ ပရေသံဝ၊
အပ္ပ ဒေါသဉ္စ ပဿတိ၊
နာဠိကေရမ္ပိ သဒေါသံ၊
ခလ-ဇာတော န ပဿတိ။
နတ္တဒေါသံ ပရေ ဇညာ၊
ဇညာ ဒေါသံ ပရဿတု၊
ဂုယှေ ¶ ကုမ္မော အင်္ဂါနိ၊
ပရ ဒေါသဉ္စ လက္ခယေ။
ပဏ္ဍိတဿ ပသံသာယ၊
ဒဏ္ဍော ဗာလေန ဒီယတေ၊
ပဏ္ဍိတော ပဏ္ဍိတေနေဝ၊
ဝဏ္ဏိတောဝ သုဝဏ္ဏိတော။
လုဒ္ဓံ အတ္ထေန ဂဏှေယျ၊
ထဒ္ဓံ အဉ္ဇလိ ကမ္မုနာ၊
ဆန္ဒာနုဝတ္တိယာ မူဠှံ၊
ယထာဘူတေန ပဏ္ဍိတံ။
ဗာလဒုဇ္ဇနကဏ္ဍော နိဋ္ဌိတော။
၄။ မိတ္တကဏ္ဍော
ဟိတကာရော ပရော ဗန္ဓု၊
ဗန္ဓူပိ အဟိတော ပရော၊
အ ဟိတော ဒေဟဇော ဗျာဓိ၊
ဟိတံ အရညမောသဓံ။
ပရောက္ခေ ဂုဏ-ဟန္တာရံ၊
ပစ္စက္ခေ ပိယဝါဒိနံ၊
ဝဇ္ဇေယျ ¶ တာဒိသံ မိတ္တံ၊
ဝိသကုမ္ဘေ ယထာ မဓုံ။
ဓနဟီနေ စဇေ မိတ္တော၊
ပုတ္တဒါရာ သဟောဒရာ၊
ဓနဝန္တံဝ သေဝန္တိ၊
ဓနံ လောကေ မဟာ သခါ။
ဇာနေယျ ပေသေန ဘစ္စံ၊
ဗန္ဓုံ ဝါပိ ဘယာဂတေ၊
အပ္ပကာသု တထာ မိတ္တံ၊
ဒါရဉ္စ ဝိဘဝက္ခယေ။
သော ဗန္ဓု ယော ဟိတေ ယုတ္တော၊
ပိတရော ဟောန္တိ ပေါသကော၊
တံ မိတ္တံ ယတ္ထ ဝိဿာသော၊
သာ ဘရိယာ စ ယဿ နိဗ္ဗူတိ။
န ဝိဿသေ အ-ဝိဿတ္တံ၊
မိတ္တဉ္စာပိ န ဝိဿသေ၊
ကဒါစိ ကုပိတော မိတော၊
သဗ္ဗံ ဒေါသံ ပကာသယေ။
သကိံ ဒုဋ္ဌဉ္စ ယော မိတ္တံ၊
ပုန သန္ဓိတုမိစ္ဆတိ၊
သော ¶ မစ္စုံ ဥပဂဏှာတိ၊
ဂဗ္ဘမဿတရီ ယထာ။
ဝဟေ အ-မိတ္တံ ခန္ဓေန၊
ယာဝ ကာလော အနာဂတော၊
တမေဝ အာဂတေ ကာလေ၊
သေလေ ဘိန္ဒေ ဃဋံ ဣဝ။
ဣဏသေသော အဂ္ဂိသေသော၊
သတြုသေသော တထေဝ စ၊
ပုနပ္ပုနံ ဝိဝဍ္ဎန္တိ၊
တသ္မာ သေသံ န ကာရယေ။
ပဒုမံဝ မုခံ ယဿ၊
ဝါစာ စန္ဒန သီတလာ၊
တာဒိသံ နောပသေဝေယျ၊
ဟဒယေတု ဟလာဟလံ။
န သေဝေ ဖရုသံ သာမိံ၊
နစ သေဝေယျ မစ္ဆရိံ၊
တတော အပဂ္ဂဏှံ သာမိံ၊
နေဝ နိဂ္ဂဟိတံ တတော။
သိင်္ဂီ ပညာသ ဟတ္ထေန၊
ဝဇ္ဇေ သတေန ဝါဇိနံ၊
ဟတ္ထိံ ¶ ဒန္တိံ သဟဿေန၊
ဒေသ စာဂေန ဒုဇ္ဇနံ။
ကုဒေသဉ္စ ကုမိတ္တဉ္စ၊
ကုကုလဉ္စ ကုဗန္ဓဝံ၊
ကုဒါရဉ္စ ကုဒါသဉ္စ၊
ဒူရတော ပရိဝဇ္ဇယေ။
ရောဂါတုရေ စ ဒုဗ္ဘိက္ခေ၊
ဗျသနေ သတ္တု ဝိဂ္ဂဟေ၊
ရာဇဒွါရေ သုသာနေ စ၊
ယေ တိဋ္ဌန္တိ သုမိတ္တကာ။
သီတဝါစော ဗဟုမိတ္တော၊
ဖရုသော အပ္ပမိတ္တကော၊
ဥပမံ ဧတ္ထ ဉာတဗ္ဗာ၊
စန္ဒ-သူရိယ-ရာဇူနံ။
မိတ္တကဏ္ဍော နိဋ္ဌိတော။
၅။ ဣတ္ထိကဏ္ဍော
ကောကိလာနံ သဒ္ဒံ ရူပံ၊
နာရီရူပံ ပတိဗ္ဗတာ၊
ဝိဇ္ဇာ ¶ ရူပံ အ-ရူပါနံ၊
ခမာ ရူပံ တပဿိနံ။
ဣတ္ထီနဉ္စ ဓနံ ရူပံ၊
ပုရိသာနံ ဝိဇ္ဇာ ဓနံ၊
ဘိက္ခူနဉ္စ ဓနံ သီလံ၊
ရာဇာနဉ္စ ဓနံ ဗလံ။
တပဿိနော ကိသာ သောဘာ၊
ထူလာ သောဘာ စတုပ္ပဒါ၊
ပုရိသာ ဝိဇ္ဇဝါ သောဘာ၊
ဣတ္ထီ သောဘာသ သာမိကာ။
ပဉ္စ ရတျာ သုဂန္ဓဗ္ဗာ၊
သတ္တ ရတျာ ဓနုဂ္ဂဟာ၊
ဧက မာသာ သုဘရိယာ၊
အဍ္ဎ မာသာ သိဿာ မလာ။
ဟိံ ရမတိ ပင၊
ဟင ရမတိ ပေါက။
ထီ ရမတိ ပု၊
ခု ရမတိ ဓံ။
ဇိဏ္ဏမန္နံ ပသံသေယျ၊
ဒါရဉ္စ ဂတယောဗ္ဗနံ၊
ရဏာ ပုနာဂတာ သူရံ၊
သဿဉ္စ ဂေဟမာဂတံ။
ဒွတ္တိ-ပတိကာ ¶ နာရီ စ၊
ဘိက္ခု ဒွတ္တိ-ဝိဟာရိကော၊
ဒွတ္တိ-ပါသ-မုတ္တော ပက္ခီ၊
ကတ-မာယာ ဗဟူထရံ။
ဒုဇ္ဇနံ ပဟာရာဒမေ၊
မိတ္တံ ဒမေ အ-ဘာဏိကာ၊
ဣတ္ထိဉ္စ ဗျသနာ ဒမေ၊
ရာဂိနံ အပ္ပ ဘောဇနာ။
န ရတ္တိ ဝိနာ စန္ဒိမာ၊
ဝီစိံ ဝိနာ စ အဏ္ဏဝေါ၊
ဟံသံ ဝိနာ ပေါက္ခရဏီ၊
ပတိံ ကညာစ သောဘတေ။
ပတိနာ ဇနိတော ဘောဂေါ၊
ဣတ္ထိယာဝ သံဂေါပ္ပိတော၊
ပုရိသောဝ ဟိ ပဓာနော၊
ဣတ္ထီ သုတ္တံဝ သူစိယာ။
သဗ္ဗာနဒီ ဝင်္ကနဒီ၊
သဗ္ဗေ ကဋ္ဌမယာ ဝနာ၊
သဗ္ဗိတ္ထိယော ကရေ ပါပံ၊
လဘမာနေ နိဝါတကေ။
ဝိဝါဒသီလိံ ¶ ဥသူယဘာဏိနိံ၊
သမ္ပဿတဏှိံ ဗဟုပါကဘုတ္တိနိံ၊
အဂ္ဂန္တဘုတ္တိံ ပရဂေဟဝါသိနိံ၊
နာရိံ စဇေ ပုတ္တသတမ္ပိ ပူမာ။
ဘုတ္တေသု မဏ္ဍေသု ဇနီဝ ကန္တိနီ၊
ဂုယှေစ ဌာနေ ဘဂိနီဝ ဟိရိဏီ၊
ကမ္မေသု ပတ္တေသု ကရောတိ ဒါသီဝ၊
ဘယေသု မန္တီ သယနေသု ရာမယေ၊
ရူပီသု သိက္ခီ ကုပနေသု ခန္တိနီ၊
သာ နာရီ သေဋ္ဌာတိ ဝဒန္တိ ပဏ္ဍိတာ၊
ကာယဿ ဘေဒါစ ဒိဝေဘဝေယျ သာ။
သာမာ မိဂက္ခီ တနုမဇ္ဈဂတ္တာ၊
သူရူ သုကေသီ သမဒန္တပန္တီ၊
ဂမ္ဘီရနာဘီ ယုဝတီ သုသီလီ၊
ဟီနေ ကုလေ ဇာတာပိ ဝိဝါဟျာ။
သရဒံရတု-ကာလာနံ၊
ဘရိယာနံ ရူပဝတီ၊
ဇေဋ္ဌော ပဓာနံ ပုတ္တာနံ၊
ဒိသာနံ ဥတ္တရာဒိသာ။
ယာ ဣစ္ဆေ ပုရိသော ဟောတုံ၊
ဇာတိ ဇာတိ ပုနပ္ပုနံ၊
သာမိကံ ¶ အပစာယေယျ၊
ဣန္ဒံဝ ပါရိစာရိကာ။
ယော ဣစ္ဆေ ပုရိသော ဟောတုံ၊
ဇာတိ ဇာတိ ပုနပ္ပုနံ၊
ပရဒါနံ ဝိဝဇ္ဇေယျ၊
ဓောတပါဒေါဝ ကဒ္ဒမံ။
အတိက္ကန္တ ဝယော ပေါသော၊
အာနေတိ တိမ္ဗရုတ္တနိံ၊
တဿာ ဣဿာ အသဒ္ဓါတိ၊
တံ ပရာဘဝတော မုခံ။
ဣတ္ထိကဏ္ဍော နိဋ္ဌိတော။
၆။ ရာဇကဏ္ဍော
ဧကယာမံ သယေ ရာဇာ၊
ဒွိယာမညေဝ ပဏ္ဍိတော၊
ဃရာဝါသော တိယာမံဝ၊
စတုယာမံ တု ယာစကော။
ဓနဝါ သုတဝါ ရာဇာ၊
နဒီ ဝေဇ္ဇော စိမေပဉ္စ၊
ယတ္ထ ¶ ဒေသေ န ဝိဇ္ဇန္တိ၊
န တတ္ထ ဒိဝသံ ဝသေ။
ယသ္မိံ ပဒေသေ န မာနော၊
န ပေမံ နစ ဗန္ဓဝါ၊
နစ ဝိဇ္ဇာဂမော ကောစိ၊
န တတ္ထ ဒိဝသံ ဝသေ။
အပုတ္တကံ ဃရံ သုညံ၊
ရဋ္ဌံ သုညံ အရာဇကံ၊
အ သိပ္ပဿ မုခံ သုညံ၊
သဗ္ဗ သုညံ ဒလိဒ္ဒကာ။
ဓနမိစ္ဆေယျ ဝါဏိဇ္ဇော၊
ဝိဇ္ဇမိစ္ဆေ ဘဇေသုတံ၊
ပုတ္တမိစ္ဆေ တရုဏိတ္ထိံ၊
ရာဇာမစ္စံ ဝသံ ဂမေ။
နဋ္ဌောယတိ အသန္တုဋ္ဌော၊
သန္တုဋ္ဌော စ မဟီပတိ၊
လဇ္ဇာ စ ဂဏိကာ နဋ္ဌာ၊
နိလ္လဇ္ဇာ ကုလဓီတိကာ။
ပက္ခီနံ ဗလမာကာသော၊
မစ္ဆာနမုဒကံ ဗလံ၊
ဒုဗ္ဗလဿ ¶ ဗလံ ရာဇာ၊
ကုမာရာနံ ရုဒံ ဗလံ။
ခမာ ဇာဂရိယုဋ္ဌာနံ၊
သံဝိဘာဂေါ ဒယိက္ခဏာ၊
နာယကဿ ဂုဏာ ဧတေ၊
ဣစ္ဆိတဗ္ဗာ သတံ ဂုဏာ။
သကိံ ဝဒန္တိ ရာဇာနော၊
သကိံ သမဏဗြာဟ္မဏာ၊
သကိံ သပ္ပုရိသာ လောကေ၊
ဧသ ဓမ္မော သနန္တနော။
အလသော ဂိဟီ ကာမဘောဂီ န သာဓု၊
အသညတော ပဗ္ဗဇိတော န သာဓု၊
ရာဇာ အနိသမ္မကာရီ န သာဓု၊
ပဏ္ဍိတော ကောဓနော တံပိ န သာဓု။
ဗဟဝေါ ယတ္ထ နေတ္တာရော၊
သဗ္ဗေ ပဏ္ဍိတမာနိနော၊
သဗ္ဗေ မဟတ္တမိစ္ဆန္တိ၊
တေသံ ကမ္မံ ဝိနဿတိ။
အာယံ ခယံ သယံ ဇညာ၊
ရာဇာ သယံ ကတာကတံ၊
နိဂ္ဂဟေ ¶ နိဂ္ဂဟေတဗ္ဗံ၊
ပဂ္ဂဟေ ပဂ္ဂဟာရဟံ။
ပိဋ္ဌိတောက္ကံ နိသေဝေယျ၊
ကုစ္ဆိနာဝ ဟုတာသနံ၊
သာမိကံ သဗ္ဗဘာဂေန၊
ပရလောကံ အမောဟဝါ။
အဂ္ဂိ အာပေါ ဣတ္ထိမူဠှော၊
သပ္ပော ရာဇ-ကုလာနိစ၊
အပယန္တေန ဂန္တဗ္ဗာ၊
အစ္စေက-ပါဏဟာရကာ။
ပဒုဋ္ဌ-ဘရိယ-သံဝါသော၊
ပဒုဋ္ဌ စိတ္တ ဒါသကော၊
သ-သပ္ပေ စ ဃရေ ဝါသော၊
မစ္စု ဧဝ န သံသယော။
မူဠှ သိဿော ပဒေသေန၊
ကုနာရီ ဘရဏေန စ၊
အသတာ သမ္ပယောဂေန၊
ပဏ္ဍိတောပ္ပဝသီဒတိ။
မာတာ ပုတ္တကရံ ပါပံ၊
သိဿပါပံ ဂုရုကတာ၊
ရာဇာ ¶ ရဋ္ဌကရံ ပါပံ၊
ရာဇပါပံ ပုရောဟိတော။
အကောဓေန ဇိနေ ကောဓံ၊
အသာဓုံ သာဓုနာ ဇိနေ၊
ဇိနေ မစ္ဆရိံ ဒါနေန၊
သစ္စေနာလီကဝါဒိနံ၊
အဒန္တံ ဒမနံ ဒါနံ၊
ဒါနံ သဗ္ဗတ္ထ သာဓကံ၊
ဒါနေန ပိယ ဝါစာယ၊
ဥန္နမန္တိ နမန္တိ စ၊
ဒါနံ သိနေဟဘေသဇ္ဇံ၊
မစ္ဆေရံ ဒေါသနောသဓံ၊
ဒါနံ ယသဿီ ဘေသဇ္ဇံ၊
မစ္ဆေရံ ကပဏောသဓံ။
ဗဟူနမပ္ပသာရာနံ၊
သာမဂ္ဂိယာ ဇယံ ဇယေ၊
တိဏေဟိ ဝတ္တတေ ယောတ္တံ၊
တေန နာဂေါပိ ဗဇ္ဈတေ။
သဟာယော အသမတ္ထောပိ၊
တေဇသာ ကိံကရိဿတိ၊
နိဝါတေ ¶ ဇလိတော အဂ္ဂိ၊
သယမေ ဝူပသမ္ပတိ။
န ရညာ သမကံ ဘုဉ္ဇေ၊
ကာမဘောဂံ ကုဒါစနံ၊
အာကပ္ပံ ရသ ဘုတ္တိံဝါ၊
မာလာ ဂန္ဓ ဝိလေပနံ၊
ဝတ္ထံ သဗ္ဗအလင်္ကာရံ၊
န ရညာ သဒိသံ ကရေ။
န မေ ရာဇာ သခါ ဟောတိ၊
န ရာဇာ ဟောတိ မေထုနော၊
ဧသော သာမိကော မယှန္တိ၊
စိတ္တေ နိဋ္ဌံ သုထာပယေ။
နာတိဒူရေ ဘဇေ ရညော၊
နာစ္စာသန္နောပဝါတကေ၊
ဥဇုကေ နာတိနိန္နေ စ၊
န ဘဇေ ဥစ္စမာသနေ။
ဆဒေါသေ ဝဇ္ဇေ သေဝကော၊
တိဋ္ဌေ အဂ္ဂိံဝ သံယတော။
ဂုဏီ သဗ္ဗညု တုလျောပိ၊
နသောဘတိ အနိဿယော၊
အနဂ္ဃမောပိ ¶ မဏိသေဋ္ဌော၊
ဟေမံ နိဿာယ သောဘတိ။
ရာဇကဏ္ဍော နိဋ္ဌိတော။
၇။ ပကိဏ္ဏကကဏ္ဍော
ဣတ္ထိမိဿေ ကုတောသီလံ၊
မံသ ဘက္ခေ ကုတောဒယာ၊
သုရာ ပါနေ ကုတောသစ္စံ၊
မဟာလောဘေ ကုတောဟိရီ၊
မဟာတန္ဒေ ကုတောသိပ္ပံ၊
မဟာ ကောဓေ ကုတောဓနံ။
သုရာ ယောဂေါ ဝိကာလော စ၊
သမဇ္ဇ စရဏာလသံ၊
ခိဍ္ဍာဓုတ္တော ပါပမိတ္တော၊
ဘောဂနာသမုခါ ဣမေ။
ဒိဝါ နာဒိက္ခာ ဝတ္တဗ္ဗံ၊
ရတ္တော နာဝစနေန စ၊
သဉ္စရေယျ ဘယာ ဘီတော၊
ဝနေ ဝနစရီ ယထာ။
ဇီဝန္တာပိ မတာပဉ္စ၊
ဗျာသေန ပရိကိတ္တိတာ၊
ဒုက္ခိတော ¶ ဗျာဓိတောမူဠှော၊
ဣဏဝါ နိတျသေဝကော။
အနာဂတံ ဘယံ ဒိသွာ၊
ဒူရတော ပရိဝဇ္ဇယေ၊
အာဂတဉ္စ ဘယံ ဒိသွာ၊
အ ဘီတော ဟောတိ ပဏ္ဍိတော။
နိဒ္ဒါလုကော ပမတ္တောစ၊
သုခတ္တော ရောဂဝါလသော၊
မဟိစ္ဆော ကမ္မာရာမောစ၊
သတ္တေ တေ သတ္ထဝဇ္ဇိတာ။
ဒုဂ္ဂတံ ဂစ္ဆ ဟေ လာဘ၊
လာဘီ လာဘေန ပူရတိ၊
ထလေ ပဝဿ ပဇ္ဇုန္န၊
သိန္ဓု အာပေန ပူရတိ၊
နတ္ထိဒံ ကမ္မပ္ပဓာနကံ။
န ဟိ ကောစိ ကတေ ကိစ္စေ၊
ကတ္တာရံ သမုပေက္ခတေ၊
တသ္မာ သဗ္ဗာနိ ကိစ္စာနိ၊
သာဝ သေသေန ကာရယေ။
တူလံ သလ္လဟုကံ လောကေ၊
တတော စာပလ္လ-ဇာတိကော၊
တတော ¶ ဝုဍ္ဎ မနောဝါဒေါ၊
ပမတ္တော ဗုဒ္ဓသာသနေ။
ပါသာဏဆတ္တံ ဂရုကံ၊
တတော ဒေဝါနစိက္ခဏံ၊
တတော ဝုဍ္ဎာနမောဝါဒေါ၊
တတော ဗုဒ္ဓဿ သာသနံ။
ကာယဿ ဒက္ခိဏ ဟတ္ထော၊
ဒေါသော ဧတ္ထ ကနိဋ္ဌကော၊
ကဏ္ဏ ဃာနာန-မက္ခီနံ၊
ဝါမော တု ပါဒ-ပါသကော။
တမ္ဗူလဿ မဇ္ဈ ပတ္တေ၊
ကုဝေရော ရက္ခတီ သဒါ၊
မူလမှိ ရက္ခတိ ယက္ခော၊
အဂ္ဂမှိ ကာလကဏ္ဏိကာ၊
တာနိ ဘုဉ္ဇေယျ ဆိန္ဒိတွာ၊
သိရီ ဧဝံ ပဝဍ္ဎတိ။
သမ္ပုဏ္ဏရက္ခော ဗြဟ္မာဝ၊
အစ္စုရက္ခော စ ဗိဿဏော၊
တသ္မာ ဟိ တေ ပူဇယန္တု၊
သဒါ မာနေန္တိ တံ နရံ။
ဂေါဏာ ¶ ဟိ သဗ္ဗဂိဟီနံ၊
ပေါသကာ ဘောဂဒါယကာ၊
တသ္မာ ဟိ မာတာ ပိတူဝ၊
မာနယေ သက္ကရေယျ စ။
ယေစ ခါဒန္တိ ဂေါမံသံ၊
မာတု မံသံဝ ခါဒရေ၊
မတေသု တေသု ဂိဇ္ဈာနံ၊
ဒဒေ သောတေ စ ဝါဟယေ။
ဂုရုသိဒ္ဓါ သိပ္ပာရမ္ဘော၊
ရဝိ သောကြာ စ မဇ္ဈိမော၊
န သိပ္ပော ဗုဒ္ဓစန္ဒရော၊
သောရီ အင်္ဂါစ မရဏံ။
အဋ္ဌမိယံ ဂုရုံ ဟန္တိ၊
သိဿံ ဟန္တိ စတုဒ္ဒသိံ၊
သိပ္ပံ ဟန္တိ ဒသ သိပ္ပံ၊
မာတာပိတာ စ ပုဏ္ဏမိံ။
နာဠိကံ သတ္တ နဘုဉ္ဇေ၊
န လာဗုံ နဝမံ တထာ၊
ဒွါဒသ ပြိန္နံတြိမိနံ၊
ဘုဉ္ဇေ သိပ္ပံ ဝိနဿတိ။
ဧကံ ¶ စဇေ ကုလအတ္ထံ၊
ဂါမဿတ္ထံ ကုဝံ စဇေ၊
ဂါမ စဇေ ဇနပဒတ္ထံ၊
အတ္တတ္ထံ ပထဝိံ စဇေ။
ဒေသံ ဩဿဇ္ဇ ဂစ္ဆန္တိ၊
သီဟော သပ္ပုရိသော ဂဇော၊
တတ္ထေဝ နိဓနံ ယန္တိ၊
ကာကော ကာပုရိသော မိဂေါ။
ယမှိ ပဒေသေ န မာနော၊
န ပေမံ န စ ဗန္ဓဝါ၊
န စ ဝိဇ္ဇာဂါဟော ကောစိ၊
န တတ္ထ ဝသနံ ကရေ။
စရတျေကေန ပါဒေန၊
တိဋ္ဌတျေကေန ပဏ္ဍိတော၊
အ နိသမ္မ ပရံ ဌာနံ၊
န ပုဗ္ဗမာလယံ ဇဟေ။
ဓန ဓည ပယောဂေသု၊
တထာ ဝိဇ္ဇာဂမေသု စ၊
ဒူတေသု အပစာရေသု၊
စဇ္ဇာ လဇ္ဇာ တဒါ ဘဝေ။
ဒွိ ¶ ဂုဏော ထီနမာဟာရော၊
ဗုဒ္ဓိစာပိ စတုဂ္ဂုဏော၊
ဆဂ္ဂုဏော ဟောတိ ဝါယာမော၊
ကာမောတွဋ္ဌ-ဂုဏော ဘဝေ။
ပဗ္ဗေ ပဗ္ဗေ ကမေနုစ္ဆု၊
ဝိသေသရသဝါဂ္ဂတော၊
တထာ သုမေတ္တိကော သာဓု၊
ဝိပရီတောဝ ဒုဇ္ဇနော။
ကဿကော ဝါဏိဇော မစ္စော၊
သမဏော သုတ သီလဝါ၊
တေသု ဝိပုလ ဇာတေသု၊
ရဋ္ဌမ္ပိ ဝိပုလံ သိယာ။
အသဇ္ဈာယ မလာ မန္တာ၊
အနုဋ္ဌာန မလာ ဃရာ၊
မလံ ဝဏ္ဏဿ ကောသဇ္ဇံ၊
ပမာဒေါ ရက္ခတော မလံ။
ဟီနာနံ ဂစ္ဆတေ ဝိတ္တံ၊
ဝီရာနံ သန္တကတ္တနံ၊
ဝဒန္တိ စ ဟီနာ ဇနာ၊
ပုဗ္ဗ-ကမ္မပ္ပဓာနကာ။
န ¶ ဝဒန္တိ စေဝံဓီရာ၊
ဝါယမိံသု သဗ္ဗကမ္မေ၊
န စေ သိဇ္ဈတိ တံ ကမ္မံ၊
အ-ဖလံ ဧဝ ကော ဒေါသော။
နီစံ ကုလံ နိပညံ ဝါ၊
နိရူပံ နိဗလံ သမံ၊
ဣမံ ကာလံ ဆုတ္တကာလံ၊
ဓနမေဝ ဝိသေသကံ။
ပကိဏ္ဏကကဏ္ဍော နိဋ္ဌိတော။
ပဏ္ဍိတော သုဇနော ကဏ္ဍော၊
ဒုဇ္ဇနော မိတ္တ-ဣတ္ထိ စ၊
ရာဇာ ပကိဏ္ဏကော စာတိ၊
သတ္တ-ကဏ္ဍ-ဝိဘူသိတံ။
ဝိသုဒ္ဓါ စာရ-ထေရေန၊
ဝိသုဒ္ဓါရာမ-ဝါသိနာ၊
သဗ္ဗ-ကုလာနမတ္ထာယ၊
ဝိသောဓိတံ ပထက္ခယေ။