📜

နမော တဿ ဘဂဝတော အရဟတော သမ္မာသမ္ဗုဒ္ဓဿ

ဝိနယပိဋကေ

စူဠဝဂ္ဂပါဠိ

၁။ ကမ္မက္ခန္ဓကံ

၁။ တဇ္ဇနီယကမ္မံ

၁။ တေန ¶ ¶ ¶ ¶ သမယေန ဗုဒ္ဓါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ပဏ္ဍုကလောဟိတကာ ဘိက္ခူ အတ္တနာ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သင်္ဃေ အဓိကရဏကာရကာ၊ ယေပိ စညေ ဘိက္ခူ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သင်္ဃေ အဓိကရဏကာရကာ တေ ဥပသင်္ကမိတွာ ဧဝံ ဝဒန္တိ – ‘‘မာ ခေါ တုမှေ၊ အာယသ္မန္တော၊ ဧသော အဇေသိ။ ဗလဝါဗလဝံ ပဋိမန္တေထ။ တုမှေ တေန ပဏ္ဍိတတရာ စ ဗျတ္တတရာ စ ဗဟုဿုတတရာ စ အလမတ္တတရာ စ [အလမတ္ထတရာ စ (သျာ။ က။)]။ မာ စဿ ဘာယိတ္ထ။ မယမ္ပိ တုမှာကံ ပက္ခာ ဘဝိဿာမာ’’တိ။ တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ ¶ ဥပ္ပန္နာနိ စ ဘဏ္ဍနာနိ ဘိယျောဘာဝါယ ဝေပုလ္လာယ သံဝတ္တန္တိ။ ယေ တေ ဘိက္ခူ အပ္ပိစ္ဆာ…ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ပဏ္ဍုကလောဟိတကာ ဘိက္ခူ အတ္တနာ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သင်္ဃေ အဓိကရဏကာရကာ၊ ယေပိ စညေ ဘိက္ခူ ဘဏ္ဍနကာရကာ ¶ ကလဟကာရကာ ဝိဝါဒကာရကာ ဘဿကာရကာ သင်္ဃေ အဓိကရဏကာရကာ တေ ဥပသင်္ကမိတွာ ဧဝံ ဝက္ခန္တိ – ‘မာ ခေါ တုမှေ၊ အာယသ္မန္တော၊ ဧသော အဇေသိ။ ဗလဝါဗလဝံ ¶ ပဋိမန္တေထ။ တုမှေ တေန ပဏ္ဍိတတရာ စ ဗျတ္တတရာ စ ဗဟုဿုတတရာ စ အလမတ္တတရာ စ။ မာ စဿ ဘာယိတ္ထ။ မယမ္ပိ တုမှာကံ ပက္ခာ ဘဝိဿာမာ’တိ။ တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ ဥပ္ပန္နာနိ စ ဘဏ္ဍနာနိ ဘိယျောဘာဝါယ ဝေပုလ္လာယ သံဝတ္တန္တီ’’တိ။

၂။ အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသင်္ဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ၊ ဘိက္ခဝေ၊ ပဏ္ဍုကလောဟိတကာ ဘိက္ခူ အတ္တနာ ¶ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သင်္ဃေ အဓိကရဏကာရကာ၊ ယေပိ စညေ ဘိက္ခူ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သင်္ဃေ အဓိကရဏကာရကာ တေ ဥပသင်္ကမိတွာ ဧဝံ ဝဒန္တိ – ‘မာ ခေါ တုမှေ၊ အာယသ္မန္တော၊ ဧသော အဇေသိ။ ဗလဝါဗလဝံ ပဋိမန္တေထ။ တုမှေ တေန ပဏ္ဍိတတရာ စ ဗျတ္တတရာ စ ဗဟုဿုတတရာ စ အလမတ္တတရာ စ။ မာ စဿ ဘာယိတ္ထ။ မယမ္ပိ တုမှာကံ ပက္ခာ ဘဝိဿာမာ’တိ။ တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ၊ ဥပ္ပန္နာနိ စ ဘဏ္ဍနာနိ ဘိယျောဘာဝါယ ဝေပုလ္လာယ သံဝတ္တန္တီ’’တိ? ‘‘သစ္စံ ဘဂဝါ’’တိ။ ဝိဂရဟိ ¶ ဗုဒ္ဓါ ဘဂဝါ – ‘‘အနနုစ္ဆဝိကံ၊ ဘိက္ခဝေ၊ တေသံ မောဃပုရိသာနံ အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ တေ၊ ဘိက္ခဝေ၊ မောဃပုရိသာ အတ္တနာ ဘဏ္ဍနကာရကာ…ပေ… သင်္ဃေ အဓိကရဏကာရကာ၊ ယေပိ စညေ ဘိက္ခူ ဘဏ္ဍနကာရကာ…ပေ… သင်္ဃေ အဓိကရဏကာရကာ တေ ဥပသင်္ကမိတွာ ဧဝံ ဝက္ခန္တိ – ‘မာ ခေါ တုမှေ၊ အာယသ္မန္တော၊ ဧသော အဇေသိ။ ဗလဝါဗလဝံ ပဋိမန္တေထ။ တုမှေ တေန ပဏ္ဍိတတရာ စ ဗျတ္တတရာ စ ဗဟုဿုတတရာ စ အလမတ္တတရာ စ။ မာ စဿ ဘာယိတ္ထ။ မယမ္ပိ တုမှာကံ ပက္ခာ ဘဝိဿာမာ’တိ? တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ၊ ဥပ္ပန္နာနိ စ ဘဏ္ဍနာနိ ဘိယျောဘာဝါယ ဝေပုလ္လာယ သံဝတ္တန္တိ။ နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ ပသန္နာနံ ဝါ ဘိယျောဘာဝါယ။ အထ ခွေတံ၊ ဘိက္ခဝေ၊ အပ္ပသန္နာနဉ္စေဝ အပ္ပသာဒါယ ပသန္နာနဉ္စ ဧကစ္စာနံ အညထတ္တာယာ’’တိ။

အထ ခေါ ဘဂဝါ တေ [ပဏ္ဍုကလောဟိတကေ (သျာ။)] ဘိက္ခူ အနေကပရိယာယေန ဝိဂရဟိတွာ ဒုဗ္ဘရတာယ ဒုပ္ပောသတာယ မဟိစ္ဆတာယ ¶ အသန္တုဋ္ဌိတာယ [အသန္တုဋ္ဌတာယ (သျာ။)၊ အသန္တုဋ္ဌိယာ (သီ။)] သင်္ဂဏိကာယ ကောသဇ္ဇဿ ¶ အဝဏ္ဏံ ဘာသိတွာ အနေကပရိယာယေန သုဘရတာယ သုပေါသတာယ အပ္ပိစ္ဆဿ သန္တုဋ္ဌဿ သလ္လေခဿ ဓုတဿ ပါသာဒိကဿ အပစယဿ ဝီရိယာရမ္ဘဿ [ဝိရိယာရမ္ဘဿ (သီ။)၊ ဝီရိယာရဗ္ဘဿ (က။)] ဝဏ္ဏံ ဘာသိတွာ ဘိက္ခူနံ တဒနုစ္ဆဝိကံ တဒနုလောမိကံ ¶ ဓမ္မိံ ကထံ ကတွာ ဘိက္ခူ အာမန္တေသိ – ‘‘တေန ဟိ၊ ဘိက္ခဝေ၊ သင်္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ ကရောတု။ ဧဝဉ္စ ပန၊ ဘိက္ခဝေ၊ ကာတဗ္ဗံ။ ပဌမံ ပဏ္ဍုကလောဟိတကာ ဘိက္ခူ စောဒေတဗ္ဗာ၊ စောဒေတွာ သာရေတဗ္ဗာ၊ သာရေတွာ အာပတ္တိံ [အာပတ္တိ (သီ။ သျာ။)] အာရောပေတဗ္ဗာ၊ အာပတ္တိံ အာရောပေတွာ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၃။ ‘‘သုဏာတု မေ၊ ဘန္တေ၊ သင်္ဃော။ ဣမေ ပဏ္ဍုကလောဟိတကာ ဘိက္ခူ အတ္တနာ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သင်္ဃေ အဓိကရဏကာရကာ၊ ယေပိ စညေ ဘိက္ခူ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သင်္ဃေ အဓိကရဏကာရကာ တေ ဥပသင်္ကမိတွာ ဧဝံ ဝဒန္တိ – ‘မာ ¶ ခေါ တုမှေ၊ အာယသ္မန္တော၊ ဧသော အဇေသိ။ ဗလဝါဗလဝံ ပဋိမန္တေထ။ တုမှေ တေန ပဏ္ဍိတတရာ စ ဗျတ္တတရာ စ ဗဟုဿုတတရာ စ အလမတ္တတရာ စ။ မာ စဿ ဘာယိတ္ထ။ မယမ္ပိ တုမှာကံ ပက္ခာ ဘဝိဿာမာ’တိ။ တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ၊ ဥပ္ပန္နာနိ စ ဘဏ္ဍနာနိ ဘိယျောဘာဝါယ ဝေပုလ္လာယ သံဝတ္တန္တိ။ ယဒိ သင်္ဃဿ ပတ္တကလ္လံ၊ သင်္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ ကရေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ ဣမေ ပဏ္ဍုကလောဟိတကာ ဘိက္ခူ အတ္တနာ ဘဏ္ဍနကာရကာ…ပေ… သင်္ဃေ အဓိကရဏကာရကာ၊ ယေပိ စညေ ဘိက္ခူ ဘဏ္ဍနကာရကာ…ပေ… သင်္ဃေ အဓိကရဏကာရကာ တေ ဥပသင်္ကမိတွာ ဧဝံ ဝဒန္တိ – ‘မာ ခေါ တုမှေ၊ အာယသ္မန္တော၊ ဧသော အဇေသိ။ ဗလဝါဗလဝံ ပဋိမန္တေထ။ တုမှေ တေန ပဏ္ဍိတတရာ စ ဗျတ္တတရာ စ ဗဟုဿုတတရာ စ အလမတ္တတရာ စ။ မာ စဿ ဘာယိတ္ထ။ မယမ္ပိ တုမှာကံ ပက္ခာ ဘဝိဿာမာ’တိ။ တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ၊ ဥပ္ပန္နာနိ စ ဘဏ္ဍနာနိ ဘိယျောဘာဝါယ ဝေပုလ္လာယ သံဝတ္တန္တိ။ သင်္ဃော ပဏ္ဍုကလောဟိတကာနံ ဘိက္ခူနံ ¶ တဇ္ဇနီယကမ္မံ ကရောတိ။ ယဿာယသ္မတော ခမတိ ပဏ္ဍုကလောဟိတကာနံ ဘိက္ခူနံ တဇ္ဇနီယဿ ကမ္မဿ ကရဏံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ ဣမေ ပဏ္ဍုကလောဟိတကာ ဘိက္ခူ အတ္တနာ ဘဏ္ဍနကာရကာ…ပေ… သင်္ဃေ အဓိကရဏကာရကာ၊ ယေပိ စညေ ဘိက္ခူ ဘဏ္ဍနကာရကာ…ပေ… သင်္ဃေ အဓိကရဏကာရကာ တေ ဥပသင်္ကမိတွာ ဧဝံ ဝဒန္တိ – ‘မာ ခေါ တုမှေ ¶ ၊ အာယသ္မန္တော၊ ဧသော အဇေသိ။ ဗလဝါဗလဝံ ပဋိမန္တေထ။ တုမှေ တေန ပဏ္ဍိတတရာ စ ဗျတ္တတရာ စ ဗဟုဿုတတရာ စ အလမတ္တတရာ စ။ မာ စဿ ဘာယိတ္ထ။ မယမ္ပိ တုမှာကံ ပက္ခာ ဘဝိဿာမာ’တိ။ တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ၊ ဥပ္ပန္နာနိ စ ဘဏ္ဍနာနိ ဘိယျောဘာဝါယ ဝေပုလ္လာယ သံဝတ္တန္တိ။ သင်္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ ကရောတိ။ ယဿာယသ္မတော ခမတိ ပဏ္ဍုကလောဟိတကာနံ ဘိက္ခူနံ တဇ္ဇနီယဿ ကမ္မဿ ကရဏံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော ¶ ။ ဣမေ ပဏ္ဍုကလောဟိတကာ ဘိက္ခူ အတ္တနာ ဘဏ္ဍနကာရကာ…ပေ… သင်္ဃေ အဓိကရဏကာရကာ၊ ယေပိ စညေ ဘိက္ခူ ဘဏ္ဍနကာရကာ…ပေ… သင်္ဃေ အဓိကရဏကာရကာ တေ ဥပသင်္ကမိတွာ ဧဝံ ဝဒန္တိ – ‘မာ ခေါ တုမှေ၊ အာယသ္မန္တော၊ ဧသော အဇေသိ။ ဗလဝါဗလဝံ ပဋိမန္တေထ။ တုမှေ တေန ပဏ္ဍိတတရာ စ ဗျတ္တတရာ စ ဗဟုဿုတတရာ စ အလမတ္တတရာ စ။ မာ စဿ ဘာယိတ္ထ။ မယမ္ပိ တုမှာကံ ပက္ခာ ဘဝိဿာမာ’တိ။ တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ၊ ဥပ္ပန္နာနိ စ ဘဏ္ဍနာနိ ဘိယျောဘာဝါယ ဝေပုလ္လာယ သံဝတ္တန္တိ။ သင်္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ ကရောတိ။ ယဿာယသ္မတော ခမတိ ပဏ္ဍုကလောဟိတကာနံ ဘိက္ခူနံ တဇ္ဇနီယဿ ကမ္မဿ ကရဏံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ကတံ သင်္ဃေန ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

အဓမ္မကမ္မဒွါဒသကံ

၄။ ‘‘တီဟိ ¶ ¶ ၊ ဘိက္ခဝေ၊ အင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ [အဓမ္မကမ္မဉ္စေဝ (သျာ။)] ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အသမ္မုခါ ကတံ ဟောတိ၊ အပ္ပဋိပုစ္ဆာ ကတံ ဟောတိ၊ အပ္ပဋိညာယ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အနာပတ္တိယာ ကတံ ¶ ဟောတိ၊ အဒေသနာဂါမိနိယာ အာပတ္တိယာ ကတံ ဟောတိ၊ ဒေသိတာယ အာပတ္တိယာ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ ¶ ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အစောဒေတွာ ကတံ ဟောတိ၊ အသာရေတွာ ကတံ ဟောတိ၊ အာပတ္တိံ အနာရောပေတွာ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အသမ္မုခါ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အပ္ပဋိပုစ္ဆာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အပ္ပဋိညာယ ကတံ ¶ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ ¶ ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အနာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အဒေသနာဂါမိနိယာ အာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ ¶ ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ ဒေသိတာယ အာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အစောဒေတွာ ကတံ ¶ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အသာရေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အာပတ္တိံ အနာရောပေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ ¶ ၊ တီဟင်္ဂေဟိ သမန္နာဂတံ တဇ္ဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

အဓမ္မကမ္မဒွါဒသကံ နိဋ္ဌိတံ။

ဓမ္မကမ္မဒွါဒသကံ

၅။ ‘‘တီဟိ၊ ဘိက္ခဝေ၊ အင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ သမ္မုခါ ကတံ ဟောတိ၊ ပဋိပုစ္ဆာ ကတံ ဟောတိ၊ ပဋိညာယ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ¶ ဟောတိ၊ ဝိနယကမ္မဉ္စ၊ သုဝူပသန္တဉ္စ။ အာပတ္တိယာ ကတံ ဟောတိ၊ ဒေသနာဂါမိနိယာ အာပတ္တိယာ ကတံ ဟောတိ ¶ ၊ အဒေသိတာယ ¶ အာပတ္တိယာ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ စောဒေတွာ ကတံ ဟောတိ၊ သာရေတွာ ကတံ ဟောတိ၊ အာပတ္တိံ အာရောပေတွာ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ သမ္မုခါ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ ပဋိပုစ္ဆာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ ¶ ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ¶ ဟောတိ၊ ဝိနယကမ္မဉ္စ၊ သုဝူပသန္တဉ္စ။ ပဋိညာယ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ ဒေသနာဂါမိနိယာ အာပတ္တိယာ ကတံ ဟောတိ၊ ဓမ္မေန ¶ ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ အဒေသိတာယ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ¶ ဟောတိ၊ ဝိနယကမ္မဉ္စ၊ သုဝူပသန္တဉ္စ။ စောဒေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ သာရေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ အာပတ္တိံ အာရောပေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ ¶ သမန္နာဂတံ တဇ္ဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

ဓမ္မကမ္မဒွါဒသကံ နိဋ္ဌိတံ။

အာကင်္ခမာနဆက္ကံ

၆။ [ပရိ။ ၃၂၃] ‘‘တီဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ တဇ္ဇနီယကမ္မံ ကရေယျ။ ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သင်္ဃေ အဓိကရဏကာရကော၊ ဗာလော ဟောတိ အဗျတ္တော အာပတ္တိဗဟုလော အနပဒါနော၊ ဂိဟိသံသဋ္ဌော ဝိဟရတိ အနနုလောမိကေဟိ ¶ ဂိဟိသံသဂ္ဂေဟိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော ¶ ၊ အာကင်္ခမာနော သင်္ဃော၊ တဇ္ဇနီယကမ္မံ ကရေယျ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ တဇ္ဇနီယကမ္မံ ကရေယျ။ အဓိသီလေ သီလဝိပန္နော ဟောတိ၊ အဇ္ဈာစာရေ အာစာရဝိပန္နော ဟောတိ၊ အတိဒိဋ္ဌိယာ ဒိဋ္ဌိဝိပန္နော ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ တဇ္ဇနီယကမ္မံ ကရေယျ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ တဇ္ဇနီယကမ္မံ ကရေယျ။ ဗုဒ္ဓဿ အဝဏ္ဏံ ဘာသတိ၊ ဓမ္မဿ အဝဏ္ဏံ ဘာသတိ၊ သင်္ဃဿ အဝဏ္ဏံ ဘာသတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ တဇ္ဇနီယကမ္မံ ကရေယျ။

‘‘တိဏ္ဏံ၊ ဘိက္ခဝေ၊ ဘိက္ခူနံ၊ အာကင်္ခမာနော သင်္ဃော၊ တဇ္ဇနီယကမ္မံ ကရေယျ။ ဧကော ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သင်္ဃေ အဓိကရဏကာရကော၊ ဧကော ဗာလော ဟောတိ အဗျတ္တော အာပတ္တိဗဟုလော အနပဒါနော၊ ဧကော ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ တဇ္ဇနီယကမ္မံ ကရေယျ။

‘‘အပရေသမ္ပိ ¶ ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ တဇ္ဇနီယကမ္မံ ကရေယျ။ ဧကော အဓိသီလေ သီလဝိပန္နော ဟောတိ၊ ဧကော အဇ္ဈာစာရေ အာစာရဝိပန္နော ဟောတိ၊ ဧကော အတိဒိဋ္ဌိယာ ဒိဋ္ဌိဝိပန္နော ဟောတိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ တဇ္ဇနီယကမ္မံ ¶ ကရေယျ။

‘‘အပရေသမ္ပိ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ တဇ္ဇနီယကမ္မံ ကရေယျ ¶ ။ ဧကော ဗုဒ္ဓဿ အဝဏ္ဏံ ဘာသတိ၊ ဧကော ဓမ္မဿ အဝဏ္ဏံ ဘာသတိ၊ ဧကော သင်္ဃဿ အဝဏ္ဏံ ဘာသတိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ တဇ္ဇနီယကမ္မံ ကရေယျ။

အာကင်္ခမာနဆက္ကံ နိဋ္ဌိတံ။

အဋ္ဌာရသဝတ္တံ

၇။ ‘‘တဇ္ဇနီယကမ္မကတေန ¶ ၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ။ တတြာယံ သမ္မာဝတ္တနာ – န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ [သမ္မတိ (သျာ။)] သာဒိတဗ္ဗာ၊ သမ္မတေနပိ ဘိက္ခုနိယော န ဩဝဒိတဗ္ဗာ။ ယာယ အာပတ္တိယာ သင်္ဃေန တဇ္ဇနီယကမ္မံ ကတံ ဟောတိ သာ အာပတ္တိ န အာပဇ္ဇိတဗ္ဗာ၊ အညာ ဝါ တာဒိသိကာ၊ တတော ဝါ ပါပိဋ္ဌတရာ၊ ကမ္မံ န ဂရဟိတဗ္ဗံ၊ ကမ္မိကာ န ဂရဟိတဗ္ဗာ။ န ပကတတ္တဿ ဘိက္ခုနော ဥပေါသထော ဌပေတဗ္ဗော၊ န ပဝါရဏာ ဌပေတဗ္ဗာ၊ န သဝစနီယံ ကာတဗ္ဗံ၊ န အနုဝါဒေါ ပဋ္ဌပေတဗ္ဗော၊ န ဩကာသော ကာရေတဗ္ဗော၊ န စောဒေတဗ္ဗော၊ န သာရေတဗ္ဗော၊ န ဘိက္ခူဟိ [န ဘိက္ခူ ဘိက္ခူဟိ (သျာ။)] သမ္ပယောဇေတဗ္ဗ’’န္တိ။

တဇ္ဇနီယကမ္မေ အဋ္ဌာရသဝတ္တံ နိဋ္ဌိတံ။

နပ္ပဋိပ္ပဿမ္ဘေတဗ္ဗအဋ္ဌာရသကံ

၈။ အထ ခေါ သင်္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ အကာသိ ¶ ။ တေ သင်္ဃေန တဇ္ဇနီယကမ္မကတာ သမ္မာ ဝတ္တန္တိ၊ လောမံ ပါတေန္တိ ¶ ၊ နေတ္ထာရံ ဝတ္တန္တိ၊ ဘိက္ခူ ဥပသင်္ကမိတွာ ဧဝံ ဝဒန္တိ – ‘‘မယံ၊ အာဝုသော၊ သင်္ဃေန တဇ္ဇနီယကမ္မကတာ သမ္မာ ဝတ္တာမ၊ လောမံ ပါတေမ၊ နေတ္ထာရံ ဝတ္တာမ၊ ကထံ နု ခေါ အမှေဟိ ပဋိပဇ္ဇိတဗ္ဗ’’န္တိ? ဘိက္ခူ ဘဂဝတော ဧတမတ္ထံ အာရောစေသုံ…ပေ…။ ‘‘တေန ဟိ၊ ဘိက္ခဝေ၊ သင်္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ ပဋိပ္ပဿမ္ဘေတု။

ပဉ္စဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော တဇ္ဇနီယကမ္မံ နပ္ပဋိပ္ပဿမ္ဘေတဗ္ဗံ။ ဥပသမ္ပာဒေတိ၊ နိဿယံ ဒေတိ၊ သာမဏေရံ ဥပဋ္ဌာပေတိ၊ ဘိက္ခုနောဝါဒကသမ္မုတိံ သာဒိယတိ၊ သမ္မတောပိ ဘိက္ခုနိယော ဩဝဒတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော တဇ္ဇနီယကမ္မံ နပ္ပဋိပ္ပဿမ္ဘေတဗ္ဗံ။

[ပရိ။ ၄၂၀] ‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော တဇ္ဇနီယကမ္မံ နပ္ပဋိပ္ပဿမ္ဘေတဗ္ဗံ။ ယာယ အာပတ္တိယာ သင်္ဃေန တဇ္ဇနီယကမ္မံ ကတံ ဟောတိ တံ အာပတ္တိံ အာပဇ္ဇတိ၊ အညံ ဝါ တာဒိသိကံ၊ တတော ဝါ ပါပိဋ္ဌတရံ၊ ကမ္မံ ဂရဟတိ၊ ကမ္မိကေ ဂရဟတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော တဇ္ဇနီယကမ္မံ နပ္ပဋိပ္ပဿမ္ဘေတဗ္ဗံ။

‘‘အဋ္ဌဟိ ¶ ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော တဇ္ဇနီယကမ္မံ ¶ နပ္ပဋိပ္ပဿမ္ဘေတဗ္ဗံ။ ပကတတ္တဿ ဘိက္ခုနော ဥပေါသထံ ဌပေတိ၊ ပဝါရဏံ ဌပေတိ၊ သဝစနီယံ ကရောတိ၊ အနုဝါဒံ ပဋ္ဌပေတိ၊ ဩကာသံ ¶ ကာရေတိ၊ စောဒေတိ၊ သာရေတိ၊ ဘိက္ခူဟိ သမ္ပယောဇေတိ [ဘိက္ခူ ဘိက္ခူဟိ သမ္ပယောဇေတိ (သျာ။)] – ဣမေဟိ ခေါ၊ ဘိက္ခဝေ၊ အဋ္ဌဟင်္ဂေဟိ သမန္နာဂတဿ ဘိက္ခုနော တဇ္ဇနီယကမ္မံ နပ္ပဋိပ္ပဿမ္ဘေတဗ္ဗံ။

နပ္ပဋိပ္ပဿမ္ဘေတဗ္ဗအဋ္ဌာရသကံ နိဋ္ဌိတံ။

ပဋိပ္ပဿမ္ဘေတဗ္ဗအဋ္ဌာရသကံ

၉။ ‘‘ပဉ္စဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော တဇ္ဇနီယကမ္မံ ပဋိပ္ပဿမ္ဘေတဗ္ဗံ။ န ဥပသမ္ပာဒေတိ၊ န နိဿယံ ဒေတိ၊ န သာမဏေရံ ဥပဋ္ဌာပေတိ၊ န ဘိက္ခုနောဝါဒကသမ္မုတိံ သာဒိယတိ၊ သမ္မတောပိ ဘိက္ခုနိယော န ဩဝဒတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော တဇ္ဇနီယကမ္မံ ပဋိပ္ပဿမ္ဘေတဗ္ဗံ။

‘‘အပရေဟိပိ ¶ ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော တဇ္ဇနီယကမ္မံ ပဋိပ္ပဿမ္ဘေတဗ္ဗံ။ ယာယ အာပတ္တိယာ သင်္ဃေန တဇ္ဇနီယကမ္မံ ကတံ ဟောတိ တံ အာပတ္တိံ န အာပဇ္ဇတိ၊ အညံ ဝါ တာဒိသိကံ၊ တတော ဝါ ပါပိဋ္ဌတရံ၊ ကမ္မံ န ဂရဟတိ၊ ကမ္မိကေ န ဂရဟတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော တဇ္ဇနီယကမ္မံ ပဋိပ္ပဿမ္ဘေတဗ္ဗံ။

‘‘အဋ္ဌဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော တဇ္ဇနီယကမ္မံ ပဋိပ္ပဿမ္ဘေတဗ္ဗံ။

န ပကတတ္တဿ ဘိက္ခုနော ဥပေါသထံ ဌပေတိ၊ န ပဝါရဏံ ဌပေတိ၊ န သဝစနီယံ ကရောတိ၊ န အနုဝါဒံ ပဋ္ဌပေတိ၊ န ဩကာသံ ကာရေတိ၊ န စောဒေတိ၊ န သာရေတိ၊ န ဘိက္ခူဟိ သမ္ပယောဇေတိ – ဣမေဟိ ခေါ၊ ဘိက္ခဝေ၊ အဋ္ဌဟင်္ဂေဟိ သမန္နာဂတဿ ဘိက္ခုနော ¶ ၊ တဇ္ဇနီယကမ္မံ ပဋိပ္ပဿမ္ဘေတဗ္ဗံ။

ပဋိပ္ပဿမ္ဘေတဗ္ဗအဋ္ဌာရသကံ နိဋ္ဌိတံ။

၁၀။ ‘‘ဧဝဉ္စ ပန၊ ဘိက္ခဝေ၊ ပဋိပ္ပဿမ္ဘေတဗ္ဗံ။ တေဟိ၊ ဘိက္ခဝေ၊ ပဏ္ဍုကလောဟိတကေဟိ ဘိက္ခူဟိ သင်္ဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘မယံ၊ ဘန္တေ၊ သင်္ဃေန တဇ္ဇနီယကမ္မကတာ ¶ သမ္မာ ဝတ္တာမ၊ လောမံ ပါတေမ၊ နေတ္ထာရံ ဝတ္တာမ၊ တဇ္ဇနီယဿ ကမ္မဿ ပဋိပ္ပဿဒ္ဓိံ ယာစာမာ’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

‘‘သုဏာတု မေ၊ ဘန္တေ၊ သင်္ဃော။ ဣမေ ပဏ္ဍုကလောဟိတကာ ဘိက္ခူ သင်္ဃေန တဇ္ဇနီယကမ္မကတာ သမ္မာ ဝတ္တန္တိ၊ လောမံ ပါတေန္တိ၊ နေတ္ထာရံ ဝတ္တန္တိ ¶ ၊ တဇ္ဇနီယဿ ကမ္မဿ ပဋိပ္ပဿဒ္ဓိံ ယာစန္တိ။ ယဒိ သင်္ဃဿ ပတ္တကလ္လံ၊ သင်္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ ပဋိပ္ပဿမ္ဘေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ ဣမေ ပဏ္ဍုကလောဟိတကာ ဘိက္ခူ သင်္ဃေန တဇ္ဇနီယကမ္မကတာ သမ္မာ ဝတ္တန္တိ၊ လောမံ ပါတေန္တိ၊ နေတ္ထာရံ ဝတ္တန္တိ၊ တဇ္ဇနီယဿ ကမ္မဿ ပဋိပ္ပဿဒ္ဓိံ ယာစန္တိ။ သင်္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ ပဋိပ္ပဿမ္ဘေတိ။ ယဿာယသ္မတော ခမတိ ပဏ္ဍုကလောဟိတကာနံ ဘိက္ခူနံ တဇ္ဇနီယဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ¶ ဧတမတ္ထံ ဝဒါမိ – သုဏာတု မေ ¶ ၊ ဘန္တေ၊ သင်္ဃော။ ဣမေ ပဏ္ဍုကလောဟိတကာ ဘိက္ခူ သင်္ဃေန တဇ္ဇနီယကမ္မကတာ သမ္မာ ဝတ္တန္တိ၊ လောမံ ပါတေန္တိ၊ နေတ္ထာရံ ဝတ္တန္တိ၊ တဇ္ဇနီယဿ ကမ္မဿ ပဋိပ္ပဿဒ္ဓိံ ယာစန္တိ။ သင်္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ ပဋိပ္ပဿမ္ဘေတိ။ ယဿာယသ္မတော ခမတိ ပဏ္ဍုကလောဟိတကာနံ ဘိက္ခူနံ တဇ္ဇနီယဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ ဣမေ ပဏ္ဍုကလောဟိတကာ ဘိက္ခူ သင်္ဃေန တဇ္ဇနီယကမ္မကတာ သမ္မာ ဝတ္တန္တိ၊ လောမံ ပါတေန္တိ၊ နေတ္ထာရံ ဝတ္တန္တိ၊ တဇ္ဇနီယဿ ကမ္မဿ ပဋိပ္ပဿဒ္ဓိံ ယာစန္တိ။ သင်္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ ပဋိပ္ပဿမ္ဘေတိ။ ယဿာယသ္မတော ခမတိ ပဏ္ဍုကလောဟိတကာနံ ဘိက္ခူနံ တဇ္ဇနီယဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ပဋိပ္ပဿဒ္ဓံ သင်္ဃေန ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ။ ခမတိ သင်္ဃဿ၊

တသ္မာ တုဏှီ၊ ဧဝမေတံ ဓာရယာမီ’’တိ။

တဇ္ဇနီယကမ္မံ နိဋ္ဌိတံ ပဌမံ။

၂။ နိယဿကမ္မံ

၁၁။ တေန ¶ ခေါ ပန သမယေန အာယသ္မာ သေယျသကော ဗာလော ဟောတိ အဗျတ္တော အာပတ္တိဗဟုလော အနပဒါနော၊ ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ၊ အပိဿု ဘိက္ခူ ပကတာ [ပကတတ္တာ (သီ။ သျာ။)] ပရိဝါသံ ဒေန္တာ မူလာယ ပဋိကဿန္တာ မာနတ္တံ ဒေန္တာ အဗ္ဘေန္တာ။ ယေ တေ ဘိက္ခူ အပ္ပိစ္ဆာ…ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ သေယျသကော ဗာလော ဘဝိဿတိ အဗျတ္တော အာပတ္တိဗဟုလော အနပဒါနော၊ ဂိဟိသံသဋ္ဌော ဝိဟရိဿတိ အနနုလောမိကေဟိ ဂိဟိသံသဂ္ဂေဟိ ¶ ၊ အပိဿု ဘိက္ခူ ပကတာ ပရိဝါသံ ဒေန္တာ မူလာယ ပဋိကဿန္တာ မာနတ္တံ ဒေန္တာ အဗ္ဘေန္တာ’’တိ။ အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။

အထ ¶ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသင်္ဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ၊ ဘိက္ခဝေ၊ သေယျသကော ဘိက္ခု ဗာလော အဗျတ္တော အာပတ္တိဗဟုလော အနပဒါနော၊ ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ၊ အပိဿု ဘိက္ခူ ပကတာ ပရိဝါသံ ဒေန္တာ မူလာယ ပဋိကဿန္တာ မာနတ္တံ ဒေန္တာ အဗ္ဘေန္တာ’’တိ? ‘‘သစ္စံ ဘဂဝါ’’တိ။ ဝိဂရဟိ ဗုဒ္ဓါ ဘဂဝါ – ‘‘အနနုစ္ဆဝိကံ၊ ဘိက္ခဝေ၊ တဿ မောဃပုရိသဿ အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ သော၊ ဘိက္ခဝေ၊ မောဃပုရိသော ဗာလော ဘဝိဿတိ အဗျတ္တော အာပတ္တိဗဟုလော အနပဒါနော၊ ဂိဟိသံသဋ္ဌော ဝိဟရိဿတိ အနနုလောမိကေဟိ ဂိဟိသံသဂ္ဂေဟိ၊ အပိဿု ဘိက္ခူ ပကတာ ပရိဝါသံ ဒေန္တာ မူလာယ ပဋိကဿန္တာ မာနတ္တံ ဒေန္တာ အဗ္ဘေန္တာ။ နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ – ‘‘တေန ဟိ၊ ဘိက္ခဝေ၊ သင်္ဃော သေယျသကဿ ¶ ဘိက္ခုနော နိယဿကမ္မံ [နိယသကမ္မံ (က။)] ကရောတု – နိဿာယ တေ ဝတ္ထဗ္ဗန္တိ။ ဧဝဉ္စ ပန၊ ဘိက္ခဝေ၊ ကာတဗ္ဗံ။ ပဌမံ သေယျသကော ဘိက္ခု စောဒေတဗ္ဗော၊ စောဒေတွာ သာရေတဗ္ဗော၊ သာရေတွာ အာပတ္တိံ အာရောပေတဗ္ဗော [အာပတ္တိ အာရောပေတဗ္ဗာ (သီ။ သျာ။)]၊ အာပတ္တိံ အာရောပေတွာ ဗျတ္တေန ဘိက္ခုနာ ¶ ပဋိဗလေန သင်္ဃော ဉာပေတဗ္ဗော –

၁၂။ ‘‘သုဏာတု မေ၊ ဘန္တေ၊ သင်္ဃော။ အယံ သေယျသကော ဘိက္ခု ဗာလော အဗျတ္တော အာပတ္တိဗဟုလော အနပဒါနော၊ ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ၊ အပိဿု ဘိက္ခူ ပကတာ ပရိဝါသံ ဒေန္တာ မူလာယ ပဋိကဿန္တာ မာနတ္တံ ဒေန္တာ အဗ္ဘေန္တာ။ ယဒိ သင်္ဃဿ ပတ္တကလ္လံ၊ သင်္ဃော သေယျသကဿ ဘိက္ခုနော နိယဿကမ္မံ ကရေယျ – နိဿာယ တေ ဝတ္ထဗ္ဗန္တိ။ ဧသာ ဉတ္တိ။

‘‘သုဏာတု ¶ မေ၊ ဘန္တေ၊ သင်္ဃော။ အယံ သေယျသကော ဘိက္ခု ဗာလော အဗျတ္တော အာပတ္တိဗဟုလော အနပဒါနော၊ ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ၊ အပိဿု ဘိက္ခူ ပကတာ ပရိဝါသံ ဒေန္တာ မူလာယ ပဋိကဿန္တာ မာနတ္တံ ဒေန္တာ အဗ္ဘေန္တာ။ သင်္ဃော သေယျသကဿ ဘိက္ခုနော နိယဿကမ္မံ ကရောတိ – နိဿာယ တေ ဝတ္ထဗ္ဗန္တိ။ ယဿာယသ္မတော ခမတိ သေယျသကဿ ဘိက္ခုနော နိယဿဿ ကမ္မဿ ကရဏံ – နိဿာယ တေ ဝတ္ထဗ္ဗန္တိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ¶ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ အယံ သေယျသကော ဘိက္ခု ဗာလော အဗျတ္တော အာပတ္တိဗဟုလော အနပဒါနော၊ ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ၊ အပိဿု ဘိက္ခူ ပကတာ ပရိဝါသံ ဒေန္တာ မူလာယ ပဋိကဿန္တာ မာနတ္တံ ဒေန္တာ အဗ္ဘေန္တာ။ သင်္ဃော သေယျသကဿ ဘိက္ခုနော နိယဿကမ္မံ ကရောတိ – နိဿာယ တေ ဝတ္ထဗ္ဗန္တိ။ ယဿာယသ္မတော ခမတိ သေယျသကဿ ဘိက္ခုနော နိယဿဿ ကမ္မဿ ¶ ကရဏံ – နိဿာယ တေ ဝတ္ထဗ္ဗန္တိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ကတံ သင်္ဃေန သေယျသကဿ ဘိက္ခုနော နိယဿကမ္မံ – နိဿာယ တေ ဝတ္ထဗ္ဗန္တိ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

အဓမ္မကမ္မဒွါဒသကံ

၁၃။ ‘‘တီဟိ၊ ဘိက္ခဝေ၊ အင်္ဂေဟိ သမန္နာဂတံ နိယဿကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အသမ္မုခါ ကတံ ဟောတိ၊ အပ္ပဋိပုစ္ဆာ ကတံ ဟောတိ၊ အပ္ပဋိညာယ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ နိယဿကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ နိယဿကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အနာပတ္တိယာ ကတံ ဟောတိ၊ အဒေသနာဂါမိနိယာ အာပတ္တိယာ ကတံ ဟောတိ၊ ဒေသိတာယ အာပတ္တိယာ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ နိယဿကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ နိယဿကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အစောဒေတွာ ကတံ ဟောတိ၊ အသာရေတွာ ကတံ ဟောတိ၊ အာပတ္တိံ အနာရောပေတွာ ¶ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ နိယဿကမ္မံ အဓမ္မကမ္မဉ္စ ¶ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ၊ ဘိက္ခဝေ…ပေ… အသမ္မုခါ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ…ပေ…။

‘‘အပရေဟိပိ ¶ ၊ ဘိက္ခဝေ…ပေ… အပ္ပဋိပုစ္ဆာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ…ပေ…။

‘‘အပရေဟိပိ၊ ဘိက္ခဝေ…ပေ… အပ္ပဋိညာယ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ…ပေ…။

‘‘အပရေဟိပိ၊ ဘိက္ခဝေ…ပေ… အနာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ…ပေ… ¶ ။

‘‘အပရေဟိပိ၊ ဘိက္ခဝေ…ပေ… အဒေသနာဂါမိနိယာ အာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ…ပေ…။

‘‘အပရေဟိပိ၊ ဘိက္ခဝေ…ပေ… ဒေသိတာယ အာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ…ပေ…။

‘‘အပရေဟိပိ၊ ဘိက္ခဝေ…ပေ… အစောဒေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ…ပေ…။

‘‘အပရေဟိပိ၊ ဘိက္ခဝေ…ပေ… အသာရေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ…ပေ… ¶ ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ နိယဿကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အာပတ္တိံ အနာရောပေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ¶ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ နိယဿကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

အဓမ္မကမ္မဒွါဒသကံ နိဋ္ဌိတံ။

ဓမ္မကမ္မဒွါဒသကံ

၁၄။ ‘‘တီဟိ၊ ဘိက္ခဝေ၊ အင်္ဂေဟိ သမန္နာဂတံ နိယဿကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ သမ္မုခါ ကတံ ဟောတိ၊ ပဋိပုစ္ဆာ ကတံ ဟောတိ၊ ပဋိညာယ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ နိယဿကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ ¶ ၊ ဘိက္ခဝေ၊ တီဟင်္ဂေဟိ သမန္နာဂတံ နိယဿကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ အာပတ္တိယာ ကတံ ဟောတိ၊ ဒေသနာဂါမိနိယာ အာပတ္တိယာ ကတံ ဟောတိ၊ အဒေသိတာယ အာပတ္တိယာ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ နိယဿကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ နိယဿကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ စောဒေတွာ ကတံ ဟောတိ၊ သာရေတွာ ကတံ ဟောတိ၊ အာပတ္တိံ အာရောပေတွာ ကတံ ဟောတိ ¶ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ နိယဿကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ၊ ဘိက္ခဝေ…ပေ… သမ္မုခါ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ…ပေ…။

‘‘အပရေဟိပိ၊ ဘိက္ခဝေ…ပေ… ပဋိပုစ္ဆာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ…ပေ…။

‘‘အပရေဟိပိ၊ ဘိက္ခဝေ…ပေ… ပဋိညာယ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ…ပေ…။

‘‘အပရေဟိပိ ¶ ၊ ဘိက္ခဝေ…ပေ… အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ…ပေ… ¶ ။

‘‘အပရေဟိပိ၊ ဘိက္ခဝေ…ပေ… ဒေသနာဂါမိနိယာ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ…ပေ…။

‘‘အပရေဟိပိ၊ ဘိက္ခဝေ…ပေ… အဒေသိတာယ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ…ပေ…။

‘‘အပရေဟိပိ၊ ဘိက္ခဝေ…ပေ… စောဒေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ…ပေ…။

‘‘အပရေဟိပိ၊ ဘိက္ခဝေ…ပေ… သာရေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ…ပေ… ¶ ။

‘‘အပရေဟိပိ ¶ ၊ ဘိက္ခဝေ၊ တီဟင်္ဂေဟိ သမန္နာဂတံ နိယဿကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ အာပတ္တိံ အာရောပေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ နိယဿကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

ဓမ္မကမ္မဒွါဒသကံ နိဋ္ဌိတံ။

အာကင်္ခမာနဆက္ကံ

၁၅။ [ပရိ။ ၃၂၃] ‘‘တီဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ နိယဿကမ္မံ ကရေယျ။ ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သင်္ဃေ အဓိကရဏကာရကော၊ ဗာလော ဟောတိ အဗျတ္တော အာပတ္တိဗဟုလော အနပဒါနော၊ ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ နိယဿကမ္မံ ကရေယျ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ နိယဿကမ္မံ ¶ ကရေယျ။ အဓိသီလေ သီလဝိပန္နော ဟောတိ၊ အဇ္ဈာစာရေ အာစာရဝိပန္နော ဟောတိ၊ အတိဒိဋ္ဌိယာ ဒိဋ္ဌိဝိပန္နော ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ နိယဿကမ္မံ ကရေယျ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော ¶ သင်္ဃော၊ နိယဿကမ္မံ ကရေယျ။ ဗုဒ္ဓဿ အဝဏ္ဏံ ဘာသတိ၊ ဓမ္မဿ အဝဏ္ဏံ ဘာသတိ၊ သင်္ဃဿ အဝဏ္ဏံ ဘာသတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ နိယဿကမ္မံ ကရေယျ။

‘‘တိဏ္ဏံ၊ ဘိက္ခဝေ၊ ဘိက္ခူနံ၊ အာကင်္ခမာနော သင်္ဃော၊ နိယဿကမ္မံ ကရေယျ။ ဧကော ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သင်္ဃေ အဓိကရဏကာရကော၊ ဧကော ဗာလော ဟောတိ၊ အဗျတ္တော အာပတ္တိဗဟုလော အနပဒါနော၊ ဧကော ဂိဟိသံသဋ္ဌော ဝိဟရတိ အနနုလောမိကေဟိ ¶ ဂိဟိသံသဂ္ဂေဟိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ နိယဿကမ္မံ ကရေယျ။

‘‘အပရေသမ္ပိ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ နိယဿကမ္မံ ကရေယျ။ ဧကော အဓိသီလေ သီလဝိပန္နော ဟောတိ၊ ဧကော အဇ္ဈာစာရေ အာစာရဝိပန္နော ဟောတိ၊ ဧကော အတိဒိဋ္ဌိယာ ဒိဋ္ဌိဝိပန္နော ဟောတိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ နိယဿကမ္မံ ကရေယျ။

‘‘အပရေသမ္ပိ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ နိယဿကမ္မံ ကရေယျ။ ဧကော ဗုဒ္ဓဿ အဝဏ္ဏံ ဘာသတိ၊ ဧကော ဓမ္မဿ အဝဏ္ဏံ ဘာသတိ၊ ဧကော သင်္ဃဿ အဝဏ္ဏံ ဘာသတိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ နိယဿကမ္မံ ကရေယျ။

အာကင်္ခမာနဆက္ကံ နိဋ္ဌိတံ။

အဋ္ဌာရသဝတ္တံ

၁၆။ ‘‘နိယဿကမ္မကတေန ¶ ၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ။ တတြာယံ သမ္မာဝတ္တနာ – န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနပိ ဘိက္ခုနိယော န ဩဝဒိတဗ္ဗာ။ ယာယ အာပတ္တိယာ ¶ သင်္ဃေန နိယဿကမ္မံ ကတံ ဟောတိ သာ အာပတ္တိ န အာပဇ္ဇိတဗ္ဗာ၊ အညာ ဝါ တာဒိသိကာ၊ တတော ဝါ ပါပိဋ္ဌတရာ၊ ကမ္မံ န ဂရဟိတဗ္ဗံ၊ ကမ္မိကာ န ဂရဟိတဗ္ဗာ။ န ပကတတ္တဿ ဘိက္ခုနော ဥပေါသထော ဌပေတဗ္ဗော၊ န ပဝါရဏာ ဌပေတဗ္ဗာ၊ န သဝစနီယံ ကာတဗ္ဗံ၊ န အနုဝါဒေါ ပဋ္ဌပေတဗ္ဗော၊ န ဩကာသော ကာရာပေတဗ္ဗော၊ န စောဒေတဗ္ဗော၊ န သာရေတဗ္ဗော၊ န ဘိက္ခူဟိ သမ္ပယောဇေတဗ္ဗ’’န္တိ။

နိယဿကမ္မေ အဋ္ဌာရသဝတ္တံ နိဋ္ဌိတံ။

၁၇။ အထ ခေါ သင်္ဃော သေယျသကဿ ဘိက္ခုနော နိယဿကမ္မံ အကာသိ – နိဿာယ တေ ဝတ္ထဗ္ဗန္တိ။ သော သင်္ဃေန နိယဿကမ္မကတော ကလျာဏမိတ္တေ ¶ သေဝမာနော ဘဇမာနော ပယိရုပါသမာနော ဥဒ္ဒိသာပေန္တော ပရိပုစ္ဆန္တော ဗဟုဿုတော ဟောတိ၊ အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဝိယတ္တော မေဓာဝီ လဇ္ဇီ ကုက္ကုစ္စကော သိက္ခာကာမော။ သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ဘိက္ခူ ဥပသင်္ကမိတွာ ဧဝံ ဝဒေတိ – ‘‘အဟံ၊ အာဝုသော၊ သင်္ဃေန နိယဿကမ္မကတော သမ္မာ ဝတ္တာမိ၊ လောမံ ပါတေမိ၊ နေတ္ထာရံ ဝတ္တာမိ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘိက္ခူ ဘဂဝတော ဧတမတ္ထံ အာရောစေသုံ…ပေ…။ ‘‘တေန ¶ ဟိ၊ ဘိက္ခဝေ၊ သင်္ဃော သေယျသကဿ ဘိက္ခုနော နိယဿကမ္မံ ပဋိပ္ပဿမ္ဘေတု။

နပ္ပဋိပ္ပဿမ္ဘေတဗ္ဗအဋ္ဌာရသကံ

၁၈။ ‘‘ပဉ္စဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော နိယဿကမ္မံ နပ္ပဋိပ္ပဿမ္ဘေတဗ္ဗံ။ ဥပသမ္ပာဒေတိ၊ နိဿယံ ဒေတိ၊ သာမဏေရံ ဥပဋ္ဌာပေတိ၊ ဘိက္ခုနောဝါဒကသမ္မုတိံ သာဒိယတိ၊ သမ္မတောပိ ဘိက္ခုနိယော ဩဝဒတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော နိယဿကမ္မံ နပ္ပဋိပ္ပဿမ္ဘေတဗ္ဗံ။

[ပရိ။ ၄၂၀] ‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော နိယဿကမ္မံ နပ္ပဋိပ္ပဿမ္ဘေတဗ္ဗံ။ ယာယ အာပတ္တိယာ သင်္ဃေန နိယဿကမ္မံ ကတံ ဟောတိ တံ အာပတ္တိံ အာပဇ္ဇတိ၊ အညံ ဝါ တာဒိသိကံ၊ တတော ဝါ ပါပိဋ္ဌတရံ၊ ကမ္မံ ဂရဟတိ၊ ကမ္မိကေ ဂရဟတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော နိယဿကမ္မံ နပ္ပဋိပ္ပဿမ္ဘေတဗ္ဗံ။

‘‘အဋ္ဌဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော နိယဿကမ္မံ နပ္ပဋိပ္ပဿမ္ဘေတဗ္ဗံ။ ပကတတ္တဿ ဘိက္ခုနော ဥပေါသထံ ဌပေတိ၊ ပဝါရဏံ ဌပေတိ၊ သဝစနီယံ ကရောတိ၊ အနုဝါဒံ ပဋ္ဌပေတိ ¶ ၊ ဩကာသံ ကာရေတိ၊ စောဒေတိ၊ သာရေတိ၊ ဘိက္ခူဟိ သမ္ပယောဇေတိ – ဣမေဟိ ခေါ၊ ဘိက္ခဝေ၊ အဋ္ဌဟင်္ဂေဟိ သမန္နာဂတဿ ဘိက္ခုနော နိယဿကမ္မံ နပ္ပဋိပ္ပဿမ္ဘေတဗ္ဗံ။

နပ္ပဋိပ္ပဿမ္ဘေတဗ္ဗအဋ္ဌာရသကံ နိဋ္ဌိတံ။

ပဋိပ္ပဿမ္ဘေတဗ္ဗအဋ္ဌာရသကံ

၁၉။ ‘‘ပဉ္စဟိ ¶ ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော နိယဿကမ္မံ ပဋိပ္ပဿမ္ဘေတဗ္ဗံ ¶ ။ န ဥပသမ္ပာဒေတိ၊ န နိဿယံ ဒေတိ၊ န သာမဏေရံ ဥပဋ္ဌာပေတိ၊ န ဘိက္ခုနောဝါဒကသမ္မုတိံ သာဒိယတိ၊ သမ္မတောပိ ဘိက္ခုနိယော န ဩဝဒတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော နိယဿကမ္မံ ပဋိပ္ပဿမ္ဘေတဗ္ဗံ။

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော နိယဿကမ္မံ ပဋိပ္ပဿမ္ဘေတဗ္ဗံ။ ယာယ အာပတ္တိယာ သင်္ဃေန နိယဿကမ္မံ ကတံ ဟောတိ တံ အာပတ္တိံ န အာပဇ္ဇတိ၊ အညံ ဝါ တာဒိသိကံ၊ တတော ဝါ ပါပိဋ္ဌတရံ၊ ကမ္မံ န ဂရဟတိ၊ ကမ္မိကေ န ဂရဟတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော နိယဿကမ္မံ ပဋိပ္ပဿမ္ဘေတဗ္ဗံ။

‘‘အဋ္ဌဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော နိယဿကမ္မံ ပဋိပ္ပဿမ္ဘေတဗ္ဗံ။

န ပကတတ္တဿ ဘိက္ခုနော ဥပေါသထံ ဌပေတိ၊ န ပဝါရဏံ ဌပေတိ၊ န သဝစနီယံ ကရောတိ၊ န အနုဝါဒံ ပဋ္ဌပေတိ၊ န ဩကာသံ ကာရေတိ၊ န စောဒေတိ၊ န သာရေတိ၊ န ဘိက္ခူဟိ သမ္ပယောဇေတိ – ဣမေဟိ ခေါ၊ ဘိက္ခဝေ၊ အဋ္ဌဟင်္ဂေဟိ သမန္နာဂတဿ ဘိက္ခုနော နိယဿကမ္မံ ¶ ပဋိပ္ပဿမ္ဘေတဗ္ဗံ။

ပဋိပ္ပဿမ္ဘေတဗ္ဗအဋ္ဌာရသကံ နိဋ္ဌိတံ။

၂၀။ ‘‘ဧဝဉ္စ ပန၊ ဘိက္ခဝေ၊ ပဋိပ္ပဿမ္ဘေတဗ္ဗံ။ တေန၊ ဘိက္ခဝေ၊ သေယျသကေန ဘိက္ခုနာ သင်္ဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘အဟံ၊ ဘန္တေ၊ သင်္ဃေန နိယဿကမ္မကတော သမ္မာ ဝတ္တာမိ၊ လောမံ ပါတေမိ၊ နေတ္ထာရံ ဝတ္တာမိ၊ နိယဿဿ ကမ္မဿ ပဋိပ္ပဿဒ္ဓိံ ယာစာမီ’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ ¶ ။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

‘‘သုဏာတု ¶ မေ၊ ဘန္တေ၊ သင်္ဃော။ အယံ သေယျသကော ဘိက္ခု သင်္ဃေန နိယဿကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ နိယဿဿ ကမ္မဿ ပဋိပ္ပဿဒ္ဓိံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော သေယျသကဿ ဘိက္ခုနော နိယဿကမ္မံ ပဋိပ္ပဿမ္ဘေယျ။ ဧသာ ဉတ္တိ။

‘‘သုဏာတု ¶ မေ၊ ဘန္တေ၊ သင်္ဃော။ အယံ သေယျသကော ဘိက္ခု သင်္ဃေန နိယဿကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ နိယဿဿ ကမ္မဿ ပဋိပ္ပဿဒ္ဓိံ ယာစတိ။ သင်္ဃော သေယျသကဿ ဘိက္ခုနော နိယဿကမ္မံ ပဋိပ္ပဿမ္ဘေတိ။ ယဿာယသ္မတော ခမတိ သေယျသကဿ ဘိက္ခုနော နိယဿဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ အယံ သေယျသကော ဘိက္ခု သင်္ဃေန နိယဿကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ နိယဿဿ ကမ္မဿ ပဋိပ္ပဿဒ္ဓိံ ယာစတိ။ သင်္ဃော သေယျသကဿ ဘိက္ခုနော နိယဿကမ္မံ ပဋိပ္ပဿမ္ဘေတိ။ ယဿာယသ္မတော ခမတိ သေယျသကဿ ဘိက္ခုနော နိယဿဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ အယံ သေယျသကော ဘိက္ခု သင်္ဃေန နိယဿကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ နိယဿဿ ကမ္မဿ ပဋိပ္ပဿဒ္ဓိံ ယာစတိ။ သင်္ဃော သေယျသကဿ ဘိက္ခုနော နိယဿကမ္မံ ပဋိပ္ပဿမ္ဘေတိ။ ယဿာယသ္မတော ¶ ခမတိ သေယျသကဿ ဘိက္ခုနော နိယဿဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ပဋိပ္ပဿဒ္ဓံ သင်္ဃေန သေယျသကဿ ဘိက္ခုနော နိယဿကမ္မံ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

နိယဿကမ္မံ နိဋ္ဌိတံ ဒုတိယံ။

၃။ ပဗ္ဗာဇနီယကမ္မံ

၂၁။ [ဣဒံ ဝတ္ထု ပါရာ။ ၄၃၁ အာဒယော] တေန ခေါ ပန သမယေန အဿဇိပုနဗ္ဗသုကာ နာမ [နာမ ဘိက္ခူ (က။)] ကီဋာဂိရိသ္မိံ အာဝါသိကာ ဟောန္တိ အလဇ္ဇိနော ပါပဘိက္ခူ။ တေ [စူဠဝ။ ၂၉၂ အာဒယော] ဧဝရူပံ အနာစာရံ အာစရန္တိ – မာလာဝစ္ဆံ ရောပေန္တိပိ ရောပါပေန္တိပိ၊ သိဉ္စန္တိပိ သိဉ္စာပေန္တိပိ၊ ဩစိနန္တိပိ ဩစိနာပေန္တိပိ၊ ဂန္ထေန္တိပိ ဂန္ထာပေန္တိပိ ¶ ၊ ဧကတောဝဏ္ဋိကမာလံ ကရောန္တိပိ ¶ ကာရာပေန္တိပိ၊ ဥဘတောဝဏ္ဋိကမာလံ ကရောန္တိပိ ကာရာပေန္တိပိ၊ မဉ္ဇရိကံ ကရောန္တိပိ ကာရာပေန္တိပိ၊ ဝိဓူတိကံ [ဝိဓုတိကံ (သျာ။)] ကရောန္တိပိ ကာရာပေန္တိပိ၊ ဝဋံသကံ ကရောန္တိပိ ကာရာပေန္တိပိ၊ အာဝေဠံ ကရောန္တိပိ ¶ ကာရာပေန္တိပိ၊ ဥရစ္ဆဒံ ကရောန္တိပိ ကာရာပေန္တိပိ။ တေ ကုလိတ္ထီနံ ကုလဓီတာနံ ကုလကုမာရီနံ ကုလသုဏှာနံ ကုလဒါသီနံ ဧကတောဝဏ္ဋိကမာလံ ဟရန္တိပိ ဟရာပေန္တိပိ၊ ဥဘတောဝဏ္ဋိကမာလံ ဟရန္တိပိ ဟရာပေန္တိပိ၊ မဉ္ဇရိကံ ဟရန္တိပိ ဟရာပေန္တိပိ၊ ဝိဓူတိကံ ဟရန္တိပိ ဟရာပေန္တိပိ၊ ဝဋံသကံ ဟရန္တိပိ ဟရာပေန္တိပိ၊ အာဝေဠံ ဟရန္တိပိ ဟရာပေန္တိပိ၊ ဥရစ္ဆဒံ ဟရန္တိပိ ဟရာပေန္တိပိ။ တေ ကုလိတ္ထီဟိ ကုလဓီတာဟိ ကုလကုမာရီဟိ ကုလသုဏှာဟိ ကုလဒါသီဟိ သဒ္ဓိံ ဧကဘာဇနေပိ ဘုဉ္ဇန္တိ၊ ဧကထာလကေပိ ¶ ပိဝန္တိ၊ ဧကာသနေပိ နိသီဒန္တိ၊ ဧကမဉ္စေပိ တုဝဋ္ဋေန္တိ၊ ဧကတ္ထရဏာပိ တုဝဋ္ဋေန္တိ၊ ဧကပါဝုရဏာပိ တုဝဋ္ဋေန္တိ၊ ဧကတ္ထရဏပါဝုရဏာပိ တုဝဋ္ဋေန္တိ၊ ဝိကာလေပိ ဘုဉ္ဇန္တိ၊ မဇ္ဇမ္ပိ ပိဝန္တိ၊ မာလာဂန္ဓဝိလေပနမ္ပိ ဓာရေန္တိ၊ နစ္စန္တိပိ၊ ဂါယန္တိပိ၊ ဝါဒေန္တိပိ၊ လာသေန္တိပိ၊ နစ္စန္တိယာပိ နစ္စန္တိ၊ နစ္စန္တိယာပိ ဂါယန္တိ၊ နစ္စန္တိယာပိ ဝါဒေန္တိ၊ နစ္စန္တိယာပိ လာသေန္တိ၊ ဂါယန္တိယာပိ နစ္စန္တိ၊ ဂါယန္တိယာပိ ဂါယန္တိ၊ ဂါယန္တိယာပိ ဝါဒေန္တိ၊ ဂါယန္တိယာပိ လာသေန္တိ၊ ဝါဒေန္တိယာပိ နစ္စန္တိ၊ ဝါဒေန္တိယာပိ ဂါယန္တိ၊ ဝါဒေန္တိယာပိ ဝါဒေန္တိ၊ ဝါဒေန္တိယာပိ လာသေန္တိ၊ လာသေန္တိယာပိ နစ္စန္တိ၊ လာသေန္တိယာပိ ဂါယန္တိ၊ လာသေန္တိယာပိ ဝါဒေန္တိ၊ လာသေန္တိယာပိ လာသေန္တိ၊ အဋ္ဌပဒေပိ ကီဠန္တိ၊ ဒသပဒေပိ ကီဠန္တိ၊ အာကာသေပိ ကီဠန္တိ၊ ပရိဟာရပထေပိ ကီဠန္တိ၊ သန္တိကာယပိ ကီဠန္တိ၊ ခလိကာယပိ ကီဠန္တိ၊ ဃဋိကာယပိ ကီဠန္တိ၊ သလာကဟတ္ထေနပိ ကီဠန္တိ၊ အက္ခေနပိ ကီဠန္တိ၊ ပင်္ဂစီရေနပိ ကီဠန္တိ၊ ဝင်္ကကေနပိ ကီဠန္တိ၊ မောက္ခစိကာယပိ ကီဠန္တိ၊ စိင်္ဂုလကေနပိ ကီဠန္တိ၊ ပတ္တာဠှကေနပိ ကီဠန္တိ၊ ရထကေနပိ ကီဠန္တိ၊ ဓနုကေနပိ ကီဠန္တိ၊ အက္ခရိကာယပိ ကီဠန္တိ၊ မနေသိကာယပိ ကီဠန္တိ၊ ယထာဝဇ္ဇေနပိ ကီဠန္တိ၊ ဟတ္ထိသ္မိမ္ပိ သိက္ခန္တိ၊ အဿသ္မိမ္ပိ သိက္ခန္တိ၊ ရထသ္မိမ္ပိ သိက္ခန္တိ၊ ဓနုသ္မိမ္ပိ သိက္ခန္တိ၊ ထရုသ္မိမ္ပိ သိက္ခန္တိ၊ ဟတ္ထိဿပိ ပုရတော ဓာဝန္တိ၊ အဿဿပိ ပုရတော ဓာဝန္တိ၊ ရထဿပိ ပုရတော [ပုရတော ဓာဝန္တိ (သျာ။)] ဓာဝန္တိပိ အာဓာဝန္တိပိ၊ ဥဿေဠေန္တိပိ၊ အပ္ဖောဋေန္တိပိ ¶ ၊ နိဗ္ဗုဇ္ဈန္တိပိ၊ မုဋ္ဌီဟိပိ ယုဇ္ဈန္တိ၊ ရင်္ဂမဇ္ဈေပိ သင်္ဃာဋိံ ပတ္ထရိတွာ နစ္စကိံ [နစ္စန္တိံ (သီ။ သျာ။)] ဧဝံ ဝဒန္တိ – ‘‘ဣဓ၊ ဘဂိနိ၊ နစ္စဿူ’’တိ၊ နလာဋိကမ္ပိ ဒေန္တိ၊ ဝိဝိဓမ္ပိ အနာစာရံ အာစရန္တိ။

၂၂။ တေန ¶ ခေါ ပန သမယေန အညတရော ဘိက္ခု ကာသီသု ဝဿံဝုဋ္ဌော [ဝဿံဝုတ္ထော (သီ။ သျာ။)] သာဝတ္ထိံ ဂစ္ဆန္တော ဘဂဝန္တံ ဒဿနာယ ယေန ကီဋာဂိရိ တဒဝသရိ။ အထ ခေါ သော ဘိက္ခု ပုဗ္ဗဏှသမယံ နိဝါသေတွာ ပတ္တစီဝရမာဒါယ ကီဋာဂိရိံ ပိဏ္ဍာယ ပါဝိသိ ပါသာဒိကေန အဘိက္ကန္တေန ပဋိက္ကန္တေန ¶ အာလောကိတေန ဝိလောကိတေန သမိဉ္ဇိတေန [သမ္မိဉ္ဇိတေန (သီ။ သျာ။ ကံ။)] ပသာရိတေန၊ ဩက္ခိတ္တစက္ခု ဣရိယာပထသမ္ပန္နော။ မနုဿာ တံ ဘိက္ခုံ ပဿိတွာ ဧဝမာဟံသု – ‘‘ကွာယံ အဗလဗလော ¶ ဝိယ မန္ဒမန္ဒော ဝိယ ဘာကုဋိကဘာကုဋိကော ဝိယ? ကော ဣမဿ ဥပဂတဿ ပိဏ္ဍကမ္ပိ ဒဿတိ? အမှာကံ ပန အယျာ အဿဇိပုနဗ္ဗသုကာ သဏှာ သခိလာ သုခသမ္ဘာသာ မိဟိတပုဗ္ဗင်္ဂမာ ဧဟိသွာဂတဝါဒိနော အဗ္ဘာကုဋိကာ ဥတ္တာနမုခါ ပုဗ္ဗဘာသိနော။ တေသံ ခေါ နာမ ပိဏ္ဍော ဒါတဗ္ဗော’’တိ။

အဒ္ဒသာ ခေါ အညတရော ဥပါသကော တံ ဘိက္ခုံ ကီဋာဂိရိသ္မိံ ပိဏ္ဍာယ စရန္တံ၊ ဒိသွာန ယေန သော ဘိက္ခု တေနုပသင်္ကမိ၊ ဥပသင်္ကမိတွာ တံ ဘိက္ခုံ အဘိဝါဒေတွာ ဧတဒဝေါစ – ‘‘အပိ၊ ဘန္တေ၊ ပိဏ္ဍော လဗ္ဘတီ’’တိ? ‘‘န ခေါ၊ အာဝုသော၊ ပိဏ္ဍော လဗ္ဘတီ’’တိ။ ‘‘ဧဟိ၊ ဘန္တေ၊ ဃရံ ဂမိဿာမာ’’တိ။ အထ ခေါ သော ဥပါသကော တံ ဘိက္ခုံ ဃရံ နေတွာ ဘောဇေတွာ ဧတဒဝေါစ – ‘‘ကဟံ၊ ဘန္တေ၊ အယျော ဂမိဿတီ’’တိ? ‘‘သာဝတ္ထိံ ¶ ခေါ အဟံ၊ အာဝုသော၊ ဂမိဿာမိ ဘဂဝန္တံ ဒဿနာယာ’’တိ။ ‘‘တေန ဟိ၊ ဘန္တေ၊ မမ ဝစနေန ဘဂဝတော ပါဒေ သိရသာ ဝန္ဒ၊ ဧဝဉ္စ ဝဒေဟိ – ‘ဒုဋ္ဌော၊ ဘန္တေ၊ ကီဋာဂိရိသ္မိံ အာဝါသော။ အဿဇိပုနဗ္ဗသုကာ နာမ ကီဋာဂိရိသ္မိံ အာဝါသိကာ အလဇ္ဇိနော ပါပဘိက္ခူ။ တေ ဧဝရူပံ အနာစာရံ အာစရန္တိ – မာလာဝစ္ဆံ ရောပေန္တိပိ ရောပါပေန္တိပိ၊ သိဉ္စန္တိပိ သိဉ္စာပေန္တိပိ၊ ဩစိနန္တိပိ၊ ဩစိနာပေန္တိပိ၊ ဂန္ထေန္တိပိ ဂန္ထာပေန္တိပိ၊ ဧကတောဝဏ္ဋိကမာလံ ကရောန္တိပိ ကာရာပေန္တိပိ၊ ဥဘတောဝဏ္ဋိကမာလံ ကရောန္တိပိ ကာရာပေန္တိပိ၊ မဉ္ဇရိကံ ကရောန္တိပိ ကာရာပေန္တိပိ၊ ဝိဓူတိကံ ကရောန္တိပိ ကာရာပေန္တိပိ၊ ဝဋံသကံ ကရောန္တိပိ ကာရာပေန္တိပိ၊ အာဝေဠံ ကရောန္တိပိ ကာရာပေန္တိပိ၊ ဥရစ္ဆဒံ ကရောန္တိပိ ကာရာပေန္တိပိ။ တေ ကုလိတ္ထီနံ ကုလဓီတာနံ ကုလကုမာရီနံ ကုလသုဏှာနံ ကုလဒါသီနံ ဧကတောဝဏ္ဋိကမာလံ ဟရန္တိပိ ဟရာပေန္တိပိ၊ ဥဘတောဝဏ္ဋိကမာလံ ဟရန္တိပိ ဟရာပေန္တိပိ၊ မဉ္ဇရိကံ ဟရန္တိပိ ဟရာပေန္တိပိ၊ ဝိဓူတိကံ ¶ ဟရန္တိပိ ဟရာပေန္တိပိ၊ ဝဋံသကံ ဟရန္တိပိ ဟရာပေန္တိပိ၊ အာဝေဠံ ဟရန္တိပိ ဟရာပေန္တိပိ၊ ဥရစ္ဆဒံ ဟရန္တိပိ ဟရာပေန္တိပိ။ တေ ကုလိတ္ထီဟိ ကုလဓီတာဟိ ကုလကုမာရီဟိ ကုလသုဏှာဟိ ကုလဒါသီဟိ သဒ္ဓိံ ဧကဘာဇနေပိ ဘုဉ္ဇန္တိ၊ ဧကထာလကေပိ ပိဝန္တိ၊ ဧကာသနေပိ နိသီဒန္တိ၊ ဧကမဉ္စေပိ တုဝဋ္ဋေန္တိ၊ ဧကတ္ထရဏာပိ တုဝဋ္ဋေန္တိ၊ ဧကပါဝုရဏာပိ တုဝဋ္ဋေန္တိ၊ ဧကတ္ထရဏပါဝုရဏာပိ တုဝဋ္ဋေန္တိ၊ ဝိကာလေပိ ဘုဉ္ဇန္တိ၊ မဇ္ဇမ္ပိ ပိဝန္တိ၊ မာလာဂန္ဓဝိလေပနမ္ပိ ဓာရေန္တိ၊ နစ္စန္တိပိ၊ ဂါယန္တိပိ၊ ဝါဒေန္တိပိ၊ လာသေန္တိပိ၊ နစ္စန္တိယာပိ ¶ နစ္စန္တိ၊ နစ္စန္တိယာပိ ဂါယန္တိ၊ နစ္စန္တိယာပိ ဝါဒေန္တိ၊ နစ္စန္တိယာပိ လာသေန္တိ…ပေ… (စက္ကံ ကာတဗ္ဗံ)။ လာသေန္တိယာပိ နစ္စန္တိ၊ လာသေန္တိယာပိ ဂါယန္တိ၊ လာသေန္တိယာပိ ဝါဒေန္တိ၊ လာသေန္တိယာပိ လာသေန္တိ၊ အဋ္ဌပဒေပိ ကီဠန္တိ၊ ဒသပဒေပိ ကီဠန္တိ၊ အာကာသေပိ ¶ ကီဠန္တိ၊ ပရိဟာရပထေပိ ကီဠန္တိ၊ သန္တိကာယပိ ကီဠန္တိ၊ ခလိကာယပိ ကီဠန္တိ၊ ဃဋိကာယပိ ကီဠန္တိ၊ သလာကဟတ္ထေနပိ ကီဠန္တိ၊ အက္ခေနပိ ကီဠန္တိ၊ ပင်္ဂစီရေနပိ ကီဠန္တိ၊ ဝင်္ကကေနပိ ကီဠန္တိ၊ မောက္ခစိကာယပိ ကီဠန္တိ၊ စိင်္ဂုလကေနပိ ကီဠန္တိ၊ ပတ္တာဠှကေနပိ ကီဠန္တိ၊ ရထကေနပိ ကီဠန္တိ၊ ဓနုကေနပိ ကီဠန္တိ၊ အက္ခရိကာယပိ ကီဠန္တိ၊ မနေသိကာယပိ ကီဠန္တိ၊ ယထာဝဇ္ဇေနပိ ကီဠန္တိ၊ ဟတ္ထိသ္မိမ္ပိ သိက္ခန္တိ၊ အဿသ္မိမ္ပိ သိက္ခန္တိ၊ ရထသ္မိမ္ပိ သိက္ခန္တိ၊ ဓနုသ္မိမ္ပိ သိက္ခန္တိ၊ ထရုသ္မိမ္ပိ သိက္ခန္တိ၊ ဟတ္ထိဿပိ ပုရတော ဓာဝန္တိ၊ အဿဿပိ ပုရတော ဓာဝန္တိ၊ ရထဿပိ ပုရတော ဓာဝန္တိပိ အာဓာဝန္တိပိ၊ ဥဿေဠေန္တိပိ၊ အပ္ဖောဋေန္တိပိ၊ နိဗ္ဗုဇ္ဈန္တိပိ၊ မုဋ္ဌီဟိပိ ယုဇ္ဈန္တိ၊ ရင်္ဂမဇ္ဈေပိ သင်္ဃာဋိံ ပတ္ထရိတွာ နစ္စကိံ ဧဝံ ဝဒန္တိ – ‘ဣဓ၊ ဘဂိနိ၊ နစ္စဿူ’တိ၊ နလာဋိကမ္ပိ ဒေန္တိ၊ ဝိဝိဓမ္ပိ အနာစာရံ အာစရန္တိ။ ယေပိ တေ၊ ဘန္တေ၊ မနုဿာ ပုဗ္ဗေ သဒ္ဓါ အဟေသုံ ပသန္နာ တေပိ ဧတရဟိ အဿဒ္ဓါ အပ္ပသန္နာ။ ယာနိပိ တာနိ သင်္ဃဿ ပုဗ္ဗေ ဒါနပထာနိ တာနိပိ ဧတရဟိ ဥပစ္ဆိန္နာနိ။ ရိဉ္စန္တိ ပေသလာ ဘိက္ခူ ¶ ၊ နိဝသန္တိ ပါပဘိက္ခူ။ သာဓု၊ ဘန္တေ၊ ဘဂဝါ ကီဋာဂိရိံ ဘိက္ခူ ပဟိဏေယျ၊ ယထာယံ ကီဋာဂိရိသ္မိံ အာဝါသော သဏ္ဌဟေယျာ’’တိ။

‘‘ဧဝမာဝုသော’’တိ ခေါ သော ဘိက္ခု တဿ ဥပါသကဿ ပဋိဿုဏိတွာ ဥဋ္ဌာယာသနာ ယေန သာဝတ္ထိ တေန ပက္ကာမိ။ အနုပုဗ္ဗေန ယေန သာဝတ္ထိ ဇေတဝနံ အနာထပိဏ္ဍိကဿ အာရာမော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ အာစိဏ္ဏံ ခေါ ပနေတံ ဗုဒ္ဓါနံ ဘဂဝန္တာနံ အာဂန္တုကေဟိ ဘိက္ခူဟိ သဒ္ဓိံ ပဋိသမ္မောဒိတုံ။ အထ ¶ ခေါ ဘဂဝါ တံ ဘိက္ခုံ ဧတဒဝေါစ – ‘‘ကစ္စိ၊ ဘိက္ခု၊ ခမနီယံ၊ ကစ္စိ ယာပနီယံ၊ ကစ္စိသိ အပ္ပကိလမထေန အဒ္ဓါနံ အာဂတော၊ ကုတော စ တွံ ဘိက္ခု အာဂစ္ဆသီ’’တိ? ‘‘ခမနီယံ၊ ဘဂဝါ၊ ယာပနီယံ ဘဂဝါ၊ အပ္ပကိလမထေန စ အဟံ၊ ဘန္တေ၊ အဒ္ဓါနံ အာဂတော။ ဣဓာဟံ၊ ဘန္တေ၊ ကာသီသု ဝဿံဝုဋ္ဌော သာဝတ္ထိံ အာဂစ္ဆန္တော ဘဂဝန္တံ ဒဿနာယ ယေန ကီဋာဂိရိ တဒဝသရိံ။ အထ ခွာဟံ၊ ဘန္တေ၊ ပုဗ္ဗဏှသမယံ နိဝါသေတွာ ပတ္တစီဝရမာဒါယ ကီဋာဂိရိံ ပိဏ္ဍာယ ပါဝိသိံ။ အဒ္ဒသာ ခေါ မံ၊ ဘန္တေ၊ အညတရော ဥပါသကော ကီဋာဂိရိသ္မိံ ပိဏ္ဍာယ စရန္တံ ¶ ၊ ဒိသွာန ယေနာဟံ တေနုပသင်္ကမိ၊ ဥပသင်္ကမိတွာ မံ အဘိဝါဒေတွာ ဧတဒဝေါစ – ‘အပိ၊ ဘန္တေ၊ ပိဏ္ဍော လဗ္ဘတီ’တိ။ ‘န ခေါ၊ အာဝုသော၊ ပိဏ္ဍော လဗ္ဘတီ’တိ။ ‘ဧဟိ၊ ဘန္တေ၊ ဃရံ ဂမိဿာမာ’တိ။ အထ ခေါ၊ ဘန္တေ၊ သော ဥပါသကော မံ ဃရံ နေတွာ ဘောဇေတွာ ဧတဒဝေါစ – ‘ကဟံ၊ ဘန္တေ၊ အယျော ဂမိဿတီ’တိ? ‘သာဝတ္ထိံ ခေါ အဟံ၊ အာဝုသော၊ ဂမိဿာမိ ဘဂဝန္တံ ဒဿနာယာ’တိ ¶ ။ ‘တေန ဟိ၊ ဘန္တေ၊ မမ ဝစနေန ဘဂဝတော ပါဒေ သိရသာ ဝန္ဒ၊ ဧဝဉ္စ ဝဒေဟိ – ဒုဋ္ဌော၊ ဘန္တေ၊ ကီဋာဂိရိသ္မိံ အာဝါသော။ အဿဇိပုနဗ္ဗသုကာ နာမ ကီဋာဂိရိသ္မိံ အာဝါသိကာ အလဇ္ဇိနော ပါပဘိက္ခူ ¶ ။ တေ ဧဝရူပံ အနာစာရံ အာစရန္တိ – မာလာဝစ္ဆံ ရောပေန္တိပိ ရောပါပေန္တိပိ…ပေ… ဝိဝိဓမ္ပိ အနာစာရံ အာစရန္တိ။ ယေပိ တေ၊ ဘန္တေ၊ မနုဿာ ပုဗ္ဗေ သဒ္ဓါ အဟေသုံ ပသန္နာ တေပိ ဧတရဟိ အဿဒ္ဓါ အပ္ပသန္နာ။ ယာနိပိ တာနိ သင်္ဃဿ ပုဗ္ဗေ ဒါနပထာနိ တာနိပိ ဧတရဟိ ဥပစ္ဆိန္နာနိ။ ရိဉ္စန္တိ ပေသလာ ဘိက္ခူ၊ နိဝသန္တိ ပါပဘိက္ခူ။ သာဓု၊ ဘန္တေ၊ ဘဂဝါ ကီဋာဂိရိံ ဘိက္ခူ ပဟိဏေယျ၊ ယထာယံ ကီဋာဂိရိသ္မိံ အာဝါသော သဏ္ဌဟေယျာ’တိ။ တတော အဟံ ဘဂဝါ အာဂစ္ဆာမီ’’တိ။

၂၃။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသင်္ဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ၊ ဘိက္ခဝေ၊ အဿဇိပုနဗ္ဗသုကာ နာမ ကီဋာဂိရိသ္မိံ အာဝါသိကာ အလဇ္ဇိနော ပါပဘိက္ခူ? တေ ဧဝရူပံ အနာစာရံ အာစရန္တိ – မာလာဝစ္ဆံ ရောပေန္တိပိ…ပေ… ဝိဝိဓမ္ပိ အနာစာရံ အာစရန္တိ? ယေပိ တေ မနုဿာ ပုဗ္ဗေ သဒ္ဓါ အဟေသုံ ပသန္နာ တေပိ ဧတရဟိ အဿဒ္ဓါ အပ္ပသန္နာ? ယာနိပိ တာနိ သင်္ဃဿ ပုဗ္ဗေ ဒါနပထာနိ တာနိပိ ဧတရဟိ ဥပစ္ဆိန္နာနိ? ရိဉ္စန္တိ ပေသလာ ဘိက္ခူ နိဝသန္တိ ပါပဘိက္ခူ’’တိ? ‘‘သစ္စံ ဘဂဝါ’’တိ။ ဝိဂရဟိ ဗုဒ္ဓါ ဘဂဝါ – ‘‘အနနုစ္ဆဝိကံ…ပေ… ကထဉှိ နာမ တေ၊ ဘိက္ခဝေ ¶ ၊ မောဃပုရိသာ ဧဝရူပံ အနာစာရံ ¶ အာစရိဿန္တိ – မာလာဝစ္ဆံ ရောပေဿန္တိပိ ရောပါပေဿန္တိပိ၊ သိဉ္စိဿန္တိပိ သိဉ္စာပေဿန္တိပိ၊ ဩစိနိဿန္တိပိ ဩစိနာပေဿန္တိပိ၊ ဂန္ထေဿန္တိပိ ဂန္ထာပေဿန္တိပိ၊ ဧကတောဝဏ္ဋိကမာလံ ကရိဿန္တိပိ ကာရာပေဿန္တိပိ၊ ဥဘတောဝဏ္ဋိကမာလံ ကရိဿန္တိပိ ကာရာပေဿန္တိပိ၊ မဉ္ဇရိကံ ကရိဿန္တိပိ ကာရာပေဿန္တိပိ၊ ဝိဓူတိကံ ကရိဿန္တိပိ ကာရာပေဿန္တိပိ၊ ဝဋံသကံ ကရိဿန္တိပိ ကာရာပေဿန္တိပိ၊ အာဝေဠံ ကရိဿန္တိပိ ကာရာပေဿန္တိပိ၊ ဥရစ္ဆဒံ ကရိဿန္တိပိ ကာရာပေဿန္တိပိ။ တေ ကုလိတ္ထီနံ ကုလဓီတာနံ ကုလကုမာရီနံ ကုလသုဏှာနံ ကုလဒါသီနံ ဧကတောဝဏ္ဋိကမာလံ ဟရိဿန္တိပိ ဟရာပေဿန္တိပိ၊ ဥဘတောဝဏ္ဋိကမာလံ ဟရိဿန္တိပိ ဟရာပေဿန္တိပိ၊ မဉ္ဇရိကံ ဟရိဿန္တိပိ ဟရာပေဿန္တိပိ၊ ဝိဓူတိကံ ဟရိဿန္တိပိ ဟရာပေဿန္တိပိ၊ ဝဋံသကံ ဟရိဿန္တိပိ ဟရာပေဿန္တိပိ၊ အာဝေဠံ ဟရိဿန္တိပိ ဟရာပေဿန္တိပိ၊ ဥရစ္ဆဒံ ဟရိဿန္တိပိ ဟရာပေဿန္တိပိ။ တေ ကုလိတ္ထီဟိ ကုလဓီတာဟိ ကုလကုမာရီဟိ ကုလသုဏှာဟိ ကုလဒါသီဟိ သဒ္ဓိံ ဧကဘာဇနေပိ ဘုဉ္ဇိဿန္တိ၊ ဧကထာလကေပိ ပိဝိဿန္တိ၊ ဧကာသနေပိ နိသီဒိဿန္တိ၊ ဧကမဉ္စေပိ တုဝဋ္ဋိဿန္တိ၊ ဧကတ္ထရဏာပိ တုဝဋ္ဋိဿန္တိ၊ ဧကပါဝုရဏာပိ တုဝဋ္ဋိဿန္တိ၊ ဧကတ္ထရဏပါဝုရဏာပိ တုဝဋ္ဋိဿန္တိ၊ ဝိကာလေပိ ဘုဉ္ဇိဿန္တိ၊ မဇ္ဇမ္ပိ ပိဝိဿန္တိ၊ မာလာဂန္ဓဝိလေပနမ္ပိ ဓာရေဿန္တိ၊ နစ္စိဿန္တိပိ၊ ဂါယိဿန္တိပိ၊ ဝါဒေဿန္တိပိ၊ လာသေဿန္တိပိ၊ နစ္စန္တိယာပိ နစ္စိဿန္တိ၊ နစ္စန္တိယာပိ ဂါယိဿန္တိ၊ နစ္စန္တိယာပိ ဝါဒေဿန္တိ၊ နစ္စန္တိယာပိ လာသေဿန္တိ၊ ဂါယန္တိယာပိ နစ္စိဿန္တိ ¶ ¶ ၊ ဂါယန္တိယာပိ ဂါယိဿန္တိ၊ ဂါယန္တိယာပိ ဝါဒေဿန္တိ၊ ဂါယန္တိယာပိ လာသေဿန္တိ၊ ဝါဒေန္တိယာပိ နစ္စိဿန္တိ၊ ဝါဒေန္တိယာပိ ဂါယိဿန္တိ၊ ဝါဒေန္တိယာပိ ဝါဒေဿန္တိ၊ ဝါဒေန္တိယာပိ လာသေဿန္တိ၊ လာသေန္တိယာပိ နစ္စိဿန္တိ၊ လာသေန္တိယာပိ ဂါယိဿန္တိ၊ လာသေန္တိယာပိ ဝါဒေဿန္တိ၊ လာသေန္တိယာပိ လာသေဿန္တိ၊ အဋ္ဌပဒေပိ ကီဠိဿန္တိ၊ ဒသပဒေပိ ကီဠိဿန္တိ၊ အာကာသေပိ ကီဠိဿန္တိ၊ ပရိဟာရပထေပိ ကီဠိဿန္တိ၊ သန္တိကာယပိ ကီဠိဿန္တိ၊ ခလိကာယပိ ကီဠိဿန္တိ၊ ဃဋိကာယပိ ကီဠိဿန္တိ၊ သလာကဟတ္ထေနပိ ကီဠိဿန္တိ၊ အက္ခေနပိ ကီဠိဿန္တိ၊ ပင်္ဂစီရေနပိ ကီဠိဿန္တိ၊ ဝင်္ကကေနပိ ကီဠိဿန္တိ မောက္ခစိကာယပိ ကီဠိဿန္တိ၊ စိင်္ဂုလကေနပိ ကီဠိဿန္တိ၊ ပတ္တာဠှကေနပိ ကီဠိဿန္တိ၊ ရထကေနပိ ကီဠိဿန္တိ၊ ဓနုကေနပိ ကီဠိဿန္တိ၊ အက္ခရိကာယပိ ကီဠိဿန္တိ၊ မနေသိကာယပိ ကီဠိဿန္တိ၊ ယထာဝဇ္ဇေနပိ ကီဠိဿန္တိ၊ ဟတ္ထိသ္မိမ္ပိ သိက္ခိဿန္တိ၊ အဿသ္မိမ္ပိ သိက္ခိဿန္တိ၊ ရထသ္မိမ္ပိ သိက္ခိဿန္တိ၊ ဓနုသ္မိမ္ပိ သိက္ခိဿန္တိ၊ ထရုသ္မိမ္ပိ သိက္ခိဿန္တိ၊ ဟတ္ထိဿပိ ပုရတော ဓာဝိဿန္တိ ¶ ၊ အဿဿပိ ပုရတော ဓာဝိဿန္တိ၊ ရထဿပိ ပုရတော [ပုရတော ဓာဝိဿန္တိ (သျာ။)] ဓာဝိဿန္တိပိ အာဓာဝိဿန္တိပိ၊ ဥဿေဠေဿန္တိပိ၊ အပ္ဖောဋေဿန္တိပိ၊ နိဗ္ဗုဇ္ဈိဿန္တိပိ၊ မုဋ္ဌီဟိပိ ယုဇ္ဈိဿန္တိ၊ ရင်္ဂမဇ္ဈေပိ သင်္ဃာဋိံ ပတ္ထရိတွာ နစ္စကိံ ဧဝံ ဝက္ခန္တိ [ဝဒိဿန္တိ (က။)] – ‘ဣဓ၊ ဘဂိနိ၊ နစ္စဿူ’တိ၊ နလာဋိကမ္ပိ ဒဿန္တိ၊ ဝိဝိဓမ္ပိ အနာစာရံ အာစရိဿန္တိ။ နေတံ ¶ ၊ ဘိက္ခဝေ၊ အပ္ပသန္နာနံ ဝါ ပသာဒါယ…ပေ… ဝိဂရဟိတွာ…ပေ… ဓမ္မိံ ကထံ ကတွာ သာရိပုတ္တမောဂ္ဂလ္လာနေ အာမန္တေသိ – ‘‘ဂစ္ဆထ တုမှေ၊ သာရိပုတ္တာ၊ ကီဋာဂိရိံ ဂန္တွာ အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ ကရောထ၊ တုမှာကံ ဧတေ သဒ္ဓိဝိဟာရိနော’’တိ။

‘‘ကထံ မယံ၊ ဘန္တေ၊ အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ ကရောမ၊ စဏ္ဍာ တေ ဘိက္ခူ ဖရုသာ’’တိ? ‘‘တေန ဟိ တုမှေ၊ သာရိပုတ္တာ၊ ဗဟုကေဟိ ဘိက္ခူဟိ သဒ္ဓိံ ဂစ္ဆထာ’’တိ။ ‘‘ဧဝံ၊ ဘန္တေ’’တိ ခေါ သာရိပုတ္တမောဂ္ဂလ္လာနာ ဘဂဝတော ပစ္စဿောသုံ။ ဧဝဉ္စ ပန၊ ဘိက္ခဝေ၊ ကာတဗ္ဗံ – ပဌမံ အဿဇိပုနဗ္ဗသုကာ ဘိက္ခူ ¶ စောဒေတဗ္ဗာ၊ စောဒေတွာ သာရေတဗ္ဗာ၊ သာရေတွာ အာပတ္တိံ အာရောပေတဗ္ဗာ၊ အာပတ္တိံ အာရောပေတွာ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၂၄။ ‘‘သုဏာတု မေ၊ ဘန္တေ၊ သင်္ဃော။ ဣမေ အဿဇိပုနဗ္ဗသုကာ ဘိက္ခူ ကုလဒူသကာ ပါပသမာစာရာ။ ဣမေသံ ပါပကာ သမာစာရာ ဒိဿန္တိ စေဝ သုယျန္တိ စ။ ကုလာနိ စ ဣမေဟိ ဒုဋ္ဌာနိ ဒိဿန္တိ စေဝ သုယျန္တိ စ။ ယဒိ သင်္ဃဿ ပတ္တကလ္လံ၊ သင်္ဃော အဿဇိပုနဗ္ဗသုကာနံ ဘိက္ခူနံ ¶ ကီဋာဂိရိသ္မာ ပဗ္ဗာဇနီယကမ္မံ ကရေယျ – န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗန္တိ။ ဧသာ ဉတ္တိ။

‘‘သုဏာတု ¶ မေ၊ ဘန္တေ၊ သင်္ဃော။ ဣမေ အဿဇိပုနဗ္ဗသုကာ ဘိက္ခူ ကုလဒူသကာ ပါပသမာစာရာ။ ဣမေသံ ပါပကာ သမာစာရာ ဒိဿန္တိ စေဝ သုယျန္တိ စ။ ကုလာနိ စ ဣမေဟိ ဒုဋ္ဌာနိ ဒိဿန္တိ စေဝ သုယျန္တိ စ။ သင်္ဃော အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ ကရောတိ – န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗန္တိ။ ယဿာယသ္မတော ခမတိ အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယဿ ကမ္မဿ ကရဏံ – န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗန္တိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ¶ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ။ သုဏာတု မေ၊ ဘန္တေ၊ သင်္ဃော။ ဣမေ အဿဇိပုနဗ္ဗသုကာ ဘိက္ခူ ကုလဒူသကာ ပါပသမာစာရာ။ ဣမေသံ ပါပကာ သမာစာရာ ဒိဿန္တိ စေဝ သုယျန္တိ စ။ ကုလာနိ စ ဣမေဟိ ဒုဋ္ဌာနိ ဒိဿန္တိ စေဝ သုယျန္တိ စ။ သင်္ဃော အဿဇိပုနဗ္ဗသုကာနံ ¶ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ ကရောတိ – န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗန္တိ။ ယဿာယသ္မတော ခမတိ အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယဿ ကမ္မဿ ကရဏံ – န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗန္တိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ကတံ သင်္ဃေန အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ – န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗန္တိ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

အဓမ္မကမ္မဒွါဒသကံ

၂၅။ ‘‘တီဟိ၊ ဘိက္ခဝေ၊ အင်္ဂေဟိ သမန္နာဂတံ ပဗ္ဗာဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အသမ္မုခါ ကတံ ဟောတိ၊ အပ္ပဋိပုစ္ဆာ ကတံ ဟောတိ၊ အပ္ပဋိညာယ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ ပဗ္ဗာဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ ¶ ၊ ဘိက္ခဝေ၊ တီဟင်္ဂေဟိ သမန္နာဂတံ ပဗ္ဗာဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အနာပတ္တိယာ ကတံ ဟောတိ၊ အဒေသနာဂါမိနိယာ အာပတ္တိယာ ကတံ ဟောတိ၊ ဒေသိတာယ အာပတ္တိယာ ကတံ ဟောတိ…ပေ… ¶ အစောဒေတွာ ကတံ ဟောတိ၊ အသာရေတွာ ကတံ ဟောတိ၊ အာပတ္တိံ အနာရောပေတွာ ကတံ ဟောတိ…ပေ… အသမ္မုခါ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အပ္ပဋိပုစ္ဆာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အပ္ပဋိညာယ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အနာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အဒေသနာဂါမိနိယာ အာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… ဒေသိတာယ အာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အစောဒေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ ¶ …ပေ… အသာရေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အာပတ္တိံ အနာရောပေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ ပဗ္ဗာဇနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

အဓမ္မကမ္မဒွါဒသကံ နိဋ္ဌိတံ။

ဓမ္မကမ္မဒွါဒသကံ

၂၆။ ‘‘တီဟိ၊ ဘိက္ခဝေ၊ အင်္ဂေဟိ သမန္နာဂတံ ပဗ္ဗာဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ သမ္မုခါ ကတံ ဟောတိ၊ ပဋိပုစ္ဆာ ¶ ကတံ ဟောတိ၊ ပဋိညာယ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ ပဗ္ဗာဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ ပဗ္ဗာဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ အာပတ္တိယာ ကတံ ဟောတိ ဒေသနာဂါမိနိယာ အာပတ္တိယာ ကတံ ဟောတိ အဒေသိတာယ အာပတ္တိယာ ကတံ ဟောတိ…ပေ… စောဒေတွာ ကတံ ဟောတိ၊ သာရေတွာ ကတံ ဟောတိ၊ အာပတ္တိံ အာရောပေတွာ ကတံ ဟောတိ…ပေ… သမ္မုခါ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ပဋိပုစ္ဆာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ပဋိညာယ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ¶ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ဒေသနာဂါမိနိယာ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… အဒေသိတာယ အာပတ္တိယာ ကတံ ဟောတိ၊ ဓမ္မေန ¶ ကတံ ဟောတိ၊ သမဂ္ဂေန ကတံ ဟောတိ…ပေ… စောဒေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… သာရေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ¶ အာပတ္တိံ အာရောပေတွာ ကတံ ဟောတိ၊ ဓမ္မေန ကတံ ¶ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ ပဗ္ဗာဇနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

ဓမ္မကမ္မဒွါဒသကံ နိဋ္ဌိတံ။

အာကင်္ခမာနစုဒ္ဒသကံ

၂၇။ [ပရိ။ ၃၂၃] ‘‘တီဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။ ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သင်္ဃေ အဓိကရဏကာရကော၊ ဗာလော ဟောတိ အဗျတ္တော အာပတ္တိဗဟုလော အနပဒါနော၊ ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။ အဓိသီလေ သီလဝိပန္နော ဟောတိ၊ အဇ္ဈာစာရေ အာစာရဝိပန္နော ဟောတိ၊ အတိဒိဋ္ဌိယာ ဒိဋ္ဌိဝိပန္နော ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။ ဗုဒ္ဓဿ အဝဏ္ဏံ ဘာသတိ၊ ဓမ္မဿ အဝဏ္ဏံ ဘာသတိ၊ သင်္ဃဿ အဝဏ္ဏံ ဘာသတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။

‘‘အပရေဟိပိ ¶ ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။ ကာယိကေန ဒဝေန သမန္နာဂတော ဟောတိ၊ ဝါစသိကေန ဒဝေန သမန္နာဂတော ဟောတိ၊ ကာယိကဝါစသိကေန ဒဝေန သမန္နာဂတော ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။

‘‘အပရေဟိပိ ¶ ¶ ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။ ကာယိကေန အနာစာရေန သမန္နာဂတော ဟောတိ၊ ဝါစသိကေန အနာစာရေန သမန္နာဂတော ဟောတိ၊ ကာယိကဝါစသိကေန အနာစာရေန သမန္နာဂတော ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။ ကာယိကေန ဥပဃာတိကေန သမန္နာဂတော ဟောတိ၊ ဝါစသိကေန ဥပဃာတိကေန သမန္နာဂတော ဟောတိ၊ ကာယိကဝါစသိကေန ဥပဃာတိကေန သမန္နာဂတော ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။ ကာယိကေန မိစ္ဆာဇီဝေန သမန္နာဂတော ဟောတိ၊ ဝါစသိကေန မိစ္ဆာဇီဝေန သမန္နာဂတော ဟောတိ၊ ကာယိကဝါစသိကေန ¶ မိစ္ဆာဇီဝေန သမန္နာဂတော ဟောတိ – ဣမေဟိ၊ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။

‘‘တိဏ္ဏံ၊ ဘိက္ခဝေ၊ ဘိက္ခူနံ ¶ ၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။ ဧကော ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သင်္ဃေ အဓိကရဏကာရကော၊ ဧကော ဗာလော ဟောတိ အဗျတ္တော အာပတ္တိဗဟုလော အနပဒါနော၊ ဧကော ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။

‘‘အပရေသမ္ပိ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။ ဧကော အဓိသီလေ သီလဝိပန္နော ဟောတိ၊ ဧကော အဇ္ဈာစာရေ အာစာရဝိပန္နော ဟောတိ၊ ဧကော အတိဒိဋ္ဌိယာ ဒိဋ္ဌိဝိပန္နော ဟောတိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။

‘‘အပရေသမ္ပိ ¶ ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။ ဧကော ဗုဒ္ဓဿ အဝဏ္ဏံ ဘာသတိ၊ ဧကော ဓမ္မဿ အဝဏ္ဏံ ဘာသတိ၊ ဧကော သင်္ဃဿ အဝဏ္ဏံ ¶ ဘာသတိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။

‘‘အပရေသမ္ပိ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပဗ္ဗာဇနီယကမ္မံ ¶ ကရေယျ။ ဧကော ကာယိကေန ဒဝေန သမန္နာဂတော ဟောတိ၊ ဧကော ဝါစသိကေန ဒဝေန သမန္နာဂတော ဟောတိ၊ ဧကော ကာယိကဝါစသိကေန ဒဝေန သမန္နာဂတော ဟောတိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။

‘‘အပရေသမ္ပိ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။ ဧကော ကာယိကေန အနာစာရေန သမန္နာဂတော ဟောတိ၊ ဧကော ဝါစသိကေန အနာစာရေန သမန္နာဂတော ဟောတိ၊ ဧကော ကာယိကဝါစသိကေန အနာစာရေန သမန္နာဂတော ဟောတိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။

‘‘အပရေသမ္ပိ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။ ဧကော ကာယိကေန ဥပဃာတိကေန သမန္နာဂတော ဟောတိ၊ ဧကော ဝါစသိကေန ဥပဃာတိကေန သမန္နာဂတော ဟောတိ၊ ဧကော ကာယိကဝါစသိကေန ဥပဃာတိကေန သမန္နာဂတော ဟောတိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။

‘‘အပရေသမ္ပိ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။ ဧကော ကာယိကေန မိစ္ဆာဇီဝေန သမန္နာဂတော ဟောတိ၊ ဧကော ဝါစသိကေန မိစ္ဆာဇီဝေန သမန္နာဂတော ဟောတိ၊ ဧကော ကာယိကဝါစသိကေန မိစ္ဆာဇီဝေန သမန္နာဂတော ဟောတိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပဗ္ဗာဇနီယကမ္မံ ကရေယျ။

အာကင်္ခမာနစုဒ္ဒသကံ နိဋ္ဌိတံ။

အဋ္ဌာရသဝတ္တံ

၂၈။ ‘‘ပဗ္ဗာဇနီယကမ္မကတေန ¶ ¶ ၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ။ တတြာယံ သမ္မာဝတ္တနာ – န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနပိ ဘိက္ခုနိယော န ဩဝဒိတဗ္ဗာ။ ယာယ အာပတ္တိယာ သင်္ဃေန ပဗ္ဗာဇနီယကမ္မံ ကတံ ဟောတိ သာ အာပတ္တိ န အာပဇ္ဇိတဗ္ဗာ၊ အညာ ဝါ တာဒိသိကာ ¶ ၊ တတော ဝါ ပါပိဋ္ဌတရာ၊ ကမ္မံ န ဂရဟိတဗ္ဗံ၊ ကမ္မိကာ န ဂရဟိတဗ္ဗာ။ န ပကတတ္တဿ ဘိက္ခုနော ဥပေါသထော ဌပေတဗ္ဗော၊ န ပဝါရဏာ ဌပေတဗ္ဗာ၊ န သဝစနီယံ ကာတဗ္ဗံ၊ န အနုဝါဒေါ ပဋ္ဌပေတဗ္ဗော၊ န ဩကာသော ကာရေတဗ္ဗော၊ န စောဒေတဗ္ဗော၊ န သာရေတဗ္ဗော၊ န ဘိက္ခူဟိ သမ္ပယောဇေတဗ္ဗ’’န္တိ။

ပဗ္ဗာဇနီယကမ္မေ အဋ္ဌာရသဝတ္တံ နိဋ္ဌိတံ။

၂၉။ အထ ခေါ သာရိပုတ္တမောဂ္ဂလ္လာနပ္ပမုခေါ ဘိက္ခုသင်္ဃော ကီဋာဂိရိံ ဂန္တွာ အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ အကာသိ – န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗန္တိ။ တေ သင်္ဃေန ပဗ္ဗာဇနီယကမ္မကတာ န သမ္မာ ဝတ္တန္တိ၊ န လောမံ ပါတေန္တိ၊ န နေတ္ထာရံ ဝတ္တန္တိ၊ န ဘိက္ခူ ခမာပေန္တိ၊ အက္ကောသန္တိ၊ ပရိဘာသန္တိ၊ ဆန္ဒဂါမိတာ ဒေါသဂါမိတာ မောဟဂါမိတာ ဘယဂါမိတာ ပါပေန္တိ၊ ပက္ကမန္တိပိ၊ ဝိဗ္ဘမန္တိပိ။ ယေ တေ ဘိက္ခူ အပ္ပိစ္ဆာ…ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အဿဇိပုနဗ္ဗသုကာ ဘိက္ခူ သင်္ဃေန ပဗ္ဗာဇနီယကမ္မကတာ န သမ္မာ ဝတ္တိဿန္တိ၊ န လောမံ ပါတေဿန္တိ၊ န ¶ နေတ္ထာရံ ဝတ္တိဿန္တိ၊ န ဘိက္ခူ ခမာပေဿန္တိ၊ အက္ကောသိဿန္တိ၊ ပရိဘာသိဿန္တိ၊ ဆန္ဒဂါမိတာ ဒေါသဂါမိတာ မောဟဂါမိတာ ဘယဂါမိတာ ပါပေဿန္တိ၊ ပက္ကမိဿန္တိပိ၊ ဝိဗ္ဘမိဿန္တိပီ’’တိ။ အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။

အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသင်္ဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ၊ ဘိက္ခဝေ၊ အဿဇိပုနဗ္ဗသုကာ ဘိက္ခူ သင်္ဃေန ပဗ္ဗာဇနီယကမ္မကတာ န သမ္မာ ဝတ္တန္တိ၊ န လောမံ ပါတေန္တိ၊ န နေတ္ထာရံ ဝတ္တန္တိ၊ န ဘိက္ခူ ခမာပေန္တိ၊ အက္ကောသန္တိ၊ ပရိဘာသန္တိ၊ ဆန္ဒဂါမိတာ ဒေါသဂါမိတာ မောဟဂါမိတာ ဘယဂါမိတာ ပါပေန္တိ၊ ပက္ကမန္တိပိ၊ ဝိဗ္ဘမန္တိပီ’’တိ? ‘‘သစ္စံ ဘဂဝါ’’တိ။ ဝိဂရဟိ ဗုဒ္ဓါ ဘဂဝါ – ‘‘အနနုစ္ဆဝိကံ ¶ …ပေ… ကထဉှိ နာမ တေ၊ ဘိက္ခဝေ၊ မောဃပုရိသာ သင်္ဃေန ပဗ္ဗာဇနီယကမ္မကတာ န သမ္မာ ဝတ္တိဿန္တိ၊ န လောမံ ပါတေဿန္တိ၊ န နေတ္ထာရံ ဝတ္တိဿန္တိ၊ န ဘိက္ခူ ခမာပေဿန္တိ၊ အက္ကောသိဿန္တိ၊ ပရိဘာသိဿန္တိ၊ ဆန္ဒဂါမိတာ ဒေါသဂါမိတာ မောဟဂါမိတာ ဘယဂါမိတာ ပါပေဿန္တိ၊ ပက္ကမိဿန္တိပိ၊ ဝိဗ္ဘမိဿန္တိပိ။ နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ – ‘‘တေန ဟိ၊ ဘိက္ခဝေ၊ သင်္ဃော ပဗ္ဗာဇနီယကမ္မံ ပဋိပ္ပဿမ္ဘေတု။

နပ္ပဋိပ္ပဿမ္ဘေတဗ္ဗအဋ္ဌာရသကံ

၃၀။ ‘‘ပဉ္စဟိ ¶ ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော ¶ ပဗ္ဗာဇနီယကမ္မံ နပ္ပဋိပ္ပဿမ္ဘေတဗ္ဗံ။ ဥပသမ္ပာဒေတိ၊ နိဿယံ ဒေတိ၊ သာမဏေရံ ¶ ဥပဋ္ဌာပေတိ၊ ဘိက္ခုနောဝါဒကသမ္မုတိံ သာဒိယတိ၊ သမ္မတောပိ ဘိက္ခုနိယော ဩဝဒတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဗ္ဗာဇနီယကမ္မံ နပ္ပဋိပ္ပဿမ္ဘေတဗ္ဗံ။

[ပရိ။ ၄၂၀] ‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဗ္ဗာဇနီယကမ္မံ နပ္ပဋိပ္ပဿမ္ဘေတဗ္ဗံ။ ယာယ အာပတ္တိယာ သင်္ဃေန ပဗ္ဗာဇနီယကမ္မံ ကတံ ဟောတိ တံ အာပတ္တိံ အာပဇ္ဇတိ၊ အညံ ဝါ တာဒိသိကံ၊ တတော ဝါ ပါပိဋ္ဌတရံ၊ ကမ္မံ ဂရဟတိ၊ ကမ္မိကေ ဂရဟတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဗ္ဗာဇနီယကမ္မံ နပ္ပဋိပ္ပဿမ္ဘေတဗ္ဗံ။

‘‘အဋ္ဌဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော ပဗ္ဗာဇနီယကမ္မံ နပ္ပဋိပ္ပဿမ္ဘေတဗ္ဗံ။ ပကတတ္တဿ ဘိက္ခုနော ဥပေါသထံ ဌပေတိ၊ ပဝါရဏံ ဌပေတိ၊ သဝစနီယံ ကရောတိ၊ အနုဝါဒံ ပဋ္ဌပေတိ၊ ဩကာသံ ကာရေတိ၊ စောဒေတိ၊ သာရေတိ၊ ဘိက္ခူဟိ သမ္ပယောဇေတိ – ဣမေဟိ ခေါ၊ ဘိက္ခဝေ၊ အဋ္ဌဟင်္ဂေဟိ သမန္နာဂတဿ ဘိက္ခုနော ပဗ္ဗာဇနီယကမ္မံ နပ္ပဋိပ္ပဿမ္ဘေတဗ္ဗံ။

ပဗ္ဗာဇနီယကမ္မေ နပ္ပဋိပ္ပဿမ္ဘေတဗ္ဗအဋ္ဌာရသကံ နိဋ္ဌိတံ။

ပဋိပ္ပဿမ္ဘေတဗ္ဗအဋ္ဌာရသကံ

၃၁။ ‘‘ပဉ္စဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော ပဗ္ဗာဇနီယကမ္မံ ပဋိပ္ပဿမ္ဘေတဗ္ဗံ။ န ဥပသမ္ပာဒေတိ၊ န နိဿယံ ဒေတိ၊ န သာမဏေရံ ဥပဋ္ဌာပေတိ ¶ ၊ န ဘိက္ခုနောဝါဒကသမ္မုတိံ သာဒိယတိ၊ သမ္မတောပိ ဘိက္ခုနိယော န ဩဝဒတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ¶ ဘိက္ခုနော ပဗ္ဗာဇနီယကမ္မံ ပဋိပ္ပဿမ္ဘေတဗ္ဗံ။

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဗ္ဗာဇနီယကမ္မံ ပဋိပ္ပဿမ္ဘေတဗ္ဗံ။ ယာယ အာပတ္တိယာ သင်္ဃေန ပဗ္ဗာဇနီယကမ္မံ ကတံ ဟောတိ တံ အာပတ္တိံ န အာပဇ္ဇတိ၊ အညံ ဝါ တာဒိသိကံ၊ တတော ဝါ ပါပိဋ္ဌတရံ၊ ကမ္မံ န ဂရဟတိ၊ ကမ္မိကေ န ဂရဟတိ ¶ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဗ္ဗာဇနီယကမ္မံ ပဋိပ္ပဿမ္ဘေတဗ္ဗံ။

‘‘အဋ္ဌဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော ပဗ္ဗာဇနီယကမ္မံ ပဋိပ္ပဿမ္ဘေတဗ္ဗံ။ န ပကတတ္တဿ ဘိက္ခုနော ဥပေါသထံ ဌပေတိ၊ န ပဝါရဏံ ဌပေတိ၊ န သဝစနီယံ ကရောတိ၊ န အနုဝါဒံ ပဋ္ဌပေတိ၊ န ဩကာသံ ကာရေတိ၊ န စောဒေတိ၊ န သာရေတိ၊ န ဘိက္ခူဟိ သမ္ပယောဇေတိ – ဣမေဟိ ခေါ၊ ဘိက္ခဝေ၊ အဋ္ဌဟင်္ဂေဟိ သမန္နာဂတဿ ဘိက္ခုနော ပဗ္ဗာဇနီယကမ္မံ ပဋိပ္ပဿမ္ဘေတဗ္ဗံ။

ပဗ္ဗာဇနီယကမ္မေ ပဋိပ္ပဿမ္ဘေတဗ္ဗအဋ္ဌာရသကံ နိဋ္ဌိတံ။

၃၂။ ‘‘ဧဝဉ္စ ပန၊ ဘိက္ခဝေ၊ ပဋိပ္ပဿမ္ဘေတဗ္ဗံ။ တေန၊ ဘိက္ခဝေ၊ ပဗ္ဗာဇနီယကမ္မကတေန ဘိက္ခုနာ သင်္ဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘အဟံ၊ ဘန္တေ၊ သင်္ဃေန ပဗ္ဗာဇနီယကမ္မကတော သမ္မာ ဝတ္တာမိ၊ လောမံ ပါတေမိ၊ နေတ္ထာရံ ဝတ္တာမိ၊ ပဗ္ဗာဇနီယဿ ကမ္မဿ ပဋိပ္ပဿဒ္ဓိံ ယာစာမီ’တိ။ ဒုတိယမ္ပိ ¶ ယာစိတဗ္ဗာ။ တတိယမ္ပိ ယာစိတဗ္ဗာ။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

‘‘သုဏာတု မေ၊ ဘန္တေ၊ သင်္ဃော။ အယံ ဣတ္ထန္နာမော ဘိက္ခု သင်္ဃေန ပဗ္ဗာဇနီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ပဗ္ဗာဇနီယဿ ကမ္မဿ ပဋိပ္ပဿဒ္ဓိံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဣတ္ထန္နာမဿ ဘိက္ခုနော ပဗ္ဗာဇနီယကမ္မံ ပဋိပ္ပဿမ္ဘေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဣတ္ထန္နာမော ဘိက္ခု သင်္ဃေန ပဗ္ဗာဇနီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ပဗ္ဗာဇနီယဿ ¶ ကမ္မဿ ပဋိပ္ပဿဒ္ဓိံ ယာစတိ။ သင်္ဃော ဣတ္ထန္နာမဿ ဘိက္ခုနော ပဗ္ဗာဇနီယကမ္မံ ပဋိပ္ပဿမ္ဘေတိ။ ယဿာယသ္မတော ခမတိ ဣတ္ထန္နာမဿ ဘိက္ခုနော ပဗ္ဗာဇနီယဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ။ သုဏာတု မေ၊ ဘန္တေ၊ သင်္ဃော ¶ ။ အယံ ဣတ္ထန္နာမော ဘိက္ခု သင်္ဃေန ပဗ္ဗာဇနီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ပဗ္ဗာဇနီယဿ ကမ္မဿ ပဋိပ္ပဿဒ္ဓိံ ယာစတိ။ သင်္ဃော ဣတ္ထန္နာမဿ ဘိက္ခုနော ပဗ္ဗာဇနီယကမ္မံ ပဋိပ္ပဿမ္ဘေတိ။ ယဿာယသ္မတော ခမတိ ဣတ္ထန္နာမဿ ဘိက္ခုနော ပဗ္ဗာဇနီယဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ပဋိပ္ပဿဒ္ဓံ သင်္ဃေန ဣတ္ထန္နာမဿ ဘိက္ခုနော ပဗ္ဗာဇနီယကမ္မံ။ ခမတိ သင်္ဃဿ၊ တသ္မာ

တုဏှီ၊ ဧဝမေတံ ဓာရယာမီ’’တိ။

ပဗ္ဗာဇနီယကမ္မံ နိဋ္ဌိတံ တတိယံ။

၄။ ပဋိသာရဏီယကမ္မံ

၃၃။ တေန ¶ ခေါ ပန သမယေန အာယသ္မာ သုဓမ္မော မစ္ဆိကာသဏ္ဍေ စိတ္တဿ ဂဟပတိနော အာဝါသိကော ဟောတိ၊ နဝကမ္မိကော ဓုဝဘတ္တိကော။ ယဒါ စိတ္တော ဂဟပတိ သင်္ဃံ ဝါ ဂဏံ ဝါ ပုဂ္ဂလံ ဝါ နိမန္တေတုကာမော ဟောတိ တဒါ န အာယသ္မန္တံ သုဓမ္မံ အနပလောကေတွာ သင်္ဃံ ဝါ ဂဏံ ဝါ ပုဂ္ဂလံ ဝါ နိမန္တေတိ။

တေန ခေါ ပန သမယေန သမ္ဗဟုလာ ထေရာ ဘိက္ခူ၊ အာယသ္မာ စ သာရိပုတ္တော၊ အာယသ္မာ စ မဟာမောဂ္ဂလ္လာနော၊ အာယသ္မာ စ မဟာကစ္စာနော၊ အာယသ္မာ စ မဟာကောဋ္ဌိကော ¶ ၊ အာယသ္မာ စ မဟာကပ္ပိနော၊ အာယသ္မာ စ မဟာစုန္ဒော၊ အာယသ္မာ စ အနုရုဒ္ဓါ၊ အာယသ္မာ စ ရေဝတော၊ အာယသ္မာ စ ဥပါလိ၊ အာယသ္မာ စ အာနန္ဒော၊ အာယသ္မာ စ ရာဟုလော၊ ကာသီသု စာရိကံ စရမာနာ ယေန မစ္ဆိကာသဏ္ဍော တဒဝသရုံ။

အဿောသိ ခေါ စိတ္တော ဂဟပတိ ထေရာ ကိရ ဘိက္ခူ မစ္ဆိကာသဏ္ဍံ အနုပ္ပတ္တာတိ။ အထ ခေါ စိတ္တော ဂဟပတိ ယေန ထေရာ ဘိက္ခူ တေနုပသင်္ကမိ ¶ ၊ ဥပသင်္ကမိတွာ ထေရေ ဘိက္ခူ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နံ ခေါ စိတ္တံ ဂဟပတိံ အာယသ္မာ သာရိပုတ္တော ဓမ္မိယာ ကထာယ သန္ဒဿေသိ သမာဒပေသိ သမုတ္တေဇေသိ သမ္ပဟံသေသိ။

အထ ခေါ စိတ္တော ဂဟပတိ အာယသ္မတာ သာရိပုတ္တေန ဓမ္မိယာ ကထာယ သန္ဒဿိတော သမာဒပိတော သမုတ္တေဇိတော သမ္ပဟံသိတော ထေရေ ဘိက္ခူ ဧတဒဝေါစ ¶ – ‘‘အဓိဝါသေန္တု မေ၊ ဘန္တေ၊ ထေရာ သွာတနာယ အာဂန္တုကဘတ္တ’’န္တိ။ အဓိဝါသေသုံ ခေါ ထေရာ ဘိက္ခူ [အဓိဝါသေသုံ ခေါ တေ ထေရာ ဘိက္ခူ (သျာ။)] တုဏှီဘာဝေန။

အထ ¶ ခေါ စိတ္တော ဂဟပတိ ထေရာနံ ဘိက္ခူနံ အဓိဝါသနံ ဝိဒိတွာ ဥဋ္ဌာယာသနာ ထေရေ ဘိက္ခူ အဘိဝါဒေတွာ ပဒက္ခိဏံ ကတွာ ယေနာယသ္မာ သုဓမ္မော တေနုပသင်္ကမိ၊ ဥပသင်္ကမိတွာ အာယသ္မန္တံ သုဓမ္မံ အဘိဝါဒေတွာ ဧကမန္တံ အဋ္ဌာသိ။ ဧကမန္တံ ဌိတော ခေါ စိတ္တော ဂဟပတိ အာယသ္မန္တံ သုဓမ္မံ ဧတဒဝေါစ – ‘‘အဓိဝါသေတု မေ၊ ဘန္တေ၊ အယျော သုဓမ္မော သွာတနာယ ဘတ္တံ သဒ္ဓိံ ထေရေဟီ’’တိ။ အထ ခေါ အာယသ္မာ သုဓမ္မော ‘ပုဗ္ဗေ ခွာယံ စိတ္တော ဂဟပတိ ယဒါ သင်္ဃံ ဝါ ဂဏံ ဝါ ပုဂ္ဂလံ ဝါ နိမန္တေတုကာမော န မံ အနပလောကေတွာ သင်္ဃံ ဝါ ဂဏံ ဝါ ပုဂ္ဂလံ ဝါ နိမန္တေတိ၊ သောဒါနိ မံ အနပလောကေတွာ ထေရေ ဘိက္ခူ နိမန္တေသိ၊ ဒုဋ္ဌောဒါနာယံ စိတ္တော ဂဟပတိ အနပေက္ခော ဝိရတ္တရူပေါ မယီ’တိ စိတ္တံ ဂဟပတိံ ဧတဒဝေါစ – ‘‘အလံ၊ ဂဟပတိ၊ နာဓိဝါသေမီ’’တိ။ ဒုတိယမ္ပိ ခေါ…ပေ… တတိယမ္ပိ ခေါ စိတ္တော ဂဟပတိ အာယသ္မန္တံ သုဓမ္မံ ဧတဒဝေါစ – ‘‘အဓိဝါသေတု မေ၊ ဘန္တေ၊ အယျော သုဓမ္မော သွာတနာယ ဘတ္တံ သဒ္ဓိံ ထေရေဟီ’’တိ။ ‘‘အလံ၊ ဂဟပတိ၊ နာဓိဝါသေမီ’’တိ။ အထ ခေါ စိတ္တော ဂဟပတိ ‘ကိံ မေ ကရိဿတိ အယျော သုဓမ္မော ¶ အဓိဝါသေန္တော ဝါ အနဓိဝါသေန္တော ဝါ’တိ အာယသ္မန္တံ သုဓမ္မံ အဘိဝါဒေတွာ ပဒက္ခိဏံ ကတွာ ပက္ကာမိ။

၃၄။ အထ ခေါ စိတ္တော ဂဟပတိ တဿာ ရတ္တိယာ အစ္စယေန ထေရာနံ ဘိက္ခူနံ ပဏီတံ ခါဒနီယံ ဘောဇနီယံ ပဋိယာဒါပေသိ။ အထ ခေါ အာယသ္မာ သုဓမ္မော ‘ယံနူနာဟံ စိတ္တဿ ဂဟပတိနော ထေရာနံ ဘိက္ခူနံ ပဋိယတ္တံ ¶ ပဿေယျ’န္တိ ပုဗ္ဗဏှသမယံ နိဝါသေတွာ ပတ္တစီဝရမာဒါယ ယေန စိတ္တဿ ဂဟပတိနော နိဝေသနံ တေနုပသင်္ကမိ၊ ဥပသင်္ကမိတွာ ပညတ္တေ အာသနေ နိသီဒိ။ အထ ခေါ စိတ္တော ဂဟပတိ ယေနာယသ္မာ သုဓမ္မော တေနုပသင်္ကမိ၊ ဥပသင်္ကမိတွာ ¶ အာယသ္မန္တံ သုဓမ္မံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နံ ခေါ စိတ္တံ ဂဟပတိံ အာယသ္မာ သုဓမ္မော ဧတဒဝေါစ – ‘‘ပဟူတံ ခေါ တေ ဣဒံ၊ ဂဟပတိ၊ ခါဒနီယံ ဘောဇနီယံ ပဋိယတ္တံ၊ ဧကာ စ ခေါ ဣဓ နတ္ထိ ယဒိဒံ တိလသင်္ဂုဠိကာ’’တိ။ ‘‘ဗဟုမှိ ဝတ၊ ဘန္တေ၊ ရတနေ ဗုဒ္ဓဝစနေ [ဘန္တေ ဗုဒ္ဓဝစနေ (သျာ။)] ဝိဇ္ဇမာနေ အယျေန သုဓမ္မေန ယဒေဝ ကိဉ္စိ ဘာသိတံ ယဒိဒံ တိလသင်္ဂုဠိကာတိ။ ဘူတပုဗ္ဗံ၊ ဘန္တေ၊ ဒက္ခိဏာပထကာ ဝါဏိဇာ ပုရတ္ထိမံ ဇနပဒံ အဂမံသု ဝါဏိဇ္ဇာယ။ တေ တတော ကုက္ကုဋိံ အာနေသုံ။ အထ ခေါ သာ၊ ဘန္တေ၊ ကုက္ကုဋီ ကာကေန သဒ္ဓိံ သံဝါသံ ကပ္ပေသိ။ သာ ပေါတကံ ဇနေသိ။ ယဒါ ခေါ သော၊ ဘန္တေ၊ ကုက္ကုဋပေါတကော ¶ ကာကဝဿံ ဝဿိတုကာမော ဟောတိ၊ ကာကကုက္ကုဋီတိ ဝဿတိ၊ ယဒါ ကုက္ကုဋိဝဿံ ဝဿိတုကာမော ဟောတိ၊ ကုက္ကုဋိကာကာတိ ဝဿတိ။ ဧဝမေဝ ခေါ၊ ဘန္တေ၊ ဗဟုမှိ ရတနေ ဗုဒ္ဓဝစနေ ဝိဇ္ဇမာနေ အယျေန သုဓမ္မေန ယဒေဝ ကိဉ္စိ ဘာသိတံ ယဒိဒံ တိလသံဂုဠိကာ’’တိ။ ‘‘အက္ကောသသိ မံ တွံ၊ ဂဟပတိ၊ ပရိဘာသသိ မံ တွံ၊ ဂဟပတိ။ ဧသော တေ၊ ဂဟပတိ၊ အာဝါသော၊ ပက္ကမိဿာမီ’’တိ။ ‘‘နာဟံ၊ ဘန္တေ၊ အယျံ သုဓမ္မံ အက္ကောသာမိ၊ ပရိဘာသာမိ ¶ [န ပရိဘာသာမိ (သီ။ သျာ။)]။ ဝသတု၊ ဘန္တေ၊ အယျော သုဓမ္မော မစ္ဆိကာသဏ္ဍေ။ ရမဏီယံ အမ္ဗာဋကဝနံ။ အဟံ အယျဿ သုဓမ္မဿ ဥဿုက္ကံ ကရိဿာမိ၊ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရာန’’န္တိ။ ဒုတိယမ္ပိ ခေါ…ပေ… ¶ တတိယမ္ပိ ခေါ အာယသ္မာ သုဓမ္မော စိတ္တံ ဂဟပတိံ ဧတဒဝေါစ – ‘‘အက္ကောသသိ မံ တွံ၊ ဂဟပတိ၊ ပရိဘာသသိ မံ တွံ၊ ဂဟပတိ။ ဧသော တေ၊ ဂဟပတိ၊ အာဝါသော၊ ပက္ကမိဿာမီ’’တိ။ ‘‘ကဟံ၊ ဘန္တေ၊ အယျော သုဓမ္မော ဂမိဿတီ’’တိ? ‘‘သာဝတ္ထိံ ခေါ အဟံ၊ ဂဟပတိ၊ ဂမိဿာမိ ဘဂဝန္တံ ဒဿနာယာ’’တိ။ ‘‘တေန ဟိ၊ ဘန္တေ၊ ယဉ္စ အတ္တနာ ဘဏိတံ၊ ယဉ္စ မယာ ဘဏိတံ တံ သဗ္ဗံ ဘဂဝတော အာရောစေဟိ။ အနစ္ဆရိယံ ခေါ ပနေတံ၊ ဘန္တေ၊ ယံ အယျော သုဓမ္မော ပုနဒေဝ မစ္ဆိကာသဏ္ဍံ ပစ္စာဂစ္ဆေယျာ’’တိ။

၃၅။ အထ ခေါ အာယသ္မာ သုဓမ္မော သေနာသနံ သံသာမေတွာ ပတ္တစီဝရမာဒါယ ယေန သာဝတ္ထိ တေန ပက္ကာမိ။ အနုပုဗ္ဗေန ယေန သာဝတ္ထိ ဇေတဝနံ အနာထပိဏ္ဍိကဿ အာရာမော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နော ခေါ အာယသ္မာ သုဓမ္မော ယဉ္စ အတ္တနာ ဘဏိတံ ¶ ယဉ္စ စိတ္တေန ဂဟပတိနာ ဘဏိတံ တံ သဗ္ဗံ ဘဂဝတော အာရောစေသိ။

ဝိဂရဟိ ¶ ဗုဒ္ဓါ ဘဂဝါ – ‘‘အနနုစ္ဆဝိကံ၊ မောဃပုရိသ၊ အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ တွံ၊ မောဃပုရိသ၊ စိတ္တံ ဂဟပတိံ သဒ္ဓံ ပသန္နံ ဒါယကံ ကာရကံ သင်္ဃုပဋ္ဌာကံ ဟီနေန ခုံသေဿသိ၊ ဟီနေန ဝမ္ဘေဿသိ? နေတံ၊ မောဃပုရိသ၊ အပ္ပသန္နာနံ ဝါ ¶ ပသာဒါယ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ – တေန ဟိ၊ ဘိက္ခဝေ၊ သင်္ဃော သုဓမ္မဿ ဘိက္ခုနော ပဋိသာရဏီယကမ္မံ ကရောတု – စိတ္တော တေ ဂဟပတိ ခမာပေတဗ္ဗောတိ။ ဧဝဉ္စ ပန၊ ဘိက္ခဝေ၊ ကာတဗ္ဗံ – ပဌမံ သုဓမ္မော ဘိက္ခု စောဒေတဗ္ဗော၊ စောဒေတွာ သာရေတဗ္ဗော၊ သာရေတွာ အာပတ္တိံ အာရောပေတဗ္ဗော၊ အာပတ္တိံ အာရောပေတွာ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၃၆။ ‘‘သုဏာတု မေ၊ ဘန္တေ၊ သင်္ဃော။ အယံ သုဓမ္မော ဘိက္ခု စိတ္တံ ဂဟပတိံ သဒ္ဓံ ပသန္နံ ဒါယကံ ကာရကံ သင်္ဃုပဋ္ဌာကံ ဟီနေန ခုံသေတိ၊ ဟီနေန ဝမ္ဘေတိ။ ယဒိ သင်္ဃဿ ပတ္တကလ္လံ၊ သင်္ဃော သုဓမ္မဿ ဘိက္ခုနော ပဋိသာရဏီယကမ္မံ ကရေယျ – စိတ္တော တေ ဂဟပတိ ခမာပေတဗ္ဗောတိ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ သုဓမ္မော ဘိက္ခု စိတ္တံ ဂဟပတိံ သဒ္ဓံ ပသန္နံ ဒါယကံ ကာရကံ ¶ သင်္ဃုပဋ္ဌာကံ ဟီနေန ခုံသေတိ၊ ဟီနေန ဝမ္ဘေတိ။ သင်္ဃော သုဓမ္မဿ ဘိက္ခုနော ပဋိသာရဏီယကမ္မံ ကရောတိ – စိတ္တော တေ ဂဟပတိ ခမာပေတဗ္ဗောတိ။ ယဿာယသ္မတော ခမတိ သုဓမ္မဿ ဘိက္ခုနော ပဋိသာရဏီယဿ ကမ္မဿ ကရဏံ – စိတ္တော တေ ဂဟပတိ ခမာပေတဗ္ဗောတိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ အယံ သုဓမ္မော ဘိက္ခု စိတ္တံ ဂဟပတိံ သဒ္ဓံ ပသန္နံ ဒါယကံ ကာရကံ သင်္ဃုပဋ္ဌာကံ ဟီနေန ခုံသေတိ၊ ဟီနေန ဝမ္ဘေတိ။ သင်္ဃော သုဓမ္မဿ ဘိက္ခုနော ပဋိသာရဏီယကမ္မံ ကရောတိ – စိတ္တော ¶ တေ ဂဟပတိ ခမာပေတဗ္ဗောတိ။ ယဿာယသ္မတော ခမတိ သုဓမ္မဿ ဘိက္ခုနော ပဋိသာရဏီယဿ ကမ္မဿ ကရဏံ – စိတ္တော တေ ဂဟပတိ ခမာပေတဗ္ဗောတိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ကတံ သင်္ဃေန သုဓမ္မဿ ဘိက္ခုနော ပဋိသာရဏီယကမ္မံ – စိတ္တော တေ ဂဟပတိ ခမာပေတဗ္ဗောတိ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

အဓမ္မကမ္မဒွါဒသကံ

၃၇။ ‘‘တီဟိ ¶ ၊ ဘိက္ခဝေ၊ အင်္ဂေဟိ သမန္နာဂတံ ပဋိသာရဏီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အသမ္မုခါ ကတံ ဟောတိ၊ အပ္ပဋိပုစ္ဆာ ကတံ ဟောတိ၊ အပ္ပဋိညာယ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ ပဋိသာရဏီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ ပဋိသာရဏီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အနာပတ္တိယာ ကတံ ဟောတိ၊ အဒေသနာဂါမိနိယာ အာပတ္တိယာ ကတံ ဟောတိ၊ ဒေသိတာယ အာပတ္တိယာ ကတံ ဟောတိ…ပေ… အစောဒေတွာ ကတံ ဟောတိ၊ အသာရေတွာ ကတံ ဟောတိ၊ အာပတ္တိံ အနာရောပေတွာ ကတံ ဟောတိ…ပေ… ¶ အသမ္မုခါ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အပ္ပဋိပုစ္ဆာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အပ္ပဋိညာယ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အနာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… ¶ အဒေသနာဂါမိနိယာ အာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… ဒေသိတာယ အာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အစောဒေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အသာရေတွာ ကတံ ဟောတိ ¶ ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အာပတ္တိံ အနာရောပေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ ¶ ပဋိသာရဏီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

ပဋိသာရဏီယကမ္မေ အဓမ္မကမ္မဒွါဒသကံ နိဋ္ဌိတံ။

ဓမ္မကမ္မဒွါဒသကံ

၃၈။ ‘‘တီဟိ၊ ဘိက္ခဝေ၊ အင်္ဂေဟိ သမန္နာဂတံ ပဋိသာရဏီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ သမ္မုခါ ကတံ ဟောတိ၊ ပဋိပုစ္ဆာ ကတံ ဟောတိ၊ ပဋိညာယ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ ပဋိသာရဏီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ ¶ ၊ ဘိက္ခဝေ၊ တီဟင်္ဂေဟိ သမန္နာဂတံ ပဋိသာရဏီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ အာပတ္တိယာ ကတံ ဟောတိ၊ ဒေသနာဂါမိနိယာ အာပတ္တိယာ ကတံ ဟောတိ၊ အဒေသိတာယ အာပတ္တိယာ ကတံ ဟောတိ…ပေ… စောဒေတွာ ကတံ ဟောတိ၊ သာရေတွာ ကတံ ဟောတိ၊ အာပတ္တိံ အာရောပေတွာ ကတံ ဟောတိ…ပေ… သမ္မုခါ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ပဋိပုစ္ဆာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ¶ ပဋိညာယ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ဒေသနာဂါမိနိယာ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… အဒေသိတာယ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… စောဒေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… သာရေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… အာပတ္တိံ အာရောပေတွာ ¶ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ ပဋိသာရဏီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

ပဋိသာရဏီယကမ္မေ ဓမ္မကမ္မဒွါဒသကံ နိဋ္ဌိတံ။

အာကင်္ခမာနစတုက္ကံ

၃၉။ ‘‘ပဉ္စဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဋိသာရဏီယကမ္မံ ¶ ကရေယျ။ ဂိဟီနံ အလာဘာယ ပရိသက္ကတိ၊ ဂိဟီနံ အနတ္ထာယ ပရိသက္ကတိ၊ ဂိဟီနံ အနာဝါသာယ [အဝါသာယ (သီ။)] ပရိသက္ကတိ၊ ဂိဟီ အက္ကောသတိ ပရိဘာသတိ၊ ဂိဟီ ဂိဟီဟိ ¶ ဘေဒေတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဋိသာရဏီယကမ္မံ ကရေယျ။

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဋိသာရဏီယကမ္မံ ကရေယျ။ ဂိဟီနံ ဗုဒ္ဓဿ အဝဏ္ဏံ ဘာသတိ ¶ ၊ ဂိဟီနံ ဓမ္မဿ အဝဏ္ဏံ ဘာသတိ၊ ဂိဟီနံ သင်္ဃဿ အဝဏ္ဏံ ဘာသတိ၊ ဂိဟီ ဟီနေန ခုံသေတိ ဟီနေန ဝမ္ဘေတိ၊ ဂိဟီနံ ဓမ္မိကံ ပဋိဿဝံ န သစ္စာပေတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပဋိသာရဏီယကမ္မံ ကရေယျ။

‘‘ပဉ္စန္နံ၊ ဘိက္ခဝေ၊ ဘိက္ခူနံ၊ အာကင်္ခမာနော သင်္ဃော၊ ပဋိသာရဏီယကမ္မံ ကရေယျ။ ဧကော ဂိဟီနံ ¶ အလာဘာယ ပရိသက္ကတိ၊ ဧကော ဂိဟီနံ အနတ္ထာယ ပရိသက္ကတိ၊ ဧကော ဂိဟီနံ အနာဝါသာယ ပရိသက္ကတိ၊ ဧကော ဂိဟီ အက္ကောသတိ ပရိဘာသတိ၊ ဧကော ဂိဟီ ဂိဟီဟိ ဘေဒေတိ – ဣမေသံ ခေါ၊ ဘိက္ခဝေ၊ ပဉ္စန္နံ ဘိက္ခူနံ၊ အာကင်္ခမာနော သင်္ဃော၊ ပဋိသာရဏီယကမ္မံ ကရေယျ။

‘‘အပရေသမ္ပိ၊ ဘိက္ခဝေ၊ ပဉ္စန္နံ ဘိက္ခူနံ၊ အာကင်္ခမာနော သင်္ဃော၊ ပဋိသာရဏီယကမ္မံ ကရေယျ။ ဧကော ဂိဟီနံ ဗုဒ္ဓဿ အဝဏ္ဏံ ဘာသတိ၊ ဧကော ဂိဟီနံ ဓမ္မဿ အဝဏ္ဏံ ဘာသတိ၊ ဧကော ဂိဟီနံ သင်္ဃဿ အဝဏ္ဏံ ဘာသတိ၊ ဧကော ဂိဟီ ဟီနေန ခုံသေတိ ဟီနေန ဝမ္ဘေတိ၊ ဧကော ဂိဟီနံ ဓမ္မိကံ ပဋိဿဝံ န သစ္စာပေတိ – ဣမေသံ ခေါ၊ ဘိက္ခဝေ၊ ပဉ္စန္နံ ဘိက္ခူနံ၊ အာကင်္ခမာနော သင်္ဃော၊ ပဋိသာရဏီယကမ္မံ ကရေယျ။

အာကင်္ခမာနစတုက္ကံ နိဋ္ဌိတံ။

အဋ္ဌာရသဝတ္တံ

၄၀။ ‘‘ပဋိသာရဏီယကမ္မကတေန၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ။ တတြာယံ သမ္မာဝတ္တနာ – န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနပိ ဘိက္ခုနိယော န ဩဝဒိတဗ္ဗာ။ ယာယ အာပတ္တိယာ သင်္ဃေန ပဋိသာရဏီယကမ္မံ ကတံ ဟောတိ သာ အာပတ္တိ န အာပဇ္ဇိတဗ္ဗာ၊ အညာ ဝါ တာဒိသိကာ ¶ ၊ တတော ဝါ ပါပိဋ္ဌတရာ၊ ကမ္မံ န ဂရဟိတဗ္ဗံ၊ ကမ္မိကာ န ဂရဟိတဗ္ဗာ။ န ပကတတ္တဿ ဘိက္ခုနော ဥပေါသထော ဌပေတဗ္ဗော၊ န ပဝါရဏာ ဌပေတဗ္ဗာ၊ န သဝစနီယံ ကာတဗ္ဗံ၊ န အနုဝါဒေါ ပဋ္ဌပေတဗ္ဗော၊ န ဩကာသော ကာရေတဗ္ဗော ¶ ၊ န စောဒေတဗ္ဗော၊ န သာရေတဗ္ဗော၊ န ဘိက္ခူဟိ သမ္ပယောဇေတဗ္ဗ’’န္တိ။

ပဋိသာရဏီယကမ္မေ အဋ္ဌာရသဝတ္တံ နိဋ္ဌိတံ။

၄၁။ အထ ¶ ခေါ သင်္ဃော သုဓမ္မဿ ဘိက္ခုနော ပဋိသာရဏီယကမ္မံ အကာသိ – ‘‘စိတ္တော တေ ဂဟပတိ ခမာပေတဗ္ဗော’’တိ။ သော သင်္ဃေန ပဋိသာရဏီယကမ္မကတော မစ္ဆိကာသဏ္ဍံ ဂန္တွာ မင်္ကုဘူတော နာသက္ခိ စိတ္တံ ဂဟပတိံ ခမာပေတုံ။ ပုနဒေဝ သာဝတ္ထိံ ပစ္စာဂဉ္ဆိ။ ဘိက္ခူ ဧဝမာဟံသု – ‘‘ခမာပိတော တယာ၊ အာဝုသော သုဓမ္မ၊ စိတ္တော ဂဟပတီ’’တိ? ‘‘ဣဓာဟံ၊ အာဝုသော၊ မစ္ဆိကာသဏ္ဍံ ဂန္တွာ မင်္ကုဘူတော နာသက္ခိံ စိတ္တံ ဂဟပတိံ ခမာပေတု’’န္တိ။ ဘိက္ခူ ဘဂဝတော ဧတမတ္ထံ အာရောစေသုံ…ပေ…။ ‘‘တေန ဟိ၊ ဘိက္ခဝေ၊ သင်္ဃော သုဓမ္မဿ ဘိက္ခုနော အနုဒူတံ ဒေတု – စိတ္တံ ဂဟပတိံ ခမာပေတုံ။ ဧဝဉ္စ ပန ဘိက္ခဝေ ဒါတဗ္ဗော – ပဌမံ ဘိက္ခု ယာစိတဗ္ဗော၊ ယာစိတွာ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

‘‘သုဏာတု မေ၊ ဘန္တေ၊ သင်္ဃော။ ယဒိ သင်္ဃဿ ပတ္တကလ္လံ၊ သင်္ဃော ဣတ္ထန္နာမံ ဘိက္ခုံ သုဓမ္မဿ ဘိက္ခုနော အနုဒူတံ ဒဒေယျ စိတ္တံ ဂဟပတိံ ခမာပေတုံ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ သင်္ဃော ဣတ္ထန္နာမံ ဘိက္ခုံ သုဓမ္မဿ ¶ ဘိက္ခုနော အနုဒူတံ ဒေတိ စိတ္တံ ဂဟပတိံ ခမာပေတုံ။ ယဿာယသ္မတော ခမတိ ဣတ္ထန္နာမဿ ဘိက္ခုနော သုဓမ္မဿ ဘိက္ခုနော အနုဒူတဿ ဒါနံ စိတ္တံ ဂဟပတိံ ခမာပေတုံ၊ သော ¶ တုဏှဿ၊ ယဿ နက္ခမတိ၊ သော ဘာသေယျ။

‘‘ဒိန္နော သင်္ဃေန ဣတ္ထန္နာမော ဘိက္ခု သုဓမ္မဿ ဘိက္ခုနော အနုဒူတော စိတ္တံ ဂဟပတိံ ခမာပေတုံ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

၄၂။ ‘‘တေန၊ ဘိက္ခဝေ၊ သုဓမ္မေန ဘိက္ခုနာ အနုဒူတေန ဘိက္ခုနာ သဒ္ဓိံ မစ္ဆိကာသဏ္ဍံ ဂန္တွာ စိတ္တော ဂဟပတိ ခမာပေတဗ္ဗော – ‘ခမ၊ ဂဟပတိ၊ ပသာဒေမိ တ’န္တိ။ ဧဝဉ္စေ ဝုစ္စမာနော ခမတိ၊ ဣစ္စေတံ ကုသလံ။ နော စေ ခမတိ၊ အနုဒူတေန ဘိက္ခုနာ ဝတ္တဗ္ဗော – ‘ခမ၊ ဂဟပတိ၊ ဣမဿ ¶ ဘိက္ခုနော၊ ပသာဒေတိ တ’န္တိ။ ဧဝဉ္စေ ဝုစ္စမာနော ခမတိ၊ ဣစ္စေတံ ကုသလံ။ နော စေ ခမတိ၊ အနုဒူတေန ဘိက္ခုနာ ဝတ္တဗ္ဗော – ‘ခမ၊ ဂဟပတိ၊ ဣမဿ ဘိက္ခုနော၊ အဟံ တံ ပသာဒေမီ’တိ။ ဧဝဉ္စေ ဝုစ္စမာနော ခမတိ၊ ဣစ္စေတံ ကုသလံ။ နော စေ ခမတိ၊ အနုဒူတေန ဘိက္ခုနာ ဝတ္တဗ္ဗော – ‘ခမ၊ ဂဟပတိ၊ ဣမဿ ဘိက္ခုနော၊ သင်္ဃဿ ဝစနေနာ’တိ။ ဧဝဉ္စေ ဝုစ္စမာနော ခမတိ၊ ဣစ္စေတံ ကုသလံ။ နော စေ ¶ ခမတိ၊ အနုဒူတေန ဘိက္ခုနာ သုဓမ္မော ဘိက္ခု [သုဓမ္မံ ဘိက္ခုံ… သာ အာပတ္တိ ဒေသာပေတဗ္ဗာတိ (သီ။ သျာ။)] စိတ္တဿ ဂဟပတိနော ဒဿနူပစာရံ အဝိဇဟာပေတွာ သဝနူပစာရံ အဝိဇဟာပေတွာ ဧကံသံ ဥတ္တရာသင်္ဂံ ကာရာပေတွာ ဥက္ကုဋိကံ နိသီဒါပေတွာ အဉ္ဇလိံ ပဂ္ဂဏှာပေတွာ တံ အာပတ္တိံ ဒေသာပေတဗ္ဗော’’တိ [သုဓမ္မံ ဘိက္ခုံ… သာ အာပတ္တိ ဒေသာပေတဗ္ဗာတိ (သီ။ သျာ။)]။

အထ ခေါ အာယသ္မာ သုဓမ္မော အနုဒူတေန ဘိက္ခုနာ သဒ္ဓိံ မစ္ဆိကာသဏ္ဍံ ဂန္တွာ စိတ္တံ ဂဟပတိံ ခမာပေသိ။ သော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ဘိက္ခူ ဥပသင်္ကမိတွာ ဧဝံ ဝဒေတိ ¶ – ‘‘အဟံ၊ အာဝုသော၊ သင်္ဃေန ပဋိသာရဏီယကမ္မကတော သမ္မာ ဝတ္တာမိ၊ လောမံ ပါတေမိ၊ နေတ္ထာရံ ဝတ္တာမိ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘိက္ခူ ဘဂဝတော ဧတမတ္ထံ အာရောစေသုံ…ပေ… ‘‘တေန ဟိ၊ ဘိက္ခဝေ၊ သင်္ဃော သုဓမ္မဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတု။

နပ္ပဋိပ္ပဿမ္ဘေတဗ္ဗအဋ္ဌာရသကံ

၄၃။ ‘‘ပဉ္စဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ နပ္ပဋိပ္ပဿမ္ဘေတဗ္ဗံ။ ဥပသမ္ပာဒေတိ၊ နိဿယံ ဒေတိ၊ သာမဏေရံ ဥပဋ္ဌာပေတိ၊ ဘိက္ခုနောဝါဒကသမ္မုတိံ သာဒိယတိ၊ သမ္မတောပိ ဘိက္ခုနိယော ဩဝဒတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ နပ္ပဋိပ္ပဿမ္ဘေတဗ္ဗံ။

[ပရိ။ ၄၂၀] ‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ နပ္ပဋိပ္ပဿမ္ဘေတဗ္ဗံ။ ယာယ အာပတ္တိယာ သင်္ဃေန ပဋိသာရဏီယကမ္မံ ကတံ ဟောတိ တံ အာပတ္တိံ အာပဇ္ဇတိ၊ အညံ ဝါ တာဒိသိကံ၊ တတော ဝါ ပါပိဋ္ဌတရံ၊ ကမ္မံ ဂရဟတိ၊ ကမ္မိကေ ဂရဟတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ နပ္ပဋိပ္ပဿမ္ဘေတဗ္ဗံ။

‘‘အဋ္ဌဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ နပ္ပဋိပ္ပဿမ္ဘေတဗ္ဗံ။ ပကတတ္တဿ ဘိက္ခုနော ဥပေါသထံ ဌပေတိ၊ ပဝါရဏံ ဌပေတိ၊ သဝစနီယံ ကရောတိ၊ အနုဝါဒံ ပဋ္ဌပေတိ၊ ဩကာသံ ကာရေတိ၊ စောဒေတိ ¶ ၊ သာရေတိ၊ ဘိက္ခူဟိ သမ္ပယောဇေတိ – ဣမေဟိ ¶ ခေါ၊ ဘိက္ခဝေ၊ အဋ္ဌဟင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ ¶ နပ္ပဋိပ္ပဿမ္ဘေတဗ္ဗံ’’။

ပဋိသာရဏီယကမ္မေ နပ္ပဋိပ္ပဿမ္ဘေတဗ္ဗအဋ္ဌာရသကံ နိဋ္ဌိတံ။

ပဋိပ္ပဿမ္ဘေတဗ္ဗအဋ္ဌာရသကံ

၄၄။ ‘‘ပဉ္စဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတဗ္ဗံ။ န ဥပသမ္ပာဒေတိ၊ န နိဿယံ ဒေတိ၊ န သာမဏေရံ ဥပဋ္ဌာပေတိ၊ န ဘိက္ခုနောဝါဒကသမ္မုတိံ သာဒိယတိ၊ သမ္မတောပိ ဘိက္ခုနိယော န ဩဝဒတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတဗ္ဗံ။

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတဗ္ဗံ။ ယာယ အာပတ္တိယာ သင်္ဃေန ပဋိသာရဏီယကမ္မံ ကတံ ဟောတိ တံ အာပတ္တိံ န အာပဇ္ဇတိ၊ အညံ ဝါ တာဒိသိကံ၊ တတော ဝါ ပါပိဋ္ဌတရံ၊ ကမ္မံ န ဂရဟတိ၊ ကမ္မိကေ န ဂရဟတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတဗ္ဗံ။

‘‘အဋ္ဌဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတဗ္ဗံ။ န ပကတတ္တဿ ဘိက္ခုနော ဥပေါသထံ ဌပေတိ၊ န ပဝါရဏံ ဌပေတိ၊ န သဝစနီယံ ကရောတိ၊ န အနုဝါဒံ ပဋ္ဌပေတိ၊ န ဩကာသံ ကာရေတိ၊ န စောဒေတိ၊ န သာရေတိ၊ န ဘိက္ခူဟိ သမ္ပယောဇေတိ – ဣမေဟိ ခေါ၊ ဘိက္ခဝေ၊ အဋ္ဌဟင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတဗ္ဗံ။

ပဋိသာရဏီယကမ္မေ ပဋိပ္ပဿမ္ဘေတဗ္ဗအဋ္ဌာရသကံ နိဋ္ဌိတံ။

၄၅။ ‘‘ဧဝဉ္စ ¶ ¶ ပန၊ ဘိက္ခဝေ၊ ပဋိပ္ပဿမ္ဘေတဗ္ဗံ။ တေန [တေန ဟိ (သျာ။ က။)]၊ ဘိက္ခဝေ၊ သုဓမ္မေန ဘိက္ခုနာ သင်္ဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘အဟံ၊ ဘန္တေ၊ သင်္ဃေန ပဋိသာရဏီယကမ္မကတော သမ္မာ ဝတ္တာမိ၊ လောမံ ပါတေမိ၊ နေတ္ထာရံ ဝတ္တာမိ၊ ပဋိသာရဏီယဿ ကမ္မဿ ¶ ပဋိပ္ပဿဒ္ဓိံ ယာစာမီ’တိ ¶ ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

‘‘သုဏာတု မေ၊ ဘန္တေ၊ သင်္ဃော။ အယံ သုဓမ္မော ဘိက္ခု သင်္ဃေန ပဋိသာရဏီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ပဋိသာရဏီယဿ ကမ္မဿ ပဋိပ္ပဿဒ္ဓိံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော သုဓမ္မဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ သုဓမ္မော ဘိက္ခု သင်္ဃေန ပဋိသာရဏီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ပဋိသာရဏီယဿ ကမ္မဿ ပဋိပ္ပဿဒ္ဓိံ ယာစတိ။ သင်္ဃော သုဓမ္မဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတိ။ ယဿာယသ္မတော ခမတိ သုဓမ္မဿ ဘိက္ခုနော ပဋိသာရဏီယဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… ¶ တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ အယံ သုဓမ္မော ဘိက္ခု သင်္ဃေန ပဋိသာရဏီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ပဋိသာရဏီယဿ ကမ္မဿ ပဋိပ္ပဿဒ္ဓိံ ယာစတိ။ သင်္ဃော သုဓမ္မဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတိ။ ယဿာယသ္မတော ခမတိ သုဓမ္မဿ ဘိက္ခုနော ပဋိသာရဏီယဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ပဋိပ္ပဿဒ္ဓံ သင်္ဃေန သုဓမ္မဿ ဘိက္ခုနော ပဋိသာရဏီယကမ္မံ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

ပဋိသာရဏီယကမ္မံ နိဋ္ဌိတံ စတုတ္ထံ။

၅။ အာပတ္တိယာ အဒဿနေ ဥက္ခေပနီယကမ္မံ

၄၆။ တေန သမယေန ဗုဒ္ဓါ ဘဂဝါ ကောသမ္ဗိယံ ဝိဟရတိ ဃောသိတာရာမေ။ တေန ခေါ ပန သမယေန အာယသ္မာ ဆန္နော အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဿိတုံ။ ယေ တေ ဘိက္ခူ အပ္ပိစ္ဆာ…ပေ… တေ ဥဇ္ဈာယန္တိ ¶ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဆန္နော အာပတ္တိံ ¶ အာပဇ္ဇိတွာ န ဣစ္ဆိဿတိ အာပတ္တိံ ပဿိတု’’န္တိ။ အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။

အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသင်္ဃံ သန္နိပါတာပေတွာ ¶ ဘိက္ခူ ပဋိပုစ္ဆိ – ‘‘သစ္စံ ကိရ၊ ဘိက္ခဝေ၊ ဆန္နော ဘိက္ခု အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဿိတု’’န္တိ? ‘‘သစ္စံ ဘဂဝါ’’တိ။ ဝိဂရဟိ ဗုဒ္ဓါ ဘဂဝါ – ‘‘အနနုစ္ဆဝိကံ…ပေ… ကထဉှိ နာမ သော၊ ဘိက္ခဝေ၊ မောဃပုရိသော အာပတ္တိံ အာပဇ္ဇိတွာ န ဣစ္ဆိဿတိ အာပတ္တိံ ပဿိတုံ? နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ – တေန ဟိ၊ ဘိက္ခဝေ၊ သင်္ဃော ဆန္နဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ကရောတု – အသမ္ဘောဂံ သင်္ဃေန။ ဧဝဉ္စ ပန၊ ဘိက္ခဝေ၊ ကာတဗ္ဗံ – ပဌမံ ဆန္နော ဘိက္ခု စောဒေတဗ္ဗော၊ စောဒေတွာ သာရေတဗ္ဗော၊ သာရေတွာ အာပတ္တိံ အာရောပေတဗ္ဗော၊ အာပတ္တိံ အာရောပေတွာ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၄၇။ ‘‘သုဏာတု မေ၊ ဘန္တေ၊ သင်္ဃော။ အယံ ဆန္နော ဘိက္ခု အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဿိတုံ။ ယဒိ သင်္ဃဿ ပတ္တကလ္လံ၊ သင်္ဃော ဆန္နဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ကရေယျ – အသမ္ဘောဂံ သင်္ဃေန။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဆန္နော ဘိက္ခု အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဿိတုံ။ သင်္ဃော ဆန္နဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ကရောတိ – အသမ္ဘောဂံ သင်္ဃေန။ ယဿာယသ္မတော ခမတိ ဆန္နဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယဿ ကမ္မဿ ကရဏံ – အသမ္ဘောဂံ သင်္ဃေန၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ¶ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ အယံ ဆန္နော ဘိက္ခု အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဿိတုံ။ သင်္ဃော ဆန္နဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ကရောတိ – အသမ္ဘောဂံ သင်္ဃေန။ ယဿာယသ္မတော ခမတိ ဆန္နဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယဿ ကမ္မဿ ကရဏံ ¶ – အသမ္ဘောဂံ သင်္ဃေန၊ သော တုဏှဿ၊ ယဿ နက္ခမတိ၊ သော ¶ ဘာသေယျ။

‘‘ကတံ ¶ သင်္ဃေန ဆန္နဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ – အသမ္ဘောဂံ သင်္ဃေန။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီတိ။

‘‘အာဝါသပရမ္ပရဉ္စ၊ ဘိက္ခဝေ၊ သံသထ – ‘ဆန္နော ဘိက္ခု သင်္ဃေန အာပတ္တိယာ [ဆန္နော ဘိက္ခု အာပတ္တိယာ (သီ။ က။)] အဒဿနေ ဥက္ခေပနီယကမ္မကတော – အသမ္ဘောဂံ သင်္ဃေနာ’တိ။

အဓမ္မကမ္မဒွါဒသကံ

၄၈။ ‘‘တီဟိ၊ ဘိက္ခဝေ၊ အင်္ဂေဟိ သမန္နာဂတံ၊ အာပတ္တိယာ အဒဿနေ၊ ဥက္ခေပနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အသမ္မုခါ ကတံ ဟောတိ၊ အပ္ပဋိပုစ္ဆာ ကတံ ဟောတိ၊ အပ္ပဋိညာယ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ၊ အာပတ္တိယာ အဒဿနေ၊ ဥက္ခေပနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ၊ အာပတ္တိယာ အဒဿနေ၊ ဥက္ခေပနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အနာပတ္တိယာ ကတံ ဟောတိ၊ အဒေသနာဂါမိနိယာ အာပတ္တိယာ ကတံ ¶ ဟောတိ၊ ဒေသိတာယ အာပတ္တိယာ ကတံ ဟောတိ…ပေ… အစောဒေတွာ ကတံ ဟောတိ၊ အသာရေတွာ ကတံ ဟောတိ၊ အာပတ္တိံ အနာရောပေတွာ ကတံ ဟောတိ…ပေ… အသမ္မုခါ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အပ္ပဋိပုစ္ဆာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အပ္ပဋိညာယ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အနာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အဒေသနာဂါမိနိယာ အာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… ဒေသိတာယ အာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အစောဒေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အသာရေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အာပတ္တိံ အနာရောပေတွာ ¶ ကတံ ဟောတိ၊ အဓမ္မေန ¶ ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ၊ အာပတ္တိယာ အဒဿနေ၊ ဥက္ခေပနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

အာပတ္တိယာ အဒဿနေ ဥက္ခေပနီယကမ္မေ အဓမ္မကမ္မဒွါဒသကံ နိဋ္ဌိတံ။

ဓမ္မကမ္မဒွါဒသကံ

၄၉။ ‘‘တီဟိ ¶ ၊ ဘိက္ခဝေ၊ အင်္ဂေဟိ သမန္နာဂတံ၊ အာပတ္တိယာ အဒဿနေ၊ ဥက္ခေပနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ သမ္မုခါ ကတံ ဟောတိ၊ ပဋိပုစ္ဆာ ကတံ ဟောတိ၊ ပဋိညာယ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ၊ အာပတ္တိယာ အဒဿနေ၊ ဥက္ခေပနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ…ပေ…။ အာပတ္တိယာ ကတံ ဟောတိ၊ ဒေသနာဂါမိနိယာ အာပတ္တိယာ ကတံ ဟောတိ၊ အဒေသိတာယ အာပတ္တိယာ ကတံ ဟောတိ…ပေ… စောဒေတွာ ကတံ ဟောတိ၊ သာရေတွာ ကတံ ဟောတိ၊ အာပတ္တိံ အာရောပေတွာ ကတံ ဟောတိ…ပေ… သမ္မုခါ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ပဋိပုစ္ဆာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ¶ ပဋိညာယ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ဒေသနာဂါမိနိယာ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… အဒေသိတာယ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… စောဒေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… သာရေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… အာပတ္တိံ အာရောပေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ၊ အာပတ္တိယာ အဒဿနေ၊ ဥက္ခေပနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

အာပတ္တိယာ အဒဿနေ ဥက္ခေပနီယကမ္မေ ဓမ္မကမ္မဒွါဒသကံ နိဋ္ဌိတံ။

အာကင်္ခမာနဆက္ကံ

၅၀။ [ပရိ။ ၃၂၃] ‘‘တီဟိ ¶ ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ အာပတ္တိယာ အဒဿနေ၊ ဥက္ခေပနီယကမ္မံ ကရေယျ။ ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သင်္ဃေ အဓိကရဏကာရကော ¶ ၊ ဗာလော ဟောတိ အဗျတ္တော အာပတ္တိဗဟုလော အနပဒါနော၊ ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ အာပတ္တိယာ အဒဿနေ၊ ဥက္ခေပနီယကမ္မံ ကရေယျ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ အာပတ္တိယာ ¶ အဒဿနေ၊ ဥက္ခေပနီယကမ္မံ ကရေယျ။ အဓိသီလေ သီလဝိပန္နော ဟောတိ၊ အဇ္ဈာစာရေ အာစာရဝိပန္နော ဟောတိ၊ အတိဒိဋ္ဌိယာ ဒိဋ္ဌိဝိပန္နော ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ အာပတ္တိယာ အဒဿနေ၊ ဥက္ခေပနီယကမ္မံ ကရေယျ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ အာပတ္တိယာ အဒဿနေ၊ ဥက္ခေပနီယကမ္မံ ကရေယျ။ ဗုဒ္ဓဿ အဝဏ္ဏံ ဘာသတိ၊ ဓမ္မဿ အဝဏ္ဏံ ဘာသတိ၊ သင်္ဃဿ အဝဏ္ဏံ ဘာသတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ အာပတ္တိယာ အဒဿနေ၊ ဥက္ခေပနီယကမ္မံ ကရေယျ။

‘‘တိဏ္ဏံ၊ ဘိက္ခဝေ၊ ဘိက္ခူနံ၊ အာကင်္ခမာနော သင်္ဃော၊ အာပတ္တိယာ အဒဿနေ၊ ဥက္ခေပနီယကမ္မံ ကရေယျ။ ဧကော ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သင်္ဃေ အဓိကရဏကာရကော၊ ဧကော ဗာလော ဟောတိ အဗျတ္တော အာပတ္တိဗဟုလော အနပဒါနော၊ ဧကော ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ ¶ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ အာပတ္တိယာ အဒဿနေ၊ ဥက္ခေပနီယကမ္မံ ကရေယျ။

‘‘အပရေသမ္ပိ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ အာပတ္တိယာ အဒဿနေ၊ ဥက္ခေပနီယကမ္မံ ကရေယျ။ ဧကော အဓိသီလေ သီလဝိပန္နော ဟောတိ ¶ ၊ ဧကော အဇ္ဈာစာရေ အာစာရဝိပန္နော ဟောတိ၊ ဧကော အတိဒိဋ္ဌိယာ ဒိဋ္ဌိဝိပန္နော ဟောတိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ အာပတ္တိယာ အဒဿနေ၊ ဥက္ခေပနီယကမ္မံ ကရေယျ။

‘‘အပရေသမ္ပိ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ အာပတ္တိယာ အဒဿနေ၊ ဥက္ခေပနီယကမ္မံ ကရေယျ။ ဧကော ဗုဒ္ဓဿ အဝဏ္ဏံ ဘာသတိ၊ ဧကော ဓမ္မဿ အဝဏ္ဏံ ဘာသတိ၊ ဧကော သင်္ဃဿ အဝဏ္ဏံ ဘာသတိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ အာပတ္တိယာ အဒဿနေ၊ ဥက္ခေပနီယကမ္မံ ကရေယျ။

အာပတ္တိယာ အဒဿနေ ဥက္ခေပနီယကမ္မေ

အာကင်္ခမာနဆက္ကံ နိဋ္ဌိတံ။

တေစတ္တာလီသဝတ္တံ

၅၁။ ‘‘အာပတ္တိယာ အဒဿနေ ဥက္ခေပနီယကမ္မကတေန၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ ¶ ။ တတြာယံ သမ္မာဝတ္တနာ – န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနပိ ဘိက္ခုနိယော န ဩဝဒိတဗ္ဗာ။ ယာယ အာပတ္တိယာ သင်္ဃေန၊ အာပတ္တိယာ အဒဿနေ၊ ဥက္ခေပနီယကမ္မံ ကတံ ဟောတိ သာ အာပတ္တိ န အာပဇ္ဇိတဗ္ဗာ၊ အညာ ဝါ တာဒိသိကာ၊ တတော ဝါ ပါပိဋ္ဌတရာ၊ ကမ္မံ န ဂရဟိတဗ္ဗံ၊ ကမ္မိကာ န ဂရဟိတဗ္ဗာ ¶ ။ န ပကတတ္တဿ ဘိက္ခုနော အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရော၊ သေယျာဘိဟာရော၊ ပါဒေါဒကံ၊ ပါဒပီဌံ ပါဒကထလိကံ၊ ပတ္တစီဝရပ္ပဋိဂ္ဂဟဏံ၊ နဟာနေ ပိဋ္ဌိပရိကမ္မံ သာဒိတဗ္ဗံ။ န ပကတတ္တော ဘိက္ခု သီလဝိပတ္တိယာ အနုဒ္ဓံသေတဗ္ဗော၊ န အာစာရဝိပတ္တိယာ အနုဒ္ဓံသေတဗ္ဗော၊ န ဒိဋ္ဌိဝိပတ္တိယာ အနုဒ္ဓံသေတဗ္ဗော၊ န အာဇီဝဝိပတ္တိယာ အနုဒ္ဓံသေတဗ္ဗော၊ န ဘိက္ခု ဘိက္ခူဟိ ဘေဒေတဗ္ဗော [န ဘိက္ခူ ဘိက္ခူဟိ ဘေဒေတဗ္ဗာ (သျာ။)]၊ န ဂိဟိဒ္ဓဇော ဓာရေတဗ္ဗော၊ န တိတ္ထိယဒ္ဓဇော ဓာရေတဗ္ဗော၊ န တိတ္ထိယာ သေဝိတဗ္ဗာ၊ ဘိက္ခူ သေဝိတဗ္ဗာ၊ ဘိက္ခုသိက္ခာယ သိက္ခိတဗ္ဗံ [ဘိက္ခုသိက္ခာ သိက္ခိတဗ္ဗာ (သျာ။)]။ န ပကတတ္တေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ¶ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ၊ ပကတတ္တံ ဘိက္ခုံ ဒိသွာ အာသနာ ဝုဋ္ဌာတဗ္ဗံ၊ န ပကတတ္တော ဘိက္ခု အာသာဒေတဗ္ဗော အန္တော ဝါ ဗဟိ ဝါ။ န ပကတတ္တဿ ဘိက္ခုနော ဥပေါသထော ဌပေတဗ္ဗော၊ န ပဝါရဏာ ဌပေတဗ္ဗာ၊ န သဝစနီယံ ကာတဗ္ဗံ၊ န အနုဝါဒေါ ¶ ပဋ္ဌပေတဗ္ဗော၊ န ဩကာသော ကာရေတဗ္ဗော၊ န စောဒေတဗ္ဗော၊ န သာရေတဗ္ဗော၊ န ဘိက္ခူဟိ သမ္ပယောဇေတဗ္ဗ’’န္တိ။

အာပတ္တိယာ အဒဿနေ ဥက္ခေပနီယကမ္မေ

တေစတ္တာလီသဝတ္တံ နိဋ္ဌိတံ။

၅၂။ အထ ခေါ သင်္ဃော ဆန္နဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ အကာသိ – အသမ္ဘောဂံ သင်္ဃေန။ သော သင်္ဃေန၊ အာပတ္တိယာ အဒဿနေ၊ ဥက္ခေပနီယကမ္မကတော တမှာ အာဝါသာ အညံ အာဝါသံ အဂမာသိ။ တတ္ထ ဘိက္ခူ နေဝ အဘိဝါဒေသုံ၊ န ပစ္စုဋ္ဌေသုံ၊ န အဉ္ဇလိကမ္မံ န ¶ သာမီစိကမ္မံ အကံသု၊ န သက္ကရိံသု၊ န ဂရု ကရိံသု [န ဂရုကရိံသု (က။)]၊ န မာနေသုံ၊ န ပူဇေသုံ။ သော ဘိက္ခူဟိ အသက္ကရိယမာနော အဂရုကရိယမာနော အမာနိယမာနော အပူဇိယမာနော အသက္ကာရပကတော တမှာပိ အာဝါသာ အညံ အာဝါသံ အဂမာသိ။ တတ္ထပိ ဘိက္ခူ နေဝ အဘိဝါဒေသုံ၊ န ပစ္စုဋ္ဌေသုံ၊ န အဉ္ဇလိကမ္မံ န သာမီစိကမ္မံ အကံသု၊ န ¶ သက္ကရိံသု၊ န ဂရုံ ကရိံသု၊ န မာနေသုံ၊ န ပူဇေသုံ။ သော ဘိက္ခူဟိ အသက္ကရိယမာနော အဂရုကရိယမာနော အမာနိယမာနော အပူဇိယမာနော အသက္ကာရပကတော တမှာပိ အာဝါသာ အညံ အာဝါသံ အဂမာသိ။ တတ္ထပိ ဘိက္ခူ နေဝ အဘိဝါဒေသုံ၊ န ပစ္စုဋ္ဌေသုံ၊ န အဉ္ဇလိကမ္မံ န သာမီစိကမ္မံ အကံသု၊ န သက္ကရိံသု၊ န ဂရုံ ကရိံသု၊ န မာနေသုံ၊ န ပူဇေသုံ။ သော ဘိက္ခူဟိ အသက္ကရိယမာနော အဂရုကရိယမာနော အမာနိယမာနော အပူဇိယမာနော အသက္ကာရပကတော ပုနဒေဝ ကောသမ္ဗိံ ပစ္စာဂဉ္ဆိ။ သော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ဘိက္ခူ ဥပသင်္ကမိတွာ ဧဝံ ဝဒေတိ – ‘‘အဟံ၊ အာဝုသော၊ သင်္ဃေန၊ အာပတ္တိယာ အဒဿနေ၊ ဥက္ခေပနီယကမ္မကတော သမ္မာ ဝတ္တာမိ၊ လောမံ ပါတေမိ၊ နေတ္ထာရံ ဝတ္တာမိ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘိက္ခူ ဘဂဝတော ဧတမတ္ထံ အာရောစေသုံ…ပေ…။ ‘‘တေန ဟိ၊ ဘိက္ခဝေ၊ သင်္ဃော ဆန္နဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတု။

နပ္ပဋိပ္ပဿမ္ဘေတဗ္ဗ-တေစတ္တာလီသကံ

၅၃။ ‘‘ပဉ္စဟိ ¶ ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။ ဥပသမ္ပာဒေတိ၊ နိဿယံ ¶ ဒေတိ၊ သာမဏေရံ ဥပဋ္ဌာပေတိ၊ ဘိက္ခုနောဝါဒကသမ္မုတိံ သာဒိယတိ၊ သမ္မတောပိ ဘိက္ခုနိယော ဩဝဒတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။

[ပရိ။ ၄၂၀] ‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။ ယာယ အာပတ္တိယာ သင်္ဃေန၊ အာပတ္တိယာ အဒဿနေ၊ ဥက္ခေပနီယကမ္မံ ကတံ ဟောတိ တံ အာပတ္တိံ အာပဇ္ဇတိ၊ အညံ ဝါ တာဒိသိကံ၊ တတော ဝါ ပါပိဋ္ဌတရံ၊ ကမ္မံ ဂရဟတိ၊ ကမ္မိကေ ဂရဟတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။ ပကတတ္တဿ ဘိက္ခုနော အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရံ သာဒိယတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။ ပကတတ္တဿ ¶ ဘိက္ခုနော သေယျာဘိဟာရံ၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပ္ပဋိဂ္ဂဟဏံ ¶ ၊ နဟာနေ ပိဋ္ဌိပရိကမ္မံ သာဒိယတိ – ဣမေဟိ ခေါ၊ ဘိက္ခဝေ ¶ ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။ ပကတတ္တံ ဘိက္ခုံ သီလဝိပတ္တိယာ အနုဒ္ဓံသေတိ၊ အာစာရဝိပတ္တိယာ အနုဒ္ဓံသေတိ၊ ဒိဋ္ဌိဝိပတ္တိယာ အနုဒ္ဓံသေတိ၊ အာဇီဝဝိပတ္တိယာ အနုဒ္ဓံသေတိ၊ ဘိက္ခုံ [ဘိက္ခူ (သီ။ သျာ။)] ဘိက္ခူဟိ ဘေဒေတိ – ဣမေဟိ ¶ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။ ဂိဟိဒ္ဓဇံ ဓာရေတိ၊ တိတ္ထိယဒ္ဓဇံ ဓာရေတိ၊ တိတ္ထိယေ သေဝတိ၊ ဘိက္ခူ န သေဝတိ၊ ဘိက္ခုသိက္ခာယ န သိက္ခတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။ ပကတတ္တေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝသတိ၊ ဧကစ္ဆန္နေ အနာဝါသေ ဝသတိ၊ ဧကစ္ဆန္နေ အာဝါသေ ဝါ အနာဝါသေ ဝါ ဝသတိ၊ ပကတတ္တံ ဘိက္ခုံ ဒိသွာ အာသနာ န ဝုဋ္ဌာတိ၊ ပကတတ္တံ ဘိက္ခုံ အာသာဒေတိ ¶ အန္တော ဝါ ဗဟိ ဝါ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။

‘‘အဋ္ဌဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။ ပကတတ္တဿ ဘိက္ခုနော ဥပေါသထံ ဌပေတိ၊ ပဝါရဏံ ဌပေတိ၊ သဝစနီယံ ကရောတိ၊ အနုဝါဒံ ပဋ္ဌပေတိ၊ ဩကာသံ ကာရေတိ၊ စောဒေတိ၊ သာရေတိ၊ ဘိက္ခူဟိ သမ္ပယောဇေတိ – ဣမေဟိ ခေါ၊ ဘိက္ခဝေ၊ အဋ္ဌဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။

အာပတ္တိယာ အဒဿနေ ဥက္ခေပနီယကမ္မေ

နပ္ပဋိပ္ပဿမ္ဘေတဗ္ဗ-တေစတ္တာလီသကံ နိဋ္ဌိတံ။

ပဋိပ္ပဿမ္ဘေတဗ္ဗ-တေစတ္တာလီသကံ

၅၄။ ‘‘ပဉ္စဟိ ¶ ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။ န ဥပသမ္ပာဒေတိ၊ န နိဿယံ ဒေတိ၊ န သာမဏေရံ ဥပဋ္ဌာပေတိ၊ န ဘိက္ခုနောဝါဒကသမ္မုတိံ သာဒိယတိ၊ သမ္မတောပိ ဘိက္ခုနိယော န ဩဝဒတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ¶ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။ ယာယ အာပတ္တိယာ သင်္ဃေန အာပတ္တိယာ အဒဿနေ ဥက္ခေပနီယကမ္မံ ကတံ ဟောတိ တံ ¶ အာပတ္တိံ န အာပဇ္ဇတိ၊ အညံ ဝါ တာဒိသိကံ၊ တတော ဝါ ပါပိဋ္ဌတရံ၊ ကမ္မံ န ဂရဟတိ၊ ကမ္မိကေ န ဂရဟတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။ န ပကတတ္တဿ ဘိက္ခုနော အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရံ သာဒိယတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။ န ပကတတ္တဿ ဘိက္ခုနော သေယျာဘိဟာရံ၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပ္ပဋိဂ္ဂဟဏံ၊ နဟာနေ ပိဋ္ဌိပရိကမ္မံ သာဒိယတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။ န ပကတတ္တံ ဘိက္ခုံ သီလဝိပတ္တိယာ အနုဒ္ဓံသေတိ၊ န အာစာရဝိပတ္တိယာ အနုဒ္ဓံသေတိ၊ န ဒိဋ္ဌိဝိပတ္တိယာ အနုဒ္ဓံသေတိ၊ န အာဇီဝဝိပတ္တိယာ အနုဒ္ဓံသေတိ၊ န ဘိက္ခုံ ¶ ဘိက္ခူဟိ ဘေဒေတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။

‘‘အပရေဟိပိ ¶ ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။ န ဂိဟိဒ္ဓဇံ ဓာရေတိ၊ န တိတ္ထိယဒ္ဓဇံ ဓာရေတိ၊ န တိတ္ထိယေ သေဝတိ၊ ဘိက္ခူ သေဝတိ၊ ဘိက္ခုသိက္ခာယ ¶ သိက္ခတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။ န ပကတတ္တေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝသတိ၊ န ဧကစ္ဆန္နေ အနာဝါသေ ဝသတိ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝသတိ၊ ပကတတ္တံ ဘိက္ခုံ ဒိသွာ အာသနာ ဝုဋ္ဌာတိ၊ န ပကတတ္တံ ဘိက္ခုံ အာသာဒေတိ အန္တော ဝါ ဗဟိ ဝါ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။

‘‘အဋ္ဌဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။ န ပကတတ္တဿ ဘိက္ခုနော ဥပေါသထံ ဌပေတိ၊ န ပဝါရဏံ ဌပေတိ၊ န သဝစနီယံ ကရောတိ၊ န အနုဝါဒံ ¶ ပဋ္ဌပေတိ၊ န ဩကာသံ ကာရေတိ၊ န စောဒေတိ၊ န သာရေတိ၊ န ဘိက္ခူဟိ သမ္ပယောဇေတိ – ဣမေဟိ ခေါ၊ ဘိက္ခဝေ၊ အဋ္ဌဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။

အာပတ္တိယာ အဒဿနေ ဥက္ခေပနီယကမ္မေ

ပဋိပ္ပဿမ္ဘေတဗ္ဗတေစတ္တာလီသကံ နိဋ္ဌိတံ။

၅၅။ ‘‘ဧဝဉ္စ ပန၊ ဘိက္ခဝေ၊ ပဋိပ္ပဿမ္ဘေတဗ္ဗံ။ တေန၊ ဘိက္ခဝေ၊ ဆန္နေန ဘိက္ခုနာ သင်္ဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘အဟံ၊ ဘန္တေ၊ သင်္ဃေန၊ အာပတ္တိယာ အဒဿနေ၊ ဥက္ခေပနီယကမ္မကတော သမ္မာ ဝတ္တာမိ၊ လောမံ ပါတေမိ၊ နေတ္ထာရံ ဝတ္တာမိ၊ အာပတ္တိယာ အဒဿနေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစာမီ’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

‘‘သုဏာတု မေ၊ ဘန္တေ၊ သင်္ဃော။ အယံ ဆန္နော ဘိက္ခု သင်္ဃေန၊ အာပတ္တိယာ အဒဿနေ၊ ဥက္ခေပနီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ အာပတ္တိယာ အဒဿနေ ဥက္ခေပနီယဿ ¶ ကမ္မဿ ပဋိပ္ပဿဒ္ဓိံ ယာစတိ ¶ ။ ယဒိ သင်္ဃဿ ပတ္တကလ္လံ၊ သင်္ဃော ဆန္နဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဆန္နော ဘိက္ခု သင်္ဃေန၊ အာပတ္တိယာ အဒဿနေ၊ ဥက္ခေပနီယကမ္မကတော သမ္မာ ¶ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ အာပတ္တိယာ အဒဿနေ၊ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ သင်္ဃော ဆန္နဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတိ။ ယဿာယသ္မတော ခမတိ ဆန္နဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ အယံ ဆန္နော ဘိက္ခု သင်္ဃေန၊ အာပတ္တိယာ အဒဿနေ၊ ဥက္ခေပနီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ အာပတ္တိယာ အဒဿနေ၊ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ သင်္ဃော ဆန္နဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ ပဋိပ္ပဿမ္ဘေတိ။ ယဿာယသ္မတော ခမတိ ဆန္နဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ပဋိပ္ပဿဒ္ဓံ သင်္ဃေန ဆန္နဿ ဘိက္ခုနော၊ အာပတ္တိယာ အဒဿနေ၊ ဥက္ခေပနီယကမ္မံ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

အာပတ္တိယာ အဒဿနေ ဥက္ခေပနီယကမ္မံ နိဋ္ဌိတံ ပဉ္စမံ။

၆။ အာပတ္တိယာ အပ္ပဋိကမ္မေ ဥက္ခေပနီယကမ္မံ

၅၆။ တေန ¶ သမယေန ဗုဒ္ဓါ ဘဂဝါ ကောသမ္ဗိယံ ဝိဟရတိ ဃောသိတာရာမေ။ တေန ခေါ ပန သမယေန အာယသ္မာ ဆန္နော အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဋိကာတုံ။ ယေ တေ ဘိက္ခူ အပ္ပိစ္ဆာ…ပေ… ¶ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဆန္နော အာပတ္တိံ အာပဇ္ဇိတွာ န ဣစ္ဆိဿတိ အာပတ္တိံ ပဋိကာတု’’န္တိ? အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။

အထ ¶ ¶ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသင်္ဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ၊ ဘိက္ခဝေ၊ ဆန္နော ဘိက္ခု အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဋိကာတု’’န္တိ? ‘‘သစ္စံ ဘဂဝါ’’တိ။ ဝိဂရဟိ ဗုဒ္ဓါ ဘဂဝါ – ‘‘အနနုစ္ဆဝိကံ…ပေ… ကထဉှိ နာမ သော၊ ဘိက္ခဝေ၊ မောဃပုရိသော အာပတ္တိံ အာပဇ္ဇိတွာ န ဣစ္ဆိဿတိ အာပတ္တိံ ပဋိကာတုံ။ နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ – တေန ဟိ၊ ဘိက္ခဝေ၊ သင်္ဃော ဆန္နဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကရောတု – အသမ္ဘောဂံ သင်္ဃေန။ ဧဝဉ္စ ပန၊ ဘိက္ခဝေ၊ ကာတဗ္ဗံ – ပဌမံ ဆန္နော ဘိက္ခု စောဒေတဗ္ဗော၊ စောဒေတွာ သာရေတဗ္ဗော၊ သာရေတွာ အာပတ္တိံ အာရောပေတဗ္ဗော၊ အာပတ္တိံ အာရောပေတွာ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

‘‘သုဏာတု မေ၊ ဘန္တေ၊ သင်္ဃော။ အယံ ဆန္နော ဘိက္ခု အာပတ္တိံ အာပဇ္ဇိတွာ န ဣစ္ဆတိ အာပတ္တိံ ¶ ပဋိကာတုံ။ ယဒိ သင်္ဃဿ ပတ္တကလ္လံ၊ သင်္ဃော ဆန္နဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကရေယျ – အသမ္ဘောဂံ သင်္ဃေန။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဆန္နော ဘိက္ခု အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဋိကာတုံ။ သင်္ဃော ဆန္နဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကရောတိ – အသမ္ဘောဂံ သင်္ဃေန။ ယဿာယသ္မတော ခမတိ ဆန္နဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယဿ ကမ္မဿ ကရဏံ – အသမ္ဘောဂံ သင်္ဃေန၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ အယံ ဆန္နော ဘိက္ခု အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဋိကာတုံ။ သင်္ဃော ဆန္နဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကရောတိ – အသမ္ဘောဂံ သင်္ဃေန။ ယဿာယသ္မတော ခမတိ ဆန္နဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယဿ ကမ္မဿ ကရဏံ – အသမ္ဘောဂံ သင်္ဃေန၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ကတံ သင်္ဃေန ဆန္နဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ – အသမ္ဘောဂံ သင်္ဃေန။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီတိ။

‘‘အာဝါသပရမ္ပရဉ္စ ¶ ¶ ၊ ဘိက္ခဝေ၊ သံသထ – ‘ဆန္နော ဘိက္ခု၊ သင်္ဃေန အာပတ္တိယာ [ဆန္နော ဘိက္ခု အာပတ္တိယာ (သီ။ က။)] အပ္ပဋိကမ္မေ၊ ဥက္ခေပနီယကမ္မကတော – အသမ္ဘောဂံ သင်္ဃေနာ’တိ။

အဓမ္မကမ္မဒွါဒသကံ

၅၇။ ‘‘တီဟိ၊ ဘိက္ခဝေ၊ အင်္ဂေဟိ သမန္နာဂတံ၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အသမ္မုခါ ကတံ ဟောတိ၊ အပ္ပဋိပုစ္ဆာ ကတံ ဟောတိ၊ အပ္ပဋိညာယ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ၊ အာပတ္တိယာ ¶ အပ္ပဋိကမ္မေ၊ ဥက္ခေပနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အနာပတ္တိယာ ကတံ ဟောတိ၊ အဒေသနာဂါမိနိယာ အာပတ္တိယာ ကတံ ဟောတိ၊ ဒေသိတာယ အာပတ္တိယာ ကတံ ဟောတိ…ပေ… အစောဒေတွာ ကတံ ဟောတိ၊ အသာရေတွာ ကတံ ဟောတိ၊ အာပတ္တိံ အနာရောပေတွာ ကတံ ဟောတိ…ပေ… အသမ္မုခါ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အပ္ပဋိပုစ္ဆာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အပ္ပဋိညာယ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အနာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အဒေသနာဂါမိနိယာ အာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… ¶ ဒေသိတာယ အာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အစောဒေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အသာရေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အာပတ္တိံ အနာရောပေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

အာပတ္တိယာ အပ္ပဋိကမ္မေ ဥက္ခေပနီယကမ္မေ

အဓမ္မကမ္မဒွါဒသကံ နိဋ္ဌိတံ။

ဓမ္မကမ္မဒွါဒသကံ

၅၈။ ‘‘တီဟိ ¶ ၊ ဘိက္ခဝေ၊ အင်္ဂေဟိ သမန္နာဂတံ၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ¶ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ သမ္မုခါ ကတံ ဟောတိ၊ ပဋိပုစ္ဆာ ကတံ ဟောတိ၊ ပဋိညာယ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ အာပတ္တိယာ ကတံ ဟောတိ၊ ဒေသနာဂါမိနိယာ အာပတ္တိယာ ကတံ ဟောတိ၊ အဒေသိတာယ အာပတ္တိယာ ကတံ ဟောတိ…ပေ… ¶ စောဒေတွာ ကတံ ဟောတိ၊ သာရေတွာ ကတံ ဟောတိ၊ အာပတ္တိံ အာရောပေတွာ ကတံ ဟောတိ…ပေ… သမ္မုခါ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ပဋိပုစ္ဆာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ပဋိညာယ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ဒေသနာဂါမိနိယာ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ¶ အဒေသိတာယ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… စောဒေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… သာရေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… အာပတ္တိံ အာရောပေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

အာပတ္တိယာ အပ္ပဋိကမ္မေ ဥက္ခေပနီယကမ္မေ

ဓမ္မကမ္မဒွါဒသကံ နိဋ္ဌိတံ။

အာကင်္ခမာနဆက္ကံ

၅၉။ [ပရိ။ ၃၂၃] ‘‘တီဟိ ¶ ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကရေယျ။ ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သင်္ဃေ အဓိကရဏကာရကော၊ ဗာလော ဟောတိ အဗျတ္တော အာပတ္တိဗဟုလော အနပဒါနော၊ ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကရေယျ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ အာပတ္တိယာ ¶ အပ္ပဋိကမ္မေ၊ ဥက္ခေပနီယကမ္မံ ကရေယျ ¶ ။ အဓိသီလေ သီလဝိပန္နော ဟောတိ၊ အဇ္ဈာစာရေ အာစာရဝိပန္နော ဟောတိ၊ အတိဒိဋ္ဌိယာ ဒိဋ္ဌိဝိပန္နော ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကရေယျ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကရေယျ။ ဗုဒ္ဓဿ အဝဏ္ဏံ ဘာသတိ၊ ဓမ္မဿ အဝဏ္ဏံ ဘာသတိ၊ သင်္ဃဿ အဝဏ္ဏံ ဘာသတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကရေယျ။

‘‘တိဏ္ဏံ၊ ဘိက္ခဝေ၊ ဘိက္ခူနံ၊ အာကင်္ခမာနော သင်္ဃော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကရေယျ။ ဧကော ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သင်္ဃေ အဓိကရဏကာရကော၊ ဧကော ဗာလော ဟောတိ အဗျတ္တော အာပတ္တိဗဟုလော အနပဒါနော၊ ဧကော ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကရေယျ။

‘‘အပရေသမ္ပိ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကရေယျ။ ဧကော အဓိသီလေ သီလဝိပန္နော ¶ ဟောတိ၊ ဧကော အဇ္ဈာစာရေ အာစာရဝိပန္နော ဟောတိ၊ ဧကော ¶ အတိဒိဋ္ဌိယာ ဒိဋ္ဌိဝိပန္နော ဟောတိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကရေယျ။

‘‘အပရေသမ္ပိ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကရေယျ။ ဧကော ဗုဒ္ဓဿ အဝဏ္ဏံ ဘာသတိ၊ ဧကော ဓမ္မဿ အဝဏ္ဏံ ဘာသတိ၊ ဧကော သင်္ဃဿ အဝဏ္ဏံ ဘာသတိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကရေယျ။

အာပတ္တိယာ အပ္ပဋိကမ္မေ ဥက္ခေပနီယကမ္မေ

အာကင်္ခမာနဆက္ကံ နိဋ္ဌိတံ။

တေစတ္တာလီသဝတ္တံ

၆၀။ ‘‘အာပတ္တိယာ ¶ အပ္ပဋိကမ္မေ ဥက္ခေပနီယကမ္မကတေန၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ။ တတြာယံ သမ္မာဝတ္တနာ – န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနပိ ဘိက္ခုနိယော န ဩဝဒိတဗ္ဗာ။ ယာယ အာပတ္တိယာ သင်္ဃေန၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကတံ ဟောတိ သာ အာပတ္တိ န အာပဇ္ဇိတဗ္ဗာ၊ အညာ ဝါ တာဒိသိကာ၊ တတော ဝါ ပါပိဋ္ဌတရာ၊ ကမ္မံ န ဂရဟိတဗ္ဗံ၊ ကမ္မိကာ န ဂရဟိတဗ္ဗာ။ န ပကတတ္တဿ ဘိက္ခုနော အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရော၊ သေယျာဘိဟာရော၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပ္ပဋိဂ္ဂဟဏံ၊ နဟာနေ ပိဋ္ဌိပရိကမ္မံ သာဒိတဗ္ဗံ။ န ပကတတ္တော ဘိက္ခု သီလဝိပတ္တိယာ အနုဒ္ဓံသေတဗ္ဗော ¶ ၊ န အာစာရဝိပတ္တိယာ အနုဒ္ဓံသေတဗ္ဗော၊ န ဒိဋ္ဌိဝိပတ္တိယာ အနုဒ္ဓံသေတဗ္ဗော၊ န အာဇီဝဝိပတ္တိယာ အနုဒ္ဓံသေတဗ္ဗော၊ န ဘိက္ခု ဘိက္ခူဟိ ဘေဒေတဗ္ဗော။ န ဂိဟိဒ္ဓဇော ဓာရေတဗ္ဗော၊ န တိတ္ထိယဒ္ဓဇော ဓာရေတဗ္ဗော၊ န တိတ္ထိယာ သေဝိတဗ္ဗာ၊ ဘိက္ခူ သေဝိတဗ္ဗာ၊ ဘိက္ခုသိက္ခာယ သိက္ခိတဗ္ဗံ။ န ပကတတ္တေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ ¶ အနာဝါသေ ဝါ ဝတ္ထဗ္ဗံ၊ ပကတတ္တံ ဘိက္ခုံ ဒိသွာ အာသနာ ဝုဋ္ဌာတဗ္ဗံ၊ န ပကတတ္တော ဘိက္ခု အာသာဒေတဗ္ဗော အန္တော ဝါ ဗဟိ ဝါ။ န ပကတတ္တဿ ဘိက္ခုနော ဥပေါသထော ဌပေတဗ္ဗော၊ န ပဝါရဏာ ဌပေတဗ္ဗာ၊ န သဝစနီယံ ကာတဗ္ဗံ၊ န အနုဝါဒေါ ပဋ္ဌပေတဗ္ဗော၊ န ဩကာသော ကာရေတဗ္ဗော၊ န စောဒေတဗ္ဗော၊ န သာရေတဗ္ဗော၊ န ဘိက္ခူဟိ သမ္ပယောဇေတဗ္ဗ’’န္တိ။

အာပတ္တိယာ အပ္ပဋိကမ္မေ ဥက္ခေပနီယကမ္မေ

တေစတ္တာလီသဝတ္တံ နိဋ္ဌိတံ။

၆၁။ အထ ခေါ သင်္ဃော ဆန္နဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ အကာသိ – အသမ္ဘောဂံ သင်္ဃေန။ သော သင်္ဃေန၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မကတော တမှာ အာဝါသာ အညံ အာဝါသံ အဂမာသိ။ တတ္ထ ဘိက္ခူ နေဝ အဘိဝါဒေသုံ၊ န ပစ္စုဋ္ဌေသုံ၊ န အဉ္ဇလိကမ္မံ န သာမီစိကမ္မံ အကံသု၊ န သက္ကရိံသု၊ န ဂရုံ ကရိံသု၊ န မာနေသုံ၊ န ပူဇေသုံ။ သော ဘိက္ခူဟိ အသက္ကရိယမာနော အဂရုကရိယမာနော အမာနိယမာနော အပူဇိယမာနော အသက္ကာရပကတော တမှာပိ အာဝါသာ အညံ အာဝါသံ ¶ အဂမာသိ။ တတ္ထပိ ဘိက္ခူ နေဝ အဘိဝါဒေသုံ၊ န ပစ္စုဋ္ဌေသုံ၊ န အဉ္ဇလိကမ္မံ န သာမီစိကမ္မံ အကံသု၊ န သက္ကရိံသု၊ န ဂရုံ ကရိံသု၊ န မာနေသုံ၊ န ပူဇေသုံ။ သော ဘိက္ခူဟိ အသက္ကရိယမာနော အဂရုကရိယမာနော အမာနိယမာနော ¶ အပူဇိယမာနော အသက္ကာရပကတော တမှာပိ အာဝါသာ အညံ အာဝါသံ အဂမာသိ။ တတ္ထပိ ဘိက္ခူ နေဝ အဘိဝါဒေသုံ၊ န ပစ္စုဋ္ဌေသုံ၊ န အဉ္ဇလိကမ္မံ န သာမီစိကမ္မံ အကံသု၊ န သက္ကရိံသု၊ န ဂရုံ ကရိံသု၊ န မာနေသုံ၊ န ပူဇေသုံ။ သော ဘိက္ခူဟိ အသက္ကရိယမာနော အဂရုကရိယမာနော အမာနိယမာနော အပူဇိယမာနော အသက္ကာရပကတော ပုနဒေဝ ကောသမ္ဗိံ ပစ္စာဂဉ္ဆိ။ သော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ဘိက္ခူ ဥပသင်္ကမိတွာ ဧဝံ ဝဒေတိ – ‘‘အဟံ၊ အာဝုသော၊ သင်္ဃေန၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မကတော သမ္မာ ဝတ္တာမိ၊ လောမံ ပါတေမိ၊ နေတ္ထာရံ ဝတ္တာမိ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘိက္ခူ ဘဂဝတော ဧတမတ္ထံ အာရောစေသုံ…ပေ…။ ‘‘တေန ဟိ၊ ဘိက္ခဝေ၊ သင်္ဃော ဆန္နဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ပဋိပ္ပဿမ္ဘေတု။

နပ္ပဋိပ္ပဿမ္ဘေတဗ္ဗတေစတ္တာလီသကံ

၆၂။ ‘‘ပဉ္စဟိ ¶ ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။ ဥပသမ္ပာဒေတိ၊ နိဿယံ ဒေတိ၊ သာမဏေရံ ဥပဋ္ဌာပေတိ၊ ဘိက္ခုနောဝါဒကသမ္မုတိံ သာဒိယတိ၊ သမ္မတောပိ ဘိက္ခုနိယော ဩဝဒတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။

[ပရိ။ ၄၂၀] ‘‘အပရေဟိပိ ¶ ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။ ယာယ အာပတ္တိယာ သင်္ဃေန၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကတံ ဟောတိ တံ အာပတ္တိံ အာပဇ္ဇတိ၊ အညံ ဝါ တာဒိသိကံ၊ တတော ဝါ ပါပိဋ္ဌတရံ၊ ကမ္မံ ဂရဟတိ၊ ကမ္မိကေ ဂရဟတိ…ပေ… ပကတတ္တဿ ဘိက္ခုနော အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရံ သာဒိယတိ…ပေ… ပကတတ္တဿ ဘိက္ခုနော သေယျာဘိဟာရံ၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပ္ပဋိဂ္ဂဟဏံ၊ နဟာနေ ပိဋ္ဌိပရိကမ္မံ သာဒိယတိ…ပေ… ပကတတ္တံ ဘိက္ခုံ သီလဝိပတ္တိယာ အနုဒ္ဓံသေတိ၊ အာစာရဝိပတ္တိယာ အနုဒ္ဓံသေတိ၊ ဒိဋ္ဌိဝိပတ္တိယာ အနုဒ္ဓံသေတိ၊ အာဇီဝဝိပတ္တိယာ အနုဒ္ဓံသေတိ၊ ဘိက္ခုံ ဘိက္ခူဟိ ဘေဒေတိ…ပေ… ဂိဟိဒ္ဓဇံ ဓာရေတိ၊ တိတ္ထိယဒ္ဓဇံ ဓာရေတိ၊ တိတ္ထိယေ သေဝတိ၊ ဘိက္ခူ န သေဝတိ၊ ဘိက္ခုသိက္ခာယ န သိက္ခတိ…ပေ… ပကတတ္တေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝသတိ၊ ဧကစ္ဆန္နေ အနာဝါသေ ဝသတိ၊ ဧကစ္ဆန္နေ အာဝါသေ ဝါ အနာဝါသေ ဝါ ဝသတိ၊ ပကတတ္တံ ဘိက္ခုံ ဒိသွာ အာသနာ န ဝုဋ္ဌာတိ၊ ပကတတ္တံ ဘိက္ခုံ အာသာဒေတိ အန္တော ဝါ ¶ ဗဟိ ဝါ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အပ္ပဋိကမ္မေ ¶ ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။

‘‘အဋ္ဌဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။ ပကတတ္တဿ ဘိက္ခုနော ဥပေါသထံ ဌပေတိ၊ ပဝါရဏံ ဌပေတိ၊ သဝစနီယံ ကရောတိ၊ အနုဝါဒံ ပဋ္ဌပေတိ၊ ဩကာသံ ကာရေတိ၊ စောဒေတိ၊ သာရေတိ၊ ဘိက္ခူဟိ သမ္ပယောဇေတိ ¶ – ဣမေဟိ ခေါ၊ ဘိက္ခဝေ၊ အဋ္ဌဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။

အာပတ္တိယာ အပ္ပဋိကမ္မေ ဥက္ခေပနီယကမ္မေ

နပ္ပဋိပ္ပဿမ္ဘေတဗ္ဗတေစတ္တာလီသကံ နိဋ္ဌိတံ။

ပဋိပ္ပဿမ္ဘေတဗ္ဗတေစတ္တာလီသကံ

၆၃။ ‘‘ပဉ္စဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။ န ဥပသမ္ပာဒေတိ၊ န နိဿယံ ဒေတိ၊ န သာမဏေရံ ဥပဋ္ဌာပေတိ၊ န ဘိက္ခုနောဝါဒကသမ္မုတိံ သာဒိယတိ၊ သမ္မတောပိ ဘိက္ခုနိယော န ဩဝဒတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။ ယာယ အာပတ္တိယာ သင်္ဃေန၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ကတံ ဟောတိ တံ အာပတ္တိံ န အာပဇ္ဇတိ၊ အညံ ဝါ တာဒိသိကံ၊ တတော ဝါ ပါပိဋ္ဌတရံ ¶ ၊ ကမ္မံ န ဂရဟတိ၊ ကမ္မိကေ န ဂရဟတိ…ပေ… န ပကတတ္တဿ ဘိက္ခုနော အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရံ သာဒိယတိ…ပေ… န ပကတတ္တဿ ဘိက္ခုနော သေယျာဘိဟာရံ၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပ္ပဋိဂ္ဂဟဏံ၊ နဟာနေ ပိဋ္ဌိပရိကမ္မံ သာဒိယတိ…ပေ… န ပကတတ္တံ ဘိက္ခုံ သီလဝိပတ္တိယာ အနုဒ္ဓံသေတိ၊ န အာစာရဝိပတ္တိယာ အနုဒ္ဓံသေတိ၊ န ဒိဋ္ဌိဝိပတ္တိယာ အနုဒ္ဓံသေတိ၊ န အာဇီဝဝိပတ္တိယာ အနုဒ္ဓံသေတိ၊ န ဘိက္ခုံ ဘိက္ခူဟိ ဘေဒေတိ…ပေ… န ဂိဟိဒ္ဓဇံ ဓာရေတိ၊ န တိတ္ထိယဒ္ဓဇံ ဓာရေတိ၊ န တိတ္ထိယေ သေဝတိ၊ ဘိက္ခူ သေဝတိ၊ ဘိက္ခုသိက္ခာယ သိက္ခတိ…ပေ… န ပကတတ္တေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝသတိ၊ န ဧကစ္ဆန္နေ အနာဝါသေ ဝသတိ၊ န ဧကစ္ဆန္နေ ¶ အာဝါသေ ဝါ အနာဝါသေ ဝါ ဝသတိ၊ ပကတတ္တံ ဘိက္ခုံ ဒိသွာ အာသနာ ဝုဋ္ဌာတိ၊ န ပကတတ္တံ ဘိက္ခုံ အာသာဒေတိ အန္တော ဝါ ဗဟိ ဝါ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။

‘‘အဋ္ဌဟိ ¶ ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ အာပတ္တိယာ ¶ အပ္ပဋိကမ္မေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။ န ပကတတ္တဿ ဘိက္ခုနော ဥပေါသထံ ဌပေတိ၊ န ပဝါရဏံ ဌပေတိ၊ န သဝစနီယံ ကရောတိ၊ န အနုဝါဒံ ပဋ္ဌပေတိ၊ န ဩကာသံ ကာရေတိ၊ န စောဒေတိ၊ န သာရေတိ၊ န ဘိက္ခူဟိ သမ္ပယောဇေတိ – ဣမေဟိ ခေါ၊ ဘိက္ခဝေ၊ အဋ္ဌဟင်္ဂေဟိ သမန္နာဂတဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။

အာပတ္တိယာ အပ္ပဋိကမ္မေ ဥက္ခေပနီယကမ္မေ

ပဋိပ္ပဿမ္ဘေတဗ္ဗတေစတ္တာလီသကံ နိဋ္ဌိတံ။

၆၄။ ‘‘ဧဝဉ္စ ပန၊ ဘိက္ခဝေ၊ ပဋိပ္ပဿမ္ဘေတဗ္ဗံ။ တေန ဘိက္ခဝေ၊ ဆန္နေန ဘိက္ခုနာ သင်္ဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘အဟံ၊ ဘန္တေ၊ သင်္ဃေန၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မကတော သမ္မာ ဝတ္တာမိ၊ လောမံ ပါတေမိ၊ နေတ္ထာရံ ဝတ္တာမိ၊ အာပတ္တိယာ အပ္ပဋိကမ္မေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစာမီ’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

‘‘သုဏာတု မေ၊ ဘန္တေ၊ သင်္ဃော။ အယံ ဆန္နော ဘိက္ခု သင်္ဃေန၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ အာပတ္တိယာ အပ္ပဋိကမ္မေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဆန္နဿ ဘိက္ခုနော ¶ ၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ပဋိပ္ပဿမ္ဘေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဆန္နော ဘိက္ခု သင်္ဃေန၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ အာပတ္တိယာ အပ္ပဋိကမ္မေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ သင်္ဃော ဆန္နဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ပဋိပ္ပဿမ္ဘေတိ။ ယဿာယသ္မတော ခမတိ ဆန္နဿ ဘိက္ခုနော၊ အာပတ္တိယာ ¶ အပ္ပဋိကမ္မေ၊ ဥက္ခေပနီယဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ¶ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ အယံ ဆန္နော ဘိက္ခု သင်္ဃေန၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ အာပတ္တိယာ အပ္ပဋိကမ္မေ၊ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ သင်္ဃော ဆန္နဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ ပဋိပ္ပဿမ္ဘေတိ။ ယဿာယသ္မတော ခမတိ ဆန္နဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ပဋိပ္ပဿဒ္ဓံ သင်္ဃေန ဆန္နဿ ဘိက္ခုနော၊ အာပတ္တိယာ အပ္ပဋိကမ္မေ၊ ဥက္ခေပနီယကမ္မံ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

အာပတ္တိယာ အပ္ပဋိကမ္မေ ဥက္ခေပနီယကမ္မံ နိဋ္ဌိတံ ဆဋ္ဌံ။

၇။ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ

၆၅။ [ဣဒံ ဝတ္ထု ပါစိ။ ၄၁၇၊ မ။ နိ။ ၂၃၄ အာဒယော] တေန ¶ သမယေန ဗုဒ္ဓါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အရိဋ္ဌဿ နာမ ဘိက္ခုနော ဂဒ္ဓဗာဓိပုဗ္ဗဿ [ဂန္ဓဗာဓိပုဗ္ဗဿ (က။)] ဧဝရူပံ ပါပကံ ဒိဋ္ဌိဂတံ ဥပ္ပန္နံ ဟောတိ – ‘‘တထာဟံ ဘဂဝတာ ဓမ္မံ ဒေသိတံ အာဇာနာမိ ယထာ ယေမေ အန္တရာယိကာ ဓမ္မာ ဝုတ္တာ ဘဂဝတာ တေ ပဋိသေဝတော နာလံ အန္တရာယာယာ’’တိ။ အဿောသုံ ခေါ သမ္ဗဟုလာ ဘိက္ခူ အရိဋ္ဌဿ နာမ ကိရ ဘိက္ခုနော ဂဒ္ဓဗာဓိပုဗ္ဗဿ ဧဝရူပံ ပါပကံ ဒိဋ္ဌိဂတံ ဥပ္ပန္နံ – ‘‘တထာဟံ ဘဂဝတာ ဓမ္မံ ဒေသိတံ အာဇာနာမိ ယထာ ယေမေ အန္တရာယိကာ ဓမ္မာ ဝုတ္တာ ဘဂဝတာ တေ ပဋိသေဝတော နာလံ အန္တရာယာယာ’’တိ။ အထ ခေါ တေ ဘိက္ခူ ယေန အရိဋ္ဌော ဘိက္ခု ဂဒ္ဓဗာဓိပုဗ္ဗော တေနုပသင်္ကမိံသု။ ဥပသင်္ကမိတွာ အရိဋ္ဌံ ဘိက္ခုံ ဂဒ္ဓဗာဓိပုဗ္ဗံ ဧတဒဝေါစုံ – ‘‘သစ္စံ ကိရ တေ၊ အာဝုသော အရိဋ္ဌ၊ ဧဝရူပံ ပါပကံ ဒိဋ္ဌိဂတံ ဥပ္ပန္နံ – တထာဟံ ဘဂဝတာ ဓမ္မံ ဒေသိတံ အာဇာနာမိ ယထာ ယေမေ အန္တရာယိကာ ဓမ္မာ ဝုတ္တာ ဘဂဝတာ တေ ပဋိသေဝတော နာလံ အန္တရာယာယာ’’တိ? ‘‘ဧဝံဗျာ ခေါ အဟံ၊ အာဝုသော၊ ဘဂဝတာ ဓမ္မံ ဒေသိတံ အာဇာနာမိ၊ ယထာ ယေမေ ¶ အန္တရာယိကာ ဓမ္မာ ဝုတ္တာ ဘဂဝတာ တေ ပဋိသေဝတော နာလံ အန္တရာယာယာ’’တိ။

‘‘မာဝုသော ¶ အရိဋ္ဌ၊ ဧဝံ အဝစ။ မာ ဘဂဝန္တံ အဗ္ဘာစိက္ခိ။ န ဟိ သာဓု ဘဂဝတော အဗ္ဘက္ခာနံ ¶ [အဗ္ဘာစိက္ခနံ (က။)]။ န ဟိ ဘဂဝါ ဧဝံ ဝဒေယျ။ အနေကပရိယာယေနာဝုသော အရိဋ္ဌ၊ အန္တရာယိကာ ဓမ္မာ အန္တရာယိကာ ဝုတ္တာ ဘဂဝတာ။ အလဉ္စ ပန တေ ပဋိသေဝတော အန္တရာယာယ။ အပ္ပဿာဒါ ကာမာ ဝုတ္တာ ဘဂဝတာ၊ ဗဟုဒုက္ခာ ဗဟုပါယာသာ [ဗဟူပါယာသာ (သီ။ သျာ။)]၊ အာဒီနဝေါ ဧတ္ထ ဘိယျော။ အဋ္ဌိကင်္ကလူပမာ ကာမာ ဝုတ္တာ ဘဂဝတာ၊ ဗဟုဒုက္ခာ ဗဟူပါယာသာ၊ အာဒီနဝေါ ဧတ္ထ ဘိယျော။ မံသပေသူပမာ ကာမာ ဝုတ္တာ ဘဂဝတာ…ပေ… တိဏုက္ကူပမာ ကာမာ ဝုတ္တာ ဘဂဝတာ…ပေ… အင်္ဂါရကာသူပမာ ကာမာ ဝုတ္တာ ဘဂဝတာ… သုပိနကူပမာ ကာမာ ဝုတ္တာ ဘဂဝတာ… ယာစိတကူပမာ ကာမာ ဝုတ္တာ ဘဂဝတာ… ရုက္ခဖလူပမာ ကာမာ ဝုတ္တာ ¶ ဘဂဝတာ… အသိသူနူပမာ ကာမာ ဝုတ္တာ ဘဂဝတာ… သတ္တိသူလူပမာ ကာမာ ဝုတ္တာ ဘဂဝတာ… သပ္ပသိရူပမာ ကာမာ ဝုတ္တာ ဘဂဝတာ၊ ဗဟုဒုက္ခာ ဗဟူပါယာသာ၊ အာဒီနဝေါ ဧတ္ထ ဘိယျော’’တိ။

ဧဝမ္ပိ ခေါ အရိဋ္ဌော ဘိက္ခု ဂဒ္ဓဗာဓိပုဗ္ဗော တေဟိ ဘိက္ခူဟိ ဝုစ္စမာနော တထေဝ တံ ပါပကံ ဒိဋ္ဌိဂတံ ထာမသာ ပရာမာသာ အဘိနိဝိဿ ဝေါဟရတိ – ‘‘ဧဝံဗျာ ခေါ အဟံ၊ အာဝုသော၊ ဘဂဝတာ ဓမ္မံ ဒေသိတံ အာဇာနာမိ၊ ယထာ ယေမေ အန္တရာယိကာ ဓမ္မာ ဝုတ္တာ ဘဂဝတာ တေ ပဋိသေဝတော နာလံ အန္တရာယာယာ’’တိ။ ယတော စ ခေါ တေ ဘိက္ခူ နာသက္ခိံသု အရိဋ္ဌံ ဘိက္ခုံ ဂဒ္ဓဗာဓိပုဗ္ဗံ ဧတသ္မာ ပါပကာ ဒိဋ္ဌိဂတာ ဝိဝေစေတုံ၊ အထ ခေါ တေ ဘိက္ခူ ယေန ဘဂဝါ တေနုပသင်္ကမိံသု၊ ဥပသင်္ကမိတွာ ဘဂဝတော ဧတမတ္ထံ အာရောစေသုံ။ အထ ¶ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသင်္ဃံ သန္နိပါတာပေတွာ အရိဋ္ဌံ ဘိက္ခုံ ဂဒ္ဓဗာဓိပုဗ္ဗံ ပဋိပုစ္ဆိ – ‘‘သစ္စံ ကိရ တေ၊ အရိဋ္ဌ၊ ဧဝရူပံ ပါပကံ ဒိဋ္ဌိဂတံ ဥပ္ပန္နံ – တထာဟံ ဘဂဝတာ ဓမ္မံ ဒေသိတံ အာဇာနာမိ ယထာ ယေမေ အန္တရာယိကာ ဓမ္မာ ဝုတ္တာ ဘဂဝတာ တေ ပဋိသေဝတော နာလံ အန္တရာယာယာ’’တိ? ‘‘ဧဝံဗျာ ခေါ အဟံ၊ ဘန္တေ၊ ဘဂဝတာ ဓမ္မံ ဒေသိတံ အာဇာနာမိ၊ ယထာ ယေမေ အန္တရာယိကာ ဓမ္မာ ဝုတ္တာ ဘဂဝတာ တေ ပဋိသေဝတော နာလံ အန္တရာယာယာ’’တိ။

‘‘ကဿ ¶ နု ခေါ နာမ တွံ၊ မောဃပုရိသ၊ မယာ ဧဝံ ဓမ္မံ ဒေသိတံ အာဇာနာသိ? နနု မယာ၊ မောဃပုရိသ၊ အနေကပရိယာယေန အန္တရာယိကာ ဓမ္မာ အန္တရာယိကာ ဝုတ္တာ? အလဉ္စ ပန တေ ပဋိသေဝတော အန္တရာယာယ။ အပ္ပဿာဒါ ကာမာ ဝုတ္တာ မယာ၊ ဗဟုဒုက္ခာ ဗဟုပါယာသာ၊ အာဒီနဝေါ ဧတ္ထ ဘိယျော။ အဋ္ဌိကင်္ကလူပမာ ကာမာ ဝုတ္တာ မယာ၊ ဗဟုဒုက္ခာ ဗဟုပါယာသာ၊ အာဒီနဝေါ ဧတ္ထ ဘိယျော။ မံသပေသူပမာ ကာမာ ဝုတ္တာ မယာ…ပေ… တိဏုက္ကူပမာ ကာမာ ဝုတ္တာ မယာ… အင်္ဂါရကာသူပမာ ကာမာ ဝုတ္တာ မယာ… သုပိနကူပမာ ကာမာ ဝုတ္တာ မယာ…ပေ… ယာစိတကူပမာ ကာမာ ဝုတ္တာ မယာ… ရုက္ခဖလူပမာ ကာမာ ဝုတ္တာ မယာ… အသိသူနူပမာ ကာမာ ဝုတ္တာ ¶ မယာ… သတ္တိသူလူပမာ ကာမာ ဝုတ္တာ မယာ… သပ္ပသိရူပမာ ကာမာ ဝုတ္တာ မယာ၊ ဗဟုဒုက္ခာ ဗဟုပါယာသာ၊ အာဒီနဝေါ ဧတ္ထ ဘိယျော။ အထ စ ပန တွံ၊ မောဃပုရိသ၊ အတ္တနာ ဒုဂ္ဂဟိတေန [ဒုဂ္ဂဟိတေန ဒိဋ္ဌိဂတေန (သျာ။)] အမှေ စေဝ အဗ္ဘာစိက္ခသိ၊ အတ္တာနဉ္စ ခဏသိ ¶ ၊ ဗဟုဉ္စ အပုညံ ပသဝသိ။ တဉှိ တေ၊ မောဃပုရိသ၊ ဘဝိဿတိ ဒီဃရတ္တံ အဟိတာယ ဒုက္ခာယ။ နေတံ၊ မောဃပုရိသ၊ အပ္ပသန္နာနံ ဝါ ပသာဒါယ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ – တေန ဟိ၊ ဘိက္ခဝေ၊ သင်္ဃော အရိဋ္ဌဿ ဘိက္ခုနော ဂဒ္ဓဗာဓိပုဗ္ဗဿ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကရောတု – အသမ္ဘောဂံ သင်္ဃေန။ ဧဝဉ္စ ပန ဘိက္ခဝေ ကာတဗ္ဗံ – ပဌမံ အရိဋ္ဌော ဘိက္ခု စောဒေတဗ္ဗော၊ စောဒေတွာ သာရေတဗ္ဗော၊ သာရေတွာ အာပတ္တိံ အာရောပေတဗ္ဗော၊ အာပတ္တိံ အာရောပေတွာ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၆၆။ ‘‘သုဏာတု မေ၊ ဘန္တေ၊ သင်္ဃော။ အရိဋ္ဌဿ ဘိက္ခုနော ဂဒ္ဓဗာဓိပုဗ္ဗဿ ဧဝရူပံ ပါပကံ ဒိဋ္ဌိဂတံ ¶ ဥပ္ပန္နံ – တထာဟံ ဘဂဝတာ ဓမ္မံ ဒေသိတံ အာဇာနာမိ ယထာ ယေမေ အန္တရာယိကာ ဓမ္မာ ဝုတ္တာ ဘဂဝတာ တေ ပဋိသေဝတော နာလံ အန္တရာယာယာတိ။ သော တံ ဒိဋ္ဌိံ န ပဋိနိဿဇ္ဇတိ။ ယဒိ သင်္ဃဿ ပတ္တကလ္လံ၊ သင်္ဃော အရိဋ္ဌဿ ဘိက္ခုနော ဂဒ္ဓဗာဓိပုဗ္ဗဿ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကရေယျ – အသမ္ဘောဂံ သင်္ဃေန။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အရိဋ္ဌဿ ဘိက္ခုနော ဂဒ္ဓဗာဓိပုဗ္ဗဿ ဧဝရူပံ ပါပကံ ဒိဋ္ဌိဂတံ ဥပ္ပန္နံ – တထာဟံ ဘဂဝတာ ဓမ္မံ ဒေသိတံ အာဇာနာမိ ယထာ ¶ ယေမေ အန္တရာယိကာ ဓမ္မာ ဝုတ္တာ ဘဂဝတာ တေ ပဋိသေဝတော နာလံ အန္တရာယာယာတိ။ သော တံ ဒိဋ္ဌိံ န ပဋိနိဿဇ္ဇတိ ¶ ။ သင်္ဃော အရိဋ္ဌဿ ဘိက္ခုနော ဂဒ္ဓဗာဓိပုဗ္ဗဿ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကရောတိ – အသမ္ဘောဂံ သင်္ဃေန။ ယဿာယသ္မတော ခမတိ အရိဋ္ဌဿ ဘိက္ခုနော ဂဒ္ဓဗာဓိပုဗ္ဗဿ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယဿ ကမ္မဿ ကရဏံ – အသမ္ဘောဂံ သင်္ဃေန၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ အရိဋ္ဌဿ ဘိက္ခုနော ဂဒ္ဓဗာဓိပုဗ္ဗဿ ဧဝရူပံ ပါပကံ ဒိဋ္ဌိဂတံ ဥပ္ပန္နံ – တထာဟံ ဘဂဝတာ ဓမ္မံ ဒေသိတံ အာဇာနာမိ ယထာ ယေမေ အန္တရာယိကာ ဓမ္မာ ဝုတ္တာ ဘဂဝတာ တေ ပဋိသေဝတော နာလံ အန္တရာယာယာတိ။ သော တံ ဒိဋ္ဌိံ န ပဋိနိဿဇ္ဇတိ။ သင်္ဃော အရိဋ္ဌဿ ဘိက္ခုနော ဂဒ္ဓဗာဓိပုဗ္ဗဿ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကရောတိ – အသမ္ဘောဂံ ¶ သင်္ဃေန။ ယဿာယသ္မတော ခမတိ အရိဋ္ဌဿ ဘိက္ခုနော ဂဒ္ဓဗာဓိပုဗ္ဗဿ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယဿ ကမ္မဿ ကရဏံ – အသမ္ဘောဂံ သင်္ဃေန၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ကတံ သင်္ဃေန အရိဋ္ဌဿ ဘိက္ခုနော ဂဒ္ဓဗာဓိပုဗ္ဗဿ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ – အသမ္ဘောဂံ သင်္ဃေန။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီတိ။

‘‘အာဝါသပရမ္ပရဉ္စ၊ ဘိက္ခဝေ၊ သံသထ – ‘အရိဋ္ဌော ဘိက္ခု ဂဒ္ဓဗာဓိပုဗ္ဗော၊ သင်္ဃေန ပါပိကာယ [ဂဒ္ဓဗာဓိပုဗ္ဗော ပါပိကာယ (သီ။ က။)] ဒိဋ္ဌိယာ အပ္ပဋိနိဿဂ္ဂေ ¶ ၊ ဥက္ခေပနီယကမ္မကတော – အသမ္ဘောဂံ သင်္ဃေနာ’’’တိ။

အဓမ္မကမ္မဒွါဒသကံ

၆၇။ ‘‘တီဟိ၊ ဘိက္ခဝေ၊ အင်္ဂေဟိ သမန္နာဂတံ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အသမ္မုခါ ကတံ ဟောတိ၊ အပ္ပဋိပုစ္ဆာ ကတံ ဟောတိ၊ အပ္ပဋိညာယ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ၊ ပါပိကာယ ¶ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အနာပတ္တိယာ ကတံ ဟောတိ၊ အဒေသနာဂါမိနိယာ အာပတ္တိယာ ကတံ ဟောတိ၊ ဒေသိတာယ အာပတ္တိယာ ကတံ ဟောတိ…ပေ… အစောဒေတွာ ကတံ ဟောတိ၊ အသာရေတွာ ကတံ ဟောတိ၊ အာပတ္တိံ အနာရောပေတွာ ကတံ ဟောတိ…ပေ… အသမ္မုခါ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အပ္ပဋိပုစ္ဆာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အပ္ပဋိညာယ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… ¶ အနာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အဒေသနာဂါမိနိယာ အာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… ဒေသိတာယ အာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အစောဒေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အသာရေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ…ပေ… အာပတ္တိံ အနာရောပေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ ¶ ၊ တီဟင်္ဂေဟိ သမန္နာဂတံ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မေ

အဓမ္မကမ္မဒွါဒသကံ နိဋ္ဌိတံ။

ဓမ္မကမ္မဒွါဒသကံ

၆၈။ ‘‘တီဟိ ¶ ၊ ဘိက္ခဝေ၊ အင်္ဂေဟိ သမန္နာဂတံ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ သမ္မုခါ ကတံ ဟောတိ၊ ပဋိပုစ္ဆာ ကတံ ဟောတိ၊ ပဋိညာယ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

‘‘အပရေဟိပိ ¶ ၊ ဘိက္ခဝေ၊ တီဟင်္ဂေဟိ သမန္နာဂတံ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ အာပတ္တိယာ ကတံ ဟောတိ၊ ဒေသနာဂါမိနိယာ အာပတ္တိယာ ကတံ ဟောတိ၊ အဒေသိတာယ အာပတ္တိယာ ကတံ ဟောတိ…ပေ… စောဒေတွာ ကတံ ဟောတိ၊ သာရေတွာ ကတံ ဟောတိ၊ အာပတ္တိံ အာရောပေတွာ ကတံ ဟောတိ…ပေ… သမ္မုခါ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ပဋိပုစ္ဆာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… ပဋိညာယ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… အာပတ္တိယာ ကတံ ဟောတိ၊ ဓမ္မေန ကတံ ¶ ဟောတိ၊ သမဂ္ဂေန ကတံ ဟောတိ…ပေ… ဒေသနာဂါမိနိယာ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… အဒေသိတာယ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… စောဒေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… သာရေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ…ပေ… အာပတ္တိံ အာရောပေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မေ

ဓမ္မကမ္မဒွါဒသကံ နိဋ္ဌိတံ။

အာကင်္ခမာနဆက္ကံ

၆၉။ [ပရိ။ ၃၂၃] ‘‘တီဟိ ¶ ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကရေယျ။ ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သင်္ဃေ အဓိကရဏကာရကော၊ ဗာလော ဟောတိ အဗျတ္တော အာပတ္တိဗဟုလော အနပဒါနော ¶ ၊ ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကရေယျ။

‘‘အပရေဟိပိ ¶ ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကရေယျ။ အဓိသီလေ သီလဝိပန္နော ဟောတိ၊ အဇ္ဈာစာရေ အာစာရဝိပန္နော ဟောတိ၊ အတိဒိဋ္ဌိယာ ဒိဋ္ဌိဝိပန္နော ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကရေယျ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကရေယျ။ ဗုဒ္ဓဿ အဝဏ္ဏံ ဘာသတိ၊ ဓမ္မဿ အဝဏ္ဏံ ဘာသတိ၊ သင်္ဃဿ အဝဏ္ဏံ ဘာသတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သင်္ဃော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကရေယျ။

‘‘တိဏ္ဏံ၊ ဘိက္ခဝေ၊ ဘိက္ခူနံ၊ အာကင်္ခမာနော သင်္ဃော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကရေယျ။ ဧကော ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သင်္ဃေ အဓိကရဏကာရကော၊ ဧကော ဗာလော ဟောတိ အဗျတ္တော အာပတ္တိဗဟုလော အနပဒါနော၊ ဧကော ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ – ဣမေသံ ¶ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကရေယျ။

‘‘အပရေသမ္ပိ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ကမာနော သင်္ဃော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကရေယျ။ ဧကော အဓိသီလေ သီလဝိပန္နော ဟောတိ၊ ဧကော အဇ္ဈာစာရေ အာစာရဝိပန္နော ဟောတိ၊ ဧကော အတိဒိဋ္ဌိယာ ဒိဋ္ဌိဝိပန္နော ဟောတိ – ဣမေသံ ခေါ၊ ဘိက္ခဝေ ¶ ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကရေယျ။

‘‘အပရေသမ္ပိ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကရေယျ။ ဧကော ဗုဒ္ဓဿ အဝဏ္ဏံ ဘာသတိ၊ ဧကော ဓမ္မဿ အဝဏ္ဏံ ဘာသတိ၊ ဧကော သင်္ဃဿ အဝဏ္ဏံ ဘာသတိ ¶ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ၊ အာကင်္ခမာနော သင်္ဃော၊ ပါပိကာယ ဒိဋ္ဌိယာ အပ္ပဋိနိဿဂေ၊ ဥက္ခေပနီယကမ္မံ ကရေယျ။

ပါပိကာယ ဒိဋ္ဌိယာ အပ္ပဋိနိဿဂေ ဥက္ခေပနီယကမ္မေ

အာကင်္ခမာနဆက္ကံ နိဋ္ဌိတံ။

တေစတ္တာလီသဝတ္တံ

၇၀။ ‘‘ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မကတေန၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ။ တတြာယံ သမ္မာဝတ္တနာ – န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနပိ ဘိက္ခုနိယော ¶ န ဩဝဒိတဗ္ဗာ။ ယာယ အာပတ္တိယာ သင်္ဃေန၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကတံ ဟောတိ သာ အာပတ္တိ န အာပဇ္ဇိတဗ္ဗာ၊ အညာ ဝါ တာဒိသိကာ၊ တတော ဝါ ပါပိဋ္ဌတရာ၊ ကမ္မံ န ဂရဟိတဗ္ဗံ၊ ကမ္မိကာ န ဂရဟိတဗ္ဗာ…ပေ… န ပကတတ္တဿ ဘိက္ခုနော ဥပေါသထော ဌပေတဗ္ဗော၊ န ပဝါရဏာ ဌပေတဗ္ဗာ၊ န သဝစနီယံ ကာတဗ္ဗံ၊ န အနုဝါဒေါ ပဋ္ဌပေတဗ္ဗော၊ န ဩကာသော ကာရေတဗ္ဗော၊ န စောဒေတဗ္ဗော၊ န သာရေတဗ္ဗော၊ န ဘိက္ခူဟိ သမ္ပယောဇေတဗ္ဗ’’န္တိ။

ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မေ

တေစတ္တာလီသဝတ္တံ နိဋ္ဌိတံ။

၇၁။ အထ ခေါ သင်္ဃော အရိဋ္ဌဿ ဘိက္ခုနော ဂဒ္ဓဗာဓိပုဗ္ဗဿ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ အကာသိ – အသမ္ဘောဂံ သင်္ဃေန။ သော သင်္ဃေန၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မကတော ဝိဗ္ဘမိ။ ယေ တေ ဘိက္ခူ အပ္ပိစ္ဆာ…ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အရိဋ္ဌော ဘိက္ခု ဂဒ္ဓဗာဓိပုဗ္ဗော သင်္ဃေန ¶ ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မကတော ဝိဗ္ဘမိဿတီ’’တိ? အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။

အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသင်္ဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ၊ ဘိက္ခဝေ၊ အရိဋ္ဌော ¶ ဘိက္ခု ဂဒ္ဓဗာဓိပုဗ္ဗော ¶ သင်္ဃေန၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မကတော ဝိဗ္ဘမတီ’’တိ [ဝိဗ္ဘမီတိ (သီ။ က။)]? ‘‘သစ္စံ ¶ ဘဂဝါ’’တိ။ ဝိဂရဟိ ဗုဒ္ဓါ ဘဂဝါ – ‘‘အနနုစ္ဆဝိကံ…ပေ… ကထဉှိ နာမ သော၊ ဘိက္ခဝေ၊ မောဃပုရိသော သင်္ဃေန၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မကတော ဝိဗ္ဘမိဿတိ? နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ – ‘‘တေန ဟိ၊ ဘိက္ခဝေ၊ သင်္ဃော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ပဋိပ္ပဿမ္ဘေတု။

နပ္ပဋိပ္ပဿမ္ဘေတဗ္ဗတေစတ္တာလီသကံ

၇၂။ ‘‘ပဉ္စဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။ ဥပသမ္ပာဒေတိ၊ နိဿယံ ဒေတိ၊ သာမဏေရံ ဥပဋ္ဌာပေတိ၊ ဘိက္ခုနောဝါဒကသမ္မုတိံ သာဒိယတိ၊ သမ္မတောပိ ဘိက္ခုနိယော ဩဝဒတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။

[ပရိ။ ၄၂၀] ‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။ ယာယ အာပတ္တိယာ သင်္ဃေန ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ကတံ ဟောတိ တံ အာပတ္တိံ အာပဇ္ဇတိ၊ အညံ ဝါ တာဒိသိကံ၊ တတော ဝါ ပါပိဋ္ဌတရံ၊ ကမ္မံ ဂရဟတိ၊ ကမ္မိကေ ဂရဟတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ…ပေ… ¶ ။

‘‘အဋ္ဌဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။ ပကတတ္တဿ ဘိက္ခုနော ဥပေါသထံ ဌပေတိ၊ ပဝါရဏံ ဌပေတိ၊ သဝစနီယံ ကရောတိ၊ အနုဝါဒံ ပဋ္ဌပေတိ၊ ဩကာသံ ကာရေတိ၊ စောဒေတိ၊ သာရေတိ ¶ ၊ ဘိက္ခူဟိ သမ္ပယောဇေတိ – ဣမေဟိ ခေါ၊ ဘိက္ခဝေ၊ အဋ္ဌဟင်္ဂေဟိ သမန္နာဂတဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ နပ္ပဋိပ္ပဿမ္ဘေတဗ္ဗံ။

ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မေ

နပ္ပဋိပ္ပဿမ္ဘေတဗ္ဗတေစတ္တာလီသကံ နိဋ္ဌိတံ။

ပဋိပ္ပဿမ္ဘေတဗ္ဗတေစတ္တာလီသကံ

၇၃။ ‘‘ပဉ္စဟိ ¶ ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။ န ဥပသမ္ပာဒေတိ၊ န နိဿယံ ဒေတိ၊ န သာမဏေရံ ဥပဋ္ဌာပေတိ၊ န ဘိက္ခုနောဝါဒကသမ္မုတိံ သာဒိယတိ၊ သမ္မတောပိ ဘိက္ခုနိယော န ဩဝဒတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။ ယာယ အာပတ္တိယာ သင်္ဃေန၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ကတံ ဟောတိ တံ အာပတ္တိံ န အာပဇ္ဇတိ၊ အညံ ဝါ တာဒိသိကံ ¶ ၊ တတော ဝါ ပါပိဋ္ဌတရံ၊ ကမ္မံ န ဂရဟတိ၊ ကမ္မိကေ န ဂရဟတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ…ပေ…။

‘‘အဋ္ဌဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ။ န ပကတတ္တဿ ဘိက္ခုနော ဥပေါသထံ ဌပေတိ၊ န ပဝါရဏံ ဌပေတိ၊ န သဝစနီယံ ကရောတိ၊ န အနုဝါဒံ ပဋ္ဌပေတိ၊ န ဩကာသံ ကာရေတိ၊ န စောဒေတိ၊ န သာရေတိ၊ န ဘိက္ခူဟိ သမ္ပယောဇေတိ – ဣမေဟိ ခေါ၊ ဘိက္ခဝေ၊ အဋ္ဌဟင်္ဂေဟိ သမန္နာဂတဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ပဋိပ္ပဿမ္ဘေတဗ္ဗံ’’။

ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မေ

ပဋိပ္ပဿမ္ဘေတဗ္ဗတေစတ္တာလီသကံ နိဋ္ဌိတံ။

၇၄။ ‘‘ဧဝဉ္စ ¶ ပန၊ ဘိက္ခဝေ၊ ပဋိပ္ပဿမ္ဘေတဗ္ဗံ။ တေန၊ ဘိက္ခဝေ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မကတေန ဘိက္ခုနာ သင်္ဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘အဟံ၊ ဘန္တေ၊ သင်္ဃေန၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မကတော သမ္မာ ဝတ္တာမိ၊ လောမံ ပါတေမိ၊ နေတ္ထာရံ ဝတ္တာမိ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယဿ ¶ ကမ္မဿ ပဋိပ္ပဿဒ္ဓိံ ¶ ယာစာမီ’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

‘‘သုဏာတု မေ၊ ဘန္တေ၊ သင်္ဃော။ အယံ ဣတ္ထန္နာမော ဘိက္ခု သင်္ဃေန၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဣတ္ထန္နာမဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ပဋိပ္ပဿမ္ဘေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဣတ္ထန္နာမော ဘိက္ခု သင်္ဃေန၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ ¶ ၊ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ သင်္ဃော ဣတ္ထန္နာမဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ပဋိပ္ပဿမ္ဘေတိ။ ယဿာယသ္မတော ခမတိ ဣတ္ထန္နာမဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ အယံ ဣတ္ထန္နာမော ဘိက္ခု သင်္ဃေန၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ သင်္ဃော ဣတ္ထန္နာမဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ ပဋိပ္ပဿမ္ဘေတိ။ ယဿာယသ္မတော ခမတိ ဣတ္ထန္နာမဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ပဋိပ္ပဿဒ္ဓံ ¶ သင်္ဃေန ဣတ္ထန္နာမဿ ဘိက္ခုနော၊ ပါပိကာယ ဒိဋ္ဌိယာ အပ္ပဋိနိဿဂ္ဂေ၊ ဥက္ခေပနီယကမ္မံ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ နိဋ္ဌိတံ သတ္တမံ။

ကမ္မက္ခန္ဓကော ပဌမော။

ဣမမှိ ခန္ဓကေ ဝတ္ထူ သတ္တ။

တဿုဒ္ဒါနံ –

ပဏ္ဍုလောဟိတကာ ¶ ဘိက္ခူ၊ သယံ ဘဏ္ဍနကာရကာ၊

တာဒိသေ ဥပသင်္ကမ္မ၊ ဥဿဟိံသု စ ဘဏ္ဍနေ။

အနုပ္ပန္နာပိ ဇာယန္တိ [အနုပ္ပန္နာနိ ဇာယန္တိ (သီ။ သျာ။)]၊ ဥပ္ပန္နာနိပိ ဝဍ္ဎရေ [ဥပ္ပန္နာနိ ပဝဍ္ဎရေ (သီ။)၊ ဥပ္ပန္နာပိ ပဝဍ္ဎန္တိ (က။)]၊

အပ္ပိစ္ဆာ ပေသလာ ဘိက္ခူ၊ ဥဇ္ဈာယန္တိ ပဒဿတော [ပရီသတော (သျာ။)၊ ပရဿတော (သီ။)]။

သဒ္ဓမ္မဋ္ဌိတိကော ဗုဒ္ဓါ၊ သယမ္ဘူ အဂ္ဂပုဂ္ဂလော၊

အာဏာပေသိ တဇ္ဇနီယကမ္မံ သာဝတ္ထိယံ ဇိနော။

အသမ္မုခါပ္ပဋိပုစ္ဆာပ္ပဋိညာယ ¶ ကတဉ္စ ယံ၊

အနာပတ္တိ အဒေသနေ၊ ဒေသိတာယ ကတဉ္စ ယံ။

အစောဒေတွာ အသာရေတွာ၊ အနာရောပေတွာ စ ယံ ကတံ၊

အသမ္မုခါ အဓမ္မေန၊ ဝဂ္ဂေန စာပိ [ဝဂ္ဂေနာပိ စ (သီ။ သျာ။)] ယံ ကတံ။

အပ္ပဋိပုစ္ဆာ အဓမ္မေန၊ ပုန ဝဂ္ဂေန [ဝဂ္ဂေနာပိ စ (သီ။ သျာ။)] ယံ ကတံ၊

အပ္ပဋိညာယ အဓမ္မေန၊ ဝဂ္ဂေန စာပိ [ဝဂ္ဂေနာပိ စ (သီ။ သျာ။)] ယံ ကတံ။

အနာပတ္တိ [အနာပတ္တိယာ (သီ။ သျာ။)] အဓမ္မေန၊ ဝဂ္ဂေန

စာပိ [ဝဂ္ဂေနာပိ စ (သီ။ သျာ။)] ယံ ကတံ။

အဒေသနာဂါမိနိယာ၊ အဓမ္မဝဂ္ဂမေဝ စ။

ဒေသိတာယ ¶ အဓမ္မေန၊ ဝဂ္ဂေနာပိ တထေဝ စ၊

အစောဒေတွာ ¶ အဓမ္မေန၊ ဝဂ္ဂေနာပိ တထေဝ စ။

အသာရေတွာ အဓမ္မေန၊ ဝဂ္ဂေနာပိ တထေဝ စ၊

အနာရောပေတွာ အဓမ္မေန၊ ဝဂ္ဂေနာပိ တထေဝ စ။

ကဏှဝါရနယေနေဝ၊ သုက္ကဝါရံ ဝိဇာနိယာ၊

သင်္ဃော အာကင်္ခမာနော စ ယဿ တဇ္ဇနိယံ ကရေ။

ဘဏ္ဍနံ ဗာလော သံသဋ္ဌော၊ အဓိသီလေ အဇ္ဈာစာရေ၊

အတိဒိဋ္ဌိဝိပန္နဿ၊ သင်္ဃော တဇ္ဇနိယံ ကရေ။

ဗုဒ္ဓဓမ္မဿ ¶ ¶ သင်္ဃဿ၊ အဝဏ္ဏံ ယော စ ဘာသတိ၊

တိဏ္ဏန္နမ္ပိ စ ဘိက္ခူနံ၊ သင်္ဃော တဇ္ဇနိယံ ကရေ။

ဘဏ္ဍနံ ကာရကော ဧကော၊ ဗာလော သံသဂ္ဂနိဿိတော၊

အဓိသီလေ အဇ္ဈာစာရေ၊ တထေဝ အတိဒိဋ္ဌိယာ။

ဗုဒ္ဓဓမ္မဿ သင်္ဃဿ၊ အဝဏ္ဏံ ယော စ ဘာသတိ၊

တဇ္ဇနီယကမ္မကတော၊ ဧဝံ သမ္မာနုဝတ္တနာ။

ဥပသမ္ပဒနိဿယာ၊ သာမဏေရံ ဥပဋ္ဌနာ၊

ဩဝါဒသမ္မတေနာပိ၊ န ကရေ တဇ္ဇနီကတော။

နာပဇ္ဇေ တဉ္စ အာပတ္တိံ၊ တာဒိသဉ္စ တတော ပရံ၊

ကမ္မဉ္စ ကမ္မိကေ စာပိ၊ န ဂရဟေ တထာဝိဓော။

ဥပေါသထံ ပဝါရဏံ၊ ပကတတ္တဿ နဋ္ဌပေ၊

သဝစနိံ [န သဝစနိယံ (သီ။ သျာ။)] အနုဝါဒေါ၊ ဩကာသော စောဒနေန စ။

သာရဏံ ¶ သမ္ပယောဂဉ္စ၊ န ကရေယျ တထာဝိဓော၊

ဥပသမ္ပဒနိဿယာ၊ သာမဏေရံ ဥပဋ္ဌနာ။

ဩဝါဒသမ္မတေနာပိ၊ ပဉ္စဟင်္ဂေဟိ [ပဉ္စအင်္ဂေါ (က။)] န သမ္မတိ၊

တဉ္စာပဇ္ဇတိ အာပတ္တိံ၊ တာဒိသဉ္စ တတော ပရံ။

ကမ္မဉ္စ ကမ္မိကေ စာပိ၊ ဂရဟန္တော န သမ္မတိ၊

ဥပေါသထံ ¶ ပဝါရဏံ၊ သဝစနီယာ စ နောဝါဒေါ။

ဩကာသော စောဒနဉ္စေဝ၊ သာရဏာ သမ္ပယောဇနာ၊

ဣမေဟဋ္ဌင်္ဂေဟိ ယော ယုတ္တော၊ တဇ္ဇနာနုပသမ္မတိ။

ကဏှဝါရနယေနေဝ၊ သုက္ကဝါရံ ဝိဇာနိယာ၊

ဗာလော အာပတ္တိဗဟုလော၊ သံသဋ္ဌောပိ စ သေယျသော။

နိယဿကမ္မံ သမ္ဗုဒ္ဓါ၊ အာဏာပေသိ မဟာမုနိ၊

ကီဋာဂိရိသ္မိံ ဒွေ ဘိက္ခူ၊ အဿဇိပုနဗ္ဗသုကာ။

အနာစာရဉ္စ ¶ ဝိဝိဓံ၊ အာစရိံသု အသညတာ၊

ပဗ္ဗာဇနီယံ သမ္ဗုဒ္ဓါ၊ ကမ္မံ သာဝတ္ထိယံ ဇိနော၊

မစ္ဆိကာသဏ္ဍေ သုဓမ္မော၊ စိတ္တဿာဝါသိကော အဟု။

ဇာတိဝါဒေန ခုံသေတိ၊ သုဓမ္မော စိတ္တုပါသကံ၊

ပဋိသာရဏီယကမ္မံ၊ အာဏာပေသိ တထာဂတော။

ကောသမ္ဗိယံ ဆန္နံ ဘိက္ခုံ၊ နိစ္ဆန္တာပတ္တိံ ပဿိတုံ၊

အဒဿနေ ¶ ဥက္ခိပိတုံ၊ အာဏာပေသိ ဇိနုတ္တမော။

ဆန္နော တံယေဝ အာပတ္တိံ၊ ပဋိကာတုံ န ဣစ္ဆတိ၊

ဥက္ခေပနာပ္ပဋိကမ္မေ၊ အာဏာပေသိ ဝိနာယကော။

ပါပဒိဋ္ဌိ ¶ အရိဋ္ဌဿ၊ အာသိ အညာဏနိဿိတာ၊

ဒိဋ္ဌိယာပ္ပဋိနိဿဂ္ဂေ [ဒိဋ္ဌိအပ္ပဋိနိဿဂ္ဂေ (က။)]၊ ဥက္ခေပံ ဇိနဘာသိတံ။

နိယဿကမ္မံ ပဗ္ဗဇ္ဇံ [ပဗ္ဗာဇံ (က။)]၊ တထေဝ ပဋိသာရဏီ၊

အဒဿနာပ္ပဋိကမ္မေ ¶ ၊ အနိဿဂ္ဂေ စ ဒိဋ္ဌိယာ။

ဒဝါနာစာရူပဃာတိ၊ မိစ္ဆာအာဇီဝမေဝ စ၊

ပဗ္ဗာဇနီယကမ္မမှိ၊ အတိရေကပဒါ ဣမေ။

အလာဘာဝဏ္ဏာ ဒွေ ပဉ္စ၊ ဒွေ ပဉ္စကာတိ နာမကာ [ဒွေ ပဉ္စကောတိ နာမကော (က။)]၊

ပဋိသာရဏီယကမ္မမှိ၊ အတိရေကပဒါ ဣမေ။

တဇ္ဇနီယံ နိယဿဉ္စ၊ ဒုဝေ ကမ္မာပိ သာဒိသာ [ကမ္မေသု သဒိသံ (က။)]၊

ပဗ္ဗဇ္ဇာ [ပဗ္ဗာဇာ (က။)] ပဋိသာရီ စ၊ အတ္ထိ ပဒါတိရိတ္တတာ။

တယော ဥက္ခေပနာ ကမ္မာ၊ သဒိသာ တေ ဝိဘတ္တိတော၊

တဇ္ဇနီယနယေနာပိ၊ သေသကမ္မံ ဝိဇာနိယာတိ။

ကမ္မက္ခန္ဓကံ နိဋ္ဌိတံ။

၂။ ပါရိဝါသိကက္ခန္ဓကံ

၁။ ပါရိဝါသိကဝတ္တံ

၇၅။ တေန ¶ ¶ ¶ ¶ သမယေန ဗုဒ္ဓါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ပါရိဝါသိကာ ဘိက္ခူ သာဒိယန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရံ၊ သေယျာဘိဟာရံ၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပဋိဂ္ဂဟဏံ၊ နဟာနေ ပိဋ္ဌိပရိကမ္မံ။ ယေ တေ ဘိက္ခူ အပ္ပိစ္ဆာ…ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ပါရိဝါသိကာ ဘိက္ခူ သာဒိယိဿန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရံ၊ သေယျာဘိဟာရံ၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပဋိဂ္ဂဟဏံ၊ နဟာနေ ပိဋ္ဌိပရိကမ္မ’’န္တိ! အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။

အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသင်္ဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ၊ ဘိက္ခဝေ၊ ပါရိဝါသိကာ ဘိက္ခူ သာဒိယန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရံ၊ သေယျာဘိဟာရံ၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပဋိဂ္ဂဟဏံ၊ နဟာနေ ပိဋ္ဌိပရိကမ္မ’’န္တိ? ‘‘သစ္စံ ဘဂဝါ’’တိ။ ဝိဂရဟိ ဗုဒ္ဓါ ဘဂဝါ – ‘‘အနနုစ္ဆဝိကံ…ပေ… ကထဉှိ နာမ၊ ဘိက္ခဝေ၊ ပါရိဝါသိကာ ဘိက္ခူ သာဒိယိဿန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရံ၊ သေယျာဘိဟာရံ၊ ပါဒေါဒကံ ¶ ပါဒပီဌံ၊ ပါဒကထလိကံ၊ ပတ္တစီဝရပဋိဂ္ဂဟဏံ၊ နဟာနေ ပိဋ္ဌိပရိကမ္မံ။ နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ – ‘‘န၊ ဘိက္ခဝေ၊ ပါရိဝါသိကေန ဘိက္ခုနာ သာဒိတဗ္ဗံ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ ¶ ၊ သာမီစိကမ္မံ၊ အာသနာဘိဟာရော၊ သေယျာဘိဟာရော၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပဋိဂ္ဂဟဏံ၊ နဟာနေ ပိဋ္ဌိပရိကမ္မံ။ ယော သာဒိယေယျ၊ အာပတ္တိ ဒုက္ကဋဿ။

‘‘အနုဇာနာမိ၊ ဘိက္ခဝေ၊ ပါရိဝါသိကာနံ ဘိက္ခူနံ မိထု ယထာဝုဍ္ဎံ အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရံ၊ သေယျာဘိဟာရံ၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပဋိဂ္ဂဟဏံ၊ နဟာနေ ပိဋ္ဌိပရိကမ္မံ။

‘‘အနုဇာနာမိ ¶ ၊ ဘိက္ခဝေ၊ ပါရိဝါသိကာနံ ဘိက္ခူနံ ပဉ္စ ယထာဝုဍ္ဎံ – ဥပေါသထံ၊ ပဝါရဏံ၊ ဝဿိကသာဋိကံ၊ ဩဏောဇနံ၊ ဘတ္တံ။ တေန ဟိ၊ ဘိက္ခဝေ၊ ပါရိဝါသိကာနံ ဘိက္ခူနံ ဝတ္တံ ပညပေဿာမိ ယထာ ပါရိဝါသိကေဟိ ဘိက္ခူဟိ ဝတ္တိတဗ္ဗံ ¶ ။

၇၆။ ‘‘ပါရိဝါသိကေန၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ။ တတြာယံ သမ္မာဝတ္တနာ –

န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနပိ ဘိက္ခုနိယော န ဩဝဒိတဗ္ဗာ။ ယာယ အာပတ္တိယာ သင်္ဃေန ပရိဝါသော ဒိန္နော ဟောတိ သာ အာပတ္တိ န အာပဇ္ဇိတဗ္ဗာ၊ အညာ ဝါ ¶ တာဒိသိကာ၊ တတော ဝါ ပါပိဋ္ဌတရာ၊ ကမ္မံ န ဂရဟိတဗ္ဗံ၊ ကမ္မိကာ န ဂရဟိတဗ္ဗာ။ န ပကတတ္တဿ ဘိက္ခုနော ဥပေါသထော ဌပေတဗ္ဗော၊ န ပဝါရဏာ ဌပေတဗ္ဗာ၊ န သဝစနီယံ ကာတဗ္ဗံ၊ န အနုဝါဒေါ ပဋ္ဌပေတဗ္ဗော၊ န ဩကာသော ကာရေတဗ္ဗော၊ န စောဒေတဗ္ဗော၊ န သာရေတဗ္ဗော၊ န ဘိက္ခူဟိ သမ္ပယောဇေတဗ္ဗံ။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ ပကတတ္တဿ ဘိက္ခုနော ပုရတော ဂန္တဗ္ဗံ၊ န ပုရတော နိသီဒိတဗ္ဗံ။ ယော ဟောတိ သင်္ဃဿ အာသနပရိယန္တော သေယျာပရိယန္တော ဝိဟာရပရိယန္တော သော တဿ ပဒါတဗ္ဗော။ တေန စ သော သာဒိတဗ္ဗော။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ ပကတတ္တေန ဘိက္ခုနာ ပုရေသမဏေန ဝါ ပစ္ဆာသမဏေန ဝါ ကုလာနိ ဥပသင်္ကမိတဗ္ဗာနိ၊ န အာရညိကင်္ဂံ သမာဒါတဗ္ဗံ [သမာဒိတဗ္ဗံ (က။)]၊ န ပိဏ္ဍပါတိကင်္ဂံ သမာဒါတဗ္ဗံ၊ န စ တပ္ပစ္စယာ ပိဏ္ဍပါတော နီဟရာပေတဗ္ဗော – မာ မံ ဇာနိံသူတိ။

‘‘ပါရိဝါသိကေန ¶ ၊ ဘိက္ခဝေ၊ ဘိက္ခုနာ အာဂန္တုကေန အာရောစေတဗ္ဗံ၊ အာဂန္တုကဿ အာရောစေတဗ္ဗံ၊ ဥပေါသထေ အာရောစေတဗ္ဗံ၊ ပဝါရဏာယ အာရောစေတဗ္ဗံ။ သစေ ဂိလာနော ဟောတိ၊ ဒူတေနပိ အာရောစေတဗ္ဗံ။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ အဘိက္ခုကော အာဝါသော ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။

‘‘န ¶ ၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ အဘိက္ခုကော အနာဝါသော ဂန္တဗ္ဗော၊ အညတြ ပကတတ္တေန၊ အညတြ အန္တရာယာ ¶ ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ အဘိက္ခုကော အာဝါသော ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ အဘိက္ခုကော အနာဝါသော ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ အဘိက္ခုကော အာဝါသော ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ အဘိက္ခုကော အနာဝါသော ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ ပကတတ္တေန၊ အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ သဘိက္ခုကော အနာဝါသော ဂန္တဗ္ဗော၊ ယတ္ထဿု ¶ ဘိက္ခူ နာနာသံဝါသကာ၊ အညတြ ပကတတ္တေန၊ အညတြ အန္တရာယာ။ န၊ ဘိက္ခဝေ၊ ပါရိဝါသိကေန ¶ ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ ¶ ပကတတ္တေန၊ အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ သဘိက္ခုကော အနာဝါသော ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ ပကတတ္တေန၊ အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ ပကတတ္တေန ¶ ၊ အညတြ အန္တရာယာ။

‘‘န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ ပကတတ္တေန၊ အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အနာဝါသော ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ ပကတတ္တေန၊ အညတြ အန္တရာယာ။ န၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ ပကတတ္တေန၊ အညတြ ¶ အန္တရာယာ။

၈၀။ ‘‘ဂန္တဗ္ဗော၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘ဂန္တဗ္ဗော၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ သဘိက္ခုကော အနာဝါသော၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘ဂန္တဗ္ဗော၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘ဂန္တဗ္ဗော ¶ ၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘ဂန္တဗ္ဗော ¶ ၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ သဘိက္ခုကော အနာဝါသော၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘ဂန္တဗ္ဗော၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘ဂန္တဗ္ဗော၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘ဂန္တဗ္ဗော၊ ဘိက္ခဝေ၊ ပါရိဝါသိကေန ဘိက္ခုနာ ¶ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အနာဝါသော၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘ဂန္တဗ္ဗော၊ ဘိက္ခဝေ၊ ပါရိဝါသိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

၈၁။ ‘‘န၊ ဘိက္ခဝေ၊ ပါရိဝါသိကေန ဘိက္ခုနာ ပကတတ္တေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ။ ပကတတ္တံ ဘိက္ခုံ ဒိသွာ အာသနာ ဝုဋ္ဌာတဗ္ဗံ။ ပကတတ္တော ဘိက္ခု အာသနေန နိမန္တေတဗ္ဗော။ န ပကတတ္တေန ဘိက္ခုနာ သဒ္ဓိံ ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ၊ န နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ [စင်္ကမန္တံ (အဋ္ဌကထာယံ သံဝဏ္ဏေတဗ္ဗပါဌော)] စင်္ကမေ စင်္ကမိတဗ္ဗံ။

၈၂။ ‘‘န ¶ ၊ ဘိက္ခဝေ၊ ပါရိဝါသိကေန ဘိက္ခုနာ ပါရိဝါသိကေန ဝုဍ္ဎတရေန ဘိက္ခုနာ သဒ္ဓိံ…ပေ… မူလာယပဋိကဿနာရဟေန ဘိက္ခုနာ သဒ္ဓိံ…ပေ… မာနတ္တာရဟေန ဘိက္ခုနာ သဒ္ဓိံ…ပေ… မာနတ္တစာရိကေန ဘိက္ခုနာ သဒ္ဓိံ…ပေ… အဗ္ဘာနာရဟေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ ¶ အာဝါသေ ဝါ အနာဝါသေ ဝါ ဝတ္ထဗ္ဗံ၊ န ဧကာသနေ နိသီဒိတဗ္ဗံ ¶ ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ၊ န နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ စင်္ကမိတဗ္ဗံ။

[မဟာဝ။ ၃၉၃] ‘‘ပါရိဝါသိကစတုတ္ထော စေ၊ ဘိက္ခဝေ၊ ပရိဝါသံ ဒဒေယျ၊ မူလာယ ပဋိကဿေယျ၊ မာနတ္တံ ဒဒေယျ၊ တံဝီသော အဗ္ဘေယျ၊ အကမ္မံ [အကမ္မံ တံ (သျာ။)]၊ န စ ကရဏီယ’’န္တိ။

စတုန္နဝုတိပါရိဝါသိကဝတ္တံ နိဋ္ဌိတံ။

၈၃။ အထ ခေါ အာယသ္မာ ဥပါလိ ယေန ဘဂဝါ တေနုပသင်္ကမိ။ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နော ခေါ အာယသ္မာ ဥပါလိ ဘဂဝန္တံ ဧတဒဝေါစ – ‘‘ကတိ နု ခေါ၊ ဘန္တေ၊ ပါရိဝါသိကဿ ဘိက္ခုနော ရတ္တိစ္ဆေဒါ’’တိ? ‘‘တယော ခေါ၊ ဥပါလိ၊ ပါရိဝါသိကဿ ဘိက္ခုနော ရတ္တိစ္ဆေဒါ ¶ ။ သဟဝါသော၊ ဝိပ္ပဝါသော၊ အနာရောစနာ – ဣမေ ခေါ၊ ဥပါလိ၊ တယော ပါရိဝါသိကဿ ဘိက္ခုနော ရတ္တိစ္ဆေဒါ’’တိ။

၈၄။ တေန ခေါ ပန သမယေန သာဝတ္ထိယံ မဟာဘိက္ခုသင်္ဃော သန္နိပတိတော ဟောတိ။ န သက္ကောန္တိ ပါရိဝါသိကာ ဘိက္ခူ ပရိဝါသံ သောဓေတုံ ¶ ။ ဘဂဝတော [တေ ဘိက္ခူ ဘဂဝတော (သျာ။၊ ဧဝမုပရိပိ)] ဧတမတ္ထံ အာရောစေသုံ။ ‘‘အနုဇာနာမိ၊ ဘိက္ခဝေ၊ ပရိဝါသံ နိက္ခိပိတုံ။ ဧဝဉ္စ ပန၊ ဘိက္ခဝေ၊ နိက္ခိပိတဗ္ဗော။ တေန ပါရိဝါသိကေန ဘိက္ခုနာ ဧကံ ဘိက္ခုံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘ပရိဝါသံ နိက္ခိပါမီ’တိ။ နိက္ခိတ္တော ဟောတိ ပရိဝါသော။ ‘ဝတ္တံ နိက္ခိပါမီ’တိ။ နိက္ခိတ္တော ဟောတိ ပရိဝါသော။

၈၅။ တေန ခေါ ပန သမယေန သာဝတ္ထိယာ ဘိက္ခူ တဟံ တဟံ ပက္ကမိံသု။ သက္ကောန္တိ ပါရိဝါသိကာ ဘိက္ခူ ပရိဝါသံ သောဓေတုံ။ ဘဂဝတော ဧတမတ္ထံ အာရောစေသုံ။ ‘‘အနုဇာနာမိ၊ ဘိက္ခဝေ၊ ပရိဝါသံ သမာဒိယိတုံ [သမာဒါတုံ (သျာ။ ကံ။)]။ ဧဝဉ္စ ပန၊ ဘိက္ခဝေ၊ သမာဒိယိတဗ္ဗော [သမာဒိတဗ္ဗော (သီ။ သျာ။ ကံ။)]။ တေန ပါရိဝါသိကေန ဘိက္ခုနာ ဧကံ ဘိက္ခုံ ဥပသင်္ကမိတွာ ¶ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ ¶ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘ပရိဝါသံ သမာဒိယာမီ’တိ။ သမာဒိန္နော ဟောတိ ပရိဝါသော။ ‘ဝတ္တံ သမာဒိယာမီ’တိ။ သမာဒိန္နော ဟောတိ ပရိဝါသော’’။

ပါရိဝါသိကဝတ္တံ နိဋ္ဌိတံ။

၂။ မူလာယပဋိကဿနာရဟဝတ္တံ

၈၆။ တေန ¶ ခေါ ပန သမယေန မူလာယပဋိကဿနာရဟာ ဘိက္ခူ သာဒိယန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရံ၊ သေယျာဘိဟာရံ၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပဋိဂ္ဂဟဏံ၊ နဟာနေ ပိဋ္ဌိပရိကမ္မံ။ ယေ တေ ဘိက္ခူ အပ္ပိစ္ဆာ…ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ မူလာယပဋိကဿနာရဟာ ဘိက္ခူ သာဒိယိဿန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ…ပေ… နဟာနေ ပိဋ္ဌိပရိကမ္မ’’န္တိ။ အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။

အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသင်္ဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ၊ ဘိက္ခဝေ၊ မူလာယပဋိကဿနာရဟာ ဘိက္ခူ သာဒိယန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ…ပေ… နဟာနေ ပိဋ္ဌိပရိကမ္မ’’န္တိ? ‘‘သစ္စံ ဘဂဝါ’’တိ။ ဝိဂရဟိ ဗုဒ္ဓါ ဘဂဝါ – ‘‘အနနုစ္ဆဝိကံ…ပေ… ကထဉှိ နာမ၊ ဘိက္ခဝေ၊ မူလာယပဋိကဿနာရဟာ ဘိက္ခူ သာဒိယိဿန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ…ပေ… နဟာနေ ပိဋ္ဌိပရိကမ္မံ! နေတံ ဘိက္ခဝေ၊ အပ္ပသန္နာနံ ဝါ ပသာဒါယ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ – ‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သာဒိတဗ္ဗံ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရော၊ သေယျာဘိဟာရော၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပဋိဂ္ဂဟဏံ၊ နဟာနေ ပိဋ္ဌိပရိကမ္မံ။ ယော သာဒိယေယျ၊ အာပတ္တိ ဒုက္ကဋဿ။ အနုဇာနာမိ၊ ဘိက္ခဝေ၊ မူလာယပဋိကဿနာရဟာနံ ¶ ဘိက္ခူနံ မိထု ယထာဝုဍ္ဎံ အဘိဝါဒနံ၊ ပစ္စုဋ္ဌာနံ…ပေ… နဟာနေ ပိဋ္ဌိပရိကမ္မံ။ အနုဇာနာမိ၊ ဘိက္ခဝေ၊ မူလာယပဋိကဿနာရဟာနံ ဘိက္ခူနံ ပဉ္စ ယထာဝုဍ္ဎံ – ဥပေါသထံ ¶ ၊ ပဝါရဏံ၊ ဝဿိကသာဋိကံ၊ ဩဏောဇနံ၊ ဘတ္တံ။ တေန ဟိ၊ ဘိက္ခဝေ၊ မူလာယပဋိကဿနာရဟာနံ ဘိက္ခူနံ ဝတ္တံ ပညာပေဿာမိ ယထာ မူလာယပဋိကဿနာရဟေဟိ ဘိက္ခူဟိ ဝတ္တိတဗ္ဗံ။

၈၇။ ‘‘မူလာယပဋိကဿနာရဟေန ¶ ၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ။ တတြာယံ သမ္မာဝတ္တနာ –

န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနပိ ဘိက္ခုနိယော န ဩဝဒိတဗ္ဗာ။ ယာယ အာပတ္တိယာ သင်္ဃေန မူလာယ ပဋိကဿနာရဟော ကတော ဟောတိ သာ အာပတ္တိ န အာပဇ္ဇိတဗ္ဗာ၊ အညာ ဝါ တာဒိသိကာ၊ တတော ဝါ ပါပိဋ္ဌတရာ၊ ကမ္မံ န ဂရဟိတဗ္ဗံ၊ ကမ္မိကာ န ဂရဟိတဗ္ဗာ။ န ပကတတ္တဿ ဘိက္ခုနော ဥပေါသထော ဌပေတဗ္ဗော၊ န ပဝါရဏာ ဌပေတဗ္ဗာ၊ န သဝစနီယံ ကာတဗ္ဗံ၊ န အနုဝါဒေါ ပဋ္ဌပေတဗ္ဗော၊ န ဩကာသော ကာရေတဗ္ဗော၊ န စောဒေတဗ္ဗော၊ န သာရေတဗ္ဗော၊ န ဘိက္ခူဟိ သမ္ပယောဇေတဗ္ဗံ။

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ ပကတတ္တဿ ဘိက္ခုနော ပုရတော ဂန္တဗ္ဗံ၊ န ပုရတော နိသီဒိတဗ္ဗံ။ ယော ဟောတိ သင်္ဃဿ အာသနပရိယန္တော သေယျာပရိယန္တော ဝိဟာရပရိယန္တော သော တဿ ပဒါတဗ္ဗော။ တေန စ သော သာဒိတဗ္ဗော။

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ ပကတတ္တေန ဘိက္ခုနာ ပုရေသမဏေန ဝါ ¶ ပစ္ဆာသမဏေန ဝါ ကုလာနိ ဥပသင်္ကမိတဗ္ဗာနိ၊ န အာရညိကင်္ဂံ သမာဒါတဗ္ဗံ၊ န ပိဏ္ဍပါတိကင်္ဂံ သမာဒါတဗ္ဗံ၊ န စ တပ္ပစ္စယာ ပိဏ္ဍပါတော နီဟရာပေတဗ္ဗော – မာ မံ ဇာနိံသူတိ။

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အာဝါသာ အဘိက္ခုကော အာဝါသော ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အာဝါသာ အဘိက္ခုကော အနာဝါသော ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။

‘‘န ¶ ၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အာဝါသာ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အနာဝါသာ အဘိက္ခုကော အာဝါသော ¶ ဂန္တဗ္ဗော…ပေ… အဘိက္ခုကော အနာဝါသော ဂန္တဗ္ဗော…ပေ… အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ အဘိက္ခုကော အာဝါသော ဂန္တဗ္ဗော…ပေ… အဘိက္ခုကော အနာဝါသော ဂန္တဗ္ဗော…ပေ… အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ ပကတတ္တေန ¶ ၊ အညတြ အန္တရာယာ။

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော ဂန္တဗ္ဗော…ပေ… သဘိက္ခုကော အနာဝါသော ဂန္တဗ္ဗော…ပေ… သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော ဂန္တဗ္ဗော…ပေ… သဘိက္ခုကော အနာဝါသော ဂန္တဗ္ဗော…ပေ… သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော ဂန္တဗ္ဗော…ပေ… သဘိက္ခုကော အနာဝါသော ဂန္တဗ္ဗော…ပေ… သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ ပကတတ္တေန၊ အညတြ အန္တရာယာ။

‘‘ဂန္တဗ္ဗော၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော…ပေ… သဘိက္ခုကော အနာဝါသော…ပေ… သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘ဂန္တဗ္ဗော ¶ ၊ ဘိက္ခဝေ ¶ ၊ မူလာယပဋိကဿနာရဟေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော…ပေ… သဘိက္ခုကော အနာဝါသော…ပေ… သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘ဂန္တဗ္ဗော ¶ ၊ ဘိက္ခဝေ၊ မူလာယပဋိကဿနာရဟေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော…ပေ… သဘိက္ခုကော အနာဝါသော…ပေ… သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ ပကတတ္တေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ၊ ပကတတ္တံ ဘိက္ခုံ ဒိသွာ အာသနာ ဝုဋ္ဌာတဗ္ဗံ၊ ပကတတ္တော ဘိက္ခု အာသနေန နိမန္တေတဗ္ဗော၊ န ပကတတ္တေန ဘိက္ခုနာ သဒ္ဓိံ ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ၊ န နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ ¶ စင်္ကမိတဗ္ဗံ။

‘‘န၊ ဘိက္ခဝေ၊ မူလာယပဋိကဿနာရဟေန ဘိက္ခုနာ ပါရိဝါသိကေန ဘိက္ခုနာ သဒ္ဓိံ…ပေ… မူလာယပဋိကဿနာရဟေန ဝုဍ္ဎတရေန ဘိက္ခုနာ သဒ္ဓိံ…ပေ… မာနတ္တာရဟေန ဘိက္ခုနာ သဒ္ဓိံ…ပေ… မာနတ္တစာရိကေန ဘိက္ခုနာ ¶ သဒ္ဓိံ…ပေ… အဗ္ဘာနာရဟေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ၊ န ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ၊ န နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ စင်္ကမိတဗ္ဗံ။

[မဟာဝ။ ၃၉၃] ‘‘မူလာယပဋိကဿနာရဟစတုတ္ထော စေ၊ ဘိက္ခဝေ၊ ပရိဝါသံ ဒဒေယျ၊ မူလာယ ပဋိကဿေယျ၊ မာနတ္တံ ဒဒေယျ၊ တံဝီသော အဗ္ဘေယျ၊ အကမ္မံ၊ န စ ကရဏီယ’’န္တိ။

မူလာယပဋိကဿနာရဟဝတ္တံ နိဋ္ဌိတံ။

၃။ မာနတ္တာရဟဝတ္တံ

၈၈။ တေန ¶ ခေါ ပန သမယေန မာနတ္တာရဟာ ဘိက္ခူ သာဒိယန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရံ၊ သေယျာဘိဟာရံ၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပဋိဂ္ဂဟဏံ၊ နဟာနေ ပိဋ္ဌိပရိကမ္မံ။ ယေ တေ ဘိက္ခူ အပ္ပိစ္ဆာ ¶ …ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ မာနတ္တာရဟာ ဘိက္ခူ သာဒိယိဿန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရံ၊ သေယျာဘိဟာရံ၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပဋိဂ္ဂဟဏံ၊ နဟာနေ ပိဋ္ဌိပရိကမ္မ’’န္တိ! အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ…ပေ… ‘‘သစ္စံ ကိရ၊ ဘိက္ခဝေ၊ မာနတ္တာရဟာ ဘိက္ခူ သာဒိယန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ…ပေ… နဟာနေ ပိဋ္ဌိပရိကမ္မ’’န္တိ? ‘‘သစ္စံ ဘဂဝါ’’တိ။ ဝိဂရဟိ ဗုဒ္ဓါ ဘဂဝါ – ‘‘အနနုစ္ဆဝိကံ…ပေ… ကထဉှိ နာမ၊ ဘိက္ခဝေ၊ မာနတ္တာရဟာ ¶ ဘိက္ခူ သာဒိယိဿန္တိ ပကတတ္တာနံ ဘိက္ခူနံ အဘိဝါဒနံ…ပေ… နဟာနေ ပိဋ္ဌိပရိကမ္မံ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ – ‘‘န၊ ဘိက္ခဝေ၊ မာနတ္တာရဟေန ဘိက္ခုနာ သာဒိတဗ္ဗံ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ…ပေ… နဟာနေ ပိဋ္ဌိပရိကမ္မံ။ ယော သာဒိယေယျ၊ အာပတ္တိ ဒုက္ကဋဿ။ အနုဇာနာမိ၊ ဘိက္ခဝေ၊ မာနတ္တာရဟာနံ ဘိက္ခူနံ မိထု ယထာဝုဍ္ဎံ အဘိဝါဒနံ၊ ပစ္စုဋ္ဌာနံ…ပေ… နဟာနေ ပိဋ္ဌိပရိကမ္မံ။ အနုဇာနာမိ၊ ဘိက္ခဝေ၊ မာနတ္တာရဟာနံ ဘိက္ခူနံ ပဉ္စ ယထာဝုဍ္ဎံ – ဥပေါသထံ၊ ပဝါရဏံ၊ ဝဿိကသာဋိကံ၊ ဩဏောဇနံ၊ ဘတ္တံ။ တေန ဟိ၊ ဘိက္ခဝေ၊ မာနတ္တာရဟာနံ ဘိက္ခူနံ ဝတ္တံ ပညာပေဿာမိ ယထာ မာနတ္တာရဟေဟိ ဘိက္ခူဟိ ဝတ္တိတဗ္ဗံ။

၈၉။ ‘‘မာနတ္တာရဟေန၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ။ တတြာယံ သမ္မာဝတ္တနာ –

န ဥပသမ္ပာဒေတဗ္ဗံ…ပေ… (ယထာ မူလာယ ပဋိကဿနာ၊ တထာ ဝိတ္ထာရေတဗ္ဗံ။) န ဘိက္ခူဟိ ¶ သမ္ပယောဇေတဗ္ဗံ။

‘‘န၊ ဘိက္ခဝေ၊ မာနတ္တာရဟေန ဘိက္ခုနာ ပကတတ္တဿ ဘိက္ခုနော ပုရတော ဂန္တဗ္ဗံ၊ န ပုရတော နိသီဒိတဗ္ဗံ။ ယော ဟောတိ သင်္ဃဿ အာသနပရိယန္တော သေယျာပရိယန္တော ဝိဟာရပရိယန္တော သော တဿ ပဒါတဗ္ဗော။ တေန စ သော သာဒိတဗ္ဗော။

‘‘န ¶ ¶ ၊ ဘိက္ခဝေ၊ မာနတ္တာရဟေန ဘိက္ခုနာ ပကတတ္တေန ဘိက္ခုနာ ပုရေသမဏေန ဝါ ပစ္ဆာသမဏေန ဝါ ကုလာနိ ဥပသင်္ကမိတဗ္ဗာနိ၊ န အာရညိကင်္ဂံ သမာဒါတဗ္ဗံ၊ န ပိဏ္ဍပါတိကင်္ဂံ သမာဒါတဗ္ဗံ၊ န စ တပ္ပစ္စယာ ပိဏ္ဍပါတော နီဟရာပေတဗ္ဗော – မာ မံ ဇာနိံသူတိ။

‘‘န၊ ဘိက္ခဝေ၊ မာနတ္တာရဟေန ဘိက္ခုနာ သဘိက္ခုကာ အာဝါသာ အဘိက္ခုကော အာဝါသော ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ မနတ္တာရဟေန ဘိက္ခုနာ သဘိက္ခုကာ အာဝါသာ အဘိက္ခုကော အနာဝါသော ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ မာနတ္တာရဟေန ဘိက္ခုနာ သဘိက္ခုကာ အာဝါသာ အဘိက္ခုကော ¶ အာဝါသော ဝါ အနာဝါသော ဝါ ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ မာနတ္တာရဟေန ဘိက္ခုနာ သဘိက္ခုကာ အနာဝါသာ အဘိက္ခုကော အာဝါသော ဂန္တဗ္ဗော…ပေ… အဘိက္ခုကော အနာဝါသော ဂန္တဗ္ဗော…ပေ… အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ မာနတ္တာရဟေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ အဘိက္ခုကော အာဝါသော ဂန္တဗ္ဗော…ပေ… အဘိက္ခုကော အနာဝါသော ဂန္တဗ္ဗော…ပေ… အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ မာနတ္တာရဟေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော ဂန္တဗ္ဗော…ပေ… သဘိက္ခုကော အနာဝါသော ဂန္တဗ္ဗော…ပေ… သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ မာနတ္တာရဟေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော ဂန္တဗ္ဗော…ပေ… သဘိက္ခုကော အနာဝါသော ဂန္တဗ္ဗော ¶ …ပေ… သဘိက္ခုကော ¶ အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ မာနတ္တာရဟေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော ဂန္တဗ္ဗော…ပေ… သဘိက္ခုကော အနာဝါသော ဂန္တဗ္ဗော…ပေ… သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ ¶ နာနာသံဝါသကာ၊ အညတြ ပကတတ္တေန၊ အညတြ အန္တရာယာ။

‘‘ဂန္တဗ္ဗော၊ ဘိက္ခဝေ၊ မာနတ္တာရဟေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော…ပေ… သဘိက္ခုကော အနာဝါသော…ပေ… သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘ဂန္တဗ္ဗော၊ ဘိက္ခဝေ၊ မာနတ္တာရဟေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော…ပေ… သဘိက္ခုကော အနာဝါသော…ပေ… သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘ဂန္တဗ္ဗော၊ ဘိက္ခဝေ၊ မာနတ္တာရဟေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော…ပေ… သဘိက္ခုကော အနာဝါသော…ပေ… သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘န၊ ဘိက္ခဝေ၊ မာနတ္တာရဟေန ဘိက္ခုနာ ပကတတ္တေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ။ ပကတတ္တံ ဘိက္ခုံ ဒိသွာ အာသနာ ဝုဋ္ဌာတဗ္ဗံ။ ပကတတ္တော ဘိက္ခု အာသနေန နိမန္တေတဗ္ဗော။ န ပကတတ္တေန ဘိက္ခုနာ သဒ္ဓိံ ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ၊ န ¶ နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ စင်္ကမိတဗ္ဗံ။

‘‘န ¶ ၊ ဘိက္ခဝေ၊ မာနတ္တာရဟေန ဘိက္ခုနာ ပါရိဝါသိကေန ဘိက္ခုနာ သဒ္ဓိံ…ပေ… မူလာယပဋိကဿနာရဟေန ဘိက္ခုနာ သဒ္ဓိံ…ပေ… မာနတ္တာရဟေန ဝုဍ္ဎတရေန ဘိက္ခုနာ သဒ္ဓိံ…ပေ… မာနတ္တစာရိကေန ဘိက္ခုနာ သဒ္ဓိံ…ပေ… အဗ္ဘာနာရဟေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ၊ န ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ၊ န နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ စင်္ကမိတဗ္ဗံ။

[မဟာဝ။ ၃၉၃] ‘‘မာနတ္တာရဟစတုတ္ထော ¶ စေ၊ ဘိက္ခဝေ၊ ပရိဝါသံ ဒဒေယျ၊ မူလာယ ပဋိကဿေယျ၊ မာနတ္တံ ဒဒေယျ၊ တံဝီသော အဗ္ဘေယျ၊ အကမ္မံ၊ န စ ကရဏီယ’’န္တိ။

မာနတ္တာရဟဝတ္တံ နိဋ္ဌိတံ။

၄။ မာနတ္တစာရိကဝတ္တံ

၉၀။ တေန ခေါ ပန သမယေန မာနတ္တစာရိကာ ဘိက္ခူ သာဒိယန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရံ၊ သေယျာဘိဟာရံ၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပဋိဂ္ဂဟဏံ၊ နဟာနေ ပိဋ္ဌိပရိကမ္မံ။ ယေ တေ ဘိက္ခူ အပ္ပိစ္ဆာ…ပေ… ¶ တေ ဥဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ မာနတ္တစာရိကာ ဘိက္ခူ သာဒိယိဿန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ…ပေ… နဟာနေ ပိဋ္ဌိပရိကမ္မ’’န္တိ! အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။

အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသင်္ဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ၊ ဘိက္ခဝေ၊ မာနတ္တစာရိကာ ဘိက္ခူ သာဒိယန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ…ပေ… နဟာနေ ပိဋ္ဌိပရိကမ္မ’’န္တိ? ‘‘သစ္စံ ဘဂဝါ’’တိ။ ဝိဂရဟိ ဗုဒ္ဓါ ဘဂဝါ – ‘‘အနနုစ္ဆဝိကံ…ပေ… ကထဉှိ နာမ၊ ဘိက္ခဝေ၊ မာနတ္တစာရိကာ ဘိက္ခူ သာဒိယိဿန္တိ ပကတတ္တာနံ ဘိက္ခူနံ အဘိဝါဒနံ…ပေ… နဟာနေ ပိဋ္ဌိပရိကမ္မံ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ –

‘‘န ¶ ၊ ဘိက္ခဝေ၊ မာနတ္တစာရိကေန ဘိက္ခုနာ သာဒိတဗ္ဗံ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရော၊ သေယျာဘိဟာရော၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပဋိဂ္ဂဟဏံ၊ နဟာနေ ပိဋ္ဌိပရိကမ္မံ။ ယော သာဒိယေယျ၊ အာပတ္တိ ဒုက္ကဋဿ။ အနုဇာနာမိ၊ ဘိက္ခဝေ၊ မာနတ္တစာရိကာနံ ဘိက္ခူနံ မိထု ယထာဝုဍ္ဎံ အဘိဝါဒနံ၊ ပစ္စုဋ္ဌာနံ…ပေ… နဟာနေ ပိဋ္ဌိပရိကမ္မံ။ အနုဇာနာမိ၊ ဘိက္ခဝေ၊ မာနတ္တစာရိကာနံ ဘိက္ခူနံ ပဉ္စ ယထာဝုဍ္ဎံ – ဥပေါသထံ၊ ပဝါရဏံ၊ ဝဿိကသာဋိကံ၊ ဩဏောဇနံ၊ ဘတ္တံ။ တေန ဟိ၊ ဘိက္ခဝေ၊ မာနတ္တစာရိကာနံ ဘိက္ခူနံ ဝတ္တံ ပညပေဿာမိ ယထာ မာနတ္တစာရိကေဟိ ဘိက္ခူဟိ ဝတ္တိတဗ္ဗံ။

၉၁။ ‘‘မာနတ္တစာရိကေန ¶ ¶ ၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ။ တတြာယံ သမ္မာဝတ္တနာ –

န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနပိ ဘိက္ခုနိယော န ဩဝဒိတဗ္ဗာ။ ယာယ အာပတ္တိယာ သင်္ဃေန မာနတ္တံ ဒိန္နံ ဟောတိ သာ အာပတ္တိ န အာပဇ္ဇိတဗ္ဗာ၊ အညာ ဝါ တာဒိသိကာ၊ တတော ဝါ ပါပိဋ္ဌတရာ၊ ကမ္မံ န ဂရဟိတဗ္ဗံ၊ ကမ္မိကာ န ဂရဟိတဗ္ဗာ။ န ပကတတ္တဿ ဘိက္ခုနော ဥပေါသထော ဌပေတဗ္ဗော၊ န ပဝါရဏာ ဌပေတဗ္ဗာ၊ န သဝစနီယံ ကာတဗ္ဗံ၊ န အနုဝါဒေါ ပဋ္ဌပေတဗ္ဗော၊ န ဩကာသော ကာရေတဗ္ဗော၊ န စောဒေတဗ္ဗော၊ န သာရေတဗ္ဗော၊ န ဘိက္ခူဟိ သမ္ပယောဇေတဗ္ဗံ။

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ ပကတတ္တဿ ဘိက္ခုနော ပုရတော ဂန္တဗ္ဗံ၊ န ပုရတော နိသီဒိတဗ္ဗံ။ ယော ဟောတိ သင်္ဃဿ အာသနပရိယန္တော သေယျာပရိယန္တော ဝိဟာရပရိယန္တော သော တဿ ပဒါတဗ္ဗော။ တေန စ သော သာဒိတဗ္ဗော။

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ ပကတတ္တေန ဘိက္ခုနာ ပုရေသမဏေန ဝါ ပစ္ဆာသမဏေန ဝါ ကုလာနိ ဥပသင်္ကမိတဗ္ဗာနိ၊ န အာရညိကင်္ဂံ သမာဒါတဗ္ဗံ၊ န ပိဏ္ဍပါတိကင်္ဂံ သမာဒါတဗ္ဗံ၊ န စ တပ္ပစ္စယာ ပိဏ္ဍပါတော နီဟရာပေတဗ္ဗော – မာ မံ ဇာနိံသူတိ။

‘‘မာနတ္တစာရိကေန၊ ဘိက္ခဝေ၊ ဘိက္ခုနာ အာဂန္တုကေန အာရောစေတဗ္ဗံ၊ အာဂန္တုကဿ အာရောစေတဗ္ဗံ၊ ဥပေါသထေ အာရောစေတဗ္ဗံ၊ ပဝါရဏာယ အာရောစေတဗ္ဗံ ¶ ¶ ၊ ဒေဝသိကံ အာရောစေတဗ္ဗံ။ သစေ ဂိလာနော ဟောတိ၊ ဒူတေနပိ အာရောစေတဗ္ဗံ။

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အာဝါသာ အဘိက္ခုကော အာဝါသော ဂန္တဗ္ဗော၊ အညတြ သင်္ဃေန၊ အညတြ အန္တရာယာ။

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အာဝါသာ အဘိက္ခုကော အနာဝါသော ဂန္တဗ္ဗော၊ အညတြ သင်္ဃေန၊ အညတြ အန္တရာယာ။

‘‘န ¶ ၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အာဝါသာ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ သင်္ဃေန၊ အညတြ အန္တရာယာ။

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အနာဝါသာ အဘိက္ခုကော အာဝါသော ဂန္တဗ္ဗော…ပေ… အဘိက္ခုကော အနာဝါသော ဂန္တဗ္ဗော…ပေ… အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ သင်္ဃေန၊ အညတြ အန္တရာယာ။

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ အဘိက္ခုကော အာဝါသော ဂန္တဗ္ဗော…ပေ… အဘိက္ခုကော အနာဝါသော ဂန္တဗ္ဗော…ပေ… အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ သင်္ဃေန၊ အညတြ အန္တရာယာ။

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော ဂန္တဗ္ဗော…ပေ… သဘိက္ခုကော အနာဝါသော ဂန္တဗ္ဗော…ပေ… သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ သင်္ဃေန၊ အညတြ အန္တရာယာ။

‘‘န ဘိက္ခဝေ ¶ ၊ မာနတ္တစာရိကေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော ဂန္တဗ္ဗော…ပေ… သဘိက္ခုကော အနာဝါသော ဂန္တဗ္ဗော…ပေ… သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ သင်္ဃေန၊ အညတြ အန္တရာယာ။

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော ဂန္တဗ္ဗော…ပေ… သဘိက္ခုကော အနာဝါသော ဂန္တဗ္ဗော…ပေ… သဘိက္ခုကော ¶ အာဝါသော ဝါ အနာဝါသော ဝါ ဂန္တဗ္ဗော ¶ ၊ ယတ္ထဿု ဘိက္ခူ နာနာသံဝါသကာ၊ အညတြ သင်္ဃေန၊ အညတြ အန္တရာယာ။

‘‘ဂန္တဗ္ဗော၊ ဘိက္ခဝေ မာနတ္တစာရိကေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော…ပေ… သဘိက္ခုကော အနာဝါသော…ပေ… သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘ဂန္တဗ္ဗော ¶ ၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော…ပေ… သဘိက္ခုကော အနာဝါသော…ပေ… သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘ဂန္တဗ္ဗော၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော…ပေ… သဘိက္ခုကော အနာဝါသော…ပေ… သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘န ¶ ၊ ဘိက္ခဝေ၊ မာနတ္တစာရိကေန ဘိက္ခုနာ ပကတတ္တေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ။ ပကတတ္တံ ဘိက္ခုံ ဒိသွာ အာသနာ ဝုဋ္ဌာတဗ္ဗံ။ ပကတတ္တော ဘိက္ခု အာသနေန နိမန္တေတဗ္ဗော။ န ပကတတ္တေန ဘိက္ခုနာ သဒ္ဓိံ ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ၊ န နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ စင်္ကမိတဗ္ဗံ။

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ ပါရိဝါသိကေန ဘိက္ခုနာ သဒ္ဓိံ…ပေ… မူလာယပဋိကဿနာရဟေန ဘိက္ခုနာ သဒ္ဓိံ…ပေ… မာနတ္တာရဟေန ဘိက္ခုနာ သဒ္ဓိံ…ပေ… မာနတ္တစာရိကေန ဝုဍ္ဎတရေန ဘိက္ခုနာ သဒ္ဓိံ…ပေ… အဗ္ဘာနာရဟေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ၊ န ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ ¶ ၊ န နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ စင်္ကမိတဗ္ဗံ။

[မဟာဝ။ ၃၉၃] ‘‘မာနတ္တစာရိကစတုတ္ထော စေ၊ ဘိက္ခဝေ၊ ပရိဝါသံ ဒဒေယျ၊ မူလာယ ¶ ပဋိကဿေယျ၊ မာနတ္တံ ဒဒေယျ၊ တံဝီသော အဗ္ဘေယျ၊ အကမ္မံ၊ န စ ကရဏီယ’’န္တိ။

၉၂။ အထ ခေါ အာယသ္မာ ဥပါလိ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နော ခေါ အာယသ္မာ ဥပါလိ ဘဂဝန္တံ ဧတဒဝေါစ – ‘‘ကတိ နု ခေါ၊ ဘန္တေ၊ မာနတ္တစာရိကဿ ဘိက္ခုနော ရတ္တိစ္ဆေဒါ’’တိ? ‘‘စတ္တာရော ခေါ ¶ ၊ ဥပါလိ၊ မာနတ္တစာရိကဿ ဘိက္ခုနော ရတ္တိစ္ဆေဒါ။ သဟဝါသော၊ ဝိပ္ပဝါသော၊ အနာရောစနာ၊ ဦနေ ဂဏေ စရဏံ [စရဏန္တိ (က။)] – ဣမေ ခေါ၊ ဥပါလိ၊ စတ္တာရော မာနတ္တစာရိကဿ ဘိက္ခုနော ရတ္တိစ္ဆေဒါ’’တိ။

၉၃။ တေန ခေါ ပန သမယေန သာဝတ္ထိယံ မဟာဘိက္ခုသင်္ဃော သန္နိပတိတော ဟောတိ။ န သက္ကောန္တိ မာနတ္တစာရိကာ ဘိက္ခူ မာနတ္တံ သောဓေတုံ။ ဘဂဝတော ဧတမတ္ထံ အာရောစေသုံ။ ‘‘အနုဇာနာမိ၊ ဘိက္ခဝေ၊ မာနတ္တံ နိက္ခိပိတုံ။ ဧဝဉ္စ ပန၊ ဘိက္ခဝေ၊ နိက္ခိပိတဗ္ဗံ။ တေန မာနတ္တစာရိကေန ဘိက္ခုနာ ဧကံ ဘိက္ခုံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘မာနတ္တံ နိက္ခိပါမီ’တိ။ နိက္ခိတ္တံ ဟောတိ မာနတ္တံ။ ‘ဝတ္တံ နိက္ခိပါမီ’တိ။ နိက္ခိတ္တံ ဟောတိ မာနတ္တ’’န္တိ။

၉၄။ တေန ခေါ ပန သမယေန သာဝတ္ထိယာ ဘိက္ခူ တဟံ တဟံ ပက္ကမိံသု ¶ ။ သက္ကောန္တိ မာနတ္တစာရိကာ ဘိက္ခူ မာနတ္တံ သောဓေတုံ။ ဘဂဝတော ဧတမတ္ထံ အာရောစေသုံ။ ‘‘အနုဇာနာမိ၊ ဘိက္ခဝေ၊ မာနတ္တံ သမာဒိယိတုံ။ ဧဝဉ္စ ပန၊ ဘိက္ခဝေ၊ သမာဒိယိတဗ္ဗံ။ တေန မာနတ္တစာရိကေန ဘိက္ခုနာ ဧကံ ဘိက္ခုံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ၊ ဧဝမဿ ဝစနီယော – ‘မာနတ္တံ သမာဒိယာမီ’တိ။ သမာဒိန္နံ ဟောတိ မာနတ္တံ။ ‘ဝတ္တံ သမာဒိယာမီ’တိ။ သမာဒိန္နံ ဟောတိ မာနတ္တ’’န္တိ။

မာနတ္တစာရိကဝတ္တံ နိဋ္ဌိတံ။

၅။ အဗ္ဘာနာရဟဝတ္တံ

၉၅။ တေန ¶ ခေါ ပန သမယေန အဗ္ဘာနာရဟာ ဘိက္ခူ သာဒိယန္တိ ပကတတ္တာနံ ဘိက္ခူနံ အဘိဝါဒနံ ပစ္စုဋ္ဌာနံ…ပေ… နဟာနေ ပိဋ္ဌိပရိကမ္မံ။ ယေ တေ ဘိက္ခူ အပ္ပိစ္ဆာ…ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အဗ္ဘာနာရဟာ ဘိက္ခူ သာဒိယိဿန္တိ ပကတတ္တာနံ ဘိက္ခူနံ အဘိဝါဒနံ ပစ္စုဋ္ဌာနံ…ပေ… နဟာနေ ပိဋ္ဌိပရိကမ္မ’’န္တိ! အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။

အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသင်္ဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ၊ ဘိက္ခဝေ၊ အဗ္ဘာနာရဟာ ဘိက္ခူ သာဒိယန္တိ ပကတတ္တာနံ ဘိက္ခူနံ အဘိဝါဒနံ ပစ္စုဋ္ဌာနံ…ပေ… နဟာနေ ပိဋ္ဌိပရိကမ္မန္တိ? ‘‘သစ္စံ ဘဂဝါ’’တိ။ ဝိဂရဟိ ဗုဒ္ဓါ ¶ ဘဂဝါ – ‘‘အနနုစ္ဆဝိကံ…ပေ… ကထဉှိ နာမ၊ ဘိက္ခဝေ၊ အဗ္ဘာနာရဟာ ဘိက္ခူ သာဒိယိဿန္တိ ပကတတ္တာနံ ဘိက္ခူနံ အဘိဝါဒနံ ပစ္စုဋ္ဌာနံ…ပေ… နဟာနေ ပိဋ္ဌိပရိကမ္မံ ¶ ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ – ‘‘န၊ ဘိက္ခဝေ၊ အဗ္ဘာနာရဟေန ဘိက္ခုနာ သာဒိတဗ္ဗံ ပကတတ္တာနံ ဘိက္ခူနံ အဘိဝါဒနံ ပစ္စုပဋ္ဌာနံ…ပေ… နဟာနေ ပိဋ္ဌိပရိကမ္မံ။ ယော သာဒိယေယျ၊ အာပတ္တိ ဒုက္ကဋဿ။ အနုဇာနာမိ၊ ဘိက္ခဝေ၊ အဗ္ဘာနာရဟာနံ ဘိက္ခူနံ မိထု ယထာဝုဍ္ဎံ အဘိဝါဒနံ ပစ္စုဋ္ဌာနံ…ပေ… နဟာနေ ပိဋ္ဌိပရိကမ္မံ။ အနုဇာနာမိ၊ ဘိက္ခဝေ၊ အဗ္ဘာနာရဟာနံ ဘိက္ခူနံ ပဉ္စ ယထာဝုဍ္ဎံ – ဥပေါသထံ၊ ပဝါရဏံ၊ ဝဿိကသာဋိကံ၊ ဩဏောဇနံ၊ ဘတ္တံ။ တေန ဟိ၊ ဘိက္ခဝေ၊ အဗ္ဘာနာရဟာနံ ဘိက္ခူနံ ဝတ္တံ ပညာပေဿာမိ ယထာ အဗ္ဘာနာရဟေဟိ ဘိက္ခူဟိ ဝတ္တိတဗ္ဗံ။

၉၆။ ‘‘အဗ္ဘာနာရဟေန၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ။ တတြာယံ သမ္မာဝတ္တနာ –

န ဥပသမ္ပာဒေတဗ္ဗံ…ပေ… (ယထာ ဟေဋ္ဌာ၊ တထာ ဝိတ္ထာရေတဗ္ဗံ၊) န ဘိက္ခူဟိ သမ္ပယောဇေတဗ္ဗံ။

‘‘န၊ ဘိက္ခဝေ၊ အဗ္ဘာနာရဟေန ဘိက္ခုနာ ပကတတ္တဿ ဘိက္ခုနော ပုရတော ဂန္တဗ္ဗံ၊ န ပုရတော နိသီဒိတဗ္ဗံ။ ယော ဟောတိ သင်္ဃဿ အာသနပရိယန္တော သေယျာပရိယန္တော ဝိဟာရပရိယန္တော သော တဿ ပဒါတဗ္ဗော။ တေန စ သော သာဒိတဗ္ဗော။

‘‘န ¶ ၊ ဘိက္ခဝေ၊ အဗ္ဘာနာရဟေန ဘိက္ခုနာ ¶ ပကတတ္တေန ဘိက္ခုနာ ပုရေသမဏေန ဝါ ပစ္ဆာသမဏေန ဝါ ကုလာနိ ဥပသင်္ကမိတဗ္ဗာနိ၊ န အာရညိကင်္ဂံ သမာဒါတဗ္ဗံ၊ န ပိဏ္ဍပါတိကင်္ဂံ သမာဒါတဗ္ဗံ၊ န စ တပ္ပစ္စယာ ပိဏ္ဍပါတော နီဟရာပေတဗ္ဗော – မာ မံ ဇာနိံသူတိ။

‘‘န၊ ဘိက္ခဝေ၊ အဗ္ဘာနာရဟေန ဘိက္ခုနာ သဘိက္ခုကာ အာဝါသာ အဘိက္ခုကော အာဝါသော ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။

‘‘န၊ ဘိက္ခဝေ၊ အဗ္ဘာနာရဟေန ဘိက္ခုနာ သဘိက္ခုကာ အာဝါသာ အဘိက္ခုကော အနာဝါသော ဂန္တဗ္ဗော၊ အညတြ ပကတတ္တေန၊ အညတြ အန္တရာယာ…ပေ…။ (ယထာ ဟေဋ္ဌာ၊ တထာ ဝိတ္ထာရေတဗ္ဗာ။)

‘‘ဂန္တဗ္ဗော ¶ ၊ ဘိက္ခဝေ၊ အဗ္ဘာနာရဟေန ဘိက္ခုနာ သဘိက္ခုကာ အာဝါသာ…ပေ… အနာဝါသာ…ပေ… အာဝါသာ ဝါ အနာဝါသာ ဝါ သဘိက္ခုကော ¶ အာဝါသော…ပေ… သဘိက္ခုကော အနာဝါသော…ပေ… သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ။

‘‘န၊ ဘိက္ခဝေ၊ အဗ္ဘာနာရဟေန ဘိက္ခုနာ ပကတတ္တေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ၊ ပကတတ္တံ ဘိက္ခုံ ဒိသွာ အာသနာ ဝုဋ္ဌာတဗ္ဗံ၊ ပကတတ္တော ဘိက္ခု အာသနေန နိမန္တေတဗ္ဗော၊ န ပကတတ္တေန ဘိက္ခုနာ သဒ္ဓိံ ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ၊ န နီစေ စင်္ကမေ ¶ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ စင်္ကမိတဗ္ဗံ။

‘‘န၊ ဘိက္ခဝေ၊ အဗ္ဘာနာရဟေန ဘိက္ခုနာ ပါရိဝါသိကေန ဘိက္ခုနာ သဒ္ဓိံ…ပေ… မူလာယပဋိကဿနာရဟေန ဘိက္ခုနာ သဒ္ဓိံ…ပေ… မာနတ္တာရဟေန ဘိက္ခုနာ သဒ္ဓိံ…ပေ… မာနတ္တစာရိကေန ဘိက္ခုနာ သဒ္ဓိံ…ပေ… အဗ္ဘာနာရဟေန ဝုဍ္ဎတရေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ၊ န ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ ¶ ၊ န နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ စင်္ကမိတဗ္ဗံ။

[မဟာဝ။ ၃၉၃] ‘‘အဗ္ဘာနာရဟစတုတ္ထော စေ၊ ဘိက္ခဝေ၊ ပရိဝါသံ ဒဒေယျ၊ မူလာယ ပဋိကဿေယျ၊ မာနတ္တံ ဒဒေယျ၊ တံဝီသော အဗ္ဘေယျ၊ အကမ္မံ၊ န စ ကရဏီယ’’န္တိ။

အဗ္ဘာနာရဟဝတ္တံ နိဋ္ဌိတံ။

ပါရိဝါသိကက္ခန္ဓကော ဒုတိယော။

ဣမမှိ ခန္ဓကေ ဝတ္ထူ ပဉ္စ။

တဿုဒ္ဒါနံ –

ပါရိဝါသိကာ ¶ သာဒေန္တိ၊ ပကတတ္တာန ဘိက္ခုနံ၊

အဘိဝါဒနံ ပစ္စုဋ္ဌာနံ၊ အဉ္ဇလိဉ္စ သာမီစိယံ။

အာသနံ ¶ သေယျာဘိဟာရံ၊ ပါဒေါ ပီဌံ ကထလိကံ၊

ပတ္တံ နဟာနေ ပရိကမ္မံ၊ ဥဇ္ဈာယန္တိ စ ပေသလာ။

ဒုက္ကဋံ သာဒိယန္တဿ၊ မိထု ပဉ္စ ယထာဝုဍ္ဎံ [ပုနာပရေ (က။)]၊

ဥပေါသထံ ပဝါရဏံ၊ ဝဿိကောဏောဇဘောဇနံ။

သမ္မာ စ ဝတ္တနာ တတ္ထ၊ ပကတတ္တဿ ဂစ္ဆန္တံ၊

ယော စ ဟောတိ ပရိယန္တော၊ ပုရေ ပစ္ဆာ တထေဝ စ [န ပုရေ ပစ္ဆာသမဏေန (သီ။ သျာ။)]။

အာရညပိဏ္ဍနီဟာရော၊ အာဂန္တုကေ ဥပေါသထေ၊

ပဝါရဏာယ ဒူတေန၊ ဂန္တဗ္ဗော စ သဘိက္ခုကော။

ဧကစ္ဆန္နေ ¶ စ ဝုဋ္ဌာနံ၊ တထေဝ စ နိမန္တယေ၊

အာသနေ နီစေ စင်္ကမေ၊ ဆမာယံ စင်္ကမေန စ။

ဝုဍ္ဎတရေန အကမ္မံ၊ ရတ္တိစ္ဆေဒါ စ သောဓနာ၊

နိက္ခိပနံ သမာဒါနံ၊ ဝတ္တံဝ ပါရိဝါသိကေ [ရတ္တိ ဝါ ပါရိဝါသိကေ (က။)၊ ဉာတဗ္ဗံ ပါရိဝါသိကာ (သီ။ သျာ။)]။

မူလာယ ¶ မာနတ္တာရဟာ၊ တထာ မာနတ္တစာရိကာ၊

အဗ္ဘာနာရဟေ နယော စာပိ၊ သမ္ဘေဒံ နယတော [သမ္ဘေဒနယတော (သျာ။)] ပုန။

ပါရိဝါသိကေသု တယော၊ စတု မာနတ္တစာရိကေ၊

န သမေန္တိ ရတ္တိစ္ဆေဒေသု [ရတ္တိစ္ဆေဒေ (ဣတိပိ)၊ ရတ္တိစ္ဆေဒါ (သျာ။)]၊ မာနတ္တေသု စ ဒေဝသိ၊

ဒွေ ကမ္မာ သဒိသာ သေသာ၊ တယော ကမ္မာ သမာသမာတိ [သမာ မတာတိ (သီ။)]။

ပါရိဝါသိကက္ခန္ဓကံ နိဋ္ဌိတံ။

၃။ သမုစ္စယက္ခန္ဓကံ

၁။ သုက္ကဝိဿဋ္ဌိ

၉၇။ တေန ¶ ¶ ¶ ¶ သမယေန ဗုဒ္ဓါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အာယသ္မာ ဥဒါယီ ဧကံ အာပတ္တိံ အာပန္နော ဟောတိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော [တေ ဘိက္ခူ ဘဂဝတော (သျာ။)] ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ဒေတု။ ဧဝဉ္စ ပန၊ ဘိက္ခဝေ၊ ဒါတဗ္ဗံ –

အပ္ပဋိစ္ဆန္နမာနတ္တံ

၉၈။ ‘‘တေန၊ ဘိက္ခဝေ၊ ဥဒါယိနာ ဘိက္ခုနာ သင်္ဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သောဟံ၊ ဘန္တေ၊ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစာမိ။ အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ ဒုတိယမ္ပိ၊ သောဟံ [ဒုတိယမ္ပိ (သီ။ က။)] ဘန္တေ၊ သင်္ဃံ ဧကိဿာ အာပတ္တိယာ ¶ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစာမိ။ အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ တတိယမ္ပိ သောဟံ [တတိယမ္ပိ (သီ။ က။)]၊ ဘန္တေ၊ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစာမီ’တိ။ ‘‘ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၉၉။ ‘‘သုဏာတု ¶ မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိဿ ဘိက္ခုနော ဧကိဿာ ¶ အာပတ္တိယာ သဉ္စေတနိကာယ သုက္ကဝိဿဋ္ဌိယာ ¶ အပ္ပဋိစ္ဆန္နာယ ဆာရတ္တံ မာနတ္တံ ဒဒေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစတိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ဒေတိ။ ယဿာယသ္မတော ခမတိ ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တဿ ဒါနံ၊ သော တုဏှဿ ¶ ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစတိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ဒေတိ။ ယဿာယသ္မတော ခမတိ ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစတိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ဒေတိ။ ယဿာယသ္မတော ခမတိ ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒိန္နံ ¶ သင်္ဃေန ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ ¶ ။

အပ္ပဋိစ္ဆန္နအဗ္ဘာနံ

၁၀၀။ သော ¶ စိဏ္ဏမာနတ္တော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သောဟံ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သောဟံ စိဏ္ဏမာနတ္တော။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိံ ဘိက္ခုံ အဗ္ဘေတု။ ဧဝဉ္စ ပန၊ ဘိက္ခဝေ၊ အဗ္ဘေတဗ္ဗော –

တေန၊ ဘိက္ခဝေ၊ ဥဒါယိနာ ဘိက္ခုနာ သင်္ဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အဟံ ဘန္တေ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ၊ သောဟံ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သောဟံ၊ ဘန္တေ၊ စိဏ္ဏမာနတ္တော သင်္ဃံ အဗ္ဘာနံ ယာစာမိ။

‘‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သောဟံ ¶ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သောဟံ စိဏ္ဏမာနတ္တော ဒုတိယမ္ပိ၊ ဘန္တေ၊ သင်္ဃံ အဗ္ဘာနံ ယာစာမိ။

‘‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သောဟံ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သောဟံ စိဏ္ဏမာနတ္တော တတိယမ္ပိ၊ ဘန္တေ၊ သင်္ဃံ အဗ္ဘာနံ ယာစာမီတိ။ ဗျတ္တေန ဘိက္ခုနာ ပဋိဗလေန သင်္ဃော ¶ ဉာပေတဗ္ဗော –

၁၀၁။ ‘‘သုဏာတု ¶ မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ ¶ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သော စိဏ္ဏမာနတ္တော သင်္ဃံ အဗ္ဘာနံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိံ ဘိက္ခုံ အဗ္ဘေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ ¶ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သော စိဏ္ဏမာနတ္တော သင်္ဃံ အဗ္ဘာနံ ယာစတိ။ သင်္ဃော ဥဒါယိံ ဘိက္ခုံ အဗ္ဘေတိ။ ယဿာယသ္မတော ခမတိ ဥဒါယိဿ ဘိက္ခုနော အဗ္ဘာနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သော စိဏ္ဏမာနတ္တော သင်္ဃံ အဗ္ဘာနံ ယာစတိ။ သင်္ဃော ဥဒါယိံ ဘိက္ခုံ အဗ္ဘေတိ။ ယဿာယသ္မတော ခမတိ ဥဒါယိဿ ဘိက္ခုနော အဗ္ဘာနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သော စိဏ္ဏမာနတ္တော ¶ သင်္ဃံ အဗ္ဘာနံ ယာစတိ။ သင်္ဃော ဥဒါယိံ ဘိက္ခုံ အဗ္ဘေတိ။ ယဿာယသ္မတော ခမတိ ဥဒါယိဿ ဘိက္ခုနော အဗ္ဘာနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘အဗ္ဘိတော ¶ ¶ သင်္ဃေန ဥဒါယီ ဘိက္ခု။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

ဧကာဟပ္ပဋိစ္ဆန္နပရိဝါသံ

၁၀၂။ တေန ခေါ ပန သမယေန အာယသ္မာ ဥဒါယီ ဧကံ အာပတ္တိံ အာပန္နော ဟောတိ သဉ္စေတနိကံ သုက္ကဝိဿဋ္ဌိံ ဧကာဟပ္ပဋိစ္ဆန္နံ။ သော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ဧကာဟပ္ပဋိစ္ဆန္နံ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ ဒေတု။ ဧဝဉ္စ ပန၊ ဘိက္ခဝေ၊ ဒါတဗ္ဗော –

‘‘တေန၊ ဘိက္ခဝေ၊ ဥဒါယိနာ ဘိက္ခုနာ သင်္ဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ဧကာဟပ္ပဋိစ္ဆန္နံ။ သောဟံ၊ ဘန္တေ၊ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ ယာစာမီ’တိ။ ဒုတိယမ္ပိ ယာစိတဗ္ဗော။ တတိယမ္ပိ ယာစိတဗ္ဗော။ ‘‘ဗျတ္တေန ¶ ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၀၃။ ‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ဧကာဟပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိဿ ဘိက္ခုနော ¶ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ ဒဒေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ဧကာဟပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ ယာစတိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ ဒေတိ ¶ ။ ယဿာယသ္မတော ခမတိ ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ¶ ဧကာဟပ္ပဋိစ္ဆန္နာယ ဧကာဟပရိဝါသဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ… ¶ ။

‘‘ဒိန္နော သင်္ဃေန ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသော။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

ဧကာဟပ္ပဋိစ္ဆန္နမာနတ္တံ

၁၀၄။ သော ပရိဝုတ္ထပရိဝါသော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ဧကာဟပ္ပဋိစ္ဆန္နံ။ သောဟံ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ အဒါသိ။ သောဟံ ပရိဝုတ္ထပရိဝါသော။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဆာရတ္တံ မာနတ္တံ ဒေတု။ ဧဝဉ္စ ပန၊ ဘိက္ခဝေ၊ ဒါတဗ္ဗံ –

‘‘တေန၊ ဘိက္ခဝေ၊ ဥဒါယိနာ ဘိက္ခုနာ သင်္ဃံ ဥပသင်္ကမိတွာ…ပေ… ဧဝမဿ ဝစနီယော – ‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ¶ ဧကာဟပ္ပဋိစ္ဆန္နံ။ သောဟံ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ အဒါသိ။ သောဟံ၊ ဘန္တေ၊ ပရိဝုတ္ထပရိဝါသော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဆာရတ္တံ မာနတ္တံ ယာစာမီ’တိ။ ဒုတိယမ္ပိ ယာစိတဗ္ဗံ [ယာစိတဗ္ဗော (သီ။ ဧဝမုပရိပိ)]။ တတိယမ္ပိ ယာစိတဗ္ဗံ [ယာစိတဗ္ဗော (သီ။ ဧဝမုပရိပိ)]။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၀၅။ ‘‘သုဏာတု ¶ မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ¶ ဧကာဟပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ ယာစိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ¶ ဧကာဟပ္ပဋိစ္ဆန္နာယ ဧကာဟပရိဝါသံ အဒါသိ။ သော ပရိဝုတ္ထပရိဝါသော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဆာရတ္တံ မာနတ္တံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဆာရတ္တံ မာနတ္တံ ဒဒေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ဧကာဟပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ¶ ဧကာဟပ္ပဋိစ္ဆန္နာယ ဧကာဟပရိဝါသံ ယာစိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ အဒါသိ။ သော ပရိဝုတ္ထပရိဝါသော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဆာရတ္တံ မာနတ္တံ ယာစတိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဆာရတ္တံ မာနတ္တံ ဒေတိ။ ယဿာယသ္မတော ခမတိ ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဆာရတ္တံ မာနတ္တဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ… ¶ ။

‘‘ဒိန္နံ သင်္ဃေန ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဆာရတ္တံ မာနတ္တံ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

ဧကာဟပ္ပဋိစ္ဆန္နအဗ္ဘာနံ

၁၀၆။ သော စိဏ္ဏမာနတ္တော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ဧကာဟပ္ပဋိစ္ဆန္နံ။ သောဟံ ¶ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ အဒါသိ။ သောဟံ ပရိဝုတ္ထပရိဝါသော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဆာရတ္တံ မာနတ္တံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ¶ ဧကာဟပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သောဟံ စိဏ္ဏမာနတ္တော။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိံ ဘိက္ခုံ အဗ္ဘေတု။ ဧဝဉ္စ ပန၊ ဘိက္ခဝေ၊ အဗ္ဘေတဗ္ဗော –

‘‘တေန ဘိက္ခဝေ၊ ဥဒါယိနာ ဘိက္ခုနာ သင်္ဃံ ဥပသင်္ကမိတွာ…ပေ… ဧဝမဿ ¶ ဝစနီယော – ‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ဧကာဟပ္ပဋိစ္ဆန္နံ။ သောဟံ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ အဒါသိ။ သောဟံ ပရိဝုတ္ထပရိဝါသော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဆာရတ္တံ မာနတ္တံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သောဟံ၊ ဘန္တေ၊ စိဏ္ဏမာနတ္တော သင်္ဃံ အဗ္ဘာနံ ယာစာမီ’တိ။ ဒုတိယမ္ပိ ယာစိတဗ္ဗံ။ တတိယမ္ပိ ယာစိတဗ္ဗံ။ ဗျတ္တေန ¶ ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၀၇။ ‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ဧကာဟပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ ယာစိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ အဒါသိ။ သော ပရိဝုတ္ထပရိဝါသော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဆာရတ္တံ မာနတ္တံ ယာစိ။ သင်္ဃော ဥဒါယိဿ ဘိက္ခုနော ¶ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သော စိဏ္ဏမာနတ္တော ¶ သင်္ဃံ အဗ္ဘာနံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိံ ဘိက္ခုံ အဗ္ဘေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ဧကာဟပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ ယာစိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ဧကာဟပရိဝါသံ အဒါသိ။ သော ပရိဝုတ္ထပရိဝါသော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ¶ ဆာရတ္တံ မာနတ္တံ ယာစိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ဧကာဟပ္ပဋိစ္ဆန္နာယ ¶ ဆာရတ္တံ မာနတ္တံ အဒါသိ။ သော စိဏ္ဏမာနတ္တော သင်္ဃံ အဗ္ဘာနံ ယာစတိ။ သင်္ဃော ဥဒါယိံ ဘိက္ခုံ အဗ္ဘေတိ။ ယဿာယသ္မတော ခမတိ ဥဒါယိဿ ဘိက္ခုနော အဗ္ဘာနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘အဗ္ဘိတော သင်္ဃေန ဥဒါယီ ဘိက္ခု။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

ပဉ္စာဟပ္ပဋိစ္ဆန္နပရိဝါသော

၁၀၈။ တေန ခေါ ပန သမယေန အာယသ္မာ ဥဒါယီ ဧကံ အာပတ္တိံ အာပန္နော ဟောတိ သဉ္စေတနိကံ သုက္ကဝိဿဋ္ဌိံ ဒွီဟပ္ပဋိစ္ဆန္နံ…ပေ… တီဟပ္ပဋိစ္ဆန္နံ…ပေ… ¶ စတူဟပ္ပဋိစ္ဆန္နံ…ပေ… ပဉ္စာဟပ္ပဋိစ္ဆန္နံ။ သော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ ဒေတု။ ဧဝဉ္စ ပန၊ ဘိက္ခဝေ၊ ဒါတဗ္ဗော –

‘‘တေန၊ ဘိက္ခဝေ၊ ဥဒါယိနာ ဘိက္ခုနာ သင်္ဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ ¶ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သောဟံ၊ ဘန္တေ၊ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ ယာစာမီ’တိ။ ဒုတိယမ္ပိ ယာစိတဗ္ဗော။ တတိယမ္ပိ ယာစိတဗ္ဗော။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၀၉။ ‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိဿ ¶ ¶ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ ဒဒေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ ယာစတိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ ဒေတိ။ ယဿာယသ္မတော ခမတိ ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘ဒိန္နော သင်္ဃေန ဥဒါယိဿ ဘိက္ခုနော ¶ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသော။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

ပါရိဝါသိကမူလာယပဋိကဿနာ

၁၁၀။ သော ပရိဝသန္တော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သောဟံ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ ¶ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ အဒါသိ။ သောဟံ ပရိဝသန္တော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿတု။ ဧဝဉ္စ ပန၊ ဘိက္ခဝေ၊ မူလာယ ပဋိကဿိတဗ္ဗော –

‘‘တေန၊ ဘိက္ခဝေ၊ ဥဒါယိနာ ဘိက္ခုနာ သင်္ဃံ ဥပသင်္ကမိတွာ…ပေ… ဧဝမဿ ဝစနီယော – ‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ ¶ ။ သောဟံ သင်္ဃံ ဧကိဿာ ¶ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ အဒါသိ။ သောဟံ ပရိဝသန္တော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သောဟံ၊ ဘန္တေ၊ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ¶ ပဋိကဿနံ ယာစာမီ’တိ။ ဒုတိယမ္ပိ ယာစိတဗ္ဗာ [ယာစိတဗ္ဗော (သီ။ ဧဝမုပရိပိ)]။ တတိယမ္ပိ ယာစိတဗ္ဗာ [ယာစိတဗ္ဗော (သီ။ ဧဝမုပရိပိ)]။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၁၁။ ‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ ယာစိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ အဒါသိ။ သော ပရိဝသန္တော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿေယျ။ ဧသာ ဉတ္တိ။

‘‘သုဏာတု ¶ မေ၊ ဘန္တေ ¶ ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ ယာစိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ အဒါသိ။ သော ပရိဝသန္တော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနံ ယာစတိ။ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿတိ။ ယဿာယသ္မတော ခမတိ ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနာ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ¶ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ… ¶ ။

‘‘ပဋိကဿိတော သင်္ဃေန ဥဒါယီ ဘိက္ခု အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနာ [မူလာယ (သျာ။)]။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

မာနတ္တာရဟမူလာယပဋိကဿနာ

၁၁၂။ သော ပရိဝုတ္ထပရိဝါသော မာနတ္တာရဟော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ¶ ပဉ္စာဟပ္ပဋိစ္ဆန္နံ။ သောဟံ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ အဒါသိ။ သောဟံ ပရိဝသန္တော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနံ ယာစိံ။ တံ မံ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ ¶ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿိ။ သောဟံ ပရိဝုတ္ထပရိဝါသော မာနတ္တာရဟော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿတု။ ဧဝဉ္စ ပန၊ ဘိက္ခဝေ၊ မူလာယ ပဋိကဿိတဗ္ဗော –

‘‘တေန၊ ဘိက္ခဝေ၊ ဥဒါယိနာ ဘိက္ခုနာ သင်္ဃံ ဥပသင်္ကမိတွာ…ပေ… ဧဝမဿ ဝစနီယော – ‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ…ပေ… ¶ သောဟံ ပရိဝုတ္ထပရိဝါသော မာနတ္တာရဟော အန္တရာ ဧကံ အာပတ္တိံ အာပဇ္ဇိံ ¶ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနံ ယာစာမီ’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၁၃။ ‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ…ပေ… ¶ သော ပရိဝုတ္ထပရိဝါသော မာနတ္တာရဟော အန္တရာ ¶ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ…ပေ… သော ပရိဝုတ္ထပရိဝါသော မာနတ္တာရဟော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနံ ယာစတိ ¶ ။ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿတိ။ ယဿာယသ္မတော ခမတိ ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ¶ အပ္ပဋိစ္ဆန္နာယ မူလာယပဋိကဿနာ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘ပဋိကဿိတော သင်္ဃေန ဥဒါယီ ဘိက္ခု အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနာ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

တိကာပတ္တိမာနတ္တံ

၁၁၄။ သော ပရိဝုတ္ထပရိဝါသော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ…ပေ… ¶ သောဟံ ပရိဝုတ္ထပရိဝါသော။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိဿ ဘိက္ခုနော တိဿန္နံ အာပတ္တီနံ ဆာရတ္တံ မာနတ္တံ ဒေတု။ ဧဝဉ္စ ပန၊ ဘိက္ခဝေ၊ ဒါတဗ္ဗံ –

‘‘တေန၊ ဘိက္ခဝေ၊ ဥဒါယိနာ ဘိက္ခုနာ သင်္ဃံ ဥပသင်္ကမိတွာ…ပေ… ဧဝမဿ ဝစနီယော – ‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သောဟံ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ¶ ပဉ္စာဟပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ အဒါသိ…ပေ… ¶ သောဟံ၊ ဘန္တေ၊ ပရိဝုတ္ထပရိဝါသော သင်္ဃံ တိဿန္နံ အာပတ္တီနံ ဆာရတ္တံ မာနတ္တံ ယာစာမီ’တိ။ ဒုတိယမ္ပိ ယာစိတဗ္ဗံ။ တတိယမ္ပိ ယာစိတဗ္ဗံ။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၁၅။ ‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ…ပေ… ¶ သော ပရိဝုတ္ထပရိဝါသော သင်္ဃံ တိဿန္နံ အာပတ္တီနံ ဆာရတ္တံ မာနတ္တံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိဿ ဘိက္ခုနော တိဿန္နံ အာပတ္တီနံ ဆာရတ္တံ မာနတ္တံ ဒဒေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ…ပေ… ¶ သော ပရိဝုတ္ထပရိဝါသော သင်္ဃံ ¶ တိဿန္နံ အာပတ္တီနံ ဆာရတ္တံ မာနတ္တံ ယာစတိ။ သင်္ဃော ဥဒါယိဿ ဘိက္ခုနော တိဿန္နံ အာပတ္တီနံ ¶ ဆာရတ္တံ မာနတ္တံ ဒေတိ။ ယဿာယသ္မတော ခမတိ ဥဒါယိဿ ဘိက္ခုနော တိဿန္နံ အာပတ္တီနံ ဆာရတ္တံ မာနတ္တဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘ဒိန္နံ သင်္ဃေန ဥဒါယိဿ ဘိက္ခုနော တိဿန္နံ အာပတ္တီနံ ဆာရတ္တံ မာနတ္တံ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

မာနတ္တစာရိကမူလာယပဋိကဿနာ

၁၁၆။ သော မာနတ္တံ စရန္တော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ…ပေ… ¶ သောဟံ မာနတ္တံ စရန္တော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿိတွာ ဆာရတ္တံ မာနတ္တံ ဒေတု။ ဧဝဉ္စ ပန၊ ဘိက္ခဝေ၊ မူလာယ ပဋိကဿိတဗ္ဗော – တေန၊ ဘိက္ခဝေ၊ ဥဒါယိနာ ဘိက္ခုနာ သင်္ဃံ ဥပသင်္ကမိတွာ…ပေ… ဧဝမဿ ဝစနီယော – ‘အဟံ၊ ဘန္တေ ¶ ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ…ပေ… ¶ သောဟံ မာနတ္တံ စရန္တော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သောဟံ၊ ဘန္တေ၊ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနံ ယာစာမီ’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ‘‘ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၁၇။ ‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု…ပေ… ¶ မူလာယပဋိကဿနံ ယာစတိ ¶ ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿေယျ။ ဧသာ ဉတ္တိ…ပေ… ¶ ပဋိကဿိတော သင်္ဃေန ဥဒါယီ ဘိက္ခု အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ¶ အပ္ပဋိစ္ဆန္နာယ မူလာယပဋိကဿနာ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီတိ။

‘‘ဧဝဉ္စ ပန၊ ဘိက္ခဝေ၊ ဆာရတ္တံ မာနတ္တံ ဒါတဗ္ဗံ – တေန၊ ဘိက္ခဝေ၊ ဥဒါယိနာ ဘိက္ခုနာ…ပေ… ဧဝမဿ ဝစနီယော – ‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ…ပေ… သောဟံ မာနတ္တံ စရန္တော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ ¶ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနံ ယာစိံ။ တံ မံ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿိ။ သောဟံ၊ ဘန္တေ၊ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစာမီ’တိ။ ဒုတိယမ္ပိ ယာစိတဗ္ဗံ။ တတိယမ္ပိ ယာစိတဗ္ဗံ။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု…ပေ… ဆာရတ္တံ မာနတ္တံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ဒဒေယျ။ ဧသာ ဉတ္တိ…ပေ… ¶ ဒိန္နံ သင်္ဃေန ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

အဗ္ဘာနာရဟမူလာယပဋိကဿနာ

၁၁၈။ သော ¶ ¶ စိဏ္ဏမာနတ္တော အဗ္ဘာနာရဟော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ…ပေ… သောဟံ စိဏ္ဏမာနတ္တော အဗ္ဘာနာရဟော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿိတွာ ဆာရတ္တံ မာနတ္တံ ဒေတု။ ဧဝဉ္စ ပန၊ ဘိက္ခဝေ၊ မူလာယ ပဋိကဿိတဗ္ဗော…ပေ…။

‘‘ဧဝဉ္စ ¶ ပန၊ ဘိက္ခဝေ၊ ဆာရတ္တံ မာနတ္တံ ဒါတဗ္ဗံ…ပေ…။

‘‘ဒိန္နံ သင်္ဃေန ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

မူလာယပဋိကဿိတအဗ္ဘာနံ

၁၁၉။ သော စိဏ္ဏမာနတ္တော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ…ပေ… သောဟံ ¶ စိဏ္ဏမာနတ္တော။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ တေန ဟိ၊ ဘိက္ခဝေ၊ သင်္ဃော ဥဒါယိံ ဘိက္ခုံ အဗ္ဘေတု။ ဧဝဉ္စ ပန၊ ဘိက္ခဝေ၊ အဗ္ဘေတဗ္ဗော –

‘‘တေန၊ ဘိက္ခဝေ၊ ဥဒါယိနာ ¶ ဘိက္ခုနာ သင်္ဃံ ဥပသင်္ကမိတွာ…ပေ… ဧဝမဿ ဝစနီယော – ‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သောဟံ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ အဒါသိ။ သောဟံ ပရိဝသန္တော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနံ ယာစိံ။ တံ မံ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ¶ အပ္ပဋိစ္ဆန္နာယ မူလာယ ပဋိကဿိ။ သောဟံ ပရိဝုတ္ထပရိဝါသော မာနတ္တာရဟော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနံ ယာစိံ။ တံ မံ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿိ။ သောဟံ ပရိဝုတ္ထပရိဝါသော သင်္ဃံ တိဿန္နံ အာပတ္တီနံ ဆာရတ္တံ မာနတ္တံ ယာစိံ။ တဿ မေ သင်္ဃော တိဿန္နံ အာပတ္တီနံ ဆာရတ္တံ မာနတ္တံ အဒါသိ။ သောဟံ မာနတ္တံ စရန္တော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ¶ အပ္ပဋိစ္ဆန္နံ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနံ ယာစိံ။ တံ မံ သင်္ဃော ¶ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿိ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစိံ။ တဿ မေ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သောဟံ စိဏ္ဏမာနတ္တော အဗ္ဘာနာရဟော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနံ ယာစိံ။ တံ မံ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿိ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစိံ။ တဿ မေ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သောဟံ၊ ဘန္တေ၊ စိဏ္ဏမာနတ္တော သင်္ဃံ အဗ္ဘာနံ ယာစာမီ’’’တိ။

‘‘ဒုတိယမ္ပိ ယာစိတဗ္ဗံ။ တတိယမ္ပိ ယာစိတဗ္ဗံ။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၂၀။ ‘‘သုဏာတု မေ ¶ ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ ¶ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ ယာစိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပဉ္စာဟပရိဝါသံ အဒါသိ။ သော ပရိဝသန္တော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ¶ မူလာယပဋိကဿနံ ယာစိ။ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿိ။ သော ပရိဝုတ္ထပရိဝါသော မာနတ္တာရဟော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနံ ယာစိ။ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ ¶ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿိ။ သော ပရိဝုတ္ထပရိဝါသော သင်္ဃံ တိဿန္နံ အာပတ္တီနံ ဆာရတ္တံ မာနတ္တံ ယာစိ။ သင်္ဃော ဥဒါယိဿ ဘိက္ခုနော တိဿန္နံ အာပတ္တီနံ ဆာရတ္တံ မာနတ္တံ အဒါသိ။ သော မာနတ္တံ စရန္တော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနံ ယာစိ။ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ ¶ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿိ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစိ။ သင်္ဃော ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သော စိဏ္ဏမာနတ္တော အဗ္ဘာနာရဟော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ အပ္ပဋိစ္ဆန္နံ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယပဋိကဿနံ ယာစိ။ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ မူလာယ ပဋိကဿိ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ ယာစိ။ သင်္ဃော ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ အပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သော စိဏ္ဏမာနတ္တော သင်္ဃံ အဗ္ဘာနံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိံ ဘိက္ခုံ အဗ္ဘေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ…ပေ… သော စိဏ္ဏမာနတ္တော သင်္ဃံ အဗ္ဘာနံ ယာစတိ။ သင်္ဃော ဥဒါယိံ ဘိက္ခုံ အဗ္ဘေတိ။ ယဿာယသ္မတော ခမတိ ဥဒါယိဿ ဘိက္ခုနော အဗ္ဘာနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ¶ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘အဗ္ဘိတော ¶ သင်္ဃေန ဥဒါယီ ဘိက္ခု။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

ပက္ခပ္ပဋိစ္ဆန္နပရိဝါသော

၁၂၁။ တေန ¶ ခေါ ပန သမယေန အာယသ္မာ ဥဒါယီ ဧကံ အာပတ္တိံ အာပန္နော ဟောတိ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ။ သော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ ဒေတု။ ဧဝဉ္စ ပန၊ ဘိက္ခဝေ၊ ဒါတဗ္ဗော –

‘‘တေန၊ ဘိက္ခဝေ၊ ဥဒါယိနာ ဘိက္ခုနာ သင်္ဃံ ဥပသင်္ကမိတွာ…ပေ… ဧဝမဿ ဝစနီယော – ‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ။ သောဟံ၊ ဘန္တေ၊ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ ယာစာမီ’တိ။ ဒုတိယမ္ပိ ယာစိတဗ္ဗော။ တတိယမ္ပိ ယာစိတဗ္ဗော။ ဗျတ္တေန ဘိက္ခုနော ပဋိဗလေန သင်္ဃော ဉာပေတဗ္ဗော –

၁၂၂။ ‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ ¶ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ ဒဒေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ ယာစတိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ ဒေတိ။ ယဿာယသ္မတော ခမတိ ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ¶ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘ဒိန္နော ¶ သင်္ဃေန ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသော။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

ပက္ခပါရိဝါသိကမူလာယပဋိကဿနာ

၁၂၃။ သော ပရိဝသန္တော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ။ သောဟံ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ ယာစိံ။ တဿ မေ သင်္ဃော ဧကိဿာ ¶ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ အဒါသိ။ သောဟံ ပရိဝသန္တော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ ကထံ နု ခေါ မယာ ပဋိပဇ္ဇိတဗ္ဗ’’န္တိ! ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယ ပဋိကဿိတွာ ပုရိမာယ အာပတ္တိယာ သမောဓာနပရိဝါသံ ဒေတု။ ဧဝဉ္စ ပန၊ ဘိက္ခဝေ၊ မူလာယ ပဋိကဿိတဗ္ဗော –

‘‘တေန၊ ဘိက္ခဝေ၊ ဥဒါယိနာ ဘိက္ခုနာ သင်္ဃံ ဥပသင်္ကမိတွာ…ပေ… ဧဝမဿ ဝစနီယော – ‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ။ သောဟံ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ ¶ အဒါသိ။ သောဟံ ပရိဝသန္တော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သောဟံ၊ ဘန္တေ၊ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယပဋိကဿနံ ယာစာမီ’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၂၄။ ‘‘သုဏာတု ¶ မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ¶ ပက္ခပ္ပဋိစ္ဆန္နာယ ပက္ခပရိဝါသံ ယာစိ ¶ ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ အဒါသိ။ သော ပရိဝသန္တော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယပဋိကဿနံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယ ပဋိကဿေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ ယာစိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ အဒါသိ။ သော ပရိဝသန္တော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယပဋိကဿနံ ယာစတိ။ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ¶ ပဉ္စာဟပ္ပဋိစ္ဆန္နာယ မူလာယ ပဋိကဿတိ။ ယဿာယသ္မတော ခမတိ ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယပဋိကဿနာ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘ပဋိကဿိတော သင်္ဃေန ဥဒါယီ ဘိက္ခု အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယပဋိကဿနာ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

သမောဓာနပရိဝါသော

၁၂၅။ ‘‘ဧဝဉ္စ ပန၊ ဘိက္ခဝေ၊ ပုရိမာယ အာပတ္တိယာ သမောဓာနပရိဝါသော ဒါတဗ္ဗော – တေန၊ ဘိက္ခဝေ၊ ဥဒါယိနာ ဘိက္ခုနာ သင်္ဃံ ဥပသင်္ကမိတွာ…ပေ… ဧဝမဿ ဝစနီယော – ‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ¶ ပက္ခပ္ပဋိစ္ဆန္နံ။ သောဟံ သင်္ဃံ ဧကိဿာ ¶ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ အဒါသိ။ သောဟံ ပရိဝသန္တော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယပဋိကဿနံ ယာစိံ။ တံ မံ သင်္ဃော အန္တရာ ဧကိဿာ အာပတ္တိယာ ¶ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယ ပဋိကဿိ။ သောဟံ၊ ဘန္တေ၊ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ ယာစာမီ’’’တိ။

‘‘ဒုတိယမ္ပိ ယာစိတဗ္ဗော။ တတိယမ္ပိ ယာစိတဗ္ဗော။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၂၆။ ‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ ယာစိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ အဒါသိ။ သော ပရိဝသန္တော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယပဋိကဿနံ ယာစိ။ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယ ပဋိကဿိ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ¶ ပုရိမာယ အာပတ္တိယာ သမောဓာနပရိဝါသံ ဒဒေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ ¶ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ ယာစိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ အဒါသိ။ သော ပရိဝသန္တော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ ¶ ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယပဋိကဿနံ ယာစိ။ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယ ပဋိကဿိ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ ယာစတိ။ သင်္ဃော ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ ဒေတိ။ ယဿာယသ္မတော ခမတိ ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘ဒိန္နော သင်္ဃေန ဥဒါယိဿ ¶ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသော။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

မာနတ္တာရဟမူလာယပဋိကဿနာဒိ

၁၂၇။ သော ပရိဝုတ္ထပရိဝါသော မာနတ္တာရဟော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ…ပေ… သောဟံ ပရိဝုတ္ထပရိဝါသော မာနတ္တာရဟော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယ ပဋိကဿိတွာ ပုရိမာယ ¶ အာပတ္တိယာ သမောဓာနပရိဝါသံ ဒေတု။ ဧဝဉ္စ ပန၊ ဘိက္ခဝေ၊ မူလာယ ပဋိကဿိတဗ္ဗော…ပေ…။

‘‘ဧဝဉ္စ ပန၊ ဘိက္ခဝေ၊ ပုရိမာယ အာပတ္တိယာ သမောဓာနပရိဝါသော ဒါတဗ္ဗော…ပေ… ဒေတိ…ပေ…။

‘‘ဒိန္နော သင်္ဃေန ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ¶ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသော။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

တိကာပတ္တိမာနတ္တံ

၁၂၈။ သော ပရိဝုတ္ထပရိဝါသော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ ¶ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ…ပေ… သောဟံ ပရိဝုတ္ထပရိဝါသော။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ ¶ ၊ ဘိက္ခဝေ၊ သင်္ဃော ဥဒါယိဿ ဘိက္ခုနော တိဿန္နံ အာပတ္တီနံ ဆာရတ္တံ မာနတ္တံ ဒေတု။ ဧဝဉ္စ ပန၊ ဘိက္ခဝေ၊ ဒါတဗ္ဗံ –

‘‘တေန၊ ဘိက္ခဝေ၊ ဥဒါယိနာ ဘိက္ခုနာ သင်္ဃံ ဥပသင်္ကမိတွာ…ပေ… ဧဝမဿ ဝစနီယော – ‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ…ပေ… သောဟံ၊ ဘန္တေ၊ ပရိဝုတ္ထပရိဝါသော သင်္ဃံ တိဿန္နံ အာပတ္တီနံ ဆာရတ္တံ မာနတ္တံ ယာစာမီ’တိ။ ဒုတိယမ္ပိ ယာစိတဗ္ဗံ။ တတိယမ္ပိ ယာစိတဗ္ဗံ။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၂၉။ ‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ…ပေ… သော ပရိဝုတ္ထပရိဝါသော သင်္ဃံ တိဿန္နံ အာပတ္တီနံ ဆာရတ္တံ မာနတ္တံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိဿ ဘိက္ခုနော တိဿန္နံ အာပတ္တီနံ ဆာရတ္တံ မာနတ္တံ ဒဒေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ…ပေ… သော ပရိဝုတ္ထပရိဝါသော သင်္ဃံ တိဿန္နံ အာပတ္တီနံ ဆာရတ္တံ မာနတ္တံ ယာစတိ။ သင်္ဃော ဥဒါယိဿ ဘိက္ခုနော ¶ တိဿန္နံ အာပတ္တီနံ ဆာရတ္တံ မာနတ္တံ ဒေတိ။ ယဿာယသ္မတော ခမတိ ¶ ဥဒါယိဿ ဘိက္ခုနော တိဿန္နံ အာပတ္တီနံ ဆာရတ္တံ မာနတ္တဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘ဒိန္နံ ¶ သင်္ဃေန ဥဒါယိဿ ဘိက္ခုနော တိဿန္နံ အာပတ္တီနံ ဆာရတ္တံ မာနတ္တံ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

မာနတ္တစာရိကမူလာယပဋိကဿနာဒိ

၁၃၀။ သော မာနတ္တံ စရန္တော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ…ပေ… သောဟံ မာနတ္တံ စရန္တော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယ ပဋိကဿိတွာ ပုရိမာယ အာပတ္တိယာ သမောဓာနပရိဝါသံ ဒတွာ ဆာရတ္တံ မာနတ္တံ ဒေတု။ ဧဝဉ္စ ပန၊ ဘိက္ခဝေ၊ မူလာယ ပဋိကဿိတဗ္ဗော…ပေ…။

‘‘ဧဝဉ္စ ပန၊ ဘိက္ခဝေ၊ ပုရိမာယ အာပတ္တိယာ သမောဓာနပရိဝါသော ဒါတဗ္ဗော…ပေ…။

‘‘ဧဝဉ္စ ပန၊ ဘိက္ခဝေ၊ ဆာရတ္တံ မာနတ္တံ ဒါတဗ္ဗံ…ပေ… ဒေတိ…ပေ… ¶ ။

‘‘ဒိန္နံ သင်္ဃေန ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ဆာရတ္တံ မာနတ္တံ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

အဗ္ဘာနာရဟမူလာယပဋိကဿနာဒိ

၁၃၁။ သော စိဏ္ဏမာနတ္တော အဗ္ဘာနာရဟော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ…ပေ… သောဟံ စိဏ္ဏမာနတ္တော အဗ္ဘာနာရဟော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ ကထံ နု ခေါ မယာ ¶ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယ ပဋိကဿိတွာ ပုရိမာယ အာပတ္တိယာ သမောဓာနပရိဝါသံ ဒတွာ ဆာရတ္တံ မာနတ္တံ ဒေတု။ ဧဝဉ္စ ပန၊ ဘိက္ခဝေ၊ မူလာယ ပဋိကဿိတဗ္ဗော…ပေ…။

‘‘ဧဝဉ္စ ¶ ပန၊ ဘိက္ခဝေ၊ ပုရိမာယ အာပတ္တိယာ သမောဓာနပရိဝါသော ဒါတဗ္ဗော…ပေ…။

‘‘ဧဝဉ္စ ပန၊ ဘိက္ခဝေ၊ ဆာရတ္တံ မာနတ္တံ ဒါတဗ္ဗံ…ပေ… ဒေတိ…ပေ…။

‘‘ဒိန္နံ သင်္ဃေန ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ဆာရတ္တံ မာနတ္တံ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

ပက္ခပ္ပဋိစ္ဆန္နအဗ္ဘာနံ

၁၃၂။ သော ¶ ¶ စိဏ္ဏမာနတ္တော ဘိက္ခူနံ အာရောစေသိ – ‘‘အဟံ၊ အာဝုသော၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ…ပေ… သောဟံ စိဏ္ဏမာနတ္တော။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော ဥဒါယိံ ဘိက္ခုံ အဗ္ဘေတု။ ဧဝဉ္စ ပန၊ ဘိက္ခဝေ၊ အဗ္ဘေတဗ္ဗော –

‘‘တေန၊ ဘိက္ခဝေ၊ ဥဒါယိနာ ဘိက္ခုနာ သင်္ဃံ ဥပသင်္ကမိတွာ၊ ဧကံသံ ဥတ္တရာသင်္ဂံ ကရိတွာ၊ ဝုဍ္ဎာနံ ဘိက္ခူနံ ပါဒေ ဝန္ဒိတွာ၊ ဥက္ကုဋိကံ နိသီဒိတွာ၊ အဉ္ဇလိံ ပဂ္ဂဟေတွာ၊ ဧဝမဿ ဝစနီယော – ‘အဟံ၊ ဘန္တေ၊ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ။ သောဟံ သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ အဒါသိ။ သောဟံ ပရိဝသန္တော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယပဋိကဿနံ ယာစိံ။ တံ မံ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယ ပဋိကဿိ။ သောဟံ သင်္ဃံ အန္တရာ ဧကိဿာ အာပတ္တိယာ ¶ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ ယာစိံ။ တဿ ¶ မေ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ အဒါသိ။ သောဟံ ပရိဝုတ္ထပရိဝါသော မာနတ္တာရဟော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယပဋိကဿနံ ယာစိံ။ တံ မံ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ¶ ပဉ္စာဟပ္ပဋိစ္ဆန္နာယ မူလာယ ပဋိကဿိ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ¶ ပုရိမာယ အာပတ္တိယာ သမောဓာနပရိဝါသံ ယာစိံ။ တဿ မေ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ အဒါသိ။ သောဟံ ပရိဝုတ္ထပရိဝါသော သင်္ဃံ တိဿန္နံ အာပတ္တီနံ ဆာရတ္တံ မာနတ္တံ ယာစိံ။ တဿ မေ သင်္ဃော တိဿန္နံ အာပတ္တီနံ ဆာရတ္တံ မာနတ္တံ အဒါသိ။ သောဟံ မာနတ္တံ စရန္တော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယပဋိကဿနံ ယာစိံ။ တံ မံ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယ ပဋိကဿိ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ ယာစိံ။ တဿ မေ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ အဒါသိ။ သောဟံ ပရိဝုတ္ထပရိဝါသော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ဆာရတ္တံ မာနတ္တံ ယာစိံ။ တဿ မေ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သောဟံ စိဏ္ဏမာနတ္တော အဗ္ဘာနာရဟော အန္တရာ ဧကံ အာပတ္တိံ အာပဇ္ဇိံ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယပဋိကဿနံ ယာစိံ။ တံ မံ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ¶ မူလာယ ပဋိကဿိ။ သောဟံ သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ ယာစိံ။ တဿ မေ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ¶ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ အဒါသိ။ သောဟံ ပရိဝုတ္ထပရိဝါသော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ဆာရတ္တံ မာနတ္တံ ယာစိံ။ တဿ မေ သင်္ဃော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သောဟံ၊ ဘန္တေ၊ စိဏ္ဏမာနတ္တော သင်္ဃံ အဗ္ဘာနံ ယာစာမီ’’’တိ။

‘‘ဒုတိယမ္ပိ ယာစိတဗ္ဗံ။ တတိယမ္ပိ ယာစိတဗ္ဗံ။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၃၃။ ‘‘သုဏာတု ¶ မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ။ သော သင်္ဃံ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ ယာစိ။ သင်္ဃော ဥဒါယိဿ ဘိက္ခုနော ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပက္ခပ္ပဋိစ္ဆန္နာယ ပက္ခပရိဝါသံ အဒါသိ။ သော ပရိဝသန္တော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယပဋိကဿနံ ယာစိ။ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယ ပဋိကဿိ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ ယာစိ။ သင်္ဃော ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ အဒါသိ။ သော ပရိဝုတ္ထပရိဝါသော မာနတ္တာရဟော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ¶ ပဉ္စာဟပ္ပဋိစ္ဆန္နံ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယပဋိကဿနံ ယာစိ။ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယ ပဋိကဿိ။ သော သင်္ဃံ အန္တရာ ဧကိဿာ ¶ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ ယာစိ။ သင်္ဃော ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ အဒါသိ။ သော ပရိဝုတ္ထပရိဝါသော သင်္ဃံ တိဿန္နံ အာပတ္တီနံ ဆာရတ္တံ မာနတ္တံ ယာစိ။ သင်္ဃော ဥဒါယိဿ ဘိက္ခုနော တိဿန္နံ အာပတ္တီနံ ဆာရတ္တံ မာနတ္တံ အဒါသိ။ သော မာနတ္တံ စရန္တော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယပဋိကဿနံ ယာစိ။ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယ ပဋိကဿိ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ ယာစိ။ သင်္ဃော ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ အဒါသိ။ သော ပရိဝုတ္ထပရိဝါသော ¶ သင်္ဃံ [သော သံဃံ (က။)] အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ဆာရတ္တံ မာနတ္တံ ယာစိ။ သင်္ဃော ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ဆာရတ္တံ မာနတ္တံ ¶ အဒါသိ။ သော စိဏ္ဏမာနတ္တော အဗ္ဘာနာရဟော အန္တရာ ဧကံ အာပတ္တိံ အာပဇ္ဇိ သဉ္စေတနိကံ သုက္ကဝိဿဋ္ဌိံ ပဉ္စာဟပ္ပဋိစ္ဆန္နံ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယပဋိကဿနံ ယာစိ။ သင်္ဃော ဥဒါယိံ ဘိက္ခုံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ မူလာယ ပဋိကဿိ။ သော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ ယာစိ။ သင်္ဃော ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ပုရိမာယ အာပတ္တိယာ သမောဓာနပရိဝါသံ အဒါသိ။ သော ပရိဝုတ္ထပရိဝါသော သင်္ဃံ အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ဆာရတ္တံ ¶ မာနတ္တံ ယာစိ။ သင်္ဃော ဥဒါယိဿ ဘိက္ခုနော အန္တရာ ဧကိဿာ အာပတ္တိယာ သဉ္စေတနိကာယ သုက္ကဝိဿဋ္ဌိယာ ပဉ္စာဟပ္ပဋိစ္ဆန္နာယ ဆာရတ္တံ မာနတ္တံ အဒါသိ။ သော စိဏ္ဏမာနတ္တော သင်္ဃံ အဗ္ဘာနံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဥဒါယိံ ဘိက္ခုံ အဗ္ဘေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဥဒါယီ ဘိက္ခု ဧကံ အာပတ္တိံ ¶ အာပဇ္ဇိ သဉ္စေတနိကံ သုက္ကဝိဿဋ္ဌိံ ပက္ခပ္ပဋိစ္ဆန္နံ…ပေ… သော စိဏ္ဏမာနတ္တော သင်္ဃံ အဗ္ဘာနံ ယာစတိ။ သင်္ဃော ဥဒါယိံ ဘိက္ခုံ အဗ္ဘေတိ။ ယဿာယသ္မတော ခမတိ ဥဒါယိဿ ဘိက္ခုနော အဗ္ဘာနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘အဗ္ဘိတော သင်္ဃေန ဥဒါယီ ဘိက္ခု။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

သုက္ကဝိဿဋ္ဌိ သမတ္တာ။

၂။ ပရိဝါသော

အဂ္ဃသမောဓာနပရိဝါသော

၁၃၄။ တေန ခေါ ပန သမယေန အညတရော ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပန္နော ဟောတိ – ဧကာ အာပတ္တိ ဧကာဟပ္ပဋိစ္ဆန္နာ၊ ဧကာ အာပတ္တိ ဒွီဟပ္ပဋိစ္ဆန္နာ၊ ဧကာ အာပတ္တိ တီဟပ္ပဋိစ္ဆန္နာ၊ ဧကာ အာပတ္တိ စတူဟပ္ပဋိစ္ဆန္နာ၊ ဧကာ အာပတ္တိ ပဉ္စာဟပ္ပဋိစ္ဆန္နာ၊ ဧကာ ¶ အာပတ္တိ ဆာဟပ္ပဋိစ္ဆန္နာ၊ ဧကာ အာပတ္တိ သတ္တာဟပ္ပဋိစ္ဆန္နာ၊ ဧကာ အာပတ္တိ အဋ္ဌာဟပ္ပဋိစ္ဆန္နာ၊ ဧကာ အာပတ္တိ နဝါဟပ္ပဋိစ္ဆန္နာ၊ ဧကာ အာပတ္တိ ဒသာဟပ္ပဋိစ္ဆန္နာ။ သော ဘိက္ခူနံ အာရောစေသိ – ‘‘အဟံ၊ အာဝုသော၊ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ – ဧကာ အာပတ္တိ ဧကာဟပ္ပဋိစ္ဆန္နာ…ပေ… ဧကာ အာပတ္တိ ဒသာဟပ္ပဋိစ္ဆန္နာ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော တဿ ဘိက္ခုနော တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ ¶ တဿာ အဂ္ဃေန သမောဓာနပရိဝါသံ ဒေတု။ ဧဝဉ္စ ပန၊ ဘိက္ခဝေ၊ ဒါတဗ္ဗော –

‘‘တေန ¶ ၊ ဘိက္ခဝေ၊ ဘိက္ခုနာ သင်္ဃံ ဥပသင်္ကမိတွာ…ပေ… ဧဝမဿ ဝစနီယော – ‘အဟံ၊ ဘန္တေ၊ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ – ဧကာ အာပတ္တိ ဧကာဟပ္ပဋိစ္ဆန္နာ…ပေ… ဧကာ အာပတ္တိ ဒသာဟပ္ပဋိစ္ဆန္နာ။ သောဟံ၊ ဘန္တေ၊ သင်္ဃံ တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ယာစာမီ’တိ။ ဒုတိယမ္ပိ ယာစိတဗ္ဗော။ တတိယမ္ပိ ယာစိတဗ္ဗော။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၃၅။ ‘‘သုဏာတု မေ၊ ဘန္တေ၊ သင်္ဃော။ အယံ ဣတ္ထန္နာမော ဘိက္ခု သမ္ဗဟုလာ သင်္ဃာဒိသေသာ ¶ အာပတ္တိယော အာပဇ္ဇိ – ဧကာ အာပတ္တိ ဧကာဟပ္ပဋိစ္ဆန္နာ…ပေ… ဧကာ အာပတ္တိ ဒသာဟပ္ပဋိစ္ဆန္နာ။ သော သင်္ဃံ တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ဒဒေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဣတ္ထန္နာမော ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိ – ဧကာ အာပတ္တိ ဧကာဟပ္ပဋိစ္ဆန္နာ…ပေ… ဧကာ အာပတ္တိ ဒသာဟပ္ပဋိစ္ဆန္နာ။ သော သင်္ဃံ တာသံ အာပတ္တီနံ ယာ ¶ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ယာစတိ။ သင်္ဃော ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ဒေတိ။ ယဿာယသ္မတော ခမတိ ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ၊ တဿာ အဂ္ဃေန သမောဓာနပရိဝါသဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ¶ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘ဒိန္နော သင်္ဃေန ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသော။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

သဗ္ဗစိရပ္ပဋိစ္ဆန္နအဂ္ဃသမောဓာနံ

၁၃၆။ တေန ခေါ ပန သမယေန အညတရော ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပန္နော ဟောတိ – ဧကာ အာပတ္တိ ဧကာဟပ္ပဋိစ္ဆန္နာ ¶ ၊ ဒွေ အာပတ္တိယော ဒွီဟပ္ပဋိစ္ဆန္နာယော [ဒွီဟပ္ပဋိစ္ဆန္နာ (က။ ဧဝံ ယာဝဒသာဟပ္ပဋိစ္ဆန္နာ)]၊ တိဿော အာပတ္တိယော တီဟပ္ပဋိစ္ဆန္နာယော၊ စတဿော အာပတ္တိယော စတူဟပ္ပဋိစ္ဆန္နာယော၊ ပဉ္စ အာပတ္တိယော ပဉ္စာဟပ္ပဋိစ္ဆန္နာယော၊ ဆ အာပတ္တိယော ဆာဟပ္ပဋိစ္ဆန္နာယော၊ သတ္တ အာပတ္တိယော သတ္တာဟပ္ပဋိစ္ဆန္နာယော၊ အဋ္ဌ အာပတ္တိယော အဋ္ဌာဟပ္ပဋိစ္ဆန္နာယော၊ နဝ အာပတ္တိယော နဝါဟပ္ပဋိစ္ဆန္နာယော၊ ဒသ အာပတ္တိယော ဒသာဟပ္ပဋိစ္ဆန္နာယော။ သော ဘိက္ခူနံ အာရောစေသိ – ‘‘အဟံ၊ အာဝုသော၊ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ၊ ဧကာ အာပတ္တိ ဧကာဟပ္ပဋိစ္ဆန္နာ…ပေ… ဒသ အာပတ္တိယော ဒသာဟပ္ပဋိစ္ဆန္နာယော ¶ ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော တဿ ဘိက္ခုနော တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ဒေတု။ ဧဝဉ္စ ပန၊ ဘိက္ခဝေ၊ ဒါတဗ္ဗော –

‘‘တေန၊ ဘိက္ခဝေ၊ ဘိက္ခုနာ သင်္ဃံ ဥပသင်္ကမိတွာ…ပေ… ဧဝမဿ ဝစနီယော – ‘အဟံ၊ ဘန္တေ၊ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ၊ ဧကာ အာပတ္တိ ဧကာဟပ္ပဋိစ္ဆန္နာ…ပေ… ဒသ အာပတ္တိယော ဒသာဟပ္ပဋိစ္ဆန္နာယော။ သောဟံ၊ ဘန္တေ၊ သင်္ဃံ တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ယာစာမီ’တိ။ ဒုတိယမ္ပိ ယာစိတဗ္ဗော။ တတိယမ္ပိ ယာစိတဗ္ဗော။ ‘‘ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၃၇။ သုဏာတု မေ၊ ဘန္တေ၊ သင်္ဃော။ အယံ ဣတ္ထန္နာမော ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိ၊ ဧကာ အာပတ္တိ ဧကာဟပ္ပဋိစ္ဆန္နာ…ပေ… ဒသ အာပတ္တိယော ဒသာဟပ္ပဋိစ္ဆန္နာယော။ သော သင်္ဃံ တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ယာစတိ။ ယဒိ သင်္ဃဿ ပတ္တကလ္လံ သင်္ဃော ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ဒဒေယျ။ ဧသာ ဉတ္တိ။

‘‘သုဏာတု ¶ မေ၊ ဘန္တေ၊ သင်္ဃော။ အယံ ဣတ္ထန္နာမော ဘိက္ခု သမ္ဗဟုလာ သင်္ဃာဒိသေသာ အာပတ္တိယော ¶ အာပဇ္ဇိ – ဧကာ အာပတ္တိ ဧကာဟပ္ပဋိစ္ဆန္နာ…ပေ… ဒသ အာပတ္တိယော ဒသာဟပ္ပဋိစ္ဆန္နာယော။ သော သင်္ဃံ တာသံ အာပတ္တီနံ ယာ ¶ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ယာစတိ။ သင်္ဃော ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ဒေတိ။ ယဿာယသ္မတော ခမတိ ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘ဒိန္နော သင်္ဃေန ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသော။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

ဒွေမာသပရိဝါသော

၁၃၈။ တေန ¶ ခေါ ပန သမယေန အညတရော ဘိက္ခု ဒွေ သင်္ဃာဒိသေသာ အာပတ္တိယော အာပန္နော ဟောတိ ဒွေမာသပ္ပဋိစ္ဆန္နာယော။ တဿ ဧတဒဟောသိ – ‘‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’’န္တိ။ သော သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိ။ တဿ သင်္ဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ။ တဿ ပရိဝသန္တဿ ¶ လဇ္ဇီဓမ္မော ဩက္ကမိ – အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ တဿ မေ ဧတဒဟောသိ – ‘‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျန္တိ။ သောဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ။ တဿ မေ ပရိဝသန္တဿ လဇ္ဇီဓမ္မော ဩက္ကမိ။ ယံနူနာဟံ သင်္ဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’’န္တိ။

သော ဘိက္ခူနံ အာရောစေသိ – ‘‘အဟံ၊ အာဝုသော၊ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ တဿ မေ ဧတဒဟောသိ – ‘အဟံ ¶ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ¶ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ။ သောဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ။ တဿ မေ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ တဿ မေ ဧတဒဟောသိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ¶ ယာစေယျ’န္တိ။ သောဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ။ တဿ မေ ပရိဝသန္တဿ လဇ္ဇီဓမ္မော ဩက္ကမိ – ယံနူနာဟံ သင်္ဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျန္တိ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော တဿ ဘိက္ခုနော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတု။ ဧဝဉ္စ ပန၊ ဘိက္ခဝေ၊ ဒါတဗ္ဗော –

‘‘တေန၊ ဘိက္ခဝေ၊ ဘိက္ခုနာ သင်္ဃံ ဥပသင်္ကမိတွာ၊ ဧကံသံ ဥတ္တရာသင်္ဂံ ကရိတွာ၊ ဝုဍ္ဎာနံ ဘိက္ခူနံ ပါဒေ ဝန္ဒိတွာ၊ ဥက္ကုဋိကံ နိသီဒိတွာ၊ အဉ္ဇလိံ ပဂ္ဂဟေတွာ၊ ဧဝမဿ ဝစနီယော – ‘အဟံ၊ ဘန္တေ၊ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ တဿ မေ ဧတဒဟောသိ – အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော ¶ ။ ယံနူနာဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ။ သောဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ။ တဿ မေ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ တဿ မေ ဧတဒဟောသိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ။ သောဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ¶ ယာစိံ။ တဿ မေ သင်္ဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ။ တဿ မေ ပရိဝသန္တဿ လဇ္ဇီဓမ္မော ဩက္ကမိ – ယံနူနာဟံ သင်္ဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျန္တိ။ သောဟံ၊ ဘန္တေ၊ သင်္ဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစာမီတိ။

‘‘ဒုတိယမ္ပိ ¶ ¶ ယာစိတဗ္ဗော။ တတိယမ္ပိ ယာစိတဗ္ဗော။ ‘‘ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၃၉။ ‘‘သုဏာတု မေ၊ ဘန္တေ၊ သင်္ဃော။ အယံ ဣတ္ထန္နာမော ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော။ တဿ ဧတဒဟောသိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ။ သော သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိ။ တဿ သင်္ဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ။ တဿ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ တဿ မေ ဧတဒဟောသိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ ¶ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ။ သောဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ။ တဿ မေ ပရိဝသန္တဿ လဇ္ဇီဓမ္မော ဩက္ကမိ။ ယံနူနာဟံ သင်္ဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျန္တိ။ သော သင်္ဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဣတ္ထန္နာမဿ ဘိက္ခုနော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒဒေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဣတ္ထန္နာမော ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော။ တဿ ဧတဒဟောသိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ¶ ဒွေမာသပရိဝါသံ ယာစေယျ’န္တိ။ သော သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိ။ တဿ သင်္ဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ။ တဿ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ တဿ မေ ဧတဒဟောသိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ¶ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ။ သောဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ။ တဿ မေ ပရိဝသန္တဿ လဇ္ဇီဓမ္မော ဩက္ကမိ။ ယံနူနာဟံ သင်္ဃံ ဣတရိဿာပိ ¶ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျန္တိ။ သော သင်္ဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ။ သင်္ဃော ဣတ္ထန္နာမဿ ဘိက္ခုနော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ။ ယဿာယသ္မတော ခမတိ ဣတ္ထန္နာမဿ ဘိက္ခုနော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘ဒိန္နော သင်္ဃေန ဣတ္ထန္နာမဿ ဘိက္ခုနော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသော။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။ တေန၊ ဘိက္ခဝေ၊ ဘိက္ခုနာ တဒုပါဒါယ ဒွေ မာသာ ပရိဝသိတဗ္ဗာ။

ဒွေ မာသာ ပရိဝသိတဗ္ဗဝိဓိ

၁၄၀။ ‘‘ဣဓ ပန၊ ဘိက္ခဝေ၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော။ တဿ ဧဝံ ဟောတိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ ¶ ။ သော သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ။ တဿ သင်္ဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ။ တဿ ပရိဝသန္တဿ လဇ္ဇီဓမ္မော ဩက္ကမိ ¶ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ တဿ မေ ဧတဒဟောသိ – အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ။ သောဟံ သင်္ဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ။ တဿ မေ သင်္ဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ။ တဿ မေ ပရိဝသန္တဿ လဇ္ဇီဓမ္မော ဩက္ကမိ။ ယံနူနာဟံ သင်္ဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျန္တိ။ သော သင်္ဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ။ တဿ သင်္ဃော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ။ တေန၊ ဘိက္ခဝေ၊ ဘိက္ခုနာ တဒုပါဒါယ ဒွေ မာသာ ပရိဝသိတဗ္ဗာ။

၁၄၁။ ‘‘ဣဓ ပန၊ ဘိက္ခဝေ၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော ¶ ၊ ဧကံ အာပတ္တိံ ဇာနာတိ၊ ဧကံ အာပတ္တိံ န ဇာနာတိ။ သော သင်္ဃံ ယံ အာပတ္တိံ ဇာနာတိ တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ။ တဿ သင်္ဃော တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ။ သော ပရိဝသန္တော ¶ ဣတရမ္ပိ အာပတ္တိံ ဇာနာတိ။ တဿ ဧဝံ ဟောတိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော၊ ဧကံ အာပတ္တိံ ဇာနိံ၊ ဧကံ အာပတ္တိံ န ဇာနိံ။ သောဟံ သင်္ဃံ ယံ အာပတ္တိံ ဇာနိံ တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ။ တဿ မေ သင်္ဃော တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ။ သောဟံ ပရိဝသန္တော ဣတရမ္ပိ အာပတ္တိံ ဇာနာမိ။ ယံနူနာဟံ သင်္ဃံ ဣတရိဿာပိ ¶ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ။ သော သင်္ဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ။ တဿ သင်္ဃော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ။ တေန၊ ဘိက္ခဝေ၊ ဘိက္ခုနာ တဒုပါဒါယ ဒွေ မာသာ ပရိဝသိတဗ္ဗာ။

၁၄၂။ ‘‘ဣဓ ပန၊ ဘိက္ခဝေ၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကံ အာပတ္တိံ သရတိ၊ ဧကံ အာပတ္တိံ နဿရတိ။ သော သင်္ဃံ ယံ အာပတ္တိံ သရတိ တဿာ အာပတ္တိယာ ဒွေမာသပ္ပဋိစ္ဆန္နာယ ¶ ဒွေမာသပရိဝါသံ ယာစတိ။ တဿ သင်္ဃော တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ။ သော ပရိဝသန္တော ဣတရမ္ပိ အာပတ္တိံ သရတိ။ တဿ ဧဝံ ဟောတိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော၊ ဧကံ အာပတ္တိံ သရိံ၊ ဧကံ အာပတ္တိံ နဿရိံ။ သောဟံ သင်္ဃံ ယံ အာပတ္တိံ သရိံ၊ တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ¶ ယာစိံ။ တဿ မေ သင်္ဃော တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ။ သောဟံ ပရိဝသန္တော ဣတရမ္ပိ အာပတ္တိံ သရာမိ။ ယံနူနာဟံ သင်္ဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ။ သော သင်္ဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ။ တဿ သင်္ဃော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ။ တေန၊ ဘိက္ခဝေ၊ ဘိက္ခုနာ တဒုပါဒါယ ဒွေ မာသာ ပရိဝသိတဗ္ဗာ။

၁၄၃။ ‘‘ဣဓ ပန၊ ဘိက္ခဝေ၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကာယ အာပတ္တိယာ နိဗ္ဗေမတိကော၊ ဧကာယ အာပတ္တိယာ ဝေမတိကော။ သော သင်္ဃံ ယာယ အာပတ္တိယာ နိဗ္ဗေမတိကော တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ။ တဿ သင်္ဃော တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ။ သော ပရိဝသန္တော ဣတရိဿာပိ အာပတ္တိယာ နိဗ္ဗေမတိကော ဟောတိ။ တဿ ဧဝံ ဟောတိ – ‘အဟံ ခေါ ဒွေ သင်္ဃာဒိသေသာ ¶ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော၊ ဧကာယ အာပတ္တိယာ နိဗ္ဗေမတိကော၊ ဧကာယ အာပတ္တိယာ ဝေမတိကော။ သောဟံ သင်္ဃံ ယာယ အာပတ္တိယာ နိဗ္ဗေမတိကော တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ။ တဿ မေ သင်္ဃော တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ။ သောဟံ ပရိဝသန္တော ဣတရိဿာပိ အာပတ္တိယာ နိဗ္ဗေမတိကော။ ယံနူနာဟံ ¶ သင်္ဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ။ သော သင်္ဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ။ တဿ သင်္ဃော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ။ တေန၊ ဘိက္ခဝေ၊ ဘိက္ခုနာ တဒုပါဒါယ ဒွေ မာသာ ပရိဝသိတဗ္ဗာ။

၁၄၄။ ‘‘ဣဓ ¶ ပန၊ ဘိက္ခဝေ၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကာ အာပတ္တိ ဇာနပ္ပဋိစ္ဆန္နာ၊ ဧကာ အာပတ္တိ အဇာနပ္ပဋိစ္ဆန္နာ။ သော သင်္ဃံ တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစတိ။ တဿ သင်္ဃော တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ဒေတိ။ တဿ ပရိဝသန္တဿ အညော ဘိက္ခု အာဂစ္ဆတိ ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဝိယတ္တော မေဓာဝီ လဇ္ဇီ ကုက္ကုစ္စကော သိက္ခာကာမော။ သော ဧဝံ ဝဒေတိ – ‘ကိံ အယံ၊ အာဝုသော၊ ဘိက္ခု အာပန္နော? ကိဿာယံ ဘိက္ခု ပရိဝသတီ’တိ? တေ ဧဝံ ဝဒေန္တိ – ‘အယံ၊ အာဝုသော၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော၊ ဧကာ အာပတ္တိ ဇာနပ္ပဋိစ္ဆန္နာ၊ ဧကာ အာပတ္တိ အဇာနပ္ပဋိစ္ဆန္နာ။ သော သင်္ဃံ တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစတိ။ တဿ သင်္ဃော တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ အဒါသိ။ တာယော အယံ၊ အာဝုသော၊ ဘိက္ခု အာပန္နော၊ တာသာယံ ဘိက္ခု ပရိဝသတီ’တိ။ သော ဧဝံ ဝဒေတိ – ‘ယာယံ၊ အာဝုသော ¶ ၊ အာပတ္တိ ဇာနပ္ပဋိစ္ဆန္နာ၊ ဓမ္မိကံ တဿာ အာပတ္တိယာ ပရိဝါသဒါနံ၊ ဓမ္မတ္တာ ရုဟတိ။ ယာ စ ခွာယံ၊ အာဝုသော၊ အာပတ္တိ အဇာနပ္ပဋိစ္ဆန္နာ၊ အဓမ္မိကံ တဿာ အာပတ္တိယာ ပရိဝါသဒါနံ၊ အဓမ္မတ္တာ န ရုဟတိ။ ဧကိဿာ၊ အာဝုသော၊ အာပတ္တိယာ ဘိက္ခု မာနတ္တာရဟော’’’တိ။

၁၄၅။ ‘‘ဣဓ ပန၊ ဘိက္ခဝေ၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကာ အာပတ္တိ သရမာနပ္ပဋိစ္ဆန္နာ၊ ဧကာ အာပတ္တိ အဿရမာနပ္ပဋိစ္ဆန္နာ။ သော သင်္ဃံ တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစတိ။ တဿ သင်္ဃော တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ဒေတိ။ တဿ ပရိဝသန္တဿ အညော ဘိက္ခု အာဂစ္ဆတိ ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဝိယတ္တော မေဓာဝီ လဇ္ဇီ ¶ ကုက္ကုစ္စကော သိက္ခာကာမော။ သော ဧဝံ ဝဒေတိ – ‘ကိ အယံ၊ အာဝုသော၊ ဘိက္ခု အာပန္နော? ကိဿာယံ ဘိက္ခု ပရိဝသတီ’တိ? တေ ဧဝံ ဝဒေန္တိ – ‘အယံ၊ အာဝုသော၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော၊ ဧကာ အာပတ္တိ သရမာနပ္ပဋိစ္ဆန္နာ၊ ဧကာ အာပတ္တိ အဿရမာနပ္ပဋိစ္ဆန္နာ။ သော သင်္ဃံ တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစိ။ တဿ သင်္ဃော တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ အဒါသိ။ တာယော ¶ အယံ၊ အာဝုသော၊ ဘိက္ခု အာပန္နော၊ တာသာယံ ဘိက္ခု ပရိဝသတီ’တိ။ သော ဧဝံ ဝဒေတိ – ‘ယာယံ၊ အာဝုသော ¶ ၊ အာပတ္တိ သရမာနပ္ပဋိစ္ဆန္နာ ဓမ္မိကံ တဿာ အာပတ္တိယာ ပရိဝါသဒါနံ၊ ဓမ္မတ္တာ ရုဟတိ။ ယာ စ ခွာယံ၊ အာဝုသော၊ အာပတ္တိ အဿရမာနပ္ပဋိစ္ဆန္နာ၊ အဓမ္မိကံ တဿာ အာပတ္တိယာ ပရိဝါသဒါနံ၊ အဓမ္မတ္တာ န ရုဟတိ။ ဧကိဿာ၊ အာဝုသော၊ အာပတ္တိယာ ဘိက္ခု မာနတ္တာရဟော’’’တိ။

၁၄၆။ ‘‘ဣဓ ပန၊ ဘိက္ခဝေ၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကာ အာပတ္တိ နိဗ္ဗေမတိကပ္ပဋိစ္ဆန္နာ၊ ဧကာ အာပတ္တိ ဝေမတိကပ္ပဋိစ္ဆန္နာ။ သော သင်္ဃံ တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစတိ။ တဿ သင်္ဃော တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ဒေတိ။ တဿ ပရိဝသန္တဿ အညော ဘိက္ခု အာဂစ္ဆတိ ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဝိယတ္တော မေဓာဝီ လဇ္ဇီ ကုက္ကုစ္စကော သိက္ခာကာမော။ သော ဧဝံ ဝဒေတိ – ‘ကိံ အယံ၊ အာဝုသော၊ ဘိက္ခု အာပန္နော? ကိဿာယံ ဘိက္ခု ပရိဝသတီ’တိ? တေ ဧဝံ ဝဒေန္တိ – ‘အယံ၊ အာဝုသော၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော၊ ဧကာ အာပတ္တိ နိဗ္ဗေမတိကပ္ပဋိစ္ဆန္နာ၊ ဧကာ အာပတ္တိ ဝေမတိကပ္ပဋိစ္ဆန္နာ။ သော သင်္ဃံ တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစိ။ တဿ သင်္ဃော တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ အဒါသိ။ တာယော အယံ၊ အာဝုသော၊ ဘိက္ခု အာပန္နော၊ တာသာယံ ဘိက္ခု ပရိဝသတီ’တိ။ သော ဧဝံ ဝဒေတိ – ‘ယာယံ ¶ ၊ အာဝုသော၊ အာပတ္တိ နိဗ္ဗေမတိကပ္ပဋိစ္ဆန္နာ၊ ဓမ္မိကံ တဿာ အာပတ္တိယာ ပရိဝါသဒါနံ၊ ဓမ္မတ္တာ ရုဟတိ။ ယာ စ ခွာယံ၊ အာဝုသော၊ အာပတ္တိ ဝေမတိကပ္ပဋိစ္ဆန္နာ အဓမ္မိကံ တဿာ အာပတ္တိယာ ပရိဝါသဒါနံ၊ အဓမ္မတ္တာ န ရုဟတိ။ ဧကိဿာ၊ အာဝုသော၊ အာပတ္တိယာ ဘိက္ခု မာနတ္တာရဟော’’တိ။

၁၄၇။ တေန ¶ ခေါ ပန သမယေန အညတ္တရော ဘိက္ခု ဒွေ သင်္ဃာဒိသေသာ အာပတ္တိယော အာပန္နော ဟောတိ ဒွေမာသပ္ပဋိစ္ဆန္နာယော။ တဿ ဧတဒဟောသိ – ‘‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ¶ ယာစေယျ’’န္တိ။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ¶ ယာစိ။ တဿ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ။ တဿ ပရိဝသန္တဿ လဇ္ဇီဓမ္မော ဩက္ကမိ – ‘‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ တဿ မေ ဧတဒဟောသိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ။ သောဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိံ။ တဿ မေ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ။ တဿ မေ ပရိဝသန္တဿ လဇ္ဇီဓမ္မော ဩက္ကမိ။ ယံနူနာဟံ သင်္ဃံ ¶ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ [ဣတရမ္ပိ မာသပရိဝါသံ (သျာ။ က။ ဧဝမုပရိပိ)] ယာစေယျ’’န္တိ။

သော ဘိက္ခူနံ အာရောစေသိ – ‘‘အဟံ ခေါ၊ အာဝုသော၊ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ တဿ မေ ဧတဒဟောသိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ။ သောဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိံ။ တဿ မေ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ။ တဿ မေ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ တဿ မေ ဧတဒဟောသိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ။ သောဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိံ။ တဿ မေ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ။ တဿ မေ ပရိဝသန္တဿ လဇ္ဇီဓမ္မော ဩက္ကမိ။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစေယျ’န္တိ။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော တဿ ဘိက္ခုနော ဒွိန္နံ ¶ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ဒေတု။ ဧဝဉ္စ ပန၊ ဘိက္ခဝေ၊ ဒါတဗ္ဗော –

‘‘တေန၊ ဘိက္ခဝေ၊ ဘိက္ခုနာ သင်္ဃံ ဥပသင်္ကမိတွာ…ပေ… ဧဝမဿ ဝစနီယော – အဟံ၊ ဘန္တေ၊ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော ¶ ။ တဿ မေ ဧတဒဟောသိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ။ သောဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ¶ ဧကမာသပရိဝါသံ ယာစိံ။ တဿ မေ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ။ တဿ မေ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ တဿ မေ ဧတဒဟောသိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ။ သောဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိံ။ တဿ မေ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ။ တဿ မေ ပရိဝသန္တဿ လဇ္ဇီဓမ္မော ဩက္ကမိ။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစေယျန္တိ။ သောဟံ၊ ဘန္တေ၊ သင်္ဃံ ¶ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစာမီတိ။ ဒုတိယမ္ပိ ¶ ယာစိတဗ္ဗော။ တတိယမ္ပိ ယာစိတဗ္ဗော။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၄၈။ ‘‘သုဏာတု မေ၊ ဘန္တေ၊ သင်္ဃော။ အယံ ဣတ္ထန္နာမော ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော။ တဿ ဧတဒဟောသိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိ။ တဿ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ။ တဿ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ တဿ မေ ဧတဒဟောသိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ။ သောဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိံ။ တဿ မေ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ။ တဿ မေ ပရိဝသန္တဿ လဇ္ဇီဓမ္မော ဩက္ကမိ။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစေယျန္တိ။ သော သင်္ဃံ ဒွိန္နံ အာပတ္တီနံ ¶ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစတိ။ ယဒိ ¶ သင်္ဃဿ ပတ္တကလ္လံ၊ သင်္ဃော ဣတ္ထန္နာမဿ ဘိက္ခုနော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ဒဒေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဣတ္ထန္နာမော ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော။ တဿ ဧတဒဟောသိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ¶ ယာစေယျ’န္တိ။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိ။ တဿ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ။ တဿ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ တဿ မေ ဧတဒဟောသိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ။ သောဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိံ။ တဿ မေ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ။ တဿ မေ ပရိဝသန္တဿ လဇ္ဇီဓမ္မော ဩက္ကမိ။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစေယျ’န္တိ။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစတိ။ သင်္ဃော ဣတ္ထန္နာမဿ ဘိက္ခုနော ဒွိန္နံ ¶ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ဒေတိ။ ယဿာယသ္မတော ခမတိ ဣတ္ထန္နာမဿ ဘိက္ခုနော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသဿ [ဣတရမ္ပိ မာသပရိဝါသဿ (က။)၊ ဣတရဿပိ မာသပရိဝါသဿ (သျာ။)] ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘ဒိန္နော သင်္ဃေန ဣတ္ထန္နာမဿ ဘိက္ခုနော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသော [ဣတရမ္ပိ မာသပရိဝါသော (က။)၊ ဣတရောပိ မာသပရိဝါသော (သျာ။)]။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

‘‘တေန၊ ဘိက္ခဝေ၊ ဘိက္ခုနာ ပုရိမံ ဥပါဒါယ ဒွေ မာသာ ပရိဝသိတဗ္ဗာ။

၁၄၉။ ‘‘ဣဓ ¶ ပန၊ ဘိက္ခဝေ၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော။ တဿ ဧဝံ ဟောတိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစတိ။ တဿ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ဒေတိ။ တဿ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ တဿ မေ ဧတဒဟောသိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော။ ယံနူနာဟံ ¶ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ။ သောဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိံ။ တဿ မေ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ¶ ဧကမာသပရိဝါသံ အဒါသိ။ တဿ မေ ပရိဝသန္တဿ လဇ္ဇီဓမ္မော ဩက္ကမိ။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစေယျ’န္တိ။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစတိ။ တဿ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ဒေတိ။ တေန၊ ဘိက္ခဝေ၊ ဘိက္ခုနာ ပုရိမံ ဥပါဒါယ ဒွေ မာသာ ပရိဝသိတဗ္ဗာ။

၁၅၀။ ‘‘ဣဓ ပန၊ ဘိက္ခဝေ၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကံ မာသံ ဇာနာတိ၊ ဧကံ မာသံ န ဇာနာတိ။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ ဇာနာတိ တံ မာသံ ပရိဝါသံ ယာစတိ။ တဿ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ ဇာနာတိ တံ မာသံ ပရိဝါသံ ဒေတိ။ သော ပရိဝသန္တော ဣတရမ္ပိ မာသံ ဇာနာတိ။ တဿ ဧဝံ ဟောတိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော၊ ဧကံ မာသံ ဇာနိံ၊ ဧကံ မာသံ န ဇာနိံ။ သောဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ ဇာနိံ တံ မာသံ ပရိဝါသံ ယာစိံ။ တဿ မေ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ ¶ မာသံ ဇာနိံ တံ မာသံ ပရိဝါသံ အဒါသိ။ သောဟံ ပရိဝသန္တော ဣတရမ္ပိ မာသံ ဇာနာမိ။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစေယျ’န္တိ။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစတိ ¶ ။ တဿ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ဒေတိ။ တေန၊ ဘိက္ခဝေ၊ ဘိက္ခုနာ ပုရိမံ ဥပါဒါယ ဒွေ မာသာ ပရိဝသိတဗ္ဗာ။

၁၅၁။ ‘‘ဣဓ ပန၊ ဘိက္ခဝေ၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကံ မာသံ သရတိ၊ ဧကံ မာသံ နဿရတိ။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ သရတိ တံ မာသံ ပရိဝါသံ ယာစတိ။ တဿ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ သရတိ တံ မာသံ ပရိဝါသံ ဒေတိ။ သော ပရိဝသန္တော ဣတရမ္ပိ မာသံ သရတိ။ တဿ ဧဝံ ဟောတိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော၊ ဧကံ မာသံ သရိံ၊ ဧကံ မာသံ နဿရိံ။ သောဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ သရိံ တံ မာသံ ပရိဝါသံ ယာစိံ။ တဿ မေ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ သရိံ တံ မာသံ ပရိဝါသံ အဒါသိ။ သောဟံ ပရိဝသန္တော ဣတရမ္ပိ မာသံ သရာမိ။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစေယျ’န္တိ။ သော သင်္ဃံ ဒွိန္နံ ¶ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစတိ။ တဿ ¶ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ဒေတိ။ တေန၊ ဘိက္ခဝေ၊ ဘိက္ခုနာ ပုရိမံ ဥပါဒါယ ဒွေ မာသာ ပရိဝသိတဗ္ဗာ။

၁၅၂။ ‘‘ဣဓ ပန၊ ဘိက္ခဝေ၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကံ မာသံ နိဗ္ဗေမတိကော၊ ဧကံ မာသံ ဝေမတိကော။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ နိဗ္ဗေမတိကော တံ မာသံ ပရိဝါသံ ယာစတိ။ တဿ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ နိဗ္ဗေမတိကော တံ မာသံ ပရိဝါသံ ဒေတိ။ သော ပရိဝသန္တော ဣတရမ္ပိ မာသံ နိဗ္ဗေမတိကော ဟောတိ။ တဿ ဧဝံ ဟောတိ – ‘အဟံ ခေါ ဒွေ သင်္ဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော၊ ဧကံ မာသံ နိဗ္ဗေမတိကော၊ ဧကံ မာသံ ဝေမတိကော ¶ ။ သောဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ နိဗ္ဗေမတိကော တံ မာသံ ပရိဝါသံ ယာစိံ။ တဿ မေ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆာန္နာနံ ယံ မာသံ နိဗ္ဗေမတိကော တံ မာသံ ပရိဝါသံ အဒါသိ။ သောဟံ ပရိဝသန္တော ဣတရမ္ပိ မာသံ နိဗ္ဗေမတိကော။ ယံနူနာဟံ သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ¶ ဣတရမ္ပိ မာသံ ပရိဝါသံ ယာစေယျ’န္တိ။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစတိ။ တဿ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ဒေတိ။ တေန၊ ဘိက္ခဝေ ¶ ၊ ဘိက္ခုနာ ပုရိမံ ဥပါဒါယ ဒွေ မာသာ ပရိဝသိတဗ္ဗာ။

၁၅၃။ ‘‘ဣဓ ပန၊ ဘိက္ခဝေ၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကော မာသော ဇာနပ္ပဋိစ္ဆန္နော၊ ဧကော မာသော အဇာနပ္ပဋိစ္ဆန္နော။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစတိ။ တဿ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ဒေတိ။ တဿ ပရိဝသန္တဿ အညော ဘိက္ခု အာဂစ္ဆတိ ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဝိယတ္တော မေဓာဝီ လဇ္ဇီ ကုက္ကုစ္စကော သိက္ခာကာမော။ သော ဧဝံ ဝဒေတိ – ‘ကိံ အယံ၊ အာဝုသော၊ ဘိက္ခု အာပန္နော? ကိဿာယံ ဘိက္ခု ပရိဝသတီ’တိ? တေ ဧဝံ ဝဒေန္တိ – ‘အယံ၊ အာဝုသော၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော။ ဧကော မာသော ဇာနပ္ပဋိစ္ဆန္နော၊ ဧကော မာသော အဇာနပ္ပဋိစ္ဆန္နော။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစိ။ တဿ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ အဒါသိ။ တာယော အယံ၊ အာဝုသော၊ ဘိက္ခု အာပန္နော တာသာယံ ဘိက္ခု ပရိဝသတီ’တိ။ သော ဧဝံ ဝဒေတိ – ‘ယွာယံ၊ အာဝုသော၊ မာသော ဇာနပ္ပဋိစ္ဆန္နော ဓမ္မိကံ တဿ မာသဿ ပရိဝါသဒါနံ၊ ဓမ္မတ္တာ ရုဟတိ။ ယော စ ¶ ခွာယံ၊ အာဝုသော၊ မာသော အဇာနပ္ပဋိစ္ဆန္နော အဓမ္မိကံ တဿ မာသဿ ပရိဝါသဒါနံ၊ အဓမ္မတ္တာ န ရုဟတိ။ ဧကဿ၊ အာဝုသော ¶ ၊ မာသဿ ဘိက္ခု မာနတ္တာရဟော’တိ။

၁၅၄။ ‘‘ဣဓ ပန၊ ဘိက္ခဝေ၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကော မာသော သရမာနပ္ပဋိစ္ဆန္နော၊ ဧကော မာသော အဿရမာနပ္ပဋိစ္ဆန္နော။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစတိ။ တဿ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ဒေတိ။ တဿ ပရိဝသန္တဿ အညော ဘိက္ခု အာဂစ္ဆတိ ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဝိယတ္တော မေဓာဝီ လဇ္ဇီ ကုက္ကုစ္စကော သိက္ခာကာမော ¶ ။ သော ဧဝံ ဝဒေတိ – ‘ကိံ အယံ၊ အာဝုသော၊ ဘိက္ခု အာပန္နော? ကိဿာယံ ဘိက္ခု ပရိဝသတီ’တိ? တေ ဧဝံ ဝဒေန္တိ – ‘အယံ၊ အာဝုသော၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော၊ ဧကော မာသော သရမာနပ္ပဋိစ္ဆန္နော၊ ဧကော မာသော အဿရမာနပ္ပဋိစ္ဆန္နော။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစိ။ တဿ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ အဒါသိ။ တာယော အယံ၊ အာဝုသော၊ ဘိက္ခု အာပန္နော တာသာယံ ဘိက္ခု ပရိဝသတီ’တိ။ သော ဧဝံ ဝဒေတိ – ‘ယွာယံ၊ အာဝုသော၊ မာသော သရမာနပ္ပဋိစ္ဆန္နော ဓမ္မိကံ တဿ မာသဿ ပရိဝါသဒါနံ၊ ဓမ္မတ္တာ ရုဟတိ။ ယော စ ခွာယံ၊ အာဝုသော၊ မာသော အဿရမာနပ္ပဋိစ္ဆန္နော အဓမ္မိကံ တဿ မာသဿ ပရိဝါသဒါနံ၊ အဓမ္မတ္တာ န ရုဟတိ။ ဧကဿ၊ အာဝုသော၊ မာသဿ ဘိက္ခု မာနတ္တာရဟော’တိ။

၁၅၅။ ‘‘ဣဓ ¶ ပန၊ ဘိက္ခဝေ၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကော မာသော နိဗ္ဗေမတိကပ္ပဋိစ္ဆန္နော၊ ဧကော မာသော ဝေမတိကပ္ပဋိစ္ဆန္နော။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစတိ။ တဿ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ဒေတိ။ တဿ ပရိဝသန္တဿ အညော ဘိက္ခု အာဂစ္ဆတိ ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဝိယတ္တော မေဓာဝီ လဇ္ဇီ ကုက္ကုစ္စကော သိက္ခာကာမော။ သော ဧဝံ ဝဒေတိ – ‘ကိံ အယံ၊ အာဝုသော၊ ဘိက္ခု အာပန္နော? ကိဿာယံ ဘိက္ခု ပရိဝသတီ’တိ? တေ ဧဝံ ဝဒေန္တိ – ‘အယံ၊ အာဝုသော၊ ဘိက္ခု ဒွေ သင်္ဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော၊ ဧကော မာသော နိဗ္ဗေမတိကပ္ပဋိစ္ဆန္နော၊ ဧကော မာသော ဝေမတိကပ္ပဋိစ္ဆန္နော။ သော သင်္ဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစိ။ တဿ သင်္ဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ အဒါသိ။ တာယော အယံ၊ အာဝုသော၊ ဘိက္ခု အာပန္နော တာသာယံ ဘိက္ခု ပရိဝသတီ’တိ ¶ ။ သော ဧဝံ ဝဒေတိ – ‘ယွာယံ၊ အာဝုသော၊ မာသော နိဗ္ဗေမတိကပ္ပဋိစ္ဆန္နော ဓမ္မိကံ တဿ မာသဿ ပရိဝါသဒါနံ၊ ဓမ္မတ္တာ ရုဟတိ။ ယော စ ခွာယံ၊ အာဝုသော၊ မာသော ဝေမတိကပ္ပဋိစ္ဆန္နော အဓမ္မိကံ တဿ မာသဿ ပရိဝါသဒါနံ၊ အဓမ္မတ္တာ န ရုဟတိ။ ဧကဿ၊ အာဝုသော၊ မာသဿ ဘိက္ခု မာနတ္တာရဟော’’တိ။

သုဒ္ဓန္တပရိဝါသော

၁၅၆။ တေန ¶ ခေါ ပန သမယေန အညတရော ဘိက္ခု သမ္ဗဟုလာ သင်္ဃာဒိသေသာ ¶ အာပတ္တိယော အာပန္နော ဟောတိ။ သော အာပတ္တိပရိယန္တံ န ဇာနာတိ၊ ရတ္တိပရိယန္တံ န ဇာနာတိ၊ အာပတ္တိပရိယန္တံ နဿရတိ၊ ရတ္တိပရိယန္တံ နဿရတိ၊ အာပတ္တိပရိယန္တေ ဝေမတိကော၊ ရတ္တိပရိယန္တေ ဝေမတိကော။ သော ဘိက္ခူနံ အာရောစေသိ – ‘‘အဟံ၊ အာဝုသော၊ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ၊ အာပတ္တိပရိယန္တံ ¶ န ဇာနာမိ၊ ရတ္တိပရိယန္တံ န ဇာနာမိ၊ အာပတ္တိပရိယန္တံ နဿရာမိ၊ ရတ္တိပရိယန္တံ နဿရာမိ၊ အာပတ္တိပရိယန္တေ ဝေမတိကော၊ ရတ္တိပရိယန္တေ ဝေမတိကော။ ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘တေန ဟိ၊ ဘိက္ခဝေ၊ သင်္ဃော တဿ ဘိက္ခုနော တာသံ အာပတ္တီနံ သုဒ္ဓန္တပရိဝါသံ ဒေတု။ ဧဝဉ္စ ပန၊ ဘိက္ခဝေ၊ ဒါတဗ္ဗော –

‘‘တေန၊ ဘိက္ခဝေ၊ ဘိက္ခုနာ သင်္ဃံ ဥပသင်္ကမိတွာ…ပေ… ဧဝမဿ ဝစနီယော – ‘အဟံ၊ ဘန္တေ၊ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ။ အာပတ္တိပရိယန္တံ န ဇာနာမိ၊ ရတ္တိပရိယန္တံ န ဇာနာမိ၊ အာပတ္တိပရိယန္တံ နဿရာမိ၊ ရတ္တိပရိယန္တံ နဿရာမိ၊ အာပတ္တိပရိယန္တေ ဝေမတိကော၊ ရတ္တိပရိယန္တေ ဝေမတိကော။ သောဟံ၊ ဘန္တေ၊ သင်္ဃံ တာသံ အာပတ္တီနံ သုဒ္ဓန္တပရိဝါသံ ယာစာမီ’တိ။ ဒုတိယမ္ပိ ယာစိတဗ္ဗော။ တတိယမ္ပိ ယာစိတဗ္ဗော။ ဗျတ္တေန ¶ ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၅၇။ ‘‘သုဏာတု မေ၊ ဘန္တေ၊ သင်္ဃော။ အယံ ဣတ္ထန္နာမော ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိ။ အာပတ္တိပရိယန္တံ န ဇာနာတိ၊ ရတ္တိပရိယန္တံ န ဇာနာတိ၊ အာပတ္တိပရိယန္တံ နဿရတိ၊ ရတ္တိပရိယန္တံ နဿရတိ၊ အာပတ္တိပရိယန္တေ ဝေမတိကော၊ ရတ္တိပရိယန္တေ ဝေမတိကော။ သော သင်္ဃံ တာသံ အာပတ္တီနံ သုဒ္ဓန္တပရိဝါသံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဣတ္ထန္နာမဿ ဘိက္ခုနော တာသံ အာပတ္တီနံ သုဒ္ဓန္တပရိဝါသံ ဒဒေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဣတ္ထန္နာမော ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိ။ အာပတ္တိပရိယန္တံ န ဇာနာတိ၊ ရတ္တိပရိယန္တံ န ဇာနာတိ၊ အာပတ္တိပရိယန္တံ နဿရတိ ¶ ၊ ရတ္တိပရိယန္တံ နဿရတိ၊ အာပတ္တိပရိယန္တေ ဝေမတိကော၊ ရတ္တိပရိယန္တေ ဝေမတိကော။ သော သင်္ဃံ တာသံ ¶ အာပတ္တီနံ သုဒ္ဓန္တပရိဝါသံ ယာစတိ။ သင်္ဃော ဣတ္ထန္နာမဿ ဘိက္ခုနော တာသံ အာပတ္တီနံ သုဒ္ဓန္တပရိဝါသံ ဒေတိ။ ယဿာယသ္မတော ခမတိ ဣတ္ထန္နာမဿ ဘိက္ခုနော တာသံ အာပတ္တီနံ သုဒ္ဓန္တပရိဝါသဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘ဒိန္နော သင်္ဃေန ဣတ္ထန္နာမဿ ဘိက္ခုနော တာသံ အာပတ္တီနံ သုဒ္ဓန္တပရိဝါသော။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

၁၅၈။ ‘‘ဧဝံ ခေါ၊ ဘိက္ခဝေ၊ သုဒ္ဓန္တပရိဝါသော ဒါတဗ္ဗော၊ ဧဝံ ¶ ပရိဝါသော ဒါတဗ္ဗော။ ကထဉ္စ၊ ဘိက္ခဝေ၊ သုဒ္ဓန္တပရိဝါသော ဒါတဗ္ဗော? အာပတ္တိပရိယန္တံ န ဇာနာတိ၊ ရတ္တိပရိယန္တံ န ဇာနာတိ၊ အာပတ္တိပရိယန္တံ နဿရတိ၊ ရတ္တိပရိယန္တံ နဿရတိ၊ အာပတ္တိပရိယန္တေ ဝေမတိကော၊ ရတ္တိပရိယန္တေ ဝေမတိကော – သုဒ္ဓန္တပရိဝါသော ဒါတဗ္ဗော။

‘‘အာပတ္တိပရိယန္တံ ဇာနာတိ၊ ရတ္တိပရိယန္တံ န ဇာနာတိ၊ အာပတ္တိပရိယန္တံ သရတိ၊ ရတ္တိပရိယန္တံ နဿရတိ၊ အာပတ္တိပရိယန္တေ နိဗ္ဗေမတိကော၊ ရတ္တိပရိယန္တေ ဝေမတိကော – သုဒ္ဓန္တပရိဝါသော ဒါတဗ္ဗော။

‘‘အာပတ္တိပရိယန္တံ ဧကစ္စံ ဇာနာတိ၊ ဧကစ္စံ န ဇာနာတိ၊ ရတ္တိပရိယန္တံ န ဇာနာတိ၊ အာပတ္တိပရိယန္တံ ဧကစ္စံ သရတိ၊ ဧကစ္စံ နဿရတိ၊ ရတ္တိပရိယန္တံ နဿရတိ၊ အာပတ္တိပရိယန္တေ ဧကစ္စေ ဝေမတိကော၊ ဧကစ္စေ နိဗ္ဗေမတိကော၊ ရတ္တိပရိယန္တေ ဝေမတိကော – သုဒ္ဓန္တပရိဝါသော ဒါတဗ္ဗော။

‘‘အာပတ္တိပရိယန္တံ န ဇာနာတိ၊ ရတ္တိပရိယန္တံ ဧကစ္စံ ဇာနာတိ၊ ဧကစ္စံ န ဇာနာတိ၊ အာပတ္တိပရိယန္တံ နဿရတိ၊ ရတ္တိပရိယန္တံ ဧကစ္စံ သရတိ၊ ဧကစ္စံ နဿရတိ၊ အာပတ္တိပရိယန္တေ ဝေမတိကော၊ ရတ္တိပရိယန္တေ ဧကစ္စေ ဝေမတိကော၊ ဧကစ္စေ နိဗ္ဗေမတိကော – သုဒ္ဓန္တပရိဝါသော ဒါတဗ္ဗော။

‘‘အာပတ္တိပရိယန္တံ ဇာနာတိ၊ ရတ္တိပရိယန္တံ ဧကစ္စံ ဇာနာတိ၊ ဧကစ္စံ န ဇာနာတိ၊ အာပတ္တိပရိယန္တံ ¶ သရတိ၊ ရတ္တိပရိယန္တံ ဧကစ္စံ သရတိ၊ ဧကစ္စံ နဿရတိ၊ အာပတ္တိပရိယန္တေ နိဗ္ဗေမတိကော၊ ရတ္တိပရိယန္တေ ဧကစ္စေ ဝေမတိကော၊ ဧကစ္စေ နိဗ္ဗေမတိကော – သုဒ္ဓန္တပရိဝါသော ¶ ဒါတဗ္ဗော။

‘‘အာပတ္တိပရိယန္တံ ဧကစ္စံ ဇာနာတိ၊ ဧကစ္စံ န ဇာနာတိ၊ ရတ္တိပရိယန္တံ ¶ ဧကစ္စံ ဇာနာတိ၊ ဧကစ္စံ န ဇာနာတိ၊ အာပတ္တိပရိယန္တံ ဧကစ္စံ သရတိ၊ ဧကစ္စံ နဿရတိ ¶ ၊ ရတ္တိပရိယန္တံ ဧကစ္စံ သရတိ၊ ဧကစ္စံ နဿရတိ၊ အာပတ္တိပရိယန္တေ ဧကစ္စေ ဝေမတိကော၊ ဧကစ္စေ နိဗ္ဗေမတိကော၊ ရတ္တိပရိယန္တေ ဧကစ္စေ ဝေမတိကော၊ ဧကစ္စေ နိဗ္ဗေမတိကော – သုဒ္ဓန္တပရိဝါသော ဒါတဗ္ဗော။ ဧဝံ ခေါ၊ ဘိက္ခဝေ၊ သုဒ္ဓန္တပရိဝါသော ဒါတဗ္ဗော။

၁၅၉။ ‘‘ကထဉ္စ၊ ဘိက္ခဝေ၊ ပရိဝါသော ဒါတဗ္ဗော? အာပတ္တိပရိယန္တံ ဇာနာတိ၊ ရတ္တိပရိယန္တံ ဇာနာတိ၊ အာပတ္တိပရိယန္တံ သရတိ၊ ရတ္တိပရိယန္တံ သရတိ၊ အာပတ္တိပရိယန္တေ နိဗ္ဗေမတိကော၊ ရတ္တိပရိယန္တေ နိဗ္ဗေမတိကော – ပရိဝါသော ဒါတဗ္ဗော။

‘‘အာပတ္တိပရိယန္တံ န ဇာနာတိ၊ ရတ္တိပရိယန္တံ ဇာနာတိ၊ အာပတ္တိပရိယန္တံ နဿရတိ၊ ရတ္တိပရိယန္တံ သရတိ၊ အာပတ္တိပရိယန္တေ ဝေမတိကော၊ ရတ္တိပရိယန္တေ နိဗ္ဗေမတိကော – ပရိဝါသော ဒါတဗ္ဗော။

‘‘အာပတ္တိပရိယန္တံ ဧကစ္စံ ဇာနာတိ၊ ဧကစ္စံ န ဇာနာတိ၊ ရတ္တိပရိယန္တံ ဇာနာတိ၊ အာပတ္တိပရိယန္တံ ဧကစ္စံ သရတိ၊ ဧကစ္စံ နဿရတိ၊ ရတ္တိပရိယန္တံ သရတိ၊ အာပတ္တိပရိယန္တေ ဧကစ္စေ ဝေမတိကော၊ ဧကစ္စေ နိဗ္ဗေမတိကော၊ ရတ္တိပရိယန္တေ နိဗ္ဗေမတိကော – ပရိဝါသော ဒါတဗ္ဗော။ ဧဝံ ခေါ၊ ဘိက္ခဝေ၊ ပရိဝါသော ဒါတဗ္ဗော။

ပရိဝါသော နိဋ္ဌိတော။

၃။ စတ္တာလီသကံ

၁၆၀။ တေန ခေါ ပန သမယေန အညတရော ဘိက္ခု ပရိဝသန္တော ဝိဗ္ဘမိ။ သော ပုန ပစ္စာဂန္တွာ ဘိက္ခူ ဥပသမ္ပဒံ ယာစိ။ ဘဂဝတော ¶ ဧတမတ္ထံ အာရောစေသုံ။

‘‘ဣဓ ¶ ပန၊ ဘိက္ခဝေ၊ ဘိက္ခု ပရိဝသန္တော ဝိဗ္ဘမတိ။ ဝိဗ္ဘန္တကဿ၊ ဘိက္ခဝေ၊ ပရိဝါသော န ရုဟတိ။ သော စေ ပုန ဥပသမ္ပဇ္ဇတိ၊ တဿ တဒေဝ ပုရိမံ ပရိဝါသဒါနံ။ ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ အဝသေသော ပရိဝသိတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော သာမဏေရော ဟောတိ။ သာမဏေရဿ၊ ဘိက္ခဝေ၊ ပရိဝါသော န ရုဟတိ။ သော စေ ပုန ဥပသမ္ပဇ္ဇတိ၊ တဿ ¶ တဒေဝ ပုရိမံ ပရိဝါသဒါနံ။ ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ အဝသေသော ပရိဝသိတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော ဥမ္မတ္တကော ဟောတိ။ ဥမ္မတ္တကဿ၊ ဘိက္ခဝေ၊ ပရိဝါသော န ရုဟတိ။ သော စေ ပုန အနုမ္မတ္တကော ဟောတိ၊ တဿ တဒေဝ ပုရိမံ ပရိဝါသဒါနံ။ ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ အဝသေသော ပရိဝသိတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော ခိတ္တစိတ္တော ဟောတိ။ ခိတ္တစိတ္တဿ၊ ဘိက္ခဝေ၊ ပရိဝါသော န ¶ ရုဟတိ။ သော စေ ပုန အခိတ္တစိတ္တော ဟောတိ၊ တဿ တဒေဝ ပုရိမံ ပရိဝါသဒါနံ။ ယော ပရိဝါသော ဒိန္နော သုဒိန္နော၊ ယော ပုရိဝုတ္ထော သုပရိဝုတ္ထော၊ အဝသေသော ပရိဝသိတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော ဝေဒနာဋ္ဋော ဟောတိ။ ဝေဒနာဋ္ဋဿ ¶ ၊ ဘိက္ခဝေ၊ ပရိဝါသော န ရုဟတိ။ သော စေ ပုန အဝေဒနာဋ္ဋော ဟောတိ၊ တဿ တဒေဝ ပုရိမံ ပရိဝါသဒါနံ။ ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ အဝသေသော ပရိဝသိတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော၊ အာပတ္တိယာ အဒဿနေ၊ ဥက္ခိပိယျတိ [ဥက္ခိပိယတိ (သျာ။)၊ ဥက္ခိပီယတိ (က။)]။ ဥက္ခိတ္တကဿ၊ ဘိက္ခဝေ၊ ပရိဝါသော န ရုဟတိ။ သော စေ ပုန ဩသာရိယျတိ [ဩသာရိယတိ (သျာ။)၊ ဩသာရီယတိ (က။)]၊ တဿ တဒေဝ ပုရိမံ ပရိဝါသဒါနံ။ ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ အဝသေသော ပရိဝသိတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော၊ အာပတ္တိယာ အပ္ပဋိကမ္မေ၊ ဥက္ခိပိယျတိ။ ဥက္ခိတ္တကဿ၊ ဘိက္ခဝေ၊ ပရိဝါသော န ရုဟတိ။ သော စေ ပုန ဩသာရိယျတိ၊ တဿ တဒေဝ ပုရိမံ ပရိဝါသဒါနံ။ ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ အဝသေသော ပရိဝသိတဗ္ဗော။

‘‘ဣဓ ¶ ပန၊ ဘိက္ခဝေ၊ ဘိက္ခု ပရိဝသန္တော၊ ပါပိကာယ ဒိဋ္ဌိယာ၊ အပ္ပဋိနိဿဂ္ဂေ၊ ဥက္ခိပိယျတိ။ ဥက္ခိတ္တကဿ၊ ဘိက္ခဝေ၊ ပရိဝါသော န ရုဟတိ။ သော စေ ပုန ဩသာရိယျတိ၊ တဿ တဒေဝ ပုရိမံ ပရိဝါသဒါနံ။ ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ အဝသေသော ပရိဝသိတဗ္ဗော။

၁၆၁။ ‘‘ဣဓ ¶ ပန၊ ဘိက္ခဝေ၊ ဘိက္ခု မူလာယပဋိကဿနာရဟော ဝိဗ္ဘမတိ။ ဝိဗ္ဘန္တကဿ၊ ဘိက္ခဝေ၊ မူလာယပဋိကဿနာ န ရုဟတိ။ သော စေ ပုန ¶ ဥပသမ္ပဇ္ဇတိ၊ တဿ တဒေဝ ပုရိမံ ပရိဝါသဒါနံ။ ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော။ သော ဘိက္ခု မူလာယ ပဋိကဿိတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု မူလာယပဋိကဿနာရဟော သာမဏေရော ဟောတိ…ပေ… ဥမ္မတ္တကော ဟောတိ…ပေ… ခိတ္တစိတ္တော ဟောတိ…ပေ… ဝေဒနာဋ္ဋော ဟောတိ…ပေ… အာပတ္တိယာ အဒဿနေ ဥက္ခိပိယျတိ…ပေ… အာပတ္တိယာ အပ္ပဋိကမ္မေ ဥက္ခိပိယျတိ…ပေ… ပါပိကာယ ဒိဋ္ဌိယာ၊ အပ္ပဋိနိဿဂ္ဂေ၊ ဥက္ခိပိယျတိ။ ဥက္ခိတ္တကဿ၊ ဘိက္ခဝေ၊ မူလာယပဋိကဿနာ န ရုဟတိ။ သော စေ ပုန ဩသာရိယျတိ၊ တဿ တဒေဝ ပုရိမံ ပရိဝါသဒါနံ။ ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော။ သော ဘိက္ခု မူလာယ ပဋိကဿိတဗ္ဗော။

၁၆၂။ ‘‘ဣဓ ပန၊ ဘိက္ခဝေ၊ ဘိက္ခု မာနတ္တာရဟော ဝိဗ္ဘမတိ။ ဝိဗ္ဘန္တကဿ၊ ဘိက္ခဝေ၊ မာနတ္တဒါနံ န ရုဟတိ။ သော စေ ပုန ဥပသမ္ပဇ္ဇတိ၊ တဿ တဒေဝ ပုရိမံ ပရိဝါသဒါနံ။ ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော။ တဿ ဘိက္ခုနော မာနတ္တံ ဒါတဗ္ဗံ။

‘‘ဣဓ ပန၊ ဘိက္ခဝေ၊ ဘိက္ခု မာနတ္တာရဟော သာမဏေရော ဟောတိ…ပေ… ဥမ္မတ္တကော ဟောတိ…ပေ… ခိတ္တစိတ္တော ဟောတိ…ပေ… ဝေဒနာဋ္ဋော ဟောတိ…ပေ… အာပတ္တိယာ အဒဿနေ၊ ဥက္ခိပိယျတိ…ပေ… အာပတ္တိယာ အပ္ပဋိကမ္မေ၊ ဥက္ခိပိယျတိ…ပေ… ပါပိကာယ ဒိဋ္ဌိယာ၊ အပ္ပဋိနိဿဂ္ဂေ ¶ ၊ ဥက္ခိပိယျတိ။ ဥက္ခိတ္တကဿ၊ ဘိက္ခဝေ၊ မာနတ္တဒါနံ န ရုဟတိ။ သော စေ ပုန ဩသာရိယျတိ၊ တဿ တဒေဝ ပုရိမံ ပရိဝါသဒါနံ။ ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော။ တဿ ဘိက္ခုနော မာနတ္တံ ဒါတဗ္ဗံ။

၁၆၃။ ‘‘ဣဓ ပန၊ ဘိက္ခဝေ၊ ဘိက္ခု မာနတ္တံ စရန္တော ဝိဗ္ဘမတိ။ ဝိဗ္ဘန္တကဿ၊ ဘိက္ခဝေ ¶ ၊ မာနတ္တစရိယာ န ရုဟတိ။ သော စေ ပုန ဥပသမ္ပဇ္ဇတိ တဿ တဒေဝ ပုရိမံ ပရိဝါသဒါနံ။ ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ ယံ မာနတ္တံ ဒိန္နံ သုဒိန္နံ၊ ယံ မာနတ္တံ စိဏ္ဏံ သုစိဏ္ဏံ၊ အဝသေသံ စရိတဗ္ဗံ။

‘‘ဣဓ ¶ ပန၊ ဘိက္ခဝေ၊ ဘိက္ခု မာနတ္တံ စရန္တော သာမဏေရော ဟောတိ…ပေ… ဥမ္မတ္တကော ဟောတိ…ပေ… ခိတ္တစိတ္တော ဟောတိ…ပေ… ဝေဒနာဋ္ဋော ဟောတိ…ပေ… အာပတ္တိယာ အဒဿနေ၊ ဥက္ခိပိယျတိ…ပေ… အာပတ္တိယာ အပ္ပဋိကမ္မေ၊ ဥက္ခိပိယျတိ…ပေ… ပါပိကာယ ဒိဋ္ဌိယာ၊ အပ္ပဋိနိဿဂ္ဂေ၊ ဥက္ခိပိယျတိ။ ဥက္ခိတ္တကဿ၊ ဘိက္ခဝေ၊ မာနတ္တစရိယာ န ရုဟတိ။ သော စေ ပုန ဩသာရိယျတိ၊ တဿ တဒေဝ ပုရိမံ ပရိဝါသဒါနံ။ ယော ပရိဝါသော ဒိန္နော သုဒိန္နော၊ ယော ပုရိဝုတ္ထော သုပရိဝုတ္ထော၊ ယံ မာနတ္တံ ဒိန္နံ သုဒိန္နံ၊ ယံ မာနတ္တံ စိဏ္ဏံ သုစိဏ္ဏံ၊ အဝသေသံ စရိတဗ္ဗံ။

၁၆၄။ ‘‘ဣဓ ပန၊ ဘိက္ခဝေ၊ ဘိက္ခု အဗ္ဘာနာရဟော ဝိဗ္ဘမတိ။ ဝိဗ္ဘန္တကဿ၊ ဘိက္ခဝေ၊ အဗ္ဘာနံ န ရုဟတိ။ သော စေ ပုန ဥပသမ္ပဇ္ဇတိ ¶ ၊ တဿ တဒေဝ ပုရိမံ ပရိဝါသဒါနံ။ ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ ယံ မာနတ္တံ ဒိန္နံ သုဒိန္နံ၊ ယံ မာနတ္တံ စိဏ္ဏံ သုစိဏ္ဏံ။ သော ဘိက္ခု အဗ္ဘေတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု အဗ္ဘာနာရဟော သာမဏေရော ဟောတိ…ပေ… ဥမ္မတ္တကော ဟောတိ…ပေ…

ခိတ္တစိတ္တော ဟောတိ…ပေ… ဝေဒနာဋ္ဋော ဟောတိ…ပေ… အာပတ္တိယာ အဒဿနေ၊ ဥက္ခိပိယျတိ…ပေ… အာပတ္တိယာ အပ္ပဋိကမ္မေ၊ ဥက္ခိပိယျတိ…ပေ… ပါပိကာယ ဒိဋ္ဌိယာ၊ အပ္ပဋိနိဿဂ္ဂေ၊ ဥက္ခိပိယျတိ။ ဥက္ခိတ္တကဿ၊ ဘိက္ခဝေ၊ အဗ္ဘာနံ ¶ န ရုဟတိ။ သော စေ ပုန ဩသာရိယျတိ၊ တဿ တဒေဝ ပုရိမံ ပရိဝါသဒါနံ။ ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ ယံ မာနတ္တံ ဒိန္နံ သုဒိန္နံ၊ ယံ မာနတ္တံ စိဏ္ဏံ သုစိဏ္ဏံ။ သော ဘိက္ခု အဗ္ဘေတဗ္ဗော။

စတ္တာလီသကံ သမတ္တံ။

၄။ ဆတ္တိံသကံ

၁၆၅။ ‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာ [ပရိမာဏာယော (သီ။ သျာ။)] အပ္ပဋိစ္ဆန္နာယော။ သော ဘိက္ခု မူလာယ ပဋိကဿိတဗ္ဗော။

‘‘ဣဓ ¶ ¶ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာ ပဋိစ္ဆန္နာယော။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ¶ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာ ပဋိစ္ဆန္နာယောပိ အပ္ပဋိစ္ဆန္နာယောပိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ အပရိမာဏာ [အပရိမာဏာယော (သီ။ သျာ။)] အပ္ပဋိစ္ဆန္နာယော…ပေ… အပရိမာဏာ ပဋိစ္ဆန္နာယော…ပေ… အပရိမာဏာ ပဋိစ္ဆန္နာယောပိ အပ္ပဋိစ္ဆန္နာယောပိ…ပေ… ပရိမာဏာယောပိ အပရိမာဏာယောပိ အပ္ပဋိစ္ဆန္နာယော…ပေ… ပရိမာဏာယောပိ အပရိမာဏာယောပိ ပဋိစ္ဆန္နာယော…ပေ… ¶ ပရိမာဏာယောပိ အပရိမာဏာယောပိ ပဋိစ္ဆန္နာယောပိ အပ္ပဋိစ္ဆန္နာယောပိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု မာနတ္တာရဟော…ပေ… မာနတ္တံ စရန္တော…ပေ… (ယထာပရိဝါသံ တထာ ဝိတ္ထာရေတဗ္ဗံ) အဗ္ဘာနာရဟော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာ အပ္ပဋိစ္ဆန္နာယော…ပေ… ပရိမာဏာ ပဋိစ္ဆန္နာယော…ပေ… ¶ ပရိမာဏာ ပဋိစ္ဆန္နာယောပိ အပ္ပဋိစ္ဆန္နာယောပိ…ပေ… အပရိမာဏာ အပ္ပဋိစ္ဆန္နာယော…ပေ… အပရိမာဏာ ပဋိစ္ဆန္နာယော…ပေ… အပရိမာဏာ ပဋိစ္ဆန္နာယောပိ အပ္ပဋိစ္ဆန္နာယောပိ…ပေ… ပရိမာဏာယောပိ အပရိမာဏာယောပိ အပ္ပဋိစ္ဆန္နာယော…ပေ… ¶ ပရိမာဏာယောပိ အပရိမာဏာယောပိ ပဋိစ္ဆန္နာယော…ပေ… ပရိမာဏာယောပိ အပရိမာဏာယောပိ ပဋိစ္ဆန္နာယောပိ အပ္ပဋိစ္ဆန္နာယောပိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

ဆတ္တိံသကံ သမတ္တံ။

၅။ မာနတ္တသတကံ

၁၆၆။ ‘‘ဣဓ ¶ ¶ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိတွာ အပ္ပဋိစ္ဆာဒေတွာ ဝိဗ္ဘမတိ။ သော ပုန [သော စေ ပုန (က။)] ဥပသမ္ပန္နော တာ အာပတ္တိယော နစ္ဆာဒေတိ။ တဿ၊ ဘိက္ခဝေ၊ ဘိက္ခုနော မာနတ္တံ ဒါတဗ္ဗံ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ ¶ သင်္ဃာဒိသေသာ အာပတ္တိယော အာပဇ္ဇိတွာ အပ္ပဋိစ္ဆာဒေတွာ ဝိဗ္ဘမတိ။ သော ပုန ဥပသမ္ပန္နော တာ အာပတ္တိယော ဆာဒေတိ။ တဿ၊ ဘိက္ခဝေ၊ ဘိက္ခုနော ပစ္ဆိမသ္မိံ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိတွာ ပဋိစ္ဆာဒေတွာ ဝိဗ္ဘမတိ။ သော ပုန ဥပသမ္ပန္နော တာ အာပတ္တိယော နစ္ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိံ အာပတ္တိက္ခန္ဓေ ¶ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိတွာ ပဋိစ္ဆာဒေတွာ ဝိဗ္ဘမတိ။ သော ပုန ဥပသမ္ပန္နော တာ အာပတ္တိယော ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိဉ္စ ပစ္ဆိမသ္မိဉ္စ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

၁၆၇။ ‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ တဿ ဟောန္တိ အာပတ္တိယော ပဋိစ္ဆန္နာယောပိ အပ္ပဋိစ္ဆန္နာယောပိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ ဆာဒေသိ တာ အာပတ္တိယော ပစ္ဆာ နစ္ဆာဒေတိ၊ ယာ အာပတ္တိယော ပုဗ္ဗေ နစ္ဆာဒေသိ တာ အာပတ္တိယော ပစ္ဆာ နစ္ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိံ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ တဿ ဟောန္တိ အာပတ္တိယော ပဋိစ္ဆန္နာယောပိ အပ္ပဋိစ္ဆန္နာယောပိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ ဆာဒေသိ တာ အာပတ္တိယော ပစ္ဆာ နစ္ဆာဒေတိ၊ ယာ အာပတ္တိယော ပုဗ္ဗေ နစ္ဆာဒေသိ တာ အာပတ္တိယော ပစ္ဆာ ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိဉ္စ ပစ္ဆိမသ္မိဉ္စ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

‘‘ဣဓ ¶ ¶ ¶ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ တဿ ဟောန္တိ အာပတ္တိယော ပဋိစ္ဆန္နာယောပိ အပ္ပဋိစ္ဆန္နာယောပိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ ဆာဒေသိ တာ အာပတ္တိယော ပစ္ဆာ ဆာဒေတိ၊ ယာ အာပတ္တိယော ပုဗ္ဗေ နစ္ဆာဒေသိ တာ အာပတ္တိယော ပစ္ဆာ နစ္ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိဉ္စ ပစ္ဆိမသ္မိဉ္စ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ တဿ ဟောန္တိ အာပတ္တိယော ပဋိစ္ဆန္နာယောပိ အပ္ပဋိစ္ဆန္နာယောပိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ ဆာဒေသိ တာ အာပတ္တိယော ပစ္ဆာ ဆာဒေတိ၊ ယာ အာပတ္တိယော ပုဗ္ဗေ နစ္ဆာဒေသိ တာ အာပတ္တိယော ပစ္ဆာ ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိဉ္စ ပစ္ဆိမသ္မိဉ္စ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

၁၆၈။ ‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာ အာပတ္တိယော ဇာနာတိ၊ ဧကစ္စာ အာပတ္တိယော န ဇာနာတိ။ ယာ အာပတ္တိယော ဇာနာတိ တာ အာပတ္တိယော ဆာဒေတိ။ ယာ အာပတ္တိယော န ဇာနာတိ ¶ တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ ဇာနိတွာ ဆာဒေသိ တာ အာပတ္တိယော ပစ္ဆာ ဇာနိတွာ နစ္ဆာဒေတိ၊ ယာ အာပတ္တိယော ပုဗ္ဗေ ¶ အဇာနိတွာ နစ္ဆာဒေသိ တာ အာပတ္တိယော ပစ္ဆာ ဇာနိတွာ နစ္ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိံ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာ အာပတ္တိယော ဇာနာတိ၊ ဧကစ္စာ အာပတ္တိယော န ဇာနာတိ။ ယာ အာပတ္တိယော ဇာနာတိ တာ အာပတ္တိယော ဆာဒေတိ။ ယာ အာပတ္တိယော န ဇာနာတိ တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ ဇာနိတွာ ဆာဒေသိ တာ အာပတ္တိယော ပစ္ဆာ ဇာနိတွာ နစ္ဆာဒေတိ၊ ယာ အာပတ္တိယော ပုဗ္ဗေ အဇာနိတွာ နစ္ဆာဒေသိ တာ အာပတ္တိယော ပစ္ဆာ ဇာနိတွာ ဆာဒေတိ။ တဿ ¶ ၊ ဘိက္ခဝေ၊ ဘိက္ခုနော ပုရိမသ္မိဉ္စ ပစ္ဆိမသ္မိဉ္စ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာ အာပတ္တိယော ဇာနာတိ၊ ဧကစ္စာ အာပတ္တိယော န ဇာနာတိ။ ယာ အာပတ္တိယော ဇာနာတိ တာ အာပတ္တိယော ¶ ဆာဒေတိ။ ယာ အာပတ္တိယော န ဇာနာတိ တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ ဇာနိတွာ ဆာဒေသိ တာ အာပတ္တိယော ပစ္ဆာ ဇာနိတွာ ဆာဒေတိ၊ ယာ အာပတ္တိယော ပုဗ္ဗေ အဇာနိတွာ နစ္ဆာဒေသိ တာ အာပတ္တိယော ပစ္ဆာ ဇာနိတွာ နစ္ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိဉ္စ ပစ္ဆိမသ္မိဉ္စ အာပတ္တိက္ခန္ဓေ ¶ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာ အာပတ္တိယော ဇာနာတိ၊ ဧကစ္စာ အာပတ္တိယော န ဇာနာတိ။ ယာ အာပတ္တိယော ဇာနာတိ တာ အာပတ္တိယော ဆာဒေတိ၊ ယာ အာပတ္တိယော န ဇာနာတိ တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ ဇာနိတွာ ဆာဒေသိ တာ အာပတ္တိယော ပစ္ဆာ ဇာနိတွာ ဆာဒေတိ၊ ယာ အာပတ္တိယော ပုဗ္ဗေ အဇာနိတွာ နစ္ဆာဒေသိ တာ အာပတ္တိယော ပစ္ဆာ ဇာနိတွာ ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိဉ္စ ပစ္ဆိမသ္မိဉ္စ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

၁၆၉။ ‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာ အာပတ္တိယော သရတိ၊ ဧကစ္စာ အာပတ္တိယော နဿရတိ။ ယာ အာပတ္တိယော သရတိ တာ အာပတ္တိယော ဆာဒေတိ၊ ယာ အာပတ္တိယော နဿရတိ တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ သရိတွာ ဆာဒေသိ တာ အာပတ္တိယော ပစ္ဆာ သရိတွာ နစ္ဆာဒေတိ၊ ယာ အာပတ္တိယော ပုဗ္ဗေ အဿရိတွာ နစ္ဆာဒေသိ တာ အာပတ္တိယော ပစ္ဆာ သရိတွာ နစ္ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိံ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ¶ ။ ဧကစ္စာ အာပတ္တိယော သရတိ၊ ဧကစ္စာ အာပတ္တိယော နဿရတိ။ ယာ ¶ အာပတ္တိယော သရတိ တာ အာပတ္တိယော ဆာဒေတိ၊ ယာ အာပတ္တိယော နဿရတိ တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ သရိတွာ ဆာဒေသိ တာ အာပတ္တိယော ပစ္ဆာ သရိတွာ နစ္ဆာဒေတိ၊ ယာ အာပတ္တိယော ပုဗ္ဗေ အဿရိတွာ နစ္ဆာဒေသိ တာ အာပတ္တိယော ပစ္ဆာ သရိတွာ ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိဉ္စ ပစ္ဆိမသ္မိဉ္စ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

‘‘ဣဓ ¶ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာ အာပတ္တိယော သရတိ၊ ဧကစ္စာ အာပတ္တိယော နဿရတိ။ ယာ အာပတ္တိယော သရတိ တာ အာပတ္တိယော ဆာဒေတိ၊ ယာ အာပတ္တိယော နဿရတိ တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ သရိတွာ ဆာဒေသိ တာ အာပတ္တိယော ပစ္ဆာ သရိတွာ ဆာဒေတိ၊ ယာ အာပတ္တိယော ပုဗ္ဗေ အဿရိတွာ နစ္ဆာဒေသိ တာ အာပတ္တိယော ပစ္ဆာ သရိတွာ နစ္ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိဉ္စ ပစ္ဆိမသ္မိဉ္စ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာ အာပတ္တိယော သရတိ၊ ဧကစ္စာ အာပတ္တိယော နဿရတိ။ ယာ အာပတ္တိယော သရတိ တာ အာပတ္တိယော ဆာဒေတိ၊ ယာ အာပတ္တိယော ¶ နဿရတိ တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ သရိတွာ ဆာဒေသိ တာ အာပတ္တိယော ပစ္ဆာ သရိတွာ ဆာဒေတိ၊ ယာ အာပတ္တိယော ပုဗ္ဗေ အဿရိတွာ နစ္ဆာဒေသိ တာ အာပတ္တိယော ပစ္ဆာ သရိတွာ ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိဉ္စ ပစ္ဆိမသ္မိဉ္စ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

၁၇၀။ ‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာသု အာပတ္တီသု နိဗ္ဗေမတိကော၊ ဧကစ္စာသု အာပတ္တီသု ဝေမတိကော။ ယာသု အာပတ္တီသု နိဗ္ဗေမတိကော တာ အာပတ္တိယော ဆာဒေတိ၊ ယာသု အာပတ္တီသု ဝေမတိကော တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ၊ ယာ အာပတ္တိယော ¶ ပုဗ္ဗေ ဝေမတိကော နစ္ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိံ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာသု အာပတ္တီသု နိဗ္ဗေမတိကော၊ ဧကစ္စာသု အာပတ္တီသု ဝေမတိကော။ ယာသု အာပတ္တီသု နိဗ္ဗေမတိကော တာ အာပတ္တိယော ဆာဒေတိ၊ ယာသု အာပတ္တီသု ဝေမတိကော တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ ¶ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ တာ အာပတ္တိယော ပစ္ဆာ ¶ နိဗ္ဗေမတိကော ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိဉ္စ ပစ္ဆိမသ္မိဉ္စ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာသု အာပတ္တီသု နိဗ္ဗေမတိကော၊ ဧကစ္စာသု အာပတ္တီသု ဝေမတိကော။ ယာသု အာပတ္တီသု နိဗ္ဗေမတိကော တာ အာပတ္တိယော ဆာဒေတိ၊ ယာသု အာပတ္တီသု ဝေမတိကော တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိဉ္စ ပစ္ဆိမသ္မိဉ္စ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာသု အာပတ္တီသု နိဗ္ဗေမတိကော၊ ဧကစ္စာသု အာပတ္တီသု ဝေမတိကော။ ယာသု အာပတ္တီသု နိဗ္ဗေမတိကော တာ အာပတ္တိယော ဆာဒေတိ၊ ယာသု အာပတ္တီသု ဝေမတိကော တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ နိဗ္ဗေမတိကော ¶ ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိဉ္စ ပစ္ဆိမသ္မိဉ္စ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

၁၇၁။ ‘‘ဣဓ ¶ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိတွာ အပ္ပဋိစ္ဆာဒေတွာ သာမဏေရော ဟောတိ…ပေ… ဥမ္မတ္တကော ဟောတိ…ပေ… ခိတ္တစိတ္တော ဟောတိ…ပေ… (ယထာ ဟေဋ္ဌာ တထာ ဝိတ္ထာရေတဗ္ဗံ) ဝေဒနာဋ္ဋော ဟောတိ…ပေ… တဿ ဟောန္တိ အာပတ္တိယော ပဋိစ္ဆန္နာယောပိ အပ္ပဋိစ္ဆန္နာယောပိ…ပေ… ဧကစ္စာ အာပတ္တိယော ဇာနာတိ၊ ဧကစ္စာ အာပတ္တိယော န ဇာနာတိ…ပေ… ဧကစ္စာ အာပတ္တိယော သရတိ၊ ဧကစ္စာ ¶ အာပတ္တိယော နဿရတိ…ပေ… ဧကစ္စာသု အာပတ္တီသု နိဗ္ဗေမတိကော၊ ဧကစ္စာသု အာပတ္တီသု ဝေမတိကော။ ယာသု အာပတ္တီသု နိဗ္ဗေမတိကော တာ အာပတ္တိယော ဆာဒေတိ၊ ယာသု အာပတ္တီသု ဝေမတိကော တာ အာပတ္တိယော နစ္ဆာဒေတိ။ သော ဝေဒနာဋ္ဋော ဟောတိ။ သော ပုန အဝေဒနာဋ္ဋော ဟုတွာ ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ ¶ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ…ပေ… ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ၊ ယာ အာပတ္တိယော ပုဗ္ဗေ ¶ ဝေမတိကော နစ္ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ…ပေ… ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ…ပေ… ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ။ တဿ၊ ဘိက္ခဝေ၊ ဘိက္ခုနော ပုရိမသ္မိဉ္စ ပစ္ဆိမသ္မိဉ္စ အာပတ္တိက္ခန္ဓေ ယထာပဋိစ္ဆန္နေ ပရိဝါသံ ဒတွာ မာနတ္တံ ဒါတဗ္ဗံ။

မာနတ္တသတံ နိဋ္ဌိတံ။

၆။ သမူလာယသမောဓာနပရိဝါသစတုဿတံ

၁၇၂။ ‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိတွာ အပ္ပဋိစ္ဆာဒေတွာ ဝိဗ္ဘမတိ။ သော ¶ ပုန ဥပသမ္ပန္နော တာ အာပတ္တိယော နစ္ဆာဒေတိ။ သော ဘိက္ခု မူလာယ ပဋိကဿိတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိတွာ အပ္ပဋိစ္ဆာဒေတွာ ဝိဗ္ဘမတိ။ သော ပုန ဥပသမ္ပန္နော တာ အာပတ္တိယော ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ¶ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိတွာ ပဋိစ္ဆာဒေတွာ ဝိဗ္ဘမတိ။ သော ပုန ဥပသမ္ပန္နော တာ အာပတ္တိယော နစ္ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိတွာ ပဋိစ္ဆာဒေတွာ ဝိဗ္ဘမတိ။ သော ပုန ဥပသမ္ပန္နော တာ အာပတ္တိယော ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

၁၇၃။ ‘‘ဣဓ ¶ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ တဿ ဟောန္တိ အာပတ္တိယော ¶ ပဋိစ္ဆန္နာယောပိ အပ္ပဋိစ္ဆန္နာယောပိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ ဆာဒေသိ တာ အာပတ္တိယော ပစ္ဆာ နစ္ဆာဒေတိ၊ ယာ အာပတ္တိယော ပုဗ္ဗေ နစ္ဆာဒေသိ တာ အာပတ္တိယော ပစ္ဆာ နစ္ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ တဿ ဟောန္တိ အာပတ္တိယော ပဋိစ္ဆန္နာယောပိ ¶ အပ္ပဋိစ္ဆန္နာယောပိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ ဆာဒေသိ တာ အာပတ္တိယော ပစ္ဆာ နစ္ဆာဒေတိ၊ ယာ ¶ အာပတ္တိယော ပုဗ္ဗေ နစ္ဆာဒေသိ တာ အာပတ္တိယော ပစ္ဆာ ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ တဿ ဟောန္တိ အာပတ္တိယော ပဋိစ္ဆန္နာယောပိ အပ္ပဋိစ္ဆန္နာယောပိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ ဆာဒေသိ တာ အာပတ္တိယော ပစ္ဆာ ဆာဒေတိ၊ ယာ အာပတ္တိယော ပုဗ္ဗေ နစ္ဆာဒေသိ တာ အာပတ္တိယော ပစ္ဆာ နစ္ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ တဿ ဟောန္တိ အာပတ္တိယော ပဋိစ္ဆန္နာယောပိ အပ္ပဋိစ္ဆန္နာယောပိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ ဆာဒေသိ တာ အာပတ္တိယော ပစ္ဆာ ဆာဒေတိ၊ ယာ အာပတ္တိယော ပုဗ္ဗေ နစ္ဆာဒေသိ တာ အာပတ္တိယော ပစ္ဆာ ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ ¶ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

၁၇၄။ ‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာ အာပတ္တိယော ဇာနာတိ၊ ဧကစ္စာ အာပတ္တိယော န ဇာနာတိ။ ယာ အာပတ္တိယော ဇာနာတိ တာ အာပတ္တိယော ဆာဒေတိ၊ ယာ အာပတ္တိယော န ဇာနာတိ တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ ဇာနိတွာ ဆာဒေသိ တာ အာပတ္တိယော ¶ ပစ္ဆာ ဇာနိတွာ နစ္ဆာဒေတိ၊ ယာ အာပတ္တိယော ပုဗ္ဗေ အဇာနိတွာ နစ္ဆာဒေသိ တာ အာပတ္တိယော ပစ္ဆာ ဇာနိတွာ နစ္ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာ အာပတ္တိယော ဇာနာတိ၊ ဧကစ္စာ အာပတ္တိယော ¶ န ဇာနာတိ။ ယာ အာပတ္တိယော ဇာနာတိ တာ အာပတ္တိယော ဆာဒေတိ၊ ယာ အာပတ္တိယော န ဇာနာတိ တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ ဇာနိတွာ ဆာဒေသိ တာ အာပတ္တိယော ပစ္ဆာ ဇာနိတွာ နစ္ဆာဒေတိ၊ ယာ အာပတ္တိယော ပုဗ္ဗေ အဇာနိတွာ နစ္ဆာဒေသိ တာ အာပတ္တိယော ပစ္ဆာ ဇာနိတွာ ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ ¶ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာ အာပတ္တိယော ဇာနာတိ၊ ဧကစ္စာ အာပတ္တိယော န ဇာနာတိ။ ယာ အာပတ္တိယော ဇာနာတိ တာ အာပတ္တိယော ဆာဒေတိ၊ ယာ အာပတ္တိယော န ဇာနာတိ တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ ဇာနိတွာ ဆာဒေသိ တာ အာပတ္တိယော ပစ္ဆာ ဇာနိတွာ ဆာဒေတိ၊ ယာ အာပတ္တိယော ပုဗ္ဗေ အဇာနိတွာ နစ္ဆာဒေသိ တာ အာပတ္တိယော ပစ္ဆာ ဇာနိတွာ နစ္ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာ အာပတ္တိယော ဇာနာတိ၊ ဧကစ္စာ အာပတ္တိယော န ဇာနာတိ။ ယာ အာပတ္တိယော ဇာနာတိ တာ အာပတ္တိယော ဆာဒေတိ၊ ယာ အာပတ္တိယော န ဇာနာတိ တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ ဇာနိတွာ ဆာဒေသိ တာ အာပတ္တိယော ပစ္ဆာ ဇာနိတွာ ဆာဒေတိ၊ ယာ အာပတ္တိယော ပုဗ္ဗေ အဇာနိတွာ နစ္ဆာဒေသိ တာ အာပတ္တိယော ပစ္ဆာ ဇာနိတွာ ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ ¶ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

၁၇၅။ ‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာ အာပတ္တိယော သရတိ၊ ဧကစ္စာ အာပတ္တိယော နဿရတိ။ ယာ အာပတ္တိယော ¶ သရတိ တာ အာပတ္တိယော ¶ ဆာဒေတိ၊ ယာ အာပတ္တိယော နဿရတိ တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ သရိတွာ ဆာဒေသိ တာ အာပတ္တိယော ပစ္ဆာ သရိတွာ နစ္ဆာဒေတိ၊ ယာ အာပတ္တိယော ပုဗ္ဗေ အဿရိတွာ နစ္ဆာဒေသိ တာ အာပတ္တိယော ပစ္ဆာ သရိတွာ နစ္ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာ အာပတ္တိယော သရတိ၊ ဧကစ္စာ အာပတ္တိယော နဿရတိ။ ယာ အာပတ္တိယော သရတိ တာ အာပတ္တိယော ဆာဒေတိ၊ ယာ အာပတ္တိယော နဿရတိ တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ သရိတွာ ဆာဒေသိ တာ အာပတ္တိယော ပစ္ဆာ သရိတွာ နစ္ဆာဒေတိ၊ ယာ အာပတ္တိယော ပုဗ္ဗေ အဿရိတွာ နစ္ဆာဒေသိ တာ အာပတ္တိယော ပစ္ဆာ သရိတွာ ဆာဒေတိ။ သော ဘိက္ခု မူလာယ ပဋိကဿိတဗ္ဗော ¶ ။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာ အာပတ္တိယော သရတိ၊ ဧကစ္စာ အာပတ္တိယော နဿရတိ။ ယာ အာပတ္တိယော သရတိ တာ အာပတ္တိယော ဆာဒေတိ၊ ယာ အာပတ္တိယော နဿရတိ တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ သရိတွာ ဆာဒေသိ တာ အာပတ္တိယော ပစ္ဆာ သရိတွာ ဆာဒေတိ၊ ယာ အာပတ္တိယော ပုဗ္ဗေ အဿရိတွာ နစ္ဆာဒေသိ တာ အာပတ္တိယော ပစ္ဆာ သရိတွာ နစ္ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာ အာပတ္တိယော သရတိ၊ ဧကစ္စာ အာပတ္တိယော နဿရတိ။ ယာ အာပတ္တိယော သရတိ တာ အာပတ္တိယော ဆာဒေတိ၊ ယာ အာပတ္တိယော နဿရတိ တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ သရိတွာ ဆာဒေသိ ¶ တာ အာပတ္တိယော ပစ္ဆာ သရိတွာ ဆာဒေတိ၊ ယာ အာပတ္တိယော ပုဗ္ဗေ အဿရိတွာ နစ္ဆာဒေသိ တာ အာပတ္တိယော ပစ္ဆာ သရိတွာ ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ ¶ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

၁၇၆။ ‘‘ဣဓ ¶ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာသု အာပတ္တီသု နိဗ္ဗေမတိကော၊ ဧကစ္စာသု အာပတ္တီသု ဝေမတိကော။ ယာသု အာပတ္တီသု နိဗ္ဗေမတိကော တာ အာပတ္တိယော ဆာဒေတိ၊ ယာသု အာပတ္တီသု ဝေမတိကော တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာသု အာပတ္တီသု နိဗ္ဗေမတိကော၊ ဧကစ္စာသု အာပတ္တီသု ဝေမတိကော။ ယာသု အာပတ္တီသု နိဗ္ဗေမတိကော တာ အာပတ္တိယော ဆာဒေတိ၊ ယာသု အာပတ္တီသု ဝေမတိကော တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ။ သော ဘိက္ခု မူလာယ ပဋိကဿိတဗ္ဗော ¶ ။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာသု အာပတ္တီသု နိဗ္ဗေမတိကော၊ ဧကစ္စာသု အာပတ္တီသု ဝေမတိကော။ ယာသု အာပတ္တီသု နိဗ္ဗေမတိကော တာ အာပတ္တိယော ဆာဒေတိ၊ ယာသု အာပတ္တီသု ဝေမတိကော တာ အာပတ္တိယော နစ္ဆာဒေတိ။ သော ဝိဗ္ဘမိတွာ ပုန ဥပသမ္ပန္နော ယာ အာပတ္တိယော ¶ ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ။ ဧကစ္စာသု အာပတ္တီသု နိဗ္ဗေမတိကော၊ ဧကစ္စာသု အာပတ္တီသု ဝေမတိကော။ ယာသု အာပတ္တီသု နိဗ္ဗေမတိကော တာ အာပတ္တိယော ဆာဒေတိ၊ ယာသု အာပတ္တီသု ဝေမတိကော တာ အာပတ္တိယော နစ္ဆာဒေတိ။ သော ဝိဗ္ဘမိတွာ [သော ဘိက္ခု ဝိဗ္ဘမိတွာ (က။)] ပုန ဥပသမ္ပန္နော ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ တာ အာပတ္တိယော ¶ ပစ္ဆာ နိဗ္ဗေမတိကော ဆာဒေတိ။ သော ဘိက္ခု မူလာယ ပဋိကဿိတဗ္ဗော ¶ ။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

၁၇၇။ ‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိတွာ အပ္ပဋိစ္ဆာဒေတွာ သာမဏေရော ဟောတိ…ပေ… ဥမ္မတ္တကော ဟောတိ…ပေ… ခိတ္တစိတ္တော ဟောတိ…ပေ… ဝေဒနာဋ္ဋော ဟောတိ…ပေ… တဿ ဟောန္တိ အာပတ္တိယော ပဋိစ္ဆန္နာယောပိ အပ္ပဋိစ္ဆန္နာယောပိ (ယထာ ဟေဋ္ဌာ ဝိတ္ထာရိတံ တထာ ဝိတ္ထာရေတဗ္ဗံ)…ပေ… ဧကစ္စာ အာပတ္တိယော ဇာနာတိ၊ ဧကစ္စာ အာပတ္တိယော န ဇာနာတိ…ပေ… ဧကစ္စာ အာပတ္တိယော သရတိ၊ ဧကစ္စာ အာပတ္တိယော နဿရတိ…ပေ… ဧကစ္စာသု အာပတ္တီသု နိဗ္ဗေမတိကော၊ ဧကစ္စာသု အာပတ္တီသု ဝေမတိကော။ ယာသု အာပတ္တီသု နိဗ္ဗေမတိကော တာ အာပတ္တိယော ဆာဒေတိ၊ ယာသု အာပတ္တီသု ဝေမတိကော တာ အာပတ္တိယော နစ္ဆာဒေတိ။ သော ဝေဒနာဋ္ဋော ဟောတိ။ သော ပုန အဝေဒနာဋ္ဋော ဟုတွာ ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ…ပေ… ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ ¶ ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ…ပေ… ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ ¶ ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ…ပေ… ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

၁၇၈။ ‘‘ဣဓ ပန၊ ဘိက္ခဝေ၊ ဘိက္ခု မာနတ္တာရဟော…ပေ… မာနတ္တံ စရန္တော…ပေ… အဗ္ဘာနာရဟော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိတွာ အပ္ပဋိစ္ဆာဒေတွာ ဝိဗ္ဘမတိ…ပေ… (မာနတ္တာရဟော စ မာနတ္တစာရီ စ အဗ္ဘာနာရဟော စ ယထာ ပရိဝါသော ဝိတ္ထာရိတော တထာ ဝိတ္ထာရေတဗ္ဗော)။

၁၇၉။ ‘‘ဣဓ ပန၊ ဘိက္ခဝေ၊ ဘိက္ခု အဗ္ဘာနာရဟော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိတွာ အပ္ပဋိစ္ဆာဒေတွာ သာမဏေရော ဟောတိ…ပေ… ဥမ္မတ္တကော ဟောတိ…ပေ… ခိတ္တစိတ္တော ဟောတိ…ပေ… ဝေဒနာဋ္ဋော ဟောတိ…ပေ… တဿ ဟောန္တိ အာပတ္တိယော ပဋိစ္ဆန္နာယောပိ အပ္ပဋိစ္ဆန္နာယောပိ ¶ …ပေ… ဧကစ္စာ အာပတ္တိယော ဇာနာတိ၊ ဧကစ္စာ အာပတ္တိယော န ဇာနာတိ…ပေ… ဧကစ္စာ အာပတ္တိယော သရတိ၊ ဧကစ္စာ အာပတ္တိယော နဿရတိ…ပေ… ဧကစ္စာသု အာပတ္တီသု နိဗ္ဗေမတိကော၊ ဧကစ္စာသု ¶ အာပတ္တီသု ဝေမတိကော။ ယာသု အာပတ္တီသု နိဗ္ဗေမတိကော တာ အာပတ္တိယော ဆာဒေတိ၊ ယာသု အာပတ္တီသု ဝေမတိကော တာ အာပတ္တိယော နစ္ဆာဒေတိ။ သော ဝေဒနာဋ္ဋော ဟောတိ။ သော ပုန အဝေဒနာဋ္ဋော ဟုတွာ ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ…ပေ… ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ ¶ တာ အာပတ္တိယော ပစ္ဆာ နိဗ္ဗေမတိကော ဆာဒေတိ…ပေ… ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ တာ အာပတ္တိယော ပစ္ဆာ နိဗ္ဗေမတိကော နစ္ဆာဒေတိ…ပေ… ယာ အာပတ္တိယော ပုဗ္ဗေ နိဗ္ဗေမတိကော ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ၊ ယာ အာပတ္တိယော ပုဗ္ဗေ ဝေမတိကော နစ္ဆာဒေသိ တာ အာပတ္တိယော ပစ္ဆာ နိဗ္ဗေမတိကော ဆာဒေတိ။ သော ဘိက္ခု မူလာယ ပဋိကဿိတဗ္ဗော။ ယထာပဋိစ္ဆန္နာနဉ္စဿ အာပတ္တီနံ ¶ ပုရိမာယ အာပတ္တိယာ သမောဓာနပရိဝါသော ဒါတဗ္ဗော။

သမူလာယသမောဓာနပရိဝါသစတုဿတံ နိဋ္ဌိတံ။

၇။ ပရိမာဏာဒိဝါရအဋ္ဌကံ

၁၈၀။ ‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိတွာ ပရိမာဏာ အပ္ပဋိစ္ဆာဒေတွာ…ပေ… အပရိမာဏာ အပ္ပဋိစ္ဆာဒေတွာ…ပေ… ဧကနာမာ အပ္ပဋိစ္ဆာဒေတွာ…ပေ… ¶ နာနာနာမာ အပ္ပဋိစ္ဆာဒေတွာ…ပေ… သဘာဂါ အပ္ပဋိစ္ဆာဒေတွာ…ပေ… ဝိသဘာဂါ အပ္ပဋိစ္ဆာဒေတွာ…ပေ… ဝဝတ္ထိတာ အပ္ပဋိစ္ဆာဒေတွာ…ပေ… သမ္ဘိန္နာ အပ္ပဋိစ္ဆာဒေတွာ ဝိဗ္ဘမတိ…ပေ… (ယထာ ဟေဋ္ဌာ တထာ ဝိတ္ထာရေတဗ္ဗံ)။

ပရိမာဏာဒိဝါရအဋ္ဌကံ နိဋ္ဌိတံ။

၈။ ဒွေဘိက္ခုဝါရဧကာဒသကံ

၁၈၁။ ‘‘ဒွေ ¶ ဘိက္ခူ သင်္ဃာဒိသေသံ အာပန္နာ ဟောန္တိ။ တေ သင်္ဃာဒိသေသေ သင်္ဃာဒိသေသဒိဋ္ဌိနော ဟောန္တိ။ ဧကော ဆာဒေတိ၊ ဧကော နစ္ဆာဒေတိ။ ယော ဆာဒေတိ သော ဒုက္ကဋံ ဒေသာပေတဗ္ဗော။ ယထာပဋိစ္ဆန္နေ [ယထာပဋိစ္ဆန္နာနံ (သီ။)] စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ။

‘‘ဒွေ ¶ ဘိက္ခူ သင်္ဃာဒိသေသံ အာပန္နာ ဟောန္တိ။ တေ သင်္ဃာဒိသေသေ ဝေမတိကာ ဟောန္တိ။ ဧကော ဆာဒေတိ၊ ဧကော နစ္ဆာဒေတိ။ ယော ဆာဒေတိ သော ဒုက္ကဋံ ဒေသာပေတဗ္ဗော။ ယထာပဋိစ္ဆန္နေ စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ။

‘‘ဒွေ ဘိက္ခူ သင်္ဃာဒိသေသံ အာပန္နာ ဟောန္တိ။ တေ သင်္ဃာဒိသေသေ မိဿကဒိဋ္ဌိနော ဟောန္တိ။ ဧကော ဆာဒေတိ၊ ဧကော နစ္ဆာဒေတိ။ ယော ဆာဒေတိ သော ဒုက္ကဋံ ဒေသာပေတဗ္ဗော။ ယထာပဋိစ္ဆန္နေ စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ။

‘‘ဒွေ ဘိက္ခူ မိဿကံ အာပန္နာ ဟောန္တိ။ တေ မိဿကေ သင်္ဃာဒိသေသဒိဋ္ဌိနော ဟောန္တိ။ ဧကော ဆာဒေတိ၊ ဧကော နစ္ဆာဒေတိ။ ယော ဆာဒေတိ သော ဒုက္ကဋံ ဒေသာပေတဗ္ဗော။ ယထာပဋိစ္ဆန္နေ စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ။

‘‘ဒွေ ¶ ဘိက္ခူ မိဿကံ အာပန္နာ ဟောန္တိ။ တေ မိဿကေ မိဿကဒိဋ္ဌိနော ဟောန္တိ။ ဧကော ဆာဒေတိ၊ ဧကော နစ္ဆာဒေတိ။ ယော ဆာဒေတိ သော ဒုက္ကဋံ ဒေသာပေတဗ္ဗော။ ယထာပဋိစ္ဆန္နေ စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ။

‘‘ဒွေ ဘိက္ခူ သုဒ္ဓကံ အာပန္နာ ဟောန္တိ။ တေ သုဒ္ဓကေ သင်္ဃာဒိသေသဒိဋ္ဌိနော ဟောန္တိ။ ဧကော ဆာဒေတိ၊ ဧကော နစ္ဆာဒေတိ။ ယော ဆာဒေတိ သော ဒုက္ကဋံ ဒေသာပေတဗ္ဗော။ ဥဘောပိ ယထာဓမ္မံ ကာရာပေတဗ္ဗာ။

‘‘ဒွေ ဘိက္ခူ သုဒ္ဓကံ အာပန္နာ ဟောန္တိ။ တေ သုဒ္ဓကေ သုဒ္ဓကဒိဋ္ဌိနော ဟောန္တိ။ ဧကော ဆာဒေတိ၊ ဧကော နစ္ဆာဒေတိ။ ယော ဆာဒေတိ သော ဒုက္ကဋံ ဒေသာပေတဗ္ဗော။ ဥဘောပိ ယထာဓမ္မံ ကာရာပေတဗ္ဗာ။

‘‘ဒွေ ¶ ဘိက္ခူ သင်္ဃာဒိသေသံ အာပန္နာ ဟောန္တိ။ တေ သင်္ဃာဒိသေသေ သင်္ဃာဒိသေသဒိဋ္ဌိနော ဟောန္တိ။ ဧကဿ ဟောတိ အာရောစေဿာမီတိ၊ ဧကဿ ဟောတိ န အာရောစေဿာမီတိ။ သော ပဌမမ္ပိ ¶ ယာမံ ဆာဒေတိ၊ ဒုတိယမ္ပိ ယာမံ ဆာဒေတိ၊ တတိယမ္ပိ ယာမံ ဆာဒေတိ – ဥဋ္ဌိတေ အရုဏေ ဆန္နာ ဟောတိ အာပတ္တိ။ ယော ဆာဒေတိ သော ဒုက္ကဋံ ဒေသာပေတဗ္ဗော။ ယထာပဋိစ္ဆန္နေ စဿ ပရိဝါသံ ဒတွာ ဥဘိန္နမ္ပိ ¶ မာနတ္တံ ဒါတဗ္ဗံ။

‘‘ဒွေ ¶ ဘိက္ခူ သင်္ဃာဒိသေသံ အာပန္နာ ဟောန္တိ။ တေ သင်္ဃာဒိသေသေ သင်္ဃာဒိသေသဒိဋ္ဌိနော ဟောန္တိ။ တေ ဂစ္ဆန္တိ အာရောစေဿာမာတိ။ ဧကဿ အန္တရာမဂ္ဂေ မက္ခဓမ္မော ဥပ္ပဇ္ဇတိ န အာရောစေဿာမီတိ။ သော ပဌမမ္ပိ ယာမံ ဆာဒေတိ၊ ဒုတိယမ္ပိ ယာမံ ဆာဒေတိ၊ တတိယမ္ပိ ယာမံ ဆာဒေတိ – ဥဋ္ဌိတေ အရုဏေ ဆန္နာ ဟောတိ အာပတ္တိ။ ယော ဆာဒေတိ သော ဒုက္ကဋံ ဒေသာပေတဗ္ဗော။ ယထာပဋိစ္ဆန္နေ စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ။

‘‘ဒွေ ဘိက္ခူ သင်္ဃာဒိသေသံ အာပန္နာ ဟောန္တိ။ တေ သင်္ဃာဒိသေသေ သင်္ဃာဒိသေသဒိဋ္ဌိနော ဟောန္တိ။ တေ ဥမ္မတ္တကာ ဟောန္တိ။ တေ ပစ္ဆာ အနုမ္မတ္တကာ ဟုတွာ ဧကော ဆာဒေတိ၊ ဧကော နစ္ဆာဒေတိ။ ယော ဆာဒေတိ သော ဒုက္ကဋံ ဒေသာပေတဗ္ဗော။ ယထာပဋိစ္ဆန္နေ စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ။

‘‘ဒွေ ဘိက္ခူ သင်္ဃာဒိသေသံ အာပန္နာ ဟောန္တိ။ တေ ပါတိမောက္ခေ ဥဒ္ဒိဿမာနေ ဧဝံ ဝဒန္တိ – ‘ဣဒါနေဝ ခေါ မယံ ဇာနာမ – အယမ္ပိ ကိရ ဓမ္မော သုတ္တာဂတော သုတ္တပရိယာပန္နော အနွဒ္ဓမာသံ ဥဒ္ဒေသံ အာဂစ္ဆတီ’တိ။ တေ သင်္ဃာဒိသေသေ သင်္ဃာဒိသေသဒိဋ္ဌိနော ဟောန္တိ။ ဧကော ဆာဒေတိ၊ ဧကော နစ္ဆာဒေတိ။ ယော ဆာဒေတိ သော ဒုက္ကဋံ ဒေသာပေတဗ္ဗော။ ယထာပဋိစ္ဆန္နေ စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ။

ဒွေဘိက္ခုဝါရဧကာဒသကံ နိဋ္ဌိတံ။

၉။ မူလာယအဝိသုဒ္ဓိနဝကံ

၁၈၂။ ‘‘ဣဓ ¶ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ၊ ဧကနာမမ္ပိ နာနာနာမမ္ပိ၊ သဘာဂမ္ပိ ဝိသဘာဂမ္ပိ၊ ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ သင်္ဃော တာသံ အာပတ္တီနံ ¶ သမောဓာနပရိဝါသံ ဒေတိ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာယော အပ္ပဋိစ္ဆန္နာယော။ သော သင်္ဃံ အန္တရာအာပတ္တီနံ မူလာယပဋိကဿနံ ယာစတိ။ တံ သင်္ဃော အန္တရာအာပတ္တီနံ မူလာယ ပဋိကဿတိ ¶ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ အဓမ္မေန မာနတ္တံ ဒေတိ၊ အဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု အဝိသုဒ္ဓါ တာဟိ အာပတ္တီဟိ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ၊ ဧကနာမမ္ပိ နာနာနာမမ္ပိ၊ သဘာဂမ္ပိ ဝိသဘာဂမ္ပိ၊ ဝဝတ္ထိတမ္ပိ ¶ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ သင်္ဃော တာသံ အာပတ္တီနံ သမောဓာနပရိဝါသံ ဒေတိ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာယော ပဋိစ္ဆန္နာယော။ သော သင်္ဃံ အန္တရာအာပတ္တီနံ မူလာယပဋိကဿနံ ယာစတိ။ တံ သင်္ဃော အန္တရာအာပတ္တီနံ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ အဓမ္မေန မာနတ္တံ ¶ ဒေတိ၊ အဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု အဝိသုဒ္ဓါ တာဟိ အာပတ္တီဟိ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ၊ ဧကနာမမ္ပိ နာနာနာမမ္ပိ၊ သဘာဂမ္ပိ ဝိသဘာဂမ္ပိ၊ ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ သင်္ဃော တာသံ အာပတ္တီနံ သမောဓာနပရိဝါသံ ဒေတိ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာယော ပဋိစ္ဆန္နာယောပိ အပ္ပဋိစ္ဆန္နာယောပိ။ သော သင်္ဃံ အန္တရာအာပတ္တီနံ မူလာယပဋိကဿနံ ယာစတိ။ တံ သင်္ဃော အန္တရာအာပတ္တီနံ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ အဓမ္မေန မာနတ္တံ ဒေတိ၊ အဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု အဝိသုဒ္ဓါ တာဟိ အာပတ္တီဟိ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ၊ ဧကနာမမ္ပိ နာနာနာမမ္ပိ၊ သဘာဂမ္ပိ ဝိသဘာဂမ္ပိ၊ ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ သင်္ဃော တာသံ အာပတ္တီနံ သမောဓာနပရိဝါသံ ဒေတိ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ အပရိမာဏာယော အပ္ပဋိစ္ဆန္နာယော…ပေ… အပရိမာဏာယော ပဋိစ္ဆန္နာယော…ပေ… အပရိမာဏာယော ပဋိစ္ဆန္နာယောပိ အပ္ပဋိစ္ဆန္နာယောပိ ¶ …ပေ… ပရိမာဏာယောပိ အပရိမာဏာယောပိ အပ္ပဋိစ္ဆန္နာယော ¶ ။ သော သင်္ဃံ အန္တရာအာပတ္တီနံ မူလာယပဋိကဿနံ ယာစတိ ¶ ။ တံ သင်္ဃော အန္တရာအာပတ္တီနံ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ အဓမ္မေန မာနတ္တံ ဒေတိ၊ အဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု အဝိသုဒ္ဓါ တာဟိ အာပတ္တီဟိ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ၊ ဧကနာမမ္ပိ နာနာနာမမ္ပိ၊ သဘာဂမ္ပိ ဝိသဘာဂမ္ပိ၊ ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ သင်္ဃော တာသံ အာပတ္တီနံ သမောဓာနပရိဝါသံ ဒေတိ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာယောပိ အပရိမာဏာယောပိ ပဋိစ္ဆန္နာယော။ သော သင်္ဃံ အန္တရာအာပတ္တီနံ မူလာယပဋိကဿနံ ယာစတိ။ တံ သင်္ဃော အန္တရာအာပတ္တီနံ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ အဓမ္မေန ¶ မာနတ္တံ ဒေတိ၊ အဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု အဝိသုဒ္ဓါ တာဟိ အာပတ္တီဟိ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ၊ ဧကနာမမ္ပိ နာနာနာမမ္ပိ၊ သဘာဂမ္ပိ ဝိသဘာဂမ္ပိ၊ ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ သင်္ဃော တာသံ အာပတ္တီနံ သမောဓာနပရိဝါသံ ဒေတိ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာယောပိ အပရိမာဏာယောပိ ပဋိစ္ဆန္နာယောပိ ¶ အပ္ပဋိစ္ဆန္နာယောပိ။ သော သင်္ဃံ အန္တရာအာပတ္တီနံ မူလာယပဋိကဿနံ ယာစတိ။ တံ သင်္ဃော အန္တရာအာပတ္တီနံ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ အဓမ္မေန မာနတ္တံ ဒေတိ၊ အဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု အဝိသုဒ္ဓါ တာဟိ အာပတ္တီဟိ။

မူလာယအဝိသုဒ္ဓိနဝကံ [သမူလာဝိသုဒ္ဓိနဝကံ (က။)] နိဋ္ဌိတံ။

၁၀။ ဒုတိယနဝကံ [ဣဒံ နဝကံ ပေါရာဏပေါတ္ထကေသု အဝိသုဒ္ဓိဝသေနေဝ အာဂတံ၊ ဝုစ္စမာနတတိယနဝကေန စ သံသဋ္ဌံ။ တံ ပဋိဝိသောဓကေဟိ အသံသဋ္ဌံ ကတွာ ဝိသုံ ပတိဋ္ဌာပိတံ။ သီဟဠသျာမပေါတ္ထကေသု ပန တံ ဝိသုဒ္ဓိဝသေနေဝ အာဂတံ။ တံ ပနေဝံ ဝေဒိတဗ္ဗံ –§၁၀- မူလာယဝိသုဒ္ဓိနဝက (သီ။ သျာ။)§၁၈၃။ ဣဓ ပန ဘိက္ခဝေ ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သော သံဃံ တာသံ အာပတ္တီနံ သမောဓာနပရိဝါသံ ယာစတိ၊ တဿ တဿ သံဃော တာသံ အာပတ္တီနံ သမောဓာနပရိဝါသံ ဒေတိ၊ သော ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာယော အပ္ပဋိစ္ဆန္နာယော…ပေ… ပရိမာဏာယော ပဋိစ္ဆန္နာယော…ပေ… ပရိမာဏာယော ပဋိစ္ဆန္နာယောပိ အပ္ပဋိစ္ဆန္နာယောပိ။ သော သံဃံ အန္တရာအာပတ္တီနံ မူလာယပဋိကဿနံ ယာစတိ၊ တံ သံဃော အန္တရာအာပတ္တီနံ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ။ သော ဘိက္ခဝေ ဘိက္ခု ဝိသုဒ္ဓါ တာဟိ အာပတ္တီဟိ။ (၁-၃)§ဣဓ ပန ဘိက္ခဝေ ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သော သံဃံ တာသံ အာပတ္တီနံ သမောဓာနပရိဝါသံ ယာစတိ၊ တဿ သံဃော တာသံ အာပတ္တီနံ သမောဓာနပရိဝါသံ ဒေတိ၊ သော ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ အပရိမာဏာယော အပ္ပဋိစ္ဆန္နာယော…ပေ… အပရိမာဏာယော ပဋိစ္ဆန္နာယော…ပေ… အပရိမာဏာယော ပဋိစ္ဆန္နာယောပိ အပ္ပဋိစ္ဆန္နာယောပိ။ သော သံဃံ အန္တရာအာပတ္တီနံ မူလာယပဋိကဿနံ ယာစတိ၊ တံ သံဃော အန္တရာအာပတ္တီနံ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ။ သော ဘိက္ခဝေ ဘိက္ခု ဝိသုဒ္ဓါ တာဟိ အာပတ္တီတိ။ (၄-၆)§ဣဓ ပန ဘိက္ခဝေ ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇတီ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သော သံဃံ တာသံ အာပတ္တီနံ သမောဓာနပရိဝါသံ ယာစတိ၊ တဿ သံဃော တာသံ အာပတ္တီနံ သမောဓာနပရိဝါသံ ဒေတိ၊ သော ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာယောပိ အပရိမာဏာယောပိ အပ္ပဋိစ္ဆန္နာယော…ပေ… ပရိမာဏာယောပိ အပရိမာဏာယောပိ ပဋိစ္ဆန္နာယော…ပေ… ပရိမာဏာယောပိ အပရိမာဏာယောပိ ပဋိစ္ဆန္နာယောပိ အပ္ပဋိစ္ဆန္နာယောပိ။ သော သံဃံ အန္တရာအာပတ္တီနံ မူလာယပဋိကဿနံ ယာစတိ၊ တံ သံဃော အန္တရာအာပတ္တီနံ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ။ သော ဘိက္ခဝေ ဘိက္ခု ဝိသုဒ္ဓါ တာဟိ အာပတ္တီဟိ။ (၇-၉)§မူလာယ ဝိသုဒ္ဓိနဝကံ နိဋ္ဌိတံ။]

၁၈၃။ ‘‘ဣဓ ¶ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ သင်္ဃော တာသံ အာပတ္တီနံ သမောဓာနပရိဝါသံ ဒေတိ။ သော ပရိဝသန္တော ¶ အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာ အပ္ပဋိစ္ဆန္နာယော။ သော သင်္ဃံ အန္တရာအာပတ္တီနံ မူလာယပဋိကဿနံ ယာစတိ။ တံ သင်္ဃော အန္တရာအာပတ္တီနံ မူလာယ ပဋိကဿတိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု အဝိသုဒ္ဓါ တာဟိ အာပတ္တီဟိ။ (၁)

ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ သင်္ဃော တာသံ ¶ အာပတ္တီနံ သမောဓာနပရိဝါသံ ဒေတိ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာ ပဋိစ္ဆန္နာယော။ သော သင်္ဃံ အန္တရာအာပတ္တီနံ မူလာယပဋိကဿနံ ယာစတိ။ တံ သင်္ဃော အန္တရာအာပတ္တီနံ မူလာယ ပဋိကဿတိ အဓမ္မိကေန ကမ္မေန ကုပ္ပေန အဋ္ဌာနာရဟေန ¶ ၊ အဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု အဝိသုဒ္ဓါ တာဟိ အာပတ္တီဟိ။ (၂)

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ သင်္ဃော တာသံ အာပတ္တီနံ သမောဓာနပရိဝါသံ ဒေတိ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာ ပဋိစ္ဆန္နာယောပိ အပ္ပဋိစ္ဆန္နာယောပိ။ သော သင်္ဃံ အန္တရာအာပတ္တီနံ မူလာယပဋိကဿနံ ယာစတိ။ တံ သင်္ဃော အန္တရာအာပတ္တီနံ မူလာယ ပဋိကဿတိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ။ သော ဘိက္ခဝေ၊ ဘိက္ခု အဝိသုဒ္ဓါ တာဟိ အာပတ္တီဟိ။ (၃)

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ၊ ဧကနာမမ္ပိ နာနာနာမမ္ပိ၊ သဘာဂမ္ပိ ဝိသဘာဂမ္ပိ၊ ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ သင်္ဃော တာသံ အာပတ္တီနံ သမောဓာနပရိဝါသံ ဒေတိ ¶ ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ အပရိမာဏာ အပ္ပဋိစ္ဆန္နာယော…ပေ… အပရိမာဏာ ပဋိစ္ဆန္နာယော…ပေ… အပရိမာဏာ ပဋိစ္ဆန္နာယောပိ အပ္ပဋိစ္ဆန္နာယောပိ…ပေ… ပရိမာဏာယောပိ အပရိမာဏာယောပိ အပ္ပဋိစ္ဆန္နာယော။ သော သင်္ဃံ အန္တရာအာပတ္တီနံ မူလာယပဋိကဿနံ ယာစတိ။ တံ သင်္ဃော အန္တရာအာပတ္တီနံ မူလာယ ပဋိကဿတိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ ¶ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု အဝိသုဒ္ဓါ တာဟိ အာပတ္တီဟိ။ (၄-၇)

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ သင်္ဃော တာသံ အာပတ္တီနံ သမောဓာနပရိဝါသံ ဒေတိ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာယောပိ အပရိမာဏာယောပိ ပဋိစ္ဆန္နာယော။ သော သင်္ဃံ အန္တရာအာပတ္တီနံ မူလာယပဋိကဿနံ ယာစတိ။ တံ သင်္ဃော အန္တရာအာပတ္တီနံ ¶ မူလာယ ပဋိကဿတိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု အဝိသုဒ္ဓါ တာဟိ အာပတ္တီဟိ။ (၈)

‘‘ဣဓ ¶ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ သင်္ဃော တာသံ အာပတ္တီနံ သမောဓာနပရိဝါသံ ဒေတိ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာယောပိ အပရိမာဏာယောပိ ပဋိစ္ဆန္နာယောပိ အပ္ပဋိစ္ဆန္နာယောပိ။ သော သင်္ဃံ အန္တရာအာပတ္တီနံ မူလာယပဋိကဿနံ ယာစတိ။ တံ သင်္ဃော အန္တရာအာပတ္တီနံ မူလာယ ပဋိကဿတိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု အဝိသုဒ္ဓါ တာဟိ အာပတ္တီဟိ။ (၉)

ဒုတိယနဝကံ နိဋ္ဌိတံ။

၁၁။ တတိယနဝကံ

၁၈၄။ ‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ ¶ သင်္ဃော တာသံ အာပတ္တီနံ ¶ သမောဓာနပရိဝါသံ ဒေတိ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာယော အပ္ပဋိစ္ဆန္နာယော။ သော သင်္ဃံ အန္တရာအာပတ္တီနံ မူလာယပဋိကဿနံ ယာစတိ။ တံ သင်္ဃော အန္တရာအာပတ္တီနံ ¶ မူလာယ ပဋိကဿတိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ ဒေတိ ¶ ။ သော ပရိဝသာမီတိ မညမာနော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာယော အပ္ပဋိစ္ဆန္နာယော။ သော တသ္မိံ ဘူမိယံ ဌိတော ပုရိမာအာပတ္တီနံ အန္တရာအာပတ္တိယော သရတိ၊ အပရာအာပတ္တီနံ အန္တရာအာပတ္တိယော သရတိ။ တဿ ဧဝံ ဟောတိ – ‘အဟံ ခေါ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သောဟံ သင်္ဃံ တာသံ အာပတ္တီနံ သမောဓာနပရိဝါသံ ယာစိံ။ တဿ မေ သင်္ဃော တာသံ အာပတ္တီနံ သမောဓာနပရိဝါသံ အဒါသိ။ သောဟံ ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ ပရိမာဏာယော အပ္ပဋိစ္ဆန္နာယော။ သောဟံ သင်္ဃံ အန္တရာအာပတ္တီနံ မူလာယပဋိကဿနံ ယာစိံ။ တံ မံ သင်္ဃော အန္တရာအာပတ္တီနံ မူလာယ ပဋိကဿိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ အဒါသိ။ သောဟံ ပရိဝသာမီတိ မညမာနော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ ပရိမာဏာယော အပ္ပဋိစ္ဆန္နာယော ¶ ။ သောဟံ တသ္မိံ ဘူမိယံ ဌိတော ပုရိမာအာပတ္တီနံ အန္တရာအာပတ္တိယော သရာမိ၊ အပရာအာပတ္တီနံ အန္တရာအာပတ္တိယော သရာမိ။ ယံနူနာဟံ သင်္ဃံ ပုရိမာအာပတ္တီနံ အန္တရာအာပတ္တီနဉ္စ အပရာအာပတ္တီနံ အန္တရာအာပတ္တီနဉ္စ မူလာယပဋိကဿနံ ယာစေယျံ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာန’န္တိ။ သော သင်္ဃံ ပုရိမာအာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယပဋိကဿနံ ယာစတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာနံ။ တံ သင်္ဃော ပုရိမာအာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု ဝိသုဒ္ဓါ တာဟိ အာပတ္တီဟိ [အယံ ပဌမဝါရော သီ သျာ။ ပေါတ္ထကေသု ပရိပုဏ္ဏော ဒိဿတိ]။

‘‘ဣဓ ¶ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ သင်္ဃော တာသံ အာပတ္တီနံ သမောဓာနပရိဝါသံ ဒေတိ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာ ပဋိစ္ဆန္နာယော။ သော သင်္ဃံ အန္တရာအာပတ္တီနံ မူလာယပဋိကဿနံ ယာစတိ ¶ ။ တံ သင်္ဃော အန္တရာအာပတ္တီနံ မူလာယ ပဋိကဿတိ၊ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ ဒေတိ။ သော ပရိဝသာမီတိ မညမာနော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာ ပဋိစ္ဆန္နာယော။ သော တသ္မိံ ဘူမိယံ ဌိတော ပုရိမာအာပတ္တီနံ [ပုရိမာနံ အာပတ္တီနံ (က။)] အန္တရာအာပတ္တိယော သရတိ၊ အပရာအာပတ္တီနံ ¶ အန္တရာအာပတ္တိယော သရတိ။ တဿ ဧဝံ ဟောတိ – ‘အဟံ ခေါ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သောဟံ သင်္ဃံ တာသံ အာပတ္တီနံ သမောဓာနပရိဝါသံ ယာစိံ။ တဿ မေ သင်္ဃော တာသံ အာပတ္တီနံ သမောဓာနပရိဝါသံ အဒါသိ။ သောဟံ ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ ပရိမာဏာ ပဋိစ္ဆန္နာယော။ သောဟံ သင်္ဃံ အန္တရာအာပတ္တီနံ မူလာယပဋိကဿနံ ယာစိံ။ တံ မံ သင်္ဃော အန္တရာအာပတ္တီနံ မူလာယပဋိကဿိ၊ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ အဒါသိ။ သောဟံ ပရိဝသာမီတိ မညမာနော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ ပရိမာဏာ ပဋိစ္ဆန္နာယော။ သောဟံ တသ္မိံ ဘူမိယံ ဌိတော ပုရိမာပတ္တီနံ အန္တရာအာပတ္တိယော သရာမိ၊ အပရာအာပတ္တီနံ အန္တရာအာပတ္တိယော သရာမိ။ ယံနူနာဟံ သင်္ဃံ ပုရိမာပတ္တီနံ အန္တရာအာပတ္တီနဉ္စ၊ အပရာ အာပတ္တီနံ အန္တရာအာပတ္တီနဉ္စ၊ မူလာယပဋိကဿနံ ယာစေယျံ ¶ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာန’န္တိ။ သော သင်္ဃံ ပုရိမာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ မူလာယပဋိကဿနံ ယာစတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာနံ။ တံ သင်္ဃော ပုရိမာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယ ပဋိကဿတိ ဓမ္မိကေန ¶ ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု ဝိသုဒ္ဓါ တာဟိ အာပတ္တီဟိ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ သင်္ဃော တာသံ အာပတ္တီနံ သမောဓာနပရိဝါသံ ဒေတိ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာ ပဋိစ္ဆန္နာယောပိ အပ္ပဋိစ္ဆန္နာယောပိ။ သော သင်္ဃံ အန္တရာအာပတ္တီနံ မူလာယပဋိကဿနံ ယာစတိ။ တံ သင်္ဃော အန္တရာအာပတ္တီနံ မူလာယ ပဋိကဿတိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ ¶ ဒေတိ။ သော ပရိဝသာမီတိ မညမာနော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာ ပဋိစ္ဆန္နာယောပိ အပ္ပဋိစ္ဆန္နာယောပိ။ သော တသ္မိံ ဘူမိယံ ဌိတော ပုရိမာပတ္တီနံ အန္တရာအာပတ္တိယော သရတိ၊ အပရာအာပတ္တီနံ အန္တရာအာပတ္တိယော သရတိ။ တဿ ဧဝံ ဟောတိ – ‘အဟံ ခေါ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သောဟံ သင်္ဃံ တာသံ အာပတ္တီနံ သမောဓာနပရိဝါသံ ယာစိံ။ တဿ မေ သင်္ဃော တာသံ အာပတ္တီနံ သမောဓာနပရိဝါသံ အဒါသိ။ သောဟံ ပရိဝသန္တော အန္တရာ သမ္ဗဟုလာ ¶ သင်္ဃာဒိသေသာ အာပတ္တိယော အာပဇ္ဇိံ ပရိမာဏာ ပဋိစ္ဆန္နာယောပိ အပ္ပဋိစ္ဆန္နာယောပိ။ သောဟံ သင်္ဃံ အန္တရာအာပတ္တီနံ မူလာယပဋိကဿနံ ယာစိံ။ တံ မံ သင်္ဃော အန္တရာအာပတ္တီနံ မူလာယ ပဋိကဿိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ အဒါသိ။ သောဟံ ပရိဝသာမီတိ မညမာနော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ ပရိမာဏာ ပဋိစ္ဆန္နာယောပိ အပ္ပဋိစ္ဆန္နာယောပိ။ သောဟံ တသ္မိံ ဘူမိယံ ဌိတော ပုရိမာပတ္တီနံ အန္တရာအာပတ္တိယော သရာမိ၊ အပရာအာပတ္တီနံ အန္တရာအာပတ္တိယော သရာမိ။ ယံနူနာဟံ သင်္ဃံ ပုရိမာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယပဋိကဿနံ ယာစေယျံ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာန’န္တိ။ သော သင်္ဃံ ပုရိမာပတ္တီနံ အန္တရာ အာပတ္တီနဉ္စ၊ အပရာ အာပတ္တီနံ အန္တရာ အာပတ္တီနဉ္စ၊ မူလာယပဋိကဿနံ ¶ ယာစတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာနံ။ တံ သင်္ဃော ပုရိမာပတ္တီနံ အန္တရာ အာပတ္တီနဉ္စ၊ အပရာ အာပတ္တီနံ အန္တရာ အာပတ္တီနဉ္စ၊ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု ဝိသုဒ္ဓါ တာဟိ အာပတ္တီဟိ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ သင်္ဃော တာသံ အာပတ္တီနံ သမောဓာနပရိဝါသံ ဒေတိ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ အပရိမာဏာယော အပ္ပဋိစ္ဆန္နာယော…ပေ… အပရိမာဏာယော ပဋိစ္ဆန္နာယော…ပေ… အပရိမာဏာယော ပဋိစ္ဆန္နာယောပိ အပ္ပဋိစ္ဆန္နာယောပိ…ပေ… ပရိမာဏာယောပိ အပရိမာဏာယောပိ အပ္ပဋိစ္ဆန္နာယော။ သော သင်္ဃံ အန္တရာအာပတ္တီနံ မူလာယပဋိကဿနံ ¶ ယာစတိ။ တံ သင်္ဃော အန္တရာအာပတ္တီနံ မူလာယ ပဋိကဿိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ ဒေတိ။ သော ပရိဝသာမီတိ မညမာနော…ပေ… တံ သင်္ဃော ပုရိမာ အာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု ဝိသုဒ္ဓါ တာဟိ အာပတ္တီဟိ [ဣမေပိ စတ္တာရော ဝါရာ သီ။ သျာ။ ပေါတ္ထကေသု ပရိပုဏ္ဏာ ဒိဿန္တိ]။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ¶ ယာစတိ။ တဿ သင်္ဃော တာသံ အာပတ္တီနံ သမောဓာနပရိဝါသံ ဒေတိ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာယောပိ ¶ အပရိမာဏာယောပိ ပဋိစ္ဆန္နာယော။ သော သင်္ဃံ အန္တရာအာပတ္တီနံ မူလာယပဋိကဿနံ ယာစတိ။ တံ သင်္ဃော အန္တရာအာပတ္တီနံ မူလာယ ပဋိကဿတိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ ဒေတိ။ သော ပရိဝသာမီတိ မညမာနော အန္တရာ သမ္ဗဟုလာ သင်္ဃာဒိသေသာ ¶ အာပတ္တိယော အာပဇ္ဇတိ ပရိမာဏာယောပိ အပရိမာဏာယောပိ ပဋိစ္ဆန္နာယော။ သော တသ္မိံ ဘူမိယံ ဌိတော ပုရိမာ အာပတ္တီနံ အန္တရာအာပတ္တိယော သရတိ၊ အပရာအာပတ္တီနံ အန္တရာအာပတ္တိယော သရတိ။ တဿ ဧဝံ ဟောတိ – ‘အဟံ ခေါ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သောဟံ သင်္ဃံ တာသံ အာပတ္တီနံ သမောဓာနပရိဝါသံ ယာစိံ။ တဿ မေ သင်္ဃော တာသံ အာပတ္တီနံ သမောဓာနပရိဝါသံ အဒါသိ။ သောဟံ ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ ပရိမာဏာယောပိ အပရိမာဏာယောပိ ပဋိစ္ဆန္နာယော။ သောဟံ သင်္ဃံ အန္တရာအာပတ္တီနံ မူလာယပဋိကဿနံ ယာစိံ။ တံ မံ သင်္ဃော အန္တရာအာပတ္တီနံ မူလာယပဋိကဿိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ အဒါသိ။ သောဟံ ပရိဝသာမီတိ မညမာနော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ ပရိမာဏာယောပိ အပရိမာဏာယောပိ ပဋိစ္ဆန္နာယော။ သောဟံ တသ္မိံ ဘူမိယံ ဌိတော ပုရိမာ အာပတ္တီနံ အန္တရာအာပတ္တိယော သရာမိ၊ အပရာအာပတ္တီနံ အန္တရာအာပတ္တိယော သရာမိ။ ယံနူနာဟံ သင်္ဃံ ပုရိမာ အာပတ္တီနံ အန္တရာ ပတ္တီနဉ္စ၊ အပရာအာပတ္တီန ¶ အန္တရာအာပတ္တီနဉ္စ၊ မူလာယပဋိကဿနံ ယာစေယျံ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာန’န္တိ။ သော သင်္ဃံ ပုရိမာ အာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယပဋိကဿနံ ယာစတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာနံ။ တံ သင်္ဃော ပုရိမာ အာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု ဝိသုဒ္ဓါ တာဟိ အာပတ္တီဟိ။

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သော သင်္ဃံ တာသံ အာပတ္တီနံ သမောဓာနပရိဝါသံ ယာစတိ။ တဿ သင်္ဃော တာသံ အာပတ္တီနံ သမောဓာနပရိဝါသံ ဒေတိ။ သော ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာယောပိ အပရိမာဏာယောပိ ပဋိစ္ဆန္နာယောပိ အပ္ပဋိစ္ဆန္နာယောပိ။ သော သင်္ဃံ အန္တရာအာပတ္တီနံ ¶ မူလာယပဋိကဿနံ ¶ ယာစတိ။ တံ သင်္ဃော အန္တရာအာပတ္တီနံ မူလာယ ပဋိကဿတိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ ဒေတိ။ သော ပရိဝသာမီတိ မညမာနော ¶ အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇတိ ပရိမာဏာယောပိ အပရိမာဏာယောပိ ပဋိစ္ဆန္နာယောပိ အပ္ပဋိစ္ဆန္နာယောပိ။ သော တသ္မိံ ဘူမိယံ ဌိတော ပုရိမာ အာပတ္တီနံ အန္တရာအာပတ္တိယော သရတိ၊ အပရာအာပတ္တီနံ အန္တရာအာပတ္တိယော သရတိ။ တဿ ဧဝံ ဟောတိ – ‘အဟံ ခေါ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ ပရိမာဏမ္ပိ အပရိမာဏမ္ပိ…ပေ… ဝဝတ္ထိတမ္ပိ သမ္ဘိန္နမ္ပိ။ သောဟံ သင်္ဃံ တာသံ အာပတ္တီနံ သမောဓာနပရိဝါသံ ယာစိံ။ တဿ မေ သင်္ဃော တာသံ အာပတ္တီနံ သမောဓာနပရိဝါသံ အဒါသိ။ သောဟံ ပရိဝသန္တော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ ပရိမာဏာယောပိ အပရိမာဏာယောပိ ပဋိစ္ဆန္နာယောပိ အပ္ပဋိစ္ဆန္နာယောပိ။ သောဟံ သင်္ဃံ အန္တရာအာပတ္တီနံ မူလာယပဋိကဿနံ ယာစိံ။ တံ မံ သင်္ဃော အန္တရာအာပတ္တီနံ မူလာယ ပဋိကဿိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ အဒါသိ။ သောဟံ ပရိဝသာမီတိ မညမာနော အန္တရာ သမ္ဗဟုလာ သင်္ဃာဒိသေသာ အာပတ္တိယော အာပဇ္ဇိံ ပရိမာဏာယောပိ အပရိမာဏာယောပိ ပဋိစ္ဆန္နာယောပိ အပ္ပဋိစ္ဆန္နာယောပိ။ သောဟံ တသ္မိံ ဘူမိယံ ဌိတော ပုရိမာ အာပတ္တီနံ အန္တရာအာပတ္တိယော သရာမိ၊ အပရာအာပတ္တီနံ အန္တရာအာပတ္တိယော သရာမိ။ ယံနူနာဟံ သင်္ဃံ ပုရိမာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယပဋိကဿနံ ယာစေယျံ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန ¶ သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာန’န္တိ။ သော သင်္ဃံ ပုရိမာ အာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယ ပဋိကဿနံ ယာစတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာနံ။ တံ သင်္ဃော ပုရိမာ အာပတ္တီနံ အန္တရာ အာပတ္တီနဉ္စ၊ အပရာ အာပတ္တီနံ အန္တရာ အာပတ္တီနဉ္စ၊ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ။ သော၊ ဘိက္ခဝေ၊ ဘိက္ခု ဝိသုဒ္ဓါ တာဟိ အာပတ္တီဟိ’’။

တတိယနဝကံ နိဋ္ဌိတံ။

သမုစ္စယက္ခန္ဓကော တတိယော။

တဿုဒ္ဒါနံ –

အပ္ပဋိစ္ဆန္နာ ¶ ဧကာဟ-ဒွီဟ-တီဟ-စတူဟ စ၊

ပဉ္စာဟပက္ခဒသန္နံ၊ အာပတ္တိမာဟ မဟာမုနိ။

သုဒ္ဓန္တော ¶ စ ဝိဗ္ဘမန္တော၊ ပရိမာဏမုခံ ဒွေ ဘိက္ခူ၊

တတ္ထ သညိနော ဒွေ ယထာ၊ ဝေမတိကာ တထေဝ စ။

မိဿကဒိဋ္ဌိနော ¶ ဒွေ စ၊ အသုဒ္ဓကေကဒိဋ္ဌိနော၊

ဒွေ စေဝ သုဒ္ဓဒိဋ္ဌိနော။

တထေဝ စ ဧကော ဆာဒေတိ၊ အထ မက္ခမတေန စ၊

ဥမ္မတ္တကဒေသနဉ္စ၊ မူလာ အဋ္ဌာရသ [ပန္နရသ (က။)] ဝိသုဒ္ဓတော။

အာစရိယာနံ ဝိဘဇ္ဇပဒါနံ [ဝိဘဇ္ဇဝါဒီနံ (သီ။)]၊ တမ္ဗပဏ္ဏိဒီပပသာဒကာနံ၊

မဟာဝိဟာရဝါသီနံ၊ ဝါစနာ သဒ္ဓမ္မဋ္ဌိတိယာတိ။

သမုစ္စယက္ခန္ဓကံ နိဋ္ဌိတံ။

၄။ သမထက္ခန္ဓကံ

၁။ သမ္မုခါဝိနယော

၁၈၅။ တေန ¶ ¶ ¶ ¶ သမယေန ဗုဒ္ဓါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ အသမ္မုခီဘူတာနံ ဘိက္ခူနံ ကမ္မာနိ ကရောန္တိ – တဇ္ဇနီယမ္ပိ၊ နိယဿမ္ပိ၊ ပဗ္ဗာဇနီယမ္ပိ၊ ပဋိသာရဏီယမ္ပိ၊ ဥက္ခေပနီယမ္ပိ။ ယေ တေ ဘိက္ခူ အပ္ပိစ္ဆာ…ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခူ အသမ္မုခီဘူတာနံ ဘိက္ခူနံ ကမ္မာနိ ကရိဿန္တိ – တဇ္ဇနီယမ္ပိ၊ နိယဿမ္ပိ၊ ပဗ္ဗာဇနီယမ္ပိ၊ ပဋိသာရဏီယမ္ပိ၊ ဥက္ခေပနီယမ္ပီ’’တိ! အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ…ပေ… ‘‘သစ္စံ ကိရ၊ ဘိက္ခဝေ၊ ဆဗ္ဗဂ္ဂိယာ ဘိက္ခူ အသမ္မုခီဘူတာနံ ဘိက္ခူနံ ကမ္မာနိ ကရောန္တိ – တဇ္ဇနီယမ္ပိ၊ နိယဿမ္ပိ၊ ပဗ္ဗာဇနီယမ္ပိ၊ ပဋိသာရဏီယမ္ပိ၊ ဥက္ခေပနီယမ္ပီ’’တိ? ‘‘သစ္စံ ဘဂဝါ’’တိ။ ဝိဂရဟိ ဗုဒ္ဓါ ဘဂဝါ – ‘‘အနနုစ္ဆဝိကံ၊ ဘိက္ခဝေ၊ တေသံ မောဃပုရိသာနံ အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ တေ၊ ဘိက္ခဝေ၊ မောဃပုရိသာ အသမ္မုခီဘူတာနံ ဘိက္ခူနံ ကမ္မာနိ ကရိဿန္တိ – တဇ္ဇနီယမ္ပိ၊ နိယဿမ္ပိ၊ ပဗ္ဗာဇနီယမ္ပိ၊ ပဋိသာရဏီယမ္ပိ၊ ဥက္ခေပနီယမ္ပိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ – န၊ ဘိက္ခဝေ၊ အသမ္မုခီဘူတာနံ ဘိက္ခူနံ ကမ္မံ ကာတဗ္ဗံ – တဇ္ဇနီယံ ဝါ၊ နိယဿံ ဝါ၊ ပဗ္ဗာဇနီယံ ဝါ၊ ပဋိသာရဏီယံ ဝါ၊ ဥက္ခေပနီယံ ဝါ။ ယော ကရေယျ ¶ ၊ အာပတ္တိ ဒုက္ကဋဿ။

၁၈၆။ ‘‘အဓမ္မဝါဒီ ပုဂ္ဂလော အဓမ္မဝါဒီ သမ္ဗဟုလာ အဓမ္မဝါဒီ သင်္ဃော။ ဓမ္မဝါဒီ ပုဂ္ဂလော ဓမ္မဝါဒီ သမ္ဗဟုလာ ဓမ္မဝါဒီ သင်္ဃော။

ကဏှပက္ခနဝကံ

၁၈၇။ ‘‘အဓမ္မဝါဒီ ¶ ပုဂ္ဂလော ဓမ္မဝါဒိံ ပုဂ္ဂလံ သညာပေတိ နိဇ္ဈာပေတိ ပေက္ခေတိ အနုပေက္ခေတိ ဒဿေတိ အနုဒဿေတိ – အယံ ဓမ္မော၊ အယံ ဝိနယော၊ ဣဒံ သတ္ထုသာသနံ၊ ဣမံ ဂဏှာဟိ၊ ဣမံ ¶ ရောစေဟီတိ။ ဧဝဉ္စေတံ အဓိကရဏံ ဝူပသမ္မတိ၊ အဓမ္မေန ဝူပသမ္မတိ သမ္မုခါဝိနယပတိရူပကေန။

‘‘အဓမ္မဝါဒီ ပုဂ္ဂလော ဓမ္မဝါဒီ သမ္ဗဟုလေ သညာပေတိ နိဇ္ဈာပေတိ ပေက္ခေတိ အနုပေက္ခေတိ ဒဿေတိ အနုဒဿေတိ – အယံ ဓမ္မော၊ အယံ ဝိနယော ¶ ၊ ဣဒံ သတ္ထုသာသနံ၊ ဣမံ ဂဏှထ၊ ဣမံ ရောစေထာတိ။ ဧဝဉ္စေတံ အဓိကရဏံ ဝူပသမ္မတိ၊ အဓမ္မေန ဝူပသမ္မတိ သမ္မုခါဝိနယပတိရူပကေန။

‘‘အဓမ္မဝါဒီ ပုဂ္ဂလော ဓမ္မဝါဒိံ သင်္ဃံ သညာပေတိ နိဇ္ဈာပေတိ ပေက္ခေတိ အနုပေက္ခေတိ ဒဿေတိ အနုဒဿေတိ – အယံ ဓမ္မော၊ အယံ ဝိနယော၊ ဣဒံ သတ္ထုသာသနံ၊ ဣမံ ဂဏှာဟိ၊ ဣမံ ရောစေဟီတိ [ဣမံ ဂဏှထ၊ ဣမံ ရောစေထာတိ (က။)]။ ဧဝဉ္စေတံ အဓိကရဏံ ဝူပသမ္မတိ၊ အဓမ္မေန ဝူပသမ္မတိ သမ္မုခါဝိနယပတိရူပကေန။

‘‘အဓမ္မဝါဒီ သမ္ဗဟုလာ ဓမ္မဝါဒိံ ပုဂ္ဂလံ သညာပေန္တိ နိဇ္ဈာပေန္တိ ပေက္ခေန္တိ အနုပေက္ခေန္တိ ဒဿေန္တိ အနုဒဿေန္တိ – အယံ ဓမ္မော၊ အယံ ဝိနယော၊ ဣဒံ သတ္ထုသာသနံ၊ ဣမံ ဂဏှာဟိ၊ ဣမံ ရောစေဟီတိ။ ဧဝဉ္စေတံ အဓိကရဏံ ဝူပသမ္မတိ၊ အဓမ္မေန ဝူပသမ္မတိ သမ္မုခါဝိနယပတိရူပကေန။

‘‘အဓမ္မဝါဒီ ¶ သမ္ဗဟုလာ ဓမ္မဝါဒီ သမ္ဗဟုလေ သညာပေန္တိ နိဇ္ဈာပေန္တိ ပေက္ခေန္တိ အနုပေက္ခေန္တိ ဒဿေန္တိ အနုဒဿေန္တိ – အယံ ဓမ္မော၊ အယံ ဝိနယော၊ ဣဒံ သတ္ထုသာသနံ၊ ဣမံ ဂဏှထ၊ ဣမံ ရောစေထာတိ။ ဧဝဉ္စေတံ အဓိကရဏံ ဝူပသမ္မတိ၊ အဓမ္မေန ဝူပသမ္မတိ သမ္မုခါဝိနယပတိရူပကေန။

‘‘အဓမ္မဝါဒီ သမ္ဗဟုလာ ဓမ္မဝါဒိံ သင်္ဃံ သညာပေန္တိ နိဇ္ဈာပေန္တိ ပေက္ခေန္တိ အနုပေက္ခေန္တိ ဒဿေန္တိ အနုဒဿေန္တိ – အယံ ဓမ္မော၊ အယံ ဝိနယော၊ ဣဒံ သတ္ထုသာသနံ၊ ဣမံ ဂဏှာဟိ၊ ဣမံ ရောစေဟီတိ။ ဧဝဉ္စေတံ အဓိကရဏံ ဝူပသမ္မတိ၊ အဓမ္မေန ဝူပသမ္မတိ သမ္မုခါဝိနယပတိရူပကေန။

‘‘အဓမ္မဝါဒီ သင်္ဃော ဓမ္မဝါဒိံ ပုဂ္ဂလံ သညာပေတိ နိဇ္ဈာပေတိ ပေက္ခေတိ အနုပေက္ခေတိ ဒဿေတိ ¶ အနုဒဿေတိ – အယံ ဓမ္မော၊ အယံ ဝိနယော၊ ဣဒံ သတ္ထုသာသနံ၊ ဣမံ ဂဏှာဟိ၊ ဣမံ ရောစေဟီတိ။ ဧဝဉ္စေတံ အဓိကရဏံ ဝူပသမ္မတိ၊ အဓမ္မေန ဝူပသမ္မတိ သမ္မုခါဝိနယပတိရူပကေန။

‘‘အဓမ္မဝါဒီ သင်္ဃော ဓမ္မဝါဒီ သမ္ဗဟုလေ သညာပေတိ နိဇ္ဈာပေတိ ပေက္ခေတိ အနုပေက္ခေတိ ဒဿေတိ အနုဒဿေတိ – အယံ ဓမ္မော၊ အယံ ဝိနယော၊ ဣဒံ သတ္ထုသာသနံ၊ ဣမံ ဂဏှထ၊ ဣမံ ရောစေထာတိ။ ဧဝဉ္စေတံ အဓိကရဏံ ဝူပသမ္မတိ၊ အဓမ္မေန ဝူပသမ္မတိ သမ္မုခါဝိနယပတိရူပကေန။

‘‘အဓမ္မဝါဒီ သင်္ဃော ဓမ္မဝါဒိံ သင်္ဃံ သညာပေတိ နိဇ္ဈာပေတိ ပေက္ခေတိ အနုပေက္ခေတိ ဒဿေတိ အနုဒဿေတိ – အယံ ဓမ္မော၊ အယံ ဝိနယော၊ ဣဒံ ¶ သတ္ထုသာသနံ၊ ဣမံ ဂဏှာဟိ၊ ဣမံ ရောစေဟီတိ။ ဧဝဉ္စေတံ အဓိကရဏံ ဝူပသမ္မတိ၊ အဓမ္မေန ¶ ဝူပသမ္မတိ သမ္မုခါဝိနယပတိရူပကေန။

ကဏှပက္ခနဝကံ နိဋ္ဌိတံ။

သုက္ကပက္ခနဝကံ

၁၈၈။ ‘‘ဓမ္မဝါဒီ ပုဂ္ဂလော အဓမ္မဝါဒိံ ပုဂ္ဂလံ သညာပေတိ နိဇ္ဈာပေတိ ပေက္ခေတိ အနုပေက္ခေတိ ဒဿေတိ အနုဒဿေတိ – အယံ ဓမ္မော၊ အယံ ဝိနယော၊ ဣဒံ သတ္ထုသာသနံ၊ ဣမံ ဂဏှာဟိ၊ ဣမံ ရောစေဟီတိ။ ဧဝဉ္စေတံ အဓိကရဏံ ဝူပသမ္မတိ၊ ဓမ္မေန ဝူပသမ္မတိ သမ္မုခါဝိနယေန။

‘‘ဓမ္မဝါဒီ ပုဂ္ဂလော အဓမ္မဝါဒီ သမ္ဗဟုလေ သညာပေတိ နိဇ္ဈာပေတိ ပေက္ခေတိ အနုပေက္ခေတိ ဒဿေတိ အနုဒဿေတိ – အယံ ဓမ္မော၊ အယံ ဝိနယော၊ ဣဒံ သတ္ထုသာသနံ၊ ဣမံ ဂဏှထ၊ ဣမံ ရောစေထာတိ။ ဧဝဉ္စေတံ အဓိကရဏံ ဝူပသမ္မတိ၊ ဓမ္မေန ဝူပသမ္မတိ သမ္မုခါဝိနယေန။

‘‘ဓမ္မဝါဒီ ပုဂ္ဂလော အဓမ္မဝါဒိံ သင်္ဃံ သညာပေတိ နိဇ္ဈာပေတိ ပေက္ခေတိ အနုပေက္ခေတိ ဒဿေတိ အနုဒဿေတိ – အယံ ဓမ္မော၊ အယံ ဝိနယော၊ ဣဒံ သတ္ထုသာသနံ၊ ဣမံ ဂဏှာဟိ၊ ဣမံ ရောစေဟီတိ။ ဧဝဉ္စေတံ အဓိကရဏံ ဝူပသမ္မတိ၊ ဓမ္မေန ဝူပသမ္မတိ သမ္မုခါဝိနယေန။

‘‘ဓမ္မဝါဒီ သမ္ဗဟုလာ အဓမ္မဝါဒိံ ပုဂ္ဂလံ သညာပေန္တိ နိဇ္ဈာပေန္တိ ပေက္ခေန္တိ အနုပေက္ခေန္တိ ဒဿေန္တိ အနုဒဿေန္တိ – အယံ ဓမ္မော၊ အယံ ဝိနယော၊ ဣဒံ သတ္ထုသာသနံ၊ ဣမံ ဂဏှာဟိ ¶ ၊ ဣမံ ရောစေဟီတိ။ ဧဝဉ္စေတံ အဓိကရဏံ ဝူပသမ္မတိ၊ ဓမ္မေန ဝူပသမ္မတိ သမ္မုခါဝိနယေန။

‘‘ဓမ္မဝါဒီ သမ္ဗဟုလာ အဓမ္မဝါဒီ သမ္ဗဟုလေ သညာပေန္တိ နိဇ္ဈာပေန္တိ ပေက္ခေန္တိ အနုပေက္ခေန္တိ ဒဿေန္တိ ¶ အနုဒဿေန္တိ – အယံ ဓမ္မော၊ အယံ ဝိနယော၊ ဣဒံ သတ္ထုသာသနံ၊ ဣမံ ဂဏှထ၊ ဣမံ ရောစေထာတိ။ ဧဝဉ္စေတံ အဓိကရဏံ ဝူပသမ္မတိ၊ ဓမ္မေန ဝူပသမ္မတိ သမ္မုခါဝိနယေန။

‘‘ဓမ္မဝါဒီ သမ္ဗဟုလာ အဓမ္မဝါဒိံ သင်္ဃံ သညာပေန္တိ နိဇ္ဈာပေန္တိ ပေက္ခေန္တိ အနုပေက္ခေန္တိ ဒဿေန္တိ အနုဒဿေန္တိ – အယံ ဓမ္မော၊ အယံ ဝိနယော၊ ဣဒံ သတ္ထုသာသနံ ¶ ၊ ဣမံ ဂဏှာဟိ၊ ဣမံ ရောစေဟီတိ။ ဧဝဉ္စေတံ အဓိကရဏံ ဝူပသမ္မတိ၊ ဓမ္မေန ဝူပသမ္မတိ သမ္မုခါဝိနယေန။

‘‘ဓမ္မဝါဒီ သင်္ဃော အဓမ္မဝါဒိံ ပုဂ္ဂလံ သညာပေတိ နိဇ္ဈာပေတိ ပေက္ခေတိ အနုပေက္ခေတိ ဒဿေတိ အနုဒဿေတိ – အယံ ဓမ္မော၊ အယံ ဝိနယော၊ ဣဒံ သတ္ထုသာသနံ၊ ဣမံ ဂဏှာဟိ၊ ဣမံ ရောစေဟီတိ။ ဧဝဉ္စေတံ အဓိကရဏံ ဝူပသမ္မတိ၊ ဓမ္မေန ဝူပသမ္မတိ သမ္မုခါဝိနယေန။

‘‘ဓမ္မဝါဒီ သင်္ဃော အဓမ္မဝါဒီ သမ္ဗဟုလေ သညာပေတိ နိဇ္ဈာပေတိ ပေက္ခေတိ အနုပေက္ခေတိ ဒဿေတိ အနုဒဿေတိ – အယံ ဓမ္မော၊ အယံ ဝိနယော၊ ဣဒံ သတ္ထုသာသနံ၊ ဣမံ ဂဏှထ၊ ဣမံ ရောစေထာတိ။ ဧဝဉ္စေတံ အဓိကရဏံ ဝူပသမ္မတိ၊ ဓမ္မေန ဝူပသမ္မတိ သမ္မုခါဝိနယေန။

‘‘ဓမ္မဝါဒီ သင်္ဃော အဓမ္မဝါဒိံ သင်္ဃံ သညာပေတိ နိဇ္ဈာပေတိ ပေက္ခေတိ အနုပေက္ခေတိ ဒဿေတိ အနုဒဿေတိ – အယံ ဓမ္မော၊ အယံ ဝိနယော၊ ဣဒံ သတ္ထုသာသနံ၊ ဣမံ ဂဏှာဟိ၊ ဣမံ ရောစေဟီတိ။ ဧဝဉ္စေတံ အဓိကရဏံ ဝူပသမ္မတိ၊ ဓမ္မေန ဝူပသမ္မတိ သမ္မုခါဝိနယေနာ’’တိ။

သုက္ကပက္ခနဝကံ နိဋ္ဌိတံ။

၂။ သတိဝိနယော

၁၈၉။ [ဣဒံ ဝတ္ထု ပါရာ။ ၃၈၀ အာဒယော] တေန ¶ သမယေန ဗုဒ္ဓါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ။ တေန ခေါ ပန သမယေန အာယသ္မတာ ဒဗ္ဗေန မလ္လပုတ္တေန ဇာတိယာ သတ္တဝဿေန အရဟတ္တံ သစ္ဆိကတံ ဟောတိ ¶ ။ ယံ ကိဉ္စိ သာဝကေန ပတ္တဗ္ဗံ သဗ္ဗံ တေန အနုပ္ပတ္တံ ဟောတိ။ နတ္ထိ စဿ ကိဉ္စိ ဥတ္တရိ [ဥတ္တရိံ (သီ။)] ကရဏီယံ၊ ကတဿ ဝါ ပတိစယော။ အထ ခေါ အာယသ္မတော ဒဗ္ဗဿ မလ္လပုတ္တဿ ရဟောဂတဿ ပဋိသလ္လီနဿ ဧဝံ စေတသော ပရိဝိတက္ကော ဥဒပါဒိ – ‘‘မယာ ခေါ ဇာတိယာ သတ္တဝဿေန အရဟတ္တံ သစ္ဆိကတံ။ ယံ ကိဉ္စိ သာဝကေန ပတ္တဗ္ဗံ သဗ္ဗံ မယာ အနုပ္ပတ္တံ။ နတ္ထိ စ မေ ကိဉ္စိ ဥတ္တရိကရဏီယံ၊ ကတဿ ဝါ ပတိစယော။ ကိံ နု ခေါ အဟံ သင်္ဃဿ ဝေယျာဝစ္စံ ကရေယျ’’န္တိ?

အထ ¶ ခေါ အာယသ္မတော ဒဗ္ဗဿ မလ္လပုတ္တဿ ဧတဒဟောသိ – ‘‘ယံနူနာဟံ သင်္ဃဿ သေနာသနဉ္စ ¶ ပညပေယျံ ဘတ္တာနိ စ ဥဒ္ဒိသေယျ’’န္တိ။ အထ ခေါ အာယသ္မာ ဒဗ္ဗော မလ္လပုတ္တော သာယနှသမယံ ပဋိသလ္လာနာ ဝုဋ္ဌိတော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နော ခေါ အာယသ္မာ ဒဗ္ဗော မလ္လပုတ္တော ဘဂဝန္တံ ဧတဒဝေါစ – ‘‘ဣဓ မယှံ၊ ဘန္တေ၊ ရဟောဂတဿ ပဋိသလ္လီနဿ ဧဝံ စေတသော ပရိဝိတက္ကော ဥဒပါဒိ – ‘မယာ ခေါ ဇာတိယာ သတ္တဝဿေန အရဟတ္တံ သစ္ဆိကတံ။ ယံ ကိဉ္စိ သာဝကေန ပတ္တဗ္ဗံ၊ သဗ္ဗံ မယာ အနုပ္ပတ္တံ။ နတ္ထိ စ မေ ကိဉ္စိ ဥတ္တရိကရဏီယံ၊ ကတဿ ဝါ ပတိစယော။ ကိံ နု ခေါ အဟံ သင်္ဃဿ ဝေယျာဝစ္စံ ကရေယျ’န္တိ ¶ ? တဿ မယှံ၊ ဘန္တေ၊ ဧတဒဟောသိ – ‘ယံနူနာဟံ သင်္ဃဿ သေနာသနဉ္စ ပညပေယျံ ဘတ္တာနိ စ ဥဒ္ဒိသေယျ’န္တိ။ ဣစ္ဆာမဟံ၊ ဘန္တေ၊ သင်္ဃဿ သေနာသနဉ္စ ပညာပေတုံ ဘတ္တာနိ စ ဥဒ္ဒိသိတု’’န္တိ။ ‘‘သာဓု သာဓု၊ ဒဗ္ဗ။ တေန ဟိ တွံ၊ ဒဗ္ဗ၊ သင်္ဃဿ သေနာသနဉ္စ ပညပေဟိ ဘတ္တာနိ စ ဥဒ္ဒိသာဟီ’’တိ [ဥဒ္ဒိသာတိ (ပါရာ။ ၃၈၀)]။ ‘‘ဧဝံ၊ ဘန္တေ’’တိ ခေါ အာယသ္မာ ဒဗ္ဗော မလ္လပုတ္တော ဘဂဝတော ပစ္စဿောသိ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘တေန ဟိ၊ ဘိက္ခဝေ၊ သင်္ဃော ဒဗ္ဗံ မလ္လပုတ္တံ သေနာသနပညာပကဉ္စ ဘတ္တုဒ္ဒေသကဉ္စ သမ္မန္နတု။ ဧဝဉ္စ ပန၊ ဘိက္ခဝေ၊ သမ္မန္နိတဗ္ဗော။ ပဌမံ ဒဗ္ဗော မလ္လပုတ္တော ယာစိတဗ္ဗော [ဒဗ္ဗော ယာစိတဗ္ဗော (သျာ။ က။)]။ ယာစိတွာ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၉၀။ ‘‘သုဏာတု မေ၊ ဘန္တေ၊ သင်္ဃော။ ယဒိ သင်္ဃဿ ပတ္တကလ္လံ၊ သင်္ဃော အာယသ္မန္တံ ဒဗ္ဗံ မလ္လပုတ္တံ သေနာသနပညာပကဉ္စ ဘတ္တုဒ္ဒေသကဉ္စ သမ္မန္နေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ သင်္ဃော အာယသ္မန္တံ ဒဗ္ဗံ မလ္လပုတ္တံ သေနာသနပညာပကဉ္စ ဘတ္တုဒ္ဒေသကဉ္စ သမ္မန္နတိ။ ယဿာယသ္မတော ခမတိ အာယသ္မတော ဒဗ္ဗဿ မလ္လပုတ္တဿ သေနာသနပညာပကဿ စ ဘတ္တုဒ္ဒေသကဿ စ သမ္မုတိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘သမ္မတော ¶ သင်္ဃေန အာယသ္မာ ဒဗ္ဗော မလ္လပုတ္တော သေနာသနပညာပကော စ ဘတ္တုဒ္ဒေသကော စ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ ¶ ။

၁၉၁။ သမ္မတော ¶ စ ပနာယသ္မာ ဒဗ္ဗော မလ္လပုတ္တော သဘာဂါနံ ဘိက္ခူနံ ဧကဇ္ဈံ သေနာသနံ ပညပေတိ။ ယေ တေ ဘိက္ခူ သုတ္တန္တိကာ တေသံ ဧကဇ္ဈံ သေနာသနံ ပညပေတိ – တေ အညမညံ သုတ္တန္တံ သင်္ဂါယိဿန္တီတိ။ ယေ တေ ဘိက္ခူ ဝိနယဓရာ တေသံ ဧကဇ္ဈံ သေနာသနံ ပညပေတိ – တေ အညမညံ ဝိနယံ ဝိနိစ္ဆိနိဿန္တီတိ။ ယေ တေ ဘိက္ခူ ဓမ္မကထိကာ တေသံ ဧကဇ္ဈံ သေနာသနံ ပညပေတိ – တေ အညမညံ ဓမ္မံ သာကစ္ဆိဿန္တီတိ။ ယေ တေ ဘိက္ခူ ဈာယိနော တေသံ ဧကဇ္ဈံ သေနာသနံ ပညပေတိ – တေ အညမညံ န ဗျာဗာဓိဿန္တီတိ ¶ ။ ယေ တေ ဘိက္ခူ တိရစ္ဆာနကထိကာ ကာယဒဠှိဗဟုလာ [ကာယဒဍ္ဎိဗဟုလာ (သီ။)] ဝိဟရန္တိ တေသမ္ပိ ဧကဇ္ဈံ သေနာသနံ ပညပေတိ – ဣမာယပိမေ အာယသ္မန္တော ရတိယာ အစ္ဆိဿန္တီတိ။ ယေပိ တေ ဘိက္ခူ ဝိကာလေ အာဂစ္ဆန္တိ တေသမ္ပိ တေဇောဓာတုံ သမာပဇ္ဇိတွာ တေနေဝ အာလောကေန သေနာသနံ ပညပေတိ၊ အပိသု ဘိက္ခူ သဉ္စိစ္စ ဝိကာလေ အာဂစ္ဆန္တိ – မယံ အာယသ္မတော ဒဗ္ဗဿ မလ္လပုတ္တဿ ဣဒ္ဓိပါဋိဟာရိယံ ပဿိဿာမာတိ။

တေ အာယသ္မန္တံ ဒဗ္ဗံ မလ္လပုတ္တံ ဥပသင်္ကမိတွာ ဧဝံ ဝဒန္တိ – ‘‘အမှာကံ၊ အာဝုသော ဒဗ္ဗ၊ သေနာသနံ ပညပေဟီ’’တိ။ တေ အာယသ္မာ ဒဗ္ဗော မလ္လပုတ္တော ဧဝံ ဝဒေတိ – ‘‘ကတ္ထ အာယသ္မန္တာ ဣစ္ဆန္တိ ကတ္ထ ပညပေမီ’’တိ? တေ သဉ္စိစ္စ ဒူရေ အပဒိသန္တိ – ‘‘အမှာကံ၊ အာဝုသော ဒဗ္ဗ၊ ဂိဇ္ဈကူဋေ ပဗ္ဗတေ သေနာသနံ ¶ ပညပေဟိ။ အမှာကံ၊ အာဝုသော၊ စောရပပါတေ သေနာသနံ ပညပေဟိ။ အမှာကံ၊ အာဝုသော၊ ဣသိဂိလိပဿေ ကာဠသိလာယံ သေနာသနံ ပညပေဟိ။ အမှာကံ၊ အာဝုသော၊ ဝေဘာရပဿေ သတ္တပဏ္ဏိဂုဟာယံ သေနာသနံ ပညပေဟိ။ အမှာကံ၊ အာဝုသော၊ သီတဝနေ သပ္ပသောဏ္ဍိကပဗ္ဘာရေ သေနာသနံ ပညပေဟိ။ အမှာကံ၊ အာဝုသော၊ ဂေါတမကကန္ဒရာယံ [ဂေါမဋကန္ဒရာယံ (သျာ။ ကံ။)] သေနာသနံ ပညပေဟိ။ အမှာကံ၊ အာဝုသော၊ တိန္ဒုကကန္ဒရာယံ သေနာသနံ ပညပေဟိ။ အမှာကံ၊ အာဝုသော၊ တပေါဒကန္ဒရာယံ [ကပေါတကန္ဒရာယံ (က။)] သေနာသနံ ပညပေဟိ။ အမှာကံ၊ အာဝုသော၊ တပေါဒါရာမေ သေနာသနံ ပညပေဟိ။ အမှာကံ၊ အာဝုသော၊ ဇီဝကမ္ဗဝနေ သေနာသနံ ပညပေဟိ။ အမှာကံ၊ အာဝုသော၊ မဒ္ဒကုစ္ဆိမှိ မိဂဒါယေ သေနာသနံ ပညပေဟီ’’တိ။

တေသံ ¶ အာယသ္မာ ဒဗ္ဗော မလ္လပုတ္တော တေဇောဓာတုံ သမာပဇ္ဇိတွာ အင်္ဂုလိယာ ဇလမာနာယ ပုရတော ပုရတော ဂစ္ဆတိ။ တေပိ တေနေဝ အာလောကေန အာယသ္မတော ဒဗ္ဗဿ မလ္လပုတ္တဿ ပိဋ္ဌိတော ပိဋ္ဌိတော ဂစ္ဆန္တိ။ တေသံ အာယသ္မာ ဒဗ္ဗော မလ္လပုတ္တော ဧဝံ သေနာသနံ ပညပေတိ – အယံ မဉ္စော၊ ဣဒံ ပီဌံ ¶ ၊ အယံ ဘိသိ၊ ဣဒံ ဗိဗ္ဗောဟနံ [ဗိမ္ဗောဟနံ (သီ။ သျာ။ ကံ။)]၊ ဣဒံ ဝစ္စဋ္ဌာနံ၊ ဣဒံ ပဿာဝဋ္ဌာနံ၊ ဣဒံ ပါနီယံ၊ ဣဒံ ပရိဘောဇနီယံ၊ အယံ ကတ္တရဒဏ္ဍော၊ ဣဒံ သင်္ဃဿ ကတိကသဏ္ဌာနံ၊ ဣမံ ကာလံ ပဝိသိတဗ္ဗံ ¶ ၊ ဣမံ ကာလံ နိက္ခမိတဗ္ဗန္တိ။ တေသံ အာယသ္မာ ဒဗ္ဗော မလ္လပုတ္တော ဧဝံ သေနာသနံ ပညပေတွာ ပုနဒေဝ ဝေဠုဝနံ ပစ္စာဂစ္ဆတိ။

၁၉၂။ တေန ခေါ ပန သမယေန မေတ္တိယဘူမဇကာ [မေတ္တိယဘုမ္မဇကာ (သီ။ သျာ။ ကံ။)] ဘိက္ခူ နဝကာ စေဝ ဟောန္တိ အပ္ပပုညာ စ။ ယာနိ သင်္ဃဿ လာမကာနိ သေနာသနာနိ တာနိ တေသံ ပါပုဏန္တိ လာမကာနိ စ ဘတ္တာနိ။ တေန ခေါ ပန သမယေန ရာဇဂဟေ မနုဿာ ဣစ္ဆန္တိ ¶ ထေရာနံ ဘိက္ခူနံ အဘိသင်္ခါရိကံ ပိဏ္ဍပါတံ ဒါတုံ – သပ္ပိမ္ပိ၊ တေလမ္ပိ၊ ဥတ္တရိဘင်္ဂမ္ပိ။ မေတ္တိယဘူမဇကာနံ ပန ဘိက္ခူနံ ပါကတိကံ ဒေန္တိ – ယထာရန္ဓံ [ယထာရဒ္ဓံ (သျာ။)] ကဏာဇကံ ဗိလင်္ဂဒုတိယံ။ တေ ပစ္ဆာဘတ္တံ ပိဏ္ဍပါတပ္ပဋိက္ကန္တာ ထေရေ ဘိက္ခူ ပုစ္ဆန္တိ – ‘‘တုမှာကံ၊ အာဝုသော၊ ဘတ္တဂ္ဂေ ကိံ အဟောသိ၊ တုမှာကံ ကိံ အဟောသီ’’တိ [ကိံ နာဟောသိ (သျာ။ ကံ။)]? ဧကစ္စေ ထေရာ ဧဝံ ဝဒန္တိ – ‘‘အမှာကံ၊ အာဝုသော၊ သပ္ပိ အဟောသိ၊ တေလံ အဟောသိ၊ ဥတ္တရိဘင်္ဂံ အဟောသီ’’တိ။ မေတ္တိယဘူမဇကာ ပန ဘိက္ခူ ဧဝံ ဝဒန္တိ – ‘‘အမှာကံ၊ အာဝုသော၊ န ကိဉ္စိ အဟောသိ – ပါကတိကံ ယထာရန္ဓံ ကဏာဇကံ ဗိလင်္ဂဒုတိယ’’န္တိ။

တေန ခေါ ပန သမယေန ကလျာဏဘတ္တိကော ဂဟပတိ သင်္ဃဿ စတုက္ကဘတ္တံ ဒေတိ နိစ္စဘတ္တံ။ သော ဘတ္တဂ္ဂေ သပုတ္တဒါရော ဥပတိဋ္ဌိတွာ ပရိဝိသတိ – အညေ ဩဒနေန ပုစ္ဆန္တိ၊ အညေ သူပေန ပုစ္ဆန္တိ၊ အညေ တေလေန ပုစ္ဆန္တိ၊ အညေ ဥတ္တရိဘင်္ဂေန ပုစ္ဆန္တိ။ တေန ခေါ ပန သမယေန ကလျာဏဘတ္တိကဿ ဂဟပတိနော ဘတ္တံ သွာတနာယ မေတ္တိယဘူမဇကာနံ ဘိက္ခူနံ ဥဒ္ဒိဋ္ဌံ ဟောတိ။ အထ ¶ ခေါ ကလျာဏဘတ္တိကော ဂဟပတိ အာရာမံ အဂမာသိ ကေနစိဒေဝ ကရဏီယေန။ သော ယေနာယသ္မာ ဒဗ္ဗော မလ္လပုတ္တော တေနုပသင်္ကမိ၊ ဥပသင်္ကမိတွာ အာယသ္မန္တံ ဒဗ္ဗံ မလ္လပုတ္တံ အဘိဝါဒေတွာ ဧကမန္တံ ¶ နိသီဒိ။ ဧကမန္တံ နိသိန္နံ ခေါ ကလျာဏဘတ္တိကံ ဂဟပတိံ အာယသ္မာ ဒဗ္ဗော မလ္လပုတ္တော ဓမ္မိယာ ကထာယ သန္ဒဿေသိ သမာဒပေသိ သမုတ္တေဇေသိ သမ္ပဟံသေသိ။ အထ ခေါ ကလျာဏဘတ္တိကော ဂဟပတိ အာယသ္မတာ ဒဗ္ဗေန မလ္လပုတ္တေန ဓမ္မိယာ ကထာယ သန္ဒဿိတော သမာဒပိတော သမုတ္တေဇိတော သမ္ပဟံသိတော အာယသ္မန္တံ ဒဗ္ဗံ မလ္လပုတ္တံ ဧတဒဝေါစ – ‘‘ကဿ၊ ဘန္တေ၊ အမှာကံ ဃရေ သွာတနာယ ဘတ္တံ ဥဒ္ဒိဋ္ဌ’’န္တိ? ‘‘မေတ္တိယဘူမဇကာနံ ခေါ၊ ဂဟပတိ၊ ဘိက္ခူနံ တုမှာကံ ဃရေ သွာတနာယ ဘတ္တံ ဥဒ္ဒိဋ္ဌ’’န္တိ။ အထ ခေါ ကလျာဏဘတ္တိကော ဂဟပတိ အနတ္တမနော အဟောသိ။ ကထဉှိ နာမ ပါပဘိက္ခူ အမှာကံ ဃရေ ဘုဉ္ဇိဿန္တီတိ ဃရံ ဂန္တွာ ဒါသိံ အာဏာပေသိ – ‘‘ယေ၊ ဇေ၊ သွေ ဘတ္တိကာ အာဂစ္ဆန္တိ တေ ကောဋ္ဌကေ အာသနံ ပညပေတွာ ကဏာဇကေန ဗိလင်္ဂဒုတိယေန ¶ ပရိဝိသာ’’တိ။ ‘‘ဧဝံ အယျာ’’တိ ခေါ သာ ဒါသီ ကလျာဏဘတ္တိကဿ ဂဟပတိနော ပစ္စဿောသိ။

အထ ခေါ မေတ္တိယဘူမဇကာ ဘိက္ခူ – ဟိယျော ခေါ၊ အာဝုသော၊ အမှာကံ ကလျာဏဘတ္တိကဿ ဂဟပတိနော ဘတ္တံ ဥဒ္ဒိဋ္ဌံ၊ သွေ အမှေ ကလျာဏဘတ္တိကော ဂဟပတိ သပုတ္တဒါရော ဥပတိဋ္ဌိတွာ ပရိဝိသိဿတိ၊ အညေ ဩဒနေန ပုစ္ဆိဿန္တိ၊ အညေ သူပေန ပုစ္ဆိဿန္တိ၊ အညေ ¶ တေလေန ပုစ္ဆိဿန္တိ၊ အညေ ဥတ္တရိဘင်္ဂေန ပုစ္ဆိဿန္တီတိ။ တေ တေနေဝ သောမနဿေန ¶ န စိတ္တရူပံ ရတ္တိယာ သုပိံသု။ အထ ခေါ မေတ္တိယဘူမဇကာ ဘိက္ခူ ပုဗ္ဗဏှသမယံ နိဝါသေတွာ ပတ္တစီဝရမာဒါယ ယေန ကလျာဏဘတ္တိကဿ ဂဟပတိနော နိဝေသနံ တေနုပသင်္ကမိံသု။ အဒ္ဒသာ ခေါ သာ ဒါသီ မေတ္တိယဘူမဇကေ ဘိက္ခူ ဒူရတောဝ အာဂစ္ဆန္တေ၊ ဒိသွာန ကောဋ္ဌကေ အာသနံ ပညာပေတွာ မေတ္တိယဘူမဇကေ ဘိက္ခူ ဧတဒဝေါစ – ‘‘နိသီဒထ၊ ဘန္တေ’’တိ။ အထ ခေါ မေတ္တိယဘူမဇကာနံ ဘိက္ခူနံ ဧတဒဟောသိ – ‘‘နိဿံသယံ ခေါ န တာဝ ဘတ္တံ သိဒ္ဓံ ဘဝိဿတိ ယထာ မယံ ကောဋ္ဌကေ နိသီဒါပိယာမာ’’တိ [နိသီဒါပေယျာမာတိ (က။)]။ အထ ခေါ သာ ဒါသီ ကဏာဇကေန [ကာဏာဇကေန (သျာ။ ကံ။)] ဗိလင်္ဂဒုတိယေန ဥပဂဉ္ဆိ – ဘုဉ္ဇထ၊ ဘန္တေတိ။ ‘‘မယံ ခေါ၊ ဘဂိနိ၊ နိစ္စဘတ္တိကာ’’တိ။ ‘‘ဇာနာမိ အယျာ နိစ္စဘတ္တိကာတိ။ အပိ စာဟံ ဟိယျောဝ ဂဟပတိနာ အာဏတ္တာ – ‘ယေ၊ ဇေ၊ သွေ ဘတ္တိကာ အာဂစ္ဆန္တိ၊ တေ ကောဋ္ဌကေ အာသနံ ပညာပေတွာ ကဏာဇကေန ဗိလင်္ဂဒုတိယေန ပရိဝိသာ’တိ။ ဘုဉ္ဇထ၊ ဘန္တေ’’တိ။ အထ ခေါ မေတ္တိယဘူမဇကာ ဘိက္ခူ – ဟိယျော ခေါ၊ အာဝုသော၊ ကလျာဏဘတ္တိကော ဂဟပတိ အာရာမံ အဂမာသိ ဒဗ္ဗဿ မလ္လပုတ္တဿ ¶ သန္တိကေ။ နိဿံသယံ ခေါ မယံ ဒဗ္ဗေန မလ္လပုတ္တေန ဂဟပတိနော အန္တရေ ပရိဘိန္နာတိ [သန္တိကေ ပရိဘိန္နာတိ (သျာ။ ကံ။)]။ တေ တေနေဝ ဒေါမနဿေန န စိတ္တရူပံ ဘုဉ္ဇိံသု။ အထ ခေါ မေတ္တိယဘူမဇကာ ဘိက္ခူ ပစ္ဆာဘတ္တံ ပိဏ္ဍပါတပ္ပဋိက္ကန္တာ အာရာမံ ဂန္တွာ ပတ္တစီဝရံ ပဋိသာမေတွာ ဗဟာရာမကောဋ္ဌကေ သင်္ဃာဋိပလ္လတ္ထိကာယ နိသီဒိံသု တုဏှီဘူတာ မင်္ကုဘူတာ ပတ္တက္ခန္ဓာ အဓောမုခါ ပဇ္ဈာယန္တာ ¶ အပ္ပဋိဘာနာ။

အထ ခေါ မေတ္တိယာ ဘိက္ခုနီ ယေန မေတ္တိယဘူမဇကာ ဘိက္ခူ တေနုပသင်္ကမိ၊ ဥပသင်္ကမိတွာ မေတ္တိယဘူမဇကေ ဘိက္ခူ ဧတဒဝေါစ – ‘‘ဝန္ဒာမိ အယျာ’’တိ။ ဧဝံ ဝုတ္တေ မေတ္တိယဘူမဇကာ ဘိက္ခူ နာလပိံသု။ ဒုတိယမ္ပိ ခေါ…ပေ… တတိယမ္ပိ ခေါ မေတ္တိယာ ဘိက္ခုနီ မေတ္တိယဘူမဇကေ ဘိက္ခူ ဧတဒဝေါစ – ‘‘ဝန္ဒာမိ အယျာ’’တိ။ တတိယမ္ပိ ခေါ မေတ္တိယဘူမဇကာ ဘိက္ခူ နာလပိံသု။ ‘‘ကျာဟံ အယျာနံ အပရဇ္ဈာမိ? ကိဿ မံ အယျာ နာလပန္တီ’’တိ? ‘‘တထာ ဟိ ပန တွံ၊ ဘဂိနိ၊ အမှေ ဒဗ္ဗေန မလ္လပုတ္တေန ဝိဟေဌိယမာနေ အဇ္ဈုပေက္ခသီ’’တိ? ‘‘ကျာဟံ၊ အယျာ၊ ကရောမီ’’တိ? ‘‘သစေ ခေါ တွံ၊ ဘဂိနိ၊ ဣစ္ဆေယျာသိ၊ အဇ္ဇေဝ ဘဂဝါ အာယသ္မန္တံ ဒဗ္ဗံ ¶ မလ္လပုတ္တံ နာသာပေယျာ’’တိ။ ‘‘ကျာဟံ၊ အယျာ၊ ကရောမိ? ကိံ မယာ သက္ကာ ကာတု’’န္တိ? ‘‘ဧဟိ တွံ၊ ဘဂိနိ၊ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ ဧဝံ ဝဒေဟိ – ‘ဣဒံ ¶ ၊ ဘန္တေ၊ နစ္ဆန္နံ နပ္ပတိရူပံ၊ ယာယံ၊ ဘန္တေ၊ ဒိသာ အဘယာ အနီတိကာ အနုပဒ္ဒဝါ သာယံ ဒိသာ သဘယာ သဤတိကာ သဥပဒ္ဒဝါ၊ ယတော နိဝါတံ တတော သဝါတံ [တတော ပဝါတံ (သီ။ သျာ။ ကံ။)]၊ ဥဒကံ မညေ အာဒိတ္တံ၊ အယျေနမှိ ဒဗ္ဗေန မလ္လပုတ္တေန ဒူသိတာ’’’တိ။ ‘‘ဧဝံ အယျာ’’တိ ခေါ မေတ္တိယာ ဘိက္ခုနီ မေတ္တိယဘူမဇကာနံ ဘိက္ခူနံ ပဋိဿုတွာ [ပဋိဿုဏိတွာ (သျာ။ ကံ။)] ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ အဋ္ဌာသိ။ ဧကမန္တံ ဌိတာ ခေါ မေတ္တိယာ [သာ မေတ္တိယာ (သျာ။ က။)] ဘိက္ခုနီ ဘဂဝန္တံ ဧတဒဝေါစ ¶ – ‘‘ဣဒံ၊ ဘန္တေ၊ နစ္ဆန္နံ နပ္ပတိရူပံ၊ ယာယံ၊ ဘန္တေ၊ ဒိသာ အဘယာ အနီတိကာ အနုပဒ္ဒဝါ သာယံ ဒိသာ သဘယာ သဤတိကာ သဥပဒ္ဒဝါ၊ ယတော နိဝါတံ တတော သဝါတံ၊ ဥဒကံ မညေ အာဒိတ္တံ၊ အယျေနမှိ ဒဗ္ဗေန မလ္လပုတ္တေန ဒူသိတာ’’တိ။

၁၉၃။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသင်္ဃံ သန္နိပါတာပေတွာ အာယသ္မန္တံ ဒဗ္ဗံ မလ္လပုတ္တံ ပဋိပုစ္ဆိ – ‘‘သရသိ တွံ၊ ဒဗ္ဗ၊ ဧဝရူပံ ကတ္တာ ¶ ယထာယံ ဘိက္ခုနီ အာဟာ’’တိ? ‘‘ယထာ မံ၊ ဘန္တေ၊ ဘဂဝါ ဇာနာတီ’’တိ။ ဒုတိယမ္ပိ ခေါ ဘဂဝါ အာယသ္မန္တံ ဒဗ္ဗံ မလ္လပုတ္တံ ဧတဒဝေါစ – ‘‘သရသိ တွံ၊ ဒဗ္ဗ၊ ဧဝရူပံ ကတ္တာ ယထာယံ ဘိက္ခုနီ အာဟာ’’တိ? ‘‘ယထာ မံ၊ ဘန္တေ၊ ဘဂဝါ ဇာနာတီ’’တိ။ တတိယမ္ပိ ခေါ ဘဂဝါ အာယသ္မန္တံ ဒဗ္ဗံ မလ္လပုတ္တံ ဧတဒဝေါစ – ‘‘သရသိ တွံ၊ ဒဗ္ဗ၊ ဧဝရူပံ ကတ္တာ ယထာယံ ဘိက္ခုနီ အာဟာ’’တိ? ‘‘ယထာ မံ၊ ဘန္တေ၊ ဘဂဝါ ဇာနာတီ’’တိ။ ‘‘န ခေါ၊ ဒဗ္ဗ၊ ဒဗ္ဗာ ဧဝံ နိဗ္ဗေဌေန္တိ။ သစေ တယာ ကတံ ကတန္တိ ဝဒေဟိ။ သစေ အကတံ အကတန္တိ ဝဒေဟီ’’တိ။ ‘‘ယတောဟံ၊ ဘန္တေ၊ ဇာတော နာဘိဇာနာမိ သုပိနန္တေနပိ မေထုနံ ဓမ္မံ ပဋိသေဝိတာ၊ ပဂေဝ ဇာဂရော’’တိ။ အထ ခေါ ဘဂဝါ ဘိက္ခူ အာမန္တေသိ – ‘‘တေန ဟိ၊ ဘိက္ခဝေ၊ မေတ္တိယံ ဘိက္ခုနိံ နာသေထ။ ဣမေ စ ဘိက္ခူ အနုယုဉ္ဇထာ’’တိ။ ဣဒံ ဝတွာ ဘဂဝါ ဥဋ္ဌာယာသနာ ဝိဟာရံ ပါဝိသိ။

အထ ခေါ တေ ဘိက္ခူ မေတ္တိယံ ဘိက္ခုနိံ နာသေသုံ။ အထ ခေါ မေတ္တိယဘူမဇကာ ဘိက္ခူ တေ ဘိက္ခူ ဧတဒဝေါစုံ – ‘‘မာဝုသော၊ မေတ္တိယံ ဘိက္ခုနိံ နာသေထ၊ န သာ ကိဉ္စိ အပရဇ္ဈတိ၊ အမှေဟိ သာ ဥဿာဟိတာ ကုပိတေဟိ အနတ္တမနေဟိ စာဝနာဓိပ္ပာယေဟီ’’တိ။ ‘‘ကိံ ပန တုမှေ၊ အာဝုသော၊ အာယသ္မန္တံ ဒဗ္ဗံ ¶ မလ္လပုတ္တံ အမူလိကာယ သီလဝိပတ္တိယာ အနုဒ္ဓံသေထာ’’တိ? ‘‘ဧဝမာဝုသော’’တိ။ ယေ တေ ဘိက္ခူ အပ္ပိစ္ဆာ…ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ အမူလိကာယ သီလဝိပတ္တိယာ အနုဒ္ဓံသေဿန္တီ’’တိ! အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ ¶ …ပေ… ‘‘သစ္စံ ကိရ၊ ဘိက္ခဝေ၊ မေတ္တိယဘူမဇကာ ဘိက္ခူ ဒဗ္ဗံ မလ္လပုတ္တံ အမူလိကာယ သီလဝိပတ္တိယာ အနုဒ္ဓံသေန္တီ’’တိ? ‘‘သစ္စံ ဘဂဝါ’’တိ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ –

‘‘တေန ဟိ၊ ဘိက္ခဝေ၊ သင်္ဃော ဒဗ္ဗဿ မလ္လပုတ္တဿ သတိဝေပုလ္လပ္ပတ္တဿ သတိဝိနယံ ဒေတု။ ဧဝဉ္စ ¶ ပန၊ ဘိက္ခဝေ၊ ဒါတဗ္ဗော – ‘‘တေန၊ ဘိက္ခဝေ၊ ဒဗ္ဗေန မလ္လပုတ္တေန သင်္ဃံ ဥပသင်္ကမိတွာ၊ ဧကံသံ ဥတ္တရာသင်္ဂံ ကရိတွာ၊ ဝုဍ္ဎာနံ ဘိက္ခူနံ ပါဒေ ဝန္ဒိတွာ၊ ဥက္ကုဋိကံ နိသီဒိတွာ၊ အဉ္ဇလိံ ပဂ္ဂဟေတွာ၊ ဧဝမဿ ဝစနီယော – ‘ဣမေ မံ၊ ဘန္တေ၊ မေတ္တိယဘူမဇကာ ဘိက္ခူ အမူလိကာယ သီလဝိပတ္တိယာ အနုဒ္ဓံသေန္တိ။ သောဟံ၊ ဘန္တေ၊ သတိဝေပုလ္လပ္ပတ္တော သင်္ဃံ သတိဝိနယံ ယာစာမီ’တိ။ ဒုတိယမ္ပိ ယာစိတဗ္ဗော။ တတိယမ္ပိ ယာစိတဗ္ဗော – ‘ဣမေ မံ၊ ဘန္တေ မေတ္တိယဘူမဇကာ ဘိက္ခူ အမူလိကာယ သီလဝိပတ္တိယာ အနုဒ္ဓံသေန္တိ။ သောဟံ ¶ [သောဟံ ဘန္တေ (က။)] သတိဝေပုလ္လပ္ပတ္တော တတိယမ္ပိ၊ ဘန္တေ၊ သင်္ဃံ သတိဝိနယံ ယာစာမီ’တိ။ ‘‘ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၉၄။ သုဏာတု ¶ မေ၊ ဘန္တေ၊ သင်္ဃော။ ဣမေ မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ အမူလိကာယ သီလဝိပတ္တိယာ အနုဒ္ဓံသေန္တိ။ အာယသ္မာ ဒဗ္ဗော မလ္လပုတ္တော သတိဝေပုလ္လပ္ပတ္တော သင်္ဃံ သတိဝိနယံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော အာယသ္မတော ဒဗ္ဗဿ မလ္လပုတ္တဿ သတိဝေပုလ္လပ္ပတ္တဿ သတိဝိနယံ ဒဒေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ ဣမေ မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ အမူလိကာယ သီလဝိပတ္တိယာ အနုဒ္ဓံသေန္တိ။ အာယသ္မာ ဒဗ္ဗော မလ္လပုတ္တော သတိဝေပုလ္လပ္ပတ္တော သင်္ဃံ သတိဝိနယံ ယာစတိ။ သင်္ဃော အာယသ္မတော ဒဗ္ဗဿ မလ္လပုတ္တဿ သတိဝေပုလ္လပ္ပတ္တဿ သတိဝိနယံ ဒေတိ။ ယဿာယသ္မတော ခမတိ အာယသ္မတော ဒဗ္ဗဿ မလ္လပုတ္တဿ သတိဝေပုလ္လပ္ပတ္တဿ သတိဝိနယဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သင်္ဃော။ ဣမေ မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ အမူလိကာယ သီလဝိပတ္တိယာ အနုဒ္ဓံသေန္တိ။ အာယသ္မာ ဒဗ္ဗော မလ္လပုတ္တော သတိဝေပုလ္လပ္ပတ္တော သင်္ဃံ သတိဝိနယံ ယာစတိ။ သင်္ဃော အာယသ္မတော ဒဗ္ဗဿ မလ္လပုတ္တဿ သတိဝေပုလ္လပ္ပတ္တဿ သတိဝိနယံ ဒေတိ။ ယဿာယသ္မတော ခမတိ အာယသ္မတော ¶ ဒဗ္ဗဿ မလ္လပုတ္တဿ သတိဝေပုလ္လပ္ပတ္တဿ သတိဝိနယဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒိန္နော သင်္ဃေန အာယသ္မတော ဒဗ္ဗဿ မလ္လပုတ္တဿ သတိဝေပုလ္လပ္ပတ္တဿ ¶ သတိဝိနယော။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

၁၉၅။ ‘‘ပဉ္စိမာနိ၊ ဘိက္ခဝေ၊ ဓမ္မိကာနိ သတိဝိနယဿ ဒါနာနိ။ သုဒ္ဓါ ဟောတိ ဘိက္ခု အနာပတ္တိကော၊ အနုဝဒန္တိ စ နံ၊ ယာစတိ စ၊ တဿ သင်္ဃော သတိဝိနယံ ဒေတိ ဓမ္မေန သမဂ္ဂေန – ဣမာနိ ခေါ၊ ဘိက္ခဝေ၊ ပဉ္စ ဓမ္မိကာနိ သတိဝိနယဿ ဒါနာနီ’’တိ။

၃။ အမူဠှဝိနယော

၁၉၆။ တေန ¶ ခေါ ပန သမယေန ဂဂ္ဂေါ ဘိက္ခု ဥမ္မတ္တကော ဟောတိ၊ စိတ္တဝိပရိယာသကတော။ တေန ဥမ္မတ္တကေန စိတ္တဝိပရိယာသကတေန ဗဟုံ အဿာမဏကံ အဇ္ဈာစိဏ္ဏံ ဟောတိ ဘာသိတပရိက္ကန္တံ။ ဘိက္ခူ ဂဂ္ဂံ ဘိက္ခုံ ဥမ္မတ္တကေန စိတ္တဝိပရိယာသကတေန အဇ္ဈာစိဏ္ဏေန အာပတ္တိယာ စောဒေန္တိ – ‘‘သရတာယသ္မာ ဧဝရူပိံ အာပတ္တိံ အာပဇ္ဇိတာ’’တိ? သော ဧဝံ ဝဒေတိ – ‘‘အဟံ ခေါ၊ အာဝုသော ¶ ၊ ဥမ္မတ္တကော အဟောသိံ စိတ္တဝိပရိယာသကတော။ တေန မေ ဥမ္မတ္တကေန စိတ္တဝိပရိယာသကတေန ဗဟုံ အဿာမဏကံ အဇ္ဈာစိဏ္ဏံ ဘာသိတပရိက္ကန္တံ။ နာဟံ တံ သရာမိ။ မူဠှေန မေ ဧတံ ကတ’’န္တိ။ ဧဝမ္ပိ နံ ဝုစ္စမာနာ စောဒေန္တေဝ – ‘‘သရတာယသ္မာ ဧဝရူပိံ အာပတ္တိံ အာပဇ္ဇိတာ’’တိ? ယေ တေ ဘိက္ခူ အပ္ပိစ္ဆာ။။ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခူ ဂဂ္ဂံ ဘိက္ခုံ ဥမ္မတ္တကေန စိတ္တဝိပရိယာသကတေန အဇ္ဈာစိဏ္ဏေန အာပတ္တိယာ စောဒေဿန္တိ – ‘‘သရတာယသ္မာ ဧဝရူပိံ အာပတ္တိံ အာပဇ္ဇိတာ’တိ! သော ဧဝံ ဝဒေတိ ¶ – ‘အဟံ ခေါ၊ အာဝုသော၊ ဥမ္မတ္တကော အဟောသိံ စိတ္တဝိပရိယာသကတော။ တေန မေ ဥမ္မတ္တကေန စိတ္တဝိပရိယာသကတေန ဗဟုံ အဿာမဏကံ အဇ္ဈာစိဏ္ဏံ ဘာသိတပရိက္ကန္တံ။ နာဟံ တံ သရာမိ။ မူဠှေန မေ ဧတံ ကတ’န္တိ။ ဧဝမ္ပိ နံ ဝုစ္စမာနာ စောဒေန္တေဝ – ‘‘သရတာယသ္မာ ဧဝရူပိံ အာပတ္တိံ အာပဇ္ဇိတာ’’တိ? အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ…ပေ… ‘‘သစ္စံ ကိရ၊ ဘိက္ခဝေ…ပေ… သစ္စံ ဘဂဝါ’’တိ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ –

‘‘တေန ဟိ၊ ဘိက္ခဝေ၊ သင်္ဃော ဂဂ္ဂဿ ဘိက္ခုနော အမူဠှဿ အမူဠှဝိနယံ ဒေတု။ ဧဝဉ္စ ¶ ပန၊ ဘိက္ခဝေ၊ ဒါတဗ္ဗော – ‘‘တေန၊ ဘိက္ခဝေ၊ ဂဂ္ဂေန ဘိက္ခုနာ သင်္ဃံ ဥပသင်္ကမိတွာ၊ ဧကံသံ ဥတ္တရာသင်္ဂံ ကရိတွာ၊ ဝုဍ္ဎာနံ ဘိက္ခူနံ ပါဒေ ဝန္ဒိတွာ၊ ဥက္ကုဋိကံ နိသီဒိတွာ၊ အဉ္ဇလိံ ပဂ္ဂဟေတွာ၊ ဧဝမဿ ဝစနီယော – ‘အဟံ၊ ဘန္တေ၊ ဥမ္မတ္တကော အဟောသိံ စိတ္တဝိပရိယာသကတော။ တေန မေ ဥမ္မတ္တကေန စိတ္တဝိပရိယာသကတေန ဗဟုံ အဿာမဏကံ အဇ္ဈာစိဏ္ဏံ ဘာသိတပရိက္ကန္တံ။ မံ ဘိက္ခူ ဥမ္မတ္တကေန စိတ္တဝိပရိယာသကတေန အဇ္ဈာစိဏ္ဏေန အာပတ္တိယာ စောဒေန္တိ – ‘သရတာယသ္မာ ဧဝရူပိံ အာပတ္တိံ အာပဇ္ဇိတာ’တိ? တျာဟံ ဧဝံ ဝဒါမိ – ‘အဟံ ခေါ၊ အာဝုသော၊ ဥမ္မတ္တကော အဟောသိံ စိတ္တဝိပရိယာသကတော။ တေန မေ ဥမ္မတ္တကေန စိတ္တဝိပရိယာသကတေန ဗဟုံ အဿာမဏကံ အဇ္ဈာစိဏ္ဏံ ဘာသိတပရိက္ကန္တံ။ နာဟံ တံ သရာမိ။ မူဠှေန မေ ဧတံ ကတ’န္တိ။ ဧဝမ္ပိ မံ ဝုစ္စမာနာ စောဒေန္တေဝ ¶ – ‘သရတာယသ္မာ ဧဝရူပိံ အာပတ္တိံ အာပဇ္ဇိတာ’တိ? သောဟံ ¶ ၊ ဘန္တေ၊ အမူဠှော သင်္ဃံ အမူဠှဝိနယံ ယာစာမီ’တိ။ ဒုတိယမ္ပိ ယာစိတဗ္ဗော။ တတိယမ္ပိ ယာစိတဗ္ဗော – ‘အဟံ၊ ဘန္တေ၊ ဥမ္မတ္တကော အဟောသိံ စိတ္တဝိပရိယာသကတော။ တေန မေ ဥမ္မတ္တကေန စိတ္တဝိပရိယာသကတေန ဗဟုံ အဿာမဏကံ အဇ္ဈာစိဏ္ဏံ ဘာသိတပရိက္ကန္တံ။ မံ ဘိက္ခူ ဥမ္မတ္တကေန စိတ္တဝိပရိယာသကတေန အဇ္ဈာစိဏ္ဏေန အာပတ္တိယာ စောဒေန္တိ – ‘သရတာယသ္မာ ဧဝရူပိံ အာပတ္တိံ အာပဇ္ဇိတာ’တိ? တျာဟံ ဧဝံ ဝဒါမိ – ‘အဟံ ခေါ၊ အာဝုသော၊ ဥမ္မတ္တကော အဟောသိံ စိတ္တဝိပရိယာသကတော။ တေန မေ ဥမ္မတ္တကေန စိတ္တဝိပရိယာသကတေန ဗဟုံ အဿာမဏကံ အဇ္ဈာစိဏ္ဏံ ဘာသိတပရိက္ကန္တံ။ နာဟံ တံ သရာမိ မူဠှေန မေ ဧတံ ကတ’န္တိ။ ဧဝမ္ပိ မံ ဝုစ္စမာနာ စောဒေန္တေဝ – ‘သရတာယသ္မာ ဧဝရူပိံ အာပတ္တိံ အာပဇ္ဇိတာ’တိ? သောဟံ အမူဠှော [သောဟံ ဘန္တေ အမူဠှော (က။)] တတိယမ္ပိ၊ ဘန္တေ၊ သင်္ဃံ အမူဠှဝိနယံ ယာစာမီ’တိ။ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၁၉၇။ ‘‘သုဏာတု မေ၊ ဘန္တေ၊ သင်္ဃော။ အယံ ဂဂ္ဂေါ ဘိက္ခု ဥမ္မတ္တကော အဟောသိ စိတ္တဝိပရိယာသကတော။ တေန ဥမ္မတ္တကေန စိတ္တဝိပရိယာသကတေန ဗဟုံ အဿာမဏကံ အဇ္ဈာစိဏ္ဏံ ဘာသိတပရိက္ကန္တံ။ ဘိက္ခူ ဂဂ္ဂံ ဘိက္ခုံ ဥမ္မတ္တကေန စိတ္တဝိပရိယာသကတေန အဇ္ဈာစိဏ္ဏေန အာပတ္တိယာ စောဒေန္တိ – ‘သရတာယသ္မာ ဧဝရူပိံ အာပတ္တိံ အာပဇ္ဇိတာ’တိ? သော ဧဝံ ဝဒေတိ – ‘အဟံ ခေါ၊ အာဝုသော၊ ဥမ္မတ္တကော အဟောသိံ စိတ္တဝိပရိယာသကတော။ တေန မေ ဥမ္မတ္တကေန စိတ္တဝိပရိယာသကတေန ဗဟုံ အဿာမဏကံ အဇ္ဈာစိဏ္ဏံ ¶ ဘာသိတပရိက္ကန္တံ။ နာဟံ တံ သရာမိ၊ မူဠှေန ¶ မေ ဧတံ ကတ’န္တိ။ ဧဝမ္ပိ နံ ဝုစ္စမာနာ စောဒေန္တေဝ – ‘သရတာယသ္မာ ဧဝရူပိံ အာပတ္တိံ အာပဇ္ဇိတာ’တိ? သော အမူဠှော သင်္ဃံ အမူဠှဝိနယံ ယာစတိ။ ယဒိ သင်္ဃဿ ပတ္တကလ္လံ၊ သင်္ဃော ဂဂ္ဂဿ ဘိက္ခုနော အမူဠှဿ အမူဠှဝိနယံ ဒဒေယျ။ ဧသာ ဉတ္တိ။

‘‘သုဏာတု ¶ မေ၊ ဘန္တေ၊ သင်္ဃော။ အယံ ဂဂ္ဂေါ ဘိက္ခု ဥမ္မတ္တကော အဟောသိ စိတ္တဝိပရိယာသကတော။ တေန ဥမ္မတ္တကေန စိတ္တဝိပရိယာသကတေန ဗဟုံ အဿာမဏကံ အဇ္ဈာစိဏ္ဏံ ဘာသိတပရိက္ကန္တံ။ ဘိက္ခူ ဂဂ္ဂံ ဘိက္ခုံ ဥမ္မတ္တကေန စိတ္တဝိပရိယာသကတေန အဇ္ဈာစိဏ္ဏေန အာပတ္တိယာ စောဒေန္တိ – ‘သရတာယသ္မာ ဧဝရူပိံ အာပတ္တိံ အာပဇ္ဇိတာ’တိ? သော ဧဝံ ဝဒေတိ – ‘အဟံ ခေါ၊ အာဝုသော၊ ဥမ္မတ္တကော အဟောသိံ စိတ္တဝိပရိယာသကတော။ တေန မေ ဥမ္မတ္တကေန စိတ္တဝိပရိယာသကတေန ဗဟုံ အဿာမဏကံ အဇ္ဈာစိဏ္ဏံ ¶ ဘာသိတပရိက္ကန္တံ။ နာဟံ တံ သရာမိ မူဠှေန မေ ဧတံ ကတ’န္တိ။ ဧဝမ္ပိ နံ ဝုစ္စမာနာ စောဒေန္တေဝ – ‘သရတာယသ္မာ ဧဝရူပိံ အာပတ္တိံ အာပဇ္ဇိတာ’တိ? သော အမူဠှော သင်္ဃံ အမူဠှဝိနယံ ယာစတိ။ သင်္ဃော ဂဂ္ဂဿ ဘိက္ခုနော အမူဠှဿ အမူဠှဝိနယံ ဒေတိ။ ယဿာယသ္မတော ခမတိ ဂဂ္ဂဿ ဘိက္ခုနော အမူဠှဿ အမူဠှဝိနယဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘ဒိန္နော သင်္ဃေန ဂဂ္ဂဿ ဘိက္ခုနော အမူဠှဿ အမူဠှဝိနယော။ ခမတိ သင်္ဃဿ၊ တသ္မာ တုဏှီ ¶ ၊ ဧဝမေတံ ဓာရယာမီ’’တိ။

၁၉၈။ ‘‘တီဏိမာနိ၊ ဘိက္ခဝေ၊ အဓမ္မိကာနိ အမူဠှဝိနယဿ ဒါနာနိ၊ တီဏိ ဓမ္မိကာနိ။ ကမ္မာနိ တီဏိ အဓမ္မိကာနိ အမူဠှဝိနယဿ ဒါနာနိ?

‘‘ဣဓ ပန၊ ဘိက္ခဝေ၊ ဘိက္ခု အာပတ္တိံ အာပန္နော ဟောတိ။ တမေနံ စောဒေတိ သင်္ဃော ဝါ၊ သမ္ဗဟုလာ ဝါ၊ ဧကပုဂ္ဂလော ဝါ – ‘သရတာယသ္မာ ဧဝရူပိံ အာပတ္တိံ အာပဇ္ဇိတာ’တိ? သော သရမာနောဝ ဧဝံ ဝဒေတိ – ‘န ခေါ အဟံ၊ အာဝုသော၊ သရာမိ ဧဝရူပိံ အာပတ္တိံ အာပဇ္ဇိတာ’တိ။ တဿ သင်္ဃော အမူဠှဝိနယံ ဒေတိ။ အဓမ္မိကံ အမူဠှဝိနယဿ ဒါနံ။

‘‘ဣဓ ပန၊ ဘိက္ခဝေ၊ ဘိက္ခု အာပတ္တိံ အာပန္နော ဟောတိ။ တမေနံ စောဒေတိ သင်္ဃော ဝါ၊ သမ္ဗဟုလာ ဝါ၊ ဧကပုဂ္ဂလော ဝါ – ‘သရတာယသ္မာ ဧဝရူပိံ အာပတ္တိံ အာပဇ္ဇိတာ’တိ? သော သရမာနောဝ ဧဝံ ဝဒေတိ – ‘သရာမိ ခေါ အဟံ၊ အာဝုသော၊ ယထာသုပိနန္တေနာ’တိ။ တဿ သင်္ဃော အမူဠှဝိနယံ ဒေတိ။ အဓမ္မိကံ အမူဠှဝိနယဿ ဒါနံ။

‘‘ဣဓ ပန၊ ဘိက္ခဝေ၊ ဘိက္ခု အာပတ္တိံ အာပန္နော ဟောတိ။ တမေနံ စောဒေတိ သင်္ဃော ဝါ၊ သမ္ဗဟုလာ ¶ ဝါ၊ ဧကပုဂ္ဂလော ဝါ – ‘သရတာယသ္မာ ဧဝရူပိံ အာပတ္တိံ အာပဇ္ဇိတာ’တိ? သော အနုမ္မတ္တကော ဥမ္မတ္တကာလယံ ကရောတိ – ‘အဟမ္ပိ ခေါ ဧဝံ ကရောမိ။ တုမှေပိ ဧဝံ ကရောထ။ မယှမ္ပိ ဧတံ ကပ္ပတိ။ တုမှာကမ္ပေတံ ကပ္ပတီ’တိ။ တဿ သင်္ဃော အမူဠှဝိနယံ ဒေတိ။ အဓမ္မိကံ အမူဠှဝိနယဿ ဒါနံ။ ဣမာနိ တီဏိ အဓမ္မိကာနိ အမူဠှဝိနယဿ ဒါနာနိ။

၁၉၉။ ‘‘ကတမာနိ ¶ ¶ တီဏိ ဓမ္မိကာနိ အမူဠှဝိနယဿ ဒါနာနိ?

‘‘ဣဓ ပန၊ ဘိက္ခဝေ၊ ဘိက္ခု ဥမ္မတ္တကော ဟောတိ စိတ္တဝိပရိယာသကတော။ တေန ဥမ္မတ္တကေန စိတ္တဝိပရိယာသကတေန ဗဟုံ အဿာမဏကံ အဇ္ဈာစိဏ္ဏံ ဟောတိ ဘာသိတပရိက္ကန္တံ။ တမေနံ စောဒေတိ သင်္ဃော ဝါ၊ သမ္ဗဟုလာ ဝါ၊ ဧကပုဂ္ဂလော ဝါ – ‘သရတာယသ္မာ ဧဝရူပိံ အာပတ္တိံ အာပဇ္ဇိတာ’တိ? သော အဿရမာနောဝ ဧဝံ ဝဒေတိ – ‘န ခေါ အဟံ၊ အာဝုသော၊ သရာမိ ဧဝရူပိံ အာပတ္တိံ အာပဇ္ဇိတာ’တိ။ တဿ သင်္ဃော အမူဠှဝိနယံ ဒေတိ။ ဓမ္မိကံ အမူဠှဝိနယဿ ဒါနံ။

‘‘ဣဓ ပန၊ ဘိက္ခဝေ၊ ဘိက္ခု ဥမ္မတ္တကော ဟောတိ စိတ္တဝိပရိယာသကတော။ တေန ဥမ္မတ္တကေန စိတ္တဝိပရိယာသကတေန ဗဟုံ အဿာမဏကံ အဇ္ဈာစိဏ္ဏံ ဟောတိ ဘာသိတပရိက္ကန္တံ။ တမေနံ စောဒေတိ သင်္ဃော ဝါ၊ သမ္ဗဟုလာ ဝါ၊ ဧကပုဂ္ဂလော ဝါ – ‘သရတာယသ္မာ ဧဝရူပိံ အာပတ္တိံ အာပဇ္ဇိတာ’တိ ¶ ? သော အဿရမာနောဝ ဧဝံ ဝဒေတိ – ‘သရာမိ ခေါ အဟံ၊ အာဝုသော၊ ယထာ သုပိနန္တေနာ’တိ။ တဿ သင်္ဃော အမူဠှဝိနယံ ဒေတိ။ ဓမ္မိကံ အမူဠှဝိနယဿ ဒါနံ။

‘‘ဣဓ ပန၊ ဘိက္ခဝေ၊ ဘိက္ခု ဥမ္မတ္တကော ဟောတိ စိတ္တဝိပရိယာသကတော။ တေန ဥမ္မတ္တကေန စိတ္တဝိပရိယာသကတေန ဗဟုံ အဿာမဏကံ အဇ္ဈာစိဏ္ဏံ ဟောတိ ဘာသိတပရိက္ကန္တံ။ တမေနံ စောဒေတိ သင်္ဃော ဝါ၊ သမ္ဗဟုလာ ဝါ၊ ဧကပုဂ္ဂလော ဝါ – ‘သရတာယသ္မာ ဧဝရူပိံ အာပတ္တိံ အာပဇ္ဇိတာ’တိ? သော ဥမ္မတ္တကော ဥမ္မတ္တကာလယံ ကရောတိ – ‘အဟမ္ပိ ဧဝံ ¶ ကရောမိ။ တုမှေပိ ဧဝံ ကရောထ။ မယှမ္ပိ ဧတံ ကပ္ပတိ။ တုမှာကမ္ပေတံ ကပ္ပတီ’တိ။ တဿ သင်္ဃော အမူဠှဝိနယံ ဒေတိ။ ဓမ္မိကံ အမူဠှဝိနယဿ ဒါနံ။ ‘‘ဣမာနိ တီဏိ ဓမ္မိကာနိ အမူဠှဝိနယဿ ဒါနာနီ’’တိ။

၄။ ပဋိညာတကရဏံ

၂၀၀။ တေန ခေါ ပန သမယေန ဆဗ္ဗဂ္ဂိယာ ဘိက္ခူ အပ္ပဋိညာယ ဘိက္ခူနံ ကမ္မာနိ ကရောန္တိ ¶ – တဇ္ဇနီယမ္ပိ၊ နိယဿမ္ပိ၊ ပဗ္ဗာဇနီယမ္ပိ၊ ပဋိသာရဏီယမ္ပိ၊ ဥက္ခေပနီယမ္ပိ။ ယေ တေ ဘိက္ခူ အပ္ပိစ္ဆာ…ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခူ အပ္ပဋိညာယ ဘိက္ခူနံ ကမ္မာနိ ကရိဿန္တိ – တဇ္ဇနီယမ္ပိ၊ နိယဿမ္ပိ၊ ပဗ္ဗာဇနီယမ္ပိ၊ ပဋိသာရဏီယမ္ပိ၊ ဥက္ခေပနီယမ္ပီ’’တိ! အထ ခေါ ¶ တေ ဘိက္ခူ ဘဂဝတော ဧတမတ္ထံ အာရောစေသုံ…ပေ… ‘‘သစ္စံ ကိရ၊ ဘိက္ခဝေ…ပေ… ‘‘သစ္စံ ဘဂဝါ’’တိ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ – ‘‘န၊ ဘိက္ခဝေ၊ အပ္ပဋိညာယ ဘိက္ခူနံ ကမ္မံ ကာတဗ္ဗံ – တဇ္ဇနီယံ ဝါ၊ နိယဿံ ဝါ၊ ပဗ္ဗာဇနီယံ ဝါ၊ ပဋိသာရဏီယံ ဝါ၊ ဥက္ခေပနီယံ ဝါ။ ယော ကရေယျ၊ အာပတ္တိ ဒုက္ကဋဿ။

၂၀၁။ ‘‘ဧဝံ ခေါ၊ ဘိက္ခဝေ၊ အဓမ္မိကံ ဟောတိ ပဋိညာတကရဏံ၊ ဧဝံ ဓမ္မိကံ။ ကထဉ္စ၊ ဘိက္ခဝေ၊ အဓမ္မိကံ ဟောတိ ပဋိညာတကရဏံ?

‘‘ဘိက္ခု ပါရာဇိကံ အဇ္ဈာပန္နော ဟောတိ။ တမေနံ စောဒေတိ သင်္ဃော ဝါ၊ သမ္ဗဟုလာ ဝါ၊ ဧကပုဂ္ဂလော ဝါ – ‘ပါရာဇိကံ အာယသ္မာ အဇ္ဈာပန္နော’တိ? သော ဧဝံ ဝဒေတိ – ‘န ခေါ အဟံ၊ အာဝုသော၊ ပါရာဇိကံ အဇ္ဈာပန္နော ¶ ၊ သင်္ဃာဒိသေသံ အဇ္ဈာပန္နော’တိ။ တံ သင်္ဃော သင်္ဃာဒိသေသေန ကာရေတိ။ အဓမ္မိကံ ပဋိညာတကရဏံ။

‘‘ဘိက္ခု ပါရာဇိကံ အဇ္ဈာပန္နော ဟောတိ။ တမေနံ စောဒေတိ သင်္ဃော ဝါ၊ သမ္ဗဟုလာ ဝါ၊ ဧကပုဂ္ဂလော ဝါ – ‘ပါရာဇိကံ အာယသ္မာ အဇ္ဈာပန္နော’တိ? သော ဧဝံ ဝဒေတိ – ‘န ခေါ အဟံ၊ အာဝုသော၊ ပါရာဇိကံ အဇ္ဈာပန္နော၊ ထုလ္လစ္စယံ…ပေ… ပါစိတ္တိယံ…ပေ… ပါဋိဒေသနီယံ…ပေ… ဒုက္ကဋံ…ပေ… ¶ ဒုဗ္ဘာသိတံ အဇ္ဈာပန္နော’တိ။ တံ သင်္ဃော ဒုဗ္ဘာသိတေန ကာရေတိ။ အဓမ္မိကံ ပဋိညာတကရဏံ။

‘‘ဘိက္ခု သင်္ဃာဒိသေသံ…ပေ… ထုလ္လစ္စယံ…ပေ… ပါစိတ္တိယံ…ပေ… ပါဋိဒေသနီယံ…ပေ… ဒုက္ကဋံ…ပေ… ဒုဗ္ဘာသိတံ အဇ္ဈာပန္နော ဟောတိ။ တမေနံ စောဒေတိ သင်္ဃော ဝါ၊ သမ္ဗဟုလာ ဝါ၊ ဧကပုဂ္ဂလော ဝါ – ‘ဒုဗ္ဘာသိတံ အာယသ္မာ အဇ္ဈာပန္နော’တိ ¶ ? သော ဧဝံ ဝဒေတိ – ‘န ခေါ အဟံ၊ အာဝုသော၊ ဒုဗ္ဘာသိတံ အဇ္ဈာပန္နော၊ ပါရာဇိကံ အဇ္ဈာပန္နော’တိ။ တံ သင်္ဃော ပါရာဇိကေန ကာရေတိ။ အဓမ္မိကံ ပဋိညာတကရဏံ။

‘‘ဘိက္ခု ဒုဗ္ဘာသိတံ အဇ္ဈာပန္နော ဟောတိ။ တမေနံ စောဒေတိ သင်္ဃော ဝါ၊ သမ္ဗဟုလာ ဝါ၊ ဧကပုဂ္ဂလော ¶ ဝါ – ‘ဒုဗ္ဘာသိတံ အာယသ္မာ အဇ္ဈာပန္နော’တိ? သော ဧဝံ ဝဒေတိ – ‘န ခေါ အဟံ၊ အာဝုသော၊ ဒုဗ္ဘာသိတံ အဇ္ဈာပန္နော၊ သင်္ဃာဒိသေသံ…ပေ… ထုလ္လစ္စယံ…ပေ… ပါစိတ္တိယံ…ပေ… ပါဋိဒေသနီယံ…ပေ… ဒုက္ကဋံ အဇ္ဈာပန္နော’တိ။ တံ သင်္ဃော ဒုက္ကဋေန ကာရေတိ။ အဓမ္မိကံ ပဋိညာတကရဏံ။ ‘‘ဧဝံ ခေါ၊ ဘိက္ခဝေ၊ အဓမ္မိကံ ဟောတိ ပဋိညာတကရဏံ။

‘‘ကထဉ္စ ¶ ၊ ဘိက္ခဝေ၊ ဓမ္မိကံ ဟောတိ ပဋိညာတကရဏံ? ဘိက္ခု ပါရာဇိကံ အဇ္ဈာပန္နော ဟောတိ။ တမေနံ စောဒေတိ သင်္ဃော ဝါ၊ သမ္ဗဟုလာ ဝါ၊ ဧကပုဂ္ဂလော ဝါ – ‘ပါရာဇိကံ အာယသ္မာ အဇ္ဈာပန္နော’တိ? သော ¶ ဧဝံ ဝဒေတိ – ‘အာမ၊ အာဝုသော၊ ပါရာဇိကံ အဇ္ဈာပန္နော’တိ။ တံ သင်္ဃော ပါရာဇိကေန ကာရေတိ။ ဓမ္မိကံ ပဋိညာတကရဏံ။

‘‘ဘိက္ခု သင်္ဃာဒိသေသံ…ပေ… ထုလ္လစ္စယံ…ပေ… ပါစိတ္တိယံ…ပေ… ပါဋိဒေသနီယံ…ပေ… ဒုက္ကဋံ…ပေ… ဒုဗ္ဘာသိတံ အဇ္ဈာပန္နော ဟောတိ။ တမေနံ စောဒေတိ သင်္ဃော ဝါ၊ သမ္ဗဟုလာ ဝါ၊ ဧကပုဂ္ဂလော ဝါ – ‘ဒုဗ္ဘာသိတံ အာယသ္မာ အဇ္ဈာပန္နော’တိ? သော ဧဝံ ဝဒေတိ – ‘အာမ၊ အာဝုသော၊ ဒုဗ္ဘာသိတံ အဇ္ဈာပန္နော’တိ။ တံ သင်္ဃော ဒုဗ္ဘာသိတေန ကာရေတိ။ ဓမ္မိကံ ပဋိညာတကရဏံ။ ဧဝံ ခေါ၊ ဘိက္ခဝေ၊ ဓမ္မိကံ ဟောတိ ပဋိညာတကရဏ’’န္တိ။

၅။ ယေဘုယျသိကာ

၂၀၂။ တေန ခေါ ပန သမယေန ဘိက္ခူ သင်္ဃမဇ္ဈေ ဘဏ္ဍနဇာတာ ကလဟဇာတာ ဝိဝါဒါပန္နာ အညမညံ မုခသတ္တီဟိ ဝိတုဒန္တာ ဝိဟရန္တိ၊ န သက္ကောန္တိ တံ အဓိကရဏံ ဝူပသမေတုံ။ ဘဂဝတော ဧတမတ္ထံ အာရောစေသုံ။ ‘‘အနုဇာနာမိ၊ ဘိက္ခဝေ၊ ဧဝရူပံ အဓိကရဏံ ယေဘုယျသိကာယ ဝူပသမေတုံ။ ပဉ္စဟင်္ဂေဟိ သမန္နာဂတော ဘိက္ခု သလာကဂ္ဂါဟာပကော သမ္မန္နိတဗ္ဗော – ယော န ဆန္ဒာဂတိံ ဂစ္ဆေယျ၊ န ဒေါသာဂတိံ ဂစ္ဆေယျ၊ န မောဟာဂတိံ ဂစ္ဆေယျ၊ န ဘယာဂတိံ ဂစ္ဆေယျ၊ ဂဟိတာဂဟိတုဉ္စ ဇာနေယျ။ ဧဝဉ္စ ပန၊ ဘိက္ခဝေ၊ သမ္မန္နိတဗ္ဗော။ ပဌမံ ဘိက္ခု ယာစိတဗ္ဗော၊ ယာစိတွာ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၂၀၃။ ‘‘သုဏာတု မေ၊ ဘန္တေ၊ သင်္ဃော။ ယဒိ သင်္ဃဿ ပတ္တကလ္လံ၊ သင်္ဃော ဣတ္ထန္နာမံ ဘိက္ခုံ သလာကဂ္ဂါဟာပကံ သမ္မန္နေယျ။ ဧသာ ¶ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ သင်္ဃော ဣတ္ထန္နာမံ ဘိက္ခုံ သလာကဂ္ဂါဟာပကံ သမ္မန္နတိ။ ယဿာယသ္မတော ¶ ခမတိ ဣတ္ထန္နာမဿ ဘိက္ခုနော သလာကဂ္ဂါဟာပကဿ သမ္မုတိ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘သမ္မတော သင်္ဃေန ဣတ္ထန္နာမော ဘိက္ခု သလာကဂ္ဂါဟာပကော။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

၂၀၄။ ‘‘ဒသယိမေ ¶ ¶ ၊ ဘိက္ခဝေ၊ အဓမ္မိကာ သလာကဂ္ဂါဟာ၊ ဒသ ဓမ္မိကာ [ဒသ ဓမ္မိကာ သလာကဂ္ဂါဟာ (က။)]။ ကတမေ ဒသ အဓမ္မိကာ သလာကဂ္ဂါဟာ? ဩရမတ္တကဉ္စ အဓိကရဏံ ဟောတိ၊ န စ ဂတိဂတံ ဟောတိ၊ န စ သရိတသာရိတံ ဟောတိ၊ ဇာနာတိ အဓမ္မဝါဒီ ဗဟုတရာတိ၊ အပ္ပေဝ နာမ အဓမ္မဝါဒီ ဗဟုတရာ အဿူတိ၊ ဇာနာတိ သင်္ဃော ဘိဇ္ဇိဿတီတိ၊ အပ္ပေဝ နာမ သင်္ဃော ဘိဇ္ဇေယျာတိ၊ အဓမ္မေန ဂဏှန္တိ၊ ဝဂ္ဂါ ဂဏှန္တိ၊ န စ ယထာဒိဋ္ဌိယာ ဂဏှန္တိ – ဣမေ ဒသ အဓမ္မိကာ သလာကဂ္ဂါဟာ။

‘‘ကတမေ ဒသ ဓမ္မိကာ သလာကဂ္ဂါဟာ? န စ ဩရမတ္တကံ အဓိကရဏံ ဟောတိ၊ ဂတိဂတဉ္စ ဟောတိ၊ သရိတသာရိတဉ္စ ဟောတိ၊ ဇာနာတိ ဓမ္မဝါဒီ ဗဟုတရာတိ၊ အပ္ပေဝ နာမ ဓမ္မဝါဒီ ဗဟုတရာ အဿူတိ၊ ဇာနာတိ သင်္ဃော န ဘိဇ္ဇိဿတီတိ၊ အပ္ပေဝ နာမ သင်္ဃော န ဘိဇ္ဇေယျာတိ၊ ဓမ္မေန ဂဏှန္တိ၊ သမဂ္ဂါ ဂဏှန္တိ၊ ယထာဒိဋ္ဌိယာ စ ဂဏှန္တိ – ဣမေ ဒသ ဓမ္မိကာ သလာကဂ္ဂါဟာ’’တိ။

၆။ တဿပါပိယသိကာ

၂၀၅။ တေန ခေါ ပန သမယေန ဥပဝါဠော ဘိက္ခု သင်္ဃမဇ္ဈေ အာပတ္တိယာ ¶ အနုယုဉ္ဇိယမာနော အဝဇာနိတွာ ပဋိဇာနာတိ၊ ပဋိဇာနိတွာ အဝဇာနာတိ၊ အညေနညံ ပဋိစရတိ၊ သမ္ပဇာနမုသာ ဘာသတိ။ ယေ တေ ဘိက္ခူ အပ္ပိစ္ဆာ…ပေ… တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဥပဝါဠော ဘိက္ခု သင်္ဃမဇ္ဈေ အာပတ္တိယာ အနုယုဉ္ဇိယမာနော အဝဇာနိတွာ ပဋိဇာနိဿတိ၊ ပဋိဇာနိတွာ အဝဇာနိဿတိ၊ အညေနညံ ပဋိစရိဿတိ၊ သမ္ပဇာနမုသာ ဘာသိဿတီ’’တိ! အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ…ပေ… ‘‘သစ္စံ ကိရ၊ ဘိက္ခဝေ…ပေ… ‘‘သစ္စံ ဘဂဝါ’’တိ…ပေ… ဝိဂရဟိတွာ…ပေ… ဓမ္မိံ ကထံ ကတွာ ဘိက္ခူ အာမန္တေသိ – တေန ဟိ၊ ဘိက္ခဝေ၊ သင်္ဃော ဥပဝါဠဿ ဘိက္ခုနော တဿပါပိယသိကာကမ္မံ ကရောတု။ ဧဝဉ္စ ပန၊ ဘိက္ခဝေ၊ ကာတဗ္ဗံ။ ပဌမံ ¶ ဥပဝါဠော ဘိက္ခု စောဒေတဗ္ဗော၊ စောဒေတွာ သာရေတဗ္ဗော၊ သာရေတွာ အာပတ္တိံ အာရောပေတဗ္ဗော၊ အာပတ္တိံ အာရောပေတွာ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော –

၂၀၆။ ‘‘သုဏာတု မေ၊ ဘန္တေ၊ သင်္ဃော။ အယံ ဥပဝါဠော ဘိက္ခု သင်္ဃမဇ္ဈေ အာပတ္တိယာ အနုယုဉ္ဇိယမာနော အဝဇာနိတွာ ပဋိဇာနာတိ၊ ပဋိဇာနိတွာ အဝဇာနာတိ၊ အညေနညံ ပဋိစရတိ၊ သမ္ပဇာနမုသာ ‘ဘာသတိ။ ယဒိ ¶ သင်္ဃဿ ပတ္တကလ္လံ၊ သင်္ဃော ဥပဝါဠဿ ဘိက္ခုနော တဿပါပိယသိကာကမ္မံ ကရေယျ။ ဧသာ ဉတ္တိ။

‘‘သုဏာတု မေ၊ ဘန္တေ၊ သင်္ဃော။ အယံ ဥပဝါဠော ဘိက္ခု သင်္ဃမဇ္ဈေ အာပတ္တိယာ အနုယုဉ္ဇိယမာနော အဝဇာနိတွာ ပဋိဇာနာတိ၊ ပဋိဇာနိတွာ ¶ အဝဇာနာတိ၊ အညေနညံ ပဋိစရတိ၊ သမ္ပဇာနမုသာ ဘာသတိ။ သင်္ဃော ဥပဝါဠဿ ဘိက္ခုနော တဿပါပိယသိကာကမ္မံ ကရောတိ။ ယဿာယသ္မတော ခမတိ ဥပဝါဠဿ ဘိက္ခုနော တဿပါပိယသိကာကမ္မဿ ကရဏံ၊ သော တုဏှဿ၊ ယဿ နက္ခမတိ၊ သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ…ပေ… တတိယမ္ပိ ဧတမတ္ထံ ဝဒါမိ…ပေ…။

‘‘ကတံ သင်္ဃေန ဥပဝါဠဿ ဘိက္ခုနော တဿပါပိယသိကာကမ္မံ။ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ။

၂၀၇။ ‘‘ပဉ္စိမာနိ ¶ ၊ ဘိက္ခဝေ၊ ဓမ္မိကာနိ တဿပါပိယသိကာကမ္မဿ ကရဏာနိ။ အသုစိ စ ဟောတိ၊ အလဇ္ဇီ စ၊ သာနုဝါဒေါ စ၊ တဿ သင်္ဃော တဿပါပိယသိကာကမ္မံ ကရောတိ ဓမ္မေန၊ သမဂ္ဂေန – ဣမာနိ ခေါ၊ ဘိက္ခဝေ၊ ပဉ္စ ဓမ္မိကာနိ တဿပါပိယသိကာကမ္မဿ ကရဏာနိ။

အဓမ္မကမ္မဒွါဒသကံ

၂၀၈။ ‘‘တီဟိ၊ ဘိက္ခဝေ၊ အင်္ဂေဟိ သမန္နာဂတံ တဿပါပိယသိကာကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။ အသမ္မုခါ ကတံ ဟောတိ၊ အပ္ပဋိပုစ္ဆာကတံ ဟောတိ၊ အပ္ပဋိညာယ ကတံ ဟောတိ…ပေ… အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဿပါပိယသိကာကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ။

ဓမ္မကမ္မဒွါဒသကံ

၂၀၉။ ‘‘တီဟိ ¶ ၊ ဘိက္ခဝေ၊ အင်္ဂေဟိ သမန္နာဂတံ တဿပါပိယသိကာကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။ သမ္မုခါ ကတံ ဟောတိ၊ ပဋိပုစ္ဆာကတံ ဟောတိ၊ ပဋိညာယ ကတံ ဟောတိ…ပေ… ¶ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ တဿပါပိယသိကာကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ။

အာကင်္ခမာနဆက္ကံ

၂၁၀။ ‘‘တီဟိ ¶ ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော အာကင်္ခမာနော သင်္ဃော တဿပါပိယသိကာကမ္မံ ကရေယျ။ ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သင်္ဃေ အဓိကရဏကာရကော၊ ဗာလော ဟောတိ အဗျတ္တော အာပတ္တိဗဟုလော အနပဒါနော၊ ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော အာကင်္ခမာနော သင်္ဃော တဿပါပိယသိကာကမ္မံ ကရေယျ။

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော အာကင်္ခမာနော ¶ သင်္ဃော တဿပါပိယသိကာကမ္မံ ကရေယျ။ အဓိသီလေ သီလဝိပန္နော ဟောတိ၊ အဇ္ဈာစာရေ အာစာရဝိပန္နော ဟောတိ၊ အတိဒိဋ္ဌိယာ ဒိဋ္ဌိဝိပန္နော ဟောတိ – ဣမေဟိ ခေါ၊ ဘိက္ခဝေ…ပေ…။

‘‘အပရေဟိပိ၊ ဘိက္ခဝေ…ပေ… ဗုဒ္ဓဿ အဝဏ္ဏံ ဘာသတိ၊ ဓမ္မဿ အဝဏ္ဏံ ဘာသတိ၊ သင်္ဃဿ အဝဏ္ဏံ ဘာသတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတဿ ဘိက္ခုနော အာကင်္ခမာနော သင်္ဃော တဿပါပိယသိကာကမ္မံ ကရေယျ။

‘‘တိဏ္ဏံ၊ ဘိက္ခဝေ၊ ဘိက္ခူနံ အာကင်္ခမာနော သင်္ဃော တဿပါပိယသိကာကမ္မံ ကရေယျ။ ဧကော ဘဏ္ဍနကာရကော ဟောတိ…ပေ… သင်္ဃေ အဓိကရဏကာရကော၊ ဧကော ဗာလော ဟောတိ အဗျတ္တော အာပတ္တိဗဟုလော အနပဒါနော၊ ဧကော ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ အာကင်္ခမာနော သင်္ဃော တဿပါပိယသိကာကမ္မံ ကရေယျ။

‘‘အပရေသမ္ပိ၊ ဘိက္ခဝေ၊ တိဏ္ဏံ ဘိက္ခူနံ အာကင်္ခမာနော သင်္ဃော တဿပါပိယသိကာကမ္မံ ကရေယျ။ ဧကော အဓိသီလေ သီလဝိပန္နော ဟောတိ၊ ဧကော အဇ္ဈာစာရေ အာစာရဝိပန္နော ဟောတိ၊ ဧကော အတိဒိဋ္ဌိယာ ဒိဋ္ဌိဝိပန္နော ဟောတိ – ဣမေသံ ခေါ၊ ဘိက္ခဝေ…ပေ…။

‘‘အပရေသမ္ပိ ¶ ၊ ဘိက္ခဝေ…ပေ… ဧကော ဗုဒ္ဓဿ အဝဏ္ဏံ ဘာသတိ၊ ဧကော ဓမ္မဿ အဝဏ္ဏံ ဘာသတိ၊ ဧကော သင်္ဃဿ အဝဏ္ဏံ ဘာသတိ – ဣမေသံ ခေါ၊ ဘိက္ခဝေ၊ တိဏ္ဏံ ဘိက္ခူနံ အာကင်္ခမာနော သင်္ဃော တဿပါပိယသိကာကမ္မံ ¶ ကရေယျ။

အဋ္ဌာရသဝတ္တံ

၂၁၁။ ‘‘တဿပါပိယသိကာကမ္မကတေန ¶ ၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ။ တတြာယံ သမ္မာဝတ္တနာ –

န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနပိ ဘိက္ခုနိယော န ဩဝဒိတဗ္ဗာ…ပေ… န ဘိက္ခူဟိ သမ္ပယောဇေတဗ္ဗ’’န္တိ။ အထ ခေါ သင်္ဃော ဥပဝါဠဿ ဘိက္ခုနော တဿပါပိယသိက�