📜

ထုပဝံသော

နမော တဿ ဘဂဝတော အရဟတော သမ္မာသမ္ဗုဒ္ဓဿ

ယသ္မိံ သယိံသု ဇိနဓာတုဝရာ သမန္တာ

ဆဗ္ဗဏ္ဏ ရံသိ ဝိသရေဟိ သမုဇ္ဇလန္တာ၊

နိမ္မာယ လောကဟိတဟေတု ဇိနဿ ရူပံ

တံ ထုပမဗ္ဘုတ တမံ သိရသာ နမိတွာ၊

စက္ခာမဟံ သကလ လောက ဟိတာဝဟဿ

ထုပဿ သဗ္ဗ ဇန နဏ္ဒန ကာရဏဿ၊

ဝံသံ သုရာသုရ နရိဏ္ဒဝရေဟိ နိစ္စံ

သမ္ပူဇိတဿ ရတနုဇ္ဇလ ထူပိကဿ၊

ကိဉ္စာပိ သော ယတိဇနေန ပုရာတနေန

အတွာယ သီဟဠဇနဿ ကတော ပုရာပိ၊

ဝါက္ကေန သိဟဠဘဝေန’ဘိသင်္ခမတ္တာ

အတ္ထံ န သာဓဟတိ သဗ္ဗဇနဿ သမ္မာ၊

ယသ္မာ စ မာဂဓ နိရုတ္တိကတောပိ ထူပ-

ဝံသော ဝိရုဒ္ဓနယ သဒ္ဒ သမာကုလော သော၊

ဝတ္တဗ္ဗမေဝ စ ဗဟုမ္ပိ ယတော န ဝုတ္တံ

တမှာ အဟံ ပုနပိ ဝံသမိ’မံ ဝဒါမိ၊

သုဏာထ သာဓဝေါ သဗ္ဗေ ပရိပုဏ္ဏမနာကုလံ

ဝုစ္စမာနံ မယာ သာဓု ဝံသံ ထူပဿ သတ္ထုနောတိ၊

တတ္ထ ထူပဿ ဝံသံ ဝက္ခာမီတိ ဧတ္ထ တထာဂတော အရဟံ သမ္မာ သမ္ဗုဒ္ဓါ ထူပါရဟော၊ ပစ္စေကဗုဒ္ဓါ ထူပါရဟော၊ တထာဂတဿ သာဝကော ထူပါရဟော၊ ရာဇာ စက္ကဝတ္တိ ထူပါရဟောတိ ဝစနတော ထူပါရဟာနံ ဗုဒ္ဓါဒီနံ ဓာတုယော ပတိဋ္ဌာပေတွာ ကတ စေတိယံ အဗ္ဘုနန တဋ္ဌေန ထူပေါတိ ဝုစ္စတိ၊ ဣဓ ပန ကဉ္စန မာလိက မဟာထူပေါ အဓိပ္ပေတော၊ သော ကဿ ဓာတုယော ပတိဋ္ဌာပေတွာ ကတောတိ စေ? ယောဒီပင်္ကရာဒီနံ စတုဝီသတိယာ ဗုဒ္ဓါနံ သန္တိကေ လဒ္ဓဝျာကရဏော သမတိံသပါရမိယော ပူရေတွာ ပရမာဘိသမ္ဗောဓိံ ပတွာ ဓမ္မစက္ကပ္ပဝတ္တနတော ပဋ္ဌာယ ယာဝ သုဟဒ္ဒ ပရိဗ္ဗာဇက ဝိနယာန သဗ္ဗ ဗုဒ္ဓကိစ္စာနိ နိဋ္ဌာပေတွာ အနုပါဒိယေသာယ နိဗ္ဗာနဓာတုယာ ပရိနိဗ္ဗုတော တဿ ဘဂဝတော အရဟတော သမ္မာ သမ္ဗုဒ္ဓဿ ဓာတုယော ပတိဋ္ဌာပေတွာ ကတော အယမေတ္ထ သင်္ခေပေါ၊ ဝိတ္ထာရော ပန ဝေဒိတဗ္ဗော?

၂။ ဣတော ကိရ ကပ္ပသတသဟဿာဓိကာနံ စတုန္နံ အသင်္ခေယျာနံ မတ္ထကေ အမရဝတီ နာမ နဂရံ အဟောသိ။ တတ္ထ သုမေဓော နာမ ဗြာဟ္မဏော ပဋိဝသတိ။ သော အညံ ကမ္မံ အကတွာ ဗြဟ္မဏသိပ္ပမေဝ ဥဂ္ဂဏှိ တဿ ဒဟရကာလေယေဝ မာတာပိတရော ကာလမကံသု။ အထဿ ရာသိဝဍ္ဎနကော အမစ္စော အာယ ပေါတ္ထကံ အာဟရိတွာ သုဝဏ္ဏ ရဇတ မဏိမုတ္တာဒိ ဘရိတေ ဂဗ္ဘေ ဝိဝရိတွာ ဧတ္တကံ တေ ကုမာရ မာတု သန္တကံ၊ ဧတ္တကံ ပိတုသန္တကံ၊ ဧတ္တကံ အယျက ပယျကာနန္တိ ယာဝ သတ္တမာ ကုလပရိဝဋ္ဋာ ဓကံ အာစိက္ခိတွာ ဧတမ္ပဋိဇဂ္ဂါဟီတိ အာဟ။ သော သာဓူတိ သမ္ပဋိစ္ဆိတွာ အဂါရံ အဇ္ဈာဝသန္တော ဧကဒိဝသံ စိန္တေသိ။

၃။ ပုနဗ္ဘဝေ ပဋိသဏ္ဓိဂဟဏံ တာမ ဒုက္ခံ၊ တထာ နိဗ္ဗတ္တ နိဗ္ဗတ္တဋ္ဌာနေ သရီရဘေဒနံ အဟဉ္စ ဇာနိဓမ္မော ဇရာဓမ္မော ဝျာဓိဓမ္မော မရဏဓမ္မော။ ဧဝံ ဘူတေန မယာ အဇာတိ အဇရံ အဝျာဓိံ အမရဏံ သုခံ သီတလံ နိဗ္ဗာနံ ဂဝေသိတုံ ဝဋ္ဋတီတိ နေက္ခမ္မကာရဏံ စိန္တေတွာ ပုန စိန္တေသိ ဣမံ ဓနံ သဗ္ဗံ မယှံ ပိတု ပိတာမဟာဒယော ပရလောကံ ဂစ္ဆန္တာ ဧက ကဟာပဏမ္ပိ ဂဟေတွာ နဂတာ မယာ ပန ဂဟေတွာ ဂမနကာရဏံ ကာတုံ ဝဋ္ဋတီတိ နဂရေ ဘေရိံ စရာပေတွာ မဟာဇနဿ ဒါနံ ဒတွာ ဟိမဝန္တဿ ပဝိသိတွာ တာပသ ပဗ္ဗဇ္ဇံ ပဗ္ဗဇိတွာ သတ္တာဟဗ္ဘန္တရေယေဝ အဘိညာ စ သမာပတ္တိယော စ နိဗ္ဗတ္တေတွ သမာပတ္တိသုခေန ဝီတိနာမေသိ။

တဒါ ဒီပင်္ကရော နာမ သတ္ထာ ပရယာဘိသမ္ဗောဓိံ ပတွာ သတ္တ သတ္တာဟံ ဗောဓိသမီပေစေဝ ဝိတိနာမေတွာ သုနဏ္ဒါရာမေ ဓမ္မစက္ကံ ပဝတ္တေတွာ ကောဋိသတ္တာနံ ဒေဝမနုဿာနံ ဓမ္မမတံ ပါယေတွာ စာတုဒ္ဒီပိက မဟာမေဃော ဝိယ ဓမ္မဝဿံ ဝဿေန္တော စတူဟိ ခီဏာသယ သတသဟဿေဟိ ပရိဝုတော အနုပုဗ္ဗေန စာရကံ စရမာနော ရမ္မ နဂရံ ပတွာ သုဒဿန မဟာဝိဟာရေ ပဋိဝသတိ တဒါ ရမ္မနဂရဝါသိနော သပ္ပိ ဖဏိတာဒီနိ ဘေသဇ္ဇာနိ ဂဟေတွာ ပုပ္ဖ ဓူပ ဂဏ္ဓဟတ္ထာ ယေန ဗုဒ္ဓါ တေနပသင်္ကမိတွာ သတ္ထာရံ ဝန္ဒိတွာ ပုပ္ဖာဒီဟိ ပူဇေတွာ ဧကမန္တံ နိသီဒိတွာ ဓမ္မံ သုတွာ သွာတနာယ ဘဂဝန္တံ နိမန္တေတွာ ဥဋ္ဌာယာသနာ ဒသဗလံ ပဒက္ခီနံ ကတွာ ပက္ကမိံသု။

တေ ပုန ဒိဝသေ အသဒိသ မဟာဒါနံ သဇ္ဇေတွာ ဒသဗလဿ အာဂမန မဂ္ဂံ သောဓေန္တိ။ တသ္မိံ ကာလေ သုမေဓတာပသော အတ္တနော အဿမ ပဒတော ဥဂ္ဂန္တွာ ရမ္မနဂရဝါသီနံ တေသံ မနုဿာနံ ဥပရိဘာဂေန အာကာသေန ဂစ္ဆန္တာ တေ ဟဋ္ဌပဟဋ္ဌေ မဂ္ဂံ သောဓေန္တေ ဒိသွာ ကိန္နု ခေါ ကာရဏန္တိ စိန္တေန္တော သဗ္ဗေသံ ပဿန္တာနံယေဝ အာကာသတော ဩရု ဧကမန္တေ ဌတ္ထာယဟ တေ မနုဿေ ပုစ္ဆိ။’ဟမ္ဘော ကဿ ပန ဣမံ မဂ္ဂံ သောဓေထာ’တိ တေ အာဟံသု ဘန္တေ သုမေဓ တုမှေ ကိံ နံ ဇာနာထ၊ ဒီပင်္ကရော နာမ သတ္ထာ ပရမာဘိသမ္ဗောဓိံ ပတွာ ပဝတ္တဝရ ဓမ္မစက္ကော ဇနပဒ စာရိကံ စရမာနော အနုက္ကမေန အမှာကံ နဂရံ ပတွာ သုဒဿန မဟာဝိဟာရေ ပဋိဝသတိ။ မယံ တံ ဘဂဝန္တံ နိမန္တယိမှ တဿ ဘဂဝတော အာဂမနမဂ္ဂံ သောဓေမာတိ။ တံ သုတွာ သုမေဓပဏ္ဍိတော စိန္တေသိ။ ဗုဒ္ဓါတိ ခေါ ပနေသ ဃောသောပိ ဒုလ္လဘော၊ ပဂေဝ ဗုဒ္ဓုပ္ပာဒေါ တေန ဟိ မယာပိ ဣမေဟိ မနုဿေဟိ သဒ္ဓိံ ဒသဗလဿ အာဂမနမဂ္ဂံ သောဓေတုံ ဝဋ္ဋတီတိ သော တေ မနုဿေ အာဟ၊ သစေ ဘော တုမှေ ဣမံ မဂ္ဂ ဗုဒ္ဓဿ သောဓေထ - သယဟမ္ပိ ဧကံ ဩကာသံ သမ္ပဋိစ္ဆတွာ အယံ သုမေဓပဏ္ဍိတော မဟိဒ္ဓိကော မဟာနုဘာဝေါတိ ဇာနန္တာ ဒုဗ္ဗိသောဓနံ ဥဒကသမ္ဘိန္နံ အတိဝိသမံ ဧကံ ဩကာသံ သလ္လက္ခေတွာ ဣမံ ဟကာသံ တုမှေ သောဓေထ။ အလင်္ကရောထာတိ အဒံသု။

သုမေဓပဏ္ဍိတော ဗုဒ္ဓါရမ္မဏ ပီတိံ ဥပ္ပာဒေတွာ စိန္တေသိ။ အဟမ္ပနိမံ ဩကာသံ ဣဒ္ဓီယာ ပရမဒဿနီယ ကာတုံ ပဟောမိ ဧဝံ ကတော ပန မံ န ပရိတောသေတိ အဇ္ဇ ပန မယာ ကာယဝေယျာဝစ္စံ ကာတုံ ဝဋ္ဋတိတိ ပံသုံ အာဟရိတွာ တံ ပဟေသံ ပူရေနိ၊ တဿ ပန တသ္မိံ ပဒေသေ အသောဓိတေ ဇယသုမန ကုသုမ သဒိသိ ဝဏ္ဏံ ဒုပဋ္ဋစီဝရံ တိမဏ္ဍလံ ပဋိစ္ဆာဒေတွာ နိဝါသေတွာ တဿုပရိ ယုဏ္ဏမာပင်္ဂေန ကုသုမကလာပံ ပရက္ခိပန္တော ဝိယ ဝိဇ္ဇုလ္လတာ သဿီရီကံ ကာယဗဏ္ဓနံ ဗဏ္ဓိတွာ ကနက ဂိရိသိခရ မတ္ထကေ လာခါရသံ ပရိသိဉ္စန္တေ ဝိယ သုဝဏ္ဏစေတိယံ ပဝါဠဇာလေန ပရိက္ခိပန္တော ဝိယ သုဝဏ္ဏင်္ဃကံ ရတ္တကမ္ဗလေန ပဋိမုဉ္စန္တော ဝိယ သရဒ သမယ ရဇနိကရံ ရတ္တဝလာဟကေန ပဋိစ္ဆာဒေန္တော ဝိယ စ လာခါရသေန တိန္န ကိံ သုကက္သုမဝဏ္ဏံ ရတ္တဝရ ပသုကူလ စီဝရံ ပါရိပိတွာ ဂဏ္ဓကူဂိဒွ ရတော ကနကဂုဟာတော သီဟော ဝိယ နိက္ခမိတွာ ဇဠဘိညာနံယေဝ စတူဟိ ခီဏာသဝ သတသဟဿေဟိ ပရိဝုတော အမရဂဏ ပရိဝုတော ဒသသတနယနော ဝိယ ဗြဟ္မဂဏပရိဝုတော မဟာ ဗြဟ္မာ ဝိယ စ အပရိမိတ သမယ သမုပစိတာယ ကုသလဗလဇနိတာယ အနောပမယာ ဗုဒ္ဓလီလာယ တာရာဂဏပရိဝုတော သရဒ သမယ ရဇနိကရော ဝိယ ဂဂနတလံ အလင်္ဂတ ပဋိယတ္တံ မဂ္ဂံ ပဋိပဇ္ဇိ။

၅။ သုမေဓတာပသောပိ တေန အလင်္ကတ ပဋိယတ္တေန မဂ္ဂေန အာဂစ္ဆန္တဿ ဒီပင်္ကရဿ ဘဂဝတော ဒွတ္တိံသ ဝရလက္ခဏ ပတိမဏ္ဍိတံ အသတိယာ အနုဗျဉ္ဇနေဟိ အနုဗျဉ္ဇိတံ ဗျာမပ္ပဟာပရိက္ခေပ သဿီရီကံ ဣဏ္ဒနီလမဏိသံကာသောအာကာသေ နာနပ္ပကာရာ ဝိဇ္ဇုလ္လတာ ဝိယ ဆဗ္ဗဏ္ဏဗုဒ္ဓရံသိယော ဝိဿဇ္ဇေန္တံ ရူပဂ္ဂပ္ပတ္တံ အတ္တဘာဝံ ဩလောကေတွာ အဇ္ဇ မယာ ဒသဗလဿ ဇီဝိတပရိစ္စာဂံ ကာတုံ ဝဋ္ဋတိ မာ ဘဂဝါ ကလလေ အက္ကမိ မဏိမယံ လကသေတုံ အက္ကမန္တော ဝိယ သဒ္ဓိံ စတူဟိ ခီဏာသဝ သတသဟဿေဟိ မမ ပိဋ္ဌိံ အက္ကမန္တော ဂစ္ဆတု တံ မေ ဘဝိဿတိ ဒီဃရတ္တံ ဟိတာယ သုခါယာတိ ကေသေ မောစေတွာ အဇိနဇဋာ ဝါကစီရာနိ ကလေလ ပတ္ထရိတွာ တတ္ထေဝ ကလလပိဋ္ဌေ နိပဇ္ဇိ နိပန္နော စ သစေ အဟံ ဣစ္ဆေယျံ သဗ္ဗကိလေသေ ဈာပေတွာ သင်္ဃနဝကော ဟုတွာ ရမ္မနဂရံ ပဝိသေယျံ အညာတကဝေသေန ပန မေ ကိလေသေ ဏ္ဓပေတွာ နိဗ္ဗာနပတ္တိယာ ကိစ္စံ နတ္ထိ၊ ယံနူနာဟံ ဒီပင်္ကရ ဒသဗလော ဝိယ ပရမာဘိသမ္ဗောဓိံ ပတွာ ဓမ္မနာဝံ အာရောပေတွာ မဟာဇနံ သံသာရသာဂရာ ဥတ္တာရေတွာ ပစ္ဆာ ပရိနိဗ္ဗာယေယျံ။ ဣဒံ မေ ပတိရုပန္တိ စိန္တေတွာ အဋ္ဌဓမ္မေ သမောဓာနေတွာ ဗုဒ္ဓဘာဝါယ အဘိနီဟာရံ ကတွာ နိပဇ္ဇ။

ဒီပင်္ကရောပိ ဘဂဝါ အာဂတ္တွာ သုမေဓပဏ္ဍိတဿ သီသသာဂေ ဌတွာ ကလလပိဋ္ဌေ နိပန္နံ တာပသံ ဒိသွာ အယံ တာပသော ဗုဒ္ဓတ္ထာယ အဘိနီဟာရံ ကတွာ နိပန္တော၊ ဣဇ္ဈိဿတိ နု ခေါ ဧတဿ ပတ္ထနာ ဥဒါဟု နောတိ ဥပဓာရေန္တော - အနာဂတေ ဂေါတမော နာမ ဗုဒ္ဓါ ဘဝိဿတီတိ ဉတွာ ဌိတကောဝ ပရိသ မဇ္ဈေ ဝျာကာသိ၊ ပဿထ နော တုမှေ ဘိက္ခဝေ ဣမံ ဥဂ္ဂတပံ တာပသံ ကလလပိဋ္ဌေ နိပန္နန္တိ။ ဧဝံ ဘန္တေ၊ အယံ ယိဒ္ဓတ္ထာယ အဘိနီဟာရံ ကတွာ နိပန္နော သမိဇ္ဈိဿတိ ဣမဿ ပတ္ထတာ ကပ္ပသတ သဟဿာဓိကာနံ စတုန္တံ အသင်္ခေယျာနံ မတ္ထကေ ဂေါတမော နာမ ဗုဒ္ဓါ ဘဝိဿတီတိ သဗ္ဗံ ဝျာကာသိ။

ဝုတ္တဉှေတံ ဗုဒ္ဓဝံသေ။

ဒီပင်္ကရော လောကဝိဒူ - အာဟုတီနံ ပဋိဂ္ဂဟော၊

ဥဿီသကေ မံ ဌတွာန - ဣဒံ ဝစနမဗြဝိ၊

ပဿထ ဣမံ တာပသံ - ဇဋိလ ဥဂ္ဂတာပသံ အပရိမေယျေ ဣတော ကပ္ပေ - အယံ ဗုဒ္ဓါ ဘဝိဿတိ။ အဟု ကပိလဝဟယာ ရမ္မာ - နိက္ခမိတွာ တထာဂတော။ ပဓာနံ ပဒဟိတွာန - ကတွာ ဒုက္ကရ ကာရိကံ

ဗုဒ္ဓေ လောကေ - ကေစိ။

အဇပါလ ရုက္ခမူလသ္မိံ - နိသီဒိတွာ တထာဂတော၊

တတ္ထ ပါယာသမဂ္ဂယှ - နေရဉ္ဇရမုပေဟေတိ၊

နေရဉ္ဇရာယ တီရမှိ - ပါယာသာဒါယ သော ဇိနော၊

ပဋိယတ္တဝရမဂ္ဂေန - ဗောဓိမူလဉှိ ဧဟီတိ၊

တတော ပဒက္ခိဏံ ကတွာ - ဗောဓိမဏ္ဍံ အနုတ္တရော

အဿတ္ထရာက္ခမူလမှိ - ဝုဇ္ဈိဿတိ မဟာယသော၊

ဣမဿဇနိကာ မာတာ - မာယာ နာမ ဘဝိဿတိ၊ ပိတာ သုဒ္ဓါဒနော နာမ - အယံ ဟေဿတိ ဂေါတမော။ အနာသဝါ ဝီတရာဂါ - သန္တစိတ္တာ သမာဟိတာ၊

ကောလိတော ဥပတိဿော စ - အဂ္ဂါ ဟေဿန္တိ သာဝကာ၊

အာနဏ္ဒေါ နာမုပဋ္ဌာကော - ဥပဋ္ဌိဿတီ’မံ ဇိနံ၊

ခေမာ ဥပ္ပလဝဏ္ဏာ စ - အဂ္ဂါ ဟေဿန္တိ သာဝိကာ၊

အနာသဝါ ဝီတရာဂါ - သန္တစိတ္တာ သမာဟိတာ၊

ဗောဓိ တဿ ဘဂဝတော အဿတ္ထောတိ ပဝုစ္စတီ’’တိ။

အဘိနီဟာရ ကထာ

၆။ တတော ဒီပင်္ကရော ဒသဗလော ဗောဓိသတ္တံ ပသံသိတွာ အဋ္ဌဟိ ပုပ္ဖ မုဋ္ဌီဟိ ပူဇေတွာ ပဒက္ခိဏံ ကတွာ ပက္ကာမိ။ တေပိ စတူသတ သဟဿ ခီဏာသဝါ ဗောဓိသတ္တံ ပုပ္ဖေဟိ စ ဂဏ္ဓေဟိ စ ပူဇေတွာ ပဒပ္ဖဏံ ကတွာ ပက္ကမိံသု။ ဒေဝမနုဿာ စ တထေဝ ပူဇေတွာ ဝန္ဒိတွာ အထ ခေါ ဗောဓိသတ္တော ဒသဗလဿ ဝျာကရဏံ သုတွာ ဗုဒ္ဓဘာဝံ ကရတလဂတမိဝ မညမာနော ပမုဒိတ ဟဒယော သဗ္ဗေသု ပဋိက္ကန္တေသု သယနာ ဝုဋ္ဌာယ ပုပ္ဖရာသိ မတ္ထကေ ပလ္လင်္ကံ အာဘုဇိတွာ နိသိန္နော ဗုဒ္ဓကာရကဓမ္မေ ဥပဓာရေန္တော ကဟနနု ခေါ ဗုဒ္ဓကာရက ဓမ္မာ၊ ကိံ ဥဒ္ဓံ အဓော ဒိသာသု ဝီဒီယာသူတိ အနုက္ကမေန သကလံ ဓမ္မဓာတုံ ဝိစိနန္တော ပေါရာဏကဗောဓိသတ္တေဟိ အာသေဝိတ နိသေဝိတ ပဌမံ ဒါနပါရမိံ ဒိသွာ တတ္ထ ဒဠဘိသမာဒါန ကတွာ ဧဝံ အနုက္ကမေန သီလ - နေက္ခမ္မ - ပညာ - ဝီရိယ - ခန္တိ - သစ္စ - အဓိဋ္ဌာန - မေတ္တာ - ဥပေက္ခာ ပါရမိယောစ ဒိသွာ တတ္ထဒဠှ သမာဒါနံ ကတွာ ဒေဝတာဟိ အဘိတ္ထုတော အာကာသမဗဘုဂ္ဂနတွ ဟိမ ဟိမဝန္တမေဝ အဂမာသိ။

ဒီပင်္ကရောပိ သတ္ထာ စတူဟိ ခီဏာသဝ သတသဟဿေဟိ ပရိဝုတော ရမ္မနဂရဝါသီဟိ ပူဇီယမာနော ဒေဝတာဟိ အဘိနဏ္ဒိယမာနော အလင်္ကတ ပဋိယတ္တေန မဂ္ဂေန ရမ္မနဂရံ ပဝိသိတွာ ပညတ္တဝရဗုဒ္ဓါသနေ နိသီဒိ။ ဘိက္ခုသင်္ဃောပိ အတ္တနော အတ္တနော ပတ္တာသနေ နိသီဒိ။ ရမ္မနဂရဝါသိနောပိ ဥပါသကာ ဗုဒ္ဓပမုခဿ ဘိက္ခုသင်္ဃဿ မဟာဒါနံ ဒတွာ ဘဂဝန္တံ ဘုတ္တာဝိံ ဩနီတ ပတ္တပါဏိံ မာလာဂဏ္ဓာဒီဟိ ပူဇေတွာ ဒါနာနုမောဒနံ သောတုကာမာ နိသီဒိံသု။ ဘဂဝါပိ တေသံ အနုမောဒနံ ကရောန္တော ဒါနကထံ သီလကထံ သဂ္ဂိကထံ ကာမာနံ အာဒီနဝံ ဩကာရံ သံကိလေသံ နေက္ခမ္မေ အာနိသံသဉ္စ ပကာသေတွာ အမတ ပရိယောသာနံ ဓမ္မကထံ ကထေသိ။

ဧဝံ တဿ မဟဇနဿ ဓမ္မံ ဒေသေတွာ ဧကစ္စေ သရဏေသု ဧကစ္စေ ပဉ္စသု သီလေသု ဧကစ္စေ သောတာပတ္တိဖလေ ဧကစ္စေ သကဒါဂါမိ ဖလေ ဧကစ္စေ အနာဂါမီ ဖလေ ဧကစ္စေ စတုသုပိ ဖလေသု ဧကစ္စေ တီသု ဝိဇ္ဇာသု ဧကစ္စေ ဆဠဘိညာသု ဧကစ္စေ အဋ္ဌသု သမာပတ္တိသု ပတိဋ္ဌာပေတွာ ဥဋ္ဌာယာသနာ ရမ္မနဂရတော နိက္ခမိတွာ သုဒဿန မဟာဝိဟာရမေဝ ပါဝိသိ။

ဝုတ္တဉှေတံ

‘‘တဒါ တေ ဘောဇယိတွာန - သသင်္ဃံ လောကနာယကံ၊

ဥဖဂဆုညံ သရဏံ တဿ - ဒီပင်္ကရဿ သတ္ထုနော၊

သရဏာဂမနေ ကဉ္စိ - နိဝသေတိ တထာဂတော

ကဉ္စိ ပဉ္စသု သီလေသု - သီလေ ဒသဝိဓေ ပရံ၊

ကဿစိ ဒေတိ သာမညံ - စတုရော ဖလမုတ္တမေ၊

ကဿစိ အသထေ ဓမ္မေ - ဒေတိ သော ပဋိသမ္ဘိဒါ၊

ကဿစိ ဝရသမာပတ္တိယော - အဋ္ဌ ဒေတိ နရာသဘော၊

တိဿော ကဿစိ ဝိဇ္ဇာယော - ဆဠဘိည ပဝေစ္ဆတိ၊

တေန ယောဂေန ဇနကာယံ - ဩဝဒေတိ မဟာမုနိ၊

တေန ဝိတ္ထာရိကံ အာသီ - လောကနာထဿ သာသနံ၊

မဟာဟနူသဘက္ခဏ္ဓော - ဒီပင်္ကရသနာမကော၊

ဗဟူ ဇနေ တာရယတိ - ပရိမောစေတိ ဒုဂ္ဂတိံ၊

ဗောဓနေယျံ ဇနံ ဒိသွာ - သတသဟဿေပိ ယောဇနေ

ခဏေန ဥပဂန္တွာန - ဗောဓေတိ တံ မဟာမုနီ’’တိ၊

ဣတိ သော ဒီပင်္ကရော သတ္ထာ ဝဿသတ သဟဿာနိ ဌတွာ သတ္တာနံ ဗဏ္ဓနမောက္ခံ ကုရုမာနော သဗ္ဗဗုဒ္ဓကိစ္စာနိ နိဋ္ဌာပေတွာ နဏ္ဒါရာမေ အနုပါဒိသေသာယ နိဗ္ဗာနဓာတုယာ ပရိနိဗ္ဗာယိနဟေဝ ဓာတုယော တဿ - သတ္ထုနော ဝိကိရိံသု တာ။ ဌိတာ ဧကဃနာ ဟုတွာ - သုဝဏ္ဏပဋိမာ ဝိယ သကလဇမ္ဗုဒီပဝါသိနော မနုဿာ ဃနကောဋိဋိမသုဝဏ္ဏဋ္ဌိကာဟိ ဧဝံ ဆတ္တိံသ ယောဇနိကံ မဟာထူပမကံသု နိဝေဒသိ - ကေစိ။

တေန ဝုတ္တံ

‘‘ဒီပင်္ကရော ဇိနော သတ္ထာ - နဏ္ဒါရာမမှိ နိဗ္ဗုတော၊

တတ္ထေဝ တဿ ဇိနထူပေါ - ဆတ္တိံသုဗ္ဗေဓ ယောဇနော‘‘၊

‘‘ပတ္တ စီဝရ ပရိက္ခာရ - ပရိဘောဂဉ္ဇ သတ္ထုနော၊

ဗောဓိမူလေ တဒါ ထူပေါ - တီဏိ ယောဇနမုဂ္ဂတော’’တိ၊

၇။ ဒီပင်္ကရဿ ပန ဘဂဝတော အပရဘာဂေါ ဧကံ အသင်္ခေယျံ အတိက္ကမိတွာ ကောဏ္ဍညော နာမ သတ္ထာ ဥဒပါဒိ။ တဒါ ဗောဓိသတ္တော ဝိဇိတာဝိ နာမ စက္ကဝတ္တိ ဟုတွာ ကောဋိသတသဟဿ သင်္ခဿ ဗုဒ္ဓ ပမုခဿ ဘိက္ခုသင်္ဃဿ မဟာဒါနံ အဒါယိ သတ္ထာ ဗောဓိသတ္တံ ဗုဒ္ဓါ ဘဝိဿတီတိ ဝျာကရိတွာ ဓမ္မံ ဒေသေသိ သော သတ္ထု ဓမ္မံကထံ သုတွာ ရဇ္ဇိ နိယျာဒေတွာ ပဗ္ဗဇိ သော တီဏိ ပိဋကာနိ ဥဂ္ဂဟေတွာ အဋ္ဌ သမာပတ္တိယော ပဉ္စအဘိညာယောစ ဥပ္ပာဒေတွာ အပရိဟီနဇ္ဈာနော ဗြဟ္မလောကေ နိဗ္ဗတ္တိ။ သောပိ ဗုဒ္ဓါ ဝဿသတသဟဿာနိ ဌတွာ သဗ္ဗဗုဒ္ဓကိစ္စာနိ နိဋ္ဌာပေတွာ စဏ္ဒါရာမေ ပရိနိဗ္ဗာယိ တဿာပိ ဘဂဝတော ဓာတုယာ န ဝိကိရိံသု သကလဇမ္ဗုဒီပဝါသိနော မနုဿာ သမာဂန္တွာ သတ္တယောဇနိကာသတ္တရတနမယံ ဟရိတာလမနောသိလာယမတ္တိကာကိစ္စံ တေလ သပ္ပီဟိ ဥဒကကိစ္စံ ကတွာ စေတိယံ နိဋ္ဌာပေသုံ

ကောဏ္ဍညေ ကိရ သမ္ဗုဒ္ဓါ - စဏ္ဒါရာမေ မနောရမေ၊

နိဗ္ဗာယိ စေတိယော တဿ - သတ္တယောဇနိကော ကတောတိ၊

တဿ အပရဘာဂေ ဧကံ အသံင်္ခယျံ အတိက္ကမိတွာ ဧကသ္မိံယေဝ ကပ္ပေ စတ္တာရော ဗုဒ္ဓါ ဥပ္ပဇ္ဇိံသု - မင်္ဂလော သုမနော ရေဝတော ယောဟိတောတိ။ မင်္ဂလဿ ပန ဘဂဝတော ကာလေ ဗောဓိသတ္တော သုရုစိ နာမ ဗြာဟ္မဏော ဟုတွာ သတ္ထာရံ နိမန္တေဿာမီတိ ဥပသင်္ကမိတွာ မဓုရ ဓမ္မံကတံ သုတွာ သွာတနာယ နိမန္တေတွာ ကောဋိသတသဟဿ သင်္ခဿ ဗုဒ္ဓပမုခဿ သင်္ဃဿ သတ္တာဟံ ဂဝပါနံ နာမ ဒါနမဒါသိ သတ္ထာ အနုမောဒနံ ကရောန္တော မဟာပုရိသံ အာမန္တေတွာ တွံ ကပ္ပသတသဟဿာဓိကာနံ ဒွန္နံ အသင်္ခေယျာနံ မတ္ထကေ ဂေါတမော နာမ ဗုဒ္ဓါ ဘဝိဿသီတိ ဝျာကာသိ မဟာပုရိသော ဝျာကရဏံ သုတွာ အဟံ ကိရ ဗုဒ္ဓါ ဘဝိဿာမိ ကော မေ ဃရာဝါသေန အတ္ထော ပဗ္ဗဇိဿမီတိ စိန္တတွာ တထာရူပံ သမ္ပတ္တိံ ကေဠပိဏ္ဍံ ဝီယ ပဟာယ သတ္ထု သန္တိကေ ပဗ္ဗဇိတွာ ဗုဒ္ဓဝစနံ ဥဂ္ဂဏှိတွာ အဘိညာ စ သမာပတ္တိယော စ နိဗ္ဗတ္တေတွာ အာယုပရိယောသာနေ ဗြဟ္မလောကေ နိဗ္ဗတ္တိ၊ တသ္မိမ္ပိ ဗုဒ္ဓေ ပရိနိဗ္ဗုတေ ဓာတုယော န ဝိကိရိံသု၊ ဇမ္ဗုဒီပဝါသိနော ပုဗ္ဗေ ဝိယ တိံသယောဇနကံ ထူပမကံသု။

တေန ဝုတ္တံ ‘‘ဥယျာနေ ဝသဘော နာမ - ဗုဒ္ဓါ နိဗ္ဗာယိ မင်္ဂလော၊ တတ္ထေဝ တဿ ဇိနထူပေါ - တိံသယောဇနမုဂ္ဂိတော’’တိ။

တဿ အပရဘာဂေ သုမနော နာမ သတ္ထာ ဥဒပါဒိ တဒါ မဟာသတ္တော အတုလော နာမ နာဂရာဇာ ဟုတွာ နိဗ္ဗတ္တိ-မဟိဒ္ဓိကော မဟာနုဘာဝေါ သော ဗုဒ္ဓါ ဥပ္ပန္နောတိ သုတွာ ဉာတိသင်္ဃပရိဝုတော နာဂဘဝနာ နိက္ခမိတွာ ကောဋိသတသဟဿ ဘိက္ခုပရိဝါရဿ တဿ ဘဂဝတော ဒိဗ္ဗတုရိယေဟိ ဥပဟာရံ ကာရေတွာ မဟာဒါနံ ပဝတ္တေတွာ ပစ္စေကံ ဒုဿယုဂါနိ ဒတွာ သရဏေသု ပတိဋ္ဌာသိ သောပိ နံ သတ္ထာ အနာဂတေ ဗုဒ္ဓါ ဘဝိဿသီတိ ဝျာကာသိ တသ္မိမ္ပိ ဗုဒ္ဓေ ပရိနိဗ္ဗုတေ ဓာတုယော န ဝိကိရိံသု ဇမ္ဗုဒီပဝါသနော ပုဗ္ဗေ ဝိယ စတုယောဇနိကံ ထူပမကံသု။

တေန ဝုတ္တံ

‘‘သုမနော ယသဓရော - ဗုဒ္ဓါ အဂ္ဂါရာမမှ နိဗ္ဗုတော၊

တတ္ထေဝ တဿ ဇိနထူပေါ - စတုယောဇနမုဂ္ဂတော’’တိ၊

တဿ အပရဘာဂေ ရေဝတော နာမ သတ္ထာ ဥဒပါဒိ တဒါ ဗောဓိသတ္တော အတိဒေဝေါ နာမ ဗြာဟ္မဏော ဟုတွာ သတ္ထု ဓမ္မဒေသန သုတွာ သရဏေသု ပတိဋ္ဌာယ သိရသိ အဉ္ဇလိံ ပဂ္ဂဟေတွာ တဿ သတ္ထုနော ကိလေသပ္ပဟာနေ ဝဏ္ဏံ ဝတွာ ဥတ္တရာသင်္ဃေန ပူဇမကာသိ။ သောပိ နံ သတ္ထာ ဗုဒ္ဓါ ဘဝိဿတိတိ ဝျာကာသိ တသ္မိံ ပန ဗုဒ္ဓေ ပရိနိဗ္ဗုတေ ဓာတုယော ဝိကိရိံသု။

တေန ဝုတ္တံ

‘‘ရေဝတော ပဝရော ဗုဒ္ဓါ - နိဗ္ဗုတော သော မဟာပုရေ၊

ဓာတု ဝိတ္ထာရိကံ အာသီ - တေသု တေသု ပဒေသတော’’တိ၊

တဿ အပရဘာဂေ သောဘိတော နာမ သတ္ထာ ဥဒပါဒိ တဒါ ဗောဓိသတ္တော အဇိတော နာမ ဗြာဟ္မဏော ဟုတွာ သတ္ထု ဓမ္မဒေသနံ သုတွာ သရဏေသု ပတိဋ္ဋာယ ဗုဒ္ဓပမုခဿ သင်္ဃဿ မဟာဒါနံ အဒါသိ။ သောပိ နံ သတ္ထာ ဗုဒ္ဓါ ဘဝိဿသီတိ ဝျာကာသိ တဿာပိ ဘဂဝတော ဓာတုယော ဝိကိရိံသု။

တေန ဝုတ္တံ

‘‘သောဘိတော ဝရသမ္ဗုဒ္ဓါ - သီဟရာမမှိ နိဗ္ဗုတော၊

ဓာတုဝိတ္ထာရိကံ အာသီ - တေသု တေသု ပဒေသတော’’တိ၊

တဿ အပရဘာဂေ ဧကမသင်္ခေယျံ အတိက္ကမိတွာ ဧကသ္မိံယေဝ ကပ္ပေ တယော ဗုဒ္ဓါ နိဗ္ဗတ္တိံသု - အနောမဒဿိ ပဒုမော နာရဒေါတိ။ အနောမဒဿိဿ ဘဂဝတော ကာလေ ဗောဓိသတ္တော ဧကော

၁။ ယသဝရော ဓီရော - ကေစိ။

ယက္ခ သေနာပတိ အဟောသိ မဟိဒ္ဓိကော မဟာနုဘာဝေါ အနေက ကောဋိသတသဟဿာနံ ယက္ခာနံ အဓိပတိ။ သော ဗုဒ္ဓါ ဥပ္ပန္နောတိ သုတွာ အာဂန္တွာ ဗုဒ္ဓပမုခဿ သင်္ဃဿ မဟာဒါနမဒါသိ သတ္ထာပိ တံ အနာဂတေ ဗုဒ္ဓါ ဘဝိဿသီတိ ဝျာကာသိ။ အနောမဒဿိမှိ ပန ဘဂဝတိ ပရိနိဗ္ဗုတေ ဓာတုယော န ဝိကိရိံသု ဇမ္ဗုဒီပဝါသိနော ပဉ္စဝီသယောဇနကံ ထူပံ ကရိံသု

တေန ဝုတ္တံ

‘‘အနောမဒဿိ ဇိနော သတ္ထာ - ဓမ္မာရာမမှိ နိဗ္ဗုတော၊

တတ္ထေဝ တဿ ဇိနထူပေါ - ဥဗ္ဗေဓာ ပဏ္ဏုဝီသတီ’တိ၊

တဿ အပရဘာဂေ ပဒုမော နာမ သတ္ထာ ဥဒပါဒိ တထာဂတေ အဂါမကာရညေ ဝိဟရေန္တာ ဗောဓိသတ္တော သီဟော ဟုတွာ သတ္ထာရံ နိရောဓသမာပတ္တိယာ သမာပန္နံ ဒိသွာ ပသန္နစိတ္တော ဝန္ဒိတွာ ပဒက္ခိဏံ ကတွာ ပီတိသောမနဿဇာတော တိက္ခတ္တုံ သီဟနာဒံ နဒိတွာ သတ္တာဟံ ဗုဒ္ဓါရမ္မဏံ ပီတိံ အဝိဇဟိတွာ ပီတိသုခေနေဝ ဂေါစရာယ အပက္ကမိတွာ ဇိဝိတပရိစ္စာဂံ ကတွာ ပယိရုပါသမာနော အဋ္ဌာသိ သတ္ထာ သတ္တာဟစ္စယေန နိရောဓာ ဝုဋ္ဌိတော သီဟံ ဩလောကေတွာ ဘိက္ခုသင်္ဃေပိ စိတ္တံ ပသာဒေတွာ သင်္ဃံ ဝန္ဒိဿတီ‘‘တိ ဘိက္ခုသင်္ဃော အာဂစ္ဆတူတိ စိန္တေသိ ဘိက္ခု တာဝဒေဝ အာဂမိံသု သီဟော သင်္ဃေ စိတ္တံ ပသာဒေသိ။ သတ္ထာ တဿ မနံ ဩလောကေတွာ အနာဂတေ ဗုဒ္ဓါ ဘဝိဿတီတိ ဝျာကာသိ တဿ ပန ဘဂဝတော ဓာတုယော ဝိကိရိံသု။

တေန ဝုတ္တံ

‘‘ပဒုမော ဇိနဝရော သတ္ထာ - ဓမ္မာရာမမှိ နိဗ္ဗုတော၊

ဓာတု ဝိတ္ထာရိကံ အာသိ - တေသု တေသု ပဒေသတော’’တိ၊

တဿ အပရဘာဂေ နာရဒေါ နာမ သတ္ထာ အဟောသိ တဒါ ဗောဓိသတ္တော၊ ဣသိပဗ္ဗဇ္ဇံ ပဗ္ဗဇိတွာ ပဉ္စသု အဘိညာသု အဋ္ဌသုစ သမာပတ္တိသုစိဏ္ဏဝသီ ဟုတွာ ဗုဒ္ဓပမုခဿ သင်္ဃဿ မဟာဒါနံ ဒတွာ လောဟိတ စဏ္ဒနေန ပူဇမကာသိ သောပိ နံ အနာဂတော ဗုဒ္ဓါ ဘဝိဿတီတိ ဝျာကာသိ နာရဒ ပန ဘဂဝတော ဓာတုယော ဧကဃနာ အဟေသုံ။ သဗ္ဗေ ဒေဝ မနုဿာ သန္နိပတိတွာ စတုယောဇနိကံ ထူပံ ကရိံသု။

တေန ဝုတ္တံ

‘‘နာရဒေါ ဇိနဝသဘော - နိဗ္ဗုတော သုဒဿနေ ပုရေ၊

တတ္ထေဝ တဿ ထူပဝရော - စတုယောဇနမုဂ္ဂတော’’တိ၊

တဿ အပရဘာဂေ ဧကမသင်္ခေယျမတိက္ကမိတွာ ဣတော ကပ္ပသတသဟဿ မတ္ထကေ ဧကသ္မိံ ကပ္ပေ ပဒုမုတ္တရော နာမ သတ္ထာ ဥဒပါဒိ။ တဒါ ဗောဓိသတ္တော ဇဋိလော နာမ မဟာရဋ္ဌိကော ဟုတွာ ဗုဒ္ဓပမုခဿ သင်္ဃဿ စိဝရဒါနမဒါသိ။ သောပိ တံ အနာဂတော ဗုဒ္ဓါ ဘဝိဿတီတိ ဝျာကာသိ။ ပဒုမုတ္တရဿာပိ ဘဂဝတော ဓာတုယော ဧကဃနာ အဟေသုံ။ သဗ္ဗေ ဒေဝမနုဿာ သန္နိပတိတွာ ဒွါဒသ ယောဇနိကံ မဟာထူပမကံသု။

တေန ဝုတ္တံ

‘‘ပဒုမုတ္တရော ဇိနော ဗုဒ္ဓါ - နဏ္ဒါရာမမှိ နိဗ္ဗုတော၊

တတ္ထေဝ တဿ ထူပဝရော - ဒွါဒသုဗ္ဗေဓယောဇနော’’တိ၊

တဿ အပရဘာဂေ တိံသကပ္ပ သဟဿာနိ အတိက္ကမိတွာ သုမေဓော သုဇာတော စာတိ ဧကသ္မိံ ကပ္ပေ ဒွေ ဗုဒ္ဓါ နိဗ္ဗတ္တိံသု သုမေဓဿ ပန ဘဂဝတော ကာလေ ဗောဓိသတ္တော ဥတ္တရော နာမ မာနဝေါ ဟုတွာ နိဒဟိတွာ ဌပိတံယေဝ အသီတိကောဋိဓနံ ဝိဿဇ္ဇေတွာ ဗုဒ္ဓပမုခဿ သင်္ဃဿ မဟာဒါနံ ဒတွာ ဓမ္မံ သုတွာ သရဏေသု ပတိဋ္ဌာယ နိက္ခမိတွာ ပဗ္ဗဇိ သောပိ နံ အနာဂတေ ဗုဒ္ဓါ ဘဝိဿတီတိ ဝျာကာသိ။ သုမ္ဓေဿ ပန ဘဂဝတော ဓာတုယော ဝိကိရိံသု

တေန ဝုတ္တံ

‘‘သုမေဓော ဇိနဝရော ဗုဒ္ဓါ - မေဓာရာမမှိ နိဗ္ဗုတော၊

ဓာတုဝိတ္ထာရိကံ အာသိ - တေသု တေသု ပဒေသတော’’တိ၊

တဿ အပရဘာဂေ သုဇာတော နာမ သတ္ထာ ဥဒပါဒိ။ တဒါ ဗောဓိသတ္တောစက္ကဝတ္တိရာဇာ ဟုတွာ ဗုဒ္ဓါ ဥပ္ပန္နောတိ သုတွာ ဥပသံကမိတွာ ဓမ္မံ သုတွာ ဗုဒ္ဓပမုခဿ သင်္ဃဿ သဒ္ဓိံ သတ္တဟိ ရတနေဟိ စတုမဟာဒီပံ ရဇ္ဇံ ဒတွာ သတ္ထု သန္တိကေ ပဗ္ဗဇိ သကလရဋ္ဌဝါသိနော ရဋ္ဌုပ္ပာဒံ ဂဟေတွာ အာရာမိက ကိစ္စံ သာဓေန္တာ ဗုဒ္ဓပမုခဿ သင်္ဃဿ နိစ္စံ မဟာဒါနမဒံသု။ သောပိ နံ သတ္ထာ အနာဂတေ ဗုဒ္ဓါဘဝိဿတီတိ ဝျာကာသိ သုဇာတဿ ပန ဘဂဝတော ဓာတုယော ဧကဃနာ အဟေသုံ ဇမ္ဗုဒီပဝါသိနော တိဂါဝုတံ ထူပမကံသု

တေန ဝုတ္တံ

‘‘သုဇာတော ဇိနဝရော ဗုဒ္ဓါ သီလာရာမမှိ နိဗ္ဗုတော၊

တတ္ထေဝ စေတိယော တဿ - တီဏိ ဂါဝုတမုဂ္ဂတော’’တိ၊

တဿ အပရဘာဂေ အဋ္ဌာရသ ကပ္ပသတမတ္ထကေ ဧကသ္မိံ ကပ္ပေ ပိယဒဿိ အတ္ထဒဿိ ဓမ္မဒဿိတိ တယော ဗုဒ္ဓါ နိဗ္ဗတ္တိံသု ပိယဒဿိ ဗုဒ္ဓကာလေ ဗောဓိသတ္တော ကဿပေါ နာမ မာဏဝေါ တိဏ္ဏံ ဝေဒါနံ ပါရဂတော ဟုတွာ သတ္ထု ဓမ္မဒေသနံ သုတွာ ကောဋိသတသဟဿ ဓန ပရိစ္စာဂေန သင်္ဃာရာမံ ကာရေတွာ သရဏေသု စ သီလေသု စ ပတိဋ္ဌာသိ အထ နံ သတ္ထာ အဋ္ဌာရသ ကပ္ပ သတစ္စယေန ဗုဒ္ဓါ ဘဝိဿတီတိ ဝျာကာသိ ပိယဒဿိဿ ဘဂဝတောပိ ဓာတုယော ဧကဃနာဝ အဟေသုံ ဇမ္ဗုဒီပဝါသိနော သန္နိပတိတွာ တိယောဇနိကံ မဟာထူပမကံသု။

တေန ဝုတ္တံ

‘‘ပိယဒဿိ မုနိဝရော - သလလာရာမမှိ နိဗ္ဗုတော၊

တတ္ထေဝ တဿ ဇိနထူပေါ - တီဏိ ယောဇနမုဂ္ဂတော’’တိ၊

တဿ အပရဘာဂေ အတ္ထဒဿိ နာမ ဘဂဝါ ဥဒပါဒိ တဒါ ဗောဓိသတ္တော မဟိဒ္ဓိကော မဟာနုဘာဝေါ သုသိမော နာမ တာပသော ဟုတွာ ဘဂဝတော သန္တိကေ ဓမ္မံ သုတွာ ပသီဒိတွာ ဒိဗ္ဗာနိ မဏ္ဒါရဝ ပဒုမပါရိစ္ဆတ္တကာဒီနိ ပုပ္ဖာနိ အာဟရိတွာ စာတုဒွီပိက မဟာမေဃော ဝိယ ပုပ္ဖဝဿံ ဝဿေတွာ သမန္တတော ပုပ္ဖမဏ္ဍပ ပုပ္ဖအဂဃိယ တောရဏာဒီနိ ကတွာ မဏ္ဒါရဝ ပုပ္ဖစ္ဆတ္တေန ဒသဗလံ ပူဇေသိ သောပိ နံ ဘဂဝါ အနာဂတော ဂေါတမော နာမ ဗုဒ္ဓါ ဘဝိဿတီတိ ဝါကာသိ။ တဿ ပန ဘဂဝတော ဓာတုယော ဝိကိရိံသု။

တေန ဝုတ္တံ

‘‘အတ္ထဒဿိ ဇိနဝရော - အနောမာရာမမှိ နိဗ္ဗုတော၊

ဓာတုဝိတ္ထာရိကံ အာသိ - တေသု တေသု စ ရဋ္ဌတော’’တိ၊

တဿ အပရဘာဂေ ဓမ္မဒဿိ နာမ သတ္ထာ ဥဒပါဒိ။ တဒါ ဗောဓိသတ္တော သက္ကာ ဒေဝရာဇာ ဒိဗ္ဗဂဏ္ဓပုပ္ဖေဟိ စ ဒိဗ္ဗတုရိယေဟိ စ ပူဇံ အကာသိ သောပိ နံ ဗုဒ္ဓါ ဘဝိဿတီတိ ဝျာကာသိ။ ဓမ္မဒဿိဿ ပန ဘဂဝတော ဓာတုယော ဧကဃနာ အဟေသုံ။ ဇမ္ဗုဒီပဝါသိနော တိယောဇနိကံ ထူပမကံသု။

တေန ဝုတ္တံ

‘‘ဓမ္မဒဿိ မဟာဝီရော-ကေလာသာရမမှိ နိဗ္ဗုတော၊

တတ္ထေဝ ထူပဝရော တဿ-တီဏိ ယောဇနမုဂ္ဂတော’’တိ၊

တဿ အပရဘာဂေ စတုနဝုတိကပ္ပ မတ္ထကေ ဧကသ္မိံ ကပ္ပေ ဧကောဝ သိဒ္ဓတ္ထော နာမ သတ္ထာ ဥဒပါဒိ။ တဒါ ဗောဓိသတ္တော ဥဂ္ဂတေဇော အဘိညာဗလ သမ္ပန္နော မင်္ဂလော နာမ တာပသော ဟုတွာ မဟာဇမ္ဗုဖလံ အာဟရိတွာ တထာဂဿ အဒါသိ သတ္ထာ တံ ဖလံ ပရိဘုဉ္ဇိတွာ စတုနဝုတိ ကပ္ပမတ္ထကေ ဗုဒ္ဓါ ဘဝိဿတီတိ ဝျာကာသိ တဿာပိ ဘဂဝတော ဓာတုယော န ဝိကိရိံသု၊ စတုယောဇနိကံ ရတနမယံ ထူပမကံသု။

တေန ဝုတ္တံ

‘‘သိဒ္ဓတ္တော မုနိဝရော ဗုဒ္ဓါ အနောမာရမမှိ နိဗ္ဗုတော၊

တတ္ထေဝ တဿ ထူပဝရော-စတုယောဇနမုဂ္ဂတော’’တိ၊

တဿ အပရဘာဂေ ဣတော ဒွါနဝုတိ ကပ္ပမတ္ထကေ တိဿော ဖုဿောတိ ဧကသ္မိံ ကပ္ပေ ဒေဝ ဗုဒ္ဓါ နိဗ္ဗတ္တိံသု တိဿဿ ဘဂဝတော ကာလေ ဗောဓိသတ္တာ မဟာဘောဂေါ မဟာယသော သုဇာတော နာမ ခတ္တိယော ဟုတွာ ဣသိပဗ္ဗဇ္ဇံ ပဗ္ဗဇိတွာ မဟိဒ္ဓိကဘာဝံ ပတွာ ဗုဒ္ဓါ ဥပ္ပန္နောတိ သုတွာ ဒိဗ္ဗမဏ္ဒါရဝ ပဒုမ ပါရိစ္ဆတ္တ ပုပ္ဖာနိ အာဒါယ စတုပရိသမဇ္ဈေ ဂစ္ဆန္တံ တထာဂတံ ပူဇေသိ။ အာကာသေ ပုပ္ဖဝိတာနမိဝ အဋ္ဌာသိ သောပိ နံ သတ္ထာ ဣတော ဒွါနဝုတိ ကပ္ပမတ္ထကေ ဗုဒ္ဓါ ဘဝိဿတီတိ ဝျာကာသိ။ တဿာပိ ဘဂဝတော ဓာတုယော န ဝိကိရိံသု ဓာတုယော ဂဟေတွာ တိယောဇနိကံ ထူပမကံသု။

တေန ဝုတ္တံ

‘‘တိဿော ဇိနဝရော ဗုဒ္ဓါ-နဏ္ဒါရာမမှိ နိဗ္ဗုတော

တတ္ထေဝ တဿ ထူပဝရော-တီဏိ ယောဇနမုဿိတော’’တိ၊

တဿ အပရဘာဂေ ဖုဿော နာမ ဗုဒ္ဓါ ဥဒပါဒိ တဒါ ဗောဓိသတ္တော ဝိဇိတာဝိ နာမ ခတ္တိယော ဟုတွာ မဟာရဇ္ဇံ ပဟာယ သတ္ထု သန္တိကေ ပဗ္ဗဇိတွာ တီဏိ ပိဋကာနိ ဥဂ္ဂဟေတွာ မဟာဇနဿ ဓမ္မကထံ ကထေတွာ သီလပါရမိဉ္စ ပူရေသိ။ သောပိ နံ ဗုဒ္ဓါ တထေဝ ဝျာကာသိ တဿ ပန ဘဂဝတော ဓာတုယော ဝိကိရိံသု။

တေန ဝုတ္တံ

‘‘ဖုဿော ဇိနဝရော သတ္ထာ-သုနန္ဒာရာမမှိ နိဗ္ဗုတော

ဓာတုဝိတ္ထာရိကံ အာသိ-တေသု တေသု ပဒေသတော’’တိ၊

တဿ အပရဘာဂေ ဣတော ဧကနဝုတိ ကပ္ပမတ္ထကေ ဝိပဿိ နာမ ဗုဒ္ဓါ ဥဒပါဒိ တဒါ ဗောဓိသတ္တော မဟိဒ္ဓိကော မဟာနုဘာဝေါ အတုလော နာမ နာဂရာဇာ ဟုတွာ သတ္တရတန ခစိတံ သောဝဏ္ဏမဟာပီဌံ ဘဂဝတော အဒါသိ သောပိ နံ ဣတော ဧကနဝုတိကပ္ပမတ္ထကေ ဗုဒ္ဓါ ဘဝိဿတီတိ ဝျာကာသိ တဿ ပန ဘဂဝတော ဓာတုယော န ဝိကိရိံသု သဗ္ဗေ ဒေဝမနုဿာ သန္တိပတိတွာ ဓာတုယော ဂဟေတွာ သတ္တယောဇနိကံ ထူပမကံသု။

တေန ဝုတ္တံ

‘‘ဝိပဿိ ဇိနဝရော ဝီရော-သုမိတ္တာရာမမှိ နိဗ္ဗုတော၊

တတ္ထေဝ သော ထူပဝရော-သတ္တယောဇနိကော ကတော’’တိ၊

တဿ အပရဘာဂေ ဣတော ဧကတိံသ ကပ္ပမတ္ထကေ သိခီ ဝေဿဘူတိ ဒွေ ဗုဒ္ဓါ နိဗ္ဗတ္တိံသု သိခိဿ ဘဂဝတော ကာလေ ဗောဓိသတ္တော အရိဏ္ဒမော နာမ ရာဇာ ဟုတွာ ဗုဒ္ဓပမုခဿ သင်္ဃဿ သစိဝရံ မဟာဒါနံ ပဝတ္တေတွာ သတ္တရတန ပတိမဏ္ဍိတံ ဟတ္ထိရတနံ ဒတွာ ဟတ္ထိပ္ပမာဏံ ကတွာ ကပ္ပိယ ဘဏ္ဍမဒါသိ သောပိ နံ ဣတော ဧကတိံသ ကပ္ပေ ဗုဒ္ဓါ ဘဝိဿတီတိ ဝျာကာသိ၊ သိခိဿ ဘဂဝတော ဓာတုယော ဧကဃနာ ဟုတွာ အဋ္ဌံသု၊ သကလ ဇမ္ဗုဒီပဝါသိနော ပန မနုဿာ ဓာတုယော ဂဟေတွာ တိယောဇနုဗ္ဗေဓံ သတ္တရတနမယံ ဟိမဂိရိ သဒိသ သောဘံ ထူပမကံသု။

သိခီ မုနိဝရော ဗုဒ္ဓါ-ဒုဿာရာမမှိ နိဗ္ဗုတော၊

တတ္ထေဝ တဿ ထူပဝရော-တီဏိ ယောဇနမုဂ္ဂတော’’တိ၊

တဿ အပရဘာဂေ ဝေဿဘူ နာမ သတ္ထာ ဥဒပါဒိ။ တဒါ ဗောဓိသတ္တော သုဒဿနော နာမ ရာဇာ ဟုတွာ ဗုဒ္ဓပမုခဿ သင်္ဃဿ သစီဝရမဟာဒါနံ ဒတွာ တဿ သန္တိကေ ပဗ္ဗဇိတွာ အာစာရဂုဏသမ္ပန္နော ဗုဒ္ဓရတနေ စိတတီကာရ ပီတိ ဗဟုလော အဟောသိ သေပိ နံ သတ္ထာ ဣတော ဧကတိံသကပ္ပေ ဗုဒ္ဓါ ဘဝိဿတီတိ ဝျာကာသိ ဝေဿဘုဿ ပန ဘဂဝတော ဓာတုယော ဝိကိရိံသု။

တေန ဝုတ္တံ

‘‘ဝေဿဘူ ဇိနဝရော သတ္ထာ-ခေမာရာမမှိ နိဗ္ဗုတော၊

ဓာတုဝိတ္ထာရိကံ အာသိ-တေသု တေသု ပဒေသတော’’တိ၊

တဿ အပရဘာဂေ ဣမသ္မိံ ကပ္ပေ စတ္တာရော ဗုဒ္ဓါ နိဗ္ဗတ္တိံသု ကကုသဏ္ဓော ကောနာဂမနော ကဿပေါ အမှာကံ ဘဂဝါတိ ကတုသဏ္ဓဿ ပန ဘဂဝတော ကာလော ဗောဓိသတ္တော ခေမော နာမ ရာဇာ ဟုတွာ ဗုဒ္ဓပမုခဿ သင်္ဃဿ သပတ္တစီဝရံ ဒါနဉ္စေဝ အဉ္ဇနာဒိ ဘေသဇ္ဇာနိ စ ဒတွာ သတ္ထု ဓမ္မဒေသနံ သုတွာ ပဗ္ဗဇိ သောပိ နံ သတ္ထာ ဝျာကာသိ တဿ ပန ဘဂဝတော ဓာတုယော န ဝိကိရိံသု သဗ္ဗေ သန္နိပတိတွာ ဓာတုယော ဂဟေတွာ ဂါဝုတုဗ္ဗေဓံ ထူပမကံသု။

တေန ဝုတ္တံ

‘‘ကကုသဏ္ဓော ဇိနဝရော - ခေမာရာမမှိ နိဗ္ဗုတော၊

တတ္ထေဝ တဿ ထူပဝရော-ဂါဝုတံ နဘမုဂ္ဂတော’’တိ၊

တဿ အပရဘာဂေ ကောနာဂမနော နာမ သတ္ထာ ဥဒပါဒိ တဒါ ဗောဓိသတ္တော ပဗ္ဗတော နာမ ရဇာ ဟုတွာ အမစ္စဂဏ ပရိဝုတော သတ္ထု သန္တိကေ ဂန္တွာ ဓမ္မဒေသနံ သုတွာ ဗုဒ္ဓပမုခံ ဘိက္ခုသင်္ဃံ နိမန္တေတွာ မဟာဒါနံ ပဝတ္တေတွာ ပတ္တုဏ္ဏစီနပဋ္ဋ ကောသေယျ ကမ္ဗလ ဒုကုလာနိ စေဝ သုဝဏ္ဏပဋ္ဋကဉ္စ ဒတွာ သတ္ထု သန္တိကေ ပဗ္ဗဇိ။ သောပိ နံ သတ္ထာ ဝျာကာသိ တဿ ဘဂဝတော ဓာတုယော ဝိကိရိံသု

တေန ဝုတ္တံ

‘‘ကောနာဂမနော သမ္ဗုဒ္ဓါ ပဗ္ဗတာရာမမှိ နိဗ္ဗုတော၊

ဓာတု ဝိတ္ထာရိကံ အာသိ-တေသု တေသု ပဒေသတော’’တိ၊

တဿ အပရဘာဂေ ကဿပေါ နာမ သတ္ထာ ဥဒပါဒိ။ တဒါ ဗောဓိသတ္တော ဇောတိပါလော နာမ မာဏဝေါ ဟုတွာ တိဏ္ဏံ ဝေဒါနံ ပါရဂုဘူမိယဉ္စေဝ အန္တလိက္ခေဝ ပါကဋော ဃဋီကာရဿ ကုမ္ဘကာရဿ မိတ္တော အဟောသိ။ သော တေန သဒ္ဓိံ သတ္ထာရံ ဥပသင်္ကမိတွာ ဓမ္မ

ကထံ သုတွာ ပဗ္ဗဇိတွာ အာရဒ္ဓဝီရိယော တီဏိ ပိဋကာနိ ဥဂ္ဂဟေတွာ ဝတ္တာ ဝတ္တသမ္ပတ္တိယာ ဗုဒ္ဓသာသနံ သောဘေသိ။ သောပိ နံ သတ္ထာ ဝျာကာသိ။ ကဿပဿ ပန သတ္ထုနော ဓာတုယော န ဝိကိရိံသု သကလ ဇမ္ဗုဒီပဝါသိနော မနုဿာ သန္နိပတိတွာ ဧကေကံ သုဝဏ္ဏဋ္ဌိကံ ကောဋိ အဂ္ဃနကံ ရတနဝိစိတ္တံ ဗဟိ ရစနတ္ထံ ဧကေကံ အဍ္ဎကောဋိ အဂ္ဃနကံ အဗ္ဘန္တရ ပူရဏတ္ထံ မနောသိလာယ မတ္တိကာကိစ္စံ တေလေန ဥဒကကိစ္စံ ကရောန္တာ ယောဇနုဗ္ဗေဓံ ထုပမကံသု။

တေန ဝုတ္တံ

‘‘မဟာကဿပေါ ဇိနော သတ္ထာ-သေတဝျာယဉှိ နိဗ္ဗုတော၊

တတ္ထေဝ တဿ ဇိနထုပေါ-ယောဇနုဗ္ဗေဓမုဂ္ဂတော’’တိ၊

ဧတ္ထ စ

ဒီပင်္ကရော စ ကောဏ္ဍညော-မင်္ဂလော သုမနော တထာ၊

အနောမဒဿီ ဗုဒ္ဓါ စ-နာရဒေါ ပဒုမုတ္တရော၊

သုဇာတော ပိယဒဿီ စ-ဓမ္မဒဿိ နရုတ္တမော၊

သိဒ္ဓတ္ထဗုဒ္ဓါ တိဿော စ-ဝိပဿိ စ သိခီ တထာ၊

ကကုသဏ္ဓော ကဿပေါ စာတိ-သောဠသေတေ မဟေသယော၊

ထုပပ္ပမာဏမေတေသံ ပါလိယံယေဝ ဒဿိတံ၊

ယသ္မာ တသ္မာ မယာ သာဓူ-တေ သဗ္ဗေပိ ပကာသိတာ၊

ထူပါ သဒ္ဓါ ဇနာ သာဓူ-တေ ဝန္ဒေယျထ သာဒရံ၊

ယေသာနံ ပန အဋ္ဌန္နံ - သုဂတာနံ ဟိတေသိနံ

ဓာတု ဝိတ္ထာရိကာ အာသုံ - တေသု တေသု ပဒေသတောတိ၊

သာဓုဇန မနောပသာဒနတ္ထာယ ကတေ ထူပဝံသေ ဝိဇ္ဇမာနထူပါနံ ဗုဒ္ဓါနံ ထူပကထာ စေဝ သဗ္ဗေသံ သန္တိကေ အဘိနိဟာရကတာစေ။ သမတ္တာ။

ကဿပဿ ပန ဘဂဝတော အပရဘာဂေ ဌပေတွာ ဣမံ သမ္မာ သမ္ဗုဒ္ဓံ အညော ဗုဒ္ဓါ နာမ နတ္ထိ။ ဧဝံ ဒီပင်္ကရာဒီနံ စတုဝီသတိယာ ဗုဒ္ဓါနံ သန္တိကေ လဒ္ဓဝျာကရဏော ဗောဓိသတ္တော ပါရမိယော ပူရေတွာ ဝေဿန္တရတ္တဘာဝေ ဌိတော-

‘‘အစေတနာယံ ပထဝီ-အဝိညာယ သုခံ ဒုခံ၊

သာပိ ဒါနဗလော မယှံ-သတ္တက္ကတ္တုံ ပကမ္ပထာ’’တိ၊

ဧဝံ မဟာပထဝိ ကမ္ပနာနိ ပုညာနိ ကတွာ အာယုပရိယောသာနေ တတော စုတော တုသိတဘဝနေ နိဗ္ဗတ္တိ တတ္ထ အညေ ဒေဝေ ဒသဟိ ဌာနေဟိ အဓိဂဏှိတွာ ယာဝတာယုကံ ဒိဗ္ဗသမ္ပတ္တိံ အနုဘဝန္တော မနုဿဂဏနာယ သတ္တဟိ ဒိဝသေဟိ အာယုက္ခယံ ပါပုဏိဿတိတိ ဝတ္ထာနိ ကိဠိဿန္တိ၊ မာလာ မိလာယန္တိ၊ ကစ္ဆေဟိ သေဒါ မုစ္စန္တိ၊ ကာယေစေဝ ဒုဗ္ဗဏ္ဏိယံ ဩက္ကမတိ။ ဒေဝေါ ဒေဝါသနေ နာဘိရမတီတိ ဣမေသု ပဉ္စသု ပုဗ္ဗနိမိတ္တေသု ဥပ္ပန္နေသု တာနိ ဒိသွာသုညာဝတ နော သဂ္ဂါ ဘဝိဿန္တိတိ သံဝေဂဇာတာဟိ ဒေဝတာဟိ မဟာသတ္တဿ ပါရမိနံ ပူရိတဘာဝံ ဉတွာ ဣမသ္မိံ ဣဒါနိ အညံ ဒေဝလောကံ အနုပဂန္တွာ မနုဿလောကေ ဥပ္ပဇ္ဇိတွာ ဗုဒ္ဓဘာဝံ ပတ္တေ ပုညာနိ ကတွာ စုတ စုတာ ဒေဝလောကံ ပူရေဿန္တီတိ စိန္တေတွာ။

‘‘ယတောဟံ တုသိတေ ကာယေ-သန္တုသိတော နာမဟံ တဒါ၊

ဒသသဟဿိ သမာဂန္တွာ-ယာစန္တိ ပဉ္ဇလီ မမံ၊

ကာလောယံတေ မဟာဝီရ-ဥပ္ပဇ္ဇ မာတုကုစ္ဆိယံ၊

သဒေဝကံ တာရယန္တော-ဗုဇ္ဈဿု အမတံ ပဒန္တိ’’၊

ဧဝံ ဗုဒ္ဓဘာဝတ္ထာယ အာယာစိတော ကာလံ-ဒီပံ-ဒေသံ ကုလံ-ဇနေတ္တိယာ အာယုပ္ပမာဏန္တိ ဣမာနိ ပဉ္စ မဟာဝိလောကနာနိ ဝိလောကေတွာ ကတသန္နိဋ္ဌာနော တတော စုတော သကျရာဇကုလေ ပဋိသဏ္ဓိံဂဟေတွာ တတ္ထ မဟာသမ္ပတ္တိယာ ပရိဟရိယမာနော အနုက္ကမေန ဘဒ္ဒံ ယောဗ္ဗနံ အနုပါပုဏိတွာ တိဏ္ဏံ ဥတူနံ အနုစ္ဆဝိကေသု တီသု ပါသာဒေသု ဒေဝလောကသိရိံ ဝိယ ရဇ္ဇသိရိံ အနုဘဝမာနော ဥယျာနကီဠာယ ဂမနသမယေ အနုက္ကမေန ဇိဏ္ဏ - ဝျာဓိ - မတသင်္ခါတေ တယော ဒေဝဒူတေ ဒိသွာ သံဇာတ သံဝေဂါ နိဝတ္တိတွာ စတုတ္ထေ ဝါရေ ပဗ္ဗဇိတံ ဒိသွာ သာဓု ပဗ္ဗဇ္ဇာတိ ပဗ္ဗဇ္ဇာယ ရုစိံ ဥပ္ပာဒေတွာ ဥယျာနံ ဂန္တွာ တတ္ထ ဒိဝသံ ခေပေတွာ မင်္ဂလ ပေါက္ခရဏိတီရေ နိသိန္နော ကပ္ပက ဝေသံ ဂဟေတွာ အာဂတေန ဝိဿကမ္မ ဒေဝပုတ္တေန အလင်္ကတ ပဋိယတ္တော ရာဟုလကုမာရဿ ပါတသာသနံ သုတွာ ပုတ္တသိနေဟဿ ဗလဝဘာဝံ ဉတွာ ယာဝ ဣမံ ဗဏ္ဓနံ န ဝဍ္ဎတိ တာဝဒေဝနံ ဆိဏ္ဒိဿာမီတိ စိန္တေတွာ သာယံ နဂရံ ပဝိသန္တော-

‘‘နိဗ္ဗုတာ နူန သာ မာတာ - နိဗ္ဗုတော နူန သော ပိတာ၊

နိဗ္ဗုတာ နူန သာ နာရီ - ယဿာယံ ဤဒိသော ပတိ’’တိ၊

ကိသာဂေါတမိယာ နာမ ပိတုစ္ဆာ ဓီတာယ ဘာသိတံ ဣမံ ဂါထာ သုတွာ ဣဟံ ဣမာယ နိဗ္ဗုတပဒံ သာဝိတောတိ ဂီဝတော သတသဟဿဂ္ဃနကံ မုတ္တာဟာရံ ဩမုဉ္စိတွာ တဿာ ပေသေတွာ အတ္တနော ဘဝနံ ပဝိသိတွာ သိရီသယနေ နိပန္နော နိဒ္ဒါဝသ ဂတာနံ နာဋကာနံ ဝိပ္ပကာရံ ဒိသွာ နိဗ္ဗိန္နဟဒယော ဆန္နံ ဥဋ္ဌာပေတွာ ကဏ္ထကံ အာဟာရာပေတွာ တံ အာရုယှ ဆန္နသဟာယော ဒသသဟဿ စက္ကဝါဠ ဒေဝတာဟိ ကတ ပရိဝါရော မဟာဘိနိက္ခမနာ နိက္ခမိတွာ တေနေဝ ရတ္တာဝသေသေန တီဏိ ရဇ္ဇာနိ အတိက္ကမ္မ အနောမာယ နဒိယာ ပရတီရံ ပတွာ အဿာပိဋ္ဌိတော ဩရုယှ မုတ္တရာသိ သဒိသေ စာလိကာပုလိဏေ ဌတွာ ဆန္နတွံ မယှံ အာဘရဏာနိ စေဝ ကဏ္ထကဉ္စ အာဒါယ ဂစ္ဆာဟိ အာဘရဏာနိ စ ကဏ္ထကဉ္စ ပဋိစ္ဆာပေတွာ ဒက္ခိဏ ဟတ္ထေန မင်္ဂလခဂ္ဂမာဒါယ ဝါမဟတ္ထေန မောလိယာ သဒ္ဓိံ စူဠံ ဆိဏ္ဒိတွာ သစေ အဟံ ဗုဒ္ဓါ ဘဝိဿာမိ အာကာသေ တိဋ္ဌတု နော စေ ဘူမိယံ ပတတူတိ အာကာသေ ခိပိ စုဠာမဏီ ဗဏ္ဓနံ ယောဇနပ္ပမာဏံ ဌာနံဂန္တွာ အာကာသေ အဋ္ဌာသိ အထ သက္ကော ဒေဝရာဇာ ယောဇနိကေန ရတနစင်္ဂေါဋကေန ပဋိဂ္ဂဟေသိ။

ယထာဟ

ဆေတွာန မောလိံ ဝရဂန္ဓဝါသိတံ

ဝေဟာသယံ ဥက္ခိပိ သကျပုင်္ဂယဝေါ၊

သဟဿနေတ္တော သိရသာ ပဋိဂ္ဂဟိ

သုဝဏ္ဏ ဝင်္ဂေါဋဝရေန ဝါသဝေါ’တိ၊

ပဋိဂ္ဂဟေတွာ စ ပန ဒေဝလောကံ နေတွာ သုနေရု မုဒ္ဓနိ တိယောဇနပ္ပမာဏံ ဣဏ္ဒနီလမဏိမယံ စုဠာမဏိ စေတိယံ နာမ အကာသိ အထ ကဿပ ဗုဒ္ဓကာလေ ပေါရာဏ သဟာယကော ဃဋိကာရ မဟာဗြဟ္မာ ဧကံ ဗုဒ္ဓန္တရံ ဝိနာဝါသဘာဝပ္ပတ္တေန မတ္တဘာဝေါ စိတ္တေသိ။ အဇ္ဇ မေ သဟာယကော မဟာဘိနိက္ခမနံ နိက္ခန္တော သမဏ ပရိက္ခာရမဿ ဂဟေတွာ ဂစ္ဆာမီတိ-

‘‘တိစီဝရဉ္စ ပတ္တော စ ဝါသိ သူစိ စ ဗဏ္ဓနံ၊

ပရိဿာဝန အဋ္ဌေတေန-ယုတ္တယောဂဿ ဘိက္ခုနော’’တိ၊

ဣမေ သမဏပရိက္ခာရေ အာဟရိတွာ အဒါသိ မဟာပုရိသော အရဟဒ္ဓဇံ နိဝါသေတွာ ဥတ္တမံ ပဗ္ဗဇ္ဇာဝေသံ ဂဏှိတွာ သာဋကယုဂလံ အာကာသေ ခိပိ တံ ဗြဟ္မာ ပဋိဂ္ဂဟေတွာ ဗြဟ္မလောကေ ဒွါဒသယောဇနိကံ သဗ္ဗရတနမယံ ဒုဿစေတိယမကာသိ။

‘‘ကိလေသ အပ္ပဟီဏေပိ=မဟာသတ္တဿ တံ ခဏေ၊

ယဿာနုဘာဝတော ဧဝံ ဒုဿစူဠာ ဟိ ပူဇိတာ

တသ္မာ တမ္မ မဟာဗောဓိ-သတ္တာနံ ပဋိပတ္တိယံ၊

န ကရေယျ မဟုဿာဟံဝ-ကော ဟိ နာမ ဗုဓော ဇနော’’တိ၊

စူဠာမဏိဒုဿ ထုပဒွယကထာ

၉။ ဗောဓိသတ္တော ပဗ္ဗဇိတွာ အနုက္ကမေန ရာဇဂဟံ ဂန္တွာ တတ္ထ ပိဏ္ဍာယ စရိတွာ ပဏ္ဍဝ ပဗ္ဗတပဗ္ဘာရေ နိသိန္နော မဂဓရာဇေန ရဇ္ဇေန နိမန္တိယမာနော တံ ပဋိက္ခိပိတွာ သဗ္ဗညုတံ ပတွာ တိဿဝိဇိတံ အာဂမနတ္ထာယတေနဂဟိတ ပဋိညော အာဠာရံ-ဥဒ္ဒကဉ္စ ဥပသင်္ကမိတွာ တေသံ သန္တိကေ အဓိဂတဝိသေသေန အပရိတုဋ္ဌော ဆဗ္ဗဿာနိ မဟာပဓာနံ ပဒဟိတွာ ဝိသာခ ပုဏ္ဏမ ဒိဝသေ သေနာနိနိဂမေ သုဇာတာယ ဒိန္နပါယာသံ ပရိဘုဉ္ဇိတွာ နေရဉ္ဇရာယ နဒိယာ သုဝဏ္ဏပါတိံ ပဝါဟေတွာ နေရဉ္ဇရာယ တီရေ မဟာဝနသဏ္ဍေ နာနာသမာပတ္တီဟိ ဒိဝါဘာဂံ ဝိတိနာမေတွာ သာယဏှ သမယေ သောတ္ထိယေန ဒိန္နံ တိဏမုဋ္ဌိံ ဂဟေတွာ ကာဠေန နာဂရာဇေန အဘိတ္ထုတဂုဏော ဗောဓိမဏ္ဍံ အာရုယှ တိဏာနိ။ သတ္ထရိတွာ န တာဝီမံ ပလ္လင်္ကံ ဘိဏ္ဒိဿာမိ ယာဝ မေ အနုပါဒါယ အာသဝေဟိ စိတ္တံ ဝိမုစ္စိဿတီ’’တိ ပဋိညံ ကတွာ ပါစီန ဒါသာဘိမုခေါ နိသီဒိတွာ-သူရိယေ အနတ္ထမိတေယေဝ မာရဗလံ ဝိဓမေတွာ ပဌမယာမေ ပုဗ္ဗေ နိဝါသဉာဏံ မဇ္ဈိမယာမေ စုတူပပါတဉာဏံ ပတွာ ပစ္ဆိမယာမာဝသာနေ ဒသဗလ စတုဝေသာရဇ္ဇာဒိ သဗ္ဗဂုဏပတိမဏ္ဍိတံသဗ္ဗညုတဉာဏံ ပဋိဝိဇ္ဈိတွာ သတ္တ သတ္တာဟံ ဗောဓိသမီပေယေဝ ဝီတိနာမေတွာ အဋ္ဌမေ သတ္တာဟေ အဇပါလ နိဂြောဓမူလေ နိသိန္နော ဓမ္မဂမ္ဘီရတာ ပစ္စဝေက္ခနေန အပ္ပောဿုက္ကတံ အာပဇ္ဇမာနော ဒသဒဟဿီ မဟာဗြဟ္မ ပရိဝါရေန သဟမ္ပတိ မဟာဗြဟ္မုနာ အာယာစိတ ဓမ္မဒေသနော ဗုဒ္ဓစက္ခုနာ လောကံ ဩလောကေန္တော ဗြဟ္မုနော အဇ္ဈေသနံ အာဒါယ ကဿ နု ခေါ ပဌမံ ဓမ္မံ ဒေသေယျန္တိ ဩလောကေန္တော အာဠာရုဒ္ဒကာနံ ကာလကတဘာဝံ ဉတွာ ပဉ္စဝဂ္ဂီယာနံ ဘိက္ခုနံ ဗဟူပကာရတံ အနုဿရိတွာ ဥဋ္ဌာယာသနာ ကာသိပုရံ ဂစ္ဆန္တော အန္တရာမဂ္ဂေ ဥပကေန သဒ္ဓိံ မန္တေတွာ အာသာဠဟိပုဏ္ဏမ ဒိဝသေ ဣသိပတနေ မိဂဒါယေ ပဉ္စ ဝဂ္ဂိယာနံ ဘိက္ခုနံ ဝသနဋ္ဌာနံ ပတွာ တေ အနနုစ္ဆဝိကေန အာဝုသော ဝါဒေန သမုဒါစရန္တေ အညာပေတွာ ဓမ္မစက္ကံ ပဝတ္တေန္တော အညာကောဏ္ဍညတ္ထေရပမုခေ အဋ္ဌာရသ ကောဋိယော အမတပါနံ ပါယေသိ။

တတော ပဋ္ဌာယ စတ္တာလီသ သံဝစ္ဆရာနိ ဌတွာ စတုရာသီတိ ဓမ္မက္ခဏ္ဓ သဟဿာနိ ဒေသေတွာ ဂဏနပထမတီတေ သတ္တေ ဘဝကန္တာရတော သန္တာရေတွာ သဗ္ဗဗုဒ္ဓကိစ္စာနိ နိဋ္ဌပေတွာ ကုသိနာရာယံ ဥပဝတ္တနေ မလ္လာနံ သာလဝနေ ယမကသာလာန မန္တရေ ဥတ္တသီသကံ ပညတ္တေ မဉ္စကေ ဝိသာခပုဏ္ဏမ ဒိဝသေ ဒက္ခိဏေန ပဿေန သတော သမ္ပဇာနော အနုဋ္ဌာနသေယျာယ နိပဇ္ဇိ။ တဒါ ကိရ ဘဂဝတော ပူဇာယ ယမကသာလာ သဗ္ဗပါလိဖုလ္လာ မူလတော ပဋ္ဌာယ ယာဝ အဂ္ဂါ ဧကစ္ဆန္နာ အဟေသုံ။ န ကေဝလဉ္စ ယမကသာလာယေဝ သဗ္ဗေပိ ရုက္ခသာခါ သဗ္ဗပါလိဖုလ္လာဝ အဟေသုံ။

န ကေဝလဉ္စ တသ္မိံယေဝ ဥယျာနေ သကလေပိ ဒသသဟဿ စက္ကဝါဠေ ဖလုပဂ ရုက္ခာ ဖလံ ဂဏှိံသု။ သဗ္ဗရုက္ခာနံ ခဏ္ဓေသု ခဏ္ဓ ပဒုမာနိ၊ ဝလလီသု ဝလလိပဒုမာနိ။ အာကာသေ ဥလ္လောကပဒုမာနိ၊ ပထဝိတလံ ဘိဏ္ဒိတွာ ဒဏ္ဍကပဒုမာနိ ပုပ္ဖိံသု။ သဗ္ဗော မဟာ သမုဒ္ဒေါ ပဉ္စဝဏ္ဏ ပဒုမသဉ္ဆန္နော အဟောသိ တိယောဇန သဟဿဝိတ္ထတော ပန ဟိမဝါ ဃနဗဒ္ဓမောရပိဉ္ဆကလာပေါ ဝိယ နိရန္တရံ မာလာဒါမဂဝက္ခိတော ဝိယ သုဋ္ဌု ပီဠေတွာ အာဗဒ္ဓပုပ္ဖဝဋံသကော ဝိယ သုပူရိတ ပုပ္ဖစင်္ဂေဋကံ ဝိယ စ အတိရမဏီယော အဟောသိ။

ယမကသာလာ ဘုမ္မဒေဝတာနိ သဉ္စာလိတက္ခဝိဏ္ဓဋပါ တထာဂတသရီရဿ ဥပရိပုပ္ဖာနိ ဝိကိရန္တိ။ ဒိဗ္ဗာနိပိ မဏ္ဒါရဝ ပုပ္ဖာနိ အန္တလိက္ခာ ပတန္တိ။ တာနိ ဟောန္တိ သုဝဏ္ဏ ဝဏ္ဏာနိ ပဏ္ဏစ္ဆတ္တပ္ပမာဏာနိ မဟာတုမ္ဗမတ္တံ ရေဏု ဂဏှန္တိ န ကေဝလဉ္စ မဏ္ဒါရဝ ပုပ္ဖာနေစ၊ အညာနိပိ သဗ္ဗာနိ ပါရိစ္ဆတ္တက ပုပ္ဖာဒီနိ သုဝဏ္ဏဝင်္ဂေါဋကာနိ ရဇတစင်္ဂေါဋကာနိ စ ပူရေတွာ ပူရေတွာ တိဒသ ပုရေပိ ဗြဟ္မလောကေပိ ဌိတာဟိ ဒေဝတာဟိ ဝိဝိဓာနိ အန္တရာ အဝိပ္ပကိဏ္ဏာနေဝ ဟုတွာ အာဂန္တွာ ပတ္တကိံဇက္ခ ရေဏု စုဏ္ဏေဟိ တထာဂတဿ သရီရမေဝ ဩကီရန္တိ န ကေဝလဉ္စ ဒေဝတာနံယေဝ နာဂ သုပဏ္ဏ မနုဿာနမ္ပိ ဥပကပ္ပန စဏ္ဒန စုဏ္ဏာနိ န ကေဝလဉ္စ စဏ္ဒနစုဏ္ဏာနေဝ ကာဠာနုသာရီ တဂရ လောဟိတစဏ္ဒနာဒိ သဗ္ဗဂန္ဓဇာတစုဏ္ဏာနိ၊ ဟရိတာလဉ္ဇန သုဝဏ္ဏ ရဇတ စုဏ္ဏာနိ၊ သဗ္ဗဂန္ဓဝါသ ဝိကတိယော သုဝဏ္ဏ ရဇတာဒိသမုဂ္ဂေ ပူရေတွာ စက္ကဝါဠ မုခဝဋ္ဋိအာဒိသု ဌိတာဟိ ဒေဝတာဟိ ပဝိဒ္ဓါ အန္တရာ အဝိပ္ပကိရိတွာ တထာဂတဿေဝ သရီရံ ဩကိရန္တိ ဒိဗ္ဗာနိပိ တုရိယာနိ အန္တလိက္ခေ ဝဇ္ဇန္တိ။ န ကေဝလဉ္စ တာနိယေဝ သဗ္ဗာနိပိ တန္တိဗဒ္ဓ စမ္မပရိယောနဒ္ဓ သုသိရာဒိ ဘေဒါနိ ဒသသဟဿစက္ကဝါဠေ ဒေဝ-နာဂဝ-သုပဏ္ဏ-မနုဿာနံ တုရိယာနိ ဧကစက္ကဝါဠေ သန္နိပတိတွာ အန္တလိက္ခေ ဝဇ္ဇန္တိ။

ဝရစာရဏဒေဝတာ ကိရ နာမေကာ ဒီဃာယုကာ ဒေဝတာ မဟာပုရိသော မနုဿပထေ နိဗ္ဗတ္တိတွာ ဗုဒ္ဓါ ဘဝိဿတီတိ သုတွ ပဋိသဏ္ဓိဒိဝသေ ဂဏှိတွာ ဂမိဿာမာတိ မာလာ ဂန္ထိတုံ အာရဘိံသု တာ ဂဏ္ထမာနာဝ မဟာပုရိသေ မာတုကုစ္ဆိယံ နိဗ္ဗတ္တေ တုမ္ဘေ ကဿ ဂဏ္ထထာတိ ဝုတ္တာ န တာဝ တိဋ္ဌာတိ ကုစ္ဆိတော နိက္ခမန ဒိဝသေ ဂဟေတွာ ဂမိဿာမာတိ အာဟံသု ပုန နိက္ခေန္တောတိ သုတွာ မဟာဘိနိက္ခမနဒိဝသေ ဂမိဿာမာတိ မဟာဘိနိက္ခမနံ နိက္ခန္တောတိ သုတွာ အဘိသမ္ဗောဓိ ဒိဝသေ ဂမိဿာမာတိ။ အဇ္ဇ အဘိသမ္ဗုဒ္ဓါတိ သုတွာ ဓမ္မစက္ကပ္ပဝတ္တနဒိဝသေ ဂမိဿာမာတိ ဓမ္မစက္ကံ ပဝတ္တယီတိ သုတွာ ယမကပါဋိဟာရိယဒိဝသေ ဂမိဿာမာတိ။ အဇ္ဇ ယမကပါဋိဟာရိယံ ကရီတိ သုတွာ ဒေဝေါ ရောဟနဒိဝသေ ဂမိဿာမာတိ။ အဇ္ဇ ဒေဝေါရောဟနံ ကရီတိ သုတွာ အာယုသင်္ခါရောဿဇ္ဇနေ ဂမိဿာမာတိ အာယုသင်္ခါရံ ဩဿဇီတိ သုတွာ န တာဝ နိဋ္ဌာတိ ပရိနိဗ္ဗာနဒိဝသေ ဂမိဿာမာတိ?

အဇ္ဇ ဘဂဝါ ယမကသာလာနမန္တရေ ဒက္ခိဏေန ပဿေန သတော သမ္ပဇာနော သီဟသေယျံ ဥပဂတော ဗလဝ ပစ္စုသမယေ ပရိနိဗ္ဗာယိဿတိ တုမှေ ကဿ ဂဏ္ထထာတိ ဝုတ္တာ ပန ကိန္နာမေတံ အဇ္ဇေဝ မာတုကုစ္ဆိယံ ပဋိသဏ္ဓိံ ဂဏှိ အဇ္ဇေဝ ကုစ္ဆိတော နိက္ခန္တော၊ အဇ္ဇေဝ မဟာဘိနိက္ခမနံ နိက္ခမိ။ အဇ္ဇေဝဗုဒ္ဓါ အဟောသိ အဇ္ဇေဝ ဓမ္မစက္ကံ ပဝတ္တယိ။ အဇ္ဇေဝ ယမကပါဋိဟာရိယံ အကာသိ။ အဇ္ဇေဝ ဒေဝလောကာ ဩတိနဏ္ဏာ။ အဇ္ဇေဝ အာယုသင်္ခရံ ဩဿဇိ။ အဇ္ဇေဝ ကိရ ပရိနိဗ္ဗုတော။ နနု နာမ ဒုတိယ ဒိဝသေ ယာဂုပါန ကာလမတ္တမ္ပိ ဌာတဗ္ဗံ အဿ၊ ဒသ ပါရမိယော ပူရေတွာ ဗုဒ္ဓတ္တံ ပတ္တဿ နာမ အနနုစ္ဆဝိကန္တိ အပရိ နိဋ္ဌိတာဝ မာလာယော ဂဟေတွာ အာဂမ္မ အန္တော စက္ကဝါဠေ ဩကာသံ အာလဘမာနာ စက္ကဝါဠ မုခဝဋ္ဋိယံ လဘိတွာ အာဓာဝန္တိယော ဟတ္ထေန ဟတ္ထံ ဂီဝါယ ဂီဝံ ဂဟေတွာ တီဏိ ရတနာနိ အာရဗ္ဘဒွတ္တိံသမဟပုရိသလက္ခဏာနိ ဆဗ္ဗဏ္ဏရံသိယော ဒသပါရမိယော အဒ္ဓစ္ဆဋ္ဌာနိ ဇာတကသတာနိ စုဒ္ဒဿ ဗုဒ္ဓဉာဏာနိ အာရဗ္ဘ ဂါယိတွာ တဿ တဿ အဝသာနေ သဟာယ ဟေ သဟာယ ဟေတိ ဝဒန္တိ။ ဣဒမေတံ ပဋိစ္စဝုတ္တံ-ဒိဗ္ဗာနိပိ သံဂီတာနိ အန္တလိက္ခေ ဝတ္တန္တိတိ။

ဘဂဝါ ပန ဧဝံ မဟတိယာ ပူဇာယ ဝတ္တမာနယာ ပဌမယာမေ မလ္လာနံ ဓမ္မံ ဒေသေသိ မဇ္ဈိမယာမေ သုဘဒ္ဒဿ ဓမ္မံ ဒေသေတွာ တံ မဂ္ဂဖလေ ပတိဋ္ဌာပေသိ ပစ္ဆိမယာမေ ဘိက္ခု ဩဝဒိတွာ ဗလဝ ပစ္စူသ သမယေ မဟာပထဝိံ ကမ္ပေန္တော အနုပါဒိသေသာယ နိဗ္ဗာနဓာတုယာ ပရိနိဗ္ဗာယိ ပရိနိဗ္ဗုတေ ပန ဘဂဝတိ လောကနာထေ အာနဏ္ဒတ္ထေရော မလ္လရာဇုနံ တံ ပဝတ္တိံ အာရောစေတိ တေ သုတွာဝ ဂဏ္ဓမာလံ သဗ္ဗဉ္စ တာလာဝစရံ ပဉ္စ စ ဒုဿယုဂသတာနိ အာဒါယ ဂန္တွာ ဘဂဝတော သရီရံ နစ္စေဟိ - ဂီတေဟိ - ဝါဒိတေဟိ - မာလေဟိ - ဂဏ္ဓေဟိ သက္ကရောန္တာ ဂရုကရောန္တာ မာနေန္တာ - ပူဇေန္တာ စေလဝိတာနာနိ ကရောန္တာ မဏ္ဍလ မာလာနိ ပဋိယာဒေန္တာ ဧဝံ တာ ဒိဝသံ ဝီတိနာမေသုံ။

အထ ဒေဝတာနဉ္စ ကောသိနာရကာနံ မလ္လာနဉ္စ ဧတဒဟောသိ-အတိဝိကာလော ခေါ အဇ္ဇ ဘဂဝတော သရီရ ဈာပေတုံ၊ သွေဒါနိ ဘဂဝတော သရီရံ ဈပေဿာမာတိ တထာ ဒုတိယမ္ပိ ဒိဝသံ ဝီတိနာမေသုံ။ တထာ တတိယံ စတုတ္ထံ ပဉ္စမံ ဆဋ္ဌမ္ပိ ဒိဝသံ ဝီတိနာမေသုံ သတ္တ မေ ဒိဝသေ ဒေဝတာ စ ဒေါသိနာရကာ မလ္လာ စ ဘဂဝတော သရီရံ ဒိဗ္ဗေဟိ မာနုသကေဟိ စ နစ္ဆေဟိ - ဂီတေဟိ - ဝါဒိတေဟိ - မာလေဟိ - ဂဏ္ဓေဟိ သက္ကာရောန္တော ဂရုကရောန္တာ မာနေန္တာ ပူဇေန္တာ နဂရမဇ္ဈေန နီဟရိတွာ ယတ္ထ မကုဋဗဏ္ဓနံ နာမ မလ္လာနံ စေတိယံ တတ္ထ နိက္ခိပိံသု

တေန ခေါ ပန သမယေန ကုသိနာရာ ယာဝ သန္ဓိသမလ သံကဋီရာဇန္နုမတ္တေန ဩဓိနာ မဏ္ဒါရဝ ပုပ္ဖေန သတ္ထတာ ဟောတိ အထ ခေါ ကောသိနာရကာ မလ္လာ ဘဂဝတော သရီရံ စက္ကဝတ္တိဿ သရီရံ ဝိယ အဟတေန ဝတ္ထေန ဝေဌေသုံ အဟတေန ဝတ္ထေန ဝေဌေတွာ ဝိဟတေန ကပ္ပာသေန ဝေဌေသုံ ဝိဟတေန ကပ္ပာသေန ဝေဌေတွာ အဟတေန ဝတ္ထေန ဝေဌေသုံ။ ဧတေနေဝ နယေန ပဉ္စဟိယုဂသတေဟိ ဝေဌေတွာ အာယသာယ တေလဒေါဏိယာ ပက္ခိပိတွာ အညိဿာ အာယသာယ ဒေါဏိယာ ပဋိကုဇ္ဇေတွာ သဗ္ဗဂန္ဓာနံ စိတကံ ကရိတွာ ဘဂဝတော သရီရံ စိတကံ အာရောပေသုံ။ တေန ခေါ ပန သမယေန အာယသ္မာ မဟာ ကဿပေါ ပါဝါယ ကုသိနာရံ အဒ္ဓါနမဂ္ဂ ပဋိပန္နော ဟောတိ မဟတာဘိက္ခုသင်္ဃေန သဒ္ဓိံ ပဉ္စမတ္တေဟိ ဘိက္ခုသတေဟိ တေန ခေါ ပန သမယေန ထေရေ စိတ္တံ ပသာဒေတွာ သဂ္ဂေ နိဗ္ဗတ္တာ ဒေဝတာ တသ္မိံ သမာဂမေ ထေရံ အဒိသွာ ကုဟိန္နု ခေါ အမှာကံ ကုလုပဂ ထေရောတိ အာဝဇ္ဇေန္တော အန္တရာမဂ္ဂပဋိပန္နံ ဒိသွာ အမှာကံ ကုလုပဂ ထေရေ အဝဏ္ဒိတေ စိတကော မာ ပဇ္ဇလိတ္ထာတိ အဓိဋ္ဌိဟိံသု။

အထ ခေါ စတ္တာရော မလ္လပါမောက္ခာ သီသံ နဟာတာ အဟတာနိ ဝတ္ထာနိ နိစတ္ထာ ဝီ သံရတနသတိကံ စဏ္ဒနစိတကံ အာလိမ္ပေဿာမာတိ အဋ္ဌပိ သောလသပိ ဒွတ္တိံသာပိ ဇနာ ဟုတွာ ယမက ဥက္ကယော ဂဟေတွာ တာလဝဏေဋဟိ ဝိဇန္တာ ဘသ္တာနိ ဓမန္တာ န သက္ကောန္တိယေဝ အဂ္ဂိံ ဂါဟာပေတုံ။ အထ ခေါ ကောသိနာရကာ မလ္လာ စိတကဿ အပဇ္ဇလန ကာရဏံ အာယသ္မန္တံ အနုရုဒ္ဓံ ပုစ္ဆိတွံ ဒေဝတာနံ အဘိပ္ပာယံ သုတွာ မဟာကဿပေါ ကိရ ဘော ပဉ္စဟိ ဘိက္ခုသတေဟိ သဒ္ဓိံ ဒသဗလဿ ပါဒေ ဝန္ဒိဿာမီတိ အာဂစ္ဆတိ တသ္မိံ ကိရ အနာဂတေ စိတကော န ပဇ္ဇလတိ ကီဒိသော ဘောသော ဘိက္ခု ကာလော ဩဒါတော ဒီဃော ရဿော ဧဝရူပေ နာမ ဘော ဘိက္ခုမှိ ဌိတော ကိံ ဒသဗလဿ ပရိနိဗ္ဗာနံ နာမာတိ ဒေစိ ဂဏ္ဓမာလာဒိ ဟတ္ထာ ပဋိပထံ ဂစ္ဆိံသု ကေစိ ဝီထိယော ဝိစိတ္တာ ကတွာ အာဂမနမဂ္ဂံ ဩလောကယမာနာ အဋ္ဌံသု။ အထ ခေါ အာယသ္မာ မဟာကဿပေါ ယေန ကုသိနာရာ မကူဋဗဏ္ဓနံ နာမ မလ္လာနံ စေတိယံ၊ ယေန ဘဂဝတော စိတကော တေနုပသင်္ကမိ။ ဥပသင်္ကမိတွာ ဧကံသံ စီဝရံ ကတွာ တိက္ခတ္တုံ စိတကံ ပဒက္ခိဏံ ကတွာ အာဝဇ္ဇေန္တောဝ သလ္လက္ခေသိ-ဣမသ္မိံ ဌာနေ ပါဒါတိ တတေ ပါဒသမီပေ ဌတွာ အဘိညာပါဒကံ စတုတ္ထဇ္ဈာနံ သမာပဇ္ဇိတွာ ဝုဋ္ဌာယ အရသဟဿ ပတိမဏ္ဍိတာ ဒသဗလဿ ပါဒါ သဒ္ဓိံ ကပ္ပာသ ပဋလေဟိ ပဉ္စဒုဿယုဂသတာနိ သုဝဏ္ဏဒေါဏိံ ဝဏ္ဒနစိတကဉ္စ ဒွေဓာ ကတွာ မယှံ ဥတ္တမင်္ဂေ သိရသိ ပတိဋ္ဌဟန္တူတိ အဓိဋ္ဌာသိ သဟ အဓိဋ္ဌာန စိတ္တေန တာနိ ဒုဿယုဂါဒိနိ ဒွေဓာ ကတွာ ဝလာဟကန္တရာ ပုဏ္ဏစဏ္ဒေါ ဝိယ ပါဒါ နိက္ခမိံသု။

ထေရော ဝိကသိတ ရတ္တပဒုမ သဒိသေ ဟတ္ထေ ပသာရေတွာ သုဝဏ္ဏဝဏ္ဏေ သတ္ထု ပါဒေ ယာဝ ဂေါပ္ဖကာ ဗာဠှံ ဂဟေတွ အတ္တနော သိရဝရေ ပတိဋ္ဌာပေသိ မဟာဇနော တံ အစ္ဆရိယံ ဒိသွာ ဧကပ္ပဟာရေ နေဝ မဟာနာဒံ နဒိ။ ဂဏ္ဓမာလာဒီဟိ ပူဇေတွာ ယထာရုစိံ ဝဏ္ဒိ။ ဧဝ ပန ထေရေန စ မဟာဇနေန စ တေဟိ စ ပဉ္စဟိ ဘိက္ခုသတေဟိ ဝဏ္ဒိတ မတ္တေထေရဿ ဟတ္ထတော မုဉ္စိတွာ အလတ္တက ဝဏ္ဏာနိ ဘဂဝတော ပါဒတာလာနိ ဒါရုအာဒိသု ကိဉ္စိ အစာလေတွာဝ ယထာဋ္ဌာနေ ပတိဋ္ဌဟိံသု။ ဘဂဝတော ပါဒေသု နိက္ခမန္တေသု ဝါ ပဝိသန္တေသု ဝါ ကပ္ပာသအံသု ဝါ ဒသာတန္တု ဝါ တေလဗိဏ္ဒု ဝါ ဒါရုခဏ္ဍံ ဝါ ဌာနာ စလိတံ နာမ နာဟောသိ။ သဗ္ဗံ ယထာဋ္ဌာနေ ဌိတမေဝ အဟောသိ။ ဥဋ္ဌဟိတွာ ပန အတ္ထင်္ဂတေ စဏ္ဒေ ဝိယ သူရိယေ ဝိယ စ တထာဂတဿ ပါဒေသု အန္တရဟိတေသု မဟာဇနော မဟာကဏ္ဒိတံ ကဏ္ဒိ။ ပရိနိဗ္ဗုတကာလတော အဓိကတရံ ကာရုညံ အဟောသိ အထ ခေါ ဒေဝါတာနုဘာဝေန ပနေသ စိတကေ သမန္တတော ဧကပ္ပဟာရေနေဝ ပဇ္ဇလိ။ ဈာယမာနဿ ဘဂဝတော သရီရဿ ဆဝိ စမ္မ မံသာဒီနံ နေဝ ဆာရိကာမတ္တမ္ပိ အန္တမသော ပညာယိတ္ထ န မသိ၊ သုမန မကုလ သဒိသာ ပန ဓောတမုတ္တ သဒိသာ သုဝဏ္ဏသဒိသာ စ ဓာတုယော အဝသိဿိံသု။

ဒီဃာယုက ဗုဒ္ဓါနဉှိ သရီရံ သုဝဏ္ဏက္ခဏ္ဓသဒိသံ ဧကဃနမေဝ ဟောတိ။ ဘဂဝါ ပန အဟံန စိရံ ဌတွာ ဌတွာ ပရိနိဗ္ဗာယာမိ။ မယှံ သာသနံ န တာဝ သဗ္ဗတ္ထ ဝိတ္ထာရိတံ၊ တသ္မာ ပရိနိဗ္ဗုတဿပိ မေ သာသသမတ္တမ္ပိ ဓာတုံ ဂဟေတွာ အတ္တနော အတ္တနော ဝသနဋ္ဌာနေ စေတိယံ ကတွာ ပရိစရန္တော မဟာဇနော သဂ္ဂပရာယနော ဟောတိတိ ဓာတူနံ ဝိကိရဏံ အဓိဋ္ဌာသိ။ ကတိ ပနဿ ဓာတုယော ဝိပ္ပကိဏ္ဏာ၊ ကတိ န ဝိပ္ပကိဏ္ဏာတိ စတဿော ဒါဋ္ဌာ၊ ဒွေ အက္ခကာ၊ ဥဏှီသန္တိ ဣမာ သတ္တဓာတုယော န ဝိပ္ပကိဏ္ဏာ။ သေသာ ဝိပ္ပကိရိံသု။ တတ္ထ သဗ္ဗခုဒ္ဒကာ ဓာတု သာသပ ဗီဇမတ္တာ အဟောသိ မဟာဓာတု မဇ္ဈေ ဘိန္န တဏ္ဍုလမတ္တာ။ အတိမဟတီ မဇ္ဈေ ဘိန္နမုဂ္ဂ ဗီဇမတ္တာ အဟောသိ။

ဒဍ္ဎေ ခေါ ပန ဘဂဝတော သရီရေ အာကာသတော အဂ္ဂဗာဟုမတ္တာပိ ဇင်္ဃမတ္တာပိ တာလက္ခဏ္ဓမတ္တာပိ ဥဒကဓာရာ ပတိတွာ စိတကံ နိဗ္ဗာပေသိ န ကေဝလံ အာကာသတောယေဝ ပရိဝါရေတွာ ဌိတသာလရုက္ခာနမ္ပိ သာခတ္တရ ဝိဋပန္တရေဟိ ဥဒကဓာရာ နိက္ခမိတွာ နိဗ္ဗာပေသုံ၊ ဘဂဝတော စိတကော မဟန္တော၊ သမန္တာ ပထဝိံ ဘိဏ္ဒိတွာ တံင်္ဂလသီသမတ္တာ ဥဒကဝဋ္ဋိ ဧဠိက ဝဋံသက သဒိသာ ဂန္တွာ စိတကမေဝ ဂဏှိ မလ္လရာဇာနော စ သုဝဏ္ဏဃဋေ ရဇတဃဋေ စ ပူရေတွာ အာဘတ နာနာဂဏ္ဓောဒကေန သုဝဏ္ဏ ရဇတမယေဟိ အဋ္ဌဒန္တကေဟိ ဝိကိရိတွာ စဏ္ဒနစိတကံ နိဗ္ဗာပေသုံ။ တတ္ထ စိတကေ ဈယမာနေ ပရိဝါရေတွာ ဌိတ သာလရုက္ခာနံ သာခန္တရေဟိ ဝိဋပန္တရေဟိ ပတ္တန္တရေဟိ စ ဇာလေ ဥဂ္ဂစ္ဆန္တေ ပတ္တံ ဝါ သာခါ ဝါ ဒဍ္ဎာ နာမ နတ္ထိ ကိပိလ္လိကာပိ မက္ကဋကာပိ ပါဏကာပိ ဇာလာနံ အန္တရေ နေဝ ဝိစရန္တိ။

အာကာသတော ပတိတ ဥဒကဓာရာသုပိ သာလရုက္ခေဟိ နိက္ခန္တ္ौဒကဓာရာသုပိ ပထဝိံ ဘိဏ္ဒိတွာ နိက္ခန္တ ဥဒကဓာရာသုပိ ဓမ္မတာဝ ပမာဏံ ဧဝံ စိတကံ နိဗ္ဗာပေတွာ ပန မလ္လရာဇာနော သန္ထာဂါရေ စတုဇာတိဂဏ္ဓ ပရိဘဏ္ဍံ ကာရေတွာ လာဇ ပဉ္စမာနိ ပုပ္ဖာနိ ဝိကိရိတွာ ဥပရိ စေလဝိတာနံ ဗဏ္ဓာပေတွာ သုဝဏ္ဏတာရကာဟိ ခစေတွာ တတ္ထ ဂဏ္ဓဒါမ မာလာဒါမ ရတနဒါမာနိ ဩလမ္ဗေတွာ သတ္ထာဂါရတော ယာဝ မကုဋ ဗဏ္ဓန သင်္ခါတာ သီသပ္ပသာဓန မင်္ဂလသာလာ တာဝ ဥဘောဟိ ပဿေဟိ သာဏိကိလဉ္ဇ ပရိက္ခေပံ ကာရေတွာ ဥပရိ စေလဝိတာနံ ဗဏ္ဓာပေတွာ သုဝဏ္ဏတာရကာဟိ ခစေတွာ တတ္ထာပိ ဂဏ္ဓဒါမ မာလာဒါမ ရတနဒါမာနိ ဩလမ္ဗေတွာ မဏိဒဏ္ဍေဟိ ပဉ္စဝဏ္ဏဓဇေ ဥဿပေတွာ သမန္တာ ဓဇပတာကာ ပိရိက္ခိပိတွာ သိတ္တသမ္မဋ္ဌာသု ဝီထိသု ကဒလိယော ပုဏ္ဏဃဋေ စ ဌပေတွာ ဒဏ္ဍဒီပိကာ ဇာလေတွာ အလင်္ကတ ဟတ္ထိက္ခဏ္ဓေ သဟဓာတူဟိ သုဝဏ္ဏဒေါဏိံ ဌပေတွာ မာလာဂဏ္ဓာဒီဟိ ပူဇေတွာ သာဓုကီဠံ ကီဠန္တာ အန္တောနဂရံ ပဝေသေတွာ သန္ထာဂါရေ သရဘမယ ပလ္လင်္ကေ ဌပေတွာ ဥပရိ သေတစ္ဆတ္တံ ဓာရယိတွာ သတ္တိ ဟတ္ထေဟိ ပုရိသေဟိ ပရိက္ခိပါပေတွာ ဟတ္ထီဟိ ကုမ္ဘေန ကုမ္ဘံ ပဟရန္တေဟိ ပရိက္ခိပါပေတွာ တတော အဿေဟိ ဂီဝါယ ဂီဝံ ပဟရန္တေဟိ တတော ရထေဟိ အာဏိကောဋိယာ အာဏိကောဋိံ ပဟန္တေဟိ တတော ယောဓေဟိ ဗာဟူဟိ ဗာဟုံ ပဟရန္တေဟိ တေသံ ပရိယန္တေ ကောဋိယာ ကောဋိံ ပဟရမာနေဟိ ဓနူဟိ ပရိက္ခိပါပေသုံ။

ဣတိ သမန္တာ ယောဇနပ္ပမာဏံ ဌာနံ သန္နာဟဂစ္ဆိတံ ဝိယ ကတွာ အာရက္ခံ သံဝိဒဟိံသု။ ကသ္မာ ပနေတေ ဧဝမကံသူတိ။ ဣတော ပုရိမေသု ဒွီသု သတ္တာဟေသု တေ ဘိက္ခုသင်္ဃဿ ဌာနနိသဇ္ဇောကာသံ ကရောန္တာ ခါဒနီယ ဘောဇနီယံ သံဝိဒဟန္တာ သာဓုကီဠာယ ဩကာသံ န လဘိံသု တတော တေသံ အဟောသိ - ဣမံ သတ္တာဟံ သာဓုကီဠံ ကီဠိဿာမ။ ဌာနံ ခေါ ပနေတံ ဝိဇ္ဇတိ ယံ အမှာကံ ပမတ္တဘာဝံ ဉတွာ ကောစီဒေဝ အာဂန္တွာ ဓာတုယော ဂဏှယျ-တသ္မာ အာရက္ခံ ဌပေတွာ ကီဠိဿာမာတိ တေန တေ ဧဝမကံသု။

အထ ခေါ အဿောသိ ခေါ ရာဇာ မာဂဓော အဇာတသတ္တု ဘဂဝါ ကိရ ကုသိနာရာယံ ပရိနိဗ္ဗုတောတိ ကထံ အဿောသိ ပဌမမေဝဿ အမစ္စာ သုတွာ စိန္တယိံသု? သတ္ထာ နာမ ပရိနိဗ္ဗုတော၊ န သော သက္ကာ ပုန အာဟရိံတု ပေါထုဇ္ဇနိက သဒ္ဓါယ ပန အမှာကံ ရညာ သဒိသော နတ္ထိ။ သစေ ဧသ ဣမိနာဝ နိယာမေန သုဏိဿတိ၊ ဟဒယမဿ ဧဠိဿတိ ရာဇာ ခေါ ပနမ္ဘေဟိ အနုရက္ခိတဗ္ဗောတိ တေ တိဿော သုဝဏ္ဏဒေါဏိယော အာဟရိတွာ စတုမဓုရဿ ပူရေတွာ ရညော သန္တိကံ ဂန္တွာ ဧတဒဝေါစုံ။ ဒွေ အမှေဟိ သုပိနကော ဒိဋ္ဌော တဿ ပဋိဃာတတ္ထံ တုမှေဟိ ဒုကူလပဋ္ဋံ နိဝါသေတွာ ယထာ နာသာပုဋမတ္တံ ပညာယတိ ဧဝံ စတုမဓုရဒေါဏိယံ နိပဇ္ဇိတုံ ဝဋ္ဋတီတိ။ ရာဇာ အတ္ထဝရကာနံ ဝစနံ သုတွာ ဧဝံ ဟောတု တာတာ’တိ သမ္ပဋိစ္ဆိတွာ တထာ အကာသိ။

အထေကော အမစ္စော အလင်္ကာရံ ဩမုဉ္စိတွာ ကေသေ ပရိကိရိယ ယာယ ဒိသာယ သတ္ထာ ပရိနိဗ္ဗုတော တဒဘိမုခေါ ဟုတွာ အဉ္ဇလိမ္ပဂ္ဂယှ ရာဇာနံ အာဟ- ဒေဝမရဏတော မုဉ္စနကသတ္တော နာမ နတ္ထိ။ အမှာကံ အာယုဝဒ္ဓကေနာ စေတိယဋ္ဌာနံ ပုညက္ခေတ္တံ အဘိသေကပိဋ္ဌိကာ ဘဂဝါ သတ္ထာ ကုသိနာရာယံ ပရိနိဗ္ဗုတောတိ ရာဇာ သုတွာ ဝိသညီ ဇာတော စတုမဓုရဒေါဏိ ဥသုမံ မုဉ္စိ ရာဇာနံ ဥက္ခိပိတွာ ဒုတိယာယ ဒေါဏိယာ နိပဇ္ဇာပေသုံ သော သညံ လဘိတွာ တာတ ကိံ ဝဒထာတိ ပုစ္ဆိ။ သတ္ထာ မဟာရာဇ ပရိနိဗ္ဗုတောတိ၊ ပုန ဝိသညိ ဇာတော စတုမဓုရဒေါဏိံ ဥသုမံ မုဉ္စိ။ အထ နံ တတောပိ ဥက္ခိပိတွာ တတိယာယ ဒေါဏိယာ နိပဇ္ဇာပေသုံ သော ပုန သညံ ပဋိလဘိတွာ တာတ ကိံ ဝဒထာတိ ပုစ္ဆိ သတ္ထာ မဟာရာဇ ပရိနိဗ္ဗုတောတိ။ ရာဇာ ပုန ဝိသညီ ဇာတော စ မဓုရဒေါဏိ ဥသုမံ မုဉ္စိ။

အထ နံ တတောပိ ဥက္ခိပိတွာ နဟာပေတွာ မတ္ထကေ ဃဋေဟိ ဥဒကံ အာသိဉ္စိံသု ရာဇာ သညံ ပဋိလဘိတွာ အာသနာ ဥဋ္ဌာယ ဂဏ္ဓပရိဘာဝီတေ မဏိဝဏ္ဏကေသေ သုဝဏ္ဏဖလက ဝဏ္ဏာယ ပိဋ္ဌိယံ ပကိရိတွာ ပဝါဠင်္ဂုရဝဏ္ဏာဟိ သုဝဋ္ဋိတင်္ဂုလီဟိ သုဝဏ္ဏဗိမ္ဗက ဝဏ္ဏံ ဥရံ သံသိဗ္ဗန္တော ဝိယ ဂဟေတွာ ပရိဒေဝမာနော ဥမ္မတ္တကဝေသေနေဝ အန္တရဝီထိံ ဩတိဏ္ဏော သော အလင်္ကတ နာဋက ပရိဝုတော နဂရာ နိက္ခမ္မ ဇီဝကမ္ဗဝနံ ဂန္တွာ ယသ္မိံ ဌာနေ နိသိန္နေန ဘဂဝတာ ဓမ္မော ဒေသိတော တံ ဩလောကေတွာ ဘဂဝါ သဗ္ဗညု နနု မေ ဣမသ္မိံ ဌာနေ နိသီဒိတွာ ဓမ္မံ ဒေသယိတ္ထ တုမှေ သောကသလ္လံ ဝိနောဒယိတ္ထ။ တုမှေ မယှံ သောကသလ္လံ နီဟရိတ္ထ။ အဟံ တုမှာကံ သရဏံ ဂတော။ ဣဒါနိ ပန မေ ပဋိဝစနမ္ပိ န ဒေထ ဘဂဝါတိ ပုနပ္ပုန ပရိဒေဝိတွာ နနု ဘဂဝါ အဟံ အညဒါ ဧဝရူပေ ကာလေ တုဋ္ဌေ မဟာဘိက္ခုသင်္ဃပရိဝါရာ ဇမ္ဗုဒီပတလေ စာရိကံ စရထာတိ သုဏာမ ဣဒါနိ ပန အဟံ တုမှာကံ အနနုရူပံ အယုတ္တံ ပဝတ္တိံ သုဏာမီတိ ဧဝမာဒီနိ စ ဝတ္တာ သဋ္ဌိမတ္တာဟိ ဂါထာဟိ ဘဂဝတော ဂုဏံ အနုဿရိတွာ စိန္တေသိ မမ ပရိဒေဝိတေ နေဝ န သိဇ္ဈတိ။ ဒသဗလဿ ဓာတုယော အာဟရာပေဿာမိတိ မလ္လရာဇုနံ ဒူတဉ္စ ပဏ္ဏဉ္စ ပါဟေသိ။

ဘဂဝါပိ ခတ္တိယော၊ အဟမ္ပိ ခတ္တိယော၊ အဟမ္ပိ အရဟာမိ ဘဂဝတော သရီရာနံ ထူပဉ္စ မဟဉ္စ ကာရေတုန္တိ ပေသေတွာ ပန သစေ ဒဿန္တိ သုဏ္ဒရံ၊ နော စေ ဒဿန္တိ အာဟရဏုပါယေန အာဟရိဿာမီတိ စတုရင်္ဂိနိံ သေနံ သန္နယှိတွာ သယမ္ပိ နိက္ခန္တောယေဝ ယထာ စ အဇာတသတ္တု ဧဝံ ဝေသာလိယံ လိစ္ဆဝိရာဇာနော ကပိလဝတ္ထုမှိ သကျရာဇာနော အလ္လကပ္ပကေ ဗုလယော ရာမဂါမကေ ကောဠိယာ ဝေဌဒီပကေ ဗြာဟ္မဏော ပါဝါယဉ္စ မလ္လာ ဒူတံ ပေသေတွာ သယမ္ပိ စတုရင်္ဂိနိယာ သေနာယ နိက္ခမိံသုယေဝ တတ္ထ ပါစေယျကာ သဗ္ဗေဟိ အာသန္နတရာ ကုသိနာရာတော တိဂါဝုတန္တရေ နဂရေ ဝသန္တိ။ ဘဂဝါပိ ပါဝံ ပဝိသိတွာ ကုသိနာရံ ဂတော။ မဟာပရိဟာရာ ပနေတေ ရာဇာနော ပရိဟာရာ ကာရေံန္တာဝ ပစ္ဆတော ဇာတာ။ တေ သဗ္ဗေပိ သတ္တနဂရဝါသိနော အာဂတ္တွာ အမှာကံ ဓာတုယော ဝါ ဒေန္တု ယုဒ္ဓံ ဝါတိ ကုသိနာရာ နဂရံ ပရိဝါရယိံသု။

တတော မလ္လရာဇာနောဧတဒဝေါစုံ-ဘဂဝါအမှာကံဂါမက္ခေတ္တေ ပရိနိဗ္ဗုတော၊ န မယံ သတ္ထု သာသနံ ပဟိဏိမှ န ဂတ္တွာ အာနယိမှ။ သတ္ထာ ပသ သယမေဝ အာဂန္တွာ သာသနံ ပေသေတွာ အမှေ ပက္ကောသပေသိ တုမှေပိ ခေါ ပန ယံ တုမှာကံ ဂါမက္ခေတ္တေ ရတနံ ဥပ္ပဇ္ဇတိ န တံ အမှာကံ ဒေထ သဒေဝကေ လောကေ ဗုဒ္ဓရတနသမံ ရတနံ နာမ နတ္ထိ၊ ဧဝရူပံ။ ဥတ္တမံ ရတနံ လဘိတွာ မယံ န ဒဿမာတိ ဧဝံ တေ ကလဟံ ဝဍ္ဎေတွာ န ခေါ ပန တုမှေဟိယေဝ မာတု ထနတော ခိရံ ပီတံ၊ အမှေဟိပိ ပီတံ တုမှေယေဝ ပုရိသာ အမှေ န ပုရိသာ ဟောတု ဟောတူတိ အညမညံ အဟံကာရံ ကတွာ သာသန ပဋိသာသနံ ပေသေန္တာ အညမညံ မာနဂဇ္ဇိတံ ဂဇ္ဇိံသု ယုဒ္ဓေ ပန သတိ ကောသိနာရကာနံယေဝ ဇယော အဘဝိဿ၊ ကသ္မာ ဓာတုပါသနတ္ထံ အာဂတာ ဒေဝတာ တေသံ ပက္ခာအဟေသုံ။

တတော ဒေါဏော ဗြာဟ္မဏော ဣမံ ဝိဝါဒံ သုတွာ ဧတေ ရာဇာနော ဘဂဝတေ ပရိနိဗ္ဗုတဋ္ဌာနေ ဝိဝိဒံ ကရောန္တိ န ခေါ ပနေတံ ပတိရူပံ အလံ ဣမိနာ ကလဟေန စူပသမေဿာမိ န န္တိ ဥဏ္ဏတပ္ပဒေသေ ဌတွာ ဒွေဘာဏဝါရပရိမာဏံ ဒေါဏဂဇ္ဇိတံ နာမ အဝေါစ တတ္ထ ပဋ္ဌမကဘာဏဝါရေ တာဝ ဧကပဒမ္ပိ တေ န ဇာနိံသု ဒုတိယက ဘာဏဝါရ ပရိယောသာနေ’အာစရိယဿ ဝိယ ဘောသဒ္ဒေါ၊ အာစရိယဿ ဝိယ ဘော သဒ္ဒေါ’တိ သဗ္ဗေ နီ ရဝါ အဟေသုံ သကလဇမ္ဗုဒီပတလေ ကိရ ကုလဃရေ ဇာတော ယေဘုယျေန တဿ န အန္တေဝါသိကော နာမ နတ္ထိ အထ သော တေ အတ္တနော ဝစနံ သုတွာ တုဏှီဘူတေ ဝိဒိတွာ ပုန ဧတဒဝေါစ

‘‘သုဏန္တု ဘောန္တော မမ ဧကဝါကျံ

အမှာကံ ဗုဒ္ဓါ အဟု ခန္တိဝါဒေါ၊

န ဟိ သာဓယံ ဥတ္တမ ပုဂ္ဂလဿ

သရီရဘင်္ဂေ သိယာ သမ္ပဟာရော

သဗ္ဗေဝ ဘောန္တော သဟိတာ သမဂ္ဂါ

သမ္မောဒမာနာ ကရောမဋ္ဌဘာဂေ၊

ဝိတ္ထာရိကာ ဟောန္တု ဒိသာယု ထူပါ

ဗဟုဇ္ဇနော စက္ခုမတော ပသန္နော’’တိ၊

တတြာယမတ္ထော ‘‘အမှာကံ ဗုဒ္ဓါ အဟု ခန္တိဝါဒေါ‘‘တိ ဗုဒ္ဓဘူမိံ အပ္ပတွာပိ ပါရမိယော ပူရေန္တော ခန္တိဝါဒ တာပသကာလေ ဓမ္မပါလကုမာရ ကာလေ ဆဒ္ဒန္တဟတ္ထိကာလေ ဘူရိဒတ္တ နာဂရာဇ ကာလေ စမ္ပေယျ နာဂရာဇ ကာလေ သင်္ခပါလ နာဂရာဇ ကာလေ မဟာကပိကာလေ အညေသုပိ ဗဟူသု ဇာတကေသု ပရေသု ကောပံ အကတွာ ခန္တိမေဝ အကာသိ။ ခန္တိမေဝ ဝဏ္ဏယိ၊ ကိမင်္ဂ ပန ဧတရဟိ ဣဋ္ဌာနိဋ္ဌေသု တာဒိလက္ခဏံ ပတ္တော သဗ္ဗထာပိ အမှာကံ ဗုဒ္ဓါ ခန္တိဝါဒေါ အဟောသိ။

တဿ ဧဝံ ဝိဓဿ န ဟိ သာဓယ ဥတ္တမပုဂ္ဂလဿ သရီရဘင်္ဂေ သိယာ သမ္ပဟာရော၊ ‘‘န ဟိ သာဓယန္တိ‘‘န ဟိ သာဓု အယံ၊ ‘‘သရီရဘင်္ဂေတိ သရီရ ဘင်္ဂနိမိတ္တံ ဓာတုကောဋ္ဌာသဟေတူတိ အတ္ထော ‘‘သိယာ သမ္ပဟာရော‘‘တိ အာယုဓ သမ္ပဟာရော န ဟိ သာဓု သိယာတိ ဝုတ္တံ ဟောတိ။ ‘‘သဗ္ဗေဝ ဘောန္တော သဟိတာ‘‘တိ သဗ္ဗေဝ ဘဝန္တော သဟိတာ ဘောထ မာ ဘိဇ္ဇိတ္ထ။ ‘‘သမဂ္ဂါတိ‘‘ ကာယေန ဝါစာယ စ ဧကသန္နိပါတာ ဧကဝစနာ သမဂ္ဂါ ဘောထ ‘‘သမ္မောဒမာနာ‘‘တိ စိတ္တေနာပိ အညမညံ မောဒမာနာ ဘောထ။’ကရောမဋ္ဌဘာဂေ‘‘တိ ဘဂဝတာ သရီရာနိ အဋ္ဌဘာဂေ ကရောမ။ ‘‘စက္ခုမတော‘‘တိ ပဉ္စဟိ စက္ခုဟီ စက္ခုတာ ဗုဒ္ဓဿ၊ န ကေဝလံ တုမှေယေဝ ဗဟုဇ္ဇနော ပသန္နော တေသု ဧကောပိ လဒ္ဓု အယုတ္တော နာမ နတ္ထိတိ ဗဟုံ ကာရဏံ ဝတွာ သညာပေသိ။

အထ သဗ္ဗေပိ ရာဇာနော ဧဝမာဟံသု-တေန ဟိ ဗြာဟ္မဏ တွညေဝ ဘဂဝတော သရီရာနိ အဋ္ဌဓာ သမံ သုဝိဘတ္တံ ဝိဘဇာဟီတိ။ ဧဝံ ဘောတိ ခေါ ဒေါဏော ဗြာဟ္မဏော တေသံ ရာဇူနံ ပဋိဿုတွာ ဓာတုယော သမံ သုဝိဘတ္တံ ဝိဘဇိ။

တတြာယမနုက္ကမော ဒေါဏော ကိရ တေသံ ပဋိဿုတွာ သုဝဏ္ဏဒေါဏိံ ဝိဝရာပေသိ။ ရာဇာနော အာဂန္တွာ ဒေါဏိယံ ယေဝတာ သုဝဏ္ဏဝဏ္ဏာ ဓာတုယော ဒိသွာ ဘဂဝါ သဗ္ဗညု ပုဗ္ဗေ မယံ တုမှာကံ ဒွတ္တိံသ လက္ခဏ ပတိမဏ္ဍိတံ ဆဗ္ဗဏ္ဏဗုဒ္ဓရသ္မိခစိတံ သုဝဏ္ဏဝဏ္ဏံ သရီရံ အဒ္ဒသာမ ဣဒါနိ ပန သုဝဏ္ဏဝဏ္ဏာ ဓာတုယောဝ အဝသိဋ္ဌာ ဇာတာ၊ န ယုတ္တမိဒံ ဘဂဝါ တုမှာကန္တိ ပရိဒေဝိံသု။ ဗြာဟ္မဏော တသ္မိံ သမယေ တေသံ ပမတ္တဘာဝံ ဉတွာ ဒက္ခိဏဒါဌံ ဂဟေတွာ ဝေဌန္တရေ ဌပေသိ အထ ပစ္ဆာ သမံ သုဝိဘတ္တံ ဝိဘဇိ။ သဗ္ဗာပိ ဓာတုယော ပါကတိက နာဠိယာ သောဠသ နာဠိယော အဟောသုံ။ ဧကေက နဂရဝါသိနော ဒွေ ဒွေ နာဠိယော လဘိံသု။

ဗြာဟ္မဏဿ ပန ဓာတုယော ဝိဘဇန္တဿေဝ သက္ကော ဒေဝါနမိန္ဒော ကေန နု ခေါ သဒေဝကဿ လောကဿ ကင်္ခါစ္ဆေဒနာယ စတုသစ္စကထာယ ပစ္စယဘူတာ ဘဂဝတော ဒက္ခိဏဒါဌာ ဂဟိတာတိ ဩလောကေန္တော ဗြာဟ္မဏေန ဂဟိတာတိ ဒိသွာ ဗြာဟ္မဏော ဒါဌာယ အနုစ္ဆဝိကံ သက္ကာရံ ကာတုံ န သက္ခိဿတိ ဂဏှာမိ နန္တိ ဝေဌန္တရတော ဂဟေတွာ သုဝဏ္ဏ စင်္ဂေါဋကေ ဌပေတွာ ဒေဝလောကံ နေတွာ စုဠာမဏီ စေတိယေ ပတိဋ္ဌာပေသိ ဗြာဟ္မဏောပိ ဓာတုယော ဝိဘဇိတွာ ဒါဌံ အပဿန္တော ကေန မေ ဌာ ဂဟိတာတိ ပုစ္ဆိတုမ္ပိ နာသက္ခိ။ နနု တယာ ဓာတုယော ဝိဘဇိတာ၊ ကိံ တွံ ပဌမံယေဝ အတ္တနော ဓာတူဟိ အတ္ထိဘာဝံ န အညာသီတိ၊ အတ္တနိ ဒေါသာရောပနံ သမ္ပဿမာနော မယှမ္ပိ ကောဋ္ဌာသံ ဒေထာတိ ဝတ္တုမ္ပိ နာသက္ခိ။

တတော အယံ သုဝဏ္ဏကုမ္ဘောပိ ဓာတုဂတိကောယေဝ ယေန တထာဂတဿ ဓာတုယော မိနိတာ။ ဣမဿာဟံ ထူပံ ကရိဿာမီတိ စိန္တေတွာ ဣမံ မေ ဘောန္တော ကုမ္ဘံ ဒဒန္တူတိ အာဟ တတော ရာဇာနော ဗြာဟ္မဏဿ ကုမ္ဘမဒံသု ပိပ္ဖလိဝနိယာပိ ခေါ မောရိယာ ဘဂဝတော ပရိနိဗ္ဗုတဘာဝံ သုတွာ ဘဂဝါပိ ခတ္တိယော၊ မယမ္ပိ ခတ္တိယော မယမ္ပိ၊ အရဟာမ လဘိတုံ ဘဂဝတော သရီရာနံ ဘာဂန္တိ ဒူတံ ပေသေတွာ ယုဒ္ဓ သဇ္ဇာ နိက္ခမိတွာ အာဂတာ တေသံ ရာဇာနော ဧဝမာဟံသု - နတ္ထိ ဘဂဝတော သရီရာနံ ဘာဂေါ၊ ဝိဘတ္တာနိ ဘဂဝတော သရီရာနိ ဣတော အင်္ဂါရံ ဂရထာတိ။ တေ တတော အင်္ဂါရံ ဟရိံသု။

အထ ခေါ ရာဇာ အဇာတသတ္တု ကုသိနာရာယ စ ရာဇဂဟဿ စ အန္တရေ ပဉ္စဝီသတိ ယောဇနမဂ္ဂံ အဋ္ဌ ဥသဘဝိတ္ထတံ သမတလံ ကာရေတွာ သာဒိသံ မလ္လရာဇာနော မကုဋဗဏ္ဓနဿ စ သန္ထာဂါရဿ စ အန္တရေ ပူဇံ ကာရေသုံ တာဒိသံ ပဉ္စဝီသတိယောဇနေပိ မဂ္ဂေ ပူဇာ ကာရေတွာ လောကဿ အနုက္ကဏ္ဌနတ္ထံ သဗ္ဗတ္ထ အန္တရာပဏေ ပသာရေတွာ သုဝဏ္ဏဒေါဏိယံ ပက္ခိတ္တဓာတုယော သတ္တိပဉ္ဇရေန ပရိက္ခိပါပေတွာ အတ္တနော ဝိဇိတေ ပဉ္စယောဇနသတ ပရိမဏ္ဍလေ မနုဿေ သန္နိပါတာပေသိ။

တေ ဓာတုယော ဂဟေတွာ ကုသိနာရာတော ဓာတုကီဠံ ကီဠန္တာ နိက္ခမိတွာ ယတ္ထ ယတ္ထ ဝဏ္ဏဝန္တာနိ ပုပ္ဖာနိ ပဿန္တိ၊ တတ္ထ တတ္ထ ဓာတုယော သတ္တိ အန္တရေ ဌပေတွာ တေသံ ပုပ္ဖာနံ ခီဏကာလေ ဂစ္ဆန္တိ။ ရထဿ ဓုရဋ္ဌာနံ ပစ္ဆိမဋ္ဌာနေ သမ္ပတ္တေ သတ္တ ဒိဝသေ သာဓုကီဠံ ကီဠန္တိ ဧဝံ ဓာတုယော ဂဟေတွာ အာဂစ္ဆန္တာနံ သတ္တဝဿာနိ သတ္တမာသာနိ သတ္တ စ ဒိဝသာနိ ဝိတိဝတ္တာနိ မိစ္ဆာဒိဋ္ဌိကာ သမဏဿ ဂေါတမဿ ပရိနိဗ္ဗုတ ကာလတော ပဋ္ဌာယ ဗလက္ကာရေန သာဓုကီဠိကာယ ဥပဒ္ဒုတမှာ၊ သဗ္ဗေ နော ကမ္မန္တာ နဋ္ဌာတိ ဥဇ္ဈာယန္တာ မနံ ပဒူသေတွာ ဆဠာသီတိသဟဿမတ္တာ အပါယေ နိဗ္ဗတ္တာ၊ ခီဏာသဝ အာဝဇ္ဇိတွာ မဟာဇနော မနံ ပဒူသေတွာ အပါယေ နိဗ္ဗတ္တောတိ သက္ကံ ဒေဝရာဇာနံ ဒိသွာ ဓာတု အာဟရဏုပါယံ ကရိဿာမာတိ တဿ သန္တိကံ ဂန္တွာ တမတ္ထံ အာရောစေတွာ ဓာတု အာဟရဏုပါယံ ကာရောဟိ မဟာရာဇာတိ အာဟံသု။ သက္ကော အာဟ ‘‘ပုထုဇ္ဇနော နာမ အဇာတသတ္တုနာ သမော သဒ္ဓါ နတ္ထိ၊ န သော မမ ဝစနံ ကရိဿတိ အပိ စ ခေါ မာရဝိဘိသကသဒိသံ ဝိဘီသကံ ဒဿေဿာမိ ယက္ခ ဂါဟက ခိပနက အရောစကေ ကရိဿာမိ တုမှေ ’မဟာရာဇ အမနုဿာ ကုပိတာ၊ ဓာတုယော အာဟရာပေထာတိ’။ ဝဒေယျာထ ဧဝံ သော အာဟရာပေဿတီတိ။ အထ ခေါ သက္ကော တံ သဗ္ဗံ အကာသိ။

ထေရာပိ ရာဇာနံ ဥပသင်္ကမိတွာ မဟာရာဇ အမနုဿာ ကုပိတံ၊ ဓာတုယော အာဟရာပေဟီတိ ဘဏိံသု ရာဇာ န တာဝ ဘန္တေ မယှံ စိတ္တံ တုဿတိ။ ဧဝံ သန္တေပိ အာဟရတူတိ အာဟ သတ္တမေ ဒိဝသေ ဓာတုယော အာဟရိံသု။ ဧဝံ အာဟတဓာတုယော ဂဟေတွာ ရာဇာ ရာဇဂဟေ ထုပမကာသိ ဣတရေပိ ရာဇာနော အတ္တနော အတ္တနော ဗလာနုရူပေန နီဟရိတွာ သကသကဋ္ဌာနေ ထူပမကံသု။ ဒေါဏိပိ ဗြာဟ္မဏော ပိဖ္ဖလီဝနိယာပိ မောရိယာ သကသကဋ္ဌာနေ ထူပမကံသူတိ။

ဧကော ထူပေါ ရာဇဂဟေ - ဧကော ဝေသာလိယာ ပုရေ၊

ဧကော ကပိလဝတ္ထုသ္မိံ - ဧကော စ အလ္လကပ္ပကေ၊

ဧကော ထူပေါ ရာမဂါမေ - ဧကော စ ဝေဌဒီပကေ၊

ဧကော ပါစေယျကေ မလ္လေ - ဧကော စ ကုသိနာရကေ၊

ယေ တေ သာရီရိကာ ထူပါ - ဇမ္ဗုဝဒီပေ ပတိဋ္ဌိတာ၊

အင်္ဂါရကုမ္ဘထူပေဟိ - ဒသ ထူပါ ဘဝန္တိ တေ၊

ဒသာပိ ထူပါ ပုရိသုတ္တမဿ ယေ-

ယထာနုရူပံ နရရာဇ ပူဇိတာ၊

သဗ္ဗေန လောကေန သဒေဝကေန တေ-

နမဿနေယျာစ ဘဝန္တိ သဗ္ဗဒါတိ၊

ဒသထူပကထာ

၁၀။ ဧဝံ ပတိဋ္ဌိတေသု ပန ထူပေသု မဟာကဿပတ္ထေရော ဓာတူနံ အန္တရာယံ ဒိသွာ အဇာတသတ္တုံ ဥပသင်္ကမိတွာ မဟာရာဇ ဧကံ ဓာတုနိဓာနံ ကာတုံ ဝဋ္ဋတိတိ အာဟ သာဓု ဘန္တေ နိဓာနကမ္မံ တာဝ မမ ဟောတု၊ ဓာတုယော ပန ကထံ အာဟရာပေမိတိ။ န မဟာရာဇ ဓာတု အာဟရဏံ တုယှံ ဘာရော၊ အမှာကံ ဘာရောတိ။ သာဓု ဘန္တေ တုမှေ ဓာတုယော အာဟရထ။ အဟံ ဓာတုနိဓာနံ ကရိဿာမီတိ။ ထေရော တေသံ တေသံ ရာဇကုလာနံ ပရိစရဏမတ္တကမေဝ ဌပေတွာ သေသေဓာတုယော အာဟရိ။

ရာမဂါမေ ပန ဓာတုယော နာဂါ ဂဏှိံသု တာသံ အန္တရာယော နတ္ထိ၊ အနာဂတေ လင်္ကာဒီပေ မဟာဝိဟာရေ မဟာစေတိယမှိ နိဓိယိဿ နီတိ။ တာ န အာဟရိတ္ထ၊ သေသေဟိ သတ္တဟိ နဂရေဟိ အာဟရိတွာ ရာဇဂဟဿ ပါစီန ဒက္ခိန ဒိသာဘာဂေ ဌပေတွာ ဣမသ္မိံ ဌာနေ ယော ပါသာဏော အတ္ထိ၊ သော အန္တရဓာယတု၊ ပံသု သုဝိသုဒ္ဓါ ဟောတု၊ ဥဒကဉ္စ မာ ဥဋ္ဌဟတူတိ အဓိဋ္ဌာသိ။

ရာဇာ တံ ဌာနံ ခဏာပေတွာ တတော ဥဒ္ဓဋ ပံသုနာ ဣဋ္ဌိကာ ကာရေတွာ အသီတိ မဟာသာဝကာနံ ထူပေ ကာရေတိ ဣဓ ရာဇာ ကိံ ကာရေဟီတိ ပုစ္ဆန္တာနမ္ပိ မဟာသာဝကာနံစေတိယာ နီတိ ဝဒန္တိ န ကောစိ ဓာတုနိဓာနဘာဝံ ဇာနာတိ အသီတိဟတ္ထဂမ္ဘီရေ ပန တသ္မိံ ပဒေသေ ဇာတေ ဟေဋ္ဌာ လောဘသတ္ထရံ သတ္ထရာပေတွာ တတ္ထ ထူပါရာမေ စေတိယ ဃရပ္ပမာဏံ တမ္ဗလောဟမယံ ဂေဟံ ကာရာပေတွာ အဋ္ဌဋ္ဌ ဟရိ စဏ္ဒနာဒိမယေ ကရဏ္ဍေ စ ထူပေ စ ကာရာပေသိ။

အထ ခေါ ဘဂဝတော ဓာတုယော ဟရိစဏ္ဒန ကရဏ္ဍေ ပက္ခိပိတွာ တံ ဟရိစဏ္ဒနံ ကရဏ္ဍံ အညသ္မိံ ဟရိစဏ္ဒန ကရဏ္ဍေ တမ္ပိ အညသ္မိန္တိ ဧဝံ အဋ္ဌ ဟရိစဏ္ဒန ကရဏ္ဍေ ဧကတော ကတွာ ဧတေနေဝ ဥပါယေန အဋ္ဌ ကရဏ္ဍေ အဋ္ဌသု ဟရိစဏ္ဒန ထူပေသု အဋ္ဌ ဟရိစဏ္ဒနထူပေ အဋ္ဌသု လောဟိတစဏ္ဒန ကရဏ္ဍေသု၊ အဋ္ဌ လောဟိတစဏ္ဒနကရဏ္ဍေ အဋ္ဌသု လောဟိတစဏ္ဒနထူပေသု၊ အဋ္ဌလောဟိတ စဏ္ဒနထူပေ အဋ္ဌသု ဒန္တကရဏ္ဍေသု၊ အဋ္ဌ ဒန္တကရဏ္ဍေ အဋ္ဌသု ဒန္တထူပေသု၊ အဋ္ဌဒန္တထူပေ အဋ္ဌသုသဗ္ဗ ရတနကရဏ္ဍေသု၊ အဋ္ဌ သဗ္ဗ ရတနကရဏ္ဍေ အဋ္ဌသု သဗ္ဗရတနထူပေသု၊ အဋ္ဌ သဗ္ဗရတန ထူပေ အဋ္ဌသု သုဝဏ္ဏကရဏ္ဍေသု။ အဋ္ဌသုဝဏ္ဏကရဏ္ဍေ အဋ္ဌသု သုဝဏ္ဏထူပေသု၊ အဋ္ဌသုဝဏ္ဏထူပေ အဋ္ဌသုရဇတကရဏ္ဍေသု၊ အဋ္ဌ ရဇတကရဏ္ဍေ အဋ္ဌသု ရဇတထူပေသေ အဋ္ဌ ရဇတထူပေ အဋ္ဌသု မဏိကရဏ္ဍေသု အဋ္ဌမဏိကရေဏ္ဍအဋ္ဌသုဝဏ္ဏထူပေသု၊ အဋ္ဌ မဏိထူပေ အဋ္ဌသု လောဟိတင်္က ကရဏ္ဍေသု၊ အဋ္ဌလောဟိတင်္က ကရဏ္ဍေ အဋ္ဌသု လောဟိတင်္ကထူပေသု၊ အဋ္ဌ လောဟိတင်္ကထူပေ အဋ္ဌသု မသာရဂလ္လထူပေသု၊ အဋ္ဌ မသာရဂလ္လထူပေ အဋ္ဌသု ဖလိက ကရဏ္ဍေသု၊ အဋ္ဌ ဖဠိက ကရဏ္ဍေ အဋ္ဌသု ဖဠိကထူပေသု ပက္ခိပိ သဗ္ဗ ဥပရိမံ ဖဠိကစေတိယံ ထူပါရာမ စေတိယပ္ပမာဏံ အဟောသိ။

တဿ ဥပရိသဗ္ဗရတနမယံ ဂေဟံ ကာရေသိ တဿ ဥပရိ သုဝဏ္ဏမယံ၊ တဿ ဥပရိ ရဇတမယံ၊ တဿ ဥပရိ တမ္ဗလောဟမယံ ဂေဟံ ကာရေသိ တတ္ထ သဗ္ဗရတနမယံ ဝါလုကံ ဩကိရိတွာ ဇလဇ ထလဇ ပုပ္ဖာနံ သဟဿာနိ ဝိပ္ပကိရိတွာ အဒ္ဓစ္ဆဋ္ဌာနိ ဇာတကသတာနိ အာသီတိ မဟာထေရေ သုဒ္ဓါဒန မဟာရာဇာနံ မဟာမာယာဒေဝိံ သတ္တ သဟဇာတေ သဗ္ဗာနေတာနိ သုဝဏ္ဏမယာနေဝ ကာရေသိ ပဉ္စပဉ္စသတေ သုဝဏ္ဏရဇတမယေ ပုဏ္ဏဃဋေ ဌပါပေသိ ပဉ္စသုဝဏ္ဏဓဇသတေ ပဉ္စသတေ သုဝဏ္ဏဒီပကေ စ ကာရာပေတွာ သုဂဏ္ဓတေလဿ ပူရေတွာ တေသု ဒုကူလဝဋ္ဋိယော ဌပေသိ။

အထာယသ္မာ မဟာကဿပေါ မာလာ မာ မိလာယန္တု။ ဂဏ္ဓာ မာ ဝိနဿန္တု၊ ဒီပါ မာ ဝိဇ္ဈာယန္တူတိ အဓိဋ္ဌဟိတွာ သုဝဏ္ဏပဋ္ဋအက္ခရာနိ ဆိဏ္ဒါပေသိ။ အနာဂတေ ပိယဒါသော နာမ ကုမာရော ဆတ္တံ ဥဿာပေတွာ အသောကော နာမ ဓမ္မရာဇာ ဘဝိဿတိ သော ဣမံ ဓာတုယော ဝိတ္ထာရိကာ ကရိဿတီတိ ရာဇာ သဗ္ဗပသာဓနေဟိ ပူဇေတွာ အာဒိတော ပဋ္ဌာယ ဒွါရံ ပိဒဟန္တော နိက္ခမိ တမ္ဗလောဟဒွါရံ ပိဒဟိတွာ အာဝိဉ္ဇန ရဇ္ဇုယံ ကုဉ္စိကမုဒ္ဒိကံ ဗဏ္ဓိ တတ္ထေဝ မဟန္တံ မဏိက္ခဏ္ဓံ ဌပေသိ အနာဂတေ ဒဠိဒ္ဒရာဇာနော ဣမံ မဏိံ ဂဟေတွာ ဓာတူနံ သက္ကာရံ ကရောန္တူတိ အက္ခရာနိ ဆိဏ္ဒါပေသီ။

သက္ကော ဒေဝရာဇာ ဝိဿကမ္မံ အာမန္တေတွာ’တာတ၊ အဇာတသတ္တုနာ ဓာတုနိဓာနံ ကတံ။ ဧတ္ထ အာရက္ခံ ဌပေဟိ’တိ ပဟိဏိ သော အာဂန္တွာ ဝါဠသင်္ဃာဋယန္တံ ယောဇေသိ။ ကဋ္ဌရူပကာနိ တသ္မိံ ဓာတုဂဗ္ဘေ ဖဠိကဝဏ္ဏ ခဂ္ဂေ ဂဟေတွာ ဝါတသဒိသေန ဝေဂေန အနုပရိယာယန္တံ ယောဇေတွာ ဧကာယ ဧဝ အာဏိဝါ ဗဏ္ဓိတွာ သမန္တတော ဂိဉ္ဇက ဝသထာကာရေန သိလာပရိက္ခေပံ ကတွာ ဥပရိ ဧကာယ ပိဒဟိတွာ ပံသုံ ပက္ခိပိတွာ ဘူမိံ သမံ ကတွာ တဿုပရိ ပါသာဏထူပံ ပတိဋ္ဌာပေသိ။

ဓာတုနိဓာန ကထာ

၁၁။ ဧဝံ နိဋ္ဌိတေ ဓာတုနိဓာနေ ယာဝတာယုကံ ဌတွာ ထေရော ပရိနိဗ္ဗုတော၊ ရာဇာပိ ယထာကမ္မံ ဂတော၊ တေပိ မနုဿာ ကာလကတာ၊ အပရဘာဂေ ပိယဒါသော ကုမာရော ဆတ္တံ ဥဿာပေတွာ အသောကော နာမ ဓမ္မ ရာဇာ ဟုတွာ တာ ဓာတုယော ဂဟေတွာ ဇမ္ဗုဒီပေ စတုရာသီတိယာ စေတိယ သဟဿေသု ပတိဋ္ဌာပေသိ။ ကထံ ဗိဏ္ဒုသာရဿ ကိရ ဧကသတံ ပုတ္တာ အဟေသုံ တေ သဗ္ဗေ အသောကော အတ္တနာ သဒ္ဓိံ ဧကမာတိကံ တိဿ ကုမာရံ ဌပေတွာ ဃာတေသိ။ ဃာတေန္တော စတ္တာရိ ဝဿာနိ အနဘိသိတ္တော ရဇ္ဇံ ကာရေတွာ စတုန္နံ ဝဿာနံ အစ္စယေန တထာဂတဿ ပရိနိဗ္ဗာနတော ဒွိန္နံ ဝဿသတာနံ ဥပရိ အဋ္ဌာရသမေ ဝဿေ သကလဇမ္ဗုဒီပေ ဧကရဇ္ဇာဘိသေကံ ပါပုဏိ။

အဘိသေကာနုဘာဝေန ဣမာ ရာဇိဒ္ဓိယော အာဂတာ မဟာပထဝိယာ ဟေဋ္ဌာ ယောဇနပ္ပမာဏေ အာဏာ ပဝတ္တိ၊ တထာ ဥပရိ အာကာသေ၊ အနောတတ္တဒဟတော အဋ္ဌဟိ ကာဇေဟိ သောဠသ ပါနီယဃဋေ ဒိဝသေ ဒိဝသေ ဒေဝတာ အာဟရန္တိ။ ယတော သာသနေ ဥပ္ပန္နသဒ္ဓါ ဟုတွာ အဋ္ဌ ဃဋေ ဘိက္ခုသင်္ဃဿ အဒါသိ ဒွေ ဃဋေ သဋ္ဌိမတ္တာနံ တိပိဋက ဘိက္ခုနံ ဒွေဃဋေ အဂ္ဂမဟေသိယာ အသဏ္ဓိမိတ္တာယ စတ္တာရော ဃဋေ အတ္တနာ ပရိဘုဉ္ဇိ။ ဒေဝတာ ဧဝ ဟိမဝန္တေ နာဂလတာ ဒန္တကဋ္ဌ နာမ အတ္ထိ သိနိဒ္ဓါ မုဒုကံ ရသဝန္တံ၊ တံ ဒိဝသေ ဒိဝသေ အာဘိရန္တိ ယေန ရညော စ အဂ္ဂမဟေသိယာ စ သောဠသန္နံ နာဋကသဟဿာနံ သဋ္ဌိမတ္တာနံ ဘိက္ခုသဟဿာနံ ဒေဝသိကံ ဒန္တပေါဏကိစ္စံ နိပ္ဖဇ္ဇိ။

ဒေဝသိကမေဝဿ ဒေဝတာ အဂဒါမလကံ အဂဒဟရီဋကံ သုဝဏ္ဏဝဏ္ဏဉ္စ ဂဏ္ဓသမ္ပန္နံ အမ္ဗပက္ကံ အာဟရန္တိ တထာ ဆဒ္ဒန္တ ဒဟတော ပဉ္စဝဏ္ဏံ နိဝါသန ပါရုပဏံ၊ ပီတကဝဏ္ဏံ ဟတ္ထပုဉ္ဆနက ပဋ္ဋံဒိဗ္ဗဉ္စဇာနကံ အာဟရန္တိ ဒေဝသိကမေဝ ပနဿ အနုလေပဂဏ္ဓံ ပါရုပနတ္ထာယ အသုတ္တမယိကံ သုမနပုပ္ဖပဋံ မဟာရဟဉ္စ အဉ္ဇနံ နာဂဘဝနတော နာဂရာဇာနော အာဟရန္တိ။ ဆဒ္ဒန္တဒဟေယေဝ ဥဋ္ဌိတဿ သာလိနော နဝ စာဟ သဟဿာနိ ဒိဝသေ ဒိဝသေ သုဝါ အာဟရန္တိ။ မူသိကာ နိတ္ထုသ ကဏေ ကရောန္တိ ဧကောပိ ခဏ္ဍတဏ္ဍုလော န ဟောတိ။ ရညော သဗ္ဗဋ္ဌာနေသု အယမေဝ တဏ္ဍုလော ပရိဘောဂံ ဂစ္ဆတိ။ မဓုမက္ခိကာ မဓုံ ကရောန္တိ။ ကမ္မာရသာလာသု အစ္ဆာ ကူဋံ ပဟရန္တိ။ ဒီပိကာ စမ္မာနိ စာလေန္တိ ကရဝီက သကုဏာ အာဂတ္တွာ မဓုရဿရံ ဝိကုဇေန္တာ ရညော ဗလိကမ္မံ ကရောန္တိ။

ဣမာဟိ ဣဒ္ဓီဟိ သမန္နာဂတော ရာဇာဧက ဒိဝသံ သုဝဏ္ဏ သင်္ခလိက ဗဏ္ဓနံ ပေသေတွာ စတုန္နံ ဗုဒ္ဓါနံ အဓိဂတ ရူပဒဿနံ ကပ္ပာယုကံ မဟာကာဠ နာဂရာဇာနံ အာနယိတွာ သေတစ္ဆတ္တဿ ဟေဋ္ဌာ မဟာရဟေ ပလ္လင်္ကေ နိသီဒါပေတွာ အနေက သတဝဏ္ဏေဟိ ဇလဇ ထလဇ ပုပ္ဖေဟိ သုဝဏ္ဏပုပ္ဖေဟိ စ ပူဇံ ကတွာ သဗ္ဗာလင်္ကာရ ပတိမဏ္ဍိတေဟိ စ သောဠသဟိ နာဋက သဟဿေဟိ သမန္တတော ပရိက္ခိပိတွာ အနန္တဉာဏဿ တာဝ မေ သဒ္ဓမ္မဝရ စက္ကဝတ္တိနော သမ္မာသမ္ဗုဒ္ဓဿ ရူပံ ဣမေသံ အက္ခီနံ အာပါထံ ကရောဟီတိ နိဗ္ဗတ္တာသီတိ အနုဗျဉ္ဇန ပတိမဏ္ဍိတံ ဒွတ္တိံသ မဟာ ပုရိသ လက္ခဏ သဿိရီကတာယ ဝိကသိတ ကမလုပ္ဖလ ပုဏ္ဍရီက ပတိမဏ္ဍိတမိဝ သလိလတလံ တာရာဂဏရံသိဇာလ ဝိသရဝိပ္ဖုတသောဘာသမုဇ္ဇလမိဝဂဂနတလံ နီလ-ပီတ-လောဟိတာဒိ ဘေဒ ဝိစိတ္တဝဏ္ဏရံသိ ဝိနဒ္ဓ ဗျာမပ္ပဘာ ပရိက္ခေပ ဝိလာသိတာယ သဉ္ဈပ္ပဘာနုရာဂ ဣဏ္ဒဓနု ဝိဇ္ဇုလ္လတာ ပရိက္ခိတ္တမိဝ ကနကဂိရိ သိခရံ နာနာဝိရာဂ ဝိမလကေတုမာလာ သမုဇ္ဇလိတစာရုမတ္ထကသောဘံ နယနရသာယနမိဝ ဗြဟ္မဒေဝ-မနုဇ နာဂ-ယက္ခ ဂဏာနံ ဗုဒ္ဓရူပံ ပဿန္တော သတ္တဒိဝသံ အက္ခိပူဇံ နာမ အကာသိ

ရာဇာ ကိရ အဘိသေကံ ပါပုဏိတွာ တီဏိယေဝ သံဝစ္ဆရာနိ ဗာဟိရက ပါသဏ္ဍံ ပရိဂဏှိ စတုတ္ထေ သံဝစ္ဆရေ ဗုဒ္ဓသာသနေ ပသီဒိနံ ဗြာဟ္မဏ ဇာတိယ ပါသဏ္ဍာနဉ္စ ပဏ္ဍရင်္ဂ ပရိဗ္ဗာဇကာနဉ္စ သဋ္ဌိသဟဿမတ္တာနံ နိစ္စဘတ္တံ ပဋ္ဌပေသိ။

အသောကော ပိတရာ ပဝတ္တိတံ ဒါနံ အတ္တနော အန္တေပုရေ တထေဝ ဒဒမာနော ဧကဒိဝသံ သီဟပဉ္ဇရေ ဌိတော ဥပသမ ပရိဗာဟိရေန အာစာရေန ဘုဉ္ဇမာနေ အသံယတိဏ္ဒြိယေ အဝိနိတ ဣရိယာပထေ ဒိသွာ စိန္တေသိ ဤဒိသံ ဒါနံ ဥပပရိက္ခိတွာ ယုတ္တဋ္ဌာနေ ဒါတုံ ဝဋ္ဋတိတိ ဧဝံ စိန္တေတွာ အမစ္စေ အာဟ။ ဂစ္ဆထ ဘဏေ အတ္တနော အတ္တနော သာဓုသမ္မတေ သမဏ ဗြာဟ္မဏေ အန္တေပုရံ အတိဟရထ၊ ဒါနံ ဒဿာမာတိ အမစ္စာ သာဓု ဒေဝါတိ ရညော ပဋိဿုတွာ တေ တေ ပဏ္ဍရင်္ဂ ပရိဗ္ဗာဇကာဇီဝက နိဂဏ္ဌာဒယော အာနေတွာ ဣမေ မဟာရာဇ အမှာကံ အရဟန္တောတိ အာဟံသု။

အထ ရာဇာ အန္တေပုရေ ဥစ္စာဝစာနိ အာသနာနိ ပညာပေတွ အာဂစ္ဆန္တူတိ ဝတွာ အာဂတာဂတေ အာဟ အတ္တနော အတ္တနော အနုရူပေ အာသနေ နိသီဒထာတိ ဧကစ္စေ ဘဒ္ဒပီဌကေ ဧကစ္စေ ဖလကပီဌကေသေ နိသီဒိံသု။ တံ ဒိသွာ ရာဇာ နတ္ထိ ဧတေသံ အန္တေသာရောတိ ဉတွာ တေသံ အနုရူပံ ခါဒနီယံ ဘောဇနီယံ ဒတွာ ဥယျောဇေသိ။

ဧဝံ ဂစ္ဆန္တေ ကာလေ ဧက ဒိဝသံ သီဟပဉ္ဇရေ ဌိတော အဒ္ဒသ နိဂြောဓ သာမဏေရံ ရာဇင်္ဂဏေန ဂစ္ဆန္တံ ဒန္တံ ဂုတ္တံ သန္တိန္ဒြိယံ ဣရိယာပထ သမ္ပန္နံ။ ကော ပနာယံ နိဂြောဓော နာမ၊ ဗိဏ္ဒုသာရ ရညော ဇေဋ္ဌပုတ္တဿ သုမနရာဇ ကုမာရဿ ပုတ္တော။ တတြာယံ အာနုပုဗ္ဗီ ကထာ-ဗိဏ္ဒုသာရ ရညော ကိရ ဒုဗ္ဗလကာလေယေဝ အသောက ကုမာရော အတ္တနာ လဒ္ဓံ ဥဇ္ဇေနိရဇ္ဇံ ပဟာယ အာဂန္တွာ သဗ္ဗံ နဂရံ အတ္တနော ဟတ္ထဂတံ ကတွာ သုမန ရာဇကုမာရံ အဂ္ဂဟေသိ။

တံ ဒိဝသမေဝ သုမနဿ ရာဇကုမာရဿ သုမနာ နာမ ဒေဝီ ပရိပုဏ္ဏဂဗ္ဘာ အဟောသိ။ သာ အညာတကဝေသေန နိက္ခမိတွာ အဝိဒူရေ အညတရံ စဏ္ဍာလဂါမံ သန္ဓာယ ဂစ္ဆန္တိ၊ ဇေဋ္ဌက စဏ္ဍာလဿ ဂေဟတော အဝိဒူရေ ဧကသ္မိံ နိဂြောဓ ရုက္ခေ အဓိဝတ္ထာယ ဒေဝတာယ ဣတော သုမနေတိ ဝဟန္တိယာ သဒ္ဒံ သုတွာ တဿာ သမီပံ ဂတာ ဒေဝတာ အတ္တနော အာနုဘာဝေန ဧကံ သာလံ နိမ္မိဏိတွာ ဧတ္ထ ဝသာဟိတိ ပဒါသိ။ သာ တံ သာလံ ပါဝိသိ။ ဂတဒိဝသေယေဝ ပုတ္တံ ဝိဇာယိ။

သာ တဿ နိဂြောဓ ဒေဝတာယ ပရိဂ္ဂဟိတတ္တာ နိဂြောဓောတွေဝ နာမံ အကာသိ။ ဇေဋ္ဌက စဏ္ဍာလော ဒဋ္ဌဒိဝသတောပ္ပဘူတိ တံ အတ္တနော သာမိဓီတရံ ဝိယ မညမာနော နိဗဒ္ဓံ ဝဋ္ဋံ ပဋ္ဌပေသိ။ ရာဇဓီတာ တတ္ထ သတ္တ ဝဿာနိ ဝသိ။ နိဂြောဓကုမာရောပိ သတ္တဝဿိကော ဇာတော တဒါ မဟာဝရုဏတ္ထေရော နာမ ဧကော အရဟာ ဒါရကဿ ဟေတုသမ္ပဒံ ဒိသွာ ဝိဟရမာနော သတ္တဝဿိကောဒါနိ ဒါရကော ကာလော နံ ပဗ္ဗာဇေတုန္တိ စိန္တေတွာ ရာဇဓီတယာ အာရောစာပေတွာ နိဂြောဓကုမာရံ ပဗ္ဗာဇေသိ။ ကုမာရော ခုရဂ္ဂေယေဝ အရဟတ္တံ ပါပုဏိ။ သော ဧကဒိဝသံ ပါတောဝ သရီရံ ပဋိဇဂ္ဂိတွာ အာစရိယုပဇ္ဈာနံ ဝတ္တံ ကတွာ ပတ္တစီဝရမာဒါယ မာတုဥပါသိကာယ ဂေဟဒွါရံ ဂစ္ဆာမီတိ နိက္ခမိ မာတု နိဝေသနဋ္ဌာနဉ္စဿ ဒက္ခိဏဒွါရေန နဂရံ ပဝိသိတွာ နဂရမဇ္ဈေန ဂန္တွာ ပါစီနဒွါရေန နိက္ခမိတွာ ဂန္တဗ္ဗံ ဟောတိ တေန စ သမယေန အသောကော ဓမ္မရာဇာ ပါစီန ဒိသာဘိမုခေါ သီဟပဉ္ဇရေ စင်္ကမတိ။

တံ ခဏံယေဝ သိဂြောဓော သာမဏေရော ရာဇင်္ဂဏံ ပါပုဏိ သန္တိန္ဒြိယော သန္တမာနသော ယုဂမတ္တံ ပေက္ခမာနော။ တေန ဝုတ္တံ။ ဧကဒိဝသံ သီဟပဉ္ဇရေ ဌိတော အဒ္ဒသ နိဂြောဓသာမဏေရံ ရာဇင်္ဂဏေန ဂစ္ဆန္တံ ဒန္တံ ဂုတ္တံ သန္တိန္ဒြိယံ ဣရိယာပထ သမ္ပန္နန္တိ။ ဒိသွာ ပနဿ ဧတဒဟောသိ? အယံ ဇနော သဗ္ဗောပိ ဝိက္ခိတ္တစိတ္တောဟန္တမဂပဋိဘာဂေါ၊ အယမ္ပန ဒါရကော အဝိက္ခိတ္တစိတ္တော အတိဝိယဿ အလောကိတ ဝိလောကိတံ သမ္မိဉ္ဇန ပသာရဏဉ္စ သောဘတိ၊ အဒ္ဓါ ဧတဿ အဗ္ဘန္တရေ လောကုတ္တရဓမ္မော ဘဝိဿတီတိ ရညော သဟဒဿနေနေဝ သာမဏေရေ စိတ္တံ ပသီဒိ။ ပေမံ သဏ္ဌဟိ ကသ္မာ? ပုဗ္ဗေ ကိရ ပုည ကရဏကာလေ ဧသ ရညော ဇေဋ္ဌဘာတာ ဝါဏိဇကော အဟောသိ။

အထ ရာဇာ သဉ္ဇာတပေမော သဗဟုမာနော သာမဏေရံ ပက္ကောသထာတိ အမစ္စေ ပေသေသိ အတိစိရာယတီတိ ပုန ဒွေ တယော ပေသေသိ တုရိတံ အာဂစ္ဆတူတိ သာမရဏေရော အတ္တနော ပကတိယာ ဧဝ အဂမာသိ ရာဇာ ပတိရူပါသနံ ဉတွာ နိသီဒထာတိ အာဟ။ ဣတော စိတော စ ဩလောကေတွာ နတ္ထိဒါနိ အညော ဘိက္ခုတိ သမုဿိတ သေတစ္ဆတ္တံ ရာဇပဠ္လင်္ကံ ဥပသင်္ကမိတွာ ပတ္တဂဟဏတ္ထာယ ရညော အာကာရံ ဒဿေသိ။ ရာဇာ တံ ပလ္လင်္ကံ သမီပံ ဂစ္ဆန္တံ ဒိသွာ ဧဝံ စိန္တေသိ။ အဇ္ဇေဝဒါနိ အယံ သာမဏေရော ဣမဿ ဂေဟဿ သာမိကော ဘဝိဿတိ။ သာမဏေရော ရညော ဟတ္ထေ ပတ္တံ ဒတွာ ပလ္လင်္ကံ အဘရုဟိတွာ နိသီဒိ။

ရာဇာ အတ္တနော အတ္ထာယ သမ္ပာဒိတံ သဗ္ဗံ ယာဂု-ကဇ္ဇက ဘတ္တ ဝိကတိံ ဥပနာမေသိ။ သာမဏေရော အတ္တနော ယာပနမတ္တမေဝ သမ္ပဋိစ္ဆိ။ ဘတ္တကိစ္စာဝသာနေ ရာဇာ အာဟ သတ္ထာရာ တုမှာကံ ဒိန္နောဝါဒံ ဇာနာထာတိ ဇာနမိ မဟာရာဇ ဧကဒေသေနာတိ။ တာတ၊ မယှမ္ပိ နံ ကထေဟီတိ သာဓု မဟာရာဇာတိ ရညော အနုရူပံ ဓမ္မပဒေ အပ္ပမာဒ ဝဂ္ဂံ အနုမောဒနတ္ထာယ အဘာသိ။

ရာဇာ ပန အပ္ပမာဒေါ အမတပဒံ၊ ပမာဒေါ မစ္စုနော ပဒန္တိ သုတွ စ၊ အညာတံ တာတ ပရိယောသာပေဟီတိ အာဟ အနုမောဒနာဝသာနေ ဒွတ္တိံသ ဓုရဘတ္တာနိ လဘိတွာ ပုန ဒိဝသေ ဒွတ္တိံသ ဘိက္ခု ဂဟေတွာ ရာဇန္တေပုရံ ပဝိသိတွာ ဘတ္တကိစ္စမကာသိ ရာဇာ အညေပိ ဒွတ္တိံသ ဘိက္ခု တုမှေဟိ သဒ္ဓိံယေဝ ဘိက္ခံ ဂဏှန္တူတိ ဧတေနေဝ ဥပါယေန ဒိဝသေ ဒိဝသေ ဝဍ္ဎာပေန္တေ သဋ္ဌိ သဟဿာနံ ဗြာဟ္မဏ ပရိဗ္ဗာဇကာနံ ဘတ္တံ ဥပစ္ဆိဏ္ဒိတွာ အန္တော နိဝေသနေ သဋ္ဌိသဟဿာနံ ဘိက္ခုနံ နိစ္စဘတ္တံ ပဋ္ဌပေသိ၊ နိဂြောဓတ္ထေရ ဂတေနေဝ ပသာဒေန၊ နိဂြောဓတ္ထေရောပိ ရာဇာနံ သပရိသံ တီသု သရဏေသု ပဉ္စသု စ သီလေသု ပတိဋ္ဌာပေတွာ ဗုဒ္ဓသာသနေ ပေါထုဇ္ဇနိကေန ပသာဒေန အစလပ္ပသာဒံ ကတွာ ပတိဋ္ဌာပေသိ။

ပုန ရာဇ အသောကာရာမံ နာမ မဟာဝိဟာရံ ကာရပေတွာ သဋ္ဌိသဟဿာနံ ဘိက္ခူနံ ဘတ္တံ ပဋ္ဌပေသိ။ သကလဇမ္ဗုဒီပေ စတုရာသီတိယာ နဂရသဟဿေသု စတုရာသီတိ ဝိဟာရသဟဿာနိ ကာရာပေသိ။ စတုရာသီတိ စေတိယသဟဿ ပတိမဏ္ဍိတာနိ ဓမ္မေနေဝ နော အဓမ္မေန၊ ဧကဒိဝသံ ကိရ ရာဇာ အသောကာရာမေ မဟာဒါနံ ဒတွာ သဋ္ဌိသဟဿ သင်္ခဿ ဘိက္ခုသင်္ဃဿ မဇ္ဈေ နိသဇ္ဇ သင်္ဃံ စတူဟိ ပဝ္စယေဟိ ပဝါရေတွာ ဣမံ ပဉှံ ပုစ္ဆိ ဘန္တေ ဘဂဝတော ဒေသိတ ဓမ္မော နာမ ကိတ္တကော ဟောတီတိ။ မဟာရာဇ နဝ အင်္ဂါနိ၊ ခဏ္ဒတော စတုရာသီတိ ဓမ္မက္ခဏ္ဓ သဟဿာနီတိ။

ရာဇာ ဓမ္မေ ပသီဒိတွာ ဧကေကံ ဓမ္မက္ခဏ္ဓံ ဧကေကေန ဝိဟာရေန ပူဇေဿာမီတိ ဧကဒိဝသမေဝ ဆန္နဝုတိ ကောဋိဓနံ ဝိဿဇ္ဇေတွာ အမစ္စေ အာဏာပေသိ။ ဧထ ဘဏေ ဧကေကသ္မိံ နဂရေ ဧကမေကံ ဝိဟာရံ ကာရေန္တာ စတုရာသီတိယာ နဂရသဟဿေသု စတုရာသီတိ ဝိဟာရသဟဿာနိ ကာရာပေထာတိ သယဉ္စ အသောကာရာမေ အသောက မဟာဝိဟာရတ္ထာယ ကမ္မံ ပဋ္ဌပေသိ။

သင်္ဃော ဣဏ္ဒဂုတ္တတ္ထေရံ နာမ မဟိဒ္ဓိယံ မဟာနုဘာဝံ ခီဏာသဝံ နဝကမ္မာဓိဋ္ဌာယကံ အဒါသိ။ ထေရော ယံ ယံ န နိဋ္ဌာတိ တံ တံ အတ္တနော အာနုဘာဝေန နိဋ္ဌာပေသိ။ ဧဝံ တီဟိ သံဝစ္ဆရေဟိ ဝိဟာရကမ္မံ နိဋ္ဌာပေသိ။ ဧကဒိဝသမေဝ သဗ္ဗနဂရေဟိ ပဏ္ဏာနိ အာဂမိံသု အမစ္စာ ရညော အာရောစေသုံ။ နိဋ္ဌိတာနိ ဒေဝ စတုရာသီတိ ဝိဟာရသဟဿာနီတိ အထ ရာဇာ ဘိက္ခုသင်္ဃံ ဥပသင်္ကမိတွာ ဘန္တေ မယာ စတုရာသီတိ ဝိဟာရသဟဿာနိ ကာရိတာနိ ဓာတုယောကုတော လဘိဿာမီတိ ပုစ ပုစ္ဆိ။

မဟာရာဇ ဓာတုနိဓာနံ နာမ အတ္ထီတိ သုဏောမ။ န ပန ပညာယတိ အသုကာဋ္ဌာနေတိ ရာဇာ ရာဇဂဟေ စေတိယံ ဘိဏ္ဒါပေတွာ ဓာတုံ အပဿန္တော ပဋိပါကတိယံ ကာရေတွာ ဘိက္ခု-ဘိက္ခုနိယော-ဥပါသက-ဥပါသိကာယောတိ စတဿော ပရိသာ ဂဟေတွာ ဝေသာလိံ ဂတော။ တတြာပိ အလဘိတွာ ကပိဠဝတ္ထုံ၊ တတြာပိ အလဘိတွာ ရာမဂါမံ ဂတော၊ ရာမဂါမေ နာဂါ စေတိယံ ဘိဏ္ဒိတုံ န အဒံသု။ စေတိယေ နိပတိတ ကုဒ္ဒါလော ခဏ္ဍာခဏ္ဍံ ဟောတိ ဧဝံ တတြာပိ အလဘိတွာ အလ္လကပ္ပံ-ပါဝံ-ကုသိနာရန္တိ သဗ္ဗတ္ထ စေတိယာတိ ဘိဏ္ဒိတွာ ဓာတုံ အလဘိတွာ ပဋိပါကတိကာနိ ကတွာ ရာဇဂဟံ ဂန္တွာ စတဿော ပရိသာ သန္နိပါတေတွာ အတ္ထိ ကေနစိ သုတပုဗ္ဗံ အသုကဋ္ဌာနေ နာမ ဓာတု နိဓာနန္တိ ပုစ္ဆိ။

တတ္ထေကော ဝိသံဝဿ သတိကော ထေရော အသုကဋ္ဌာနေ ဓာတုနိဓာနန္တိ န ဇာနာမိ။ မယှံ ပန ပိတာမဟတ္ထေရော မယိ သတ္တဝဿိကကာလေ မာလာစင်္ဂေါဋကံ ဂါဟာပေတွာ ဧဟိ သာမဏေရ၊ အသုက ဂစ္ဆန္တရေ ပါသာနထူပေါ အတ္ထိ၊ တတ္ထ ဂစ္ဆာမာတိ ဂန္တွာ ပူဇေတွာ ဣမံ ဌာနံ ဥပဓာရေတုံ ဝဋ္ဋတိ သာမဏေရောတိ အာဟ။ အဟံ ဧတ္တကမေဝ ဇာနာမိ မဟာရာဇာတိ အာဟ။

ရာဇာ ဧတဒေဝ ဌာနန္တိ ဝတွာ ဂစ္ဆေ ဟရာပေတွာ ပါသာဏထူပံ ပံသုဉ္စ အပနေတွာ ဟေဋ္ဌာ သုဓာဘူမိံ အဒ္ဒသ။ တတော သုဓဉ္စ ဣဋ္ဌကာယော စ ဟရာပေတွာ အနုပုဗ္ဗေန ပရိဝေဏာ ဩရုယှ သတ္တ ရတနဝါလိကံ အသီတိ ဟတ္ထာနိ စ ကဋ္ဌရူပါနိ သမ္ပရိဝတ္တန္တာနိ အဒ္ဒသ။ သော ယက္ခ ဒါသကေ ပက္ကောသာပေတွာ ဗလိကမ္မံ ကာရေတွာပိ နေဝ အန္တံ န ကောဋိံ ပန္နန္တော ဒေဝတာ နမဿမာနော အဟံ ဣမာ ဓာတုယော ဂဟေတွာ စတုရာသီတိယာ ဝိဟာရသဟဿေသု နိဒဟိတွာ သက္ကာရံ ကရောမိ မာ ဒေဝတာ အန္တရာယံ ကရေန္တူတိ အာဟ။

သက္ကော ဒေဝရာဇာ စာရိကံ စရန္တော တံ ဒိသွာ ဝိဿကမ္မံ အာမန္တေတွာ အာဟ။ တာတ၊ အသောကော ဓမ္မရာဇာ ဓာတုယော နီဟရိဿာမီတိ ပရိဝေဏံ ဩတိဏ္ဏော၊ ဂန္တွာ ကဋ္ဌရူပါနိ ဟာရေဟီတိ သော ပဉ္စစူဠဂါမ ဒါရကဝေသေနာဂန္တွာ ရညော ပုရတော ဓနုကဟတ္ထော ဌတွာ ဟာရေမိ မဟာရာဇာတိ အာဟ။ ဟရ တာတာတိ။ သရံ ဂဟေတွာ သန္ဓိမှိယေဝ ဝိဇ္ဈိ၊ သဗ္ဗံ ဝိပ္ပကိရီယိတ္ထ။

အထ ရာဇာ အာစိဉ္ဇနေ ဗဒ္ဓ ကုဉ္စိက မုဒ္ဒိကံ ဂဏှိ၊ မဏိက္ခဏ္ဓံ ပဿိ၊ အနာဂတေ ဒဠိဒ္ဒရာဇာနော ဣမံ မဏိံ ဂဟေတွာ ဓာတူနံ သက္ကာရံ ကရောန္တူတိ ပန အက္ခရာနိ ဒိသွာ ကုဇ္ဈိတွာ မာဒိသံ နာမ ရာဇာနံ ဒဠိဒ္ဒရာဇာတိ စတ္တု ယုတ္တန္တိ ပုနပ္ပုန ဃဋေတွာ ဒွါရံ ဝိစရိတွာ အန္တောဂေဟံ ပဝိဋ္ဌော။ အဋ္ဌာရသ ဝဿာဓိကာနံ ဒွိန္နံ ဝဿသတာနံ ဥပရိ အာရောပိတဒီပါ တထေဝ ပဇ္ဇလန္တိ နိလုပ္ပလ ပုပ္ဖာနိ တံ ခဏံ အာဟရိတွာ အာရောပိတာနိ ဝိယ၊ ပုပ္ဖသဏ္ထရော တံ ခဏံ သန္ထတော ဝိယ၊ ဂဏ္ဓာ တံ မုဟုတ္တံ ပိံသိတွာ ဌပိတာ ဝိယ။

ရာဇာ သုဝဏ္ဏပဋ္ဋံ ဂဟေတွာ အနာဂတေ ပိယဒါသောနာမ ကုမာရော ဆတ္တံ ဥဿာပေတွာ အသောကော နာမ ဓမ္မရာဇာ ဘဝိဿတိ သော ဣမာ ဓာတုယော ဂဟေတွာ ဝိတ္ထာရိကာ ကရိဿတီတိ ဝါစေတွာ ဒိဋ္ဌော’ဟံ အယျောန မဟာကဿပတ္ထေရေနာတိ ဝတွာ ဝါမဟတ္ထံ အာဘုဇိတွာ ဒက္ခိဏဟတ္ထေန အပ္ပောဌေသိ။

သော တသ္မိံ ဌာနေ ပရိစရဏက ဓာတုမတ္တကမေဝ ဌပေတွာ သေသဓာတုယော သဗ္ဗာ ဂဟေတွာ ဓာတုဃရံ ပုဗ္ဗေ ပိဟိတနယေနေဝ ပိဒဟိတွာ သဗ္ဗံ ယထာ ပကတိယာဝ ကာရေတွာ ဥပရိ ပါသာဏစေတိယံ ပတိဋ္ဌာပေတွာ စတုရာသီတိယာ ဝိဟာရသဟဿေသုဓာတုယော ပတိဋ္ဌာပေသိ ဧဝံ ဇမ္ဗုဒီပတလေ အသောကော ဓမ္မရာဇာ စတုရာသိတိ စေတိယ သဟဿာနိ ကာရာပေသိ။

သဗ္ဗေ ထူပါ သဗ္ဗလောကေကဒီပါ သဗ္ဗေသံ ယေ သဂ္ဂမောက္ခာဝဟာ စ၊ ဟိတွာ သဗ္ဗံ ကိစ္စမညံ ဇနေန ဝဏ္ဒယျာ တေ သဗ္ဗထာ သဗ္ဗကာလန္တိ။

စတုရာသီတိ သဟဿ ထူပကထာ

၁၂။ ဧဝံ အသောကော ဓမ္မရာဇာ စတုရာသီတိ ဝိဟာရသဟဿမဟံ ကတွာ မဟာထေရော ဝန္ဒိတွာ ပုစ္ဆိ ဒါယာဒေါမှိ ဘန္တေ ဗုဒ္ဓသာသနေ’တိ။ ကိဿ ဒါယာဒေါ တွံ မဟာရာဇ၊ ဗာဟိရကော တွံ သာသနဿာတိ။ ဘန္တေ ဆန္နဝုတိကောဋိဓနံ ဝိဿဇ္ဇေတွာ စတုရာသီတိ ဝိဟာရသဟဿာနိ သစေတိယာနိ ကာရာပေတွာ အဟံ န ဒါယာဒေါ၊ အညေ ကော ဒါယာဒေါတိ၊ ပစ္စယ ဒါယကော နာမ တွံ မဟာရာဇ၊ ယော ပန အတ္တနော ပုတ္တဉ္စ ဓီတရဉ္စ ပဗ္ဗာဇေတိ၊ အယံ သာသနေ ဒါယာဒေါ နာမာတိ။

ဧဝံ ဝုတ္တေ အသောကော ရာဇာ သာသနေ ဒါယာဒဘာဝံ ပတ္ထယမာနော အဝိဒူရေ ဌိတံ မဟိဏ္ဒကုမာရံ ဒိသွာ သက္ခိဿသိတွံ တာတ ပဗ္ဗဇိတုန္တိ အာဟ။ ကုမာရော ပကတိယာ ပဗ္ဗဇိတုကာမော ရညော ဝစနံ သုတွာ အတိဝိယ ပါမောဇ္ဇဇာတော ပဗ္ဗ္ဇာမိ ဒေဝ၊ မံ ပဗ္ဗာဇေတွာ သာသနေ ဒါယာဒေါ ဟောထာတိ အာဟ တေန စ သမယေန ရာဇဓီတာ သင်္ဃမိတ္တာပိ တသ္မိံ ဌာနေ ဌိတာ ဟောတိ တံ ဒိသွာ အာဟ-’တွမ္ပိ အမ္မ ပဗ္ဗဇိတုံ သက္ခိဿသီ’တိ၊ သာဓု တာတာတိ သမ္ပဋိစ္ဆိ။ ရာဇာ ပုတ္တ န မနံ လဘိတွာ ပဟဋ္ဌစိတ္တော ဘိက္ခုသင်္ဃံ ဥပသင်္ကမိတွာ ဘန္တေ ဣမေ ဒါရကေ ပဗ္ဗာဇေတွာ မံ သာသနေ ဒါယာဒံ ကရောထာတိ သင်္ဃော ရညော ဝစနံ သမ္ပဋိစ္ဆိတွာ ကုမာရံ မောဂ္ဂလိပုတ္တ တိဿတ္ထေရေန ဥပဇ္ဈာယေန မဟာဒေဝတ္ထေရေန စ အာစရိယေန ပဗ္ဗဇ္ဇာပေသိ။ မဇ္ဈန္တိကတ္ထေရေန အာစရိယေန ဥပသမ္ပာဒေသိ ဥပသမ္ပဒါမာလကေယေဝ သဟပဋိသမ္ဘိဒါဟိ အရဟတ္တံ ပါပုဏိ။

သင်္ဃမိတ္တာယပိ ရာဇဓီတာယ အာစရိယာ အာယုပါလတ္ထေရိ နာမ၊ ဥပဇ္ဈာယာ ပန ဓမ္မပါလတ္ထေရီ နာမ အဟောသိ။ အထ မဟိဏ္ဒတ္ထေရော ဥပသမ္ပန္န ကာလတောပ္ပဘူတိ အတ္တနော ဥပဇ္ဈာယဿေဝ သန္တိကေ ဓမ္မဉ္စ ဝိနယဉ္စ ပရိယာပုဏန္တော ဒွေပိ သင်္ဂိတိယော အာရုဠှံ တိပိဋက သင်္ဂဟီတံ သာဋ္ဌကထံ ထေရဝါဒံ တိဏ္ဏံ ဝဿာနံ အဗ္ဘန္တရေ ဥဂ္ဂဟေတွာ အတ္တနော ဥပဇ္ဈာယဿ အန္တေဝါသိကာနံ သဟဿမတ္တာနံ ဘိက္ခူနံ ပါမောက္ခံ အဟောသိ။

တေန ခေါ ပန သမယေန မောဂ္ဂလိပုတ္တတိဿတ္ထေရော ကတ္ထ နု ခေါ အနာဂတေ သာသနံ သုပ္ပတိဋ္ဌိတံ ဂဝေယျာတိ ဥပပရိက္ခန္တော ပစ္စန္တိမေသု ဇနပဒေသု သုပ္ပတိဋ္ဌိတံ ဘဝိဿတီတိ ဉတွာ တေသံ တေသံ ဘိက္ခူနံ ဘာရံ ကတွာ တေ တေ ဘိက္ခု တတ္ထ တတ္ထ ပေသေသိ။

မဇ္ဈန္တိကတ္ထေရံ ကသ္မီရ ဂဏ္ဓာရ ရဋ္ဌံပေသေသိ တွံ ဧတံ ရဋ္ဌံ ဂန္တွာ တတ္ထ သာသနံ ပတိဋ္ဌာပေဟီတိ မဟာဒေဝတ္ထေရံ တထေဝ ဝတွာ မဟိံသကမဏ္ဍလံ ပေသေသိ။ ရက္ခိတတ္ထေရံဝနဝါသီံ၊ ယောနကဓမ္မရက္ခိတတ္ထေရံ အပရန္တကံ၊ မဟာဓမ္မရက္ခိတတ္ထေရံ မဟာရဋ္ဌံ မဟာရက္ခိတတ္ထေရံ ယောနက လောကံ။ မဇ္ဈိမတ္ထေရံ ဟိမဝန္တဒေသ ဘာဂံ၊ သောဏတ္ထေရံ-ဥတ္တရတ္ထေရဉ္စ သုဝဏ္ဏဘူမိံ။ အတ္တနော သဒ္ဓိဝိဟာရိကံ မဟိဏ္ဒတ္ထေရံ ဣဋ္ဋိယတ္ထေရေန ဥတ္တိယတ္ထေရေန ဘဒ္ဒသာလတ္ထေရေန သမ္ဗလတ္ထေရေန စ သဒ္ဓိံ တမ္ဗပဏ္ဏိဒီပံ ဂန္တွာ ဧတ္ထ သာသနံ ပတိဋ္ဌာပေထာတိ။ သဗ္ဗေပိ တံ တံ ဒိသာဘာဂံ ဂစ္ဆန္တာ အတ္တပဉ္စမာ အဂမိံသု သဗ္ဗေပိ ထေရာ ဂတဂတဋ္ဌာနေ မနုဿေ ပသာဒေတွာ သာသနံ ပတိဋ္ဌာပေသုံ။

မဟိဏ္ဒတ္ထေရော ပန တမ္ဗပဏ္ဏိဒီပံ ဂန္တွာ သာသနံ ပတိဋ္ဌာပေဟီတိ ဥပဇ္ဈာယေန ဘိက္ခုသင်္ဃေန စ အဇ္ဈိဋ္ဌော ကာလော နု ခေါ မေ တမ္ဗပဏ္ဏိဒီပံ ဂန္တုံ နောတိ ဥပဓာရေန္တော မုဋသီဝရညော မဟလ္လကဘာဝံ စိန္တေသိ။ အယံ မဟာရာဇာ မဟလ္လကော၊ န သက္ကာ ဣမံ ဂဏှိတွာ သာသနံ ပဂ္ဂဟေတုံ၊ ဣဒါနိ ပနဿ ပုတ္တော ဒေဝါနမ္ပိယတိဿော ရဇ္ဇံ ကာရေဿတိ။ တံ ဂဏှိတွာ သက္ကာ ဘဝိဿတိ သာသနံ ပဂ္ဂဟေတုံ၊ ဟဏ္ဒ ယာဝ သော သမယော အာဂစ္ဆတိ တာဝ ဉာတကေ ဩလောကေမ၊ ပုန’ဒါနိ ဣမံ ဇနပဒံ အာဂစ္ဆေယျာမ ဝါ န ဝါတိ။

သော ဧဝံ စိန္တေတွာ ဥပဇ္ဈာယဉ္စ ဘိက္ခုသင်္ဃဉ္စ ဝန္ဒိတွာ အသောကာရာမတော နိက္ခမ္မ တေဟိ ဣဋ္ဋိယာဒီဟိ စတူဟိ ထေရေဟိ သင်္ဃမိတ္တာယ ပုတ္တေန သုမနသာမဏေရေန ဘဏ္ဍုကေနက စ ဥပါသကေန သဒ္ဓိံ ရာဇဂဟနဂရ ဥပဝတ္တကေ ဒက္ခိဏ ဂိရိဇနပဒေ စာရိကံ စရမာနော ဉာတကေ ဩလောကေန္တော ဆ မာသေ အတိက္ကာမေသိ အထာနုပုဗ္ဗေန မာတုနိဝေသနဋ္ဌာနံ ဝေဋိသ နဂရံ နာမ သမ္ပတ္တော သမ္ပတ္တဉ္စ ပန ထေရံ ဒိသွာ ထေရမာတာ ဒေဝီ ပါဒေ သိရသာ ဝန္ဒိတွာ ဘိက္ခံ ဒတွာ ထေရံ အတ္တနာ ကတံ ဝေဋိသဂိရိ ဝိဟာရံ နာမ အာရောပေသိ။

ထေရော တသ္မိံ ဝိဟာရေ နိသန္နော စိန္တေသိ အမှာကံ ဣဓ ကတ္တဗ္ဗ ကိစ္စံ နိဋ္ဌိတံ။ သမယော နု ခေါ ဣဒါနိ လင်္ကာဒိပံ ဂန္တုန္တိ။ တတော စိန္တေသိ-အနုဘဝတု တာဝ မေ ပိတရာ ပေသိတံ အဘိသေကံ ဒေဝါနမ္ပိယတိဿော ရတနတ္တယဂုဏဉ္စ သုဏာတု၊ ဆဏတ္ထဉ္စ နဂရတော နိက္ခမိတွာ မိဿကပဗ္ဗတံ အဘိရူဟတု တဒါ တံ တတ္ထ ဒက္ခိဿာမာတိ။ အထာပရံ ဧကမာသံ တတ္ထေဝ ဝါသံ ကပ္ပေသိ။

မာသာတိက္ကမေ သက္ကော ဒေဝါနမိန္ဒော မဟိဏ္ဒတ္ထေရံ ဥပသင်္ကမိတွာ ဧတဒဝေါစ။’ ကာလကတော ဘန္တေ မုဋသီဝရာဇာ၊ ဣဒါနိ ဒေဝါနမ္ပိယတိဿ ရာဇာ ရဇ္ဇံ ကာရေတိ။ သမ္မာသမ္ဗုဒ္ဓေန စ တုမှေ ဝျာကတာ အနာဂတေ မဟိဏ္ဒေါ နာမ ဘိက္ခု တမ္ဗပဏ္ဏိဒီပံ ပသာဒေဿတီ’တိ။ တသ္မာ တိဟ ဝေါ ဘန္တေ ကာလော ဒီပဝရံ ဂမနာယ၊ အဟမ္ပိ ဝေါ သဟာယော ဘဝိဿာမီ။

ထေရော တဿ ဝစနံ သမ္ပဋိစ္ဆိတွာအတ္တသတ္တမော ဝေဋိသ ပဗ္ဗတဝိဟာရာ ဝေဟာသံ ဥပ္ပတိတွ အနုရာဓပုရဿ ပုရတ္ထိမာယ ဒိသာယ မိဿကပဗ္ဗတေ ပတိဋ္ဌဟိ ယံ ဧတရဟိ စေတိယပဗ္ဗတောတိပိ သဉ္ဇာနန္တိ တဿမိံ ဒိဝသေ တမ္ဗပဏ္ဏိဒိပေ ဇေဋ္ဌမူလ နက္ခတ္တံ နာမ ဟောတိ ရာဇာ နက္ခတ္တံ ဃောသာပေတွာ ဆဏံ ကရောထာတိ အမစ္စေ အာဏာပေတွာ စတ္တာလီသ ပုရိသ သဟဿပရိဝါရော နဂရမ္ဘာ နိက္ခမိတွာ ယေန မိဿကပဗ္ဗတော တေန ပါယာသိ မိဂဝံ ကီဠိတုကာမော အထ တသ္မိံ ပဗ္ဗတေ အဓိဝတ္ထာ ဒေဝတာ ရညော ထေရေ ဒဿေဿာမီတိ ရောဟိတ မိဂရူပံ ဂဟေတွာ အဝိဒူရေ တိဏပဏ္ဏာနိ ခါဒမာနာ ဝိယ စရတိ။

ရာဇာ ဒိသွာ အယုတ္တံ ဒါနိ ပမတ္တံ ဝိဇ္ဈိတုန္တိ ဇီယံ ပေါဌေသိ။ မဂေါ အမ္ဗတ္ထလမဂ္ဂံ ဂဟေတွာ ပလာယိတုံ အာရဘိ ရာဇာပိ ပိဋ္ဌိတော ပိဋ္ဌိတော အနုဗဏ္ဓန္တော အမ္ဗတ္ထလမေဝ အာရုဟိ။ မိဂေါ ထေရာနံ အဝိဒူရေ အန္တရဓာယိ။

မဟိဏ္ဒတ္ထေရော ရာဇာနံ အဝိဒူရေ အာဂစ္ဆန္တံ’မမံယေဝ ရာဇာ ပဿတု၊ မာ ဣတရေ’တိ အဓိဋ္ဌဟိတွာ’တိဿ! တိဿ! ဣတော ဧဟီ’တိ အာဟ။ ရာဇာ သုတွာ စိန္တေသိ-ဣမသ္မိံ တမ္ဗပဏ္ဏိဒီပေ ဇာတော မံ တိဿောတိ နာမံ ဂဟေတွာ အာလပိတုံ သမတ္ထော နာမ နတ္ထိ။ အယမ္ပန ဆိန္နဘိန္နပဋဓရော ဘဏ္ဍုကာသာဝ ဝသနော မံ နာမေန အာလပတိ၊ ကော နု ခေါ အယံ ဘဝိဿတိ မနုဿော ဝါ အမနုဿော ဝါတိ။ ထေရော အာဟ။

သမဏာ မယံ မဟာရာဇ - ဓမ္မရာဇဿ သာဝကာ၊

တဝေဝ အနုကမ္ပာယ - ဇမ္ဗုဒီပါ ဣဓာဂတာတိ၊

တေန သမယေန ဒေဝါနမ္ပိယတိဿ ရာဇာ စ အသောကဓမ္မရာဇာ စ အဒိဋ္ဌ သဟာယကာ ဟောန္တိ။ ဒေဝါနမ္ပိယတိဿ ရညေ စ ပုညာနုဘာဝေန ဆာတပဗ္ဗတပါဒေ ဧကသ္မိံ ဝေဠုဂုမ္ဗေ တိဿော ဝေဠုယဋ္ဌိယော နိဗ္ဗတ္တိံသု ဧကာ လတာယဋ္ဌိ နာမ၊ ဧကာ ပုပ္ဖယဋ္ဌိ နာမ ဧကာ သကုဏယဋ္ဌိ နာမ။ တာသု လတာယဋ္ဌိ သယံ ရဇတဝဏ္ဏာ ဟောတိ တံ အလင်္ကရိတွာ ဥပ္ပန္နလတာ ကဉ္စန ဝဏ္ဏာ ခါယတိ ပုပ္ဖယဋ္ဌိယံ ပန နီလ-ပီတ-လောဟိတ-ဩဒါတ-ကာဠဝဏ္ဏာနိ ပုပ္ဖာနိ သုစိဘတ္တဝဏ္ဋ ပတ္တ ကိဉ္ဇက္ခာ ဟုတွာ ခါယန္တိ သကုဏယဋ္ဌိယံ ဟံသကုက္ကုဋ-ဇီဝံဇီဝကာဒယော သကုဏာ နာနာပ္ပကာရာနိ စ စတုပ္ပဒါနိ သဇီဝါနိ ဝိယ ခါယန္တိ သမုဒ္ဒတောပိဿ မုတ္တာ-မဏိ-ဝေဠုရိယာဒိ အနေကဝိဟိတံ ရတနံ ဥပ္ပဇ္ဇိ။

တမ္ဗပဏ္ဏိယံ ပန အဋ္ဌမုတ္တံ ဥပ္ပဇ္ဇိံသု-ဘယမုတ္တာ ဂဇမုတ္တာ ရထမုတ္တာ အာမလကမုတ္တာ စလယမုတ္တာ အင်္ဂုလီဝေဌကမုတ္တာ ကကုဓဖလမုတ္တာ ပါကတိကမုတ္တာတိ သော တာ စ ယဋ္ဌိယော တာ စ မုတ္တာယော အည္စ ဗဟုံ ရတနံ အသောကဿ ဓမ္မရညော ပဏ္ဏာကာရတ္ထာယ ပေသေသိ။ အသောကောပိ ပသီဒိတွာ ပဉ္စ ရာဇကကုဓဘဏ္ဍာနိစေဝ အညေ စ အဘိသေကတ္ထာယ ဗဟူပဏ္ဏာကာရေ ပဟိဏိ။ န ကေဝလဉ္စ ဧတံ အာမိသ ပဏ္ဏာကာရံ၊ ဣမံ ကိရ ဓမ္မ ပဏ္ဏာကာရမ္ပိ ပေသေသိ။

‘‘အဟံ ဗုဒ္ဓဉ္စ ဓမ္မဉ္စ-သင်္ဃဉ္စ သရဏံ ဂတော၊

ဥပါသကတ္တံ ဝေဒေသိံ-သကျပုတ္တဿ သာသနေ၊

ဣမေသု တီသု ဝတ္ထူသု-ဥန္နမေသု နရုတ္တမ၊

စိတ္တံ ပသာဒယိတွာန-သဒ္ဓါယ သရဏံ ဝဇာ’တိ၊’’

ရာဇာ အဝိရသုတံ သာသနပဝတ္တိံ အနုဿရမာနော ထေရဿ တံ ‘‘သမဏာမယံ မဟာရာဇ ဓမ္မရာဇဿ သာဝကာ‘‘တိ ဝစနံ သုတွာ အယျာ နု ခေါ အာဂတာတိ တာဝဒေဝ အာဝုဓံ နိက္ခိပိတွာ ဧကမန္တံ နိသီဒိ သမ္မောဒနီယံ ကထံ ကထယမာနော၊ သမ္မောဒနီယကထံ ကုရုမာနေယေဝ တသ္မိံ တာနိပိ စတ္တာလီသ ပုရိသသဟဿာနိ အာဂန္တွာ တံ ပရိဝါရေသုံ။ တဒါ ထေရော ဣတရေပိ ဇနေ ဒဿေသိ။

ရာဇာ ဒိသွာ ဣမေ ကဒါ အာဂတာတိ ပုစ္ဆိ မယာ သဒ္ဓိံယေဝ မဟာ ရာဇာတိ။ ဣဒါနိ ပန ဇမ္ဗုဒီပေ အည္ဉောပိ ဧဝရူပါ သမဏာ သန္တီတိ။ မဟာရာဇ ဧတရဟိ ဇမ္ဗုဒီပေါ ကာသာဝ ပဇ္ဇောတော ဣသိဝါတပရိဝါတော၊ တသ္မိံ-

‘‘တေ ဝိဇ္ဇာ ဣဒ္ဓိပတ္တာ စ စေတောပရိယာယ ကောစိဒါ၊

ခီဏာသာဝ အရဟန္တော-ဗဟူ ဗုဒ္ဓဿ သာဝကာတိ’’၊

အထ ရာဇာ ဘန္တေ သွေ ရထံ ပေသေဿာမိ။ တံ အဘိရူဟိတွာ အာဂစ္ဆေယျာထာတိ ဝတွာ ပက္ကာကမိ ထေရော အစိရပက္ကန္တဿ ရညော သုမဏသာမဏေရံ အာမန္တေသိ ဧဟိ တွံ သုမန ဓမ္မသဝနကာလံ ဃောသေဟီတိ သာမဏေရော အဘိညာပါဒကံ စတုတ္ထဇ္ဈာနံ သမာပဇ္ဇိတွာ ဝုဋ္ဌာယ အဓိဋ္ဌဟိတွာ သမာဟိတေန စိတ္တေန သကလတမ္ဗပဏ္ဏိဒီပံ သာစေန္တော ဓမ္မသဝနကာလံ ဃောသေသိ။

သာမဏေရဿ သဒ္ဒံ သုတွာ ဘုမ္မာ ဒေဝတာ သဒ္ဒမနုဿာဝေသု၊ ဧတေနုပါယေန ယာဝ ဗြဟ္မလောကာ သဒ္ဒေါ အဗ္ဘုဂ္ဂဉ္ဆိ။ တေန သဒ္ဒေန မဟာဒေဝတာ သန္နိပါတော အဟောသိ ထေရော မဟန္တံ ဒေဝတာ သန္တိပါတံ ဒိသွာ သမစိတ္တသုတ္တန္တံ ကထေသိ။ ကထာ ပရိယောသာနေ အသင်္ခေယျာနံ ဒေဝါနံ ဓမ္မာဘိသမယော အဟောသိ။ ဗဟူ နာဂ သုပဏ္ဏာ စ သရဏေသု ပတိဋ္ဌဟိံသု။ အထ တဿာ ရတ္တိယာ အစ္စယေန ရာဇာ ထေရာနံ ရထံ ပေသေသိ။ ထေရာ န မယံ ရထံ အာရုဟာမ။ ဂစ္ဆ တွံ၊ ပစ္ဆာ မယံ အာဂစ္ဆိဿာမာတိ ဝတွာ ဝေဟာသံ အဗ္ဘုဂ္ဂန္တွာ အနုရာဓပုရဿ ပစ္ဆိမဒိသာယ ပဌမက စေတိယဋ္ဌာနေ ဩတရိံသု။

ရာဇာပိ သာရထိံ ပေသေတွာ အန္တော နိဝေသနေ မဏ္ဍပံ ပဋိယာဒေတွာ စိန္တေသိ’ နိသီဒိဿန္တိ နု ခေါ အယျာ အာသနေ န နိသီဒိဿန္တီ‘‘တိ။ တဿေဝံ စိန္တယန္တဿေဝ သာရထိ နဂရဒွါရံ ပတွာ အဒ္ဒသ ထေရေ ပဌမတရံ အာဂန္တွာ ကာယဗဏ္ဓနံ ဗဏ္ဓိတွာ စီဝရံ ပါရုပန္တေ၊ ဒိသွာ အတိဝိယ ပသန္နမာနသော ဟုတွာ အာဂန္တွာ ရညော အာရောစေသိ အာဂတာ ဒေဝ ထေရာတိ။

ရာဇာ ရထံ အာရုဠှာတိ ပုစ္ဆိ န အာရူဠှာ ဒေဝ၊ အပိ စ ပစ္ဆတော နိက္ခမိတွာ ပဌမတရံ အာဂန္တွာ ပါစီနဒွါရေ ဌိတာတိ။ ရာဇာ ရထံ န အာရုဘိံသူတီ သုတွာ တေန ဟိ ဘဏေ ဘုမ္မတ္ထရဏ သင်္ခေပေန အာသနာနိ ပညာပေထာတိ ဝတွာ ပဋိပထာ အာဂမာသိ အမစ္စာ ပထဝိယံ တဋ္ဋိကံ ပညာပေတွာ ဥပရိ ကောဇဝကာဒီနိ ဝိစိတ္တတ္ထရဏာနိ ပညာပေသုံ ရာဇာပိ ဂန္တွာ ထေရေ ဝန္ဒိတွာ မဟိဏ္ဒတ္ထေရဿ ဟတ္ထတော ပတ္တံ ဂဟေတွာ မဟတိယာ ပူဇာယ စ သက္ကာရေန စ ထေရေ ပဏီတေန ခါဒနီယေန ဘောဇနီယေန သဟတ္ထာ သန္တပ္ပေတွာ အနုလာဒေဝီ ပမုခါ ပဉ္စ ဣတ္ထိသတာနိ ထေရာနံ အဘိဝါဒနံ ပူဇာသက္ကာရဉ္စ ကာရောနတူတိ ပက္ကောသာပေတွာ ဧကမန္တံ နိသီဒိ။ ထေရော ရညော သပရိဇနဿ ဓမ္မရတနဝဿံ ဝဿေန္တော ပေတဝတ္ထုံ-ဝိမာနဝတ္ထုံ-သစ္စသံယုတ္တဉ္စ ကထေသိ။ တံ သုတွာ တာနိပိ ပဉ္စ ဣတ္ထိသတာနိ သောတာပတ္တိဖလံ သစ္ဆိကရိံသု။

တဒါ နာဂရာ ထေရာနံ ဂုဏေ သုတွာ ထေရေ ဒဋ္ဌုံ န လဘာမာတိ ဥပက္ကောသန္တိ အထ ရာဇာ ဣဓ ဩကာသော နတ္ထီတိ စိန္တေတွာ၊’ဂစ္ဆထ ဘဏေ ဟတ္ထိသာလံ ပဋိဇဂ္ဂိတွာ ဝါလုကံ ဩကိရိတွာ ပဉ္စဝဏ္ဏာနိ ပုပ္ဖာနိ ဝိကိရိတွာ ဝိတာနံ ဗဏ္ဓိတွာ မင်္ဂလ ဟတ္ထိဋ္ဌာနေ ထေရာနံ အာသနာနိ ပညာပေထာ’တိ အာဟ၊ အမစ္စာ တထာ အကံသု။

ထေရော တတ္ထ ဂန္တွာ နိသီဒိတွာ ဒေဝဒူတသုတ္တန္တံ ကထေသိ ကထာ ပရိယောသာနေ ပါဏသဟဿံ သောတာပတ္တိဖလေ ပတိဋ္ဌဟိ တထာ ဟတ္ထိသာလာ သမ္ဗာဓာတိ ဒက္ခိဏဒွါရေ နဏ္ဒနုယျာနေ အာသနံ ပညာပေသုံ။ ထေရော တတ္ထ နိသီဒိတွာ အာသိဝိသောပမ သုတ္တန္တံ ကထေသိ။ တမ္ပိ သုတွာ ပါဏသဟဿံ သောတာပတ္တိဖလံ ပဋိလဘိ ဧဝံ အာဂတဒိဝသတော ဒုတိယဒိဝသေ အဍ္ဎတေယျာနံ ပါဏသဟဿာနံ ဓမ္မာဘိသမယော အဟောသိ။

ထေရဿ နဏ္ဒနဝနေ အာဂတာဂတာဟိ ကုလိတ္ထီဟိ ကုလသုဏှာဟိ ကုလကုမာရီဟိ သဒ္ဓိ သမောဒမာနဿေဝ သာယဏှသမယော ဇာတော၊ ထေရော ကာလံ သလ္လက္ခေတွာ ဂစ္ဆာမိ’ဒါနိ မိဿက ပဗ္ဗတန္တိ ဥဋ္ဌဟိ။ အမစ္စာ မဟာမေဃဝနုယျာနေ ထေရေ ဝါသေသုံ ရာဇာပိ ခေါ တဿာ ရတ္တိယာ အစ္စယေန ထေရဿ သမီပံ ဂန္တွာ သုခသယိတဘာဝံ ပုစ္ဆိတွာ ကပ္ပတိ ဘန္တေ ဘိက္ခုသင်္ဃဿ အာရာမောတိ ပုစ္ဆိ။ ထေရော ကပ္ပတိ မဟာရာဇာတိ အာဟ။

ရာဇာ တုဋ္ဌော သုဝဏ္ဏ ဘိံကာရံ ဂဟေတွာ ထေရဿ ဟတ္ထေ ဥဒကံ ပါတေတွာ မဟာမေဃဝနုယျာနံ အဒါသိ ထေရော ပုနဒိဝသေပိ ရာဇဂေဟေယေဝ ဘုဉ္ဇိတွာ နဏ္ဒနဝနေ အနမတဂ္ဂိယာနိ ကထေသိ။ ပုန ဒိဝသေ အဂ္ဂိက္ခဏ္ဓောပမ သုတ္တန္တံ ကထေသိ။ ဧတေနေဝ ဥပါယေန သတ္တ ဒိဝသာနိ ကထေသိ အဍ္ဎ နစမာနံ ပါဏသဟဿာနံ ဓမ္မာဘိသမယော အဟောသိ။ သတ္တမေ ဒိဝသေ ပန ထေရော အန္တောပုရေ ရညော အပ္ပမာဒ သုတ္တန္တံ ကထယိတွာ စေတိယဂိရိမေဝ အဂမာသိ။

အထ ခေါ ရာဇာ ထေရော အာယာစိတော သယမေဝါဂတော၊ တသ္မာ တဿ အနာပုစ္ဆာ ဂမနမ္ပိ ဘဝေယျာတိ စိန္တေတွာ ရထံ အဘိရူဟိတွာ၊ စေတိယဂိရိံ အဂမာသိ မဟတာ ရာဇာနုဘာဝေန ဂန္တွာ ထေရာနံ သန္တိကံ ဥပသင်္ကမန္တော အတိဝိယ ကိလန္တရူပေါ ဟုတွာ ဥပသင်္ကမိ။ တတော နံ ထေရော အာဟ ကသ္မာ တွံ မဟာရာဇ ဧဝံ ကိလမ မာနော အာဂတောတိ။ တုမှေ မမ ဂါဠှံ ဩဝါဒံ ဒတွာ ဣဒါနိ ဂန္တုကာမာ နုခေါတိ ဇာနနတ္ထံ ဘန္တေတိ။ န မယံ မဟာရာဇ ဂန္တုကာမာ၊ အပိ စ ဝဿုပနာယိက ကာလောနမာယံ သမဏေန နာမ ဝဿုပနာယိကံ ဌာနံ ဉာတုံ ဝဋ္ဋတီတိ။ ရာဇာပိ ခေါ တံခဏံယေဝ ကရဏ္ဍက စေတိယင်္ဂဏံ ပရိက္ခိပိတွာ အဋ္ဌသဋ္ဌိယာ လေဏေသု ကမ္မံ ပဋ္ဌပေတွာ နဂရမေဝ အဂမာသိ။

တေပိ ထေရော မဟာဇနံ ဩဝဒမာနာ စေတိယဂိရိမှိ ဝဿံ ဝသိံသု။ အထာယသ္မာ မဟာမဟိဏ္ဒေါ ဝုတ္ထဝဿော ပဝါရေတွာ ကတ္တိကပုဏ္ဏမာယံ ဥပေါသထဒိဝသေ ရာဇာနံ ဧတဒဝေါစ စိရဒိဋ္ဌော နော မဟာရာဇ သမ္မာသမ္ဗုဒ္ဓါ အဘိဝါဒန ပစ္စုပဋ္ဌာန အဉ္ဇလိ ကမ္မ သာမီစိ ကမ္မ ကရဏဋ္ဌာနံ နတ္ထိ၊ တေနမှံ ဥက္ကဏ္ဌိတာတိ တနု ဘန္တေ တုမှေ အဝေါစုတ္ထ ပရိနိဗ္ဗုတော သမ္မာသမ္ဗုဒ္ဓါတိ ကိဉ္စာပိ မဟာရာဇ ပရိနိဗ္ဗုတော၊ အထဿ သရီရဓာတုယော တိဋ္ဌန္တီတိ။ အညာ တမ္ဘန္တေ ထူပံ ပတိဋ္ဌာပေမိ ဘူမိဘာဂံ ဝိစိနထာတိ။ အပိ စ ဓာတုယော ကုတော လစ္ဆာမီတိ သုမနေန သဒ္ဓိံ မန္တေဟိ မဟာရာဇာတိ ရာဇာ သုမနံ ဥပသင်္ကမိတွာ ပုစ္ဆိ’ကုတောဒါနိ ဘန္တေဓာတုယော လစ္ဆာမာ’တိ သုမနော အာဟ-အပ္ပောဿုက္ကော တွံ မဟာရာဇ၊ ဝီထိယော သောဓာပေတွာ ဓဇ ပတာက ပုဏ္ဏဃဋာဒီဟိ အလင်္ကာရာပေတွာ သပရိဇ္ဇနော ဥပေါသထံ သမာဒိယိတွာ သဗ္ဗတာလာဝစရေ ဥပဋ္ဌပေတွာ မင်္ဂလဟတ္ထိံ သဗ္ဗာလင်္ကာရေဟိ ပတိမဏ္ဍိတံ ကာရေတွာ ဥပရိ ဝဿ သေတစ္ဆတ္တံ ဥဿာပေတွာ သာယဏှသမယေ မဟာနာဂဝနုယျာနာဘိမုခေါ ယာ ဟိ အဒ္ဓါ တသ္မိံ ဌာနေ ဓာတုယော လစ္ဆသိတိ၊ ရာဇာ သာဓူတိ သမ္ပဋိစ္ဆိ။ ထေရော စေတိယဂိရိမေဝ အဂမိံသု။

တတြာယသ္မာ မဟိဏ္ဒတ္ထေရော သုမန သာမဏေရမာဟ- ဂစ္ဆ တွံ သာမဏေရ ဇမ္ဗုဒီပေ အယျကံ အသောကဓမ္မရာဇာနံ ဥပသင်္ကမိတွာ မမ ဝစနေန ဧဝံ ဝဒေဟိ’သဟာယော တေ မဟာရာဇ ဒေဝါနမ္ပိယ တိဿော ဗုဒ္ဓသာသနေ ပသန္နော ထူပံ ပတိဋ္ဌာပေတုကာမော တုမှာကံ ကိရ ဟတ္ထေ ဘဂဝတော ပရိဘုတ္တပတ္တော စေဝဓာတု စ အတ္ထိ၊ တမ္မေ ဒေထာ’တိ တံ ဂဟေတွာ သက္ကံ ဒေဝရာဇာနံ ဥပသင်္ကမိတွာ တုမှာကံ ကိရ မဟာရာဇ ဟတ္ထေ ဒွေ ဓာတုယော အတ္ထိ ဒက္ခိဏဒါဌာ စ ဒက္ခိဏက္ခကဉ္စ၊ တတောတုမှေ ဒက္ခိဏဒါဌံပူဇေထ၊ ဒက္ခိဏက္ခကံ ပန မယှံ ဒေထာတိ၊ ဧဝဉ္စ နံ ဝဒေဟိ ကသ္မာ တွံ မဟာရာဇ အမှေ တမ္ဗပဏ္ဏိဒီပံ ပဟိဏိတွာ ပမဇ္ဇိတ္ထာတိ။

သာဓု ဘန္တေတိ ခေါ သုမနော ထေရဿ ဝစနံ သမ္ပဋိစ္ဆိတွာ တာဝဒေဝ ပတ္တစီဝရမာဒါယ ဝေဟာသမဗ္ဘုဂ္ဂန္တွာ ပါဋလိပုတ္တဒွါရေ ဩရုယှ ရညော သန္တိကံ ဂန္တွာ တမတ္ထံ အာရောစေသိ ရာဇာ တုဋ္ဌော သာမဏေရဿ ဟတ္ထတော ပတ္တံ ဂဟေတွာ ဘောဇေတွာ ဘဂဝတော ပတ္တံ ဂဏ္ဓေဟိ ဥဗ္ဗဋ္ဋေတွာ ဝရမုတ္တသဒိသာနံ ဓာတူနံ ပူရေတွာ အဒါသိ။

သော တုံ ဂဟေတွာ သက္ကံ ဒေဝရာဇာနံ ဥပသင်္ကမိ သက္ကော ဒေဝါရာဇာ သာမဏေရံ ဒိသွာ ကိံ ဘန္တေ သုမန အာဟိဏ္ဍသီတိ အာဟ။ တွံ မဟာရာဇ အမှေ တမ္ဗပဏ္ဏိဒီပံ ပဟိဏိတွာ ကသ္မာ ပမဇ္ဇသီတိ၊ တပ္ပမဇ္ဇာမိ ဘန္တေ၊ ဝဒေဟိ ကိံ ကရောမီတိ။ တုမှာကံ ကိရ ဟတ္ထေ ဒွေ ဓာတုယော အတ္ထိ ဒက္ခိဏဒါဌာ စ ဒက္ခိဏက္ခကဉ္စ၊ တတော တုမှေ ဒက္ခိဏဒါဌံ ပူဇေထ ဒက္ခိဏက္ခကံ ပန မယှံ ဒေထာတိ။ သာဓု ဘန္တေတိ ခေါ သက္ကော ဒေဝါနမိဏ္ဒေါ ယောဇနပ္ပမာနံ မဏိထူပံ ဥဂ္ဃာဋေတွာ ဒက္ခိဏက္ခကံ နီဟရိတွာ သုမနဿ အဒါသိ။

သော တံ ဂဟေတွာ စေတိယဂိရိမှိယေဝ ပတိဋ္ဌာသိ အထ ခေါ မဟိဏ္ဒပမုခါ သဗ္ဗေ တေ မဟာနာဂါ အသောကဓမ္မရာဇေန ဒိန္န ဓာတုယော စေတိယဂိရိယမှိယေဝ ပတိဋ္ဌာပေတွာ ဒက္ခိဏက္ခကံ အာဒါယ ဝဍ္ဎမာနကစ္ဆာယာယ မဟာနာဂ ဝနုယျာနမဂမံသု။ ရာဇာပိ ခေါ သုမနေန ဝုတ္တပ္ပကာရံ ပူဇာသက္ကာရံ ကတွာ ဟတ္ထိက္ခဏ္ဓဝရဂတော သာယံ မင်္ဂလဟတ္ထိမတ္ထကေ သေတစ္ဆတ္တံ ဓာရယမာနော မဟာနာဂ ဝနုယျာနံ သမ္ပာပုဏိ။

အထဿ ဧတဒဟောသိ- သစေ အယံ သမ္မာသမ္ဗုဒ္ဓဿ ဓာတု၊ ဆတ္တံ အပနမတု၊ မင်္ဂလဟတ္ထိ ဇဏ္ဏုကေဟိ ဘူမိယံ ပတိဋ္ဌာဟတု၊ ဓာတု စင်္ဂေါဋကံ မယှံ မတ္ထကေ ပတိဋ္ဌဟတူတိ သဟ ရညော စိတ္တုပ္ပာဒေန ဆတ္တံ အပနမိ ဟတ္ထိဇဏ္ဏုကေဟိ ပတိဋ္ဌဟိ ဓာတုစင်္ဂေါဋကံ ရညော မတ္ထကေ ပတိဋ္ဌဟိ ရာဇာ အမတေနေဝါဘိသိတ္တဂတ္တော ပရမေန ပီတိပါမောဇ္ဇေန သမန္နာဂတော ဟုတွာ ပုစ္ဆိ ဓာတုံ ဘန္တေ ကိံ ကရောမီတိ။ ဟတ္ထိကုမ္ဘိယေဝ တာဝ မဟာရာဇ ဌပေဟီတိ။ ရာဇာ ဓာတုဝင်္ဂေါဋကံ ဟတ္ထိကုမ္ဘေ ဌပေသိ။ ပမုဒိတော နာဂေါ ကုဉ္စနာဒံ နဒိ မဟာမေဃော ဥဋ္ဌဟိတွာ ပေါက္ခရဝဿံ ဝသိသိ ဥကဒပရိယန္တံ ကတွာ မဟာဘူမိစာလော အဟောသိ ပစ္စန္တေပိ နာမ သမ္မာသမ္ဗုဒ္ဓဿ ဓာတုယော ပတိဋ္ဌဟိဿန္တီတိ။

အထ သော ဟတ္ထိနာဂေါ အနေက တာလာဝစရပရိဝုတော အတိဝိယ ဥဠာရေန ပူဇာသက္ကာရေန သက္ကရိယမာနော ပစ္ဆိမဒိသာဘိမုခေါ ဟုတွာ အပသက္ကန္တော ယာဝ နဂရဿ ပုရတ္ထိမ ဒွါရံ တာဝ ဂန္တွာ ပုရတ္ထိမေန ဒွါရေန နဂရံ ပဝိသိတွာ သကလနဂရေ ဥဠာရာယ ပူဇာယ ကယိရာမာနာယ ဒက္ခိဏဒွါရေန နိက္ခမိတွာ ထူပါရာမဿ ပစ္ဆိမဒိသာဘာဂေ ပဘေဇဝတ္ထု နာမ ကိရ အတ္ထိ တတ္ထ ဂန္တွာ ပုန ထူပါရာမာဘိမုခေါ ဧဝ ပဋိနိဝတ္တိ။ သော စ ပုရိမကာနံ တိဏ္ဏံ သမ္မာသမ္ဗုဒ္ဓါနံ ဓမ္မကရကံ ကာယဗဏ္ဓနံ ဥဒကသာဋီကံ ပတိဋ္ဌာပေတွာ ကတစေတိယဋ္ဌာနံ ဟောတီ။ တဒေတံ ဝိနဋ္ဌေသုပိ စေတိယေသု ဒေဝတာနုဘာဝေန ကဏ္ဋက သမာကိဏ္ဏသာခါဟိ နာနာဂစ္ဆေဟိ ပရိဝုတံ တိဋ္ဌတိ။ မာ နံ ကောစိ ဥစ္စိဋ္ဌာ သုဝိမလ ကစဝရေဟိ သန္ဒုသေသီတိ။

အထ တဿ ဟတ္ထိနော ပုရတော ဂန္တွာ ရာဇပုရိသာ သဗ္ဗ ဂစ္ဆေ ဆိဏ္ဒိတွာ ဘူမိံ သောဓေတွာ တံ ဟတ္ထတလသဒိသံ အကံသု။ ဟတ္ထိနာဂေါ ဂန္တွာ တံ ဌာနံ ပုရတော ကတွာ တဿ ပစ္ဆိမဒိသာဘာဂေ ဗောဓိရုက္ခဋ္ဌနေ အဋ္ဌာသိ။ အထဿ မတ္ထကတော ဓာတုံ ဩရောပေတုံ အာရဘိံသု နာဂေါ ဩရောပေတုံ န ဒေတိ။ ထေရံ ပုစ္ဆိ၊ ကသ္မာ ဘန္တေ နာဂေါ ဓာတုံ ဩရောပေတုံ န ဒေတီတိ

အာရုဠှံ မဟာရာဇ ဩရောပေတုံ န ဝဋ္ဋတိတိ။ တသ္မိဉ္စ ကာလေ အဘယဝါပိယာ ဥဒကံ ဇိန္နံ ဟောတိ သမန္တာ ဘူမိ ဖလိတာ သုဥဒ္ဓရာ မတ္တိကပိဏ္ဍာ။ တတော မဟာဇနော သီဃသီဃံ မတ္တိကံ အာဟရိတွာ ဟတ္ထကုမ္ဘပ္ပမာဏံ ဝတ္ထုမကာသိ။ တာဝဒေဝ ထူပကရဏတ္ထံ ဣဋ္ဌိကာ ကာတုံ အာရဘိံသု။ ယာဝ ဣဋ္ဌိကာ ပရိနိဋ္ဌန္တိ တာဝ ဟတ္ထိနာဂေါ ကတိပါဟံ ဒိဝါ ဗောဓိရုက္ခဋ္ဌာနေ ဟတ္ထိသာလာယံ တိဋ္ဌတိ။ ရတ္တိယံ ထူပပတိဋ္ဌာန ဘူမိယံ ပရိယာယတိ။

အထ ဝတ္ထုံ ဝိနာပေတွာ ရာဇာ ထေရံ ပုစ္ဆိ၊ ကီဒိသော ဘန္တေ ထူပေါ ကာတဗ္ဗောတိ။ ဝီဟိရာသိ သဒိသော မဟာရာဇာတိ၊ သာဓု ဘန္တေတိ ရာဇာ ဇင်္ဃပ္ပမာဏံ ထူပံ စိနာပေတွာ ဓာတုဩရောပနတ္ထာယ မဟာသက္ကာရံ ကာရေသိ။

တတော သကလနာဂရာ စ ဇာနပဒါ စ ဓာတုမှ ဒဿနတ္ထံ သန္တိပတိံသု သန္နိပတိတေ စ တသ္မိံ မဟာဇနေ ဒသဗလဿ ဓာတု ဟတ္ထိကုမ္ဘတော သတ္တတာလပ္ပမာနံ ဝေဟာသမဗ္ဘုဂ္ဂန္တွာ ယမကပါဋိဟာရိယံ ဒဿေသိ။ တေဟိ တေဟိ ဓာတုပ္ပဒေသေဟိ ဆဗ္ဗဏ္ဏရံသိယော ဥဒကဓရာ စ အဂ္ဂိက္ခဏ္ဓာ စ ပဝတ္တန္တိ။ သာဝတ္ထိယံ ဂဏ္ဍမ္ဗမူလေ ဘဂဝတာ ဒဿိတ ပါဋိဟာရိယ သဒိသံ ဧဝ ပါဋိဟာရိယံ အဟောသိ။ တဉ္စ ခေါ နေဝ ထေရာနုဘာဝေနန ဒေဝတာနုဘာဝေန၊ အပိ စ ခေါ ဗုဒ္ဓါနံယေဝ အာနုဘာဝေန ဘဂဝါ ကိရ ဓရမာနောဝ အဓိဋ္ဌာသိ - တမ္ဗပဏ္ဏိဒီပေ အနုရာဓပုရဿ ဒက္ခိဏဒိသာဘာဂေ ပုရိမကာနံ တိဏ္ဏံ ဗုဒ္ဓါနံ စေတိယဋ္ဌာနေ မမ ဒက္ခိဏက္ခကဓာတု ပတိဋ္ဌာန ဒိဝသေ ယမကပါဋိဟာရိယံ ဟောတူတိ။

ဧဝံ အစိန္တိယာ ဗုဒ္ဓါ-ဗုဒ္ဓဓမ္မာ အစိန္တိယာ၊

အစိန္တိယေသု ပသန္နာနံ-ဝိပါကော ဟောတိ အစိန္တိယောတိ၊

ဓာတုသရီရတော နိက္ခန္တ ဥဒကဖုသိတေဟိ သကလေဟိ တမ္ဗပဏ္ဏိဒီပတလေ န ကောစိ အဖုဋ္ဌောကာသော နာမ အဟောသိ။ ဧဝမဿ တံ ဓာတု သရီရံ ဥဒကဖုသိတေဟိ တမ္ဗပဏ္ဏိတ္ထလဿ ပရိဒါဟံ ဝူပသမေတွာ မဟာဇနဿ ပါဋိဟာရိယံ ဒဿေတွာ ဩတရိတွာ ရညော မတ္ထကေ ပတိဋ္ဌာသိ ရာဇာ သဖလံ မနုဿတ္တပဋိလာဘံ မညမာနော မဟန္တံ သက္ကာရံ ကတွာ ဓာတုံ ပတိဋ္ဌာပေသိ။ သဟ ဓာတုပတိဋ္ဌာနေန မဟာဘူမိစာလော အဟောသိ နိဋ္ဌိတေ ပန ထူပေ ရာဇာ စ ရာဇာ ဘာတိကာ စ ဒေဝိယော စ ဒေ-နာဂ-ယက္ခာနံ ဝိမ္ဘယကရံ ပစ္စေကံ ထူပမကံသု။

ဧဝံ ဇိနော ဓာတုသရီရကေန

ဂတောပိ သန္တိံ ဇနတာဟိတဉ္စ၊

သုခဉ္စ ဓမ္မာ ဗဟုဓာ ကရေယျ

ဌိတော ဟိ နာထောနုကရံ ကရေယျ၊

သာဓုဇန မနောပသာဒနတ္ထာယ ကတေ ထူပဝံသေ ထူပါရာမ ကထာ၊

၁၃။ နိဋ္ဌိတာယ ပန ဓာတုပူဇာယ ပတိဋ္ဌိတေ ဓာတုဝရေ မဟိဏ္ဒတ္ထေရော မဟာမေဃဝနုယျာနမေဝ ဂန္တွာဝါသံ ကပ္ပေသိ။ တသ္မိံ ခေါ ပန သမယေ အနုလာဒေဝီ ပဗ္ဗဇိတုကာမာ ဟုတွာ ရညော အာရောစေသိ။ ရာဇာ တဿာ ဝစနံ သုတွာ ထေရံ ဧတဒဝေါစ? ဘန္တေ အနုလာဒေဝီ ပဗ္ဗဇိတုကာမာ၊ ပဗ္ဗာဇေထ နန္တ န မဟာရာဇ အမှာကံ မာတုဂါမံ ပဗ္ဗာဇေတုံ ကပ္ပတိ။ ပါဋလိပုတ္တေ ပန မယှံ ဘဂိနိ သင်္ဃမိတ္တာ ထေရီ နာမ အတ္ထိ၊ တံ ပက္ကောသာပေဟိ မဟာရာဇ၊ ဣမသ္မိဉ္စ ဒီပေ ပုရိမကာနဉ္စ တိဏ္ဏံ သမ္မာသမ္ဗုဒ္ဓါနံ ဗောဓိ ပတိဋ္ဌံသိ အမှာကမ္ပိ ဘဂဝတော သရသ ရံသိဇာလ ဝိဿဇ္ဇနကေန ဗောဓိနာ ပတိဋ္ဌာတဗ္ဗံ၊ တသ္မာ သာသနံ ပဟိဏေယျသိ ယထာ သင်္ဃမိတ္တာ ဗောဓိံ ဂဟေတွာ အာဂစ္ဆေယျာတိ။

ရာဇာ ထေရဿ ဝစနံ သမ္ပဋိစ္ဆိတွာ အမစ္စေဟိ သဒ္ဓိံ မန္တေန္တော အရိဋ္ဌံ နာမ အတ္တနော ဘာဂိနေယျံ အာဟ သက္ခိဿသိ တွံ တာတ ပါဋလီပုတ္တံ ဂန္တွာ မဟာဗောဓိနာ သဒ္ဓိံ အယျံ သင်္ဃမိတ္တတ္ထေရိံ အာနေတုန္တိ သက္ခိဿာမိ ဒေဝ သစေ မေ ပဗ္ဗဇ္ဇံ အနုဇာနိဿသီတိ။

ဂစ္ဆ တာတ ထေရိံ အာနေတွာ ပဗ္ဗဇ္ဇာဟီတိ။ သော ရညော စ ထေရိဿ စ သာသနံ ဂဟေတွာ ထေရဿ အဓိဋ္ဌာနဝသေန ဧကဒိဝသေ န ဇမ္ဗုကောလပဋ္ဋနံ ဂန္တွာ နာဝံ အဘိရူဟိတွ သမုဒ္ဒံ အတိက္ကမိတွာ ပါဋလီပုတ္တံ ဂန္တွာ ရညော သာသနံ အာစိက္ခိ-ပုတ္တော တေ ဒေဝ မဟိဏ္ဒထေရော ဧဝမာဟ။ သဟာယဿ ကိရ တေ ဒေဝါနမ္ပိယတိဿဿ ဘာတုဇာယာ အနုလာဒေဝီ နာမ ပဗ္ဗဇိတုကာမာ၊ တံ ပဗ္ဗာဇေတုံ အယျံ သင်္ဃမိတ္တတ္ထေရိံ ပဟိဏေယျာထ၊ အယျာယ ဧဝ စ သဒ္ဓိံ မဟာဗောဓိန္တိ။

ထေရဿ သာသနံ အာရောစေတွာ သင်္ဃမိတ္တတ္ထေရိံ ဥပသင်္ကမိတွာ ဧဝမာဟ။ အယျေ တုမှာကံ ဘာတာ မဟိဏ္ဒတ္ထေရော မံ တုမှာကံ သန္တိကံ ပေသေသိ ဒေဝါနမ္ပိယတိဿ ရညော ဘာတုဇာယာ အနုလာဒေဝီ နာမ ပဉ္စဟိ ကညာသတေဟိ ပဉ္စဟိ စ အန္တေပုရိသာ သတေဟိ သဒ္ဓိံ ပဗ္ဗဇိတုကာမာတိ၊ တံ ကိရ အာဂန္တွာ ပဗ္ဗာဇေထာတိ။

သာ တာဝ ဒေဝ တုရိတ တုရိတာ ဂန္တွာ ရညာ တ္ैမတ္ထံ အာရောစေတွာ ဂစ္ဆာမဟံ မဟာရာဇ တမ္ဗပဏ္ဏိဒီပန္တိ အာဟ။

တေန ဟိ အမ္မ မဟာဗောဓိံ ဂဟေတွာ ဂစ္ဆာဟီတိ ဝတွာ ပါဋလီပုတ္တတော ယာဝ မဟာဗောဓိ တာဝ မဂ္ဂံ ပဋိဇဂ္ဂါပေတွာ သတ္တယောဇနာယာမယ တိယောဇန ဝိတ္ထတာယ မဟတိယာ သေနာယ ပါဋလိပုတ္တတော နိက္ခမိတွာ အရိယသင်္ဃံ အာဒါယ မဟာဗောဓိသမီပံ အဂမာသိ။

သေနာယ သမုဿိတ ဓဇပတာကံ နာနာရတန ဝိစိတ္တံ အနေကာလင်္ကာရ ပတိမဏ္ဍိတံ နာနာဝိဓ ကုသုမ သမာကိဏ္ဏံ အနေက တုရိယ သံဃြဋ္ဌံ မဟာဗောဓိံ ပရိက္ခိပိ တတော ရာဇာ ပုပ္ဖ-ဂဏ္ဓ-မာလာဒီဟိ ပူဇေတွာ တိက္ခတ္တုံ ပဒက္ခိဏံ ကတွာ အဋ္ဌသု ဌာနေသု ဝန္ဒိတွာ ဥဋ္ဌာယ အဉ္ဇလိမ္ပဂ္ဂယှ ဌတွာ သစ္စဝစနကိရိယာယ ဗောဓိံ ဂဏှိတုကာမော ရတနပီဌံ အာရုယှ တုလိကံ ဂဟေတွာ မနောသိလာယ လေခံ ကတွာ ယဒိ မဟာဗောဓိနာ လင်္ကာဒီပေ ပတိဋ္ဌာတဗ္ဗံ၊ ယဒိ စာဟံ ဗုဒ္ဓသာသနေ နိဗ္ဗေမတိကော ဘဝေယျံ၊ မဟာဗောဓိ သယမေဝ ဣမသ္မိံ သုဝဏ္ဏကဋာဟေ ပတိဋ္ဌဟတူတိ သစ္စကိရိယမကာသိ သဟ သစ္စကိရိယာယ ဗောဓိသာခါ မနောသိလာယ ပရိစ္ဆိန္နဋ္ဌာနေဟိ ဆိဏ္ဒိတွာ ဂဏ္ဓ ကလလ ပူရဿ သုဝဏ္ဏကဋာဟဿ ဥပရိ အဋ္ဌာသိ။

တတော ရာဇာ မဟာဗောဓိံ ဗောဓိမဏ္ဍတော မဟန္တေန သက္ကာရေန ပါဋလီပုတ္တံ အာနေတွာ သဗ္ဗပရိဟာရာနိ ဒတွာ မဟာဗောဓိံ ဂင်္ဂါယ နာဝံ အာရောပေတွာ သယမ္ပိ နဂရတော နိက္ခမိတွာ ဝိဉ္ဈာဋဝိံ သမတိက္ကမ္မ အနုပုဗ္ဗေန သတ္တဒိဝသေဟိ တာမလိတ္တိံ အနုပ္ပတ္တော အန္တရမဂ္ဂေ ဒေဝ-နာဂ-မနုဿာ ဥဠာရံ မဟာဗောဓိ ပူဇမကံသု။

ရာဇာပိ သမုဒ္ဒတီရေ သတ္တဒိဝသာနိ မဟာဗောဓိံ ဌပေတွာ မဟန္တံ သက္ကာရံ ကတွာ ဗောဓိမ္ပိ သံင်္ဃမိတ္တတ္ထေရိမ္ပိ သပရိဝါရံ နာဝံ အာရောပေတွာ ဂစ္ဆတိ ဝတရေ ဒသဗလဿ သရသ ရံသိဇာလာ မုဉ္စမာနော မဟာဗောဓိ ရုက္ခောတိ ကဏ္ဒိတွာ အဉ္ဇလိမ္ပဂ္ဂဟေတွာ အဿူနိ ပဝတ္တယမာနော အဋ္ဌာသိ သာပိ ခေါ မဟာဗောဓိ သမရူဠှနာဝါ ပဿတော ပဿတော မဟာရာဇဿ မဟာသမုဒ္ဒတလံ ပက္ခဏ္ဒိ မဟာသမုဒ္ဒေပိ သမန္တာ ယောဇနံ ဝီစိ ဝူပသန္တာ ပဉ္စဝဏ္ဏာနိ ပဒုမာနိ ပုပ္ဖိတာနိ အန္တလိက္ခေ ဒိဗ္ဗတုရိယာနိ ဝဇ္ဇိံသု အာကာသေ ဇလ ထလ သန္နိဿိတာဟိ ဒေဝတာဟိ ပဝတ္တိတာ အတိဝိယ ဥဠာရ ပူဇာ အဟောသိ။ ဧဝံ မဟတိယာ ပူဇာယ သာ နာဝါ ဇမ္ဗုကောလပဋ္ဋနံ ပါဝိသိ။

ဒေဝါနမ္ပိယတိဿ မဟာရာဇာပိ ဥတ္တရဒွါရတော ပဋ္ဌာယ ယာဝ ဇမ္ဗုကောလပဋ္ဋနာ မဂ္ဂံ သောဓာပေတွာ အလင်္ကာရာပေတွာ နဂရတော နိက္ခမန ဒိဝသေ ဥတ္တရဒွါရ သမီပေ သဒ္ဒသာလာဝတ္ထုသ္မိံ ဌိတော တာယ ဝိဘူတိယာ မဟာသမုဒ္ဒေ အာဂစ္ဆန္တံယေဝ မဟာဗောဓိံ ထေရဿာနုဘာဝေန ဒိသွာ တုဋ္ဌမာနသော နိက္ခမိတွာ သဗ္ဗံ မဂ္ဂံ ပဉ္စဝဏ္ဏေဟိ ပုပ္ဖေဟိ ဩကိရန္တော အန္တရန္တရာ ပုပ္ဖအဂ္ဃိယာနိ ဌပေန္တော ဧကာဟေနေဝ ဇမ္ဗုကောလပဋ္ဋနံ ဂန္တွာ သဗ္ဗတာလာဝစရ ပရိဝုတော ပုပ္ဖ ဓူပဂဏ္ဓာဒီဟိ ပူဇယမာနော ဂလပ္ပမံနံ ဥဒကံ ဩရုယှ အာဂတော ဝတ ရေဒသဗလဿ သရသ ရံသိဇာလံ ဝိဿဇ္ဇနကော ဗောဓိရုက္ခောတိ ပသန္နစိတ္တော မဟာဗောဓိံ ဥက္ခိပိတွာ ဥတ္တမင်္ဂေ သိရသ္မိံ ပတိဋ္ဌပေတွာ မဟာဗောဓိံ ပရိဝါရေတွာ အာဂတေဟိ သောဠသဟိ ဇာတိသမ္ပန္နကုလေဟိ သဒ္ဓိံ သမုဒ္ဒတော ပစ္စုတ္တရိတွာ သမုဒ္ဒတီရေ ဗောဓိံ ဌပေတွာ တီဏိ ဒိဝသာနိ သကလ တမ္ဗပဏ္ဏိ ရဇ္ဇေန ပူဇေသိ။

အထ စတုတ္ထေ ဒိဝသေ မဟာဗောဓိံ အာဒါယ ဥဠာရံ ပူဇံ ကုရုမာနော အနုပုဗ္ဗေန အနုရာဓပုရံ သမ္ပတ္တေ အနုရာဓပုရေပိ မဟာသက္ကာရံ ကတွာ စာတုဒ္ဒသီ ဒိဝသေ ဝဍ္ဎမာနကစ္ဆာယာယ မဟာဗောဓိံ ဥတ္တရဒွါရေန ပဝေသေတွာ နဂရမဇ္ဈန အတိဟရိတွာ ဒက္ခိဏဒွါရေန နိက္ခမိတွာ ဒက္ခိဏဒွါရတော ပဉ္စဓနု သတိကေ ဌာနေ ယတ္ထ အမှာကံ သမ္မာသမ္ဗုဒ္ဓါ နိရောဓ သမာပတ္တိံ သမာပဇ္ဇိတွာ နိသီဒိ။ ပုရိမကာ စ တယော သမ္မာသမ္ဗုဒ္ဓါ သမာပတ္တိံ အပ္ပေတွာ နိသီဒိံသု။ ယတ္ထ စ ကကုသဏ္ဓဿ ဘဂဝတော သိရီသဗောဓိ၊ ကောနာဂမနဿ ဘဂဝတော ဥဒုမ္ဗရဗောဓိ၊ ကဿပဿ ဘဂဝတော နိဂြောဓဗောဓိ၊ ပတိဋ္ဌာပေသိ -တသ္မိံ မဟာမေဃဝနုယျာနဿ တိလကဘူတေ ကတဘူမိ ပရိကမ္မေ ရာဇဝတ္ထုဒွါရကောဋ္ဌကဋ္ဌာနေ မဟာဗောဓိံ ပတိဋ္ဌာပေသိ။

ဧဝံ လင်္ကာဟိတတ္ထာယ-သာသနဿစ ဝုဒ္ဓိယာ၊

မဟာမေဃဝနေ ရမ္မေ-မဟာဗောဓိ ပတိဋ္ဌိတောတိ၊

ဗောဓိ အာဂမနကထာ

၁၄။ အနုလာဒေဝီ ပဉ္စဟိ ကညာသတေဟိ ပဉ္စဟိ အန္တေပုရိသာ သတေဟီတိ မာတုဂါမသဟဿေန သဒ္ဓိံ သင်္ဃမိတ္တတ္ထေရိယာ သန္တိကေ ပဗ္ဗဇိတွာ နစိရဿေဝ သပရိဝါရာ အရဟတ္တေ ပတိဋ္ဌာသိ။ အရိဋ္ဌောပိ ခေါ ရညော ဘာဂိနေယျော ပဉ္စဟိ ပုရိသ သတေဟိ သဒ္ဓိံ ထေရဿ သန္တိကေ ပဗ္ဗဇိတွာ သပရိဝါရော နစိရဿေဝ အရဟတ္တေ ပတိဋ္ဌာသိ။ အထေကဒိဝသံ ရာဇာ ဗောဓိံ ဝန္ဒိတွာ ထေရေန သဒ္ဓိံ ထူပါရာမံ ဂစ္ဆတိ။ တဿ လောဟပါသာဒဋ္ဌာနံ သမ္ပတ္တဿ ပုရိသာ ပုပ္ဖာနိ အာဟရိံသု ရာဇာ ထေရဿ ပုပ္ဖာနိ အဒါသိ။ ထေရော ပုပ္ဖေဟိ လောဟပါသာဒဋ္ဌာနံ ပူဇေသိ ပုပ္ဖေသု ဘူမိယာ ပတိတ မတ္တေသု မဟာဘူမိစာလော အဟောသိ?

ရာဇာ ကသ္မာ ဘန္တေ ဘူမိ စလိတာနိ ပုစ္ဆိ။ ဣမသ္မိံ မဟာရာဇ ဩကာသေ အနာဂတေ သင်္ဃဿ ဥပေါသထာဂါရံ ဘဝိဿတိ။ တဿေတံ ပုဗ္ဗနိမိတ္တန္တိ အာဟ။ ပုန တဿ မဟာစေတိယဋ္ဌာနံ သမ္ပတ္တဿ စမ္ပက ပုပ္ဖာနိ အဘိဟရိံသု။ တာနိပိ ရာဇာ ထေရဿ အဒါသိ။ ထေရော မဟာစေတိယဋ္ဌာနံ ပုပ္ဖေဟိ ပူဇေတွာ ဝန္ဒိ တာဝဒေဝ မဟာပထဝီ သံကမ္ပိ။ ရာဇာ ဘန္တေ ကသ္မာ ပထဝီ ကမ္ပိတ္ထာတိ ပုစ္ဆိ။ မဟာရာဇ ဣမသ္မိံ ဌာနေ အနာဂတေ ဗုဒ္ဓဿ ဘဂဝတော အသဒိသော မဟာထူပေါ ဘဝိဿတိ။ တဿေတံ ပုဗ္ဗနိမိတ္တန္တိ အာဟ။ အဟမေဝ ကရောမိ ဘန္တေတိ။ အလံ မဟာရာဇ တုမှာကံ အညံ ဗဟုံ ကမ္မံ အတ္ထိ။ တုမှာကံ ပန နန္တာ ဒုဋ္ဌဂါမဏီ အဘယော နာမ ကာရေဿတီတိ။

အထ ရာဇာ သစေ ဘန္တေ မယှံ နန္တာ ကရိဿတိ။ ကတံယေဝ မယာတိ ဒွါဒသဟတ္ထံ ပါသာဏတ္ထမှံ အာဟရာပေတွာ ဒေဝါနမ္ပိယတိဿ ရညော နတ္တာ ဒုဋ္ဌဂါမဏိ အဘယော နာမ ဣမသ္မိံ ပဒေသေ ထူပံ ကရောတီတိ အက္ခရာနိ လိခါပေတွာ ပတိဋ္ဌာပေသီတိ အထ ဒေဝါနမ္ပိယတိဿရာဇာ စေတိယပပ္ပတေ နိဟိတာ သမ္မာသမ္ဗုဒ္ဓ ဘုတ္တ ပတ္တ ပူရေတွာ အာဟဋာ ဓာတုယောဟတ္ထိက္ခဏ္ဓေန အာဟရာပေတွာ သကလတမ္ဗပဏ္ဏိဒီပေ ယောဇနေ ယောဇနေ ထူပံ ကာရေတွာ ဓာတုယော ပတိဋ္ဌာပေသိ ဘဂဝတော ပတ္တံ ပန ရာဇ ဂေဟေယဝ ဌပေတွာ ပူဇမကာသီတိ။

နိဓာပေတွာန သမ္ဗုဒ္ဓ-ဓာတုယော ပတ္တမတ္တကာ၊

ကာရာပေသိ မဟာရာဇ-ထူပေ ယောဇန ယောဇနေတိ၊

ယောဇနထူပ ကထာ

အထ ရာဇာ အညာနိ စ ဗဟူနိ ပုညကမ္မာနိ ကတွာ စတ္တာလီသ ဝဿာနိ ရဇ္ဇံ ကာရေသိ။ တဿ အစ္စယေန တံ ကနိဋ္ဌော ဥတ္တိယ ရာဇာ ဒသဝဿာနိ ရဇ္ဇံ ကာရေသိ။ တဿ အစ္စယေန တံ ကနိဋ္ဌော မဟာသီဝေါ ဒသဝဿာနေဝ ရဇ္ဇံ ကာရေသိ တဿ အစ္စယေန တဿာပိ ကနိဋ္ဌော သူရတိဿော ဒသဝဿာနေဝ ရဇ္ဇံ ကာရေသိ တတော အဿနာဝိက ပုတ္တာ ဒွေ ဒမိဠာ သူရတိဿံ ဂဟေတွာ ဒွေဝီသ ဝဿာနိ ဓမ္မေန ရဇ္ဇံ ကာရေသုံ။ တေ ဂဟေတွာ မုဋသီဝဿ ရညော ပုတ္တော အသေလော နာမ ဒသဝဿာနိ ရဇ္ဇံ ကာရေသိ အထ စောဠရဋ္ဌတော အဂန္တွာ ဧဠာရော နာမ ဒမိလော အသေလ ဘူပတိံ ဂဟေတွာ စတုစတ္တာလီသ ဝဿာနိ ရဇ္ဇံ ကာရေသိ ဧဠာရံ ဂဟေတွာ ဒုဋ္ဌဂါမဏိ အဘယော ရာဇာ အဟောသိ။

တဒတ္ထဒီပနတ္ထံ အယမနုပုဗ္ဗကထာ

၁၅။ ဒေဝါနမ္ပိယတိဿ ရညော ကိရ ဒုတိယဘာတိကော ဥပရာဇာ မဟာနာဂေါ နာမ အဟောသိ။ အထ ရညော ဒေဝီ အတ္တနော ပုတ္တဿ ရဇ္ဇံ ဣစ္ဆန္တိ တရစ္ဆနာဝါ ဝါပိံ ကရောန္တဿ ဥပရာဇဿဝိသေန အမ္ဗံ ယောဇေတွာ အမ္ဗမတ္ထကေ ဌပေတွာ ပေသေသိ ဒေဝိယိ ပုတ္တေ၊ ဥပရာဇေန သဒ္ဓိံ ဂတော ဘာဇနေ ဝိဝဋေ သယမေဝ အမဗံ ဂဟေတွာ ခါဒိတွာ ကာလမကာသိ ဥပရာဇာ တံ ကာရဏံ ဉတွာ ဒေဝိယာ ဘီတော တတောယေဝ အတ္တနော ဒေဝိဉ္စ ဗလဝါဟနဉ္စ ဂဟေတွာ ရောဟဏံ အဂမာသိ။ တဿ အဂ္ဂမဟေသိ အန္တရာမဂ္ဂေ ယဋ္ဋာလဝိဟာရေ နာမ ပုတ္တံ ဝိဇာယိ တဿ တိဿောတိ ဘာတုနာမ’မကံသိ။

သော တတော ဂန္တွာ မဟာဂါမေ ဝသန္တော ရောဟဏေ ရဇ္ဇံ ကာရေသိ တဿ အစ္စယေန တဿ ပုတ္တော ယဋ္ဋာလတိဿော မဟာဂါမေယေဝ ရဇ္ဇံ ကာရေသိ။ တဿ အစ္စယေန တဿာပိ ပုတ္တော ဂေါဌာဘယော နာမ တတ္ထေဝ ရဇ္ဇံ ကာရေသိ။ ဂေါဌာဘယဿ ပုတ္တော ကာကဝဏ္ဏတိဿော နာမ တတ္ထေဝ ရဇ္ဇံ ကာရေသိ။ ကာကဝဏ္ဏတိဿ ရညော ကိရ ကလျာဏိတိဿ ရညော ဓီတာ ဝိဟာရမဟာဒေဝီ နာမ အဂ္ဂမဟေသိ အဟောသိ သာ ရညော ပိယာ အဟောသိ မနာပါ။ ရာဇာ တာယ သဒ္ဓိံ သမဂ္ဂဝါသံ ဝသန္တော ပုညာနိ ကရောန္တော ဝိဟာသိ။ အထေကဒိဝသံ ဒေဝီ ရာဇဂေဟေယေဝ ဘိက္ခုသင်္ဃဿ မဟာဒါနံ ဒတွာ သာယဏှသမယေ ဂဏ္ဓမာလာဒီနိ ဂါဟာပေတွာ ဓမ္မံ သောတုံ ဝိဟာရံဂတာ၊ တတ္ထ နိပန္နံ ဗာဠှဂိလာနံ အာသန္နမရဏံ သီလဝန္တံ သာမဏေရံ ဒိသွာ ဂဏ္ဓမာလာဒီဟိ ပူဇေတွာ အတ္တနော သမ္ပတ္တိံ ဝဏ္ဏေတွာ မမ ပုတ္တဘာဝံ ပတ္ထေထ ဘန္တေတိ ယာစိ။

သော န ဣစ္ဆိ၊ ယာပိ ပုနပ္ပုန ယာစိယေဝ။ သာမဏေရောပိ ဧဝံ သန္တေ သာသနာနုဂ္ဂဟံ ကာတုံ သက္ကာတိသမ္ပဋိစ္ဆိတွာ ဂတိနိမိတ္တဝသေန ဥပဋ္ဌိတမ္ပိ ဒေဝလောကံ ဆဍ္ဍေတွာ နိကန္တိဝသေန သုဝဏ္ဏ သိဝိကာယ ဂစ္ဆန္တိယာ ဒေဝိယာ ကုစ္ဆိမှိ ပဋိသဏ္ဓိံ ဂဏှိ။

သာ ဒသမာသစ္စယေန ပုတ္တံ ဝိဇာယိ။ တဿ ဂါမဏိ အဘယောတိ နာမံ ကရိံသု။ အပရဘာဂေ အပရမ္ပိ တဿ တိဿောတိ နာမံ ကရိံသု။ ဂါမဏိ ကုမာရော ကမေန ဝဍ္ဎေန္တော သောဠသ ဝဿိကော ဟုတွာ ဟတ္ထဿ ထရာ သိပ္ပေသု ကောဝိဒေါ တေဇောဗလ ပရက္ကမ သမ္ပန္နော အဟောသိ။ အထ ခေါ ကာကဝဏ္ဏတိဿ ရာဇာ နဏ္ဓိမိတ္တော-သုရနိမ္မလော-မဟာသေနော-ဂေါဌယိမ္ဗရော-ထေရပုတ္တာဘ- ယော-ဘရဏော-ဝေဠုသုမနော-ခဉ္စဒေဝေါ-ဖုဿဒေဝေါ-လဘိယျဝသဘောတိ ဣမေ ဒသာမဟာယောဓေ ပုတ္တဿ သန္တိကေ ဌပေတွာ ဝါသေသိ။

တေသံ ဥပ္ပတ္တိကထာ မဟာဝံသတော ဂဟေတဗ္ဗာ ရာဇာ ဒသမဟာယောဓာနံ ပုတ္တဿ သက္ကာရသမံသက္ကာရံ ကာရေသိ တိဿကုမာရံ ဇနပဒ ရက္ခနတ္ထာယ ဒီဃဝါပိယံ ဌပေသိ အထေကဒိဝသံ ဂါမိဏီ ကုမာရော အတ္တနော ဗလဝါဟန သမ္ပတ္တိံ ဒိသွာ ဒမိဠေဟိ သဒ္ဓိံ ယုဇ္ဈဿာမီတိ ရညော ကထာပေသိ။ ရာဇာ ပုတ္တံ အနုရက္ခန္တော အလံ ဩရဂင်္ဂန္တိ နိဝါရေသိ။ သော ယာဝ တတိယံ ကထာပေသိ ရာဇာ ကုဇ္ဈိတွာ ဟေမသင်္ခလိကံ ကရောထ ဗဏ္ဓိတွာ ရက္ခိဿာမီတိ။ အဘယော ပိတု ရညော ကုဇ္ဈိတွာ ပလာယိတွာ မလယံ အဂမာသိ တတော ပဋ္ဌာယ ပိတရိ ဒုဋ္ဌတ္တာ ဒုဋ္ဌဂါမဏီတိ ပညာတော ရာဇာ ပုတ္တာနံ ကလဟဋ္ဌာနံ အာဂမနတ္ထာယ ယောဓေဟိ သပထံ ကာရေသိ။

အထ ကာကဝဏ္ဏတိဿ ရာဇာ စတုသဋ္ဌိဝိဟာရေ ကာရေတွာ စတုသဋ္ဌိ သံဝစ္ဆရာနေဝ ဌတွာ ကာလမကာသိ တိဿကုမာရော ပိတုကာလကတဘာဝံ သုတွာ ဒီဃဝါပိတော အာဂန္တွာ ပိတု သရီရကိစ္စံ ကာရေတွာ မာတရံ - ကဏ္ဍုလ ဟတ္ထိဉ္စ ဂဟေတွာ ဘာတု ဘယာ ဒီဃဝါပိံ အဂမာသိ။ အမစ္စာ သန္နိပတိတွာ တံ ပဝတ္တိံ ဝတွာ ဒုဋ္ဌဂါမဏိတိဿ သန္တိကံ ပေသေသုံ။ သော တံ သာသနံ သုတွာ ဘုတ္တသာလံ အာဂမ္မ ဘာတု သန္တိကံ ဒူတေ ပေသေတွာ တတော မဟာဂါမံ အာဂန္တွာ အဘိသေကံ ပတွာ မာတရံ ကဏ္ဍုလဟတ္ထိဉ္စ ပေသေတူတိ ယာဝ တတိယံ ဘာတု သန္တိကံ လေခါ ပေသေတွာ အပေသန ဘာဝံ ဉတွာ ယုဒ္ဓါယ နိက္ခမိ။ ကုမာရောပိ ယုဒ္ဓသဇ္ဇောဟုတွာနိက္ခမိ။ စုဠင်္ဂဏိယ ပိဋ္ဌိယံ ဒွိန္နံ ဘာတူနံ မဟာယုဒ္ဓံ အဟောသိ။

တေ ကိရ ယောဓာ သပထဿ ကတတ္တာ တေသံ ယုဒ္ဓေ သဟာယာ န ဘဝိံသု။ တဒါ ရညော အနေကသဟဿ မနုဿာ မရိံသု။ ရာဇာ ပရဇ္ဇိတွာ တိဿာမစ္စံ ဒိဃတုဏိကံ ဝဠဝဉ္စ ဂဟေတွာ ပလာယိ။ ကုမာရော ပစ္ဆတော ပစ္ဆတော အနုဗဏ္ဓိ။ အန္တရေ ဘိက္ခု ပဗ္ဗတံ မာပေသုံ။ တံ ဒိသွာ ကုမာရော ဘိက္ခုသင်္ဃဿ ကမ္မန္တိ ဉတွာ နိဝတ္တိ ရာဇာ ပလာယိတွာ ကပ္ပဏ္ဒကရ နဒိယာ ဇလမာလတိတ္ထံ နာမ ဂန္တွံ ဆာတောမှိတိ အာဟ။ အမစ္စော သုဝဏ္ဏသရကေ ပက္ခိတ္တဘတ္တာ နိဟရိတွာ အဒါသိ။

ရာဇာ ကာလံ သလ္လက္ခေတွာ သင်္ဃဿ ဒတွာ ဘုဉ္ဇာမိတိ သင်္ဃဿ-အမစ္စဿ-ဝဠဝါယ-အတ္တနော စာတိ စတုဘာဂံ ကတွာ ကာလာ ဃောသာပေသိ တဒါ ပိယင်္ဂုဒိပတော ကုဋုမ္ဗိယတိဿတ္ထေရော နာမ အာဂန္တွာ ပုရတော အဋ္ဌာသိ။ ရာဇာ ထေရံ ဒိသွာ ပသန္နမာနသော သင်္ဃဿ ဌပိတဘာဂံ အတ္တနော ဘာဂဉ္စ ထေရဿ ပတ္တေ ပက္ခိပိံ အမစ္စောပိ အတ္တနော ဘာဂံ ပက္ခိပိ ဝဠဝါပိ ဒါတုကာမာ အဟောသိ။ တဿာဘိပ္ပာယံ ဉတွာ အမစ္စော တဿာပိ ဘာဂံ ပတ္တေ ပက္ခိပိ။

ဣတိ သော ရာဇာ ထေရဿ ပရိပုဏ္ဏ ဘတ္တပတ္တံ အဒါသိ။ ထေရော ပတ္တံ ဂဟေတွာ ဂန္တွာ ဂေါတမတ္ထေရဿ နာမ အဒါသိ။ သော ပဉ္စသတ ဘိက္ခု ဘောဇေတွာ ပုန တတော လဒ္ဓေဟိ ဘာဂေဟိ ပတ္တပူရေတွာ အာကာသေ ခိပိ ပတ္တော ဂန္တွာ ရညော ပုရတော အဋ္ဌာသိ တိဿော ပတ္တံ ဂဟေတွာ ရာဇာနံ ဘောဇေတွာ တတော သယံ ဘုဉ္ဇိတွာ ဝဠဝံ ဘောဇေသိ။ တတော ရာဇာ သန္နာဟံ စုမ္ဗဋကံ ကတွာ ပတ္တံ ဝိဿဇ္ဇေသိ။ တတော ဂန္တွာ ထေရဿ ဟတ္ထေ ပတိဋ္ဌာသိ၊ ရာဇာ ပုန မဟာဂါမံ အာဂန္တွာ သေနံ သင်္ကဍ္ဍိဝေါ သဋ္ဌိသဟဿဗလာ ဂဟေတွာ ပုန ဘာတရာ သဒ္ဓိံ ယုဇ္ဈိ တဒါ ကုမာရဿ အနေက သဟဿံ မနုဿာ ပတိံသု။

ကုမာရော ပလာယိတွာ ဝိဟာရံ ပဝိသိတွာ မဟာထေရဿ ဂေဟံ ပါဝိသိ။

ရာဇာ ပစ္ဆတော ပစ္ဆတော အနုဗဏ္ဓန္တော ဝိဟာရံ ပဝိဋ္ဌဘာဝံ ဉတွာ နိဝတ္တိ ပစ္ဆာ ထေရာ တေ ဥဘော ဘာတရော အညမညံ ခမာပေသုံ။ တဒါ ရာဇာ သဿကမ္မာနိ ကာရေတုံ တိဿကုမာရံ ဒီဃဝါပိမေဝ ပဟိဏိတွာ သယမ္ပိ ဘေရံ စရာပေတွာ သဿကမ္မာနိ ကာရေသိ။ အထ မဟာဇနဿ သင်္ဂဟံကတွာ ကုန္တေ ဓာတုံ နိဓာပေတွာ ဗလဝါဟန ပရိဝုတော တိဿာရာမံ ဂန္တွာ သင်္ဃံ ဝန္ဒိတွာ ဘန္တေ သာသနံ ဇောတေတုံ ပါရဂင်္ဂံ ဂမိဿာမိ သက္ကာရေတုံ အမှေဟိ သဟဂါမိနော ဘိက္ခု ဒေထာတိ အာဟ။

သင်္ဃော ပဉ္စသတဘိက္ခု အဒါသိ။ ရာဇာ ဘိက္ခုသင်္ဃံ ဂဟေတွာ ကဏ္ဍုလဟတ္ထိမာရုယှ ယောဓေဟိ ပရိဝုတော မဟတာ ဗလကာယေန ယုဒ္ဓါယ နိက္ခမိတွာ မဟိယင်္ဂဏံ အာဂနန္တွာ တတ္ထ ဒမိဠေဟိ သဒ္ဓိံ ယုဇ္ဈန္တော မဟိယင်္ဂဏေ ကဉ္စုက ထူပံ ကာရေသိ။ တဿ ထူပဿ ဝိဘာဝနတ္ထံ အယမာနုပုဗ္ဗကထာ။

၁၆။ ဘဂဝါ ကိရ ဗောဓိတေ နဝမေ မာသေ ဣမံ ဒီပမာဂန္တွာ ဂင်္ဂါတီရေ တိယောဇနာယတေ ယောဇနဝိတ္ထတေ မဟာနာဂဝနုယျာနေ ယက္ခသမာဂမံ အာဂန္တွာ တေသံ ယက္ခာနံ ဥပရိဘာဂေ မဟိယင်္ဂဏ ထူပဿ ဌာနေ ဝေဟာသယံ ဌိတော ဝုဋ္ဌိ ဝါတန္ဓကာရာဒီဟိ ယက္ခေ သန္တာသေတွာ တေဟိ အဘယံ ယာစိတော တုမှာကံ အဘယံ ဒဿာမိ တုမှေ သမဂ္ဂါ မယှံ နိသီဒနဋ္ဌာနံ ဒေထာတိ အာဟ။

ယက္ခာ၊ မာရိသ တေ ဣမံ သကလဒီပံ ဒေမိ။ အဘယံ နော ဒေဟီတိ အာဟံသု။ တတော ဘဂဝါ တေသံ ဘယံ အပနုဒိတွာ တေဟိ ဒိန္နဘဘူမိယံ စမ္မခဏ္ဍံ ပတ္ထရိတွာ တတ္ထ နိသိန္နော တေဇောကသိဏံ သမာပဇ္ဇိတွာ စမ္မခဏ္ဍံ သမန္တတော ဇာလေတွာ ဝဍ္ဎေသိ။ တေ စမ္မခဏ္ဍေန အဘိဘူနာ သမန္တတော သာဂရ ပရိယန္တေ ရာသိဘူတာ အဟေသုံ ဘဂဝါ ဣဒ္ဓိဗလေန ဂိရိဒီပံ နာမ ဣဓာနေတွာ တတ္ထ ယက္ခေ ပဝေသေတွာ ဒီပံ ယထာဋ္ဌာနေ ဌပေတွာ စမ္မခဏ္ဍံ သင်္ခိပိ တဒါ ဒေဝတာ သမာဂမော အဟောသိ။ တသ္မိံ သမာဂမေ ဘဂဝါ ဓမ္မံ ဒေသေသိ-တဒါ။

‘‘နေကေသံ ပါဏကောဋီနံ-ဓမ္မာဘိသမယော အဟူ၊

သရဏေသု စ သီလေသု-ဌိတာ အာသုံ အသင်္ခိယာ၊

သောတာပတ္တိဖလံ ပတွာ-သေလေ သုမနကူဋကေ၊

မဟာသုမန ဒေဝိဏ္ဒေါ-ပူဇိယံ ယာစိ ပူဆိယံ၊

သိရံ ပရာမသိတွာန-နိလာမလသိရောရုဟေ၊

ပါဏိမတ္တေ အဒါ ကေသေ တဿ ပါဏိဟိတော ဇိနော၊

သော တံ သုဝဏ္ဏိစင်္ဂေါဋံ-စရေနာဒါယ သတ္ထုနော၊ နိသိန္နဋ္ဌာန ရစိတေ-နာနာရတနသဉ္စယေ။

ဥစ္စတော သတ္တရတနေ-ဌပေတွာန သိရောရုဟေ၊

တံ ဣဏ္ဒနီလ ထူပေန-ပိဒဟေသိ နမဿိ စ’’၊

ပရိနိဗ္ဗုတေ ပန ဘဂဝတိ ဓမ္မသေနာပတိ သာရိ ပုတ္တတ္ထေရဿ အန္တေဝါသိကော သရဘူ နာမေကော ထေရော စိတကတော ဂီဝဋ္ဌိဓာတု ဂဟေတွာ ဘိက္ခု သင်္ဃပရိဝုတော အာဂန္တွာ တသ္မိံယေဝ စေတိယေ ပတိဋ္ဌာပေတွာ မေဃဝဏ္ဏပါသာဏေဟိ ဆာဒေတွာ ဒွါဒသ ဟတ္ထုဗ္ဗေဓံ ထူပံ ကာရေတွာ ပက္ကာမိ။ အထ ဒေဝါနမ္ပိယတိဿ ရညော ဘာတာ စူဠာဘယော နာမ တံ အဗ္ဘုတံ စေတိယံ ဒိသွာ တိံသဟတ္ထုဗ္ဗေဓံ စေတိယံ ကာရေသိ။ ဣဒါနိ ဒုဋ္ဌဂါမဏီပိ အဘယရာဇာ မဟိယင်္ဂဏံ အာဂန္တွာ တတ္ထ ဒမိဠေ မဒ္ဒန္တော အသိတိဟတ္ထုဗ္ဗေဓံ ကဉ္စုကစေတိယံ ကာရေတွာ ပူဇမကာသိ။

ဧဝမစ္စာယိကံ ကမ္မံ-ကရောန္တာပိ ဂုဏာကရာ၊ ကရောန္တိ ပုညံ သပ္ပညာ-သံသာရဘသ ဘီရုကာတိ။

မဟိယင်္ဂန ထူပကထာ

၁၇။ တတော ရာဇာ ဒမိဠေဟိ သဒ္ဓိံ ယုဇ္ဈိတွာ ဆတ္တဒမိဠံ ဂဏှိတွာ တတြ ဗဟု ဒမိဠေ ဃာတေတွာ အမ္ဗတိတ္ထံ အာဂန္တွာ အမ္ဗဒမိဠံ စတူဟိ မာသေဟိ ဂဏှိ။ တတော ဩရုယှ မဟဗ္ဗလေ သတ္တဒမိဠေ ဧကာဟေနေဝ ဂဏှိ တတော အန္တရသောဗ္ဘေ မဟာကောဋ္ဌ ဒမိဠံ-ဒေါဏဂါမေ ဂဝရ ဒမိဠံ-ဟာလကောလေ မဟိဿရိယ ဒမိဠံ-နာဠိသောဗ္ဘေ နာဠိက ဒမိဠံ-ဒိဃာဘသဂလ္လမှိ ဒိဃာဘယ ဒမိဠံ ဂဏှိ။ တတော ကစ္ဆတိတ္ထေ ကိဉ္စိသီသ ဒမိဠံ စတူဟိ မာသေဟိ ဂဏှိ တတော ဝေဌ နဂရေ တာဠ ဒမိဠံ၊ ဘာဏကဒမိဠဉ္စ-ဝဟိဋ္ဌေ ဝဟိဋ္ဌ ဒမိဠံ=ဂါမဏိမှိ ဂါမဏိ ဒမိဠံ-ကုမ္ဗုဂါမမှိ ကုမ္ဗု ဒမိဠံ-နဏ္ဒိက ဂါမမှိ နဏ္ဒိက ဒမိဠံ-ခါဏုဂါမမှိ ခါဏု ဒမိဠံ-တမ္ဗုန္နဂါမကေ မာတုလ ဘာဂိနေယျေ ဒွေ ဒမိဠေ ဂဏှိ တဒါ-

‘‘အဇာနိတွာ သကံ သေနံ-ဃာတေန္တိ သဇနာ ဣတိ၊

သုတွာန သစ္စကိရိယံ-အကရိ တတ္ထ ဘုပတိ၊

ရဇ္ဇသုခါယ ဝါယာမော-နာယံ မမ ကဒါပိ စ၊

သမ္ဗုဒ္ဓသာသနဿေဝ-ဌပနာယ အယံ မမ၊

တေန သစ္စေန မေ သေနာ-ကာယောပဂတ ဘဏ္ဍကံ၊

ဇာလဝဏ္ဏံဝ ဟောတူတိ-တံ တထေဝ တဒါ အဟု၊’’

ဧဝံ ရာဇာ ဂင်္ဂါတီရေ ဒမိဠေ ဃာတေသိ။ ဃာတိတ သော သဗ္ဗေ အာဂန္တွာ ဝိဇိတ နဂရေ ပဝိသိံသု။ တဒါ ရာဇာ ဝိဇိတ နဂရံ ဂဏှိတုံ ဝီမံသနတ္ထာယ အာဂစ္ဆန္တံ နဏ္ဓိမိတ္တံ ဒိသွာ ကဏ္ဍုလံ မုဉ္စေသိ။ ကဏ္ဍုလောပိ တံ ဂဏှိတုံ အာဂဉ္ဆိ တဒါ နဏ္ဓိမိတ္တော ဟတ္ထေတဟိ ဥဘော ဒန္တေ ဗာဠှံ ဂဟေတွာ ပီဠေတွာ ဥက္ကုဋိကံ နိသီဒါပေသိ။ ရာဇာ ဥဘော ဝိမံသေတွာ ဝိဇိတနဂရံ အာဂတော။ တတော ဒက္ခိဏဒွါရေ ယောဓာနံ မဟာသင်္ဂါမော အဟောသိ ပုရတ္ထိမဒွါရေ ဝေဠုသုမနော အဿံ အာရုယှ ဗဟူ ဒမိဠေ ဃာတေသိ ဒမိဠာ အန္တော ပိဝိသိတွာ ဒွါရံ ထကေသုံ။ တတော ရာဇာ ယောဓေ ဝိဿဇ္ဇေသိ၊ ကဏ္ဍုလဟတ္ထိ နဏ္ဓိမိတ္တော သုရနိမ္မလော စ ဒက္ခိဏဒွါရေ ကမ္မံ ကရိံသု မဟာသောဏော ဂေါဌယိမ္ဗရော ထေရပုတ္တာဘယော စာတိ ဣမေ တယော ဣတရေသု တီသု ဒွါရေသု ကမ္မံ ကရိံသု။

တဉ္စ နဂရံ ပရိခါတ္တယ ပရိက္ခိတ္တံ၊ ဒဠှ ပါကာရ ဂေါပုရံ၊ အယော ဒွါရယုတ္တံ အဟောသိ ကဏ္ဍုလော ဇာဏုဟိ ဌတွာ သိလာ သုဓာ ဣဋ္ဌကာ ဘိဏ္ဒိတွာ အယောဒွါရံ ပါပုဏိ တဒါ ဒမိဠာ ဂေါပုရေ ဌတွာ နာနာဝုဓာနိ ခိပိံသု ပက္က အယောဂုဠေ စေဝပက္ကဋ္ဌိတ သိလေသဉ္စ ဟတ္ထိပိဋ္ဌိယံ ပက္ခိပိံသု? တဒါ ကဏ္ဍုလော ဝေဒနဋ္ဋော ဥဒကဋ္ဌာနံ ဂန္တွာ ဥဒကေ ဩဂါဟိ။ တဒါ ဂေါဌယိမ္ဗရော န ဣဒံ သုရာပါနံ ဘဝတိ။ အယောဒွါရ ဝိဃာဋနံ နာမ၊ ဂစ္ဆ ဒွါရံ ဝိဃာဋေဟီတိ အာဟ။ တံ သုတွာ ဇာတာဘိမာတော ကုဉ္စနာဒံ ကတွာ ဥဒန ဥဂ္ဂမ္မ ထလေ အဋ္ဌာသိ အထ ဟတ္ထိဝေဇ္ဇော သိလေသံ ဓောဝိတွာ ဩသဓံ အကာသိ။ တတော ရာဇာ ဟတ္ထိံ အာရုယှ ပါဏိနာ ကုမ္ဘေ ပရာမသိတွာ သကလ လင်္ကာတလေ ရဇ္ဇံ တဝ ဒမ္မီတိ တောသေတွာ ဝရဘောဇနံ ဘောဇေတွာ ဝဏံ သာဋကေန ဝေဌေတွာ သုဝမ္မီတံ ကတွာ ဝမ္မပိဋ္ဌိယံ မဟိသစမ္မံ သတ္တဂုဏံ ကတွာ ဗဏ္ဓိတွာ တဿုပရိ တေလစမ္မံ ဗဏ္ဓိတွာ တံ ဝိဿဇ္ဇေသိ သော အသနိ ဝိယဂဇ္ဇန္တော ဂန္တွာ ဒါဌာဟိ ပဒရံ ဝိဇ္ဈိတွာ ပါဒေန ဥမ္မာရံ ဟနိ။ ဒွါရံ ဗာဟာဟိ သဒ္ဓိံ အယောဒွါရံ မဟာသဒ္ဒေန ဘူမိယံ ပတိ။ ဂေါပုရေ ဒဗ္ဗသမ္ဘာရံ ပန ဟတ္ထိပိဋ္ဌိယံ ပတန္တံ ဒိသွာ နဏ္ဓိမိတ္တော ဗာဟာဟိ ပဟရိတွာ ပဝဋ္ဋေသိ တဒါ ကဏ္ဍုလော ဒါဌာပီဠနဝေရံ ဆဍ္ဎေသိ။

တတော ကဏ္ဍုလော အတ္တနော ပိဋ္ဌိံ အာရူဟနတ္ထာယ နဏ္ဓိမိတ္တံ ဩလောကေသိ။ သော တယာ ကတမဂ္ဂေန န ပဝိသိဿာမီတိ အဋ္ဌာရသ ဟတ္ထုဗ္ဗေဓံ ပါကာရံ ဗာဟုနာ ပဟရိတွာ အဋ္ဌုသဟပ္ပမာဏံ ပါကာရပ္ပဒေသံ ပါတေတွာ သုရနိမ္မလံ ဩလောကေသိ သောပိ တေန ကတမဂ္ဂံ အနိစ္ဆန္တော ပါကာရံ လဍ္ဍီတွာ နဂရဗ္ဘန္တရေ ပတိ ဂေါဌယိမ္ဗရောပိ - သောဏောပိ - ထေရပုတ္တာဘယောပိ ဧကေက ဒွါရံ ဘိဏ္ဒိတွာ ပဝိသိံသု-တတော။

‘‘ဟတ္ထိ ဂဟေတွာ ရထစက္ကံ-မိတ္တော သကဋ ပဉ္ဇရံ၊

နာဠိကေရတရုံ ဂေါဌော-နိမ္မလော ခဂ္ဂမုတ္တမံ၊

တာလရုက္ခံ မဟာသောဏော-ထေရပုတ္တော မဟာဂဒံ၊

ဝိသုံ ဝိသုံ ဝီထိဂတာ-ဒမိဠေ နတ္ထ စုဏ္ဏယုံ’’၊

ဧဝံ ဝိဇိတနဂရံ စတူဟိ မာသေဟိ ဘိဏ္ဒိတွာ ဒမိဠေ မာရေတွာ တတော ဂရိလောကံ နာမ ဂန္တွာ ဂိရိယ ဒမိဠံ အဂ္ဂဟေသိ။ တတော မဟေလ နဂရံ ဂန္တွာ စတူဟိ မာသေဟိ မဟေလ ရာဇာနံ ဂဏှိံ တတော ရာဇာ အနုရုဓပုရံ ဂစ္ဆန္တော ပရိတောကာသပဗ္ဗတေ နာမ ခဏ္ဓာဝါရံ နိဝါသေတွာ တတ္ထ တဠာကံ ကာရေတွာ ဇေဋ္ဌမူလမာသမှိ ဥဒကကီဠံ ကီဠိ။ ဧဠာရောပိ ဒုဋ္ဌဂါမဏိဿ အာဂတဘာဝံ သုတွာ အမစ္စေဟိ သဒ္ဓိံ မန္တေတွာ သွေ ယုဒ္ဓံ ကရိဿာမာတိ နိစ္ဆယံ အကာသိ ပုနဒိဝသေ သန္နဒ္ဓါ မဟာပဗ္ဗတ ဟတ္ထိံ အာရုယှ မဟာ ဗလကာယ ပရိဝုတော နိက္ခမိ။ ဂါမဏီပိ မာတရာ သဒ္ဓိံ မန္တေတွာ ဒွတ္တိံသ ဗလ ကောဋ္ဌကေ ကာရေတွာ ဆတ္တဓရေ ရာဇရူပကေ တတ္ထ တတ္ထ ဌပေသိ။ အဗ္ဘန္တရ ကောဋ္ဌကေ သယံ အဋ္ဌာသိ။

တတော သင်္ဂါမေ ဝတ္တမာနေ ဧဠာရ ရညော ဒီဃဇတ္တု နာမ မဟာ ယောဓော ခဂ္ဂဖလကံ ဂဟေတွာ ဘူမိတော အဋ္ဌာရသ ဟတ္ထံ နဘမုဂ္ဂန္တွာ ရာဇရူပံ ဆိဏ္ဒိတွာ ပဌမံ ဗလ ကောဋ္ဌကံ ဘိဏ္ဒိ ဧဝံ သေသေပိ ဗလကောဋ္ဌကေ ဘိဏ္ဒိတွာ မဟာဂမဏိနာ ဌတံ ဗလကောဋ္ဌကံ အာဂမိ။ တဒါ သုရနိမ္မလော ရညော ပရိဂစ္ဆန္တံ ဒိသွာ အတ္တနော နာမံ သာဝေတွာ တံ အက္ကောသိ တံ သုတွာ ဒီဃဇန္တု ပဌမံ ဣမံ မာရေမီတိ ကုဇ္ဈိတွာ အာကသမဗ္ဘုဂ္ဂန္တွာ အတ္တနောပရိ ဩတရန္တံ ဒိသွာ သရနိမ္မလော အတ္တနော ဖလကံ ဥပနာမေသိ။ ဣတရောပိ ဖလကေန သဒ္ဓိံ တံ ဘိဏ္ဒိဿ မီတိ စိန္တေတွာ ဖလကံ ပဟရိ။ ဣတရော ဖလကံ မုဉ္စိ၊ ဒီဃဇန္တု ဖလကံ ဆိဏ္ဒန္တော ဘူမိယံ ပတိ။ သုရနိမ္မလော တံ သတ္တိယာ ပဟရိ၊ ဖုဿဒေဝေါ တံ ခဏေ သင်္ခံ ဓမိ၊ အသနိသဒ္ဒေါ ဝိယ အဟောသိ ဥမ္မာဒပ္ပတ္တာ ဝိယ မနုဿာ အဟေသုံ။ တတော ဒမိဠ သေနာ ဘိဇ္ဇိတ္ထ၊ ဧဠာရော ပလာယိတ္ထ တဒါပိ ဗဟု ဒမိဠေ ဃာတေသုံ။

‘‘တတ္ထ ဝါပိဇလံ အာသိ-ဟတာနံ လောဟိတာဝိလံ၊

တသ္မာ ကုလတ္ထဝါပီတိ-နာမတော ဝိဿုတာ အဟူ၊

စရာပေတွာ တဟိံ ဘေရိံ-ဒုဋ္ဌဂါမိဏိ ဘူပတိ၊

န ဟနိဿတု ဧဠာရံ-မံ မုဉ္စိယ ပရော ဣတိ၊

သန္နဒ္ဓါ သယမာရုယှ-သန္နဒ္ဓံ ကဏ္ဍုလံ ကရိံ၊

ဧဠာရံ အနုဗဏ္ဓန္တော-ဒက္ခိဏဒွါရ မာဂမိ၊

ပုရေ ဒက္ခိဏဘာဂမှိ-ဥဘော ယုဇ္ဈိံသု ဘူမိပါ၊

တောမရံ ခိပိ ဧဠာရော-ဂါမဏိ တံ အဝဉ္စယိ၊

ဝိဇ္ဈာပေသိ စ ဒန္တေဟိ-တံ ဟတ္ထိံ သကဟတ္ထိနာ၊

တောမရံ ခိပိ ဧဠာရော-သဟတ္ထိ တတ္ထ သော ပတိ၊

တတော ဝိဇိတ သင်္ဂါမော-သယောဂ္ဂဗလဝါဟနော၊

လင်္ကာ ဧကာတပတ္တံ သော-ကတွာန ပါဝိသိ ပုရံ၊’’

အထ ရာဇာ နဂရေ ဘေရိံ စရာပေတွာ သမန္တာ ယောဇနပ္ပမာဏေ မနုဿေ သန္နိပါတေတွာ ဧဠာရ ရညော သရီရံ မဟန္တံ သက္ကာရံ ကာရေတွာ ကူဋာဂါရေန နေတွာ ဈာပေတွာ တတ္ထ တေစိယံ ကာရေတွာ ပရိဟာရမဒါသိ။ အဇ္ဇပိ ရာဇာနော တံ ပဒေသမ္ပတွာ ဘေရိံ န ဝါဒါပေန္တိ။ ဧဝံ ဒုဋ္ဌဂါမဏိ အဘယ မဟာရာဇာ ဒွတ္တိံသ ဒမိဠ ရာဇာနော မာရေတွာ လင်္ကာဒီပံ ဧကစ္ဆတ္တမကာသိ။

ယဒါ ဒုဋ္ဌဂါမဏိ ဝိဇိတံ နဂရံ ဂဏှိ တဒါ ဒီဃဇန္တု ယောဓော ဧဠာရံ ဥပသင်္ကမိတွာ အတ္တနော ဘာဂိနေယျဿ ဘလ္လုကဿ ယောဓ ဘာဝံ အာစိက္ခိတွာ ဣဓာဂမနတ္ထာယ တဿ သန္တိကံ ပေသေသိ။ ဘလ္လုကောပိ ဧဠာရဿ ဒဍ္ဎဒိဝသတော သတ္တမေ ဒိဝသေ သဋ္ဌိယာ ပုရိသ သဟဿေဟိ သဒ္ဓိံ ဩတိဏ္ဏော ရညော မတဘာဝံ သုတွာပိ လဇ္ဇာယ ယုဇ္ဈိဿာမီတိ မဟာတိတ္ထတော နိက္ခမိတွာ ကောလမ္ဗဟာလကေ နာမ ဂါမေ ခဏ္ဓာဝါရံ နိဝေသေသိ။ ရာဇာပိ တဿာ’ဂမနံ သုတွာ သန္နဒ္ဓါ ကဏ္ဍုလံ အာရုယှ ယောဓပရိဝုတော မဟတာ ဗလကာယေန အဘိနိက္ခမိ။ ဖုဿဒေဝေါပိ ပဉ္စာဝုဓ သန္နဒ္ဓါ ရညော ပစ္ဆိမာသနေ နိသီဒိ။ ဘလ္လုကောပိ ပဉ္စာဝုဓ သန္နဒ္ဓါ ဟတ္ထိံ အာရုယှ ရာဇာဘိမုခေါ အဂဉ္ဆိ။ တဒါ ကဏ္ဍုလော တဿ ဝေဂမဏ္ဒိ ဘာဝတ္ထံ သနိကံ သနိကံ ပစ္စောသကကိ သေနာပိ ဟတ္ထိနာ သဒ္ဓိံ တထေဝ ပစ္စောသကကိ။

ရာဇာ ဖုဿဒေဝံ အာဟ အယံ ဟတ္ထိ ပုဗ္ဗေ အဋ္ဌဝီသတိယာ ယုဒ္ဓေသု အပစ္စောသကကိတွာ ဣဒါနိ ကသ္မာ ပန ပစ္စောသက္ကတီတိ။ သော အာဟာဒေဝ။ အမှာကမေဝ ဇယော အယံ ဂဇော ဇယဘူမိံ အဝေက္ခန္တော ပစ္စောသက္ကတိ ဇယဘူမိံ ပတွာ ဌဿတီတိ? နာဂေါပိ ပစ္စောသကကိတွ ပုရ ဒေဝဿ ပဿေ မဟာဝိဟာရ သီမန္တေ အဋ္ဌာသိ။

တတော ဘလ္လုကော ရာဇာဘိမုခါ အာဂန္တွာ ရာဇာနံ ဥပ္ပဏ္ဍေသိ ရာဇာပိ ခဂ္ဂတလေန မုခံ ပိဓာယ တံ အက္ကောသိ ရညော မုခေ ဝိဇ္ဈိဿာမီတိ သရံ ခိပိ။ သော ခဂ္ဂတလ မာဂစ္စဘူမိယံ ပတိ၊ ဘလ္လုကော မုခေ ဝိဒ္ဓေသ္မိတိ သညာယ ဥက္ကုဋ္ဌိ၊ အကာသိ တဒါ ရညော ပစ္ဆိမာသနေ နိသိန္နော ဖုဿဒေဝေါ ရညော ကုဏ္ဍလံ ဃဋေန္တော တဿ မုခေ ကဏ္ဍံ ပါတေသိ ရညော ပါဒေ ကတွာ ပတမာနဿ ဇာဏုမှိ အပရေန ကဏ္ဍေန ဝိဇ္ဈိတွာ ရညော သီသံ ကတွာ ပါတေသိ။ ရာဇာ လဒ္ဓဇယော နဂရံ အာဂန္တွာ သရံ အာဟရာပေတွာ ပုင်္ခေန ဥဇုကံ ဌပါပေတွာ တံ ပမာဏံ ကဟာပဏရာသိံ ကတွာ ဖုဿဒေဝဿ အဒါသိ။

ဧဝံ လင်္ကာရဇ္ဇံ ဧကစ္ဆတ္တံ ကတွာ ရာဇာ ယောဓာနံ ယထာနုရူပံ ဌာနန္တရံ အဒါသိ။ ထေရပုတ္တာဘယော ပန ဒီယမာနံ ဋ္ဌာနန္တရံ န ဂဏှိ ကသ္မာ န ဂဏှသိတိ ပုစ္ဆိနော ယုဒ္ဓံ အတ္ထိ မဟာရာဇာတိ အာဟံ။ ဣဒါနိ ဧကရဇ္ဇေ ကတေ ကိံ နာမ ယုဒ္ဓန္တိ ပုစ္ဆိတေ ကိလေသ စောရေဟိ ယုဇ္ဈိဿ မီတိ အာဟ။ ရာဇာ ပုနပ္ပုနံ နိဝါရေသိ သောပိ ပုနပ္ပုန ယာစိတွာ ရာဇာနုညာယ ပဗ္ဗဇိတွာ ဝိပဿနာယ ကမ္မံ ကရောန္တော အရဟတ္တံ ပတွာ ပဉ္စ ခီဏာသဝသတ ပရိဝါရော အဟောသိ။

တတော ရာဇာ အတ္တနော ပါသာဒတလေ သိရီသယနဂတော မဟတိံ သမ္ပတ္တိံ ဩလောကေတွာ အက္ခောဘိဏိ သေနာဃာတံ အနုဿရိ။ အနုဿရန္တဿ ရညော မဟန္တံ ဒေမနဿံ ဥပ္ပဇ္ဇိ သဂ္ဂ မဂ္ဂန္တရာယော မေ ဘဝေယျာတိ။

တဒါ ပိယင်္ဂုဒီပေ အရဟန္တော ရညော ပရိစိတက္ကံ ဉတွာ တံ အဿာသေတုံ အဋ္ဌ အရဟန္တေ ပေဿေ။ တေ အာဂန္တွာ အာဂတဘာဝါ နိဝေဒေတွာ ပါသာဒတလံ အဘိရုဟိံသု ရာဇာ ထေရေ ဝန္ဒိတွာ အာသနေ နိသီဒါပေတွာ အာဂတ ကာရဏံ ပုစ္ဆိ။ ထေရာပိ အာဂတ ကာရဏံ ဝတွာ ရညော တေန ကမ္မုနာ သဂ္ဂ-မောက္ခန္တရာယဘာဝံ ဗောဓေတွ ပက္ကမိံသု ရာဇာ တေသံ ဝစနံ သုတွာ အဿာသံ ပဋိလဘိတွာ ဝန္ဒိတွာ (တေ ဝိဿဇ္ဇေတွာ) သိရိသယနဂတော ပုန စိန္တေသိ။

မာတိပိတရော ခေါ ပန မာ စော ကဒါစိပိ ဝိနာ သင်္ဃေန အာဟာရံ ဘုဉ္ဇထာတိ အမှေဟိ သပထံ ကာရေသုံ ဘိက္ခုသင်္ဃဿ အဒတွာ ဘုတ္တံ အတ္ထိ နု ခေါ နတ္ထိတိ စိန္တယန္တော သတိသမ္မောသေန သင်္ဃဿ အဒတွာ ပါတရာသကာလေ ပရိဘုတ္တံ ဧကံယေဝ မရိစဝဋ္ဋိံ အဒ္ဒသ။ ဒိသွာ စ အယုတ္တံ မယာ ကတံ ဒဏ္ဍကမ္မံ မေ ကာတဗ္ဗန္တီ စိန္တေသိ အထ ရာဇာ ဆတ္တမင်္ဂလ သတ္တာဟေ ဝီတိဝတ္တေ မဟတာ ရာဇာနုဘာဝေန မဟန္တေန ကီဠာဝိဓာနေန ဥဒကကီဠံ ကီဠိတုံ အဘိသိတ္တာနံ ရာဇုနံ စာရိတ္တာနု ပါလနတ္ထဉ္စ တိဿဝါပိံ အဂမာသိ။ ရညော သဗ္ဗံ ပရိစ္ဆဒံ ဥပါဟနဆတ္တာနိ စ မရိစဝဋ္ဋိ ဝိဟာရဋ္ဌာနမှိ ဌပယိံသု။

တတြာပိ ထူပဋ္ဌာနေ ရာဇပုရိသာ ရညော သဓာတုကံ ကုန္တံ ဥဇုကံ ဌပေသုံ။ ရာဇာ ဒိဝသဘာဂံ ဩရောဓ ပရိဝုတော ကီဠိတွာ သာယဏှေ ဇာတေ နဂရံ ဂမိဿာမ ကုန္တံ ဝဍ္ဎေထာတိ အာဟ။ ရာဇပုရိသာ ကုန္တံ ဂဏှန္တာ စာလေတုံ နာသက္ခိံသု ရာဇသေန၊ တံ အစ္ဆရိယံ ဒိသွာ သမာဂန္တွာ ဂဏ္ဓမာလာဒီဟိ ပူဇေသိ ရာဇာပိ မဟန္တံ အစ္ဆရိယံ ဒိသွာ ဟဋ္ဌမာနသော သမန္တာ အာရက္ခံ သံဝိဒဟိတွာ နဂရံ ပါဝိသိ။

တတော ရာဇာ ကုန္တံ ပရိက္ခိပါပေတွာ စေတိယံ တံ ပရိက္ခိပါပေတွာ ဝိဟာရဉ္စ ကာရေသိ။ ဝိဟာရော တီဟိ သံဝစ္ဆရေဟိ နိဋ္ဌာသိံ ရာဇာ ဝိဟာရမဟတ္ထာယ သင်္ဃံ သန္နိပါတေသိ ဘိက္ခူနံ သတသဟဿာနိ ဘိက္ခုနီနံ နဝုတိ သဟဿာနိ သန္နိပတိံသု တသ္မိံ သမာဂမေ ရာဇာ သင်္ဃံ ဝန္ဒိတွာ ဧဝမာဟ ဘန္တေ ဝိဿရိတွာ ဝိနာ သင်္ဃေန မရိစဝဋ္ဋိကံ ပရိဘုဉ္ဇိံ တဒတ္ထံ ဒဏ္ဍကမ္မံ မေ ဟောတူတိ-သစေတိယံ မရိစဝဋ္ဋိယံ ဝိဟာရံ ကာရေသိံ ပတိဂဏှာတု ဘန္တေ သင်္ဃော သစေတိယံ ဝိဟာရန္တိ ဒက္ခိဏောဒကံ ပါတေတွာ ဘိက္ခုသင်္ဃဿ ဝိဟာရံ အဒါသိ။

ဝိဟာရဿ သမန္တတော ဘိက္ခုသင်္ဃဿ နိသီဒနတ္ထာယ မဟန္တံ မဏ္ဍပံ ကာရေသိ မဏ္ဍပ ပါဒါ အဘယဝါပိယာ ဇလေ ပတိဋ္ဌိတာ အဟေသုံ။ သေသောကာသေ ကထာစနတ္ထိ။ တတ္ထ ဘိက္ခုသင်္ဃံ နိသီဒါပေတွာ သတ္တာဟံ မဟာဒါနံ ဒတွာ သဗ္ဗပရိက္ခာရံ အဒါသိ။ တတ္ထ သင်္ဃတ္ထေရေန လဒ္ဓ ပရိက္ခာရော သတသဟဿဂ္ဃနကော အဟောသိ။

ဧဝံ-

‘‘ယုဒ္ဓေ ဒါနေ စ သူရေန-သူရိနာ ရတနတ္တမေ၊

ပသန္နာမလစိတ္တေန-သာသနုဇ္ဇောတနတ္ထိနာ၊

ရညာ ကတညုနာ တေန-ထူပကာရာပနာဒိတော၊

ဝိဟာရမဟနန္တာနိ - ပူဇေတုံ ရတနတ္တယံ၊

ပရိစ္စတ္တဓနာနေတ္ထ-အနဂ္ဃာနိ ဝိမုဉ္စိယ၊

သေသာနိ ဟောန္တိ ဧကာယ-ဦနာ ဝိသတိကောဋိယော၊’’

ဧဝံ သပညော ဘိဒူရေ အသာရေ၊

ဒေဟေ ဓနေ သင်္ဂမတိက္ကမိတွာ

ကတွာန ပုညံ သုခသာဒနတ္ထံ၊

သာရံ ဂဟေတုံ သတတံ ယတေယျာတိ၊

မရီစဝဋ္ဋိ ဝိဟာရကထာ

၁၈။ တတော ရာဇာ စိန္တေသိ မဟာမဟိဏ္ဒတ္ထေရော ကိရ မမ အယျကဿ ဒေဝါနမ္ပိယတိဿ ရညော ဧဝမာဟ။ နတ္တာ တေ မဟာရာဇ ဒုဋ္ဌဂါမဏိ အဘယော ဝိသံ ဟတ္ထသတိကံ သောဝဏ္ဏမာလိံ ထူပံ ကာရေဿတိ။ သင်္ဃဿ စ ဥပေါသထာဂါရဘူတံ နဝဘူမကံ လောဟပါသာဒံ ကာရေဿတီတိ စိန္တေတွာ စ ပန ဩလောကေန္တော ရာဇဂေဟေ ကရဏ္ဍကေ ဌပိတံ သုဝဏ္ဏပဋ္ဋလေခံ ဒိသွာ တံ ဝါစေသိ။ အနာဂတေ စတ္တာလီသံ ဝဿသတံ အတိက္ကမ္မ ကာကဝဏ္ဏတိဿဿ ပုတ္တော ဒုဋ္ဌဂါမဏိ အဘယော ဣဒဉ္စိဒဉ္စ ကာရေဿတီတိ သုတွာ ဟဋ္ဌော ဥဒဂ္ဂေါ အပ္ပောဌေသိ-အယျေန ကိရ ဝတမှိ ဒိဋ္ဌော မဟာ မဟိဏ္ဒေနာတိ။

တတော ပါတောဝ မဟာမေဃဝနံ ဂန္တွာ ဘိက္ခုသင်္ဃံ သန္နိပါတေတွာ ဧတဒဝေါစ? ဘန္တေ ဘိက္ခုသင်္ဃဿ ဥပေါသထာဂါရံ ကတွာ ဒေဝဝိမာန သဒိသံ ပါသာဒံ ကာရေဿာမိ ဒေဝလောကံ ပေသေတွာ ပဋေ ဝိမာနာကာရံ လိခါပေတွာ မေ ဒေထာတိ? သင်္ဃော အဋ္ဌ ခီဏာသဝေ ပေသေသိ။ တေ တာဝတိံသဘဝနံ ဂန္တွာ ဒွါဒသယောဇနုဗ္ဗေဓာ အဋ္ဌစတ္တာလီသ ယောဇန ပရိက္ခေပံ ကူဋာဂါရံ သဟဿ ပတိမဏ္ဍိတံ နဝဘူမကံ သဟဿဂဗ္ဘံ ခီရဏ ဒေဝဓီတာယ ပုညာနုဘာဝနိဗ္ဗတ္တံ အာကာသဋ္ဌံ ရတနပါသာဒံ ဩလောကေတွာ ဟိင်္ဂုလကေန ပဋေ တဒါကာရံ လိခိတွာ အာနေတွာ ဘိက္ခုသင်္ဃဿ အဒံသု သင်္ဃော ရညော ပါဟေသိ။

တံ ဒိသွာ ရာဇာ တုဋ္ဌမာနသော တဒါ တံ လေခတုလျံ လောဟပါသာဒံ ကာရေသိ။ ကမ္မန္တာရမ္ဘ ကာလေ ပန စတုသု ဒွါရေသု အဋ္ဌသတသဟဿာနိ ဟိရညာနိ ဌပါပေသိ တဒါ စတုသု ဒွါရေသု သဟဿ သဟဿံ ဝတ္ထပုဋာနိ စေဝ ဂုဠ-တေလ-သက္ခရ-မဓုပုရာ အနေကသဟဿစာဋိယော စ ဌပါပေသိ။ ပါသာဒေ အမူလကေန ကမ္မံ န ကာတဗ္ဗန္တိ ဘေရိံ စာရပေတွာ အမူလကေန ကတကမ္မံ အဂ္ဃာပေတွာ ကာရကာနံ မူလံ ဒါပေသိ။ ပါသာဒေါ ဧကေကေန ပဿေန ဟတ္ထသတ ဟတ္ထသတပ္ပမာဏော အဟောသိ တထာ ဥဗ္ဗေဓန၊ နဝဘူမာယော စဿ အဟေသုံ ဧကေကိဿာ ဘူမိယာ သတံ သတံ ကူဋာဂါရာနိ၊ တာနိ သဗ္ဗာနိပိ ရတနခစိတာနိ စေဝ သုဝဏ္ဏ ကိင်္ကိဏိကာပန္တိ ပရိက္ခိတ္တာနိ စ အဟေသုံ တေသံ ကူဋာဂါရာနိ နာနာရတန ဘူသိကာ ပဝါဠ ဝေဒိကာ စေဝ၊ တာသံ ပဒုမာနိ စ နာနာရတန ဝိစိတ္တာနေဝ အဟေသုံ။ တထာ သဟဿဂဗ္ဘာ စ နာနာရတန ခစိတာ သီယပဉ္ဇရ ဝိဘူသိတာ စ။ ဝေဿဝနဿ နာရိဝါဘနယာနံ သုတွာ တဒါကာရံ မဇ္ဈေ ရတန မဏ္ဍပံ ကာရေသိ။

သော အနေကေဟိ ရတနတ္ထမ္ဘေဟိ သီဟဝျဂ္ဃာဒိ ရူပေဟိ ဒေဝတာ ရူပေဟိ စ ပတိမဏ္ဍိတော သမန္တတော ဩလမ္ဗက မုတ္တာ ဇာလေန စ ပရိက္ခိတ္တော အဟောသိ ပဝါဠဝေဒိကာ စဿ ပုဗ္ဗေ ဝုတ္တပ္ပကာရာဝ သတ္တရတန ဝိစိတ္တမဏ္ဍပ မဇ္ဈေ ပန ဧဠိကမယ ဘူမိယာ ဒန္တမယ ပလ္လင်္ကော အဟောသိ အပဿေနမ္ပိ ဒန္တမယမေဝ၊ သော သုဝဏ္ဏသူရိယမဏ္ဍလေဟိ ရဇတ စဏ္ဒ မဏ္ဍလေဟိ မုတ္တာမယ တာရကာဟိ စ ဝိစိတ္တော တတ္ထ တတ္ထ ယထာရဟံ နာနာရတနမယ ပဒုမာနိ စေဝ ပသာဒ ဇနကာနိ စ ဇာတကာနိ အန္တရန္တရာ သုဝဏ္ဏလတာယော စ ကာရေသိ။ တတ္ထ မဟဂ္ဃံ ပစ္စတ္ထရဏံ အတ္ထရိတွာ မနုညံ ဒန္တ ဝိဇနိံ ဌပေသိ။ ပဝါဠမယ ပါဒုကာ ကာရေသိ။ တထာ ပလ္လင်္ကဿောပရိ ဧဠိကဘူမိယာ ပတိဋ္ဌိတံ ရဇတမယဒဏ္ဍံ သေတစ္စတ္တံ ကာရေသိ။ တတ္ထ သတ္တရတနမယာနိ အဋ္ဌမင်္ဂလာနိ အန္တရန္တရာ စ မဏိမုတ္တာမယာ စတုပ္ပာဒ ပန္တိယော စ ကာရေသိ။ ဆတ္တန္တေ စဿ ရတနမယ ဃဏ္ဋာပန္တိယော ဩလမ္ဗိံသု။

ပါသာဒေါ ဆတ္တံ ပလ္လင်္ကော မဏ္ဍပေါ စာတိ စတ္တာရော အနဂ္ဃာ အဟေသုံ မဟဂ္ဃာနိ မဉ္စပီဌာနိ ပညတွော တတ္ထ မဟဂ္ဃာနိ ကမ္ဗလာနိ ဘုမ္မတ္ထရဏာနိ အတ္ထရာပေသိ အာဝမန ကုမှိ ဥဠုင်္ကော စ သောဝဏ္ဏမယာယေဝ အဟေသုံ။ သေသ ပရိဘောဂ ဘဏ္ဍေသု ဝတ္တဗ္ဗမေဝ နတ္ထိ ဒွါရကောဋ္ဌကောပိ မနောဟရ ပါကာရေန ပရိက္ခိတ္တော။ တမ္ဗလောဟိဋ္ဌိကာဘိ ပန ဆာဒိတတ္တာ ပါသာဒဿ လောဟပါသာဒေါတိ ဝေါဟာရော အဟောသိ။

ဧဝံ တာဝတိံသဘဝနေ ဒေဝသဘာ ဝိယ ပါသာဒံ နိဋ္ဌာပေတွာ သင်္ဃံ သန္နိပါတေသိ။ မရိစဝဋ္ဋိ ဝိဟာရမဂေ ဝိယ သင်္ဃော သန္နိပတိ။ ပဌမဘူမိယံ ပုထုဇ္ဇနာယေဝ အဋ္ဌံသု ဒုတိယဘူမိယာ တေပိဋကာ၊ တတိယာဒိသု တီသု ဘူမိသု ကမေန သောတာပန္န - သကဒါဂါမိ - အနာဂါမိနော၊ ဥပရိ စတုသု ဘူမိသု ခီဏာသဝါယေဝ အဋ္ဌံသု။ ဧဝံ သင်္ဃံ သန္နိပါတေတွာ သင်္ဃဿ ပါသာဒံ ဒတွာ မရိစဝဋ္ဋိ ဝိဟာရမဟေ ဝိယ သတ္တာဟံ မဟာဒါနမဒါသီတိ။

‘‘ပါသာဒဟေတု စတ္တာနိ-မဟာစာဂေန ရာဇိနာ၊

အနဂ္ဃာနိ ဌပေတွာန-အဟေသုံ တိံသကောဋိယော၊’’

ပဟာယ ဂမနီယန္တံ-ဒတွာန ဓနသဉ္စယံ၊

အနုဂါမိဓနံ ဒါနံ-ဧဝံ ကုဗ္ဗန္တိ ပဏ္ဍိတာ၊

၁၉။ အထေကဒိဝသံ ရာဇာ သတသဟဿံ ဝိဿဇ္ဇေတွာ မဟာဗောဓိ ပူဇံ ကာရေတွာ နဂရံ ပဝိသန္တော ထူပဋ္ဌာနေ ပတိဋ္ဌိတံ သိလာထူပံ ဒိသွာ မဟိဏ္ဒတ္ထေရေန ဝုတ္တဝစနံ အနုဿရိတွာ မဟာထူပံ ကာရေဿာမီတိ ကတသန္နိဋ္ဌာနော နဂရံ ပဝိသိတွာ မဟံတလံ အာရုယှ သုဘောဇနံ ဘုဉ္ဇိတွာ သိရိသယနဂတော ဧဝံ စိန္တေသိ မယာ ဒမိဠေ မဒ္ဒမာနေန အယံ လောကော အတိဝိယ ပီဠိတော၊ ကေန နု ခေါ ဥပါယေန လောကဿ ပိဠနံ အကတွာ ဓမ္မေန သမေန မဟာ စေတိယဿ အနုစ္ဆဝိကံ ဣဋ္ဌကာ ဥပ္ပာဒေဿာမီတိ တံ စိန္တိတံ ဆတ္တံ အဓိဝတ္ထာ ဒေဝတာ ဇာနိတွာ ရာဇာ ဧဝံ စိန္တေသီတိ ဥဂ္ဃောသေသိ။

ပရမ္ပရာယ ဒေဝလောကေပိ ကောလာဟလမဟောသိ တံ ဉတွာ သက္ကော ဒေဝရာဇံ ဝိဿကမ္မံ အာမန္တေတွာ’တာတ! ဝိဿ ကမ္မ! ဒုဋ္ဌဂါမဏိ အဘယ မဟာရာဇာ မဟာ စေတိယဿ ဣဋ္ဌကတ္ထာယ စိန္တေသိ။ တွံ ဂန္တွာ ဥတ္တရပဿေ နဂရတော ယောဇနပ္ပမာဏေ ဌာနေ ဂမ္ဘိရ နဒိယာ တီရေ ဣဋ္ဌကာ မာပေတွာ ဧဟိ’တိ ပေသေသိ။

တံ ဉတွာ ဝိဿကမ္မ ဒေဝပုတ္တော အာဂန္တွာ တတ္ထေဝ မဟာစေတိယာနုစ္ဆဝိကံ ဣဋ္ဌကာ မာပေတွာ ဒေဝပုရမေဝ ဂတော။ ပုန ဒိဝသေ ဧကော သုနခလုဒ္ဒေါ သုနခေ ဂဟေတွာ အရညံ ဂန္တွာ တတ္ထ တတ္ထ ဝိစရန္တော တံ ဌာနံ ပတွာ ဣဋ္ဌကာ အဒိသွာ စ နိက္ခမိ။ တသ္မိံ ခဏေ ဧကာ ဘုမ္မာ ဒေဝတာ တဿ ဣဋ္ဌကာ ဒဿေတုံ မဟန္တံ ဂေါဓာဝဏ္ဏံ ဂဟေတွာ လုဒ္ဒဿ သုနခါနဉ္စ အတ္တာနံ ဒဿေတွာ တေဟိ အနုဗဒ္ဓါ ဣဋ္ဌကာဘိမုခံ အတ္တွာ အန္တရဓာယိ။

သုနခလုဒ္ဒေါ ဣဋ္ဌကာ ဒိသွာ အမှာကံ ရာဇာ ထူပံ ကာရေတုကာမော၊ မဟန္တော ဝတ နော ပဏ္ဏာကာရော လဒ္ဓါတိ ဟဋ္ဌမာနသော ပုန ဒိဝသေ ပါတောစ အာဂန္တွာ အတ္တနာ ဒိဋ္ဌံ ဣဋ္ဌက ပဏ္ဏာကာရံ ရညော နိဝေဒေသိ။ ရာဇာ တံ သာသနံ သုတွာ အတ္တမနော ဟုတွာ တဿ မဟန္တံ သက္ကာရံ ကာရေတွာ တံယေဝ ဣဋ္ဌက ဂေါပနံ ကာရေသိ။ တတော ရာဇာ အဟမေဝ ဣဋ္ဌကောလောကနတ္ထာယ ဂစ္ဆာမိ - ကုန္တံ ဝဍ္ဎေထာတိ အာဟ။

တသ္မိံယေဝ ခဏေ ပုန အညံ သာသနံ အာဟရိံသု။ နဂရတော တိယောဇနမတ္ထကေ ဌာနေ ပုဗ္ဗုတ္တရကဏ္ဏေ အာစာရ ဝိဋ္ဌိဂါမေ တိယာမရတ္တိံ အဘိပ္ပဝဋ္ဋေ ဒေဝေ သောဠသ ကရီသပ္ပမာဏေ ပဒေသေ သုဝဏ္ဏဗီဇာနိ ဥဋ္ဌဟိံသု။ တာနိ ပမာဏတော ဥက္ကဋ္ဌာနိ ဝိဒတ္ထိပ္ပမာဏာနိ။ ဩမကာနိ အဋ္ဌင်္ဂုလပ္ပမာဏာနိ အဟေသုံ၊ အထ ဝိဘာတာယ ရတ္တိယာ ဂါမဝါသိနော သုဝဏ္ဏဗိဇာနိ ဒိသွာ ရာဆာ’ရဟံ ဝတ ဘဏ္ဍံ ဥပ္ပန္နန္တိ သမန္တတော အာရက္ခာ သံဝိဒဟိတွာ သုဝဏ္ဏဗီဇာနိ ပါတိယံ ပူရေတွာ အာဂန္တွာ ရညော ဒဿေသုံ ရာဇာ တေသမ္ပိ ယထာရဟံ သက္ကာရံ ကာရေတွာ တေယေဝ သုဝဏ္ဏ ဂေါပကေ အကာသိ။

အထ တသ္မိံယေဝ ခဏေ အညံ သာသနံ အာဟရိံသု။ နဂရတော ပါစီနပဿေ သတ္တယောဇန မတ္ထကော ဌာနေ ပါရဂင်္ဂါယ တမ္ဗဝိဋ္ဌိ နာမ ဇနပဒေ တမ္ဗလောဟံ ဥပ္ပဇ္ဇိ။ ဂါမိကာ ပါတိံ ပူရေတွာ တမ္ဗလောဟံ ဂဟေတွာ အာဂန္တွာ ရညော ဒဿေသုံ ရာဇာ ယထာနုရူပံ သက္ကာရံ တေသမ္ပိ ကာရေတွာ တေယေဝ ဂေါပကေ အကာသိ။

တဒနန္တရံ အညံ သာသနံ အာဟရိံသု။ ပုရတော စတုယောဇနမတ္ထကော ဌာနေ ပုဗ္ဗဒက္ခိဏ ကဏ္ဏေ သုမနဝါပိဂါမေ ဥပ္ပလကုရုဝိဏ္ဒ မိဿကာ ဗဟူ မဏယော ဥပ္ပဇ္ဇိံသု ဂါမိကာ ပါတိံ ပူရေတွာ အာဂန္တွာ မာနယော ရညော ဒဿေသုံ။ ရာဇာ တေသမ္ပိ သက္ကာရံ ကာရေတွာ တေယေဝ ဂေါပကေ အကာသိ။

တဒနန္တရံ အညမ္ပိ သာသနံ အာဟရိံသု။ နဂရတော ဒက္ခိဏ ပဿေ အဋ္ဌယောဇန မတ္ထကေ ဌာနေ အမ္ဗဋ္ဌကောလ ဇနပဒေ ဧကသ္မိံ လေဏေ ရဇတံ ဥပ္ပဇ္ဇိ တသ္မိံ သမယေ နဂရဝါသိကော ဧကော ဝါဏိဇော ဗဟူဟိ သကဋေဟိ ဟဠိဒ္ဒိ သိင်္ဂိဝေရာဒီနမတ္ထာယ မလယံ ဂတော၊ လေဏဿ အဝိဒူရေ သကဋာနိ မုဉ္စိတွာ ပတောဒဒါရုံ ပရိယေသန္တော တံ ပဗ္ဗတံ အဘိရူဠှော ဧကံ ပဏသယဋ္ဌိံ အဒ္ဒသ။

တဿ မဟန္တံ စာဋိပ္ပမာဏံ ဧကမေဝ ပဏသ ဖလံ နရုဏယဋ္ဌိံ နာမေတွာ ဟေဋ္ဌာ ပါသာဏပိဋ္ဌိယံ အဋ္ဌာသိ။ သော တံ ဖလဘာရေန နမိတံ ဒိသွာ ဥပဂန္တွာ ဟတ္ထေန ပရာမသိတွာ ပက္ကဘာဝံ ဉတွာ ဝဏ္ဋံ ဆိဏ္ဒိ ပဏသယဋ္ဌိ ဥဂ္ဂန္တွာ ယဋာဋ္ဌာနံ အဋ္ဌာသိ ဝါဏိဇော အဂ္ဂံ ဒတွာ ဘုဉ္ဇိဿာမီတိ စိန္တေတွာ ကာလံ ဃောသေသိ။ တဒါ စတ္တာရော ခီဏာသဝ အာဂန္တွာ တဿ ပုရတော ပါတုရဟေသုံ။ ဝါဏိဇော တေ ဒိသွာ အတ္တမနော ပါဒေ ဝန္ဒိတွာ နိသီဒါပေတွာ တဿ ဖလဿ ဝဏ္ဋာသမန္တာ ဝါသိယာ တစ္ဆေတွာ အပဿယံ လုဉ္စိတွာ အပနာမေသိ။ သမန္တတော ယုသံ ဩတရိတွာ အပဿယာနိတံ အာဝါဋံ ပူရေသိ ဝါဏိဇော မနောသိလောဒကဝဏ္ဏ ပဏသယုသံ ပတ္တေ ပူရေတွာ အဒါသိ။ တေ ခီဏာသဝါ တဿ ပဿန္တဿေဝ အာကာသမဗ္ဘုဂ္ဂန္တွာ ပက္ကမိံသု။

သော ပုန ကာလံဃောသေသိ အညေ စတ္တရော ခီဏာသဝါ အာဂမိံသု။ တေသမ္ပိ ဟတ္ထတော ပတ္တေ ဂဟေတွာ သုဝဏ္ဏဝဏ္ဏေဟိ ပန သမိဉ္ဇေဟိ ပူရေတွာ အဒါသိ တေသု တယော ထေရာ အာကာသေန ပက္ကမိံသု ဣတရော ဣဏ္ဒဂုတ္တတ္ထေရော နာမ ခီဏာသဝေါ တဿ တံ ရဇတံ ဒဿေတုကာမော ဥပရိ ပဗ္ဗတာ ဩတရိတွာ တဿ လေဏဿ အဝိဒူရေ နိသီဒိတွာ ပဏသ မိဉ္ဇံ ပရိဘုဉ္ဇတိ ဥပါသကော ထေရဿ ဂတကာလေ အဝသေသ မိဉ္ဇံ အတ္တနာပိ ခါဒိတွာ သေသကံ ဘဏ္ဍိကံ ကတွာ အာဒါယ ဂစ္ဆန္တော ထေရံ ဒိသွာ ဥဒကဉ္စ ပတ္တဓောဝနသာခဉ္စ အဒါသိ။

ထေရောပိ လေဏဒွါရေန သကဋ သမီပဂါမိ မဂ္ဂံ မာပေတွာ ဣမိနာ မဂ္ဂေန ဂစ္ဆ ဥပါသကာတိ အာဟ။ သော ထေရံ ဝန္ဒိတွာ တေန မဂ္ဂေန ဂစ္ဆန္တော လေဏဒွါရံ ပတွာ သမန္တာ လေဏံ ဩလောကေန္တော တံ ရဇတရာသိံ ဒိသွာ ရဇတပိဏ္ဍံ ဂဟေတွာ စာသိယာ ဆိဏ္ဒိတွာ ရဇတဘာဝံ ဉတွာ မဟန္တံ သဇ္ဈပိဏ္ဍံ ဂဟေတွာ သကဋ သန္တိကံ ဂန္တွာ တိဏောဒက သမ္ပန္နေ ဌာနေ သကဋာနိ နိဝေသေတွာ လဟုံ အနုရာဓပုရံ ဂန္တွာ ရည္ဉော ဒဿေတွာ တမတ္ထံ နိဝေဒေသိ ရာဇာ တဿာပိ ယထာရဟံ သက္ကာရံ ကာရေသိ။

တဒန္တရံ အညမ္ပိ သာသနံ အာဟရိံသု နဂရတော ပစ္ဆိမ ဒိသာဘာဂေ ပဉ္စ ယောဇန မတ္ထကေ ဌာနေ ဥရုဝေလ ပဗ္ဗတ မဟာမလကမတ္တာ ပစာဠ မိဿကာ သဋ္ဌိ သကဋပ္ပမာဏမုတ္တာ သမုဒ္ဒတော ထလမုဂ္ဂမိံသု ကေဝဋ္ဋာ ဒိသွာ ရာဇာရဟံ ဝတ ဘဏ္ဍံ ဥပ္ပန္နန္တိ ရာသိံ ကတွာ အာရက္ခံ ဒတွာ ပါတိံ ပူရေတွာ အာဂန္တွာ ရညော ဒဿေတွာ တမတ္ထံ နိဝေဒေသုံ။ ရာဇာ တေသမ္ပိ ယထာရဟံ သက္ကာရံ ကာရေသိ။

ပုန အညံ သာသနံ အာဟရိံသု နဂရတော ပစ္ဆိမုတ္တရ ကဏ္ဏေ သတ္တယောဇန မတ္ထကေ ဌာနေ ပေဠိဝါပိ ဂါမဿ ဝါပိယာ ဩတိဏ္ဏ ကဏ္ဒရေ ပုလိန ပုဋ္ဌေ နိသဒပေါတပ္ပမာဏ ဒီဃတော ဝိဒတ္ထိစတုရင်္ဂုလာ ဥမ္မာပုပ္ဖဝဏ္ဏာ စတ္တာရော မဟာမဏိ ဥပ္ပဇ္ဇိံသု။ အထေကော မတ္တော နာမ သုနခလုဒ္ဒေါ သုနခေ ဂဟေတွာ တတ္ထ ဝိစရန္တော တံ ဌာနံ ပတွာ ဒိသွာ ရာဇာရဟံ ဝတ ဘဏ္ဍန္တိ ဝါလိကာဟိ ပဋိစ္ဆာဒေတွာ အာဂန္တွာ ရညော နိဝေဒေသိ။ ရာဇာ တဿာပိ ယထာရဟံ သက္ကာရံ ကာရေသိ။ ဧဝံ ရာဇာ ထူပတ္ထာယ ဥပ္ပန္နာနိ ဣဋ္ဌကာဒီနိ တဒဟေဝ အဿောသိ ဣဋ္ဌက ရဇတာနံ ဥပ္ပန္နဋ္ဌာနံ တေနေဝ နာမံ လဘိ။

ထူပသာဓန လာဘကထာ

၂၀။ အထ ရာဇာ ထူပတ္ထာယ ဥပ္ပန္နာနိ သုဝဏ္ဏာဒီနိ အာဟရာပေတွာ ဘဏ္ဍာဂါရေသု ရာသိံ ကာရေသိ တတော သဗ္ဗသမ္ဘာရေ သမတ္တေ ဝိသာခ ပုဏ္ဏမုပေါသထဒိဝသေ ပတ္တ ဝိသာခ နက္ခတ္တေ မဟာထူပကရဏတ္ထာယ ဘူမိပရိကမ္မံ အာရဘိ။ ရာဇာ ထုပဋ္ဌာနေ ပတိဋ္ဌာပိတံ သိလာထူပံ ဟရာပေတွာ ထိရဘာဝတ္ထာယ သမန္တတော ဟတ္ထိပါကာရ ပရိယန္တံ ဂမ္ဘီရတော သတရတနပ္ပမာဏံ ဘူမိံ ခနာပေတွာ ပံသုံ အပနေတွာ ယောဓေဟိ ဂုဠပါသာဏေ အတ္ထရာပေတွာ ကမ္မာရကူဋေဟိ အာဟနာပေတွာ စုဏ္ဏဝိစုဏ္ဏေ ကာရေသိ။

တတော စမ္မဝိနဒ္ဓေဟိ ပါဒေဟိ မဟာ ဟတ္ထီဟိ မဒ္ဒါပေတွာ ပါသာဏကောဋ္ဋိမဿုပရိ နဝနီတ မတ္တိကံ အတ္ထရာပေသိ။ အာကာသ ဂင်္ဂါယဟိ တိပတိတဋ္ဌာနေ ဥဒကဗိန္ဒူနိ ဥဂ္ဂန္တွာ သမန္တာ တိံသ ယောဇနပ္ပမာဏပဒေသေ ပတန္တိ ယတ္ထ သယဉ္ဇာတသာလီ ဥပ္ပဇ္ဇတ္တိ တံ ဌာနံ နိစ္စမေဝ တိန္တတ္တာ နိန္တသီသကောဠံ နာမ ဆာတံ။ တတ္ထ မတ္တိကာ သုခုမုတ္တာ နဝနီတ မတ္တိကာတိ ဝုစ္စတိ။

တံ တတော ခီဏသဝါ သာမဏေရာ အာဟရန္တိ တာယ သဗ္ဗတ္ထ မတ္တိကာကိစ္စန္တိ ဉာတဗ္ဗံ။ မတ္တိကောပရိ ဣဋ္ဌကာ အတ္ထရာပေသိ။ ဣဋ္ဌကောပရိ ခရသုကမ္မံ၊ တဿောပရိကုရုဝိဏ္ဒပါသာဏံ၊ တဿောပရိအယောဇာလံ၊ တဿောပရိ ခီဏာသဝ သာမဏေရေဟိ ဟိမဝန္တတော အာဟဋံ သုဂဏ္ဓမာရုမ္ဗံ၊ တဿောပရိ ခီရပါသာဏံ၊ တဿောပရိ ဧဠိကပါသာဏံ၊ တဿောပရိ သီလံ အတ္ထရာပေသိ။ သဗ္ဗမတ္တိကာကိစ္စေ နဝနီတမတ္တိကာ ဧဝ အဟောသိ။

သိလာသတ္ထာရောပရိ ရသောဒက သန္တိန္တေန ကပိတ္ထ နိယျာသေန အဋ္ဌင်္ဂုလဗဟလတမ္ဗလောဟပဋ္ဋံ၊ တဿောပရိ တိလတေလယန္တိန္တာယ မနောသိလာယ သတ္တင်္ဂုလ ဗဟလံ ရဇတပဋ္ဋံ အတ္ထရာပေသိ ဧဝံ ရာဇာ သဗ္ဗာကာရေန ဘူမိပရိကမ္မံ ကာရာပေတွာ အာသာဠဟိ သုက္ကပက္ခဿ စာတုဒ္ဒသ ဒိဝသေ ဘိက္ခုသင်္ဃာ သန္နိပါတေတွာ ဧဝမာဟ။ သွေ ပုဏ္ဏမုပေါသထဒိဝသေ ဥတ္တရာသာဠှ နက္ခတ္တေန မဟာစေတိယေ မင်္ဂလိဋ္ဌကံ ပတိဋ္ဌာပေဿာမိ သွေ ထူပူဋ္ဌာနေ သဗ္ဗော သင်္ဃော သန္တိပတတူတိ နဂရေ ဘေရိံ စရာပေသိ မဟာဇနော ဥပေါသထိကော ဟုတွာ ဂဏ္ဓမာလာဒီနိ ဂဟေတွာ ထူပဋ္ဌာနေ သန္နိပတတူတိ။

တတော ဝိသာခသိရိ ဒေဝနာမကေ ဒွေ အမစ္စေ အာဏာပေသိ။ တုမှေ ဂန္တွာ မဟာ စေတိယဋ္ဌာနံ အလင်္ကရောထာတိ။ တေ ဂန္တွာ သမန္တတော ရဇတပဋ္ဋဝဏ္ဏဝါလုကံ ဩကီရာပေတွာ လာဇပဉ္စမကာနိ ပုပ္ဖာနိ ဝိကိရိတွာ ကဒလိတောရဏံ ဥဿာပေတွာ ပုဏ္ဏဃဋေ ဌပါပေတွာ မဏိဝဏ္ဏေ ဝေဠုမှိ ပဉ္စပဏ္ဏဓဇံ ဗဏ္ဓာပေတွာ ဂဏ္ဓသမ္ပန္နာနိ နာနာဝိဓ ကုသုမာနိသဏ္ထရာပေတွာ နာနာပ္ပကာရေဟိ တံ ဌာနံ အလင်္ကရိံသု။

အထ ရာဇာ သကလနဂရဉ္စ ဝိဟာရဂါမိ မဂ္ဂဉ္စ အလင်္ကာရာပေသိ ပဘာတာယ ရတ္တိယာ နဂရေ စတုသု ဒွါရေသု မဿု ကမ္မတ္ထာယ နဟာပိတေ၊ နဟာပနတ္ထာယနဟာပနကေ၊ အလင်္ကာရတ္ထာယ ကပ္ပကေဝ နာနာဝိရာဂ ဝတ္ထ ဂဏ္ဓမာလာဒီနိ စ သူပဝျဉ္ဇန သမ္ပန္နာနိ မဓုရဘတ္တာနိ စ ဌပါပေတွာ သဗ္ဗေ နဂရာ စ ဇာနပဒါ စ ယထာရုစိံ မဿူကမ္မံ ကာရေတွာ နဟာတွာ ဘုဉ္ဇိတွာ ဝတ္ထာဘရဏာဒီဟိ အလင်္ကရိတွာ မဟာစေတိယဋ္ဌာနံ အာဂစ္ဆန္တူတိ အာယုတ္တကေဟိ အာရောစာပေသိ။

သယမ္ပိ သဗ္ဗာဘရဏ ဝိဘူသိတော စတ္တာလီသ ပုရိသ သဟဿေဟိ သဒ္ဓိံ ဥပေါသကော ဟုတွာ အနေကေဟိ သုမဏ္ဍိတ ပသာဓိတေဟိ အမစ္စေဟိ ဂဟိတာရက္ခော အလင်္ကတာဟိ ဒေဝကည ပမာဟိ နာဋကိတ္ထိဟိ ပရိဝုတော အမရဂဏ ပရိဝုတော ဒေဝရာဇာ ဝိယ အတ္တနော သိရိသမ္ပတ္တိဟာ မဟာဇနံ တောသယန္တော အနေကေဟိ တုရိယ သင်္ဃုဋ္ဌေဟိ ဝတ္တမာနေဟိ အပရဏှေ မဟာထူပဋ္ဌာနံ ဥပဂဉ္ဇိ။ မဟာ စေတိယဋ္ဌာန မင်္ဂလတ္ထာယ ပုဋဗဒ္ဓါနိ ဝတ္ထာနိ အဋ္ဌုတ္တရ သဟဿံ ဌပါပေသိ။ စတုသု ပဿေသု ဝတ္ထရာသိံ ကာရေသိ တေလ-မဓု-သက္ကရ-ဖာဏိတာဒီနိ စ ဌပါပေသိ။

အထ နာနာဒေသတော ဗဟူ ဘိက္ခူ အာဂမိံသု ရာဇဂဟာ သမန္တာ ဣဏ္ဒိဂုတ္တတ္ထေရော နာမ အသီတိ ဘိက္ခုသဟဿာနိ ဂဟေတွာ အာကာသေနာဂဉ္ဆိ တထာ ဗာရာဏသိယံ ဣသိပတနေ မဟာ ဝိဟာရတော ဓမ္မသေနတ္ထေရော နာမ ဒွါဒသ ဘိက္ခုသဟဿာနိ။ သာဝတ္ထိယံ ဇေတဝန ဝိဟာရတော ပိယဒဿိ နာမ ထေရော သဋ္ဌိ ဘိက္ခု သဟဿာနိ ဝေသာလိယံ မဟာ ဝနတော ဗုဒ္ဓရက္ခိတတ္ထေရော အဋ္ဌာရသ ဘိက္ခု သဟဿာနိ၊ ကောသမ္ဗိယံ ဃောသိတာရာမတော မဟာဓမ္မရက္ခိတတ္ထေရော တိံသ ဘိက္ခုသဟဿာနိ။ ဥဇ္ဇေနိယံ ဒက္ခိဏဂိရိ မဟာ ဝိဟာရတော ဓမ္မရက္ခိတတ္ထေရော စတ္တာလီသ ဘိက္ခုသဟဿာနိ-ပါဋလိပုတ္တေ အသောကာရာမတော မိတ္တိဏ္ဏတ္ထေရော ဘိက္ခူနံ သတသဟဿာနိ သဋ္ဌိဉ္စ သဟဿာနိ ဂဏ္ဓာရ ရဋ္ဌတော အတ္တိန္န ထေရော နာမ ဘိက္ခူနံ ဒွေ သတသဟဿာနိ အသီတိဉ္စ သဟဿာနိ။ မဟာပလ္လဝ ဘောဂတော မဟာဒေဝတ္ထေရော ဘိက္ခူနံ စတ္တာရိ သတသဟဿာနိ သဋ္ဌိဉ္စ သဟဿာနိ ယောနကရဋ္ဌေ အလသဏ္ဒါ နဂရတော ယောနက ဓမ္မရက္ခိတတ္ထေရော တိံသ ဘိက္ခု သဟဿာနိ။ ဝိဉ္ဈာဋဝိဝတ္တနိယ သေနာသနတော ဥတ္တရတ္ထေရော အသီတိ ဘိက္ခုသဟဿာနိ။ မဟာဗောဓိမဏ္ဍ ဝိဟာရတော စိတ္တဂုတ္တတ္ထေရော တိံသ ဘိက္ခုသဟဿာနိ ဝနဝါသိဘောဂတော စဏ္ဒဂုတ္တတ္ထေရော အသီတိ ဘိက္ခုသဟဿာနိ။ ကေလာသ မဟာဝိဟာရတော သုရိဘဂုတ္တတ္ထေရော ဆန္နဝုတိ သဟဿာနိ ဂဟေတွာ အာကာသေနာဂဉ္ဆိ။

‘‘ဘိက္ခူနံ ဒီပဝါသီနံ-အာဂတာနဉ္စ သဗ္ဗသော၊

ဂဏနာယ ပရိစ္ဆေဒေါ-ပေါရာဏေဟိ န ဘာသိတော၊

သမာဂတာနံ ဘိက္ခူနံ-သဗ္ဗေသံ တံ သမာဂမေ၊

ဝုတ္တာ ခီဏာသဝါယေဝ-တေ ဆန္နဝုတိ ကောဋိယော၊’’

အထ သင်္ဃော ပရိက္ခိတ္တ ပဝါဠဝေဒိကာ ဝိယ မဇ္ဈေ ရညော ဩကာသေ ဌပေတွာ အညမညံ အဃဋ္ဋေတွာ အဋ္ဌာသိ။ ပါစိနပဿေ ဗုဒ္ဓရက္ခိတနာမကော ခီဏာသာဝတ္ထေရော အတ္တနာသဒိသနာမကေ ပဉ္စသတခီဏာသဝေ ဂဟေတွာ အဋ္ဌာသိ။ တထာ ဒက္ခိဏပဿေ ပစ္ဆိမပဿေ ဥတ္တရပဿေ စ ဓမ္မရက္ခိတ - သင်္ဃရက္ခိတ - အာနဏ္ဒ နာမကာ ခီဏာသဝတ္ထေရာ အတ္တနာ သဒိသနာမကေ ပဉ္စပဉ္စသတ ခီဏာသဝေ ဂဟေတွာ အဋ္ဌံသု ပိယဒဿိ နာမ ခီဏာသဝတ္ထေရော မဟာဘိက္ခုသင်္ဃံ ဂဟေတွာ ပုဗ္ဗုတ္တရ ကဏ္ဏေ အဋ္ဌာသိ။

ရာဇာ ကိရ သင်္ဃမဇ္ဈံ ပဝိသန္တောယေဝ သစေ မယာ ကယိရမာနံ စေတိယကမ္မံ အနန္တရာယေန နိဋ္ဌံ ဂစ္ဆတိ ပါစိန-ဒက္ခိဏ-ပစ္ဆိမ-ဥတ္တရပဿေသု ဗုဒ္ဓရက္ခိတ-စမ္မရက္ခိတ-သင်္ဃရက္ခိတ-အာနဏ္ဒ နာမကာ ထေရာ အတ္တနာသဒိသနာမကေ ပဉ္စပဉ္စသတဘိက္ခု ဂဟေတွာ တိဋ္ဌန္တု ပိယဒဿိ နာမ ထေရော ပုဗ္ဗုတ္တရကဏ္ဏေ ဘိက္ခုသင်္ဃံ ဂဟေတွာ တိဋ္ဌတူတိ စိန္တေသိ။ ထေရာပိ ရညော အဓိပ္ပာယံ ဉတွာ တထာ ဌိတာတိ ဝဒန္တီ သိဒ္ဓတ္ထေရော ပန မင်္ဂလော-သုမနော-ပဒုမော-သီဝလိ-စဏ္ဒဂုတ္တော-သူရိယဂုတ္တော-ဣဏ္ဒဂု- တ္တော-သာဂရော-စိတ္တသေနော -ဇယသေနော-အစလောတိ ဣမေဟိ ဧကာဒသဟိ ထေရေဟိ ပရိဝုတော ပုဏ္ဏဃဋေ ပူရတော ကတွာ ပုရတ္ထာဘိမုခေါ အဋ္ဌာသိ။

အထ ရာဇာ တထာ ဌိတံ ဘိက္ခုသင်္ဃံ ဒိသွာ ပသန္နစိတ္တော ဂဏ္ဓမာလာဒီဟိ ပူဇေတွာ ပဒက္ခိဏံ ကတွာ စတူသု ဌာနေသု ဝန္ဒိတွာ ပုဏ္ဏသဋဋ္ဌာနံ ပဝိသိတွာ သုယဏ္ဏခီလေ ပဋိမုက္ကံရဇတမယံ ပရိဗ္ဘမန ဒဏ္ဍံ ဝိဇ္ဇမာနမာတာပိတူနံ ဥဘတော သုဇာတေန သုမဏ္ဍိတ ပသာဓိတေန အဘိမင်္ဂလ သမ္မတေန အမစ္စပုတ္တေန ဂါဟာပေတွာ မဟန္တံ စေတိယာဝဋ္ဋံ ကာရေတုံ အာရဘိ။ တထာ ကာရေန္တံ ပန သိဒ္ဓတ္ထတ္ထေရော နိဝါရေသိ။ ဧဝံ ကိရဿ အဟောသိ - ယဒိ မဟာရာဇာ မဟန္တံ စေတိယံ ကရောတိ၊ အနိဋ္ဌိတေယေဝ မရိဿတိ အနာဂတေ ဒုပ္ပရိဟရိယဉ္စ ဘဝိဿတီတိ။ တသ္မိံ ခဏေ ဘိက္ခုသင်္ဃော မဟာ ရာဇ ထေရော ပါဏ္ဍိတော၊ ထေရဿ ဝစနံ ကာတုံ ဝဋ္ဋတီတိ အာဟ။

ရာဇာ ဘိက္ခုသင်္ဃဿ အဓိပ္ပာယံ ဉတွာ ထေရော ကရောတီတိ မညမာနော ကီဒိသံ ဘန္တေ ပမာဏံ ကရောမီတိ အာဟ။ ထေရော မမ ဂတဂတဋ္ဌာနတော စေတိယာဝဋ္ဋံ ကရောဟီတိ ဝတွာ ဥပဒိသန္တော အာဝိဇ္ဈိတွာ အဂမာသိ။ ရာဇာ ထေရဿ ဝုတ္တနယေန စေတိယာဝဋ္ဋံ ကာရေတွာ ထေရံ ဥပသင်္ကမိတွာ နာမံ ပုစ္ဆိတွာ ဂဏ္ဓမာလာဒီဟိ ပူဇေတွာ ဝမ္ဗတွာ ပရိဝါရေတွာ ဌိတေ သေသ ဧကာဒသ ထေရေ စ ဥပသင်္ကမိတွာ ပူဇေတွာ ဝန္ဒိတွာ တေသံ နာမာနိ စ ပုစ္ဆိတွာ ပရိဗ္ဘမန ဒဏ္ဍဂါဟကဿ အမစ္စ ပုတ္တဿ တာမ ပုစ္ဆိ။

အဟံ ဒေဝ သုပ္ပတိဋ္ဌိတ ဗြဟ္မာ နာမာတိ ဝုတ္တေ တဝ ပိတာ ကိံ နာမောတိ ပုစ္ဆိတွာန နဏ္ဒိသေနော နာမာတိ ဝုတ္တေ မာတုနာမံ ပုစ္ဆိ။ သုမနာဒေဝီ နာမာတိ ဝုတ္တေ သဗ္ဗေသံ နာမာနိ အဘိမင်္ဂလသမ္မတာနိ၊ မယာ ကယရမာနံ စေတိယကမ္မံ အဝဿံ နိဋ္ဌာနံ ဂစ္ဆတိတိ ဟဋ္ဌော အဟောသိ၊ တတော ရာဇာ မဇ္ဈေ အဋ္ဌ သုဝဏ္ဏဃဋေ ရဇတဃဋေ စ ဌပါပေတွာ တေ ပရိဝါရေတွာ အဋ္ဌုတ္တရသယဿ ပုဏ္ဏဃဋေ ဌပါပေသိ။

အထ အဋ္ဌ သုဝဏ္ဏိဋ္ဌကာ ဌပါပေသိ။ တာသု ဧကေကံ ပရိဝါရေတွာ အဋ္ဌုတ္တရသတ အဋ္ဌုတ္တရသတ ရဇတိဋ္ဌကာယော။ အဋ္ဌုတ္တရသတ အဋ္ဌုတ္တရသတ ဝတ္ထာနိ စ ဌပါပေသိ။ အထ သုပ္ပတိဋ္ဌိတ ဗြဟ္မနာမေန အမစ္စပုတ္တေန ဧကံ သုဝဏ္ဏိဋ္ဌကံ ဂါဟာပေတွာ တေန သဒိသ နာမေဟိ စ ဇီဝမာနက မာတာပိတူဟိ သတ္တဟိ အမစ္စပုတ္တေဟိ သေသ သတ္တိဋ္ဌကာယော ဂါဟာပေသိ။

တသ္မိံ ခဏေ မိတ္တတ္ထေရော နာမ ပုရတ္ထိမ ဒိသာဘာဂေ ပရိဗ္ဘမိတ လေခါယ ဘူမိယံ ဂဏ္ဓပိဏ္ဍံ ဌပေသိ။ ဇယသေနတ္ထေရော နာမ ဥဒကံ အာသိဉ္စိတွာ သန္တိန္တေတွာ သမံ အကာသိ။ သုပ္ပတိဋ္ဌိတဗြဟ္မာ ဘဒ္ဒ နက္ခတ္တေန ဧဝံ နာနာဝိဓ မင်္ဂလာနိသင်္ခဋဋ္ဌာနေ ပဌမံ မင်္ဂလိကဋ္ဌကံ ပတိဋ္ဌာပေသိ။ သုမနတ္ထေရောနာမ ဇာတိသုမနပုပ္ဖေဟိ တံ ပူဇေသိ။ တသ္မိံ ခဏေ ဥဒကပရိယန္တံ ကတွာ မဟာပထဝိ ကမ္ပော အဟောသိ။ ဧတေနေဝ နယေန သေသ သတ္တိဋ္ဌကာယောပိ ပတိဋ္ဌာပေသုံ။

တတော ရာဇာ ရဇတိဋ္ဌကာယောပိ ပတိဋ္ဌာပေတွာ ဂဏ္ဓမာလာဒီဟိ ပူဇေတွာ မင်္ဂလဝိဓာနံ နိဋ္ဌာပေတွာ သုဝဏ္ဏပေလာယပုပ္ဖာနိ ဂါဟာပေတွာ ပါစီနပဿေ ဘိက္ခုသင်္ဃဿ ပုရတော ဌိတံ မဟာ ဗုဒ္ဓရက္ခိတတ္ထေရံ ဥပသင်္ကမိတွာ ဂဏ္ဓမာလာဒီဟိ ပူဇေတွာ ဝန္ဒိတွာ ထေရဿ ပရိဝါရေတွာ ဌိတ ဘိက္ခူနဉ္စ နာမာနိ ပုစ္ဆိတွာ တတော ဒက္ခိဏပဿေ ဌိတံ မဟာဓမ္မရက္ခိတတ္ထေရံ ပစ္ဆိမပဿေ ဌိတံ မဟာသင်္ဃရက္ခိတတ္ထေရံ ဥတ္တရပဿေ ဌိတံ အာနဏ္ဒတ္ထေရဉ္စ ဥပသင်္ကမိတွာ ဂဏ္ဓမာလာဒီဟိ ပူဇေတွာ ပဉ္စပတိဋ္ဌိတေန ဝန္ဒိတွာ တထေဝ နာမာနိ ပုစ္ဆိတွာ ပုဗ္ဗုတ္တရ ကဏ္ဏံ ဂန္တွာ တတ္ထ ဌိတံ ပိယဒဿိ မဟာထေရံ ဝန္ဒိတွာ ပူဇေတွာ နာမာနိ ပုစ္ဆိတွာ သန္တိကေ အဋ္ဌာသိ။

ထေရော မင်္ဂလံ ဝဍ္ဎေန္တော ရညော ဓမ္မံ ဒေသေသိ။ မင်္ဂလပရိယောသာနေ သမ္ပတ္တ ဂိဟိပရိသာသု စတ္တာလီသ သဟဿာနိ အရဟန္တော ပတိဋ္ဌဟိံသု။ စတ္တာလီသ သဟဿာနိ သောတာပတ္တိဖလော သဟဿံ သကဒါဂါမိဖလေ၊ သဟဿံ အနာဂါမိဖလေ၊ ဘိက္ခူနံ ပန အဋ္ဌာရသသဟဿာနိ အရဟတ္တံ ပါပုဏိံသု။ ဘိက္ခုနီနံ စတုဒ္ဒသ သဟဿာနီတိ။

ထူပါရမှ ကထာ

၂၁။ တတော ရာဇာ ဘိက္ခုသင်္ဃံ ဝန္ဒိတွာ ယာစ မဟာစေတိယံ နိဋ္ဌာတိနာဝ မေ ဘိက္ခုသင်္ဃော ဘိက္ခံ ဂဏှာတူတိ အာဟ။ ဘိက္ခူ နာဓိဝါသေသု၊ အနုပုဗ္ဗေန ယာစန္တော ဥပလ္လဘိက္ခူနံ သတ္တာဟံ အဓိဝါသနံ လဘိတွာ ထူပဋ္ဌာနဿ သမန္တတော အဋ္ဌာရသသု ဌာနေသု မဏ္ဍပေ ကာရယိတွာ ဘိက္ခုသင်္ဃံ နိသီဒါပေတွာ သတ္တာဟံ မဟာဒါနံ ဒတွာ သဗ္ဗေသံယေဝ တေလ-မဓု-ပါဏိတာဒိ ဘေသဇ္ဇံ ဒတွာ ဘိက္ခုသင်္ဃံ ဝိဿဇ္ဇေသိ တတော နဂရေ ဘေရိံစာရာပေတွာ သဗ္ဗေ ဣဋ္ဌက ဝဍ္ဎကိ သန္တိပါတေသိ။ တေ ပဉ္စသတမတ္တာ အဟေသုံ။

တေသု ဧကော အဟံ ရညော စိတ္တံ အာရာဓေတွာ မဟာစေတိယံ ကာတုံ သက္ကောမီတိ ရာဇာနံ ပဿိ ရာဇာ ကထံ ကရောသီတိ ပုစ္ဆိ။ အဟံ ဒေဝ ပေသိကာနံ သတံ ဂဟေတွာ ဧကာဟံ ဧကံ ပံသုသကဋံ ခေပေတွာ ကမ္မံ ကရောမီတိ အာဟ။ ရာဇာ ဧဝံ သတိ ပံသုရာသိကံ ဘဝိဿတိ။ တိဏရုက္ခာဒီနိ ဥပ္ပဇ္ဇိဿန္တိ အဒ္ဓါနံ နပ္ပဝတ္တတီတိ တံ ပဋိဗာဟိ။

အညော အဟံ ပုရိသသတံ ဂဟေတွာ ဧကာဟံ ဧကံ ပံသုဂုမ္ဗံ ခေပေတွာ ကမ္မံ ကရောမီတိ အာဟ။

အညော ပံသူနံ ပဉ္စမ္မဏာနိ ခေပေတွာ ကမ္မံ ကရောမီတိ အာဟ။

အညော ဒွေ အမ္မဏာနိ ခေပေတွာ ကမ္မံ ကရောမီတိ အာဟ။ တေပိ ရာဇာ ပဋိဗာဟိယေဝ။

အထ အညော ပဏ္ဍိတော ဣဋ္ဌက ဝဍ္ဎကီ အဟံ ဒေဝ ဥဒုက္ခလေ ကောဋ္ဋေတွာ သုပ္ပေဟိ ဝဋ္ဋေတွာ နိသဒေပိံသိတွာ ပံသူနံ ဧကမ္မဏံ ဧကာဟေနေဝ ခေပေတွာ ပေသိကာနံ သတံ ဂဟေတွာ ကမ္မံ ကရောမီတိ အာဟ။

ရာဇာ ဧဝံ သတိ မဟာစေတိယေ တိဏာဒီနိ န ဘဝိဿန္တိ စိရဋ္ဌိတိကဉ္စ ဘဝိဿတိတိ သမ္ပဋိစ္ဆိတွာ ပုန ပုစ္ဆိ-ကိံ သဏ္ဌာနံ ပန ကရိဿသီတိ။

တသ္မိံ ခဏေ ဝိဿကမ္မ ဒေဝပုတ္တော ဝဍ္ဎကိဿ သရီရေ အဓိမုစ္စိ။ ဝဍ္ဎကီ သုဝဏ္ဏပါတိံ ပူရေတွာ ဥဒကမာဟရာပေတွာ ပါဏိနာ ဥဒကံ ဂဟေတွာ ဥဒကပိဋ္ဌိယံ အာဟနိ။ ဧဠိကဃဋ သဒိသံ မဟန္တံ ဥဒကဗုဗ္ဗုလံ ဥဌ္ဌာသိ။ ဒေဝ ဤဒိသံ ကရောမီတိ အာဟ။

ရာဇာ သာဓူတိ သမ္ပဋိစ္ဆိတွာ တဿ သဟဿဂ္ဃနကံ သာဋက ယုဂလံ၊ သဟဿဂ္ဃနကံယေဝ ပုဏ္ဏကံ နာမ သုဝဏ္ဏာလင်္ကာရံ သဟဿဂ္ဃနကာ ပါဒုကာ၊ ဒွါဒသ ကဟာပန သဟဿာနိ စ ဒတွာ အနုရူပဋ္ဌာနေ ဂေဟဉ္စ ခေတ္တဉ္စ ဒါပေသိ။

တတော ရာဇာရတ္တိဘာဂေ စိန္တေသိ ကထံ နာမ မနုဿေ အပီလေတွာ ဣဋ္ဌကာ အာဟရာပေယျန္တိ ဒေဝတာ ရညော စိတ္တံ ဉတွာ စေတိယဿ စတုသု ဒွါရေသု ဧကေကဒိဝသပ္ပဟောဏကံ ကတွာ တဿာယေဝ ရတ္တိယာ ဣဋ္ဌကာရာသိံ အကံသု ဝိဟာတာယ ရတ္တိယာ မနုဿာ ဒိသွာ ရညော အာရောစေသုံ။ ရာဇာ တုဿိတွာ ဝဍ္ဎကိံ ကမ္မေ ပဋ္ဌပေသိ။ ဒေဝတာ ဧတေနေဝ နယေန ယာဝ မဟာစေတိယဿ နိဋ္ဌာနံ တာဝ ဧကေကဿ ဒိဝသဿ ပဟောဏကံ ကတွာ ဣဋ္ဌကာ အာဟရိံသု။ သကလဒိဝသဘာဂေ ကမ္မံ ကတဋ္ဌာနေ မတ္တိကာ ဣဋ္ဌက စုဏ္ဏံ ဝါပိ န ပညာယတိ။ ရတ္တိယံ ဒေဝတာ အန္တရဓာပေန္တိ။

အထ ရာဇာ မဟာစေတိယေကမ္မကာရာယစတုပရိသာယဟတ္ထ ကမ္မမူလတ္ထံစတုသု ဒွါရေသု ဧကေကသ္မိံ ဒွါရေ သောဠသ ကဟာပန သဟဿာနိ ဝတ္ထာလင်္ကာရ-ဂန္ဓ-မာလ-တေလ-မဓု-ဖာဏိတ-ပဉ္စကဋုက ဘေသဇ္ဇာနိ နာနာဝိဓ သူပဝျဉ္ဇန သံယုတ္တံ ဘတ္တံ ယာဂုခဇ္ဇကာဒီနိ အဋ္ဌဝိဓ ကပ္ပိယယ ပါနကာနိ ပဉ္စဝိဓ မုခဝါသ သဟိတ တာမ္ဗူလာနိ စ ဌပါပေတွာ မဟာစေတိယေ ကမ္မံ ကရောန္တာဂဟဋ္ဌာ ဝါ ပဗ္ဗဇိတာ ဝါ ယထာဇ္ဈာသယံ ဂဏှန္တု မုလံ အဂဟေတွာ ကမ္မံ ကရောန္တာနံ ကာတုံ န ဒေထာတိ အာဏာပေသိ။

အထေကော ထေရော စေတိယကမ္မေ သဟာယ ဘာဝံ ဣစ္ဆန္တော ကမ္မကရဏဋ္ဌာနေ မတ္တိကာ သဒိသံ ကတွာ အတ္တာနံ အဘိသင်္ခဋံ မတ္တိကာ ပိဏ္ဍံ ဧကေန ဟတ္ထေန ဂဟေတွာ အညေန မာလာ ဂဟေတွာ မဟာစေတိယင်္ဂဏံ အာရုယှ ရာဇကမ္မိကေ ဝဉ္စေတွာ ဝဍ္ဎကိဿ အဒါသိ။ သော ဂဏှန္တောဝ ပကတိမတ္တိ ကာ နာ ဘဝတီတိ ဉတွာ ထေရဿ မုခံ ဩလောကေသိ တဿာကာရံ ဉတွာ တတ္ထ ကောလာဟလ မဟောသိ အနုက္ကမေန ရာဇာ သုတွာ အာဂန္တွာ ဝဍ္ဎကိံ ပုစ္ဆိ-တုယှံ ကိရ ဘဏေ ဧကော ဘိက္ခု အမူလက မတ္တိကာပိဏ္ဍံ အဒါသီတိ။

သော ဧဝမာဟ-ယေဘုယျေန အယျာ ဧကေန ဟတ္ထေန ပုပ္ဖံ ဧကေန မတ္တိကာပိဏ္ဍေ ဂဟေတွာ အာဟရိတွာ ဒေန္တိ တေနာဟံ အဇာနိတွာ ကမ္မေ ဥပနေသိံ ‘‘အယံ ပန အာဂန္တုကော၊ အယံ နေဝါသိကောတိ ဧတ္တကံ ဇာနာမီတိ။‘‘တေန ဟိ တံ ထေရံ ဣမဿ ဒဿေဟီတိ ဧကံ မဟလ္လက ဗလတ္ထံ ဝဍ္ဎကိဿ သန္တိကေ ဌပေသိ ဝဍ္ဎကီ ပုန အာဂတကာလေ တံ ထေရံ ဗလတ္ထဿ ဒဿေသိ သော တံ သဉ္ဇာနိတွာ ရညော အာရောစေသိ။

ရာဇာ တဿ သညံ အဒါသိ။ တော တွံ တယော ဇာတိသုမန မကုလကုမ္ဘေ မဟာဗောဓိ အင်္ဂဏေ ရာသိံ ကတွာ ဂဏ္ဓဉ္စ ဌပေတွာ မဟာဗောဓိ အင်္ဂဏံ ဂတ ကာလေ အာဂန္တုကဿ ထေရဿ ပူဇနတ္ထာယ ရညော ဒါပိတံ ဂဏ္ဓမာလာန္တိ ဝတွာ ဒေဟီတိ။ ဗလတ္ထော ရညော ဝုတ္တနယေနေဝ တဿ ဗောဓိ အင်္ဂဏံ ဂတ ကာလေ တံ ဂဏ္ဓမာလံ အဒါသိ။

သောပိ သောမနဿပ္ပတ္တော ဟုတွာ သေလသဏ္ထရံ ဓောဝိတွာ ဂဏ္ဓေန ပရိဘဏ္ဍံ ကတွာ သိလာသန္ထရံ ကတွာ ပုပ္ဖံ ပူဇေတွာ စတုသု ဌာနေသု ဝန္ဒိတွာ ပါစီနဒွါရေ အဉ္ဇလိံ ပဂ္ဂယှ ပီတိံ ဥပ္ပာဒေတွာ ပုပ္ဖ ပူဇံ ဩလောကေန္တော အဋ္ဌာသိ။

ဗလတ္ထော တသ္မိံ ကာလေ တံ ထေရံ ဥပသင်္ကမိတွာ ဝန္ဒိတွာ ဧဝမာဟ။ ဘန္တေ တုမှာကံ စေတိယကမ္မေ သဟာယဘာဝတ္ထာယ ဒိန္နဿ အမူလက မတ္တိကာပိဏ္ဍဿ မူလံ ဒိန္နဘာဝံ ရာဇာ ဇာနာပေတိ အတ္တနော ဝန္ဒနေန ဝန္ဒာပေတီတိ။ တံ သုတွာ ထေရော အနတ္တမနော အဟောသိ။ ဗလတ္ထော တိဋ္ဌန္တု ဘန္တေ တယော သုမန မကုလ ကုမ္ဘာတတ္တကာနေဝ သုဝဏ္ဏပုပ္ဖာနိပိ ဧတံ မတ္တိကပိဏ္ဍံ နာဂ္ဃန္တိ။ စိတ္တံ ပသာဒေထ ဘန္တေတိ ပက္ကာမိ။

တဒါ ကောဋ္ဌိဝါလဇနပဒေ ပိယင်္ဂလ္လ ဝိဟာရဝါသီ ဧကော ထေရော ဣဋ္ဌကဝဍ္ဎကိဿ ဉာတကော အဟောသိ။ သော အာဂန္တွာ ဝဍ္ဎကိနာ သဒ္ဓိံ မန္တေတွာ ဒီဃ ဗဟလ ကိရိယတော ဣဋ္ဌကပ္ပမာဏံ ဇာနိတွာ ဂန္တွာ သဟတ္ထေနေဝ သက္ကစ္စံ မတ္တိကံ မဒ္ဒိတွာ ဣဋ္ဌကံ ကတွာ ပစိတွာ ပတ္တတ္ထဝိကာယ ပက္ခိပိတွာ ပစ္စာဂန္တွာ ဧကေန ဟတ္ထေန ရညော ဣဋ္ဌကံ ဧကေန ပုပ္ဖံ ဂဟေတွာ အတ္တနော ဣဋ္ဌကာသ သဒ္ဓိံ ရညော ဣဋ္ဌကံ အဒါသိ။ ဝဍ္ဎကီ ဂဟေတွာ ကမ္မေ ဥပနေသိ။

ထေရော သဉ္ဇာတ ပီတိ သောမနဿော မဟာစေတိယေ ကမ္မံ ကရောန္တော ဣဋ္ဌ ကသာလပရိဝေဏေ ဝသတိ တဿ တံ ကမ္မံ ပါကဋံ အဟောသိ။ ရာဇာ ဝဍ္ဎကိံ ပုစ္ဆိ-ဘဏေ ဧကေန ကိရ အယျေန အမူလိက ဣဋ္ဌကာ ဒိန္နာတိ။ သစ္စံ ဒေဝ၊ ဧကေန အယျေန ဒိန္န ဣဋ္ဌကာ အမှာကံ ဣဋ္ဌကာယ သဒိသာတိ ကမ္မေ ဥပနေသိန္တိ အာဟ။ ပုန တံ ဣဋ္ဌကံ သဉ္ဇာနာသီတိ ရညာ ဝုတ္တေ ဉာတကာနုဂ္ဂဟေန န ဇာနာမီတိ အာဟ။

ရာဇာ ယဒိ ဧဝံ တံ ဣမဿ ဒန္နေဟီတိ ဗလတ္ထံ ဌပေသိ သော တံ ပုဗ္ဗေ ဝိယ ဗလတ္ထဿ ဒဿေသိ။ ဗလတ္ထော ပရိဝေဏံ ဂန္တွာ သန္တိကေ နိသီဒိတွာ ပဋိသဏ္ထာရံ ကတွာ ဘန္တေ တုမှေ အာဂန္တုကာ နေဝါသိကာတိ ပုစ္ဆိ။ အာဂန္တုကောမှီ ဥပါသကာတိ။ ကတရ ရဋ္ဌဝါသိကော ဘန္တေတိ ကောဋ္ဌိဝါလဇနပဒေ ပိယင်္ဂလ္လ ဝိဟာရဝါသိမှိ ဥပါသကာတိ ဣဓေဝ ဝသထ ဂစ္ဆထာတိ။ ဣဓ န ဝသာမ အသုကဒိဝသေ ဂစ္ဆာမာတိ အာဟ။ ဗလတ္ထောပိ အဟမ္ပိ တုမှေဟိ သဒ္ဓိံ အာဂမိဿာမိ။ မယှမ္ပိ ဂါမော ဧတသ္မိံယေဝ ဇနပဒေ အသုက ဂါမော နာမာတိ အာဟ။ ထေရော သာဓူတိ သမ္ပဋိစ္ဆိ။ ဗလတ္ထော တံ ပဝတ္တိံ ရညော နိဝေဒေသိ။

ရာဇာ ဗလတ္ထဿ သဟဿဂ္ဃနကံ ဝတ္ထယုဂလံ မဟဂ္ဃံ ရတ္တကမ္ဗလံ ဥပါဟနယုဂံ သုဂဏ္ဓတေလနာဠိံ အည္စ ဗဟုံ သမဏပရိက္ခာရံ ထေရဿ ဒေဟီတိ ဒါပေသိ သောပိ ပရိက္ခာရံ ဂဟေတွာ ပရိဝေဏံ ဂန္တွာ ထေရေန သဒ္ဓိံ ရတ္တိံ ဝသိတွာ ပါတော သဒ္ဓိံယေဝ နိက္ခမိတွာ အနုပုဗ္ဗေန ဂန္တွာ ပိယင်္ဂလ္လ ဝိဟာရဿ ဒိဿမာနေ ဌာနေ သီတစ္ဆာယာယ ထေရံ နိသီဒါပေတွာ ပါဒေ ဓောဝိတွာ ဂဏ္ဓတေလေန မက္ခေတွာ ဂုဠောဒကံ ပါယေတွာ ဥပါဟနံ ပဋိမုဉ္စိတွာ ဣဒံ မေ ပရိက္ခာရံ ကုလူပဂထေရဿတ္ထာယ ဂဟိတံ၊ ဣဒါနိ တုမှာကံ ဒမ္မိ၊ ဣဒံ ပန သာဋကယုဂံ မမ ပုတ္တဿ မင်္ဂလတ္ထာယ ဂဟိတံ၊ တုမှေ စီဝရံ ကတွာ ပါရုပထာတိ ဝတွာ ထေရဿ ပါဒမူလေ ဌပေသိ။

ထေရော သာဋကယုဂံ ပတ္တတ္ထဝိကာယ ပက္ခိပိတွာ သေသပရိက္ခာရံ ဘဏ္ဍိကံ ကတွာ ဥပါဟနံ အာရုယှံ ကတ္တယဋ္ဌိံ ဂဟေတွာ မဂ္ဂံ ပဋ္ပဇ္ဇိ။ ဗလတ္ထော တေန သဒ္ဓိံ ထောကံ ဂန္တွာ ‘‘တိဋ္ဌထ ဘန္တေ၊ မယှံ အယံ မဂ္ဂေါ‘‘တိ ဝတွာ ပုဗ္ဗေ ဝုတ္တနယေနေဝ ရညော သာသနံ ထေရဿ အာရောစေသိ

ထေရော တံ သုတွာ မဟန္တေန ပရက္ကမေန ကတကမ္မံ အကတံ ဝိယ ဇာတန္တိ ဒေါမနဿပ္ပတ္တော ဟုတွာ အဿုဓာရံ ပဝတ္တေတွာ’ဥပါသက တဝ ပရိက္ခာရံ တွမေဝ ဂဏှာဟီ‘‘တိ ဌိတကောဝ သဗ္ဗာပရိက္ခာရံ ဆဍ္ဍေသိ ဗလတ္ထော ကိံ နာမ ဘန္တေ ဝဒထ ဧသ ရာဇာ တုယှံ ဘဝဂ္ဂပ္ပမာဏံ ကတွာ ပစ္စယံ ဒေန္တောပိ တဝ ဣဋ္ဌကာနုရူပံ ကာတုံ န သက္ကောတိ။ ကေဝလံ ပန မဟာစေတိယေ ကမ္မံ အညေသံ အပတ္တကံ ကတွာ ကရောမီတိ အဓိပ္ပာယေန ဧဝံ ကာရေတိ တုမှေ ပန ဘန္တေ အတ္တနာ လဒ္ဓပရိက္ခာရံ ဂဟေတွာ စိတ္တံ ပသာဒေထာတိ ဝတွာ ထေရံ သညာပေတွာ ပက္ကာမိ။ ဣမသ္မိံ ပန စေတိယေ ဘတိယာ ကမ္မံ ကတွာ စိတ္တံ ပသာဒေတွာ သဂ္ဂေ နိဗ္ဗတ္တ သတ္တာနံ ပမာဏံ နတ္ထိ။

တာဝတိံသ ဘဝနေ ကိရ နိဗ္ဗတ္တ ဒေဝဓီတရော အတ္တနော သမ္ပတ္တိံ ဩလောကေတွာ ကေန နု ကော ကမ္မေန ဣမံ သမ္ပတ္တိံ လဘိမှာတိ အာဝဇ္ဇမာနာ မဟာစေတိယေ ဘတိယာ ကမ္မံ ကတွာ လဒ္ဓဘာဝံ ဉတွာ ဘတိယာ ကတကမ္မဿာပိ ဖလံ ဤဒိသံ၊ အတ္တနော သန္တကေန ကမ္မဖလံ သဒ္ဒဟိတွာ ကတကမ္မဿ ဖလံ ကီဒိသံ ဘဝိဿတီတိ စိန္တေတွာ ဒိဗ္ဗဂဏ္ဓမာလံ အာဒါယ ရတ္တိဘာဂေ အာဂန္တွာ ပူဇေတွာ စေတိယံ ဝန္ဒန္တိ။

တသ္မိံ ခဏေ ဘာတိဝင်္ကဝါသီ မဟာသီဝတ္ထေရော နာမ စေတိယံ ဝန္ဒနတ္ထာယ ဂတော၊ တာ ဝန္ဒန္တိယော ဒိသွာ မဟာသတ္တပဏ္ဏိရုက္ခသမီပေ ဌိတော တာသံ ယထာရုစိံ ဝန္ဒိတွာ ဂမနကာလေ ပုစ္ဆိ? တုမှာကံ သရီရာလောကေန သကလတမ္ဗပဏ္ဏိဒိပေါ ဧကာလောကော၊ ကိံ ကမ္မံ ကရိတ္ထာတိ ဘန္တေ အမှာကံ သန္တကေ ကတကမ္မံ နာမ နတ္ထိ ဣမသ္မိံ စေတိယေ မနံ ပသာဒေတွာ ဘတိယာ ကမ္မံ ကရိမှာတိ အာဟံသု ဧဝံ ဗုဒ္ဓသာသနေ ပသန္နစိတ္တေန ဘတိယာ ကတကမ္မမ္ပိ မဟပ္ဖလံ ဟောတိ။ တသ္မာ-

‘‘စိတ္တပ္ပသာဒမတ္တေန-သုဂတေ ဂတိ ဥတ္တမာ၊

လဗ္ဘတီတိ ဝိဒိတွာန-ထူပပူဇံ ကရေ ဗုဒ္ဓါ’’တိ၊

ဧဝံ ရာဇာ စေတိယကမ္မံ ကာရာပေန္တော ပုပ္ဖဓာနတ္တယံ နိဋ္ဌာပေသိ။ တံ ခီဏာသဝ ထိရဘာဝတ္ထာယ ဘူမိသမံ ကတွာ ဩသီဒါပေသုံ၊ ဧဝံ နဝဝါရေ စိတံ စိတံ ဩသီဒါပေသုံ။ ရာဇာ ကာရဏံ အဇာနန္တော အနတ္တမနော ဟုတွာ ဘိက္ခုသင်္ဃံ သန္နိပါတေသိ။ အသီတိ ဘိက္ခုသဟဿာနိ သန္နိပတိံသု ရာဇာ ဘိက္ခုသင်္ဃံ ဂဏ္ဓမာလာဒီဟိ ပူဇေတွာ ဝန္ဒိတွာ ပုစ္ဆိ’ဘန္တေ မဟာစေတိယေ ပုပ္ဖဓာနတ္တယံ နဝဝါရေ န ဇာနာမီ’တိ ဘိက္ခုသင်္ဃော အာဟ မဟာရာဇ တုယှံ ကမ္မဿ ဝါ ဇီဝိတဿ ဝါ အန္တရာယော နတ္ထိ။ အနာဂတေ ထိရဘာဝတ္ထာယ ဣဒ္ဓိမန္တေဟိ ဩသီဒါပိတံ၊ ဣတော ပဋ္ဌာယ န ဩသီဒါပေဿန္တိ။ တွံ အညထတ္တံ အကတွာ မဟာထူပံ သမာပေဟီတိ။ တံ သုတွာ ဟဋ္ဌော ရာဇာ ထူပကမ္မံ ကာရေသိ။

ဒသပုပ္ဖဓာနာနိ ဒသဟိ ဣဋ္ဌကာကောဋီဟိ နိဋ္ဌနံ ဂမိံသု ပုန ပုပ္ဖဓာနတ္တယေ နိဋ္ဌိတေ ဘိက္ခုသင်္ဃော ဥတ္တရ-သုမန နာမကေ ဒွေ ခီဏာသဝ သာမဏေရေ အာဏာပေသိ။ တုမှေ သမစတုရဿံ အဋ္ဌရတန ဗဟလံ ဧကေက ပဿတော အသီတိ အသိတိ ဟတ္ထပ္ပမာဏံ ဆမေဒက ဝဏ္ဏပါသာဏေ အာဟရထာတိ။ တေ သာဓူတိ သမ္ပဋိစ္ဆိတွာ ဥတ္တရကုရုံ ဂန္တွာ စုတ္တပ္ပကာရပ္ပမာဏေ ဘဏ္ဍိပုပ္ဖနိဟေဆ မေဒဝဏ္ဏပါသာဏေ အာဟရိတွာ ဧကံ ပါသာဏံ ဓာတုဂဗ္ဘဿ ဘူမိယံ အတ္ထရိတွာ စတ္တာရော ပါသာဏေ စတုသု ပဿေသု သံဝိဓာယ အပရံ ဓာတုဂဗ္ဘံ ပိဒဟနတ္ထာယ ပါစီန ဒိသာဘာဂေ ဝါလုက ပါကာရ သမီပေ အဒိဿမာနံ ကတွာ ဌပေသုံ။

၂၂။ တတော ရာဇာ ဓာတုဂဗ္ဘဿ မဇ္ဈေ သဗ္ဗရတနမယံ သဗ္ဗာကာရသမ္ပန္နံ မနောဟရံ ဗောဓိရုက္ခံ ကာရေသိ သော ဟိ ဣဏ္ဒနီလမဏိဘူမိယံ ပတိဋ္ဌိတော၊ တဿမူလာနိ ပစာဠမယာနိ၊ ခဏ္ဓော သိရိဝစ္ဆာဒီဟိ အဋ္ဌမင်္ဂလိကေဟိ ပုပ္ဖပန္တိ လတာပန္တိ စတုပ္ပဒ ဟံသပန္တိဟိ စ ဝိစိတ္တော အဋ္ဌာရသ ဟတ္ထုဗ္ဗေဓော ရဇတမယော အဟောသိ။

ပဉ္စမဟာသာခါပိ အဋ္ဌာရသဟတ္ထာစ၊ ပတ္တာပိ မဏိမယာနိ၊ ပဏ္ဍုပတ္တာနိ၊ ဟေမမယာနိ၊ ဖလာ ပဝါဠမယာနိ။ တထာ အင်္ကုရောပရိ စေလဝိတာနံ ဗဏ္ဓာပေသိ။ တဿ အန္တေ သမန္နတော မုတ္တမယ ကိင်္ကိဏိကဇာလံ ဩလမ္ဗတိ။ သွဏ္ဏဃဏ္ဋာပန္တိ စ သုဝဏ္ဏဒါမာနိ စ တဟိံ တဟိံ ဩလမ္ဗန္တိ ဝိတာနဿ စတုသု ကဏ္ဏေသု နဝသတသဟဿဂ္ဃနကော ဧကေကော မုတ္တာကလာပေါ ဩလမ္ဗတိ။ တတ္ထ ယထာနုရူပံ နာနာရတန ကတာနေဝ စဏ္ဒ-သူရိယ-တာရကာရူပါနိ ပဒုမာနိ စ အပ္ပိတာနိ အဟေသုံ။ မဟဂ္ဃာနိ အနေကဝဏ္ဏာနိ အဋ္ဌုတ္တရ သဟဿာနိ ဝတ္ထာနိ ဩလမ္ဗိံသု။

တတော ဗောဓိရုက္ခဿ သမန္တတော သတ္တ ရတနမယ ဝေဒိကာ ကာရေတွာ မဟာမလက မုတ္တာ အတ္ထရာပေသိ မုတ္တာ ဝေဒိကာနံ အန္တရေ ဂဏ္ဓောဒက ပုဏ္ဏ သတ္တရတနမယ ပုဏ္ဏဃဋ ပန္တိယော ဌပါပေသိ။ တာသု သုဝဏ္ဏဃဋေ ပဝါဠမယာနိ ပုပ္ဖာနိ အဟေသုံ။ ပဝါဠဃဋေ သုဝဏ္ဏမယာနိ ပုပ္ဖာနိ။ မဏိဃဋေ ရဇတမယာနိ ပုပ္ဖာနိ ရဇတဃဋေ မဏိမယာနိပုပ္ဖာတိ။ သတ္တရတနဃဋေ သတ္တရတနမယာနိ ပုပ္ဖာနိ အဟေသုံ။

ဗောဓိရုက္ခဿ ပါစီန ဒိသာဘာဂေ ရတနမယေ ကောဋိအဂ္ဃနကေ ပလ္လင်္ကေ ဃနကောဋ္ဋိမ သုဝဏ္ဏမယံ ဗုဒ္ဓပဋိမံ နိသီဒါပေသိ။ တဿာ ပဋိမာယ ဝီသတိ နခါ အက္ခိနံ သေတဋ္ဌာနာနိ စ ဖဠကမယာနိ။ ဟတ္ထတလ ပါဒတလ ဒန္တာဝရဏာနိ အက္ခီနံ ရတ္တဋ္ဌာတာနိ စ ပဝါဠမယာနိ ကေသ ဘမုကာနိ အက္ခိနံ ကာဠကဋ္ဌာနာနိ စ ဣဏ္ဒနီလ မဏိမယာနိ ဥဏ္ဏာလောမံ ပနံ ရဇတမယံ အဟောသိ။ တတော သဟမ္ပတိ မဟာ ဗြဟ္မာနံ ရဇတစ္ဆတ္တံ ဓာရေတွာ ဌိနံ ကာရေသိ။ တတာ ဒွီသု ဒေဝလောကေသု ဒေဝတာဟိ သဒ္ဓိံ ဝိဇယုတ္တရသင်္ခံ ဂဟေတွာ အဘိသေကံ ဒဒမာနံ သက္ကံ ဒေဝရာဇာနံ ပဉ္စသိခ ဒေဝပုတ္တံ ဗေဠုဝ ပဏ္ဍု ဝီဏမာဒါယ ဂဏ္ဓဗ္ဗံ ကုရုမာနံ။ မဟာကာဠ နာဂရာဇာနံ နာဂကညာပရိဝုတံ နာနာဝိဓေနထုတိဃောသေန တထာဂတံ ဝဏ္ဏေန္တံ ကာရေသိ။

ဝသဝတ္တိမာရမ္ပန ဗာဟုသဟဿံ မာပေတွာ တိသူလ မုဂ္ဂရာဒိ နာနာဝုဓာနိ ဂဟေတွာ သဟဿကုမ္ဘံ ဂိရိမေခလ ဟတ္ထိက္ခဏ္ဓ မာရုယှ မာရဗလံ ပရိဝါရေတွာ ဗောဓိမဏ္ဍံ အာဂန္တွာ အနေက ဘိံသနကံ ကုရုမာနံ ကာရေသိ။ သေသာသု ဒိသာသု ပါစီန ဒိသာဘာဂေ ပလ္လင်္ကသဒိသေ ကောဋိ ကောဋိ အဂ္ဃနကေ တယော ပလ္လင်္ကေ အတ္ထရာပေတွာ ဒန္တမယံ ဒဏ္ဍံ ပဝါဠဝီဇနိံ ဌပါပေသိ။ ဗောဓိက္ခဏ္ဓံ ဥဿီသကေ ကတွာ နာနာရတနံ မဏ္ဍိတံ ကောဋိအဂ္ဃနကံ ရဇတ သယနံ အတ္ထရာပေသိ။

ဒသဗလဿ အဘိသမ္ဗောဓိမ္ပတွာ အနိမိသေန စက္ခုနာ ဗောဓိပလ္လင်္ကံ ဩလောကိတဋ္ဌာနံ သတ္တာဟမေဝ ရတနစင်္ကမေ စင်္ကမိတဋ္ဌာနံ ဩလောကိတဋ္ဌာနံ သတ္တာဟမေဝ ရတနစင်္ကမေ စင်္ကမိတဋ္ဌာနံ ရတနဃရံ ပဝိသိတွာ ဓမ္မသမ္မသိတဋ္ဌာနံ မုစလိဏ္ဒမူလံ ဂန္တွာ နိသိန္နဿ မုစလိဏ္ဒေန နာဂေန သတ္တက္ခတ္တုံ ဘောဂေဟိ ပရိက္ခိပိတွာ ဥပရိ ဖဏံ ကတွာ ဌိတဋ္ဌာနံ၊ တတော အဇပါလ နိဂြောဓ မူလံ ဂန္တွာ နိသိန္နဋ္ဌာနံ၊ တတော ရာဇာယတနံ ဘောဇနေ ဥပနီတေ စတုမဟာရာဇေဟိ ဥပနီတ ပတ္တပဋိဂ္ဂဟဏံ ကာရေသိ။

တတော ဗြဟ္မာယာစနံ ဓမ္မစက္ကပ္ပဝတ္တနံ သသပဗ္ဗဇ္ဇံ၊ ဘဒ္ဒဝဂ္ဂိယ ပဗ္ဗဇ္ဇံ၊ တေဘာတိက ဇဋိလ ဒမနံ၊ လဋ္ဌိဝနုယျာနေ ဗိမ္ဗိသာရောပဂမဏံ၊ ရာဇဂဟပ္ပဝေသနံ၊ ဝေဠုဝန ပဋိဂ္ဂဟဏံ အသီတိ မဟာသာဝကေ စ ကာရေသိ တတော ကပိလဝတ္ထုဂမနံ ရတနစင်္ကမေ ဌတဋ္ဌာနံ၊ ရာဟုလပဗ္ဗဇ္ဇံ၊ နဏ္ဒြပဗ္ဗဇ္ဇံ ဇေတဝနပဋိဂ္ဂဟဏံ၊ ဂဏ္ဍမ္ဗမူလေ ယမက ပါဋိဟာရိကံ ဒေဝလောကေ။

‘‘နိသိန္နေ’’တိ ကတ္ထစိ။

အဘိဓမ္မ ဒေသနာ ဒေဝေါရောဟဏ ပါဋီဟီရံ ထေရပဉှ သမာဂမဉ္စ ကာရေသိ။

တထာ မဟာသမယသုတ္တ-ရာဟုလောဝါဒ သုတ္တ-မင်္ဂသုတ္တပါရာယန သုတ္တ သမာဂမံ ဓနပါလ-အာဠဝက-အင်္ဂုလိမာလ-အပလာလ ဒမနံ အာယုသင်္ခါရ ဝေါဿဇ္ဇနံ သူကရမဒ္ဒဝ ပရိဂ္ဂဟဏံ သိင်္ဂိဝဏ္ဏ ဝတ္ထယုဂ ပဋိဂ္ဂဟဏံ ပသန္နောဒကပါနံ ပရိနိဗ္ဗာနံ ဒေဝမနုဿ ပရိဒေဝနံ မဟာကဿပတ္ထေရဿဘဂဝတောပါဒဝဏ္ဒနံ သရီရ ငဟနံ အဂ္ဂိနိဗ္ဗာနံ အာဠာဟနသက္ကာရံ ဒေဏေန ဗြာဟ္မဏေန ကတဓာတု ဝိဘာဂဉ္စ ကာရေသိ။

တထာ အဒ္ဓစ္ဆဋ္ဌာနိ ဇာတကသတာနိ ကာရေသိ။ ဝေဿန္တရဇာတကံ ပန ကာရေန္တော သဉ္ဇယ မဟာရာဇံ ဖုသတီဒေဝိံ မဒ္ဒိဒေဝိံ ဇာလိယ ကုမာရံ ကဏှာဇိနဉ္စ ကာရေသိ။ တတော ပဏ္ဍဝ ဟတ္ထိဒါနံ သတ္တ သတက မဟာဒါနံ နဂရ ဝိလောကနံ သိန္ဓဝဒါနံ ဒေဝတာဟိ ရောဟိတထ ဝဏ္ဏေန ရထဿ ဝဟနံ ရထဒါနံ သယမေဝေါဏတ ဒုမတော ဖလံ ဂဟေတွာ ဒါရကာနံ မဓုမံသ ဒိန္န နေသာဒဿ သုဝဏ္ဏ သူစိဒါနံ ဝင်္ကပဗ္ဗတကုစ္ဆိမှိ ပဗ္ဗဇ္ဇာဝေသေန ဝသိတဋ္ဌာနံ ပူဇကဿ ဒါရကဒါနံ သက္ကဗြာဟ္မဏဿ ဘရိယံဒါနံ ပူဇကဿ ဒေဝတာနုဘာဝေက ဒါရကေ ဂဟေတွာ ဂန္တွာ သဉ္ဇယ နရိဏ္ဒဿ ပုရတော ဂတဋ္ဌာနံ တတော ဝင်္ကပဗ္ဗတကုစ္ဆိယံ ဆန္နံ ခတ္တိယာနံ သမာဂမံ ဝေဿန္တရဿ မဒ္ဒိယာ စ အဘိသေကံ ပတ္တဋ္ဌာနံ နကရမ္ပဝိဋ္ဌေ သတ္တရတနဝဿံ ဝဿိတဋ္ဌာနံ တတော စဝိတွာ တုသိတပုရေ နိဗ္ဗတ္တဋ္ဌာနဉ္စ သဗ္ဗံ ဝိတ္ထာရေန ကာရေသိ။

တတော ဒသ သဟဿ စက္ကဝါဠဒေဝတာဟိ ဗုဒ္ဓ ဘာဝါယ အာယာစိတဋ္ဌာနံ အပုနရာဝတ္တနံ မာတုကုစ္ဆိဩက္ကမနံ မဟာမာယာဒေဝိံ သုဒ္ဓါဒန မဟာရာဇံ လုမ္ဗိနီဝနေ ဇာတဋ္ဌာနံ အန္တလိက္ခတော ဒွိန္နံ ဥဒကဓာရာနံ ပတနံ ဥတ္တရာဘိမုခံ သတ္တပဒဝီတိဟာရ ဂမနံ ကာဠဒေဝဠဿ ဇဋာမတ္ထကေ မဟာပုရိသဿ ပါဒပတိဋ္ဌာန အနတိဝတ္တမာနာယ ဇမ္ဗုစ္ဆာယာယ ဓာတီနံ ပမာဒံ ဒိသွာ သိရိသယနေ ပလ္လင်္ကေ နိသီဒိတွာ ဈာနသမာပန္နဋ္ဌာနဉ္စ ကာရေသိ။

တတော ရာဟုလ မာတရံ ရာဟုလ ဘဒ္ဒကဉ္စ ကာရေသိ တတော ဧကူန တိံသဝဿကာလေ ဥယျာနေ ကီဠတတ္ထာယ ဂမန သမယေ ဇိဏ္ဏ ဝျာဓိတ မတ သင်္ချာတေ တယော ဒေဝဒူတေ ဒိသွာ နိဝတ္တနဋ္ဌာနံ စတုတ္ထဝါရေ ပဗ္ဗဇိတရူပံ ဒိသွာ သာဓုပဗ္ဗဇ္ဇာတိ စိတ္တံ ဥပ္ပာဒေတွာ ဥယျာနံ ဂန္တွာ ဥယျာနသိရိံ အနုဘဝိတွာ သာယဏှ သမယေ နဟာတွာ မင်္ဂလ သိလာပဋ္ဋေ နိသိန္နမတ္တ ဝိဿကဋ္ဌာနာ အလင်္ကရဏဋ္ဌာဏံ တတော မဇ္ဈိမရတ္တိယံ နာဋကာနံ ဝိပ္ပကာရံ ဒိသွာ ကဏ္ထက ဟယ ဝရမာရုယှ) မဟာဘိနိက္ခမဏံ နိက္ခမိတဋ္ဌာနံ ဒသ သဟဿ) စက္ကဝါဠ ဒေဝတာဟိ ကတ ပူဇာဝိဓိံ ကဏ္ထကနိဝတ္တန စေတိယဋ္ဌာနံ အနောမာ နဒီတီရေ ပဗ္ဗဇ္ဇံ ရာဇဂဟပ္ပဝေသနံ ပဏ္ဍဝ ပဗ္ဗတစ္ဆ ယာယ ရညော ဗိမ္ဗိသာရမ္မ ရဇ္ဇကရဏတ္ထာယ အာယာစနံ သုဇာတာယ ဒိန္န ခီရပါယာသ ပဋိဂ္ဂဟဏံ နေရဉ္ဇရာယ နဒိယာ တီရေ ပါယာသ ပရိဘောဂံ နဒိယာ ပါတိဝိဿဋ္ဌံ ပါဋိဟာရိယံ သာလဝနေ ဒိဝါဝိဟာရ ဂတဋ္ဌာနံ သောတ္ထိယေန ဒိန္န ကုသတိဏပဋိဂ္ဂဟဏံ ဗောဓိမဏ္ဍံ အာရုယှ နိသိန္နဋ္ဌာနဉ္စ သဗ္ဗံ ဝိတ္ထာရေန ကာရေသိ။

တတော မဟိဏ္ဒတ္ထေရ ပမုခေ သတ္တ သဟ အာဂတေ စ ကာရာပေသိ။ စတုသု ဒိသာသု ခဂ္ဂဟတ္ထေ စတ္တာရော မဟာရာဇာနော ကာရေသိ တတော ဒွတ္တိံသ ဒေဝပုတ္တေ တတော သုဝဏ္ဏ ဒဏ္ဍ ဒီပကဓာရာ ဒွတ္တိံသ ဒေဝကုမာရိယော တတော အဋ္ဌဝီသတိ ယက္ခသေနာပတိနော တတော အဉ္ဇလိံ ပဂ္ဂယှ ဌိတ ဒေဝတာယော တတော ရတနမယ ပုပ္ပကလာပေ ဂဟေတွာ ဌိတ ဒေဝတာယော တတော သုဝဏ္ဏဃဋေ ဂဟေတွာ ဌိတိ ဒေဝတာယော တတော နစ္စနက ဒေဝတာယော တတော တုရိယဝါဒက ဒေဝတာယော တတော ပစ္စေက သတသဟဿဂ္ဃနကေ ဒသဟတ္ထပ္ပမာဏေ အာဒါသေ ဂဟေတွာ ဌိတ ဒေဝတာယော တတော တထေဝ သတသဟဿဂ္ဃနက ပုပ္ဖ သာခါယော ဂဟေတွာ ဌိတဒေဝတာယော တတော စဏ္ဒမဏ္ဍလေ ဂဟေတွာ ဌိတဒေဝတာယော သူရိယမဏ္ဍလေ ဂဟေတွာ ဌိတဒေဝတာယော တတော ပဒုမာနိ ဂဟေတွာ ဌိတ ဒေဝတာယော တတော ဆတ္တာနိ ဂဟေတွာ ဌိတဒေဝတာယော တတော ဝိစိတ္တဝေသဓရေ မလ္လဒေဝပုတ္တေ တတော ဒုဿပေါဌန ဒေဝတာယော တတော ရတနဂ္ဃိကေ ဂဟေတွာ ဌိတဒေဝတာယော တတော ဓမ္မစက္ကာကိ ဂဟေတွာ ဌိတဒေဝတာယော တတော ခဂ္ဂဓရာ ဒေဝတာယော တတော ပဉ္စဟတ္ထပ္ပမာဏ ဂဏ္ဓိတေလပူရိတာ ဒုကူလဝဋ္ဋိယံ ပဇ္ဇလိတ ဒီပကဉ္စနန ပါတိယော သီသေဟိ ဓာရေတွာ ဌိတဒေဝတာယော စ ကာရာပေသိ။

တတော စတုသုကဏ္ဏေသုဖဠိကမယအဂ္ဃိယ မတ္ထကေ စတ္တာရောမဟာမဏ ဌပါပေသိ စတုသု ကဏ္ဏေသု သုဝဏ္ဏ-မဏိ-မုတ္တ-ဝဇိရာနံ စတ္တာရော ရာသိယော ကာရေသိ တတော မေဃဝဏ္ဏ ပါသာဏဘိတ္တိယံ ဝိဇ္ဇုလ္လတာ ကာရေသိ တတော ရတန လတာယော တတော စာဠဝိဇတိယော တတော နိလုပ္ပလေ ဂဟေတွာ ဌိတ နာဂမဏဝိကာယော ကာရေသိ။

ရာဇာ ဧက္တိကာနိ ရူပကာနိ ဃနကောဋ္ဋိမ သုဝဏ္ဏေဟေဝ ကာရေသိ။ အဝသေသမ္ပိ ပူဇာဝိဓိံ သတ္တရတနေဟေဝ ကာရေသီတိ။ ဧတ္ထ စ ဝုတ္တပ္ပကာရမ္ပန ပူဇနီယဘဏ္ဍံ အနန္တမပရိမာဏံ ဟောတိ တထာ ဟိ အမ္ဗပါသာနဝါသီ စိတ္တဂုတ္တတ္ထေရောနာမ ဟေဋ္ဌာ လောဟပါသာဒေ သန္နိပတိတာနံ ဒွါဒသန္နံ ဘိက္ခုသဟဿာနံ ဓမ္မံ ကထေန္တော ရထဝိနီတသုတ္တံ အာရဘိတွာ မဟာ ဓာတုနိဓာနံ ဝဏ္ဏေန္တော ဧကစ္စေ န သဒ္ဒဟိဿန္တီတိ မညမာနော ဩသက္ကိတွာ ကထေသိ။ တသ္မိံ ခဏေ ကောဋပဗ္ဗတဝါသီ မဟာတိဿတ္ထေရော နာမ ခီဏာသဝေါ အဝိဒူရေ နိသီဒိတွာ ဓမ္မံ သုဏန္တော အာဝုသော ဓမ္မကထိက တဝ ကထာတော ပရိဟီနမ္ပိ အတ္ထိ။ အပစ္စော သကကိတွာ ဝိတ္ထာရေန ကထေဟီတိ အာဟ။ အထ ဣမသ္မိံယေဝ ဒီပေ ဘာတိယ မဟာရာဇာ နာမ သဒ္ဒေါ ပသန္နော အဟောသိ သော သာယံ ပါတံ မဟစေတိယံ ဝန္ဒိတွာဝ ဘုဉ္ဇတိ။ ဧကဒိဝသံ ဝိနိစ္ဆယေ နိသီဒိတွ ဒုဗ္ဗီနိစ္ဆိတံ အဋ္ဋံ ဝိနိစ္ဆိနန္တော အတိသာယံ ဝုဋ္ဌိတော ထူပဝဏ္ဒနံ ဝိဿရိတွာ ဘောဇနေ ဥပနီတေ ဟတ္ထံ ဩတာရေတွာ မနုဿေ ပုစ္ဆိအဇ္ဇ မယာ အယျကော ဝန္ဒိတော န ဝန္ဒိတောတိ။ ပေါရာဏက ရာဇာနော ဟိ သတ္ထာရံ အယျကောတိ ဝဒန္တိ။ မနုဿာ န ဝန္ဒိတော ဒေဝါတိ အာဟံသု။

တသ္မိံ ခဏေ ရာဇာ ဟတ္ထေန ဂဟိတ ဘတ္တပိဏ္ဍံ ပါတိယံ ပါတေတွာ ဥဋ္ဌာယ ဒက္ခိဏဒွါရံ ဝိဝရာပေတွာ အာဂန္တွာ ပါစီန ဒွါရေန မဟာစေတိယင်္ဂဏံ အာရုယှ ဝန္ဒန္တော အန္တော ဓာတုဂဗ္ဘေ ခီဏာသဝါနံ ဓမ္မံ ဩသာရဏသဒ္ဒံ သုတွာ ဒက္ခိဏဒွါရေတိ မညမာနော တတ္ထ ဂန္တွာ အဒိသွာ ဧတေနေဝ နယေန ဣတရာနိပိ ဒွါရာနိ ဂန္တွာ တတ္ထာပိ အဒိသွာ အယျာ ဓမ္မံ ဩသာရေန္တော ဝိစရန္တီတိ မညမာနော ဩလောကနတ္ထာယ စတုသု ဒွါရေသု မနုဿေ ဌပေတွာ သယံ ပုန ဝိစရိတွာ အပဿန္တော မနုဿေ ပုစ္ဆိတွာ ဗဟိဒ္ဓါ နတ္ထိ ဘာဝံ ဉတွာ အန္တော ဓာတုဂဗ္ဘေ ဘဝိဿတိတိ သန္နိဋ္ဌာနံ ကတွာ ပါစီနဒွါရေ အာသန္နတရေ မဟာ စေတိယာဘိမုခေါ ဟတ္ထပါဒေ ပသာရေတွာ ဇီဝိတုံ ပရိစ္စဇိတွာ ဒဠှသမာဒါနံ ကတွာ နိပဇ္ဇိ။ သစေ မာ အယျာ ဓာတုဂဗ္ဘံ န ဩလောကာပေန္တိ-သတ္တာဟံ နိရာဟာရော ဟုတွာ သုဿမာနော ဘူသမုဋ္ဌိ ဝိယ ဝိပ္ပကိရိယမာနောပိ န ဥဋ္ဌဟိဿာမီတိ။ တဿ ဂုဏာနုဘာဝေန သက္ကဿ ဘဝနံ ဥဏှာကာရံ ဒဿေသိ။

သက္ကော အာဝဇ္ဇန္တော တံ ကာရဏံ ဉတွာ အဂန္တွာ ဓမ္မံ ဩသာရေန္တာနံ ထေရာနံ ဧဝမာဟ။ အယံ ဘန္တေ ရာဇာ ဓမ္မိကော ဗုဒ္ဓသာသနေ ပသန္နော ဣမသ္မိံ ဌာနေ သဇ္ဈာယန သဒ္ဒံ သုတွာ ဓာတုဂဗ္ဘံ အပဿိတွာ န ဥဋ္ဌဟိဿာမီတိ ဒဠှသမာဒါနံ ကတွာ နိပန္နော သစေ ဓာတုဂဗ္ဘံ န ပဿတိ တတ္ထေဝ မရိဿတိ။ တံ ပဝေသေတွာ ဓာတု ဂဗ္ဘံ ဩလောကာပေထာတိ။ ထေရာပိ တဿ အနုကမ္ပာယ ဓာတုဂဗ္ဘံ ဒဿေတုံ ဧကံ ထေရံ အာဏာပေသုံ ရာဇာနံ အာနေတွာ ဓာတုဂဗ္ဘာ ဩလောကာပေတွာ ပေသေဟီတိ။ သော ရညော ဟတ္ထေ ဂဟေတွာ ဓာတုဂဗ္ဘံ ပဝေသေတွာ ယထာရုစိံ ဝန္ဒာပေတွာ သဗ္ဗံ သလ္လက္ခိတကာလေ ပေသေသိ ရာဇာ နဂရံ ဂန္တွာ အပရေန သမယေန ဓာတုဂဗ္ဘေ အတ္တနာ ဒိဋ္ဌရူပကေသု ဧကဒေသာနိ သုဝဏ္ဏခစိတာနိ ကာရေတွာ ရာဇင်္ဂဏေ မဟန္တံ မဏ္ဍပံ ကာရေတွာ တသ္မိံ မဏ္ဍပေ တာနိ ရူပကာနိ သံဝိဒဟာပေတွာ နဂရေ သန္နိပါတေတွာ ဓာတုဂဗ္ဘေ မယာ ဒိဋ္ဌာနိ သုဝဏ္ဏရူပကာနိ ဤဒိသာနိ အာဟ။ တေသံ ရူပကာနံ နိယာမေန ကတတ္တာ နိယာမက ရူပကာနိ နာမ ဇာတာနိ။

ရာဇာ သံဝစ္ဆရေ သံဝစ္ဆရေ တာနိ ရူပကာနိ နီဟရာပေတွာ နာဂရာနံ ဒဿေသိ ပဌမံ ဒဿိတကာလေ နာဂရာ ပသီဒိတွာ ဧကေက ကုလတော ဧကေကံ ဒါရကံ နီဟရိတွာ ပဗ္ဗာဇေသုံ။ ပုန ရာဇာ အယျာ ဧတံ ပကာရံ အဇာနနကာ ဗဟူ တေသမ္ပိ အာရောစေဿာမီတိ ဝိဟာရံ ဂန္တွာ ဟေဋ္ဌာ လောဟပါသာဒေ ဘိက္ခုသင်္ဃံ သန္နိပါတေတွာ သယံ ဓမ္မာသနဂတော တိယာမ ရတ္တိံ ဓာတုဂဗ္ဘေ အဓိကာရံ ကထေတွာ ပရိယောသာပေတုမသက္ကာန္တောသေဝ ဥဋ္ဌာသိ။ တတ္ထေကော ဘိက္ခု ရာဇာနံ ပုစ္ဆိ-မဟာရာဇ တွံ ပါတရာသဘတ္တံ ဘူတွာ အာဂတောသိ။ တိယာမ ရတ္တိံ ဝဏ္ဏေန္တော ဓာတုဂဗ္ဘေ ပူဇာဝိဓိမ္ပိ ပရိယောသာပေတုံ နာသက္ခိ အညမ္ပိ ဗဟုံ အတ္ထိတိ။

ရာဇာ ကိံ ကထေတ ဘန္တေ၊ တုမှာကံ မယာ ကထိတံ ဒသဘာဂေသု ဧကဘာဂမ္ပိ နပ္ပဟောတိ။ အဟမ္ပန မယာ သလ္လက္ခိတ မတ္တမေဝ ကထေသိံ။ အနန္တံ ဘန္တေ ဓာတုဂဗ္ဘေ ပူဇာဝိဓာနန္တိ အာဟ ဧဝံ အနန္တံ ပူဇနီယဘဏ္ဍံ သမစတုရဿေ ဧကေက ပဿတော အသီတိ အသီတိ ဟတ္ထပ္ပမာဏေ ဓာတုဂဗ္ဘေ နိရန္တရံ ကတွာ ပုရေတုမ္ပိ န သုကရံ၊ ပဂေဝ ယထာရဟံ သံဝိဓာတု တိဋ္ဌတု တာဝ ဓာတုဂဗ္ဘော ယာဝ မဟာစေတိယေ ဝါလုက ပါကာရ ပရိစ္ဆေဒါ နိရန္တရံ ပုရေတုမ္ပိ န သက္ကာ။ တသ္မာ တံ သဗ္ဗံ ပူဇနီယဘဏ္ဍံ တတ္ထ ကထံ ဂဏှီတိ ယဒေတ္ထ ဝတ္တဗ္ဗံ ပေါရာဏေဟိ ဝုတ္တမေဝ။

နိဂြော ဓပိဋ္ဌိ တေပိဋက မဟာသီဝတ္ထေရော ကိရ ရာဇဂေဟေ နိသိဒိတွာ ရညော ဒသဗလ သီဟနာဒသုတတံ ကထေန္တော ဓာတုနိဓာနံ ဝဏ္ဏေတွာ သုတ္တန္တံ ဝိနိဝဋ္ဋေသိ။ ရာဇာ ထေရဿ ဧဝမာဟ-အယံ ဘန္တေ ဓာတုဂဗ္ဘာ သမစတုရဿော၊ ဧကေကပဿတော အသီတိ အသီတိ ဟတ္ထပ္ပမာဏေ ဧတ္တကာနိ ပူဇနီယ ဘဏ္ဍာနိ ဧတ္ထ ဋ္ဌိတာနီတိ ကော သဒ္ဒဟေဿတိတိ။ ထေရော အာဟ။ ဣဏ္ဒသာလဂုဟာကိတ္တကပ္ပမာဏာတိ တယာ သုတပုဗ္ဗာတိ။ ရာဇာ ခုဒ္ဒက မဉ္စကပ္ပမာဏာ ဘန္တေတိ အာဟ။ တတော ထေရော အာဟ၊ မဟာရာဇ အမှာကံ သတ္ထာရာ သက္ကသသ သက္က ပဉှသုတ္တန္တံ ကထနဒိဝသေ ဂုဟာယ ကိတ္တကာ ပရိသာ ဩသဋာတိ သုတပုဗ္ဗာတိ။ ရာဇာ ဒွီသု ဘန္တေ ဒေဝလောကေသု ဒေဝတာတိ အာဟ။ ဧဝံ သန္တေ တမ္ပိ အသဒ္ဒဟေယျံ နု မဟာရာဇာတိ ထေရေန ဝုတ္တေ ရာဇာ တံ ပန ဒေဝါနံ ဒေဝိဒ္ဓိယာ အဟောသိ ဒေဝိဒ္ဓိ နာမ အစိန္တေယျာ ဘန္တေတိ အာဟ။

တတော ထေရော မဟာရာဇ တံ ဧကာယယေဝ ဒေဝိဒ္ဓိယာ အဟောသိ။ ဣဒံ ပန ရညော ရာဇိဒ္ဓိယာ ဒေဝါနံ ဒေဝိဒ္ဓိယာ အရိယာနံ အရိယိဒ္ဓိယာတိ ဣမာဟိ တီဟိ ဣဒ္ဓီဟိ ဇာတန္တိ အဝေါစ။ ရာဇာ ထေရဿ ဝစနံ သာဓူတိ သမ္ပဋိစ္ဆိတွာ ထေရံ သေတစ္ဆတ္တေန ပူဇေတွာ မတ္ထကေ ဆတ္တံ ဓာရေန္တော မဟာ ဝိဟာရံ အာနေတွာ ပုန မဟာစေတိယဿ သတ္တာဟံ ဆတ္တံ ဒတွာ ဇာတိ သုမနပုပ္ဖ ပူဇံ အကာသီတိ။ ဧတဿတ္ထဿ သာဓနတ္ထမေဝ အညာနိပိ ဗဟူနိ ဝတ္ထူနိ ဒဿိတာနိ တာနိ ကိန္တေဟီတိ အမှေ ဥပေက္ခိတာနိ ဧတ္ထ စ ရာဇာ မဟေသက္ခော မဟာနုဘာဝေါ ပူရိတပါရမိ ကတာဘိနီဟာရောတိ တဿဝသေန ရာဇိဒ္ဓိဝေဒိတဗ္ဗာ သက္ကေန အာဏတ္တေန ဝိဿကမ္မုနာ ဒေဝပုတ္တေန အာဒိတော ပဋ္ဌာယ အာဝိသိတွာ ကတတ္တာ တဿ ဝသေန ဒေဝိဒဓိ ဝေဒိတဗ္ဗာ၊ ကမ္မာဓိဋ္ဌာယက ဣဏ္ဒဂုတ္တတ္ထေရော ခုဒ္ဒါနုခုဒ္ဒကံ ကမ္မံ အနုဝိဓာယန္တော ကာရေသိ န ကေဝလံထေရောယေဝ၊ သဗ္ဗေပိ အရိယာ အတ္တနာ အတ္တနာ ကတ္တဗ္ဗ ကိစ္စေသု ဥဿုက္ကမာပန္နာယေဝ အဟေသုန္တိ ဣမာဟိ တီဟိ ဣဒ္ဓီဟိ ကတန္တိ ဝေဒိတဗ္ဗံ။

ဝုတ္တဉှေတံ မဟာဝံသော။

ဣဏ္ဒဂုတ္တ မဟာထေရော-ဆဠဘိညော မဟာမတိ၊

ကမ္မာဓိဋ္ဌာယကော ဧတ္ထ-သဗ္ဗံ သံဝိဒဟိ ဣမံ၊

သဗ္ဗံ ရာဇိဒ္ဓိယာ ဧတံ ဒေဝတာနဉ္စ ဣဒ္ဓိယာ၊

ဣဒ္ဓိယာ အရိယာနဉ္စ-အသမ္ဗာဓာ ပတိဋ္ဌိတ’’န္တိ၊

ဓာတုဂဗ္ဗ ရူပဝဏ္ဏနာကထာ

၂၃။ ဧဝံ ရာဇာ ဓာတုဂဗ္ဘေ ကတ္တဗ္ဗ ကမ္မံ နိဋ္ဌာပေတွာ စာတုဒ္ဒသိ ဒိဝသေ ဝိဟာရံ ဂန္တွာ ဘိက္ခုသင်္ဃံ သန္နိပါတေသိ၊ သန္နိပတ္တိ ဘိက္ခူ တိံသ သဟဿာနိ အဟေသုံ ရာဇာ ဘိက္ခုသင်္ဃံ ဝန္ဒိတွာ ဧဝမာဟ။ ဓာတုဂဗ္ဘေ မယာ ကတ္တဗ္ဗကမ္မံ နိဋ္ဌာပိတံ၊ သွေ အာသာဠဘိမုပေါသထ ဒိဝသေ ဥတ္တရသာဠှ နက္ခတ္တေန ဓာတုနိဓာနံ ဘဝိဿတိ ဓာတုယော ဇနာထ ဘန္တေတိ ဘိက္ခုသင်္ဃဿ ဘာရံ ကတွာ နဂရမေဝါဂဉ္ဇိ။

အထ ဘိက္ခုသင်္ဃော ဓာတု အာဟရဏကံ ဘိက္ခုံ ဂဝေသန္တော ပူဇာ ပရိဝေဏ ဝါသိကံ သောဠသ ဝဿုဒ္ဒေသိကံ ဆဠဘိညံ သောဏုတ္တရံ နာမ သာမဏေရံ ဒိသွာ တံ ပက္ကောသာပေတွာ အာဝုသော သောဏုတ္တရ ရာဇာ ဓာတုဂဗ္ဘံ နိဋ္ဌာပေတွာ ဓာတု အာဘရဏံ ဘိက္ခုသင်္ဃဿ ဘာရမကာသိ။ တသ္မာ တယာ ဓာတုယော အာဟရိတဗ္ဗာတိ အာဟရာမိ ဘန္တေ ဓာတုယော ကုတော လစ္ဆာမီတိ ပုစ္ဆိ တဿ ဘိက္ခုသင်္ဃော ဧဝမာဟ။ အာဝုသော သောဏုတ္တရ တတာဂတော မရဏမဉ္စေ နိပန္နော သက္ကံ ဒေဝရာဇာနံ အာမန္တေတွာ မယှံ အဋ္ဌဒေါဏပ္ပမာဏေသု သာရီရိက ဓာတုသု ဧကံ ဒေါဏံ ကောဠိယရာဇုဟိ သက္ကတံ၊ အနာဂတေ တမ္ဗပဏ္ဏိ ဒီပေ မဟာစေတိယေ ပတိဋ္ဌဟိဿတီတိ အာဟ။

အထ ဘဂဝတိ ပရိနိဗ္ဗုတေ ဒေါဏ ဗြာဟ္မဏော ဓာတုယော အဋ္ဌ ကောဋ္ဌာသေ ကတွာ အဋ္ဌန္နံ နဂရဝါသီနံ အဒါသိ တေ အတ္တနော အတ္တနော နဂရေ စေတိယံ ကာရေတွာ ပရိဟရိံသု တေသု ရာမဂါမေ ကောဠိယေဟိ ကတစေတိယေ မဟောဃေန ဘိန္နေ ဓာတုကရဏ္ဍကော သမုဒ္ဒံ ပဝိသိတွာ ရတနဝါလုကာ ပိဋ္ဌေ ဆဗ္ဗဏ္ဏရံသိ သမာကိဏ္ဏော အဋ္ဌာသိ။

နာဂါ ဒိသွာ မဉ္ဇေရိက နာဂ ဘဝနံ ဂန္တွာ မဟာကာဠ နာဂ ရညော အာရောစေသုံ သော ဒသကောဋိ နာဂ သဟဿ ပရိဝုတော အာဂန္တွာ ဂဏ္ဓမာလာဒီဟိ ပူဇေတွာ သုဝဏ္ဏ-ပဝါဠ-မိဏိ-ရဇတဓဇေ ဥဿာပေတွာ ပဉ္စင်္ဂိက တုရိယ ပဂ္ဂဟီတ နာနာဝိဓ နာဂ နာဋကာနံ မဇ္ဈဟတော ဓာကုကရဏ္ဍံ မဏိစင်္ဂေါဋကေ ဌပေတွာ သီသေနာဒါယ မဟာသက္ကာရ သမ္မာနံ ကရောန္တော နာဂဘဝနံ နေတွာ ဆန္နဝုတိ ကောဋိဓနေ ပူဇေတွာ သဗ္ဗရတနေဟိ စေတိယဉ္စ စေတိယဃရဉ္စ မာပေတွာ ဓာတုယော ပရိဟရတိ။ မဟာကဿပတ္ထေရော အဇာတသတ္တုနော ဓာတုနိဓာနံ ကရောန္တော ရာမဂါမေ ဓာတုယော ဌပေတွာ သေသ ဓာတုယော အာဟရိတွာ အဒါသိ ရာဇာ ရာမဂါမေ ဓာတုယော ကသ္မာ နာဟဋာတိ ပုစ္ဆိ။

ထေရော မဟာရာဇ တာသံ အန္တရာယော နတ္ထိ အနာဂတေ တမ္ဗပဏ္ဏိဒီပေ မဟာစေတိယေ ပတိဋ္ဌဟိဿန္တီတိ အာဟ။ အသောကော ဓမ္မရာဇာပိ ဓာတုနိဓာနံ ဥဂ္ဃာဋေတွာ ဩလောကေန္တော အဋ္ဌမံ ဓာတုဒေါဏံ အဒိသွာ အပရံ ဓာတုံ ဒေါဏံ ကတ္ထ ဘန္တေတိ ပုစ္ဆိ မဟာရာဇ တံ ကောဠိယေဟိ ဂင်္ဂါတီရေ ကတ စေတိယေ ပတိဋ္ဌိတံ၊ မဟောဃေန စေတိယေ ဘိန္နေ မဟာသမုဒ္ဒံ ပါဝိသိ။

တံ နာဂါ ဒိသွာ အတ္တနော နာဂဘဝနံ နေတွာ ပရိဟရန္တီတိ ခီဏာသဝါ အာဟံသု ရာဇာ နာဂဘဝနံ နာမ မမ အာဏာပဝတ္တနဋ္ဌာနံ၊ တမ္ပိ အာဟရာမိ ဘန္တေတိ အာဟ။ မဟာရာဇ တာ ဓာတုယော အနာဂတေ တမ္ဗပဏ္ဏိဒီပေ မဟာစေတိယေ ပတိဋ္ဌဟိဿန္တိတိ နိဝါရေသုံ။ တသ္မာ တွံ မဉ္ဆေရိက နာဂ ဘဝနံ ဂန္တွာ တံ ပဝတ္တိံ နာဂ ရညော နိဝေဒေတွာ ဓာတုယော အာဟရ၊ သွေ ဓာတု နိဓာနံ ဘဝိဿတီတိ။ သောဏုတ္တရော သာဓူတိ သမ္ပဋိစ္ဆိတွာ အတ္တနော ပရိဝေဏံ အဂမာသိ။

ရာဇာပိ နဂရံ အန္တွာ နဂရေ ဘေရိံ စရာပေသိ- သွေ ဓာတုနိဓာနံ ဘဝိဿတိ နာဂရာ အတ္တနော အတ္တနော ဝိဘဝါနုရူပေန အလင်္ကရိတွာ ဂဏ္ဓမာလာဒီနိ ဂဟေတွာ မဟာစေတိယင်္ဂဏံ ဩတရန္တုတိ။ သက္ကောပိ ဝိဿကမ္မံ အာဏာပေသိ-သွေ မဟာစေတိယေ ဓာတုနိဓာနံ ဘဝိဿတိ။ သကလ တမ္ပပဏ္ဏိဒီပံ အလင်္ကရောဟီတိ။ သော ပုနဒိဝသေ ဧကူနယောဇနသတိကံ တမ္ဗပဏ္ဏိဒီပံ ကသီဏမဏ္ဍလံ ဝိယ သမံ ကတွာ ရဇတပဋ္ဋသဒိသံ ဝါလုကာကိဏ္ဏံပဉ္စဝဏ္ဏပုပ္ဖသမာကူလံ ကတွာ သမန္တတော ပုဏ္ဏဃဋပန္တိယော ဌပါပေတွာ သာဏီဟိ ပရိက္ခိပိတွာ ဥပရိ စေလဝိတာနံ ဗဏ္ဓိတွာ ပထဝိတလေ ထလပဒုမာနိ အာကာသေ ဩလမ္ဗက ပဒုမာနိ ဒဿေတွာ အလင်္ကတ ဒေဝသဘံ ဝိယ သဇ္ဇေသိ။ မဟာသမုဒ္ဒဉ္စ သန္နိသိန္နံ ပဉ္စဝိဓ ပဒုမသဉ္စန္နံ အကာသိ။

ဓာတု အာနုဘာဝေန သကလ စက္ကဝါဠံ ဂဗ္ဘောက္ကမနာဘိသမ္ဗောဓိကာလာဒိသု ဝိယ သဇ္ဇိတံ အဟောသိ နာဂရာပ နဂရ ဝီထိယော သမ္မဇ္ဇိတွာ မုတ္တာဖလ သဒိသံ ဝါလုကံ ဩကိရိတွာ လာဇပဉ္စမက ပုပ္ဖာနိ သမောကိရိတွာ နာနာဝိရာဂ ဓဇပဋာကာယော ဥဿာပေတွာ သုဝဏ္ဏဃဋ ကဒလိတောရဏ မာလဂဃိကာဒီဟိ အလင်္ကရိတွာ နဂရံ သဇ္ဇေသု။ ရာဇာ နဂရဿ စတုသု ဒွါရေသု အနာထာနံ မနုဿာနံ ပရိဘောတ္ထာယ နာနာပ္ပကာရ ခါဒနီယ ဘောဇနီယ ဂဏ္ဓမာလ ဝတ္ထာဘရဏ ပဉ္စဝိဓိ မုဓဝါသ သဟိတ တာမ္ဗုလာနိ စ ဌပါပေသိ။

အထ ရာဇာ သဗ္ဗာဘရဏ ဝိဘူသိတော ကုမုဒ ပန္နဝဏ္ဏ စတုသိဏ္ဓဝယုတ္တ ရထဝရမာရုယှ အလင်္ကတံ ကဏ္ဍုလံ ဟတ္ထိံ ပုရတော ကတွာ သုဝဏ္ဏစင်္ဂေါဋကံ သီသေ ကတွာ သေတစ္ဆတ္တဿ ဟေဋ္ဌာ အဋ္ဌာသိ။ တသ္မိံ ခဏေ သက္ကံ ဒေဝရာဇာနံ ဒေဝစ္ဆရာ ဝိယ နာနာဘရဏဝိဘူသိတာ ဒေဝကညုပမာ အနေက သဟဿ နာဋကိတ္ထိယော စေဝ ဒသမဟာယောဓာ စ စတုရင်္ဂိနီ သေနာ စ ရာဇာနံ ပရိဝါရေသုံ။

တထာ အဋ္ဌုတ္တရ သဟဿ ဣတ္ထိယော စ ပုဏ္ဏဃဋေ ဂရဟတွာ ပရိဝါရေသုံ။ အဋ္ဌုတ္တရ သဟဿ အဋ္ဌုတ္တရ သရဿပ္ပမာဏေယေဝ ပုရိသာ စေဝ ဣတ္ထိယော စ ပုပ္ဖသမုဂ္ဂါနိ ဒဏ္ဍဒီပိကာ နာနာဝဏ္ဏ ဓဇေ စ ဂဟေတွာ ပရိဝါရေသုံ။ ဧဝံ ရာဇာ မဟန္တေန ရာဇာနုဘာဝေန နဏ္ဒနဝနံ နိက္ခန္တ ဒေဝရာဇာ ဝိယ နိက္ခမိ။ တဒါ နာနာဝိဓ တုရိယ ဃောသေဟိ စေဝ ဟတ္ထဿ ရထ သဒ္ဒေဟိ စ မဟာပထဝိဘိဇ္ဇနာကာရပ္ပတ္တာ ဝိယ အဟောသိ။

တသ္မိံ ခဏေ သောဏုတ္တရော အတ္တနော ပရိဝေဏေယေဝ နိသိန္နော တုရိယ ဃောသေန ရညော နိက္ခန္တဘာဝံ ဉတွာ အဘိညာပါဒကံ စတုတ္ထဇ္ဈာနံ သမာပဇ္ဇိတွာ အဓိဋ္ဌယာ ပထဝိယံ နိမုဇ္ဇိတွာ မဉ္ဇေရိက နာဂဘဝနေ မဟာကာဠာနာဂရညော ပုရတော ပါတုရဟောသိ။ နာဂရာဇာ သောဏုတ္တရံ ဒိသွာ ဥဋ္ဌာယာသနာ အဘိဝါဒေတွာ ဂဏ္ဓောဒကေန ပါဒေ ဓောဝိတွာ ဝဏ္ဏ ဂဏ္ဓ သမ္ပန္န ကုသုမေဟိ ပူဇေတွာ ဧကာမန္တံ နိသီဒိတွာ ကုတော အာဂတတ္ထ ဘန္တေတိ ပုစ္ဆိ တမ္ဗပဏ္ဏိ ဒီပတော အာဂတမှာဟိ ဝုတ္တေ ကိမတ္ထာယာတိ ပုစ္ဆိ။

မဟာရာဇ တမ္ဗပဏ္ဏိဒီပေ ဒုဋ္ဌဂါမဏိ အဘယ မဟာရာဇာ မဟာ စေတိယံ ကာရေန္တော ဓာတုယော ဘိက္ခုသင်္ဃဿ ဘာရမကာသိ။ မဟာဝိဟာရေ တိံသမတ္တာနိ ဘိက္ခုသဟဿာနိ သန္နိပတိတွာ မဟာထူပတ္ထာယ ဌပိတဓာတုယော မဟာကာဠ နာဂ ရညော သန္တိကေ ဌိတာ၊ တဿ တံ ပဝတ္တိံ ကထေတွာ ဓာတုယော အာဟရာတိ မံ ပေသေသုံ၊ တသ္မာ ဣဓာဂတောမှီတိ အာဟ။

တံ သုတွာ နာဂရာဇာ ပဗ္ဗတေန ဝိယ အဇ္ဈောတ္ထဋော မဟန္တေန မဒါမနဿေန အဘိဘူတော ဧဝံ စိန္တေသိ မယံ ပန ဣမာ ဓာတုယော ပူဇေတွာ အပါယတော မုဉ္စိတွာ သဂ္ဂေ နိဗ္ဗတ္တိဿမာတိ အမညိမှ။ အယံ ပန ဘိက္ခု မဟိဒ္ဓိကော မဟာနုဘာဝေါ၊ သစေ ဣမာ ဓာတုယော ဣမသ္မိံ ဌာနေ ဌိတော ဘဝေယျုံ၊ အမှေ အဘိဘဝိတွာပိ ဂဏှိတုံ သက္ကုဏေယျ။ ဓာတုယော အပနေတုံ ဝဋ္ဋတီတိ စိန္တေတွာ ပရိသံ ဩလောကေန္တော ပရိသ ပရိယန္တေ ဌိတံ ဝါသုလဒတ္တံ နာမ အတ္တနော ဘာဂိနေယျံ ဒိသွာ တဿ သညမဒါသိ သော မာတုလဿ အဓိပ္ပာယံ ဉတွာ စေတိယဃရံ ဂန္တွာ ဓာတုကရဏ္ဍကံ အာဒါယ ဂိလိတွာ သိနေရုပဗ္ဗတ ပါဒမူလံ ဂန္တွာ-

ယောဇနသတာမာဝဋ္ဋံ ဒီဃံ တိသတ ယောဇနံ၊

ဖဏာနေကသဟဿာနိ-မာပိသိတွာ မဟိဒ္ဓိကော၊

သိနေရု ပါဒမူလမှိ-ဓုမာယန္တော စ ပဇ္ဇလံ၊

အာဘုဇိတွာန သော ဘောဂေ-နိပဇ္ဇိ ဝါလုကာတလေ၊

‘‘အနေကာနိ သဟဿာနိ-အတ္တနာ သဒိသေ အဟိ၊

မာပယိတွာ သယာပေသိ-သမန္တာ ပရိဝါရိတေ၊

ဗဟူ ဒေဝါ စ နာဂါ စ-ဩသရိံသု တဟိံ တဒါ၊

ယုဒ္ဓံ ဥဘိန္နံ နာဂါနံ-သဿိဿာမ မယံ ဣတိ၊’’

တတော နာဂရာဇာ ဘာဂိနေယျေန ဓာတုယော အပနီတဘာဝံ ဉတွာ ဧဝမာဟ- မမ သန္တိကေ ဓာတုယော နတ္ထိ၊ တုမှေ ဣဓ ပပဉ္စ အကတွာ သီဃံ ဂန္တွာ ဘိက္ခုသင်္ဃဿ တံ ပဝတ္တိံ အာရောစေထ ဘိက္ခုသင်္ဃော အညတော ဓာတုံ ပရိယေသိဿတီတိ သာမဏေရော အာဒိတေ ပဋ္ဌာယ ဓာတု အာဂမနံ ဝတွာ ဓာတုယော တဝ သန္တိကေယေဝ၊ ပပဉ္စံ အကတွာ ဒေဟီတိ စောဒေသိ။

တတော နာဂရာဇာ သာမဏေရေန မူလမှိ ဂဟိတဘာဝံ ဉတွာ ယေန ကေနစိ ပရိယာယေန ဓာတုယော အဒတွာဝ ပေသိတုံ ဝဋ္ဋတီတိ စိန္တေတွာ သာမဏေရံ ဓာတုဃရံ နေတွာ စေတိယဉ္စ စေတိယဃရဉ္စ ဒဿေသိ။ တံ ပန စေတိယဉ္စ စေတိယဃရဉ္စ သဗ္ဗရတနမယမေဝ အဟောသိ။

ဝုတ္တဉှေတံ မဟာဝံသေ

‘‘အနေကဓာ အနေကေဟိ ရတနေဟိ သုသင်္ခတံ၊

စေတိယံ စေတိယဃရံ-ပဿ ဘိက္ခု သုနိမ္မိတ’’န္တိ၊

ဒဿေတွာ စ ပန စေတိယဃရတော ဩရုယှ အဒ္ဓစဏ္ဒကပါသာဏေ ပဝါဠပဒုမမှိ ဌတွာ ဣမဿ စေတိယဿ စေတိယဃရဿ စ အဂ္ဃံ ကရောဟိ ဘန္တေတိ အာဟ သာမဏေရော န သက္ကောမ မဟာရာဇ အဂ္ဃံ ကာတုံ၊ သကလေပိ တမ္ဘပဏ္ဏိဒီပေ ရတနာနိ ဣမံ အဒ္ဓစဏ္ဒက ပါသာဏံ နာဂ္ဃတီတိ အာဟ။

နာဂရာဇာ ဧဝံ သန္တေ မဟာသက္ကာရဋ္ဌာနတော အပ္ပသက္ကာရဋ္ဌာနံ ဓာတူနံ နယနံ အယုတ္တံ နနု ဘိက္ခူတိ အာဟ။ သာမဏေရော ဧဝမာဟမဟာရာဇ ဗုဒ္ဓါ နာမ ဓမ္မဂရုကာ၊ န အာမိသ ဂရုကံ၊ တုမှေသု စက္ကဝါဠပ္ပမာဏံ ရတနဃရံ မာပေတွာ သဗ္ဗရတနဿ ပူရေတွာ ဓာတုယော ပရိဟရန္တေသုပိ ဧကနာဂေါပိ ဓမ္မာဘိသမယံ ကာတုံ သမတ္ထော နာမ နတ္ထိ ယသ္မာ-

‘‘သစ္စာဘိသမယော နာဂ-တုမှာကမ္ပိ န ဝိဇ္ဇတိ။ သစ္စာဘိသမယဋ္ဌာနံ-နေတုံ ယုတ္တဉှိ ဓာတုယော။ သံသာရဒုက္ခမောက္ခာယ-ဥပ္ပဇ္ဇန္တ တထာဂတာ၊ ဗုဒ္ဓဿ ဝေတ္ထာဒီပ္ပာယော-တေန နေဿာမိ ဓာတုယော။ ဓာတုနိဓာနံ အဇ္ဇေဝ-သော ဟိ ရာဇာ ကရိဿတိ။

တသ္မာ ပပဉ္စမကရိတွာ-လဟုံ မေ ဒေဟိ ဓာတုယေ’’တိ-အာဟ။ ဧဝံ ဝုတ္တေ နာဂရာဇာ အပ္ပဋိဟာနော ယုတွာ အတ္တနော ဘာဂိနေယျေန ဓာတုယော ဂေါပိတောတိ မညမာနော ဧဝမာဟ။ တုမှေ ဘန္တေ စေတိယေ ဓာတူနံ အတ္ထိဘာဝံ ဝါ နတ္ထိဘာဝံ ဝါ အဇာနန္တာ ဒေဟိ ဒေဟီတိ ဝဒထ။ အဟံ နတ္ထီတိ ဝဒါမိ။ သစေ ပဿထ ဂဟေတွာ ဂစ္ဆထာတိ။ ဂဏှာမိ မဟာရာဇာတိ၊ ဂဏှ ဘိက္ခူတိ။ ဂဏှာမိ မဟာရာဇာတိ၊ ဂဏှ ဘိက္ခူတိ တိက္ခတ္တုံ ပဋိညံ ဂဟေတွာ။

‘‘သုခုမံ ကရံ မာပယိတွာ-ထိက္ခူ တတြ ဌိတောစ သော၊

ဘာဂိနေယျဿ ဝဒနေ-ဟတ္ထမ္ပက္ခိပ္ပ တာဝဒေ၊

ဓာတုကရဏ္ဍမဒါယ-တိဋ္ဌ နာဂါတိ ဘာသိဟ၊

နိမုဇ္ဇိတွာ ပထဝိယံ-ပရိဝေဏမှိ ဥဋ္ဌဟိ၊’’

တဒါ သာမဏေရဿ နာဂေန သဒ္ဓိံ ယုဒ္ဓံ ပဿိဿာမာတိ သမာဂတာ ဒေဝ-နာဂ ပရိသာပ ဘိက္ခုနာဂဿ ဝိဇယံ ဒိသွာ ဟဋ္ဌာ ပမောဒိတော ဓာတုယော ပူဇယန္တာဝ တေနေဝ သဟ အာဂမုံ၊ နာဂရာဇာ သာမဏေရဿ ဂတ ကာလေ ဘိက္ခုံ ဝဉ္စေတွာ ပေသိတောမှီတိ ဟဋ္ဌတုဋ္ဌော ဓာတုယော ဂဟေတွာ အာဂမတ္ထာယ ဘာဂိနေယျဿ သာသနံ ပေသေသိ။

‘‘ဘာဂိနေယျော’ထ ကုစ္ဆိမှိ-အပဿိတွာ ကရဏ္ဍကံ၊

ပရိဒေဝမာနော အာဂန္တွာ-မာတုလဿ နိဝေဒယိ၊

တဒါ သော နာဂရာဇာပိ-ဝဉ္စိတမှ မယံ ဣတိ၊

ပရိဒေဝိ နာဂါ သဗ္ဗေပိ-ပရိဒေဝိံသု ပိဏ္ဍိတာ၊’’

တတော နာဂဘဝနေ သဗ္ဗေ နာဂါ သမာဂန္တွာ ကေသေ မုဉ္စိတွာ ဥဘောဟိ ဟတ္ထေဟိ ဟဒယေ ဂဟေတွာ နီလုပ္ပလ သဒိသေဟိ နေတ္တေဟိ ဝိလီန သောကမိဝ အဿုဓာရံ ပဝတ္တယမာနာ-

‘‘ပရိဒေဝမာနာ အာဂန္တွာ-နာဂါ သင်္ဃဿ သန္တိကေ၊

ဗဟုဓာ ပရိဒေဝိံသ-ဓာတာဟရဏ ဒုက္ခိတာ’’တိ၊

ပရိဒေဝိတွာ စ ဘိက္ခုသင်္ဃဿ ဧဝမာဟံသု- ဘန္တေ ကဿစိ ပီဠံ အကတွာ အမှာကံ ပုညာနုဘာဝေန လဘိတွာ စီရပရိဟဋ ဓာတုယော ကသ္မာ အနဝသေသံ ကတွာ အဟရာပေထ အမှာကံ သဂ္ဂမောက္ခန္တရာယံ ကရောထာတိ။

’တေသံ သင်္ဃော’နုကမ္ပာယ-ထောကံ ဓာတုမဒါပယိ၊

တေ တေန တုဋ္ဌာ ဂန္တွာန-ပူဇာဘဏ္ဍာနိ အာဟရုံ၊

တတော သက္ကော ဒေဝါနမိဏ္ဒေါ ဝိဿကမ္မံ အာမန္တေတွာ သာမဏေရဿ ဥဋ္ဌိတဋ္ဌာနေ သတ္တရတနမယံ မဏ္ဍပံ မာပေဟီတိ အာဟ။ သော တသ္မိယေဝ ခဏေ မဏ္ဍပံ မာပေသိ အထ သက္ကော ဒွီသု ဒေဝလောကေသု ဒေဝပရိသာယ ပရိဝုတော သုဝဏ္ဏစင်္ဂေါဋကေန သဒ္ဓိံ ရတန ပလ္လင်္ကမာဒါယ အာဂန္တွာ တသ္မိံ မဏ္ဍပေ ပတိဋ္ဌာပေတွာ သာမဏေရဿ ဟတ္ထတော ဓာတုကရဏ္ဍကံ ဂဟေတွာ တသ္မိံ ပလ္လင်္ကေ ပတိဋ္ဌာပေသိ။ တဒါ-

’ဗြဟ္မာ ဆတ္တမဓာရေသိ-သန္တုသိတော ဝါလဝိဇနိံ၊

မဏိတာလဝဏ္ဋံ သုယာမော-သက္ကော သင်္ခန္တု သောဒကံ၊

စတ္တာရော တု မဟာရာဇ-အဋ္ဌံသု ခဂ္ဂပါဏိနော၊

သမုဂ္ဂဟတ္ထာ ဒွတ္တိံသာ-ဒေဝပုတ္တာ မဟိဒ္ဓိကာ၊

ပါရိစ္ဆတ္တက ပုပ္ဖေဟိ ပူဇယန္တာ တဟိံ ဌိတာ၊

ကုမာရိယောပိ ဒွတ္တိံသာ-ဒဏ္ဍိဒီပဓရာ ဌိတာ၊

ပလာပေတွာ ဒုဋ္ဌယက္ခေ-ယက္ခသေနာပတိ ပန

အဋ္ဌဝီသတိ အဋ္ဌံသု-အာရက္ခံ ကုရုမာနကာ၊

ဝီဏံ ဝါဒယမာနောဝ-အဋ္ဌာ ပဉ္စသိခေါ တဟိံ၊

ရင်္ဂဘူမိံ မာပယိတွာ-တိမ္ဗရူ တုရိယဃောသဝါ၊

အနေကာ ဒေဝပုတ္တာ စ-သာဓုဂီတပ္ပယောဇကာ၊

မဟာကာလော နာဂရာဇာ-ထူယမာနော အနေကဓာ၊

ဒိဗ္ဗတုရိယာနိ ဝဇ္ဇန္တိ-ဒိဗ္ဗသင်္ဂိတိ ဝတ္တတိ၊

ဒိဗ္ဗဂဏ္ဓာ စ ဝဿာနိ-ဝဿာပေန္တိ စ ဒေဝတာ၊

တဒါ ဣဏ္ဒဂုတ္တတ္ထေရော မာရဿ ပဋိဗာဟနတ္ထာယ စက္ကဝါဠပရိယန္တံ ကတွာ အာကာသေ လောဟဆတ္တံ မာပေသိ။ ပဉ္စနိကာယိက ထေရာ ဓာတုယော ပရိဝါရေတွာ ပဉ္စသု ဌာနေသု နိသီဒိတွာ ဂဏသဇ္ဈာယမကံသု။ တသ္မိံ ကာလေ ရာဇာ တံ ဌနံ အာဂန္တွာ သိသတော သုဝဏ္ဏ စင်္ဂေါဋကံ ဩတာရေတွာ ဓာတု စင်္ဂေါဋကံ အတ္တနော စင်္ဂေါဋကေ ဌပေတွာ ပလ္လင်္ကေ ပတိဋ္ဌာပေတွာ ဂဏ္ဓမာလာဒီဟိ ပူဇေတွာ ပဉ္စပတိဋ္ဌိတေန ဝန္ဒိတွာ သိရသိ အဉ္ဇလိံ ပဂ္ဂယှ အက္ခီနိ ဥမ္မီလေတွာ ဩလောကေန္တော အဋ္ဌာသိ။ တသ္မိံ ခဏေ ဓာတုမတ္ထကေ သေတစ္ဆတ္တံ ဒိဿတိ ဆတ္တဂါဟက ဗြဟ္မာ န ဒိဿတိ။ တထာ တာလဝဏ္ဋ ဝိဇနိ အာဒယော ဒိဿန္တိ ဂါဟကာ န ဒိဿန္တိ ဒိဗ္ဗတုရိယဃောသ သင်္ဂိတိယော သုယျန္တိ ဂဏ္ဓဗ္ဗ ဒေဝတာ န ဒိဿန္တိ။ ရာဇာ ဧတံ အစ္ဆရိယံ ဒိသွာ ဣဏ္ဒဂုတ္တတ္ထေရံ ဧဝမာဟ-ဒေဝတာ ဒိဗ္ဗဆတ္တေန ပူဇေသုံ အဟံ မာနုသ ကစ္ဆတ္တေန ပူဇေမိ ဘန္နေတိ။ ထေရော ယုတ္တံ မဟာရာဇာတိ အာဟ။ ရာဇာ အတ္တနော သုဝဏ္ဏပိဏ္ဍိကေ သေတစ္ဆတ္တေန ပူဇေတွာ သုဝဏ္ဏဘိံကာရံ ဂဟေတွာ အဘိသေကောဒကံ ဒတွာ တံ ဒိဝသံ သကလတမ္ဗပဏ္ဏိ ဒီပေ ရဇ္ဇံ အဒါသိ။

တတော သဗ္ဗတုရိယာနိ ပဂ္ဂဏှိံသု၊ ဂဏ္ဓမာလာဒီဟိ ပူဇေတွ မဟန္တံ သက္ကာရမကံသု ပုန ရာဇာ ထေရံ ပုစ္ဆိ - အမှာကံ သတ္ထာ ဒိဗ္ဗမာနုသကာနိ ဒွေ ဆတ္တာနိ ဓာရေသိ ဘန္တေ။ န ဒွေ ဆတ္တာနိ တီဏိ ဆတ္တာနိ မဟာရာဇာတိ။ အညံ ဆတ္တံ နပဿာမိ ဘန္နေတိ။ သီလပတိဋ္ဌံ သမာဓိဒဏ္ဍကံ ဣဏ္ဒြိယသလာကံ ဗလမာလံ မဂ္ဂဖလပတ္တ သဉ္ဆန္နံ ဝိမုတ္တိဝရသေတစ္ဆတ္တံ ဥဿာပေတွာ ဉာဏာဘိသေကမ္ပတ္တော ဓမ္မရတန စက္ကံ ပဝတ္တေတွာ ဒသသဟဿ စက္ကဝါဠေသု ဗုဒ္ဓရဇ္ဇံ ဟတ္ထဂတံ ကတွာ ရဇ္ဇံ ကာရေသီတိ ရာဇာ တီဏိစ္ဆတ္တ ဓာရကဿ သတ္ထုနော တိက္ခတ္တုံ ရဇ္ဇံ ဒမ္မီတိ တိက္ခတ္တုံ ဓာတုယော ရဇ္ဇေန ပူဇေသိ။

တတော ရာဇာ ဒေဝမနုဿေသု ဒိဗ္ဗဂဏ္ဓမာလာဒီဟိ ပူဇေန္တေသု အနေကေသု တုရိယဃောသ သင်္ဂိတေသု ဝတ္တမာနေသု ဓာတုကရဏ္ဍကံ သီသေနာဒါယ ရတနမဏ္ဍပတော နိက္ခမိတွာ ဘိက္ခုသင်္ဃ ပရိဝုတော မဟာစေတိယံ ပဒက္ခိဏံ ကတွာ ပါစီနဒွါရေနာရုယှ ဓာတုဂဗ္ဘံ ဩတရိ။ တတော မဟာစေတိယံ ပရိဝါရေတွာ ဆန္နဝုတိ ကောဋိပ္ပမာဏ အရဟန္တော အဋ္ဌံသု။

ရာဇာ သီသတော ဓာတုကရဏ္ဍကံ ဩတာရေတွာ မဟာရဟေ သယနပိဋ္ဌေ ဌပေဿာမီတိ စိန္တေသိ တသ္မိံ ခဏေ ဓာတုကရဏ္ဍကော ရညော သီသတော သတ္တ တာလပ္ပမာဏေ ဌာနေ ဂန္တွာ သယမေဝ ဝိစရိ ဓာတုယော အာကာသမုဂ္ဂန္တွာ ဒွတ္တိံသ မဟာ ပုရိသလက္ခဏ အသိတိ အနုဗျဉ္ဇနာ ဗျာမပ္ပဘာ ပတိမဏ္ဍိတံ ကေတုမာလောပ သောဘိတံ နိလ-ပီတ-လောဟိတာဒိ ဘေဒ ဝိစိတြ ရံသိဇာလာ သမုဇ္ဇလံ ဗုဒ္ဓဝေသံ ဂဟေတွာ ဂဏ္ဍမ္ဗမူလေ ယမက ပါဋိဟာရိယံ သဒိသ ယမက ပါဋိဟာရိယံ အကံသု။ တံ ဓာတုပါဋိဟာရိယံ ဒိသွာ ပသီဒိတွာ အရဟတ္တမ္ပတ္တာ ဒေဝမနုဿာ ဒွါဒသကောဋိယော အဟေသုံ။ သေသဖလတ္တယံ ပတ္တာ ဂဏနပထမတီတာ အဟေသုံ။ ဧဝံ ဓာတုယော အနေကဓာ ပါဋိဟာရိယံ ဒဿေတွာ ဗုဒ္ဓဝေသံ ဝိဿဇ္ဇေတွာ ကရဏ္ဍကံ ပဝိသိတွာ တေန သဒ္ဓိံ ဩတရိတွာ ရညော သီသေ ပတိဋ္ဌဟိံသု။

ရာဇာ အမတေန ဝိယ အဘိသိတ္တော သဖလံ မနုဿတ္တ ပဋိလာဘံ မညမာနော ဥဘောဟိ ဟတ္ထေဟိ ဓာတုကရဏ္ဍကံ ဂဟေတွာ နာဋက ပရိဝုတော အလင်္ကတ သယန သမီပံ ဂန္တွာ ဓာတုစင်္ဂေါဋကံ ရတနပလ္လင်္ကေ ဌပေတွာ ဂဏ္ဓဝါသိတောဒကေန ဟတ္ထေ ဓောဝိတွာ ဝတုဇာတိယ ဂဏ္ဓေန ဥဗ္ဗဋ္ဋေတွာ ရတနကရဏ္ဍကံ ဝိစရိတွာ ဓာတုယော ဂဟေတွာ ဧဝံ စိန္တေသိ။

‘‘အနာကုလာ ကေဟိစိပိ ယဒိ ဟေဿသ္တိ ဓာတုယော၊

ဇနဿ သရဏံ ဟုတွာ ယဒိ ဌဿန္တိ ဓာတုယော၊

သတ္ထုနိပန္နာ ကာရေန ပရိနိဗ္ဗာန မဉ္စကေ၊

နိပဇ္ဇန္တု သုပညတ္တေ-သယနမှိ မဟာရဟေ’’တိ၊

ဧဝံ စိန္တေတွာ ပန ဝရသယနပိဋ္ဌေ ဓာတုယော ဌပေသိ တသ္မိံ ခဏေ ဓာတုယော ရညာ စိန္တိတ နိယာမေနေဝ မဟာရဟေ သယနေ ဗုဒ္ဓဝေသေန သယိံသု။

‘‘အာသာဠဟိ သုက္ကပက္ခဿ ပန္နရသ ဥပေါသထေ၊

ဥတ္တရာသာဠှ နက္ခတ္တေ ဧဝံ ဓာတု ပတိဋ္ဌိတာ၊

သဟ ဓာတု ပတိဋ္ဌာနာ အကမ္ပိတ္ထ မဟာမဟီ၊ ပါဋိဟီရာနိ နေကာနိ ပဝတ္တိံသု အနေကဓာ။’’

တဒဟိ ဥဒကပရိယန္တံ ကတွာ အယံ မဟာပထဝီ သင်္ကမ္ပိ သမ္ပကမ္ပိ သမ္ပဝေဓိ၊ မဟာသမုဒ္ဒေါ သင်္ခူဘိ၊ အာကာသေ ဝိဇ္ဇုလ္လတာ နိစ္ဆရိံသု။ ခဏိကဝဿံ ဝဿိ၊ ဆ ဒေဝလောကာ ဧကကောလာဟလ မဟောသိ ရာဇာ ဧတံ အစ္ဆရိယံ ဒိသွာ ပသန္နော အတ္တနော ကဉ္စန မာလိက သေတစ္ဆတ္တေန ဓာတုယော ပူဇေတွာ တမ္ဗပဏ္ဏိဒိပေ ရဇ္ဇံ သတ္တာဟံ ဒတွာ တိံသ သတသဟဿဂ္ဃနကံ အလင်္ကာရ ဘဏ္ဍံ ဩမုဉ္စိတွာ ပူဇေသိ။ တထာ သဗ္ဗာပိ နာဋကိတ္ထိယော အမစ္စာ သေသ မဟာဇနော ဒေဝါ စ သဗ္ဗာဘရဏာနိ ပူဇေသုံ တသ္မာ-

တိဋ္ဌန္တံ သုဂတံ တိလောကမဟိတံ ယော ပူဇယေ သာဒရံ၊

ယော ဝါ သာသပ ဗီဇမတ္တမ္ပိ တံ ဓာတုံ နရော ပူဇယေ၊

တေသံ ပုညဖလံ သမာနမီတိ တံ စိတ္တပ္ပသာဒေ သမေ၊

ဉတွာ တံ ပရိနိဗ္ဗုတေပိ သုဂတေ ဓာတုံ ဗုဓော ပူဇယေ’တိ၊

တတော ရာဇာ စီဝရဝတ္ထာနိ စေဝ ဂုဠ-သပ္ပိ အာဒိ ဘေသဇ္ဇာနိ စ သင်္ဃဿ ဒတွာ သဗ္ဗရတ္တိံ ဂဏသဇ္ဈာယံ ကာရေသိ ပုန ဒိဝသေ နဂရေ ဘေရိံ စရာပေသိ မဟာဇနော ဣမံ သတ္တာဟံ ဂဏ္ဓမာလာဒီနိ အာဒိယ ဂန္တွာ ဓာတုယော ဝန္ဒတူတိ ဣဏ္ဒဂုတ္တတ္ထေရောပိ သကလ တမ္ဗပဏ္ဏိ ဒီပေ မနုဿာ ဓာတုယော ဝန္ဒိတုကာမာ၊ တံ ခဏံယေဝ အာဂန္တွာ ဝန္ဒိတွာ ယထာဋ္ဌာနံ ဂစ္ဆန္တူတိ အဓိဋ္ဌာသိ။

တေ တထေဝ ဓာတုယော ဝန္ဒိတွာ ဂမိံသု ရာဇာ သတ္တာဟံ သင်္ဃဿ မဟာဒါနံ ပဝတ္တေတွာ သတ္တာဟဿ အစ္စယေန ဓာတုဂဗ္ဘေ မယာ ကတ္တဗ္ဗကိစ္စံ နိဋ္ဌာပိတံ၊ ဓာတုဂဗ္ဘံ ပိဒဟထ ဘန္တေတိ သင်္ဃဿ အာရောစေသိ။ သင်္ဃော ဥတ္တရသုမန သာမဏေရေ အာမန္တေတွာ တုမှေဟိ ပုဗ္ဗေ အာဟဋ မေဒဝဏ္ဏ ပါသာဏေန ဓာတု ဂဗ္ဘံ ပိဒဟထာတိ အာဟ။ တေ သာဓူတိ သမ္ပဋိစ္ဆိတွာ ဓာတုဂဗ္ဘံ ပိဒဟိံသု။

တတော ခီဏာသဝါ ဓာတုဂဗ္ဘေ ဂဏ္ဓာ မာ သုသန္တု မာလာ မာ မိလာယန္တု။ ဒီပါ မာ နိဗ္ဗာယန္တု ရတနာနိ မာ ဝိဝဏ္ဏာနိ ဟောန္တု ပူဇနီယဘဏ္ဍာနိ မာ နဿန္တု။ မေဒဝဏ္ဏ ပါသာဏာ သန္ဓီယန္တု၊ ပစ္စတ္ထိကာနံ ဩကာသော မာ ဟောတူတိ အဓိဋ္ဌဟိံသု။

ဧဝံ ရာဇာ ဓာတု နိဓာပေတွာ ပုန နဂရေ ဘေရိံ စရာပေသိ မဟာ စေတိယေ ဓာတုံ နိဓာပေတွာ ဓာတုံ အာဟရိတွာ နိဓာနံ ကရောန္တူတိ။ မဟာဇနော အတ္တနော အတ္တနော ဗလာနုရူပေန သုဝဏ္ဏ ရဇတာဒိ ကရဏ္ဍေ ကာရာပေတွာ တတ္ထ ဓာတုယော ပတိဋ္ဌာပေတွာ ဓာတုနိဓာနဿုပရိ မေဒဝဏ္ဏ ပါသာဏ ပိဋ္ဌိယံ နိဒဟိံသု။ သဗ္ဗေဟိ သန္နိဟိတ ဓာတုယော သဟဿမတ္တာ အဟေသုန္တိ။

ဣတိ သာဓုဇန မနောပသာဒနတ္ထာယ ကတေ ထူပဝံသေ ဓာတုနိဓာန ကထာ နိဋ္ဌိတာ။

၂၄။ တတော ရာဇာ တံ သဗ္ဗံ ပိဒဟေတွာ စေတိယံ ကရောန္တော ဥဒရေန သဒ္ဓိံ စတုရဿ ကောဋ္ဌကံ နိဋ္ဌာပေသိ အထ ဆတ္တကမ္မေ သုဓာကမ္မေ စ အနိဋ္ဌိတေယေဝ မာရဏန္တိက ရောဂေန ဂိလာနော ဟုတွာ ဒီဃဝါပိတော ကနိဋ္ဌဘာတရံ ပက္ကောသာပေတွာ စေတိယေ အနိဋ္ဌိတံ ဆတ္တကမ္မံ သုဓာကမ္မဉ္စ သီဃံ နိဋ္ဌာပေတွာ မံ တောသေဟိ တာတာတိ အာဟ။ သော ရညော ဒုဗ္ဗလဘာဝံ ဉတွာ အန္တရေ အနိဋ္ဌိတကမ္မံ ကာတုံ န သက္ကာတိ သုဒ္ဓဝတ္ထေဟိ ကဉ္စုကံ ကာရေတွာ စေတိယေ ပဋိမုဉ္စာပေတွာ စိတ္တကာရေဟိ ကဉ္စုက မတ္ထကေ ဝေဒိကာ စ ပုဏ္ဏဃဋ ပဉ္စင်္ဂုလိ ပန္တိယော စ ကာရာပေသိ။

နဠကာရေဟိ ဝေဠုမယ ဆတ္တံ ကာရေတွာ ခရပတ္တမယေ စဏ္ဒသူရိယမဏ္ဍလေ မုဒ္ဓနိ ဝေဒိကာ ကာရေတွာ လာခါကုကုဋ္ဌကေဟိ တံ ဝိစိတ္တံ ကတွာ ထူပကမ္မံ နိဋ္ဌိတန္တိ ရညော အရောစေသိ ရာဇာ တေန ဟိ မံ မဟာစေတိယံ ဒဿေဟီတိ ဝတွာ သိဝိကာယ နိပဇ္ဇိတွာ စေတိယာ ပဒက္ခိဏံ ကတွာ ဒက္ခိဏဒွါရေ ဘူမိသယနံ ပညာပေတွာ တတ္ထ နိပန္နော ဒက္ခိဏေန ပဿေန သယိတွာ မဟာထူပံ ဝါမပဿေန သယိတွာ လောဟပါသာဒံ ဩလောကေန္တော ပသန္န စိတ္တော အဟောသိ။ တဒါ ရညော သာသနဿ ဗဟူပကာရဘာဝံ သလ္လက္ခေတွာ ဂိလာန ပုစ္ဆနတ္ထာယ တတော တတော အာဂတာ ဘိက္ခု ဆန္နဝုတိ ကောဋိယော ရာဇာနံ ပရိဝါရေတွာ အဋ္ဌံသု။ တတော သင်္ဃော ဝဂ္ဂ ဝဂ္ဂါ ဟုတွာ ဂဏသဇ္ဈာယံ အကာသိ။

ရာဇာ တသ္မိံ သမာဂမေ ထေရပုတ္တာဘယတ္ထေရံ အဒိသွာ ဧဝံ စိန္တေသိ။ သော မယိ ဒမိဠေဟိ သဒ္ဓိံ အဋ္ဌဝီသတိ မဟာယုဒ္ဓေ ကယိရမာသေ အပစ္စောသကကိတွာ ဣဒါနိ မရဏယုဒ္ဓေ ဝတ္တမာဏေ မယှံ ပရာဇယံ ဒိသွာ မညေ နာဂစ္ဆတီတိ။ တဒါ ထေရော ကရိဏ္ဒ နဒီ သီသေ ပဇ္ဇလိတ ပဗ္ဗတေ ဝသန္တော ရညော ပရိဝိတက္ကံ ဉတွာ ပဉ္စသတ ခီဏာသဝ ပရိဝုသေတာ အာကာသေနာဂန္တွာ ရညော ပုရတော ပါတုရဟောသိ။

ရာဇာ ထေရံ ဒိသွာ အတ္တနော ပုရတော နိသီဒါပေတွာ ဧဝမာဟ ဘန္တေ တုမှေဟိ သဒ္ဓိံ ဒသမဟာ ယောဓေ ဂဟေတွာ ဒမိဠေဟိ သဒ္ဓိ ယုဇ္ဈိံ။ ဣဒါနိ ဧကကောဝ မစ္စူနာ သဒ္ဓိံ ယုဇ္ဈိတုံ အာရဘိံ။ မစ္စု သတ္တုမ္ပန ပရာဇေတုံ န သက္ကောမီတိ။ တတော-

ထေရပုတ္တာဘယတ္ထေရော မာ ဘာယိ မနုဇာဓိပ၊

ကိလေသ သတ္တုံ အဇိနိတွာ အဇေယျော မစ္စူသတ္တုကော၊

ဣတိ ဝတွာ ဧဝံ အနုသာသိ။ မဟာရာဇ သဗ္ဗောယေဝ လောက သန္နိဝါသေ ဇာတိယာ အနုဂတော၊ ဇရာယ အနုသဋော၊ ဝျာဓိနာ အဘိဘူတော၊ မရဏေန အဗ္ဘာဟတော။ တေတာဟ-

‘‘ယထာပိ သေလာ ဝိပုလာ-နဟံ အာဟစ္စ ပဗ္ဗတာ၊

သမန္တာ အနုပရိယေယျုံ-နိပ္ပောထေန္တာ စတုဒ္ဒိသံ၊

ဧဝံ ဇရာ စ မစ္စု စ-အဓိဝတ္တန္တိ ပါဏိနော၊

ခတ္တိယော ဗြာဟ္မဏေ ဝေဿေ သုဒ္ဒေ စဏ္ဍာလ ပုက္ကုသေ၊

န ကိဉ္စိ ပရိဝဇ္ဇေတိ-သဗ္ဗမေဝါဘိမဒ္ဒတိ၊

န တတ္ထ ဟတ္ထိနံ ဘူမိ-န ရထာနံ န ပတ္တိယာ၊

န စာပိ မန္တယုဒ္ဓေန-သက္ကာ ဇေတုံ ဓနေန ဝါ’’တိ၊

တသ္မာ ဣဒံ မရဏံ နာမ မဟာယသာနံ မဟာသမ္မတာဒီနံ မဟာ ပုညာနံ ဇောတိယာဒီနံ မဟာထာမာနံ ဗလဒေဝါဒီနံ ဣဒ္ဓိမန္တာနံ မဟာမောဂ္ဂလ္လာနာဒီနံ ပညာဝန္တာနံ သာရိပုတ္တာဒီနံ သယမ္ဘူဉာဏေန အဓိဂတ သစ္စာနံ၊ ပစ္စေကဗုဒ္ဓါနံ သဗ္ဗဂုဏသမန္နာဂတာနံ သမ္မာသမ္ဗုဒ္ဓါနမ္ပိ ဥပရိ နိရာသင်္ကမေဝ ပတတိ ကိမင်္ဂပနညေသု သတ္တေသု။

တသ္မာ-

မဟာယသာ ရာဇဝရာ ဂတာ တေ သဗ္ဗေ မဟာသမ္မတ အာဒယောပိ၊

အနိစ္စဘာဝံ ဗလဒေဝ အာဒိ မဟာဗလာ စေဝ တထာ ဂမိံသု၊

ယေ ပုညဝန္တာနိ ဂတာ ပသိဒ္ဓိံ မဟဒ္ဓနံ ဇောတိယမေဏ္ဍကာဒီ၊

ဥပါဝိသိံ ဝစ္စုမုခံ သဘောဂါ သဗ္ဗေပိ တေ ရာဟုမုခံ သသီဝ၊

ယော ဣဒ္ဓိမန္တေသု တထာဂတဿ ပုတ္တေသုသေဋ္ဌော ဣတိ ဝိဿုတောပိ၊

ထေရော မဟာရာဇသဟေဝ ဣဒ္ဓိဗလေန သော မစ္စုမုခံ ပဝိဋ္ဌော၊

သဗ္ဗေသု သတ္တေသု ဇိနံ ဌပေတွာ နေဝတ္ထိ ပညာယ သမောပိ ယေန၊

သော ဓမ္မသေနာပတိ သာဝကောပိ ဂတော မဟာရာဇ အနိစ္စတံ’စ၊

သယမ္ဘူဉာဏဿ ဗလေန သန္တိံ ဂတာ မဟာရာဇ သယမ္ဘူနောပိ၊

သဗ္ဗေပိ တေ ဉာဏဗလူပ ပန္နာ အနိစ္စတံ နေဝ အတိက္ကမိံသု၊

တိလောကနာထော ပုရိသုတ္တမော သော အနိစ္စဘာဝံ သမတိက္ကမိတွာ၊

နာသက္ခိ ဂန္တုံ သုဂတောပိ ရာဇ အညေသု သတ္တေသု ကထာဝ နတ္ထိ၊

တသ္မာ မဟာရာဇ ဘဝေသု သတ္တာ သဗ္ဗေပိ နာသုံ မရဏာ ဝိမုတ္တာ၊

သဗ္ဗမ္ပိ သင်္ခါရဂတံ အနိစ္စံ ဒူက္ခံ အနတ္တာတိ ဝိစိန္တယဿု၊

‘‘ဒုတိယေ အတ္တဘာဝေပိ ဓမ္မစ္ဆဏ္ဒေါ မဟာ ဟိ တေ၊

ဥပဋ္ဌိတေ ဒေဝလောကေ ဟိတွာ ဒိဗ္ဗသုခံ တုဝံ၊

ဣဓာဂမ္မ ဗဟုံ ပုညံ အကာသိ စ အနေကဓာ၊

ကရဏမ္ပေက ရဇ္ဇဿ သာသနဇ္ဇောတနာယ တေ၊

မဟာ ရာဇ ကတံ ပုညံ ယာဝဇ္ဇ ဒိဝသာ တယာ၊

သဗ္ဗံ အနုဿရေထေဝ သုခံ သဇ္ဇု ဘဝိဿတိ၊

တံ သုတွာ တုဋ္ဌမာနသော ရာဇာ ဘန္တေ တုမှေ မစ္စုယုဒ္ဓေပိ အပဿယာတိ ဝတွာ လဒ္ဓဿာသော ပုညပေါတ္ထကံ ဝါစေတုံ အာဏာပေသိ လေခကော ပုညပေါတ္ထကံ ဧဝံ ဝါစေသိ။

‘‘ဧကူနသတဝိဟာရာ မဟာရာဇေန ကာရိတာ၊

ဧကူနသတကောဋီဟိ ဝိဟာရော မရိစဋ္ဋိ စ၊

ဥတ္တမော လောဟပါသာဒေါ တိံသကောဋီဟိ ကာရိတော၊

မဟာထူပေ အနဂ္ဃာနိ ကာရိတာ စတုဝီသတိ၊

မဟာထူပမှိ သေသာနိ ကရိတာနိ သုဗုဒ္ဓိနာ၊

ကောဋိသဟဿံ အဂ္ဃန္တိ မဟာရာဇ တယာ ပုန၊

ကောဠမ္ဗ နာမ မလေယ အက္ခက္ခာယိက ဆာတကေ၊

ကုဏ္ဍလာနိ မဟဂ္ဃာနိ ဒုဝေ ဒတွာန ဂဏှိယ၊

ခီဏာသဝါနံ ပဉ္စန္နံ မဟာထေရာနမုတ္တမော၊

ဒိန္နော ပသန္နစိတ္တေန ကင်္ဂု အမ္ဗိလ ပိဏ္ဍကော၊

စူဠင်္ဂဏိယ ယုဒ္ဓမှိ ပရဇ္ဈိတွာ ပလာယတာ၊

ကာလံ ဃောသာပယိတွာန အာဂတဿ ဝိဟာယသာ၊

ခီဏာသဝဿ ယတိနော အတ္တာနမနပေက္ခိယ၊

ဒိန္နံ သရက ဘတ္တန္တိ ပုညပေါတ္ထံ အဝါစယိ၊

၂၅။ တံ သုတွာ ရာဇာ တုဿိတွာ ဌပေဟိ ဌပေဟိ ဘဏေတိ ဝတွာ ဧဝမာဟ။ မရိစဝဋ္ဋိ ဝိဟာရမဟသတ္တာဟေ ထူပါရမှသတ္တာဟေ စ စာတုဒ္ဒိသ ဥဘတော သင်္ဃဿ မဟာရဟံ မဟာဒါနံ ပဝတ္တေသိံ။ စတုဝီသတိ မဟာဝိသာခပူဇာ ကာရေသိံ တမ္ဗပဏ္ဏိဒီပေ မဟာဘိက္ခုသင်္ဃဿ တိက္ခတ္တုံ စီဝရမဒါသိံ သတ္တ သတ္တ ဒီနာနိ လင်္ကာ ရဇ္ဇံ သာသနဿ ပဉ္စက္ခတ္တုံ အဒါသိံ သပ္ပိ သန္နိတ္တ သုပရိသုဒ္ဓ ဝဋ္ဋိယာ ဒွါဒသဌာနေသု၊ သတ္တံ ဒီပသဟဿံ ဇာလေသိံ အဋ္ဌာရဿု ဌာနေသု ဂိလာနာနံ ဝေဇ္ဇေဟိ ဘေသဇ္ဇဉ္စ ဘတ္တဉ္စ နိစ္စံ ဒါပေသိ။ စတုစတ္တာလီသ ဌာနေသု တေလုလ္လောပကဉ္စ အဒါသိံ။ တတ္တကေသုယေဝ ဌာနေသု ဃတပက္ကဇာလပူဝေ ဘတ္တေန သဒ္ဓိံ နိစ္စံ ဒါပေသိံ။

မာသေ မာသေ အဋ္ဌသု ဥပေါသထဒိဝသေသု လင်္ကာဒီပေ သဗ္ဗဝိဟာရေသု ဒီပတေလံ ဒါပေသိံ။ အာမိသ ဒါနတော ဓမ္မဒါနံ မဟန္တန္တိ သုတွာ ဟေဋ္ဌံ လောဟပါသာဒေ ဓမ္မာသနေ နိသီဒိတွာ မင်္ဂလ သုတ္တံ ဩသာရေတုံ အာရဘိတွာပိ သင်္ဃ ဂါရဝေန ဩသာရေတုံ နာသက္ခိံ။ တတော ပဋ္ဌာယ ဓမ္မဒေသကေ သက္ကရိတွာ သဗ္ဗဝိဟာရေသု ဓမ္မကထံ ကထာပေသိံ ဧကေကဿ ဓမ္မကထိကဿ နာဠ နာဠိပ္ပမာဏာနိ သပ္ပိဖာဏိတ သက္ခရာနိ စတုရင်္ဂုလ မုဋ္ဌိပ္ပမာဏံ ယဋ္ဌိမဓုကံ သာဋကဒွယဉ္စ မာသဿ အဋ္ဌသု ဥပေါသထ ဒိသေသု ဒါပေသိံ။ ဧတံ သဗ္ဗမ္ပိ ဣဿရိယေ ဌတွာ ဒိန္နတ္တာ မမ စိတ္တံ သ အာရာဓေတိ။ ဇီဝိတံ ပန အနပေက္ခိတွာ ဒုဂ္ဂတေန မယာ ဒိန္နဒါနဒွယမေဝ အာရာဓေတီတိ။

တံ သုတွာ အဘယတ္ထေရော မဟာရာဇ ပသာဒနီယဋ္ဌာနေယေဝ ပသာဒံ အကာသိ တံ ပန ပိဏ္ဍပါတဒွယံ ပရိဿ ပီဠံ အကတွာ လဒ္ဓ ဓမ္မိက ပစ္စယတ္တာ အတ္တာနံ အနဝလောကေတွာ အသဇ္ဇမာနေန ဒိန္နတ္တာ ပဋိဂ္ဂါဟကာနံ ယာဝဒတ္ထံ ကတွာ ဒိန္နတ္တာ ပီတိပါမောဇ္ဇံဇနယိတွာ ဗလဝ သဒ္ဓါယ ဒိန္နတ္တာ ဒေယျဓမ္မဿ နိရဝသေသံ ပရိဘောဂံ ဂတတ္တာတိ ဣမေဟိ ပဉ္စဟိ ကာရဏေဟိ မဟန္တတ္တိ ဝတွာ မဟာရာဇ ကင်္ဂု အမ္ဗိလိ ပိဏ္ဍဂါဟကတ္ထေရေသု မလိယမဟာဒေဝတ္ထေရော သမန္တကူဋေ ပဉ္စန္နံ ဘိက္ခုသတာနံ ဒတွာ ပရိဘုဉ္ဇိ ပထဝိ စာလနက ဓမ္မဂုတ္တတ္ထေရော ကလျာဏီယ ဝိဟာရေ ပဉ္စန္နံ ဘိက္ခုသတာနံ ဒတွာ ပရိဘုဉ္ဇိ။

တလင်္ဂရဝါသီ ဓမ္မဂုတ္တတ္ထေရောပိ ပိယင်္ဂုဒီပေ ဒွါဒသန္နံ ဘိက္ခုသဟဿာနံ ဒတွာ ပရိဘုဉ္ဇိ။ မင်္ဂဏဝါသီ စုဠတိဿတ္ထေရော ကေလာသကူဋေ ဝိဟာရေ သဋ္ဌိသဟဿာနံ ဘိက္ခူနံ ဒတွာ ပရိဘုဉ္ဇိ မဟာဘဂ္ဂတ္ထေရောပိ ဥက္ကာနဂရ ဝိဟာရေ သတ္တသတာနံ ဘိက္ခူနံ ဒတွာ ပရိဘုဉ္ဇိ သရက ဘတ္တဂါဟကတ္ထေရော ပန ပိယင်္ဂုဒီပေ ဒွါဒသန္နံ ဘိက္ခုသဟဿာနံ ဒတွာ ပရိဘောဂမကာသီတိ ဝတွာ ရညော စိတ္တံ ဟာသေသိ။

ရာဇာ စိတ္တံ ပသာဒေတွာ ဧဝမာဟ-အဟမ္ဘန္တေ စတုဝီသတိ ဝဿာနိ ရဇ္ဇံ ကာရေန္တော ဘိက္ခုသင်္ဃဿ ပဟူပကာရော အဟောသိံ။ ကာယောပိ မေ သင်္ဃဿ ဥပကာရကော ဟောတု သင်္ဃဒါသဿ မေ သရီရံ မဟာစေတိယဿ ဒဿနဋ္ဌာနေ သင်္ဃဿ ကမ္မမာလကေ ဈာပေထာတိ။ တတော ကနိဋ္ဌံ အာမန္တေတွာ’တာတ! တိဿ! မဟာထူပေ အနိဋ္ဌိတံ ကမ္မံ သာဓုကံ နိဋ္ဌာပေသိ။ သာယံ ပါတော စ မဟာထူပေ ပုပ္ဖပူဇံ ကာရေတွာ တိက္ခတ္တုံ ဥပဟာရံ ကာရေဟိ။ မယာ ဌပိတံ ဒါနဝဋ္ဋံ သဗ္ဗံ အပရိဟာပေတွာ သင်္ဃဿ ကတ္တဗ္ဗကိစ္စေသု သဒါ အပ္ပမတ္တော ဟောဟီ’တိ အနုသာယိတွာ တုဏှိ အဟောသိ။

တသ္မိံ ခဏေ ဘိက္ခု ဂဏသဇ္ဈာယံ အာရဘိံသု ဒေဝတာ ပန ဆဒေဝ လောကတော ဆ ရထေ ဂဟေတွာ အာဒါယ ပဋိပါဋိယာ ဌပေတွာ မဟာရာဇ အမှာကံ ဒေဝလောကော ရမဏီယော၊ အမှာကံ ဒေဝလောကော ရမဏီယောတိ ဝတွာ အတ္တနော အတ္တနော ဒေဝလောကံ အာဂမနတ္ထာယ ယာစိံသု ရာဇာ တေသံ ဝစနံ သုတွာ ယာဝါဟံ ဓမ္မံ သုဏာမိ- တာဝ အဓိဝါသေထာတိ တေ ဟတ္ထသညာယ နိဝါရေသိ သင်္ဃော ဂဏသဇ္ဈာယံ နိဝါရေသီတိ မညိတွာ သဇ္ဈာယံ ဌပါပေသိ။

ရာဇာ ကသ္မာ ဘန္တေ ဂဏသဇ္ဈာယံ ဌပေထာတိ အာဟ။ မဟာရာဇ တယာ ဟတ္ထသညာယ နိဝါရိတတ္တာတိ။ ဘန္တေ တုမှာကံ သညံ နာဒါသိံ။ ဒေဝတာ ဆဒေဝလောကတော ဆ ရထေ အာနေတွာ အတ္တနော အတ္တနော ဒေဝလောကံ ဂန္တုံ ယာစန္တိ တသ္မာ တေသံ ယာဝါဟံ ဓမ္မံ သုဏာမိ တာဝ အာဂမေထာတိ သညံ အဒါသိန္တိ တံ သုတွာ ကေစိ အယံ ရာဇာ မရဏဘယဘိတော ဝိပ္ပလပတိ၊ မရဏတော အဘာယနက သတ္တော နာမ နတ္ထီတိ မညိံသု။

တတော အဘယတ္ထေရော အာဟ ကထံ မဟာရာဇ သဒ္ဒဟိတုံ သက္ကာ ဆ ဒေဝလောကတော ဆ ရထာ အာနီတာတိ တံ သုတွာ ရာဇာ အာကာသေ ပုပ္ဖဒါမာနိ ခိပါပေသိ။ တာနိ ဂန္တွာ ဝိသုံ ရထဓုရေ ဩလမ္ဗိံသု မဟာဇနော အာကာသေ ဩလမ္ဗန္တာနိ ပုပ္ဖဒါမာနိ ဒိသွာ နိက္ကင်္ခေါ အဟောသိ။

တတော ရာဇာ ထေရံ ပုစ္ဆိ-ကတမော ပန ဘန္တေ ဒေဝလောကော ရမဏီယောတိ။ တုသိတဘဝနံ ပန မဟာရာဇ ရမဏီယံ၊ ဗုဒ္ဓဘာဝါယ သမယံ ဩလောကေန္တော မေတ္တေယျော ဗောဓိသတ္တောပိ တသ္မိံယေဝ ဝသတီတိ အာဟ။

တံ သုတွာ ရာဇာ တသ္မိံ အာလယံ ကတွာ မဟာထူပံ ဩလောကေန္တော နိပန္နောဝ စဝိတွာ သုတ္တပ္ပဗုဒ္ဓါ ဝိယ တုသိတ ဘဝနတော အာဟဋ။ ရထေ နိဗ္ဗတ္တိတွာ အတ္တနော ကတပုညဿ ထလံ မဟာဇနဿ ပါကဋံ ကာတုံ ရထေယေဝ ဌတွာ ဒိဗ္ဗာဘရဏ ဝိဘူသိတော မဟာဇနဿ ပဿန္တဿေဝ တိက္ခတ္တုံ မဟာထူပံ ပဒက္ခိဏံ ကတွာ ဘိက္ခုသင်္ဃဉ္စ ဝန္ဒိတွာ တုသိတဘဝနံ အဂမာသိ။

ဧဝံ အသာရေ နိစယေ ဓနာနံ အနိစ္စသင်္ဃံ သတ္တံ သပညာ၊

ကတွန စာဂံ ရတနတ္တယမဟိ အာဒါယ သာရံ သုဂတိံ ဝဇန္တိ၊

ရညော နာဋကတ္ထိယော မတဘာဝံ ဉတွာ ယတ္ထ ဌိတာ မကုဠံ မောစယိံသု တတ္ထံ ဌာနေ ကတသာလာ မကုဠမုတ္တသာလာနာမဇာတာ။ ရညော သရီရသ္မိံ စိတကံ အာရောပိတေ ယတ္ထ မဟာဇနော ဟတ္ထေ ပဂ္ဂဟေတွာ ဝိရစိ။ တတ္ထ ကတသာလာ ဝိရစိတ္ထသာလာ နာမ ဇာတာ။ ရညော သရီရံ ယတ္ထ ဈာပေသုံ - သော သီမာမာလကော ရာဇမာလကော နာမ ဇာတော။ အထ ရညော ကနိဋ္ဌဘာတာ သဒ္ဓါတိဿမဟာရာဇာ နာမ ဟုတွာ စေတိယေ အနိဋ္ဌတံ ဇတ္တကမ္မံ သုဓာကမ္မဉ္စ နိဋ္ဌာပေတွာ ထူပမကာသီတိ

ဣတိ သာဓုဇန မနောပသာဒနတ္ထာယ ကတေ ထူပဝံသေ မဟာစေတိယေ ကတာ နိဋ္ဌိတာ။

၂၆။ ဧတရဟိ ဒုဋ္ဌဂါမဏိ အဘယ မဟာရာဇဿ ပိတာ ကာကဝဏ္ဏတိဿ ရာဇာ မေတ္တေယျဿ ဘဂဝတော ပိတာ ဘဝိဿတိ။ ဝိဟာရမဟာဒေဝီ မာတာ ဘဝိဿတိ။ ဒုဋ္ဌဂါမိဏိ အဘယော အဂ္ဂသာဝကော ဘဝိဿတိ။ ကနိဋ္ဌော ဒုတိယ သာဝကော ဘဝိသသတိ။ ရညော ပိတုစ္ဆာ အနုဠာဒေဝီ အဂ္ဂမဟေသီ ဘဝိဿတိ။ ရညော ပုတ္တော သာလိ ရာဇကုမာရော ပုတ္တော ဘဝိဿတိ။ ဘဏ္ဍာဂါရိက သင်္ဃာမစ္စော အဂ္ဂုပဋ္ဌာကော ဘဝိဿတိ တဿာမစ္စဿ ဓီတာ အဂ္ဂုပဋ္ဌာယိကာ ဘဝိဿတီတိ ဧဝံ သဗ္ဗေပိ ကတာဓိကာရာ ဟေတု သမ္ပန္နာ တဿ ဘဂဝတော ဓမ္မံ သုတွာ ဒုက္ခဿန္တံ ကရိတွာ အနုပါဒိသေသာယ နိဗ္ဗာနဓာတုယာ ပရိနိဗ္ဗာယိဿန္တီတိ။

ဧတ္တာဝတာ စ

၂၇။

မဟိဏ္ဒသေန နာမမှိ ဝသန္တော ပရိဝေဏကေ၊

ပတ္တစီဝရပါဒေါ? ယော ပိဋကတ္တယ ပါရဂေါ၊

သဒ္ဓါသိလဂုဏုပေတော သဗ္ဗသတ္တဟိတေ ရတော၊

တေန သာဓု သမဇ္ဈိဋ္ဌော ယမဟံ ကာတုမာရဘိံ၊

သောဒါနိ နိဋ္ဌံ သမ္ပတ္တော ထူပဝံသော အနာကုလော၊

ပရိပုဏ္ဏော သင်္ခထာ သာဓု ပဏ္ဍိတေဟိ ပသံသိတော၊

ယံ ပတ္တံ ကုသလံ ကမ္မံ ကရောန္တေန ဣမံ မယံ၊

တေန ဧတေန ပုညေန သတ္တာ ဂစ္ဆန္တု နိဗ္ဗုတိံ၊

အနန္တရာယေန ယထာ စ သိဒ္ဓိံ

မူပါဂတော ထူပဝရဿ ဝံသော၊

တထေဝ သဒ္ဓမ္မသိတာ ဇနာနံ

မနော ရထာ သီဃမုပေန္တု သိဒ္ဓိံ၊

ပရိသမ္ဘိဒါမဂ္ဂဿ ယေန လီလတ္ထ ဒီပနိ

ဋီကာ ဝိရစိတာ သာဓု သဒ္ဓမ္မောဒယ ကာမိနာ၊

တထာ ပကရဏေ သစ္စသင်္ခေပေ အတ္ထဒီပနာ၊

ဓီမတာ သုကတာ ယေန သုဋ္ဌု သီဟဠ ဘာသတော

ဝိသုဒ္ဓိမဂ္ဂ သင်္ခေပေ ယေန အတ္ထပ္ပကာသနာ၊

ယောဂီ နမုပကာရာယ ကတာ သီဟဠဘာသတော၊

ပရက္ကမ နရိဏ္ဒဿ သဗ္ဗဘူပါန ကေတုနော၊

ဓမ္မာဂါရေ နိယုတ္တော ယော ပိဋကတ္တယ ပါရဂေါ၊

သာသနံ သုဋ္ဌိတံ ယဿ အန္တေဝါသိက ဘိက္ခုသု၊

တေန ဝါစိဿရတ္ထေရ ပါဒေန လိခိတော အယန္တိ၊

ထူပဝံသော နိဋ္ဌိတော။