📜

ဇိနဝံသဒီပံ ¶

နမော တဿ ဘဂဝတော အရဟတော သမ္မာသမ္ဗုဒ္ဓဿ

၁။

မဟာဒယော ယော ဟဒယော’ဒယော’ဒယော

ဟိတာယ ဒုက္ခာနုဘဝေ ဘဝေ ဘဝေ၊

အကာသိ သမ္ဗောဓိပဒံ ပဒံ ပဒံ

တမာဘိဝန္ဒာမိ ဇိနံ ဇိနံ ဇိနံ၊ (ယမကဗန္ဓနံ)

၂။ ¶

ပဟာယ ယတ္ထာ’ဘိရတိံ ရတိံ ရတိံ

ရမန္တိ ဓမ္မေဝ မုနီ မုနီ မုနီ၊

ဝိမုတ္တိဒံ သဗ္ဗဘဝါ ဘဝါ’ဘဝါ

တမာဘိဝန္ဒေ မဟိတံ ဟိတံ ဟိတံ၊ (ယမကဗန္ဓနံ)

၃။ ¶

နိပီတသဒ္ဓမ္မရသာ ရသာ’ရသာ

သုပုညခေတ္တော’ရသတံ သတံ သတံ၊

ဂတာ ဝိဓူတာ ဝိနယေန ယေန ယေ

တမာဘိဝန္ဒေ’သိဂဏင်္ဂဏ’င်္ဂဏံ၊ (ယမကဗန္ဓနံ)

၄။ ¶

ဇိနာ’နတမ္ဘောရုဟ ဟံသရာဇိနီ

ဇိနောရသာနံ မုခပဉ္ဇရာ’လိ နီ၊

သဒတ္ထသာရံ သရသံ ဝိသူဒ နီ

ဥပေတု မေ မာနသမေဝ ဝါဏိ နီ၊

၅။

ကမ္မာဝသေသာ ဝိစိတော’ပဇာတျာ

ဂန္ထာ’ဟိသင်္ခါရဝိဗန္ဓကာ မေ၊

ပဏာမ ပုညာတိသယေန’နေန

မာ ပါကဒါနာ’ဝသရာ ဘဝန္တု၊

၆။

သုဝဏ္ဏဝဏ္ဏဿ ဇိနဿ ဝဏ္ဏံ

ဝဏ္ဏေယျ ကပ္ပမ္ပိ ကဇိတော သုဝဏ္ဏော၊

ကပ္ပဿိ’ဝေါသာန မနတ္တတာယ

န ပါပုဏေ ဗုဒ္ဓဂုဏာန မန္တံ၊

၇။ ¶

နိဒ္ဓန္တ စာမီကရ စာရု ရူပံ

သရဿတီ ဘူသဏ ဘာသနံစ၊

အနည သာဓာရဏ ဉာဏမဿ

အဝါဝိယာ’စိန္တိယ မပက္ပမေယျံ၊

၈။

ကုဟိံ အသာဓာရဏ ရူပ လီလာ

ကုဟိံ အသာဓာရဏ ဝါဏိ လီလာ၊

ကုဟိံ အသာဓာရဏဉာဏ လီလာ

ကုဟိံ နု မေ မန္ဒမတိဿ လီလာ၊

၉။ ¶

ဝိဘာဝိမာနီ ပရဝမှိနော ယေ

ဣဿာ’ဘိမာနေန ဝိဘညမာနာ၊

ဂဝေသယန္တီ’ဓ ပရဿ ရန္ဓံ

တေသံ ပသံသာဂရဟာဟိ ကိမ္မေ၊

၁၀။

ပသတ္ထ သတ္ထာဂမ ပါရဒဿီ

ယေ သာဓဝေါ သာဓု ဂုဏပ္ပသန္တာ၊

ဂန္ထဿ နိမ္မာဏပရိဿမံ နော

ဇာနန္တိ တေယေဝ ဣဓပ္ပမာဏာ၊

၁၁။

အာဒိစ္စဝံသပ္ပဘဝဿ တဿ

ဇိနဿ သတ္ထာဂမကောဝိဒေဟိ၊

ဝုတ္တောပိ ပုဗ္ဗာစရိယေဟိ ယေသု

ဂန္ထေသု သင်္ခေပဝသေန ဝံသော၊

၁၂။

န တေဟိ သက္ကာ သုဂတဿ ဝံသံ

ကိဉ္စာပိ ဝိညာတု မသေသယိတွာ၊

သမ္ပုဏ္ဏဝံသဿ ဝိဘာဝနာယ

တသ္မာ သမုဿာဟိတ မာနသေန၊

၁၃။ ¶

အဘိပ္ပသန္နော ရတနတ္တယမှိ

ပသတ္ထဝံသပ္ပဘဝေါ ပဘုနံ၊

ဝိဘုသဏော ဝိဿုတကိတ္တိဃောသော

ယော ဘာတိ လင်္ကာယ မုဠာရဘာဂျော၊

၁၄။

အမန္ဒစာဂါ’ဘိရတဿ

ပုနန္ဒု နာမဿ ဒယာဓနဿ၊

ဗုဒ္ဓေ ပသာဒါတိသယဿ တဿ

အဇ္ဈေသနဉ္စာပိ ပဋိဂ္ဂဟေတွာ၊

၁၅။

နဿာယ ပုဗ္ဗာစရိယော’ပဒေသံ

သောတူန မတ္ထာယ မယာ ဟိတာယ၊

နိရုတ္တိယာ မာဂဓိကာယ သမ္မာ

ဝိဓီယတေ’ဒံ ဇိနဝံသဒီပံ၊

၁၆။ ¶

သဒ္ဓါသိနေဟာနုဂတာယ ပညာ-

ဒသာယ သောတူဟိ မနောဝိမာနေ၊

ပဒီပိတော’ယံ ဇိနဝံသဒီပ-

ဒီပေါဟရေပါပတမပ္ပဗန္ဓံ၊

၁၇။

ပုရင်္ဂပုဏ္ဏာ သိရိဇမ္ဗုဒီပေ

သမ္ပတ္တိဘာရေန ဒိဝါ’ဝတိဏ္ဏာ၊

ယာ ဒေဝရာဇဿ’မရာဝတီ’ဝါ-

မရာဝတီနာမ ပုရီ ပုရေ’သီ၊

၁၈။

ဝိဇ္ဇာဓရာနဉ္စ ဝိဟင်္ဂမာနံ

ဝိဗန္ဓ ဝေဟာသဂတိံ ဗဟာသ၊

ယသ္မိံ ပုရသ္မိံ ဇိတဝေရိ စက္ကံ

ပါကာရစက္ကံ ဝိယ စက္ကဝါဠံ၊

၁၉။ ¶

သဉ္စုမ္ဗိတမှောဇ ရဇော ပဗန္ဓ-

သုပိဉ္ဇရာပါ ပရိခါဟိရာမာ၊

ပုရိတ္ထိ ပါကာရ နိတမ္ဗဘာဂေ

သမုဗ္ဗဟီ ကဉ္စန မေခလာ’ဘံ၊

၂၀။

ရတ္တိန္ဒိဝါ ရတ္တမဏိ’န္ဒနီလ-

မဏိပ္ပဘာရဉ္ဇိတ ရာဇဓာနိ၊

ဗဗန္ဓ ယာ’မန္ဒသုရိန္ဒစာပ-

သမုဇ္ဇလာကာသတလဗ္ဗိလာသံ၊

၂၁။

ယဟိံဝဓူနံ ဝဒနမ္ဗုဇေဟိ

ကတာဝမာနံ ဟရိဏင်္ကဗိမ္ဗံ၊

ပဘာဟိ နီလောပလတောရဏာတံ

သောကာဘီဘူတံစ ဝိဝဏ္ဏမာပ၊

၂၂။ ¶

သရောရုဟ’န္တီ မဏိမန္ဒိရာဘာ-

သဉ္စုမ္ဗိတံ ပုဏ္ဏသသင်္ကဗိမ္ဗံ၊

သင်္ကာယ ရာမာဇနတာ’ဘိရာမာ

ကရေ ပသာရေသိ ပုရမှိ ယသ္မိံ၊

၂၃။

ယတ္ထ’င်္ဂနာနံ ပဋိဗိမ္ဗိတာနိ

အာဒါသဘိတ္တီသု မုခမ္ဗုဇာနိ၊

အာသုံ ဝိဃာတာယ မဓုဗ္ဗတာနံ

ဝိလောစနာလီန မနုဂ္ဂဟာယ၊

၂၄။

သမ္မတ္တ မာတင်္ဂ ဓရာဓရေဟိ

ယသ္မိံ အဘိဿန္ဒ မဒဿဝန္တိ၊

တုရင်္ဂ ရင်္ဂေဟီ တရင်္ဂ မာလာ

သမာကုလေဝါ’သိ ဝိဓူတ ဓူလီ၊

၂၅။ ¶

နိက္ခိတ္တဝီဏာ မဏိနုပုရာနံ

ဝိလာသိနီနံ မုဒုပါဏိ ပါဒေ၊

မတ္တာလိမာလာ ကလနာဒိနီ ကိံ

နာလင်္ကရုံ ယတ္ထ ကတာဝကာသာ၊

၂၆။

ဓဝတ္ထိနီနံ ကုစသာရသေဟိ

နေတ္တာလိဘာရာ’နနနီရဇေဟိ၊

ယာ ဟာသဝီစီဟိ ပုရီ ရဇနျာ

ရရာဇ သမဖုလ္လသရောဇိနီ’ဝ၊

၂၇။

စန္ဒပ္ပဘာ စုမ္ဗိတ စန္ဒကန္တ

ပါသာဏဓာရာ မဏိစန္ဒိကာသူ၊

စန္ဒာနနာနံ ယဟိ မင်္ဂနာဟံ

ပရိဿမဿော’ပသမာယ’ဟေသုံ၊

၂၈။ ¶

ယသ္မိံ ပူရေ ဥဒ္ဓမဓော ဝိနဒ္ဓ-

ဇုတိပ္ပဗန္ဓော မဏိမန္ဒိရာနံ၊

သမုဗ္ဗဟီ ဂေရုက ပင်္က ဒိဒ္ဓ-

ဝိတာန ပစ္စတ္ထရဏဗ္ဗိလာသံ

၂၉။

သုဝဏ္ဏ မုတ္တာ မဏိ ဝံသဝဏ္ဏာ-

ပဝါဠ ရူပီ ဝဇိရေဟိဉ္စာ’ပိ၊

ယာ သတ္တဓညေဟိ ဓနေဟိ ဖီတာ

အဟူ ပုရိ ဓညဝတီ’ဝ နာရီ၊ (သိလေသဗန္ဓနံ)

၃၀။

ပသာရိတာ’နေကဒိသာမုခေသု

ဝိစိတ္တဝတ္ထာ’ဘရဏာဒိပူရာ၊

ယတ္ထာ’ပဏာ နိဇ္ဇိတကပ္ပရုက္ခာ

ကရိံသု လောကာဘိမတတ္ထသိဒ္ဓိံ၊

၃၁။ ¶

ပရာဂရတ္တာ မဓုပါတိမတ္တာ

သမှိန္နဝေလာ ဃနနီလဝါလာ၊

ဟံသာသယာ ပဉ္စသရာဘိရာမာ

ယသ္မိံ တဠာကာ ဝိယ ကာမဘောဂီ၊ (သိလေသဗန္ဓနံ)

၃၂။

ပုရန္တရသ္မိံ ရတနဂ္ဃိကာနံ

ရံသိပ္ပဗန္ဓေဟိ ဟတန္ဓကာရေ၊

ကုန္ဒာရဝိန္ဒဗ္ဘုဒယေနယသ္မိံ

ရတ္တိန္ဒိဝါဘေဒ မဝေဒိ လောကော၊

၃၃။ ¶

မာတင်္ဂဇီမူတဃဋာယ ဃဏ္ဋာ-

ဋင်္ကာရဂမ္ဘီရရဝါယ ယသ္မိံ၊

ပလမ္ဘီတာ မတ္တသိခဏ္ဍိမာလာ

အကာ ဝိကာလေပိ အခဏ္ဍကီဠံ၊

၃၄။

ပုရမှိ ယသ္မိံ စရဏမ္ဗုဇေဟိ

ဝဓူဇတော ဗန္ဓိတနူပုရေဟိ၊

ဝိကာသ ကောကာသန သီသ ဗဒ္ဓ

မတ္တာလိ သေသ’မ္ဗုဇိနီ အဇေသိ၊

၃၅။

ရသာတလံ နာဂဖဏာဝနဒ္ဓံ

နဘောတလံ ဝိဇ္ဇုလတာဝနဒ္ဓံ၊

ယာ ဆာဒိတာ ရူပိယဇာတရူပ-

ဓဇာဝလီဟာ’ဇိနိ ရာဇဓာနီ၊

၃၆။ ¶

နာနတ္ထသာရံ မိတဓာတုဝဏ္ဏံ

ဆန္ဒာရဟံ ပါဏဂဏာ’ဘိရာမံ၊

ကဝိပ္ပသတ္ထံ သရသံ သိလေသာ-

လင်္ကာရပဇ္ဇံ’ဝ ပုရံ ယမာသိ၊ (သိလေသဗန္ဓနံ)

၃၇။

ပုရမှိ တသ္မိံ ကရုဏာနိဓာနော

ဗုဒ္ဓင်္ကုရော ဗြာဟ္မဏသာရဝံသေ၊

အသင်္ခကပ္ပာန မိတော စတုန္နံ

လက္ခာဒိကာနံ ဥဒပါဒိ ပုဗ္ဗေ၊

၃၈။

ဘောဝါဒိဝံသေ’ကဒိဝါကရဿ

ပုညာနုဘာဝေါ’ဒယမင်္ဂလေဟိ၊

ဇာတဿ ခေါ သမ္ပတိ ဇမ္ဗုဒီပေါ

ဝိလုမ္ပယီ မင်္ဂလဝါသလီလံ၊

၃၉။ ¶

ဇာတက္ခဏေ တဿ သရီရဇေန

ဂန္ဓေန ဝဏ္ဏေန သကေ နိကေတေ၊

ဟတပ္ပဘာ စန္ဒနတေလဒီပါ

သဏ္ဌာနမတ္တေဟိ ဝိဇာနိယာသုံ၊

၄၀။

ဝိမုတ္တဒေါသာဟိ သုခေဓိတာဟိ

ဓာတီဟိ ကုမ္ဘောရုပယောဓရာဟိ၊

ဘတော ကုမာရော သုကုမာရကာယော

ခေပေသိ သော ကာနိစိ ဝါသရာနိ၊

၄၁။

မဟာမဟေစာ’ထ ပဝတ္တမာနေ

သဝေဒ ဝေဒင်္ဂ ဝိဒူ ဝိဒူဟိ၊

ကာရာပယုံ တေ ပိတရော’ရသဿ

နာမံ သုမေဓော’တိ ပဒတ္ထသာရံ၊

၄၂။ ¶

ဥဠာရဘာဂျေန သမံ ကုမာရေ

သံဝဒ္ဓမာနေ ဇနနီ န တိတ္တိံ၊

ပါယာသိ နီလာမကလလောစနာလိံ

မုခမ္ဗုဇံ တဿ’ဘိစုမ္ဗမာနာ၊

၄၃။

သုခေဓိတ’င်္ဂါဝယဝေါ ကုမာရော

ဝိမာနဘုမျာ မဏိနိမ္မိတာယ၊

ပရောဒိ မာတာပိတရော’ဘိယာစံ

ဗိမ္ဗံ ကနိဇံ ဇာနုယုဂေန ဂစ္ဆံ၊

၄၄။

သုဝဏ္ဏဗိမ္ဗော’ပမစာရုရူပေါ

သမာစရံ ဓာတိဘုဇာ’ဝလမ္ဗံ၊

ဝိညာသပါဒ’င်္ဂုလိမဉ္ဇရီဟိ

သလီလမာဝါသမလင်္ကရိတ္ထ၊

၄၅။ ¶

နိဇေန တေဇေန စ ဇိဝလောကံ

ယသေန’ပုဗ္ဗာစရိမံ ဖုသန္တော၊

တိရောကရိတွာ ရဝိစန္ဒသောဘံ

သံဝဍ္ဎိ ဓီရော ဥဘတော သုဇတော၊

၄၆။

သော သတ္တမာ ယာဝ ပိတာမဟဿ

ယုဂါ သဂဗ္ဘာသယသုဒ္ဓိကော’သိ၊

နိဟီနဇစ္စော’တိ န ဇာတိဝါဒါ

ခိတ္တော’ပကုဋ္ဌော ဘဝိ ဝိပ္ပသေဋ္ဌော၊

၄၇။

ဝေဒန္တယံ သော သနိဃဏ္ဋု သတ္ထံ

သကေဋုဘံ သာက္ခရဘေဒ သတ္ထံ၊

သာဓဗ္ဗတဗ္ဗေဒိ’တိဟာသ သတ္ထံ

အဝေဒိ ဝေဒင်္ဂယုတံ ပ သတ္ထံ၊

၄၈။

အဇ္ဈာယကော မန္တဓရော ပဝီဏော

ကလာသု လောကာယတလက္ခဏေသု၊

ပပူရကာရိ ပဒကော ကဝီနံ

တေတာ’သိ ဝေယျာကရဏော ဂဏိသော၊

၄၉။ ¶

ကန္ဒပ္ပဒပ္ပာ’နလဓုမရာဇိ-

လီလာဝလမ္ဗိ နိဇမဿုရာဇိ၊

န ကေဝလံ ကောမလဂဏ္ဍဘာဂံ

မနမ္ပိ ထီနံ မလိနီကရိတ္ထ၊

၅၀။

တန္ဒေဘဝဏ္ဏာယတန’ဏ္ဏဝမှိ

နရူပတဏှာတရဏိ နရာနံ၊

ပါယာသိ စက္ခာယတနပ္ပိယာဟိ

တီရန္တရံ စိတ္တနိယာမကဋ္ဌာ၊

၅၁။

ဒွိဇော သုမေဓော သုဝိသုဒ္ဓမေဓော

မာတာပိတုန္နံ နိဓနာဝသာနေ၊

ပုညာနုဘာဝပ္ပဘဝံ အဂါရ-

မဇ္ဈာဝသံ ကာမသုခံ’နုဘုဉ္ဇီ၊

၅၂။ ¶

နိသဇ္ဇ ပါသာဒတလေ’ကဒါ သော

ပလ္လင်္ကမာဓာယ ရဟောဂတောဝ၊

ပုနဗ္ဘဝုပ္ပတ္တိ သရီရဘေဒေါ

ဒုက္ခော’တိ စိန္တေသိ သဘာဝစိန္တီ၊

၅၃။

ဇာတော သ’ဟံ ဇာတိဇရာရုဇာဒိ-

ဓမ္မော’မှိ တသ္မာ ဘဝဒုက္ခသုညံ၊

နိစ္စံ အဇာတိံ အဇရံ အရောဂံ

ဂဝေသိတုံ ဝဋ္ဋတိ နိဗ္ဗုတိ’န္တိ၊

၅၄။

ယထာပိဒုက္ခေ သတိ စ’တ္ထိသာတံ

တဒညမုဏှေ သတိ သီတမတ္ထိ၊

ဘဝမှိ သန္တေ ဝိဘဝေါ’ပိ ဧဝံ

နိဗ္ဗာဏမတ္ထီ တိဝိဓဂ္ဂိသန္တေ၊

၅၅။ ¶

သာဝဇ္ဇဓမ္မေ ဣဟဝိဇ္ဇမာနေ

သံဝိဇ္ဇတေ ဘော နိရဝဇ္ဇဓမ္မော၊

အဇာတိ ဟောတိ သတိ ဇာတိယာ’တိ

ဧဝံ ဝိစိန္တေသိ သဒတ္ထဝိန္တီ၊

၅၆။

ဒိသွာ ယထာ ဂုထဂတော တဠာကံ

န တဿ ဒေါသော န တမောတရေယျ၊

ကိလေသဓောဝေ အမတမှိ သန္တေ

တထာ န သေဝေထ န တဿ ဒေါသော၊

၅၇။

ပါပါရိရုဒ္ဓါ သတိ ခေမမဂ္ဂေ

န တဿ ဒေါသော န သုခံ ဝဇေယျ၊

ပါပါရိရုဒ္ဓါ သတိ ခေမမဂ္ဂေ

တထာ နဂစ္ဆေယျ န တဿ ဒေါသော၊ (ယမကဗန္ဓနံ)

၅၈။ ¶

ယထာပိ ဝေဇ္ဇေ သတိ ဃောရရောဂီ

န တဿ ဒေါသော တ လဘေ တိကိစ္ဆံ၊

ရာဂါဒိရောဂီ သတိ ဗုဒ္ဓဝေဇ္ဇေ

ဓမ္မောသဓံ နေ’စ္ဆတိ ကဿ ဒေါသော၊

၅၉။

ယော ကဏ္ဌဗဒ္ဓံ ကုဏပံ ပဟာယ

ယထာသုခံ ဂစ္ဆတိ သေရိစာရီ၊

တထေဝိ’မံ ကုစ္ဆိတ ပူတိကာယံ

ယံနူန ဂစ္ဆေယျမဟံ ဇဟိတွာ၊

၆၀။

ဥစ္စာရဌာနမှိ ဇနာ’နပေက္ခာ

ကတွာ ကရီသာနိ ကယထာ ဝဇန္တိ၊

တထာ သရီရံ ကုဏပေဟိ ပူရံ

ယံနူန ဂစ္ဆေယျမဟံ ဇဟိတွာ၊

၆၁။ ¶

နာဝံ ယထာ ဇဇ္ဇရမာပဂါဟိံ

ဝဇေယျ နေတာ အတပေက္ခကောဝ၊

တထာ နဝဒွါရသဝံ သရီရံ

ယံနူန ဂစ္ဆေယျမဟံ ဇဟိတွာ၊

၆၂။

စောရေဟိ ဂစ္ဆံ အဝဟာရဘီတျာ

ခေမံ သုမေဓော ပုရမောတရေယျ၊

တထာ သရီရံ ကုသလာဝဟာရံ

ယံနူန ဂစ္ဆေယျမဟံ ဇဟိတွာ၊

၆၃။

နေက္ခမ္မ သင်္ကပ္ပ ပရော’ပမာဟိ

အနုဿရိတွေ’ဝမုဠာရဝီရော၊

ဟတော’ရပါရေ တိဘဝေ အသာရေ

ဝိဟာသိ ဥက္ကဏ္ဌိတမာနသော သော၊

၆၄။ ¶

သုဝဏ္ဏ မုတ္တာ မဏိ ရူပိယာဒိ-

ဓနေဟိ ဓညေဟိ စ ပူရိတာနိ၊

အဝါပုရိတွာန၊ထ ကောသကောဋ္ဌာ-

ဂါရာနိ တံ ဒဿယိ ရာသိဝဍ္ဎော၊

၆၅။

ပိတာမဟာနံ ပကပိတာမဟာနံ

မာတာပိတုန္နံ ဝိဘဝါ ပနေတ္ထ၊

အနပ္ပကာထာဝရဇင်္ဂမာတေ

သံဒိဿရေ ဓီရ သုမေဓဝိပ္ပ၊

၆၆။

သော သတ္တမာ ယာဝ ပဝေဏိဝဋ္ဋာ

ဝိဘာဝယိတွာ ဝိဘဝဿရာသိံ၊

ဓနာဂမဿာပိ ဓနဗ္ဗယဿ

ပမာဏ’မာစီက္ခိပမာဏဒဿိံ၊

၆၇။

ကုဋုမ္ဗမေတံ ပဋိပဇ္ဇမာနော

ကာမေသု ဒေဝေါဝိယ ဣန္ဒြိယာနိ၊

ဣစ္ဆာနုရူပံ ပရိစာရယဿု

ဣစ္စေဝ မာရောစယိ ရာသိဝဍ္ဎော၊

၆၈။ ¶

အမုံ မဟန္တံ ဓနဓညရာသိံ

သမာဝိနိတွေ’က ကဟာပဏမ္ပိ၊

နာ’ဒါယ မာတာပိတရောပျ’ဟော တော

ဂတာ ယထာကမ္မ မိတော ပရတ္ထ၊

၆၉။

တဗ္ဗတ္ထုသာရဂ္ဂဟဏာတိသူရော

ဝေါဿဂ္ဂသန္တော အထ သတ္တသာရော၊

ရညော သမာရောစိယ ဧတမတ္ထံ

ဘေရိံ စရာပေသိ သကေ ပုရမှိ၊

၇၀။

သန္တပ္ပယိ ဘေရိဝိရာဝဂန္ဓ-

မာဃာယ သမ္ပတ္တဇာတာ’လိဇာတံ၊

ဘောဝါဒိ နာနာရတနာဒိဘောဂ-

မဓူဟိ သတ္တာဟ’မနာထနာထော၊

၇၁။ ¶

တဒဂ္ဂ ယညာလယ ဝါရိဝါဟ-

ဓာရာနိပါတဒ္ဓနဝုဋ္ဌိဟေတု၊

မဟာ ဇနဿာ’ဓိကဝတ္ထုတဏှာ-

တဋာနိ ဘိန္နာနိ မနောဒဟေသု၊

၇၂။

သုခေဓိတော ကာမသုခံ ပဟာယ

ဃရာ’ဘီနိက္ခမ္မ တတော သုမေဓော၊

အဇ္ဈောဂဟေတွာ ဟိမဝန္တ’မာပ

ဓမ္မေသကော ဓမ္မကပကဗ္ဗတ’န္တံ၊

၇၃။

ဝိတက္ကမညာယ’ထ ဒေဝရညာ

ဝျာပါရိတော မာပယိ ဝိဿကမ္မော၊

တဟိံ ဝိဝေကက္ခမက မဿမဉ္စ

မနောရမံ စင်္ကမဘုမိဘာဂံ၊

၇၄။ ¶

တမဿမံ ပဗ္ဗဇိတေဟိ သုညံ

ဥပေစ္စ သောဉ္စာရမဝါပုရိတွာ၊

ဉတွာ တဒန္တောလိခိတ’က္ခရာနိ

ခါရိံပရိက္ခာရဘရံအဝေက္ခိ၊

၇၅။

နိဝတ္ထဝတ္ထံနဝဝဒေါသုပေတံ

ဝိဝဇ္ဇိယာဝဇ္ဇိယဝဇ္ဇဒဿိ၊

ဓာရေသိတံဗာရသဓာနိသံသ-

မနောဇပုပ္ဖတ္ထရဝါကစီရံ၊

၇၆။

ပုန္နာဂပုပ္ဖတ္ထရကာ’ဘိရာမံ

အံသေ ဝိဓာယာ’ဇိနစမ္မခဏ္ဍံ၊

ကတွာ ဇဋာမဏ္ဍလ မိတ္တမင်္ဂေ

တိဝင်္က မာဒါယ’ထ ခါရိကာဇံ၊

၇၇။

ဘုဇင်္ဂဘောဂေါ’ရုဘုဇေန ဓီရော

အာဒါယ စာလမ္ဗနဒဏ္ဍကောဋိံ၊

သမဂ္ဂဟီ တာပသဝေသမေဝံ

ဝိရတ္တစိတ္တောက ဝိဘဝေဝ ဘဝေ’ပိ၊

၇၈။ ¶

သော စင်္ကမီ စင်္ကမမောတရိတွာ

သိလာတလသ္မိဉ္စ ဒိဝါ နိသဇ္ဇိ၊

သာယံ ပဝိဋ္ဌော ဝသိ ပဏ္ဏသာလံ

နိပဇ္ဇိ ကဋ္ဌတ္ထရသေသမဉ္စေ၊

၇၉။

ပစစူသကာလမှိ ပဗုဇ္ဈိတော သော

အာဝဇ္ဇယိတွာ’ဂမနပ္ပဝတ္တိံ၊

ဝိဝေကကာမဿ မမေ’တ္ထ ဝါသော

ကာမံ ဃရာဝါသသမော သိယာ’တိ၊

၈၀။

အဒုဉှိ ပဏ္ဏစ္ဆဒနံ ကပေါတ-

ပါဒါရုဏံ ဗေလုဝပက္ကဝဏ္ဏာ၊

ဘူမီပိ ဘိတ္တီ ရဇတာဝဒါတာ

မဉ္စော’ပိ စိတ္တတ္ထရဝါရုရူပေါ၊

၈၁။ ¶

သုဘာက မနာပါ မမ ပကဏ္ဏသာလာ

သာဒီနဝါ ဒုပ္ပရိဘာရိယာ’ယံ၊

ပဏီတဘိက္ခာ ပရိယေဋ္ဌိ မူလ-

ဒုက္ခဿ နတ္ထိ’တိ ပမာဏ မန္တော၊

၈၂။

အဂါရသညာယ ပဋိက္ခပိတွာ

တဉ္စ’ဋ္ဌဒေါသာ ကုလပဏ္ဏသာလံ၊

ဒသင်္ဂ သာဓာရဏ ရုက္ခမူလံ

ဖလာဖခလာဟာရ မုပေစ္စ ဘောဇီ၊

၈၃။

သုမေဓသော သော ဒိဝသာနိ သတ္တ

မဟာပဓာနံ ပဒဟံ သုမေဓော၊

ပတ္တော အဘိညာသု ဝသိသု ပါရံ

သဗ္ဗံက သမာပတ္တိသုခံ အဝိန္ဒိ၊

၈၄။ ¶

တသ္မိံခဏေ ကာနန ဒေဝတာဟိ

သာဓူ’တိ နိဂ္ဃောသိတပီတိဃောသော၊

အဗ္ဘုဂ္ဂတော တဿ ယသေန သဒ္ဓိံ

ဝိသုဒ္ဓဝိဇ္ဇာစရဏု’ဗ္ဘဝေန၊

၈၅။

ဝိဇ္ဇာဓရာ တဂ္ဂုဏဒီပကာနိ

မုတိင်္ဂဝီဏာဓနိဗန္ဓဝါနိ၊

ဂါယိံသု ဂီတာနိ’ဝ နစ္စမာနော

ဟိမာစလော သမ္ပတိ သမ္ပဝေဓိ၊

၈၆။

မုဒ္ဓင်္ကုရံ ဘုဓရကုဋဗာဟု-

သတေဟိ တန္နိဇ္ဈရ စာမရေဟိ၊

ဝိဓူယမာနေဟိ ဝိဓူတပါပံ

ကတောပဟာရေဝ မဟာသရာ’ပီ၊

၈၇။ ¶

အကာလမေဃဒ္ဓနိ ဘေရိရာဝ-

ဝျာပါရိတာ မတ္တသိခဏ္ဍိသဏ္ဍာ၊

အဇ္ဈာဝသန္တံ ဝနသဏ္ဍမဇ္ဈံ

မဟိံသုစာ’ခဏ္ဍနတဏ္ဍဝေန၊

၈၈။

မန္ဒာ’နိလာ’မန္ဒဘုဇာ’ဝလမ္ဗ-

သုနီလသာခါမဏိဝိဇနီဟိ၊

လတင်္ဂနာ’လိင်္ဂိတသာလသာမီ

သံဝိဇယုံ ဝိတဒရမ္ပိ ဓီရံ၊

၉၀။ ¶

ကပီတနာ’သောက တမာလ နီပါ

ကပီတနာ’သောက တမာလ နီပါ၊ (သမတ္တပါဒဘျာသ မဟာ ယမကံ)

ကပီတနာ’သောက တမာလ နီပါ

ကပီတနာ’သောက တမာလ နီပါ၊

၉၁။

န ဝေလလိတာ ကိံ ပသဝကာ’ဝတံသာ

လတာဝိတာနာ မဓုပါလိသာလီ၊

လတာဝိတာနာ မဓုပါ’လိသာလီ

န ဝေလ္လိတာ ကိံ ပကသဝါ’ဝတံသာ၊(သမုဂ္ဂဘေဒ ယမကံ)

၉၂။ ¶

ပုပ္ဖာဝလီ ကန္ဒလ ပါဋလဂ္ဂါ

ကလာပိနီ သာ ဝနရာဇိနီလာ၊

ပုပ္ဖာကုလီ ကန္ဒန ပါဋလက္ခီ

ကလာပနီလာ ဝရ ရာဇိနီဝ၊ (အဒ္ဓဂေါမုတ္တိကာ ဗန္ဓနံ)

၉၃။ ¶

နတာသိရော မဉ္ဇရိကာသုရမှာ

နတာသိရော ပဉ္ဇလိကာဝ ရမ္မေ၊

ဝနေ နိဗဒ္ဓံ ရမိတော ဝိဘာသိ

ဝိနေယျ ဗန္ဓူရစီတော ပဟာရော၊ (ပါဒဂေါမုတ္တိကာ ဗန္ဓနံ)

၉၄။

ရဇောကိရန္တာ’ဝနတာ လတာသုံ

လာဇောကိရန္တာ ဝနိတာ နတာဝ၊

ဒွိဇောအရညံ ဝသိတာ ပိတာဃော

ဂဇောတရန္တောဝ လတာ ဝိတာနံ၊ (သိလောကဂေါမုတ္တိကာ ဗန္ဓနံ အာကုလဇာလမိတိပိ)

၉၅။ ¶

မတင်္ဂဇိန္ဒာ န မသက္ကရိံသု

ပါဒါနိ နတွာန ပဒိပဓာမံ၊

ပညာဓဝံ ပီန တပံ ဖလေဟိ

ဟိမဒ္ဒိပါဒေ ပရိသုတ္တမဉှိ၊ (ကဗ္ဗနာမ ဂဗ္ဘ စက္ကံ)

၉၆။ ¶

မေတ္တာယ ဆတ္တံ’ဝ ဖဏံ ဖဏိန္ဒော

ဓာရေသိ သီသေ ဝသိနော စစာရ၊

နထာမဝါ’ကာဝ’ဗလေသု ကိဉ္စိ

မေဓာယ နန္ဒော ထိရဝါစိ ခေမေ၊ (ကဝိနာမ ဂဗ္ဘ စက္ကံ)

၉၇။ ¶

နော’သိတေဟိ’ဿ သန္တာသ’နူ’န တောသ ဝတော ဒေါ၊

ဒါယတော ဝသတော န’နုသန္တာသဿ ဟိတေသိနော၊ (ဂါထဒ္ဓဝိသယ ပဋိလောမ ယမကံ)

၉၈။

ယောကာ’သာ’ဝါသ ကာယော ကာမ’ကာမ’မကာမ’ကာ၊

သကာယနာ’နာယ’ကာသ ဝါမ နာ ဂ ဂနာ’မဝါ၊ (သဗ္ဗတော ဘဒ္ဒ ဗန္ဓနံ)

၉၉။ ¶

ဒယာယ ဝသိတော ဒါယေ ယာပဇာသိဝ မာသဒါ၊

ယဇာရဟံ ရဉ္ဇမာနော ဝသိဟံသော စိရံဝသိ၊ (အဒ္ဓဗ္ဘမ ဗန္ဓနံ)

၁၀၀။

မဓုမဒ မဓုကရ ဝိရုတေ ဝိရုတေ

မလယဇ သုရဟီတ ပဝနေ ပဝနေ

ဟိမဝတိ ဝိကသိတ ပဒုမေ ပဒုမေ

အဓိသုခ မနုဘဝိ သဝသိ သဝကသိ၊ (ပါဒန္တ ယမကံ)

ဣတိ မေဓာနန္ဒာဘိဓာနေန ယတိနာ ဝိရစိတေ သကလကဝိဇန ဟဒယာနန္ဒဒါနနိဒါနေ ဇိနဝံသဒီပေ ဒူရေနိဒါနေ သုမေဓဗြာဟ္မဏာပဒါနပရိဒီပေါ။

ပဌမော သဂ္ဂေါ။

၁။ ¶

(မန္ဒာ’က္ကန္တာ) မရပုရသိရိံ သဗ္ဗသမ္ပတ္တိသာရံ

ဇမ္ဗုဒ္ဒီပါ’သမ သရသိဇေ ကဏ္ဏိကာ သန္နိကာသံ၊

ရမ္မံ ရမ္မဝှယ ပုရဝရံ ပါရမီပါရဒဿီ

ဗုဒ္ဓါ ဒီပင်္ကရ ဒသဗလော သဗ္ဗလောကေကဒီ၊ ()

တသ္မိံ ကာလေ ဝိပုလကရုဏာ နာရိသဉ္စောဒိတ’တ္တော

နာနာ ခီဏာသဝ ပရိဝုတော စာရိကံ သဉ္စရန္တော၊

သံဝတ္တေန္တော သုနိပုဏတယံ ဓမ္မစက္ကံ ကမေန

ပတွာ တသ္မိံ ပဋိဝသတိ သောဒဿနဝှေ ဝိဟာရေ၊ ()

၃။ ¶

သုတွာ ဒိပင်္ကရ ဘဂဝတော နာဂရာ ကိတ္တိသဒ္ဒံ

သမ္ဗုဒ္ဓါ သော ဣတိပိ အရဟံ တျာဒိနာ’ဗ္ဘုဂ္ဂတံ တံ၊

ဂါဟာပေတွာ တုဝဋတုဝဋံ ဝတ္ထဘေသဇ္ဇ ပါနံ

တန္နိတ္တာ’သုံ ပမုဒိတမတာ ဂန္ဓမကာလာဒိဟတ္ထာ၊ ()

၄။

ပတွာ ဒီပင်္ကရတရိဟရိံ ဂန္ဓမာလာဒိကေဟိ

ပူဇေတွာတ’ဉဇလိမုကုလိကာ ဧကမန္တံ နိသိန္နာ၊

ဓမ္မံ သုတွာ သဝဏသုဘဂံ ဗုဒ္ဓပါမောက္ခသင်္ဃံ

သံယာစိတွာ မုဒိတဟဒယာ သွာတ္တယာ’ပဂဉ္ဇုံ၊ ()

၅။ ¶

သဇ္ဇေတွာ တေ ဒုတိယဒိဝသေ သဇ္ဇနာ ဒါနသာလံ

ဥဿာပတ္တာ ဓဇကဒလိယော ပုဏ္ဏကုမ္ဘေ ဌပေန္နာ၊

ကုဗ္ဗန္တာ’ပိ ဓဝလသုဠိနု’က္ခေပ လာဇောပဟာရံ

ဧဝံ တဿာ’ဂမန မယနံ လင်္ကရောန္တာ ဝိဟာသုံ၊ ()

၆။

အဗ္ဘုဂ္ဂန္တွာ အထ ဟိမဝတာ သော သုမေဓော တပဿိ

ဂစ္ဆံ တေသံ ဥပရိ နဘသာ ဝါကစီရံ ဓုနန္နော၊

ဒိသွာ ပီတိပ္ပမုဒိတဇတေ အဉ္ဇသံ သောဓယန္တေ

သဉ္ဈာမေဃော ရိဝ ပရိလသံ ဓတရိတ္ထေ’ကမန္တံ၊ ()

၇။

သံသောဓေန္တာ ကလလဝိသမဋ္ဌာန သင်္ကာရဓာနံ

ကသ္မာ တုမှေ ပဋိပထမိမံ’လင်္ကရောထာ’တိ ပုစ္ဆိ၊

ဘန္တေ ဒီပင်္ကရတရဟရိ’ဒါနိ နိဿာယ ရမ္မံ

ဗုဒ္ဓါ ဟုတွာ ဝိဟရတိ မဟာဓမ္မသင်္ခံ ဓမန္တော၊ ()

၈။ ¶

သော သမ္ဗုဒ္ဓါ ပရိဝုတမဟာဘိက္ခုသင်္ဃော ယတော နော

ဂါမက္ခေတ္တံ ပဝိသတိ တတော’လင်္ကရောမာ’ဗြုဝိံသု၊

ဗုဒ္ဓူပ္ပာဒေါ ကိမုတ သုတရံ ဒုလ္လဘော ဗုဒ္ဓသဒ္ဒေါ

ဣစ္စေဝံသော သုမရိယ အလင်္ကတ္တုကာမော’သိ မဂ္ဂံ၊ ()

၉။

ဈာနာ’ဘိညာ ရတတကဝစု’ဇ္ဇောတမာန’တ္တဘာဝေါ

သဒ္ဓါယေ’သော အစလသဒိသော ဣဒ္ဓိမာ တာပသော’တိ၊

သလ္လက္ခေတွာ ကလလဝိသမံ ဒုဂ္ဂမဂ္ဂပ္ပဒေသံ

သဇ္ဇေတုံ တေ သပဒိ မုဒိတာ သာဓဝေါ တဿ’ဒံသု၊ ()

၁၀။ ¶

နာနာပုပ္ဖံ ဇလဇထလဇံ ဩစိနိတွာ ဝနမှာ

တေတွာ ဒေဝါသုရဘဝနတော ကောဝိဠာရာဒိပုပ္ဖေ၊

အာနေတွာ’ဟံ ဘုဇဂဘဝတာ ဖုလ္လကဏ္ဍုပ္ပလာနိ

ဆေကောသ္မီ’တိ ဝိထရိယ ပထံ ဣဒ္ဓိယာ သံဝိဓာတုံ၊ ()

၁၁။

ကတွေ’ဝံ မေ ဟဒယမကုဠံ တောဝိကာသေယျ တသ္မာ

ဝေယျာဝစ္စံ ဝိသဒမတိနော ကာယိကံ သံဝိဓာယ၊

အဇ္ဇေဝါ’ဟံ ဝိပုလကုသလံ သဉ္စိနိဿ’န္တီ ဓီရော

သံသောဓေတုံ ကလလကလုသံ အဉ္ဇသံ အာရဘိတ္ထ၊ ()

၁၂။

ပဿန္တာနံ ဝိမလနယနော’ဘာသ ဇိမူတဂဗ္ဘေ

ဗုဒ္ဓါဗုဒ္ဓါ’တျ’ဘိဟိတဝစော ဝိဇ္ဇုရာဇီဝ စာရီ၊

တသ္မိံ ပင်္ကေ နိဇကရတလ’မေဘာဇပစ္ဆိဟိ ဓီမာ

ပံသုံ ဒတွာ ရဇတဓဝလံ ဝါလုကံ ဝေါကိရန္တော၊ ()

၁၃။ ¶

တသ္မိ ဌာနေ ကလ္လလုလိတေ သုဋ္ဌု နာ’လင်္ကတေဝ

သဒ္ဓိံ ဒီပင်္ကရ’နဓိဝရော’နေကခီဏာသဝေဟိ၊

ပတ္တော ဗြဟ္မာ’မရနရဖဏိသိဒ္ဓဝိဇ္ဇာဓရာနံ

သံဝတ္တန္တေ သုဝိပုလမဟေ ပါဋိဟီရေ ဥဠာရေ၊ ()

၁၄။

ဟေမ’မ္ဘောဇော’ပမသုဝဒနံ မဏ္ဍိတံ လက္ခဏှော-

သီတျာ’နုဗျဉ္ဇနဝိလသိတံ ကေတုမာလာဝိလာသံ၊

သတ္ထာရံ တံ ဒိသိဒိသိ ပဘာနိစ္ဆရန္တ’ဉ္ဇသမ္ဘိ

အာဂစ္ဆန္တံ ဝိယ မဏိတလေ မတ္တမာတင်္ဂရာဇာ၊ ()

၁၅။ ¶

ဩလောကေတွာ ဝိမလနယနဉ္စန္ဒနိလုပ္ပလာနိ

ဥမ္မိလေတွာ ရတနဖလကံ အက္ကမန္တောဝ ပိဋ္ဌိံ၊

နာနာခီဏာသဝပရိစုတော ကဒ္ဒမံ နာ’က္ကမိတွာ

သမ္ဗုဒ္ဓါယံ ဝဇတု ဣတိ မေ ဒီဃရတ္တံ ဟိတာယ၊ ()

၁၆။

သလ္လက္ခေတွာ ခရ’ဇိနဇဋာဝါကစီရာနိ ကေသေ

ဩမုဉ္စိတွာ ဝိသမကလလေ ပတ္ထရိတွာ’တ္တဘာဝံ၊

သေတုံ ကတွာ ပရမပဏိဓီ ကောမိနီ စောဒိတ’တ္တော

ပဉ္စာ’ဘိညာရတနမဏိမာ သွာ’စကုဇ္ဇော နိပဇ္ဇိ၊ ()

၁၇။

သုတွာ ဂါထာပဒမ္ပိ န မေ ဘာရိယံ သံကိလေသေ

ဝိဒ္ဓံသေတွာ ဝရသိဝုရံ ပတ္တုမိစ္ဆေ သစာ’ဟံ၊

သံဝိဇ္ဇန္တေ တိဘဝဘဝနေ ဒုက္ခိတာ’နန္တသတ္တေ

သော’ဘံ ဧကော ကထမဓိဂမေ ဓမ္မ မညာတဝေသော၊()

၁၈။ ¶

ယန္နူနာ’ဟံ ပရဟိတရတော သမ္မဒညာယ ဗောဓိံ

အာရောပေတွာ နိခိလဇနတံ’နုတ္တရံ ဓမ္မနာဝံ၊

ဥတ္တာရေတွာ ဝရသိဝပုရံ ဝဋ္ဋဒုက္ခောဒဓိမှာ

ပစ္ဆာ ဒီပင်္ကရမုနိ ယထာ နိဗ္ဗုတိံ ပါပုဏိဿံ၊ ()

၁၉။

ဣစ္စေဝံ သော ပုမရိယ သမောဓာနယိတွာ’ဋ္ဌဓမ္မေ

သံသာရမှာ’ဝတရဏမဟာသေတုရူပေါ ပဇာနံ၊

မုဒ္ဓါဗဒ္ဓ’ဉ္ဇလိပုဋဇဋော ပင်္ကပိဋ္ဌေ နိပန္နော

သမ္ဗောဓတ္ထံ ပဏိဓိမကရိ တာဝ တပ္ပာဒမူလေ၊ ()

၂၀။ ¶

ဥဿိသဌော သပဒိ ဘဂဝါ ပဉ္စဝဏ္ဏပ္ပသာဒံ

ဥမ္မီလေတွာ နယနယုဂလံ ဖုလ္လနီလုပ္ပလာဘံ၊

ဒိသွာ နီလောပလမဏိမယံ ဝါတပါနဉ္စယံ’ဝ

ဥဂ္ဃာဋေန္တော ဣသိဝရမှာပင်္ကဇံ ပင်္ကပိဋ္ဌေ၊ ()

၂၁။

ဧတဿိ’ဇဈိဿတိ ဣတိ အယံ ပတ္ထနာ’နာဂတံသ-

ဉာဏံ သမ္မာ ပတိနိယ ဣတော ကပ္ပလက္ခာဓိကာနံ၊

အာဝဇ္ဇေန္တော ဥပရိ စတုရာသင်္ခိယာနန္တျ’ဝေဒိ

ပတွာ ဗောဓိံ အဟမိဝ သိယာ ဂေါတမော နာမ ဗုဒ္ဓါ၊ ()

၂၂။

တုမှေ သမ္ပဿထ ဣတိ ဣမံ တာပသံ သင်္ဃမဇ္ဈေ

ဝတွေ’ဝံ သော ပဒမသဒိသံ ဓမ္မရာဇာ ဒဒန္တော၊

သမှိန္ဒိတ္ထာ’ဓရကိသလယာ’လတ္တကံ နာဂတံယ-

ပညာမုဒ္ဒါ’င်္ကိတပဒသတံ ဝတ္တသန္ဒေသဂဗ္ဘံ၊ ()

၂၃။ ¶

ဝါသဋ္ဌာနံ ကပိလနဂရံ နာမ မာသာမဟေသိ

မာတာ သုဒ္ဓါဒနနရပတိ တေ ပိတာ’ဒိစ္စဝံသေ၊

ဗိမ္ဗာ ဗိမ္ဗာ ဓရဝတိ ပိယာ ဟေမ ဗိမ္ဗာ ဘိရာမာ

တသ္မိံကာလေ တနုဇရတနံ ရာဟုလော ဟေဿတေ တေ၊ ()

၂၄။

ဟေဿန္တေ တေ ပဌမဒုတိယဿာဝကာ သာရိပုတ္တ-

မောဂ္ဂလ္လာနာ ဒွိဇကုလဘဝါ ဘုရိပညိဒ္ဓိမန္တော၊

အာနန္ဒာချော ယတိ ပတိ ရုပဋ္ဌာယကောသာဝိကာနံ

ခေမာထေရိ ပရမ ယုဂလံ ဥပ္ပလဗ္ဗဏ္ဏထေရိ၊ ()

၂၅။ ¶

အဿတ္ထော တေ ဝိဇယဝိဋပီ တွဉ္စ ခေါ ဂေါတမဝှော

ဆဗ္ဗဿာနီ ပဒဟိယ ဃရာ နိက္ခမိတွာ သကမှာ၊

ပါယာသဂ္ဂံ ပရိဝိသိယ ဘော တွံ သုဇာတာယ ဒိန္နံ

ဗောဓိံ ဗုဇ္ဈိဿသိ ဣတိ ဓုဝံ ဗောဓိမူလေ နိသဇ္ဇ၊ ()

၂၆။

သတ္ထာ သဉ္ဈာဃနပဋလတော မုတ္တဝိဇ္ဇုလ္လတေ၊ဝ

သန္ဒဿေတွာ နိဇဘုဇလတံ စီဝရဗ္ဘန္တရမှာ၊

ပချာကာသိ ဇလဓရရဝါ’ကာရဂမ္ဘီရဃောယံ

နိစ္ဆာရေတွာ သုရဓနုရိဝေါ’ဘာသ ဆဗ္ဗဏ္ဏရံသိ၊ ()

၂၇။

အမှေ ဒီပင်္ကရဘဂဝတော သာသနေ နာ’ဝဗုဒ္ဓါ

လစ္ဆာမာ’တိ တဝ ပရိမုခေ’ဝါ’ယတိံ မောက္ခဓမ္မံ၊

တသ္မိံ ပတ္တာ’ခီလ သုရနရာပတ္ထယုံ တင်္ခဏေဝံ

ပူဇေတွာ’တဉ္ဇလိသရသိဇေ ပါဒပီဌမှိ တဿ၊ ()

၂၈။ ¶

ဗုဒ္ဓါ ဗြဟ္မာမရနရသိရော စုမ္ဗိတင်္ဃီ သရောဇော

သမ္ပူဇေတွာ’ဋ္ဌဟိ ဇဋိလကံ ပုပ္ဖမုဋ္ဌီဟိ တမှာ၊

ပက္ကာမိ သော ကနကသိခရီဟာရိ ကိဉ္ဇက္ခဘာရေ

ဥဗ္ဘူတ’မှောရုဟဝနသိရေ အပ္ပယန္တော ပဒါနိ၊ ()

၂၉။

ရမ္မံ ရမ္မံ မဟီယ ဇဋိလံ ပုပ္ဖမုဋ္ဌီဟိ ကတွာ

ခီဏာ ခီဏာသဝဝသိဂဏာ ဒက္ခိဏံ ပက္ကမိံသု၊

ဒေဝါ’ဒေဝါ ပဝုရမကရုံ ဝန္ဒနာမာနပူဇံ

ဒီပံ ဒီပင်္ကရဒသဗလဉ္စာ’နုဂန္တွာ နိဝတ္တာ၊ ()

၃၀။ ¶

တမှာ ဌာနာ ဂတသတိ ဇနေ သန္နိသိန္နဿ တဿ

ပလ္လင်္ကေနာ’မရနရ ပရိစ္စန္တ ပုပ္ဖာသနမှိ၊

ဇာတိက္ခေတ္တာ တဟိမုပဂတာ ဒေဝတာ ဧတမတ္ထံ

အာရောစေသုံ မဟိတဝရဏာ အဉ္ဇလိမဉ္ဇရီဟိံ၊ ()

၃၁။

ပုဗ္ဗေ ပုပ္ဖာသနုပရိ သမာရူဠှဗုဒ္ဓင်္ကုရာနံ

အဒ္ဓါနေ’ဝေ’တရဟိ ဘဝတောစာ’သနာရောဟဏမှိ၊

ဧကာလောကာ ဒသဟိ ဂုဏိတာ လောကဓာတု သဟဿီ

သံဝတ္တန္တေ တွမနဝရတံ ဟေဿသေ တေန ဗုဒ္ဓါ၊ ()

၃၂။

တာသံ ဝါစံ သဝဏမဓုရံ ဒေဝတာနံ နိသမ္မ

ဘိယျော စိတ္တပ္ပဘဝဝီရိယော ပီတိဝိပ္ဖာရိတတ္တော၊

ပုဗ္ဗေ သတ္တုတ္တမပရိစိတာ ဗောဓိသမ္ဘာရဓမ္မာ

အာဝဇ္ဇေသိ ကတိ ဣတိ သုဓီ ဓမ္မဓာတုံ သဟေတုံ၊ ()

၃၃။ ¶

ဩကုဇ္ဇိတွာ ဓရဏိဌပိတော ပုဏ္ဏ ကုမ္ဘော သုမေဓ

ဝိဿန္ဒေတွာ သလိလမခိလံ ကိန္တုပစ္စာဟရေထ၊

ဧဝံ ဒတွာ ဓနသုတကလတ္တ’င်္ဂပစ္စင်္ဂဇီဝေ

နိဗ္ဗိန္နော မာ ဘဝိ’တိ ပဌမံ ပါရမိံ’ဓိဋ္ဌဟိ သော၊ ()

၃၄။

နာ’ပေက္ခိတွာ ယထရိဝ နိဇံ ဇီဝိတံ ဇီဝိတံ’ဝ

ရက္ခန္တော သဉ္စရတိ စမရိ စာမရ စန္ဒိကာဘံ၊

ဧဝံ သီလံ ဝရသိဝပုရဒွါရမာရက္ခ ဓီရ

အဇ္ဈိဋ္ဌာသိ ဣတိ သဒုတိယံ ပါရမိံ သုဒ္ဓသီလော၊ ()

၃၅။ ¶

သံဝိဂ္ဂေါ ယော စိရပရိဝသံ ဃောရကာရာဃရမှိ

မုတ္တီံ တမှာ’ဂမယတိ ယထာ ဟောဟိ နေက္ခမ္မနိတ္တော

နိဗ္ဗိန္နော တွံ တထရိဝ ဘဝေ ဗန္ဓနာဂါရရူပေ

အဇ္ဈိဋ္ဌာသိ တတိယမ္ပိ သော ပါရမိန္တျေ’ကစာရီ၊ ()

၃၆။

ဟီနုက္ကဋ္ဌံ ကုလမနုဃရံ ဘိက္ခကော ဘိက္ခု ဘိက္ခံ

အဏွာဟိဏ္ဍံ လဘတိ နစိရံ သံဝရဋ္ဌော ယထေ’ဝံ၊

သမ္ဗောဓတ္ထ ဘဇ ပဋိဗလေ ပဏ္ဍိတေ ပုဋ္ဌပဉှော

အဇ္ဈိဋ္ဌာသိ တွမိတိ မတိမာ ပါရမိံ သော စတုတ္ထိံ၊ ()

၃၇။

နိစ္စုဿာဟော ဝိစရတိ ယထာ ကေသရီ သေရိစာရီ

ဧဝံ ဌာနေ ဂမနသယနေစာ’သနေ တွံ သုမေဓ၊

ဥဿောဠှီ တျာသိထိလဝီရိယော ဟောတိ သမ္ဗောဓနတ္ထံ

အဇ္ဈီဋ္ဌာသိ ထိရဝီရိယဝါ ပဉ္စမိံ ပါရမိံ သော၊ ()

၃၈။ ¶

ဣဋ္ဌာနိဋ္ဌံ ပထဝိရိဝ ဘော သဗ္ဗမာနာဝမာနံ

နာပဇ္ဇိတွာ မနသိဝိက္တိံ တွံ သဟန္တော ခမန္တော၊

သမ္ဗောဓတ္ထံ ပရဝဓခမော ဟောဟိ’တီ ခန္တိဝါဒီ

အဇ္ဈိဋ္ဌာသိ ပရဟိတရတော ဆဋ္ဌမိံ ပါရမိံ သော၊ ()

၃၉။

ဝီထိံ နာတိက္ကမတိ နိယမံ ဩသဓီတာရကာ’ယံ

ဧဝံ သန္တုတ္တမ ပရိစိတံ သစ္စဝါစံ သုမေဓ၊

တွံ မာဝိတိက္ကမိ ကရဟစိ ဗောဒ္ဓုကာမော သုဗောဓိံ

အဇ္ဈိဋ္ဌာသိ’တျ’ဝိတထကထိ သတ္တမိံ ပါရမိံ သော၊ ()

၄၀။ ¶

တမှာဌာနာ ဗလဝပဝနေ ဝါယမာနေ’ပိ ထောကံ

ကပ္ပဋ္ဌာသိ တစလတိ ယထာ ပဗ္ဗတော သုပ္ပတဋ္ဌော၊

တွံ တိဋ္ဌာဟိ တထရိဝ အဓိဋ္ဌာနဓမ္မေသု ဒဠှံ

အဇ္ဈိဋ္ဌာသီ’တျဝလသဒိသော စ’ဋ္ဌမိံ ပါရမိံ သော၊ ()

၄၁။

ဩတိဏ္ဏေသု ဥဒကရဟဒေါ ဘော နိဟီနုတ္တမေသု

သီတတ္တံ သမ္ဖရတိ ဟိ သမံ ဝါရိနာ ဘာဝယေနိ၊

မေတ္တာယေဝံ တိဘဝဘဝနေ သဗ္ဗသတ္တေသု တုလျံ

အဇ္ဈိဋ္ဌာသိ သမုတိ နဝမိံ ပါရမိံ မေတ္တ စိတ္တော၊ ()

၄၂။

ဣဋ္ဌာနိဋ္ဌေ သတိ ပဋိဟတေ ဝတ္ထုဇာတေ ယထာဟိ

မဇ္ဈတ္တာ’ယံ ဝသုမတိဝဓူ ဟောတိ ဒုက္ခေ သုခေက ဝါ၊

ဧဝံ ဘော တွံ ဘဝ သမတုလာသန္တိဘော’ပေက္ခ ကော’တိ

အဇ္ဈိဋ္ဌာသိ သဝသိ ဒသမိံ ပါရမိံ ဘုရိမေဓော၊ ()

၄၃။ ¶

အာလောလေန္တော တိဒသပမိတံ ပါရမိသာဂရံ သော

သတ္တာဓိသော နိသိတမတိမာ ဉာဏမတ္ထာ’စလေန၊

အာဝဇ္ဇေသိ ဝသုမတဝဓု သာဓုကာရံ’ဝ ဒေန္တိ

သံကမ္ပိ သမ္ပတိ သတိမတော ဓမ္မတေဇေန တေန၊ ()

၄၄။

ဘီရူစ္ဆမှီ ဃဏပထဝိယာ ကမ္ပမာတာယိ’မာယ

ပတွာ ဒီပင်္ကရဘဂဝတော ရမ္မဝါသီ သမီပံ၊

သမ္ပုစ္ဆိံသု ဝသုမတိ ဘုသံ ကမ္ပိ တံကိဿဟေတု

အာဝဇ္ဇေတွာ သမုတိ မုနိနော တမ္ပဝတ္တိံ ကထေသိ၊ ()

၄၅။

နိက္ကင်္ခါ တေ ပုနပိ နဂရာ နာဂရာ တံ ဥပေစ္စ

သမ္ပူဇေသုံ စရဏယုဂလံ ဂန္ဓမာလာဒိကေဟိ၊

ကတွာ တေန’ဉ္ဇလိသရသိဇေ ယေန ဒီပင်္ကရေ’ဏော

ဥဋ္ဌာသိ သော ပုရိသတိသဟော သန္နီသိန္နာသနမှာ၊ ()

၄၆။ ¶

မာ တေ ရောဂေါ ဘဝိ ပဋိဘယံ မာ ဘဝိ ဆမ္ဘိတတ္တံ

သင်္ကပ္ပော တေ ပရမပဏိဓိ သိဇ္ဈတံ ခိပ္ပမေဝ၊

ဣတ္ထဉ္စာ’သိထုတိပဒသတံ ဇာတိခေတ္တာ ဂတာ တံ

ပုပ္ဖာဒီဟိ မဟီယ ဇဋိလံ နိဇ္ဇရာ ဗျာဟရိံသု၊ ()

၄၇။

အဗ္ဘုဂ္ဂန္တွာ ပဝနပဒဝိံ ဒေဝတာနံ မနာနိ

ဗောဓာတွော ဟိမဝတိ သကံ အဿမံ တာပသော သော၊

ပတ္တော အတ္ထာစလမုပဂမီ တင်္ခဏေ ရံသိမာလီ

သင်္ကောစေတွာ သရသိဇဝနံ သံဟရိတွာ’ံသုဇာလံ၊ ()

၄၈။ ¶

ရမ္မံ ဒီပင်္ကရဘဂဝတော ရမ္မဝတျာ’ဘိဓာနံ

ဝါသဋ္ဌာနံ ဇနကဇနနီ ဒွေ သုဒေဝဿုမေဓာ၊

နိစ္စောပဋ္ဌာယကယတိဝရော သာဂတောမင်္ဂလောစ

တိဿောစာ’သုံ ပဌမဒုတိယဿာဝကာ ထေရနာဂါ၊ ()

၄၉။

နာနာခီဏာသဝပရိဝုတော စာ’သိ နန္ဒာ သုနန္ဒာ

တဿာ’ဟေသုံ ပဌမဒုတိယဿာဝိကာ အဂ္ဂဘူတာ၊

ကာယော’သိတိရတနပမိတော ပိပ္ဖလိနာမဗောဓိ

အဋ္ဌာသိ သော ပစုရဇနတံ တာရယံ ဝဿလက္ခံ၊ ()

၅၀။

သတ္ထာ ဒီပင်္ကရဝှော သုရနရသရဏောဒီပဒီပေါစိရဿံ

ဒီပေဝေါ ဓမ္မဒီပံ တိဘုဝနဘဝနေ ဝီတ’ဝိဇ္ဇန္ဓကာရံ

အဂ္ဂိက္ခန္ဓော’ဝဘာသံ ဝိဟရိယ ပရိနိဗ္ဗာယိ ခီဏာသဝါ’ပိ

ခီဏသ္နေဟာပဒီပါယထရိဝ အရိယာ သာဝကာ နိဗ္ဗုတာ’သုံ၊ ()

ဣတိ မေဓာနန္ဒာဘိဓာနေန ယတိနာ ဝိရစိတေ သကလကဝိဇန ဟဒယာနန္ဒဒါနနိဒါနေ ဇိတဝံသဒီပေ ဒူရေနိဒါနေ သုမေဓ တာပသဿ မူလပဏိဌာနဋ္ဌပနပဝတ္တိ ပရိဒီပေါ ဒုတိယော သဂ္ဂေါ။

၁။ ¶

လောကံ (’ဝသန္တတိလကော) ကုမုဒါကရံ မာ

ကောဏ္ဍညနာမဘဂဝါ’ထ ပဗောဓယတ္တော၊

ဇာတော တဒါ ဝရမတီ ဝိဇိတာဝိ ရာဇာ

သမ္ပန္န စက္ကရတနော’ဘဝိ စက္ကမတ္တိ၊ ()

၂။

သင်္ဃဿ ဗုဒ္ဓပမုခဿ ဥဠာရဒါနံ

ဒတွာ ဝိဓာယ ပဏိဓိံ ဝရဗောဓိယာ သော၊

ရဇ္ဇံ ပဟာယ ဇိနသာသနမောတရိတွာ

ဈာနာနျ’လတ္ထ ပဋိလင်ွရပ္ပဒါနော၊ ()

၃။ ¶

တဿာ’သိ ရမ္မဝတိနာမ ပုရံ သုနန္ဒော

ရာဇာ အဟောသိ ဇနကော ဇနနီ သုဇာတာ၊

ဘဒ္ဒဿုဘဒ္ဒသမဏာ ဝရသာဝကာ’သုံ

တိဿော’ပတိဿ’သမဏိ ဝရသာဝိကာယော၊ ()

၄။

လက္ခာယုကော ဝိဇယဗောဓိ ဝိသာလသာလ-

ကလျာဏိ နာမ တဒုပဋ္ဌဟိ စာ’နုရုဒ္ဓါ၊

တဿာ’ဋ္ဌ သီတိရတနပ္ပမိတံ သရီရံ

အာသုံ တယော အရိယသာဝကသန္နိပါတာ၊ ()

၅။

တဿာ’ပရေန သမယေနိ’ဟ’နင်္ဂဘင်္ဂေါ

ဥပ္ပဇ္ဇိ မင်္ဂလဇိနော ဇနမင်္ဂလာယ၊

ဗုဒ္ဓင်္ကုရော’တိရုစိရော သုရုစီ သမညော

အာသိ တဒါ’ဝတိသုရော ဒွိဇဝံသကေတု၊ ()

၆။ ¶

ဒတွာ သသာဝကဇိတဿ ဒိနာနိ သတ္တ

ပတ္ထေသိ ဗောဓိမသမံ ဂဝပါနဒါနံ၊

ပဗျာကတော ဘဂဝတာ ဘဝနာ’ဟီဂန္တွာ

ပဗ္ဗဇ္ဇိတော သုခမဝိန္ဒိ သမာဓိဇံ သော၊ ()

၇။

တဿု’န္တရံ ပုရဝရံ ပိတရော’တ္တရ’ဝှာ

အာသုံ သုဒေဝသမဏော ဝသိ ဓမ္မသေနော၊

တဿာ’ဂ္ဂသာဝကယုဂံ သကသာဝိကာနံ

ဘဒ္ဒံယုဂံ အဘဝိ သိဝလိစာ’ပျ’သောကာ၊ ()

၈။ ¶

တံ ပါလိတော ဇိနမုပဋ္ဌဟိ အဋ္ဌ’သီတိ

ဟတ္ထော’သိ တဿ ဝဇိရူပမရူပကာယော၊

ဗောဓီ’ပိ နာဂတရု သာဝကသန္တိပါတာ

အာသုံ တယော နဝုတိဝဿသဟဿမာယု၊ ()

၉။

တဿာ’ပရေန သုမနော ကရုဏာနိဓာနော

နာထော မနောဇမထနော ဥဒပါဒိ လောကေ၊

ဗုဒ္ဓင်္ကုရော’ဘဝိ တဒါ’တုလနာဂရာဇာ

တေဇ’ဂ္ဂိဇာလဇလိတော အတုလိဒ္ဓိမာ သော၊ ()

၁၀။

နာဂေါ’ပိ နာဂဘဝနမှိ သသာဝကဿ

ဗုဒ္ဓဿ ဒိဗ္ဗတုရိယေဟိ ကတုပဟာရော၊

ဒတွာန ဒါနမတုလံ ပဏိဓိံ အကာသိ

ဗုဒ္ဓါ ဘဝိဿသိ တုဝန္တိ အဟာသိ ဗုဒ္ဓါ၊ ()

၁၁။ ¶

ခေမဝှယံ ပုရမဟူ ဇနကော သုဒန္တော

ရာဇာ ဇနေတ္တိ သိရိမာ နိဇသာဝကာနံ၊

အဂ္ဂါ ဘဝိံသု သရဏော ဝသိ ဘာဝိတတ္တော

သောဏာ တဒဂ္ဂသမဏိ’သိ တထု’ပသောဏာ၊ ()

၁၂။

တဿာ’သိ နာဂတရု ဗောဓိ ဥဒေနတေရော-

ပဋ္ဌာယကော နဝုတိဝဿသဟဿမာယု၊

ဥဗ္ဗေဓတော နဝုတိဟတ္ထမိတံ သရီရံ

အာသုံ တယော အရိယသာဝကသန္နိပါတာ၊ ()

၁၃။

တဿာ’ပရေန ဥဒပါဒိ’ဟ ရေဝတာချော

ဒေဝါဒိဝန္ဒိတပဒေါ ဘုဝိ ဒေဝဒေဝေါ၊

သတ္တုတ္တမော ဘဝိ တဒါ အတိဒေဝနာမော

ဘောဝါဒိဝံသတိလကော စတုဝေဒဝေဒီ၊ ()

၁၄။ ¶

ဗဒ္ဓဉ္ဇလီ သိရသိ ဓမ္မကထံ နိသမ္မ

ဂန္တွာန တံ သရဏမုတ္တရမုတ္တရိယံ၊

ဒတွာ’ဟိပတ္ထယိ သုခေါဓိမထော မဟေသိ

ဗုဒ္ဓါ ဘဝိဿသိ တုဝန္တီ ဝိသာကရိတ္ထ၊ ()

၁၅။

တဿာ’သိ ဓညဝတိနာမ ပုရံ ဇိနဿ

မာတာ မဟေသိ ဝိပုလာ ဝိပုလော ပိတာ’သိ၊

သဗြဟ္မဒေဝဝရုဏော ဘဝိ သင်္ဃမဇ္ဈေ

ဘဒ္ဒါ စ ဘဒ္ဒယုဂလံ ဒုဝိဓံ သုဘဒ္ဒါ၊ ()

၁၆။

တံ သမ္ဘဝေါ ဝသိ ဥပဋ္ဌဟိ နာဂဗောဓိ

ရုက္ခောပျ’သိတိရတနံ ဘဝိ အတ္တဘာဝေါ၊

အာယုပ္ပမာဏမ္ပိ သဋ္ဌိသဟဿဝဿံ

အာသုံ တယော အရိယသာဝကသန္နိပါတာတ၊

၁၇။ ¶

တဿာ’ပရမှိ သမယေ ဇနပါရိဇာတော

ဥပ္ပဇ္ဇိ သောဘိတဇိနော ဇိတပဉ္စမာရော၊

အဇ္ဈာယကော သကလဝေဒ မုဠာရဘောဂီ

ဗုဒ္ဓင်္ကုရော ဘဝိ တဒါ’ဇိတနာမဝပ္ပော၊

၁၈။

ဓမ္မံ နိသမ္မ သရဏေသု ပတိဋ္ဌဟိတွာ

သင်္ဃဿ ဗုဒ္ဓပမုခဿ ဥဠာရဒါနံ၊

ဒတွာ ပဓာနပဏိဓာန မကာသိ ဓီရော

တွံ လစ္ဆသိ’တိ ဝရဗောဓိ မဟာသိ သတ္ထာ၊ ()

၁၉။

ရမ္မံ သုဓမ္မမဟု တဿ ပုရံ သုဓမ္မော

ရာဇာ အဟောသိ ဇနကော ဇနိကာ သုဓမ္မာ

တဿာ’ဂ္ဂသာဝကယုဂံ အသမော သုနေတ္တော

တဿာဝိကာ’ဂ္ဂယုဂလံ နကုလာ သုဇာတာ၊ ()

၂၀။ ¶

နာဂဿ နာဂတရု ဗောဓိ သရီရမဋ္ဌ-

ပဏ္ဏာသဟတ္ထပမိတံ တမတောမထေရော၊

သောပဋ္ဌဟီ နဝုတိဝဿသဟဿမာယု

အာသုံ တယော အရိယ သာဝက သန္နိပါတာ၊ ()

၂၁။

ဥပ္ပဇ္ဇိ တဿ အပရေန အနောမဒဿိ

ဗုဒ္ဓါ ပဗုဒ္ဓကမလာမလနီလနေတ္တော၊

ဗုဒ္ဓင်္ကုရော ဇိတသုရာရိ တဒါနိ ယက္ခ-

သေနာပတီ ဘဝိ မဟိဒ္ဓိမဟာနုဘာဝေါ၊ ()

၂၂။

သမ္ဗောဓိ မဂ္ဂပုရိသော ပဏိဓာနယံ သော

သင်္ဃဿ ဗုဒ္ဓပမုခဿ ဥဠာရဒါနံ၊

ပါဒါသိ တိသု သရဏေသု ပတိဋ္ဌဟိတွာ

ဗုဒ္ဓါ ဘဝိဿသိ တုဝန္တိ ဇိနော’ဗြုဝိတံ၊ ()

၂၃။ ¶

ဌာနဉှိ စန္ဒဝတိနာမ ယသောဓရာချာ

မာတာ မဟေသိ ယသဝါ ဇနကော ဇနိန္ဒော၊

တဿ’ဂ္ဂသာဝကယုဂံ နိသဘော အတောမော

ဒွေ သုန္ဒရီ စ သုမနာ စရသာဝိကာ’သုံ၊ ()

၂၄။

ဗောဓီ’ပိ တဿ ကကုဓော မုနိဒေဟမဋ္ဌ-

ပဏ္ဏာသဟတ္ထပမိတံ ဝရုဏာဘိဓာနော၊

ထေရော ဥပဋ္ဌဟိ စ လက္ခပမာဏမာယု

အာသုံ တယော အရိယသာဝကသန္နိပါတာ၊ ()

၂၅။

တဿာ’ပရေန ပဒုမော ဒိပဒါနမိန္ဒော

ဇာတော ပဗုဇ္ဈိတမနောပဒုမော ပဇာနံ၊

ဓီရော ဗဘူဝ ဝရဝါရဏကုမ္ဘဘေဒီ

သီဟော တဒါ ရုစိရကေသရဘာရဂီဝေါ၊ ()

၂၆။ ¶

ဗုဒ္ဓံ နိရောဓသုခဝေဒိယနံ ဝတမှိ

သတ္တာဟမက္ခိပဒူမေဟိ တမစ္စယိတွာ၊

စိတ္တံ ပသာဒိယ ပုနာ’ဂတသာဝကေသု

သီဟော ဝိဘာသိ ပဋိလဒ္ဓဝရပ္ပဒါနော၊ ()

၂၇။

တဿာ’သိ စမ္ပကပုရံ ပဒုမာဘိဓာနော

ရာဇာ အဟောသိ ဇနကော အသမာ ဇနေတ္တီ၊

သာလောပသာလယတယော ဝရသာဝကာ’သုံ

ရာမာ’ပိ တဿ ပရမာသမဏိ သုရာမာ၊ ()

၂၈။

နာမေနု’ပဋ္ဌဟိ ဝသိ ဝရုဏော တမဋ္ဌ-

ပဏ္ဏာသဟတ္ထမိတ မဿ သရီရမာ’သိ၊

ဗောဓိ’ပိ သောဏတရု လက္ခပမာဏမာယု

အာသုံ တယော အရိယသာဝကသန္နိပါတာ၊ ()

၂၉။ ¶

တဿာ’ပရေန ဝရဒေါ မုနိ နာရဒဝှော

ပါပန္ဓကာရနိကရံ ဘီဒုရော’ဒပါဒိ၊

ဗုဒ္ဓင်္ကုရော ဘဝိ တဒါ’ခိလဈာတဘိညာ-

လာဘီ ပဝတ္တဖလဘောဇိ တပေါဓနီသော၊ ()

၃၀။

ကတွာနု’ဠာရပဏိဓာန မုဠာရဝိရော

ဒတွာ သသာဝကဇိနဿ ဥဠာရဒါနံ၊

ပူဇေသိ တံ သုရဘိနာ ဟရိစန္ဒနေန

သတ္ထာပိ သမ္ပတိ ဝိယာကရဏံ အဒါသိ၊ ()

၃၁။

တဿာ’သိ ဓညဝတိနာမ ပုရံ သုမေဓော

ရာဇာ အဟောသိ ဇနကော ဇနနီ အနောမာ၊

ဒွေ ဘဒ္ဒသာလဇိတမိတ္တဝသိ ဝသိန-

မဂ္ဂေါ’န္တရာ သမဏိ ဖဂ္ဂုဏိ ဘိက္ခုနီတံ၊ ()

၃၂။ ¶

ဝါသေဋ္ဌဘိက္ခု တဒုပဋ္ဌဟိ ရူပကာယော

တဿာ’ဋ္ဌသိတိရတနံ မဟသောဏသာခီ၊

ဗောဓိဒ္ဒုမော နဝုတိဝဿသဟဿမာယု

အာသုံ တယော အရိယသာဝကသန္တိပါတာ၊ ()

၃၃။

တဿာ’ပရေန ပဒုမုတ္တရ ဓမ္မရာဇာ

ဇာတော တိလောကပဒုမော ပဒုမပ္ပိတင်္ဃီ၊

အဍ္ဎော ဥဠာရဝိဘဝေါ မဟရဋ္ဌိယော သော

ဗုဒ္ဓင်္ကုရော ဘဝိ တဒါ ဇဋိလာဘိဓာနော၊()

၃၄။

သမ္ဗောဓိယာ’ဓိဂမ ပစ္စယပတ္ထနံ သော

ဝိရောဝိဓာယ ပဒုမုတ္တရပါဒမူလေ၊

သင်္ဃဿ ဗုဒ္ဓပမုခဿ တိစိဝရာနိ

ပါဒါသိ တီသုရတနေသု အဘိပ္ပသန္နော၊ ()

၃၅။ ¶

တဿာ’သိ ဟံသဝတိနာမ ပုရံ ဇိနဿ

အာနန္ဒဘုပတိ ပိတာ ဇနိကာ သုဇာတာ၊

ဒွေ တဿ ဒေဝလသုဇာတဝသိ ဝသိနံ

အဂ္ဂါ ဘဝိံသု သမဏိသွာမိတာသမာ’ဂ္ဂါ၊ ()

၃၆။

လက္ခာယုကော သဇယဗောဓိက ဝိသာလသာလ

ရုက္ခော ဥပဋ္ဌဟိ မုနိံ သုမနာဘိဓာနော၊

တဿ’ဋ္ဌ’သိတိရတနပ္ပမိတံ သရီရံ

အာသုံ တယော ဘဂဝတော ဂဏသန္နိပါတာ၊ ()

၃၇။

တဿာ’ပရေန သမယေန သုမေဓနာမော

လောကမှိ ပါတုဘဝိ လောကဟိတာယ သတ္ထာ၊

ဗုဒ္ဓင်္ကုရော ကိရ တဒါနျု’ဘတော သုဇာတော

သွာ’သိတိကောဋိဝိဘဝေါ’တ္တရ မာဏဝေါ’သိ၊ ()

၃၈။ ¶

ဝိဿဇ္ဇိယာန ဝိဘဝံ တိံသတိကောဋိံ

ဒတွာန ဒါနမသ္မံ သုဂတေ သသင်္ဃေ၊

ပဗ္ဗဇ္ဇိတော ပရမဗောဓိ မပတ္ထယိတ္ထ

ဗျာကာသိ သောမုနိ တ’မိဇ္ဈနဘာဝ’မဒ္ဓါ၊ ()

၃၉။

ရမ္မံ သုဒဿနမဟူ နဂရံ သုဒန္တော

တဿာ’သိ ဘူပတိ ပိတာ ဇနနီ သုဒတ္တာ၊

သင်္ဃေသု’ဟောသု သရဏော ဝသိ သဗ္ဗကာမော

ရာမာ ယမာနိ ပရမာနျ’ဘဝုံက သုရာမာ၊ ()

၄၀။ ¶

ဗောဓီ’ပိ နီပတရု သာဂရနာမထေရော

’ပဋ္ဌာသိ တံ နဝုတိဝဿသဟဿမာယု၊

တဿာ’ဎသိတိရတနု’ဂ္ဂတမာသိ ဂတ္တံ

အာသုံ တယော သတိမတော ဂဏသန္တိပါတာ၊ ()

၄၁။

တဿာ’ပရေန သမယေန ဇနပ္ပဒီပေါ

ဇာတော သုဇာတဘဂဝါ ဇိတပဉ္စမာရော၊

သမ္ပန္နသတ္တရတတော ဝရစက္ကဝတ္တိ

ရာဇာ ဗဘူဝိ’ဟ မဟာပုရိသော တဒါသော၊ ()

၄၂။

ဓမ္မာ’မတေန မုဒိတော ရတနဒွယဿ

ဒတွာ သသတ္တရတနံ စတုဒီပရဇ္ဇံ၊

ပဗ္ဗဇ္ဇိ ဗောဓိပဏိဓိံ ပဏိဓာယ ဓီမာ

ဉတွာ မဟာမုနိ တမိဇ္ဈနဘာဝမာဟ၊

၄၃။ ¶

ရမ္မံ သုမင်္ဂလမဟူ ပုရမုဂ္ဂတာချော

ရာဇာ ပိတာဘဝိ ပဘာဝတိနာမ မာတာ၊

အဂ္ဂါဘဝိံသု စ သုဒဿနဒေဝထေရာ

နာဂါ ဂဏဿဒသိ နာဂသမာလထေရိ၊ ()

၄၄။

တံ နာရဒေါမုနိရု’ပဋ္ဌဟိ စ’တ္တဘာဝေါ

ပဏ္ဏာသဟတ္ထပမိတော ဘဝိဝေဏုဗောဓိ၊

တဿာ’ဘဝီ နဝုတိဝဿသဟဿမာယု

အာသုံ တယော ဓီတိမတော ဂဏသန္နိပါတာ၊ ()

၄၅။

တဿာ’ပရေနိ’ဟ နိရူပမရူပသာရော

ဇာတောဗဘူဝ ပိယဒဿိသမန္တဒဿိ၊

ဓီရော တဒနျ’ဘဝိ ကဿပမာဏဝေါ သော

ဝေဒေသု တီသု ကုသလော ကုသလံ ဂဝေသိ၊ ()

၄၆။ ¶

သော ကောဋိလက္ခပရိမာဏဓတဗ္ဗယေန

သင်္ဂဿ ဗုဒ္ဓပမုခဿ မဟာဝိဟာရံ၊

ကတွာ ပဒါသိ အဘိပတ္ထိတဗုဒ္ဓဘာဝေါ

ဗုဒ္ဓါ’ပိ တပ္ပဏိဓိသိဒ္ဓိ သိယာ’တျ’ဘာသိ၊ ()

၄၇။

စန္ဒာမဟေသိ ဇနနီ ဇနကော ပုဒိန္နော

ရာဇာ ဗဘူဝ ပုရမဿ အနောမနာမံ၊

အာသုံ တဒဂ္ဂယုဂလာနိ သုဇာတဓမ္မ-

ဒိန္နာ ဂဏဿဒသိ ပကာလိတသဗ္ဗဒဿိ၊ ()

၄၈။

တံ သောတဝှသမဏော သမုပဋ္ဌဟိတ္ထ

ဗောဓီ ပိယင်္ဂု ဘဂဝါ’သိ အသိတိဟတ္ထော၊

အဋ္ဌာသိက သော နဝုတိဝဿသဟဿမ’ဿ

အာသုံ တယော မတိမတော ဂဏသန္နိပါတာ၊ ()

၄၉။ ¶

တဿာ’ပရေန သမယေနု’ဒပါဒိ လောကေ

လောကတ္ထသာဓနရတော မုနိရ’တ္ထဒဿီ၊

သတ္တုန္တမော’ပိ နိရတိက္ကမဓမ္မသိမော

တေဇိဒ္ဓိမာ ဣသိ တဒါ’သိ သုသိမနာမော၊ ()

၅၀။

အာနီယ ဒိဗ္ဗဘဝနာ ကုသုမာနိ တဿ

မန္ဒာရဝါနိ သုပတိဋ္ဌိတပါဒပီဌေ၊

သမ္ပူဇိယာန ပဏိဓာနမကာသိ သတ္ထာ

တွံ မာဒိသော’ဗြုဝိ ဘဝိဿသိ စာ’ယတိန္တိ၊ ()

၅၁။

တဿာ’သိ သောဘိတပုရံ ဘဝိသာဂရဝှော

ရာဇာ ပိတာ ဇနတိဒေဝိ သုဒဿနာချာ၊

သန္တောပသန္တသမဏာ ဝရသာဝကာ’သုံ

ဓမ္မာ တဒဂ္ဂသမဏိပျ’ဘဝုံ သုဓမ္မာ၊ ()

၅၂။ ¶

တဉ္စာ’ဘယော မုနိရူပဋ္ဌဟိ သောပျ’သီတိ-

ဟတ္ထုဂ္ဂတော သတသဟဿပမာဏမာယု၊

စမ္ပေယျသာခိ ဘဝိ ဗောဓိ သုဗောဓိဟေတု

အာသုံ တယော အရိယသဝကသန္နိတာ၊ ()

၅၃။

တဿာ’ပရေန ဥဒပါဒိ’ဟ ဓမ္မဒဿီ

နိဿီမဓီ’နဓိဝရော ဘဝပါရဒဿိ၊

သော တာဝတိံသဘဝတမှိ မဟာနုဘာဝေါ

ဗုဒ္ဓင်္ကုရော ဘဝိ တဒါ ကိရ ဒေဝရာဇာ၊()

၅၄။

ဒိဗ္ဗာနိ ဂန္ဓကုသုမာနိ ကထာဂတဿ

စက္ကင်္ကိတောရုစရဏမ္ဗုရုဟာသနမှိ၊

ပူဇေသိ ဒိဗ္ဗတုရိယေဟိ စ ဗုဒ္ဓဘာဝံ

သော ပတ္ထယံ မုနိတမိဇ္ဈ နဘာဝမာဟ၊ ()

၅၅။ ¶

ဌာနိယမာသိ သရဏံ သုဂတဿ တဿ

ရာဇာ ပိတာ’သိ သရဏော ဇနနိ သုနန္ဒာ၊

အဂ္ဂါဘဝိံသု ပဒုမောဝသိ ဖုဿဒေဝေါ

ခေမာ စ ဘိက္ခုသမဏိသွ’ပိ သဗ္ဗနာမာ၊ ()

၅၆။

ထေရော သုနေတ္တဝိသုတော တဒုပဋ္ဌဟိ သော

လက္ခာယုကော’သိ ဇယဗောဓိ ဉ္စ ဗိမ္ဗိဇာလော၊

တဿာ’ပျ’သိတိရတနပ္ပမိတံ သရီရံ

အာသုံ တယော အရိယသာဝကသန္နိပါတာ၊ ()

၅၇။

တဿာ’ပရေန သမယေနိ’ဂ သိဒ္ဓဗောဓိ

သိဒ္ဓတ္ထနာမဝိဒိတော ဥဒပါဒိ သတ္ထာ၊

ဗုဒ္ဓင်္ကုရော ဘဝိ တဒါ’ခီလငဈာနလာဘီ

ဘောဇိ ပဝတ္တိတဖလံ ဝသိ မင်္ဂလာချော၊ ()

၅၈။ ¶

သမ္ပန္နဂန္ဓရသိကံ ပရိပက္ကမေကံ

အာနီယ သော ဝိပကုလဇမ္ဗုဘလံ ဝနမှာ၊

ပါဒါသိ တဿ ပဏိဓီကတဗုဒ္ဓဘာဝေါ

တဉ္စာနုဘုယ ဘဂဝါပိ ဝိယာကရိတ္ထ၊ ()

၅၉။

ဝေဟာရမာသိ နဂရံ ဇယသေနနာမော

ရာဇာ အဟောသိ ဇနကော ဇနနီ သုဖဿာ

ဘိက္ခူသု တဿ ဝသိ သမ္ဗဟုလော သုမိတ္တော

ဒွေ သီဝလိ ဉ္စ သမဏီသု ဝရာ သုရာမာ၊ ()

၆၀။

တံ ရေဝတောမုနိ မုနိန္ဒမုဋ္ဌဟိတ္ထ

ဗောဓီ’ပိ တဿ ကဏိကာရမဘီရုဟော’သိ၊

လက္ခာယုကော သ’နရသာရထိ သဋ္ဌိဟတ္ထော

အာသုံ တယော အရိယသာဝကသန္နိပါတာ၊ ()

၆၁။ ¶

တဿာ’ပရေနိ’ဟ သမုဗ္ဘဝိ နိဿနာမော

သတ္ထာ ပသတ္ထစရဏော စတုရော’ဃတိဏ္ဏော၊

ဗုဒ္ဓင်္ကုရော ဘဝိ တဒါနိ သုဇာတရာဇာ

ရာဇညမောဠိမဏိလင်္ကတပါဒပီဌော၊ ()

၆၂။

ဟိတွာ သ’ရဇ္ဇမိသိဝေယဓရော သုဓီရော

ဒိဗ္ဗေဟိ’နေကကုသုမေဟိ ဇိနံ ဝဇန္တံ၊

ပူဇေသိ မုဒ္ဓနိ တမာပဝိတာနသောဘံ

သတ္ထာ’ပိ တပ္ပဏိဓိသိဒ္ဓိ သိယာ’တျ’ဘာသိ၊ ()

၆၃။

ခေမံ ပုရဉှိ ဇနကော ဇနသန္ဓနာမော

ရာဇာ ဇနေတ္တိ ပဒုမာ နိဇသင်္ဃမဇ္ဈေ၊

ဒွေ ဗြဟ္မဒေဝုဒယ ဝိဿုတထေရနာဂါ

ဖုဿာ စ အဂ္ဂယုဂလာနျ’ဘဝုံ သုဒတ္တာ၊ ()

၆၄။ ¶

တံ သမ္ဘဝေါဝသိ ဝသိန္ဒမုပဋ္ဌဟိတ္ထ

တဿာ’သနဝှတရု ဗောဓိ သ’သဋ္ဌိတတ္ထော၊

အဋ္ဌာသိ ဝဿဂဏနာယ မဟေသိ လက္ခံ

အာသုံ တယော အရိယသာဝကသန္နိပါတာ၊ ()

၆၅။

တဿာ’ပရေန ဘဝသာဂရပါဒဿိ

ဖုဿော မဟာမုနိရိ’ဟကဗ္ဘုဒပါဒိ လောကေ၊

ဓီရော တဒါနိ ဝိဇိတာဝိ ဇိတာရိဝဂ္ဂေါ

ရာဇာ ဗဘူဝ သုရရာဇနိဘော’ရုတေဇော၊ ()

၆၆။

သမ္ဗောဓိ မဂ္ဂပုရိသော ပဏီဓာယ ဖီတံ

ရဇ္ဇံ ဝိဝဇ္ဇိယ သ’ပဗ္ဗဇိတော ဇနဿ၊

အညာယ တီဏိပိဋကာနိ ကထေသိ ဓမ္မံ

ဝျာကာသိ ဖုဿဘဂဝါ’ပိ’ဝ ပုဗ္ဗဗုဒ္ဓါ၊ ()

၆၇။ ¶

တဿာ’သိ ကာသိနဂရံ ဇယသေနနာမော

ရာဇာ ပိတာ’သိ ဇနတိ သိရိမာ မဟေသိ၊

သင်္ဃေသု’ဘောသု’ပိ သုရက္ခိတဓမ္မသေတာ

စာလာ တဒဂ္ဂယုဂလာနိ တထူ’ပဉ္စာလာ၊ ()

၆၈။

ဗောဓိဒ္ဒုမာ’မလကသာခိ သရီရမဋ္ဌ-

ပဏ္ဏာသဟတ္ထပမိတံ သဘိယာဘိဓာနော၊

သောပဋ္ဌဟီ နဝုတိဝဿသဟဿမာယု

အာသုံ တယော ဘကဝတော ဂဏသန္နိပါတာ၊ ()

၆၉။

တဿာ’ပရေန သနရာမရသတ္တသာရော

သတ္ထာ ဝိပဿိ’ဟ သမုဗ္ဘဝိ သဗ္ဗဒဿီ၊

ကမ္မေန ကေနစိ မဟိဒ္ဓိမဟာနုဘာဝေါ

ဗုဒ္ဓင်္ကုရော’ဘဝိ တဒါ’တုလနာဂရာဇာ၊ ()

၇၀။ ¶

အင်္ဂီရသဿ ဃနကဉ္စနဟဒ္ဒပီဌံ

ပါဒါသိ တဿ ခဝိတံ ရတနေဟိ နာနာ၊

သော ဗုဒ္ဓဘာဝမဟိပတ္ထိယ ဗောဓိသတ္တော

ဝျာကာသိ တတ္ထသုနိသဇ္ဇ ဇိနော ဝိပဿိ၊ ()

၇၁။

တဿာ’သိ ဗန္ဓုမတိနာမပုရံ တဒေဝ-

နာမော ပိတာ ဇနနိ ဗန္ဓုမတီ မဟေသိ၊

ဒွေ ခဏ္ဍတိဿဝသိနော ဝရသာဝကာ’သုံ

စန္ဒာ စ ဘဒ္ဒယုဂလံ ဘဝိ စန္ဒမိတ္တာ၊ ()

၇၂။

ဒေဟံ အသိတိရတတံ တမသောကထေရော-

ပဋ္ဌာသိ ဗောဓိဝိဋပီ ဘဝိ ကဏှဝဏ္ဋာ၊

ဝါသံအကာ မုနိရ’သီတိသဟဿဝဿံ

အာသုံ တယော အရိယသာဝကသန္နိပါတာ၊ ()

၇၃။ ¶

တဿာ’ပရေန အဓိသီလသမာဓိပညော

သတ္ထာ သမုဗ္ဘဝီ သိခီ ဇနကပ္ပသာခီ၊

ဓီရော တဒါ’ဘဝိ အရိန္ဒမနာမရာဇာ

သဒ္ဓါ ပဟူတရတတော ရတနတ္တယမှိ၊ ()

၇၄။

ဘိက္ခဉ္စ သတ္တရတနာဘရဏာဘိရာမံ

ဉတွာန ဟတ္ထိရတနံ သုဂတေ သသင်္ဃေ၊

သော ဗုဒ္ဓဘာဝမဟိပတ္ထယိ သတ္တသာရော

ဝျာကာသိ လစ္ဆသိ သုခေါဓိပဒန္တိ သတ္ထာ၊ ()

၇၅။

ဗုဒ္ဓဿ စာရိဏဝတီ နဂရံ အဟောသိ

မာတာ ပဘာဝတိ ပိတာ အရုဏဝှ ရာဇာ၊

သင်္ဃေသု’ဘောသု အဘိဘုဝသိ သမ္ဘဝေါ စ

အဂ္ဂါဘဝိံသု မခိလာပဒုမာဘိဓာနာ၊ ()

၇၆။ ¶

ခေမင်္ကရော ဇိနမုပဋ္ဌဟိ သတ္တတိံသ-

ဟတ္ထုစ္ဆိတော ဝိဇယဗောဓိ စ ပုဏ္ဍရိကော၊

သော သတ္တတိံသတိသဟဿ မိတာယုကော’သိ

အာသုံ တယော တဒိယသာဝကသန္နိပါတာ၊ ()

၇၇။

တဿာ’ပရေနိ’ဟ သမုဗ္ဘဝိ ကေတုမာလာ-

ဗျာမပ္ပဘာပရိလသံ မုနိဝေဿဘူ’တိ၊

ဗုဒ္ဓင်္ကုရော ကိရ တဒါနိ သုဒဿနဝှ-

ရာဇာ ဗဘူဝ ပရရာဇဂဇိန္ဒသီဟော၊ ()

၇၈။

သင်္ဃဿ ဗုဒ္ဓပမုခဿ သစီဝရံ သော

ဒတွာန ဒါနမတုလံ ဇိနသာသနမှိ၊

သဗ္ဗညုဗောဓိမဘိပတ္ထိယ ပဗ္ဗဇိတ္ထ

ဗုဒ္ဓါ ဘဝိဿသိ ဓုဝန္တိ တမာဟသတ္ထာ၊ ()

၇၉။ ¶

တဿာ’ပျ’နောပမပုရံ ဘဝိ သုပ္ပတီတော

ရာဇာ ပိတာ ယသဝတီ ဇနိကာ မဟေသီ၊

သောဏုတ္တရာ စ နိဇသာဝကသာဝိကာနံ

ဒါမာ မတိဒ္ဓိပရမာ ပရမာ သမာလာ၊ ()

၈၀။

ဗောဓီ’ပိ တဿ ဘဝိ သာလမဟီရူဟော’ပ-

သမ္ပန္နဘိက္ခု တဒုပဋ္ဌဟိ သဋ္ဌိဟတ္ထော၊

သတ္ထာ ဝိဟာသိ သမသဋ္ဌိသဟဿဝဿံ

အာသုံ တယော တဒိယသာဝကသတ္တိပါတာ၊ ()

၈၁။

တဿာ’ပရေနိ’ကဟ သမုဗ္ဘဝိ သစ္စသန္ဒော

ဝေနေယျဗန္ဓု ဘဂဝါ ကကုသန္ဓနာမော၊

ဗုဒ္ဓင်္ကုရော ဘုဝိ တဒါ’ဘဝိ ခေမရာဇာ

ဒါနပ္ပဗန္ဓဇလသေကသုဓောတဟတ္ထော၊ ()

၈၂။ ¶

သော ပတ္တစီဝရပဘူတိကမန္နပါနံ

ဒတွာ သသာဝကဇိနဿ ဃရာ’ဘိဂန္တွာ၊

ပဗ္ဗဇ္ဇိ ဗောဓိပဏိဓိံ ပဏိဓာယ ရာဇာ

သတ္ထာသယာ’တျ’ဝစ တပ္ပဏိဓာနသိဒ္ဓိ၊ ()

၈၃။

ခေမဝဟယံ နဂရမဿ ပိတာ’ဂ္ဂိဒတ္တော

ဝိပ္ပော ဝိဘာဝိ အဘဝိ ဇနိကာ ဝိသာခါ၊

သဉ္ဇိဝထေရဒုတိယော ဝိဓုရော စ ထေရော

သာမာ တဒဂ္ဂယုဂလံ ဘဝိ စမ္ပကာချာ၊ ()

၈၄။ ¶

တံ ဗုဒ္ဓိဇော ဇိနမုပဋ္ဌဟိ တဿ ဂတ္တံ

တာဠိသဟတ္ထမိတမာသိ သိရိသဗောဓိ၊

တာဠိသဟာယနသဟဿပမာဏမာယု

ဧကော’ဝ တဿ ဘဝိ သာဝကသန္နိပါတော၊ ()

၈၅။

တဿာ’ပရမှိ သမယေ ကရုဏာနိဓာနော

လောကာဘိဘူ ကနကဘုဓရဟာရိရူပေါ၊

ဥပ္ပဇ္ဇိ ကောဏဂမနောမုနိ ပဗ္ဗတာချော

ဘုမိဿရော ဘဝိ မဟာပုရိသော တဒါနိ၊ ()

၈၆။

သင်္ဃဿ ဗုဒ္ဓပမုခဿ ဥဠာရဒါနံ

ဒတွာ မဟဂ္ဃဝရစိဝရသာဋကေ စ၊

သော ပကဗ္ဗဇိတ္ထ အဘိပတ္ထိတ ဗုဒ္ဓဘာဝေါ

ဗုဒ္ဓါ ဘဝိဿသိ တုဝန္တိ တမာဟသတ္ထာ၊ ()

၈၇။ ¶

နာမေန သောဘဝတိ တမ္ပုရမုတ္တရာချာ

မာတာ ပိတာ’ဝနိသုရော ဘဝိ ယညဒတ္တော၊

ဟီယောသောတ္တရဝသီ သမဏိ သမုဒ္ဒါ

တဿော’တ္တရာ စ ပရမာ ပရိသာသု’ဘောသု၊ ()

၈၈။

တံ သောတ္ထိဇော ဇိနမုပဋ္ဌဟိ တိံသဟတ္ထော

အင်္ဂီရသော ဘဝိ ဥဒုမ္ဗရသာခိ ဗောဓိ၊

သော တိံသဟာယနသဟဿမိတာယုကော’သိ

ဧကော’ဝ တဿ ဘဝိ သာဝကသန္တိပါတော၊ ()

၈၉။

တဿာ’ပရေနိ’ဟ မဟာမုနိ ကဿပါချော

လောကမှိ ပါတုဘဝိ ခဂ္ဂဝိသာဏကပ္ပော၊

ဗုဒ္ဓင်္ကုရော ဘုဝိ တဒါ’ဘဝိ ဇောတိပါလော

ဝေဒေသု တီသု သကလာသု ကလာသု ဆေကော၊ ()

၉၀။ ¶

ကလျာဏမိတ္တဒုတိယော သုဂတံ ဥပေစ္စ

သုတွာန ဓမ္မမထသာသန မောတရိတွာ၊

သဗ္ဗညုဘာဝမှိပတ္ထယိ မာဏဝေါ သော

ဝျာကာသိ ကဿပမုနီ’ပိ မုနီ’စ ပုဗ္ဗာ၊ ()

၉၁။

ဗာရာဏသိ နဂရမာသိ ပိတာ စ မာတာ

ဒွေ ဗြဟ္မဒတ္တဓနဝတျ’ဘိဓာနဝန္တော၊

ဘိက္ခုသု တဿ သမဏိသွ’ပိ တိဿဘာရ-

ဒွါဇာ စ ဘဒ္ဒယုဂလာတျ’နုလောရုဝေလာ၊ ()

၉၂။

တံ သဗ္ဗမိတ္တသမဏော သမုပဋ္ဌဟိတ္ထ

နိဂြောဓသာခီ ဇယဗောဓိ သ’ဝီသဟတ္ထော၊

တဿာ’သိ ဝိသတိသဟဿ ပမာဏမာယု

ဧကော’ဝ’ဟူ အရိယသာဝကသန္နီပါတော၊ ()

ဣတိ မေဓာနန္ဒာဘိဓာနေန ယတိတာ ဝိရစိတေ သကလကဝိဇန ဟဒယာနန္ဒ ဒါနနိဒါနေ ဇိနဝံသဒီပေ ဒူရေနိဒါနေ ဗောဓိသတ္တဿ သေသပဏိဓာတဋ္ဌပန ပဝတ္တိ ပရိဒီပေါ တတိယော သဂ္ဂေါ။

၁။ ¶

ဒီပင်္ကရာဒိစတုဝီသတိ ဗုဒ္ဓပါဒ-

မူလေသု လငပဏိဓာန မဟာနိဓာနော၊

လက္ခာဓိကံ စတုရသင်္ခိယကပ္ပသင်္ခံ

ပုညာဘိသန္ဒမဘိသင်္ခရိ ဗောဓိသတ္တော၊ ()

၂။

ဧတ္ထန္တရေ ဝိဝိဓဗာဟိရဝတ္ထုဇာတံ

သိသ’က္ခိမံသရုဓိရာနိ စ ပုတ္တဒါရေ၊

သော ဇိဝိတမ္ပိ ကပဏဍိကယာစကာနံ

ဝီရော ပရိစ္စဇိ ပဇာယ ဟိတတ္ထမေဝ၊ ()

၃။ ¶

ဒါနာဓိမုတ္တိပရိယေသန ဝိပ္ပဝေသော

ပတွာ တပေါဝနမကိတ္တိ တပေါဓနဿ၊

တိဟံ အလတ္ထ သကဋာဟမလောဏဍာကံ

ယဿာ’ဘိဘူတဇဌရဿ ဇိဃစ္ဆိတတ္တာ၊ () (အကိတ္တိစရိယံ)

၄။

ကန္တာရမဂ္ဂ ပဋိပန္န မနာတပတ္တံ

ပစ္စေက ဗုဒ္ဓမဟိပဿိယ သငက္ခဝိပ္ပော၊

ဖုဋ္ဌံ သကိစ္စပသုတော သူရိယာတပေန

ယော ဆတ္တုပါဟဏမဒါသိ သုဓောတပါဏိ၊ () (သင်္ခစရိယံ)

၅။

ဒုဗ္ဘိက္ခပီဠနဘယေန ကလိင်္ဂရဋ္ဌာ

သံယာစတံ ယဒုပဂမ္မ ဓနဉ္ဇယဝှော၊

သောဏ္ဍာယ ဂယှ နိဇမဉ္ဇန နာဂရာဇံ

ယော ဒက္ခိဏောဒက နိသေကမကာသိ ရာဇာ၊ () (ကုရုဓမ္မစရိယံ)

၆။ ¶

ဟုတွာန ယော မဟသုဒဿန စက္ကဝတ္တီ

ရာဇာ ကုသာဝတိပုရမှိ ဒိဝါ စ ရတ္တော၊

ဝတ္ထတ္တပါနမုပတေသိ စရာပယိတွာ

ဘေရိံက အသေသကပဏ္ဍိကယာစကာနံ၊ () (မဟာသုဒဿနစရိယံ)

၇။

ယော သတ္တဘုမိဘုဇသာသိ ပုရောဟိတော’ပိ

ရာဇူဟိ လဒ္ဓမခိလံ ဓနဓညရာသိံ၊

သမ္ပတ္တယာစကဇနဿ ပရိစ္ဆဇိတွာ

ပုညပ္ပဗန္ဓမဘိသဉ္စိနိ ဗောဓိဟေတု၊ () (မဟာဂေါဝိန္ဒစရိယံ)

၈။

ဓမ္မာနုသာသိ နိမိနာမ မဟီဘုဇော’ပိ

သာလံ ဝိဓာယ မိထိလာယ စတုမ္မုခံ ယော၊

အစ္ဆိန္နမတ္ထိဇနပက္ခိစတုပ္ပဒါနံ

ဒါနံ ပဝတ္တယီ ပုရာ ဒဒတံ ဝရိဋ္ဌော၊ () (နိမိရာဇစရိယံ)

၉။ ¶

ယော ဧကရာဇသုတစန္ဒကုမာရဘူတော

မုဒ္ဓါဘိသေက ကရဏာယ ဇနေဟိ ဂစ္ဆံ၊

သံဝေဇိတော သဝိဘဝေ တိဘဝေ’ပိ ယညာ-

ဝါဋံ ဝိဓာယ’ဘိပဝတ္တယိ ဒါနဝဋ္ဋံ၊ () (စန္ဒကုမာရစရိယံ)

၁၀။

ယော ဝတ္ထုသာရဂဟဏေန အတိတ္တရူပေါ

ဘုမိဿရော’ပိ သိဝိနာမ သုရာဓိပဿ၊

ဇစ္စန္ဓဝေသဂဟိတဿ ဝိလောစနာနိ

ဥပ္ပာဋယိတွ ပဒဒံ လဘိ ဒိဗ္ဗစက္ခူ၊ () (သိဝိရာဇစရိယံ၊)

၁၁။

ဒါနာဓိမုတ္တိပရမော သသပဏ္ဍိတော ယော

မိတ္တေနု သာသိယ အဓိဋ္ဌိတုပေါသထင်္ဂေါ၊

အင်္ဂါရမုဒ္ဓနိ ပပါတ သဇီဝိတာသံ

ဟိတွာ ဒွိဇဿ တနုမံသပဒါတုကာမော၊ () (သသပဏ္ဍိတစရိယံ၊ ဣတိဒါနပါရမီံ)

၁၂။ ¶

ယော မာတုပေါသကကရိ ဘိသမုဒ္ဓရတ္တော

အန္ဓာယ ဟတ္ထိဒမကေန ကရေဏုကာယ၊

သောဏ္ဍာယ သုဋ္ဌုဂဟိတော’ပျ’ဝိကဏ္ဍိတဿ

သီလဿ ခဏ္ဍနဘယာ နဇနေသိ ကောပံ၊ () (မာတုပေါသကစရိယံ)

၁၃။

ယော ဘုရိဒတ္တဘုဇဂေါ’ပရိဝမ္မိကဋ္ဌော၊

သီလဗ္ဗတံ ဝိသဓရော သမဓိဋ္ဌဟိတွာ၊

ပေဠာယ ခိတ္တဘုဇဂေ အဟိဂုဏ္ဌိကမှိ

သီလဿ ကုပ္ပနဘယေန ဇဟာသိ ကောပံ၊ () (ဘုရိဒတ္တစရိယံ၊)

၁၄။

သီလဗ္ဗတာဒိဝိဘဝေါ ဇလိတိဒ္ဓိမာ ယော

စမ္ပေယျနာမဘုဇဂေါ အဟိဂုဏ္ဌိကမှိ၊

ဣစ္ဆာနုရူပဝိစရော စမရီ’ဝ ဝါလံ

သီလံ ဇုဂေါပ နပိ တဗ္ဗဓကေ စုကောပ၊ () (စမ္ပေယျစရိယံ၊)

၁၅။ ¶

ယော စူလဗောဓိဝိသုတော သမဒိဋ္ဌဟတွာ

သီလဗ္ဗတံ ဝနမုပေစ္စ ဝသံ ပိယာယ၊

တာယံ ပသယှ ဂဟိတာယ’ပိ ကာသိရညာ

သီလဗ္ဗိသောဓနပရော ပဇဟိတ္ထ ရောသံ၊ () (စူလဗောဓိစရိယံ)

၁၆။

ယော ဘိံသရူပိ မဟိသော’ပိ ဝလိမုခဿ

အာဂုံ တိတိက္ခမခီလံ ပရိသုဒ္ဓသိလော၊

ရုက္ခဋ္ဌယက္ခဝစနာနိ ပဋိက္ခိပိတွာ

တံ သီလဘင်္ဂဘယတော ဘယတော မုမောစ၊ ()

၁၇။

ယော ဝုယှမာနမပနီယ နဒီပဝါဟာ

မိတ္တဒ္ဒုဟိံ ပုတသဇီဝိတဒါနဟေတု၊

ရညာ မုမောစ ဝဓိယံ အဝိကောပနေန

သီလဿ ရူရုဟရိဏော’ပိ ဟရိဿဝဏ္ဏော၊ () (ရူရုမိဂရာဇစရိယံ၊)

၁၈။ ¶

ယော ဒန္တကဋ္ဌသကလေဟိ ဇဋာကုလေဟိ

ကုဒ္ဓေန ကုဋဇဋိလေန ကတာဟိသာပေါ၊

မာတင်္ဂနာမမုနိ သီလဓနံ ဇုဂေါပ

သမ္ပာတသာပရိပုမိဒ္ဓိဗလေန ရက္ခံ၊ () (မာတင်္ဂစရိယံ၊)

၁၉။

မဂ္ဂါဝတိဏ္ဏမဓမံ ကလှာဘီလာသာ-

သင်္ဃဋ္ဋိတောဘယရထင်္ဂမဓမ္မယက္ခံ၊

ကောပဂ္ဂိနာ နပရိဈာပယမိဒ္ဓိမာ ယော

သီလံ ရရက္ခ ခလု ဓမ္မိကယက္ခရာဇာ၊ () (ဓမ္မာဓမ္မ ဒေဝပုတ္တစရိယံ၊)

၂၀။

ယော ပေါရိသာဒဝသဂဿ ဇယဒ္ဒိသဿ

ရညော ပဋိညမဓိကိစ္စ ဝိဇိဝိတာသော၊

ခီတ္တာယုဓော တဒုပဂမ္မ အလီနသတ္တော

ယက္ခံ ဒမေသိ နနု သီလဝတံ နိဒါနာ၊ () (အလီနသတ္တစရိယံ၊)

၂၁။ ¶

ယော သင်္ခပါလဘုဇဂေါ နိဇဘောဂပူရ-

ဝျာဘင်္ဂိဘာရတရဝါဟိတိ ဘောဇပုတ္တေ၊

ကာရုညမာပ အဘိဂန္တုမပါဒတာယ

သီလဿ ဘင်္ဂဘယတော’ပိ ဟုတာသတေဇော၊ () (သင်္ခပါလစရိယံ၊ ဣတိ သီလပါရမိံ၊)

၂၂။

သင်္ခါရဓမ္မခဏဘင်္ဂသဘာဝဒဿိ

ဥဿာဝဗိန္ဒုဝိလယံ’ဝ ယုဓဉ္ဇယော ယော၊

ရာဇာ ဇနဿ ရုဒတော ပဝိဟာယ ရဇ္ဇံ

နေက္ခမ္မပါရမိမပုရယိ ပဗ္ဗဇိတွာ၊ () (ယုဓဉ္ဇယ စရိယံ၊)

၂၃။

ယော သောမနဿဝိသုတော ကုရုရာဇပုတ္တော

ဒုဿီလကုဋဇဋိလဗ္ဗစနံ ပဋိစ္စ၊

ရညာ နိယောဇိတဝဓော ဝဓကာဝကာသံ

လဒ္ဓါနုသာသိယ’ဘိနိက္ခမိ စတ္တရဇ္ဇော၊ () (သောမနဿ စရိယံ၊)

၂၄။ ¶

ယော ကာသိရာဇတနုဇော’ပိ အယောဃရာချော

ဤဟံ ဘတော စိရမယောဃရဝါသဟီရူ၊

ရဇ္ဇံ ပဟာယ ပရမံ ပိတရာ ပဒတ္တံ

နေက္ခမ္မပါရမိပရော ဝနမောတရိတ္ထ၊ () (အယောဃရစရိယံ၊)

၂၅။

ယော ပဉ္စကာမဂုဏဒီပနတော’ပဒိဋ္ဌ-

သမ္ဘတ္တမိတ္တဝစနမ္ပိ ပဋိက္ခိပိတွာ၊

နိဒ္ဓန္တကဉ္စနနိဘစ္ဆဝိ ကဉ္စနာချော

ပတွာ တပေါဝနမပဗ္ဗဇိ ဗန္ဓဝေဟိ၊ () (ဘိသစရိယံ၊)

၂၆။ ¶

ပက္ခိတ္တဒဒ္ဒုလနဟာရုရိဝါ’နလမှိ

သင်္ခါရဓမ္မဝိသယေ ပဋိဝဋ္ဋိတတ္တော၊

ယော သောဏဘုသုရသုဓီ ဝိဘဝံ ပဟာယ

ပဗ္ဗဇ္ဇိတုံ သပရိသော ပဝနံ ဇဂါမ၊ () (သောဏပဏ္ဍိတစရိယံ၊ ဣတိ နေက္ခမ္မ ပါရမိ၊)

၂၇။

ယော သေဏကော သုဓိ ပသိဗ္ဗကဂဗ္ဘသာယိံ

ဝိပ္ပဿိ မောဟကလုသိကတမာနသဿ၊

သပ္ပံ သုဃောရမုပဒဿိယ ဒီဃဒဿီ

ပညာသုပါရမိမပူရယိ ဘုရိမေဓော၊ () (သေဏကပဏ္ဍိတ စရိယံ၊)

၂၈။

ယော ယံ မဟောသဓသမာချသုဓီ သုဓီသော

ဥမ္မဂ္ဂသံဝုတနိသဂ္ဂဝတိသမော’ပိ၊

ဥမ္မဂ္ဂတော’ဝ သဗလံ မိထိလာဓိနာထံ

ပညာပဇာပတိပတိ ရိပုတော မုမောစ၊ () (မဟောသဓစရိယံ ဣတိ ပညာ ပါရမီ၊)

၂၉။ ¶

ဝါလေနု’ဠာရဝီရိယော ဝီရိယေန ဃောရံ

သံသာရဒုက္ခမိဝ ယော ကိသကာလကော’ပိ၊

ဂမ္ဘီရသာဂရဇလံ သပဇာနုကမ္ပီ

ဥဿိဉ္စိတုံ သတတမာရဟိ သတ္တသာရော၊ () (ကာလက စရိယံ)

၃၀။

ရာဇာမဟာဒိဇနကော ဇနကုန္ဒစန္ဒော

ဂမ္ဘီရဘုရိသလိလံ သလိလာကရံ ယော၊

သူရော’ရုဗာဟုဝီရိယော ဝီရိယံ တတာရ

သံသာရသိန္ဓုတရဏေ တရဏီသရူပေါ၊ () (မဟာဇနကစရိယံ၊ ဣတိ ဝီရိယပါရမိ၊)

၃၁။

ယော ခန္တိတိန္တဟဒယော ယတိခန္တိဝါဒီ

ဆေဒါပိတေ’ပိ သကလံ သကလတ္တဘာဝေ၊

သမပူတခန္တိဇလမေဝဘူသံ သိသေစ

ဝျာပါဒပါဝကပဒိတ္တကလာဗုရာဇေ၊ () (ခန္တိဝါဒီ စရိယံ)

၃၂။ ¶

ယော ဓမ္မပါလနပရော သုသု ဓမ္မပါလော

ကာရာပိတေ’ပိ ဝဓကေဟ’သိမာလကမ္မံ၊

အာသန္နတာပနိရယမှိ ပတာပရာဇေ

ခန္တိံ ပဝတ္တယိ မနပ္ပိတခန္တိမေတ္တော၊ () (ဓမ္မပါလ စရိယံ၊ ဣတိ ခန္တိပါရမီ၊)

၃၃။

ယော အန္တရီပဂဘယံကရသုံသုမာရ-

မုဒ္ဓါသမပ္ပိတပဒေါ ကပိရာဇဘူတော၊

ဒိန္နံ ပဋိညမနုကုဗ္ဗမနညလဗ္ဘံ

နဇ္ဇာ ပပါတ ပရတီရမသစ္စဘီရူ၊ () (ကပိရာဇ စရိယံ)

၃၄။ ¶

ယော သစ္စပါရမိပရော ဝသိ ပစ္စနာမော

သစ္စေန သစ္စမဟီသန္ဓိယ သစ္စဒဿီ၊

ပေါရိံ သမဂ္ဂကရဏိံ သိရိဇမ္ဗုဒီပေ

သမ္ပာလယံ သကလလောကမဝေါစ ဝါစံ၊ () (သစ္စသဝ္ဘယ စရိယံ၊)

၃၅။

ယော ဝဋ္ဋပေါတကဒိဇော အဝိရူဠှပက္ခ-

ပါဒေါ’တိခုဒ္ဒကကုလာဝကဂဗ္ဘသာယီ၊

သစ္စေန သောဠသကရိသမိတပ္ပဒေသေ

ဒါဝဂ္ဂိနိဗ္ဗုတိမကာ ထိရမာယုဂန္တံ၊ () (ဝဋ္ဋပေါတက စရိယံ၊)

၃၆။

ယော ဂိဇ္ဈကာကဗကဗာဏကဘက္ခဘုတ-

ဗန္ဓု နိဒါဃရဝိတာပပရိက္ခယာ’ပေ၊

ရိတ္တေ သရမှိ ပရိမောစယိ မစ္ဆရာဇာ

သစ္စေန’ကာလဇလဒါဂမပစ္စယေန၊ () (မစ္ဆရာဇ စရိယံ၊)

၃၇။ ¶

ဒုဋ္ဌာဟိဒဋ္ဌဝိသဝေဂဝိမုစ္ဆိတံ ယော

မဏ္ဍဗ္ဗတာပသဝရော’ရသယညဒတ္တံ၊

ကတွာန သစ္စကိရိယံ ကရုဏာယ ကဏှ-

ဒီပါယနော မုနိ မုမောစ တမာပဒမှာ၊ () (ကဏှာဒီပါယန စရိယံ၊)

၃၈။

ယော ပေါရိသာဒဝသဂေါ သုတသောမရာဇာ

ရဇ္ဇေ တိယောဇနသတေ သကဇီဝိတေ’ပိ၊

သစ္စံ ရရက္ခ နနု သစ္စပရော နိရာသော

ဒိန္နံ ပဋိဿဝမုဘိန္နမပါနုကုဗ္ဗံ၊ () (သုတသောမစရိယံ၊ ဣတိ သစ္စပါရမီ၊)

၃၉။

နိဗ္ဗိန္နရဇ္ဇဝိဘဝေါ ဘဝဘီရူတာယ

ယော မူဂပက္ခဗဓိရာကတိ မူဂပက္ခော၊

နီတေ နိခါတုမပကိ သီဝထိကာဝကာသေ

ဒဠှံ အဓိဋ္ဌိတဝတံ ဝတ နောဇဟာသိ၊ () (တေမိယစရိယံ၊ ဣတိ အဓိဋ္ဌာန ပါရမီ၊)

၄၀။ ¶

မေတ္တဝိဟာရပရမော ပိတုရန္ဓယဋ္ဌိ

ယော သောမသောမ္မယဒယော’ပိ သုဝဏ္ဏသာမော၊

ဝါဠေဟိ သမ္ပရိဝုတော ပဝနေ ဝိဟာရိ

မေတ္တာချပါရမိမပူရယိ ပါပဘီရူ၊ () (သုဝဏ္ဏသာမစရိယံ၊)

၄၁။

ယော ဧကရာဇဝိသုတော ဘုဝိ ကာသိရာဇာ

မေတ္တာကလတ္တဒုတိယော သကဇီဝိတေ’ပိ၊

အဝဆိန္နရဇ္ဇဝိဘာဝေ ပဋိပက္ခရာဇေ

မေတ္တာယ သမ္ဖရိ သမံ ပရိဘာဝိတာယ၊ () (ဧကရာဇစရိယံ၊ ဣတိ မေတ္တာ ပါရမီ၊)

၄၂။ ¶

ယာ လောမေဟံသဝိသုတော’ပိ တုလာသရိက္ခော

မာနာဝမာနနကရေသု သုခေ စ ဒုက္ခ၊

ဝါသံ စဝဋ္ဌိပရိကိဏ္ဏသုသာနမဇ္ဈေ

ဝေရံ အဝေရမနုပေစ္စ ရရက္ခု’ပေက္ခံ၊ () (လောမဟံသစရိယံ၊ ဣတိ ဥပေက္ခာက ပကာရမိံ)

၄၃။

သော ဗောဓိယာ’ဘိနိယတော ပရိပက္ကဉာဏော

ဗုဒ္ဓင်္ကုရော’ပစိတပါရမိတာဗလေန၊

နိဇ္ဈာမတဏှ’သိတကဉ္ဇက္ခုပ္ပိပါသ-

လောကန္တရောရုနိရယေသု န ဇာတု ဇာတော၊ ()

၄၄။

နာလတ္ထ ပဏ္ဍကနပုံသကမူဂပက္ခ-

ဆစ္စန္ဓဇာတိဗဓိရိတ္ထိဇဠတ္တဘာဝံ၊

သော မက္ခိကာမကသကုတ္ထကိပိလ္လိကာဒိ-

ဇာတျာ နပါတုဘဝိ ကီဋပဋင်္ဂဇာတျာ၊ ()

၄၅။ ¶

နာလတ္ထ ဂန္ဓဂဇတော ပုထုလတ္တ ဘာဝံ

နာလတ္ထ ဝဋ္ဋသုသုကာ သုခုမန္တ ဘာဝံ၊

နာလတ္ထ ဥမ္ဒနမမ္မနကတ္တ ဘာဝံ

နာလတ္ထ ဧဝမတိဟီနတရတ္တ ဘာဝံ၊

၄၆။

နာဟောသိ မာတုဝဓကော ပိတုဃာတကော ဝါ

နာဟောသိ သင်္ဃဘိဒုရော အရဟန္တဃာတော၊

နာဟောသိ ဒုဋ္ဌဟဒယေန တထာဂတဿ

နာဟောသိ သံဇနနကော ရုဓိရဿ ကာယေ၊ ()

၄၇။

ကမ္မံ ဖခလံ တဒုဘယံ ပဋိဗာဟိနော ယေ

ဥစ္ဆေဒဒိဋ္ဌိဂတိကာ ဝိဟရိံသု တေသံ၊

လဒ္ဓိံ ကဒါစိ နပရာမသိ သဒ္ဒဟာနော

ကမ္မံ ဖလံ နိယတဗောဓိပရာယဏော သော၊ ()

၄၈။ ¶

ယသ္မိံ ဘဝေ ဘဝတိ နာမစတုက္ကမတ္တံ

တတြာ’ပိ ပုညကရဏတ္ထ မသညသတ္တေ၊

အဋ္ဌာနတော နပဋိသန္ဓိမဂဏှိ သုဒ္ဓါ-

ဝါသေသု ပဉ္စသု ကဒါစိ ပပဉ္စဘီရူ၊ ()

၄၉။

ဗုဒ္ဓင်္ကုရော နိယတဗောဓိပဒေါ ကဒါစိ

ဒီဃာယုကေသု’ပိဘဝေသု သုခါနပေခေါ၊

ကတွာ’ဓိမုတ္တိဝစနံ ဣဓ ဇီဝလောကေ

နိဗ္ဗတ္တိ သော တိဒသပါရမိပူရဏတ္ထံ၊ ()

၅၀။

ဣစ္စေဝံ သော ပုရိသနိသဘော ဒုပ္ပဝေသဿ ဗောဓိ-

ပါသာဒဿာ’ဝတရဏသမတ္တိံသတိဿေဏိရူပံ၊

နိပ္ဖာဒေန္တော ပရဟိတရတော ပါရမီဓမ္မဇာတံ

သံသာရေ သံသရိ စိရတရံ ဃောရဒုက္ခံ တိတိက္ခံ၊ ()

ဣတိ မေဓာနန္ဒာဘိဓာနေန ယတိနာ ဝိရစိတေ သကလကဝိဇန ဟဒယာနန္ဒ ဒါနနိဒါနေ ဇိနဝံသဒီပေ ဒုရေနိဒါနေ ပါရမိဓမ္မာဘိသင်္ခရဏ ပဝတ္တိ ပရိဒီပေါ စတုတ္ထော သဂ္ဂေါ။

၁။ ¶

အတ္ထဝတ္တပဒံ နာနာဝဏ္ဏမဏ္ဏဝဇာနွိတံ၊

ပတ္ထျာဝတ္တမိဝါဟောသိ ဇေတုတ္တရပုရံ ပုရေ၊ () (သိလေသ ဗန္ဓနံ၊)

၂။

ပရိခါမေခလာဒါမ ဗဒ္ဓပါကာရသောဏိနီ၊

ရရာဇ ရာဇဓာနီ သာ ဝဓူဝ ပတိမဏ္ဍိတာ၊ ()

၃။ ¶

မဏိသိင်္ဂံသုမာလာဘိ ဗာလံသုမာလိဝိဗ္ဘမံ၊

သသင်္ကမဏ္ဍလံ တသ္မိံ ပလမှေသာ’ဘီသာရိကာ၊ ()

၄။

ဣန္ဒိရာမန္ဒိရာ’မန္ဒမဏိမန္ဒိရသာလိနီ၊

ဟေမဒ္ဓဇာဝလိ တသ္မိံ ကိဠာပယိ ကလာပိနော၊ ()

၅။

ရရာဇ နာဂရာဇာနံ ကပ္ပိတာဘရဏေဟိ စ၊

ဒါဌာဟိ ဒါနဓာရာဟိ မေဃဝစ္ဆန္တာ’ဝ သာ ပုရီ၊ ()

၆။

တုရင်္ဂနိကရောဏ္ဍုတဓုလိဓူသရိတမ္ဗရံ၊

နိဝါရိတာတပံရင်္ဂဝိတာနဿိရိမာဟရိ၊ ()

၇။ ¶

နီလသေဝါလဓမ္မိလ္လာ သမ္ဖုလ္လကမလာ’နနာ၊

တဟိမုပ္ပလလောလ’က္ခီ ဟံသပီနပယောဓရာ၊ ()

၈။

ကိဉ္ဇက္ခရာဇိရသာနာရုဒ္ဓရောဓနိတမ္ဗိနီ၊

ဘိင်္ဂါလိမဏိမဉ္ဇိရာ နာရီ’ဝါ’သုံ သရောဇိနီ၊ () (သိလေသ ဗန္ဓနံ၊)

၉။

ကေဝကလံ ကပ္ပရုက္ခေဟိ ဝိနာ သာ ရာဇဓာနျ’ဟု၊

ဝိသာဏာရာဇဓာနီ’ဝ သဗ္ဗသမ္ပတ္တိသာလိနီ၊ ()

၁၀။

ကဒါစိ ပုရိသာဇညော ရာဇာ’ဟောသိ ပုရေ တဟိံ၊

ဝေဿန္တရော’တိနာမေန ဝိဿုတော ဘုဝနတ္တယေ၊ ()

၁၁။ ¶

ကုမာရော’ဝ သမာနော သော ဒါနကီဠာပရာယဏော၊

ကာယူပဂါနိ ဓာတီနံ ရတနာဘရဏာနိ’ပိ၊ ()

၁၂။

ခဏ္ဍာခဏ္ဍံ ကရိတွာန နဝက္ခန္တုံ ကပရိစ္စဇိ၊

ဧဝံ ဗာဟိရဝတ္ထူနိဒဒန္တော အဋ္ဌဝဿိကော၊ ()

၁၃။

ပါသာဒမဘိရီဟိတွာ သောနိသဇ္ဇာ’ဘိယာစနံ၊

ဒဿာမီ’တိ ဝိစိန္တေသိ သိသက္ခိမံသလောဟိတံ၊ ()

၁၄။

သုခေဓိတော မဟာသတ္တော သုက္ကပက္ခေ’ဝ စန္ဒိမာ၊

ပါလေသိ ဒသဓမ္မေန ပတွာ ရဇ္ဇသိရိံ ပဇံ၊ ()

၁၅။

နိသဇ္ဇော ပရိပါသာဒေ သော ရာဇာ ဧကဒါ ရဟော၊

ကာမာနံ သင်္ကိလေသဉ္စ ဝေါကာရာဒီနဝံ သရိ၊ ()

၁၆။ ¶

ပဗ္ဗဇ္ဇာဟိရတော ရာဇာ နိဗ္ဗိန္တော ဝိဘဝေဘဝေ၊

သမ္ပတ္တိသာရမာဒါယ ဟိတွာ ရဇ္ဇသိရိံ ဝရံ၊ ()

၁၇။

မတ္တမာတင်္ဂရာဇာ’ဝ အဂ္ဂိပဇ္ဇလကာနနာ၊

ရုဒတော ဉာတိသင်္ဃဿ အဂါရသ္မာ’ဘိ နိက္ခမီ၊ ()

၁၈။

စမ္ပကာသောကဝကုလတရုသဏ္ဍသုမဏ္ဍိတံ၊

သိခဏ္ဍိမဏ္ဍလာခဏ္ဍကီဠံ ကောကိလကူဇနံ၊ ()

၁၉။

အနေကမိဂပက္ခီနမာသယံ သလိလာသယံ၊

ဝီကာသကုသုမာမောဒပ္ပဝါသိတသမီရဏံ၊ ()

၂၀။

မဓုမတ္တာ’လိင်္ဓင်္ကာရနိဗ္ဘရ’မ္ဗုရုဟာကရံ၊

သမ္ပာတနိဇ္ဈရာ’ရာဝဂမ္ဘီရဘုရိဘူဓရံ၊ ()

၂၁။ ¶

ပဝဝေကက္ခမံ ဝင်္ကပဗ္ဘာရံ ဂိရိဂဗ္ဘရံ၊

ဒုပ္ပဝေသပကထံ ဝင်္ကဂိရိနာမတပေါဝနံ၊ ()

၂၂။

ပတွာ လဒ္ဓေ’သိပဗ္ဗဇ္ဇာ ကဝိလာသော သော မဟီဘုဇော၊

စရန္တော ဗြဟ္မစရိယံ စိရဿံ ဝီတိနာမယိ၊ ()

၂၃။

တဿရညော မဟေသိပိ မဒ္ဒီနာမ သုခေဓိတာ၊

ပုတ္တဓီတူဘိသဒ္ဓိံ တံ တပေါဝနမုပါဝိသိ၊ ()

၂၄။

မဟိစ္ဆော ပူဇကောဝိပ္ပော တဒါ ဗီဂစ္ဆဒဿနော၊

ယေန ဝေဿန္တရောသတ္တသာရော တေနုပသင်္ကမိ၊ ()

၂၅။ ¶

အတ္ထော ကမ္မကရေဟီ’တိ ဇရာဇဇ္ဇရိတဿ မေ၊

ပုတ္တဉ္စဓီတရံ ယာစီ ဓီရံ ပတွာ ဒယာပရံ၊ ()

၂၆။

ဥဘော ကဏှာဇိနံ ဇာလိံ သသေနဟဘာရဘာဇနံ၊

သမ္မာသမ္ဗောဓိကာမော သော တဏှာဒါသဗျမုတ္တိယာ၊ ()

၂၇။

ဒက္ခိဏောဒကသမ္ပုတဇူဇက’ဉ္ဇလိဘာဇနေ၊

သမပ္ပယိတ္ထ ဗန္ဓိတွာ အဂမာ’ဒါယ နိဒ္ဒယော၊ ()

၂၈။

ဒါနာဓိမုတ္တီဝီမံသီ ဝိပ္ပာကပ္ပေနု’ပါဂတော၊

သံယာစိ ဒေဝရာဇာ’ထ မဒ္ဒိဒေဝိံ ပတိဗ္ဗတံ၊ ()

၂၉။

ဒက္ခိဏောဒကနိဒ္ဓါတဟတ္ထော သော ဒက္ခိဏောဒကံ၊

ကတွာ ဒေဝေသဝိပ္ပဿ ဒေဝိံ ဒေဝေါ ပရိစ္စဇိ၊ ()

၃၀။ ¶

သတ္တက္ခတ္တုံ ပကမ္ပိတ္ထ တဿ ပါရမိတေဇသာ၊

သာဓုသာဓူတိ ပတ္တာနုမောဒန္တီ’ဝ မဟီဝဓူ၊ ()

၃၁။

ဣစ္စေဝံ ပုရိသာရညော ပရိပါစိနပါရမီ၊

မဏိရံသိသ္မုဇ္ဇောတ ပါသာဒသတလင်္ကတေ၊ ()

၃၂။

မန္ဒမန္ဒာနိလောဏ္ဍူတ ပဉ္စဝဏ္ဏဒ္ဓဇာလီနံ၊

မဏိကိံကိဏိဇာလာနုရာဝသောတရသာယနေ၊ ()

၃၃။

ဒိဗ္ဗေဟိ နစ္စဂီတေဟိ ဝါဒိတေဟိ မနောရမေ၊

ကန္ဒပ္ပမဏ္ဍပါကာရ ရင်္ဂမဏ္ဍပမဏ္ဍိတေ၊ ()

၃၄။

ဒိဗ္ဗန္တဒိဗ္ဗရာဇူနံ ဣန္ဒစာပသတေဟိ’ဝ၊

စူဠာမဏီမရီစိဟီ သမ္ဗာဓီကဠိတ’မ္ဗရေ၊ ()

၃၅။ ¶

အစ္ဆရာဟိ ကုစဉ္စန္ဒနမိတင်္ဂီဟိ ဒူရတော၊

ဝိဓူတစန္ဒိကာရာဇိ စာရုစာမရ မာရုတေ၊ ()

၃၆။

သုတ္တပ္ပဗုဒ္ဓပေါသော’ဝ တုသိတေ တိဒသာလယေ၊

တတော စဝိတွာ နိဗ္ဗတ္တိ ဟုတွာ သန္တုသိတ’ဝှယော၊ ()

၃၇။

ဒိဗ္ဗေသု ပဉ္စကာမေသု ဝသန္တော တုသိတာလယေ၊

ပဉ္စိန္ဒြိယာနိ လောကေကလောစနော ပရိစာရယိ၊ ()

၃၈။

တဒါ ဒသသဟဿေသု စက္ကဝါဠေသု ဒေဝတာ၊

ဧကတ္ထ သန္နိပတိတာ သုတွာ ဗုဒ္ဓဟဠာဟဠံ၊ ()

၃၉။

တေနော’ပသင်္ကမိတွာန ယေနာ’သိ ပုရိသုတ္တမော၊

ကတွာ တဗ္ဗဒနမ္ဘောဇံ နယနာလိကုလာလယံ၊ ()

၄၀။ ¶

စူဠာမဏိမယုခမ္ဗုတိဒ္ဓါတစရဏာသနေ၊

ဗဒ္ဓဉ္ဇလိပုဋမ္ဘောဇမကုလာတိ သမပ္ပယုံ၊ ()

၄၁။

စက္ကဝတ္တိပဒံ သက္ကမာရဗြဟ္မပဒတယာ၊

နခေါ မာရိသ ပတ္ထေတွာ ပါရမီ ပရိပါစိတာ၊ ()

၄၂။

ဝေနေယျဗန္ဓုဘုတေန သမ္မာသမ္ဗောဓိမိစ္ဆတာ၊

တယာ မာရိသ ကိစ္ဆေန ပူရိတာ ဒသပါရမီ၊ ()

၄၃။

သဒေဝကဿ လောကဿ ဟိတာယ မာတုကုစ္ဆိယံ၊

ဥပ္ပဇ္ဇတူတိ ယာစိံသု တံဓီရံ ကရုဏာပရံ၊ ()

၄၄။

သတဝဿာယုဟေဋ္ဌာပိ ဥဒ္ဓံ သဟသဟဿတော၊

ယသ္မာ အကာလော ဗုဒ္ဓါနံ တသ္မာ ကာလံ ဝိပဿိ သော၊ ()

၄၅။ ¶

ယသ္မာ အညေသု ဒီပေသု သမ္ဗုဒ္ဓါ နောပပဇ္ဇရေ၊

ဇာယန္တိ ဇမ္ဗုဒီပသ္မိံ တသ္မာ ဒီပံ ဝိပဿိ သော၊ ()

၄၆။

ယသ္မာ မိလက္ခဒေသေသု နူပ္ပဇ္ဇန္တိ တထာဂတာ၊

ဇာယရေ မဇ္ဈိမေ ဒေသေ တသ္မာဒေသံ ဝိပဿိ သော၊ ()

၄၇။

ယသ္မာ နဇာယရေ ဝေဿသုဒ္ဒတွယေသု ဇာယရေ၊

ခန္တိယေ ဗြာဟ္မဏေ ဗုဒ္ဓါ ကုလံ တသ္မာ ဝိပဿိ သော၊ ()

၄၈။

ယသ္မာ အနညဝိသယာ ကုစ္ဆိ သမ္ဗုဒ္ဓမာတုယာ၊

တသ္မာ အာယုပရိစ္ဆေဒဝသေန ပဿိ မာတရံ၊ ()

၄၉။

လောကေကလောစနော ဧဝံ ကတွာ ပဉ္စာဝလောကနံ၊

တာသံ ပဋိညံ ပါဒါသိ ကရုဏာပုဏ္ဏမာနသော၊ ()

၅၀။ ¶

တပ္ပာဒတာမရသစုမ္ဗိတ မောဠိမာလာ

သမ္ပတ္တဒေဝပရိသာ’န္တရဓာယိ တာဝ၊

ဩဂယှ နန္ဒနဝနံ တုသိတာဓိရာဇာ

တမှာ စဝီ မတိဒယာဒယိနာသဘာယော၊ ()

ဣတိ မေဓာနန္ဒာဘိဓာနေနယတိနာ ဝိရစိတေ သကလကဝိဇန ဟဒယာနန္ဒဒါနတိဒါနေ ဇိနဝံသဒီပေ ဒုရေနိဒါနေ ဝေဿန္တရစရိယပ္ပဘုတိဒေဝါရာဓနာ ပဝတ္တိ ပရိဒီပေါ ပဉ္စမော သဂ္ဂေါ။

ဇိနဝံသဒီပေ ဒူရေနိဒါန ဘာဂေါ ပဌမော။

၁။ ¶

ယာ သတ္တသာရပဘဝါ သိရိဇမ္ဗုဒီပေ

ဖီတာ’မရာဝတိပုရီ’ဝ ပုရီဝတံသာ၊

အာဒိစ္စဝံသိကနရိန္ဒပဝေဏိ ဘူမိ

လက္ချာလယာ ကပိလဝတ္ထုပုရီ ပုရေ’သိ၊ ()

၂။

ဝဏ္ဏေဟိ ကဏ္ဏသုခသဒ္ဒရသေဟိ ဇာတ-

ရူပေဟိ အတ္ထဝိသရေဟိ ယတီဟိ ယုတ္တာ၊

ယာ ရာဇဓာနိ ပုထုပါဏဂဏပ္ပဒေဟိ

အာသီ (ဝသန္တတိလကာ) ရစနာ ယထေဝ၊ () (သိလေသ ဗန္ဓနံ၊)

၃။ ¶

ပါစီဒိသာဘုဇလတာယ မဟီယုဝတျာ

သန္နဒ္ဓသင်္ခဝလယဿိရိမာဝဟန္တံ၊

ယဿာ သုဓာသုပရိကမ္မကတံ ရရာဇ

ပါကာရစက္ကမစလံ မကုဋာနုကာရံ၊ ()

၄။

ယဿာ ရရာဇ ပရိခါ နဂရိန္ဒိရာယ

ကိဉ္ဇက္ခိဉ္ဇရိတတီရဒသာဘိရာမာ၊

သံသိဗ္ဗိတာလိဝိတ္တီမဏိတန္တုပန္တီ

ပါကာရသောဏိဘရတော ဂလိတမ္ဗရံ’ဝ၊ ()

၅။

ကန္ဒပ္ပဒပ္ပမဒိရာမဒမတ္တဓုတ္တာ

မန္ဒာနိလေရိတသုနီလလတာဝိတာနံ၊

ယသ္မိံ ဝိလောလနယနဉ္ဇလိပိယမာနံ

အာပါနဘုမိနိဘမောပဝနံဘဇိံသု၊ ()

၆။ ¶

မတ္တင်္ဂနာယ နဝယောဗ္ဗနဂဗ္ဗိတာယ

ရင်္ဂါလယဂ္ဂမဏိဒပ္ပဏဗိမ္ဗိတေဟိ၊

ယာ ရာဇဓာနိ ဃနပီနပယောဓရေဟိ

သောမ္မာနနေဟိ ဘဇိ မာနသဝါပိသောဘံ၊ ()

၇။

သင်္ကပ္ပိတာဘရဏရံသိ သတေရတာလီ

ဒါဌာဗလာကဝိသရာ မဒဝုဋ္ဌိဓာရာ၊

ယသ္မိံ ပုရေ ဃရမယူရကုလံ အကာလေ

ကီဠာပယိံသု ဝရဝါရဏဝါရိဝါဟာ၊ ()

၈။

ပါကာရစက္ကဗဟိနိဂ္ဂတ မုဂ္ဂရာဂံ

ယသ္မိံ တုရင်္ဂနိကရုဒ္ဓဋဓူလိဇာလံ၊

ရစ္ဆာဝတာရဇနတာယ ခဏံ ဇနေသိ

ဘီတိံ ပဒိတ္တပလယာနလဇာလသောဘံ၊ ()

၉။ ¶

ယသ္မိံ ဝိမာနမဏိသိင်္ဂဇုတိပ္ပဗန္ဓ-

သဉ္စုမ္ဗိတံ ဇိတရဝိံ ဟရိဏ္ဍကဗိမ္ဗံ၊

နာရီဇနာနနသရောဇကတာဝမာနံ

ကောဓာဘိဘုတမိဝ ဝဏ္ဏဝိကာရမာပ၊ ()

၁၀။

ယတ္ထိဿရေဟိ သမဓိဂ္ဂဟိတာနိ တုင်္ဂ-

ကေလာသကုဋဓဝလာတိ မနောဟရာတိ၊

နိစ္စံ သုဓာသုပရိကမ္မကတာနိ စာ’သုံ

လက္ခီနိကေတနနိဘာနိ နိကေတနာနိ၊ ()

၁၁။

ယတ္ထိန္ဒနိလမဏိမာပိတမဏ္ဍပဂ္ဂေ

ဟေမဒ္ဓဇာဝလိပရိဗ္ဘမဏံက ပုရမှိ၊

ဇီမူတကူဋပမုခေ သတဝိဇ္ဇုမာလာ-

လီလာဝဟံ ဝိရဟိနီနမဃံ ဇနေသိ၊ ()

၁၂။ ¶

သဉ္ဈာနုရာဂမဏိတောရဏဒီဓိတီဟိ

ဘိန္နန္ဓကာရနိကရာ’ခိလနာဂရာနံ၊

ယာ ရာဇဓာနိ ဇနယန္တိပိ တုင်္ဂတုဋ္ဌိံ

ပီတျာ နဝါသိ ရဇနီသ္မ ဘိသာရိကာနံ၊ ()

၁၃။

သေဝါလကေသရသမာကုလတီရဘာဂါ

သမ္ဖုလ္လရတ္တပဒုမုပ္ပလကလ္လဟာရာ၊

ဟံသာလိသာရသသမောသရဏာဘိရာမာ

ယသ္မိံ သုနိမ္မလဇလာ ကမလာကရာသုံ၊ ()

၁၄။

ယသ္မိံပုရေ ကုလဝဓူဝဒနမ္ဗုဇာနံ

လဒ္ဓုံ နိရူပမသိရိံ ဘုသမုဿဟန္တာ၊

ယာဝဇ္ဇ သေတသရသိရုဟသီတရံသီ

အညောညဗဒ္ဓပဋိဃာ’ဝ ဝဇန္တိ နာသံ၊ ()

၁၅။ ¶

ယသ္မိံ သုဝဏ္ဏမကဏိရူပိယဝံသဝဏ္ဏ-

မုတ္တာပဝါဠစဇိရေဟိ မဟာရဟေဟိ၊

နာနာပဏာ သုခုမကာသိကသာဏဟင်္ဂ-

ကောသေယျခေါမဝသနေဟိ’ဘဝုံ ပပုဏ္ဏာ၊ ()

၁၆။

စက္ကာသိသတ္တိဓနုကုန္တဂဒါဒိဘတ္ထာ

သန္နဒ္ဓဟေမကဝစာ ဝိဇိတာရိဝဂ္ဂါ၊

သင်္ဂါမသာဂရသမုတ္တရဏာတိသုရာ

ယောဓာ ယဟိံ ပုရဝရေ အကရိံသု ရက္ခံ၊ ()

၁၇။

ဖူဋ္ဌာ က ဝါဋနိကဋေ မဏိမန္ဒိရာနံ

ကပ္ပာသပဋ္ဋဓဝလာ သရဒဗ္ဘရာဇီ၊

ယသ္မိံ ခဏံ ဇဝနိကာသိရိမာဒဓာနာ

ထီနံ ဇုဂေါပ မဓုပေဟိ မုခမ္ဗုဇာနိ၊ ()

၁၈။ ¶

နိဗ္ဗိဒ္ဓဝီထိဝိသရေဟိ သုသဇ္ဇိတေဟိ

နိစ္စုဿဝါယ ပုရမုဿိတတောရသေဟိ၊

ဘောဂိန္ဒဘောဂနိကရေဟိ ရသာတလံ’ဝ

ယံ သမ္ပသာရိတဖဏေဟိ ဗဘုဝ ရမ္မံ၊ ()

၁၉။

ယသ္မိံပုရေ ဝိဝဋမန္ဒိရဇာလကာနံ

ဥဒ္ဓူတဓုလိမလိနီကဠိတာလကာနံ၊

နာရိနမိန္ဒုရုစီရာနန ဒပ္ပဏေသု

လောကဿ လောစနမဏိ ပဋိဗိမ္ဗိတာ’သုံ၊ ()

၂၀။

ဂမ္ဘီရသင်္ခပဋဘဒ္ဓနိဘူရိဃောသံ

ကေလာသကူဋဓဝလာလယဖေဏပိဏ္ဍံ၊

ယံ ပုဏ္ဏသတ္တရတနံ ပုရခီရသိန္ဓုံ

လက္ခီ အလင်္ကရိ တုရင်္ဂတရင်္ဂဝေဂံ၊ ()

၂၁။ ¶

ရေဏုပ္ပဗန္ဓမလိနံ ကဝနရာဇိနီလံ

မဓဝါတိမတ္တမဓုပံ ပဒုမာဘိရာမံ၊

ယံ ရာဇဟံသဘဇိတံ အဝတိဏ္ဏလောကံ

အာသိ ပုရံ ဝိကစကဉ္ဇဝနံ ယထေဝ၊ () (သိလေသဗန္ဓနံ၊)

၂၂။

ယသ္မိံပုရမှိ ရတနုဇ္ဇလနီလကဏ္ဌာ

ရာဂါဝမဒ္ဒိတဓရာ’ဝိဝဋဒွိဇာလိ၊

အာသုံပယောဓရဘရာ’ဝိရဠပ္ပဒေသာ

သမ္ပတ္တဝုဋ္ဌိဒိဝသာဝိယမာတုဂါမာ၊ () (သိလေသဗန္ဓနံ၊)

၂၃။ ¶

ဓမ္မာနုဓမ္မပဋိပတ္တိ ပရာယဏဿ

သံသာရဘီရုကဇနဿ တပေါဝနာဘာ၊

ယာ ရာဇဓာနိ ပစုရန္ဓပုထုဇ္ဇနာနံ

အာပါနဘုမိဝ ဗဘူဝု’ဘယပ္ပကာရာ၊ ()

၂၄။

ဗုဒ္ဓင်္ကုရဿ ရဝိဝံသပဘင်္ကရဿ

သမ္မာ သုခါနုဘာဝနာယ သုဘုမိဘုတာ၊

ဘော ယာဒိသိ ကပိလဝတ္ထုပုရိ ပုရေ’သိ

ဓမ္မဿဘာဝမဓုနာ ပရိဒီပယေ သာ၊ ()

၂၅။

တသ္မိံ ဗဘူဝ နဂရေ နဂရာဓိရာဇေ

ရာဇာ သုနီတိစတုရော စတုသင်္ဂဟေဟိ၊

ဓမ္မေန သဗ္ဗဇနရဉ္ဇနကော ကဒါစိ

သုဒ္ဓါဒနဝှဝိသုတော ရဝိဝံသကေတု၊ ()

၂၆။ ¶

ဒိသွာ’ဝတာရကလုသိကတမတ္တဘာဝံ

ဥက္ကဏ္ဌိတေ’ဝ ကမလာ ကမလာပတိဿ၊

ဘူပါလိပါလိဘဇိတံ စရဏာရဝိန္ဒံ

သံသေဝိ ယဿ ရဝိဝံသဓဇဿ ရညော၊ ()

၂၇။

ယဿာ’ဝနီသကဝိနော ကဝိကဏ္ဌဘုသာ

ဝါဏိဝဓူ မဓုရကောမကလကတ္တဝါဏီ၊

ပတွာ စတုမ္မုခမုခမ္ဗုဇကာနနမှာ

ဟံသီဝ မာနသတဠာကမလင်္ကရိတ္ထ၊ ()

၂၈။

သဗ္ဗာရိဒပ္ပမထနောပရိ ဧကဓတွာ

အဇ္ဈတ္တိကာရိပရာဇိယမပ္ပသယှံ၊

သံသုဒ္ဓစိတ္တနိကသေ နိသိတေန တာဝ

ပညာယုဓေန အဝဓိတ္ထ မဟီဘုဇော ယော၊ ()

၂၉။ ¶

ယသ္မာ မဟီပတိမဟီဓရတော ဥပေက္ခာ-

ဝေဠာတလာဝဓိ ဒယာသလိလေန ပုဏ္ဏာ၊

မေတ္တာသဝန္တိ ပဘဝါ မုဒိတုမိမာလာ

အဇ္ဈောတ္ထရိတ္ထ ဘုဝနတ္တယဂံဇနောဃံ၊ ()

၃၀။

သမ္ပန္နဒါနသဒနမ္ဗုဓရေဟိ ယဿ

ဒါနာဓိမုတ္တိပရမဿ မနောဒဟေသု၊

တဏှာတဋာနိ ကပဏဒ္ဓိကယာစကာနံ

ဟိန္နာနိ သတ္တရတနမ္ဗုနိပါတနေန၊ ()

၃၁။

ယဿိန္ဒနီလနယနံ ရဇတာဝဒါတ-

ဒန္တံ သုဝဏ္ဏဝဒနဉ္စ ပဝါဠသီသံ၊

မုတ္တာမယင်္ဂဝယဝံ ရတနေဟိ နာနာ

ဒေဟံ သုမာပိတမိဝါသိ ပိတာမဟေန၊ () (သီလေသဗန္ဓနံ)

၃၂။ ¶

ယဿာတိပဏ္ဍရယသောဝိသရော’သဓီသော

သငေက္ကာစိတာနနသရော’ရိနရာဓိပါနံ၊

သောကန္ဓကာရဘိဒုရော ရိပုရာဇိနီနံ

အာသာဂရန္တပထဝိံ ပရိဓိကရိတ္ထ၊ ()

၃၃။

ရာဇညဆပ္ပဒကုလံ သကလံ ပဒေသ-

ရဇ္ဇာဓိပစ္စမကရန္ဒရသာဘိလာသံ၊

ယဿတ္တဘာဝကမလာကရဖုလ္လိတာနိ

သံသေဝိ စာရုစရဏမ္ဗူရုဟာနိ ဘတျာ၊ ()

၃၄။ ¶

သေတာတပတ္တမိဝ ဝိဿုတကိတ္တိပုဉ္ဇံ

ကတွာ’သိပတ္တမိဝ ပါဝကဘီမတေဇံ၊

ယသ္မိံ သရဇ္ဇမနုသာသတိ သေသဘူပါ

ဆတ္တာသိဘူသိတကရာ သကကိင်္ကရာ’ဝ၊ ()

၃၅။

ဒွါရာနိ’နေကကပဏ္ဍိကယာစကာနံ

ဥဂ္ဃာဋိတောပျ’ဝိရတံ ရတနာလယေသု၊

သဒ္ဓါဒိသတ္တဓနရက္ခဏတပ္ပရော သံ

ဒွါရတ္တယံ ပိဒဟိ ယော ကပိလာဓိနာထော၊ ()

၃၆။

ယဿုဿိတဒ္ဓနုဧဏော ပဗလာရိဝဂ္ဂံ

ဝိဿဋ္ဌာဗာဏဝိသရဗ္ဗိသမုဗ္ဗဟန္တော၊

ဘသ္မိကရိ ကရိကရာယတပီနဗာဟု-

သပ္ပော သုဖောဌိတဇိယာပရိဖန္ဒဇိဝှော၊ ()

၃၇။ ¶

လက္ခီနိဓာနနဂရဏ္ဏဝပါတုဘူတော

မန္တိန္ဒကူဋသိခရီဝလယာဝုတော ယော၊

ဝါလဂ္ဂမတ္တမ္ပိ ရာဇသိဏေရုရာဇာ

ကောဓာနိလေန ရိပုရညမကမ္ပိယော’သိ၊ ()

၃၈။

ဘသ္မိကတာခီလဝိပက္ခနရိန္ဒကဋ္ဌော

ကောဓာနလော သရသမီရဏဘာဝိတောပိ၊

နိဗ္ဗာယိ ပဂ္ဃရိတဗပ္ပဇလေဟိ ယဿ

လောလဗ္ဗိလောစနဃဋေဟိ ဝိပက္ခထီနံ၊ ()

၃၉။

သန္နီတိမဂ္ဂဇလိတုဂ္ဂမတိပ္ပဒီပေါ

ကိတ္တိပ္ပဗန္ဓဓဝလီကတဇိဝလောကော၊

ရာဇိန္ဒမောဠိမဏိလင်္ကတပါဒပီဌော

ဓမ္မေန ရဇ္ဇမနုသာသိ စိရံ သရာဇာ၊ ()

၄၀။ ¶

တဿတိပီဝရပယောဓရဘဒ္ဒကုမ္ဘ-

ဒွန္ဒာတိဘာရဝိရဠီကတမဇ္ဈဘာဂါ၊

နိဒ္ဒေါသဗာလရဝိမဏ္ဍလစာရုဂဏ္ဍာ

ဒိဗ္ဗစ္ဆရာဇိတဝိရာဇိတရူပသောဘာ၊ ()

၄၁။

သမ္ဖုလ္လနီလကမလာမလနီလနေတ္တာ

ဩလမ္ဗမာနမဏိကုဏ္ဍလလမ္ဗကဏ္ဏာ၊

မုတ္တာဝလိဝဒသနာဝလိ ဟံသဓေနု-

ဟေလာပဟာသဂမနာ မုဒုစာရုဝါဏီ၊ ()

၄၂။

ဗိမ္ဗာဓရာ ဇလဓရာယတကေသပါသာ

သောဝဏ္ဏဒပ္ပဏနိဘာနနစန္ဒဗိမ္ဗာ၊

သန္နီရပုပ္ဖမကုဠောပမစာရုဇင်္ဃာ

ကန္ဒပ္ပ မင်္ဂလသိလာတလသောဏိဘာဂါ၊ ()

၄၃။ ¶

နာဘာလဝါဠရုဟနီလတမာလဝလ္လီ-

လီလာဝိနဒ္ဓနဝကောမလရောမရာဇီ၊

လာဝဏ္ဏဝါရိဓိတရင်္ဂဘုဇာ’ဘိနီလ-

သုဗ္ဘုလတာမကရကေတနစာပရူပါ၊ ()

၄၄။

ဘုပါလဝံသကမလာကရရာဇဘံသိ

မာယာဝဓု ဣဝ သုဇမ္ပတိနော သုဇာတာ၊

စန္ဒဿကောမုဒိ’ဝ ဝိဇ္ဇုရိဝ’မ္ဗုဒဿ

ရညော’တိစာရုစရိတာသိ ပိယာ မဟေသိ၊ ()

၄၅။ ¶

တသ္မိံ နဂေါပမဃရေ နဂရေ တဒါသိ

အာသာဠှိမင်္ဂလမဟော ဒိဝသာနိသတ္တ၊

မိလာသုဂန္ဓပရမံ ဝိဂတာသဝံ တံ

နက္ခတ္တကီဠမကရိတ္ထ မဟေသိ မာယာ၊ ()

၄၆။

ဝုဋ္ဌာယ သတ္တမဒိနာဂတပုဏ္ဏမာယ

ပါတော သုဂန္ဓပရိဝါသိတဝါရိနာ သာ၊

ကတွာ သိနာနမတုလံ ကပဏ္ဍိကာနံ

ဒါနံ အဒါသိ စတုလက္ခဓနဗ္ဗယေန၊ ()

၄၇။

ဝတ္ထာဟတေဟိ သုနိဝတ္ထသုပါရုတာ သာ

ဘုတွာ’ဂ္ဂဘောဇနမဓိဋ္ဌိတုပေါသထ’င်္ဂါ၊

နိဒ္ဒါတုရာ သုပိနမောဝရကံ ပဝိဿ

ကလျာဏမဒ္ဒသ သိရီသယနေ နိပန္နာ၊ ()

၄၈။ ¶

နေတွာ နိပန္နသယနံ ဟိမဝန္တပဿေ

ဟေဋ္ဌာ ဝိသာလတရသာဠမဟီရုဟဿ၊

နံ သဋ္ဌိယောဇနကစာရုမနောသိလာယံ

အာရောပယိံသု စတုရော ကိရ ဒေဝရာဇာ၊ ()

၄၉။

နေတွာ မနုဿမလသံဟရဏာယ တမှာ’

နောတတ္တနာမရဟဒံ သုနဟာပယိတွာ၊

ဒေဝိတ္ထိယော သပဒိ ဒိဗ္ဗမယေဟိ နေသံ

ဝတ္ထေဟိ ဂန္ဓကုသုမေဟိ အလင်္ကရိတွာ၊ ()

၅၀။

တတ္ထုဗ္ဘဝေါ လသတိ ရူပိယပကဗ္ဗတော ယော

တဿောဒရေ’တိရုစိရေ ကနကဗ္ဗိမာနေ၊

ပါစီနသီသဝတိ ဒိဗ္ဗမယမှိ သမ္မာ

ပညာပိတဂ္ဂသယနမှိ သယာပယိံသု၊ ()

၅၁။

ဩရုယှ သေတဝရဝါရဏရာဇဝေသော

ဗုဒ္ဓင်္ကုရော ရုစိရကဉ္စနပဗ္ဗတမှာ၊

အာရုယှ သဇ္ဈုဓရဏိဓရမုတ္တရာယ

သောဏ္ဍာယ သေတသရသိရုဟမုဗ္ဗဟန္တော၊ ()

၅၂။ ¶

ပတွာ ဝိမာနဝထကုဉ္စနဒံ နဒိတွာ

ကတွာ ပဒက္ခိဏမလင်္ကတမာတုသေယျံ၊

ဘေတွာန တာယပန ဒက္ခိဏပဿမန္တော

ကုစ္ဆိံ ပဝိဋ္ဌသဒိသော သုပိနေန ဒိဋ္ဌော၊ ()

၅၃။

မာယာယ ရာဇဝဓုယာ ရုစိရာနနာယ

အာသာဠှိပုဏ္ဏမိယမုတ္တရ’သာဠှဘေန၊

ဗုဒ္ဓင်္ကုရဿ ပဌမေန မဟာဝိပါက-

စိတ္တေန သမ္ပတိ အဟူ ပဋိသန္ဓိဂဗ္ဘေ၊ ()

၅၄။

ဗုဒ္ဓင်္ကုရဿ ပဋိသန္ဓိဂတဿ ဂဗ္ဘေ

မာယာယ စာရုစရိတာယ စ ခဂ္ဂဟတ္ထာ၊

နိဿေသုပဒ္ဒဝနိရာကရဏာယ ရက္ခံ

ဂဏှိံသု တာဝ စတုရော သုရရာဇပုတ္တာ၊ ()

၅၅။ ¶

မာယာယ ဘတ္တုပရမာယ တတောပ္ပဘုတိ

နူပ္ပဇ္ဇိ ကိဉ္စိ ပုရိသေသု သရာဂစိတ္တံ၊

သာ ပဉ္စကာမသုခိနီ အကိလန္တကာယာ

လာဘေနုဠာရယသသာပျဘိဝဍ္ဎိတာသိ၊ ()

၅၆။

ပညာယိ ဓောတရတနေ ဇနိကာယ အန္တော

ကုစ္ဆိံ ဂတော ယထရိဝါဝုတပဏ္ဍုသုတ္တံ၊

တံ ကုစ္ဆိနာ ပရိဟရီ ဒသမာသမတ္တံ

ပတ္တေန တေလမိဝ ရာဇိနိ အပ္ပမတ္တာ၊ ()

၅၇။

ပါတော’ဝ ပါဋိပဒဂေ ဒိဝသေ ပဗုဒ္ဓါ

ရညော ကထေသိ သုပိနံ အထ သော နရိန္ဒော၊

ဝေဒင်္ဂဝေဒစတုရေ စတုသဋ္ဌမတ္တေ

ပက္ကောသယီ ဒွိဇဝရေ ဒွိဇဝံသကေတူ၊ ()

၅၈။ ¶

လာဇုတ္တရာယ ပရိဘဏ္ဍကတာယ ဘုမျာ

ပညာပိတေသု သုခုမတ္ထရဏတ္ထတေသု၊

ဘဒ္ဒါသနေသု ဘဝနမှိနိသိန္နကာနံ

နေမိတ္တိကာနမဝနီပတိ ဘုသုရာနံ၊ ()

၅၉။

ပက္ခိတ္တသပ္ပိမဓုသက္ခိရခီရမိဿ-

ပါယာသပုဏ္ဏဟရိရူပိယဘာဇနေဟိ၊

ဝတ္ထာဟတာနိ ဓနဓညစယဉ္စ ဓေနူ

ဒတွာန ဒိဋ္ဌသုပိနဿ ဖခလံ အပုစ္ဆိ၊ ()

၆၀။

မာစိန္တယိတ္ထ တဝ ရာဇိနိယာ ဇနိန္ဒ

ကုစ္ဆိမှိ တမ္ပတိ ပတိဋ္ဌဟိ ပုတ္တဂဗ္ဘော၊

အဇ္ဈာဝသိဿတိ သဉ္စေပန စက္ကဝတ္တိ

ရာဇာ ဘဝိဿတိ အဂါရမသံသယံ သော၊ ()

၆၁။ ¶

ဟိတွာ သသတ္တရတနံ စတုဒီပရဇ္ဇံ

သော ပဗ္ဗဇိဿတိ သစေ ဘဝနာ’ဘိဂန္တွာ၊

ဗုဒ္ဓါ ဘဝိဿတိ ဓုဝံ စတုသစ္စဗုဒ္ဓါ

ဣစ္စဗြုဝိံသု သုပိနတ္ထဝိဒူ ဝိဒူ တေ၊ ()

၆၂။

သာ ဂဗ္ဘဘာရဝဌရိကတမဇ္ဈဘာဂါ

ဂန္တုံ သကံ ကုလဃရံ ကုလကဉ္ဇဟံသိ၊

ဣစ္ဆာမဟန္တိ ပဋိဝေဒယိ ဒေဝိ ရညော

သော သမ္ပဋိစ္ဆိ ဝစနံ ကရဝီကဝါဏျာ၊ ()

၆၃။

တမှာ မဟာနဂရတော နဂရင်္ဂပုဏ္ဏံ

သော ယာဝ ဒေဝဒဟနာမိကရာဇဓာနီ၊

မုတ္တာ’ဝဒါတပုဠိနတ္ထရဏေဟိ ရာဇာ

လာဇောပဟာရဝိဓိနာ ကမလုပ္ပလေဟိ၊ ()

၆၄။ ¶

သန္တီရပုပ္ဖကလသေဟိ သမပ္ပိတေဟိ

မန္ဒာတိလေရိတပဋာက ဓဇာဝလီဟိ၊

ကာရာပယီ ကနကရူပိယတောရဏေဟိ

အဒ္ဓါနမဂ္ဂသမလင်္ကရဏံ’တခိပ္ပံ၊ ()

၆၅။

ဝန္ဒီ’ဘိဂီတထုတိမင်္ဂလဂီတိကာဟိ

ပဉ္စင်္ဂိကေဟိ တုရိယေဟိ ကတုပဟာရံ၊

တသ္မိံ သုမဏ္ဍိတပသာဓိတမဉ္ဇသမှိ

ဒိဗ္ဗဝ္စရာသိရိဝိဍမ္ဗနရူပသောဘံ၊ ()

၆၆။

ဒေဝိံ သုဝဏ္ဏသိဝိကာယ သုသဇ္ဇိတာယ

အာရောပယိတွ ခစိတာယ မဏီဟိ နာနာ၊

ပေသေသိ ဘုပတိ ပုရက္ခတဉာတိသင်္ဃံ

သဒ္ဓိံ သဟဿသစိဝေဟိ သုခေဓိတံ သော၊ ()

၆၇။ ¶

သမ္ထုလ္လပုပ္ဖဖလပလ္လဝဝတ္တဘာရ-

ရုက္ခာကုလံ ဃနသုနီလလတာဝိတာနံ၊

ဟိန္တာလတာလနဠကီစကနာဠိကေရ-

သန္နီရပူဂတိဏပါဒပပန္တိသာလိံ၊ ()

၆၈။

သေဝါလနီလသလိလာနိလသီတလေဟိ

ဩတိဏ္ဏကဟံသဝိသရေဟိ သမုလ္လသတ္တံ၊

ဈင်္ကာရရာဝမုခရာလိကုလာကရာလ-

ကိဉ္ဇက္ခဇာလဘရိတမ္ဗုရုဟာကရေဟိ၊ ()

၆၉။

ပုပ္ဖာဘိဂန္ဓသုရဘီကတဂန္ဓဝါဟံ

အဒ္ဒက္ခိသဗ္ဗဇနလောစနပီယမာနံ၊

နိန္ဒန္တနန္ဒနဝနံ ဝနဇာယတက္ခီ

သာ လုမ္ဗိနီဝနမနင်္ဂဝိမာနဘူတိံ၊ ()

၇၀။ ¶

သာ ရာဇိနီ နဝဒလင်္ဂုလိပန္တီစာရု-

သာခါဘုဇောပဟိတမဉ္ဇရိစာမရေဟိ၊

သန္နဒ္ဓကောမလလတာဝနိတာနမဂ္ဂေ

အတ္တုပဟာရကရဏာယ ကတာဝကာသာ၊ ()

၇၁။

သေနာယ စာရုစရဏမ္ဗုရုဟောဒ္ဓဋေဟိ

ရေဏူဟိ ဓူသရိတမဂ္ဂမနက္ကမန္တိ၊

သဒ္ဓိံ သကာယ ပရိသာယ တတောတရိတွာ

တံ လုမ္ဗိနီဝနမုပါဝိသိ ရာမဏေယျံ၊()

၇၂။

တံ ရာဇိနိံ ဝနဝဓု ဇိတဟံသဂါမိံ

အာမောဒမန္ဒမလယာနိလဟတ္ထဂေဟိ၊

သမ္ဘာဝယိတ္ထ မုခရာလိကုလာဘိကိဏ္ဏ-

ရေဏုပ္ပဗန္ဓဟရိသင်္ခသတေဟိ မဂ္ဂေ၊ ()

၇၃။ ¶

ဂစ္ဆန္တိယာ စရဏနူပုရနာဒပါသ-

ဗဒ္ဓါနမုန္နတသိရောမိဂပေါတကာနံ၊

ဥမ္မီလိတာယတဝိလောစနပန္တိပက္ခေ

ဒဿေသိ နီလနလိနီဝနရာဇိသောဘံ၊ ()

၇၄။

ဥဒ္ဓံ သမဂ္ဂသိခရေဟိ ကတာဝကာသ-

မဂ္ဂန္တရေဟိ ကလိကာကုသုမာကုလေဟိ၊

နာနာလတာကုလမဟိရုဟတောရဏေဟိ

ဥယျာနဘုမိ ဥပဟာရရတေ’ဝ ဘုယ၊ ()

၇၅။

ဥက္ခိတ္တပိဉ္ဆဘရမန္တသိခဏ္ဍိမာလာ-

ကီဠာဟိ ကောကိလကုလငနိကာဟဠေဟိ၊

ဥယျာနဘုမိ မကရငဇရင်္ဂဘုမိ-

လီလံ ဘဇိတ္ထ ဘမရဒ္ဓနိဝလ္လကီဟိ၊ ()

၇၆။ ¶

နိစ္စံ ဝသန္တသမယဿိရိမုဗ္ဗဟန္တံ

တံခေါဝနံ ဝနဝဓူဟဒယာနုတာပီ၊

ပတ္တော နိဒါဃသမယောပိ ဇနေသိ တုဋ္ဌိံ

တဿာ သိရိသကုသုမာလိကုလာဝတံသော၊ ()

၇၇။

တသ္မိံ နိဒါဃသူရိယာတပတာပိတာမ္ဘံ

ရိတ္တာလဝါဠမိဝကာလမကာလမေဃော၊

စိန္တာတုရံ ဟဒယမတ္တသခီဇနောပိ

ပီဏေသိ ဂဗ္ဘပရိပါကဘရံ ဝါဟန္တျာ၊ ()

၇၈။

ကဋ္ဌာဝသိဋ္ဌတရဝေါ ပရိဟီနပတ္တာ

တဿာဓရက္ခိဒသနဇ္ဇုတိသင်္ဂမေန၊

အာသုံ နဝင်္ကုရပလာသဝိကာသပုပ္ဖ-

သံဝေလ္လိတာ’ဝ ရမဏီယဝနပ္ပ ဒေသေ၊ ()

၇၉။ ¶

ဂိမှာဘီတာပပရိပီဠိတင်္ဓလ္လိကာနံ

ဂမ္ဘီရရာဝမုခရီကတဒါယရာဇိ၊

ဒုက္ခာတုရဗ္ဗိရဟိနီပမဒါဇနဿ

အာသိ ဝိလာပဗဓိရီကဠိတေ’ဝ သာဠာ၊ ()

၈၀။

တသ္မိံ ဝိကာသကလိကာဝလိဟာရိဟာရာ

ကိဉ္စာပိ ပက္ကဖခလဝလ္လရိကဏ္ဌဘုသာ၊

နာသက္ခိ ပူဂတရုပန္တိ သုမဏ္ဍိတာယ

မာယာယ တာယ သိရိမာဘရိတုံ ဃဋန္တီ၊ ()

၈၁။

ဥယျာနမုဗ္ဘမိတမတ္တမဓုဗ္ဗတေဟိ

စမ္ပေယျပုပ္ဖမကုလေဟိ သမာကုလံတံ၊

ဥဒ္ဓုတဓုမပဋလေဟိ မနောဘဝဿ

ဒီပေဟိ ဝါသဘဝကနံ’ဝ လသန္တမာသိ၊ ()

၈၂။ ¶

ဂဗ္ဘူပဂံ ဘမရကေသကလာပဘာရာ

ဗုဒ္ဓင်္ကုရံ ပရိဏတင်္ကုရလောမဟံသာ၊

ဝန္ဒန္တိယော ဝိယ တဟိံ ထဗကဉ္ဇလီဟိ

မန္ဒာနိလေရိတလတာဝနိတာ ကနတာ’သုံ၊ ()

၈၃။

ဂဗ္ဘူပဂဿ ပရိပက္ကဖလေဟိ နာနာ

ပုညာနုဘာဝပဘဝေါတုသမုဗ္ဘဝေဟိ၊

မာယာယ ဂဗ္ဘဗလိကမ္မနိ တပ္ပရေ’ဝ

ဥယျာနဘုမိ ဇနတံ ဘဝိ တပ္ပယန္တိ၊ ()

၈၄။

ဂဗ္ဘူပဂဿ ဟိ မဟာပုရိသဿ ဂဗ္ဘ-

ဝုဋ္ဌာနမင်္ဂလမဟုဿဝဝါသရမှိ၊

ဥယျာနဘုမိ သကလောတုသမုဗ္ဘဝေဟိ

အာသိ ဝိကာသကုသုမေဟိ သမာဘိကိဏ္ဏာ၊ ()

၈၅။ ¶

သာလုမ္ဗိနီဝနသိရိံ ကလဟံသဃောသံ

သမဖုလ္လပုပ္ဖသုရဘိံဖလသမ္ဘဝေါဇံ၊

ပဉ္စိန္ဒြိယေဟိ ဂိရိနိဇ္ဈရသိတဝါတံ

ပစ္စက္ခပဉ္စဝိဓကာမရသံအဝိန္ဒိ၊ ()

၈၆။

နိယျာသသာရသုရဟိံဖခလပလ္လဝေဟိ

ဈံကာရိတာလိကုလကုဇိတကောကိလေဟိ၊

သမ္ဖုလ္လပုပ္ဖနိကရေဟိ သမာဘိကိဏ္ဏ

မဒ္ဒက္ခိသာယုဝတိမင်္ဂလသာဠသာလံ၊ ()

၈၇။

သမ္ဖုလ္လသာဠကလိကံတယတာလိမာလာ

သဉ္စုမ္ဗိတံကုဝလယာမလလောစနာယ၊

သာခံသုကောမလကရင်္ဂုလိပလ္လဝေဟိ

မာယာမဟေသိသမလင်္ကရိ ဝိတမာယာ၊ ()

၈၈။ ¶

ဘာရောနတာ’ဝ ရုစိရင်္ဂုလိပလ္လဝါနံ

ဈင်္ကာရရာဝမုခရာလိကုလာဘိရာမာ၊

သာခါ ဝိကာသကုသုမေဟိသမာကုလာ သာ

ဩလမ္ဗယဋ္ဌိ ဘဝိ ဂဗ္ဘဘရာတုရာယ၊ ()

၈၉။

တဿာ စလိတ္ထ ပဝနော စလလောစနာယ

ကမ္မုဗ္ဘဝေါ ဝရတိရောကရဏေဟိ တာဝ၊

ဒေဝိံ နိရူပမသိရိံ သုပရိက္ခိပိတွာ

တမှာ ပဋိက္ကမိ ဇနော ကဠိတာဝကာသော၊ ()

၉၀။

ဗြဟ္မာမရာသုရနရောရဂပူဇနီယံ

ဗတ္တိံသလက္ခဏသမုဇ္ဇလရူပ သာရံ

နိဒ္ဓါတဇာတိမဏိသန္နိဘသုဒ္ဓဂတ္တံ

သတ္တုတ္တမံ သပဒိ ဒေဝိ ဌိတာ ဝိဇာယိ၊ ()

၉၁။ ¶

ဒုဂ္ဂန္ဓမုတ္တမလသောဏိတမက္ခိတင်္ဂါ

ဇာယန္တျ’သေသမနုဇာ မနုဇေသုနေ’ဝံ၊

စင်္ဂေါဋကမှိ ဇိနဓာတုရိဝါဓိဝါသော

ထူပမှိ သောဏ္ဏပဋိမာရိဝ မာတုဂဗ္ဘံ၊ ()

၉၂။

နိဿေဏိတောဝ ပုရိသော ရတနာသနမှာ

ထေရောဝ ဓမ္မကထိကော ဌိတကော’တရန္တော၊

သမ္မာ ပသာရိယ ဥဘော မုဒုပါဏိပါဒေ

သော နိက္ခမိတ္ထ ကုဏပေဟိ အမက္ခိတင်္ဂေါ၊ ()

၉၃။ ¶

တတြောပဂမ္မ စတုရော စတုရာနနာ တံ

ဇာလေန ကဉ္စနမယေန ဝိသုဒ္ဓစိတ္တာ၊

အာဒါယ မာတုပုရတော တနယံ ဌပေတွာ

စန္ဒာနနေ ဘဝတု နန္ဒမနာ’တျ’ဝေါစုံ၊ ()

၉၄။

အာဒိစ္စဝံသကမလာကရဘာကရဿ

ဗုဒ္ဓင်္ကုရဿ သုဘသီတလဝါရိဓာရာ၊

နိက္ခမ္မ တာဝ နဘသာ နိဇမာတုယာ စ

ဂါဟာပယုံ ဥတုမုဘောသု ကလေဗရေသု၊ ()

၉၅။

တေသံ ကရေဟိ စတုရော သုရရာဇပုတ္တာ

ဂဏှိံသု သဏှသုခုမာယ’ဇိဏပ္ပဝေဏျာ၊

တေသဉှိ ပါဏိတလတော ပဏိပါတပုဗ္ဗံ

ဂဏှိံသု တံ ဒုကုလစုမ္ဗဋကေန’မစ္စာ၊ ()

၉၆။ ¶

တေသံ ကရေဟိ ပထဝိတလမောတရိတွာ

ဌတွာ ပုရတ္ထိမဒိသံ အသမော ဝိပဿိ၊

ဥဒ္ဓံ အဓော စတုဒိသာနုဒိသာ စ ဧဝံ

ဧကင်္ဂနံ ဘဝိတဒါ’ခိလလောကဓာတု၊ ()

၉၇။

တုမှေဟိ ဥတ္တရိတရော ဘုဝသေ တီသု

နတ္ထီတိ မတ္ထကဇဋာမကုဋပ္ပိတေဟိ၊

ကတွာနိဇဉ္ဇလိပုဋေဟိ နိပစ္စကာရံ

ဗြဟ္မာမရာသုရနရာ တမဘိတ္ထဝိံသု၊ ()

၉၈။

သောစ’တ္တနာ သမမဒိသွ ဒိသာသု တာသူ

တပ္ပာဒဝီတိဟရဏေန ပဒါနိသတ္တ၊

ဂန္တွာန ဥတ္တရဒိသာ’ဘိမုခေါ အဝနျာ

အဗ္ဘုဂ္ဂတမ္ဗုရုဟမုဒ္ဓနိ တိဋ္ဌမာနော၊ ()

၉၉။ ¶

အဂ္ဂေါ’ဟမသ္မိ အဟမသ္မိ ဇနဿ ဇေဋ္ဌော

သေဋ္ဌော’ဟမသ္မိ အယမန္တိမ’ဇာတိ မယှံ၊

ဓီရော မမေတရဟိ နတ္ထိ ပုနဗ္ဘဝေါ’တိ

နိစ္ဆာရိတာသဘိဝစော နဒိ သီဟကနာဒံ၊ ()

၁၀၀။

ဝေသာခေမာသေ သုဟကုဇဒိနေ ပုဏ္ဏမာယံ ဝိသာခေ

နက္ခတ္တေယောဂေ သုရဂုရုဂတေ သော ကုဠီရဝှရာသိံ၊

သဉ္ဇာတော နာထော ပရမကရုဏာဘာဝနာဘာဝတတ္တော

မာယာကုစ္ဆိမှာ ကုသုမိတလတာဝေလလိတုယျာနဘုမျာ၊ ()

ဣတိ မေဓာနန္ဒာဘိဓာနေန ယတိနာ ဝိရစိတေ သကလ ကဝိဇန ဟဒယာနန္ဒဒါနနိဒါနေ ဇိနဝံသဒီပေ အဝိဒုရေနိဒါနေ ပစ္ဆိမဘဝိက မဟာဗောဓိ သတ္တုပ္ပတ္တိ ပဝတ္တိပရိဒီပေါ ဆဋ္ဌောသဂ္ဂေါ။

၁။ ¶

အထရမ္မတရာ’သိ ဇာတိခေတ္တ-

ပရိယာပတ္တ’ဝကာသလောကဓာတု၊

ကမလုပ္ပလ (မာလဘာရိနီ) ဟိ

တဒုပဋ္ဌာနဂတာဟိ ဒေဝတာဟိ၊ ()

၂။

ကမလာသနဒေဝဒါနဝါနံ

ဘုဝနေ’ကတ္ထ သမာဂမော တဒါ’သိ၊

ဇိနစက္ကပဋိဂ္ဂဟဿ ဌာနံ

အဝိဝါဒေန သဒေဝမာနုသာနံ၊ ()

၃။

ပဋိလာဘနိမိတ္တမာဒိသန္တီ

ဝတ သဗ္ဗညုတဉာဏသမ္ပဒါယ၊

ဒသသင်္ခသဟဿိလောကဓာတု

အဘိကမ္ပီ ပဟဋေ’ဝ ကံသပါတီ၊ ()

၄။ ¶

ဇနနုဿဝဝါသရမှိ တသ္မိံ

နိဇဒေဟဇ္ဇုတိပိဉ္ဇရော’ဒပါဒိ၊

ဒသသင်္ခသဟဿစက္ကဝါဠ-

ကုဟရာလောကကရော မဟာဝဘာသော၊ ()

၅။

အပတာဠိတစမ္မနဒ္ဓဘေရီ-

ဝိကတီနံ သယမေဝ ဝဇ္ဇနမ္ပိ၊

တဒနုတ္တရဓမ္မဒေသနာယ

ဘဝိ ဌာနံ အနုသာဝဏဿ လောကေ၊ ()

၆။

ဃဏကာဟဠဝံသသင်္ခဝီဏာ-

ဘရဏာနံ သယမေဝ ဝဇ္ဇနမ္ပီ၊

အနုပုဗ္ဗဝိဟာရဘာဝနာနံ

ပဋိလာဘာယ နိဗန္ဓနံ ဗဘူဝ၊ ()

၇။ ¶

ပရိမုတ္တိဝရတ္တပါသကာရာ-

ဃရ၊ယောသင်္ခလိကာဒိဗန္ဓနေဟိ၊

မိဂပက္ခိနရာနမသ္မိမာန-

ဝိဂမဿာ’သိ နိဒါနမာဒိဘုတံ၊ ()

၈။

ဘုဝနေသု မဟာဇနဿ ရောဂါ-

ပဂမေနာ’ဒိသနံ အဟောသုခန္တိ၊

စတုရာရိယသစ္စဒဿနေန

ဘဝိ ဌာနံ စတုသစ္စဒေသနာယ၊ ()

၉။

ဝိဝိဓဗ္ဘုတရူပဂေါစရာနံ

ဘုဝိ ဇစ္စန္ဓဇနဿလောစနာနံ၊

ပဘဝေါ ပဘဝေါ’သိ ဒိဗ္ဗစက္ခု

ပဋိလာဘာယ တိလောကလောစနဿ၊ ()

၁၀။ ¶

ထုတဂီတိသုဓာရသဿ ပါနံ

ဗဓိရာနံ သဝဏဉ္ဇလီပုဋေဟိ၊

အတိမာနုသဒိဗ္ဗသောတဓာတု-

ပဋိဝေဓာယ နိဒါနမာသိ တဿ၊ ()

၁၁။

ဘုဝိ ဇာတိဇဠာဒိပုဂ္ဂလာနံ

တဒဟေ’နုဿတိယာ သုပါတုဘာဝေါ၊

ဘဝိ ပုဗ္ဗမုပဋ္ဌိတဿတိဿ

သတိပဋ္ဌာနနိဗောဓနာယ ဌာနံ၊ ()

၁၂။

ဝိသိခါစရဏံ သရောဇစာရု-

ပဒဝိညာသဝသေန ပင်္ဂုလာနံ၊

ပုရိမံ စတုရိဒ္ဓိပါဒဝေဂ-

ပဋိလာဘာယ နိမိတ္တမာသိ လောကေ၊ ()

၁၃။

မဓုရေန သရေန ဇာတိမူဂါ

ထုတိဂီတာနျ’ဝဒိံသု ဝန္ဒိနော’ဝ၊

ဘုဝိ ခုဇ္ဇဇနော’ဇုဂတ္တလာဘော

ကုဋိလတ္တာ’ပဂမာယ ဌာနမာသိ၊ ()

၁၄။ ¶

သရဏံ ပုရိသာသဘော သိယာနော

ဘဝတော ဒုဂ္ဂတိတော ဝိမုတ္တိယာ’တိ၊

ကရိနော’ပိ ကရိံသု ကုဉ္စနာဒံ

တုရဂါ ဟေသမကံသု ပီတိယေ’ဝ၊ ()

၁၅။

ဝိသဒါ ပဋိသမ္ဘိဒါ စတဿော

ပဋိဝိဇ္ဈိဿတိ စာ’ယတိံ သစာ’ယံ၊

သကပဋ္ဋနမေဝ တန္နိဒါနာ

တရဏီ သီဃမုပါဂမုံ ဝိဒေသာ၊ ()

၁၆။

သယမေဝ ဝိရောစနံ တဒါနိ

ရတနာနံ ဘုဝနာကရုဗ္ဘဝါနံ၊

ရဝိဝံသရဝိဿ ဓမ္မရံသီ

ဝိသရဿု’ဇ္ဇလနာယ ဌာနမာသီ၊ ()

၁၇။ ¶

တုရိယာနိ သကံသကံ နိနာဒံ

အကရုံ တဂ္ဂုဏဒီပကာနိဝါ’တြ၊

ဝိဝဋာ ဝိဒိသာဒိသာ သကိတ္တိ-

ဝိသရောကာသကတေ’ဝ’ဟိပ္ပသတ္တာ၊ ()

၁၈။

သကလဿ ကိလေသပါဝကဿ

ပရိနိဗ္ဗာနသဘာဝဒီပနေန၊

နိရယေသု ဟုတာသဇာလမာလာ

တဒဟေ နိဗ္ဗုတိမာပ ဇာတိခေတ္တေ၊ ()

၁၉။

ပရိသာသု ဝိသာရဒဿ တဿ

စတုဝေသာရဒဉာဏလာဘဟေတု၊

ဘုဝနေသု တဒါမဟာနဒီနံ

အနဘိဿန္ဒနမာသိ ကုန္နဒီနံ၊ ()

၂၀။

ဥဒပါဒိ ပဘာ နိရာကရိတွာ-

ဗိလလောကန္တရိယေသု အန္ဓကာရံ၊

ဟတမောဟတမ’ဂ္ဂ မဂ္ဂဉာဏ-

ဇ္ဇုတိလာဘာယ နိဗန္ဓနံ တမာသိ၊ ()

၂၁။ ¶

သုဝိမုတ္တိရသော သိယာ’ဝ တဿ

စတုရာသိတသဟဿဓမ္မခန္ဓော၊

မဓုရံ စတုရောဒဓီနမာသိ

သလိလံ သန္တတရံ တရင်္ဂရိတ္တံ၊ ()

၂၂။

ဝိဒိသာသု စတုဒ္ဒိသာသု စဏ္ဍ-

ပဝနဿာ’ပိ အဝါယနံ တဒါနိ၊

ဘဝိ ပုဗ္ဗနိမိတ္တမတ္တနော’ပိ

ဘဋဒိဋ္ဌျာဘဝဒဋ္ဌိဘေဒနာယ၊ ()

၂၃။

နဝပလ္လဝပတ္တသေခရာနံ

ဝိဋပီနံ ကုသုမာဟိကိဏ္ဏဘာဝေါ၊

ဘဝိ ပုဗ္ဗနိဗန္ဓနံ ဝိမုတ္တိ

ကုသုမေဟာ’တုမဒေဟဘူသဏာယ၊ ()

၂၄။ ¶

ကုမုဒါကရဗောဓကဿ စန္ဒ-

ကိရဏဿာ’တိဝိရောစနံ တဒါသိ၊

သတိဗုဒ္ဓသုဓာကရော’ဒယမှိ

ဇနသန္ဒောဟမနောပသာဒဟေတု၊ ()

၂၅။

ဝိမလတ္တမနုဏှတာ နိဒါဃ-

သူရိယဿူ’ပသမော နိမိတ္တမဂ္ဂံ၊

ဘဝိ စေတသိကဿ ကာယိကဿ

ပဋိလာဘာယ သုခဿ တမှိဇာတေ၊ ()

၂၆။

ဂဂနာ’ဂနဂါဒိတော’တရိတွာ

ပထဝိသင်္ကမဏံ တဒါ ခဂါနံ၊

သရဏာဂမနဿ ဌာနမာသိ

ဇိနဓမ္မံ သုနိသမ္မ သဇ္ဇနာနံ၊ ()

၂၇။

နဘသာ’ဘိပဝဿနံ တဒါနိ

စတုဒီပေသု အကာလဝါရိဒါနံ၊

ပရိသာသု အခဏ္ဍဓမ္မဝုဋ္ဌိ-

ပတနဿာ’သိ နိဗန္ဓနံ ဇိနမှာ၊ ()

၂၈။ ¶

ဆဏမင်္ဂလကီဠဏံ တဒါနိ

တိဒသာနမ္ပိ သကေသကေ ဝိမာနေ၊

ဥပဂမ္မ တဟိံတဟိံ ဥဒါန

သမုဒါနဿနိဒါနမာ’သိ ဗောဓိံ၊ ()

၂၉။

ဝိဝဋာ သယမေဝ မန္ဒိရာနံ

ပိဟိတဉ္စာရကဝါဋဝါတပါနာ၊

ဘဝဒုက္ခနိရောဓဂါမိမဂ္ဂ-

ပဋိလာဘာယ နိမိတ္တမာဟရိံသု၊ ()

၃၀။

တဒဟေ မဓုရာမိသဿ ပေတ္တီ-

ဝိသယေသွာဟရဏံ ခုဒါတုရာနံ၊

ဘဝိ ကာယဂတာသတာမတဿ

ပဋိလာဘာယ နိမိတ္တမတ္တနော’ပိ၊ ()

၃၁။ ¶

ဒိဝသေ ဇနနုဿဝေ ပိပါသာ-

ဝိဂမော ဒီနဇနဿ ပေတလောကေ၊

သုခိတတ္တဿ ဥပေစ္စဗုဒ္ဓဘာဝံ၊ ()

၃၂။

ပဋိပက္ခဇနဿ မေတ္တိလာဘော

တဒဟေ ဝါယသဝါယသာရိနမ္ပိ၊

ဘဝိဌာနမနန္တသတ္တလောက-

ဝိသယဗြဟ္မဝိဟာရဘာဝနာယ၊ ()

၃၃။

သတိမဂ္ဂဖလုဗ္ဘဝေ ယထေဝ

ဘဝဘီတျာပဂမော တထာဂတာနံ၊

သတိ ဇာတမဟာမဟေ ဘယံ ဝါ

နတိရစ္ဆာနဂတာနမာသိ တာသော၊ ()

၃၄။

ပိယဘာဝုပသင်္ကမော ပဇာနံ

ဟဒယာနန္ဒကရာယ ခေါ ဂိရာယ၊

ဇိနဓမ္မကထာယ သာဝကာနံ

ဝိယ သာမဂ္ဂိရသဿ ပါတုဘာဝေါ၊ ()

၃၅။ ¶

သိတကိတ္တိလတာယ ရောပိတာယ

ဘဝတော’သ္မိံ ဘုဝနာလဝါဠဂဗ္ဘေ၊

ဝိယ နိမ္မိတယန္တဝါရိဓာရာ

ဇလဓာရာ ဓရဏီတလုဋ္ဌဟိံသု၊ ()

၃၆။

ဘမရာဝလိဘာရပဉ္စဝဏ္ဏ-

ကမလစ္ဆန္နမဟီတလံ ရရာဇ၊

ဇလဇံ ထလဇံ ပရာဂဟာရံ

ဘုဝိ သဗ္ဗတ္ထ အပုပ္ဖိ ပုပ္ဖဇာတံ၊ ()

၃၇။

ဝိဋပီသု လတာသု ခန္ဓသာခါ-

သတပတ္တာနိ တဒါ သုပုပ္ဖိတာနိ၊

နရဝီရ’ဘိရူပဒဿနာယ

ဘူသမုမ္မီလိတလောစနာနိ’ဝါသုံ၊ ()

၃၈။ ¶

ဥပရူပရိ သတ္တသတ္တ ဟုတွာ

သတပတ္တာနိ သီလာတလုဗ္ဘဝါနိ၊

တဝ အဗ္ဘုဒယော သုဒုလ္လဘောတိ

ကထယန္တိဝိ’ဟ ကပါတုဘာဝတော နော၊ ()

၃၉။

နိဇပါရမိတာလတာယ ကတ္တိ-

လတယာ’လင်္ကတပုပ္ဖဟာသရူပါ၊

သမလင်္ကရိ ယာဝတာ ဘဝဂ္ဂံ

ဓဇမာလာ ဇနနုဿဝေ တိလောကံ၊ ()

၄၀။

အဝကုဇ္ဇသရောရုဟာဘိရာမံ

နဘဝမ္ဘောဇဝနဿိရိံ ဗဗန္ဓ၊

ဘုဝိ ပေါက္ခရဝဿမီဒိသန္တိ

ဝဒမာနံဝ ပဝဿိ ဓမ္မဝဿံ၊ ()

၄၁။

ရမဏီ ရမဏီယရူပသောဘာ

အစရုံ ဓမ္မမနင်္ဂရင်္ဂဘူမိ၊

မဓုပါ မဓုပါနမန္ဒိရာနိ

တဒဟေ နာဝသရိံသု ဓမ္မကာမာ၊ () (အဗျပေတ ပဌမဒုတိယ ပါဒါဒိယမေကံ)

၄၂။ ¶

ကမလာ ကမလာလယာ ဝိဝေသ

ဘုဝနံ ဘူရိနဝါဝတာရဟာရီ၊

ဓရဏီ ဓရဏီဓရာဝတံသာ

ဥပဟာရာတိဘရာတုရေဝ ကမ္ပိ၊ () (အဗျပေတ ပဌမဒုတိယ ပါဒါဒိယမကံ)

၄၃။

ရုစိရံ ရုစိရင်္ဂနာ တဒါနိ

အကရုံ ကီဠမနေကစန္ဒိကာသု၊

သုဝီရံ သုစိရံသိကိဏ္ဏတာရာ-

နိကရော’ဘာသတရော’သိ ဘာကရော’ဝ၊ () (အဗျပေတ ပဌမဒုတိယ ပါဒါဒိယမကံ)

၄၄။

ပဝနော’ပဝနော’ပဝါယမာနော

ပဝိနောဒေသိ ပရိဿမံ ဇနဿ၊

ဝနဒါ ဝနဒါဟဝုပသန္တိံ

အကရုံ သဗ္ဗဓိ သဿသမ္ပဒဉ္စ၊ () (အဗျပေတ ပဌမဒုတိယ ပါဒါဒိယမကံ)

၄၅။ ¶

ဝိသဒါ ဝိသဒါ သကိတ္တိရာမာ

မုခရင်္ဂါလယ မာပကောဝိဒါနံ၊

သုဇနာ’သုဇနာ ဘဇိံသု တဿ

စရဏာနျင်္ကိတစက္ကလက္ခဏာနိ၊ () (အဗျပေတ ပဌမဒုတိယ ပါဒါဒိယမကံ)

၄၆။

ဝသုဓံ ဝသုဓမ္ပတီ သမဂ္ဂါ

ဒသဓမ္မေန’နုသာသယုံ တဒါနိ၊

ဟဒယံ ယဒယင်္ဂမာယ ဝါဏျာ

အသတံ မိတ္တဒုဟီ ဝိဓာနယိံသု၊ () (အဗျပေတ ပဌမဒုတိယ ပါဒါဒိယမကံ)

၄၇။

တိမဒါ’တိမဒါ ဂဇာဓိပါပိ

မိဂရာဇူဟိ တဒါ သမာစရိံသု၊

ပဗလာ’ပဗလာ မိဂါ တဒညေ

ပဋိသတ္ထာရမကံသု အညမညံ၊ () (အဗျပေတ ပဌမဒုတိယ ပါဒါဒိယမကံ)

၄၈။ ¶

ဘုဝနေ ဘုဝနေကလောစနဿ

ဇနနသ္မိံ ဒိဝသေ သမုဇ္ဇလာနီ၊

နိဟနိတာ’နိဟိတာယုဓာတိ ဘိတိံ

ဇနယုံ ပါပိမတောဝ နေတရေသံ၊ () (အဗျပေတ ပဌမဒုတိယ ပါဒါဒိယမကံ)

၄၉။

ပရိဝါဒိတဒိဗ္ဗဘေရိဝီဏာ-

တုရိယံ ဒဿိတဒိဗ္ဗနစ္စဘေဒံ၊

ဂဂနံ သုရရင်္ဂမဏ္ဍလာဘံ

တိဒသာနံ ဥပဟာရသာရမာသိ၊ ()

၅၀။ ¶

သောဝဏ္ဏဝဏ္ဏဝဓုယာ ဂရုဂဗ္ဘဂသ္မိံ

တံနန္ဒနဗ္ဗနသမာနဝနင်္ဂတသ္မိံ၊

ဘုတဗ္ဘုတနွိတမဟေ နယနဉ္ဇနသ္မိံ

ဇာတမှိ တမှိ တနုဇေ ဘဝိ ဘဒ္ဒဘတ္တိ၊ () (မာလာဗန္ဓနံ)

ဣတိ မေဓာနန္ဒာဘိဓာနေန ယတိနာ ဝိရစိတေ သကလကဝိဇန ဟဒယာနန္ဒနနိဒါနေ ဇိနဝံသဒီပေ အဝိဒူရေနိဒါနေ ဝိဝိဓပုဗ္ဗနိမိတ္တပါတုဘာဝပ္ပဝတ္တိ ပရိဒိပေါ။ သတ္တမောသဂ္ဂေါ။

၁။ ¶

ဝိသုဒ္ဓ (ဝံသဋ္ဌ) မသေသဗန္ဓဝေါ

ကုမာရမာဒါယ တိလောကလောစနံ၊

အဂံသု တမှာ ကပိလဝှယံပုရံ

ပုရီဝတံသံ သမလင်္ကတဉ္ဇသံ၊ ()

၂။

တဒါ အဘိညာသု ဝသိသု ပါရဂေါ

သမာဓိဝိက္ခမ္ဘိတသဗ္ဗကိဗ္ဗိသော၊

ဝိဟာသိ သုဒ္ဓါဒနဘုမိဘတ္တုနော

ကုလူပဂေါ ဒေဝလနာမတာပသော၊ ()

၃။ ¶

တပေါဓနော သော ပဝိဝေကကာမဝါ

ဒိဝါဝိဟာရတ္ထမုပါဂတော ဒိဝံ၊

တမတ္ထမညာတုမပုစ္ဆိ ဒေဝတာ-

ပဝတ္တိတံ ပဿိယမင်္ဂလုဿဝံ၊ ()

၄။

တဝေဝုပဋ္ဌာယကဘုမိဘတ္တုနော

ဝရောရသော မာရိယ မာရဝါဟိနိံ၊

ပရာဇယံ လစ္ဆတိ ဗောဓိမာယတိံ

မဟုဿဝေါ တမ္ပတိ ဝတ္တတေ၊ ဗြဝုံ၊ ()

၅။

ဣမာယ ဝုတ္တန္တကထာယ စောဒိတော

တပေါဓနော ဣဒ္ဓိဗလေန ဣဒ္ဓိမာ၊

သုရာလယေ အန္တရဓာန’နန္တရံ

နိကေတနေ ပါတုရဟောသိ ရာဇိနော၊ ()

၆။ ¶

ကုမာရနိဇ္ဈာနမနောရထောက ဝသိ

တဟိံ သုပညတ္တမဟာရဟကာသနေ၊

နိသဇ္ဇ သုဒ္ဓါဒနရာဇိနော’ဗြုဝိ

တဝတြဇံ ဒဋ္ဌုမိဓာဂတောတျ’ဟံ၊ ()

၇။

နရိန္ဒစူဠာမဏိစုမ္ဗိတာနျ’ထ

ပဒါနိ ဝန္ဒာပယိတု တပဿိနော၊

ဝိဘုသဏာလင်္ကတမတ္တသမ္ဘဝံ

နရာဓိပေါ ရာဇကုမာရမာဟရိ၊ ()

၈။

တဒတ္တဘာဝေန’ဟိဝါဒနာရဟ-

ဿ’ဘာဝတော တဿ ရရာဇ သူနုနော၊

ပဝဋ္ဋယိတွာ ဇဋိလဿ သမ္ပတိ

ဇဋာသု စက္ကင်္ကိတပါဒပင်္ကဇံ၊ ()

၉။

ကုမာရမာဒါယ သမပ္ပိတဉ္ဇလိံ

ဝိဓာယ ပါဒေသွနိသမ္မကာရိနော၊

သစေ ဌပေယျုံ ဇဋိလဿ သတ္တဓာ

ဖလေယျ မုဒ္ဓါ ဇဋိတောဇဋာယ’ပိ၊ ()

၁၀။

သကာသနုဋ္ဌာယ အထေ’သိဘူမိယာ

နိဟစ္စ သော ဒက္ခိဏဇာနုမဏ္ဍလံ၊

အကာ မဟာကာရုဏိကဿ ဂါရဝံ

သိရောဝိရူဠှဉ္ဇလိ ပုပ္ဖမဉ္ဇရီ၊ ()

၁၁။

ဥဒိက္ခမာနော ဝသိနာ သမပ္ပိတံ

တမဉ္ဇလိံ ဘတ္တိဘရေန ဘူပတိ၊

အထော’နမေတွာ တနုမီသကံ သကံ

ပဝန္ဒိ ပါဒမ္ဗုရုဟာနိ သုနုနော၊ ()

၁၂။

သိယာ’ဝ ဗုဒ္ဓါ ပုရိသာသဘော အယံ

နဒဿနံ တဿ သိယာ မမန္တီ သော၊

နိရူပမံ ရူပသိရိံ သမေက္ခိယ

ပယာသိ နိဋ္ဌံ ဥပဓာရယံ ဝသိ၊ ()

၁၃။ ¶

ဝဝတ္ထယိတွေဝမုဠာရဗုဒ္ဓိမာ

ဝိတိဏ္ဏကင်္ခေါ ဟသမီသကံ ရုဒံ၊

နရိန္ဒမောရောဓပုရက္ခတံ ဝသီ

တဒဝသီဒါပယိ သံသယဏ္ဏဝေ၊ ()

၁၄။

တမာဟရိတွာန ပကဝတ္တိမဗ္ဘုတံ

ပုရက္ခတော’ရောဓဇနဿ ရာဇိနော၊

ယတိဿရော သံသယသလ္လမုဒ္ဓရံ

သဗန္ဓဝေ’နုဿရိ ကာလဒေဝလော၊()

၁၅။

သကေကုလေ နာဠကနာမဒါရကော

သယမ္ဘုနော လစ္ဆတိ ဒဿနံ ဣတိ၊

တမတ္ထမညာ သမုပေစ္စ တံကုလံ

တွမာဟ ပဗ္ဗဇ္ဇိတိ ဘာဂိနေယျကံ၊ ()

၁၆။ ¶

နိရာမယံ ပဉ္စမဝါသရမှိ သော

ဝရောရသံ ဝါသိတဂန္ဓဝါရိနာ၊

ပဝတ္တမာနေ ဘဝနေ မဟာမဟေ

နဟာပယိ ဘူပတိ ဗန္ဓုမဇ္ဈဂေါ၊ ()

၁၇။

ပသတ္ထမနွတ္ထဘိဓာန မတ္တနော

ကုမာရမာရောပယိတုံ ပရောသတံ၊

သဝေဒဝေဒင်္ဂပဘေဒကောဝိဒေ

ဒွိဇေ နိမန္တာပယိ သော နရာဓိပေါ၊ ()

၁၈။

သုရိန္ဒရူပေါ သုရမန္ဒိရောပမံ

တမိန္ဒိရာဓာရနရိန္ဒမန္ဒိရံ၊

ဇနိန္ဒသီဟော’ပဂတာ’ဝနီသုရေ

အမန္ဒပူဇာဝိဓိနာ’ဘိရာဓယိ၊ ()

၁၉။

အနေနသိဒ္ဓါ သမတိံသပါရမီ-

သဒတ္ထသမ္ပတ္တိပရတ္ထကာရိနာ၊

တထာ’တ္ထ သင်္ခါတဓနံ နိဓာနဂံ

ဣမမှိ သိဒ္ဓံ သဟဇာတိယာ ယတော၊ (၅)

၂၀။ ¶

ဒွိဇေဟိ တန္တိဗ္ဗစနဒွယာရဟံ

သမာသသံခိတ္တပဒတ္ထသံဟိတံ၊

သုတဿ သိဒ္ဓတ္ထ’ဘိဓာနမတ္တနော

တတော’ဘိဝေါဟာရသုခါယ ကာရယိ၊ ()

၂၁။

သုယာမရာမဒ္ဓဇမန္တိလက္ခဏ-

သုဘောဇကောဏ္ဍညသုဒတ္တသညိနော၊

ဣမေ ဒွိဇာ ရာဇသုပူဇိတာ တဒါ

ဝိစက္ခဏာလက္ခဏပါဌကာ’ဘဝံ၊ ()

၂၂။

သုဘာသုဘံ ပဿိယ ဒေဟလက္ခဏံ

ဝိဘာဝယဝှော ဣတိ တေသမဗြုဝိ၊

သမုက္ခိပိတွာ’င်္ဂုလိပလ္လဝဒွယံ

ဇနာဓိပံ သတ္တဇနာ’ဗြဝုံ ဒွိဓာ၊ ()

၂၃။ ¶

သစေ မဟာရာဇ အဂါရမာဝသေ

ဝရောရသော တေ ပရိစာရိတိန္ဒြိယော၊

သမင်္ဂိဘုတော ရတနေဟိ သတ္တဟိ

ဘဝေယျ ရာဇာ ဝတစက္ကဝတျ’ယံ၊ ()

၂၄။

မဟာဒယော’ယံ ကရုဏာယ စောဒိတော

ဃရာ’ဘိဂန္တွာ ယဒိ ပဗ္ဗဇိဿတိ၊

ဘဝေယျ ဗုဒ္ဓါ’ခိလဉေယျမဏ္ဍလံ

သယံ အဘိညာယ နဟေ’တ္ထသံသယော၊ ()

၂၅။

ကဏိဋ္ဌဘူတော ဝယသာ တဒန္တရေ

ပသတ္ထသတ္ထာ’ဝဂမေန ဇေဋ္ဌကော၊

သမုက္ခိပိတွာ’င်္ဂုလိမေကမဗြုဝိ

ဣတီဟ ကောဏ္ဍညသမညဘုသုရော၊ ()

၂၆။ ¶

ဣမဿ ဝေနေယျဇနာကတဉ္ဇလီ

သမံ ဖုသန္တာနိ ဝသုန္ဓရာတလံ၊

သုဘာနိ ဘောပါဒတလာတိ သဗ္ဗဒါ

ဘဇန္တိ ဘတျာ ကမလာနိဝါလိနော၊ ()

၂၇။

ဣမဿ ခေမန္တမသေသပါဏိနော

တိပဋ္ဋကန္တာရပထာဝတာရဏေ၊

သုသဇ္ဇိတံ စက္ကယုဂံဝ ပါရမီ

ရထမှိ ပါဒင်္ကိတစက္ကလက္ခဏံ၊ ()

၂၈။

ဣမဿ ဘော ကမ္ဗလဘေဏ္ဍုကောပမံ

သုမဋ္ဋဝဋ္ဋာယတပဏှိမဏ္ဍလံ၊

သဒါ ပဒမ္ဘောဇနိဝါသလက္ခိယာ

တနောတိ ပီနတ္ထနပိဏ္ဍဝိဗ္ဘမံ၊ ()

၂၉။ ¶

ဣမဿ ဒီဃင်္ဂုလိပန္တိ ဝဋ္ဋိတ-

မနောသိလာလတ္တကဝတ္တိကောပမာ၊

ဝိဘာတိ ဘော ဗာဟုလတာယ ပါရမီ-

လတာယ ဝါ နူတနပတ္တပန္တိဝ၊ ()

၃၀။

ဣမဿ ပါရေဝဋပါဒ ပါဋလာ

သပါဏိပါဒါ တဠုဏာတိကောမလာ၊

ဥဠာရပူဇာဝိဓိသမ္ပဋိစ္ဆနေ

ပဝါဠပါတိ’ဝ သမုလ္လသန္တိ ဘော၊ ()

၃၁။

ဣမဿရူပဿိရိမန္ဒိရောဒရေ

သမပ္ပမာဏာဘိနဝင်္ဂုလီဟိ ဘော၊

ပဒိဿရေ ဇာလကဝါဋသန္တိဘာ

သပါဏိပါဒါ တတဇာလလက္ခဏာ ()

၃၂။ ¶

ဣမဿ ဥဿင်္ခပဒဿ ဂေါပ္ဖကာ

ပဒမ္ဗုဇာနံ စတုရင်္ဂုလောပရိ၊

ပတိဋ္ဌိတာ ပုဏ္ဏဃဋေသုကန္ဓရာ-

ဝိလာသမာလိင်္ဂိယ ရာဇဘာသရေ၊ ()

၃၃။

ဣမဿ ဒေဟဇ္ဇုတိဝါရိပူရိတ-

သရီရကေဒါရဘဝါ ဖလတ္ထိနော၊

သုရတ္တသာလျောဒရသန္နိဘာ သုဘာ

ဒုဝေဏိဇင်္ဃာ အဘိပီဏယန္တီ ဘော၊ ()

၃၄။

ဣမဿ ဘော ဇာနုယုဂံ ပရာမသံ

အနောနမန္တော ဌိတကော မဟာဘုဇော၊

သဟတ္တနာ သမ္ဘဝဗောဓိသာခိနော

ဝိသာလသာခါယ ဝိလာသမာဒိသေ၊ ()

၃၅။

ဣမဿ ကောသောဟိတဝတ္ထဂုယှကော

အဘိန္နကောကာသကကောသကောသဂေါ၊

အနညသာဓာရဏတာဒိနာ’ယတိံ

အနင်္ဂသင်္ဂါမပရမ္မုခေါ သိယာ၊ ()

၃၆။ ¶

ဣမဿ ဘော ဂေါတမဂေါတ္တကေတုနော

ကလေဝရေ ကဉ္စနသတ္တိဘတ္တစော၊

သုဝဏ္ဏဝဏ္ဏော ဇိနစီဝရဿပိ

တနောတိ သောဘံ ဃနဗုဒ္ဓရံသိနော၊ ()

၃၇။

ဣမဿ ဇမ္ဗောနဒီပိဉ္ဇရာယ ဘော

သိရိသပုပ္ဖဿုကုမာရစာရိယာ

ရဇောနုမတ္တံ ဆဝိယာ နလိမ္ပတေ

သရောဇပတ္တေရိဝ ဝါရိဗိန္ဒဝေါ၊ ()

၃၈။

ဣမဿ လောမာနိ ကလေဝရေ ဝရေ

ဝိသုံ ဝိသုံ ကူပဂတာနိ သူနုနော၊

ဝိလုမ္ပရေ ရူပဝိလာသလက္ခိယာ

မနောရမံ ဘော ကမဏိကဉ္စုကဿိရိံ၊ ()

၃၉။ ¶

ဣမဿ ဥဒ္ဓဂ္ဂမုခံ မုခဿိရိံ

ပဒက္ခိဏာဝတ္တ မပေက္ခိနော ယထာ၊

တိရောကရေ ရောမဝိတာန မိန္ဒိရာ-

နိကေတနိန္ဒီဝရကာနနဿိရိံ၊ ()

၄၀။

ဣမဿ ဘောရာဇ သရောဇယောနိနော

ယထောဇုဂတ္တံ ဥဇုဂတ္တမာယတိံ၊

အနညသာမညဂုဏာဝကာသတော

ပဇာဘိပူဇာဝိဓိဘာဇနံ သိယာ၊ ()

၄၁။

ဣမဿ သတ္တုဿဒလက္ခဏံ သုဘံ

သမံသမဒ္ဒိဋ္ဌသိရာဝလိံ သဒါ၊

ဒဓာတိ ဘော ပါရမိဓမ္မသိပက္ပိနော

သုဓန္တစာမီကရပိဏ္ဍဝိဗ္ဘမံ၊ ()

၄၂။ ¶

ဣမဿ ပုဏ္ဏောဘယကာယဘာဂိမံ

မိဂိန္ဒပုဗ္ဗဒ္ဓသရီရလက္ခဏံ၊

ကုဒိဋ္ဌိဝါဒီဘသိရောဝိဒါရဏေ

နရိန္ဒသာမတ္ထိယမုဗ္ဗဟေ နကိံ၊ ()

၄၃။

ဣမဿု’ပေတော ဃနမံသဝဋ္ဋိယာ

စိတန္တရံသော မုဒုစာရုပိဋ္ဌိယံ၊

ဘဝဏ္ဏဝါ ကဉ္စနပစ္စရိသိရံ

တနောတိ သတ္တုတ္တရဏေ နရာဓိပ၊ ()

၄၄။

ဣမဿ နိဂြောဓမဟီရုဟဿိဝ

သမပ္ပမာဏော ပရိမဏ္ဍလောပျ’ယံ၊

ကဒါစိ ဒုက္ခာတပခိန္နဒေဟိနံ

ပရိဿမံ ဘော ပဇဟေ ဘဝဉ္ဇသေ၊ ()

၄၅။ ¶

ဣမဿ ရာဇိတ္တယရဉ္ဇိတော’တ္တရိံ

ကရီယမာနု’တ္တမဓမ္မနိဿနော၊

သုမဋ္ဋဝဋ္ဋော သမဝတ္တခန္ဓကော

မုတိင်္ဂခန္ဓောရိဝ ရာဇ ရာဇတေ၊ () (သိလေသ ဗန္ဓနံ)

၄၆။

ဣမဿ ဘော သတ္တသဟဿသမ္မိတာ

ယထာ’မတဇ္ဈောဟရဏာဘိလာသိနော၊

ရသဂ္ဂသာ သန္တိ ရသာဒနုမ္မုခါ

ရသဂ္ဂသဂ္ဂီ’တျ’ဘိဓီယတေ တတော၊ ()

၄၇။

ဣမဿ’နုဗျဉ္ဇနတာရကာကုလေ

အနန္တရူပါယတနမ္ဗရော ဒရေ၊

ဝိရောစတေဗာရသမီသသိရိဝ

နရိန္ဒသီဟဿဟနူပမာဟနူ၊ ()

၄၈။ ¶

ဣမဿ တာဠိသတိဒန္တပန္တိ ဘော

ပဟူတဇိဝှာရထိကံ စရန္တိယာ၊

မနုညဝါဏိဝနိတာယ တတွတေ

ပသတ္ထမုတ္တာဝလိလီလမာယတိံ၊ ()

၄၉။

ဣမဿ ဇဝှာဝရကဏ္ဏိကာဝဟေ

မုခမ္ဗုဇေ သစ္စသုဂန္ဓဝါသိတေ၊

သမပ္ပမာဏာ ဒသနာဝလီ သုဘာ

ဝိဘာတိ ကိဉ္ဇက္ခတတီဝ ဘူပတီ၊ ()

၅၀။

ဣမဿ ဘော ခဏ္ဍိတသင်္ခပဏ္ဍရာ

ဒွိဇာဝလီ နိဗ္ဗိဝရန္တရာယတိံ၊

သမုဗ္ဘဝါယုတ္တိလတာယ တာယတိ

မုခါလဝါဠေ မုကုလာဝလိဿိရိံ၊ ()

၅၁။ ¶

ဣမဿ ပီဏာနနစန္ဒစန္ဒိကာ

သုသုက္ကဒါဌာဝလိ သစ္စဝါဒိနော၊

ပဒိဿတေ ဓမ္မတဠာကကီဠနေ

ကတာဘိလာသာရိဝဟံသမာလိနီ၊ ()

၅၂။

ဣမဿ စာနုတ္တရဓမ္မဒေသနာ-

တရဏျမာလောလလကာရရူပိနီ၊

ပဟူတဇိဝှာ ဘဝသာဂရာ’ယတိံ

နရိန္ဒ ပါရံ ဇနတာ’ဝတာရယေ၊ ()

၅၃။

ဣမဿ ဘော ဗြဟ္မသရောပမော သဒါ

သဟဿဓာ’ယံ ကရဝီကရာဝတော၊

မနောဟရဋ္ဌင်္ဂသမင်္ဂိသုဿရော

သသောတကာနံ မဏိကုဏ္ဍလာယတေ၊ ()

၅၄။ ¶

ဣမဿ နီလံ နယနုပ္ပလဉ္စယံ

နိရူပမေ ရူပဝိလာသမန္ဒိရေ၊

နိရောပိတံ ဘော မဏိသီဟပဉ္ဇရ-

ဒွယံဝ ဘာသေ ကုသလေန ကေနစိ၊ ()

၅၅။

ဣမဿ ပါဌီနယုဂံ’ဝ ဒိဿတေ

ဝိသိဋ္ဌရူပါယတနာပဂါသယံ၊

သုဘံ ဂဝစ္ဆာပဝိလောစနောပမံ

မဏိပ္ပဘံ ဂေါပခုမဒွယံ သဒါ၊ ()

၅၆။

ဣမဿာ ဥဏ္ဏာ ဘမုကန္တရုဗ္ဘဝါ

ဠာဋမဇ္ဈောပဂတာ ဝိရောစတိ၊

ယဒတ္ထိ သဉဈာဃနရာဇိမဇ္ဈဂံ

သသင်္ကဟီနံ သသိမဏ္ဍလံ တထာ ()

၅၇။ ¶

ဣမဿ ဥဏှီသကသီသလက္ခဏံ

သဓမ္မရဇ္ဇိဿရိယံ အနာဂတေ၊

ကရိယမာနဿ ဟိ စက္ကဝတ္တိနော

ဒဓာတိ ဥဏှီသကသိသဝိဗ္ဘမံ၊ ()

၅၈။

ဣမဿ ဘုမိဿရ သုပက္ပတိဋ္ဌိတ-

ပဒင်္ကိတေ စက္ကယုဂမှိ ဒိဿရေ၊

အရာသဟဿာနိ စ နေမိနာဘိယော

တိဝဋ္ဋရေခါ သိရိဝစ္ဆကာဒယော၊ ()

၅၉။

ဣမေဟိ ဗတ္တိံသတိလက္ခဏေဟိ ဘော

အသီတျနုဗျဉ္ဇနလက္ခဏေဟိ’ပိ၊

သမုဇ္ဇလန္တော ပုရိသာသဘောတျယံ

ဘဝေယျ ဗုဒ္ဓါ ဘဝဗန္ဓနစ္ဆိဒေါ၊ ()

၆၀။ ¶

သသောတမာပါထဂတာယ တာဝဒေ

ဒွိဇဿ ဝိတ္ထာရကထာယ စောဒိတော၊

အပုစ္ဆိ ရာဇာ ကိမယံ သမေက္ခိယ

အနာဂတေ ဗြာဟ္မဏ ပဗ္ဗဇိဿတိ၊ ()

၆၁။

ကဒါစိ ဥယျာနဂတော မဟာပထေ

ဇရာရုဇာမစ္စုဝိရူပဒဿနံ၊

ဝိဓာယ နိဗ္ဗိန္တမနော ဘဝတ္တယေ

တပေါဓနံ ပဿိယ ပဗ္ဗဇိဿတိ၊ ()

၆၂။

ဣတိဟ ဝတွာန သကံသကံ ဃရံ

တတော’ပဂန္တွာ’ဒ္ဓနိမိတ္တပါဌကာ၊

မဟလ္လကာ’ဒါနိ မယန္တိ သုနဝေါ

တမာနုပဗ္ဗဇ္ဇိတုမောဝဒိံသု တေ၊ ()

၆၃။ ¶

ဒွိဇေသု ဝုဒ္ဓေသု မတေသု သတ္တသု

အယံဟိ ကောဏ္ဍညသမဝှယော သုဓီ၊

မဟာပဓာနံ ပုရိသာသဘော’ဓုနာ

ကရောတိ သုတွာ ကရုဏာယ စောဒိတော၊ ()

၆၄။

သမာနလဒ္ဓိဟိ ကုလေသု တေသု ဟိ

စတုဟိ ဝိပ္ပေဟိ သဟ’န္တပဉ္စမော၊

အထော’ရုဝေလံ ဥပဂမ္မ ပဗ္ဗဇိ

ဘဝိံသု တေပဉ္စိ’ဓ ပဉ္စဝဂ္ဂိယာ၊ ()

၆၅။

ကဒါစိ လဒ္ဓါ ပရိယန္တသာဂရံ

ဣမံ စတုဒ္ဒီပိကရဇ္ဇမတြဇံ၊

ဇိတာရိဝဂ္ဂံ ဝိစရန္တမမ္ဗရေ

ကရောမိ ပစ္စက္ခမဟန္တိ စိန္တိယ၊ ()

၆၆။

နိမိတ္တရူပက္ခိပထပ္ပဝေသနံ

နိဝါရဏတ္ထံ တနိဇရာဇသူနုနာ၊

နရာဓိပေါ သော ပုရိသေဟိ သဗ္ဗထာ

ဒိသာသု ရက္ခာဝရဏံ အကာရယိ၊ ()

၆၇။ ¶

အယံ ကုမာရော ယဒိ စက္ကဝတ္တိဝါ

ဘဝေယျ သမ္ဗောဓိပဒံ လဘေယျဝါ၊

သကေကုလေ ခတ္တိယဗန္ဓဝေဟိ သော

ပုရက္ခတောယေဝ စရိဿတံ ဣတိ၊ ()

၆၈။

ကုမာရနာမဋ္ဌပနမှိ ဝါသရေ

သဟဿမတ္တေသု ကုလေသွ’သိတိယာ၊

အဒါသိ ပစ္စေကဇနော ပဋိဿဝံ

ပဒါတုကာမောဝ ဝိသုံဝိသုံ သုတေ၊ ()

၆၉။

အသေသဒေါသာပဂတာ သုခေဓိ တာ

သုဝဏ္ဏကုမ္ဘောရုပယောဓရော န တာ၊

အနေကဓာတီ ဝရဝဏ္ဏဂဗ္ဗိ တာ

သပစ္စုပဋ္ဌာပယိ တင်္ခဏေပိ တာ၊ ()

၇၀။ ¶

တဠာကတီရမှိ တရင်္ဂဘာသုရေ

ယထေဝ ဟံသျာ ကလဟံသပေါတကံ၊

မဟေသိယာ’င်္ကေ သယနေ သိတတ္ထရေ

သုဝါသရေ ဘုပတိ ပုတ္တမဒ္ဒသ၊ ()

၇၁။

အဒိဋ္ဌပုတ္တာနနပင်္ကဇာ စိရံ

လဟုံ ပရိက္ခီဏဝယောဂုဏာ ဣတော၊

စုတာ’ဝ မာယာဇနနိ နိရာမယာ

ဥပါဝိသိ သတ္တမဝါသရေ ဒိဝံ၊ ()

၇၂။

မဟေသိမာယာဘဂိနီ တဒါ မဟာ-

ပဇာပတိဂေါတမိနာမရာဇိနီ၊

နိဇံ ကုမာရံ ဘရဏာယ ဓာတိနံ

ဝိဓာယ ဘာရံ ပဋိဇဂ္ဂိ တံ သယံ၊ ()

၇၃။ ¶

တဒါ’ဘဝုံ ဒီပသိခါ ဇဂန္တယေ

ကလေဗရော’ဘာသလဝေန သုနုနော၊

ဝိနဋ္ဌတေဇာရိဝ ရင်္ဂဒီပိကာ

ဝိမာနဒိပေသု ကထာဝကာ’တ္တနော၊ ()

၇၄။

ဝိစိတ္တဘုမ္မတ္ထရဏေ အဘိက္ခဏံ

သဇန္နုကေဟာ’စရိ မန္ဒိရောဒရေ၊

မဟာဝနသ္မိံ မဏိဝါလုကာတလေ

ဝိဇမ္ဘမာနောရိဝ သိဟပေါတကော၊ ()

၇၅။

သုတဿ ကီဠာပသုတဿ မန္ဒိ ရေ

ဘမန္တဗိမ္ဗံ မဏိဒပ္ပဏောဒ ရေ

နိဗဒ္ဓမဒ္ဒက္ခိ စရန္တမမ္ဗ ရေ

ယထေဝ စက္ကံ ရတနံ မဟီဘု ဇော၊ ()

၇၆။ ¶

တဒင်္ဃိဝိညာသဝသေန ဘုမိယာ

ဝဇန္တမင်္ကော’ပနိဓာယ ဘုမိပေါ၊

တဒါ’ဘိနိစ္ဆာရိတ မာသဘိံ ဂိရံ

ဣဒါနိ မံ သာဝယ ပုတ္တမဗြုဝိ၊ ()

၇၇။

နိဗဒ္ဓမန္တောမဏိဝေဒိကာတလေ

မုခေန္ဒုဗိမ္ဗုဒ္ဓရဏေ ပယောဇယံ၊

သယံ ပလမ္ဘေသိ အမစ္စသူနဝေါ

ဝယေန မန္ဒော’ပိ အမန္ဒဗုဒ္ဓိမာ၊ ()

၇၈။

ဥဠာရသောကံ ပိတုစိတ္တသမ္ဘဝံ

တိလောကဒီပေါ နိဇပုညတေဇသာ၊

တမောပဗန္ဓံ ဘုဝနော’ဒရုဗ္ဘဝံ

နိရာကရိ ဗာလရဝီ’ဝ ရံသိနာ၊ ()

၇၉။

ဝိကိဏ္ဏလာဇာကုသုမာကုလဉ္ဇသေ

ဝိတာနရင်္ဂဒ္ဓဇနိဗ္ဘရမ္ဗရေ၊

ပုရေ တဟိံ မင်္ဂလကိစ္စသမ္မတံ

ကဒါစိ ရညော ဘဝိ ဝပ္ပမင်္ဂလံ၊ ()

၈၀။ ¶

သုဂန္ဓမာလာဘရဏာဒိမဏ္ဍိတ-

ပသာဓိတာ ကာပိလဝတ္ထဝါ နရာ၊

သကိင်္ကရာ ကမ္မကရာ’ပိ ကပ္ပိတာ

တတော တတော သတ္တိပတိံသု တံ ကုလံ၊ ()

၈၁။

မဟစ္စသေနာယပုရက္ခတောဟိသော

ဥဠာရရာဇိဒ္ဓိသမုဇ္ဇလံတတော

ပယာသိကမ္မန္တပဒေသမတြဇံ

ကုမာရမာဒါယပုရိန္ဒဒေါပမော၊ ()

၈၂။

ဆဏမှိ တသ္မိံ မနုဝံသကေတုနော

မနောရမံ မင်္ဂလနင်္ဂလာဒိကံ၊

သုဝဏ္ဏပဋ္ဋေဟိ ပရိက္ခဋံက မဟာ-

ဇနဿ’ပီ ရူပိယပဋ္ဋဆာဒိတံ၊ ()

၈၃။ ¶

ဝိသာလသာခါကုလဇမ္ဗုသာခိနော

ဝိဓာယ ဟေဋ္ဌာ သယနေ မဟာရဟေ၊

နိဇံ ကုမာရံ သဇနော ဇနာဓိပေါ

သမာရဟီ သမ္ပတိ ဝပ္ပမင်္ဂလံ၊ ()

၈၄။

ကုမာရရက္ခာဝရဏာယု’ပဋ္ဌိတာ

တမုဿဝံ ဓာတိဇနာ ဝိပဿိတုံ၊

အပက္ကမိတွာ ဗဟိ သာဏိတော ခဏံ

ပမတ္တရူပါ ဝိစရိံသွိ’တောစိတော၊ ()

၈၅။

ပရိဂ္ဂဟေတွာ’နမပါန မာသနေ

နိသဇ္ဇ ပလ္လင်္က မလတ္ထ ဗန္ဓိယ၊

ဇိနင်္ကုရော နီဝရဏေဟိ နိဿဋံ

ဝိဝေကဇံ ဈာနမဂါဓဗုဒ္ဓိမာ၊ ()

၈၆။ ¶

ဝိပဿ ပုတ္တဿု’ပဝေသနံ တဟိံ

ဒုမဿ ဆာယာယ နိဝတ္တတံ တထာ၊

ပဝန္ဒိ ရာဇာ ပဋိဟာရိကာကထာ-

ပစောဒိတောပုတ္တမုပေစ္စ တင်္ခဏေ၊ ()

၈၇။

ကလာသု ဝုဇ္ဇာသု စ ပုတ္တမတ္တနော

ဝိနေတုကာမော ဝိနယက္ခမံ ပိတာ၊

ပသတ္ထသတ္ထန္တရပါရဒဿိနံ

ကဒါစိ ဝိပ္ပာစရိယံ ကိရာ’နယိ၊ ()

၈၈။

သမပ္ပိတံ တံ ဂုရုနော ကရမ္ဗုဇေ

သဒေဝလောကဿ ဂုရုံ သဂါရဝံ၊

မဟီသုရော သော ဇလဗိန္ဒုနာ ယထာ

သုဒုတ္တရာဂါဓမဟောဒဓီရသံ၊ ()

၈၉။ ¶

သဝဏ္ဏဘေဒံ သနိဃဏ္ဋုကေဋုဘံ

အထဗ္ဗဗေဒေနိ’နိဟာသပဉ္စမံ၊

တိဝေဒမုဒ္ဒေသပဒေန ဒုဒ္ဒသံ

တထာ ကလာသိပ္ပတံ နိဗောဓယီ၊ ()

၉၀။

အနညသာဓာရဏပုညဝါသနာ-

ဝိဓူတသမ္မောဟဝိသုဒ္ဓဗုဒ္ဓိနော၊

သမတ္တဝိဇ္ဇာ သကလာကလာ ဓိယာ

ကလမ္ပိ နာလံ ဗဟုဘာသနေန ကိံ၊ ()

၉၁။

န ကေဝလံ တဿ ကလေဗရံ ဗဟိ

ဝိဘာတိ ဗတ္တိံသတိလက္ခဏေဟိ ဘော၊

ဘုသံ တဒဗ္ဘန္တရဝတ္ထု ဒိပ္ပတေ

သုဗုဒ္ဓသတ္ထန္တရလက္ခဏေဟီ’ပိ၊ ()

၉၂။ ¶

တိလောစနဿာ’ပိ တိလောကစက္ခုနော

အယံ ဝိသေသော နယနေဟိ ဒိဿတေ၊

လလာဋနေတ္တော ပုရိမော နသောဘတိ

ပရော’ဝ အဗ္ဘတ္တရဉာဏလောစနော၊ ()

၉၃။

အနုဗ္ဗဇန္တော နဝယောဗ္ဗနဿိရိံ

ယသောပဗန္ဓေန သကေ နိကေတနေ၊

ပဝဍ္ဎိ ဓီရော သကလံ ကလာန္တရံ

ကလာနိဓီ ရံသိစယေနိ’ဝ’မ္ဗရေ၊ ()

၉၄။

ဥပဍ္ဎဂဏ္ဍာဟိတဒါဌိကာယ သော

ယသောဓနော သောဠသဝဿိကော ယဒါ၊

ကပေါလဖုဋ္ဌဉ္ဇနဒါနရာဇိယာ

ကရိ ယထာ ဗာလဒသံ ဝျတိက္ကမိ ()

၉၅။ ¶

တဒါ နရိန္ဒော သုရမန္ဒိရော’ပမံ

ဥတုတ္တယာနုစ္ဆဝိကံ မနောရမံ၊

ပယောဇယိတွာန ပဝိဏသိပ္ပိကေ

သုတာယ ကာရာပယိ မန္ဒိရတ္တယံ၊ ()

၉၆။

နိသိတသမ္ဗာဓတလံ နိဝါရိတ-

သရောနိလံ ဖဿိတသိဟပဉ္ဇရံ၊

မဟိဝတံသံ နဝဘုမိကံ ဃရံ

ဗဘုဝ ရမ္မံ ဘုဝိ ရမ္မနာမိကံ၊ ()

၉၇။

သသိကရ’မ္ဘောဓရရာဝနိဗ္ဘရ-

ဝိတာန မုဂ္ဃာဋကဝါဋဗန္ဓနံ၊

သုရမ္မနာမံ ဟတဃမ္မမိန္ဒိရာ-

နိဝါသရမ္မံ ဘဝိ ပဉ္စဘူမိကံ၊ ()

၉၈။

အဟိဏှသိတုဏ္ဘဂုဏေဟိ ပါဝုသေ

သုခါနုလောမံ သမသတ္တဘုမိကံ၊

သုဖဿိတာ’ဖဿိတသိဟပဉ္ဇရံ

သုဘံ သုဘံ နာမ နိကေတနံ ဘဝိ၊ ()

၉၉။ ¶

ဝယောနုပတ္တဿ နရိန္ဒသုနုနော

ဥဠာရရာဇိဒ္ဓိဝိလာသဒဿနေ၊

ကတာ’ဘိလာသော ဇနကော ဇနာဓိပေါ

ပဒါတုကာမော နိဇရဇ္ဇသမ္ပဒံ၊ ()

၁၀၀။

ဝသန္တိ စေ ယောဗ္ဗနဟာရိဒါရိကာ

နရိန္ဒသန္ဒေသဟရေဟိ ပေသယိ

သ သာကိယာနံ သစိဝေဟိ သာသနေ၊ ()

၁၀၁။

နိဝေဒယုံ ယောဗ္ဗနဂဗ္ဗိတဿ တေ

နကိဉ္စိသိကပ္ပာယတန’န္တဒဿိနော၊

သုတဿ ဒါရာဘရဏာယ ဓီတရော

ကထန္နု ဒဿာမ မယန္တိ ခတ္တိယာ၊ ()

၁၀၂။ ¶

သုတေန တံ ရာဇသုတေန စောဒိတော

ပိတာ စရာပေသိ ပုရမှိ ဘေရိယော၊

မမ’တြဇော ကာဟတိ သိပ္ပဒီပနံ

ဣတောပရံ သတ္တမဝါသရေ ဣတိ၊ ()

၁၀၃။

ဝရော ကုမာရော ဟိ ကုမာရဝိက္ကမော

ကလာပသန္နဒ္ဓ ကလေဗရော တဒါ၊

ဝိပဿတံ ဗန္ဓုဇနာနမောသရိ

အနပ္ပဒပ္ပော ရဏကေဠိမဏ္ဍလံ၊ ()

၁၀၄။

ဓနုဒ္ဓရော သော ပဌမံ သကေ ဘုဇေ

သဟဿထာမံ သသရံ သရာသနံ၊

ဝိဓာယ ပေါဌေသိ ဇိယံ ဝသုန္ဓရာ-

ဝိဒါရဏာကာရမဟာရဝံ ရဝိ၊ ()

၁၀၅။ ¶

စတုဒ္ဒိသာ’ဓရဓနုဒ္ဓရာ မမံ

ကရောန္တု လက္ခံ နိဇခါဏပတ္တိယာ၊

ဣတီဟ ဝတွာ သရဝါရဏေန သော

အဘုတပုဗ္ဗံ သရသိပ္ပမာဟရိ၊ ()

၁၀၆။

စတုဒ္ဒိသာယံ စတုရော ဓနုဒ္ဓရေ

မမေ’ကဗာဏေန ဟဏာမ’ဟံ ဣတိ၊

အကာသိ တဒဒီပယမညထာ’ဗ္ဘုတံ

သ စက္ကဝေဓဝှယသိပ္ပဒီပနံ၊ ()

၁၀၇။

သရေဟိ ဝေဏျာ’ယတယဋ္ဌိရဇ္ဇုကံ

သရေဟိ စာ’ရောဟဏမဏ္ဍပါလယံ၊

သရေဟိ ပါကာရတဠာကပင်္ကဇံ

သရေဟိ ဝဿံ ဣတိသိပ္ပမာဟရိ၊ ()

၁၀၈။ ¶

မဟာသတ္တော လောကပ္ပဘဝမသမံ သိပ္ပဇာတံ ဇနာနံ

တဒါ သံဒဿေသိ မုဒိတဟဒယာ သာကိယာ ဒါရိကာယော၊

ဥပဋ္ဌာပေသုံ တာ သုရတိရတိသင်္ဂါမစတုရာ

သဟဿာနံ တာဠိသတိပရိမိတာ နာဋိကာ’သုံ ဃရေသူ၊ ()

ဣတိ မေဓာနန္ဒာဘိဓာနေန ယတိနာ ဝိရစိတေ သကလကဝိဇန ဟဒယာနန္ဒ ဒါနနိဒါနေ ဇိနဝံသဒီပေ အဝိဒူရေနိဒါနေ လက္ခဏပဋိဂ္ဂဟဏ ကုမာရသမ္ဘရဏာဒိ ပဝတ္တိ ပရိဒိပေါ အဋ္ဌမော သဂ္ဂေါ။

၁။ ¶

ဣတိ ဝိဟိတေ သတိ သိပ္ပဒီပနသ္မိံ

တဒဘိမုခေ’တရခတ္တိယာ’တိသူရာ၊

အပဂတမာနမဒါဘဝိံသုမညော

(တရုဏမိဂိန္ဒမုခေ)ဝ မတ္တဒန္တိ၊ ()

၂။

ဝိဇဋိတ သံသယဗန္ဓနော ပဒါတုံ

သုမရိယ ဒေဝဒဟမှိ သုပက္ပဗုဒ္ဓါ၊

နရပဝရော နိဇဓီတရံ ကုမာရိံ

သုဝိမလ ကောလိယဝံသကဉ္ဇဟံသိံ၊ ()

၃။

တဟိမထမန္တိဝရေဟိ မန္တယိတွာ

နိခိလပဝတ္တိနိဝေဒနာယ ဒူတေ၊

ပဟိဏိ ကဝိဝါဟမဟေ ဝိဓိယတန္တိ

တဝ တနုဇေန မမဉှိ ဓီတုကညာ၊ ()

၄။ ¶

ဝလယိတတာရမုပဋ္ဌိတော’ဒယံ တေ

ဟိမကရဗိမ္ဗမိဝေါ’ပဝိဋ္ဌပီဌံ၊

ပရိဝုတမန္တိဂဏံ ပဏမ္မ ရာဇံ

ကပိလပုရောပဂတာ တမတ္ထမာဟု၊

၅။

အထ ပဋိလဒ္ဓပဋိဿဝေနု’ဒဂ္ဂါ

ပဒယုဂမဉ္ဇလိပုပ္ဖမဉ္ဇရီဟိ၊

သုမဟိယ တံ ပဋိဝေဒယိံသု ရညော

သကဝိသယံ သမုပေစ္စ ရာဇဒူတာ၊ ()

၆။

ဥဘယကုလမှိ မဟီဘုဇာ’ညမညံ

ပုနရပိ မန္တိဝရေဟိ မန္တယိတွာ၊

ဝိသဒမတီဟိ နိမိတ္တပါဌကေဟိ

နိယမိတမင်္ဂလဝါသရမှိတမှာ၊ ()

၇။

ကနကဝိတာနဝိနဒ္ဓဟာရိဟာရံ

ကုသုမသမာကုလဟေမပုဏ္ဏကုမ္ဘံ၊

တိဒိဝဝိမာနသမာနမုလ္လသန္န-

ရတနဝိစိတ္တဝိဝါဟမဏ္ဍပဂ္ဂံ၊ ()

၈။ ¶

ဂဟိတဝိတာနသိတာတပတ္တကေတု-

ဒ္ဓဇမဏိဝိဇနိစရုစာမရေဟိ၊

ပစုရဇနေဟိ ကတုပဟာရမဂ္ဂေ

သုပရိဝုတံ စတုင်္ဂိရနိဓဇိနျာ၊ (၆)

၉။

ဝိဝိဓဝိဘူသဏဘုသိတတ္တဘာဝံ

အဘိနဝပီနပယောဓရာဘိရာမံ၊

ဟရိသိဝိကာယ ယသောဓရံ ကုမာရိံ

မဏိခစိတာယ ဝိဓာယ စာ’နယိံသု၊ ()

၁၀။

ဝလယိတမာလတိဒါမဟေမမာလာ

ပရိမလဘာဝိတကုန္တလပ္ပဝေဏိ၊

ဝိရဠဗကာဝလိမပ္ပဝိဇ္ဇုရာဇိံ

ဇလဓရမာလမဇေသိ ကောမလာယ ()

၁၁။ ¶

နိရဝဓိရူပနဘောတလမှိ တဿာ

ဇနမနကုန္ဒဝိကာသနံ ဗဘာသ၊

ကုဋိလတရာလကကာလမေဃရာဇိ-

ဇဋိတလလာဋတလဒ္ဓစန္ဒဗိမ္ဗံ၊ ()

၁၂။

မိဂမဒကုင်္ကုမဂန္ဓပင်္ကလိတ္တော

ကုလဝဓုယာ တိလကော လလာဋမဇ္ဈေ၊

မကရဓဇေန နိရောပိတောရိ’ဝါ’သိ

တိဘုဝနဘုတဇယာယ ပုပ္ဖကေတု၊ ()

၁၃။

ဇနနယနဉ္ဇနရူပသမ္ပဒါယ

ကုလမပဒါယ ရရာဇ နိမ္မဒါယ၊

ပရမသိရိံ သရုသီရုဟာဘိရာမံ

ဝဒနမနင်္ဂသုဝဏ္ဏဒပ္ပဏာဘံ၊ ()

၁၄။ ¶

မဏိဂဏမဏ္ဍိတကုဏ္ဍလေဟိ တဿာ

သဝဏျုဂံ ဃဋိတာဝဂဏ္ဍဘာဂံ၊

မနသိဇသာကုဏိကေန ခိတ္တပါသ-

ယုဂလမိဝက္ခိဝိဘင်္ဂမာနမာသိ၊ ()

၁၅။

သုဝိမလကန္တိပဗန္ဓသန္ဒနတ္ထံ

နယနနဒီနမုဘိန္နမန္တရာဠေ၊

ကနကပဏာဠိသမပ္ပိတေ’ဝ တာယ

ဝရဝဒနာယ ရရာဇ တုင်္ဂနာသာ၊ ()

၁၆။

နိရုပမရူပဝိလာသမန္ဒိရသ္မိံ

သဇဝနိကာနိ’ဝ သီဟပဉ္ဇရာနိ၊

ရုစိရဝိလာသိနိယာ လသိံသု ပမ္ဘာ-

ဝလိသဟိတာနိ သုနီလလောစနာနိ၊ ()

၁၇။ ¶

ကနကကပါလနိဘံ မနောဘဝဿ

ဝိမလကပေါလယုဂံ သိနိဒ္ဓကန္နိံ၊

နဝသသိမဏ္ဍလပုဏ္ဍရီကသဏ္ဍ-

သသိရိမဝရုန္ဓိမနောဟရာဓရာယ၊ (၆)

၁၈။

သုစရိတပါရမိတာလတာယ တာယ

ပရိဏတရာဂလတာယ ဘူလတာယ၊

အဓရယုဂံ တရုဏင်္ကုရဒွယံ ဝါ

ကိမိတိ ဝိတက္ကဟတော’ယမာသိ လောကော၊ ()

၁၉။

ကုလဝဓုယာ ဝဒနာ’လဝါဠဂဗ္ဘေ

နဝကလိကာဝလိဖုလ္လိတေ’ဝကိဉ္စိ၊

သုမဓုရဝါဏိလတာယ မန္ဒဟာသ-

ဇ္ဇုတိဓဝလိ ဒသနဝလိ ရရာဇ၊ ()

၂၀။ ¶

ကုဝလယနီလဝိလောလလောစနာယ

မုခကမလာ’လိကုလာနုကာရိနီဘု၊

နယနမယူခဂုဏေဟ’ပါင်္ဂဘင်္ဂ-

နိသိတ္သရေဟိ အနင်္ဂစာပရူပါ၊ ()

၂၁။

ကလရဝမဉ္ဇုဂိရာ တိဝဋ္ဋရာဇိ

ဃနကုစဘဒ္ဒဃဋာယ ကမ္ဗုဂီဝါ၊

မဓုရဂဘီရဝိရာဝ ရင်္ဂလေခံ

အဇိနိ သုဝဏ္ဏမုတိင်္ဂဘေရိသင်္ခံ၊ ()

၂၂။

အဘိနဝပိနပယောဓရော’ပဓာနံ

သုခုမတရစ္ဆဝိကောဇဝါဘိရာမံ၊

ဥရသယနံ သမလင်္ကတံ ဝိယာ’သိ

နိဇပတိသင်္ဂမမင်္ဂလာယ တာယ၊ ()

၂၃။ ¶

ကုစကနကာ’စလသမ္ဘဝါယ နာဘိ-

ကုဟရတဋာဘိမုခါယ ကန္တိနဇ္ဇာ၊

ဆဌာရဝလိတ္တယမိန္ဒိရောပမာယ

အဝဟရိ တုင်္ဂတရင်္ဂပန္တိကန္တိံ၊ ()

၂၄။

မဏိရသနာဂုဏမန္ထရာယ တဿာ

ဃနကုစဘာရကိသော ကိသောဒရာယ၊

ဟရိသိရိဝစ္ဆသုဟဇ္ဇမဇ္ဈဘာဂေါ

မဒဓနုမုဋ္ဌိဝိလာသမာဟရိတ္ထ၊ ()

၂၅။

သရသိဇတန္တုပဝေသနာဝကာသ

မဝဟရိ ပီနပယောဓရန္တရာဠံ၊

နိဇဂဠဘာသုရဟာရနိဇ္ဈရေဟိ

ကနကဒရိမုခဝိဗ္ဘမံ ယုဝတျာ၊ ()

၂၆။ ¶

အဝိကလရူပဝိလာသသိန္ဓုဝေလာ

ဝိရလဝိလဂ္ဂိနိယာက ဝိသာလသောဏိ၊

ပရိဟရိ ရာဇကုမာရိကာယ တာယ

ကုသုမသရာဘဝဘုမိဘာဂသောဘံ၊ ()

၂၇။

ကုလဝဓုယာ ကမလာမလာနနာယ

ကုဝလယကောမလနိလရောမရာဇိ၊

ဘုသမဘိစုမ္ဗိ ဂဘိရနာဘိဂဗ္ဘံ၊

ကမလဝိဝါယတမတ္တဘိင်္ဂရာဇိ ()

၂၈။

ရုစိရတရောရုယုဂံ သုဝဏ္ဏ ရမ္ဘာ-

ကရိကရပီဝရမိန္ဒိရောပမာယ၊

ဘဇိ မကရဒ္ဓဇရင်္ဂမန္ဒိရသ္မိံ

ဟရိမယထမ္ဘယုဂဿိရိံ ရမာယ၊ ()

၂၉။ ¶

မဒရယရူပရသဒွယံ တုလာယ

သုပရိမိတာယ စတုမ္မုခေန တုလျံ၊

နိဇမိဟဇာနုယုဂံ ပဝါဠပါတိ-

ယုဂလဝိဝါသိ အဝမ္မုခေါပနီတံ၊ ()

၃၀။

ဝိသယဝိတက္ကတမာကုလံ ယုဝတျာ

မဒနုပသင်္ကမဏေ မနောဝိမာနံ၊

ဇိတမဒမတ္တမယူရကဏ္ဌဘူတိ

ဇလိတပဒီပသိခေ’ဝ စာရုဇင်္ဃာ၊ ()

၃၁။

မဏိမယနူပုရဘာသုရေဟိ တဿာ

စရဏတလေဟိ ပရာဇိတာနိ ထီနံ၊

မုခပဒုမာနိဝ သင်္ကုစန္တိ မညေ

ဘမရဘရမ္ဗုရုဟာနိ ကဉ္ဇနီနံ၊ ()

၃၂။

ကရစရဏင်္ဂုလိပလ္လ’ဝဂ္ဂသာလီ-

ဇလလဝပန္တိနိဘာ’တိကောမလာယ၊

အဘိနဝတမ္ဗနခါဝလီ ဗဘူဝ

မကရဓဇဿ ကတေ’ဝ ပုပ္ဖပူဇာ၊ ()

၃၃။ ¶

သပရိဇနော ဝနိတာယ တာယ သဒ္ဓိံ

မဏိဂဏမဏ္ဍိတမဏ္ဍပပ္ပဒေသေ၊

ဒိနကရဝံသဓဇဿ ရာဇပုတ္တ-

ဿုပဂမနံ အပလောကယံ နိသီဒိ၊ ()

၃၄။

ပရိဝုတဗန္ဓုဇနေဟိ ရာဇပုတ္တော

ယထရိဝ ဒေဝဂဏေဟိ ဒေဝရာဇာ၊

သပဒိ တုရင်္ဂရထံ သမာဟိရူဠှော

တဒဘိမုခေါ ယသသာ ဇလံ ပယာသိ၊ ()

၃၅။

တဟိမုပဂမ္မ ဌိတဿ မဏ္ဍပသ္မိံ

ပရိဒဟိတု’တ္တရသာဋကေန တဿ၊

ဟရိမဏိမဏ္ဍနမဏ္ဍိတ’တ္တဘာဝေါ

ဟိမပဋလေန ဟိမာစလော ရိဝါသိ၊ ()

၃၆။ ¶

မဏိမကုဋေန နိဝတ္ထကာသိကေန

နရပတိသုနု သုမဏ္ဍိတော ရရာဇ၊

သုရဘဝနေန စ ခီရသာဂရေန

ကနကသိဏေရုဂိရီ’ဝ နိစ္စလဋ္ဌော၊ ()

၃၇။

နဘသိ သမာကုလတာရကာဝလီ’ဝ

ဥရသိ ဝိရာဇိတတာရဟာရပန္တီ၊

နရပဝရော ပိဝိ တာယ ရူပသာရံ

အမတမိဝါ’ယတလောစန’ဉ္ဇလီဟိ၊ ()

၃၈။

တဒဟနိ ရာဇကုမာရပုဗ္ဗသေလ-

ပ္ပဘဝဝရာနနစန္ဒမဏ္ဍလေန၊

မုကုဠိတလောစနနီလနီရဇာယ

အဘဝိမနောကုမုဒါကရပ္ပဗောဓော၊ ()

၃၉။ ¶

ယုဝတယုဝါနမပေက္ခတံ ဇနာနံ

အနိမိသလောစနနီလကန္တိဂင်္ဂါ၊

ရုစိရဝဓူဟိ ဝိဓူတစာမရေဟိ

အနိလဝိလောလတရင်္ဂသာလိနီဝ၊ ()

၄၀။

ဂဂနတလောပရိ တာရကာကုလမှိ

ယုဝယုဝတီနဝစန္ဒစန္ဒိကေဝ၊

နိစိတသုဝဏ္ဏကဟာပဏေ ဝရေဇုံ

အထမဏိမဏ္ဍပဝေဒိကာတလမှိ၊ ()

၄၁။

သကလကလာကုသလော’ပဂမ္မဝိပ္ပာ-

စရိယဂဏော ဇယမင်္ဂလာယ တေသံ၊

သုပရိသမာပယိ သဗ္ဗပုဗ္ဗကိစ္စံ

သပဒိ ပဝဿိ အခဏ္ဍလာဝုဇဋ္ဌိ၊ ()

၄၂။ ¶

ကရတလတာမရသေသု ကုဏ္ဍိကာယ

မဏိခဝိတာယ ပုရောဟိတော ဥဘိန္နံ၊

သုဘမဘိသေကဇလံ နိပါတယံ တေ

ပုနဟိပယောဇယိ ပါဏိပီဠဏသ္မိံ၊ ()

၄၃။

သုရဓနုဝိဇ္ဇုလတေ’ဝ ဝါရိဝါဟံ

ရထမဘိရုယှ ဂဟီရမန္ဒဃောသံ၊

ပရိဝုတခတ္တိယဗန္ဓဝေဟိ တမှာ

ကပိလပုရာ’ဘိမုခါဘဝုံ ဥဘောတ တေ၊ ()

၄၄။

အထ သမလင်္ကတဝီထိမဇ္ဈိဂါနံ

ဝိဝဋနိကေတနသီဟပဉ္ဇရဋ္ဌာ၊

အနိမိသလောစနပင်္ကဇောပဟာရံ

ဘူသမကရုံ ကပိလင်္ဂနာ ပသန္နာ၊ ()

၄၅။ ¶

ဂမနဝိလာသမုဒိက္ခတံ ဇနာနံ

ရုစိရသိရောပဟိတ’ဉ္ဇလီဟိ ဘတ္တျာ၊

မဏိကလသပ္ပိတပုပ္ဖမဉ္ဇရီဟိ

ရစိတမိဝေါဘယဝီထိပဿမာသိ၊ ()

၄၆။

တိခိဏဝိလောစနဗာဏလက္ခဘာဝံ

နိရုပမရူပိနိ ကာမိနီဟိ နီတေ၊

ပတိတ’နုရာဂသရေဟိယေဝ တာသံ

ဟဒယဝိဒါရဏမာသိ တပ္ဖလံ’ဝ၊ ()

၄၇။

ကထမပိ ကာပိလဝတ္ထဝါ အဟေသုံ

တဒဟနိ နိစ္စလလောစနုပ္ပလေဟိ၊

ကပိလပုရံ တိဒသာလယာဝတိဏ္ဏာ

တိဒသဂဏာ’ဝ ဝိပဿနာယု’ဘိန္နံ၊ ()

၄၈။ ¶

တိဒိဝပုရာ နိဇဝေဇယန္တနာမ-

သုရဘဝနံ’ဝ သုဇမ္ပတီ သုဇာတာ၊

ကပိလပုရာ ပုနရာဂမိံသု တမှာ

ပတိပတိနီ နိဇရာဇမန္ဒိရံ ဒွေ၊ ()

၄၉။

ဓရဏိပတိသုတော ပတ္တရဇ္ဇာဘိသေကော

ကပိလပုရဝရေ တေသု တိသွာလယေသု၊

အပရိမိတသုခံ တာယ ဗိမ္ဗာယ သဒ္ဓိံ

သုစိရမနုဘဝိ စန္ဒဗိမ္ဗာနနာယ၊ ()

၅၀။

ဝိကစကမလ (နန္ဒီမုခိ) မဉ္ဇုဘာဏီ

တိဝိဓဝယသိ ဒိဗ္ဗစ္ဆရာရူပသောဘာ၊

အဂမိ ခယဝယံ သာ’ပိ ဗိမ္ဗာမဟေသိ

သရထ သရထ သင်္ခါရဓမ္မဿဘာဝံ၊ ()

ဣတိ မ္ဗေဓာနန္ဒာဘိဓာနေန ယတိနာ ဝိရစိတေ သကလကဝိဇန ဟဒယာနန္ဒဒါနနိဒါနေ ဇိနဝံသဒီပေ အဝိဒူရေနိဒါနေ ပါဏိဂ္ဂဟမင်္ဂလုဿဝပဝတ္တိပရိဒီပေါ။ နဝမော သဂ္ဂေါ။

၁။ ¶

ဂုဏမဏိမဏိမာ သော ဒေဝရာဇာ’ဝ ရာဇာ

သုခမနုဘဝမာနော ဝါဇိယာနေန ယေန၊

ဘမရဘရိတမာလာ မင်္ဂလုယျာနဘူမိ

တဒဝသရိ ကဒါစိ သာလိနီ (မာလိနီ) ဟိ၊ ()

၂။

ဥပဂတသမယော’တိ ဗုဇ္ဈနတ္ထာယ ဗောဓိံ

သုမရိယ သုရပုတ္တာ ဗောဓိသတ္တေ ဝဇန္တေ၊

ဘဝဝိရတိသမတ္ထံ ဒဿယုံ မာပယိတွာ

ဇရသကဋသရူပံ ဇိဏ္ဏရူပံက ဝိရူပံ၊ ()

၃။ ¶

ကိမိဒမိတိဟပုဋ္ဌော ဇိဏ္ဏရူပံ ဝိပဿ

ဝိမတိပရဝသော သော သာရထိံ ရူပသာရော၊

နိဇဟဒယနိဓာနေ ဒေဝတာစောဒိတဿ

နိဒဟိ ဓနမိဝဂ္ဃံ တဿဓမ္မောပဒေသံ၊ ()

၄။

ဟရိတနဠကလာပံ မင်္ဂလုယျာနမဂ္ဂေ

ယထရိဝ’ဟိမုခဋ္ဌာ ကုဉ္ဇရိ ဘဉ္ဇမာနာ၊

တထရိဝ’ဘိဘဝန္တီ သဗ္ဗယောဗ္ဗညဒပ္ပံ

ခရတရဇရတာ သာ အတ္တပစ္စက္ခဘူတာ၊ ()

၅။

မုခကုကဝလယဂဗ္ဘာ ဘဋ္ဌကိဉ္ဇက္ခသောဘာ

ဘဝိ ကဌိနဇရာရိခဏ္ဍဒန္တဋ္ဌိပန္တိ၊

ကုဋိလပလိတဇာတံ တဉ္ဇရာယာ’ဘိသေကေ

သိရသိ ရစိတသေတစ္ဆတ္တသောဘံ ဗဗန္ဓ၊ ()

၆။ ¶

အဝိရဠဝလိယော တာ ဇိဏ္ဏရူပဿ စမ္မေ

ပဘဝဗလဝတေဇောဓာတုဝေဂုဋ္ဌိတာ’သုံ၊

တရလသလိလပိဋ္ဌေ သေယျထာပေါ’ဒဓိဿ

တရလသလိလပိဋ္ဌေ သေယျထာပေါ’ဒဓိဿ

ပလယပဝနဝေဂု’တ္တုင်္ဂကလ္လောလမာလာ ()

၇။

ဌိတမုပဝနပန္ထေ ဝင်္ကဂေါပါဏသိ’ဝ

အနုဇုကမုဇုဘုတံ ဒဏ္ဍမောလုဗ္ဘ ဘုမျာ၊

နိဇတရုဏဝိလာသံ လက္ခမာပါဒယန္တံ

ဓနုမိဝ သဂုဏံ တံ ရူပမဒ္ဒက္ခိ ဓီရော၊ ()

၈။ ¶

ဇိနိအဇဂရဘောဂေ ဇိဏ္ဏနိမ္မောကဘာရံ

တိလကဝိဗတစမ္မံ တန္တိရောဇတ္တဘာဝေ၊

အပဂတဃနမံသော ဖာသုကဋ္ဌိပ္ပန္ဓော

အဇိနိတိရဝလေပံ ကုဍ္ဍဒါရုပ္ပဗန္ဓံ၊ ()

၉။

ဝိဂတဗလမဒါဒိံ ဝိဿဝန္တံ သရီရေ

နဝှိ ဝဏမုခေဟိ ဂုထမုတ္တာဒျ’သူဝိံ၊

ဝလိဝိသမကပေါလံ ကမ္ပမာနုတ္တမင်္ဂံ

သုဝိသဒမတိနော တံ ပဿတော ဇိဏ္ဏရူပံ၊ ()

၁၀။

ဘုဝနမနဝသေသံ တဿု’ပဋ္ဌာသိ သမ္ပ-

ဇ္ဇလိတမထ ဇရာယာ’ဒိတ္တဂေဟတ္တယံ’ဝ၊

အဟမပကိ အနတီတော ဓမ္မမေတန္တိ ဝတွာ

ဘဝနဝနမဂဉ္ဆိ ဇာတိယု’က္ကဏ္ဌိတတ္တော၊ ()

၁၁။ ¶

ပုနရုပဝနမဂ္ဂံ ဩဂဟန္တဿ ရညော

သုခမနုဘဝနတ္ထံ ဒေဝတာမာပယိတွာ၊

ပရပရိဟရနီယံ ဃောရရောဂါဝတိဏ္ဏံ

အပရမပိ ဝိရူပံ ဒဿယုံ ဝျာဓိရူပံ၊ ()

၁၂။

ဝိသဒမတိ ဝိမတျာ သကျဝံသေကကေတု

ကိမိမိဝပလိပန္နံ ဝစ္စပဿာဝပင်္ကေ၊

ပဘဝဗလဝဒုက္ခံ တံ ပရာဓီနဝုတ္တိံ

ကိမိဒမိတိ ပဒိသွာ ပါဇိတာရံ အပုစ္ဆိ၊ ()

၁၃။

ဝရမတိ ဝရဓမ္မံ တေန သူတေန ဝုတ္တံ

အမတမိဝ ပိဗန္တော သောတဓာတွဉ္ဇလီဟိ၊

အဂမပိ အနတိတော ဗျာဓိဓမ္မန္တိ တမှာ

နိဇဘဝနဝနံ သောပါ’ဂ သံဝိဂ္ဂရူပေါ၊ ()

၁၄။ ¶

တဒုပဝနဝိမာနံ ဝါဇိယာနေန နာထေ

ဝဇတိ သတိ ကဒါစိ မာပယုံ ဒေဝတာယော၊

သုဏခကုလလဂိဇ္ဈာဒီဟီဝါ ခဇ္ဇမာနံ

နရကုဏပသရီရံ ဥဒ္ဓုမာတံ ပဌမှိ၊ ()

၁၅။

ပဘဝကိမိကုလာနံ စာလယံ နီလဝဏ္ဏံ

ဝဏဝိဝရမုခေဟိ လောဟိတံ ပဂ္ဃရန္တံ၊

သကုဏဂဏွိတစ္ဆိံ မက္ခိကာမက္ခိတင်္ဂံ

သုမတိ မတသရီရံ အဒ္ဒသာ သာရဟီနံ၊ ()

၁၆။

အဘိဂမိ ဂမယန္တော ဘာရတိံ သာရထိဿ

နိဇသဝဏယုဂသ္မိံ ဟေမတာဍင်္ကသောဘံ၊

အဟမ္ပိ မရဏံ ဘော နာတိဝတ္တောတိ ဝတွာ

ဝနမိဝ မိဂရာဇာ သကျရာဇာ ဝိမာနံ၊ ()

၁၇။ ¶

ပုနပိ သပရိသော သော ယာနမာရုယှ ဘဒြံ

ကတိပယဒိဝသာနံ အစ္စယေနာ’ဓိရာဇာ၊

ကပိလပုရဝရမှာ’နင်္ဂရင်္ဂါလယာဘံ

တဒုပဝနမဂဉ္ဆိ ပဉ္စဗာဏာဘိရူပေါ၊ ()

၁၈။

ဂုဏမဏိ မဏိဝဏ္ဏံ ပတ္တမာဒါယ ပတ္ထေ

ပနသသရသရာဂံ ဝီဝရံပါရုပိတွာ၊

ဌိတမဝိကလစက္ခုံ နိမ္မိတံ ဒေဝတာဟိ

သုမတိ သမဏရူပံ ဗုဒ္ဓရူပံ’ဝ ပဿိ၊ ()

၁၉။

တဒဟနိ ဝိဗုဓာ’ဓိဋ္ဌာနတော ဘာဝနီယော

ယတိပတိရိဝ သူတော အတ္ထဓမ္မာနုသာသိ၊

သမဏဂုဏမနေကာဒီနဝံ ပဉ္စကာမေ

တမဝဒိ ဂမနသ္မိံ အာနိသံသဉ္စ ဂေဟာ၊ ()

၂၀။ ¶

ကုဟနလပနမိစ္ဆာဇီဝမောဟာယ ကုစ္ဆိ-

ပရဟရဏသမတ္ထံ မတ္တိကာပတ္တမဿ၊

ကရ ကမကလဂတံ သော ပါရမီစောဒိတတ္တော

ဝိသဒမတိ ပဒိသွာ သမ္ပသာဒံ ဇနေသိ၊ ()

၂၁။

ဝိကသိတကလိကာလင်္ကာရမုဒ္ဒါလသာလ-

မိဝ သမဏဝိလာသံ စီဝရောဘာသမဂ္ဂေ၊

နယနမဓုကရာနံ ဘာရမာဓာယ ဓီရော

နိဇမနသိ ဇနေသိ စီဝရေ သမ္ပသာဒံ၊ ()

၂၂။

ခဏိကမရဏဒုက္ခာဝဋ္ဋမာဗာဓရာသိ-

မကရနိကရဘိမံ တံ ဇရာဝီစိဝေဂံ၊

ဘဝဇလဓိမဂါဓံ ဇာတိဝေလာဝဓိံ သော

အယမိဝ ပဋိပန္နာ နိတ္တရေယျုန္တျ’ဝေဒိ၊ ()

၂၃။ ¶

သမဏဝဒနပီနစ္စန္ဒဗိမ္ဗောဒယေန

ဝိကသိတမနကုန္ဒော နန္ဒနုယျာနသောဘံ၊

ဥပဝနမဘီဂန္တုံ သန္ဒနံ စာရယေ’တိ

တဒဟနိ မနုဇိန္ဒော သန္ဒနာစာရိမာဟ၊ ()

၂၄။

ဝလယိတနဠတာဠီတာလဟိန္တာလပန္တိံ

မလယဇတရုဇာယာသီတလံ နိမ္မလာပံ၊

ဥပဝနမဝတိဏ္ဏော နန္ဒနံ ဝါသဝေါ’ဝ

အကရိ ဒိဝသဘာဂံ သာဓုကီဠံ သရာဇာ၊ ()

၂၅။

ဒသသတကိရဏသ္မိံ ယဿ ကိတ္တိပ္ပဗန္ဓ-

သရဒဇလဒရာဇိဆာဒိတသ္မိံ နဘသ္မိံ၊

ဥပရိသိရသိ သေတစ္ဆတ္တသောဘံ ဘဇန္တေ

တဒိယစရဏလက္ချာ’လင်္ကရိ ဝါပိတီရံ၊ ()

၂၆။ ¶

သရသိဇဝဒနေဟိ ဟံသပီနတ္ထနေဟိ

ကုဝလယနယနေဟီ နီလိကာကုန္တလေဟိ၊

မဓုမဒမုဒိတာလီနူပုရေဘာ’ဝရောဓ-

ဇနမိဝ ရမဏီယံ ဩတရိ သော တဠာကံ၊ () (သိလေသဗန္ဓနံ)

၂၇။

ဝရယုဝတိဇနာနံ ကုမ္ဘဂမ္ဘီရနာဘိ-

ဝိဝရဂဟိတဝါရိ ဝါပိ သာ ရိတ္တရူပါ၊

ဃနထနဇဃနာနံ သင်္ဂမေနေ’တရာသံ

ပုနရဘဝိ ကပပုဏ္ဏာ ပီတိဝိပ္ဖာရိနီဝ၊ ()

၂၈။

အဘိနဝရမဏိနံ ဇာတုလဇ္ဇာတုရာနံ

ဝိမုခနယနမီနေ မီနကေတုပမေန၊

ဥပဝဓိတုမီဝဂ္ဂေ ခိတ္တဇာလဗ္ဗိလာသံ

ခဏမဝဟရိ ရညာ ဝိဒ္ဓဟတ္ထမ္ဗုဓာရာ၊ ()

၂၉။ ¶

နဝဇလကဏိကာလင်္ကာရဝတ္တာရဝိန္ဒာ

ဃနကုစကလဟံသာ ကေသသေဝါလနီလာ၊

ပတိမထိတတရင်္ဂါကိဏ္ဏသုဿောဏိဝေလာ

သရသိ သရသိ’ဝါ’သိ တတြ ကီဠာတုရေ’ကာ၊ ()

၃၀။

သသိရူစိရမုခီနံ ခေါမဝတ္ထန္တရီယေ

သနိကမပနယန္တေ ဝိစီဟတ္ထေဟိ ရညာ၊

ရစိတနယနကန္တီ ဗျန္တ ဂမ္ဘီရနာဘီ-

သရသိဇပရိယန္တာ နာဠပန္တီရိ’ဝါ’သိ၊ ()

၂၉။ ¶

နဝဇလကဏိကာလင်္ကာရဝတ္တာရဝိန္ဒာ

ဃနကုစကလဟံသာ ကေသသေဝါလနီလာ၊

ပတိမထိတတရင်္ဂါကိဏ္ဏသုဿောဏိဝေလာ

သရသိ သရသိ’ဝါ’သိ တတြ ကီဠာတုရေ’ကာ၊ ()

၃၀။

သသိရုစိရမုခီနံ ခေါမဝတ္ထန္တရီယေ

သနိကမပနယန္တေ ဝိဝိဘဏ္ထေဟိ ရညာ၊

ရစိတနယနကန္တီ ဗျန္တ ဂမှီရနာဟီ

သရသိဇပရိယန္တာ နာဠပန္တိရိ’ဝါ’သိ၊ ()

၃၁။ ¶

ပုနရပိ ကုစကုမ္ဘဉ္စန္ဒဟာရေနိဝါ’ပေ

နိဇဂဠပရိမာဏေ သန္နိမုဂ္ဂင်္ဂနာနံ၊

မလိနကမလိနီ သာ လောစနေဟာ’နနေဟိ

အဘဝိ ဘမရဘာရ’မ္ဘောဇသဏ္ဍာ’ကုလေ’စ၊ ()

၃၂။

မဓုမဒမဓုပေဟိ ဂီယမာနေဟိ ဝိစိ-

ဘုဇသတပဟဋာဟိ သောဏိဘေရီဟိ ထိနံ၊

လလိတကမလသီသေ နစ္စမာနိန္ဒိရာယ

အဇိနိ ဇလဇိနီ သာ ဒိဗ္ဗသင်္ဂီတသာလံ၊ ()

၃၃။

တုဟိနကရမုခီနံ တန္တဠာက’န္တလိက္ခေ

သုလလိတဘုဇဝလ္လီ ဝိဇ္ဇုလေခါဘိရာမာ၊

ကုဝလယဝနရာဇိ နီလဇီမုတရာဇိ

ပတိနယနမယူရေ ကီဠယန္တီ ရရာဇ၊ ()

၃၄။ ¶

ဖုဋကုဝလယဟတ္ထံ ရာဇဘံသေဟိ ခိတ္တံ

ဝိဝိဓမဓုပဘုတ္တံ ဓမ္မဝေလာတိဝတ္တံ၊

ယထရိဝ ဂဏိကံ တံ ကဉ္ဇနိံ သော ဇနိန္ဒော

တဒဟနိ ပရိဘုတွာ’မန္ဒမာနနွ္ဒမာပ၊ () (သိလေသဗန္ဓနံ)

၃၅။

စရဏ’နုဝဇမာနဗ္ဗီစိသင်္ခေါဘတီရံ

ဇဟတိ သတိ တဠာကံ သာဝရောဓေ နရိန္ဒေ၊

သရသိဝိရဟိနီသံရုဒ္ဓနိဿာသရူပေါ

မုဒုသုရဘိသမီရော မန္ဒမန္ဒံ ပဝါယိ၊ ()

၃၆။ ¶

ပရိဘဝိ ရဝိဗိမ္ဗံ တင်္ခဏတ္ထာစလဋ္ဌံ

တဟိမုပလတလဋ္ဌော ဘာနုဝံသေကဘာနု၊

အထ သရသိဝဓူနံ ကိဉ္စိသင်္ကောဝိတာနိ

သရသိဇဝဒနာတိ သောကဒီနာနိဝါ’သုံ၊ ()

၃၇။

အသိတနဘသိ သဉ္ဈာမေဃမာလာဝိလာသံ

အဘိဘဝိယ နိသိန္နေ တတြ သကျာဓိနာထေ၊

တုဝဋမုပဂတာ တံ ကပ္ပကာ’နေကဝတ္ထာ-

ဘရဏဝိကတိဟတ္ထာ ဘူပတိံ ဘူသဏတ္ထံ၊ ()

၃၈။

ရဝိကုလရဝိနော ခေါ ဓမ္မတေဇာဘိဘူတော

သုရပတိ သုရပုတ္တံ ဝိဿကမ္မာဘိဓာနံ၊

သပဒိ ပဟိဏိ သမ္မာ ဒိဗ္ဗဝတ္ထာဒိနာ ဘော

တိဘုဝနသရဏံ တံ ဘူသယဿူ’တိ ဝတွာ၊ ()

၃၉။ ¶

ဂဟိတမနုဇဝေသော သော’ပသင်္ကမ္မ သီသေ

သုခုမပဋသတေဟီ ဝေဌနဉ္စာ’ပိ ဒတွာ၊

မဏိကနကမယေဟိ ဘူသယိ ဘူသဏေဟိ

တဒဟနိ ဘဝိ သက္ကော ဒေဝရာဇာ’ဝ ရာဇာ၊ ()

၄၀။

တိမိရဟမရဘာရ’က္ကန္တပါစီနပဿံ

မုကုလိတသတသဉ္ဈာမေဃပတ္တာဝလီနံ၊

ဂဂနတလတဠာကာဓာရမန္ဒာရနာဠံ

ကမလမကုလသောဘံ ဘာနုဗိမ္ဗံ ဗဗန္ဓ၊ ()

၄၁။

ပဟိဏိ ပိတုနရိန္ဒော သာသနံ တာဝ တဿ

နိဇတနုဇကုမာရု’ပ္ပတ္တိမာရောစယိတွာ၊

ပမုဒိတဘဒယော သော လေခဏာလောကနေန

အဝဒိတိ မမ ဇာတံ ဗန္ဓနံ ရာဟုဇာတော၊ ()

၄၂။ ¶

တဒဟနိပိတုရညာ ဝုတ္တဝါကျာနုရူပံ

တဟိမခိလပဒတ္ထံ သဒ္ဒသတ္ထက္ကမေန၊

ကရဟစီ မနုဇိန္ဒော အယျကော သင်္ဂဟေတွာ

အဝဒိတိ မမတတ္တာ ရာဟုလောနာမဟောတံ၊ ()

၄၃။

ဝနသုရဝနိတာနံ လောစနိန္ဒီဝရေဟိ

မဟိတသိရိသရိရော ဘဒြမာရုယှ ယာနံ၊

သဘဝနမဘိဂန္တုံ ဩသရိ နာဂရာနံ

သုဝိမလနယနာလီတောရဏာကိဏ္ဏဝီထိံ၊ ()

၄၄။

ဝိဝဋမဏိကဝါဋော’ပန္တိကဋ္ဌာ ဝိမာနေ

ဇိတသုရဝနိတာ’သိ ယာ ပိတုစ္ဆာယ ဓီတာ၊

နယနကရပုဋေဟိ ရူပသာရံ နိပီယ

သမိတရတိပိပါသာ သာ ကိသာဂေါတမီ ထီ၊ ()

၄၅။ ¶

ဇိတမနသိဇရူပံ ဤဒိသံ ယေသမတ္ထိ

တနုဇရတနမဒ္ဓါ နိဗ္ဗုတာ သာ’ပိ မာတာ၊

ပိတုဇဂတိပတီ သော နိဗ္ဗုတော သီတိဘူတော

နိဇပိယဘရိယာ’ပိ နိဗ္ဗုတာ’တျေ’ဝမာဟ၊ ()

၄၆။

ဟဒယဂတကိလေသေ နိဗ္ဗုတေ ဝူပသန္တေ

ယတိပတိရိဝ ဒိဋ္ဌော နိဗ္ဗုတော သော’ဟမသ္မိ၊

ဣတိ ဝရမတိ သုတွာ တာယ ဂါထံ သုဂီတံ

ဝိဝိဓနယဝိဘတ္တံ တပ္ပဒတ္ထံ အဝေဒိ၊ ()

၄၇။

အဟမိတိပဒမဿာ နိဗ္ဗုတိံ သာဝိတော’သ္မိ

သုမရိယ ဂရုဘတျာ တာယ လက္ခဂ္ဃမဂ္ဂံ၊

ဓဝလကိရဏဘာရံ ဘာသုရံ ဟာရိဟာရံ

ပဟိဏိယ ဘဝနံ သော ပါဝိသိ သာဝရောဓော၊ ()

၄၈။ ¶

မယမိဝ ဝရဗောဓိံ ဗုဇ္ဈမာနဿ ဇာတု

မနသိ ဝုပသမေ’တိ တုယှမေကာဒသဂ္ဂိ၊

ဥပဂမုမုပသန္တိံ ဝျာကရောန္တီ’ဝ တာဝ

အပရဒိသိ ဝိနဒ္ဓါ’နေကသဉ္ဈာဃနာလီ၊ ()

၄၉။

အတုလဓဝဇဆတ္တံ ဓောတမုတ္တာဝလီဟိ

ဝလယိတမိဝ ရညော တဿ သိဟာသနသ္မိံ၊

ဥဒယသိခရိသီသေ တာဝတာရာဝလီဟိ

ပရိဝုတမတိသောဘံ စန္ဒဗိမ္ဗံ ဗဟာသ၊ ()

၅၀။

ဃနတရတိမိရေဟာ’ဝတ္ထရတ္တေဟိ လောကေ

မသိမလိနဝိလာသံ တင်္ခဏေ ဒဿယန္တိ၊

ရဇနိကရကရေဟိ ဝိပ္ဖုရတ္တေဟိ ဖီတာ

ကတနဝပရိကမ္မေ’ဝါ’သိ သာ ရာဇဓာနိ၊ ()

၅၁။ ¶

ဟိမကရကရဘာရက္ကတ္တရတ္တန္ဓကာရ-

ဂလိတတိမိရလေခါကာရမာဝီ ကရောန္တိ၊

ဖုဋကုမုဒ ဝနေသု စာသိကုန္ဒာဋဝီသု

သုမဓုရ မဓုမတ္တာ ဘိင်္ဂမာလာ ပမတ္တာ၊ ()

၅၂။

ဇိတသုရပတိဝေသော ဓမ္မစိန္တာပရော သော

ဇလိတ မဏိပဒီပါလောကဘိန္နန္ဓကာရေ၊

နိဇသိရိဘဝနသ္မိံ ဟေမသီဟာသနသ္မိံ

နစိရ မဘိနိသဇ္ဇီ ပဉ္စကာမေ ဝိရတ္တော၊ ()

၅၃။

သပဒိ တုရိယဟတ္ထာ နီလဇိမုတကေသာ

ကုဝလယဒလနေတ္တာ စန္ဒလေခါလလာဋာ၊

ဝိကစကမလဝတ္တာ မေခလာဘာရသောဏီ

ကုစဟရဝိရဠင်္ဂီ စာရုဝါမောရုဇင်္ဃာ၊ ()

၅၄။ ¶

ကုမုဒမုဒကပေါလာ ကုဏ္ဍလောလမ္ဗကဏ္ဏာ

အဝိဝရဒသနာလိမာလတီဒါမလိလာ၊

ကနကရတနမာလာဘာရဂီဝါ၊ ဘိရာမာ၊

အဘိနဝဝနိတာယော နစ္စဂီတေသု ဆေကာ၊ ()

၅၅။

ရဟဒမိဝပသန္နံ နိစ္စလာသိနမိနံ

သုမတိမုပနိသိန္နံ သံဝုတဒွါရုပေတံ၊

တမဘိရတိနိရာသံ ဗုဒ္ဓဘာဝါဘိလာသံ

အဘိရမယိတုကာမာ ဩတရုံ ရင်္ဂဘူမိံ၊ ()

၅၆။ ¶

မဏိမယဝသုမတျာ ပါဒသင်္ဃဋ္ဋနေန

ကနကဝကလယဃောသံ ကာစိ နိစ္ဆာရယန္တီ၊

စလကိသလယလီလာ အင်္ဂုလိ စာလယန္တိ

အနုလယမဘိနစ္စုံ ဟေမဝလ္လီဝိလာသာ၊ ()

၅၇။

နရပတိမုခဗိမ္ဗံက လက္ခမာပါဒယန္တီ

နယနခရသရာနံ ရင်္ဂသင်္ဂါမဘူမျာ၊

ဇိတကလရဝဝါဏီ ကာစိ ရာမာ ဘိရာမာ

သဝဏသုဘဂဂီတံ ဂါယမာနာ ဝိဘာသုံ၊ ()

၅၈။

ဇိတသုရလလနာယောကာဝိ ပဉ္စင်္ဂိကာနိ

တဒဟနိ တုရိယာနိ ဝါဒယုံ လောလပါင်္ဂါ၊

သဝဏမဓုရဝီဏာ ဘေရိနာဒေဟိ တာသံ

ဂဂနတလ မိဝါ၊သိ ပါဝုသေ ရင်္ဂဘူမိ၊ ()

၅၉။ ¶

ဝရမတိ ရမဏီနံ တံ မဟာဘူတရူပ-

ပ္ပဘဝမိဝဝိကာရံ နစ္စမဒ္ဒက္ခိ တာသံ၊

ဝိသမဘဝကုဋီရေ ရာဇရောဂါတုရာနံ

အသုနိတုရိယရာဝံ ဂီတမဋ္ဋဿရံ၊ဝ၊ ()

၆၀။

ဘုသမနဟိရတော သော နစ္စဂီတေသု တာသံ

သိရိသယနဝရသ္မိံ သီဟသေယျံ အကာသိ၊

ဣတိဂဟိတဝိဟေသာ လဒ္ဓနိဒ္ဒါဝကာသာ

သပဒိ မဒနပါသာ တာ နိပဇ္ဇိံသုနာရီ၊ ()

၆၁။

သဟကုမုဒိနိယာ သော သုတ္တမတ္တပ္ပဗုဒ္ဓါ

နိဇသိရိသယနသ္မိံ သန္နိသိန္နော ရဇနျာ၊

ဂဟိတတုရိယဘဏ္ဍေ တတ္ထတတ္ထော၊ တ္ထရိတွာ

ယုဝတိဇနမပဿိ ဒဠှနိဒ္ဒါဘိဘူတံ၊ ()

၆၂။ ¶

အနိလစလကပေါ လာ ကာစိ လာလံ ဂိလန္တေ

ဂလိတဗဟဠခေ ဠာ ကာစိ ခါဒန္တိ ဒန္တေ၊

ဘဂမပဂတစော ဠာ ကာစိ သံဒဿယ န္နေ

ခလိတဝစနမာ လာ ကာစိ ယံယံ လပန္တေ၊ ()

၆၃။

ခိပိတမပိ ကရောန္တီ ကာစိ ကာသန္တိကာစိ

ဣတိ ပစုရဝိကာရံ နိဿိရိကံ အသာရံ၊

ဘဝနမနဝသေသံ တဿု၊ ပဋ္ဌာသိ ဒဠှံ

နရကုဏပဝိကိဏ္ဏံ အာမကာဠာဟဏံဝ၊ ()

၆၄။

တဒဟနိ တိဘဝံ စာ၊ဒိတ္တဂေဟတ္တယံ၊ဝ

သုမရိယ ဝတဘော၊ ပဿဋ္ဌမောပဒ္ဒုတံ ဘော၊

ဣတိ ပရမမုဒါနံ ကဝတ္တယံ တဗ္ဗိမုတျာ

မနသိ ပုရိသသူရော သူရဘာဝံ ဇနေသိ၊ ()

၆၅။ ¶

သုရတစတုရရာမာရက္ခသိဝါသဘူတေ

သိရိဘဝနဝနသ္မိံ မောဟယန္တမှိ ဗာလေ၊

အလမိတိ မမ ဝါသော ဟန္ဒ နိက္ခမ္မ တမှာ

တိဘဝဘယဝိမုတ္တိံ ဧသယိဿာမဟံ၊တိ၊ ()

၆၆။

ဥပကမိယ ဝိမာနဒွါရမုမ္မာရုပန္တေ

သယနုပရိ နိပန္နံ ဆန္နမုဋ္ဌာပယိတွာ၊

တမဝဒိ အဘိဂန္တုံ ကပ္ပယိတွံ၊ နယေတိ

ပဗလဇဝဗလဂ္ဂံ ဝါဇိရာဇံ သရာဇာ၊ ()

၆၇။

ဂတသတိ ဟယသာဠံ တင်္ခဏေ ဆန္နမစ္စေ

သကပတိဂမနတ္ထံ ဧသမံ ကပ္ပနတ္ထော၊

အဂမိတိ သဟဇာတော ကတ္ထကော ဝါဇိရာဇာ

အကရိ ဝိပုလဟေသာရာဝမာနန္ဒဘာရော၊ ()

၆၈။ ¶

ပဝိသိယ သိရိဂဗ္ဘံ တေလဒီပုဇ္ဇလန္တံ

ရတနခစိတမဉ္စေ ဂန္ဓပုပ္ဖာဘိကိဏ္ဏေ၊

ဓရဏိပတိနိပန္နံ ဟေမဗိမ္ဗောပမာနံ

နိဇတနုဇကုမာရံ ပဿိဗိမ္ဗာယသဒ္ဓိံ၊ ()

၆၉။

ယဒိ အဟမပနေတွာ ဒေဝိယာ ဟတ္ထပါသံ

မမ တနုဇကုမာရံ အင်္ကမာရောပယာမိ၊

ဝဒနဇိတသရောဇာ ရာဇိနီ ဝုဋ္ဌဟိတွာ

ဝနမဟီဂမနံ မေ ဝါရယေ ဒုန္နိဝါရံ၊ ()

၇၀။

တနုဇမုခသရောဇံ ဗုဒ္ဓဘူတော သမာနော

နယနမဓုကရာနံ ဇာတု ကာဟာမိဘာရံ၊

သုမရိယ စရဏံ သော ဥဒ္ဓရန္တော၊ဝ မေရုံ

အဝတရိ ဘဝနမှာ ဥက္ခိပိတွာ ပဝီရော၊ ()

၇၁။ ¶

ကုဝလယဒလနေတ္တဉ္စန္ဒမမှောဇဝတ္တံ

မဒနရထရထင်္ဂါကာရသုဿောဏိဘာရံ၊

ကထမဝတရိ ဗိမ္ဗာနာမဒေဝိံ ပဟာယ

နရပတိ ဘဝနမှာ ဟေမဗိမ္ဗာဘိရာမံ၊ ()

၇၂။

မရကတပဋိမာဘံ သမ္ဘဝံ သကျဝံသေ

သမုပစိတသုပုညံ လက္ခဏာကိဏ္ဏဂတ္တံ၊

ပဇဟိယ သုကုမာရံ ရာဟုလာချံ ကုမာရံ

ကထမဝတရိ ပါဒမန္ဒမုက္ခိပ္ပ ဓီရော၊ ()

၇၃။

ရိပုဂဇမိဂရာဇံ ဇမ္ဗုဒီပဂ္ဂရာဇံ

တဒဟနိ ပိတုရာဇံ ပုတ္တသောကဏ္ဏဝမှိ၊

ကထမမိတဒယော သော နိဒ္ဒယော ပက္ခိပိတွာ

အဝတရိ ဘဝနမှာက ဥဒ္ဓရိတွာန ပါဒေ၊ ()

၇၄။ ¶

သကလပထဝိစက္ကံ စက္ကဝါဠာဝဓိံ သော

အဘိဝိဇိယ အသတ္ထော သတ္တမေ ဝါသရမှိ၊

နရဟရိ ကတပုညော စက္ကဝတ္တိ အဟုတွာ

ကထမဝတရိ တမှာ ဥက္ခိပိတွာန ပါဒေ၊ ()

၇၅။

အဝတရိယ ဝိမာနာ အဇ္ဇ မံ တာရယတွံ

တွမပိတိဘဝတော)ဟံ ဥတ္တရေယျ’န္တိ ဝတွာ၊

တမဘိရုဟိ ဇနိန္ဒော ဝါဇိရာဇိန္ဒ’မဋ္ဌာ-

ရသရတနပမာဏံ ဓောတသင်္ခါဝဒါတံ၊ ()

၇၆။

ပဝနတုရိတဝေဂေါ ကန္ထကော ဝါဇိရာဇာ

ယဒဟနိ ပဒသဒ္ဒံ စာ’ပိ ဟေသံ ကရေယျ၊

နနု သကလပုရံ သော ယာတိ အဇ္ဈောတ္ထရိတွာ

တဒဟနိ ကတသဒ္ဒံ ဝါရယုံ ဒေဝတာယော၊ ()

၇၇။ ¶

ကရကမလတလေသု ဒေဝတာနိမ္မိတေသု

ပနိဟိတပဒဝါရံ အဿ မာရုယှ ဓီရော၊

လဟုမုပဂမိ ဆန္နံ ဝါလဓိံ ဂါဟယိတွာ

ထိရပိဟိတကဝါဋဒွါရပါကာရုပန္တံ၊ ()

၇၈။

ယဒိ ပိဟိတကဝါဋုဂ္ဃာဋနံ နာ’ဘဝိဿာ

ဟယဝရမပိ ဆန္နာမစ္စမာဒါယ သောဟံ၊

အသရိ ပုရိသသိဟော ဥပ္ပတေယျန္တိ အဋ္ဌာ-

ရသရတတပမာဏု’တ္တုင်္ဂပါကာရစက္ကံ၊ ()

၇၉။

တထရိဝ ဟယရာဇာ ဆန္နနာမော စ မန္တီ

ဝီရိယဗလသမင်္ဂီ စီန္တယုံ တာဝဒေဝ၊

ဝိဝရိ တဒဓိဝတ္ထာ ဒေဝတာ စောဒိတတ္တာ

ပုရိသဒသသတေနု’ဂ္ဃာဋိယံ ဒွါရဗာဟံ၊ ()

၈၀။ ¶

မမ ဝိသယမသေသံ ဧသသိဒ္ဓတ္ထနာမော

အဘိဘဝိယ သုဗောဓိံ ဇာတု ဗုဇ္ဈိဿတီတိ၊

အထ သုမရိယ မာရော ပါပိမာ’တီဝကုဒ္ဓါ

ပဋိပထမုပဂဉ္ဆိ နိက္ခမိတွာ ဝိမာနာ၊ ()

၈၁။

တုရိတမဟိဝဇန္တေ မာရဝေရိမှိ မာရော

အသိတနဘသိ ဌတွာ ဣတ္ထမာရောစယိတ္ထ၊

ဝရပုရိသ ဣတော ခေါ သတ္တမေ ဝါသရမှိ

တွမဟိဝိဇိယ လောကံ ဟေဿသေ စက္ကဝတ္တီ၊ ()

၈၂။

သုခမနုဘဝမာနော စက္ကဝတ္တီ ဘဝိတွာ

ဃရမဓိဝသ စက္ကံ ဝတ္တယံ ယာဝဇီဝံ၊

အမိတမတိ တုဝံ မာ နိက္ခမဿူ’တိ မာရော

အဘိဂမနနိသေဓံ ကာတုမိစ္စာနုသာသိ၊ ()

၈၃။ ¶

နမုဝိလပိတဝါစံ သောတဓာတွဉ္ဇလီဟိ

သဝိသမိဝ ပိဗန္တော တံ တုဝံ ကော’သိ ပုစ္ဆိ၊

ပဝနပထဌိတော’ဟံ ဣဿရော ဒေဝတာနံ

နရဝရ ဝသဝတ္တီ ပါပိမာ’တျေ’ဝ မာဟ၊ ()

၈၄။

သုရနရသရဏော သော နိဗ္ဘယော ဒိဗ္ဗစဒ္ဒ-

ရတနဇနနမဒ္ဓါ မာရဇာနာမဟ’န္တိ၊

ပဋိဝစနမဒါသိ မာဒိသော ဒုပ္ပသယှော

ဘဝတိ ဒသသဟဿေဟာ’ပိ တုမှာဒိသေဟိ၊ ()

၈၅။

ယဒိ မနသိ သိယာ တေ ကာမဒေါသဗ္ဗိဟိံသာ-

ပဘုတိပရိဝိတက္ကော တာဝဇာနာမ’ဟန္တိ၊

ပဋိဃပရဝသော သော ကိဉ္စိဩတာရပေခေါ

အနုပဒမနုဗန္ဓိ တဿ ဆာယာယထေဝ၊ ()

၈၆။ ¶

ပုနရဘိဝဇတောဝါ’သာဠှိယာ ပုဏ္ဏမာယ

ကပိလပုရဝိဘူတိံ ဒဋ္ဌုကာမမှိ ဇာတေ၊

ဝသုမတိ ပရိဝတ္တီ ဒဿယိ အဿရညော

ပုရဝရဘိမုခဋ္ဌော စေတိယဋ္ဌာနဘုမိံ၊ ()

၈၇။

သပဒိ ဒသသဟဿိစက္ကဝါဠေသု ဒေဝါ

တိဘုဝနသရဏဿာ’ရက္ခဏေ ဝျာဝဋာသုံ၊

မဏိကနကမယေဟိ ဒဏ္ဍဒီပါဒိကေဟိ

အနိမိသတနယေ’ကေ မဂ္ဂမာလောကယိံသု၊ ()

၈၈။

သုရဘိကုသုမဒါမောလမ္ဗမာနဗ္ဗိတာန-

ကနကကလသသေတစ္ဆတ္တကေတုဒ္ဓဇေဟိ၊

တဒဟိဂမနမဂ္ဂံ ဒေဝတာ’လင်္ကရိံသု

ဘုဝနကုဟရမာသိ ပုပ္ဖပူဇာဘိရာမံ၊ ()

၈၉။ ¶

ဂဂနမသနိဃောသစ္ဆန္တမေဝဋ္ဌသဋ္ဌိ-

တုရိယသတသဟဿာရဝဝိပ္ဖာရမာသိ၊

မဟိတသုရဘိပုပ္ဖာကိဏ္ဏမဂ္ဂါဝတိဏ္ဏော

အတုရိတမဘိဂန္တွာ ယောဇနန္တိံသမတ္တံ၊ ()

၉၀။

ဝိမလသလိလပုဏ္ဏံ ဖေဏမာလာဘိကိဏ္ဏံ

ဝိကစကမလရာဇိံ တုင်္ဂကလ္လောလရာဇိံ၊

သသိရတရသမီရံ ဝါဠုကာကိဏ္ဏတိရံ

သမုပဂမိ အနောမာနာမဂင်္ဂံ သဝီရော၊ ()

၉၁။

အသိတမဏိတလာဘာ ဆန္န ကာ နာမိကာ’ယံ

ဣတိ ဝရမတိ ပုစ္ဆိ သော အနောမာနဒီတိ၊

တမဝဒိ ယဒိ တီရေ ဧတ္ထ’ဟံ ပဗ္ဗဇေယျံ

အတိဝိယ သဖခလာ မေ သာ အနောမာသိယာ’တိ၊ ()

၉၂။ ¶

ရဝိကုလတိလကော သော ပဏှိယာ ဝါဇိရာဇံ

သဇဝမဒဒိ သညံ တာယ အဋ္ဌောသဘာယ၊

သုဝိမလသလိလာယာ’နောမဂင်္ဂါယ တီရေ

တရဏိရိဝ ဌိတော’သိ ဥပ္ပတိတွာ တုရင်္ဂေါ၊ ()

၉၃။

သိတပုလိနတလဋ္ဌော တိဏှဓာရာ’သိဟတ္ထော

ဝိသဒမတိ သမောဠိံ စူဠမာဒါယ ဒဠှံ၊

အလုနိ သိရသိ သေသာ ဒွင်္ဂုလာ နီလကေသာ

န တဒုပရိ ပရူဠှာ ဒက္ခိဏာဝတ္တယိံသု၊ ()

၉၄။

အဘဝိ တဒနုရူပံ ဒါဌိကာ မဿုစာ’ပိ

အယမုပရိ သစာ’ဟံ ဌာတု ဗုဒ္ဓါ ဘဝေယျံ၊

နဘသိ ခိပိ သိခံ တံ ဣစ္စဓိဋ္ဌာယ ဓီရော

ပရိဘဝိယ ဌိတာ သာ မေဃမာလာဝိလာသံ၊ ()

၉၅။ ¶

သပဒိ သုရပုရမှာ ဒေဝရာဇာဘိ’ဂန္တွာ

တမဘိဟရိယ စူဠံ စာရိစင်္ဂေါဋကေန၊

ရတနမယမုဠာရံ စေတိယံ မာပယိတ္ထ

သုရဂဏမဟနီယံ တတြ စူဠာမဏိန္တိ၊ ()

၉၆။

ဝိဓိရဘဝိ သဟာယော ယော ဃဋိကာရနာမော

အဒဒိ သမဏကပ္ပံက သော ကပရိက္ခာရမဿ၊

ဂဟိတသမဏဝေသော ပုဗ္ဗဗုဒ္ဓါ’ဝ နာထော

နဘသိ ခိပိ နိဝတ္ထံ သာဋကံ သံဟရိတွာ၊ ()

၉၇။

တမဘိဟရိယ ဒုဿံ ပက္ခိပိတွာ သမုဂ္ဂေ

ရတနမယမတုလျံ ယောဇနဒွါဒသုစ္စံ၊

အကရိ ပရဟိတတ္ထံ ဗြဟ္မလောကေက ဝိဓာတာ

မကုဋမဏိမရိစီစုမ္ဗိယံ စေတိယံသော၊ ()

၉၈။ ¶

ပိတုနရပတိနော တွံ ဘုသဏာဒီနိ ဒတွာ

ဣတိ မမ ဝစနေနာ’ရောဂျမာရောစယဿု၊

သစိဝမနုပလဗ္ဘာ’ ဒါနိ ပဗ္ဗဇ္ဇိတုံ တေ

ပဟိဏိ ဟယသဟာယံ ဩဝဒိတွာန ဆန္နံ၊ ()

၉၉။

ပဋိပထမဝတိဏ္ဏော ဂန္တုကာမော သရဋ္ဌံ

ဓရဏိပတိဝိယောဂါ သောကနိဗ္ဗိဒ္ဓဂတ္တော၊

တုရဂပတိ စဝိတွာ ကန္ထကော ဒေဝပုတ္တော

ဘဝိ ကနကဝိမာနေ တင်္ခဏေတာဝတိံသေ၊ ()

၁၀၀။

သကလဝနသုရာနံ အဉ္ဇလိမဉ္ဇရိဟိ

မဟိတဉ္စရဏပီဌော ယေန ပဗ္ဗဇ္ဇိတော သော၊

တဒဝသရိအနောမာနာမနဇ္ဇာ သမီပေ

ဝနမနုပိယနာမံ အမ္ဗရုက္ခာဘိရာမံ၊ ()

၁၀၁။ ¶

သော နိက္ခမ္မ အဘိန္နခတ္တိယကုလာ နေက္ခမ္မ ဓမ္မာလယော

ဘောဂက္ခန္ဓမုဠာရစက္ကရတနံ ဥစ္စာရဘာရံ ဝိယ၊

ဩဟာယာ’နုပိယမ္ဗနာမဝိပိနေ သတ္တာဟမဇ္ဈာဝသံ

ပဗ္ဗဇ္ဇာပဋိလာဘသမ္ဘဝသုခံ ဝေဒေသိ ဗုဒ္ဓင်္ကုရော၊ ()

ဣတိ မေဓာနန္ဒာဘိဓာနေန ယတိနာ ဝိရစိတေ သကလ ကဝိဇန ဟဒယာနန္ဒ ဒါနနိဒါနေ ဇိနဝံသဒီပေ အဝိဒူရေ နိဒါနေ မဟာဘိနိက္ခမန ပဝတ္တိပရိဒီပေါ ဒသမော သဂ္ဂေါ။

၁။ ¶

မန္ဒာနိလေရိတတရုသဏ္ဍမဏ္ဍိတေ

တသ္မိံ တပေါဝနဂဟဏေ တပေါဓနော၊

ဘုတွာ (ပဘာဝတိ) ဝနဒေဝတာ ယထာ

ဒိဗ္ဗံ သုခံ သုခမနဂါရိယံ တတော၊ ()

၂။

ယော သေနိယော နရပတိ မာဂဓော တဒါ

ယသ္မိံ ပုရေ ဝသတိ ပုရင်္ဂဘာသုရေ၊

ရာဇဂ္ဂဟံ တမဟိပဝေသနတ္ထိကော

အဒ္ဓါနမောသရိ သမတိံသယောဇနံ၊ ()

၃။

စက္ကင်္ကိတဿိရိစာရဏော သုသညမော

ဒီဃဉ္ဇသံ ဝသိ တဒဟေန ခေပယံ၊

ရာဇဂ္ဂဟံ ကပုရဝရမိန္ဒိရာလယံ

သမ္ပာဝိသိ ဇိတဂဇရာဇဂါမိ သော၊ ()

၄။ ¶

ဣန္ဒာသုဓာဝလိဝလယိကတော မဟာ-

မဂ္ဂမှိ ဇင်္ဂမ္မဏိပဗ္ဗတောရိဝ၊

ခတ္တိံသလက္ခဏသမလင်္ကတော မဟာ-

ဝီရော တပေါနိဓိ ယုဂမတ္တဒဿနော၊ ()

၅။

ဗောဓာပယံ ဗုဓဇနမာနသမ္ဗုဇေ

အဝှာပယံ ပထိကဇန’က္ခိပက္ခိနော၊

ဝိမှာပယံ နိဇသိရိယာ သဒေဝကေ

တသ္မိံ ပုရေ စရိ သပဒါနစာရိကံ၊ ()

၆။

ပိဏ္ဍာယ ဂစ္ဆတိသတိ ရူပဒဿန-

ပဗျာဝဋာ’ခိလဇနတာယ ဂေါတမေ၊

သင်္ဃောဘိတာ’သုရမိသရေဟိ သာ ပုရိ

ပတ္တေ ယထေဝ’သုရပုရိ ပုရိန္ဒဒေ၊ ()

၇။ ¶

ခတ္တိံသလက္ခဏသုရစာပဘာသုရေ

ရူပမ္ဗရေ ဝရပုရိသဿ ဂစ္ဆတော၊

လောကဿ လောစနသကုဏာဝလိတဒါ

အန္တံ နပါပုဏိ ပရိသင်္ကမန္တီပိ၊ ()

၈။

မဉ္ဇီရပိဉ္ဇရကရ ကန္ဓရာမဏိ-

ကေယူရဘာသုရစရဏာ သိရိမတော၊

သီမန္တိနီ ပရမသိရိံ ဝိပဿိတုံ

ဓာဝိံသု နိဇ္ဇိတကလဟံသကာမိနီ၊ ()

၉။

နာရိဇနာ မဟိတုမိဝါ’ဘိဂစ္ဆတော

ရူပိန္ဒိရာယ’ နိမိသလောစနုပ္ပလေ၊

ဓမ္မိလ္လဝေလ္လိတဘုဇစမ္ပကာဝလီ

ဓာဝိံသု ပီဝရကုစဟာရပီဠိတာ၊ ()

၁၀။ ¶

နိဿာသိနီ သမဇလဗိန္ဒုစုမ္ဗိတ-

ဝတ္တမ္ဗုဇာ သိထိလိတကာသိကမ္ဗရာ၊

ကာစိတ္ထိယော သမဏမုဒိက္ခိတုံ ပထေ

ဓာဝန္တိယော ကိမုပတိသင်္ကိယာ’ဘဝုံ၊ ()

၁၁။

ဥဂ္ဃာဋိတာ’သိတမဏိသိဟပဉ္ဇရာ

ရာမာပသာရိတဝဒနမ္ဗုဇာက ဝသိံ၊

ဒဋ္ဌုံ ပဘုဇနဘဝနေသု တင်္ခဏေ

မန္ဒာကိနိသရသိဝိလာသမာဟရုံ၊ ()

၁၂။

ဥစ္ဆင်္ဂတောပတိတသုတာ’ဘိရူပိနော

ရူပပ္ပလမှိတဟဒယာက ပူရီဝဓူ၊

ပဿန္တိယော ပထိကဇနဿဟတ္ထဂေ

နာကံသု ကိံ အဓိကရဏာ’ဓိရောပဏံ၊ ()

၁၃။ ¶

ဧကေ ဇနာ ယတိပတိရူပဒဿန-

ကောတုဟဠာ သကပဋိဘာနမဗြဝုံ၊

သီမန္တိနီ မနကုမုဒါနိ ဗောဓယံ

ပတ္တော’တျ’ယံ ပကတိနိသာပတီနုခေါ၊ ()

၁၄။

သုတွာန တံ သကလကလာန္တရောပဂံ

ဗိမ္ဗံ တဒင်္ကိတဟရိဏင်္ကမမ္ဗရေ၊

တုမှေ နပဿထ ဟိမရံသိနော ဣတိ

ဂဗ္ဗာဘိဇပ္ပိတဝစနာ’ပရေဇနာ၊ ()

၁၅။

အစ္ဆေရပင်္ကဇဝိသရာနိ စိန္တိယ

သဉ္စုမ္ဗိတုံ ပုရလလနာနန’မ္ဗုဇေ၊

ဝေရောစနော ဣဓုပဂမာ ဝိရူပိမာ

ဣစ္စဗြဝုံ ပုနရနိသမ္မကာရိနော၊ ()

၁၆။

သုတွာန တံ ဂဂနတလင်္ဂနေ’ဓုနာ

ဝေရောစနဿ’ဘိစရတော နပဿထ၊

စဏ္ဍာတပံ ထိရပရိဝေသမမ္ဗုဇ-

ပါဏိန္တိ ဂဇ္ဇိတဝစနာ’ပရေဇနာ၊ ()

၁၇။ ¶

ဥတ္တုင်္ဂမန္ဒိရမဏိစန္ဒိကာတလေ

ဒိဗ္ဗစ္ဆရာနိဘရမဏိဟိ ဝဉ္စိတော၊

ဧယာ’မရာဝတိနဂရိတိ စိန္တိယ

သက္ကော စရေ နနု သကဝါဒမပက္ပယုံ၊ ()

၁၈။

သက္ကဿ ဒါနဝဝိဇယာ’ဘိလာသိနော

ပါဏိမှိ ဒိဿတိ ဝဇိရာယုဓံ ခရံ၊

သံဝိဇ္ဇရေ ဒသသတလောစနာနိ’ပိ

နောတာဒိသော အယမိတိ တဗ္ဗိပက္ခိနော၊ ()

၁၉။

ယာ သာလဝတျ’ဓိဝစနာ’ဘိရူပိနီ

သဉ္စောဒိတော ဇိတဂိရိဇာယ တာယ ဟော၊

ကေလာသပဗ္ဗတနိဘပဏ္ဍဝါစလ-

ဉတ္တံ ဝဇံ အယမိတိဣဿရော’ဗြဝုံ၊ ()

၂၀။ ¶

တုမှေ နပဿထ ပရမိဿရဿ ကိံ

နဂ္ဂတ္တနံ ပသုသယနော’ပဝေသနံ၊

ပါဏိံ ကပါလကမဓိကက္ခိမဏ္ဍလံ

ဣတ္ထံ ပဝေဒိတဝစနာ’ပရေဇနာ၊ ()

၂၁။

ဧသာ’ဝလမ္ဗိတပုရခီရနီရဓိံ

လက္ခိံ သမေက္ခိယ နိဇလက္ခိသံသယော၊

ပီတမ္ဗရံ ပရိဒဟိယ’ဉ္ဇသေ စရံ

နာရာယနော ဣတိ မတိမပ္ပယုံ သကံ၊ ()

၂၂။

နာရာယနော ကုဝလယနီလဝိဂ္ဂဟော

ကောပန္တရော’ရဂသယနိန္ဒိရာဓနော၊

စက္ကာယုဓော’လ္လသိတကရော’တိဝါမနော

တဗ္ဗာဒမဒ္ဒနစတုရေ’တရေ ဇနာ၊ ()

၂၃။ ¶

ဝေဒတ္တယံ ဝိဗုဓဇနာနမာနနေ

သွ’ဇ္ဈာယတံ ဝသတိနုခေါ သရဿတီ၊

သဉ္ဇာတသံသယ ဇဋိတော ပိတာမဟော

တဿာဂဝေသနပသုတော’တျု’ဒီရယုံ၊ ()

၂၄။

သုတွာန တံ သရသိဇယောနိနော သဒါ

ပါဏိမှိ ဝိဇ္ဇတိ ဝရမတ္တပေါတ္ထကံ၊

စတ္တာရိစာနနပဒုမာနိ ဒိဿရေ

ဂစ္ဆံ အယံပန ပုရိသော နတာဒိသော၊ ()

၂၅။

သုဒ္ဓါဒနဝှယဝသုဓာဓိပ’တြဇော

ဗုဒ္ဓါ ဘဝိဿတိ ဣတိ ဝေဒကောဝိဒါ၊

ကောဏ္ဍညဘုသုရပမုခါ ဒွိဇာ တဒါ

ပဗျာကရုံ တနု ဗဟုဘာသဏေန ကိံ၊ ()

၂၆။ ¶

ဥက္ကဏ္ဌိတော သကဘဝနာ မဟာမတီ

နိက္ခမ္မ သတ္တမဒိဝသောတိ ဝိဿုတော၊

အာပါထဂံ နိဇသဝဏဉ္ဇလိဟိ ဘော

တံ ဗျပ္ပထံ နပိဝထ ကိံ ယထာမတံ၊ ()

၂၇။

ဝေဒါဂတံ ဝရပုရိသင်္ဂလက္ခဏံ

ဒေဟမှိ ဝိဇ္ဇတိ သမဏဿ ဂစ္ဆတော၊

အန္ဓာ’ဝ ဘော အပဂတရူပဒဿနာ

တုမှေ’ပိ ကိံ တလဟထ ရူပဒဿနံ၊ ()

၂၈။

နိက္ခမ္မ ဆဍ္ဍိတဝိဘဝေါ မဟာကုလာ

သုဒ္ဓါသယော သုဂဟိယ ပတ္တစီဝရံ၊

ပဗ္ဗဇ္ဇိယာ’နဟိရမိတော ဘဝတ္တယေ

အတ္ထာစရံ အနုဃရမဉ္ဇသေ’ဓုနာ၊ ()

၂၉။ ¶

သုဒ္ဓါဒနာဝနိပတိနော ဝရောရသော

ဧသော သမုဇ္ဇလသတပုညလက္ခဏော၊

ဝျာပါရိတော ကုသလဗလေန ဗောဓိယာ

ဟောတေ’ဝ ဂေါတမသမဏော နသံသယော၊ ()

၃၀။

ဒိသွာ တပေါဓနမဟိယန္တမဉ္ဇသေ

ယေ မာနဝါ သကသကဝါဒမပ္ပယုံ၊

တဗ္ဗာဒဗန္ဓနဝိနိဝေဌနာ ပရံ

ဣစ္စာဟု ပဏ္ဍိတပုရိသာ ယထာဝတော၊ ()

၃၁။

ဒုတာ တဒါ သုရသိ သမပ္ပိတဉ္ဇလီ

ရညော တမစ္ဆရိယပဝတ္တိမာဟရုံ၊

အဒ္ဒက္ခိ ဘုပတိ စရမာနမဉ္ဇသေ

ပိဏ္ဍာယ’ထဗ္ဗိဝရိယ သိဟပဉ္ဇရံ၊ ()

၃၂။

နာ ဂေါ သိယာ ပဌမိနိမုဇ္ဇနံ က ရေ

ယက္ခော သိယာ သဟယမဒဿနံ က ရေ၊

ဒေ ဝေါ သိယာ ဂဂနတလင်္ဂဏဉ္စ ရေ

ပေါသော သိယာ ယဒိ ပဋိလဒ္ဓမာဟ ရေ၊ ()

၃၃။ ¶

ဒူတေနု’သာသိယ မဂဓာဓိပေါ ဣတိ

ဝီမံသိတုံ ပကတိမနင်္ဂဟင်္ဂိနော၊

ပါဟေသိ တေ ပဒမနုဂမ္မု’ပါဂမုံ

သဒ္ဓိံ မဟာသမဏဝရေန ပဏ္ဍဝံ၊ ()

၃၄။

ဝိက္ခာလယံ မုခကမလံ ကုလေ ကုလေ

ဘိက္ခာဋနေန’ ဘိဟဋမိဿဘောဇနံ၊

လဒ္ဓါ ဇိဂုစ္ဆိယ ဝသိ ပဏ္ဍဝါစလ-

စ္ဆာယာယ မာရဘိ သုနိသဇ္ဇ ဘုဉ္ဇိတုံ၊ ()

၃၅။

ဘတ္တမှီ ကုက္ကုရဝမထူပမေ မုဟုံ

အန္တောဒရံ ပဝိသတိ ဓီမတော သတိ၊

အန္တာနိ ဗာဟိရကရဏာနိ’ဝါ’ဘဝုံ

တံခေါ သဟီ ဝသိသနိသမ္ပဇညဝါ၊ ()

၃၆။ ¶

ပဗ္ဗဇ္ဇိတံ သုဂဟိတပတ္တစီဝရံ

ဒိသွာ ရတိံ ပဇဟိယ ရာဇဘောဇနေ၊

သိဒ္ဓတ္ထ နော တွမဘိဂမိတ္ထ အတ္တနာ

အတ္တာနမောဝဒိယ ပဘုဉ္ဇိ ဘောဇနံ၊ ()

၃၇။

ဒူတေဟိ စောဒိတဟဒယော ဒယာဓနော

သော မာဂဓော နရပတိ တေန ပါဝိသိ၊

ယေနာ’သိ ပဏ္ဍဝဂိရိ ဘဒြဝါဟနံ

အာရုယှ ဒဿနရသဃေဓလောစနော၊ ()

၃၈။

အညာယ သာကိယကုလသမ္ဘဝံ ဝသိံ

ရာဇာ ပသိဒိယ အရိယေ’ရိယာပထေ၊

မာ ကာဟသေ သခ ဣတိ ဒုက္ကရံ ခရံ

ရဇ္ဇေန တံနရပဝရံ ပဝါရယိ၊ ()

၃၉။ ¶

ရဇ္ဇေန ကိံ တဝ စတုရဏ္ဏဝါဝဓိံ

ရဇ္ဇံ နိဇံ ပဇဟိယ အာဂတဿ မေ၊

ဗောဓိံ ပဗုဇ္ဈိယ ပဌမံ တထာသတိ

အာဂစ္ဆတံ မမ ဝိဇိတန္တျ’ဝေါစ နံ၊ ()

၄၀။

ဒတွာ ပဋိဿဝမထ ဘုမိဘတ္တုနော

လောကဿ လောစနမဏိတောရဏာကုလေ၊

ဒီဃဉ္ဇသေ ဝသိ ဌပိတင်္ဃိပင်္ကဇော

အာဠာရာကံ ဣသိပဝရံ ဥပါဝိသိ၊ ()

၄၁။

ပတွာန ကိံ ကုသလဂဝေသိ သော ဝသိ

အာဠာရကံ ဝိရဇမုဠာရဈာယိနံ၊

ဣစ္ဆာမဟန္တိ’သိ တဝ သန္တိကေ’ဓုနာ

ဓမ္မံ သမာစရိတုမိဓာဂတော ဗြုဝိ၊ ()

၄၂။ ¶

သုတွာန တံ တတိယမရူပိကံ ဝသိ

ဈာနံ ဝိယာကရိ ပဋိလဒ္ဓမတ္တနာ၊

ခိပ္ပံ တပေါနိဓိပဂုဏံ အကာသိ တံ

ဓမ္မံ သကာစရိယနယာ’ဝလမ္ဗိယ၊ ()

၄၃။

နာ’ယံ ဝသိ တနုတရသဒ္ဓယာ မမံ

ဓမ္မံ သယံ သမဓိဂတံ ဝိယာကရေ၊

ဂေါသာမိကော ယထရိဝ ပဉ္စဂေါရသံ

အဒ္ဓါဖလံ အနုဘဝတီတိ တိန္တိယ၊ ()

၄၄။

ကာလာမ ဒွေ အဓိဂတဈာနသမ္ဘဝံ

တွံ ယာဝတာသုခ မနုဘောသိ မံ ဝဒ၊

ပုဋ္ဌဿ တဿိ’တိ နစကိဉ္စိ ဘာဝိယံ

အာကိဉ္စနံ အဝစ အကိဉ္စနာလယော၊ ()

၄၅။ ¶

သံဝိဇ္ဇရေ မမပကိ ဣမဿိ’ဝေ’သိနော

သဒ္ဓါသတီဝီရိယသမာဓိဗုဒ္ဓိယော၊

ဧဝံ ဝိတက္ကိယ နစိရံ ကတုဿဟော

ဈာနံ လဘီ တတီယမရူပိကံ ဝသီ၊

၄၆။

ယံ ခေါ တုဝံ ဝိဟရသိ ဈာတမပက္ပိတော

သမ္ပဇ္ဇ သမ္ပတိ ဝိဟရာမဟန္တိ တံ၊

အာဠာရိ’သိ ဝရပုရိသေန သာဝိတော

လာဘာ’ဝုသောတျဝစ သုလဒ္ဓမာဝုသော၊

၄၇။

ဇာနာမိ ပါဝစနမဟံ ယထာ တုဝံ

ဇာနာသိ ပါဝစနမဟံ ယထာ တုဝံ၊

တွံ တာဒိသော အဟမပိ ယာဒိသော ဘဝေ

တွံ ယာဒိသော အဟမပကိ တာဒိသော ဘဝေ၊

၄၈။ ¶

ဧဟာ’ဝုသော သမဏ မယံ ဥဘော ဇနာ

ကာဟာမိ’တော ပရိဟရဏံ ဂဏဿိ’ဒံ၊

ဝတွာန အာစရိယသမာနကော သကံ

သိဿံ အကာ တမသမမတ္တနာ သမံ၊ ()

၄၉။

ဓမ္မောပျ’ယံ နဘဝတိ နိဗ္ဗိဒါယ ဝါ

ဗောဓာယဝါ နဝုပသမာယ ကေဝလံ၊

အာရုပ္ပဘုမိယမုပပတ္တိယာ သိယာ

ဣစ္စာနလင်္ကရိယ တတော အပက္ကမိ၊ ()

၅၀။

ကာလမတော ဥပရိဝိသေသမုဒ္ဒကော

ဇညာ’တျ’ယံ သုမရိယ ရာမပုတ္တကော၊

ပတွာ’ဿမံ သမဓိဂတံ တွယာ’ပ’ဟံ

ဓမ္မံ သမာစရိတုမိဓာဂတော’ဗြုဝိ၊ ()

၅၁။ ¶

ဉတွာ သကာစရိယမတဉှိ ဗုဒ္ဓိမာ

ဓမ္မဉ္စရေ မမ သမယော စ တာဒိသော၊

ဝတွေ’ဝမုဒ္ဒကဝသိ ခိပ္ပမတ္တနော

သိက္ခေသိ ပါဝစနပထေ တပေါဓနံ၊ ()

၅၂။

သဒ္ဓါယ မံ သကသမယာ’နုသာသကော

အဒ္ဓါ သမာဓိဇဖလမာဟရေ’တျ’ယံ၊

စိန္တာပရော ဝရပုရိသော အရူပိကံ

ဈာနံ ဝလဉ္ဇသိ ကတမန္တျ’ပုစ္ဆိ နံ၊ ()

၅၃။

သုတွာ တမုဒ္ဒကဝသိ သန္တမာနသော

သန္တံဟိ’ဒံ ပရမမိဒန္တိ ဘာဝိယံ၊

သာမံ ဝလဉ္ဇနကမရူပဘုမိကံ

ဈာနံ စတုတ္ထကမဝိကမ္ပမာဟရီ၊ ()

၅၄။ ¶

သံဝိဇ္ဇရေ မမပိ မနောနိကေတနေ

သဒ္ဓါဒိသဂ္ဂုဏရတနာနိ’မဿိ’ဝ၊

ဧဝံသရံ နစိရမရူပိကံ ဝသိ

ဈာနံ လဘီ ဝီရိယဗလေနဝါ’န္တမံ၊ ()

၅၅။

လဒ္ဓံ တယာ ယမဓိဂတန္တိ တမ္မယာ

အာရောစိတေ သမဏ ဝရေ’သိပုင်္ဂဝေါ၊

အမှေ ဂဏံ သုပရိဟရာမု’ဘော’တိမံ

ဝတွာ တမာစရိယဓုရေန မာနယိ၊ ()

၅၆။

နာ’ယံ ပထော ဘဝပရိမုတ္တိယာ သိယာ

အဒ္ဓါဘဝေ မမပကိ ဘဝဂ္ဂပတ္တိယာ၊

ဧဝံ ဝဝတ္ထိတဟဒယော မဟာဒယော

နိဗ္ဗိဇ္ဇသော တဒပဂတော’နလံဣတိ၊ ()

၅၇။ ¶

မောက္ခေသကော ဇိတဝရဝါရဏက္ကမော

ဧကောစရံ ဝသိ မဂဓေသု စာရိကံ၊

သေနာနိဝိဿုန္နိဂမော ယဟိံသိယာ

တံ တာပသာလယမုရုဝေလမောသရိ၊ ()

၅၈။

အဒ္ဒက္ခိ သော ဟရိဏဝိဟင်္ဂမာကုလံ

မန္ဒာနိလေရိတတရုသဏ္ဍမဏ္ဍိတံ၊

နေရဉ္ဇရာသလိလပဝါဟသိတလံ

ပါသာဒိကံ ပရမတပေါဝနံ တဟိံ၊ ()

၅၉။

အန္တောဇဋံ ဇဋိလဇဋာ’လိဝုမ္ဗိတ-

ပါဒမ္ဗုဇော ဝိဇဋယိတုံ ဃဋံ ဝသီ၊

အတ္တာဟိတာပနပဋိပတ္တိယာ တဟိံ

ဝိဇ္ဇာဓရေ ဇဋိလဝရေ ပသာဒယီ၊ ()

၆၀။ ¶ သဉ္စာရိတော ဇနပဒစာရိကံ တဒါ

ပတွာ တပေါဝနမထ ပဉ္စဝဂ္ဂိယာ၊

ဘိက္ခု မဟာပုရိသမုပဋ္ဌဟိံသု တံ

အာရဒ္ဓဒုက္ကရကိရိယံ ယထာဗလံ။ ()

၆၁။ ဓီရော’တိဒုက္ကရပဋိပတ္တိပူရကော

ဒန္တာနိ ဝီသတိဒသနေဟိ ဝီသတိ၊

တာလုံ နိရုမှိယ ရသနာယ စေတသာ

စိတ္တံ နိပီဠယိ ပရိတာပယိ တဟိံ။ ()

၆၂။ ပဂ္ဂယှ မုဒ္ဓနိ ဗလဝါ’တိဒုဗ္ဗလံ

နိပ္ဖီဠယေ ယထရိဝ ဓီမတော တထာ၊

အတ္တာဟိတာပနပသုတဿ ပဂ္ဃရုံ

ကစ္ဆာဒိနာ’ဓီကတရသေဒဗိန္ဒဝေါ၊ ()

၆၃။ ¶ မဂ္ဂေါဘဝတျ’ယမိတိ ဗောဓိသိဒ္ဓိယာ

အပ္ပာဏကံ ပဋိပဒ မာစရံ စိရံ၊

ဝါသံ အကာ ဝသိ မုခတော စ နာသတော

အဿာသမပ္ပဋိပဋိမော’ပရုန္ဓိယ၊ ()

၆၄။

ရုဒ္ဓေသု တေသွ’ ပိဟိတသောတရန္ဓတော

ဝါတော’ဘိနိက္ခမိ အဓိမတ္တနိဿနော၊

ကမ္မာရဂဂ္ဂရိမုခတော ရဝေါ ဘုသံ

နိဂ္ဂစ္ဆတေ အဘိဓမနေန သေယျထာ၊ ()

၆၅။

ယာဝေဒနာ ခရသိခရေန ဇာယရေ

သီသဿ ဝိဇ္ဈနသမယေ သုခတ္ထိနော၊

ဧဝံ တဒါ ကဌိနသိရောရုဇာ’ဘဝုံ

ရုဒ္ဓါနိလဿ ဟိ မုခကဏ္ဏနာသတော၊ ()

၆၆။ ¶

ဝါတာဘိဃာတနသမယေ သုဓိမတော

သီသေ’ဘဝုံ ပုနရပိသိသဝေဒနာ၊

ဒဠှေန ယော သိရသိ ဝရတ္တကေန ယံ

ဒဠှံ ဒဒေ ယထရိဝ သိသဝေဌနံ၊ ()

၆၇။

သမ္မာ နိရုမှိတမုခကဏ္ဏနာသတော

ဓီရော သမီရဏမုပရုန္ဓိစု’တ္တရိံ၊

ဂဗ္ဘန္တရံ ခရတရဝေဒနာ’တုရံ

ဝါတာ’ဘိမန္ထိယ ပရိကန္တယုံ တတော၊ ()

၆၈။

ဂေါဃာတကော စတုရတရော ဝိကတ္တယေ

ကုစ္ဆိံ ဂဝံ တိခိဏဝိကန္တနေန စေ၊

ရုဒ္ဓါတိလေဟ’နရိယမဂ္ဂဂါမိနော

ဇာတာ တထာ ခရတရ ကုစ္ဆိဝေဒနာ၊ ()

၆၉။ ¶

အပ္ပာနကံ ပုနရပိ ဈာနမာစရံ

ဝီရော သမီရဏ မုပရုန္ဓိ သဗ္ဗထာ၊

စီန္တုဗ္ဘဝံ သကမုခကဏ္ဏနာသဂံ

တေနာ’သိ ကာယိကဒရထော ဓိတီမတော၊ ()

၇၀။

ဒဠှံ ဥဘော စရပုရိသာ မဟဗ္ဗလာ

ဗာဟာသု ဂဏှိယ ပုရိသံ’တိဒုဗ္ဗလံ၊

အင်္ဂါရကာသုယမဟိတာပယန္တိစေ

သော တာဒိသိံ အနုဘဝိ ဒုက္ခဝေဒနံ၊ ()

၇၁။

ခိတ္တံ ကလိင်္ဂရမိဝကာဝိဒေဝတာ

ရုဒ္ဓါနိလုဗ္ဘဝခရဝေဒနာတုရံ၊

ဝီရံ ဝိလောကိယ ပတိတံ တပေါဝနေ

ပဗျာကရုံက ဝရပုရိသော မတော ဣတိ၊ ()

၇၂။ ¶

ကာလံကရောတျ’ယမိတိ ကာစိ ဒေဝတာ

နောစာဟုကိံ တဒိတရ ဒေဝတာ ဝတံ၊

အဿေ’ဝ ဂေါတမသမဏဿ မာရိသာ

အာရောစယုံ ဝိဟရဏမီဒိသံဣတိ၊ ()

၇၃။

ယံနူန’ဟံ ပဋိပဒဟေယျမာယတိံ

အာဟာရယာပနဟရဏာယ သဗ္ဗသော၊

ဧဝံ သစိန္တယိ ကရုဏာယ စောဒိတာ

တာ ဒေဝတာ တုဝဋုမုပေစ္စ ဂေါတမံ၊ ()

၇၄။

အာရောစယုံ ယဒိပန နိစ္စဘောဇနော-

ပစ္ဆေဒနံ သမဏတုဝံ ကရိဿသိ၊

ကာဟာမ တေ မယမိတိလောမကုပတော

ဒိဗ္ဗောဇမောကိရိယ သရိရတပ္ပဏံ၊ ()

၇၅။

ဃာသဿဆေဒနဝီရိယံ ကရောမိ စေ

ယာပေန္တိ တာ မဓုရ သုဓာရသေန မံ၊

တေနာ’ဘိယာပနဝိဓိမိစ္ဆတော သတော

တံခေါတပံ နဘဝတိ ကိံ မုသာ မမံ၊ ()

၇၆။ ¶

နာလန္တိ သော ကုဟနဝသေန ဒေဝတာ-

ဝိမှာပနေတိ’ဟ နိဇဒေဟတပ္ပဏံ၊

ဧဝံ အနုဿရိယ’နုဝါသရံ ဝသီ

အာဟာရမာဟရိ ဝိရသံ ပရိတ္တကံ၊ ()

၇၇။

သွာစေလကော ဝိစရိကရာပလေခဏော

အာစာရမုတ္တျ’ဘဝိ နစေဟိတိဋ္ဌိကော၊

ဥဒ္ဒိဿကံ အဘိဟဋကံ နိမန္တနံ

နာသာဒယိ ပိဋကကလောပိကုမ္ဘိကံ၊ ()

၇၈။ ¶

သော ဒဏ္ဍမုဂ္ဂရမုသလေ’ဠကန္တရံ

ပါယန္တိဂဗ္ဘိနိပနိတီဟိ စာ’ဟဋံ၊

သာမက္ခိကာဝိသယ မုဟိန္နမေကိကံ

သင်္ကိတ္တိနောဒနမပိ နာဘိသာဒယီ၊ ()

၇၉။

သောဝီရကံ နပိဝိ သုရံ နမေရယံ

သုက္ခာမကံ ယဒပိ တိကောဝိသုဒ္ဓိကံ၊

သော မစ္ဆမံသကဝိကတိံ ပဋိက္ခိပိ

အပ္ပေကဒါ တပသိ နိရာမဂန္ဓိကော၊ ()

၈၀။ ¶

သော သတ္တတောပ္ပဘုတိ ကမေန ဟာပယံ

ယာဝေကမာဟရိ ကဗလံ ဗလတ္ထိကော၊

သော သတ္တတောပ္ပဘုတိ ကမေန ဟာပယံ

ဧကံ ကုလံ ဥပဂမိ ယာဝ ဘိက္ခိတုံ၊ () (ယမကဗန္ဓနံ)

၈၁။

ဧကာယ ဒီဟိပိ တိစတူဟိ ပဉ္စဟိ

ဒိန္နံ ပဋိဂ္ဂဟိ ဆဟိ ဒတ္တိသတ္တဟိ၊

ဧကာဟိကပ္ပဘုတိကမဒ္ဓမာသိကံ

မူလံ သယံ ပတိတဖလံ ပဘုဉ္ဇိ သော၊ ()

၈၂။

သာမာကတဏ္ဍုလမထသာကမဒ္ဒကံ

နီဝါရကုဏ္ဍကဟဋဒဒ္ဒုလာဒိကံ၊

ပိညာကဂေါမယတိဏ ဈာမကောဒနံ

ဝီရော မဟာဝိကဋမပါနုဘုဉ္ဇိ သော၊ ()

၈၃။ ¶

ထောကံ ပိဝိ ပကသတမိတံ ဟရေဏုက-

ယူသံ တထာ စနက ကုလတ္ထမုဂ္ဂဇံ၊

သော အပ္ပဘောဇနပရမော သဇီဝိတံ

ဧကေန ယာပယိ တိလတဏ္ဍုလေန’ပိ၊ ()

၈၄။

သာဏမ္မသာဏ?ဇိန’ဇိနက္ခိပစ္ဆဝ-

ဒုဿံ တိရီဋကကုသဝါကစီရကံ၊

သော ကေသကမ္ဗလမပိဝါဠကမ္ဗလ

မောဠုကပက္ခိကဖလကာနျ’ဓာရယိ၊ ()

၈၅။ ¶

ဒုဗ္ဗဏ္ဏနတ္တကမယမဂ္ဂပုဂ္ဂလော

အပ္ပေကဒါ ပရိဒဟိ ပံသုကူလကံ၊

အတ္တန္တပေါဝရဏ ပရာယဏော ဘဝိ

သော မဿုကုန္တလတနုလောမလောစကော၊ ()

၈၆။

ဥဗ္ဘဋ္ဌကော’ဘဝိ ပရိဝဇ္ဇိတာသနော

ဥက္ကဋ္ဌမုက္ကုဋိကဝတံ အဓိဋ္ဌဟီ၊

ဥဒ္ဓဂ္ဂကဏ္ဋကဝီသမေ အပဿယေ

သေယျံ အကာ တဒုပရိဌာနစင်္ကမံ၊ ()

၈၇။

သော သာယတတိယကမုဒကာဝရောဟဏ-

ယုတ္တော ပဝါဟယိတုမဃံ သမုဿ ဟီ၊

အာတာပယံ ဣတိ ပရိတာပယံ သကံ

ဒေဟံ စိရံ ပရိဟရိ ပါပဘီရုကော၊ ()

၈၈။ ¶

ယော နေကဟာယနဂဏိကော’တ္ထိ’တိန္ဒုက-

ရုက္ခဿ ခေါ ပပဋိကဇာတခါဏုကော၊

ဧဝံ တထာ ပပဋိကဇာတမတ္တနော

ဂတ္တဉ္စ သန္နိဝိတရဇောမလံ ဘဝိ၊ ()

၈၉။

သောဝါ ပရော နတု ပရိဝဇ္ဇယီ ရဇော-

ဇလ္လာနိ ကဇ္ဇလမလိနာနိ ပါဏိနာ၊

ဒေဟံ သုဘောဇနဇဟနေန ဇဇ္ဇရံ

တေလံ ဝိလေပိယ ရဇသာ’ဘိထူလယီ၊ ()

၉၀။

သော ဒွေ’ကပဿယိကဝတံ ပပူရယီ

အာပါနကော’ ဘဝိ ဖလကေ’ပိ ထဏ္ဍိလေ၊

သေယျံ အကာက ဝိဟရိ ဝိဝေကကာမဝါ

အဇ္ဈောဂဟံ အဒုတိယကော မဟာဝနံ၊ ()

၉၁။ ¶

ပါဏေ ဣမေ ဝိသမဂတေ’တိခုဒ္ဒကေ

နာ’ဟံ ဝဓိဿမိတိ ပဋိစ္စ’နုဒ္ဒယံ၊

ဥဿာဝမဒ္ဒနဟိရဘီရုတာယ သော

နာထော အဘိက္ကမိ စ သတော ပဋိက္ကမိ၊ ()

၉၂။

နိန္နတ္ထလာ ဝနဂဟနာ ဝနာသယော

နိန္နတ္ထလံ ဝနဂဟနံ မိဂေါ ယထာ၊

ဟီတော ဝိပဿိယ ဝိပိနောပဂေ ဇနေ

တာသာဘိဘူ ပပနတိ ဧဝမေဝခေါ၊ ()

၉၃။

ဒိသွာန လုဒ္ဒကဝနကမ္မိကာဒယော

ဂေါပါလကေ တိဏနဠကဋ္ဌဟာရကေ၊

မာစဒ္ဒသံ အဟမပိ တေတျ’ယံဇနော

မာ မံ ဝိပဿတု သမဓိဋ္ဌဟံ ဝတံ၊ ()

၉၄။

ဧကောဝသင်္ဂဏိကဝိဟာရဘီတိယာ

နိန္နတ္ထလာ ဝနဂဟနာ တပေါနိဓီ၊

နိန္နတ္ထလံ ဝနဂဟနံ ပပါတ သော

တဿာသိ တာဒိသိ ပဝိဝိတ္တတာ တဒါ၊ ()

၉၅။ ¶

ယသ္မိံဝနေ စရတမဝီတရာဂီနံ

ရောမုဂ္ဂမော စရဏတလာနိ ကမ္ပရေ၊

ဒိသွာန ဘိံသဏကဝနံ တထာဝိဓံ

အဇ္ဈောဂဟံ ဝသိ ပဝိဝေကကာမဝါ၊ ()

၉၆။

ဥဿာဝပါတတသမယေ’န္တရဋ္ဌကေ

ဟေမန္တိကေ သိသိရတရာယ ရတ္တိယာ၊

အဗ္ဘာဝကာသိက မဘိပူရယိ ဝတံ

ကိစ္ဆံ ဝသိ ဝသိ ဝနသဏ္ဍဂေါ ဒိဝါ၊ ()

၉၇။

ဂိမှောတု ပစ္ဆိမဒိဝသန္တရေ ဒိဝါ

အဗ္ဘာဝကာသိကဓုတဓမ္မပူရကော၊

ရတ္တိံ ဝနေ ဝိဟရိ ဇဝဋ္ဌိကာနျု’ပ

နိဿာယ သော အသယိ သုသာနဘူမိယံ၊ ()

၉၈။ ¶

ဗုဒ္ဓင်္ကုရံ ဥပဂမိယော’ဌုဘန္တိ’ပိ

ဩမုတ္တယန္တိပိ ရဇသော’ကိရန္တိ’ပိ၊

ဂေါမဏ္ဍလာ သဝဏခိလေသု ဒဏ္ဍကံ

ဒတွာ ဝဒါပယိတုမုပက္ကမန္တိ’ပိ၊ ()

၉၉။

သောဝါဓိဝါသယိ သတိမာ ဥပေက္ခကော

တံဝေဒနံ ကဋုကက မနညဝေဒိယံ၊

ဒုက္ခေ သုခေ သုမတိ တုလာသရိက္ခကော

ဗာလေသု တေသွ’ပိ နဝိကောပယိမနံ၊ ()

၁၀၀။

အာဟာရတပ္ပဏဝိဓိနာ ဝိသုဒ္ဓိ’တိ

ဧကေ ဝဒန္တိ’ဟ သမဏာညတိတ္ထိယာ၊

ကောလာဒိဘောဇနဝိကတိံ တထာဝိဓံ

အပ္ပိစ္ဆတာယ’နုဘဝိ သုဒ္ဓိကာမဝါ၊ ()

၁၀၁။ ¶

အပ္ပောဇဘောဇနဝိကတိံ ပဘုဉ္ဇတော

ခတ္တိံသလက္ခဏသိရိယာ သမုဇ္ဇလံ၊

ကာယော သုရဒ္ဒုမရုစိရော’ဓိမတ္တက-

သီမာနမဋ္ဌိကတစ မာပဓီမတော၊ ()

ပဗ္ဗာနိဝါ အသိတလနာသွ’သိတိက-

ဝလ္လိသု ဥန္နတ’ဝနတာနိ သေယျထာ၊

အာသုံ တထာ ကရစရဏာဒိကာနိ’ပိ

တဿု’န္နတောနတ’ဝယဝါတိ ဝိဂ္ဂဟေ၊ ()

၁၀၃။

မောက္ခေသိနော ကရဘပဒံဝ နိဿိရိံ

နိမ္မံသ မာနိသဒ မဟူ သိရိမတော၊

တဿု’န္တတာဝနတကပိဋ္ဌိကဏ္ဋကော

အာသိ ယထာဝလယိတဝဋ္ဋနာဝလိ၊ ()

၁၀၄။ ¶

ဂေါပါဏသိ သိထိလိတဗန္ဓနာ ဇရ-

သာဠာယ ဟေဋ္ဌုပရိဌိတေ’ဝ ဓီမတော၊

နိမ္မံသလောဟိတကကလေဗရေ ပျ’ဝ-

ဘဂ္ဂါ ဘဝုံ ပဝိသမဖာသုကာဝလီ၊ ()

၁၀၅။

အပ္ပံ ကုဘောဇနဝိကတိံ ပဘုဉ္ဇနော

တဿ’က္ခိကူပဂယုဂလက္ခိတာရကာ၊

ဩက္ကာယိကာ အဘဝု မဂါဓဂါ တဒါ

ဂမ္ဘီရကုပဂဒကတာရကာက ဝိယ၊ ()

၁၀၆။

ဝါတာတပေန’ ဘိဖုသိတော ယထာ’မက-

စ္ဆိန္နော’ဘိသမ္ဖုဋနိ အလာဗု တိတ္တကော၊

သီသစ္ဆဝီ သုခုမဆဝိဿ ဘောဇနော-

ပစ္ဆေဒနေန’ဘိဖုဋိတာ ဌိတံ တထာ၊ ()

၁၀၇။ ¶

တဿောဒရစ္ဆဝိ ပန ပိဋ္ဌိကဏ္ဋကံ

အလ္လိယိ သော မုနိ မလမုတ္တမောစကော၊

ဩကုဇ္ဇိတော ပရိပတိ ပူတိမူလက-

လောမာနိ တဗ္ဗပုဂလိတာနိ ဘူမိယံ၊ ()

၁၀၈။

သော ပိဋ္ဌိကဏ္ဋကမဝသင်္ဂပါဏိနာ

ကုစ္ဆိစ္ဆဝိံ ဖုသိတုမိတော ပရာမသိ၊

သော ပိဋ္ဌိကဏ္ဋကမဝသင်္ဂပါဏိနာ

ကုစ္ဆိစ္ဆဝိံ ဖုသိတုမိတော ပရာမသိ၊ () (ယမကဗန္ဓနံ)

၁၀၉။

ကာလောနုခေါ ဝရပုရိသော’တိ နော တထာ

သာမောနုခေါ နပိ နနုမင်္ဂုရစ္ဆဝိ၊

အာသုံ တဒါ ကဝိမတိကထာပရာ နရာ

ဒိသွာ မလဂ္ဂဟိတမသောဘနစ္ဆဝိံ၊ ()

၁၁၀။ ¶

ယေ သန္တီ သမ္ပတီ သမဏာ’ဘဝုံ ပုရေ

အတ္တန္တပါ တပသိ အနာဂတေ သိယုံ၊

တေ ဝေဒနံ ကဋုကမိတောဓိကံ ကိမု

ဝေဒေန္တိ ဝေဒယု မဘိဝေဒယိဿရေ၊ ()

၁၁၁။

ဤဟာယ ဒုက္ကရကိရိယာယိ’မာယ’ပိ

နေဝ’ဇ္ဈဂါ ယမရိယဉာဏဒဿနံ၊

အတ္တူပတာပနကသိရဿ ကေဝလံ

ဘာဂီ ဘဝိ အနရိယမဂ္ဂဂါမိသော၊ ()

၁၁၂။

သံသာရေ သာတိသာရေ ဗရတရဒရထေ သံသရံ သစ္စသန္ဓော

ခေဒေဝေဒေသိ ဒေဝါသိရနရသရဏောဧသယံသတ္တသန္တိံ၊

ဓီရောဝီရောဝရောယောပဘဝဘဝဘယောပါပတာပဗ္ဗိပတ္တော

အာယောဂံ ယောဂိယောဂီ ပရိဟရိ ဟိရိမာဧဝမေဝစ္ဆဝဿံ၊ () (မုတ္တာဟာရ ဗန္ဓနံ)

ဣတိ မေဓာနန္ဒာဘိဓာနေန ယတိနာ ဝိရစိတေ သကလ ကဝိဇန ဟကယာနန္ဒဒါနနိဒါနေ ဇိနဝံသဒီပေ အဝိဒုရေနိဒါနေ မဟာဗောဓိသတ္တဿ မဟာ ပဓာနာနုယောဂပ္ပဝတ္တိပရိဒီပေါ ဧကာဒသမောသဂ္ဂေါ။

၁။ ¶

ကာမံ ကာမသုခလ္လိကာ’နုယောဂေါ

ဟီနော’နတ္ထကရော’တျ’နေ(’ကရူပံ)၊

စိန္တေတွာန တပေါဝနံ ဝိမာနာ

တွံ သိဒ္ဓတ္ထု’ပဂမ္မ ကာဟသေ ကိံ၊ ()

၂။ ¶

ကောနာမ’န္တု’ပတာပနာ’နုယုတ္တော

ပတ္တော ဟောတိ သုခပ္ပဒံ ကဒါစိ၊

တသ္မာ အတ္တု’ပတာပနာ’နုယောဂေါ

ဟီနော’နတ္ထကရော’တိ စိန္တယဿု၊ ()

၃။

အတ္တာနံ သယမေဝမောဝဒိတွာ

ပိဏ္ဍာယာ’နုဃရံ စရိတွ လဒ္ဓံ၊

ဘတ္တံ ဘုတ္တဝတော သကမှိ ကာယေ

အာသုံ ပါကတိကာနိ လက္ခဏာနိ၊ ()

၄။

ဟီနန္တဒွယဝဇ္ဇနေန ဇာတု

ဉာဏုက္ကံသဂတမှိ တမှိ ဝီရေ၊

ဗောဓာယူ’ပသမာယ နိဗ္ဗိဒါယ

ဥက္ကဋ္ဌံ ပဋိပတ္တိမာစရန္တေ၊ ()

၅။ ¶

ဆဗ္ဗဿာနျ’နိဒုက္ကရံ ကရိတွာ

ဗောဓိံ နာဇ္ဈဂတော သုဘောဇနာနိ၊

ဘုဉ္ဇန္တော ကိမု ကုဗ္ဗတေ’ ပဓာနာ

ဝိဗ္ဘန္တော ဣတိ ပဉ္စဝဂ္ဂိယာယံ၊ ()

၆။

မဒဒိတွာ သိကတံ သိနေဟလဒ္ဓါ

ကေဝါ’သုံ သမဏံ ဟိ’မံ ဥပေစ္စ၊

ကော မူဠှော’ဓိဂမာဓိဂန္တုမိစ္ဆေ

စိန္တေတွာ မိဂဒါယမောတရိံသု၊ ()

၇။

သေနာနီနိဂမေ တဒါနိ သေဋ္ဌိ-

ဓီတာ သာမိကုလံ အလင်္ကတာ’သိ၊

ဘာရေနာ’ဝနတင်္ဂိနီ ကုစာနံ

ဟံသိဝါ’လသဂါမိနီ သုဇာတာ၊ ()

၈။ ¶

ဇာတေ ပတ္ထိတပတ္ထနာသမိဒ္ဓေ

ရုက္ခာ’ဓိဂ္ဂဟိတာယ ဒေဝတာယ၊

ကာတုံ သာဗလိကမ္မက မာနယိတွာ

ဓေနူ လဋ္ဌိဝနောပဂါ သဟဿံ၊ ()

၉။

တာသံ ပဉ္စသတာနိ ဒုဒ္ဓခီရံ

ပါယေတွာ ကတပုန ယာဝတာ’ဎဓေနူ၊

ခီရာနံ ပရိဝတ္တနံ ဝိဓာယ

ပစ္စူသမှိ ဒုဒေါဟ တာ’ဎဓေနူ၊ ()

၁၀။

မိဿေတွာ သယမေဝဝ ဒုဒ္ဓခီရံ

ပါယာသံ ပစိတုံ သမာရဘိတ္ထ၊

ဒေဝါ တတ္ထ သုဓာရသံ ခိပိတွာ

အာရက္ခာဒိမကံသု ဥဒ္ဓနသ္မိံ၊ ()

၁၁။

တဿာ’သိ ဟိမာဝါစလော’ပဓာနံ

ပလ္လင်္ကော ပထဝိတလံ အဟူ စေ၊

ဟတ္ထာ ပစ္ဆိမပုဗ္ဗသာဂရေသု

ပါဒါ ဒက္ခိဏသာဂရေ ဘဝိံသူ၊ ()

၁၂။ ¶

ဥဂ္ဂန္တွာ တိဏဇာတိ နာဟိရန္ဓာ

တဿာ’ဟစ္စ ဌိတာ နဘံ အသေသံ၊

ဆာဒေသုံ စရဏုဋ္ဌိတာ’ဿ ကဏှ-

သီသာ’ဇာနုယုဂါ’ပျ’ကဏှကီဋာ၊ ()

၁၃။

စတ္တာရော သကုဏာ စတုဒ္ဒိသာဟိ

ပတွာ တပ္ပဒပဉ္ဇရံ ဝိဝဏ္ဏာ၊

သေတာ’သုံ ပုထုမီဠှပဗ္ဗတဿ

သီသေ စင်္ကမိ သော အလိမ္ပမာနော၊ ()

၁၄။

ဣစ္စေဝံ သုမတိ’ဋ္ဌပါကဒါနိ

ပဿိတွာ သုပိနာနိ ပဉ္စ နိဋ္ဌံ၊

ပတ္တော အဇ္ဇ ဘဝါမဟန္တိ ဗုဒ္ဓါ

နိဂြောဓံ သမုပေစ္စ သန္နိသီဒိ၊ ()

၁၅။ ¶

သောဓေတံ သဟိတာ တု ပုဏ္ဏဒါသီ

ပစ္စူသေ ဝဋမူလပုဗ္ဗသေလေ၊

တံ လောကေကရဝိံ ဝိရာဇမာနံ

ဒိသွာ’ဝေါစ သုဇာတမေတမတ္ထံ၊ ()

၁၆။

လက္ခဂ္ဃံ ဟရိပါတိမာဟရိတွာ

သာ အာဝဇ္ဇယိ ပက္ကဘာဇနံ သော၊

ပါယာသော ဝိနိဝဋ္ဋိတော ဌိတော’သိ

တာယံ ပေါက္ခရပတ္တတောဝ’တောယံ၊ ()

၁၇။

သာ အညာယ သုဝဏ္ဏပါတိယာ တံ

ဆာဒေတွာ မုဒိတာ ပသန္တစိတ္တာ

ဂန္တွာ မဏ္ဍန မဏ္ဍိတာ သသီသေ

ကတွာ ပူဇယိ ဘောဇနံ သုဇာတာ၊ ()

၁၈။

ကာလံ ဧတ္တကမေဝဗောဓိသတ္တံ

နာတိက္ကမ္မ ဝိဓာတုဒိန္နပတ္တော၊

သမ္ပတ္တော’သိ အဒဿနံ တတော တံ

ပါတိံ သောဏ္ဏမယံ ပဋိဂ္ဂဟေတွာ၊ ()

၁၉။ ¶

ဟံသာလိမလိနီကတာရဝိန္ဒ-

ရေဏုစ္ဆန္နသုနီလနီရပုရာ၊

ယာ နေရဉ္ဇရဝိဿုတာ’သိ တာယ

နဇ္ဇာတီရမဂဉ္ဇိ သတ္တသာရော၊ ()

၂၀။

ပါယာသာမိသပုဏ္ဏသောဏ္ဏပါတိံ

ကာသာဝါနိ ဇိနင်္ကုရော ဌပေတွာ၊

တီရေ တာယ သဝန္တိယာ နဟာတုံ

တိတ္ထံ ဂန္ဓဂဇောရိဝေါ’တရိတ္ထ၊ ()

၂၁။

ရောလမ္ဗာကုလနီလနီရဇေဟိ

သေဝါလေဟိ နဒီဇလံ သုနိလံ၊

နိက္ခန္တဇ္ဇုတိသဉ္စယေဟိ ဒေဟာ

ဩတိဏ္ဏဿ ဇဂါမ ပိဉ္ဇရတ္တံ၊ ()

၂၂။ ¶

ဂင်္ဂါကာမိနိ ကဉ္ဇရေဏုဂန္ဓ-

စုဏ္ဏံ တုင်္ဂတရင်္ဂဗာဟုနာ တံ၊

ဘတ္တာရံ သလိလေန သီတလေန

မက္ခေတွာသုနဟာပယန္တီ’ဝါ’သိ၊ ()

၂၃။

တုလျံ တဗ္ဗဒနမ္ဗုဇေန လဒ္ဓုံ

အာယန္တံ ရဝိရံသိသင်္ဂမေန၊

ဟံသဿေဏိ သရောဇကောသရာသိံ

သံဒူသေသိ အာဝါရိယော ဟိ ပါကော၊ ()

၂၄။

တီရေ သာရသစက္ကဝါကပက္ခီ

သောသာယ’ဿဝိသာရိတံ’သပက္ခာ၊

ဂမ္ဘီရမ္ဘသိ မတ္တမာဟရိံသု

မညေ နိက္ကရုဏာယ ဧတ္တကန္တီ၊ ()

၂၅။ ¶

တုဏ္ဍေ မဏ္ဍိတပုဏ္ဍရီကဒဏ္ဍော

ပက္ခေ ကေရဝပဏ္ဍရေ ပသာရီ၊

နာထဿု’ဗ္ဗဟိ မတ္တဟံသရာဇာ

သေတစ္ဆတ္တဝိဘုတိမုတ္တမင်္ဂေ၊ ()

၂၆။

ဝတ္တမှောဇပလောဘိတာလိစက္ကံ

စက္ခဝါပါထဂတံ ဇိနင်္ကုရဿ၊

သံဒဿေသိ ပဓာနဘုဌိတဿ

နိလသ္မိံ ကသိဏမှိ ဘူတိဘာရံ၊ ()

၂၇။

ဝေယျာဝစ္စကရာရိဝါပဂါယံ

သေဝါလာဒိမလာပနေန မီနာ၊

ပါဒဉ္စန္ဒဂမီနလက္ခဏဿ

တဿ’ဂ္ဂေ ဝိမလိကရိံသု ဝါရိံ၊ ()

၂၈။ ¶

ဥတ္တိဏ္ဏဿ ဝိသာလသာဠသာခီ-

သာခါဟတ္ထပုဋေဟိ ပုဉ္က္နာယ၊

ဂတ္တံ မန္ဒသုဂန္ဓဂန္ဓဝါဟ-

ဝတ္ထံ သာဠဝနင်္ဂနာ အဒါသိ၊ ()

၂၉။

လောကိန္ဒော ပရိမဏ္ဍလံ နိဝတ္ထော

ဆာဒေတွာန တိမဏ္ဍလ’န္တရိယံ၊

ဗန္ဓိတွောပရိ ကာယဗန္ဓနမ္ပိ

ကာသာဝံ ပရိဓာယိ ပံသုကူလံ၊ ()

၃၀။

ပါယာသဿ နိရူဒကဿ ဦန-

ပညာသပ္ပမိတေ ဝိဓာယ ပိဏ္ဍေ၊

ပါစီနာဘိမုခေါ နိသဇ္ဇ နဇ္ဇာ

တီရေ တာယ အကာသိ ဘတ္တကိစ္စံ၊ ()

၃၁။ ¶

ပါယာသော မဓုရော’ယမဿ သတ္တ-

သတ္တာဟံ ပဋိဝိဒ္ဓဗောဓိနော ဟိ၊

ဩဇာသမဖရဏာယ ဌာနမာသိ

တသ္မာ သော ပဝိဟာသိ နိဗ္ဗိဟေသံ၊ ()

၃၂။

ဗုဇ္ဈေယျံ ယဒိ ဗောဓိမဇ္ဇ သောဟံ

ဥဒ္ဓံသောတမယံ သုဝဏ္ဏပါတိ၊

ဂင်္ဂါယံ ခိပကိ ဂစ္ဆတူတိ ဝတွာ

ဓီမာ ဒက္ခိဏဟတ္ထဂံ တမဂ္ဃံ၊ ()

၃၃။

သောတံ ဘိန္ဒိယ သာ သဝန္တိမဇ္ဈေ

ဌတွာ ပါတိ ယတော အသီတိဟတ္ထံ၊

ဥဒ္ဓံသောတမုပေစ္စ သန္နိမုဇ္ဇိ

တသ္မာ သော’ပိ နိမုဇ္ဇိ ပီတိနဇ္ဇံ၊ ()

၃၄။

နာဂါနံ ဘဝနံ ဥပေစ္စ တိဏ္ဏံ

ဗုဒ္ဓါနံ ပနိမမှိ ဘဒ္ဒကပ္ပေ၊

သာပါတိပရိဘုတ္တသောဏ္ဏပါတိ

ဃဋ္ဋေတွာန ဌိတာ ကတာနုရာဝါ၊ ()

၃၅။

တံ ဒီဃာယုကကာလနာဂရာဇာ

သုတွာ သဒ္ဒမထဇ္ဇပေ’ကဗုဒ္ဓါ၊

ဥပ္ပန္နောတိ ဇိနံ အဘိတ္ထဝန္တော

အဋ္ဌာသိ ထုတိဂီတိကာသတေဟိ၊ ()

၃၆။

ဆာယာဗဒ္ဓဝိသာလသာဠသာလံ

ပတွာသာဠဝနံ နဒီသမီပေ၊

အာဇီဝဋ္ဌမသီလသံဝရေန

အာဒေါယေဝ ဝိသုဒ္ဓကာယဝါစော၊ ()

၃၇။

ကတွာဋ္ဌာရသပိဋ္ဌိကဏ္ဋကာနံ

ကောဋီနံပဋိပါဒနံ ကမေန၊

ပလ္လင်္ကဿနိသဇ္ဇဗန္ဓနေန

ကမ္မဋ္ဌာနသတိံ ဥပဋ္ဌပေတွာ၊ ()

၃၈။ ¶

အာနာပါနသတိံပရိဂ္ဂဟေတွာ

နိဗ္ဗတ္တေသိမလဂ္ဂဟီတပုဗ္ဗေ၊

ရူပါရူပသမာဓယော’ဋ္ဌပဉ္စာ-

ဘိညာယော ဝသိတာစ သော ဝသီသော ()

၃၉။

ဈာနဿာဒရတော ဒိဝါဝိဟာရံ

ကတွာ သာဠဝနေ သုရာသုရေဟိ၊

ဓီရော မဂ္ဂမလင်္ကတံ ကရီဝ

ဂန္တုံ ဩတရိယတြဗောဓိမူလံ၊ ()

၄၀။

လာဇာဒီကုသုမေဟိဝိပ္ပကိဏ္ဏော

မုတ္တာပဏ္ဍရဝါဠုကာတ္ထတော သော၊

မဂ္ဂေါ တုင်္ဂတရင်္ဂ ဘင်္ဂဟာရိ

လက္ခီဝါသပယောဒဓီရိ’ဝါ’သိ၊ ()

၄၁။ ¶

မဇ္ဈာ’ရောပိတပင်္ကဇာဘိရာမံ

မုတ္တာဒါမသမာကုလံ သမန္တာ၊

ကဏ္ဏောလမ္ဗသုဝဏ္ဏဃဏ္ဋမဿ

ဒေဋာ ဒိဗ္ဗဝိတာန မုက္ခိပိံသု၊ ()

၄၂။

လောကတ္ထံ ကရဏာယ စောဒိတသ္မိံ

တသ္မိံ လောကဒိဝါကရေ’ကဝီရေ၊

ဂစ္ဆန္တေ သဟဇာတဗောဓိမူလံ

အာလောကော ဥဒပါဒိ သဗ္ဗလောကေ၊ ()

၄၃။

အာယန္တံ တိဏှာရကော ပထမှိ

ဒိသွာ သောတ္ထိယနာမဘူသုရော တံ၊

ပါဒါသိ တိဏမုဋ္ဌိယော’ဋ္ဌမတ္တာ

နာထော တာနိ တိဏာနိ သမ္ပဋိစ္ဆိ၊ ()

၄၄။ ¶

ဝတ္တတ္တေ ဝရပါဋိဟာရိယမှိ

မဂ္ဂေ ဂန္ဓဂဇော’စ ဇမှမာနော၊

သမ္ပတ္တော ကရုဏာကလတ္တဘတ္တာ

သမ္ဗောဓာဓိဂမာယ ဗောဓိမူလံ၊ ()

၄၅။

တဿောသီဒဌိတံ’ဝ စက္ကဝါဠံ

ဟေဋ္ဌာ ဒက္ခိဏတော’တ္တရာနနဿ၊

ပညာယု’တ္တရစက္ကဝါဠမုဒ္ဓံ

လင်္ဃိတွာနဌိတံ’ဝ အာဘဝဂ္ဂံ၊ ()

၄၆။

ဧဝံ ပစ္ဆိမမုတ္တရံ ဒိသမ္ပိ

အဋ္ဌာနန္တိ ပဒက္ခိဏံ ကရောန္တော၊

ဂန္တွာ ဌာနဝရံ ပုရတ္ထိမသ္မိံ

အဋ္ဌာသိ ဝသိ ပစ္ဆိမာနနော သော၊ ()

၄၇။ ¶

ဓီမာ ဒက္ခိဏပါဏိပလ္လဝေန

အဂ္ဂေ တာနိ တိဏာနိ သတ္ထရီ သော၊

တမှာ စုဒ္ဒသဟတ္ထမုပ္ပတိတွာ

ပလ္လင်္ကော သမလင်္ကရီ ဒုမိန္ဒံ၊ ()

၄၈။

ဒက္ခော ကာရုပဝီဏစိတ္တကာရော

ကာတုံ ဝါ’လိခိတုံ ယထာနသက္ကာ၊

အဋ္ဌံသု ဟရိတာနိ သန္ထတာနိ

ဧဝံ တာနိ တိဏာနိ ဥပ္ပတိတွာ၊ ()

၄၉။

မံသာဒီ ဥပသုဿရေ နဟာရူ

အဋ္ဌီစေပျဝသိဿရေ သရီရေ၊

မုဉ္စေယျံ စတုရာသဝေဟိ ယာဝ

ဘိန္ဒိဿာမိ နတာဝိမံ အဟန္တိ၊ ()

၅၀။ ¶

ဒဠှံ စိန္တိယ ဒဠှမာနသော သော

ပါစီနာဘိမုခေါ ဒုမိန္ဒဗန္ဓံ၊

ကတွာ ပိဋ္ဌိဂတံ နိသီဒိ ဗောဓိ-

ပလ္လင်္ကမှိ ယုဂန္ဓရေ ရဝီ’ဝ၊ ()

၅၁။

လောကေသော သသိမဏ္ဍလာဝဘာသံ

သေတစ္ဆတ္တမဓာရယီ တဒညေ၊

သုဒ္ဓါဝါသတလဋ္ဌဒေဝတာ တံ

ပူဇေသုံ မကုဋပ္ပိတဉ္ဇလီဟိ၊ ()

၅၂။

ယေ ရူပါဝစရေ ဝသန္တိ ဒေဝါ

တေ စ’ညတြ အသညသတ္တဒေဝေ၊

သမ္ပတွာ ဝဇိရာသနေ နိသိန္နံ

ပူဇေသုံ ကုသုမာကုလဉ္ဇလီဟိ ()

၅၃။ ¶

ဧကစ္စေ ပရနိမ္မိတာဒိလောကာ

ပတွာ ဘတ္တိဘရာ’မရာ မဟိံသု၊

ပူဇာဘဏ္ဍသမာဘိကိဏ္ဏဟတ္ထာ

မာရာရိံ တဟိမာပ ပါပိမာ ကိံ၊ ()

၅၄။

ယေ နိမ္မာဏရတိမှိ နိဇ္ဇရာ တေ၊

ပတွာ ဂန္ဓကရဏ္ဍမဏ္ဍလေဟိ၊

သမ္ပူဇေသုမလင်္ကတင်္ဃိပီဌံ

နံ သေဋ္ဌံ ဝိဇယာသနောပဝိဋ္ဌံ၊ ()

၅၅။

အဋ္ဌာသိ တုသိတာလယာ သသေနော

ပတွာ သန္တုသိတဝှဒေဝရာဇာ၊

ဝိဇေန္တော ဟရိမောရ ပိဉ္ဆပုဉ္ဇ-

သောဘံ ကဉ္စနတာလဝဏ္ဋပန္တိံ၊ ()

၅၆။

ပတွာ ယာမသုရာလယာ သသေနော

သံဝိဇေသိ သုယာမ ဒေဝရာဇာ၊

ဓီရံ သောဏ္ဏပဏာဠိကာနိပါတ-

ဓာရာသန္နိဘစာရုစာမရေဟိ၊ ()

၅၇။ ¶

ဒေဝိန္ဒော ဝိဇယုတ္တရာချသင်္ခံ

ဝီသံ ဟတ္ထသတံ ဓမီတဒညေ၊

ပူဇေသုံ တမုပေစ္စ ကောဝိဠာရ-

ပုပ္ဖာဒီဟိ စ တာဝတိံသဒေဝါ၊ ()

၅၈။

ယက္ခာဒီဟိ ပုရက္ခတာ’ပိ ဒေဝ-

ရာဇာနော စတုရော စတုဒ္ဒိသာသု၊

ရက္ခံ သံဝိဒဟိံသု ဒေဝလောကာ

တံ ပတွာန ဝိနဋ္ဌလောမဟဋ္ဌံ၊ ()

၅၉။

ဝါဒေန္တော သရမဏ္ဍလံ ဝိဓာယ

ဝီဏံ ပဉ္စသိခေါ’ပိ ဗေဠုဝါချံ၊

တံ သမ္ပူဇယိ ကာလနာဂရာဇာ

ထောမေန္တော ထုတိဂီတိကာသတေဟိ၊ ()

၆၀။ ¶

ဧဝံ ကာဟဠဘေရိသင်္ခဝီဏာ-

ဃဏ္ဋာဝီဇနိဆတ္တစာမရေဟိ၊

နစ္စာဒီဟိစလာဇပဉ္စမေဟိ

ဒီပဒ္ဓုပဓဇေဟိ မာနယုံ တံ၊ ()

၆၁။

သိဒ္ဓတ္ထော ပဋိသိဒ္ဓမာရဓေယျော

ကတ္တုံ အတ္တဝသေ သဒေဝလောကံ၊

သုတွာ ဝါယမတီတိ ဗောဓိမဏ္ဍေ

မာရော တတြ သမာရဘိတ္ထဂန္တုံ၊ ()

၆၂။

တသ္မိံ ခေါ သမယေ ဘယာဝဟာနိ

မာရဿော’တရဏာယ ကာရဏာနိ၊

စက္ခစာပါထဂတာနိ ဒုန္နိမိတ္တ-

ရူပါဒီနိ တိလောကလောစနဿ၊ ()

၆၃။ ¶

သုက္ခ’မှောဓရရာဝဘေရိရာဝ-

ဝိပ္ဖာရာဗဓိရီကတမ္ဗရမ္ပိ၊

ဘီမံ ဝိဇ္ဇုလတာ’သိဃဋ္ဋဏေဟိ

မာရဿာ’ဟဝမ္ဗ္ဍလာဘမာဟ၊ ()

၆၄။

မာရဿာ’ဂမနဉ္ဇသေ ရဇောဝ

ဝါဇီနံ ခုရဃဋ္ဋဏေန ဇာတော၊

ဥက္ကာပါတသတံ ဇနေသိ တဿ

စက္ခဝါနိဋ္ဌဖခလံ ဒိသာသု ဍာဟော၊ ()

၆၅။

ဝေဟာသေ ဝိစရုံ ကဗန္ဓရူပါ

ကာကောလာ ဗလိပုဋ္ဌဝါယသာရီ၊

ဥန္နာဒိံသု ခရာနိလော ပဝါယီ

အဗ္ဘုဋ္ဌာသိ ရဇော ဒိသာသု ဓူမော၊ ()

၆၆။

အာလောကော ဝိဂတော ဃဏန္ဓကာရော

ဩတိဏ္ဏော မဟိကာသမာဘိကိဏ္ဏော၊

အာကာသော ပထဝိ ဘူသံ ပကမ္ပိ

မေဃစ္ဆန္နဒိနံ ဒိနံ ဗဘူဝ၊ ()

၆၇။ ¶

သိဒ္ဓတ္ထဉှိ အသိဒ္ဓမတ္ထမေတံ

ကာတုံ အဿဝမာရကိင်္ကရာမေ၊

ဝတွေ’ထာ’တိ ပဇာပတီ သသေနော

တတ္ထေဝ’န္တရဓာယိ တာဝဒေဝ၊ ()

၆၈။

သာ သေတာ ပုရတော ပဇာပတိဿ

အာသီ ဗာရသယောဇနံ ဝိနဒ္ဓါ၊

ဧဝံ ဒက္ခိဏဝါမနော စ လောက-

ဓာတွန္တာဝဓီမာသိ ပစ္ဆတော’ပိ၊ ()

၆၉။

ဥဒ္ဓံ သာ နဝယောဇနပ္ပမာဏာ

သဒ္ဒေါ ဘူမိဝိဒါရဏောရိ’ဝါ သိ၊

သော’ပဍ္ဎံ သတယောဇနံ ဗဘူဝ

ဥစ္စံ သော ဂိရိမေခလော ဂဇိန္ဒော၊ ()

၇၀။ ¶

နာဟေသုံ ပရိသာသု နိမ္မိတာသုံ

ဒွေယောဓာ သဒိသာယုဓာဒဓာနာ၊

တဗျာသေန အလဉှိ လောမဟံသော

ယဿာ’နုဿရဏေန စေ သိယာ မေ၊ ()

၇၁။

မာပေတွာ သဟသာ သဟဿဗာဟုံ

ဂဏှိတွာ ဝိဝိဓာယုဓာနိ တေဟိ၊

အာရူဠှော ဂိရိမေခလံ သသေနော

မာရော ပါတုရဟောသိ ဗဒ္ဓဝေရော၊ ()

၇၂။

ဒေဝေသော ယသသာ သမံ သကေန

သေတစ္ဆတ္တ မဂဉ္ဆိ သံဟရိတွာ၊

ဒေဝေသော ယသသာ သမံ သကေန

သငက္ခံ ပိဋ္ဌိဂတံ ဝိဓာယ ဓာဝီ၊ () (ယမကဗန္ဓနံ)

၇၃။ ¶

သင်္ကောစာ’နနကာဟလော ဇဂါမ

ပါတာလံ ခလု ကာလနာဂရာဇာ၊

ဝီဏာဒေါဏိသခေါ သခါနပေခေါ

တမှာ ပဉ္စသိခေါ ကလဟုံ ပလာယိ၊ ()

၇၄။

ဒိသွာ မာရဗလံ သမောသရန္တံ

သမ္ပတ္တာ ဇနတာ ပလာယိ ဘီတာ၊

သောသီဟော’ဝ ဝိဟာသိ သကျသီဟော

ဧကော ကမာရကရိန္ဒကုမှဘေဒီ၊ ()

၇၅။

ပဿိတွာ’ဓရကန္တိဘာရမဿ

ဝတ္တမှောရုဟ မိန္ဒိရာဝိဟာရံ၊

သိဒ္ဓတ္ထေန သမော နစတ္ထိ လောကေ

ဣစ္စေဝံ ကလိမာ’ဟ မာရသေနံ၊ ()

၇၆။ ¶

ဧတသသာ’ဘိမုခါ မယံ ကဒါစိ

နောသက္ကောမ’ဘိယုဇ္ဈိတုန္တိ တာတာ၊

ဝတွာ ဥတ္တရပဿတော သမာရော

ခန္ဓာဝါရမဗန္ဓိ ဗဒ္ဓဝေရော၊

၇၇။

ဒိသွာ’ဇ္ဈောတ္ထရမာနမာရသေနံ

အာရက္ခာဝရဏံ ထိရံ ဝိဓာယ၊

ခန္ဓာဝါရမဗန္ဓိ သောပိ ဝီရော

ဇေတုံ တံ ဒသပါရမီ ဘဋေဟိ၊ ()

၇၈။

မာရော ဘုဓရမေရုစက္ကဝါဠေ

ရုက္ခာဒီနိ ဝိစုဏ္ဏိတုံ သမတ္ထံ၊

ခေါဘေတွာ ဘုဝနတ္တယံ ဒိသာသု

ဥဋ္ဌာပေသိ သမီရဏံ သုဃောရံ၊ ()

၇၉။

ဝါတော ပါရမိဓာမဝါရိတော သော

နိတ္တေဇံ ပလယာနိလဿမောပိ၊

ပတ္တော စာမရမန္ဒမာရုတောဝ

တန္ဒေဟောတုပရိဿမံ ဇဟာသိ၊ ()

၈၀။ ¶

ဓာရာဝေဂဝိဟိန္နဘူမိဘာဂံ

ဂမ္ဘီရာ’သနိရာဝနိဗ္ဘရာ’ဃံ၊

မာရော မာပယိ တုင်္ဂဝီစဘင်္ဂံ

ဝဿောဃံ ပရိပါတရုက္ခသေလံ၊ ()

၈၁။

ဝီရော ပါရမိပါဠိဗန္ဓနေန

ရက္ခံ ဗန္ဓိ နိဇန္တဘာဝခေတ္တေ၊

တေနော’ဃော ဝိပထင်္ဂမော ဝိပက္ခ-

သေနာယာ’သိ ပဝါဟဏေ နိဒါနံ၊ ()

၈၂။

တေဇောခဏ္ဍသမာနမတ္တနော သော

တတ္တံ ပဇ္ဇလိတံ သဇောတိဘူတံ၊

မာပေတွော’ပလဝဿမပ္ပသယှံ

ဈာပေတုံ တမုပက္ကမိတ္ထ မာရော၊ ()

၈၃။ ¶

မာရဿေဝ ပတန္တမုတ္တမင်္ဂေ

ဃောရံ ပါရမိဝါယုဝေဂရုဒ္ဓံ၊

တံဝဿံ ဝဇိရာသနူပစာရေ

ပူဇာပုပ္ဖဂုဠတ္တနံ ဇဂါမ၊ ()

၈၄။

အဿဒ္ဓါ ဝိသဒိဒ္ဓတိဏှဓာရံ

အာဒိတ္တံ ပိဟိတမ္ဗရော’ဒရံ သော၊

မာပေသိ အသိသတ္တိတောမရာဒိ-

ဝဿံ သဗ္ဗဒိသာနိပါတမာနံ၊ ()

၈၅။

တသ္မိံ ပါရမိဝမ္မဝမ္မိတသ္မိံ

ဝိဿဋ္ဌာ’ယုဓဝုဋ္ဌိ ကုဏ္ဌိတဂ္ဂါ၊

ပတွာ သမ္ပတိ ပုပ္ဖဝုဋ္ဌိဘာဝံ

တပ္ပာဒါသနမတ္ထကေ ပပါတ၊ ()

၈၆။ ¶

မာရော ဝိစ္စိဋစိစ္စိဋာယမာနံ

သံဝဋ္ဋာနလခဏ္ဍဝိဗ္ဘမံ သော၊

ဝဿင်္ဂါရမယံ သဝိပ္ဖုလိင်္ဂံ

ဥဋ္ဌာပေသိ ပလာသပကုပ္ဖဝဏ္ဏံ၊ ()

၈၇။

ခိပ္ပံပါရမိမန္တဇပ္ပနေန

အင်္ဂါရာနိနိဝါရိတာနိတာနိ၊

တံဗုဒ္ဓင်္ကုရပုဏ္ဏစန္ဒဗိမ္ဗံ

သေဝန္တာနိဝိကိဏ္ဏဘာနိဝါသုံ၊ ()

၈၈။

ဘသ္မီကာတုမလန္တိမာရဝေရိံ

ဓူမာကိဏ္ဏမနိဂ္ဂတဂ္ဂိဇာလံ၊

မာရောဘေရဝရာဝမုဿဒါဘ-

မဗ္ဘုဋ္ဌာပယိခါရဘသ္မဝဿံ၊ ()

၈၉။

သေတာမုဒ္ဓနိဝိပ္ပကိဏ္ဏဘသ္မိံ

တံဝဿံစိတပါရမီဗလေန၊

ပတွာစန္ဒနဂန္ဓစုဏ္ဏဘာဝံ

မာရာရိဿပပါတပါဒမူလေ၊ ()

၉၀။ ¶

အသ္မိံ ဂုဝလယာလဝါဠဂဗ္ဘေ

သမ္ပာတာနလဒဍ္ဎဝဏ္ဏုဓာရံ၊

ဥတ္တာသာဝဟမတ္တနော’ပိ ကဏှော

ဝဿာပေသိ ဥဠာရဝဏ္ဏုဝဿံ၊ ()

၉၁။

ဒိသွာ’ငက္ဃီနခရာလိရံသိဂင်္ဂါ-

တီရုဿာရိတဝဏ္ဏုရာသိ မဿ၊

အင်္ဂါရော’ဝ’ဓိကောဓပါဝကေန

ကဏှော ကဏှတရော’သိ ဈာပိတတ္တော၊ ()

၉၂။

ဓူပါယန္တမဝီစိမစ္စိမန္တံ

သမ္ဖုဋ္ဌံ ဃနဖေဏဏဗုဗ္ဗုလေဟိ၊

ဝဿံ ပင်္ကမယံ ဘုသံ နိမုဂ္ဂေါ

မာရော မာပယိ ပဉ္စကာမပင်္ကေ၊ ()

၉၃။ ¶

တသ္မိံပါရမိသတ္တီသိတိဘူတေ

ပင်္ကေ စန္ဒနပင်္ကဘာဝယာတေ၊

မာရော ပဿိယ ဖုလ္လပင်္ကဇာဟံ

ကောပါ ပင်္ကဟတာနနောရိဝါသိ၊ ()

၉၄။

မာရာရိံ ဣမိနာ ဟနာမဟန္တီ

သော လောကန္တရိယန္ဓကာရဃောရံ၊

မာရော သူဝိဝိဒါရိယံ ဒိသာသု

ဥဋ္ဌာပေသိဃနန္ဓကာရခန္ဓံ၊ ()

၉၅။

သော’ယံ ပါရမိဇာတရံသိဇာလ-

ဘိန္နာ’သေသတမောဇိနင်္ကုရေဏော၊

ပလ္လင်္ကောဒယပဗ္ဗတောဒိတော’သိ

ကာမံ မာရတုသာရသောသနာယ၊ ()

၉၆။ ¶

ဧတံ ဂဏှထ ဗန္ဓထာ’တိ ဝတွာ

နိဋ္ဌံ ကပ္ပမဝဏ္ဏိယံ ကဝီဟိ၊

သဒ္ဓိံ မာရဗလေနု’ပါဂတော သော

ကုဒ္ဓါ ယုဒ္ဓမကာ ပမတ္တဗန္ဓု၊ ()

၉၇။

တံ ဒိသွာ’စလနိစ္စလဋ္ဌမေသ

ပလ္လင်္ကော နစပါပုဏာတိ တုယှံ၊

မယှံ ဟေ’သု’ပကပက္ပတေဝ တသ္မာ

အသ္မာ ဝုဋ္ဌဟထာ’ဝုသောတျ’ဝေါစ၊ ()

၉၈။

ဧကာ’ပီ သမတိံသပါရမီနံ

ပလ္လင်္ကတ္ထမပူရိတာ တယာ’တိ၊

ဝုတ္တေ သော ခိပိ နိဇ္ဇိတော’ရစက္ကံ

စက္ကံ စက္ကဝရင်္ကိတဿ သီသေ၊ ()

၉၉။

တံ စက္ကာယုဓမုဇ္ဈိတပ္ပဘာဝံ

ယုဒ္ဓေ လဒ္ဓဇယဿ မာရဇိဿ၊

ဥဿိသမှိ ဝရာသနူပစာရေ

သေတစ္ဆန္တမိဝုဿိတံ ရရာဇ၊ ()

၁၀၀။ ¶

တုယှံ သဉ္စိနနမှိ ပါရမီနံ

ကော သက္ခီ’တိ အဟဉ္စ သက္ခိဟောမိ၊

သက္ခီ’ဂန္တိ ပဝတ္တမာရသေနာ-

ဃောသော ဘုမိဝိဒါရဏောရိ’ဝါသိ၊ ()

၁၀၁။

ဒါပေန္တောနိဇသက္ခိမုဂ္ဂတေဇော

ဗာဟုံတာဝပသာရယီ ပဝိရော၊

သက္ခီဟန္တီဝဒံ’ဝ မာရသေနံ

တဇ္ဇေန္တော’ဝ ဗဘူဝ ဘုမိစာလော၊ ()

၁၀၂။

မာတင်္ဂေါ ဂိရိမေခလော ဆိတာရိံ

ဝန္ဒန္တော’ဝပပါတ ဇန္နုကေဟိ၊

မာရော လဒ္ဓပရာဇယော နိဝတ္ထ-

ဝတ္ထဿာ’ပိ အနိဿရော ပလာယိ၊ ()

၁၀၃။ ¶

ဃောရမာရဗလဝါရဏာဓိပ-

မာနဒပ္ပနိဘကုမ္ဘဒါရဏော၊

ဗောဓိမူလဝဇိရာသနောပရိ

ကေသရီဝ ဝိရရာဇ မာရဇိ၊ ()

ဣတိ မေဓာနန္ဒာဘိဓာနေန ယတိနာ ဝိရစိတေ သကလ ကဝကိဇန ဟဒယာနန္ဒဒါနနိဒါနေ ဇိနဝံသဒီပေ အဝိဒူရေ နိဒါနေ ဒေဝပုတ္တ မာရဗလ ဝိဒ္ဓံသန ပဝတ္တိပရိဒီပေါ ဒွါဒသမော သဂ္ဂေါ။

၁။

နိခိလမာရတုသာရဝိသောသိနော

အထဇိနင်္ကုရဒီဓိတိမာလိနော၊

ရဝိ ကတာဝသရော’ဝ’ပရာစလံ

(ဒုတ’ဝိလမ္ဗိတ) ဂါမိမုပါဂမီ၊ ()

၂။ ¶

ဇလဓိဝါရိသိနေဟသုပုရိတေ

အဘဝိ ပံသုမဟီတလမလ္လကေ၊

ပဏိဟိတာပရဘုဓရဝတ္တိကာ-

ဇလိတဒီပသိခေ’ဝ နဘောမဏိ၊ ()

၃။

ဥဒယပဗ္ဗတဂဗ္ဘသမုဗ္ဘဝံ

သကယသောပဋိဗိမ္ဗသမံသုဘံ၊

သပဒိ တပ္ပမုခေ သသိမဏ္ဍလံ

ကသိဏမဏ္ဍလဝိဗ္ဘမမုဗ္ဗဟိ၊ ()

၄။

အရုဏဝဏ္ဏသုဓာကရ ဘာကရာ

ဒိဝသသန္ဓိဝိလာသိနိယာ ခဏံ၊

ပရိဟရိံသု’ဒယာပရဘုဓရ-

သဝဏဂံ မဏိမဏ္ဍန ဝိဗ္ဘမံ၊ ()

၅။ ¶

ရဝိဓုရာ ဝိဓုရာ သရသီဝဓု

ကမလကောမလကောသပုဋဉ္ဇလီ၊

ဥပဝနေ ပဝနေ’ရိတဘူရုဟာ

ပနမိတာနမိတာဝ တပေါဓနံ၊ () (ယမကဗန္ဓနံ၊)

၆။

အပရသာဂရမုဒ္ဓနိ ဘာသုရံ

တိမိရဇာလပရံ ရဝိမဏ္ဍလံ၊

မုကုလိတမ္ဗုရုဟဿိရိမာဟရိ

ဘမရစက္ကဘရံ သရသူပရိ၊ ()

၇။

လဝဏဝါရိဓိကာစသရာဝကေ

အပရဘူဓရ ကူဋ ဘုဇပ္ပိတာ၊

သူရိယမဏ္ဍလပါတိ နိမုဇ္ဇိယ

ပုရိမယာမမုခံနကိမာဟရိ၊ ()

၈။ ¶

မဏိပဘာရုဏ ဘာကရ မဏ္ဍလံ

တမနုဘုယ မဟမ္ဗုဓိရာဟုနာ၊

မုခဂတံဝမိတံ ဝိယက လောဟိတံ

ဇလဒရာဇိ ရရာဇ ဒိနစ္စယေ၊ ()

၉။

ဝိတတမေဃပဘာဟိ မုဟုံ မုဟုံ

ကဠိတ ပါဋလ ပလ္လဝ သမ္ပဒံ၊

ဝနဃဋံ ဝိဋပန္တရဂံ ကမာ

ဖူဋတမောပဋလံပရိဏာမယီ ()

၁၀။

သုဘဇနေဘဇနေနိရပေက္ခိနီ

ဝိပတိနီ ပတိနီဝ ရဇဿလာ၊

သုမဓုပေ မဓုပေ ပရိဝဇ္ဇယုံ

ကမလိနီမလိနီကတနိရဇာ၊ () (ယမကဗန္ဓနံ၊)

၁၁။ ¶

မဓုမဒါလိကုလာ မကုလာဝလီ

အနိလဘင်္ဂ တရင်္ဂ ဘုဇေရိတာ၊

ပဒုမိနီ ရမဏီဟိ သိရိမတော

သုမဟိတာမဏိကိင်္ကိဏိသေဏိဝ၊ ()

၁၂။

ရသိကပက္က ဖလာဖလ သာလိသု

တရုသိရေသု သမောသရမာနကာ၊

တိမိရခဏ္ဍနိဘာ ဗဓိရီကရုံ

ရဝိပထံ ဝိရုတေဟိ ဝိဘင်္ဂမာ၊ ()

၁၃။

ကုမုဒိနီပမဒါ’ထသုဓာကရ-

ကရသတေဟိ ပရာမသနာပရံ၊

ကုသုမဟာသဝိလာသဓရာ ဘုသံ

ဘုဝနဝန္ဒိရဂဗ္ဘမလင်္ကရိ၊ ()

၁၄။ ¶

ဟိမကရော ဟရိဏဉ္ဇနဟာရိနာ

နိဇကရေန နိရာကရိ တင်္ခဏေ၊

သကလလောက’ဝိလောစန သမ္ဘဝံ

ဃနတမောပဋလံဟိသဇော ယထာ၊ () (သိလေသဗန္ဓနံ)

၁၅။

သပဒိပါရမိတာရမိတာသယော

နဝမ’နုဿတိယာသတိယာ ပရံ၊

အဓိကတာ’ဓိ သမာဓိ သမာဟိတော

ပုရိမဇာတိဘဝေ တိဘဝေ သရိ၊ () (ယမကဗန္ဓနံ)

၁၆။

သုမတိပါဒက ဈာန သမုဋ္ဌိတော

ပုရိမခန္ဓသမူဟမနုက္ကမံ၊

အသရိသော’ပနိသိန္နဇယာသန-

ပ္ပဘုတိ ယာဝသုမေဓဘဝါဝဓိံ၊ ()

၁၇။ ¶

ဣဓဘဝေ သမနန္တရဇာတိယံ

တဒိယခန္ဓပဗန္ဓမနုဿရိ၊

တိစတုပဉ္စဆသတ္တ နဝ’ဋ္ဌပိ

ဒသပိ ဝိသတိတိံသတိ ဇာတိယော၊ ()

၁၈။

လဟုမနုဿရိတာဠိသ ဇာတိယော

ပဘဝ ခန္ဓဝသေန တဟိံတဟိံ၊

ဘဝသတံဘဝုပဍ္ဎသတံဘဝ-

ဒသသတံဘဝလက္ခမထာပရံ ()

၁၉။

အပရိမာဏ ယုဂန္တဂဇာတိယော

အပရိမာဏ ဝိဝဋ္ဋဂဇာတိယော၊

အပရိမာဏ ယုဂန္တ ဝိဝဋ္ဋဂါ

အပရိမာဏ ဂုဏော သရိဇာတိယော၊ ()

၂၀။ ¶

စတုသုယောနိသုသတ္တမနဋ္ဌိတိ-

တိဘဝပဉ္စဂတီသုပရိဗ္ဘမိံ၊

ကသိရဘာရဝဟော အဟမဉ္ဇသေ

သကဋဘာရဝဟော ဂဝဇောယထာ၊ ()

၂၁။

ဣတိသမည ဓရော’သိမမုတြ’ဟံ

ဣတိ နိဟီနပသတ္ထ ကုလော ဘဝိံ၊

ဣတိ ဘဝိံ အဘီရူပဝိရူပိမာ

ဣတိပိ ဘတ္တ ဖခလာဖလ မာဟရိံ၊ ()

၂၂။ ¶

အနုဘဝိံကုသလာကုသလာရဟံ

ဝိဝိဓဒုက္ခမဒုက္ခ မဒုက္ခ ခံ၊

ဒသသတာယု သတာယုမိတောဘဝိံ

ဣတိဘဝံတိဘဝံသမနုဿရိ၊ () (ယမကဗန္ဓနံ)

၂၃။

ဣတိဟ ယာဝသုမေဓ ဘဝံ သုဓီ

သုမရိယာ’တိဂတာ’မိတဇာတိယော၊

အသရိ သောပဋိလောမဝသာ တတော-

ပ္ပဘုတိ ယာဝ ဣတော တတိယံ ဘဝံ၊ ()

၂၄။

ပုနရမုတြ တတောဘဝတော စုတော

သမုပပဇ္ဇိ မနန္တရဇာတိယံ၊

တဟိမဟံတုသိတေ တိဒသာလယေ

ဘဝိမတိဇ္ဇုတိ သန္တုသိတာဘိဓော၊ ()

၂၅။ ¶

တုသိတဒေဝနိကာယသမတွယော

ပရမရူပ ဝိလာသဓရော’ဘဝိံ၊

သုမဓုရာမတမာဟရိ မိဒိသံ

အနုဘဝိံသုခမိန္ဒြိယ ဂေါစရံ၊ ()

၂၆။

သမုပဇီဝိမမာနုသဟာယန-

စတုသဟဿ မဟံတုသိတာလယေ၊

မရုဂဏမ္ဗုရုဟာသနယာစနံ

ဣဟ ပဋိစ္စ တတော ဘဝတော စုတော၊ ()

၂၇။

ဇနနိရာဇိနိယာ မဏိစေတိယေ

သုဂတဓာတုမိဝါ’သမကုစ္ဆိယံ၊

ရဝိကုလေ ပဋိသန္ဓိမဟံ ပိတြ-

နရပတိံ အဓိကိစ္စ သမပ္ပယိံ၊ ()

၂၈။

ဣတိဟ ရူပမရူပမနာဒိကံ

ဝိပရိဝတ္တတိ ဝတ္တတိ နာပရံ၊

ဝိသတိယာ သတိ ယာဝ ဓိယာ’သနံ

ဝိဟတမောဟတမော’သိ ဘဝေ သုဓီ၊ () (ယမကဗန္ဓနံ၊)

၂၉။ ¶

စုတုပပတ္တိပဗန္ဓဝသေနဟိ

အဝသဝကတ္တနဓာတုပရမ္ပရာ၊

ဇလိတဒီပသိခေ’ဝ ပဝတ္တတိ

နယိဓပုဂ္ဂလဝေဒကကာရကော၊ ()

၃၀။

ပုရိမခန္ဓပဗန္ဓမနေကဓာ

ဣတိဝဝတ္ထယတော ဟိ ကုဒိဋ္ဌိယော၊

အပဂတာ’တ္တနိ ဝီသတိဝတ္ထုကာ

တမိဟဒိဋ္ဌိဝိသုဒ္ဓိ’တိ ဝုစ္စတိ၊ ()

၃၁။ ¶

သတိမတော ရဝိမဏ္ဍလသန္တိဘာ

သကဋမဂ္ဂနိဘာ’ယမနုဿတိ၊

ပုရိမဇာတိသု နာဘိဝိရဇ္ဈတိ

သရဝယေ သရဘင်္ဂသရော ယထာ၊ ()

၃၂။

အစုတိယာစုတိယာမတိ မာသနေ

သုတဝတီ’တဝတီ’ဟတိ ဗုဇ္ဈိတုံ၊

သမုဒိတေ’မုဒိတေ ကုမုဒါနိ’မ

နကမလာ ကမလာနိ အလင်္ကရိ၊ () (ယမကဗန္ဓနံ၊)

၃၃။

ရုစိရစန္ဒမရိစိဝိလေပိနီ

ကုမုဒသဏ္ဍဝိကာသဝိဟာသိနီ၊

ရဇနိမဇ္ဈိမယာမဝိလာသိနီ

တဒဓိသီလဓနံ ဝိဇာဘာသိ ကိံ ()

၃၄။ ¶

ဃနသုနီလဝိသာလတပေါဝနံ

အနလဘာသုရကီဋကုလာကုလံ၊

ရဇနိရာဇိနိယာ ကုသုမာကုလာ-

ဝိရဠကေသကလာပသိရိံ ဘဇီ၊ ()

၃၅။

တဒုပဟာရရတာယိ’ဝ ကောမုဒီ-

ဘုဇလတာယ ဝိဘာဝရိဘီရုယာ၊

ဂဟိတလာဇကဘာဇနဝိဗ္ဘမံ

ဖုဋိတကေရဝကာနန မာဟရိ၊ ()

၃၆။

တိဘုဝနေကရဝိံ ရဝိဘတ္တရိ

အပရဒီပဂတေ သရသီဝဓူ၊

ရဇနိယာ ဝိဟိတာဝသရာ’ပိ ကိံ

ပရိစရိံသု ပတိဗ္ဗတမဗ္ဘုတံ၊ ()

၃၇။

ပရိလသိံသု ဘုသံ ဘုဝနေ’ဝု ဘော

ရဝိပထေ ဝိတတာ၊ ဝိတတာရကာ၊

အနိမိသေ ဟိ မဟာယ မဟိမတော

ဇလိတဒီပသိခါစ မဟီတလေ၊ ()

၃၈။ ¶

မကရတေနကေတနသန္တိဘာ

တုဟိနဒီဓိတိဒီဓိတိ မဇ္ဈိမေ၊

နိသိ ဒဒါရ သဒါရသရာဂိနံ

ဟဒယကေရဝကေရဝကာနနံ၊ () (ယမကဗန္ဓနံ)

၃၉။

အထ ဘဝါဘဝဒိဋ္ဌိဝိဘေဒ နံ

ဝိမတိ မောဟ တမောပုဋပါဋ နံ၊

စုတုပပါတပဘုတိ ဝိဇာန နံ

ကထမလတ္ထ သဒိဗ္ဗဝိလောစ နံ၊ ()

၄၀။

ကုသလကမ္မပဘာဝသမုဗ္ဘဝံ

သုခုမဒုရဂတာနိ’ပိ ဂေါစရံ၊

အနိမိသာန ပသာဒဝိလောစနံ

ရုဓိရသေမ္ဘမကလာပဂတံက ယထာ၊ ()

၄၁။ ¶

တထရိဝ’က္ခိသမေန သုဓာသိနံ

ဝိမတိဒိဋ္ဌိမိသောဓနဟေတုနာ၊

ဟတမနောပကိလေသမလေန သော

ဝိဂတမာနုသကေနဟိ စက္ခုနာ၊ ()

၄၂။

ကရတလမ္ဗုရုဟောပရိစက္ခုမာ

ယထာရိဝါ’မလကီဗဒရီဖလံ၊

စုတုပပတ္တိဂတေပိ တထာဂတေ

တိဘုဝနမှိ ယထိစ္ဆိတ မဒ္ဒသ၊ ()

၄၃။

နဝုပပါတခဏေစ စုတိက္ခဏေ

ဝိသယဘာဝမုပေန္တိ တထာဂတာ၊

တဒုပစာရဝသေနိ’ဟဒဿနံ

ခမတိ အဋ္ဌကထာစရိယာသဘော၊ ()

၄၄။ ¶

ဥပဓိဟီန’ဓိဟနီနတထာဂတေ

အနပနီတပဏီတ တထာဂတေ၊

အနဘိရူပ’ဘိရူပတထာဂတေ

သုဂတိ ဒုဂ္ဂတိ ဒုဂ္ဂ မုပါဂတေ၊ () (ယမကဗန္ဓနံ၊)

၄၅။

တိရိယမုဒ္ဓမဓောပတိတီယ သော

မတိပဟံ အဘိပဿိ ယထာရဟံ၊

နိစိတကမ္မပထေစ တထာဂတေ

ဥပရိ ပါဒကဈာနသမုဋ္ဌိတော၊ ()

၄၆။

အကုသလာနိ ကရိံသု ဣမေ တိဓာ

သုစရိတာနိ ကရိံသု တိဓာ ဣမေ၊

အရိယမဂ္ဂဖလေဟိက သမင်္ဂိနော

နသမဏာ’တိပိ အန္တိမဝတ္ထုနာ၊ ()

၄၇။

ဂုဏနိရာကရဏေန အသာဓဝေါ

ဥပဝဒိံသု နသန္တိ ဂုဏာ’တိ’မေ၊

အပိစသပ္ပုရိသာ’ရိယပုဂ္ဂလေ

တဒနုရူပဂုဏေဟိ ပသံသယုံ၊ ()

၄၈။

ဝိတထလဒ္ဓိပရာမသနာ ဣမေ

ပရမလဒ္ဓိပရာမသနာ ဣမေ၊

ဂဟိတလဒ္ဓိဝသေန တဟိံတဟိံ

နိစိတကမ္မပထာ ဇနတာ အယံ၊ ()

၄၉။

စတုရပါယမပါယမပါယတိံ

ဥပဂတာ သုဂတိ သုဂတိံဣတိ၊

ယတိ သမာဟိတဝါဟိတဝါ’ ဒ္ဒသ

အနိမိသက္ခိသမက္ခိသမနွိတော၊ () (ယမကဗန္ဓနံ)

၅၀။ ¶

သမ္မာသမ္မသတောသတော သတိမတော ကမ္မာဒိဟေတုဗ္ဘဝံ

ရူပါရူပမနာဂတင်္နိ မဟာ မောဟန္ဓကာရော ဓိယာ၊

အဗ္ဘတ္ထင်္ဂမိ ယာယ သောဠသဝိဓာ ကင်္ခါစတေကာလိကာ

သာကင်္ခါတရဏဗ္ဗိသုဒ္ဓု ဒုတိယေယာမေ ပဝတ္တာ မတိ၊ ()

ဣတိ မေဓာနန္ဒာဘိဓာနေနယတိနာ ဝိရစိတေ သကလကဝိဇန ဟဒယာနန္ဒဒါနနိဒါနေ ဇိနဝံသဒီပေ အဝိဒုရေ နိဒါနေ ပုဗ္ဗေနိဝါသဉာဏဒိဗ္ဗစက္ခုဉာဏာဓိဂမ ပဝတ္တိပရိဒီပေါ တေရသမော သဂ္ဂေါ။

၁။ ¶

သုဓာကရေ ဝိကသိတကေရဝါကရေ

ကမေနု’ ပါသတိ သတိ ပစ္ဆိမံ ဒိသံ၊

ဝိဟာဝရီ သသိရုစိရာနနံ ဇိနံ

ဘဇန္တိ ပစ္ဆိမမထယာမ မောတရိ၊ ()

၂။

ခဏံ နိသာပတိ ဝိရဟာတုရေဝ’ယံ

နိသာဝဓူ မလိနပယောဓရမ္ဗရာ၊

စတုဒ္ဒိသာယတနယနေဟိ သမ္ပတိ

မုမောစ သီကရနိကရဿုဗိန္ဒဝေါ၊ ()

၃။

ကိလေသနာသနပသုတော သမာဓိနာ

ပုထုဇ္ဇနော တဒနုသယံ ယထုဗ္ဗဟေ၊

တထံ’သုနာ ဘုဝနကလင်္ကသောဓနော

နဟေ ကလာနိဓိ သကလင်္က မုဗ္ဗဟီ၊ ()

၄။ ¶

ပုရတ္ထိမေ နဘသိ ဝိကိဏ္ဏ တာရကာ-

ပဗန္ဓနိဗ္ဘရတိမိရံ ဝိယာကရီ

နိသာဝဓု ဝလယိတဟာရဘာသုရ-

သုနီလကောမလနဝကုန္တလဿိရိံ၊ ()

၅။

ဝိပဿနာဗလဝိမလီကတန္တရော

ဇိနင်္ကုရော ဒုရိတမလံဝ စန္ဒိမာ၊

မရိစိသဉ္စယဓဝလီကတမ္ဗရော

တမောစယံ တမနုစရံ နိရာကရီ၊ ()

၆။

ပဝါယိ သီတလမလယာနိလော ဘုသံ

ဒိသင်္ဂနာ သိသိရတုသာရဗိန္ဒဝေါ၊

မုမောစ သာ ဝိစရိ နိသာ နိသာကရ-

မရီစိမဉ္ဇရိပရိစုမ္ဗိတေ ဘုဝိ၊ ()

၇။ ¶

နိရင်္ဂဏေ နိရုပကိလေသ နိစ္စလေ

မုဒုမှိ ကမ္မနိယဝိသုဒ္ဓိဘာဝဂေ၊

သမာဟိတေ မနသိ ဝိပဿနာမနံ

အထာသဝက္ခယမတိယာ’ ဘီနီဟရိ၊ ()

၈။

သဗာရသင်္ဂိကဘဝစက္က မဇ္ဈဂါ

အနုက္ကမေန’ပိ ပဋိလောမတော သုဓီ

ဝဝတ္ထယံ ယမရိယဉာဏဒဿနံ

ဝိသုဒ္ဓိယာ ဝိသဒ္ဓိယာ တဒုစ္စတေ၊ ()

၉။

ခဏေန ယော သရတိ သဟဿလောစနော

ယထာဝတော ဒသသတမတ္ထ မဿပိ၊

ဝိဓာတုနော နိဇစရဏင်္ဂုလိပ္ပဘာ-

ဝိဘုသိတာ’ခိလဘုဝနောဒရဿ’ပိ၊ ()

၁၀။ ¶

အသေသနီဝရဏတုသာရသောသိနော

သမာဓိသမ္ဘဝ’ ခိလဈာနလာဘိနော၊

ဇဂတ္တယံ ကရဗဒရံ’ဝ ဒဿိနော

နယဿ ကဿစိ ဝိသယတ္တ မာဂတံ၊ ()

၁၁။

အဒိဋ္ဌ မပ္ပဋိ ဝိဒိတံ သယံပုရာ

အနုတ္တရံတမရိယဉာဏဒဿနံ၊

ဣမဿ ဂေါတမသမဏဿ သိဇ္ဈတေ

ဂရူပသေဝနဝိရဟဿ အဗ္ဘူတံ၊ ()

၁၂။

ဘဝေဘဝေ ပရိဝိတဒါနပါရမိ-

ဗလေန’ဟူ ဝိဇဋိတလောဘဗန္ဓနော၊

သမေတ္တိခန္တျနုဂတသီလပါရမီ-

ဇလေန နိဗ္ဗုတပဋိဃာဒိပါဝကော၊ ()

၁၃။ ¶

ဘဝေဘဝေ ဘဝိ ထိရဉာဏပါရမီ-

ပဓံသိတာ’ခိလဝိပရီတဒဿနော၊

ဝိနာယကပ္ပဘုတိ ဂရူပသေဝန-

ဝသေန ပုစ္ဆိယ ဟတမောဟသံသယော၊ ()

၁၄။

ဘဝေဘဝေ ဗုဓဇနပုဇနာဒိနာ

ဂရူဘိဝါဒနဗဟုမာနနာဒိနာ၊

ဇနာပစာယနဝိဓိနာ ဝိနောဒယိ

သဒပ္ပ မုန္နတိ မဘိမာန မုဒ္ဓဋံ၊ ()

၁၅။

ဘဝေဘဝေ ဝိဘဝရတိံ ရတိံဘဝေ

အနင်္ဂသင်္ဂမရတိ မင်္ဂနာရတိံ၊

ဃရာ’ဘိနိက္ခမိယ’နဂါရိယံရတော

အပါနုဒီ ပဋိလဘိ ဈာန မတ္တနာ၊ ()

၁၆။ ¶

ဘဝေဘဝေ သ’ဝီရိယ သစ္စပါရမီ-

ပရာယဏော အဓိကုသလေသု စာရတိံ၊

ဇဟံ ဝစီဒုရိတမလံ စတုဗ္ဗိဓံ

ဝိသောဓယီ နိဇဟဒယဉ္စ ပဂ္ဂဟီ၊ ()

၁၇။

ဘဝေ ဘဝေ ဣတိ သမတိံသပါရမီ-

ဝိသုဇ္ဈိတာ’ ကုသလမနောမလိမသော၊

ကမေန ဣန္ဒြိယ ပရိပါကတံ ဂတော

နစညသမ္ပဒ မဟိပတ္ထယီ သုဓီ၊ ()

၁၈။

ဘဝေ ဘဝေ အဂဏိတမေဝ ဗောဓိယာ

ဒယာယ စောဒိတဟဒယော’ဟိ ကပတ္ထနံ၊

အကာ စတုဗ္ဗိဓဖလသမ္ပဒါ တတော

ပဒိဿရေ နိရဝသရာ ရိဝ’န္တနိ၊ ()

၁၉။ ¶

ဘဝေ ဘဝေ သကပဏိဓာနသတ္တိယာ

တိဓာ’ဟိသင်္ခတကုသလံ ဣမဿ ဘော၊

နသာဓယေ ကိမရိယဉာဏဒဿနံ

အနညပုဂ္ဂလဝိသယံ နသံသယော၊ ()

၂၀။

အနိစ္စတော’ဒယဝယတာယ ဒုက္ခတော

သဒုက္ခတာယပိ အဝိဓေယတာဒိနာ၊

အနတ္တတော ဝရမတိ ခန္ဓပဉ္စကံ

ပုနပ္ပုနံ သမုပပရိက္ခ မုဿဟီ၊ ()

၂၁။

ကလာပသမ္မသနမုခေန ဗာရသ-

ဝိဓေ အနာဒိကဘဝစက္ကနိဿိတေ၊

ကမေန သတ္တသု အနုပဿနာသု သော

ဇိနင်္ကုရော တဒဝယဝေ’ဘိနီဟရိ၊ ()

၂၂။ ¶

အနိစ္စတောဘုသမနုပဿမုဒ္ဓရိ

အသေသသင်္ခတဂတနိစ္စသညိတံ၊

အနတ္တတော သမနုဝိပဿ ဒုက္ခတော

သသင်္ခတေပဇဟိ သုခတ္တသညိတံ၊ ()

၂၃။

ဝိနောဒယီ သုမတိ ဝိရာဂနိဗ္ဗိဒါ-

ဝသေန သင်္ခတဂတရာဂနန္ဒိယော၊

နိရောဓနိဿဇနဝသာ’နုပဿိယ

တထောဒယာဒိယနမသေသင်္ဃတေ၊ ()

၂၄။

ဝိဓာယဒုဗ္ဗိဓမနုပဿတော ကသတော

အသေသသင်္ခတမပိ နာမရူပတော၊

နိဒါနတော ပုနခဏတော’ဒယဗ္ဗယံ

ဥပဋ္ဌဟိ ဒွိဂုဏိတပဉ္စဝိသဓာ၊ ()

၂၅။ ¶

သုဓီမတော တရုဏဝိပဿနာယိ’မေ

ဝိပဿကဿိ’တိ ဒသုပက္ကိလေသကာ၊

ဘဝုံပဘာသတိမတိပီတိနိစ္ဆယော

သုခီ’ဟနာသမထနိကန္တျုပေက္ခနာ၊ ()

၂၆။ ¶

ပသန္နလောဟိတ ပရိပုဏ္ဏဝိဂ္ဂဟာ

ဝိနိဂ္ဂတာ နိရဝဓိလောကဓာတုသု၊

ဝိပဿနာဗလပဘဝါ’ဘိပတ္ထရိ

သုဓန္တကဉ္စနရသပိဉ္ဇရပ္ပဘာ၊ ()

၂၇။

အယံပထော နဘဝတိ တပ္ပဘာဒယော

ဝိသတ္တိကာပဘုတိကိလေသဝတ္ထုကာ၊

ပုနောဒယဗ္ဗယ မနုပဿတော တတော

ပထော သမုဗ္ဘဝိ ဒသုပက္ကိလေသဂံ၊ ()

၂၈။

ပထာပထံ သမုပပရိက္ခတောဣတိ

သုဓီမတော တရုဏဝိပဿကဿယာ၊

သမုဋ္ဌိတာ နိသိတဝိပဿနာမတိ

ပထာပထိက္ခဏကဝိသုဒ္ဓိ ဝုစ္စတေ၊ ()

၂၉။ ¶

နရာသဘော အဓိဂတဉာတတီရဏ-

ပရိညဝါ ဥပရိပဟာဏသင်္ခယာ၊

ပရိညယာ ဥဘယ ဝိသုဒ္ဓိသိဒ္ဓိယာ

တိသစ္စဒဿနပသုတော သမာရဘီ၊ ()

၃၀။

အနိစ္စလက္ခဏမပကိ ဒုက္ခလက္ခဏံ

အနတ္တလက္ခဏမထ သဗ္ဗသင်္ခတေ၊

ယထာဝတော နသမနုပဿိ သန္တတိ-

ရိယာပထေဟိစ ပိဟိတံဃဏေနသော၊ ()

၃၁။

ဝိသောဓယံ မတိမုဒယဗ္ဗယေ တတော

လဟုံ တိလက္ခဏဝိသဒတ္တဂေါ ဘုသံ၊

ဝိပဿနာပထပဋိပန္န မတ္တနာ

အလတ္ထဘင်္ဂဓိဘယဉာဏမာဒိကံ၊ ()

၃၂။ ¶

သယမ္ဘုနော ဥပရိနဝါနုပဿနာ-

ဝိဘာဝနာ နဝဂုဏဝဏ္ဏနာယိဓ၊

ဝိဓီယတေ နဝဝိဓဉ္ဏဘာဝနာ

ပဝုစ္စတေ သပကဋိပဒါဝိသုဒ္ဓိတိ၊ ()

၃၃။

မတီဟိတိဟိပိ စတုသစ္စဆာဒက-

တမောဝိဓံသန သမနန္တရံ ထိရံ၊

နိရောဓဂေါစရမလဘိတ္ထ ဂေါတြဘု-

မတိံ သုဓီ အနရိယဂေါတ္တဗာဟိရံ၊ ()

၃၄။ ¶

ပသတ္ထဂေါတြဘုမတိဒိန္နသညကံ

သမူလမုဒ္ဓဋကလုသတ္တယံ သုဓီ၊

ဝိဗန္ဓဒုဂ္ဂတိဝိနိပါတနာဒိကံ

အထာဒိမံပဋိလဘီ ဉာဏဒဿနံ၊ ()

၃၅။

ယဒေဝနန္တရဖလဒန္တိ ပဏ္ဍိတာ

ဝဒန္တိတပ္ဖလမပိ ပစ္စဝေက္ခဏံ၊

အလတ္ထ သော ပုန ဒုတိယာယ ဘုမိယာ

ဝိပဿနံ သမဓိဂမာယ ဘာဝယီ၊ ()

၃၆။

ဘုသောဝိသောသိတ ဘဝဒုက္ခကဒ္ဒမံ

အကာလိကံ တနုကတကိဗ္ဗိသတ္တယံ၊

အနုတ္တရံ ဒုတိယမလတ္ထ တပ္ဖလံ

သပစ္စဝေက္ခဏမထ ဉာဏဒဿနံ၊ ()

၃၇။ ¶

ဝိပဿနံပုနရပိဘာဝယံ သယံ

သမုဒ္ဓဋာလယပဋိဃံ ဘဝါပဟံ၊

သပစ္စဝေက္ခဏဖလဉာဏမဇ္ဈဂါ

အနုတ္တရံ တတိယက ဉာဏဒဿနံ၊ ()

၃၈။

တိလက္ခဏံ ထိရမတိမာ’ဘိပတ္တိယာ

သုဘာဝယိက ဥပရိ စတုတ္ထဘုမိယာ၊

အဝါရိယာသနိရိဝ တာလမတ္ထကေ

ကိလေသမုဒ္ဓနိရနိဟစ္စစာရိနံ၊ ()

၃၉။

နိဝါရိတာခိလ ဘဝစက္ကဝိဗ္ဘမံ

သဝါသနာပရိမိတ ပကာပနာသနံ၊

အနညဂေါစရ ဝရဉာဏဒဿနံ

အလတ္ထ တပ္ဖလမပိပစ္စဝေက္ခဏံ၊ ()

၄၀။ ¶

တဒါသဝက္ခယမတိဂ္ဉာဏဒဿန-

ဝိသုဒ္ဓိဝုစ္စတိ အရဟတ္တပတ္တိယာ၊

သဟေဝစုဒ္ဒသဝိဓ ဗုဒ္ဓဗုဒ္ဓိယော

ဇိနော စတုဗ္ဗိဓ ပဋိသမ္ဘိဒါလဘီ၊ ()

၄၁။

အသာဓာရဏံ ဉာဏဆက္ကံဗလာနိ

ဒသ’ဋ္ဌာရသာဝေဏိကာ ဗုဒ္ဓဓမ္မာ၊

စတုဒ္ဓါဝိသာရဇ္ဇမိဒ္ဓါနုဘာဝါ

သမိဒ္ဓါသဟေစာရဟတ္တေန တဿ၊ ()

၄၂။

အဘိညေယျဓမ္မေ အဘိညာယ သာမံ

ပရိညေယျ ဓမ္မေ ပရိညာယ သာမံ၊

ပဟာတဗ္ဗ ဓမ္မေ ပဟန္တွာန သာမံ

သနိဗ္ဗာနမဂ္ဂပ္ဖလံ သစ္ဆိကတွာ၊ ()

၄၃။ ¶

သိယာယာဝတာဉေယျ ဓမ္မပ္ပဝတ္တိ

သိယာတာဝတာ တဿ ဉာဏပ္ပဝတ္တိ၊

အဘိညာယ သဗ္ဗညုတာဉာဏ မာသိ

သဟေဝါရဟတ္တေန သဗ္ဗညု ဗုဒ္ဓါ၊ ()

၄၄။

မဟာမောဟနိဒ္ဒါပဂေါမဂ္ဂဉာဏ-

ပ္ပဗုဒ္ဓါ’ဟိသမ္ဗောဓိယာ သောဘမာနော၊

မုနိန္ဒော ဒိနိန္ဒံ’ သုသန္ဒောဟဟာသိ-

’န္ဒိရာမန္ဒိရိန္ဒိဝရာဘံအဟာသိ၊ ()

၄၅။

သုဗုဒ္ဓါဘိသမ္ဗောဓိပုဗ္ဗာစလမ္ဘာ

သဟေဝါရုဏော ဗုဒ္ဓသူရောဒယေန၊

သမုဋ္ဌာသိ ဝေနေယျ ဗန္ဓူဟိသဒ္ဓိံ

ပဗုဇ္ဈိံသု အဗ္ဘုဂ္ဂတမှောဇကောသာ၊ ()

၄၆။ ¶

ဥဠာရာဝဘာသော တဒါ ဇာတိခေတ္တေ

ဘုသံပါတုဘုတော မဟီသမ္ပဝေဓိ၊

သိဠာသာဠသေဠာဝတံသာ သုဘာနိ

နိမတ္တာနိ ဗတ္တိံသဇာတာတိလောကေ၊ ()

၄၇။

တမောဇာလဝိဒ္ဓံသနာဒီနိ လောကေ

ကရောန္တောဝ စတ္တာရိကိစ္စာနိ’မာနိ၊

သမုဋ္ဌာသိ တသ္မိံခဏေ ရံသိမာလိ

ရိဝါဒိစ္စဝံသုဗ္ဘဝေါ ဗုဒ္ဓသူရော၊ ()

၄၈။

မဟီလာဇဝုဋ္ဌီဟိ သဉ္ဆန္နဘုတာ

နဘံ ကနိဗ္ဘရံ ဂန္ဓဓုပဒ္ဓဇေဟိ၊

ဆဏှောကုလာ ကေဝလံ လောကဓာတု

မဟာမင်္ဂလာဝါသ ကလီလာဝလမ္ဗိံ ()

၄၉။ ¶

တဒါတပ္ပဒမ္ဘောဇ ပူဇာဂတာနံ

သိရော ဘတ္တိဘာရဉ္ဇလီနံ သုရာနံ၊

နိရာလမ္ဗမာကာသ ရန္ဓံ ဗဘာသ

ပဘာသာရ စူဠာမဏိဟကာ’ကရာဠံ၊ ()

၅၀။

ဂုဏောနာမ သက္ခန္ဓသန္တာန သုဒ္ဓိ

သကောသုဒ္ဓခနွ္ဓပ္ပဗန္ဓောဟိ ဗုဒ္ဓါ၊

နမောဗုဒ္ဓဘုတဿ နိပ္ဖန္တဉာဏ-

ပ္ပဟာဏာနုဘာဝါဟိရူပဿတဿ၊ ()

ဣတိ မေဓာနန္ဒာဘိဓာနေနယတိနာ ဝိရစိတေ သကလကဝိဇန ဟဒယာနန္ဒဒါနနိဒါနေ ဇိနဝံသဒီပေ အဝိဒုရေ နိဒါနေ မဟာ ဗောဓိသတ္တဿ အရိယမဂ္ဂဉာဏာဘိသမ္ဗောဓိ သမဓိဂမ ပဝတ္တိပရိဒီပေါ စုဒ္ဒသမော သဂ္ဂေါ။

ဇိနဝံသဒီပေ အဝိဒုရေ နိဒါနဘာဂေါ ဒုတိယော။

၁။ ¶

အဿေဝ ပကလ္လင်္ကဝရဿကာရဏာ

သီသက္ခိမံသာနိ စ ဒါရသုနဝေါ၊

ဒတွာ စိရဿံ အကရိန္တိ ဒုက္ကရံ

သော (ဣန္ဒဝံသာ’)ဘိဓဇော ဝိစိန္တယီ၊ ()

၂။

ပလ္လင်္ကတော တာဝ နဝုဋ္ဌဟံ တဟိံ

ပလ္လင်္ကမာဓာယ နိသဇ္ဇ သတ္တဟံ၊

သင်္ကပ္ပပုဏ္ဏော’ဓိသမာဓယော မုနိ

သမ္မာ သမာပဇ္ဇိ အနေကကောဋိယော၊ ()

၃။

နာ’ယံ ဇဟာတေ ဝိဇယာသနာ’လယံ

ယံကိဉ္စိကိစ္စံ ကရဏိယမဿဟိ၊

သံဝိဇ္ဇတေ ဒါနိပိ ကာစိ ဒေဝတာ

သင်္ကာဘိဃာ’တာဘိဝိတက္ကယုံ ဣတိ၊ ()

၄။ ¶

တာသံ ဝိဒိတွာန ဝိတက္ကမာသနာ

အဗ္ဘုဋ္ဌိတော သော ဂဂနင်္ဂဏံ ခဏံ၊

သံဒဿယန္တော ယမပါဋိဟာရိယံ

နိဿံသယော သံသယသလ္လမုဒ္ဓရီ၊ ()

၅။

နိဿာယ ပလ္လင်္ကမိမံ မဟီရုဟံ

သမ္ပတ္တသမ္ဗောဓိပဒေါ’သ္မိ စိန္တိယ၊

ဩရုယှ ပကလ္လင်္ကဌိတပ္ပဒေသတော

ပုဗ္ဗုတ္တရာနဉှိ ဒိသာန မန္တရာ၊ ()

၆။

သတ္တာဟ မိန္ဒိဝရစာရုလောစန-

ပဉ္စပ္ပဘာသာရနိသေစနေန သော၊

သမပူဇယန္တော ဇယဗောဓိမာသနံ

အဋ္ဌာသိ လောကေကဝိလောစနော ဇိနော၊ ()

၇။ ¶

ဂန္တွာ ဌီတဋ္ဌာနဇယာသနန္တရာ

ပုဗ္ဗာပရဿံ ဒိသိ သတ္တဝါသရံ၊

နိက္ခိတ္တစက္ကင်္ကိတပါဒပင်္ကဇော

သော စင်္ကမီ နိမ္မိတရတနစင်္ကမေ၊ ()

၈။

သော ဗောဓိတော ဥတ္တရပစ္ဆိမန္တရာ

ဒေဝေဟိ နာနာရတနေဟိ နိမ္မိတေ၊

သတ္တာဟမတ္တံ မဏိမန္ဒိရေ မုနိ

သမ္မာဘိဓမ္မံ ပဝိဟာသိ သမ္မသံ၊ ()

၉။

မန္ထာစလေ’နမ္ဗုနိဓိံ’ဝ ကေသဝေါ

ဝိညာဏကဏ္ဍာဒိဋသာ စတုဗ္ဗိဓံ၊

တသ္မိံ နိသိန္နော မုနိ ဓမ္မသင်္ဂဏိ-

မာလောလယီ ဉာဏဗလေန ဒုဒ္ဒသံ၊ ()

၁၀။ ¶

ဝေဘင်္ဂိယံ ခန္ဓဝိဘင်္ဂမာဒိကံ

ဂမ္ဘီရမဋ္ဌာရသဓာ သုဒုဗ္ဗုဓံ၊

သော မာရဘင်္ဂေါ’ထ ဝိဘင်္ဂသာဂရံ

သံခေါဘယီ ဉာဏယုဂန္တဝါယုနာ၊ ()

၁၁။

သော ဓာတုသုညတ္တပဇာနနော ဇိနော

နိဿတ္တနိဇ္ဇိဝသဘာဝဓာတုယော၊

ဝိတ္ထာရယန္တော တဒနန္တရံ ဝရံ

နာနာနယံ ဓာတုကထံ ဝဝတ္ထယီ၊ ()

၁၂။

ခန္ဓာဒိပညတ္တိဝသေန ဆဗ္ဗိဓာ

ပညတ္တိယော’တိ သုဝိဘတ္တမာတိကံ၊

ပညာယ သဗ္ဗညုဇိနော’ထ ပုဂ္ဂလ-

ပညတ္တိ မာလောလယိ အဂ္ဂပုဂ္ဂလော၊ ()

၁၃။ ¶

ဝါဒီဘသီဟော သကဝါဒမဏ္ဍလံ

ဩရုယှ သမ္မာ ပရဝါဒမဏ္ဍလံ၊

သုတ္တာနိ သင်္ဂယှ သဟဿမဋ္ဌဓာ

သံခိတ္တ မာဒေါ မုခဝါဒယုတ္တိကံ၊ ()

၁၄။

ဉာဏေန ဝိတ္ထာရိယမာန မတ္တနော

ကိဉ္စာပျ’နန္တာပရိယန္တ မုတ္တမံ၊

တက္ကီဟိ နက္ကာဝစရံ နကေဟိစိ

နာထော ကထာဝတ္ထု မထာ’ဘိသမ္မသိ၊ ()

၁၅။

ယံ မူလခန္ဓာဒိဝသာ ဒသဗ္ဗိဓံ

ဥဒ္ဒေသနိဒ္ဒေသပဒါ’နုရူပတော၊

နိဋ္ဌာနတော သံသယတော ဝိဘာဂိယံ

ဂမ္ဘီရဉာဏေန’ထ သာဂရူပမံ၊ ()

၁၆။ ¶

သန္တံ ပဏိတံ နိပုဏံ သုဒုဒ္ဒသံ

ဂုဠှံ အတက္ကာဝစရံ အစိန္တိယံ၊

နာနာနယံ တံ ယမကံ သုသညမော

ဓမ္မဿရော သမ္မသိ နိပ္ပဒေသတော၊ ()

၁၇။

နာနာနယု’တ္တုင်္ဂတရင်္ဂနိဗ္ဘရံ

နေယျတ္ထနီတတ္ထမဏိဟိ မဏ္ဍိတံ၊

ဓမ္မန္တရာဝဋ္ဋသတံ အထာပရံ

သဒ္ဓမ္မခန္ဓောဒကခန္ဓပူရိတံ၊ ()

၁၈။

သတ္ထာ စတုဗ္ဗိသ တိမတ္တပစ္စယ-

ဝေလံ ပရိစ္ဆေဒဝိသာလပဋ္ဋနံ၊

ဂမ္ဘီရပဋ္ဌာန မဟဏ္ဏဝံ ကထံ

အာလောလယံ သမ္မသိ ဉာဏမေရုနာ၊ ()

၁၉။ ¶

နိဿင်္ဂဉာဏော မုနိ ဟေတုပစ္စယော

ဣစ္စာဒိနာ’ရောပိတမာတိကာရဟံ၊

နိဒ္ဒိဋ္ဌနိဒေဒသပဒံ ပပဉ္စိတ-

ဉေယျံ စတုဗ္ဗီသဝိဓံ သုဒုဗ္ဗုဓံ၊ ()

၂၀။

နိဿာယ ဗာဝီသဝိဓေ တိကေ တိက-

ပဋ္ဌာန မန္တောဂဓနာမရူပိကေ

နိဿာယ နိဿေသကေ တထာ ဒုက-

ပဋ္ဌာန မန္တောဂဓနာမရူပိကေ ()

၂၁။

ဗာဝိသမတ္တာ တိကမာတိကာ ဒုကေ

ပက္ခိပ္ပ ပဋ္ဌာနဝိဒံ ဒုကန္တိကံ၊

ဗာဝီသမတ္တာယ တိကေ သတံဒုကေ

ပက္ခိပ္ပ ပဋ္ဌာနမိဒံက တိကဒ္ဒုကံ၊ ()

၂၂။ ¶

ကတွာ တိကေသွေ’ဝ တိကေ ဒုဝီသတိ

ပဋ္ဌာန မန္တောဂတိကေ တိကတ္တိကံ၊

ကတွာ ဒုကေသွေ’ဝ တထာ သတံဒုကေ

ပဋ္ဌာန မန္တာဂေတိကေ ဒုကဒ္ဒုကံ၊ ()

၂၃။

ဣစ္စာနုလောမေ ဇနယာနိ ပက္ခိပံ

ဆ ပ္ပစ္စနီယေ’ပိ နယာနိ ပက္ခိပံ၊

ဧဝံ ခိပိတွာ အနုလောမပစ္စနိ-

ယေစာ’ပိ ဆ ပ္ပစ္စနိယာ’နုလောမကေ၊ ()

၂၄။

ဂမ္ဘီရပဋ္ဌာနမဟောဒဓိံ ဣတိ

သင်္ခေါဘယံ သမ္မသိ ဉာဏမေရုနာ၊

တံ သမ္မသန္တဿ သဝတ္ထုကံ ဆဝိ-

ဝဏ္ဏော ပသန္တော’သိ ပသီဒိ လောဟိတံ၊ ()

၂၅။ ¶

တသ္မိံခဏေ စတ္တဇဝဏ္ဏဓာတုယော

အဋ္ဌံသု ဌာနမှိ အသိတိဟတ္ထကေ၊

အညတြ’ဓိဋ္ဌာနဗလံ သရီရတော

ဆဗ္ဗဏ္ဏရံသီ ဝိသရာ’ဟိနိစ္ဆရုံ၊ ()

၂၆။

သေဝါလကာလိန္ဒိနဒိ’န္ဒိရာပတိ-

နိလမ္ဗရိ’န္ဒိဝရဝဏ္ဏသန္တိဘာ၊

ကေသ’က္ခိမဿူဟိက ဝိနိဂ္ဂတာ ဘုသံ

နီလပ္ပဘာ’သေသဒိသာ အလင်္ကရုံ၊ ()

၂၇။

တာသံ ဝသာ’ သေသဒိသာဝိလာသိနီ

အာသုံ ယထာ ပါရုတနီလကမ္ဗလာ၊

တာ စက္ကဝါဠာတိ ပပူရယန္တိယော

ဓာဝိံသု နိလောပလစုဏ္ဏသန္နိဘာ၊ ()

၂၈။ ¶

နိဿေသလောကံ ဟရိတာလကုင်္ကုမ-

စုဏ္ဏေဟိ သောဝဏ္ဏရသေဟိ မိဿကံ၊

အာလေပယန္တီဝိယ ပီတရံသိယော

ယာ နိဂ္ဂတာ ကဉ္စနသန္နိဘတ္တစာ၊ ()

၂၉။

တာသံ ဝသေနာ’သိ သိဏေရုပဗ္ဗတ-

ရာဇာ ဝိလိနော’ဝ မဟဏ္ဏဝေ ဇလံ၊

သံကပ္ပိတာ’ဝ’ဋ္ဌ ဒိသာဂဇာ’ဘဝုံ

နိဒ္ဓန္တစာမီကရကပ္ပနာဒိနာ၊ ()

၃၀။

လာခါရသာနံ ပရိသေစနံ ဝိယ

နိန္ဒူရစုဏ္ဏော’ကိရဏံ’ဝ ယာဒိသိ၊

သဉ္ဈာပဘာရတ္တသုရတ္တရံသိယော

နိက္ခမ္မ ဓာဝိံသု သမံသလောဟိတာ၊ ()

၃၁။

တာသံ ဝသေနာ’ခိလဘူမိကာမိနီ

အာသီ နိမုဂ္ဂါရိဝ ဥတ္တရဏ္ဏဝေ၊

အမ္ဘောဇရာဂေဟိ သုနိမ္မိတာနိ’ဝ

သဗ္ဗာနိ ဒဗ္ဗာနျ’ဘဝုံ ဇဂတ္တယေ၊()

၃၂။ ¶

ယာကုန္ဒသောဂန္ဓိကစန္ဒစန္ဒိကာ-

ကပ္ပူရခီရောဒဓိဝီစိပဏ္ဍရာ၊

အဋ္ဌီဟိ ဒါဌာဟီ ဝိတဿဋာ ဘုသံ

ဩဒါတရံသီ ဓဝလီကရုံ ဒိသာ၊ ()

၃၃။