အည > ပကိဏ္ဏက-ဂန္ထ-သင်္ဂဟော

တတ္ထ တေသံ ဝတ္ထူန မုပ္ပတ္တိယော ဒွိဓာ ဘဝန္တိ ဇမ္ဗုဒီပေ သီဟဠဒီပေစာတိ၊ တတ္ထ ဇမ္ဗုဒီပေ တာဠီသ၊ သီဟဠဒီပေ တေသဋ္ဌိ၊ တေသု တာဝ ဇမ္ဗုဒီပုပ္ပတ္တိဝတ္ထူနိ အာဝိ ဘဝိဿန္တိ၊ တတောပိ ဓမ္မသောဏ္ဍကဿ ဝတ္ထု အာဒိ၊ ကထံ၊ အမှာကံ ကိရ ဘဂဝတော ပုဗ္ဗေ ဣမသ္မိံယေဝ ဘဒ္ဒကပ္ပေ ကဿပေါနာမ သတ္ထာ လောကေ ဥဒပါဒိ၊ တဿ ခေါ ပန ဘဂဝတော သာသနန္တရဓာနတော န စိရေနေဝ ကာလေန အမှာကံ ဗောဓိသတ္တော ဗာရာဏသီရညော အဂ္ဂမဟေသိယာ ကုစ္ဆိသ္မိံ နိဗ္ဗတ္တိ၊ တဿု ပ္ပတ္တိ ကာလသမနန္တရမေဝ သဗ္ဗသတ္တာနံ မနသိ ဓမ္မသညာ ဥဒပါဒိ၊ တသ္မာဿ ဓမ္မသောဏ္ဍောတိနာမ မကံသု၊ သော ပနေသော ကုမာရော မဟန္တေန ပရိဝါရေန ဝဍ္ဎေန္တော သဗ္ဗသိပ္ပေသု နိပ္ဖတ္တိံ ပတွာ ပိတရာ ဥပရဇ္ဇေန ပူဇိတော ဟုတွာ ဒါနာဒယော ဒသကုသလကမ္မပထေ ပူရေန္တော ပိတုအစ္စယေနာမစ္စေဟိ ¶ ရဇ္ဇေနာဘိသိဉ္စိတော အဟောသိ၊ သော ပနေသ ဓမ္မသောဏ္ဍကမဟာရာဇာ ဒေဝနဂရသဒိသေ ဗာရာဏသီနဂရေ စက္ကဝတ္တိသဒိသံ ဗာရာဏသီရဇ္ဇံ ကာရေန္တော မာသဒ္ဓမာသစ္စယေန သိရိသယနဂတော ဧဝံ စိန္တေသိ၊ မမေဝံ ရဇ္ဇသိရိမနုဘဝနံ န သောဘတိ ဓမ္မဝိယောဂေန၊ ဒိဝါကရ ဝိရဟိတော နဘော ဝိယာတိအာဒိနာ နာနာကာရဏံ စိန္တေသိ၊ တေနေတ္ထ။

သမိဒ္ဓိပတ္တောသ္မိ မဟိဒ္ဓိကောဟံ၊

မာ ပဇ္ဇိတုံ ယုတ္တရူပန္တိ ဉတွာ။

န သောဘတိ ယထာကာသံ၊ ဇလံ ဓာမပတိံဝိနာ၊

ရဇ္ဇကရဏံ တထာ မယှံ၊ ဝိနာ ဓမ္မာ န သောဘတိ။

န သောဘတိ ဟထာ ရတ္တိ၊ နိသာနာထံ ဝိနာ သဒါ၊

ရဇ္ဇကရဏံ တထာ မယှံ၊ ဝိနာ ဓမ္မာ န သောဘတိ။

အလင်္ကတောပိ ¶ စေ ဟတ္ထီ၊ ဝိနာ ဒါဌာ န သောဘတိ၊

ရဇ္ဇကရဏံ တထာ မယှံ၊ ဝိနာ ဓမ္မာ န သောဘတိ။

ဓမ္မမေဝ သုဏိဿာမိ၊ ဓမ္မေ မေ ရမတီ မနော၊

န ဟိ ဓမ္မာ ပရံ အတ္ထိ၊ ဓမ္မမူလံ တိသမ္ပဒန္တိ။

ဧဝံ စိန္တေတွာ ပါတောဝ သိရိဂဗ္ဘာ နိက္ခမ္မ သုသဇ္ဇိတေ သမုဿိတသေတစ္ဆတ္တေ ရာဇပလ္လေင်္ကေ အမစ္စဂဏ ပရိဝုတော နိသီဒိ ဒေဝရာဇာဝိယ ဝိရောစမာနော၊ နိသိန္နော ပန ရာဇာ အမစ္စေ ဧဝမာဟ၊ ယော ပနေတ္ထ ဘောန္တော ဗုဒ္ဓဘာသိတေသု ဓမ္မေသု ကိဉ္စိဓမ္မံ ဇာနာတိ၊ သော ဘာသတု၊ သောတုမိစ္ဆာမိဓမ္မန္တိ၊ တေ သဗ္ဗေပိ မယံ ဒေဝ န ဇာနာမာတိ အာဟံသု၊ တံ သုတွာ အ န တ္တ မ နော ရာဇာ ဧဝံ စိန္တေသိ၊ ယန္နူနာဟံ ဟတ္ထိက္ခန္ဓေ သဟဿံ ဌပေတွာ နဂရေ ဘေရိံစရာပေယျံ၊ ယံ အပ္ပေဝနာမ ကောစိ ဓနလောဘေန စာတုပ္ပဒိကာယပိ ဂါထာယ ဓမ္မံ ဒေသေယျ။ တံ မေ ဒီဃရတ္တံ ဟိတာယ သုခါယ ဘဝိဿတီတိ၊ တတော သော တထာ ကတွာပိ ဓမ္မဒေသကံ အလဘန္တော ပုန ဒွိသဟဿံ တိစတုပဉ္စသဟဿန္တိယာဝကောဋိပ္ပကောဋိံဒမ္မီတိ၊ တတော ဂါမ နိဂမ ဇနပဒေ၊ တတော သေဋ္ဌိဋ္ဌာနံ သေနာပတိ ဥပရာဇဋ္ဌာနာ ဒယောပိ၊ ပုန သေတစ္ဆတ္တံ ဒမ္မိ၊ ရာဇဝေသံ ပဟာယ အတ္တာနံ ဒါသံ သာဝေတွာ ဓမ္မဒေသေန္တဿ ဒမ္မိတိ ဝတွာ ဘေရိ စရာပေတွာပိ ဓမ္မ ဒေသကမလဘိတွာ သံဝိဂ္ဂေါ ¶ ကိမ္မေ ဓမ္မဝိယောဂေန ရဇ္ဇေနာတိ အမစ္စာနံ ရဇ္ဇံ နီယျာတေတွာ သဒ္ဓမ္မဂဝေသကော ဓမ္မသောဏ္ဍကမဟာရာဇာ မဟာဝနံ ပါဝိသိ ဂါမ နိဂမ ရာဇဓာနိ ပရမ္ပရာယ၊ တေနေတ္ထ။

ရဇ္ဇံ နီယျာတယိတွာန၊ အမစ္စာနံ မနောရမံ၊

ဝနံ ပါဝိသိ သော ရာဇာ၊ ဂဝေသံ ဓမ္မမုတ္တမန္တိ။

မဟာဝနံ ပဝိဋ္ဌက္ခဏေ ပန မဟာသတ္တဿ ပုညတေဇေန သက္ကဿာသနံ ဥဏှာကာရံ ဒဿေသိ၊ အထ ဒေဝရာဇာ စိန္တေသိ အကာမံ မေ ပဏ္ဍုကမ္ဗလ သိလာသနံ ဥဏှမဟောသိ၊ ကိန္နုခေါ ကာရဏန္တိ လောကံ ဩလောကေန္တော သက္ကော ဒေဝရာဇာ ဓမ္မသောဏ္ဍက မဟာရာဇာနံ သကလဇမ္ဗုဒီပံ ဝိစိနိတွာ သဒ္ဓမ္မဇ္ဈေသကံ အလဘိတွာ ဝနံ ပဝိဋ္ဌဘာဝံ အဒ္ဒသ၊ ဓမ္မသောဏ္ဍကမဟာရာဇာ သဒ္ဓမ္မတ္ထာယ ရဇ္ဇ ဓန ဗန္ဓု ဇီဝိတမ္ပိ ပဟာယ အရညံ ပဝိဋ္ဌော၊ န သော ဝတာယံ ယောဝါ သောဝါ သတ္တော၊ ဣမသ္မိံယေဝ ကပ္ပေ ဗုဒ္ဓါ ဘဝိဿတိ၊ ဗုဒ္ဓဗောဓိသတ္တော စာယံ အဇ္ဇေဝ မဟာရညံ ပဝိဋ္ဌော သဒ္ဓမ္မံ အလဒ္ဓါ မဟာဒုက္ခံ ပါပုဏေယျ၊ န စေတံ ယုတ္တံ၊ အဇ္ဇ မယာ တတ္ထ ဂန္ထဗ္ဗံ ဓမ္မာမတရသေန တမဘိသိဉ္စိတွာ ရဇ္ဇေ ပဟိဋ္ဌာပေတုန္တိ စိန္တေတွာ အတ္တဘာဝံ ဝိဇဟိတွာ ဘယာနကံ မဟန္တံ ရက္ခသဝေသံ နိမ္မိဏိတွာ မဟာသတ္တာဘိမုခေါ အဝိဒူရေ အတ္တာနံ ဒဿေသိ၊ တေနေတ္ထ။

ဗျဂ္ဃစ္ဆသီဟမဟိသော ¶ ရဂဟတ္ထိဒီပိ၊

ဣတောစိတော ဝိဗ္ဘမိ ဓမ္မကာမော။

ဒိတ္တဂ္ဂိသင်္ကာသ ဝိသာလနေတ္တံ၊

အထ မဟာသတ္တော အတ္တနော အဝိဒူရေ ဌိတံ ရက္ခသံ အဒ္ဒက္ခိ၊ တံ ဒိသွာနာဿ ဘယံဝါ ဆမ္ဘိတတ္တံဝါ စိတ္ထုတြာသမတ္တံဝါ နာဟောသိ၊ ကိမတြ စိန္တေသိ၊ အပိနာမ ဧဝရူပေါ ပိရက္ခသော ဓမ္မံ ¶ ဇာနေယျ၊ ယန္နူနာဟံ တဿ သန္တိကေ ဓမ္မံ သုဏိဿာမိ၊ တမ္မေ ဒီဃရတ္တံ ဟိတာယ သုခါယ ဘဝိဿတီတိ စိန္တေသိ။ စိန္တေတွာ စပန အဇ္ဇ မယာ တမုပသင်္ကမ္မ ပုစ္ဆိတံ ဝဋ္ဋတီတိ ဂန္တွာ ရက္ခသေန သဒ္ဓိံ သလ္လပန္တော အာဟ။

အသ္မိံ ဝနသ္မိံ တရုသဏ္ဍ မဏ္ဍိတေ၊

ဒေသေဟိ ဓမ္မံ သုဂတ ပ္ပသတ္ထန္တိ။

ဟန္တွာ ပိပါသံ ရုဓိရံ ပိဝိတွာ၊

ဝတ္တုံ န သက္ကောမိ ခုဒါပရေတောတိ။

ဧဝံ ဝုတ္တေ သက္ကော ဒေဝါနမိန္ဒော သာဓု မဟာရာဇ အဟမေဝ ယုတ္တံ ဇာနာမီတိ ဝတွာ တဿာဝိဒူရေ တိဂါဝုတုဗ္ဗေဓံ အဉ္ဇနဝဏ္ဏံ မဟန္တံ ပဗ္ဗတံ မာပေတွာ မဟာရာဇ ဣမမာရုယှ ပဗ္ဗတမုဒ္ဓနိဋ္ဌိတော မမ မုခေ ပတတု၊ အဟံ ပတန္ထဿ တေ ဓမ္မံ ဒေသေဿာမိ၊ ဧဝံ သန္တေ တုယှံ ဓမ္မပဋိလာဘော၊ မယှံစ မံသပဋိလာဘော ဘဝိဿတီတိ။ တံ သုတွာ မဟာသတ္တော အနမတဂ္ဂေ သံသာရေ သံသရတော မေ သီဟဗျဂ္ဃစ္ဆမစ္ဆကစ္ဆပဝိဟင်္ဂါဒီနံ ဘက္ခဘူတဿ ဇာတီသု ပမာဏံ နတ္တိ၊ အဇ္ဇ မယာ သမ္ဗုဒ္ဓဿ ဓမ္မတ္ထာယ ဇီဝိတံ ပရိစ္စဇိတုံ ဝဋ္ဋတီတိ စိန္တေတွာ ဧဝမာဟ။

ပပ္ပောန္တိ ဒုက္ခံ ဇနတာ အနေကာ၊

အတ္ထာယ နာဟောသိ အဟောသိ တုစ္ဆံ။

တွမဒိန္နဟာရီ တိစ ပါရဒါရိကော၊

အတ္ထာယ နာဟောသိ အဟောသိ တုစ္ဆံ၊

အတ္ထာယ နာဟောသိ အဟောသိ တုစ္ဆံ။

ဗျဂ္ဃစ္ဆမစ္ဆော ရဂကုစ္ဆိယဉှိ၊

အတ္ထာယ နာဟောသိ အဟောသိ တုစ္ဆံ။

ဧဝဉ္စ ပန ဝတွာ မဟာသတ္တော ပဗ္ဗတမာရုယှ ဌိတော အာဟ၊ အဟမဇ္ဇ ရဇ္ဇေန သဒ္ဓိံ ဇီဝိတဉ္စ သရီရမံသဉ္စ သဒ္ဓမ္မတ္ထာယ ဒမ္မီတိ သောမနဿပ္ပတ္တော ဟုတွာ သမ္မ ဓမ္မံ ဒေသေဟီတိ ဝတွာ တသ္မိံ မဟာဒါဌံ မဟာမုခံ ဝိဝရိတွာ ဌိတေ တဿာဘိမုခေါ ဥပပတိ။ အထ သက္ကော ဒေဝါနမိန္ဒော သောမနဿော အစ္ဆရိယပ္ပတ္တော အတ္တဘာဝံ ဝိဇဟိတွာ အလင်္ကတဒိဗ္ဗတ္တဘာဝံ မာပေတွာ အာကာသေ ¶ တရုဏသုရိယော ဝိယ ဩဘာသမာနော အာကာသတော ပတန္တံ မဟာသတ္တံ ဥဘောဟိ ဟတ္ထေဟိ ဒဠှံ ပတိဂဏှိတွာ ဒေဝလောကံ နေတွာ ပဏ္ဍုကမ္ဗလ သိလာသနေ နိသီဒါပေတွာ ဒိဗ္ဗမယေဟိ ဂန္ဓမာလာဒီဟိ ပူဇေတွာ သယံ ဓမ္မံ သုတွာ ပသန္နော ပသန္နာကာရံ ကတွာ ကဿပဒသဗလေန ဒေသိတာယ အနိစ္စာဒိပရိဒီပိကာယ။

အနိစ္စာဝ တ သင်္ခါရာ၊ ဥပ္ပာဒဝယဓမ္မိနော၊

ဥပ္ပဇ္ဇိတွာ နိရုဇ္ဈန္တိ၊ တေသံ ဝူပသမော သုခေါတိ။

ဂါထာယ ဓမ္မဒေသနေန တဿ မနောရထံ မတ္ထကံ ပါပေတွာ ဒေဝလောကေ မဟန္တံ သိရိဝိဘဝံ ဒဿေတွာ အာနေတွာ သကရဇ္ဇေယေဝ ပတိဋ္ဌာပေတွာ အပ္ပမတ္တော ဟောတိ မဟာရာဇာတိ ဩဝဒိတွာ ဒေဝလောကမေဝ အဂမာသီတိ။

ဣတိ အမိတသိရိံ ဝါ ဇီဝိတံ ဝါပိ သန္တော၊

န သုမရိယ ပသတ္ထံ ဓမ္မမေဝါ စရန္တိ၊

တနုတရ ဝိဘဝါနံ အပ္ပမာယူနမမ္ဘော၊

ဣဟ ကုသလပမာဒေါ ကော နု တုမှာဒိသာနန္တိ။

၂။ မိဂလုဒ္ဒကဿ ဝတ္ထုမှိ အယမာနုပုဗ္ဗိကထာ

ဣတော ကိရ ဧက တိံသတိမေ ကပ္ပေ သိခီနာမ သမ္မာသမ္ဗုဒ္ဓါ သမတိံသ ပါရမိယော ပူရေတွာ ပရမာတိသမ္ဗောဓိံ ပတွာ သဒေဝကံ လောကံ သံသာရကန္တာရာ ဥတ္တာရေန္တော ဓမ္မရတနဝဿံ ဝဿာပေန္တော ဓမ္မဘေရိံပဟရန္တော ဓမ္မကေတုံ ဥဿာပေန္တော ဧကသ္မိံ သမယေ ဝိဝေက မနုဗြူဟန္တော အရညာယတနံ ပါဝိသိ၊ ¶ ပဝိသိတွာ စပန သုပုပ္ဖိတနာဂပုန္နာဂါဒိနာနာတရုသဏ္ဍမဏ္ဍိတေ သုဖုလ္လသုမနမာလတိပ္ပဘုတိနာနာလတာကုလေ အနေကဝိဓဒိပဒစတုပ္ပဒသင်္ဃနိသေဝိတေ ရမဏီယေ သီတလသိလာတလေ စတုဂ္ဂုဏံ သင်္ဃာဋိံပညပေတွာ နိသီဒိ ဆဗ္ဗဏ္ဏရံသီဟိ ဒိသံ ပူရယန္တော၊ တဒါ တတ္ထ ဒေဝဗြဟ္မနာဂသုပဏ္ဏာဒယော သန္နိပတိတွာ ဒိဗ္ဗမယေဟိ ဂန္ဓမာလာဒီဟိ ဘဂဝန္တံ ပူဇယမာနာ ထောမယမာနာ နမဿမာနာ အဋ္ဌံသု၊ တသ္မိံ ပနသမာဂမေ ဘဂဝါ မဓုရဿရံ နိစ္ဆာရေန္တော ဗြဟ္မဃောသေန စတုသစ္စပဋိသံယုတ္တံ ဓမ္မံ ဒေသေတိ အမတဝဿံ ဝဿာပေန္တောဝိယ။ တဒါ ဧကော မိဂလုဒ္ဒကော ဝနံ ပဝိဋ္ဌော မိဂသူကရေ ဟန္တွာ မံသံ ခါဒန္တော တံ ဌာနံ ပတွာ အဒ္ဒသ ဘဂဝန္တံ ဓမ္မံ ဒေသေန္တံ။ ဒိသွာ ဧကမန္တံ ဌိတော ဓမ္မံ သုတွာ စိတ္တံ ပသာဒေတွာ တတော စုတော ဒေဝလောကေ နိဗ္ဗတ္တိတွာ ဆသု ကာမသဂ္ဂေသု မနုဿေသုစ အပရာပရံ ဣဿရိယံ အနုဘဝန္တော ဣမသ္မိံ ဗုဒ္ဓုပ္ပာဒေ သာဝတ္ထိယံ ကုလဂေဟေ နိဗ္ဗတ္တိတွာ ဝိညုတံ ပတ္တော ဘဂဝတော သာသနေ ပဗ္ဗဇိတွာ ဧကဒိဝသံ ဓမ္မံ ဒေသေန္တဿ ဘဂဝတော စတုသစ္စပတိ သံယုတ္တံ ဓမ္မကထံ သုတွာ စတုပဋိသမ္ဘိဒါဟိ အရဟတ္တံ ပတွာ ဧကဒိဝသံ ဘိက္ခုသင်္ဃမဇ္ဈဂတော အတ္တနော ကတကမ္မပ္ပကာသနေန ပီတိဝါစမုဒါဟရိ။

ဇလန္တော ဒီပရုက္ခောဝ၊ သူရိယောဝ နဘ မုဂ္ဂတော၊

မေရုရာဇာဝ သမ္ဗုဒ္ဓါ၊ ဇနေသဂ္ဂေါ ပတာပဝါ။

ပူရေတွာ ဓမ္မနာဝါယံ၊ သ နာထော သကလံ ပဇံ၊

ပတိဋ္ဌပေန္တော သံသာရ၊ ကန္တာရာ သန္တိဘူမိယံ။

ဓမ္မကေတုံ ¶ သမုဿေန္တော၊ ဟနန္တော ဓမ္မဒုန္ဒုဘိံ၊

သတ္တေ ဒုက္ခာ ပမောစေန္တော၊ ဝသီ တတ္ထ ဇိနော ဝသီ။

ပုန္နာဂနာဂပူဂါဒိ၊ နာနာပါဒပသံကုလံ၊

လတာ လိင်္ဂိတသာခါဟိ၊ သာ မောဒကုသုမာယုတံ။

ကုသုမာ မောဒသမ္မတ္တ၊ ဆပ္ပဒါလိ နိသေဝိတံ၊

နာနာမိဂ ဂဏာကိဏ္ဏံ၊ မယူရဂဏ နစ္စိတံ။

သီတလစ္ဆောဒိကာသာဓု၊ သုပတိတ္ထဇလာသယံ၊

အာသာရ သာရဓာရာဟိ၊ နိဇ္ဈရာသတ သံကုလံ။

ဒေဝါ တတ္ထ သမာဂန္တွာ၊ ပူဇေသုံ ဒွိပဒုတ္တမံ၊

ဒိဗ္ဗေဟိ ဂန္ဓမာလာဟိ၊ နစ္စေဟိ တုရိယေဟိစ။

ဒေဝဒေဝေါ တဒါ ဒေဝ၊ သင်္ဃမဇ္ဈေ နိသီဒိယ၊

စတုသစ္စ မဒေသေသိ၊ နိစ္ဆရံ မဓုရံ ဂိရံ။

တဒါဟံ လုဒ္ဒကော အာသိံ၊ မိဂသူကရမာရကော၊

မိဂမံသေန ဇိဝါမိ၊ တေန ပေါသေမိ ဒါရကေ [ပေါသေန္တောပုတ္တဒါရကေ ဣတိကတ္ထစိ]။

စန္ဒံဝ တာရကာကိဏ္ဏံ၊ မေရုံဝဏ္ဏဝမဇ္ဈဂံ၊

ဝိရောစမာန မာသီနံ၊ စတုသစ္စပ္ပကာသကံ။

ဧကပဿေ ဌိတော တတ္ထ၊ အဿောသိံ ဓမ္မမုတ္တမံ၊

တတ္ထ စိတ္တံ ပသာဒေတွာ၊ သောမနဿံ ပဝေဒယိံ။

သမ္ပတ္တိမနုဘုတွာန၊ ဆကာမဂ္ဂေ ပရာပရံ၊

ဒေဝသင်္ဃပရိဗ္ဗူဠှော၊ ဝိမာနေ ရတနာမယေ။

မနုဿေသုစ ယံ အဂ္ဂံ၊ တဿ ဘာဂီ ဘဝါမဟံ၊

ဘောဂေ မေ ဦနတာ နတ္ထိ၊ သဒ္ဓမ္မသဝဏေ ဖလံ။

မဟတာ ပရိဝါရေန၊ ပတ္တော ဝုဒ္ဓိံစ ဝိညုတံ၊

စာရိကံ စရမာနောဟံ၊ ပတ္တော ဇေတဝနံ ဝရံ။

အဒ္ဒသံ သဟ သိဿေဟိ၊ နိသိန္နံ သုဂတံ တဒါ၊

အဿောသိံ မဓုရံ ဓမ္မံ၊ စတုသစ္စပ္ပကာသကံ။

သုတွာန မဓုရံ ဓမ္မံ၊ ပဗ္ဗဇိတွာန သာသနေ၊

အ ဇရာ မရံ သီတိဘူတံ၊ ပတ္တော နိဗ္ဗာဏမုတ္တမံ။

သုတံ ¶ ဧကမုဟုတ္တံ မေ၊ တဒါ ဓမ္မံ သုဒေသိတံ၊

တေနမှိ စတုရာပါယေ၊ န ဇာတော န ကုတောဘယံ။

ကရမုက္ခိပ္ပ ဝက္ခာမိ၊ ကရောထေ ကဂိရံ မမ၊

မမော ပမံ ကရိတွာန၊ ဓမ္မံ သုဏာထ သာဓုကန္တိ။

ဧဝဉ္စ ပန ဝတွာ သတ္တေ ဓမ္မသဝဏေ နိယောဇေသီတိ။

ဣတိ တနုတရကာလံ သာဓု ဓမ္မံ သုဏိတွာ၊

အဓိဂတဝိဘဝါနံ အာနုဘာဝံ သုဏိတွာ၊

ဘဝဝိဘဝသုခံ ဘော ပတ္ထယန္တာ ကုသီတံ၊

ဇဟထ သုဏထ ဓမ္မံ ဒုလ္လဘံ ဒုလ္လဘဿာတိ။

၃။ တိဏ္ဏံဇနာနံ ဝတ္ထုမှိ အယမာနုပုဗ္ဗီကထာ

ဇမ္ဗုဒီပသ္မိံ ကိရ ပုဗ္ဗေ မဟာနိဒါဃော အဟောသိ၊ တဒါ နိဒါဃသုရိယေန သကိရဏကရာ ဝါပိ ပေါက္ခရဏိ နဒီ ဂိရိကန္ဒရနိဇ္ဈရာဒီသု ဥဒကံ နိဿေသံ ကတွာ ပီတမိဝ ဥဒကေ ပရိက္ခီဏေ မစ္ဆကစ္ဆပါဒယော ယေဘုယျေန ဝိနာသံ ပတ္တာ။ အထ မဟာရညဘူမိယံ ရုက္ခတိဏလဘာဒယော အတီဝ မိလာတာ အဟေသုံ။ မိဂပက္ခိနောပိဃမ္မာဘိတတ္တာ ပိပါသိတော မရီစိံ တောယန္တိမညမာနာ ဣတောစိတောစ ဓာဝန္တာ မဟာဒုက္ခပ္ပတ္တာ အဟေသုံ။ တဒါ ဧကော သုဝပေါတကော ပိပါသိတော တတ္ထ တတ္ထ ပါနီယံ ပရိယေသန္တော မဟာရညေ ဧကသ္မိံ ပူတိပါဒပေ သဋ္ဌိရတနေ နရကာဝါဋေ ပါနီယဂန္ဓံ ဃာယိတွာ လောဘေန ပါတုံ ဩတိဏ္ဏော အတိပါနေန ဘာရော တတ္ထေဝ ပတိတွာ ဥဂ္ဂန္တုံ နာသက္ခိ။ အထာပရောပိ သပ္ပောစ မနုဿောစာတိ ဒွေ ဇနာ တတ္ထေဝ ပတိံသု၊ သပ္ပာနာမ ဝိဝေကံ လဒ္ဓါဝ အတ္တံ ဝိဇဟန္တိ။ တသ္မာယံ အလဒ္ဓါ ¶ ဝိဝေကတ္တံ ဥဂ္ဂန္တုံ နာသက္ခိ။ အနာလမ္ဗတ္တာ မနုဿောပိ။ တေ ဥဂ္ဂန္တုံ အသက္ကောန္တာ မရဏဘယဘီတာ အညမည မဝိဟေဌေန္တာ တတ္ထေဝ ဝသိံသု။ အထေကော ဗရာဏသီဝါသိကော မနုဿော ဝနံ ပဝိဋ္ဌော တထေဝ ပါနီယံ ပရိယေသမာနော တံ ဌာနံ ပတွာ တေ တယောပိ ဒိသွာ ကမ္ပမာနဟဒယော ဝလ္လိယာ ပိဋကံ ဗန္ဓိတွာ သိက္ကာယ ပက္ခိပိတွာ ဩတာရေတွာ တေ တယောပိ ဥဒ္ဓရိ၊ အထာနေန တေ အမှာကံ ဇီဝိတံ ဒိန္နန္တိ သောမနဿာ တဿေဝမာဟံသု၊ သာမိ မယံ တုမှေ နိဿာယ ဇီဝိတံ လဘိမှ၊ တုမှေ ဣတော ပဋ္ဌာယ အမှာကံ သဟာယော၊ မယမ္ပိ တေ သဟာယာ၊ အမှာကံ ဝသနဋ္ဌာနာနိ အာဂန္တုကာမာတိ ဝတွာ တေသု တာဝ သုဝပေါတကော အာဟ၊ သာမိ ဗာရာဏသိယံ ဒက္ခိဏဒွါရေ မဟာနိဂြောဓော အတ္ထိ၊ တတ္ထာဟံ ဝသာမိ၊ တဝ တထာရူပေ ကိစ္စေ သတိ မမ သန္တိကမာဂမ္မ သုဝါတိ သဒ္ဒံကရောဟီတိ ဝတွာ မေတ္တိထိရံ ကတွာ ပက္ကာမိ၊ သပ္ပောပိ သမ္မာဟံ တဿေဝ နိဂြောဓဿာ ဝိဒူရေ မဟန္တံ ဝမ္မိကံ အတ္ထိ၊ တတ္ထ ဝသာမိ၊ တဝတ္ထေ သတိ တတ္ထာဂန္တွာ ဒီဃာတိသဒ္ဒံ ကရောဟီတိ ဝတွာ တထေဝပက္ကာမိ၊ မနုဿောပိ ဗာရာဏသိယံ အသုကာယနာမ ဝီထိယာ အသုကဂေဟေ ဝသာမိ၊ တဝတ္ထေ သတိ မမ သန္တိကံ အာဂစ္ဆာတိ ဝတွာ ပက္ကာမိ၊ အထာ ပရဘာဂေ သော ဥပကာရကော ပုရိသော အတ္တနော ကိစ္စေ သဉ္ဇာတေ မမ သဟာယာနံ သန္တိကံ ဂမိဿာမီတိ သင်္ကေတာနုသာရေန ဂန္တွာ နိဂြောဓမူလေ ဌိတော သုဝဿ သဒ္ဒမကာသိ၊ တံ သုတွာ သုဝပေါတကော ဝေဂေနာဂန္တွာ တေန သဒ္ဓိံ ပဋိသမ္မောဒိတွာသမ္မ စိရေနာ ဂတောသိ၊ အာဂတကာရဏံ မေ အာစိက္ခာတိ အာဟ။ သောပါဟ သမ္မာဟံ ဇီဝိတု မသက္ကောန္တော ပုတ္တဒါရကေ ဉာတီနံ ပဋိပါဒေတွာ တဝ သန္တိကမာဂတောမှိတိ၊ သုဝပေါတကောပိ သာဓု သမ္မ တယာ ကတံ မမ သန္တိကမာဂစ္ဆန္တေန၊ တယာ မမ ဇီဝိတံ ဒိန္နံ၊ မယာပိ တဝ ဇီဝနုပါယံ ကာတုံ ဝဋ္ဋတိ၊ ယာဝါဟံ အာဂစ္ဆာမိ၊ တာဝေတ္ထ ထောကံ ဝိဿမာတိ ဝတွာ ပက္ကာမိ ဇီဝနုပါယံ ပရိယေသမာနော၊ ¶ တသ္မိံ ကိရ သမယေ ဗာရာဏသီရာဇာ နဂရတော နိက္ခမ္မ သုသဇ္ဇိတုယျာနံ ပဝိသိတွာ သပရိသော ကီဠိတွာ မဇ္ဈန္တိကသမယေ သုဖုလ္လိတံ ပဉ္စပဒုမသဉ္ဆနွံ မင်္ဂလပေါက္ခရဏိံ ဒိသွာ နဟာယိတုကာမော သဗ္ဗာဘရဏာနိ ဩမုဉ္စိတွာ ရာဇပုရိသေ ပဋိပါဒေတွာ နဟာယိတုံ ဩတရိ၊ တဒါ သုဝပေါတကော တံ ဌာနံ ပတ္တော သာခန္တရေ နိလီနော ရာဇပုရိသာနံ ပမာဒံ ဒိသွာ ရညော မုတ္တာဟာရံ ဍသိတွာ အာကာသံ ပက္ခန္ဒိတွာ ဝေဂေနာဂန္တွာ အတ္တနော သဟာယဿ ဒတွာ အပ္ပမတ္တော ဣမံ ဝလဉ္ဇေဟိ သမ္မာတိ ဝတွာ အဒါသိ၊ တတော သော နံ ဂဟေတွာ ဣမံ ကုဟိံ ပဋိသာမေဿာမီတိ စိန္တောန္တော မမေကော သဟာယကော အန္တောနဂရေ ဝသတိ၊ တသ္မိံ ဌပေဿာမီတိ စိန္တေတွာ ယထာသင်္ကေတမုပဂမ္မ တံ ဒိသွာ ပဋိသန္ထာရံ ကတွာ သုဝပေါတကေန ကတော ပကာရံ ပကာသေတွာ ဣမံ မုတ္တာဟာရံ သာဓုကံ ဌပေဟီတိ ဝတွာ အဒါသိ၊ တံခဏေ ရာဇာ နဟာတွာနုလိတ္တော အာဘရဏာနိ ပိလန္ဓေန္တော မုတ္တာဟာရံ နာဒ္ဒသ။ တတော ရာဇပုရိသာ အန္တောစ ဗဟိစ ပရိဇနေ ဥပပရိက္ခိတွာ မုတ္တာဟာရံ အပဿန္တာ နဂရေ ဘေရိံ စရာပေသုံ၊ ယော မုတ္တာဟာရံ ပဿတိ၊ တဿ ရာဇာ မဟန္တံ ယသံ ဒဿတီတိ။ တံ သုတွာ သော မိတ္တဒူဘီ ဧဝံ စိန္တေသိ၊ အဟံစမှိ ဒုက္ခိတော၊ ယန္နူနာဟံ မုတ္တာဟာရံ ရညော ဒဿေတွာ သုခေန ဝသေယျံ၊ ကိမ္မေ ဧတေနာတိ တေန ကတံ တထာရူပံ ဥပကာရံ အသလ္လက္ခေန္တော မဟာမိတ္တဒူဘီ ပုရိသော ရာဇပုရိသေ ဥပသင်္ကမ္မ မုတ္တဟာရံ အတ္တနော သန္တိကေ ဌပိတဘာဝံ ကထေသိ၊ ဘော မမ သန္တိကေ ဧကော ပုရိသော မုတ္တဟာရံ ဌပေသီတိ။ ဧဝံ အသပ္ပုရိသသံသဂ္ဂေါတိ၊ တထာဟိ။

ယထာ သံဝဍ္ဎိတော နိမ္ဗော၊ မဓုခီရော ဒသိဉ္စနာ၊

န ယာတိ မဓုရံ တံ ဝေါ၊ ပကာရ မသတံ ကတံ။

သီသေနု ဒက မာဒါယ၊ ဝဍ္ဎိတောပိ နုဟီတရု၊

န ယာတိ မဓုရံ တံဝေါ၊ ပကာရမသတံ ကတံ။

နိစ္စံ ¶ ခီရောဒပါနေန၊ ဝဍ္ဎိတော သိဝိသော ယထာ၊

ဝိသံဝ ပရိဝတ္တေတိ၊ တထာ နီစောပကာရကံ။

ယထာတ္တနာ ကတော အဂ္ဂိ၊ သီတလံ န ဒဒေ ခလု၊

တထာ နီစေ ကတံ ကာရံ၊ အဂ္ဂီဝ ဒဟတေ တနုံ။

တသ္မာ ဥပပရိက္ခိတွာ၊ ဟာဝဘာဝေန ဗုဒ္ဓိယာ၊

ကာတဗ္ဗာ မေတ္တိ ဇန္တူဟိ၊ နာမိတ္တော လဘတေသုခန္တိ။

အထဿ မိတ္တဒုဘိနော ဝစနေန ရာဇပုရိသာ မုတ္တာဟာရံစတံစ ဂဟေတွာ သဘဏ္ဍကံ ပုရိသံ ဒဿေသုံ။ အထ ရာဇာ သဘဏ္ဍကံ စောရံ ဒိသွာ ကုဒ္ဓါ ဣမံ နေတွာ ဒက္ခိဏဒွါရေ ဇီဝသူလေ ဥတ္တာသေထာတိ အာဏာပေသိ၊ ရာဇပုရိသာ တဿ ရာဇာဏံ ကရောန္တော အဂမံသု၊ တေဟိ နီယမာနော ပုရိသော ဒက္ခိဏဒွါရာ နိက္ခမ္မ သပ္ပသဟာယံ သရိတွာ အပ္ပေဝနာမေ တဿ သန္တိကာ ကိဉ္စိ သောတ္ထိ ဘဝေယျာတိ ပုဗ္ဗေ ဝုတ္တသင်္ကေတာ နုသာရေန ဝမ္မိကံ ဒိသွာ သမ္မ ဒီဃာတိ သဒ္ဒမကာသိ၊ သော ဝမ္မိကာ နိက္ခမ္မတံ တထာ နိယမာနံ ဒိသွာ သံဝိဂ္ဂေါ ဒုက္ခပ္ပတ္တော သဟာယဿမေ အဇ္ဇ အဝဿယေန ဥပတ္ထမ္ဘံ ဘဝိတုံ ဝဋ္ဋတီတိ တံ သမဿာသေတွာ အတ္တဘာဝံ ဝိဇဟိတွာ အညတရဝေသေန ရာဇပုရိသေ ဥပသင်္ကမ္မ ဣမံ ပုရိသံ မုဟုတ္တံမာ မာရေထာတိ ဒဠှံ ဝတွာ မုဟုတ္တေန ရညော အဂ္ဂမဟေသိယာ ဝသနဋ္ဌာနံ ဂန္တွာ သပ္ပဝဏ္ဏေန ဒေဝိံ ဍသိတွာ တာယ ဝိသေန မုစ္ဆိတကာလေ မနုဿဝဏ္ဏေန ဝဇ္ဈပ္ပတ္တော ဝိသောသဓံ ဇာနာတိတီ ဝတွာ တံခဏေဝ သဟာယဿ သန္တိကံ ဂန္တွာ ရညာ တဝ ပက္ကော သိတကာလေ ဂန္တွာ ဥဒကပ္ပသတေန ဒေဝိယာ သရီရေ ပဟရိတွာ နိဗ္ဗိသံ ကရာဟီတိ ဝတွာ ပက္ကာမိ၊ အထ ရာဇာ ဝိသဝေဇ္ဇ ပရိယေသန္တော တံ ပဝတ္တိံ သုတွာ ဝဇ္ဈပ္ပတ္တံ အာနေထာတိ အာဏာပေတွာ ဒေဝိယာ နိဗ္ဗိသံ ကရောထာတိ အာဟ၊ သော နာဂရာဇေန ဝုတ္တနယေန နိဗ္ဗိသမကာသိ၊ သာ သုခိတာ အရောဂါ အဟောသိ၊ ရာဇာ တံ ဒိသွာ တုဋ္ဌော တဿ ခေတ္တဝတ္ထုယာနဝါဟနာဒိဒါနေန ¶ မဟာသက္ကာရမကာသိ၊ အထ သော ရာဇာနံ ဥပသင်္ကမ္မ အတ္တနာ ကတံ သဗ္ဗံ ပကာသေသိ။ တေန ဝုတ္တံ။

ဧကဒါဟံ မဟာရာဇ၊ ဝနံ ကမ္မေန ကေနစိ၊

ဂတောဒ္ဒသံ မဟာဝါဋေ၊ ပတိတံ သုဝပေါတကံ။

အဒါသိ ဇီဝမမှာကံ၊ ဥပကာရောသိ နော တုဝံ၊

တဝ ကိစ္စေ သမုပ္ပန္နေ၊ အမှာကံ ဧဟိ သန္တိကံ။

ဧဝံ တေဟိ ပဝုတ္တောဟံ၊ အဂဉ္ဆိံ သုဝသန္တိကံ၊

တေန ကတူပကာရောဟံ၊ မနုဿဿာပိ သန္တိကံ။

တေနာဟံ မရဏပ္ပတ္တော၊ အဒ္ဒသံ ဥရဂါဓိပံ၊

သောဒါသိ ဇီဝိတံ မယှံ၊ အလတ္ထံ [အလဒ္ဓ ဣတိသဗ္ဗတ္ထ] ဝိပုလံ ဓနံ။

သုဇနော နာဝမန္တဗ္ဗော၊ ခုဒ္ဒကောတိ နရာဓိပ၊

သုဝေါစ ဥရဂေါစေတေ၊ မိတ္တဓမ္မေ ပတိဋ္ဌိတာ။

အကသ္မာ ဒေဝ ကုပ္ပန္တိ၊ ပသီဒန္တိနိမိတ္တတော၊

သီလံ ဟေတမသာဓူနံ၊ ဗာလာနမဝိဇာနတံ။

မနုဿာပိ မဟာရာဇ၊ ကေစိ ဝိဿာသိယာ န ဝေ၊

တိရစ္ဆာနာပိ ဟောန္တေဝ၊ အဇိမှမနသာသဌာတိ။

ဧဝံ ¶ သော အတ္တနော ပဝတ္တိံ ကထေသိ၊ ရာဇာ တံ သုတွာ ပသန္နော ဣမဿ ပုရိသဿ မဟန္တံ ဂေဟံ ကတွာ မဟာပရိဟာရံ ကရောထာတိ အာဏာပေသိ၊ သော ပန မမ ဂေဟံ နိဂြောဓဿ စ ဝမ္မိကဿ စ အန္တရေ ကရောထာတိ ဝတွာ တထာ ကာရေတွာ တတ္ထ ဝသန္တော ရာဇူပဋ္ဌာနံ ကရောန္တော တေဟိ သဟာယေဟိ သဒ္ဓိံ သမ္မောဒမာနော ယာဝဇီဝံ ဝသိတွာ အာယု ပရိယောသာနေ တေဟိ သဒ္ဓိံ ယထာကမ္မံ ဂတောတိ။

ဣတိ ပတိတသုခမှာ အင်္ဂတော ဝါ ဓနမှာ၊

ပရမတရပတိဋ္ဌာ ဟောန္တိ မိတ္တာ သခါနံ၊

ဝိရဟိတသခိနံ ဘော နတ္ထိ ယသ္မာဘိဝုဒ္ဓိ၊

စိဏုထ ကုသလဓမ္မံ မိတ္တဝန္တာ မဟန္တံ။

၄။ ဗုဒ္ဓေနိယာ ဝတ္ထုမှိ အယမာနုပုဗ္ဗီကထာ

ဇမ္ဗုဒီပေ ကိရ ပုဗ္ဗေ ပါဋလိပုတ္တနဂရေ သတ္တာသီတီကောဋိနိဟိတဓနံ ဧကံ သေဋ္ဌိကုလံ အဟောသိ၊ တဿ ပန သေဋ္ဌိနော ဧကာယေဝ ဓီတာ အဟောသိ နာမေန ဗုဒ္ဓေနိနာမ၊ တဿာ သတ္တဝဿိကကာလေ မာတာပိတရော ကာလမကံသု၊ တသ္မိံ ကုလေ သဗ္ဗံ သာပတေယျံ တဿာယေဝ အဟောသိ၊ သာ ကိရ အဘိရူပါ ပါသာဒိကာ ပရမာယ ဝဏ္ဏပေါက္ခရတာယ သမန္နာဂတာ ဒေဝစ္ဆရပဋိဘာဂါ ပိယာစ အဟောသိ မနာပါ၊ သဒ္ဓါ ပသန္နာ ရတနတ္တယမာမိကာ ပဋိဝသတိ၊ တသ္မိံ ပန နဂရေ သေဋ္ဌိသေနာပတိဥပရာဇာဒယော တံ အတ္တနော ပါဒပရိစာရိကံ ကာမယမာနာ မနုဿေ ပေသေသုံ ပဏ္ဏာကာရေဟိ သဒ္ဓိံ၊ သာ တံ သုတွာ စိန္တေသိ၊ မယှံ မာတာပိတရော သဗ္ဗံ ဝိဘဝံ ပဟာယ မတာ၊ မယာ ပန တထာ အဂန္တဗ္ဗံ၊ ကိံ မေ ပတိကုလေန၊ ကေဝလံ ¶ ဝိတ္တဝိနာသာယ ဘဝတိ၊ မယာ ပနိ မံ ဓနံ ဗုဒ္ဓသာသနေယေဝ နိဒဟိတုံ ဝဋ္ဋတီတိ စိန္တေသိ၊ စိန္တေတွာ စ ပန တေသံ န မယှံ ပတိကုလေနတ္ထောတိ ပဋိက္ခိပိ၊ သာ တတော ပဋ္ဌာယ မဟာဒါနံ ပဝတ္တေန္တီ သမဏဗြဟ္မဏေ သန္တပ္ပေသိ၊ တေနေတ္ထ။

အထာပရဘာဂေ ဧကော အဿဝါဏိဇကော အဿ-ဝါဏိဇ္ဇာယ ပုဗ္ဗန္တာပရန္တံ ဂစ္ဆန္တော အာဂမ္မ ဣမိဿာ ဂေဟေ နိဝါသံ ဂဏှိ၊ အထ သော ဝါဏိဇော တံ ဒိသွာ ဓီတုသိနေဟံ ပတိ ဋ္ဌာ ပေ တွာ ဂန္ဓမာလဝတ္ထာလင်္ကာရာဒီဟိ တဿာ ဥပကာရကော ဟုတွာ ဂမနကာလေ အမ္မ ဧတေသု အဿေသု တဝ ရုစ္စနကံ အဿံ ဂဏှာဟီတိ အာဟ၊ သာပိ အဿေ ဩလောကေတွာ ဧကံ သိန္ဓဝပေါတကံ ဒိသွာ ဧတံ မေ ဒေဟီတိ အာဟ၊ ဝါဏိဇော အမ္မ ဧသော သိန္ဓဝပေါတကော၊ အပ္ပမတ္တာ ဟုတွာ ပဋိဇဂ္ဂါဟီတိ ဝတွာ တံ ပဋိပါဒေတွာ အဂမာသိ။ သာပိ တံ ပဋိဇဂ္ဂမာနာ အာကာသဂါမိဘာဝံ ဉတွာ သမ္မာ ပဋိဇဂ္ဂန္တီ ဧဝံ စိန္တေသိ၊ ပုညကရဏဿ ¶ မေ သဟာယော လဒ္ဓါတိ၊ အဂတပုဗ္ဗာစ မေ ဘဂဝတော သမာရံ မာရဗလံ ဝိဓမေတွာ ဗုဒ္ဓဘူတဿ ဇယမဟာဗောဓိဘူမိ၊ ယန္နူနာဟံ တတ္ထ ဂန္တွာ ဘဂဝတော ဇယမဟာဗောဓိံ ဝန္ဒေယျန္တိ စိန္တေတွာ ဗ ဟူ ရဇတသုဝဏ္ဏမာလာဒယော ကာရာပေတွာ ဧကဒိဝသံ အဿ မဘိရုယှ အာကာသေန ဂန္တွာ ဗောဓိမာလကေ ဌတွာ အာဂစ္ဆန္တုအယျာ သုဝဏ္ဏမာလာ ပူဇေတုံတိ ဥဂ္ဃောသေသိ။ တေနေတ္ထ။

ယတော ပဋ္ဌာယဟံ ဗုဒ္ဓ၊ သာသနေ သုဒ္ဓမာနသာ၊

ပသန္နာ တေန သစ္စေန၊ မမာနုဂ္ဂဟဗုဒ္ဓိယာ။

အာဂစ္ဆန္တု နမဿန္တု၊ ဗောဓိံ ပူဇေန္တု သာဓုကံ၊

သောဏ္ဏမာလာဟိ သမ္ဗုဒ္ဓ၊ ပုတ္တာ အရိယသာဝကာ။

သုတွာ တံ ဝစနံ အယျာ၊ ဗဟူ သီဟဠဝါသိနော၊

အာဂမ္မ နဘသာ တတ္ထ၊ ဝန္ဒိံ သုစ မဟိံသုစာတိ။

တတော ပ္ပတုတိ သာ ကုမာရိကာ ဗုဒ္ဓသာသနေ အတီဝ ပသန္နာ နိစ္စမေဝ အဿ မဘိရုယှ အာဂန္တွာ အရိယေဟိ သဒ္ဓိံ မဟာဗောဓိံ သုဝဏ္ဏမာလာဟိ ပူဇေတွာ ဂစ္ဆတိ၊ အထ ပါဋလိပုတ္တနဂရောပဝနေ ဝနစရာ တဿာ အဘိဏှံ ဂစ္ဆန္တိယာ စ အာဂစ္ဆန္တိယာ စ ရူပသမ္ပတ္တိံ ဒိသွာ ရညော ကထေသုံ။ မဟာရာဇ ဧဝရူပါ ကုမာရိကာ အဿ မဘိရုယှ အာဂန္တွာ နိဗဒ္ဓံ ဝန္ဒိတွာ ဂစ္ဆတိ။ ဒေဝဿာနုရူပါ အဂ္ဂမဟေသီ ဘဝိတုန္တိ၊ ရာ ဇာ တံ သုတွာ တေနဟိ ဘဏေ ဂဏှထ နံ ကုမာရိံ၊ မမ အဂ္ဂမဟေသိံ ကရောမီတိ ပုရိသေ ပယောဇေသိ၊ တေန ပယုတ္တပုရိသာ ဗောဓိပူဇံ ကတွာ အာဂစ္ဆန္တိံ ဂဏှာမာတိ တတ္ထ နိလီနာ ဂဟဏသဇ္ဇာ အဋ္ဌံသု၊ တဒါ သာ ကုမာရိကာ အဿ မဘိရုယှ မဟာဗောဓိမဏ္ဍံ ဂန္တွာ ဝီတရောဂေဟိ သဒ္ဓိံ ပုပ္ဖပူဇံ ကတွာ ဝန္ဒိတွာ နိဝတ္တိ၊ အထ တေသု ဧကော ဓမ္မရက္ခိတ တ္ထေရောနာမ တဿာ ဧဝ မာဟ၊ ဘဂိနိ တံ အန္တရာမဂ္ဂေ စောရာ ဂဏှိတုကာမာ ဌိတာ၊ အသုကဋ္ဌာနံ ပတွာ အပ္ပမတ္တာ ¶ သီဃံ ဂစ္ဆာတိ၊ သာပိ ဂစ္ဆန္တီ တံ ဌာနံ ပတွာ စောရေဟိ အနုဗန္ဓိတာ အဿဿ ပဏှိယာ သညံ ဒတွာ ပက္ကာမိ၊ စောရာ ပစ္ဆတော ပစ္ဆတော အနုဗန္ဓိံသု။ အဿော ဝေဂံ ဇ နေ တွာ အာကာသ မုလ္လင်္ဃိ၊ ကုမာရိကာ ဝေဂံ သန္ဓာရေတုံ အသက္ကောန္တီ အဿဿ ပိဋ္ဌိတော ပရိဂလိတွာ ပတန္တီ မယာ ကတူပကာရံ သရ ပုတ္တာတိ အာဟ၊ သော ပတန္တိံ ဒိသွာ ဝေဂေနာ ဂန္တွာ ပိဋ္ဌိယံ နိသီဒါပေတွာ အာကာသတော နေတွာ သ က ဋ္ဌာ နေ ယေဝ ပတိဋ္ဌာပေသိ။ တသ္မာ။

တိရစ္ဆာနဂတာပေဝံ၊ သရန္တာ ဥပကာရကံ၊

န ဇဟန္တီတိ မန္တွာန၊ ကတညူ ဟောန္တု ပါဏိနောတိ။

တတော သာ ကုမာရိကာ သတ္တာ သီတိကောဋိဓနံ ဗုဒ္ဓသာသနေယေဝ စဇိတွာ ယာဝဇီဝံ သီလံ ရက္ခိတွာ ဥပေါသထကမ္မံ က တွာ တ တော စုတာ သုတ္တ ပ္ပဗုဒ္ဓါ ဝိယ ဒေဝလောကေ နိဗ္ဗတ္တီတိ။

အတိတရုဏဝယာ ဘော မာတုဂါမာပိ ဧဝံ၊

ဝိဝိဓကုသလကမ္မံ ကတွ သဂ္ဂံ ဝဇန္တိ၊

ဘဝထ ကထ မုပေက္ခာ ဒါနမာနာဒိကမ္မေ။

၅။ အဟိတုဏ္ဍိကဿ ဝတ္ထုမှိ အယမာနုပုဗ္ဗီကထာ

ဣမသ္မိံ ကိရ ဘဒ္ဒကပ္ပမှိ အမှာကံ ကိရ ဘဂဝတော ပုဗ္ဗေ ကဿပေါနာမ သတ္ထာ လောကေ ဥပ္ပဇ္ဇိတွာ သဒေဝကံ လောကံ သံသာရသာဂရာ တာရေတွာ သဗ္ဗဗုဒ္ဓကိစ္စာနိ နိဋ္ဌပေတွာ အတ္ထံ ဂတော ဒိဝသကရောဝိယ သေတဗျမှိ အနုပါဒိသေသာယ နိဗ္ဗာဏဓာတုယာ ပရိနိဗ္ဗာယိ၊ တဒါ သကလဇမ္ဗုဒီပဝါသိနော မနုဿာ သန္နိပတိတွာ ¶ ဧကေကံ သုဝဏ္ဏိဋ္ဌကံ ကောဋိအဂ္ဃနကံ ရတနဝိစိတ္တံ ဗဟိစိနနတ္ထာယ ဧကေကံ အဍ္ဎကောဋိအဂ္ဃနကံ အဗ္ဘန္တရူပပူရဏတ္ထံ မနောသိလာယ မတ္တိကာကိစ္စံ ကရောန္တာ ယောဇနဗ္ဗေဓံ ထူပံ ကတွာ မဟန္တံ သက္ကာရံ ကရောန္တိ။ တဒါ ဧကော အဟိတုဏ္ဍိကော ဂါမနိဂမရာဇဓာနီသု သပ္ပေ ကီဠာပေတွာ ဇီဝိကံ ကပ္ပေန္တော ဧကံ ဂါမကံ ပတွာ တတ္ထ သပ္ပေ ကီဠာပေတွာ သန္တုဋ္ဌေဟိ ဂါမဝါသီဟိ ဒိန္နဝိဝိဓောပါယနော ခါဒနီယဘောဇနီယံ ခါ ဒိ တွာ ဘုဉ္ဇိတွာ တတ္ထေဝ နိဝါသံ ဂဟေတွာ နိသီဒိ။ တသ္မိံ ကိရ ဂါမကေ မနုဿာ ယေဘုယျေန ရတနတ္တယမာမကာ။ တသ္မာ တေ ရတ္တိဘာဂေ သယန္တာ ‘‘နမော ဗုဒ္ဓါယာတိ’’ ဧဝမာဒိံ ဝဒန္တိ။ သော ပန အဟိတုဏ္ဍိကော မိစ္ဆာဒိဋ္ဌိကော တိဏ္ဏံ ရတနာနံ ဂုဏံ န ဇာနာတိ။ တသ္မာ တေသံ တံ ဝစနံ သုတွာ သယမ္ပိ ကေ ဠိံ ကုရုမာနော ပရိဟာသဝသေန ‘‘နမော ဗုဒ္ဓါယာတိ’’ ဝဒတိ၊ အထေကဒိဝသံ သော အတ္တနော ကီဠာပနသမတ္ထံ ဧကံ သပ္ပံ ဘတ္ထ တတ္ထ ပရိယေသမာနော အာဟိဏ္ဍတိ။ တဒါ ဧကော နာဂရာဇာ ကဿပဒသဗလဿ ထူ ပံ ဂ န္တွာ ဝန္ဒိတွာ ဧကံ ဝမ္မိကံ ပဝိသတိ။ တံ ဒိ သွာ အဟိတုဏ္ဍိကော ဝေဂေနာ ဂန္တွာ နာဂရာဇံ ဂဏှိတုံ မန္တံ ပရိဇပိ၊ သော မန္တံ သုတွာ ကုဇ္ဈိတွာ တံ မာရေတုကာမော အနုဗန္ဓိ၊ တံ ဒိ သွာ အဟိတုဏ္ဍိကော ဝေ ဂေ န ပလာယန္တော ဧကသ္မိံ ပါသာဏေ ပက္ခလိတွာ ပတမာနော ပုဗ္ဗေဝုတ္တပရိဟာသ ဝစနပရိစယေန ‘‘နမော ဗုဒ္ဓါယာတိ’’ ဝဒန္တော ပတိ။ တဿ တံ ဝစနံ အနုဗန္ဓန္တဿ နာဂရညော သောတပထေ အမတံဝိယ ပတိ။ အထ သော ရတနတ္တယဂါရဝေန တသ္မိံ ကောဓံ နိဗ္ဗာပေတွာ သမ္မ မာ ဘာယိ။ အဟံ ရတနတ္တယမန္တာနုဘာဝပါသေန ဗဒ္ဓါ။ တသ္မာ တု ဝံ ဍသိတုံ မယှံ အနနုရူပံ။ အဇ္ဇ တ ယိ ပသန္နောမှိ၊ ပဏ္ဏာကာရံ တေဒမ္မိ၊ ဂဏှာတိ တီဏိ သုဝဏ္ဏပုပ္ဖာနိ အဒါသိ။ ဧဝံ ရတနတ္တယံ နာမ ဃောရာသိဝိသာနမ္ပိ သပ္ပာနံ မနံ ပီဏေတိ။ ဟောန္တိ စေတ္ထ။

ဗုဒ္ဓါတိ ¶ ဝစနံ သေဋ္ဌံ၊ ဗုဒ္ဓါတိ ပဒ မုတ္တမံ၊

နတ္ထိ တေန သမံ လောကေ၊ အညံ သောတရသာယနံ။

ဓမ္မောတိဝစနံ သေဋ္ဌံ၊ ဓမ္မောတိ ပဒမုတ္တမံ၊

နတ္ထိ တေန သမံ လောကေ၊ အညံ သောတရသာယနံ။

သင်္ဃောတိ ဝစနံ သေဋ္ဌံ၊ သင်္ဃောတိ ပဒမုတ္တမံ၊

နတ္ထိ တေန သမံ လောကေ၊ အညံ သောတရသာယနံ။

တဿ မုခံ မုခံ နာမ၊ ယံ ဝတ္တတိ မုခေ သဒါ၊

ဒုလ္လဘံ ဗုဒ္ဓဝစနံ၊ သဗ္ဗသမ္ပတ္တိဒါယကံ။

တဿ မနော မနော နာမ၊ ယံ စေ မနသိ ဝတ္တတိ၊

ဒုလ္လဘံ ဗုဒ္ဓဝစနံ၊ သဗ္ဗသမ္ပတ္တိဒါယကံ။

တမေဝ ကဝစံ ဒေဟေ၊ တမေဝ မဏိ ကာမဒေါ၊

တမေဝ သုရဘီ ဓေနု၊ တမေဝ သုရပါဒပေါ။

တဿေဝ သောတံ သောတံဝ၊ ယံ သုဏာတိ ဇနော အယံ

ဒုလ္လဘံ ဗုဒ္ဓဝစနံ၊ သဗ္ဗသမ္ပတ္တိဒါယကံ။

ဧဝံ ဝိဓော ရဂေါ ဃောရော၊ ဟဠာဟဠဝိသော သဒါ၊

ဗုဒ္ဓါတိ ဝစနံ သုတွာ၊ သန္တုဋ္ဌော ဒါသိ ဇီဝိတံ။

သောဏ္ဏပုပ္ဖတ္တယံစာပိ၊ မဟဂ္ဃံ ဗဟလံ အဒါ၊

ပဿ ဗုဒ္ဓါတိ ဝါစာယ၊ အာနုဘာဝမဟန္တတန္တိ။

အထ နာဂရာဇာ တဿ တာနိ သုဝဏ္ဏပုပ္ဖာနိ ဒတွာ ဧဝမာဟ။ သမ္မ ဧတေသု ဧကံ တဝ ပုညတ္တာယ ဧကံ မမ ပုညတ္ထာယ ပူဇေဟိ။ ဣတရေန ယာဝဇီဝံ သုခေန ဇီဝန္တော ပုတ္တဒါရေ ပေါသေန္တော ဒါနာဒီသု အပ္ပမဇ္ဇန္တော ဇီဝိကံ ကပ္ပေဟိ။ မာ ဟီနကမ္မေ ဗျဝဋော ဟောဟိ၊ မိစ္ဆာဒိဋ္ဌိဉ္စ ပဇဟာတိ ဩဝဒိတွာ ပက္ကာမိ။ အဟိတုဏ္ဍိကောပိ သောမနဿပ္ပတ္တော တေန ဝုတ္တနယေနေဝ ဒွိဟိ ပုပ္ဖေဟိ စေတိယံ ပူဇေတွာ ဧကေန သ ဟ ဿံ လဘိတွာ တေ န ပုတ္တဒါရေ ¶ ပေါသေန္တော ကပဏဒ္ဓိကဝဏိဗ္ဗကာဒီနံ ဒါနံ ဒေန္တော အဟိတုဏ္ဍိကကမ္မံ ပဟာဟ ကုသလမေဝ ဥပစိနန္တော အာယုပရိယောသာနေ သဂ္ဂပရာယနော အဟောသိ။

ဣတိ အဝိဒိတသတ္တော ကိဉ္စိ ဗုဒ္ဓါနုဘာဝံ၊

ဝိဒိတဇနနိကာယော ကိန္နု တဿာနုဘာဝံ၊

န လပတိ ဇိနနာမံ ကိစ္စ မညပ္ပဟာယာတိ။

၆။ သရဏတ္ထေရဿ ဝတ္ထုမှိ အယမာနုပုဗ္ဗီကထာ

သာဝတ္ထိယံ ကိရ သုမနော နာမေ ကော ဂဟပတိ အဟောသိ။ တဿ ဘရိယာ သုဇမ္ပတိကာ နာမ။ တေ အဂါရံ အဇ္ဈာဝသန္တာ အပရဘာဂေ ပုတ္တံစ ဓီတရံစ လဘိံသု။ အထ တေသံ ဒဟရကာလေယေဝ မာတာပိတရော ကာလံ ကရောန္တာ ဇေဋ္ဌကံပက္ကောသိတွာ မယံ ပုတ္တ တုဝံ ပတိရူပေ ဌာနေ နိဝေသိတုံ နာသက္ခိမှ၊ ယံ နော ဃရေ ဝိဘဝံ၊ သဗ္ဗံ တံ ဂဏှ။ ဣမာယစ တေ ကဏိဋ္ဌိကာယ ဝုဒ္ဓိံတွမေဝ ဇာနာဟီတိ ဝတွာ ဇေဋ္ဌကဿ ဟတ္ထေ ကဏိဋ္ဌိကာယ ဟတ္ထံ ဌပေတွာ ကာလမကံသု။ အထ သော မာတာပိတုန္နံ အစ္စယေန အာဠာဟနကိစ္စံ ကတွာ ဝသန္တော ကာလန္တရေန ကဏိဋ္ဌိကံ ပတိရူပေန ကုလေန သမ္ဗန္ဓိတွာ သယမ္ပိ ဒါရပရိဂ္ဂဟမကာသိ။ အထာပရဘာဂေ တဿ ကဏိဋ္ဌိကာ ဂဗ္ဘိနီ ဟုတွာ ဧကဒိဝသံ သာမိကံ အာဟ၊ သာမိ မမ ဘာတရံ ဒဋ္ဌုကာမာမှီတိ။ သောပိ သာဓု ဘဒ္ဒေတိ အနုရူပေန ပဏ္ဏာကာရေန တာယ သဒ္ဓိံ နိက္ခမိ။ တဒါ ပန ဘဂဝါ သုနိဝတ္ထော သုပါရုတော ဘိက္ခုသင်္ဃပရိဝုသော ပိဏ္ဍာယ နဂရံ ပါဝိသိ ဆဗ္ဗဏ္ဏဃနဗုဒ္ဓရံသိယော ဝိဿဇ္ဇေန္တော၊ တ တော တေ ဘဂဝန္တံ ဒိသွာ ပသန္နစိတ္တာ ပဉ္စပတိဋ္ဌိတေန ¶ ဝန္ဒိတွာ အဋ္ဌံသု၊ အထ သတ္တာ တေသံ ဇယမ္ပတိကာနံ ဥပနိဿယသမ္ပတ္တိံဒိသွာ တေ သရဏေသုစ သီလေသုစ ပတိဋ္ဌာပေတွာ ဧဝမာဟ၊ ကဒါစိ ဝေါ ဒုက္ခေ ဥပ္ပန္နေ တထာဂတော အနုဿရိတဗ္ဗောတိ။ တထာဟိ။

ယံကိဉ္စိ ဘယမုပ္ပန္နံ၊ ရာဇစောရာဒိသမ္ဘဝံ၊

တဒါ သရေယျ သမ္ဗုဒ္ဓံ၊ နိစ္ဆန္တောတ ဒုပဒ္ဒဝံ။

ယံ ဝေ ဥပဒ္ဒဝံ ဟောတိ၊ ယက္ခပေတာ ဒိသမ္ဘဝံ၊

တဒါ သရေယျ သမ္ဗုဒ္ဓံ၊ နိစ္ဆန္တော တဒုပဒ္ဒဝံ။

သီဟဗျဂ္ဃတရစ္ဆာဒိ၊ ပုဏ္ဍရီကာဒိသမ္ဘဝံ၊

တဒါ သရေယျ သမ္ဗုဒ္ဓံ၊ နိစ္ဆန္တော တဒုပဒ္ဒဝံ။

ယမာတပဂ္ဂိ ဝါတာဒိ၊ ဥဒကာသနိသမ္ဘဝံ၊

တဒါ သရေယျ သမ္ဗုဒ္ဓံ၊ နိစ္ဆန္တော တဒုပဒ္ဒဝံ။

ပဇ္ဇရာဒီဟိ ရောဂေဟိ၊ ဝိသမော တုဟိသမ္ဘဝံ၊

တဒါ သရေယျ သမ္ဗုဒ္ဓံ၊ နိစ္ဆန္တော တဒုပဒ္ဒဝံ။

မစ္စုနာ စေ ယဒါ ယုဒ္ဓံ၊ ကရေ တေနာပိ ဇန္တုနာ၊

သရိတဗ္ဗော တဒါ ဗုဒ္ဓါ၊ ပတ္ထေန္တေနတ္တနော ဇယန္တိ။

တတော တေ ဘဂဝတော ဝစနံ ပဋိနန္ဒိတွာ ဝန္ဒိတွာ အဂမံသု။ အထ ဇေဋ္ဌကော အာဂတေ တေ ဒိသွာ ယထာနုရူပံ သက္ကာရ မကာသိ။ တဿာ သာမိကော ကတိပါဟံ တတ္ထ ဝသိတွာ ဘရိယံ ဇေဋ္ဌကဿ ပဋိပါဒေတွာ မမ ဂါမေ ကိစ္စံ အတ္ထီတိ ဝတွာ ပက္ကာမိ။ အထဿာ ဘာတာ ဘရိယံ ပက္ကောသိတွာ အာဟ ဘဒ္ဒေ ဣမိဿာ သဗ္ဗံ ကတ္တဗ္ဗံ ကရောဟီတိ။ သာ တတော ပဋ္ဌာယ တဿာ ဥဒကန္န ပါနာ ဒိနာ ဝေယျာဝစ္စံ ကုရုမာနာ ဧတိဿာ ဟတ္ထပါဒဂီဝူပဂေသု အာဘရဏေသု လောဘံ ဥပ္ပာဒေတွာ တံ ဝူပသမေတုံ အသက္ကောန္တီ အာဟာရူ ပစ္ဆေဒံ ကတွာ ဂိလာနာဝိယ မဉ္စကံ ဥပဂူဟိတွာ နိပတိ။ အထ သော ဂေဟံ ဂန္တွာ တံ တထာ သယိတံ ¶ ဒိသွာ မဉ္စကေ နိသိန္နော ကိံ ဘဒ္ဒေ အဖာသုကန္တိ ပုစ္ဆိ၊ သာ တုဏှီ ဟုတွာ ကတိပယဝါရေ ပုစ္ဆိတာ န သက္ကာ ကထေတုန္တိ အာဟ။ ပုန သာမိကေန ဂါဠှံ နိဗန္ဓိတေ သာ စိန္တေသိ၊ ဥဇုကံ မယာ တဿာ ပိဠန္ဓနံ ပတ္ထေမီတိ ဝုတ္တေ န ပ္ပတိရုပံ၊ တဿာ ပဉ္စမဓုရ မံသံ ပတ္ထေမီတိ ဝုတ္တေ တံ မာရေဿတိ၊ တဒါ ပိဠန္ဓနာနိ မယှမေဝါတိ၊ တတော သာမိ တဝ ကဏိဋ္ဌိကာယ ပဉ္စမဓုရမံသံ ပတ္ထေမိ၊ အလဘမာနာယ မေ ဇီဝိတံ နတ္ထီတိ အာဟ၊ တံ သုတွာ သော အနေကပရိယာယေန မနုဿမာရဏံ နာမ ဘာရိယန္တိ ဝတွာ နိဝါရေန္တောပိ နိဝါရေတုံ နာသက္ခိ၊ အထ တာယ ပဋိဗဒ္ဓစိတ္တော ကာမမုစ္ဆိတော မောဟမူဠှော ဟုတွာ သာဓု လဘိဿသီတိ တဿာ ဝစနံ သမ္ပဋိစ္ဆိ။ တထာဟိ။

ဟာယန္တိ ဣဓလောကတ္ထာ၊ ဟာယန္တိ ပါရလောကိကာ၊

ဟာယန္တိ မဟတာ အတ္ထာ၊ ယေ ဣတ္ထီနံ ဝသင်္ဂတာ။

ဧသာ မာတာ ပိတာ ဧသော၊ ဘဂိနီ ဘာတရော ဣမေ၊

ဂရုတဗ္ဗေ န ဇာနန္တိ၊ ယေ ဣတ္ထီနံ ဝသင်္ဂတာ။

ကာရဏာကာရဏန္တေတံ၊ ကတ္တဗ္ဗံဝါ န ဝါ ဣဒံ၊

ကာမန္ဓတ္တာ န ဇာနန္တိ၊ ယေ ဣတ္ထီနံ ဝသင်္ဂတာ။

ပါဏံ ဝါ အတိပါတေန္တိ၊ ဟောန္တိ ဝါ ပါရဒါရိကာ၊

ဘာသန္တိ အလိကံ ဝါစံ၊ ယေ ဣတ္ထီနံ ဝသင်္ဂတာ။

သန္ဓိစ္ဆေဒါဒိကံ ထေယျံ၊ မဇ္ဇပါနံစ ပေသုနံ၊

ကရောန္တိ သာဟသံ သဗ္ဗံ၊ ယေ ဣတ္ထီနံ ဝသင်္ဂတာ။

အဟော အစ္ဆရိယံ လောကေ၊ သရန္တာနံ ဘယာ ဝဟံ၊

ဘရိယာယ ဝသံ ဂန္တွာ၊ သောဒရိံဟန္တုမိစ္ဆတီတိ။

အထ သော သာဟသိကော ပုရိသော ဘဂိနိ ဧဝ မာဟ၊ ဧဟိ အမ္မ အမှာကံ မာတာပိတုန္နံ ဣဏံ သာဓေဿာမ၊ အပ္ပေဝနာမ နော ဒိသွာ ဣဏာယိကာ ဣဏံ ဒဿန္တီတိ၊ တံ သုတွာ တာယ သမ္ပဋိစ္ဆိတေ ¶ သုခယာနကေ နိသီဒါပေတွာ ဣဏာယိကာနံ ဂါမံ ဂစ္ဆန္တော ဝိယ မဟာအဋဝိံပတွာ ယာနံ မဂ္ဂါ ဩက္ကမ္မ ဌပေတွာ ဝိရဝန္တိမေဝ နံ ဟတ္ထေ ဂဟေတွာ ဆိန္ဒိဿာမီတိ စိန္တေတွာ ကေသေ ဂဟေတွာ ဘူမိယံ ပါတေသိ၊ တသ္မိံ ခဏေ တဿာ ကမ္မဇဝါတာ စလိံသု။ သာ ဘာတုလဇ္ဇာယ သာမိ ကမ္မဇဝါတာ မေ စလိံသု၊ ယာ ဝါ ဟံ ဝိဇာယာမိ၊ တာဝ ဥပဓာရေဟီတိ ဝဒန္တီပိ အပနေတုံ အသက္ကောန္တီ ပုတ္တံ ဝိဇာယိ၊ အထ သော တံ သမီပေ ဝဋရုက္ခမူလေ မာရေဿာမီတိ စိကုရေ ဂဟေတွာ အာကဍ္ဎိ၊ တသ္မိံ ကာလေ သာ သာမိ တဝ ဘာဂိနေယျဿ မုခံ ဩလောကေတွာ တဿ သိနေဟေနာပိ မံ န မာရေဟီတိ ဝဒန္တီ ယာစိ၊ အထ သော ကက္ခဠော တဿာ တံ ကာရုဏိကဝစနံ အသုဏန္တော ဝိယ မာရေတုံ ဥဿဟတေဝ၊ တတော သာ ကုမာရိကာ အတ္တနော အသရဏာ စိန္တေသိ၊ မမ သဒ္ဒေနာ ဂန္တွာ ယော ကောစိ မမ ဘာတု အနယံ ကရေယျ၊ တံ န ပ္ပတိရူပန္တိ ဘာတုသိနေဟေန နိဿဒ္ဒါ အတ္တနာ ဂတိတသရဏံ အာဝဇ္ဇမာနာ နိပဇ္ဇိ၊ အထဿာ ဘာ တ ရိ မေတ္တာနုဘာဝေနစ အနုဿရိတသရဏာနုဘာဝေနစ တသ္မိံ နိဂြောဓေ အဓိဝတ္ထာ ဒေဝတာ ဧဝရူပေါ မာတုဂါမော ဧတ္ထ မာရိတာ အဘဝိဿာ၊ အဒ္ဓါဟံ ဒေဝသမာဂမံ ပဝိသိတုံ န လဘိဿာမီတိ စိန္တေတွာ ဧတိဿာ သာ မိ ကော ဝိယ တံ တ ဇ္ဇေ တွာ ပလာပေတွာ တွံ မာ ဘာယီတိ သမဿာသေတွာ ယာ န ကေ သ ပု တ္တံ ကုမာရိံ နိသီဒါပေတွာ တံ ဒိဝသမေဝ သာဝတ္ထိမာဂမ္မ အန္တောနဂရေ သာ လာ ယ နံ နိပဇ္ဇာပေတွာ အန္တရဓာယိ။ တထာဟိ။

သဗ္ဗသမ္ပတ္တိဒါတာရံ၊ သဗ္ဗလောကေကနာယကံ၊

မနသာပိ ယော ဝိဘာဝေတိ၊ တံ ဝေ ပါလေန္တိ ဒေဝတာ။

မုဟုတ္တမ္ပိစ ယော မေတ္တံ၊ ဘာဝေတိ ယဒိ သာဓုကံ၊

တံ ဝေ ပါလေန္တိ ဒေဝါပိ၊ တောသယန္တိ ဥပါယနာတိ။

တတော ¶ တဿာ ပန သာမိကော နဂရာ နိက္ခမ္မ ဂစ္ဆန္တော အတ္တနော ဘရိယံ ဒိသွာ တွံ ကဒါ အာဂတာ၊ ကေနာနီတာသီတိ ပုစ္ဆိ။ သာ ဒေဝတာယ အာနီတဘာဝံ အဇာနန္တီ ကိံ တွံ ဘဏသိ၊ နနု တယာ အာနီတာမှီတိ၊ သောပိ ကိံဘောတိ ဘဏသိ၊ တဝ ဘာတုဂါမေ ဒိဋ္ဌကာလတော ပ္ပတုတိ အဇ္ဇ စတ္တာရော မာသာ ဇာတာ၊ ဧတ္တကံ ကာလံ တွံ န ဒိဋ္ဌပုဗ္ဗာ၊ ကထံ တွံ မယာ သဒ္ဓိံအာဂတာတိ ပုစ္ဆိ။ သာ တံ သုတွာ တေနဟိ မာညဿ ဣမံ ရဟဿံ ကထေဟိ သာမီတိ ဝတွာ ဘာ တ ရာ အတ္တနော ကတံ သဗ္ဗံ ဝိတ္ထာရေန ကထေသိ။ တံ သုတွာ တဿ သာမိကော သံဝိဂ္ဂေါ ဘယပ္ပတ္တော ဟုတွာ တံ အတ္တနော ဂေဟံ ပါပေသိ၊ တတော ကတိပါဟံ တာယ ဝိဿမိတေ တေ ဥဘောပိ သတ္ထာရံ နိမန္တေတွာ မဟာဒါနံ ဒတွာ ဝန္ဒိတွာ ဧကမန္တေ နိသီဒိံသု၊ အထ သာ ဘဂဝတော သရဏသီလာနုဘာဝေန အတ္တနော ဇီဝိတပဋိလာဘံ ပကာသေတွာ အတ္တနော ပုတ္တံ ဘဂဝန္တံ ဝန္ဒာပေတွာ သရဏောတိနာမမကံသု၊ သတ္ထာ တေ သံ အဇ္ဈာသယံ ဉတွာ တဒနုရူပံ ဓမ္မံ ဒေသေသိ၊ ဒေသနာဝသာနေ ဥဘောပိ သောတာပန္နာ အဟေသုံ၊ အထဿာ ပုတ္တော သရဏကုမာရော ဝီသတိမေ ဝဿေ ဗုဒ္ဓသာသနေ ပဗ္ဗဇိတွာ ဝိပဿနံ ဝဍ္ဎေတွာ အရဟတ္တံ ပတ္တော သရဏတ္ထေရောနာမ ပညာယီတိ။

ပရမတရပတိဋ္ဌံ ပါပုဏန္တီတိ မန္တွာ၊

ဘဝဂတိ ဂုဏရာသိံ ဇာနမာနာ ဇနာ ဘော၊

ဘဇထ သရဏသီလံ သဗ္ဗထာ သဗ္ဗကာလန္တိ။

၇။ ဝေဿာမိတ္တာယ ဝတ္ထုမှိ အယမာနုပုဗ္ဗီကထာ

ဇမ္ဗုဒီပေ ¶ ကိရ ကောသမ္ဗိနဂရေ ကောသမ္ဗိရညော ဝေဿာမိတ္တာနာမ အဂ္ဂမဟေသီ အဟောသိ။ တဒါ ဘဂဝါ ကောသမ္ဗိယံ ပဋိဝသတိ မဟတာ ဘိက္ခုသင်္ဃေန သဒ္ဓိံ စာရိကံ စရမာနော။ တသ္မိံ သမယေ သာ ရညာ သဒ္ဓိံ ဝိဟာရံ ဂန္တွာ အနောပမာယ ဗုဒ္ဓလီဠာယ မဓုရေန သရေန ဒေသေန္တဿ ဘဂဝတော ဓမ္မံ သုတွာ ပသန္နာ သရဏေသု ပတိဋ္ဌာယ ဗုဒ္ဓမာမိကာ ဟုတွာ ဝိဟရတိ။ အထာ ပရဘာဂေ တဿ ရညော ရဇ္ဇတ္ထာယ ပစ္စန္တရာဇာ ယုဒ္ဓသဇ္ဇော ရဇ္ဇံ ဝါ ဒေတု၊ ယုဒ္ဓံဝါတိ ပဏ္ဏံ ပဟိဏိ။ တံ သုတွာ ရာဇာ မဟတိယာ သေနာယ ပရိဝုတော ယုဒ္ဓဘူမိံ ဂစ္ဆန္တော မဟေသိယာ သဒ္ဓိံ ဂန္တွာ ခန္ဓာဝါရံ နိဝါသေတွာ တဿာ ဧဝမာဟ။ ဘဒ္ဒေ သင်္ဂါမသီသေ ဇယပရာဇယော နာမ န သက္ကာ ဝိညာတုံ။ သစေ မေ ပရာဇယော အဘဝိဿ၊ ပုရေတရမေဝ ရတ္တပတာကံ ဥဿာပေဿာမိ၊ တေန အဘိညာဏေန တွံ ကောသမ္ဗိမေဝ ဂစ္ဆာဟီတိ အနုသာသိတွာ သင်္ဂါမ မဏ္ဍလံ ဂန္တွာ မဟာရဏံ ကရောန္တော အတ္တနော ပရာဇယဘာဝံ ဉတွာ မာတုဂါမံ သရိတွာ ရတ္တဒ္ဓဇံ ဥဿာပေတွာ ယုဇ္ဈန္တော ရဏေ ပတိ။ အထ သာ ရတ္တပတာကံ ဒိသွာ ပရာဇိတော နူန မေ သာမိကောတိ ဘယေန ပလာယိတုမာရဘိ။ အထ တံ စောရရညော မနုဿာ ဒိသွာ နူနာယံ ရညော အဂ္ဂမဟေသီတိ ဉတွာ အတ္တနော ရာဇာနံ ဒဿေသုံ၊ ရာဇာ တံ ဒိသွာ ပဋိဗဒ္ဓစိတ္တော မမေတံ အဘိသေကံ ကရောထာတိ အမစ္စေ အာဏာပေသိ။ အမစ္စာ တံ အဘိသေကတ္ထာယ ယာစိံသု၊ သာ န မေ ဘဏေ အဘိသေကေနတ္ထောတိ န ဣစ္ဆိ။ အမစ္စာ တမတ္ထံ ရညော အာရောစေသုံ။ ရာဇာ နံ ပက္ကောသာပေတွာ ကသ္မာ န ဣစ္ဆသီတိ ပုစ္ဆိ။ သာ ဧဝမာဟ။

သုဏောဟိ သာဓုကံ ဒေဝ၊ ဘာသမာနာယ မေ ဝစော၊

ဘတ္တာ မယှံ မတော အဇ္ဇ၊ သဗ္ဗသမ္ပတ္တိဒါယကော။

ကတွာန ¶ သောဘိသေကံ မံ၊ အတ္တနော ဟဒယံ ဝိယ၊

ပါလေတိ တံ သရန္တဿာ၊ သောကဂ္ဂိ ဒဟတေ မနံ။

တမှာ ဒုက္ခာ န မုစ္စာမိ၊ တေနာဟံ တံ န ပတ္ထယေ။

သောကဂ္ဂိနာ ပဒိတ္တာဟံ၊ သောကေ သောကံ ကထံ ခိပေ၊

ဇလန္တဂ္ဂိမှီ ကော နာမ၊ ပလာလံ ပက္ခိပေ ဗုဓော။

ပိယဝိပ္ပယောဂဒုက္ခံ၊ တံ စိန္တယန္တီ ပုနပ္ပုနံ၊

တမှာ ဒုက္ခာ န မုစ္စာမိ၊ တသ္မာဟံ တံ န ပတ္ထယေတိ။

တံ သုတွာ ရာဇာ ကောဓေနာဘိဘူတော သစေ နာဘိသိဉ္စိဿသိ၊ အဂ္ဂိမှိ တံ ပက္ခိပိဿာမီတိ ဝတွာ မဟန္တံ ဒါရုစိတကံ ကာရာပေတွာ အဂ္ဂိံ ဒတွာ ဧကပဇ္ဇောတေ ဇာတေ ဧတ္တ ပဝိသာတိ အာဟ။ အထ သာ ယာစန္တီ ရာဇာနံ အာဟ။

ပါပေါ နိပ္ပာပိနံ ရာဇ၊ ပါတနံ ခလု ပါဝကေ၊

ဟောတိ ပါပဖလံ တဿ၊ ပစ္စတ္တေစ ပရတ္ထစ။

ပုရာတနေဟိ ဘူပါလ၊ သမဏဗြဟ္မဏေသုစ၊

မာတာပိတုသု ဗာလေသု၊ ရောဂေနာ တုရဣတ္ထိသု၊

နပ္ပသတ္ထော ဝဓော ဒေဝ၊ တသ္မာဟံ န ဝဓာရဟာတိ။

တံ သုတွာပိ ရာဇာ အသဒ္ဒဟန္တော မနုဿေ အာဏာပေသိ။ ဧတာယ ဟတ္ထပါဒေ ဂဟေတွာ အဂ္ဂိမှိ ပက္ခိပထာတိ တေ တထာ ကရိံသု၊ အထ သာ အဂ္ဂိမှိ ပက္ခိပမာနာ နတ္ထေတ္ထ မေ ကောစိ ပဋိသရဏောတိ သရဏမေဝ သရဏံ ကရောမီတိ စိန္တေတွာ ‘‘ဗုဒ္ဓံ သရဏံ ဂစ္ဆာမိ၊ ဓမ္မံ သရဏံ ဂစ္ဆာမိ၊ သင်္ဃံ သရဏံ ဂစ္ဆာမီတိ’’ ဝဒန္တီ မနသာစ အနုဿရန္တီ အဂ္ဂိမှိ ပတိ၊ တထာဝိဓောပိ အဂ္ဂိ တဿာ သရီရေ လောမကူပမတ္တမ္ပိ ဥဏှာကာရံ ကာတုံ နာသက္ခိ။ ပဒုမဂဗ္ဘံ ပဝိဋ္ဌာ ဝိယ သီတိဘူတသရီရာ အဟောသိ။ ရာဇာ တံ အစ္ဆရိယံ ¶ ဒိသွာ သံဝိဂ္ဂေါ လောမဟဋ္ဌဇာတော ဝေဂေန တံ ဥပသင်္ကမိတွာ ဥဘောဟိ ဟတ္ထေဟိ ပဂ္ဂယှ ဥရေ နိပဇ္ဇာပေတွာ ရာဇာသနေ နိသီဒါပေတွာ အဉ္ဇလိံ ဂဂ္ဂယှ ဌိတော ကသ္မာ တေ တံ အဂ္ဂိ သရီရံ မာ ပရိဒဟီတိ ပုစ္ဆိ။ သာ တံ ကာရဏံ ကထေန္တီ ဧဝ မာဟ။

မာတာ ပိတာစ ဉာတီစ၊ ပရိဝါရာစ သောဟဒါ၊

မန္တော သဓာဒယောစာပိ၊ မဟေသက္ခာစ ဒေဝတာ။

ဧတေစ ညေစ ဘူပါလ၊ သတ္တာနံ ဘယ မာဂတေ၊

ရက္ခိတုံ နေဝ သက္ကောန္တိ၊ ဟိတွာန သရဏတ္တယံ။

အဂါဟံ ဗုဒ္ဓံ သရဏံ၊ ဗုဒ္ဓါ မေ သရဏံ ဣတိ၊

တေန တေဇေန မံ ရာဇ၊ ဇလန္တော အဂ္ဂိ နော ဒဟိ။

အဂါဟံ ဓမ္မံ သရဏံ၊ ဓမ္မော မေ သရဏံ ဣတိ၊

တေန တေဇေန မံ ရာဇ၊ ဇလန္တော အဂ္ဂိ နော ဒဟိ။

အဂါဟံ သင်္ဃံ သရဏံ၊ သင်္ဃော မေ သရဏံ ဣတိ၊

တေန တေဇေန မံ ရာဇ၊ ဇလန္တော အဂ္ဂိ နော ဒဟိ။

ဧဝံ မဟာနုဘာဝန္တံ၊ ပစ္စက္ခံ ဧဟိပဿိကံ၊

နာနော ပဒ္ဒဝ ဝိဒ္ဓံသိံ၊ နာနာသမ္ပတ္တိဒါယကံ။

သရဏတ္တယဉှိ ယော သတ္တော၊ န သမာဒါယ ဂဏှတိ၊

ဣဓဝါ ပရတ္ထဝါ လောကေ၊ သော သုခံ နာနုဘောဿတိ။

သရဏတ္တယဉှိ ယော သတ္တော၊ သုသမာဒါယ ဂဏှတိ၊

ဣဓဝါပရတ္ထဝါ လောကေ၊ သော သုခါ န ဝိဟာယတိ။

တသ္မာ တုဝမ္ပိ ဘူပါလ၊ ဂဏှာဟိ သရဏတ္တယံ၊

တံ တေ ဘဝတိ သဗ္ဗတ္ထ၊ တာဏံ လေဏံ ပရာယဏန္တိ။

တံ သုတွာ ရာဇာ အတိဝိယ ပသန္နမာနသော တံ ခမာပေတွာ မဟန္တံ သက္ကာရသမ္မာနံ ကတွာ အဇ္ဇပ္ပဋ္ဌာယ တွံ မမ မာတာတိ တံ မာတုဋ္ဌာနေ ဌပေတွာ သရဏ မဂမာသိ။ တသ္မိံ သန္နိပတိတွာ ဌိတမဟာဇနာ တံ ပါဋိဟာရိယံ ဒိသွာ သရဏေသုစ သီလေသုစ ပတိဋ္ဌာယ ဒါနာဒီနိ ပုညကမ္မာနိ ကတွာ ယထာကမ္မံ ဂတာတိ။

ဣတိ ¶ သရဏဝရံ သာ ကေဝလံ ဥဂ္ဂဟေတွာ၊

ဇလိတဒဟနမဇ္ဈေ သီတိဘာဝံ အလတ္ထ၊

န လဘထ ဘဝဘောဂံ နိဗ္ဗုတိဉ္စာပိ အန္တေတိ။

၈။ မဟာမန္ဓာတုဝတ္ထုမှိ အယမာနုပုဗ္ဗီကထာ

ဣတော ကိရ ဧကနဝုတိကပ္ပမတ္ထကေ ဝိပဿီနာမ သမ္မာသမ္ဗုဒ္ဓါ လောကေ ဥပ္ပဇ္ဇိတွာ ပဝတ္တဝရဓမ္မစက္ကော သဒေဝကေဟိ လောကေဟိ ပူဇိယမာနော ဗန္ဓုမတီနဂရေ ပဋိဝသတိ။ တဒါ သော မန္ဓာတာ တသ္မိံ နဂရေ တုန္နကာရော ဟုတွာ နိဗ္ဗတ္တိ။ တုန္နကာရကမ္မေန ဇီဝိကံ ကပ္ပေန္တော ဝိဟရတိ။ တဒါ သကလနဂရဝါသိနော ဗုဒ္ဓပမုခံ ဘိက္ခုသင်္ဃံ နိမန္တေတွာ မဟာဒါန မဒံသု။ အထ သော ဧဝံ စိန္တေသိ၊ သဗ္ဗေပိမေ နဂရဝါသိနော ဒါနံ ဒဒန္တိ။ အဟမေကောဝ သေသော ဒုဂ္ဂတတ္တာ၊ ယဇ္ဇာဟမဇ္ဇ ဗီဇံ န ရောပေမိ၊ ဣမမှာ ဒုက္ခာ န ပရိမုစ္စိဿာမီတိ။ သော ဝေဂေန တုန္နကာရကမ္မံ ပရိယေသိတွာ ကိဉ္စိမူလံ လဘိတွာ တေန ဧကဿာပိ ဒါနံ ဒါတုံ ဩကာသ မလဒ္ဓါ အာပဏံ ဂန္တွာ ရာဇမာသကေ ဂဟေတွာ စင်္ကောဋကံ ပူရေတွာ အာဒါယ ဗုဒ္ဓပမုခဿ ဘိက္ခုသင်္ဃဿ ဘတ္တဂ္ဂံ ဂန္တွာ ဌိတော ဧဝံ စိန္တေသိ၊ နတ္ထိ ဒါနိ ဩကာသံ ဧကဿာပိ ဘိက္ခုနော ပတ္တေ ဩကိရိတုံ၊ အဒ္ဓါဟံ ဣမေ အာကာသေ ဝိကိရိဿာမီတိ အပ္ပေဝနာမ ပတမာနာနံ ဧကဿာပိ ဘိက္ခုနော ပတ္တေ ဧကမ္ပိ ပတေယျ၊ တံ မေ ဘဝိဿတိ ဒီဃရတ္တံ ဟိဘာယ သုခါယာတိ ပသန္နမာနသော ဥဒ္ဓံ ခိပိ၊ တ တော ပတမာနာ တေ ပရိဝါရိကဒေဝတာနဉ္စ ဘဂဝတော အာနုဘာဝေနစ ဗဟိ အပတိတွာ ဘဂဝန္တမာဒိံ ကတွာ သဗ္ဗေသံ ဘိက္ခူနံ ¶ ပတ္တေယေဝ ပတိံသု။ အထ သော တံ အစ္ဆရိယံ ဒိသွာ ပသန္နမာနသော သိရသိ အဉ္ဇလိံ ပဂ္ဂယှ ဌိတော ဧဝံ ပတ္ထနမကာသိ။

ဣမိနာ မေ အဓိကာရေန၊ ပသာဒေန ယတိဿရေ၊

ကာမဘောဂီနဟံ အဂ္ဂေါ၊ ဘဝေယျံ ဇာတိဇာတိယံ။

ပဟရိတွာ ယဒါ ပါဏိံ၊ ဩလောကေမိ နဘောတလံ၊

သတ္တရတနသမ္ပန္နံ၊ ဝဿံ ဝဿတု သဗ္ဗဒါတိ။

သော တတော ပဋ္ဌာယ ဒေဝမနုဿေသု သံသရန္တော မဟန္တံ ဒိဗ္ဗသမ္ပတ္တိံ အနုဘဝိတွာ ဣမသ္မိံ ဘဒ္ဒကပ္ပေ အာဒိမှိ မဟာသမ္မတော နာမ ရာဇာ အဟောသိ။ တဿ ပုတ္တော ရောဇော နာမ။ တဿ ပုတ္တော ဝရရောဇော နာမ၊ တဿ ပုတ္တော ကလျာဏော နာမ၊ တဿ ပုတ္တော ဝရကလျာဏော နာမ။ ဝရကလျာဏဿ ပုတ္တော ဥပေါသထော နာမ။ ဥပေါသထဿ ပုတ္တော မန္ဓာတာ နာမ ဟုတွာ နိဗ္ဗတ္တိ။ သော သတ္တဟိ ရတနေဟိ စတူဟိ စ ဣဒ္ဓီဟိ သမန္နာဂတော စက္ကဝတ္တိရဇ္ဇံ ကာရေသိ၊ တဿ ဝါမဟတ္ထံ သမ္မိဉ္ဇိတွာ ဒက္ခိဏဟတ္ထေန အပ္ပောဋ္ဌိတေ အာကာသတော ဒိဗ္ဗမေဃာ ဝိယ ဇဏ္ဏုပ္ပမာဏံ သတ္တရတနဝဿံ ဝဿတိ။ ဧဝရူပေါ အစ္ဆရိယော အဟောသိ။ သော စတုရာသီတိဝဿသဟဿာနိ ကုမာရကီဠံ ကီဠိ။ စတုရာသီတိဝဿသဟဿာနိ ဩပရဇ္ဇံ ကာရေသိ။ စတုရာသီတိဝဿသဟဿာနိ စက္ကဝတ္တိရဇ္ဇံ ကာရေသိ၊ အာယု ပနဿ အသင်္ချေယျံ အဟောသိ။ သော ဧကဒိဝသံ ကာမတဏှံ ပူရေတုံ အသက္ကောန္တော ဥက္ကဏ္ဌိတာကာရံ ဒဿေသိ၊ အမစ္စာ ဒေဝ ကိန္နခေါ ဥက္ကဏ္ဌာ သီတိ ပုစ္ဆိံသု။ သော ဘဏေ မယှံ ပုညကမ္မေ ဩလောကိယမာနေ ဣမံ ရဇ္ဇံ နပ္ပဟောတိ၊ ကတရန္နု ခေါ ဌာနံ ရမဏီယန္တိ။ ဒေဝလောကော မဟာရာဇာတိ။ သော စက္ကရတနံ အဗ္ဘုက္ကိရိတွာ ပရိသာယ သဒ္ဓိံ စာတုမဟာရာဇိကဒေဝလောကံ အဂမာသိ၊ အထဿ စတ္တာရော မဟာရာဇာနော ဒိဗ္ဗမာလဂန္ဓ- ဟတ္ထာ ¶ ဒေဝဂဏပရိဝုတာ ပစ္စုဂ္ဂမနံ ကတွာ တံ အာဒါယ စာတုမဟာရာဇိကဒေဝလောကံ ဂန္တွာ ရဇ္ဇံ အဒံသု၊ တဿ ပရိသာယ ပရိဝုတဿ တသ္မိံ ရဇ္ဇံ ကရောန္တဿ ဒီဃော အဒ္ဓါ ဝီတိဝတ္တော။ သော တတ္ထပိ တဏှံ ပူရေတု မသက္ကောန္တော ဥက္ကဏ္ဌိတာ ကာရံ ဒဿေသိ။ တတော စတ္တာရော မဟာရာဇာနော ကိန္နုခေါ မဟာရာဇ ဥက္ကဏ္ဌိတောတိ ပုစ္ဆိံသု။ ဣမမှာ ဒေဝလောကာ ကတရန္နု ခေါ ဌာနံ ရမဏီယန္တိ၊ ဒေဝ ပရေသံ ဥပဋ္ဌာကမနုဿသဒိသာ မယံ။ တာဝတိံသဒေဝလောကော ဣတော သတဂုဏေန ရမဏီယောတိ။ မန္ဓာတာ စက္ကရတနံ အဗ္ဘုက္ကိရိတွာ အတ္တနော ပရိသပရိဝုတော တာဝတိံသာဘိမုခေါ ပါယာသိ၊ အထဿ သက္ကော ဒေဝရာဇာ ဒိဗ္ဗမာလဂန္ဓဟတ္ထော ဒေဝဂဏပရိဝုတော ပစ္စုဂ္ဂမနံ ကတွာ တံ ဟတ္ထေ ဂဟေတွာ ဣတော ဧဟိ မဟာရာဇာတိ အာဟ။ တတော ရညော ဒေဝဂဏပရိဝုတဿ ဂမနကာလေ ပရိဏာယကရတနံ စက္ကရတနံ အာဒါယ သဒ္ဓိံပရိသာယ မနုဿပထံ ဩတရိတွာ အတ္တနော ဃရံ ပါဝိသိ။ သက္ကော မန္ဓာတုံ သက္ကဘဝနံ နေတွာ ဒေဝတာ ဒွေ ကောဋ္ဌာသေ ကတွာ အတ္တနော ရဇ္ဇံ မဇ္ဈေ ဘိန္ဒိတွာ အဒါသိ။ တတော ပဋ္ဌာယ ဒွေပိ ရာဇနော ရဇ္ဇံ ကာရေသုံ။ ဧဝံ ကာလေ ဂစ္ဆန္တေ သက္ကော သဋ္ဌိသတသဟဿာဓိကာနိ တိဿောစ ဝဿကောဋိယော အာယုံ ခေပေတွာ စဝိ။ အညော သက္ကော နိဗ္ဗတ္တိ၊ သောပိ တထေဝ ဒေဝရဇ္ဇံ ကာရေတွာ အာယုက္ခယေန စဝိ၊ ဧတေနု ပါယေန ဆတ္တိံသ သက္ကာ စဝိံသု၊ မန္ဓာတာ ပန မနုဿပရိဟာရေန ဒေဝရဇ္ဇံ ကာရေသိယေဝ၊ တဿေဝံ ကာလေ ဂစ္ဆန္တေ ဘီယျောသော မတ္တာယ ကာမတဏှာ ဥပ္ပဇ္ဇိ၊ သော ကိမ္မေ ဥပဍ္ဎရဇ္ဇေန။ သက္ကံ မာရေတွာ ဧကရဇ္ဇံ ကရိဿာမီတိ စိန္တေသိ။ သက္ကံ ပန မာရေတုံ န သက္ကာ၊ ကာမတဏှာ ပနေသာ ဝိပတ္တိမူလာ။ တထာဟိ။

ဝရမတြ သုခန္တျတြ၊ အတြိစ္ဆာဝိဟတော နရော၊

ဣဓဝါ ပရတ္ထဝါ ကိဉ္စိ၊ န သာတံ ဝိန္ဒတေ သဒါ။

တဏှာဒါသော နရော ဧတ္ထ၊ ရာဇစောရာဒိသမ္ဘဝံ၊

ဟတ္တစ္ဆေဒါဒိကံ ဒုက္ခံ၊ ပါပုဏာတိ ဝိဟညတိ။

ယေန လောဘေန ဇာတေန၊ သဒါ ဇီယန္တိ ပါဏိနော၊

ခေတ္တံ ဝတ္ထုံ ဟိရညံစ၊ ဂဝါဿံ ဒါသပေါရိသံ၊

သဗ္ဗတ္ထာမေန သော လောဘော၊ ပဟာတဗ္ဗောဝ ဝိညုနာတိ။

တတော အတြိစ္ဆာဝိဟတဿ တဿ အာယုသင်္ခါရော ပရိဟာယိ၊ ဇရာ သရီရံ ပဟရိ၊ မနုဿသရီရဉှိ နာမ န ဒေဝလောကေဘိဇ္ဇတိ၊ တထ သော ဒေဝလောကာ ဘဿိတွာ ဗန္ဓုမတီနဂရုယျာနံ ပါဝိသိ၊ ဥယျာနပါလော တဿ အာဂတဘာဝံ ရာဇကုလံ နိဝေဒေသိ။ ရာဇာ ရာဇကုလာ အာဂန္တွာ ဥယျာနေယေဝ အာသနံ ပညာပေသိ။ တတော မန္ဓာတာ ဥယျာနေ ပညတ္တဝရာသနေ နိပန္နော အနုဋ္ဌာနသေယျံ ကပ္ပေသိ။ တတော အမစ္စာ ဒေဝ တုမှာကံ ပရတော ကိန္နု ကထေသာမာတိ ပုစ္ဆိံသု၊ မမ ပရတော တုမှေ ဣမံ သာသနံ မဟာဇနဿ ကထေယျာထ၊ မန္ဓာတုမဟာရာဇာ ဒွိသဟဿဒီပပရိဝါရေသု စတူသု မဟာဒီပေသု စက္ကဝတ္တိရဇ္ဇံ ကာရေတွာ စာတုမဟာရာဇိကေသု ရဇ္ဇံ ကာရေတွာ ဆတ္တိံသသက္ကာနံ အာယုပရိမာဏေန ဒေဝလောကေ ရဇ္ဇံ ကာရေတွာ ကာလမကာသီတိ။ သော ဧဝံ ဝတွာ ကာလံကတွာ ယထာကမ္မံ ဂတောတိ ဣမမတ္ထံ ပကာသေတုံ ဘဂဝါ စတုမဟာပရိသမဇ္ဈေ ဣမာ ဂါထာယော အာဟ။

ယာဝတာ စန္ဒိမသုရိယာ၊ ပရိဟရန္တိ ဒိသာ ဘန္တိ ဝိရောစနာ၊

သဗ္ဗေဝ ဒါသာ မန္ဓာတာ၊ ယေ ပါဏာ ပထဝိနိဿိတာ။

န ¶ ကဟာပဏဝဿေန၊ တိတ္တိ ကာမေသု ဝိဇ္ဇတိ၊

အပ္ပဿဒါ ဒုခါ ကာမာ၊ ဣတိ ဝိညာယ ပဏ္ဍိတော။

အပိ ဒိဗ္ဗေသု ကာမေသု၊ ရတိံသော နာဓိဂစ္ဆတိ၊

တဏှာက္ခယရတော ဟောတိ၊ သမ္မာသမ္ဗုဒ္ဓသာဝကောတိ။

တံ သုတွာ ဗဟူ သောတာပတ္တိဖလာဒီနိ ပါပုဏိံသူတိ။

ဣတိ ဂတိနိယတာနံ ဗောဓိယာ ဥတ္တမာနံ၊

သကဝသမုပနေတွာ ဒေတိ ဒုက္ခာတိတဏှာ၊

အနိယတဂတိကာနံ ကာ ကထာ မာဒိသာနံ၊

ဇဟထ တမိတိ မန္တွာ ဘော ဘဇဝှော တိဝတ္ထုံတိ။

၉။ ဗုဒ္ဓဝမ္မဝါဏိဇကဝတ္ထုမှိ အယမာနုပုဗ္ဗီကထာ

ဇမ္ဗုဒီပေ ကိရ ပါဋလိပုတ္တနဂရေ ဗုဒ္ဓဝမ္မော နာမ ဝါဏိဇကော အဟောသိ ဝါဏိဇကကမ္မေန ဇီဝမာနော။ သော အပရဘာဂေ သတ္ထဝါဟေဟိ သဒ္ဓိံ ဂါမနိဂမဇနပဒ ရာဇဓာနီသု ဝါဏိဇ္ဇံ ပယောဇယမာနော ဝိစရတိ၊ တသ္မိံ သမယေ ဘဂဝါနေကဘိက္ခုသဟဿပရိဝုတော ဇနပဒစာရိကံ စရတိ ဗဟူ ဒေဝမနုဿေ သံသာရကန္တာရာ ဥတ္တာရေန္တော။ တဒါ သော ဘဂဝန္တံ အဒ္ဒသ ဒွတ္တိံသလက္ခဏာနုဗျဉ္ဇနပတိမဏ္ဍိတံ ဇလမာနသုဝဏ္ဏမေရုံ ဝိယဝိရောစမာနံ မဟာဘိက္ခုသင်္ဃပရိဝုတံ၊ ဒိသွာ ပရမပီတိယာ ဖုဋသရီရော အဉ္ဇလိံ ပဂ္ဂယှ ဘဂဝန္တံ ဥပသင်္ကမိတွာ ဝန္ဒိတွာ သာယဏှေ ဘဂဝန္တံ ဘတ္တေန နိမန္တေသိ ဗုဒ္ဓသာသနေ အပရိစိတဘာဝေန။ အထဿ ဘဂဝါ ဝိကာလဘောဇနာ ပဋိဝိရတာ တထာဂတာတိ အာဟ။ အထ သော ဘဂဝန္တံ ဝန္ဒိတွာ ကိံ ဘန္တေ ဘဂဝန္တာ ဝိကာလေ ဘုဉ္ဇိဿန္တီတိ၊ အထဿ ကထံ ပဋိစ္စ ဘဂဝါ ¶ အဋ္ဌဝိဓံ ပါနံ တထာဂတာနံ ဝိကာလေ ဘုဉ္ဇိတုံ ကပ္ပတိ။ သေယျထိဒံ၊ အမ္ဗပါနံ ဇမ္ဗုပါနံ စောစပါနံ မောစပါနံ ဖာရုသကပါနံ မဓုပါနံ မုဒ္ဒိကပါနံ သာလူကပါနန္တိ။ တံ သုတွာ ဝါဏိဇော သဟသက္ကာရာရသေဟိ မုဒ္ဒိကပါနံ ကတွာ ဗုဒ္ဓပမုခဿ ဘိက္ခုသင်္ဃဿ အဒါသိ၊ သဘိက္ခုသင်္ဃော သတ္ထာ ပရိဘုတ္တပါနီယရသော တဿ ဓမ္မံ ဒေသေတွာ ဇနပဒစာရိကံ ပက္ကာမိ။ သောပိ ပသန္နမာနသော ဟုတွာ နိဝတ္တော သဒ္ဓိံ ဝါဏိဇကေဟိ တေသု တေသု ဇနပဒေသု ဝါဏိဇ္ဇံ ပယောဇေန္တော မဟာဝတ္တနီယံနာမ ကန္တာရံ ပါပုဏိ၊ တတ္တ တေသံ သဗ္ဗေသုယေဝ သကဋေသု ပါနီယံ ပရိက္ခယမဂမာသိ။ တတ္ထ သဗ္ဗမနုဿာနံစ ဗလီဝဒ္ဒါနံစ ပါနီယံ နာဟောသိ။ အထ သော ဝါဏိဇော ပိပါသာဘိဘူတော တေသု တေသု သကဋေသု ပါနီယံ ပရိယေသန္တော ဝိစရတိ။ အထေကသ္မိံ သကဋေ မနုဿာ တံ ဒိသွာ ကာရုညေန ဧတ္ထာဂစ္ဆ၊ ဣမသ္မိံ ကောဠမ္ဗေ ထောကံ ပါနီယံ အတ္ထိ ပိဝါတိ ဝဒိံသု။ တ တော သော ဂန္တွာ ပါနီယံ ပိဝိ။ တဿ တံ ရသံ မုဒ္ဒိကပါနရသသဒိသံ အဟောသိ၊ ပိဝန္တောဝ သော ဧဝံ စိန္တေသိ။ သမ္မာသမ္ဗုဒ္ဓဿ တဒါ မေ ဒိန္နမုဒ္ဒိကပါနဿ နိဿန္ဒော အဇ္ဇ သမ္ပတ္တော ဘဝိဿတီတိ အစ္ဆေရဗ္ဘုတစိတ္တော သောမနဿဇာတော ဂန္တွာ သယမေဝ စာဋိယာ ပိဓာနံ ဝိဝရိ။ သကလာပိ သာ စာဋိ မုဒ္ဒိကပါနေန ပရိပုဏ္ဏာ အဟောသိ။ တတော သော ရ သဝ န္တံ ဩဇဝန္တံ အပရိက္ခယံ ဒိဗ္ဗပါနသဒိသံ ပါနီယံ ဒိသွာ ပရမာယ ပီတိယာ ဖုဋသရီရော ဥဂ္ဃောသေသိ သဗ္ဗေ ပါနီယံ ပိဝန္တူတိ။ တံ သုတွာ သဗ္ဗေ သန္နိပတိတွာ ပါနီယံ ဒိသွာ အဗ္ဘုတစိတ္တာ ဇာတာ။ ဝါဏိဇော တေသံ မဇ္ဈေ ဗုဒ္ဓါနုဘာဝံ ပကာသေန္တော အာဟ။

ပဿထေဒံ ဘဝန္တော ဘော၊ အာနုဘာဝံ မဟေသိနော၊

အစိန္တနီယမစ္ဆေရံ၊ သန္ဒိဋ္ဌိက မကာလိကံ။

ပသန္နမနသာ ဗုဒ္ဓေ၊ ဒိန္နံ ပါနီယကံ မယာ၊

ဝိပစ္စတိ ဣဒါနေဝ၊ တံ ဒါနံ မုနိဝါဟသာ။

ဩဇဝန္တံ ¶ သုခန္နံဝ၊ သီတလံ မဓုရော ဒကံ၊

ဒိဗ္ဗပါနံဝ ဒေဝါနံ၊ ဇာတမဗ္ဘုတမက္ခယံ။

သီလဝန္တေသု ကော နာမ၊ န ဒဒေယျ ဝိစက္ခဏော၊

ဣဓ လောကေ ပရတ္တေစ၊ သုခဒံ ဒါန မုတ္တမံ။

ယထိ စ္ဆိတံ ဂဟေတွာန၊ ပိဝန္တု မဓုရော ဒကံ၊

ဘာဇနာနိစ ပူရေတွာ၊ ယန္တု သဗ္ဗေ ယထိစ္ဆိတန္တိ။

ဧဝဉ္စ ပန ဝတွာ သဗ္ဗေ မနုဿေစ ဗလီဝဒ္ဒေစ မုဒ္ဒိကရသေနေဝ သန္တပ္ပေသိ။ တတော တတော အာဂတာပိ ပါနီယံ ပိဝန္တောစ ပါနီယံ အက္ခယံ အဟောသိ။ တတော ဝါဏိဇော သတ္ထဝါဟေဟိ သဒ္ဓိံ ဝါဏိဇ္ဇံ ပယောဇေတွာ သကနဂရံ အာဂစ္ဆန္တော ဘဂဝန္တံ ပဿိတွာ ဂမိဿာမီတိ ဝေဠုဝနံ ဂန္တွာ သတ္ထာရံ ဝန္ဒိတွာ ကတာနုညော ဧကမန္တေ နိသီဒိ။ သတ္ထာပိ တေန သဒ္ဓိံ မဓုရပဋိသန္ထာရမကာသိ။ ဥပါသကောပိ ဘန္တေ တုမှာကံ ပါဋိဟာရိယံ ဒိသွာ ပသန္နော ဝန္ဒိတွာ ဂမိဿာမီတိ အာဂတောမှိ၊ ဧဝဉ္စေ ဝဉ္စ ပါဋိဟာရိယန္တိ ဝိတ္ထာရေန ကထေသိ။ အထဿ ဘဂဝါ ဓမ္မံ ဒေသေသိ။ သော ဓမ္မံ သုတွာန သတ္ထာရံ သွာတနာယ နိမန္တေတွာ မဟာဒါနံ ဒတွာ အတ္တနော ဂေဟမေဝ အဂမာသိ။ သော တတော ပဋ္ဌာယ ဒါနာဒီနိ ပုညာနိ ကတွာ တတော စုတော ဒေဝလောကေ ဒွါဒသယောဇနိကေ ကနကဝိမာနေ ဒေဝစ္ဆရာပရိဝုတော ဒေဝိဿရိယသမန္နာဂတော နိဗ္ဗတ္တိ။ တဿ ပုဗ္ဗကမ္မပကာသနတ္ထံ တတ္ထ တတ္ထ ရတနဘာဇနေသု ဒိဗ္ဗမယေဟိ မုဒ္ဒိကပါနေဟိ ပရိပုဏ္ဏံ အဟောသိ။ ပါနီယံ ပိဝိတွာ ဒေဝါ နစ္စန္တိ ဝါဒေန္တိ ကီဠန္တီတိ။

န ဝိပုလဇိနသာရံ ဇာနမာနော ဇနေဝံ၊

လဘတိ ဝိပုလဘောဂံ တောယမတ္တဿ ဒါနာ၊

ဝိဒိတဂုဏဂဏာ ဘော တီသု ဝတ္ထူသု တုမှေ၊

လဘထ ခလု ဝိသေသံ သီလဝန္တေသု ဒါနာတိ။

ဗုဒ္ဓဝမ္မဝါဏိဇကဿ ဝတ္ထုံ နဝမံ။

၁၀။ ရူပဒေဝိယာ ဝတ္ထုမှိ အယမာနုပုဗ္ဗီကထာ

အတီတေ ¶ ကိရ ဝိပဿိဿ ဘဂဝတော ကာလေ တသ္မိံ နဂရေ ဧကာ ဂါမဒါရိကာ ဝိဟာရေ အာဟိဏ္ဍန္တီ ဧကံ ဂိလာနဘိက္ခုံ ဒိသွာ ကမ္ပမာနဟဒယာ ဥပသင်္ကမိတွာ ဝန္ဒိတွာ ဘန္တေ ကောတေ အာဗာဓော သရီရံ ပီဠေတီတိ ပုစ္ဆိ။ တေနာပိ ဘဂိနိ ခရာဗာဓော မေ ပီဠေတီတိ ဝုတ္တေ သာ တေနဟိ ဘန္တေ အဟံ တံ ရောဂံ ဝူပသမေဿာမီတိ နိမန္တေတွာ ဂေဟံ ဂန္တွာ တံ ပဝတ္တိံ မာတာပိတုန္နံ ကထေတွာ တေဟိ အနုညာတာ ပုန ဒိဝသေ နာနဂ္ဂရသေန ဘေသဇ္ဇာဟာရံ သမ္ပာဒေသိ၊ တတော သော ဘိက္ခု ပုနဒိဝသေ စီဝရံ ပါရုပိတွာ ဘိက္ခာယ စရန္တော တဿာ ဂေဟံ ဂန္တွာ အဋ္ဌာသိ။ သာ ထေရံ အာဂတံ ဒိသွာ သောမနဿဇာတာ ပတ္တံ ဂဟေတွာ အာသနံ ပညာပေတွာ အဒါသိ။ တတ္ထ နိသိန္နံ တံ အာဟာရေန သာဓုကံ ပရိဝိသိတွာ သက္ကာရ မကာသိ။ အထဿာ သဒ္ဓါဗလေန ဘုတ္တမတ္တေယေဝ သော အာဗာဓော ဝူပသမိ။ တတော သော ဝူပသန္တရောဂေါ ဒုတိယဒိဝသေ တဿာ ဂေဟံ နာ ဂမာသိ။ အထ သာ ဝိဟာရံ ဂန္တွာ တံ ဝန္ဒိတွာ ကသ္မာနာဂတတ္ထာတိ ပုစ္ဆိတွာ တေန မေ ဘဂိနိ ဗျာဓိ ဝူပသမိ၊ တသ္မာ နာဂတောသ္မီတိ ဝုတ္တေ သာ သာဓု ဘန္တေတိ သောမနဿဇာတာ ဂေဟမေဝ အဂမာသိ။ သာ တေန ပုညကမ္မေန ကာလံ ကတွာ ဒေဝလောကေ နိဗ္ဗတ္တိ။ တဿာ တတ္ထ ဒွါဒသယောဇနိကံ ကနကဝိမာနံ နိဗ္ဗတ္တိ။ သာ တတ္ထ ဒေဝိဿရိယံ အနုဘဝန္တီ ဆဗုဒ္ဓန္တရံ ခေပေတွာ အမှာကံ ဘဂဝတော ကာလေ ဇမ္ဗုဒီပေ ဒေဝပုတ္တနဂရေ ဥဒိစ္စဗြဟ္မဏကုလေ ဇေဋ္ဌဗြာဟ္မဏဿ ဘရိယာယ ကုစ္ဆိမှိ ပဋိသန္ဓိံ ဂဏှိ၊ သာ ပရိပါက မနွာယ မာတုကုစ္ဆိတော နိက္ခမိ။ တဿာ မာတုကုစ္ဆိတော နိက္ခန္တကာလတော ပဋ္ဌာယ ဒိဝသေ ဒိဝသေ အဋ္ဌဋ္ဌနာလိမတ္တံ တဏ္ဍုလံ နိဗ္ဗတ္တတိ။ တဿာ ရူပသမ္ပတ္တိံ ဒိသွာ ပသန္နာ မာတာပိတရော ရူပဒေဝီတိ နာမ မကံသု။ ပစ္ဆာ တံ ပတိရူပေန ဒါရကေန နိယောဇေသုံ။ အထဿာ တဏ္ဍုလ- နာလိမတ္တံ ¶ ဂဟေတွာ ပစိတုံ အာရဒ္ဓေ ဣစ္ဆိတိစ္ဆိတမံသာဒိဗျဉ္ဇနဉ္ဇ သပ္ပိနဝနီတဒဓိခီရာဒိဂေါရသဉ္စ ဇီရမရိစာဒိကဋုကဘဏ္ဍဉ္စ ကဒလိပနသမဓုဂုဠာဒိဥပကရဏဉ္စ ဘာဇနာနိ ပူရေတွာ နိဗ္ဗတ္တတိ၊ တာယ ဟတ္ထေန ဂဟိတံ ကိဉ္စိ ခါဒနီယံ ဘောဇနီယံဝါ ပူတိဘာဝံ န ဂစ္ဆတိ၊ ဘတ္တုက္ခလိံ ဂဟေတွာ သကလနဂရဝါသိနော ဘောဇေန္တိယာပိ ဧကကဋစ္ဆုမတ္တံ ဘတ္တံ ဂဟိတဋ္ဌာနံ န ပညာယတိ။ ဧဝံ အပရိက္ခယပုညာ အဟောသိ၊ သကလဒေဝပုတ္တနဂရေ စန္ဒသုရိယာဝ ပါကဋာ အဟောသိ၊ အထ သာ ပဉ္စသတဘိက္ခူ နိမန္တေတွာ နိစ္စံ သကနိဝေသနေယေဝ ဘောဇေတိ၊ တဒါ တေသံ အန္တရေ ပဋိသမ္ဘိဒါပတ္တော မဟာသင်္ဃရက္ခိတတ္ထေရောနာမ ဣမိဿာ ပုညာနုဘာဝံ ဒိဗ္ဗစက္ခုနာ ဒိသွာ န ဇာနာတိ ဧသာ အတ္ထနာ ပုဗ္ဗေ ကတကမ္မံ။ ယန္နူနာဟံ အဿာ ပကာသေယျန္တိ ဧကဒိဝသံ တဿာ နိဝေသနေ ဘုဉ္ဇိတွာ အနုမောဒနံ ကရောန္တော ဇာနာသိ ဘဂိနိ တယာ ပုဗ္ဗေ ကတကမ္မန္တိ ပုစ္ဆိ၊ န ဇာနာမိ ဘန္တေ။ သောတုမိစ္ဆာမီတိ၊ အထဿာ သော ပုဗ္ဗကမ္မံ ပကာသေန္တော။

တဒါ တသ္မိံ ပုရေ ရမ္မေ၊ အာသိ တွံ ဂါမဒါရိကာ၊

အာဟိဏ္ဍန္တီ ဝိဟာရသ္မိံ၊ အဒ္ဒက္ခိ ဇိနသာဝကံ။

ရောဂါတုရံ ကိသံ ပဏ္ဍုံ၊ အဿသန္တံ မုဟုံ မုဟုံ၊

ဒိသွာန ကမ္ပိတာ စိတ္တာ၊ နိမန္တေတွာန တံ မုနိံ။

ဘေသဇ္ဇဉ္စေဝ ဘတ္တဉ္စ၊ အဒါ တွံ တေန သော ယတိ၊

အဗျာဗာဓော အနီဃောစ၊ အဟောသိ အနုပဒ္ဒဝေါ။

တတော တွံ တေန ကမ္မေန၊ သုကတေန တတော စုတာ၊

ဇာတာသိ ဒေဝလောကသ္မိံ၊ သဗ္ဗကာမသမိဒ္ဓိနီ။

တတ္ထ ¶ တေ ပုညတေဇေန၊ ပါသာဒေါ ရတနာမယော၊

မဏိထူပိသတာကိဏ္ဏော၊ ကူဋာဂါရေဟိ လင်္ကတော။

နေကဂဗ္ဘသတာကိဏ္ဏော၊ သယနာသနမဏ္ဍိတော၊

အစ္ဆရာသတသံကိဏ္ဏော၊ နစ္စဂီတာဒိသံကုလော။

ရမ္ဘာမ္ဗဇမ္ဗုသန္နီရ၊ ပူဂပုန္နာဂပါဋလီ၊

နာဂါဒိတရုသဏ္ဍေဟိ၊ မဏ္ဍိတုယျာနပန္တိဟိ။

ပဒုမုပ္ပလကဠာရ၊ ကုန္ဒကာနနမဏ္ဍိတေ၊

မဓုမတ္တာလိပါလီဟိ၊ သာရသီသရသံကုလေ။

ဒေဝပုတ္တေဟိ နေကေဟိ၊ တထာ ဒေဝစ္ဆရာဟိစ၊

နိစ္စုဿဝေ မဟာဘောဂေ၊ ဝိမာနေ မနနန္ဒနေ။

တွမေဝံ ဒေဝလောကမှိ၊ ဝိန္ဒမာနာ မဟာယသံ၊

အဒ္ဓါနံ ဝီတိနာမေတွာ၊ နိဗ္ဗုတေ ဂေါတမေ ဇိနေ။

ဇမ္ဗုဒီပေ ဣဒါနိ တွံ၊ နိဗ္ဗတ္တာ ဥဒိတေ ကုလေ၊

ပုညပညာဂုဏာဝါသာ၊ ရူပေနဂ္ဂါ ပိယံဝဒါ။

ဧတံ တေ ဒေဝလောကသ္မိံ၊ ဒေဝိဿရိယမဗ္ဘုတံ၊

ဣမံ တေ ဣဓ လောကသ္မိံ၊ သဗ္ဗံ မာနုသိကံ သုခံ။

ဝိပဿိမုနိနော ကာလေ၊ တွံ တဿေကဿ ဘိက္ခုနော၊

အဒါ ဒါနံ ဂိလာနဿ၊ တဿ တံ ဖလမီဒိသံ။

ကာတဗ္ဗဉှိ သဒါ ပုညံ၊ ဣစ္ဆန္တေန သုခပ္ပဒံ၊

တသ္မာ တွံ သဗ္ဗဒါ ဘဒ္ဒေ၊ ဥဿုက္ကာ ကုသလေ ဘဝါတိ။

ဧဝံ သော တဿ ပုရိမတ္တဘာဝေ ကတကမ္မံ ပကာသေတွာ ဣဒါနိ ပုညကမ္မေ အပ္ပမာဒါ ဘဝါတိ အနုသာသိ။ သာ ထေရဿ ဓမ္မဒေသနံ သုတွာ ပရမသောမနဿာ တတော ပဋ္ဌာယ ဒါနာဒီသု နိရတာ ပုညာနိ ကရောန္တီ တေနေဝ သောမနဿေန သောတာပန္နာ အရိယသာဝိကာ အဟောသီတိ။

ဣတိ ¶ တရုဏကုမာရီ ပုညကမ္မေသု သာရံ၊

အဝိဒိတဂုဏမတ္တာ ဒတွ ဘိက္ခုဿ ဒါနံ၊

ဒိဝိမနုဇသုခံ သာလတ္ထ တုမှေ ဘဝန္တာ၊

ဝိဒိတကုသလပါကာ ကိံ န လဗ္ဘေထ သန္တိံ။

၁၁။ နန္ဒိယရာဇဿ ဝတ္ထုမှိ အယမာနုပုဗ္ဗီကထာ

ဣတော ¶ ကိရ ကပ္ပသတသဟဿမတ္ထကေ ပဒုမုတ္တရော နာမ သတ္ထာ လောကေ ဥဒပါဒိ သဒေဝကံ လောကံ သံသာရကန္တာရာ ဥတ္တာရေန္တော။ တသ္မိံ ကိရ သမယေ ဧကော ကုဋုမ္ဗိကော သတ္ထု ဓမ္မဒေသနံ သုတွာ ပသန္နမာနသော ဗုဒ္ဓပမုခံ ဘိက္ခုသင်္ဃံ နိမန္တေတွာ မဟာဒါနံ သဇ္ဇေတွာ အတ္တနော ဘဝနံ ဒေဝဘဝနမိဝ အလင်္ကရိတွာ ဗုဒ္ဓါရဟံ မဟာသနံ ပညာပေတွာ ဂန္တွာ ဘဂဝန္တံ ယာစိ ကာလောယံ ဘန္တေ ဘဂဝတော ဘတ္တဂ္ဂဿ ဥပသင်္ကမနာယာတိ။ အထ ဘဂဝါ ဘိက္ခုသင်္ဃပရိဝုတော မဟတာ ဗုဒ္ဓါနုဘာဝေန ဂန္တွာ နိသီဒိ ပညတ္တဝရဗုဒ္ဓါသနေ၊ တတော ကုဋုမ္ဗိကော ဟဋ္ဌော ဥဒဂ္ဂေါ သပရိသော ဘဂဝန္တံ ပရိဝိသတိ အနေကေဟိ မဓုရန္နပါနာဒီဟိ။ တဒါ တဿ ဘဂဝတော သာသနေ ဓုတင်္ဂဓရာနံ အဂ္ဂေါ ဝသဘတ္ထေရောနာမ မဟာသာဝကော သပဒါနဝတ္တေန ပိဏ္ဍာယ စရမာနော တဿ ကုဋုမ္ဗိကဿ ဂေဟဒွါရေ အဋ္ဌာသိ၊ အထ သော ထေရံ ဒိသွာ ဘန္တေ သတ္ထာ အန္တောဂေဟေ နိသိန္နော၊ တုမှေပိ ပဝိသထာတိ ယာစိ၊ ထေရော အပဝိသိတွာဝ အဂမာသိ၊ ကုဋုမ္ဗိကော ဘဂဝန္တံ ဥပသင်္ကမိတွာ တမတ္တံ ဝတွာ ကိံ ဘန္တေ သဒေဝကေ လောကေ ဘဂဝတာပိ ဥတ္တရိတရော ဂုဏေန သံဝိဇ္ဇတီတိ အာဟ။ အထဿ သတ္ထာ ပုတ္တောပမံ ဒဿေတွာ ထေရဿ ဂုဏေ ဝဏ္ဏေန္တော ဧဝမာဟ။

ပါလေန္တိ နိမ္မလံ ကတွာ၊ ပါတိမောက္ခာဒိသံဝရံ၊

သမာဒိန္နဓုတင်္ဂါစ၊ အပ္ပိစ္ဆာ မုနိသူနဝေါ။

နိစ္စ မန္တကယုဒ္ဓမှိ၊ နဒ္ဓါ ယောဓာဝ ဒပ္ပိတာ၊

ပုညာနံ ဝတ္ထုဘူတာ တေ၊ ဒေဝမာနုသကာ ဒိနံ။

ဓာရေမဟံ ဝဏ္ဏဝန္တံ၊ သီဝေယျမ္ပိစ စီဝရံ၊

ဗုဒ္ဓပုတ္တာ မဟာနာဂါ န ဓာရေန္တိ တထာဝိဓံ။

ဓာရေန္တိ ¶ တေ ပံသုကူလံ၊ သင်္ဃာဋေတွာ ပိလောတိကေ၊

ဝဏစ္ဆာဒနစောလံဝ၊ ဣစ္ဆာလောဘ ဝိဝဇ္ဇိတာ။

သာဒိယာမိ သဒါ ဟမ္ဘော၊ ဥပါသကနိမန္တနံ၊

နေဝ သာဒေန္တိ သမ္ဗုဒ္ဓ၊ ပုတ္တော ပါသကယာစနံ။

သပဒါနေန ယံ လဒ္ဓံ၊ လူခံဝါပိ ပဏီတကံ၊

တေန တုဿန္တိ မေ ပုတ္တာ၊ ရသဂေဓဝိဝဇ္ဇိတာ။

နိပဇ္ဇာမိ အဟံ သာဓု၊ သန္ထတေ သယနေ သုဘေ၊

န တေ သေယျံ ပကပ္ပေန္တိ၊ သံသာရဘယဘီရုကာ။

ဌာနာ သနဂမနေန၊ ကပ္ပေန္တိ ဣရိယာပထံ၊

နေကဘူမိသမာကိဏ္ဏ၊ ပါသာဒေသု ဝသာမဟံ။

ဗုဒ္ဓပုတ္တာ တထာစ္ဆန္နံ၊ န ကဒါ ပဝိသန္တိ တေ၊

ရုက္ခမူလေ သုသာနသ္မိံ၊ အဗ္ဘောကာသေ ရမန္တိ တေ။

ဘာဝေတွာ ဘဝနာသာယ၊ ဟေတုံ ဘာဝနမုတ္တမံ၊

အဟံ ဂါမေ ဝသိဿာမိ၊ ပါပေန္တော ဇနတံ သိဝံ။

ရမန္တိ မမ ပုတ္တာ တေ၊ ပန္တသေနာသနေ ကကာ၊

တေသံ မဟတ္တရော သန္တော၊ ထေရောယံ ဝသဘော မဟာ၊

ဓုတပါပေါ ဓုတင်္ဂဂ္ဂေါ၊ ဉာတောယံ မမ သာသနေတိ။

ဧဝံ ဘဂဝါ ဟတ္ထံ ဥက္ခိပိတွာ စန္ဒမဏ္ဍလေ ပဟရန္တော ဝိယ ထေရဿ ဂုဏေ ပကာသေသိ၊ တတော သော တဿ ဂုဏကထံ သုတွာ သယမ္ပိတံ ဌာနန္တရံ ကာမယမာနော ယန္နူနာဟံ အနာဂတေ အညတရဿ သမ္မာသမ္ဗုဒ္ဓဿ သာသနေ ဓုတင်္ဂဓရာနံ အဂ္ဂေါ ဘဝိဿာမီတိ တံ ဌာနန္တရံ ပတ္ထေန္တော ဘဂဝတော ပါဒမူလေ နိပဇ္ဇိ၊ သတ္ထာ တံ ကာရဏံ ဥပပရိက္ခိတွာ ဣတော ကပ္ပသတသဟဿမတ္ထကေ ဂေါတမော နာမ သတ္ထာ ဥပ္ပဇ္ဇိဿတိ။ တွံ တဒါ ဓုတင်္ဂဓရာနံ အဂ္ဂေါ ဟုတွာ ကဿ ပေါတိ ပညာယိဿတီတိ ဗျာကရဏ ¶ မဒါသိ။ တတော ပဋ္ဌာယ သော သောမနဿော ပုညကမ္မံ ကတွာ တတော စုတော ဒေဝမနုဿေသု ဒေဝိဿရိယံ အနုဘဝန္တော ဝိပဿီသမ္မာသမ္ဗုဒ္ဓကာလေ ဧကသာဋကော နာမ ဗြာဟ္မဏော ဟုတွာ မဟာဒါနံ အဒါသိ။ တတော စုတော ကဿပသမ္မာသမ္ဗုဒ္ဓေ ပရိနိဗ္ဗုတေ ဗာရာဏသီနဂရေ ဗာရာဏသီသေဋ္ဌိ ဟုတွာ နိဗ္ဗတ္တော ဒါနာဒီနိ ပုညာနိ ကတွာ တတော စဝိတွာ သံသာရေ သံသရန္တော ဒသဝဿသဟဿာ ယုကေသု မနုဿေသု ဗာရာဏသိယံ ဧကော ကုဋုမ္ဗိကော ဟုတွာ နိဗ္ဗတ္တိ။ သော ပနာယံ ကုဋုမ္ဗိကော အရညေ ဇင်္ဃာဝိဟာရံ အနုဝိစရန္တော ပစ္စန္တိမေ ဇနပဒေ အရညာယတနေ အညတရံ ပစ္စေကဗုဒ္ဓံ အဒ္ဒသ။ သော စ ပစ္စေကဗုဒ္ဓါ တတ္ထ စီဝရကမ္မံ ကရောန္တော အနုဝါတေ အပ္ပဟောန္တေ သံဟရိတွာ ဌပေတုံ အာရဒ္ဓါ။ ကုဋုမ္ဗိကော တံ ဒိသွာ ဘန္တေ ကိံ ကရောထာတိ ပုစ္ဆိ။ သော ပစ္စေကဗုဒ္ဓါ အပ္ပိစ္ဆတာယ တေန ပုဋ္ဌော န ကိဉ္စိ ဝုတ္တော ဟောတိ။ သော စီဝရဒုဿံ နပ္ပဟောတီတိ ဉတွာ အတ္တနော ဥတ္တရသာဋကံ ပစ္စေကဗုဒ္ဓဿ ပါဒမူလေ ဌပေတွာ အဂမာသိ။ ပစ္စေကဗုဒ္ဓါ တံ ဂဟေတွာ အနုဝါတကံ အာရောပေန္တော စီဝရံ ကတွာ ပါရုပိ။ ကုဋုမ္ဗိကော ဇီဝိတပရိယောသာနေ ကာလံ ကတွာ တာဝတိံသဘဝနေ နိဗ္ဗတ္တိတွာ တတ္ထ ယာဝတာယုကံ ဒိဗ္ဗသမ္ပတ္တိံ အနုဘဝိတွာ တတော စဝိတွာ ဗာရာဏသိတော တိယောဇနမတ္တကေ ဌာနေ အညတရသ္မိံ နဂရေ နိဗ္ဗတ္တိ၊ တဿ မာတာပိတရော နန္ဒိယောတိ [နန္ဒီတိနာမံ ဣတိသဗ္ဗတ္ထ] နာမံ အကံသု၊ တဿ သတ္တ ဘာတရော အဟေသုံ၊ သေသာ ဆ ဘာတရော နာနာကမ္မန္တေသု ဗျာဝဋာ မာတာပိတုန္နံ ပေါသေန္တိ။ နန္ဒိယော ပန အကမ္မသီလော ဂေဟေယေဝ ဝသတိ။ တသ္မာ တဿ သေသာ ကုဇ္ဈန္တိ။ မာတာပိတရောပိ နန္ဒိယံ အာမန္တေတွာ ဩဝဒန္တိ။ သော တုဏှီ ဟောတေဝ။ အထာပရသ္မိံ သမယေ ဂါမေ နက္ခတ္တံ သင်္ဃုဋ္ဌံ၊ တဒါ သော မာတရံ အာဟ။ အမ္မ သာဋကံ ဒေဟိ၊ နက္ခတ္တံ ကီဠိဿာမီတိ၊ သာ ဓောတ- ဝတ္ထံ ¶ နီဟရိတွာ အဒါသိ၊ အမ္မ ထူလံ ဣဒန္တိ၊ သာ အညံ နီဟရိတွာ အဒါသိ၊ တမ္ပိ ပဋိက္ခိပိ။ အထ နံ မာတာ အာဟ။ တာတ ယာဒိသေ မယံ ဂေဟေ ဇာတာ၊ နတ္ထိ ဣတော သုခုမတရဿ ပဋိလာဘာယ ပုညန္တိ၊ လဘနဋ္ဌာနံ ဂမိဿာမိ အမ္မာတိ။ ပုတ္တ အဟံ အဇ္ဇေဝ တဝ ဗာရာဏသီနဂရေ ရဇ္ဇပဋိလာဘံ ဣစ္ဆာမီတိ အာဟ။ သော သာဓု အမ္မာတိ မာတရံ ဝန္ဒိတွာ ပဒက္ခိဏံ ကတွာ ပက္ကာမိ။ မာတုယာ ပနဿ ဧဝံ အဟောသိ။ ကဟံ သော ဂမိဿတိ၊ ပုဗ္ဗေဝိယ ဣဓဝါ ဧတ္ထဝါ ဂေဟေ နိသီဒိတွာ အာဂစ္ဆတီတိ၊ သော ပန ပုညနိယာမေန စောဒိယမာနော ဂါမတော နိက္ခမိတွာ ဗာရာဏသိံ ဂန္တွာ သေနဂုတ္တဿ ဂေဟေ ပဋိဝသတိ၊ အထေကဒိဝသံ သော တဿ ကမ္မကာရေဟိ သဒ္ဓိံ သလ္လပန္တော နိသီဒိတွာ ပစလာယန္တော သုပိနံ အဒ္ဒသ။ မုခေန အန္တံ နိက္ခမိတွာ သကလဇမ္ဗုဒီပေ ပတ္ထရိတွာ အန္တောကုစ္ဆိမေဝ ပါဝိသိ။ ပဗုဒ္ဓါ သော ဘီတော မဟာသဒ္ဒမကာသိ။ အထ နံ မဟာသေနဂုတ္တော ပုစ္ဆိ။ နန္ဒိယော သုပိနံ အဒ္ဒသန္တိ အာဟ။ အထ တေန ကီဒိသန္တိ ပုဋ္ဌော ကထေသိ၊ တတော သေနဂုတ္တော တံ အတ္တနော ကုလူပဂံ ပရိဗ္ဗာဇိကံ ပုစ္ဆိ ကော တဿ ဝိပါကောတိ။ ပရိဗ္ဗာဇိကာ ယဒိ ဘော ဣတ္ထီ ပဿတိ။ သတ္တဒိဝသဗ္ဘန္တရေယေဝ အဘိသေကံ လဘတိ၊ ယဒိ ပုရိသော ပဿတိ၊ တထေဝ ရာဇာ ဟောတီတိ ကထေသိ။ သေနဂုတ္တော တဿာ တံ ကထံ သုတွာ ဣမံ မမ ဉာတိံ ကရောမီတိ အတ္တနော သတ္တ ဓီတရေ ပက္ကောသိတွာ ပဋိပါဋိယာ ပုစ္ဆိ။ နန္ဒိယဿ သန္တိကေ ဝသထာတိ၊ သေသာ သဗ္ဗာ န ဣစ္ဆိံသု၊ န မယံ ဇာနာမ ဧတံ အဓုနာဂတံ ကုလဝန္တံ ဝါ ဒုက္ကုလဝန္တံဝါတိ။ အထ ကဏိဋ္ဌိကံ ပုစ္ဆိ။ သာ ယဿ မံ မာတာပိတရော ဒဿန္တိ။ တေသံ ဝစနံ န ဘိန္ဒိဿာမီတိ သမ္ပဋိစ္ဆိ၊ အထ သေနဂုတ္တော နန္ဒိယံ ပက္ကောသိတွာ အတ္တနော ဓီတရံ ဒတွာ တဿ မဟာသမ္ပတ္တိ မဒါသိ။ တတော သတ္တမေ ဒိဝသေ နန္ဒိယော တတ္ထ တတ္ထ အာဟိဏ္ဍန္တော ရညော မင်္ဂလုယျာနံ ပဿိဿာမီတိ ဂန္တွာ ဓင်္ဂလသိလာပဋ္ဋေသသီသံ ပါရုပိတွာ နိပဇ္ဇိ၊ သော စ ဗာရာဏသီရညော ကာလင်္ကတဿ သတ္တမော ¶ ဒိဝသော ဟောတိ။ အမစ္စာစ ပုရောဟိတောစ ရညော သရီရကိစ္စံ ကာရေတွာ ရာဇင်္ဂဏေ နိသီဒိတွာ မန္တယိံသု။ ရညော ဧကာဝ ဓီတာ အတ္ထိ၊ ပုတ္တော ပနဿ နတ္ထိ။ အရာဇိကံ ရဇ္ဇံ န တိဋ္ဌတိ။ ဖုဿရထံ ဝိဿဇ္ဇေဿာမာတိ။ တေ ကုမုဒပတ္တဝဏ္ဏေ စတ္တာရော သိန္ဓဝေ ယောဇေတွာ သေတစ္ဆတ္တပမုခံပဉ္စဝိဓရာဇကကုဓဘဏ္ဍံ ရထသ္မိံယေဝ ဌပေတွာ ရထံ ဝိဿဇ္ဇေတွာ ပစ္ဆတော တုရိယာနိ ပဂ္ဂဏှာပေသုံ။ ရထော ပါစီဒွါရေန နိက္ခမိတွာ ဥယျာနာဘိမုခေါ အဟောသိ။ ပရိစယေန ဥယျာနာဘိမုခေါ ဂစ္ဆတိ။ နိဝတ္တေမာတိ ကေစိ အာဟံသု။ ပုရောဟိတော မာ နိဝါရယိတ္ထာတိ အာဟ။ ရထော ကုမာရကံ ပဒက္ခိဏံ ကတွာ အာရောဟဏသဇ္ဇော ဟုတွာ အဋ္ဌာသိ။ ပုရောဟိတော ပါရုပဏကဏ္ဏံ အပနေတွာ ပါဒတလာနိ ဩလောကေန္တော တိဋ္ဌတု အယံ ဒီပေါ။ ဒွိသဟဿဒီပ ပရိဝါရေသု စတူသု မဟာဒီပေသု ဧကရဇ္ဇံ ကာတုံ သမတ္ထောတိဝတွာ တဿ ဓိတိံ ဥပဓာရေတုံ တိက္ခတ္တုံ တုရိယာနိ ပဂ္ဂဏှာပေသိ။ အထ ကုမာရော မုခံ ဝိဝရိတွာ ဩလောကေတွာ ကေန ကာရဏေန အာဂတတ္ထာတိ အာဟ၊ ဒေဝ တုမှာကံ ရဇ္ဇံ ပါပုဏာတီတိ၊ ရာဇာ ကဟန္တိ၊ ဒေဝတ္တံ ဂတော သာမီတိ၊ ကတိ ဒိဝသာ အတိက္ကန္တာတိ၊ အဇ္ဇ သတ္တမော ဒိဝသောတိ။ ပုတ္တော ဝါ ဓီတာ ဝါ နတ္ထီတိ၊ ဓီတာ အတ္ထိ ဒေဝ။ ပုတ္တော န ဝိဇ္ဇတီတိ၊ တေနဟိ ကရိဿာမိ ရဇ္ဇန္တိ၊ တေ တာဝဒေဝ အဘိသေကမဏ္ဍပံ ကာရေတွာ ရာဇဓီတရံ သဗ္ဗာလင်္ကာရေဟိ အလင်္ကာရိတွာ ဥယျာနံ နေတွာ ကုမာရဿ အဘိသေကံ အကံသု၊ အထဿ ကတာဘိသေကဿ သတသဟဿဂ္ဃနကံ ဝတ္ထံ အာနေသုံ၊ သော ကိမိဒံ တာတာတိ အာဟ၊ နိဝါသနဝတ္ထံ ဒေဝါတိ၊ နနု တာတာ ထူလံတိ၊ မနုဿာနံ ပရိဘောဂဝတ္ထေသု ဣတော သုခုမတရံ နတ္ထိ ဒေဝါတိ၊ တုမှာကံ ရာဇာ ဧဝရူပံ နိဝါသေသီတိ၊ အာမ ဒေဝါတိ။ န မညေ ပုညဝါ တုမှာကံ ရာဇာတိ ဝတွာ ဟန္ဒ သုဝဏ္ဏဘိင်္ကာရံ အာဟရထ၊ လဘိဿာမ ဝတ္ထန္တိ၊ တေ သုဝဏ္ဏဘိင်္ကာရံ အာဟရိံသု၊ သော ဥဋ္ဌာယ ဟတ္ထေ ဓောဝိတွာ မုခံ ဝိက္ခာလေတွာ ဟတ္ထေန ဥဒကံ အာဒါယ ပုရတ္ထိမဒိသာယ အဗ္ဘုက္ကိရိ၊ ¶ တာဝဒေဝ ဃနပထဝိံ ဘိန္ဒိတွာ သောဠသကပ္ပရုက္ခာ ဥဋ္ဌဟိံသု၊ ပုန ဥဒကံ ဟတ္ထေန ဂဟေတွာ ဒက္ခိဏံ ပစ္ဆိမံ ဥတ္တရန္တိ ဧဝံ စတဿောပိ ဒိသာ အဗ္ဘုက္ကိရိ၊ သဗ္ဗဒိသာသု သောဠသ သောဠသ ဟုတွာ စတုသဋ္ဌိကပ္ပရုက္ခာ ဥဋ္ဌဟိံသု၊ သော ဧကံ ဒိဗ္ဗဒုဿံ နိဝါသေတွာ ဧကံ ပါရုပိတွာ နန္ဒိယရညော ဝိဇိတေ သုတ္တကန္တိကာ ဣတ္ထိယော မာ သုတ္တံ ကန္တန္တူတိ ဘေရိံ စရာပေထာတိ ဝတွာ ဆတ္တံ ဥဿာပေတွာ အလင်္ကတပဋိယတ္တော ဟတ္ထိက္ခန္ဓဝရဂတော နဂရံ ပဝိသိတွာ ပါသာဒမဘိရုယှ မဟာသမ္ပတ္တိံ အနုဘဝိ။ အဟော တဒါ ပစ္စေကဗုဒ္ဓဿ ဒိန္နာနုဝါတကဿ ဝိပါကော။ တေနာဟု ပေါရာဏာ။

ယထာ သာသပမတ္တမှာ၊ ဗီဇာ နိဂြောဓပါဒပေါ၊

ဇာယတေ သတသာခဍ္ဎော၊ မဟာနီလမ္ဗုဒေါပမော။

တထေဝ ပုညကမ္မမှာ၊ အဏုမှာ ဝိပုလံ ဖလံ၊

ဟောတီတိ အပ္ပပုညန္တိ၊ နာဝမညေယျ ပဏ္ဍိတောတိ။

ဧဝံ ဂစ္ဆန္တေ ကာလေ ဧကဒိဝသံ ဒေဝီ ရညော သမ္ပတ္တိံ ဒိသွာ အဟော တပဿီတိ ကာရုညာကာရံ ဒဿေသိ။ ကိမိဒံ ဒေဝီတိ စ ပုဋ္ဌာ အတိမဟတီ တေ ဒေဝ သမ္ပတ္တိ။ အတီတမဒ္ဓါနံ ကလျာဏံ ကတတ္တာ။ ဣဒါနိ အနာဂတဿတ္ထာယ ကုသလံ ကရောထာတိ အာဟ။ ကဿ ဒဿာမ။ သီလဝန္တာ နတ္ထီတိ။ အသုညော ဒေဝ ဇမ္ဗုဒီပေါ အရဟန္တေဟိ၊ တုမှေ ဒါနံ သဇ္ဇေထ၊ အဟံ အရဟန္တေ လစ္ဆာမီတိ အာဟ။ ပုနဒိဝသေ ရာဇာ မဟာရဟံ ဒါနံ သဇ္ဇာပေသိ။ ဒေဝီ သစေ ဣမိဿာ ဒိသာယ အရဟန္တော အတ္ထိ၊ ဣဓာ ဂန္တွာ အမှာကံ ဘိက္ခံ ဂဏှန္တူတိ ဥတ္တရဟိမဝန္တာဘိမုခီ ပုပ္ဖာနိ ဥဒ္ဓံ ခိပိတွာ ဥရေန နိပဇ္ဇိ။ အထ တာနိ ပုပ္ဖာနိ အာကာသတော ဂန္တွာ ဟိမဝန္တပဒေသေ ဝသန္တာနံ ပဒုမဝတိယာ ပုတ္တာနံ ပဉ္စသတာနံပစ္စေကဗုဒ္ဓါနံ ဇေဋ္ဌကမဟာပဒုမပစ္စေကဗုဒ္ဓဿ ပါဒမူလေ ပတိံသု။ တထာဟိ။

အဟော ¶ ပဿထ ဘော ဒါနိ၊ ဝိမှယံ ပုညကမ္မုနော၊

အစေတနာပိ ပုပ္ဖာနိ၊ ဒူတကိစ္စေသု ဗျာဝဋာ။

ကတ္တုကာမေန လောကသ္မိံ၊ သကလံ အတ္တနော ဝသံ၊

သဗ္ဗတ္ထာမေန ကတ္တဗ္ဗံ၊ ပုညံ ပညဝတာ သဒါတိ။

တတော မဟာပဒုမပစ္စေကဗုဒ္ဓါ တံ ဉတွာ သေသဘာတရေ အာမန္တေသိ။ မာရိသာ နန္ဒိယရာဇာ တုမှေ နိမန္တေသိ။ အဓိဝါသေထ တဿ နိမန္တနန္တိ။ တေ အဓိဝါသေတွာ တာဝဒေဝ အာကာသေနာ ဂန္တွာ ဥတ္တရဒွါရေ ဩတရိံသု။ မနုဿာ ပဉ္စသတာ ဒေဝ ပစ္စေကဗုဒ္ဓါ အာဂတာတိ ရညော အာရောစေသုံ၊ ရာဇာ သဒ္ဓိံ ဒေဝိယာ ဂန္တွာ ဝန္ဒိတွာ ပတ္တေ ဂဟေတွာ ပစ္စေကဗုဒ္ဓေ ပါသာဒံ အာရောပေတွာ တတ္ထ တေသံ ဒါနံ ဒတွာ ဘတ္တကိစ္စာဝသာနေ ရာဇာ သင်္ဃတ္ထေရဿ ဒေဝီ သင်္ဃနဝကဿ စ ပါဒမူလေ နိပဇ္ဇိတွာ အယျာ ပစ္စယေဟိ န ကိလမိဿန္တု၊ မယံ ပုညေန န ဟာယိဿာမ၊ အမှာကံ ဣဓ ဝါသာယ ပဋိညံ ဒေထာတိ ပဋိညံ ကာရေတွာ ဥယျာနေ နိဝါသဋ္ဌာနာဒယော ကာရေတွာ ယာဝဇီဝံ ပစ္စကဗုဒ္ဓေ ဥပဋ္ဌဟိတွာ တေသု ပရိနိဗ္ဗုတေသု သာဓုကီဠနံ ကာရေတွာ စန္ဒနာ ဂရုအာဒီဟိ သရီရကိစ္စံ ကာရေတွာ ဓာတုယော ဂဟေတွာ စေတိယံ ပတိဋ္ဌာပေတွာ ဧဝရူပါနမ္ပိ မဟာနုဘာဝါနံ မဟေသီနံ မရဏံ ဘဝိဿတိ၊ ကိမင်္ဂံ ပန မာဒိသာနန္တိ သံဝေဂဇာတော ဇေဋ္ဌပုတ္တံ ရဇ္ဇေ ပတိဋ္ဌာပေတွာ သယံ ပဗ္ဗဇံ ပဗ္ဗဇိ၊ ဒေဝီပိ ရညေ ပဗ္ဗဇိတေ အဟံ ကိံကရိဿာမီတိ ပဗ္ဗဇိတွာ ဒွေပိ ဥယျာနေ ဝသန္တာ ဈာနာဘိညံ နိဗ္ဗတ္တေတွာ ဈာနသုခေန ဝီတိနာမေန္တာ အာယုပရိယောသာနေ ဗြဟ္မလောကေ နိဗ္ဗတ္တိံသု။ တေ အမှာကံ ဘဂဝတော ကာလေ ဗြာဟ္မဏကုလေ နိဗ္ဗတ္တိတွာ ဗုဒ္ဓသာသနေ ပဗ္ဗဇိံသု၊ တဒါ နန္ဒိယရာဇာ ဓုတင်္ဂဓရာနံ အဂ္ဂေါ မဟာကဿပတ္ထေရောနာမ ဟုတွာ စန္ဒော ဝိယ သုရိယော ဝိယစ လောကေ ပါကဋော ဟုတွာ ဘဂဝတိ ပရိ- နိဗ္ဗုတေ ¶ ဗုဒ္ဓသာသနံ အတိဝိယ သောဘေတိ။ ဘရိယာပိဿ ဘဒ္ဒကာပိဠာနီ နာမ အဟောသီတိ။

တုမှေစ ဘောန္တော ခလု သီလဝန္တေ၊

စိန္တာမဏိံ ကပ္ပတရုံဝ သာရန္တိ။

၁၂။ အညတရမနုဿဿ ဝတ္ထုမှိ အယမာနုပုဗ္ဗီကထာ

အမှာကံ ဘဂဝတိ ပရိနိဗ္ဗုတေ ပါဋလိပုတ္တသမီပေ အညတရသ္မိံ ဂါမေ အညတရော ဒုဂ္ဂတမနုဿော ဝသတိ၊ သော ပနေကဒိဝသံ အညတရံ ဂါမံ ဂစ္ဆန္တော ဒွေ သာဋကေ နိဝါသေတွာ မဟန္တံ အဋဝိံပါပုဏိ၊ တဒေဝံ ဂစ္ဆန္တံ ဒိသွာ ဧတဿ ဝတ္ထံ ဂဏှိဿာမီတိ ဧကော စောရော အနုဗန္ဓိ၊ သော ဒူရတောဝ အာဂစ္ဆန္တံ စောရံ ဒိသွာ စိန္တေသိ၊ အဟမေတသ္မာ ပလာယိတုံ ဝါ တေန သဒ္ဓိံယုဇ္ဈိတုံ ဝါ န သက္ကောမိ၊ အယမာဂန္တွာ အဝဿံ အနိစ္ဆန္တဿာပိ မေ ဝတ္ထံ ဂဏှိဿတိ။ မယာပိဿ နိရတ္ထကေန ဟရိတုံ န သက္ကာ၊ ဒါနဝသေနဿ ဒဿာမီတိ သန္နိဋ္ဌာန မကာသိ၊ အထ စောရော အာဂန္တွာ ဝတ္ထကံ ပရာမသိ၊ အထ သော ပုရိသော စိတ္တံ ပသာဒေတွာ ဣမံ မမ ဝတ္ထဒါနံ ဘဝဘောဂသုခတ္ထာယ ပစ္စယော ဟောတူတိ ဝတ္ထံ ဒတွာ ဒုစ္ဆာဒိတတ္တာ မဟာမဂ္ဂံ ပဟာယ အညေန ဇင်္ဃာမဂ္ဂေန ဂစ္ဆန္တော အာသိဝိသေန ဒဋ္ဌော ကာလံ ကတွာ ဟိမဝန္တပ္ပဒေသေ ¶ ဒွါဒသယောဇနိကေ ကနကဝိမာနေ နေကစ္ဆရာသဟဿပရိဝုတော နိဗ္ဗတ္တိ။ ဝိမာနံ ပနဿ ပရိဝါရေတွာ တိယောဇနိကေ ဌာနေ ကပ္ပရုက္ခာ နိဗ္ဗတ္တိံသု၊ သော မဟန္တံ ဒိဗ္ဗသမ္ပတ္တိံ ဒိသွာ သောမနဿံ ပဝေဒေန္တော အာဟ။

ပရိဏာမိတမတ္တေန၊ ဒါနဿ သကသန္တကံ၊

ဒဒါတိ ဝိပုလံ ဘောဂံ၊ ဒိဗ္ဗမိဿရိယံ ဝရံ။

ဒွါဒသယောဇနုဗ္ဗေဓံ၊ ဒုဒ္ဒိက္ခံ စက္ခုမူသနံ၊

ကူဋာ ဂါရဝရုပေတံ၊ သဗ္ဗသောဝဏ္ဏယံ သုဘံ။

မမ ပုညေန နိဗ္ဗတ္တံ၊ နေကရာဂဒ္ဓဇာကုလံ၊

တထေဝ ပရိသုဒ္ဓေဟိ၊ ဝိတာနေဟိ စ လင်္ကတံ။

ပါသာဒပရိယန္တမှိ၊ ဒိဗ္ဗဝတ္ထာနိ လမ္ဗရေ၊

ဝါတေရိတာ တေ သောဘန္တိ၊ အဝှေန္တာဝ သုဓာသိနော။

ပါသာဒဿ သမန္တာ မေ၊ ဘူမိဘာဂေ တိယောဇနေ၊

ဣစ္ဆိတိစ္ဆိတဒါတာရော၊ ဇာတာသုံ သုရပါဒပါ။

တတ္ထ နစ္စေဟိ ဂီတေဟိ၊ ဝါဒေဟိ တုရိယေဟိ စ၊

နေ ကစ္ဆရာသဟဿေဟိ၊ မောဒါမိ ဘဝနေ မမ။

န သမ္မာ ဒိန္နဝတ္ထဿ၊ အက္ခေတ္တေ ဖလမီ ဒိသံ၊

ခေတ္တေ သမ္မာ ဒဒန္တဿ၊ ကော ဖလံ ဝဏ္ဏယိဿတီတိ။

ဧဝံ ဝိဓမ္ပိ ကုသလံ မနုဇော ကရိတွာ၊

ပပ္ပောတိ ဒိဗ္ဗဝိဘဝံ မုနိဝဏ္ဏနီယံ၊

မန္တွာန ဘော ဒဒထ ဒါနဝရံ သုသီလေ၊

သဒ္ဓါယ သုဒ္ဓမနသာဿ ဝိသေသဘာဂီတိ။

၁၃။ ဝိသမလောမကုမာရဿ ဝတ္ထုမှိ အယမာနုပုဗ္ဗီကထာ

အတီတေ ¶ ကိရ ဣမသ္မိံ ဇမ္ဗုဒီပေ ကဿပေါ နာမ သမ္မာသမ္ဗုဒ္ဓါ ပါရမိယော ပူရေတွာ သဗ္ဗညုတံ ပတ္တော လောကဿ ဒုက္ခာပနုဒေါ သုခါဝဟော ပဋိဝသတိ လောကံ နိဗ္ဗာဏမဟာနဂရဝရေ ပရိပူရေန္တော။ တသ္မိံ သမယေ အညတရော ပုရိသော သတ္ထု ဓမ္မဒေသနံ သုတွာ ပသန္နော ဘိက္ခုသင်္ဃဿ ဒါနံ ဒေန္တော သီလံ ရက္ခန္တော ဥပေါသထကမ္မံ ကရောန္တော နာနာဝိဓာနိ ပုညကမ္မာနိ ကတွာ သုတ္တပ္ပဗုဒ္ဓါဝိယ ဂန္တွာ ဒေဝလောကေ နိဗ္ဗတ္တိ သဗ္ဗရတနမယေ ဒိဗ္ဗဝိဓာနေ ဒေဝစ္ဆရာသဟဿပရိဝုတော။ တတ္ထ ယာဝတာယုကံ ဌတွာ တတော စုတော အမှာကံ ဘဂဝတိ ပရိနိဗ္ဗုတေ ဇမ္ဗုဒီပေ ပါဋလိပုတ္တနဂရေ အာဏာစက္ကဝတ္တိဓမ္မာသောကမဟာနရိန္ဒဿ အဂ္ဂမဟေသိယာ ကုစ္ဆိမှိ နိဗ္ဗတ္တိ။ တဿ နာမံ ကရောန္တော သီသေ လောမံ ဝိသမံ ဟုတွာ ဇာတတ္ထာ ဝိသမလောမကုမာရောတိ သဉ္ဇာနိံသု။ သော ကမေန ဝိညုတံ ပတ္တော ဗလသမ္ပန္နော အဟောသိ။ မဟာထာမော အဘိရူပေါစ အဟောသိ။ ဒဿနီယော ပါသာဒိကော ယသပရိဝါရသမ္ပန္နော ပဋိဝသတိ။ တတော အပရေန သမယေန ဓမ္မာသောကမဟာနရိန္ဒော စတုရာသီတိသဟဿရာဇပရိဝုတော အနန္တဗလဝါဟနော ကီ ဠာ ပ ရော ဟိမဝန္တံ ဂန္တွာ ယထာဘိရန္တံ ကီဠိတွာ အာဂစ္ဆန္တော စန္ဒဘာဂံ နာမ ဂင်္ဂံ သမ္ပာပုဏိ။ သာ ပန ယောဇနဝိတ္ထတာ တိဂါဝုတဂမ္ဘီရာ အဟောသိ။ တဒါ သာ အဓုနာဂတေဟိ ဩဃေဟိ မဟာဖေဏသမာကုလာ ဗဟူမိယော ဥဘောကူလေ ဥတ္တရန္တီ မဟာဝေဂါ [မဟာဝေဂါဂစ္ဆန္တီ ဣတိသဗ္ဗတ္ထ] ဂစ္ဆန္တိ။ တဒါ ရာဇာ ဂင်္ဂံ ဒိသွာ ကော နာမေတ္ထ ပုရိသော ဧဝံဝိဓံ မဟာဂင်္ဂံ တရိတုံ သမတ္ထော ဘဝိဿတီတိ အာဟ။ တံ သုတွာ ဝိသမလောမ ကုမာရော အာဂန္တွာ ဝန္ဒိတွာ အဟံ ဒေဝ ဂင်္ဂံ တရိတွာ ဂန္တုဉ္စ အာဂန္တုဉ္စ သက္ကောမီတိ အာဟ။ ရာဇာ သာဓူတိ သမ္ပဋိစ္ဆိ။ အထ ကုမာရော ဂါဠှံ နိဝါသေတွာ မကရဒန္တိယာ ¶ ကေသေ ဗန္ဓိတွာ ဂင်္ဂါကူလေ ဌိတော အဋ္ဌာရသဟတ္ထံ အဗ္ဘုဂ္ဂန္တွာ ဥသဘမတ္တဋ္ဌာနေ ပတိတွာ တရိတု မာရဘိ။ တတော စဏ္ဍသောတံ ဆိန္ဒိတွာ တရန္တော ဂမနာ ဂမနကာလေ ဂဏှနတ္ထာယ အာဂတေ စဏ္ဍသုံသုမာရေ ပါဏိနာ ပဟရိတွာ စုဏ္ဏဝိစုဏ္ဏံ ကရောန္တော ဝီသသတံ မာရေတွာ ဥတ္တာရေတွာ တလမုဂ္ဂမ္မ ရာဇာနံ ဝန္ဒိတွာ အဋ္ဌာသိ။ ရာဇာ တံ ကာရဏံ ဒိသွာ ဘယပ္ပတ္တော ဧသော ခေါ မံ မာရေတွာ ရဇ္ဇမ္ပိ ဂဟိတုံ သမတ္ထော။ ဧတံ မာရေတုံ ဝဋ္ဋတီတိ စိန္တေတွာ နဂရံ သမ္ပတ္တော ကုမာရံ ပက္ကောသာပေတွာ အမစ္စေ အာဟ။ ဣမံ ဘဏေ ဗန္ဓနာဂါရေ ကရောထာတိ။ တေ တထာ ကရိံသု၊ အထဿ ဗန္ဓနာဂါရေ ဝသန္တဿ စတ္တာရော မာသာ အတိက္ကန္တာ။ တတော ရာဇာ စတုမာသစ္စယေန ဒီဃတော သဋ္ဌိဟတ္ထပ္ပမာဏေ သဋ္ဌိဝေဠုကလာပေ အာဟရာပေတွာ ဂဏ္ဌိယော သောဓာပေတွာ အန္တော အယောသာရံ ပူရေတွာ ရာဇင်္ဂဏေ ဌပါပေတွာ ဝိသမလောမကုမာရံ ဗန္ဓနာဂါရတော အာဟာရာပေတွာ [အာဏာပေတွာ ဣတိသဗ္ဗတ္ထ] အမစ္စေ ဧဝမာဟ။ ဘဏေ သွာယံ ကုမာရော ဣမိနာ ခဂ္ဂေန ဣမေ ဝေဠုကလာပေ စတုရင်္ဂုလံ ကတွာ ဆိန္ဒတု။ နော စေ ဆိန္ဒိတုံ သက္ကောတိ။ တံ မာရေထာတိ အာဟ၊ တံ သုတွာ ကုမာရော အဟံ ဗန္ဓနာဂါရေ စိ ရ ဝု တ္ထော ဇိဃစ္ဆာပီဠိတော အာဟာရေန ကိလမိံ၊ ယန္နူနာဟံ အာဟာရံ ဘုဉ္စိတွာ ဆိန္ဒေယျန္တိ။ တေ နတ္ထိ ဒါနိ တုယှံ အာဟာရန္တိ အာဟံသု။ တေနဟိ ပေါက္ခရဏိယာ ပါနီယံ ပိဝိဿာမီတိ အာဟ။ တေ သာဓူတိ ပေါက္ခရဏိံ နေသုံ။ ကုမာရော ပေါက္ခရဏိံ ဩတရိတွာ နဟာယိတွာ နိမုဂ္ဂေါ ယာဝဒတ္ထံ ကလလံ ဘုဉ္စိတွာ ပါနီယံ ပိဝိတွာ ဥဋ္ဌာယ အသိပတ္တံ ဂဟေတွာ မဟာဇနာနံ [မဟာဇနာနံပဿန္တမေဝ ဣတိသဗ္ဗတ္ထ] ပဿန္တာနမေဝ အဋ္ဌာသီတိဟတ္ထဋ္ဌာနံ အာကာသံ ဥလ္လင်္ဃိတွာ သဗ္ဗဝေဠုကလာပေ စတုရင်္ဂုလမတ္တေန ခဏ္ဍာခဏ္ဍံ ကုရုမာနော ဩတရိတွာ မူလေ ထူလအယသလာကံ ပတွာ ကိဏီတိ သဒ္ဒံ သုတွာ အသိပတ္တံ ဝိဿဇ္ဇေတွာ ရောဒမာနော အဋ္ဌာသိ။ တတော ရာဇပုရိသေဟိ ကိမတ္တံ ရောဒသီတိ ဝုတ္တေ ¶ ဧတ္တကာနံ ပုရိသာနမန္တရေ မယှံ ဧကောပိ သုဟဒေါ နတ္တိ။ သစေ ဘဝေယျ၊ ဣမေသံ ဝေဠုကလာပါနမန္တရေ အယော သာရံ အတ္ထိဘာဝံ ကထေယျ၊ အဟံ ပန ဇာနမာနော ဣမေ ဝေဠု ကလာပေ အင်္ဂုလင်္ဂုလေသု ဆိန္ဒေယျန္တိ အာဟ။ တတော ရာဇာ ကုမာရေန ကတကမ္မံ ဩလောကေတွာ ပသန္နော ဥပရာဇဋ္ဌာနံ ဗဟုဉ္စ ဝိဘဝံ ဒါပေသိ၊ ဧဝမဿ ဗလသမ္ပတ္တိလာဘော နာမ န ဇာတိဂေါတ္တကုလပဒေသာဒီနံ ဗလံ။ န ပါဏာတိပါတာဒိဒုစ္စရိတာနံ ဗလံ။ ကဿေတံ ဗလန္တိ။ ကဿပသမ္မာသမ္ဗုဒ္ဓကာလေ ဘိက္ခုသင်္ဃဿ ဒိန္နဒါနာဒိသုစရိတကမ္မဝိပါကံ။ တေန ဝုတ္တံ။

ကဿပဿ မုနိန္ဒဿ၊ ကာလေ အညတရော နရော၊

သမ္ဗုဒ္ဓမုပသံကမ္မ၊ သုတွာ ဓမ္မံ သုဒေသိတံ။

ပဋိလဒ္ဓသဒ္ဓါ ဟုတွာ၊ သီလဝန္တာန ဘိက္ခုနံ၊

မဓုရန္နပါနေ ပစုရေ၊ အဒါသိ သုမနော တဒါ။

အဒါသိ စီဝရေ ပတ္တေ၊ တထေဝ ကာယဗန္ဓနေ၊

အဒါ ခီရသလာကဉ္စ၊ ဗဟူ ကတ္တရယဋ္ဌိယော။

အဒါ သုပဿယံ ဒါနံ၊ မဉ္စပီဌာဒိကံ တထာ၊

ပါဝါရ ကမ္ဗလာဒီနိ၊ အဒါ သီတနိဝါရဏေ။

အဒါ ဘေသဇ္ဇဒါနာနိ၊ အာရောဂျတ္ထာယ ဘိက္ခုနံ၊

ဧဝံ နာနာဝိဓံ ပုညံ၊ ကတွာန တိဒိဝံ ဂတော။

တတ္ထ ဒိဗ္ဗဝိမာနမှိ၊ ဥပ္ပန္နော သော မဟိဒ္ဓိကော၊

ဒေဝစ္ဆရာပရိဝုတော၊ ဒေဝသေနာပုရက္ခတော။

ဒိဗ္ဗေဟိ နစ္စဂီတေဟိ၊ ဒိဗ္ဗဝါဒိတတန္တိဟိ၊

မောဒမာနော အနေကေဟိ၊ ဒိဗ္ဗသမ္ပတ္တိယာ သဟ။

ယာဝတာယုံ တဟိံ ဌတွာ၊ ဇမ္ဗုဒီပေ မနောရမေ၊

ပုရေ ပါဋလိပုတ္တမှိ၊ ဓမ္မာသောကဿ ရာဇိနော။

ပုတ္တော ¶ ဟုတွာန နိဗ္ဗတ္တိ၊ မဟာထာမော မဟာဗလော၊

မဟာယသော မဟာဘောဂေါ၊ အာသိ ဗုဒ္ဓါဒိမာမကော။

ကာတဗ္ဗံ ကုသလံ တသ္မာ၊ ဘဝသမ္ပတ္တိ မိစ္ဆတာ၊

ပါလေတဗ္ဗ မထော သီလံ၊ ဘာဝေတဗ္ဗဉ္စ ဘာဝနန္တိ။

တတော ကုမာရော ဥပရာဇဋ္ဌာနံ လဘိတွာ သမ္ပတ္တိံအနုဘဝမာနော မောဂ္ဂလိပုတ္တတိဿတ္ထေရမာဒိံ ကတွာ မဟာဘိက္ခုသင်္ဃဿ စီဝရပိဏ္ဍပါတသေနာသနဂိလာနပစ္စယဒါနာ ဒိဝသေန သက္ကာရံ ကတွာ သီလံ ရက္ခိတွာ ဥပေါသထကမ္မံ ကတွာ အာယုပရိယောသာနေ ယထာကမ္မံ ဂတောတိ။

ဧဝံဝိဓံ သုစရိတံ သုမနော ကရိတွာ၊

တုမှေပိ ဘော သုစရိတံ ဝိဘဝါနုရူပံ၊

ကတွာန နိဗ္ဗုတိပဒံ ကရဂံ ကရောထာတိ။

ဝိသမလောမကုမာရဿ ဝတ္ထုံ တတိယံ။

၁၄။ ကဉ္စနဒေဝိယာ ဝတ္ထုမှိ အယမာနုပုဗ္ဗီကထာ

ဇမ္ဗုဒီပေ ကိရ ဒေဝပုတ္တနဂရံ နာမ ဒဿနီယံ ဧကံ နဂရံ အဟောသိ။ တသ္မိံ သမယေ မနုဿာ ယေဘုယျေန ပတ္တမဟံ နာမ ပူဇံ ကရောန္တိ၊ ဘဂဝတာ ပရိဘုတ္တပတ္တံ ဂဟေတွာ ကတာနေကပူဇာဝိဓာနာ ဥဿဝံ ကရောန္တိ။ တံ ပတ္တမဟန္တိ ဝုစ္စတိ။ တသ္မိံ သမယေ ဒေဝပုတ္တနဂရေ ရာဇာ သဗ္ဗရတနမယံ ရထံ သဗ္ဗာလင်္ကာရေဟိ အလင်္ကာရာပေတွာ ကုမုဒပတ္တဝဏ္ဏေ စတ္တာရော သိန္ဓဝေ ယောဇေတွာ သုသိက္ခိတသိပ္ပာစရိယေဟိ သတ္တရတနပရိနိဋ္ဌိတေ အသီတိဟတ္ထဝေဠဂ္ဂေ သတ္ထုနာ ပရိဘုတ္တံ သေလမယပတ္တံ မုတ္တာဇာလာဒီဟိ အလင်္ကရိတွာ ဝေဠဂ္ဂံ အာရောပေတွာ ဝေဠုံ ¶ ရထေ ဌပါပေတွာ နဂရံ ဒေဝနဂရံ ဝိယ အလင်္ကရိတွာ ဓဇပတာကာဒယော ဥဿာပေတွာ တောရဏဂ္ဃ ကပန္တိယောစ ပုဏ္ဏဃဋဒီပမာလာဒယောစ ပတိဋ္ဌာပေတွာ အနေကေဟိ ပူဇာဝိဓာနေဟိ နဂရံ ပဒက္ခိဏံ ကာရေတွာ နဂရမဇ္ဈေ သုသဇ္ဇိတရတနမဏ္ဍပေ ပတ္တဓာတုံ ဌပေတွာ သတ္တမေ ဒိဝသေ မဟာဓမ္မသဝဏံ ကာရာပေသိ။ တဒါ တသ္မိံ ဇနပဒေ ဗဟူ မနုဿာစ ဒေဝတာစ ယက္ခရက္ခသနာဂသုပဏ္ဏာဒယောစ မနုဿဝေသေန ယေဘုယျေန တံ သမာဂမံ ဩတရန္တိ၊ ဧဝမစ္ဆရိယံ တံ ပူဇာဝိဓာနံ အဟောသိ။

တဒါ ဧကော နာဂရာဇာ ဥတ္တမရူပဓရံ အဂတပုဗ္ဗပုရိသံ ဧကံ ကုမာရိကံ ဓမ္မပရိသန္တရေ နိသိန္နံ ဒိသွာ တဿာ ပဋိဗဒ္ဓစိတ္တော အနေကာကာရေဟိ တံ ယာ စိ တွာ တဿာ အလဒ္ဓမာနော ကုဇ္ဈိတွာ နာသာဝါတံ ဝိဿဇ္ဇေသိ ဣမံ မာရေဿာမီတိ။ တံ တဿာ သဒ္ဓါဗလေန ကိဉ္စိ ဥပဒ္ဒဝံ ကာတုံ သမတ္ထော နာဟောသိ။ အထဿာ နာဂေါ ပါဒတော ပဋ္ဌာယ ယာဝသကလသရီရံ ဘောဂေန ဝေဌေတွာ သီသေ ဖဏံ ကတွာ ဘာယာပေန္တော အဋ္ဌာသိ။ အနညဝိဟိတာယ တာယ ဓမ္မသဝဏဗလေန အဏုမတ္တမ္ပိ ဒုက္ခံ နာဟောသိ။ ပဘာတာယ ရတ္တိယာ တံ ဒိသွာ မနုဿာ ကိမေတန္တိ ကာရဏံ ပုစ္ဆိံသု၊ သာပိ တေသံ ကထေတွာ ဧဝံ သစ္စကိရိယမကာသိ။ တထာဟိ။

ဗြဟ္မစာရီ အဟောသာဟံ၊ သဉ္ဇာတာ ဣဓ မာနုသေ၊

တေန သစ္စေန မံ နာဂေါ၊ ခိပ္ပမေဝ ပမုဉ္စတု။

ကာမာတုရဿ နာဂဿ၊ နောကာသမကရိံယတော၊

တေန သစ္စေန မံ နာဂေါ၊ ခိပ္ပမေဝ မုဉ္စတု။

ဝိသဝါတေန ခိတ္တဿ၊ ကုပိတဿောရဂဿဟံ၊

အကုဒ္ဓါ တေန သစ္စေန၊ သော မံ ခိပ္ပံ ပမုဉ္စတု။

သဒ္ဓမ္မံ သုဏမာနာဟံ၊ ဂရုဂါရဝဘတ္တိယာ၊

အဿောသိံ တေန သစ္စေန၊ ခိပ္ပံ နာဂေါ ပမုဉ္စတု။

အက္ခရံဝါ ¶ ပဒံဝါပိ၊ အဝိနာသေတွာဝ အာဒိတော၊

အဿောသိံ တေန သစ္စေန၊ ခိပ္ပံ နာဂေါ ပမုဉ္စတူတိ။

သစ္စကိရိယာဝသာနေ နာဂရာဇာ တဿာ အတီဝ ပသန္နော ဘောဂံ ဝိနိဝေဌေတွာ ဖဏသတံ မာပေတွာ တံ ဖဏဂဗ္ဘေ နိသီဒါပေတွာ ဗဟူဟိ နာဂမာနဝကေဟိ သဒ္ဓိံ ဥဒကပူဇံ နာမ ပူဇ မကာသိ၊ တံ ဒိသွာ ဗဟူ နဂရဝါသိနော အစ္ဆရိယဗ္ဘုတဇာတာ အဋ္ဌာရသကောဋိဓနေန ပူဇ မကံသု။ တထာဟိ။

နတ္ထိ သဒ္ဓါသမော လောကေ၊ သုဟဒေါ သဗ္ဗကာမဒေါ၊

ပဿထဿာ ဗလံ သဒ္ဓါ၊ ပူဇေန္တေဝံ နရော ရဂါ။

ဣဓ လောကေဝ သာလတ္ထ၊ ဘဝဘောဂ မနပ္ပကံ၊

တသ္မာ သဒ္ဓေန ကာတဗ္ဗံ၊ ရတနတ္တယဂါရဝန္တိ။

အထေဝံ သာ ပဋိလဒ္ဓမဟာဝိဘဝါ ယာဝဇီဝံ ကောမာရိယ ဗြဟ္မစာရိဏီ ဟုတွာ အာယုပရိယောသာနေ ကာလံ ကတွာ တသ္မိံယေဝ နဂရေ ရညော အဂ္ဂမဟေသိယာ ကုစ္ဆိမှိ ပဋိသန္ဓိံ ဂဏှိတွာ ဒသမာသစ္စယေန မာတုကုစ္ဆိတော နိက္ခမိ။ နိက္ခန္တဒိဝသေ ပနဿာ သကလဒေဝပုတ္တနဂရေ ရတနဝဿံ ဝဿိ။ တေနဿာ ကဉ္ဇနဒေဝီတိ နာမံ ကရိံသု။ သမန္တပါသာဒိကာ အဟောသိ။ အဘိရူပါ ဒေဝစ္ဆရပဋိဘာဂါ။ မုခတော ဥပ္ပလဂန္ဓော ဝါယတိ။ သရီရတော စန္ဒနဂန္ဓော ဝါယတိ။ သကလသရီရတော ဗာလသုရိယော ဝိယ ရံသိယော နိစ္ဆာရေန္တီ စတုရတနဂဗ္ဘေ ပဒီပကိစ္စံ နာမ နတ္ထိ။ သဗ္ဗော ဂဗ္ဘော သရီရာ လောကေန ဧကော ဘာသော ဟောတိ၊ တဿာ ရူပသမ္ပတ္တိ သကလဇမ္ဗုဒီပေ ပါကဋာ အဟောသိ။ တတော သကလဇမ္ဗုဒီပဝါသီ ရာဇာနော တဿာ အတ္ထာယ ပိတုရညော ပဏ္ဏာကာရာနိ ပဟိဏိံသု။ သာ ပန ပဉ္စကာမေ အနနုလိတ္တာ ပိတရံ အနုဇာနာပေတွာ ဘိက္ခုနူ ပဿယံ ဂန္တွာ ပဗ္ဗဇိတွာ ဝိပဿနံ ဝဍ္ဎေတွာ သဟ ပဋိသမ္ဘိဒါဟိ အရဟတ္တံ ပါပုဏီတိ။

သုတွာန ¶ သာဒရဝသေန ကုမာရိကေဝံ၊

ဓမ္မဉှိ သီလမမလံ ပရိပါလယန္တီ၊

မာ ဘော ပမဇ္ဇထ သဒါ ကုသလပ္ပယောဂေတိ။

၁၅။ ဗျဂ္ဃဿ ဝတ္ထုမှိ အယမာနုပုဗ္ဗီကထာ

ဇမ္ဗုဒီပေ စူလရဋ္ဌာ သန္နေ ဗာရာဏသီနဂရေ ဧကံ ပံသုပဗ္ဗတံ ဝိနိဝိဇ္ဈိတွာ မဟာမဂ္ဂေါ ဟောတိ၊ တတ္ထ ဝေမဇ္ဈေ ဧကော ဗျဂ္ဃော အတ္တနော အန္ဓပိတရံ ပဗ္ဗတဂုဟာယံ ကတွာ ပေါသေန္တော ဝသတိ။ တဿေဝ ပဗ္ဗတဿ ဝနဒွါရေ တုဏ္ဍိလော နာမ ဧကော သုဝပေါတကော ရုက္ခသ္မိံ ဝသတိ။ တေ ဥဘောပိ အညမညံ ပိယသဟာယာ အဟေသုံ၊ တသ္မိံ သမယေ ပစ္စန္တဂါမဝါသီ ဧကော မနုဿော အတ္တနော မာတုဂါမေန သဒ္ဓိံ ကလဟံ ကတွာ ဗာရာဏသိံ ဂစ္ဆန္တော တံ ဝနဒွါရံ သမ္ပာပုဏိ။ အထ သုဝပေါတကော ပရိဟီနတ္တဘာဝံ ဒုက္ခိတံ တံ ဒိသွာ ကမ္ပမာနဟဒယော တံ ပက္ကောသိတွာ ဘော ကုဟိံ ဂစ္ဆသီတိ အာဟ၊ တေန ပရခဏ္ဍံ ဂစ္ဆာမီတိ ဝုတ္တေ တုဏ္ဍိလော ဘော ဣမသ္မိံ ဝနခဏ္ဍမဇ္ဈေ ဧကော ဗျဂ္ဃော ဝသတိ။ ကက္ခလော ဖရုသော သမ္ပတ္တသမ္ပတ္တေ မာရေတွာ ခါဒတိ။ မာ တွံ တေန ဂစ္ဆာတိ အာဟ။ သွာယံ ဒုဗ္ဘဂေါ မနုဿော ဟိတကာမဿ တဿ ဝစနံ အနာဒိယိတွာ ဂစ္ဆာမေဝါတိ အာဟ။ တုဏ္ဍိလော တေနဟိ သမ္မ ယဒိ အနိဝတ္တမာနော ဂစ္ဆသိ။ ဧသော ဗျဂ္ဃော မမ သဟာယော။ မေ ဝစနံ တဝ သန္တိကာ သုတွာ န ဂဏှာတီတိ။ တဿ တံ အနာဒိယန္တော သော သုဝရာဇေ ပဒုဋ္ဌစိတ္တော မုဂ္ဂရေန ပဟရိတွာ မာရေတွာ အရဏိံ အဂ္ဂိံ ကတွာ မံသံ ခါဒိ။ အသပ္ပုရိသသံသဂ္ဂေါ နာမေ သ ဣဓ လောကပရလောကေသု ဒုက္ခာဝဟောယေဝ။ တထာဟိ။

မယာ ¶ ကတံ မယှမိဒံ၊ ဣတိ ဝေဿာနရံ နရော၊

သမာလိင်္ဂတိ သပ္ပေမော၊ ဒဟတေဝဿ ဝိဂ္ဂဟံ။

မဓုခီရာဒိဒါနေန၊ ပေမသာ ပရိပါလိတော၊

သောရဂေါ ကုပိတောဝဿ၊ ဍသတေဝဿ ဝိဂ္ဂဟံ။

ဧဝံ နိဟီနဇစ္စေန၊ ပါပေန အကတညုနာ၊

နရာ ဓမေန ဒီနေန၊ ကတောပိ ခဏသင်္ဂမော။

အသာဓုကော အယံတေဝံ၊ ဇာနမာနေန ဇန္တုနာ၊

မုဟုတ္တမ္ပိ န ကာတဗ္ဗော၊ သင်္ဂမော သော အနတ္ထဒေါတိ။

တတော သော အသပ္ပုရိသော မံသံ ခါဒိတွာ ဂစ္ဆန္တော ဝနခဏ္ဍမဇ္ဈံ သမ္ပာပုဏိ။ အထ ဗျဂ္ဃော တံ ဒိသွာ မဟာနာဒံ ကရောန္တော ဂဟဏတ္ထာယ ဥဋ္ဌာသိ။ သော ဗျဂ္ဃံ ဒိသွာ ဘယပ္ပတ္တော တုဏ္ဍိလဿ ဝစနံ သရိတွာ အဟံ ဘော တဝ သဟာယတုဏ္ဍိလဿ သန္တိကာ အာဂတောမှီတိ အာဟ၊ တံ သုတွာ ဗျဂ္ဃော အတ္တမနော ဧဟိ သမ္မာတိ တံ ပက္ကောသိတွာ အတ္တနော ဝသနဋ္ဌာနံ နေတွာ ခါဒိတဗ္ဗာဟာရေန တံ သန္တပ္ပေတွာ ပိတုသန္တိကေ နိသီဒါပေတွာ ပုန ဝနခဏ္ဍ မဂမာသိ။ အထဿ ပိတာ ပုတ္တဿ ဂတကာလေ တေန သဒ္ဓိံ သလ္လပန္တော တဿ ဝစနာနုသာရေန တုဏ္ဍိလံ မာရေတွာ ခါဒိတဘာဝံ အညာသိ။ တတော သော ပုတ္တဿ အာဂတကာလေ တဝ သဟာယော တေန မာရိတောတိ အာဟ။ တံ သုတွာ ဗျဂ္ဃော အနတ္တမနော ဝေဂေန တဿ ဝသနဋ္ဌာနံ ဂန္တွာ သမ္မ တုဏ္ဍိလာတိ သဒ္ဒံ ကတွာ အပဿန္တော လုဉ္စိတပတ္တံစဿ ဒိသွာ နိဿံသယံ တေန မာရိတော မေ သဟာယောတိ သောစန္တော ပရိဒေဝန္တော အာဂဉ္ဆိ။ အထ သော အသပ္ပုရိသော တသ္မိံ တတ္ထ ဂတေ တဿ ပိတရံ ပါသာဏေန ပဟရိတွာ မာရေတွာ ဗျဂ္ဃံစ ဒါနိ မာရေဿာမီတိ ဗျဂ္ဃာဂမနမဂ္ဂံ ဩလောကေန္တော နိလီနော အဋ္ဌာသိ။ တသ္မိံ ခဏေ ဗျဂ္ဃောပိ အာဂဉ္ဆိ။ သော တဿာ ဂတကာလေ တဿ တေဇေန ဘီတော ဂန္တွာ ¶ ဇီဝိတံ မေ သာမိ ဒေဟီတိ ပါဒမူလေ ဥရေန နိပဇ္ဇိ၊ ဗျဂ္ဃော ပန တေန ကတကမ္မံ ဒိသွာ တသ္မိံ စိတ္တံ နိဗ္ဗာပေတွာ မမ သဟာယဿ သာသနမာဒါယာဂတဿ ဒုဗ္ဘိတုံ န ယုတ္တန္တိ စိန္တေန္တော တံ သမဿာသေတွာ ဂစ္ဆ သမ္မာတိ သုခံ ပေသေသိ။ ဧဝဉှိ သပ္ပုရိသသမာဂမော နာမ ဣဓ လောကပရလောကေသု သုခါဝဟောယေဝ၊ ဝုတ္တံဟိ။

သဗ္ဘိရေဝ သမာသေထ၊ သဗ္ဘိ ကုဗ္ဗေထ သန္ထဝံ၊

သဗ္ဗတ္ထ သန္ထဝေါ တေန၊ သေယျော ဟောတိ န ပါပိယော။

သုခါဝဟော ဒုက္ခနုဒေါ၊ သဒါ သဗ္ဘိ သမာဂမော၊

တသ္မာ သပ္ပုရိသေဟေဝ၊ သင်္ဂမော ဟောတု ဇန္တုနံ။

တတော သော ဗျဂ္ဃော တေန မေတ္တစိတ္တာနုဘာဝေန ကာလံ ကတွာ သဂ္ဂေ နိဗ္ဗတ္တောတိ။

ဧဝံဝိဓောပိ ဖရုသော ပရမံသဘောဇီ၊

ဗျဂ္ဃော ဒယာယုပဂတော သုဂတိံ သုမေဓော၊

တံ ဝေါ ဒဒါတိ ဝိဘဝဉ္စ ဘဝေသု ဘောဂန္တိ။

၁၆။ ဖလကခဏ္ဍဒိန္နဿ ဝတ္ထုမှိ အယမာနုပုဗ္ဗီကထာ

သာဝတ္ထိယံ ကိရေကော မနုဿော ဥတ္တရာပထံ ဂစ္ဆာမီတိ အဒ္ဓါနမဂ္ဂပဋိပန္နော ဂိမှာနမာသေ မဇ္ဈဏှေ ဗဟလာတပေန ကိလန္တော ဟုတွာ ရုက္ခစ္ဆာယံ ပဝိသိတွာ တမ္ဗုလံ ခါဒန္တော ဖလကေ နိသီဒိ။ အထ ဥတ္တရာပထေနာဂစ္ဆာန္တော ဧကော တထေဝ အာတပေန ကိလန္တော အာဂန္တွာ ပုရိမဿ သန္တိကေ နိသီဒိတွာ ဘော ပါနီယံ အတ္ထီတိ ပုစ္ဆိ။ ဣတရော ပါနီယံ နတ္ထီတိ အာဟ။ အထဿ ¶ သော မယှမ္ပိ ဘော တမ္ဗုလံ ဒေဟိ ပိပါသိတောမှိတိ ဝတွာပိ န လဘိ။ စတုကဟာပဏေန ဧကံ တမ္ဗုလပဏ္ဏံ ကိဏိတွာ လဒ္ဓါ တတ္ထေဝ နိသီဒိတွာ ခါဒိတွာ ပိပါသံ ဝိနောဒေတွာ တေန ဥပကာရေန တဿ သိနေဟံ ကတွာ အတ္တနော ဂမနဋ္ဌာန မဂမာသိ၊ အထာ ပရဘာဂေ သော ပဋ္ဋနံ ဂန္တွာ နာဝါယ ဝဏိဇ္ဇတ္ထာယ ဂစ္ဆန္တော သမုဒ္ဒမဇ္ဈံ ပါပုဏိ။ တတော သတ္တမေ ဒိဝသေ နာဝါ ဘိဇ္ဇိ။ မနုဿာ မစ္ဆကစ္ဆပါနံ ဘက္ခာ ဇာတာ။ သော ဧဝ ပုရိသော အရောဂေါ ဟုတွာ ဧကံ ဖလကခဏ္ဍံ ဥရေ ကတွာ သမုဒ္ဒံ တရတိ။ အထေ တရောပိ တထေဝ နာဝါယ ဘိန္နာယ သေသော ဟုတွာ သမုဒ္ဒံ တရန္တော ပုရိမေန သမာဂမိ။ အထ တေ သတ္တဒိဝသံ သမုဒ္ဒေ တရန္တာ အညမညံ သဉ္ဇာနိံသု။ တေသု ကဟာပဏေ ဒတွာ တမ္ဗုလံ ဂဟိတော ဧကံ ဖလကခဏ္ဍံ ဥရေ ကတွာ တရတိ။ ဣတရဿေတံ နတ္ထိ။ အထ သော ကဟာပဏေ ဂဟေတွာ ဒိန္နတမ္ဗုလမတ္တဿော ပကာရံ သရိတွာ အတ္တနော ဖလကခဏ္ဍံ တဿ အဒါသိ။ သော တသ္မိံ သယိတွာ တရန္တော တံ ပဟာယ အဂမာသိ၊ အပရော အနာဓာရကေန တရန္တော ဩဿဋ္ဌဝိရိယော ဥဒကေ ဩသီဒိတုမာရတိ။ တသ္မိံ ခဏေ သမုဒ္ဒေ အဓိဝတ္ထာ မဏိမေခလာ နာမ ဒေဝဓီတာ ဩသီဒန္တံ တံ ဒိသွာ သပ္ပုရိသောတိ တဿ ဂုဏာနုဿရန္တီ ဝေဂေနာ ဂန္တွာ တံ အတ္တနော အာနုဘာဝေန သမုဒ္ဒတီရံ ပါပေသိ။ ဣတရံပိ သာ ဧတဿေဝ ဂုဏာနုဘာဝေန တီရံ ပါပေသိ။ အထ ဖလကေနောတိဏ္ဏပုရိသော တံ ဒိသွာ ဝိမှိတော ကထံ ပုရတော အဟောသိ သမ္မာတိ ပုစ္ဆိ။ သော န ဇာနာမိ။ အပိစ ခေါ သုခေနေဝ တီရံ ပတ္တောသ္မီတိ အာဟ။ အထ ဒေဝဓီတာ ဒိဿမာနကသရီရေနေဝ အတ္တနာ အာနီတဘာဝံ အာရောစေန္တီ အာဟ။

ယော မာတရံ ပိတရံဝါ၊ ဓမ္မေန ဣဓ ပေါသတိ၊

ရက္ခန္တိ တံ သဒါ ဒေဝါ၊ သမုဒ္ဒေ ဝါ ထလေပိ ဝါ။

ယော စေ ဗုဒ္ဓဉ္စ ဓမ္မဉ္စ၊ သံဃဉ္စ သရဏံ ဂတော၊

ရက္ခန္တိ တံ သဒါ ဒေဝါ၊ သမုဒ္ဒေ ဝါ ထလေပိ ဝါ။

ပဉ္စဝိဓံ ¶ အဋ္ဌဝိဓံ၊ ပါတိမောက္ခဉ္စ သံဝရံ၊

ပါလေတိ ယော တံ ပါလေန္တိ၊ ဒေဝါ သဗ္ဗတ္ထ သဗ္ဗဒါ။

ကာယေန ဝါစာ မနသာ၊ သုစရိတ္တံ စရတီ ဓ ယော၊

ပါလေန္တိ တံ သဒါ ဒေဝါ၊ သမုဒ္ဒေ ဝါ ထလေပိ ဝါ။

ယော သပ္ပုရိသဓမ္မေသု၊ ဌိတော ဓ ကတဝေဒိကော၊

ပါလေန္တိ တံ သဒါ ဒေဝါ၊ သမုဒ္ဒေ ဝါ ထလေပိ ဝါ။

နေဝ ဒါနံ အဒါသာဟံ၊ န သီလံ ပရိပါလယိံ၊

ကေန မေ ပုညကမ္မေန၊ မမံ ရက္ခန္တိ ဒေဝတာ၊

ပုစ္ဆာမိ သံသယံ တုယှံ၊ တံ မေ အက္ခာဟိ ဒေဝတေတိ။

အဂါဓာ ပါရဂေ ဘီမေ၊ သာဂရေ ဒုရိတာ ကရေ၊

ဘိန္နနာဝေါ တရန္တော တွံ၊ ဟဒယေ ကတွာ ကလိင်္ဂရံ။

ဌတွာ သပ္ပုရိသေ ဓမ္မေ၊ အတ္တာန မနဝေက္ခိယ၊

ခဏသန္ထဝဿ ပုရိသဿ၊ အဒါသိ ဖလကံ သကံ။

တံ တုယှံ မိတ္တဓမ္မဉ္စ၊ ဒါနဉ္စ ဖလကဿ တေ၊

ပတိဋ္ဌာသိ သမုဒ္ဒသ္မိံ၊ ဧဝံ ဇာနာဟိ မာရိသာတိ။

ဧဝဉ္စ ဝတွာ သာ တေ ဒိဗ္ဗာဟာရေန သန္တပ္ပေတွာ ဒိဗ္ဗဝတ္ထာလင်္ကာရေဟိ အလင်္ကရိတွာ အတ္တနော အာနုဘာဝေန သာဝတ္ထိနဂရေယေဝ တေ ပတိဋ္ဌာပေသိ။ တတော ပဋ္ဌာယ တမေဝ အာရမ္မဏံ ကတွာ တေ ဒါနံ ဒဒန္တာ သီလံ ရက္ခန္တာ ဥပေါသထကမ္မံ ကရောန္တာ အာယုပရိယောသာနေ သဂ္ဂပရာယဏာ အဟေသုံ။

ဧဝံ ပရိတ္တကုသလေနပိ သာဂရသ္မိံ၊

သတ္တာ လဘန္တိ သရဏံ ခလု ဒေဝတာဟိ၊

တုမှေပိ သပ္ပုရိသတံ န ဝိနာသယန္တာ၊

မာ ဘော ပမဇ္ဇထ သဒါ ကုသလပ္ပယောဂေတိ။

ဖလကခဏ္ဍဒိန္နဿ ဝတ္ထုံ ဆဋ္ဌမံ။

၁၇။ စောရသဟာယဿ ဝတ္ထုမှိ အယမာနုပုဗ္ဗီကထာ

အမှာကံ ¶ ဘဂဝတိ ပရိနိဗ္ဗုတေ ဇမ္ဗုဒီပေ ဒေဝဒဟနဂရေ ဧကော မနုဿော ဒုက္ခိတော တတ္ထ တတ္ထ ဝိစရန္တော ပစ္စန္တေ အညတရံ ဂါမံ ဂန္တွာ တတ္ထ ဧကသ္မိံ ကုလဂေဟေ နိဝါသံ ကပ္ပေသိ။ တတ္ထ မနုဿာ တဿ ယာဂုဘတ္တံ ဒတွာ ပေါသေသုံ၊ တတော သော တတ္ထ မနုဿေဟိ မိတ္တသန္ထဝံ ကတွာ ကတိပါဟံ တတ္ထ ဝသိတွာ အညဋ္ဌာနံ ဂန္တွာ အပရဘာဂေ စောရကမ္မံ ကရောန္တော ဇီဝိကံ ကပ္ပေတိ။ အထေကဒိဝသံ စောရေန္တံ တံ ရာဇပုရိသာ ဂဟေတွာ ရညော ဒဿေသုံ။ ရာဇာ တံ ဗန္ဓနာဂါရေ ကရောထာတိ အာဏာပေသိ၊ တေ တံ ဗန္ဓနာဂါရံ နေတွာ သင်္ခလိကာဟိ ဗန္ဓိတွာ အာရက္ခကာနံ ပဋိပါဒေတွာ အဂမံသု၊ ဗန္ဓနာဂါရေ ဝသန္တဿ တဿ ဒွါဒသသံဝစ္ဆရာနိ အတိက္ကန္တာနိ။ တတော အပရဘာဂေ တဿ ပုဗ္ဗသဟာယော ပစ္စန္တဂါမဝါသီ မနုဿော ကေနစိ ကမ္မေန ဒေဝဒဟ မာဂတော တတ္ထ တတ္ထ အာဟိဏ္ဍန္တော ဗန္ဓနာဂါရေ ဗဒ္ဓံ တံ အဒ္ဒသ။ ဒိသွာ တဿ ဟဒယံ ကမ္ပိ၊ သော ရောဒိတွာ ပရိဒေဝိတွာ ကိံ တေ မယာ ကတ္တဗ္ဗံ သမ္မာတိ ပုစ္ဆိ။ တတော တေန သမ္မ ဗန္ဓနာဂါရေ ဝသန္တဿ မေ ဣဒါနိ ဒွါဒသသံဝစ္ဆရာနိ အတိက္ကန္တာနိ၊ ဧတ္တကံ ကာလံ ဒုဗ္ဘောဇနာဒိနာ မဟာဒုက္ခံ အနုဘောမိ။ ယာဝါဟံ အာဟာရံ ပရိယေသိတွာ ဘုဉ္ဇိတွာ အာဂမိဿာမိ။ တာဝ မံ ဣတော မုဉ္စနုပါယံ ဇာနာဟီတိ ဝုတ္တေ သော သပ္ပုရိသော။

ရူပေန ကိန္တု ဂုဏသီလဝိဝဇ္ဇိတေန၊

မိစ္ဆာလယဿ ကိတဝဿ ဓိယာ ကိမတ္ထံ၊

မိတ္တေန ကိံ ဗျသနကာလပရမ္မုခေနာတိ။

ဧဝဉ္စ ပန ဝတွာ သာဓု သမ္မ ကရောမိ တေ ဝစနန္တိ အာရက္ခကာနံ သန္တိကံ ဂန္တွာ ဘောန္တော ယာဝေသော ဘတ္တံ ဘုဉ္ဇိတွာ အာဂစ္ဆတိ။ တာဝါဟံ တဿ ပါဋိဘောဂေါ ဘဝိဿာမိ။ ဝိဿဇ္ဇေထ ¶ နန္တိ အာဟ၊ တေဟိ န သက္ကာ ဘော ဧတံ ဝိဿဇ္ဇေတုံ၊ အပိ စ ခေါ ယာဝါယံ အာဂစ္ဆတိ။ တာဝ တွံ အယသင်္ခလိကာယ ဗဒ္ဓါ နိသီဒိဿသိ၊ ဧဝံ တံ ဝိဿဇ္ဇေဿာမ၊ နော စေ န သက္ကာတိ အာဟံသု၊ သော ဧဝမ္ပိ ဟောတု သမ္မာတိ ဝတွာ တဿ ပါဒတော သင်္ခလိကံ မုဉ္စိတွာ အတ္တနော ပါဒေ ကတွာ ဗန္ဓနာဂါရံ ပဝိသိတွာ ဣတရံ မုဉ္စာပေသိ။ သောပိ အသပ္ပုရိသော ဗန္ဓနာ မုတ္တော န ပုန တံ ဌာန မဂမာသိ၊ အဟော အကတညုနော ပကတိံ ဉာတုံ ဘာရိယံ။ ယထာဟ။

ဝါရိပူရေ ယထာ သောဗ္ဘေ၊ နေဝန္တော ဝိသမံ သမံ၊

ပညာယတေဝံသာဓုဿ၊ ဘာဝံ မနသိ သမ္ဘဝံ။

ဘာသန္တိ မုခတော ဧကံ၊ စိန္တေန္တိ မနသာ ပရံ၊

ကာယေနေကံ ကရောန္တေဝံ၊ ပကတာယမသာဓုနံ။

တေသံ ယော ဘာဝမညာသိ၊ သောဝ ပဏ္ဍိတဇာတိကော၊

ဗဟုဿုတောပိ သောယေဝ၊ ပရစိတ္တဝိဒူပိ သော။

အထဿ ဗန္ဓနာဂါရေ ဝသန္တဿ ဒွါဒသသံဝစ္ဆရာနိ အတိက္ကန္တာနိ။ ဧတ္တကံ ကာလံ ဇိဃစ္ဆာပီဠိတေန တေန အာဟာရတ္တာယ ပရော န ယာစိတပုဗ္ဗော၊ အနုစ္ဆိဋ္ဌာဟာရံ လဘနဒိဝသတော အလဘနဒိဝသာယေဝ ဗဟုတရာ ဟောန္တိ၊ အထ ဒွါဒသသံဝစ္ဆရာတိက္ကမေ ရညော ပုတ္တော နိဗ္ဗတ္တိ။ တဒါ ရာဇာ အတ္တနော ဝိဇိတေ သဗ္ဗဗန္ဓနာဂါရာနိ ဝိဝရာပေသိ။ အန္တမသော မိဂပက္ခိနောပိ ဗန္ဓနာ မုဉ္စာပေသိ။ ဒွါရေ ဝိဝဋမတ္တေယေဝ ဗန္ဓနာဂါရေ မနုဿာ ဣစ္ဆိတိစ္ဆိတဋ္ဌာနံ အဂမံသု။ သော ပနေကောဝ တေဟိ သဒ္ဓိံ အဂန္တွာ ဩဟီယိ။ အာရက္ခကေဟိ တွံ ဘော ကသ္မာ န ဂစ္ဆသီတိ ဝုတ္တေ အဟံ ဘော ပညာတဘာဝေန ဣဒါနိ န ဂမိဿာမိ။ အတီဝ ပရိဟီနဂတ္တောသ္မိ။ အန္ဓကာရေ ဂမိဿာမီတိ ဝတွာ အန္ဓကာရေ အာဂတေ နိက္ခမ္မ အန္တောနဂရေ ဝိဿာသိကာနံ အဘာဝေန ကုတော အာဟာရံ လဘိဿာမီတိ စိန္တေန္တော နိက္ခမ္မ ရတ္တန္ဓကာရေ အာမကသုသာန ¶ မဂမာသိ။ ဧတ္ထာဟာရံ လဘိဿာမီတိ။ တတ္ထ သော အဓုနာ နိက္ခိတ္တမတမနုဿံ ဒိသွာ မနုဿဋ္ဌိနာ မံသံ ဆိန္ဒိတွာ သီသကပါလေ ပက္ခိပိတွာ တီဟိ မနုဿသီသေဟိ ကတဥဒ္ဓနေ ဌပေတွာ စိတကတော ဩမုက္ကအလာတေဟိ အဂ္ဂိံ ကတွာ သုသာနံ နိဗ္ဗာပနတ္ထာယာ ဘတဥဒကေန မနုဿဋ္ဌိနာ အာလောလေန္တော မံသံ ပစိတွာ ဩတာရေတွာ သာခါဘင်္ဂေန ဟိရိကောပီဏံ ပဋိစ္ဆာဒေတွာ နိဝတ္ထပိလောကိကံ ဝါတာဝရဏံ ကတွာနိသီဒိ။ တသ္မိံ ခဏေ တတ္ထ ပိပ္ပလီရုက္ခေ အဓိဝတ္ထာ ဒေဝတာ တဿ တံ ကိရိယံ ဒိသွာ ပုစ္ဆိဿာမိ တာဝ နန္တိ တံ ဥပသင်္ကမိတွာ ဧဝမာဟ။ ဘော တွံ ဃနတရတိမိရာကုလေ မဟာရတ္တိယံ တတ္ထ တတ္ထ ဝိကိဏ္ဏနရဋ္ဌိသမာကိဏ္ဏေ သောဏသိဂါလာဒိကုဏပါဒကာကုလေ မနုဿမံသဘက္ခယက္ခရက္ခသာကုလေ တတ္ထ တတ္ထ ပဇ္ဇလန္တာနေကစိတကဘယာနကေ သုသာနေ မနုဿမံသံ ပစိတွာ ကိံကရောသီတိ ပုစ္ဆန္တီ အာဟ။

တတော ဒေဝတာ တံ တထာ ဟောတု၊ ဣမိနာ ပိလောတိကေန ဝါတာဝရဏံ ကရောသိ။ ကိမတ္ထမေတန္တိ ပုစ္ဆန္တီ။

ကိမတ္ထမေတံ ဝဒ ပုစ္ဆိတော မေတိ။

ဖုသာတိ [ဖုသာတိသာသင်္ဂတိမဇ္ဇဒါနိ ဣတိကတ္တစိ] တံ ဝါယု မမာ ဝိသိတွာ၊

ပရိဝဇ္ဇိတုံ ဗဒ္ဓမိမံ ကုစေလန္တိ။

မာတာ ပိတာ ဗန္ဓဝေါ ခေတ္တ ဝတ္ထူ၊

သမ္ဖံ ဂိရံ ဓုတ္တဇနေဟိ [အက္ခဓုတ္တာဒိယောဂံ ဣတိကတ္ထစိ] ယောဂံ။

အပါယိကံ [အပါယိကံ ဣတိကတ္ထစိ] ဒုက္ခမနန္တ မညံ၊

အာရာဝ သော ဘော ပရိဝဇ္ဇနီယောတိ။

ဝတွာ အတ္တနာ အသပ္ပုရိသသံသဂ္ဂေနာနုဘူတံ သဗ္ဗံ ဒုက္ခံ ကထေသိ၊ တတော ဒေဝတာ အဟမ္ပိ ဘော သတ္ထုနော မင်္ဂလသုတ္တဒေသနာဒိဝသေ ဣမသ္မိံယေဝ ရုက္ခေ နိသိန္နော။

အသေဝနာ စ ဗာလာနံ၊ ပဏ္ဍိတာနဉ္စ သေဝနာ၊

ပူဇာ စ ပူဇနီယျာနံ၊ ဧတံ မင်္ဂလ မုတ္တမန္တိ။

ဂါထာယ ဗာလဿ ဒေါသေ အဿောသိံတိ ဝတွာ တဿ ပသန္နော တံ အတ္တနော ဝိမာနံ နေတွာ နဟာပေတွာ ဒိဗ္ဗဝတ္ထာလင်္ကာရေဟိ အလင်္ကရိတွာ ဒိဗ္ဗန္နပါနံ ဒတွာ မဟန္တံ သက္ကာရသမ္မာနံ ကတွာ အတ္တနော အာနုဘာဝေန တသ္မိံ နဂရေ ရဇ္ဇေ အဘိသိဉ္စာပေသိ။ သော တတ္ထ ရဇ္ဇံ ကရောန္တော ဒါနာဒီနိ ပုညာနိ ကတွာ အာယုပရိယောသာနေ ယထာကမ္မံ ဂတောတိ။

ဧဝံ ¶ အသာဓုဇနသင်္ဂမသန္နိဝါသံ၊

သဉ္စဇ္ဇ သာဓုသုစိသဇ္ဇနသင်္ဂမေန၊

ဒါနာဒိ နေကကုသလံ ပရိပူရယန္တာ၊

သဂ္ဂါ ပဝဂ္ဂဝိဘဝံ အဘိသမ္ဘုနာထာတိ။

၁၈။ မရုတ္တဗြာဟ္မဏဿ ဝတ္ထုမှိ အယမာနုပုဗ္ဗီကထာ

ဇမ္ဗုဒီပေ စန္ဒဘာဂါ နာမ ဂင်္ဂါတီရေ ဟောမဂါမံ နာမ အတ္ထိ။ တသ္မိံ ဧကော မရုတ္တော နာမ ဗြာဟ္မဏော ပဋိဝသတိ။ တဒါ သော ဝေါဟာရတ္ထာယ တက္ကသီလံ ဂန္တွာ ဂေဟံ အာဂစ္ဆန္တော အန္တရာမဂ္ဂေ ဧကာယ သာလာယ ကုဋ္ဌရောဂါ တုရံ သုနခံ ဒိသွာ တသ္မိံ ကာရုညေန နီလဝလ္လိတက္ကမ္ဗိလေန မဒ္ဒိတွာ ပါယေသိ။ သုနခေါ ဝူပသန္တရောဂေါ ပါကတိကော ဟုတွာ ဗြာဟ္မဏေန အတ္တနော ကတူပကာရံ သလ္လက္ခေန္တော တေနေဝ သဒ္ဓိံ အဂမာသိ။ အပရဘာဂေ ဗြာဟ္မဏဿ ဘရိယာ ဂဗ္ဘံ ပဋိလဘိ၊ ပရိပုဏ္ဏဂဗ္ဘာယ တာယ ဝိဇာယနကာလေ ဒါရကော တိရိယမ္ပတိတွာ အန္တောဂဗ္ဘေယေဝ မတော။ တဒါ တံ သတ္ထေန ခဏ္ဍာခဏ္ဍိကံ ဆိန္ဒိတွာ နီဟရိံသု၊ အထ ဗြာဟ္မဏော တံ ဒိသွာ နိဗ္ဗိန္ဒဟဒယော ဃရာဝါသံ ပဟာယ ဣသိပဗ္ဗဇ္ဇံ ပဗ္ဗဇိတွာ အရညေ ဝိဟရတိ။ အထဿ ဘရိယာ အညေန သဒ္ဓိံ သံဝသန္တီ အယံ မံ ပဟာယ ပဗ္ဗဇိတောတိ ဗြာဟ္မဏေ ပဒုဋ္ဌစိတ္တာ ဘော ဗြာဟ္မဏံ မာရေဟီတိ သာမိကေန သဒ္ဓိံ မန္တေသိ။ တေသံ မန္တနံ သုနခေါ သုတွာ ဗြာဟ္မဏေနေဝ သဒ္ဓိံ စရတိ။ အထေကဒိဝသံ တဿာ သာမိကော တာ ပ သံ မာရေဿာမီတိ ဓနု ကလာပံ ဂဟေတွာ နိက္ခမိ၊ တဒါ တာပသော ဖလာဖလတ္ထာယ အရညံ ဂတော။ သု န ခေါ အဿမေယေဝ ဩ ဟီ ယိ။ ပုရိသော တာပသဿာဂမနမဂ္ဂံ ဩလောကေန္တော ဂစ္ဆန္တရေ ¶ နိလီနော အစ္ဆိ။ သုနခေါ တဿ ပမာဒံ ဩလောကေတွာ ဓနုနော ဂုဏံ ခါဒိတွာ ဆိန္ဒိ။ သော ပုန ဂုဏံ ပါကတိကံ ကတွာ အာရောပေသိ။ ဧဝံ သော အာရောပိတံ အာရောပိတံ ခါဒတေဝ၊ အထ သော ပါပပုရိသော တာပသဿာဂမနံ ဉတွာ တံ မာရေဿာမီတိ ဓနုနာ သဒ္ဓိံ အဂမာသိ။ အထဿ သုနခေါ ပါဒေ ဍသိတွာ ပါတေတွာ တဿ မုခံ ခါဒိတွာ ဒုဗ္ဗလံ ကတွာ ဘုင်္ကာရမကာသိ၊ ဧဝဉှိ သပ္ပုရိသာ အတ္တနော ဥပကာရကာနံ ပစ္စုပကာရံ ကရောန္တိ။ ဝုတ္တဉှိ။

ဥပကာရံ ကရောန္တော သော၊ သုနခေါ ကတဝေဒိကော၊

သတ္တူပဃာတကံ ကတွာ၊ ဣသိနော ဒါသိ ဇီဝိတံ။

တိရစ္ဆာနာပိ ဇာနန္တိ၊ ဂုဏမတ္တနိ ကတံ သဒါ၊

ဣတိ ဥတွာန မေဓာဝီ၊ ကတညူ ဟောန္တု ပါဏိနောတိ။

တတော တာပသော သုနခဿ သဒ္ဒေနာ ဂန္တွာ တဿ တံ ဝိပ္ပကာရံ ဒိသွာ ကာရုညေန ပဋိဇိဂ္ဂိတွာ ဝူပသန္တဝဏံ ဗလပ္ပတ္တံ ပေါသေတွာ တတ္ထေဝ ဝသန္တော ဈာနာဘိညံ နိဗ္ဗတ္တေတွာ အာယုပရိယောသာနေ ဗြာဟ္မလောကပရာယဏော အဟောသီတိ။

မေတ္တိံဒိသဿ ပကတံ ဣသိနာ စ သုတွာ၊

သမ္မာ ကရောထ ကရုဏဉ္စ ပရူပကာရံ၊

တံ သဗ္ဗဒါ ဘဝတိ ဝေါ ဘဝဘောဂဟေတူတိ။

မရုတ္တဗြာဟ္မဏဿ ဝတ္ထုံ အဋ္ဌမံ။

၁၉။ ပါနီယဒိန္နဿ ဝတ္ထုမှိ အယမာနုပုဗ္ဗီကထာ

ဇမ္ဗုဒီပေ ¶ အညတရသ္မိံ ဇနပဒေ ကိရေ ကော မနုဿော ရဋ္ဌတော ရဋ္ဌံ ဇနပဒတော ဇနပဒံ ဝိစရန္တော အနုက္ကမေန စန္ဒဘာဂါနဒီတီရံ ပတွာ နာဝံ အဘိရုဟိတွာ ပရတီရံ ဂစ္ဆတိ။ အထာပရာ ဂဗ္ဘိနိတ္ထီ တာယ ဧဝ နာဝါယ ဂစ္ဆတိ၊ အထ နာဝါ ဂင်္ဂါမဇ္ဈပ္ပတ္တကာလေ တဿာ ကမ္မဇဝါတာ စလိံသု။ တတော သာ ဝိဇာယိတုမသက္ကောန္တီ ကိလန္တာ ပါနီယံ မေ ဒေထ၊ ပိပါသိတာမှိတိ မနုဿေ ယာစိ။ တေ တဿာ ဝစနံ အသုဏန္တာ ဝိယ ပါနီယံ နာဒံသု၊ အထ သော ဇာနပဒိကော တဿာ ကရုဏာယန္တော [ကရုဏာယပါနီယံ၊ ကရုဏာယန္တောပါနီယံ၊ ကရုဏာယတောယံ ဣတိစကတ္ထစိ] တောယံ ဂဟေတွာ မုခေ အာသိဉ္စိ၊ တသ္မိံ ခဏေ သာ လဒ္ဓဿာသာ သုခေန ဒါရကံ ဝိဇာယိ၊ အထ တေ တီရံ ပတွာ ကတိပယဒိဝသေန အတ္တနော အတ္တနော ဌာနံ ပါပုဏိံသု။ အထာပရဘာဂေ သော ဇာနပဒိကော အညတရကိစ္စံ ပဋိစ္စ တဿာ ဣတ္ထိယာ ဝသနနဂရံ ပတွာ တတ္ထ တတ္ထ အာဟိဏ္ဍန္တော နိဝါသနဋ္ဌာနံ အလဘိတွာ နဂရဒွါရေ သာလံ ဂန္တွာ တတ္ထ နိပဇ္ဇိ။ တသ္မိံယေဝ ဒိဝသေ စောရာ နဂရံ ပဝိသိတွာ ရာဇဂေဟေ သန္ဓိံ ဆိန္ဒိတွာ ဓနသာရံ ဂဟေတွာ ဂစ္ဆန္တာ ရာဇပုရိသေဟိ အနုဗန္ဓာ ဂန္တွာ တာယေဝ သာလာယ ဆဍ္ဍေတွာ ပလာယိံသု။ အထ ရာဇပုရိသာ အာဂန္တွာ စောရေ အပဿန္တာ တံ ဇာနပဒိကံ ဒိသွာ အယံ စောရောတိ ဂဟေတွာ ပစ္ဆာဗာဟံ ဂါဠှံ ဗန္ဓိတွာ ပုန ဒိဝသေ ရညော ဒဿေသုံ။ ရညာ ကသ္မာ ဘဏေ စောရကမ္မ မကာသီတိ ပုစ္ဆိတော နာဟံ ဒေဝ စောရော၊ အာဂန္တုကောမှီတိ ဝုတ္တေ ရာဇာ စောရေ ပရိယေသိတွာ အလဘန္တော အယမေဝ စောရော၊ ဣမံ မာရေထာတိ အာဏာပေသိ။ ရာဇပုရိသေဟိ တံ ဂါဠှံ ဗန္ဓိတွာ အာဃာတနံ နီတေ သာ ဣတ္ထီ တံ တထာ နီယမာနံ ဒိသွာ သဉ္ဇာနိတွာ ကမ္ပမာနဟဒယာ မုဟုတ္တေန ရညော သန္တိကံ ဂန္တွာ ဝန္ဒိတွာ ဒေဝ ဧသော ¶ န စောရော အာဂန္တုကော မုဉ္စထေတံ ဒေဝါတိ အာဟ။ ရာဇာ တဿာ ကထံ အသဒ္ဒဟန္တော ယဇ္ဇေတံ မောစေတု မိစ္ဆသိ။ တဿဂ္ဃနကံ ဓနံ ဒတွာ မုဉ္စာပေဟီတိ၊ သာ သာမိ မမ ဂေဟေ ဓနံ နတ္ထိ။ အပိစ မမ သတ္တပုတ္တေဟိ သဒ္ဓိံ မံ ဒါသိံ ကရောဟိ၊ ဧတံ မုဉ္စ ဒေဝါတိ အာဟ၊ အထ ရာဇာ တွံ ဧတံ အဓုနာဂတောတိ ဝဒသိ။ ဧတံ နိဿာယ ပုတ္တေဟိ သဒ္ဓိံ အတ္တာနံ ဒါသတ္တံ သာဝေသိ။ ကိမေသော တေ ဉာတိ ဝါ၊ ဥဒါဟု ဥပကာရကောတိ ပုစ္ဆန္တော အာဟ။

ကိံတေ ဘောတိ အယံ ပေါသော၊ တုဝံ ပုစ္ဆာမိ သံသယံ၊

ဘာတာ ဝါ တေ ပိတာ ဟောတိ၊ ပတိ ဝါ ဒေဝရော တဝ။

ဉာတိ သာလောဟိတော ကိန္နု၊ ဥဒါဟု ဣဏဒါယကော၊

အထောပကာရကော ကိန္နု၊ ကသ္မာဿ ဒေသိ ဇီဝိတံတိ။

ဧသော မေ ပုရိသော ဒေဝ၊ ကတပုဗ္ဗောပကာရကော၊

အတာဏမေကိကံ [အတ္တာနမေကိကံ ဣတိကတ္ထစိ] စေသော၊ ဒုက္ခိတံ မရဏေ ဌိတံ။

ဝိဇာယိတု မသက္ကောန္တိံ၊ ဂဗ္ဘိနိံ ဒုက္ခဝေဒိနိံ၊

တောယေန မံ ဥပဋ္ဌာသိ၊ တေနာဟံ သုခိတာ တဒါ။

ဘင်္ဂကလ္လောလမာလာယ၊ ဥတ္တရန္တံ မဟဏ္ဏဝံ၊

ပဟာယ ပါတုံ ကူပဿ၊ ယာတိ လောကော ပိပါသိတော။

တထေဝ ဝိဇ္ဇမာနေသု၊ ဇနေသု မနုဇာဓိပ၊

ဧကဿေဝ မနသ္မိံဟိ၊ ဂုဏံ တိဋ္ဌတိ သာဓုကံ။

ပဟတွာန မတံ ဟတ္ထိံ၊ မံသတ္ထီ ကေစိ ဇန္တုနော၊

အနုဗန္ဓန္တိ မံသတ္ထံ၊ သသံ ဓာဝန္တ မေကကံ။

တထေဝ ¶ ဝိဇ္ဇမာနေသု၊ ဇနေသု မနုဇာဓိပ၊

ဂုဏဝန္တ မနုဗန္ဓန္တိ၊ သပ္ပုရိသံ ကတဝေဒိကံ။

တသ္မာ သပ္ပုရိသေ ဓမ္မေ၊ ပတိဋ္ဌာသ္မိ နရာဓိပ၊

အနုဿရန္တိ ဧတေန၊ ကတပုဗ္ဗူ ပကာရကံ။

အဟဉ္စ မမ ပုတ္တာ စ၊ ဧတေနမှ သုခါပိတာ၊

ဇီဝိတမ္ပိ ပရိစ္စဇ္ဇ၊ မုစ္စနီယော အယံ မယာတိ။

တတော ရာဇာ ဒေါဝါရိကံ ပက္ကောသိတွာ တမ္ပိ ပုစ္ဆိတွာ အဓုနာဂတဘာဝံ ဉတွာ တဿာ သပ္ပုရိသဓမ္မေ သန္တုဋ္ဌော တေသံ ဥဘိန္နမ္ပိ မဟန္တံ ယသံ အနုပ္ပဒါသိ။ တေ လဒ္ဓယသာ တ တော ပဋ္ဌာယ ဒါနာဒီနိ ပုညကမ္မာနိ ကတွာ သဂ္ဂပရာယဏာ အဟေသုန္တိ။

ဓမ္မေ ပတိဋ္ဌိတမနာ အပိ မာတုဂါမာ၊

ဓမ္မဉ္စ သာဓုစရိတံ မနသီကရောန္တော၊

ဓမ္မေသု ဝတ္တထ သဒါ သုစိသဇ္ဇနာတိ။

၂၀။ သဟာယဿ ပရိစ္စတ္တဇီဝိတကဿ ဝတ္ထုမှိ အယမာနုပုဗ္ဗီကထာ

ဘဂဝတိ ပရိနိဗ္ဗုတေ သာဝတ္ထိယံ သောမဗြာဟ္မဏော သောမဒတ္တဗြာဟ္မဏောတိ ဒွေ ဗြာဟ္မဏာ ဝသန္တိ။ တတ္ထ သောမဒတ္တဗြာဟ္မဏေန သဒ္ဓိံ သောမဗြာဟ္မဏော ယေဘုယျေန ဒူတံ ကီဠတိ။ အထေကဒိဝသံ သောမဒတ္တော သောမဗြာဟ္မဏံ တေန ပရာဇေတွာ တဿ ဥတ္တရာသင်္ဂဉ္စ လဉ္ဆနမုဒ္ဒိကဉ္စ ဂဟေတွာ အတ္တနော ဂေဟံ ဂစ္ဆန္တော သောမဗြာဟ္မဏဿ ဧဟိ ဂေဟံ ဂစ္ဆာ- မာတိ ¶ အာဟ။ တတော သောမော နာဟံ သမ္မ ဧကသာဋကော ဟုတွာ အန္တရဝီထိံ ဩတရိတုံ သက္ကောမိ။ ဂမနတော ဧတ္ထေဝ မေ ဌာနံ ဝရတရန္တိ အာဟ၊ သောမဒတ္တေန ဧဝံ သတိ သမ္မ ဣမံ ဥတ္တရာသင်္ဂံ ဂဏှာတိ တဿ တံ ဒတွာ ဣဒါနိ သမ္မ ဧဟီတိ ဝုတ္တောပိ နာဂစ္ဆတိ။ ပုန တေန ဘော ကသ္မာ နာဂစ္ဆသီတိ ပုဋ္ဌော သမ္မ မမ ဟတ္ထေ မုဒ္ဒိကံ အပဿန္တာ မေ ပုတ္တဒါရာဒယော မယာ သဒ္ဓိံ ကလဟံ ကရောန္တီတိ အာဟ၊ အထ သော ဧဝံ သန္တေ ယဒါ တေ ပဟောတိ။ တဒါ မယှံ ဒေဟီတိ မုဒ္ဒိကမ္ပိ ဒတွာ တံ ဂဟေတွာ ဂေဟံ အဂမာသိ။ အထ တေ ဧတ္တကေန သဟာယာ အဟေသုံ။ အပရဘာဂေ သောမဒတ္တဗြာဟ္မဏံ အယံ ပရဒါရကမ္မံ အကာသီတိ မနုဿာ ဂဟေတွာ ရညော ဒဿေသုံ။ ရာဇာ တဿ ရူပသမ္ပတ္တိံ ဒိသွာ ရာဇာဏံ အကတွာ မာ ဘော ပုန ဧဝမကာသီတိ ဩဝဒိတွာ ဝိဿဇ္ဇေသိ။ ရာဇာ နံ ယာဝတတိယဝါရံ ဩဝဒန္တော ဝိဿဇ္ဇေတွာ စတုတ္ထေဝါရေ ဂစ္ဆထေတံ အာဃာတနံ နေတွာ မာရေထာတိ အာဏာပေသိ။ ဧဝံ ပါပကမ္မေ နိရတာ အနေကာကာရေန ဩဝဒန္တာပိ န သက္ကာ နိဝါရေတုံ။ တထာဟိ။

သောဏာ စေဝ သိဂါလာ စ၊ ဝါယသာ နီလမက္ခိကာ၊

ဣစ္စေတေ ကုဏပေ သတ္တာ၊ န သက္ကာ တေ နိသေဓိတုံ။

တထာ ပါဏာတိပါတေသု၊ ပရဒါရေ သုရာယ စ၊

မုသာဝါဒေသု ထေယျေသု၊ သတ္တသတ္တာ န ဝါရိယာတိ။

တတော ရာဇပုရိသာ တံ ဗန္ဓိတွာ ပက္ကမိံသု။ တဒါ သောမဗြာဟ္မဏော သောမဒတ္တံ တထာ နီယမာနံ ဒိသွာ ကမ္ပမာနဟဒယော ရာဇပုရိသာနံ သန္တိကံ ဂန္တွာ ဣမံ ဘော မုဟုတ္တံ မာ မာရေထ။ ယာဝ ရာဇာနံ ဇာနာပေဿာမီတိ ဝတွာ ရညော သန္တိကံ ဂန္တွာ ဝန္ဒိတွာ ဌိတော ဒေဝ မမ ဇီဝိတံ သောမဒတ္တဿ ဗြာဟ္မဏဿ ဒဿာမိ။ ဧတံ မုဉ္စထ။ ယဒိ မာရေတုကာမာ၊ မံ မာရေထာတိ အာဟ။ ရာဇာ တုဏှီ [တုဋ္ဌော ဣတိကတ္ထစိ] အဟောသိ၊ ရာဇပုရိသာ သောမဒတ္တံ မုဉ္စိတွာ ¶ သောမဗြာဟ္မဏံ အာဃာတနံ နေတွာ မာရေသုံ၊ အဟော ကတညုနော ကတဝေဒိတာ။

ကကူပကာရ မတ္တာနံ၊ သရန္တာ ကေစိ မာနုသာ၊

ဇီဝိတံ ဒေန္တိ သောမောဝ၊ သောမဒတ္တဿ အတ္တနောတိ။

သော တေန ဇီဝိတဒါနေန ဒေဝလောကေ နိဗ္ဗတ္တိတွာ မဟန္တေ ကနကဝိမာနေ ဒေဝစ္ဆရာသဟဿပရိဝုတော ဒိဗ္ဗသမ္ပတ္တိမနုဘောန္တော ပဋိဝသတိ။ တဒါ သောမဒတ္တဗြာဟ္မဏော ဧသော မံ မရဏပ္ပတ္တံ မောစေသီတိ ဝတွာ တဿတ္ထာယ ဒါနံ ဒတွာ ပတ္တိံ အဒါသိ။ တာဝဒေဝဿ တတော ဗဟုတရံ ဒေဝိဿရိယံ အဟောသိ ဒေဝါနုဘာဝဉ္စ။ တတော သော သောမဒေဝေါ အတ္တနော ဒေဝိဿရိယံ ဩလောကေန္တော သဟာယဿ အတ္တနော ဇီဝိတဒါနံ အဒ္ဒသ။ ဒိသွာ အတ္တဘာဝံ ဝိဇဟိတွာ မာဏဝကဝဏ္ဏေန သောမဒတ္တဗြာဟ္မဏံ ဥပသင်္ကမိတွာ ပဋိသန္ထာရံ ကတွာ အတ္တာနံ ဒေဝလောကေ နိဗ္ဗတ္တဘာဝံ ပကာသေတွာ တံ ဂဟေတွာ အတ္တနော အာနုဘာဝေန ဒေဝလောကံ နေတွာ ယထာကာမံ သမ္ပတ္တိ မနုဘဝါတိ ဝတွာ သတ္တာဟံ ဒေဝဿရိယံ ဒတွာ သတ္တမေ ဒိဝသေ နေတွာ တဿ ဂေဟေယေဝ ပတိဋ္ဌာပေသိ။ တတ္ထ ဟိ ဒိဗ္ဗသမ္ပတ္တိ မနုဘူတဿ မနုဿသမ္ပတ္တိ ပဋိက္ကုလာ ဟောတိ။ တတော သော ဒိဗ္ဗသမ္ပတ္တိမနုဿရန္တော ကိသော ဒုဗ္ဗလော ဥပ္ပဏ္ဍုပ္ပဏ္ဍုကဇာတော အဟောသိ။ အထေကဒိဝသံ ဒေဝပုတ္တော တံ ဩလောကေန္တော တထာ ဒုက္ခပ္ပတ္တံ ဒိသွာ န သက္ကာ မနုဿေန ဒိဗ္ဗသမ္ပတ္တိမနုဘဝိတုန္တိ ဣစ္ဆိတိစ္ဆိတသမ္ပတ္တိဒါယကံ ဧကံ စိန္တာမဏိံ ဒတွာ တဿ ဘရိယမ္ပိ အတ္တနော အာနုဘာဝေန ရူပဝန္ထံ ယသဝန္တံ ဝဏ္ဏဝန္တံ အတိက္ကန္တမနုဿိတ္ထိဝဏ္ဏံ အကာသိ၊ အပရဘာဂေ တေ ဇယမ္ပတိကာ ပစ္စက္ခတော ဒိဋ္ဌဒိဗ္ဗသမ္ပတ္တိဝိဘဝါ ဒါနံ ဒတွာ သီလံ ရက္ခိတွာ သဟာယဒေဝပုတ္တဿ သန္တိကေယေဝ နိဗ္ဗတ္တိံသူတိ။

ပါဏမ္ပိ ဒေန္တိ သုဇနာ ဣတိ စိန္တယိတွာ၊

ပါသံသိယာ ဘဝထ သာဓုဇနေဟိ နိစ္စံတိ။

သဟာယဿ ပရိစ္စတ္တဇီဝိတကဿ ဝတ္ထုံ ဒသမံ။

၂၁။ ယက္ခဝဉ္စိတ ဝတ္ထုမှိ အယမာနုပုဗ္ဗီကထာ

ဘဂဝတိ ¶ ပရိနိဗ္ဗုတမှိ ကောသလရညော ကိရ ဇနပဒေ တုဏ္ဍဂါမောနာမ အဟောသိ။ တတ္ထေကော ဗုဒ္ဓဒါသော နာမ မနုဿော ‘‘ယာဝဇီဝံ ဗုဒ္ဓံ သရဏံ ဂစ္ဆာမိ။ ဗုဒ္ဓါ မေ သရဏံ တာဏံ လေဏံ ပရာယဏန္တိ’’ ဧဝံ ဇီဝိတပရိယန္တံ ဗုဒ္ဓံ သရဏံ ဂတော ပဋိဝသတိ၊ တသ္မိံ သမယေ ဧကော ဇနပဒဝါသိကော တတ္ထ တတ္ထ အာဟိဏ္ဍန္တော တံ တုဏ္ဍဂါမံ ပတွာ တဿေဝ ဃရေ နိဝါသံ ကပ္ပေသိ၊ တဿ ပန ဇာနပဒိကဿ သရီရေ ဧကော ယက္ခော အာဝိသိတွာ ပီဠေတိ၊ တဒါ တဿ ဂါမဿ ပဝိသနကာလေ ယက္ခော ဗုဒ္ဓဒါသော ပါသကဿ ဂုဏတေဇေန တဿ ဂေဟံ ပဝိသိတုံ အသက္ကောန္တော တံ မုဉ္စိတွာ ဗဟိဂါမေ သတ္တာဟံ အဋ္ဌာသိ တဿာဂမနံ ဩလောကေန္တော။ တတော သော ဇာနပဒိကော သတ္တဒိဝသံ တတ္ထ ဝသိတွာ သတ္တမေ ဒိဝသေ သကရဋ္ဌံ ဂန္တုကာမော ဂါမာ နိက္ခမိ။ အထ တံ တထာ နိက္ခန္တံ ဒိသွာ ယက္ခော အဂ္ဂဟေသိ၊ အထ သော တံ ဧတ္တကံ ကာလံ ကုဟိံဂတောသီတိ ပုစ္ဆိ။ ယက္ခော ဘော တဝတ္ထာယ ဧတ္ထ ဝသန္တဿ မေ သတ္တာဟံ အတိက္ကန္တန္တိ။ တတော သော ကော တေ မယာ အတ္ထော၊ ကိံ တေ ဒမ္မီတိ၊ အထ ယက္ခေန ဘော အဟံ ခုဒါယ ပီဠိတော ဘတ္တေန မေ အတ္ထောတိ ဝုတ္တော သော ဧဝံ သတိ ကသ္မာ မံ အန္တောဂေဟေ ဝသန္တံ န ဂဏှီတိ အာဟ။ ယက္ခေန ဘော တသ္မိံ ဃရေ ဗုဒ္ဓံ သရဏံ ဂတော ဧကော ဥပသကော အတ္ထိ၊ တဿ သီလတေဇေန ဂေဟံ ပဝိသိတုမသက္ကောန္တော အဋ္ဌာသိန္တိ ဝုတ္တော ဇာနပဒိကော သရဏံ နာမ ကိန္တိ အဇာနန္တော ကိန္တိ ဝတွာ သော သရဏံ အဂ္ဂဟေသီတိ ယက္ခံ ပုစ္ဆိ။ ယက္ခော ‘‘ဗုဒ္ဓံ သရဏံ ဂစ္ဆာမီ’’တိ ဝတွာ သရဏံ အဂ္ဂဟေသီတိ အာဟ။ တံ သုတွာ ဇာနပဒိကော ဣဒါနိ ဣမံ ဝဉ္စေဿာမီတိ စိန္တေတွာ တေနဟိ ယက္ခ အဟမ္ပိ ဗုဒ္ဓံ သရဏံ ဂစ္ဆာမီတိ အာဟ။ ဧဝံ ဝုတ္တမတ္တေယေဝ ယက္ခော မဟာသဒ္ဒံ ကရောန္တော ဘ ယေ န ဘမန္တော ¶ ပလာယိ၊ ဧဝံ သမ္မာသမ္ဗုဒ္ဓဿ သရဏံ ဣဓလောကေ ဘယော ပဒ္ဒဝ နိဝါရဏတ္ထံ ဟောတိ၊ ပရလောကေ သဂ္ဂမောက္ခာဝဟံ။ တထာဟိ။

ဗုဒ္ဓါတိ ဝစနံ ဧတံ၊ အမနုဿာနံ ဘယာဝဟံ၊

ဗုဒ္ဓဘတ္တိကဇန္တူနံ၊ သဗ္ဗဒါ မုဒမာဝဟံ။

သဗ္ဗောပဒ္ဒဝနာသာယ၊ ပစ္စက္ခဒိဗ္ဗမောသဓံ၊

ဒိဗ္ဗမန္တံ မဟာတေဇံ၊ မဟာယန္တံ မဟဗ္ဘုတံ။

ဘမန္တော ဓာဝိတံ ဒိသွာ၊ တိမိရောဝ သုရိယုဂ္ဂတေ၊

သိမ္ဗလိတူလဘဋ္ဌံဝ၊ စဏ္ဍဝါတေန ခဏ္ဍိတံ။

ယံ ဒုက္ခံ ရာဇစောရာရိ၊ ယက္ခပေတာ ဒိသမ္ဘဝံ၊

နိစ္ဆန္တေန မနုဿေန၊ ဂန္တဗ္ဗံ သရဏတ္တယံတိ။

တတော ဇာနပဒိကော သရဏာဂမနေ မဟာဂုဏံ မဟာနိသံသံ ဩလောကေတွာ ဗုဒ္ဓေ သဂါရဝေါ သပ္ပေမော ‘‘ဇီဝိတပရိယန္တံ ဗုဒ္ဓံ သရဏံ ဂစ္ဆာမီ’’တိ သရဏံ ဂန္တွာ တေနေဝ သရဏာဂမနာနုဘာဝေန ဇီဝိတပရိယောသာနေ သုတ္တပ္ပဗုဒ္ဓါဝိယ ဒေဝလောကေ နိဗ္ဗတ္တီတိ။

၂၂။ မိစ္ဆဒိဋ္ဌိကဿ ဝတ္ထုမှိ အယမာနုပုဗ္ဗီကထာ

ဘဂဝတိ ¶ ဓရမာနေ ရာဇဂဟနဂရေ ကိရ ဧကော ဗြဟ္မဘတ္တိကော မိစ္ဆာဒိဋ္ဌိကော ပဋိဝသတိ၊ တတ္ထေဝ သမ္မာဒိဋ္ဌိကောပိ။ တေသံ ဥဘိန္နမ္ပိ ဒွေ ပုတ္တာ အဟေသုံ။ တေ ဧကတော ကီဠန္တာ ဝဍ္ဎန္တိ။ အထာပရဘာဂေ ဂုဠကီဠံကီဠန္တာနံ သမ္မာဒိဋ္ဌိကဿ ပုတ္တော ‘‘နမော ဗုဒ္ဓယာ’’တိ ဝတွာ ဂုဠှံ ခိပန္တော ဒိဝသေ ဒိဝသေ ဇိနာတိ။ မိစ္ဆာဒိဋ္ဌိကဿ ပုတ္တော ‘‘နမော ဗြဟ္မုနော’’တိ ဝတွာ ခိပန္တော ပရာဇေတိ၊ တတော မိစ္ဆာဒိဋ္ဌိကဿ ပုတ္တော နိစ္စံ ဇိနန္တံ သမ္မာဒိဋ္ဌိကံ ကုမာရံ ဒိသွာ သမ္မ တွံ နိစ္စမေဝ ဇိနာသိ၊ ကိံ ဝတွာ ဂုဠံ ခိပသီတိ ပုစ္ဆိ။ သောဟံ သမ္မ ‘‘နမော ဗုဒ္ဓါယာ’’တိ ဝတွာ ခိပါမီတိ အာဟ။ သောပိ တတော ပဋ္ဌာယ ‘‘နမော ဗုဒ္ဓါယာ’’တိ ဝတွာ ခိပတိ၊ အထ တေ ယေဘုယျေန ဒူတေ သမသမာဝ ဟောန္တိ။ အပရဘာဂေ မိစ္ဆာဒိဋ္ဌိကဿ ပုတ္တော ပိတရာ သဒ္ဓိံ ဒါရူနမတ္ထာယ ဝနံ ဂန္တွာ သကဋေန ဒါရုံ ဂဟေတွာ အာဂစ္ဆန္တော နဂရဒွါရသမီပေ သကဋံ ဝိဿဇ္ဇေတွာ တိဏေ ခါဒနတ္ထာယ ဂေါဏေ ဝိဿဇ္ဇေသိ၊ ဂေါဏာ တိဏံ ခါဒန္တော အညေဟိ ဂေါရူပေဟိ သဒ္ဓိံ အန္တောနဂရံ ပဝိသိံသု။ အထဿ ပိတာ ဂေါဏေ ပရိယေသန္တော သကဋံ ဩလောကေဟီတိ ပုတ္တံ နိဝတ္တေတွာ နဂရံ ပဝိဋ္ဌော အဟောသိ၊ အထ သာယဏှေ ဇာတေ မနုဿာ နဂရဒွါရံ ပိဒဟိံသု၊ တတော ကုမာရော ဗဟိနဂရေ ဒါရုသကဋဿ ဟေဋ္ဌာ သယန္တော နိဒ္ဒူပဂတော အဟောသိ။ အထ တဿာ ရတ္တိယာ သမ္မာဒိဋ္ဌိကော စ မိစ္ဆာဒိဋ္ဌိကော စာတိ ဒွေ ယက္ခာ ဂေါစရံ ပရိယေသမာနာ သကဋဿ ဟေဋ္ဌာ နိပန္နံ ကုမာရံ အဒ္ဒသံသု၊ တေသု မိစ္ဆာဒိဋ္ဌိကော ဣမံ ခါဒါမီတိ အာဟ။ အထာပရော မာ ဧဝ မကာသိ၊ ‘‘နမော ဗုဒ္ဓါယာ’’တိ ဝါစကော ဧသောတိ၊ ခါဒါမေဝေတန္တိ ဝတွာ ဣတရေန ယာဝတတိယံ ဝါရိယမာနောပိ ဂန္တွာ တဿ ပါဒေ ဂဟေတွာ အာကဍ္ဎိ။ တသ္မိံ ခဏေ ဒါရကော ပုဗ္ဗပရိစယေန ‘‘နမော ဗုဒ္ဓါယာ’’တိ အာဟ တံ သုတွာ ယက္ခော ဘယပ္ပတ္တော လောမဟဋ္ဌော ¶ ဟတ္ထံ ဝိဿဇ္ဇေတွာ ပဋိက္ကမ္မ အဋ္ဌာသိ။ အဟော အစ္ဆရိယံ ဗုဒ္ဓါနုဘာဝံ အဗ္ဘုတံ၊ ဧဝံ အတ္တံ အနီယျာတေတွာ ပရိစယေန ‘‘နမော ဗုဒ္ဓါယာ’’တိ ဝုတ္တဿပိ ဘယံ ဆမ္ဘိတတ္တံ ဥပဒ္ဒဝံ ဝါ န ဟောတိ။ ပဂေဝ အတ္တံ နီယျာတေတွာ ယာဝဇီဝံ ဗုဒ္ဓံ သရဏံ ဂတဿာတိ။ ဝုတ္တဉှိ။

ယထာပိ သိခိနော နာဒံ၊ ဘုဇင်္ဂါနံ ဘယာဝဟံ၊

ဧဝံ ဗုဒ္ဓါတိ ဝစနံ၊ အမနုဿာနံ ဘယာဝဟံ။

ယထာ မန္တဿ ဇပ္ပေန၊ ဝိလယံ ယာတိ ကိဗ္ဗိသံ၊

ဧဝံ ဗုဒ္ဓါတိ ဝစနေန၊ အပယန္တိ [ပဟာယန္တိ ဣတိသဗ္ဗတ္ထ] ပိသာစကာ။

အဂ္ဂိံ ဒိသွာ ယထာ သိတ္ထံ၊ ဒူရတောဝ ဝိလီယတိ၊

ဒိသွာနေဝံ သရဏဂတံ၊ ပေတာ ပေန္တိဝ [ပေတာပေန္တာဝ ဣတိကတ္ထစိ] ဒူရတော။

ပဝရံ ဗုဒ္ဓဣစ္စေတ၊ မက္ခရဒွယမဗ္ဘုတံ၊

သဗ္ဗော ပဒ္ဒဝနာသာယ၊ ထိရပါကာရ မုဂ္ဂတံ။

သတ္တရတနပါသာဒံ၊ တမေဝ ဝဇိရံ ဂုဟံ၊

တမေဝ နာဝံ ဒီပံ တံ၊ တမေဝ ကဝစံ သုဘံ။

တမေဝ သိရသိ ဘာသန္တံ၊ ကိရီဋံ ရတနာမယံ၊

လလာဋေ တိလကံ ရမ္မံ၊ ကပ္ပူရံ နယနဒွယေ။

တာဍင်္ကံ ကဏ္ဏယုဂလေ၊ သောဏ္ဏမာလာ ဂလေ သုဘာ၊

ဧကာဝဠိ တာရဟာရ၊ ဘာရာ ဇတ္တုသု လင်္ကတာ။

အင်္ဂဒံ ဗာဟုမူလဿ၊ ကရဂ္ဂေ ဝလယံ တထာ၊

အင်္ဂုလိသွင်္ဂုလိယဉ္စ၊ ခဂ္ဂံ မင်္ဂလသမ္မတံ။

သောဏ္ဏာ တပတ္တ မုဏှီသံ၊ သဗာဏံဝ သရာသနံ၊

တမေဝ သဗ္ဗာလင်္ကာရံ၊ တမေဝ ဒုရိတာပဟံ။

နမောတိ ဝစနံ ပုဗ္ဗံ၊ ဗုဒ္ဓါယေတိ ဂိရံ တဒါ၊

သုပန္တေန ကုမာရေန၊ မိစ္ဆာဒိဋ္ဌိကသူနုနာ။

သုတွာ ဝုတ္တံ ပိသာ စာပိ၊ မနုဿကုဏပေ ရတာ၊

န ဟိံသန္တိ အဟော ဗုဒ္ဓ၊ ဂုဏသာရမဟန္တတာတိ။

အထ သမ္မာဒိဋ္ဌိကယက္ခော မိစ္ဆာဒိဋ္ဌိကဿ ယက္ခဿ ဧဝမာဟ၊ အယုတ္တံ ဘော တယာ ကတံ။ ဗုဒ္ဓဂုဏေ ပဟာရော ဒိန္နော၊ ဒဏ္ဍကမ္မံ တယာ ကာတဗ္ဗံတိ၊ တေန ကိံမယာ သမ္မ ကာတဗ္ဗန္တိ ဝုတ္တေ ဗုဘုက္ခိတဿ အာဟာရံ ဒေဟီတိ အာဟ။ တတော သော သာဓူတိ ဝတွာ ယာဝါဟံ အာဂစ္ဆာမိ၊ တွံ တာဝေတ္ထ ဝစ္ဆာဟီတိ ဝတွာ ဗိမ္ဗိသာရရညော ကဉ္စနတဋ္ဋကေ ဝဍ္ဎိတံ ရသဘောဇနံ အာဟရိတွာ ကုမာရဿ ပိတုဝဏ္ဏေန ဒါရကံ ဘောဇေတွာ ပုန ကုမာရေန ဝုတ္တဗုဒ္ဓဝစနဉ္စ အတ္တနာ ကတဝါယာမံ စာတိ သဗ္ဗံ တဋ္ဋကေ လိခိတွာ ဣဒံ ရညောယေဝ ပညာယတူတိ အဓိဋ္ဌာယ အဂမံသု၊ အထ ပဘာတာယ ရတ္တိယာ ရညော ဘောဇနကာလေ ရာဇပုရိသာ တတ္ထ တဋ္ဋကံ အဒိသွာ နဂရံ ဥပပရိက္ခန္တာ သကဋေ ဒါရကဉ္စ တဋ္ဋကဉ္စ ဒိသွာ တဋ္ဋကေန သဒ္ဓိံ တံ ဂဟေတွာ ရညော ဒဿေသုံ။ ရာဇာ တဋ္ဋကေ အက္ခရာဒီနိ ဒိသွာ ဝါစေတွာ တဿ ဂုဏေ ပသန္နော မဟန္တေန ယသေန သဒ္ဓိံ သေဋ္ဌိဋ္ဌာနမဒါသိ။

မိစ္ဆာဒိဋ္ဌိကဿ ဝတ္ထုံ ဒုတိယံ။

၂၃။ ပါဒပီဌိကာယ ဝတ္ထုမှိ အယမာနုပုဗ္ဗီကထာ

ဇမ္ဗုဒီပေ ¶ မဟာဗောဓိတော ကိရ ဒက္ခိဏပဿေ ဧတံ ပစ္စန္တနဂရံ အဟောသိ။ တတ္ထ သဒ္ဓါသမ္ပန္နော ရတနတ္တယမာမကော ဧကော ဥပါသကော ပဋိဝသတိ။ တဒါ ဧကော ခီဏာသဝေါ ဘဂဝတာ ပရိဘုတ္တံ ပါဒပီဌံ ထဝိကာယ ပက္ခိပိတွာ ဂတဂတဋ္ဌာနေ ပူဇေန္တော အနုက္ကမေန တံ နဂရံ သမ္ပာပုဏိတွာ သုနိဝတ္ထော သုပါရုတော ပတ္တံ ဂဟေတွာ အန္တရဝီထိံ ပဋိပဇ္ဇိ ယုဂမတ္တဒသော ပဗ္ဗဇ္ဇာလီလာယ ဇနံ ပရိတောသေန္တော။ အထ သော ဥပါသကော တထာ ဂစ္ဆန္တံ ထေရံ ဒိသွာ ပသန္နမာနသော ဥပဂန္တွာ ပဉ္စပတိဋ္ဌိတေန ဝန္ဒိတွာ ပတ္တံ ဂဟေတွာ ဘောဇေတွာ နိဗဒ္ဓံ မမ ဂေဟံ အာဂမနမိစ္ဆာမိ၊ မမာနုကမ္ပာယ ဧတ္ထေဝ ဝသထ သာမီတိ ယာစိတွာ နဂရာသန္နေ ရမဏီယေ ဝနသဏ္ဍေ နဒီကူလေ ပဏ္ဏသာလံ ကတွာ ထေရဿ တံ နီယျာတေတွာ စတုပစ္စယေဟိ ပဋိဇဂ္ဂန္တော မာနေန္တော ပူဇေန္တော ဝသတိ။ ထေရောပိ တတ္ထ ဖာသုကဋ္ဌာနေ ဘဂဝတာ ပရိဘုတ္တပါဒပီဌဓာတုံ နိဓာယ ဝါလုကာဟိ ထူပံ ကတွာ နိစ္စံ ဂန္ဓဓူပဒီပပုပ္ဖပူဇာဒီဟိ ပူဇယမာနော ဝါသံ ကပ္ပေတိ။ တသ္မိံ သမယေ တဿော ပါသကဿ အနန္တရဂေဟဝါသိကော ဧကော ဣဿရဘတ္တိကော အတ္တနော ဒေဝတံ နိဗဒ္ဓံ နမဿတိ။ တံ ဒိသွာဿ ဥပါသကော ဗုဒ္ဓဂုဏေ ဝတွာ အခေတ္တေ သမ္မ မာ ဝိရိယံ ကရောဟိ။ ပဇဟေတံ ဒိဋ္ဌိံတိ အာဟ။ တတော သော ကေရာဋိကော ဣဿရဘတ္တိကော ကော တေ သတ္ထု ဂုဏာနုဘာဝေါ၊ အမှာကံ ဣဿရဿ ဂုဏောဝ မဟန္တောတိ ဝတွာ တဿ အဂုဏံ ဂုဏန္တိ ကထေန္တော အာဟ။

တိပုရံ သော ဝိနာသေသိ၊ လလာဋနယနဂ္ဂိနာ၊

အသုရေစ ဝိနာသေသိ၊ တိသူလေန မဟိဿရော။

ဇဋာကလာပမာဝတ္တံ၊ နစ္စတီ ဒိနသန္ဓိယံ၊

ဝါဒေတိ ဘေရိဝီဏာဒိံ၊ ဂီတံစာပိ သ ဂါယတိ။

ဘရိယာယော ¶ တဿ တိဿော၊ ဇဋာယေကံ သမုဗ္ဗဟေ၊

ဧကမေကေန ပဿေန၊ ပဿမာနော စရေကကံ။

ဟတ္ထိစမ္မမ္ဗရဓရော၊ တေနေဝ ဝါရိတာ တပေါ၊

အသာဒိသေဟိ ပုတ္တေဟိ၊ ရူပေန စ သုပါကဋော။

ရတိယာ စ မဓုပါနေ စ၊ ဗျာဝဋော သဗ္ဗဒါ စ သော၊

မနုဿဋ္ဌိဓရော သီသ၊ ကပါလေနေသ ဘုဉ္ဇကိ။

န ဇာတော န ဘယံ တဿ၊ မရဏံ နတ္ထိ သဿတော၊

ဤဒိသော မေ မဟာဒေဝေါ၊ နတ္ထညဿီဒိသော ဂုဏောတိ။

တံ သုတွာ ဥပါသကော သမ္မ တုယှံ ဣဿရဿ ဧတေ ဂုဏာ နာမ တာဝ ဟောန္တု။ အဂုဏာ နာမ ကိတ္တကာ ဟောန္တီတိ ဝတွာ ဘဂဝတော သကလဂုဏေ သံဟရိတွာ ကထေန္တော အာဟ။

လောကေ သဗ္ဗသဝန္တီနံ၊ အာဓာရော သာဂရော ယထာ၊

သဗ္ဗေသံ ဂုဏရာသီနံ၊ အာဓာရောဝ တထာဂတော။

စရာစရာနံ သဗ္ဗေသံ၊ အာဓာရာဝ ဓရာ အယံ၊

တထာ ဂုဏာနံ သဗ္ဗေသံ၊ အာဓာရောဝ တထာဂတော။

ဧဝံ သန္တော ဝိယတ္တောစ [ဝိယန္တော ဣတိကတ္ထစိ]၊ ဧဝံ သော ကရုဏာပရော၊

ဧဝ မိဒ္ဓိဝိဓာ တဿ၊ ဧဝမေဝံ ဂုဏာ ဣတိ။

ဝတ္တုံ န ဟာနန္တဂုဏဿ ဝဏ္ဏန္တိ။

ဧဝံ ဝဒန္တာ ပန တေ ဥဘောပိ အမှာကံ ဒေဝေါ ဥတ္တမော အမှာကံ ဒေဝေါ ဥတ္တမောတိ ကလဟံ ဝဍ္ဎေတွာ ရညော သန္တိကမဂမံသု၊ ရာဇာ ¶ တေသံ ကထံ သုတွာ တေနဟိ တုမှာကံ ဒေဝတာနံ မဟန္တဘာဝံ ဣဒ္ဓိပါဋိဟာရိယေန ဇာနိဿာမ။ ဒဿေထ တေဟိ နော ဣဒ္ဓိံတိ နဂရေ ဘေရိံ စရာပေသိ။ ဣတော ကိရ သတ္တာဟစ္စယေန ဣမေသံ ဒွိန္နံ သတ္ထာရာနံ ပါဋိဟာရိယာနိ ဘဝိဿန္တိ။ သဗ္ဗေ သန္နိပတန္တူတိ တံ သုတွာ နာနာဒိသာသု ဗဟူ မနုဿာ သမာဂမိံသု၊ အထ မိစ္ဆာဒိဋ္ဌိကာ အဇ္ဇ အမှာကံ ဒေဝဿ အာနုဘာဝံ ပဿာမာတိ မဟန္တံ ပူဇံ ကရောန္တော တတ္ထ သာရံ နာဒ္ဒသံသု၊ သမ္မာဒိဋ္ဌိကာပိ အဇ္ဇ အမှာကံ ဘဂဝတော အာနုဘာဝံ ပဿိဿာမာတိ ဝါဠုကာထူပံ ဂန္တွာ ဂန္ဓမာလာဒီဟိ ပူဇေတွာ ပဒက္ခိဏံ ကတွာ အဉ္ဇလိမ္ပဂ္ဂယှ အဋ္ဌံသု။ အထ ရာဇာပိ ဗလဝါဟနပရိဝုတော ဧကမန္တေ အဋ္ဌာသိ။ နာနာသမယဝါဒိနောပိ အဇ္ဇ တေသံ ပါဋိဟာရိယံ ပဿိဿာမာတိ မဉ္စာတိမဉ္စံ ကတွာ အဋ္ဌံသု။ တေသံ သမာဂမေ သမ္မာဒိဋ္ဌိကာ ဝါဠုကာထူပ မဘိမုခံ ကတွာ အဉ္ဇလိမ္ပဂ္ဂယှ သာမိ အမှာကံ ဘဂဝါ သဗ္ဗဗုဒ္ဓကိစ္စာနိ နိဋ္ဌာပေတွာ အနုပါဒိသေသာယ နိဗ္ဗာဏဓာတုယာ ပရိနိဗ္ဗာယိ။ သာရိပုတ္တမဟာမောဂ္ဂလ္လာနာဒယော အသီတိမဟာသာဝကာပိ ပရိနိဗ္ဗာယိံသု၊ နတ္ထေတ္ထ အမှာကံ အညံ ပဋိသရဏန္တိ ဝတွာ သစ္စကိရိယံ ကရောန္တာ အာဟံသု။

အာပါဏကောဋိံ ဗုဒ္ဓဿ၊ သရဏံ နော ဂတာ ယဒိ၊

တေန သစ္စေန ယံ ဓာတု၊ ဒဿေတု ပါဋိဟာရိယံ။

အာပါဏကောဋိံ ဓမ္မဿ၊ သရဏံ နော ဂတာ ယဒိ၊

တေန သစ္စေန ယံ ဓာတု၊ ဒဿေတု ပါဋိဟာရိယံ။

အာပါဏကောဋိံ သင်္ဃဿ၊ သရဏံ နော ဂတာ ယဒိ၊

တေန သစ္စေန ယံ ဓာတု၊ ဒဿေတု ပါဋိဟာရိယံ။

ရာမကာလေ မုနိန္ဒဿ၊ ပါဒုကာ စာသိ အဗ္ဘုတာ၊

တေန သစ္စေန ယံ ဓာတု၊ ဒဿေတု ပါဋိဟာရိယံ။

ဆဒ္ဒန္တကာလေ ¶ မုနိနော၊ ဒါဌာ ဆရံသိရဉ္ဇိတာ၊

တေန သစ္စေနယံ ဓာတု၊ နိစ္ဆာရေတု ဆ ရံသိယော။

ဇာတမတ္တော တဒါ ဗုဒ္ဓါ၊ ဌိတော ပင်္ကဇမုဒ္ဓနိ၊

နိစ္ဆာရေသာသဘိံဝါစံ၊ အဂ္ဂေါ သေဋ္ဌောတိအာဒိနာ၊

တေန သစ္စေနယံ ဓာတု၊ ဒဿေတု ပါဋိဟာရိယံ။

နိမိတ္တေ စတုရော ဒိသွာ၊ နိက္ခန္တော အဘိနိက္ခမံ၊

တေန သစ္စေန ယံ ဓာတု၊ ဒဿေတု ပါဋိဟာရိယံ။

မာရသေနံ ပလာပေတွာ၊ နိသိန္နော ဗုဇ္ဈိ ဗောဓိယံ၊

တေန သစ္စေန ယံ ဓာတု ဒဿေတု ပါဋိဟာရိယံ။

ဓမ္မစက္ကံ ပဝတ္တေသိ၊ ဇိနော သိပတနေ တဒါ၊

တေန သစ္စေန ယံ ဓာတု၊ ဒဿေတု ပါဋိဟာရိယံ။

နန္ဒောပနန္ဒဘောဂိန္ဒံ၊ နာဂံ နာလာဂိရိဝှယံ၊

အာဠဝကာ ဒယော ယက္ခေ၊ ဗြဟ္မာနော စ ဗကာ ဒယော။

သစ္စကာဒိနိဂဏ္ဌေစ၊ ကူဋဒန္တာ ဒယော ဒွိဇေ၊

ဒမေသိ တေန သစ္စေန၊ ဒဿေတု ပါဋိဟာရိယံတိ။

ဧဝဉ္စ ပန ဝတွာ ဥပါသကာ အမှာကံ အနုကမ္မံ ပဋိစ္စ မဟာဇနဿ မိစ္ဆာဒိဋ္ဌိဘေဒနတ္တံ ပါဋိဟာရိယံ ဒဿေထ သာမီတိ အာရာဓေသုံ။ အထ ဗုဒ္ဓါနုဘာဝဉ္စ ထေရာနုဘာဝဉ္စ ဥပါသကာနံ သစ္စကိရိယာနုဘာဝဉ္စ ပဋိစ္စ ဝါဠုကာထူပံ ဒွိဓာ ဘိန္ဒိတွာ ပါဒပီဌဓာတု အာကာသ မဗ္ဘုဂ္ဂန္တွာ ဆဗ္ဗဏ္ဏရံသိယော ဝိဿဇ္ဇေန္တီ ဝိလာသမာနာ အဋ္ဌာသိ။ အထ မဟာဇနာ စေလုက္ခေပသဟဿာနိ ပဝတ္တေန္တာ သာဓုကီဠှံ ကီဠန္တာ မဟာနာဒံ ပဝတ္တေန္တာ မဟန္တံ ပူဇမကံသု။ မိစ္ဆာဒိဋ္ဌိကာပိ ဣမံ အစ္ဆရိယံ ဒိသွာ ဝိမှိတမာနသာ မိစ္ဆာဒိဋ္ဌိံ ဘိန္ဒိတွာ ရတနတ္တယပရာယဏာ သရဏ မဂမံသူတိ။

မဟာနုဘာဝေါ ဟိ အစိန္တနီယောတိ။

၂၄။ ဥတ္တရသာမဏေရဿ ဝတ္ထုမှိ အယမာနုပုဗ္ဗီကထာ

သော ကိရ ပုရိမဗုဒ္ဓေသု [ပုရိမဗုဒ္ဓေ ဣတိသဗ္ဗတ္ထ] ကတာဓိကာရော တတ္ထ တတ္ထ ဘဝေ ဝိဝဋ္ဋူပနိဿယံ ပုညံ ဥပစိနန္တော သုမေဓဿ ဘဂဝတော ကာလေ ဝိဇ္ဇာဓရော ဟုတွာ ဟိမဝတိ ပဋိဝသတိ။ တဒါ သုမေဓော နာမ သမ္မာသမ္ဗုဒ္ဓါ ဝိဝေက မနုဗြူဟန္တော ဟိမဝန္တံ ဂန္တွာ ရမဏီယေ ပဒေသေ ပလ္လင်္ကံ အာဘုဇိတွာ နိသီဒိ။ တဒါ ဝိဇ္ဇာဓရော အာကာသေန ဂစ္ဆန္တော ဆဗ္ဗဏ္ဏရံသီဟိ ဝိရာဇမာနံ ဘဂဝန္တံ ဒိသွာ တီဟိ ကဏိကာရပုပ္ဖေဟိ ပူဇေသိ၊ ပုပ္ဖာနိ ဗုဒ္ဓါနုဘာဝေန သတ္ထု ဥပရိ ဆတ္တာကာရေန အဋ္ဌံသု၊ သော တေန ဘီယျောသော မတ္တာယ ပသန္နစိတ္တော ဟုတွာ အပရဘာဂေ ကာလံကတွာ တာဝတိံသဘဝနေ နိဗ္ဗတ္တိတွာ ဥဠာရံ ဒိဗ္ဗသမ္ပတ္တိမနုဘဝန္တော ယာဝတာယုကံ တတ္ထ ဌတွာ တတော စုတော ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပာဒေ ရာဇဂဟနဂရေ ဗြာဟ္မဏမဟာသာလဿ ပုတ္တော ဟုတွာ နိဗ္ဗတ္တိ။ ဥတ္တရောတိဿ နာမံ အဟောသိ။ သော ဥတ္တမရူပဓရော ဝိညုတံ ပတ္တော ဗြာဟ္မဏဝိဇ္ဇာသု နိပ္ဖတ္တိံ ပတွာ ဇာတိယာ ရူပေန ဝိဇ္ဇာယ သီလာစာရေန စ လောကဿ မဟနီယော ဇာတော၊ တဿ တံ ပညာသမ္ပတ္တိံဒိသွာ ဝဿကာရော မဂဓမဟာမတ္တော အတ္တနော ဓီတရံ ဒါတုကာမော ဟုတွာ အတ္တနော အဓိပ္ပာယံ ပဝေဒေသိ။ သော နိဿရဏဇ္ဈာသယတာယ တံ ပဋိက္ခိပိတွာ ကာလေနကာလံ ဓမ္မသေနာပတိံ ပယိရုပါသန္တော တဿ ¶ သန္တိကေ ဓမ္မံ သုတွာ ပဋိလဒ္ဓသဒ္ဓါ ပဗ္ဗဇိတွာ ဝတ္တသမ္ပန္နော ဟုတွာ ထေရံ ဥပဋ္ဌဟတိ။ တေန စ သမယေန ထေရဿ အညတရော အာဗာဓော ဥပ္ပန္နော ဟောတိ၊ တဿ ဘေသဇ္ဇတ္ထာယ ဥတ္တရသာမဏေရော ပါတောဝ ပတ္တစီဝရ မာဒါယ ဝိဟာရတော နိက္ခမ္မ အန္တရာမဂ္ဂေ တဠာကဿ တီရေ ပတ္တံ ဌပေတွာ ဥဒကသမီပံ ဂန္တွာ မုခံ ဓောဝတိ၊ တဒါ အညတရော ဥမ္မဂ္ဂစောရော ကတကမ္မော အာရက္ခပုရိသေဟိ အနုဗဒ္ဓါ အဂ္ဂဒွါရေနေဝ နဂရတော နိက္ခမိတွာ ပလာယန္တော အတ္တနာ ဂဟိတံ ရတနဘဏ္ဍိကံ သာမဏေရဿ ပတ္တေ ပက္ခိပိတွာ ပလာယိ။ သော သာမဏေရောပိ ပတ္တသမီပံ [သတ္တုသမီပံ ဣတိပိ ကတ္ထစိ] ဥပဂတော ဟောတိ၊ စောရံ အနုဗန္ဓန္တာ ရာဇပုရိသာ သာမဏေရဿ ပတ္တေ ဘဏ္ဍိကံ ဒိသွာ အယံ စောရော၊ ဣမိနာ စောရိယံ ကတန္တိ သာမဏေရံ ပစ္ဆာဗာဟံ ဗန္ဓိတွာ ဝဿကာရဿ ဗြာဟ္မဏဿ ဒဿေသုံ။ ဝဿကာရော စ တဒါ ရညော ဝိနိစ္ဆယေ နိယုတ္တော ဟုတွာ ဆေဇ္ဇဘေဇ္ဇံ အနုသာသတိ။ သော ဧသော ပုဗ္ဗေ မမ ဝစနံ နာဒိယိ။ သုဒ္ဓပါသဏ္ဍိယေသု ပဗ္ဗဇီတိ စ ဗဒ္ဓါဃာတတ္တာ တံ ကမ္မံ အသောဓေတွာဝ ဇီဝန္တမေဝေတံ သူလေ ဥတ္တာသေထာတိ အာဏာ ပေသိ၊ ရာဇပုရိသာ တံ နိမ္ဗသူလေ ဥတ္တာသေသုံ။ သာမဏေရော သူလဂ္ဂေ နိသိန္နော ဥပဇ္ဈာယဿ မေ ကော ဘေသဇ္ဇံ အာဟရိဿတီတိ သာရိပုတ္တတ္ထေရံ သရိ။ တတော ထေရော တံ ပဝတ္တိံ ဉတွာ သမ္မာသမ္ဗုဒ္ဓဿ ကထေသိ၊ ဘဂဝါပိ မဟာသာဝကပရိဝုတော တဿ ဉာဏပရိပါကံ ဩလောကေတွာ တံ ဌာနမဂမာသိ။ တတော ဘဂဝတော နိက္ခန္တဘာဝါ သကလနဂရေ ကောလာဟလံ အဟောသိ၊ မဟာဇနကာယော သန္နိပတိ။ အထ ဘဂဝါ ဝိပ္ဖုရန္တဟတ္ထတလေ နခမဏိမယူခသမ္ဘိန္နပီတာဘာသတာယ ပဂ္ဃရန္တဇာတိဟိင်္ဂုလကသုဝဏ္ဏရသဓာရာဝိယ ဇာလာဝဂုဏ္ဌိတမုဒုတလုနင်္ဂုလံ ဟတ္ထံ ဥတ္တရဿ သီသေ ဌပေတွာ ဥတ္တရ ဣဒံ တေ ပုဗ္ဗေ ကတပါပကမ္မဿ ဖလံ ဥပ္ပန္နံ၊ တတ္ထ တယာ ပစ္စဝေက္ခဏဗလေန အဓိဝါသနာ ကာတဗ္ဗာတိ အာဟ။ တေနေဝ အာဟ။

အတီတေ ¶ ကိရ ဧကသ္မိံ၊ ဂါမေ တွ မသိ ဒါရကော၊

ဒါရေကေဟိ သမာဂမ္မ၊ ကီဠန္တော ကေဠိမဏ္ဍလေ။

ဂဟေတွာ သုခုမံ သူကံ၊ တဒါ တွံ နိမ္ဗဇလ္လိယာ၊

ဥတ္တာသေသိ တတ္ထ သူလေ၊ ဇီဝမာနကမက္ခိကံ။

အပရမ္ပိ တေ ပါပကမ္မံ၊ ပဝက္ခာမိ သုဏောဟိ မေ၊

ဩဝဒန္တိံ ဟိတေန တွံ၊ အတီတေ သကမာတရံ။

ဇီဝသူလေ နိသီဒါတိ၊ ကောပေနာဘိသပီ တုဝံ၊

ဣမေဟိ ဒွီဟိ ပါပေဟိ၊ သရံ သံသာရသာဂရေ။

ပဉ္စဇာတိသတေ အစ္ဆိ၊ ဇီဝသူလမှိ နိမ္ဗဇေ၊

အယံ တေ စရိမာ ဇာတိ၊ ဧတ္ထာပိစ ဝိပစ္စိ သောတိ။

ဧဝမာဒိနာ နယေန တဿ အဇ္ဈာသယာနုရူပေန ဓမ္မံ ဒေသေသိ၊ ဥတ္တရော အမတာဘိသေကသဒိသေန သတ္ထုနော ဟတ္ထသမ္ဖဿသဉ္ဇာတပသာဒသောမနဿတာယ ဥဠာရံ ပီတိပါမောဇ္ဇံ ပဋိလဘိတွာ ယထာပရိစိတံ ဝိပဿနာမဂ္ဂံ သမာရူဠှော ဉာဏဿ ပရိပါကံ ဂတတ္တာ သတ္ထု ဒေသနာဝိလာသေန မဂ္ဂပဋိပါဋိယာ သဗ္ဗကိလေသေ ခေပေတွာ ဆဠဘိညော အဟောသိ။ ဓမ္မံ သုတွာ တတ္ထ သမာဂတာနံ ဒေဝမနုဿာနံ စတုရာသီတိပါဏသဟဿာနံ ဓမ္မာဘိသမယော အဟောသီတိ ဝဒန္တိ။ ဥတ္တရော ပန ဆဠဘိညော ဟုတွာ သူလတော ဥဋ္ဌဟိတွာ အာကာသေ ဌတွာ ပါဋိဟာရိယံ ဒဿေသိ။ မဟာဇနာ အစ္ဆရိယဗ္ဘုတစိတ္တာ ဇာတာ အဟေသုံ။ တာဝဒေဝဿ ဝဏောရုန္ဓိ၊ သော ဘိက္ခူဟိ အာဝုသော တာဒိသံ ဒုက္ခံ အနုဘဝန္တော ကထံ တွံ ဝိပဿနံ အနုယုဉ္ဇိတုံ သက္ခီတိ ပုဋ္ဌော ပဂေဝ မေ အာဝုသော သံသာရေ အာဒီနဝေါ သင်္ခါရာနဉ္စ သဘာဝေါ သုဒိဋ္ဌော။ တသ္မာဟံ တာဒိသံ ဒုက္ခံ အနုဘဝန္တောပိ အသက္ခိံ ဝိပဿနံ ဝဍ္ဎေတွာ ဝိသေသံ အဓိဂန္တုံတိ အာဟ။ အထာပရဘာဂေ သော ဘိက္ခုသင်္ဃမဇ္ဈေ အတ္တနော ပုဗ္ဗစရိတာ ပဒါနံ ပကာသေန္တော ဣမာ ဂါထာ အဘာသိ။

သုမေဓော ¶ နာမ သမ္ဗုဒ္ဓါ၊ ဒွတ္တိံသဝရလက္ခဏော၊

ဝိဝေကကာမော သမ္ဗုဒ္ဓါ၊ ဟိမဝန္တ မုပါဂမိ။

အဇ္ဈောဂဟေတွာ ဟိမဝန္တံ၊ အဂ္ဂေါ ကာရုဏိကော မုနိ၊

ပလ္လင်္ကံ အာဘုဇိတွာန၊ နိသီဒိ ပုရိသုတ္တမော။

ဝိဇ္ဇာဓရော တဒါ အာသိံ၊ အန္တလိက္ခစရော အဟံ၊

တိသူလံ သုကတံ ဂယှ၊ ဂစ္ဆာမိ အမ္ဗရေ တဒါ။

ပဗ္ဗတဂ္ဂေ ယထာ အဂ္ဂိ၊ ပုဏ္ဏမာသေဝ စန္ဒိမာ၊

ဝနံ ဩဘာသတေ ဗုဒ္ဓါ၊ သာလရာဇာဝ ဖုလ္လိတော။

ဝနဂ္ဂါ နိက္ခမိတွာန၊ ဗုဒ္ဓရံသီ ဝိဓာဝရေ၊

နလဂ္ဂိဝဏ္ဏသင်္ကာသာ၊ ဒိသွာ စိတ္တံ ပသာဒယိံ။

ဝိစိနံ အဒ္ဒသံ ပုပ္ဖံ၊ ကဏိကာရံ ဒေဝဂန္ဓိကံ၊

တီဏိ ပုပ္ဖာနိ အာဒါယ၊ ဗုဒ္ဓသေဋ္ဌံ အပူဇယိံ။

ဗုဒ္ဓဿ အာနုဘာဝေန၊ တီဏိ ပုပ္ဖာနိ မေ တဒါ၊

ဥဒ္ဓဝဏ္ဋာ အဓောပတ္တာ၊ ဆာယံ ကုဗ္ဗန္တိ သတ္ထုနော။

တေန ကမ္မေန သုကတေန၊ စေတနာပဏိဓီဟိစ၊

ဇဟိတွာ မာနုသံ ဒေဟံ၊ တာဝတိံသမဂဉ္ဆဟံ။

တတ္ထ မေ သုကတံ ဗျမှံ၊ ကဏိကာရီတိ ဉာယတိ၊

သဋ္ဌိယောဇန မုဗ္ဗေဓံ၊ တိံသယောဇနဝိတ္ထတံ။

သဟဿခဏ္ဍံ သတဘေဏ္ဍု၊ ဓဇာလု ဟရိတာမယံ၊

သတသဟဿာနိ ဗျူဟာနိ၊ ဗျမှေ ပါတုရဟံသု မေ။

သောဏ္ဏမယာ မဏိမယာ၊ လောဟိတင်္ကမယာ ပိစ၊

ဖလိကာ ပိစ ပလ္လင်္ကာ၊ ယဒိစ္ဆက ယဒိစ္ဆကာ။

မဟာရဟဉ္စ သယနံ၊ တူလိကံ ဝိကတီယကံ၊

ဥဒ္ဒလောမိကဧကန္တံ၊ ဗိမ္ဗောဟနသမာယုတံ။

ဘဝနာ ¶ နိက္ခမိတွာန၊ စရန္တော ဒေဝစာရိကံ၊

ယဒါ ဣစ္ဆာမိ ဂမနံ၊ ဒေဝသံဃပုရက္ခတော။

ပုပ္ဖဿ ဟေဋ္ဌာ တိဋ္ဌာမိ၊ ဥပရိစ္ဆဒနံ မမ၊

သမန္တာ ယောဇနသတံ၊ ကဏိကာရေဟိ ဆာဒိတံ။

သဋ္ဌိတုရိယသဟဿာနိ၊ သာယံ ပါတံ ဥပဋ္ဌဟုံ၊

ပရိဝါရေန္တိ မံ နိစ္စံ၊ ရတ္တိန္ဒိဝမတန္ဒိတာ။

တတ္ထ နစ္စေဟိ ဂီတေဟိ၊ တာလေဟိ ဝါဒိတေဟိ စ၊

ရမာမိ ခိဍ္ဍာရတိယာ၊ မောဒါမိ ကာမကာမဟံ။

တတ္ထ ဘုတွာ စ ပိတွာ စ၊ မောဒါမိ တိဒသေ တဒါ၊

နာရီဂဏေဟိ သဟိတော၊ မောဒါမိ ဗျမှမုတ္တမေ။

သတာနံ ပဉ္စက္ခတ္တုဉ္စ၊ ဒေဝရဇ္ဇ မကာရယိံ၊

သတာနံ တီဏိက္ခတ္တုံစ၊ စက္ကဝတ္တီ အဟောသဟံ၊

ပဒေသရဇ္ဇံ ဝိပုလံ၊ ဂဏနာတော အသံခိယံ။

ဘဝါဘဝေ သံသရန္တော၊ မဟာဘောဂံ လဘာမဟံ၊

ဘောဂေ မေ ဦနတာ နတ္ထိ၊ ဗုဒ္ဓပူဇာယိ ဒံ ဖလံ။

ဒွေ မေ ဘဝေ သံသရာမိ၊ ဒေဝတ္တေ အထ မာနုသေ၊

အညံ ဂတိံ န ဇာနာမိ၊ ဗုဒ္ဓပူဇာယိဒံ ဖလံ။

ဒွေ မေ ကုလေ ပဇာနာမိ၊ ခတ္တိယေ စာပိ ဗြာဟ္မဏေ၊

နီစေ ကုလေ န ဇာနာမိ၊ ဗုဒ္ဓပူဇာယိဒံ ဖလံ။

ဟတ္ထိယာနံ အဿယာနံ၊ သိဝိကံ သန္ဒမာနိကံ၊

လဘာမိ သဗ္ဗမေဝေ တံ၊ ဗုဒ္ဓပူဇာယိဒံ ဖလံ။

ဒါသီဂဏံ ဒါသဂဏံ၊ နာရိယော စ အလင်္ကတာ၊

လဘာမိ သဗ္ဗ မေဝေ တံ၊ ဗုဒ္ဓပူဇာယိဒံ ဖလံ။

ကောသေယျကမ္ဗလိယာနိ၊ ခေါမကပ္ပာသိကာနိစ၊

လဘာမိ သဗ္ဗမေဝေတံ၊ ဗုဒ္ဓပူဇာယိဒံ ဖလံ။

နဝဝတ္ထံ ¶ နဝဖလံ၊ နဝဂ္ဂရသဘောဇနံ၊

လဘာမိ သဗ္ဗမေဝေတံ၊ ဗုဒ္ဓပူဇာယိဒံ ဖလံ။

ဣမံ ခါဒ ဣမံ ဘုဉ္ဇ၊ ဣမမှိ သယနေ သယ၊

လဘာမိ သဗ္ဗမေဝေတံ၊ ဗုဒ္ဓပူဇာယိဒံ ဖလံ။

သဗ္ဗတ္ထ ပူဇိတော ဟောမိ၊ ယသော အစ္စုဂ္ဂတော မမ၊

မဟေသက္ခော ဃဒါ ဟောမိ၊ အဘေဇ္ဇပရိသော သဒါ၊

ဉာတီနံ ဥတ္တမော ဟောမိ၊ ဗုဒ္ဓပူဇာယိဒံ ဖလံ။

သီတံ ဥဏှံ န ဇာနာမိ၊ ပရိဠာဟော န ဝိဇ္ဇတိ၊

အထော စေတသိကံ ဒုက္ခံ၊ ဟဒယေ မေ န ဝိဇ္ဇတိ။

သုဝဏ္ဏဝဏ္ဏော ဟုတွာန၊ သံသရာမိ ဘဝါဘဝေ၊

ဝေဝဏ္ဏိယံ န ဇာနာမိ၊ ဗုဒ္ဓပူဇာယိဒံ ဖလံ။

ဒေဝလောကာ စဝိတွာန၊ သုက္ကမူလေန စောဒိတော၊

သာဝတ္ထိယံ ပုရေ ဇာတော၊ မဟာသာလေ သုအဍ္ဎကေ။

ပဉ္စကာမဂုဏေ ဟိတွာ၊ ပဗ္ဗဇိံအနဂါရိယံ၊

ဇာတိယာ သတ္တဝဿောဟံ၊ အရဟတ္တမပါပုဏိံ။

ဥပသမ္ပာဒယီ ဗုဒ္ဓါ၊ ဂုဏမညာယ စက္ခုမာ၊

တရုဏောဝ ပူဇနီယော ဟံ၊ ဗုဒ္ဓပူဇာယိဒံ ဖလံ။

ဒိဗ္ဗစက္ခုံ ဝိသုဒ္ဓံ မေ၊ သမာဓိကုသလော အဟံ၊

အဘိညာပါရမိပ္ပတ္တော၊ ဗုဒ္ဓပူဇာယိဒံ ဖလံ။

ပဋိသမ္ဘိဒါ အနုပ္ပတ္တော၊ ဣဒ္ဓိပါဒေသု ကောဝိဒေါ၊

သဒ္ဓမ္မေ ပါရမိပ္ပတ္တော၊ ဗုဒ္ဓပူဇာယိဒံ ဖလံ။

တိံသကပ္ပသဟဿမှိ၊ ယံ ဗုဒ္ဓမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။

သွာဂတံ ¶ ဝတ မေ အာသိ၊ ဗုဒ္ဓသေဋ္ဌဿ သန္တိကံ၊

တိဿော ဝိဇ္ဇာ အနုပ္ပတ္တော၊ ကတံ ဗုဒ္ဓဿ သာသနံ။

ပဋိသမ္ဘိဒါ စတဿော စ၊ ဝိမေက္ခာ ပိစ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံတိ၊

တံ သုတွာ ဗဟူ ကုသလကမ္မပရာယဏာ အဟေသုံ။

ဥတ္တရသာမဏေရဿ ဝတ္ထုံ စတုတ္ထံ။

၂၅။ ကဝီရပဋ္ဋန ဝတ္ထုမှိ အယမာနုပုဗ္ဗီကထာ

ဇမ္ဗုဒီပေ ကိရ စောဠရဋ္ဌေ ကာဝီရပဋ္ဋနံ နာမ အဟောသိ။ တတ္ထ မာဟိဿရိကာ ဗဟူ မိစ္ဆာဒိဋ္ဌိကာ ဝသန္တိ။ တတ္ထေကသ္မိံ ဒေဝါလယေ စိတ္တကမ္မံ ကရောန္တာ ဧကသ္မိံ ဖလကေ ဣဿရဿ ဩနမိတွာ ဝန္ဒနာကာရံ ဘဂဝတော ရူပံ အကံသု။ တသ္မိံ သမယေ တတ္ထ ဗဟူ ဥပါသကာ တံ ဒေဝကုလံ ဂန္တွာ တတ္ထ တတ္ထ စိတ္တကမ္မာနိ ဩလောကေန္တာ တသ္မိံ ဖလကေ တံ စိတ္တကမ္မံ အဒ္ဒသံသု။ ဒိသွာန တေ အဟော အမှေဟိ အပဿိတဗ္ဗံ ပဿိတံ။ သဒေဝကေ လောကေ သမာရကေ သဗြဟ္မကေ သဿမဏဗြာဟ္မဏိယာသဒေဝမနုဿာယ ပဇာယ စ အပရိမာဏေသု စက္ကဝါဠေသု ဘဂဝတော ဥတ္တရိတရံ ဌပေတွာ သမသမောပိ နတ္ထိ။ သကလေဟိ သတ္တနိကာယေဟိ ဝန္ဒနီယော ပူဇနီယော ဘဂဝါ။ အနနုရူပံ တဿ ဧတေဟိ ကတံတိ ရောဒန္တာ ပရိဒေဝန္တာ ရာဇဒွါရံ ဂန္တွာ ဥဂ္ဃောသေသုံ၊ တံ သုတွာ ရာဇာ တေ ပက္ကောသာပေတွာ ကသ္မာ တုမှေ ¶ ဥဂ္ဃောသေထာတိ ပုစ္ဆိ၊ တေ ဧဝ မာဟံသု။ ဒေဝ အမှာကံ ဘဂဝါ ဒေဝါတိဒေဝေါ သက္ကာတိသက္ကော ဗြဟ္မာတိဗြဟ္မာ မေရုဝ အစလော သာဂရော ဂမ္ဘီရော အာကာသောဝ အနန္တော ပထဝီဝ ပတ္ထဋောတိအာဒီဟိ ဘဂဝတော ဂုဏံ ဝဏ္ဏေသုံ။ တေန ဝုတ္တံ အပဒါနေ။

ဗတ္တိံသလက္ခဏဓရော၊ သုနက္ခတ္တောဝ စန္ဒိမာ၊

အနုဗျဉ္ဇနသမ္ပန္နော၊ သာလရာဇာဝ ဖုလ္လိတော။

ရံသိဇာလပရိက္ခိတ္တော၊ ဒိတ္တောဝ ကနကာစလော၊

ဗျာမပ္ပဘာပရိဝုတော၊ သတရံသိ ဒိဝါကရော။

သောဏ္ဏာ နနော ဇိနဝရော၊ သမဏီဝ သိလုစ္စယော၊

ကရုဏာပုဏ္ဏဟဒယော၊ ဝိဝဋ္ဋော ဝိယ သာဂရော။

လောကဝိဿုတကိတ္တီဝ၊ သိနေရုဝ နဂုတ္တမော၊

ယသသာ ဝိတတော ဓီရော၊ အာကာသသဒိသော မုနိ။

အသင်္ဂစိတ္တော သဗ္ဗတ္ထ၊ အနိလော ဝိယ နာယကော၊

ပတိဋ္ဌာ သဗ္ဗဘူတာနံ၊ မဟီဝ မုနိသုတ္တမော။

အနူပလိတ္တော လောကေန၊ တောယေန ပဒုမံ ယထာ၊

ကုဝါဒဂစ္ဆဒဟနော၊ အဂ္ဂိက္ခန္ဓောဝ သောဘတိ။

အဂဒေါ ဝိယ သဗ္ဗတ္ထ၊ ကိလေသဝိသနာသကော၊

ဂန္ဓမာဒနသေလောဝ၊ ဂုဏဂန္ဓဝိဘူသိတော။

ဂုဏာနံ အာကရော ဓီရော၊ ရတနာနံဝ သာဂရော၊

သိန္ဓူဝ ဝနရာဇီနံ၊ ကိလေသမလဟာရကော။

ဝိဇယီဝ မဟာယောဓော၊ မာရသေနပ္ပမဒ္ဒနော၊

စက္ကဝတ္တီဝ သော ရာဇာ၊ ဗောဇ္ဈင်္ဂရတနိဿရော။

မဟာဘိသက္ကသင်္ကာသော၊ ဒေါသဗျာဓိတိကိစ္ဆကော၊

သလ္လကတ္တော ယထာ ဝေဇ္ဇာ၊ ဒိဋ္ဌိဂဏ္ဍဝိဖာလကော။

သတ္ထာ ¶ နော ဘဂဝါ ဒေဝ၊ မဟာဗြဟ္မေဟိ ဝန္ဒိတော၊

ဒေဝိန္ဒသုရသိဒ္ဓေဟိ၊ ဝန္ဒနီယော သဒါ ဒရာ။

သဗ္ဗေသု စက္ကဝါဠေသု၊ ယေ အဂ္ဂါ ယေ စ ပူဇိတာ၊

တေသမဂ္ဂေါ မဟာရာဇ၊ ဘဂဝါ နော ပတာပဝါတိ။

အယုတ္တံ ဒေဝ ဒေဝကုလေဟိ ကတံတိ အာဟံသု။ တံ သုတွာ ရာဇာ ဘော သဗ္ဗေပိ မနုဿာ အတ္တနော အတ္တနော ဒေဝတာနံ မဟန္တဘာဝံ ကထေန္တိ။ တုမှာကံ ပန သတ္ထုနော မဟန္တဘာဝံ ကထံ အမှာကံ ဇာနာပေထာတိ၊ ဥပါသကာ န ဂရု တွံ မဟာရာဇ ဖလကံ အာဟရာပေတွာ သုဒ္ဓဝတ္ထေန ဝေဌေတွာ တံ အတ္တနော မုဒ္ဒိကာယ လဉ္ဆိတွာ သုရက္ခိတသုဂေါပိတေ ဧကသ္မိံ ဒေဝကုလေ ဌပေတွာ သတ္တာဟစ္စယေန အာဟရာပေတွာ တံ ဩလောကေထ၊ တဒါ နော သတ္ထုနော မဟန္တာနုဘာဝံ ဇာနာထာတိ အာဟံသု၊ အထ ရာဇာ တေသံ ဝုတ္တနိယာမေနေဝ ကာရာပေတွာ အန္တောဒေဝကုလေ ဌပေတွာ သဗ္ဗဒွါရာနိ ပိဒဟိတွာ လဉ္ဆေတွာ ရက္ခေယျာထာတိ နိယောဇေသိ။ တတော တေ ဥပါသကာ သဗ္ဗေ သန္နိပတိတွာ သတ္တာဟံ ဒါနံ ဒေန္တာ သီလံ ရက္ခန္တာ ဥပေါသထကမ္မံ ကရောန္တာ သဗ္ဗသတ္တေသု မေတ္တိံ ဘာဝေန္တာ သဗ္ဗသတ္တာနံ အတ္တနာ ကတပုညေသု ပတ္တိံ ဒေန္တာ တိဏ္ဏံ ရတနာနံ ပူဇံ ကရောန္တာ ဧဝံ ဥဂ္ဃောသေသုံ။ အမှာကံ ကတကုသလနိဿန္ဒေန လောကေ မဟိဒ္ဓိကာ မဟာနုဘာဝါ သဗ္ဗေ ဒေဝါ စ လောကံ ပါလေန္တာ စတ္တာရော မဟာရာဇာနော စ အမှာကံ သတ္ထုနော ဥပဋ္ဌာနာယ [ဥပဋ္ဌာယ ဣတိသဗ္ဗတ္ထ] ဌိတဘာဝံ ဒဿေန္တူတိ သစ္စကိရိယံ အကံသု။ အထ တေသံ ပုညာနုဘာဝေန တသ္မိံ ခဏေ သက္ကဿ ဒေဝရညော ပဏ္ဍုကမ္ဗလသိလာသနံ ဥဏှာကာရံ ဒဿေသိ။ တတော သော မနုဿလောကံ ဩလောကေန္တော မိစ္ဆာဒိဋ္ဌီဟိ ကတံ တံ ဝိပ္ပကာရံ ဒိသွာ သံဝိဂ္ဂေါ အာဂန္တွာ ဣဿရံ ဘဂဝတော ပါဒေ ဝန္ဒိတွာ သယိတာကာရံ ¶ ကတွာ တံ ပဝတ္တိံ ဥပါသကာနံ ကထေတွာ သကဋ္ဌာနမေဝ အဂမာသိ။ တတော သတ္တမေ ဒိဝသေပါတောဝ တေ သဗ္ဗေပိ ရညော သန္တိကံ ဂန္တွာ ဝန္ဒိတွာ ဧဝမာဟံသု။ ဒေဝ ဣဿရော အမှာကံ ဘဂဝတော ပါဒေ သိရသာ ဝန္ဒိတွာ နိပန္နောတိ။ အထ ရာဇာ တေသံ ကထံ သုတွာ နဂရေ ဘေရိံ စရာပေတွာ မဟာဇနေ သန္နိပါတေတွာ တေဟိ ပရိဝုတော ဒေဝကုလံ ဂန္တွာ လဉ္ဆံ ဘိန္ဒာပေတွာ ဒွါရံ ဝိဝရိတွာ ဖလကံ အာဟရာပေတွာ ဝေဌိတသာဋကေ မောစာပေသိ။ အထ ရာဇာ စ မဟာဇနော စ တံ မဟန္တံ ပါဋိဟာရိယံ ဒိသွာ မိစ္ဆာဒိဋ္ဌိံ ပဟာယ သဗ္ဗေ သတ္ထုနော သရဏ မဂမံသု။ အထ ရာဇာ တံ ဒေဝကုလံ ဘိန္ဒာပေတွာ မဟန္တံ ရမဏီယံ ဝိဟာရံ ကာရာပေတွာ ယာဝဇီဝံ ပုညကမ္မံ ကတွာ ဒေဝလောကေ နိဗ္ဗတ္တိ။

ကရောန္တိ ဒိသွာ ကုသလာနိ ဣဒ္ဓိံ၊

ယေ တံ မုနိန္ဒေ ပရိနိဗ္ဗုတမှိ၊

ကရောန္တိ ပုညာနိ မဟဗ္ဘူတံ ယေတိ။

၂၆။ စောရဃာတကဝတ္ထုမှိ အယမာနုပုဗ္ဗီကထာ

ဧကသ္မိံ ကိရ သမယေ အမှာကံ ဘဂဝါ သာဝတ္ထိယံ ဥပနိဿာယ ဇေတဝနေ ဝိဟရတိ ဓမ္မဒေသနာယ မဟာဇနဿ သဂ္ဂမောက္ခသမ္ပဒံ ဒဒမာနော။ တသ္မိံသမယေ ပဉ္စသတာ စောရာ အဋဝိတော နဂရံ အာဂန္တွာ ရတ္တိဘာဂေ စောရကမ္မံ ကတွာ တေန ပုတ္တဒါရေ ပေါသေန္တိ။ အထေကဒိဝသံ စောရာ စောရကမ္မတ္ထာယ နဂရံ ပဝိသန္တာ နဂရဒွါရေ ဧကံ ဒုက္ခိတံ ဇနပဒမနုဿံ ပဿိတွာ ဟမ္ဘော ¶ ကတ္ထ ဝသတီတိ ပုစ္ဆိံသု၊ သော အတ္တဇနာ ဇနပဒဝါသိဘာဝံ ပကာသေသိ။ အထဿ တေ ကသ္မာ ဘော ဣမိနာ ဒုက္ခဝါသေန ဝသိဿသိ၊ ဧဟိ အမှေဟိ သဒ္ဓိံ စောရကမ္မံ ကရောန္တော ဝတ္ထာလင်္ကာရသမ္ပန္နော ပုတ္တဒါရံ ပေါသေဟိ။ ဣမိနာ ကပဏဝါသေန န ဝသာတိ အာဟံသု။ သော ပနိမေ ယုတ္တံ ကထေန္တီတိ တေသံ ဝစနံ သမ္ပဋိစ္ဆိ။ အထ တေ ဧဝံ သတိ အမှေဟိ သဒ္ဓိံ အာဂစ္ဆာဟီတိ ဝတွာ နံ ဂဟေတွာ အန္တောနဂရံ ပဝိဋ္ဌာ တတ္ထ တတ္ထ ဝိလုမ္ပန္တာ စောရကမ္မံ အကံသု။ တဒါ ဇာနပဒိကော လဒ္ဓဝိဘဝေါ ဣမမေဝ ဝရတရန္တိ တေဟိ သဒ္ဓိံ စောရကမ္မံ ကရောန္တော ဇီဝိကံ ကပ္ပေသိ၊ အထေကဒိဝသံ ရာဇပုရိသာ ကတကမ္မေ တေ သဗ္ဗေဝ ဂဟေတွာ ပစ္ဆာဗာဟံ ဂါဠှံ ဗန္ဓိတွာ ကောသလရညော ဒဿေသုံ၊ ရာဇာ တေ ဒိသွာ ဧဝမာဟ၊ ဘဏေ တုမှာကံ အန္တရေ ယော ဧတေသံ မာရေတွာ ဇီဝိတက္ခယံ ပါပေဿတိ၊ တဿ ဇီဝိတဒါနံ ဒမ္မီတိ၊ တံ သုတွာ တေ စောရာ သဗ္ဗေ အညမညဉာတိသုဟဒသမ္ဗန္ဓဘာဝေန တံ န ဣစ္ဆိံသု။ သော ပန ဇနပဒဝါသီ မနုဿော အဟမေတေ သဗ္ဗေ မာရေဿာမီတိ ရညော ဝတွာ တေနာနုညာတော တေ သဗ္ဗေ မာရေသိ။ တံ ဒိသွာ တုဋ္ဌော ရာဇာ တဿ စောရဃာတကမ္မံ အဒါသိ။ သော စောရေ စ ဝဇ္ဈပ္ပတ္တေ စ မာရေန္တော ပဉ္စဝီသတိဝဿာနိ ဝသန္တော အပရဘာဂေ မဟလ္လကော အဟောသိ။ အထ သော မန္ဒဗလတ္တာ ကတိပယပဟာရေနာပိ စောရံ မာရေတုံ န သက္ကောတိ၊ ရာဇာ တံ ဉတွာ အညဿ စောရဃာတကမ္မံ အဒါသိ။ အထ သော စောရဃာတကမ္မာ [စောရဃာတကမ္မ ဣတိပိကတ္ထစိ] ပရိဟီနော အတ္တနော ဂေဟေ ဝသတိ။ တဒါ အညတရော မနုဿော မန္တံ ပရိဝတ္တေတွာ နာသာဝါတေန မနုဿမာရဏကမန္တံ ဇာနာတိ။ တထာဟိ ဟတ္ထပါဒကဏ္ဏနာသသီသာဒီသု ယံကိဉ္စိ ဆေဇ္ဇဘေဇ္ဇံ ကတ္တုကာမော မန္တံ ပရိဝတ္တေတွာ နာသာဝါတံ ဝိဿဇ္ဇေတိ။ တံ တံ ဌာနံ ဆိဇ္ဇတိ ဘိဇ္ဇတိ၊ ဧဝံ မဟာနုဘာဝေါ သော မန္တော၊ အထ သော တံ ပုရိသံ ဥပဋ္ဌဟိတွာ မန္တံ လဘိတွာ ရညော သာသနံ ပေသေသိ ¶ ။ အဟံ ဣတော ပုဗ္ဗေ မဟလ္လကတ္တာ စောရာနံ ဟတ္ထပါဒါဒယော ဒုက္ခေန ဆေဇ္ဇ ဘေဇ္ဇံ ကရောမိ၊ မာရေတဗ္ဗေပိ ဒုက္ခေန မာရေမိ။ ဣဒါနိ ပနာဟံ တထာ န ကရောမိ၊ မမ မန္တာနုဘာဝေန ဆေဇ္ဇဘေဇ္ဇကမ္မံ ကရိဿာမီတိ။ ရာဇာ တံ သာသနံ သုတွာ သာဓူတိ တံ ပက္ကောသာပေတွာ ဌာနန္တရံ တဿေဝ ပါကတိက မကာသိ။ သော တတော ပဋ္ဌာယ တံ ကမ္မံ ကရောန္တော ပုန ပဉ္စဝဿာနိ အတိက္ကာမေသိ။ သော မဟလ္လကော ခီဏာယုကော ဒုဗ္ဗလော မရဏမဉ္စပရာယဏော ဟုတွာ မရဏဝေဒနာဒုက္ခေန မဟန္တေန ဘယာနကေန သဒ္ဒေန ဝိဿရံ ဝိရဝန္တော နိမီလိတေန စက္ခုနာ ဘယာနကံ နရကဂ္ဂိဇာလာပဇ္ဇလန္တအယကူဋမုဂ္ဂရဓရေ နိရယပါလေ စ ပဿန္တော နိပန္နော ဟောတိ၊ တတော တဿ ပဋိဝိဿကဂေဟေ မနုဿာ တဿ ဘယာနကသဒ္ဒသဝဏေန ဂေဟံ ဆဋ္ဋေတွာ ပလာယိံသု။ တသ္မိံ ကိရ ဒိဝသေ မဟာသာရိပုတ္တတ္ထေရော ဒိဗ္ဗစက္ခုနာ လောကံ ဩလောကေန္တာ တံ စောရဃာတကံ တဒဟေဝ ကာလံကတွာ နိရယေ နိဗ္ဗတ္တမာနံ ဒိသွာ မယိ တတ္ထ ဂတေ ပနေသ မယိ ပသာဒေန သဂ္ဂေ နိဗ္ဗတ္တတီတိ ဉတွာ အဇ္ဇ မယာ တဿာနုဂ္ဂဟံ ကာတုံ ဝဋ္ဋတီတိ ပုဗ္ဗဏှသမယံ နိဝါသေတွာ တဿ ဃရဒွါရ မဂမာသိ။ အထ သော ထေရံ ဒိသွာ ကုဒ္ဓါ ကောပေန တဋတဋာယမာနဒေဟော အဇ္ဇ တံ ဝိဇ္ဈိတွာ ဖာလေတွာ မာရေဿာမီတိ နိပန္နောဝ မန္တံ ပရိဝတ္တေတွာ နာသာဝါတံ ဝိဿဇ္ဇေသိ၊ ထေရော တသ္မိံ ခဏေ နိရောဓသမာပန္နော နိရောဓာ ဝုဋ္ဌာယ သုရိယော ဝိယ ဝိရောစမာနော အဋ္ဌာသိ၊ အထ သော ထေရဿ တယော ဝါရေ တထေဝ ကတွာ ကိဉ္စိ ကာတုံ အသက္ကောန္တော အတိဝိယ ဝိမှိတစိတ္တော ထေရေ စိတ္တံ ပသာဒေတွာ အတ္တနော ပဋိယတ္တံ ပါယသံ ထေရဿ ဒါပေသိ၊ ထေရော မင်္ဂလံ ဝဍ္ဎေတွာ ဝိဟာရမေဝ အဂမာသိ၊ စောရဃာတကော ထေရဿ ဒိန္နဒါနံ အနုဿရန္တော တသ္မိံ ခဏေ ကာလံ ကတွာ သဂ္ဂေ နိဗ္ဗတ္တိ။ အဟော ဝီတရာဂါနံ ဗုဒ္ဓပုတ္တာနံ အာနုဘာဝေါ။ ဧဝံ နရကေ နိဗ္ဗတ္တမာနောပိဿ ဗလေန သဂ္ဂေ နိဗ္ဗတ္တောတိ။ တထာဟိ။

ဒါနံ ¶ တာဏံ မနုဿာနံ၊ ဒါနံ ဒုဂ္ဂတိဝါရဏံ၊

ဒါနံ သဂ္ဂဿ သောပါနံ၊ ဒါနံ သန္တိကရံ ပရံ။

ဣစ္ဆိတိစ္ဆိတဒါနေန၊ ဒါနံ စိန္တာမဏီ ဝိယ၊

ကပ္ပရုက္ခောဝ သတ္တာနံ၊ ဒါနံ ဘဒ္ဒဃဋောဝိယ။

သီလဝန္တဿ ဒါနေန၊ စက္ကဝတ္တိသိရိမ္ပိ စ၊

လဘန္တိ သက္ကသမ္ပတ္တိံ၊ တထာ လောကုတ္တရံ သုခံ။

ပါပကမ္မေသု နိရတော၊ ဌိတောယံ နရကာယနေ [နရကာဝနေ ဣတိပိကတ္ထစိ]၊

သာရိပုတ္တဿ ထေရဿ၊ ပိဏ္ဍပါတဿ ဝါဟသာ။

အပါယံ ပရိဝဇ္ဇေတွာ၊ နေကဒုက္ခသမာကုလံ၊

ဒေဝသင်္ဃပရိဗ္ဗူဠှော၊ ဂတော ဒေဝပုရံ ဝရံ။

တသ္မာ သုခေတ္တေ သဒ္ဓါယ၊ ဒေထ ဒါနာနိ ကာမဒံ၊

ဒါနံ ဒေန္တေဟိ သီလမ္ပိ၊ ပါလနီယံတိသုန္ဒရန္တိ [ပါလနံစာတိသုန္ဒရံ ဣတိပိကတ္ထစိ]။

အထ ဘိက္ခူ ဓမ္မသဘာယံ သန္နိပတိတွာ နိသိန္နာ ဘဂဝန္တံ ပုစ္ဆိံသု၊ ကိံဘန္တေ သော ပါပေါ စတူသု အပါယေသု ကတရသ္မိံ နိဗ္ဗတ္တောတိ။ အထ သတ္ထာ အဇ္ဇေသ ဘိက္ခဝေ သာရိပုတ္တဿ ဒိန္နဒါနာနုဘာဝေန ဒေဝလောကေ နိဗ္ဗတ္တော၊ တဿေဝ နိဿန္ဒေန အနာဂတေ ပစ္စေကဗုဒ္ဓါ ဘဝိဿတီတိ ဗျာကာသီတိ။

ဘော သာရိပုတ္တေ နိဟိတပ္ပဒါနံ၊

၂၇။ သဒ္ဓါပါသကဿ ဝတ္ထုမှိ အယမာနုပုဗ္ဗီကထာ

အတီတေ ¶ ကိရ ကဿပဒသဗလဿ ကာလေ ဧကော ပုရိသော သဒ္ဓါ ရတနတ္တယေသု ပသန္နော ဥစ္ဆုယန္တကမ္မေန ဇီဝိကံ ကပ္ပေန္တော ပဋိဝသတိ။ အထ သော ဧကံ ဂိလာနဘိက္ခုံ ဒိသွာ တဿ ဥဠုင်္ကမတ္တံ သပ္ပိံ အဒါသိ၊ တထေဝေကဿ ဘိက္ခုဿ ဧကံ ဂုဠပိဏ္ဍံ အဒါသိ၊ အထာပရသ္မိံဒိဝသေ ဧကံ ဆာတဇ္ဈတ္တံ သုနခံ ဒိသွာ တဿ ဘတ္တပိဏ္ဍေန သင်္ဂဟ မကာသိ၊ အထေကဿ ဣဏဋ္ဌကဿ ဧကံ ကဟာပဏံ အဒါသိ၊ အထေကဒိဝသံ ဓမ္မံ သုဏမာနော ဓမ္မဒေသကဿ ဘိက္ခုဿ သာဋကံ ပူဇေသိ၊ သော ဧတ္တကံ ပုညကမ္မံ ကတွာ ဘဝေသု စရမာနောဟံ သမုဒ္ဒပဗ္ဗတာဒီသုပိ ယံ ယံ ဣစ္ဆာမိ။ တံ တံ သမိဇ္ဈတူတိ ပတ္ထနံ အကာသိ၊ သော အပရဘာဂေ ကာလံ ကတွာ တေဟေဝ ကုသလမူလေဟိ သုတ္တပ္ပဗုဒ္ဓါ ဝိယ ဒေဝလောကေ နိဗ္ဗတ္တိတွာ တတ္ထ မဟန္တံ ဒိဗ္ဗသမ္ပတ္တိံ အနုဘဝိတွာ တတော စုတော အမှာကံ ဘဂဝတော ကာလေ သာဝတ္ထိယံ မဟဒ္ဓနေ မဟာသာလကုလေ နိဗ္ဗတ္တိတွာ တတော သော ဝိညုတံ ပတ္တော ကာလေန ကာလံ ဓမ္မံ သုဏန္တော ဃရာဝါသေ အာဒီနဝံ ပဗ္ဗဇ္ဇာယ စ အာနိသံသံ သုတွာ ပဗ္ဗဇိတော န စိရေနေဝ အရဟတ္တံ ပါပုဏိ။ သော အပရဘာဂေ သတ္ထာရံ ဝန္ဒိတွာ ပဉ္စသတဘိက္ခုပရိဝါရော ဥဂ္ဂနဂရံ အဂမာသိ၊ တတ္ထ သေဋ္ဌိနော ဘရိယာ သဒ္ဓါ အဟောသိ ပသန္နာ။ သာ ထေရံ ပဉ္စဟိ ဘိက္ခုသတေဟိ သဒ္ဓိံ ဘိက္ခာယ စရန္တံ ဒိသွာ တုရိတတုရိတာ ဂန္တွာ ထေရဿ ပတ္တံ ဂဟေတွာ သဒ္ဓိံ ပဉ္စသတေဟိ ဘိက္ခူဟိ ဘောဇေတွာ ထေရံ တတ္ထ နိဗဒ္ဓဝါသတ္ထံ ယာစိတွာ ပဉ္စသတကူဋာဂါရာနိ ကာရာပေတွာ အလင်္ကရိတွာ ပဉ္စသတဘိက္ခူ တတ္ထ ဝါသေန္တီ နိဗဒ္ဓံ စတုပစ္စယေဟိ ဥပဋ္ဌာနမကာသိ။ တတော ထေရော တံ ပဉ္စသု သီလေသု ပတိဋ္ဌာပေတွာ တတ္ထ ယထာဘိရန္တံ ဝိဟရိတွာ အညတ္တ ဂန္တုကာမော အနုပုဗ္ဗေန ပဋ္ဋနဂါမံ အဂမာသိ၊ တတ္ထ ဝသိတွာ တတော နာဝံ အဘိရုယှ ပဉ္စသတဘိက္ခူဟိ ပရိဝုတော သမုဒ္ဒပိဋ္ဌေန ဂစ္ဆတိ၊ သမုဒ္ဒံ တရန္တဿ ¶ တဿ သာဂရမဇ္ဈေ ဥဒရဝါတော သမုဋ္ဌဟိတွာ ပီဠေတိ၊ တံ ဒိသွာ ဘိက္ခူ ဘန္တေ ဣဒံ ပုဗ္ဗေ ကေန ဝူပသမေဿတီတိ ပုစ္ဆိံသု၊ ထေရော ပုဗ္ဗေ မေ အာဝုသော ဥလုင်္ကမတ္တေ သပ္ပိပီတေ ရောဂေါ ဝူပသမ္မတီတိ အာဟ၊ ဘိက္ခူ ဘန္တေ သမုဒ္ဒပိဋ္ဌေ ကထံ သပ္ပိံ လဘိဿာမ၊ အဓိဝါသေထာတိ အာဟံသု၊ တံ သုတွာ ထေရေန [ထေရောနနောအာယသ္မန္တာ ဣတိသဗ္ဗတ္ထ] န နော အာယသ္မန္တာ သပ္ပိ ဒုလ္လဘာ၊ မမ ပတ္တံ ဂဟေတွာ သမုဒ္ဒေါဒကံ ဥဒ္ဓရိတွာ အာနေထာတိ ဝုတ္တေ ဘိက္ခူ တထာ အကံသု။ ဥဒ္ဓဋမတ္တမေဝ တံဥဒကံ ပရိဝတ္တေတွာ သပ္ပိ အဟောသိ၊ အထ ဘိက္ခူ တံ ဒိသွာ အစ္ဆရိယဗ္ဘုတစိတ္တာ ဇာတာ ထေရဿ သပ္ပိံ ဥပနာမေသုံ၊ ထေရေန သပ္ပိနော [သပ္ပိနာ ဣတိသဗ္ဗတ္ထ] ပီတမတ္တေ သော အာဗာဓော ဝူပသမိ၊ အထဿ ဘိက္ခူဟိ ကိ မေတံ ဘန္တေ အစ္ဆရိယံ၊ န နော ဣတော ပုဗ္ဗေ ဧဝရူပံ ဒိဋ္ဌပုဗ္ဗံတိ ဝုတ္တေ ထေရော တေနဟိ ကတပုညာနံ ပုညဝိပါကံ ပဿိဿထာတိ ဝတွာ သမုဒ္ဒံ ဩလောကေသိ ဣဒံ သပ္ပိ ဟောတူတိ။ အထဿ စက္ခုပထေ သမုဒ္ဒေ သဗ္ဗောဒကံ ပရိဝတ္တေတွာ သပ္ပိ အဟောသိ။ အထဿ ဘိက္ခူ အဗ္ဘုတစိတ္တာ အညမ္ပိ ဤဒိသံ ပုညံ အတ္ထိ ဘန္တေတိ ပုစ္ဆိံသု၊ တတော ထေရော တေနဟိ ပဿထာယသ္မန္တာ မမ ပုညန္တိ ဝတွာ သမန္တာ တတ္ထ တတ္ထ ဃနသေလပဗ္ဗတေ ဩလောကေသိ၊ သဗ္ဗာနိ တာနိ ဂုဠပိဏ္ဍာနိ အဟေသုံ၊ တတော စက္ခုပထေ သမန္တာ ဘတ္တဘာဇနာနိ ဒဿေသိ သဗျဉ္ဇနံ သောပကရဏံ။ တတော ဟိမဝန္တံ ဩလောကေသိ၊ သဗ္ဗံ တံ သုဝဏ္ဏမယံ အဟောသိ။ အထာဘိမုခဋ္ဌာနေ မဟန္တံ ဝနသဏ္ဍံ ဩလောကေသိ၊ သကလဝနသဏ္ဍံနာနာဝိရာဂဝတ္ထေဟိ သဉ္ဆန္နံ အဟောသိ၊ ဘိက္ခူ တံ တံ ပါဋိဟာရိယံ ဒိသွာ အတီဝ ဝိမှိတာ ဘန္တေ ကေန တေ ပုညကမ္မေန ဧတာဒိသာနိ ပါဋိဟာရိယာနိ ဘဝိဿန္တီတိ ပုစ္ဆိံသု၊ ထေရော ကဿပဒသဗလဿ ကာလေ အတ္တနာ ကတံ သဗ္ဗံ တံ ကုသလံ ပကာသေသိ။ တေနေတ္ထ။

ဣမသ္မိံ ¶ ဘဒ္ဒကေ ကပ္ပေ၊ ကဿပေါ နာမ နာယကော၊

သဗ္ဗလောကဟိတတ္ထာယ၊ လောကေ ဥပ္ပဇ္ဇိ စက္ခုမာ။

တဒါဟံ ဥစ္ဆုယန္တမှိ၊ နိယုတ္တော ဂုဠကာရကော၊

တေန ကမ္မေန ဇီဝါမိ၊ ပေါသေန္တော ပုတ္တဒါရကေ။

ကိလန္တိန္ဒြိယမဒ္ဒက္ခိံ၊ ဘိက္ခုံ ရောဂါတုရံ တဒါ၊

ဘိက္ခာစာရကဝတ္တေန၊ ဃတတ္ထံ [ဃတမတ္တမုပါဂတံ ဣတိသဗ္ဗတ္ထ] သမုပါဂတံ။

ဥလုင်္ကမတ္တံ သပ္ပိဿ၊ အဒဒံ တဿ ဘိက္ခုနော၊

သဒ္ဒဟန္တော ဒါနဖလံ၊ ဒယာယု ဒဂ္ဂမာနသော။

တေန ကမ္မေန သံသာရေ၊ သံသရန္တော ဘဝါဘဝေ၊

ယတ္ထိစ္ဆာမိ ဃတံ တတ္ထ၊ ဥပ္ပဇ္ဇတိ အနပ္ပကံ။

ဣစ္ဆာမဟံ သမုဒ္ဒသ္မိံ၊ ဖလမ္ပိ ဃတမတ္တနော၊

တံ တံ သဗ္ဗံ ဃတံ ဟောတိ၊ ဃတဒါနဿိဒံ ဖလံ။

သုဏာထ မယှံ အညမ္ပိ၊ ပုညကမ္မံ မနောရမံ၊

တဒါ ဒိသွာနဟံ ဘိက္ခုံ၊ ရောဂေန ပရိပီဠိတံ။

ဂုဠပိဏ္ဍံ ဂဟေတွာန၊ ပတ္တေ တဿ သမာကိရိံ၊

တေန သော သုခိတော အာသိ၊ ရောဂံ ဗျပဂတံ တဒါ။

တေန မေ ဂုဠဒါနေန၊ သံသရံ ဒေဝမာနုသေ၊

ယတ္ထတ္ထောသ္မိ ဂုဠေနာဟံ၊ တတ္ထ တံ သုလဘံ မမ။

သေလာစ ဝိပုလာ မယှံ၊ ဟောန္တိ စိတ္တာနုဝတ္တကာ၊

မဟန္တဂုဠပိဏ္ဍာဝ၊ ဂုဠဒါနေ ဣဒံ ဖလံ။

အထာပိ မေ ကတံ ပုညံ၊ သုဏာထ သာဓု ဘိက္ခဝေါ၊

ဆာတဇ္ဈတ္တံ ဖန္ဒမာနံ၊ ဒိသွာန သုနခံ တဒါ။

ဘတ္တပီဏ္ဍေန ¶ သင်္ဂဏှိံ၊ တမ္ပိ ဒါနံ ဖလာဝဟံ၊

တတော ပဋ္ဌာယ နာဟောသိ၊ အန္နပါနေန ဦနတာ။

သုလဘန္နပါနော သုခိတော၊ အဟောသိံဇာတိဇာတိယံ၊

အဇ္ဇာပိ ယဒိ ဣစ္ဆာမိ၊ ဘောဇနေန ပယောဇနံ။

စက္ခုပထေ သမန္တာ မေ၊ ဇာယန္တုက္ခလိယော ဗဟူ၊

အထာပရမ္ပိ ကုသလံ၊ အကာသိံတံ သဏာထ မေ။

ဣဏဋ္ဌကဿ ပေါသဿ၊ အဒါသေကံ ကဟာပဏံ၊

တေန မေ ပုညကမ္မေန၊ အနောမဘဝသမ္ပဒံ။

ပစုရံ ဇာတရူပဉ္စ၊ လဘာမိ ဇာတိဇာတိယံ၊

သစဇ္ဇ ဓနကာမောဟံ၊ ဃနသေလောပိ ပဗ္ဗတော၊

ဟောတိ ဟေမမယံ သဗ္ဗံ၊ ဣဏတော မောစနေ ဖလံ။

အညမ္ပိ မမ ပုညံ ဘော၊ သုဏာထ သုတိသောဘနံ၊

ကဿပဿ ဘဂဝတော၊ သာသနေကံ ဗဟုဿုတံ။

ဒေသေန္တံ မုနိနော ဓမ္မံ၊ သုတွာ ပီဏိတမာနသော၊

ပူဇေသိံသာဋကံ မယှံ၊ ဓမ္မဿ ဓမ္မသာမိနော။

တေနာဟံ ပုညကမ္မေန၊ သံသရံ ဒေဝမာနုသေ၊

လဘာမိ ပစုရံ ဝတ္ထံ၊ ယံ လောကသ္မိံ ဝရံ ပရံ။

ဣစ္ဆမာနော သစေ အဇ္ဇ [ဇာနမာနောပဟံအဇ္ဇ၊ ဇာနဓာနောစဟံအဇ္ဇ ဣတိကတ္ထစိ]၊ ဟိမဝန္တမ္ပိ ပဗ္ဗတံ၊

နာနာဝိရာဂဝတ္ထေဟိ၊ ဆာဒယိဿံ သမန္တတော။

သစေ ဣစ္ဆာမိ အဇ္ဇေဝ၊ ဝတ္ထေနစ္ဆာဒယာ မိတေ၊

ဇန္တဝေါ စတုဒီပသ္မိံ၊ ဝတ္ထဒါနဿိဒံ ဖလံ။

ဧတေသံ ပုညကမ္မာနံ၊ ဝါဟသာ ကာမဘူမိယံ၊

သမ္ပတ္တိ မနုဘုတွာန၊ သာဝတ္ထိပုရ မုတ္တမေ။

လောကုတ္တရံ အဂ္ဂရသံ၊ ဘုဉ္စန္တော မုနိဝါဟသာ၊

ကိလေသေ ပဇဟိတွာန၊ အရဟတ္တမပါပုဏိံ။

ကုသလံ နာ ဝမန္တဗ္ဗံ၊ ခုဒ္ဒကန္တိ ကဒါစိပိ၊

အနန္တဖလဒံ ဟောတိ၊ နိဗ္ဗာဏမ္ပိ ဒဒါတိ တံ။

အထဿ ဓမ္မဒေသနံ သုတွာ ဘိက္ခူ စ မဟာဇနော စ ဒါနာဒိကုသလကမ္မံ ကတွာ ယေဘုယျေန သဂ္ဂပရာယဏာ အဟေသုံတိ။

၂၈။ ကပဏဿ ဝတ္ထုမှိ အယမာနုပုဗ္ဗီကထာ

အမှာကံ ဘဂဝတိ ပရိနိဗ္ဗုတေ ဗာရာဏသီနဂရဝါသီ ဧကော ဒုဂ္ဂတပုရိသော ပရဂေဟေ ဘတိံကတွာ ဇီဝိကံ ကပ္ပေတိ၊ တသ္မိံ သမယေ နဂရဝါသိနော ယေဘုယျေန တသ္မိံ တသ္မိံ ဌာနေ မဏ္ဍပါဒယော ကာရာပေတွာ မဟာဒါနံ ဒေန္တိ၊ တံ ဒိသွာ ဒုဂ္ဂတော ဧဝံ စိန္တေသိ၊ အဟံ ပုဗ္ဗေ အကတပုညတ္တာ ပရဂေဟေ ဘတိံ ကတွာ ကိစ္ဆေန ကသိရေန ဇီဝါမိ။ နိဝါသနပါရုပနမ္ပိ ဝါသဋ္ဌာနမတ္တမ္မိ ဒုက္ခတော လဘာမိ။ ဣဒါနိ ဗုဒ္ဓုပ္ပာဒေါ ဝတ္တတိ ဘိက္ခုသင်္ဃောပိ။

သဗ္ဗေ ¶ ဣမေ ဒါနံ ဒတွာ သဂ္ဂမဂ္ဂံ သောဓေန္တိ။ မယာပိ ဒါနံ ဒါတုံ ဝဋ္ဋတိ။ တမ္မေ ဒီဃရတ္တံ ဟိတာယ သုခါယ ဘဝိဿတိ။ အပိ စ မယှံ တဏ္ဍုလနာလိမတ္တမ္ပိ နတ္ထိ၊ အကတဝီရိယေန တံ မတ္ထကံ ပါပေတုံ န သက္ကာ၊ ဧတဒတ္ထာယာဟံ ဥယျောဂံ ကတွာ ဒါနံ ဒဿာမီတိ စိန္တေတွာ တတော ပဋ္ဌာယ ဘတိံ ပရိယေသမာနော ဂန္တွာ တတ္ထ တတ္ထ ဘတိံ ကတွာ လဒ္ဓနိဝါပေ စ ဘိက္ခာစရိယာယ လဒ္ဓတိလတဏ္ဍုလာဒယော စ ဧကတ္ထ သံဟရိတွာ မနုဿေ သမာဒါပေတွာ တသ္မိံ မဏ္ဍပံ ကာရာပေတွာ ဝနကုသမာဒီဟိ တံ အလင်္ကရိတွာ ဘိက္ခူ နိမန္တေတွာ မဏ္ဍပေ နိသီဒါပေတွာ သဗ္ဗေသံ ပါယသံ [ပါယာသံ ဣတိသဗ္ဗတ္ထ] ပဋိယာဒေတွာ ဘောဇေသိ။ အထ သော မရဏကာလေ အတ္တနာ ကတံ တံ ဒါနဝရံ အနုဿရိ။ သော တေန ကုသလကမ္မေန သုတ္တပ္ပဗုဒ္ဓါ ဝိယ ဒေဝလောကေ နိဗ္ဗတ္တိ။ တသ္မိံ တေန ကတပုညာနုရူပံ မဟန္တံ ကနကဝိမာနံ နိဗ္ဗတ္တိ။ သမန္တာ တိဂါဝုတဋ္ဌာနေ ဒေဝတာ နာနာ ဝိဓာနိ တုရိယာနိ ဂဟေတွာ ဥပဟာရံ ကရောန္တိ။ နိစ္စံ ဒေဝစ္ဆရာသဟဿာနိ [ဒေဝစ္ဆရာသဟဿံ ဣတိသဗ္ဗတ္ထ] တံ ပရိဝါရေတွာ တိဋ္ဌန္တိ။ ဧဝံ သော မဟန္တံ သမ္ပတ္တိံ အနုဘဝတိ။ အထေကဒိဝသံ သုဝဏ္ဏသေလဝိဟာရဝါသီ မဟာသင်္ဃရက္ခိတတ္ထေရော ပတ္တပဋိသမ္ဘိဒေါ ဒေဝစာရိကံ စရမာနော တံ ဒေဝပုတ္တံ အနုပမာယ ဒေဝသမ္ပတ္တိယာ ဝိရောစမာနံ ဒိသွာ ဥပသင်္ကမ္မ ဌိတော တေန ကတကမ္မံ ပုစ္ဆိ။ သောပိဿ ယထာဘူတံ ဗျာကာသိ၊ တေနတ္ထ။

သဗ္ဗသောဝဏ္ဏယော အာသိ၊ ပါသာဒေါ ရတနာမယော၊

သောဏ္ဏသိင်္ဂသတာကိဏ္ဏော၊ ဒုဒ္ဒိက္ခော စ ပဘဿရော။

ကူဋာဂါရ သတာကိဏ္ဏော၊ သောဏ္ဏမာလာသမာကုလော၊

မုတ္တာကလာပါလမ္ဗန္တိ၊ တတ္ထ တတ္ထ မနောရမာ။

နေကဂဗ္ဘသတာကိဏ္ဏော၊ သယနာသနမဏ္ဍိတော၊

ဝိဘတ္တော ဘဗ္ဗဘာဂေဟိ၊ ပုညဝဍ္ဎကိနာ ကတော။

နစ္စန္တိ ¶ ပမဒါ တတ္ထ၊ ဘေရိမဏ္ဍလမဇ္ဈဂါ၊

ဂါယန္တိ ကာစိ ကီဠန္တိ၊ ဝါဒေန္တိ ကာစိ တန္တိယော။

တတော တိဂါဝုတေ ဌာနေ၊ ပါသာဒဿ သမန္တတော၊

သဟစ္ဆရာ ဒေဝပုတ္တာ၊ ဂဟေတွာ အာတတာဒယော။

မောဒန္တိ ပရိဝါရေတွာ၊ နစ္စဂီတာဒိနာ သဒါ၊

ဥလ္လင်္ဃန္တိစ သေလေန္တိ၊ သိလာဃန္တိ သမန္တတော။

ဧဝံ မဟိဒ္ဓိကော ဒါနိ၊ တုဝံ ဝန္ဒောဝ ဘာသတိ၊

ပုစ္ဆာမိ တံ ဒေဝပုတ္တ၊ ကိံ ကမ္မမကရီ ပုရာ။

အဟောသိံ ဒုဂ္ဂတော ပုဗ္ဗေ၊ ဗာရာဏသီပုရုတ္တမေ၊

ဒါနံ ဒေန္တိ နရာ တတ္ထ၊ နိမန္တေတွာန ဘိက္ခဝေါ။

ဇီဝန္တော ဘတိယာ သောဟံ၊ ဒါနံ ဒေန္တေ မဟာဇနေ၊

တုဋ္ဌဟဋ္ဌေ ပမုဒိတေ၊ ဧဝံ စိန္တေသဟံ တဒါ။

သမ္ပန္နဝတ္ထာလင်္ကာရာ၊ ဒါနံ ဒေန္တိ ဣမေ ဇနာ၊

ပရတ္ထပိ ပဟဋ္ဌာဝ၊ သမ္ပတ္တိမနုဘောန္တိ တေ။

ဗုဒ္ဓုပ္ပာဒေါ အယံ ဒါနိ၊ ဓမ္မော လောကေ ပဝတ္တတိ၊

သုသီလာ ဒါနိ ဝတ္တန္တိ၊ ဒက္ခိဏေယျာ ဇိနောရသာ။

အနာဝဋ္ဌိတော [အဝဋ္ဌိတောစ၊ အန္ဓဋ္ဌိတောစ ဣတိပိကတ္တစိ] သံသာရော၊ အပါယာ ခလု ပူရိတာ၊

ကလျာဏဝိမုခါ သတ္တာ၊ ကာမံ ဂစ္ဆန္တိ ဒုဂ္ဂတိံ။

ဣဒါနိ ဒုက္ခိတော ဟုတွာ၊ ဇီဝါမိ ကသိရေနဟံ၊

ဒလိဒ္ဒေါ ကပဏော ဒီနော၊ အပ္ပဘောဂေါ အနာလယော။

ဣဒါနိ ဗီဇံ ရောပေမိ၊ သုခေတ္တေ သာဓုသမ္မတေ၊

အပ္ပေဝနာမ တေနာဟံ၊ ပရတ္ထ သုခိတော သိယာ။

ဣတိ စိန္တိယ ဘိက္ခိတွာ၊ ဘတိံ ကတွာန နေကဓာ၊

မဏ္ဍပံ တတ္ထ ကာရေတွာ၊ နိမန္တေတွာန ဘိက္ခဝေါ။

အာယာသေန ¶ အဒါသာဟံ၊ ပါယသံ အမတာယ သော၊

တေန ကမ္မဝိပါကေန၊ ဒေဝလောကေ မနောရမေ။

ဇာတောမှိ ဒိဗ္ဗကာမေဟိ၊ မောဒမာနော အနေကဓာ၊

ဒီဃာယုကော ဝဏ္ဏဝန္တော၊ တေဇဿီစ အဟောသဟန္တိ။

ဧဝံ ဒေဝပုတ္တော အတ္တနာ ကတပုညကမ္မံ ဝိတ္တာရေန ကထေသိ၊ ထေရောပိ မနုဿလောကံ အာဂန္တွာ မနုဿာနံ အတ္တနာ ပစ္စက္ခတော ဒိဋ္ဌဒိဗ္ဗသမ္ပတ္တိံ ပကာသေသိ။ တံ သုတွာ မဟာဇနော ကုသလကမ္မံ ကတွာ ယေဘုယျေန သဂ္ဂေ နိဗ္ဗတ္တောတိ။

၂၉။ ဒေဝပုတ္တဿ ဝတ္ထုမှိ အယမာနုပုဗ္ဗီကထာ

ဣတော ပုဗ္ဗေ နာရဒဿ ကိရ သမ္မာသမ္ဗုဒ္ဓဿ ကာလေ အယံ ဒီပေါ အညတရေန နာမေန ပါကဋော အဟောသိ၊ သော ပနေကသ္မိံ ကာလေ ဒုဗ္ဘိက္ခော အဟောသိ ဒုဿဿော၊ မဟာဆာတကဘယံ သတ္တေ ပီဠေတိ။ တသ္မိံ သမယေ နာရဒဿ ဘဂဝတော ဧကော သာသနိကော သာဝကော အညတရသ္မိံ ဂါမေ ပိဏ္ဍာယ စရိတွာ ယထာ ဓောတပတ္တောဝ နိက္ခမိ။ အထညတရသ္မိံ ဂေဟေ မနုဿာ ဧကံ တဏ္ဍုလနာဠိံပေါဋလိကာယ ဗန္ဓိတွာ ဥဒကေ ပက္ခိပိတွာ ပစိတွာ ဥဒကံ ဂဟေတွာ ပိဝန္တော ဇီဝန္တိ၊ တဒါ ထေရံ ဒိသွာ ဝန္ဒိတွာ ပတ္တံ ဂဟေတွာ တေန တဏ္ဍုလေန ဘတ္တံ ပစိတွာ ပတ္တေ ပက္ခိပိတွာ ထေရဿ အဒံသု။ အထ ¶ တေသံ သဒ္ဓါဗလေန သာ ဥက္ခလိ ဘတ္တေန ပရိပုဏ္ဏာ အဟောသိ၊ တေ တံ အဗ္ဘုတံ ဒိသွာ အယျဿ ဒိန္နဒါနေ ဝိပါကော အဇ္ဇေဝ နော ဒိဋ္ဌောတိ သောမနဿဇာတာ မဟာဇနံ သန္နိပါတေတွာ တေ ဘတ္တံ ဘောဇေတွာ ပစ္ဆာ သယံ ဘုဉ္ဇိံသု။ ဘတ္တဿ ဂဟိတဂဟိတဋ္ဌာနံ ပူရတေဝ။ တတော ပဋ္ဌာယ တေ သမ္ပတ္တမဟာဇနဿ ဒါနံ ဒဒန္တာ အာယုပရိယောသာနေ ဒေဝလောကေ နိဗ္ဗတ္တိံသု၊ အထ သော ထေရော ဘတ္တံ အာဒါယ ဂန္တွာ အညတရသ္မိံ ရုက္ခမူလေ နိသီဒိတွာ ဘုဉ္ဇိတုမာရတိ။ တသ္မိံ ကိရ ရုက္ခေ နိဗ္ဗတ္တော ဧကော ဒေဝပုတ္တော အာဟာရေန ကိလန္တော ဘုဉ္ဇမာနံ ထေရံ ဒိသွာ အတ္တဘာဝံ ဝိဇဟိတွာ မဟလ္လကဝေသေန တဿ သမီပေ အဋ္ဌာသိ။ ထေရော အနာဝဇ္ဇိတွာဝ ဘုဉ္ဇတိ။ ဒေဝပုတ္တော စရိမာလောပံ ဌပေတွာ ဘုတ္တကာလေ ဥက္ကာသိတွာ အတ္တာနံ ဌိတဘာဝံ ဇာနာပေသိ။ ထေရော တံ ဒိသွာ ဝိပ္ပဋိသာရိ ဟုတွာ စရိမံ ဘတ္ထပိဏ္ဍံ တဿ ဟတ္ထေ ဌပေသိ၊ တတော သော ဘတ္တပိဏ္ဍံ ဂဟေတွာ ဌိတော စိန္တေသိ။ ဣတော ကိရ မယာ ပုဗ္ဗေ သမဏဗြာဟ္မဏာနံ ဝါ ကပဏဒ္ဓိကာနံ ဝါ အန္တမသော ကာကသုနခါ ဒီနမ္ပိ အာဟာရံ အဒိန္နပုဗ္ဗံ ဘဝိဿတိ၊ တေနဝါဟံ ဒေဝေါ ဟုတွာပိ ဘတ္တံ န လဘာမိ။ ဟန္ဒာဟံ ဣမံ ဘတ္တပိဏ္ဍံ ထေရဿေဝ ဒဿာမိ၊ တံ မေ ဘဝိဿတိ ဒီဃရတ္တံ ဟိတာယ သုခါယ စာတိ။ ဧဝဉ္စ ပန စိန္တေတွာ ဘတ္တပိဏ္ဍေ အာသံ ပဟာယ ထေရံ ဥပသင်္ကမ္မ သာမိ ဒါသဿ ဝေါ အလံ ဣဓ လောကေန သင်္ဂဟံ။ ပရလောကေန မေ သင်္ဂဟံ ကရောထာတိ ဝတွာ တဿ ပတ္တေ ဩကိရိ။ အထဿ ဘတ္ထပိဏ္ဍံ [ဘတ္ထပိဏ္ဍံ ဣတိသဗ္ဗတ္ထ] ပတ္တေ ပတိတမတ္တေယေဝ တိဂါဝုတဋ္ဌာနေ ဒိဗ္ဗမယာနိ ဘတ္တဘာဇနာနိပညာယိံသု။ ဒေဝပုတ္တော ထေရံ ပဉ္စပတိဋ္ဌိတေန ဝန္ဒိတွာ တတော ဒိဗ္ဗဘောဇနံ ဂဟေတွာ ပထမံ ဒါနံ ဒတွာ ပစ္ဆာ သယံ ဘုဉ္စိ။ တတော ဒေပုတ္တော ဒုတိယဒိဝသတော ပဋ္ဌာယ ထေရဿ စ သမ္ပတ္တမဟာဇနဿ စ မဟာဒါနံ ဒေန္တော အာယုပရိယောသာနေ ¶ ၀ ဒေဝလောကေ နိဗ္ဗတ္တိတွာ ဆသု ကာမသဂ္ဂေသု အပရာပရံ ဒိဗ္ဗသမ္ပတ္တိ မနုဘဝမာနော ပဒုမုတ္တရဿ ဘဂဝတော ကာလေ တတော စုတော ဗာရာဏသိယံ အနေကဝိဘဝဿ မိစ္ဆာဒိဋ္ဌိကဿ ကုဋုမ္ဗိကဿ ဂေဟေ နိဗ္ဗတ္တိ။ ဒေဝေါတိဿ နာမံ အကံသု။ အပရဘာဂေ ဝိညုတံ ပတ္တဿ တဿ မာတာပိတရော ကာလမကံသု။ သောဝဏ္ဏမဏိမုတ္တာဒိပူရိတကောဋ္ဌာဂါရာဒယော ဩလောကေတွာ မမ မာတာပိတရော မိစ္ဆာဒိဋ္ဌိကတ္တာ ဣတော ဒါနာဒိကိဉ္စိကမ္မံ အကရိတွာ ပရလောကံ ဂစ္ဆန္တာ ကာကဏိကမတ္တမ္ပိ အဂဟေတွာ ဂတာ၊ အဟံ ပန တံ ဂဟေတွာဝ ဂမိဿာမီတိ သန္နိဋ္ဌာနံ ကတွာ ဘေရိံ စရာပေတွာ ကပဏဒ္ဓိကဝနိဗ္ဗကေ သန္နိပါတေတွာ သတ္တာဟဗ္ဘန္တရေ သဗ္ဗံ သာပတေယျံ ဒါနမုခေန ဒတွာ အရညံ ပဝိသိတွာ ဣသိပ္ပဗ္ဗဇ္ဇံ ပဗ္ဗဇိတွာ ကသိဏပရိကမ္မံ ကတွာ ပဉ္စ ဘိညာ အဋ္ဌ သမာပတ္တိယော နိဗ္ဗတ္တေတွာ အာကာသစာရီ အဟောသိ။ အထ တသ္မိံသမယေ ပဒုမုတ္တရော နာမ ဘဂဝါ ဟံသဝတီနဂရေ ပဋိဝသန္တော ဒေဝဗြဟ္မာဒိပရိဝုတော စတုသစ္စပဋိသံယုတ္တံ ဓမ္မံ ဒေသေန္တော နိသိန္နော ဟောတိ၊ တဒါ သော တာပသော အာကာသေန ဂစ္ဆန္တော မဟာဇနသမာဂမဉ္စ ဘဂဝတော သရီရတော နိက္ခန္တဆဗ္ဗဏ္ဏရံသိယော စ ဒိသွာ ကိမေတံတိ ဝိမှိတော အာကာသာ ဩတရိတွာ မဟတိယာ ဗုဒ္ဓလီဠာယ နိသီဒိတွာ ဓမ္မံ ဒေသေန္တံ ဘဂဝန္တံ ဒိသွာ ပသန္နမာနသော ပရိသန္တရေ နိသိန္နော ဓမ္မံ သုတွာ ဘဂဝန္တံ ဝန္ဒိတွာ အတ္တနော အဿမမေဝ အဂမာသိ။ အထ သော တတ္ထ ယာဝတာယုကံ ဌတွာ အာယုပရိယောသာနေ တာဝတိံသဘဝနေ နိဗ္ဗတ္တော တိံသကပ္ပေ ဒိဗ္ဗသမ္ပတ္တိမနုဘဝန္တော ဆသု ကာမသဂ္ဂေသု အပရာပရိယဝသေန သံသရိ။ ဧကပညာသအတ္တဘာဝေ သက္ကော ဒေဝရာဇာ အဟောသိ၊ ဧကကဝီသတိအတ္တဘာဝေ စက္ကဝတ္တိ ဟုတွာ မနုဿသမ္ပတ္တိ မနုဘဝိတွာ ဣမသ္မိံဗုဒ္ဓုပ္ပာဒေ ဘဂဝတိ ပရိနိဗ္ဗုတေ သာဝတ္ထိယံ အညတရသ္မိံ ကုလဂေဟေ နိဗ္ဗတ္တိတွာ သတ္တဝဿိကော ဧကံ ဘိက္ခုံ ဓမ္မံ ဒေသေန္တံ အဒ္ဒသ။ ဒိသွာ တံ ဥပသင်္ကမိတွာ ဓမ္မံ သုတွာ အနိစ္စသညံ ¶ ပဋိလဘိတွာ တတ္ထ နိသိန္နောဝ အရဟတ္တံ ပါပုဏိ၊ တတော သော ပတ္တပဋိသမ္ဘိဒေါ အတ္တနာ ကတပုညကမ္မံ ဩလောကေန္တော တံ ပုဗ္ဗစရိယံ ဘိက္ခူနံ မဇ္ဈေ ပကာသေန္တော အာဟ။ တသ္မာ။

နာရဒေါ ကိရ သမ္ဗုဒ္ဓါ၊ ပုဗ္ဗေ အာသိ နရုတ္တမော၊

လောကံ ဒုက္ခာ ပမောစေန္တော၊ ဒဒန္တော အမတံ ပဒံ။

တသ္မိံ တု သမယေ တဿ၊ သာဝကော ဆိန္နဗန္ဓနော၊

ဘိက္ခိတွာ ဒီပကေ လဒ္ဓ၊ မာဟာရံ ပရိဘုဉ္ဇိတုံ။

ရုက္ခမူလ မုပါ ဂဉ္ဆိ၊ တတ္ထာသိံ ရုက္ခဒေဝတာ၊

ဗုဘုက္ခိတာ ဥဒိက္ခန္တီ၊ အဋ္ဌာသိံ တဿ သန္တိကေ။

အဒါသိ မေ ဘတ္တပိဏ္ဍံ၊ ကရုဏာပူရိတန္တရော၊

ဂဟေတွာန ဌိတော ပိဏ္ဍံ၊ သဟမာနော ခုဒံ တဒါ။

အဒိန္နတ္တာ မယာ ပုဗ္ဗေ၊ ကိဉ္စိ ဒါနံ သုပေသလေ၊

ဇိဃစ္ဆာပီဠိတော ဟောမိ၊ ဇာတောပိ ဒေဝယောနိယံ။

အဇ္ဇ ခေတ္တံ သုလဒ္ဓံမေ၊ ဒေယျဓမ္မောပိ ဝိဇ္ဇတိ၊

ဗီဇမေတ္ထ စ ရောပေမိ၊ ဘဝတော ပရိမုတ္တိယာ။

ဣတိ စိန္တိယ ဝန္ဒိတွာ၊ ဒါသဿ သာမိ ဝေါ အလံ၊

သင်္ဂဟံ ဣဓ လောကသ္မိံ၊ ကရောထ ပါရလောကိကံ။

ဣတိ ဝတွာ အဒါသာဟံ၊ ဘုဉ္စိ သောပိ ဒယာပရော၊

တေနာဟံ ပုညကမ္မေန၊ သုဓန္နမလဘိံ ခဏေ။

တတော စုတော ဆဒေဝေသု၊ ဝိန္ဒန္တော မဟတိံသိရိံ၊

စိရကာလံ ဝသိံ တတ္ထ၊ ဒေဝိဒ္ဓီဟိ သမင်္ဂိတာ။

သတသဟဿေ ဣတော ကပ္ပေ၊ ပဒုမုတ္တရနာမကော၊

ဥပ္ပဇ္ဇိ လောကနာယကော၊ ဓမ္မရာဇာ တထာဂတော။

မဟိဒ္ဓိကော ¶ တဒါ အာသိံ၊ တာပသော ကာနနေ ဝနေ၊

သမ္ပတ္တပဉ္စာ ဘိညာဏော၊ အာကာသေန စရာမဟံ။

တဒါ ကာသေန ဂစ္ဆန္တော၊ ရမ္မေ ဟံသဝတီပုရေ၊

ဗုဒ္ဓရံသိပရိက္ခိတ္တံ၊ ကေတုမာလာဝိလာသိတံ။

ဒေဝသင်္ဃပရိဗ္ဗူဠှံ၊ ဒေသေန္တံ အဒ္ဒသံ ဇိနံ၊

သော တံ ဒိသွာန နဘသာ၊ ဌိတောဟံ ပရိသန္တရေ။

ဓမ္မံ သုတွာ ဥဒဂ္ဂေါဟံ၊ ကာလံ ကတွာန သတ္ထုနော၊

တတော စုတော ပပန္နောသ္မိ၊ တာဝတိံသေ မနောရမေ။

တိံသကပ္ပသဟဿာနိ၊ စရန္တော ဒေဝမာနုသေ၊

ဒုဂ္ဂတိံ နာဘိဇာနာမိ၊ လဘာမိ ဝိပုလံ သုခံ။

ဧကပညာသတိက္ခတ္တုံ၊ ဒေဝရဇ္ဇမကာရယိံ၊

အထေကဝီသတိက္ခတ္တုံ၊ စက္ကဝတ္တီ အဟောသဟံ။

ပဒေသရဇ္ဇံ ကာသာဟံ၊ ဗဟုက္ခတ္တုံ တဟိံ တဟိံ၊

ဣမသ္မိံ ဘဒ္ဒကေ ကပ္ပေ၊ နိဗ္ဗုတေတု [နိဗ္ဗုတေသု ဣတိသဗ္ဗတ္ထ] တထာဂတေ။

စောဒိတော ပုညကမ္မေန၊ သာဝတ္ထိပုရမုတ္တမေ၊

ဥပ္ပဇ္ဇိတွာ ကုလေ သေဋ္ဌေ၊ ဇာတိယာ သတ္တဝဿိကော။

သုတွာ ဓမ္မံ ကထေန္တဿ၊ ဘိက္ခုဿညတရဿဟံ၊

ဘဝဿန္တံ ကရိတွာန၊ အရဟတ္တမပါပုဏိံ။

သုဒိန္နံ မေ တဒါ ဒါနံ၊ သုဿုတံ ဓမ္မမုတ္တမံ၊

ဒုက္ခဿန္တံ အကာသာဟံ၊ တဿ ကမ္မဿ ဝါဟသာတိ။

ဧဝဉ္စ ပန ဝတွာ ဗဟူ ဇနေ ကုသလကမ္မေ နိယောဇေသီတိ။

လဘန္တိ သတ္တာ တိဝိဓမ္ပိ သမ္ပဒံ၊

၃၀။ သီဝလိတ္ထေရဿ ဝတ္ထုမှိ အယမာနုပုဗ္ဗီကထာ

ဣတော ကိရ ကပ္ပသတသဟဿမတ္ထကေ ပဒုမုတ္တရော နာမ သတ္ထာ လောကေ ဥဒပါဒိ ဓမ္မဒေသနာယ သတ္တေ အမတမဟာနိဗ္ဗာဏံ ပါပေန္တော၊ တသ္မိံ သမယေ ဘဂဝါ ဟံသာဝတိယံ သရာဇိကာယ ပရိသာယ မဇ္ဈေ ဧကံ ဘိက္ခုံ လာဘီနံ အဂ္ဂဋ္ဌာနေ ဌပေသိ။ တဒါ ရာဇာ တံ ဒိသွာ တံ ဌာနံ ကာမယမာနော ဗုဒ္ဓပမုခဿ သင်္ဃဿ မဟာဒါနံ ဒတွာ ဘဂဝတော ပါဒမူလေ သိရသာ နိပဇ္ဇိ၊ တဒါဿ ဘဂဝါ အနာဂတေ ဂေါတမဿ ဘဂဝတော သာသနေ တံ ဌာနံ လဘိဿသီတိ ဝတွာ ဗျာကာသိ။ တံ သုတွာ မုဒိတော ရာဇာ ပုညာနိ ကတွာ ဒေဝလောကေ နိဗ္ဗတ္တိ။ တတော အပရဘာဂေ ဗာရာဏသိယံ သေဋ္ဌိပုတ္တော ဟုတွာ ပစ္စေကဗုဒ္ဓသဟဿံ စတုပစ္စယဒါနေန ယာဝဇီဝံ ပဋိဇဂ္ဂိတွာ ဒေဝလောကေ နိဗ္ဗတ္တော မဟန္တံ သမ္ပတ္တိ မနုဘဝိတွာ တတော စုတော ဝိပဿိဿ ဘဂဝတော ကာလေ ဗန္ဓုမတီနဂရေ အညတရသ္မိံ ကုလဂေဟေ နိဗ္ဗတ္တိ။ သော တသ္မိံ သမယေ သေနဂုတ္တဋ္ဌာနေ ဌတွာ ရညော ကမ္မံ ကရောတိ၊ တဒါ နဂရဝါသိနော ဥပါသကဂဏာ ဝိပဿီသမ္မာသမ္ဗုဒ္ဓံ ဥပသင်္ကမ္မ ဝန္ဒိတွာ ဘဂဝါ ဘန္တေ သသာဝကော အမှာကံ အနုဂ္ဂဟံ ကရောတူတိ သွာတနာယ နိမန္တေတွာ မဟာဒါနံ ဒတွာ သဗ္ဗေ ဧကစ္ဆန္ဒာ ဘဂဝန္တ မုဒ္ဒိဿ မဟာရဟံ မဟာပရိဝေဏံ ကာရာပေတွာ ပရိဝေဏမဟေ မဟာဒါနံ ဒဒန္တာ ဒါနဂ္ဂေ အသုကံ နာမ ¶ နတ္ထီတိ န ဝတ္တဗ္ဗန္တိ ဝတွာ ဒါနံ ပဋိယာဒေတွာ ဒါနဂ္ဂံ ဩလောကေန္တာ နဝဒဓိဉ္စ ပဋလမဓုဉ္စ အပဿန္တာ ပုရိသေ ပက္ကောသိတွာ သဟဿံ ဒတွာ ဒဓိမဓုံ ခိပ္ပံ ပရိယေသိတွာ အာနေထာတိ ပေသေသုံ၊ တေ သဟဿံ ဂဟေတွာ ဒဓိမဓုံ ဥပဓာရေတုံ တတ္ထ တတ္ထ ဝိစရန္တာ ဒွါရန္တရေ အဋ္ဌံသု၊ တဒါ အယံ သေနဂုတ္တော ရညော သဘတ္တံ ဒဓိမဓုံ အာဒါယ ဂစ္ဆန္တော မဟာဒွါရံ သမ္ပာပုဏိ၊ အထ တေ ဒဓိမဓုံ ဒိသွာ ဘော ကဟာပဏံ ဂဟေတွာ ဣမံ ဒေဟီတိ ယာစိံသု။ တေန [တေနဒဿာမိ ဣတိပိကတ္တစိ] န ဒဿာမီတိ ဝုတ္တေ ယာဝသဟဿံ ဝဍ္ဎေတွာ ယာစိံသု။ တတော သေနဂုတ္တော ဣမံ အပ္ပဂ္ဃံ သဟဿေန ယာစထ၊ ကိ မနေန ကရောထာတိ ပုစ္ဆိ၊ တေဟိ သမ္ဗုဒ္ဓတ္ထာယာတိ ဝုတ္တေ တေနဟိ အဟမေဝ ဒဿာမီတိ ဇီရမရိစာဒီဟိ သက္ခရမဓုဖာဏိတာဒယော ယောဇေတွာ ဒါနဂ္ဂံ ဥပနာမေသိ။ တံ သတ္ထု အာနုဘာဝေန ဗုဒ္ဓပမုခဿ အဋ္ဌသဋ္ဌိဘိက္ခုသတသဟဿဿ ပဟောဏကံ အဟောသိ။ တတော သော တေန ပုညကမ္မေန ဒေဝမနုဿလောကေသု သမ္ပတ္တိ မနုဘဝိတွာ အပရဘာဂေ အမှာကံ ဘဂဝတော ကာလေ ကောလိယနဂရေ မဟာလိလိစ္ဆဝိရညော ဥပနိဿာယ သုပ္ပိယာယ နာမ အဂ္ဂမဟေသိယာ ကုစ္ဆိသ္မိံ ပဋိသန္ဓိံ ဂဏှိ။ သော သတ္တမာသသတ္တသံဝစ္ဆရာနိ မာတုကုစ္ဆိယံ ဝသိတွာ သတ္တဒိဝသာနိ မူဠှဂဗ္ဘော ဒုက္ခမနုဘဝိ။ မာတုကုစ္ဆိတော နိက္ခမန္တဿ တဿ မာတာပိတရော သီဝလီတိ နာမ မကံသု။ ဧဝံ မဟာပုညဿ ဧတ္တကံ ကာလံ မာတုကုစ္ဆိမှိ ဒုက္ခာနုဘဝနံ အတ္တနာဝ ကတေန ပါပဗလေန အဟောသိ၊ သော ကိရ အတီတေ ရာဇာ ဟုတွာ အတ္တနော သပတ္တရညာ သဒ္ဓိံ သင်္ဂါမေန္တော မာတရာ သဒ္ဓိံ မန္တေသိ။ သာ နဂရံ ရုန္ဓိတွာ အမိတ္တေ ဂဏှိတုံ သက္ကာတိ ဥပါယ မဒါသိ၊ သောပိ တဿာ ဝစနေန နဂရံ ရုန္ဓိတွာ သတ္တမေ ဒိဝသေ အဂ္ဂဟေသိ၊ တေန ပါပကမ္မဗလေန မာတာပုတ္တာနံ ဧဝံ မဟန္တံ ဒုက္ခံ အဟောသီတိ။ တတော ¶ သာ ပုတ္တံ ဝိဇာယနကာလေ သတ္တမေ ဒိဝသေ ဘဂဝန္တံ အနုဿရိတွာ သုခေန ဘာရံ မုဉ္စိ။ တုဋ္ဌာ သာ သတ္တမေ ဒိဝသေ ဗုဒ္ဓပမုခဿ ဘိက္ခုသင်္ဃဿ မဟာဒါနံ အဒါသိ၊ အထဿာ ပုတ္တော သတ္တဝဿိကကာလေ ဂေဟာ နိက္ခမ္မ သတ္ထာရံ ဒိသွာ ပဗ္ဗဇ္ဇံ ယာစိ။ သတ္ထာ သာရိပုတ္တတ္ထေရဿ နိယောဇေသိ၊ တတော သာရိပုတ္တတ္ထေရေန ဥပဇ္ဈာယေန မောဂ္ဂလ္လာနမာစရိယံ ကတွာ ပဗ္ဗဇိ၊ အထ သော ခုရဂ္ဂေယေဝ အရဟတ္တံ ပတွာ ဗုဒ္ဓသာသနံ သောဘေသိ၊ သော ပုဗ္ဗေ ကတပုညာနုဘာဝေန မဟာပုညော အဟောသိ လာဘီနဉ္စ အဂ္ဂေါ။ အထေကသ္မိံ သမယေ ဘဂဝါ ရေဝတတ္ထေရံ ဒဿနာယ ခဒိရဝနဝိဟာရံ ဂစ္ဆန္တော တိံသဘိက္ခုသဟဿေဟိ သဒ္ဓိံ တိံသယောဇနိကံ ဆဋ္ဋိတကန္တာရံ သမ္ပာပုဏိ နိရူဒကံ အပ္ပဘက္ခံ။ ယေဘုယျေန ဒေဝတာ သီဝလိတ္ထေရေ ပသန္နာ။ တသ္မာ ဘဂဝါ သီဝလိတ္ထေရံ ပုရတော စာရိကံ ကတွာ ဒေဝတာဟိ ကာရာပိတေ ဝိဟာရေ ဝသန္တော ဒေဝတာဟိ သဇ္ဇိတဒါနံ ပရိဘုဉ္ဇန္တော ရေဝတတ္ထေရံ သံပါပုဏိတွာ ဂတကမ္မံ နိဋ္ဌာပေတွာ ဇေတဝနမာဂမ္မ လာဘီနံ အဂ္ဂဋ္ဌာနေ တံ ဌပေသီတိ။ တေန ဝုတ္တံ အပဒါနေ။

ပဒုမုတ္တရော နာမ ဇိနော၊ သဗ္ဗဓမ္မေသု စက္ခုမာ၊

ဣတော သတသဟဿမှိ၊ ကပ္ပေ ဥပ္ပဇ္ဇိ နာယကော။

သီလံ တဿ အသင်္ချေယျံ၊ သမာဓိ ဝဇိရူပမော [ဝဇိရူပမာ ဣတိကတ္ထစိ]၊

အသံခိယံ ဉာဏဝရံ၊ ဝိမုတ္တိ စ အနောပမာ။

မနုဇာမရနာဂါနံ၊ ဗြဟ္မာနဉ္စ သမာဂမေ၊

သမဏဗြာဟ္မဏာကိဏ္ဏေ၊ ဓမ္မံ ဒေသေတိ နာယကော။

သသာဝကံ မဟာလာဘိံ၊ ပုညဝန္တံ ဇုတိန္ဓရံ၊

ဌပေသိ ဧတဒဂ္ဂမှိ၊ ပရိသာသု ဝိသာရဒေါ။

တဒါဟံ ¶ ခတ္တိယော အာသိံ၊ ပုရေ ဟံသဝတီဝှယေ [ဟံသာဝတဝှယေ ဣတိသဗ္ဗတ္ထ]၊

သုတွာ ဇိနဿ တံ ဝါကျံ၊ သာဝကဿ ဂုဏံ ဗဟုံ။

နိမန္တယိတွာ သတ္တာဟံ၊ ဘောဇယိတွာ သသာဝကံ၊

မဟာဒါနံ ဒဒိတွာန၊ တံ ဌာနမဘိပတ္ထယိံ။

တဒါ မံ ဝိနတံ ပါဒေ၊ ဒိသွာန ပုရိသာသဘော၊

သော သရေန မဟာဝီရော၊ ဣမံ ဝစနမဗြဝီ။

တတော ဇိနဿ ဝစနံ၊ သောတုကာမာ မဟာဇနာ၊

ဒေဝဒါနဝဂန္ဓဗ္ဗာ၊ ဗြဟ္မာနောစ မဟိဒ္ဓိကာ။

သမဏဗြာဟ္မဏာ စာပိ၊ နမဿိသုံ ကတဉ္ဇလီ၊

နမော တေ ပုရိသာဇည၊ နမော တေ ပုရိသုတ္တမ။

ခတ္တိယေန မဟာဒါနံ၊ ဒိန္နံ သတ္တာဟကမ္ပိ [သတ္တာဟကံပိတော ဣတိပိကတ္ထစိ] နော၊

သောတုကာမာ ဖလံ တဿ၊ ဗျာကရောဟိ မဟာမုနေ။

တတော အဝေါစ ဘဂဝါ၊ သုဏောထ မမ ဘာသိတံ၊

အပ္ပမေယျမှိ ဗုဒ္ဓသ္မိံ၊ ဂုဏမှိ သုပ္ပတိဋ္ဌိတာ။

ဒက္ခိဏာ ဒါယကံ ပတွာ၊ အပ္ပမေယျဖလာဝဟာ၊

အပိ စေ သ မဟာဘောဂေါ၊ ဌာနံ ပတ္ထေတိ မုတ္တမံ။

လာဘီ ဝိပုလလာဘီနံ၊ ယထာ ဘိက္ခု သုဒဿနော၊

တထာဟံပိ ဘဝေယျန္တိ၊ လစ္ဆတေ တံ အနာဂတေ။

သတသဟဿိတော ကပ္ပေ၊ ဩက္ကာကကုလသမ္ဘဝေါ၊

ဂေါတမောနာမ နာမေန၊ သတ္ထာ လောကေ ဘဝိဿတိ။

တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော၊

သီဝလိ နာမ နာမေန၊ ဟေဿတိ သတ္ထုသာဝကော။

တေန ¶ ကမ္မေန သုကတေန၊ စေတနာပဏိဓီဟိ စ၊

ဇဟိတွာ မာနုသံ ဒေဟံ၊ တာဝတိံသူပဂေါ အဟံ။

တတောပရသ္မိံသမယေ၊ ဗာရာဏသိပုရုတ္တမေ၊

သေဋ္ဌိပုတ္တော အဟံ အာသိံ၊ အဍ္ဎပ္ပတ္တော မဟာဓနော။

သဟဿမတ္တေ ပစ္စေက၊ နာယကေ စ နိမန္တိယ၊

မဓုရေနန္နပါနေန၊ သန္တပ္ပေသိံတဒါဒရော။

တတော စုတော ဆကာမဂ္ဂေ၊ အနုဘောသိံမဟာယသံ၊

ဒေဝစ္ဆရာပရိဝုတော၊ ပါသာဒေ ရတနာမယေ။

ဧဝံ အစိန္တိယာ ဗုဒ္ဓါ၊ ဗုဒ္ဓဓမ္မာ အစိန္တိယာ၊

အစိန္တိယေ ပသန္နာနံ၊ ဝိပါကောပိ အစိန္တိယော။

ဧကနဝုတိတော ကပ္ပေ၊ ဝိပဿီနာမ နာယကော၊

ဥပ္ပဇ္ဇိ စာရုနယနော၊ သဗ္ဗဓမ္မဝိပဿကော။

တဒါဟံ ဗန္ဓုမတိယာ၊ ကုလဿညတရဿ စ၊

ဒယိတော ပတ္ထိတော ပုတ္တော၊ အာသိံ ကမ္မန္တဗျာဝဋော။

တဒါ အညတရော ပူဂေါ၊ ဝိပဿိဿ မဟေသိနော၊

ပရိဝေဏံ အကာရေသိ၊ မဟန္တ မိတိ ဝိဿုတံ။

နိဋ္ဌိတေ စ မဟာဒါနံ၊ ဒဒံ ခဇ္ဇကသံယုတံ၊

နဝံ ဒဓိ မဓုဉ္စေဝ၊ ဝိစိနံ န စ မဒ္ဒသ။

တဒါဟံ တံ ဂဟေတွာန၊ နဝံ ဒဓိ မဓုမ္ပိစ၊

ကမ္မသာမိဃရံ ဂစ္ဆံ၊ တမေနံ [တမေသံ ဣတိသဗ္ဗတ္ထ] ဒါန မဒ္ဒသံ။

သဟဿမ္ပိ စ ဒတွာန၊ န လတိံသု စ တံ ဒွယံ၊

တတော ဧဝံ ဝိစိန္တေသိံ၊ နေတံ ဟေဿတိ ဩရကံ။

ယထာ ¶ ဣမေ ဇနာ သဗ္ဗေ၊ သက္ကရောန္တိ တထာဂတံ၊

အဟမ္ပိ ကာရံ ကဿာမိ၊ သသင်္ဃေ လောကနာယကေ။

တဒါဟမေဝံ စိန္တေတွာ၊ ဒဓိံမဓုဉ္စ ဧကတော၊

ယောဇေတွာ လောကနာထဿ၊ သသင်္ဃဿ အဒါသဟံ။

တေန ကမ္မေန သုကတေန၊ စေတနာပဏိဓီဟိ စ၊

ဇဟိတွာ မာနုသံ ဒေဟံ၊ တာဝတိံသ မဂဉ္ဆဟံ။

ပုနာဟံ ဗာရာဏသိယံ၊ ရာဇာ ဟုတွာ မဟာယသော၊

သတ္တုကဿ တဒါ ရုဒ္ဓါ၊ ဒွါရရောဓံ အကာရယိံ။

တတော သပတ္တိနော [သမ္ပတ္တိနော၊ သပတ္တာနော ဣတိစကတ္ထစိ] ရုဒ္ဓါ၊ ဧကာဟံ ရက္ခိတာ အဟုံ၊

တတော တဿ ဝိပါကေန၊ ပါပုဏိံ နိရယံ ဘုသံ။

ပစ္ဆိမေ စ ဘဝေ ဒါနိ၊ ဇာတောဟံ ကောလိယေ ပုရေ၊

သုပ္ပဝါသာ စ မေ မာတာ၊ မဟာလိ လိစ္ဆဝီ ပိတာ။

ခတ္တိယေ ပုညကမ္မေန၊ ဒွါရရောဓဿ ဝါဟသာ၊

သတ္တမာသေ သတ္တဝဿေ၊ ဝသိံကုစ္ဆိမှိ ဒုက္ခိတော။

သတ္တာဟံ ဒွါရမူဠှောဟံ၊ မဟာဒုက္ခသမပ္ပိတော၊

မာတာ မေ ဆန္ဒဒါနေန၊ ဧဝ မာသိ သုဒုက္ခိတာ။

သုဝတ္ထိတောဟံ နိက္ခန္တော၊ ဗုဒ္ဓေန အနုကမ္ပိတော၊

နိက္ခန္တဒိဝသေယေဝ၊ ပဗ္ဗဇိံ အနဂါရိယံ။

ဥပဇ္ဈာ သာရိပုတ္တော မေ၊ မောဂ္ဂလ္လာနော မဟိဒ္ဓိကော၊

ကေသေ ဩရောပယန္တော မေ၊ အနုသာသိ မဟာမတိ။

ကေသေသု ဆိဇ္ဇမာနေသု [ဆန္နမနေသု ဣတိပိကတ္ထစိ]၊ အရဟတ္တမပါပုဏီံ၊

ဒေဝေါ နာဂါ မနုဿာ စ၊ ပစ္စယာနု ပနေန္တိ မေ။

ပဒုမုတ္တရနာမဉ္စ၊ ဝိပဿိံစ ဝိနာယကံ၊

သံပူဇယိံ ပမုဒိတော၊ ပစ္စယေဟိ ဝိသေသတော။

တတော ¶ တေသံ ဝိပါကေန၊ ကမ္မာနံ ဝိပုလုတ္တမံ၊

လာဘံ လဘာမိ သဗ္ဗတ္ထ၊ ဝနေ ဂါမေ ဇလေ ထလေ။

ရေဝတံ ဒဿနတ္ထာယ၊ ယဒါ ယာတိ ဝိနာယကော၊

တိံသဘိက္ခုသဟဿေဟိ၊ သဟ လောကဂ္ဂနာယကော။

တဒါ ဒေဝေါ ပနီတေဟိ [ပဏီတေဟိ ဣတိသဗ္ဗတ္ထ]၊ မမတ္ထာယ မဟာမတိ၊

ပစ္စယေဟိ မဟာဝီရော၊ သသင်္ဃော လောကနာယကော။

ဥပဋ္ဌိတော မယာ ဗုဒ္ဓါ၊ ဂန္တွာ ရေဝတမဒ္ဒသ၊

တတော ဇေတဝနံ ဂန္တွာ၊ ဧတဒဂ္ဂေ ဌပေသိမံ။

လာဘီနံ သီဝလိ အဂ္ဂေါ၊ မမ သိဿေသု ဘိက္ခဝေါ၊

သဗ္ဗေလောကဟိတော သတ္ထာ၊ ကိတ္တယီ ပရိသာသုမံ။

ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။

သွာဂတံ ဝတ မေ အာသိ၊ ဗုဒ္ဓသေဋ္ဌဿ သန္တိကံ၊

တိဿော ဝိဇ္ဇာ အနုပ္ပတ္တော၊ ကတံ ဗုဒ္ဓဿ သာသနံ။

ပဋိသမ္ဘိဒါ စတဿောပိ၊ ဝိမောက္ခာ ပိစ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနန္တိ။

ဣတ္ထံ သုဒံ အာယသ္မာ သီဝလိတ္ထေရော ဣမာ ဂါထာယော အဘာသိတ္ထာတိ။

ကာမာတ္ထ ကာမံ ဘဝဘောဂနိဗ္ဗုတိံ။

၃၁။ မဟာသေနရညော ဝတ္ထုမှိ အယမာနုပုဗ္ဗီကထာ

ဘဂဝတိ ¶ ပရိနိဗ္ဗုတေ ပါဋလိပုတ္တနဂရေ မဟာသေနော နာမ ရာဇာ ရဇ္ဇံ ကာရေသိ ဓမ္မိကော ဓမ္မရာဇာ။ သော ပန ပိတုပိတာမဟာဒီနံ ဓနရာသိံ ဩလောကေတွာ ဣမေ ဣမံ သာပတေယျံ ပဟာယ မစ္စုနော မုခမုပဂတာ။ အဟော သံသာရိကာနံ အညာဏတာ။ ဓနံ ဌပေတွာ အတ္တနော ဝိနာသဉ္စ အတ္တာနံ ဌပေတွာ ဓနဝိနာသဉ္စ န ဇာနန္တီတိ သမ္ပတ္တိယာ အဓိဂမဉ္စ ဝိနာသံ စာတိ သဗ္ဗံ စိန္တေတွာ ဓမ္မဉ္စ သုတွာ ပဋိလဒ္ဓသဒ္ဓါ ဒိဝသေ ဒိဝသေ ဒသသဟဿာနံ ဘိက္ခူနံ မဓုရေန အန္နပါနေန သန္တပ္ပေန္တော အနေကာနိ ပုညာနိ ဥပစိနန္တော ဧကဒိဝသံ ရဟော ပဋိသလ္လိနော ဧဝံ စိန္တေသိ။ ဧဝံ ရာဇနိယောဂေန ဇနဿ ပီဠနံ ကတွာ ဒိန္နဒါနတော သဟတ္ထေန ကမ္မံ ကတွာ လဒ္ဓေန ဒိန္နဒါနံ မဟပ္ဖလံ မဟာနိသံသံ ဘဝိဿတိ၊ ဧဝံ မယာ ကာတဗ္ဗန္တိ သော သုဟဒါ မစ္စဿ ရဇ္ဇံ နီယျာတေတွာ အတ္တနော ကဏိဋ္ဌိကံ အာဒါယ ကိဉ္စိ အဇာနာပေတွာ အညတရဝေသေန နဂရာ နိက္ခမ္မ ဥတ္တရမဓုရံ နာမ နဂရံ အဂမာသိ၊ တတ္ထ မဟာဝိဘဝေါ ဧကော သေဋ္ဌိ ပဋိဝသတိ၊ တေ သေဋ္ဌိနော သမီပ မုပဂမ္မ ဌိတာ။ တေန ကိမတ္ထာယာဂတာတိ ဝုတ္တေ ရာဇာ တဝ ဂေဟေ ဘတိယာ ကမ္မံ ကရိဿာမီတိ ဝတွာ တေနာနုညာတော တီဏိ ဝဿာနိ ကမ္မ မကာသိ၊ တတော ဧကဒိဝသံ သေဋ္ဌိ တေ ဒိသွာ ပက္ကောသိတွာ အတီဝ တုမှေ သုခုမာလတရာ။ တထာပိ ဣမသ္မိံ ဂေဟေ ကမ္မကရဏေန စိရံ ဝသိတ္ထ၊ ဧတ္တကံ ကာလံ ကိသ္မိဉ္စိ ကမ္မေပိ ကုသီတတ္တံ န ပညာယတိ။ ပဂေဝ အနာစာရမ္ပိ၊ ယာဂုဘတ္တံ ဌပေတွာ အညံ ဥပကာရမ္ပိ မမ သန္တိကာ နတ္ထိ၊ ကေနတ္ထေန ကမ္မံ ကရောထာတိ ပုစ္ဆိ။ ရာဇာ တဿ ဝစနံ သုတွာ ဣမသ္မိံ ဇနပဒေ သာလိနော မနာပဘာဝေါ ဗဟုသော သူယတိ။ တသ္မာ သာလီနမတ္ထာယ ဣဓာ ဂတမှာတိ အာဟ၊ တံ သုတွာ တေသံ တုဋ္ဌော သေဋ္ဌိ သာလီနံ သကဋသဟဿံ အဒါသိ၊ ရာဇာ သာလိံလဘိတွာ သေဋ္ဌိနော ¶ ဧဝမာဟ၊ ဘော ဣမံ အမှာကံ နဂရံ ပါပေထာတိ၊ တံ သုတွာ သေဋ္ဌိ သာဓူတိ ဝတွာ သာလိပရိပုဏ္ဏသကဋသဟဿံ ရညော နဂရံ ပါပေသိ၊ ရာဇာ နဂရံ ဂန္တွာ သေဋ္ဌိဿ နာနာဝဏ္ဏဝတ္ထဟိရညသုဝဏ္ဏာဒီဟိ သကဋေ ပူရေတွာ ပဋိပေသေတွာ မေတ္တိံ ထိရံ ကတွာ အာဘတဝီဟယော ရာဇဂေဟေ သန္နိစယမကာသိ၊ အထ ရာဇာ ကတိပါဟစ္စယေန မုသလံ ပဂ္ဂယှ သဟတ္ထေနေဝ ဝီဟိံ ကောဋ္ဋေတိ၊ ကောဋ္ဋိတကောဋ္ဋိတံ ကဏိဋ္ဌိကာ ပပ္ဖောဋေတိ။ ဧဝံ ဥဘောပိ တဏ္ဍုလာနံ မဟန္တံ ရာသိံ ကတွာ ဒါရူဒကာဒယော အာဟရိတွာ အမ္ဗိလဘတ္တံ ပစိတွာ ရာဇဂေဟေ ပဉ္စသတအာသနာနိ ပညာပေတွာ ကာလံ ဥဂ္ဃောသေသုံ၊ အာဂစ္ဆန္တု အယျာ အနုကမ္ပံ ဥပါဒါယ မမ ဂေဟေ ဘုဉ္ဇန္တူတိ။ တံ သုတွာ ပဉ္စသတာ ဘိက္ခူ အာကာသေန အာဂမိံသု၊ ရာဇာ တေ ယာဝဒတ္ထံ ပရိဝိသိ၊ တတော တေသံ အန္တရေ ပိယံဂုဒီပဝါသီ ဧကော မဟာသိဝတ္ထေရော နာမ ဘတ္တံ ဂဟေတွာ ဧတေ မံ ပဿန္တူတိ အဓိဋ္ဌဟိတွာ အာကာသေန ပိယံဂုဒီပံ ဂန္တွာ ဘတ္တံ ပဉ္စသတာနံ ဘိက္ခူနံ ဒတွာ ပရိဘုဉ္စိ။ တံ တဿာနုဘာဝေန သဗ္ဗေသံ ယာဝဒတ္ထံ အဟောသိ။ ဧဝံ အပ္ပကေနာပိ ဒေယျဓမ္မေန သပ္ပုရိသာ ဒါယကာနံ မနံ ပသာဒေတွာ ပတိဋ္ဌံ ကရောန္တီတိ။ ဝုတ္တဉှိ။

အပ္ပကေနပိ မေဓာဝီ၊ ဒါယကာနံ မနံ ပတိ၊

သဒ္ဓံ ဝဍ္ဎေန္တိ စန္ဒောဝ၊ ရံသိနာ ခီရသာဂရံ။

အဋ္ဌာနေ န နိယောဇေန္တာ၊ ကရောန္တာ နေဝ သန္နိဓိံ၊

ပရိဘောဂ မကတွာန၊ နေဝ နာသေန္တိ ပစ္စယံ။

န ပါပေန္တာစ ထေယျဿ၊ န ကရောန္တာ တထေဝိဏံ၊

ဝိဘဇန္တိ သုသီလေသု၊ သယံ ဘုတွာန သီလဝါတိ။

အထ ရာဇာ ကဏိဋ္ဌိကာယ သဒ္ဓိံ ထတ္ထေဝ ဌိတော ပိယံဂုဒီပေ ပရိဘုဉ္ဇန္တေ ပဉ္စသတဘိက္ခူ ဒိသွာ ဟဋ္ဌော ဥဒဂ္ဂေါ အဟောသိ။ အထ ¶ တေ အပရဘာဂေ အတ္တနာ ကတံ ဒါနဝရံ အနုဿရန္တာ န စိရေနေဝ ဥဘောပိ သောတာပန္နာ အဟေသုံတိ။

န ဂဏေန္တာတ္တနော ဒုက္ခံ၊ ဝိဟာယ မဟတိံ သိရိံ၊

အာယတိံဘဝမိစ္ဆန္တာ၊ သုဇနေဝံ သုဘေ ရတာ။

အာယာသေန ကတံ ပုညံ၊ မဟန္တဖလဒါယကံ၊

ဣတိ မန္တွာန မေဓာဝီ၊ သဟတ္ထေနေဝ တံ ကရေတိ။

၃၂။ သုဝဏ္ဏတိလကာယ ဝတ္ထုမှိ အယမာနုပုဗ္ဗီကထာ

လင်္ကာဒီပေ ကိရ အနုရာဓပုရနဂရေ ဧကော မာတုဂါမော [ဧကာမာတုဂါမာတိဝါ ဧကာမာတုဂါမောတိဝါ ကတ္ထစိ] သဒ္ဓါသမ္ပန္နာ နိစ္စံ အဘယုတ္တရစေတိယေ ပုပ္ဖပူဇံ ကရောတိ၊ အထေကဒိဝသံ သာ အတ္တနော ဓီတုယာ သဒ္ဓိံ တသ္မိံ စေတိယေ ပုပ္ဖပူဇနတ္ထာယ [ပုပ္ဖပူဇတ္ထာယ ဣတိကတ္ထစိ] ဂန္တွာ ပုပ္ဖာသနသာလာယ ဥဒကံ အပဿန္တီ ဓီတု ဟတ္ထေ ပုပ္ဖစင်္ဂေါဋကံ ဌပေတွာ ဃဋ မာဒါယ ပေါက္ခရဏိံ အဂမာသိ၊ တတော သာ ဒါရိကာ မာတရိ အနာဂတာယယေဝ [အနာဂတေယေဝ ဣတိသဗ္ဗတ္ထ] အဓောတာသနေ ပုပ္ဖမုဋ္ဌိံဂဟေတွာ မဏ္ဍလံ ကတွာ ပူဇေတွာ ဧဝံ ပတ္ထနမကာသိ။ တထာ ဟိ။

မဟာဝီရဿ ဓီရဿ၊ သယမ္ဘုဿ မဟေသိနော၊

တိလောကဂ္ဂဿ နာထဿ၊ ဘဂဝန္တဿ သတ္ထုနော။

ယ မဟံ ပူဇယိံ ပုပ္ဖံ၊ တဿ ကမ္မဿ ဝါဟသာ၊

ရူပီနံ ပဝရာ ဟေဿံ၊ အာရောဟပရိဏာဟဝါ။

မံ ¶ ဒိသွာ ပုရိသာ သဗ္ဗေ၊ မုစ္ဆန္တု ကာမမုစ္ဆိတာ၊

နိစ္ဆရန္တု သရီရာ မေ၊ ရံသိမာလီဝ ရံသိယော။

ဟဒယင်္ဂမာ ကဏ္ဏသုခါ၊ မဉ္ဇုဘာဏီ သုဘာ မမ၊

ကိန္နရာနံ ယထာ ဝါဏီ၊ ဧဝမေဝ ပဝတ္တတူတိ။

အထဿာ မာတာ အာဂမ္မ အဓောတာသနေ ပူဇိတာနိ ပုပ္ဖာနိ ဒိသွာ ကသ္မာ စဏ္ဍာလီ အဓောတာသနေ ဘဂဝတော ပုပ္ဖာနိ ပူဇေသိ၊ အယုတ္တံ တယာ ကတန္တိ အာဟ၊ တံ သုတွာ သာ မာတုယာ ကုဇ္ဈိတွာ တွံ စဏ္ဍာလီတိ အက္ကောသိ၊ သာ ဧတ္တကံ ပုညာပုညံ ကတွာ အပရဘာဂေ တတော စုတာ ဇမ္ဗုဒီပေ ဥတ္တရမဓုရာယံ ဧကဿ စဏ္ဍာလဂန္ဓဗ္ဗဗြာဟ္မဏဿ ဓီတာ ဟုတွာ နိဗ္ဗတ္တိ၊ ဥတ္တမရူပဓရာ အဟောသိ၊ တဿာ သရီရတော မေဃမုခတော ဝိဇ္ဇုလ္လတာဝိယ ရံသိယော နိစ္ဆရန္တိ။ သမန္တာ စတုဟတ္ထဋ္ဌာနေ သရီရပ္ပဘာယ အန္ဓကာရေ ဝိဓမတိ။ မုခတော ဥပ္ပလဂန္ဓော ဝါယတိ၊ ကာယတော စန္ဒနဂန္ဓော၊ တဿာ ဒွိန္နံ ထနာန မန္တရေ သုဝဏ္ဏဝဏ္ဏံ ဧကံ တိလကံ အဟောသိ၊ တေန ဗာလသုရိယဿ ဝိယ ပဘာ နိစ္ဆရတိ။ ဒိဋ္ဌဒိဋ္ဌာ ယေဘုယျေန ဥမ္မတ္တာ ဝိယ ကာမမဒေန ဝိသညိနော ဟောန္တိ၊ အဟော ကုသလာကုသလာနံ အာနုဘာဝေါ။ တထာ ဟိ။

ယေန သာ ကောဓသာမာတု၊ စဏ္ဍာလီ ဣတိ ဘာသိတာ၊

တေန သာ အာသိ စဏ္ဍာလီ၊ ဇေဂုစ္ဆာ ဟီနဇာတိကာ။

သလ္လက္ခေတွာန သမ္ဗုဒ္ဓ၊ ဂုဏံ ပူဇေသိ ယံ တဒါ၊

တေန ပုညာနုဘာဝေန၊ သာ ဘိရူပီ မနောရမာ။

ယေန ယေန ပကာရေန၊ ပုညပါပါနိ ယော ကရေ၊

တဿ တဿာနုရူပေန၊ မောရောဝ လဘတေ ဖလံ။

ပါပေန စ တိရစ္ဆာနေ၊ ဇာယန္တိ ကုသလေန တေ၊

ဝဏ္ဏပေါက္ခရတာ ဟောတိ၊ မောရာနံ ကမ္မ မီဒိသန္တိ။

တတော ¶ တဿာ မာတာပိတရော သုဝဏ္ဏတိလကာတိ နာမ မကံသု။ တသ္မိံကိရ နဂရေ မနုဿာ တဿာ ရုပဒဿနေနစ သဝဏေနစ သမ္ပတ္တာပိ စဏ္ဍာလဓီတာ အယန္တိ ပရိဘဝဘယေန အာဝါဟံ န ကရောန္တိ။ အထ တသ္မိံ နဂရေ ဇေဋ္ဌစဏ္ဍာလဗြာဟ္မဏဿ ပုတ္တော ဧတမတ္ထာယ တဿာ မာတာပိတုန္နံ သန္တိကံ ဝတ္ထာဘရဏဂန္ဓမာလာဒယော ပေသေသိ သုဝဏ္ဏတိလကံ အမှာကံ ဒဒန္တူတိ၊ တေ တံ ပဝတ္တိံ တဿာ အာရောစေသုံ။ သာဿ ဇိဂုစ္ဆန္တီ ပရိဟာသ မကာသိ။ တတော ဗြာဟ္မဏဿ ပုတ္တော လဇ္ဇိတော ရညော သန္တိကံ ဂန္တွာ ဝီဏံ မုဉ္စေတွာ ဂါယမာနော ဧဝမာဟ။

မနုဇော ဟိ ယော နေတ္တပိယံ ကရောတိ၊

ဧဝဉ္စ ပန ဝတွာ ဒေဝ ဣမသ္မိံနဂရေ သုဝဏ္ဏတိလကာ နာမေကာ စဏ္ဍာလဓီတာ အတ္ထိ၊ သာ သမာနဇာတိကေဟိ ပေသိတပဏ္ဏာကာရံ န ဂဏှာတိ၊ ကုလဝန္တေယေဝ ပတ္ထေတိ၊ ကဒါ နာမ ကာကီ သုဝဏ္ဏဟံသေန သမာဂစ္ဆတိ ဒေဝါတိ။ ရာဇာ တံ သုတွာ တဿာ ပိတရံ ပက္ကောသာပေတွာ တမတ္ထံ ဝတွာ သစ္စံ ဘဏေတိ ပုစ္ဆိ၊ သောပိ သစ္စံ ဒေဝ၊ သာ ဇာတိသမ္ပန္နမေဝ ကာမေတီတိ အာဟ။ ရာဇာ ဧဝံ သတိ ဘဏေ ပဉ္စမဓုရနဂရေ ဥဒ္ဒါဠဗြာဟ္မဏော နာမ အတ္ထိ၊ သော ဇာတိသမ္ပန္နော မာတိတောစ ပိတိတောစ အနုပက္ကုဋ္ဌော ¶ ၊ ဇေဂုစ္ဆာ ပဋိက္ကူလာ ဧတာတိ မာတုဂါမေန သဒ္ဓိံ န သံဝသတိ။ အတ္တနော ဂေဟတော ရာဇဂေဟံ ဂစ္ဆန္တောစ အာဂစ္ဆန္တော စ သောဠသခီရောဒကဃဋေဟိ မဂ္ဂေ သိဉ္စာပေသိ။ မာတုဂါမေ ဒိသွာ ကာလကဏ္ဏီ မယာ ဒိဋ္ဌာတိ ခီရောဒကေန မုခံ ဓောဝတိ။ တဝ ဓီတာ သက္ကောန္တီ တေန သဒ္ဓိံ သံဝသတု၊ ဧတမတ္ထံ တဝ ဓီတရံ ကထေဟီတိ အာဟ၊ သောပိ တံ သုတွာ ဂေဟံ ဂန္တွာ ဓီတရံ ပက္ကောသိတွာ ရညာ ဝုတ္တနိယာမေနေဝ တဿာ ကထေသိ။ တာယ တံ သုတွာ သက္ကောန္တီ အဟံ ဥဒ္ဒါဠဗြာဟ္မဏေန သဒ္ဓိံ ဝသိဿာမိ၊ မာ တုမှေ စိန္တေထ၊ ပပဉ္စမ္ပိ မာ ကရောထ၊ ပါတောဝ ဂမိဿာမီတိ ဝုတ္တေ ပိတာ ပနဿာ သာဓူတိ သဟဿဂ္ဃနကစိတ္တကမ္ဗလကဉ္စုကေန ဓီတု သရီရံ ပါရုပါပေတွာ ဝီဏာဒိတုရိယဘဏ္ဍာနိ ဂါဟာပေတွာ ဓီတုယာ သဒ္ဓိံ အဒ္ဓါနမဂ္ဂံ ပဋိပဇ္ဇိ။ ဂစ္ဆန္တော အန္တရာမဂ္ဂေ အညတရသ္မိံ နဂရေ ရညော ဂန္ဓဗ္ဗံ ကရောန္တော ဓီတရံ ပိဋ္ဌိပဿေ နိသီဒါပေတွာ ဂန္ဓဗ္ဗမကာသိ။ အထဿ ပိဋ္ဌိပဿနိသိန္နာ သုဝဏ္ဏတိလကာ နယနကောဋိယာ ဒိဋ္ဌိံ ပါပေန္တီ သရသေန တံ ဩလောကေတွာ ပါရုတကဉ္စုကံ ကိဉ္စိ အပနေတွာ သရီရပ္ပဘံ ပညာပေသိ၊ ရာဇာ ပနဿာ သရီရပ္ပဘံစ ရူပသမ္ပဒံစ ဒိသွာ ကာမာတုရော ဝိဂတသညော သမ္မူဠှော ဟုတွာ မုဟုတ္တေန ပဋိလဒ္ဓဿာသော တဿာ သဿာမိကာဿာမိကဘာဝံ ပုစ္ဆိတွာ စဏ္ဍာလဓီတာတိ သုတွာ ပရိဘဝဘယေန တံ အာနေတု မသက္ကောန္တော ဧဝရူပံ ဝဏ္ဏပေါက္ခရသမ္ပန္နံ ဣတ္ထိရတနံ အလဘန္တဿ မေ ကော အတ္ထော ဇီဝိတေနာတိ သောစန္တော ပရိဒေဝန္တော ကာမမုစ္ဆိတော ကတ္တဗ္ဗာ ကတ္တဗ္ဗံ အဇာနန္တော အသိံ ဂဟေတွာ အတ္တနော သီသံ သယမေဝ ဆိန္ဒိတွာ ကာလ မကာသိ။ ဧဝမေဝ အန္တရာမဂ္ဂေ ပဉ္စရာဇာနော တဿာ ရူပသမ္ပတ္တိမဒမတ္တာ အသိနာ ဆိန္နသီသာ ဇီဝိတက္ခယံ ပါပုဏိံသု။ တထာ ဟိ သတ္တာ ဟိရညသုဝဏ္ဏဒါသိဒါသ ပုတ္တဒါရာဒီသု [ပုတ္တဒါရာဒီဟိ ဣတိသဗ္ဗတ္ထ] ပိယံ နိဿာယ ကာမေန မုစ္ဆိတာ အနယဗျသနံ ပါပုဏန္တီတိ။ ဝုတ္တဉှေတံ ဘဂဝတာ။

တတော သော အနုက္ကမေန ပဉ္စမဓုရနဂရံ ဂန္တွာ အတ္တနော အာဂတဘာဝံ ရညာ ကထာပေတွာ တေန အနုညာတော ဂန္တွာ ရာဇာနံ အဒ္ဒသ။ တဒါ ဥဒ္ဒါဠဗြာဟ္မဏော ရညော အဝိဒူရေ ကမ္ဗလဘဒ္ဒပီဌေ နိသိန္နော ဟောတိ၊ ဂန္ဓဗ္ဗဗြာဟ္မဏောပိ ဓီတုယာ သဒ္ဓိံ ဂန္ဓဗ္ဗံ ကုရုမာနော နိသီဒိ။ တသ္မိံခဏေ ပိတု ပိဋ္ဌိပဿေ နိသိန္နာ သုဝဏ္ဏတိလကာ ဥဒ္ဒါဠဗြာဟ္မဏော ကတမောတိ ပုစ္ဆိတွာ ဧတသ္မိံ ဘဒ္ဒပီဌေ နိသိန္နောံ ဧသောတိ သုတွာ နိလာမလလောစနေဟိ တံ ဩလောကန္တိ ဒသနရံသိနာ သမ္ဘိန္နသုရတ္တာဓရေန မန္ဒဟသိတံ ¶ ကရောန္တီ တံ ဩလောကေတွာ ပါရုတကဉ္စုကံ အပနေတွာ သရီရပ္ပဘံ ဝိဿဇ္ဇေသိ။ တံ ဒိသွာ ဗြာဟ္မဏော ဥမ္မတ္တော သောကေန ပရိဒဍ္ဎဂတ္တော ဥဏှဝါတေန ပူရိတမုခနာသော အဿုနာ ကိလိန္နနေတ္တော ဝိသညီ အဟောသိ။ တတော သော မုဟုတ္တေန လဒ္ဓဿာသော ရောဂီဝိယ ရညော သကာသာ အပသရန္တော အတ္တနော ဂေဟံ ဂန္တွာ သုဟဒေ ပက္ကောသိတွာ တေသံ ဧဝမာဟ။ ဘဝန္တေတ္ထ။

ယော ဂုဏံ ဘာသတေ ယဿ၊ အဂုဏဉ္စ နိဂူဟတိ၊

ပဋိသေဓေတျ [ပဋိသေဓေတိကတ္တဗ္ဗာ ဣတိသဗ္ဗတ္ထ] ကတ္တဗ္ဗာ၊ သော မိတ္တော သောစ ဉာတကော။

သုဝဏ္ဏတိလကာနာမ၊ လလနာ ကာမလာလယာ၊

နီလက္ခိစဏ္ဍကဏ္ဍေဟိ၊ ဝိခဏ္ဍေသိ မနော မမ။

တဿာ မုခမ္ဗုဇေ သတ္တာ၊ မမ နေတ္တမဓုဗ္ဗတာ၊

အပ္ပမ္ပိန သရန္တာမံ၊ တတ္ထေဝါ ဘိရမန္တိ တေ။

သဟေဝ တေဟိ မေ စိတ္တံ၊ ဂတံ ဥလ္လံဃိယုဒ္ဓတော၊

လဇ္ဇာဂမ္ဘီရပရိခံ၊ ဓိတိပါကာရမုဂ္ဂတံ။

သမ္မုယှာမိ ပမုယှာမိ၊ သဗ္ဗာ မုယှန္တိ မေ ဒိသာ၊

တဿ မေ သရဏံ ဟောထ၊ ကရောထ မမ သင်္ဂဟန္တိ။

ယံ တွမာစရိယ ပတ္ထေသိ၊ စဏ္ဍာလီ သာ အသင်္ဂမာ၊

ကိန္နု မီဠှေန သံယောဂေါ၊ စန္ဒနဿ ကဒါ သိယာ။

အဂမ္မဂမနာ ¶ ယာတိ၊ နရာနံ ဒူရတော သိရီ၊

ကိတ္တိစာယု ဗလံ ဗုဒ္ဓိ၊ အယသံစ သ ဂစ္ဆတီတိ။

န ပရိစ္စဇတိ လောကောယံ၊ အမေဇ္ဈေ မဏိမုတ္တမံ၊

ထီရတနံ ယုဝါဏီ စ၊ ဒုက္ကုလာ အပိ ဂါဟိယာတိ။

ဧဝဉ္စ ပန ဝတွာ တဿာ သဿာမိကာဿာမိကဘာဝံ ဉတွာ အာနေထာတိ အာဟ၊ တေ တထာ အကံသု။ တတော ဗြာဟ္မဏော တာယ ဂေဟံ အာဂတကာလတော ပဋ္ဌာယ စတ္တာရော မာသေ ရညော ဥပဋ္ဌာနံ နေဝ အဂမာသိ။ တဿ ပန ဗြဟ္မဏဿ သန္တိကေ ပဉ္စသတရာဇကုမာရာ နာနာဝိဓာနိ သိပ္ပာနိ ဥဂ္ဂဏှန္တိ။ တေ တံ ကာရဏံ ဉတွာ သုဝဏ္ဏတိလကာယ ဝိဇ္ဇမာနာယ အမှာကံ သိပ္ပုဂ္ဂဟဏဿ အန္တရာယော ဘဝိဿတိ၊ ယေန ကေနစိ ဥပါယေန ဧတံ မာရေတုံ ဝဋ္ဋတီတိ၊ စိန္တေတွာ တေ ဟတ္ထာ စရိယံ ပက္ကောသိတွာ လဉ္ဇံ ဒတွာ ဧဝမာဟံသု၊ ဟတ္ထိံ သုရာယ မတ္တံ ကတွာ သုဝဏ္ဏတိလကံ မာရေဟီတိ။ တတော တေ သဗ္ဗေ ရာဇင်္ဂဏေ သန္နိပတိတွာ ဒူတံ ပါဟေသုံ၊ အာစရိယံ ဒဋ္ဌုကာမမှာတိ။ တတော ဗြာဟ္မဏေန အာဂန္တွာ နိသိန္နေန ပဋိသန္ထာရံ ကတွာ အာစရိယ အာစရိယာနိံ ပဿိတုကာမမှာတိ အာဟံသု။ အထ သော သုဝဏ္ဏတိလကံ ဂဟေတွာ အာဂစ္ဆထာတိ မနုဿေ ပေသေသိ။ တေ တထာ ကရိံသု၊ အထ တဿာ ဝီထိမဇ္ဈံ သမ္ပတ္တကာလေ ဟတ္ထိံ ဝိဿဇ္ဇာပေသုံ။ သော သောဏ္ဍာယ ဘူမိယံ ပဟရန္တော [ပဟရန္တောဥပဓာဝိတွာ ဣတိကတ္ထစိ] ဂစ္ဆန္တော ဥပဓာဝိတွာ သောဏ္ဍေန တံ ဥက္ခိပိတွာ ကုမ္ဘေ နိသီဒါပေသိ။ တတော ရာဇာနော တထာ တံ မာရာပေတု မသက္ကောန္တာ ပုန ဒိဝသေ မနုဿေ ပယောဇေတွာ ရတ္တိယံ မာရာပေသုံ။ ဗြာဟ္မဏောပိ ဧဝရူပံ ဣတ္ထိံ အလသိတွာ ဇီဝနတော မတမေဝ [မတံမေသေယျော ဣတိကတ္ထစိ] သေယျောတိ သောစန္တော ပရိဒေဝန္တော ရာဇင်္ဂဏေ ဒါရုစိတကံ ကာရာပေတွာ အဂ္ဂိံပဝိသိတွာ ¶ မတောတိ။ ဧဝံ မာတုဂါမဝသင်္ဂတာ မဟန္တံ အနယဗျသနဉ္စ မရဏဉ္စ ပါပုဏန္တီတိ။ ဝုတ္တဉှေတံ ဘဂဝတာ။

မာယာဝေသာ [မာယာစေသာ ဣတိကတ္ထစိ] မရီစီဝ၊

ဓီသမ္ပယုတ္တံ [ဓိတိသမ္ပယုတ္တံ ဣတိကတ္ထစိ] ကုသလံ ကရောန္တာ၊

၃၃။ ကပဏာယ ဝတ္ထုမှိ အယမာနုပုဗ္ဗီကထာ

ဘဂဝတိ ပရိနိဗ္ဗုတေ ဇမ္ဗုဒီပေ တတ္ထ တတ္ထ ဘိက္ခုဘိက္ခုဏိယော စ ဥပါသကဥပါသိကာယော စ ဇယမဟာဗောဓိံ ဝန္ဒိဿာမီတိ ယေဘုယျေန ဂန္တွာ ဝန္ဒန္တိ။ အထာ ပရဘာဂေ ဗဟူ ဘိက္ခူ သင်္ဂမ္မ မဟာဗောဓိံ ဝန္ဒနတ္ထာယ ဂစ္ဆန္တာ အညတရသ္မိံ ဂါမကေ ဘိက္ခာယ စရိတွာ အာသနသာလံ ဂန္တွာ ကတဘတ္တကိစ္စာ ထောကံ ဝိဿမိံသု၊ တဒါ တတ္ထ ဧကာ ကပဏာ ဒုဂ္ဂတိတ္ထီ တထာ နိသိန္နဘိက္ခူ ဒိသွာ ဥပသင်္ကမိတွာ ပဉ္စပတိဋ္ဌိတေန ဝန္ဒိတွာ ဧကမန္တေ ဌိတာ အယျာ ကုဟိံ ဂစ္ဆန္တီတိ ပုစ္ဆိ။ ဘိက္ခူ တံ သုတွာ ဇယမဟာဗောဓိဿ အာနုဘာဝဉ္စ တံ ဝန္ဒနတ္ထာယ အတ္တာနံ ဂမနဉ္စ ကထေန္တာ ဧဝမာဟံသု။

ယတ္ထာသီနော ¶ ဇိနော ဇေသိ၊ သသေနံ မကရဒ္ဓဇံ၊

ဟန္တွာ ကိလေသသေနဉ္စ၊ ဗုဒ္ဓါ အာသိ နိရုတ္တရော။

ယံ ပူဇေသိ မဟာဝီရော၊ ဌိတော ပဒ မကောပယံ၊

သတ္တရတ္တိန္ဒိဝံ နေတ္တ၊ နီလနီရဇရံသိနာ။

သုရာသုရနရာဒီနံ၊ နေတ္တာလိ ပါဠိပါတနာ၊

မေစကာကာရပတ္တေဟိ၊ သိခဏ္ဍီဝိယ ဘာတိ ယော။

သုရပါဒပေါဝ သတ္တာနံ၊ ယံ တိဋ္ဌတိ မဟီတလေ၊

ဣဟ လောကေ ပရတ္တေ စ၊ ဒဒန္တော ဣစ္ဆိတိစ္ဆိတံ။

ယဿ ပုရာဏပဏ္ဏမ္ပိ၊ ပတိတံ ယော နရော ဣဓ၊

ပူဇေတိ တဿ သော ဒေတိ၊ ဘဝဘောဂံ မဟီရုဟော။

ဂန္ဓမာလေဟိ သလိလေဟိ၊ ယမုပါသတိ သဒါ နရော၊

အဇ္ဈတ္တဉ္စ ဗဟိဒ္ဓါ စ၊ ဒုရိတံ သော နိဟညတိ။

တံ သုတွာ ဥဒဂ္ဂါ သောမနဿဇာတာ ဘိက္ခူနံ ဧဝမာဟ။ အဟံ ဘန္တေ ပရကုလေ ဘတိယာ ကမ္မံ ကရောန္တီ ဒုက္ခေန ကသိရေန ဇီဝိကံ ကပ္ပေမိ။ သွာတနာယ မေ တဏ္ဍုလနာလိပိ [ဘဏ္ဍုလနာမ္ပ ဣတိသဗ္ဗတ္ထ] နတ္ထိ၊ ပဂေဝ အညံ ဓနံ၊ ဣမံ ဝိနာ အညံ သာဋကမ္ပိ နတ္ထိ၊ ကသ္မာ ပုဗ္ဗေ အကတပုညတ္တာ၊ တသ္မာ ဣမံ ဘန္တေ သာဋကံ မမာနုဂ္ဂဟာယ ဗောဓိမှိ ဓဇံ ဗန္ဓထာတိ ယာစိတွာ သာဋကံ ဓောဝိတွာ တေသံ အဒါသိ။ ဘိက္ခူပိ တဿာနုဂ္ဂဟာယ တံ ဂဟေတွာ အဂမံသု။ သာ သာဋကံ ဒတွာ ပီတိပါမောဇ္ဇမာနသာ ဂေဟံ ဂန္တွာ တဒဟေဝ ရတ္တိယာ မဇ္ဈိမယာမေ သတ္ထကဝါတေန ဥပဟတာ ကာလံ ကတွာ တေသံ ¶ ဘိက္ခူနံ ဂမနမဂ္ဂေ ဧကသ္မိံ ရမဏီယေ ဝနသဏ္ဍေ ဘုမ္မဒေဝတာ ဟုတွာ နိဗ္ဗတ္တီ၊ အထဿာ ပုညာနုဘာဝေန တိယောဇနိကေ ဌာနေ ဒိဗ္ဗကပ္ပရုက္ခာ ပါတုရဟံသု၊ တတ္တ တတ္တ နာနာဝိရာဂဓဇပတာကာ ဩလမ္ဗန္တိ။ ဒေဝပုတ္တာ စ ဒေဝဓီတရော စ သဗ္ဗာဘရဏဝိဘူသိတာ တထေဝ ဓဇပတာကာဒယော ဂဟေတွာ ကီဠန္တိ။ နစ္စဂီတာဒိနေကာနိ အစ္ဆရိယာနိ ပယောဇေန္တိ။ အထ ဒုတိယဒိဝသေ တေပိ ဘိက္ခူ ဗောဓိမဏ္ဍလံ ဂစ္ဆန္တာ သာယဏှေ တံ ဌာနံ ပတွာ အဇ္ဇ ဣမသ္မိံ ဝနသဏ္ဍေ ဝသိတွာ ဂမိဿာမာတိ တတ္ထ ဝါသံ ဥပဂမိံသု၊ တတော တေ ရတ္တိဘာဂေ နာနာဝဏ္ဏဓဇေ စ ဒေဝတာဟိ ပယောဇိယမာနာ ဂီတဝါဒိတာဒယော စ တိယောဇနဋ္ဌာနေ ကပ္ပရုက္ခာနိ စ ဣဒံ သဗ္ဗံ ဒေဝိဿရိယံ တဿာနုဘာဝေန နိဗ္ဗတ္တဘာဝံ ဒိသွာ ဝိမှိတမာနသာ ဒေဝဓီတရံ အာမန္တေတွာ တွံ ကေန ကမ္မေန ဣဓ နိဗ္ဗတ္တာတိ ပုစ္ဆိံသု။ သာ ဘိက္ခူ ဝန္ဒိတွာ အဉ္ဇလိံ ပဂ္ဂယှ ဌိတာ ဘန္တေ မံ န သဉ္ဇာနိတ္ထာတိ အာဟ။ ဘိက္ခူဟိ န မယံ သဉ္ဇာနာမ ဘဂိနီတိ ဝုတ္တေ သာ အတ္တနော သဘာဝံ ကထေန္တီ ဧဝမာဟ။

ဟီယျော အာသနသာလာယ၊ နိသီဒိတ္ထ သမာဂတာ၊

တုမှကံ သန္တိကံ ဂမ္မ၊ ယာ ဝရာကီဘိဝါဒယိ။

ယာ ဗောဓိံ ပူဇနတ္ထာယ၊ ဝတ္ထကံ ပဋိပါဒယိ၊

သာဟံ ဟီယျော စုတာ အာသိံ၊ ရတ္တိယံ ဗျာဓိပီဠိတာ။

နာနာသမ္ပတ္တိသံယုတ္တာ၊ နာနာဘူသနဘူသိတာ၊

ဝိမာနေ ရတနာ ကိဏ္ဏေ၊ ဇာတာဟံ ဧတ္ထ ကာနနေ။

ဟီယျော ပဿိတ္ထ မေ ဂတ္တံ၊ ရဇောဇလ္လေဟိ သံကုလံ၊

အဇ္ဇ ပဿထ မေ ဂတ္တံ၊ ဝဏ္ဏဝန္တံ ပဘဿရံ။

ဟီယျော ပဿိတ္ထ မေ ဘန္တေ၊ နိဝတ္ထံ မလိနမ္ဗရံ၊

အဇ္ဇ ပဿထ မေ ဘန္တေ၊ ဒိဗ္ဗမမ္ဗရမုတ္တမံ။

ဝိကိဏ္ဏဖလိတဂ္ဂေဟိ ¶ ၊ ကေသေဟိ ဝိရလာ ကုလံ၊

ဦကာဂူထပဋိက္ကူလံ၊ ဟီယျော အာသိသိရံ မမ။

အဇ္ဇ တံ ပရိဝတ္တိတွာ၊ မမ ပုညာနုဘာဝတော၊

သုနီလမုဒုဓမ္မိလ္လံ၊ ကုသုမာ ဘရဏဘူသိတံ။

ပုရာ မေ သကသီသေန၊ ဝဟိတံ ဒါရူ ဒကာဒိကံ၊

ပုညေနာဟံ အဇ္ဇ မာလာ၊ ဘာရံ သီသေ သမုဗ္ဗဟေ။

ဓဇတ္ထာယ မယာ ဟီယျော၊ ပဒိန္နံ ထူလသာဋကံ၊

အဇ္ဇ နိဗ္ဗတ္တိ မေ ဘောန္တော၊ မဟန္တံ ဒိဗ္ဗသမ္ပဒံ။

ဇာနမာနေန ကတ္တဗ္ဗံ၊ ဒါနာဒီသု မဟပ္ဖလံ၊

ဒေဝလောကေ မနုဿေသု၊ သုခဒံ ဒါန မုတ္တမန္တိ။

တံ သုတွာ သဗ္ဗေ ဘိက္ခူ အစ္ဆရိယဗ္ဘုတစိတ္တာ အဟေသုံ။ သာ ဒေဝတာ တဿာ ရတ္တိယာ အစ္စယေန ဘိက္ခူ နိမန္တေတွာ ဒိဗ္ဗေဟိ ခဇ္ဇဘောဇ္ဇေဟိ သဟတ္ထာ သန္တပ္ပေတွာ တေဟိ သဒ္ဓိံ အာဂစ္ဆန္တီ အန္တရာမဂ္ဂေ ဒါနံ ဒဒမာနာ မဟာဗောဓိံ ဂန္တွာ သဗ္ဗေဟိ ဓဇပတာကာ ဒီဟိ စ နာနာဝိဓဝဏ္ဏဂန္ဓသမ္ပန္နပုပ္ဖေဟိ စ ဒီပဓူပေဟိ စ ဗောဓိံ ပူဇေတွာ ဘိက္ခူနံ စီဝရတ္ထာယ ဒိဗ္ဗဝတ္ထာနိ ဒတွာ အာဂမ္မ တသ္မိံယေဝ ဝနသဏ္ဍေ ဝသန္တီ နာနာဝိဓာနိ ပုညာနိ ကတွာ တာဝတိံသဘဝနေ နိဗ္ဗတ္တိ။ ဘိက္ခူပိ တံ အစ္ဆရိယံ တတ္ထ တတ္ထ ပကာသေန္တာ ဗဟူဇနေ ပုညကမ္မေ နိယောဇေသုံတိ။

ပူဇေတွ ဒိဗ္ဗဝိဘဝံ အလဘီတိ ဉတွာ၊

ပူဇာပရာ ဘဝထ ဝတ္ထုသု တီသု သမ္မာတိ။

၃၄။ ဣန္ဒဂုတ္တတ္ထေရဿ ဝတ္ထုမှိ အယမာနုပုဗ္ဗီကထာ

အမှာကံ ဘဂဝတော ပရိနိဗ္ဗာဏတော ဩရဘာဂေ ဇမ္ဗုဒီပေ ကိရ ပါဋလိပုတ္တံ နာမ နဂရံ အဟောသိ။ တတ္ထ ဓမ္မာသောကော နာမ မဟိဒ္ဓိကော မဟာနုဘာဝေါ အာဏာစက္ကဝတ္တိ ရာဇာ ရဇ္ဇံ ကာရေတိ။ ဥဒ္ဓံ အာကာသတော ဟေဋ္ဌာ ပထဝိယာ ယောဇနပ္ပမာဏေ သကလဇမ္ဗူဒီပေ တဿ အာဏာ ပဝတ္တတိ၊ တဒါ သကလဇမ္ဗုဒီပဝါသိနော စ စတုရာသီတိ နဂရသဟဿေ ရာဇာနော စ အတ္တနော အတ္တနော ဗလဝါဟနေ ဂဟေတွာ အာဂမ္မ ဓမ္မာသောကမဟာရညော ဥပဋ္ဌာနံ ကရောန္တိ။ တသ္မိံ သမယေ ဒေဝပုတ္တနဂရေ ဒေဝပုတ္တော နာမ မဟာရာဇာ အတ္တနော ဗလဝါဟနံ ဂဟေတွာ ရညော ဥပဋ္ဌာနံ အဂမာသိ။ ဓမ္မာသောကော ဒေဝပုတ္တမဟာရာဇာနံ ဒိသွာ မဓုရပဋိသန္ထာရံ ကတွာ တုမှာကံ ရဋ္ဌေ ဗဟုဿုတာ အာဂတာဂမာ မဟာဂုဏဝန္တာ အယျာ အတ္ထီတိ ပုစ္ဆိ။ တံ သုတွာ ဒေဝပုတ္တရာဇာ အတ္ထိ ဒေဝ တသ္မိံ နဂရေ သီဟကုမ္ဘကံ နာမ မဟာဝိဟာရံ။ တတ္ထ အနေကသဟဿဘိက္ခူ ဝိဟရန္တိ သီလဝန္တာ အပ္ပိစ္ဆာ သန္တုဋ္ဌာ ဝိဝေကကာမိနော။ တေသု သာဋ္ဌကထာတိပိဋကဓရော ဣန္ဒဂုတ္တတ္ထေရော နာမ တေသံ ပါမောက္ခော အဟောသိ။ သော အနေကပရိယာယေန သနရာမရာနံ ဘိက္ခူနံ ဓမ္မံဝဏ္ဏေတိ။ ဂုဏဝါ အတ္တနော ဂုဏံ နိဿာယ လောကေ ပါကဋောတိ။ တံ သုတွာ ရာဇာ တုဋ္ဌမာနသော ထေရံ ပဿိတုကာမော ဟုတွာ သမ္မ တွမေဝ ဂန္တွာ ထေရံ ယာစိတွာ ဣဓာ နေဟီတိ အာဟ။ တံ သုတွာ ဒေဝပုတ္တရာဇာ အတ္တနော ဟတ္ထဿဗလဝါဟနာ ဒိမဟာ သေနင်္ဂပရိဝုတော ဣန္ဒဂုတ္တတ္ထေရဿ သန္တိကံ ဂန္တွာ ဝန္ဒိတွာ အယျ အယျံ ဓမ္မာသောကမဟာရာဇာ ဒဋ္ဌုကာမောတိ အာဟ။ ထေရေန သာဓူတိ သမ္ပဋိစ္ဆိတေ ရာဇာ ထေရေန သမ္ပဋိစ္ဆိတဘာဝံ ဓမ္မာသောကမဟာရာဇိနော ပေသေသိ။ တတော ဓမ္မာသောကမဟာရာဇာ သောမနဿပ္ပတ္တော အတ္တနော အာဏာပဝတ္တိတဋ္ဌာနေ ရာဇူနံ သာသနံ ပေသေသိ။ သဗ္ဗေဝ ထေရာဂမနမဂ္ဂံ ¶ အလင်္ကရောန္တူတိ။ အထ တေ ရာဇာနော တုဋ္ဌပဟဋ္ဌာ အတ္တနော အတ္တနော နဂရေ ဘေရိံ စရာပေတွာ ဒေဝပုတ္တနဂရတော ယာဝ ပါဋလိပုတ္တနဂရံ ဧတ္ထန္တရေ ပဉ္စပဏ္ဏာသယောဇနိကံ မဂ္ဂံ ဝိသမံ သမံ ကရောန္တော ဒေဝတာနံ ဒိဗ္ဗဝီထိမိဝ အလင်္ကရိတွာ ဓမ္မာသောကမဟာနရိန္ဒဿ ဧဝံ သာသနံ ပေသေသုံ။ ဘဝန္တေတ္ထ။

ဣန္ဒဂုတ္တမဟာထေရ၊ သာမိနော ဂမနာယ နော၊

မဂ္ဂံ အလင်္ကရောန္တူတိ၊ မဟာရာဇေန ပေသိတံ။

တတော တေ အပနေတွာန၊ ပါသာဏကဏ္ဋကာဒိကံ၊

ဝိသမံ သမံ ကရိတွာန၊ သမ္မဇ္ဇိတွာန သာဓုကံ။

ဓောတမုတ္တာ သမာဘာသာ၊ ဩကိရိတွာန ဝါလုကာ၊

ဥဿာပိတာ တတ္ထ တတ္ထ၊ ဒုဿတောရဏပန္တိယော။

ကလဓောတဟေမရမ္ဘာဒိ၊ နာနာတောရဏပန္တိယော၊

တထာ ပုပ္ဖမယာ နေက၊ တောရဏူပရိတောရဏာ။

တေသု တေသုစ ဌာနေသု၊ သင်္ခတာ ကုသုမဂ္ဃိကာ၊

တထေဝ ဂန္ဓတေလေဟိ၊ ဒီပိတာ ဒီပပန္တိယော။

ပဒုမုပ္ပလသန္နီရ၊ ပုပ္ဖပလ္လဝ လင်္ကတာ၊

ဌပိတာ ဃဋမာလာယော၊ ပုဏ္ဏာ သောဂန္ဓဝါရိဟိ။

နိလပီတာ ဒိသမ္ဘိန္န၊ ပတာကာဟိ ဓဇေဟိ စ၊

မဂ္ဂဿ ဥဘတော ပဿေ၊ ဝနမာသိ သမာကုလံ။

ကေတဝေါ ဥဂ္ဂတာ တတ္ထ၊ မန္ဒမန္ဒသမီရဏာ၊

အဝှယန္တာဝ သောဘန္တိ၊ ဗြဟ္မောရဂသုရာဒယော။

နာဂစမ္ပပုန္နာဂ၊ ကေတကီဝကုလာဒိဟိ၊

ပဒုမုပ္ပလာ ဒိဇလဇေဟိ၊ မာလတီ ကုသုမာ ဒိဟိ။

မာလာဒါမေဟိ ¶ နေကေဟိ၊ မဂ္ဂမာသိ ဝိစိတ္တကံ၊

ပတ္ထရိတွာ ပါဒပဋေ၊ သိတ္တသမ္မတ္တဘူမိယံ။

လာဇာဒိပဉ္စပုပ္ဖာနိ၊ ဝိကိရိံသု မနောရမံ၊

အလင်္ကရိတွာ ဟတ္တဿာ၊ ကုသုမာ ဘရဏာဒိဟိ။

မဂ္ဂါလင်္ကရဏတ္ထာယ၊ ဌပိတာသုံ တတော တတော၊

တေသု တေသု စ ဌာနေသု၊ ဘေရိမဏ္ဍလမဇ္ဈဂါ။

နစ္စန္တိ စာတုရာ နာရီ၊ ရသဘာဝနိရန္တရာ၊

ကံသဝံသာဒိပဂ္ဂယှ၊ ဝဇ္ဇေန္တာနေကတန္တိယော။

ဂါယန္တိ မဓုရံ ဂီတံ၊ ဂါယန္တေတ္ထ လယာနွိတံ၊

မဂ္ဂေါသော သာဓုဝါဒေဟိ၊ ဘေရိတန္တိနဒေဟိစ။

ကရီနံ ကောဉ္စနာဒေဟိ၊ ဟယာနံ ဟေသိတေဟိ စ၊

နေကဝိဋင်္ကသင်္ဃေဟိ၊ သော ကရီဟိ သမာကုလော။

မဂ္ဂဿ ဥဘတော ပဿေ၊ ဒေဝကညူပမာ သုဘာ၊

မာလာကလာပေ ပဂ္ဂယှ၊ တိဋ္ဌန္တိ တုဋ္ဌမာနသာ။

တထာ ပုဏ္ဏဃဋေ ဂယှ၊ ပဒုမုပ္ပလသံကုလေ၊

အဋ္ဌမင်္ဂလမုဂ္ဂယှ၊ တိဋ္ဌန္တိ ပမဒါ တဟိံ။

သီတလူဒကသမ္ပန္န၊ ပပါဟိ သမလင်္ကတာ၊

သိနာနတ္ထံ ခတာ အာသုံ၊ ပေါက္ခရညော တဟိံတဟိံ။

တဟိံတဟိံကတာ အာသုံ၊ ဒါနသာလာ မနောရမာ၊

နိစိတာသုမနေကာနိ၊ ဒါနောပကရဏာ တဟိံ။

ဧဝံ နေကဝိဓာ ပူဇာ၊ အမှေဟိ ပဋိပါဒိတာ၊

ဌပေတွာန မဟာဂင်္ဂံ၊ တံ ဇာနာတု မဟီပတီတိ။

တံ သုတွာ အသောကမဟာရာဇာ ဂင်္ဂံ အလင်္ကရောထာတိ သောဠသယက္ခေ ပေသေသိ၊ တေ သပရိဝါရာ တတ္ထ ဂန္တွာ အတ္တနော ¶ အာနုဘာဝေန ဂင်္ဂါယ အန္တော တိဂါဝုတဋ္ဌာနေ ဥဒုက္ခလပါသာဏေ ဌပေသုံ။ ဌပေတွာ ထမ္ဘေ ဥဿာပေတွာ တုလာသံဃာဋေ ဒတွာ ဟိမဝန္တတော ရတ္တစန္ဒနသာရေ အာဟရိတွာ ပဒရေ သန္ထရိတွာ အနေကေဟိ ပူဇာဝိဓာနေဟိ အလင်္ကရိတွာ ရညော ဧဝံ သာသနံ ပေသေသုံ။ ဘဝန္တေတ္ထ။

ယမတ္ထာယ မယံ သဗ္ဗေ၊ မဟာရာဇေန ပေသိတာ၊

အမှေဟိ ဒါနိ တံ သဗ္ဗံ၊ ကတမေဝ သုဏောထ တံ။

ဂါဝုတတ္တယဂမ္ဘီရံ၊ ဂင်္ဂံ ယောဇနဝိတ္ထတံ၊

ထမ္ဘေ ပတိဋ္ဌပေတွာန၊ အနဂ္ဃံ ရတ္တစန္ဒနံ။

ဟိမဝန္တတော ဟရိတွာန၊ သေတုံ တတ္ထ သုမာပိတံ၊

တောရဏာ စ ဥဘော ပဿေ၊ ရတနေဟိ သုနိမ္မိတာ။

ပုဏ္ဏကုမ္ဘဒ္ဓဇာ စေဝ၊ ပဒီပါဝလိယော တထာ၊

ဥဘော ပဿေသု ရတနာနိ၊ မာပေတွာလမ္ဗနာနိစ။

သုဝဏ္ဏမဏိမုတ္တာဒိ၊ ဒါမေဟိ သမလင်္ကတာ၊

ဝါလုကတ္ထာယ ဩကိဏ္ဏာ၊ ဓောတမုတ္တာ ပဘဿရာ။

တေသု တေသု စ ဌာနေသု၊ ဌပိတာသုံ မဟာမဏီ၊

နာနာရာဂဝိတာနေဟိ၊ သောဘိတာ သေတုနော ပရိ။

ဩလမ္ဗိတာသုံ တတ္ထေဝ၊ ဒိဗ္ဗာဒိကုသုမာဒယော၊

နိဋ္ဌိတံ ဣဓ ကာတဗ္ဗ၊ ယုတ္တံ ပူဇာဝိဓိံတု နော၊

ဒေဝေါတံ ပဋိဇာနာတု၊ ဣတိ ဝတွာန ပေသယုံတိ။

တမ္ပိ သုတွာ အသောကော မဟာရာဇာ တုမှေဝ ထေရံ ဣဓာနေထာတိ တေသံယေဝ သာသနံ ပဋိပေသေသိ၊ တေ သာဓူတိ ဣန္ဒဂုတ္တတ္ထေရဿ သန္တိကံ ဂန္တွာ ဝန္ဒိတွာ ဘန္တေ ပါဋလိပုတ္တနဂရဿ ဂမနာယ ကာလောတိ အာဟံသု၊ တတော ထေရော သဋ္ဌိသဟဿမတ္တေဟိ ¶ ဘိက္ခုသင်္ဃေဟိ ပရိဝုတော ပဉ္စပဏ္ဏာသယောဇနမဂ္ဂံ ပဋိပဇ္ဇိ။ အထာပရံ ဒေဝပုတ္တနဂရဝါသိနော အနေကဝိဓမာလာဂန္ဓဝါသစုဏ္ဏဒ္ဓဇပတာကာဒီဟိ အနေကေဟိ တာလာဝစရေဟိ နစ္စဂီတဝါဒိတေဟိ ပူဇေတွာ အဂမံသု။ အထ ထေရော မဟန္တေန ပူဇာဝိဓာနေန ဇမ္ဗုဒီပဝါသီဟိ ပူဇိယမာနော အနုက္ကမေန စန္ဒဘာဂါယ ဂင်္ဂါယ သေတုံ ပတွာ တတ္ထ မဟန္တံ ပူဇာဝိဓာနံ ဩလောကေန္တော ဧဝံ စိန္တေသိ၊ ဧဝံ ဥဠာရံ ပူဇာဝိဓာနံ ဣဒါနိ ဇမ္ဗုဒီပေ နာညဿ ဟောတိ၊ မယှမေဝေတံ ကတံ။ အဟမေဝေတ္တ ဥတ္တမော အပ္ပဋိမောတိ ဧဝံ သေယျဿ သေယျောဟမသ္မီတိ မာနံ ဥပ္ပာဒေတွာ အဋ္ဌာသိ။ တသ္မိံ ခဏေ ဧကော ခီဏာသဝတ္ထေရော တံ မာနေနုပတ္ထဒ္ဓစေတသာ ဌိတံ ဒိဗ္ဗစက္ခုနာ ဒိသွာ ဥပသင်္ကမိတွာ ဝန္ဒိတွာ ထေရဿ ဩဝဒန္တော ဧဝမာဟ။ တသ္မာ။

မာ မာနဿ ဝသီ ဟောထ၊ မာနော ဘန္တေ ဝသံဂတံ [မာနံဘန္တေဝသီကတံ ဣတိသဗ္ဗတ္ထ]၊

အနတ္ထဒေါ သဒါ ဟောတိ၊ ပါတေတွာန ဘဝါ ဝဋေ။

မာနော ပလာလိတော သတ္တော၊ တဏှာပဋိဃသင်္ဂတော၊

မက္ကဋောရဂသောဏာဒိ၊ ဟုတွာ ဇာယတိ ဇာတိသု။

မာ မာနံ သာမိ ပူရေဟိ၊ အတ္တာနံ ပရိသောဓယ၊

အပရိသုဒ္ဓါ သယော ဘိက္ခု၊ ဒါယကံ န ပရိတောသတိ။

ဒဒန္တာနံ သရန္တာနံ၊ ပူဇေန္တာနံ သစေ တုဝံ၊

မဟပ္ဖလံ မဟာဘူတိံ၊ ကာမတ္ထ ဟောထ နိဗ္ဗဏာတိ [နိမ္မနာ ဣတိကတ္တစိ]။

တံ သုတွာ ထေရော သံသာရေ နိဗ္ဗိန္ဒော တတ္ထေဝ ဌိတော တိလက္ခဏံ ပဋ္ဌပေတွာ ကရဇကာယံ သမ္မသန္တော သဟပဋိ သမ္ဘိဒါဟိ အရဟတ္တံ ပတွာဝ နိက္ခမိ။ တတော ဓမ္မာသောကမဟာရာဇာ ဗလဝါဟနပရိဝုတော မဟန္တေန ပူဇာဝိဓာနေန ပဋိမဂ္ဂံ အာဂမ္မ ဝန္ဒိတွာ ¶ တတော ဒိဂုဏံ ပူဇာသက္ကာရံ ကုရုမာနော မဟာဘိက္ခုသင်္ဃေန သဒ္ဓိံ ထေရံ အတ္တနော နဂရံ နေတွာ တဿ ဓမ္မကထံ သုတွာ ပသန္နမာနသော ပဉ္စသီလေ ပတိဋ္ဌာယ မဟန္တံ ဝိဟာရံ ကာရေတွာ ထေရေန သဟာဂတာနံ သဋ္ဌိသဟဿာနံ ဘိက္ခူနံ စတုပစ္စယေဟိ ဥပဋ္ဌာန မကာသိ၊ အထ ထေရော သာဋ္ဌကထံ ပိဋကတ္တယံ ပကာသေန္တော တသ္မိံ စိရံ ဝသိတွာ တတ္ထေဝ ပရိနိဗ္ဗာယိ။ တတော ရာဇာ သပရိသော တဿ သရီရနိက္ခေပံ ကာရေတွာ ဓာတုယော ဂဟေတွာ မဟန္တံ စေတိယံ ကာရာပေသီတိ။

ဣန္ဒဂုတ္တတ္ထေရဿ ဝတ္ထုံ စတုတ္ထံ။

၃၅။ သာခမာလပူဇိကာယ ဝတ္ထုမှိ အယမာနုပုဗ္ဗီကထာ

အမှာကံ ဘဂဝါ ဒသပါရမိယော ပူရေတွာ အနုက္ကမေန တုသိတဘဝနေ နိဗ္ဗတ္တော ဒေဝေဟိ အာရာဓိတော သက္ကရာဇကုလေ ပဋိသန္ဓိံ ဂဟေတွာ မာတုကုစ္ဆိတော နိက္ခန္တော အနုက္ကမေန ပရမာဘိသမ္ဗောဓိံ ပတွာ တတော ပဋ္ဌာယ ပဉ္စစတ္တာလီသသံဝစ္ဆရာနိ ဌတွာ စတုရာသီတိဓမ္မက္ခန္ဓသဟဿာနိ ဒေသေတွာ ဂဏနပထမတီတေ သတ္တေ ဘဝကန္တာရတော သန္တာရေတွာ သဗ္ဗဗုဒ္ဓကိစ္စာနိ နိဋ္ဌာပေတွာ ကုသိနာရာယံ ဥပဝတ္တနေ မလ္လာနံ သာလဝနေ ယမကသာလာန မန္တရေ ဥတ္တရသီသကံ ပညတ္တေ မဉ္စကေ ဝေသာခပုဏ္ဏဒိဝသေ ဒက္ခိဏေန ပဿေန သတော သမ္ပဇာနော အနုဋ္ဌာနသေယျာယ နိပန္နော ပစ္ဆိမယာမေ ဘိက္ခူ ဩဝဒိတွာ ဗလဝပစ္စူ-သ ¶ သမယေ မဟာပထဝိံကမ္ပေန္တော အနုပါဒိသေသာယ နိဗ္ဗာဏဓာတုယာ ပရိနိဗ္ဗာယိ၊ နိဗ္ဗုတေ ပန ဘဂဝတိ လောကနာထေ အာနန္ဒတ္ထေရော မလ္လရာဇူနံ ဧတံ ပဝတ္တိံ အာရောစေသိ။ တတော ကောသိနာရကာ စ ဒေဝဗြဟ္မာဒယော စ သန္နိပတိတွာ နစ္စဂီတဝါဒိတေဟိ မာလာဂန္ဓာဒီဟိ စ သက္ကရောန္တာ ဂရုကရောန္တာ မာနေန္တာ ပူဇေန္တာ စေလဝိတာနာဒယော ကရောန္တာ ဘဂဝတော သရီရံ နဂရမဇ္ဈေ ယတ္ထ မကုဋဗန္ဓနံ နာမ မလ္လာနံ စေတိယံ၊ တတ္ထ နေတွာ စက္ကဝတ္တိဿ သရီရံ ဝိယ အဟတေန ဝတ္ထေန ဝေဌေတွာ တတော ဝိဟတေန ကပ္ပာသေန ဝေဌေတွာတိ ဧဝံ ပဉ္စဒုဿယုဂသတေဟိ ဝေဌေတွာ အာယသာယ တေလဒေါဏိယာ ပက္ခိပိတွာ အညိဿာယ အာယသာယ ဒေါဏိယာ ပဋိကုဇ္ဇိတွာ သဗ္ဗဂန္ဓာနံ စိတကံ ကရိတွာ ဘဂဝတော သရီရံ စိတကံ အာရောပေသုံ။ အထ မဟာကဿပတ္ထေရေန ဘဂဝတော ပါဒေ သိရသာ ဝန္ဒိတေ ဒေဝတာနုဘာဝေန စိတကော သမန္တာ ဧကပ္ပဟာရေနေဝ ပဇ္ဇလိ။ ဘဂဝတော ပန သရီရေ ဒဍ္ဎေ သုမနမကုဠသဒိသာ ဓာတုယော အဝသိဿိံသု။ တသ္မိံ ကိရ သမယေ ကောသလရညော ဇနပဒေ အညတရာ ဂါမဝါသိကာ ဣတ္ထီ ဘဂဝတိ ပရိနိဗ္ဗုတေ သာဓုကီဠှံ အာဂစ္ဆမာနာ အန္တရာမဂ္ဂေ အတ္တနော သရီရေ ဥပ္ပန္နဝါတရောဂေန ဥပဒ္ဒုတာ သာဓုကီဠှံ သမ္ပာပုဏိတုံ အသက္ကောန္တီ သတ္ထု အာဠာဟနံ ဂန္တွာ ဘဂဝတော ဓာတုသရီရေ တီဏိ သာခပုပ္ဖာနိ ပူဇေတွာ ပသန္နမာနသာ ပဉ္စပတိဋ္ဌိတေန ဝန္ဒိတွာ ဂတာ တာယ ဧဝ ရတ္တိယာ မဇ္ဈိမယာမေ ကာလံ ကတွာ တာဝတိံသဘဝနေ တိံသယောဇနိကေ ကနကဝိမာနေ နိဗ္ဗတ္တိ။ တဿာ ပုဗ္ဗကမ္မပကာသနတ္ထံ စက္ကမတ္တာနိ သာခပုပ္ဖာနိ တတ္တ တတ္ထ ဩလမ္ဗန္တိ။ တေဟေဝ သဗ္ဗံ ဝိမာနံ ဧကောဘာသီ [ဧကောဘာသိ တတော ဣတိသဗ္ဗတ္ထ] အဟောသိ။ တတော သုဂန္ဓကရဏ္ဍကံ ဝိယ စ အဟောသိ၊ သာ ပန အတ္တနော သောဘဂ္ဂပ္ပတ္တံ အတ္တဘာဝဉ္စ ဝိမာနသမ္ပဒဉ္စ ပရိဝါရသမ္ပတ္တိယော စ ဒိသွာ ဝိမှိတမာနသာ ပုဗ္ဗေ ကတေန [ပုဗ္ဗေကိဿမေ။ ပုဗ္ဗေကတေနမေ ဣတိစကတ္ထစိ] ¶ ကေန မေ ပုညကမ္မေနာ ယံ လဒ္ဓါတိ ဩလောကန္တီ ဘဂဝတော ဓာတုသရီရသ္မိံ ပူဇိတာနိ တီဏိ သာခပုပ္ဖာနိ ဒိသွာ ပသန္နမာနသာ မဟာစက္ကပ္ပမာဏံ သာခမာလံ ဟတ္ထေန ဓာရေန္တီ ဓာတုပူဇနတ္ထာယ အဂမာသိ။ တဒါ တတ္ထ သန္နိပတိတာ မနုဿာ တဿာ ရူပသမ္ပဒဉ္စ ဟတ္တေ မဟန္တံ သာခမာလဉ္စ ဒိသွာ ဝိမှိတမာနသာ အမ္မ တွံ ကတ္ထ ဝါသိကာ။ ကတ္ထ ပနိမံ ပုပ္ဖံ ပဋိလဒ္ဓန္တိ ပုစ္ဆိံသု၊ တံ သုတွာ ဒေဝဓီတာ အတ္တနာ ဘဂဝတော ဓာတုသရီရဿ ပူဇိတသာခမာလတ္တယာနုဘာဝေန ပဋိလဒ္ဓသမ္ပတ္တိယော စ ဒိဗ္ဗဝိမာနဉ္စ ပုဗ္ဗေ မတကလေဝရံ စာတိ သဗ္ဗံ တေသံ ဒဿေတွာ ဓမ္မဒေသနာဝသာနေ အာဟ။

သမာဂတာ ဘဝန္တာ ဘော၊ ပဿန္တု မမ သမ္ပဒံ၊

ကတမပ္ပေန ကာရေန၊ သမ္မာသမ္ဗုဒ္ဓဓာတုယာ။

သာခမာလာနိ တီဏေဝ၊ ဟီယျောဟံ မုနိဓာတုယာ၊

ပူဇယိတွာန သန္တုဋ္ဌာ၊ နိဝတ္တာ တာယ ရတ္တိယာ။

မရန္တီ ခရဝါတေန၊ တမဟံ သုစရိတံ သရိံ၊

တေနာဟံ ပုညကမ္မေန၊ တာဝတိံသူပဂါအဟုံ။

တတ္ထ မေ အာသိ ပါသာဒေါ၊ တိံသယောဇနမုဂ္ဂတော၊

ကူဋာဂါရဝရာကိဏ္ဏော၊ သာခမာလာတိ [သာဓမာလော ဣတိပိကတ္ထစိ]၊ ဝိဿုတော။

ယထာ သဗ္ဗသုဂန္ဓေဟိ၊ ကရဏ္ဍံ ပရိဘာဝိတံ၊

တထာ ဒိဗ္ဗသုဂန္ဓေဟိ၊ ဂန္ဓိတံ ဘဝနံ မမ။

စက္ကမတ္တာ သာခပုပ္ဖာ၊ တတ္ထ တတ္ထူပလမ္ဗရေ [တတဝတ္ထုပလဗ္ဗရေ ဣတိပိကတ္ထစိ]၊

ဒိဗ္ဗဂန္ဓာ ပဝါယန္တိ၊ မဓုဗ္ဗဘနိသေဝိတာ။

ဘဿန္တိ ဧကပုပ္ဖသ္မာ၊ တုမ္ဗမတ္တာ ဟိ ရေဏဝေါ၊

တေဟိ ပိဉ္ဇရိတာ ဒေဝါ၊ ကီဠန္တိ စ လလန္တိစ။

ပီဠန္ဓိတွာန ¶ မာလာဓယာ၊ သုဒိဗ္ဗာ ဘရဏာနိစ၊

သဟစ္ဆရာ ဒေဝပုတ္တာ၊ နစ္စဂီတာဒိဗျာဝဋာ။

ပဿထေမံ ဘုဇင်္ဂါ ဘော၊ သတ္တာ မောဟေန ပါရုတာ၊

ဟီယျော မတံ ပဝိဒ္ဓံ မေ၊ ပူတိဘူတံ ကလေဝရံ။

ပုဠဝေဟိ သမာကိဏ္ဏံ၊ မက္ခိကာဂဏကီဠိတံ၊

ကာကသောဏာဒိသတ္တာန၊ မာဟာရံ ကုဏပါလယံ။

ပတ္ထေန္တိ ပုရိသာ ပုဗ္ဗေ၊ အနေကောပါယနေန တံ၊

ဒဋ္ဌုမ္ပိဒါနိ နိစ္ဆန္တိ၊ တဏှာယညာဏတာ အဟော။

လောကပဇ္ဇောတကဿာဟံ၊ ဝိမလဿ ယသဿိနော၊

ဓာတုံ ဟီယျော မဟိံ သမ္မာ၊ အဇ္ဇ သဂ္ဂေ ပတိဋ္ဌိတာ။

ဟိတွာနေ တာဒိသံ ကာယံ၊ လဒ္ဓံဒါနိ မမေဒိသံ၊

ဒိဗ္ဗတ္တဘာဝံ သောဘာဟိ၊ ဘာသမာန မုဒိက္ခထ။

ဘာသမာနာယ မေ ဝါစံ၊ သုဏောထေတ္ထ သမာဂတာ၊

နတ္ထေဝါကတပုညဿ၊ အဏုမတ္တံ ဘဝေ သုခံ။

ဗိန္ဒုမတ္တမ္ပိ ယော ပုည၊ ဗီဇံ ရောပေတိ သာသနေ၊

န ဟာ နတ္ထဖလံ [နဟပနန္တဖလံ ဣတိပိကတ္ထစိ] ဟောတိ၊ ယာဝ နိဗ္ဗာဏပတ္တိယာတိ။

ဧဝံ သာ ဒေဝတာ အတ္တနာ ပဋိလဒ္ဓဒိဗ္ဗဝိဘဝံ ဒဿေတွာ ဇနကာယံ ဩဝဒိတွာ ဒိဗ္ဗသာခပုပ္ဖေဟိ ဇိနဓာတုံ ပူဇေတွာ မနုဿာနံ ပဿန္တာနံယေဝ သဒ္ဓိံ ဝိမာနေန ဒေဝလောကမေဝ အဂမာသိ။ တံ ဒိသွာ မဟာဇနော ဒါနာဒီနိ ပုညာနိ ကတွာ ဒေဝလောကံ ပူရေသီတိ။

တုမှေပိ ဘောန္တော တိဒိဝေသု သာတံ၊

ကာမတ္ထ စေ ကတ္ထ ပုညာနိ သာဓုံတိ။

သာခမာလပူဇိကာယ ဝတ္ထုံ ပဉ္စမံ။

၃၆။ မောရိယဗြဟ္မဏဿ ဝတ္ထုမှိ အယမာနုပုဗ္ဗီကထာ

အမှာကံ ဘဂဝတိ ပရိနိဗ္ဗုတေ မဂဓရဋ္ဌေ မစလံ နာမ မဟာဂါမံ အဟောသိ။ တတ္ထ မောရိယောနာမ ဗြာဟ္မဏော ပဋိဝသတိ သဒ္ဓါ ပသန္နော၊ တဿ သေနာနာမေ ကာ ဘရိယာ အတ္ထိ။ သာပိ သဒ္ဓါ ပသန္နာ ရတနတ္တယေသု။ တေ ဥဘောပိ သမဂ္ဂါ သမ္မောဒမာနာ ဘိက္ခုသင်္ဃံ နိမန္တေတွာ နိစ္စံ ဒါနံ ပဝတ္တေန္တာ စီဝရာဒိစတုပစ္စယေဟိ ဥပဋ္ဌဟန္တာ သီလံ ရက္ခန္တာ ဥပေါသထကမ္မံ ကရောန္တာ ဒိဝသံ ဝီတိနာမေန္တိ။ အထဿ ဂေဟေ ဝိဘဝံ ယေဘုယျေန ဒါနာဒီသု ပရိက္ခယမဂမာသိ။ တတော ဗြာဟ္မဏီ သာမိ နော ဂေဟေ ဓနံ ပရိက္ခီဏံ။ ကထံ ဒါနံ ပဝတ္တေယျာမာတိ ဗြာဟ္မဏဿ အာရောစေသိ၊ တတော ဗြာဟ္မဏော မာ ဘဒ္ဒေ စိန္တေသိ။ ယေနကေနစိ ဥပါယေန ဒါနံ ပတိဋ္ဌပေဿာမာတိ ဝတွာ တသ္မိံယေဝ အတ္တနော သဥဿာဟတံ ပကာသောန္တော အာဟ။

ဇာနမာနော ဟိ လောကသ္မိံ၊ ဒါနဿေဒံ ဖလံ ဣတိ၊

န ဒဇ္ဇာ ကော သုသီလေသု၊ အပ္ပမ္ပိ ဒိဝသမ္ပတိ။

သဂ္ဂလောကနိဒါနာနိ၊ ဒါနာနိ မတိမာ ဣဓ၊

ကောဟိနာမ နရော လောကေ၊ န ဒဒေယျ ဟိတေ ရတောတိ။

ဧဝဉ္စ ပန ဝတွာ ဘဒ္ဒေ ဝနံ ပဝိသိတွာ အနေကဝိဓာနိ ပဏ္ဏာနိ စ ဖလာနိ စ ပစ္ဆိပူရံ အာဟရိတွာ ဝိက္ကိဏိတွာပိ ဒါနံ န ဥပစ္ဆိန္ဒိဿာမာတိ ¶ ဝတွာ တတော ပဋ္ဌာယ ဝနံ ဂန္တွာ ပဏ္ဏာနိ စ ဖလာနိ စ အာဟရိတွာ ဝိက္ကိဏိတွာ ဒါနံ ဒေန္တော ပဋိဝသတိ။ အထေကဒိဝသံ ဗြာဟ္မဏော ဝနံ ပဝိဋ္ဌော ပဏ္ဏေဟိ စ ဖလေဟိ စ ပစ္ဆိံ ပူရေတွာ သီသေနာ ဒါယ ဂေဟံ အာဂစ္ဆန္တော ပုပ္ဖဖလပလ္လဝေဟိ ဝိနတံ နေကတရုဂဏနိစိတံ သမ္မတ္တာနေကစာတကစတုပ္ပဒနိသေဝိတံ ဝိပ္ပကိဏ္ဏာနန္တပုပ္ဖပတ္တကိဉ္ဇက္ခစ္ဆန္နဝါဠုကာတလံ သန္ဒမာနသီတလာ မလဇလပ္ပဝါဟံ အကဒ္ဒမာနိန္နသုပတိတ္တေဟိ သုန္ဒရံ ကန္ဒရံ ဒိသွာ ပစ္ဆိံ တီရေ ဌပေတွာ ဩတိဏ္ဏော နဟာယတိ၊ တသ္မိံ ခဏေ တတ္ထ ဧကသ္မိံ ရုက္ခေ အဓိဝတ္ထော ဒေဝပုတ္တော တံ တတ္ထ နဟာယန္တံ ဒိသွာ ကိန္နု ခေါ ဧသ ကလျာဏဇ္ဈာသယော ဝါ ဥဒါဟု ပါပဇ္ဈာသယော သတ္တောတိ ဒိဗ္ဗစက္ခုနာ ဥပဓာရန္တော အစ္ဆရိယပုရိသော ဧသော ဒုဂ္ဂတောပိ ဟုတွာ အတ္တနော ဒါနပ္ပဝေဏိယာ ဥပစ္ဆိဇ္ဇနဘယေန ဝနံ ဂန္တွာ ပဏ္ဏာနိ စ ဖလာနိ စ အာဟရိတွာ ဒုက္ခေန ကသိရေန ဇီဝိကံ ကပ္ပေန္တော ဒါနဓမ္မံ န ဥပစ္ဆိန္ဒတီတိ စိန္တေတွာ တဿ ဂုဏာဒယော ပဋိစ္စ ပစ္ဆိယံ ဌပိတပဏ္ဏာနိ စ ဖလာနိ စ သဗ္ဗာနိ သုဝဏ္ဏာနိ ဟောန္တူတိ အဓိဋ္ဌာသိ။ အထဿာနုဘာဝေန သဗ္ဗံ သုဝဏ္ဏံ အဟောဘိ၊ အထ သော သုဝဏ္ဏပုဏ္ဏပစ္ဆိယံ ဥပရိ သုဝဏ္ဏရာသိမတ္ထကေ သဗ္ဗကာမဒဒံ မဟန္တံ မဏိရတနံ ဌပေတွာ အန္တရဟိတော ပဋိက္ကမ္မ အဋ္ဌာသိ၊ တတော ဗြာဟ္မဏော နဟာတွာ ဥတ္တိဏ္ဏော ပစ္ဆိယံ သမ္ပုဏ္ဏသုဝဏ္ဏဝဏ္ဏရံသိနာ သမ္ဘိန္နဝိဇ္ဇောတမာနမဏိရတနံ ဒိသွာ ကိမေတံတိ အာသင်္ကိတပရိသင်္ကိတော ပစ္ဆိသမီပံ ဂန္တွာ ဟတ္ထံ ပသာရေတုံ အဝိသဟန္တော အဋ္ဌာသိ။ တံ ဒိသွာ ဒေဝပုတ္တော ဒိဿမာနသရီရေန ဌတွာ မာ တွံ ဘာယိ ဗြာဟ္မဏ။ မယာ ဧတာနိ နိမ္မိတာနိ၊ ဂဟေတွာ ဂစ္ဆာဟီတိ အာဟ၊ အထ ဗြာဟ္မဏော ဒေဝပုတ္တဿ ကထံ သုတွာ အယံ ဒေဝပုတ္တော ဣမံ မယာ နိမ္မိတံ၊ ဂဟေတွာ ဂစ္ဆာတိ ဝဒတိ။ ကိန္နု ခေါ သော အတ္တနော အာနုဘာဝေန ဒေတိ၊ ဥဒါဟု မယာ ကတပုညေနာတိ ပုစ္ဆိဿာမိ တံတိ ပဉ္ဇလိကောဝ ဒေဝပုတ္တံ ပုစ္ဆန္တော အာဟ။

ပုစ္ဆာမိ ¶ ပဉ္ဇလီ ဒါနိ၊ ဒေဝပုတ္တ မဟိဒ္ဓိက၊

ဒဒါသိ မေ သုဝဏ္ဏဉ္စ၊ ကာမဒံ မဏိမုတ္တမံ။

ကေန တပေန သီလေန၊ ကေနာစာရဂုဏေန စ၊

ယေန ဒဇ္ဇာသိ မေ ဒေဝ၊ ကိံ မေ သုစရိတံ စိတံ။

ကိန္နု ပုရာတနံ ကမ္မံ၊ ကေန ကမ္မေန ဒဿသိ၊

အထဝါ တဝိဒ္ဓိယာ ဒေသိ၊ တံ မေ အက္ခာဟိ ပုစ္ဆိတောတိ။

တတော ဒေဝပုတ္တော န ခေါ ပနာဟံ ဗြာဟ္မဏ ဒေဝေါတိ ပရေသံ ကိဉ္စိ ဒါတုံ သက္ကောမိ၊ တယာ ပုဗ္ဗေ ကတသုစရိတာနုဘာဝေန နိဗ္ဗတ္တတီတိ ဝတွာ ဒိဗ္ဗစက္ခုနာ တဿ ပုဗ္ဗကမ္မံ ဒိသွာ တဿ ပကာသေန္တော အာဟ။

ကဿပေ လောကပဇ္ဇောတေ၊ သမ္ဗုဒ္ဓေ ပရိနိဗ္ဗုတေ၊

သဗ္ဗတ္ထ ပတ္ထဋံ အာသိ၊ တဿ ဗုဒ္ဓဿ သာသနံ။

တဒါ ပစ္စန္တိမေ ဂါမေ၊ တွမာသိ ကုလဒါရကော၊

သဒ္ဓါ အာသိ ပသန္နော စ၊ ဒါယကော ကုသလေ ရတော။

တဒါ ပဗ္ဗဇိတော ဧကော၊ ဂစ္ဆန္တော အန္တရာပထေ၊

စောရေဟိ အနုဗဒ္ဓါသိ၊ အစ္ဆိန္နပတ္တစီဝရော။

သာခါဘင်္ဂံ နိဝါသေတွာ၊ ပါရုပိတွာ တထေဝ တံ၊

အန္တောဂါမံ ပဝိဋ္ဌောသိ၊ ဧသမာနော ပိလောတိကေ။

တတော တွံ စရမာနံ တံ၊ ဒိသွာ ကမ္ပိတမာနသော၊

ဝတ္ထယုဂံ အဒါသိ တွံ၊ သဒ္ဒဟံ ဒါနတော ဖလံ။

ပတ္ထောဒနေန ¶ တံ ဘိက္ခုံ၊ ပရိဝိသိတွာ ယထာဗလံ၊

ပေသေသိ အဘိဝါဒေတွာ၊ သဒ္ဓါယ သုဒ္ဓမာနသော။

ဣမံ တွံ အကရီ ပုညံ၊ တုယှေတံ စရိတံ ဣမံ၊

တဿ တေ ပုညကမ္မဿ၊ အမုချဖလ မီဒိသံတိ။

ဧဝဉ္စ ပန ဝတွာ ဣဒံ တေ ဗြာဟ္မဏ ဓနံ ရာဇာဒီဟိ မယာ အနာဟရဏီယံ ကတံ၊ တွံ အပရိသင်္ကန္တော ဂဟေတွာ ယထာဓိပ္ပာယံ ကရောဟိ၊ ဣမံ ခေါ ပန မဏိရတနံ ဣစ္ဆိတိစ္ဆိတံ ပသဝတိ၊ တေနာပိ အာနုဘာဝေန တဝ ဒါနံ အနုပစ္ဆိန္ဒန္တော ပုတ္တဒါရာဒယော ပေါသေဟီတိ အနုသာသိ၊ တံ သုတွာ ဗြာဟ္မဏော တေန ဝုတ္တနိယာမေနေဝ ဘိက္ခုသင်္ဃဿ မဟာဒါနံ ဒဒန္တော သီလံ ရက္ခန္တော စိရံ ဝသိတွာ အပရဘာဂေ တတော စုတော ဒေဝလောကေ နိဗ္ဗတ္တီတိ။

တသ္မာ ဟိ ဘောန္တော သတိ ဒေယျဓမ္မေ၊

မောရိယဗြာဟ္မဏဿ ဝတ္ထုံ ဆဋ္ဌမံ။

၃၇။ ပုတ္တဝတ္ထုမှိ အယမာနုပုဗ္ဗီကထာ

ဧကသ္မိံ ကိရ သမယေ လင်္ကာဒီပဝါသိနော သဋ္ဌိမတ္တာ ဘိက္ခူ ဇယမဟာဗောဓိံ ဝန္ဒိတုကာမာ ဧကတော မန္တေတွာ မဟာတိတ္ထေန နာဝံ အာရုယှ ဇမ္ဗုဒီပံ ပတွာ တာမလိတ္တိပဋ္ဌေနေ [တမလိတ္တပဋ္ဋနေ ဣတိကတ္ထစိ] ဩတရိတွာ အနုက္ကမေန ပါဋလိပုတ္တနဂရံ ပါပုဏိံသု။ အထ တသ္မိံ ¶ နဂရေ ပိဏ္ဍာယ စရန္တေ တေ ဘိက္ခူ ဧကော ဒုဂ္ဂတမနုဿော ဒိသွာ စိရေန [စိရေနာဟံဒိဋ္ဌာ ဣတိသဗ္ဗတ္ထ] မယာ ဒိဋ္ဌာ ဗုဒ္ဓပုတ္တာတိ သောမနဿော ဘရိယံ ပက္ကောသိတွာ ဘဒ္ဒေ ဣမေသံ အယျာနံ ဒါနံ ဒါတုကာမောမှိ၊ ပုဗ္ဗေ နော အကတပုညတ္တာ ဣဒါနိ ဒုဂ္ဂတာ ဇာတာ၊ ဣမေသု ပုညက္ခေတ္တေသု ဗီဇံ နော စေ ရောပေဿာမ၊ ပုနပိ ဧဝမေဝ ဘဝိဿာမာတိ ဝတွာ ကိံ မေ ဂေဟေ ဒေယျဓမ္မံ အတ္ထီတိ ပုစ္ဆိ။ သာ တံ သုတွာ ဃရေ နော သာမိ အယျာနံ ကိဉ္စိ ဒါတဗ္ဗံ န ပဿာမိ။ အပိ စ မမ ပုတ္တံ မာရေတွာ ဒါနံ ဒါတုံ သက္ကာတိ။ သော တဿာ ကထံ သုတွာ ဘဒ္ဒေ ပုတ္တံ မာရေတွာ ကိံ ဒါနံ ဒေမာတိ အာဟ။ တာယ တံ သုတွာ သာမိ ကိံ န ဇာနာသိ၊ ပုတ္တေ နော မတေ သန္ဒိဋ္ဌသမ္ဘတ္တာ ဉာတိမိတ္တသုဟဇ္ဇာ စ အမှာကံ သန္တိကံ အာဂစ္ဆာန္တာ ကိဉ္စိ ပဏ္ဏာကာရံ ဂဟေတွာ အာဂစ္ဆန္တိ။ မယံ တေန ပဏ္ဏာကာရေန ဒါနံ ဒဿာမာတိ ဝုတ္တေ ဥပါသကော သာဓု တထာ ကရောဟီတိ မာတုယာ ဧဝ ဘာရမကာသိ၊ သာ ပုတ္တံ မာရေတုံ အဝိသဟန္တီ အာဟ။ တထာ ဟိ။

ကိစ္ဆာ လဒ္ဓံ ပိယံ ပုတ္တံ၊ အမ္မမ္မာတိ ပိယံ ဝဒံ၊

သုနီလနေတ္တံ သုဘမုံ၊ ကော ပက္ကမိတုမိစ္ဆတိ။

မာတရာ မာရိယန္တောပိ၊ မာတရမေဝ ရောဒတိ၊

မာရေတုံ တံ န သက္ကောမိ၊ ဟဒယံ မေ ပဝေဓတီတိ။

ဧဝဉ္စ ပန ဝတွာ အဟံ သာမိ န သက္ကောမိ ပုတ္တံ မာရေတုံ။ တွံ မာရေဟီတိ ပုတ္တံ ပိတုသန္တိကံ ပေသေသိ။ အထ သောပိ တံ မာရေတု မသက္ကောန္တော ဧဝမာဟ။ ဝုတ္တဉှိ။

တာယန္တိ ပိတုနော ဒုက္ခံ၊ ပုတ္တာ ပုတ္တာတိ ကိတ္တိတာ၊

ပိတု ဒုက္ခံ သုခံ ပုတ္တာ၊ ဒါယာဒါ ဟောန္တိ သဗ္ဗဒါ။

တသ္မာ ¶ မေ သဒိသံ ပုတ္တံ၊ ပိလ္လကံ မဉ္ဇုဘာသနံ၊

န သက္ကောမိ အဟံ ဘဒ္ဒေ၊ ဇီဝိတာ တံ ဝိယောဇိတုံ။

အယသဉ္စ အကိတ္တိဉ္စ၊ ပပ္ပောတိ ပုတ္တဃာတကော၊

ပါဏာတိပါတကမ္မမ္ပိ၊ ကာမံ သော ဖုသတေ နရောတိ။

ဧဝဉ္စ ပန ဝတွာ သော တွမေဝ တဝ ပုတ္တံ မာရေဟီတိ ပေသေသိ၊ ဧဝံ တေန ဝုတ္တေ ပုတ္ထဿ မာရပါဏူပါယံ ပရိယေသန္တာ ဧဝမာဟံသု၊ အမှေ ပနိမံ မာရေတုံ န သက္ကောမိ၊ အမှာကံ ပစ္ဆာဂေဟေ မဟန္တော ဝမ္မိကော အတ္ထိ၊ တသ္မိံ ဧကော နာဂရာဇာ ပဋိဝသတိ။ ကုမာရံ တတ္ထ ပေသေဿာမ၊ သော တံ ဍသိတွာ မာရေဿတီတိ။ ဣစ္စေတေ ဧသော ခေါ ဥပါယော ဧဝါတိ စိန္တေတွာ ကုမာရံ ပက္ကောသိတွာ အဉ္စနာ ဝလိဝလယာဒီဟိ မဏ္ဍေတွာ တဿ ဟတ္ထေ ဂေဏ္ဍုံ [တေဏ္ဍုံ ဣတိသဗ္ဗတ္ထ] ဌပေတွာ တာတ ပစ္ဆာဂေဟေ ဝမ္မိကသမီပံ ဂန္တွာ ကီဠာတိ ပေသေသုံ။ တတော ဒါရကော ဂန္တွာ ဂေဏ္ဍုကေန ကီဠန္တော ဝမ္မိကဗိလေ ဂေဏ္ဍုကံ ပါတေသိ။ အထ သော ဂေဏ္ဍုကံ ဂဏှိဿာမီတိ ဝမ္မိကသုသိရေ ဟတ္ထံ ပဝေသေသိ။ တတော သပ္ပော ကုဇ္ဈိတွာ သုသူတိသဒ္ဒံ ကရောန္တော မဟန္တံ ဖဏံ ကတွာ ဗိလတော သီသံ ဥက္ခိပိတွာ ဩလောကေန္တော အဋ္ဌာသိ ကုမာရဿ ဟတ္ထတော ပရိဂလိတပါသံဝိယ။ အထဿ ကုမာရော ကိဉ္စိ အဇာနန္တော သပ္ပဿ ဂီဝံ ဒဠှံ ဂဏှိ။ အထဿ မာတာပိတုန္နံ သဒ္ဓါဗလေန နာဂရာဇာ ကုမာရဿ ကရတလေ အဋ္ဌံသံ ဣစ္ဆာဒါယကံ ကဏ္ဌမဏိရတနံ ပါတေသိ။ ကုမာရဿ မာတာပိတရော ဒွါရံ နိဿာယ ဌိတာ တဿ ကိရိယံ ဩလောကေန္တော တံ မဏိရတနံ ဒိသွာ သီဃံ ဂန္တွာ ပုတ္တံ ဥက္ခိပိတွာ ဟတ္ထတော မဏိရတနံ ဂဏှိံသု။ တတော တေ တံ မဏိရတနံ ပရိသုဒ္ဓါသနေ ဌပေတွာ ဥပစာရံ ကတွာ အမှာကံ ဣဒဉ္စိဒဉ္စ ဒေထာတိ အဗ္ဘုက္ကိရိံသု။ အထ တေ မဏိရတနာနုဘာဝေန ဂေဟဒွါရေ မဟန္တံ မဏ္ဍပံ ကာရေတွာ ဝိတာနာဒိနာ မဏ္ဍပံ ¶ အလင်္ကရိတွာ ဘိက္ခူနံ အာသနာနိ ပညာပေတွာ တေ သဋ္ဌိမတ္တေ ဘိက္ခူ နိသီဒါပေတွာ မဟာဒါနံ အဒံသု။ တတော နဂရဝါသိနော မဏိရတနာနုဘာဝံ သုတွာ သန္နိပတိံသု။ အထ တေ တေသံ မဇ္ဈေ အတ္တနော သဒ္ဓါဗလေန မဏိရတနဿ လာဘံ ပကာသေတွာ ဣမဉှိ ဒါနတ္ထာယေဝ ပရိစ္စဇ္ဇာမာတိ ဧကသ္မိံ ဌာနေ ပတိဋ္ဌာပေတွာ တေနာနုဘာဝေန ယာဝဇီဝံ ဒါနံ ဒဒန္တာ သီလံ ရက္ခန္တာ အာယုပရိယောသာနေ ဒေဝလောကေ နိဗ္ဗတ္တိံသူတိ။

၃၈။ တေဘာတိကမဓုဝါဏိဇကာနံ ဝတ္ထုမှိ အယမာနုပုဗ္ဗီကထာ

အတီတေ ကိရ ဗာရာဏသိယံ တေ ဘာတိကာ ဧကတော ဟုတွာ မဓုံ ဝိက္ကိဏန္တာ ပုတ္တဒါရေ ပေါသေန္တိ။ တတော တေသု ဧကော ပစ္စန္တံ ဂန္တွာ မလယဝါသီနံ [မလဝါသီနံ ဣတိပိကတ္ထစိ] ဟတ္ထတော မဓုံ ကိဏိတွာ [ဝက္ကိဏိတွာ ဣတိသဗ္ဗတ္ထ] ဂဏှာတိ၊ ဧကော ဂဟိတဂဟိတမဓုံ နဂရံ အာဟရတိ။ ဧကော တေန အာဟဋာဟဋမဓူနိ ဗာရာဏသိယံ နိသီဒိတွာ ဝိက္ကိဏာတိ။ တသ္မိံ သမယေ ဂန္ဓမာဒနပဗ္ဗတေ ဧကော ပစ္စေကဗုဒ္ဓါ ဝဏရောဂေနာ တုရော အဟောသိ။ အထညတရော ပစ္စေကဗုဒ္ဓါ တဿ မဓုနာ ဖာသု ဘဝိဿတီတိ ဉတွာ ဂန္ဓမာဒနပဗ္ဗတေယေဝ ဌိတော ¶ စီဝရံ ပါရုပိတွာ အာကာသေနာ ဂန္တွာ နဂရဒွါရေ ဩတရိတွာ ကတ္ထ မဓုံ လဘာမီတိ [လဗ္ဘတိ ဣတိသဗ္ဗတ္ထ] ဩလောကေန္တော အဋ္ဌာသီ၊ တဒါ တသ္မိံပရကုလေ ဘတိံ ကတွာ ဇီဝမာနာ ဧကာ စေဋိကာ ဃဋမာဒါယ ဥဒကတ္ထံ တိတ္ထံ ဂစ္ဆန္တီ မဂ္ဂါ ဩက္ကမ္မ ဃဋံ ဌပေတွာ ဝန္ဒိတွာ ဧကမန္တံ အဋ္ဌာသိ၊ တဒါ ပစ္စေကဗုဒ္ဓါ ဘဂိနီ ဧတ္ထ ဘိက္ခာယ စရန္တာနံ ကတရသ္မိံ ဌာနေ မဓု လဗ္ဘတီတိ ပုစ္ဆိ။ သာ တဿ ကထံ သုတွာ မဓုအာပဏဿ ပညာယနဋ္ဌာနေ ဌတွာ ဟတ္ထံ ပသာရေတွာ ဧသ ဘန္တေ မဓုအာပဏောတိ ဒဿေတွာ ယဇ္ဇာယံ ပစ္စေကဗုဒ္ဓါ အာပဏတော မဓုံ န လဘတိ။ မမ နိဝတ္ထဝတ္ထကံ ဒတွာပိ မဓုံ ဒဿာမီတိ စိန္တေတွာ ဩလောကေန္တီ တတ္ထေဝ အဋ္ဌာသိ၊ အထ ပစ္စေကဗုဒ္ဓါ အနုပုဗ္ဗေန ဝိစရန္တော [စရန္တော ဣတိပိကတ္ထစိ] မဓုအာပဏံ သမ္ပာပုဏိ၊ တတော ကုဋိမ္ဗိကော [ကုဋိမ္ဗ ကော ဣတိပိကတ္ထစိ] တံ ဒိသွာ ဟတ္ထတော ပတ္တံ ဂဟေတွာ အာဓာရကေ ဌပေတွာ မဓုဃဋံ အာဒါယ ပတ္တဿ ဥပနာမေန္တော သဟသာ နိက္ကုဇ္ဇိ။ တတော မဓု ပတ္တံ ပူရေတွာ ဥတ္တရန္တော ပုန ဘူမိယံ ပဂ္ဃရိ။ တံ ဒိသွာ သောမနဿော ဝါဏိဇော ဧဝံ ပတ္ထနမကာသိ။

တတ္ထ ပတ္တဿ ဗုဒ္ဓဿ၊ ဝါဏိဇော သော ပသာဒဝါ၊

ဝိဿန္ဒယန္တော မုခတော၊ ပတ္တပူရံ မဓုံ အဒါ။

ပုဏ္ဏဉ္စ ဥပ္ပတီတဉ္စ၊ ပတိတဉ္စ မဟီတလေ၊

ဒိသွာ မဓုံ ပသန္နော သော၊ ဧဝံ ပဏိဒဟီ တဒါ။

ဇမ္ဗုဒီပေ ဧကရဇ္ဇံ၊ ဒါနေနာနေန ဟောတု မေ၊

အာကာသေ ယောဇနေ အာဏာ၊ ဘူမိယံ ယောဇနေပိတိ။

ဧဝဉ္စ ပန ဝတွာ ပတ္တံ အဒါသိ၊ ပစ္စေကဗုဒ္ဓါ ပတ္တံ ပဋိဂ္ဂဟေတွာ တတ္ထေဝ ဌိတော။

ဣစ္ဆိတံ ¶ ပတ္ထိတံ တုယှံ၊ ခိပ္ပမေဝ သမိဇ္ဈတု၊

ပူရေန္တု စိတ္ထသံကပ္ပာ၊ စန္ဒော ပဏ္ဏရသော ယထာ။

ဣစ္ဆိတံ ပတ္ထိတံ တုယှံ၊ သဗ္ဗမေဝ သမိဇ္ဈတု၊

ပူရေန္တု စိတ္တသံကပ္ပာ၊ မဏိဇောတိရသော ယထာတိ။

ဝတွာ မင်္ဂလံ ဝဍ္ဎေတွာ အဂမာသိ။ အထန္တရာမဂ္ဂေ ဌိတာ ဃဋစေဋိကာ ပစ္စေကဗုဒ္ဓါဘိမုခံ ဂန္တွာ မဓုံ လဘိတ္ထ ဘန္တေတိ ပုစ္ဆိ။ တေန လဒ္ဓံ ဘဂိနီတိ ဝုတ္တေ ကိံ ဝတွာ သော အဒါသီတိ ပုစ္ဆိ။ ပစ္စေကဗုဒ္ဓါ သဗ္ဗံ ကထေသိ။ သာ တံ သုတွာ ထောကံ ဘန္တေ ဣဓေဝ ဟောထ ဒါသိယာ အနုဂ္ဂဟတ္ထာယာတိ သီဃံ ဂေဟံ ဂန္တွာ နိဝတ္ထပိဠောတိကာ အတ္တနော သာဋကံ ဓောဝိတွာ အာဟရိတွာ စုမ္ဗဋကံ ကတွာ ပစ္စေကဗုဒ္ဓဿ အဒါသိ၊ ယဒါ သော ဘန္တေ မဓုဒါယကော သကလဇမ္ဗုဒီပေ ဧကရဇ္ဇံ ကာရေတိ။ တဒါဟံ တဿ အဂ္ဂမဟေသီ ဘဝေယျံတိ ဝတွာ ပတ္ထနံ ကရောန္တီဧဝမာဟ။

ယဒါ တေ မဓုဒေါ ဘန္တေ၊ ဘူဘုဇော ဟောတိ ဘူတလေ၊

တဿ ဟေဿံ တဒါ ဘန္တေ၊ ပိယာ အဂ္ဂမဟေသိကာ။

သုရူပါစ သုဝါဏီစ၊ သုယသာ သုဗ္ဗတာ သုဘာ၊

အဿံ တဿ ပိယာစာထ၊ မနာပါ ဣစ္ဆဒါ [ဣစ္ဆိဒါ ဣတိပိကတ္ထစိ] သဒါတိ။

တဿာပိ တဒါ ပစ္စေကဗုဒ္ဓါ တထေဝ ဟောတူတိ မင်္ဂလံ ဝတွာ အာကာသေန ဂန္ဓမာဒနမေဝ အဂမာသိ၊ အထာပရဘာဂေ တေ တယောပိ ဧကတော ဟုတွာ မဓုလောကနံ ကရောန္တာ တံ မဓုဃဋံ ကုဟိံတိ ပုစ္ဆိံသု၊ သော တေနတ္တနာ ကတကမ္မံ ဝတွာ သစေ တုမှေ တသ္မိံ ပတ္တိံ အနုမောဒေယျာထ၊ တံ သာဓု။ နော စေ။ မဓုအဂ္ဃနကံ မမ ဟတ္ထတော ဂဏှထာတိ ဝတွာ တေဟိ တတော န နော အတ္ထော [နနောဟတ္ထော ဣတိသဗ္ဗတ္ထ] မဓုနာ၊ ကီဒိသဿေတံ အဒါသီတိ ဝုတ္တေ တံ သုတွာ ဣတရော ပစ္စေကဗုဒ္ဓါ နာမေ တေ ဂန္ဓမာဒနေ ဝသန္တိ ကာသာဝံ ¶ ပါရုပိတွာ ကုလေ ကုလေ ဘိက္ခံ စရန္တိ၊ သန္တော ဧတေ သီလဝန္တာတိ ကထေသိ၊ အထ တေသု ဇေဋ္ဌော ဗြာဟ္မဏစဏ္ဍာလကာပိ ကာသာဝံ ပရိဒဟိတွာ စရန္တိ။ နူနာယံ စဏ္ဍာလကောတိ မညာမီတိ အာဟ၊ မဇ္ဈိမော ကုဇ္ဈိတွာ တဝ ပစ္စေကဗုဒ္ဓံ ပရသမုဒ္ဒေ ခိပါဟီတိ အဝေါစ၊ အထ တေသံ ကထံ သုတွာ မဓုဒါယကော မာ ဘော တုမှေ အရိယာနံ မဟေသက္ခာနံ မဟာနုဘာဝါနံ ပစ္စေကဗုဒ္ဓါနံ ဖရုသံ ကထေထ။ နိရယဒုက္ခာ န ဘာယထာတိအာဒိနာ အနေကာ ကာရေန နိဝါရေတွာ တေသံ ဂုဏံ ပကာသေသိ၊ တံ သုတွာ တေ ဥဘောပိ သာဓူတိ ပသန္နာစိတ္တာ အနုမောဒိံသု၊ အပရဘာဂေ တေ ကာလံ ကတွာ ဒေဝမနုဿေသု သံသရန္တာ တတ္ထ တတ္ထ မဟာသမ္ပတ္တိယော အနုဘဝိတွာ အမှာကံ သတ္ထု ပရိနိဗ္ဗာဏတော ဒွိန္နံ ဝဿသတာနံ အစ္စယေန အတ္တနော အတ္တနော သမ္ပတ္တဋ္ဌာနေ နိဗ္ဗတ္တိံသု။ တေန ဝုတ္တံ။

အသောကော မဓုဒေါ သန္ဓိ၊ မိတ္တာဒေဝီ တု စေဋိကာ၊

စဏ္ဍာလဝါဒီ နိဂြောဓော၊ တိဿော သော ပါရဝါဒိကောတိ။

တေသု စဏ္ဍာလဝါဒီ ဇေဋ္ဌဝါဏိဇော ဗိန္ဒုသာရရညော ဇေဋ္ဌပုတ္တဿ သုမနရာဇကုမာရဿ ပုတ္တော ဟုတွာ နိဗ္ဗတ္တိ။ တဿာယမာနုပုဗ္ဗီကထာ။ ဗိန္ဒုသာရရညော ကိရ ဒုဗ္ဗလကာလေယေဝ အသောကကုမာရော အတ္တနာ လဒ္ဓံ ဥဇ္ဇေနိယာ ရဇ္ဇံ ပဟာယ အာဂန္တွာ သဗ္ဗနဂရံ အတ္တနော ဟတ္ထဂတံ ကတွာ သုမနရာဇကုမာရံ အဂ္ဂဟေသိ။ တံ ဒိဝသမေဝ သုမနဿ ရာဇကုမာရဿ သုမနာ နာမ ဒေဝီ ပရိပုဏ္ဏဂဗ္ဘာ အဟောသိ။ သာ အညာတကဝေသေန နိက္ခမိတွာ အဝိဒူရေ အညတရံ စဏ္ဍာလဂါမံ သန္ဓာယ ဂစ္ဆန္တီ ဇေဋ္ဌကစဏ္ဍာလဿ ဂေဟတော အဝိဒူရေ နိဂြောဓော အတ္ထိ၊ တသ္မိံ ရုက္ခေ အဓိဝတ္ထာယ ဒေဝတာယ ဣတော ဧဟိ သုမနေတိ ဝဒန္တိယာ သဒ္ဒံ သုတွာ တဿာ သမီပံ ဂတာ၊ ဒေဝတာ အတ္တနော အာနုဘာဝေန ဧကံ သာလံ နိမ္မိဏိတွာ ဧတ္ထ ဝသာဟီတိ ပါဒါသိ။ သာ ¶ တံ သာလံ ပါဝိသိ၊ ဂတဒိဝသေယေဝ သာ ပုတ္တံ ဝိဇာယိ။ သာ တဿ နိဂြောဓဒေဝတာယ ပရိဂ္ဂဟိတတ္တာ နိဂြောဓောတွေဝ နာမံ အကာသိ။ ဇေဋ္ဌကစဏ္ဍာလော ဒိဋ္ဌဒိဝသတောပ္ပဘုတိ တံ အတ္တနော သာမိဓီတရံ ဝိယ မညမာနော နိဗဒ္ဓဝတ္တံ ပဋ္ဌပေသိ။ ရာဇဓီတာ တတ္ထ သတ္တဝဿာနိ ဝသိ၊ နိဂြောဓကုမာရောပိ သတ္တဝဿိကော ဇာတော၊ တဒါ မဟာဝရုဏတ္ထေရော နာမ ဧကော အရဟာ ဒါရကဿ ဟေတုသမ္ပဒံ ဒိသွာ ဝိဟရမာနော သတ္တဝဿိကော ဒါနိ ဒါရကော။ ကာလော နံ ပဗ္ဗာဇေတုံတိ စိန္တေတွာ ရာဇဓီတာယ အာရောစာပေတွာ နိဂြောဓကုမာရံ ပဗ္ဗာဇေသိ၊ ကုမာရော ခုရဂ္ဂေယေဝ အရဟတ္တံ ပါပုဏိ။ တေန ဝုတ္တံ မဟာဝံသေ။

တံ မဟာဝရုဏော ထေရော၊ တဒါ ဒိသွာ ကုမာရကံ၊

ဥပနိဿယသမ္ပန္နံ၊ အရဟာ ပုစ္ဆိ မာတရံ၊

ပဗ္ဗာဇေသိ ခုရဂ္ဂေ သော၊ အရဟတ္တမပါပုဏီတိ။

သော ကိရ ဧကဒိဝသံ ပါတောဝ သရီရံ ပဋိဇဂ္ဂိတွာ အာစရိယုပဇ္ဈာယဝတ္တံ ကတွာ ပတ္တစီဝရ မာဒါယ မာတုဥပါသိကာယ ဂေဟဒွါရံ ဂစ္ဆာမီတိ နိက္ခမိ။ မာတုနိဝါသဋ္ဌာနဉ္စဿ ဒက္ခိဏဒွါရေန နဂရံ ပဝိသိတွာ နဂရမဇ္ဈေန ဂန္တွာ ပါစီနဒွါရေန နိက္ခမိတွာ ဂန္တဗ္ဗံ ဟောတိ။ တေန စ သမယေန အသောကော ဓမ္မရာဇာ ပါစီနဒိသာဘိမုခေါ သီဟပဉ္ဇရေ စင်္ကမတိ။ တံ ခဏံယေဝ နိဂြောဓော ရာဇင်္ဂဏံ သမ္ပာပုဏိ သန္တိန္ဒြိယော သန္တမာနသော ယုဂမတ္တံ ပေက္ခမာနော၊ တေန ဝုတ္တံ ဧကဒိဝသံ သီဟပဉ္ဇရေ ဌိတော အဒ္ဒသ နိဂြောဓံ သာမဏေရံ ရာဇင်္ဂဏေန ဂစ္ဆန္တံ ဒန္တံ ဂုတ္တံ သန္တိန္ဒြိယံ ဣရိယာပထသမ္ပန္နန္တိ။ ဒိသွာ ပနဿ ဧတဒဟောသိ။ အယံ ဇနော သဗ္ဗောပိ ဝိက္ခိတ္တစိတ္တော ဘန္တမိဂပဋိဘာဂေါ။ အယံ ပန ဒဟရကော အဝိက္ခိတ္တော အတိဝိယဿ အာလောကိတဝိလောကိတံ သမ္မိဉ္ဇနပသာရဏဉ္စ သောဘတိ။ အဒ္ဓါ ဧတဿဗ္ဘန္တရေ လောကုတ္တရဓမ္မော ဘဝိဿတီတိ ရညော သဟ ¶ ဒဿနေနေဝ သာမဏေရေ စိတ္တံ ပသီဒိ၊ ပေမံ သဏ္ဌဟိ၊ ကသ္မာ။ ပုဗ္ဗေ ကိရ ပုညကရဏကာလေ ရညော ဇေဋ္ဌကဘာတာ ဝါဏိဇကောယံ။

ပုဗ္ဗေဝ [ပုဗ္ဗေန ဣတိကတ္ထစိ] သန္နိဝါသေန၊ ပစ္စုပ္ပန္နဟိတေန ဝါ၊

ဧဝံ တံ ဇာယတေ ပေမံ၊ ဥပ္ပလံဝ ယထောဒကေတိ။

အထ ရာဇာ သဉ္ဇာတပေမော သဗဟုမာနော သာမဏေရံ ပက္ကောသထာတိ အမစ္စေ ပေသေသိ၊ တေ အတိစိရာယန္တီတိ ပုန ဒွေ တယော ပေသေသိ တုရိတံ အာဂစ္ဆတူတိ။ သာမဏေရော အတ္တနော ပကတိယာ ဧဝ အဂမာသိ။ ရာဇာ ပတိရူပါသနံ ဉတွာ နိသီဒထာတိ အာဟ။ သော ဣတောစိတော စ ဝိလောကေတွာ နတ္ထိ ဒါနိ အညော ဘိက္ခူတိ သမုဿိတသေတစ္ဆတ္တံ ရာဇပလ္လင်္ကံ ဥပသင်္ကမိတွာ ပတ္တံ ဂဏှနတ္ထာယ ရညော အာကာရံ ဒဿေသိ။ ရာဇာ တံ ပလ္လင်္ကသမီပံ ဂစ္ဆန္တံ ဧဝ ဒိသွာ စိန္တေသိ အဇ္ဇေဝ ဒါနိ အယံ သာမဏေရော ဣမဿ ဂေဟဿ သာမိကော ဘဝိဿတီတိ၊ သာမဏေရော ရညော ဟတ္ထေ ပတ္တံ ဒတွာ ပလ္လင်္ကံ အဘိရုဟိတွာ နိသီဒိ။ ရာဇာ အတ္တနော အတ္ထာယ သမ္ပာဒိတံ သဗ္ဗံ ယာဂုခဇ္ဇကဘတ္တဝိကတိံ ဥပနာမေသိ။ သာမဏေရော အတ္တနော ယာပနမတ္တမေဝ သမ္ပဋိစ္ဆိ။ ဘတ္တကိစ္စာဝသာနေ ရာဇာ အာဟ သတ္ထာရာ တုမှာကံ ဒိန္နဩဝါဒံ ဇာနာထာတိ။ ဇာနာမိ မဟာရာဇ ဧကဒေသေနာတိ။ တာတ မယှမ္ပီ နံ ကထေဟီတိ။ သာဓု မဟာရာဇာတိ ရညော အနုရူပံ ဓမ္မပဧဒ အပ္ပမာဒဝဂ္ဂံ အနုမောဒနတ္ထာယ အဘာသိ။ ရာဇာ ပန အပ္ပမာဒေါ အမတပဒံ၊ ပမာဒေါ မစ္စုနော ပဒံတိ သုတွာဝ အညာတံ တာတ၊ ပရိယောသာပေဟီတိ အာဟ။ သာမဏေရော အနုမောဒနာ ဝသာနေ ဒွတ္တိံသဓုဝဘတ္တာနိ [ဒွိတ္တိံသဓုရဘတ္တာနိ ဣတိသဗ္ဗတ္ထ] လဘိတွာ ပုန ဒိဝသေ ဒွတ္တိံသဘိက္ခူ ဂဟေတွာ ရာဇန္တောပုရံ ပဝိသိတွာ ဘတ္တကိစ္စ မကာသိ။ ရာဇာ အညေပိ ဒွတ္တိံသဘိက္ခူ တုမှေဟိ သဒ္ဓိံသွေ ဘိက္ခံ ဂဏှန္တူတိ ဧတေနေဝ ဥပါယေန ဒိဝသေ ¶ ဒိဝသေ ဝဍ္ဎာပေန္တော သဋ္ဌိသဟဿာနံ ဗြာဟ္မဏပရိဗ္ဗာဇကာနံ ဘတ္တံ ဥပစ္ဆိန္ဒိတွာ အန္တောနိဝေသနေ သဋ္ဌိသဟဿာနံ ဘိက္ခူနံ နိစ္စဘတ္တံ ပဋ္ဌပေသိ နိဂြောဓတ္ထေရဂတေနေဝ ပသာဒေန။ နိဂြောဓတ္ထေရောပိ ရာဇာနံ သပရိသံ တီသု သရဏေသု ပဉ္စသု သီလေသု ပတိဋ္ဌာပေတွာ ဗုဒ္ဓသာသနေ ပေါထုဇ္ဇနိကေန ပသာဒေန အစလပ္ပသာဒံ ကတွာ ပတိဋ္ဌာပေသိ။ ရာဇာပိ အသောကာရာမံ နာမ မဟာဝိဟာရံ ကာရာပေတွာ သဋ္ဌိသဟဿာနံ ဘိက္ခူနံ နိစ္စဘတ္တံ ပဋ္ဌပေသိ။ သကလဇမ္ဗုဒီပေ စတုရာသီတိယာ နဂရသဟဿေသု စတုရာသီတိဝိဟာရသဟဿာနိ ကာရာပေသိ။ တေန ဝုတ္တံ။

အာသေ သော [အသေသော ဣတိပိကတ္ထစိ] ဟိ အနာသဝေါတိ။

မဓုဒါယကော ပန ဝါဏိဇော ဒေဝလောကတော စဝိတွာ ပုပ္ဖပုရေ ရာဇကုလေ ဥပ္ပဇ္ဇိတွာ ပိယဒါသော နာမ ကုမာရော ဟုတွာ ဆတ္တံ ဥဿာပေတွာ သကလဇမ္ဗုဒီပေ ဧကရဇ္ဇံ အကာသိ။ ကထံ။

ဗိန္ဒုသာရရာဇဿ ဧကသတပုတ္တာ အဟေသုံ။ တေ သဗ္ဗေ အသောကော အတ္တနာ သဒ္ဓိံ ဧကမာတိကံ တိဿကုမာရံ ဌပေတွာ ဃာတေသိ။ ဃာတေန္တော စတ္တာရိ ဝဿာနိ အနဘိသိတ္တောဝ ရဇ္ဇံ ကာရေတွာ စတုန္နံ ဝဿာနံ အစ္စယေန တထာဂတဿ ပရိနိဗ္ဗာဏတော ဒွိန္နံ ဝဿသတနံ ဥပရိ အဋ္ဌာရသမေ ဝဿေ သကလဇမ္ဗုဒီပေ ဧကရဇ္ဇာဘိသေကံ ပါပုဏိ။ အထ တံ သကလဇမ္ဗုဒီပေ စတုရာသီတိနဂရသဟဿေ ရာဇာနော အာဂန္တွာ ဥပဋ္ဌဟိဿန္တိ။ တိဏ္ဏံ ဥတူနံ အနုစ္ဆဝိကာ တယော ပါသာဒါ အဟေသုံ။ ဧကော မဟာသပ္ပိကော ¶ ၊ ဧကော မောရဂီဝေါ၊ ဧကော မင်္ဂလော နာမ၊ တေသု နေကနာဋကသဟဿပရိဝုတော ပဋိဝသတိ။ ယာဿ မဓုအာပဏံ ဒဿေသိ၊ သာ အသန္ဓိမိတ္တာ နာမ ဒေဝစ္ဆရပရိဘာဂါ ရာဇဓီတာ ဟုတွာ သဋ္ဌိသဟဿာနံ ဣတ္ထီနံ ဇေဋ္ဌိကာ ဓမ္မာသောကရညော အဂ္ဂမဟေသီ အဟောသိ။ အဘိသေကာနန္တရံ တဿ ဣမာ ရာဇိဒ္ဓိယော အာဂတာ၊ ပထဝိယာ စ ဟေဋ္ဌာ ယောဇနပ္ပမာဏေ အာဏာ ပဝတ္တတိ။ တထာ ဥပရိ အာကာသေ။ အနောတတ္တဒဟတော အဋ္ဌဟိ ကာဇေဟိ သောဠသပါနီယဃဋေ ဒိဝသေ ဒိဝသေ ဒေဝတာ အာဟရန္တိ။ ယတော သာသနေ ဥပ္ပန္နသဒ္ဓါ ဟုတွာ အဋ္ဌဃဋေ ဘိက္ခုသင်္ဃဿ အဒါသိ။ ဒွေ ဃဋေ သဋ္ဌိမတ္တာနံ တေပိဋကဘိက္ခူနံ ဒွေ ဃဋေ အဂ္ဂမဟေသိယာ အသန္ဓိမိတ္တာယ။ စတ္တာရော ဃဋေ အတ္တနာ ပရိဘုဉ္စိ ဒေဝတာ [ဒေဝတာဧဝံ ဣတိသဗ္ဗတ္ထ]၊ ဧဝ ဟိမဝန္တတော နာဂလတာဒန္တကဋ္ဌံ သိနိဒ္ဓံ မုဒုကံ ရသဝန္တံ ဒိဝသေ ဒိဝသေ အာဟရန္တိ၊ တေန ရညော စ မဟေသိယာ စ သောဠသန္နံ နာဋကသဟဿာနဉ္စ သဋ္ဌိမတ္တာနဉ္စ ဘိက္ခုသဟဿာနံ ဒေဝသိကံ ဒန္တပေါဏကိစ္စံ နိပ္ဖဇ္ဇတိ။ ဒေဝသိကမေဝဿ ဒေဝတာ အဂဒါမလကံ အဂဒဟရီဋကံ သုဝဏ္ဏဝဏ္ဏဉ္စ ဂန္ဓရသသမ္ပန္နံ အမ္ဗပက္ကံ အာဟရန္တိ။ ဆဒ္ဒန္တဒဟတော ပဉ္စဝဏ္ဏံ နိဝါသနပါရုပနံ ပီတကဝဏ္ဏံ ဟတ္ထပုဉ္ဆနကပဋံ [ဟတ္ထပုစ္ဆနကပဋ္ဋံ ဣတိသဗ္ဗတ္ထ] ဒိဗ္ဗဉ္စ ပါနံ အာဟရန္တိ။ ဒေဝသိကမေဝဿ အနုလေပနဂန္ဓံ ပါရုပနတ္ထာယ အသုတ္တမယိကံ သုမနပုပ္ဖပဋံ မဟာရဟဉ္ဇ အဉ္ဇနံ နာဂဘဝနတော နာဂရာဇာနော အာဟရန္တိ။ ဆဒ္ဒန္တဒဟတောယေဝ ဥဋ္ဌိတဿ သာလိနော နဝဝါဟသဟဿနိ ဒိဝသေ ဒိဝသေ သုဝါ အာဟရန္တိ။ တေ မူသိကာ နိတ္ထုသကာနိ ကရောန္တိ။ ဧကောပိ ခဏ္ဍတဏ္ဍုလော နာဟောသိ။ ရညော သဗ္ဗဋ္ဌာနေသု အယမေဝ တဏ္ဍုလော ပရိဘောဂံ ဂစ္ဆတိ။ မဓုမက္ခိကာ မဓုံ ကရောန္တိ။ ကမ္မာရသာလာသု အစ္ဆာ ကူဋံ ပဟရန္တိ။ ကရဝီကသကုဏာ အာဂန္တွာ မဓုရဿရံ ဝိကူဇေန္တာ ရညော ဗလိကမ္မံ ကရောန္တိ။ ဣမာဟိ ဣဒ္ဓီဟိ သမန္နာဂတော ရာဇာ ဧကဒိဝသံ သုဝဏ္ဏသင်္ခလိကဗန္ဓနံ ¶ ပေသေတွာ စတုန္နံ ဗုဒ္ဓါနံ အဓိဂတရူပဒဿနံ ကပ္ပာ ယုကံ မဟာကာလနာဂရာဇာနံ အာနယိတွာ သေတစ္ဆတ္တဿ ဟေဋ္ဌာ မဟာရဟေ ပလ္လင်္ကေ နိသီဒါပေတွာ အနေကသတ ဝဏ္ဏေဟိ ဇလဇထလဇပုပ္ဖေဟိ သုဝဏ္ဏပုပ္ဖေဟိ စ ပူဇံ ကတွာ သဗ္ဗာ လင်္ကာရပတိမဏ္ဍိတေဟိ သောဠသဟိ နာဋကသဟဿေဟိ သမန္တတော ပရိက္ခိပိတွာ အနန္တဉာဏဿ တာဝ မေ သဒ္ဓမ္မဝရစက္ကဝတ္တိနော သမ္မာသမ္ဗုဒ္ဓဿ [သမ္မာသမ္ဗုဒ္ဓရူပံ ဣတိသဗ္ဗတ္ထ] ရူပံ ဣမေသံ အက္ခီနံ အာပါထံ ကရောဟီတိ ဝတွာ တေန နိမ္မိတံ သကလသရီရေ ဝိပ္ပကိဏ္ဏပုညပ္ပဘာဝနိဗ္ဗတ္တာသီတိ အနုဗျဉ္ဇနပတိမဏ္ဍိတ ဒွတ္တိံသ မဟာပုရိသလက္ခဏ သဿိရီကတာယ ဝိကစကမလုပ္ပလပုဏ္ဍရီကပတိမဏ္ဍိတမိဝ သလိလတလံ တာရာဂဏရံသိဇာလဝိသရဝိပ္ဖုရိတသောဘာသမုဇ္ဇလမိဝ ဂဂနတလံ နီလပီတလောဟိတာ ဒိဘေဒံ ဝိစိတ္တဝဏ္ဏရံသိဝိနဒ္ဓဗျာမပ္ပဘာပရိက္ခေပဝိလာသိတာယ သဉ္စျာပ္ပဘာနုရာဂဣန္ဒဓနုဝိဇ္ဇုလ္လတာပရိက္ခိတ္တမိဝ ကဏကဂိရိသိခရံ နာနာဝိရာဂဝိမလကေတုမာလာသမုဇ္ဇလိတစာရုမတ္ထကသောဘနံ နယနရသာယနမိဝ စ ဗြဟ္မဒေဝမနုဇနာဂယက္ခဂဏာနံ ဗုဒ္ဓရူပံ ပဿန္တော သတ္တဒိဝသာနိ အက္ခိပူဇံ နာမ အကာသိ။ ရာဇာ ကိရ အဘိသေကံ ပါပုဏိတွာ တီဏိယေဝ သံဝစ္ဆရာနိ ဗာဟိရကပါသဏ္ဍံ ပရိဂဏှိ၊ စတုတ္ထေ သံဝစ္ဆရေ ဗုဒ္ဓသာသနေ ပသီဒိ၊ တဿ ပန ပိတာ ဗိန္ဒုသာရော ဗြာဟ္မဏဘတ္တော အဟောသိ။ သော ဗြာဟ္မဏာနဉ္စ ဗြာဟ္မဏဇာတိပါသဏ္ဍာနံ ပဏ္ဍရင်္ဂပရိဗ္ဗာဇကာနဉ္စ သဋ္ဌိသဟဿမတ္တာနံ နိစ္စဘတ္တံ ပဋ္ဌပေသိ။ အသောကောပိ ပိတရာ ပဝတ္တိတံ ဒါနံ အတ္တနော အန္တောပုရေ [အန္တေပုရေ ဣတိသဗ္ဗတ္ထ] တထေဝ ဒဒမာနော ဧကဒိဝသံ သီဟပဉ္ဇရေ ဌိတော တေ ဥပသမပရိဗာဟိရေန အာစာရေန ဘုဉ္ဇမာနေ အသံယတိန္ဒြိယေ အဝိနီတဣရိယာပထေ ဒိသွာ စိန္တေသိ၊ ဤဒိသံ ဒါနံ ဥပပရိက္ခိတွာ ယုတ္တဋ္ဌာနေ ဒါတုံ ဝဋ္ဋတီတိ။ ဧဝံ စိန္တေတွာ အမစ္စေ အာဟ၊ ဂစ္ဆထ ဘဏေ အတ္တနော အတ္တနော သာဓုသမ္မတေ သမဏဗြာဟ္မဏေ အန္တောပုရံ အဘိဟရထ ဒါနံ ဒဿာမီတိ၊ အမစ္စာ သာဓု ဒေဝါတိ ရညော ¶ ပဋိဿုတွာ တေ တေ ပဏ္ဍရင်္ဂပရိဗ္ဗာဇကာ ဇီဝက နိဂဏ္ဌာဒယော အာနေတွာ ဣမေ မဟာရာဇ အမှာကံ အရဟန္တောတိ အာဟံသု၊ အထ ရာဇာ အန္တောပုရေ ဥစ္စာဝစာနိ အာသနာနိ ပညာပေတွာ အာဂစ္ဆန္တူတိ ဝတွာ အာဂတာဂတေ အာဟ အတ္တနော အနုရူပေ အာသနေ နိသီဒထာတိ၊ ဧကစ္စေ ဘဒ္ဒပီဌကေသု ဧကစ္စေ ဖလကပီဌကေသု နိသီဒိံသု၊ တံ ဒိသွာ ရာဇာ နတ္ထိ ဧတေသံ အန္တော သာရောတိ ဉတွာ တေသံ အနုရူပံ ခါဒနီယဘောဇနီယံ ဒတွာ ဥယျောဇေသိ။ ဧဝံ ဂစ္ဆန္တေ ကာလေ ဧကဒိဝသံ သီဟပဉ္ဇရေ ဌိတော နိဂြောဓသာမဏေရံ ဒိသွာ တသ္မိံ ဂတေန ပသာဒေန ဗုဒ္ဓသာသနေ ပသန္နော သဋ္ဌိသဟဿမတ္တေ ပါသဏ္ဍိယေ အပနေတွာ သဋ္ဌိသဟဿမတ္တေ ဘိက္ခူ ဘောဇေန္တော ဗုဒ္ဓသာသနေ ပသီဒိတွာ အသောကာရာမံ ကာရေတွာ တတ္ထ တေ ဝသာပေန္တော ဧကဒိဝသံ အသောကာရာမေ သဋ္ဌိသဟဿဘိက္ခူနံ ဒါနံ ဒတွာ တေသံ မဇ္ဈေ နိသဇ္ဇ သင်္ဃံ စတူဟိ ပစ္စယေဟိ ပဝါရေတွာ ဣမံ ပဉှံ ပုစ္ဆိ၊ ဘန္တေ ဘဂဝတာ ဒေသိတဓမ္မော နာမ ကိတ္တကော ဟောတီတိ၊ မဟာရာဇ နဝ အင်္ဂါနိ၊ ခန္ဓတော စတုရာသီတိဓမ္မက္ခန္ဓသဟဿာနီတိ။ ရာဇာ ဓမ္မေ ပသီဒိတွာ ဧကေကံ ဓမ္မက္ခန္ဓံ ဧကေကဝိဟာရေန ပူဇေဿာမီတိ ဧကဒိဝသမေဝ ဆန္နဝုတိကောဋိခနံ ဝိဿဇ္ဇေတွာ အမစ္စေ အာဏာပေသိ၊ ဧကမေကသ္မိံ နဂရေ ဧကမေကံ ဝိဟာရံ ကာရေန္တာ စတုရာသီတိယာ နဂရသဟဿေသု စတုရာသီတိဝိဟာရသဟဿာနိ ကာရာပေထာတိ၊ သယဉ္စ အသောကာရာမေ အသောကမဟာဝိဟာရတ္ထာယ [သယံစအသောကဟောဝိဟာရတ္ထာယ ဣတိပိကတ္ထစိ] ကမ္မံ ပဋ္ဌပေသိ၊ သင်္ဃော ဣန္ဒဂုတ္တတ္ထေရံ နာမ မဟိဒ္ဓိကံ မဟာနုဘာဝံ ခီဏာသဝံ နဝကမ္မာဓိဋ္ဌာယကံ အဒါသိ၊ ထေရော ယံ ယံ န နိဋ္ဌာတိ၊ တံ တံ အတ္တနော အာနုဘာဝေန နိဋ္ဌာပေသိ၊ ဧဝံပိတီဟိ သံဝစ္ဆရေဟိ ဝိဟာရကမ္မံ နိဋ္ဌာပေသိ၊ ဧကဒိဝသမေဝ သဗ္ဗနဂရေဟိ ပဏ္ဏာနိ အာဂမိံသု၊ အမစ္စာ ရညော အာရောစေသုံ နိဋ္ဌိတာနိ ဒေဝ စတုရာသီတိမဟာဝိဟာရသဟဿာနီတိ။ အထ ရာဇာ ¶ ဘိက္ခုသင်္ဃံ ဥပသင်္ကမိတွာ ဘန္တေ မယာ စတုရာသီတိဝိဟာရသဟဿာနိ ကာရိတာနိ၊ ဓာတုယော ကုတော လစ္ဆာမီတိ ပုစ္ဆိ၊ မဟာရာဇ ဓာတုနိဓာနံ နာမ အတ္ထီတိ သုဏောမ၊ န ပန ပညာယတိ အသုကဋ္ဌာနေတိ။ ရာဇာ ရာဇဂဟေ စေတိယံ ဘိန္ဒာပေတွာ ဓာတုံ အပဿန္တော ပဋိပါကတိကံ ကာရာပေတွာ ဘိက္ခုဘိက္ခုဏိယော ဥပါသကဥပါသိကာယောတိ စတဿော ပရိသာ ဂဟေတွာ ဝေသာလိယံ ဂတော။ တတြာပိ အလဘိတွာ ကပိလဝတ္ထုံ ဂတော၊ တတြာပိ အလဘိတွာ ရာမဂါမံ ဂတော၊ ရာမဂါမေ နာဂါ စေတိယံ ဘိန္ဒိတုံ နာဒံသု။ စေတိယေ နိပတိတကုဒ္ဒါလော ခဏ္ဍာဝဏ္ဍံ ဟောတိ၊ ဧဝံ တတြာပိ အလဘိတွာ အလ္လကပ္ပံ ပါဝံ ကုသိနာရံတိ သဗ္ဗစေတိယာနိ ဘိန္ဒိတွာ ဓာတုံ အလဘိတွာ ပဋိပါကတိကာနိ ကတွာ ရာဇဂဟံ ဂန္တွာ စတဿော ပရိသာ သန္နိပါတာပေတွာ အတ္ထိ ကေနစိ သုတပုဗ္ဗံ အသုကဋ္ဌာနေ ဓာတုနိဓာနံတိ ပုစ္ဆိ။ တတ္ထေကော ဝီသံဝဿ သတိကော ထေရော အသုကဋ္ဌာနေ ဓာတုနိဓာနံတိ န ဇာနာမိ၊ မယှံ ပန ပိတာမဟတ္ထေရော မယိ သတ္တဝဿိကာလေ မာလာစင်္ဂေါဋကံ ဂါဟာပေတွာ ဧဟိ သာမဏေရ အသုကဂစ္ဆန္တရေ ပါသာဏထူပေါ အတ္ထိ။ တတ္ထ ဂစ္ဆာမာတိ ဂန္တွာ ပူဇေတွာ ဣမံ ဌာနံ ဥပဓာရေတုံ ဝဋ္ဋတိ သာမဏေရာတိ အာဟ။ အဟံ ဧတမေဝ ဇာနာမိ မဟာရာဇာတိ အာဟ။ ရာဇာ ဧတဒေဝ ဌာနံတိ ဝတွာ ဂစ္ဆေ ဟရာပေတွာ ပါသာဏထူပံ ပံသုံစ အပနေတွာ ဟေဋ္ဌာ သုဓာဘူမိံ အဒ္ဒသ၊ တတော သုဓာ စ ဣဋ္ဌကာယော စ ဟရာပေတွာ အနုပုဗ္ဗေန ပရိဝေဏံ ဩရုယှ သတ္တရတနဝါလိကံ အသိဟတ္ထာနိ စ ကဋ္ဌရူပကာနိ သမ္ပရိဝတ္တန္တာနိ အဒ္ဒသ၊ သော ယက္ခဒါသကေ ပက္ကောသာပေတွာ ဗလိကမ္မံ ကာရာပေတွာပိ နေဝ အန္တံ ပဿန္တော ဒေဝတာ နမဿမာနော အဟံ ဣမာ ဓာတုယော ဂဟေတွာ စတုရာသီတိဝိဟာရသဟဿေ နိဒဟိတွာ သက္ကာရံ ကရောမိ။ မာ မေ ဒေဝတာ အန္တရာယံ ကရောန္တူတိ အာဟ၊ သက္ကော ဒေဝရာဇာ စာရိကံ စရန္တော တံ ဒိသွာ ဝိဿကမ္မံ အာမန္တေတွာ တာတ အသောကဓမ္မရာဇာ ဓာတုယော ¶ နီဟရိဿာမီတိ ပရိဝေဏံ ဩတိဏ္ဏော။ ဂန္တွာ ကဋ္ဌရူပါနိ နီဟရာပေဟီတိ။ သော ပဉ္စစူလကဂါမဒါရကဝေသေန ဂန္တွာ ရညော ပုရတော ဓနုကဟတ္ထော ဌတွာ ဟာရေမိ မဟာရာဇာတိ အာဟ၊ ဟရ တာတာတိ သရံ ဂဟေတွာ သန္ဓိမှိယေဝ ဝိဇ္ဈိ၊ သဗ္ဗံ ဝိပ္ပကိရီယိတ္ထ၊ အထ ရာဇာ အာဝိဉ္ဇနေ [အဝိဉ္စိနေ ဣတိပိကတ္ထစိ] ဗန္ဓကုဉ္စိကမုဒ္ဒိကံ ဂဏှိ၊ မဏိက္ခန္ဓံ ပဿိတွာ အနာဂတေ ဒဠိဒ္ဒရာဇာနော ဣမံ မဏိံ ဂဟေတွာ ဓာတူနံ သက္ကာရံ ကရောန္တူတိ ပဏ္ဏေ အက္ခရာနိ ဒိသွာ ကုဇ္ဈိတွာ မာဒိသာနံ ပန ရာဇူနံ [ရာဇာနံ ဣတိသဗ္ဗတ္ထ] ဒဠိဒ္ဒရာဇာတိ ဝတ္တုံ အယုတ္တံတိ ပုနပ္ပုနံ ဃဋေတွာ ဒွါရံ ဝိဝရိတွာ အန္တောဂေဟံ ပဝိဋ္ဌော အဋ္ဌာရသဝဿာဓိကာနံ ဒွိန္နံ ဝဿသတာနံ ဥပရိ အာရောပိတဒီပါ တထေဝ ပဇ္ဇလန္တိ၊ နီလုပ္ပလပုပ္ဖာနိ တံခဏံယေဝ အာဟရိတွာ အာရောပိတာနိ ဝိယ ပုပ္ဖသန္ထာရော တံ ခဏံ သန္ထတော ဝိယ ဂန္ဓာ တံ မုဟုတ္တံ ပိံသိတွာ ဌပိတာ ဝိယ အဟေသုံ။ ရာဇာ သုဝဏ္ဏပဋ္ဋံ ဂဟေတွာ အနာဂတေ ပိယဒါသော နာမ ကုမာရော ဆတ္တံ ဥဿာပေတွာ အသောကော နာမ ဓမ္မရာဇာ ဘဝိဿတိ၊ သော ဣမာ ဓာတုယော ဝိတ္ထာရိတာ ကရိဿတီတိ ဝါစေတွာ ဒိဋ္ဌောဟံ အယျေန မဟာကဿပတ္ထေရေနာတိ ဝတွာ ဝါမဟတ္ထံ အာဘုဇိတွာ ဒက္ခိဏဟတ္ထေန အပ္ဖောဋေသိ။ သော တသ္မိံ ဌာနေ ပရိစရဏကဓာတုမတ္တမေဝ ဌပေတွာ သေသဓာတုယော သဗ္ဗာ ဂဟေတွာ ဓာတုဃရံ ပုဗ္ဗေ ပိဟိတနယေနေဝ ပိဒဟိတွာ သဗ္ဗာ ယထာ ပကတိယာယေဝ ကာရေတွာ ဥပရိပါသာဏစေတိယံ ပတိဋ္ဌာပေတွာ စတုရာသီတိယာ ဝိဟာရသဟဿေသု ဓာတုယော ပတိဋ္ဌာပေသိ။ အထေကဒိဝသံ ရာဇာ ဝိဟာရံ ဂန္တွာ ဘိက္ခုသံဃံ ဝန္ဒိတွာ ဧကမန္တေ နိသိန္နော ယဒိ ဘန္တေ ဆန္နဝုတိကောဋိဓနံ ဝိဿဇ္ဇေတွာ စတုရာသီတိဝိဟာရသဟဿာနိသစေတိယာနိ ကာရာပေတွာပိ အဟံ န ဒါယာဒေါ။ အညော ကော ဒါယာဒေါတိ၊ ပစ္စယဒါယကော နာမ တွံ မဟာရာဇ၊ ယော ပန အတ္တနော ပုတ္တဉ္စ ဓီတရဉ္စ ပဗ္ဗာဇေတိ၊ အယံ သာသနေ ဒါယာဒေါ နာမာတိ ဧဝံ ဝုတ္တေ ¶ အသောကော ရာဇာ သာသနေ ဒါယာဒဘာဝံ ပတ္ထယမာနော အဝိဒူရေ ဌိတံ မဟိန္ဒကုမာရံ ဒိသွာ သက္ခိဿသိ တာတ တွံ ပဗ္ဗဇိတုံတိ အာဟ။ ကုမာရော ပကတိယာ ပဗ္ဗဇိတုကာမော ရညော ဝစနံ သုတွာ အတိဝိယ ပါမောဇ္ဇဇာတော ပုဗ္ဗဇာမိ [ပဗ္ဗဇ္ဇာမိ ဣတိသဗ္ဗတ္ထ] ဒေဝ။ မံ ပဗ္ဗာဇေတွာ သာသနေ ဒါယာဒေါ ဟောထာတိ အာဟ။ တေန စ သမယေန ရာဇဓီတာ သံဃမိတ္တာပိ တသ္မိံ ဌာနေ ဌိတာ ဟောတိ။ တံ ဒိသွာ အာဟ တွမ္ပိ အမ္မ ပဗ္ဗဇိတုံ သက္ခိဿသီတိ၊ သာဓု တာတာတိ သမ္ပဋိစ္ဆိ။ ရာဇာ ပုတ္တာနံ မနံ လဘိတွာ ပဟဋ္ဌစိတ္တော ဘိက္ခုသံဃံ ဥပသင်္ကမိတွာ ဘန္တေ ဣမေ ဒါရကေ ပဗ္ဗာဇေတွာ မံ သာသနေ ဒါယာဒံ ကရောထာတိ။ သင်္ဃော ရညော ဝစနံ သမ္ပဋိစ္ဆိတွာ ကုမာရံ မောဂ္ဂလိပုတ္တတိဿတ္ထေရေန ဥပဇ္ဈာယေန မဟာဒေဝတ္ထေရေန အာစရိယေန ပဗ္ဗဇာပေသိ [ပဗ္ဗဇ္ဇာပေသိ ဣတိသဗ္ဗတ္ထ]။ မဇ္ဈန္တိကတ္ထေရေန အာစရိယေန ဥပသမ္ပာဒေသိ၊ သော ဥပသမ္ပဒါမာလကေယေဝ သဟ ပဋိသမ္ဘိဒါဟိ အရဟတ္တံ ပါပုဏိ။ သင်္ဃမိတ္တာယပိ ရာဇဓီတာယ အာစရိယာဏီ အာယုပါလတ္ထေရီ နာမ [အစာရိယာ အာယုပါလတ္ထေရီနာမ ဣတိသဗ္ဗတ္ထ]။ ဥပဇ္ဈာယာ ဓမ္မပါလတ္ထေရီ နာမ အဟောသိ။ ရာဇာ ပန အနေကာကာရေန ဗုဒ္ဓသာသနံ သောဘေတွာ မောဂ္ဂလိပုတ္တတိဿတ္ထေရဿ သဟာယေန [သဟယျေန။ သာဟာယျေန။ သာဟယျေန ဣတိပိကတ္ထစိ] သဋ္ဌိသဟဿမတ္တေ ဒုဿီလေ တိတ္ထိယေ ဗုဒ္ဓသာသနာ ဥပ္ပဗ္ဗာဇေတွာ တတိယဓမ္မသံဂီတိံ နိဋ္ဌာပေသိ။ တသ္မိံ ကိရ သမာဂမေ ဘိက္ခုဘိက္ခုဏိယော ကိတ္တကာတိ [ကိတ္တကာနီတိ ဣတိသဗ္ဗတ္ထ]၊ ဝုတ္တဉှိ။

တသ္မိံ သမာဂမေ အာသုံ၊ အသီတိဘိက္ခုကောဋိယော၊

အဟေသုံ သတသဟဿာနိ၊ တေသု ခီဏာသဝါ ယတီ။

နဝုတိသတသဟဿာနိ၊ အဟူ ဘိက္ခုဏိယော တဟိံ၊

ခီဏာသဝါ သိက္ခုဏိယော၊ သဟဿံ အာသု တာသု စာတိ။

ဧဝံ ¶ သော အသောကော ဓမ္မရာဇာ သကလဇမ္ဗုဒီပေ အဂ္ဂရာဇာ ဟုတွာ ဗုဒ္ဓသာသနံ သောဘေန္တော ဝိဟာသိ။ အယံ ပနေတ္ထ သင်္ခေပေါ၊ ဝိတ္ထာရော ပန မဟာဝံသေ ဝုတ္တောတိ။ ဝုတ္တဉှိ။

သမ္ပုဏ္ဏတ္တာ အယံ တိဿော၊ စေတနာယော မဓုပ္ပဒေါ၊

သဗ္ဗတ္ထ သဗ္ဗဒါ သဗ္ဗ၊ သမ္ပတ္တိမဘိသမ္ဘုဏီတိ။

မဇ္ဈိမော ပန ဝါဏိဇော အတ္တနော ပါရဝါဒိဒေါသေန ပရသမုဒ္ဒေ လင်္ကာယံ နိဗ္ဗတ္တိ။ တဿေဝံ ကထာပဋိပါဋိ ဝေဒိတဗ္ဗာ။ တမ္ဗပဏ္ဏိဒီပေ ကိရ မုဋသီဝေါ နာမ ရာဇာ သဋ္ဌိဝဿာနိ ရဇ္ဇံ ကာရေသိ၊ တဿ ပုညပညာဂုဏောပေတာ အညမညံ ဟိတေသိနော ဒသ ပုတ္တာ အဟေသုံ။ ဒွေ စ ဓီတရော။ သဗ္ဗေ တေ သမဂ္ဂါ သမ္မောဒမာနာ ဝသန္တိ။ အထာပရသ္မိံ သမယေ အမစ္စာ မုဋသီဝရညေ ကာလကတေ ဒေဝါနံပိယတိဿကုမာရံ အဘိသိဉ္စိံသု၊ အဘိသေကသမကာလမေဝဿ အနေကာနိ အစ္ဆရိယာနိ အဟေသုံ။ တာနိ ပကာသေန္တာ မဟာဝံသကထာစရိယာ အာဟံသု။

ဒေဝါနံပိယတိဿောတိ၊ ဝိဿုတော ဒုတိယော သုတော၊

တေသု [အဟောသိမုဋသီဝဿ၊ ဒသပုတ္တေသုပုညဝါ ဣတိကတ္ထစိ] ဘာတုသု သဗ္ဗေသု၊ ပုညပညာဓိကော အဟု။

ဒေဝါနံပိယတိဿော သော၊ ရာဇာသိ ပိတုအစ္စယေ၊

တဿာဘိသေကေန သမံ၊ ဗဟူနစ္ဆရိယာနဟူ။

လင်္ကာဒီပမှိ သကလေ၊ နိဓယော ရတနာနိစ၊

အန္တောဌိတာနိ ဥဂ္ဂန္တွာ၊ ပထဝီတလမာရုဟုံ။

လင်္ကာဒီပသမီပမှိ၊ ဘိန္နနာဝါ ဂတာနိ စ၊

တတြ ဇာတာနိ စ ထလံ၊ ရတနာနိ သမာရုဟုံ။

ဆာတပဗ္ဗတပါဒမှိ၊ တိဿော စ ဝေဠုယဋ္ဌိယော၊

ဇာတာ ရထပတောဒေန၊ သမာနာ ပရိမာဏတော။

တာသု ¶ ဧကာ လတာယဋ္ဌိ၊ ရဇတာဘာ တဟိံ လတာ၊

သုဝဏ္ဏဝဏ္ဏာ ရုစိရာ၊ ဒိဿန္တေတာ မနောရမာ။

ဧကာ ကုသုမယဋ္ဌီတု၊ ကုသုမာနိ တဟိံပန၊

နာနာနိ နာနာဝဏ္ဏာနိ၊ ဒိဿန္တေတိဖုဋာနိ စ။

ဧကာ သကုဏယဋ္ဌီ တု၊ တဟိံပက္ခိမိဂါ ဗဟူ၊

နာနာ စ နာနာဝဏ္ဏာ စ၊ သဇီဝါဝိယ ဒိဿရေ။

ဟယဂဇရထာ မလကျာ၊ ဝလယင်္ဂုလိဝေဌကာ စေဝ၊

ကကုဓဖလာ ပါကတိကာ၊ ဣစ္စေ တာ အဋ္ဌ ဇာတိယာ။

မုတ္တာ သမုဒ္ဒါ ဥဂ္ဂန္တွာ၊ တီရေ ဝဋ္ဋိဝိယဋ္ဌိတာ၊

ဒေဝါနံပိယတိဿဿ၊ သဗ္ဗံ ပုညဝိဇမ္ဘိတံ။

ဣန္ဒနီလံ ဝေဠုရိယံ၊ လောဟိတင်္ကမဏီ စိ မေ၊

ရတနာနိ ပနေ တာနိ၊ မုတ္တာ တာ တာစ ယဋ္ဌိယော၊

သတ္တာဟဗ္ဘန္တရေယေဝ၊ ရညော သန္တိကမာဟရုံတိ။

တေန စ သမယေန ဒေဝါနံပိယတိဿမဟာရာဇာ စ အသောကော ဓမ္မရာဇာ စ အဒ္ဒိဋ္ဌသဟာယာ ဟောန္တိ။ တသ္မာ သော ဧတာနိ ရတနာနိ စ အညာနိ ဗဟူနိ ဥပါယနာနိ မမ သဟာယဿ ဒေထာတိ ဓမ္မာသောကမဟာနရိန္ဒဿ ပဏ္ဏာကာရတ္ထာယ ပေသေသိ။ သောပိ တံ ဒိသွာ ပသီဒိတွာ ပဉ္စရာဇကကုဓဘဏ္ဍာနိ စ အညဉ္စ ဗဟုပဏ္ဏာကာရဉ္စ အဘိသေကတ္ထာယ ပေသေသိ။ မယှံ သဟာယံ အဘိသေကံ ကရောန္တူတိ။ န ကေဝလဉ္စေတံ အာမိသပဏ္ဏာကာရံ။ ဣမံ ကိရ ဓမ္မပဏ္ဏာကာရမ္ပိ ပေသေသိ။

အဟံ ဗုဒ္ဓံစ ဓမ္မံစ၊ သံဃံစ သရဏံ ဂတော၊

ဥပသကတ္တံ ဝေဒေသိံ၊ သကျပုတ္တဿ သာသနေ။

ဣမေသု တီသု ဝတ္ထူသု၊ ဥတ္တမေသု နရုတ္တမ၊

စိတ္တံ ပသာဒယိတွာန၊ သဒ္ဓါယ သရဏံ ဝဇာတိ။

အမစ္စာ ¶ ပုန လင်္ကမာဂမ္မ ရာဇာနံ အဘိသိဉ္စိံသု၊ တေန ခေါ ပန သမယေန မောဂ္ဂလိပုတ္တတိဿတ္ထေရော ကတ္ထ နုခေါ အနာဂတေ သာသနံ သုပ္ပတိဋ္ဌိတံ ဘဝေယျာတိ ဥပပရိက္ခန္တော ပစ္စန္တိမေ သုပ္ပတိဋ္ဌိတံ ဘဝိဿတီတိ ဉတွာ တေ တေ ထေရေ တတ္ထ တတ္ထ ပေသေတွာ မဟာမဟိန္ဒတ္ထေရံ ဂန္တွာ တမ္ဗပဏ္ဏိဒီပံ ပသာဒေဟီတိ နိယောဇေသိ၊ သက္ကော စ ဒေဝါနမိန္ဒော မဟာမဟိန္ဒတ္ထေရံ ဥပသံကမိတွာ ကာလကတော ဘန္တေ မုဋသီဝေါ ရာဇာ။ ဣဒါနိ ဒေဝါနံပိယတိဿမဟာရာဇာ ရဇ္ဇံ ကာရေတိ။ သမ္မာသမ္ဗုဒ္ဓေန စ တုမှေ ဗျာကတာ အနာဂတေ မဟိန္ဒော နာမ ဘိက္ခု တမ္ဗပဏ္ဏိဒီပံ ပသာဒေဿတီတိ။ တသ္မာ တိဟ ခေါ ဘန္တေ ကာလော ဒီပဝရံ ဂမနာယ၊ အဟမ္ပိ သဟာယော ဘဝိဿာမီတိ၊ ထေရော တဿ ဝစနံ သမ္ပဋိစ္ဆိတွာ အတ္တသတ္တမော စေတိယပဗ္ဗတဝိဟာရတော ဝေဟာသံ ဥပ္ပတိတွာ အနုရာဓပုရဿ ပုရတ္ထိမဒိသာယ မိဿကပဗ္ဗတေ ပတိဋ္ဌဟိ၊ ဣမံ ဧတရဟိ စေတိယပဗ္ဗတောတိပိ သဉ္ဇာနန္တိ။ တဒါ တမ္ဗပဏ္ဏိယံ ဥဿဝဒိဝသော ဟောတိ၊ ရာဇာ ဆဏံ ကရောထာတိ အမစ္စေ အာဏာပေတွာ စတ္တာဠီသသဟဿပုရိသေဟိ ပရိဝါရိတော နဂရမှာ နိက္ခမိတွာ မိဿကပဗ္ဗတံ ပါယာသိ မိဂဝံ ကီဠိတုကာမော။ အထ တသ္မိံ ပဗ္ဗတေ အဓိဝတ္ထာ ဧကာ ဒေဝတာ ရညော ထေရေ ဒဿေဿာမီတိ ရောဟိတမီဂဝဏ္ဏေန အဝိဒူရေ တိဏပဏ္ဏာနိ ခါဒမာနာ ဝိယ စရတိ၊ ရာဇာ အယုတ္တံ ဒါနိ ပမတ္တံ ဝိဇ္ဈိတုံတိ ဇိယံ ပေါဌေသိ၊ မိဂေါ အမ္ဗတ္ထလမဂ္ဂံ ဂဟေတွာ ပလာယိတုံ အာရဘိ၊ ရာဇာ တံ အနုဗန္ဓန္တော အမ္ဗတ္ထလမေဝ အဘိရုဟိ၊ မိဂေါပိ ထေရာနံ အဝိဒူရေ အန္တရဓာယိ၊ မဟိန္ဒတ္ထေရော ရာဇာနံ အဝိဒူရေ အာဂစ္ဆန္တ မံယေဝ ရာဇာ ပဿတု၊ မာ ဣတရေတိ အဓိဋ္ဌဟိတွာ တိဿ တိဿ ဣတော ဧဟီတိ အာဟ၊ ရာဇာ တံ သုတွာ စိန္တေသိ။ ဣမသ္မိံ တမ္ဗပဏ္ဏိဒီပေ ဇာတော မံ တိဿောတိ နာမံ ဂဟေတွာ အာလပိတုံ သမတ္ထော နာမ နတ္ထိ။ အယံ ပန ဆိန္နဘိန္နပဋဓရော ဘဏ္ဍုကာသာဝ ဝသနော မံ နာမေနာ လပတိ၊ ကော နုခေါ ယံ ဘဝိဿတိ မနုဿော အမနုဿော ဝါတိ။ ထေရော အာဟ။

သမဏာ ¶ မယံ မဟာရာဇ၊ ဓမ္မရာဇဿ သာဝကာ၊

တဝေဝ အနုကမ္ပာယ၊ ဇမ္ဗုဒီပါ ဣဓာဂတာတိ။

ရာဇာ ဓမ္မာသောကနရိန္ဒေန ပေသိတသာသနာနုသာရေန အနုဿရမာနော အယျာ နုခေါ အာဂတာတိ တာဝဒေဝ အာယုဓံ နိက္ခိပိတွာ ဧကမန္တံ နိသီဒိ သမ္မောဒနီယံ ကထံ ကထယမာနော သာရဏီယံ [သမ္မောဒနီယံ-ဣတိသဗ္ဗတ္ထ] ကထံ ကုရုမာနော။ တသ္မိံ တာနိပိ စတ္တာဠီသပုရိသသဟဿာနိ အာဂန္တွာ တံ ပရိဝါရေသုံ၊ တဒါ ထေရော ဣတရေပိ ဇနေ ဒဿေသိ၊ ရာဇာ ဒိသွာ ဣမေ ကဒါ အာဂတာတိ ပုစ္ဆိ၊ မယာ သဒ္ဓိံယေဝ မဟာရာဇာတိ။ ဣဒါနိ ပန ဇမ္ဗုဒီပေ အညေပိ ဧဝရူပါ သမဏာ သန္တီတိ။ မဟာရာဇ ဧတရဟိ ဇမ္ဗုဒီပေါ ကာသာဝပဇ္ဇောတော ဣသိဝါတပဋိဝါတော၊ တသ္မိံ။

တေဝိဇ္ဇာ ဣဒ္ဓိပ္ပတ္တာ စ၊ စေတောပရိညကောဝိဒါ၊

ခီဏာသဝါ အရဟန္တော၊ ဗဟူ ဗုဒ္ဓဿ သာဝကာတိ။

ရာဇာ တံ သုတွာ ပသန္နော အဟောသိ၊ အထ ထေရော ရုက္ခောပမာဒိနာ တဿ ပညာဝေယျတ္တိယံ ဉတွာ ဓမ္မံ ဒေသေသိ သနရာမရေဟိ သာဓုကာရံ ကာရယမာနော။ တေန ဝုတ္ထံ။

ပဏ္ဍိတောတိ ဝိဒိတွာန၊ စုလ္လဟတ္ထိပဒေါပမံ၊

သုတ္တန္တံ ဒေသယီ ထေရော၊ မဟီပဿ မဟာမတိ [မဟီမတီ ဣတိပိကတ္ထစိ]။

ဒေသနာပရိယောသာနေ သော သဒ္ဓိံ တေဟိ နရေဟိ စတ္တာဠီသသဟဿေဟိ သရဏေသု ပတိဋ္ဌဟီတိ။ အထဿ ရာဇာ သွေ ဘန္တေ မမ ဂေဟေ ဘိက္ခံ ဂဏှာထာတိ ယာစိတွာ ဂန္တွာ နဂရဉ္စ ရာဇဂေဟဉ္စ အလင်္ကရိတွာ ထေရေ နိသီဒါပေတွာ ပဏီတေနာဟာရေန ပရိဝိသိတွာ အနုဠာဒေဝိပ္ပမုခါဟိ ပဉ္စသတဣတ္ထီဟိ သဒ္ဓိံ ဧကမန္တံ နိသီဒိ။ အထ ထေရော ဓမ္မရတန ဝဿံ ဝဿာပေသိ။ တတော ¶ တာ ပဉ္စသတဣတ္ထိယော သောတာပတ္တိဖလံ ပါပုဏိံသု။ တတော ဟတ္ထိသာလာယံ သဟဿံ၊ နန္ဒနဝနေ သဟဿံတိ ဧဝံ ဒုတိယဒိဝသေ အဍ္ဎတေယျာနိ ပါဏသဟဿာနိ သောတာပတ္တိဖလေ ပတိဋ္ဌာပေသိ။ တတိယဒိဝသေ အဍ္ဎနဝပ္ပမာဏံ ပါဏသဟဿံတိ ဧဝံ အနေကသတာနံ အနေကသဟဿာနံ အနေကသတ သဟဿာနံ ဓမ္မာ မတံ ပါယေသိ။ ဝုတ္တဉှိ။

မဟာမဟိန္ဒသုရိယော၊ လင်္ကာဝေဟာသမဇ္ဈဂေါ၊

ဗောဓနေယျမ္ဗုဇေ ကာသိ၊ ဝိကာသံ ဓမ္မရံသိနာ။

မဟာမဟိန္ဒစန္ဒော သော၊ လင်္ကာဝေဟာသမဇ္ဈဂေါ၊

ဗောဓေသိ ဓမ္မရံသီဟိ၊ ဝေနေယျကုမုဒါကရေ။

မဟာမဟိန္ဒမေဃော သော၊ ဝဿံ ဓမ္မမ္ဗုဝုဋ္ဌိယာ၊

သာဓူနံ စိတ္တဗီဇေသု၊ ဇနေသိ ကုသလင်္ကုရေတိ။

အထ ရာဇာ သုမနသာမဏေရေန ဓမ္မာသောကဿ ဟတ္ထတော သမ္မာသမ္ဗုဒ္ဓပရိဘုတ္တပတ္တပူရဓာတုယော စ သက္ကဿ သန္တိကာ ဒက္ခိဏက္ခကဓာတုံစ အာဟရာပေတွာ [အာဟာရိတွာ-ဣတိသဗ္ဗတ္ထ] စေတိယပဗ္ဗတေ ထူပံ အာဒိံကတွာ သကလလင်္ကာဒီပေ ယောဇနေ ယောဇနေ ထူပါနိ ကာရေတွာ ဒက္ခိဏကဓာတုံ နိဒဟိတွာ ထူပါရာမထူပဉ္စ ပတိဋ္ဌာပေသိ။ အထ သင်္ဃမိတ္တာယ ထေရိယာ အာနီတံ ဇယမဟာဗောဓိနော ဒက္ခိဏမဟာသာခံ ပတိဋ္ဌာပေတွာ ပူဇံ ကာရေသိ။ သဗ္ဗော ပနေတ္ထ ကထာဝိတ္ထရော မဟာဝံသတော ဝေဒိတဗ္ဗော။

ပါရဝါဒိကဒေါသေန၊ ဇာတေဝံ ပရသာဂရေ၊

ပတ္တာနုမောဒနာ ဧဝံ၊ လင်္ကာယံ အာသိ ဣဿရော။

ဘော ယောနိသော ကုဗ္ဗထ ပုညကမ္မေ၊

ဂန္တွာန ယေ ယတ္ထ န သောစယန္တီတိ။

တေဘာတိကမဓုဝါဏိဇကာနံ ဝတ္ထုံ အဋ္ဌမံ။

၃၉။ ဗောဓိရာဇဓီတုယာ [ဗောဓိရာဇဓီတာယ ဣတိသဗ္ဗတ္ထ] ဝတ္ထုမှိ အယမာနုပုဗ္ဗီကထာ

ဘဂဝတိ ပရိနိဗ္ဗုတေ လင်္ကာယံ သာသနေ သုပ္ပတိဋ္ဌိတေ တတ္ထ ဟကုရေဠီတိ ဧကော ဂါမော အဟောသိ၊ တတ္ထေကာ ဒါရိကာ ဂါမာဒါရိကာဟိ သဒ္ဓိံ တတ္ထ တတ္ထ ကီဠန္တီ ဝိဟရတိ၊ တဒါ ဂါမသမီပေ မဟာသောဗ္ဘံ ဟောတိ။ တတ္ထေကော မရုတ္ထရုက္ခော သဗ္ဗဒါ ပါဠိဖုလ္လောဝ တိဋ္ဌတိ။ မနုဿာ ဗုဒ္ဓပူဇနတ္ထံ ပုပ္ဖာနိ ဝိစိဏန္တာ ဥဒကံ ဩဂဟေတွာ ရုက္ခမဘိရုယှ ပုပ္ဖာနိ ဩစိဏန္တိ၊ ကုမာရိကာ တေ ဒိသွာ မနုဿာ သုခေန ဂန္တွာ ပုပ္ဖာနိ ဩစိဏန္တူတိ ဧကံ သုက္ခပါလိဘဒ္ဒဒဏ္ဍကံ အာဟရိတွာ သေတုံ ကတွာ ဌပေသိ၊ တတော ပဋ္ဌာယ မနုဿာ တေနဂန္တွာ ပုပ္ဖာနိ ဩစိဏန္တိ။ အထ သာ တတော စုတာ တေနေဝ ကုသလကမ္မေန ဇမ္ဗုဒီပေ ပါဋလိပုတ္တနဂရေ သောမဒတ္တရညော ဓီတာ ဟုတွာ နိဗ္ဗတ္တိ၊ ဥတ္တမရူပဓရာ ဒေဝစ္ဆရပဋိဘာဂါ အဟောသိ။ မာတာပိတရော ပနဿာ ဗောဓိရာဇကုမာရိကာတိ ဝေါဟရိံသု။ ပုဗ္ဗေ ကတသေတုအာနုဘာဝေန တဿာ သုဝီရကော နာမေကော အာကာသဂါမီ သိန္ဓဝပေါတကော နိဗ္ဗတ္တိ။ ရာဇဓီတုယာ ပန ပိတာ ဗုဒ္ဓမာမကော ဓမ္မမာမကော သင်္ဃမာမကော ဟုတွာ မဟန္တံ ပုညံ ပသဝန္တော သိန္ဓဝပေါတကံ ဒိသွာ ပုညကရဏဿ မေ သဟာယော လဒ္ဓါတိ တုဋ္ဌမာနသော အဿံ အဘိရုဟိတွာ ဒိဝသဿ တိက္ခတ္တုံ ဂန္တွာ မဟာဗောဓိံ ¶ ဝန္ဒတိ။ ရာဇဓီတာ နံ ဒိသွာ ပိတုသန္တိကံ ဂန္တွာ အဘိဏှံ တာတ ကုဟိံ ဂစ္ဆသီတိ ပုစ္ဆိ။ ရာဇာ န ကိဉ္စိ ကထေသိ၊ အထ သာ ပုနပ္ပုနံ ပိတရံ နိဗန္ဓန္တီ ပုစ္ဆိ။ တတော ရာဇာ တဿာဝိ ကရောန္တော ဧဝမာဟ။

အမှာကံ ဘဂဝါ ပုဗ္ဗေ၊ ပူရေန္တော ဒသပါရမီ၊

အဒါသိ သီသရတ္တက္ခိ၊ မံသံ ဇီဝိတမေဝ စ။

ပုတ္တဒါရေ စ ရဇ္ဇေ စ၊ ပတွာ [ဒတွာ ဣတိပိကတ္ထစိ] ပါရမိမတ္ထကံ၊

အနပ္ပကပ္ပကောဋီနံ၊ ခေပေတွာ ကပိလဝုယေ။

သက္ကရာဇကုလေ ဇာတော၊ လောကေ အပ္ပဋိပုဂ္ဂလော၊

သမ္ပတ္တစက္ကဝတ္တိတ္တံ၊ ပဟန္တွာန နရာဓိပေါ။

ဒိသွာ နိမိတ္တေ စတုရော၊ နိက္ခမ္မ အဘိနိက္ခမံ၊

ဗောဓိမူလမုပါဂမ္မ၊ နိသိန္နော ဝဇိရာသနေ။

သဟဿဗာဟုံ မာပေတွာ၊ နာနာယုဓသမာကုလံ [နာနာဝုဓသမာကုလံ-ဣတိသဗ္ဗတ္ထ]၊

မဟာဘီတိကရံ ဝေသံ၊ ကာဠပဗ္ဗတသာဒိသံ။

မာပေတွာန သမာရုယှ၊ ဂိရိမေခလဝါရဏံ၊

မာရသေနံ သမာနေတွာ၊ အာဂတံ မကရဒ္ဓဇံ။

ပါရမိတာဗလေန တံ၊ မာရသေနံ ပလာပိယ၊

ယတ္ထာသီနော ကိလေသာရိ၊ သဟဿံ ဃာတယီ ဇိနော။

နယနံ သုဇလသေကေဟိ၊ သတ္တာဟံ ဇိနသေဝိတံ၊

ပူဇိတံ ဒေဝဗြဟ္မေဟိ၊ သိဒ္ဓါရဂနရာဒိဟိ၊

ဝန္ဒိတုံ ဇယဗောဓိံတံ၊ ဂစ္ဆာမိ သတတံ အဟံ။

ဥပါသတိ သဒါ ဂန္တွာ၊ ယော နရော ဗောဓိပါဒပံ၊

ဂန္ဓောဒဒီပဓူပါဒိ၊ နာနာပူဇာဟိ သာဓုကံ။

သ နရော နိရာမယော ဟောတိ၊ ပစ္စတ္တေ စ ပရတ္ထ စ၊

ပူဇိတော မာနိတော ဟောတိ၊ ဒီဃာယု ဗလဝါ သုခီ။

တဒတ္ထံ ပတ္ထယန္တေန၊ အတ္ထကာမေန ဇန္တုနာ၊

ဥပါသနီယံ သဒ္ဓါယ၊ နိစ္စံ တံ ဗောဓိပါဒပံတိ။

တံ သုတွာ ကုမာရိကာ ပီတိယာ ဖုဋသရီရာ ပိတရံ ဝန္ဒိတွာ အဟမ္ပိ တာတ ဂစ္ဆာမီတိ အာဟ။ ရာဇာ ပနဿာ ဥပဒ္ဒဝဘယေန ဂမနံ န ဣစ္ဆိ။ တတော သာ ယာဝတတိယံ ပိတရံ ယာစိတွာ ရညာ အနုညာတာ။ တတော ပဋ္ဌာယ ပိတရာ သဒ္ဓိံ သိန္ဓဝမာရုယှ ဗောဓိံ ဝန္ဒိတုံ သတတံ ဂစ္ဆတိ။ အထာပရဘာဂေ ရာဇာ မရဏမဉ္စေ နိပန္နော စိန္တေသိ။ ဓီတာ မေ နိရန္တရံ ဗောဓိဥပဋ္ဌာနံဂစ္ဆတိ၊ ဧတိဿာ အနာဂတေ ယံကိဉ္စိ ဘယံ ဥပ္ပဇ္ဇမာနံ တတော ဥပ္ပဇ္ဇတိ။ တတ္ထ မေ ကိံ ကာတဗ္ဗန္တိ။ တတော သိန္ဓဝံ ပက္ကောသာပေတွာ တဿ ကဏ္ဏမူလေ မန္တေန္တော ဧဝမာဟ၊ တာတ မမ ဓီတာ အဘိဏှံ တဝ သဟာယံ ကတွာ ဗောဓိံ ဝန္ဒိတုံ ဂစ္ဆတိ။ တတ္ထဿာ ယံကိဉ္စိ ဘယံ ဘဝေယျ။ တံ နပ္ပတိရူပံ။ တတ္ထ ဂမနာဂမနေ မမ ဓီတရံ ရက္ခေယျာသီတိ တဿ ဓီတရံ ပဋိပါဒေတွာ ကာလမကာသိ။ တတော ရာဇဓီတာ ပိတုသရီရကိစ္စံ ကာရေတွာ ဒိဝသဿ တိက္ခတ္တုံ အဿမဘိရုယှ ဗောဓိဥပဋ္ဌာနံ ဂစ္ဆတိ။ မနုဿာ ပနဿာ ရူပသမ္ပတ္တိံ ဒိသွာ ဝိမှိတမာနသာ ရာဇာရဟံ ဝတ နော ဣဒံ ပဏ္ဏာကာရံ ဒိဋ္ဌံ။ ဂန္တွာ ရညော အာစိက္ခိဿာမ။ အပ္ပေဝ နာမ ရာဇာ သော ကိဉ္စိ နော ဒဒေယျာတိ စိန္တေတွာ ရညော သန္တိကံ ဂန္တွာ ဝန္ဒိတွာ ဌိတာ ဧဝမာဟံသု။

ဗောဓိမဏ္ဍံ သမာဂမ္မ၊ အဘိဏှံ တုဋ္ဌမာနသာ၊

ဝန္ဒန္တီ ယာတိ ကညေကာ၊ ဝိဇ္ဇူဝ သိရိယာ ဇလံ။

နီလဓမ္ပိလ္လဘာရာ သာ၊ ဝိသာလာယတလောစနာ၊

သောဏ္ဏဒေါလာဘသဝဏာ၊ သာမာ သုဘပယောဓရာ။

သတရံသီဟိ သမ္မိဿ၊ သဉ္စျာမ္ဗုဒသမာဓရာ၊

တုင်္ဂနာသာ နီလဘမု၊ ဟာသဘာသာ မနောရမာ။

ဤဒိသံ ¶ နော မဟာရာဇာ [မဟာရာဇဒိဋ္ဌပုဗ္ဗ ဣတိပိကတ္ထစိ]၊ ဒိဋ္ဌပုဗ္ဗံ ကုဒါစနံ၊

ဧဟိ တဿာ သိရိံဒေဝ၊ ဗောဓိမဏ္ဍမှိ ဒက္ခသီတိ။

တံ သုတွာ ရာဇာ သဝဏသံသဂ္ဂေနေဝ တာယ ပဋိဗဒ္ဓစိတ္တော စတုရင်္ဂိနိံသေနံ ဂဟေတွာ ရာဇဓီတရံ ဗောဓိဝန္ဒနတ္ထာယ အာဂတကာလေ ဗဟိပါကာရေ သေနံ ပရိက္ခိပါပေတွာ ဂဏှထေတန္တိ မနုဿေ နိယောဇေသိ။ တတော သေနာပိ တံ ဂဟဏသဇ္ဇာ အဋ္ဌာသိ။ ရာဇဓီတာ တေ ဒိသွာ သီဃံ သိန္ဓဝံ ဥပသင်္ကမိတွာ တဿ ပိဋ္ဌိယံ နိသိန္နာ ပဏှိယာ သညံ အဒါသိ။ သော တံ ဂဟေတွာ ဝေဂေန အာကာသံ ပက္ခန္ဒိ။ သာ ပန ဒုန္နိသိန္နဘာဝေန အဿဿ ဝေဂံ သန္ဓာရေတုမသက္ကောန္တီ အဿပိဋ္ဌိတော ပရိဂလိ။ သိန္ဓဝေါ ရာဇဓီတရံ ပတမာနံ ဒိသွာ ရာဇောဝါဒံ သရမာနော ဝေဂေနာဂန္တွာ တဿာ ကေသေ ဍံသိတွာ ဥက္ခိပိတွာ ပတမာနာယ တဿာ ပိဋ္ဌိံဒတွာ နိသီဒါပေတွာ အာကာသေန တံ နေတွာ ပါဋလိပုတ္တနဂရေယေဝ ပတိဋ္ဌာပေသိ [ပါတလိပုတ္တနဂရေယေဝတံ ပဝိဌာပေသိဣတိပိကတ္ထစိ]။

တိရစ္ဆာနဂတာပေဝံ၊ သရန္တာ ဥပကာရကံ၊

န ဇဟန္တီတိ မန္တွာန၊ ကတညူ ဟောန္တု [ဟောန္တိပါဏိနော-ဣတိပိကတ္ထစိ] ပါဏိနောတိ။

တတော ပဋ္ဌာယ သာ ပုညကမ္မံ ကတွာ သဂ္ဂပရာယနာ အဟောသီတိ။

သဗ္ဗတ္ထ သော ဟောတိ ပသတ္ထရူပေါ။

၄၀။ ကုဏ္ဍလိယာ ဝတ္ထုမှိ အယမာနုပုဗ္ဗီကထာ

လင်္ကာဒီပေ ¶ ရောဟဏဇပဒေ မဟာဂါမော နာမ အဟောသိ၊ တတ္ထ တိဿဝိဟာရံ နာမ အနေကသတဘိက္ခူဟိ သမာကိဏ္ဏံ အနေကပရိဝေဏပတိမဏ္ဍိတံ ဝိဟာရံ အဟောသိ။ တတ္ထေကော တိဿော နာမ သာမဏေရော ပဋိဝသတိ။ သော ဧကသ္မိံသမယေ ဇနပဒစာရိကံ စရန္တော ပါသာဏဝါပိဂါမေ ဘိက္ခံ စရိတွာ ယာပနမတ္တံ ဘတ္တံ သပ္ပိနာ သဒ္ဓိံ လဘိတွာ နိက္ခမ္မ ဂါမဒွါရံ ပတွာ မဟာဂါမာဘိမုခေါ ဂစ္ဆန္တော မနုဿေ ဥဒကဖာသုကဋ္ဌာနံ ပုစ္ဆိ။ တေဟိ ဘန္တေ တုမှာကံ အဘိမုခေ အဝိဒူရဋ္ဌာနေ ကကုဗန္ဒကန္ဒရံ နာမ သန္ဒမာနသီတလောဒကံ ဓဝလဝါလုကာတလံ တတ္ထ တုမှေ ဂန္တွာ နဟာတွာ သီတလစ္ဆာယာယ ဝါလုကာတလေ နိသိန္နော ဘတ္တကိစ္စံ ကတွာ ဂစ္ဆထာတိ ဝုတ္တေ သာမဏေရော ¶ သာဓူတိ ဝတွာ တတ္ထ ဂန္တွာ ဖာသုကဋ္ဌာနေ နိသိန္နော ဘတ္တံ ဘုဉ္ဇိတုမာရဘိ။ တဒါ ဧကေန ဝနကမ္မိကေန သဒ္ဓိံအရညံ ဂတာ ဧကာ သုနခီ တသ္မိံ ကန္ဒရေ ဧကသ္မိံ ပဗ္ဘာရဋ္ဌာနေ ဒါရကေ ဝိဇာယိတွာ ဆာတဇ္ဈတ္တာ ပဝေဓမာနဂတ္တာ ဒါရကာနံ သမီပေနိပန္နာ သာမဏေရဿ ပတ္တေ အာဟာရဂန္ဓံ ဃာယိတွာ နိပန္နဋ္ဌာနတော ဝုဋ္ဌာယ ပဝေဓမာနာ တဿ သမီပံ အာဂမ္မ နင်္ဂုဋ္ဌံ စာလေန္တီ အဋ္ဌာသိ၊ သာမဏေရော တံ ဒိသွာ ကမ္ပိတမာနသော အတ္တနော ဘောဇနတ္ထာယ ဝဋ္ဋိတံ ပထမာလောပံ တဿာ ပုရတော ဌပေသိ၊ တတော သာ သောမနဿာ တံ ဘုဉ္ဇိ။ တံ ဒိသွာ တုဋ္ဌော ပုနပ္ပုနံ အာလောပံ ကရောန္တော တဿာ ဘတ္တံ ဒတွာ ပတ္တံ ဓောဝိတွာ ထဝိကာယ ပက္ခိပိတွာ အဂမာသိ။ တတော သာ သုနခီ သာမဏေရဂတေန ပသာဒေန တတော စုတာ ဇမ္ဗုဒီပေ ဒေဝပုတ္တနဂရေ ရာဇာနံ ပဋိစ္စ တဿ မဟေသိယာ ကုစ္ဆိမှိ ပဋိသန္ဓိံ ဂဏှိတွာ ဒသမာသစ္စယေန မာတုကုစ္ဆိတော နိက္ခမိ၊ အထဿာ သိခါမင်္ဂလဒိဝသေ သမ္ပတ္တေ မာတာပိတရော ပနဿာ ကုဏ္ဍလာဝဋ္ဋကေသတ္တာ ကုဏ္ဍလာတိ နာမ မကံသု။ သာ အနုက္ကမေန သောဠသဝဿုဒ္ဒေသိကာ အဟောသိ၊ တသ္မိံ ကိရ သမယေ တိဿော သာမဏေရော မဟာဗောဓိံ ဝန္ဒိဿာမီတိ နာဝံ အဘိရုယှ ဇမ္ဗုဒီပံ ဂန္တွာ အနုပုဗ္ဗေန ဒေဝပုတ္တနဂရံ ပတွာ သုနိဝတ္ထော သုပါရုတော ယုဂမတ္တဒသော ဘိက္ခာယ စရန္တော မဟာဝီထိံ သမ္ပာပုဏိ။ ရာဇဓီတာ သီဟပဉ္ဇရံ ဥဂ္ဃာဋေတွာ အန္တရဝီထိံ ဩလောကေန္တီ ဘိက္ခန္တံ သာမဏေရံ ဒိသွာ ပုဗ္ဗသိနေဟံ ပဋိလဘိ၊ တသ္မိံခဏေ တဿာ ဇာတိဿရဉာဏံ အဟောသိ။ သာ ကိရ ပုဗ္ဗေ ဘိက္ခုဏီ ဟုတွာ ပဏ္ဏသူစိယာ သဒ္ဓိံ ပေါတ္ထကဉ္စ ပဒီပိယတေလဉ္စ ဒတွာ ဇာတိဿရာ ဘဝေယျံတိ ပတ္ထနံ ဌပေသိ၊ တတော သာဇာတိံ အနုဿရန္တီ သာမဏေရေန အတ္တနော ကတူပကာရံ ဒိတွာ သောမနဿာ နံ ပက္ကောသာပေတွာ ရာဇဂေဟေ အာသနံ ပညာပေတွာ တတ္ထ နိသိန္နံ နာနဂ္ဂရသ ဘောဇနေန ပရိဝိသိတွာ ဩနီတပတ္တပါဏိံ သာမဏေရံ ဥပသင်္ကမိတွာ ဝန္ဒိတွာ ဧကမန္တံ နိသိန္နာ တေန သဒ္ဓိံ သလ္လပန္တီ ဧဝမာဟ။

န သဉ္ဇာနာသိ မံ ဓီရ၊ ပုဗ္ဗေဟံ တဝ ဒါသိကာ၊

တေနာဟံ သုခိတာ အာသိံ၊ တသ္မာ တွမသိ ဣဿရောတိ။

နတ္ထိ မေ တာဒိသီ ဒါသီ၊ န သဉ္ဇာနာမိ တံ အဟံ၊

ကာသိ တွံ ကဿ ဝါ ဓီတာ၊ တံ မေ အက္ခာဟိ ပုစ္ဆိတာတိ။

သာရာပေမိ တုဝံ အဇ္ဇ၊ ယထာ ဇာနာသိမံ ဣသေ၊

ဗုဇ္ဈဿု ဗောဓိတော ဒါနိ၊ မယာ ဇာတိံသရန္တိယာ။

ပါသာဏဝါပိဂါမမှိ၊ တမ္ဗပဏ္ဏိမှိ ရောဟဏေ၊

ဘိက္ခိတွာန တုဝံ ဘန္တေ၊ ယဒါ ကကုဗန္ဒကန္ဒရေ။

နိသီဒိတွာန တွံ ဘတ္တံ၊ ဘုတ္တကာလံ သရိဿသိ၊

တဒါဟံ သုနခီ အာသိံ၊ ဝိဇာတာ လဒ္ဓဂေါစရာ။

ဒါရကေ ¶ ခါဒိတုံ မယှ၊ မာသန္နာ ခုဒပီဠိတာ၊

ပဝေဓမာနသဗ္ဗင်္ဂါ၊ အဋ္ဌာသိံ တဝ သန္တိကေ။

ဒိသွာ တံ မံ တဒါ ဘန္တေ၊ ဝေဓမာနံ ဗုဘုက္ခိတံ၊

ဆိန္နဘတ္တော တုဝံ ဟုတွာ၊ မမံ ဘတ္တေန တောသယီ။

တဒါဟံ မုဒုစိတ္တေန၊ စိတ္တံ တယိ ပသာဒယိံ၊

တေနာဟံ ပုညကမ္မေန၊ ဒုတိယေ အတ္တသမ္ဘဝေ။

ဣဓ ရာဇကုလေ ဇာတာ၊ သဗ္ဗကာမသမိဒ္ဓိနီ၊

စိတ္တပ္ပသာဒမတ္တေန၊ လောကနာထဿ သာသနေ။

တဒဟုပဗ္ဗဇိတဿာပိ၊ ဤဒိသာ ဟောန္တိ သမ္ပဒါ၊

ကီဒိသံ ဟောတိ သမ္ဗုဒ္ဓေ၊ ပသာဒေန ဖလံ အဟော။

အညာနိ ပန ကိစ္စာနိ၊ ပဟာယာတ္တဟိတေ ရတော၊

အတန္ဒိတော ဒိဝါရတ္တိံ၊ သရာတု ရတနတ္တယံတိ။

ဧဝံ သာမဏေရေန ကတူပကာရံ သာရာပေတွာ ဘန္တေ တဝ ဒါသိယာ အနုဂ္ဂဟံ ပဋိစ္စ ဣဓေဝ ဝသထာတိ နိမန္တိတွာ တေန သမ္ပဋိစ္ဆိတေ မဟန္တံ ဝိဟာရံ ကာရာပေတွာ သာမဏေရံ အာဒိံ ကတွာ အနေကဘိက္ခုသတေ နိမန္တေတွာ ဝိဟာရေ ဝသာပေတွာ သုလဘံ ကတွာ စတုပစ္စယေဟိ ဥပဋ္ဌာသိ။ သာမဏေရောပိ သုနခိယာ ဒိန္နဒါနံ အနုဿရိတွာ တုဋ္ဌော ဗုဒ္ဓါနုဿတိံ မနသိကရောန္တော န စိရေနဝ အရဟတ္တံ ပတွာ တသ္မိံယေဝ ဝိဟာရေ ဝသန္တော အာယုပရိယောသာနေ တတ္ထေဝ ပရိနိဗ္ဗာယီတိ။

တိယဒ္ဓေသု တိလောကသ္မိံ၊ နတ္ထိ ဝတ္ထုတ္တယံ ဝိနာ၊

သတ္တာန မည မိစ္ဆတ္ထ၊ ဒါယကံ သုရပါဒပံ။

ဧတ္တာဝတာ ဇမ္ဗုဒီပုပ္ပတ္တိကထာ သမတ္တာ။