📜
နမော တဿ ဘဂဝတော အရဟတော သမ္မာသမ္ဗုဒ္ဓဿ
သုတ္တန္တနီတိ
ပရာ ¶ ဘဝန္တံ ပုရိသံ၊
မယံ ပုစ္ဆာမ ဂေါတမံ၊
ဘဝန္တံ ပုဋ္ဌု မာဂမ္မ၊
ကိံ ပရာဘဝတော မုခံ။
သုဝိဇာနော ¶ ဘဝံဟောတိ၊
ဒုဝိဇာနော ပရာဘဝေါ၊
ဓမ္မကာမော ဘဝံ ဟောတိ၊
ဓမ္မဒေဿီ ပရာဘဝေါ။
ဣတိဟေ ¶ တံ ဝိဇာနာမ၊
ပထမော သော ပရာဘဝေါ၊
ဒုတီယံ ဘဂဝါ ဗြူဟိ၊
ကိံ ပရာဘဝတော မုခံ။
အသန္တဿ ¶ ပိယော ဟောတိ၊
သန္တေ န ကုရုတေ ပိယံ၊
အသတံ ဓမ္မံ ရောစေတိ၊
တံ ပရာဘဝတော မုခံ။
ကမ္မာပရာဓသတ္တာနံ ¶ ၊
ဝိနာသေ ပစ္စုပဋ္ဌိတေ၊
အနယော နယရူပေန၊
ဗုဒ္ဓိမာကမျ တိဋ္ဌတိ။
နိဒ္ဒါသီလီ ¶ သဘာသီလီ၊
အနုဋ္ဌာတာ စ ယော နရော၊
အလသော ကောဓပညာဏော၊
တံ ပရာဘဝတော မုခံ။
ယော ¶ မာတရံ ပိတရံ ဝါ၊
ဇိဏ္ဏကံ ဂတယောဗ္ဗနံ၊
ပဟုသန္တော န ဘရတိ၊
တံ ပရာဘဝတော မုခံ။
ယော ¶ ဗြာဟ္မဏံ သမဏံ ဝါ၊
အညံ ဝါပိ ဝဏိဗ္ဗကံ၊
မုသာဝါဒေန ဝဉ္စေတိ၊
တံ ပရာဘဝတော မုခံ။
ပဟုတဝိတ္တော ¶ ပုရိသော၊
သဟိရညော သဘောဇနော၊
ဧကော ဘုဉ္ဇတိ သာဒူနိ၊
တံ ပရာဘဝတော မုခံ။
ဇာတိထဒ္ဓါ ¶ ဓနထဒ္ဓါ၊
ဂေါတ္တထဒ္ဓါ စ ယော နရော၊
သဉာတိံ အတိမညေတိ၊
တံ ပရာဘဝတော မုခံ။
ဣတ္ထိဓုတ္တော ¶ သုရာဓုတ္တော၊
အက္ခဓုတ္တော စ ယော နရော၊
လဒ္ဓံလဒ္ဓံ ဝိနာသေတိ၊
တံ ပရာဘဝတော မုခံ။
န ¶ ဗာဠှံ ဣတ္ထိံ ဂစ္ဆေယျ၊
သမ္ပဿံ တေဇသင်္ခယံ၊
ကာသံ သာသံ ဒရံ ဗာလျံ၊
ခီဏမေဒေါ နိဂစ္ဆတိ။
(က)
မာယာစေတာ ¶ မရီစီ စ၊
သောကော ရောဂေါ ဥပဒ္ဒဝေါ၊
ခရာ စ ဗန္ဓနာစေတာ၊
မစ္စုပါသော ဂုဟာသယော။
(ခ)
ဗလဝန္တော ဒုဗ္ဗလာ ဟောန္တိ၊
ထာမဝန္တောပိ ဟာယရေ၊
စက္ခုမာ အန္ဓကာ ဟောန္တိ၊
မာတုဂါမဝသံဂတာ။
(ဂ)
ဂုဏဝန္တော ¶ နိဂ္ဂုဏာ ဟောန္တိ၊
ပညဝန္တောပိ ဟာယရေ၊
ပမုတ္တာ ဗန္ဓနာ သေန္တိ၊
မာတုဂါမဝသံဂတာ။
(ဃ)
ယသံ ¶ ကိတ္တိံ ဓိတိံ သူရံ၊
ဗာဟုဿစ္စံ ပဇာနနံ၊
ဟာပယန္တိ ပမတ္တဿ၊
ကဋ္ဌပုဉ္စံဝ ပါဝကော။
သေဟိ ¶ ဒါရေဟိ သန္တုဋ္ဌော၊
ဝေသိယာသု ပဒုဿတိ၊
ဒုဿတိ ပရဒါရေသု၊
တံ ပရာဘဝတော မုခံ။
(က)
မယဉ္စ ¶ ဘရိယံ နာတိက္ကမာမ၊
အမှေစ ဘရိယာ နာတိက္ကမန္တိ၊
အညတြ တာဟိ ဗြဟ္မစရိယံ စရာမ၊
တသ္မာ ဟိ အမှံ ဒဟရာ န မိယျရေ။
(ခ)
ဧတာသု ¶ ဇာယရေ သုတ္တမာသု၊
မေဓာဝိနော ဟောန္တိ ပဟုတပညာ၊
ဗဟုဿုတာ ထေရဂုဏာ စ ဟောန္တိ၊
တသ္မာ ဟိ အမှံ ဒဟရာ န မိယျရေ။
အတီတယောဗ္ဗနော ¶ ပေါသော၊
အာနေတိ တိမ္ဗရုတ္ထနိံ၊
တဿ ဣဿာ န သုပတိ၊
တံ ပရာဘဝတော မုခံ။
(က)
န ¶ ဒုက္ခံ အဟိနာ ဒဋ္ဌံ၊
န ဒုက္ခံ သတ္တိယာ ဟတံ၊
တဉ္စ ဒုက္ခဉ္စ တိဗ္ဗဉ္စ၊
ယံ ပဿေ ဇိဏ္ဏကံ ပတိံ။
(ခ)
နတ္ထိ ¶ ခိဋ္ဋာ နတ္ထိ ရတိ၊
ဇိဏ္ဏေန ပတိနာ သဟ၊
နတ္ထိ အလ္လာပသလ္လာပေါ၊
ဇဂ္ဃိတုံပိ န သောဘတိ။
(ဂ)
ယဒါ စ ဒဟရော ဒဟရီ၊
မန္တယိံသု ရဟောဂတာ၊
သဗ္ဗေ သောကာ ဝိနဿန္တိ၊
ယေကေစိ ဟဒယဿိတာ။
ဣတ္ထိံ ¶ သောဏ္ဍိံ ဝိကိရဏိံ၊
ပုရိသံ ဝါပိ တာဒိသံ၊
ဣဿရိယသ္မိံ ထပေတိ၊
တံ ပရာဘဝတော မုခံ။
အပ္ပဘောဂေါ ¶ မဟာတဏှော၊
ခတ္တိယေ ဇာယတေ ကုလေ၊
သော စ ရဇ္ဇံ ပတ္ထယတိ၊
တံ ပရာဘဝတော မုခံ။
‘‘သုဝိဇာနော ¶ ဘဝံဟောတိ၊
ဒုဝိဇာနော ပရာဘဝေါ’’၊
အပ္ပဘောဂေါ မဟာတဏှော။
ဧတေ ¶ ပရာဘဝေ လောကေ၊
ပဏ္ဍိတော သမဝေက္ခိယ၊
အရိယော ဒဿနသမ္ပန္နော၊
သ လောကံ ဘဇတေ သိဝံ။
ဝသလသုတ္တ
ကောဓနော ¶ ဥပနာဟီစ၊
ပါပမက္ခီ စ ယော နရော၊
ဝိပန္နဒိဋ္ဌီ မာယာဝီ၊
တံ ဇညာ ဝသလော ဣတိ။
ဧကဇံ ¶ ဝါ ဒွိဇံ ဝါပိ၊
ယောဓ ပါဏံ ဝိဟိံသတိ၊
ယဿ ပါဏေ ဒယာ နတ္ထိ၊
တံ ဇညာ ဝသလော ဣတိ။
ယော ¶ ဟန္တိ ဥပရုန္ဓတိ၊
ဂါမာနိ နိဂမာနိ စ၊
နိဂ္ဂါဟကော သမညာတော၊
တံ ဇညာ ဝသလော ဣတိ။
ဂါမေ ¶ ဝါ ယဒိ ဝါ ရညေ၊
ယံ ပရေသံ မမာယိတံ၊
ထေယျာ အဒိန္နံ အာဒေတိ၊
တံ ဇညာ ဝသလော ဣတိ။
ယော ¶ ဟဝေ ဣဏမာဒါယ၊
ဝုစ္စမာနော ပလာယတိ၊
န ဟိ တေ ဣဏမတ္ထီတိ၊
တံ ဇညာ ဝသလော ဣတိ။
ယောဓ ကိဉ္စိက္ခကမျတာ၊
ပထသ္မိံ ဝဇတံ ဇနံ၊
ဟန္တွာ ကိဉ္စိက္ခ မာဒေတိ၊
တံ ဇညာ ဝသလော ဣတိ။
ယော ¶ အတ္တဟေတု ပရဟေတု၊
ဓနဟေတု စ ယော နရော၊
သက္ခိပုဋ္ဌော မုသာဗြူတိ၊
တံ ဇညာ ဝသလော ဣတိ။
ယော ¶ ဉာတီနံ သခီနံ ဝါ၊
ဒါရေသု ပဋိဒိဿတိ၊
သဟသာ သမ္ပိယေန ဝါ၊
တံ ဇညာ ဝသလော ဣတိ။
ယော ¶ ၄ မာတရံ ပိတရံ ဝါ၊
ဇိဏ္ဏကံ ဂတယောဗ္ဗနံ၊
ပဟုသန္တော န ဘရတိ၊
တံ ဇညာ ဝသလော ဣတိ။
ယော ¶ မာတရံ ပိတရံ ဝါ၊
ဘာတရံ ဘဂိနိံ သဿုံ၊
ဟန္တိ ရောသေတိ ဝါစာယ၊
တံ ဇညာ ဝသလော ဣတိ။
ယော ¶ အတ္ထံ ပုစ္ဆိတော သန္တော၊
အနတ္ထ မနုသာသတိ၊
ပဋိစ္ဆန္နေန မန္တေတိ၊
တံ ဇညာ ဝသလော ဣတိ။
ယော ¶ ကတွာ ပါပကံ ကမ္မံ၊
မာမံ ဇညာတိ ဣစ္ဆတိ၊
ယော ပဋိစ္ဆန္နကမ္မန္တော၊
တံ ဇညာ ဝသလော ဣတိ။
ယော ¶ ဝေ ပရကုလံ ဂန္တွာ၊
ဘုတွာန သုစိဘောဇနံ၊
အာဂတံ နပ္ပဋိပူဇေတိ၊
တံ ဇညာ ဝသလော ဣတိ။
ယော ¶ သမဏံ ဝါ ဗြာဟ္မဏံ၊
အညံ ဝါပိ ဝဏိဗ္ဗကံ၊
မုသာဝါဒေန ဝဉ္စေတိ၊
တံ ဇညာ ဝသလော ဣတိ။
ယော သမဏံ ဝါ ဗြာဟ္မဏံ၊
ဘတ္တကာလေ ဥပဋ္ဌိတံ၊
ရောသေတိ ဝါ န စ ဒေတိ၊
တံ ဇညာ ဝသလော ဣတိ။
အသန္တံ ¶ ယောဓ ပဗြူတိ၊
မောဟေန ပလိဂုဏ္ဌိတော၊
ကိဉ္စနံ နိဇိဂီသာနော၊
တံ ဇညာ ဝသလော ဣတိ။
ယောစတ္တာနံ ¶ သမုက္ကံသေ၊
ပရေစ မဝဇာနာတိ၊
နိဟီနော သေန မာနေန၊
တံ ဇညာ ဝသလော ဣတိ။
ရောသကော ¶ ကဒရီယော စ၊
ပါပိစ္ဆော မစ္ဆရီ သဌော၊
အဟိရီကော အနောတ္တပ္ပီ၊
တံ ဇညာ ဝသလော ဣတိ။
ယော ¶ ဗုဒ္ဓံ ပရိဘာသတိ၊
အထဝါ တဿ သာဝကံ၊
ပရိဗ္ဗဇံ ဂဟဋ္ဌံ ဝါ၊
တံ ဇညာ ဝသလော ဣတိ။
အဋ္ဌဟိ ¶ ဘိက္ခဝေ အင်္ဂေဟိ သမ္ပန္နာဂတဿ ဥပါသကဿ ပတ္တော နိကုဇ္ဇိတဗ္ဗော။ ဘိက္ခူနံ အလာဘာယ ပရိသက္ကတိ၊ ဘိက္ခူနံ အနတ္ထာယ ပရိသက္ကတိ၊ ဘိက္ခူနံ အနာဝါသာယ ပရိသက္ကတိ၊ ဘိက္ခူနံ အက္ကောသတိ ပရိဘာသတိ၊ ဘိက္ခူဘိက္ခူဟိ ဘေဒေတိ၊ ဗုဒ္ဓဿ အဝဏ္ဏံ ဘာသတိ၊ ဓမ္မဿ အဝဏ္ဏံ ဘာသတိ၊ သင်္ဃဿ အဝဏ္ဏံ ဘာသတိ၊ အနုဇာနာမိ ဘိက္ခဝေ ဣမေဟိ အဋ္ဌဟိ အင်္ဂေဟိ သမ္ပန္နာဂတဿ ဥပါသကဿ ပတ္တံ နိကုဇ္ဇိတုံ။
ယော ¶ အနရဟံ သန္တော၊
အရဟာတိ ပဋိဇာနာတိ၊
စောရော သဗြဟ္မကေ လောကေ၊
တံ ဇညာ ဝသလော ဣတိ။
ဧတေ ¶ ခေါ ဝသလာ ဝုတ္တာ၊
မယာ ယေ တေ ပကာသိတာ၊
န ဇစ္စာ ဝသလော ဟောတိ၊
န ဇစ္စာ ဟောတိ ဗြာဟ္မဏော။
ကမ္မုနာ ဝသလော ဟောတိ၊
ကမ္မုနာ ဟောတိ ဗြာဟ္မဏော။
တဒမိနာပိ ¶ ဇာနာထ၊
ယထာဟေတံ နိဒဿနံ၊
စဏ္ဍာလပုတ္တော သောပါကော၊
မာတင်္ဂေါ ဣတိ ဝိဿုတော။
သော ¶ ယသံ ပရမံ ပတ္တော၊
မာတင်္ဂေါ ယံ သုဒုလ္လဘံ၊
အာဂစ္ဆုံ တဿုပဋ္ဌာနံ၊
ခတ္တိယာ ဗြာဟ္မဏာ ဗဟူ။
သော ¶ ဒေဝယာနံ အဘိရုယှ၊
ဝိရဇံ သော မဟာပထံ၊
ကာမရာဂံ ဝိရာဇေတွာ၊
ဗြဟ္မလောကူပဂေါ အဟု။
ဂိရိံ ¶ နခေန ခဏသိ၊
အယော ဒန္တေဘိ ခါဒသိ၊
ဇာတဝေဒံ ပဒဟသိ၊
ယော ဣသိံ ပရိဘာသတိ။
အာဝေလိတံ ¶ ပိဋ္ဌိတော ဥတ္တမင်္ဂံ၊
ဗာဟုံ ပသာရေတိ အကမ္ပဏေယျံ၊
သေတာနိ အက္ခီနိ ယထာ မတဿ၊
ကော မေ ဣမံ ပုတ္တမကာသိ ဧဝံ။