📜
ဒါဌာဝံသော ¶
နမော တဿ ဘဂဝတော အရဟတော သမ္မာသမ္ဗုဒ္ဓဿ
ဝိသာရဒံ ဝါဒပထာတိ ဝတ္တိနံ၊
တိလောကပဇ္ဇောတမသယှသာဟိနံ၊
အသေသ ဉေယျာဝရဏပ္ပဟာယိနံ၊
နမာမိ သတ္ထာရမနန္တဂေါစရံ။
၂။ ¶
တိလောက နာထပ္ပဘဝံ ဘယာပဟံ၊
ဝိသုဒ္ဓဝိဇ္ဇာစရဏေဟိ သေဝိတံ၊
ပပဉ္စ သံယောဇနဗန္ဓနစ္ဆိဒံ၊
နမာမိ ဓမ္မံ နိပုဏံ သုဒုဒ္ဒသံ။
ပသာဒမတ္တေန’ပိ ယတ္ထ ပါဏိနော၊
ဖူသန္တိ ဒုက္ခက္ခယမစ္စုတံ ပဒံ၊
တမာဟုဏေယျံ သုသမာဟိတိန္ဒြိယံ၊
နမာမိ သင်္ဃံ မုနိရာဇသာဝကံ။
ဝိဘုသယံ ကာဠကနာဂရနွ ယံ၊
ပရက္ကမော ကာရုဏိကော စမူပတိ၊
ဂဝေသမာနော ဇိနသာသနဿ ယော၊
ဝိရူဠှိမတ္ထဉ္စ ဇနဿ ပတ္ထယံ။
၅။ ¶
သုဓာမယူခါမလ ပဏ္ဍုဝံသဇံ၊
ဝိရူဠှသဒ္ဓံ မုနိရာဇသာသနေ၊
ပိယံ ဝဒံ နီတိပထာနုဝတ္တိနိံ၊
သဒါ ပဇာနံ ဇနိကံ’ဝ မာတရံ။
ပိယံ ပရက္ကန္တိဘုဇဿ ရာဇိနော၊
မဟေသိ မစ္စုန္နတခုဒ္ဓိသမ္ပဒံ၊
ဝိဓာယ လီလာဝတိမိစ္ဆိတတ္ထဒံ၊
အသေသ လင်္ကာတလရဇ္ဇလက္ခိယံ။
ကုမာရမာရာဓိတသာဓုမန္တိနံ၊
မဟာဒယံ ပဏ္ဍုနရိန္ဒ ဝံသဇံ၊
ဝိဓာယ သဒ္ဓံ မဓုရိန္ဒနာမကံ၊
သုသိက္ခီတံ ပါဝစနေ ကလာသု စ။
၈။ ¶
နရိန္ဒသုညံ သုစိရံ တိသီဟဠံ၊
ဣတိပ္ပတီတံ အယသံ အပါနုဒိ၊
စိရံ ပဏီတေန စ စိဝရာဒိနာ၊
သုသညတေ သံယမိနော အတပ္ပယိ။
စိရဋ္ဌိတိံ ပါဝစနဿ ဣစ္ဆတာ၊
ကတညုနာ ဝိက္ကမ ဗုဒ္ဒိသာလိနာ၊
သတီမတာ စန္ဒိမ ဗန္ဓုကိတ္တိနာ၊
သဂါရဝံ တေန’ဘီယာစိတော အဟံ။
သဒေသ ဘာသာယ ကဝီဟိ သီဟဠေ၊
ကတမ္ပိ ဝံသံ ဇိနဒန္တဓာတုယာ၊
နိရုတ္တိယာ မာဂဓိကာယ ဝုဒ္ဓိယာ၊
ကရောမိ ဒီပန္တရဝါသိနံ အပိ။
၁၁။ ¶
ဇီနော’ယမိဒ္ဓေ အမရဝှယေ ပုရေ၊
ကဒါစိ ဟုတွာန သုမေဓနာမကော၊
သဝေဒဝေဒင်္ဂဝိဘာဂကောဝိဒေါ၊
မဟဒ္ဓနေ ဝိပ္ပကုလမှိ မာဏဝေါ။
အဟဉှိ ဇာတိဗျသနေန ပီဠိတော၊
ဇရာဘိဘုတော မရဏေန ဩတ္ထဋော၊
သိဝံ ပဒံ ဇာတိဇရာဒိနိဿဋံ၊
ဂဝေသယိဿံ’တိ ရဟော ဝိစိန္တိယ။
အနေကသင်္ခံ ဓနဓညသမ္ပဒံ၊
ပတိဋ္ဌပေတွာ ကပဏေသိ ဒုစ္စဇံ၊
အနပ္ပကေ ပေမဘရာနုဗန္ဓိနော၊
ဝိဟာယ မိတ္တေ စ သုတေစ ဗန္ဓဝေ။
၁၄။ ¶
ပဟာယ ကာမေ နိခိလေ မနောရမေ၊
ဃရာဘိနိက္ခမ္မ ဟိမာစလန္တိကေ၊
မဟီဓရံ ဓမ္မိကနာမ ဝိဿုတံ၊
ဥပေစ္စ နာနာတရုရာဇိဘုသိတံ။
မနောနုကူလေ သုရရာဇနိမ္မီတေ၊
အသမ္မိဂါနံ အဂတိမှိ အဿမေ၊
နိဝတ္တစီရော အဇိနက္ခိပံ ဝဟံ၊
ဇဋာဓရော တာပသ ဝေသမဂ္ဂဟီ။
သုသညတတ္တောပရိဝါရိ တိန္ဒြိယော၊
ဖလာဖလာဒီဟိ ပဝတ္တယံ တနုံ၊
ဂတော အဘိဉ္ဂ္ဉာသု စ ပါရမိံ ဝသီ၊
တဟိံ သမာပတ္တိ သုခံ အဝိန္ဒိ သော။
၁၇။ ¶
သုသဇ္ဇိတေ ရမ္မပုရာဓိဝါသိနာ၊
မဟာဇနေန’တ္တမနေန အဉ္ဇသေ၊
ပထပ္ပဒေသေ အဘိယန္တမတ္တနော၊
အနိဋ္ဌိတေယေဝ သုမေဓ တာပသော။
အဂါဓဉေယျောဒဓီပါရဒဿိနံ၊
ဘဝန္တဂုံ နိဗ္ဗနထံ ဝိနာယကံ၊
အနေကခီဏာသဝလက္ခသေဝိတံ၊
ကဒါ စိ ဒီပင်္ကရဗုဒ္ဓမဒ္ဒသ။
တတော သသင်္ဃဿ တိလောကဘတ္တုနော၊
ပရိစ္စဇိတွာန တနုမ္ပိ ဇီဝိတံ၊
ပသာရယိတွာန ဇဋာဇိနာဒိကံ၊
ဝိဓာယ သေတုံ တနုမေဝ ပလ္လလေ။
၂၀။ ¶
အနက္ကမိတွာ ကလလံ မဟာဒယေ၊
သဘိက္ခုကော ဂစ္စတု ပိဋ္ဌိယာ ဣတိ၊
အဓိဋ္ဌဟိတွာန နိပန္နကော တဟိံ၊
အနာထ မေတံ တိဘဝံ သမေက္ခိယ။
ဒယာယ သဉ္စောဒိတမာနသော ဇနေ၊
ဘဝဏ္ဏဝါ ဥဒ္ဓရိတုံ ဒုခဒ္ဒိတေ၊
အကာသိ သမ္ဗောဓိပဒဿ ပတ္တိယာ၊
မဟာဘိနီဟာရမုဒဂ္ဂဝိက္ကမော။
၂၂။ ¶
အထော ဝိဒိတွာ ဝသိနော တမာသယံ၊
အဒါသိ သော ဝျာကရဏံ မဟာမုနိ၊
တတော ပုရံ တမှိ တထာဂတေ ဂတေ၊
သယံဝသီ သမ္မသိ ပါရမိဂုဏေ။
တတော စ ကပ္ပာနမလီနဝိက္ကမော၊
အသံခိယေ သော စတုရော သလက္ခကေ၊
တဟိံ တဟိံ ဇာတိသု ဗောဓိပါစနေ၊
ဝိသုဒ္ဓသမ္ဘာရဂုဏေ အပူရယိ၊
အထာဘိဇာတော တုသိတေ မဟာယသော၊
ဝိသုဒ္ဓသမ္ဗောဓိပဒေါပလဒ္ဓိယာ၊
ဥဒိက္ခမာနော သမယံ ဒယာဓနော၊
စိရံ ဝိဘုတိံ အနုဘောသိ သဗ္ဗသော။
၂၅။ ¶
သဟဿသင်္ခါ ဒသစက္ကဝါလတော၊
သမာဂတာနေကသုရာဓိပါဒိဟိ၊
ဥဒဂ္ဂုဒဂ္ဂေဟိ ဇိနတ္တပတ္တိယာ၊
သဂါရဝံ သော အဘိဂမ္မ ယာစိတော။
တတော စဝိတွာ ကပိဠဝှယေ ပုရေ၊
သဒါ သတော သကျကုလေကကေတုနော၊
အဟောသိ သုဒ္ဓါဒနဘုမိဘတ္တုနော၊
မဟာဒိမာယာယ မဟေသိယာ သုတော။
၂၇။ ¶
ဝိဇာတမတ္တော’ဝ ဝသုန္ဓရာယ သော၊
ပတိဋ္ဌဟိတွာန ဒိသာ ဝိလောကယီ၊
တဒါ အဟေသုံ ဝိဝဋင်္ဂနာ ဒိသာ၊
အပူဇယုံ တတ္ထ စ ဒေဝမာနုသာ။
အာဓာရယုံ အာတပဝါရဏာဒိကံ၊
အဒိဿမာနာဝ နဘမ္ဘိ ဒေဝတာ၊
ပဒါနိ သော သတ္တ စ ဥတ္တရာမုခေါ၊
ဥပေစ္စ နိစ္ဆာရယိ ဝါစမာသဘိံ။
ယထတ္ထသိဒ္ဓတ္တကုမာရနာမကော၊
မဟဗ္ဗလော ယောဗ္ဗနဟာရိဝိဂ္ဂဟော၊
ဥတုတ္တယာနုစ္ဆဝိကေသု တီသု သော၊
နုဘောသိ ပါသာဒဝရေသု သမ္ပဒံ။
၃၀။ ¶
ကဒါစိ ဥယျာနပထေ ဇရာဟတံ၊
တထာတုရံ ကာလကတဉ္စ သံယမိံ၊
ကမေန ဒိသွာန ဝိရတ္တမာနသော၊
ဘဝေသု သော ပဗ္ဗဇိတုံ အကာမယိ။
သပုပ္ဖဒီပါဒီကရေဟိ ရတ္တိယံ၊
ပုရက္ခတော သော တိဒိဝါဓိဝါသိဟိ၊
သဆန္နကော ကန္တကဝါဇိယာနတော၊
တတော မဟာကာရုဏိကော’ဘိနိက္ခမိ။
ကမေန ပတွာန အနောမမာပဂံ၊
သုဓောတမုတ္တာဖလဟာရိသေကတေ၊
ပတိဋ္ဌဟိတွာ ဝရမောဠိဗန္ဓနံ၊
သိတာသိလူနံ ဂဂနေ သမုက္ခိပီ။
၃၃။ ¶
ပဋိဂ္ဂဟေတွာ တိဒသာနမိဿရော၊
သုဝဏ္နစင်္ဂေါဋဝရေန တံ တဒါ၊
တိယောဇနံ နီလမဏီဟိ စေတိယံ၊
အကာသိ စူဠာမဏိမတ္တနော ပုရေ။
တတော ဃဋီကာရသရောဇယောနိနာ၊
သမာဟဋံ ဓာရယီ စီဝရာဒိကံ၊
အထော သကံ ဝတ္ထယုဂံ နဘတ္ထလေ၊
ပသတ္ထဝေသဂ္ဂဟဏော သမုက္ခိပီ။
ပဋိဂ္ဂဟေတွာန တမမ္ဗုဇာသနော၊
မဟိဒ္ဓိကော ဘတ္တိဘရေန စောဒိတော၊
သကေ ဘဝေ ဒွါဒသယောဇနံ အကာ၊
မဏီဟိ နီလာဒိဟိ ဒုဿစေတိယံ။
၃၆။ ¶
သုသညတတ္တော သတိမာ ဇိတိန္ဒြိယော၊
ဝိနီတဝေသော ရသဂေဓဝဇ္ဇိတော၊
ဆဟာယနာနေဝ အနောမဝိက္ကမော၊
မဟာပဓာနံ ပဒဟိတ္ထ ဒုက္ကရံ။
ဝိသာခမာသဿထ ပုဏ္ဏမာသိယံ၊
ဥပေစ္စ မူလံ သဟဇာယ ဗောဓိယာ၊
တိဏာသနေ စုဒ္ဒသဟတ္ထသမ္မိတေ၊
အဓိဋ္ဌဟိတွာ ဝီရိယံ နိသဇ္ဇိ သော။
အဝတ္ထရန္တိံ ဝသုဓံစ အမ္ဗရံ၊
ဝိရူပဝေသဂ္ဂဟဏေန ဘိံသနံ၊
ပကမ္ပယန္တော သဓရာဓရံ မဟိံ၊
ဇိနော ပဒေါသေ’ဇိနိ မာရဝါဟိဏိံ။
၃၉။ ¶
သုရာသုရဗြဟ္မဂဏေဟိ သဇ္ဇိတေ၊
ဇဂတ္တယေ ပုပ္ဖမယဂဃိကာဒိနာ၊
ပဝတ္တမာနေ သုရဒုန္ဒုဘိဿရေ၊
အဗုဇ္ဈိဗောဓိံ ရဇနီပရိက္ခယေ။
တဒါ ပကမ္ပိံသု သသေလကာနနာ၊
သဟဿသံခါ ဒသလောကဓာတုယော၊
အဂဉ္ဇိ သော လောဏပယောဓိ သာဓုတံ၊
မဟာဝဘာသော ဘုဝနေသု ပတ္ထရီ။
လဘိံသု အန္ဓာ ဝိမလေ ဝိလောစနေ၊
သုဏိံသု သဒ္ဒေ ဗဓိရာပိ ဇာတိယာ၊
လပိံသု မူဂါ ဝစနေန ဝဂ္ဂုနာ၊
စရိံသု ခေလံ ပဒသာ’ဝ ပင်္ဂုလာ။
ဘဝိံသု ခုဇ္ဇာ ဥဇုသောမ္မဝိဂ္ဂဟာ၊
သိခီ’ပိ နိဗ္ဗာယိ အဝီစိအာဒိသု၊
အပါဂမုံ ဗန္ဓနတော’ပိ ဇန္တဝေါ၊
ခုဒါဒိကံ ပေတဘဝါ အပက္ကမီ။
၄၃။ ¶
သမိံသု ရောဂဝျသနာနိ ပါဏိနံ၊
ဘယံ တိရစ္စာနဂတေ န ပီဠယီ၊
ဇနာ အဟေသုံ သခိလာ ပိယံဝဒါ၊
ပဝတ္တယုံ ကောဉ္စနဒံ မတင်္ဂဇာ။
ဟယာ စ ဟေသိံသု ပဟဋ္ဌမာနသာ၊
နဒိံသု သဗ္ဗာ သယမေဝ ဒုန္ဒုဘီ၊
ရဝိံသု ဒေဟာဘရဏာနိ ပါဏိနံ၊
ဒိသာ ပသီဒိံသု သမာ သမန္တတော။
ပဝါယိ မန္ဒော သုခသီတမာရုတော၊
ပဝဿိ မေဃော’ပိ အကာလသမ္ဗဝေါ၊
ဇဟိံသု အာကာသဂတိံ ဝိဟင်္ဂမာ၊
မဟိံ သမုဘိဇ္ဇဇလံ သမုဋ္ဌဟီ။
အသန္ဒမာနာ’ဝ ဌိတာ သဝန္တိယော၊
နဘေ ဝိရောစိံသု အသေသဇောတိယော၊
ဘဝါ အဟေသုံ ဝိဝဋာ သမန္တတော၊
ဇနဿ နာသုံ ဝစနူပပတ္တိယော။
၄၇။ ¶
သမေက္ခတံ နာဝရဏာ နဂါဒယော၊
ပဝါယိ ဂန္ဓော အပိ ဒိဗ္ဗသမ္မတော၊
ဒုမာ အဟေသုံ ဖလပုပ္ဖ ဓာရိနော၊
အဟောသိ ဆန္နော ကမလေဟိ အဏ္ဏဝေါ။
ထလေသု တောယေသု စ ပုပ္ဖမာနကာ၊
ဝိစိတ္တပုပ္ဖာ ဝိကသိံသု သဗ္ဗထာ၊
နိရန္တရံ ပုပ္ဖသုဂန္ဓဝုဋ္ဌိယာ၊
အဟောသိ သဗ္ဗံ ဝသုဓမ္ဗရန္နရံ။
နိသဇ္ဇ ပလ္လင်္ကဝရေ တဟိံ ဇိနော၊
သုခံ သမာပတ္တိဝိဟာရသမ္ဘဝံ၊
တတော’နုဘောန္တော သုစိရာဘိပတ္ထိတံ၊
ဒိနာနိ သတ္တေဝ အတိက္ကမာပယီ။
၅၀။ ¶
သမုပ္ပတိတွာ ဂဂဏင်္ဂနံ တတော၊
ပဒဿယိတွာ ယမကံ မဟာမုနိ၊
သပါဋိဟီရံ တိဒိဝါဓိဝါသိနံ၊
ဇိနတ္တနေ သံသယိတံ နိရာကရိ။
အထောတရိတွာန ဇယာသနဿ သော၊
ဌိတော’ဝ ပုဗ္ဗုတ္တရကဏ္ဏနိဿိတော၊
ဒိနာနိ သတ္တာနိမိသေန စက္ခုနာ၊
တမာသနံ ဗောဓိတရုံစ’ပူဇယိ။
အထ’န္တရာဠေ မဏိစင်္ကမေ ဇိနော၊
ဌိတပ္ပဒေသဿ စ အာသနဿ စ၊
မဟာရဟေ ဒေဝဝရာဘိနိမ္မိတေ၊
ဒိနာနိ သတ္တေဝ အကာသိ ဝင်္ကမံ။
၅၃။ ¶
တတော ဒိသာယံ အပရာယ ဗောဓိယာ၊
ဥပါဝိသိတွာ ရတနာလယေ ဇိနော၊
သမန္တပဋ္ဌာနနယံ ဝိစိန္တယံ၊
ဒိနာနိ သတ္တေဝ သဝီတိနာမယိ။
ဝိနိဂ္ဂတော သတ္ထုသရီရတော တဒါ၊
ဇုတိပ္ပဗန္ဓော ပဋိဗန္ဓဝဇ္ဇိတော၊
ပမာဏသုညာသု စ လောကဓာတုသု၊
သမန္တတော ဥဒ္ဓမဓော စ ပတ္ထရီ။
ဝဋဿ မူလေ အဇပါလသညိနော၊
သုခံ ဖုသန္တော ပဝိဝေကသမ္ဘဝံ၊
ဝိနာယကော သတ္တ ဝိဟာသိ ဝါသရေ၊
အနန္တဒဿီ သုရရာဇပူဇိတော။
၅၆။ ¶
ဝိဟာသိ မူလေ မုစလိန္ဒသာခိနော၊
နိသဇ္ဇ ဘောဂါဝလိမန္ဒိရောဒရေ၊
ဝိကိဏ္ဏပုပ္ဖေ မုစလိန္ဒဘောဂိနော၊
သမာဓိနာ ဝါသရသတ္တကံ ဇိနော။
ဒုမေ’ပိ ရာဇာယတနေ သမာဓိနာ၊
ဝိဟာသိ ရတ္တိန္ဒိဝ သတ္တကံ မုနိ၊
သဟဿနေတ္တော အထ ဒန္တပေါဏကံ၊
မုခေါဒကဉ္စာပိ အဒါသိ သတ္ထုနော။
တတော မဟာရာဇဝရေဟိ အာဘတံ၊
သိလာမယံ ပတ္တ စတုက္ကမေကကံ၊
ဝိဓာယ မတ္ထံ မဓုပိဏ္ဍိကံ တဟိံ၊
ပဋိဂ္ဂဟေတွာန သဝါဏိဇာဟဋာ။
၅၉။ ¶
ကတန္နကိစ္စော သရဏေသု တေ ဥဘော၊
ပတိဋ္ဌပေတွာန တပဿုဘလ္လိကေ၊
အဒါသိ တေသံ အဘိပူဇိတုံ သကံ၊
ပရာမသိတွာန သိရံ သိရောရုဟေ။
ဝဋဿမုလေ အဇပါလသညိနော၊
သဟမ္ပတီဗြဟ္မဝရေန ယာစိတော၊
ဇနဿ ကာတုံ ဝရဓမ္မသင်္ဂဟံ၊
အဂဉ္ဆိ ဗာရာဏသိမေကကော မုနိ။
၆၁။ ¶
ဂန္တွာ သော ဓမ္မရာဇာ ဝနမိသိပတနံ သညတာနံ နိကေတံ၊
ပလ္လင်္ကသ္မိံ နိသိန္နော တဟိမဝိစလိတဋ္ဌာနသမ္ပာဒိတမှိ၊
အာသာဠှေ ပုဏ္ဏမာယံ သိတရုစိရုစိယာ ဇောတိတေ စက္ကဝါဠေ၊
ဒေဝဗြဟ္မာဒိကာနံ ဒုရိတမလဟရံ ဝတ္တယိ ဓမ္မစက္ကံ။
သုတွာ သဒ္ဓမ္မမဂ္ဂံ တိဘူဝနကုဟရာဘောဂဝိတ္ထာရိကံ တံ၊
အညာကောဏ္ဍညနာမဒွိဇမုနိပမုခါဋ္ဌာရသဗြဟ္မကောဋီ၊
အညာသုံ မဂ္ဂဓမ္မံ ပရိမိတရဟိတေ စက္ကဝါဠေ ဥဠာရော၊
ဩဘာသော ပါတုဘုတော သပဒိ ဗဟုဝိဓံ အာသိ အစ္ဆေရကဉ္စ။
ပဌမော ပရိစ္ဆေဒေါ။
၆၃။ ¶
တတော ပဋ္ဌာယ သော သတ္ထာ ဝိနေန္တော ဒေဝမာနုသေ၊
ဗောဓိတော ဖုဿမာသမှိ နဝမေ ပုဏ္ဏမာသိယံ။
လင်္ကမာဂမ္မ ဂင်္ဂါယ တီရေ ယောဇနဝိတ္ထတေ၊
မဟာနာဂဝနုယျာနေ အာယာမေန တိယောဇနေ။
ယက္ခာနံ သမိတိံ ဂန္တွာ ဌတွာန ဂဂနေ တဟိံ၊
ဝါတန္ဓကာရဝုဋ္ဌိဟိ ကတွာ ယက္ခေ ဘယဒ္ဒိတေ။
လဒ္ဓါဘယေဟိ ယက္ခေဟိ တေဟိ ဒိန္နာယ ဘုမိယာ၊
စမ္မခဏ္ဍံ ပသာရေတွာ နိသီဒိတွာန တင်္ခဏေ။
စမ္မခဏ္ဍံ ပဒိတ္တဂ္ဂိ ဇာလာမာလာသမာကုလံ၊
ဣဒ္ဓိယာ ဝဍ္ဎယိတွာန ယာဝ သိန္ဓုံ သမန္တတော။
၆၈။ ¶
ဇဝေန သိန္ဓုဝေလာယ ရာသိဘုတေ နိသာစရေ၊
ဂိရိဒီပမိဓာနေတွာ ပတိဋ္ဌာပေသိ တေ တဟိံ။
ဒေသယိတွာ ဇိနော ဓမ္မံ တဒါ ဒေဝသမာဂမေ၊
ဗဟုန္နံ ပါဏကောဋီနံ ဓမ္မာဘိသမယံ အကာ။
မဟာသုမနဒေဝဿ သေလေ သုမနကူဋကေ၊
ဒတွာ နမဿိတုံ ကေသေ အဂါ ဇေတဝနံ ဇိနော။
ပတိဋ္ဌပေတွာ တေ သတ္ထု နိသိန္နာသနဘုမိယံ၊
ဣန္ဒနီလမယံ ထူပံ ကရိတွာ သော အပူဇယိ။
နိဿာယ မဏိပလ္လင်္ကံ ပဗ္ဗတဏ္ဏဝဝါသိနော၊
ဒိသွာ ယုဒ္ဓတ္ထိကေ နာဂေ စူဠောဒရ မဟောဒရေ။
ဗောဓိတော ပဉ္စမေ ဝဿေ စိတ္တမာသေ မဟာမုနိ၊
ဥပေါသထေ ကာလပက္ခေ နာဂဒီပမုပါဂမီ။
၇၄။ ¶
တဒါ သမိဒ္ဓိသုမနော ဒေဝေါ ဇေတဝနေ ဌိတံ၊
အတ္တနော ဘဝနံယေဝ ရာဇာယတနပါဒပံ။
ဣန္ဒနီလဒ္ဒိကူဋံ’ဝ ဂဟေတွာတုဋ္ဌမာနသော၊
ဓာရယိတွာ သဟာဂဉ္ဆိ ဆတ္တံ ကတွာန သတ္ထုနော။
ဥဘိန္နံ နာဂရာဇူနံ ဝတ္တမာနေ မဟာဟဝေ၊
နိသိန္နော ဂဂနေ နာထော မာပယိတ္ထ မဟာတမံ။
အာလောကံ ဒဿယိတွာထ အဿာသေတွာန ဘောဂိနော၊
သာမဂ္ဂိကရဏံ ဓမ္မံ အဘာသိ ပုရိသာသဘော။
အသီတိကောဋိယော နာဂါ အစလမ္ဗုဓိဝါသိနော၊
ပတိဋ္ဌဟိံသု မုဒိတာ သီလေသု သရဏေသု စ။
၇၉။ ¶
ဒတွာန မဏိပလ္လင်္ကံ သတ္ထုနော ဘုဇဂါဓိပါ၊
တတ္ထာသီနံ မဟာဝီရံ အန္နပါနေဟိ တပ္ပယုံ။
ပတိဋ္ဌပေတွာ သော တတ္ထ ရာဇာယတနပါဒပံ၊
ပလ္လင်္ကံ တဉ္စ နာဂါနံ အဒါသိ အဘိပူဇိတုံ။
ဗောဓိတော အဋ္ဌမေ ဝဿေ ဝေသာခေ ပုဏ္ဏမာသိယံ၊
မဏိအက္ခိကနာမေန နာဂိန္ဒေန နိမန္တိတော။
နာဂရာဇဿ တဿေဝ ဘဝနံ သာဓု သဇ္ဇီတံ၊
ကလျာဏိယံ ပဉ္စဘိက္ခူ သတေဟိ သဟ အာဂမိ။
ကလျာဏိစေတိယဋ္ဌာနေ ကတေ ရတန မဏ္ဍပေ၊
မဟာရဟမှိ ပလ္လင်္ကေ ဥပါဝိသိ နရာသဘော။
ဒိဗ္ဗေဟိ ခဇ္ဇဘောဇ္ဇေဟိ သသင်္ဃံ လောကနာယကံ၊
သန္တပ္ပေသိ ဖဏိန္ဒော သော ဘုဇင်္ဂေဟိ ပုရက္ခတော။
၈၅။ ¶
ဒေသယိတွာန သဒ္ဓမ္မံ သဂ္ဂမောက္ခသုခါဝဟံ၊
သော သတ္ထာ သုမနေ ကူဋေ ဒဿေသိ ပဒလဉ္ဆနံ။
တတော ပဗ္ဗတပါဒမှိ သသင်္ဃော သော ဝိနာယကော၊
ဒိဝါဝိဟာရံ ကတွာန ဒီဃဝါပိံ ဥပါဂမိ။
ထူပဋ္ဌာနေ တဟိံ ဗုဒ္ဓါ သသင်္ဃော’ဘိနိသီဒိယ၊
သမာပတ္တိ သမုဗဘုတံ အဝိန္ဒိ အသမံ သုခံ။
မဟာဗောဓိတရုဋ္ဌာနေ သမာဓိံ အပ္ပယိ ဇိနော၊
မဟာထူပပ္ပဒေသေ စ ဝိဟရိတ္ထ သမာဓိနာ။
ထူပါရာမမှိ ထူပဿ ဌာနေ ဈာနသုခေန သော၊
သဘိက္ခုသင်္ဃော သမ္ဗုဒ္ဓါ မုဟုတ္တံ ဝီတိနာမယီ။
၉၀။ ¶
သိလာထုပပ္ပဒေသမှိ ဌတွာကာလာဝိဒူ မုနိ၊
ဒေဝေ သမနုသာသိတွာ တတော ဇေတဝနံ အဂါ။
အဂိဒ္ဓါ လာဘသက္ကာရေ အသယှမဝမာနနံ၊
သဟန္တော ကေဝလံ သဗ္ဗ လောကနိတ္ထရဏတ္ထိကော။
သံဝစ္ဆရာနိ ဌတွာန စတ္တာဠီသဉ္စ ပဉ္စ စ၊
ဒေသယိတွာန သုတ္တာဒိ နဝင်္ဂံ သတ္ထုသာသနံ။
တာရေတွာ ဘဝကန္တာရာ ဇနေ သင်္ချာတိဝတ္တိနော၊
ဗုဒ္ဓကိစ္စာနိ သဗ္ဗာနိ နိဋ္ဌာပေတွာန စက္ခုမာ။
၉၄။ ¶
ကုသိနာရာပုရေ ရညံ မလ္လာနမုပဝတ္တနေ၊
သာလဝနမှိ ယမကသာလရုက္ခာနမန္တရေ။
မဟာရဟေ သုပညတ္တေ မဉ္စေ ဥတ္တရသီသကံ၊
နိပန္နော သီဟသေယျာယ ဝေသာခေ ပုဏ္ဏမာသိယံ။
ဒေသေတွာ ပဌမေ ယာမေ မလ္လာနံ ဓမ္မမုတ္တမံ၊
သုဘဒ္ဒံ မဇ္ဈိမေ ယာမေ ပါပေတွာ အမတံ ပဒံ။
ဘိက္ခု ပစ္ဆိမယာမမှိ ဓမ္မက္ခန္ဓေ အသေသကေ၊
သင်္ဂယှ ဩဝဒိတွာန အပ္ပမာဒ ပဒေန စ။
ပစ္စုသသမယေ ဈာနသမာပတ္တိဝိဟာရတော၊
ဥဋ္ဌာယ ပရိနိဗ္ဗာယိ သေသောပါဒိဝိဝဇ္ဇိတော။
၉၉။ ¶
မဟီကမ္ပာဒယော အာသုံ တဒါ အစ္ဆရိယာဝဟာ၊
ပူဇာဝိသေသာ ဝတ္တိံသု ဒေဝမာနုသကာ ဗဟူ။
ပရိနိဗ္ဗာဏသုတ္တန္တေ ဝုတ္တာနုက္ကမတော ပန၊
ပူဇာဝိသေသော ဝိညေယျော ဣစ္ဆန္တေဟိ အသေသတော။
အဟတေဟိ စ ဝတ္ထေဟိ ဝေဌေတွာ ပဌမံ ဇိနံ၊
ဝေဌယိတွာန ကပ္ပာသပိစုနာ ဝိဟတေန စ။
ဧဝံ ပဉ္စသတက္ခတ္တုံ ဝေဌယိတွာန သာဓုကံ၊
ပက္ခိပိတွာ သုဝဏ္ဏာယ တေလပုဏ္ဏာယ ဒေါဏိယာ။
ဝီသံဟတ္ထသတုဗ္ဗေဓံ ဂန္ဓဒါရူဟိ သင်္ခတံ၊
အာရောပယိံသု စိတကံ မလ္လာနံ ပမုခါ တဒါ။
မဟာကဿပထေရေန ဓမ္မရာဇေ အဝန္ဒိတေ၊
စိတကံ မာ ဇလိတ္ထာတိ ဒေဝဓိဋ္ဌာနတော ပန။
၁၀၅။ ¶
ပါမောက္ခာ မလ္လရာဇူနံ ဝါယမန္တောပ’နေကဓာ၊
စိတကံ တံ န သက္ခိံသု ဂါဟာပေတုံ ဟုတာသနံ။
မဟာကဿပထေရေန အဓိဋ္ဌာနေန အတ္တနော၊
ဝတ္ထာဒီနိ မဟာဒေါဏိံ စိတကဉ္စ မဟာရဟံ။
ဒွိဓာ ကတွာန နိက္ခမ္မ သကသီသေ ပတိဋ္ဌိတာ၊
ဝန္ဒိတာ သတ္ထုနော ပါဒါ ယထာဋ္ဌာနေ ပတိဋ္ဌိတာ။
တတော ဒေဝါနုဘာဝေန ပဇ္ဇလိတ္ထ စိတာနလော၊
န မသိ သတ္ထုဒေဟဿ ဒဍ္ဎဿာသိ န ဆာရိကာ။
ဓာတုယော အဝသိဿိံသု မုတ္တာဘာ ကဉ္စနပ္ပဘာ၊
အဒိဋ္ဌာနေန ဗုဒ္ဓဿ ဝိပ္ပကိဏ္ဏာ အနေကဓာ။
၁၁၀။ ¶
ဥဏှီသံ အက္ခကာ ဒွေ စ စတဿော ဒန္တဓာတုယော၊
ဣစ္စေတာ ဓာတုယော သတ္တ ဝိပ္ပကိဏ္ဏာ န သတ္ထုနော။
အာကာသတော ပတိတွာပိ ဥဂ္ဂန္တွာပိ မဟီတလာ၊
သမန္တာ ဇလဓာရာယော နိဗ္ဗာပေသုံ စိတာနလံ။
ထေရဿ သာရိပုတ္တဿ အန္တေဝါသိ မဟိဒ္ဓိကော၊
သရဘုနာမကော ထေရော ပဘိန္န ပဋိသမ္ဘိဒေါ။
ဂီဝါဓာတုံ ဂဟေတွာန စိတတော မဟိယင်္ဂဏေ၊
ပတိဋ္ဌပေတွာ ထူပမှိ အကာ ကဉ္စုကစေတိယံ။
ခေမဝှယော ကာရုဏိကော ခီဏသံယောဇနော မုနိ၊
စိတကာ တော တတော ဝါမဒါဌာဓာတုံ သမဂ္ဂဟိ။
အဋ္ဌန္နမထ ရာဇုနံ ဓာတုအတ္ထာယ သတ္ထုနော၊
ဥပ္ပန္နံ ဝိဂ္ဂဟံ ဒေါဏော သမေတွာန ဒွိဇုတ္တမော။
၁၁၆။ ¶
ကတွာန အဋ္ဌ ကောဋ္ဌာသေ ဘာဇေတွာ သေသဓာတုယော၊
အဒါသိ အဋ္ဌရာဇူနံ တံ တံ နဂရဝါသိနံ။
ဟဋ္ဌတုဋ္ဌာ ဂဟေတွာန ဓာတုယော တာ နရာဓိပါ၊
ဂန္တွာ သကေ သကေ ရဋ္ဌေ စေတိယာနိ အကာရယုံ။
ဧကာ ဒါဌာ သုရိန္ဒေန ဧကာ ဂန္ဓာရဝါသိဟိ၊
ဧကာ ဘုဇင်္ဂရာဇူဟိ အာသိ သက္ကတပူဇိတာ။
ဒန္တဓာတုံ တတော ခေမော အတ္တနာ ဂဟိတံ အဒါ၊
ဒန္တပုရေ ကလိင်္ဂဿ ဗြဟ္မဒတ္တဿ ရာဇိနော။
ဒေသယိတွာန သော ဓမ္မံ ဘေတွာ သဗ္ဗာ ကုဒိဋ္ဌိယော၊
ရာဇာနံ တံ ပသာဒေသိ အဂ္ဂမ္ဘီ ရတနတ္တယေ။
၁၂၁။ ¶
အဇ္ဈောဂါဠှော မုနိန္ဒဿ ဓမ္မာမတမဟဏ္ဏဝံ၊
သော နရိန္ဒောပဝါဟေသိ မလံ မစ္ဆရိယာဒိကံ။
ပါဝုဿကော ယထာ မေဃော နာနာ ရတနဝဿတော၊
ဒါဠိဒ္ဒိယနိဒါဃံ သော နိဗ္ဗာပေသိ နရုတ္တမော။
သုဝဏ္ဏခစိတာလမ္ဗ မုတ္တာဇာလေဟိ သောဘိတံ၊
ကူဋာဂါရသတာကီဏ္ဏံ တရုဏာဒိစ္စသန္နိဘံ။
နာနာရတနသောဘာယ ဒုဒိက္ခံ စက္ခုမူသနံ၊
ယာနံ သဂ္ဂါပဝဂ္ဂဿ ပသာဒါတိသယာဝဟံ။
ကာရယိတွာန သော ရာဇာ ဒါဌာဓာတုနိဝေသနံ၊
ဓာတုပီဌဉ္စ တတ္ထေဝ ကာရေတွာ ရတနုဇ္ဇလံ။
တဟိံ သမပ္ပယိတွာန ဒါဌာဓာတုံ မဟေသိနော၊
ပူဇာဝတ္ထူဟိ ပူဇေသိ ရတ္တိန္ဒိဝမတန္ဒိတော။
၁၂၇။ ¶
ဣတိ သော သဉ္စိနိတွာန ပုညသမ္ဘာရ သမ္ပဒံ၊
ဇဟိတွာ မာနုသံ ဒေဟံ သဂ္ဂကာယမလင်္ကရိ။
အနုဇာတော တတော တဿ ကာသိရာဇဝှယော သုတော၊
ရဇ္ဇံ လဒ္ဓါ အမစ္စာနံ သောကသလ္လမပါနုဒီ။
ပုပ္ဖဂန္ဓာဒိနာ ဒန္တဓာတုံ တမဘိပူဇိယ၊
နိစ္စံ မဏိပ္ပဒီပေဟိ ဇောတယိ ဓာတုမန္ဒိရံ။
ဣစ္စေဝမာဒိံ သော ရာဇာ ကတွာ ကုသလသဉ္စယံ၊
ဇဟိတွာန နိဇံ ဒေဟံ ဒေဝိန္ဒပုရမဇ္ဈဂါ။
သုနန္ဒော နာမ ရာဇိန္ဒော အာနန္ဒဇနနော သတံ၊
တဿ’တြဇော တတော အာသိ ဗုဒ္ဓသာသနမာမကော။
သမ္မာနေတွာန သော ဒန္တဓာတုံ ဉေယျန္တဒဿိနော၊
မဟတာ ဘတ္တိယောဂေန အဂါ ဒေဝသဟဝျတံ။
၁၃၃။ ¶
တတော ပရဉ္စ အညေ’ပိ ဗဟဝေါ ဝသုဓာဓိပါ၊
ဒန္တဓာတုံ မုနိန္ဒဿ ကမေန အဘိပူဇယုံ။
ဂုဟသီဝဝှယော ရာဇာ ဒုရတိက္ကမ သာသနော၊
တတော ရဇ္ဇသိရိံ ပတွာ အနုဂဏှိ မဟာဇနံ။
သပရတ္ထာနဘိညေ သော လာဘသက္ကာရလောလုပေ၊
မာယာဝိနော အဝိဇ္ဇန္ဓေ နိဂန္ဌေ သမုပဋ္ဌဟိ။
ဝဿာရတ္တေ ယထာ စန္ဒော မောဟက္ခန္ဓေန အာဝဋော၊
နာသက္ခီ ဂုဏရံသီဟိ ဇလိတုံ သော နရာသဘော။
ဓမ္မမဂ္ဂါ အပေတေ’ပိ ပဝိဋ္ဌေ ဒိဋ္ဌိကာနနံ၊
တသ္မိံ သာဓုပထံ အညေ နာတိဝတ္တိံသု ပါဏိနော
၁၃၈။ ¶
ဟေမတောရဏမာလာဟိ ဓဇေဟိ ကဒလိဟိ စ၊
ပုပ္ဖဂဃိယေဟိ’နေကေဟိ သဇ္ဇေတွာ နာဂရာ ပုရံ
မင်္ဂလတ္ထုတိ ဃောသေဟိ နစ္စဂီတာဒိကေဟိ စ၊
ဟေမရူပိယပုပ္ဖေဟိ ဂန္ဓစုဏ္ဏာဒိကေဟိ စ။
ပူဇေန္တာ မုနိရာဇဿ ဒါဌာဓာတုံ ကုဒါစနံ၊
အကံသု ဧကနိဂ္ဃောသံ သံဝဋ္ဋမ္ဗုဓိသန္နိဘံ။
ဥဂ္ဃာဋေတွာ နရိန္ဒော သော ပါသာဒေ သိဟပဉ္ဇရံ၊
ပဿန္တော ဇနမဒ္ဒက္ခီ ပူဇာဝိဓိပရာယဏံ။
အထာမစ္စသဘာမဇေတ္ဓ ရာဇာ ဝိမ္ဘီတ မာနသော၊
ကောတုဟလာကုလော ဟုတွာ ဣဒံ ဝစနမဗြဝီ။
အစ္ဆေရကံ ကိမေတန္နု ကီဒိသံ ပါဋိဟာရိယံ၊
မမေတံ နဂရံ ကသ္မာ ဆဏနိဿိတကံ ဣတိ။
၁၄၄။ ¶
တတော အမစ္စော အာစိက္ခိ မေဓာဝီ ဗုဒ္ဓမာမကော၊
ရာဇိနော တဿ သမ္ဗုဒ္ဓါနုဘာဝမဝိဇာနတော။
သဗ္ဗာဘိဘုဿဗုဒ္ဒဿ တနှာသင်္ကယဒဿိနော၊
ဧသာ ဓာတု မဟာရာဇ ခေမတ္ထေရေန အာဟဋာ။
တံ ဓာတုံ ပူဇယိတွာန ရာဇာနော ပုဗ္ဗကာ ဣဓ၊
ကလျာဏမိတ္တေ နိဿာယ ဒေဝကာယမုပါဂမုံ။
နာဂရာပိ ဣမေ သဗ္ဗေ သမ္ပရာယ သုကတ္ထိကာ၊
ပူဇယန္တိ သမာဂမ္မ ဓာတုံ တံ သတ္ထုနော ဣတိ။
တဿာမစ္စဿ သော ရာဇာ သုတွာ ဓမ္မံ သုဘာသိတံ၊
ဒုလ္လဒ္ဓီမလမုဇ္ဈိတွာ ပသီဒိ ရတနတ္တယေ။
၁၄၉။ ¶
ဓာတုပူဇံ ကရောန္တော သော ရာဇာ အစ္ဆရိယာ ဝဟံ၊
တိတ္ထိယေ ဒုမ္မနေ’ကာသိ သုမနေ စေတရေ ဇနေ။
ဣမေ အဟိရိကာ သဗ္ဗေ သဒ္ဓါဒိဂုဏဝဇ္ဇိတာ၊
ထဒ္ဓါ သဌာ စ ဒုပ္ပညာ သဂ္ဂမောက္ခဝိဗန္ဓကာ။
ဣတိ သော စိန္တယိတွာန ဂုဟသီဝေါ နရာဓိပေါ၊
ပဗ္ဗာဇေသိ သကာ ရဋ္ဌာ နိဂဏ္ဌေ တေ အသေသကေ။
တတော နိဂ္ဏ္ဌာ သဗ္ဗေ’ပိ ဃတသိတ္တာနလာ ယထာ၊
ကောဓဂ္ဂိဇလိတာ’ဂဉ္ဆုံ ပုရံ ပါဋလိပုတ္တကံ။
တတ္ထ ရာဇာ မဟာတေဇော ဇမ္ဗုဒီပဿ ဣဿရော၊
ပဏ္ဍုနာမော တဒါ အာသိ အနန္တဗလဝါဟဏော။
၁၅၄။ ¶
ကောဓန္ဓာထ နိဂဏ္ဌာ တေ သဗ္ဗေ ပေသုညကာရကာ၊
ဥပသင်္ကမ္မ ရာဇာနံ ဣဒံ ဝစနမဗြဝူံ။
သဗ္ဗဒေဝမနုဿေဟိ ဝန္ဒနီယေ မဟိဒ္ဓိကေ၊
သိဝဗြဟ္မာဒယော ဒေဝေ နိစ္စံ တုမှေ နမဿထ။
တုယှံ သာမန္တဘုပါလော ဂုဟသီဝေါ ပနာဓုနာ၊
နိန္ဒန္နော တာဒိသေ ဒေဝေ ဆဝဋ္ဌိံ ဝန္ဒတေ ဣတိ။
သုတွာန ဝစနံ တေသံ ရာဇာ ကောဓဝသာနုဂေါ၊
သူရံ သာမန္တဘူပါလံ စိတ္တယာနမထ’ဗြဝီ။
ကလိင်္ဂရဋ္ဌံ ဂန္တွာန ဂုဟသီဝမိဓာနယ၊
ပူဇိတံ တံ ဆဝဋ္ဌိဉ္စ တေန ရတ္တိန္ဒိဝံ ဣတိ။
စိတ္တယာနော တတော ရာဇာ မဟတိံ စတုရင်္ဂိနိံ၊
သန္နယဟိတွာ သကံ သေနံ ပုရာ တမှာဘိနိက္ခမိ။
၁၆၀။ ¶
ဂန္တွာန သော မဟီပါလော သေနင်္ဂေဟိ ပုရက္ခတော၊
ဒန္တပုရဿာဝိဒူရေ ခန္ဓာဝါရံ နိဝေသယိ။
သုတွာ အာဂမနံ တဿ ကလိင်္ဂေါ သော မဟိပတိ၊
ဂဇိန္ဒပါဘတာဒိဟိ တံ တောသေသိ နရာဓိပံ။
ဟိတဇ္ဈာသယတံ ဉတွာ ဂုဟသီဝဿ ရာဇိနော၊
ဒန္တပုရံ စိတ္တယာနော သဒ္ဓိံ သေနာယ ပါဝိသိ။
ပါကာရဂေါပုရဋ္ဋာလပါသာဒဂဃိကစိတ္တိတံ၊
ဒါနသာလာဟိ သော ရာဇာ သမိဒ္ဓံ ပုရမဒ္ဒသ။
တတော သော သုမနော ဂန္တွာ ပဝိဋ္ဌော ရာဇမန္ဒိရံ၊
ဂုဟသီဝဿ အာစိက္ခိ ပဏ္ဍုရာဇဿ သာသနံ။
၁၆၅။ ¶
သုတွာန သာသနံ တဿ ဒါရုဏံ ဒုရတိက္ကမံ၊
ပသန္နမုခဝဏ္ဏော’ဝ စိတ္တယာနံ သမဗြဝီ။
သဗ္ဗလောကဟိတတ္ထာယ မံသနေတ္တာဒိဒါနတော၊
အနပ္ပကပ္ပေ သမ္ဘာရေ သမ္ဘရိတွာ အတန္ဒိတော။
ဇေတွာ နမုစိနော သေနံ ပတွာ သဗ္ဗာသဝက္ခယံ၊
အနာဝရဏဉာဏေန သဗ္ဗဓမ္မေသု ပါရဂု။
ဒိဋ္ဌဓမ္မသုကဿာဒံ အဂဏေတွာန အတ္တနော၊
ဓမ္မနာဝါယ တာရေသိ ဇနတံ ယော ဘဝဏ္ဏဝါ။
ဒေဝါတိဒေဝံ တံ ဗုဒ္ဓံ သရဏံ သဗ္ဗပါဏိနံ၊
ဇနော ဟိ အဝဇာနန္တော အဒ္ဓါ သော ဝဉ္စိတော ဣတိ။
၁၇၀။ ¶
ဣစ္စေဝမာဒိံ သုတွာန သော ရာဇာ သတ္ထုဝဏ္ဏနံ၊
အာနန္ဒဿုပ္ပဗန္ဓေဟိ ပဝေဒေသိ ပသန္နတံ။
ဂုဟသီဝေါ ပသန္နံ တံ စိတ္တယာနံ ဥဒိက္ခိယ၊
တေန သဒ္ဓိံ မဟဂ္ဃံ တံ အဂမာ ဓာတုမန္ဒိရံ။
ဟရိစန္ဒနသမ္ဘုတံ ဒွါရဗာဟာဒိကေဟိ စ၊
ပဝါဠဝါဠမာလာဟိ လမ္ဗမုတ္တာလတာဟိ စ။
ဣန္ဒနီလကဝါဋေဟိ မဏိကိင်္ကိဏိကာဟိ စ၊
သောဝဏ္ဏကဏ္ဏမာလာဟိ သောဘိတံ မဏိထူပိကံ။
ဥစ္စံ ဝေလုရိယုဗ္ဘာသိ ဆဒနံ မကရာကုလံ၊
ဓာတုမန္ဒိရမဒ္ဒက္ခိ ရတနုဇ္ဇလ ပီဌကံ။
တတော သေတာတပတ္တဿ ဟေဋ္ဌာ ရတနစိတ္တိတံ၊
ဒိသွာ ဓာတုကရန္ဍဉ္စ တုဋ္ဌော ဝိမ္ဘယမဇ္ဈဂါ။
၁၇၆။ ¶
တတော ကလိင်္ဂနာထော သော ဝိဝရိတွာ ကရဏ္ဍကံ၊
မဟီတလေ နိဟန္တွာန ဒက္ခိဏံ ဇာနုမဏ္ဍလံ။
အဉ္ဇလိံ ပဂ္ဂဟေတွာန ဂုဏေ ဒသဗလာဒိကေ၊
သရိတွာ ဗုဒ္ဓသေဋ္ဌဿ အကာသိ အဘိယာစနံ။
ဂဏ္ဍမ္ဗရုက္ခမူလမှိ တယာ တိတ္ထီယမဒ္ဒနေ၊
ယမကံ ဒဿယန္တေန ပါဋိဟာရိယမဗ္ဘုတံ။
ပုဗ္ဗကာယာဒိနိက္ခန္တဇလာနလသမာကုလံ၊
စက္ကဝါဠင်္ဂဏံ ကတွာ ဇနာ သဗ္ဗေ ပသာဒိတာ။
ဒေသေတွာန တယော မာသေ အဘိဓမ္မံ သုဓာသိနံ၊
နဂရံ ဩတရန္တေန သင်္ကဿံ တာဝတိံသတော။
၁၈၁။ ¶
ဆတ္တဝါမရသင်္ခါဒိဂါဟကေဟိ အနေကဓာ၊
ဗြဟ္မဒေဝါသုရာဒီဟိ ပူဇိတေန တယာ ပန။
ဌတွာန မဏိသောပါဏေ ဝိဿကမ္မာဘိနိမ္မိတေ၊
လောကဝိဝရဏံ နာမ ဒဿိတံ ပါဋိဟာရိယံ။
တထာနေကေသု ဌာနေသု မုနိရာဇ တယာပုန၊
ဗဟူနိ ပါဋိဟိရာနိ ဒဿိတာနိ သယမ္ဘုနာ။
ပါဋိဟာရိယမဇ္ဇာပိ သဂ္ဂမောက္ခသုခါဝဟံ၊
ပဿန္တာနံ မနုဿာနံ ဒဿနီယံ တယာ ဣတိ။
၁၈၅။ ¶
အဗ္ဘုဂ္ဂန္တွာ ဂဂဏ ကုဟရံ စန္ဒလေခါဘိရာမာ၊
ဝိဿဇ္ဇေန္တိ ရဇတ ဓဝလာ ရံသိယော ဒန္တဓာတု၊
ဓူပါယန္တိ သပဒိ ဗဟုဓာ ပဇ္ဇလန္တီ မုဟုတ္တံ၊
နိဗ္ဗာယန္တီ နယနသုဘဂံ ပါဋိဟီရံ အကာသိ။
အစ္ဆေရံ တံ ပရမ ရုစိရံ စိတ္တယာနော နရိန္ဒော၊
ဒိသွာ ဟဋ္ဌော စိရပရိစိတံ ဒိဋ္ဌိဇာလံ ဇဟိတွာ၊
ဂန္တွာ ဗုဒ္ဓံ သရဏမသမံ သဗ္ဗသေဏီဟိ သဒ္ဓိံ၊
အဂ္ဂံ ပုညံ ပသဝိ ဗဟုဓာ ဓာတုသမ္မာနနာယ။
ဒုတိယော ပရိစ္ဆေဒေါ
၁၈၇။ ¶
တတော ကလိင်္ဂါဓိပတိဿ တဿသောစိတ္တယာနောပရမပ္ပတီတော၊
တံ သာသနံ ပဏ္ဍုနရာဓိပဿ ဉာပေသိ ဓီရော ဒုရတိက္ကမံ’တိ။
ရာဇာတတော ဒန္တပုရံ ဓဇေဟိ ပုပ္ဖေဟိ ဓူပေဟိ စ တောရဏေဟိ၊
အလင်္ကရိတွာန မဟာဝိတာန နိဝါရိတာဒိစ္စမရီစိဇာလံ။
အဿုပ္ပဗန္ဓာဝုတလောစနေဟိ ပုရက္ခတော နေဂမ နာဂရေဟိ၊
သမုဗ္ဗဟန္တော သိရသာ နိဇေန မဟာရဟံ ဓာတုကရဏ္ဍကံ တံ။
သမုဿိတောဒါရ သိတာတပတ္တံ သင်္ခေါဒရောဒါတ တုရင်္ဂယုတ္တံ၊
ရထံ နဝါဒိစ္စသမာနဝဏ္ဏ မာရုယှ စိတ္တတ္ထရဏာဘိရာမံ။
အနေကသင်္ခေဟိ ဗလေဟိ သဒ္ဓိံ ဝေလာတိဝတ္တမ္ဗုဓိသန္နိဘေဟီ၊
နိဝတ္တမာနဿ ဗဟုဇ္ဇနဿ ဝိနာပိ ဒေဟံ မနသာနုယာတော
၁၉၂။ ¶
သုသန္ထတံ သဗ္ဗဓိဝါလုကာဟိ သုသဇ္ဇိတံ ပုဏ္ဏ ဃဋာဒိကေဟိ၊
ပုပ္ဖာဘိကိဏ္ဏံ ပဋိပဇ္ဇိ ဒီဃံ သုဝိတ္ထတံ ပါဋလိပုတ္တမဂ္ဂံ။
ကလိင်္ဃနာထော ကုသုမာဒိကေဟိ နစ္စေဟိ ဂီတေဟိ စ ဝါဒိတေဟိ၊
ဒိနေ ဒိနေ အဒ္ဓနိ ဒန္တဓာတုံ ပူဇေသိ သဒ္ဓိံ ဝနဒေဝတာဟိ။
သုဒုဂ္ဂမံ သိန္ဓုမဟီဓရေဟိ ကမေန မဒ္ဓါနမတိက္ကမိတွာ၊
အာဒါယ ဓာတုံ မနုဇာဓိနာထော အဂါ ပုရံ ပါဋလိ ပုတ္တနာမံ။
ရာဇာဓိရာဇော’ထ သဘာယ မဇ္ဈေ ဒိသွာန တံ ဝီတဘယံ ဝိသင်္ကံ၊
ကလိင်္ဂရာဇံ ပဋိဃာဘိဘုတော အဘာသိ ပေသုညကရေ နိဂဏ္ဌေ
ဒေဝေ ဇဟိတွာန နမဿနီယေ ဆဝဋ္ဌိမေတေန နမဿိတံ’တံ၊
အင်္ဂါရရာသိမှိ သဇောတိဘူတေ နိက္ခိပ္ပ ခိပ္ပံ ဒဟထာဓုနေတိ။
၁၉၇။ ¶
ပဟဋ္ဌစိတ္တာ’ဝတတော နိဂဏ္ဌာရာဇင်္ဂဏေ တေ မဟတိံ ဂဘီရံ၊
ဝီတစ္စိကင်္ဂါရက ရာသိ ပုဏ္ဏံ အင်္ဂါရကာသုံ အဘိသင်္ခရိံသု။
သမန္တတော ပဇ္ဇလိတာယ တာယ သဇောတိယာ ရောရုဝဘေရဝါယ၊
မောဟန္ဓဘုတာ အထ တိတ္ထိယာ တေ တံ ဒန္တဓာတုံ အဘိနိက္ခိပိံသု။
တဿာနုဘာဝေန တမဂ္ဂီရာသိံ ဟေတွာ သရောဇံ ရထစက္ကမတ္တံ၊
သမန္တတော ဥဂ္ဂတရေဏုဇာလ မုဋ္ဌာသိ ကိဉ္ဇက္ခ ဘရာဘိရာမံ။
တသ္မိံ ခဏေ ပင်္ကဇ ကဏ္ဏိကာယ ပတိဋ္ဌဟိတွာ ဇိနဒန္တဓာတု၊
ကုန္ဒာဝဒါတာဟိ ပဘာဟိ သဗ္ဗာ ဒိသာ ပဘာသေသိ ပဘဿရာဟိ။
၂၀၁။ ¶
ဒိသွာန တံ အစ္ဆရိယံ မနုဿာ ပသန္နစိတ္တာ ရတနာဒိကေဟိ၊
သမ္ပူဇယိတွာ ဇိနဒန္တဓာတုံ သကံ သကံ ဒိဋ္ဌိမဝေါဿဇိံသု။
သော ပဏ္ဍုရာဇာ ပန ဒိဋ္ဌိဇာလံ စိရာနုဗဒ္ဓံ အပရိစ္စဇန္တော၊
ပတိဋ္ဌပေတွာ’ဓိကရညမေတံ ကုဋေန ဃာတာပယိ ဒန္တဓာတုံ။
တဿံ နိမုဂ္ဂါ’ဓိကရညမေသာ ဥပဍ္ဎဘာဂေ နစ ဒိဿမာနာ၊
ပုဗ္ဗာစလဋ္ဌော’ဝ သုဓာမရီစိ ဇောတေသိ ရံသီဟိ ဒိသာ သမန္တာ။
ဒိသွာနုဘာဝံ ဇိနဒန္တဓာတု ယာပဇ္ဇိ သော ဝိမ္ဘယ မဂ္ဂရာဇာ၊
ဧကော’ထ ဣဿာပသုတော နိဂဏ္ဌော တံ ရာဇရာဇာနမိဒံ အဝေါစ။
ရာမာဒယော ဒေဝ ဇနဒ္ဒနဿ နာနာဝတာရာ ဘုဝနေ အဟေသုံ၊
တဿေကဒေသော’စ ဣဒံ ဆဝဋ္ဌိနောစေ’နုဘာဝေါကထမီဒိသောတိ။
၂၀၆။ ¶
အဒ္ဓါ မနုဿတ္တမုပါဂတဿ ဒေဝဿ ပစ္ဆာ တိဒိဝံ ဂတဿ၊
ဒေဟေကဒေသော ဌပိတော ဟိတတ္ထမေတန္တိ သစ္စံဝစနံဘဝေယျ။
သံဝဏ္ဏယိတွာန ဂုဏေ ပဟူတေ နာရာယဏဿ’ဿမဟိဒ္ဓိကဿ၊
နိမုဂ္ဂမေတ္တာ’ဓိကရညမေတံသမ္ပဿတော မေဗဟိနီဟရိတွာ။
သမ္ပာဒယိတွာန မဟာဇနာနံ မုခါနိ ပင်္ကေရုဟသုန္ဒရာနိ၊
ယဋိစ္ဆိတံ ဂဏှထ ဝတ္ထုဇာတံ ဣစ္စာဟ ရာဇာ မုခရေ နိဂဏ္ဌေ။
တေ တိတ္ထိယာ ဝိဏဟုသုရံ ဂုဏေဟိ ဝိစိတ္တ ရူပေဟိ အဘိတ္ထဝိတွာ၊
တောယေန သိဉ္စိံသု သဌာ တထာပိ ဌိတပ္ပဒေသာ န စလိတ္ထ ဓာတု။
ဇိဂုစ္ဆမာနော အထ တေ နိဂဏ္ဌေ သော ဓာတုယာနီဟရဏေ ဥပါယံ၊
အနွေသမာနော ဝသုဓာဓိနာထော ဘေရိံ စရာပေသိ သကေ ပုရမှိ။
၂၁၁။ ¶
နိမုဂ္ဂမေတ္ထာ’ဓိကရညမဇ္ဇိ ယော ဓာတုမေတံ ဗဟိ နီဟရေယျ၊
လဒ္ဓါန သော ဣဿရိယံ မဟန္တံ ရညောသကာသာသုခမေဿတီတိ
သုတွာ န တံ ဘေရိရဝံဥဠာရံပုဉညတ္ထိကောဗုဒ္ဓဗလေပသန္နော၊
တသ္မိံ ပုရေ သေဋ္ဌိသုတော သုဘဒ္ဒေါ ပါဝေက္ခိရညော သမိတိံ ပဂဗ္ဘော။
တမဂ္ဂရာဇံ အထ သော နမိတွာ သာမာဇိကာနံ ဟဒယင်္ဂမာယ၊
ဘာသာယ သဗ္ဗညုဂုဏပ္ပဘာဝံ ဝဏ္ဏေသိ သာရဇ္ဇဝိမုတ္တ စိတ္တော။
ဘုမိံ ကိဏိတွာ မဟတာ ဓနေန မနောရမံ ဇေတဝနံ ဝိဟာရံ၊
ယော ကာရယိတွာန ဇိနဿ ဒတွာ ဥပဋ္ဌဟိ တံ စတုပစ္စယေဟိ။
၂၁၅။ ¶
အနာထပိဏ္ဍိပ္ပဒသေဋ္ဌိသေဋ္ဌောသောဒိဋ္ဌဓမ္မောပပိတာမဟောမေ၊
တိလောကနာထေ မမ ဓမ္မရာဇေ တုမှေ’ဓုနာပဿထဘတ္တိဘာရံ။
ဣတ္ထံ နဒိတွာန ပဟူတပဉေညာ ကတွာန ဧကံသမထုတ္တရီယံ၊
မဟီတလံ ဒက္ခိဏဇာနုကေန အာဟစ္စ ဗဒ္ဓဉ္ဇလိကော အဝေါစ။
ဆဒ္ဒန္တနာဂေါ သဝိသေန ဝိဒ္ဓါ သလ္လေန ယော လောဟိတမက္ခိ တင်္ဂေါ၊
ဆဗ္ဗဏ္ဏရံသီဟိ သမုဇ္ဇလန္တေ ဆေတွာန လုဒ္ဒါယ အဒါသိ ဒန္တေ။
သသော’ပိ ဟုတွာန ဝိသုဒ္ဓသီလော အဇ္ဈတ္တဒါနာဘိရတော ဒွိဇာယ၊
ယော’ဒဇ္ဇိဒေဟမ္ပိ သကံ နိပစ္စ အင်္ဂါရရာသိမှိ ဗုဘုက္ခိတာယ။
၂၁၉။ ¶
ယော ဗောဓိယာ ဗာဟိရဝတ္ထုဒါနာ အတိတ္တရူပေါ သိဝိရာဇ သေဋ္ဌော၊
အဒါသိ စက္ခူနိ ပဘဿရာနိ ဒွိဇာယ ဇိဏ္ဏာယ အစက္ခုကာယ။
ယောခန္တိဝါဒီ’ပိ ကလာဗုရာဇေ ဆေဒါပယန္တေ’ပိ သဟတ္ထပါဒံ၊
ပရိပ္လုတင်္ဂေါရုဓိရေ တိတိက္ခိမေတ္တာယမာနော ယသဒါယကေ’ဝ။
ယော ဓမ္မပါလော အပိ သတ္တမာသ ဇာတောပဒုဋ္ဌေ ဇနကေသကမှိ၊
ကာရာပယန္တေ အသိမာလကမ္မံ စိတ္တံ န ဒူသေသိ ပတာပရာဇေ။
သာခါမိဂေါ ယော အသတာ ပုမေန ဝနေ ပပါတာ သယမုဒ္ဓဋေန၊
သိလာယ ဘိန္နေ’ပိ သကေ လလာဋေ တံ ခေမဘုမိံ အနယိတ္ထမူဠှံ။
ရုဋ္ဌေန မာရေန’ဘိနိမ္မိတမ္ပိ အင်္ဂါရကာသုံ ဇလိတံ ဝိဟိဇ္ဇ၊
သမုဋ္ဌိတေ သဇ္ဇုမဟာရဝိန္ဒေ ဌတွာန ယော သေဋ္ဌိ အဒါသိ ဒါနံ။
၂၂၄။ ¶
မိဂေန ယေနာပေဝိဇညမေကံ ဘီတံဝဓာမောစယိတုံကုရင်္ဂိံ၊
အာဃာတနေ အတ္တသိရံဌပေတွာပမောစိတာ’ည္ဉပိပါဏိသင်္ဃာ။
ယော သတ္တဝဿော ဝိသိခါယ ပံသု ကီဠာပရော သမ္ဘဝနာမကော’ပိ၊
သဗ္ဗညုလီဠှာယ နိဂုဠှပဉှံ ပုဋ္ဌော ဝိယာကာသိ သုစီရတေန။
ဟိတွာ နိကန္တိံ သကဇီဝိတေ’ပိ ဗဒ္ဓါသကုစ္ဆိမှိ စ ဝေတ္တဝလ္လိံ၊
သာခါမိဂေ နေကသဟဿသင်္ခေ ဝဓာပမောစေသိ ကပိဿရောယော။
သန္တပ္ပယံ ဓမ္မသုဓာရသေန ယော မာနုသေ တုဏ္ဍိလသူကရော’ပိ၊
ဣသီ’ဝ ကတွာ အထ ဉာယဂန္ထံ နိဇံ ပဝတ္တေသိ စိရာယ ဓမ္မံ။
၂၂၈။ ¶
ပစ္စတ္ထိကံ ပုဏ္ဏကယက္ခမုဂ္ဂံ မဟိဒ္ဓိကံ ကာမဂုဏေသု ဂိဒ္ဓံ၊
ယော တိက္ခပညောဝိဓုရာဘိဓာနောဒမေသိ ကာဠာဂိရိမတ္တကမှိ။
ကုလာဝသာယိ အဝိရူဠှပက္ခော ယော ဗုဒ္ဓိမာ ဝဋ္ဋကပေါတကော’ပိ၊
သစ္စေန ဒါဝဂ္ဂိမဘိဇ္ဇလန္တံ ဝဿေန နိဗ္ဗာပယိ ဝါရိဒေါ’ဝ။
ယော မစ္ဆရာဇာပိ အဝုဋ္ဌိကာလေဒိသွာနမစ္ဆေ တသိတေကိလန္တေ၊
သစ္စေနဝါကျေနမဟောဃပုဏ္ဏံမုဟုတ္တမတ္တေနအကာသိရဋ္ဌံ။
ဝိစိတ္တဟတ္ထဿ ရထာဒိကာနိ ဝသုန္ဓရာ ကမ္ပန ကာရဏာနိ၊
ပုတ္တေ’နုဇာတေ သဒိသေစဒါရေယော’ဒဇ္ဇိဝေဿန္တရဇာတိယမ္ပိ။
၂၃၂။ ¶
ဗုဒ္ဓါ ဘဝိတွာ အပိ ဒိဋ္ဌဓမ္မ သုခါနပေက္ခော ကရုဏာနုဝတ္တီ၊
သဗ္ဗံ သဟန္တော အဝမာနနာဒိံ ယောဒုက္ကရံ လောကဟိတံအကာသိ။
ဗလေန သဒ္ဓိံ စတုရင်္ဂိကေန အဘိဒ္ဒဝန္တံ အတိဘိံသနေန၊
အဇေယျသတ္ထံ ပရမိဒ္ဓိပတ္တံ ဒမေသိ ယော အာလဝကမ္ပီ ယက္ခံ။
ဒေဟာဘိနိက္ခန္တ ဟုတာသနစ္စိ မာလာကုလံ ဗြဟ္မဘဝံ ကရိတွာ၊
ဘေတွာန ဒိဋ္ဌိံ သုစိရာနုဗဒ္ဓံ ဒမေသိ ယော ဗြဟ္မဝရံ မုနိန္ဒော။
အစ္စင်္ကုသံ ဒါနသုဓောတ ဂဏ္ဍံ နိပါတိတဋ္ဌာလက ဂေါပုရာဒိံ၊
ဓာဝန္တမဂ္ဂေ ဓနပါလဟတ္ထိံ ဒမေသိ ယော ဒါရုဏမန္တကံ’ဝ။
၂၃၆။ ¶
မနုဿရတ္တာရုဏပါဏိပါဒမုက္ခိပ္ပ ခဂ္ဂံ အနုဗန္ဓမာနံ၊
မဟာဒယော ဒုပ္ပသဟံ ပရေဟိ ဒမေသိ ယော အင်္ဂုလိမာလစောရံ။
ယော ဓမ္မရာဇာ ဝိဇိတာရိသင်္ဃော ပဝတ္တယန္တော ဝရဓမ္မစက္ကံ၊
သဒ္ဓမ္မ သညံ ရတနာကရဉ္စ ဩဂါဟယီ သံ ပရိသံ သမဂ္ဂံ။
တဿေဝ သဒ္ဓမ္မ ဝရာဓိပဿတထာဂတဿ’ပ္ပဋိပုဂ္ဂလဿ၊
အနန္တဉာဏဿ ဝိသာရဒဿ ဧသာ မဟာကာရုဏိကဿ ဓာတု။
အနေန သစ္စေန ဇိနဿ ဓာတု ခိပ္ပံ သမာရုယှ နဘန္တရာဠံ၊
သုဓံသုလေခေဝ သမုဇ္ဇလန္တိ ကင်္ခံ ဝိနောဒေတု မဟာဇနဿ။
၂၄၀။ ¶
တသ္မိံ ခဏေ သာ ဇိနဒန္တဓာတု နဘံ သမုဂ္ဂမ္မ ပဘာသယန္တီ၊
သဗ္ဗာ ဒိသာ ဩသဓိတာရကာ’ဝ ဇနံ ပသာဒေသိ ဝ္တိဏ္ဏကင်္ခံ။
အထောတရိတွာ ဂဂနင်္ဂဏမှာ သာ မတ္ထကေ သေဋ္ဌိသုတဿ တဿ၊
ပတိဋ္ဌဟိတွာန သုဓာဘိသိတ္တဂတ္တံ’ဝ တံ ပီဏယိ ဘတ္တိတိန္နံ။
ဒသွာန တံ အစ္ဆရိယံ နိဂဏ္ဌာ ဣစ္စဗြဝုံ ပဏ္ဍုနရာဓိပံ တံ၊
ဝိဇ္ဇာဗလံ သေဋ္ဌိသုတဿ ဧတံ န ဓာတုယာ ဒေဝ အယမ္ပဘာဝေါ။
နိသမ္မ တေသံ ဝစနံ နရိန္ဒော ဣစ္စဗြဝီ သေဋ္ဌိသုတံ သုဘဒ္ဒံ၊
ယထာ စ ဧတေ အဘိသဒ္ဒဟေယျုံ တထာဝိဓံ ဒဿယ ဣဒ္ဓိမညံ။
တတော သုဘဒ္ဒေါ တပနီယပတ္တေ သုဂန္ဓိသီတောဒကပူရိတမှိ၊
ဝဍ္ဎေသိ ဓာတုံ မုနိပုင်္ဂဝဿ အနုဿရန္တော စရိတဗ္ဘုတာနိ။
၂၄၅။ ¶
သာ ရာဇဟံ သီ’ဝ ဝိဓာဝမာနာ သုဂန္ဓိတောယမှိ ပဒက္ခိဏေန၊
ဥမ္မုဇ္ဇမာနာ စ နိမုဇ္ဇမာနာ ဇနေ ပမောဒဿုဓရေ အကာသိ။
တတော စ ကာသုံ ဝိသိခါယမဇ္ဈေ ကတွာ တဟိံ ဓာတုမဘိက္ခိပိတွာ၊
ပံသူဟိ သမ္မာ အဘိပူရယိတွာ ဗဟူဟိ မဒ္ဒါပယိ ကုဉ္ဇရေဟိ။
ဘေတွာ မဟိံဥဋ္ဌဟိ စက္ကမတ္တံ ဝိရာဇမာနံ မဏိကဏ္ဏိကာယ၊
ပဘဿရံ ရူပိယကေသရေဟိ သရောရုဟံ ကဉ္စနပတ္တပါဠိံ။
ပတိဋ္ဌဘိတွာန တဟိံ သရောဇေ မန္ဒာနိလာဝတ္တိတရေဏု ဇာလေ၊
ဩဘာသယန္တိ’ဝ ဒိသာ ပဘာဟိ ဒိဋ္ဌာ မုဟုတ္တေန ဇိနဿဓာတု။
ခိပိံသု ဝတ္ထာဘရဏာနိ မစ္စာ ပဝဿယုံ ပုပ္ဖမယဉ္စ ဝဿံ၊
ဥက္ကုဋ္ဌိသဒ္ဒေဟိ စ သဓုကာရနာဒေဟိ ပုဏ္ဏံ နဂရံ အကံသု။
၂၅၀။ ¶
တေ တိတ္ထိယာ တံ အဘိဝဉ္စနံ’တိ ရာဇာဓိရာဇံ အထ သညပေတွာ၊
ဇိဂုစ္ဆနီယေ ကုဏပါဒိကေဟိ ခိပိံသု ဓာတုံ ပရိခါယ ပိဋ္ဌေ။
တသ္မိံ ခဏေ ပဉ္စဝိဓမ္ဗုဇေဟိသဉ္ဆာဒိတာဟံသဂဏောပဘုတ္တာ၊
မဓုဗ္ဗတာလီ ဝိရုတာဘိရာမာ အဟောသိ သာ ပေါက္ခရဏီ’ဝ နန္ဒာ။
ဂဇာဓိပါ ကောည္စရဝံ ရဝိံသု ကရိံသု ဟေသာနိနဒံ တုရင်္ဂါ၊
ဥက္ကုဋ္ဌိနာဒံ အကရိံသု မစ္စာ သုဝါဒိတာ ဒုန္ဒုဘိအာဒယော’ပိ။
ထောမိံသု မစ္စာ ထုတိဂီတကေဟိ နစ္စိံသု ဩတ္တပ္ပဝိဘုသနာ’ပိ၊
ဝတ္ထာနိ သီသေ ဘမယိံသု မတ္တာ ဘုဇာနိ ပေါဌေသုမုဒဂ္ဂစိတ္တာ။
၂၅၄။ ¶
ဓူပေဟိ ကာလာဂရုသမ္ဘဝေဟိ ဃနာဝနဒ္ဓံ’ဝ နဘံ အဟောသိ၊
သမုဿိတာနေကဓဇာဝလီဟိ ပုရံ တဒါ ဝတ္ထမယံ’ဝ အာသိ။
ဒိသွာ တမစ္ဆေရမစိန္တနီယံ အာမောဒိတာမစ္စဂဏာ သမဂ္ဂါ၊
အတ္ထေ နိယောဇေတု မုပေစ္စ တဿ ဝဒိံသု ပဏ္ဍုဿ နရာဓိပဿ။
ဒိသွာန ယော ဤဒိသကမ္ပိ ရာဇ ဣဒ္ဓါနုဘာဝံ မုနိပုင်္ဂဝဿ၊
ပသာဒမတ္တမ္ပိ ကရေယျ နောစေ ကိမတ္ထိယာ တဿ ဘဝေယျ ပညာ။
ပသာဒနီယေသု ဂုဏေသု ရာဇ ပသာဒနံ သာဓုဇနဿ ဓမ္မော၊
ပုပ္ဖန္တိ သဗ္ဗေ သယမေဝ ဝန္ဒေ သမုဂ္ဂတေ ကောမုဒကာနနာနိ။
၂၅၈။ ¶
ဝါစာယ တေသံ ပန ဒုမ္မတီနံ မာ သဂ္ဂမဂ္ဂံ ပဇဟိတ္ထ ရာဇ၊
အန္ဓေ ဂဟေတွာ ဝိစရေယျ ကော ဟိ အနွေသမာနော သုပထံ အမူဠှော။
နရာဓိပါ ကပ္ပိဏ ဗိမ္ဗိသာရ သုဒ္ဓါဒနာဒိ အပိ တေဇဝန္တာ၊
တံ ဓမ္မရာဇံ သရဏံ ဥပေစ္စ ပိဝိံသု ဓမ္မာမတမာဒရေန။
သဟဿနေတ္တော တိဒသာဓိပေါ’ပိ ခီဏာယုကော ခိဏဘဝံ မုနိန္ဒံ၊
ဥပေစ္စ ဓမ္မံ ဝိမလံ နိသမ္မ အလတ္ထ အာယုံ အပိ ဒိဋ္ဌဓမ္မော။
တုဝမ္ပိ တသ္မိံ ဇိတပဉ္စမာရေ ဒေဝါတိဒေဝေ ဝရဓမ္မရာဇေ၊
သဂ္ဂါပဝဂ္ဂါဓိဂမာယ ခိပ္ပံ စိတ္တံ ပသာဒေဟိ နရာဓိရာဇ။
၂၆၂။ ¶
သုတွာနတေသံ ဝစနံ နရိန္ဒော ဝိကိဏ္ဏကင်္ခေါ ရတနတ္တယမှိ၊
သေနာပတိံ အတ္ထဝရံ အဝေါစ ပဟဋ္ဌဘာဝေါ ပရိသာယ မဇ္ဈေ။
အသဒ္ဒဟာနော ရတနတ္တယဿ ဂုဏေ ဘဝစ္ဆေဒနကာရဏဿ၊
စိရာယ ဒုလ္လဒ္ဓိပထေ စရန္တော ဌိတော သရဇ္ဇေ အပိ ဝဉ္စိတောဟံ။
မောဟေန ခဇ္ဇောပနကံ ဓမေသိံ သီတဒ္ဒိတော ဓုမသိခေ ဇလန္တေ၊
ပိပါသိတော သိန္ဓုဇလံ ပဟာယ ပိဝိံ ပမာဒေန မရီစိတောယံ။
ပရိစ္စဇိတွာ အမတံ စိရာယ ဇိဝတ္ထိကော တိက္ခဝိသံ အခါဒိံ၊
ဝိဟာယ’ဟံ စမ္ပကပုပ္ဖဒါမံ အဓာရယိံ ဇတ္တုသု နာဂဘာရံ။
၂၆၆။ ¶
ဂန္တွာန ခိပ္ပံ ပရိခါ သမီပံ အာရာဓယိတွာ ဇိနဒန္တဓာတုံ၊
အာနေဟိ ပူဇာဝိဓိနာ ကရိဿံ ပုညာနိ သဗ္ဗတ္ထ သုခါဝဟာနိ။
ဂန္တွာတတေသောပရိခါသမီပံ သေနာဓိနာထော ပရမပ္ပတီတော၊
ဓာတုံ မုနိန္ဒဿ နမဿမာနော အဇ္ဈေသိ ရညော ဟိတမာ စရန္တော
စိရာဂတံ ဒိဋ္ဌိမလံ ပဟာယ အလတ္ထ သဒ္ဓံ သုဂတေ နရိန္ဒော၊
ပါသာဒမာဂမ္မ ပသာဒမဿ ဝဍ္ဎေဟိ ရညော ရတနတ္တယမှိ။
တသ္မိံ ခဏေ ပေါက္ခရဏီ ဝိစိတ္တာ ဖုလ္လေဟိ သောဝဏ္ဏသရောရုဟေဟိ၊
အလင်္ကရောန္တီ ဂဂနံ အဟောသိ မန္ဒာကိနီဝါဘိနဝါဝတာရာ။
ဟံသင်္ဂဏေဝါထ မုနိန္ဒဓာတု သာ ပင်္ကဇာ ပင်္ကဇမောက္ကမန္တိ၊
ကုန္ဒာဝဒါတာဟိ ပဘာဟိ သဗ္ဗံ ခိရောဒကုစ္ဆိံ’ဝ ပုရံ အကာသိ။
၂၇၁။ ¶
တတော သုရတ္တဉ္ဇလိပင်္ကဇမှိ ပတိဋ္ဌဟိတွာန စမုပတိဿ၊
သန္ဒိဿမာနာ မဟတာ ဇနေန မဟပ္ဖလံ မာနုသကံ အကတ္ထ။
သုတွာန ဝုတ္တန္တမိမံ နရိန္ဒော ပဟဋ္ဌဘာဝေါပဒသာ’ဝ ဂန္တွာ၊
သံသူစယန္တော ဒိဂုဏံ ပသာဒံ သုဝိမှိတောပဉ္ဇလိကောအဝေါစ။
ဝေါဟာရဒက္ခာ မနုဇာ မုနိန္ဒ သင်္ဃဋ္ဋယိတွာ နိကသောပလမှိ၊
ကရောန္တိအဂ္ဃံ ဝရကဉ္စနဿ ဧသောဟိ ဓမ္မော စရိတောပုရာဏော။
မဏိံ ပသတ္ထာကရသမ္ဘဝမ္ပိ ဟုတာသကမ္မေဟဘီသင်္ခရိတွာ၊
ပါပေန္တိရာဇညကိရီဋကောဋိံ ဝိဘုသနတ္တံ ဝိဒုနောမနုဿာ။
၂၇၅။ ¶
ဝီမံသနတ္ထာယ တဝါဓုနာပိ မယာ ကတံ သဗ္ဗမိဒံ မုနိန္ဒ၊
အာဂုံ မဟန္တံ ခမ ဘုရိပည ခိပ္ပံ မမာလင်္ကုရု ဥတ္တမင်္ဂံ။
ပတိဋ္ဌိတာ တဿ တတော ကိရီဋေ မဏိပ္ပဘာ ဘာသိနိ ဒန္တဓာတု၊
အမုဉ္စိ ရံသီ ဓဝလာ ပဇာသု သိနေဟဇာတာ ဣဝ ခီရဓာရာ။
သော ဒန္တဓာတုံ သိရသာဝဟန္တော ပဒက္ခိဏံတံနဂရံ ကရိတွာ၊
သမ္ပူဇယန္တော ကုသုမာဒိကေဟိ သုသဇ္ဇိတန္တေ ပုရမာဟရိတ္ထ။
သမုဿိတောဒါရသိတာတပတ္တေ ပလ္လင်္ကသေဋ္ဌေ ရတနုဇ္ဇလမှိ၊
ပတိဋ္ဌပေတွာန ဇိနဿ ဓာတုံ ပူဇေသိ ရာဇာ ရတနာဒိကေဟိ။
ဗုဒ္ဓါဒိဝတ္ထုတ္တယမေဝ ရာဇာ အာပါဏကောဋိံ သရဏံ ဥပေစ္စ၊
ဟိတွာ ဝိဟိံသံ ကရုဏာဓိဝါသော အာရာဓယီ သဗ္ဗဇနံ ဂုဏေဟိ။
၂၈၀။ ¶
ကာရေသိ နာနာရတနပ္ပဘာဟိ သဟဿရံသီံ’ဝ ဝိရောစမာနံ၊
နရာဓိပေါ ဘတ္တိဘရာနုရူပံ သုစိတ္တိတံ ဓာတုနိဝေသနမ္ပိ။
ဝဍ္ဎေသိ သော ဓာတုဃရမှိ ဓာတုံ အလင်္ကရိတွာ သကလံ ပုရမ္ပိ၊
သေသေန ပူဇာဝိဓိနာ အတိတ္တော ပူဇေသိ ရဋ္ဌံ သဓနံ သဘောဂ္ဂံ။
အာမန္တယိတွာ ဂုဟသီဝရာဇံ သမ္မာနိတံ အတ္တသမံ ကရိတွာ၊
ဒါနာဒိကံ ပုညမနေကရူပံ သဒ္ဓါဓနော သဉ္စိဏိရာဇသေဋ္ဌော။
တတော သော ဘုပါလော ကုမတိဇနသံသဂ္ဂမနယံ၊
နိရာကတွာ မဂ္ဂေ သုဂတဝစနုဇ္ဇောတသုဂမေ၊
ပဓာဝန္တော သမ္မာ သပရဟိတသမ္ပတ္တိစတုရော၊
ပသတ္ထံ လောကတ္ထံ အစရိ စရိတာဝဇ္ဇိတဇနော။
တတိယော ပရိစ္ဆေဒေါ။
၂၈၄။ ¶
စရတိ ဓရဏိ ပါလေ ရာဇဓမ္မေသု တသ္မိံ၊
သမရစတုရသေနော ခီရဓာရော နရိန္ဒော၊
နိဇဘုဇဗလလီလာ’ရာတိဒပ္ပပ္ပမာထီ၊
ဝိဘဝဇနိတမာနော ယုဒ္ဓသဇ္ဇော’ဘိဂဉ္ဆိ။
ကရိဝရမထ ဒိသွာ သော ဂုဟာဒွါရယာတံ၊
ပဋိဘယရဟိတတ္တော သီဟရာဇာ’ဝ ရာဇာ၊
နိဇနဂရသမီပါယာတမေတံ နရိန္ဒံ၊
အမိတဗလမမဟောဃေနောတ္ထရန္တာ’ဘိယာယိ။
ဥဒိတဗဟဠဓူလီပါဠိရုဒ္ဓန္တဠိက္ခော၊
သမဒဝိဝိဓယောဓာရာဝသံရမ္ဘဘီမေ၊
နိသိတသရသတာလီဝဿဓာရာကရာဠေ၊
အဇိနိ မဟတိ ယုဒ္ဓေ ပဏ္ဍုကော ခီရဓာရံ။
၂၈၇။ ¶
အထ နရပတိသေဋ္ဌော သင်္ဂဟေတွာန ရဋ္ဌံ၊
နိဇ တနုဇ ဝရသ္မိံ ရဇ္ဇဘာရံ နိဓာယ၊
သုဂတ ဒသန ဓာတုံ သမ္ပဋိစ္ဆာပယိတွာ၊
ပဟိဏိ စ ဂုဟသီဝံ သက္ကရိတွာ သရဋ္ဌံ။
သုဝိရမဝနီပါလော သညမံ အဇ္ဈုပေတော၊
ဝိဝိဓ ဝိဘဝ ဒါနာယာစကေ တပ္ပယိတွာ၊
တိဒသပုရ သမာဇံ ဒေဟဘေဒါ ပယာတော၊
ကုသလ ဖလမနပ္ပံ ပတ္ထိတံ ပစ္စလတ္ထ။
နရပတိ ဂုဟသီဝေါ တံ မုနိန္ဒဿ ဓာတုံ၊
သကပုရမုပနေတွာ သာဓု သမ္မာနယန္တော၊
သုဂတိ ဂမန မဂ္ဂေ ပါဏိနော ယောဇယန္တော၊
သုစရိတ မဘိရူပံ သဉ္စိဏန္တော ဝိဟာသိ။
၂၉၀။ ¶
အဂဏိတမဟိမဿုဇ္ဇေ နိရညော တနူဇော၊
ပုရိမ ဝယသိ ယေဝါရဒ္ဓသဒ္ဓါဘိယောဂေါ၊
ဒသဗလ တနုဓာတုံ ပူဇိတုံ တဿ ရညော၊
ပုရဝရ မုပါယာတော ဒန္တနာမော ကုမာရော။
ဂုဏဇနိတ ပသာဒံ တံ ကလိင်္ဂါဓိနာထံ၊
နိခိလ ဂုဏ နိဝါသော သော ကုမာရော ကရိတွာ၊
ဝိဝိဓ မဟဝိဓာနံ သာဓုသမ္ပာဒယန္တော၊
အဝသိ သုဂတဓာတုံ အနွဟံ ဝန္ဒမာနော။
အဘဝိ စ ဂုဟသီဝဿာဝနီသဿ ဓိတာ၊
ဝိကစ ကုဝလယက္ခီ ဟံသကန္တာဘိယာတာ၊
ဝဒန ဇိတ သရောဇာ ဟာရိဓမ္မိလ္လဘာရာ၊
ကုစဘရနမိတင်္ဂိ ဟေမ မာလာဘိဓာနာ။
၂၉၃။ ¶
အခိလဂုဏနိဓာနံ ဗန္ဓုဘာဝါနုရူပံ၊
သုဝိမလကုလဇာတံ တံ ကုမာရံ ဝိဒိတွာ၊
နရပတိ ဂုဟသီဝေါ အတ္တနော ဓီတရံ တံ၊
အဒဒိ သဗဟုမာနံ ရာဇပုတ္တဿ တဿ။
မနုဇပတိ ကုမာရံ ဓာတုရက္ခာဓိကာရေ၊
ပစုရပရိဇနံ တံ သဗ္ဗထာ ယောဇယိတွာ၊
ဂဝ မဟိသ သဟဿာဒီဟိ သမ္ပီဏယိတွာ၊
သက ဝိဘဝ သရိက္ခေ ဣဿရတ္တေ ဌပေသိ။
သမရဘုဝိ ဝိနဋ္ဌေ ခီရဓာရေ နရိန္ဒေ၊
မလယဝနမုပေတာ ဘာဂိနေယျာ ကုမာရာ၊
ပဗလ မတိ မဟန္တံ သံဟရိတွာ ဗလဂ္ဂံ၊
ဥပပုရမုပဂဉ္ဆုံ ဓာတုယာ ဂဏှနတ္ထံ။
အထ နဂရသမီပေ တေ နိဝေသံ ကရိတွာ၊
သဝဏကဋုကမေတံ သာသနံ ပေသယိံသု၊
သုဂတဒသနဓာတုံ ဒေဟိ ဝါ ခိပ္ပမမှံ၊
ယသသိရိဇနနိံ ဝါ ကီဠ သင်္ဂါမကေဠိံ။
၂၉၇။ ¶
သပဒိ ဓရဏိပါလော သာသနံ တံ သုဏိတွာ၊
အဝဒိ ရဟသိ ဝါစံ ရာဇပုတ္တဿ တဿ၊
နဟိ သတိ မမ ဒေဟေ ဓာတုမညဿ ဒဿံ၊
အဟမပိ ယဒိ ဇေတုံ နေဝ တေ သက္ကုဏေယျံ။
သုရနရ နမိတံ တံ ဒန္တဓာတုံ ဂဟေတွာ၊
ဂဟိတ ဒိဇဝိလာသော သီဟဠံ ယာဟိ ဒီပံ၊
ဣတိ ဝစနမုဒါရံ မာတုလဿာထ သုတွာ၊
တမဝစ ဂုဟသီဝံ ဒန္တနာမော ကုမာရော။
တဝစ မမစ ကော ဝါ သီဟဠေ ဗန္ဓုဘူတော၊
ဇိနဝရဏသရောဇေ ဘတ္တိယုတ္တော စ ကောဝါ၊
ဇလနီဓိပရတီရေ သီဟဠံ ခုဒ္ဒဒေသံ၊
ကထမဟမတိနေဿံ ဒန္တဓာတုံ ဇိနဿ။
၃၀၀။ ¶
တမဝဒိ ဂုဟသီဝေါ ဘာဂိနေယျံ ကုမာရံ၊
ဒသဗလတနုဓာတု သဏ္ဌိတာ သီဟဠသ္မိံ၊
ဘဝဘယဟတိဒက္ခော ဝတ္တတေ သတ္ထုဓမ္မော၊
ဂဏနပထမတီတာ ဘိက္ခဝေါ စာဝသိံသု။
မမ စ ပိယသဟာယော သော မဟာသေန ရာဇာ၊
ဇိနစရဏသရောဇဒွန္ဒသေဝါဘိယုတ္တော၊
သလိလမပိ စ ဖုဋ္ဌံ ဓာတုယာ ပတ္ထယန္တော၊
ဝိဝိဓရတနဇာတံ ပါဘတံ ပေသယိတ္ထ။
ပဘဝတိ မနုဇိန္ဒော သဗ္ဗဒါ ဗုဒ္ဓိမာ သော၊
သုဂတဒသနဓာတုံ ပူဇိတုံ ပူဇနေယျံ၊
ပရိစိတဝိသယမှာ ဝိပ္ပဝုတ္ထံ ဘဝန္တံ၊
ဝိဝိဓဝိဘဝဒါနာ သာဓု သင်္ဂဏှိတုဉ္စ။
၃၀၃။ ¶
နိဇ ဒုဟိတုပတိံ တံ ဣတ္ထမာရာဓယိတွာ၊
နရပတိ ဂုဟသီဝေါ သင်္ဂဟေတွာန သေနံ၊
ရဏဓရဏိမုပေတော သော ကုမာရေဟိ သဒ္ဓိံ၊
မရဏပရဝသတ္တံ အဇ္ဈဂါ ယုဇ္ဈမာနော။
အထ နရပတိ ပုတ္တော ဒန္တနာမော သုဏိတွာ၊
သဝဏ ကဋုကမေတံ မာတုလဿပ္ပဝတ္တိံ၊
ဂဟိတ ဒိဇဝိလာသော ဒန္တဓာတုံ ဂဟေတွာ၊
တုရိတ တုရိတ ဘူတော သော ပုရမှာ ပဠာယိ။
သရဘသ မုပဂန္တွာ ဒက္ခိဏံ စာထ ဒေသံ၊
အဝိစလိတသဘာဝေါ ဣဒ္ဓိယာ ဒေဝတာနံ၊
နဒိမတိမဟတိံ သော ဥတ္တရိတွာန ပုဏ္ဏံ၊
နိဒဟိ ဒသနဓာတုံ ဝါလုကာရာသိမဇ္ဈေ။
ပုန ပုရမုပဂန္တွာ တံ ဂဟီတညဝေသံ၊
ဘရိယမပိ ဂဟေတွာ အာဂတော တတ္ထ ခိပ္ပံ၊
သုဂတဒသနဓာတုံ ဝါလုကာထုပကုစ္ဆိံ၊
ဌပိတမုပစရန္တော အစ္ဆိ ဂုမ္ဗန္တရသ္မိံ။
၃၀၇။ ¶
သပဒိ နဘသိ ထေရော ဂစ္ဆမာနော ပနေကော၊
ဝိဝိဓကိရဏဇာလံ ဝါလုကာရာသိထူပါ၊
အဝိရဠိတမုဒေန္တံ ဓာတုယာ တာယ ဒိသွာ၊
ပဏမိ သုဂတဓာတုံ ဩတရိတွာန တတ္ထ။
မုနိသုတမထ ဒိသွာ ဇမ္ပတီ တေ ပတီတာ၊
နိဇဂမနဝိဓာနံ သဗ္ဗမာရောစယိံသု၊
ဒသဗလတနုဇော သော ဓာတုရက္ခာ နိယုတ္တော၊
ပရဟိတနိရတတ္တော တေ ဥဘော အဇ္ဈဘာသိ။
ဒသဗလတနုဓာတုံ သီဟဠံ နေထ တုမှေ၊
အဂဏိတ တနုခေဒါ ဝီတသာရဇ္ဇမေတံ၊
အပိ စ ဂမနမဂ္ဂေ ဇာတမတ္တေ ဝိဃာတေ၊
သရထ မမမနေကောပဒ္ဒဝစ္ဆေဒဒက္ခံ။
၃၁၀။ ¶
ဣတိ သုဂတနနူဇော ဇမ္ပတီနံ ကထေတွာ၊
ပုန’ပိ တဒနုရူပံ ဒေသယိတွာန ဓမ္မံ၊
ပုထုတရမပနေတွာ သောကသလ္လဉ္စ ဂါဠှံ၊
သကဝသတိမုပေတော အန္တလိက္ခေန ဓီရော။
ဘုဇဂဘဝနဝါသီ နိန္နဂါယာထ တဿာ၊
ဘုဇဂပတိ မဟိဒ္ဓိ ပဏ္ဍုဟာရာဘိဓာနော၊
သကပုရပဝရမှာ နိက္ခမိတွာ စရန္တော၊
သမုပဂမိ တဒါ တံ ဌာနမိစ္ဆာဝသေန။
ဝိမလပုလိနထူပါ သော သမုဂ္ဂစ္ဆမာနံ၊
သသိရုစိရမရီစိဇ္ဇာလမာလောကယိတွာ၊
ဌိတမထ မုနိဓာတုံ ဝါလုကာရသိဂဗ္ဘေ၊
ကိမိဒမိတိ သကင်္ခံ ပေက္ခမာနော အဝေဒိ။
၃၁၃။ ¶
သပဒိ သဗဟုမာနော သော အသန္ဒိဿမာနော၊
ရတနမယကရဏ္ဍံ ဓာတုယုတ္တံ ဂိလိတွာ၊
ဝိတတပုထုလဒေဟော ဘောဂမာလာဟိ တုင်္ဂံ၊
ကဏကသိခရိရာဇံ ဝေဌယိတွာ သယိတ္ထ။
သလိလနိဓိသမီပံ ဇမ္ပတီ ဂန္တုကာမာ၊
ပုလိနတလဂတံ တံ ဒန္တဓာတုံ အဒိသွာ၊
နယနသလိလဓာရံ သောကဇာတံ ကိရန္တာ၊
သုဂတသုတဝရံ တံ တင်္ခဏေ’နုဿရိံသု။
အထ သုဂတသုတော သော စိန္တိတံ သံဝိဒိတွာ၊
အဂမိ သဝိဓမေသံ သောကဒိနာနနာနံ၊
အသုဏိ စ ဇိနဓာတုံ ဝါလုကာရာသိမဇ္ဈေ၊
နီဟိတမပိ အဒိဋ္ဌံ ပူဇိတံ ဇမ္ပတီဟိ။
သယိတမထ ယတီသော ဒိဗ္ဗစက္ခုပ္ပဘာဝါ၊
ရတနဂိရိနိကုဉ္ဇေ နာဂရာဇံ အပဿိ၊
ဝိဟဂပတိသရီရံ မာပယိ တမ္မုဟုတ္တေ၊
ဝိတတပုထုလပက္ခေန’န္တဠိက္ခံ ထကေန္တံ။
၃၁၇။ ¶
ဇလဓိမတိဂဘီရံ တံ ဒွိဓာ သော ကရိတွာ၊
ပဗလပဝနဝေဂေန’တ္တနော ပက္ခဇေန၊
သရဘသ မဟိဓာဝံ ဘီမသံရမ္ဘယောဂါ၊
အဘိဂမိ ဘုဇဂိန္ဒံ မေရုပါဒေ နိပန္နံ။
ဇဟိတဘုဇဂဝေသော တင်္ခဏေ သော ဖဏိန္ဒော၊
ပဋိဘယစကိတတ္တော သံခိပိတွာန ဘောဂေ၊
သရဘသ မုပဂန္တွာ တဿ ပါဒေ နမိတွာ၊
ဝိနယမဓုရမိတ္ထံ တံ မုနီသံ အဝေါစ။
သကလဇနဟိတတ္ထံ ဧဝ ဇာယန္တိ ဗုဒ္ဓါ၊
ဘဝတိ ဇနဟိတတ္ထံ ဓာတုမတ္တဿ ပူဇာ၊
အဟမပိ ဇိနဓာတုံ ပူဇယိတွာ မဟဂ္ဃံ၊
ကုသလဖလမနပ္ပံ သဉ္စိဏိဿံ’တိ ဂဏှိံ။
၃၂၀။ ¶
အထ မနုဇဂဏာနံ သစ္စဗောဓာရဟာနံ၊
ဝသတိဘဝနမေသာ နီယျတေ သီဟဠံ တံ၊
မုနိဝရတနုဓာတုံ တေန ဒေဟီတိ ဝုတ္တော၊
ဘုဇဂပတိ ကရဏ္ဍံ ဓာတုဂဗ္ဘံ အဒဇ္ဇိ။
ဝိဟဂပတိတနုံ တံ သံဟရိတွာန ထေရော၊
ဇလစရသတဘီမာ အဏ္ဏဝါ ဥပ္ပတိတွာ၊
သကလပထဝိစက္ကေ ရဇ္ဇလက္ခိံ’ဝ ဓာတုံ၊
နရပတိတနုဇာနံ ဇမ္ပတီနံ အဒါသိ။
ဣတိ ကတဗဟုကာရေ သံယမိန္ဒေ ပယာတေ၊
သုဂတဒသနဓာတုံ မုဒ္ဓနာ ဥဗ္ဗဟန္တာ၊
မဟတိ ဝိပိနဒေဝါဒီဟိ မဂ္ဂေ ပယုတ္တေ၊
ဝိဝိဓမဟဝိဓာနေ တေ တတော နိက္ခမိံသု။
၃၂၃။ ¶
မုဒုသုရဘီသမီရော ကဏ္ဋကာဒိဝျပေတော၊
ဝိမလပုလိနဟာရီ အာသီ သဗ္ဗတ္ထ မဂ္ဂေါ၊
အယနမုပဂတေ တေ ဒန္တဓာတုပ္ပဘာဝါ၊
နိဂမနဂရဝါသီ သာဓု သမ္မာနယိံသု။
ကုသုမသုရဘိစုဏ္ဏာကိဏ္ဏဟတ္ထာဟိ နိစ္စာ၊
သကုတုကမနုယာတာ ကာနနေ ဒေဝတာဟီ၊
အစလဂဟဏဒုဂ္ဂံ ခေပယိတွာန မဂ္ဂံ၊
အဂမုမတုရိတာ တေ ပဋ္ဋနံ တာမလိတ္တိံ။
အစလပဒရဗဒ္ဓံ သုဋ္ဌိတောဒါရကူပံ၊
ဥဒိတပုထုလကာရံ ဒက္ခနီယာမကဉ္စ၊
သယမဘိမတလင်္ကာဂါမိနိံ နာဝမေတေ၊
သပဒိ သမုပရူဠှံ အဒ္ဒသုံ ဝါဏိဇေဟိ။
၃၂၆။ ¶
အထ ဒိဇပဝရာ တေ သီဟဠံ ဂန္တုမိစ္ဆံ၊
သရဘသ မုပဂန္တွာ နာဝိကဿာဝဒိံသု၊
သုတိသုခဝစသာ သော သာဓုဝုတ္တေန စေသံ၊
ပမုဒိတဟဒယော တေ နာဝမာရောပယိတ္ထ။
ဇလနိဓိမဘိရူဠှေသွေသု အာဒါယ ဓာတုံ၊
သမဘဝုမုပသန္နာ လောလကလ္လောလမာလာ၊
သမသုရဘိမနုညော ဥတ္တရော ဝါယိ ဝါတော၊
ဝိမလရုစိရသောဘာ သဗ္ဗထာ’သုံ ဒိသာ’ပိ။
နဘသိ အသိတသောဘေ ဝေနတေယျော’ဝ နာဝါ၊
ပဗလပဝနဝေဂါ သတ္တတံ ဓာဝမာနာ၊
နယနဝိသယဘာဝါတီတတီရာစလာဒိံ၊
ပဝိသိ ဇလဓိမဇ္ဈံ ဖေဏပုပ္ဖာဘိကိဏ္ဏံ။
၃၂၉။ ¶
အထ အဘဝိ သမုဒ္ဒေါ ဘီမသံဝဋ္ဋဝါတာ၊
ဘီဟတသိခရိကူဋာကာရဝီစိပ္ပဗန္ဓော၊
သဝနဘိဒုရဃောရာရာဝရုန္ဓန္တလိက္ခော၊
ဘယစကိတမနုဿက္ကန္ဒိတော သဗ္ဗရတ္တိံ။
ဥဒယသိခရိသီသံ နူတနာဒိစ္စဗိမ္ဗေ၊
ဥပဂတဝတိ တဿာ ရတ္တိယာ အစ္စယမှိ၊
သလိလနိဓိဇလံ တံ သန္တကလ္လောလမာလံ၊
အသိတမဏိဝိစိတ္တံ ကောဋ္ဋိမံ’ဝါဝဘာသိ။
အထ ဝိတတဖဏာလီ ဘိံသနာ ကေစိ နာဂါ၊
သုရဘိကုသုမဟတ္ထာ ကေစိ ဒိဗ္ဗတ္တဘာဝါ၊
ရုစိရမဏိပဒီပေ ကေစိ သန္ဓာရယန္တာ၊
နိဇသိရသိ ကရောန္တာ ကေစိ ကဏ္ဍုပ္ပလာနီ။
၃၃၂။ ¶
ဖုဋကုမုဒကလာပေ ဇတ္တုနေကေ ဝဟန္တာ၊
ကဏကကလသမာလာ ဥက္ခိပတ္တာ စ ကေစိ၊
ပဝနစလိတကေတုဂ္ဂါဟကာ ကေစိ ဧကေ၊
ရုစိရ ကဏက စုဏ္ဏာပုဏ္ဏစင်္ဂေါဋဟတ္ထာ။
သလဠိတရမဏိယံ ကေစိ နစ္စံ ကရောန္တာ၊
သလယမဓုရဂီတံ ဂါယမာနာ’ဝ ကေစိ၊
ပစုရတုရိယဘဏ္ဍေ အာဟနန္တာ’ဝ ဧကေ၊
မုနိဝရတနုဓာတုံ ပူဇိတုံ ဥဋ္ဌဟိံသု။
ရုစိရကစကလာပါ ရာဇကညာယ တဿာ၊
မုနိဝရဒသနံ တံ နိဂ္ဂတေဝိန္ဒုလေခါ၊
ဥဇုရဇတသလာကာ သန္နိဘေ မုဉ္စိ ရံသီ။
၃၃၅။ ¶
အတုလိတမနုဘာဝံ ဓာတုယာ ပေက္ခတံ တံ၊
ပမုဒိတဟဒယာနံ တင်္ခဏေ ပန္နဂါနံ၊
ပဋိရဝဟရိတာနံ သာဓုဝါဒါဒိကာနံ၊
ဂဂနမပရိယန္တံ’ဝါသိ ဝိတ္ထာရိတာနံ။
ပဝိသိ သုဂတ ဒါဌာဓာတု သာ မောဠိဂဗ္ဘံ၊
ပုန ဂဂနတလမှာ ဩတရိတွာန တဿာ၊
ဖဏဓရနိဝဟာ တေ တံ တရိံ ဝါရယိတွာ၊
မဟမကရုမုဒါရံ သတ္တရတ္တိန္ဒိဝံဟိ။
အစလမိဝ ဝိမာနံ အန္တလိက္ခမှိ နာဝံ၊
ဂတိဝိရဟိတမမှောရာသိမဇ္ဈမှိ ဒိသွာ၊
ဘယဝိလုလိတစိတ္တာ ဇမ္ပတီ တေ သမဂ္ဂါ၊
ဒသဗလတနုဇံ တံ ဣဒ္ဓိမန္တံ သရိံသု။
သပဒိ မုနိသုတော သော စိတ္တမေသံ ဝိဒိတွာ၊
နဘသိ ဇလဓရာလီ မဒ္ဒမာနော’ဘိဂန္တွာ၊
ဝိဟဂပတိသရီရံ မာပယိတွာ မဟန္တံ၊
ဘယစကိတဘုဇင်္ဂေ တေ ပဠာပေသိ ခိပ္ပံ။
၃၃၉။ ¶
ဣတ္ထံ ဗုဒ္ဓိသုတေ ဘုဇင်္ဂဇနိတံ ဘီတိံ သမေတွာ ဂတေ၊
သာ နာဝါ ပဝနာ ပကမ္ပိတဓဇာ တုင်္ဂံ တရင်္ဂါဝလိံ၊
ဘီန္ဒန္တီ ဂတိဝေဂသာ ပုထုတရံ မေဃာဝလီသန္နိဘံ၊
လင်္ကာပဋ္ဋနမောတရိတ္ထ သဟသာ ထေရဿ တဿိဒ္ဓိယာ။
စတုတ္ထော ပရိစ္ဆေဒေါ။
သံဝစ္ဆရမှိ နဝမမှိ မဟာဒိသေန၊
ပုတ္တဿ ကိတ္တိသိရိမေဃနရာဓိပဿ၊
တေ ဇမ္ပတီ တမထ ပဋ္ဋနမောတရိတွာ၊
ဒေဝါလယေ ပဋိဝသိံသု မနောဘိရာမေ။
၃၄၁။ ¶
ဒိသွာန တေ ဒွိဇဝရော ပထိကေ နိသာယံ၊
သန္တပ္ပယိတ္ထ မဓုရာသနပါနကေဟိ၊
ရတ္တိက္ခယေ စ အနုရာဓပုရဿ မဂ္ဂံ၊
ဆာယာပတီနမထ သော အဘိဝေဒယိတ္ထ။
အာဒါယ တေ ဒသနဓာတုဝရံ ဇိနဿ၊
သမ္မာနိတာ ဒွိဇဝရေန’ထ ပဋ္ဋနမှာ၊
နိက္ခမ္မ ဒူရတရမဂ္ဂမတိက္ကမိတွာ၊
ပဒွါရဂါမမနုရာဓပုရဿ’ဂဉ္ဆုံ။
ယံ ဓမ္မိကံ နရဝရံ အဘိတက္ကယိတွာ၊
ဇာယာပတီ ဝိသယမေတမုပါဂမိံသု၊
တံ ဝျာဓိနာ သမုဒိတေန မဟာဒိသေန၊
လင်္ကိဿရံသုစိရကာလကတံ သုဏိံသု။
သောကေန တေ သိခရိနေဝ သမုဂ္ဂတေန၊
အဇ္ဈောတ္ထဋာ ဗဟုတရံ ဝိလပီံသု မုဠှာ၊
ကာယိံသု တေသမထ မုစ္ဆိတမာနသာနံ၊
သဗ္ဗာ ဒိသာ စ ဝိဒိသာ စ ဃနန္ဓကာရာ
၃၄၅။ ¶
သုတွာန ကိတ္တိသိရိမေဃနရာဓိပဿ၊
ရဇ္ဇေဌိတဿ ရတနတ္တယမာမကတ္တံ၊
ဝဿေန နိဗ္ဗုတမဟာဒဟနာ’ဝ ကစ္ဆာ၊
တေ ဇမ္ပတီ သမဘဝုံ ဟတသောကတာပါ။
သုတွာန မေဃဂိရိနာမမဟာဝိဟာရေ၊
ဘိက္ခုဿ ကဿစိ နရာဓိပဝလ္လဘတ္တံ၊
တဿ’န္တိကံ သမုပဂမ္မ ကတာတိထေယျာ၊
ဓာတုပ္ပဝတ္တိမဝဒိံသု ဥဘော သမေစ္စ။
သုတွာန သော မုနိဝရော ဒသနပ္ပဝတ္တိံ၊
ဟဋ္ဌော ယထာမတရသေန’ဟိသိတ္တဂတ္တော၊
ဂေဟေ သကေ သပဒိ ပဋ္ဋဝိတာနကေဟိ၊
ဝဍ္ဎေသိ ဓာတုမမလံ သမလင်္ကတမှိ။
၃၄၈။ ¶
တေသဉ္စ ဇာနိပတိကာနမုဘိန္နမေသော၊
ကတွာန သင်္ဂဟမုဠာရတရံ ယထိစ္ဆံ၊
ဝုတ္တန္တမေတမဘိဝေဒယိတုံ ပသတ္ထံ၊
လင်္ကာဓိပဿ သဝိဓံ ပဟိဏိတ္ထ ဘိက္ခုံ။
ရာဇာ ဝသန္တသမယေ သဟ ကာမိနီဟိ၊
ဥယျာနကေဠိသုခ မေကဒိနေ’နုဘောန္တော၊
အာဂစ္ဆမာနမထ တတ္ထ သုဒုရတော’စ၊
တံ ဝိပ္ပသန္နမုခဝဏ္ဏမပဿိ ဘိက္ခုံ။
သော သံယမိ သမုပဂမ္မ နရာဓိပံ တံ၊
ဝုတ္တန္တမေတမဘိဝေဒယိ တုဋ္ဌစိတ္တော၊
သုတွာန တံ ပရမပီတိဘရံ ဝဟန္တော၊
သမ္ပတ္တစက္ကရတနော’ဝ အဟောသိ ရာဇာ။
၃၅၁။ ¶
လင်္ကိဿရော ဒွိဇဝရာ ဇိနဒန္တဓာတု၊
မာဒါယ ဇာနိပတယော ဥဘယေ သမေစ္စ၊
ဧဿန္တိ လင်္ကမစိရေန ဣတီရိတံ တံ၊
နေမိတ္တိကဿ ဝစနဉ္စ တထံ အမညိ။
ရာဇာ တတော မဟတိယာ ပရိသာယ သဒ္ဓိံ၊
တဿာနုရာဓနဂရဿ ပုရုတ္တရာယ၊
အာသာယ တံ သပဒိ မေဃဂိရိံ ဝိဟာရံ၊
သဒ္ဓါ အဂဉ္ဆိ ပဒသာ’ဝ ပသန္နစိတ္တော။
ဒိသွာ တတော သုဂတဓာတုမလဗ္ဘနေယျံ၊
အာနန္ဒဇဿုနိဝဟေဟိ စ တာရဟာရံ၊
သိဉ္စံ ဝိဓာယ ပဏိဓိံ ဗဟုမာနပုဗ္ဗံ၊
ရောမဉ္စကဉ္စုကဓရော ဣတိ စိန္တယိတ္ထ။
၃၅၄။ ¶
သော’ဟံ အနေကရတနုဇ္ဇလမောဠိဓာရိံ၊
ပူဇေယျမဇ္ဇ ယဒိ ဒုစ္စဇမုတ္တမင်္ဂံ၊
လောကတ္တယေကသရဏဿ တထာဂတဿ၊
နော ဓာတုယာ မဟမနုစ္ဆဝိကံ ကရေယျံ။
ဧတံ ပဟူတရတနံ သဓနံ သဘောဂ္ဂံ၊
သမ္ပူဇယံ အပိ ဓရာဝလယံ အသေသံ၊
ပူဇံ ကရောမိ တဒနုစ္ဆဝိကံ အဟံ’တိ၊
စိန္တေယျ ကောဟိ ဘုဝနေသု အမူဠှတိတ္တော။
လင်္ကာဓိပစ္စမိဒမပ္ပတရံ မမာသိ၊
ဗုဒ္ဓါ ဂုဏေဟိ ဝိဝိဓေဟိ ပမာဏ သုညော၊
သော’ဟံ ပရိတ္တဝိဘဝေါ တိဘဝေကနာထံ၊
တံ တာဒိသံ ဒသဗလံ ကထမစ္စယိဿံ။
၃၅၇။ ¶
ဣတ္ထံ ပုနပ္ပုန တဒေဝ ဝိစိန္တယန္တော၊
အာပဇ္ဇိ သော ဓိတိယုတော’ပိ ဝိသညိဘာဝံ၊
သံဝီဇိတော သပဒိ စာမရမာရုတေန၊
ခိန္နေန သေဝကဇနေန အလတ္ထ သညံ။
ထောကမ္ပိ ဗီဇမထ ဝါ အဘိရောပယန္တာ၊
မေဓာဝိနော မဟတိယာ’ပိ မသုန္ဓရာယ၊
ကာလေန ပတ္တ တဝ ပုပ္ဖဖလဒိကာနိ၊
ဝိန္ဒန္တိ ပတ္ထိတဖလာနိ အနပ္ပကာနိ။
ဧဝံ ဂုဏေဟိ ဝိဝိဓေဟိ’ပိ အပ္ပမေယျ၊
ဓမ္မိဿရမှိ မဟမပ္ပတရမ္ပိ ကတွာ၊
ကာလစ္စယေန ပရိဏာမ ဝိသေသရမ္မံ၊
သဂ္ဂါပဝဂ္ဂသုခမပ္ပဋိမံ လဘိဿံ။
၃၆၀။ ¶
ဣတ္ထံ ဝိစိန္တိယ ပမောဒဘရာတိရေက၊
သမ္ပုဏ္ဏစန္ဒိမသရိက္ခမုခေါ နရိန္ဒော၊
သဗ္ဗညုနော ဒသနဓာတုဝရဿ တဿ၊
ပူဇေသိ သဗ္ဗမပိ သီဟဠဒီပမေတံ။
ဘိက္ခူ’ပိ တေပိဋက ဇာတကဘာဏကာဒိ၊
တက္ကဂမာဒိ ကုသလာ အပိ ဗုဒ္ဓိမန္တော၊
ဝတ္ထုတ္တယေကသရဏာ အပိ ပေါရဝဂ္ဂါ၊
ကောတုဟလာ သပဒိ သန္နိပတိံသု တတ္ထ။
ရာဇာ တတော မဟတိယ ပရိသာယ မဇ္ဈေ၊
ဣစ္စဗြုဝီ မုနိဝရော ဟိ သုသုက္ကဒါဌော၊
ဒါဌာ ဇိနဿ ယဒိ ဩသဓိတာရကာ’ဝ၊
သေတာ ဘဝေယျ ကိမယံ မလိနာဝဘာသာ။
၃၆၃။ ¶
တသ္မိံ ခဏေ ဒသနဓာတု မုနိဿရဿ၊
ပက္ခေ ပသာရိယ ဒုဝေ ဝိယ ရာဇဟံသီ၊
ဝိတ္ထာရိတံ’သုနိ ဝဟာ ဂဂနင်္ဂနမှိ၊
အာဝဋ္ဋတော ဆဝိ ဇဝေန မုဟုတ္တမတ္တံ။
ပစ္စဂ္ဃမတ္ထရဏကံ သိတမတ္ထရိတွာ၊
ဘဒ္ဒါသနမှိ ဝိနိဓာယ မုနိန္ဒဓာတုံ၊
တံ ဇာတိပုပ္ဖနိကရေန ထကေသိ ရာဇာ၊
ဝဿစ္စယမ္ဗုဓရကူဋသမပ္ပဘေန။
ဥဂ္ဂမ္မ ခိပ္ပမထ ဓာတု မုနိဿရဿ၊
သာ ပုပ္ဖရာသိသိခရမှိ ပတိဋ္ဌဟိတွာ၊
ရံသီဟိ ဒုဒ္ဓဓဝလေဟိ ဝိရောစမာနာ၊
သမ္ပဿတံ အနိမိသေ နယနေ အကာသိ။
၃၆၆။ ¶
တံ ဓာတုမာသနဂတမှိ ပတိဋ္ဌပေတွာ၊
ခီရောဒဧဏေပဋလပ္ပဋိမေ ဒုကုဠေ၊
ဆာဒေသိ သာဋကသတေဟိ မဟာရဟေဟိ၊
ဘိယျော’ပိ သော ဥပပရိက္ခိတုကာမတာယ။
အဗ္ဘုဂ္ဂတာ သပဒိ ဝတ္ထသတာနိ ဘေတွာ၊
သေတမ္ဗုဒေါဒရဝိနိဂ္ဂတစန္ဒိမာ’ဝ၊
ဌတွာန သာ ဥပရိ တေသမဘာသယိတ္ထ၊
ရံသီဟိ ကုန္ဒဝိသဒေဟိ ဒိသာ သမန္တာ
တသ္မိံ ခဏေ ဝသုမတီ သဟ ဘူဓရေဟိ၊
ဂဇ္ဇိတ္ထ သာဓုဝစနံ’ဝ သမုဂ္ဂိရန္တီ၊
တံ အဗ္ဘူတံ ဝိယ သမေက္ခိတုမမ္ဗုရာသိ၊
သော နိစ္စလော အဘဝိ သန္တတရင်္ဂဗာဟု။
၃၆၉။ ¶
မတ္တေဘကမ္ပိတသုပုပဖိတသာလတော’ဝ၊
ဘဿိံသု ဒိဗ္ဗကုသုမာနိ’ပိ အန္တဠိက္ခာ၊
နစ္စေသု စာတုရိယယမစ္ဆရိယံ ဇနဿ၊
သန္ဒဿယိံသု ဂဂနေ သုရသုန္ဒရီ’ပိ။
အာနန္ဒသဉ္ဇနိတတာရရဝါဘိရာမံ၊
ဂါယိံသု ဂီတမမတာသနဂါယကာ’ပိ၊
မုဉ္စိံသု ဒိဗ္ဗတုရိယာနိ’ပိ ဝါဒိတာနိ၊
ဂမ္ဘီရမုစ္စမဓုရံ ဒွိဂုဏံ နိနာဒံ။
သံသိဗ္ဗိတံ ရဇတရဇ္ဇုသတာနုကာရီ၊
ဓာရာသတေဟိ ဝသုဓမ္ဗရမမ္ဗုဒေန၊
သဗ္ဗာ ဒိသာ ဇလဒကုဋမဟဂဃိယေသု၊
ဒိတ္တာစိရဇ္ဇုတိပဒီပသတာဝဘာသာ။
၃၇၂။ ¶
အာဓုယမာန မလယာဝလ ကာနနန္တော၊
သမထုလ္လ ပုပ္ဖဇ ပရာဂဟရာဘိဟာရိ၊
သေဒေါဒ ဗိန္ဒုဂဏ သံဟရဏပ္ပဝီဏော၊
မန္ဒံ အဝါသိ သိသိရော အပိ ဂန္ဓဝါဟော။
ရာဇာ တမဗ္ဘုတမဝေက္ခိယ ပါဋိဟီရံ၊
လောကုဿဝံ ဗဟုတရဉ္စ အဒိဋ္ဌပုဗ္ဗံ၊
စိပ္ဖာရိတက္ခိယုဂလော ပရမပ္ပမောဒါ၊
ပူဇံ ကရိတ္ထ မဟတိံ ရတနာဒိကေဟိ။
သော ဓာတုမတ္တသိရသာ’ထ သမုဗ္ဗဟန္တော၊
ဌတွာ သမုဿိတ သိတာတပဝါရဏမှိ၊
စိတ္တတ္ထရေ ရထဝရေ သိတဝါဇိယုတ္တေ၊
လက္ခိနိဓာနနုရာဓပုရံ ပဝေက္ခိ။
၃၇၅။ ¶
ဒေဝိန္ဒ မန္ဒိရ သမေ သမလင်္ကတမှိ၊
ရာဇာ သကမှိ ဘဝနေ အတုလာနုဘာဝေါ၊
သီဟာသနေ ပဋိက ကောဇဝ သန္ထတမှိ၊
ဓာတုံ ဌပေသိ မုနိနော သသိတာတပတ္တေ။
အန္တော’ဝ ဘုမိပတိ ဓာတုဃရံ မဟဂ္ဃံ၊
ကတွာန တတ္ထ ဝိနိဓာယ မုနိန္ဒဓာတုံ၊
သမ္ပူဇယိတ္ထ ဝိဝိဓေဟိ ဥပါယနေဟိ၊
ရတ္တီန္ဒိဝံ တိဒိဝမောက္ခ သုခါဘိကင်္ခီ။
တေသဉ္စ ဇာနိပတိကာနမုဘိန္နမေဝ၊
တုဋ္ဌော ဗဟူနိ ရတနာဘရဏာဒိကာနိ၊
ဂါမေစ ဣဿရကုလေက နီဝါသဘုတေ၊
ဒတွာန သင်္ဂဟမကာသိ တိသီဟဠိန္ဒော။
၃၇၈။ ¶
သင်္ဂမ္မ ဇာနပဒ နေဂမ နာဂရာဒီ၊
ဥက္ကဏ္ဌိတာ သုဂတဓာတုမပဿမာနာ၊
လောကုတ္တမဿ စရိတာနိ အဘိတ္ထဝန္တာ၊
ဥဂ္ဃောသယိံသု ဓရဏီပတိသန္နိဓာနိ၊
ဓမ္မိဿရော သကလလောကဟိတာယ လောကေ၊
ဇာယိတ္ထ သဗ္ဗဇနတာဟိတမာစရိတ္ထ၊
ဝိတ္ထာရိတာ ဗဟုဇနဿ ဟိတာယ ဓာတု၊
ဣစ္ဆာမ ဓာတုမဘိပူဇယိတုံ မယမ္ပိ။
သော သန္နိပါတိယ မဟီပတိ ဘိက္ခုသင်္ဃ၊
မာရာမဝါသိမနုရာဓပုရောပကဏ္ဌေ၊
အဇ္ဈာသယံ တမဘိဝေဒယိ သတ္ထုဓာတု၊
ပူဇာယ သန္နိပတိတဿ မဟာဇနဿ။
၃၈၁။ ¶
ထေရော တဟိံ မဟတိ ဘိက္ခုဂဏေ ပနေကော၊
မေဓာဗလေန အသမော ကရုဏာဓိဝါသော၊
ဧဝံ တိသီဟဠပတိဿ မဟာမတိဿ၊
လောကတ္ထစာရစတုရဿ နိဝေဒယိတ္ထ။
ယော အာစရေယျ အနုဇီဝိဇနဿ အတ္ထံ၊
ဧသော ဘဝေ’နုစရိတော မဟတံ သဘာဝေါ၊
ဓာတုံ ဝသန္တသမယေ ဗဟိ နီဟရိတွာ၊
ဒဿေဟိ ပုညမဘိပတ္ထယတံ ဇနာနံ။
သုတွာန သံယမိဝရဿ သုဘာသိတာနိ၊
ပုစ္ဆိတ္ထ သော နရဝရော ပုန ဘိက္ခုသင်္ဃံ၊
ဓာတုံ နမဿိတုမနေန မဟာဇနေန၊
ဌာနံ ကိမေတ္ထ ရမဏီယတရံ သိယာ’တိ။
၃၈၄။ ¶
သဗ္ဗေ’ပိ တေ အထ နိကာယ နိဝါသိ ဘိက္ခူ၊
ဌာနံ သကံ သကမ ဝဏ္ဏယုမာဒရေန၊
အညောညဘိန္နဝစနေသု စ တေသု ရာဇာ၊
နေဝါဘိနန္ဒိ န ပဋိက္ခိပိ ကိဉ္စိဝါကျံ။
မဇ္ဈတ္တတာနုဂတမာနသတာယ ကိန္တု၊
ရာဇာ အဝေါ စ ပုန ဘိက္ခုဂဏဿ မဇ္ဈေ၊
အတ္တာနုရူပမယမေဝ မုနိန္ဒဓာတု၊
ဌာနံ ခဏေန သယမေဝ ဂမိဿတီတိ။
ရာဇာ တတော ဘဝနမေဝ သကံ ဥပေစ္စ၊
ဓာတုပ္ပဏာမမဘိပတ္ထယတံ ဇနာနံ၊
ခိပ္ပံမုခမ္ဗုဇဝနာနီ ဝိကာသယန္တော၊
သဇ္ဇေတုမာဟ နဂရဉ္စ ဝိဟာရမဂ္ဂံ။
သမ္မဇ္ဇိတာ သလိလ သေဝန သန္တဓူလီ၊
ရစ္ဆာ တဒါ’သိ ပုလိနတ္ထရဏာဘိရာမာ၊
ဥဿာပိတာနိ ကဏကာဒိဝိစိတ္တိတာနိ၊
ဝျဂ္ဃာဒိ ရူပခစိတာနိ စ တောရဏာနိ။
၃၈၈။ ¶
ဆာယာ နိဝါရိတ ဝိရောစန ရံသိတာပါ၊
နစ္စံ’ဝ ဒဿယတိ ဝါတဓူတာ ဓဇာလိ၊
ဝီထိ ဝသန္တဝနရာဇိ သမာနဝဏ္ဏာ၊
ဇာတာ သုဇာတကဒလီတရုမာလိကာဟိ။
သံသူစယန္တိ စ သတံ နဝပုဏ္ဏကုမ္ဘာ၊
သဂ္ဂါပဝဂ္ဂသုခမိစ္ဆိတမိဇ္ဈတီတိ၊
ကပ္ပုရသာရတဂရာဂရုသမ္ဘဝေဟိ၊
ဓူပေဟိ ဒုဒ္ဒိနမထော သုဒိနံ အဟောသိ။
ဩလမ္ဗမာနသိတမုတ္တကဇာလကာနိ၊
သဇ္ဇာပိတာနိ ဝိဝိဓာနိ စ မဏ္ဍပါနိ၊
သမ္ပာဒိတာနိ စ တဟိံ ကုသုမဂဃိကာနိ၊
အာမောဒ လုဒ္ဓ မဓုပါဝလိ ကုဇိတာနိ။
၃၉၁။ ¶
ဂစ္ဆိံသု ကေစိ ဂဟိတုဿဝ ဝေသသောဘာ၊
ဧကေ သမုဂ္ဂပရိပုရိတပုပ္ဖဟတ္ထာ၊
အညေ ဇနာ သုရဘိစုဏ္ဏဘရံ ဝဟန္တာ၊
တတ္ထေတရေ ဓတဝိစိတ္တမဟာတပတ္တာ။
လင်္ကိဿရော’ထ သသိပဏ္ဍရဝါဇိယုတ္တေ၊
ဥဇ္ဇောတိတေ ရထဝရေ ရတနပ္ပဘာဟိ၊
ဓာတုံ တိလောကတိလကဿ ပတိဋ္ဌပေတွာ၊
ဧတံ အဝေါစ ဝစနံ ပဏိပါတပုဗ္ဗံ။
သမ္ဗောဓိယာ ဣဝ မုနိဿရ ဗောဓိမဏ္ဍံ၊
ဂဏ္ဍမ္ဗရုက္ခမိဝ တိတ္ထိယမဒ္ဒနာယ၊
ဓမ္မဉ္စ သံဝိဘဇိတုံ မိဂဒါယမဇ္ဇ၊
ပူဇာနုရူပမုပဂစ္ဆ သယံ ပဒေသံ။
၃၉၄။ ¶
ရာဇာ တတော သမုစိတာစရဏေသု ဒက္ခော၊
ဝိဿဇ္ဇိ ဖုဿရထမဋ္ဌိတသာရထိံ တံ၊
ပစ္ဆာ သယံ မဟတိယာ ပရိသာယ သဒ္ဓိံ၊
ပူဇာဝိသေသမသမံ အဂမာ ကရောန္တော။
ဥက္ကုဋ္ဌိနာဒဝိသရေန မဟာဇနဿ၊
ဟေသာရဝေန ဝိသဋေန တုရင်္ဂမာနံ၊
ဘေရီရဝေန မဟတာ ကရိ ဂဇ္ဇိတေန၊
ဥဒ္ဒါမသာဂရ သမံ နဂရံ အဟောသိ။
အာမောဒိတာ ဥဘယဝီထိဂတာ ကုလိတ္ထိ၊
ဝါတာယနေဟိ ကနကာဘရဏေ ခိပိံသု၊
သဗ္ဗတ္ထကံ ကုသုမဝဿမဝဿယိံသု၊
စေလာနိစေဝ ဘမယိံသုနိဇုတ္တမင်္ဂေ။
၃၉၇။ ¶
ပါစီနဂေါပုရသမီပမုပါဂတမှိ၊
တသ္မိံ ရထေ ဇလဓိပိဋ္ဌိဂတေ’ဝ ပေါတေ၊
တုဋ္ဌာ တဟိံ ယတိဂဏာ မနုဇာ စ သဗ္ဗေ၊
သမ္ပုဇယိံသု ဝိဝိဓေဟိ ဥပါယနေဟိ။
ကတွာ ပဒက္ခိဏမထော ပုရမုတ္တရေန၊
ဒွါရေန သော ရထဝရော ဗဟိ နိက္ခမိတွာ၊
ဌာနေ မဟိန္ဒမိနုဓမ္မကထာပဝိတ္တေ၊
အဋ္ဌာသိ တိတ္ထဂမိတာ ဣဝ ဘဏ္ဍနာဝါ။
ဌာနေ တဟိံ ဒသနဓာတုဝရံ ဇိနဿ၊
လင်္ကိဿရော ရတနဝိတ္တကရဏ္ဍဂဗ္ဘာ၊
သဉ္ဈာဃနာ ဣဝ ဝိဓုံ ဗဟိနီဟရိတွာ၊
ဒဿေသိ ဇာနပဒ နေဂမ နာဂရာနံ။
၄၀၀။ ¶
တသ္မိံ ဇနေ သပဒိ အာဘရဏာဒိဝဿ၊
မစ္စန္တပီတိဘရိတေ အဘိဝဿယန္တေ၊
သာနန္ဒိဝန္ဒိဇနမင်္ဂလဂီတကေဟိ၊
သမ္ပာဒိတေသု မုခရေသု ဒိသာမုခေသု။
ဟတ္ထာရဝိန္ဒနိဝဟေသု မဟာဇနဿ၊
စန္ဒောဒယေ’စ မုကုလတ္တနမာဂတေသု၊
ဗြဟ္မာမရာဒိဇနိတာမိတ သာဓုဝါဒေ၊
တာရာပထမှိ ဘုဝနောဒရ မောတ္ထရန္တေ။
သာဒန္တဓာတု သသိခဏ္ဍ သမာနဝဏ္ဏာ၊
ရံသီဟိ ကုန္ဒ နဝစန္ဒန ပဏ္ဍရေဟိ၊
ပါသာဒ ဂေါပုရ သိလုစ္စယ ပါဒပါဒိံ၊
နိဒ္ဓါတ ရူပိယမယံ’ဝ အကာ ခဏေန။
တံ ပါဋိဟာရိယ မစိန္တိယ မစ္စုဠာရံ၊
ဒိသွာန ကေ တဟီမဟေသု မဟဋ္ဌလောမာ၊
ကေဝါ’နယုံ သကသကာဘရဏာနိ ဂေဟံ၊
ကေဝါ န အတ္တပဋိလာဘမဝဏ္ဏယိံသု။
၄၀၄။ ¶
ကေ နောဇဟိံသု သကဒိဋ္ဌိမလာနုဗဒ္ဓံ၊
ကေ ဝါ န ဗုဒ္ဓမဟိမံ အဘိပတ္ထယိံသု၊
ကေ နာမ မစ္ဆရိယပါသဝသာ အဟေသုံ၊
ဝတ္ထုတ္တယဉ္စ သရဏံ နဂမိံသု ကေဝါ။
လင်္ကိဿရော’ပိ နဝလက္ခ ပရိဗ္ဗယေန၊
သဗ္ဗညုဓာတုမတုလံ အဘိပူဇယိတွာ၊
တံ ဒန္တဓာတုဘဝနံ ပုန ဝဍ္ဎယိတွာ၊
အန္တေပုရမှိ ပဋိဝါသရမစ္စယိတ္ထ။
ဓာတုံ ဝိဟာရမဟယုတ္တရမေဝ နေတွာ၊
ပူဇံ ဝိဓာတုမနုဝစ္ဆရမေဝရူပံ၊
ရာဇာ’ထ ကိတ္တိသိရိမေဃသမဝှယော သော၊
ဝါရိတ္တလေခ မဘိလေခယိ သစ္စသန္ဓော။
၄၀၇။ ¶
ဝါရိတ္တမေတမိတရေ’ပိ ပဝတ္တယန္တာ၊
တေ ဗုဒ္ဓဒါသပမုခါ ဝသုဓာဓိနာထာ၊
သဒ္ဓါဒယာဓိကဂုဏာဘရဏာဘိရာမာ၊
တံ သက္ကရိံသု ဗဟုဓာ ဇိနဒန္တဓာတုံ။
သတ္ထာရာ သမ္ဘတတ္ထံ ပုရိမတရဘဝေ သမ္ပဇာနံ ပဇာနံ၊
သမ္ဗောဓိံ တဿ သဗ္ဗာသဝဝိဂမကရိံ သဒ္ဒဟန္တော’ဒဟန္တော၊
သောတံ တဿ’ဂ္ဂဓမ္မေ နိပုဏမတိ သတံ သင်္ဂမေသင်္ဂမေသံ၊
နိဗ္ဗာဏံ သန္တမိစ္ဆေ တိဘဝဘယပရိစ္စာဂဟေတုံ ဂဟေတုံ။
ပဉ္စမော ပရိစ္ဆေဒေါ။
၄၀၉။ ¶
ယော စန္ဒဂေါမိ ရစိတေဝရသဒ္ဒသတ္ထေ၊
ဋီကံ ပသတ္ထမကရိတ္ထ စ ပဉ္စိကာယ၊
ဗုဒ္ဓပ္ပဘာဝဇန နိံစ အကာ သမန္တ၊
ပါသာဒိကာယ ဝိနယဋ္ဌကထာယ ဋီကံ။
အင်္ဂုတ္တရာဂမဝရဋ္ဌကထာယ ဋီကံ၊
သမ္မောဘဝိဗ္ဘမ ဝိဃာတကရိံ အကာသိ၊
အတ္ထာယ သံယမိဂဏဿ ပဓာနိကဿ၊
ဂန္ထံ အကာ ဝိနယသင်္ဂဟနာမဓေယျံ။
သန္တိန္ဒြိယဿပဋိပတ္တိ ပရာယဏဿ၊
သလ္လေခ ဝုတ္တိ နိရတဿ သမာဟိတဿ၊
အပ္ပိစ္ဆတာဒိ ဂုဏယောဂ ဝိဘုသနဿ၊
သမ္ဗုဒ္ဓသာသနမဟောဒယကာရဏဿ။
၄၁၂။ ¶
သဗ္ဗေသုအာစရိယတံ ပရမံ ဂတဿ၊
သတ္ထေသု သဗ္ဗသမယန္တရ ကောဝိဒဿ၊
သိဿေနသာရိတနုဇဿ မဟာဒိသာမိ။
သုဒ္ဓနွယေန ကရုဏာဒိဂုဏောဒယေန၊
တက္ကာဂမာဒိ ကုသလေန ဝိသာရဒေန၊
သဗ္ဗတ္ထ ပတ္ထဋ သုဓာကရရံသိဇာလ၊
သင်္ကာသကိတ္တိဝိသရေန ပရိက္ခကေန။
၄၁၄။ ¶
သဒ္ဓါဓနေန သခိလေန စ ဓမ္မကိတ္တိ၊
နာမေန ရာဇဂရုနာ စရိယေန ဧသော၊
သောတုပ္ပသာဒဇနနော ဇိနဒန္တဓာတု၊
ဝံသော ကတော နိခိလဒဿိပဘာဝဒီပေါ။
ဓမ္မော ပဝတ္တတု စိရာယ မုနိဿရဿ၊
ဓမ္မေ ဌိတာ ဝသုမတီပတယော ဘဝန္တု၊
ကာလေ ပဝဿတု ဃနော နိခိလာ ပဇာ’ပိ၊
အညောညမေတ္တိပဋိလာဘသုခံ လဘန္တု။