📜
နမော တဿ ဘဂဝတော အရဟတော သမ္မာသမ္ဗုဒ္ဓဿ။
ဝေဿန္တရာဂီတိ
[က]
ဗာတ္တိံသလက္ခဏူပေတ ¶ ၊
ဒါတဗ္ဗံ ဒဒတံ ဝရ၊
ဝေဿန္တရတ္တ မာပါဒိ၊
သဉ္စရံ ဘဝသာဂရေ။
[ခ]
ဒွန္ဒံဒွန္ဒံ ¶ သဉ္စရန္တီ၊
ဇနာနန္ဒေ ယသောဓီရေ၊
မဒ္ဒိတ္တံ သမုပါဂဉ္ဆိ၊
တွံပိတေန ဘဝဏ္ဏဝေ။
[ဂ]
တုမှံဒါနိ ပဝက္ခာမိ၊
ဥပတ္တိံ နန္ဒိနိံ တဟိံ၊
ဒဇ္ဇဟွောဝေါ မမောကာသံ၊
ကဝယော ပျာဘိနန္ဒထ။
ဧကနဝုတေဟိတော ကပ္ပေ၊
ဝိပဿီနာမ နာယကော၊
ဝိနေယျေ ¶ တာရယံခေမံ၊
လောကေ ဥပ္ပဇ္ဇိစက္ခုမာ။
ခေမာရာမမှိ သမ္ဗုဒ္ဓါ၊
မိဂဒါယေ မနောရမေ၊
နိဿာယ ဗန္ဓုမတိံသော၊
ဝိဟာသိ နဂရံတဒါ။
ရဇ္ဇံဓမ္မေန ကာရေသိ၊
နဂရေတမှိ ဗန္ဓုမာ၊
ရာဇာတဿ ဒုဝေဓီတာ၊
အာသုံ သဗ္ဗင်္ဂသောဘဏာ။
ဧကောဟိ ¶ ဧကဒါရာဇာ၊
ဗန္ဓုမဿ သုပေသယိ၊
သဟဿဂ္ဃနိကံ သောဏ္ဏ-
မာလဉ္စာ နဂ္ဃ စန္ဒနံ။
အဒါသိ ဗန္ဓုမာရာဇာ၊
ပိတာဇေဋ္ဌာယ စန္ဒနံ၊
သောဏ္ဏမာလံ ကနိဋ္ဌာယ၊
တဟိံ ဝိယာယ ဓီတုယာ။
ဥဘောတာပီတိ ¶ စိန္တေသုံ၊
နတ္ထတ္ထောဝတ တေဟိနော၊
ဘဂျဝန္တဿ ပူဇေမ၊
သံပသာဒေန စေတသာ။
တတောသာစန္ဒနံ စုဏ္ဏံ-
ကာရာပေတွာန ဇေဋ္ဌကာ၊
ဂန္တွာန ဝိဟာရံ သောဏ္ဏ၊
ဝဏ္ဏံပူဇေသိ နာယကံ။
ဝိကိရိတွာ တု သာဂန္ဓ၊
ကုဋိယံ သေသစန္ဒနံ၊
ဧဝဉှိ ပတ္ထနံ ကာသိ၊
ဗုဒ္ဓမာတာ ဘဝါမဟံ။
ကာရေတွာ ¶ သောဏ္ဏမာလံတု၊
ဥရစ္ဆဒ ပသာဒနံ၊
ပူဇေသိ ဟေမဝဏ္ဏံသာ၊
ဘဂဝန္တံ ကနိဋ္ဌကာ။
ဧဝမ္ပိ ပတ္ထနံကာသိ၊
ဣဒံမမ ပသာဒနံ၊
သရီရေ နိစ္စလာ ဌာတု၊
စရန္တိယာ ဘဝါဘဝံ။
ဥဘောပိ ¶ ရာဇကညာတာ၊
ဌတွာန ယာဝတာ ယုကံ၊
ဥပပဇ္ဇိံသု သောဝဂ္ဂံ၊
စုတာသုခ ပမောဒနံ။
မနုဿဒေဝ လောကေသု၊
သံသရိံသု သုခံဒုဝေ၊
ဧကနဝုတိ ကပ္ပာနိ၊
မုစ္စိတွာ ပါယဒုက္ခတော။
ကဿပဿ ကာလေတာသု၊
ကနိဋ္ဌာ ကိကိရာဇိနော၊
ဓီတာ ဥရစ္ဆဒါနာမ၊
ဟုတွာန ပရိနိဗ္ဗုတာ။
ဇေဋ္ဌကာ ¶ ပန ဓီတာသိ၊
ကိကိဿ ရာဇိနော တဟိံ၊
ဓမ္မာနာမ ဒမိတာ သာ၊
ကောမာရ ဗြဟ္မစာရိနီ။
တတောစ ဝိတွာန သာ ဒေဝ၊
မနုဿေသု ပုနပ္ပုနံ၊
သံသရန္တီ မဟေသီသိ၊
ပူရိန္ဒဒဿ ဧကဒါ။
ရတ္တစန္ဒန ¶ လေပေန၊
လိမ္ပိတ ဒေဟိနီ ဟိသာ၊
ကတပုည ဝိသေသေန၊
နာမေန ဖုဿတီဟွိတာ။
ဒေဝိန္ဒော အညဒါဒိသွာ၊
ပရိက္ခီဏာယုကံ ဝိယံ၊
ဒေဝိံ တံ ပရိဝါရေန၊
မဟတာ နေသိနန္ဒနံ။
သိရီသယန ပိဋ္ဌမှိ၊
တံသယာဝိယ မာဃဝါ၊
ဌိတော ¶ သယနပဿမှိ၊
ဖုဿတိံ ဧတဒဗြဝီ။
ဝရေတေဒသဒဿာမိ၊
ဖုဿတေဝရဝဏ္ဏိကေ၊
တွံဉှိဣစ္ဆသိယေလဒ္ဓုံ၊
လဘာပေဿာမိတေဝရေ။
သုတွာတံ ဖုဿတီဒေဝီ၊
လောမဟံ သနရူပိနီ၊
ခီဏာယုတမဇာနန္တီ၊
အတ္တနော ဧတဒဗြဝီ။
ပါပံနု ¶ တွယိ ဒေဝိံန္ဒ၊
ကတံမေ အပ္ပိယာထတေ၊
ရမ္မာမေ စဝနံ ဣစ္ဆံ၊
မညေဘဏံတိ ဤဒိသံ။
နတေဘဒ္ဒေ ကတံပါပံ၊
နစမေ အပ္ပိယာတုဝံ၊
ပုညံတုတေ ပရိက္ခီဏံ၊
တသ္မာ တေ ဝံဝဒါမဟံ။
သန္တိကေ ¶ မရဏံ တုယှံ၊
ဝိနာဘာဝေါ ဘဝိဿတိ၊
ပဋိဂ္ဂဏှာဟိ မေ ဧတေ၊
ဝရေဒသ ပဝစ္ဆတော။
သက္ကဿဝစနံ သုတွာ၊
ဉာတွာမရဏ မတ္တနော၊
ဝရေသာ လဒ္ဓုမိစ္ဆန္တီ၊
ဒေဝိန္ဒမေတ ဒဗြဝီ။
ဣတော စုတာသဟဿက္ခိ၊
သီဝိရာဇနိဝေသနေ၊
မဟေသီ ဖုဿတီနာမ၊
နီလနေတ္တာ ယထာမိဂီ။
အဿံ ¶ နီလဘမုကာဟံ၊
လဘေယျံ ပုတ္တမုတ္တမံ၊
ဓာရေန္တိ ယာစမေဂဗ္ဘံ၊
မဇ္ဈိမင်္ဂံ အနုန္နတံ။
ပလိတာန ဝိရူဟန္တု၊
အလမ္ဗာစ ပယောရော၊
ကာယေရဇော နလိမ္ပေထ၊
ဝဇ္ဈဉ္စာပိ ပမောစယေ။
ယေယာစိတာ ¶ ဝရာဘဒ္ဒေ၊
တယာဒသ မယာတဝ၊
ဒိန္နာတေ တုဋ္ဌစိတ္တေန၊
သဗ္ဗေလစ္ဆသိ မာနုသေ။
တတောစဝိတွာန သာဒေဝ-
လောကာ နိဗ္ဗတ္တိ ဣစ္ဆိယံ၊
မဟေသိယာ ပဋိသန္ဓိ-
ဝသေန မဒ္ဒရာဇိနော။
ဒသမာ ¶ သစ္စယေနေသာ၊
ဓီတရံ မဒ္ဒရာဇိနီ၊
ဟေဋ္ဌာသုသေတစ္ဆတ္တဿ၊
ဝိဇာယိ သေဋ္ဌရူပိနိံ။
ရတ္တစန္ဒန လေပေန၊
ဧသာလိမ္ပိ တဒေဟိနီ၊
တေနဿာ ဗြာဟ္မဏာနာမံ၊
အကံသု ဖုဿတီဣတိ။
သညာကာရ ဒေါဠာရုဠ-
မင်္ဂလာဒီနိ ကာတုန၊
မဟတာ ပရိဟာရေန၊
ပေါသိံသု ခတ္တိယာနိယော။
မဓူရခီရ ¶ သမ္ပန္နာ၊
သိနိဒ္ဓပီဏ ယောဗ္ဗနာ၊
ဓာတိယော ခတ္တိယာနီတံ၊
ခီရံပါယိံသု ယာပနံ။
သင်္ကမန္တီဝ ဝုဒ္ဓါသာ၊
အင်္ကာအင်္ကံ ကရာကရံ၊
ရာဇကညာစ တောသိံသု၊
နစ္စဂီတေဟိ နာဋကီ။
ဒေဝစ္ဆရာဝရူပေန၊
သုဘာသောဠသ ဝဿိကာ၊
ဟရန္တီ ¶ နေတ္တရသံသာ၊
ပဿန္တာနံသုခေဓိတာ။
သိဝိရဋ္ဌေ တဒါရဇ္ဇံ၊
သိဝိရာဇာ ဇေတုတ္တရေ၊
ကာရေသိသိဉ္စယောနာမ၊
ပုတ္တောတဿ မဟာယသော။
ဝယပ္ပတ္တော ဘိရူပေါသိ၊
ဒေဝပုတ္တောဝ သိဉ္စယော၊
အရောဟ ပရိဏာဟေန၊
နာနာသိဗ္ဗေသု ကောဝိဒေါ။
သိဉ္စယဿ ¶ နိယျာဒေသိ၊
ရဇ္ဇံပုတ္တဿ အတ္တနော၊
ဇီဝန္တော ပဿိတုံရာဇ-
သိရိံဣစ္ဆံ မဟာရဟံ။
အာနေတွာ မဒ္ဒရာဇဿ၊
ဓီတရံ ဖုဿတိံတဟိံ၊
သောဠသိတ္ထိ သဟဿာနံ၊
မဟေသိံကာသိ ဇေဋ္ဌိကံ။
ဖုဿတီသိဉ္စယောညောည- ¶
မုခံဒွေပိယစက္ခုနာ၊
ပဿမာနာဝအစ္ဆိံသု၊
အညမညပိယံဝဒါ။
အထစိန္တိ ယဒေဝိန္ဒော၊
ဒိန္နာဖုဿတိယာမယာ၊
ဝရာဒသ တေသုပုတ္တ-
ဝရောနဟိသမိဇ္ဈတိ။
သမိဇ္ဈာ ပေသာမိဧတံတိ၊
အဇေယျေဘိဒသာလယေ၊
ဥပဓာရိတ္ထတိဿာယ၊
ပုတ္တဘာဝါရဟံမရုံ။
စဝိတွာဟုဥဒ္ဓံဂါမီ ¶ ၊
ဗောဓိဒေဝေါတတောတဟိံ၊
ဗြဟ္မံဂန္တွာသဟဿက္ခီ၊
တဿတံဧတဒဗြဝီ။
ဣတော ဘော သုဂတိံဂစ္ဆ၊
အနုကမ္ပာဟိမရိသ၊
သိဉ္စယံဒေဝိယံတဿ၊
သန္ဓိံ ဂဏှဇုတိန္ဓရ။
အညေပိ ¶ သဋ္ဌိသဟဿ-
ဒေဝေ စဝန ဓမ္မိနေ၊
ဥပသင်္ကမ္မ သောယာစိ၊
ဂစ္ဆဟွော သုဂတိံဣတိ။
ဗောဓိသတ္တောစ အညေစ၊
သာဓူတိ သမ္ပဋိစ္ဆိသုံ၊
တတောစုတာ စတေဒေဝါ၊
အာဂုံ မာနုသကံဣမံ။
ဖုဿတျံဟိ ¶ မဟာသတ္တော၊
နိဗ္ဗတ္တိ ပဋိသန္ဓိယာ၊
ကုလေသွညေစ မစ္စာနံ၊
နိဗ္ဗတ္တိံသု ဝိသုံဝိသုံ။
ကုစ္ဆိင်္ဂတေ မဟာသတ္တေ၊
ဒေဝီ ဒေါ ဟဠိနီအဟု၊
ဒါတုကာမာ မဟာဒါနံ၊
ဝိသဇ္ဇိယ ဗုဟုံဓနံ။
ရာဇမန္ဒိရဒွါရမှိ၊
ဝေမဇ္ဈေနဂရဿစ၊
စတုဒွါရေသုဆဒ္ဒါန-
သာလာယော ဒေယျပူရိတာ။
ကာရာပေတွာန ¶ ဆဿတ-
သဟဿာနိ ဒိနေဒိနေ၊
ဝိသဇ္ဇိတွာန သဗ္ဗေသံ၊
ဣစ္ဆန္တီ အာသိဒါတဝေ။
ဥတွာတံ ကာရဏံရာဇာ၊
ပက္ကောသာဝိယ ဗြာဟ္မဏေ၊
နိမိတ္တ ပါဌကေပုစ္ဆိ၊
ကိံ ဘဝိဿတီတိဉာတဝေ။
ဇာနာမ နော မဟာရာဇ၊
ဂတောကုစ္ဆိမှိ ဒေဝိယာ၊
ဟေဟိတျ ¶ ဘိရတောဒါနေ၊
ဧဝံဝဒိံသု ဗြာဟ္မဏာ။
ဗြာဟ္မဏာနံ ဝစောသုတွာ၊
နရိန္ဒော တုဋ္ဌမာနသော၊
ဒါနံအဒါသိ ဆဒ္ဒါန-
သာလာယော သုဋ္ဌုမာဝိယ။
ပဋိသန္ဓိဂ္ဂဟဏမှာ၊
ဗောဓိသတ္တဿ ဝိညုနော၊
ပဋ္ဌာယဏ္ဏဝ ဝေဂေါဝ၊
လာဘောဠာရော အနပ္ပကော။
ပဏ္ဏာကာရံ ¶ ပဟိဏိံသု၊
ရာဇိနော ဇမ္ဗုမဏ္ဍလေ၊
ဗောဓိသတ္တာ နုဘာဝေန၊
နာနာရဋ္ဌိန္ဒခတ္တိယာ။
ပရိဟာရံ ပဝစ္ဆေသိ၊
မဟေသိံ ပဋိသန္ဓိနိံ၊
ရာဇာသုခံ ဝသာပေသိ၊
ကာရေသိဣစ္ဆိတိစ္ဆိတံ။
ဗုဒ္ဓင်္ကုရာနုဘာဝေန၊
ဇနာသုံ မောဒမာနသာ၊
ကာလေဝဿတိမေဃောပိ၊
သုဘိက္ခောသမယောအဟု။
သဒ္ဓိံပုတ္တေန ¶ ဇုဏှာယ၊
ကိဠန္တိယာဝမာတုယာ၊
မဟန္တီရတိသဗ္ဗေသံ၊
ဇနာနံဝိပုလာတဟိံ။
ဂဗ္ဘံဟိ ဓာရေန္တီဒေဝီ၊
ဒသမာသမှိပူရိတေ၊
နဂရံဒဋ္ဌု ကာမာသိ၊
တဒါရောစေသိရာဇိနော။
သာဓုဘဒ္ဒေတိ ¶ ဝတွာန၊
ပုရံဒေဝ ပုရံဝိယ၊
ရာဇာ အလင်္ကရာပေသိ၊
ဒေဝိယာ ပိတိဝဍ္ဎနံ။
အာရောပိယ တတောဒေဝိံ၊
ဝိစိတ္တံ လက္ခိကံရထံ၊
ပဒက္ခိဏံ ကာရာပေသိ၊
နဂရံ သဗ္ဗလင်္ကတံ။
ဝေဿာနံ ¶ ဝီထိယာမဇ္ဈေ၊
ဌာနာဌာနံ ပထာပထံ၊
စလိံသု ကမ္မဇာဝါတာ၊
စရန္တိယာဝ ဒေဝိယာ။
ဥတွာမစ္စာပဝတ္တိံတံ၊
ရညောရောစိံသုသီဃသော၊
သုတိဂေဟံကာရာပေသိ၊
တံဝီထိယံဝသိဉ္စယော။
တတ္ထသာဝသမာနာဝ၊
ဝိဇာယိအကုတောဘယာ၊
နိမ္မလံသုသုဒ္ဓံပုတ္တံ၊
သုဝဏ္ဏက္ခန္ဓသန္နိဘံ။
အက္ခီနိဥမ္မိလိတွာန ¶ ၊
နိက္ခန္တောမာတု ကုစ္ဆိတော၊
ပသန္နပ္ပိယာကာရေန၊
ပဿိတ္တမာတုယာမုခံ။
အမ္မ ဒါနံ ဒဒိဿာမိ၊
အတ္ထိနု ကိဉ္စိ တေဓနံ၊
ဟတ္တံသော ပသာရေတွာန၊
ဣတိဗြဝိတဟိံ မုဟုံ။
သုတွာမောဒိယ ¶ တံမာတာ၊
ဒေဟိဒါနံ ယထိစ္ဆိတံ၊
တာတာတိ တဿပါဒါသိ၊
သဟဿတ္ထဝိကံတဟိံ။
မဟောသဓ ဝေဿန္တရ-
မဟာသိဒ္ဓတ္ထ ဇာတိသု၊
ကထေသိ မာတရာဗောဓိ-
သသတ္တော ဇာတက္ခဏေတိသု။
အစ္ဆေရ မဗ္ဘုတံဒိသွာ၊
ဇနာမောဒိံ သုတာဝဒေ၊
အပ္ဖောဋေန္တော ဟသန္တာစ၊
ဇယနာဒံ ပနာဒယုံ။
ဝေဿန္တရောတိ ¶ ဟွာယိံသု၊
နာမဂ္ဂဟဏ မင်္ဂလံ၊
သင်္ခတာ ဗြာဟ္မဏာတဿ၊
ဇာတတ္တာ ဝေဿဝီထိယံ။
ဝိဇာတ ဒိဝသေတဿ၊
ဧကာအာကာသစာရိနီ၊
ဟတ္ထိနီဟိ သဗ္ဗသေတံ၊
ဧကံ ကုဉ္ဇရပေါသကံ။
ဗောဓိသတ္တာ နုဘာဝေန၊
အာနေတွာ မင်္ဂလသမ္မတံ၊
ထပေတွာန ပက္ကာမိ၊
ဟတ္ထိသာလာယ သာဓုကံ။
ဥပ္ပန္နတ္တာမဟာသတ္တံ ¶ ၊
တဿကတွာနပစ္စယံ၊
အကံသုနာဂရာနာမံ၊
သမဂ္ဂါပစ္စယောဣတိ။
တဒ္ဒိနေဝဝိဇာယိံသု၊
အမစ္စာနံကုမာရကာ၊
ဂေဟေသုသဌိသဟဿာ၊
မဟာသတ္တသဇာတကာ။
အတိဒီဃာဒယောဒေါသေ ¶ ၊
ဝိဝဇ္ဇေတွာနသိဉ္စယော၊
ကုမာရံစတုဿဌိကာ၊
ဥပဋ္ဌာပေသိဓာတိယော။
အလမ္ဗတ္ထနိယောစေတာ၊
ဘိရူပါယောဗ္ဗနေဌိတာ၊
အာသုံမဓုရထညာယော၊
သံသုဒ္ဓါသေဋ္ဌကောလိယော။
သုသုသဋ္ဌိသဟဿာနံ ¶ ၊
ဧကေကာဓာတိယောတထာ၊
ဗုဒ္ဓင်္ကုရသဇာတာနံ၊
ဥပဋ္ဌာပေသိသုံန္ဒရာ။
သဒ္ဓိံ သဋ္ဌိသဟဿေဟိ၊
ကုမာရေဟိမဟာယသော၊
မဟတာပရိဝါရေန၊
သံဝဍ္ဎိဗောဓိသတ္တဝေါ။
ရာဇာသတသဟဿဂ္ဃ-
နိကံ သုသုပိဠန္ဓနံ၊
ကာရာပေတွာဝိဘူသေသိ၊
အတ္တဇံဒါနနန္ဒနံ။
ဩမုဉ္စိတွာနဓာတီနံ ¶ ၊
တံစတုပ္ပဉ္စဝဿိကော၊
အဒါသိသောမဟာသတ္တော၊
ဗောဓိံ အပေက္ခမာနသော။
ပုနတံတာဟိဓာတီဟိ၊
ဒိယျမာနံပိသာဒရံ၊
နသောဂဏှိတ္ထကုမာရော၊
ဒိန္နေသုအနပေခဝါ။
အာရောစိံသုပဝတ္တိံတံ ¶ ၊
ရညောတာဓာတိယောတဒါ၊
သုတွာမုဒိတစိတ္တေန၊
တံသောထောမိတ္ထအတ္တဇံ။
ပုတ္တေနမမဒိန္နံတံ၊
ဗြဟ္မဒေယျံပိဠန္ဓနံ၊
တုမှာကံသန္တကံဟောတု၊
ဣစ္စာပိဗြဝိသိဉ္စယော။
ပုနာပရံပိကာရေတွာ၊
ပါဒါသိပုတ္တနန္ဒနော၊
ပုတ္တဿဒါတုကာမဿ၊
သုဝိစိတ္တပိဠန္ဓနံ။
ဩမုဉ္စိတွာနဧတံပိ ¶ ၊
ဓာတီနံဒါသိဒါယကော၊
ဒါရကောတုဋ္ဌစိတ္တေန၊
သဗ္ဗညုတပ္ပိယာယနော။
ဧဝံဝုတ္တ နယေနေဝ၊
နဝ ဝါရေ ပိဠန္ဓနံ၊
ဒဟရောဒါသိ ဓာတီနံ၊
နာထာနာထ ပရာယနော။
အဋ္ဌဝဿိ ¶ ကကာလေတု၊
ဧဝံစိန္တေသိ ဗုဒ္ဓိမာ၊
နိသိန္နော သိရိသယနော၊
ပါသာဒေါ ပရိမဏ္ဍလေ။
ဒေမိဗာဟိရ ဒါနံဝ၊
နတာဝ မမ မာနသံ၊
ပရိတော သေတိဧဝဉှိ၊
အဇ္ဈတ္တိကံဒဒါမဟံ။
သစေမံ ကောစိယာစေယျ၊
သီသံသ မောဠိမုတ္တဓံ၊
ဆိဇ္ဇ တံ တဿဒဇ္ဇေယျံ၊
နဟေယျံ လီနစေတသော။
ဟဒယံမမ ¶ ယာစေယျ၊
ဘိန္ဒိတွာ အသိနာဥရံ၊
နီဟရိတွာနတံတဿ၊
ဒဇ္ဇေယျံ တုဋ္ဌမာနသာ။
အက္ခီနိ မမယာစေယျ၊
ဥပ္ပာဋေတွာန တာဝဒေ၊
သတ္ထေန တဿဒဇ္ဇေယျံ၊
သလောဟိတာနိ တာနိမေ။
ဟတ္ထေပါဒေစကဏ္ဏေစ ¶ ၊
ယာစေယျမမသာဓုကံ၊
ဆိန္ဒိတွာ တာနိဒဇ္ဇေယျံ၊
တဿပူရေ မနောရထံ။
မံသံမေကောစိယာစေယျ၊
သီဃံသဗ္ဗသရီရတော၊
ခဏ္ဍာခဏ္ဍံ ဆိန္ဒိတွာန၊
ဒဇ္ဇေ မံသံ သလောဟိတံ။
ဟောဟိတွံမမဒါသောတိ၊
ဝဒေယျကောစိစေတဟိံ၊
သယံအာမာတိသာဝေတွာ၊
အတ္တာနံပိ ဒဒါမဟံ။
တဿေဝံ ¶ စိန္တယန္တဿ၊
ကမ္ပိတ္ထ ပထဝီမဟာ၊
သမန္တာဂဇ္ဇမာနာယံ၊
မတ္တောဝ ကုဉ္ဇရောဝနေ။
မေရုရာဇော နမိတွာန-
ဘိမုခေါဝ ဇေတုတ္တရံ၊
နဂရံ ဌာသိ သေရိတ-
ဝေတ္တင်္ကုရောဝ တာဝဒေ။
မဟီသဒ္ဒသန္တာသေန ¶ ၊
မေဃောပါဝဿိ တာဝဒေ၊
ဃနဝဿံမဟာဓာရံ၊
ဂဇ္ဇမာနော ဒိသောဒိသံ။
နိစ္ဆရိံသု ဗဟူဝိဇ္ဇု-
လတာယောစ သမန္တတော၊
ဣန္ဒစာပါ ဥဋ္ဌဟိံသု၊
ဥက္ကာပါတော တဒါ အဟု။
အပ္ဖောဋေသိ တဟိံဒေဝ-
ရာဇာတုဋ္ဌော သုဇမ္ပတိ၊
သာဓုသာဓူတိ သာဝေသိ၊
မဟာဗြဟ္မာ ကတဉ္စလီ။
ဗြဟ္မလောကာ ¶ တဒါယာဝ၊
ဣတောပထဝိ မဏ္ဍလာ၊
အစ္ဆေရံ အဗ္ဘုတံ အာသိ၊
ဧကကောလာဟလံ မဟာ။
ဧဝံဉှိ နေကဗ္ဘူတာနိ၊
ဇနေတွာန မဟာဇနံ၊
ဟာသယံ သုသုခံဝဍ္ဎ-
မာနောသောဠသ ဝဿိကော။
ကုမာရော ¶ သဗ္ဗသိဗ္ဗေသု၊
ကောဝိဒေါစ ပါရင်္ဂတော၊
ဖုလ္လသာလောဝ သောဘန္တော၊
ဝဏ္ဏေန ဝယသာ တဒါ။
အထဿ ဒါတုကာမောဝ၊
ရဇ္ဇံမန္တိယ ဒေဝိယာ၊
ပိတာသိ သိဉ္စိရာဇတ္တေ၊
ပုတ္တံသောဠသ ဝဿိကံ။
မဒ္ဒရဋ္ဌေ တဒါမဒ္ဒ-
ရာဇကုလာ ဘိဝဏ္ဏိနိံ၊
နေတွာမဟေ သိတ္တေမဒ္ဒိံ-
ဘိသိဉ္စိ ဓမ္မစာရိနိံ။
မဒ္ဒီမာတုလဓီတာသာ ¶ ၊
ဘဂိနီ မန္ဒဟာသိနီ၊
ဝေဿန္တရကုမာရဿ၊
သေဋ္ဌလက္ခဏဓာရိနီ။
ပုဗ္ဗဥဋ္ဌာယိနီ မဒ္ဒီ၊
နိစ္စံ ပစ္ဆာနိပါတိနီ၊
မနာပစာရိနီ ဒေဝီ၊
ကိံကာရ ပဋိသာဝိနီ။
သောဠသိတ္ထိ ¶ သဟဿာတံ၊
မဒ္ဒိံသဗ္ဗင်္ဂ သောဘဏံ၊
နစ္စဝါဒိတ ဂီတေဟိ၊
ပရိစာရိံသု သဗ္ဗဒါ။
ဝေဿန္တရော မဟာရာဇာ၊
ရဇ္ဇေဘိ သိတ္တကာလတော၊
ပဌာယ ဒါနသာလာယော၊
ဆဒ္ဒါနံ ဒါသိကာရိယ။
မဟာဒါနံ ပဝတ္တေသိ၊
ဝိဿဇ္ဇန္တော ဒိနေဒိနေ၊
သမ္မောဒမာနော ဆဿတ-
သဟဿာနိ ဓနာနိသော။
ဧဝံဒါနေ ¶ ရမန္တဿ၊
မဟေသီတဿရာဇိနော၊
ပုတ္တံဝိဇာယိအပရ-
ဘာဂေမဒ္ဒီ သုဒဿနံ။
သမ္ပဋိစ္ဆိံသု ဝိဇာတ-
ကာလေတံ သောဏ္ဏသန္နိတံ၊
သောဏ္ဏ ဇာလေနတေနဿ၊
နာမံဇာလီတိ ဝေါဟရုံ။
ပဒသာ ¶ ဂမနေ ကာလေ၊
ပုတ္တဿ တဿဇာလိနော၊
ဝိဇာယိ ဓီတရံဧကံ၊
နာရီနံ သေဋ္ဌံသမ္မတံ။
ကဏှာဇိနေန ဓီတံတံ၊
သမ္ပဋိစ္ဆိံသု သာဒရံ၊
တေနဿာ ဓိတုယာနာမံ၊
ကဏှာဇိနာတိ ဝေါဟရုံ။
မဟတာ ပရိဝါရေန၊
ဝုဒ္ဓိံနွာယိံသု တေဒုဝေ၊
သယန္တာ နစ္စဂီတေန၊
နစ္စဂီတ ပဗောဓနာ။
မဟာသတ္တောဟိ ¶ မာသဿ၊
ဆက္ခတ္တုံ ဒါနမဏ္ဍပေ၊
ဩလောကေသိ အလင်္ကတ-
ဟတ္ထိက္ခန္ဓ ဝရေဌိတော။
တဟိံ ကလိင်္ကရဋ္ဌမှိ၊
ဒုဗ္ဗုဋ္ဌိကာ ဘယာနကာ၊
သဿာနိ နသမ္ပဇ္ဇိံသု၊
ဒုဗ္ဘိက္ခော သမယောအဟု။
စောရကမ္မံ ¶ အကရိံသု၊
အသက္ကောန္တာဝ ဇီဝိတုံ၊
ဇနာ နိဂမဂါမေသု၊
ဝိလုမ္ပန္တိ ဒါမရိကာ။
ကလိင်္ကရဋ္ဌံ သကလံ၊
ဒုဗ္ဘိက္ခဘယပီဠိတံ၊
ဃဋေ ဝိလောလပါရီဝ၊
သင်္ခုမ္ဘိတ္ထ အနာထကံ။
နေဂမာ ဇာနပဒါသဗ္ဗေ၊
နာဂရာစ သမဂ္ဂတာ၊
ရာဇင်္ဂဏေ ဥက္ကောသိံသု၊
ဒုဗ္ဘိက္ခဘယ စောဒိတာ။
တဒါသုတွာန ¶ တံရာဇာ၊
သီဃံဥဗ္ဗိဂ္ဂ မာနသာ၊
ကောယံသဒ္ဒေါတိ ပုစ္ဆိတ္ထ၊
မဟာမစ္စေ သကန္တိကေ။
အာရောစယိံသု ရာဇာနံ၊
ပဝတ္တိံ တံအသေသတော၊
ရာဇာပိ ပဋိဇာနာသိ၊
မေဃံ ဝဿာပယေ-ဣတိ။
တတောသော ပတ္ထနံကာသိ၊
သမာဒိယ ဥပေါသထံ၊
ဒေဝံ ဝဿာပနတ္ထာယ၊
သတ္တာဟံသတ္တကာရုဏော။
နဟိဧဝံပိသောသက္ခိ ¶ ၊
ဝဿာပေတုံ နရိဿရော၊
မေဃံကလိင်္က ရဋ္ဌမှိ၊
ဒုဗ္ဗုဋ္ဌိကာဝ ဇာယဟိ။
တတောသော သန္နိပါတေတွာ၊
နာဂရေ ဧတဒဗြဝီ၊
ဝသာပေတုံ နသက္ကောမိ၊
ဒေဝံ ကိံ နုကရေ-ဣတိ။
တဒါဧဝမဝေါစိံသု ¶ ၊
နရာကလိင်္ကရာဇိနော၊
ဒေဝံ ဝဿာပနတ္ထာယ၊
သုဘိက္ခကာလကာမိနော။
သိဝိရဋ္ဌေမဟာရာဇ၊
ရဇ္ဇေဓမ္မေနယောဌိတော၊
ဇေတုတ္တရေမဟာဝေဿ-
န္တရော သိဉ္စယဩရသော။
ဒါနေသုဘိရတောဟေသ၊
ကိရမင်္ဂလကုဉ္ဇရော၊
တဿတ္ထိပစ္စယောနာမ၊
ပဝရောသဗ္ဗပဏ္ဍရော။
ဂတဌာနေကုဉ္ဇရဿ ¶ ၊
တဿေကန္တေနခတ္တိယ၊
ပါဝဿိကိရဂဇ္ဇန္တော၊
မဟာမေဃောသဝိဇ္ဇုကော။
ပေသေတွာဗြာဟ္မာဏေရာဇ၊
ယာစာပေတုံသုပဏ္ဍရံ၊
ဟတ္ထိံဝဋ္ဋတိတံတေန၊
သီဃံပေသေဟိဗြာဟ္မဏေ။
သမ္ပဋိစ္ဆိယသာဓူတိ၊
သုတွာတံတုဋ္ဌမာနသော၊
ရာဇင်္ဂဏမှိရာဇာသော၊
သန္နိပါတေသိဗြာဟ္မဏေ။
ဂုဏဝဏ္ဏေဟိသမ္ပန္နေ ¶ ၊
ဝိစိနိတွာနဗြဟ္မဏေ၊
အဋ္ဌတေသုရာဇာတေသံ၊
နေကံဒါသိပရိဗ္ဗယံ။
အာနေထကုဉ္ဇရံဘောန္တော၊
ဝေဿန္တရဿသန္တိကံ၊
ဂန္တွာယာစိယ-ဧဝံတေ၊
ရာဇာဝတွာနပေသယိံ။
ဗြာဟ္မာဏာ ¶ အဋ္ဌရာဇာနံ၊
တေကတွာန ပဒက္ခိဏံ၊
ဂဉ္ဆိံသု ဇေတုတ္တရံ နာဂံ၊
နေထုံ သဗ္ဗင်္ဂသုန္ဒရံ။
အနုပုဗ္ဗေန ဂန္တွာန၊
တေပါပုဏိံသု ဗြာဟ္မဏာ၊
ဇေတုတ္တရံ ဘုဉ္ဇမာနာ၊
ဒါနသာလာသု အစ္ဆယုံ။
တတောပုဏ္ဏ မဒိနမှိ၊
ကတွာသရီရမတ္တနော၊
တေပံသုမက္ခိတံအာဂုံ၊
ပါစီနဒွါရမဏ္ဍလံ။
သံယာစိဿာမနာဂန္တိ ¶ ၊
စိန္တမာနာဝရာဇိနော၊
အာဂမေန္တာအာဂမနံ၊
တတ္ထအစ္ဆိံ သုဗြာဟ္မာဏာ။
ဒါနဂ္ဂံ ဩလေကေယျန္တိ၊
တဒါသုရ သဘောဇနော၊
ပါတောနူတွာ မဟာသတ္တော၊
အလင်္ကာရေန လင်္ကရိ။
အလင်္ကတ ဟတ္ထိက္ခန္ဓံ၊
အရုယှ အဂမာတတော၊
ရာဇာ ¶ ပုရတ္ထိမံ ဒွါရံ၊
ပရိသာယ မဟန္တိယာ။
မဟန္တိံ ပရိသံဒိသွာ၊
ဘိတာ ဥဗ္ဗိဂ္ဂ မာနသာ၊
တတ္ထောကာသံ နလဘိံသု၊
ယာစိတုံ ဗြာဟ္မဏာ တဟိံ။
တမှာ ဒက္ခိဏဒွါရံ တေ၊
သင်္ကမိတွာန ဥန္နတေ၊
ပဒေသေ သေဋ္ဌရာဇာနံ၊
အာဂမေသုံ ဌိတာ တတော။
ဩလောကေတွာန ¶ ပါစီန-
ဒါရမှိ ဒါနမဏ္ဍပေ၊
ဟတ္ထိက္ခန္ဓဂတော ရာဇာ၊
ဒွါရမာ ဂဉ္စိဒက္ခိဏံ။
ရာဇာနံ အာဂတံ ဒိသွာ၊
ပသာရေတွာန ဗြာဟ္မဏာ၊
ဟတ္ထေ ‘‘ဝေဿန္တရောဇေတု’’
တိက္ခတ္တုံ ဣတိဘာသိံသု။
ဇယသဒ္ဒံ ပနာဒန္တေ၊
ရာဇာဒိသွာန ဗြာဟ္မဏေ၊
ဟတ္ထိံ တေသံ ဌိတဌာနံ၊
ပါဇေသိ ဒါနမာနသာ။
ဟတ္ထိက္ခန္ဓေ ¶ နိသိန္နောဝ၊
ပသန္နေန မုခေနသော၊
မှိတပုဗ္ဗံ တတောဝေါစ၊
ဂိရေဝံ ဟဒယင်္ဂမံ။
ဒက္ခိဏာဝဋ္ဋသင်္ခေန၊
ဗာဟုံပဂ္ဂယှ ဒက္ခိဏ၊
ပုရတော မမ တိဋ္ဌန္တာ၊
ကိံ မံယာစန္တိ ဗြာဟ္မဏာ။
ဧဝံသီဃမ ¶ ဝေါစိံသု၊
ပဟဋ္ဌာ ဗြာဟ္မဏာ တဟိံ၊
ရတနံရာဇ ယာစာမ၊
ကုဉ္ဇရံ သဗ္ဗပဏ္ဍရံ။
ဣဒံသုတွာနသောစိန္တိ၊
အဇ္ဈတ္တိကံ ပိဒါတဝေ၊
အဟမိစ္ဆာမိတေဒါနိ၊
မမံ ယာစန္တိ ဗာဟိရံ။
ဣဒါနိ ပူရယိဿာမိ၊
ယာစန္တာနံ မနောရထံ၊
ဧဝံစိန္တိယသောဘာသိ ¶ ၊
ဟတ္ထိက္ခန္ဓဌိတော ဣတိ။
ဒေမိတံ နဝိကမ္ပာမိ၊
ယံမံယာစန္တိ ဗြာဟ္မဏာ၊
ကေလာသ သဒိသံ သေတံ၊
အလင်္ကတံ ဂဇုတ္တမံ။
ဟတ္ထိက္ခန္ဓာ တတော ရုယှ၊
ရာဇာ စာဂါဓိမာနသော၊
ဩလောကေသိတိက္ခတ္တုံတံ၊
ကတွာ နာဂံ ပဒက္ခိဏံ။
ဂဟေတွာ ¶ သောဏ္ဏဘိင်္ဂါရံ၊
သုဂန္ဓောဒက ပူရိတံ၊
အဟွာယိ ဧထ ဘောန္တောတိ၊
ကုဉ္ဇရံဧသ ဒါတဝေ။
ဂဟေတွာ ရဇတဒါမ-
သဒိသံ သေတ ဟတ္တိနော၊
သောဏ္ဍံဋ္ဌပိယ ဟတ္ထေသု၊
ဗြာဟ္မဏာနံ ဂဇိဿရော။
သာလင်္ကတံ မဟာနာဂံ၊
ပါတေတွာ ဒက္ခိဏောဒကံ၊
အဒါသိ သေဋ္ဌဒန္တိံတံ၊
အသလ္လိနေန စေတသာ။
သဒ္ဓိံ ¶ ဝီသတိလက္ခေန၊
စတုလက္ခာနိ အဂ္ဃတိ၊
အလင်္ကာရောဟိ နာဂဿ၊
နာနာရတနစိတ္တိတော။
အထာပိအနဂ္ဃာ ဟောန္တိ၊
ဆဠေဝ အင်္ကုသာဒိသု၊
မဏယော ဝါရဏောစာပိ၊
အနင်္ဃော သတ္တနဂ္ဃိကာ။
ယတာဝုတ္တ ရတနေဟိ၊
သဒ္ဓိံ အဒါသိ ကုဉ္ဇရံ၊
နာဂေါပိယောပိ တေနေဝ၊
တတော သဗ္ဗညုတံ ပိယံ။
အထာပိ ¶ ပဉ္စသတာနိ၊
ပရိစာရာနိ ဟတ္ထိနော၊
ကုလာနိ ဟတ္ထိဂေါပေဟိ၊
သဒ္ဓိံ အဒါသိ သာဒရံ။
ဝေဿန္တရေန ဒိန္နမှိ၊
သေတ မင်္ဂလ ကုဉ္ဇရေ၊
အစေတနာပိနာဒေန္တီ၊
မေဒနီ သမ္ပ ကမ္ပထ။
တဟိံ ¶ ဘီသနကံ အာသိ၊
နာနံ လောမဟံသနံ၊
မဟန္တော ဝိပုလော ဃောသော၊
ခုမ္ဘိတ္ထ သကလံ ပုရံ။
မဟီသဒ္ဒသန္တာသေန၊
မေဃော ပါဝဿိ တာဝဒေ၊
ဃနဝဿံ မဟာဓာရံ၊
ဂဇ္ဇမာနော ဒိသော ဒိသံ။
နိစ္ဆရိံသု ဗဟူဝိဇ္ဇု-
လတာ ယောစ သမန္တတော၊
ဣန္ဒစာပါ ဥဋ္ဌဟီံသု၊
ဥက္ကာပါတော တဒါ အဟု။
ဟတ္ထိံ ¶ လဒ္ဓါနတေ တုဋ္ဌာ၊
ဗြာဟ္မဏာ ကိရဒက္ခိဏာ-
ဒွါရာ နဂရ မဇ္ဈေန၊
ဂဇက္ခန္ဓ ဂတာနယုံ။
မဟာဇနပရိဝါရေ၊
ဂဇာရုဠှေဋ္ဌ ဗြာဟ္မဏေ၊
ပဿိံ သုနာဂရာ သဗ္ဗေ၊
တဒါတေ ဧတဒဗြဝုံ။
အမှာကံ ¶ ကုဉ္ဇရံ ဟမ္ဘော၊
အာရုဠှာ ဝေါ ဣဓာဂတာ၊
ဒိန္နောယံ ကေန တုမှာကံ၊
ကဒါ လဒ္ဓါ ကုတော-ဣတိ။
ဝေဿန္တရေန ဒိန္နော နော၊
ကထံတုမှေ ဝဒိဿထ၊
နကထေယျာမ ဝိတ္ထာရံ၊
ဂစ္ဆေမ နဂရံ မယံ။
ဧဝံဝတွာ နိက္ခမိံသု၊
ဒွါရေန ဥတ္တရေနတေ၊
စိတ္တံဝိလောလ ¶ မာနာဝ၊
နာဂရာနံ ကလိင်္ကဇာ။
တဒါဟိ နာဂရာ သဗ္ဗေ၊
ဗောဓိသတ္တဿ ကုဇ္ဈိတာ၊
ရာဇဒွါရေ သန္နိပစ္စ၊
ဥပက္ကောသမကံသု တေ။
အဓမ္မေနေဝဘောန္တ္တောနော၊
နာဂံ ရဋ္ဌဿ ပူဇိတံ၊
အဒါဝေဿန္တရောဒုဋ္ဌ-
ဗြာဟ္မဏာနမလင်္ကတံ။
သင်္ခုမ္ဘိတစိတ္တာ ¶ သဗ္ဗေ၊
တတောနဂရဝါသိနော၊
ဂန္တွာ သိဉ္စယရာဇဿ၊
သန္တိကံ ဧဝမဗြဝုံ။
ဝိဓမံဒေဝတေရဋ္ဌံ၊
ပုတ္တောဝေဿန္တရောတဝ၊
ကတံသောကုဉ္ဇရံဒါသိ၊
သိဝိရဋ္ဌဿပူဇိတံ။
ကထံသော ¶ ဝါရဏံဒါသိ၊
သေတံ ကေလာသသန္နိဘံ၊
ပဏ္ဍုကမ္ပလသဉ္ဆန္နံ၊
ဇယ ဘူမိ ဝိဇနာနံ။
သစေ သော ဒါတုမိစ္ဆေယျ၊
အန္နံပါဏဉ္စဘောဇနံ၊
ဝတ္ထံ သေနာသနံ သောဏ္ဏံ၊
ယုတ္တံဒါတုံ ယထိစ္ဆိတံ။
သစေတွံ နကရိဿသိ၊
သိဝီနံ ဝစနံဣဒံ၊
မညေတံ သဟပုတ္တေန၊
သိဝီဟတ္ထေ ကရိဿရေ။
တဇ္ဇမာနာဟိ ¶ ဧဝဉှိ၊
သုတွာ သိဝီဟိ ဘာသိတံ၊
မညိတ္ထ သိဉ္စယော ပုတ္တံ၊
မာရေတုံ ဣစ္ဆရေဣတိ။
ဧဝံဗျာကာသိ တေနေဝ၊
သီဃံဝိဗ္ဘန္တ မာနသော၊
ပုတ္တပေမ စောဒိတော သော၊
သောကသလ္လ သမပ္ပိတော။
ကာမံ ¶ ဇနပဒေါ သဗ္ဗံ၊
ရဋ္ဌဉ္စာပိ ဝိနဿတု၊
နာဟံ သိဝီနံဝစနာ၊
ပဗ္ဗာဇေယျံ မမတြဇံ။
ကထံ ဟံ တမှိ ဒုဗ္ဘေယျံ၊
သန္တောသော သုဒ္ဓစေတသော၊
ပုတ္တံကထဉ္စ နိဒ္ဒေါသံ၊
သတ္ထေန ဃာတယေ မမ။
သိဝယော တဿ သုတွာန၊
ဘာသိတံ ပုတ္တဂိဒ္ဓိနော၊
အဝေါစုံ ဝိသဋ္ဌာ ဝီတ-
ဘဟာဧဝံ ယထာတထံ။
မာနံ ¶ ဒဏ္ဍေန သတ္ထေန၊
နာပိ သော ဗန္ဓနာရဟော၊
ပဗ္ဗာဇေဟိ ဝနံ ရဋ္ဌာ၊
ဝင်္ကေ ဝသတု ပဗ္ဗတေ။
တဒါစိန္တယိ သောရာဇာ၊
နယုတ္တံ ပနူဒေတဝေ၊
ဆန္ဒံ ဟိ သိဝိနံ ဒါနိ၊
တတော ဝေါစ သုဘာသိတံ။
ယထာဆန္ဒံ ¶ ကရေယျာမိ၊
ရဋ္ဌ ပဗ္ဗာဇယေထ တံ၊
ဧကောကာသဉ္စ ယာစာမ၊
ရတ္တိံ သော ဝသတံ ဣမံ။
အမန္တေတု ယထာကာမံ၊
ကဏှာဇိနာယ ဇာလိနာ၊
တထာစ မဒ္ဒိယာ သဒ္ဓိံ၊
ကာမေစ ပရိဘုဉ္ဇတု။
တတော ရတျာ ဝိဝသာနေ၊
သူရိယုဂ္ဂမနေသတိ၊
သမဂ္ဂါ သိဝယော ဟုတွာ၊
ရဋ္ဌာ ပဗ္ဗဇယန္တု တံ။
ပစ္စာဂဉ္ဆုံ ¶ တဒါ သဗ္ဗေ၊
သိဝယော တုဋ္ဌမာနသာ၊
သမ္ပဋိစ္ဆိတွာန သာဓူတိ၊
ဝစနံ သိဝိရာဇိနော။
တတောသော သိဉ္စယောဧကံ၊
ကတ္တာရံ ပုတ္တသန္တိကံ၊
သာသနံ ပေသနတ္ထာယ၊
တုရိတံ ဧဝမဗြဝီ။
ဥဋ္ဌေဟိ ကတ္တေ တရမာနော၊
ဂန္တွာ ဝဿန္တရံ ဝဒ၊
သိဝယော ဒေဝ တေကုဒ္ဓါ၊
နေဂမာစ သမာဂတာ။
အသ္မာ ¶ ရတျာ ဝိဝသာနေ၊
သူရိယုဂ္ဂမနေ သတိ၊
သမဂ္ဂါ သိဝယော ဟုတွာ၊
ရဋ္ဌာ ပဗ္ဗာဇယန္တိတံ။
သကတ္တာ တရမာနောဝ၊
သိဝိရာဇေန ပေသိတော၊
ဥပါဂမိ ပုရံရမ္မံ၊
ဝေဿန္တရ နိဝေသနံ။
တတ္ထဒ္ဒသ ¶ ကုရံသော၊
ရမမာနံ သကေ ပုရေ၊
ပရိကိဏ္ဏံ အမစ္စေဟိ၊
တိဒသာနံဝ ဝါသဝံ။
ဝန္ဒိတွာ ရောဒမာနောသော၊
ကတ္တာ ဝေဿန္တရံ ဗြဝီ၊
ဒုက္ခံ တေ ဝေဒယိဿာမိ၊
မာမေကုဇ္ဈ ရထေသဘ။
အသ္မာရတျာ ဝိဝသာနေ၊
သူရိယုဂ္ဂမနေ သတိ၊
သိဝယော ဒေဝ တေကုဒ္ဓါ၊
ရဋ္ဌာ ပဗ္ဗာဇယန္တိတံ။
သုတွာန ¶ ဘာသိတံ ဧတံ၊
ဟသမာနော ပမောဒယံ၊
ဧဝံပုစ္ဆိတ္ထ ကတ္တာရံ၊
ဝေဿန္တရော သုဓီတိမာ။
ကိသ္မိံ မေ သိဝယော ကုဒ္ဓါ၊
ယံ နပဿာမိ ဒုက္ကဋံ၊
တံမေ ကတ္တေ ဝိယာစိက္ခ၊
ကသ္မာ ပဗ္ဗာဇယန္တိ မံ။
တဟိံ ¶ ကတ္တာ ဣဒံဝေါစ၊
ဟတ္ထိဒါနေန ကုဇ္ဈရေ၊
ခီယန္တိ သိဝယော ရာဇ၊
တသ္မာ ပဗ္ဗာဇယန္တိ တံ။
တံသုတွာန မဟာသတ္တော၊
ဒါနေသု ထီရမာနသော၊
ဝစနံ မှိတပုဗ္ဗံ သော၊
ကတ္တာရံ ဧတဒဗြဝီ။
ဟဒယံ ¶ စက္ခုမဟံ ဒဇ္ဇံ၊
ဗာဟုံပိ ဒက္ခိဏံ မမ၊
ဟိရည မဏိသောဏ္ဏာဒိံ၊
နကိံ ဗာဟိရကံ ဓနံ။
ကာမံမံသိ ဝယောသဗ္ဗေ၊
ပဗ္ဗာဇေန္တု ဟနန္တုဝါ၊
နေဝဒါနာ ဝိရမိဿံ၊
ကာမံဆိန္ဒန္တု သတ္တဓာ။
တတောသော ဒေဝတာဝိဋ္ဌော၊
ကတ္တာမဂ္ဂမ ဒေသယိ၊
ပဗ္ဗာဇိတာနံ သဗ္ဗေသံ၊
ဂတပုဗ္ဗံ ပုရာဏကံ။
ကောန္တီမာရာယ ¶ တီရေန၊
ဂီရိမာ ရဉ္စရံ ပတိ၊
ယေနပဗ္ဗာဇိတာယန္တိ၊
တေနဂစ္ဆတု သုဗ္ဗတော။
တံသုတွာန ဗောဓိသတ္တော၊
သာဓူတိ သမ္ပဋိစ္ဆိယ၊
ဧကောကာသံ နာဂရာနံ၊
ယာစေတုံ ဧဝမဗြဝီ။
ဒါနံသတ္တသတကံဟံ ¶ ၊
ကတ္တေဒဇ္ဇံ သုဝေတတော၊
ပရသွေ နိက္ခမိဿာမိ၊
ရတ္တိံဒိဝံ ခမန္တုမေ။
သာဓုဒေဝပဝက္ခာမိ၊
ခမာပေတုံနိသာဒိဝံ၊
နာဂရာနံတိဝတွာန၊
တဒါကတ္တာပိပက္ကမိ။
မဟာသတ္တောမဟာယေန- ¶
ကုတ္တံသကလကမ္မိကံ၊
ပက္ကောသာဝိယသွေဒါနံ၊
ဧဝံဗျာကာသိဒါတဝေ။
ဟတ္ထီအဿေရတေဣတ္ထီ၊
ဒါသီဒါသေစဓေနုယော၊
ပဋိယာဒေဟိတွံသတ္တ-
သတေစာဂါယမာရိသ။
အထောနာနပ္ပကာရာနိ၊
အန္နပါနာနိသဗ္ဗသော၊
သုရံပိ ပဋိယာဒေဟိ၊
သဗ္ဗံဒါတဗ္ဗယုတ္တကံ။
ဧဝံသောဗျာကရိတွာန ¶ ၊
ပေမစိတ္တေနစောဒိတော၊
ဧကောဝမဒ္ဒိယာရမ္မံ၊
ပါသာဒမဘိရူဟထ။
ရတ္တစန္ဒန ဂန္ဓေဟိ၊
ဂန္ဓောဒကေဟိဝါသိတံ၊
သောပါဝေက္ခိသိရီဂဗ္ဘံ၊
မဒ္ဒီဒေဝီနိဝါသနံ။
မဒ္ဒီဒိသွာနအာယန္တံ ¶ ၊
မှိတာနနေနသာမိကံ၊
ဥဋ္ဌာသိအာသနာသီဃံ၊
ရေဏုမတ္တာဝကိန္နရီ။
ဥဋ္ဌာဟိတွာနသာမဒ္ဒီ၊
ဝါမဟတ္ထေသု ရာဇိနော၊
ဒက္ခိဏေ နသဟတ္ထေန၊
ဂဏှိတ္ထမန္ဒဟာသိနီ။
တတောသိရိသယနမှိ ¶ ၊
နသိန္နံသကသာမိကံ၊
ဗီဇယန္တီဝသာဋ္ဌာသိ၊
မဒ္ဒီသညတဝါသိနီ။
မဒ္ဒိံအင်္ကေဋ္ဌပေတွာထ၊
ဂဏှံဟတ္တေသုဒေဝိယာ၊
မုခံမုခေနကတွာန၊
ရာဇာမန္ဒမဘာသထ။
ယံတေသစေမယာဒိန္နံ၊
ယဉ္စတေပေတ္တိကံဓနံ၊
သဗ္ဗံတံနိဒဟေယျာသိ၊
ဘဒ္ဒေကောမာရပေမိကေ။
တဟိံနဝုတ္တပုဗ္ဗံမေ ¶ ၊
သာမိကေနမမီဒိသံ၊
ကဒါစိဧတ္ထကံကာလံ၊
မဒ္ဒီဧဝဉှိစိန္တယိ။
တတော ဥဗ္ဗိဂ္ဂစိတ္တေန၊
မဒ္ဒီဧဝ မဘာသထ၊
ကုဟိံ ဒေဝ နိဒဟာမိ၊
တံမေ အက္ခာဟိ ပုစ္ဆိတော။
သီလဝန္တေသု ¶ ဒုဇ္ဇာသိ၊
ဒါနံ မဒ္ဒီ ယထာရဟံ၊
နဟိဒါနာ ပရံအတ္ထိ၊
ပတိဋ္ဌာ သဗ္ဗပါဏိနံ။
နိဓာနံ နာမ ဧတံဝ၊
ဓနာနံ နန္ဒိဝဍ္ဎနေ၊
ဒါနံဟိ နိဓိ သတ္တာနံ၊
ဧဝံဗျာကာသိ ခတ္တိယော။
မဒ္ဒီဝတွာန ¶ သာဓူတိ၊
ဩနမိတွာ သိရုတ္တမံ၊
သမ္ပဋိစ္ဆိ တတော ရာဇာ၊
ပုနာပိ ဧဝမဗြဝီ။
ဇာလိမှိမဒ္ဒိဒယေသိ၊
သာဓုကဏှာဇိနာယစ၊
ဂါရဝံနိဝါတံကာသိ၊
သဿုယာသဿုရမှိစ။
ယောဟိတံ ပေမ စိတ္တေန၊
မယာဝိပ္ပဝသေန တေ၊
ဣစ္ဆေ စေဘဝိတုံ အတ္တာ၊
သက္ကစ္စံ တံဥပဋ္ဌဟေ။
သစေ ¶ ဧဝံ နဘဝေယျ၊
ဘတ္တာရံ မာဒိသံ ဝိယံ၊
ပရိရေ သေဟိ အညံ တွံ၊
မာကိ ဿိတ္ထော မယာဝိနာ။
တဒါဟိ ဒုမ္မုခီ မဒ္ဒီ၊
ရာဇာန မေဝ မဗြဝီ၊
ဒုဿုတံ ဝတ သုဏောမိ၊
ဤဒိသံ ကိန္နုဘာသသိ။
ဝိယာစိက္ခာမိ ¶ မေဘ ဒ္ဒေ၊
သကလံ ဒါနိ ကာရိဏံ၊
ဟတ္ထိဒါနေနကုဇ္ဈန္တိ၊
သမဂ္ဂါ သိဝယော မမ။
ပဗ္ဗာဇေန္တိ မမံ တေန၊
သိဝယော သိဝိရဋ္ဌတော၊
မဟာဒါနံ ဒဒိဿာမိ၊
သုဝေ ကောမာရသင်္ဂမေ။
ပရသွေ နိက္ခမိဿာမိ၊
ရဋ္ဌာ ဧကောဝ သောဘဏေ၊
နာနာဘယေဟိ သံကိဏ္ဏံ
ဝင်္ကံ ဂစ္ဆာမိ ပဗ္ဗတ။
ပါဏီကတပိယေ ¶ ဇာလိံ၊
ကဏှာဇိနဉ္စ အတ္တဇံ၊
တဉ္စဩဟာယ ဂစ္ဆေယျံ၊
ဝသေယျံ ဧကကောဝနေ။
ရညော သုတွာန သင်္ကမ္ပိ၊
ဝစနံသောကဝဍ္ဎနံ၊
မာလုတေရိတပတ္တံဝ၊
မဒ္ဒီယာ ဟဒယံ တဒါ။
မာမမေဝမဝစုတ္ထ ¶ ၊
ကမ္ပေသိ ဟဒယံ မမ၊
တတ္တတေလေနသိတ္တံဝ၊
သရိရံ ရာဇ ဒယှတေ။
နေသဓမ္မော မဟာရာဇ၊
ယံ တွံ ဂစ္ဆေယျ ဧကကော၊
အဟံပိ တေန ဂစ္ဆာမိ၊
ယေနဂစ္ဆသိ ခတ္တိယ။
မရဏံဝါ ¶ တယာ သဒ္ဓိံ၊
ဇီဝိတံဝါ တယာ ဝိနာ၊
တဒေဝ မရဏံ သေယျော၊
ယဉ္စေဇီဝေ တယာပိနာ။
အဂ္ဂိံ ဥဇ္ဇာလယိတွာန၊
ဧကဇာလ သမာဟိတံ၊
တတ္ထေ ဝမရဏံ သေယျော၊
ယဉ္စေ ဇီဝေ တယာ ဝိနာ။
စရန္တာ ရညနာဂံဝ၊
ဒုဂ္ဂေသွနွေတ္တိ ဟတ္ထိနီ၊
ဧဝံတံ ¶ အနုဂစ္ဆာမိ၊
ပုတ္တေအာဒါယပစ္ဆတော။
ဝိမံသေတုံ တဒါ ရာဇာ၊
မာနသံ မဒ္ဒိဒေဝိယာ၊
နာနာဘယံ ပကာသေန္တော၊
ဧဝံဗြဝိ ဘယာပယံ။
ဝိယာစိက္ခာမိ ¶ တေသစ္စံ၊
ဝနမှိ မုဒုမာနသေ၊
နာနာဘယံ ခရံ ဃောရံ၊
ဟေသ္မံ ဟဒယကမ္ပနံ။
ကေသရီနာမ ယေဘဒ္ဒေ၊
မိဂရာဇာ ခရဿရာ၊
ဟိံ သန္တိံ တေ သသဒ္ဒေန၊
မိဂေတိက္ခဂ္ဂ ဒါဌိနော။
ဒီပီဗျဂ္ဃာကဏှာစ္ဆာစ၊
တိက္ခဂ္ဂ နခ ဓာရိနော၊
ခဂ္ဂါ ¶ ဝနမဟိံသာစ၊
တိက္ခဂ္ဂသိင်္ဂဓာရိနော။
တိက္ခဂ္ဂ နခ သိင်္ဂေဟိ၊
ဧတေ ပေါသံပိ ဆိန္ဒိယ၊
ခဏ္ဍာခဏ္ဍံ ကရိတွာန၊
မူလာလံဝိယ ဘက္ခရေ။
ယာစယက္ခိနိယောယက္ခာ၊
ဗဟူမနုဿခါဒကာ၊
နရံနာရိံ ဂဝေသန္တိ၊
ဒုမ္မုခါ ခဂ္ဂပါဏိနော။
အထော ¶ အဇဂရာသပ္ပာ၊
ဃောရဝီသာစ ဝိဇ္ဇရေ၊
ဝိံသာစာ ရက္ခသာဝါဠာ၊
သဇ္ဇုလောဟိတဘောဇနာ။
အညေပိ ဗဟဝေါသန္တိ၊
ဘယာဘေသ္မကာရကာ၊
ကိံနဘာယသိ ဧတေသံ၊
ဘယာနံ ဘယမာနသေ။
မာ ¶ မမံ တွံ နုဂစ္ဆာဟိ၊
ဂစ္ဆန္တံ ဘယသံယုတံ၊
ဝနံ ဣဓေဝ အစ္ဆာဟိ၊
ဝုတ္တေဟိသဟဘီရုကေ။
တွေကဒါသိရိဂဗ္ဘမှိ၊
ဝသန္တီ သဟမေ သုဘေ၊
သုတွာဂဝေသိတာဏင်္ကေ၊
ကိံမေ မဉ္ဇာရဂဇ္ဇိတံ။
တွေကဒါကိံဝိဗောဓေသိ ¶ ၊
ဘေမိဘေမီတိ ဘာသိယ၊
ရတ္တိယံ ဟိ သယန္တံ မံ၊
သုတွာ နုလုင်္ကဝဿိတံ။
တွေကဒါ မေဃသဒ္ဒံဟိ၊
သုတွာဒိဝါ မမန္တိကံ၊
ဓာဝိတွာမံ ပရိဿဇ္ဇ၊
ကိံ မုစ္ဆိလောမဟံသီနီ။
ဧဝံဘယ ¶ စဉ္စလာယ၊
သုခုမာလာယ ဒေဝိယာ၊
နာလံဟိ ဝသိတုံရညေ၊
ဘေသ္မေ အဝနဝါသိကေ။
မဒ္ဒီသုတွာန ရာဇဿ၊
ဘာသိတ္တံ ထီရမာနသာ၊
ဝိသာရဒေန စိတ္တေန၊
သာမိကံ ဧဝမဗြဝီ။
တယိမေ ပေမ စိတ္တဉ္စ၊
အရညေ ဘယမာနသံ၊
တယိတေသုမဟာရာဇ ¶ ၊
သုတိက္ခံ ပေမ စေတသံ။
သန္ဒတေ သီဃသောတံမေ၊
တယိသာဂရ သန္နိဘေ၊
နိစ္စံပေမောဒကံရာဇ၊
ဂင်္ဂေါဒကံဝ သာဂရေ။
မရဏံပေမစိတ္တေန၊
ဇီဝိတံ ဘယ စေတသာ၊
တဒေဝ မရဏံသေယျော၊
ယဉ္စေတံ ဇီဝိတံစိရံ။
ပါကာရံ ¶ မမူရံရာဇ၊
ကတွာန ပုရတောဝနံ၊
နာနာဘယံ နိဝါရေန္တီ၊
ဂစ္ဆံ ဟံဝေရဟိံသိနီ။
တယိဟံ ပေမစိတ္တာသိံ၊
ဂဟေတ္တွာ ဝင်္ကပဗ္ဗတေ၊
ဖလာဖလံဂဝေသန္တီ၊
ဝသေယျာမိ တယာသဟ။
ဧဝံဉှိ ¶ သူရဘာဝံ သာ၊
ဒဿယိတွာန အတ္တနော၊
ဟိမဝန္တ ဝါသိနီဝ-
ရာဇာနံ ဝီတိတောသယိ။
ယဒါဒက္ခသိနစ္စန္တေ၊
ကုမာရေ မာလဓာရိနေ၊
ကီဠန္တေ အဿမေရမ္မေ၊
နရဇ္ဇဿ သရိဿသိ။
ယဒါဒက္ခသိဂါယန္တေ ¶ ၊
အညောညမုခဒဿိနေ၊
ကုမာရေဝနဂုမ္ဗမှိ၊
နရဇ္ဇဿ သရိဿသိ။
ယဒါဒက္ခသိမာတင်္ဂံ၊
သာယံပါတံဗြဟာဝနေ၊
အသဟာယံဝိစရန္တံ၊
နရဇ္ဇဿ သရိဿသိ။
နာဒံကရေဏုသင်္ဃဿ ¶ ၊
နဒမာနဿပူရတော၊
နာဂဿဝဇတောသုတွာ၊
နရဇ္ဇဿသရိဿသိ။
မိဂံဒိသွာနသာယနှံ၊
ပဉ္စမာလိနမာဂတံ၊
ကိံ ပူရိသေစနစ္စန္တေ၊
နရဇ္ဈဿသရိဿသိ။
ယဒါသုဿသိနိဂ္ဃောသံ ¶ ၊
သန္ဒမာနာယသိန္ဓုယာ၊
ဂီတံကိံပုရိသာနဉ္စ၊
နရဇ္ဇဿသရိဿသိ။
သရတဿစသီဟဿ၊
ဗျဂ္ဃဿစ္ဆဿဒိဝိနော၊
သဒ္ဒံ သုတွာနခဂ္ဂဿ၊
နရဇ္ဇဿသရိဿသိ။
ယဒါမောရီဟိပရိကိဏ္ဏံ ¶ ၊
ဝိစိတြပုစ္ဆပက္ခိနံ၊
မောရံဒက္ခသိနစ္စန္တံ၊
နရဇ္ဇဿ သရိဿသိ။
ယဒါဒက္ခသိ ဟေမန္တေ၊
ပုပ္ဖိတေဓရဏီရုဟေ၊
သုရဗ္ဘိသမ္ပဝါယန္တေ၊
နရဇ္ဇဿ သရိဿသိ။
ယဒါ ¶ ဟေမန္တိ ကေမာသေ၊
ဟရိတံ ဒက္ခသိ မေဒနိံ၊
ဣန္ဒဂေါပက သဉ္ဆန္နံ၊
နရဇ္ဇဿ သရိဿသိ။
တဒါဟိဖုဿတီဒေဝီ၊
ဌိတာသိ ပုတ္တသောကိနီ၊
သီရီပဂဗ္ဘဿဒွါရမှိ၊
ဝိမံသန္တီကထာကထံ။
ကလုနံပရိဒေဝိတ္ထ ¶ ၊
အညောညာဘာသိတံဂိရံ၊
သုတွာနဖုဿတီဒေဝီ၊
ဝုတ္တဿသုဏိသာယစ။
ဝိသံမေခါဒိတံသေယျော၊
ပဗ္ဗတာစ ပပါတနံ၊
မတဉ္စရဇ္ဇုယာဗဇ္ဈ၊
နတ္ထတ္ထောဇီဝိတေနမေ။
အဇ္ဈာယကံ ¶ ဒါန ပတိံ၊
ယသဿိနံ အမစ္ဆရိံ၊
ကသ္မာ ဝေဿရံ ပုတ္တံ၊
ပဗ္ဗာဇန္တိ အဒူသကံ။
ပူဇိတံ ပတိရာ ဇူဟိ၊
သဗ္ဗလောကဟိ တေသိနံ၊
ကသ္မာ ဝေဿန္တရံ ဝုတ္တံ၊
ပဗ္ဗာဇေန္တိအဒူသကံ။
ကလုနံ ပရိ ဒေဝိတွာ၊
အဿာ သေတွာန ဖုဿတီ၊
ဝုတ္တဉ္စ သုဏိသံ သီဃံ၊
အဂါ သိဉ္စယ သန္တိကံ။
တတောတံ ¶ သိဉ္စယံဒေဝီ၊
ဝိသဋ္ဌာ ဧတဒဗြဝီ၊
နာနူပါယံ ပကာသေန္တီ၊
ဝိစိတ္တ ဝါဒ ဝိညုနီ။
မဓူနိဝ ပလာ တာနိ၊
အမ္ဗာဝပတိ တာဆမာ၊
ဧဝံဟေ ဿတိတေ ရဋ္ဌံ၊
ပဗ္ဗာဇိတေအဒူသကေ။
ဟံသော ¶ နိခီဏ ပတ္တောဝ၊
ပလ္လသ္မိံ အနူဒကေ၊
အပဝိဋ္ဌော အမစ္စေဟိ၊
ဧကောရာဇာဝိဟိယျသိ။
တန္တံဗြူမိ မဟာရာဇ၊
အတ္ထောတေမာ ဥပစ္စဂါ၊
မာနံသိဝီနံဝစနာ၊
ပဗ္ဗာဇေသိအဒူသကံ။
ဒေဝိယာဝစနံသုတွာ ¶ ၊
ဓမ္မရာဇာဓမ္မဉ္စရော၊
ဓမ္မေနဓမ္မိကံဗြူသိ၊
မဟေသိံ ပုတ္တသောကိနိံ။
ဧသောဝေဿန္တရောဘဒ္ဒေ၊
ပါဏာပိယတရောဟိမေ၊
တထာပိနံ ပဗ္ဗာဇေမိ၊
ဓမ္မသတ္ထဝသာနုဂေါ။
သီဝိရဋ္ဌမှိပေါရာဏ- ¶
ရာဇူနံဓမ္မတန္တိယာ၊
အဟဉှိပစိတိံကုမ္မိ၊
ဝိနယန္တောမမောရသံ။
ရညောတံ ဝစနံသုတွာ၊
ခိန္နာဟဒယကမ္ပိနီ၊
ပုနသာပရိဒေဝန္တီ၊
ဧဝံဝိလဝိဖုဿတီ။
ယဿပုဗ္ဗေဓဇဂ္ဂါနိ၊
ကဏိကာရာဝပုပ္ဖိတာ၊
ယာယန္တမနုယာယန္တိ၊
သွဇ္ဇေကောဝဂမိဿတိ။
ဣန္ဒဂေါပကဝဏ္ဏာဘာ ¶ ၊
ဂန္ဓာရာ ပဏ္ဍုကမ္ပလာ၊
ယာယန္တမနုယာယန္တိ၊
သွဇ္ဇေကောဝဂမိဿသိ။
ယောပုဗ္ဗေဟတ္ထိနာယာတိ၊
သိဝိကာယရထေနစ၊
သွဇ္ဇဝေဿရောရာဇာ၊
ကထံဂစ္ဆတိပတ္ထိကာ။
ကထံစန္ဒနလိတ္တင်္ဂေါ ¶ ၊
နစ္စဂီတပဗောဓနော၊
ခုရာဇိနံ ဖရုသဉ္စ၊
ခါရိကာဇဉ္စဟာဟိတိ။
ပဝီသန္တော ဗြဟာရညံ၊
ကာသာဝံ အဇိနာ နိဝါ၊
ခရံ ကုသ မယံ စီရံ၊
ကထံ ပရိ ဒဟိဿတိ။
ကာသိယာနိစ ¶ ဓရေတွာ၊
ခေါမကော ဋုမ္ပရာနိစ၊
ကုသစီရာနိ ဓာရေန္တီ၊
ကထံမဒ္ဒီကရိဿတိ။
ဝယှာဟိ ပရိယာယိတွာ၊
သိဝိကာယ ရထေနစ၊
သာကထဇ္ဇ အနုဇ္ဈင်္ဂီ၊
ပထံ ဂစ္ဆတိ ပတ္ထိကာ။
သုခေဓိတာဟိဟိရည- ¶
ပါဒုကာရုဠှဂါမိနီ၊
သာကထဇ္ဇသုခါနန္ဒီ၊
ပထံဂစ္ဆတိပတ္ထိကာ။
ဂန္တွာဣတ္ထိသဟဿာနံ၊
ပူရတောယာဟိမာလိနီ၊
သာကထဇ္ဇယသာနန္ဒီ၊
ဝနံဂစ္ဆတိဧကိကာ။
သဒ္ဒံသိဝါယသုတွာယာ ¶ ၊
မုဟုံဥတ္တဿတေပုရေ၊
ဝသန္တီသာဗြဟာရညေ၊
ကထံ ဝစ္ဆတိဘီရုကာ။
သဒ္ဒံသုတွာနုလုင်္ကဿ၊
မုဟုံဥတ္တသတေပုရေ၊
ဝသန္တီသာဗြဟာရညေ၊
ကထံဝစ္ဆတိဘီရုကာ။
သကုဏီဟတ ¶ ပုတ္တာဝ၊
သုညံဒိသွာ ကုလာဝကံ၊
စီရံဒုက္ခေန ဈာယိဿံ၊
သုညံအာဂမ္မိမံပုရံ။
ကုရုရီ ဟတဆာပါဝ၊
သုညံဒိသွာ ကုလာဝကံ၊
တေနတေန ပဓာဝိဿံ၊
ပိယေပုတ္တေအပဿတီ။
ဧဝံမေဝိလ ¶ ပန္တိယာ၊
ရာဇပုတ္တံ အဒူသကံ၊
ပဗ္ဗာဇေသိ ဝနံရဋ္ဌာ၊
မညေဟိဿာမိဇီဝိတံ။
ဖုဿတျာ လဝိတံသုတွာ၊
သဗ္ဗာ သိဉ္စယရာ ဇိနော၊
ဗာဟာပဂ္ဂယှ ပက္ကန္ဒုံ၊
သိဝိကညာ သမာဂတာ။
ပက္ကန္ဒိတရဝံတာသံ ¶ ၊
သုတွာ သောကပမဒ္ဒိတာ၊
သိဝိကညာစ ပက္ကန္ဒုံ၊
ဝေဿန္တရနိဝေသနေ။
ဩရောဓာစ ကုမာရာစ၊
ဝေသိယာနာ ဗြဟ္မဏာ၊
ဗာဟာပဂ္ဂယှပက္ကန္ဒုံ၊
ဝေဿန္တရနိဝေသနေ။
ဟတ္ထာရောဟာအနီကဋ္ဌာ ¶ ၊
ရထိကာ ပတ္ထိကာရကာ၊
ဗာဟာပဂ္ဂယှ ပက္ကန္ဒုံ၊
ဝေဿန္တရ နိဝေသနေ။
တဿာရတျာ အစ္စယေန၊
သူရိယေ ဥဂ္ဂတေသတိ၊
အာရောစယိံသု ရာဇာနံ၊
ဒါနဂ္ဂံ ဥပဂန္တဝေ။
အထပါတောဝ သောရာဇာ၊
နှတွာဘူသန ဘူသိတော၊
ဒါနသာလ မုပါဂဉ္ဆိ၊
မဟာဇန ပုရက္ခတော။
ဒါနသာလာသု ¶ ဒါတဗ္ဗံ၊
ဒိသွာန ပဋိယာဒိတံ၊
အမစ္စေဝ မာဏာပေသိ၊
ရာဇာဘိ တုဋ္ဌမာနတော။
ဝတ္တာနိဝတ္ထကာမာနံ၊
သောဏ္ဍာနံ ဒေထဝါရုဏိံ၊
ဘောဇနံ ဘောဇနတ္ထိနံ၊
သမ္မဒေဝ ပဝစ္ဆထ။
ယေယံယံ ¶ လဒ္ဓုမိစ္ဆန္တိ၊
တံတံတဿပဝစ္ဆထ၊
မာယာစကေ နိဝါရေထ၊
ဒါနသာလာသု အာဂတေ။
တဒါသိယံ ဘီသနကံ၊
တဒါသိ လောမဟံသနံ၊
မဟာဒါနေ ပဒိန္နမှိ
မေဒိနီ သမ္ပကမ္ပထ။
ပရိဒေဝိံသု ဝေဿန္တ္တ-
ရရာဇံ ပတိတာဝဒေ၊
ပကိတ္တေတွာန နာနပ္ပ-
ကာရံ ဧဝံ ဝဏိဗ္ဗကာ။
အမှေဟိတွာန ¶ ဝေဿန္တ-
ရရာဇာ ဒါနဒါယကော၊
အစိရေ နေဝ ရဋ္ဌမှာ၊
နိက္ခမိဿတိကာနနံ။
သတ္တဟတ္ထိသတေဒတွာ၊
သဗ္ဗာလင်္ကာရ ဘူသိတေ၊
ဧသဝေဿန္တရော သမှာ၊
ရဋ္ဌမှာ နိက္ခမိဿတိ။
သတ္တအဿ သတေ ဒတွာ၊
သိန္ဓဝေ သီဃ ဝါဟနေ၊
ဧသ ဝေဿန္တရောသမှာ၊
ရဋ္ဌမှာ နိက္ခမိဿတိ။
ရထေသတ္တသတေဒတွာ ¶ ၊
သန္နန္ဓေ ဥဿိတဒ္ဓဇေ၊
ဧသ ဝေဿန္တရောသမှာ၊
ရဋ္ဌမှာ နိက္ခမိဿတိ။
သတ္တကညာ သတေဒတွာ၊
သုရူပိနီ ဝိဘူသိတာ၊
ဧသ ဝေဿန္တရောသမှာ၊
ရဋ္ဌမှာ နိက္ခမိဿတိ။
သတ္တဓေနု ¶ သတေ ဒတွာ၊
သဗ္ဗာကံသု ပဓာရဏာ၊
ဧသဝေဿန္တရောရာဇာ၊
သမှာရဋ္ဌာနိရစ္ဆတိ။
သတ္တဒါသိ သတေ ဒတွာ၊
သတ္တဒါသ သတာနိစ၊
ဧသဝေဿန္တရောရာဇာ၊
သမှာရဋ္ဌာနိရစ္ဆတိ။
အထေတ္ထဝတ္တတေသဒ္ဒေါ၊
တုမုလောဘေ ရဝေါမဟာ၊
သမာကုလံ ပုရံအာသိ၊
အဟောသိ လောမဟံသနံ။
သောဒတွာန ¶ မဟာဒါနံ၊
ဝေဿန္တရော အမစ္ဆရီ၊
ပုရက္ခတော အမစ္စေဟိ၊
အဂါသကနိဝေသနံ။
တတောဟိ မဒ္ဒိယာသဒ္ဓိံ၊
မာတာပိတူန သန္တိကံ၊
ဝန္ဒနတ္ထာယ အဂဉ္ဆိ၊
အလင်္ကတ ရထေနသော။
ဝန္ဒိတွာ ¶ ပိတရံဗောဓိ-
သတ္တောဗြဝိကတဉ္ဇလီ၊
ဧဝံအာဝီကရောန္တောဝ၊
ဂမိဿမာနအဉ္ဇသံ။
မမံတာတ ပဗ္ဗာဇေသိ၊
ယမှာရဋ္ဌာ အဒူသကံ၊
သိဝီနံ ဝစနတ္ထေန၊
တေနံ-ဂစ္ဆာမိ ကာနနံ။
သုဝေအဟံ မဟာရာဇ၊
သူရိယုဂ္ဂ မနေ သတိ၊
နိက္ခမိဿာမိ ရဋ္ဌမှာ၊
ဝင်္ကံ ဂစ္ဆာမိ ပဗ္ဗတံ။
ဝနေဝါဠ ¶ မိဂါကိဏ္ဏေ၊
ခဂ္ဂဒီပိနိဣသေ ဝိတေ၊
အဟံပုညာနိ ကရောမိ၊
တုမှေ ပင်္ကမှီ သီဒထ။
တတောသောတရမာနောဝ၊
ဂန္တွာနမာကုသန္တိကံ၊
ဝန္ဒမာနောအာရောစိတ္တ၊
ဧဝံဉှိသကမာတုယာ။
အနုဇာနာဟိမံအမ္မာ၊
ဂစ္ဆာမိဝင်္ကပဗ္ဗတံ၊
ဝနေပုညာနိကာဟာမိ ¶ ၊
ပဗ္ဗဇ္ဇာမမရုစ္စတိ။
တံသုတ္တွာရုဏ္ဏမုခေန၊
ဇနနီဧဝမဗြဝီ၊
အနုဇာနာမိတံဝုတ္တံ၊
ပဗ္ဗဇ္ဇာတေသမိဇ္ဈဘု။
အယဉှိဝုတ္တ မေမဒ္ဒီ၊
သုဏှာ သုခုမဝဒ္ဓိနီ၊
အစ္ဆတံ သဟ ဝုတ္တေဟိ၊
ကိံ အရညေကရိဿတိ။
မာတုယာဝစနံသုတွာ ¶ ၊
ဝေဿန္တရော ကတဉ္ဇလီ၊
မှိတပုဗ္ဗမဘာ သိတ္တ၊
ဉာပေန္တောအတ္တနောမတိံ။
နာဟံအကာ မာဒါသံဝိ၊
အရညံနေတု မုဿဟေ၊
သစေဣစ္ဆ တိအနွေတု၊
သစေနိစ္ဆတိ အစ္ဆတု။
တတောသုဏှံမဟာရာဇာ ¶ ၊
ယာစိတုံပဋိပဇ္ဇထ၊
မာစန္ဒနသမာစာရေ၊
ရဇောဇလ္လံမဓာရယိ။
ကာသိယာနိစဓာရေတွာ၊
ကုသစီရမဓာရယိ၊
ဒုက္ခောဝါသောအရညသ္မိံ၊
မာဟိတွံလက္ခဏေဂမိ။
တတော ¶ ပတိဗ္ဗတာ သုဏှာ၊
သဿုရံ ဧဝမဗြဝီ၊
နာဟံ တံသုခမိစ္ဆယျံ၊
ယံမေ ဝေဿန္တရံ ဝိနာ။
တတော သုဏှံ မဟာရာဇာ၊
ဒုဿဟာနိ ဗြဟာဝနေ၊
နာနာဘယာနိ ဉာပေန္တော၊
ဝနံ ယာစိ အဂန္တဝေ။
ယာန သန္တိ မဟာရာဇ၊
ဘယာနိတာနိ ကာနနေ၊
သဗ္ဗာနိ ¶ ဟံ သဟိဿမိ၊
အနုဂစ္ဆာမိ မေပတိံ။
ပူရတောဟံ ဂမိဿာမိ၊
ဒဒန္တီ ဘတ္ထုနော ပထံ၊
ဥရသာ ပနုဒဟိတွာန၊
ကုသ နဠ ဝနာဒယော။
ဗဟူဟိ ဝတဝရိယာဟိ၊
ကုမာရီ ဝိန္ဒတေ ပတိံ၊
ဝေဓဗျံ ကဋုကံ လောကေ၊
ဂစ္ဆညေဝ ရထေသဘ။
နာနာကာရေဟိ ¶ ပီဠေန္တိ၊
အနာထံဝိဓဝံ ဇနာ၊
အတိဝါကျေန ဘာသန္တိ၊
မိတ္တာစာပိ သလောဟိတာ။
နဂ္ဂါ နဒီ အနူဒကာ၊
နဂ္ဂံ ရဋ္ဌံ အရာဇကံ၊
ဣတ္ထီပိ ဝိဓဝါ နဂ္ဂါ၊
ယဿာသုံဒသ ဘာတရော။
ဓဇော ¶ ရထဿ ပညာနံ၊
ဓုမော ပညာ နမဂ္ဂိနော၊
ရာဇာ ရဋ္ဌဿ ပညာနံ၊
ဘတ္တာ ပညာနမိတ္ထိယာ။
ယာ ဒလိဒ္ဒဿ ပေါသဿ၊
ဒလိဒ္ဒီ ဘရိယာ သိယာ၊
အဍ္ဎာ အဍ္ဎဿ ရာဇိန္ဒ၊
တံ ဝေ ဒေဝါ ပသံသရေ။
ကထံ နုတာသံ ဟဒယံ၊
သုခရာဝတ ဣတ္ထိယော၊
ယာ ¶ သာမိကေ ဒုက္ခိတမှိ၊
သုခမိစ္ဆန္တိ အတ္တနော။
အပိသာဂရပရိယန္တံ၊
ဗဟုဝိတ္တဓရံမဟိံ၊
နာနာရတနပရိပူရံ၊
နိစ္ဆေဝေဿန္တရံဝိနာ။
သာမိကံ အနုဂစ္ဆိဿံ၊
အဟံ ကာသာယဝါသိနီ၊
ဓီရတ္ထုတံ ¶ နိဿီရိကံ၊
ဝေဓဗျံယဉ္စ နာရိယာ။
သုဏှာယ ဘာသိတံ သုတွာ၊
သဿုရော နိက္ခိပေတဝေ၊
ဒုဝေ ဣဓေဝ နတ္တာရော၊
သုဏှံသော ဧဝ မဗြဝီ။
ဣမေတေ ဒဟရာပုတ္တာ၊
ဇာလီကဏှာဇိနာ စုဘော၊
နိက္ခိပ္ပ လက္ခဏေ ဂစ္ဆ၊
မယံတေ ပေါသိသာမသေ။
ပိယာမေ ¶ ပုတ္တကာ ဒေဝ၊
ဇာလီ ကဏှာဇိနာ စုဘော၊
တျမှံ တတ္ထ ရမေဿန္တိ၊
အရညေ ဇီဝိသော ကိနံ။
ပုတ္တေနေတွာန ဂစ္ဆာမ၊
ဒွေမယံ ဝင်္ကပဗ္ဗတံ၊
ဒက္ခမာနာ ဝသိဿာမ၊
ဧတေ ပမောဒမာနသာ။
သုဏမာနာ ¶ ဝသိဿာမ၊
ဂီတဉ္စ ဝိယဘာဏိနံ၊
ဧတေသံ နစ္စမာနာနံ၊
အရညေ မာလဓာရိနံ။
သုဏှာယ ဘာသိတံသုတွာ၊
သဿုရောခိန္န မာနသော၊
ဧဝဉှိသော ဝိလဝိတ္ထ၊
ပဋိစ္စဒါရကေ ဒုဝေ။
သာလိနံ ¶ ဩဒနံ ဘုတွာ၊
သုစိံ မံသုပသေစနံ၊
ရုက္ခဖလာနိ ဘုဉ္ဇန္တာ၊
ကထံကာဟန္တိ ဒါရကာ။
ဘုတွာ သတပလေ ကံသေ၊
သောဝဏ္ဏေ သတရာဇိတေ၊
ရုက္ခပတ္တေသု ဘုဉ္ဇန္တာ၊
ကထံကာဟန္တိ ဒါရကာ။
ကာသိယာနိစ ဓာရေတွာ၊
ခေါမ ကောဋုမ္ပရာနိစ၊
ကုသစီရာနိ ¶ ဓာရေန္တာ၊
ကထံ ကာဟန္တိ ဒါရကာ။
ဝယှာဟိပရိယာယိတွာ၊
သိဝိကာယ ရထေနစ၊
ပတ္ထိကာ ပရိဓာဝန္တာ၊
ကထံ ကာဟန္တိ ဒါရကာ။
ကုဋာဂါရေ သယိတွာန၊
နိဝါတေ ဖုသိတဂ္ဂလေ၊
သယန္တာ ရုက္ခမူလသ္မိံ၊
ကထံကာဟန္တိ ဒါရကာ။
ပလ္လင်္ကေသု ¶ သယိတွာန၊
ဂေါနကေ စိတ္တသန္ထတေ၊
သယန္တာ တိဏသန္ထာရေ၊
ကထံကာဟန္တိ ဒါရကာ။
ဂန္ဓကေန ဝိလိမ္ပေတွာ၊
အဂလုစန္ဒနေနစ၊
ရဇောဇလ္လာနိ ဓာရေန္တာ၊
ကထံကာဟန္တိ ဒါရကာ။
စာမရီ ¶ မောရ ဟတ္ထေဟိ၊
ဗီဇိတင်္ဂါ သုခေဓိတာ၊
ဖုဋ္ဌာ ဍံသေဟိ မကသေဟိ၊
ကထံကာဟန္တိ ဒါရကာ။
တဟိံဝံဗြဝိ ရာဇာနံ၊
ဝိလပန္တံ သောကဋ္ဋိတံ၊
ပဋိစ္စ ဒါရကေ သုဏှာ၊
ဝေဿန္တရပိယဉ္ဇနာ။
မာ ¶ ဒေဝ ပရိဒေဝေသိ၊
မာစ တွံ ဝိမနောအဟု၊
ယထာမယံ ဘဝိဿာမ၊
တထာ ဟေဿန္တိ ဒါရကာ။
ဧဝဉှိ သလ္လပန္တာနံ၊
တေသံ ခတ္တိယဇာတိနံ၊
အညောညံ ဝိဘာတာ ရတ္တိ၊
သမုဂ္ဂဉ္ဆိတ္ထ သူရိယော။
တဒါနေတွာ ¶ ဌပယိံသု၊
စတုသိန္ဓဝယုဉ္ဇိတံ၊
အလင်္ကတ ရထံရာဇ-
ဒွါရေ မင်္ဂလသမ္မတံ။
ဝန္ဒိတွာ သဿုရေ မဒ္ဒီ၊
အာဒါယ ပုတ္တကေ ဒုဝေ၊
ဘတ္တုနော ပုရတော ဂန္တွာ၊
ပထမံ ရထမာရုဟိ။
တတောဝေဿန္တရောမာတာ-
ပိတရော အတိဝန္ဒိယ၊
ပဒက္ခိဏဉ္စ ကတွာန၊
သီဃသော ရထမာရုဟိ။
တတော ¶ မင်္ဂလဒွါရေန၊
ရထံ ပေသေသိ လင်္ကတံ၊
တောသာပယံ မဟာသတ္တော၊
မဒ္ဒိံ ဇာလိဿ မာတရံ။
ပထန္တေသု ဘိဝန္ဒန္တိ၊
သက္ကစ္စံ ဗဟဝေါ ဇနာ၊
ဝေဿန္တရဉ္စ မဒ္ဒိဉ္စ၊
ပဿမာနာ ကတဉ္စလီ။
အာပုစ္ဆန္တောစ ¶ ပက္ကာမိ၊
ဂစ္ဆိဿာမီဟိ ပတ္ထယံ၊
နိဒုက္ခာ သုခိတာဟောထ၊
ဣတိသော ဝန္ဒကေ ဇနေ။
ရထေ ဌိတောဝ သောရာဇာ၊
ဩဝဒန္တော အပက္ကမိ၊
ဒါနအာဒီနိ ပုညာနိ၊
ကရောထာတိ မဟာဇနံ။
ဂစ္ဆန္တေ ဗောဓိသတ္တမှိ၊
မာတာ ဧဝဉှိ စိန္တယိ၊
ဒါတုကာမောသိ မေဝုတ္တော၊
ပဋ္ဌာယ ဇာတကာလတော။
တတောဒါနံ ¶ ဒဒေါပေတုံ၊
ပုတ္တံရတန ပူရိတေ၊
ပုတ္တဿုဘောသု ပဿေသု၊
ပေသေသိ သကဋေဗဟူ။
ဝေဿန္တရောဟိ သမ္ပရောဟိ သမ္ပတ္တ-
ယာစကာနံ အသေသကံ၊
အဋ္ဌာရသဝါရေ ဒါသိ၊
ကာယာရုဠှံပိအတ္တနော။
နဂရာ ¶ နိက္ခမန္တမှိ၊
ဝေဿန္တရေသ ပေတ္တိကံ၊
နဂရံ ဒဋ္ဌုကာမောသိ၊
တဒါ သင်္ကမ္ပိ မေဒနီ။
တဟိံ ရထပ္ပမာဏမှိ၊
ဌာနေ ဘိဇ္ဇိယ မေဒနီ၊
ပရိဝတ္တိတ္ထ ကုလာလ-
စက္ကံဝနဂရာမုခီ။
နဂရံ ဩလောကေတွာန၊
နဂရာဘိမုခေ ရထေ၊
ဌိတောမဒ္ဒိံပိ ဒက္ခေတုံ၊
ဧဝံသောဗြဝိ ဟာသယံ။
ဣင်္ဃ ¶ မဒ္ဒိ နိသာမေဟိ၊
ရမ္မရူပံဝ ဒိဿတိ၊
အာဝါသော သိဝိသေဋ္ဌဿ၊
ပေတ္တိကံ ဘဝနံ မမ။
သဟဇာတအမစ္စေစ၊
နိဝတ္တေတွာ မဟာဇနံ၊
ရထံ ပါဇေသိ သော သီဃံ၊
မောဒန္တောမဒ္ဒိယာတတော။
အနွာဂမိံသု ¶ ပါဇေန္တံ၊
စတ္တာရော ဗြဟ္မဏာ တဟိံ၊
ယာစိတုံ သိန္ဓဝေ ဧတေ၊
မဒ္ဒီ ပဿိတ္ထ တာဝဒေ။
မဒ္ဒီပိ မန္ဒသဒ္ဒေန၊
ယာစကာ ဝိယ အာဂတာ၊
ဣတျာရောစေသိ ဘတ္တာရံ၊
ဂဏှန္တီ တဿ ပိဋ္ဌိယံ။
သာဓု ¶ ဘဒ္ဒေတိ ဝတွာန၊
ရထဿာဂမနံ အကာ၊
ဗြဟ္မဏာ ဥပဂန္တွာန၊
ယာစိံသု သိန္ဓဝေ တဟိံ။
မောဒမာနောဝ သောဒါသိ၊
ဗြဟ္မဏာနံ သုသိန္ဓဝေ၊
ဗြဟ္မဏာဒါယ ဂဉ္ဆိံသု၊
အဿေသက နိဝေသနံ။
အဿေသု ပန ဒိန္နေသု၊
စတ္တာရော ဒေဝပုတ္တကာ၊
ရောဟိစ္စမိဂဝဏ္ဏေန၊
ရထံ ဝဟိယ ဂဉ္ဆိသုံ။
ဒေဝါ ¶ ရောဟိစ္စဝဏ္ဏေန၊
ဝဟန္တီတိ သုဗုဒ္ဓိမာ၊
ဝိဇာနိတွာန မဒ္ဒိံပိ၊
ဉာပေန္တော ဧဝမဗြဝီ။
ဣင်္ဃပ္မဒ္ဒိ နိသာမေဟိ၊
စိတ္တရူပံဝ ဒိဿတိ၊
မိဂရော ဟိစ္စဝဏ္ဏေန၊
ဒက္ခိဏဿာဝဟန္တိမံ။
မဒ္ဒီစေဝံ ¶ နိစ္ဆာရေသိ၊
ဂိရံ အစ္ဆေရရူပိနီ၊
ဝေဿန္တရဿတေဇေန၊
ရထံဝဟန္တိဒေဝတာ။
အာဂန္တွာန ရထံ ယာစိ၊
အပရော ဗြာဟ္မဏော တတော၊
ဗောဓိသတ္တောပိသောဒါသိ၊
ရထံ တဿ အနိဂ္ဃိယံ။
သကပ္ပိယေ ဒဒန္တမှိ၊
မဒ္ဒီ ပဟဋ္ဌမာနသာ၊
သာဓုကာရံ ပဝတ္တေသိ၊
သဒါ မစ္ဆေရဟိံသိနီ။
ဒိန္နေ ¶ ရထမှိ အန္တရ-
ဓာရိယိံသု ဒေဝပုတ္တကာ၊
သဗ္ဗေ တေ ပတ္ထိကာ အာသုံ၊
ရာဇာမဒ္ဒိံ တဒါဗြဝီ။
တွံ မဒ္ဒိ ကဏှံဂဏှာဟိ၊
လဟုဧသာ ကနိဋ္ဌကာ၊
အဟံ ဇာလိံ ဂဟေဿာမိ၊
ဂရုကော ဘာတိကောဟိသော။
ရာဇာ ¶ ကုမာရမာဒါယ၊
ရာဇပုတ္တီစ ဒါရိကံ၊
သမ္မောဒမာနာ ပက္ကာမုံ၊
အညမည ပိယံ ဝဒါ။
အာဂစ္ဆန္တေ ပဋိပထံ၊
ဒိသွာန အဒ္ဓိကေဇနေ၊
ဧဝံ ပုစ္ဆိယဂဉ္ဆိံသု၊
ကုဟိံ ဝင်္ကတပဗ္ဗတော။
ကလုဏံ ¶ ပရိဒေဝိတွာ၊
ပုစ္ဆိတာ အဒ္ဓိကာဇနာ၊
ဧဝံ တေ ပဋိဝေဒေသုံ၊
ဒူရေဝင်္ကတပဗ္ဗတော။
မဂ္ဂါသန္နေသု ပဿန္တာ၊
ဒါရကာ ဖလိနေ ဒုမေ၊
တေသံဖလာနံ ဟေတုမှိ၊
ပိတရော ဥပရောဒရေ။
ရောဒန္တေ ဒါရကေ ဒိသွာ၊
ဥဗ္ဗိဂ္ဂါ ဝိပုလာ ဒုမာ၊
ယသမေဝေါနမိတွာန၊
ဥပဂစ္ဆန္တိ ဒါရကေ။
ဣဒံ ¶ အစ္ဆေရကံ ဒိသွာ၊
မဒ္ဒီ သသင်္ကသန္နိဘာ၊
ပိတိပုဏ္ဏေန ကာယေန၊
ဧဝံဂါယိတ္ထ နန္ဒနာ။
အစ္ဆေရံ ဝတ လောကသ္မိံ၊
အဗ္ဘူတံ လောမဟံသနံ၊
ဝေဿန္တရဿ တေဇေန၊
သယမေ ဝေါနတာ ဒုမာ။
သံခိပိံသု ¶ ပထံ ယက္ခာ၊
အနုကမ္ပာယ ဒါရကေ၊
နိက္ခန္တဒိဝသေနေဝ၊
ဇေတရဋ္ဌမုပါဂမုံ။
ဧကာဟေနေဝတေ တိံသ-
ယောဇနာနိ အတိက္ကမုံ၊
သာယနှေ မာတုလံနာမ၊
သမ္ပတ္တာ နဂရံ သုဘံ။
နဂရဿဿ ဒွါရမှိ၊
သာလာယံ နိသိဒိံ သုတေ၊
ခေဒံ ဝိနောဒမာနာဝ၊
တောသေန္တာ ဒါရကေ ဒုဝေ။
မဒ္ဒီပိ ¶ ဗောဓိသတ္တဿ၊
ရဇံ ပါဒေသု ပုဉ္ဆိယ၊
သမ္ဗဟိတွာန ပါဒေစ၊
ဝိဇယန္တီ ဌိတာ တဒါ။
သာလာယ နိက္ခမိတွာန၊
ဘတ္တုစက္ခုပထေ ဌိတာ၊
ဒိသောဒိသံ ဩလောကေသိ၊
မဒ္ဒီ ကန္တာရခေဒိနီ။
ဇေတိယော ¶ ပရိဝါရိံသု၊
ဒိသွာန အသဟာယိကံ
မဒ္ဒိံ ဧဝံဥဂ္ဃောသိံသု၊
ဣတ္ထီ ဣစ္ဆေရရူဝိနီ။
ဝယှာဟိ ပရိယာယိတွာ၊
သိဝိကာယ ရထေနစ၊
သာဇ္ဇ မဒ္ဒီအရညသ္မိ၊
ပတ္ထိကာ ပရိဓာဝတိ။
အနာထာဂမနံ မဒ္ဒိံ၊
ဘတ္တာရာ ပုတ္တကေဟိစ၊
ဒိသွာဂန္တွာနာ စိက္ခံသု၊
ဇေတိန္ဒာနံ ခဏေန တာ။
တံ ¶ သုတွာ ဇေတပါမောက္ခာ၊
ရောဒမာနာ ဥပါဂမုံ၊
ဝေဿန္တရဿ ပါဒေသ၊
နိပစ္စ ဣတိ ပုစ္ဆိသုံ။
ကိစ္စိနု ဒေဝ ကုသလံ၊
ကိစ္စိ ဒေဝ အနာမယံ၊
ကိစ္စိပိတာ အရောဂေါတေ၊
သိဝီနဉ္စ အနာမယံ၊
ကော တေ ဗလံ မဟာရာဇ၊
ကောနု တေ ရထမဏ္ဍလံ။
အနဿကော ¶ အရထကော၊
ဒီဃမဒ္ဓါန မာဂတော၊
ကိစ္စာမိတ္တေဟိ ပကတော၊
အနုပ္ပတ္တော သိမံဒိသံ။
အထ ဝေဿန္တရောရာဇာ၊
အာဂတဟေတုမတ္တနော၊
ဉာပေတုံ ဇေတရာဇူနံ၊
ဣမာဂါထာ အဘာသထ။
ကုသလဉ္စေဝ ¶ မေသမ္မ၊
အထော သမ္မ အနာမယံ၊
အထော ဝိဘာ အရောဂေါမေ၊
သိဝီနဉ္စ အာနာမယံ။
အဟဉှိကုဉ္ဇရံ ဒဇ္ဇံ၊
သဗ္ဗသေတံ ဂဇုတ္တမံ၊
ဗြာဟ္မဏာနံ သာလင်္ကာရံ၊
ခေတ္တညုံ ရဌပူဇိတံ။
တသ္မိံ မေ သိဝယောကုဒ္ဓါ၊
ဝိဘာ ဥပဟတောမနော၊
အဝရုဒ္ဓသိ မံ ရာဇာ၊
ဝင်္ကံဂစ္ဆာမိပဗ္ဗတံ။
တဒါ ¶ တေ ဇေတရာဇာနော၊
ဗလာနုပ္ပဒမာနသာ၊
ဧဝံ တောသိံသု ရာဇာနံ၊
နိက္ခန္တံ သကရဌတော။
သွာဂတန္တေ မဟာရာဇ၊
အထောတေအဒုရာဂတံ၊
ဣဿရော သိအနုပ္ပတ္တော၊
ယံဣဓတ္ထိပဝေဒယ။
ဣဓေဝ ¶ တာဝ အစ္ဆဿု၊
ဇေတရဋ္ဌေ ရထေသဘ၊
ယာဝ ဇေတာ ဂမိဿန္တိ၊
ရညော သန္တိက ယာစိတုံ။
တဒါ ဝေဿန္တရော အာဟ၊
မာဝေါဂမိတ္ထ သန္တိကံ၊
ယာစိတုံ မမ ပိတုဿ၊
ရာဇာပိ တတ္ထ နိဿရော။
အစ္စုဂ္ဂတာဟိ သိဝယော၊
ဗလဂ္ဂါနေ ဂမာစယေ၊
တေပအဓံသိ တုမိစ္ဆန္တိ၊
ရာဇာနံ မမ ကာရဏာ။
သစေဧဝံ ¶ မဟာရာဇ၊
သိယာ ဇေတုတ္တရေ ပုရေ၊
ဣဓေဝရဇ္ဇံ ကာရေဟိ၊
ဇေတေဟိ ပရိဝါရိတော။
ဣဒ္ဓံ ဖိတဉ္စိဒံရဋ္ဌံ၊
ဣဒ္ဓါ ဇနပဒေါ မဟာ၊
မတိံ ကရောဟိ တွံ ဒေဝ၊
ရဇ္ဇဿ မနုဿတိတုံ။
အလံ ¶ မေ ရဇ္ဇသုခေန၊
ပဗ္ဗာဇိတဿ ရဋ္ဌတော၊
အတုဋ္ဌာ သိဝယောစာသုံ၊
မဉ္စေရဇ္ဇေဘိသေစယျူံ။
အသမ္မောဒနီ ယမ္ပိဝေါအဿ၊
အစ္စန္တံ မမကာရဏာ၊
သိဝီဟိ ဘဏ္ဍနဉ္စာဝိ၊
ဝိဂ္ဂဟော မေ နရုစ္စတိ။
ပဋိဂ္ဂဟိတံ ယံ ဒိန္နံ၊
သဗ္ဗဿ အဂ္ဃိယံ ကတံ၊
အဝရုဒ္ဓသိ မံ ရာဇာ၊
ဝင်္က ဂစ္ဆာမိပဗ္ဗတံ။
အနေက ¶ ပရိယာယေန၊
ဇေတရာဇူဟိ ယာစိတော၊
အနိစ္ဆန္တော ပဋိက္ခီပိ၊
ရဇ္ဇံ သော ဇေတရဋ္ဌကေ။
နဂရံ အပဝီသိတွာ၊
သာလံ သာဏိပရိက္ခိပံ၊
ကာရေတွာ ဧကရတ္တိံသော၊
သယီ သပုတ္တဒါရကော။
ပုဗ္ဗဏှသမယေ ¶ ဘုတွာ၊
နာနဂ္ဂံ ရသဘောဇနံ၊
နူတွာ သော ဇေတရာဇူဟိ၊
ပရိဝုတောဝ နိက္ခမိ။
ဇေတရာဇာ ပန္နရသ-
ယောဇနံ ဇေတရဋ္ဌတော၊
ဂန္တွာန ဝနဒွါရမှိ
ဌိတာမဂ္ဂ မဘာသိသုံ။
ဧသသေလောမဟာရာဇ၊
ပဗ္ဗတော ဂန္ဓမာဒနော၊
ယတ္တ တွံ သဟ ပုတ္တေဟိ၊
သဟဘရိယာယ ဝစ္ဆသိ။
တံ ¶ ဇေတာ အနုသာသိံသု၊
အဿုနေတ္တာ ရုဒမ္မုခါ၊
ဣတော ဂစ္ဆံမဟာရာဇ၊
ဥဇုံ ယေနုတ္တရာဘိမုခေါ။
အထ ဒက္ခသိ ဘဒ္ဒန္တေ၊
ဝေပုလ္လံနာမ ပဗ္ဗတံ၊
နာနာဒုမဂဏာကိဏ္ဏံ၊
သီတစ္ဆာယံ မနောရမံ။
တမတိက္ကမဘဒ္ဒန္တေ ¶ ၊
အထဒက္ခသိအာပဂံ၊
နဒိံကေတုမဒိံနာမ၊
ဂမ္ဘီရံဂိရိဂဗ္ဘရံ။
ပုထုလောမစ္ဆအာကိဏ္ဏံ၊
သုပ္ပတိတ္ထံမဟောဒကံ၊
ထတ္တနူတွာပိဝိတွာစ၊
အဿာသေတွာသပုတ္တကေ။
အထဒက္ခသိဘဒ္ဒန္တေ၊
နဂြောဓံမဓုဝိပ္ဖလံ၊
ရမ္မကေ သိခရေဇာတံ၊
သီတစ္ဆာယံမနောရမံ။
အထ ¶ ဒက္ခသိ ဘဒ္ဒန္တေ၊
နာဠိကံနာမ ပဗ္ဗတံ၊
နာနာဒိဇ ဂဏာကိဏ္ဏံ၊
သေလံ ကိံ ပုရိသာယုတံ။
တဿဥတ္တရပုဗ္ဗေန၊
မုစလိန္ဒောနာမသောသရော၊
ပုဏ္ဍရိကေဟိသဉ္ဆန္နော၊
သေတသောဂန္ဓိကေဟိစ။
သောဝနံ မေဃသင်္ကာသံ၊
ဓုဝံ ဟရိတသဒ္ဒလံ၊
သီဟောဝါ မိသပေက္ခီဝ၊
ဝနသဏ္ဍံ ဝိဂါဟယ။
တတ္ထ ¶ ဗိန္ဒုဿရာ ဝဂ္ဂူ၊
နာနာဝဏ္ဏာ ဗဟူဒိဇာ၊
ကူဇန္တိ မုပကူဇန္တိ၊
ဥတုသံပုပ္ဖိတေ ဒုမေ။
ဂန္တွာ ဂိရိဝိဒုဂ္ဂါနံ၊
နဒီနံ ပဘဝါနိစ၊
သော အဒ္ဒသ ပေါက္ခရဏိံ၊
ကရဉ္စ-က ကုဓာယုတံ။
ပုထုလော မစ္ဆအာကိဏ္ဏံ၊
သုပ္ပတိတ္ထံ မဟောဒကံ၊
သမဉ္စ စတုရံ သဉ္စ၊
သာဒုံ အပ္ပတိဂန္ဓိယံ။
တဿာ ¶ ဥတ္တရပုဗ္ဗေန၊
ပဏ္ဏသာလံ အမာပယ၊
ပဏ္ဏသာလံ အမာပေတွာ၊
ဥဉ္ဆာစရိယာယ ဤဟထ။
ဧဝဉှိ ဇေတရာဇာနော၊
အာစိက္ခိတွာန အဉ္ဇသံ၊
ဧကံ ဇေတပုတ္တံ ဗျတ္တံ၊
အာမန္တေသုံ သုသိက္ခိတံ။
ဂစ္ဆန္တေစာ ¶ ဂစ္ဆန္တေစ၊
ပရိဂ္ဂဏှဿု လုဒ္ဓက၊
ဣစ္စေဝံ သညာပေတွာန၊
ဝနဒွါရေ ဌပိံ သုတံ။
နာနာဘယ ဝိနောဒါယ၊
ဝေဿန္တရဿ ရာဇိနော၊
အာရက္ခံ တေ ဌပေတွာန၊
အာဂမိံသု သကံပုရံ။
ဝေဿန္တရောစ ဂစ္ဆန္တော၊
ဂန္ဓ မာဒနပဗ္ဗတံ၊
သပုတ္တ ¶ ဒါရကော ပတ္တော၊
ဝိဿမီ ဒိဝသံ တဟိံ။
တတောတ္တရာဟိ မုခေါသော၊
ဂစ္ဆ ဝေပုလ္လ ပဗ္ဗတံ၊
ပတွာ တပ္ပာဒ မဂ္ဂေန၊
ပတ္တော ကေတုမတိံ နဒိံ။
တိဿာ တီရေ နိသီဒိတွာ၊
မံသံခါဒိယ သုန္ဒရံ၊
ဒိန္နမေကေန လုဒ္ဓေန၊
နူတွာ ပိတွာစ ဝိဿမီ။
သောဏ္ဏသူစိံ ¶ လုဒ္ဓကဿ၊
ဒတွာန သော တတောပရံ၊
ဂစ္ဆန္တော ဒက္ခိနိဂြောဓံ၊
ပဗ္ဗတသိခရေ ဌိတံ။
တဿမူလေ နိသီဒိတွာ၊
ထောကံဖလာနိ ဘုဉ္ဇိယ၊
တတောပရံ သ ဂစ္ဆန္တော၊
ပတ္တော နာဠိကပဗ္ဗတံ။
နာဠိကံ ပရိဟရိတွာ၊
ဂစ္ဆန္တော သော မဟာသရံ၊
မုစလိန္ဒံ ဥပါဂဉ္ဆိ၊
နာနာကမလ ဘူသိတံ။
တဿ ¶ ပုဗ္ဗဥတ္တရေန၊
ခုဒ္ဒမဂ္ဂေန ဂစ္ဆတာ၊
ဒိဋ္ဌံ ဗြဟာဝနံ ရမ္မံ၊
ဖလ ပုပ္ဖာန ပူရိတံ။
တမတိက္ကမ္မ ဂစ္ဆန္တော၊
အနုပုဗ္ဗေန ခတ္ထိယော၊
စတုရံသ ပေါက္ခရဏိံ၊
သမ္ပတ္တော၊ သိ မဟောဒကံ။
ဝေဿန္တရောစ ¶ မဒ္ဒီစ၊
ဇာလီကဏှာဇိနာ စုဘော၊
တတ္ထေဝ တေ ဝိဿမိံသု၊
အညမညပိယံဝဒါ။
အာဝဇ္ဇန္တော တဒါ သက္ကော၊
ပဿိတ္ထ ဒေဝကုဉ္ဇရော၊
ဟိမဝန္တံ မဟာသတ္တံ၊
ပဝိဋ္ဌံဘယဘေရဝံ။
ဝိဿုကမ္မံ ဒေဝပုတ္တံ၊
ပက္ကောသာပိယ သော တတော၊
အဿမံ မာပနတ္ထာယ၊
ပေသေသိ ဝင်္ကပဗ္ဗတံ။
ဝိဿုကမ္မောပိ ¶ သော သီဃံ၊
ဩတရိတွာ ဒေဝလောကတော၊
ဝင်္ကပဗ္ဗတ ကုစ္ဆိမှိ၊
မာပေသိ အဿမေ ဒုဝေ။
ဒုဝေစ စင်္ကမေရတ္တိ-
ဒိဝါ ဌာနာနိမာပယိ၊
ပဋိရူပေသု ဌာနေသု၊
ပုပ္ဖိတေ ဖလိတေ ဒုမေ။
ပဋိယာဒိယိတွာ သမဏ-
ပရိက္ခာရေ အသေသတော၊
အက္ခရာနိပိ သောကာသိ၊
ဧဝံအဿမ ဘိတ္တိယံ။
ပဗ္ဗဇ္ဇံ ¶ ဣစ္ဆမာနာစေ၊
ယောတေ ဣမေ ဂဏှန္တုဝေ၊
ပဗ္ဗဇိတွာန အစ္ဆန္တု၊
ဣမမှိအဿမေ သုခံ။
ဧဝံလိခိတွာန သောဒေဝေါ၊
အမနုဿေစ ဘေရဝေ၊
မိဂေ ခဂေ ပလာပေတွာ၊
သကဌာန ဂတော အဟု။
သော ¶ ဧကပဒိကံ မဂ္ဂံ၊
ဒိသွာ ဝေဿန္တရော တတော၊
ပဗ္ဗဇိတာန မာဝါသော၊
အယံ ဟေဟီတိ စိန္တိယ။
မဒ္ဒိံ အဿမ ဒွါရမှိ၊
ဌပေတွာ ပုတ္တကေပိစ၊
အဿမံ ပဝိသိတွာန၊
ပဿိတ္ထ အက္ခရာနိသော။
ဣဒံသက္ကေန ဒိန္နံတိ၊
ဥတွာ သော တုဋ္ဌမာနသော၊
ပဏ္ဏသာလံ ပဝိသိတ္ထ၊
ဧကကော ပဗ္ဗဇေတဝေ။
တဟိံ ¶ ဓနုဉ္စ ခဂ္ဂဉ္စ၊
အပနေတွာ သသာဋကေ၊
ဩမုဉ္စိတွာန သောရတ္တ-
ဝါကစီရံ နိဝါသယိ။
အံသေ ကတွာန အဇိန-
စမ္မဉ္စ သက္ကဒတ္တိယံ၊
ဂဏှိတ္ထ ဣသိဝေသံသော၊
ဗန္ဓိတွာ ဇဋမဏ္ဍလံ။
ဒဏ္ဍမာဒါယ ¶ နိက္ခမ္မ၊
ပဏ္ဏသာလာယ စင်္ကမံ၊
အာရုယှ ဥဒ၊ နေတွာနံ၊
စင်္ကမီ အပရာပရံ။
တတောသော ပုတ္တဒါရာနံ၊
သန္တိကံ သံဝုတိန္ဒြိယော၊
အာဂဉ္ဆိ သဋ္ဌိ ဝဿောဝ၊
ထေရော ဩရုယှ စင်္ကမာ။
မဒ္ဒီဒိသွာ မဟာသတ္တံ၊
ကလုနံ ပရိဒေဝယိ၊
နိပစ္စ တဿ ပါဒေသု၊
ပုရာဏာနိ အနုတ္ထုနံ။
တတော ¶ သာ ဗောဓိသတ္တေန၊
သဒ္ဓိံ ပဝိသိ အဿမံ၊
ဂန္တွာ သကပဏ္ဏသာလံ၊
ဣသိဝေသဂ္ဂဟာ အဟု။
ပစ္ဆာပုတ္တေပိ တာပသ-
ကုမာရကေ ကရိံသုတေ၊
ဝသိံသု ဝင်္ကကုစ္ဆိမှိ၊
စတ္တာရော ခတ္တိယာဇနာ။
အထမဒ္ဒီ ဝရံယာစိ၊
မဟာသတ္တံ မဟာဣသိံ၊
မာတုမှေ ဒေဝဂဉ္ဆိတ္ထ၊
ဖလာဖလ ဂဝေသနံ။
ဣဓပုတ္တေ ¶ ဂဟေတွာန၊
ဝသေယျာထ ယထာသုခံ၊
အဟမေဝါ ဟရိဿာမိ၊
မူလာလေစ ဖလာဖလေ။
ဧဝံဝရံ ယာစိတွာန၊
အရညတော ဖလာဖလံ၊
အာဟရိတွာန ပေါသေသိ၊
ဇဋိနီသာ တယောဇနေ။
ဗောဓိသတ္တောပိ ¶ ယာစိတ္တ၊
ဝရံမဒ္ဒိံ သုစာရိနိံ၊
မာဂစ္ဆ အာကာလေဘဒ္ဒေ၊
ပဋ္ဌာယိတော မမန္တိကံ။
ဣတ္ထီစ ဗြဟ္မစရိယ-
မလံနာမ သုမေဓသေ၊
ဗြဟ္မစာရိံဟိ နာသေန္တိ၊
တသ္မာ ယာစာမိ မံဝရံ။
သမ္ပဋိစ္ဆိတ္ထ သာဓူတိ၊
သာမဒ္ဒီ ဗြဟ္မစာရိနီ၊
သကဋ္ဌာနေ တေ ဝသိံသု၊
ဘာဝေန္တာ ပိယ ဘာဝနံ။
မေတ္တာယ ¶ အာနုဘာဝေန၊
မဟေသိဿ တိယောဇနေ၊
အညမညံ မေတ္တာယိံသု၊
သမန္တာ သဗ္ဗပါဏိနော။
ပါတောဝုဋ္ဌာယ မဒ္ဒီပိ၊
ဥပဋ္ဌာပိယ ပါနိယံ၊
ပရိဘောဇနိယဉ္စေဝ၊
မုခေါဒကဉ္စ အာဟရိ။
ဒန္တကဋ္ဌဉ္စ ¶ ပါဒါသိ၊
တတော အဿမမဏ္ဍလံ၊
သမ္မဇိတွာန ဒွေပုတ္တေ၊
ဌပေတွာ ပိတုသန္တိကေ။
ခဏိတ္တိံ ပစ္ဆိ မာဒါယ၊
အင်္ကုသဉ္စာပိ ဂဏှိယ၊
ဝနမူလဖလတ္ထာယ၊
ပါဝေက္ခိ ဧကိကာဝနံ။
သာယနှသမယေ ပစ္ဆိံ၊
မူလာလေဟိ ဖလေဟိစ၊
ပူရာပေတွာန သာဂဉ္ဆိ၊
ပဏ္ဏသာလံ အရညတော။
ဖလပစ္ဆိံ ¶ နိက္ခိပေတွာ၊
သယံ နှာတွာန ပုတ္တကေ၊
နှာပေတွာစ ဘုဉ္ဇိံသု၊
မောဒေန္တာ စတုရောဇနာ။
ဘုတွာ နလ္လာပ သလ္လာပံ၊
ကတွာန ပုတ္တကေ ဒုဝေ၊
မဒ္ဒီအာဒါယ ပါဝီသိ၊
သာပဏ္ဏသာလမတ္တနော။
ဧဝံဝုတ္တနိယာမေန၊
စတ္တာရောခတ္တိယာဇနာ၊
ဝင်္ကပဗ္ဗတကုစ္ဆိမှိ၊
သတ္တမာသေဝသိံသုတေ။
တဒါကလိင်္ဂရဋ္ဌမှိ ¶ ၊
ဂါမမှိဒုန္နိဝိဋ္ဌကေ၊
ဗြဟ္မဏောဇူစကောနာမ၊
ဘိက္ခာစာရော အလက္ခိကော။
ကဟာပဏသတံလဒ္ဓါ၊
ဘိက္ခာစာရေနဗြာဟ္မဏော၊
ဧကဗြာဟ္မဏကုလမှိ၊
ထပေတွာပုနသောဂတော။
အနာဂန္တွာစိရာယန္တေ၊
ဇူစကမှိဂဟာပဏံ၊
ခီဏံဗြာဟ္မဏဂေဟမှိ၊
ဝလဉ္ဇေတွာအသေသတော။
စောဒေသိဂဟာပဏံသော ¶ ၊
ပစ္ဆာဂန္တွာနဇူစကော၊
ကဟာပဏဿခီဏတ္တာ၊
ဒါတုံနာသက္ခိဗြာဟ္မဏော။
ဓီတာ တဿ ဗြာဟ္မဏဿ၊
နာမေနာမိတ္တတာပနာ၊
ယုဝတီရူပဝန္တီစ၊
ဇူစကဿအဒံသုတံ။
ဝသိတ္ထဒုန္နိဝိဋ္ဌမှိ ¶ ၊
အာဒါယာမိတ္တတာပနံ၊
ဒဟရိံဇိဏ္ဏကောပါပေါ၊
ဇူစကောယာစဇီဝကော။
အမိတ္တတာပနာသမ္မာ၊
ဂရုံကတွာနဗြာဟ္မဏံ၊
ပဋိဇဂ္ဂတိဣန္ဒံဝ၊
သူဇာဥဋ္ဌာနသီလိနီ။
ယုဝါနောဗြာဟ္မဏာအညေ၊
ဒိသွာနာမိတ္တတာပနံ၊
ဇာယာဝတ္တေနသမ္ပန္နံ၊
သဒါရေဣတိတဇ္ဇရေ။
အယံမဟလ္လကံသမ္မာ ¶ ၊
ပဋိဇဂ္ဂတိဇူစကံ၊
ကိံ ပမဇ္ဇထ အမှာကံ၊
ယုဝါနာနံတု ဝေါ သတံ။
ပဋိဇဂ္ဂထနောဗာလာ၊
ပဿိတွာ မိတ္တတာပနံ၊
နောစေပဋိဇဂ္ဂေယျာထ၊
ဒဏ္ဍေဿာမခရံဘုသံ။
တဇ္ဇိတာ ¶ ဘရိယာသဗ္ဗာ၊
ပတီဟိ ဘယမာနသာ၊
သန္နိသိန္နာ မန္တလိံသု၊
အာရဗ္ဘာမိတ္တတာပနံ။
ပလာပေဿာမ အယျာယော၊
ဣမမှာဒုန္နိ ဝိဋ္ဌတော၊
ဧဝံသုခံ ဝိဟိဿာမ၊
ဇူစကဿ ပဇာပတိံ။
မန္တယိတွာနတာ ဧဝံ၊
နဒိံ ဥဒကဟာရိယာ၊
သမာဂန္တာ ဥဇ္ဈာယိံသု၊
တိတ္ထေ အမိတ္တတာပနံ။
အမိတ္တာနုနတေမာတာ ¶ ၊
အမိတ္တောနုနတေပိတာ၊
ယေသံဇိဏ္ဏဿပါဒံသု၊
ဧဝံ ဒဟရိယံ သတိံ။
အဟိတံဝတတေညာတီ၊
မန္တယိံသု ရဟောဂတာ၊
ယေတံဇိဏ္ဏဿ ပါဒံသု၊
ဧဝံ ဒဟရိယံသတိံ။
အမနာပဝါသံဝသတိ ¶ ၊
ဇိဏ္ဏေနပတိနာသဟ၊
ယာတွံဝသသိဇိဏ္ဏဿ၊
မတန္တေဇီဝိတာဝရံ။
နဟိနုနတေဝိန္ဒိံသု၊
မာတာပိတာစသောဘဏေ၊
တုယှတ္ထာယဇူစကမှာ၊
ပတိံအညံသုယောဗ္ဗနံ။
ဒုယိဋ္ဌံတေနဝမိယာ၊
အကတံအဂ္ဂိဟုတကံ၊
ယေတံဇိဏ္ဏဿပါဒံသု၊
ဧဝံဒဟရိယံသတိံ။
သမဏေ ¶ ဗြာဟ္မဏေ သုဒ္ဓေ၊
အက္ကောသိ ဗြာဟ္မစာရိနေ၊
ယေနတေနဒဟရီတွံ၊
မညေဇိဏ္ဏေနသင်္ဂမီ။
နဒုက္ခံအဟိနာဒဋ္ဌံ၊
နဒုက္ခံသတ္တိယာဟတံ၊
တဉ္စဒုက္ခဉ္စတိဗ္ဗဉ္စ၊
ယံပဿေဇိဏ္ဏကံပတိံ။
နတ္ထိခိဋ္ဋာနတ္ထိရတိ ¶ ၊
ဇိဏ္ဏေနပတိနာသဟ၊
နတ္ထိအလ္လာပသလ္လာပေါ၊
ဇဂ္ဃိတုံဝိနသောဘတိ။
ယဒါဒဟရောဒဟရီ၊
မန္တယိံသုရဟောဂတာ၊
သဗ္ဗသောကာဝိနဿန္တိ၊
ယေကေစိဟဒယဿိတာ။
ဒဟရီတွံရူပါတီ၊
ပုရိသာတွမဘိပတ္ထိတာ၊
ဂစ္ဆ ဉာတိကုလေ အစ္ဆ၊
ကိံ ဇိဏ္ဏော ရမယိဿတိ။
ရောဒမာနာဝအာဂဉ္ဆိ ¶ ၊
သာဃရံပရိဘာသိတာ၊
ဗြာဟ္မဏီဟိ ဟိရာယန္တီ၊
ဃဋမာဒါယသီဃသော။
ရောဒန္တိံ အာဂတံဇာယံ၊
ဒိသွာကိံ ဘောတိရောဒိယ၊
အာဂစ္ဆ သီတိပုစ္ဆိတ္ထ၊
ပစ္စုဂ္ဂစ္ဆံ ဝဇူစကော။
နတေဗြာဟ္မဏ ¶ ဂစ္ဆာမိ၊
နဒိံ ဥဒကဟာရိယာ၊
ထိယောမံပရိဘာသိံသု၊
တယာဇိဏ္ဏေနဗြာဟ္မဏ။
ဗြာဟ္မဏျာဘာသမာနာယ၊
ကထံသုတွာနဗြာဟ္မဏော၊
တောသေန္တောဘရိယံရုဏ္ဏံ၊
ဇိဏ္ဏောသောဧတဒဗြဝီ။
မာမေတွံအကရာကမ္မံ၊
မမေဥဒကမာဟရိ၊
အဟံဥဒကမာဟိဿံ၊
မာဘောတိကုပိတာအဟု။
နာဟံတမှိကုလေဇာတာ ¶ ၊
ယံတွံဥဒကမာဟရိ၊
ဧဝံဗြာဟ္မဏဇာနာဟိ၊
နတေဝစ္ဆာမိဟံဃရေ။
သစေမေဒါသံဒါသိံ ဝါ၊
နာနယိဿသိဗြာဟ္မဏ၊
ဧဝံဗြာဟ္မဏဇာနာဟိ၊
နတေဝစ္ဆာမသန္တိကေ။
နတ္ထိမေ ¶ သိဗ္ဗဋ္ဌာနံဝါ၊
ဓနဓညဉ္စ ဗြဟ္မဏိ၊
ကုတောတံ ဒါသံဒါသိံ ဝါ၊
အာနယိဿာမိ ဘောတိယာ၊
အဟံဘောတိံ ဥပဋ္ဌိဿံ၊
မာဘောတိကု ပိတာအဟု။
ဧဟိတေ အဟ မက္ခိဿံ၊
ယထာမေဝစနံသုတံ၊
ဧသဝေဿန္တရော ရာဇာ၊
ဝင်္ကေဝသတိ ပဗ္ဗတေ။
တံတွံဂန္တွာန ယာစဿု၊
ဒါသံဒါသိဉ္စ ဗြဟ္မဏ၊
သောတေဒဿတိ ယာစိတော၊
ဒါသံဒါသိဉ္စ ခတ္ထိယော။
ဇိဏ္ဏောဟသ္မိ ¶ ဒုဗ္ဗလော၊
ဒီဃောစဒ္ဓါသု ဒုဂ္ဂမော၊
ကထံဂန္တုံ သက္ခိဿမိ၊
ဥပဌိဿာမိ တံ အဟံ။
ယထာအဂန္တွာ သင်္ဂါမံ၊
အယုဒ္ဓါဝ ပရာဇိတော၊
ဧဝမေဝ တုဝံဗြဟ္မေ၊
အဂန္တွာဝ ပရာဇိတော။
သစေမေ ¶ ဒါသံဒါသိံ ဝါ၊
နာနယိဿသိ ဗြဟ္မဏ၊
ဧဝံ ဗြဟ္မဏ ဇာနာဟိ၊
နတေဝစ္ဆာ မဟံဃရေ၊
အမနာပံ တေကရိဿာမိ၊
တံတေဒုက္ခံ ဘဝိဿတိ။
နက္ခတ္တေ ဥတုပုပ္ဖေသု၊
ယဒါမံဒက္ခသိ လင်္ကတံ၊
အညေဟိ သဒ္ဓိံ ရမမာနံ၊
တန္တေဒုက္ခံ ဘဝိဿတိ။
အဒဿနေန ¶ မယှံတေ၊
ဇိဏ္ဏဿ ပရိဒေဝတော၊
ဘိယျောဝင်္ကာ ပလိတာစ၊
ဗဟူဟေဿန္တိ ဗြဟ္မဏ။
တတော သော ဗြဟ္မဏော ဘီတော၊
ဗြဟ္မဏိယာဝ သာနုဂေါ၊
အဋ္ဋိတော ကာမရာဂေန၊
ဗြဟ္မဏိံ ဧတဒဗြဝီ။
ပါထေယျံမေကရောဟိတွံ ¶ ၊
သံကုလျာသကလာနိစ၊
မဓုပိဏ္ဍိကာစသုကတာယော၊
သတ္ထု ဘတ္တဉ္စဗြဟ္မဏိ။
အာနယိဿံ မေထုနကေ၊
ဥဘောဒါသကုမာရကေ၊
တေတံပရိစရိဿန္တိ၊
ရတ္တိံဒိဝမတန္ဒိတာ။
သာခိပ္ပံပဋိယာဒေသိ ¶ ၊
ပါထေယျံမိတ္တတာပနာ၊
ပဋိယာဒိတန္တိ အာစိက္ခိ၊
ဗြဟ္မဏဿအလက္ခိနော။
ဂေဟေဒုဗ္ဗလဌာနံသော၊
ထိရံကတွာနဗြဟ္မဏော၊
ဘရိယာယဂေါပနတ္ထံ၊
ဂုတ္တဒွါရဉ္စသင်္ခရိ။
ဒါရူနိအာဟရိတွာန၊
ဃဋေပူရေသိဝါရိနာ၊
ဇာယာယသုခဝါသတ္ထံ၊
အနိက္ခန္တုံစဂေဟတော။
ပစ္စက္ခေယေဝ ¶ ဇာယာယ၊
ဣသိဝေသံသမာဒိယ၊
ပဿိတွာဘရိယံဧဝံ၊
ဩဝဒေသိသဇူစကော။
ဣတောပဌာယတွံဘဒ္ဒေ၊
ဝိကာလေမာဿုနိက္ခမိ၊
မမအာဂမနာယာဝ၊
ဝသေသိအပ္ပမတ္တကာ။
ဣဒံဝတွာနလဂ္ဂိတွာ ¶ ၊
သောပါထေယျပသိဗ္ဗဟံ၊
ဥပါဟနဉ္စအာရုယှ၊
ဂဏှီကတ္တရဒဏ္ဍကံ။
တတောသောရုဏ္ဏမုခေန၊
ဘရိယံကတွာပဒက္ခိဏံ၊
သောစမာနော ဝပက္ကာမိ၊
ဒါသကေ ပရိယေသိတုံ။