📜
နမော တဿ ဘဂဝတော အရဟတော သမ္မာသမ္ဗုဒ္ဓဿ
စတုရာရက္ခဒီပနီ
ကာယပစ္စဝေက္ခဏာ
ပဏာမပဋိဉာ
စက္ကဝါဠ ¶ နဟုတာ ဂ၊ ဒေဝါလိ ဂဏ စုမ္ဗိတော၊
ဗုဒ္ဓ ပါဒမ္ဗုဇော ဌာတု၊ သီသေ ဒယာ တိဂန္ဓဇော။
နန္တ ¶ စက္ကဝါဠ ဗ္ဘုဂ္ဂ၊ ဂုဏ သန္နိစ္စိတံ ဇိနံ၊
ဝန္ဒေ တပ္ပူဇိတံ ဓမ္မံ၊ တဇ္ဇံ သင်္ဃဉ္စ နိမ္မလံ။
ဝက္ခာမိ ¶ စတုရာရက္ခံ၊ သမ္ဗုဒ္ဓ ဝစန နွယံ၊
အပ္ပမာဒါဝဟံ ဧတံ၊ သောတ္တဗ္ဗံ ဘဝဘီရုဟိ။
ဗုဒ္ဓါနုဿတိ ¶ မရဏာ၊ ဘုဘာ မေတ္တာစ ဘာဝနာ၊
အပ္ပမာဒါယ အာရက္ခာ၊ စတဿော မာနိတာ သတံ။
ဗုဒ္ဓါဝါဒံ ¶ သရိတွာဝ၊ မစ္စုဗ္ဗိဂ္ဂါ သုခေသိနော၊
သီတာ သီတတရံ ယန္တိ၊ သုဘမေတ္တမ္ဗုသိ-ဋ္ဌိတာ။
မရဏဂ္ဂိ ဝါရဏမ္ဗု၊ သမ္ဗုဒ္ဓဝစနံ ယိဒံ၊
ဗဟူ တဒဂ္ဂိ သန္တတ္တာ၊ သီတာဝါသုံ တဒမ္ဗုနာ။
သဒ္ဓံ ¶ ဗုဒ္ဓေန တေဇေတွာ၊ မာနံ မရဏစိန္တယာ၊
အသုဘာယ ဟနေ ရာဂံ၊ ဒေါသံ မေတ္တာယ ပညဝါ။
၁။ ဗုဒ္ဓါနုဿတိ နိဒ္ဒေသ
အရဟံ ¶ သမ္မာသမ္ဗုဒ္ဓါ၊ ဝိဇ္ဇက္ခိ စရဏပ္ပဒေါ၊
သုဂတော သုဂဒေါ သတ္ထာ၊ သဗ္ဗညူ ဘဂဝါဒမော။
အာရကတ္တာရိဟန္တတ္တာ ¶ ၊ ပါပါကာရကတောရဟော၊
ဟတ စက္ကာရတော ပူဇာ၊ ရဟတ္တာ စာရဟံ နမေ။
သမုတ္တေ ¶ ဇိယ ဂိဟီနံ၊ အနုပုဗ္ဗိကထော ဇိနော၊
အဒါသိ ပရမံ တုဋ္ဌိံ၊ သစ္စာနိ ဒဿယံ ဒိဝါ။
ဘိက္ခူနံ ¶ ပဌမေ ယာမေ၊ ပါယေသိ အမတာဂဒံ၊
ဇာတိခေတ္တာဂ ဒေဝါနံ၊ ကင်္ခစ္ဆေဒေါ သ မဇ္ဈိမေ၊
အာဒေါ ဖလသုခံ ဝေဒိ၊ မဇ္ဈေ သေယျ မကာ ဇိနော၊
ဝေနေယျော လောကနံ အန္တေ၊ ပစ္ဆိမေပိ တိဓာ ကတေ။
ခေဒံ ¶ အဂဏယံ နာထော၊ ပဉ္စ ဗုဒ္ဓကတံ ဝဟံ၊
သတ္ထသိဒ္ဓါ ပရတ္ထံဝ၊ ဗျာဝဋော သုမဟာဒယော။
စင်္ကမိတွာ နိသီဒိတွာ၊ ရတ္တိံဒိဝဉ္စ ဈာယိတုံ၊
သုပိတုံ မဇ္ဈယာမေဝ၊ ဗုဒ္ဓါ ဘိက္ခူန မောဝဒိ။
နာလ ¶ မာလသိတုံ တဿ၊ မဟာဝီရဿ သာသနေ၊
ပမာဒါယ မုနိန္ဒဿ၊ ကတညူ သာဓု သမ္မတော။
အနညာတဿ ဉာတာယ၊ အပတ္တဿစ ပတ္တိယာ၊
အာရဘေတုံဝ နော ယုတ္တော၊ အပ္ပမတ္တော ရဟောဂတော။
အာရဗ္ဘထ ¶ နိက္ကမထ၊ ယုဉ္ဇထ ဗုဒ္ဓသာသနေ၊
ဓုနာထ မစ္စုနော သေနံ၊ နဠာဂါရံဝ ကုဉ္ဇရော။
ယော ¶ ဣမသ္မိံ ဓမ္မဝိနယေ၊ အပ္ပမတ္တော ဝိဟိဿတိ၊
ပဟာယ ဇာတိ သံသာရံ၊ ဒုက္ခဿန္တံ ကရိဿတိ၊
ဣတိ ¶ ဥယျောဇနံ မှာကံ၊ မုတ္တဿ မုတ္တိယာ သရံ၊
နယုတ္တောဝ ပမာဒါယ၊ မဟာဒယဿ သတ္ထုနော။
သုတ္တေန ဒုဗ္ဗိတက္ကေန၊ အကိစ္စ ကရဏေနဝါ၊
မောဃ ကာလက္ခယော မန္ဒော၊ ဒုက္ခဿန္တံ ကထံကရေ။
အာကာသံ ¶ စက္ကဝါဠဉ္စ၊ သတ္တာ ဗုဒ္ဓဂုဏာ ပိစ၊
အနန္တာနာမ စတ္တာရော၊ ပရိစ္ဆေဒေါ နဝိဇ္ဇတိ။
ယထာပိ နဘ မာကာသံ၊ အင်္ဂုလရဇ္ဇုယဋ္ဌိဘိ၊
မိနေတုံ နေဝ သက္ကောတိ၊ ဧဝံ ကေနစိ တဂ္ဂုဏံ။
၂။ မရဏဿတိနိဒ္ဒေသ
မရဏဿတိ ¶ မိစ္ဆန္တော၊ တာဝ ဗုဒ္ဓဝစော သုဏ၊
အဝိက္ခိတ္တေန စိတ္တေန၊ သမ္ဗုဒ္ဓ ဝစနံ ဟိဒံ။
အနိမိတ္တ ¶ မနညာတံ၊ မစ္စာနံ ဣဓ ဇီဝိတံ၊
ကသိရဉ္စ ပရိတ္တဉ္စ၊ တဉ္စ ဒုက္ခေန သံယုတံ။
န ဟိ သော ပက္ကမော အတ္ထိ၊ ယေန ဇာတာ နမိယျရေ၊
ဇရမ္ပိ ပတွာ မရဏံ၊ ဧဝံဓမ္မာ ဟိ ပါဏိနော။
ဖလာန ¶ မိဝ ပက္ကာနံ၊ ပါတော ပတနတော ဘယံ၊
ဧဝံ ဇာတာန မစ္စာနံ၊ နိစ္စံ မရဏ တော ဘယံ။
ယထာပိ ကုမ္ဘကာရဿ၊ ကတာ မတ္တိကဘာဇနာ၊
သဗ္ဗေ ဘေဒပရိယန္တာ၊ ဧဝံ မစ္စာန ဇီဝိတံ။
ဒဟရာစ ¶ မဟန္တာစ၊ ယေဗာလာ ယေစ ပဏ္ဍိတာ၊
သဗ္ဗေ မစ္စုဝသံ ယန္တိ၊ သဗ္ဗေ မစ္စုပရာယနာ။
တေသံ မစ္စုပရေတာနံ၊ ဂစ္ဆတံ ပရလောကတော၊
နပိတာ တာယတေ ပုတ္တံ၊ ဉာတိဝါပန ဉာတကေ၊
ပေက္ခတညေဝ ¶ ဉာတီနံ၊ ပဿ လာလပ္ပတံ ပုထု၊
ဧကမေကောဝ မစ္စာနံ၊ ဂေါ ဝဇ္ဈောဝိယ နိယျတိ။
ဧဝ မဗ္ဘာဟတော လောကော၊ မစ္စုနာစ ဇရာယစ၊
တသ္မာ ဓီရာ နသောစန္တိ၊ ဝိဒိတွာ လောက ပရိယာယံ။
အညေပိ ¶ ပဿ ဂမနေ၊ ယထာ ကမ္မုပဂေ နရေ၊
မစ္စုနော ဝသမာဂမ္မ၊ ဖန္ဒန္တေဝိဓ ပါဏိနော။
ယေန ယေနဟိ မညန္တိ၊
တတောတဿ ဟိ အညထာ၊
ဧတာဒိသော ဝိနာဘာဝေါ၊
ပဿ လောကဿ ပရိယာယန္တိ။
[သုလ္လ သုတ္တေ ဝုတ္တံ။]
ယထာပိ ¶ သေလာ ဝိပုလာ၊
နဘံ အာဟစ္စ ပစ္စတာ၊
သမန္တာ အနုပရိ ယေယျုံ၊
နိပ္ပောထေန္တာ စတုဒ္ဒိသာ။
ဧဝံ ဇရာစ မစ္စုစ၊
အဓိဝတ္တန္တိ ပါဏိနေ၊
ခတ္တိယေဗြာဟ္မဏေ ဝေဿေ၊
သုဒ္ဒေ စဏ္ဍာလ ပက္ကုသေ၊
နကိဉ္စိ ပရိဝဇ္ဇေတိ၊
သဗ္ဗမေဝါ ဘိမဒ္ဒတိ။
န ¶ တတ္ထ ဟတ္ထိ နံ ဘုမ္မိ၊ န ရထာနံ နပတ္တိယာ၊
န စာပိ မန္တယုဒ္ဓေန၊ သက္ကာ ဇေတုံ ဓနေနဝါ။
တသ္မာဟိ ¶ ပဏ္ဍိတော ပေါသော၊
သမ္ပဿံ အတ္ထ မတ္တနော၊
ဗုဒ္ဓေ ဓမ္မေ စ သင်္ဃေစ၊
ဓီရော သဒ္ဒံ နိဝေသယေ။
ယော ဓမ္မစာရီ ကာယေန၊ ဝါစာယ ဥဒ စေတသာ၊
ဣဓေဝနံ ပသံသန္တိ၊ ပစ္စသဂ္ဂေ ပမောဒတီတိ။
[ပဗ္ဗတူ မမ သုတ္တေ ဝုတ္တံ။]
ယထာ ¶ ဝါရိဝဟော ပူရော၊ ဝဟေ ရုက္ခေ ပကူလဇေ၊
ဧဝံ ဇရာမရဏေန၊ ဝုယှန္တေ သဗ္ဗ ပါဏိနော။
ဒဟရာပိ ဟိ မိယျန္တိ၊
နရာစ အထနာရိယော၊
တတ္ထ ကော ဝိသာသေပေါသော၊
ဒဟရော မှီတိဇီဝိတေ။
သာယ ¶ မေကေ နိဒိဿန္တိ၊ ပါတော ဒိဋ္ဌာ ဗဟုဇ္ဇနာ၊
ပါတော ဧကေ နဒိဿန္တိ၊ သာယံ ဒိဋ္ဌာ ဗဟုဇ္ဇနာ။
အဇ္ဇေဝ ကိစ္စံ အာတပ္ပံ၊ ကော ဇညာ မရဏံ သုဝေ၊
နဟိ နော သင်္ကရံ တေန၊ မဟာသေနန မစ္စုနာတိ။
[ဇာတကေသုဝုတ္တံ။]
နတ္ထေတ္ထညော ¶ နုသာသန္တော၊ သယံဝတ္တာန မောဝဒ၊
ဇိနေရိတာ နုသာရေန၊ ဘိက္ခု သံသာရ ဘီရုကော။
အဟိဝါပိ ¶ မံ ဍံသေယျ၊ အညေပိ ဝိသဓာရိနော၊
အပိယာပိစ ဃာတေယျုံ၊ ဥပ္ပဇ္ဇေယျုံ ရုဇာပိမေ။
မစ္စုသေနာ ဝုဓာသင်္ချာ၊ ဗာဟိရဇ္ဈတ္တု ပဒ္ဒဝါ၊
တေဟာယု ပီဠိတံဆေဇ္ဇံ၊ မရိဿ မဇ္ဇဝါ သုဝေ။
အဠက္ကာ ¶ ဟိ ဂဝါဒီဟိ၊ စောရာဒီဟိ အရီဟိပိ၊
အဘိဏှ သန္နိပါတေဟိ၊ ရုဇာ ဆနဝုတီဟိပိ။
ဗဟူန မုပကာရေဟိ၊ အန္နောဒကာဒိကေဟိပိ၊
မရိဿံ ပီဠိတော နိစ္စံ၊ နိရုဇ္ဈေယျာယု အဇ္ဇဝါ။
ဗဟွာဝုဓေ ¶ ဝိသဇ္ဇေတိ၊ နိလ္လေဏံ မစ္စုနိဒ္ဒယော၊
ဝသန္တံ ဘဝသင်္ဂါမေ၊ နမုတ္တော ကောစိ အာဝုဓာ၊
မဟဗ္ဗလာ မဟာပညာ၊ မဟိဒ္ဓိကာ မဟဒ္ဓနာ၊
နမုတ္တာ သမ္မာသမ္ဗုဒ္ဓါ၊ သဗ္ဗလောကာဓိပေါ အပိ၊
မယာ ¶ သမာ နဝါ ဝုဒ္ဓါ၊ တဒါဝုဓေဟိ တေ မတာ၊
တထာ ဟမ္ပိ မရိဿာမိ၊ လေဏံ ပုညံဝ မေ ကတံ။
ပထဗျာပါဒယော ဓာတ္ထူ၊
အာဟာရာ ဘောဇနာဒယော၊
သီတုဏှ မုတုနာမေတံ၊
ဒေါသာ ပိတ္တသေမှာနိလာ။
ဓာတွာဟာရု ¶ တုဒေါသာနံ၊ သမတ္တေ ဝါယု တိဋ္ဌတိ၊
ဝိသမေ တင်္ခဏညေဝ၊ ဆေဇ္ဇ မပ္ပံ ပရာဓိနံ။
ဓာတွာ ဟာရုတု ဒေါသာနံ၊ ဝိသမာ သွေပျကလ္လကော၊
ဥဿာဟေ ကလ္လကာလေဝ၊ ကိံကရေယျအကလ္လကော၊
ဥပ္ပဇ္ဇေယျုံ ¶ ရုဇာ သွေပိ၊ အသာတော ဒုက္ခမာ ခရာ၊
ပုရေတရံဝ အာရဗ္ဘေ၊ မာပစ္ဆာ အနုတာပနံ။
သတ္တာနံ ¶ နီစကမ္မာနံ၊ သရဏောပိ ဘယင်္ကရော၊
နီစာနီစံ နဇာနာမိ၊ မရဏာသန္နတမ္ပိစ။
ကမ္မ ပီဠိတ သတ္တာနံ၊ တင်္ခဏမ္ပိ ဘယုဗ္ဘဝေါ၊
မရေယျ မဇ္ဇဝါ သွေဝါ၊ နယုတ္တောဝ ပမဇ္ဇိတုံ။
ပုညက္ခီဏာ ပဇာ ခိပ္ပံ၊ အဟေတုနာပိ နဿယေ၊
သုဒ္ဓစိတ္တော မရိဿာမိ၊ န ကိလိဋ္ဌေန စေတသာ။
ဥပစ္ဆေဒါပိ ¶ မေ သန္တိ၊ ဘဝါဘဝစိတာ ဗဟူ၊
ဆေဇ္ဇံ တေဟာယု အဇ္ဇာပိ၊ သာဓွာသုမာရဘေ မတံ၊
ကမ္မာ ပရာဓ သတ္တာနံ၊ ဝိနာသေ ပစ္စုပဋ္ဌိတေ၊
အနယော နယရူပေန၊ ဗုဒ္ဓိမာကမျ တိဋ္ဌတိ။
မရဏာသန္န ¶ တညေဝ၊ စိန္တေယျ ပညဝါ သတော၊
ဧဝံ စိန္တယန္တော သန္တော၊ နပါပံ ကတ္တု မုဿဟေ။
မရဏာသန္န တညေဝ၊ စိန္တေယျ ဗုဒ္ဓသာဝကော၊
ဧဝံ စိန္တယန္တော သန္တော၊ ကဒါစိပိ အနုဏ္ဏတော။
အဒ္ဓါဂ ¶ မရဏံ ပညော၊ ပုရေတရံဝ စိန္တယေ၊
ကရေ ကာတဗ္ဗ ကမ္မဉ္စ၊ ဧဝံ သော နာနုသောစတိ။
မရဏာသန္န သညီ သော၊ အပ္ပမတ္တော ဝိစက္ခဏော၊
ပတ္တေပိ မရဏေ ကာလေ၊ န သမ္မုဠှော နသောကဝါ။
မရဏာ ¶ သန္နသညီ သော၊ သောဓေတိ အတ္တနော မလံ၊
နိမ္မလေန စုတော ဘိက္ခု၊ နတွေဝါ ပါယ ဂါမိကော။
သတိ အာသန္န မရဏေ၊
ဒူရသညီ ပမာဒ ဝါ၊
ယော ကရောတိ အကာတဗ္ဗံ၊
တဒါ သော အတိသောစတိ။
သတိ ¶ အာသန္နမရဏေ၊ ဒူရသညီ ပမာဒဝါ၊
အာကိဏ္ဏော ပါပဓမ္မေဟိ၊ ပဇ္ဈာယိ ဒုမ္မနော တဒါ။
သတိ အာသန္န မရဏေ၊ ဒုဋ္ဌော ဒေါသောတိ ထဒ္ဓဝါ၊
အဘိနန္ဒတိ သာဒေတိ၊ တဒါသော အတိဒုက္ခိတော။
သတိ ¶ အာသန္နမရဏေ၊ တုဝဋံ န စိကိစ္ဆတိ၊
သဉ္စိစ္စာပတ္တိ မာပန္နော၊ တဒါ သော ပရိဒေဝတိ။
သတိ အာသန္န မရဏေ၊ ဂိဟီဟိ နဝကေဟိစ၊
သံသဋ္ဌော န နုလောမေဟိ၊ သွတိဝဿု မုခေါ တဒါ။
သတိ ¶ အာသန္န မရဏေ၊ ကုဟကော ကုလဒူသကော၊
မိစ္ဆာဇီဝ သမာပန္နော၊ ဒုန္နိမိတ္တောဝ သော စုတော။
သသောကီ ¶ သဟနန္ဒီစ၊ ဒုက္ခေ ဒုက္ခော သုခေ သုခေါ၊
ဂိဟိကမ္မေသု ဥဿုက္ကော၊ ပဿံ ဂိဇ္ဈကူဋံ စုတော။
မရိဿန္တိ အနာဝဇ္ဇ၊ ကိလေသာတုရ ပီဠိတော၊
ကိမိခဇ္ဇဝဏော သာဝ၊ ဘန္တော ကိံ သုဂတိံ ဝဇေ။
မရိဿန္တိ ¶ အနာဝဇ္ဇ၊ ဓုရဒွယံ န ပူရတိ၊
ဂန္ထံ ဝိပဿနံ တန္ဒီ၊ ကာရုညောယေဝ သော စုတော။
မရိဿန္တိ အနာဝဇ္ဇ၊ ကိလေသာနံ ဝသာနုဂေါ၊
သမ္ဗုဒ္ဓါ-ဏံ ဝီတိက္ကန္တော၊ ကာရုညော နတ္ထိ တဿမော။
မရိဿန္တိ ¶ အနာဝဇ္ဇံ၊ ဓနမေသီ အဓမ္မတော၊
ပုညေ စိန္တာပိ နုပ္ပဇ္ဇိ၊ နိရယံ သော မနံ ဂတော။
မရေယျန္တိ အနာဝဇ္ဇံ၊ ဓနံ စိနိ အဓမ္မတော၊
စိတံ စိတံ ဣဟေဝေတံ၊ တသ္မိံဂိဒ္ဓါ သ ပေတ္တိကော။
အတ္ထာ ¶ ဂေဟေ နိဝတ္တန္တေ၊ သုသာနေ မိတ္တဗန္ဓဝါ၊
သုကတံ ဒုက္ကတံ ကမ္မံ၊ ဂစ္ဆန္တ မနုဂစ္ဆတိ။
မရေယျန္တိ အနာဝဇ္ဇံ၊ ဣဟတ္ထံ ဝါ နုယုဉ္ဇတိ၊
သမ္ပရာယ မနပေက္ခော၊ သုဇုံ ဝါ ပါယဂါမိကော။
မရေယျန္တိ ¶ သမာဝဇ္ဇ၊ ဓမ္မတော ဓန မေသတိ၊
ပုညကာရီ သုလဒ္ဓေန၊ မရဏေပိ သ မောဒတိ။
ပဉ္စသီလ သဒါရက္ခော၊ ယထာဗလဉ္စ ဒါယကော၊
ကာလေ ဥပေါသထာဝါသော၊ သော နိစ္စံ သုဂတိံ ဝဇ္ဇေ။
ဓောဝါပတ္တိမလံ ¶ ခိပ္ပံ၊ မစ္စု အဒ္ဓါ ဂမိဿတိ၊
မိစ္ဆာဝိတက္က မုစ္ဆိဇ္ဇ၊ ကရ ကာတဗ္ဗဘာဝနံ။
အတိက္ကန္တာ ဗဟူ ရတျော၊ ခေပေတွာ မမ ဇီဝိတံ၊
မန္ဒာယုနာ ပမာဒေန၊ ယုတ္တော ဝိဟရိတုံ ကထံ။
ဟာသန္တံ ¶ နန္ဒိ မတ္တာနံ၊ မစ္စုသန္ဓီဟိ တစ္ဆယေ၊
ကုစ္ဆိ မေယျစုတော အဇ္ဇ၊ ကော ဟာသနန္ဒိတဗ္ဗကော။
မစ္စုသေနာဝုဓာ သင်္ချာ၊ မရဏာဘိမုခေါ အဟံ၊
အစ္စာယိတဗ္ဗ ကာလော ယံ၊ ဣက္ခိတဗ္ဗ မုဒိက္ခတု။
ပုရေမရာမိ ¶ ဒဋ္ဌဗ္ဗံ၊
ဒက္ခေယျံ မစ္စု ဧဿတိ၊
အစ္စာယိတဗ္ဗ ကာလော ယံ၊
နောကာသော ဟာသတုဋ္ဌိယာ။
အာကိဏ္ဏမစ္စုသေနာနံ ¶ ၊ အဇ္ဇ သွေဝါ ဝိနာသိနံ၊
အဒ္ဓါ ပဟာယ ဂါမီနံ၊ ကိံ ပမာဒ ဝိဟာရိနာ။
ခဏမတ္တောဝ ပစ္စက္ခော၊ အဇ္ဇ သွေဝါ အတိဿတိ၊
သမ္ပရာယော အတိဒီဃော၊ ပရမ္ပရော အနန္တိကော။
ခဏမတ္တောဝ ¶ ပစ္စက္ခော၊ မစ္စုနာ တံ ဇဟိဿတိ၊
ပဟာယ ဂမနီယေ-သ္မိံ၊ မဟုဿာဟော နိရတ္ထကော။
သမ္ပရာယော အတိဒီဃော၊ အပါထေယျေ သုဒုတ္တရော၊
မဟုဿာဟေန ကာတဗ္ဗော၊ တဒတ္ထော ဒီဃဒဿိနာ။
သဒ္ဓါ ¶ ဗန္ဓတု ပါထေယျံ၊ တဒေသနံ ဣဟေဝ ဟိ၊
ဘဝန္တရေ နလဗ္ဘေယျ၊ အပါထေယျ တိဒုက္ခိတော။
သံသာရ တရဏတ္ထာယ၊ မဟောလုမ္ပာနိ ဗန္ဓထ၊
ဘာဝနာ ဒါန သီလေဟိ၊ တိဝိတ္တိဏ္ဏော ဘဝဏ္ဏဝေါ။
ဘုဉ္ဇံ ¶ ဘုဉ္ဇံ ဇနံ ကာမေ၊
ကာလာကာလာ-ဗုဓောန္တကော၊
ကန္တေကန္တေတိ မံသာသော၊
ပိဝံပိဝံဝ ကံ မိဂံ။
ကာမေ ကာမေသနာယေယျ၊
ကာလောကာလော မတေဋ္ဌိယာ၊
ပူရေ ပူရေတဗ္ဗံ ဓမ္မံ၊
အဒ္ဓါ အဒ္ဓါန သံသရံ။
မရေယျန္တိ ¶ အနုဗ္ဗိဂ္ဂေါ၊ ပါပကံ ကတ္တုမုဿဟေ၊
ကရေယျ ဟာသနန္ဒိဉ္စ၊ စာပလ္လဉ္စ ပမာဒ ဝါ။
မရေယျမိတိ ¶ သံဝိဂ္ဂေါ၊ လေဏမေဝ ဂဝေသတိ၊
န ဟာသိ နေဝနန္ဒီစ၊ န စာပလ္လော ကဒါစိပိ။
အစ္စုဋ္ဌိတ ရုဇဂ္ဂီဟိ၊ အစ္စာယာသေ ဘယာနကေ၊
နောသဓေ မရဏာသန္နေ၊ ကတပုညံဝ သာတ-ဒံ။
ဉာတိသင်္ဃာ ¶ ဝိယောဇေန္တာ၊ မရဏန္တ ဘုသာတုရာ၊
သဗ္ဗံ ပဟာယ ဂန္တာပိ၊ နန္ဒိတဗ္ဗာနိ ပုညိနော။
ပဿန္တာ သုနိမိတ္တာနိ၊ ပါကဋာနိ သကမ္မုနာ၊
သုခန္တိ မရဏေ ကာလေ၊ နုမောဒန္တာ ကတာနိစ။
သာတ-ဒါတာနိ ¶ ပုညာနိ၊ ဧဝံ မဟဗ္ဘယေ အပိ၊
သုဂတိံ လဟုနေတာနိ၊ ကာတဗ္ဗာနိ ပုရေတရံ။
ဒေဝဒူတေ ¶ ပကာသေတွာ၊ ယမပုဋ္ဌော သယံကတံ၊
ပုညံ သရတိ စေ သတ္တော၊ တဒေဝ သုဂတိံ ဝဇေ။
ပါပ ¶ ကဍ္ဎမ္ပိ နိရယေ၊ မနံ ဒုက္ခဂတံ ပဇံ၊
ဒုက္ခာ မောစေတိ ယံပုညံ၊ သဒါ ကာတဗ္ဗမေဝ တံ။
ပဟာယကံဝ ပုညဉှိ၊ ပဟာတဗ္ဗံဝ ပါပကံ၊
တံ ပဒီပန္ဓကာရံဝ၊ ဒွယံ ဩတွာ ခုကံ ဝိယ။
ဉာတိသင်္ဃာ ¶ ဝိယောဇေန္တာ၊ မရဏန္တ ဘုသာတုရာ၊
သဗ္ဗံ ပဟာယ ဂန္တာရော၊ ဘယာနကာနိ ပါပိနော။
ပဿန္တာ ဒုန္နိမိတ္တာနိ၊ ပါကဋာနိ သကမ္မုနာ၊
မရဏေ အတိဒုက္ခန္တိ၊ နုတာပေန္တာ ကတာနိစ။
ပဋိပီဠာနိ ¶ ပါပါနိ၊ ဧဝံ မဟဗ္ဘယေ သတိ၊
ဒုဂ္ဂတိံ လဟုနေတာနိ၊ ယုတ္တောဝ ပရိဝဇ္ဇိတုံ။
ဒေဝဒူတေ ¶ ပကာသေတွာ၊ ယမရာဇေန ပုစ္ဆိတော၊
ပမာဒဿန္တိ စိက္ခန္တော၊ မဟဂ္ဂိမှိ တုရံ ပတိ။
ပုညံ အကရိဝါ မာဝါ၊ ယမရာဇိန္ဒ ပုစ္ဆိတော၊
ပမာဒဿန္တိ စိက္ခန္တော၊ မဟာဒုက္ခံ တုရံ ဂမိ။
ပါပံ ¶ အကရိဝါ မာဝါ၊ ပုစ္ဆိတော ယမသာမိနာ၊
ပမာဒဿန္တိ စိက္ခန္တော၊ တတ္တံ ဂုဠံ တုရံ ဂိလိ။
ဇာတမတ္တာ တိဇိဏ္ဏာစ၊ အာတုရာစ မတာ ဝုဓာ၊
ဒေဝဒူတေ ဣမေ ပဉ္စ၊ ဒိသွာ သံဝိဂ္ဂတံ ဝဇေ။
စောဒိတာ ¶ ဒေဝဒူတေဟိ၊ ယေ ပမဇ္ဇန္တိ မာနဝါ၊
တေ ဒီဃရတ္တံ သောစန္တိ၊ ဟိန ကာယူ ပဂါနရာ။
ဓုရဒွယ ¶ မနာရဗ္ဘ၊ ဂိဟိကမ္မာဒိကေ ရတော၊
ကထံ ဂိဇ္ဈကူဋံ သေသံ၊ ပေတာဝါသံ အတိဿတိ။
ပရိယတ္တိ မသိက္ခန္တော၊
နာရဒ္ဓါ ပဋိပတ္တိယံ၊
အလသော ဒုဗ္ဗိတက္ကော သော၊
ကိံ တံသေလံ အတိဿတိ။
မောစနတ္ထာယ ¶ ပဗ္ဗဇ္ဇ၊ သံကိလိဋ္ဌာ ပမာဒိနော၊
သုဂတျာပိစ တေ ဘဋ္ဌာ၊ အတိဒူရာဝ မုတ္တိတော။
သီဒန္တေဝ ¶ ဇလေ ခိတ္တာ၊ သိလာ မဟာဝ ခုဒ္ဒကာ၊
ပတန္တိ ခုဒ္ဒကေနာပိ၊ အပါယံ ပါပ ကမ္မုနာ။
ပတန္တာ ခုဒ္ဒကေနေဝ၊ ဗဟူဟိ ပုန ပီဠိတာ၊
မောက္ခောကာသံ နဝိန္ဒန္တိ၊ ပါပံ ခုဒ္ဒမ္ပိ နာစရေ။
ဇေဂုစ္ဆိတ္ထူဒရာဂမ္မ ¶ ၊ ပုနာပိ တတ္ထ နိစ္စဂူ၊
ဒုက္ခာတိ ဒုက္ခ သံကိဏ္ဏော၊ ဟဋ္ဌုံ တုဋ္ဌုံ နသက္ကုဏေ။
အတိဗျာပိဂုဏော ¶ ပုညော၊
မဟာယသော သိရိန္ဓရော၊
ကုစ္ဆိယံ ရေတသိ ဝါသော၊
အတီဝ လဇ္ဇိတဗ္ဗကော။
မစ္စုဒုက္ခံ ခဏံယေဝ၊ အတိဒုက္ခံ တဒုတ္တရိ၊
မာတုဂါမုဒရေ သန္ဓိ၊ ပတိဋ္ဌာနံ ဘယာနကံ။
မစ္စုဒုက္ခံ ¶ ခဏံယေဝ၊ အတိဒုက္ခံ စိရတ္တနံ၊
အာမ ပက္ကန္တရေ သန္ဓိ၊ ပတိဋ္ဌာနံ ဘယာနကံ။
ဒုဂ္ဂတျံဌာတု တံဒုက္ခံ၊ သုဏ ဥစ္စကုလေအပိ၊
ကုစ္ဆိယံ အတိသမ္ဗာဓေ၊ ဇလာဗုမှိ ဇိဂုစ္ဆိတေ။
မိဠှ သေမှာဒိ သံကိဏ္ဏေ၊ အတိ ဒုဂ္ဂန္ဓ ဝါသိတေ၊
ဂူထကူပေ ကိမီဝိယ၊ တမေဇာ မူလကမ္မတော။
ပရမာဏုကာယော ဌာတိ၊ ဒုက္ခီ နေရယိကော ဝိယ၊
ဓုဝါတုရော သုခါမိဿော၊ အာမ ပက္ကာသယန္တရေ၊
ဝေဒနဋ္ဋောဝ သံဝဍ္ဎော၊ အစိတ္တောဝိယ နိစ္စလော၊
ဒသမာသန္တရေ ကစ္စေ၊ ဗဟူ မရန္တိ ပါဏိနော။
ပရိပက္ကော ¶ ပမုဉ္ဆော သော၊
အတိသမ္ဗာဓ ယောနိတော၊
မလာကိဏ္ဏေန ဂတ္တေန၊
အစ္စာယာသော ဝိဇာယတိ။
ဧဝံ ¶ မစ္စုဉ္စ သန္ဓိဉ္စ၊ ဝိဇာယနဉ္စ ဘေရဝံ၊
ပဿံ နိဗ္ဗိန္ဒန္တော သန္တော၊ ဝိရဇ္ဇေယျ ဘဝန္ဒုကေ။
ဧဝံ မစ္စုဉ္စ သန္ဒိဉ္စ၊ အနုဿရ မဘိဏှသော၊
ရာဇသေဋ္ဌိ ဘဝါဒိမ္ပိ၊ နဣစ္ဆေယျ တဒနွိတံ။
ဘဝေ ¶ ဒုက္ခ မစိန္တေတွာ၊ ဘဝါသာယ ပဝတ္တိတံ၊
ပုညံ ပုနပ္ပုနံ ဒေတိ၊ သန္ဓိံ န နိဗ္ဗုတိံ ဝရံ။
ဘဝေ ဒုက္ခံ ဝိဘာယိတွာ၊ နိဗ္ဗိန္ဒေန ပဝတ္တိတံ၊
ပုညံ ဘဝ မတိက္ကမ္မ၊ နိဗ္ဗာနံ ဒေတိ နိဗ္ဗုတိံ။
ဘဝေ ¶ ဒုက္ခံ သရိတွာန၊ မစ္စုသန္ဓိ သယာဒိကံ၊
တိဘဝေသု ဝိရဇ္ဇေယျာ၊ ဒိတ္တ ဂေဟေဝ သာမိကော။
သန္တော ပုညာနိ ကရောန္တော၊ သန္ဓိဒုက္ခ မနုဿရံ၊
နိဗ္ဗိန္ဒ ယုတ္တ စိတ္တေန၊ ဝဇ္ဇေယျ ဘဝသာတ တော။
ပုည ¶ နိဗ္ဗတ္တ ဌာနေပိ၊ ဇေဂုစ္ဆေ သန္ဓိသမ္ဘဝေါ၊
ဘဝ သာတ ဝသာ တသ္မာ၊ ဓီရော တံ လဂ္ဂနံ စဇေ။
၃။ အသုဘဘာဝနာ နိဒ္ဒေသ
သိရိမံ ¶ ဂဏိကံ ဒိသွာ၊ ဒမေတုံ ရတ္တစေတသံ၊
ဒဿေတွာ မတသာရီရံ၊ တဿာ ဇိနော ဣဒံ ဗြဝိ။
စရံဝါ ¶ ယဒိဝါ တိဋ္ဌံ၊ နိသိန္နော ဥဒဝါ သယံ၊
သမဉ္ဆေတိ ပသာရေတိ၊ ဧသာ ကာယဿ ဣဉ္ဇနာ။
အဋ္ဌိ နှာရူဟိ သံယုတ္တော၊ တစ မံသာဝ လေပနော၊
ဆဝိယာ ကာယော ပဋိစ္ဆန္နော၊ ယထာဘူတံ နဒိဿတိ။
အန္တပူရော ¶ ဒရပူရော၊ ယကန ပေဠဿ ဝတ္ထိနော၊
ဟဒယဿ ပပ္ဖာသဿ၊ ဝက္ကဿ ပိဟကဿစ။
သိင်္ဃာနိကာယ ခေဠဿ၊ သေဒဿစ မေဒဿစ၊
လောဟိတဿ လသိကာယ၊ ပိတ္တဿစ ဝသာယစ။
အထဿ ¶ နဝဟိ သောတေဟိ၊ အသုစိ သဝတိ သဗ္ဗဒါ၊
အက္ခိမှာ အက္ခိဂူထကော၊ ကဏ္ဏမှာ ကဏ္ဏဂူထကော။
သိင်္ဃာနိကာစ နာသတော၊ မုခတော ဝမတိ ဧကဒါ၊
ပိတ္တံ သေမှဉ္စ ဝမတိ၊ ကာယမှာ သေဒဇလ္လိကာ။
အထဿ ¶ သုသိရံ သီသံ၊
မတ္ထလုင်္ဂဿ ပူရိတံ၊
သုဘတော နံ မညတိ ဗာလော၊
အဝိဇ္ဇာယ ပုရက္ခတော။
ယဒါစ သော မတော သေတိ၊
ဥဒ္ဓုမာတော ဝိနီလကော၊
အပဝိဒ္ဓါ သုသာနသ္မိံ၊
အနပေက္ခာ ဟောန္တိ ဉာတယော။
ခါဒန္တိ ¶ နံ သုဝါနာစ၊ သိင်္ဂါလကာစ ကိမိယော၊
ကာကာ ဂိဇ္ဈာစ ခါဒန္တိ၊ ယေစညေ သန္တိ ပါဏကာ။
သုတွာန ¶ ဗုဒ္ဓဝစနံ၊ ဘိက္ခု ပညာဏဝါ ဣဓ၊
သောခေါ နံ ပရိဇာနာတိ၊ ယထာဘူတဉှိ ပဿတိ။
ယထာဣဒံ တထာဧတံ၊ ယထာဧတံ တထာဣဒံ၊
အဇ္ဈတ္တဉ္စ ဗဟိဒ္ဓါစ၊ ကာယေ ဆန္ဒံ ဝိရာဇယေ။
ဆန္ဒ ¶ ရာဂ ဝိရတ္တော သော၊ ဘိက္ခု ပညာဏဝါ ဣဓ၊
အဇ္ဈဂါ အမတံ သန္တိံ၊ နိဗ္ဗာနံ ပဒ မစ္စုတံ။
ဒွိပါဒကော ယံ အသုစိ၊ ဒုဂ္ဂန္ဓော ပရိဟာရတိ၊
နာနာကုဏပ ပရိပူရော၊ ဝိဿဝန္တော တတောတတော။
ဧတာဒိသေန ¶ ကာယေန၊ ယော မညေ ဥန္နမေတဝေ၊
ပရံဝါ အဝဇာနေယျ၊ ကိမညတြ အဒဿနာတိ၊
ကာယ ဝိစ္ဆန္ဒနီယသုတ္တံ၊ ဝိဇယသုတ္တန္တိပိ ဝတ္တဗ္ဗံ။
ရ-အက္ခရော ¶ သိယာဂ္ဂိမှိ၊ ရောဝ အဂ္ဂိဝ အာဂတော၊
တသ္မာ ရာဂေါတိ ဝတ္တဗ္ဗော၊ တဏှာဝ နိစ္စတာပိကာ။
အဘိဏှမေဝ ရာဂဂ္ဂိ၊ ဒယှတေ သုဘသညိနံ၊
ကိမိခဇ္ဇဝဏော သာဝ၊ ဒုက္ခီ ရာဂီ သ သဗ္ဗဒါ။
ဒုက္ခီ ¶ ပိယ မလဒ္ဓါန၊ လဒ္ဓါပျ ပရိပုဏ္ဏတော၊
နတ္ထိ ရာဂဂ္ဂိခန္ဓဿ၊ ပိယိန္ဓေန ဟိ ပုဏ္ဏတာ။
နတ္ထိ ¶ ရာဂသမော အဂ္ဂိ၊
ဣတိ ဝုတ္တံ မဟေသိနာ၊
တေန ရာဂဂ္ဂိနာ ဒဍ္ဎော၊
သဗ္ဗော လောကော တိဒုက္ခိတော။
ဧကဿ ပိဝိတံ ခီရံ၊ စတူ ဒဓိ ဇလာ ဗဟု၊
ရာဂဟေတု ဘဝေ သန္ဓိ၊ ဋ္ဌာနံ အနမတဂ္ဂိကံ။
စတူဒမိ ¶ ဇလာ ဘိယျော၊ သီသစ္ဆေဒန လောဟိတံ၊
ရာဂဟေတု ဘဝေ မစ္စ၊ ဘယံ အနမတဂ္ဂိကံ။
ဧကဿ ရုဒတော အဿု၊ စတူ ဒဓိ ဇလာ ဗဟု၊
ဒုက္ခံ အနမတဂ္ဂံဝ၊ တံဟေတု ပရိဒေဝနံ။
တတ္တာယော ¶ ဂုဠ ဂိလိတ၊ ဝဓဂ္ဂိ ဒယှနာ ဒိကံ၊
အသင်္ချေယျံ မဟာဒုက္ခံ၊ တံဟေတု နိရယေ လဘိ။
ဧက ဒွိတ္တိ စတု ပဉ္စ၊ ဗုဒ္ဓုပ္ပာဒေပျ မောစိတံ၊
ခုပ္ပိပါသိတ နိဇ္ဈာမံ၊ လဘိ တံဟေတု ပေတ္တိကံ။
တိရစ္ဆာနေ ¶ အသူရေစ၊ ဒုက္ခံ နာနာဝိဓံ လဘိ၊
နမတဂ္ဂိက သံသာရေ၊ သဗ္ဗန္တံ ရာဂဟေတုကံ။
ဧကဿေကေန ကပ္ပေန၊ ပုဂ္ဂလဿဋ္ဌိ သဉ္စယော၊
သစေ သံဟာရိတော အဿ၊ ဝေပုလ္လ ပဗ္ဗတာဓိကော။
ဧက ကပ္ပေ ဣဒံ ဒုက္ခံ၊ နာဒိကပ္ပေသု ကာကထာ၊
ရာဂေါ နနု မဟာဝေရီ၊ ဗာလော ဇနော တ မိစ္ဆတိ။
ရာဂသုဒ္ဓိ ¶ အသောကောစ၊ နိဒ္ဒုက္ခော ဉာယပတ္တိစ၊
နိဗ္ဗာနံ ပဉ္စ ပစ္စက္ခာ၊ အသုဘာယ ဖလာ မတာ။
အသုဘဂ္ဂဟဏံ ¶ ဈာယီ၊ မိတာ သိန္ဒြိယ သံဝရော၊
သောမိတျ မုက္ကဋ္ဌာဝါစာ၊ ဆဠိမေ ရာဂ သုဒ္ဓိယာ။
နိစ္စုဂ္ဂရာဂ ရောဂီနံ၊ အသုဘာ ဝါတုလောသဓာ၊
ရာဂယက္ခာဘိ ဂယှာနံ၊ အသုဘာ မန္တ မုတ္တရံ။
သဇီဝကာစ ¶ နိဇ္ဇီဝါ၊ အသုဘာ ဒုဝိဓာ မတာ၊
သဇီဝါ ကေသလောမာဒိ၊ ဒသေဝိမေ အဇီဝကာ။
ဥဒ္ဓုမာတက ¶ ဝီနီလံ၊ ဝိပုဗ္ဗကံ ဝိဆိဒ္ဒကံ၊
ဝိက္ခာယိတက ဝိက္ခိတ္တံ၊ ဟတိဝိက္ခိတ္တ လောဟိတံ။
ပုဠုဝ ဋ္ဌိက မိစ္စေသု၊ လဒ္ဓါ အညတရံ သတော၊
ရတန ဝါနပဿေယျ၊ ယထာ စေတသိ ပါကဋံ။
မတံ ¶ ခဇ္ဇံ သ မံသဉ္စ၊ နိလောဟိတံ နိမံသကံ၊
ဝိက္ခိတ္တံ သေတ ပုဉ္ဇဋ္ဌိံ၊ နဝဓာ ပုတိမိက္ခယေ။
မစ္စုတော ¶ ပရိမုစ္စာမိ၊ ပဋိဝတ္တိ ယိမာ ယိတိ၊
ပယောဇန သမာဝဇ္ဇ၊ မောဒိတဗ္ဗံ ဇိဂုစ္ဆကေ။
သဇီဝကေ ဇိဂုစ္ဆတ္ထံ၊ နိဇ္ဇီဝါ သုဘ မီရိတံ၊
တထူပမော အယံကာယော၊ ဧဝမေဝ ဘဝိဿတိ။
ဧဝံဓမ္မော ¶ အယံကာယော၊ ဧဝံဘာဝီ နတိက္ကမော၊
ဣစ္စုပ သံဟရေ ဒိသွာ၊ ဧကဒွိဟ မတာဒိကံ။
ယထာ ¶ ဣဒံ တထာဧတံ၊ ယထာဧတံ တထာ ဣဒံ၊
ဇေဂုစ္ဆံ ပဋိကူလျဉ္စ၊ ကာယေ ဣစ္စုပ သံဟရေ။
ဥဒ္ဓုမာတ ဝိနီလာဒိ၊
ပဋိကူလျော ဇိဂုစ္ဆိတော၊
တထေဝါယမ္ပိ မေ ကာယော၊
ဝိသေသော နာယု-သာယုဝ။
ဥဒ္ဓုမာတ ¶ ဝိနီလာဒေါ၊ သောဘဏံ နတ္ထိ ကိဉ္စိပိ၊
ဣမသ္မိံပိ မေ ကာယေ၊ ဂဝေသန္တောပိ သဗ္ဗသော။
ပဋိကူလဝသာ ဓာတု၊ ဝသာစ ဒွိပ္ပကာရတော၊
ပစ္စဝေက္ခေယျိမံ ကာယံ၊ ဣစ္ဆံ ဝိရာဂ မတ္တနိ။
ဝဏ္ဏ ¶ သဏ္ဌာန ဂန္ဓေဟိ၊ အာသယော ကာသတောပိစ၊
ဇေဂုစ္ဆ ပဋိကူလျာစ၊ ကေသာ န တုဋ္ဌမာနိတာ။
ဣတိ ကေသေသု ဣက္ခေယျ၊
လောမာ ဒီသုပျယံ နယော၊
ဒွတ္တိံသေဝဉှိ ကောဋ္ဌာသေ၊
ပစ္စဝေက္ခေ ဝိသုံဝိသုံ။
ကာယတော ¶ ဗဟိနိက္ခန္တံ၊ ပဋိကူလျံ ဇိဂုစ္ဆိတံ၊
အနိက္ခန္တမ္ပိ ဇေဂုစ္ဆံ၊ ပဋိကူလျံဝ တဿမံ။
သင်္ခတမ္ပိ ယထာ ဝစ္စံ၊ မနုညတံ န ပါပုဏေ၊
ဥပက္ကမ သဟဿေဟိ၊ ဧဝံ ကေသာဒိကမ္ပိစ။
သဘာဝ ¶ ပဋိကူလျံဝ၊ ဧကမ္ပိ ဝစ္စ ပုဉ္ဇကံ၊
နနု ဇေဂုစ္ဆိတာ ဘိယျော၊ ဒွတ္တိံသ ဝစ္စပုဉ္ဇကာ။
ပစ္စေကမ္ပိ ¶ ပဋိကူလျံ၊ ကေသာဒိကံ သဘာဝတော၊
ကေသာဒိဒွတ္တိံသ ပုဉ္ဇော၊ ဘိယျော ဇေဂုစ္ဆိတော နနု။
ပုဉ္ဇိတေသွေဝ ကန္တေသု၊ ကန္တောဟောတိ သ ပုဉ္ဇကော၊
ပုဉ္ဇိတေသု အကန္တေသ၊ အကန္တောဝ သ ပုဉ္ဇကော။
ပစ္စေကံ ¶ ဝိနိဘုတ္တေသ၊ ကေသ လောမ နခါဒိသု၊
နတ္ထိ တညာ ကုမာရီဝါ၊ မုခဟတ္ထာဒိကာနိဝါ။
သမ္ပိဏ္ဍိ တေသု တေသွေဝ၊
ကုတော တာ တာနိ အာဂတာ၊
ပညတ္တိ မတ္တ မေဝေသာ၊
ဇိဂုစ္ဆညာ န ကာစိပိ။
သန္တံ ¶ စိန္တေယျ နာသန္တံ၊ သန္တ စိန္တယတော သုခံ၊
အသန္တံ ပရိကပ္ပေန္တော၊ နာနာဒုက္ခေဟိ တပ္ပတိ။
နာဝဇ္ဇ သန္တဇေဂုစ္ဆံ၊ သညံ အသတိ ကာတုန၊
သုဘာ ဣတ္ထီတိ ဂါရဂ္ဂိ၊ ဥပ္ပဇ္ဇိ သုဘသညိနော။
အသန္တံဝ ¶ အဘူတံဝ၊ ပဿေ ရာဂဂ္ဂိဇောတိယာ၊
တာယ သန္တဉ္စ ဘူတဉ္စ၊ န ပဿတိ ကဒါစိပိ။
ဧကဿ ¶ ပိဝိတံ ခီရံ၊ သီသစ္ဆေဒန လောဟိတံ၊
ရုဒတော အဿု တံဟေတု၊ စတူဒဓိ ဇလာ ဗဟု။
အာယတိမ္ပိ အတီတေဝ၊ သံသရန္တဿ ဟေဿတိ၊
ရာဂံ ဟန္တု မနီဟောစေ၊ ခီရံ အဿုစ လောဟိတံ။
သုဘသညာယ ¶ သော ဝဍ္ဎော၊
တဒဘာဝေ သ နဿတိ၊
ထိရံ ဟန္တုံ န တံသညံ၊
သက္ကာ သိထိလ ဝီရိယော။
ဥဿောဠှိ ¶ ဝီရိယော ဟုတွာ၊ ဗြူဟေယျာသုဘ ဘာဝနံ၊
သုဘသညာပ္ပ ဟာနာယ၊ ပရိစ္စဇ္ဇာပိ ဇီဝိတံ။
အညကိစ္စ မုပေက္ခာယ၊ ဗြူဟေယျာသုဘ ဘာဝနံ၊
မန္ဒိ ဟုတွေဟ ရာဂဂ္ဂိ၊ နိဗ္ဗာယိဿတိ အာယတိံ။
ကိစ္စံ မေ ဣဒမေဝေတိ၊ ဗြူဟေယျာသုဘ ဘာဝနံ၊
ဒါနိ မန္ဒဂ္ဂိ ဟုတွာန၊ ပါမောဇ္ဇံ ဝေ လဘိဿတိ။
ကာယေ ¶ ဒဋ္ဌဗ္ဗ ဇေဂုစ္ဆံ၊ အပဿန္တော ပမာဒဝါ၊
အလဒ္ဓါ ကိဉ္စိ ပါမောဇ္ဇံ၊ ပဗ္ဗဇ္ဇမ္ပိ န မောဒတိ။
ပုရေ မရာမိ ကာယေ သ္မိံ၊ ပဿာ မိ ပဿိတဗ္ဗကံ၊
ဣစ္စာ ရဒ္ဓါ ဝီတိံလဒ္ဓါ၊ ပဗ္ဗဇ္ဇံ အတိမောဒတိ။
ကာယေ ¶ ဒဋ္ဌဗ္ဗ ဇေဂုစ္ဆံ၊ အပဿန္တော ပမာဒ ဝါ၊
မောဃံဝ ဒုလ္လဘာတီတော၊ မဟာဇာနီယတံ ဂတော။
သန္တံ ဘူတဉ္စ ဇေဂုစ္ဆံ၊ ရာဂဂ္ဂိနာ အပဿိယံ၊
ပညာပဒီပဇောတေန၊ သမိက္ခေယျ အဘိဏှသော။
သန္တံ ¶ ဘူတဉ္စ ကာယေ သ္မိံ၊ ဒဋ္ဌုကာမော သဒါသတော၊
ပညာပဒီပကေနေဝ၊ ဒက္ခေ န ရာဂီသီခိနာ။
ဇေဂုစ္ဆိတေန ကာယေန၊ နိက္ခန္တေန ဇိဂုစ္ဆတော၊
အဇ္ဇ သွေဝါ ဝိနဋ္ဌေန၊ နာလ မုန္နမိတုံ သတော။
ကီဒိသံ ¶ မံ တုဝံ မညိ၊ အဟံ သဗ္ဗ ဇေဂုစ္ဆကော၊
ဇေဂုစ္ဆတောစ နိက္ခန္တော၊ ဣစ္စေဝ ဝတ္တု မရဟတိ။
ကာယေ ဇေဂုစ္ဆသညံဝ၊ ကရေ သဗ္ဗိရိယာ ပထေ၊
တသ္မိံ တုဋ္ဌဗ္ဗကံ နတ္ထိ၊ ပိယာယိတံ မမာယိတံ။
သုဘာယ ¶ နဝ မတ္တာနံ၊ အသုဘာ ပရိပါစယေ၊
သန္တော ပက္ကဿ သံသာရော၊ နန္တော နဝဿ ရာဂိနော။
ကာယေ အသုဘ သညာယ၊ ပရိပက္က သဘာဝိနော၊
အာလမ္ဗေသု အစာပလ္လာ၊ ထိရာ သမ္ဗုဒ္ဓ သာသနေ။
အန္တော ¶ ဂေါစရိကာ ပက္ကာ၊ ဗဟိ ဂေါစရိကာ နဝါ၊
ပက္ကာ နာသာယ ဥစ္စာ တေ၊ နီစာယေဝ နဝါ သိနော။
နဝါနဝါ ¶ သုဘာဘောဂီ၊ နီစာနီစာ ဘိဂါမိနော၊
ပက္ကာ ပက္ကာဝ ဓီဈာယီ၊ သန္တာသန္တာ ဝိရာဂိနော။
သက္ကာ သက္ကာ န ဒဿေတုံ၊ သုဘံသုဘံ သတံသတံ၊
ဓီရာဓီရာဂ မုဇ္ဈန္တိ၊ ကာယေ ကာယေ ကြိယေကြိယေ။
သက္ကာ ¶ သက္ကာပိ တံ ကာတုံ၊ သုဘံသုဘံ န ဓီမယံ၊
သန္တောသန္တောဇိဂုစ္ဆညူ၊ န ဝါနဝါ သုဘေသကော။
ဒုကာယံ ¶ သုတိ စိန္တေတွာ၊ မမာယန္တာ မဟာတပါ၊
တပံ နိဗ္ဗာယိတုံ ဣစ္ဆံ၊ ဒုကာယံ ဒုတိ စိန္တယေ။
ယွာသုဘံ သုဘတော မညိ၊ ကောနုဗာလောတဒုတ္တရိ၊
အန္ဓော ဥမ္မတ္တကောဝါ သော၊ နတ္တာနံ မညတေ တထာ။
သရိတဗ္ဗက ¶ မေဝေတံ၊ ကာယေ ဇေဂုစ္ဆ ပုဉ္ဇတံ၊
မန္ဒရာဂေါ မနောသီတံ၊ လဘေယျ တမနုဿနံ။
ဂိဟိဘာဝေ အပါယေစ၊ ရာဂယက္ခန္ဓ နိန္နိတာ၊
မံပိ နေဿတိ သောယက္ခော၊ သာဒေမိစေ တဒါဂတံ။
အဘိဏှ ¶ ဂါဟိနံ ရာဂ၊ ယက္ခံ အနန္တ ဒုက္ခ ဒံ၊
အသုဘာ တုလ မန္တေန၊ ဝါရေဟိ တံ သ ဘာယတိ။
ရာဂယက္ခော ဗဟုမာယော၊ သဒ္ဓါမေတ္တာ ဒိဝေသဝါ၊
ရာဂမ္ပိ ကုသလံ မညိ၊ ဇနော တေနေဝ ဝဉ္စိတော။
အာတုရံ ¶ အသုစိံ ပုတိံ၊ ပဿ နန္ဒေ သမုဿယံ၊
ဥဂ္ဃရန္တံ ပဂ္ဃရန္တံ၊ ဗာလာနံ အဘိပတ္ထိတံ။
သုဘတော နံ မညတိ ဗာလော၊ အဝိဇ္ဇာယ ပုရက္ခတော၊
ဣစ္စာဟ ဘဂဝါ နိန္ဒိ၊ ဗာလောတိ သုဘသညိနံ။
နှာရုဋ္ဌိ ¶ တစ မံသာနိ၊ သရံ သတံ န နိန္ဒိတော၊
ဗုဒ္ဓနိန္ဒာယ မောစေတုံ၊ တာနာရဗ္ဘ အနုဿရေ။
မညိတွာ အတ္တနော ဗာလျံ၊ အသုဘေ သုဘဒဿိနော၊
ဝါယာမေယျ အဗာလာယ၊ ကာယံ အသုဘတော သရံ။
အတ္တာနံ ¶ ဂရဟိတွာန၊ ဗာလံ ဝိပရိဒဿိနံ၊
သုဘသညံ ပဟိန္နေယျ၊ ကရေယျာသုဘ သညိတံ။
ဝိသ ဘေသဇ္ဇရုက္ခဋ္ဌော၊ အဟိ ဍံသေယျသောသတော၊
ယထာ တဿေဝ ပဏ္ဏာဒိံ၊ ခါဒေတွာ ဝိသ မုဇ္ဇဟေ။
ဧဝံ ရာဂေါ သမုပ္ပဇ္ဇေ၊ ကာယေ ဂန္ဓာဒိ ဝါသိတေ၊
အန္တော တဿေဝ ဇေဂုစ္ဆံ၊ စိန္တေတွာ ရာဂ မုဇ္ဇဟေ။
ဇိဂုစ္ဆိတေန ¶ ကာယေန၊ အပဿန္တော ဇိဂုစ္ဆတံ၊
ဥန္နမေတိ အဝညာတိ၊ အဝိဇ္ဇာယ ပုရက္ခတော။
အာယတိံ ¶ မဂ္ဂလာဘာယ၊ ဗီဇံ ကရေယျ ဘာဝနံ၊
ဗီဇာ ဘာဝေ ကုတော မဂ္ဂေါ၊ မဂ္ဂဗီဇာ ဟိ ဘာဝနာ။
မဂ္ဂဗီဇော အပါယေပိ၊ နိမ္မုဂ္ဂေါ သမယေ ဂတေ၊
ဥမ္မုဇ္ဇိတွာဝ ဗုဒ္ဓါနံ၊ မဂ္ဂံ လဘေယျ သန္တိကေ။
အဇီဇဿ ¶ တု သံသာရော၊ ဒီဃောယေဝ အနန္တိကော၊
တသ္မာဟိ ဘာဝနာဗီဇံ၊ ကရေယျ မောစနတ္ထိကော။
အဘိဏှ ပီဠိတံ ရာဂံ၊ အသုဘာယ နိဝါရယေ၊
မန္ဒီဟုတွာ ပဟီယေယျ၊ ရာဂေါ အသုဘ ဘီရုကော။
မာဇေဂုစ္ဆံ ¶ မမာယေထ၊ သာဝ ဇေဂုစ္ဆမာမကော၊
အနန္တ ဒုက္ခ မာပါဒိ၊ ဇေဂုစ္ဆိတ မမာယနာ။
မံသလဂ္ဂေါ တစစ္ဆန္နော၊
နှာရုဗန္ဓော ဋ္ဌိပုဉ္ဇကော၊
မောဟေတိ ဆဝိယာ လောကံ၊
မဟာဒုက္ခော သ မောဟိတော။
နှာရုဋ္ဌိ ¶ တစ မံသေဟိ၊ ရာဂဝဍ္ဎကိ သင်္ခတေ၊
ဂေဟေ ရောဂါ ပုတီ ပါပါ၊ ဝသန္တိ ကုစ္ဆိတာ သဒါ။
လုင်္ဂန္တာ ဝီသ ဘူဓာတူ၊ ပိတ္တာဒီ ဒွါဒသမ္ဗုဝ၊
တာပံ ဇိရံ ဒဟံ ပက္ကံ၊ စတုရဂ္ဂိ ဆဝါယုကာ။
အဓောဒ္ဓံ ကုစ္ဆိ ကောဋ္ဌာသာ၊
အင်္ဂစာရီစ ပါဏကာ၊
ဓာတုယောယေဝ ကာယေသ္မိံ၊
ဒွိတာလီသ အနညကာ။
ယထာ ¶ ဗဟိ တထာ အဇ္ဈတ္တံ၊ ဓာတူ ဘွာပါ နလာနိလာ၊
နမေ နာဟံ နအတ္တာတိ၊ သံမသေယျ ပုနပ္ပုနန္တိ။
၄။ မေတ္တာဘာဝနာနိဒ္ဒေသ
မေတ္တာ ¶ ဘာဝန မိစ္ဆမ္ပိ၊ သုဏ ဗုဒ္ဓဝစော ယိဒံ၊
ဒေါသ နိဂ္ဂဟဏတ္ထာယ၊ ဒေါသော မေတ္တာယဝေရိဟိ။
အက္ကောစ္ဆိမံ အဝဓိမံ၊ အဇိနိမံ အဟာသိမေ၊
ယေစ တံ ဥပနယှန္တိ၊ ဝေရံ တေသံ နသမ္မတိ။
အက္ကောစ္ဆိမံ ¶ အဝဓိမံ၊ အဇိနိမံ အဟာသိမေ၊
ယေစတံ နုပနယှန္တိ၊ ဝေရံ တေသံ ဥပသမ္မတိ။
နဟိဝေရေန ဝေရာနိ၊ သမ္မန္တိဓ ကုဒါစန၊
အဝေရေနစ သမ္မန္တိ၊ ဧသဓမ္မော သနန္တနော။
ပရေစ ¶ နဝိဇာနန္တိ၊ မယ မေတ္ထ ယမာမသေ၊
ယေစ တတ္ထ ဝိဇာနန္တိ၊ တတော သမ္မန္တိ မေဓဂါ။
ကုဒ္ဓါ အတ္ထံ နဇာနာတိ၊ ကုဒ္ဓါ ဓမ္မံ နပဿတိ၊
သဒါ အန္ဓတမံ ဟောတိ၊ ယံကောဓော သဟတေနရံ။
ဥဘိန္န ¶ မတ္ထံ စရတိ၊ အတ္တနောစ ပရဿစ၊
ပရံ သံကုပ္ပိတံ ဉတွာ၊ ယော သတော ဥပသမ္မတိ။
တဿေဝ တေန ပါပိယျော၊ ယော ကုဒ္ဓံ ပဋိကုဇ္ဈတိ၊
ကုဒ္ဓံ အပဋိကုဇ္ဈန္တော၊ သင်္ဂါမံ ဇေတိ ဒုဇ္ဇယံ။
ခန္တီ ¶ ပရမံ တပေါ တိတိက္ခာ၊
နိဗ္ဗာနံ ပရမံ ဝဒန္တိ ဗုဒ္ဓါ၊
နဟိ ပဗ္ဗဇိတော ပရူပဃာတီ၊
နသမဏော ဟောတိ ပရံ ဝိဟေဌယန္တော။
အကောဓေန ဇိနေ ကောဓံ၊ အသာဓုံ သာဓုနာ ဇိနေ၊
ဇိနေ ကဒရိယံ ဒါနေန၊ သစ္စေနာ လိကဝါဒိနံ။
ယော ¶ ဝေ ဥပ္ပတိတံ ကောဓံ၊ ရထံ ဘန္တံဝ ဝါရယေ၊
တ မဟံ သာရထီ ဗြူမိ၊ ရသ္မိဂ္ဂါဟော ဣတရောဇနော။
ပုရိသဿ ¶ ဟိ ဇာတဿ၊ ကုဓာရီ ဇာယတေ မုခေ၊
ယာယ ဆိန္ဒတိ အတ္တာနံ၊ ဗာလော ဒုဗ္ဘာသိတံဘဏံ။
သေလော ယထာ ဧကဂ္ဃနော၊ ဝါတေန နသမီရတိ၊
ဧဝံ နိန္ဒာ ပသံသာသု၊ နသမိဉ္ဇန္တိ ပဏ္ဍိတာ။
သမာနဘာဂံ ¶ ကြုဗ္ဗေထ၊ ဂါမေ အက္ကုဋ္ဌ ဝန္ဒိတံ၊
မနောပဒေါသံ ရက္ခေယျ၊ သန္တော အနုဏ္ဏတော သိယာ။
နပရော ပရံ နိကုပ္ပေထ၊ နာတိမညေထ ကတ္ထစိ နကိဉ္စိ၊
ဗျာရောသနာ ပဋိဃသညာ၊ နညမညဿ ဒုက္ခ မိစ္ဆေယျ။
မာတာ ¶ ယထာ နိယံ ပုတ္တ၊
မာယုသာ ဧကပုတ္တ မနုရက္ခေ၊
ဧဝမ္ပိ သဗ္ဗ ဘူတေသု၊
မာနသံ ဘာဝယေ အပရိမာဏံ။
သုတွာန ဒုသိတော ဗဟုံ ဝါစံ၊
သမဏာနံဝါ ပုထုဇနာနံ၊
ဖရုသေန ဟိ န ပဋိဝဇ္ဇာ၊
န ဟိ သန္တော ပဋိသေနိံ ကရောန္တိ။
သစ္စံ ¶ ဘဏေ နကုဇ္ဈေယျ၊ ဒဇ္ဇာ အပ္ပမ္ပိ ယာစိတော၊
ဧတေဟိ တီဟိ ဌာနေဟိ၊ ဂစ္ဆေ ဒေဝါန သန္တိကေ။
န ပရေသံ ဝိလောမာနိ၊ န ပရေသံ ကတာကတံ၊
အတ္တနောဝ အဝေက္ခေယျ၊ ကတာနိ အကတာနိစ။
သု ¶ ဒသံ ဝဇ္ဇမညေသံ၊ အတ္တနော ပန ဒုဒ္ဒသံ၊
ပရေသဉှိ သော ဝဇ္ဇာနိ၊ ဩဖုနာတိ ယထာ ဘုသံ၊
အတ္တနော ပန ဆာဒေတိ၊ ကလိံဝ ကိတဝါ သဋ္ဌော။
နိဓီနံဝ ¶ ပဝတ္တာနံ၊ ယံ ပဿေ ဝဇ္ဇဒဿိနံ၊
နိဂ္ဂယှဝါဒိံ မေဓာဝိံ၊ တာဒိသံ ပဏ္ဍိတံ ဘဇေ။
တာဒိသံ ဘဇမာနဿ၊
သေယျောဟောတိ နပါပိယော၊
ဣတိ ဝုတ္တံ မုနိန္ဒေန၊
တိလောကဂ္ဂေန သတ္ထုနာ။
မေတ္တာ ¶ ဂန္ဓေန ဝါသေန္တော၊
ဒေါသံ ဒူရေကရေ ဗုဓော၊
ဒူရာသန္နေသု သဗ္ဗေသု၊
အတ္တနော ဝေရိကေသုပိ။
ဟနေ ဒေါသူ ပနာဟာနိ၊ အနတ္ထ ကာရကာနိ ဟိ၊
တေသွ သန္တေသု သဗ္ဗေသု၊ မေတ္တာဟောတိ သုနိမ္မလာ။
သတံ ¶ ဒုဇ္ဇန ဝါကျေဟိ၊ နမနော ယာတိ ဝိကြိယံ၊
နဟိတာပယိတုံ သက္ကာ၊ ဂင်္ဂါနဒိံ တိဏုက္ကယာ။
နဟိ နိန္ဒာ ပသံသာဟိ၊ သတံ မနောဝိကာရတာ၊
န ကဒါစိပိ ကမ္ပေယျ၊ ဝါတေဟိ သေလပဗ္ဗတော။
နဒိယံ ¶ ခုဒ္ဒကာ နာဝါ၊ ဝိစီဟိ ဥန္နတောနတာ၊
မဟာနာဝါ နကမ္ပန္တိ၊ မဟန္တီဟိ ဝိစီဟိပိ။
လောကေ ပသံသ နိန္ဒာဟိ၊ ဒုဇ္ဇနောဝုန္နတောနတော၊
သန္တောပညော နစလတိ၊ မဟာနိန္ဒာ ထုတီဟိပိ။
သေလောသေလော ¶ နိလေဟေဝ၊
ဝဏ္ဏာဝဏ္ဏာ အသဿတာ၊
လာဘာလာဘာ သုခါဒုက္ခာ၊
ယသာယသာ နကမ္ပတိ။
ခမာဓဂ္ဂ ကရေတဿ၊ ဒုဇ္ဇနော ကိံ ကရိဿတိ၊
အတိဏေ ပတိတော အဂ္ဂိ၊ သယမေဝ ပသမ္ဘတိ။
သယမေဝ ¶ သကတ္တာနံ၊ မစ္စုဗ္ဘယေန တစ္ဆတု၊
မာညေ တစ္ဆတု ဒေါသေန၊ ကိမတ္ထံ အညတစ္ဆနံ။
မာညေ တစ္ဆ တုဒေါသေန၊ နသေယျော အညတစ္ဆနံ၊
မာညော တံ အဟိဗျဂ္ဃေဝ၊ ဒေါမနဿေန ဘာယတု။
နိဿာယ ¶ ဂရုကာတဗ္ဗံ၊ ဗဟူနံ ပါပမောစနံ၊
အစာပလ္လေန သန္တေန၊ ဂရုကာတဗ္ဗတံ ဝဇေ။
နိဿာယ ဂရုကာတဗ္ဗံ၊ ဗဟူနံ ပုညဝဍ္ဎနံ၊
ဂရုကာတဗ္ဗတံ ဂစ္ဆေ၊ ဓီတိယာ သီလ ဂုတ္တိယာ။
သန္တံ ¶ ဟိ သီလဝံ ဓီတိံ၊ ဟိရောတ္တပ္ပေန ဘာယတိ၊
ဒုဇ္ဇနံ ဒေါမနဿေန၊ အဟိဗျဂ္ဃေဝ ဘာယတိ။
နဖရုသာယ ဝါစာယ၊ အညေ ဒမေယျ ပဏ္ဍိတော၊
အတ္တာနံဝ ဒမေတွာန၊ အညေ သဏှေန ဩဝဒေ။
စိတ္တေ ¶ သဏှေ အသဏှာပိ၊ နဝါစာဖရုသာ ဘဝေ၊
တသ္မာ ဩဝါ ဒနာဒီသု၊ ရက္ခေယျ ထဒ္ဓစိတ္တတော။
အတ္တာန မောဝဒတ္ထာယ၊ သိက္ခေယျ ဗုဒ္ဓဘာသိတံ၊
ပရမ္ပိ အနုကမ္ပာယ၊ ဣစ္ဆန္တော အနုသာသယေ။
အညံ နနိဂ္ဂဟေ ကိဉ္စိ၊ သုတေန ပဋိပတ္တိယာ၊
အတ္တနိဂ္ဂဟဏံ သေယျော၊ နုန္နမေယျ ဇိနောရသော။
နာဝီကရေယျ ¶ ဒေါသံဝါ၊ လောဘံ မာနံ သကံမလံ၊
မာညေ မညန္တု တံ ဒိသွာ၊ စိရပ္ပဗ္ဗ ဇိတော နုတိ။
ကကစေန တ္တဆေဒေန္တေ၊ ဝေရိကေပိနဒေါသယေ၊
ဣစ္စောဝါဒံ မုနိန္ဒဿ၊ သမ္ပဋိစ္ဆ ဇိနောရသော။
ဝေရီ ¶ အစ္စုပနာဟီပိ၊ ရူပေဝ ဒုက္ခကာရကော၊
န တွ တဗ္ဗိသယေ နာမေ၊ ဒုက္ခံ မာကရိ စေတသိ။
ဝေရီ တိဗန္ဓ ဝေရောပိ၊ ဣဟေဝ ဒုက္ခကာရကော၊
ဘဝန္တရံ နအနွေတိ၊ သကမ္မုနာ ဂတော ဟိသော။
ဒေါသောတု ¶ ဣဟ ပီဠေတွာ၊
ဒုက္ခာဝဟော ဘဝေဘဝေ၊
မဟာနတ္ထ ကရံ ဒေါသံ၊
ကသ္မာ ဝဍ္ဎေတိ စေတသိ။
မေတ္တာသီတမ္ဗုသေကေန၊ ဇိနောဝါဒ မနုဿရံ၊
မဟာ နတ္ထ ကရံ ဒေါသံ၊ နိဗ္ဗာယတု သ စေတသိ။
ဆဒ္ဒန္တော ¶ လုဒ္ဒကံ ပါပံ၊ ဘူရိဒတ္တောဟိ တုဏ္ဍိကံ၊
ဓမ္မပါလော ခမိ တာတံ၊ ကပိန္ဒော ကန္ဒရော ပတံ။
အသင်္ချေယျ တ္တဘာဝေသု၊ ပရဝဇ္ဇံ တိတိက္ခတော၊
နာထဿ ပါရမိံ ခန္တိံ၊ သရံ ဓီရော တိတိက္ခတု။
သာသနေ ¶ စိရဝါသေန၊ ဧဝံ နိဒ္ဒေါသကာ ဣတိ၊
တုဝံ ပဋိစ္စ မညန္တု၊ သာသနေ သပ္ပယောဇနံ။
သာသနေ စိရ ဝါသာပိ၊ မာဒိသာဝ ဣမေ ဣတိ၊
တမာဂမ္မ နမညန္တု၊ သာသနေ နိပ္ပယောဇနံ။
ဒွေ ဥသေတီတိ ဒေါသော သော၊ သပရံ ဒယှတေ ဒွယံ၊
ပဟာတဗ္ဗော သ သဗ္ဗေသု၊ ပရတ္ထ သတ္ထ မိစ္ဆတာ။
ပရဒိန္နေဟိ ¶ နောအာယု၊ တိဋ္ဌတေ နာတ္တနော ဝသာ၊
ပရဝဇ္ဇံ ခမေတဗ္ဗံ၊ နသာဓု အညဝိရောဓိတော။
ဇေဂုစ္ဆ ¶ က္ကောသ နိန္ဒာနိ၊ ဗာလော ဂဏှာတိ အက္ခမော၊
ခမန္တောတု နဂဏှာတိ၊ ဇာနံ ဇေဂုစ္ဆိတာနိတိ။
ပရဒိန္နာနိ ဝစ္စာနိ၊ ပါဘတန္တိ နကောစိပိ၊
ဂဏှေယျေဝံ ဒုရုတ္တာနိ၊ အဂဏှန္တော ခမေ သတော။
နဒိ ¶ ကလ္လောလ ဝိစိယော၊ တီရံ ပတွာ သမန္တိဓ၊
သဗ္ဗေ ဥပ္ပတိတာ ဒေါသာ၊ ခန္တိပတွာ သမန္တိ တေ။
ဒေါသုမ္မတ္တက ဝါစာယ၊ နုမ္မတ္တော ကိံကရိဿတိ၊
ဘဝေ ယျုမ္မတ္တကော သောဝ၊ တာဒိသံ ဝစနံ ဘဏံ။
ကောဓနော အက္ခမော အည၊ ဒုဋ္ဌသညီ ဘယာလုကော၊
ဂါမမဇ္ဈေ အဠက္ကောဝ၊ တထာ မာဟောဟိ တံ ဇဟ။
မေတ္တာလုကော ¶ ခမာသီလော၊
သဗ္ဗဋ္ဌာနေသုနိဗ္ဘယော၊
ပရတ္ထ သတ္ထ မိစ္ဆန္တော၊
ခန္တိ မေတ္တဉ္စ ဘာဝယေ။
ပရက္ကောသာနိ နိန္ဒာနိ၊ တံဝ ပစ္စေန္တိ နာညဂူ၊
ခိတ္တံပံသုဝ ဝါတုဒ္ဓံ၊ ဂရုကံ ကိံ ခမာယတေ။
အက္ကောသန္တောစ ¶ နိန္ဒီစ၊ ပီဠိတော သက ကမ္မုနာ၊
ဣဓ ပေစ္စစ နီစေယျော၊ နံနယံ ဂဏှိ အက္ခမော။
အက္ကောသော ¶ မံ နအာဂစ္ဆိ၊
တဿေဝါ နတ္ထကာရကော၊
ဣတိ ဉတွာဝ သပ္ပညော၊
အက္ကောသံ န ဂရုံ ကရေ။
ဝိကာရာပတ္တိ မိစ္ဆန္တော၊ ဝေရီ ဗဟု မုပက္ကမိ၊
မာမိတ္တဝသ မနွေဟိ၊ နိဗ္ဗိကာရော တုဝံဘဝ။
မေတ္တမ္ဗုနာ သဒ္ဒေါသောစ၊ ပရဒေါသောစ သမ္မတိ၊
မေတ္တာသေကေန သဗ္ဗေသု၊ သဗ္ဗတောဂ္ဂိံ နိပါရယေ။
သဒေါသ ¶ ပရဒေါသဂ္ဂိံ၊ သဗ္ဗတော ဒိသတော ဋ္ဌိတံ၊
မေတ္တာ တောယေန ဝါရေယျ၊ သိယာ နိဗ္ဗုတိ သဗ္ဗဓိ။
နဂမေ အတ္တနော အဂ္ဂိံ၊ ပရဂ္ဂိံဝါပိ နာဂမေ၊
မေတ္တမ္ဗုနာဝ နိဗ္ဗာတု၊ သပရဂ္ဂိ ဒွယံ ဘုသံ။
ဂုဏီ ¶ ဂုဏီ နန္ဒိန္ဒာယ၊ ပသံသာယ ဂုဏီ ဂုဏီ၊
နိန္ဒံနိန္ဒံ နကုပ္ပေယျ၊ နသာဒိယေ ထုတိံ ထုတိံ။
ဂုဏံ နိန္ဒာယ နာသေတုံ၊ နသက္ကာ ကောစိ ကုဿကော၊
ဝဍ္ဎေတုံဝါ ပသံသာယ၊ ဂရုံကရေ န တံဒွယံ။
ဒေါသဗ္ဘာ ¶ မလ သဉ္ဆန္နော၊ မေတ္တာစန္ဒော န ရောစတိ၊
တံမုတ္တဿ တု ဧတဿ၊ အတိဿယ ပဘာဝတော။
သု သုတ္တ ဗုဒ္ဓ သုပိနာ၊ ဒွေပိယာ ဂုတ္တိ နာက္ကမော၊
သမာဓိ သုမုခါ မုဠှာ၊ ဗြဟ္မာ တျေကာ ဒသ ဂ္ဂုဏာ။
သီတံ ¶ ကရောတု မေတ္တာယ၊ စက္ခုံ လာဘေတု ပညာယ၊
မာကာသိနိပ္ပဘေ စညေ၊ စန္ဒော ဟောဟိ ဂတေဂတေ။
ဒူရာသန္နေသု ¶ သဗ္ဗေသု၊ မေတ္တံ ပေသေတု ပါဘတံ၊
ဓမ္မံ ဒေသေတု ပတ္တာနံ၊ စန္ဒော ဟောဟိ ဂတေဂတေ။
သမ္ပတ္တာနံ မလံ ဓောဝ၊ သီတံကရေ သဒါဒယော၊
ဥစ္စနီစေ နဝိသေသေ၊ ဇလဿမော ဂတေဂတေ။
အသအဿတေသု ¶ ဖုဋ္ဌေသု၊ လောကဓမ္မေသု အဋ္ဌသု၊
ပတိဋ္ဌော နိဗ္ဗိကာရော တွံ၊ ပထဝီသဒိသော ဘဝ။
နာကာသိ ကလဟံ သိလာ၊ သဒါ ကေနစိ နိစ္စလာ၊
မေတ္တာယန္တော ခမာယန္တော၊ မဟာသိလံ ဂုရုံကရေ။
သိလာဝ ¶ သီလဝါ ဟောတု၊ ဒုရုတ္တာနိ တိတိက္ခတု၊
ပစ္စုတ္တေ ဒေါသသံဝဍ္ဎော၊ အနုတ္တောဝ ပသမ္ဘတိ။
သဗ္ဗေ အဟံဝ ဣစ္ဆန္တိ၊ သတ္တာ သုခန္တိ ဉာတုန၊
ဘာဝေယျ ကမတော မေတ္တံ၊ ပိယ မဇ္ဈတ္တ ဝေရိကေ။
သဗ္ဗေ ¶ တသန္တိ ဒဏ္ဍဿ၊ သဗ္ဗေ ဘာယန္တိ မစ္စုနော၊
အတ္တာနံ ဥပမံ ကတွာ၊ နဟနေယျ နဃာတယေ။
သုခ ကာမာနိ ဘူတာနိ၊
ယောဒဏ္ဍေန ဝိဟိံသတိ၊
အတ္တနော သုခ မေသာနော၊
ပေစ္စ သော နလဘေသုခံ။
အဝေရာ ¶ ဗျာပဇ္ဇာ နီဃော၊ သုခီ စဿံ အဟံဝ မေ၊
ဟိတကာမာ တထာ အဿု၊ မဇ္ဈတ္တာ ဝေရိနောပိစ။
မာတရော ¶ ဘာတရော ဉာတီ၊ ဒါယကော ပါသကာပိစ၊
သုခီဟောန္တူတိ ဘာဝေယျ၊ စဇေ တေသုစ လဂ္ဂနံ။
ဒေါသော မေတ္တာယ ဒူရာရိ၊ တဏှာ အာသန္န ဝေရိကာ၊
တဏှံ ပိယေသု ဝါရေယျ၊ ဒေါသံ ဝေရီသု မေတ္တိကော။
ဧကုဒ္ဒေသေ ¶ ကကမ္မာစ၊ သိဿာ အာစရိယာ သုခီ၊
ဟောန္တု သဗြဟ္မစာရီစ၊ တေစ ညောည ဟိတာဝဟာ။
ရာဇာနောစ အမစ္စာစ၊ ဂါမေ ဣဿရိယာ သုခီ၊
ဘဝန္တု ဒေဝတာယောစ၊ တေဟိ သုရက္ခိတော သုခေါ။
မယံ ¶ ယေန သုဂုတ္တာဝ၊
သုခိတာ ရဋ္ဌဝါသိနော၊
သုခီ ကလ္လ တ္ထု သောရာဇာ၊
တေဇဝန္တော စိရာယုကော။
ရဋ္ဌ ¶ ပိဏ္ဍေန ဇီဝါမ၊ ရဋ္ဌဝါသီ သုခန္တုတိ၊
ဘာဝေယျေဝံ အမောဃံဝ၊ ရဋ္ဌပိဏ္ဍံ သုဘုဉ္ဇတိ။
အာပါယိကာ ဗဟူ သန္တိ၊ မာတာပိတာဒိ ပုဗ္ဗကာ၊
တေစညေစ သုခီနီဃာ၊ ဿွ ဗျာပဇ္ဇာ အဝေရိနော။
သတ္တာ ¶ ဘူတာစ ပါဏာစ၊ ပုဂ္ဂလာ အတ္တဘာဝိကာ၊
ထီ ပူ ရိယာ နရိယာစ၊ ဒေဝါနရာ နိပါတိကာ။
အဝေရာ ဟောန္တု ဗျာပဇ္ဇာ၊ အနီဃာစ သုခီ ဣမေ၊
အတ္တာနံ ပရိဟာရန္တု၊ စတုဓာ ဣတိ ဘာဝယေ။
ပုရတ္ထိမာယ ¶ ဒိသာယ၊ သဗ္ဗေသတ္တာ အဝေရိနော၊
အဗျာပဇ္ဇာ သုခီနီဃာ၊ ဟောန္တူတိ တာဝ ဘာဝယေ။
ပုရတ္ထိမာယ ဒိသာယ၊ သဗ္ဗေပါဏာတိအာဒိနာ၊
ဒွါဒသက္ခတ္တုံ ဘာဝေယျ၊ သေသာသုပိ အယံနယော။
စတုဒ္ဒိသာ ¶ နုဒိသာ ဓော၊ ဥဒ္ဓံ သတ္တာစ ပါဏိနော၊
ဘူတာစ ပုဂ္ဂလာ အတ္တ၊ ဘာဝီ သဗ္ဗေ ထိ ပူရိသာ။
အရိယာ အရိယာ ဒေဝါ၊ နရာစ ဝိနိပါတိကာ၊
အဝေရာ ဗျာပဇ္ဇာ နီဃာ၊ သုခတ္တာစ ဘဝန္တု တေ။
စတုဒ္ဒိသာ ¶ နုဒိသာ ဓော၊ ဥဒ္ဓန္တိ ဒသကေဒိသိ၊
ဒွါဒသေ တေ ပရိစ္ဆိဇ္ဇ၊ ဘာဝေယျ ပုဂ္ဂလေ ဗုဓော။
မေတ္တာ ¶ ဝဿေန တေမေတု၊ ပဇ္ဇုန္တောဝိယ သဗ္ဗဓိ၊
မာကိဉ္စိ ပရိဝဇ္ဇေဟိ၊ ဧဝံ မေတ္တာ သုဘာဝိတာ။
ပဉ္စာ နောဓိ သတ္တောဓိသာ၊ သိယုံ ဒွါဒသပုဂ္ဂလာ၊
န္တု စတူဟေသု ဘာဝေတွာ၊ အဋ္ဌတာလီသကာ သိယုံ။
ဒသကေဒိသိ ¶ တာမေတ္တာ၊ စတုဿတ အသီတိယော၊
အဋ္ဌတာလီသာဟိ ပဉ္စ၊ သတာ ဋ္ဌဝီသ သာဓိကာ။
ဒုက္ခိတေ ¶ ကရုဏံ ဗြူဟေ၊ မုဒိတံ သုခိတေ ဇနေ၊
မေတ္တာစေဝ ဥပေက္ခာစ၊ ဥဘော ဥဘောသု ဘာဝိတာ။
ဗြဟ္မဝါသီတိ ဝတ္တဗ္ဗော၊ တေသွညတရ ဝါသိတော၊
ဂန္ဓဘူတေသု သော လောကေ၊ ဗြဟ္မာဝိယ ဝိရောစတိ။
အပ္ပမာဒါဝဟ ပကိဏ္ဏကနိဒ္ဒေသ
သံဝိဇ္ဇန္တိ ¶ ဓ လောကသ္မိံ၊
ဗဟူ ဇီဝိတကပ္ပနာ၊
ဂဟေတွာ ပတ္တ မုဉ္ဆော ယော၊
ဇီဝိကာနံ သ လာမကော။
သုကုလာစ တဒုပဂါ၊ ကာမဘောဂါ နပေက္ခိနော၊
န ဘယဋ္ဋာ န ဣဏဋ္ဋာ၊ နေဝ အာဇီဝ ကာရဏာ။
နာလံဝ ¶ ဂိဟိနာ ဗြဟ္မ၊ စရိယာယ အခဏ္ဍိတံ၊
ဃရာဝါသော တိသမ္ဗာဓော၊ ပဗ္ဗဇ္ဇာဝ နိရာလယာ။
ဘဝပင်္ကာ ¶ ပမုစ္စာမ၊ တိဝိတ္တိဏ္ဏာ ဘယာနကာ၊
ပဋိပတ္တိ ယိမာယာတိ၊ ကတွာ တဒုပဂါ ဣမေ။
ဥတ္တိဋ္ဌေ နပ္ပမဇ္ဇေယျ၊ ဓမ္မံ စရိတံ သုစရေ၊
ဓမ္မစာရီ သုခံသေတိ၊ အသ္မိံလောကေ ပရမှိစ။
သွာဂတာ ¶ ဝတ တေဘိက္ခူ၊ ပတ္တာ သမ္ဗုဒ္ဓပုတ္တ တံ၊
ဂိဟိ ဗန္ဓန ပုစ္ဆိဇ္ဇ၊ သုခိတာ သာသနေ ရတာ။
ကတပုည ဝိသေသာဝ၊ ဧတေ သုလဒ္ဓ ဒုလ္လဘာ၊
ဆဋ္ဋေတွာပိ မဟာရဇ္ဇံ၊ နေဒိသံ လဒ္ဓ မညဒါ။
သွာဂတာ ¶ သုဂတီ ဟောန္တု၊ မာဒုဂ္ဂတီ ပမာဒိနော၊
ဒုဿီလာ စေ ဂမိဿန္တိ၊ အပါယံ တိဘယာနကံ။
ဂိဟိဘောဂါ ¶ ပရီဟိန္နော၊ သာမညတ္တဉ္စ ဒူဘတော၊
ပရိဓံသမာနော ပကိရေတိ၊ ဆဝါလာတံဝ နဿတိ။
ကုသော ယထာ ဒုဂ္ဂဟိတော၊ ဟတ္ထမေဝါ နုကန္တတိ၊
သာမညံ ဒုပ္ပရာမဋ္ဌံ၊ နိရယာ ယုပ ကဍ္ဎတိ။
ယံကိဉ္စိ ¶ သိထိလံ ကမ္မံ၊ သံကိလိဋ္ဌဉ္စ ယံကတံ၊
သင်္ကဿရံ ဗြဟ္မစရိယံ၊ နတံဟောတိ မဟပ္ဖလံ။
ကရိယာစေ ကရိယာ ဝေနံ၊ ဒဠှမေနံ ပရက္ကမေ၊
သိထိလောဟိ ပရိဗ္ဗဇော၊ ဘိယျော အာကိရတေ ရဇံ။
ဣတိ ¶ ဝုတ္တံ မုနိန္ဒေန၊ နုဿရံ အနိ ဝတ္တိတော၊
သဒါ အလိန စိတ္တေန၊ စရေယျ ဗုဒ္ဓသာဝကော။
ရာဂံ အသုဘစိန္တာယ၊ ဒေါသံ မေတ္တာယ ဝါရယေ၊
မရဏေန ဓဇံမာနံ၊ သမ္ဗုဒ္ဓေ တိက္ခ သဒ္ဓိကော။
အသုဘာ ကာမဝိတက္ကံ၊ မေတ္တာ ဗျာပါဒ တက္ကိတံ၊
ဝိဟိံသံ ကရုဏာယေဝ၊ နိဝါရေယျ သဒါသတော။
ဗုဒ္ဓါဏတ္တိ ¶ သဒါတီတော၊ မိစ္ဆာဝိတက္က ပီဠိတော၊
ပါပဓမ္မေဟိ သံကိဏ္ဏော၊ သောနိစ္စာပါယ ဂါမိကော။
ဓောဝိတွာ ပတ္တိမလာနိ၊ ပုနာတိက္ကမ သံဝုတော၊
မိစ္ဆာဝိတက္က သဉ္ဆေဒီ၊ ဒူရော အပါယ ဂါမိတော။
ခီဏာသဝတ္တ ¶ ဗုဒ္ဓတ္တံ၊ နိယျာနိက န္တရာ ယိကံ၊
သီဟနာဒံ စတုဋ္ဌာနေ၊ ဝေသာရဇ္ဇော ဇိနော နဒိ။
သီလံ ¶ နိယျာနိကံ နာမ၊ အာပတ္တိ အန္တရာယိကံ၊
အန္တရာယ မနာပဇ္ဇ၊ နိယျာနေဝ ပတိဋ္ဌတု။
နိယျာနိကာစ ¶ အသုဘာ၊ သုဘသညာ န္တရာယိကာ၊
အန္တရာယ မနာပဇ္ဇ၊ နိယျာနေဝ ပတိဋ္ဌတု။
နာနာပတ္တိ ¶ ပကိဏ္ဏောပိ၊ ပါရာဇိကာ ဝသေသကော၊
သော မိတျတ္တ ပဏီဓီဟိ၊ လဇ္ဇီယေဝ ဝိသောဓကော။
အလဇ္ဇီကမ္မ ကိဏ္ဏောပိ၊
သံဝေဇေတွာ သုမိတ္တိကော၊
လဇ္ဇီယေဝ ဝိသောဓေန္တော၊
မတကောဝ အသောဓကော။
ယော ¶ ပုဗ္ဗေဝ ပမဇ္ဇိတွာ၊ ပစ္ဆာသော နပ္ပမဇ္ဇတိ၊
သောမံ လောကံ ပဘာသေတိ၊ အဗ္ဘာမုတ္တောဝစန္ဒိမာ။
ဓုရံကတွာ ¶ ဓိပတယော၊ ယော ပုညေသု ပရက္ကမေ၊
တဿ နိယျာနိကံ ကမ္မံ၊ ကိံနာမကံ နသိဇ္ဈတေ။
ပစ္စတေ ¶ မုနိနော ဘတ္တံ၊ ထောကံထောကံ ဃရေဃရေ၊
ပိဏ္ဍိကာယေဝ ဇီဝန္တု၊ မာပဇ္ဇန္တု အနေသနံ။
ဓောဝေယျာ ပတ္တိမဂါနိ၊ ဝုဋ္ဌာန ဒေသနမ္ဗုဟိ၊
သံဝရိဿန္တိ စိတ္တေန၊ သီလံ ဓောတဿ နိမ္မလံ။
ဗုဒ္ဓါဏာတိက္ကမာပတ္တိ ¶ ၊ နိဂ္ဂဟေ ရာဂဒေါသကေ၊
နတ္ထိ သဉ္စိစ္စ အာပတ္တိ၊ လဇီဝ သော ပဝုစ္စတိ။
ဝါဏိဇ္ဇ ကသိကာဒီဟိ၊ နာဟာရေဋ္ဌိ ဓသာသနေ၊
ဓုရ ဒွယံဝ ကိစ္စံ တံ၊ နာညကိစ္စေဟိ ဟာပယေ။
နိဂ္ဂဏှေယျ ¶ သကံစိတ္တံ၊ ကိဋ္ဌာဒိံ ဝိယ ဒုပ္ပသုံ၊
သတိမာ သမ္ပဇာနောစ၊ စရေ သဗ္ဗိရိယာပထေ။
ယထာ ¶ ထမ္ဘေ နိဗန္ဓေယျ၊ ဝစ္ဆံ ဒမံ နရော ဣဓ၊
ဗန္ဓေယျေဝံ သကံစိတ္တံ၊ သတိယာ ရမ္မဏေ ဒဠှံ။
အဓိသီလာဓိစိတ္တာနံ၊ အဓိပညာယ သိက္ခနံ၊
ဘိက္ခု ကိစ္စတ္တယံ ဧတံ၊ ကရောန္တောဝ သုဘိက္ခုကော။
ပဉ္စာဋ္ဌ ¶ ဒသ သီလာနိ၊ နာဓိသီလံ တဒုတ္တရိ၊
ပါတိမောက္ခံ အဓိသီလံ၊ ပဗ္ဗတာ ဓိက မေရုဝ။
ပါတိမောက္ခံ ¶ ဝိသောဓေန္တော၊ အပ္ပေဝ ဇီဝိတံ ဇဟေ၊
ပညတ္တံ လောကနာထေန၊ နဘိန္ဒေ သီလသံဝရံ။
သီလေနာ တိက္ကမံ ထုလ္လံ၊ ပရိယုဋ္ဌံ သမာဓိနာ၊
ပညာယာ နုသယံ သဏှံ၊ ကိလေသံ ဘိက္ခု ဘိန္ဒတိ။
သာသနဿာဒိ ¶ သီလံဝ၊ မဇ္ဈေ တဿ သမာဓိဝ၊
ပညာဝ ပရိယောသာနံ၊ ကလျာဏာဝ ဣမေတယော။
မဟာပုညေ ¶ ဌိတံ သီလံ၊ သမာဓိ အပ္ပနာ ဂတံ၊
စတုမဂ္ဂ ယုတာ ပညာ၊ ဧတံ သိက္ခတ္တယံ မတံ။
သီလနလက္ခဏံ သီလံ၊ ဒုဿီလျ ဓံသနံ ရသံ၊
ဟိရောတ္တပ္ပ ပဒဋ္ဌာနံ၊ သုစိ ပစ္စုပဋ္ဌာနကံ။
သသီလဂုတ္တိ ¶ နာထောစ၊ ဒုန္နိဂဟော ဝိသာရဒေါ၊
ဓမ္မဋ္ဌီတီတိ ပဉ္စေတေ၊ ဂုဏာ ဝေနယိကေ မတာ။
အာဒိ ¶ ကလြာဏ သံဝေဒီ၊ သီလမတ္တဋ္ဌ ဘိက္ခဝေါ၊
ဥဒ္ဓံ ကလျာဏ လာဘာယ၊ အလိနော အနိဝတ္တိကော။
ဓောဝိတွာ ပတ္တိမလာနိ၊ ဝုဋ္ဌာန ဒေသန မ္ဗုဟိ၊
သုဒ္ဓသီလေ ဌိတောယေဝ၊ ဧဝံ စိန္တေယျ ပညဝါ။
သမ္ပုဒ္ဓါရသ ¶ ပုတ္တာဝ၊ ဗုဒ္ဓုရောဇာ နုဿာဝနာ၊
သမ္ဘူတာ ပိတု ဒါယာဒါ၊ ပုတ္တာနာမ သဘာဝတော။
ခီရံ ပိတွာဝ ဇီဝန္တိ၊ ဇာတာပိ ဣဓ ပုတ္တကာ၊
ပရိယတ္တိ ဇိနက္ခီရံ၊ ပိတွာဝ ဇိနပုတ္တကာ။
ဒါယောစ ¶ နာမ ဗုဒ္ဓဿ၊ ဓမ္မာမိသ ဝသာဒွိဓာ၊
မဂ္ဂဉာဏာ ဒယော ဓမ္မော၊ စတ္တာရော ပစ္စယာမိသာ။
စိရ မာမိသ ဒါယာဒါ၊ ရာဇပူဇာဒိ ဂါဟိနော၊
ဒါယာ မိဿဂ္ဂဟံ နိစ္ဆိ၊ သဒ္ဓမ္မ ဂရုကော ဇိနော။
လက္ခ ¶ ကပ္ပ စတုဿင်္ချ၊ ကာလံ ဝိစိတ နိစ္စိတံ၊
ဓမ္မဒါယံ နဝိန္ဒမှာ၊ ဗုဒ္ဓပုတ္တာပိ ယေမယံ။
ဗုဒ္ဓဝါရိတ ဒါယာဒါ၊ သဒ္ဓမ္မဒါယ ဗာဟိရာ၊
ပုတ္တာပိ သတ္ထုဒါသာဘာ၊ ဘုတ္တမတ္တာ ဟိ ဒါသကာ။
ဘဒ္ဒန္တ ¶ ရာဟုလဿေဝ၊ ဒါယံ နောပိ အဒါ ဇိနော၊
နာဒိယိမှာ ပမာဒါယ၊ တံ ဒါယံ ကုသလန္တကံ။
ဓမ္မဒါယာဒါ မေဘိက္ခဝေ တုမှေဘဝထ၊
မာအာမိသ ဒါယာဒါ၊
ဣတိ ဝုတ္တံ မုနိန္ဒေန၊
သာဝကေသု ဒယာဝတာ။
ဣမာယ ¶ ဗုဒ္ဓဝါစာယ၊ ဗုဒ္ဓသန္တက တံ သရေ၊
ဒွိန္နံ အာမိသအ ဒါယာဒ၊ ဘာဝဿစ နိဝါရဏံ။
ရဇ္ဇေ စဏ္ဍာလပုတ္တာဝ၊ သဒ္ဓမ္မစက္က ဝတ္တိနော၊
ပုတ္တာ ဟောန္တာပိ ဒါယေသ္မိံ၊ နိရာသာ တိဝ နိန္ဒိတာ။
မိစ္ဆာဇီဝ ¶ သမာပန္နာ၊ အစ္စာသာ ပစ္စယာမိသေ၊
မဟာဇာနီယ သမ္ပတ္တာ၊ မောဃကတွာ တိဒုလ္လဘံ။
ဂိဟိကာမေ ¶ ပဟာယာဂေါ၊ ပရဝန္တောသု လဂ္ဂိတော၊
ဂင်္ဂါတိဏ္ဏော တဠာကမှိ၊ နိမုဂ္ဂေါဝါ တိနိန္ဒိတော။
စီဝရေ ¶ ပိဏ္ဍပါတေစ၊ ပစ္စယေ သယနာသနေ၊
ဧတေသု တဏှ မာကာသိ၊ မာလောကံ ပုနရာဂမိ။
ဣတိဝုတ္တာ နုသာရေန၊ ပစ္စဝေက္ခဏ သုဒ္ဓိယာ၊
အာမိသေသု ဟနေ အာသံ၊ ပုတ္တမံသု ပမံ သရံ။
သေယျော ¶ အယောဂုဠော ဘုတ္တော၊
တတ္တော အဂ္ဂိသိခူပမော၊
ယဉ္စေ ဘုဉ္ဇေယျ ဒုဿီလော၊
ရဋ္ဌပိဏ္ဍံ အသညတော။
ဣတိဝုတ္တံ ¶ နုစိန္တေန္တော၊ ဝဇ္ဇေ ဒုဿီလ ဘာဝတော၊
သီလေ ဌိတောဝ ဘုဉ္ဇေယျ၊ မာဒိတ္တ ဂုဠကံ ဂိလိ။
အန္နာန မထော ပါနာနံ၊
ခါဒနီယာန မထောပိ ဝတ္ထာနံ၊
လဒ္ဓါန သန္နိဓိံ ကရိယာ၊
နစ ပရိတ္တသေ တာနိ အလဘမာနော။
အညာဟိ ¶ လာဘုပနိသာ၊ အညာ နိဗ္ဗာန ဂါမိနီ၊
သက္ကာရံ နာဘိနန္ဒေယျ၊ ဝိဝေက မနုဗြူဟယေ။
အကတွာ ¶ အာမိသေ အာသံ၊
သဒ္ဓမ္မေယေဝ အာသိကော၊
အပ္ပမတ္တော သမာရဒ္ဓါ၊
ဓမ္မဒါယံ လဘိဿတိ။
ပရိယတ္တိံ ဝိနာ သေယျံ၊ နလဘန္တိ ဗုဓာအပိ၊
သေယျတ္ထိကောဝ သိက္ခေယျ၊ နေဝ ပူဇာဒိ ကာရဏာ။
ဘဝနိဿရဏတ္ထံဝ ¶ ၊ သိက္ခေ နာ လဂ္ဂဒူပမော၊
တထူပမာယ သိက္ခန္တော၊ အပါယေသု ပတိဿတိ။
သိက္ခိတေန အမာနတ္ထံ၊ နသာဓု မာနထဒ္ဓိကော၊
မုဒုဘာဝါယ သိက္ခိတွာ၊ ဒမေန္တော မုဒုကော ဘဝေ။
ရာဂံ ¶ ဒေါသံ ဓဇံမာနံ၊ သိက္ခန္တောပိ ဝိဝဇ္ဇယေ၊
ဒဟရာပိ ဟိ မိယျန္တိ၊ နတ္ထိ ဝဿဂ္ဂတော မတံ။
သဒ္ဓံတိက္ခေယျ ဗုဒ္ဓေန၊ ရာဂံ အသုဘ စိန္တယာ၊
မရဏေန ဓဇံမာနံ၊ ဒေါသံ မေတ္တာယ ဝါရယေ။
ဧတေဟိ ¶ စတုရက္ခေဟိ၊ ဂန္ထံ သိက္ခေယျ သံ ဝုတော၊
သိက္ခန္တဿေဟိ ရက္ခေဟိ၊ နကောစိ သံကိလေသိကော။
ဗုဒ္ဓဝါစမ္ပိ ¶ သဇ္ဈာယ၊ ဧတေပိ မနသီကရ၊
ဝုတ္တော ဓမ္မဝိဟာရီတိ၊ ဧဒိသော သာသနေ ဝရော။
ဂရူန မုပဒေသေန၊
စတုရက္ခော သုသီလဝါ၊
အပ္ပဿုတောပိ ပါသံသော၊
ဘိယျောယေဝ ဗဟုဿုတော။
သာတံ ¶ သေဝက္ခဏေဝပ္ပံ၊ တံဟေတွာ နန္တာဒုက္ခန္တိ၊
ဓီရော အာသံ ဟနေ ကာမေ၊ ခုရဓာရမဓူပမေ။
ယောဓ ကာမေ သုခံမညိ၊
န သော ဒုက္ခာ ဝိမုစ္စတိ၊
မာတာဟိ ဗျဂ္ဃ မနွေန္တော၊
ဝဆော မုတ္တော ကထံဘယာ။
တိရစ္ဆာ ¶ ပေတ လဒ္ဓဗ္ဗေ၊ နာသံ ကာမသုခေ ကရေ၊
ဘာယိတဗ္ဗ သုခံ တဉှိ၊ တသ္မိံ လဂ္ဂါ မဟာတပါ။
လဒ္ဓါ ကာမသုခံ ဗာလာ၊ ပမောဒန္တိ နပဏ္ဍိတာ၊
ပသုပက္ခီဘိ လဒ္ဓဗ္ဗံ၊ အနန္တဒုက္ခ ကာရဏံ။
လဒ္ဓါ ¶ ဓမ္မရတိံဝိညူ၊ မောဒန္တိ န အပဏ္ဍိတာ၊
အနောမ သတ္တ ပရိဘောဂံ၊ ဘဂနိဿရဏာဝဟံ။
ဟီနကမ္မံ ¶ ပဋိစ္ဆန္နံ၊ ကာမဿာဒံ နပတ္ထယေ၊
ဓမ္မေ ပီတိဉ္စ ပါမောဇ္ဇံ၊ ပတ္ထေယျ သာဓုသမ္ပတော။
ပရိဂ္ဂဏှန္တိ ယေကာမေ၊ ဟိံ သန္တိတေ တဒတ္ထိကာ၊
ပရိစ္စတ္တံ န ဟိံ သန္တိ၊ မုတ္တံ ဝဏ္ဏေန္တိ သာဓဝေါ။
နိစ္စုပက္ကမ္မ ¶ ပုဋ္ဌောပိ၊ ကာယော ဝေရီဝသာ နုဂေါ၊
အစိရံယေဝ ဘူသာယီ၊ ယုတ္တောဝ တ မုပေက္ခိတုံ။
ရက္ခိတောပိ အဂုတ္တောဝ၊ ကာယော ဘယမုခေ ဌိတော၊
တသ္မာ ကာယ မုပေက္ခိတွာ၊ စရေဓမ္မ မဆမ္ဘိတော။
ပုဋ္ဌော ¶ ပုဋ္ဌောပိ ယံကာယော၊ ဘုဝိ ရောဂါသယီသယီ၊
ကတံကတံ မုဓာတော န၊ တဒတ္ထံ ဒုစ္စရေ စရေ။
ပါပံ ¶ ကရောတိ ယောဗာလော၊
ပုဋ္ဌုံ ကာယံ တိဒုဗ္ဘရံ၊
ဘူမျံ ကာယံ ဌပေတွာန၊
အနာထော သော အပါယိကော။
ဝေရီဝသာ နုဂံ ကာယံ၊
ဗာလော ပေါသေတိ ဒုစ္စရော၊
ပေါသေန္တော နိရယေ ပက္ကော၊
ကာယော ဘူမျံ ဝိကာရဂူ။
ပါပံ ¶ မာကရ ကာယတ္ထံ၊ ကာယော ဝေရီ ဝသာနုဂေါ၊
ဘူမျံ သေဿတိ ဝေကာရီ၊ ပါပိကော နိရယံ ဂတော။
အမယှံ မယှသညာယ၊
ကာယံ ရောဂဝသာနုဂံ၊
ပေါသံ ပတ္တော မဟာဇာနိံ၊
နောကာသော ဓမ္မ မိက္ခိတုံ။
ကာယာပေက္ခာယ ¶ နောကာသော၊
ဓမ္မံ ဒဋ္ဌုံ ရဟောဂတော၊
ဥပေက္ခာယေဝ ဩကာသော၊
ဒုက္ခိတာ မှ အပေက္ခယာ။
စိတ္တ ¶ သံသောဓကာ ပက္ကာ၊ ကာယသံသောဓကာ နဝါ၊
သောဓေ စိတ္တံဝ ပက္ကတ္ထံ၊ နကာယံ ဘဝဘီရုကော။
စိတ္တသင်္ခရဏံ ¶ သာဓု၊ တံ သင်္ခတံ ပဘဿရံ၊
နသာဓု ကာယသင်္ခါရော၊ သင်္ခတောပျသုဘောဝ သော။
သဘာဝ မလိနံ ကာယံ၊ နိမ္မလာယ ကထံ ကရေ၊
အာဂန္တုမလိနံ စိတ္တံ၊ သက္ကာ ကာတုံ သုနိမ္မလံ။
အာဓိဗျာဓိ ¶ ပရောတာယ၊ အဇ္ဇသွေဝါ ဝိနာသိနာ၊
ကောဟိနာမ သရီရာယ၊ ဓမ္မာပေတံ သမာစရေ။
သဘာဝဇေဂုစ္ဆံ ကာယံ၊ သောဘေတုံနေဝသက္ကုဏေ၊
စိတ္တံ ဝါ လင်္ကတံ သောဘံ၊ သီလာဒိ ဂန္ဓဝါသိတံ။
သစေ ¶ ဘာယထ ဒုက္ခဿ၊ သစေ ဝေါ ဒုက္ခ မပ္ပိယံ၊
မာကတ္ထ ပါပကံ ကမ္မံ၊ အာဝိဝါ ယဒိဝါ ရဟော။
ကိလေသာ ဂန္တုမလံစိတ္တံ၊ ပဘဿရ သဘာဝိကံ၊
တဒါဂန္တုမလံ ဓောဝ၊ စိတ္တံ ဓောတေ ပဘဿရံ။
ကိလေသာ ¶ ဂန္တုမလံစိတ္တံ၊ ဥပက္ကမေန သောဓယေ၊
သုဝိသုဒ္ဓ မနာယေဝ၊ ဥတ္တရိံသု ဘဝဏ္ဏဝါ။
ကာယေ မလမုပေက္ခာယ၊ စိတ္တေ မလံဝ ဓောဝတု၊
စိတ္တေ ဟိ နိမ္မလေသန္တော၊ ပူတိကာယောပိ ပူဇိတော။
ကာယရောဂံ ¶ တိတိက္ခာယ၊ စိတ္တရောဂံ စိကိစ္ဆတု၊
သုခိတော ကာယရောဂီပိ၊ စိတ္တေ နိရာမယေ သတိ။
ကာယရောဂေ ဗဟူ ဝေဇ္ဇာ၊ ဗုဒ္ဓုတ္တိဝ မနောဂဒေ၊
ဣဓာပိ ကာယိကော သန္တော၊ အနန္တာဝ မနောရုဇာ။
သီသဒဍ္ဎ ¶ မုပေက္ခာယ၊ နိဗ္ဗာတု ရာဂပါဝကံ၊
ခိပ္ပံ အသုဘ သညာယ၊ နိစ္စဒဍ္ဎံ ဘဝေဘဝေ။
သုဘာယ ဥဋ္ဌိတံ ရာဂံ၊ အသုဘာယ နိဝါရယေ၊
သောရာဂေါ သာဒိတံ ဇန္တုံ၊ စတွာပါယံ နယိဿတိ။
ပဏ္ဍိတာနံ ¶ မလံ မာနော၊ သောတ္တုက္ကံသေန ပါကဋော၊
မာခေါ အတ္တာန မုက္ကံသေ၊ မာဝိဘာဝေ သကံမလံ။
ဂုဏံ ပဋိစ္စ ဂုဏီနံ၊ အဟံမာနော သမုဋ္ဌဟေ၊
မရဏံ အနုစိန္တာယ၊ ဓဇံမာနံ နိပါတယ။
ဧကော ¶ ကာယဝိဝေကေသီ၊ ကတွာ ကိလေသနိဂ္ဂဟံ၊
ဝသေ စိတ္တဝိဝေကေသီ၊ ဥဘော ပဓိ ဝိဝေကာဒါ။
အဒိဋ္ဌေ အသုတေ ဌာနေ၊ ဝသေယျ မောစနတ္ထိကော၊
အဿာဒံဟိ နိဝါရေတုံ၊ ဒိဋ္ဌေ သုတေ တိဒုက္ကရံ။
အဒိဋ္ဌေ ¶ အသုတေ ရညေ၊ ဝသေယျိ န္ဒြိယဂေါပကော၊
ဝါရေတုံ ဝိသယာကိဏ္ဏေ၊ စက္ခုသောတံ တိဒုက္ကရံ။
ရာဂံ အသတိ ဥပ္ပန္နံ၊ သန္တာဘုဇေန ဝါရယေ၊
ဗာဟိရေ ရာဂ မုပ္ပန္နံ၊ အန္တော အသုဘစိန္တယာ။
ရာဂံ ¶ ဆိန္ဒာတိ ဗုဒ္ဓါဏံ၊ သရံ ဘိက္ခု ရဟောဂတော၊
ပဿံ ကာယေဓ ဇေဂုစ္ဆံ၊ လဘေယျာ သိဋ္ဌမောစနံ။
ကာယံ အသုဘတောပဿ၊ ကလ္လကာလေဝ ဒဿနံ၊
မောဃံ ကာလံ နခီယေယျ၊ ဘဝေယျုံသွေပိအာတုရာ။
ကာယံ ¶ ဇေဂုစ္ဆတောပဿ၊ ဗာလျန္တော ပစ္စဝေက္ခိယ၊
အာဒေါ ကိဉ္စိ ဇိဂုစ္ဆာယ၊ ဇိဂုစ္ဆေယျာယတိံ ဘုသံ။
ကာယာဒိနဝ မိက္ခေယျ၊ ဒါနိ ကိဉ္စိပိ ဒဿနံ၊
အာယတိံ မဂ္ဂလာဘာယ၊ ဘဝေယျ ဥပနိဿ ယော။
ဣတ္ထီန ¶ မင်္ဂမင်္ဂါနိ၊ နပဿေယျ နစိန္တယေ၊
တဒါသာ ဥဘတော ဘဋ္ဌာ၊ သုဂတျာ သာသနာပိစ။
ဣတ္ထိရူပ သရာကဍ္ဎာ၊ ဘဋ္ဌာ ဗဟူဝ သာသနာ၊
ဣဟာပိ ဒုက္ခိတာ ဟုတွာ၊ တေ ပေစ္စ အတိဒုက္ခိနော။
ပုံမနော ¶ ပရိယာဒါယ၊ ဣတ္ထိရူပသရာ ဌိတာ၊
တဿမ မည မေကမ္ပိ၊ နဝိဇ္ဇတေဝ သဗ္ဗဓိ။
သလ္လပေ ¶ အသိဟတ္ထေန၊ ပိသာစေနာပိ သလ္လပေ၊
အာသဒေ အာသိဝိသေပိ၊ အဂ္ဂိက္ခန္ဓေပိ အာသဒေ၊
နတွေဝ မာတုဂါမေန၊ ဧကေကာယ သုပေသလော။
ကာမံ အသုဘစိန္တာယ၊ ဗျာပါဒံ သ္နေဟစေတသာ၊
ဝိဟိံသံ ကရုဏာယေဟိ၊ ဝိတက္ကဂ္ဂီ တယောသမေ။
အသမေတ ¶ ဝိတက္ကဂ္ဂီ၊ ထုသရာသိမှိ ခါဏုဝ၊
အထိရာ သာသနေ တာပီ၊ တေပစ္ဆာအတိတာပိနော။
အသုဘာ ¶ ပဂမေ လောကာ၊ တံ မေတ္တာယုပသင်္ကမေ၊
သုဘာဝိတာဟိ ဧတာဟိ၊ ဇဟေလောကေ ပိယာပိယံ။
ဂတဋ္ဌိတာဒေါ ဥပ္ပန္နေ၊ ဝိတက္ကဂ္ဂီ တယော သမေ၊
အာတာပီ ပဟိတတ္တောတိ၊ ဧဝံဘူတော ပဝုစ္စတိ။
ဝိဝါဒပ္ပတ္တော ¶ ဒုတီယော၊ ကေနေကော ဝိဝဒိဿတိ၊
တဿတေ သဂ္ဂကာမဿ၊ ဧကတ္တ မုပရောစိတံ။
သိနိဟပ္ပတ္တော ဒုတီယော၊ ကမေကာ သိနိဟိဿတိ၊
တဿတေ မောက္ခကာမဿ၊ ဧကတ္တ မုပရောစိတံ။
ပုရတော ¶ ပစ္ဆတောဝါပိ၊ အပရော စေ နဝိဇ္ဇတိ၊
တဿေဝ ဖာသု ဘဝတိ၊ ဧကဿ ဝသတော ဝနေ။
သုခဉ္စ ကာမ မယိကံ၊ ဒုက္ခဉ္စ ပဝိဝေကိကံ၊
ပဝိဝေကံ ဒုက္ခံ သေယျော၊ ယဉ္စေ ကာမမယံ သုခံ။
ယောစ ¶ ဝဿသတံ ဇီဝေ၊ အပဿံ ဥဒယဗ္ဗယံ၊
ဧကာဟံ ဇီဝိတံ သေယျော၊ ပဿတော ဥဒယဗ္ဗယံ။
သုညာဂါရံ ¶ ပဝိဋ္ဌဿ၊ သန္တစိတ္တဿ ဘိက္ခုနော၊
အမာနုဿီ ရတိ ဟောတိ၊ သမ္မာဓမ္မံ ဝိပဿတော။
ယတောယတော ¶ သမ္မသတိ၊ ခန္ဓာနံ ဥဒယဗ္ဗယံ၊
လဘတိ ပီတိပါမောဇ္ဇံ၊ အမတံ တံ ဝိဇာနတံ။
ဣစ္စုတ္တံ ဓမ္မပါမောဇ္ဇံ၊ ဝိဝေကဇံ ရသာဓိကံ၊
ဣစ္ဆန္တော သီလဝါ ဘိက္ခု၊ အနိဝတ္တိတ ဝီရိယော။
ဝနာ ဝါသေ ဝသိတွာန၊ အပ္ပိစ္ဆာဒိဂုဏာဝဟော၊
ပလိ ဗောဓေ သမုစ္ဆိဇ္ဇ၊ ဘာဝေယျေဝံရဟောဂတော။
ကာယေ ¶ ဇေဂုစ္ဆပုဉ္ဇာနိ၊ ရူပံ ရုပ္ပနဘာဝတော၊
တဿိတာ ဝေဒနာ သညာ၊ သင်္ခါရာစ တတောပရေ။
ဝိညာဏဉ္စ ဣမေပဉ္စ၊ ခန္ဓာ ရာသတ္ထတော မတာ၊
တေစာနိစ္စ ဒုက္ခာ နတ္တာ၊ ဥပါဒါ ဝယဓမ္မိနော။
ဖေဏပိဏ္ဍူ ¶ ပမံ ရူပံ၊ ဝေဒနာ ပုပ္ဖုဠူပမာ၊
မရီစိကူပမာ သညာ၊ သင်္ခါရာ ကဒလူပမာ။
မာယူပမန္တိ ဝိညာဏံ၊ ဒဿိတေ သဗ္ဗ ဒဿိနာ၊
ဥပမာဟိ သမဿေ ယျ၊ ပဉ္စက္ခန္ဓေ အသာရကေ။
ယာဝ ¶ ဗျာတိ နိမ္မိဿတိ၊
ကောဋိလက္ခာတဟိံခဏေ၊
ခန္ဓာ ဘိဇ္ဇန္တိ ဟုတွာန၊
အနိစ္စာနာမ တေ တတော။
ဘယ ပီဠိတတော ဒုက္ခာ၊ အနတ္တာ အဝိဓေယျတော၊
ခန္ဓာဝ ဟောန္တိ ဘိဇ္ဇန္တိ၊ အညော ကောစိ နလဗ္ဘတိ။
ခန္ဓာ ¶ နိစ္စာ ခယဋ္ဌေန၊ ဘယဋ္ဌေန ဒုခါစတေ၊
အနတ္တာ သာရကဋ္ဌေန၊ ဣတိ ပဿေ ပုနပ္ပုနံ။
ဘာဏူဒယေ ကယံ ဧန္တိ၊ ဟေမန္တေ ပတိတုဿဝါ၊
ရာဂါ မာနာစ သဗ္ဗေဝံ၊ သတျာ နိစ္စာနုပဿနေ။
သီဟနာဒံ ¶ ဝနေသုတွာ၊ သံဝေဇေန္တိ သသောတကာ၊
ဝေဟပ္ဖလာပိ လောကေဝံ၊ ဇိနေရိတ တိလက္ခဏံ။
ဝေဒနာဒီနိ ¶ နာမာနိ၊ နာမရူပဒွယံဝ တေ၊
တဏှာဝိဇ္ဇာစ ကမ္မာဒိ၊ နာမရူပဿ ပစ္စယာ။
နာမရူပံ ပရိဂ္ဂယှ၊ တတော တဿစ ပစ္စယံ၊
ဟုတွာ အဘာဝတော နိစ္စာ၊ ဥဒယဗ္ဗယ ပီဠနာ။
ဒုက္ခာ အဝသဝတ္တိတ္တာ၊ အနတ္တာတိတိလက္ခဏံ၊
အာရောပေတွာဝ သင်္ခါရေ၊ သမ္မသန္တော ပုနပ္ပုနံ။
ပါပုဏေယျာ ¶ နုပုဗ္ဗေန၊
သဗ္ဗသံယောဇန က္ခယံ၊
တမ္ပတ္တော အရဟာ ဘိက္ခု၊
ဘဝတိဏ္ဏော သုနိဗ္ဗုတော။
နတုမှံ ¶ ဘိက္ခဝေ ရူပံ၊ တံ ဇဟေထာတိ ဝုတ္တတော၊
မေမေတန္တိ ဥပါဒါနံ၊ ပဉ္စက္ခန္ဓေ ဝိနာသယေ။
ပုတ္တာ မတ္ထိ ဓနာ မတ္ထိ၊ ဣတိ ဗာလော ဝိဟညတိ၊
အတ္တာပိ အတ္တနော နတ္ထိ၊ ကုတောပုတ္တောကုတောဓနံ။
ဣစ္စုတ္တ မနုစိန္တာယ၊ အတ္တာတိ အတ္ထိမေတိဝါ၊
သညံ နာသေယျ ခန္ဓာဝ၊ အတ္ထီတိ အာဘုဇေ ဗုဓော။
ခန္ဓနာသ ¶ မနာဘုဇ္ဇ၊ မတော မေ ပုတ္တကော ဣတိ၊
သောစန္တိ ပရိဒေဝန္တိ ပုတ္တောနတ္ထိ နသောမတော။
ဘိဇ္ဇမာနေသု ¶ ခန္ဓေသု၊ အတ္တသညီ အနတ္တေသု၊
နာဒိကာလ ဝိပရိတာ၊ မဟာဇာနီယတံ ဂတာ။
ဘိဇ္ဇမာနေသု ခန္ဓေသု၊ လဂ္ဂါ ရတ္တာ မမာယိတာ၊
နာရီပုမာဒိ သညာယ၊ ဝိပရေတာ အနာဒိကေ။
နာဒိကာလ ¶ ဝိပရိတော၊ အတ္တသညီ အနတ္တနိ၊
ဘိဇ္ဇမာနေသု ခန္ဓေသု၊ ဇဟ တ္တာတိ မမာယနံ။
အဘိဏှုပ္ပတ္တိယာယေဝ၊ ဘိဇ္ဇမာနော နညယတိ၊
အနိစ္စလက္ခဏံ ဆန္နံ၊ တံ စိန္တေယျ သုပညဝါ။
အသန္တေယေဝ ¶ လဂ္ဂန္တာ၊ နမုစ္စန္တိ ဘဝတ္တယာ၊
နတ္ထိ သန္တေသု လဂ္ဂန္တာ၊ ရူပက္ခန္ဓာ ဒိကေ သွိဓ။
တဏှာ ဂိဇ္ဈတိ မေတန္တိ၊ မာနော အဟန္တိ မညတိ၊
ဒိဋ္ဌိ ဂဏှာတိ အတ္တာတိ၊ ဧတေ ပပဉ္စကာ တယော။
မမေ ¶ တ မဟ မတ္တာတိ၊ ပပဉ္စာနံ ဝသာနုဂေါ၊
ဂဏှန္တော ဘဝ ပင်္ကမှိ၊ နိမ္မုဂ္ဂေါဝ ဘယာနကေ။
နမေ နာဟံ နအတ္တာတိ၊ ဧတေဟိ ဝိဝဒံ ကရေ၊
ဝိဝဒန္တာဝ မုစ္စန္တိ၊ ဘဝပင်္ကာ ဘယာနကာ။
နမေ ¶ နာဟံ နအတ္တာတိ၊ ဒဋ္ဌဗ္ဗန္တိ ဇိနေရိတံ၊
တထေဝ သဗ္ဗဒါ မညေ၊ မာ ပပဉ္စ ဝသာနုဂေါ။
လောကော ဝိဝဒိ ဗုဒ္ဓေန၊ နလောကေန ကဒါစိသော၊
အနတ္တာတိ ဇိနုဒ္ဒိဋ္ဌံ၊ လောကော အတ္တာတိ မညတိ။
မော ¶ လောကေန သမော ဟောတု၊
တဿမော ကိံတဒုတ္တရေ၊
အန္ဓိဘူတော အယံလောကော၊
သမ္ဗုဒ္ဓဿ ဝိရောဓိကော။
သမ္ဗုဒ္ဓဿ ဝသံ နွေတု၊ သန္ဈာဒိ ဘယတဇ္ဇိတော၊
တဗ္ဗသံယေဝ အနွေန္တော၊ ဘဝတိဏ္ဏော ဘဝိဿတိ။
အနတ္တာတိ ¶ ဂိရာ သစ္စာ၊ အတ္တာတိ ဝစနံ မုသာ၊
မုသာယ ဝိဝဒေ လောကော၊ ဗုဒ္ဓေန သစ္စ ဝါဒိနာ။
တုရင်္ဂဝဇဂါမမှာ၊ ပုရိမေ စမကျ ကာနနေ၊
ဝသတာ အဂ္ဂဓမ္မေန၊ ထေရေန ရစိတော အယံ။
အရိမတ္တေယျ ဗုဒ္ဓဿ၊
ဓမ္မ ဿုတက္ခဏေ ဘဝေ၊
ခီဏာသဝေါ မဟာပညော၊
ပုညေန တေန သာဝကောတိ။
ကာယပစ္စဝေက္ခဏာ
နာဒိကာလ ¶ ဝိပရိတ၊ ဇန ဘူတတ္ထ ဒဿိနော၊
ဒါတုမေ ကန္တိကဿာဒံ၊ သတ္ထု ပါဒေါ တိမာနိတော။
သီသေ ¶ ပိလန္ဒိယာ မောဒီ၊ သမ္ဗုဒ္ဓ စရဏ မ္ဗုဇံ၊
သာဓု တုဋ္ဌိကရံ ဗြူမိ၊ သုကာယ ပစ္စဝေက္ခဏံ။
ယောနိသော မနသီကတွာ၊ နာဒါ ဝိရုဒ္ဓ မညိတံ၊
သာဓဝေါ တ မုဒိက္ခန္တု၊ မယာပိ မန္ဒဗုဒ္ဓိနော။
ဣစ္ဆိတဗ္ဗာန ¶ မာယတ္တာ၊ တေသဉ္စ စယဘာဝတော၊
တဒါကာရေန ဝတ္တိတာ၊ ကာယော ဇေဂုစ္ဆ ပုဉ္ဇကော။
ပုနပ္ပုနံဝ ဩက္ကမ၊ ဉာဏ မန္တော ပဝေသိယ၊
ဗာဟိရံဝ အနာလမ္ဗ၊ ဣက္ခဏာ ပစ္စဝေက္ခဏာ။
မံသစ္ဆန္န ¶ ဋ္ဌိရူပေဝ၊ မနောဇ ဝါယု စာလိတေ၊
နာရီ ဂတာတိ ယာစိန္တာ၊ နေဝ သာပစ္စဝေက္ခဏာ။
သညာဒိဋ္ဌိစ စိတ္တဉ္စ၊ ဝိပလ္လာသာ ဣမေတယော၊
တ ဒါကာရေန ဝတ္တန္တိ၊ အဝိဇ္ဇော တ္ထရိတာ ဘုသံ။
အာသာ ¶ ဝိပရိတေ ယေသံ၊
ဝိပလ္လာသာတိ တေမတာ၊
အာသာ အာသိသနာ ဝုတ္တာ၊
တဏှာယေဝ သဘာဝတော။
အသုဘေဝ သုဘမိတိ၊ အနိစ္စေဧဝ နိစ္စတော၊
ဒုက္ခေယေဝ သုခံဝါတိ၊ အနတ္တနိဝ အတ္တတော။
သညာဏံ ဒဿနံ စိန္တာ၊
ဒွါဒသာ ကာရတော တယော၊
ဒိဋ္ဌိသာ စာဒိ မဂ္ဂေန၊
သေသာ သေသေဟိ ဝဇ္ဈိတာ။
တဏှာ ¶ တဿိ မမေတန္တိ၊ မာနော မညိ အဟန္တိစ၊
ယဿိ ဒိဋ္ဌိစ အတ္တာတိ၊ ပပဉ္စာ နာမိမေ တယော။
ပပဉ္စန္တိ သံသာရံ၊ တသ္မာ ပပဉ္စနာမကာ၊
ဘဝယန္တေ ပယောဇေန္တာ၊ မောက္ခံ နာဒံသု တေ စိရံ။
ဘဝပင်္ကေ နိ မုဇ္ဇန္တာ၊ ပပဉ္စာနံ ဝသာနုဂါ၊
စိရဿံ ဒုက္ခိတာ ဟောန္တိ၊ အာရာ နိဗ္ဗာနတော တိဝ။
နမေ ¶ နာဟံ နအတ္တာတိ၊ ဧတေဟိ ဝိဝဒံ ကရေ၊
ဘဏ္ဍန္တာ ဝိဝဒန္တာ တေ၊ နိဗ္ဗာနတော အဒူရိနော။
ဝိပလ္လာသေ ပပဉ္စေစ၊ ဒွေပိဧတေ ပဟာတဝေ၊
သောပစ္စဝေက္ခိတဗ္ဗေ ဝံ၊ ကာယော ဇေဂုစ္ဆပုဉ္ဇကော။
ကေသာ ¶ လောမာ နခါဒန္တာ၊
တဏှာယာပိစ ဂေါစရာ၊
တသ္မာ တေ ဒဋ္ဌုကာမေန၊
တဏှာ နိဝါရိတာ သဒါ။
လဂ္ဂိကာ ဆဝိယံယေဝ၊ တဏှာ ဗာဟိရဂေါစရာ၊
တသ္မာ ဧတ္ထ တစောဝါဟ၊ သမ္ဗုဒ္ဓါ န ဗဟိစ္ဆဝိံ။
ဧသာ ¶ တစပရိယန္တ၊ ပဒေနာပိ နိဝါရိတာ၊
အတော ဆဝိ မနာလမ္ဗ၊ တစသီဝ မနေကရေ။
ဇိဂုစ္ဆိတာနိ ဆာဒေတိ၊ အဋ္ဌိ မံသ တစာဒိနိ၊
ဉာဏေန ဆိန္ဒိ တဗ္ဗာစ၊ တသ္မာ ဆဝီတိ ဝုစ္စတိ။
ဆဝိံ ¶ ဆေတွာ တစံ ပဿေ၊
တံ ဆေတွာ မံသကာဒယော၊
ဂဗ္ဘေဝတ္ထူနိ ဒီပေန၊
ယထာ ပညာပဒီပိကော။
ဇေဂုစ္ဆော ဆဝိယာ ကာယော၊
အသုဘောဝ သုဘာယတေ၊
နိစ္ဆဝါ တစမတ္တေန၊
ကထံ သုဘာယတေ အယံ။
နှာရုဗန္ဓော ¶ ဋ္ဌိသင်္ဃာတော၊ မံသလောဟိ တ လိမ္ပိတော၊
ဆဝိယာဝ ဝိမောဟေတိ၊ တစစ္ဆန္နော ဣမံ ပဇံ။
ဝဏ္ဏ သဏ္ဌာန တောစေဝ၊
ဂန္ဓော ကာသာ သယေဟိစ၊
ဇေဂုစ္ဆာ ပဋိကုလျာစ၊
ကေသာနာမ န မေပိယာ။
ဧကေကံ ¶ မနသီကတွာ၊ နယေ နိစ္စေဝ မာဒိနာ၊
ဘာဝေတဗ္ဗာ သမာရမ္ဘ၊ ယထာပညာယတေ တထာ။
ပူရိတံ မတ္ထလုင်္ဂဿ၊ သီသဋ္ဌိပိ ဇိဂုစ္ဆိတံ၊
မုခ နာသက္ခိ ကဏ္ဏာဒိ၊ ဆိဒ္ဒါ ဝဆိဒ္ဒ ဒုဒ္ဒသံ။
ပူတိ ¶ ဝါယု ဝိစရိတ၊ ကုစ္ဆိဋ္ဌန္တာနိ လောဟိတံ၊
ပိတ္တံ သေမှဉ္စ ပပ္ဖာသံ၊ ဟဒယံ ယကနမ္ပိ ဓီ။
အန္န ပါနံ မနုညမ္ပိ၊ ခေဠ တိန္တ မဓောပရိ၊
ဒန္တေဟိ ပိသိတံ သွာန၊ ဝမထူဝ ဇိဂုစ္ဆိတံ။
ယာဝတာယု ¶ အဓောတေဝါ၊ မာသယေ ဂိလိတံ ဌိတံ၊
ကိမိကူလ သမာကိဏ္ဏေ၊ တဟိမေဝါ သိတာသိတံ။
ဧတံ ဥဒရိယံ နာမ၊ တမှာ ပက္ကာသယံ ဂတံ၊
ဒိနစ္စယေ ကရီသန္တံ၊ သာ သယံ တံဒွယမ္ပိ ဓီ။
ပကာသေတွာ ¶ ပဝေသေတိ၊ အန္နပါနံ မဟာရဟံ၊
ပဋိစ္ဆန္နော နိဟရတိ၊ တမေဝ န္တော ဌိတံ ဇနော။
ပဝေသေ တံ ပရိဝတော၊
နိဟရေကော ရဟော လိနော၊
မနုညံဝ ပဝီသန္တေ၊
နိက္ခမန္တေ ဇိဂုစ္ဆိတံ။
ဇေဂုစ္ဆ ¶ ပဋိကုလျာနိ၊ မံသနှာရု တစဋ္ဌိနိ၊
နပိယာနိ န တုဋ္ဌာနိ၊ နေဝဣတ္ထီ နပူပိသော။
ဟတ္ထ ပါဒ မုခါဒီနိ၊
နတ္ထညာနိ ဇိဂုစ္ဆိတာ၊
တတ္ထာ ကုမာရိကာ ကညာ၊
မောဟေန အတ္ထိသညိတာ။
ပစ္စေကံ ¶ ဝိနိဘုတ္တေသ၊ ကေသ လောမ နခါဒိသု၊
နတ္ထိကညာ ကုမာရီဝါ၊ သမ္ပိဏ္ဍိတေသု သာ ကုတော။
အာကာသောယေဝ ¶ ကာယာင်္ချော၊
တစာဒိ ပရိဝါရိတော၊
တထာသီသံ မုခံဟတ္ထော၊
ပါဒေါရု ကဋိအာဒယော။
ထမ္ဘာဒီသွိဝ ဂေဟောတိ၊
ပိဏ္ဍိတေ သွေသု သမ္မုတိ၊
ကာယောတိ ဣတ္ထိပေါသောတိ၊
သံမုဠှော တာယရဇ္ဇတိ။
သန္တံ ¶ စိန္တေယျ နာသန္တံ၊ သန္တံ စိန္တယတော သုခံ၊
အသန္တံ အနုစိန္တေန္တော၊ နာနာဒုက္ခေဟိ တပ္ပတိ။
ဇဝတျာ ဝိဇ္ဇမာနေဝ၊ နာဝိဇ္ဇာ ဝိဇ္ဇမာနကေ၊
တသ္မာတံနာမကော မောဟော၊ တဏှာပိစ တဒနွိတာ။
ပုံကာယောဝါထီကာယောဝါ ¶ ၊ မလာသုစိဇိဂုစ္ဆိတော၊
တဿမံ နတ္ထိဂါရယှံ၊ ယွာမလမ္ပိ မလံကရေ။
နတ္ထိ ¶ ကာယသမောဝေရီ၊
မဟာနတ္ထကရော စီရံ၊
နတ္ထိ ကာယသမော ဝဉ္စော၊
အသုဘောဝ သုဘာယတေ။
ထီပုံ သပရကာယောတိ၊ ပဿတိပိ နပဿတိ၊
ဇေဂုစ္ဆ ပဋိကုလျောတိ၊ သမ္မာ ပဿတိ ပဿတိ။
သုဘောသုဘောတိ ¶ မညန္တာ၊
ဓီတိ ဓီတိ ဇိနေရိတေ၊
လောကာလောကာ နဓီယေသံ၊
ဘဝါ ဘဝါ ဝစာရိနော။
ဘိယျောဘိယျောဝ ရာဂဂ္ဂိ၊
သုဘောသုဘောတိပဿတော၊
မန္ဒောမန္ဒောဝ သောအဂ္ဂိ၊
ဓီဝဓီဝဝိပဿတော။
ဗဟုဿုတောပိ ¶ ဗာလောဝ၊ အသုဘေ သုဘမညကော၊
အသုဘောတိ ဝိပဿန္တော၊ အပ္ပဿုတောပိပဏ္ဍိတော။
ယောစ သိပ္ပာနိ ဇာနေယျ၊ သတာနိ သဟဿာနိပိ၊
ကာယေကဇာနနံ သေယျော၊ ယဉ္စေ အည ဝိဇာနံနံ။
ကာယမေကမ္ပိ ¶ နညာမိ၊ ဗုဒ္ဓါလဒ္ဓနယော အပိ၊
သုတာစ ပဏ္ဍိတာတျမှာ၊ ယုတ္တောယေဝါ တိလဇ္ဇိတုံ။
သုဘတောယေဝ မညာမိ၊ ဧဝံ ဇိဂုစ္ဆိတမ္ပိနံ၊
မဉ္စ ဉေ ပဏ္ဍိတော တျာဟု၊ အလမေဝါတိလဇ္ဇိတုံ။
ကာယေ ¶ အသုဘသညံယော၊ နလဘာမိ ကဒါစိပိ၊
သုလဒ္ဓ သုဂတော ဝါဒေါ၊ သွာရဟောဝါတိလဇ္ဇိတုံ။
ကာယေန သံသရန္တောပိ၊ တဒါကာရံ ယထာတထံ၊
ဘဝေဘဝေ အဇာနန္တော၊ မမာယိတွာဝ တံ စဇိံ။
ကာယေန ¶ သံသရန္တောပိ၊ နညာ ကာယ ဇိဂုစ္စတံ၊
နိစ္စုပါဒါ မမာယန္တော၊ ပိယာယိတွာဝ တံ စဇိံ။
ကုဘာရံ သာရသညာယ၊ ပိယာယိတွာဝ ဟိံသကံ၊
အနန္တဒုက္ခ မာပါဒိံ၊ ဝိပလ္လာသော ဘဝေဘဝေ။
မဟာဇာနီယ ¶ ပတ္တောတိ၊ သံဝေဇေတွာ သကံမနံ၊
ဒိရောကတ ဇိနောဝါဒေါ၊ အနိဝတ္တိတ ဝီရိယော။
အဒိဋ္ဌပုဗ္ဗ မေတဿ၊ တထာကာရံဝ ပဿတု၊
ကိစ္စ မည မုပေက္ခာယ၊ သံသာရ ဘယ ဘီရုကော။
ယဉှိကိစ္စံ ¶ အပဝိဋ္ဌံ၊ အကိစ္စံ ပန ကယိရာ၊
ဥန္နဠာနံ ပမတ္တာနံ၊ တေသံ ဝဍ္ဎန္တိ အာသဝါ။
ယေသဉ္စ သုသမာရဒ္ဓါ၊ နိစ္စံ ကာယဂတာ သတိ၊
အကိစ္စံ တေ နသေဝန္တိ၊ ကိစ္စေ သာတတ ကာရိနော၊
သတာနံ သမ္ပဇာနာနံ၊ အတ္ထံ ဂစ္ဆန္တိ အာသဝါတိ။
ထောမေန္တာ ¶ သောဏ္ဏံ ကာယောရ၊
မုခက္ခိ တျာဒိနာ ဣမံ၊
ရတ္တေ မုဋ္ဌေ ကရောန္တေတေ၊
အညေဇနေ သယံဝိယ။
ကာယသောဘျ ပကာသေတာ၊
ဝါစာ ဝေ မာရဒေသနာ၊
တဒသောဘျ ပကာသေတာ၊
ဝါစာ သမ္မုဒ္ဓ ဒေသနာ။
အသုဘောတိ ¶ ဇိနုဒ္ဒိဋ္ဌံ၊ ကာယံ သုဘောတိ ဂါဟိနော၊
သံမုဠှာတေ န မုစ္စန္တိ၊ ဘဝါ ဗုဒ္ဓ ဝိရောဓိနော။
အသုဘောတိ ဇိနုဒ္ဒိဋ္ဌံ၊ ကာယံ တထေဝ ဂါဟိနော၊
ပဏ္ဍိတာ တေဝ မုစ္စန္တိ၊ ဘဝါ ဗုဒ္ဓမတာနုဂါ။
သောဓေန္တေလင်္ကရောန္တေဝ ¶ ၊ မလာသဝန္တိကာယတော၊
အလံ ကာယဝိသောဓေန၊ ဗာလောဝ တံ ဂရုံ ကရော။
ဂေါပေန္တေဝ အရောဂါယ၊
ကာယော ရောဂေနသံဝသေ၊
ဂါယဂုတ္တံ မုဓာယေဝ၊
စိတ္တဂုတ္တံဝ သာတ္ထကံ။
စန္ဒနာဒိ ¶ ဝိလိတ္တောပိ၊
မုတ္တောမဏိ ဝိဘူသိတော၊
တံသဘာဝေါဝ သောကာယော၊
ဝိဿဝန္တော တတောတတော။
ပတိတေစ ¶ အပတိတေ၊
ဝိသေသော နတ္ထိ ကိဉ္စိပိ၊
ကာယော စေမနုညော တမှာ၊
ပတိတောပိ တထာသိယာ။
ကာယော မနုဿဇာတီနံ၊ တိရစ္ဆာန တ္တဘာဝတော၊
ဇေဂုစ္ဆိတ တရောဟောတိ၊ ဒုဗ္ဗိသောဓောစ ဒုဗ္ဘရော။
ယထာဇာတေန ¶ ကာယေန၊ သက္ကာ ဝိဟရိတုံ နစ၊
ပစ္စဟံ သောဓနီယောစ၊ ဓောဝန မဇ္ဇနာဒိဘိ။
ရတ္တံ ပါတုံ ဆဝိံ ဆေတွာ၊ သက္ကာ ဍံသာဒယောပိနံ၊
ဆေတွာ မံသ ဋ္ဌိကာဒီနိ၊ ဓီရော နာလမ္ဗိတုံ ကထံ။
လဂ္ဂန္တိ ¶ ဆဝိမတ္တေ ယေ၊ မက္ခိကာ သေဒပါ ယထာ၊
ထီပုံ မုခါဒိ သညာယ၊ တေ ပမုဠှာ မဟာတပါ။
စာရီ အဂေါစရေ ကာမေ၊ လဂ္ဂါလေပေ ကပီရိဝ၊
ဗဟူဟိ ပီဠိတာ ရီဟိ၊ မရန္တိ အတိဒုက္ခိနော။
ရာဂါရိံ ¶ ဒုဇ္ဇယံ ဇေယျုံ၊ ဇယဘုမ္မာသုဘေ စရာ၊
သီတာနိဿိတ လဋုကီ၊ သေနကံဝ မဟဗ္ဗလံ။
ကာယဓိ ¶ ဂ္ဂေါစရော ဝေသော၊
ဇယဘူဗုဒ္ဓ ဒုတ္တိယာ၊
ဧတ္ထေဝ ဂေါစရာ ဟောန္တု၊
မာဘော ကာမေ ဇယတ္ထိကာ။
ကာယာ ¶ သုဘံ ဝိပဿန္တု၊ ဒိဗ္ဗ က္ခိနာပျ ပဿိယံ၊
အာယတိံ မဂ္ဂလာဘာယ၊ တံ ဒဿနံ ဘဝိဿတိ။
ဓီစက္ခုနာဝ ဓိက္ကာယံ၊ ပဿေ န မံသစက္ခုနာ၊
ဥမ္မိလိတွာဝ ဓီစက္ခုံ၊ ဝိဝေကဋ္ဌော ဥဒိက္ခတု။
ပဉ္စင်္ဂါနိ ¶ ယထာ ကုမ္မော၊ စက္ခာဒီနိ နိဂူဟယေ၊
ဝေရီ လဘတု မောကာသံ၊ ပဉ္စဒွါရာ အရက္ခိတာ။
စက္ခုရူပေန ¶ သံဝါသာ၊ ရာဂပုတ္တံ ဝိဇာယတိ၊
မဟာနတ္ထကရော သောစ၊ သံဝါသံ တေန ဝါရယေ။
ရူပါဒီသုသဉ္ဇန္တီတိ၊ သတ္တာ ဣတ္ထျာဒိ သညာယ၊
နတွေဝ ခန္ဓသညာယ၊ တံသညိဟိ ဝိရာဂိနော။
သကာယေပရကာယေစ ¶ ၊
အာသံ ဆိန္ဒေယျ ပဏ္ဍိတော၊
အာသံ ဆေတွာ သုခံသေတိ၊
အာသာယ ဒုက္ခိတာ ပဇာ။
ဒဿနေ သဝနေ ကာယ၊
သံသဂ္ဂေ မေထုနေပိစ၊
နိရာသော သုခိတော ဟောတိ၊
အနိရာသောတိဒုက္ခိတော။
ဗဟီဝ ¶ သောဓိတံ ယဿ၊ န ဝန္တော ဇေဂုစ္ဆ ပုဉ္ဇကံ၊
တံကာယံ အသုတံဇာန၊ တနုရာဂေါ သိယာတ္တနိ။
ကာယေဝိရာဂ မိစ္ဆန္တော၊ နုပဿေယျ တဒန္တရံ၊
အန္တောဒဿီ အတပ္ပန္တော၊ လဘေ သံသာရမောစနံ။
သတ္တာ ¶ သတ္တာ ဗဟိဋ္ဌေဝါ၊ သာရံသာရံ မမာယိနော၊
သန္တောသန္တော ဝိပဿန္တော၊ နဝါနဝါယတိံဘဝေ။
အလံ ¶ အလံ ကတွာ ကာယံ၊ မလာမလာသဝန္တိတော၊
သောဘံ သောဘံ နယေ ဌာနံ၊ မနံ မနံ ပျလံ ကတံ။
သံသဂ္ဂဇာတဿ ဘဝန္တိ သ္နေဟာ၊
သ္နေဟာနွယံ ဒုက္ခ မိဒံ ပဟောတိ၊
အာဒိနဝံ သ္နေဟဇံပေက္ခ မာနော၊
ဧကော စရေခဂ္ဂ ဝိသာဏ ကပ္ပော။
ခိဋ္ဋာ ¶ ရတိ ဟောတိ သဟာယ မဇ္ဈေ၊
ပုတ္တေသုစ ဝိပုလံ ဟောတိ ပေမံ၊
ပိယဝိပ္ပယောဂံ ဝိဇိဂုစ္ဆမာနော၊
ဧကော စရေ ခဂ္ဂဝိသာဏ ကပ္ပော။
ဝံသော ¶ ဝိသာလောယထာ ဝိသတ္တော၊
ပုတ္တေသု ဒါရေသုစ ယာအပေက္ခာ၊
ဝံသကဠိရောဝ အသဇ္ဇမာနော၊
ဧကော စရေ ခဂ္ဂဝိသာဏ ကပ္ပော။
ကာမံ ¶ ကာမယ မာနဿ၊ တဿစေတံ သမိဇ္ဈတိ၊
အဒ္ဓါ ပီတိမနော ဟောတိ၊ မစ္စော လဒ္ဓါ ယဒိစ္ဆတိ။
တဿစေ ကာမယာနဿ၊ ဆန္ဒဇာတဿ ဇန္တုနော၊
တေကာမာ ပရိဟာယန္တိ၊ သလ္လဝိဒ္ဓါဝ ရုပ္ပတိ။
ယောကာမေ ¶ ပရိဝဇ္ဇေတိ၊ သပ္ပဿေဝ ပဒါ သိရော၊
သောမံ ဝိသတ္တိကံ လောကေ၊ သတော သမတိဝတ္တတိ။
ခေတ္တံ ဝတ္ထုံ တဠာကံဝါ၊ ဂဝဿံ ဒါသပေါရိသံ၊
ထိယော ဗန္ဓူ ပုထုကာမေ၊ ယောနရော အနုဂိဇ္ဈတိ။
အဗလာ နံ ဗလီယန္တိ၊ မဒ္ဒန္တေနံ ပရိဿယာ၊
တတောနံ ဒုက္ခမနွေတိ၊ နာဝံ ဘိန္န မိဝေါဒကံ။
တသ္မာဇန္တု ¶ သဒါသတော၊ ကာမာနိ ပရိဝဇ္ဇယေ၊
တေ ပဟာယ တရေ ဩဃံ၊ နာဝံ သိတွာဝ ပါရဂူ။
ကာမတော ¶ ဇာယတေ သောကော၊
ကာမတော ဇာယတေ ဘယံ၊
ကာမတော ဝိပ္ပမုတ္တဿ၊
နတ္ထိ သောကော ကုတော ဘယံ။
သုဘာနုပဿိံ ¶ ဝိဟရန္တံ၊ ဣန္ဒြိယေသု အသံဝုတံ၊
ဘောဇနမှိ အမတ္တညုံ၊ ကုသိတံ ဟီန ဝီရိယံ၊
တံဝေ ပသဟတိ မာရော၊ ဝါတော ရုက္ခံဝ ဒုဗ္ဗလံ။
အသုဘာနုပဿိံ ဝိဟရန္တံ၊ ဣန္ဒြိယေသု သုသံဝုတံ၊
ဘောဇနမှိစ မတ္တညုံ၊ သဒ္ဓံ အာရဒ္ဓ ဝီရိယံ၊
တံဝေ နပ္ပသဟတိ မာရော၊ ဝါတော သေလံဝ ပဗ္ဗတံ။
ယထာ ¶ အဂါရံ ဒုစ္ဆန္နံ၊ ဝုဋ္ဌိ သမတိ ဝိဇ္ဈတိ၊
ဧဝံ အဘာဝိတံ စိတ္တံ၊ ရာဂေါ သမတိဝိဇ္ဈတိ။
တဒေဝံ ¶ ပစ္စဝေက္ခန္တိ၊ ယေ တေ ရာဂဂ္ဂိဒုဗ္ဗလာ၊
ပတိဋ္ဌံ သာသနေ လဒ္ဓါ၊ နုက္ကဏ္ဌာ နလသာ ရတာ။
ဗုဒ္ဓါဝါဒံ ¶ လဘိတွာပိ၊ နာဟံသက္ကာ နဝေါမှိတိ၊
ဒေါသံ တဏှံ အနာသေန္တော၊ ပရိပက္ကော ကဒါဘဝေ၊
ပုညကမ္မံ အကရောန္တော၊ ပရဝဇ္ဇံ အခမန္တော။
ကာယ သင်္ခါရိကာ တဏှာ၊ နီစာနီစကရာစ သာ၊
စိတ္တသင်္ခါရိကာ သဒ္ဓါ၊ ဥစ္စာ ဥစ္စကရာစ သာ။
ဒဿနီယေ ¶ ရတာ တဏှာ၊ သဒ္ဓါသွာစာရဘတ္တိကာ၊
ဝိကိဏ္ဏစာရိကာ တဏှာ၊ သဒ္ဓါ ဝိသဒစာရိနီ။
မနောကိလေသိကာ တဏှာ၊ သာနုဂါနန္တ ဒုက္ခဒါ၊
စိတ္တပ္ပသာဒိကာ သဒ္ဓါ၊ အတ္တာနုဂ သုခါဝဟာ။
တဏှာ ¶ သဒ္ဓါန မိစ္စေဝံ၊ ဝိသေသံ ဇာန တတွတော၊
ဉတွာ တဏှံ ဝိနာသေယျ၊ သဒ္ဓံဘာဝေယျ စေတသိ။
ဥစ္ဆုကံ ယန္တပတ္တမ္ပိ၊ သဉ္စုဏ္ဏိတမ္ပိ စန္ဒနံ၊
မဓုရံဝ သုဂန္ဓံဝ၊ မေတ္တိဝ ဟိံသိတောပိ သံ။
အတ္တစ္ဆေဒမ္ပိ ¶ ဝါသေတိ၊ သုဂန္ဓေနိဝ စန္ဒနံ၊
သန္တော မေတ္တာသုဂန္ဓေန၊ အတ္တဟိံသမ္ပိ ဝါသယေ။
ကဒါစိပိ န ဒုဂ္ဂန္ဓိ၊ သုက္ခံ စုဏ္ဏမ္ပိ စန္ဒနံ၊
တထေဝ ဒုက္ခပတ္တောပိ၊ န သန္တော ပါပကာရကော။
ခမေ ¶ ဝဇ္ဇံ ကရေယျတ္ထံ၊ ဗုဒ္ဓခန္တိ မနုဿရံ၊
မေတ္တာတိန္တေန ဝေရီပိ၊ နုပနာဟော သိယတ္တနိ။
နဂစ္ဆတိ တ မက္ကောသော၊ မမေဝါ နတ္ထကာရကော၊
ဣတိ ဉတွာဝ သပ္ပညော၊ နေဝ က္ကောသေယျ ကိဉ္စနံ။
အက္ကောသော ¶ မံ နအာဂစ္ဆေ၊
တဿေဝါ နတ္ထကာရကော၊
ဣတိ ဉတွာ တိတိက္ခေယျ၊
န ပစ္စက္ကောသနံ ကရေ။
အက္ကောသက နယံ ဂဏှိ၊
ပစ္စက္ကောသော န သော ဝရော၊
ဗုဓော တံ နာနုဂါဟေယျ၊
မာ သောဝ ပါပိယော ဘဝေ။
တဏှာဝိဇ္ဇာစ ¶ မူလာဒွေ၊ သံသာရဝိသပါဒပေ၊
သဗ္ဘတ္တိ သဒ္ဓမ္မဿုတံ၊ ဒွေယေဝ မဓုရာ ဖလာ။
သောဓေ စိတ္တ မုပက္ကမ္မ၊ သုဒ္ဓံ ဥပက္ကမေန တံ၊
ဝဟေ သုခံ အသင်္ခေယျံ၊ ဒုက္ခံ အသောဓိတံ မလိ။
သောဓိတံ ¶ သုဂတိံနေတိ၊ ဒုဂ္ဂတိံဝ အသောဓိတံ၊
စိတ္တံ သောဓေတု မာလိမ္ပေ၊ ရာဂဒေါသ မလေဟိ တံ။
ဒေါသေဇာ နာသိတာ ယေန၊
သာသနေဝတ္ထိ သောနယော၊
နတ္ထညတ္ထ တမာဒါယ၊
ဗုဓော နာသေတု တံဒွယံ။
ရနကုနဝါသိ ¶ ကတာဝါသေ၊ ဒဂုံစေတီ ပုရတ္ထိမေ၊
ဝသတာ အဂ္ဂဓမ္မေန၊ ထေရေန ရစိတော အယန္တိ။