📜

ဓာတုဝံသော ¶

နမော တဿ ဘဂဝတော အရဟတော သမ္မာသမ္ဗုဒ္ဓဿ

၁။ တထာဂတဿာဂမနကထာ

သမ္ဗုဒ္ဓမတုလံ သုဒ္ဓံ ဓမ္မံ သင်္ဃံ အနုတ္တရံ၊

နမဿိတွာ ပဝက္ခာမိ ဓာတုဝံသပ္ပကာသနံ၊

တိက္ခတ္တုမဂမာ နာထော လင်္ကာဒီပံ မနောရမံ၊

သတ္တာနံ ဟိတမိစ္ဆန္တော သာသနဿ စိရဋ္ဌိတိံ။

တတ္ထ တိက္ခတ္တုမဂမာ နာထော’တိ အနမတဂ္ဂေ သံသာရဝဋ္ဋေ ပရိနာမေတွာ အပ္ပတိသရဏဘာဝပ္ပတ္တာနံ လောကိယလောကုတ္တရသုခနိပ္ဖာဒနဘာဝေန နာထော ပတိသရဏ ဘူတော ဘဂဝါ ဗုဒ္ဓဓမ္မသင်္ဃရတနတ္တယမဂ္ဂံ အာစိက္ခန္တော လင်္ကာဒီပံ တိက္ခတ္တုံ ဂတော။ တတ္ထ ပဌမဂမနေ တာဝ ဗောဓိမဏ္ဍံ အာရုယှ ပုရတ္ထီမာဘိမုခေါ နိသီဒိတွာ သူရိယေ အနတ္ထမိတေယေဝ မာရဗလံ ဝိဓမေတွာ၊ ပဌမယာမေ ပုဗ္ဗေနိဝါသဉာဏံ အနုဿရိတွာ မဇ္ဈိမယာမေ စုတုပပါတဉာဏံ ပတွာ ပစ္ဆိမယာမာဝသာနေ ပစ္စယာကာရေ ဉာဏံ ဩတာရေတွာ ဒသဗလစတုဝေသာရဇ္ဇာဒိ ဂုဏပတိမဏ္ဍိတံ သဗ္ဗညုတဉာဏံ ပဋိဝိဇ္ဈိတွာ ဗောဓိမဏ္ဍပ္ပဒေသေ အနုက္ကမေန သတ္တသတ္တာဟံ ဝီတိနာမေတွာ အဋ္ဌမေ သတ္တာဟေ အဇပါလနိဂြောဓမူလေ နိသိန္နော ဓမ္မဂမ္ဘိရတံ ပစ္စဝေက္ခနေန အပ္ပောဿုက္ကတံ အာပဇ္ဇမာနော ဒသသဟဿ ဗြဟ္မပရိဝါရေန သဟမ္ပတိမဟာဗြဟ္မုနာ အာယာစိတဓမ္မဒေသနော ဟုတွာ ¶ ဗုဒ္ဓစက္ခုနာ လောကံ ဩလောကေန္တော ပဉ္စဝဂ္ဂိယာနံ ဘိက္ခုနံ ဗဟူပကာရကံ အနုဿရိတွာ ဥဋ္ဌာယာသနာ ကာသီနံ ပုရံ ဂန္တွာ အညာကောဏဍညပ္ပမုခေ အဋ္ဌာရသ ဗြဟ္မကောဋိယော အမတံ ပါယေန္တော ဓမ္မစက္ကံ ပဝတ္တေတွာ ပက္ခဿ ပဉ္စမိယံ ပဉ္စဝဂ္ဂိယေ သဗ္ဗေပိ တေ အရဟန္တေ ပတိဋ္ဌာပေတွာ တံ ဒိဝသမေဝ ယသကုလပုတ္တဿ ရတ္တိဘာဂေ သောတာပတ္တိဖလံ ဒတွာ ပုနဒိဝသေ အရဟန္တံ ဒတွာ တဿ သဟာယကေ စတုပညာသဇနေ အရဟန္တံ ပါပေတွာ ဧဝံ လောကေ ဧကသဋ္ဌိယာ အရဟန္တေသု ဇာတေသု ဝုတ္ထဝဿော ပဝါရေတွာ၊ ‘စရထ ဘိက္ခဝေ စာရိက’ န္တိ ဘိက္ခု ဒိသာသု ပေသေတွာ သယံ ဥရုဝေလံ ဂစ္ဆန္တော အန္တရာမဂ္ဂေ ကပ္ပာသိကဝနသဏ္ဍေ ဘဒ္ဒဝဂ္ဂိယေ ကုမာရေ တိံသဇနေ ဝိနေတွာ ဧဟိဘိက္ခုဘာဝေန ပဗ္ဗာဇေတွာ ဥရုဝေလံ ဂန္တွာ အဍ္ဎုဍ္ဎာနိ ပါဋိဟာရိယသဟဿာနိ ဒဿေန္တော ဥရုဝေလကဿပါဒယော သဟဿဇဋိလပရိဝါရေ တေဘာတိကဇဋိလေ ဝိနေန္တော တတ္ထေဝ ဝိဟာသိ။ အပရဘာဂေ အင်္ဂမဂဓရဋ္ဌဝါသိနော ဥရုဝေလကဿပဿ မဟာယညံ ဥပဋ္ဌာပေသုံ။ သော ပန ဣစ္ဆာစာရာဘိဘူတော စိန္တေသိ? ‘‘သစာယံ မဟာသမဏော ဣမဿ သမာဂမဿ မဇ္ဈေ ပါဋိဟာရိယံ ကရေယျ လာဘသက္ကာရော မေ ပရိဟာယိဿတိ’’တိ။ တဿေဝံ ပဝတ္တအဇ္ဈာသယံ ဉတွာ ပါတောဝ ဥတ္တရကုရုတော ဘိက္ခံ အာဟရိတွာ အနောတတ္တေ အာဟာရံ ပရိဘုဉ္ဇိတွာ သာယနှ သမယေ ဖုဿပုဏ္ဏမီဥပေါသထဒိဝသေ လင်္ကာဒီပဿတ္ထာယ လင်္ကာဒီပမုပါဂမိ။

တဿ ပန ဒီပဿ မဟာဂင်္ဂါယ ဒက္ခိဏပဿေ အာယာမတော တိယောဇနေ ပုထုလတော ဧကယောဇနပ္ပမာဏေ မဟာနာဂဝနုယျာနေ ယက္ခသမာဂမဿ မဇ္ဈေ တဿ ဥပရိ မဟိယင်္ဂဏထူပဿ ပတိဋ္ဌာနဋ္ဌာနေ အာကာသေယေဝ ဌီတော ဝုဋ္ဌိဝါတန္ဓကာရံ ဒဿေတွာ တေသံ ဘယံ ဥပ္ပာဒေသိ။ တေ ဘယေန ဥပဒ္ဒုတာ ‘‘ကဿ နု ခေါ ဣမံ ကမ္မ’’န္တိ ဣတော စိတော ဩလောကေန္တော အဒ္ဒသံသု ဘဂဝန္တံ အာကာသေ နိသိန္နံ။ ဒိသွာန ဘဂဝန္တံ အဘယံ ယာဝိံသု။ တေသံ ဘဂဝါ အာဟ?

‘‘သစေ ¶ တုမှေ အဘယံ ဣစ္ဆထ မယှံ နိသဇ္ဇဋ္ဌာနဿ ဩကာသံ ဒေထာ’’တိ။ သဗ္ဗေပိ တေ တဿ နိသဇ္ဇဋ္ဌာနံ အဒံသု။ ဘဂဝါ နိသဇ္ဇာယ ဩကာသံ ဂဟေတွာ တေသံ ဘယံ ဝိနောဒေတွာ တေဟိ ဒိန္နေ ဘုမိဘာဂေ စမ္မခဏ္ဍံ ပတ္ထရိတွာ နိသီဒိ။ နိသိန္နောဝ ပန ဘဂဝါ စမ္မခဏ္ဍံ ပသာရေသိ။ တေ ယက္ခာ ဘီတတသိတာ အညတ္ထ ဂန္တုံ အသဟမာနာ သမန္တတော သာဂရတီရေ ရာသိဘူတာ အဟေသုံ။ သတ္ထာ ဂိရိဒီပံ ဣဒ္ဓါနုဘာဝေန အာဟရိတွာ ဒဿေသိ။ တေသု တတ္ထ ပတိဋ္ဌိတေသု ပုန ယထာဋ္ဌာနေဝ ဌပေတွာ ပတ္ထရိတစမ္မခဏ္ဍမ္ပိ သံခိပိ။ တသ္မိံ ခဏေ တတော တတော ဒေဝါ သန္နိပတိံသု။ တေသံ သမာဂမေ ဓမ္မံ ဒေသေသိ။ အနေကေသံ ပါဏကောဋီနံ ဓမ္မာဘိသမယော အဟောသိ။ သရဏေသု စ သီလေသု စ ပတိဋ္ဌိတာ အသင်္ခေယျာ အဟေသုံ။ သုမနကူဋေ ပန မဟာသုမနဒေဝေါ သောတာပတ္တိဖလံ ပတွာ အတ္တနော ပူဇနီယံ ဘဂဝန္တံ ယာစိ။ ဘဂဝါ တေန ယာစိတော သီသံ ပါဏိနာ ပရာမသိတွာ ကေသဓာတုံဂဟေတွာ တဿ အဒါသိ။ ဒတွာ စ ပန လင်္ကာဒီပံ တိက္ခတ္တုံ ပဒက္ခိဏံ ကတွာ ပရိတ္တံ ကတွာ အာရက္ခံ သံဝိဓာယ ပုန ဥရုဝေလမေဝ အာဂတော။ သော ပန ကေသဓာတုယော သုဝဏ္ဏစင်္ဂေါဋကေနာဒါယ သတ္ထု နိသိန္နဋ္ဌာနေ နာနာရတနေဟိ ဝိစိတ္တံ ထူပံ ပတိဋ္ဌာပေတွာ ဥပရိ ဣန္ဒနီလမဏိထူပိကာဟိ ပိဒဟိတွာ ဂန္ဓမာလာဒီဟိ ပူဇေန္တော ဝိဟာသိ။ ပရိနိဗ္ဗုတေ ပန ဘဂဝတိ သာရိပုတ္တဿ အန္တေဝါသိကော သရဘူ နာမ ထေရော ခီဏာသဝေါ စိတကတော ဣဒ္ဓိယာ တထာဂတဿ ဂီဝဋ္ဌိံ အာဒါယ တသ္မိံ ဣန္ဒနီလမဏိထူပေ ပတိဋ္ဌာပေတွာ မေဃဝဏ္ဏပါသာဏေဟိ ဒွါဒသဟတ္ထံ ထူပံ ကာရာပေတွာ ဂတော။ တတော ဒေဝါနမ္ပိယတိဿရညော ဘာတာ စူဠာဘယော နာမ ကုမာရော တမဗ္ဘုတံ စေတိယံ ဒိသွာ အဘိပ္ပသန္နော တံ ပဋိစ္ဆာဒေန္တော တိံသဟတ္ထံ စေတိယံ ပတိဋ္ဌာပေသိ။ ပုန ဒုဋ္ဌဂါမဏီ အဘယမဟာရာဇာ တံ ပဋိစ္ဆာဒေတွာ အသီတိဟတ္ထံ ကဉ္စုကစေတိယံ ကာရာပေသိ။ မဟိယင်္ဂဏ ¶ ထူပဿ ပတိဋ္ဌာနာဓိကာရော ဧဝံ ဝိတ္ထာရတော ဝေဒိတဗ္ဗော?

ဗောဓိံ ပတွာန သမ္ဗုဒ္ဓါ ဗောဓိမူလေ နရာသဘော

နိသီဒိတွာန သတ္တာဟံ ပါဋိဟီရံ တတော အကာ။

တတော ပုဗ္ဗုတ္တရေ ဌတွာ ပလ္လင်္ကာ ဤသကေ ဇိနော

အနိမိသေန နေတ္တေန သတ္တာဟံ တံ ဥဒိက္ခယိ။

စင်္ကမိတွာန သတ္တာဟံ စက္ခမေ ရတနာမယေ

ဝိစိနိတွာ ဇိနော ဓမ္မံ ဝရံ သော ရတနာဃရေ။

အဇပါလမှိ သတ္တာဟံ အနုဘောသိ သမာဓိဇံ

ရမ္မေ စ မုစလိန္ဒသ္မိံ ဝိမုတ္တိသုခမုတ္တမံ။

ရာဇာယတနမူလမှိ သတ္တရတ္တိန္ဒိဝံ ဝသီ

ဒန္တပေါနောဒကံ သက္ကော အဒါသိ သတ္ထုနော တဒါ။

စတုဟိ လောကပါလေဟိ သိလာပတ္တံ သမာဟဋံ စတုက္ကမေကကံ ကတွာ အဓိဋ္ဌာနေန နာယကော။

ဝါဏိဇေဟိ တဒါ ဒိန္နံ မန္ထဉ္စ မဓုပိဏ္ဍိကံ

တဟိံ ပန ဂဟေတွာန ဘတ္တကိစ္စံ အကာ ဇိနော။

ဂဏှိံသု သရဏံ တဿ တပုဿဘလ္လိကာ ဥဘော

သရဏံ အဂမုံ တေ တံ သတ္ထု ဒိန္နသိရောရုဟာ။

ဂန္တွာန တေ သကံ ရဋ္ဌံ ထူပံ ကတွာ မနောရမံ

နမဿိံသု စ ပူဇေသုံ ဒွေဘာတိကောပါသကာ။

ဣတိ သော သတ္တသတ္တာဟံ ဝီတိနာမေသိ နာယကော?

ဗြဟ္မုနာ ယာစိတော သတ္ထာ ဓမ္မစက္ကံ ပဝတ္တိတုံ။

တတော ဗာရာဏသိံ ဂန္တွာ ဓမ္မစက္ကံ ပဝတ္တယိ

ကောဏ္ဍညော ဒေသိတေ ဓမ္မေ သောတာပတ္တိဖလံ လဘိ။

ဗြဟ္မာနော’ဋ္ဌာရသကောဋီ ဒေဝတာ စ အသင်္ခိယာ

သောတာပတ္တိဖလံ ပတ္တာ ဓမ္မစက္ကေ ပဝတ္တိတေ။

ပတ္တော ¶ ပါဋိပဒေ ဝပ္ပော ဘဒ္ဒိယော ဒုတိယေ ဖလံ၊

တတိယေ စ မဟာနာမော အဿဇီ စ စတုတ္ထီယံ။

တေ သဗ္ဗေ သန္နိပါတေတွာ ပဉ္စ’မေ ပဉ္စဝဂ္ဂိယေ၊

အနတ္တသုတ္တံ ဒေသေတွာ ဗောဓိယဂ္ဂ ဖလေန တေ။

ဗောဓိံ ပါပေတွာ ပဉ္စာဟေ ယသတ္ထေရာဒိကေ ဇနေ၊

တတော မဂ္ဂန္တရေ တိံသကုမာရေ ဘဒ္ဒဝဂ္ဂိယေ။

ဥရုဝေလံ တတော ဂန္တွာ ဥရုဝေလာယ သညိတံ၊

ဥရုဝေလေနနုညာတော ဥရုဝေလနာဂံ ဒမိ။

တံ တံ ဒမီ ဇိနော နာဂံ ဒမနေန ဥရာဒိဂံ၊

တထာဂတံ နိမန္တိံသု ဒိသွာ တေ ပါဋိဟာရိယံ။

ဣဓေဝ ဝနသဏ္ဍသ္မိံ ဝိဟာရေတွာ မဟာမုနီ၊

ဥပဋ္ဌာဟာမသေ သဗ္ဗေ နိစ္စဘတ္တေန တံ မယံ။

ဥရုဝေလကဿပဿ မဟာယညေ ဥပဋ္ဌိတေ၊

တဿ’တ္တနော နာဂမနေ ဣစ္ဆာစာရံ ဝိဇာနိယ။

ဥတ္တရကုရုတော ဘိက္ခံ ဟရိတွာ ဒိပဒုတ္တမော၊

အနောတတ္တဒဟေ ဘုတွာ သာယနှ သမယေ သယံ။

ဗောဓိတော နဝမေ မာသေ ဖုဿပုဏ္ဏမိယံ ဇိနော၊

လင်္ကာဒီပံ ဝိသောဓေတုံ လင်္ကာဒီပမုပါဂမိ။

ယက္ခေ ဒမိတွာ သမ္ဗုဒ္ဓါ ဓာတုံ ဒတွာန နာယကော၊

ဂန္တွာန ဥရုဝေလံ သော ဝသီ တတ္ထ ဝနေ ဇိနော။

ပဌမဂမနကထာ သမတ္တာ။

ဒုတိယဂမနေ ပန ဗောဓိတော ပဉ္စမေ ဝဿေ ဇေတဝနမဟာဝိဟာရေ ဝသန္တော စူဠောဒရ’မဟောဒရာနံ မာတုလဘာဂိနေယျာနံ နာဂါနံ မဏိပလ္လင်္ကံ နိဿာယ သင်္ဂါမံ ပစ္စုပဋ္ဌိတံ ဒိသွာ သယံ ပတ္တစီဝရမာဒါယ စိတ္တမာသဿ ကာဠပက္ခေ ဥပေါသထဒိဝသေ ¶ နာဂဒီပံ ဂန္တွာ တေသံ သင်္ဂါမမဇ္ဈေ အာကာသေ နိသိန္နော အန္ဓကာရံ အကာသိ။ တေ အန္ဓကာရာဘိဘူတေ သမဿာသေတွာ အာလောကံ ဒဿေတွာ အတ္တနော သရဏဘူတာနံ တေသံ သာမဂ္ဂိကရဏတ္ထံ ဖလဘရိတရုက္ခံ စာလေန္တော ဝိယ ဓမ္မံ ဒေသေသိ။ တေ ဥဘောပိ ဓမ္မေ ပသီဒိတွာ တမ္ပိ ပလ္လင်္ကံ တထာဂတဿ အဒံသု။ ဘဂဝါ ပလ္လင်္ကေ နိသိန္နော ဒိဗ္ဗန္နပါနေဟိ သန္တပ္ပိတော ဘတ္တာနုမောဒနံ ကတွာ အသီတိကောဋိယော နာဂေ သရဏေသု စ သီလေသု စ ပတိဋ္ဌာပေသိ။ တသ္မိံ သမာဂမေ မဟောဒရဿ မာတုလော မဏိအက္ခိကော နာမ နာဂရာဇာ ဘဂဝန္တံ ပုန ကလျာဏိဒေသမာဂမနတ္ထံ။ အယာစိ။ ဘဂဝါ ပန တုဏှီဘာဝေန အဓိဝါသေတွာ ‘‘ဇေတဝနမေဝ ဂတော။

ဧဝဉှိ သော နာဂဒီပံ ဥပေတော၊

မာရာဘိဘု သဗ္ဗဝိဒု သုမေဓော၊

ဒမေတွ နာဂေ ကရုဏာယုပေတော၊

ဂန္တွာ ဝသီ ဇေတဝနေ မုနိန္ဒော။

ဒုတိယဂမနကထာ သမတ္တာ။

တတိယဂမနေ ပန ဗောဓိတော အဋ္ဌမေ ဝဿေ ဇေတဝနမဟာဝိဟာရေ ဝိဟရန္တော ဘဂဝါ? ‘‘မမ ပရိနိဗ္ဗာနတော ပစ္ဆာ တမ္ဗပဏ္ဏိဒီပေ သာသနံ ပတိဋ္ဌဟိဿတိ၊ သော ဒီပေါ ဗဟု ဘိက္ခုဘိက္ခုနီဥပါသကောပါသိကာဒိ အရိယဂဏသေဝိတော ကာသာဝပဇ္ဇောတော ဘဝိဿတိ၊ မယှံ စတုန္နံ ဒါဌာဓာတုနံ အန္တရေ ဧကာ ဒါဌာ စ ဒက္ခိဏအက္ခဓာတု စ နလာဋဓာတု စ ရာမဂါမဝါသီဟိ လဒ္ဓါ ဧကကောဋ္ဌာသော စ အညေ ဗဟုသရီရဓာတု စ ကေသဓာတုယော စ တတ္ထေဝ ပတိဋ္ဌဟိဿန္တိ အနေကာနိ သင်္ဃာရာမသဟဿာနိ စ။ ဗုဒ္ဓဓမ္မသင်္ဃရတနေ ပတိဋ္ဌိတသဒ္ဓါ မဟာဇနော ဘဝိဿတိ။ တသ္မာ လင်္ကာဒီပံ ဂန္တွာ တတ္ထ သမာပတ္တိံ သမာပဇ္ဇိတွာ အာဂန္တုံ ဝဋ္ဋတီ ‘‘တိ စိန္တေတွာ အာနန္ဒတ္ထေရံ အာမန္တေသိ? ‘‘အာနန္ဒ စတုပဋိသမ္ဘိဒပ္ပတ္တာနံ ပဉ္စသတမဟာခီဏာသဝါနံ ဘိက္ခူနံ ပဋိဝေဒေသိ။ အမှေဟိ သဒ္ဓိံ ဂန္တဗ္ဗ ‘‘န္တိ။ အာနန္ဒတ္ထေရော ကပိလဝတ္ထုကောဠိယ နဂရဝါသီနံ ပဉ္စသတမဟာခီဏာသဝါနံ ဘိက္ခူနံ ပဋိဝေဒေသိ။ တေ ပဋိဝေဒိတာ ပဉ္စသတခီဏာသဝါ ပတ္တစီဝရဓာရာ ဟုတွာ သတ္ထာရံ ဝန္ဒိတွာ ¶ အဉ္ဇလိံ ပဂ္ဂယှ နမဿမာနာ အဋ္ဌံသု။ သတ္ထုနော ပန သလလာယ နာမ ဂန္ဓကုဋိယာ အဝိဒူရေ ရတ္တသေတနီလုပ္ပလကုမုဒပဒုမပုဏ္ဍရီကသတပတ္တသဟဿပတ္တဇလဇေဟိ သောဂန္ဓိက နာနာပုပ္ဖေဟိ သဉ္စန္နာ၊သုဘသောပါနာ၊ ပသာဒိတသမတိတ္တိကကာကပေယျသုရမဏီယသီတလမဓုရောဒကာ သုဖုလ္လပုပ္ဖဖလဓာရိတ နာနာဝိဓဝိစိတ္တသာလသလလစမ္ပကာသောကရုက္ခာနာဂရုက္ခာဒီဟိ သုသဇ္ဇိတဘူမိပဒေသာ အစ္စန္တရမဏိယာ ပေါက္ခရဏီ အတ္ထိ။ တတ္ထ အဓိဝတ္ထော မဟာနုဘာဝေါ သုမနောနာမ နာဂရာဇာ သောဠသသဟဿမတ္တာဟိ နာဂမာဏဝိကာဟိ ပရိဝုတော မဟန္တံ သိရိသမ္ပတ္တိံ အနုဘဝမာနော တထာဂတဿ ရူပသောဘဂ္ဂပ္ပတ္တံ အတ္တဘာဝံ ဩလောကေတွာ မဟန္တံ သုခသောမနဿံ အနုဘဝမာနော အတ္တနော မာတရံ နန္ဒနာဂမာနဝိကံ ဂရုဋ္ဌာနေ ဌပေတွာ တဿာ ဝေယျာဝစ္စံ ကုရုမာနော တသ္မိံယေဝ ပေါက္ခရဏိံ အဇ္ဈာဝသတိ။ သတ္ထာ ပန အတ္တနော ဂမနံ သံဝိဓာနာနန္တရေ သုမနံ နာဂရာဇာနံ အဝိဒုရေ ဌိတံ အာမန္တေတွာ သပရိဝါရော အာဂစ္ဆာ ဟီတိ အာဟ။ သော သာဓုတိ သမ္ပဋိစ္ဆိတွာ အတ္တနော ပရိဝါရေ ဆကောဋိမတ္တေ နာဂေ ဂဟေတွာ သုပုပ္ပီတစမ္ပကရုက္ခံ တထာဂတဿ သူရိယရံသိနိဝါရဏတ္ထံ ဆတ္တံ ကတွာ ဂဏှိ။ အထ ဘဂဝါ ရဝိရသ္မိပတ္ထဋသုဝဏ္ဏပဗ္ဗတော ဝိယ ဝိရောစမာနော အတ္တနော ပတ္တစီဝရမာဒါယ အာကာသံ အဗ္ဘူဂ္ဂဉ္ဆိ။ သတ္ထာရံ ပရိဝါရေတွာ ဌီတာ တေ ပဉ္စသတခီဏာသဝါပိ သကံ သကံ ပတ္တစီဝရမာဒါယ အာကာသံ ဥဂ္ဂန္တွာ သတ္ထာရံ ပရိဝါရယိံသု။ သတ္ထာ ပဉ္စသတခီဏာသဝပရိဝုတော ဝိသာခပုဏ္ဏမုပေါသထဒိဝသေ ကလျာဏိယံ ဂန္တွာ မဟာရဟေ မဏ္ဍပမဇ္ဈေ ပညတ္တဝရ ဗုဒ္ဓါသနေ ပဉ္စသတခီဏာသဝပရိဝုတော ဟုတွာ နိသီဒိ။

အထ မဏိအက္ခိကော နာမ နာဂရာဇာ ဗုဒ္ဓပမုခံ ဘိက္ခု သင်္ဃံ အနေကေဟိ ဒိဗ္ဗေဟိ ခဇ္ဇဘောဇ္ဇေဟိ သန္တပ္ပေတွာ ဧကမန္တံ နိသီဒိ။ သတ္ထာ တဿ ဘတ္တာနုမောဒနံ ကတွာ သုမနကုဋေ ပဒလဉ္ဆနံ ဒဿေတွာ တသ္မိံ ပဗ္ဗတပါဒေ အနေကပါဒပါကိဏ္ဏဘူမိပ္ပဒေသေ နိသိန္နော ဒိဝါဝိဟာရံ ကတွာ တတော ဝုဋ္ဌာယ ဒီဃဝါပိစေတိယဋ္ဌာနေ သမာပတ္တိံ သမာပဇ္ဇိ။ မဟာပထဝီ ဥဒကပရိယန္တံ ကတွာ သတဝါရံ သဟဿဝါရံ သင်္ကမ္ပိ။ တတ္ထ မဟာသေနံ နာမ ဒေဝပုတ္တံ အာရက္ခတ္ထာယ နိဝတ္တေတွာ တတော ¶ ဝုဋ္ဌာယ မဟာထူပဋ္ဌာနေ တထေဝ သမာပတ္တိံ သမာပဇ္ဇိ။ မဟာပထဝိ တထေဝ ကမ္ပိ။ တတြာပိ ဝိသာလရူပ ဒေဝပုတ္တံ အာရက္ခံ ဂဏှနတ္ထာယ ဌပေတွာ တတော ဝုဋ္ဌာယ ထူပါရာမ စေတိယဋ္ဌာနေ တထေဝ နိရောဓသမာပတ္တိံ သမာပဇ္ဇိ။ မဟာပထဝီ တထေဝ ကမ္ပိ။ တတ္ထ စ ပထဝိပါလ ဒေဝပုတ္တံ အာရက္ခတ္ထာယ။ နိဝတ္တေတွာ တတော ဝုဋ္ဌာယ မရိစဝဋ္ဋိစေတိယဋ္ဌာနံ ဂန္တွာ ပဉ္စဟိ ဘိက္ခုသတေဟိ သဒ္ဓိံ သမာပတ္တိံ အပ္ပယိ။ ပထဝိ တထေဝ ကမ္ပိ။ တသ္မိံ ဌာနေ ဣန္ဒကဒေဝပုတ္တံ အာရက္ခံ ဂဏှနတ္ထာယ ဌပေသိ။ တတော ဝုဋ္ဌာယ ကာစရဂါမစေတိယဋ္ဌာနေ တထေဝ သမာပတ္တိံ သမာပဇ္ဇိ။ ပထဝိ တထေဝ ကမ္ပိ။ (တသ္မိံ ဌာနေ မဟာဃောသ ဒေဝပုတ္တံ အာရက္ခံ ဂဏှနတ္ထာယ နိယျာဒေသိ) ဧတသ္မိံ မဟာစေတိယဋ္ဌာနေ မဟာဃောသံ နာမ ဒေဝပုတ္တံ အာရက္ခံ ဂဟဏတ္ထာယ နိဝတ္တေတွာ တတော ဝုဋ္ဌာယ တိဿမဟာဝိဟာရစေတိယဋ္ဌာနေ တထေဝ သမာပတ္တိံ သမာပဇ္ဇိ။ ပထဝိ တထေဝ ကမ္ပိ။ တတ္ထ မဏိမေခလံ နာမ ဒေဝဓီတရံ အာရက္ခံ ဂါဟာပေတွာ တတော နာဂမဟာဝိဟာရစေတိယဋ္ဌာနေ တထေဝ သမာပတ္တိံ သမာပဇ္ဇိ။ ပထဝိ တထေဝ ကမ္ပိ။ တသ္မိမ္ပိ မဟိန္ဒံ နာမ ဒေဝပုတ္တံ အာရက္ခံ ဂဟဏတ္ထာယ ဌပေသိ။ တတော ဝုဋ္ဌာယ မဟာဂင်္ဂါယ ဒက္ခိဏဒိသာဘာဂေ သေရု နာမ ဒဟဿ အန္တေ ဝရာဟ နာမ သောဏ္ဍိမတ္ထကေ အတိမနောရမံ ဥဒကဗုဗ္ဗုဠကေလာသကူဋပဋိဘာဂံ စေတိယံ ပတိဋ္ဌဟိဿတီ’တိ ပဉ္စသတခီဏာသဝေဟိ သဒ္ဓိံ နိရောဓသမာပတ္တိံ သမာပဇ္ဇိ။ ဗဟလဃနမဟာပထဝိ ပရိဗ္ဘမိတကုမ္ဘကာရစက္ကံ ဝိယ ပဘိန္တမဒမဟာ ဟတ္ထိနာဂဿ ကုဉ္စနာဒကရဏံ ဝိယ ဥစ္ဆုကောဋ္ဋန ယန္တ-မုခသဒ္ဒေါ ¶ ဝိယ (စ) သတဝါရံ သဟဿဝါရံ နဒမာနာ သောမနဿပ္ပတ္တာ ဝိယ သကလလင်္ကာဒီပံ ဥန္နာဒံ ကုရုမာနာ သံကမ္ပိ။ တတော ဝုဋ္ဌာယ သုမနနာဂရညော ဟတ္ထေသု ဌိတ စမ္ပကရုက္ခတော ပုပ္ဖာနိ အာဒါယ တတ္ထ ပူဇေတွာ ပုနပ္ပုနံ တံ ဩလောကေသိ။ သော သတ္ထာရံ ဝန္ဒိတွာ မယာ ဘန္တေ ကိံ ကတ္တဗ္ဗန္တိ ပုစ္ဆိ။ ဣမဿ ဌာနဿ အာရက္ခံ ကရောဟီတိ အာဟ။ သော တံ သုတွာ ဘန္တေ တုမှာကံ ဂန္ဓကုဋိံ မမ အာရက္ခံ ကရောန္တဿ ရူပသောဘဂ္ဂပ္ပတ္တံ အသီတျာနုဗျဉ္ဇနဗျာမပ္ပဘာဒွတ္တိံသမဟာပုရိသလက္ခဏဝိစိတ္တံ ဒဿနာနုတ္တရိယဘူတံ ပဿန္တဿ မနောသိလာတလေ သီဟနာဒံ နဒန္တော တရုဏသီဟော ဝိယ ဂဇ္ဇန္တော ပါဝုဿကမဟာမေဃော ဝိယ အာကာသဂင်္ဂံ ဩတရန္တော ဝိယ ရတနဒါမံ ဂန္ထေန္တော ဝိယ စ အဋ္ဌင်္ဂသမန္နာဂတံ သဝနီယသရံ ဝိဿဇ္ဇေတွာ ဗြမှဃောသံ နိစ္ဆာရေန္တော နာနာနယေဟိ ဝိစိတ္တကထံ ကထယမာနာနံ သဝနာနုရိတ္တယဘူတံ သံသာရဏ္ဏဝနိမုဂ္ဂါနံ တာရဏသမတ္ထံ မဓုရ ဓမ္မဒေသနံ သုဏန္တဿ၊ ဉာဏိဒ္ဓိယာ ကောဋိပ္ပတ္တေ သာရိပုတ္တမောဂ္ဂလ္လာနာဒယော အသီတိမဟာသာဝကေ ပဿန္တဿ၊ တတ္ထေဝ မယှံ ဝသနံ ရုစ္စတိ။ န သက္ကောမိ အညတ္ထ တုမှေဟိ ဝိနာ ဝသိတုန္တိ အာဟ။ ဘဂဝါ တဿ ကထံ သုတွာ နဂရာဇ၊ ဣမံ ပဒေသံ တယာ စိရံ ဝသိတဋ္ဌာနံ။ ကကုသန္ဓဿ ဘဂဝတော ဓာတု ဣမသ္မိံယေဝ ဌာနေ ပတိဋ္ဌိတာ၊ တွမေဝ တသ္မိံ ကာလေ ဝရနိဒ္ဒေါ နာမ နာဂရာဇာ ဟုတွာ တဿာ ဓာတုယာ အာရက္ခံ ဂဟေတွာ ဂန္ဓမာလာဒီဟိ ပူဇံ ကရောန္တော စိရံ ဝိဟာသိ။ ပုန ကောဏာဂမနဿ ဘဂဝတော ဓာတု ဣမသ္မိံယေဝ ဌာနေ ပတိဋ္ဌိတာ တွမေဝ တသ္မိံ ကာလေ ဇယသေနော နာမ ဒေဝပုတ္တော ဟုတွာ တဿာ ဓာတုယာ အာရက္ခံ ဂဟေတွာ ဂန္ဓမာလာဒီဟိ ပူဇံ ကတွာ တတ္ထေဝ စိရံ ဝိဟာသိ။ ပုန ကဿပဿ ဘဂဝတော ဓာတု ဣမသ္မိံယေဝ ဌာနေ ပတိဋ္ဌိတာ။ တွမေဝ တသ္မိံ ကာလေ ဒီဃသာလော နာမ နာဂရာဇာ ဟုတွာ တာယ ဓာတုယာ အာရက္ခံ ဂဟေတွာ ဂန္ဓမာလာဒီဟိ ပူဇံ ကရောန္တော ဝိဟာသိ။ မယိ ပန ပရိနိဗ္ဗုတေ ကာကဝဏ္ဏတိဿမဟာရာဇာ မယှံ နလာဋဓာတုံ ဣမသ္မိံယေဝ ¶ ဌာနေ ပတိဋ္ဌာပေဿတိ၊ တသ္မာ တွံ ဣမဿ ဌာနဿ အာရက္ခံ ကရောဟီတိ ဝတွာ ပဉ္စသီလေသု ပတိဋ္ဌာပေတွာ ပဉ္စသတခီဏာသဝေဟိ သဒ္ဓိံ စေတိယဋ္ဌာနံ ပဒက္ခိဏံ ကတွာ တွံ အပ္ပမတ္တော ဟောဟီတိ ဝတွာ အာကာသံ ဥပ္ပတိတွာ ဇေတဝနမေဝ ဂတော။

တဿ ပန နာဂရညော မာတာ ဣန္ဒမာနဝိကာ နာမ အာဂန္တွာ တထာဂတံ ဝန္ဒိတွာ ဧကမန္တံ ဌိတာ၊ ဘန္တေ မမ ပုတ္တော သုမနော နာမ နာဂရာဇာ ကုဟိန္တိ အာဟ။ တဝ ပုတ္တော တမ္ဗပဏ္ဏိဒီပေ မဟာဝါလုကဂင်္ဂါယ ဒက္ခိဏဘာဂေ သေရု နာမ ဒဟဿ သမီပေ ဝရာဟ နာမ သောဏ္ဍိယံ သမာဓိ အပ္ပိတတ္တာ အတ္တနော ပရိဝါရေ ဆကောဋိမတ္တေ နာဂေ ဂဟေတွာ သတ္ထာရံ ဝန္ဒိတွာ ဘန္တေ ဣတော ပဋ္ဌာယ တုမှာကံ ဒဿနံ ဒုလ္လဘံ၊ ခမထ မေတိ အစ္စယံ ဒေသေတွာ မဟတိံ နာဂသမ္ပတ္တိံ ဂဟေတွာ ပုတ္တဿ သုမနနာဂရာဇဿ သန္တိကံ ဂန္တွာ မဟတိံ ဣဿရိယသမ္ပတ္တိံ အနုဘဝန္တိ တတ္ထေဝ အာရက္ခံ ဂဟေတွာ စိရံ ဝိဟာသိ။

မဟာပညော မဟာသဒ္ဓါ မဟာဝီရော မဟာဣသိ၊

မဟာဗလေန သမ္ပန္နော မဟန္တဂုဏဘုသိတော၊

ဂန္တွာန တမ္ဗပဏ္ဏိံ သော သတ္တာနုဒ္ဒယမာနသော၊

ဂန္တွာ နာဂဝရံ ဒီပံ အဂါ ဇေတဝနံ ဝိဒု။

အတိသယမတိသာရော သာရဒါနံ ကရောန္တော၊

အတိအဓိရမဏိယော သဗ္ဗလောကေကနေတ္တော၊

အတိဂုဏဓရဏီယော သဗ္ဗသတ္တေ တမဂ္ဂံ၊

အတိဝိပုလဒယော တာနေတုမာဂါ သုဒီပံ။

တတိယဂမနကထာ သမတ္တာ။

ဣတိ အရိယဇနပသာဒနတ္ထာယ ကတေ ဓာတုဝံသေ တထာဂတဿ ဂမနံ နာမ ပဌမော ပရိစ္ဆေဒေါ။

အာဂန္တွာ တမ္ဗပဏ္ဏိံ သော သတ္တာနုဒ္ဒယမာနသော

ပုန ဂန္တွာ နာဂဒီပံ အဂါ ဇေတဝနံ ဝရံ

အတိသယမတိသာရော သာရဒါနေက ရတ္တော

အတိဓိတိရမဏိယော သဗ္ဗလောကေကနေတ္တော

အတိဂုဏရမဏီယံ သဗ္ဗသန္တေကမဂ္ဂံ

အတိဝိပုလဒယတ္တာ လင်္ကမာဂါ သုဒီပံ

ဣတိ သီဟဠဘာသာယ ကတေ ဓာတုဝံသေ ဒိဿတေ။

၂။ ¶ ပရိနိဗ္ဗာနကထာ

သတ္ထာ ပန တတော ပဉ္စစတ္တာလီသဝဿာနိ တိပိဋကပရိယတ္တိဓမ္မံ ဒေသေတွာ ဝေနေယျဇနေ သံသာရတော စတုအရိယမဂ္ဂဖလပဋိလာဘဝသေန ဥဒ္ဓါရေတွာ နိဗ္ဗာနေ ပတိဋ္ဌာပေတွာ ပစ္ဆိမေ ကာလေ ဝေသာလိနဂရံ ဥပနိဿာယ စာပါလစေတိယံ နိဿာယ ဝိဟရန္တော မာရေန ပရိနိဗ္ဗာနတ္ထာယ အာရာဓိတော သတော သမ္ပဇာနော အာယုသင်္ခါရေ ဝိဿဇ္ဇေသိ။ တဿ ဝိဿဋ္ဌဘာဝံ အာနန္ဒောယေဝ အညာသိ။ အညော ကောစိပိ ဇာနန္တော နာမ နတ္ထိ။ တသ္မာ ဘိက္ခုသင်္ဃမ္ပိ ဇာနာပေဿာမီတိ ဇေတဝနမဟာဝိဟာရံ ဂန္တွာ သဗ္ဗံ ဘိက္ခုသင်္ဃံ သန္နိပါတာပေတွာ ဘိက္ခဝေ တထာဂတဿ န စိရဿေဝ တိဏ္ဏံ မာသာနံ အစ္စယေန ပရိနိဗ္ဗာနံ ဘဝိဿတိ၊ တုမှေ သတ္တတိံသဗောဓိ ပက္ခိယဓမ္မေသု သမဂ္ဂါ ဟုတွာ ဧကီဘာဝါ ဟောထ၊ တုမှေ ဝိဝါဒံ မာ ကရောထ။ အပ္ပမာဒေန တိဿော သိက္ခာ သမ္ပာဒေထာတိ ဝတွာ ပုန ဒိဝသေ ဝေသာလိယံ ပိဏ္ဍာယ စရိတွာ ပိဏ္ဍပါတာ ပဋိက္ကမိတွာ ဘဏ္ဍဂါမံ ဂတော။ ဘဏ္ဍဂါမတော ဟတ္ထိဂါမံ ဟတ္ထိဂါမတော အမ္ဗဂါမံ အမ္ဗဂါမတော ဇမ္ဗုဂါမံ ဇမ္ဗုဂါမတော နိဂြောဓဂါမံ နိဂြောဓဂါမတော ဘောဂနဂရံ ဘောဂနဂရတော ပါဝါနဂရံ ပါဝါနဂရတော ကုသိနာရာနဂရံ ပတ္တော။ တတ္ထ ယမကသာလာနမန္တရေ ဌီတော အာနန္ဒတ္ထေရံ အာမန္တေတွာ ဥန္တရသီသကံ ကတွာ မဉ္စကံ ပညာပေဟိ ကိလန္တောသ္မိ အာနန္ဒ နိပဇ္ဇိဿာမိ’တိ အာဟ။ တံ သုတွာ အာနန္ဒတ္ထေရော ဥတ္တရသီသကံ ကတွာ မဉ္စကံ ပညာပေတွာ စတုဂ္ဂုဏံ သင်္ဃာဋိံ အတ္ထရိတွာ ပဉ္စစတ္တာလီသဝဿာနိ အသယိတဗုဒ္ဓသေယျံ သယန္တော ဒက္ခိဏပဿေန သတော သမ္ပဇာနော အနုဋ္ဌာနသညံ မနသိကရိတွာ သီဟသေယျံ ကပ္ပေသိ။

အတီတမဒ္ဓါန ဘဝေ စရန္တော၊

အနန္တသတ္တေ ကရုဏာယုပေတော၊

ကတွာန ပုညာနိ အနပ္ပကာနိ၊

ပတ္တော သိဝံ လောကဟိတာယ နာထော။

ဧဝံ ¶ ဟိ သော ဒသဗလောပိ ဝိဟီနထာမော၊

ယမဿ သာလာန နိပဇ္ဇိ မဇ္ဈေ၊

ကတွာန သညဉှိ အနုဋ္ဌဟာနံ၊

သ ဣဒ္ဓိမာ မာရမုခံ ပဝိဋ္ဌော။

တသ္မိံ ခဏေ သမကသာလာ သုပုပ္ဖိတာ အဟေသုံ။ န ကေဝလံ ယမကသာလာယေဝ သုပုပ္ဖီတာ၊ အထ ခေါ ဒသသဟဿီ လောကဓာတု စက္ကဝါဠေသု သာလရုက္ခာပိ ပုပ္ဖိတာ။ န သာလရုက္ခာယေဝ သုပုပ္ဖိတာ၊ အထ ခေါ ယံ ကိဉ္စိ ပုပ္ဖုပဂဖလူပဂ ရုက္ခဇာတံ သဗ္ဗမ္ပိ ပုပ္ဖဉ္စ ဖလဉ္စ ဂဏှိ။ ဇလေသု ဇလပဒုမာနိ ထလေသု ထလပဒုမာနိ ခန္ဓေသု ခန္ဓပဒုမာနိ သာခါသု သာခါပဒုမာနိ လတာသု လတာပဒုမာနိ အာကာသေ ဩလမ္ဗပဒုမာနိ ပိဋ္ဌိပါသာဏေ ဟိန္ဒိတွာ သတပတ္တပဒုမာနိ သုပုပ္ဖိတာနိ အဟေသုံ။ ပထဝိတော ယာဝ ဗြဟ္မလောကော တာဝ ဒသသဟဿိ စက္ကဝါဠာ ဧကမာလာဂုဏာ ဝိယ အဟေသုံ။ ဒေဝါ အာကာသတော ဒိဗ္ဗမန္ဒာရဝပါရိစ္ဆတ္တကကောဝိဠာရပုပ္ဖာနိ စ စန္ဒနစုဏ္ဏာနိ စ သမာကိရန္တိ။ ဒိဗ္ဗတုရိယသင်္ဂိတိယော စ အန္တလိက္ခေ ပဝတ္တန္တိ။ အနေကာနိ အစ္ဆရိယသဟဿာနိ အဟေသုံ။ ဧဝံ ပူဇာဝိသေသေ ပဝတ္တမာနေ ပဌမယာမေ သုဘဒ္ဒပရိဗ္ဗာဇကံ ဝိနေတွာ မဇ္ဈိမယာမေ ဒသသဟဿိ လောကဓာတု ဒေဝတာနံ အနုသာသိတွာ ပစ္ဆိမယာမာဝသာနေ ပဌမဇ္ဈာနံ သမာပဇ္ဇိတွာ တတော ဝုဋ္ဌာယ ဒုတိယဇ္ဈာနံ စတုတ္ထဇ္ဈာနံ သမာပဇ္ဇိ။ တတော ဝုဋ္ဌာယ အာကာသာနဉ္စာယတနံ ဝိညာဏဉ္စာယတနံ အာကိဉ္စညာယတနံ နေဝသညာနာသညာယတနံ သမာပဇ္ဇိတွာ တတော ဝုဋ္ဌာယ နိရောဓသမာပတ္တိံ သမာပဇ္ဇိ။ တတော ဝုဋ္ဌာယ ပဌမဇ္ဈာနံ ဒုတိယဇ္ဈာနံ တတိယဇ္ဈာနံ စတုတ္ထဇ္ဈာနဉ္စ သမာပဇ္ဇိ။ တတော ဝုဋ္ဌာယ ဧတ္ထန္တရတော အနုပါဒိသေသနိဗ္ဗာနဓာတုယာ ပရိနိဗ္ဗာယိ။

မဟာမောဟတမံ ဟန္တွာ သတ္တာနံ ဟဒယဿိတံ၊

ရဝီဝ ဇောတမာနော သော လောကဿ အနုကမ္ပကော၊

ဝဿာနိ ¶ ပဉ္စတာလီသံ ကတွာ သတ္တဟိတံ ဗဟုံ၊

အဓုနာ အဂ္ဂိက္ခန္ဓောဝ ပရိနိဗ္ဗာယိ သော ဇိနော။

ဧဝံ ပန ဘဂဝတိ ပရိနိဗ္ဗုတေ ဝိဿကမ္မဒေဝပုတ္တော တထာဂတဿ သရီရပ္ပမာဏံ ဝရဒေါဏိံ ရတနေဟိ မာပေတွာ ဝိသုဒ္ဓကပ္ပာသေဟိ တထာဂတဿ သရီရံ ဝေဌေတွာ ရတနဒေါဏိယံ ပက္ခိပိတွာ ဂန္ဓတေလေဟိ ပူရေတွာ အပရာယ ဒေါဏိယာ ပိဒဟိတွာ သဗ္ဗဂန္ဓဒါရုစိတကံ ကတွာ ယေဘုယျေန ဒေဝတာယော လောဟိတစန္ဒနဃဋိကာယော အာဒါယ စိတကာယံ ပက္ခိပိတွာ အဂ္ဂိံ ဂါဟာပေတုံ နာသက္ခိံသု။ ကသ္မာ? မဟာကဿပတ္ထေရဿ အနာဂတတ္တာ။ သော အာယသ္မာ မဟာကဿပတ္ထေရော ယေဘုယျေန ဗဟုန္နံ ဒေဝါနံ ပိယော မနာပေါ။ ထေရဿ ဟိ ဒါနံ ဒတွာ သဂ္ဂေ နိဗ္ဗတ္တာနံ ပမာဏော နာမ နတ္ထိ။ တသ္မာ ဒေဝတာ တသ္မိံ သမာဂမေ အတ္တနော ကုလူပဂတ္ထေရံ အဒိသွာ အမှာကံ မဟာကဿပတ္ထေရော ကုဟိန္တိ ဩလောကေန္တော အတ္တနော ပရိဝါရေဟိ ပဉ္စမတ္တေဟိ ဘိက္ခုသတေဟိ သဒ္ဓိံ မဂ္ဂံ ပဋိပန္နောတိ ဉတွာ ယာဝ ထေရော ဣမသ္မိံ န သမ္ပတ္တော စိတကံ တာဝ န ပဇ္ဇလတုတိ အဓိဋ္ဌဟိံသု။ တသ္မိံ ကာလေ ထေရော ယေဘုယျေန တေရသဓုတင်္ဂဓရေဟိ ပဉ္စမတ္တေဟိ ဘိက္ခုသတေဟိ သဒ္ဓိံ အာဂန္တွာ စိတကံ တိက္ခတ္တုံ ပဒက္ခိဏံ ကတွာ ပါဒပဿေ ဌီတော၊ ဘန္တေ တုမှာကံ ဒဿနတ္ထာယ ဣတော ကပ္ပသတသဟဿမတ္ထကေ ပဒုမုတ္တရသတ္ထုနော ပါဒမုလေ အဘိနီဟာရတော ပဋ္ဌာယ အဝိဇဟိတွာ အာဂတော။ ဣဒါနိ မေ အဝသာနဒဿနန္တိ ပါဒေ ဂဟေတွာ ဝန္ဒိတုံ အဓိဋ္ဌာသိ။

မဟာကဿပထေရော သော ဘိက္ခုသင်္ဃပုရက္ခတော၊

ဧကံသံ စီဝရံ ကတွာ ပဂ္ဂဟေတွာန အဉ္ဇလိံ။

ပဒက္ခိဏဉ္စ တိက္ခတ္တုံ ကတွာ ဌတွာ ပဒန္တိကေ၊

ပတိဋ္ဌဟန္တု သီသေ မေ ဇိနပါဒေတိ’ဓိဋ္ဌဟိ။

သဟာဓိဋ္ဌာနံ စိတကာ ဒုဿာနိ စ ဝိဘိန္ဒိယ၊

နိက္ခမိံသု တဒါ ပါဒါ ဃနမုတ္တောဝ စန္ဒိမာ။

ဥဟော ဟတ္ထေဟိ ပဂ္ဂယှ ဌပေတွာ အတ္တနော သိရေ၊

ဝန္ဒိတွာ သတ္ထုနော ပါဒေ ခမာပေတွာ ဝိသဇ္ဇယီ။

ပုဏ္ဏစန္ဒော ယထာ အဗ္ဘံ စိတကံ ပါဝိသိ တဒါ၊

ဣဒံ အစ္ဆေရကံ ဒိသွာ ရဝံ ရဝိ မဟာဇနော။

ဥဋ္ဌဟိတွာန ပါစီနာ ဝန္ဒော အတ္ထင်္ဂတော ယထာ၊

ပါဒေ အန္တရဓာယန္တေ အရောဒိံသု မဟာဇနာ။

တဒါ မလ္လရာဇာနော ဘဂဝတော သရီရကိစ္စံ ကရိဿာမာတိ ဝတွာ နာနာဝတ္ထာဘရဏာနိ နိဝါသေတွာ ပရိဝါရယိံသု။ တတော ရာဇာနော မနုဿာ စ အဂ္ဂိံ ဒါတုံ အာရဟိံသု။ တဒါ သက္ကော? မယိ ပန ပရိနိဗ္ဗုတေ သက္ကော ဒေဝရာဇာ မဏိဇောတိရသံ ပသာရေတွာ နိက္ခန္တအဂ္ဂိနာ မမ သရီရကိစ္စံ ကရိဿတိ။ မဏိအဂ္ဂိနော အဝသာနေ မနုဿာ အဂ္ဂိံ ကရိဿန္တိတိ။ ဧဝံ ဗုဒ္ဓဝစနံ ပရိဘာဝေတွာ နိက္ခတ္တုံ ပဒက္ခိဏံ ကတွာ ဘဂဝတော သရီရကိစ္စံ ကတွာ သမန္တတော ဥဋ္ဌဟတုတိ အဓိဋ္ဌဟိ။

တသ္မိံ ခဏေ သယမေဝ စိတကံ အဂ္ဂိ ဂဏှိ။ သရီရံ ပန ဘဂဝတော ဈာယာမာနံ ဆဝိစမ္မမံသနဟာရုအဋ္ဌိအဋ္ဌိမိဉ္ဇံ အသေသေတွာ သုမနမကုဠမုတ္တာရာသိသဒိသမေဝ ဓာတုယော အဝသေသာ အဟေသုံ။

ပရိနိဗ္ဗုတကာလေပိ သကလံ ကလုနံ အဟု၊

ပရိဒေဝေါ မဟာ အာသိ မဟီ ဥဒြိယနံ ယထာ။

ဒေဝတာယာနုဘာဝေန သတ္ထုနော စိတကော သယံ၊

တတော ဧကပ္ပဟာရေန ပဇ္ဇလိတ္ထ သမန္တတော။

ယဉ္စ အဗ္ဘန္တရံ ဒုဿံ ယံ ဒုဿံ သဗ္ဗဗာဟိရံ

ဒုဿေ ဒွေဝ န ဈာယိံသု တေသံ ဒုဿာနမန္တရေ၊

ယထာ နိရုဒ္ဓတေလဿ န မသီ န စ ဆာရိကာ၊

ဧဝမဿ န ဒိဿတိ ဗုဒ္ဓဂတ္တဿ ဈာယတော။

သုမနမကုဠသဘာဝါ စ ဓောတမုတ္တာဘမေဝ စ၊

သုဝဏ္ဏဝဏ္ဏသံကာသာ အဝသိဿံသု ဓာတုယော။

ဒါဌာ စတဿော ဥဏှီသံ အက္ခကာ ဒွေ စ သတ္တိမာ၊

န ဝိကိဏ္ဏာ တတော သေသာ ဝိပ္ပကိဏ္ဏာဝ ဓာတုယော။

အဟောသိ တနုကာ ဓာတု သာသပဗီဇမတ္တိကာ၊

ဓာတုယော မဇ္ဈိမာ မဇ္ဈေဘိန္နတဏ္ဍုလမတ္တိကာ။

ဓာတုယော ¶ မဟတိ မဇ္ဈေ ဘိန္နမုဂ္ဂပ္ပမာဏိကာ၊

ဓာတုဝဏ္ဏာ တယော အာသုံ ဗုဒ္ဓါဓိဋ္ဌာနတေဇသာ။

သာရိပုတ္တဿ ထေရဿ သိဿော သရဘုနာမကော၊

အာဒါယ ဇိနဂီဝဋ္ဌိံ စိတကာတောဝ ဓာတု သော။

သဒ္ဓိံ သိဿသဟဿေန စေတိယေ မဟိယင်္ဂဏေ၊

ဌပေတွာ စေတိယံ ကတွာ ကုသိနာရမဂါ မုနိ။

ဆဠဘိညော ဝသိပ္ပတ္တော ခေမော ကာရုဏိကော မုနိ၊

သဟသာ စိတကာတောဝ ဝါမဒါဌံ သမဂ္ဂဟီ။

အာကာသတော ပတိတွာပိ နိက္ခမိတွာပိ သာလတော၊

သမန္တတောမ္ဗုမုဂ္ဂန္တွာ နိဗ္ဗာပေသုံ ဇလာနလံ။

မလ္လရာဇဂဏာ သဗ္ဗေ သဗ္ဗဂန္ဓောဒကေန တံ၊

စိတကံ လောကနာထဿ နိဗ္ဗာပေသုံ မဟေသိနော။

ဧဝံ ပန သဗ္ဗလောကေ ကရုဏာဓိကော သမ္မာသမ္ဗုဒ္ဓါ ဝေသာခပုဏ္ဏမုပေါသထေ အင်္ဂါရဒိဝသေ ပရိနိဗ္ဗုတော။ ဒေဝမနုဿာနံ သင်္ဂဟကရဏတ္ထာယ ယမကသာလာနမန္တရေ စိတကံ သတ္တရတ္တိန္ဒိဝံ ဝသီ။ တတော ဝီသံ ဟတ္ထသတိကဿ ဥပရိ သတ္တရတ္တိန္ဒိဝံ ဝသိ။ ယာဝ အဂ္ဂိပရိနိဗ္ဗာပနံ သတ္တရတ္တိန္ဒိဝံ ဟောတိ။

တတော သတ္တဒိဝသာနိ ကုသိနာရာယံ မလ္လရာဇပုတ္တေသု ဂန္ဓောဒကေန စိတကံ နိဗ္ဗာပယမာနေသု သာလရုက္ခတော ဥဒကဓာရာ နိက္ခမိတွာ စိတကံ နိဗ္ဗာပယိံသု။ တတော ဒသဗလဿ ဓာတုယော သုဝဏ္ဏစင်္ဂေါဋကေ ပက္ခိပိတွာ အတ္တနော နဂရေ သန္ထာဂါရေ ဌပေတွာ သတ္တိပဉ္ဇရံ ကတွာ ဓနုပါကာရေဟိ ပရိက္ခိပါပေတွာ သတ္တာဟံ နစ္စဂီတဝါဒိတဂန္ဓမာလာဒီဟိ မလ္လရာဇပုတ္တာ သက္ကာရံ ကရိံသု။

တတော တေ မလ္လရာဇာနော ရမ္မံ ဒေဝသဘောပမံ၊

သဗ္ဗထာ မဏ္ဍုယိတွာန သန္ထာဂါရံ တတော ပန။

မဂ္ဂံ ¶ အလင်္ကရိတွာန ယာဝ မကုဋစေတိယာ၊

ဟတ္ထီက္ခန္ဓေ ဌပေတွာန ဟေမဒေါဏိံ သဓာတုကံ။

ဂန္ဓာဒီဟိပိ ပူဇေတွာ ကီဠန္တာ သာဓုကီဠိတံ၊

ပဝေသေတွာန နဂရံ သန္ထာဂါရေ မနောရမေ။

ဒသဘူမသ္မိံ ပလ္လင်္ကေ ဌပေတွာ ဇိနဓာတုယော၊

ဥဿယုံ တေ တဒါ ဆတ္တေ သန္ထာဂါရသမန္တတော။

ဟတ္ထီဟိ ပရိက္ခိပါပေသုံ တတော အဿေ တတော ရထေ၊

အညော’ညံ ပရိဝါရေတွာ တတော ယောဓေ တတော ဓနု၊

ဣတိ ပရိက္ခိပါပေသုံ သမန္တာ ယောဇနံ ကမာ၊

တဒါ နစ္စေဟိ ဂီတေဟိ ဝါဒိတေဟိ စ ပူဇယုံ။)

ပရိနိဗ္ဗာနကထာ သမတ္တာ။

တတော ဘဂဝတော ပရိနိဗ္ဗုတဘာဝံ သုတွာ အဇာတသတ္တု မဟာရာဇာ ကောသိနာရကာနံ မလ္လာနံ သာသနံ ပေသေသိ။ အဟမ္ပိ ခတ္တိယော ဘဂဝါပိ ခတ္တိယော သတ္ထုနော သရီရဓာတုနံ ထူပဉ္စ မဟဉ္စ ကရောမီတိ။ တေနေဝ ဥပါယေန ဝေသာလိယံ လိစ္ဆဝိရာဇာနော စ ကပိလဝတ္ထုမှိ သကျရာဇာနော စ အလ္လကပ္ပကေ ဗုလယော စ ရာမဂါမကေ ကောဠိယာ စ ဝေဌဒီပကေ ဗြာဟ္မဏော စ ပါဝါယံ ပါဝေယျကာ စ သာသနံ ပေသေတွာ သဗ္ဗေ ဧကတော ဟုတွာ ကောသိနာရကေဟိ သဒ္ဓိံ ဝိဝါဒံ ဥပ္ပာဒေသုံ။ တေသံ ပန အာစရိယော ဒြောဏဗြာဟ္မဏော နာမ။ သော တေသံ? မာ ဘောန္တော ဝိဂ္ဂဟဝိဝါဒံ ကရောထ၊ အမှာကံ ဘဂဝါ ခန္တိဝါဒီယေဝါတိ ဝတွာ တာဒိသဿ စ ခန္တိမေတ္တာနုဒ္ဒယသမ္ပန္နဿ သရီရဘာဂေ ကလဟံ ကာတုံ အယုတ္တန္တိ အာဟ။

(ရာဇာ အဇာတသတ္တု စ လိစ္ဆဝီ စ နရာဓိပါ၊

သကျာ စ အလ္လကပ္ပာ စ ကောဠိယာပိ စ ရာမကေ။

ဗြာဟ္မဏော ဝေဌဒီပေါ စ မလ္လပါဝေယျကာပိ စ၊

မလ္လာ စ ဓာတု အတ္ထာယ အညမညံ ဝိဝါဒယုံ။

ဧဝံ ¶ သန္တေ တဒါ ဒေါဏော ဗြာဟ္မဏော ဧတဒဗြဝီ၊

သုဏန္တု ဘောန္တော မေ ဝါစံ ဟိတမတ္ထုပသံဟိတံ။

ခန္တိဝါဒီ ဣသိကာလေ ဓမ္မပါလကုမာရကေ၊

ဆဒ္ဒန္တေ ဘုရိဒတ္တေ စ စမ္ပေယျေ သင်္ခပါလကေ။

မဟာကပိဇာတကာလေ အမှာကံ လောကနာယကော၊

ကောပံ အကတွာ အညေသု ခန္တိမေဝ အကာ ဇိနော။

သိဋ္ဌာသိဋ္ဌေ သုခေ ဒုက္ခေ လာဘာလာဘေ ယသာယသေ၊

တာဒီ လက္ခဏသမ္ပန္နော ခန္တိဝါဒေသု ကာ ကထာ။

ဧဝံ ဘဝတံ ဝိဝါဒေ သမ္ပဟာရော န သာဓုကော၊

သဗ္ဗေဝ သဟိတာ ဟောထ သမဂ္ဂါ မောဒမာနကာ။

တထာဂတဿ သာရီရံ အဋ္ဌဘာဂံ ကရောမသေ၊

ထူပါ ဝိတ္ထာရိတာ ဟောန္တု ပသန္နာ ဟိ ဗဟုဇ္ဇနာ။

တေန ဟိ ဝိဘဇေဟိ တွံ အဋ္ဌဘာဂန္တု ဗြာဟ္မဏ၊

ထူပါ ဝိတ္ထာရိတာ ဟောန္တု ပသန္နာ ဟိ ဗဟုဇ္ဇနာ။

ဧဝံ ဝုတ္တေ တဒါ ဒေါဏော ဗြာဟ္မဏော ဂဏဇေဋ္ဌကော၊

သုဝဏ္ဏံ နာဠိံ ကတွာန သမံ ဘာဇေသိ ရာဇုနံ။

သောဠသနာဠိယော အာသုံ သဗ္ဗာ တာ သေသဓာတုယော၊

ဧကေကပုရဝါသီနံ ဒွေ ဒွေ ဒေါဏော အဒါ တဒါ။

ဓာတုယော စ ဂဟေတွာန ဟဋ္ဌတုဋ္ဌာ နရာဓိပါ၊

ဂန္တွာ သကေ သကေ ရဋ္ဌေ စေတိယာနိ အကာရယုံ။

ဒေါဏော တုမ္ဗံ ဂဟေတွာန ကာရေသိ တုမ္ဗစေတိယံ၊

အင်္ဂါရထူပံ ကာရေသုံ မောရိယာ ဟဋ္ဌမာနသာ။

ဧကာ ဒါဌာ တိဒသပုရေ ဧကာ နာဂပုရေ အဟု၊

ဧကာ ဂန္ဓာရဝိသယေ ဧကာ ကာလိင်္ဂရာဇိနော။)

တတ္ထ ¶ ဒေါဏောတိ? တဒါ ဂဏာစရိယော။ သော ဓာတုယော ဝိဘဇန္တော ဧကံ ဒက္ခိဏဒါဌာဓာတုံ ဂဟေတွာ ဝေဌန္တရေ ဌပေသိ။ တဒါ သက္ကော အဇ္ဇ ဒက္ခိဏဒါဌာဓာတုံ ကော လဘတီတိ စိန္တေတွာ ဝေဌန္တရေ ပဿိ။ သော ရတနစင်္ဂေါဋကံ ဂဟေတွာ အဒိဿမာနကာယေန ဂန္တွာ ဓာတုံ ဂဟေတွာ တာဝတိံသဘဝနေ စူဠာမဏိစေတိယ ဧကယောဇနုဗ္ဗေဓံယေဝ မဟန္တံ ထူပံ ကတွာ ဌပေသိ။ ဧကံ ဒက္ခိဏဒဌာဓာတုံ ပါဒဂ္ဂန္တရေ အက္ကမိတွာ ဂဏှိ။ ဧတ္တာဝတာ တာဝတိံသဘဝနဒန္တဓာတုကထာ ပရိပုဏ္ဏာ ဝေဒိတဗ္ဗာ။

တဒါ ဇယသေနော နာမ နာဂရာဇာ ဘဂဝတော ပရိနိဗ္ဗုတဘာဝံ သုတွာ အဇ္ဇ ပစ္ဆိမဒဿနံ ပဿိဿာမီတိ မဟန္တံ နာဂရာဇသမ္ပတ္တိံ ဂဟေတွာ ကုသိနာရံ ဂန္တွာ မဟာပူဇံ ကတွာ ဧကမန္တံ ဌတွာ ပါဒဂ္ဂန္တရေ ဌိတံ ဓာတုံ ဒိသွာ နာဂေဒ္ဓိဗလေန ဂဟေတွာ နာဂဘဝနံ နေတွာ နာဂပုရဿ မဇ္ဈေ ရတနခစိတေ စေတိယေ ဌပေသိ။ တံ တမ္ဗပဏ္ဏိယံ ကာကဝဏ္ဏတိဿရာဇကာလေ မဟာဒေဝတ္ထေရဿ သိဿော မဟိန္ဒတ္ထေရော နာမ နာဂဘဝနံ ဂန္တွာ ဒက္ခိဏဒါဌံ ဂဟေတွာ တမ္ဗပဏ္ဏိယံ သေရုနဂရံ ဟရိတွာ ဂိရိအဘယဿ သေရုနဂရပဗ္ဗတန္တရေ စေတိယံ ကာရာပေတွာ ဌပေသိ။

ဧတ္တာဝတာ နာဂဘဝနဒန္တဓာတုကထာ ပရိပုဏ္ဏာ ဝေဒိတဗ္ဗာ။

တတြာယံ ဂန္ဓာရဝါသိနောတိ? ဧကာ ဝါမဒါဌာ ဒေါဏော နာမ အာစရိယော နိဝတ္ထ ဝတ္ထန္တရေ ဌပေတွာ ဂဏှိ။ တဒါ ဧကော ဂန္ဓာရဝါသီ ပုဗ္ဗေ လဒ္ဓဗျာကရဏော ကတာဘိနီဟာရော ဝတ္ထန္တရေ ဌတပိဒန္တဓာတုံ ဒိသွာ ကုသလစိတ္တေန တတော ဒန္တဓာတုံ ဂဟေတွာ ဂန္ဓာရဝါသိကေဟိ သဒ္ဓိံ အတ္တနော ရဋ္ဌံ ဂန္တွာ စေတိယဝနေ ဌပေသိ။

ဧတ္တာဝတာ ဝါမဒန္တဓာတုကထာ ပရိပုဏ္ဏာ ဝေဒိတဗ္ဗာ။

တတ္ထ အဓော ဝါမဒန္တဓာတုံ သာရိပုတ္တတ္ထေရဿ သိဿော ခေမော နာမ မုနိ ဇာလစိတကတောဝ ဥပ္ပတိတွာ ဝါမဒါဌံ ဂဟေတွာ ကာလိင်္ဂပုရံ နေတွာ ဗြဟ္မဒတ္တဿ ရညော သမီပံ ဂန္တွာ ¶ ဒန္တဓာတုံ ဒဿေတွာ? မဟာရာဇ ဝါမဒန္တဓာတုံ ဘဂဝါ တမေဝ ဣမသ္မိံ ဇမ္ဗုဒီပေ ယာဝ ဂုဟသီဝပရမ္ပရာ ဒေဝမနုဿာနံ အတ္ထံ ကရိတွာ ပရိယောသာနေ ဂုဟသီဝရညော ပါဟေဿတီတိ (နီယာဒေတုံ) အာဟာတိ နီယျာဒေသိ။

အပရဘာဂေ ဟေမမာလာ ရာဇကညာ ဒန္တကုမာရေန သဒ္ဓိံ ဗြာဟ္မဏဝေသံ ဂဟေတွာ ဒန္တဓာတုံ အာဒါယ ပလာယိတွာ ဝါဏိဇေ အာရောစေတွာ နာဝါ ဝေဂေန ဂန္တွာ စေဝ နာဂသုပဏ္ဏေဟိ မဟန္တံ ပူဇံ ကာရေတွာ အနုက္ကမေနာဂန္တွာ ဇမ္ဗုကောဠပဋ္ဋနံ ပတွာ ဒိဇဝရဿ အာစိက္ခိတမဂ္ဂေန အနုရာဓပုရံ ပတွာ ကိတ္တိဿိရိမေဃဿ ပဝတ္တိံ ပုစ္ဆိတွာ နဝဝဿအာယုသမာနော တီသု သရဏေသု ပသန္နဘာဝံ သုတွာ မေဃဂိရိ မဟာထေရဿ သန္တိကံ ဂန္တွာ ဝန္ဒိတွာ ဧကမန္တံ နိသီဒိတွာ ဒန္တဓာတုံ ဇမ္ဗုဒီပတော ဂဟေတွာ အာဂတဘာဝံ အာရောစေတွာ ဒဿေသိ။ ဒိသွာ စ ပန ပီတိယာ ဖုဋော ဥဘိန္နမ္ပိ သင်္ဂဟံ ကတွာ မဟာဝိဟာရံ အလင်္ကာရေတွာ ဇိနဒန္တဓာတုံ ဌပေတွာ ဧကံ ဘိက္ခုံ ပေသေတွာ တံ ပဝတ္တိံ ရညော အာရောစာပေသိ။ တံ သုတွာ ရာဇာ ပီတိပါမောဇ္ဇော စက္ကဝတ္တိဿ သိရိသမ္ပတ္တော ဒဠိဒ္ဒေါ ဝိယ တဿ ပါဋိဟာရိယံ ဒိသွာ ဝီမံသိတွာ နိက္ကင်္ခေါ ဟုတွာ သကလလင်္ကာဒီပေန ပူဇေသိ။ ဧတေန နယေန ပူဇံ ကတွာ ဧကဒိဝသေနေဝ နဝလက္ခံ ပူဇေသိ။

သီဟဠိန္ဒော ဥဘိန္နမ္ပိ ဗဟူနိ ရတနာနိ စ၊

ဂါမေ စ ဣဿရေ စေဝ ဒတွာန သင်္ဂဟံ အကာ။

ဧတ္တာဝတာ အဓောဒါဌာဓာတုကထာ ပရိပုဏ္ဏာ ဝေဒိတဗ္ဗာ။

စတ္တာလီသ သမာ ဒန္တာ ကေသာ လောမာ စ သဗ္ဗသော ဒေဝါ ဟရိံသု ဧကေကံ စက္ကဝါဠပရမ္ပရာ။

တတြ ဝစနေ၊ စတ္တာလီသ သမာ ဒန္တာတိ? သေသဒန္တာ စ ကေသာ စ လောမာ စ နခါ စ သဗ္ဗသောပိ မယိ ပရိနိဗ္ဗုတ-ကာလေ ¶ မာ ဍယှန္တု လုဉ္စိတွာ အာကာသေ ပတိဋ္ဌန္တု ဧကေကစက္ကဝါဠဉ္စ ဧကေကကေသလောမနခဒန္တဓာတုပရမ္ပရာ နေတွာ စေတိယံ ကာရေတွာန ဒေဝမနုဿာနံ အတ္ထံ ကရောတုတိ အဓိဋ္ဌဟိ။ တသ္မာ ပရိနိဗ္ဗုတကာလတော ယာဝ သရီရံ န ဍယှတိ တာဝ ဆဗ္ဗဏ္ဏရသ္မိယော လောမဓာတု န ပဇဟတိ။ ဒေါဏဗြာဟ္မဏောပိ ဓာတုဝိဘဇနာဝသာနေ ဝေဌန္တရေ စ နိဝါသနန္တရေ စ ပါဒဂ္ဂန္တရေ စ ဓာတုနံ ဝိနဋ္ဌဘာဝံ ဉတွာ ပထဝိယံ ဥတ္တာနကောယေဝဇာတော။ တဒါ သက္ကော ဒေဝရာဇာ ဒိသွာ အယံ ဒေဏာစရိယော ဓာတု အတ္ထာယ အနုပရိဝတ္တေတွာ ဝိနာသံ ပါပုဏေယျ အဟံ ဝီဏာစရိယဝေသံ ဂဟေတွာ တဿ သန္တိကံ ဂန္တွာ သောကံ ဝိနောဒေဿာမီတိ သက္ကရူပံ ဇဟိတွာ ဝီဏာစရိယဝေသံ ဂဟေတွာ တဿ သန္တိကံ ဂန္တွာ ဧကမန္တံ ဌိတော ဒိဗ္ဗဂီတံ ဂါယိတွာ ဝီဏံ ဝါဒေန္တော နာနပ္ပကာရံ ဥဒါနေသိ။ ယံ ဓမ္မမေတံ ပုရိသဿ ဝါဒံ ဆိန္ဒိဿာမီတိ ဝတွာ ကထာယ သောတုနံ လောဘံ ပရဿ အတ္ထံ ဝိနာသေတွာ အတိလောဘေန ပုရိသော ပါပကော ဟောတီတိ။ ဟံသရာဇဇာတကံ ဒီပေတွာ ယံ လဒ္ဓံ တံ သုလဒ္ဓန္တိ အာဟ။ တံ သုတွာ ဒေါဏော အယံ ဝီဏာစရိယော မယှံ ထေနဘာဝံ အညာသီတိ သောကံ ဝိနောဒေတွာ ဥဋ္ဌာယ အာဝဇ္ဇမာနော တုမ္ဗံ ဒိသွာ ယေန ဘဂဝတော သရီရဓာတုယော မိတာ သောပိ ဓာတုဂတိကောဝ။ ဣဒံ ထူပံ ကရိဿာမီတိ စိန္တေတွာ တုမ္ဗံ ဂဟေတွာန စေတိယေ ဌပေသိ။ မောရိယာ အင်္ဂါရံ ဂဟေတွာ အင်္ဂါရစေတိယံ နာမ ကာရေသုံ။

(နဂရေ ကပိလဝတ္ထုမှိ သမ္မာဒိဋ္ဌိ ဗဟုဇ္ဇနော၊

တတ္ထ သာရီရိကံ ထူပံ အကာသိ ရတနာမယံ။

နဂရေ ¶ အလ္လကေ ရမ္မေ ဗုဒ္ဓဓာတု ပတိဋ္ဌိယ၊

သိလာယ မုဂ္ဂဝဏ္ဏာယ ထူပံ သဓာတုကံ အကာ။

ဇနော ပါဝေယျရဋ္ဌသ္မိံ ပတိဋ္ဌိယ သာရီရိကံ၊

သိလာယ မဏိဝဏ္ဏာယ ပါဝေယျံ စေတိယံ အကာ။

စီဝရံ ပတ္တဒဏ္ဍဉ္စ မဓုရာယံ အပူဇယုံ၊

နိဝါသနံ ကုသဃရေ ပူဇယိံသု မဟာဇနာ။

ပစ္စတ္ထရဏံ ကပိလေ ဥဏ္ဏလောမဉ္စ ကောသလေ၊

ပူဇေသုံ ပါဋလိပုတ္တေ ကရကံ ကာယဗန္ဓနံ။

နိသီဒနံ အဝန္တိသု စမ္ပာယံ’ဒကသာဋကံ၊

ဒေဝရဋ္ဌေ အတ္ထရဏံ ဝိဒေဟေ ပရိဿာဝနံ။

ဝါသိ-သူစိဃရဉ္စာပိ ဣန္ဒပတ္ထေ အပူဇယုံ၊

ပါသာဏကေ ပဒံ သေဋ္ဌံ ဘဏ္ဍသေသံ ပရန္တကေ။

မဟိံသု မနုဇာ ဓာတုံ အဋ္ဌဒေါဏမိတံ တဒါ၊

ဓာတု ဝိတ္ထာရိတာ အာသိ လောကနာထဿ သတ္ထုနော)။

တေ ပန ရာဇာနော ဟိ အတ္တနောလဒ္ဓဓာတုံ ဂဟေတွာ သကသကနဂရံ ဂန္တွာ စေတိယံ ကာရာပေတွာ မဟန္တံ ပူဇာဝိဓာနံ ကရိံသု။ စက္ခုမန္တဿ ဘဂဝတော သရီရဓာတု အဋ္ဌဒေါဏမတ္တံ သုဝဏ္ဏနာဠိယာ ဧကသတအဋ္ဌဝီသတိနာဠိကာ အဟောသိ? သတ္ထာ ပန ဥတ္တရာသာဠှနက္ခတ္တေန မာတုကုစ္ဆိယံ ပဋိသန္ဓိံ ဂဏှိ။ ဝိသာခနက္ခတ္တေန မာတုကုစ္ဆိတော နိက္ခမိ။ ဥတ္တရာသာဠှနက္ခတ္တေန မဟာဘိနိက္ခမနံ နိက္ခမိ။ ဝိသာခနက္ခတ္တေန ဗုဒ္ဓါ အဟောသိ။ ဥတ္တရာသာဠှနက္ခတ္တေန ဓမ္မစက္ကံ ပဝတ္တေသိ။ တေနေဝ ယမကပါဋိဟာရိယံ အကာသိ။ အဿယုဇနက္ခတ္တေန ဒေဝေါရောဟဏံ အကာသိ။ ဝိသာခနက္ခတ္တေန ပရိနိဗ္ဗာယိ။ မဟာကဿပတ္ထေရာ စ အနုရုဒ္ဓတ္ထေရော စ ဒွေ မဟာထေရာ ဘဂဝတော သရီရဓာတုယော ဝိဿဇ္ဇာပေတွာ အဒံသု။

တေသံ ¶ ရာဇုနံ ဘဂဝတော သရီရဓာတုံ လဘိတွာ သတ္တဒိဝသသတ္တမာသာဓိကာနိ သတ္တဝဿာနိ မဟာရဟံ ပူဇံ ကတွာ ဂတကာလေ မိစ္ဆာဒိဋ္ဌိကမနုဿာ? သမဏော ဂေါတမော ပရိနိဗ္ဗုတော။ တဿ ဓာတု အတ္ထာယ အမှာကံ ဇီဝိတကပ္ပနံ နာသေတွာ ပူဇံ ကရောတီ’တိ သမ္မာသမ္ဗုဒ္ဓေ ပဒုဿန္တိ။ သက္ကော အာဝဇ္ဇေန္တော တံ ကာရဏံ ဉတွာ မဟာကဿပတ္ထေရဿ အာရောစေသိ၊’ဘန္တေ မိစ္ဆာဒိဋ္ဌိကာ မနုဿာ ဘဂဝတိ ပဒုဋ္ဌစိတ္တေန ဣတော စုတာ အဝီစိနိရယံ ဥပ္ပဇ္ဇန္တိ။ ဗဟုတရာ အနာဂတေ မိစ္ဆာဒိဋ္ဌိကာ မာတုပိတုဃာတကာ ရာဇာနော ဘဝိဿန္တိ။ အဇ္ဇေဝ ဓာတုယော နိဒဟိတုံ ဝဋ္ဋတီ’တိ ထေရော ဝိစာရေတွာ အဒ္ဒသ။

အနန္တမတ္ထံ ဓရမာနကာလေ ကတွာန သတ္တာနမလီနစိတ္တော သေသာနမတ္ထာယ သရီရဓာတုံ ဌပေတွ သော မစ္စုမုခံ ဥပေတော။ (ကတွာ ယော ဗောဓိဉာဏံ ဝိဝိဓဗလဝရံ ဗုဇ္ဈိတုံ ပါရမီယော ဝတွာ သင်္ခေယျပုဏ္ဏေ အပရိမိတဘဝေ ဥတ္တရိတွာ သုမုတ္တံ။ အာရောဟိတွာန သီဃံ အရိယသိဝပဒံ အစ္စုတံ သီတိဘာဝံ ပတ္တော သော ဇာတိပါရံ နိခိလပဒဟနံ ဒုက္ကရံ ကာရယိတွာ။

ဓာတွန္တရာယံ ဒိသွာန ထေရော ကဿပသဝှယော၊

နိဓာနံ သဗ္ဗဓာတုနံ ကရောဟီတျာဟ ဘူပတိံ။

သာဓူတိ သော ပဋိဿုတွာ မာဂဓော တုဋ္ဌမာနသော၊

ဓာတုနိဓာနံ ကာရေသိ သဗ္ဗတ္ထ ဝတ္တိတာဒိယ။

ကာရာပေတွာန သော ရာဇာ ကဿပဿ နိဝေဒယီ၊

ဓာတုယော အာဟရီ ထေရော ဣဒံ ကာရဏမဒ္ဒသ။

ဘုဇင်္ဂါ ¶ ပရိဂဏှိံသု ရာမဂါမမှိ ဓာတုယော၊

စေတိယေ ဓာရယိဿန္တိ လင်္ကာဒီပေ အနာဂတေ။

တာ ဓာတုယော ဌပေတွာန ထေရော ကဿပသဝှယော၊

ရညော အဇာတသတ္တုဿ အဒါသိ ဓာတုယော တဒါ။

ဂေဟေ စူပကရဏာနိ စတုသဋ္ဌိသတာနိ သော၊

အဗ္ဘန္တရေ ဌပေသိ ရာဇာ သဗ္ဗာ တာ ဗုဒ္ဓဓာတုယော။

ကရဏ္ဍာသီတိ သံကိဏ္ဏံ စေတိယာသီတိလင်္ကတံ၊

ဂေဟေ ဗဟုသမာကိဏ္ဏံ ထူပါရာမပ္ပမာဏကံ။

ကာရေတွာ သဗ္ဗကရဏံ ဝါလိကံ ဩကိရီ တဟိံ၊

နာနာပုပ္ဖသဟဿာနိ နာနာ ဂန္ဓံ သမာကိရိ။

အသီတိထေရရူပါနိ အဋ္ဌစက္ကသတာနိ စ၊

သုဒ္ဓါဓနဿ ရူပမ္ပိ မာယာပဇာပတာဒိနံ။

သဗ္ဗာနိ တာနိ ရူပါနိ သုဝဏ္ဏဿေဝ ကာရယိ၊

ပဉ္စ ဆတ္တဓဇသတေ ဥဿာပေသိ မဟီပတီ။

ဇာတရူပမယေ ကုမ္ဘေ ကုမ္ဘေ စ ရတနာမယေ၊

ပဉ္စ ပဉ္စ သတေယေဝ ဌပါပေသိ သမန္တတော။

သောဝဏ္ဏနိက္ခမယေန စ ကပါလေ ရဇတာမယေ၊

ပုရေသိ ဂန္ဓတေလဿ ဇာလာပေတွာ ပဒီပကေ။

ပဉ္စ ပဉ္စ သတေယေဝ ဌပါပေသိ ဒိသမ္ပတိ၊

ဣမေ တထေဝ တိဋ္ဌန္တ အဓိဋ္ဌာသိ မဟာမုနိ။

ဝိတ္ထာရိတာ ဓမ္မာသောကော ဘဝိဿတိ အနာဂတေ၊

အက္ခရေ သောဏ္ဏပတ္တမှိ ဆိန္ဒာပေသိ မဟာမတီ။

ပကပ္ပိတွာ ဝိသုကမ္မံ ဓာတုဂဗ္ဘသမန္တတော၊

ဝါတဝေဂေန ယာယန္တံ ယန္တရူပမကာရယီ။

ကတွာ သိလာပရိက္ခေပံ ပိဒဟိတွာ သိလာဟိ တံ၊

တဿူပရိ ကရီ ထူပံ သမံ ပါသာဏထူပိယံ။)

ဓာတုနိဓာနကထာ သမတ္တာ။

ဣတိ အရိယဇနပ္ပသာဒနတ္ထာယ ကတေ ဓာတုဝံသေ တထာဂတဿ ပရိနိဗ္ဗုတာဓိကာရော နာမ ဒုတိယော ပရိစ္ဆေဒေါ။

၃။ ¶ ဓာတုပရမ္ပရာကထာ

ဓာတုသု ပန ဝိဘဇိတွာ ဒီယမာနေသု သတ္ထုနော နလာဋဓာတု ကောသိနာရကာနံ မလ္လာနံ လဒ္ဓကောဋ္ဌာသေယေဝ အဟောသိ။ မဟာကဿပတ္ထေရော တေ ဥပသင်္ကမိတွာ သတ္ထုနော နလာဋဓာတု တုမှာကံ ကောဋ္ဌာသေ အဟောသိ၊ တံ ဂဟေတုံ အာဂတော၊ ဘဂဝါ ဟိ ဓရမာနေယေဝ တမ္ဗပဏ္ဏိဒီပဿ အနုဇာနိ၊ ‘တသ္မာ တံ အမှာကံ ဒေထာ’တိ။ တံ သုတွာ မလ္လရာဇာနော?’ဧဝံ ပတိဂဏှထ ဘန္တေ ဓာတု’တိ မဟာကဿပတ္ထေရဿ အဒံသု။ သော အတ္တနော သဒ္ဓိဝိဟာရိကံ မဟာနန္ဒတ္ထေရံ ပက္ကောသာပေတွာ နလာဋဓာတုံ ထေရဿ နိယျာဒေတွာ’ ဣမံ ဓာတုံ တမ္ဗပဏ္ဏိ ဒီပေ မဟာဝါလုကဂင်္ဂါယ ဒက္ခိဏဘာဂေ သေရုနာမ ဒဟဿ အန္တေ ဝရာဟ နာမ သောဏ္ဍိမတ္ထကေ ကာကဝဏ္ဏတိဿော နာမ ရာဇာ ပတိဋ္ဌာပေဿတိ၊ စေတိယံ သင်္ဃာရာမံ ကာရာပေဿတိ၊ တွံ ဣမံ ဓာတုံ ဂဟေတွာ ဝေသာလိယံ ဥပနိဿာယ မဟာဝနဝိဟာရေ ကုဋာဂါရသာလာယံ သတ္ထုနော ဝသိတဂန္ဓကုဋိယံ ဌပေတွာ ဓာတုပူဇံ ကတွာ အာယုသင်္ခါရေ ဩဿဋ္ဌေ ပရိနိဗ္ဗာပယမာနေ အတ္တနော သဒ္ဓိဝိဟာရိကဿ စန္ဒဂုတ္တတ္ထေရဿ ဓာတုဝံသံ ကထေတွာ အပ္ပမတ္တော ဟောဟီ’တိ ဝတွာ ဓာတုံ ထေရဿ ဒတွာ အနုပါဒိသေသနိဗ္ဗာနဓာတုယာ ပရိနိဗ္ဗာယိ။

သာဝကော သတ္ထုကပ္ပော သော ပဘီန္နပဋိသမ္ဘိဒေါ၊

ဂဟေတွာ မာနယီ ဓာတုံ မဟာနန္ဒော မဟာဝနေ။

တဿ ထေရဿ သဒ္ဓိဝိဟာရိကော စန္ဒဂုတ္တတ္ထေရော ဓာတုံ ဂဟေတွာ အာကာသံ ဥဂ္ဂန္တွာ သာဝတ္ထီယံ ဇေတဝနမဟာဝိဟာရေ ဒသဗလေန ဝသိတဂန္ဓကုဋိယံ ဌပေတွာ ဓာတုပူဇံ ကတွာ စိရံ ဝိဟာသိ။ သောပိ အာယုသင်္ခါရေ ဩဿဋ္ဌေ ပရိနိဗ္ဗာပယမာနေ အတ္တနော။ သဒ္ဓိဝိဟာရိကံ ဘဒ္ဒသေနတ္ထေရံ ပက္ကောသာပေတွာ ဓာတုံ ထေရဿ နိယျာဒေတွာ ဓာတုဝံသံ ကထေတွာ အနုသာသိတွာ အနုပါဒိသေသာယ နိဗ္ဗာနဓာတုယာ ပရိနိဗ္ဗာယိ။

စန္ဒဂုတ္တော မဟာပညော ဆဠဘိညော ဝိသာရဒေါ၊

ရမ္မေ ဇေတဝနေ ဓာတုံ ဌပေတွာ ဝန္ဒနံ အကာ။

တဿ ¶ သိဿော ဘဒ္ဒသေနတ္ထေရော ဓာတုံ ဂဟေတွာ အာကာသေန ဂန္တွာ ဓမ္မစက္ကပ္ပဝတ္တနေ ဣသိပတနေ မဟာ ဝိဟာရေ သတ္ထုနော ဝသိတဂန္ဓကုဋိယံ ဌပေတွာ ဂန္ဓမာလာဒီဟိ ပူဇေတွာ စိရံ ဝိဟာသိ။ သော ပရိနိဗ္ဗာပယမာနော အတ္တနော သဒ္ဓိဝိဟာရိကဿ ဇယသေနတ္ထေရဿ ဓာတုံ နိယျာဒေတွာ ဓာတုဝံသံ ကထေတွာ အနုပါဒိသေသာယ နိဗ္ဗာနဓာတုယာ ပရိနိဗ္ဗာယိ။

ဘဒ္ဒသေနော မဟာထေရော ကတကိစ္စော မဟာဣသိ၊

ဓာတုံ ဌပေတွာ ဣသိပတနေ ဝန္ဒိတွာ နိဗ္ဗုတိံ ဂတော။

သော ပန ဇယသေနတ္ထေရော တံ ဓာတုံ ဂဟေတွာ ဝေလုဝနမဟာဝိဟာရေ သတ္ထုနော ဝသိတဂန္ဓကုဋိယံ ဌပေတွာ ဂန္ဓမာလာဒီဟိ ပူဇေတွာ စိရံ ဝသိတွာ ပရိနိဗ္ဗာပယမာနော အတ္တနော သဒ္ဓိဝိဟာရိကဿ မဟာသင်္ဃရက္ခိတတ္ထေရဿ ဓာတုံ နိယျာဒေတွာ ဓာတုဝံသံ ကထေတွာ အနုပါဒိသေသာယ နိဗ္ဗာနဓာတုယာ ပရိနိဗ္ဗာယိ။

ဂဟေတွာန ဓာတုဝရံ ဇယသေနော မဟာမုနိ၊

နိဓာယ ဝေလုဝနေ ရမ္မေ အကာ ပူဇံ မနောရမံ။

သော ပနာယသ္မာ သင်္ဃရက္ခိတတ္ထေရော ဓာတုံ ဂဟေတွာ အာကာသေန အာဂန္တွာ ကောသမ္ဗိံ ဥပနိဿာယ ဃောသိတ သေဋ္ဌိနာ ကာရာပိတေ ဃောသိတာရာမေ ဘဂဝတော ဝသိတဂန္ဓကုဋိယံ ဌပေတွာ ဂန္ဓမာလာဒီဟိ ပူဇံ ကတွာ စိရံ ဝိဟာသိ။ သော’ပိ ပရိနိဗ္ဗာပယမာနော အတ္တနော သဒ္ဓိဝိဟာရိကံ မဟာဒေဝတ္ထေရံ ပက္ကောသာပေတွာ ဓာတုဝံသံ ကထေတွာ အပ္ပမတ္တော ဟောဟီ’တိ ဝတွာ အနုပါဒိသေသာယ နိဗ္ဗာနဓာတုယာ ပရိနိဗ္ဗာယိ။

သင်္ဃရက္ခိတဝှယော ထေရော စန္ဒော ဝိယ သုပါကဋော၊

ဌပေတွာ ဃောသိတာရာမေ အကာ ပူဇံ မနောရမံ။

တဿ ထေရဿ သဒ္ဓိဝိဟာရိကော မဟာဒေဝတ္ထေရော ဓာတုံ ဂဟေတွာ ဒေဝါနမ္ပိယတိဿဿ မဟာရညော ဘာတု မဟာနာဂဿ ဥပရာဇဿ မဟာဂါမေ သေတစ္ဆတ္တံ ဥဿာပိတကာလေ ဟတ္ထောဋ္ဌ နာမဇနပဒေ ကုက္ကုဋပဗ္ဗတန္တရေ မဟာသာလရုက္ခမူလေ အာကာသတော ဩတရိတွာ နိသီဒိ။ တသ္မိံ သမယေ မဟာကာဠော နာမ ဥပါသကော အတ္တနော ပုတ္တဒါရေဟိ သဒ္ဓိံ မာလာဂန္ဓဝိလေပနံ ဓဇပတာကာဒီနိ ဂါဟာပေတွာ ဒိဝသဿ တိက္ခတ္တုံ မဟန္တေဟိ ပူဇာဝိဓာနေဟိ ဓာတုံ ပရိဟရိတွာ စိရံ ဝသိ။ မာသဿ အဋ္ဌ-ဥပေါသထဒိဝသေ ¶ ဓာတုတော ဆဗ္ဗဏ္ဏရံသိယော ဥဂ္ဂစ္ဆိံသု။ တသ္မိံ သမယေ သော ပဒေသော ဗုဒ္ဓဿ ဓရမာနကာလော ဝိယ အဟောသိ။ ဇနပဒဝါသီ မနုဿာပိ ထေရဿ သန္တိကေ သီလာနိ ဂဏှန္တိ၊ ဥပေါသထဝါသံ ဝသန္တိ၊ ဒါနံ ဒေန္တိ၊ စေတိယဿ မဟန္တံ ပူဇံ ကရောန္တီ။ တတော အပရဘာဂေ ဥပရာဇာ မဟာဂါမေ ဝိဟရန္တော ဘေရိံ စရာပေသိ? ယော အမှာကံ ဒသဗလဿ ဓာတုံ ဂဟေတွာ ဣဓာဂတော၊ တဿ မဟန္တံ သမ္ပတ္တိံ ဒဿာမီတိ။ တသ္မိံ ကာလေ ကုဋုမ္ဗိကော မဟာကာဠော ဥပရာဇံ ပဿိဿာမီတိ တဿ အနုစ္ဆဝိကံ ပဏ္ဏာကာရံ ဂဟေတွာ ရာဇဒွါရေ ဌတွာ သာသနံ ပဟိဏိ။ ဥပရာဇာ တံ ပက္ကောသာပေသိ။ သော ဂန္တွာ ဝန္ဒိတွာ ဌိတော တံ ပဏ္ဏာကာရံ ရာဇပုရိသာနံ ပဋိစ္ဆာပေသိ။ ဥပရာဇာ? မာတုလ မဟာကာဠ၊ တုမှာကံ ဇနပဒေ အမှာကံ သတ္ထုနော ဓာတု အတ္ထီ’တိ အာဟ။ မဟာကာဠော ဥပ ရာဇဿ ကထံ သုတွာ အတ္ထိ ဒေဝ၊ မယှံ ကုလုပဂတ္ထေရဿ သန္တိကေ အာဒါသမဏ္ဍလပ္ပမာဏံ သတ္ထုနော နလာဋဓာတု ဆဗ္ဗဏ္ဏရံသီဟိ အာကာသပ္ပဒေသေ သူရိယသဟဿစန္ဒသဟဿာနံ ဥဋ္ဌိတကာလော ဝိယ ဩဘာသေတိ။ သော ဇနပဒေါ ဗုဒ္ဓဿ ဥပ္ပန္နကာလော ဝိယ အဟောသီတိ အာဟ။ တဿ ကုဋုမ္ဗိကဿ ကထံ သုဏန္တဿဧဝ ရညော သကလသရီရံ ပဉ္စဝဏ္ဏာယ ပီတိယာ ပရိပုဏ္ဏံ အဟောသိ။ အတိဝိယ သောမနဿပ္ပတ္တော ရာဇာ မယှံ မာတုလဿ မဟာကာဠဿ သတသဟဿံ ကဟာပဏာနိ စ စတုသိန္ဓဝယုတ္တရထဉ္စ သုဝဏ္ဏာလင်္ကာရေဟိ သုသဇ္ဇိတံ ဧကံ အဿဉ္စ ဥဒကဖာသုကဋ္ဌာနကေ ခေတ္တဉ္စ ပဉ္စဒါသီသတဉ္စ ဒေထာ’တိ ဝတွာ အညဉ္စ ပသာဒံ ဒါပေသိ။ သော ဥပရာဇာ ဧတ္တကံ ကုဋုမ္ဗိကဿ ဒါပေတွာ တံ ဒိဝသမေဝ နဂရေ ဘေရိံ စရာပေတွာ ဟတ္ထဿရထယာနာနိ ဂဟေတွာ ကုဋုမ္ဗိကံ မဂ္ဂဒေသကံ ကတွာ အနုပုဗ္ဗေန ဟတ္ထောဋ္ဌဇနပဒံ ပတွာ ရမဏီယေ ဘူမိပ္ပဒေသေ ခန္ဓာဝါရံ ဗန္ဓိတွာ အမစ္စဂဏပရိဝုတော ကုဋုမ္ဗိကံ ဂဟေတွာ ထေရဿ ဝသနဋ္ဌာနံ ဂန္တွာ ဝန္ဒိတွာ ဧကမန္တံ အဋ္ဌာသိ။ သေသာ အမစ္စာ ကုဋုမ္ဗိကော စ ထေရံ ဝန္ဒိတွာ ဧကမန္တံ ¶ အဋ္ဌံသု။ ဥပရာဇာ ထေရံ ဝန္ဒိတွာ သာရာဏီယံ ကထံ ကတွာ ဧကမန္တံ နိသိန္နော ပဋိသန္ထာရမကာသိ။ မဟာဒေဝတ္ထေရောပိ သမ္မောဒနီယံ ကထံ ကတွာ ကိဿ တွံ မဟာရာဇ ဣဓာဂတောသိ အာဂတကာရဏံ မေ အာရောစေဟီ’တိ အာဟ။ ဘန္တေ တုမှာကံ။ သန္တိကေ အမှာကံ ဘဂဝတော နလာဋဓာတု အတ္ထီ ကိရ။ တံ ဝန္ဒိဿာမိ’တိ အာဂတောမှီ’တိ အာဟ။ ထေရော? ဘဒ္ဒကံ မဟာ ရာဇ တယာ ကတန္တိ ဝတွာ ဓာတုဃရဒွါရံ ဝိဝရိတွာ မဟာရာဇ ဗုဒ္ဓဿ နလာဋဓာတု အတိဒုလ္လဘာ’တိ အာဟ။ ရာဇာ သောဠသေဟိ ဂန္ဓောဒကေဟိ နဟာယိတွာ သဗ္ဗာလင်္ကာရပတိမဏ္ဍိတော ဧကံသံ ဥတ္တရာသင်္ဂံ ကရိတွာ အဉ္ဇလိံ ပဂ္ဂယှ နမဿမာနော အဋ္ဌာသိ။ ဗုဒ္ဓါရမ္မဏာယ ပီတိယာ သကလသရီရံ ဖုဋံ အဟောသိ။

(ရာဇာ ပီတိဝေဂေန ဣမာ ဂါထာ အာဟ၊

နမာမိ ဝီရ ပါဒေ တေ စက္ကင်္ကိတ တလေ သုဘေ၊

ဝန္ဒိတေ နရဒေဝေဟိ အမတံ ဒေဟိ ဝန္ဒိတေ။

လောကနာထ တုဝံ ဧကော သရဏံ သဗ္ဗပါဏိနံ၊

လောကေ တယာ သမော နတ္ထိ တာရေဟိ ဇနတံ ဗဟုံ။

မဟဏ္ဏဝေ မယံ ဘန္တေ နိမုဂ္ဂါ ဒီဃသမ္ဘဝေ၊

အပ္ပတိဿာ အပ္ပတိဋ္ဌာ သံသရာမ စိရံ တဟိံ။

ဧတရဟိ တုမှေ အာပဇ္ဇ ပတိဋ္ဌံ အဓိဂစ္ဆရေ၊

တုမှာကံ ဝန္ဒနံ ကတွာ ဥတ္တိဏ္ဏမှ ဘဝဏ္ဏဝါ’တိ။)

တသ္မိံ ခဏေ ဓာတုတော ရသ္မိယော နိက္ခမိံသု။ သကလ လင်္ကာဒီပံ သုဝဏ္ဏရသဓာရာဟိ သဉ္ဆန္နံ ဝိယ အဟောသိ။ မဟန္တံ ပီတိသောမနဿံ ဥပ္ပဇ္ဇိ။ ရာဇာ မဟန္တံ သောမနဿံ ပတ္တော ဟုတွာ ဟဋ္ဌတုဋ္ဌော အဟောသိ။ သော ဓာတုဃရတော နိက္ခမိတွာ ထေရေန သဒ္ဓိံ အလင်္ကတမဏ္ဍပေ ဧကမန္တံ နိသီဒိ။ ဧကမန္တံ နိသိန္နော (နိသဇ္ဇာဒေါသေ ဝဇ္ဇေတွာ သေယျထိဒံ? အတိဒုရစ္စာသန္တ-ဥပရိဝါတ-ဥန္နတပ္ပဒေသ-အတိသမ္မုခ-အတိပစဆာ’တိ။ ¶ အတိဒူရေ နိသိန္နော သစေ ကထေတုကာမော ဥစ္စာသဒ္ဒေန ကထေတဗ္ဗံ ဟောတိ။ အစ္စာသန္နေ နိသိန္နော သင်္ကရံ ကရောတိ။ ဥပရိဝါတေ နိသိန္နော သရီရဂန္ဓော ဝါယတိ။ ဥန္နတပ္ပဒေသေ နိသိန္နော အဂါရဝံ ကရောတိ။ အတိသမ္မုခေ နိသိန္နော စက္ခုနာ စက္ခုံ ပဟရိတွာ ဒဋ္ဌဗ္ဗံ ဟောတိ။ အတိပစ္ဆာ နိသိန္နော ဂီဝံ ပရိဝတ္တေတွာ ဒဋ္ဌဗ္ဗံ ဟောတိ။ ဣတိ နိသဇ္ဇာဒေါသံ ဝဇ္ဇေတွာ နိသိန္နော)။ ဧဝမာဟ။ ဘန္တေ ဣမံ ဓာတုံ မယှံ ဒေထ။ မဟန္တံ ပူဇာသက္ကရံ ကတွာ ပရိဟရာမီတိ။ ဘဒ္ဒကံ မဟာရာဇ ဣမာယ ဓာတုယာ သမ္မာသမ္ဗုဒ္ဓါ ဓရမာနောယေဝ ဝျာကရဏံ အကာသိ။ တုမှာကံ ဝံသေ ဇာတော ကာကဝဏ္ဏတိဿော နာမ ရာဇာ ဣမသ္မိံ ဒီပေ မဟာဝါလုကဂင်္ဂါယ ဒက္ခိဏတီရေ သေရု နာမ ဒဟဿ အန္တေ ဝရာဟ နာမ သောဏ္ဍိယာ မတ္ထကေ ပတိဋ္ဌပေတွာ မဟန္တံ ထူပံ ကရိဿတီ’တိ ဝတွာ သတ္ထာ တတ္ထ သမာပတ္တိံ သမာပဇ္ဇိတွာ ပဉ္စသတခီဏာသဝေဟိ သဒ္ဓိံ တိက္ခတ္တုံ ပဒက္ခိဏံ ကတွာ ဂတော။ တသ္မာ ဂဏှထ မဟာရာဇာ’တိ ဝတွာ ဓာတုံ အဒါသိ။

ရာဇာ ဓာတုံ ဂဟေတွာ စတုရဿပလ္လင်္ကေ ဓာတုကရဏ္ဍကံ နိဒဟိတွာ ကရဏ္ဍကေ ဓာတုံ ပတိဋ္ဌာပေတွာ တံ ကုမုဒပတ္တသန္နိဟမင်္ဂလသိန္ဓဝယုတ္တရထေ ဌပေတွာ သမန္တာ အာရက္ခံ သံဝိဒဟိတွာ (ရာဇာ ဓာတုံ ဂဟေတွာ) ပဉ္စင်္ဂတုရိယေ ပဂ္ဂဏှာပယမာနော ပစ္ဆာ အာဂစ္ဆတု’တိ မဟာဇနဿ သာသနံ ဝတွာ မဟာဒေဝတ္ထေရဿ သန္တိကံ ဂန္တွာ? တုမှေ ဘန္တေ၊ ဓာတုယာ ဥပဋ္ဌာနံ ကရောန္တော အာဂစ္ဆထာ’တိ အာဟ။ ထေရော တဿ ကထံ သုတွာ၊’မဟာရာဇ အယံ ဓာတု ပရမ္ပရာ အာဂတာ။ အဟံ ဘဂဝတော ဓမ္မဘဏ္ဍာဂါရိကအာနန္ဒတ္ထေရော ဝိယ ဣမံ ဓာတုံ ပရိဟရိဿာမီ’တိ ဝတွာ အတ္တနော ပစ္စယဒါယကံ ကုဋုမ္ဗိကံ အာပုစ္ဆိတွာ ပတ္တစီဝရမာဒါယ ဓာတုံ ဥပဋ္ဌဟိယမာနော ပစ္ဆတော ပစ္ဆတော ဂစ္ဆတိ။ ရာဇာ ဓာတုံ ဂဟေတွာ အနုပုဗ္ဗေန မဟာဂါမံ ပတ္တော မဟာသေနဂုတ္တံ ပက္ကောသာပေတွာ နဂရံ အလင်္ကရာပေဟီ’တိ အာဟ။ သော နဂရေ ဘေရိံ စရာပေတွာ အဋ္ဌာရသ ဝီထိယော သမ္မဇ္ဇန္တု၊ ပုဏ္ဏဃဋေ ဌပေန္တု၊ ဓဇပတာကာဒယော ဥဿာပေန္တု၊ တောရဏာနိ ဥဿာပေန္တု၊ ပဉ္စဝဏ္ဏာနိ ပုပ္ဖာနိ ¶ ဩကိရန္တု၊ သကလနဂရံ အလင်္ကရောန္တု၊ ဂန္ဓမာလာဒယော ဂဟေတွာ သုဒ္ဓုတ္တရာသင်္ဂါ ဟုတွာ သကလနာဂရာ ပဋိပထံ အာဂစ္ဆန္တုတိ အာဏာပေသိ။ တတော မဟာဇနော သဗ္ဗတုရိယာနိ ဃောသာပယမာနော ဂန္ဓမာလာဒိဟတ္ထော ပဋိပထံ နိက္ခန္တော။ ဒေဝမနုဿာ ဘိက္ခုဘိက္ခုနိယော ဥပါသကောပါသိကာ အပ္ပမာဏာ အဟေသုံ။ (ဂန္ဓမာလာဒိ ပုဏ္ဏဃဋသမုဿိတဓဇာကိဏ္ဏာ) ပရိသာ ဝေလုက္ခေပသဟဿာနိ ပဝတ္တယိံသု။ သုဂန္ဓဝါတာဘိဃာတသမုဒ္ဒဃောသော ဝိယ သကလနဂရံ ဧကနိန္နာဒဇာတံ။ သော ရာဇာ နဂရေ ဗန္ဓနာဂါရေ သဗ္ဗသတ္တေ ဗန္ဓနာ မုဉ္စန္တု၊ ဓမ္မေန သမေန အနုသာသန္တုတိ ဝတွာ ဓာတုံ ဂဟေတွာ အတ္တနော နဂရံ ပဝေသေတွာ အတ္တနော ရာဇနိဝေသနံ အာဂန္တွာ နာဋကီနံ သညမဒါသိ ဓာတုံ ဝန္ဒန္တုတိ။ နာဋကီ နာနာဘရဏေဟိ ပတိမဏ္ဍိတာ ရာဇဂေဟတော နိက္ခမိတွာ ဓာတုံ ဝန္ဒိတွာ အတ္တနော အတ္တနော ဟတ္ထဂတာနိ တုရိယဘဏ္ဍာနိ သာဓုကံ ပဂ္ဂဏှိတွာ မဟန္တံ ပူဇမကံသု။

တတော ဝဍ္ဎကိံ ပက္ကောသာပေတွာ ရာဇနိဝေသနတော နာတိဒူရေ နာစ္စာသန္တေ သုဘုမိတလေ ဓာတုဃရံ ကာရာပေတွာ မာလာကမ္မလတာကမ္မာဒိံ ပတိဋ္ဌာပေတွာ ဓာတုဃရေ ဝိစိတ္တမဏ္ဍပံ ကာရာပေတွာန သတ္တရတနမယံ ဓာတုကရဏ္ဍကံ ကာရာပေတွာ ဓာတုကရဏ္ဍကေ ဓာတုံ ဌပေတွာ ရတနပလ္လင်္က မတ္ထကေ ဓာတုံ ဌပေတွာ ဥပရိ ဝိစိတ္တဝိတာနံ ဗန္ဓိတွာ သာဏိယာ ပရိက္ခိပါပေတွာ မဟန္တေန ပရိဝါရေန မဟန္တံ ဓာတုပူဇံ အကာသိ။ မဟာဇနာ ဂန္ဓမာလံ ဂဟေတွာ မာသဿ အဋ္ဌူပေါသထဒိဝသေ ဓာတုယာ မဟန္တံ ပူဇံ အကံသု။ ဓာတုတော ရံသိယော သမုဂ္ဂစ္ဆန္တိ။ မဟာဇနာ ဝိမ္ဘယဇာတာ သာဓုကာရံ ကရောန္တိ။ သောမနဿဘူတာ သကလနဂရဝါသိနော ဗုဒ္ဓါရမ္မဏ ပီတိံ ဂဟေတွာ ဒိဝသေ ဒိဝသေ ဓာတုယာ မဟန္တံ ပူဇံ ကရောန္တာ ဝီတိနာမေန္တိ။ ပဉ္စသီလာနိ ရက္ခန္တိ၊ ဗုဒ္ဓမာမကာ ဓမ္မမာမကာ သင်္ဃမာမကာ ဟုတွာ သရဏာနိ ဂစ္ဆန္တိ။ ရာဇာ မဟာဇနဿ ဩဝဒတိ။ ‘‘မေတ္တံ ဘာဝေထ၊ ကရုဏံ မုဒိတံ ဥပေက္ခံ ဘာဝေထ၊ ကုလေ ဇေဋ္ဌာပစာယနကမ္မံ ကရောထာ‘‘တိ။ ဩဝဒိတွာ ဘိက္ခုသင်္ဃဿပိ စတ္တာရော ပစ္စယေ ဂင်္ဂါယ မဟော-ဃပ္ပဝတ္တနကာလော ¶ ဝိယ မဟာဒါနံ ပဝတ္တေသိ။ မာတာပိတုဋ္ဌာနေ ဌတွာ ဘိက္ခုသင်္ဃံ သင်္ဂဏှိ။ မဟာဇနာ တဿ ဩဝါဒေ ဌတွာ ဒါနာဒီနိ ပုညာနိ ကတွာ ယေဘုယျေန တသ္မိံ ကာလေ မတာ သဂ္ဂံ ဂတာ။

ကလျာဏဝဂ္ဂမှိ ပတိဋ္ဌိတာ ဇနာ၊

ဒါနာဒိ ပုညာနိ ကရိတွ သဗ္ဗဒါ၊

စုတာ စုတာ သဗ္ဗဇနာ သုမာနသာ၊

ဂတာ အသေသံ သုဂတိံ သုဘေ ရတာ။

ရာဇာ ဓာတုယာ မဟန္တံ ပူဇံ ကရောန္တော မဟဂါမေ ဝိဟာသိ။ တေန ပတိဋ္ဌာပိတဝိဟာရာ ကထေတဗ္ဗာ? ကထံ? လေနဝိဟာရံ စန္ဒဂိရိဝိဟာရံ ကောဋိပဗ္ဗတဝိဟာရံ နဂရင်္ဂဏဝိဟာရံ သေလကာ ဝိဟာရံ တလာကာဝိဟာရန္တိ ဧဝမာဒယော ဝိဟာရေ ပတိဋ္ဌာပေတွာ တိပိဋကမဟာအရိဋ္ဌတ္ထေရဿ ဒက္ခိဏောဒကံ ဒတွာ မဟာဝိဟာရေ နိယျာဒေသိ။ ဧဝံ သော ရာဇာ ယာဝဇီဝံ ဓာတုံ ပရိဟရိတွာ ပစ္ဆိမေ ကာလေ မရဏမဉ္စေ နိပန္နော အတ္တနော ပုတ္တံ ယဋာလတိဿ ကုမာရံ ပက္ကောသာပေတွာ၊ တာတ တိဿ၊ အမှေဟိ ပရိဟရိတ နလာဋဓာတု ပူဇေဟီ’တိ ဓာတုဝံသံ ကထေတွာ ပုတ္တံ အနုသာသိတွာ ကာလံ ကတွာ သဂ္ဂပုရံ ဂတော။

ရာဇာ မဟာနာဂဝရော ယသဿိ၊

ကတွာပိ ရဇ္ဇံ မတိမာ သုသဒ္ဓါ၊

မာနေတွ သင်္ဃံ စတုပစ္စယေဟိ၊

အဂါ အသောကော ဝရဒေဝလောကံ၊

တဿ ပုတ္တော ယဋာလတိဿကုမာရော ပိတု အစ္စယေန ပိတရာ ဝုတ္တနိယာမေနေဝ ဓာတုယာ မဟန္တံ ပူဇံ ကာရေသိ။ သော’ပိ ဒိဝသဿ တယော ဝါရေ ဓာတုပဋ္ဌာနံ ကရောန္တော ရဇ္ဇံ ကာရေတွာ စိရံ ဝိဟာသိ။ ဣမိနာ’ပိ ပတိဋ္ဌာပိတဝိဟာရာ ကထေတဗ္ဗာ၊ ဓမ္မသာလဝိဟာရံ မဟာဓမ္မသာလဝိဟာရံ သေလာဘယဝိဟာရန္တိ ဧဝမာဒယော ¶ ပတိဋ္ဌာပေတွာ-တိပိဋကမဟာအရိဋ္ဌတ္ထေရဿ သဒ္ဓိဝိဟာရိကော တိပိဋကမဟာအဘယတ္ထေရော ဥပရာဇဿ မဟာနာဂဿ အယျကော။ တဿ ထေရဿ ဒက္ခိဏောဒကံ အဒါသိ။ သော’ပိ ရာဇာ ယာဝဇီဝံ ဓာတုံ ပရိဟရိတွာ ပစ္ဆိမေ ကာလေ မရဏမဉ္စေ နိပန္နော အတ္တနော ပုတ္တံ ဂေါဌာဘယကုမာရံ ပက္ကောသာပေတွာ’ဓာတုယာ မဟန္တံ ပူဇံ ကရောန္တော အပ္ပမတ္တော ဟောဟီ’တိ ဝတွာ ဓာတုဝံသံ ကထေတွာ ကာလံ ကတွာ သဂ္ဂေ နိဗ္ဗတ္တိ။

ယဋ္ဌာလကော နာမ မဟာမဟီပတိ၊

မဟာဇနဿတ္ထကရော ဂုဏာလယော၊

သော ဓာတုပူဇံ ဝိပုလံ အနေကဓာ၊

ကတွာ ဂတော ဒေဝပုရံ အနိန္ဒိတော။

တဿ ပုတ္တော ဂေါဌာဘယကုမာရော ပိတု အစ္စယေန ပိတရာ ဝုတ္တနိယာမေနေဝ ဓာတုယာ မဟန္တံ ပူဇံ ကတွာ ဂေါဌာဘယ မဟာရာဇာ ဟုတွာ ရဇ္ဇံ ကရောန္တော ကာစရဂါမေ ဒသဘာတိကေ ရာဇာနော ဃာတေတွာ ဒဏ္ဍကမ္မတ္ထာယ ဂေါဌာဘယမဟာထေရဿ ဟတ္ထောဋ္ဌဇနပဒေ ဝသန္တဿ မတ္တိကလေနဝိဟာရံ ခီရသာလ ဝိဟာရံ နာဂမဟာဝိဟာရံ ကုမ္ဘသေလဝိဟာရံ စေတိယပဗ္ဗတဝိဟာရံ သာနုပဗ္ဗတဝိဟာရံ ကဏိကာရ သေလဝိဟာရံ အမ္ဗသေလ ဝိဟာရံ တိန္ဒုကလေန ဝိဟာရံ ကရဏ္ဍကဝိဟာရံ ဂေါဓသာလဝိဟာရံ ဝါလုကတိတ္ထဝိဟာရန္တိ ဧဝမာဒယော ဂင်္ဂါယ ပရတီရေ ပဉ္စသတဝိဟာရေ ဩရိမတီရေ ပဉ္စသတဝိဟာရေ စာ’တိ ဝိဟာရသဟဿံ ကာရေတွာ အတ္တနော သဒိသနာမဿ ဂေါဌာဘယတ္ထေရဿ ဒက္ခိဏောဒကံ ဒတွာ အဒါသိ။ သော ယာဝဇီဝံ ဓာတုပူဇံ ကတွာ ပစ္ဆိမေ ကာလေ မရဏမဉ္စေ နိပန္နော အတ္တနော ပုတ္တံ ကာကဝဏ္ဏတိဿ ကုမာရံ ပက္ကောသာပေတွာ အာလိင်္ဂိတွာ၊’တာတ တိဿ၊ အယံ နလာဋဓာတု အမှာကံ ပရမ္ပရာယ အာဂတာ။ တွံ ကိရ ဓာတုံ ဂဟေတွာ မဟာဂင်္ဂါယ ပဿေ သေရု နာမ ဒဟဿ အန္တေ ဝရာဟ နာမ သောဏ္ဍိယာ မတ္ထကေ ပတိဋ္ဌာပေတွာ သင်္ဃာရာမံ ကာရာပေဿသီ’တိ သတ္ထာ ဇီဝမာနော ဝျာကရဏမကာသိ။ တသ္မာ တွံ ဣမံ ဓာတုံ ဂဟေတွာ မမစ္စယေန တသ္မိံ ဌာနေ ပတိဋ္ဌာပေဟီ’တိ ပုတ္တံ အနုသာသိတွာ ကာလကိရိယံ ကတွာ သဂ္ဂေ နိဗ္ဗတ္တိ။

ဂေါဌာဘယော ¶ နာမ မဟီပတိဿရော၊

မဟာဇနေ တောသယိ အပ္ပမတ္တော၊

သော ဓာတုပူဇံ ဝိပုလံ ကရိတွာ၊

အဂါ အသောကော ဝရဒေဝလောကံ။

မဟာနန္ဒော မဟာပညော စန္ဒဂုတ္တော ဗဟုဿုတော၊

ဘဒ္ဒသေနော မဟာထေရော ဘဒ္ဒဓမ္မေ ဝိသာရဒေါ။

ဇယသေနော စ သော ဝီရော ထေရော သော သင်္ဃရက္ခိတော၊

ဒေဝတ္ထေရော စ မေဓာဝီ ရက္ခကာ ဓာတု ဘဒ္ဒကာ။

ဥပရာဇာ မဟာနာဂေါ ယဋ္ဌာလကော မဟာဗလော၊

ဂေါဌာဘယော မဟာပုညော ကာကဝဏ္ဏော စ ဝီရိယဝါ။

ဧတေ ထေရာ စ ရာဇာနော ပုညဝန္တော သုမာနသာ၊

ဓာတု ပရမ္ပရာနီတာ ဓာတာ ဓာတုသုကောဝိဒါ။

ကဿပါဒီနထေရာနံ ပရမ္ပရာယမာဂတာ၊

မဟာနာဂါဒိ ဟတ္ထတော ယာဝ တိဿမုပါဂတာ။

ဣတိ အရိယဇနပ္ပသာဒနတ္ထာယ ကတေ ဓာတုဝံသေ

ဓာတုပရမ္ပရာ ကထာ နာမ

တတိယော ပရိစ္ဆေဒေါ။

၄။ ¶ ပကိဏ္ဏကကထာ

တတြ ဌတွာ ရဉေဉော ဥပ္ပတ္တိ ကထေတဗ္ဗာ။ (သော ပန) အမှာကံ သတ္ထုနော ဗောဓိပ္ပတ္တိတော ပုရေတရမေဝ မဟာမလယ ရဋ္ဌေ ဝနစရကံ ပဋိစ္စ တဿ ဘရိယာယ ကုစ္ဆိယံ ပဋိသန္ဓိံ ဂဏှိ။ နဝဍ္ဎမာသာဝသာနေ မာတုကုစ္ဆိတော နိက္ခမိတွာ ကမေန ဝဍ္ဎန္တော ဝိညုဘာဝံ ပါပုဏိ။ တဿ ပိတာ ဧကံ ဒါရိကံ အာနေတွာ ပုတ္တဿ ဂေဟေ အကာသိ။ အပရဘာဂေ တဿ ပိတာ ကာလမကာသိ။ ကုမာရော’စရကော’တိ ပညာယိ။ သော တတော ပဋ္ဌာယ ပစ္စေကဗုဒ္ဓံ ဥပဋ္ဌဟိ။ စရကော အတ္တနော နိဝါသဝတ္ထုသ္မိံ ကဒလိပနသာဒီနိ ရောပေတွာ ဖလာရာမံ အကာသိ။ တတော အပရဘာဂေ တေန ရောပိတပနသရုက္ခော မဟန္တံ စာဋိပ္ပမာဏံ ပနသဖလံ ဂဏှိ။ စရကော အတ္တနော ဝတ္ထုံ ဂန္တွာ သာခါယ သုပက္ကံ ပနသဖလံ ပဿိတွာ ဆိန္ဒိတွာ ဂေဟံ အာဟရိတွာ အပဿာယံ လုဉ္စိတွာ ဥပဓာရေသိ။ တတော သမန္တာ စတုမဓုရံ ဝိယ ယူသံ ဩတရိတွာ အပဿယံ အပနီတ အာဝါဋံ ပူရေတွာ အဋ္ဌာသိ။ တတော စရကော ဧဝံ စိန္တေသိ။ ဣမံ ပနသဖလံ အမှာကံ ပစ္စေကဗုဒ္ဓေန ဝိနာ အညေသံ နာနုစ္ဆဝိကန္တိ။ ပဋိသာမေတွာ ဌပေသိ။

ပုနဒိဝသေ ပစ္စေကဗုဒ္ဓါ လေနတော နိက္ခမိတွာ သရီရပဋိဇဂ္ဂနံ ကတွာ သုရတ္တပလ္လဝသဒိသံ အန္တရဝါသကံ ပရိမဏ္ဍလံ ကတွာ နိဝါသေတွာ ဗဟလပဝရမဟာပံသုကူလစီဝရံ ပါရုပိတွာ နီလဘမရဝဏ္ဏံ ပတ္တံ ဟတ္ထေန ဂဟေတွာ အာကာသေန အာဂန္တွာ တဿ ကုဋိဒွါရေ ပါကဋော အဟောသိ။ စရကော ကုဋိတော နိက္ခမိတွာ တံ ဝန္ဒိတွာ ဟတ္ထတော ပတ္တံ ဂဟေတွာ ဂေဟံ ပဝေသေတွာ ပီဌေ နိသီဒါပေတွာ အတ္တနာ ဌပိတဋ္ဌာနတော ပနသဖလံ ဂဟေတွာ ယူသံ ပတ္တေ ပူရေတွာ ပဋိဂ္ဂဟာပေသိ။ ပစ္စေကဗုဒ္ဓါ ¶ တံ ပရိဘုဉ္ဇိတွာ အာကာသတော အတ္တနော ဝသနဋ္ဌာနမေဝ ဂတော။ အထေကဒိဝသံ စရကော ပရဒေသာ ဂစ္ဆန္တော ဘရိယံ ပက္ကောသာပေတွာ၊’ အမ္မ၊ အယျဿ အပ္ပမတ္တော ဟုတွာ ဒါနံ ဒေဟီ’တိ သဗ္ဗူပကရဏံ နိယျာဒေတွာ ပရဒေသံ ဂတော။ ပုနဒိဝသေ ပစ္စေကဗုဒ္ဓါ လေနတော နိက္ခမိတွာ စီဝရံ ပါရုပိတွာ ပတ္တမာဒါယ အာကာသတော အာဂန္တွာ ကုဋိဒွါရေ ဩတရိတွာ အဋ္ဌာသိ။ တသ္မိံ ခဏေ စရကဿ ဘရိယာ ကုဋိတော နိက္ခမိတွာ ပစ္စေကဗုဒ္ဓဿ ဟတ္ထတော ပတ္တံ ဂဟေတွာ ဂေဟေ နိသီဒါပေတွာ ဘတ္တံ အဒါသိ။

တေန ဘတ္တကိစ္စေ ပရိနိဋ္ဌိတေ သာ တရုဏပစ္စေကဗုဒ္ဓံ ပဿိတွာ ကိလေသပဋိသံယုတ္တံ စိတ္တံ ဥပ္ပာဒေတွာ ပစ္စေကဗုဒ္ဓဿ အတ္တနော အဇ္ဈာသယံ ကထေသိ။ ပစ္စေကဗုဒ္ဓါ တဿာ ကထံ သုတွာ ဇိဂုစ္ဆမာနော ဥပ္ပတိတွာ အာကာသတော အတ္တနော ဝသနဋ္ဌာနမေဝ ဂတော။ သာ ပစ္စေကဗုဒ္ဓဿ ဂတကာလေ အတ္တနော သရီရံ တေလေန မက္ခေတွာ ဘဏ္ဍနကာ ဝိယ နိတ္ထုနမာနာ မဉ္စေ နိပဇ္ဇိ။ စရကော ပရဒေသတော အာဂန္တွာ ဘရိယံ နိပဇ္ဇမာနံ ဧဝမာဟ?’ဘဒ္ဒေ၊ ကိံ အယျဿ ဘိက္ခံ အဒါသီ’တိ။ သာ နိတ္ထုနမာနာ အာဟ? မာ ပုစ္ဆ တဝ အယျဿ ကမ္မန္တိ။ ကထေဟိ ဘဒ္ဒေ၊ ကိံ တေန ကမ္မံ ကတန္တိ။ သော အတ္တနာ သဒ္ဓိံ ကိလေသဝသ္နေ ဩကာသံ ကာရာပေတုံ ဝါယမိတွာ မယာ အယုတ္တန္တိ ဝုတ္တေ မမ ကေသေ ဂဟေတွာ ဟတ္ထပါဒေဟိ အာကောဋေတွာ သရီရံ နခေန ဩတ္ထရိတွာ သီသေ ပဟရိတွာ ဂတော’တိ ဝုတ္တေ စရကော တံ သုတွာ အသဟန္တော (ဧသော မယာ) ဧဝရူပဿ အဿမဏကမ္မဿ ပေါသိတော’တိ ဝတွာ တဿာ သောကံ ဝိနောဒေတွာ ဓနုံ အာဒါယ တိက္ခသရံ ဂဟေတွာ ဧတံ မာရေတွာ အာဂမိဿာမီ’တိ ဝတွာ ဝသနဋ္ဌာနံ အဂမာသိ။

တသ္မိံ သမယေ ပစ္စေကဗုဒ္ဓါ နဟာနတ္ထာယ ဂတော။ ဂန္တွာ စ ပန ကာယဗန္ဓနံ အာကာသေ စီဝရဝံသံ ဝိယ ကတွာ နိဝါသနပါပုရဏံ တသ္မိံ ဌပေတွာ ဇလသာဋကံ နိဝါသေတွာ ဥဒကမတ္ထကာ အာကာသေ နိသီဒိတွာ နဟာယိတုံ အာရဘိ။ စရကော ပစ္စေကဗုဒ္ဓဿ ဂရုဂါရဝကာရဏံ ပဿန္တော ဂုမ္ဗန္တရေ နိလီနော ¶ အဋ္ဌာသိ။ ဌတွာ စ ပန ဧဝရူပံ အစ္ဆရိယံ ဒိသွာ စိန္တေသိ? အယဉ္စ ဧဝရူပံ န ကရောတိ၊ အဒ္ဓါ ဧသာ မုသာဝါဒါ’တိ။ အဟံ ဧတိဿာ ဝစနံ ဂဟေတွာ ဧဝရူပဿ သမဏဿ အကာရဏေ အပရာဓံ ကတံ။ ဧသော တာဒိသံ န ကရောတီ’တိ စိန္တေတွာ ပစ္စေကဗုဒ္ဓဿ နဟတွာ ဌီတကာလေ ဂန္တွာ ပါဒေသု နိပတိတွာ?’မယှံ ခမထ အယျာ’တိ အာဟ။ ပစ္စေက ဗုဒ္ဓါ? ကိံ ကထေသိ ဥပါသကာ’တိ။ သော အတ္တနော မာတုဂါမဿ ကထိတံ အာစိက္ခိ။ ဧဝဉှိ သတိ ဥပါသက တုမှာကံ အာဂတကမ္မံ နိဋ္ဌပေတွာ ဂန္တုံ ဝဋ္ဋတီ’တိ အာဟ။ မာ ဧဝံ ကထေထ သာမိ၊ အဟံ အညာဏဘာဝေန တဿာ ဝစနံ ဂဟေတွာ တုမှာကံ အကာရဏေ ဒုဗ္ဘိတုံ အာဂတောမှိ’တိ သဗ္ဗံ အတ္တနာ စိန္တိတံ အာစိက္ခိ။

ပစ္စေကဗုဒ္ဓါ? အာမ ဥပါသက၊ သာ အတ္တနာ သဒ္ဓိံ အသဒ္ဓမ္မပဋိသံယုတ္တကထံ ကထေသီ’တိ အာဟ။ သော တဿာ ကုဇ္ဈိတွာ အဟံ ဧတံ နိဿာယ ဣမဿ အပရဇ္ဈာမိ။ ဂန္တွာ တံ မာရေဿာမီ’တိ ပစ္စေကဗုဒ္ဓံ ပဉ္စပတိဋ္ဌိတေန ဝန္ဒိတွာ နိက္ခမိ။ ပစ္စေကဗုဒ္ဓါ တံ နိဝတ္တေတွာ မာတုဂါမံ မာ မာရေဟီ’တိ အနေကဝိဓာနိ ကာရဏာနိ ကထေတွာ ပဉ္စသီလေ ပတိဋ္ဌပေတွာ တဿ ဓမ္မံ ဒေသေန္တော ဣမံ ဂါထမာဟ?

ယော အပ္ပဒုဋ္ဌဿ နရဿ ဒုဿတိ၊

သုဒ္ဓဿ ပေါသဿ အနင်္ဂဏဿ၊

တမေဝ ဗာလံ ပစ္စေတိ ပါပံ၊

သုခုမော ရဇော ပဋိဝါတံဝ ခိတ္တော’တိ၊

စရကော တဿ ဓမ္မဒေသနံ သုတွာ ပသန္တစိတ္တော ဟုတွာ ပဉ္စပတိဋ္ဌိတေန ဝန္ဒိတွာ ဂေဟံ ဂန္တွာ တာယ သဒ္ဓိံ သမဂ္ဂဝါသံ ဝသိတွာ တတော ပဋ္ဌာယ ယာဝဇီဝံ ပစ္စေကဗုဒ္ဓဿ စီဝရပိဏ္ဍပါတသေနာသနဂိလာနပစ္စယဘေသဇ္ဇပရိက္ခာရာဒယော ပရိက္ခာရေ စ ဒတွာ ပဋိဇဂ္ဂိ။ သော တသ္မိံယေဝ လေနေ ဝသန္တော အပရဘာဂေ အနုပါဒိသေသာယ နိဗ္ဗာနဓာတုယာ ပရိနိဗ္ဗာယိ။

သယမ္ဘုဉာဏေန ¶ ဝိဂယှ ဓမ္မံ၊

ဒုက္ခံ အနန္တံ သကလံ ပဟာယ၊

သမာဓိဈာနာဘိရတော ယသဿိ၊

ဂတော ဝိနာသံ ပဝရော ယသဿိ။

အထ ပစ္ဆာ စရကော ကာလံ ကတွာ သဂ္ဂေ နိဗ္ဗတ္တိ။ တတ္ထ စိရံ ဒိဗ္ဗသမ္ပတ္တိံ အနုဘဝိတွာ ဒေဝလောကတော စဝိတွာ ဣမသ္မိံ ဒီပေ မလယ ရဋ္ဌေ အမရုပ္ပလ လေနဿ အာသန္နဋ္ဌာနေ ဥပစရကဿ ပုတ္တော ဟုတွာ နိဗ္ဗတ္တိ။ သော နဝမာသဍ္ဎပရိယောသာနေ မာတုကုစ္ဆိတော နိက္ခမိ။ တဿ နာမဂဟဏဒိဝသေ ဉာတကာ အမရုပ္ပလ ကုမာရောတိ နာမံ အကံသု။ သော ပန အပရဘာဂေ ဝဍ္ဎေန္တော ဒါရကေဟိ သဒ္ဓိံ ကီဠန္တော ပတ္တပုဋေန ဝါလုကဘတ္တံ ပစိတွာ၊ ဒါရကာ ဣမေ သမဏာတိ ဝတွာ ပဋိပါဋိယာ နိသီဒါပေတွာ ဒါနံ ဒဿာမီ’တိ ဝတွာ ကီဠာဒါနံ ဒေတိ။ ဧကဒိဝသံ အမရုပ္ပလ ကုမာရော ဝါလုကထုပံ ကတွာ အတ္တနော နိဝါသနဝတ္ထဒုဿံ ဂဟေတွာ ခုဒ္ဒကဒဏ္ဍကေ ဗန္ဓိတွာ ပဋာကံ ကတွာ ပူဇနတ္ထာယ ဌပေသိ။ အမရုပ္ပလ လေနဝါသီ မလိယ ဒေဝတ္ထေရံ နိဿာယ ဒါနာဒီနိ ပုညာနိ ကတွာ တတော စုတော ဣမသ္မိံယေဝ ဒီပေ မဟာဂါမေ ဂေါဌာဘယမဟာရာဇဿ အဂ္ဂမဟေသိယာ ကုစ္ဆိမှိ ပဋိသန္ဓိံ ဂဏှိ။ သော နဝမာသဍ္ဎပရိယောသာနေ မာတုကုစ္ဆိတော နိက္ခမိ။ တဿ နာမဂဟဏ ဒိဝသေ’ကာကဝဏ္ဏတိဿော’တိ နာမံ အကံသု။ သော အနုပုဗ္ဗေန ဝဍ္ဎိတွာ ပိတု အစ္စယေန ဆတ္တံ ဥဿာပေတွာ ကာကဝဏ္ဏတိဿမဟာရာဇာ အဟောသိ။ တဿ ဆတ္တေ ဥဿာပိတေယေဝ သကလရဋ္ဌံ သုဘိက္ခံ အဟောသိ။ ပဉ္စ ဝါ ဒွါဒသ ဝါ ဒိဝသေ အနတိက္ကမိတွာ ဒေဝေါ သမ္မာ ဝဿတိ။ ဝေဿန္တရဗောဓိသတ္တဿ ဒါနဂ္ဂေ ယာစကာနံ ဟတ္ထေ ဘိက္ခာဘာဇနံ ဝိယ တသ္မိံ ကာလေ ဝါပီပေါက္ခရဏီ-နဒီ-ကန္ဒရ-သောဗ္ဘ-ဇာတသရာဒယော ဝဿောဒကေန ပူရိတာ အဟေသုံ။ ပဉ္စဝိဓပဒုမသဉ္ဆန္နာ အနေကဒိဇသမာကိဏ္ဏာ နာနာရုက္ခေဟိ ဝိရောစိတာ အဟေသုံ။ နာနာ သဿာနိ သမ္ပဇ္ဇိံသု၊ ဥတ္တရကုရု အာလကမန္ဒာ ရာဇဓာနိသဒိသံဝ ဟိရညသုဝဏ္ဏာဒိ ရတနဋ္ဌာနံ။

သော ¶ ရာဇာ သဒ္ဓါယ သမ္ပန္နော မဟာဘိက္ခုသင်္ဃဿ စတ္တာရော ပစ္စယေ အနူနံ ကတွာ ဒါပေသိ။ သဋ္ဌိမတ္တာနံ တိပိဋကဓရာနံ စန္ဒနဒေါဏိယာ သတပါကတေလဿ ပူရာပေတွာ ယာဝပိဋ္ဌိပါဒံ တာဝ ဩသီဒါပေတွာ နိသိန္နာနံ လဋ္ဌိမ ဓုဒန္တကဋ္ဌံ စတုမဓုရံ ပက္ခိပိတွာ ဒါပေသိ။ ဥစ္ဆုကဏ္ဍ-သက္ခရာ-နာလိကေရ-ဖလမူလခန္ဓခါဒနဉ္စ နာနာဝိဓမစ္ဆရသေဟိ သုဂန္ဓသာလိတဏ္ဍုလေန သာဓိတယာဂုဘတ္တဉ္စ ပါတောဝ အဒါသိ။ အန္တရာဘတ္တေ အဋ္ဌာရသဝိဓ-အန္တရခဇ္ဇကဉ္စ ဥစ္ဆုကဒလိပနသဖလာဒယော စ နာနာဝိဓောတ္တရိဘင်္ဂေန သဒ္ဓိံ သုဂန္ဓသာလိတဏ္ဍုလဘတ္တံ နာနဂ္ဂရသံ ဒါပေတွာ ပစ္ဆာဘတ္တံ အဋ္ဌဝိဓကပ္ပီယပါနကေ စ ဒါပေသိ။ အညေ သမဏပရိက္ခာရေ စ ဒါပေသိ။ ဣမိနာ နိယာမေနေဝ ဘိက္ခုသင်္ဃဿ တိပိဋကဓရဘိက္ခူနဉ္စ နိရန္တရံ မဟာ ဒါနံ ဒတွာ ဝသတိ။

အထာပရေန သမယေန ကလျာဏိယံ သိဝေါ နာမ မဟာရာဇာ အတ္တနော ဘာဂိနေယျဿ အဘယကုမာရဿ ကာကဝဏ္ဏတိဿ ရညော ဘဂိနိယာ သောမဒေဝိယာ နာမ ရာဇပုတ္တိယာ အာဝါဟမင်္ဂလံ ကတွာ အာနေတွာ ပါဒပရိစာရိကံ ဒါပေသိ။ ဒတွာ စ ပန အဘယ ကုမာရံ ဂိရိနဂရမှိ နိသီဒါပေသီ။ သော ဂိရိနဂရေ ရဇ္ဇံ ကာရာပေတွာ ဂိရိအဘယော နာမ ရာဇာ ဟုတွာ မဟန္တံ သမ္ပတ္တိံ အနုဘဝမာနော ဝိဟာသိ။ တတော အပရဘာဂေ ကာကဝဏ္ဏတိဿ မဟာရာဇာ မဟာဂါမေ ဝိဟရန္တော အညတရဿ ဘိက္ခုဿ ဂတ္တေ မင်္ကုနာ ဒဋ္ဌဋ္ဌာနေ ဂဏ္ဍံ ဥဋ္ဌိတံ ဒိသွာ ကိမေတံ အယျာ’တိ ပုစ္ဆိ။ မင်္ကုနာ ဒဋ္ဌဋ္ဌာနံ မဟာရာဇာတိ။ တံ သုတွာ သံဝေဂပ္ပတ္တော၊ ဘန္တေ မင်္ကုနာ ကိသ္မိံ န ဘဝန္တိ’တိ ပုစ္ဆိ။ ပဋ္ဋသာဋကေ န ဘဝန္တိ’တိ။ ဣမေ ပန ဘဒ္ဒန္တာ ပဋ္ဋသာဋကေ ကုတော လဘန္တီ’တိ စိန္တေတွာ ဂတော။ တံ ဒိဝသမေဝ ပါနီယမာဠကေ နိသိန္နော တိပိဋကတိဿတ္ထေရော နာမ ရညော ဗုဒ္ဓသီဟနာဒသုတ္တံ နာမ ကထေသိ။ သော ထေရေ ပသန္နော၊ ဥတ္တရာသင်္ဂေ ဒီယမာနေ’ဧကသာဋကော ဘဝိဿာမိ’ တသ္မာ ဣမမေဝ ဒါတုံ န သက္ကာ၊ ကထံ ကရိဿာမီ’တိ စိန္တေန္တော ထေရေန သဒ္ဓိံ ကထယမာနော တတ္ထ မာဠကေယေဝ အဋ္ဌာသိ။ တသ္မိံ ခဏေ ဧကော ကာကော အမ္ဗသာခန္တရေ နိသီဒိတွာ

သဒ္ဒံ ¶ ကရောန္တော ဧဝမာစိက္ခိ။ အယျ ကာကဝဏ္ဏတိဿမဟာရာဇ၊ တုမှာကံ ကင်္ခါ နာမ နတ္ထီ၊ ပသာဒက္ခဏေ ဓမ္မကထိကဿ ဥတ္တရာသင်္ဂံ ဒေဟီ’တိ အာဟ။

(ကာကော သော ကာကဝဏ္ဏဿ ဝဒေတိ ဝစနက္ခမော၊

ပသာဒဇာတော ထေရဿ တုဝံ သဒ္ဓမ္မဒေသနေ၊

ဒဒါဟိ ဥတ္တရာသင်္ဂံ မဟာထေရဿ ဘူမိပါ’တိ။)

မဟာရာဇ၊ အဟံ တုမှာကံ ပဉ္စသာသနံ ဂဟေတွာ အာဂတော။ ဝိဟာရဒေဝိ ပုတ္တံ ဝိဇာယိ။ ဣဒမေကံ သာသနံ။ ဧကာ ကရေဏုကာ သုဝီရဟတ္ထိပေါတကံ တိတ္ထသရေ ဝိဇာယီ။ ဣဒံ ဒုတိယံ သာသနံ။ ဂေါဌသမုဒ္ဒမဇ္ဈေန သတ္တမတ္တာ နာဝါ ပဋ္ဋနေ ပစ္စုဋ္ဌိတာ၊ ဣဒံ တတိယံ သာသနံ ဥတ္တရ ဝဍ္ဎမာနပဗ္ဗတပါဒေ ဒွိကရီသပ္ပမာဏေ ခေတ္တေ တရုဏတာလက္ခန္ဓပ္ပမာဏာ သုဝဏ္ဏက္ခန္ဓာ ဥဂ္ဂစ္ဆိံသု၊ ဣဒံ စတုတ္ထံ သာသနံ။ ဂိရိပဗ္ဗတပါဒေ ကောဋ ရဋ္ဌက ဝိဟာရေ ကောဋရဋ္ဌကော နာမ ထေရော မဂ္ဂေါပသမံ ဝတွာ ဂိရိပဗ္ဗတမတ္ထကေ သတ္တတာလပ္ပမာဏံ ဥဂ္ဂန္တွာ အာကာသေ နိသိန္နော ပရိနိဗ္ဗာယိ၊ ဣဒံ ပဉ္စမံ သာသနံ။

(ပုတ္တော ဟတ္ထီ စ နာဝါ စ စတုတ္ထံ ဟေမခန္ဓကံ၊

ထေရဿ ပရိနိဗ္ဗာနံ ပဉ္စမံ သာသနံ ဣဒံ။

ဣမံ ဂဟေတွာန အဟံ အာဂတော တဝ သန္တိကံ၊

သာသနံ ဤဒိသံ သုတွာ ပုညကမ္မေ ရတော ဘဝ။

ဝတ္ထံ သဟသာ ဒါပေဟိ ကတော သဗ္ဗသမာဂမော၊

ဣဒံ နိစ္စံ ဇာနန္တော ကိံ လဂ္ဂေါ ဥတ္တရာသင်္ဂေ’တိ။)

ရာဇာ ကာကဿ ဝစနံ သုတွာ ဟသိ။ ထေရော? ကသ္မာ မဟာရာဇ ဟသီ’တိ ပုစ္ဆိ။ ဘန္တေ၊ ဧတသ္မိံ အမ္ဗသာခန္တရေ နိသီဒိတွာ သဒ္ဒံ ကရောန္တဿ ကာကဿ ကထံ သုတွာ ဟသိန္တိ သဗ္ဗံ အာရောစေသိ။ ထေရော’ပိ ရညာ ပုရိမတ္တဘာဝေ ကတကမ္မံ ¶ ပဿိတွာ ဟသိ။ ရာဇာ ကသ္မာ အယျော ဟသီ’တိ ပုစ္ဆိ။ မဟာရာဇ၊ တုမှာကံ အနန္တရေ အတ္တဘာဝေ မလယရဋ္ဌေ အမရုပ္ပလ နာမ ကာလေ ကတကမ္မံ ပဿိတွာ ဟသိတ္တိ။ တေန ပုဋ္ဌော ကတကုသလကမ္မံ သဗ္ဗံ ဝိတ္ထာရေန တဿ အာစိက္ခိ။ ရာဇာ သောမနဿပ္ပတ္တော အတ္တနော ဥတ္တရာသင်္ဂံ ဒတွာ ထေရံ ဝန္ဒိတွာ ဂေဟံ ဂတော။ ကောဋရဋ္ဌကဝိဟာရံ ဂန္တွာ ထေရဿ သရီရဇ္ဈာပနံ ကာရာပေတွာ ဓာတုံ အာဒါယ စေတိယံ ကာရာပေတွာ မဟန္တံ ပူဇံ ကတွာ မဟာဂါမံ ဂတော။ သုဝဏ္ဏံ အာဟရာပေတွာ ရာဇင်္ဂဏေ ဌပါပေသိ။ ဂေါဌသမုဒ္ဒကုစ္ဆိယံ ပတ္တ နာဝါတော ဝတ္ထာနိ အာဟရာပေတွာ ဘိက္ခုသင်္ဃဿ စီဝရတ္ထာယ ဒါပေတွာ မဟာဒါနံ ပဝတ္တေတွာ မဟာဂါမသမီပေ ဝိဟာရံ ကာရာပေတွာ ဝိဟရန္တော အတ္တနော ပုတ္တံ ဒုဋ္ဌဂါမဏိံ ပက္ကောသာပေတွာ၊ တာတ၊ တွံ ဂန္တွာ ဂိရိမှိ နဂရေ နိသီဒါ’တိ ဝတွာ အမစ္စဉ္စဿ ပိတုဋ္ဌာနေ ဌပေတွာ ဂိရိနဂရံ ပါဟေသိ။ တံ ဒိသွာ ဂိရိအဘယ ကုမာရော ကုမာရေန သဒ္ဓိံ အာဂတဗဠဿ ဝတ္ထာဟာရာဒီနိ ဒါပေတွာ မဟန္တံ သမ္မာနံ အကာသိ။ ရာဇကုမာရော ဂိရိပဗ္ဗတပါဒေ ဝိဟာသိ။

တတော အပရဘာဂေ ဇာတိံ နိဿာယ ခတ္တိယာနံ ဝိဝါဒေါ အဟောသိ။ သော အဘယရာဇာ ကိံ မေဝိဝါဒေနာ’တိ အတ္တနော ဘရိယာယ သောမဒေဝိယာ သဒ္ဓိံ ဗလဝါဟနံ ဂဟေတွာ အနုက္ကမေန ဂစ္ဆန္တော သေရုနဂရေ ရဇ္ဇံ ကာရေန္တံ အတ္တသဟာယံ သိဝရာဇံ သန္ဓာယ တဿ သန္တိကံ အာဂဉ္ဇိ။ သော’ပိ သိဝရာဇာ ဂိရိအဘယရညာ သဒ္ဓိံ အာဂတဗဠဿ မဟန္တံ သက္ကာရံ ကာရေတွာ အဟတဝတ္ထတိလတဏ္ဍုလာဒီနိ အာဟရာပေတွာ ဒါပေသိ။ ကတိပါဟစ္စယေ၊ သမ္မ၊ ကသ္မာ အာဂတောသိ’တိ ပုစ္ဆိ။ သော အာဂတကာရဏံ သဗ္ဗမဿ အာစိက္ခိ။ ဘဒ္ဒကံ သမ္မ၊ တေ ကတံ အာဂန္တဗ္ဗမေဝ အာဂတော။ အဟံ တေ ကတ္တဗ္ဗံ ဇာနိဿာမိ။ တွံ မာ စိန္တယီ’တိ ဝတွာ တဿ ဝသနတ္ထာယ နဂရဘူမိံ ဂဝေသန္တော သရကောဋိယံ အတိရမဏီယဘူမိံ ပဿိတွာ တသ္မိံ ဘူမိဘာဂေ သော နဂရံ မာပေတွာ ဒေဝိယာ ဧကသဒိသနာမံ ကရိဿာမီ’တိ သောမနဂရန္တိ နာမံ အကာသိ။ တံ နဂရံ သုသမိဒ္ဓံ သမ္ပန္နဓနဓညာဒီဟိ ဥပကရဏေဟိ ဒွါရဋ္ဋာလကဂေါပုရပရိခါပေါက္ခရ-ဏိယာဒီဟိ ¶ သဟိတံ ဟတ္ထိအဿရထပတ္တိအာဒီဟိ သမာကုလံ သင်္ခပဏဝဘေရိသဒ္ဒါဒီဟိ သမာကိဏ္ဏံ နဂရံ အဟောသိ။ သော အဘယော စိရံ သောမနဂရေ မဟန္တံ ဣဿရိယံ အနုဘဝန္တော ဝိဟာသိ။

အထာပရသ္မိံ ကာလေ သောမဒေဝီ ရညာ သဒ္ဓိံ ကထေသိ၊ အယျ အမှာကံ ပဋိသရဏံ စေတိယဉ္စ ဝိဟာရဉ္စ ကာရေတုံ ဝဋ္ဋတီ’တိ။ ဘဒ္ဒကံ တေ ကထိတန္တိ သောမနဿပ္ပတ္တော ဟုတွာ ဝိဟာရဘူမိံ ဂဝေသန္တော နဂရတော နာတိဒုရေ နာစ္စာသန္နေ မဟန္တံ သာလဝနံ အတ္ထိ။ တံ ပဿိတုံ ဂတော။ တဒါ တသ္မိံ သာလဝနေ မဟာအရိဋ္ဌတ္ထေရဿ ဝံသေ မဟာမဟိန္ဒတ္ထေရော နာမ ဧကော ထေရော အတ္ထိ။ သော သဋ္ဌိမတ္တေ ဘိက္ခူ ဂဟေတွာ ဝိဟရတိ။ တံ ဒိသွာ ဣရိယာပထေ ပသန္နော ထေရံ ဧဝမာဟ၊ ‘အယျ တုမှာကံ ဣမသ္မိံ သာလဝနေ ဝိဟာရံ ကရိဿာမိ’တိ။ ထေရော တဿ ဝစနံ သုတွာ တုဏှီဟာဝေန အဓိဝါသေသိ။ ရာဇာ သောမနဿပ္ပတ္တော ထေရံ ဝန္ဒိတွာ နဂရမေဝ ဂန္တွာ သောမဒေဝိံ အာမန္တေတွာ၊ ဘဒ္ဒေသောမဒေဝိ၊ အမှာကံ မနောရထော မတ္ထကံ ပတ္တော။ ဝိဟာရကရဏတ္ထာယ မနာပေါ ဘူမိဘာဂေါ လဒ္ဓါ။ တတ္ထ စ မဟိန္ဒော နာမ ထေရော သမဏာနံ သဋ္ဌိမတ္တံ ဂဟေတွာ ဝိဟရတိ။ တံ ဝန္ဒိတွာ ဝိဟရဏတ္ထာယ ပဋိညံ ဂဟေတွာ အာဂတော။ တတ္ထ ဝိဟာရံ ကရိဿာမီ’တိ အာဟ။ သာ တံ သုတွာ သောမနဿပ္ပတ္တာ သာဓူ’တိ သမ္ပဋိစ္ဆိ။ ပုနဒိဝသေ ဒေဝိယာ သဒ္ဓိံ ထေရဿ သန္တိကံ ဂန္တွာ ဝန္ဒိတွာ ဧကမန္တံ နိသီဒိ။ ထေရော တေသံ မဟာသမယသုတ္တံ ကထေသိ။ တေ ဥဘော’ပိ ဓမ္မံ သုတွာ သောမနဿဇာတာ အဟေသုံ။ အထ ရာဇာ အယျ ဓာတုံ ကုတော လဘိဿာမာ’တိ ထေရံ ပုစ္ဆိ။ မာ စိန္တယိ မဟာရာဇ၊ ဓာတုံ အမှေ ဇာနိဿာမာ’တိ အာစိက္ခိ။

သော တတော ပဋ္ဌာယ ဝိဟာရဘုမိံ သောဓာပေတွာ ခါဏုကဏ္ဋကာဒယော နီဟရိတွာ ဘေရိတလမိဝ ရမဏီယံ သမံ ကာရာပေတွာ ဣဋ္ဌကဝဍ္ဎကိံ ပက္ကောသာပေတွာ ဣဋ္ဌစိတံ ကာရာပေတွာ စေတိယကမ္မံ ပဋ္ဌပေသိ။ ဝဍ္ဎကီ စေတိယံ စိနန္တော ကတိပါဟေန ပုပ္ဖာဓာနတ္တယံ နိဋ္ဌပေတွာ ဓာတုဂဗ္ဘေ သဗ္ဗံ ကတ္တဗ္ဗံ ကမ္မံ နိဋ္ဌပေတွာ ရညော ပဋိဝေဒေသိ။ ရာဇာ၊ အာဂန္တွာ ထေရဿ အာရောစေသိ။ နိဋ္ဌာပိတော အယျ ဓာတု ဂဗ္ဘော’တိ။ ထေရော ရညော ဝစနံ သုတွာ အတ္တနာ ပရိဟရိတံ ¶ တထာဂတဿ ဒက္ခိဏဒါဌာဓာတုံ တဿ အဒါသိ။ ရာဇာ ဓာတုံ ဂဟေတွာ သုနက္ခတ္တေန သုမုဟုတ္တေန မဟတာ ပရိဝါရေန ဓာတုဂဗ္ဘေ နိဒဟိတွာ အတိမနောရမံ ဥဒကဗုဗ္ဗုဠကေလာသကုဋပဋိဘာဂံ စေတိယံ ကာရာပေသိ။

သဒ္ဓါဒိဂုဏသမ္ပန္နော လောကသာသနရက္ခကော၊

သစေတိယံ မဟာရာဇာ ကာရာပေသိ ဝိဟာရကံ။

တတော ထေရဿ သန္တိကေ သဋ္ဌိမတ္တာနံ ဘိက္ခုနံ အတ္ထာယ သဋ္ဌိမတ္တာနိ ပရိဝေဏာနိ ကာရာပေတွာ ဒွါရဋ္ဋာလကပါကာရေဟိ သောဘိတံ ဝိဟာရံ နိဋ္ဌပေတွာ အတ္တနော ဒေဝိယာ ဧကနာမံ ကတွာ မဟိန္ဒတ္ထေရဿ ဒက္ခိဏောဒကံ ဒတွာ ဂန္ဓမာလာဓူပဓဇေဟိ ပူဇံ ကရောန္တော ဒိဝသဿ တိက္ခတ္တုံ ဓာတုပဋ္ဌာနံ ဂန္တွာ ဒါနာဒီနိ ပုညာနိ ကုရုမာနော ဂိရိအဘယရာဇာ မဟန္တံ သမ္ပတ္တိံ အနုဘဝမာနော သောမနဂရံ ပဋိဝသတိ။

(နဂရေ သောမနာမမှိ ရမဏီယေ မနောရမေ၊

ဒေဝိယာ သဟ မောဒန္တော ရဇ္ဇံ ကာရေသိ နာယကော။)

တတော ဝိဟာရဒေဝိယာ ဘာတာ စုလ္လပိဏ္ဍပါတိယတိဿတ္ထေရော နာမ ဧကဒိဝသံ ကာကဝဏ္ဏတိဿမဟာရညော အာယုသင်္ခါရမောလောကေန္တော န စိရပ္ပဝတ္တနဘာဝံ ဉတွာ ပုနဒိဝသေ ရညော သန္တိကံ ဂန္တွာ တေန သဒ္ဓိံ ကထေသိ။ မဟာရာဇ တုမှာကံ နလာဋဓာတုယာ သတ္ထာရာ ဗျာကရဏံ ဒိန္နံ၊’မဟာဝါလုကဂင်္ဂါယ ဒက္ခိဏဘာဂေ သေရု နာမ ဒဟဿ အန္တေ ဝရာဟ နာမ သောဏ္ဍိယာ မတ္ထကေ အနာဂတေ ကာကဝဏ္ဏတိဿော နာမ မဟာရာဇာ မယှံ နလာဋဓာတုံ ပတိဋ္ဌပေဿတီ’တိ ဝတွာ တံ သန္ဓာယ ဘဂဝါ သမာပတ္တိံ သမာပဇ္ဇိတွာ ဂတော။ တဿ ဝစနံ မနသိကရောဟီ’တိ အာဟ။ တဿ ကထံ သုတွာ အမှာကံ ကုသလသမ္ပတ္တိံ အဝိနာသေတွာ အယျဿ ဝစနမုဒ္ဒိဿ စေတိယံ ကာရာပနတ္ထာယ ဂန္တဗ္ဗန္တိ မန္တွာ ဘဒ္ဒကံ အယျာ’တိ ထေရဿ ဝစနံ သမ္ပဋိစ္ဆိတွာ အတ္တနော ပုတ္တံ ဒုဋ္ဌဂါမဏိံ ဂိရိနဂရတော ပက္ကောသာပေတွာ မဟာဂါမေ နိသီဒါပေတွာ နဂရေ ဘေရိံ စရာပေသိ၊ အဟံ မဟာဝါလုကာယ ဂင်္ဂါယ သမီပေ သေရု နာမ ¶ ဒဟဿ အန္တေ ဝရာဟ နာမ သောဏ္ဍိယာ မတ္ထကေ စေတိယံ ကာရာပနတ္ထာယ ဂမိဿာမိ၊ သဗ္ဗသေနိယော စ မဟာ ဇနော စ မယာ သဒ္ဓိံ အာဂစ္ဆန္တု’တိ ဝတွာ ရာဇာ စုလပိဏ္ဍပါတိယတိဿတ္ထေရဿ တိဿမဟာဝိဟာရေ သာဂလတ္ထေရဿ စ သန္တိကံ ဂန္တွာ ဘန္တေ တုမှာကံ ပရိဝါရေ ပဉ္စသတမတ္တေ ဘိက္ခု ဂဟေတွာ ဓာတုံ ဥပဋ္ဌဟန္တာ မယာ သဒ္ဓိံယေဝ အာဂစ္ဆထာ’တိ ဝတွာ ဘဒ္ဒမာသေ ဘဒ္ဒဒိဝသေ သုနက္ခတ္တေ သုမုဟုတ္တေ ဗန္ဓာဝါရံ သဇ္ဇေတွာ ဓာတုဃရတော ဓာတုကရဏ္ဍကံ နီဟရိတွာ သုသဇ္ဇိတရထေ ဌပေတွာ ဥပရိ သေတစ္ဆတ္တဉ္စ ကတွာ ပုရတော ပုရတော ရတနမဏဍပေ ကာရာပေတွာ ပုရေတရမကာသိ။

တတော ရာဇာ ပုတ္တံ ဒုဋ္ဌဂါမဏိံ ပက္ကောသာပေတွာ အနုသာသိတွာ ပုတ္တံ သဒ္ဓါတိဿကုမာရဉ္စ ဝိဟာရဒေဝိဉ္စ ဂဟေတွာ သီဃံ နိက္ခမိ။ စူဠပိဏ္ဍပါတိယတိဿတ္ထေရော စ အတ္တနော ပရိဝါရေ ပဉ္စသတဘိက္ခူ ဂဟေတွာ ဓာတုံ ဥပဋ္ဌဟန္တော ပစ္ဆတော အာဂဉ္ဆိ။ သဗ္ဗသေနိယော စ ရာဇာ စ ဘိက္ခုသင်္ဃဿ မဟာဒါနံ ဒတွာ ဘိက္ခု သင်္ဃေန သဒ္ဓိံ ဂန္တွာ ဒီဃဝါပိံ ပါပုဏိံသု။ တသ္မိံ သဒ္ဓါတိဿကုမာရံ နိသီဒါပေတွာ အနုက္ကမေန အာဂန္တွာ သုမနမာလာပိဋ္ဌိယံ ခန္ဓဝါရံ ဗန္ဓိတွာ နိသီဒိ။ ကသ္မာ ပန တံ ဌာနံ ဧဝံ နာမကံ ဇာတန္တိ။ သုမနနာဂရာဇာ သတ္တဒိဝသာနိ နာဂသမ္ပတ္တိံ အဘိရမမာနော (နလာဋဓာတုံ ဝိဿရိ။) သတ္တာဟစ္စယေန နလာဋဓာတုံ အနုဿရိတွာ ပစ္ဆာ အာဝဇ္ဇမာနော ရညော ဓာတုံ ဂဟေတွာ အာဂတဘာဝံ ဉတွာ မဟန္တံ သောမနဿံ ပတ္တော မဟန္တဇ္ဈာသယော အတ္တနော ပရိဝါရေ ဆကောဋိမတ္တေ နာဂေ ဂဟေတွာ ဓာတုပဋိပထံ ဂန္တွာ ဓာတုပတိဋ္ဌိတဋ္ဌာနေဝ ပထဝိယံ နာဘိပ္ပမာဏတော သုမနမာလာဝဿံ ဝဿေသိ။ တသ္မာ တံ ဌာနံ သုမနမာလာပိဋ္ဌိတိ ဇာတံ။ ပုနဒိဝသေ ရာဇာ ဓာတုံ ဂဟေတွာ ဝရာဟ ¶ နာမ သောဏ္ဍိံ ပါပုဏိ။ သမ္ပတ္တာယ ဓာတုယာ တသ္မိံ ဌာနေ သုမနနာဂရာဇာ ရထစက္ကေ ယာဝ နာဘိံ တာဝ ဩသီဒါပေတွာ အပရိဝတ္တနံ အကာသိ။ တံ ဒိသွာ ရာဇာ သံဝေဂပ္ပတ္တော ထေရံ ပုစ္ဆိ။ မာ ဘာယိ မဟာရာဇ၊ ဓာတု ပတိဋ္ဌာနဋ္ဌာနံ အာဂတော။ ဣမသ္မိံ ဌာနေ ပတိဋ္ဌဟိဿတီ’တိ အာဟ။

တံ သုတွာ ရာဇာ ဓာတုပတိဋ္ဌာန ဘူမိဘာဂံ ဘဝိဿတီ’တိ စိန္တေတွာ တတ္ထေဝ သေနံနိဝေသေတွာ ဣဒံ ဌာနံ သမန္တတော သကဏ္ဋကံ ဝနံ နီဟရာပေတွာ ဘူမိဘာဂံ အတိရမဏီယံ ဘေရိတလမိဝ သမံ ကာရာပေတွာ သေနိယပါမောက္ခံ အာမန္တေတွာ တုမှေ ဓာတုံ ဌပနတ္ထာယ ပဌမံ ဓာတုဃရံ ကာရာပေတွာ ဓာတု ဂဗ္ဘံ ပတိဋ္ဌာပေတွာ နိဝေဒေသိ။ ရာဇာ အန္တော ဓာတုဃရေ တသ္မိံ ဓာတုဂဗ္ဘေ ဓာတုကရဏ္ဍကံ ပတိဋ္ဌပေတွာ ဗဟိ အာရက္ခံ သံဝိဓာယ တတ္ထ မဟန္တံ ပူဇာဝိဓာနံ ကာရာပေတွာ ဓာတုဃရံ စတုဇာတိယဂန္ဓေန ဝိလိမ္ပာပေသိ။ တဒုပါဒါယ တံ ဂေဟံ ဂန္ဓမူလံ နာမ ဇာတံ။ တသ္မိံ ဌာနေ ဗဟူ သန္နိပတိံသု။ တတ္ထ မဟိန္ဒော နာမ ထေရော အာဂန္တုက ဘိက္ခူနံ ဝတ္တပဋိဝတ္တံ အကာသိ။ ပုနဒိဝသေ ရာဇာ ဝိဟာရံ ဂန္တွာ သုခေန ဝသိတ္ထ အယျာ’တိ ပုစ္ဆိတွာ သဗ္ဗေ ဘိက္ခု နိမန္တေတွာ ရာဇဂေဟေ နိသီဒါပေတွာ ယာဂုဘတ္တံ သက္ကစ္စံ ဒတွာ ပစ္ဆာ ဘတ္တံ အနုမောဒနံ သုတွာ နိသိန္နကာလေ ထေရော ဩဝဒန္တော မဟာရာဇ၊ ပမာဒေန ဝသိတုံ န ဝဋ္ဋတိ ဇီဝိတံ နာမ န စိရဋ္ဌိတိကံ၊ ဓာတုပတိဋ္ဌာပနံ ပပဉ္စံ အကတွာ ကာရေဟီ’တိ ဝတွာ ဂါထမာဟ?

ယသ္မာ ဟိ ဇီဝိတံ နာမ အပ္ပံ ဗုဗ္ဗုလကုပမံ၊

တသ္မာ ဟိ ပဏ္ဍိတော ပေါသော ကရေယျ ကုသလံ သဒါ’တိ။

ဣမိနာ ¶ နယေန ဓမ္မံ ကထေတွာ စူဠပိဏ္ဍပါတိယတိဿ တ္ထေရော စ သာဂလတ္ထေရော စ မဟိန္ဒတ္ထေရော စာ’တိ တယော ထေရာ အတ္တနော အတ္တနော ပရိဝါရေ ဘိက္ခူ ဂဟေတွာ ဓာတု ပရိဟရဏတ္ထာယ အာဂစ္ဆိံသု။

ဝိပုလယသော ပရဟိတာဝဟန္တော၊

သုဇနဟိတော ဓိတိမာ အဝီတသဒ္ဓါ၊

သုပရိဝုတော မဟတိယာ ဟိ ပရိသာ၊

ရာဇသေဋ္ဌော ပဝရထူပမာရဘီ’တိ။

ဣတိ အရိယဇနပ္ပသာဒနတ္ထာယ ကတေ ဓာတုဝံသေ

ပကိဏ္ဏကော နာမ

စတုတ္ထော ပရိစ္ဆေဒေါ။

၅။ ¶ ဓာတုနိဓာနာဓိကာရော

တတော ဝိမံသေတွာ ဘုမိဘာဂံ ဂဟေတုံ ဝဋ္ဋတီ’တိ ဘူမိ ဘာဂံ ဝီမံသေန္တော မင်္ဂလသမ္မတေ အဋ္ဌ ဂေါဏေ အာဟရာပေတွာ ဂန္ဓောဒကေန နဟာပေတွာ သိင်္ဂေသု သုဝဏ္ဏကဉ္စုကံ ပတိမုဉ္စာပေတွာ ဂန္ဓပဉ္စင်္ဂုလိကံ ဒါပေတွာ ဂီဝါယ မာလာဒါမံ ဗန္ဓာပေတွာ အယောဒါမေန ဗန္ဓာပေတွာ ဧဝံ စိန္တေသိ? ယဒိ ပန ဘဂဝတော နလာဋဓာတု ယသ္မိံ ဌာနေ ပတိဋ္ဌဟိတွာ လောကတ္ထစရိယံ ကရောန္တီ ပဉ္စဝဿသဟဿာနိ သာသနံ ပတိဋ္ဌဟိဿတိ တသ္မိံ ဌာနေ ဂေါဏာ သယမေဝ အယောဒါမတော မုဉ္စိတွာ ထုပဋ္ဌာနံ သမန္တတော ဝိစရိတွာ စတုသု ဒိသာသု သယန္တုတိ အဓိဋ္ဌဟိတွာ ပုရိသေ အာဏာပေသိ။ တေ တထေဝ အကံသု။ တတော ဝိဘာတာယ ရတ္တိယာ ရာဇာဂေါဏေ ဂါဟာပနတ္ထာယ အာယုတ္တကေ အာဏာပေသိ။ တေ မနုဿာ ဂန္တွာ ဂေါဏေ အပဿိတွာ န ပဿာမ ဒေဝါ’တိ ရညော အာရောစေသုံ။ ဂစ္ဆ ဘဏေ၊ ဂေါဏာနံ ဂတဋ္ဌာနံ ဩလောကေထာ’တိ အာဟ။ တေ ဂဝေသမာနာ ဗန္ဓနဋ္ဌာနေ အဒိသွာ ပဒါနုပဒံ ဂန္တွာ ထူပကရဏဋ္ဌာနံ သမန္တာ ဝိစရိတွာ စတုသု ဒိသာသု သယိတဂေါဏေ ဒိသွာ သယိတဋ္ဌာနတော နင်္ဂုဋ္ဌာဒီနိ မဒ္ဒန္တာပိ ဥဋ္ဌာပေတုံ အသက္ကောန္တာ ဂန္တွာ ရညော အာရောစေသုံ၊ ဒေဝ၊ ဂေါဏာ န ဥဋ္ဌဟန္တိ၊ ဧကံ ဌာနံ သမန္တာ ဝိစရိတွာ စတုသု ဒိသာသု သယိတာ’တိ။ တံ သုတွာ ရာဇာ သေနင်္ဂပရိဝုတော သယမေဝ ဂန္တွာ’ပိ ဂေါဏေ ဥဋ္ဌာပေတုံ အသက္ကောန္တော ရာဇာ ဧဝံ အဓိဋ္ဌာသိ၊ ယဒိ ဣမသ္မိံ ဌာနေ ဓာတု ပတိဋ္ဌာပေတဗ္ဗာ ဘဝေယျ ဂေါဏာ ဥဋ္ဌဟိတွာ ဂစ္ဆန္တု’တိ။ ဂေါဏာ စိတ္တက္ခဏေယေဝ ဥဋ္ဌဟိတွာ ပလာယိံသု။ ရာဇာ တံ အစ္ဆရိယံ ဒိသွာ ပသန္နမနော ဟုတွာ ပုနေကဒိဝသံ ဝုတ္တနိယာမေနေဝ အဿေ ¶ အလင်္ကာရာပေတွာ အယောဒါမေန ဗန္ဓာပေတွာ ဌပေသိ။ အဿာပိ တေ ဂေါဏာ ဝိယ ဂန္တွာ နိပဇ္ဇိံသု။ ရာဇာ ဂန္တွာ တထေဝ အဓိဋ္ဌဟိတွာ အဿေ ဥဋ္ဌာပေသိ။ ပုနေကဒိဝသံ ဟတ္ထီံ အလင်္ကာရာပေတွာ တထေဝ အဓိဋ္ဌာသိ။ သောပိ ဗန္ဓဒါမေ ဆိန္ဒိတွာ ပစ္ဆိမယာမသမနန္တရေ ဂန္တွာ စေတိယကရဏဋ္ဌာနေ နိပဇ္ဇိ။ ပဘာတာယ ရတ္တိယာ ရာဇာ ဟတ္ထီဂေါပကေ ပက္ကောသာပေတွာ ဟတ္ထိံ အာနေထာ’တိ အာဟ။ ဟတ္ထိဂေါပကာ ဟတ္ထိံ ဗန္ဓနဋ္ဌာနေ အဒိသွာ၊ ဟတ္ထိံ ဗန္ဓနဋ္ဌာနေ န ပဿာမ ဒေဝါ’တိ အာဟံသု။ တေနဟိ ဘဏေ၊ သီဃံ ဥပဓာရေထာ’တိ ဝုတ္တေ ဟတ္ထိဂေါပကာ ပဒါနုပဒံ ဂဝေသမာနာ စေတိယဋ္ဌာနေ နိပန္နံ ဟတ္ထိံ ဒိသွာ အာဂန္တွာ ရညော အာရောစေသုံ။ တံ သုတွာ ရာဇာ ဟေဋ္ဌာ ဝုတ္တပ္ပကာရေန ပဋိပဇ္ဇိတွာ ဟတ္ထိံ ပုရေ ကတွာ အာဂစ္ဆိ။

ဧဝံ တီဟိ ဝိမံသနာဟိ ဝီမံသေတွာ ဘုမိဂဟိတဘာဝံ ထေရဿ သန္တိကံ ဂန္တွာ ဝန္ဒိတွာ ဥပဋ္ဌဟမာနော အာရောစေသိ။ တသ္မိံ ကာလေ သေရုနဂရေ သိဝရာဇာ ဗဟူ ပဏ္ဏာကာရေ ဂါဟာပေတွာ ရာဇာနံ ပဿိဿာမိ’တိ အာဂန္တွာ ဝန္ဒိတွာ ဧကမန္တံ အဋ္ဌာသိ။ ရာဇာ တေန သဒ္ဓိံ သမ္မောဒနီယံ ကထံ ကတွာ နိသိန္နကာလေ လောဏနဂရေ မဟာနာဂရာဇာ’ပိ ဗဟုပဏ္ဏာကာရံ ဂါဟာပေတွာ ရာဇာနံ ပဿိဿာမိ’တိ အာဂန္တွာ ဝန္ဒိတွာ ဧကမန္တံ နိသီဒိ။ တေန သဒ္ဓိံ သမ္မောဒနီယံ ကထံ အကာသိ၊ ဣမသ္မိံ ဌာနေ ဒသဗလဓာတုံ ပတိဋ္ဌာပေဿာမိ၊ တုမှေ မမ သဟာယာ ဟောထာ’တိ တေ ဂဟေတွာ ဂန္တွာ ဓာတုံ ဝန္ဒထာ’တိ ဝန္ဒာပေသိ။ တသ္မိံ ခဏေ ဓာတုတော ဆဗ္ဗဏ္ဏရံသိယော ဥဂ္ဂစ္ဆိံသု။ ဒေဝါ သာဓုကာရံ ကရောန္တာ အာကာသတော မာလာယော ခိပိံသု။ ရာဇာနော သောမနဿပ္ပတ္တာ အမှာကံ လင်္ကာယံ ဒသဗလဿ နလာဋဓာတု အမှာကံ ရဋ္ဌေ ပတိဋ္ဌဟိဿတိ။ ဧသာ ဓာတု မဟာ ဇနဿ သတ္ထုကိစ္စံ သာဓေယျာတိ ဝန္ဒိတွာ ဂတာ။ ရာဇာ တေသံ ဂတကာလေ ဂိရိအဘယံ ပက္ကောသာပေတွာ တာတ၊ ဣဋ္ဌကံ ဇနဿ ပီဠနံ အကတွာ ကာရာပေမာ’တီ အာဟ။ မာ စိန္တယိတ္ထ ဒေဝ၊ အဟံ ¶ ဣဋ္ဌကံ ကာရာပေဿာမီတိ။ ဧဝဉှိ သတိ ပပဉ္စော ဘဝိဿတီ’တိ အာဟ။ အမှာကံ သန္တိကေ သုဝဏ္ဏရဇတာနိ မန္ဒာနိ ကုတော လဘိဿာမာ’တိ ဝုတ္တေ ဂိရိအဘယော ဧဝမာဟ၊ ဒေဝ၊ သတ္ထာ မဟာပုညော မဟန္တံ ပူဇာသက္ကာရသမ္မာနံ လဘိဿတိ။ တွံ အစိန္တေတွာ စေတိယကမ္မံ ပဋ္ဌပေဟီ’တိ အာဟ။

သော တဿ တံ အစိန္တနီယံ ကထံ သုတွာ သောမနဿပ္ပတ္တော ထေရဿ သန္တိကေ ဓမ္မံ သုတွာ ဓာတုံ ဝန္ဒိတွာ နဂရံ ဂန္တွာ ဘုတ္တသာယမာသော သယနေ နိပန္နော နိဒ္ဒံ ဩက္ကမိ။ ဝိဘာတာယ ရတ္တိယာ ပဗုဇ္ဈိတွာ ဣဋ္ဌကံ စိန္တယမာနဿ ဒေါမနဿံ အဟောသိ။ တသ္မိံ ကာလေ သက္ကော ဒေဝရာဇာ ဝိဿကမ္မံ ဒေဝပုတ္တံ အာမန္တေတွာ၊ တာတ၊ ဝိဿကမ္မ၊ ကာကဝဏ္ဏတိဿမဟာရာဇာ အမှာကံ သတ္ထုနော နလာဋ ဓာတုံ နိဒဟိတွာ မဟန္တံ စေတိယံ ကာရာပေတုကာမော ဣဋ္ဌကံ စိန္တယိ။ တွံ ဂန္တွာ ဖာသုကဋ္ဌာနေ ဣဋ္ဌကံ မာပေဟီတိ အာဟ။ တံ သုတွာ ဝိဿကမ္မဒေဝပုတ္တော ဒုဂ္ဂတဿ ဗြာဟ္မဏဿ ခေတ္တေ ဣဋ္ဌကံ မာပေတွာ ဒေဝလောကမေဝ ဂတော။ တသ္မိံ ခဏေ ခေတ္တသာမိကော ဒုဂ္ဂတဗြာဟ္မဏော ပါတောဝ အတ္တနော ခေတ္တံ ဩလောကနတ္ထာယ ဂတော ဣတောဝိတော ဩလောကေန္တော ဣဋ္ဌကရာသိံ ဒိသွာ စိန္တေသိ၊ ဟီယော ရာဇာ ဣဋ္ဌကံ ကထံ လဘိဿာမီတိ ကထေသိ။ မဟန္တံ ဝတ ပဏ္ဏာကာရံ မယာ လဒ္ဓန္တိ တုဋ္ဌော ဒေဝ္ैဋ္ဌကာနိ ကာဇေန ဂဟေတွာ ရညော ဒဿနတ္ထာယ ဂန္တွာ ရာဇဒွါရေ ဌတွာ သာသနံ ပဟိဏိ။ တံ ပက္ကောသာပေတွာ ကသ္မာ ပါတော’ဝ အာဂတောသီ’တိ ပုစ္ဆိ။ ဒေဝ မယှံ ခေတ္တေ ဣဋ္ဌကရာသိံ ဒိသွာ ပါတော’ဝ ဣဋ္ဌကာနိ ဂဟေတွာ အာဂတောမှီ’တိ။ ဤဒိသာနိ ဣဋ္ဌကာနိ စေတိယဿ အနုစ္ဆဝိကာနီတိ ဒဿေသိ။ ရာဇာ ပဿိတွာ သောမနဿပ္ပတ္တော ဗြာဟ္မဏဿ ဗဟုံ ဓနံ ဒါပေသိ။

တသ္မိံ ¶ ခဏေ အညံ သာသနံ အာဟရိ။ မဒနပဋ္ဋနဒွါရတော စတဿော ရဇတနာဝါ သုဝဏ္ဏဘုမိတော စတဿော သုဝဏ္ဏနာဝါ ဥက္ကမိံသူတိ ပဋ္ဋနမုခဒွါရေ ဝိဟရန္တော အာရက္ခက ဇေဋ္ဌကော ဓမ္မပါလော နာမ အာဂန္တွာ ရညော အာရောစေသိ။ ရာဇာ တုဋ္ဌော သုဝဏ္ဏရဇတေ အာဟရာပေသိ။

(ဣဋ္ဌကံ ရဇတဉ္စေဝ သုဝဏ္ဏဉ္စ မဟာရဟံ၊

အာဟရိတွာန တံ သဗ္ဗံ ကမ္မံ အာရဘိ စေတိယေ။

သတ္ထု ပုညာနုဘာဝေန ရညော ပုညဗလေန စ၊

စိန္တိတစိန္တိတံ သဗ္ဗံ ခဏေနေဝ သမိဇ္ဈတိ။)

တတော ရာဇာ စူဠပိဏ္ဍပါတိယတိဿတ္ထေရဿ သန္တိကံ ဂန္တွာ? အယျ ဣဋ္ဌကဘုမိံ ဂမိဿာမီတိ အာဟ။ ထေရော သုတွာ တုဋ္ဌော အတ္တနော ပရိဝါရေဟိ ပဉ္စသတဘိက္ခူဟိ သဒ္ဓိံ ဣဋ္ဌက ဘူမိံ ဂတော။ တတော မဟာသာဂလတ္ထေရော စ မဟိန္ဒတ္ထေရော စ အတ္တနော ပရိဝါရေဟိ ဘိက္ခုဟိ သဒ္ဓိံ ဣဋ္ဌကဘုမိံ ဂတာ။ သိဝ နဂရေ ရာဇာပိ ဣဋ္ဌကဘုမိံ ဂတော။ လောဏနဂရေ နာဂရာဇာပိ ဣဋ္ဌကဘုမိံ ဂတော။ သောမနဂရေ ဂိရိအဘယရာဇာပိ အတ္တနော သေနင်္ဂေဟိ ပရိဝါရေတွာ ဣဋ္ဌကဘုမိံ ဂတော။ တေသံ သမဏ ဗြာဟ္မဏာနံ ရာဇဗဠာနဉ္စ သမ္ပိဏ္ဍိတတ္တာ သော ပိဋ္ဌိပါသာဏော ဗလဝါဟနော နာမ ဇာတော။ တေ သဗ္ဗေ ဣဋ္ဌကဘုမိံ သမောသရိံသု။ ထေရော ဣဋ္ဌကရာသိံ ဩလောကေတွာ ရာဇာနံ ဧဝမာဟ? မဟာရာဇ၊ အယံ ဣဋ္ဌကရာသိ စေတိယေ သဗ္ဗကမ္မတ္ထာယ ပဟောတီ’တိ။ ရာဇာ အတ္တမနော သေနင်္ဂပရိဝုတော သယမေဝ ပဌမံ ဣဋ္ဌကံ ဂဏှိ။ တံ ဒိသွာ သေသရာဇာနော စ အမစ္စာဒယော စ ပရိသာ စ သဗ္ဗေ ဘိက္ခု စ ဣဋ္ဌကာနိ ဂဏှိံသု တသ္မိံ ကာလေ ဘာရံ ဥက္ခိပိတွာ ဂမနံ ပပဉ္စံ ဘဝိဿတီ’တိ ရာဇာ စိန္တေသိ။ ထေရော တဿ စိတ္တံ ဇာနိတွာ ဧဝမာဟ? မာ စိန္တယိတ္ထ မဟာရာဇ၊ ဣဋ္ဌကာနိ ဂဟေတွာ ဂစ္ဆ။ ပစ္ဆာ ဒေဝနာဂါဒယော ဣဋ္ဌကဘုမိတော ပဋ္ဌာယ ယာဝ စေတိယဋ္ဌာနံ နိရန္တရာ ဌိတာ အာဟရိဿန္တီ’တိ။ တေ အာဟရိတွာ စေတိယဋ္ဌာနေ ရာသိံ ကရောန္တိ။ တေနေဝ ¶ နီယာမေန ယာဝ စေတိယဿ နိဋ္ဌင်္ဂမာ တာဝ ဒေဝနာဂသုပဏ္ဏာဒယော နိရန္တရံ ဌတွာ ဣဋ္ဌကာနိ အာဟရိတွာ စေတိယကရဏဋ္ဌာနေဝ စတုသု ဒိသာသု ရာသိံ အကံသု။

တတော ရာဇာ သဗ္ဗေ ဣဋ္ဌကဝဍ္ဎကီ ရာသိံ ကာရာပေတွာ တေသံ ဝဍ္ဎကီနံ အန္တရေ ဇယသေနံ နာမ ဣဋ္ဌကဝဍ္ဎကိံ ပရိဂဏှိတွာ တဿ ပန သတသဟဿဂ္ဃနကာနိ ဒွေ သာဋကာနိ ကဟာပဏသတသဟဿာနိ စ သုဝဏ္ဏကုဏ္ဍလာဒယော အာဘရဏာနိ စ ဒါပေသိ။ တဿ ပရိဝါရာနံ ဝဍ္ဎကီနံ အဟတဝတ္ထာဒီနိ သဗ္ဗုပကရဏာနိ ဒါပေသိ။ အနေကဝိဓံ မဟန္တံ သမ္မာနံ ကာရေတွာ ထေရေန သဒ္ဓိံ မန္တေန္တော၊ အယျ အဇ္ဇ ဝိသာခပုဏ္ဏမီ ဥပေါသထဒိဝသော၊ တသ္မာ နလာဋဓာတုယာ မင်္ဂလံ ကရိတွာ စေတိယဋ္ဌာနေ ဣဋ္ဌကံ ပတိဋ္ဌာပေတုံ ဝဋ္ဋတီ’တိ အာဟ။ တံ သုတွာ ထေရော၊ ဘဒ္ဒကံ မဟာရာဇ၊ ဗုဒ္ဓဿ ဘဂဝတော ဇာတဒိဝသော’တိ ဝတွာ စေတိယကမ္မကရဏတ္ထာယ ပဉ္စ ဇနေ ဂဏှိ။ တေသု ဧကော ဝရဒေဝေါ နာမ၊ ဧကော သင်္ခေါ နာမ၊ ဧကော ဝိဇ္ဇော နာမ၊ ဧကော ပုဿဒေဝေါ နာမ၊ ဧကော မဟာဒေဝေါ နာမ။ ဣမေသံ ဝဍ္ဎကီနံ မင်္ဂလံ ကာရာပေတွာ ဆဏဝေသံ ဂဟေတွာ သဗ္ဗာလင်္ကာရေန အလင်္ကာရာပေတွာ ရာဇာ သယမ္ပိ သဗ္ဗာလင်္ကာရေန ပတိမဏ္ဍိတော မင်္ဂလဝိဓာနံ ကာရာပေတွာ ဘိက္ခုသင်္ဃံ ဂန္ဓမာလာဒီဟိ ပူဇေတွာ တိက္ခတ္တုံ ပဒက္ခိဏံ ကတွာ စတုသု ဌာနေသု ပဉ္စပတိဋ္ဌိတေန ဝန္ဒိတွာ ဝိဇမှေတွာ သုဝဏ္ဏဃဋ္ဌာနံ ပဝိသိတွာ သုဝဏ္ဏခစိတံ မဏိမုတ္တာရတနမယံ ပရိဗ္ဘမနဒဏ္ဍံ ဇီဝမာနကမာတာပိတရေန ဥဘတောသုမဏ္ဍိတပသာဓိတေန အဘိမင်္ဂလသမ္မတေန အမစ္စပုတ္တေန ဂါဟာပေတွာ မဟန္တံ စေတိယံ တတ္ထ ကရောန္တော သယမ္ပိ ပရိဗ္ဘမနဒဏ္ဍံ ဂဟေတွာ ပရိကမ္မကတဘုမိယံ ပရိဗ္ဘမိတွာ ဧကမန္တံ အဋ္ဌာသိ။ တတော မဟာဝဍ္ဎကီ သုနက္ခတ္တေန သုမုဟုတ္တေန စေတိယဋ္ဌာနေ ဣဋ္ဌကံ ပတိဋ္ဌာပေသိ။

တသ္မိံ ¶ ခဏေ စတုနဟုတာဓိက ဒွိယောဇန သတသဟဿဗဟုလာ အယံ မဟာပထဝီ သာဓုကာရံ ပဝတ္တေန္တီ ဝိယ မဟာနာဒံ ပဝတ္တေသိ။ ဒေဝမနုဿာ ဒိဝသေ ဒိဝသေ ပဟောနက-မတ္တိကံ နိသဒေန ပိံသိတွာ သုပ္ပေဟိ ပပ္ဖောဌေတွာ ဒေန္တိ။ ဧဝံ ကရောန္တော ကတိပယေနေဝ ဒိဝသေန ပုပ္ဖာဓာနတ္တယံ စိနိတွာ မဟာဘိက္ခု သင်္ဃဿ နိဝေဒေသိ။ တံ သုတွာ သင်္ဃော စုန္ဒုတ္တရနာမကေ ဒွေ သာမဏေရေ အာဏာပေသိ? တုမှေ ဟိမဝန္တံ ဂန္တွာ မေဒဝဏ္ဏပါသာဏေ အာဟရထာ’တိ။ တေ ပန သာမဏေရာ ဇာတိယာ သောဠသဝဿိကာ ဆဠဘိညာပ္ပဘေဒေန ပဋိသမ္ဘိဒပ္ပတ္တာ။ မဟာခီဏာသဝဘိက္ခုသင်္ဃဿ သန္တိကာ ဘိက္ခုသင်္ဃဿ ဝစနံ သမ္ပဋိစ္ဆိတွာ အာကာသံ အဗ္ဘုဂ္ဂန္တွာ ဟိမဝန္တတော အတ္တနော ဣဒ္ဓိဗလေန မေဒဝဏ္ဏပါသာဏေ အာဟရိံသု။ ဧတေသု ဧကံ ပါသာဏံ ဓာတုဂဗ္ဘဿ ဘုမိယံ ပတ္ထရိတွာ စတုသု ပဿေသု စတ္တာရော ပါသာဏေ ပတိဋ္ဌာပေတွာ အပရံ ဓာတုဂဗ္ဘံ ပိဒဟိတုံ အဒဿနံ ကတွာ ဌပယိံသု။

တဒါ ရာဇာ ဓာတုဂဗ္ဘေ ကမ္မံ နိဋ္ဌပေန္တော နဝ ကောဋိပ္ပမာဏံ သုဝဏ္ဏံ အာဟရာပေတွာ သုဝဏ္ဏကာရာနံ ဒတွာ ဓာတုဂဗ္ဘဿ ဣဋ္ဌကာနိ ကရောထာ’တိ အာဏာပေသိ။ တေ သုဝဏ္ဏကာရာ ဒီဃတော ရတနပ္ပမာဏံ ပုထုလတော ဝိဒတ္ထီပ္ပမာဏံ ဗဟလတော စတုရင်္ဂုလပ္ပမာဏံ ဣဋ္ဌကံ ကတွာ ဓာတုဂဗ္ဘံ စိနိံသု။ တံ ပန ဓာတုဂဗ္ဘံ ဥစ္စတော သောဠသဟတ္ထံ ဝိတ္ထာရတောပိ ဣတောစိတော ဒသဒသရတနံ ကတွာ သုဝဏ္ဏိဋ္ဌကေဟေဝ နိဋ္ဌပေတွာ ဓာတုဂဗ္ဘဿ မဇ္ဈေ သတ္တရတနမယံ သိနေရုံ ကာရာပေတွာ သိနေရုဿ ဥပရိ ဇာတိဟိင်္ဂုလကေန ပဏ္ဍုကမ္ဗလသိလာသနံ သတ္တရတနေန ပါရိစ္ဆတ္တကရုက္ခံ ရဇတမယံ သေတစ္ဆတ္တံ ဗြဟ္မုနာ ဂါဟာပေတွာ သတ္ထုနော ပဋိမာယ ဥပရိ ဓာရိယမာနံ ကာရေသိ။ သိနေရုပါဒမူလေ ဂန္ဓကလလပူရိတ နီလုပ္ပလဝိဘုသိတသုဝဏ္ဏမယအဋ္ဌုတ္တရသတဃဋပန္တိယော ဌပါပေသိ။ တဒနန္တရံ ဂန္ဓကလလပူရိတရတ္နပဒုမဝိဘုသိတရဇတမယအဋ္ဌုတ္တရ- ¶ သတဃဋပန္တိယော ဌပါပေသိ။ တဒနန္တရံ ဂန္ဓကလလပူရိတ သေတုပ္ပလမာလာဝိဘုသိတမဏိမယအဋ္ဌုတ္တရသတဃဋပတ္တိယော ဌပါပေသိ။ တဒနန္တရံ ဂန္ဓကလလပူရိတသေတုပ္ပလဝိဘုသိတ-မသာရဂလ္လမယ အဋ္ဌုတ္တရသတဃဋပန္တိယော ဌပါပေသိ။ တဒနန္တရံ ဂန္ဓကလလပူရိတစမ္ပကပုပ္ဖဝိဘုသိတလောဟိတင်္ကမယအဋ္ဌုတ္တရသတ ဃဋပတ္တိယော ဌပါပေသိ။ တဒနန္တရံ ဂန္ဓကလလပူရိတပဉ္စုပ္ပလဝိဘုသိတမတ္တိကာမယအဋ္ဌုတ္တရသတဃဋပန္တိယော ဌပါပေသိ။ တာသံ ဃဋပန္တီနံ အန္တရေ ဂန္ဓကလလပူရိတသတ္တရတနမယသရာဝကေ ဌပါပေသိ။ ကဉ္စနမယ-သတ္တရတနမယ-ဝိစိတ္တမာလာလတာပုဏ္ဏဃဋသိရိဝစ္ဆနန္ဒိယာဝဋ္ဋဘဒ္ဒပီဌာဒယော စ ဟတ္ထိအဿသီဟဝျဂ္ဃောသဘပန္တိအာဒယော စ ကာရေသိ။ ဒေဝေါရောဟဏံ ယမကပါဋိဟီရာဒယော ဓနပါလ-အင်္ဂုလိမာလ-အာဠဝကဒမနာဒယော၊ သာရိပုတ္တ-မောဂ္ဂလ္လာန-မဟာကဿပတ္ထေရာဒယော၊ အသီတိမဟာသာဝကရူပါဒီနိ စ ကာရာပေသိ။ သိနေရုဿ မဇ္ဈိမဘာဂေ တာရာဂဏပရိဝါရိတံ ရဇတမယံ စန္ဒမဏ္ဍလဉ္စ ကာရာပေသိ။ ရံသိဇာလဝိဘုသိတံ ကနကမယံ သူရိယမဏ္ဍလဉ္စ ကာရာပေသိ။

တတော သိနေရုဿ မတ္ထကေ ပါရိစ္ဆတ္တကမုလေ ပဏ္ဍုကမ္ဗလသိလာသနေ အမှာကံ သတ္ထုနော ပဋိမံ ဃနကောဋ္ဋိမ ရတ္တသုဝဏ္ဏမယံ ကာရာပေတွာ မာတုဒေဝပါမောက္ခ ဒသသဟဿ စက္ကဝါဠဒေဝတာနံ သတ္တပ္ပကရဏံ အဘိဓမ္မံ ဒေသနာကာရေန နိသီဒါပေသိ။ တဿ ဝီသတိနခါ အက္ခိတလာနံ သေတဋ္ဌာနာနိ ဇာတိဖလိကမယာနိ။ အင်္ဂုလိယော သုဝဏ္ဏမယာ ဟတ္ထပါဒတလာနိ စ ဒန္တာဝရဏာနိ စ အက္ခီနံ ရတ္တဋ္ဌာနာနိ စ ဇာတိပဝါဠမယာနိ၊ ကေသမဿုဘမုကဋ္ဌာနာနိ ဣန္ဒနီလမယာနိ၊ သမစတ္တာလီသ ဒန္တာ ဝဇိရမယာ အဟေသုံ။ ဥဏ္ဏလောမံ ပန သုဝဏ္ဏ ဘိတ္တိယံ ဌပိတရဇတဗုဗ္ဗုဠဝိလာသံ ရဇတမယံ အဟောသိ။ ဘဂဝတော အနဝလောကိတ မုဒ္ဓနိ မတ္ထကေ သတ္တရတနမယံ ဝိစိတ္တကိံကိဏိဇာလံ ပရိက္ခိပါပေသိ။ မဏ္ဍပဿ အန္တော နဝသတသဟဿဂ္ဃနကံ မုတ္တာကလာပမောလမ္ဗကံ မနောရမံ စေလဝိတာနံ ဗန္ဓာပေတွာ မဏ္ဍပကောဋိယံ မုတ္တာဇာလံ တဒနန္တရံ သတ္တ ရတနဝိစိတ္တံ ကိံကိဏိဇာလံ ပရိက္ခိပါပေသိ။

အမှာကံ ¶ ဘဂဝတော မာတုဒေဝပုတ္တမ္ပိ သတ္တရတနေန ကာရာပေသိ။ တထာ ဧရာဝဏဝိဿကမ္မဒေဝပုတ္တာဒယော စ သပရိဝါရော သက္ကော ဒေဝရာဇာ စ စတ္တာရော မဟာရာဇာနော စ ပဉ္စသိခဒေဝပုတ္တာဒယော ဂန္ဓဗ္ဗဒေဝပုတ္တာ စ သဟမ္ပတိ မဟာ ဗြဟ္မာဒယော မဟာဗြဟ္မနော စ ကာရာပေသိ။ ဝေဿန္တရဇာတကံ ကရောန္တော သံဇယမဟာရာဇာ ဖုသတီဒေဝီ အာဒယော စ မဒ္ဒီဒေဝီ ဒွေ ဒါရကေ စ ဇူဇကဗြာဟ္မဏာဒယော စ ကာရာပေသိ။ ဝိဓုရ-သောဏဒတ္တ မဟာနာရဒကဿပ-သုတသောမ-သုပ္ပာရက-သင်္ခပါလဇာတကာဒီနိ စ၊ ဓမ္မစက္ကပ္ပဝတ္တန-မဟာသမယသုတ္တာဒိ ဒေသနာကာရော စ၊ သုဒ္ဓါဒနမဟာရာဇာ မဟာမာယာ မဟာပဇာပတီ ဂေါတမီ ဘဒ္ဒကစ္စာနာ ရာဟုလမာတာဒေဝီ စ ရာဟုလကုမာရော စ ဆန္နဉ္စ ကန္ထကဉ္စ မဟာဘိနိက္ခမနံ မဟာဗောဓိမဏ္ဍလံ အသီတိမဟာသာဝကာ ကောသလမဟာရာဇာ အနာထပိဏ္ဍိကမဟာသေဋ္ဌိ စူဠအနာထပိဏ္ဍိက-ဝိသာခါ သုပ္ပဝါသာ စ ပစ္ဆာ စူဠပိဏ္ဍပါတိယ တိဿတ္ထေရဉ္စ အတ္တာနဉ္စ ကာရာပေတွာ တေ သဗ္ဗေ ဓာတု ဂဗ္ဘေ ပတိဋ္ဌာပေသိ။

ဓာတုဂဗ္ဘဝဏ္ဏဏာ သမတ္တာ။

ဧဝံ ဓာတုဂဗ္ဘေ ပူဇာဝိဓာနံ သုဝိဘတ္တံ သုမနောရမံ ကာရာပေတွာ ထေရေန သဒ္ဓိံ ကထေသိ? ဘန္တေ ဓာတုဂဗ္ဘေ မယာ ကတ္တဗ္ဗံ နိဋ္ဌာပိတံ။ သွေ ရောဟိဏီနက္ခတ္တေန ဓာတု နိဓာနံ ကရိဿာမီ။ အယျာ ပန ကေသဓာတုယော ဂဟေတွာ အာဂစ္ဆန္တုတိ။ တိဿတ္ထေရဿ ဘာရမကာသိ။ ထေရော တံ သုတွာ ဘဒ္ဒကံ မဟာရာဇ၊ ကေသဓာတုယော ဝိစိနိတွာ အာဟရာပေဿာမာတိ ဝတွာ အတ္တနော သဒ္ဓိဝိဟာရိကံ သိဝတ္ထေရံ ပက္ကောသာပေတွာ အာဝုသော ဘူမိန္ဓရနာဂဝိမာနေ ဇယသေနော နာမ နာဂရာဇာ ဝသတိ။ တဿ သန္တိကေ (ကေသဓာတုယော သန္တိ။) တပုဿ ဘလ္လိကာနံ ဒွေဘာတိကဝါဏိဇာနံ ပရိစရဏကာလေ တေသံ ပမာဒံ ဉတွာ နာဂရာဇာ ဒွေ ကေသဓာတုယော ဂဟေတွာ နာဂဘဝနေ ဌပေသိ။ တွံ တာ ဓာတုယော အာဟရိတွာ ရညော ဒေဟီတိ အာဏာပေသိ။ ထေရော တံ ဝစနံ သမ္ပဋိစ္ဆိတွာ ဂတော။

တတော ရာဇာ အတ္တနော ဘဂိနိယာ သောမဒေဝိယာ စ ဘာဂိနေယျဿ ဂိရိအဘယရညော စ သာသနံ ပေသေသိ? သွေ ဓာတုနိဓာနံကရိဿာမ။ တုမှေ သေနင်္ဂံ ဂဟေတွာ အာဂစ္ဆထာ’တိ။ လောဏနဂရေ ¶ မဟာနာဂရညော စ သေရု နဂရေ သိဝရညော စ တထေဝ သာသနံ ပေသေတွာ သယမ္ပိ အတ္တနော ဝိဇိတေ ယေန မယှံ ဟတ္ထတော အန္တမသော ဧကကရီသမတ္တမ္ပိ လဒ္ဓံ တဒုပါဒါယ သဗ္ဗေပိ တုမှေ သဒ္ဓိံ ပရိဝါရေန အာဂစ္ဆထာ’တိ ဘေရိံ စရာပေသိ။ တံ သုတွာ သောမနဿပ္ပတ္တာ မဟာဇနာ အတ္တနော အတ္တနော ဝိဘဝါနုရူပေန အလင်္ကတပဋိယတ္တာ အဂမိံသု။ ရာဇာ ပဘာတာယ ရတ္တိယာ သဗ္ဗေ သေနိယော ဂန္ဓမာလာဓူပဓဇာဒယော ဂဟေတွာ ဓာတုနိဓာနံ အာဂစ္ဆန္တုတိ ဝတွာ ဘိက္ခုသင်္ဃဿ မဟာဒါနံ ဒတွာ တိဝီဝရတ္ထာယ မဟဂ္ဃဝတ္ထာဒီနိ ဒတွာ သယမ္ပိ သဗ္ဗာလင်္ကာရပတိမဏ္ဍိတော နာနဂ္ဂရသဘောဇနံ ဘုဉ္ဇိတွာ ဥပေါသထံ အဓိဋ္ဌာယ မဏိကုဏ္ဍလမေခလာနူပုရ ဝလယာဒိဝိစိတ္တသဗ္ဗာလင်္ကာရဝိဘူသိတာဟိ ကောသေယျာဒိသုခုမနာနာဝိဓဝိစိတ္တဝတ္ထနိဝတ္ထာဟိ နစ္စဂီတဝါဒိတတုရိယဘဏ္ဍဂဟိတ ဟတ္ထာဟိ ဒေဝစ္ဆရာပဋိဘာဂနာဋကိတ္ထီဟိ ပရိဝါရိတော ဝုတ္တပ္ပကာရေဟိ သဒ္ဓိံ စေတိယဋ္ဌာနံ ဂန္တွာ မဟာဘိက္ခုသင်္ဃံ ဝန္ဒိတွာ အဋ္ဌာသိ။

တတော သောမနဂရေ ဂိရိအဘယရာဇာ’ပိ သဗ္ဗေ နာဂရာ အတ္တနော အတ္တနော ဝိဘဝါနုရူပေန ဓာတုနိဓာနဋ္ဌာနံ အာဂစ္ဆန္တုတိ နဂရေ ဘေရိံ စရာပေတွာ သယံ သဗ္ဗာလင်္ကာရပတိမဏ္ဍိတော သုသဇ္ဇိတအမစ္စဂဏပရိဝါရိတော နိက္ခမိ။ သောမ ဒေဝီပိ သီသံ နဟာတွာ အဟတဝတ္ထနိဝတ္ထာ သဗ္ဗာလင်္ကာရပတိမဏ္ဍိတာ ဒေဝစ္ဆရာ ဝိယ အတ္တနော ပရိဝါရာ ပဉ္စသတကုမာရိယော နီလဝတ္ထေဟိ ပရိဒဟာပေတွာ တထေဝ အလင်္ကာရေတွာ ပုဏ္ဏဃဋေ ဂါဟာပေတွာ တာသံ အနန္တရာ ပဉ္စသတကုမာရိယော ပီတဝတ္ထေဟိ ပရိဒဟာပေတွာ တထေဝ အလင်္ကာရေတွာ ပူဇာဘဏ္ဍာနိ ဂါဟာပေတွာ၊ တာသံ အနန္တရာ ပဉ္စသတ ကုမာရိယော ရတ္တဝတ္ထေဟိ ပရိဒဟာပေတွာ တထေဝ။ အလင်္ကာရေတွာ ဝိစိတြပုပ္ဖပူရိတမဉ္ဇုသာယော ဂါဟာပေတွာ တာသံ အနန္တရာ ပဉ္စသတကုမာရိယော သေတဝတ္ထေဟိ ပရိဒဟာပေတွာ တထေဝ အလင်္ကာရေတွာ ဓူမ ကဋစ္ဆုကေ ဂါဟာပေတွာ ဧဝံ ပူဇာဝိဓာနံ သံဝိဒဟိတွာ ပရိဝါရေန ¶ စေတိင်္ဂဏံ ဂန္တွာ မဟာဘိက္ခုသင်္ဃံ ပဉ္စပတိဋ္ဌိတေန ဝန္ဒိတွာ ဂန္ဓမာလာဒီဟိ ပူဇံ ကတွာ အတ္တနော သာမိနာ ဂိရိအဘယရာဇေန သဒ္ဓိံ ဧကပဿေ ဌီတာ။

လောဏနဂရေ မဟာနာဂရာဇာ’ပိ သဗ္ဗာလင်္ကာရေဟိ ပတိမဏ္ဍိတော သဗ္ဗာဘရဏေဟိ သုသဇ္ဇီတအမစ္စမဏ္ဍလပရိဝုတော နစ္စဂီတတုရီယာနိ ပဂ္ဂဏှာပယမာနော ဂန္ဓမာလာ ဓူမကဋစ္ဆု ဂါဟာပေတွာ စေတိယဋ္ဌာနံ အာဂန္တွာ ဘိက္ခုသင်္ဃံ ဝန္ဒိတွာ ဧကမန္တံ အဋ္ဌာသိ။

သေရုနဂရေ သိဝရာဇာ’ပိ အတ္တာနံ သဗ္ဗာလင်္ကာရေဟိ အလင်္ကရိတွာ မဟန္တေန ပရိဝါရေန ပူဇာဝိဓာနံ ဂါဟာပေတွာ စေတိယဋ္ဌာနံ အာဂန္တွာ မဟာဘိက္ခုသင်္ဃံ ဝန္ဒိတွာ ဧကမန္တံ အဋ္ဌာသိ။ ရာဇပရိသာ အတ္တနော ဝိဘဝါနုရူပေန ဝတ္ထာလင်္ကာရေဟိ စန္ဒန မာလာဒီဟိ စ သောဘမာနာ နလာဋေ မုတ္တာကလာပမောလမ္ဗက ဝိစိတ္တသုဝဏ္ဏပဋ္ဋာနိ ဗန္ဓိတွာ ဟတ္ထာဘရဏာဒိ အနေကာဘရဏေဟိ ဒိဗ္ဗပရိသာ ဝိယ သုမဏ္ဍိတပသာဓိတာ ဝေသာနုရူပါနိ ဝိဝိဓာဝုဓာနိ ဂဟေတွာ ဧကပဿေ ဌီတာ။ သီဟဝျဂ္ဃဒီပိစမ္မေဟိ ပသာဓိတသုဝဏ္ဏာလင်္ကာရသုဝဏ္ဏဓဇဟေမဇာလသဉ္ဆန္နေ ရထ ဝရေ စ သဗ္ဗာလင်္ကာရဝိဘုသိတာ ရထိကာ အာရုယှ ဧကပဿေ ဌီတာ။ ဗြာဟ္မဏပုတ္တာဒယော မဏ္ဍိတစမ္မေ ပါရုပိတွာ ဥပသောဘယမာနာ ဧကပဿေ ဌီတာ။ ဗဟု အမစ္စာ အတ္တနော အတ္တနော ဝေသာနုရူပေန မဟဂ္ဃဝတ္ထာဘရဏဝိဘူသိတာ သပရိဝါရာ ဧကပဿေ ဌီတာ။ ဂန္ဓောဒက ပူရိတ ဒက္ခိဏာဝတ္တ သင်္ခံ ဂဟေတွာ ဥပဝီတသုတ္တံ ဧကံသံ ကရိတွာ ဗြာဟ္မဏဝေဌနံ ဝေဌေတွာ ပုရောဟိတဗြာဟ္မဏာ မဟန္တေန ပရိဝါရေန ပူဇာဝိဓာနံ ဂါဟာပေတွာ စေတိယဋ္ဌာနံ အာဂန္တွာ မဟာဘိက္ခုသင်္ဃံ ဝန္ဒိတွာ ဇယဃောသံ သာဝေန္တာ ဧဝမာဟံသု?

ခေမံ သုဘိက္ခံ ဘဝတု နိစ္စံ ဇနပဒံ သိဝံ၊

သဿာနိ သမုပ္ပဇ္ဇန္တု ရညော ဧဝံ ဇယာ သိယုံ။

အဝသေသာ မဟာဇနာ ဧဝမာဟံသု? သမုဒ္ဒပရိယန္တံ ¶ ဟိ မဟိံ သာဂရကုဏ္ဍလံ ဝသုန္ဓရံ အာဝသတု အမစ္စပရိဝါရိတော။ ဧဝံ ဝတွာ? အမှာကံ အယျော ကာကဝဏ္ဏတိဿော မဟာ ရာဇာ သဒေဝကေ လောကေ ဧကပုဂ္ဂလဿ လောကနာထဿနလာဋဓာတုံ ပတိဋ္ဌာပေတီ’တိ အတ္တနော အတ္တနော ဝိဘဝါနုရူပေန သုမဏ္ဍိတပသာဓိတာ။ ခုဇ္ဇဝါမနကာဒယော’ပိ သဗ္ဗေ ဇနာ ပူဇာဘဏ္ဍာနိ ဂဟေတွာ သာဓုကာရံ ဒဒမာနာ အဋ္ဌံသု။ ဣမသ္မိံ စေတိယဋ္ဌာနေ ရာသီဘူတာ ပရိသာ ဧဝံ ဝေဒိတဗ္ဗာ? ခတ္တိယာ ဗြာဟ္မဏာ ဝေဿာ နေဂမာ စ သမာဂတာ ပုပ္ဖာဒိဂဟိတာ သဗ္ဗေ အလင်္ကာရဝိဘူသိတာ။

ဂဏနာ ဝီတိဝတ္တာ တေ အနေကေ စ မဟာဇနာ၊

သမုဒ္ဒေါ ပတ္ထရန္တောဝ ခတ္တိယာ သမုပါဂတာ။

အလင်္ကတော မဟာရာဇာ သရာဇပရိဝါရိတော၊

ဒေဝရာဇာ ယထာ သက္ကော အဋ္ဌာသိ စေတိယင်္ဂဏေ။

သာဓုဝါဒေန သတ္တာနံ ပဉ္စင်္ဂတုရိယေဟိ စ၊

ဟတ္ထဿရထသဒ္ဒေန သမာကိဏ္ဏံ မဟီတလံ။

တတော စူဠပိဏ္ဍပါတိယတိဿတ္ထေရော အတ္တနော သဒ္ဓိဝိဟာရီကေ ပဉ္စသတ ခီဏာသဝေ ပရိဝါရေတွာ စေတိယဋ္ဌာနမေဝ အာဂတော။ မဟာသာဂလတ္ထေရော’ပိ ပဉ္စသတ ခီဏာသဝေ ပရိဝါရေတွာ စေတိယဋ္ဌာနမေဝ အာဂတော။ မဟိန္ဒတ္ထေရော’ပိ အတ္တနော သာဝကေ သဋ္ဌိမတ္တေ ခိဏာသဝေ ဂဟေတွာ စေတိယဋ္ဌာနမေဝ အာဂတော။ ဣတိ ဣမိနာ နိယာမေနေဝ ဧကော ဒွေ တယော စတ္တာရော ပဉ္စ ခီဏာသဝါ အာဂစ္ဆန္တာ သတ္တ သဟဿမတ္တာ အဟေသုံ။ တတော စူဠပိဏ္ဍပါတိယတိဿတ္ထေရော ဧတ္တကေ ဘိက္ခူ ပရိဝါရေတွာ စေတိယင်္ဂဏေ နိသီဒီ။ တတော ရာဇာ အာဂန္တွာ ပဉ္စပတိဋ္ဌိတေန ဝန္ဒိတွာ ထေရေန သဒ္ဓိံ ကထေသိ? ¶ ကေသဓာတု ကုတော လဘိဿာမ အယျာ’တိ။ တသ္မိံ ခဏေ တိဿတ္ထေရော အတ္တနော သဒ္ဓိဝိဟာရိကံ သိဝတ္ထေရံ ဩလောကေသိ။ သော ဩလောကိတက္ခဏေယေဝ နိသိန္နဋ္ဌာနတော ဥဋ္ဌာယ စီဝရံ ပါရုပိတွာ မဟာဘိက္ခုသင်္ဃံ ဝန္ဒိတွာ ဆဠဘိညော မဟာခီဏာသဝေါ စတုတ္ထဇ္ဈာနံ သမာပဇ္ဇိတွာ တတော ဝုဋ္ဌာယ ပထဝိယံ နိမုဇ္ဇိတွာ ဘုမိန္ဓရနာဂဝိမာနေ ပါတုရဟောသိ။

(သုတွာဿ သိဝထေရော စ ဝသိပ္ပတ္တော ဝိသာရဒေါ၊

ပါကဋော အဘဝိ နာဂနဂရံ ပုရတော ခဏေ။)

တသ္မိံ ခေါ ပန သမယေ ဇယသေနော နာဂရာဇာ အတ္တနော ဘာဂိနေယျံ ဒွိကောဋိမတ္တေ နာဂေ ပရိဝါရေတွာ မဟာ ယသံ အနုဘဝမာနံ နိသိန္နံ ဣင်္ဂိတသညံ ဒတွာ ထေရံ ဒုရတောဝ အာဂစ္ဆန္တံ ဒိသွာ စိန္တေသိ? ဣမသ္မိံ နာဂဘဝနေ သမဏေဟိ ကတ္တဗ္ဗကိစ္စံ နတ္ထီ။ နိဿံသယံ ကေသဓာတုံ နိဿာယ အာဂတော ဘဝိဿတီတိ ဥဋ္ဌာယ ဓာတုဃရံ ပဝိသိတွာ ဓာတုကရဏ္ဍကံ ဂိလိတွာ ကိဉ္စိ အဇာနန္တော ဝိယ နိသီဒိ။ တသ္မိံ ကာလေ ထေရော တဿ သန္တိကံ အဂမာသိ။ နာဂရာဇာ ပစ္စုဂ္ဂန္တွာ ပဋိသန္ထာရံ ကရောန္တော ထေရေန သဒ္ဓိံ ကထေသိ။ ကသ္မာ အယျော အာဂတော’တိ ဝုတ္တေ ဧဝမာဟ? တိလောကနာထဿ အမှာကံ သမ္ဗုဒ္ဓဿ ကေသဓာတူနံ အတ္ထာယ အာဂတော၊ တုယှံ သန္တိကေ ဌပိတကေသဓာတုယော ပပဉ္စံ အကတွာ မယှံ ဒေဟိ၊ တေယေဝ သန္ဓာယ ဥပဇ္ဈာယေန ပေသိတောမှီ’တိ ဝုတ္တေ အမှာကံ သမ္မာ သမ္ဗုဒ္ဓဿ ကေသဓာတုယော မမ သန္တိကေ နတ္ထီ’တိ အာဟ။ ထေရော ဓာတုကရဏ္ဍကံ ဂိလိတဘာဝံ ဉတွာ ဂဏှာမိ မဟာရာဇာ ကေသဓာတုယော’တိ ဝုတ္တေ အာမ ပဿန္တော ဂဟေတွာ ဂစ္ဆာဟီတိ အာဟ။ ဧဝံ တယော ဝါရေ ပဋိညံ ဂဟေတွာ တထေဝ ဌီတော?

ဣဒ္ဓိယာ မာပယိတွာန တတော သော သုခုမံ ကရံ၊

ပဝေသေတွာ မုခေ တဿ ဂဏှီ ဓာတုကရဏ္ဍကံ၊

နာဂါလယာဘိနိက္ခမိ တိဋ္ဌ နာဂါ’တိ ဘာသိယ။

တသ္မိံ ¶ ခဏေ ဇယသေနော နာဂရာဇာ သမဏံ ဝဉ္စေတွာ ပေသိတောမှီ’တိ ဝတွာ တဿ ဂတကာလေ ဓာတုကရဏ္ဍကံ ဩလောကေတွာ ဓာတု အပဿိတွာ သမဏေန နာသိတောမှီ’တိ ဒွေ ဟတ္ထေ ဥက္ခိပိတွာ ဌပေတွာ အတ္တနော သကလနာဂဘဝနံ ဧက ကောလာဟလံ ကတွာ မဟန္တေန သဒ္ဒေန ပရိဒေဝန္တော? အမှာကံ စက္ခုနိ ဥပ္ပာဋေတွာ ဂတော ဝိယ သဒေဝကဿ လောကဿ ပတိဋ္ဌာနဘူတဿ သမ္မာသမ္ဗုဒ္ဓဿ ကေသဓာတုယော အပါယဒုက္ခတော အမုဉ္စန္တာနံ အမှာကံ အဘိဘဝိတွာ ဓာတုယော ဂဟေတွာ ဂတသမဏံ အနုဗန္ဓိတွာ ဂဏှိဿာမာ’တိ ဒွေကောဋိမတ္တေ နာဂေ ဂဟေတွာ အတ္တနော ဘာဂိနေယျေန သဒ္ဓိံ တဿ ပိဋ္ဌိတော ပိဋ္ဌိတော အနုဗန္ဓိတွာ အာကာသံ ဥဂ္ဂစ္ဆိံ (သု)။ တသ္မိံ ခဏေ ပန သိဝတ္ထေရော အကာသတော ဩတရိတွာ ပထဝိယံ ပါဝိသိ။ ပုန တေပိ ပထဝိယံ ပဝိသိံသု။ ဧဝံ ထေရော တေဟိ သဒ္ဓိံ ဥမ္မုဇ္ဇ နိမုဇ္ဇံ ကရောန္တော ပါဋိဟာရိယံ ဒဿေတွာ သေရုနဂရဿ နာတိဒူရေ ပိဋ္ဌိပါသာဏေ ဥဂ္ဂဉ္ဇိ။ တတ္ထေဝ တေ သံဝေဇေတွာ စေတိယင်္ဂဏေ မဟာဘိက္ခုသင်္ဃဿ ပုရတော ပါကဋော အဟောသိ။ နာဂါ တံ ဂဟေတုံ အသက္ကောန္တာ မဟန္တေန သဒ္ဒေန ရဝံ ပတိရဝံ ဒတွာ။ ဣတော ပဋ္ဌာယ နဋ္ဌမှာ’တိ တသ္မိံ ပိဋ္ဌိ ပါသာဏေ သဗ္ဗေ သမာဂမံ ကတွာ မဟာသဒ္ဒေန ပရိဒေဝိံသု? နဋ္ဌမ္ဘာ ဝတ ဘော’တိ။ တတော ပဋ္ဌာယ သော ပိဋ္ဌိပါသာဏော နာဂါနံ ရဝံ ပတိရဝံ ဒတွာ ပရိဒေဝိတဟာဝေန နာဂဂလ္လံ နာမ အဟောသိ။

နာဂေါ ထေရဿ ပိဋ္ဌိတောယေဝ အနုဗန္ဓိတွာ စေတိယင်္ဂဏံ ဂန္တွာ ရာဇာနံ ဧဝမာဟ? ဒေဝ၊ ဧသော ဘိက္ခု မယာ အဒိန္နဓာတု ဂဟေတွာ အာဂတော’တိ။ တံ သုတွာ ရာဇာ? သစ္စံ ကိရ အယျ နာဂဿ ဝစနန္တိ ဝုတ္တေ နဟေဝ မဟာရာဇ၊ ဣမိနာ ဒိန္နံ ဧဝ ဓာတုံ အဂ္ဂဟေသိန္တိ ဝုတ္တေ? နာဂေါ တဝ သက္ခိံ ဒေဟီတိ အာဟ။ ထေရော တဿ ဘာဂိနျေံ သမဏုပ္ပလ နာဂရာဇာနံ သက္ခိံ အကာသိ။ ရာဇာ တဿ ဘာဂိနေယျဿ သဗ္ဗဝစနံ သုတွာ သဒ္ဒဟိ။ တသ္မိံ ကာလေ ဒုက္ခာဘိဘူတော နာဂရာဇာ ဂန္တွာ ဗဟိ ဌီတော။ တတော ပဋ္ဌာယ သော နာဂရာဇာ ¶ ဗဟိ ဟုတွာ နိသိန္နတ္တာ ဗဟိနာဂရာဇာ နာမ အဟောသိ။ တဿ ပန ဘာဂိနေယျံ အန္တော စေတိယင်္ဂဏေ နိသီဒါပေသိ။ ဣမဿ ပန စေတိယဿ အာရက္ခံ ဂဟိတနာဂါ ကထေတဗ္ဗာ။ သုမနနာဂရညော ပရိဝါရာ ဆကောဋိမတ္တာ နာဂါ၊ ဇယသေနဿ ပရိဝါရာ ကောဋိသတမတ္တာ နာဂါ၊ သမဏုပ္ပလနာဂရညော ပရိဝါရာ ဒွိကောဋိမတ္တာ နာဂါ အဟေသုံ။ သဗ္ဗေ ဓာတုယာ အာရက္ခံ ဂဏှိံသု။ ရာဇာ ထေရဿ ဟတ္ထတော ကေသဓာတုံ ဂဟေတွာ ရတနစငေဂါဋကေ ဌပေတွာ မဟိန္ဒဿ နာမ အမစ္စဿ အဒါသိ။ တသ္မိံ သမာဂမေ တိပိဋကမဟာဖုဿဒေဝတ္ထေရဿ သဒ္ဓိဝိဟာရိကာ ပဋိသမ္ဘိဒပ္ပတ္တာ စတ္တာရော သာမဏေရာ အဟေသုံ။ တေသု ဧကော မလယ ရာဇပုတ္တော သုမနသာမဏေရော နာမ၊ ဧကော သေရုနဂရေ သိဝရာဇဘာဂိနေယျဿ ပုတ္တော ဥတ္တရ သာမဏေရော နာမ။ ဧကော မဟာဂါမေ မာလာကာရပုတ္တော စုန္ဒ သာမဏေရော နာမ ဧကော မဟာဂါမေ ဧကဿ ကုဋုမ္ဗိကဿ ပုတ္တော မဟာကဿပသာမဏေရော နာမ၊ ဣမေ စတ္တာရော သာမဏေရာ အဇ္ဇ ကာကဝဏ္ဏတိဿမဟာရာဇာ မဟာစေတိယေ ဓာတု နိဓာနံ ကရိဿတိ၊ မယံ ဟိမဝန္တံ ဂန္တွာ သုကုသုမာနိ အာဟရိဿာမာတိ ထေရံ ဝန္ဒိတွာ အာကာသတော ဟိမဝန္တံ ဂန္တွာ စမ္ပကနာဂသလလာဒယော ပူဇနီယမာလံ ဂဟေတွာ တာဝတိံသဒေဝ လောကံ ဂတာ။

တသ္မိံ ကာလေ သက္ကော ဒေဝရာဇာ သဗ္ဗာဘရဏပတိမဏ္ဍိတော ဒွိသု ဒေဝလောကေသု ဒေဝတာယော ဂဟေတွာ ဧရာဝဏဟတ္ထီက္ခန္ဓမာရုယှ အဍ္ဎတေယျကောဋိဒေဝစ္ဆရာပရိဝါရိတော သုဒဿနမဟာ ဝီထိယံ ဝိစရန္တော သဝင်္ဂေါဋကေ တေ စတ္တာရော သာမဏေရေ ဒုရတောဝ အာဂစ္ဆန္တေ ဒိသွာ ဟတ္ထီက္ခန္ဓတော ဩရုယှ ပဉ္စ ပတိဋ္ဌိတေန ဝန္ဒိတွာ တေသံ ဟတ္ထေ မာလာစင်္ဂေါဋကေ ဒိသွာ? ကိံ အယျာ တုမှာကံ ဟတ္ထေ’တိ ပုစ္ဆိ။ တံ သုတွာ သာမဏေရာ မဟာရာဇ၊ ကိံ တွံ န ဇာနာသိ။ လင်္ကာယံ ကာကဝဏ္ဏတိဿ မဟာရာဇာ ဒသဗလဿ နလာဋဓာတုံ ဂဟေတွာ မဟာဝါလုကဂငဂါယ ဒက္ခိဏပဿေ သေရု နာမ ဒဟဿ အန္တေ ဝရာဟ နာမ သောဏ္ဍိမတ္ထကေ စေတိယံ ကာရာပေတုံ တုမှာကံ နိယောဂေန ဝိဿကမ္မဒေဝပုတ္တေန နိမ္မိတ္ैဋ္ဌကာနိ ဂဟေတွာ စေတိယံ ကာရာပေတွာ အဇ္ဇ ဓာတုနိဓာနံ ကရောတိ။ တတ္ထ ပူဇနတ္ထာယ ဟိမဝန္တတော အာနီတပုပ္ဖမိဒန္တိ ဝတွာ ဣတောပိ ကုသုမံ ဂဟေတုံ အာဂတမှာ’တိ ဝဒိံသု။ သက္ကော တေသံ ဝစနံ သုတွာ?

အယျ ¶ တုမှာကံ ဟတ္ထေ ပုပ္ဖာနိ စူဠာမဏိစေတိယေ ပုဇေတွာ အမှာကံ ဥယျာနတော ပုပ္ဖာနိ ဂဟေတွာ ဂစ္ဆထာတိ ဝတွာ တေဟိ သဒ္ဓိံ ဂန္တွာ တေသံ ပုပ္ဖေဟိ စူဠာမဏိစေတိယံ ပူဇေသိ။ တတော ပပဉ္စံ န ဘဝိတဗ္ဗန္တိ သက္ကဿ နိဝေဒေသုံ။ တံ သုတွာ သက္ကော သာမဏေရာနံ ပဉ္စမဟာဥယျာနတော ပါရိစ္ဆတ္တ-ကောဝိဠာရာဒီနိ ပုပ္ဖာနိ စ စန္ဒနစုဏ္ဏဉ္စ ဂဟေတွာ ဒါပေသိ။ သာမဏေရာ ပုပ္ဖာနိ ဂဟေတွာ ဒေဝလောကတော ဩတရိတွာ ဟိမဝန္တံ ပဝိသိတွာ သုဝဏ္ဏမဏိပဗ္ဗတေ သန္တစ္ဆာယာယ နသီဒိတွာ ဒိဝါဝိဟာရံ ကတွာ နက္ခတ္တဝေလာယ သမ္ပတ္တာယ မဏီ ဂဝေသမာနာ စတ္တာရော မဏယော အဒ္ဒသံသု။ တေသံ ဧကော ဣန္ဒနီလမဏီ၊ ဧကော ပဟဿရဇောတိရင်္ဂ မဏီ၊ ဧကော ဝေလုရိယမဏိ၊ ဧကော မသာရဂလ္လမဏိ၊ စတ္တာရော မဏယော စ ဒိဗ္ဗပုပ္ဖာနိ စ ဂဟေတွာ ထေရာနံ ဒဿေသုံ။ ထေရော? မဟာရာဇ၊ ဣမေ သာမဏေရာ ပါရိစ္ဆတ္တကကောဝိဠာရာဒီနိ ပုပ္ဖာနိ စ စန္ဒနစုဏ္ဏဉ္စ စတ္တာရော မဏယော စ ဂဟေတွာ အာဂတာ’တိ ရညော အာရောစေသုံ။

ရာဇာ တံ သုတွာ သောမနဿဇာတော သာမဏေရေ ပဉ္စ ပတိဋ္ဌီတေန ဝန္ဒိတွာ တေသမာဟတမဏယော ဂဟေတွာ မဟာနန္ဒ နာမ အမစ္စဿ ဒတွာ ထေရေဟီ သဒ္ဓိံ မဟန္တေန ပရိဝါရေန စေတိယင်္ဂဏံ ဂန္တွာ မဏိကရဏ္ဍကေန ဓာတုံ ဂဟေတွာ အတ္တနော သီသေ ဓာတုံ ဌပေတွာ ဥပရိ သေတစ္ဆတ္တံ ကာရာပေတွာ စေတိယံ တိက္ခတ္တုံ ပဒက္ခိဏံ ကတွာ ပါစီနဒွါရေ ဌီတော? အယံ ဒသဗလဿ နလာဋဓာတု အမှေဟိ ကာရာပိတာယ ဗုဒ္ဓပဋိမာယ နလာဋေ ဥဏ္ဏလောမာကာရံ ဟုတွာ ပတိဋ္ဌဟတူတိ အဓိဋ္ဌာသိ။ တဿ စိန္တိတက္ခဏေယေဝ ဓာတု ကရဏ္ဍတော နဘမုဂ္ဂန္တွာ အာကာသေ သတ္တတာလပ္ပမာဏေ ဌတွာ ဆဗ္ဗဏ္ဏ ရံသိယော ဝိဿဇ္ဇေသိ။ တာ ရံသိယော ကုဋေန အာသိဉ္စမာနဝိလီန သုဝဏ္ဏံ ဝိယ အန္တလိက္ခတော နိက္ခန္တသုဝဏ္ဏရသဓာရာ ဝိယ သကလလင်္ကာဒီပံ ¶ ရံသိဇာလေဟိ ဧကောဘာသံ ကတွာ ဂဏှိံသု။ တသ္မိံ ကာလေ ယမကပါဋိဟာရိယသဒိသံ ပါဋိဟာရိယံ အဟောသိ။ မဟာကာရုဏိကဿ ဘဂဝတော အဒိဋ္ဌပုဗ္ဗံ ပါဋိဟာရိယံ ဒိသွာ မဟာဇနာ တထာဂတဿ ရူပကာယံ ပစ္စက္ခဘုတာ ဝိယ အဟေသုံ။

အဒိဋ္ဌပုဗ္ဗံ သတ္ထုဿ ပါဋိဟီရံ မဟာဇနာ၊

ဒိသွာ ပီတိပရာ ဇာတာ ပသာဒမဇ္ဈဂုံ ဇိနေ။

ပူဇေသုံ ဂန္ဓမာလဉ္စ အလင်္ကာရံ သကံ သကံ၊

သဗ္ဗေ ဝန္ဒိံသု သိရသာ-စေတိယံ ဤဒိသံ ဝရံ။

တသ္မိံ သမာဂမေ ဧကော ပဏ္ဍိတပုရိသော ဇိနံ ထောမေန္တော ဧဝမာဟ?

နိဗ္ဗုတဿာပိ ဗုဒ္ဓဿ ယသော ဘဝတိ ဤဒိသော၊

ဌီတဿ လောကနာထဿ ကီဒိသာ အာသိ သမ္ပဒါ။

အနုဘာဝမိဒံ သဗ္ဗံ ပုညေနေဝ မဟေသိနော၊

ကရေယျ ဉတွာ ပုညံ တံ ပတ္ထေန္တော ဗောဓိမုတ္တမံ။

တသ္မိံ ကာလေ နာနာရတနဝိစိတ္တံ အနေကာလင်္ကာရပတိမဏ္ဍိတံ မဟာရဟံ သမုဿိတဓဇပတာကံ နာနာဝိဓကုသုမသမာကိဏ္ဏံ အနေကပူဇာဝိဓာနံ ဂဟေတွာ မနုဿာ ဆဏဝေသံ ဂဏှိံသု။ အနေကဝိဓတုရိယသင်္ဃုဋ္ဋံ အဟောသိ။ တသ္မိံ ခဏေ ဒေဝတာယော ပုပ္ဖဝဿံ ဝဿာပေန္တိ။ မဟာနုဘာဝသမ္ပန္နာ နာဂါ ပူဇံ ကရောန္တိ။ ဧဝံ သဗ္ဗေ ဒေဝါ နာဂါ မနုဿာ သာဓုကာရံ ဒေန္တိ၊ အပ္ဖောဋေန္တိ၊ ဝေလုက္ခေပံ ကရောန္တိ၊ ဟတ္ထီနော ကုဉ္စနာဒံ နဒန္တိ။ အဿာ တုဋ္ဌိရဝံ ရဝန္တိ၊ ဗဟလဃန မဟာပထဝီ ယာဝ ဥဒကပရိယန္တံ ကမ္ပိ။ ဒိသာသု ဝိဇ္ဇုလ္လတာ နိစ္ဆရိံသု။ သကလလင်္ကာဒီပေ သုမနကူဋာဒယော မဟာနဂါ ကုသုမဂဏသမာကိဏ္ဏာ အဟေသုံ။ သဗ္ဗေ ဇလာသယာ ပဉ္စဝိဓ ပဒုမသဉ္ဆန္တာ၊ ဒေဝတာနမန္တရေ မနုဿာ၊ မနုဿာနံ အန္တရေ ယက္ခနာဂသုပဏ္ဏာဒယော စ အဟေသုံ။ ဘိက္ခုဘိက္ခုနီဥပါသက ဥပါသိကာ အပရိမာဏာ အဟေသုံ။ မဟန္တေန သာဓုကာရေန မဟာ နိဂ္ဃောသေန သကလလင်္ကာဒီပေ တိဗ္ဗဝါတာဘိဟတသမုဒ္ဒေါ ဝိယ ဧကနိန္နာဒံ ¶ ဧကနိဂ္ဃောသံ အဟောသိ။ ဣမိနာ ပူဇာဝိဓာနေန ပသာဒကဘူတမဟာဇနကာယမဇ္ဈေ ဓာတု ပါဋိဟာရိယံ ဒဿေတွာ အာကာသတော ဩတရိတွာ ဗုဒ္ဓပဋိမာယ နလာဋေ ပုဏ္ဏစန္ဒသဿိရီကံ အဘိဘဝန္တမိဝ ဝိရောစမာနာ ပတိဋ္ဌာသိ။

ရာဇာ မဟာနန္ဒနာမကဿ အမစ္စဿ ဟတ္ထတော ကေသဓာတုံ ဂဟေတွာ ဝိဟာရဒေဝိယာ ဒတွာ တွံ ဣမာ ကေသဓာတုယော ဒသဗလဿ အနဝလောကိတ မတ္ထကေ ပတိဋ္ဌာပေဟီ’တိ အာဟ။ သာ ကေသဓာတုယော ဂဟေတွာ တတ္ထေဝ ပတိဋ္ဌဟန္တု’တိ အဓိဋ္ဌာနံ အကာသိ။ တသ္မိံ ခဏေ ကေသဓာတုယော ကရဏ္ဍတော နဘံ ဥဂ္ဂန္တွာ မယူရဂီဝသံကာသနီလရံသိယော ဝိဿဇ္ဇေန္တီ အာကာသတော ဩတရိတွာ ဗုဒ္ဓပဋိမာယ ဥတ္တမင်္ဂေ သိရသ္မိံ ပတိဋ္ဌဟိံသု။

တတော ရာဇာ ထေရေန သဒ္ဓိံ ဓာတုဂဗ္ဘံ ပဝိသိတွာ ဒိဗ္ဗစန္ဒနစုဏ္ဏသမာကိဏ္ဏံ ပါရိစ္ဆတ္တကကောဝိဠာရာဒိ သုဂန္ဓပုပ္ဖသန္ထရံ ဝိယူဟိတွာ ပဘာသမုဒယသမာကိဏ္ဏေ စတ္တာရော မဏိ ပါသာဏေ ဌပေသိ။ တေသံ အာလောကာဘိဘူတော ဓာတုဂဗ္ဘော အတိဝိယ ဝိရောစိတ္ထ။ သဗ္ဗနာဋကိတ္ထီယော အတ္တနော အတ္တနော အာဘရဏာနိ ဩမုဉ္စိတွာ ဓာတုဂဗ္ဘေယေဝ ပူဇေသုံ။ တတော ရာဇာ ဓာတုနိဓာနံ ကတွာ ဗုဒ္ဓရူပဿ ပါဒတလေ သီသံ ဌပေတွာ နိပန္နော ဧဝံ ပရိဒေဝိ၊ မယှံ ပိတုပိတာမဟပရမ္ပရာဂတာဓာတု အဇ္ဇ အာဒိံ ကတွာ ဣတော ပဋ္ဌာယ ဝိယောဂါ ဇာတာ အဟံ ဒါနိ တုမှာကံ အတိစိရံ (ဌီတာ) ရမဏီယာ ရောဟဏဇနပဒါ အာဟရိတွာ ဣမသ္မိံ ဌာနေ ပတိဋ္ဌာပေသိန္တိ ဝတွာ သိနေရု မုဒ္ဓနိ ¶ သမုဇ္ဇလမဟာပဒီပေါ ဝိယ တုမှေ ဣဓေဝ ဌီတာ။ ဣဒါနိ န ဂမိဿာမ မယံ ခမထ ဘဂဝါ’တိ ပရိဒေဝမာနော ဓာတု ဂဗ္ဘေယေဝ ပတိတွာ အာဟ?

အဟော ဝိယောဂံ ဒုက္ခံ မေ ဧတာ ဗာဓေန္တိ ဓာတုယော၊

ဝတွာ သော ပရိဒေဝန္တော ဓာတုဂဗ္ဘေ သယီ တဒါ။

မရိဿာမိ နော ဂမိဿံ အယျံ ဟိတွာ ဣဓေဝ’ဟံ၊

ဒုလ္လဘံ ဒဿနံ တဿ သံသာရေ စရတော မမာ’တိ။

ဝတွာ ပရိဒေဝန္တော နိပဇ္ဇိ။ တဿ ပန ဘိက္ခုသင်္ဃဿ အန္တရေ သဟဒေဝေါ နာမ ထေရော ရာဇာနံ ဓာတုဂဗ္ဘေ ရောဒမာနံ နိပန္နံ ဒိသွာ ကိမဇ္ဈာသယော ဧတဿာ’တိ စေတောပရိယဉာဏေန သမန္တာဟရိတွာ ဣဓ နိပန္နော မရိဿာမီ’တိ နိပန္နဘာဝံ ဇာနိတွာ ဣဒ္ဓိယာ သံသရံ ပိယရူပံ မာပေတွာ ဓာတုဂဗ္ဘတော တံ ဗဟိ အကာသိ။

(ဣဒ္ဓိယာ သော ဝသိပတ္တော ဆဠဘိညော ဝိသာရဒေါ၊

တံ ခဏညေဝ သပ္ပညော ရာဇာနံ တံ ဗဟိံ အကာ။)

တတော ပဌမာနီတဇောတိရင်္ဂ ပါသာဏံ ဓာတုဂဗ္ဘဿ ဥပရိ ဝိတာနံ ဝိယ ဌပေတွာ အရဟန္တာ? ဓာတုဂဗ္ဘော သမန္တတော စတုရဿမဉ္စံ ဝိယ ဧကဃနော ဟောတု။ ဓာတု ဂဗ္ဘေ ဂန္ဓာ မာ သုဿန္တု၊ ပုပ္ဖာနိ မာ မိလာယန္တု၊ ရတနာနိ မာ ဝိဝဏ္ဏာ ဟောန္တု၊ ပူဇနီယဘဏ္ဍာနိ မာ နဿန္တု၊ ပစ္စတ္ထိကပစ္စာမိတ္တာနံ ဩကာသော ဝါ ဝိဝရော ဝါ မာ ဟောတု’တိ အဓိဋ္ဌဟိံသု။ တတော ရာဇာ ဓာတုယော မဟန္တံ ပူဇံ ကတွာ မင်္ဂလစေတိယေ စတုရဿကောဋ္ဌကံ အတိမနောရမံ ဆတ္တကမ္မဉ္စ ကေလာသကူဋံ ဝိယ သုဓာကမ္မဉ္စ ဝါလုကပါဒတော ပဋ္ဌာယ သဗ္ဗဉ္စ ကတ္တဗ္ဗံ ကမ္မံ နိဋ္ဌာပေသိ။ သော ပန သေတ နိမ္မလစန္ဒရံသိ ဝိယ ဥဒကဗုဗ္ဗုဠကေလာသကူဋပဋိဘာဂေါ ဆတ္တဓရော ¶ အစလပ္ပတိဋ္ဌိတော သုဇနပ္ပသာဒကော အညတိတ္ထီယ မဒ္ဒနကရော မင်္ဂလထူပေါ ဝိရောစိတ္ထ။

ဝိလာသမာနော အဋ္ဌာသိ တောသယန္တော မဟာဇနေ၊

မင်္ဂလကေလာသထူပေါ အစလော သုပ္ပတိဋ္ဌိတော။

သုဇနပ္ပသာဒနကရော တိတ္ထိယဒိဋ္ဌိမဒ္ဒနော၊

ဘဝိ သဒ္ဓါကရော သေဋ္ဌော သဗ္ဗဇနပသာဒကော။

စေတိယော ပဝရော လောကေ မဟာဇနနိသေဝိတော၊

ဓဇပုပ္ဖသမာကိဏ္ဏော သဒါ ပူဇာရဟော ဘဝိ။

ဗဟူ ဇနာ သမာဂမ္မ နာနာ ဒေသာ သမာဂတာ၊

ပူဇေသုံ တံ မဟာထူပံ သဗ္ဗဒါပိ အတန္ဒိတာ။

ဤဒိသော ပတိရူပဝါသော သော ဒေသော ဒုလ္လဘော ဘဝေ၊

အပ္ပမတ္တာ သဒါ သန္တာ ဝိနာထ ကုသလံ ဗဟုန္တိ။

ရာဇာ ကပ္ပာသိကသုခုမဝတ္ထေန မဟာရဟံ စေတိယံ ဝေဌေတွာ၊ သိရိဝဍ္ဎနံ နာမ မဟာဗောဓိံ ပတိဋ္ဌပေတွာ တတ္ထ ဗောဓိဃရဉ္စ ကာရာပေတွာ တိဘူမကံ ဥပေါသထာဂါရံ ကာရာပေတွာ ရတ္တိဋ္ဌာန ဒိဝါဋ္ဌာနာဒီနိ ကတွာ သဗ္ဗံ ဝိဟာရေ ကတ္တဗ္ဗံ ကာရေသိ။ ဧတ္တကံ ကာရာပေတွာ ဝိဟာရံ ဒက္ခိဏောဒကံ ဒဿာမီ’တိ စိန္တေတွာ အသီတိသဟဿမတ္တာနံ ဘိက္ခူနံ သတ္တဒိဝသာနိ နာနာဝိဓ သူပဝျဉ္ဇနေဟိ မဟာဒါနံ ဒတွာ သတ္တမေ ဒိဝသေ မဟာဘိက္ခု သင်္ဃဿ တိစီဝရတ္ထာယ ဝတ္ထာနိ ဒါပေတွာ ပါတောဝ ပါတရာသဘတ္တံ ဘုဉ္ဇိတွာ ထေရဿ သန္တိကံ ဂန္တွာ ဝန္ဒိတွာ ဧကမန္တံ ဌီတော ဧဝမာဟ? အယျာ၊ စာတုဒ္ဒသိကေ မဟာဘိက္ခုသင်္ဃဿ ဒက္ခိဏံ ဒါတုမိစ္ဆာမီ’တိ။ သော ပနာယသ္မာ ဧဝမာဟ၊ ဥပကဋ္ဌ ပုဏ္ဏမာယံ ဥပေါသထဒိဝသေ အဿယုဇနက္ခတ္တေန ဒက္ခိဏံ ဓာတုံ ဘဒ္ဒကန္တိ။ သော ထေရဿ ဝစနံ သုတွာ ပဉ္စပတိဋ္ဌိတေန ထေရံ ဝန္ဒိတွာ သောမနဂရေ အတ္တနော ဘဂိနိံ ဒေဝိံ ကထေသိ? ဘဂိနိ၊ ဒသဗလဿ နလာဋဓာတုံ နိဒဟိတွာ မင်္ဂလမဟာစေတိယာနုရူပံ ¶ ပါသာဒံ အလင်္ကတဒွါရဋ္ဋာလကတောရဏံ သေတ ဝတ္ထ အနေကဓဇသမာကိဏ္ဏံ ဝိဟာရဉ္စ ကာရာပေတွာ ဒက္ခိဏံ ဒဿာမီ’တိ အယျဿ ကထေသိံ။ သော ပနာယသ္မာ၊ ဥပကဋ္ဌ ပုဏ္ဏမာယ ဥပေါသထဒိဝသေ ဒါတုံ ယုတ္တန္တိ အာဟာ’တိ။ ဒေဝ၊ ကိံ ကထေသိ၊ အယျဿ ကထီတနိယာမေနေဝ ဥပကဋ္ဌ ပုဏ္ဏမာယ ဥပေါသထဒိဝသေ ဒက္ခိဏံ ဒေဟီ’တိ အာဟ။ သော တဿာ ကထံ သုတွာ သောမနဿပတ္တော သာဓု ဘဒ္ဒေ’တိ သမ္ပဋိစ္ဆိတွာ သောမနဂရေ ဝိဟရန္တော၊ ဥပကဋ္ဌ ပုဏ္ဏမာယ ဥပေါသထေ သမ္ပတ္တေယေဝ အဇ္ဇုပေါသထော’တိ ဉတွာ ဂိရိအဘယံ ပက္ကောသာပေတွာ၊ တာတ သွေ ဒက္ခိဏံ ဒါတဗ္ဗံ တွံ သေနင်္ဂံ အလင်္ကရိတွာ သွေ အမှေဟိ သဒ္ဓိံ ဧဟီ’တိ ဝတွာ သေရုနဂရေ သိဝရညော လောဏနဂရေ မဟာနာဂရညော ပဏ္ဏံ ပဟိဏီ။ သွေ တုမှာကံ ဟတ္ထိအဿရထပတ္တာဒီနိ သုဝဏ္ဏာလင်္ကာရေဟိ အလင်္ကရိတွာ သွေ အမှေဟိ သဒ္ဓိံ ဆဏ ဝေသံ ဂါဟာပေတွာ အယျဿ တိဿတ္ထေရဿ ဒက္ခိဏံ ဒီယမာနံ သမောသရန္တုတိ။ တေ ပန ရာဇာနော သာသနံ သုတွာ အတ္တနော အတ္တနော ဝိဘဝါနုရူပေန ဟတ္ထိအဿရထပတ္တာဒီနိ အလင်္ကရိတွာ ဂန္ဓပဉ္စင်္ဂုလိကံ ဒတွာ သုဝဏ္ဏမာလာဒီနိ ပိလန္ဓာပေတွာ မဟာ ဂေါဏေပိ တထေဝ အလင်္ကရိတွာ သိင်္ဂေသု သုဝဏ္ဏကဉ္စုကံ (ပဋိ) မုဉ္စာပေတွာ အမစ္စဂဟပတိ-ဗြာဟ္မဏပုတ္တ-အဇဂေါပက-ခုဇ္ဇဝါမနက-သေနာပတိအာဒယော စ ဝိစိတ္တဝတ္ထာနိ နိဝါသေတွာ နာနာဝိဓဝိလေပနာနိ ဝိလိမ္ပေတွာ အာဂန္တွာ ရညော ဒဿယိံသု။ ရာဇာပိ စတုရင်္ဂိနိယာ သေနာယ ပရိဝုတော အလင်္ကတဟတ္ထိက္ခန္ဓံ အာရုဟိ။ သေသရာဇာနော စ အတ္တနော အတ္တနော သေနင်္ဂေဟိ ပရိဝါရေတွာ ဟတ္ထိက္ခန္ဓေ နိသီဒိတွာ ရာဇာနံ မဇ္ဈေ ကတွာ ဝါမဒက္ခိဏပဿတော နမဿမာနာ နိက္ခမိံသု။ တဿ ပန ဂမနံ အဇာတသတ္တုနော တထာဂတဿ ဒဿနတ္ထာယ ဇီဝကမ္ဗဝနဂမနံ ဝိယ တိံသယောဇနပ္ပမာဏံ ဧရာဝဏဟတ္ထိက္ခန္ဓံ အာရုဟိတွာ ဒွီသု ဒေဝလောကေသု ဒေဝေဟိ ပရိဝါရေတွာ သက္ကဿ ဒေဝါနမိန္ဒဿ နန္ဒနဝနဂမနကာလော ဝိယ စ အဟောသိ။ သော ဝဍ္ဎမာသကစ္ဆာယာယ ¶ သမ္ပတ္တာယ သောမနဂရတော နိက္ခမိတွာ သေရုဒဟဿ အန္တေ နာနာဝိဓ အလင်္ကတပဋိယတ္တနာဋကိတ္ထီနံ ပဉ္စင်္ဂိကတုရိယံ ပဂ္ဂဏှာပယမာနော အဋ္ဌာသိ။

မဟာပထဝီ ဘိဇ္ဇမာနာ ဝိယ ပဗ္ဗတာ ပရိဝတ္တမာနာ ဝိယ မဟာသမုဒ္ဒေါ (ထလံ) အဝတ္ထရိတွာ ဘိဇ္ဇမာနကာလော ဝိယ စ အဟောသိ။ ဗြာဟ္မဏာ ဇယမုခမင်္ဂလိကာ သောတ္ထိ ဝစနံ ဝဒိံသု။ သဗ္ဗာလင်္ကာရပတိမဏ္ဍိတာ နာဋကိတ္ထိယော ပဉ္စင်္ဂိကတုရိယံ ပဝတ္တယိံသု။ မဟာဇနော ဝေလုက္ခေပသဟဿာနိ ပဝတ္တေသိ။ တတော ရာဇာ ဗဟူ ဂန္ဓဒီပဓူပါဒယော ဂါဟာပေတွာ ဥဋ္ဌာယ သေနာယ ပရိဝုတော ထေရဿ ဝသနဋ္ဌာနံ ပဝိသိတွာ ထေရံ ဝန္ဒိတွာ နိသိန္နော အာဟ? အယျ ရာဇာနော စ သမ္ပိဏ္ဍိတွာ ဒက္ခိဏောဒကဿ ဒီယမာနဿ ကာလော’တိ။ ထေရော တဿ ကထံ သုတွာ ဘဒ္ဒကံ မဟာရာဇာ’တိ သမ္ပဋိစ္ဆိ။ တသ္မိံ ဒက္ခိဏောဒကဿ ဒါနဒိဝသေ နာနာဝိဓဝိစိတ္တမဏိဒဏ္ဍကေသု နာနာဝိဓ ဓဇပတာကာဒီနိ ဗန္ဓာပေတွာ သမုဿိတာနိ အဟေသုံ။ ပုရိမာဒီ ဒိသာသု မနုညဝါတာ ဝါယိံသု။ တထာ မဟာရံသိဇာလသမုဇ္ဇလိတော သဟဿရံသိဘာကရော အတ္ထင်္ဂတော အဟောသိ။ ဝိပ္ဖုရိတကိရဏရဇဓူမရာဟုအဗ္ဘာဒီဟိ ဥပရောဓေဟိ ဝိရဟိတော တာရာဂဏပရိဝုတော ပုဏ္ဏစန္ဒော သမုဇ္ဇလရဇတမယံ အာဒါသမဏ္ဍလံ ဝိယ ပါစီနဒိသတော သမုဂ္ဂတော။ တသ္မိံ ခဏေ ဒဏ္ဍဒီပိကာဒယော သမုဇ္ဇလာပေသုံ။ မဟာမင်္ဂလစေတိယံ ပန ဇာတိသုမနမာလာဒါမေန ပရိက္ခိပိတွာ ဧကမာလာဂုဏံ ဝိယ အလင်္ကရိ။ ယထာ တာရာဂဏပရိဝုတော ပုဏ္ဏစန္ဒော တထာ ပဒီပမာလာလင်္ကတော မဟာစေတိယော အတိဝိယ ဝိရောစတိ။ သကလ လင်္ကာဒီပေ ပန သဗ္ဗေ ရုက္ခာပိ ဝိစိတ္တဓဇေန အလင်္ကတာ ဝိယ အကာလဖလပလ္လဝေဟိ ဝိစိတ္တာ အဟေသုံ။ မဟာသမုဒ္ဒလောဏသာဂရာဒယော’ပိ ပဉ္စဝိဓပဒုမသဉ္ဆန္နာ အဟေသုံ။

ဝိစိတြဝတ္ထာဘရဏေဟိ သဗ္ဗေ၊

အလင်္ကတာ ဒေဝသမာနဝဏ္ဏာ၊

အနေကသင်္ချာ သုမနာ ပတီတာ၊

ဇနာ သမန္တာ ပရိဝါရယိံသု။

သဗ္ဗေဝ ¶ ဥဇ္ဇလာပေသုံ ဒဏ္ဍဒီပံ မနောရမံ၊

သကလမ္ပိ ဣဒံ ဒီပံ အာသိ ဩဘာသိတံ တဒါ။

တာရာဂဏသမာကိဏ္ဏော ပုဏ္ဏစန္ဒောဝ ဇောတယီ၊

သာရဒေ နဘမဇ္ဈမှိ ဌိတော ရုစိရရံသိယာ။

တထာ အယံ ထူပဝရော သုပ္ပဘာသော အလင်္ကတော၊

မာလာပဒီပမဇ္ဈမှိ ဘာတိ ဘုတိလကုတ္တမော။

သဗ္ဗေ’ပိ ပါဒပါ အဿ လင်္ကာဒီပဿ သဗ္ဗသော၊

ဓဇေဟိ’ဝ သမာကိဏ္ဏာ အာသုံ ပုပ္ဖဖလန္ဒဒါ။

သစေတနာ ယထာ သဗ္ဗေ အကာ ပူဇံ အကာ တဒါ၊

တထာ အစေတနာ သဗ္ဗေ အကာ ပူဇံ အနပ္ပကံ။

ယေဘုယျေန ဘုမဋ္ဌေ ဒေဝေ ဥပါဒါယ ယာဝ အကဏိဋ္ဌကာ ဒေဝါ ဗြဟ္မာ ဒိဗ္ဗမာလာပါရိစ္ဆတ္တကကောဝိဠာရစန္ဒနစုဏ္ဏံ ဂဟေတွာ အာဂတာဒေဝါတိ ဝါ မနုဿာတိ ဝါ ဇာနိတုံ အသက္ကောန္တိ။ ဥက္ကဋ္ဌမဟာသမာဂမော အဟောသိ။ တသ္မိမ္ပိ ဒိဝသေ မဟာပထဝိ အာကာသယုဂန္ဓရစက္ကဝါဠပဗ္ဗတုတ္တမာဒယော ကမ္ပိံသု။ တံ ဒိသွာ ရာဇာ အတိဝိယ သောမနဿပ္ပတ္တော ထေရေ စ အဝသေသ မဟာမတ္တာဒယော သန္နိပါတေတွာ နာဋကာဒယော စ ဂဟေတွာ၊ ဣဒါနေဝါဟံ ဝိဟာရဒက္ခိဏံ ဒဿာမိ’တိ စေတိယင်္ဂဏံ အဂမာသိ။ ထေရောပိ ဘိက္ခုသင်္ဃံ ဂဟေတွာ စေတိယင်္ဂဏေ အလင်္ကတမဏ္ဍပေ နိသီဒိ။ ရာဇာ ဝါသိတဂန္ဓောဒကသုဝဏ္ဏဘိင်္ကာရံ ဂဟေတွာ ဥဒကံ ထေရဿ ဟတ္ထေ အာသိဉ္စိတွာ ဒက္ခိဏံ အဒါသိ။ ဒတွာ စ ပန ဧဝမာဟ၊ အယျာ ဧသာ ဓာတု မယှံ ပိတာမဟဝံသေန အာဂတာ။ ဣဒါနိ အမှာကံ အတိရုစိရရမဏိယာ ရောဟဏဇနပဒါ အာဟရိတွာ သုဝဏ္ဏေန ဓာတုဂဗ္ဘံ၊ သတ္တရတနေန ဓာတုမဏ္ဍပံ ကာရာပေတွာ တသ္မိံ သုဝဏ္ဏမယံ ဗုဒ္ဓပဋိမံ နိသီဒါပေတွာ အမှာကံ ဒသဗလဿ နလာဋဓာတုံ ¶ နိဒဟိတွာ အယျဿ စီဝရာဒီနမတ္ထာယ ဣဒါနိ သောဠသဂါမဝရာနိ ဒဿာမိ’တိ ဂါမဝရာနိ ဒတွာ သမန္တတော တိဂါဝုတပ္ပမာဏေ သေရုဒဟေ ဘေရိံ စရာပေတွာ အာရာမိကံ ကတွာ အာဟ? ဘန္တေ၊ တုမှာကံ မယာ ဒိန္နသောဠသဂါမံ အဇ္ဇေဝ ဂန္တဗ္ဗံ။ ဂန္တွာ စ ပန အဇ္ဇေဝ ပရိဂ္ဂဟံ ကရောထာတိ ဝတွာ တတ္ထေဝ ဝါသုပဂတော ပုန ဒိဝသေ သမာဂန္တွာ သတ္တာဟံ မဟာဒါနံ ဒတွာ သတ္တမေ ဒိဝသေ မဟာဘိက္ခုသင်္ဃဿ တီစီဝရပ္ပဟောနကသာဋကံ ပဏီတံ ဘောဇနံ ဒတွာ ထေရဿ သန္တိကံ အာဂတော၊ အယျ ဝိဟာရေ ကတ္တဗ္ဗံ အပရိဟာပေတွာ မယာ ကတံ၊ ဂေဟံ ဂမိဿာမီတိ (နိဝေဒေသိ)။ ထေရော တဿ ကထံ သုတွာ သာဓု မဟာရာဇာတိ သမ္ပဋိစ္ဆိ။

သော ပန စေတိယဿ ပူဇနတ္ထာယ ပုပ္ဖာရာမံ ကာရာပေတွာ မာလာကာရာနံ ပရိဗ္ဗယံ ဒါပေသိ။ တထာ ဘေရိဝါဒကနာဋကာနမ္ပိ ဝိဟာရသီမန္တေ သုဝဏ္ဏနင်္ဂလေန ပရိစ္ဆိန္ဒိတွာ အာရာမိကာနမ္ပိ ဂါမံ ကာရာပေသိ။ ဘိက္ခုသင်္ဃဿ ဝေယျာဝစ္စတ္ထာယ အတ္တနော သန္တိကေ ပဉ္စသတအမစ္စဓီတရော တတ္တကေ အမစ္စပုတ္တေ ဒါသဒါသိယော စ ဒတွာ ပရိဗ္ဗယတ္ထာယ တေသံ တေသံ ပဉ္စသတသဟဿကဟာပဏေ စ ဒါပေသိ။ ဘိက္ခုသင်္ဃဿ စ ဓာတုပုဇနတ္ထာယ သောဠသသဟဿံ ကဟာပဏံ ဒါပေသိ။

တတော ဂိရိအဘယံ ပက္ကောသာပေတွာ၊ တာတ တုမှေ ဣဓေဝ နိစ္စံ ဝသထ။ အမှာကံ ဝိဟာရေ စ အာရာမိကေသု စ အယျေသု စ အပ္ပမတ္တော ဟောဟီတိ ဩဝဒိတွာ သဗ္ဗံ တဿ နိယျာဒေသိ။ ထေရော တဿ ဧဝမာဟ? မဟာရာဇ သမန္တတော မဟာသီမံ ဗန္ဓိတဗ္ဗန္တိ။ ဗန္ဓထ ဘန္တေတိ ဝုတ္တေ? မဟာရာဇ အကိတ္တိတေန နိမိတ္တေန သီမံ ဗန္ဓိတုံ နသက္ကာ၊ ဝိဟာရဿ ပါစီန ပစ္ဆိမုတ္တရဒက္ခိဏတော မဟာသီမံ ဗန္ဓနာယ နိမိတ္တံ သလ္လက္ခေတွာ ဒေဟိ၊ မယံ သီမံ ဗန္ဓိဿာမာတိ အာဟ။ ရာဇာ တုဋ္ဌော သတ္တ အမစ္စေ သဗ္ဗာလင်္ကာရေန အလင်္ကရိတွာ သီမာနိမိတ္တံ ကိတ္တေတွာ အာဂမနတ္ထံ ¶ ပေသေသိ။ တေ ပန သတ္တ အမစ္စာ စတုသု ဒိသာသု နိမိတ္တံ သလ္လက္ခေတွာ ပဏ္ဏေ လိခိတွာ အာဟရိတွာ ရညော အဒံသု။ ရာဇာ ဧကေကံ သတကဟာပဏံ ဒတွာ စတုသု ဒိသာသု အာရက္ခံ ဒါပေတွာ သီမံ ဗန္ဓန္တူတိ မဟာဘိက္ခုသင်္ဃဿ နိဝေဒေသိ။ အထ ထေရော ဘိက္ခုသင်္ဃပရိဝုတော စေတိယင်္ဂဏေ နိသီဒိတွာ ဝပ္ပမာသကာဠပက္ခဒွါဒသဒိဝသေ သီမံ ဗန္ဓိတွာ နိဋ္ဌပေသိ။

တတ္ထ သီမာနိမိတ္တံ ဧဝံ ဇာနိတဗ္ဗံ၊ ပုရိမာယ ဒိသာယ သိဂါလ ပါသာဏံ ဂတော။ တတော မစ္ဆသေလဂါမဿ ဝါမ ပဿေန ကောဋသီမာ နာမ ဂါမက္ခေတ္တံ ဝိဿဇ္ဇေတွာ ဂဏဒွါရဂါမံ ဂတော။ စိတ္တဝါပိယာ ဥတ္တရဝါန ကောဋိတော ဝရဂါမက္ခေတ္တေ ပိဋ္ဌိပါသာဏံ ဂတော။ တတော သာလိကံ နာမ မဓုကရုက္ခေ ဌီတပါသာဏထူပဿ ဂတော။ တတော ဝုတ္တိက နာမ ဝါပိယာ ဒက္ခိဏဝါန ကောဋိတော ကဏိကာရ သေလဿ ဂတော။ တတော ဆန္နဇ္ဈာပိတသေလဿ ဂတော။ တတော ကုက္ကုဋသိဝ နာမ ဥပါသကဿ မဓုကရုက္ခေ ဌီတံ ထူပံ ဂတော။ တတော သောဏ္ဍံ နာမ သေလံ ဂတော။ တတော သဗရံ နာမ ပါသာဏံ ဂတော။ တတော ဧလာလတိတ္ထဿ ဂတော။ တတော သောဗ္ဘ မဇ္ဈိမေန ဂန္တွာ အဿဗန္ဓနံ နာမ ဌာနံ ဂတော။ တတော ပါသာဏဿ မတ္ထကေ ဥဒက ကာကံ နာမ နိဂြောဓံ ဂတော။ သော ရုက္ခော ဥဒက ကာကာနံ ဝုသိတ ဘာဝေန ဧဝံ နာမ ဇာတော။ တတော တမ္ဗတိတ္ထံ နာမ ဂန္တာ မဟာစာရိကဿနာမ ထူပမဂ္ဂဿ ဂတော။ ¶ တတော အဿမဏ္ဍလပိဋ္ဌိံ ဂတော။ တတော မဟာ ကဒမ္ဗ ပဿေ ဌီတံ ပါသာဏထူပံ ဂတော။ တတော မဟာ ရာဇုဝါပိယာ ဥတ္တရကောဋိယာ ဌီတံ မဟာနိဂြောဓရုက္ခံ ဂတော။ တတော မဟာဝနပိဋ္ဌိံ ဂတော။ တတော လောဏသာဂရဿ အန္တေ ရဇတသေလံ ဂတော။ ပုန အာဝတ္တိတွာ သိဂါလ ပါသာဏေယေဝ ဌီတော။ ဣမံ ဧတ္တကံ ပဒေသံ သမန္တတော ပရိစ္ဆိန္ဒာပေတွာ ရာဇာ အဒါသိ။ ဝိဟာရဿ ဗဟူ အာရာမိကေ စ (တေသံ) ဝိဝိဓာနိ ဥပကရဏာနိ (စ) ဒါပေတွာ သဗ္ဗေ ပါကာရတောရဏာဒယော ကာရာပေတွာ ဝိဟာရံ နိဋ္ဌာပေတွာ ရောဟဏမေဝ ဂတော။

ရာဇာ ပသန္နဟဒယော မဟာပုညော မဟာဗလော၊

ကာရေတွာ ဥတ္တမံ ထူပံ ကဉ္စနဂ္ဃီက သောဘိတံ။

ဗန္ဓာပေတွာ တတော သီမံ ဝဋ္ဋဂါမဉ္စ သောဠသ၊

ဒတွာ အာရာမိကာနဉ္စ သဗ္ဗုပကရဏာနိ စ။

တတော သော ရောဟဏံ ဂန္တွာ မဟာသေနာပုရက္ခတော၊

ဝိဟာရဒေဝိယာ သဒ္ဓိံ မောဒမာနော ဝသီ တဟိံ။

ထေရော ပန တတ္ထေဝ ဝိဟရန္တော ယော ဣမသ္မိံ ဝိဟာရေ ဝသန္တော တထာဂတဿ ဧကဂန္ဓကုဋိယံ ဝုတ္ထော ဝိယ ဘဝိဿတီတိ ချာကရိတွာ တတော ပဋ္ဌာယ သီလာစာရသမာဓိသမာပတ္တိပဋိလဒ္ဓဇဠဘိညာပဋိသမ္ဘိဒပ္ပတ္တေဟိ ခီဏာသဝေဟိ ပရိဝါရေတွာ သဗ္ဗ ဗုဒ္ဓဂုဏံ အနုဿရန္တော စိရံ ဝသိတွာ တတ္ထေဝ အနုပါဒိသေသာယ နိဗ္ဗာနဓာတုယာ ပရိနိဗ္ဗာယိ။

အနေကဂုဏသမ္ပန္နော ¶ တိဿတ္ထေရော ဗဟုဿုတော၊

ဇနာနံ သင်္ဂဟံကတွာ နိဗ္ဗုတော သော အနာသဝေါ။

ထေရာပိ တေ သီလသမာဓိယုတ္တာ၊

ဗဟုဿုတာ သာဓုဂုဏာဘိရာမာ၊

ပညာပဘာဝါယုပ္ပန္နစိတ္တာ၊

ဂုဏာကရာ တာနယုတာ ဇနာနံ။

ပဟီနဘဝသံသာရာ ပဘိန္နပဋိသမ္ဘိဒါ၊

နာမရူပံ သမာသန္တော ပေသလာ ဆိန္နဗန္ဓနာ။

သတ္တာနံ ဥတ္တမံ သန္တိံ ကတွာ စ ဇနသင်္ဂဟံ၊

နိဗ္ဗုတာ တေ မဟာပညာ ပဒီပေါစ သုမာနသာ။

ဣတိ အရိယဇနပ္ပသာဒနတ္ထာယ ကတေ ဓာတုဝံသေ

ဓာတုနိဓာနာဓိကာရော နာမ

ပဉ္စမော ပရိစ္ဆေဒေါ။

ဣမိနာ ¶ ကာရာပိတဝိဟာရာ ကထေတဗ္ဗာ၊ ဝိဟာရဒေဝီမဟာဝိဟာရံ၊ ဆာတပဗ္ဗတ ဝိဟာရံ၊ သမုဒ္ဒဝိဟာရံ၊ စိတ္တလပဗ္ဗတဝိဟာရံ၊ ဘဒ္ဒပါသာဏဒွါရဝိဟာရံ၊ အစ္ဆဂလ္လ ဝိဟာရံ၊ ကောဠမ္ဗတိဿပဗ္ဗတဝိဟာရံ၊ ဂဏဝိဟာရံ၊ ကာလကဝိဟာရံ၊ ဒုက္ခပါလက ဝိဟာရံ၊ ဥစ္စင်္ဂဏဝိဟာရံ၊ ကောဋိတိဿဝိဟာရံ၊ တဿ ပန ဧကနာမံ ကတွာ ကာရာပိတေ မဟာဂါမေ တိဿမဟာဝိဟာရာဒိံ ကတွာ ဧကသတအဋ္ဌဝီသဝိဟာရာနိ ကတာနိ အဟေသုံ။

အဋ္ဌဝီသဧကသတဝိဟာရဉ္စ မဟာရဟံ၊

ဝိဟာရဒေဝိယာ သဒ္ဓိံ ကာရာပေသိ မဟာယသော။

တတော ပဋ္ဌာယ ရာဇာ မဟာဒါနံ ဒတွာ ပုညာနိ ကတွာ တတော စုတော ဒေဝလောကေ နိဗ္ဗတ္တိ။

ကတွာနိ ပုညကမ္မာနိ အနေကာနိ မဟာယသော၊

အတ္ထံ ဇနဿ ကတွာန ဂန္တွာန တုသိတံ ပုရံ။

သော တတ္ထ ဒိဗ္ဗသမ္ပတ္တိံ စီရံ ဘုဉ္ဇိယ နန္ဒိတော၊

မဟာဝီဘဝသမ္ပန္နော ဒေဝတာနံ ပုရက္ခတော။

တမ္ပိ သမ္ပတ္တိမောဟာယ ဇီဝဝလောကေ မနောရမေ၊

လောကုတ္တရံ သိဝံ ခေမံ ဣစ္ဆန္တော အာဂမိဿတိ။

သော တတော စုတော ဇမ္ဗုဒီပေ နိဗ္ဗတ္တိတွာ မေတ္တေယျ ဘဂဝတော ပိတာ သုဗြဟ္မာ နာမ ဘဝိဿတိ။ ဝိဟာရဒေဝီ တဿေဝ မာတာ ဗြဟ္မဝတီ နာမ ဗြာဟ္မဏီ ဘဝိဿတိ။ အဘယဂါမဏီကုမာရော တဿေဝ မေတ္တေယျဿ ဘဂဝတော ပဌမဂ္ဂသာဝကော ဘဝိဿတိ။ ကနိဋ္ဌော သဒ္ဓါတိဿော ဒုတိယဂ္ဂသာဝကော ဘဝိဿတိ။

ဧတ္တာဝတာ နလာဋဓာတု သံဝဏ္ဏနာ သမတ္တာ။

ဓာတုဝံသော သမတ္တော။

အနေန ¶ ပုညကမ္မေန သံသရန္တော ဘဝါဘဝေ၊

သဗ္ဗတ္ထ ပဏ္ဍိတော ဟောမီ သာရိပုတ္တောဝ ပညဝါ။

အရိမေဒဿ ဗုဒ္ဓဿ ပဗ္ဗဇိတွာန သာသနေ၊

နိဗ္ဗာနံ ပါပုဏိတွာန မုဉ္စေမိ ဘဝဗန္ဓနာ။

အနေန မေ သဗ္ဗဘဝါဘဝေ’ဟံ၊

ဘဝေယျမေကန္တပရာနုကမ္ပီ၊

ကုလီ ဗလီ စေဝ သတီ မတီ စ၊

ကဝီဟိသန္တေဟိ သဒါ သမင်္ဂီ။

ပညာဝန္တာနံ အဂ္ဂေါ ဘဝတု။