📜

နမော တဿ ဘဂဝတော အရဟတော သမ္မာသမ္ဗုဒ္ဓဿ

ကင်္ခါဝိတရဏီပုရာဏ-ဋီကာ

ဂန္ထာရမ္ဘကထာ

ဗုဒ္ဓံ ¶ ¶ ဓမ္မဉ္စ သင်္ဃန္တိ-အာဒိနာ ယာ ပကာသိတာ၊

ဘဒန္တဗုဒ္ဓဃောသေန၊ မာတိကာဋ္ဌကထာ သုဘာ၊

တဿာ ဟိ လီနပဒံ ဝိ-ကာသနကောယမာရမ္ဘော။

ဂန္ထာရမ္ဘကထာဝဏ္ဏနာ

ဝိပ္ပသန္နေနာတိ ¶ ဝိဝိဓပ္ပသန္နေန။ ကထံ? ‘‘ဣတိပိ သော…ပေ… ဗုဒ္ဓါ ဘဂဝါ၊ သွာက္ခာတော…ပေ… ဝိညူဟိ၊ သုပ္ပဋိပန္နော…ပေ… လောကဿာ’’တိ (အ။ နိ။ ၅။၁၀) ဧဝမာဒိနာ။ ‘‘စေတသာ’’တိ ဝုတ္တတ္တာ တီသု ဝန္ဒနာသု စေတောဝန္ဒနာ အဓိပ္ပေတာ။ တန္နိန္နတာဒိဝသေန ကာယာဒီဟိ ပဏာမကရဏံ ဝန္ဒနာ၊ ဂုဏဝသေန မနသာပိ တထာဝ ကရဏံ မာနံ၊ ပစ္စယပ္ပဋိပတ္တိယာဒီဟိ ပူဇာကရဏံ ပူဇာ၊ ပစ္စယာဒီနံ အဘိသင်္ခရဏံ သက္ကစ္စ ကရဏံ သက္ကာရော၊ တေသံ။ ဘာဇနန္တိ အာဓာရော၊ အဓိကရဏံ ဝါ။

ထေရာ မဟာကဿပါဒယော၊ တေသံ ဝံသောတိ ထေရဝံသော၊ အာဂမာဓိဂမသမ္ပဒါယ တဿ ဝံသဿ ပဒီပဘူတာတိ ထေရဝံသပ္ပဒီပါ၊ တေသံ ထေရဝံသပ္ပဒီပါနံ။ အသံဟီရတ္တာ ထိရာနံ။ ဝိနယက္ကမေတိ ဝိနယပိဋကေ၊ အာရမ္ဘာနုရူပဝစနမေတံ။ သုတ္တာဘိဓမ္မေသုပိ တေ ထိရာ ဧဝ။ ‘‘ဗုဒ္ဓံ ဓမ္မဉ္စ သင်္ဃဉ္စ ပုဗ္ဗာစရိယသီဟာနဉ္စာ’’တိ အဝတွာ ကသ္မာ ဝိသုံ ဝုတ္တန္တိ စေ? ပယောဇနဝိသေသဒဿနတ္ထံ။ ဝတ္ထုတ္တယဿ ဟိ ပဏာမကရဏဿ အန္တရာယနိဝါရဏံ ပယောဇနံ ¶ အတ္တနော နိဿယဘူတာနံ အာစရိယာနံ ပဏာမကရဏဿ ဥပကာရညုတာဒဿနံ။ တေန ဗုဒ္ဓဉ္စ ဓမ္မဉ္စ သင်္ဃဉ္စ ဝန္ဒိတွာ၊ စ-သဒ္ဒေန ပုဗ္ဗာစရိယသီဟာနဉ္စ နမော ကတွာတိ ယောဇနာ။ အထ ဝါ ‘‘ဝန္ဒိတွာ’’တိ စေတောဝန္ဒနံ ဒဿေတွာ တတော ‘‘နမော ကတွာ’’တိ ဝါစာဝန္ဒနာ၊ ‘‘ကတဉ္ဇလီ’’တိ ကာယဝန္ဒနာပိ ဒဿိတာတိ ယောဇေတဗ္ဗံ။

ဣဒါနိ အဘိဓာနပ္ပယောဇနံ ဒဿေတုံ ‘‘ပါမောက္ခ’’န္တိအာဒိမာဟ။ တတ္ထ ပါမောက္ခန္တိ ပဓာနံ။ သီလဉှိ သဗ္ဗေသံ ကုသလဓမ္မာနံ ပဓာနံ အာဒိဘာဝတော။ ယထာ စ သတ္တာနံ ခဇ္ဇဘောဇ္ဇလေယျပေယျဝသေန စတုဗ္ဗိဓောပိ အာဟာရော မုခေန ပဝိသိတွာ အင်္ဂမင်္ဂါနိ ဖရတိ၊ ဧဝံ ယောဂိနောပိ စာတုဘူမကံ ကုသလံ သီလမုခေန ပဝိသိတွာ အတ္ထသိဒ္ဓိံ သမ္ပာဒေတိ။ တေန ဝုတ္တံ ‘‘မုခ’’န္တိအာဒိ။ အထ ဝါ မုခန္တိ ဥပါယော၊ တေန မောက္ခပ္ပဝေသာယ နိဗ္ဗာနသစ္ဆိကိရိယာယ မုခံ ဥပါယောတိ အတ္ထော။ မဟေသိနာ ယံ ပါတိမောက္ခံ ပကာသိတန္တိ သမ္ဗန္ဓော။ မဟန္တေ သီလာဒိက္ခန္ဓေ ဧသိ ဂဝေသီတိ မဟေသိ။

သူရတေန နိဝါတေနာတိ ‘‘တတ္ထ ကတမံ သောရစ္စံ? ယော ကာယိကော အဝီတိက္ကမော’’တိအာဒိနာ (ဓ။ သ။ ၁၃၄၉) သူရတေန၊ နီစဝုတ္တိနာ မာနုဒ္ဓစ္စဝသေန အတ္တာနံ အနုက္ခိပနဘာဝေန နိဝါတေန။ ဝိနယာစာရယုတ္တေန စာရိတ္တဝါရိတ္တေဟိ ယုတ္တေန။ ‘‘သောဏတ္ထေရေန ယာစိတော’’တိ အဝတွာ ‘‘သူရတေနာ’’တိအာဒိ ¶ ကသ္မာ ဝုတ္တံ၊ ကိံ ဒုဿီလေန ဝါ ဒုဋ္ဌေန ဝါ အလဇ္ဇိနာ ဝါ ယာစိတေန ဝဏ္ဏနာ ကာတုံ န ဝဋ္ဋတီတိ စေ? န န ဝဋ္ဋတိ။ ထေရဿ ဝစနံ ပဋိက္ခိပိတုံ န သက္ကာ၊ ဧဝရူပဂုဏော ထေရောဝ၊ ယာစနဝသေန ကတ္တဗ္ဗော အာဒရေနာတိ ဒဿေတုံ ဝုတ္တံ။

နာမေနာတိ အတ္တနော ဂုဏနာမေန။ သဒ္ဒလက္ခဏသုဘတော၊ ဝိနိစ္ဆယသုဘတော၊ ဝိညေယျသုဘတော စ သုဘံ။

ဂန္ထာရမ္ဘကထာဝဏ္ဏနာ နိဋ္ဌိတာ။

နိဒါနဝဏ္ဏနာ

‘‘အာဝိကတာ ဟိဿ ဖာသု ဟောတိ၊ တတ္ထာယသ္မန္တေ ပုစ္ဆာမိ…ပေ… တုဏှီ၊ ဧဝမေတံ ဓာရယာမီ’’တိ ဝတွာ ‘‘ဥဒ္ဒိဋ္ဌံ ခေါ အာယသ္မန္တော နိဒါန’’န္တိအာဒိနာ နယေန ဝုတ္တံ။ ဧတ္ထေဝ ယာဝတတိယာနုသာဝနကထာဝသာနေ အထ ¶ ခေါ ဥဒ္ဒေသကာလေ ‘‘အာဝိကတာ ဟိဿ ဖာသု ဟောတီ’’တိ ဝတွာ ‘‘ဥဒ္ဒိဋ္ဌံ ခေါ အာယသ္မန္တော နိဒါနံ။ တတ္ထာယသ္မန္တေ ပုစ္ဆာမီ’’တိအာဒိနာ နယေန အာဂတံ။ ဥပေါသထက္ခန္ဓကေပိ ဧဝမေဝ အာဂတံ။ တတ္ထ ပုဗ္ဗေ ဝုတ္တံ ပစ္ဆာ အာဂတသုတ္တေန ဝိရုဇ္ဈတိ။ တသ္မာ ယထာ န ဝိရုဇ္ဈတိ၊ တထာ ဥပပရိက္ခိတွာ ဂဟေတဗ္ဗံ။ ဧဝံ န ဝိရုဇ္ဈတီတိ ဧကေ။ ကထံ? ‘‘အာဝိကတာ ဟိဿ ဖာသု ဟောတီ’’တိ ဝတွာ ‘‘ဥဒ္ဒိဋ္ဌံ ခေါ အာယသ္မန္တော နိဒါနံ။ တတ္ထာယသ္မန္တေ ပုစ္ဆာမီ’’တိအာဒိနာ သုဥဒ္ဒိဋ္ဌံ ဟောတီတိ ဧတံ ဥဒ္ဒေသလက္ခဏံ ဣဓာပိ ခန္ဓကေပိ ဝုတ္တတ္တာ။ တသ္မာ ‘‘ဖာသု ဟောတီ’’တိ ဝတွာ ‘‘တတ္ထာယသ္မန္တေ ပုစ္ဆာမီ’’တိ ဝုတ္တဋ္ဌာနေ အဝုတ္တမ္ပိ အာနေတွာ ဂဟေတဗ္ဗံ။ ကသ္မာ? ဣဓ နိဒါနံ န ဒဿိတံ၊ ဥဒ္ဒေသော ဥဒ္ဒေသကာလေ ဥဒ္ဒိသိတဗ္ဗလက္ခဏဿ တတ္ထ ဝုတ္တတ္တာ။ အပိစ ‘‘နိဒါနုဒ္ဒေသော’’တိ ပဒံ ဥဒ္ဓရိတွာ နိဒါနုဒ္ဒေသံ ဒဿေတုကာမောပိ ‘‘သုဏာတု မေ၊ ဘန္တေ၊ သင်္ဃော…ပေ… အာဝိကတာ ဟိဿ ဖာသု ဟောတီ’’တိ ပါဌဝသေန အာဂတံ နိဒါနံ နိဋ္ဌာပေတွာ ဥပရိ အဋ္ဌကထာဝသေန ယောဇေတဗ္ဗံ ပါဠိံ ဣဓ ယောဇေတွာ ‘‘တတ္ထာယသ္မန္တေ ပုစ္ဆာမိ…ပေ… ဓာရယာမီ’’တိ နိဒါနပါဠိံ ပရိပုဏ္ဏံ ကတွာ ပုန ‘‘တတ္ထ နိဒါနုဒ္ဒေသော’’တိ ဥဒ္ဓဋပဒဝသေန သင်္ခေပတော နိဒါနုဒ္ဒေသလက္ခဏံ ဒဿေတုံ ‘‘ဧဝမေတံ ဓာရယာမီ’’တိ ဝတွာ ‘‘ဥဒ္ဒိဋ္ဌံ ခေါ အာယသ္မန္တော နိဒါန’’န္တိအာဒိ ဝုတ္တံ၊ တသ္မာ ဧဝံ ဥပရိ စ ခန္ဓကေ စ၊ အထ ခေါ ဥဒ္ဒေသကာလေ ‘‘အာဝိကတာ ဟိဿ ¶ ဖာသု ဟောတီ’’တိ ဝတွာ ‘‘ဥဒ္ဒိဋ္ဌံ ခေါ အာယသ္မန္တော နိဒါနံ။ တတ္ထာယသ္မန္တေ ပုစ္ဆာမီ’’တိအာဒိ နိဒါနုဒ္ဒေသောဝ ဒဿိတော၊ န နိဒါနံ။

သဝနာဏတ္တိဝစနန္တိ ဧတ္ထ သင်္ဃနဝကတရေန ဝတ္တုံ အယုတ္တန္တိ စေ? ယုတ္တမေဝ။ ‘‘ပါတိမောက္ခုဒ္ဒေသကေန ဧဝံ ဝတ္တဗ္ဗ’’န္တိ ဘဂဝတာ ဝုတ္တတ္တာ ဘဂဝတောဝ အာဏတ္တိ၊ န ဥဒ္ဒေသကဿ။ ဣဓ နဝကတရဝသေန ဝုတ္တံ။ ထေရောပိ ပန ဥဒ္ဒိသိတုံ လဘတီတိ ဒဿနတ္ထံ ‘‘ထေရာဓိကံ ပါတိမောက္ခ’’န္တိ ဝုတ္တံ။ ဣမိနာ သုတ္တေန နဝကတရော န လဘတီတိ စေ? တံ ဒဿေတုံ ‘‘ယော တတ္ထ ဘိက္ခူ’’တိအာဒိ ဝုတ္တံ။

ယထာ စတုဝဂ္ဂေန ဌပေတွာ ဥပသမ္ပဒါပဝါရဏာအဗ္ဘာနာနိ သဗ္ဗံ သင်္ဃကမ္မံ ကာတုံ ဝဋ္ဋတိ၊ ဧဝံ ‘‘အတိရေကဝီသတိဝဂ္ဂေန ဣမံ နာမ ကမ္မံ ကာတဗ္ဗ’’န္တိ အဝတွာ အတိရေကဝစနတ္တာ အညံ အတ္ထံ သူစေတိ၊ ကိံ တန္တိ ‘‘စတုဝဂ္ဂါဒိနာ’’တိအာဒိ။ တဉှိ တေဟိ ဧဝ သိဒ္ဓံ။ ကထံ? စတုဝဂ္ဂေန ဥပသမ္ပဒါပဝါရဏာ…ပေ… ဝီသတိဝဂ္ဂေန ¶ န ကိဉ္စိ သင်္ဃကမ္မံ ကာတုံ န ဝဋ္ဋတီတိ။ ဧတ္ထ ‘‘ဒသဝဂ္ဂေန အဗ္ဘာနကမ္မမတ္တံ ဌပေတွာ’’တိ ဝဒန္တေန စတုပဉ္စဝဂ္ဂေန ကရဏီယာနိပိ ဒသဝဂ္ဂေန ကာတုံ အနုညာတာနိ။ တသ္မာ အတိရေကေန ဝဋ္ဋတီတိ ဒီပိတံ၊ ‘‘ဌပေတွာ’’တိ ဝစနေန ဦနတရေန န ဝဋ္ဋတီတိ ဒီပိတမေဝ။ တသ္မာ န ဝတ္တဗ္ဗံ အတိရေကဝီသတိဝဂ္ဂေါတိ စေ? ဝတ္တဗ္ဗမေဝ။ စတုပဉ္စဝဂ္ဂေန ကတ္တဗ္ဗံ ဆသတ္တအဋ္ဌနဝဝဂ္ဂေန ကာတဗ္ဗန္တိ စ၊ ဒသဝဂ္ဂေန ကာတဗ္ဗံ ဧကာဒသဒွါဒသ…ပေ… ဧကူနဝီသတိဝဂ္ဂေန ကာတဗ္ဗန္တိ စ ဒီပိတံ။ ဦနတရေန န ဝဋ္ဋတီတိ ဒီပိတံ ပါကဋတော။ သဗ္ဗပ္ပကာရေန ပန အတိရေကဝီသတိအနတိရေကဝီသတိဝဂ္ဂေ ဝုတ္တေပိ ဒီပိတံ ဟောတီတိ ဝဇိရဗုဒ္ဓိတ္ထေရေန လိခိတံ။ ဣတော ပဋ္ဌာယ ‘‘လိခိတ’’န္တိ ဝုတ္တေ ဝဇိရဗုဒ္ဓိတ္ထေရေနာတိ ဂဟေတဗ္ဗံ။

သစေ အနုပေါသထေပိ ဝဋ္ဋေယျ၊ ‘‘ဥပေါသထံ ကရေယျာ’’တိ န ဝဒေယျ၊ ယသ္မာ အနုပေါသထေ ကာတုံ န ဝဋ္ဋတိ၊ တသ္မာ ‘‘အဇ္ဇုပေါသထော’’တိ ဝတွာ ပုန ‘‘ဥပေါသထံ ကရေယျာ’’တိ ဝုတ္တံ။ ‘‘ပစ္ဆိမကတ္တိကပုဏ္ဏမာ ဧဝါ’’တိ အဝဓာရဏံ တတော ပရံ ပဝါရဏာဒိဝသဿ နတ္ထိတာယ ကတံ။ ဥဒ္ဓံ ပကတိဥပေါသထေ ဝုတ္တေန ပကတိစာရိတ္တေန သဒ္ဓိံ ဣဒမ္ပိ။

‘‘နိမိတ္တေန နိမိတ္တံ သမ္ဗန္ဓိတွာ’’တိ န ဝတ္တဗ္ဗံ ‘‘တိဝိဓသမ္ပတ္တိယုတ္တာ’’တိ ဝုတ္တတ္တာတိ စေ? ဝတ္တဗ္ဗမေဝ။ ကသ္မာ? တိဝိဓသမ္ပတ္တိ နာမ နိမိတ္တသမ္ပတ္တိ၊ ပရိသာသမ္ပတ္တိ၊ ကမ္မဝါစာသမ္ပတ္တီတိအာဒိံ ဝတွာ ‘‘နိမိတ္တသမ္ပတ္တိ နာမ ပဗ္ဗတနိမိတ္တံ၊ ပါသာဏနိမိတ္တ’’န္တိအာဒိ ¶ ဝုတ္တံ၊ န နိမိတ္တေန နိမိတ္တသမ္ဗန္ဓနံ ဝုတ္တံ။ အပိစ ‘‘တိဝိဓသမ္ပတ္တိယုတ္တာ’’တိ သမ္ပယောဂင်္ဂေသု ဒဿေတွာ ပုန တမေဝ ပဟာနင်္ဂေသု ဒဿေတုံ ‘‘နိမိတ္တေန နိမိတ္တံ သမ္ဗန္ဓိတွာ’’တိ ဝုတ္တံ။ နဒိသမုဒ္ဒဇာတဿရေသု သမ္မတသီမာတော ကမ္မာနိ န ဝိပဇ္ဇန္တိ ဥဒကုက္ခေပသီမတ္တာတိ ‘‘ဝိပတ္တိသီမာယော နာမာ’’တိ ကသ္မာ ဝုတ္တာတိ စေ? သေသလက္ခဏာနိ သမ္ပာဒေတွာ နဒိယံ သီမာယ ဗဒ္ဓါယ ဥဒကပရိယန္တံ ကတွာ သီမာဂတတ္တာ ပုန တံ နဒိံ အန္တော ကတွာ တဠာကေ ကတေ သစေ တဿာ သီမာယ ကမ္မံ ကာတုံ ဝဋ္ဋေယျ၊ သီမာတော ကမ္မာနိ န ဝိပဇ္ဇေယျုံ။ ယသ္မာ ပန ဧဝံ ကာတုံ န ဝဋ္ဋတိ၊ တသ္မာ ‘‘ဥဒကုက္ခေပသီမတ္တာ’’တိ ဝုတ္တံ အကာရဏံ။

ဝီသတိဝဂ္ဂကရဏီယတ္တာ သင်္ဃကမ္မဿ ကမ္မာရဟေန သဒ္ဓိံ ဧကဝီသတိ ဘိက္ခူ နိသီဒိတုံ န သက္ကောန္တီ’’တိ ဝုတ္တံ၊ သုခနိသဇ္ဇာဝသေန နိသီဒိတုန္တိ အဓိပ္ပာယော။ ‘‘ပရိမဏ္ဍလာကာရေန နိသီဒိတု’’န္တိ အဋ္ဌကထာယံ ဝုတ္တံ။ တိယောဇနံ အတိက္ကမိတွာတိ မဇ္ဈေ ဌတွာ ဒိယဍ္ဎံ ကတွာ တိယောဇနံ။ ကောဏတော ¶ ဟိ ကောဏံ တိယောဇနံ အတိက္ကာမေတိ၊ အာပတ္တိဉ္စ အာပဇ္ဇတိ၊ သီမာ စ အသီမာ ဟောတိ။ ကိတ္တေတွာတိ နိမိတ္တာနိ သမ္ပန္နာနိပိ အညမညနာမဝိပရိယာယေန၊ အနိမိတ္တာနံ နာမေဟိ စ ကိတ္တေတွာတိ အတ္ထော။

ရာသိကတံ ပံသုပိ ရုက္ခေသု ဇာတေသု သုဒ္ဓပံသုပဗ္ဗတော ဟောတိ။ ဂုဠပိဏ္ဍပရိမာဏော ထူလတာယ၊ န တုလဂဏနာယ။ ဘူမိယံ ပတိဋ္ဌိတော’’တိ ဣမိနာ ကုဋသရာဝါဒီသု ရောပိတံ ပဋိက္ခိပတိ၊ တတော အပနေတွာ ပန တင်္ခဏမ္ပိ ဘူမိယံ ရောပိတော ဝဋ္ဋတိ။ နဝမူလသာခါနိဂ္ဂမနံ ပန အကာရဏံ။ ခန္ဓံ ဆိန္ဒိတွာ ရောပိတေ ပန ဧတံ ယုဇ္ဇတိ။ သူစိဒဏ္ဍကပ္ပမာဏော ကနိဋ္ဌင်္ဂုလိပရိမာဏမတ္တော။ ‘‘အဋ္ဌင်္ဂုလုဗ္ဗေဓော’’တိ ဣမိနာ ဥဗ္ဗေဓော ပရိစ္ဆိန္နော ဟောတိ၊ ‘‘ဂေါဝိသာဏမတ္တော’’တိ ဣမိနာ ပရိဏာဟော။ ‘‘ဧဝံ သန္တေပိ ဂေါဝိသာဏပရိဏာဟေ ပရိစ္ဆေဒေါ နတ္ထိ၊ တသ္မာ ခုဒ္ဒကောပိ မဟန္တောပိ ဝဋ္ဋတိ ဧဝါတိ ဝဒန္တိ။

ဇာတဿရေ ပရိပုဏ္ဏမေဝ ဥဒကံ နိမိတ္တူပဂံ ဒိသွာ အပရိပုဏ္ဏံ အန္တရာ ဌိတိဘူတံ ‘‘ဇာတဿရေ သမ္မတာ’’တိ ဝုတ္တံ ဝိပတ္တိံ န အာပဇ္ဇတီတိ ‘‘နဒိယာ သမ္မတာ၊ သမုဒ္ဒေ သမ္မတာ၊ ဇာတဿရေ သမ္မတာ’’တိ ဧတ္ထာပိ လောဏီ န ဂဟိတာ။ ဗဒ္ဓသီမံ ဝါ နဒိသမုဒ္ဒဇာတဿရေ ဝါ အနောက္ကမိတွာတိ ဧတ္ထာပိ ‘‘နဒိယာ ဝါ၊ ဘိက္ခဝေ၊ သမုဒ္ဒေ ဝါ ဇာတဿရေ ဝါ’’တိ (မဟာဝ။ ၁၄၇) ဧတ္ထာပိ န ဂဟိတာ။ တသ္မာ လောဏီ န အဗဒ္ဓသီမာတိ စေ? အဗဒ္ဓသီမာဝ။ ‘‘ယောပိ နဒိံ ဝါ သမုဒ္ဒံ ဝါ ဘိန္ဒိတွာ နိက္ခန္တဥဒကေန ကတော သောဗ္ဘော ဧတံ လက္ခဏံ ပါပုဏာတိ၊ အယမ္ပိ ¶ ဇာတဿရောယေဝါ’’တိ (ကင်္ခါ။ အဋ္ဌ။ နိဒါနဝဏ္ဏနာ) ဝုတ္တတ္တာ ဇာတဿရဂ္ဂဟဏေန ဂဟိတာတိ တတ္ထ တတ္ထ အဝုတ္တာ။ ‘‘ယာဝတိကာ တသ္မိံ ဂါမခေတ္တေ’’တိ ဝုတ္တတ္တာ အညမ္ပိ ဂါမံ အန္တော ကတွာ သမာနသံဝါသကသီမာသမ္မန္နနကာလေ တသ္မိံ ဂါမေ ဘိက္ခူ အာဂစ္ဆန္တု ဝါ မာ ဝါ၊ ဝဋ္ဋတိ။ အဝိပ္ပဝါသသီမာသမ္မန္နနကာလေ အာဂန္တဗ္ဗမေဝ။

အဂမနပထေသူတိ ဧတ္ထ ဧကဒိဝသေန ဂန္တွာ ပစ္စာဂန္တုံ အသက္ကုဏေယျဋ္ဌာနေတိ ဝဒန္တိ၊ ဗဒ္ဓသီမာဘာဝံ ပဋိက္ခိပိတွာတိ အတ္ထော။

‘‘သမန္တာ ဥဒကုက္ခေပါ’’တိ ဝုတ္တတ္တာ သဗ္ဗဒိသာသု ဂဟေတဗ္ဗမေဝါတိ စေ? ယတော လဗ္ဘတိ၊ တတော ဂဟေတဗ္ဗော ‘‘ယသ္မိံ ပဒေသေ ပကတိဝီစိယော ဩတ္ထရိတွာ ¶ သဏ္ဌဟန္တိ၊ တတော ပဋ္ဌာယ ကပ္ပိယဘူမိ၊ တတ္ထ ဌတွာ ဥပေါသထာဒိကမ္မံ ကာတုံ ဝဋ္ဋတီ’’တိ ဝုတ္တတ္တာ။ အနုဗန္ဓော အဍ္ဎမာသော အနွဍ္ဎမာသော၊ အဍ္ဎမာသဿ ဝါ အနု။ ယော ပန ကေနစိ အန္တမသော တိရစ္ဆာနေနပိ ခဏိတွာ အကတောတိ အဓိပ္ပာယော။

‘‘အညံ တတ္တကံယေဝ ပရိစ္ဆေဒံ အနတိက္ကမိတွာ ဌိတောပိ ကမ္မံ ကောပေတီ’’တိ ဝုတ္တတ္တာ အတိက္ကမိတွာ ဌိတော န ကောပေတီတိ ဒီပိတမေဝ ဟောတီတိ ဥပတိဿတ္ထေရော၊ တံ ပန ‘‘ဒွိန္နံ ဥဒကုက္ခေပါနံ အန္တရေ အညော ဧကော ဥဒကုက္ခေပေါ ဥပစာရတ္ထာယ ဌပေတဗ္ဗော’’တိ ဝစနေန ဝိရုဇ္ဈတိ။ သမန္တပါသာဒိကာယဉှိ ‘‘အညံ တတ္တကံယေဝါ’’တိ ပဒံ နတ္ထိ။ တသ္မာ တဿာဓိပ္ပာယော ပရိယေသိတဗ္ဗော။ အန္တောဥဒကုက္ခေပသီမာယ ဥပစာရတ္ထာယ ဌပိတံ ဥဒကုက္ခေပပရိစ္ဆေဒံ အနတိက္ကမိတွာတိ အတ္ထော ဂဟေတဗ္ဗော။ ထေရေန အညထာ ပပဉ္စိတွာ လိခိတံ။

‘‘သဘာဂဝတ္ထုနာ လဟုကာပတ္တိ’’န္တိ ဝုတ္တတ္တာ သဘာဂသင်္ဃာဒိသေသံ အာရောစေတုံ ဝဋ္ဋတီတိ စေ? န ဝဋ္ဋတိ ဒေသနာဂါမိနိံ သန္ဓာယ ဣဓ ဝုတ္တတ္တာ။ တသ္မာ ဧဝ သမုစ္စယက္ခန္ဓကေ ‘‘သဘာဂသင်္ဃာဒိသေသံ အာပန္နဿ ပန သန္တိကေ အာဝိကာတုံ န ဝဋ္ဋတိ။ သစေ အာဝိကရောတိ၊ အာပတ္တိ အာဝိကတာ ဟောတိ၊ ဒုက္ကဋာ ပန န မုစ္စတီ’’တိ (စူဠဝ။ အဋ္ဌ။ ၁၀၂) ဝုတ္တံ။ ယထာ သင်္ဃေန ‘‘သုဏာတု မေ၊ ဘန္တေ၊ သင်္ဃော…ပေ… ပဋိကရိဿတီ’’တိ ဝတွာ ဥပေါသထံ ကာတုံ လဘတိ၊ ဧဝံ တီဟိ ဒွီဟိပိ အညံ သုဒ္ဓံ ပဿိတွာ ‘‘ပဋိကရိဿာမာ’’တိ ဝတွာ ဥပေါသထံ ကာတုံ ဝဋ္ဋတိ။ ဧကေနာပိ ‘‘ပရိသုဒ္ဓံ လဘိတွာ ပဋိကရိဿာမီ’’တိ အာဘောဂံ ကတွာ ဥပေါသထံ ကာတုံ ဝဋ္ဋတီတိ။ အဋ္ဌကထာယမ္ပိ ‘‘သာမန္တော ဘိက္ခု ဧဝမဿ ဝစနီယောတိ ဧတ္ထ သဘာဂေါ ဧဝ ဝတ္တဗ္ဗော။ ဝိသဘာဂဿ ဟိ ဝုစ္စမာနေ ဘဏ္ဍနကလဟသင်္ဃဘေဒါဒီနိပိ ဟောန္တိ၊ တသ္မာ တဿ အဝတွာ ဣတော ဝုဋ္ဌဟိတွာ ¶ ပဋိကရိဿာမီ’’တိ အာဘောဂံ ကတွာ ဥပေါသထော ကာတဗ္ဗောတိ အန္ဓကဋ္ဌကထာယံ ဝုတ္တ’’န္တိ ဝတွာ တဿ အပ္ပဋိက္ခိတ္တတ္တာ ဝဋ္ဋတီတိ ဒီပိတမေဝ။ ‘‘ယဒါ အညံ သုဒ္ဓံ ဘိက္ခုံ အနာပတ္တိကံ ပဿိဿတိ၊ တဒါ တဿ သန္တိကေ’’တိ ဝုတ္တတ္တာ လဟုကဿေဝ အနုညာတတ္တာ သမုစ္စယက္ခန္ဓကေ ဝုတ္တတ္တာ သဘာဂသင်္ဃာဒိသေသံ ပန ဉတ္တိယာ အာရောစေတွာ ဥပေါသထံ ကာတုံ န ဝဋ္ဋတိ။

ဒေဝဗြဟ္မာ ¶ ပန ‘‘တိရစ္ဆာနဂတော’’တိ ပဒံ ဌပေတွာ ယေန ကေနစိ ပဒေန အသင်္ဂဟိတာပိ ဣမိနာ သင်္ဂဟိတာတိ ဒဿနတ္ထံ ‘‘ယဿ ဥပသမ္ပဒါ ပဋိက္ခိတ္တာ’’တိ ဝုတ္တံ။

‘‘စာတုမာသိနိယံ ပန ပဝါရိတာနံ သန္တိကေ အနုပဂတေန ဝါ ဆိန္နဝဿေန ဝါ ဝုဋ္ဌဝဿေန ဝါ’’တိ အဝတွာ ‘‘အနုပဂတေန ဝါ ဆိန္နဝဿေန ဝါ’’တိ ဧတ္တကမေဝ ဝုတ္တံ။ ဝုဋ္ဌဝဿော ပန တသ္မိံ ကာလေ အနုပဂတတ္တာ ‘‘အနုပဂတော’’တိ သင်္ချံ ဂတောတိ။ သဗ္ဗာယ ဝုဋ္ဌိတာယ သဗ္ဗေ ဝုဋ္ဌဟိတွာ ဂတေ သန္နိပါတေတုံ န သက္ကာ၊ ဧကစ္စေ သန္နိပါတေတွာ ပါရိသုဒ္ဓိံ အာရောစေတုံ ဝဋ္ဋတီတိ ဝဒန္တိ။ ကသ္မာ? ဉတ္တိံ ဌပေတွာ ကတ္တဗ္ဗသင်္ဃကမ္မာဘာဝါ ဝဂ္ဂံ န ဟောတီတိ။ ပဝါရဏာယပိ ဧသေဝ နယော။ အယဉှေတ္ထ ဝိသေသော – သစေ ပုရိမိကာယ ဥပဂတေဟိ ပစ္ဆိမိကာယ ဥပဂတာ ထောကတရာ စေဝ ဟောန္တိ သမသမာ စ၊ သင်္ဃပဝါရဏာယ စ ဂဏံ ပူရေန္တိ၊ သင်္ဃပဝါရဏာဝသေန ဉတ္တိ ဌပေတဗ္ဗာတိ။ ‘‘ဧကောဝ ဘိက္ခု ဟောတိ…ပေ… အညေသံ အနာဂတဘာဝံ ဉတွာ’’တိ ဝုတ္တတ္တာ အဓိဋ္ဌာနုပေါသထံ သီမံ ပဝိသိတွာ ကာတုံ န သက္ကာတိ ဝဒန္တိ။

‘‘ကိံ သင်္ဃဿ ပုဗ္ဗကိစ္စ’’န္တိ ဣဒံ န ဉတ္တိံ ဌပေတွာ ဝတ္တဗ္ဗံ။ တဉှိ ဉတ္တိတော ပုရေတရမေဝ ကရီယတိ။ တသ္မာ ‘‘သုဏာတု မေ၊ ဘန္တေ၊ သင်္ဃော၊ ကိံ သင်္ဃဿ ပုဗ္ဗကိစ္စံ၊ ယဒိ သင်္ဃဿ ပတ္တကလ္လ’’န္တိ ဝတ္တဗ္ဗံ သိယာတိ။ တထာပိ န ဝတ္တဗ္ဗံ။ န ဟိ တံ ဉတ္တိယာ အန္တော ကရီယတီတိ။ ဧဝံ သန္တေ နေတံ ဝတ္တဗ္ဗန္တိ အာပဇ္ဇတိ ပယောဇနာဘာဝါတိ စေ? န၊ ယထာဂတဋ္ဌာနေ ဧဝ ဝတ္တဗ္ဗတော၊ ပရပဒါပေက္ခတာယာတိ ဝုတ္တံ ဟောတိ။ ဣဒံ ပုဗ္ဗကိစ္စံ အကတွာ ဥပေါသထကမ္မံ ကရောန္တော သင်္ဃော၊ ပုဂ္ဂလော ဝါ ဌပနက္ခေတ္တာတိက္ကမေ အာပဇ္ဇတိ။ တသ္မိဉှိ ခေတ္တေ အတိက္ကန္တေ သမ္မဇ္ဇနာဒိကရဏေ အာပတ္တိမောက္ခော န ဟောတိ ဥပေါသထကမ္မတော ပုဗ္ဗေ ကတ္တဗ္ဗကမ္မာကရဏပစ္စယတ္တာ တဿာ အာပတ္တိယာ။ န သာ ကမ္မပရိယောသာနာပေက္ခာ ဧတ္ထာဂတသမ္ပဇာနမုသာဝါဒါပတ္တိ ဝိယ၊ တသ္မာ ပါတိမောက္ခုဒ္ဒေသကော ဘိက္ခု ‘‘ပါရိသုဒ္ဓိံ အာယသ္မန္တော အာရောစေထာ’’တိ ဝတ္တုကာမော ပဌမမေဝ ပါရိသုဒ္ဓါပါရိသုဒ္ဓိပစ္စယံ ပုဗ္ဗကိစ္စံ သရာပေတိ။ တဉှိ ကတံ ပါရိသုဒ္ဓိပစ္စယော ဟောတိ၊ အကတံ အပါရိသုဒ္ဓိပစ္စယော။ တေနေဝ ဥဘယာပေက္ခာဓိပ္ပာယေန ကတံ၊ န ကတန္တိ အဝတွာ ‘‘ကိံ သင်္ဃဿ ပုဗ္ဗကိစ္စ’’မိစ္စေဝါဟ။ တတ္ထ အကတပက္ခေ တာဝ ပါရိသုဒ္ဓိအာရောစနက္ကမနိဒဿနတ္ထံ ပရတော ¶ ‘‘ယဿ ¶ သိယာ အာပတ္တိ၊ သော အာဝိကရေယျာ’’တိ စ၊ ကတပက္ခေ ‘‘အသန္တိယာ အာပတ္တိယာ တုဏှီ ဘဝိတဗ္ဗ’’န္တိ စ ဝက္ခတိ။

‘‘သဗ္ဗန္တိမေန ပရိစ္ဆေဒေန စတူဟိ ဘိက္ခူဟိ သန္နိပတိတွာ’’တိ စ၊ ‘‘ဥပေါသထကရဏတ္ထံ သန္နိပတိတေ သင်္ဃေ ဗဟိ…ပေ… အဒေန္တေန ဆန္ဒော ဒါတဗ္ဗော’’တိ စ ဝဒန္တိ။ အသန္နိပတိတေပိ ပန ဝဋ္ဋတိ။ ဣဒဉှိ ဆန္ဒဒါနသမယဒဿနတ္ထံ ဝုတ္တံ။ ဥပေါသထကရဏတ္ထံ သန္နိပတိတေ သင်္ဃေ ဗဟိ ဥပေါသထံ ကတွာ အာဂတဿ ကတ္တဗ္ဗာကာရဒဿနတ္ထဉ္စ ဝုတ္တံ။ ပဓာနဃရဝါသိနော ပဓာနဃရံ ပဝိသိတုကာမာ အတ္တနော သဘာဂဘိက္ခူနံ ဆန္ဒံ ဒတွာ သစေ သင်္ဃော သန္နိပတတိ၊ ‘‘မယှံ ဆန္ဒော အာရောစေတဗ္ဗော’’တိ ဝတွာ ပဓာနဃရံ ပဝိသန္တိ။ အယံ သီဟဠဒီပေ ပယောဂေါ။ အာရောစေန္တေန ပန သန္နိပတိတေ အာရောစေတဗ္ဗံ။ ပဉ္စသု ဘိက္ခူသု ဧကသ္မိံ ဝိဟာရေ ဝသန္တေသု ဧကဿ ဆန္ဒပါရိသုဒ္ဓိံ အာဟရိတွာ စတုန္နံ ပါတိမောက္ခံ ဥဒ္ဒိသိတုံ အနုညာတတ္တာ သန္နိပတိတေ ဆန္ဒော ဂဟေတဗ္ဗော အာရောစေတဗ္ဗောတိ ဝစနံ နိရတ္ထကံ ဝိယ။ ‘‘ထေယျသံဝါသကော ပဋိဇာနာတီတိ (မဟာဝ။ ၁၆၅) ဝစနတော သာမဏေရေန အာဟဋာပိ ဝဋ္ဋတိ။ ကမ္မံ န ကောပေတီ’’တိ စ၊ ‘‘သစေ ပုဗ္ဗေ ဆန္ဒံ ဒတွာ ဗဟိသီမာဂတော ပုန ပဝိသတိ၊ ပစ္ဆာ ဆန္ဒဂ္ဂဟဏကိစ္စံ နတ္ထိ၊ တဿ ပယောဂေါ သီမာသမ္မုတိဝသေန ဝေဒိတဗ္ဗော’’တိ စ ‘‘ဆန္ဒဒါနေ တိက္ခတ္တုံ ဝစနေ ဣဒံ ပယောဇနံ – ပဌမံ သမဂ္ဂဘာဝံ၊ ဒုတိယံ ပစ္ဆာ ဝိဓာတဗ္ဗဘာဝံ၊ တတိယံ ဆန္ဒဟာရကဿ ဒုက္ကဋမောစနံ ဒီပေတီ’’တိ (ဝဇိရ။ ဋီ။ မဟာဝဂ္ဂ ၁၆၄) စ လိခိတံ။ ဗိဠာလသင်္ခလိကာဗဒ္ဓါဝ ဟောတိ အန္တောဂေဟေ ဧဝ သမ္ပယောဇနတ္တာ၊ ယထာ သာ န ကတ္ထစိ ဂစ္ဆတိ၊ တထာ သာပိ န ကတ္ထစိ ဂစ္ဆတီတိ အဓိပ္ပာယော။ ဣတရထာ ဝိသေသနံ နိရတ္ထကံ ဟောတီတိ အာစရိယေန ဂဟိတံ။

‘‘န ဟိ တံ အကတွာ ဥပေါသထံ ကာတုံ ဝဋ္ဋတီ’’တိ ပုဗ္ဗေ ဒဿိတတ္တာ ‘‘ဣဒမ္ပိ ဟိ ဥဘယ’’န္တိ ကသ္မာ ဝုတ္တန္တိ စေ? သေသာနိ ထေရေန အာဏတ္တေန ကာတဗ္ဗာနိ ဒဿိတာနိ၊ ဣမေ ပန ဒွေ ထေရေန ဝါ ပါတိမောက္ခုဒ္ဒေသကေန ဝါ ဉတ္တိဋ္ဌပနကေန ဝါ ယေန ဝါ တေန ဝါ ကာတဗ္ဗာနီတိ စ၊ သမ္မဇ္ဇနာဒီနိ တတ္ထ တတ္ထ တာဒိသာနိ ပယောဇနာနိ နိပ္ဖာဒေန္တိ၊ ဣမေ ပန ဒွေ တတ္ထ တတ္ထ န ကိဉ္စိ ကမ္မံ သာဓေန္တိ၊ တသ္မာ ‘‘ကိံ ဣမိနာ’’တိ အဝတွာ ကာတဗ္ဗမေဝါတိ ဒဿေတုဉ္စ ‘‘ဣဒမ္ပိ ဟိ ဥဘယ’’န္တိအာဒိ ဝုတ္တံ။ ‘‘အာယသ္မန္တာနံ ပါဒေ ဝန္ဒတီ’’တိ ¶ ဂဏဝသေန ဝတွာ ပုဂ္ဂလဝသေန န ဝုတ္တံ တေန အာရောစေတဗ္ဗဿ အညဿ အဘာဝါ။

သင်္ဃဿ ဥဒ္ဒိဋ္ဌံ ဟောတီတိ သင်္ဃေန ဥဒ္ဒိဋ္ဌံ ဟောတီတိ အတ္ထော။ သမဂ္ဂဿ ဟိ သင်္ဃဿာတိ ဧတ္ထ သမဂ္ဂဘာဝဿ ကာယသာမဂ္ဂိကာရဏတ္တာ နတ္ထိ ဒေါသောတိ စေ? တံ န၊ ဥဒ္ဒေသေပိ သဝနေပိ သမဂ္ဂဘာဝဿ ¶ ဣစ္ဆိတဗ္ဗတ္တာ။ ‘‘သုဏာတု မေ၊ ဘန္တေ’’တိ ဟိ ဣမိနာ စိတ္တသာမဂ္ဂိံ ဒီပေတိ သဝနေ သဗ္ဗေဟိ ဧကီဘူတဘာဝတော။

သဉ္စိစ္စ အာပတ္တိံ အာပဇ္ဇတီတိ ဧတ္ထ အနာဒရိယဝသေန အာပဇ္ဇန္တော ဧဝ အလဇ္ဇီ ဟောတိ၊ န ဣတရောတိ။ အာပတ္တိံ ပရိဂူဟတီတိ ဧတ္ထ လဇ္ဇာယ ပရိဂူဟန္တော အလဇ္ဇီ န ဟောတိ၊ ‘ကိံ ဣမိနာ’တိ အနာဒရိယဝသေန ပရိဂူဟန္တော ဟောတီ’’တိ စ လိခိတံ။

‘‘သတ္တန္နံ အာပတ္တိက္ခန္ဓာန’’န္တိ န ဝတ္တဗ္ဗံ၊ ‘‘ဆန္န’’န္တိ ဝတ္တဗ္ဗန္တိ စေ? သတ္တန္နမေဝါတိ ဝတ္တဗ္ဗံ။ ပါရာဇိကာပတ္တိံ အာပန္နော ဟိ သစေ အတ္တနော သာပတ္တိကဘာဝံ ပကာသေတိ၊ သင်္ဃဿ စ ဥပေါသထော သမ္ပဇ္ဇတိ၊ တဿ စ ဂိဟိဘာဝေန ဝါ သာမဏေရဘာဝေန ဝါ သုဒ္ဓိ ဟောတီတိ။

ဧကစ္စေ အာစရိယာ နာမ ဓမ္မဘာရိကော ကိရ အာစရိယော။ ကသ္မာ ဧဝံ ဝုတ္တန္တိ စေ? ယာဝတတိယာနုသာဝနာ နာမ တိက္ခတ္တုံ ဝစနံ။ တထာ ပါဌေ အနာဂတတ္တာ ကေဝလံ ‘‘ယာဝတတိယံ အနုသာဝိတ’’န္တိ ပဒမေဝ ဒိသွာ ‘‘ယဿ သိယာ အာပတ္တိ၊ သော အာဝိကရေယျာ’’တိ ဣဒံ ‘‘သစေ အာပတ္တိံ အာပန္နာ၊ အာဝိကရောထာ’’တိ ဣမမတ္ထံ ဒီပေတိ။ ‘‘အသန္တိယာ အာပတ္တိယာ တုဏှီ ဘဝိတဗ္ဗ’’န္တိ ဣဒမ္ပိ တမေဝတ္ထံ ဒီပေတိ။ ‘‘တုဏှီဘာဝေန ခေါ ပနာယသ္မန္တေ ပရိသုဒ္ဓါတိ ဝေဒိဿာမီ’’တိ ဣဒမ္ပိ တမေဝါတိ ဧဝမတ္ထံ ဂဟေတွာ ဝုတ္တံ ကိရ။

အပရေတိ အတ္ထဒဿိတ္ထေရော ကိရ။ ဧတံ သန္ဓာယာတိ ဧတ္ထ ‘‘သကိမ္ပိ အနုသာဝိတ’’န္တိ ပဒဿ ဝစနေန တိက္ခတ္တုံ အနုသာဝနာ ကာတဗ္ဗာတိ ဧတ္တကမေဝ ဒီပိတံ ဝိယ ဒိဿတိ။

ဣမမတ္ထံ သန္ဓာယ ဝုတ္တန္တိ ကထံ ဝိညာယတီတိ စေ? ‘‘အယမေတ္ထ အာစရိယပရမ္ပရာဘတော ဝိနိစ္ဆယော’’တိ ဝုတ္တံ။

‘‘သရမာနေနာ’’တိ ¶ ဣမိနာ သမ္ပဇာနမုသာဝါဒဿ သစိတ္တကတ္တံ ဒဿေတိ။ သင်္ဃမဇ္ဈေ ဝါတိအာဒိ လက္ခဏဝစနံ ကိရ။ သင်္ဃုပေါသထကရဏတ္ထံ သင်္ဃမဇ္ဈေ စေ နိသိန္နော၊ တသ္မိံ သင်္ဃမဇ္ဈေ အာဝိကာတဗ္ဗာ။ ဂဏုပေါသထကရဏတ္ထဉ္စေ ဂဏမဇ္ဈေ နိသိန္နော၊ တသ္မိံ ဂဏမဇ္ဈေ။ ဧကဿေဝ သန္တိကေ စေ ပါရိသုဒ္ဓိဥပေါသထံ ကတ္တုကာမော၊ တသ္မိံ ဧကပုဂ္ဂလေ အာဝိကာတဗ္ဗာတိ၊ ဧတေန န ကေဝလံ သင်္ဃမဇ္ဈေ ဧဝါယံ မုသာဝါဒေါ သမ္ဘဝတိ၊ အထ ခေါ ဧတ္ထ ဝုတ္တလက္ခဏေန အသတိပိ ‘‘ပါရိသုဒ္ဓိံ အာယသ္မန္တော အာရောစေထာ’’တိအာဒိဝိဓာနေ ဂဏုပေါသထေပိ သာပတ္တိကော ဟုတွာ ဥပေါသထံ ¶ ကတ္တုကာမော အနာရောစေတွာ တုဏှီဘူတောဝ စေ ကရောတိ၊ အယံ သမ္ပဇာနမုသာဝါဒါပတ္တိံ အာပဇ္ဇတီတိ ဣမဿတ္ထဿ အာဝိကရဏတော လက္ခဏဝစနံ ကိရေတန္တိ ဝုတ္တန္တိ တက္ကိကာ။ အညထာ ‘‘ဂဏမဇ္ဈေ ဝါ’’တိ န ဝတ္တဗ္ဗန္တိ တေသံ အဓိပ္ပာယော။ အာရောစနာဓိပ္ပာယဝသေန ဝုတ္တန္တိ အာစရိယဿ တက္ကော။ အာရောစေန္တော ဟိ ‘‘သင်္ဃဿ အာရောစေမီ’’တိ အဓိပ္ပာယေန အာဝိကရောန္တော သင်္ဃမဇ္ဈေ အာဝိကရောတိ နာမ၊ ဥဘတောပဿေ နိသိန္နာနံ အာရောစေန္တော ဂဏမဇ္ဈေ အာဝိကရောတိ နာမ၊ ‘‘ဧကဿေဝ အာရောစေဿာမီ’’တိ အဓိပ္ပာယေန အာဝိကရောန္တော ဧကပုဂ္ဂလေ အာဝိကရောတိ နာမ။ သစေပိ ဝေမတိကော ဟောတိ…ပေ… ပဋိကရိဿာမီတိ ဧဝံ ကတေ ယာဝ ဝေမတိကော ဟောတိ၊ တာဝ သဘာဂါပတ္တိံ ပဋိဂ္ဂဟေတုံ လဘတိ၊ အညေသဉ္စ ကမ္မာနံ ပရိသုဒ္ဓါ နာမ ဟောတိ။ ပုန နိဗ္ဗေမတိကော ဟုတွာ ဒေသေတဗ္ဗံ ဝါ န ဝါတိ နေဝ ပါဠိယံ၊ န အဋ္ဌကထာယံ အတ္ထိ၊ ဒေသိတေ ပန ဒေါသော နတ္ထိ။ တထာ ဣတော ဝုဋ္ဌဟိတွာ တံ အာပတ္တိံ ပဋိကရိဿာမီတိ ဧတ္ထ စ သကလသင်္ဃေ သဘာဂါပတ္တိံ အာပန္နေ၊ ဝေမတိကေ စာတိ လိခိတံ (ဝဇိရ။ ဋီ။ မဟာဝဂ္ဂ ၁၆၉-၁၇၀)။

နိဒါနဝဏ္ဏနာ နိဋ္ဌိတာ။

ပါရာဇိကကဏ္ဍံ

၁။ ပဌမပါရာဇိကဝဏ္ဏနာ

ဣဓ ¶ ¶ ပန ဌတွာ သိက္ခာပဒါနံ ကမဘေဒေါ ပကာသေတဗ္ဗော။ ကထံ – သဗ္ဗသိက္ခာပဒါနံ ယထာသမ္ဘဝံ ဒေသနာက္ကမော၊ ပဟာနက္ကမော၊ ပဋိပတ္တိက္ကမော၊ ဥပ္ပတ္တိက္ကမောတိ စတုဗ္ဗိဓော ကမော လဗ္ဘတိ။ တတ္ထ ဘဂဝတာ ရာဇဂဟေ ဘိက္ခူနံ ပါတိမောက္ခုဒ္ဒေသံ အနုဇာနန္တေန ပါတိမောက္ခုဒ္ဒေသဿ ယော ဒေသနာက္ကမော အနုညာတော၊ တံ ဒေသနာက္ကမံ အနုက္ကမန္တောဝ မဟာကဿပေါ ပဌမံ ပါရာဇိကုဒ္ဒေသံ ပုစ္ဆိ၊ တဒနန္တရံ သင်္ဃာဒိသေသုဒ္ဒေသံ၊ တဒနန္တရံ အနိယတုဒ္ဒေသံ၊ တဒနန္တရံ ဝိတ္ထာရုဒ္ဒေသံ။ တဒနန္တရံ ဘိက္ခုနိဝိဘင်္ဂဉ္စ တေနေဝ အနုက္ကမေန ပုစ္ဆိ။ တတော ပရံ တယော အာပတ္တိက္ခန္ဓေ သင်္ဂဟေတုံ ဝိနာ ဂဏနပရိစ္ဆေဒေန သေခိယဓမ္မေ ပုစ္ဆိ။ အာပတ္တိက္ခန္ဓေ သဘာဂတော ပဋ္ဌာယ ပုစ္ဆန္တော ဝီသတိခန္ဓကေ ပုစ္ဆိ။ နိဒါနုဒ္ဒေသန္တောဂဓာနံ ဝါ သရူပေန အနုဒ္ဒိဋ္ဌာနံ ပုစ္ဆနတ္ထံ ခန္ဓကေ ပုစ္ဆိ။ ဧတေန ခန္ဓကေ ပညတ္တာ ထုလ္လစ္စယာပိ သင်္ဂဟိတာ ဟောန္တိ။ ပုစ္ဆိတာနုက္ကမေနေဝ အာယသ္မာ ဥပါလိတ္ထေရော ဗျာကာသိ။ အယမေတ္ထ ဒေသနာက္ကမော။ ဥဘတောဝိဘင်္ဂခန္ဓကတော ပန ဥစ္စိနိတွာ တဒါ ပရိဝါရော ဝိသုံ ပါဠိ ကတော၊ ဣမမေဝ ဝစနံ သန္ဓာယ အဋ္ဌကထာယံ ဝုတ္တံ ‘‘ဧတေနေဝ ဥပါယေန ခန္ဓကံ ပရိဝါရေပိ အာရောပယိံသူ’’တိအာဒိ (ပါရာ။ အဋ္ဌ။ ၁။ပဌမမဟာသင်္ဂဤတိကထာ)။ အပိစ ပါဠိယံ ‘‘ဧတေနေဝ ဥပါယေန ဥဘတောဝိဘင်္ဂေ ပုစ္ဆိ။ ပုဋ္ဌော ပုဋ္ဌော အာယသ္မာ ဥပါလိ ဝိဿဇ္ဇေသီ’’တိ (စူဠဝ။ ၄၃၉) ဧတ္တကမေဝ ဝုတ္တံ။ တသ္မာ ထေရော ဥဘတောဝိဘင်္ဂေ ဧဝ ပုစ္ဆိ။ ဝိဿဇ္ဇန္တော ပန အာယသ္မာ ဥပါလိ နိရဝသေသံ ဒဿေန္တော ခန္ဓကပရိဝါရေ အန္တော ကတွာ ဒေသေသိ။ ဂဏသဇ္ဈာယကာလေ ပန တဒါ ခန္ဓကပရိဝါရာ ဝိသုံ ပါဠိ ကတာတိ အယမေတ္ထ ဒေသနာက္ကမော။

ယဒိ ဧဝံ နိဒါနုဒ္ဒေသော ပဌမဒေသနာတိ စေ? န၊ ဥပေါသထက္ခန္ဓကေ (မဟာဝ။ ၁၃၃) ‘‘ယာနိ မယာ ဘိက္ခူနံ သိက္ခာပဒါနိ ပညတ္တာနိ၊ တာနိ နေသံ ပါတိမောက္ခုဒ္ဒေသံ အနုဇာနေယျ’’န္တိ ¶ ဝစနတော၊ ‘‘ယဿ သိယာ အာပတ္တီ’’တိ (မဟာဝ။ ၁၃၄) ဝစနတော စ။ အကုသလာဗျာကတာနံ အာပတ္တီနံ ဒိဋ္ဌဓမ္မသမ္ပရာယိကာသဝဋ္ဌာနိယတ္တာ ယထာဘူတံ သီလသံဝရကေန ပရိဝဇ္ဇနေန ပဟာတဗ္ဗတ္တာ ပဟာနက္ကမောပေတ္ထ သမ္ဘဝတိ ‘‘တာဝဒေဝ စတ္တာရိ အကရဏီယာနိ အာစိက္ခိတဗ္ဗာနီ’’တိ ¶ ဝစနတော။ တထာ ‘‘သမာဒါယ သိက္ခတိ သိက္ခာပဒေသူ’’တိ (မ။ နိ။ ၃။၇၅၊ ဝိဘ။ ၅၀၈) ဝစနတော ယထာဘူတံ အာစိက္ခနသိက္ခနေန ပဋိပတ္တိက္ကမောပိ သမ္ဘဝတိ။ ယထုဒ္ဒေသက္ကမံ ပရိယာပုဏိတဗ္ဗပရိယတ္တိအတ္ထေနာပိ ပဋိပတ္တိက္ကမော၊ ဧဝမိမေဟိ တီဟိ ကမေဟိ ဒေသေတဗ္ဗာနမေတေသံ သိက္ခာပဒါနံ ယထာသမ္ဘဝံ ဥပ္ပတ္တိက္ကမော သမ္ဘဝတိ။ တထာ ဟိ ယံ ယံ သာဓာရဏံ၊ တံ တံ ဘိက္ခုံ အာရဗ္ဘ ဥပ္ပန္နေ ဧဝ ဝတ္ထုသ္မိံ ‘‘ယာ ပန ဘိက္ခုနီ ဆန္ဒသော မေထုနံ ဓမ္မ’’န္တိအာဒိနာ နယေန ဘိက္ခုနီနမ္ပိ ပညတ္တံ။ ယတော ဘိက္ခုနီနံ တံ အနုပ္ပန္နပညတ္တိ န သိယာ၊ တတော အနုပ္ပန္နပညတ္တိ တသ္မိံ နတ္ထီတိ (ပရိ။ ၂၀၁-၂၀၂) ပရိဝါရဝစနံ န ဝိရုဇ္ဈတိ။ ဧတ္တာဝတာ ပုရိမေန ကမတ္တယေန ယံ ပဌမံ ဒေသေတဗ္ဗံ၊ တံ ပါရာဇိကုဒ္ဒေသေ ပဌမုပ္ပန္နတ္တာ မေထုနဓမ္မပါရာဇိကံ သဗ္ဗပဌမံ ဒေသေတုကာမော အာယသ္မာ ဥပါလိတ္ထေရော ‘‘တတြ သုဒံ ဘဂဝါ ဝေသာလိယံ ဝိဟရတီ’’တိ (ပါရာ။ ၂၃) ဝေသာလိယမေဝ ပါပေတွာ ဌပေသိ။

ဣဒါနိ သဗ္ဗေသံ သိက္ခာပဒါနံ ပညာပနဝိဓာနံ ဝေဒိတဗ္ဗံ။ ကထံ? ‘‘ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထာ’’တိ (ပါရာ။ ၃၉၊ ၄၃) ဧဝံ သဥဒ္ဒေသအနုဒ္ဒေသဘေဒတော ဒုဝိဓံ။ တတ္ထ ပါတိမောက္ခေ သရူပတော အာဂတာ ပဉ္စ အာပတ္တိက္ခန္ဓာ သဥဒ္ဒေသပညတ္တိ နာမ။ သာပိ ဒွိဓာ သပုဂ္ဂလာပုဂ္ဂလနိဒ္ဒေသဘေဒတော။ တတ္ထ ယဿာ ပညတ္တိယာ အန္တော အာပတ္တိယာ သဟ၊ ဝိနာ ဝါ ပုဂ္ဂလော ဒဿိတော၊ သာ သပုဂ္ဂလနိဒ္ဒေသာ။ ဣတရာ အပုဂ္ဂလနိဒ္ဒေသာ။

တတ္ထ သပုဂ္ဂလနိဒ္ဒေသာ ဒွိဓာ အဒဿိတဒဿိတာပတ္တိဘေဒတော။ တတ္ထ အဒဿိတာပတ္တိကာ နာမ အဋ္ဌ ပါရာဇိကာ ဓမ္မာ ဝေဒိတဗ္ဗာ။ ‘‘ပါရာဇိကော ဟောတိ အသံဝါသော’’တိ (ပါရာ။ ၃၉၊ ၄၄၊ ၈၉၊ ၉၁၊ ၁၆၇၊ ၁၇၁၊ ၁၉၅၊ ၁၉၇) ဟိ ပုဂ္ဂလောဝ တတ္ထ ဒဿိတော၊ နာပတ္တိ။ ဒဿိတာပတ္တိကာ နာမ ဘိက္ခုနိပါတိမောက္ခေ အာဂတာ သတ္တရသ သင်္ဃာဒိသေသာ ဓမ္မာ။ ‘‘အယမ္ပိ ဘိက္ခုနီ ပဌမာပတ္တိကံ ဓမ္မံ အာပန္နာ နိဿာရဏီယံ သင်္ဃာဒိသေသ’’န္တိ (ပါစိ။ ၆၈၃၊ ၆၈၇) ဟိ တတ္ထ အာပတ္တိ ဒဿိတာ သဒ္ဓိံ ပုဂ္ဂလေန။

တထာ အပုဂ္ဂလနိဒ္ဒေသာပိ အဒဿိတဒဿိတာပတ္တိဘေဒတော ဒွိဓာ။ တတ္ထ အဒဿိတာပတ္တိကာ နာမ သေခိယာ ဓမ္မာ။ ဝုတ္တာဝသေသာ ဒဿိတာပတ္တိကာတိ ဝေဒိတဗ္ဗာ။

သာပိ ¶ ¶ ဒွိဓာ အနိဒ္ဒိဋ္ဌကာရကနိဒ္ဒိဋ္ဌကာရကဘေဒတော။ တတ္ထ အနိဒ္ဒိဋ္ဌကာရကာ နာမ သုက္ကဝိသဋ္ဌိမုသာဝါဒေါမသဝါဒပေသုညဘူတဂါမအညဝါဒကဥဇ္ဈာပနကဂဏဘောဇနပရမ္ပရဘောဇနသုရာမေရယအင်္ဂုလိပတောဒကဟသဓမ္မအနာဒရိယတလဃာတကဇတုမဋ္ဌကသိက္ခာပဒါနံ ဝသေန ပဉ္စဒသဝိဓာ ဟောန္တိ။ တတ္ထ နိဒ္ဒိဋ္ဌကာရကေ မိဿာမိဿဘေဒေါ ဝေဒိတဗ္ဗော – တတ္ထ ဥပယောဂဘုမ္မဝိဘတ္တိယော ဧကံသေန မိဿာ။ အဝသေသာ မိဿာ စ အမိဿာ စ။ သေယျထိဒံ – ပစ္စတ္တံ တာဝ ဒွီသု အနိယတေသု ဥပယောဂေန မိဿံ၊ ဒွါဒသသု ပါဋိဒေသနီယေသု ကရဏေန မိဿံ၊ ဦနပဉ္စဗန္ဓနပတ္တသိက္ခာပဒေသု သာမိကရဏေဟိ၊ ဦနဝီသတိဝဿေ ဘုမ္မေန၊ မောဟနကေ ဥပယောဂသာမိဘုမ္မေဟိ။ ယသ္မာ ‘‘ဝိဝဏ္ဏက’’န္တိ ဘာဝေါ အဓိပ္ပေတော၊ န ကတ္တာ၊ တသ္မာ ဝိဝဏ္ဏကသိက္ခာပဒံ ယဒါ န သမ္ဘဝတိ၊ ဧဝံ ပစ္စတ္တံ ပဉ္စဝိဓံ မိဿံ ဟောတိ။ သေသေသု ပဌမာနိယတံ ဌပေတွာ အာဒိမှိ ‘‘ယော ပန ဘိက္ခူ’’တိ ဧဝမာဂတံ ပစ္စတ္တံ ဝါ၊ ဒုတိယာနိယတံ ဌပေတွာ ပဏီတဘောဇနသမဏုဒ္ဒေသတတိယစတုတ္ထပါဋိဒေသနီယသိက္ခာပဒေသု မဇ္ဈေ ‘‘ယော ပန ဘိက္ခူ’’တိ ဧဝမာဂတံ ပစ္စတ္တံ ဝါ၊ ဒုဗ္ဗစကုလဒူသကသံသဋ္ဌသိက္ခာပဒေသု အာဒိမှိ ကေဝလံ ‘‘ဘိက္ခူ’’တိ အာဂတံ ပစ္စတ္တံ ဝါ၊ ဘေဒါနုဝတ္တကသိက္ခာပဒေ မဇ္ဈေ အာဂတံ ပစ္စတ္တံ ဝါ အညာယ ဝိဘတ္တိယာ အမိဿမေဝ ဟောတိ။ တတ္ထ ဘေဒါနုဝတ္တကတုဝဋ္ဋနဒွယသံသဋ္ဌဒုတိယပါဋိဒေသနီယသိက္ခာပဒေသု ဗဟုဝစနံ၊ ဣတရတ္ထ သဗ္ဗတ္ထ ဧကဝစနမေဝါတိ ဝေဒိတဗ္ဗံ။

တထာ ဥပယောဂေါ ဒွီသု ဝိကပ္ပနသိက္ခာပဒေသု၊ တန္တဝါယသိက္ခာပဒေ စ ပစ္စတ္တေန မိဿော၊ အဘိဟဋသိက္ခာပဒေ ကရဏေန၊ ရာဇသိက္ခာပဒေ ကရဏသာမိပစ္စတ္တေဟီတိ ဥပယောဂေါ တိဓာ မိဿော ဟောတိ။ ကရဏဉ္စ ကုဋိကာရမဟလ္လကဒုတိယကထိနဒွေဘာဂနိသီဒနသန္ထတဒုဗ္ဗဏ္ဏကရဏသိက္ခာပဒေသု ဆသု ပစ္စတ္တေန မိဿံ၊ ပဌမတတိယကထိနအဋ္ဌင်္ဂုလပါဒကနိသီဒနကဏ္ဍုပ္ပဋိစ္ဆာဒိကဝဿိကသာဋိကဥဒကသာဋိကဒွေဓမ္မပစ္စာသီသနသိက္ခာပဒေသု အဋ္ဌသု သာမိနာ မိဿန္တိ ကရဏံ ဒွိဓာ မိဿံ ဟောတိ။ အဝသေသေသု ဆဗ္ဗဿဝဿိကသာဋိကဒွတ္တိစ္ဆဒနာဝသထပိဏ္ဍမဟာနာမဂရုလဟုပါဝုရဏသိက္ခာပဒေသု သတ္တသု ကရဏဝိဘတ္တိ အညဝိဘတ္တိယာ အမိဿာ၊ အစ္စေကဧဠကလောမသိက္ခာပဒေသု သာမိဝိဘတ္တိ ကရဏဝိဘတ္တိယာ မိဿာ။ အတိရေကပတ္တဘေသဇ္ဇသိက္ခာပဒေသု အဂ္ဂဟိတဂ္ဂဟဏေန သာမိဝိဘတ္တိ အမိဿာဝ ဟောတီတိ ဝေဒိတဗ္ဗာ။ ဧဝံ တာဝ နိဒ္ဒိဋ္ဌကာရကေသု သိက္ခာပဒေသု –

ပဉ္စဓာ ¶ စ တိဓာ စေဝ၊ ဒွိဓာ စေပိ တထေကဓာ၊

ဘိန္နာ ဝိဘတ္တိယော ပဉ္စ၊ သဗ္ဗေကာဒသဓာ သိယုံ။

ဧဝံ ¶ တာဝ ယထာဝုတ္တေသု သဥဒ္ဒေသပညတ္တိသင်္ခါတေသု သိက္ခာပဒေသု အဂ္ဂဟိတဂ္ဂဟဏေန ပညာသုတ္တရေသု တိသတေသု နဝုတိအနိဒ္ဒိဋ္ဌကာရကေ ဝဇ္ဇေတွာ နိဒ္ဒိဋ္ဌကာရကာနိ အတိရေကသဋ္ဌိဒွိသတာနိ ဟောန္တိ။ တေသု ပစ္စတ္တကရဏာနိ တိံသုတ္တရာနိ ဒွိသတာနိ ဟောန္တိ။ တေသု အမိဿပစ္စတ္တကရဏာနိ ဒွါဒသုတ္တရာနိ ဒွိသတာနိ၊ မိဿပစ္စတ္တကရဏာနိ အဋ္ဌာရသ ဟောန္တိ။ အဝသေသေသု တိံသတိယာ သိက္ခာပဒေသု မိဿောပယောဂကရဏာနိ ပဉ္စ ဟောန္တိ၊ မိဿကရဏာနိ စုဒ္ဒသ၊ အမိဿာနိ သတ္တ၊ မိဿာမိဿကရဏာနိ ဒွေ၊ အမိဿာနိ ဒွေတိ သဗ္ဗေသုပိ နိဒ္ဒိဋ္ဌကာရကေသု ဘေဒါနုဝတ္တကဒုဗ္ဗစကုလဒူသကပဌမဒုတိယတတိယကထိနအဘိဟဋကုဋိကာရမဟလ္လကဝိကပ္ပနဒွယဒွေဘာဂဆဗ္ဗဿနိသီဒနသန္ထတဧဠကလောမာတိရေကပတ္တဘေသဇ္ဇဝဿိကသာဋိကတန္တဝါယအစ္စေကဆာရတ္တဒွ ပဉ္စတ္တိံသေသု ‘‘ယော ပန ဘိက္ခူ’’တိ နတ္ထိ။ ဒုတိယာနိယတပဏီတဘောဇနသမဏုဒ္ဒေသတတိယစတုတ္ထပါဋိဒေသနီယေသု မဇ္ဈေ အတ္ထိ။

ဧတ္တာဝတာ သဥဒ္ဒေသာနုဒ္ဒေသဒုကံ၊ သပုဂ္ဂလာပုဂ္ဂလနိဒ္ဒေသဒုကံ၊ ပစ္စေကဒဿိတာပတ္တိဒုကဒွယံ၊ အနိဒ္ဒိဋ္ဌကာရကဒုကံ၊ တတ္ထ နိဒ္ဒိဋ္ဌကာရကေသု ပစ္စတ္တဘုမ္မဒုကံ၊ သယောပနာယောပနဒုကံ၊ အယောပနမဇ္ဈေယောပနဒုကံ၊ ဧကာနေကဝစနဒုကန္တိ နဝ ဒုကာနိ ဒဿိတာနိ ဟောန္တိ။ ဝိသေသကာရဏံ တသ္မိံ တသ္မိံ သိက္ခာပဒေ သမ္ပတ္တေ အာဝိဘဝိဿတိ။ ဧဝံ တာဝ သဥဒ္ဒေသပညတ္တိံ ဉတွာ သေသဝိနယပိဋကေ ယာ ကာစိ ပညတ္တိ အနုဒ္ဒေသပညတ္တီတိ ဝေဒိတဗ္ဗာ။ သာ ပဒဘာဇနန္တရာပတ္တိဝိနီတဝတ္ထုပဋိက္ခေပပညတ္တိအဝုတ္တသိဒ္ဓိသိက္ခာပဒဝသေန ဆဗ္ဗိဓာ ဟောတိ။

တတ္ထ ‘‘ယေဘုယျေန ခယိတေ အာပတ္တိ ထုလ္လစ္စယဿ (ပရိ။ ၁၅၇-၁၅၈)၊ ဝဋ္ဋကတေ မုခေ အစ္ဆုပန္တဿ အာပတ္တိ ဒုက္ကဋဿာ’’တိ (ပါရာ။ ၇၃) ဧဝမာဒိကာ ပဒဘာဇနေ သန္ဒိဿမာနာပတ္တိ ပဒဘာဇနသိက္ခာပဒံ နာမ။ ‘‘န စ၊ ဘိက္ခဝေ၊ သဗ္ဗမတ္တိကာမယာ ကုဋိ ကာတဗ္ဗာ၊ ယော ¶ ကရေယျ၊ အာပတ္တိ ဒုက္ကဋဿာ’’တိအာဒိ (ပါရာ။ ၈၅) အန္တရာပတ္တိသိက္ခာပဒံ နာမ။ ‘‘အနုဇာနာမိ၊ ဘိက္ခဝေ၊ ဒိဝါပဋိသလ္လီယန္တေန ဒွါရံ သံဝရိတွာ ပဋိသလ္လီယိတု’’န္တိ (ပါရာ။ ၇၇) ဧဝမာဒိ ဝိနီတဝတ္ထုသိက္ခာပဒံ နာမ။ ‘‘သင်္ဃဘေဒကော၊ ဘိက္ခဝေ၊ အနုပသမ္ပန္နော န ဥပသမ္ပာဒေတဗ္ဗော’’တိ (မဟာဝ။ ၁၁၅) ဧဝမာဒိ ပဋိက္ခေပသိက္ခာပဒံ နာမ။

ယသ္မာ ပန တေန တေန ပဋိက္ခေပေန ‘‘ယော ပန ဘိက္ခု သမဂ္ဂံ သင်္ဃံ အဓမ္မသညီ ဘိန္ဒေယျ၊ ပါရာဇိကော ဟောတိ အသံဝါသော။ ယော ပန ဘိက္ခု ဒုဋ္ဌစိတ္တော ဘဂဝတော ဇီဝမာနကသရီရေ လောဟိတံ ¶ ဥပ္ပာဒေယျ၊ ပါရာဇိကော ဟောတိ အသံဝါသော’’တိ သိက္ခာပဒါနိ ပညတ္တာနိ ဟောန္တိ။ ယာနိ သန္ဓာယ ‘‘ဧကဿ ဆေဇ္ဇကာ ဟောတိ၊ စတုန္နံ ထုလ္လစ္စယံ၊ စတုန္နဉ္စေဝ အနာပတ္တိ၊ သဗ္ဗေသံ ဧကဝတ္ထုကာ’’တိ ဝုတ္တံ။ ‘‘အတ္ထာပတ္တိ တိဋ္ဌန္တေ ဘဂဝတိ အာပဇ္ဇတိ၊ နော ပရိနိဗ္ဗုတေ’’တိ (ပရိ။ ၃၂၃) စ ဝုတ္တံ။ တေန န ကေဝလံ ‘‘န၊ ဘိက္ခဝေ၊ ဇာနံ သင်္ဃဘေဒကော အနုပသမ္ပန္နော ဥပသမ္ပာဒေတဗ္ဗော…ပေ… အာပတ္တိ ဒုက္ကဋဿာ’’တိ ဣဒမေဝ သိက္ခာပဒံ ပညတ္တံ ဟောတိ သာဓကံ ဟောတိ။ ‘‘ပဏ္ဍကော၊ ဘိက္ခဝေ၊ အနုပသမ္ပန္နော န ဥပသမ္ပာဒေတဗ္ဗော၊ ဥပသမ္ပန္နော နာသေတဗ္ဗော’’တိ (မဟာဝ။ ၁၀၉) ဧဝမာဒီသု ပန ဥပဇ္ဈာယာဒီနံ ဒုက္ကဋမေဝ ပညတ္တံ၊ န ပဏ္ဍကာဒီနံ ပါရာဇိကာပတ္တိ။ န ဟိ တေသံ ဘိက္ခုဘာဝေါ အတ္ထိ။ ယတော သိယာ ပါရာဇိကာပတ္တိ။ တထာ ‘‘န အစ္ဆိန္နေ ထေဝေ ပက္ကမိတဗ္ဗ’’န္တိ (မဟာဝ။ ၆၆၊ ၆၇၊ ၇၈၊ ၇၉) ဧဝမာဒိကဉ္စ ပဋိက္ခေပသိက္ခာပဒမေဝ နာမ။

ခန္ဓကေသု ပညတ္တဒုက္ကဋထုလ္လစ္စယာနိ ပညတ္တိသိက္ခာပဒံ နာမ။ ‘‘တေန ဟိ၊ သာရိပုတ္တ၊ ဘေဒါနုဝတ္တကေ ထုလ္လစ္စယံ ဒေသာပေဟီ’’တိ (စူဠဝ။ ၃၄၅) ဝုတ္တံ၊ ထုလ္လစ္စယမ္ပိ တတ္ထေဝ သမောဓာနံ ဂစ္ဆတိ။ ဣဒံ တေသံ ဝိဘတ္တိကမ္မက္ခဏေ အပညတ္တတ္တာ အဝိဇ္ဇမာနမ္ပိ ဘဂဝတော ဝစနေန ဝိသုဒ္ဓက္ခဏေပိ ဝိဇ္ဇမာနံ ဇာတန္တိ ဧကေ။ ‘‘ဘေဒါနုဝတ္တကေ ဒေသာပေဟီ’’တိ ဝစနတော သေသဘေဒါနုဝတ္တကာနံ ‘‘ယော ပန ဘိက္ခု ဇာနံ သင်္ဃဘေဒကာနံ အနုဝတ္တေယျ၊ အာပတ္တိ ထုလ္လစ္စယဿာ’’တိ သိက္ခာပဒံ ပညတ္တံ ဟောတီတိ ဝေဒိတဗ္ဗံ။ တထာ သဗ္ဗာနိ ခန္ဓကဝတ္တာနိ၊ ဝိနယကမ္မာနိ စ တတ္ထေဝ သမောဓာနံ ဂစ္ဆန္တိ။ ယထာဟ ‘‘ပညတ္တေ တံ ဥပါလိ မယာ အာဂန္တုကာနံ ဘိက္ခူနံ အာဂန္တုကဝတ္တံ…ပေ… ဧဝံ သုပညတ္တေ ခေါ မယာ ဥပါလိ သိက္ခာပဒေ’’တိအာဒိ။ ‘‘ယာ ပန ဘိက္ခုနီ နစ္စံ ဝါ ဂီတံ ဝါ ဝါဒိတံ ဝါ ဒဿနာယ ဂစ္ဆေယျ ¶ ၊ ပါစိတ္တိယ’’န္တိ (ပါစိ။ ၈၃၄) ဣမိနာ သုတ္တေန ဘိက္ခုနီ နစ္စေယျ ဝါ ဂါယေယျ ဝါ ဝါဒေယျ ဝါ၊ ပါစိတ္တိယန္တိ ဧဝမာဒိကံ ယံ ကိဉ္စိ အဋ္ဌကထာယ ဒိဿမာနံ အာပတ္တိဇာတံ ဝိနယကမ္မံ ဝါ အဝုတ္တသိဒ္ဓိသိက္ခာပဒံ နာမ။ ဆဗ္ဗိဓမ္ပေတံ ဆဟိ အာကာရေဟိ ဥဒ္ဒေသာရဟံ န ဟောတီတိ အနုဒ္ဒေသသိက္ခာပဒံ နာမာတိ ဝေဒိတဗ္ဗံ။ သေယျထိဒံ – ပဉ္စဟိ ဥဒ္ဒေသေဟိ ယထာသမ္ဘဝံ ဝိသဘာဂတ္တာ ထုလ္လစ္စယဒုဗ္ဘာသိတာနံ သဘာဂဝတ္ထုကမ္ပိ ဒုက္ကဋထုလ္လစ္စယဒွယံ အသဘာဂါပတ္တိကတ္တာ အန္တရာပတ္တိပညတ္တိသိက္ခာပဒါနံ၊ နာနာဝတ္ထုကာပတ္တိကတ္တာ ပဋိက္ခေပသိက္ခာပဒါနံ၊ ကေသဉ္စိ ဝိနီတဝတ္ထုပညတ္တိသိက္ခာပဒါနဉ္စ အဒဿိတာပတ္တိကတ္တာ၊ အဒဿိတဝတ္ထုကတ္တာ ဘေဒါနုဝတ္တကထုလ္လစ္စယဿ၊ အဒဿိတာပတ္တိဝတ္ထုကတ္တာ အဝုတ္တသိဒ္ဓိသိက္ခာပဒါနန္တိ။ ဧတ္တာဝတာ ‘‘ဒုဝိဓံ သိက္ခာပဒပညာပနံ သဥဒ္ဒေသာနုဒ္ဒေသဘေဒတော’’တိ ယံ ဝုတ္တံ၊ တံ သမာသတော ပကာသိတံ ဟောတိ။

ပညတ္တိယံ ¶ တာဝ –

‘‘ကာရကော ဣဓ နိဒ္ဒိဋ္ဌော၊ အပေက္ခာယ အဘာဝတော၊

ပုဗ္ဗေ ဝတ္တဗ္ဗဝိဓာနာ-ဘာဝတော စ အာဒိတော ယောပနေန သဟာ’’တိ။ –

အယံ နယော ဝေဒိတဗ္ဗော။ တဿတ္ထော – ယေ တေ အနိဒ္ဒိဋ္ဌကာရကာ ပုဗ္ဗေ ဝုတ္တပ္ပဘေဒါ သုက္ကဝိသဋ္ဌိအာဒယော သိက္ခာပဒဝိသေသာ၊ တေသု အဓိပ္ပာယကမ္မဝတ္ထုပုဂ္ဂလပယောဂေ အပေက္ခာယ ဘာဝတော ကာရကော န နိဒ္ဒိဋ္ဌော တေသံ သာပေက္ခဘာဝဒဿနတ္ထံ။ တံ သဗ္ဗံ တသ္မိံ တသ္မိံ သိက္ခာပဒေ အာဝိဘဝိဿတိ၊ ဣဓ ပန ပါရာဇိကပညတ္တိယံ အပေက္ခာယ အဘာဝတော ကာရကော နိဒ္ဒိဋ္ဌော။ ယော ပန ကာရကော ‘‘နိဋ္ဌိတစီဝရသ္မိံ ဘိက္ခုနာ ဥဗ္ဘတသ္မိ’’န္တိအာဒီသု (ပါရာ။ ၄၆၂၊ ၄၇၂၊ ၄၇၅) ဝိယ ပုဗ္ဗေ ဝတ္တဗ္ဗဝိဓာနာဘာဝတော ကရဏာဒိဝသေန အနိဒ္ဒိသိတွာ ပစ္စတ္တဝသေန နိဒ္ဒိဋ္ဌော အပေက္ခာယ အဘာဝတော။ တတ္ထ နိဒ္ဒိသိယမာနော သေသဒုတိယာနိယတပဏီတဘောဇနံ သမဏုဒ္ဒေသတတိယစတဥတ္ထပါဋိဒေသနီယေသု ဝိယ မဇ္ဈေ အနိဒ္ဒိသိတွာ ‘‘န ဟေဝ ခေါ ပန…ပေ… ဩဘာသိတု’’န္တိအာဒိ (ပါရာ။ ၄၅၃) ဝိယ ပုဗ္ဗေ ဝတ္တဗ္ဗဝိဓာနာဘာဝတော ဧဝ အာဒိမှိ နိဒ္ဒိဋ္ဌော။ အာဒိမှိ နိဒ္ဒိသိယမာနောပိ ပုဗ္ဗေ ဝုတ္တပ္ပဘေဒေသု ဘေဒါနုဝတ္တကာဒီသု ပဉ္စတ္တိံသေသု သိက္ခာပဒေသု ဝိယ အနိဒ္ဒိသိတွာ ပုဗ္ဗေ ဝတ္တဗ္ဗဝိဓာနာဘာဝတော ဧဝ ‘‘ယော ပန ဘိက္ခူ’’တိအာဒိတောဝ ယောပန-သဒ္ဒေန သဟ ¶ နိဒ္ဒိဋ္ဌော။ ဧဝံ နိဒ္ဒိသိယမာနောပိ သော ယသ္မာ ‘‘ယာ ပန ဘိက္ခုနိယော ဒွေ ဧကမဉ္စေ တုဝဋ္ဋေယျု’’န္တိအာဒိ (ပါစိ။ ၉၃၃) အာပတ္တိ ဝိယ ပရပ္ပဘဝံ အာပတ္တိံ န အာပဇ္ဇတိ၊ တသ္မာ ‘‘ယော ပန ဘိက္ခူ’’တိ ဧကဝစနေန နိဒ္ဒိဋ္ဌော။ မေထုနဓမ္မာပတ္တိပိ ပရပ္ပဘဝါ ‘‘ဒွယံဒွယသမာပတ္တီ’’တိ (ပါရာ။ ၃၉) ဝစနတောတိ စေ? တံ န၊ အဓိပ္ပာယဇာနနတော။ အနေကိဿာ ဧဝ ဘိက္ခုနိယာ အာပတ္တိ၊ န ဧကိဿာတိ နိယမော တတ္ထ အတ္ထိ၊ န ဧဝံ ဣဓ နိယမောတိ အနိယမိတာဓိပ္ပာယော။ လမ္ဗီမုဒုပိဋ္ဌီနံ ကုတော ‘‘ဒွယံဒွယသမာပတ္တီ’’တိ (ပါရာ။ ၅၅) ဝစနတော တေသံ မေထုနဓမ္မာပတ္တိ။ အယမတ္ထော စတဿော မေထုနဓမ္မပစ္စယာတိ အဋ္ဌဝတ္ထုကံ သန္ဓာယ ‘‘ဆေဇ္ဇံ သိယာ မေထုနဓမ္မပစ္စယာ’’တိ (ပရိ။ ၄၈၁) စ ပရိဝါရေ ဝုတ္တဝစနေန သာဓေတဗ္ဗော။

ဘေဒါနုဝတ္တကသိက္ခာပဒေ တိဏ္ဏံ ဥဒ္ဓံ န သမနုဘာသိတဗ္ဗာ၊ န သင်္ဃေန သင်္ဃံ ဧကတော ကာတဗ္ဗန္တိ။ နယဒဿနတ္ထံ အာဒိတောဝ ‘‘ဘိက္ခူ ဟောန္တီ’’တိ ဗဟုဝစနနိဒ္ဒေသံ ကတွာ ပုန ‘‘ဧကော ဝါ ဒွေ ဝါ တယော ဝါ’’တိ (ပါရာ။ ၄၁၈) ဝုတ္တံ၊ အညထာ န တတော ဥဒ္ဓံ ‘‘အနုဝတ္တကာ ဟောန္တီ’’တိ အာပဇ္ဇတိ။ တတော နိဒါနဝိရောဓော။ ပဉ္စသတမတ္တာ ဟိ တဒနုဝတ္တကာ အဟေသုံ။ ယံ ပန သတ္တသတိကက္ခန္ဓကေ ‘‘သင်္ဃော စတ္တာရော ပါစီနကေ ဘိက္ခူ၊ စတ္တာရော ပါဝေယျကေ ဘိက္ခူ သမ္မန္နေယျ ¶ …ပေ… သမ္မတာ’’တိအာဒိ (စူဠဝ။ ၄၅၆) ဉတ္တိဒုတိယကမ္မံ ဝုတ္တံ၊ တံ ‘‘ဥဗ္ဗာဟိကာယ ဣမံ အဓိကရဏံ ဝူပသမေတု’’န္တိ ဝုတ္တတ္တာ တေဟိ ကတ္တဗ္ဗဝိဓာနံ။ သမ္မုတိကရဏမေဝ ဝါ တတိယံ ကတွာ ကပ္ပတိ။ န ဟိ တေ တေန ကမ္မေန ကမ္မာရဟာ ကမ္မကတာ ဟောန္တိ။ ယဿ သင်္ဃော ကမ္မံ ကရောတိ၊ သော ကမ္မာရဟောတိ လက္ခဏံ။ န စ တဒါ သင်္ဃော တေသံ အဋ္ဌန္နမ္ပိ ဘိက္ခူနံ ကမ္မံ အကာသိ။ ဘဇာပိယမာနာ တေ ကမ္မပတ္တဘာဝံ ဘဇန္တိ။ အဓိကရဏဝူပသမကမ္မဿ ပတ္တာ ယုတ္တာ သင်္ဃေန ကတာတိ ကတွာ ကမ္မပတ္တာ ဧဝ ဟိ တေ ဟောန္တိ။ ‘‘တေ ဘိက္ခူ ဘိက္ခူဟိ ယာဝတတိယံ သမနုဘာသိတဗ္ဗာ တဿ ပဋိနိဿဂ္ဂါယာ’’တိ (ပါရာ။ ၄၁၈) ဝစနတော တေဟိ ကတ္တဗ္ဗဝိဓာနံ။ သမ္မုတိကရဏမေဝ ကမ္မံ ဟောတီတိ စေ? တံ န၊ အဓိပ္ပာယဇာနနတော၊ တဿ ပဋိနိဿဂ္ဂါယ ဧဝ တေ ဘိက္ခူ ကမ္မာရဟာ ကာတဗ္ဗာ၊ န ဒေါသာဂတိဝသေနာတိ အယမေတ္ထ အဓိပ္ပာယော။ န ဟိ ပါစီနကာဒီနံ သမ္မုတိယာ အဓိကရဏဝူပသမသိဒ္ဓိ ဝိယ တေသံ သမနုဘာသနကမ္မေန တဿ ပဋိနိဿဂ္ဂသိဒ္ဓိ ဟောတိ၊ သမ္မုတိ နာမေသာ ¶ ပဌမံ အနုမတိံ ဂဟေတွာ ယာစိတွာဝ ကရီယတိ၊ န တထာ ကမ္မန္တိ။ ကမ္မကရဏေ ပန တဒတ္ထသိဒ္ဓိ ဟောတိယေဝ။ ပရသမ္မုတိယာ ဗဟုတရာဝ သမ္မန္နိတဗ္ဗာတိ ဝေဒိတဗ္ဗံ။

‘‘မေထုနဓမ္မ’’န္တိ ဧဝံ ဗာဟုလ္လနယေန လဒ္ဓနာမကံ သကပယောဂေန ဝါ ပရပယောဂေန ဝါ အတ္တနော နိမိတ္တဿ သကမဂ္ဂေ ဝါ ပရမဂ္ဂေ ဝါ ပရနိမိတ္တဿ ဝါ သကမဂ္ဂေ ဧဝ ပဝေသနပဝိဋ္ဌဋ္ဌိတဥဒ္ဓရဏေသု ယံ ကိဉ္စိ ဧကံ ပဋိသာဒိယနဝသေန သေဝေယျ၊ ပါရာဇိကော ဟောတိ အသံဝါသောတိ။ ကေစိ ပန ‘‘ပဝေသနာဒီနိ စတ္တာရိ ဝါ တီဏိ ဝါ ဒွေ ဝါ ဧကံ ဝါ ပဋိသေဝေယျ၊ ပါရာဇိကော ဟောတိ။ ဝုတ္တဉှေတံ ‘သော စေ ပဝေသနံ သာဒိယတိ၊ ပဝိဋ္ဌံ သာဒိယတိ၊ ဌိတံ သာဒိယတိ၊ ဥဒ္ဓရဏံ သာဒိယတိ၊ အာပတ္တိ ပါရာဇိကဿာ’တိအာဒီ’’တိ (ပါရာ။ ၅၈) ဝဒန္တိ။ တေသံ မတေန စတူသုပိ စတဿော ပါရာဇိကာပတ္တိယော အာပဇ္ဇတိ။ တေယေဝ ဧဝံ ဝဒန္တိ – အာပဇ္ဇတု မေထုနဓမ္မပါရာဇိကာပတ္တိ၊ မေထုနဓမ္မပါရာဇိကာပတ္တိယာ တံဘာဂိယာတိ အတ္တနော ဝီတိက္ကမေ ပါရာဇိကာပတ္တိယော၊ သင်္ဃာဒိသေသာပတ္တိဉ္စ အာပဇ္ဇိတွာ သိက္ခံ ပစ္စက္ခာယ ဂဟဋ္ဌကာလေ မေထုနာဒိကံ ပါရာဇိကံ အာပဇ္ဇိတွာ ပုန ပဗ္ဗဇိတွာ ဥပသမ္ပဇ္ဇိတွာ ဧကံ သင်္ဃာဒိသေသာပတ္တိံ ဧကမနေကံ ဝါ ပဋိကရိတွာဝ သော ပုဂ္ဂလော ယသ္မာ နိရာပတ္တိကော ဟောတိ၊ တသ္မာ သော ဂဟဋ္ဌကာလေ သာပတ္တိကောဝါတိ။ အန္တိမဝတ္ထုအဇ္ဈာပန္နဿာပိ အတ္ထေဝ အာပတ္တိ။ ဝုဋ္ဌာနဒေသနာဟိ ပန အသုဇ္ဈနတော ‘‘ပယောဂေ ပယောဂေ အာပတ္တိ ပါရာဇိကဿာ’’တိ န ဝုတ္တံ။ ဂဏနပယောဇနာဘာဝတော ကိဉ္စာပိ န ဝုတ္တံ၊ အထ ခေါ ပဒဘာဇနေ (ပါရာ။ ၅၈) ‘‘အာပတ္တိ ပါရာဇိကဿာ’’တိ ဝစနေနာယမတ္ထော သိဒ္ဓါတိ ယုတ္တိဉ္စ ဝဒန္တိ။

ယဒိ ¶ ဧဝံ မာတိကာယမ္ပိ ‘‘ယော ပန ဘိက္ခု မေထုနံ ဓမ္မံ ပဋိသေဝေယျ၊ ပါရာဇိက’’န္တိ ဝတ္တဗ္ဗံ ဘဝေယျ၊ ပါရာဇိကဿ အနဝသေသဝစနမ္ပိ န ယုဇ္ဇေယျ။ သဗ္ဗေပိ ဟိ အာပတ္တိက္ခန္ဓေ၊ ဘိက္ခုဂဏနဉ္စ အနဝသေသေတွာ တိဋ္ဌတီတိ အနဝသေသဝစနန္တိ ကတွာ ပဝေသေဝ အာပတ္တိ၊ န ပဝိဋ္ဌာဒီသု။ တမေဝေကံ သန္ဓာယ ‘‘ယဿ သိယာ အာပတ္တီ’’တိ (မဟာဝ။ ၁၃၄) ပါရာဇိကာပတ္တိမ္ပိ အန္တော ကတွာ နိဒါနုဒ္ဒေသဝစနံ ဝေဒိတဗ္ဗံ။ တသ္မာ မာတိကာယံ ‘‘ပါရာဇိက’’န္တိ အဝတွာ ‘‘ပါရာဇိကော ဟောတီ’’တိ (ပါရာ။ ၄၂၊ ၄၄) ပုဂ္ဂလနိဒ္ဒေသဝစနံ တေန သရီရဗန္ဓနေန ဥပသမ္ပဒါယ အဘဗ္ဗဘာဝဒီပနတ္ထံ။ ‘‘အာပတ္တိ ပါရာဇိကဿာ’’တိ ပဒဘာဇနေ ဝစနံ အန္တိမဝတ္ထုံ အဇ္ဈာပန္နဿာပိ ¶ ပါရာဇိကဿ အသံဝါသဿ သတော ပုဂ္ဂလဿ အထေယျသံဝါသကဘာဝဒီပနတ္ထံ။ န ဟိ သော သံဝါသံ သာဒိယန္တောပိ ထေယျသံဝါသကော ဟောတိ၊ တသ္မာ ဥပသမ္ပန္နော ‘‘ဘိက္ခူ’’တွေဝ ဝုစ္စတိ။ တေနေဝါဟ ‘‘အသုဒ္ဓါ ဟောတိ ပုဂ္ဂလော အညတရံ ပါရာဇိကံ ဓမ္မံ အဇ္ဈာပန္နော၊ တဉ္စေ သုဒ္ဓဒိဋ္ဌိ သမာနော အနောကာသံ ကာရာပေတွာ အက္ကောသာဓိပ္ပာယော ဝဒတိ၊ အာပတ္တိ ဩမသဝါဒေန ဒုက္ကဋဿာ’’တိ (ပါရာ။ ၃၈၉) အနုပသမ္ပန္နဿ တဒဘာဝတော သိဒ္ဓါ သော ဥပသမ္ပန္နော ‘‘ဘိက္ခူ’’တွေဝ ဝုစ္စတီတိ၊ တေန ပဒသောဓမ္မံ၊ သဟသေယျဉ္စ ဇနေတိ၊ ဘိက္ခုပေသုညာဒိဉ္စ ဇနေတီတိ ဝေဒိတဗ္ဗံ (ဝဇိရ။ ဋီ။ ပါရာဇိက ၃၉)။

နိဒါနာ မာတိကာဘေဒေါ၊ ဝိဘင်္ဂေါ တန္နိယာမကော၊

တတော အာပတ္တိယာ ဘေဒေါ၊ အနာပတ္တိ တဒညထာတိ။ (ဝဇိရ။ ဋီ။ ပါရာဇိက ၄၃-၄၄) –

အယံ နယော ဝေဒိတဗ္ဗော။ တတ္ထ သုဒိန္နဝတ္ထု (ပါရာ။ ၂၄ အာဒယော)-မက္ကဋိဝတ္ထု (ပါရာ။ ၄၀ အာဒယော)-ဝဇ္ဇိပုတ္တကဝတ္ထု (ပါရာ။ ၄၃) စာတိ တိပ္ပဘေဒဝတ္ထု ဣမဿ သိက္ခာပဒဿ နိဒါနံ နာမ။ တတော နိဒါနာ ‘‘ယော ပန ဘိက္ခု ဘိက္ခူနံ…ပေ… အသံဝါသော’’တိ (ပါရာ။ ၄၄) ဣမိဿာ မာတိကာယ ဘေဒေါ ဇာတော။ တတ္ထ ဟိ ‘‘အန္တမသော တိရစ္ဆာနဂတာယာ’’တိ (ပါရာ။ ၄၄) ဣတ္ထိလိင်္ဂဝသေန ‘‘သစ္စံ၊ အာဝုသော၊ ဘဂဝတာ သိက္ခာပဒံ ပညတ္တံ၊ တဉ္စ ခေါ ဣတ္ထိယာ၊ နော ပုရိသေ၊ နော ပဏ္ဍကေ၊ နော ဥဘတောဗျဉ္ဇနကေ စာ’’တိ မက္ကဋိပါရာဇိကော ဝိယ အညောပိ လေသံ ဩဍ္ဍေတုံ သက္ကောတိ၊ တသ္မာ တာဒိသဿ အလေသောကာသဿ ဒဿနတ္ထံ ဣဒံ ဝုစ္စတိ၊ မက္ကဋိသင်္ခါတာ နိဒါနာ ‘‘အန္တမသော တိရစ္ဆာနဂတာယပီ’’တိ မာတိကာယ ဝစနဘေဒေါ၊ န ဣတ္ထိယာ ဧဝ မေထုနသိဒ္ဓိဒဿနတော။ တသ္မာ ဝိဘင်္ဂေါ တန္နိယာမကော တဿာ မာတိကာယ အဓိပ္ပေတတ္ထနိယာမကော ဝိဘင်္ဂေါတိ။ ဝိဘင်္ဂေ ဟိ ‘‘တိဿော ဣတ္ထိယော၊ တယော ဥဘတောဗျဉ္ဇနကာ၊ တယော ပဏ္ဍကာ၊ တယော ပုရိသာ။ မနုဿိတ္ထိယာ တယော မဂ္ဂေ၊ တိရစ္ဆာနဂတပုရိသဿ ဒွေ မဂ္ဂေ’’တိအာဒိနာ (ပါရာ။ ၅၆) နယေန ¶ သဗ္ဗလေသောကာသံ ပိဒဟိတွာ နိယမော ကတော။ ဧတ္ထာဟ – ယဒိ ဧဝံ သာဓာရဏသိက္ခာပဒဝသေန ဝါ လိင်္ဂပရိဝတ္တနဝသေန ဝါ န ကေဝလံ ဘိက္ခူနံ၊ ဘိက္ခုနီနမ္ပိ ‘‘သိက္ခာသာဇီဝသမာပန္နော’’တိ ဝိဘင်္ဂေ ဝတ္တဗ္ဗံ သိယာ။ တဒဝစနေန ဟိ ဘိက္ခုနီ ပုရိသလိင်္ဂပါတုဘာဝေန ဘိက္ခုဘာဝေ ¶ ဌိတာ ဧဝံ ဝဒေယျ ‘‘နာဟံ ဥပသမ္ပဒါကရဏကာလေ ဘိက္ခူနံ သိက္ခာသာဇီဝသမာပန္နာ၊ တသ္မာ န အပစ္စက္ခာတသိက္ခာပိ မေထုနဓမ္မေန ပါရာဇိကာ ဟောမီ’’တိ။ ဝုစ္စတေ – ယထာ ဝုတ္တံ၊ တထာ န ဝတ္တဗ္ဗံ အနိဋ္ဌပ္ပသင်္ဂတော။ တထာ ဝုတ္တေ ဘိက္ခုနီနမ္ပိ သိက္ခာပစ္စက္ခာနံ အတ္ထီတိ အာပဇ္ဇတိ။ တဉ္စာနိဋ္ဌံ။ ဣဒမပရမနိဋ္ဌံ ‘‘သဗ္ဗသိက္ခာပဒါနိ သာဓာရဏာနေဝ နာသာဓာရဏာနီ’’တိ။ အပိစာယံ ဘိက္ခူနံ သိက္ခာသာဇီဝသမာပန္နာဝ ဟောတီတိ ဒဿနတ္ထံ ‘‘အနုဇာနာမိ၊ ဘိက္ခဝေ၊ တံယေဝ ဥပဇ္ဈံ တမေဝ ဥပသမ္ပဒံ တာနိ ဝဿာနိ ဘိက္ခူဟိ သင်္ဂမိတု’’န္တိအာဒိ (ပါရာ။ ၆၉) ဝုတ္တံ။ တတော အာပတ္တိယာ ဘေဒေါတိ တတော ဝိဘင်္ဂတော ‘‘အက္ခယိတေ သရီရေ ပါရာဇိကံ၊ ယေဘုယျေန ခယိတေ ထုလ္လစ္စယ’’န္တိအာဒိ (ပါရာ။ ၇၃၊ ပရိ။ ၁၅၇) အာပတ္တိယာ ဘေဒေါ ဟောတိ။ အနာပတ္တိ တဒညထာတိ တတော ဧဝ ဝိဘင်္ဂတော ယေန အာကာရေန အာပတ္တိ ဝုတ္တာ၊ တတော အညေနာကာရေန အနာပတ္တိဘေဒေါဝ ဟောတိ။ ‘‘သာဒိယတိ၊ အာပတ္တိ ပါရာဇိကဿ၊ န သာဒိယတိ၊ အနာပတ္တီ’’တိ ဟိ ဝိဘင်္ဂေ အသတိ န ပညာယတိ။ ဧတ္တာဝတာ ‘‘နိဒါနာ မာတိကာဘေဒေါ’’တိ အယံ ဂါထာ သမာသတော ဝုတ္တတ္ထာ ဟောတိ။ ဝိသေသကာရဏံ ပန တသ္မိံ တသ္မိံ သိက္ခာပဒေ အာဝိဘဝိဿတိ။

ပဌမပညတ္တိ တာဝ ပဌမဗောဓိံ အတိက္ကမိတွာ ပညတ္တတ္တာ၊ အာယသ္မတော သုဒိန္နဿ အဋ္ဌဝဿိကကာလေ ပညတ္တတ္တာ စ ရတ္တညုမဟတ္တံ ပတ္တကာလေ ပညတ္တာ၊ ဒုတိယပညတ္တိ ဗာဟုသစ္စမဟတ္တံ ပတ္တကာလေ။ သော ဟိ အာယသ္မာ မက္ကဋိပါရာဇိကော ယထာ မာတုဂါမပ္ပဋိသံယုတ္တေသု သိက္ခာပဒေသု တိရစ္ဆာနဂတိတ္ထီ န အဓိပ္ပေတာ၊ တထာ ဣဓာပီတိ သညာယ ‘‘သစ္စံ၊ အာဝုသော…ပေ… တဉ္စ ခေါ မနုဿိတ္ထိယာ၊ နော တိရစ္ဆာနဂတာယာ’’တိ (ပါရာ။ ၄၁) အာဟ။ တတိယပညတ္တိ လာဘဂ္ဂမဟတ္တံ ပတ္တကာလေ ဥပ္ပန္နာ ‘‘ယာဝဒတ္ထံ ဘုဉ္ဇိတွာ’’တိအာဒိ (ပါရာ။ ၄၃) ဝစနတော၊ ဝေပုလ္လမဟတ္တမ္ပိ ဧတ္ထေဝ လဗ္ဘတီတိ ဣမံ ပဌမပါရာဇိကသိက္ခာပဒံ တိဝိဓမ္ပိ ဝတ္ထုံ ဥပါဒါယ စတုဗ္ဗိဓမ္ပိ တံ ကာလံ ပတွာ ပညတ္တန္တိ ဝေဒိတဗ္ဗံ။

တတ္ထ ယော ပနာတိ အနဝသေသပရိယာဒါနပဒံ။ ဘိက္ခူတိ တဿ အတိပ္ပသင်္ဂနိယမပဒံ။ ဘိက္ခူနံ သိက္ခာသာဇီဝသမာပန္နောတိ တဿ ဝိသေသနဝစနံ။ န ဟိ သဗ္ဗောပိ ဘိက္ခုနာမကော၊ ယာ ဘဂဝတာ ယာယ ကာယစိ ဥပသမ္ပဒါယ ဥပသမ္ပန္နဘိက္ခူနံ ဟေဋ္ဌိမပရိစ္ဆေဒေန သိက္ခိတဗ္ဗာ သိက္ခာ ဝိဟိတာ ¶ ၊ ‘‘ဧတ္ထ သဟ ဇီဝန္တီ’’တိ ယော စ သာဇီဝေါ ဝုတ္တော၊ တံ ဥဘယံ သမာပန္နောဝ ဟောတိ။ ကဒါ ပန သမာပန္နော ဟောတိ? ယာယ ကာယစိ ဥပသမ္ပဒါယ ဥပသမ္ပန္နသမနန္တရမေဝ တဒုဘယံ ¶ ဇာနန္တောပိ အဇာနန္တောပိ တဒဇ္ဈုပဂတတ္တာ သမာပန္နောဝ နာမ ဟောတိ။ သဟ ဇီဝန္တီတိ ယာဝ သိက္ခံ န ပစ္စက္ခာတိ၊ ပါရာဇိကဘာဝံ ဝါ န ပါပုဏာတိ။ ယံ ပန ဝုတ္တံ အန္ဓကဋ္ဌကထာယံ ‘‘သိက္ခံ ပရိပူရေန္တော သိက္ခာသမာပန္နော သာဇီဝံ အဝီတိက္ကမန္တော သာဇီဝသမာပန္နော’’တိ၊ တံ ဥက္ကဋ္ဌပရိစ္ဆေဒဝသေန ဝုတ္တံ။ န ဟိ သိက္ခံ အပရိပူရေန္တော၊ ကာမဝိတက္ကာဒိဗဟုလော ဝါ ဧကစ္စံ သာဝသေသံ သာဇီဝံ ဝီတိက္ကမန္တော ဝါ သိက္ခာသာဇီဝသမာပန္နော နာမ န ဟောတိ။

ဥက္ကဋ္ဌပရိစ္ဆေဒေန ပန စတုက္ကံ လဗ္ဘတိ – ‘‘အတ္ထိ ဘိက္ခု သိက္ခာသမာပန္နော သီလာနိ ပစ္စဝေက္ခန္တော န သာဇီဝသမာပန္နော အစိတ္တကံ သိက္ခာပဒံ ဝီတိက္ကမန္တော၊ အတ္ထိ န သိက္ခာသမာပန္နော ကာမဝိတက္ကာဒိဗဟုလော သာဇီဝသမာပန္နော နိရာပတ္တိကော၊ အတ္ထိ န သိက္ခာသမာပန္နော န စ သာဇီဝသမာပန္နော အနဝသေသံ အာပတ္တိံ အာပန္နော၊ အတ္ထိ ဥဘယသမာပန္နော သိက္ခံ ပရိပူရေန္တော သာဇီဝဉ္စ အဝီတိက္ကမန္တော’’တိ။ အယမေတ္ထ စတုတ္ထော ဘိက္ခု ဥက္ကဋ္ဌော ဣဓ အဓိပ္ပေတော သိယာ။ န ဟိ ဘဂဝါ အနုက္ကဋ္ဌံ ဝတ္တုံ ယုတ္တောတိ စေ? န၊ ‘‘တတြ ယာယံ အဓိသီလသိက္ခာ၊ အယံ ဣမသ္မိံ အတ္ထေ အဓိပ္ပေတာ သိက္ခာ’’တိ ဝစနဝိရောဓတော၊ ဥက္ကဋ္ဌဂ္ဂဟဏာဓိပ္ပာယေ သတိ ‘‘သိက္ခာတိ တိဿော သိက္ခာ’’တိ ဧတ္တကမေဝ ဝတ္တဗ္ဗန္တိ အဓိပ္ပာယော။ သိက္ခတ္တယသမာပန္နော ဟိ သဗ္ဗုက္ကဋ္ဌော။ ‘‘မေထုနံ ဓမ္မံ ပဋိသေဝေယျာ’’တိ ပရတော ဝစနံ အပေက္ခိတွာ အဓိသီလသိက္ခာဝ ဝုတ္တာတိ စေ? န၊ တဿာပိ အဘဗ္ဗတ္တာ။ န ဟိ အဓိသီလသိက္ခံ ပရိပူရေန္တော၊ သာဇီဝဉ္စ အဝီတိက္ကမန္တော မေထုနဓမ္မံ ပဋိသေဝိတုံ ဘဗ္ဗော၊ တံ သိက္ခံ အပရိပူရေန္တော၊ သာဇီဝဉ္စ ဝီတိက္ကမန္တောယေဝ ဟိ ပဋိသေဝေယျာတိ အဓိပ္ပာယာ။ တသ္မာ ဧဝမေတ္ထ အတ္ထော ဂဟေတဗ္ဗော။ ယသ္မာ သိက္ခာပဒသင်္ခါတော သာဇီဝေါ အဓိသီလသိက္ခမေဝ သင်္ဂဏှာတိ၊ န ဣတရသိက္ခာဒွယံ၊ တသ္မာ ‘‘တတြ ယာယံ အဓိသီလသိက္ခာ၊ အယံ ဣမသ္မိံ အတ္ထေ အဓိပ္ပေတာ သိက္ခာ’’တိ ဝုတ္တံ။ တသ္မာ အဓိသီလသိက္ခာယ သင်္ဂါဟကော သာဇီဝေါ သိက္ခာသာဇီဝေါတိ ဝုတ္တော။ ဣတိ သာဇီဝဝိသေသနတ္ထံ သိက္ခာဂ္ဂဟဏံ ကတံ။ တဒတ္ထဒီပနတ္ထမေဝ ဝိဘင်္ဂေ သိက္ခံ အပရာမသိတွာ ‘‘တသ္မိံ သိက္ခတိ၊ တေန ဝုစ္စတိ သာဇီဝသမာပန္နော’’တိ (ပါရာ။ ၄၅) ဝုတ္တံ။ တေန ¶ ဧကမေဝိဒံ အတ္ထပဒန္တိ ဒီပိတံ ဟောတိ။ တဉ္စ ဥပသမ္ပဒူပဂမနန္တရတော ပဋ္ဌာယ သိက္ခနာဓိကာရတ္တာ ‘‘သိက္ခတီ’’တိ စ ‘‘သမာပန္နော’’တိ စ ဝုစ္စတိ။ ယော ဧဝံ ‘‘သိက္ခာသာဇီဝသမာပန္နော’’တိ သင်္ခံ ဂတော၊ တာဒိသံ ပစ္စယံ ပဋိစ္စ အပရဘာဂေ သာဇီဝသင်္ခါတမေဝ သိက္ခံ အပစ္စက္ခာယ တသ္မိံယေဝ ဒုဗ္ဗလျံ အနာဝိကတွာ မေထုနံ ဓမ္မံ ပဋိသေဝေယျာတိ အယမတ္ထော ယုဇ္ဇတိ။

ကိန္တု အဋ္ဌကထာနယော ပဋိက္ခိတ္တော ဟောတိ၊ သော စ န ပဋိက္ခေပါရဟော ဟောတိ၊ အဓိပ္ပာယော ပနေတ္ထ ¶ ပရိယေသိတဗ္ဗော။ သဗ္ဗေသု သိက္ခာပဒေသု ဣဒမေဝ ဘိက္ခုလက္ခဏံ သာဓာရဏံ ယဒိဒံ ‘‘ဘိက္ခူနံ သိက္ခာသာဇီဝသမာပန္နော’’တိ။ ခီဏာသဝေါပိ သာဝကော အာပတ္တိံ အာပဇ္ဇတိ အစိတ္တကံ၊ တထာ သေက္ခော၊ ပုထုဇ္ဇနော ပန သစိတ္တကမ္ပိ၊ တသ္မာ သေက္ခာသေက္ခပုထုဇ္ဇနာနံ သာမညမိဒံ ဘိက္ခုလက္ခဏန္တိ ကတွာ ကေဝလံ သိက္ခာသမာပန္နော၊ ကေဝလံ သာဇီဝသမာပန္နော၊ ဥဘယသမာပန္နော စာတိ သရူပေကဒေသဧကသေသနယေန ‘‘သိက္ခာသာဇီဝသမာပန္နော’’တွေဝ သမ္ပိဏ္ဍေတွာ ဥက္ကဋ္ဌဂ္ဂဟဏေန အနုက္ကဋ္ဌာနံ ဂဟဏသိဒ္ဓိတော အဋ္ဌကထာယံ ဥက္ကဋ္ဌောဝ ဝုတ္တော။ တမေဝ သမ္ပာဒေတုံ ‘‘တသ္မိံ သိက္ခတိ၊ တေန ဝုစ္စတိ သာဇီဝသမာပန္နော’’တိ ဧတ္ထ သိက္ခာသဒ္ဒဿ အဝစနေ ပရိဟာရံ ဝတွာ ယသ္မာ ပန သော သိက္ခမ္ပိ သမာပန္နော၊ တသ္မာ သိက္ခာသမာပန္နောတိပိ အတ္ထတော ဝေဒိတဗ္ဗောတိ စ ဝတွာ ‘‘ယံ သိက္ခံ သမာပန္နော၊ တံ အပစ္စက္ခာယ၊ ယဉ္စ သာဇီဝံ သမာပန္နော၊ တတ္ထ ဒုဗ္ဗလျံ အနာဝိကတွာ’’တိ ဝုတ္တန္တိ အယမဋ္ဌကထာယ အဓိပ္ပာယော ဝေဒိတဗ္ဗော။ ဧတသ္မိံ ပန အဓိပ္ပာယေ အဓိသီလသိက္ခာယ ဧဝ ဂဟဏံ သဗ္ဗတ္ထိကတ္တာ၊ သီလာဓိကာရတော စ ဝိနယဿာတိ ဝေဒိတဗ္ဗံ။ ယထာ စ သိက္ခာပဒံ သမာဒိယန္တော သီလံ သမာဒိယတီတိ ဝုစ္စတိ၊ ဧဝံ သိက္ခာပဒံ ပစ္စက္ခန္တော သီလံ ပစ္စက္ခာတီတိ ဝတ္တုံ ယုဇ္ဇတိ၊ တသ္မာ တတ္ထ ဝုတ္တံ ‘‘ယံ သိက္ခံ သမာပန္နော၊ တံ အပစ္စက္ခာယာ’’တိ (ပါရာ။ အဋ္ဌ။ သိက္ခာပစ္စက္ခာနဝိဘင်္ဂဝဏ္ဏနာ)။ ဧတ္တာဝတာ သမာသတော ‘‘သိက္ခာသာဇီဝသမာပန္နော’’တိ ဧတ္ထ ဝတ္တဗ္ဗဝိနိစ္ဆယော နိဋ္ဌိတော ဟောတိ။

ကိံ ဣမိနာ ဝိသေသဝစနေန ပယောဇနံ၊ နနု ‘‘ယော ပန ဘိက္ခု သိက္ခံ အပစ္စက္ခာယ ဒုဗ္ဗလျံ အနာဝိကတွာ…ပေ… အသံဝါသော’’တိ ဧတ္တကမေဝ ဝတ္တဗ္ဗန္တိ စေ? န ဝတ္တဗ္ဗံ အနိဋ္ဌပ္ပသင်္ဂတော။ ‘‘ယော ပန သိက္ခာသာဇီဝသမာပန္နော ထေယျသံဝါသာဒိကော ကေဝလေန သမညာမတ္တေန၊ ပဋိညာမတ္တေန ¶ ဝါ ဘိက္ခု၊ တဿာပိ သိက္ခာပစ္စက္ခာနံ အတ္ထိ၊ သိက္ခံ အပစ္စက္ခာယ စ မေထုနံ ဓမ္မံ ပဋိသေဝန္တဿ ပါရာဇိကာပတ္တိ။ ယော ဝါ ပစ္ဆာ ပါရာဇိကံ အာပတ္တိံ အာပဇ္ဇိတွာ န သိက္ခာသာဇီဝသမာပန္နော၊ တဿ စ၊ ယော ဝါ ပက္ခပဏ္ဍကတ္တာ ပဏ္ဍကဘာဝူပဂမနေန န သိက္ခာသာဇီဝသမာပန္နော၊ တဿ စ တဒုဘယံ အတ္ထီတိ အာပဇ္ဇတိ။ ပဏ္ဍကဘာဝပက္ခေ စ ပဏ္ဍကော ဥပသမ္ပဒါယ န ဝတ္ထူ’’တိ ဝုတ္တံ။ တသ္မာ ဣတရသ္မိံ ပက္ခေ ဝတ္ထူတိ သိဒ္ဓံ။ တသ္မိံ ပက္ခေ ဥပသမ္ပန္နော ပဏ္ဍကဘာဝပက္ခေ ပဏ္ဍကတ္တာ န သိက္ခာသာဇီဝသမာပန္နော၊ သော ပရိစ္စဇိတဗ္ဗာယ သိက္ခာယ အဘာဝေန သိက္ခံ အပစ္စက္ခာယ မုခေန ပရဿ အင်္ဂဇာတဂ္ဂဟဏနယေန မေထုနံ ဓမ္မံ ပဋိသေဝေယျ၊ တဿ ကုတော ပါရာဇိကာပတ္တီတိ အဓိပ္ပာယော။ အယံ နယော အပဏ္ဍကပက္ခံ အလဘမာနဿေဝ ပရတော ယုဇ္ဇတိ၊ လဘန္တဿ ပန အရူပသတ္တာနံ ကုသလာဒိသမာပတ္တိက္ခဏေ ဘဝင်္ဂဝိစ္ဆေဒေ သတိပိ အမရဏံ ဝိယ ပဏ္ဍကဘာဝပက္ခေပိ ဘိက္ခုဘာဝေါ အတ္ထိ။ သံဝါသံ ဝါ သာဒိယန္တဿ န ထေယျသံဝါသကဘာဝေါ အတ္ထိ အန္တိမဝတ္ထုအဇ္ဈာပန္နဿ ဝိယ။ န စ သဟသေယျာဒိံ ဇနေတိ ¶ ။ ဂဏပူရကော ပန န ဟောတိ အန္တိမဝတ္ထုံ အဇ္ဈာပန္နော ဝိယ။ န သော သိက္ခာသာဇီဝသမာပန္နော။ ဣတရသ္မိံ ပန ပက္ခေ ဟောတိ၊ အယံ ဣမဿ တတော ဝိသေသော။ ကိမယံ သဟေတုကော၊ ဥဒါဟု အဟေတုကောတိ? န အဟေတုကော။ ယတော ဥပသမ္ပဒါ တဿ အပဏ္ဍကပက္ခေ အနုညာတာ သဟေတုကပ္ပဋိသန္ဓိကတ္တာ။ ပဏ္ဍကဘာဝပက္ခေပိ ကိဿ နာနုညာတာတိ စေ? ပဏ္ဍကဘူတတ္တာ ဩပက္ကမိကပဏ္ဍကဿ ဝိယ။

အပိစ ‘‘သိက္ခာသာဇီဝသမာပန္နော’’တိ ဣမိနာ တဿ သိက္ခာသမာဒါနံ ဒီပေတွာ တံ သမာဒိန္နံ သိက္ခံ အပစ္စက္ခာယ၊ တတ္ထ စ ဒုဗ္ဗလျံ အနာဝိကတွာတိ ဝတ္တုံ ယုဇ္ဇတိ၊ န အညထာတိ ဣမိနာ ကာရဏေန ယထာဝုတ္တာနိဋ္ဌပ္ပသင်္ဂတော ‘‘ယော ပန ဘိက္ခု ဘိက္ခူနံ သိက္ခာသာဇီဝသမာပန္နော သိက္ခံ အပစ္စက္ခာယာ’’တိအာဒိ ဝုတ္တံ။ ယထာ စေတ္ထ၊ ဧဝံ ‘‘ယော ပန ဘိက္ခု ဘိက္ခူနံ သိက္ခာသာဇီဝသမာပန္နော သိက္ခံ အပစ္စက္ခာယ ဒုဗ္ဗလျံ အနာဝိကတွာ ဂါမာ ဝါ အရညာ ဝါ အဒိန္နံ…ပေ… ယော ပန ဘိက္ခု ဘိက္ခူနံ သိက္ခာသာဇီဝသမာပန္နော သိက္ခံ အပစ္စက္ခာယ ဒုဗ္ဗလျံ အနာဝိကတွာ သုဂတစီဝရပ္ပမာဏံ စီဝရံ ကာရာပေယျာ’’တိ သဗ္ဗတ္ထ ယောဇေတဗ္ဗံ။

‘‘အန္တမသော တိရစ္ဆာနဂတာယပီ’’တိ မနုဿိတ္ထိံ ဥပါဒါယ ဝုတ္တံ။ န ဟိ ပဂေဝ ပဏ္ဍကေ၊ ပုရိသေ ဝါတိ ဝတ္တုံ ယုဇ္ဇတိ။ သေသံ တတ္ထ တတ္ထ ဝုတ္တနယမေဝ ¶ ။ အယံ တာဝ မာတိကာယ ဝိနိစ္ဆယော အညတ္ထာပိ ယထာသမ္ဘဝံ ယောဇေတွာ ဒီပေတဗ္ဗော။

သာရိပုတ္တဗေလဋ္ဌသီသာနန္ဒာဒယောပိ သိက္ခာပဒပညတ္တိကာရဏတ္တာ စ အာပတ္တိအာပဇ္ဇနတော စ ကသ္မာ မဟာဝိဘင်္ဂေ ဉတ္တိစတုတ္ထဥပသမ္ပဒါယေဝ အာဂတာတိ? ပဋိက္ခိတ္တာယ သရဏဂမနူပသမ္ပဒါယ အနုညာတပ္ပသင်္ဂဘယာတိ ဥပတိဿတ္ထေရော။ အာပတ္တိယာ ဘဗ္ဗတံ သန္ဓာယ တသ္မိမ္ပိ ဝုတ္တေ ပုဗ္ဗေ ပဋိက္ခိတ္တာပိ ဘဂဝတာ ပုန အနုညာတာတိ ဘိက္ခူနံ မိစ္ဆာဂါဟော ဝါ ဝိမတိ ဝါ ဥပ္ပဇ္ဇတိ၊ တသ္မာ န ဝုတ္တာတိ ဝုတ္တံ ဟောတိ။

‘‘အဓမ္မကမ္မံ ဝဂ္ဂကမ္မ’’တိ (မဟာဝ။ ၃၈၇) ဝစနတော ကုပ္ပကမ္မမ္ပိ ကတ္ထစိ ‘‘ကမ္မ’’န္တိ ဝုစ္စတိ၊ တသ္မာ ‘‘အကုပ္ပေနာ’’တိ ဝုတ္တံ။ ယသ္မာ အကုပ္ပကမ္မမ္ပိ ဧကစ္စံ န ဌာနာရဟံ၊ ယေန အပတ္တော ဩသာရဏံ သုဩသာရိတောတိ ဝုစ္စတိ၊ တသ္မာ ‘‘ဌာနာရဟေနာ’’တိ ဝုတ္တံ။ ယဒိ ဧဝံ ‘‘ဌာနာရဟေနာ’’တိ ဣဒမေဝ ဝတ္တဗ္ဗံ ဣမိနာ အကုပ္ပသိဒ္ဓိတောတိ စေ? န၊ အဋ္ဌာနာရဟေန အကုပ္ပေန ဥပသမ္ပန္နော ဣမသ္မိံ အတ္ထေ န အဓိပ္ပေတော အနိဋ္ဌပ္ပသင်္ဂတော။ ဒွီဟိ ပနေတေဟိ ဧကတော ဝုတ္တေဟိ ¶ အယမတ္ထော ပညာယတိ – ကေဝလံ တေန အကုပ္ပေန ဥပသမ္ပန္နော အယမ္ပိ ဣမသ္မိံ အတ္ထေ အဓိပ္ပေတော ဘိက္ခူတိ၊ ဌာနာရဟေန စ အကုပ္ပေန စ ဥပသမ္ပန္နော အယမ္ပိ ဣမသ္မိံ အတ္ထေ အဓိပ္ပေတော ဘိက္ခူတိ၊ ကုပ္ပေန ဥပသမ္ပန္နော နာဓိပ္ပေတောတိ။

‘‘ပဋိသန္ဓိဂ္ဂဟဏတော ပဋ္ဌာယ အပရိပုဏ္ဏဝီသတိဝဿော’’တိ ဝုတ္တတ္တာ ဩပပါတိကဉ္စာတိ သောဠသဝဿုဒ္ဒေသိကာ ဩပပါတိကာ ပဋိသန္ဓိတော ပဋ္ဌာယ အပရိပုဏ္ဏဝီသတိဝဿာတိ ဝဒန္တိ။ ‘သောဠသဝဿုဒ္ဒေသိကာ ဟောန္တီ’တိ ဝုတ္တတ္တာ ပုန စတ္တာရိ ဝဿာနိ ဣစ္ဆိတဗ္ဗာနိ၊ ‘ပဋိသန္ဓိဂ္ဂဟဏတော ပဋ္ဌာယာ’တိ ဣဒံ ဂဗ္ဘသေယျကာနံ ဝသေန ဝုတ္တ’’န္တိ ဧကေ။ ‘‘ကေစိ ဝဒန္တီ’’တိ ယတ္ထ ယတ္ထ လိခီယတိ၊ တတ္ထ တတ္ထ ဝိစာရေတွာ အတ္ထံ သုဋ္ဌု ဥပလက္ခယေ။ ဩပက္ကမိကေ ပဏ္ဍကဘာဝေါ အာရုဠှနယေန ဝေဒိတဗ္ဗော။ ‘‘ပက္ခပဏ္ဍကော အပဏ္ဍကပက္ခေ ပဗ္ဗာဇေတွာ ပဏ္ဍကပက္ခေ နာသေတဗ္ဗော’’တိ (ဝဇိရ။ ဋီ။ မဟာဝဂ္ဂ ၁၀၉) လိခိတံ။

‘‘ဗိန္ဒုံ အဒတွာ စေ နိဝါသေတိ၊ ထေယျသံဝါသကော န ဟောတီ’’တိ ဝဒန္တိ၊ ဝီမံသိတဗ္ဗံ။ လိင်္ဂါနုရူပဿာတိ သာမဏေရာရဟဿ သံဝါသဿ သာဒိတတ္တာတိ အဓိပ္ပာယော။

ရာဇဘယာဒီဟိ ¶ ဂဟိတလိင်္ဂါနံ ‘‘ဂိဟီ မံ ‘သမဏော’တိ ဇာနန္တူ’’တိ ဝဉ္စနစိတ္တေ သတိပိ ဘိက္ခူနံ ဝဉ္စေတုကာမတာယ စ တေဟိ သံဝသိတုကာမတာယ စ အဘာဝါ ဒေါသော န ဇာတောတိ။ ‘‘ယော ဧဝံ ပဗ္ဗဇတိ၊ သော ထေယျသံဝါသကော နာမ ဟောတီ’’တိ ဝါ ‘‘ဧဝံ ကာတုံ န လဗ္ဘတီ’’တိ ဝါ ‘‘ဧဝံ ပဗ္ဗဇိတော သာမဏေရော န ဟောတီ’’တိ ဝါ န ဇာနာတိ၊ ဝဋ္ဋတိ။ ‘‘ဇာနာတိ၊ န ဝဋ္ဋတီ’’တိ စ လိခိတံ။ ‘‘ရာဇဒုဗ္ဘိက္ခာဒိအတ္ထာယ စီဝရံ ပါရုပိတွာ သံဝါသံ သာဒိယန္တော ထေယျသံဝါသကော ဟောတိ။ ကသ္မာ? အသုဒ္ဓစိတ္တတ္တာ။ ပုန သော ‘သုဒ္ဓံ ဗြဟ္မစရိယံ ကရိဿာမိ၊ ကိံ ဧတေနာတိ ဝိပ္ပဋိသာရေန ဝါ ပစ္စယာဒိသုလဘတာယ ဝါ ကရိဿာမီ’တိ သုဒ္ဓမာနသော ဟုတွာ ယာဝ သော သံဝါသံ နာဓိဝါသေတိ၊ တာဝ ထေယျသံဝါသကော န ဟောတိ။ ဧဝံ သုဒ္ဓစိတ္တုပ္ပတ္တိတော ပဋ္ဌာယ သံဝါသံ သာဒိယတိ စေ၊ ထေယျသံဝါသကော ဟောတီတိ အဓိပ္ပေတော။ ဣတရထာ သဗ္ဗံ ဝိရုဇ္ဈတီ’’တိ ဧကေ။

‘‘နာဘိပရာမာသာဒိနာ ဇာတော တထာရူပံ ပိတရံ ဃာတေတိ စေ၊ ပိတုဃာတကော ဟောတီ’’တိ ဝဒန္တိ။

ယော ပန ကာယသံသဂ္ဂေန သီလဝိနာသံ ပါပေတိ၊ န သော ဘိက္ခုနိဒူသကော ‘‘တိဏ္ဏံ မဂ္ဂါန’’န္တိ ¶ ဝစနတော။ ဘိက္ခုနိံ ပန ဧကတောဥပသမ္ပန္နံ ဒူသေတွာပိ ဘိက္ခုနိဒူသကော ဟောတိ၊ သောပိ ပါရာဇိကော ဟောတီတိ ဝိနိစ္ဆယော။ ဘိက္ခုနီ ပန ထေယျသံဝါသိကာ၊ မာတုပိတုအရဟန္တဃာတိကာ၊ လောဟိတုပ္ပာဒိကာ၊ တိတ္ထိယပက္ကန္တိကာ စ ဟောတိ၊ အဋ္ဌကထာသု အနာဂတံ ဝိနယဓရာ သမ္ပဋိစ္ဆန္တိ။

‘‘သမ္ပဇာနမုသာဝါဒေ ပါစိတ္တိယ’’န္တိ (ပါစိ။ ၂) ဝုတ္တံ မရိယာဒံ အဝီတိက္ကမန္တော တသ္မိဉ္စ သိက္ခာပဒေ သိက္ခတီတိ ဝုစ္စတိ။ သိက္ခာပဒန္တိ အသဘာဝဓမ္မော သင်္ကေတောဝ၊ ဣဓ ပညတ္တိ အဓိပ္ပေတာ။ ‘‘မေထုနသံဝရဿေတံ အဓိဝစန’’န္တိ သမန္တပါသာဒိကာယံ ဝုတ္တံ၊ တံ ပနတ္ထံ သန္ဓာယာတိ လိခိတံ။ သိက္ခာတိ တံ တံ သိက္ခာပဒံ၊ သိက္ခနဘာဝေန ပဝတ္တစိတ္တုပ္ပာဒေါ။ သာဇီဝန္တိ ပညတ္တိ။ တဒတ္ထဒဿနတ္ထံ ပုဗ္ဗေ ‘‘မေထုနသံဝရဿေတံ အဓိဝစန’’န္တိ ဝုတ္တံ။ ယသ္မာ သိက္ခာယ ဂုဏသမ္မတာယ ပုညသမ္မတာယ တန္တိယာ အဘာဝတော လောကဿ ဒုဗ္ဗလျာဝိကမ္မံ တတ္ထ န သမ္ဘဝတိ။ ပတ္ထနီယာ ဟိ သာ၊ တသ္မာ ‘‘ယဉ္စ သာဇီဝံ ¶ သမာပန္နော၊ တသ္မိံ ဒုဗ္ဗလဘာဝံ အပ္ပကာသေတွာ’’တိ ဝုတ္တံ။ အာဏာယ ဟိ ဒုဗ္ဗလျံ သမ္ဘဝတီတိ ဥပတိဿော။ ဒုဗ္ဗလျာဝိကမ္မပဒံ သိက္ခာပစ္စက္ခာနပဒဿ ဗျဉ္ဇနသိလိဋ္ဌတာယ ဝါ ပရိဝါရကဘာဝေန ဝါ ဝေဒိတဗ္ဗံ။ အထ ဝါ ယသ္မာ သိက္ခာပစ္စက္ခာနဿ ဧကစ္စံ ဒုဗ္ဗလျာဝိကမ္မံ အကတံ ဟောတိ၊ တသ္မာ တံ သန္ဓာယ ‘‘သိက္ခံ အပစ္စက္ခာယာ’’တိ ပဒဿ အတ္ထံ ဝိဝရန္တော ‘‘ဒုဗ္ဗလျံ အနာဝိကတွာ’’တိ အာဟ။ တတ္ထ သိယာ ယသ္မာ န သဗ္ဗံ ဒုဗ္ဗလျာဝိကမ္မံ သိက္ခာပစ္စက္ခာနံ၊ တသ္မာ ‘‘ဒုဗ္ဗလျံ အနာဝိကတွာ’’တိ ပဌမံ ဝတွာ တဿ အတ္ထနိယမတ္ထံ ‘‘သိက္ခံ အပစ္စက္ခာယာ’’တိ ဝတ္တဗ္ဗန္တိ? တံ န၊ ကသ္မာ? အတ္ထာနုက္ကမာဘာဝတော။ ‘‘သိက္ခာသာဇီဝသမာပန္နော’’တိ ဟိ ဝုတ္တတ္တာ ‘‘ယံ သိက္ခံ သမာပန္နော၊ တံ အပစ္စက္ခာယ၊ ယဉ္စ သာဇီဝံ သမာပန္နော၊ တတ္ထ ဒုဗ္ဗလျံ အနာဝိကတွာ’’တိ ဝုစ္စမာနေ အနုက္ကမေနေဝ အတ္ထော ဝုတ္တော ဟောတိ၊ န အညထာ၊ တသ္မာ ဣဒမေဝ ပဌမံ ဝုတ္တန္တိ။ တေသံယေဝါတိ စုဒ္ဒသန္နံ။

‘‘သိက္ခံ အပစ္စက္ခာယာ’’တိ သဗ္ဗသိက္ခာပဒါနံ သာဓာရဏတ္ထံ ‘‘အယမေတ္ထ အနုပညတ္တီ’’တိ ဝုတ္တံ။

ပဝေသနံ နာမ အင်္ဂဇာတံ ပဝေသေန္တဿ အင်္ဂဇာတေန သမ္ဖုသနံ။ ပဝိဋ္ဌံ နာမ ယာဝ မူလံ ပဝေသေန္တဿ ဝိပ္ပကတကာလော ဝါယာမကာလော။ သုက္ကဝိသဋ္ဌိသမယေ အင်္ဂဇာတံ ဌိတံ နာမ။ ဥဒ္ဓရဏံ နာမ နီဟရဏကာလော။ ဝိနယဂဏ္ဌိပဒေ ပန ‘‘ဝါယာမတော ဩရမိတွာ ဌာနံ ဌိတံ နာမာ’’တိ ဝုတ္တံ၊ တံ ¶ အသင်္ကရတော ဒဿနတ္ထံ ဝုတ္တံ။ ပဝေသနပဝိဋ္ဌဥဒ္ဓရဏကာလေသုပိ သုက္ကဝိသဋ္ဌိ ဟောတိယေဝ။ သာဒိယနံ နာမ သေဝနစိတ္တဿ အဓိဝါသနစိတ္တဿ ဥပ္ပာဒနံ။

ဥဘတောဝိဘင်္ဂေ ဧဝ ပညတ္တာနိ သန္ဓာယ ‘‘ဣဒဉှိ သဗ္ဗသိက္ခာပဒါနံ နိဒါန’’န္တိ ဝုတ္တံ။ ‘‘ဝိနယဓရပဉ္စမေန ဂဏေန ဥပသမ္ပဒါ’’တိ (မဟာဝ။ ၂၅၉) ဝုတ္တတ္တာ ဣဓ တတိယာ သဟယောဂေန ဝုတ္တာ။ တသ္မာ ဝီသတိပိ ဘိက္ခူ စေ နိသိန္နာ၊ ပဉ္စမော ဝိနယဓရောဝ ဣစ္ဆိတဗ္ဗော၊ ဧဝံ သတိ ပါရာဇိကော စေ ဝိနယဓရော၊ ဥပသမ္ပဒါကမ္မံ ကောပေတီတိ စေ? န၊ ပရိဝါရာဝသာနေ ကမ္မဝဂ္ဂေ (ပရိ။ ၄၈၂ အာဒယော) ယံ ကမ္မဝိပတ္တိလက္ခဏံ ဝုတ္တံ၊ တဿ တသ္မိံ နတ္ထိတာယ။ ‘‘ကထံ ဝတ္ထုတော ဝါ ဉတ္တိတော ဝါ အနုဿာဝနတော ဝါ သီမတော ဝါ ပရိသတော ဝါ’’တိ ဧတ္တကံ ဝုတ္တံ၊ နနု အယံ ‘‘ပရိသတော ဝါ’’တိ ဝစနေန သင်္ဂဟိတောတိ စေ? န၊ ‘‘ဒွါဒသဟိ အာကာရေဟိ ပရိသတော ကမ္မာနိ ဝိပဇ္ဇန္တီ’’တိ (ပရိ။ ၄၈၇) သုတ္တဿ ¶ ဟိ ဝိဘင်္ဂေ တဿ အနာမဋ္ဌတ္တာတိ အယမတ္ထော ယသ္မာ တတ္ထ တတ္ထ သရူပေန ဝုတ္တပါဠိဝသေနေဝ သက္ကာ ဇာနိတုံ၊ တသ္မာ နယမုခံ ဒဿေတွာ သံခိတ္တောတိ လိခိတံ။ ‘‘အင်္ဂ’’န္တိ ပဒံ ဥဒ္ဓရိတွာ ‘‘သဗ္ဗသိက္ခာပဒေသု အာပတ္တီနံ အင်္ဂါနင်္ဂံ ဝေဒိတဗ္ဗ’’န္တိ ဝုတ္တံ၊ ဣဓ ပန ‘‘အင်္ဂ’’န္တိ ဝုတ္တံ၊ ကသ္မာ? သမုဋ္ဌနာဒီနံ ပရိဝါရာဒီသု သင်္ခေပေန အာဂတတ္တာ တတ္ထ ဂဟေတွာ ဣဓာပိ နိဒ္ဒိဋ္ဌာနံ အနင်္ဂါနံ ဝဝတ္ထာနာဘာဝတော၊ သဗ္ဗတ္ထ သင်္ခေပတော စ ဝိတ္ထာရတော စ အနင်္ဂတ္တေ ဝုစ္စမာနေ အတိဝိတ္ထာရတာယ တသ္မိံ တသ္မိံ သိက္ခာပဒေ အနူနံ ဝတ္တဗ္ဗတော စာတိ ဝေဒိတဗ္ဗော၊ သဗ္ဗာပတ္တီနံ သင်္ဂါဟကဝသေနာတိ အတ္ထော။

ယာနိ သိက္ခာပဒါနိ ‘‘ကိရိယာနီ’’တိ ဝုစ္စန္တိ၊ တေသံ ဝသေန ကာယဝါစာ သဟ ဝိညတ္တိယာ ဝေဒိတဗ္ဗာ၊ အကိရိယာနံ ဝသေန ဝိနာ ဝိညတ္တိယာ ဝေဒိတဗ္ဗာ။ စိတ္တံ ပနေတ္ထ အပ္ပမာဏံ ဘူတာရောစနသမုဋ္ဌာနဿ ကိရိယတ္တာ၊ အစိတ္တကတ္တာ စ။ တတ္ထ ကိရိယာ အာပတ္တိယာ အနင်္ဂန္တရစိတ္တသမုဋ္ဌာနာ ဝေဒိတဗ္ဗာ။ အဝိညတ္တိဇနကမ္ပိ ဧကစ္စံ ဗာဟုလ္လနယေန ‘‘ကိရိယ’’န္တိ ဝုစ္စတိ ယထေဝ ပဌမပါရာဇိကံ။ ဝိညတ္တိယာ အဘာဝေပိ ‘‘သော စေ သာဒိယတိ၊ အာပတ္တိ ပါရာဇိကဿ၊ န သာဒိယတိ၊ အနာပတ္တီ’’တိ ဟိ ဝုတ္တံ၊ ဝိညတ္တိသင်္ခါတာပိ ကိရိယာ ဝိနာ သေဝနစိတ္တေန န ဟောတိ ဝုတ္တစိတ္တဇတ္တာ၊ ဝိကာရရူပတ္တာ၊ စိတ္တာနုပရိဝတ္တိကတ္တာ စ။ တသ္မာ ကိရိယာသင်္ခါတမိဒံ ဝိညတ္တိရူပံ၊ ဣတရံ စိတ္တဇရူပံ ဝိယ ဇနကစိတ္တေန ဝိနာ န တိဋ္ဌတိ၊ ဣတရံ သဒ္ဒါယတနံ တိဋ္ဌတိ၊ တသ္မာ ကိရိယာယ သတိ ဧကန္တတော တဇ္ဇနကံ သေဝနစိတ္တံ အတ္ထိ ဧဝါတိ ကတွာ န သာဒိယတိ၊ အနာပတ္တီတိ န ယုဇ္ဇတီတိ။ ယသ္မာ ဝိညတ္တိဇနကမ္ပိ သမာနံ သေဝနစိတ္တံ န သဗ္ဗကာလံ ဝိညတ္တိံ ဇနေတိ၊ တသ္မာ ဝိနာပိ ဝိညတ္တိယာ သယံ ဥပ္ပဇ္ဇတီတိ ကတွာ ‘‘သာဒိယတိ၊ အာပတ္တိ ပါရာဇိကဿာ’’တိ ဝုတ္တံ။ နုပ္ပဇ္ဇတိ စေ၊ န သာဒိယတိ နာမ၊ တဿ ¶ အနာပတ္တိ။ တေနေဝ ဘဂဝါ ‘‘ကိံစိတ္တော တွံ ဘိက္ခူ’’တိ (ပါရာ။ ၁၃၅) စိတ္တေနေဝ အာပတ္တိံ ပရိစ္ဆိန္ဒတိ၊ န ကိရိယာယာတိ ဝေဒိတဗ္ဗံ။

ဧတ္ထ သမုဋ္ဌာနဂ္ဂဟဏံ ကတ္တဗ္ဗတော ဝါ အကတ္တဗ္ဗတော ဝါ ကာယာဒိဘေဒါပေက္ခမေဝ အာပတ္တိံ အာပဇ္ဇတိ၊ န အညထာတိ ဒဿနပ္ပယောဇနံ။ တေသု ကိရိယာဂ္ဂဟဏံ ကာယာဒီနံ သဝိညတ္တိကာဝိညတ္တိကဘေဒဒဿနပ္ပယောဇနံ။ သညာဂ္ဂဟဏံ အာပတ္တိယာ အင်္ဂါနင်္ဂစိတ္တဝိသေသဒဿနပ္ပယောဇနံ။ တေန ¶ ယံ စိတ္တံ ကိရိယလက္ခဏေ ဝါ အကိရိယလက္ခဏေ ဝါ သန္နိဟိတံ၊ ယတော ဝါ ကိရိယာ ဝါ အကိရိယာ ဝါ ဟောတိ၊ န တံ အဝိသေသေန အာပတ္တိယာ အင်္ဂံ ဝါ အနင်္ဂံ ဝါ ဟောတိ။ ကိန္တု ယာယ သညာယ ‘‘သညာဝိမောက္ခ’’န္တိ ဝုစ္စတိ၊ တာယ သမ္ပယုတ္တံ စိတ္တံ အင်္ဂံ၊ ဣတရံ အနင်္ဂန္တိ ဒဿိတံ ဟောတိ။ ဣဒါနိ ယေန စိတ္တေန သိက္ခာပဒံ သစိတ္တကံ ဟောတိ၊ တဒဘာဝါ အစိတ္တကံ၊ တေန တဿ အဝိသေသေန သာဝဇ္ဇတာယ ‘‘လောကဝဇ္ဇမေဝါ’’တိ ဝုတ္တံ။ ကိန္တု သာဝဇ္ဇံယေဝ သမာနံ ဧကစ္စံ လောကဝဇ္ဇံ၊ ဧကစ္စံ ပဏ္ဏတ္တိဝဇ္ဇန္တိ ဒဿနပ္ပယောဇနံ စိတ္တလောကဝဇ္ဇဂ္ဂဟဏံ။ စိတ္တမေဝ ယသ္မာ ‘‘လောကဝဇ္ဇ’’န္တိ ဝုစ္စတိ၊ တသ္မာ မနောကမ္မမ္ပိ သိယာ အာပတ္တီတိ အနိဋ္ဌပ္ပသင်္ဂနိဝါရဏပ္ပယောဇနံ ကမ္မဂ္ဂဟဏံ။

ယံ ပနေတ္ထ အကိရိယလက္ခဏံ ကမ္မံ၊ တံ ကုသလတ္တိကဝိနိမုတ္တံ သိယာတိ အနိဋ္ဌပ္ပသင်္ဂနိဝါရဏပ္ပယောဇနံ ကုသလတ္တိကဂ္ဂဟဏံ။ ယာ ပနေတ္ထ အဗျာကတာပတ္တိ၊ တံ ဧကစ္စံ အဝေဒနမ္ပိ နိရောဓံ သမာပန္နော အာပဇ္ဇတီတိ ဝေဒနာတ္တိကံ ဧတ္ထ န လဗ္ဘတီတိ အနိဋ္ဌပ္ပသင်္ဂနိဝါရဏတ္ထံ ဝေဒနာတ္တိကဂ္ဂဟဏံ။ သိက္ခာပဒဉှိ သစိတ္တကပုဂ္ဂလဝသေန ‘‘တိစိတ္တံ တိဝေဒန’’န္တိ လဒ္ဓဝေါဟာရံ အစိတ္တကေနာပန္နမ္ပိ ‘‘တိစိတ္တံ တိဝေဒန’’မိစေဝ ဝုစ္စတိ။ တတြိဒံ သာဓကသုတ္တံ – ‘‘အတ္ထာပတ္တိ အစိတ္တကော အာပဇ္ဇတိ အစိတ္တကော ဝုဋ္ဌာတိ (ပရိ။ ၃၂၄)၊ အတ္ထာပတ္တိ ကုသလစိတ္တော အာပဇ္ဇတိ ကုသလစိတ္တော ဝုဋ္ဌာတီ’’တိအာဒိ (ပရိ။ ၄၇၀)။ ‘‘သစိတ္တကံ အာပတ္တိဒီပနံ၊ သညာဝိမောက္ခံ အနာပတ္တိဒီပနံ၊ အစိတ္တကံ ဝတ္ထုအဇာနနံ၊ နောသညာဝိမောက္ခံ ဝီတိက္ကမနာဇာနနံ။ ဣဒမေဝ တေသံ နာနာတ္တ’’န္တိ (ဝဇိရ။ ဋီ။ ပါရာဇိက ၆၁-၆၆ ပကိဏ္ဏကကထာဝဏ္ဏနာ) လိခိတံ။

သစိတ္တကပက္ခေတိ ဧတ္ထ အယံ တာဝ ဂဏ္ဌိပဒနယော – သစိတ္တကပက္ခေတိ သုရာပါနာဒိအစိတ္တကေ သန္ဓာယ ဝုတ္တံ။ သစိတ္တကေသု ပန ယံ ဧကန္တမကုသလေနေဝ သမုဋ္ဌာတိ၊ တဉ္စ ဥဘယံ လောကဝဇ္ဇံ နာမ။ သုရာပါနသ္မိဉှိ ‘‘သုရာ’’တိ ဝါ ‘‘ပါတုံ န ဝဋ္ဋတီ’’တိ ဝါ ဇာနိတွာ ပိဝနေ အကုသလမေဝါတိ။ တတ္ထ ‘‘န ဝဋ္ဋတီတိ ဇာနိတွာ’’တိ ဝုတ္တဝစနံ န ယုဇ္ဇတိ ပဏ္ဏတ္တိဝဇ္ဇဿပိ ¶ လောကဝဇ္ဇတာပသင်္ဂတော။ ဣမံ အနိဋ္ဌပ္ပသင်္ဂံ ပရိဟရိတုကာမတာယ စ ဝဇိရဗုဒ္ဓိတ္ထေရေန လိခိတံ – ‘‘ဣဓ ‘သစိတ္တက’န္တိ စ ‘အစိတ္တက’န္တိ စ ဝိစာရဏာ ဝတ္ထုဝိဇာနနေ ဧဝ ဟောတိ၊ န ပညတ္တိဝိဇာနနေ။ ယဒိ ပညတ္တိဝိဇာနနေ ဟောတိ ¶ ၊ သဗ္ဗသိက္ခာပဒါနိ လောကဝဇ္ဇာနေဝ သိယုံ၊ န စ သဗ္ဗသိက္ခာပဒါနိ လောကဝဇ္ဇာနိ။ တသ္မာ ဝတ္ထုဝိဇာနနေ ဧဝ ဟောတီတိ ဣဒံ ယုဇ္ဇတိ။ ကသ္မာ? ယသ္မာ သေခိယေသု ပညတ္တိဝိဇာနနမေဝ ပမာဏံ၊ န ဝတ္ထုမတ္တဝိဇာနန’’န္တိ။ အယံ ပနေတ္ထ အတ္ထော သိက္ခာပဒသီသေန အာပတ္တိံ ဂဟေတွာ ယဿ သိက္ခာပဒဿ သစိတ္တကဿ စိတ္တံ အကုသလမေဝ ဟောတိ၊ တံ လောကဝဇ္ဇံ၊ သစိတ္တကာစိတ္တကသင်္ခါတဿ အစိတ္တကဿ စ သစိတ္တကပက္ခေ စိတ္တံ အကုသလမေဝ ဟောတိ၊ တမ္ပိ သုရာပါနာဒိလောကဝဇ္ဇန္တိ ဣမမတ္ထံ သန္ဓာယ ‘‘ယဿာ သစိတ္တကပက္ခေ စိတ္တံ အကုသလမေဝ ဟောတိ၊ အယံ လောကဝဇ္ဇာ နာမာ’’တိ ဝုတ္တံ။ ‘‘သစိတ္တကပက္ခေ’’တိ ဟိ ဣဒံ ဝစနံ အစိတ္တကံ သန္ဓာယာဟ။ န ဟိ ဧကံသတော သစိတ္တကာယ ‘‘သစိတ္တကပက္ခေ’’တိ ဝိသေသနေ ပယောဇနံ အတ္ထီတိ၊ ဧဝံ သန္တေပိ အနိယမေန ဝုတ္တဉ္စ နိယမဝသေန ဧဝ ဂဟေတဗ္ဗန္တိ အတ္ထော။

တိရစ္ဆာနာနံ ပနာတိ ပန-သဒ္ဒေန ထုလ္လစ္စယာဒိကာရံ နိဝတ္တေတိ။ ကိရိယာတိ ဧတ္ထ ‘‘ဌိတံ သာဒိယတီ’’တိ (ပါရာ။ ၅၈) ဝုတ္တတ္တာ တံ ကထန္တိ စေ? ‘‘သာဒိယတီ’’တိ ဝုတ္တတ္တာ ကိရိယာ ဧဝ။ ဧဝံ သန္တေ ‘‘ကာယကမ္မံ မနောကမ္မ’’န္တိ ဝတ္တဗ္ဗန္တိ စေ? န၊ ပစုရဝေါဟာရဝသေန ‘‘ကာယကမ္မ’’န္တိ ဝုတ္တတ္တာ။ ဥဗ္ဘဇာဏုမဏ္ဍလိကာယ လဗ္ဘတိ ဧဝါတိ လိခိတံ။ ပုဗ္ဗေ ဝုတ္တနယေန သံသန္ဒေတွာ ဂဟေတဗ္ဗံ။ ‘‘ဒုန္နိက္ခိတ္တဿ၊ ဘိက္ခဝေ၊ ပဒဗျဉ္ဇနဿ အတ္ထောပိ ဒုန္နယော ဟောတီ’’တိ (အ။ နိ။ ၂။၂၀) ဝဒန္တေနာပိ အတ္ထဿ သုခဂ္ဂဟဏတ္ထမေဝ ပဒဗျဉ္ဇနဿ သုနိက္ခိတ္တဘာဝေါ ဣစ္ဆိတော၊ န အက္ခရဝစနာယ၊ တသ္မာ အာဟ ‘‘အတ္ထဉှိ နာထော သရဏံ အဝေါစာ’’တိအာဒိ။

ပဌမပါရာဇိကဝဏ္ဏနာ နိဋ္ဌိတာ။

၂။ ဒုတိယပါရာဇိကဝဏ္ဏနာ

ဂါမာ ဝါ အရညာ ဝါတိ လက္ခဏာနုပညတ္တိကတ္တာ အာဒိမှိ ဝုတ္တာ။ သဗ္ဗသ္မိဉှိ ဝိနယပိဋကေ ဂါမော၊ ဂါမူပစာရော၊ ဂါမက္ခေတ္တံ၊ ဂါမသီမာ၊ ဂါမသီမူပစာရောတိ ပဉ္စဝိဓော ဂါမဘေဒေါ ဝေဒိတဗ္ဗော။ တထာ အာရညကသီမာယ ဧကံ အဂါမကံ အရညံ၊ သံဝိဓာနသိက္ခာပဒါနံ (ပါစိ။ ၁၈၀ အာဒယော) ဧကံ၊ သဂါမကံ ဧကံ ¶ ၊ အဝိပ္ပဝါသသီမာယ ဧကံ၊ ဂဏမှာဩဟီယနကဿ (ပါစိ။ ၆၉၁) ဧကန္တိ ပဉ္စဝိဓော အရညဘေဒေါ ဝေဒိတဗ္ဗော။ တတ္ထ အတ္ထိ ¶ ဂါမော န ဂါမပရိဟာရံ ကတ္ထစိ လဘတိ၊ အတ္ထိ ဂါမော န ဂါမကိစ္စံ ကရောတိ၊ တထာ အတ္ထိ အရညံ န အရညပရိဟာရံ ကတ္ထစိ လဘတိ၊ အတ္ထိ အရညံ န အရညကိစ္စံ ကရောတီတိ အယမ္ပိ ဘေဒေါ ဝေဒိတဗ္ဗော။

တတ္ထ အဝိပ္ပဝါသသီမာသမ္မန္နနကမ္မဝါစာယ ဌပေတွာ ‘‘ဂါမဉ္စ ဂါမူပစာရဉ္စာ’’တိ (မဟာဝ။ ၁၄၄) ဧတ္ထ ဂါမော နာမ ပရိက္ခိတ္တော စေ၊ ပရိက္ခေပဿ အန္တော၊ အပရိက္ခိတ္တော စေ၊ ပရိက္ခေပေါကာသတော အန္တော ဝေဒိတဗ္ဗော။ အယံ ဥဒေါသိတသိက္ခာပဒေ ‘‘အန္တောဂါမော’’တိ (ပါရာ။ ၄၇၈) အာဂတော။ သာသင်္ကသိက္ခာပဒေ ‘‘အန္တရဃရ’’န္တိ (ပါရာ။ ၆၅၄) အာဂတော အနာသင်္ကတော။ ယထာဟ ‘‘အန္တရဃရေ နိက္ခိပေယျာတိ သမန္တာ ဂေါစရဂါမေ နိက္ခိပေယျာ’’တိ (ပါရာ။ ၆၅၄)။ တထာ အန္တရဃရပ္ပဋိသံယုတ္တာနံ သေခိယာနံ အယမေဝ ပရိစ္ဆေဒေါ ဝေဒိတဗ္ဗော။ ‘‘ယာ ပန ဘိက္ခုနီ ဧကာ ဂါမန္တရံ ဂစ္ဆေယျာ’’တိ (ပါစိ။ ၆၈၇) ဧတ္ထာပိ အယမေဝ ပရိစ္ဆေဒေါ အဓိပ္ပေတော ‘‘ပရိက္ခိတ္တဿ ဂါမဿ ပရိက္ခေပံ အတိက္ကမန္တိယာ၊ အပရိက္ခိတ္တဿ ဂါမဿ ဥပစာရံ အတိက္ကမန္တိယာ’’တိ ဝုတ္တတ္တာ။

ယေသု ပုရာဏပေါတ္ထကေသု ‘‘ဥပစာရံ ဩက္ကမန္တိယာ’’တိ လိခိတံ၊ တံ ဝိကာလေ ဂါမပ္ပဝေသနသိက္ခာပဒေသု အာစိဏ္ဏံ နယံ ဂဟေတွာ ပမာဒေန လိခီယတိ၊ န ပမာဏံ။ ယေသု စ ပေါတ္ထကေသု ဝိကာလေ ဂါမပ္ပဝေသနသိက္ခာပဒဿ ဝိဘင်္ဂေ (ပါစိ။ ၅၁၃) ‘‘ဂါမံ ပဝိသေယျာတိ ပရိက္ခိတ္တဿ ဂါမဿ ပရိက္ခေပံ အတိက္ကမန္တဿ၊ အပရိက္ခိတ္တဿ ဂါမဿ ဥပစာရံ အတိက္ကမန္တဿာ’’တိ လိခီယတိ၊ သာ ပမာဒလေခါ။ ဥပစာရံ ဩက္ကမန္တဿာတိ တတ္ထ ပါဌော။ ဝုတ္တဉှိ သမန္တပါသာဒိကာယံ ‘‘အပရိက္ခိတ္တဿ ဂါမဿ ဥပစာရော အဒိန္နာဒါနေ ဝုတ္တနယေနေဝ ဝေဒိတဗ္ဗော’’တိ (ပါစိ။ အဋ္ဌ။ ၅၁၂)။ ဣဓ ကင်္ခါဝိတရဏိယမ္ပိ ဝုတ္တံ ‘‘သန္တံ ဘိက္ခုံ အနာပုစ္ဆိတွာတိ…ပေ… ဥပစာရံ ဩက္ကမန္တဿာ’’တိအာဒိ (ကင်္ခါ။ အဋ္ဌ။ ဝိကာလဂါမပ္ပဝေသနသိက္ခာပဒဝဏ္ဏနာ)။

ယံ ပန ကတ္ထစိ ပေါတ္ထကေ ‘‘ဘိက္ခုနိယာ ဂါမန္တရာဓိကာရေ ဧကေန ပါဒေန ဣတရဿ ဂါမဿ ပရိက္ခေပံ ဝါ အတိက္ကမန္တေ၊ ဥပစာရံ ဝါ ဩက္ကန္တေ ထုလ္လစ္စယံ၊ ဒုတိယေန အတိက္ကန္တမတ္တေ၊ ဩက္ကန္တမတ္တေ စ သင်္ဃာဒိသေသော’’တိ ပါဌော ဒိဿတိ။ တတ္ထ ‘‘ဩက္ကန္တေ၊ ဩက္ကန္တမတ္တေ’’တိ ဧတာနိ ပဒါနိ အဓိကာနိ ¶ ၊ ကေဝလံ လိခိတကေဟိ အညေဟိ လိခိတာနိ။ ကတ္ထစိ ပေါတ္ထကေ ‘‘ဩက္ကန္တမတ္တေ စာ’’တိ ပဒံ န ဒိဿတိ၊ ဣတရံ ဒိဿတိ။ တာနိ ဒွေ ပဒါနိ ပါဠိယာ ဝိရုဇ္ဈန္တိ။ ‘‘အပရိက္ခိတ္တဿ ဂါမဿ ဥပစာရံ အတိက္ကာမေန္တိယာ’’တိ (ပါစိ။ ၆၉၂) ဟိ ပါဠိ ¶ ။ တထာ သမန္တပါသာဒိကာယ (ပါစိ။ အဋ္ဌ။ ၆၉၂) ဝိရုဇ္ဈန္တိ။ ‘‘ပရိက္ခေပါရဟဋ္ဌာနံ ဧကေန ပါဒေန အတိက္ကမတိ၊ ထုလ္လစ္စယံ၊ ဒုတိယေန အတိက္ကမတိ၊ သင်္ဃာဒိသေသော။ အပိစေတ္ထ သကဂါမတော…ပေ… ဧကေန ပါဒေန ဣတရဿ ဂါမဿ ပရိက္ခေပေ ဝါ ဥပစာရေ ဝါ အတိက္ကန္တေ ထုလ္လစ္စယံ၊ ဒုတိယေန အတိက္ကန္တမတ္တေ သင်္ဃာဒိသေသော’’တိ (ပါစိ။ အဋ္ဌ။ ၆၉၂) ဟိ ဝုတ္တံ။

ဂဏ္ဌိပဒေ စဿ ‘‘ပရိက္ခေပံ အတိက္ကာမေန္တိယာ’’တိ ဝတွာ ‘‘ဥပစာရေပိ ဧသေဝ နယော’’တိ ဝုတ္တံ။ အနုဂဏ္ဌိပဒေ စ ‘‘အပရိက္ခိတ္တဿ ဂါမဿ ဥပစာရံ ‘ဩက္ကမန္တိယာ’တိပိ ပေါတ္ထကေသု ဧကစ္စေသု ဒိဿတိ၊ တံ န ဂဟေတဗ္ဗ’’န္တိ ဝုတ္တံ။ အပရမ္ပိ ဝုတ္တံ ‘‘အပရိက္ခိတ္တဿ ဂါမဿ ဥပစာရံ ‘အတိက္ကာမေန္တိယာ’တိ ဝစနေနာပိ ဧဝံ ဝေဒိတဗ္ဗံ – ဝိကာလေ ဂါမပ္ပဝေသနေ ဒွိန္နံ လေဍ္ဍုပါတာနံ ဧဝ ဝသေန ဥပစာရော ပရိစ္ဆိန္ဒိတဗ္ဗော၊ ဣတရထာ ယထာ ဧတ္ထ ပရိက္ခေပါရဟဋ္ဌာနံ ပရိက္ခေပံ ဝိယ ကတွာ ‘အတိက္ကာမေန္တိယာ’တိ ဝုတ္တံ၊ ဧဝံ တတ္ထာပိ ‘အပရိက္ခိတ္တဿ ဂါမဿ ဥပစာရံ အတိက္ကာမေန္တဿာ’တိ ဝဒေယျ။ ယသ္မာ ပန တတ္ထ ပရိက္ခေပါရဟဋ္ဌာနတော ဥတ္တရိမေကော လေဍ္ဍုပါတော ဥပစာရောတိ အဓိပ္ပေတော။ တသ္မာ တဒတ္ထဒီပနတ္ထံ ‘အပရိက္ခိတ္တဿ ဂါမဿ ဥပစာရံ ဩက္ကမန္တဿာ’တိ ဝုတ္တ’’န္တိ။

ယံ ပန အန္ဓကဋ္ဌကထာယံ ပရိက္ခေပါရဟဋ္ဌာနံယေဝ ဥပစာရန္တိ သလ္လက္ခေတွာ ‘‘ပရိက္ခေပပအက္ခေပါရဟဋ္ဌာနာနံ နိန္နာနာကရဏဒီပနတ္ထံ ဥပစာရံ ဩက္ကမန္တဿာ’’တိ ဝုတ္တံ၊ ပါဠိဝိသေသမသလ္လက္ခေတွာ ‘‘အပရိက္ခိတ္တဿ ဂါမဿ ဥပစာရံ အတိက္ကမန္တဿ ဣဓ ဥပစာရော ပရိက္ခေပေါ ယထာ ဘဝေယျ၊ တံ ဥပစာရံ ပဌမံ ပါဒံ အတိက္ကာမေန္တဿ အာပတ္တိ ဒုက္ကဋဿ၊ ဒုတိယံ ပါဒံ အတိက္ကာမေန္တဿ အာပတ္တိ ပါစိတ္တိယဿာ’’တိ ဝုတ္တံ၊ တံ န ဂဟေတဗ္ဗမေဝ ပါဠိယာ ဝိသေသသမ္ဘဝတောတိ။ ပေါရာဏဂဏ္ဌိပဒေ ‘‘ဥပစာရံ အတိက္ကာမေန္တိယာ ဘိက္ခုနိယာ ဂါမန္တရာပတ္တီ’’တိ ဝုတ္တံ။ တသ္မာ ဣဓ ကင်္ခါဝိတရဏိယာ ‘‘ဧကေန ပါဒေန ဣတရဿ…ပေ… အတိက္ကန္တမတ္တေ သင်္ဃာဒိသေသော’’တိ အယမေဝ ပါဌော ဝေဒိတဗ္ဗော။ ဧတ္တာဝတာ ဣမေသု ယထာဝုတ္တေသု ဌာနေသု ယထာဝုတ္တပရိစ္ဆေဒေါဝ ဂါမောတိ ဝေဒိတဗ္ဗော။ ဣမဿ ¶ အတ္ထဿ ဒီပနတ္ထံ ‘‘ဂါမော နာမ ဧကကုဋိကောပီ’’တိအာဒိ (ပါရာ။ ၉၂) ဝုတ္တံ။ ဣမဿ ဝသေန အသတိပိ ပရိက္ခေပါတိက္ကမေ၊ ဥပစာရောက္ကမနေ ဝါ အန္တရာရာမတော ဝါ ဘိက္ခုနုပဿယတော ဝါ တိတ္ထိယသေယျတော ဝါ ပဋိက္ကမနတော ဝါ တံ ဂါမံ ပဝိသန္တဿ အန္တရာရာမပရိက္ခေပဿ၊ ဥပစာရဿ ဝါ အတိက္ကမနဝသေန ဂါမပစ္စယာ အာပတ္တိယော ဝေဒိတဗ္ဗာ။

ဂါမူပစာရော ပန ‘‘ဌပေတွာ ဂါမဉ္စ ဂါမူပစာရဉ္စာ’’တိ (မဟာဝ။ ၁၄၄) ဧတ္ထ ပရိက္ခိတ္တဿ ¶ ဂါမဿ ပရိက္ခေပေါဝ၊ အပရိက္ခိတ္တဿ ဂါမဿ ပရိက္ခေပေါကာသောဝ။ ဝုတ္တဉှေတံ အဋ္ဌကထာယံ ‘‘ဂါမူပစာရောတိ ပရိက္ခိတ္တဿ ဂါမဿ ပရိက္ခေပေါ၊ အပရိက္ခိတ္တဿ ဂါမဿ ပရိက္ခေပေါကာသော။ တေသု အဓိဋ္ဌိတတေစီဝရိကော ဘိက္ခု ပရိဟာရံ န လဘတီ’’တိ (မဟာဝ။ အဋ္ဌ။ ၁၄၄)။ ကိံ ပနေတ္ထ ကာရဏံ၊ ယေန အယံ ဂါမော၊ ဂါမူပစာရော စ ဣဓ အညထာ၊ အညတ္ထ တထာတိ? အဋ္ဌုပ္ပတ္တိတော ‘‘တေန ခေါ ပန သမယေန ဘိက္ခူ ‘ဘဂဝတာ တိစီဝရေန အဝိပ္ပဝါသသမ္မုတိ အနုညာတာ’တိ အန္တရဃရေ စီဝရာနိ နိက္ခိပန္တီ’’တိ (မဟာဝ။ ၁၄၃) ဣမိဿာ ဟိ အဋ္ဌုပ္ပတ္တိယာ ‘‘ဌပေတွာ ဂါမဉ္စ ဂါမူပစာရဉ္စာ’’တိ (မဟာဝ။ ၁၄၄) ဝုတ္တံ။ တသ္မာ ယတ္ထ အန္တရဃရသညာ၊ တတ္ထ အဝိပ္ပဝါသသီမာ န ဂစ္ဆတီတိ ဝေဒိတဗ္ဗာ။ တေန စ ဥဒေါသိတသိက္ခာပဒေ ‘‘အန္တောဂါမေ စီဝရံ နိက္ခိပိတွာ အန္တောဂါမေ ဝတ္ထဗ္ဗ’’န္တိ (ပါရာ။ ၄၇၈) စ ‘‘သဘာယေ ဝါ ဒွါရမူလေ ဝါ၊ ဟတ္ထပါသာ ဝါ န ဝိဇဟိတဗ္ဗ’’န္တိ စ ဝုတ္တံ။ ကပ္ပိယဘူမိယံ ဝသန္တောယေဝ ဟိ ကပ္ပိယဘူမိယံ နိက္ခိတ္တစီဝရံ ရက္ခတိ။ သာသင်္ကသိက္ခာပဒေ ပန ‘‘ယသ္မာ ယတ္ထ ဂါမေ စီဝရံ နိက္ခိတ္တံ၊ တေန ဂါမေန ဝိပ္ပဝသန္တော စီဝရေန ဝိပ္ပဝသတီတိ ဝုစ္စတိ၊ တသ္မာ ပုန ဂါမသီမံ ဩက္ကမိတွာ ဝသိတွာ ပက္ကမတီ’’တိ ဝုတ္တံ။ တသ္မိဉှိ သိက္ခာပဒေ ဂါမသီမာ ဂါမော နာမာတိ အဓိပ္ပေတော။ တတ္ထ ဝိကာလေ ဂါမပ္ပဝေသနသိက္ခာပဒဝိဘင်္ဂေ ‘‘ပရိက္ခိတ္တဿ ဂါမဿ ပရိက္ခေပံ အတိက္ကမန္တဿ အာပတ္တိ ပါစိတ္တိယဿာ’’တိ (ပါစိ။ ၅၁၃) ဝစနတော ပရိက္ခေပေါ န ဂါမော။ ကိန္တု ဂါမူပစာရောတိ လေသေန ဒဿိတံ ဟောတိ။ ဣမသ္မိံ ပန သိက္ခာပဒဝိဘင်္ဂေ ‘‘ဂါမူပစာရော နာမာ’’တိ အာရဘိတွာ ‘‘အပရိက္ခိတ္တဿ ဂါမဿ ဃရူပစာရေ ဌိတဿ မဇ္ဈိမဿ ပုရိသဿ လေဍ္ဍုပါတော’’တိ ဣမိနာ အပရိက္ခိတ္တဿ ပရိက္ခေပေါကာသော ဂါမူပစာရောတိ သိဒ္ဓံ။ တဒတ္ထသမ္ဘဝတော တသ္မိံ ဃရူပစာရေ ဌိတဿ လေဍ္ဍုပါတော ဂါမူပစာရောတိ ကုရုန္ဒဋ္ဌကထာယံ၊ မဟာပစ္စရိယမ္ပိ ဝုတ္တံ ¶ ။ ဥပစာရော ဟိ ‘‘ဂါမော ဧကူပစာရော နာနူပစာရော’’တိအာဒီသု ဒွါရံ၊ ‘‘အဇ္ဈောကာသော ဧကူပစာရော’’တိ ဧတ္ထ သမန္တာ သတ္တဗ္ဘန္တရသင်္ခါတံ ပမာဏံ၊ တသ္မာ ‘‘ဂါမူပစာရောတိ ပရိက္ခိတ္တဿ ဂါမဿ ပရိက္ခေပေါ၊ အပရိက္ခိတ္တဿ ဂါမဿ ပရိက္ခေပေါကာသော’’တိ အန္ဓကဋ္ဌကထာယံ ဝုတ္တန္တိ ဝေဒိတဗ္ဗံ။ တထာ ကုရုန္ဒိယံ၊ မဟာပစ္စရိယဉ္စ။ တထာ ပါဠိယမ္ပိ ‘‘အဇ္ဈာရာမော နာမ ပရိက္ခိတ္တဿ အာရာမဿ အန္တော အာရာမော၊ အပရိက္ခိတ္တဿ ဥပစာရော။ အဇ္ဈာဝသထော နာမ ပရိက္ခိတ္တဿ အာဝသထဿ အန္တော အာဝသထော၊ အပရိက္ခိတ္တဿ ဥပစာရော’’တိအာဒီသု ဒိဿတိ။ မဟာအဋ္ဌကထာယံ ပန ‘‘ဂါမူပစာရော’’တိအာဒီသု ဒိဿတိ။ တသ္မာ ဒုတိယော လေဍ္ဍုပါတော ဥပစာရောတိ အဓိပ္ပေတော။

‘‘အပရိက္ခိတ္တဿ ဂါမဿ ဥပစာရံ ဩက္ကမန္တဿ အာပတ္တိ ပါစိတ္တိယဿာ’’တိ ပါဠိဝိသေသသမ္ဘဝတော စ ပဌမော လေဍ္ဍုပါတော ဂါမော ဧဝ၊ ဒုတိယော ဂါမူပစာရောတိ ဝုတ္တံ။ ပရိက္ခိတ္တဿ ¶ ပန ဂါမဿ ဣန္ဒခီလေ ဌိတဿ မဇ္ဈိမဿ ပုရိသဿ လေဍ္ဍုပါတော ဂါမူပစာရောတိ ဝုတ္တန္တိ ဧတ္ထ ဘေဒေါ နတ္ထိ။ ဧတ္တာဝတာ ပရိက္ခိတ္တဿ ဒုဝိဓော ဥပစာရော၊ အပရိက္ခိတ္တဿ စတုဗ္ဗိဓော ဥပစာရော ယတ္ထ သမ္ဘဝတိ၊ ယတ္ထ စ န သမ္ဘဝတိ၊ တံ သဗ္ဗံ ဒဿိတံ ဟောတိ။

ဂါမခေတ္တဿ စ ဂါမသီမာယ စ လက္ခဏံ အဋ္ဌကထာယမေဝ ဝုတ္တံ။ ဥဘယဉှိ အတ္ထတော ဧကံ။ တတ္ထ ဂါမသီမာယ ဂါမဘာဝေါ သာသင်္ကသိက္ခာပဒဝသေန ဝေဒိတဗ္ဗော။

ဂါမသီမူပစာရော နာမ မနုဿာနံ ကဋ္ဌတိဏပုပ္ဖဖလာဒိအတ္ထိကာနံ ဝနစရကာနံ ဝလဉ္ဇနဋ္ဌာနံ။ ဣမဿ ဂါမသီမူပစာရဘာဝေါ ဥဒေါသိတသိက္ခာပဒေ၊ ‘‘အဂါမကေ အရညေ သမန္တာ သတ္တဗ္ဘန္တရာ’’တိ (ပါရာ။ ၄၉၄) အာဂတဋ္ဌာနေ ခန္ဓကေ (မဟာဝ။ ၁၄၇) စ ဝေဒိတဗ္ဗော။ ဧတ္ထ ဟိ ဘဂဝါ ဂါမန္တဝါသီနံ ဘိက္ခူနံ သီမံ ဒဿေန္တော ‘‘ယံ ဂါမံ ဝါ နိဂမံ ဝါ ဥပနိဿာယ ဝိဟရတီ’’တိ (မဟာဝ။ ၁၄၇) ဝတွာ ဒဿေတိ။ တဒနန္တရမေဝ ‘‘အဂါမကေ’’တိအာဒိနာ သတ္တဗ္ဘန္တရသီမံ ဒဿေတိ။ တသ္မာ ယော ဘိက္ခု ဂါမံ ဝါ နိဂမံ ဝါ ဥပနိဿာယ န ဝိဟရတိ၊ ကေဝလံ နာဝါယံ ဝါ ထလမဂ္ဂေန ဝါ အဒ္ဓါနမဂ္ဂပ္ပဋိပန္နော ဟောတိ၊ တဿ တတ္ထ တတ္ထ သတ္တဗ္ဘန္တရသီမာ လဗ္ဘတီတိ ဝေဒိတဗ္ဗော။ ဝုတ္တဉှိ ‘‘ဧကကုလဿ သတ္ထော ဟောတိ ¶ ၊ သတ္ထေ စီဝရံ နိက္ခိပိတွာ ပုရတော ဝါ ပစ္ဆတော ဝါ သတ္တဗ္ဘန္တရာ န ဝိဇဟိတဗ္ဗ’’န္တိအာဒိ (ပါရာ။ ၄၈၉)။ ဣဒမေဝ အရညံ သန္ဓာယ ‘‘အာရညကသီမာယ ဧကံ အဂါမကံ အရည’’န္တိ ဝုတ္တံ။

ယံ သန္ဓာယ ‘‘အဂါမကေ အရညေ အဒ္ဓယောဇနေ အဒ္ဓယောဇနေ အာပတ္တိ ပါစိတ္တိယဿာ’’တိ (ပါစိ။ ၄၁၄) ပါဠိယံ ဝုတ္တံ။ ဣဒံ သံဝိဓာနသိက္ခာပဒါနံ ဧကံ အဂါမကံ အရညံ နာမ။

ပုရိမေန ပန သဃရံ သင်္ဂဟိတံ၊ ဣမိနာ တမသင်္ဂဟိတန္တိ။ ယံ သန္ဓာယ ဂဏမှာ ဩဟီယနာဓိကာရေ အဋ္ဌကထာယံ (ပါစိ။ အဋ္ဌ။ ၆၉၂) ‘‘အဂါမကေ အရညေတိ ဧတ္ထ ‘နိက္ခမိတွာ ဗဟိ ဣန္ဒခီလာ သဗ္ဗမေတံ အရည’န္တိ ဧဝံ ဝုတ္တံ လက္ခဏံ အရညံ။ တံ ပနေတ ကေဝလံ ဂါမာဘာဝေန ‘အဂါမက’န္တိ ဝုတ္တံ၊ န ဝိဉ္ဈာဋဝိသဒိသတာယာ’’တိ ဝုတ္တံ။ ယံ သန္ဓာယ ‘‘အာရညကံ နာမ သေနာသနံ ပဉ္စဓနုသတိကံ ပစ္ဆိမ’’န္တိ (ပါရာ။ ၆၅၄၊ ပါစိ။ ၅၇၃) ဝုတ္တံ။ ဣဒံ အာရညကသေနာသနံ နာမ ပရိက္ခိတ္တဿ ပရိက္ခေပတော ဗဟိ၊ အပရိက္ခိတ္တဿ ပန ပရိက္ခေပေါကာသတော ဗဟိ သရုက္ခံ ဝါ အရုက္ခံ ဝါ ဝိဟာရေ ကုန္နဒိသမာကိဏ္ဏမ္ပိ အရညံ နာမ။ တထာ ‘‘ဂဏမှာ ဩဟီယနကဿ ဧက’’န္တိ ဝုတ္တံ။ ဣဒံ အရညံဝ။ ဣဒံ ပန ပုဗ္ဗေ အဂါမကဘာဝေန အာဂတဋ္ဌာနေ ဝုတ္တလက္ခဏမေဝ ဟုတွာ နိက္ခမိတွာ ဗဟိ ဣန္ဒခီလာ ဒဿနူပစာရဝိဇဟနေ ¶ ဧကမေဝ အာပတ္တိံ ကရောတိ၊ တတော ဥဒ္ဓံ အနာပတ္တိ။ ‘‘သံဝိဓာနသိက္ခာပဒါနံ ဧက’’န္တိ ဝုတ္တံ ပန အဒ္ဓယောဇနေ အဒ္ဓယောဇနေ ဧကေကံ အာပတ္တိံ ကရောတိ၊ န တတော ဩရံ။ ဣတရာနိ တီဏိ ယထာဝုတ္တပရိစ္ဆေဒတော ဩရမေဝ တတ္ထ ဝုတ္တဝိဓိံ န သမ္ပာဒေန္တိ၊ ပရံ သမ္ပာဒေန္တိ။ ဧဝမေတေသံ အညမညနာနတ္တံ ဝေဒိတဗ္ဗံ။

တတ္ထ ပဉ္စဝိဓေ ဂါမေ ယော ‘‘ပရိက္ခိတ္တဿ ဂါမဿ ဣန္ဒခီလေ ဌိတဿ လေဍ္ဍုပါတော’’တိ (ပါရာ။ ၉၂) ဝုတ္တော၊ သော န ကတ္ထစိ ဝိနယပိဋကေ ဥပယောဂံ ဂတော၊ ကေဝလံ အပရိက္ခိတ္တဿ ပရိက္ခေပေါကာသတော အပရော ဧကော လေဍ္ဍုပါတော ဂါမူပစာရော နာမာတိ ဒီပနတ္ထံ ဝုတ္တော။ ပရိက္ခိတ္တဿပိ စေ ဂါမဿ ဧကော လေဍ္ဍုပါတော ကပ္ပိယဘူမိသမာနော ဥပစာရောတိ ဝုတ္တော၊ ပဂေဝ အပရိက္ခိတ္တဿ ပရိက္ခေပေါကာသတော ဧကော။ သော ပန ပါကဋတ္တာ စ အဇ္ဈောကာသတ္တာ စ ဩက္ကမန္တဿ အာပတ္တိံ ကရောတိ ဌပေတွာ ¶ ဘိက္ခုနိယာ ဂါမန္တရာပတ္တိံ။ ဘိက္ခုနိယော ဟိ တသ္မိံ ဒုတိယလေဍ္ဍုပါတသင်္ခါတေ ဂါမူပစာရေ ဝသန္တီ အာပတ္တိဉ္စ အာပဇ္ဇန္တိ၊ ဂါမံ ပဝိသန္တီ ဂါမန္တရာပတ္တိဉ္စ။ တာသဉှိ ဌိတဋ္ဌာနံ အရညသင်္ချံ ဂစ္ဆတိ ‘‘တာဝဒေဝ ဆာယာ မေတဗ္ဗာ…ပေ… တဿာ တယော စ နိဿယေ၊ အဋ္ဌ စ အကရဏီယာနိ အာစိက္ခေယျာထာ’’တိ (စူဠဝ။ ၄၃၀) ဝစနတော။ အရညပ္ပဋိသံယုတ္တာနံ သိက္ခာပဒါနံ၊ ဝိကာလေဂါမပ္ပဝေသနသိက္ခာပဒဿ (ပါစိ။ ၅၀၈) စ ဘိက္ခုနီနံ အသာဓာရဏတ္တာ စ အန္တရာရာမဘိက္ခုနုပဿယပ္ပဋိက္ကမနာဒီနံ ကပ္ပိယဘူမိဘာဝဝစနတော စ ‘‘ဧကာ ဂဏမှာ ဩဟီယေယျာတိ အဂါမကေ အရညေ ဒုတိယိကာယ ဘိက္ခုနိယာ ဒဿနူပစာရံ ဝါ သဝနူပစာရံ ဝါ ဝိဇဟန္တိယာ အာပတ္တိ ထုလ္လစ္စယဿာ’’တိအာဒိသိက္ခာပဒပညတ္တိတော (ပါစိ။ ၆၉၂) စ ဘိက္ခုနိက္ခန္ဓကနယဧန ဝါ ယသ္မာ ပရိက္ခိတ္တဿ ဂါမဿ ဣန္ဒခီလတော ပဋ္ဌာယ အပရိက္ခိတ္တဿ ဥပစာရတော ပဋ္ဌာယ နီယတိ၊ တတ္ထ အန္တရဃရေ နိက္ခိတ္တစီဝရေ သတိ စတုရင်္ဂသမောဓာနေန ဘိက္ခူ ဝသန္တိ၊ တသ္မာ သဂါမကံ နာမ ဟောတိ။

အဝိပ္ပဝါသသီမာယ ဧကံ နာမ ‘‘န၊ ဘိက္ခဝေ၊ ဘိက္ခုနိယာ အရညေ ဝတ္ထဗ္ဗံ၊ ယာ ဝသေယျ၊ အာပတ္တိ ဒုက္ကဋဿာ’’တိ (စူဠဝ။ ၄၃၁) ဝစနတော ဘိက္ခုနီနံ အရညဝါသော နာမ နတ္ထီတိ သိဒ္ဓံ။ တာယ ဟိ အရညေ ဘိက္ခုနုပဿယေ သတိ အန္တောအာဝါသေပိ ဒုတိယိကာယ ဒဿနသဝနူပစာရံ ဝိဇဟန္တိယာ အာပတ္တိ။ တသ္မာ အဝိပ္ပဝါသသီမာဓိကာရေ ‘‘ဌပေတွာ ဂါမဉ္စ ဂါမူပစာရဉ္စာ’’တိ (မဟာဝ။ ၁၄၄) ဧတ္ထ ယံ ဌာနံ ဌပိတံ၊ တတ္ထေဝ ဘိက္ခုနုပဿယောပိ ကပ္ပတိ၊ န တတော ပရံ။

တာသဉ္စ ¶ အဝိပ္ပဝါသသီမာကမ္မဝါစာယံ ‘‘ဌပေတွာ ဂါမဉ္စ ဂါမူပစာရဉ္စာ’’တိ ဝစနံ နတ္ထီတိ ကတွာ တေသွေဝ ဂါမဂါမူပစာရေသု ဖရတိ။ တတော ပရံ ဒုတိယေသု လေဍ္ဍုပါတာဒီသု တာသံ အကပ္ပိယဘူမိကတ္တာ န သမာနသံဝါသကသီမာ အရညေ ဖရတိ ဘိက္ခူနံ ဂါမဂါမူပစာရံ ဝိယ။ တသ္မာ ဝုတ္တံ ‘‘ဘိက္ခုနိယာ ဌပေတွာ ဂါမန္တရာပတ္တိ’’န္တိ။

ဧဝံ တာဝ ပဉ္စဝိဓံ ဂါမဘေဒံ၊ အရညဘေဒဉ္စ ဉတွာ ဣဒါနိ ‘‘အတ္ထိ ဂါမော န ဂါမပရိဟာရံ ကတ္ထစိ လဘတီ’’တိအာဒိဘေဒေါ ဝေဒိတဗ္ဗော။ တတ္ထ ယော အဋ္ဌကထာယံ ‘‘အမနုဿော နာမ ယော သဗ္ဗသော ဝါ မနုဿာနံ အဘာဝေန ယက္ခပရိဂ္ဂဟဘူတော’’တိ ဝုတ္တော၊ သော ဂါမော န ဂါမပရိဟာရံ ကတ္ထစိ သိက္ခာပဒေ လဘတိ။ ယဉှိ သန္ဓာယ အဋ္ဌကထာယံ ‘‘တံ ပနေတံ ဗုဒ္ဓကာလေ၊ စက္ကဝတ္တိကာလေ ¶ စ နဂရံ ဟောတိ၊ သေသကာလေ သုညံ ဟောတိ ယက္ခပရိဂ္ဂဟိတ’’န္တိ (ပါရာ။ အဋ္ဌ။ ၁။၈၄၊ ဒီ။ နိ။ အဋ္ဌ။ ၁။၁၅၀) ဝုတ္တံ။ ယော ပန ပဋိရာဇစောရာဒီဟိ ဝိလုတ္တတ္တာ၊ ကေဝလံ ဘယေန ဝါ ဆဍ္ဍိတော သဃရောဝ အန္တရဟိတဂါမဘူတော၊ သော ‘‘ဂါမန္တရေ ဂါမန္တရေ အာပတ္တိ ပါစိတ္တိယဿာ’’တိ (ပါစိ။ ၁၈၃) ဝုတ္တပါစိတ္တိယံ ဇနေတိ၊ ဝိကာလေ ဂါမပ္ပဝေသနံ၊ သေခိယေ စတ္တာရိ ဇနေတီတိ ဝေဒိတဗ္ဗာ။ ယော ပန ဂါမော ယတော ဝါ မနုဿာ ကေနစိဒေဝ ကရဏီယေန ပုနပိ အာဂန္တုကာမာ ဧဝ အပက္ကန္တာတိ ဝုတ္တော၊ အမနုဿော သော ပကတိဂါမသဒိသောဝ။

အတ္ထိ အရညံ န အရညပရိဟာရံ ကတ္ထစိ လဘတီတိ ဧတ္ထ ‘‘အဇ္ဈောကာသော ဧကူပစာရော နာမ အဂါမကေ အရညေ သမန္တာ သတ္တဗ္ဘန္တရာ ဧကူပစာရော၊ တတော ပရံ နာနူပစာရော’’တိ (ပါရာ။ ၄၉၄) ဧတ္ထ ယွာယံ နာနူပစာရောတိ ဝုတ္တော၊ တံ ဝေဒိတဗ္ဗံ။ ယော ပန ပရိက္ခိတ္တဿ ဧကလေဍ္ဍုပါတသင်္ခါတော ဂါမူပစာရနာမကော ဂါမော၊ ယော ဝါ သတ္ထော နာတိရေကစာတုမာသနိဝိဋ္ဌော၊ သော အတ္ထိ ဂါမော န ဂါမကိစ္စံ ကရောတိ။ န ဟိ တံ ဌာနံ ဩက္ကမန္တော ဂါမပ္ပဝေသနာပတ္တိံ အာပဇ္ဇတိ။ ယံ ပန ဂါမသီမာယ ပရိယာပန္နံ မနုဿာနံ ဝလဉ္ဇနဋ္ဌာနဘူတံ အရညံ၊ တံ အတ္ထိ အရညံ န အရညကိစ္စံ ကရောတိ နာမ။ န ဟိ တတ္ထ အာရညကသီမာ လဗ္ဘတီတိ။ ဧတ္တာဝတာ ‘‘ဂါမာ ဝါ အရညာ ဝါ’’တိ ဣမိဿာ အနုပညတ္တိယာ လက္ခဏာနုပညတ္တိဘာဝေါ ဒဿိတော ဟောတိ။

‘‘ဂေါနိသာဒိနိဝိဋ္ဌောပိ ဂါမော’’တိ ဧတ္ထ သစေ တဿ ဂါမဿ ဂါမခေတ္တပရိစ္ဆေဒေါ အတ္ထိ၊ သဗ္ဗောပိ ဧကော ဂါမော။ နော စေ၊ ဥပစာရေန ဝါ ပရိက္ခေပေန ဝါ ပရိစ္ဆိန္ဒိတဗ္ဗော။ သစေ ဂါမခေတ္တေ သတိ ကာနိစိ တာနိ ဃရာနိ အညမညဥပစာရပ္ပဟောနကံ ဌာနံ အတိက္ကမိတွာ ဒူရေ ဒူရေ ကတာနိ ဟောန္တိ၊ ဝိကာလေ ဂါမပ္ပဝေသေ ဥပစာရောဝ ပမာဏံ။ အန္တရဃရပ္ပဋိသံယုတ္တေသု သေခိယေသု၊ ¶ ဘိက္ခုနိယာ ဂါမန္တရာပတ္တီသု စ ဃရာနံ ပရိက္ခေပါရဟဋ္ဌာနံ ပမာဏံ၊ ဥပေါသထာဒိကမ္မာနံ ဂါမခေတ္တံ ပမာဏံ၊ အာရညကသေနာသနဿ အာသန္နဃရဿ ဒုတိယလေဍ္ဍုပါတတော ပဋ္ဌာယ ပဉ္စဓနုသတန္တရတာ ပမာဏန္တိ ဧဝံ နော ပဋိဘာနန္တိ အာစရိယာ။

‘‘ယမ္ပိ ဧကသ္မိံယေဝ ဂါမခေတ္တေ ဧကံ ပဒေသံ ‘အယမ္ပိ ဝိသုံဂါမော ဟောတူ’တိ ပရိစ္ဆိန္ဒိတွာ ရာဇာ ကဿစိ ဒေတိ၊ သောပိ ဝိသုံဂါမသီမာ ဟောတိယေဝါ’’တိ ¶ (မဟာဝ။ အဋ္ဌ။ ၁၄၇) အဋ္ဌကထာဝစနတော တံ ပဝိသန္တိယာ ဘိက္ခုနိယာ ဂါမန္တရာပတ္တိ ဟောတိ ဧဝ။ သစေ တတ္ထ ဝိဟာရော ဝါ ဒေဝကုလံ ဝါ သဘာ ဝါ ဂေဟံ ဝါ နတ္ထိ၊ ကေဝလံ ဝတ္ထုမတ္တကမေဝ ဟောတိ၊ ဂါမောတိ ဝိနယကမ္မံ သဗ္ဗံ တတ္ထ ကပ္ပတိ။ ‘‘အမနုဿော ဂါမော’’တိ ဟိ ဝုတ္တံ။ တဉ္စ ဌာနံ ဣတရဿ ဂါမဿ ပရိက္ခေပဗ္ဘန္တရေ ဝါ ဥပစာရဗ္ဘန္တရေ ဝါ ဟောတိ၊ ဝိကာလေ ဂါမပ္ပဝေသနံ အာပုစ္ဆိတွာဝ ဂန္တဗ္ဗံ။ နော စေ၊ အရညံ ဝိယ ယထာသုခံ ဂန္တဗ္ဗံ။ တတ္ထ စေ အာရာမော ဝါ တိတ္ထိယသေယျာဒီသု အညတရောဝါ ဟောတိ၊ လဒ္ဓကပ္ပမေဝ။ ဘိက္ခုနုပဿယော စေ ဟောတိ၊ ဂါမံ ပိဏ္ဍာယ ပဝိသန္တိယာ ဘိက္ခုနိယာ ဂါမန္တရာပတ္တိ ပရိဟရိတဗ္ဗာ။ ‘‘အရညံ နာမ ဌပေတွာ ဂါမဉ္စ ဂါမူပစာရဉ္စ အဝသေသံ အရညံ နာမာ’’တိ (ပါရာ။ ၉၂) ဧတ္ထ ပရိက္ခေပေ သတိ ယထာဝုတ္တပရိစ္ဆေဒံ ဂါမမေဝ ဌပေတွာ အဝသေသံ တဿ ဥပစာရံ၊ တတော ပရဉ္စ အရညံ နာမ၊ ပရိက္ခေပေ အသတိ ယထာဝုတ္တပရိစ္ဆေဒံ ဂါမူပစာရမေဝ ဌပေတွာ တတော ပရံ အဝသေသံ အရညံ နာမာတိ အဓိပ္ပာယော။ ဧဝံ သတိ ‘‘နိက္ခမိတွာ ဗဟိ ဣန္ဒခီလာ သဗ္ဗမေတံ အရည’’န္တိ (ဝိဘ။ ၅၂၉) ဝုတ္တလက္ခဏေ အဂါမကေ အရညေ ဂဏမှာဩဟီယနာပတ္တိ၊ တတ္ထ အဝိပ္ပဝါသသီမာယ ဖရဏံ ဝိကာလေ ဂါမပ္ပဝေသနာပတ္တိယာ အနာပတ္တီတိ ဧဝမာဒိဝိနယဝိဓိ သမေတိ၊ အညထာ န သမေတိ။

‘‘ဌပေတွာ ဂါမူပစာရံ အဝသေသံ အရညံ နာမာ’’တိ (မဟာဝ။ ၁၄၄) ဝုတ္တေ ဂါမူပစာရတော ပရော အရညန္တိ သိဒ္ဓေ ‘‘ဌပေတွာ ဂါမ’’န္တိ ဝိသေသတ္ထော န ဒိဿတိ၊ ဂါမဿ ပန အရညဘာဝပ္ပသင်္ဂဘယာ ဝုတ္တန္တိ စေ? န၊ ဂါမူပစာရဿ အဘာဝပ္ပသင်္ဂတော။ သတိ ဟိ ဂါမေ ဂါမူပစာရော ဟောတိ၊ သော စ တဝ မတေန အရညဘူတော။ ကုတော ဒါနိ ဂါမူပစာရော။ ဂါမူပစာရောပိ စေ အရညသင်္ချံ ဂစ္ဆတိ၊ ပရောဝ ဂါမောတိ ကတွာ န ယုတ္တံ ဂါမဿ အရညဘာဝပ္ပသင်္ဂတော စ။ တသ္မာ ‘‘ဂါမာ ဝါ အရညာ ဝါ’’တိ ဧတ္ထ ဂါမူပစာရောပိ ‘‘ဂါမော’’ တွေဝ သင်္ဂဟိတော။ တသ္မာ ဂါမဿ အရညဘာဝပ္ပသင်္ဂေါ န ယုဇ္ဇတိ။ ယဒိ ဧဝံ ‘‘ဌပေတွာ ဂါမံ အဝသေသံ အရညံ နာမာ’’တိ ဧတ္တကံ ဝတ္တဗ္ဗန္တိ စေ? န၊ အရညဿ ပရိစ္ဆေဒဇာနနပ္ပသင်္ဂတော။ တထာ ဟိ ဝုတ္တော ‘‘အရညပရိစ္ဆေဒေါ န ပညာယတီ’’တိ နော လဒ္ဓိ။ ဂါမူပစာရပရိယန္တော ဟိ ဣဓ ဂါမော နာမ။ ယဒိ ဧဝံ ‘‘ဂါမဿ စ အရညဿ စ ပရိစ္ဆေဒဒဿနတ္ထံ ဝုတ္တ’’န္တိ အဋ္ဌကထာယံ ဝတ္တဗ္ဗံ၊ ‘‘အရညဿ ¶ ပရိစ္ဆေဒဒဿနတ္ထံ ဝုတ္တ’’န္တိ ကိမတ္ထံ ¶ ဝုတ္တန္တိ စေ? ဝုစ္စတေ – အဋ္ဌကထာစရိယေန ပဌမဂါမူပစာရံယေဝ သန္ဓာယ ဝုတ္တံ ‘‘အရညပရိစ္ဆေဒဒဿနတ္ထ’’န္တိ သဗ္ဗသိက္ခာပဒေ ဟိ ဗာဟိရဣန္ဒခီလတော ပဋ္ဌာယ ဂါမူပစာရံ အရညံ နာမ။ ဂါမပရိစ္ဆေဒဝစနေ ပယောဇနံ ပနေတ္ထ နတ္ထိ ပရိက္ခေပေနေဝ ပါကဋဘူတတ္တာ။ ဒုတိယဂါမူပစာရောဝ ဂါမဿ ပရိစ္ဆေဒဒဿနတ္ထံ ဝုတ္တော ပရိက္ခေပဘာဝေန အပါကဋတ္တာ။ တတ္ထ ပဌမဂါမူပစာရော စေ အရညပရိစ္ဆေဒဒဿနတ္ထံ ဝုတ္တော၊ တတ္ထ န ဝတ္တဗ္ဗော။ ‘‘နိက္ခမိတွာ ဣန္ဒခီလာ သဗ္ဗမေတံ အရည’’န္တိ ဝတ္တဗ္ဗံ။ ဧဝံ သန္တေ သုဗျတ္တတရံ အရညပရိစ္ဆေဒေါ ဒဿိတော ဟောတိ၊ မိစ္ဆာဂါဟော စ န ဟောတိ။

‘‘မဇ္ဈိမဿ ပုရိသဿ လေဍ္ဍုပါတော’’တိ ဟိ ဝုတ္တေ အယံ ဂါမူပစာရောဝ အရညံ ဂါမူပစာရဿ ဝိဘင်္ဂတ္တာ။ ယဒိ အရညပရိစ္ဆေဒဒဿနတ္ထံ ဝုတ္တံ၊ အဝုတ္တကမေဝ၊ အရညတော ပရန္တိ စ မိစ္ဆာဂါဟော ဟောတီတိ စေ၊ နနု ဝုတ္တံ ‘‘ပဌမမေဝ ဣဒံ ပရိက္ခိတ္တဿ ဂါမဿ ဥပစာရနိယမနတ္ထံ ဝုတ္တ’’န္တိ? အရညပရိစ္ဆေဒဒဿနတ္ထံ ကိဉ္စာပိ ‘‘ဂါမူပစာရော’’တိအာဒိ အာရဒ္ဓံ၊ ဣန္ဒခီလေ ဌိတဿ မဇ္ဈိမဿ ပုရိသဿ လေဍ္ဍုပါတောတိ ပန ဧဝံ ဝစနပ္ပယောဇနံ။ အပရိက္ခိတ္တဿ စ ဂါမဿ ယွာယံ လေဍ္ဍုပါတော ဥပစာရော’’တိ မဟာအဋ္ဌကထာယံ ဝုတ္တော၊ တဿ နိယမနန္တိ ဝုတ္တံ ဟောတိ။ ကထံ ပညာယတီတိ စေ? ‘‘အရညံ နာမာ’’တိ ပဒံ အနုဒ္ဓရိတွာ ‘‘ဂါမူပစာရော နာမာ’’တိ ဥဒ္ဓရဏဿ ကတတ္တာ။ တတ္ထ ‘‘ဂါမူပစာရော နာမာ’’တိ မာတိကာယံ အဝိဇ္ဇမာနံ ပဒံ ဥဒ္ဓရန္တော တယော အတ္ထဝသေ ဒဿေတိ။ သေယျထိဒံ – အရညပရိစ္ဆေဒဒဿနမေကော အတ္ထော၊ အပရိက္ခိတ္တဿ ဂါမဿ ဥပစာရေန သဒ္ဓိံ ပရိစ္ဆေဒဒဿနမေကော၊ န ကေဝလံ အပရိက္ခိတ္တဿယေဝ ဥပစာရော ဝိနယာဓိကာရေ သပ္ပယောဇနော ဒဿိတဗ္ဗော၊ နိပ္ပယောဇနောပိ ပရိက္ခိတ္တဿ ဥပစာရော ဣမိနာ ပရိယာယေန လဗ္ဘတီတိ အနုသင်္ဂပ္ပယောဇနမေကော အတ္ထောပိ ဝေဒိတဗ္ဗော။

‘‘အပရိက္ခိတ္တဿ ဂါမဿ ဃရူပစာရေ ဌိတဿ မဇ္ဈိမဿ ပုရိသဿ လေဍ္ဍုပါတော’’တိ ဣဒံ ဘဂဝါ တယော အတ္ထဝသေ ပဋိစ္စ အဘာသိ။ သေယျထိဒံ – အပရိက္ခိတ္တဿ ဂါမဿ ပရိစ္ဆေဒဒဿနမေကော၊ အဝိပ္ပဝါသသီမာဓိကာရေ အယမေဝ ဂါမူပစာရောတိ ဒဿနမေကော၊ တတ္ထ ဌိတဿ ဒုတိယော လေဍ္ဍုပါတော သဗ္ဗတ္ထ ဂါမပ္ပဋိသံယုတ္တေသု သိက္ခာပဒေသု သကိစ္စကော ဥပစာရောတိ ဒဿနမေကောတိ ဧဝံ ဘဂဝါ အတ္တနော ဒေသနာဝိလာသပ္ပတ္တိယာ ဧကေကပဒုဒ္ဓါရဏေန တယော အတ္ထဝသေ ဒဿေတီတိ ဝေဒိတဗ္ဗံ။

တထာ ¶ အဝိပ္ပဝါသသီမာကမ္မဝါစာယ ‘‘ဌပေတွာ ဂါမဉ္စ ဂါမူပစာရဉ္စာ’’တိ (မဟာဝ။ ၁၄၄) ဧတ္ထာပိ ¶ ပရိက္ခေပေ သတိ ဂါမံ ဌပေတွာ၊ အသတိ ဂါမူပစာရံ ဌပေတွာတိ အတ္ထော။ ပရိက္ခိတ္တဿ၊ အပရိက္ခိတ္တဿ စ မဇ္ဈေ အာရာမေ အဝိပ္ပဝါသသီမာသမ္မန္နနကာလေ အယံ နယော အတိဝိယ ယုဇ္ဇတိ။ ဥဘယပရိဝဇ္ဇနတော ပုဗ္ဗေ ဝုတ္တနယေန ဝါ ဥဘယတ္ထ ဥဘယံ လဗ္ဘတေဝ။ ‘‘အန္တရာရာမေသု ပန အာစိဏ္ဏကပ္ပာ ဘိက္ခူ အဝိပ္ပဝါသသီမံ သမ္မန္နန္တီ’’တိ ဂဏ္ဌိပဒေ ဝုတ္တံ။ ‘‘အန္တရဃရပ္ပဋိသံယုတ္တာနံ သေခိယာနံ အန္တရာရာမေသု အသမ္ဘဝတော အန္တရာရာမော န ဂါမသင်္ခံ ဂစ္ဆတိ၊ တသ္မာ တတ္ထပိ အဝိပ္ပဝါသသီမာ ရုဟတေဝါ’’တိ ဧကေ။ တေ ဘိက္ခူ ဒုတိယဿ ဂါမူပစာရဿ ဂါမသင်္ခါသဘာဝတော တာသံ ဣမာယ ဒုတိယာယ အဝိပ္ပဝါသကမ္မဝါစာယ အဘာဝံ ဒဿေတွာ ပဋိက္ခိပိတဗ္ဗာ။ အဇ္ဈာရာမော ပန ဂါမောပိ သမာနော တိတ္ထိယသေယျာဒိ ဝိယ ကပ္ပိယဘူမီတိ ဝေဒိတဗ္ဗော။

အာပတ္တိယာ ပရိစ္ဆေဒံ၊ တထာနာပတ္တိယာပိ စ၊

ဒဿေတုံ ဂါမသမ္ဗန္ဓ-သိက္ခာပဒဝိဘာဝနေ။

ဂါမဂါမူပစာရာ ဒွေ၊ ဒဿိတာ ဣဓ တာဒိနာ၊

သီမာ သီမူပစာရာ တု၊ အနေကန္တာတိ နုဒ္ဓဋာ။

ဥပစာရာ စ ဒွေ ဟောန္တိ၊ ဗာဟိရဗ္ဘန္တရဗ္ဗသာ၊

ပရိက္ခိတ္တာပရိက္ခိတ္တ-ဘေဒါ စေ စတုရော သိယုံ။

အယဉှိ ဥပစာရသဒ္ဒေါ ဝိနယပိဋကေ ‘‘အနုဇာနာမိ၊ ဘိက္ခဝေ၊ အဂိလာနေနပိ အာရာမေ အာရာမူပစာရေ ဆတ္တံ ဓာရေတု’’န္တိ (စူဠဝ။ ၂၇၀) ဧဝမာဒီသု ဗာဟိရေ ဥပစာရေ ဒိဿတိ။ ဗာဟိရော ဥပစာရော နာမ ပရိက္ခေပတော၊ ပရိက္ခေပါရဟဋ္ဌာနတော ဝါ ဧကော လေဍ္ဍုပါတော။ ‘‘အဇ္ဈာရာမော နာမ ပရိက္ခိတ္တဿ အာရာမဿ အန္တောအာရာမော၊ အပရိက္ခိတ္တဿ ဥပစာရော။ အဇ္ဈာဝသထော နာမ ပရိက္ခိတ္တဿ အာဝသထဿ အန္တောအာဝသထော၊ အပရိက္ခိတ္တဿ ဥပစာရော’’တိအာဒီသု (ပါစိ။ ၅၀၆) ပန ဥပစာရသဒ္ဒေါ အဗ္ဘန္တရေ ဥပစာရေ ဒိဿတိ။ အဗ္ဘန္တရော ဥပစာရော စ နာမ ပရိက္ခေပေါ၊ ပရိက္ခေပါရဟဋ္ဌာနဉ္စ ဟောတိ။ ဣဓ ပန ပရိက္ခေပေါ ‘‘အဇ္ဈာရာမော၊ အဇ္ဈာဝသထော’’တိ ဝါ န ဝုစ္စတိ၊ အန္တော ဧဝ အာရာမော၊ အာဝသထောတိ ဝါ။ တေသု ဗာဟိရဗ္ဘန္တရဘေဒဘိန္နေသု ဒွီသု ဥပစာရေသု အဝိပ္ပဝါသသီမာဓိကာရေ ‘‘ဌပေတွာ ဂါမဉ္စ ဂါမူပစာရဉ္စာ’’တိ (မဟာဝ။ ၁၄၄) ဧတ္ထ ဂါမူပစာရော နာမ အဗ္ဘန္တရူပစာရော ¶ အဓိပ္ပေတော၊ န ဗာဟိရော။ ဘိက္ခုနိယာ အရညသညိတတာယ တဿ ဗာဟိရဿ၊ တဿာ ဂါမန္တရာပတ္တိယာ ဌာနဘူတတ္တာ စ အဗ္ဘန္တရဥပစာရဿာတိ ¶ ဣဒမေတ္ထ ကာရဏဒွယံ ဝေဒိတဗ္ဗံ။ တတ္ထ ဣဓ အဒိန္နာဒါနပါရာဇိကဝိဘင်္ဂေယေဝ ပဌမော ဂါမူပစာရော ဒဿိတော၊ သော ဗာဟိရော၊ ဒုတိယော အဗ္ဘန္တရောတိ ဝေဒိတဗ္ဗော။ ပဌမေန စ အပရိက္ခိတ္တဿ ဂါမဿ ဒုတိယလေဍ္ဍုပါတသင်္ခါတော ဗာဟိရော ဥပစာရော၊ ဒုတိယေန စ ပရိက္ခိတ္တဿ ဂါမဿ ပရိက္ခေပတော ဗာဟိရသင်္ခါတော အဗ္ဘန္တရော ဥပစာရော လေသေန ဒဿိတောတိ ဝေဒိတဗ္ဗော။ ဧဝံ စတ္တာရောပိ ဥပစာရာ ဣဓ ဘဂဝတာ ဒေသနာဝိလာသပ္ပတ္တေန ဒေသနာလီလာယ ဒဿိတာ ဟောန္တီတိ အယံ နယော သုဋ္ဌု လက္ခေတွာ အာစရိယေဟိ သမ္မန္တယိတွာ ယထာနုရူပံ တတ္ထ ယောဇေတဗ္ဗော။ ဣတရထာ –

အသမ္ဗုဓံ ဗုဒ္ဓမဟာနုဘာဝံ၊

ဓမ္မဿ ဂမ္ဘီရနယတ္တတဉ္စ၊

ယော ဝဏ္ဏယေ နံ ဝိနယံ အဝိညူ၊

သော ဒုဒ္ဒသော သာသနနာသဟေတု။

ပါဠိံ တဒတ္ထဉ္စ အသမ္ဗုဓဉှိ၊

နာသေတိ ယော အဋ္ဌကထာနယဉ္စ၊

အနိစ္ဆယံ နိစ္ဆယတော ပရေဟိ၊

ဂါမောတိ တေယေဝ ပုရက္ခတော သော။

အနုက္ကမေနေဝ မဟာဇနေန၊

ပုရက္ခတော ပဏ္ဍိတမာနိ ဘိက္ခု၊

အပဏ္ဍိတာနံ ဝိမတိံ အကတွာ၊

အာစရိယလီလံ ပုရတော ကရောတိ။

တတ္ထ ဟိ ပါဠိယံ ‘‘ဂါမဿ ဥပစာရော ဂါမူပစာရော၊ ဂါမသင်္ခါတော ဥပစာရော ဂါမူပစာရော နာမာ’’တိ ဥဒ္ဓရိတွာ ဂါမဿ ဥပစာရံ ဒဿေန္တော ‘‘ဣန္ဒခီလေ ဌိတဿ မဇ္ဈိမဿ ပုရိသဿ လေဍ္ဍုပါတော’’တိ (ပါရာ။ ၉၂) ဝတွာ ပုန ဂါမသင်္ခါတံ ဥပစာရံ ဒဿေန္တော ‘‘ဃရူပစာရေ ဌိတဿ မဇ္ဈိမဿ ပုရိသဿ လေဍ္ဍုပါတော’’တိ ဝုတ္တံ။ ဣမမတ္ထံ သန္ဓာယ ဝိကာလေ ဂါမပ္ပဝေသနဂါမန္တရအအပ္ပဝါသသမ္မုတိအာဒီသု ပရိက္ခေပါရဟဋ္ဌာနမေဝ ဂါမူပစာရန္တိ ဝုတ္တန္တိ လိခိတံ။

အတ္ထတော ¶ ဧကန္တိ ဧတ္ထ သင်္ခါသဒ္ဒံ သင်္ခါတသဒ္ဒေန သမာနယတိ။ ‘‘အာဒိယေယျာ’’တိ ဣဒံ ပဉ္စဝီသတိယာ အဝဟာရာနံ သာဓာရဏပဒံ။ ဌာနာစာဝနဝသေန စ ခီလာဒီနိ သင်္ကာမေတွာ ခေတ္တာဒိဂ္ဂဟဏဝသေန ¶ စာတိ အတ္ထော။ ဌာနာစာဝနေ ယထာ သာမိကဿ ဓုရနိက္ခေပါဒိံ အနောလောကေတွာဝ အာပတ္တိ၊ တထာ ဣဟာပီတိ ဂဟေတဗ္ဗာ။

‘‘အသုကံ နာမ ဘဏ္ဍံ အဝဟရိဿာမီ’’တိ သဗ္ဗေသံ ဧကာသယတ္တာ ‘‘ဧကေနာပီ’’တိ ဝုတ္တံ။ ယဒိ အာဏတ္တိ ဣစ္ဆိတဗ္ဗာ၊ သံဝိဓာဝဟာရော နာမ ဧကော အဝဟာရော ပရိဟာယိတဗ္ဗော။

ဩကာသပရိကပ္ပေ ဌာနာစာဝနာယ ဂဟိတမ္ပိ ဩကာသပရိကပ္ပိတတ္တာ ရက္ခတိ။ ဩကာသာတိက္ကမောဝ ပမာဏံ ပုဗ္ဗေ အသုဒ္ဓစိတ္တေန ဂဟိတတ္တာ။ ဣဒါနိ သုဒ္ဓစိတ္တေန ဂဟိတေပိ ဟောတိ ဧဝါတိ ဝဒန္တိ၊ တံ န သုန္ဒရံ။ ဧတ္ထ ပန ဝိနိစ္ဆယော သမန္တပါသာဒိကံ ဩလောကေတွာ ဂဟေတဗ္ဗော။

ဥဒ္ဓါရော နတ္ထီတိ ဌာနာစာဝနံ နတ္ထီတိ အတ္ထော။

ဥဒ္ဓတမတ္တေ အဝဟာရော သကလဿ ပယောဂဿ နိဋ္ဌာပိတတ္တာ၊ န အတ္ထသာဓကဝသေန။ ဥဒ္ဓါရေယေဝ ရက္ခတီတိ ဧတ္ထ ဧဝ-သဒ္ဒေန ပါတနေ န ရက္ခတီတိ အတ္ထေ သိဒ္ဓေပိ အတ္ထသာဓကဝသေန အတ္ထံ ဒဿေတုံ ‘‘တံ ဥဒ္ဓရိတွာ’’တိအာဒိ ဝုတ္တံ။

‘‘ပထဗျာရာဇပဒေသရာဇာဒယော ဗဟူ၊ တေသံ သင်္ဂဏှနတ္ထံ ‘ရာဇာနော’တိ ဗဟုဝစနံ ဝုတ္တ’’န္တိ လိခိတံ။ ကိဉ္စာပိ ဗဟုဝစနံ ကတံ၊ ဣဒံ ပန ဧကံ ဗိမ္ဗိသာရမေဝါတိ ဒဋ္ဌဗ္ဗံ။ ရာဇာနောတိ ကိဉ္စိ အနိဒ္ဒိသိတွာ သာဓာရဏဝသေန ကိဉ္စာပိ ဝုတ္တံ၊ ဣဒံ ပန ဗိမ္ဗိသာရမေဝါတိ။

ပုဗ္ဗပ္ပယောဂေတိ ဧတ္ထ ဂမနကာလေ မဂ္ဂသောဓနာဓိကရဏေ အပါစိတ္တိယခေတ္တေ ဒုက္ကဋံ၊ လတာစ္ဆေဒနာဒီသု ပါစိတ္တိယမေဝ။ ဂန္တွာ ပန ကုမ္ဘိမတ္ထကေ ဇာတလတာဒိစ္ဆေဒနေ သဟပယောဂတ္တာ ဒုက္ကဋံ။ ‘‘ဧကဘဏ္ဍေ ဧဝံ ဘာရိယမိဒံ၊ ‘တွမ္ပိ ဧကပဿံ ဂဏှ၊ အဟမ္ပိ ဧကပဿံ ဂဏှာမီ’တိ သံဝိဒဟိတွာ ဥဘယေသံ ပယောဂေန ဌာနာစာဝနေ ကတေ ကာယဝါစာစိတ္တေဟိ သမုဋ္ဌာတိ။ အညထာ သာဟတ္ထိကံ ဝါ အာဏတ္တိကဿ အင်္ဂံ န ဟောတိ ¶ ၊ အာဏတ္တိကံ ဝါ သာဟတ္ထိကဿာတိ ဝုတ္တလက္ခဏေန ဝိရုဇ္ဈတီ’’တိ ဝိနယဂဏ္ဌိပဒေ လိခိတံ။ ပိ-သဒ္ဒေါ ပနေတ္ထ တတ္ထေဝ လိခိတော။

ကာယဝါစာသမုဋ္ဌာနံ၊ ယဿာ အာပတ္တိယာ သိယာ၊

တတြ ဝါစင်္ဂံ စိတ္တံဝ၊ ကမ္မံ နဿာ ဝိဓီယတိ။

ကိရိယာကိရိယာဒိကံ ¶ ယဉ္စေ၊ ယမ္ပိ ကမ္မတ္တယံ ဘဝေ၊

န ယုတ္တံ တံ ဝိရုဒ္ဓတ္တာ၊ ကမ္မမေကံဝ ယုဇ္ဇတီတိ။ (ဝဇိရ။ ဋီ။ ပါရာဇိက ၁၃၁ ပကိဏ္ဏကကထာဝဏ္ဏနာ)၊

ဒုတိယပါရာဇိကဝဏ္ဏနာ နိဋ္ဌိတာ။

၃။ တတိယပါရာဇိကဝဏ္ဏနာ

ယထာ ဉာတပရိညာ ဓမ္မာနံ သဘာဝဇာနနမေဝ ‘‘ဣဒံ ရူပံ၊ အယံ ဝေဒနာ’’တိ၊ တီရဏပရိညာ ပန ဓမ္မသဘာဝေန သဒ္ဓိံ အနိစ္စာဒိဝသေန ပဝတ္တမာနံ ‘‘ရူပံ အနိစ္စန္တိ ဝါ’’တိအာဒိ၊ ဧဝမိဓ သဒ္ဓိံ စေတေတွာ ဧကတ္တေနာပိ ပါဏာတိပါတာဘာဝါ ‘‘ဇီဝိတာ ဝေါရောပေယျာ’’တိ ဝုတ္တံ။ ‘‘မနုဿဝိဂ္ဂဟ’’န္တိ ဝုတ္တတ္တာ ဂဗ္ဘသေယျကာနံ ဝသေန သဗ္ဗသုခုမအတ္တဘာဝတော ပဋ္ဌာယ ဒဿေတုံ ‘‘ကလလတော ပဋ္ဌာယာ’’တိ အာဟ။ ဧတ္ထ ဇီဝိတာ ဝေါရောပေန္တော ပစ္စုပ္ပန္နတော ဝိယောဇေတိ။ တတ္ထ ခဏပစ္စုပ္ပန္နံ န သက္ကာ ဝေါရောပေတုံ၊ သန္တတိပစ္စုပ္ပန္နံ ဝါ အဒ္ဓါပစ္စုပ္ပန္နံ ဝါ သက္ကာ။ ကထံ? တသ္မိဉှိ ဥပက္ကမေ ကတေ လဒ္ဓူပက္ကမံ ဇီဝိတဒသကံ နိရုဇ္ဈမာနံ ဒုဗ္ဗလဿ ပရိဟီနဝေဂဿ ပစ္စယော ဟောတိ။ သန္တတိပစ္စုပ္ပန္နံ ယထာ ဒွေ တယော ဇဝနဝါရေ ဇဝိတွာ နိရုဇ္ဈတိ၊ အဒ္ဓါပစ္စုပ္ပန္နဉ္စ တဒနုရူပံ ကတွာ နိရုဇ္ဈတိ၊ တထာ ပစ္စယော ဟောတိ။ တတော သန္တတိပစ္စုပ္ပန္နံ ဝါ အဒ္ဓါပစ္စုပ္ပန္နံ ဝါ ယထာပရိစ္ဆိန္နကာလံ အပတွာ အန္တရာဝ နိရုဇ္ဈတိ။ ဧဝံ တဒုဘယမ္ပိ ဝေါရောပေတုံ သက္ကာ။ တသ္မာ ပစ္စုပ္ပန္နံ ဝိယောဇေတိ။

‘‘ဣမဿ ပနတ္ထဿာ’’တိ ဝေါဟာရဝသေန ဝုတ္တမတ္ထံ ပရမတ္ထဝသေန အာဝိဘာဝတ္ထံ ‘‘ပါဏော ဝေဒိတဗ္ဗော’’တိအာဒိ ဝုတ္တံ။ ကာယဝိညတ္တိသဟိတာယ စေတနာယ ပယုဇ္ဇတီတိ ပယောဂေါ၊ ကော သော? သရီရေ သတ္ထာဒီနံ ဂမနံ ပဟရဏန္တိ ကာယဝစီဝိညတ္တိသဟိတာယ စေတနာယ ပရသရီရေ သတ္ထပါတနံ။ ဒူရေ ဌိတန္တိ ဒူရေ ဝါ တိဋ္ဌတု၊ သမီပေ ဝါ။ ဟတ္ထတော ¶ မုတ္တေန ပဟာရော နိဿဂ္ဂိယော။ တတ္ထာတိ နိဿဂ္ဂိယပ္ပယောဂေ။ ယော ကောစိ မရတူတိ ဧတ္ထ မဟာဇနသမူဟေ န သက္ကာ။ ယဿူပရိ သရော ပတတိ၊ တဿေဝ ဇီဝိတမရဏံ ကာတုံ၊ န ယဿ ကဿစိ ဇီဝိတမရဏံ။ အာဏာပနန္တိ ဝစီဝိညတ္တိသဟိတာယ စေတနာယ အဓိပ္ပေတတ္ထသာဓနံ။ တေနေဝ ‘‘သာဝေတုကာမော န သာဝေတီ’’တိ (ပါရာ။ ၅၄) ဝုတ္တံ။ အာဏတ္တိနိယာမကာတိ အာဏတ္တိကပ္ပယောဂသာဓိကာ။ ဧတေသု ဟိ အဝိရဇ္ဈိတေသု ဧဝ အာဏတ္တိပယောဂေါ ဟောတိ၊ န အညထာ။

ရူပူပဟာရောတိ ¶ ဧတ္ထ –

‘‘မမာလာဘေန ဧသိတ္ထီ၊ မရတူ’’တိ သမီပဂေါ၊

ဒုဋ္ဌစိတ္တော သစေ ယာတိ၊ ဟောတိ သော ဣတ္ထိမာရကော။

ဘိက္ခတ္ထာယ သစေ ယာတိ၊ ဇာနန္တောပိ န မာရကော၊

အနတ္ထိကော ဟိ သော တဿာ၊ မရဏေန ဥပေက္ခကော။

ဝိယောဂေန စ မေ ဇာယာ၊ ဇနနီ စ န ဇီဝတိ၊

ဣတိ ဇာနံ ဝိယုဉ္ဇန္တော၊ တဒတ္ထိကော ဟောတိ မာရကော။

ပဗ္ဗဇ္ဇာဒိနိမိတ္တဉ္စေ၊ ယာတိ ဇာနံ န မာရကော၊

အနတ္ထိကော ဟိ သော တဿာ၊ မရဏေန ဥပေက္ခကော။

ဟာရကသဒ္ဒဿ ဘေဒတော အတ္ထံ ဝိတ္ထာရေတွာ ဥဘယမ္ပိ ဧကမေဝါတိ ဒဿေတုံ ‘‘သတ္ထဉ္စ တံ ဟာရကဉ္စာ’’တိအာဒိ ဝုတ္တံ။ ဧတေန ထာဝရပ္ပယောဂံ ဒဿေတိ သာဟတ္ထိကာဒီသု ပယောဂေသု။ ‘‘ဣတိ စိတ္တမနော’’တိ ဥဒ္ဓရိတွာပိ ဣတိသဒ္ဒဿ အတ္ထော န တာဝ ဝုတ္တော။ ကိဉ္စာပိ န ဝုတ္တော၊ အဓိကာရဝသေန ပန အာဂတံ ဣတိသဒ္ဒံ ယောဇေတွာ ဣတိ စိတ္တသင်္ကပ္ပောတိ ဧတ္ထ ‘‘မရဏသညီ မရဏစေတနော မရဏာဓိပ္ပာယော’’တိ ဝုတ္တတ္တာ မရဏံယေဝ ဝက္ခတီတိ ဝေဒိတဗ္ဗော။ ဝုတ္တနယေနာတိ ဆပ္ပယောဂဝသေန။ သာဟတ္ထိကနိဿဂ္ဂိယပ္ပယောဂေသု သန္နိဋ္ဌာပကစေတနာယ သတ္တမာယ သဟ ဥပ္ပန္နကာယဝိညတ္တိယာ သာဟတ္ထိကတာ ဝေဒိတဗ္ဗာ။ အာဏတ္တိကေ ပန သတ္တဟိပိ စေတနာဟိ သဟ ဝစီဝိညတ္တိသမ္ဘဝတော သတ္တ သတ္တ သဒ္ဒါ ဧကတော ဟုတွာ ဧကေကက္ခရဘာဝံ ဂန္တွာ ယတ္တကေဟိ အက္ခရေဟိ ¶ အတ္တနော အဓိပ္ပာယံ ဝိညာပေန္တိ၊ တဒဝသာနက္ခရသမုဋ္ဌာပိကာယ သတ္တမစေတနာယ သဟဇာတဝစီဝိညတ္တိယာ အာဏတ္တိကတာ ဝေဒိတဗ္ဗာ။

တတိယပါရာဇိကဝဏ္ဏနာ နိဋ္ဌိတာ။

၄။ စတုတ္ထပါရာဇိကဝဏ္ဏနာ

ဣဓေဝ သင်္ဂဟန္တိ ‘‘ဣတိ ဇာနာမိ၊ ဣတိ ပဿာမီ’’တိ ပဒေ ကထန္တိ စေ၊ ‘‘ဣတိ ဇာနာမီ’’တိအာဒိမာဟ ¶ ။ ကေဝလံ ‘‘ပါပိစ္ဆတာယာ’’တိ (ကင်္ခါ။ အဋ္ဌ။ စတုတ္ထပါရာဇိကဝဏ္ဏနာ) ဝစနတော မန္ဒတ္တာ မောမူဟတ္တာ သမုဒါစရန္တဿ အနာပတ္တီတိ ဒီပိတံ။ ‘‘အတီတကာလေ သောတာပန္နောမှီ’’တိ ဝဒန္တော ပရိယာယေန ဝဒတိ၊ ‘‘ယော တေ ဝိဟာရေ ဝသတိ၊ သော ဘိက္ခု အရဟာ’’တိအာဒီသု (ပရိ။ ၁၆၅) ဝိယ သိက္ခာပဒေပိ ‘‘ဣတိ ဇာနာမီ’’တိ (ပါရာ။ ၁၉၅၊ ၁၉၇) ပစ္စုပ္ပန္နမေဝ ဝုတ္တံ။

စတုတ္ထပါရာဇိကဝဏ္ဏနာ နိဋ္ဌိတာ။

မာတုဃာတကပိတုဃာတကအရဟန္တဃာတကာ တတိယပါရာဇိကံ အာပန္နာ၊ ဘိက္ခုနိဒူသကော၊ လမ္ဗီအာဒယော စ စတ္တာရော ပဌမပါရာဇိကံ အာပန္နာ ဧဝါတိ ကတွာ ကုတော စတုဝီသတီတိ စေ? န၊ အဓိပ္ပာယာဇာနနတော။ မာတုဃာတကာဒယော ဟိ စတ္တာရော ဣဓာနုပသမ္ပန္နာ ဧဝ အဓိပ္ပေတာ၊ လမ္ဗီအာဒယော စတ္တာရော ကိဉ္စာပိ ပဌမပါရာဇိကေန သင်္ဂဟိတာ၊ ယသ္မာ ပန ဧကေန ပရိယာယေန မေထုနဓမ္မံ ပဋိသေဝိနော ဟောန္တိ၊ တသ္မာ ဝိသုံ ဝုတ္တာ။ န လဘတိ ဘိက္ခူဟီတိ ဧတ္ထ ‘‘ဥပေါသထာဒိဘေဒံ သံဝါသ’’န္တိ ဧတ္တကံ ဝုတ္တံ။ ဝိနယဋ္ဌကထာယံ ‘‘ဥပေါသထပ္ပဝါရဏာပါတိမောက္ခုဒ္ဒေသသင်္ဃကမ္မပ္ပဘေဒ’’န္တိ ဝုတ္တံ။ ပါဠိယံ ‘‘သံဝါသော နာမ ဧကကမ္မံ ဧကုဒ္ဒေသော သမသိက္ခတာ’’တိ (ပါရာ။ ၅၅၊ ၉၂၊ ၁၇၂၊ ၁၉၈) ဝုတ္တံ။ တိဝိဓေနာပိ သင်္ဃကမ္မံ ကာတုံ န ဝဋ္ဋတီတိ ပဋိက္ခိတ္တံ။ ‘‘န၊ ဘိက္ခဝေ၊ ဂဟဋ္ဌေန နိသိန္နပရိသာယ ပါတိမောက္ခံ ဥဒ္ဒိသိတဗ္ဗ’’န္တိအာဒိ (မဟာဝ။ ၁၅၄) ပါတိမောက္ခပ္ပဝါရဏာသု ဧဝ အာဂတံ၊ အညေသု စ ဧဝရူပေသု ဌာနေသု သေသံ ကမ္မံ ကာတုံ နတ္ထိ ပဋိက္ခေပေါ။ အာစရိယာပိ ‘‘သေသံ ကမ္မံ ကာတုံ ဝဋ္ဋတိ၊ နတ္ထိ အာပတ္တီ’’တိ ဝဒန္တိ။ ‘‘အန္တိမဝတ္ထု အဇ္ဈာပန္နံ အမူလကေန ပါရာဇိကေန စောဒေန္တဿ သင်္ဃာဒိသေသော၊ သင်္ဃာဒိသေသေန ¶ စောဒေန္တဿ ပါစိတ္တိယန္တိ ဘိက္ခုနော ဝိယ ဝုတ္တံ၊ န အနုပသမ္ပန္နဿ ဝိယ ဒုက္ကဋံ။ တသ္မာ တေန သဟသေယျာ၊ တဿ ပဋိဂ္ဂဟဏဉ္စ ဘိက္ခုဿ ဝဋ္ဋတီတိ အာစရိယာ ဝဒန္တီ’’တိ လိခိတံ။ ‘‘ယထာ ပုရေ တထာ ပစ္ဆာတိ ‘ဧကကမ္မံ ဧကုဒ္ဒေသော သမသိက္ခတာ’တိ ဧဝံ ဝုတ္တသံဝါသဿ အဘဗ္ဗတာမတ္တံ သန္ဓာယ ဝုတ္တ’’န္တိ ဝဒန္တိ၊ ဝီမံသိတဗ္ဗံ။

ဣဒါနိ စတုန္နမ္ပိ သာဓာရဏံ ပကိဏ္ဏကံ – မေထုနဓမ္မံ ပဋိသေဝန္တော အတ္ထိ ကောစိ ပါရာဇိကော ဟောတိ အသံဝါသော၊ အတ္ထိ ကောစိ န ပါရာဇိကော ဟောတိ အသံဝါသော၊ အတ္ထိ ကောစိ န ပါရာဇိကော သံဝါသော ဒုက္ကဋဝတ္ထုသ္မိံ ဝါ ထုလ္လစ္စယဝတ္ထုသ္မိံ ဝါ ပဋိသေဝန္တော၊ အတ္ထိ ကောစိ န ပါရာဇိကော ပက္ခပဏ္ဍကော အပဏ္ဍကပက္ခေ ဥပသမ္ပန္နော ပဏ္ဍကပက္ခေ မေထုနဓမ္မံ ပဋိသေဝန္တော။ သော အာပတ္တိံ နာပဇ္ဇတီတိ န ပါရာဇိကော နာမ။ န ဟိ အဘိက္ခုဿ အာပတ္တိ နာမ အတ္ထိ။ သော ¶ အနာပတ္တိကတ္တာ အပဏ္ဍကပက္ခေ အာဂတော ကိံ အသံဝါသော ဟောတိ၊ န ဟောတီတိ? ဟောတိ။ ‘‘အဘဗ္ဗော တေန သရီရဗန္ဓနေနာ’’တိ (မဟာဝ။ ၁၂၉) ဟိ ဝုတ္တံ။ ‘‘ယော ပန ဘိက္ခု ဘိက္ခူနံ သိက္ခာသာဇီဝသမာပန္နော…ပေ… အသံဝါသော’’တိ (ပါရာ။ ၄၄) ဝုတ္တတ္တာ ယော ဘိက္ခုဘာဝေန မေထုနံ ဓမ္မံ ပဋိသေဝတိ၊ သော ဧဝ အဘဗ္ဗော။ နာယံ အပါရာဇိကတ္တာတိ စေ? န၊ ‘‘ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော’’တိ (မဟာဝ။ ၁၂၆) ဝုတ္တဋ္ဌာနေ ယထာ အဘိက္ခုနာ ကမ္မဝါစာယ သာဝိတာယပိ ကမ္မံ ရုဟတိ ကမ္မဝိပတ္တိယာ အသမ္ဘဝတော၊ ဧဝံသမ္ပဒမိဒံ ဒဋ္ဌဗ္ဗံ။ တတြာယံ ဝိသေသော – ဥပသမ္ပန္နပုဗ္ဗော ဧဝံ စေ ကမ္မဝါစံ သာဝေတိ၊ သင်္ဃော စ တသ္မိံ ဥပသမ္ပန္နသညီ ဧဝ စေ၊ ကမ္မံ ရုဟတိ၊ နာညထာတိ နော ခန္တီတိ အာစရိယော။

ဂဟဋ္ဌော ဝါ တိတ္ထိယော ဝါ ပဏ္ဍကော ဝါ ကမ္မဝါစံ သာဝေတိ၊ သင်္ဃေန ကမ္မဝါစာ န ဝုတ္တာ ဟောတိ။ ‘‘သင်္ဃော ဥပသမ္ပာဒေယျ သင်္ဃော ဥပသမ္ပာဒေတိ၊ ဥပသမ္ပန္နော သင်္ဃေနာ’’တိ (မဟာဝ။ ၁၂၇) ဟိ ဝစနတော သင်္ဃေန ကမ္မဝါစာယ ဝတ္တဗ္ဗတာယ သင်္ဃပရိယာပန္နေန၊ သင်္ဃပရိယာပန္နသညိတေန ဝါ ဧကေန ဝုတ္တာယ သင်္ဃေန ဝုတ္တာ ဟောတီတိ ဝေဒိတဗ္ဗော၊ န ဂဟဋ္ဌတိတ္ထိယပဏ္ဍကာဒီသု အညတရေန။ အယမေဝ သဗ္ဗကမ္မေသု ယုတ္တိ ဒဋ္ဌဗ္ဗာ။

တထာ အတ္ထိ မေထုနံ ဓမ္မံ ပဋိသေဝန္တော ကောစိ နာသေတဗ္ဗော၊ ‘‘ယော ဘိက္ခုနိဒူသကော၊ အယံ နာသေတဗ္ဗော’’တိ (မဟာဝ။ ၁၁၄-၁၁၅ အတ္ထတော သမာနံ) ဝုတ္တတ္တာ တေန ဧဝ သော အနုပသမ္ပန္နောဝ ¶ သဟသေယျာပတ္တိံ ဝါ အညံ ဝါ တာဒိသံ ဇနေတိ၊ တဿ ဩမသနေ စ ဒုက္ကဋံ ဟောတိ။ အဘိက္ခုနိယာ မေထုနဓမ္မံ ပဋိသေဝန္တော န နာသေတဗ္ဗော၊ ‘‘အန္တိမဝတ္ထုံ အဇ္ဈာပန္နော၊ ဘိက္ခဝေ၊ အနုပသမ္ပန္နော န ဥပသမ္ပာဒေတဗ္ဗော’’တိ ပါဠိယာ အဘာဝတော၊ တေနေဝ သော ဥပသမ္ပန္နသင်္ခံ ဂစ္ဆတိ၊ သဟသေယျာပတ္တိအာဒိံ န ဇနေတိ၊ ကေဝလံ အသံဝါသောတိ ကတွာ ဂဏပူရကော န ဟောတိ။ ဧကကမ္မဧကုဒ္ဒေသော ဟိ သံဝါသောတိ ဝုတ္တော၊ သမသိက္ခတာပိ သံဝါသောတိ ကတွာ သော တေန သဒ္ဓိံ နတ္ထီတိ။ ပဒသောဓမ္မာပတ္တိံ ပန ဇနေတီတိ ကာရဏစ္ဆာယာ ဒိဿတီတိ။ ယထာ ဘိက္ခုနိယာ သဒ္ဓိံ ဘိက္ခုသင်္ဃဿ ဧကကမ္မာဒိနော သံဝါသဿ အဘာဝါ ဘိက္ခုနီ အသံဝါသာ ဘိက္ခုဿ၊ တထာ ဘိက္ခု စ ဘိက္ခုနိယာ၊ ပဒသောဓမ္မာပတ္တိံ ပန န ဇနေတိ။ တထာ အန္တိမဝတ္ထုံ အဇ္ဈာပန္နောပိ ဧကေစ္စော ‘‘ယော နာသေတဗ္ဗောတိ ဝုတ္တော’’တိ ဣမိနာ နိဒဿနေန သကာရဏစ္ဆာယာ အဇ္ဈုပေက္ခိတာ ဟောတီတိ န ဂဟဏံ ဂစ္ဆတိ။ အပိစ ‘‘ဥဘော နာသေတဗ္ဗာ၊ ဒူသကော နာသေတဗ္ဗော’’တိ (ပါရာ။ ၆၆) ဝစနတော၊ ‘‘မေတ္တိယံ ဘိက္ခုနိံ နာသေထာ’’တိ (ပါရာ။ ၃၈၄) ဝစနတော စ ယော သင်္ဃမဇ္ဈံ ပဝိသိတွာ အနုဝိဇ္ဇကေန အနုဝိဇ္ဇိယမာနော ပရာဇိတော၊ သောပိ အနုပသမ္ပန္နောဝ၊ န ဩမသဝါဒပါစိတ္တိယံ ဇနေတီတိ ဝေဒိတဗ္ဗော။

အပိစေတ္ထ ¶ သိက္ခာပစ္စက္ခာတကစတုက္ကံ ဝေဒိတဗ္ဗံ။ အတ္ထိ ဟိ ပုဂ္ဂလော သိက္ခာပစ္စက္ခာတကော န သိက္ခာသာဇီဝသမာပန္နော၊ အတ္ထိ ပုဂ္ဂလော န သိက္ခာပစ္စက္ခာတကော သိက္ခာသာဇီဝသမာပန္နော၊ အတ္ထိ ပုဂ္ဂလော သိက္ခာပစ္စက္ခာတကော စေဝ သိက္ခာသာဇီဝသမာပန္နော စ၊ အတ္ထိ ပုဂ္ဂလော နေဝ သိက္ခာပစ္စက္ခာတကော န သိက္ခာသာဇီဝသမာပန္နော။ တတ္ထ တတိယော ဘိက္ခုနီ သိက္ခာပစ္စက္ခာတကာ ဝေဒိတဗ္ဗာ။ သာ ဟိ ယာဝ န လိင်္ဂံ ပရိစ္စဇတိ၊ ကာသာဝေသု သဥဿာဟာဝ သမာနာ သာမညာ စဝိတုကာမာ သိက္ခံ ပစ္စက္ခန္တီပိ ဘိက္ခုနီ ဧဝ သိက္ခာသာဇီဝသမာပန္နာဝ။ ဝုတ္တဉှိ ဘဂဝတာ ‘‘နတ္ထိ၊ ဘိက္ခဝေ၊ ဘိက္ခုနိယာ သိက္ခာပစ္စက္ခာန’’န္တိ။ ကဒါ ပန သာ အဘိက္ခုနီ ဟောတီတိ? ယဒါ သာ ဝိဗ္ဘန္တာတိ သင်္ခံ ဂစ္ဆတိ။ ဝုတ္တဉှိ ဘဂဝတာ ‘‘ယဒေဝ သာ ဝိဗ္ဘန္တာ၊ တဒေဝ သာ အဘိက္ခုနီ’’တိ (စူဠဝ။ ၄၃၄)။ ကိတ္တာဝတာ ပန ဝိဗ္ဘန္တာ ဟောတီတိ? သာမညာ စဝိတုကာမာ ကာသာဝေသု အနာလယာ ကာသာဝံ ဝါ အပနေတိ၊ နဂ္ဂါ ဝါ ဂစ္ဆတိ၊ တိဏပဏ္ဏာဒိနာ ဝါ ပဋိစ္ဆာဒေတွာ ဂစ္ဆတိ၊ ကာသာဝံယေဝ ¶ ဝါ ဂိဟိနိဝါသနာကာရေန နိဝါသေတိ၊ ဩဒါတံ ဝါ ဝတ္ထံ နိဝါသေတိ၊ လိင်္ဂေနေဝ ဝါ သဒ္ဓိံ တိတ္ထိယေသု ပဝိသိတွာ ကေသလုဉ္စနာဒိဝတံ သမာဒိယတိ၊ တိတ္ထိယလိင်္ဂံ ဝါ သမာဒိယတိ၊ တဒါ ဝိဗ္ဘန္တာ နာမ ဟောတိ။ တတ္ထ ယာ သလိင်္ဂေ ဌိတာဝ တိတ္ထိယဝတံ သမာဒိယတိ၊ သာ တိတ္ထိယပက္ကန္တဘိက္ခု ဝိယ ပစ္ဆာ ပဗ္ဗဇ္ဇမ္ပိ န လဘတိ။ သေသာ ပဗ္ဗဇ္ဇမေဝ လဘတိ၊ န ဥပသမ္ပဒံ။ ပါဠိယံ ကိဉ္စာပိ ‘‘ယာ၊ ဘိက္ခဝေ၊ ဘိက္ခုနီ သကာဝါသာ တိတ္ထာယတနံ သင်္ကန္တာ၊ သာ အာဂတာ န ဥပသမ္ပာဒေတဗ္ဗာ’’တိ (စူဠဝ။ ၄၃၄) ဝစနတော ယာ ပဌမံ ဝိဗ္ဘမိတွာ ပစ္ဆာ တိတ္ထာယတနံ သင်္ကန္တာ၊ သာ အာဂတာ ဥပသမ္ပာဒေတဗ္ဗာတိ အနုညာတံ ဝိယ ဒိဿတိ။ သင်္ဂီတိအာစရိယေဟိ ပန ‘‘စတုဝီသတိ ပါရာဇိကာနီ’’တိ (ပါရာ။ အဋ္ဌ။ ၂။၂၃၃) ဝုတ္တတ္တာ န ပုန သာ ဥပသမ္ပာဒေတဗ္ဗာ။ တသ္မာ ဧဝ သိက္ခာပစ္စက္ခာနံ နာနုညာတံ ဘဂဝတာ။ အန္တိမဝတ္ထုံ အဇ္ဈာပန္နာ ပန ဘိက္ခုနီ ဧဝ။ ပက္ခပဏ္ဍကီပိ ဘိက္ခုနီ ဧဝ။ ဣမံ နယံ စတူသုပိ ယောဇေတွာ ယထာရဟံ ကထေတဗ္ဗံ။

ပါရာဇိကဝဏ္ဏနာ နိဋ္ဌိတာ။

သင်္ဃာဒိသေသကဏ္ဍံ

၁။ သုက္ကဝိဿဋ္ဌိသိက္ခာပဒဝဏ္ဏနာ

အညတြ ¶ ¶ သုပိနန္တာတိ သွာယံ ဒုဗ္ဗလဝတ္ထုကတ္တာ စေတနာယ ပဋိသန္ဓိံ အာကဍ္ဎိတုံ အသမတ္ထာ၊ သုပိနေ ဥပဋ္ဌိတံ နိမိတ္တဉှိ ဒုဗ္ဗလံ။ ပဝတ္တေ ပန အညေဟိ ကုသလာကုသလေဟိ ဥပတ္ထမ္ဘိတာ ဝိပါကံ ဒေတိ။ ကိဉ္စာပိ ဝိပါကံ ဒေတိ၊ အထ ခေါ အဝိသယေ ဥပ္ပန္နတ္တာ အဗ္ဗောဟာရိကာဝ သုပိနန္တစေတနာတိ လိခိတံ။ ယံ ပနေတ္ထ ‘‘သုပိနေ ဥပဋ္ဌိတံ နိမိတ္တဉှိ ဒုဗ္ဗလ’’န္တိ ဝုတ္တံ၊ တံ အနေကန္တံ၊ န စ အာရမ္မဏဒုဗ္ဗလတာယ စိတ္တပ္ပဝတ္တိ ဒုဗ္ဗလာ အတီတာနာဂတာရမ္မဏာယ၊ ပညတ္တာရမ္မဏာယ ဝါ အဒုဗ္ဗလတ္တာ။ တသ္မာ ဒုဗ္ဗလဝတ္ထုကတ္တာတိ ဒုဗ္ဗလဟဒယဝတ္ထုကတ္တာတိ နော တက္ကောတိ (ဝဇိရ။ ဋီ။ ပါရာဇိက ၂၃၆-၂၃၇) အာစရိယော။ အဝတ္ထုကတာယ ဒုဗ္ဗလဘာဝေါ ယုဇ္ဇတီတိ စေ? န၊ အဝတ္ထုကာယ ဘာဝနာပဘဝါယ အတိရေကဗလဝသမ္ဘဝတော။ ဘာဝနာဗလသမပ္ပိတဉှိ စိတ္တံ အရူပမ္ပိ သမာနံ အတိဘာရမ္ပိ ကရဇကာယံ ဂဟေတွာ ဧကစိတ္တက္ခဏေနေဝ ဗြဟ္မလောကမ္ပိ ပါပေတွာ ဌပေတိ၊ တပ္ပဋိဘာဂံ အနပ္ပိတမ္ပိ ကာမာဝစရစိတ္တံ ကရဇကာယံ အာကာသေ လင်္ဃနသမတ္ထံ ကရောတိ။ ကိံ ပနေတ္ထ တံ အနုမာနကရဏံ? ယေန စိတ္တဿေဝ အာနုဘာဝေါတိ ပညာယေယျ စိတ္တာနုဘာဝေန ဌပနလင်္ဃနာဒိကိရိယာဝိသေသနိဗ္ဗတ္တိဒဿနတော။ ပကတိစိတ္တသမုဋ္ဌာနရူပံ ဝိယ အသံသဋ္ဌတ္တာ၊ နိက္ခမနတ္တာ စ ဝတ္ထိသီသံ၊ ကဋိ၊ ကာယောတိ တိဓာ သုက္ကဿ ဌာနံ ပကပ္ပေန္တိ အာစရိယာ။ သပ္ပဝိသံ ဝိယ တံ ဒဋ္ဌဗ္ဗံ၊ န စ ဝိသေ ဌာနနိယမော၊ ကောဓဝသေန ပဿန္တဿ ဟောတိ။ ဧဝမဿ န ဌာနနိယမော၊ ရာဂဝသေန ဥပက္ကမန္တဿ ဟောတီတိ နော တက္ကောတိ အာစရိယော။

‘‘ဒကသောတံ အနောတိဏ္ဏေပီ’’တိ ဣဒံ ‘‘ဩတိဏ္ဏမတ္တေ’’တိ ဣမိနာ ဝိရုဇ္ဈတီတိ စေ၊ တံ ဒဿေတုံ ‘‘ဌာနတော ပန စုတ’’န္တိအာဒိမာဟ။ တဿတ္ထော – နိမိတ္တေ ဥပက္ကမံ ကတွာ သုက္ကံ ဌာနာ စာဝေတွာ ပုန ဝိပ္ပဋိသာရဝသေန ဒကသောတောရောဟဏံ နိဝါရေတုံ န သက္ကာ၊ တထာပိ အဓိဝါသာဓိပ္ပာယေန ¶ အဓိဝါသေတွာ အန္တရာ ဒကသောတတော ဥဒ္ဓံ နိဝါရေတုံ အသက္ကုဏေယျတာယ ‘‘ဗဟိ နိက္ခန္တေ ဝါ’’တိ ဝုတ္တံ၊ တသ္မာ ဌာနာ စုတဉှိ အဝဿံ ¶ ဒကသောတံ ဩတရတီတိ အဋ္ဌကထာယ အဓိပ္ပာယော။ တသ္မာ ဥဘယံ သမေတီတိ ဂဟေတဗ္ဗော။

ဧတ္ထာဟ – ကသ္မာ ဣမသ္မိံ သိက္ခာပဒေ ‘‘ယော ပန ဘိက္ခူ’’တိအာဒိနာ ကာရကော န နိဒ္ဒိဋ္ဌောတိ? ဝုစ္စတေ – အဓိပ္ပာယာပေက္ခာယ ဘာဝတော ကာရကော န နိဒ္ဒိဋ္ဌော တဿ သာပေက္ခဘာဝဒဿနတ္ထံ။ ကထံ? ကဏ္ဍုဝနာဒိအဓိပ္ပာယစေတနာဝသေန စေတေန္တဿ ကဏ္ဍုဝနာဒိဥပက္ကမေန ဥပက္ကမန္တဿ မေထုနရာဂဝသေန ဦရုအာဒီသု ဒုက္ကဋဝတ္ထူသု၊ ဝဏာဒီသု ထုလ္လစ္စယဝတ္ထူသု စ ဥပက္ကမန္တဿ သုက္ကဝိသဋ္ဌိယာ သတိပိ န သင်္ဃာဒိသေသော ‘‘အနာပတ္တိ ဘိက္ခု န မောစနာဓိပ္ပာယဿာ’’တိ (ပါရာ။ ၂၆၃) ဝစနတော။ တသ္မာ တဒတ္ထဒဿနတ္ထံ ဣဓ ကာရကော န နိဒ္ဒိဋ္ဌော။ အညထာ ‘‘ယော ပန ဘိက္ခု သဉ္စေတနိကံ သုက္ကဝိသဋ္ဌိံ အာပဇ္ဇေယျ၊ သင်္ဃာဒိသေသော’’တိ နိဒ္ဒိဋ္ဌေ ကာရကေ ‘‘စေတေတိ န ဥပက္ကမတိ မုစ္စတိ၊ အနာပတ္တီ’’တိ (ပါရာ။ ၂၆၂) ဝုတ္တဝစနဝိရောဓော။ တထာ ‘‘သဉ္စေတနိကာယ သုက္ကဝိသဋ္ဌိယာ အညတြ သုပိနန္တာ သင်္ဃာဒိသေသော’’တိ ဘုမ္မေ နိဒ္ဒိဋ္ဌေပိ သော ဧဝ ဝိရောဓော ဟေတွတ္ထနိယမသိဒ္ဓိတော။ တသ္မာ တဒုဘယမ္ပိ ဝစနက္ကမံ အဝတွာ ‘‘သဉ္စေတနိကာ သုက္ကဝိသဋ္ဌိ အညတြ သုပိနန္တာ သင်္ဃာဒိသေသော’’တိ ဝုတ္တံ။ တတ္ထ နိမိတ္တတ္ထေ ဘုမ္မဝစနာဘာဝတော ဟေတွတ္ထနိယမော န ကတော ဟောတိ။ တသ္မိံ အကတေ သဉ္စေတနိကာ သုက္ကဝိသဋ္ဌိ အညတြ သုပိနန္တာ သင်္ဃာဒိသေသောတိ၊ ဥပက္ကမေ အသတိ အနာပတ္တီတိ အယမတ္ထော ဒီပိတော ဟောတီတိ ဝေဒိတဗ္ဗံ။

ဣမသ္မိံ သိက္ခာပဒေ ဒွေ အာပတ္တိသဟဿာနိ ဟောန္တိ။ ကထံ? အတ္တနော ဟတ္ထာဒိဘေဒေ အဇ္ဈတ္တရူပေ ရာဂူပတ္ထမ္ဘနဝသေန အင်္ဂဇာတေ ကမ္မနိယပ္ပတ္တေ အာရောဂျတ္ထာယ နီလံ မောစေန္တဿ ဧကာ အာပတ္တိ၊ အဇ္ဈတ္တရူပေ ဧဝ ရာဂူပတ္ထမ္ဘေ ပီတကာဒီနံ မောစနဝသေန နဝါတိ ဒသ။ ဧဝံ ‘‘သုခတ္ထာယာ’’တိအာဒီနံ နဝန္နံ ဝသေနာတိ ရာဂူပတ္ထမ္ဘေ အဇ္ဈတ္တရူပဝသေန သတံ။ ဧဝမေဝံ ဝစ္စပ္ပဿာဝဝါတဥစ္စာလိင်္ဂပါဏကဒဋ္ဌူပတ္ထမ္ဘေသု စ သတံ သတံ ကတွာ သဗ္ဗံ ပဉ္စသတံ။ ယထာ အဇ္ဈတ္တရူပေ ပဉ္စသတံ၊ ဧဝံ ဗဟိဒ္ဓါရူပေ ဝါ အဇ္ဈတ္တဗဟိဒ္ဓါရူပေ ဝါ အာကာသေ ဝါ ကဋိံ ကမ္ပေန္တောတိ ဒွေ သဟဿာနိ အာပတ္တိယော ဟောန္တီတိ။

သုက္ကဝိဿဋ္ဌိသိက္ခာပဒဝဏ္ဏနာ နိဋ္ဌိတာ။

၂။ ကာယသံသဂ္ဂသိက္ခာပဒဝဏ္ဏနာ

‘‘ဩတိဏ္ဏော’’တိ ¶ ¶ ဣမိနာဿ သေဝနာဓိပ္ပာယတာ ဒဿိတာ။ တေနေဝ ‘‘ကာယသံသဂ္ဂရာဂသမင်္ဂိဿေတံ အဓိဝစန’’န္တိ ဝုတ္တံ။ ‘‘ဝိပရိဏတေန…ပေ… သဒ္ဓိ’’န္တိ ဣမိနာဿ ဝါယာမော ဒဿိတော။ ‘‘သဒ္ဓိ’’န္တိ ဟိ ပဒံ သံယောဂံ ဒီပေတိ၊ သော စ သံယောဂေါ သမာဂမော။ ကေန စိတ္တေန? ဝိပရိဏတေန စိတ္တေန၊ န ပတ္တပ္ပဋိဂ္ဂဟဏာဓိပ္ပာယာဒိနာတိ အဓိပ္ပာယော။ ‘‘ကာယသံသဂ္ဂံ သမာပဇ္ဇေယျာ’’တိ ဣမိနာဿ ဝါယမတော ဖဿပ္ပဋိဝိဇာနနာ ဒဿိတာ ဟောတိ။ ဝါယမိတွာ ဖဿံ ပဋိဝိဇာနန္တော ဟိ သမာပဇ္ဇတိ နာမ။ ဧဝမဿ တိဝင်္ဂသမ္ပတ္တိ ဒဿိတာ ဟောတိ။ အထ ဝါ ဩတိဏ္ဏော ဝိပရိဏတေန စိတ္တေန ယက္ခာဒိနာ သတ္တော ဝိယ။ ဥပယောဂတ္ထေ ဝါ ဧတံ ကရဏဝစနံ၊ ဩတိဏ္ဏော ဝိပရိဏတံ စိတ္တံ ကူပါဒိံ ဝိယ သတ္တော။ အထ ဝါ ‘‘ရာဂတော ဥတ္တိဏ္ဏော ဘဝိဿာမီ’’တိ ဘိက္ခုဘာဝံ ဥပဂတောပိ ယော ပန ဘိက္ခု တတော ဥတ္တိဏ္ဏာဓိပ္ပာယတော ဝိပရိဏတေန စိတ္တေန ဟေတုဘူတေန တမေဝ ရာဂံ ဩတိဏ္ဏော။ မာတုဂါမေန အတ္တနော သမီပံ ဝါ အာဂတေန၊ အတ္တနာ ဥပဂတေန ဝါ။ ဧတေန မာတုဂါမဿ သာရတ္တတာ ဝါ ဟောတု၊ ဝိရတ္တတာ ဝါ၊ သာ ဣဓ အပ္ပမာဏံ။

ဟတ္ထဂ္ဂါဟံ ဝါတိ ဧတ္ထ ဟတ္ထေန သဗ္ဗောပိ ဥပါဒိန္နကော ကာယော သင်္ဂဟိတော၊ န ဘိန္နသန္တာနော တပ္ပဋိဗဒ္ဓါ ဝတ္ထာလင်္ကာရာဒိ။ ဝေဏိဂ္ဂဟဏေန အနုပါဒိန္နကော အဘိန္နသန္တာနော ကေသလောမနခဂ္ဂဒန္တဂ္ဂါဒိကော ကမ္မပစ္စယဥတုသမုဋ္ဌာနော ဂဟိတောတိ ဝေဒိတဗ္ဗံ။ တေနေဝါဟ ‘‘အန္တမသော လောမေန လောမံ ဖုသန္တဿာပီ’’တိ။ တေန အညတရဿ ဝါ…ပေ… ပရာမသနန္တိ ဧတ္ထ အနုပါဒိန္နကာနမ္ပိ သေသလောမာဒီနံ အင်္ဂဘာဝေါ ဝေဒိတဗ္ဗော။ ဧဝံ သန္တေ ‘‘ဖဿံ ပဋိဇာနန္တဿ သင်္ဃာဒိသေသော’’တိ ဣမိနာ ဝိရုဇ္ဈတီတိ စေ? န၊ တဒတ္ထဇာနနတော။ ဖုဋ္ဌဘာဝံ ပဋိဝိဇာနန္တောပိ ဖဿံ ပဋိဇာနာတိ နာမ၊ န ကာယဝိညာဏုပ္ပတ္တိယာ ဧဝ။ အနေကန္တိကဉှေတ္ထ ကာယဝိညာဏံ။ တသ္မာ ဧဝ ဣဓ ဖဿပ္ပဋိဝိဇာနနံ အင်္ဂန္တွေဝ န ဝုတ္တံ။ တသ္မိဉှိ ဝုတ္တေ ဌာနမေတံ ဝိဇ္ဇတိ ‘‘န စ မေ လောမဃဋ္ဋနေန ကာယဝိညာဏံ ဥပ္ပန္နံ၊ တသ္မိံ ‘န ဖဿံ ပဋိဇာနာမီ’တိ အနာပန္နသညီ သိယာ’’တိ။ ‘‘ဝေဏီ နာမ ကဟာပဏမာလာဒိသမ္ပယုတ္တံ၊ တတ္ထ ‘ဝေဏိံ ဂဏှိဿာမီ’တိ ကဟာပဏမာလာဒိံ ဧဝ ဂဏှာတိ၊ န လောမံ၊ နတ္ထိ သင်္ဃာဒိသေသော’’တိ ဝဒန္တိ။ ဝီမံသိတဗ္ဗံ။

ကာယသံသဂ္ဂသိက္ခာပဒဝဏ္ဏနာ နိဋ္ဌိတာ။

၃။ ဒုဋ္ဌုလ္လဝါစာသိက္ခာပဒဝဏ္ဏနာ

‘‘ကဒါ ¶ ¶ တေ မာတာ ပသီဒိဿတီ’’တိ အာယာစနံ ဒုဋ္ဌုလ္လဝါစာယ သိခါပတ္တလက္ခဏဒဿနတ္ထံ ဝုတ္တံ၊ န မေထုနုပသံဟိတေယေဝ ဒုဋ္ဌုလ္လဝါစာတိ ဒဿနတ္ထံ။ ‘‘ဥဘတောဗျဉ္ဇနကာသီ’’တိ ဝစနံ ပန ပုရိသနိမိတ္တေန အသင်္ဃာဒိသေသဝတ္ထုနာ မိဿဝစနံ၊ ပုရိသဥဘတောဗျဉ္ဇနကဿ စ ဣတ္ထိနိမိတ္တံ ပဋိစ္ဆန္နံ၊ ဣတရံ ပါကဋံ။ ယဒိ တမ္ပိ ဇနေတိ၊ ကထံ ‘အနိမိတ္တာသီ’တိအာဒီနိ ပဒါနိ န သင်္ဃာဒိသေသံ ဇနေန္တီ’’တိ ဧကေ၊ တံ န ယုတ္တံ ပုရိသဿာပိ နိမိတ္တာဓိဝစနတ္တာ။ ‘‘မေထုနုပသံဟိတာဟိ သင်္ဃာဒိသေသော’’တိ (ပါရာ။ ၂၄၈) မာတိကာယံ လက္ခဏဿ ဝုတ္တတ္တာ စ မေထုနုပသံဟိတာဟိ ဩဘာသနေ ပဋိဝိဇာနန္တိယာ သင်္ဃာဒိသေသော၊ အပ္ပဋိဝိဇာနန္တိယာ ထုလ္လစ္စယံ၊ ဣတရေဟိ ဩဘာသနေ ပဋိဝိဇာနန္တိယာ ထုလ္လစ္စယံ၊ အပ္ပဋိဝိဇာနန္တိယာ ဒုက္ကဋန္တိ ဧကေ၊ ဝိစာရေတွာ ဂဟေတဗ္ဗံ။ ဧတ္ထာဟ – ‘‘သိခရဏီ’’တိအာဒီဟိ အက္ကောသန္တဿ ပဋိဃစိတ္တံ ဥပ္ပဇ္ဇတိ၊ ကသ္မာ ‘‘တိဝေဒန’’န္တိ အဝတွာ ‘‘ဒွိဝေဒန’’န္တိ ဝုတ္တန္တိ? ရာဂဝသေန အယံ အာပတ္တိ၊ န ပဋိဃဝသေန။ တသ္မာ ရာဂဝသေနေဝ ပဝတ္တော အက္ကောသော ဣဓ အဓိပ္ပေတော။ တသ္မာ ‘‘ဒွိဝေဒန’’န္တိ ဝစနံ သုဝုတ္တမေဝ။

ဒုဋ္ဌုလ္လဝါစာသိက္ခာပဒဝဏ္ဏနာ နိဋ္ဌိတာ။

၄။ အတ္တကာမသိက္ခာပဒဝဏ္ဏနာ

ဒုဋ္ဌုလ္လောဘာသနေ ဝုတ္တပ္ပကာရာယာတိ ဒုဋ္ဌုလ္လာဒုဋ္ဌုလ္လဇာနနသမတ္ထာယ။ ပရဿ ဘိက္ခုနော အတ္တကာမပါရိစရိယာယ ဝဏ္ဏဘဏနေ ဒုက္ကဋံ၊ ‘‘ယော တေ ဝိဟာရေ ဝသတိ၊ တဿ အဂ္ဂဒါနံ မေထုနံ ဓမ္မံ ဒေဟီ’’တိ ပရိယာယဝစနေပိ ဒုက္ကဋံ၊ ‘‘အတ္တကာမပါရိစရိယာယ ဝဏ္ဏံ ဘာသေယျ၊ ယာ မာဒိသံ သီလဝန္တ’’န္တိ စ ဝုတ္တတ္တာတိ ဧကေ။ ပဉ္စသု အင်္ဂေသု သဗ္ဘာဝါ သင်္ဃာဒိသေသောဝါတိ ဧကေ၊ ဝိစာရေတွာ ဂဟေတဗ္ဗံ။ ‘‘ဣမသ္မိံ သိက္ခာပဒဒွယေ ကာယသံသဂ္ဂေ ဝိယ ယက္ခိပေတီသုပိ ဒုဋ္ဌုလ္လတ္တကအာမဝစနေ ထုလ္လစ္စယန္တိ ဝဒန္တိ။ အဋ္ဌကထာသု ပန နာဂတ’’န္တိ (ဝဇိရ။ ဋီ။ ပါရာဇိက ၂၉၅) လိခိတံ။ ဥဘတောဗျဉ္ဇနကော ပန ပဏ္ဍကဂတိကောဝ။

အတ္တကာမသိက္ခာပဒဝဏ္ဏနာ နိဋ္ဌိတာ။

၅။ သဉ္စရိတ္တသိက္ခာပဒဝဏ္ဏနာ

အလံဝစနီယာတိ ¶ ¶ န ဝစနီယာ၊ နိဝါရဏေ အလံ-သဒ္ဒေါ၊ န အလံဝစနီယာ နာလံဝစနီယာ။ ‘‘ပဋိဂ္ဂဏှာတိ ဝီမံသတိ ပစ္စာဟရတိ၊ အာပတ္တိ သင်္ဃာဒိသေသဿာ’’တိ (ပါရာ။ ၃၀၅) ဝုတ္တတ္တာ ယဿ ဧကန္တေန သင်္ဃာဒိသေသော ဟောတိ၊ တဿ ပဋိဂ္ဂဏှနဝီမံသနပယောဂါ ဧတေ ဒုက္ကဋထုလ္လစ္စယာ နတ္ထီတိ ဝဒန္တီတိ လိခိတံ။ ကိဉ္စာပိ ဧတ္ထ ‘‘ဣတ္ထီ နာမ မနုဿိတ္ထီ၊ န ယက္ခီ န ပေတီ န တိရစ္ဆာနဂတာ။ ပုရိသော နာမ မနုဿပုရိသော၊ န ယက္ခော န ပေတော န တိရစ္ဆာနဂတော’’တိ ပါဠိ နတ္ထိ၊ တထာပိ ကာယသံသဂ္ဂါဒီသု ‘‘မာတုဂါမော နာမ မနုဿိတ္ထီ’’တိ (ပါရာ။ ၂၈၅) ဣတ္ထိဝဝတ္ထာနဿ ကတတ္တာ ဣဓာပိ မနုဿိတ္ထီ ဧဝါတိ ပညာယတိ။ မေထုနပုဗ္ဗဘာဂသာမညတော ဣတ္ထိဝဝတ္ထာနေန ပုရိသဝဝတ္ထာနံ ကတမေဝ ဟောတိ။ တေနေဝါဟ ‘‘ယေသု သဉ္စရိတ္တံ သမာပဇ္ဇတိ၊ တေသံ မနုဿဇာတိကတာ’’တိ (ကင်္ခါ။ အဋ္ဌ။ သဉ္စရိတ္တသိက္ခာပဒဝဏ္ဏနာ)။ ကာယသံသဂ္ဂါဒီသု စ ပဏ္ဍကယက္ခိပေတိယော ထုလ္လစ္စယဝတ္ထုကာဝ ဝုတ္တာ၊ တထာ ဣဓာပိ၊ ပဏ္ဍကသဘာဝတ္တာ မနုဿဥဘတောဗျဉ္ဇနကော စ ထုလ္လစ္စယဝတ္ထုကောဝ ဟောတိ။ သေသာ မနုဿပုရိသအမနုဿပဏ္ဍကဥဘတောဗျဉ္ဇနကတိရစ္ဆာနဂတပုရိသာဒယော ဒုက္ကဋဝတ္ထုကာဝ မိစ္ဆာစာရဒဿနသဘာဝတောတိ ဝေဒိတဗ္ဗံ။

သဉ္စရိတ္တသိက္ခာပဒဝဏ္ဏနာ နိဋ္ဌိတာ။

၆။ ကုဋိကာရသိက္ခာပဒဝဏ္ဏနာ

ကိံ ဘန္တေတိ ဧတ္တကေပိ ဝုတ္တေ။ ပုစ္ဆိတော ယဒတ္ထာယ ပဝိဋ္ဌော၊ တံ ကထေတုံ လဘတိ ပုစ္ဆိတပညတ္တာ ဘိက္ခာစာရဝတ္တေတိ လိခိတံ။ ဟတ္ထကမ္မံ ယာစိတော ‘‘ဥပကရဏံ၊ မူလံ ဝါ ဒဿတီ’’တိ ယာစတိ၊ ဝဋ္ဋတိ၊ န ဝဋ္ဋတီတိ? ဝဋ္ဋတိ သေနာသနေ ဩဘာသပရိကထာဒီနံ လဒ္ဓတ္တာတိ ဧကေ။ တိဟတ္ထာ ဝါတိ ဧတ္ထ ဝဍ္ဎကိဟတ္ထေန တိဟတ္ထာ။ ‘‘ပမာဏယုတ္တော မဉ္စောတိ ပကတိဝိဒတ္ထိယာ နဝဝိဒတ္ထိပ္ပမာဏမဉ္စော၊ သော တတ္ထ ဣတော စ န သဉ္စရတိ၊ တသ္မာ စတုဟတ္ထဝိတ္ထာရာ န ဟောတီ’’တိအာဒိ လိခိတံ။ အကုဋိယာ ပန ဝတ္ထုဒေသနာကိစ္စံ နတ္ထိ ဥလ္လိတ္တာဝလိတ္တံ ကာတုံ ဝုတ္တတ္တာ။ ‘‘ဥလ္လိတ္တာဒိဘာဝေါ…ပေ… ‘ဆဒနမေဝ သန္ဓာယ ဝုတ္တော’တိ ယုတ္တမိဒံ။ ကသ္မာတိ စေ? ယသ္မာ မတ္တိကာမယဘိတ္တိံ ¶ ဥဋ္ဌာပေတွာ ဥပရိ ဥလ္လိတ္တံ ဝါ အဝလိတ္တံ ဝါ ဥဘယံ ဝါ ဘိတ္တိယာ ဃဋိတံ ကရောန္တဿ အာပတ္တိ ဧဝ ဝိနာပိ ဘိတ္တိလေပေနာ’’တိ လိခိတံ။ ဧဝမေတ္ထ ထမ္ဘတုလာပိဋ္ဌသင်္ဃာဋာဒိ နိရတ္ထကံ သိယာ။ တသ္မာ ဝိစာရေတွာဝ ဂဟေတဗ္ဗံ။ ‘‘ဥပေါသထာဂါရမ္ပိ ဘဝိဿတိ၊ အဟမ္ပိ ဝသိဿာမီ’’တိ ဝါ ‘‘ဘိက္ခူဟိ ဝါ သာမဏေရေဟိ ဝါ ဧကတော ဝသိဿာမီ’’တိ ဝါ ကရောန္တဿ ဝဋ္ဋတိ ဧဝ။ ကသ္မာ? ‘‘အတ္တုဒ္ဒေသ’’န္တိ ဝုတ္တတ္တာတိ လိခိတံ။

ဣဒံ ¶ ပန သိက္ခာပဒံ စတုတ္ထပါရာဇိကံ ဝိယ နိဒါနာပေက္ခံ။ န ဟိ ဝဂ္ဂုမုဒါတီရိယာ ဘိက္ခူ သယမေဝ အတ္တနော အသန္တံ ဥတ္တရိမနုဿဓမ္မံ မုသာဝါဒလက္ခဏံ ပါပေတွာ ဘာသိံသု။ အညမညဉှိ တေ ဥတ္တရိမနုဿဓမ္မဝဏ္ဏံ ဘာသိံသု။ န စ တာဝတာ ပါရာဇိကဝတ္ထု ဟောတိ၊ တတ္တကေန ပန လေသေန ဘဂဝါ တံ ဝတ္ထုံ နိဒါနံ ကတွာ ပါရာဇိကံ ပညပေသိ၊ တထာ ဣဓာပိ။ န ဟိ နိဒါနေ ‘‘အဒေသိတဝတ္ထုကာယော သာရမ္ဘာယော အပရိက္ကမနာယော’’တိ ဝုတ္တံ။ ‘‘အပ္ပမာဏိကာယော’’တိ ပန ဝုတ္တတ္တာ ပမာဏမတိက္ကမန္တဿ သင်္ဃာဒိသေသောဝ နိဒါနာပေက္ခော။ တတ္ထ သာရမ္ဘေ အပရိက္ကမနေ သင်္ဃာဒိသေသပ္ပသင်္ဂံ ဝိယ ဒိဿမာနံ ‘‘ဝိဘင်္ဂေါ တံနိယမကော’’တိ ဝုတ္တတ္တာ ဝိဘင်္ဂေ န နိဝါရေတိ။ တထာ မဟလ္လကေ။

ဧတ္ထာဟ – ကိမတ္ထံ မာတိကာယံ ဒုက္ကဋဝတ္ထု ဝုတ္တံ၊ နနု ဝိဘင်္ဂေ ဧဝ ဝတ္တဗ္ဗံ သိယာတိ? ဧဝမေတံ။ ကိံ နု ဘိက္ခူ အဘိနေတဗ္ဗာ ဝတ္ထုဒေသနာယ၊ တေဟိ ဘိက္ခူဟိ ဝတ္ထု ဒေသေတဗ္ဗံ၊ ကီဒိသံ? အနာရမ္ဘံ သပရိက္ကမနန္တိ။ ဣတရဉှိ ‘‘သာရမ္ဘေ စေ ဘိက္ခု ဝတ္ထုသ္မိံ အပရိက္ကမနေ’’တိ ဧဝံ အနုပ္ပသင်္ဂဝသေန အာဂတတ္တာ ဝုတ္တံ။ ယသ္မာ ဝတ္ထု နာမ အတ္ထိ သာရမ္ဘံ အပရိက္ကမနံ၊ အတ္ထိ အနာရမ္ဘံ သပရိက္ကမနံ၊ အတ္ထိ သာရမ္ဘံ သပရိက္ကမနံ၊ အတ္ထိ အနာရမ္ဘံ အပရိက္ကမနန္တိ ဗဟုဝိဓံ၊ တသ္မာ ဗဟုဝိဓတ္တာ ဝတ္ထု ဒေသေတဗ္ဗံ အနာရမ္ဘံ သပရိက္ကမနံ၊ နေတရန္တိ ဝုတ္တံ ဟောတိ။ ကိမတ္ထိကာ ပနေတ္ထ ဝတ္ထုဒေသနာတိ စေ? ဂရုကာပတ္တိပညာပနဟေတုပရိဝဇ္ဇနုပါယတ္တာ။ ဝတ္ထုအဒေသနာ ဟိ ဂရုကာပတ္တိပညာပနဟေတုဘူတာ။ ဂရုကာပတ္တိပညာပနံ အကတဝိညတ္တိဂိဟိပီဠာဇနနံ၊ အတ္တဒုက္ခပရဒုက္ခဟေတုဘူတော စ သာရမ္ဘဘာဝေါတိ ဧတေ ဝတ္ထုဒေသနာပဒေသေန ဥပါယေန ပရိဝဇ္ဇိတာ ဟောန္တိ။ န ဟိ ဘိက္ခူ အကပ္ပိယကုဋိကရဏတ္ထံ ဂိဟီနံ ဝါ ပီဠာနိမိတ္တံ၊ သာရမ္ဘဝတ္ထုကုဋိကရဏတ္ထံ ဝါ ဝတ္ထုံ ဒေသေန္တီတိ။ ဟောန္တိ စေတ္ထ –

‘‘ဒုက္ကဋဿ ¶ ဟိ ဝတ္ထူနံ၊ မာတိကာယ ပကာသနာ၊

ဂရုကာပတ္တိဟေတူနံ၊ တေသံ ဧဝံ ပကာသိတာ။

‘‘ဝတ္ထုဿ ဒေသနုပါယေန၊ ဂရုကာပတ္တိဟေတုယော၊

ဝဇ္ဇိတာ ဟောန္တိ ယံ တသ္မာ၊ သာရမ္ဘာဒိ ဇဟာပိတ’’န္တိ။

ကုဋိကာရသိက္ခာပဒဝဏ္ဏနာ နိဋ္ဌိတာ။

၇။ ဝိဟာရကာရသိက္ခာပဒဝဏ္ဏနာ

ကိရိယာမတ္တတော ¶ သမုဋ္ဌာနဘာဝတော အကိရိယမေဝေတံ။ တံ ဒေသနာအကရဏဝသေန။ ဘိက္ခူ ဝါ အနဘိနေယျာတိ ဧတ္ထ ဝါ-သဒ္ဒေါ အဝဓာရဏတ္ထောတိ ဝေဒိတဗ္ဗော။ ‘‘အာယသ္မာ ဆန္နော စေတိယရုက္ခံ ဆေဒါပေသီ’’တိ (ပါရာ။ ၃၆၅) အာဂတတ္တာ ဣဒမ္ပိ နိဒါနာပေက္ခန္တိ ဝေဒိတဗ္ဗံ။

ဝိဟာရကာရသိက္ခာပဒဝဏ္ဏနာ နိဋ္ဌိတာ။

၈။ ဒုဋ္ဌဒေါသသိက္ခာပဒဝဏ္ဏနာ

‘‘ကသ္မာ မမ ဝန္ဒနာဒီနိ…ပေ… ‘ဃဋိတေယေဝ သီသံ ဧတီ’တိ ဝုတ္တတ္တာ အန္တိမဝတ္ထုအဇ္ဈာပန္နကံ ဝန္ဒိတုံ န ဝဋ္ဋတီ’’တိ ဝဒန္တိ၊ တံ န ဂဟေတဗ္ဗံ။ ပရိဝါရာဝသာနေ ဥပါလိပဉ္စကေ ‘‘ကတိ နု ခေါ၊ ဘန္တေ၊ အဝန္ဒိယာ’’တိအာဒိနာ (ပရိ။ ၄၆၇) ဝုတ္တပါဠိယံ အဝုတ္တတ္တာ၊ ‘‘ပစ္ဆာ ဥပသမ္ပန္နေန ပုရေ ဥပသမ္ပန္နော ဝန္ဒိယော’’တိ (ပရိ။ ၄၆၈) ဝုတ္တတ္တာ စ၊ တသ္မာ ဧဝ ဣမိဿံ ကင်္ခါဝိတရဏိယံ ‘‘ဥပသမ္ပန္နောတိ သင်္ချုပဂမန’’န္တိ ဝုတ္တံ။ သုတ္တာဓိပ္ပာယော ပန ဧဝံ ဂဟေတဗ္ဗော – အဝန္ဒန္တော သာမီစိပ္ပဋိက္ခေပသင်္ခါတာယ စောဒနာယ စောဒေတိ နာမာတိ ဒဿနတ္ထံ ဝုတ္တန္တိ။ တသ္မာ ဧဝ ‘‘ဧတ္တာဝတာ စ စောဒနာ နာမ ဟောတီ’’တိ ဝုတ္တံ။ ဣဓ အဓိပ္ပေတံ အာပတ္တိအာပဇ္ဇနာကာရံ ဒဿေတုံ ‘‘‘ကသ္မာ မမ ဝန္ဒနာဒီနိ န ကရောသီ’တိအာဒိ ဝုတ္တ’’န္တိ လိခိတံ။

ကတူပသမ္ပဒန္တိ ယဿ ဥပသမ္ပဒါ ရုဟတိ၊ တံ၊ ပဏ္ဍကာဒယော။ ဌပနက္ခေတ္တန္တိ ဧတ္ထ သဗ္ဗသင်္ဂါဟိကံ၊ ပုဂ္ဂလိကဉ္စာတိ ဒုဝိဓံ ပဝါရဏာဌပနံ။ တတ္ထ ¶ သဗ္ဗသင်္ဂါဟိကေ ‘‘သုဏာတု မေ၊ ဘန္တေ၊ သင်္ဃော…ပေ… တေဝါစိကံ ပဝါရေ’’တိ သု-ကာရတော ယာဝ ရေ-ကာရော။ ပုဂ္ဂလိကဌပနေ ပန ‘‘သင်္ဃံ၊ ဘန္တေ၊ ပဝါရေမိ…ပေ… ပဿန္တော ပဋီ’’တိ သံ-ကာရတော ယာဝ အယံ သဗ္ဗပစ္ဆိမော ဋိ-ကာရော၊ ဧတ္ထန္တရေ ဧကပဒေပိ ဌပေန္တေန ဌပိတာ ဟောတိ။ ဥပေါသထေ ပန ဣမိနာနုသာရေန ဝိသေသော ဝေဒိတဗ္ဗော ‘‘ကရေယျာ’’တိ ရေ-ကာရေ အနတိက္ကမန္တေ။

ဒုဋ္ဌဒေါသသိက္ခာပဒဝဏ္ဏနာ နိဋ္ဌိတာ။

၉။ အညဘာဂိယသိက္ခာပဒဝဏ္ဏနာ

အညဘာဂေါ ¶ ဝါ အဿ အတ္ထီတိ ယထာ သုဝဏ္ဏဿေဒံ သောဝဏ္ဏမိတျတြ သုဝဏ္ဏဝါ အနေန သုဝဏ္ဏော ဣတျုစ္စတေ။ တံ ပဋိမာယ သရီရံ၊ သိလာပုတ္တကဿ သရီရန္တိ စ နိဒဿနံ။ ဆဂလကဿ ‘‘ဒဗ္ဗော’’တိ ဒိန္နံ နာမံ ‘‘ဒေသော’’တိ ဝုစ္စတိ။ ကသ္မာ? ထေရံ အနုဒ္ဓံသေတုံ ထေရဿာပိ အပဒိသိတဗ္ဗတ္တာ။ အညမ္ပိ ဝတ္ထုံ န ထေရံယေဝ။ လိဿတိ သိလိဿတိ ဝေါဟာရမတ္တေနေဝန အတ္ထတော။ ဤသကံ အလ္လီယတီတိ လေသောတိ အဓိပ္ပာယော။ လိသသေလဆကောလအလ္လီဘာဝေ။ တေန ဝုတ္တံ ‘‘ဤသကံ အလ္လီယတီတိ လေသော’’တိ။ ယသ္မာ ဒေသလေသာ အတ္ထတော နိန္နာနာကရဏံ၊ တသ္မာ ‘‘ကိဉ္စိဒေသံ လေသမတ္တံ ဥပါဒါယာ’’တိ ပဒံ ဥဒ္ဓရိတွာ ‘‘ဒသ လေသာ ဇာတိလေသော’’တိအာဒိ (ပါရာ။ ၃၉၄) ပဒဘာဇနေ ဝုတ္တံ။

အဋ္ဌုပ္ပတ္တိဝသေနေဝ အာဝိဘူတန္တိ ဧတ္ထ ကိဉ္စ ဘိယျော အနိယမတ္တာ။ န ဟိ မေတ္တိယဘူမဇကာနံ ဝိယ အညေသံ သဗ္ဗေသမ္ပိ ‘‘ဆဂလကမေဝေတ္ထ အညဘာဂိယံ အဓိကရဏံ ဟောတိ၊ အညံ ဂေါမဟိံသာဒိကမ္ပိ ဟောတိ၊ န စ မေတ္တိယဘူမဇကာ ဝိယ သဗ္ဗေပိ နာမလေသမတ္တမေဝ ဥပါဒိယန္တိ၊ အညမ္ပိ ဇာတိလေသာဒိံ ဥပါဒိယန္တိ၊ တသ္မာ အနိယမတ္တာ န ဝိဘတ္တံ။ ကိဉ္စ ဘိယျော တထာဝုတ္တေ ဆဂလကဿေဝ အညဘာဂိယတာ သမ္ဘဝတိ၊ န အညဿ၊ ယေန သောဝ ဒဿိတော။ လေသော စ နာမ လေသောဝ၊ န ဇာတိအာဒိ၊ ယေန သောဝ ဒဿိတောတိ ဧဝံ မိစ္ဆာဂါဟပ္ပသင်္ဂတောတိ ဝေဒိတဗ္ဗံ။ ဣဓ စ…ပေ… သညိနောပီတိ ဣမသ္မိံ သိက္ခာပဒေ စ အမူလကသိက္ခာပဒေ စာတိ အတ္ထော။

အညဘာဂိယသိက္ခံ ¶ ယော၊ နေဝ သိက္ခတိ ယုတ္တိတော၊

ဂစ္ဆေ ဝိနယဝိညူဟိ၊ အညဘာဂိယတံဝ သော။ (ဝဇိရ။ ဋီ။ ပါရာဇိက ၄၀၈)၊

အညဘာဂိယသိက္ခာပဒဝဏ္ဏနာ နိဋ္ဌိတာ။

၁၁။ ဘေဒါနုဝတ္တကသိက္ခာပဒဝဏ္ဏနာ

တိဏ္ဏံ ဥဒ္ဓံ ကမ္မာရဟာ…ပေ… ကရောတီတိ ဧတ္ထ ‘‘ဣမေ စတ္တာရော’’တိ ဝါ ‘‘ဣမဉ္စ ဣမဉ္စာ’’တိ ဝါ ဝတွာ ကာတုံ န ဝဋ္ဋတီတိ လိခိတံ။

ဘေဒါနုဝတ္တကသိက္ခာပဒဝဏ္ဏနာ နိဋ္ဌိတာ။

၁၂။ ဒုဗ္ဗစသိက္ခာပဒဝဏ္ဏနာ

ဒုက္ခေန ¶ ဝတ္တဗ္ဗော ဒုဗ္ဗစော။ ဝုစ္စမာနော န သဟတိ။

ဒုဗ္ဗစသိက္ခာပဒဝဏ္ဏနာ နိဋ္ဌိတာ။

နိဂမနဝဏ္ဏနာ

‘‘နာမမတ္တဝသေနာ’’တိ ပါဌော။ ‘‘နာမဂေါတ္တဝသေနာ’’တိ လိခိတံ။ ဣဒံ ဝုတ္တံ ဟောတိ – ‘‘အယံ ကိရိယာ ဘိက္ခူနံ ကာတုံ န ဝဋ္ဋတီ’’တိ ဇာနိတွာ သစေ ဆာဒေတိ၊ ဆန္နာဝ ဟောတီတိ အတ္ထော။ သဘာဂမတ္တမေဝါတိ အဝေရိသဘာဂမတ္တမေဝါတိ အဓိပ္ပာယော။

ဝတ္ထု စေဝ ဂေါတ္တဉ္စာတိ ဧတ္ထ ဝတ္ထူတိ ဝီတိက္ကမနံ အသုစိမုစ္စနံ။ ဂေါတ္တန္တိ ဂံ တာယတီတိ ဂေါတ္တံ၊ သဇာတိတော အညတ္ထ ဂန္တုံ အဒတွာ ဂံ ဗုဒ္ဓိံ၊ ဝစနဉ္စ တာယတီတိ အတ္ထော။ ဝတ္ထု စ သဇာတိမေဝ ဂစ္ဆတိ။ သဇာတိ နာမေတ္ထ အညေဟိ ဝိသိဋ္ဌာဝိသိဋ္ဌဘူတာ ကိရိယာ၊ န ကာယသံသဂ္ဂါဒိ။ နာမဉ္စေဝ အာပတ္တိ စာတိ ဧတ္ထ အာပတ္တီတိ ဝီတိက္ကမေနာပန္နာပတ္တိယာ နာမံ။

ပုန ¶ အာဂတာဂတာနံ ဘိက္ခူနံ အာရောစေန္တေနာတိ ဧတ္ထ ဒွိန္နံ အာရောစေန္တေန ‘‘အာယသ္မန္တာ ဓာရေန္တု’’တိဏ္ဏံ ဝါ အတိရေကာနံ ဝါ အာရောစေန္တေန ‘‘အာယသ္မန္တော ဓာရေန္တူ’’တိ ဧဝံ အာရောစနဝိဓာနံ ဝေဒိတဗ္ဗံ။ ဝတ္တဘေဒဉ္စ ရတ္တိစ္ဆေဒဉ္စ အကတွာတိ ဧတ္ထ ဌပေတွာ နဝကတရံ ပါရိဝါသိကံ အဝသေသာနံ အန္တမသော မူလာယပဋိကဿနာရဟာဒီနမ္ပိ အဘိဝါဒနာဒိသာဒိယနေ၊ ပဋိပါဋိယာ နိသီဒနေ၊ ဩဝဒနေ၊ ကမ္မိကာနံ ဂရဟဏေ စာတိအာဒီသု ဝတ္တဘေဒေါ ဟောတိ။ ဒဿနသဝနဝိသယေသု အနာရောစနေ စ ဘိက္ခူဟိ ဧကစ္ဆန္နေ ဝသနေ စ အဇာနန္တဿေဝ ဝိဟာရေ ဘိက္ခူနံ အာဂန္တွာ ဂမနေ စာတိအာဒီသု ရတ္တိစ္ဆေဒေါ ဟောတိ။ နာနာသံဝါသကေဟိ ဝိနယကမ္မာဘာဝတော တေသံ အနာရောစနေ ရတ္တိစ္ဆေဒေါ န ဟောတိ။ ‘‘ဒွေ လေဍ္ဍုပါတေ အတိက္ကမိတွာ’’တိ ဝစနတော အန္တော န ဝဋ္ဋတိ။ နိက္ခိတ္တဝတ္တေနေဝ ဟုတွာ ဝိစရန္တေန ယဿ သန္တိကေ ပုဗ္ဗေ သမာဒိယိတွာ အာရောစိတံ၊ တဿာပိ သန္တိကေ ပစ္ဆာ နိက္ခိပနကာလေ အာရောစေတွာဝ နိက္ခိပိတဗ္ဗံ။ တသ္မာ ပုန သမာဒါနကာလေပိ သော စေ တတော ဂစ္ဆတိ၊ တံ ဒိဝသံ အဂန္တွာ ဒိဝါ အာရောစေတွာပိ ယဒိ ဧဝံ အတီတဒိဝသံ ဟောတိ၊ ‘‘အရုဏေ ဥဋ္ဌိတေ တဿ သန္တိကေ အာရောစေတွာ ဝတ္တံ နိက္ခိပိတွာ ဝိဟာရံ ဂန္တဗ္ဗန္တိ တဿ သန္တိကေ အာရောစေတွာ ဝတ္တံ နိက္ခိပိတဗ္ဗ’’န္တိ ဝုတ္တံ။ အပိစ ‘‘ဝိဟာရံ ဂန္တွာ ယံ သဗ္ဗပဌမံ ¶ ဘိက္ခုံ ပဿတိ၊ တဿ အာရောစေတွာ နိက္ခိပိတဗ္ဗ’’န္တိ ဝုတ္တံ။ သစေ ရတ္တိစ္ဆေဒေါ ဟောတိ၊ ဝိဟာရသီမာပရိယာပန္နာနံ သဗ္ဗေသံ အာရောစေတဗ္ဗံ သိယာ။ ‘‘တဿ အာရောစေတွာ’’တိ ဣဒံ ပန ပုဗ္ဗေ အနာရောစိတံ သန္ဓာယ ဝတ္တဘေဒရက္ခဏတ္ထံ ဝုတ္တံ။ တသ္မာ ဧဝ သမန္တပါသာဒိကာယံ (စူဠဝ။ အဋ္ဌ။ ၉၇) ဧဝံ ဝုတ္တံ ‘‘အညံ ဝိဟာရတော နိက္ခန္တံ ဝါ အာဂန္တုကံ ဝါ’’တိ။

သုဒ္ဓန္တပရိဝါသေ ပန သစေ ‘‘မာသမတ္တံ အသုဒ္ဓါမှီ’’တိ အဂ္ဂဟေသိ၊ ပရိဝသန္တော ပုန ဦနံ ဝါ အဓိကံ ဝါ သန္နိဋ္ဌာနံ ကရောတိ၊ တတ္တကမ္ပိ ပရိဝသိတဗ္ဗမေဝ၊ ပရိဝါသဒါနကိစ္စံ နတ္ထိ။ အယဉှိ သုဒ္ဓန္တပရိဝါသော နာမ ဥဒ္ဓမ္ပိ အာရောဟတိ၊ ဟေဋ္ဌာပိ ဩရောဟတိ။ ဣဒမဿ လက္ခဏံ။

သမောဒဟိတွာတိ မူလာပတ္တိဋ္ဌာနေ ဌပေတွာ၊ ပက္ခိပိတွာတိ အတ္ထော။ အပ္ပဋိစ္ဆန္နာ စေ အန္တရာပတ္တိ၊ မူလာယ ပဋိကဿနံ အကတွာ ပုဗ္ဗေ ဂဟိတပရိဝါသေနေဝ ပရိဝသိတဗ္ဗံ။ ယော ပန အာပတ္တိံ အာပဇ္ဇိတွာ ဝိဗ္ဘမိတွာ ပုန ဥပသမ္ပန္နော ¶ ဟုတွာပိ ပဋိစ္ဆာဒေတိ၊ ယော စ ပုဗ္ဗေ ပဋိစ္ဆာဒေတွာ ပစ္ဆာ န ပဋိစ္ဆာဒေတိ၊ ယော စ ဥဘယတ္ထ ပဋိစ္ဆာဒေတိ၊ သဗ္ဗေသံ ပဋိစ္ဆန္နဒိဝသဝသေန ပရိဝါသော ဒါတဗ္ဗော။ ‘‘ပုရိမသ္မိံ အာပတ္တိက္ခန္ဓေ ဝါ’’တိ စ ‘‘ပစ္ဆိမသ္မိံ အာပတ္တိက္ခန္ဓေ ဝါ’’တိ (စူဠဝ။ ၁၆၆ အာဒယော) စ ပါဠိယံ ဝုတ္တတ္တာ ဒွေ ဘိက္ခူ ဝိသုဒ္ဓိကံ အာပန္နာ ဟောန္တိ၊ တေ သုဒ္ဓိကဒိဋ္ဌိနော ဟောန္တိ။ ဧကော ဆာဒေတိ၊ ဧကော န ဆာဒေတိ။ ယော ဆာဒေတိ၊ သော ဒုက္ကဋံ ဒေသာပေတဗ္ဗော။ ‘‘ဥဘောပိ ယထာဓမ္မံ ကာရာပေတဗ္ဗာ’’တိ (စူဠဝ။ ၁၈၁) ဝစနတော ယံ ကဉ္စိ အာပတ္တိံ ဆာဒေတွာ ဒုက္ကဋံ အာပဇ္ဇတီတိ ဝေဒိတဗ္ဗော။

တေသု ဂတေသု ဝါ အဂတေသု ဝါ ပုရိမနယေနေဝ ပဋိပဇ္ဇိတဗ္ဗန္တိ ဧတ္ထ ဦနေ ဂဏေ စရဏံ၊ အနုဋ္ဌဟနံ ဧကရတ္တမ္ပိ ဂဏေန ဝိပ္ပဝါသံ၊ သစေ ရတ္တိယာ ဧကက္ခဏေန သင်္ဃော ဝသတိ၊ သစေ သော ပုရေ အရုဏမေဝ ကေနစိ ကရဏီယေန ဂတောတိ ဧတ္ထပိ မာနတ္တေပိ ဧဝံ ဇာတေ။ ‘‘အယဉ္စ ယသ္မာ ဂဏဿ အာရောစေတွာ၊ ဘိက္ခူနဉ္စ အတ္ထိဘာဝံ သလ္လက္ခေတွာဝ ဝသိ၊ တေနဿ ဦနေ ဂဏေ စရဏဒေါသော ဝါ ဝိပ္ပဝါသော ဝါ န ဟောတီ’’တိ (စူဠဝ။ အဋ္ဌ။ ၉၇) သမန္တပါသာဒိကာယံ ဝုတ္တံ။ တသ္မာ တေန အာရောစိတေ မုဟုတ္တမ္ပိ နိသီဒိတွာ ဂတေပိ ဝိပ္ပဝါသော နတ္ထိ။ ပါရိဝါသိကဿ၊ ဥက္ခိတ္တကဿ စ ပကတတ္တေန တသ္မိံ ဝသနံ ဥဒကပါတေန ဝါရိတံ၊ တသ္မာ နာနူပစာရေပိ ဧကစ္ဆန္နေ န ဝဋ္ဋတိ။

ဣဒါနိ ပါဌဝိစာရဏာ ဝေဒိတဗ္ဗာ – ‘‘နဝ ပဌမာပတ္တိကာ စတ္တာရော ယာဝတတိယကာ’’တိ ဣဒံ သဘာဝနိယမဝစနံ။ တေန ဝုဋ္ဌာနံ အနိယမန္တိ ဒဿေတိ။ ဧကစ္စာပတ္တိဝုဋ္ဌာနဉှိ ကမ္မတောပိ ¶ ဟောတိ အကမ္မတောပိ၊ န ဧဝံ အာပဇ္ဇနန္တိ ဝုတ္တံ ဟောတိ။ အညတရံ ဝါ အညတရံ ဝါတိ တေသံ ဒွိဓာ ဘိန္နာနမ္ပိ ဝုဋ္ဌာနက္ကမဘေဒါဘာဝဒီပကဝစနံ။ ယာဝတီဟံ၊ တာဝတီဟန္တိ ဧတ္ထ အဟပရိစ္ဆေဒေါ အရုဏဝသေန။ ‘‘ဇာန’’န္တိ ဣမိနာ ဇာနနပ္ပဋိစ္ဆန္နဿ အကာမာ ပရိဝတ္ထဗ္ဗန္တိ ဒဿေတိ။ တေန ဘိက္ခုနာ အကာမာ ပရိဝတ္ထဗ္ဗန္တိ တေန ဘိက္ခုနာ ဝသတာ အကာမာ ပရိဝတ္ထဗ္ဗံ၊ န ပရိဝတ္တိတလိင်္ဂေနာတိ ဒဿနတ္ထံ ဝုတ္တံ။ ပရိဝုတ္ထပရိဝါသေနာတိ အာဒိမှိ ပရိဝုတ္ထပရိဝါသေနေဝ ပရိဝါသတော ဥတ္တရိ ဣတိဝါရေန အာဒိတော ဘိက္ခုနာဝ ဆာရတ္တံ၊ ပရိဝတ္တိတလိင်္ဂေန ဥဒ္ဓမ္ပိ ဘိက္ခုမာနတ္တာယ ပဋိပဇ္ဇိတဗ္ဗံ၊ န ပရိဝါသေ ဝိယ တပ္ပစ္စယာ အစိဏ္ဏမာနတ္တော။ စိဏ္ဏမာနတ္တောဝ အဗ္ဘေတဗ္ဗော၊ န ဣတရော၊ န ပရိဝါသေ ဝိယ မာနတ္တာရဟေ၊ ပက္ခမာနတ္တဉ္စ ¶ စရန္တိယာ ဘိက္ခုနိယာ လိင်္ဂံ ပရိဝတ္တာတိက္ကမေ သတိ စိဏ္ဏမာနတ္တော ဘိက္ခု ဟောတိ၊ ပုန ဘိက္ခုမာနတ္တံ ဂဟေတွာ စိဏ္ဏမာနတ္တောဝ ဘိက္ခု အဗ္ဘေတဗ္ဗောတိ ဒဿေတိ။

ယတ္ထ သိယာတိ ယဿံ သမာနသံဝါသကသီမာယမ္ပိ ဝီသတိဂဏော ဘိက္ခုသင်္ဃော အတ္ထိ။ ဧကေနပိ စေ ဦနော ဝီသတိဂဏောတိ န ယုဇ္ဇတိ၊ ဦနော စေ။ န ဟိ ဝီသတိဂဏော၊ သင်္ဃော စေ ဦနော။ တသ္မာ ‘‘ဧကေနပိ စေ ဦနော သင်္ဃော’’တိ ဧတ္တကမေဝ ဝတ္တဗ္ဗန္တိ စေ? န၊ စတုဝဂ္ဂပဉ္စဝဂ္ဂဒသဝဂ္ဂပ္ပသင်္ဂနိဝါရဏပ္ပယောဇနတော။ တသ္မာ ဝီသတိဝဂ္ဂေါ ဘိက္ခုသင်္ဃော စေ ဘိက္ခုနာ ဧကေနပိ ဦနော၊ နဋ္ဌော ဒဋ္ဌဗ္ဗော။ ကေစိ ပန ဝိနယေ အပ္ပကတညုနော ‘‘ယထာ အတိရေကစတုဝဂ္ဂေါပိ သင်္ဃော စတုဝဂ္ဂကရဏီယေ ကမ္မေ ‘စတုဝဂ္ဂေါ’တိ ဝုစ္စတိ၊ တထာ ပဉ္စဝဂ္ဂဒသဝဂ္ဂကရဏီယေ ကမ္မေ အတိရေကပဉ္စဝဂ္ဂဒသဝဂ္ဂေါပိ ‘ပဉ္စဝဂ္ဂဒသဝဂ္ဂေါ’တိ ဝုစ္စတိ။ တသ္မာ ဦနောပိ စတုဝဂ္ဂပဉ္စဝဂ္ဂဒသဝဂ္ဂဝီသတိဝဂ္ဂေါဝါ’’တိ မညေယျုံ၊ တေသံ မညနာနိဝါရဏတ္ထံ ‘‘ဧကေနပိ စေ ဦနော’’တိအာဒိ ဝုတ္တံ။ အထ ဝါ ဝီသတိ ဘိက္ခုသင်္ဃော စေ၊ ဌပေတွာ ဧကေနပိ စေ ဦနော အပ္ပကတတ္တော၊ တံ ဌပေတွာ ဧကေနပိ စေတိ ဧဝမေတ္ထ အတ္ထော ဒဋ္ဌဗ္ဗော။ အယံ တတ္ထ သာမီစီတိ ဝစနံ ယံ ဝုတ္တံ သဗ္ဗတ္ထ ‘‘တဿ အာပတ္တိယာ ပရိဝါသံ ဒေတိ၊ မူလာယ ပဋိကဿတိ၊ မာနတ္တံ ဒေတိ၊ အဗ္ဘေတီ’’တိ၊ တဿ အာဝိဘာဝကရဏတ္ထံ ဝုတ္တန္တိ ဝေဒိတဗ္ဗံ။ တေန တေသု အယံ ယထာဝုတ္တာ သာမီစိ နိယတာ ဣစ္ဆိတဗ္ဗာ၊ န ရာဇသိက္ခာပဒါဒီသု ဝိယ အနိယတာ။ တတ္ထ ဟိ ကေနစိ အန္တရာယေန တံ သာမီစိမကရောန္တေပိ အနာပတ္တီတိ ဒီပိတံ ဟောတိ။

သင်္ဃာဒိသေသဝဏ္ဏနာ နိဋ္ဌိတာ။

အနိယတကဏ္ဍံ

၁။ ပဌမာနိယတသိက္ခာပဒဝဏ္ဏနာ

အနိယတေ ¶ ¶ အာဒိတောဝ ဣဒံ ပကိဏ္ဏကံ။ သေယျထိဒံ – ဣဒံ အနိယတကဏ္ဍံ နိပ္ပယောဇနံ တတ္ထ အပုဗ္ဗာဘာဝတောတိ စေ? န၊ ဂရုကလဟုကဘေဒဘိန္နာပတ္တိရောပနာရောပနက္ကမလက္ခဏဒီပနပ္ပယောဇနတော။ ဧတ္ထ ဟိ ‘‘သာ စေ ဧဝံ ဝဒေယျ ‘အယျော မယာ…ပေ… သော စ တံ ပဋိဇာနာတိ၊ အာပတ္တိယာ ကာရေတဗ္ဗော’’’တိအာဒိနာ (ပါရာ။ ၄၄၆) အာပတ္တိယာ ဂရုကာယ၊ လဟုကာယ စ အာရောပနက္ကမလက္ခဏံ၊ ‘‘န ကာရေတဗ္ဗော’’တိ ဣမိနာ အနာရောပနက္ကမလက္ခဏဉ္စ ဒဿိတံ။ လက္ခဏဒီပနတော အာဒိမှိ၊ အန္တေ ဝါ ဥဒ္ဒိသိတဗ္ဗန္တိ စေ? န၊ အသမ္ဘဝတော။ ကထံ န တာဝ အာဒိမှိ သမ္ဘဝတိ၊ ယေသမိဒံ လက္ခဏံ၊ တေသံ သိက္ခာပဒါနံ အဒဿိတတ္တာ။ န အန္တေ ဂရုကမိဿကတ္တာ။ တသ္မာ ဂရုကလဟုကာနံ မဇ္ဈေ ဧဝ ဥဒ္ဒိသိတဗ္ဗတံ အရဟတိ ဥဘယမိဿကတ္တာ။ ယာ တတ္ထ ပါစိတ္တိယသင်္ခါတာ လဟုကာပတ္တိ ဒဿိတာ၊ သာပိ ဂရုကာတိ ကထိတာ။ တေနေဝါဟ ‘‘မေထုနဓမ္မသန္နိဿိတကိလေသသင်္ခါတေန ရဟဿာဒေနာ’’တိအာဒိ။ တသ္မာ ဂရုကာနံ ဧဝ အနန္တရံ ဥဒ္ဒိဋ္ဌန္တိပိ ဧကေ။ ဧဝံ သတိ ပဌမာနိယတမေဝါလံ တာဝတာ လက္ခဏဒီပနသိဒ္ဓိတော၊ ကိံ ဒုတိယေနာတိ စေ? န၊ ဩကာသနိယမပစ္စယမိစ္ဆာဂါဟနိဝါရဏပ္ပယောဇနတော။ ‘‘ပဋိစ္ဆန္နေ အာသနေ အလံကမ္မနိယေ’’တိ ဩကာသနိယမတော ဟိ တဗ္ဗိပရီတေ ဩကာသေ ဣဒံ လက္ခဏံ န ဝိကပ္ပိတန္တိ မိစ္ဆာဂါဟော ဟောတိ။ တံနိဝါရဏတော ဒုတိယာနိယတမ္ပိ သာတ္ထကမေဝါတိ အဓိပ္ပာယော။ ကသ္မာ? ဩကာသဘေဒတော၊ ရဟောဘေဒဒီပနတော၊ ရဟောနိသဇ္ဇဿာဒဘေဒဒီပနတော။ ဩကာသနိယမဘာဝေ စ ရဟောနိသဇ္ဇဿာဒဘေဒေါ ဇာတော။ ဒွိန္နံ ရဟောနိသဇ္ဇသိက္ခာပဒါနံ နာနာတ္တဇာနနဉ္စ သိယာ တထာ ကာယသံသဂ္ဂဘေဒဒီပနတော။ နာလံ ကမ္မနိယေပိ ဟိ ဩကာသေ အပ္ပဋိစ္ဆန္နေ၊ ပဋိစ္ဆန္နေပိ ဝါ နိသိန္နာယ ဝါတပါနကဝါဋစ္ဆိဒ္ဒါဒီဟိ နိက္ခန္တကေသာဒိဂ္ဂဟဏေန ကာယသံသဂ္ဂေါ လဗ္ဘတီတိ ဧဝမာဒယောပိ နယာ ဝိတ္ထာရတော ဝေဒိတဗ္ဗာ။

တတြိဒံ ¶ မုခမတ္တနိဒဿနံ – ဩကာသဘေဒတောတိ အလံကမ္မနိယနာလံကမ္မနိယဘေဒတော။ ပဋိစ္ဆန္နမ္ပိ ဟိ ဧကစ္စံ နာလံကမ္မနိယံ ဝါတပါနာဒိနာ အန္တရိတတ္တာ ¶ ၊ ဥဘယပ္ပဋိစ္ဆန္နမ္ပိ ဧကစ္စံ နာလံကမ္မနိယံ ဝိဇာနတံ အဇ္ဈောကာသတ္တာ။ ရဟောဘေဒဒီပနတောတိ ဧတ္ထ ရဟဘာဝသာမညေပိ ရဟော ဒွိဓာ ပဋိစ္ဆန္နာပဋိစ္ဆန္နဘေဒတောတိ အဓိပ္ပာယော။ ရဟောနိသဇ္ဇဿာဒဘေဒဒီပနတောတိ မေထုနဿာဒဝသေန နိသဇ္ဇာ၊ ဒုဋ္ဌုလ္လဿာဒဝသေန နိသဇ္ဇာတိ တာဒိသဿ ဘေဒဿ ဒီပနတောတိ အတ္ထော။ ‘‘ဣဓ အာဂတနယတ္တာ ဘိက္ခုနိပါတိမောက္ခေ ဣဒံ ကဏ္ဍံ ပရိဟီနန္တိ ဝေဒိတဗ္ဗ’’န္တိ ဝဒန္တိ။ ‘‘အဋ္ဌုပ္ပတ္တိယာ တတ္ထ အနုပ္ပန္နတ္တာ’’တိ ဧကေ၊ တံ အနေကန္တဘာဝဒီပနတော အယုတ္တံ။ သဗ္ဗဗုဒ္ဓကာလေ ဟိ ဘိက္ခူနံ ပဉ္စ၊ ဘိက္ခုနီနံ စတ္တာရော စ ဥဒ္ဒေသာ သန္တိ။ ပါတိမောက္ခုဒ္ဒေသပညတ္တိယာ အသာဓာရဏတ္တာ တတ္ထ နိဒ္ဒိဋ္ဌသင်္ဃာဒိသေသပါစိတ္တိယာနန္တိ ဧကေ။ တာသဉှိ ဘိက္ခုနီနံ ဥဗ္ဘဇာဏုမဏ္ဍလိက (ပါစိ။ ၆၅၈) -အဋ္ဌဝတ္ထုက (ပါစိ။ ၆၇၅) -ဝသေန ကာယသံသဂ္ဂဝိသေသော ပါရာဇိကဝတ္ထု၊ ‘‘ဟတ္ထဂ္ဂဟဏံ ဝါ သာဒိယေယျ၊ ကာယံ ဝါ တဒတ္ထာယ ဥပသံဟရေယျာ’’တိ (ပါစိ။ ၆၇၅) ဝစနတော သာဒိယနမ္ပိ၊ ‘‘သန္တိဋ္ဌေယျ ဝါ’’တိ (ပါစိ။ ၆၇၅) ဝစနတော ဌာနမ္ပိ၊ ‘‘သင်္ကေတံ ဝါ ဂစ္ဆေယျာ’’တိ (ပါစိ။ ၆၇၅) ဝစနတော ဂမနမ္ပိ၊ ‘‘ဆန္နံ ဝါ အနုပဝိသေယျာ’’တိ (ပါစိ။ ၆၇၅) ဝစနတော ပဋိစ္ဆန္နဋ္ဌာနပ္ပဝေသောပိ ဟောတိ၊ တထာ ‘‘ရတ္တန္ဓကာရေ အပ္ပဒီပေ၊ ပဋိစ္ဆန္နေ ဩကာသေ အဇ္ဈောကာသေ ဧကေနေကာ သန္တိဋ္ဌေယျ ဝါ သလ္လပေယျ ဝါ’’တိ (ပါစိ။ ၈၃၉) ဝစနတော ဒုဋ္ဌုလ္လဝါစာပိ ပါစိတ္တိယဝတ္ထုကန္တိ ကတွာ တာသံ အညထာ အနိယတကဏ္ဍဿ အဝတ္တဗ္ဗတာပတ္တိတော န ဝုတ္တန္တိ တေသံ အဓိပ္ပာယော။ ပကိဏ္ဏကံ။

‘‘ဒေသနာဝုဋ္ဌာနဂါမိနီနံ အာပတ္တီနံ ဝသေန အလဇ္ဇိအာဒယော လဇ္ဇီနံ စောဒေဿန္တီ’’တိ အာဂတတ္တာ လဇ္ဇိပဂ္ဂဟတ္ထာယ ပတိရူပါယပိ ဥပါသိကာယ ဝစနေန အကတွာ ဘိက္ခုဿေဝ ပဋိညာယ ကာတဗ္ဗန္တိ အာပတ္တိယော ပန လက္ခဏဒဿနတ္ထံ ပညတ္တံ ဝိတ္ထာရနယမေဝ ဂဟေတွာ ဝတ္တုံ ယုတ္တံ ‘‘ဣမေ ခေါ ပနာယသ္မန္တော ဒွေ အနိယတာ ဓမ္မာ’’တိ (ပါရာ။ ၄၄၃) ဥဒ္ဒေသဒဿနတ္တာတိ လိခိတံ။ သောတဿ ရဟောတိ ဧတ္ထ ရဟောတိ ဝစနသာမညတော ဝုတ္တံ။ ဒုဋ္ဌုလ္လသာမညတော ဒုဋ္ဌုလ္လာရောစနပ္ပဋိစ္ဆာဒနသိက္ခာပဒေသု ပါရာဇိကဝစနံ ဝိယ။ တသ္မာ ‘‘စက္ခုဿေဝ ပန ရဟော ‘ရဟော’တိ ဣဓ အဓိပ္ပေတော’’တိ ဝုတ္တံ။ ကထံ ပညာယတီတိ စေ? ‘‘မာတုဂါမော နာမ…ပေ… အန္တမသော တဒဟုဇာတာပိ ဒါရိကာ’’တိ (ပါရာ။ ၄၄၅) ဝုတ္တတ္တာ ဒုဋ္ဌုလ္လောဘာသနံ ဣဓ နာဓိပ္ပေတန္တိ ဒီပိတမေဝါတိ။ အန္တောဒွါဒသဟတ္ထေပီတိ ¶ ပိ-သဒ္ဒေန အပိဟိတကဝါဋဿ ဂဗ္ဘဿ ဒွါရေ နိသိန္နောပီတိ အတ္ထော။ အစေလကဝဂ္ဂေ ရဟောပဋိစ္ဆန္နာသနသိက္ခာပဒေ (ပါစိ။ ၂၈၈) ‘‘ယော ကောစိ ဝိညူ ပုရိသော ဒုတိယော ဟောတီ’’တိ ဣမဿ အနုရူပတော ‘‘ဣတ္ထီနံ ပန သတမ္ပိ အနာပတ္တိံ န ကရောတိယေဝါ’’တိ ဝုတ္တံ။ ‘‘အလံကမ္မနိယေတိ သက္ကာ ဟောတိ မေထုနံ ဓမ္မံ ပဋိသေဝိတု’’န္တိ (ပါရာ။ ၄၄၅) ဝိဘင်္ဂေ ¶ ဝစနတော ရဟောနိသဇ္ဇဿာဒေါ စေတ္ထ မေထုနဓမ္မသန္နိဿိတကိလေသော၊ န ဒုတိယေ ဝိယ ဒုဋ္ဌုလ္လဝါစဿာဒကိလေသော။ တသ္မာ စ ပညာယတိ သောတဿ ရဟော နာဓိပ္ပေတောတိ။

တိဏ္ဏံ ဓမ္မာနံ အညတရေန ဝဒေယျာတိ ရဟောနိသဇ္ဇသိက္ခာပဒဝသေန နိသိန္နဿ တဿာနုသာရေန ပါစိတ္တိယမေဝ အဝတွာ ပါရာဇိကသင်္ဃာဒိသေသာယပိ အာပတ္တိယာ ဘေဒဒဿနတ္ထံ ဝုတ္တံ။ ပုန အာပတ္တိပ္ပဋိဇာနနံ အဝတွာ ကသ္မာ ‘‘နိသဇ္ဇံ ဘိက္ခု ပဋိဇာနမာနော’’တိ ဝတ္ထုပ္ပဋိဇာနနံ ဝုတ္တန္တိ? ဝုစ္စတေ – အာပတ္တိယာ စောဒိတေ ဝိနယဓရေန ‘‘ကိသ္မိံ ဝတ္ထုသ္မိ’’န္တိ ပုစ္ဆိတေ စုဒိတကေန ‘‘ဣမသ္မိံ ဝတ္ထုသ္မိ’’န္တိ ဝုတ္တေ ဝိနယဓရေန ‘‘ဤဒိသံ နာမ အကာသီ’’တိ ပုစ္ဆိတေ သော ဝတ္ထုံ ပဋိဇာနမာနောဝ ကာရေတဗ္ဗောတိ ဒဿနတ္ထံ ‘‘နိသဇ္ဇံ ဘိက္ခု ပဋိဇာနမာနော’’တိ ဝုတ္တံ။ ယဒိ ဧဝံ နိသဇ္ဇံ ပဋိဇာနမာနောပိ အာပတ္တိယာဝ ကာရေတဗ္ဗောတိ? အနုရူပမေဝ။ ဧဝံ ပန ဂဟေတဗ္ဗံ – တိဏ္ဏမ္ပိ အာပတ္တီနံ ဝတ္ထူနိ အဂ္ဂဟေတွာ ဣဓ သိက္ခာပဒဝသေန နိသဇ္ဇမေဝ ဝုတ္တံ။ တသ္မိံ ဂဟိတေပိ ဟိ အာပတ္တိ ဂဟိတာဝ ဟောတီတိ။ ယေန ဝါ သာတိ ဧတ္ထ ဝါ-သဒ္ဒေါ ‘‘တေန သော ဘိက္ခု ကာရေတဗ္ဗော ဝါ’’တိ ယောဇေတဗ္ဗော။ သော စ ဝိကပ္ပတ္ထော။ တသ္မာ ‘‘ကာရေတဗ္ဗော ဝါ ပဋိဇာနမာနော၊ န ဝါ ကာရေတဗ္ဗော အပ္ပဋိဇာနမာနော’’တိ အတ္ထော။ တေန ဝုတ္တံ ‘‘ပဋိဇာနမာနော ဝါ’’တိအာဒိ။ ရဟောနိသဇ္ဇသိက္ခာပဒဝသေန နိသဇ္ဇပစ္စယာ အာပတ္တိယာ ဝုတ္တတ္တာ သေသေသုပိ သေသသိက္ခာပဒဝသေန အာပတ္တိ ဂဟေတဗ္ဗာ။ ‘‘သမုဋ္ဌာနာဒီနိ ပဌမပါရာဇိကသဒိသာနေဝါ’’တိ ဝုတ္တတ္တာ ဣဓ ဒုဋ္ဌုလ္လောဘာသနဿ အနဓိပ္ပေတဘာဝေါ ဝေဒိတဗ္ဗော။

ပဌမာနိယတသိက္ခာပဒဝဏ္ဏနာ နိဋ္ဌိတာ။

၂။ ဒုတိယာနိယတသိက္ခာပဒဝဏ္ဏနာ

သင်္ဃာဒိသေသေန ¶ ဝါတိ ကာယသံသဂ္ဂဒုဋ္ဌုလ္လောဘာသနေန။ တသ္မာ ဧဝံ ကာယသံသဂ္ဂဝါရော ပါဠိယမ္ပိ ဝုတ္တော။ အနန္ဓော အဗဓိရောတိ အနန္ဓော ကာယသံသဂ္ဂံ ပဿတိ၊ အဗဓိရော ဒုဋ္ဌုလ္လံ သုဏာတိ၊ တသ္မာ ဧဝ အဒိန္နာဒါနသဒိသာနေဝါတိ ဝုတ္တ’’န္တိ လိခိတံ။ ဧတ္ထ စ ကာယဝါစာစိတ္တတော သမုဋ္ဌာနံ ကထန္တိ စေ? ကာယသံသဂ္ဂဉှိ သမာပဇ္ဇန္တော ဒုဋ္ဌုလ္လမ္ပိ ဘဏတိ၊ ဒုဋ္ဌုလ္လံ ဘဏန္တော နိသီဒတိ စာတိ သမ္ဘဝတိ၊ ဒုဋ္ဌုလ္လမေဝ ဝါ သန္ဓာယ ဝုတ္တံ။ တဉှိ အဒိန္နာဒါနသမုဋ္ဌာနန္တိ။

ယော ¶ ဒေသနံ သဗ္ဗဝိဒူပမောဝ၊

နာနာနယာကာရဝိစိတ္တဘေဒံ၊

ဉာတုံ ဥပါယာန မနော သတိမာ၊

တံ လာဘဟေတုံ န ကရောတိ ပုညန္တိ။

ဒုတိယာနိယတသိက္ခာပဒဝဏ္ဏနာ နိဋ္ဌိတာ။

အနိယတဝဏ္ဏနာ နိဋ္ဌိတာ။

နိဿဂ္ဂိယကဏ္ဍံ

၁။ စီဝရဝဂ္ဂေါ

၁။ ကထိနသိက္ခာပဒဝဏ္ဏနာ

နိဿဂ္ဂိယကဏ္ဍေ ¶ ¶ တိဏ္ဏံ ကထိနသိက္ခာပဒါနံ၊ ဝဿိကသာဋိကအစ္စေကစီဝရသာသင်္ကသိက္ခာပဒါနဉ္စ ဧကဒေသနာယ တထာကိဏ္ဏာပတ္တိက္ခန္ဓာဝ ဝေဒိတဗ္ဗာ –

ကထိနံ ယဿ စတ္တာရော၊ သဟဇာ သမယဒွယံ၊

ဆန္နံ သိက္ခာပဒါနဉ္စ၊ ဧကဒေသဝိနိစ္ဆယော။

တတ္ထ ကထိနန္တိ ‘‘သင်္ဃဿ အနုမောဒနာယ၊ ဂဏဿ အနုမောဒနာယ၊ ပုဂ္ဂလဿ အတ္ထာရာ သင်္ဃဿ အတ္ထတံ ဟောတိ ကထိန’’န္တိ (ပရိ။ ၄၁၄) ဝစနတော တေသံယေဝ အနုမောဒနာဒိဓမ္မာနံ သင်္ဂဟော ကထိနံ နာမ။ ယထာဟ ‘‘ကထိနံ ဇာနိတဗ္ဗန္တိ တေသညေဝ ဓမ္မာနံ သင်္ဂဟော သမဝါယော နာမံ နာမကမ္မ’’န္တိအာဒိ (ပရိ။ ၄၁၂)။ တသ္မာ ကထိနန္တိ ဣဒံ ဗဟူသု ဓမ္မေသု နာမမတ္တံ၊ န ပရမတ္ထတော ဧကော ဓမ္မော။ ကော ပနဿ အတ္ထာရောတိ? တဒေကဒေသောဝ ခီရဿ ဓာရာ ဝိယ။ ယထာ စာဟ ‘‘အတ္ထာရော ဧကေန ဓမ္မေန သင်္ဂဟိတော ဝစီဘေဒေနာ’’တိ။ သဟဇာ နာမ အဋ္ဌ မာတိကာ၊ ဒွေ ပလိဗောဓာ၊ ပဉ္စာနိသံသာတိ ဣမေ ပန္နရသ ဓမ္မာ။ သမယဒွယံ နာမ ကထိနတ္ထာရသမယော၊ စီဝရသမယော စာတိ။ တတ္ထ ကထိနတ္ထာရသမယော ဝဿာနဿ ပစ္ဆိမော မာသော။ စီဝရသမယော နာမ အနတ္ထတေ ကထိနေ အယံ ကတ္တိကမာသော၊ အတ္ထတေ စတ္တာရော ဟေမန္တိကာ စာတိ ပဉ္စ မာသာ။

တတ္ထ အဋ္ဌ မာတိကာ နာမ ပက္ကမနန္တိကာဒယော။ တာ သဗ္ဗာပိ အတ္ထာရေန ဧကတော ဥပ္ပဇ္ဇန္တိ နာမ။ တဗ္ဘာဝဘာဝိတာယ အတ္ထာရေ သတိ ဥဒ္ဓါရော သမ္ဘဝတိ။ တတ္ထ ကထိနတ္ထာရေန ဧကုပ္ပာဒါ ¶ ဧကနိရောဓာ အန္တရုဗ္ဘာရော သဟုဗ္ဘာရော၊ အဝသေသာ ကထိနုဗ္ဘာရာ ဧကုပ္ပာဒါ၊ နာနာနိရောဓာ စ။ တတ္ထ ဧကနိရောဓာတိ အတ္ထာရေန သဟ နိရောဓာ၊ အန္တရုဗ္ဘာရသဟုဗ္ဘာရာနံ ဥဒ္ဓါရာဘာဝေါ ဧကက္ခဏေ ဟောတီတိ အတ္ထော။ သေသာ နာနာ နိရုဇ္ဈန္တိ နာမ။ တေသု ဟိ ဥဒ္ဓါရဘာဝံ ပတ္တေသုပိ အတ္ထာရော တိဋ္ဌတိ ဧဝါတိ အဋ္ဌကထာယံ အတ္ထဝိဘာဝနာ။ သစေ အတ္ထတေ ကထိနေ ဘိက္ခုသ္မိံ သာပေက္ခေ ¶ တမှာ အာဝါသာ ပက္ကမန္တေ သင်္ဃော အန္တရုဗ္ဘာရံ ကရောတိ၊ တဿ ဘိက္ခုနော ပဌမမေဝ မူလာဝါသေ နိဋ္ဌိတစီဝရပလိဗောဓာဘာဝေပိ သတိ အန္တရုဗ္ဘာရေ ပလိဗောဓော ဆိဇ္ဇတိ သတိပိ သာပေက္ခတာယ သဥဿာဟတ္တာ။ ဣမိနာ ပရိယာယေန ပက္ကမနန္တိကော ကထိနုဒ္ဓါရော အတ္ထာရေန ဧကုပ္ပာဒေါ နာနာနိရောဓော ဟောတိ။ တထာ အန္တရုဗ္ဘာရေ သတိ သုဏန္တဿာပိ ယာဝ စီဝရနိဋ္ဌာနံ န ဂစ္ဆတိ၊ တာဝ ပရိဟာရသမ္ဘဝတော နိဋ္ဌာနန္တိကော။ ယာဝ သန္နိဋ္ဌာနံ န ဂစ္ဆတိ၊ တာဝ ပရိဟာရသမ္ဘဝတော သန္နိဋ္ဌာနန္တိကော။ ယာဝ န နဿတိ၊ တာဝ ပရိဟာရသမ္ဘဝတော နာသနန္တိကော။ ယာဝ န သုဏာတိ၊ တာဝ ပရိဟာရသမ္ဘဝတော သဝနန္တိကော။ ယာဝ စီဝရာသာ န ဆိဇ္ဇတိ၊ တာဝ ပရိဟာရသမ္ဘဝတော အာသာဝစ္ဆေဒိကော။ ယာဝ သီမံ နာတိက္ကမတိ၊ တာဝ ပရိဟာရသမ္ဘဝတော သီမာတိက္ကန္တိကော။ အတ္ထာရေန ဧကုပ္ပာဒေါ နာနာနိရောဓော ဟောတီတိ ဝေဒိတဗ္ဗော။

တတ္ထ အန္တရုဗ္ဘာရသဟုဗ္ဘာရာ ဒွေ အန္တောသီမာယံ ဧဝ သမ္ဘဝန္တိ၊ န ဗဟိသီမာယံ။ ပက္ကမနသဝနသီမာတိက္ကန္တိကာ ဗဟိသီမာယမေဝ သမ္ဘဝန္တိ၊ န အန္တောသီမာယံ။ နိဋ္ဌာနသအအာဋ္ဌာနာသာဝစ္ဆေဒိကာ အန္တောသီမာယဉ္စေဝ ဗဟိသီမာယဉ္စ။ အန္တရုဗ္ဘာရော သင်္ဃာယတ္တော၊ ပက္ကမနနိဋ္ဌာနသန္နိဋ္ဌာနသီမာတိက္ကန္တိကာ ပုဂ္ဂလာဓီနာ၊ သေသာ တဒုဘယဝိပရီတာ။

တတ္ထ ‘‘နိဋ္ဌိတစီဝရသ္မိ’’န္တိ ဣမိနာ စီဝရပလိဗောဓာဘာဝမေဝ ဒီပေတိ။ န အာဝါသပလိဗောဓာဘာဝံ။ ‘‘ဥဗ္ဘတသ္မိံ ကထိနေ’’တိ ဣမိနာ ဥဘယပလိဗောဓာဘာဝံ ဒီပေတိ၊ တသ္မာ ဥဘယပလိဗောဓာဘာဝဒီပနတ္ထံ တဒေဝ ဝတ္တဗ္ဗန္တိ စေ? န၊ ဝိသေသတ္တာ။ ကထံ? ကာမဉ္စေတံ တသ္မာ ‘‘ဥဗ္ဘတသ္မိံ ကထိနေ’’တိ ကေသဉ္စိ ကထိနုဒ္ဓါရာနံ နာနာနိရောဓတ္တာ၊ သင်္ဃပုဂ္ဂလာဓီနာနဓီနတ္တာ စ အန္တောဗဟိဥဘယသီမာသု နိယမာနိယမတော စ ဥဗ္ဘတသ္မိံ ကထိနေ သင်္ဃဿ၊ န ပုဂ္ဂလဿ ဥဗ္ဘတံ ဟောတိ၊ တထာပိ ‘‘ဥဗ္ဘတသ္မိံ ကထိနေ’’တိ ဣဒံ သာမညဝစနံ။ တသ္မာ ‘‘နိဋ္ဌိတစီဝရသ္မိ’’န္တိ ဣမိနာ နိယမေတိ။

ကိံ ဝုတ္တံ ဟောတိ – သင်္ဃဿ အန္တရုဗ္ဘာရေန ဥဗ္ဘတသ္မိံ ကထိနေ အစ္ဆိန္နစီဝရပလိဗောဓော ဗဟိသီမာဂတော ပစ္ဆာ ဂန္တွာ အတ္တနော သီမာဂတော အနိဋ္ဌိတစီဝရော အာနိသံသံ လဘတိ ဧဝါတိ ကတွာ ‘‘နိဋ္ဌိတစီဝရသ္မိ’’န္တိ ဝုတ္တန္တိ ဝေဒိတဗ္ဗံ။ တတ္ထ အာဝါသပလိဗောဓော နာမ ဝသတိ ဝါ တသ္မိံ ¶ အာဝါသေ၊ သာပေက္ခော ဝါ ပက္ကမတိ။ စီဝရပလိဗောဓော နာမ စီဝရံ အကတံ ¶ ဝိပ္ပကတံ၊ စီဝရာသာနုပစ္ဆိန္နာ၊ တဗ္ဗိပရီတေန အပလိဗောဓော ဝေဒိတဗ္ဗော။ တတ္ထ အနတ္ထတကထိနာနံ စီဝရကာလသမယေ နိယမတော စတ္တာရော အာနိသံသာ လဗ္ဘန္တိ၊ အသမာဒါနစာရော အနိယမတော။ တေန သာသင်္ကသိက္ခာပဒံ ဝုတ္တံ။ ကထံ စတ္တာရော နိယတာတိ စေ? ‘‘စီဝရကာလသမယော နာမ အနတ္ထတေ ကထိနေ ဝဿာနဿ ပစ္ဆိမော မာသော’’တိ (ပါရာ။ ၆၄၉) ဝစနတော အနတ္ထတကထိနာနံ တသ္မိံ မာသေ ယာဝဒတ္ထစီဝရံ သိဒ္ဓံ၊ တထာ တတိယကထိနသိက္ခာပဒေ (ပါရာ။ ၄၉၇ အာဒယော) အကာလစီဝရံ နာမ ပိဋ္ဌိသမယတော ပဋ္ဌာယ တံ ပဋိဂ္ဂဟေတွာ သင်္ဃတော လဘိတဗ္ဗံ စေ၊ ယာဝ စီဝရကာလသမယံ နိက္ခိပိတွာ ဘာဇေတွာ ဂဟေတဗ္ဗံ။ ပုဂ္ဂလိကံ စေ၊ ဝဿာနဿ ဆဋ္ဌပက္ခဿ ပဉ္စမိတော ပဋ္ဌာယ ယာဝ စီဝရကာလသမယံ အနဓိဋ္ဌိတံ အဝိကပ္ပိတံ ဝဋ္ဋတိ အစ္စေကစီဝရသိက္ခာပဒေန အနုညာတတ္တာ၊ န တတော ပရံ။ တဒါ ဥပ္ပန္နစီဝရဿ ပဋိသိဒ္ဓတ္တာ ပဌမကထိနေန။ တတ္ထ အဋ္ဌကထာယံ ဝုတ္တနယော သင်္ဃိကံ သန္ဓာယ၊ တထာ ပေါရာဏဂဏ္ဌိပဒေ စာတိ ဝေဒိတဗ္ဗံ။

ပဌမကထိနေ (ပါရာ။ ၄၅၉ အာဒယော) ပဌမပညတ္တိယာ၊ အဝိသေသေန ဝါ ဧကာဒသမေ ဒိဝသေ အာပတ္တိ။ ဝဿာနဿ ဟိ အန္တောနိဝါရဏတ္ထံ အဋ္ဌကထာယ ‘‘နိဋ္ဌိတစီဝရသ္မိံ ဘိက္ခုနာ ဥဗ္ဘတသ္မိံ ကထိနေ’’တိ (ပါရာ။ ၄၆၂ အာဒယော) ဝုတ္တံ။ ဧသေဝ နယော ဒုတိယေ၊ တတိယေ စ။ တေန စီဝရကာလတော ပုရေ ဝါ အန္တော ဝါ ဥပ္ပန္နံ စီဝရကာလတော ဥဒ္ဓံ ဧကဒိဝသမ္ပိ ပရိဟာရံ န လဘတိ။ ယဒိ လဘေယျ၊ အစ္စေကစီဝရသိက္ခာပဒဝိရောဓော။ ‘‘ယာဝ စီဝရကာလသမယံ နိက္ခိပိတဗ္ဗံ၊ တတော စေ ဥတ္တရိ နိက္ခိပေယျ၊ နိဿဂ္ဂိယ’’န္တိ (ပါရာ။ ၆၄၈) ဟိ တတ္ထ ဝုတ္တံ။ ဝဿာဝါသိကဘာဝေန သင်္ဃတော လဒ္ဓံ ဝုဋ္ဌဝဿတ္တာ အတ္တနော သန္တကဘူတံ အစ္စေကစီဝရံ စီဝရကာလသမယံ အတိက္ကာမယတော ဧဝ အာပတ္တိ၊ န အစ္စေကစီဝရကာလံ အတိက္ကာမယတော အာပတ္တီတိ။ ‘‘အနတ္ထတေ ကထိနေ ဧကာဒသမာသေ ဥပ္ပန္န’’န္တိ (ပါရာ။ ၅၀၀) ဝစနတော ယော စ တတ္ထ စီဝရုပ္ပာဒေါ၊ သော စ နေသံ ဘဝိဿတီတိ သိဒ္ဓံ၊ အနာမန္တစာရဂဏဘောဇနသိက္ခာပဒေ ‘‘အညတြ သမယာ’’တိ (ပါစိ။ ၂၂၂ အာဒယော) ဝုတ္တတ္တာ သေသဒွယံ သိဒ္ဓမေဝ။ တသ္မာ ‘‘ကာလေပိ အာဒိဿ ဒိန္နံ၊ ဧတံ အကာလစီဝရ’’န္တိ (ပါရာ။ ၅၀၀) ဝစနတော အာဒိဿ ဒိန္နစီဝရံ ပရိဟာရံ န လဘတိ။

အပရကတ္တိကာယမေဝ ဝါ ဥဗ္ဘတသ္မိံ ကထိနေ လဘတိ၊ ဧဝံ ‘‘ဥဗ္ဘတသ္မိံ ကထိနေ’’တိ ဝုတ္တတ္တာတိ စေ? န ဝတ္တဗ္ဗံ။ ဆ ဌာနာနိ ဟိ သာပေက္ခတာယ ဝုတ္တာနိ ¶ ။ ဒုဋ္ဌဒေါသဒွယေ အဓိကရဏစတုတ္ထံ၊ ပဌမာနိယတေ သောတဿ ရဟော၊ တတိယကထိနေ အာဒိဿ ဒိန္နံ စီဝရံ၊ အစ္စေကစီဝရသိက္ခာပဒေ ¶ ‘‘သညာဏံ ကတွာ နိက္ခိပိတဗ္ဗ’’န္တိ ပဒံ၊ ဒုဋ္ဌုလ္လာရောစနပ္ပဋိစ္ဆာဒနဒွယေ အဓိကရဏံ၊ ပါရာဇိကဝစနဉ္စ၊ တီသု ကထိနသိက္ခာပဒေသု ‘‘အဋ္ဌန္နံ မာတိကာနံ အညတရာယာ’’တိ ဝစနန္တိ။ တတ္ထ အာဒိဿ ဒိန္နံ စီဝရံ သင်္ဃိကံ ဘာဇိတဗ္ဗစီဝရံ သန္ဓာယ ဝုတ္တံ၊ န ပုဂ္ဂလိကံ။ သညာဏံ ကတွာ နိက္ခိပိတဗ္ဗန္တိ ဝဿာဝါသိကစီဝရံ သန္ဓာယ ဝုတ္တံ။ အဝုဋ္ဌဝဿေန ပစ္ဆာ ဒါတဗ္ဗတ္တာ သညာဏံ ကာတဗ္ဗံ၊ န ဉာတိပ္ပဝါရိတတော လဒ္ဓံ ပုဂ္ဂလိကံ သန္ဓာယ။ တသ္မာ ဒုဝိဓံ အစ္စေကစီဝရံ သင်္ဃေ နိန္နံ၊ ပုဂ္ဂလေ နိန္နဉ္စာတိ သိဒ္ဓံ။ တတ္ထ သင်္ဃေ ပရိဏတံ အစ္စေကစီဝရံ ဝဿူပနာယိကဒိဝသတော ပဋ္ဌာယ၊ ပိဋ္ဌိသမယတော ပဋ္ဌာယ ဝါ ယာဝ ပဝါရဏာ နိက္ခိပိတုံ ဝဋ္ဋတိ ဧဝ သင်္ဃိကတ္တာ၊ ပုဂ္ဂလိကမ္ပိ ‘‘ဝဿံဝုဋ္ဌကာလေ ဂဏှထာ’’တိ ဒိန္နတ္တာ။ တာဒိသဉှိ ယာဝ ဝဿံဝုဋ္ဌော န ဟောတိ၊ တာဝ တဿေဝ ဒါယကဿ သန္တကံ ဟောတိ။ ဧတ္တကော ဝိသေသဟေတု။

‘‘အနစ္စေကစီဝရေ အနစ္စေကစီဝရသညီ စီဝရကာလသမယံ အတိက္ကာမေတိ၊ အနာပတ္တီ’’တိ ဝစနတော အစ္စေကစီဝရကဿေဝ သော အပရာဓော။ ယေန ‘‘ဝိရောဓော’’တိ ဝစနံ ဒဿေယျာတိ န ဝိနယေ ဝိသေသဟေတု ပရိယေသိတဗ္ဗော။ ဗုဒ္ဓဝိသယတ္တာ ပမာဏန္တိ စေ? န၊ ယဒိ ဧဝံ ဧတ္ထ အတ္တနော သန္တကဘူတမ္ပိ အစ္စေကစီဝရံ သညာဏံ ကတွာ နိက္ခိပိတဗ္ဗမေဝ၊ န အဓိဋ္ဌာတဗ္ဗံ န ဝိကပ္ပေတဗ္ဗံ န ဝိဿဇ္ဇေတဗ္ဗံ။ တတော ‘‘အနာပတ္တိ၊ အန္တောသမယေ အဓိဋ္ဌေတိ ဝိကပ္ပေတိ ဝိဿဇ္ဇေတီ’’တိအာဒိဝစနဝိရောဓော (ပါရာ။ ၆၅၁) အဓိဝါသေတဗ္ဗော သိယာ။ တထာ ‘‘ဝဿာနဿ ပစ္ဆိမေ မာသေ ကထိနုဒ္ဓါရေ ကတေ တသ္မိံ မာသေ အတ္ထတေ ကထိနေ ကထိနုဒ္ဓါရဒိဝသံ အတိက္ကာမေတိ၊ နိဿဂ္ဂိယံ ဟောတီ’’တိ ဝစနတော နိဿဂ္ဂိယံ ဟောတီတိ အယမ္ပိ အတ္ထဝိရောဓော အဓိဝါသေတဗ္ဗော သိယာ။ တသ္မိဉ္စ ‘‘အနစ္စေကစီဝရေ အနာပတ္တီ’’တိ ဝုတ္တံ၊ တဉ္စ အနဓိဋ္ဌိတံ အဝိကပ္ပိတမေဝါတိ ဧတ္တကော ဝိသေသဟေတု။ အတိရေကစီဝရဉ္စေတံ ပဌမသိက္ခာပဒေနာပတ္တိ၊ ဣတရံ စေ အနာပတ္တိယေဝါတိ ဣမဿ အတ္ထဿ အယံ ဘဂဝတော ဝိသေသဟေတု။ တထာ အတိရေကဒသာဟာနာဂတာယေဝ ကတ္တိကပုဏ္ဏမာယ သင်္ဃဿ ဝဿာဝါသိကတ္ထံ အစ္စေကစီဝရံ ဝိယ ဒဒမာနံ န ¶ ဂဟေတဗ္ဗံ၊ ဒသာဟာနာဂတာယ ဧဝ ဂဟေတဗ္ဗန္တိ ဧတ္တကော ဝိသေသဟေတု။ တတော အဋ္ဌကထာနယဝိရောဓော စ အဓိဝါသေတဗ္ဗော သိယာ။ တတ္ထ ‘‘အဓိဋ္ဌိတတော ပဋ္ဌာယ ဥပ္ပန္နံ အစ္စေကစီဝရံ န ဟောတီ’’တိ ဝတွာ အညထာ နယော ဒဿိတော။ ပေါရာဏဂဏ္ဌိပဒေ သော စ နယော သင်္ဃိကံ ဥပါဒါယ ဝုတ္တတ္တာ န ဝိရုဇ္ဈတီတိ နေဝ သော စ ပဋိက္ခိတ္တော။ ယထာ အနစ္စေကစီဝရံ ဆဋ္ဌိတော ပဋ္ဌာယ ဥပ္ပန္နံ အတိရေကဒသာဟာနာဂတာယပိ ပဋိဂ္ဂဟေတဗ္ဗံ၊ ပဋိဂ္ဂဟေတွာ စီဝရကာလသမယံ အတိက္ကာမယတောပိ အနာပတ္တီတိ အယမ္ပိ နယော အဓိဝါသေတဗ္ဗော သိယာ။ တတော ပဌမကထိနဝိရောဓော။ ဒသာဟာနာဂတာယ ဧဝ ပဋိဂ္ဂဟေတဗ္ဗံ၊ ပဋိဂ္ဂဟေတွာ ¶ စီဝရကာလသမယံ အတိက္ကာမယတော အနာပတ္တီတိ စေ၊ တံ ဒွေ ဒသာဟေ လဘတီတိ ဧတ္တကော ဝိသေသဟေတု။

အန္တရာ အနာပတ္တိက္ခေတ္တစီဝရကာလပ္ပဝိဋ္ဌတ္တာ အဓိဋ္ဌဟိတွာ ပစ္စုဒ္ဓဋံ ဝိယ တံ ပုနပိ ဒသာဟေ လဘတီတိ စေ? န၊ ကာလပ္ပဝေသော အဓိဋ္ဌာနံ ဝိယ ဟောတီတိ စေ? န၊ ‘‘ဝဿိကသာဋိကံ ဝဿာနံ စာတုမာသံ အဓိဋ္ဌာတုံ၊ တတော ပရံ ဝိကပ္ပေတု’’န္တိ ဝစနဝိရောဓံ ကတွာ၊ တတော ပရံ ဒသာဟံ အဝိကပ္ပေန္တဿာပိ အနာပတ္တိ သိယာ။ အပိစ ယံ ဝုတ္တံ အဋ္ဌကထာယံ ‘‘ဝဿိကသာဋိကာ အန္တောဝဿေ လဒ္ဓါ စေဝ နိဋ္ဌိတာ စ၊ အန္တောဒသာဟေ အဓိဋ္ဌာတဗ္ဗာ၊ ဒသာဟာတိက္ကမေ နိဋ္ဌိတာ၊ တဒဟေဝ အဓိဋ္ဌာတဗ္ဗာ၊ ဒသာဟေ အပ္ပဟောန္တေ စီဝရကာလံ နာတိက္ကာမေတဗ္ဗာ’’တိ (ပါရာ။ အဋ္ဌ။ ၂။၆၃၀)။ တေန အာပတ္တိတော န မုစ္စေယျ။ ကာလပ္ပဝေသော ဟိ အဓိဋ္ဌာနပရိယာယော န ဇာတောတိ။ ဧတ္တာဝတာ ယထာဝုတ္တော အတ္ထဝိကပ္ပော ပါဠိနယေနေဝ ပတိဋ္ဌာပိတော ဟောတိ။

အပိစေတ္ထ ယံ ဝုတ္တံ အဋ္ဌကထာယံ ‘‘ဒသာဟေ အပ္ပဟောန္တေ စီဝရကာလံ နာတိက္ကာမေတဗ္ဗာ’’တိ၊ တတ္ထပိ စီဝရကာလေ ဥပ္ပန္နံ၊ ဒသာဟေ အပ္ပဟောန္တေ စဿ ကရဏံ နတ္ထိ၊ တံ အစ္စေကစီဝရံ အကာလစီဝရမိဝ စီဝရကာလံ နာတိက္ကာမေတဗ္ဗန္တိ သိဒ္ဓမေတံ။ ပါဠိတော စ တဉ္စေ အန္တောကာလေ ဥပ္ပဇ္ဇတိ၊ ဒသာဟေ အပ္ပဟောန္တေပိ ဥပ္ပဇ္ဇတိ၊ ဧဝံ ဥပ္ပန္နံ အစ္စေကစီဝရံ အစ္စေကစီဝရမေဝ န ဟောတိ။ န ဟိ တံ ကာလဝိသေသဝသေန အစ္စေကစီဝရသင်္ခံ ဂစ္ဆတိ။ ဝုတ္တဉှေတံ ‘‘အစ္စေကစီဝရံ နာမ သေနာယ ဝါ ဂန္တုကာမော ဟောတိ၊ ပဝါသံ ဝါ ဂန္တုကာမော ဟောတိ၊ ဂိလာနော ဝါ ဟောတိ၊ ဂဗ္ဘိနီ ဝါ ဟောတိ ¶ ၊ အဿဒ္ဓဿ ဝါ သဒ္ဓါ ဥပ္ပန္နာ ဟောတိ…ပေ… ‘ဝဿာဝါသိကံ ဒဿာမီ’တိ ဧဝံ အာရောစိတံ၊ ဧတံ အစ္စေကစီဝရံ နာမာ’’တိ (ပါရာ။ ၆၄၉)။ တသ္မာ ယထာ တံ စီဝရံ နာတိက္ကာမေတဗ္ဗံ၊ တထာ အနစ္စေကစီဝရမ္ပီတိ သိဒ္ဓံ ဟောတိ။ တေန ဝုတ္တံ အဋ္ဌကထာယံ ‘‘ဒသာဟေ အပ္ပဟောန္တေ စီဝရကာလံ နာတိက္ကာမေတဗ္ဗာ’’တိ။ အပိစ ယဒိ ဧဝံ တံ အစ္စေကစီဝရသိက္ခာပဒမေဝ အစ္စေကစီဝရံ စီဝရကာလံ နာတိက္ကာမေတဗ္ဗန္တိ ဣမဿ ပန အတ္ထဝိသေသဿ ဒဿနတ္ထံ ဘဂဝတာ ပညတ္တံ။

မဟာအဋ္ဌကထာယံ ပန တံ ဧဝံ ဝုတ္တံ – ကာမဉ္စေဒံ ‘‘ဒသာဟပရမံ အတိရေကစီဝရံ ဓာရေတဗ္ဗ’’န္တိ ဣမိနာ သိဒ္ဓံ၊ အဋ္ဌုပ္ပတ္တိဝသေန ပန အပုဗ္ဗံ ဝိယ အတ္ထံ ဒဿေတွာ သိက္ခာပဒံ ဌပိတန္တိ အတ္ထဝိသေသဒီပနပယောဇနတော။ တသ္မာ တံ တဿ အတ္ထဝိသေသဒဿနတ္ထံ ဝုတ္တန္တိ သိဒ္ဓမေဝ။ တသ္မာပိ ဝေဒိတဗ္ဗမေဝ ယံ ကိဉ္စိ စီဝရံ စီဝရကာလသမယံ နာတိက္ကာမေတဗ္ဗန္တိ။ အပိစ ယံ ဝုတ္တံ အဋ္ဌကထာယံ ‘‘ဆဋ္ဌိတော ပဋ္ဌာယ ပန ဥပ္ပန္နံ အနစ္စေကစီဝရမ္ပိ ပစ္စုဒ္ဓါရေတွာ ဌပိတစီဝရမ္ပိ ¶ ဧတံ ပရိဟာရံ လဘတီ’’တိ (ပါရာ။ အဋ္ဌ။ ၂။၆၄၆-၆၄၉)။ တေန ‘‘အနစ္စေကစီဝရေ အနစ္စေကစီဝရသညီ စီဝရကာလသမယံ အတိက္ကာမေတိ၊ အနာပတ္တီ’’တိ (ပါရာ။ ၆၅၀) ဣမိနာပိ အနစ္စေကစီဝရဿာပိ အစ္စေကစီဝရပရိဟာရလာဘံ ဒီပေတီတိ။

ဧတ္တာဝတာ ယထာဝုတ္တော ဒုတိယော အတ္ထဝိကပ္ပော ပါဠိနယေန၊ အဋ္ဌကထာနယေန စ ပတိဋ္ဌာပိတော ဟောတိ။ ဧဝံ တာဝ ပကိဏ္ဏကာယ အဓိကထာ ပရတော ပါဌတော ဝိတ္ထာရိတာ ဟောတီတိ အပကိဏ္ဏကံ။

စီဝရပလိဗောဓော၊ အာဝါသပလိဗောဓော စာတိ ဒွေ ပလိဗောဓာ။ တေသု ဧကပလိဗောဓေပိ သတိ အနာမန္တစာရာဒိအာနိသံသံ လဘတိ၊ တံ ဣဓ နတ္ထီတိ ဒဿေတုံ ‘‘နိဋ္ဌိတစီဝရသ္မိံ ဘိက္ခုနာ ဥဗ္ဘတသ္မိံ ကထိနေ’’တိ ဝုတ္တံ။ တသ္မာ ဧဝ ‘‘အတ္ထတကထိနဿ ဟိ ဘိက္ခုနော’’တိအာဒိ ဝုတ္တံ။ ကထိနတ္ထာရာရဟဿာတိ ဧတ္ထ ‘‘အဋ္ဌဟိ အင်္ဂေဟိ သမန္နာဂတော ပုဂ္ဂလော ဘဗ္ဗော ကထိနံ အတ္ထရိတုံ – ပုဗ္ဗကရဏံ ဇာနာတိ၊ ပစ္စုဒ္ဓါရံ ဇာနာတိ၊ အဓိဋ္ဌာနံ ဇာနာတိ၊ အတ္ထာရံ ဇာနာတိ၊ မာတိကံ ဇာနာတိ၊ ပလိဗောဓံ ဇာနာတိ၊ ဥဒ္ဓါရံ ဇာနာတိ၊ အာနိသံသံ ဇာနာတီ’’တိ (ပရိ။ ၄၀၉) ဝစနတော ဣမေဟိ အဋ္ဌဟိ အင်္ဂေဟိ သမန္နာဂတော ပုဂ္ဂလော ကထိနတ္ထာရာရဟော နာမ။ ပုဗ္ဗကရဏံ နာမ ဓောဝနဝိစာရဏစ္ဆေဒနသိဗ္ဗနရဇနကပ္ပကရဏံ။

‘‘စီဝရံ ¶ နာမ ခေါမ’’န္တိအာဒိနာ ပါဠိဝသေန ဇာတိဉ္စ ပမာဏဉ္စ ဒဿေတွာ ဣဒါနိ အတိရေကစီဝရံ ဒဿေတုံ ‘‘ယံ ပန ဝုတ္တံ အဓိဋ္ဌိတဝိကပ္ပိတေသူ’’တိအာဒိ ဝုတ္တံ။ ဌပိတဋ္ဌာနံ သလ္လက္ခေတွာ’’တိ ဝုတ္တေပိ ယသ္မိံ ဌာနေ ယံ ဌပိတံ၊ တသ္မိံ တံ ပစ္ဆာ ဟောတု ဝါ၊ မာ ဝါ၊ အဓိဋ္ဌာနံ ရုဟတေဝ။ ပုရေ ပစ္ဆာ ဌပနဋ္ဌာနံ န ပမာဏံ။

အန္တိမဝတ္ထုံ အဇ္ဈာပန္နဿ ဘိက္ခုဘာဝပရိစ္စာဂဝသေန သေတဝတ္ထနိဝါသနံ ဝါ ကာသာဝစဇနံ ဝါ ဟီနာယာဝတ္တနံ။

ဧကာဒသမေ အရုဏုဂ္ဂမနေတိ အန္တိမံ ဌပေတွာ တတော ပုရိမတရသ္မိန္တိ အတ္ထော ဝေဒိတဗ္ဗော။ တတ္ထ အန္တိမံ နာမ အပရကတ္တိကာယ ပဌမာရုဏုဂ္ဂမနံ။ တဉှိ ကာလတ္တာ နိဿဂ္ဂိယံ န ကရောတိ။ ဣဓ ‘‘နိဋ္ဌိတစီဝရသ္မိံ ဘိက္ခုနာ’’တိ ကရဏဝစနံ နိဒါနာနပေက္ခံ နိဒါနေ ကရဏာဘာဝတော။ တသ္မာ ဧဝ ‘‘ဒသာဟပရမ’’န္တိ အယမေတ္ထ အနုပညတ္တီတိ ဝုတ္တံ။ ‘‘အနုဇာနာမိ၊ ဘိက္ခဝေ၊ တိစီဝရံ အဓိဋ္ဌာတုံ န ဝိကပ္ပေတု’’န္တိအာဒိ (မဟာဝ။ ၃၅၈) ဝစနတော စ ဣဓ ‘‘ဝိကပ္ပေတီ’’တိ အဝိသေသေန ဝုတ္တဝစနံ ဝိရုဒ္ဓံ ဝိယ ဒိဿတိ၊ န စ ဝိရုဒ္ဓံ တထာဂတာ ဘာသန္တိ၊ ¶ တသ္မာ ဧဝမဿ အတ္ထော ဝေဒိတဗ္ဗော – တိစီဝရံ တိစီဝရသင်္ခေပေန ပရိဟာရတော အဓိဋ္ဌာတုမေဝ အနုဇာနာမိ၊ န ဝိကပ္ပေတုံ။ ဝဿိကသာဋိကံ ပန စတုမာသတော ပရံ ဝိကပ္ပေတုမေဝ၊ န အဓိဋ္ဌာတုန္တိ။ ဧဝဉ္စ ပန သတိ ယော တိစီဝရေ ဧကေန စီဝရေန ဝိပ္ပဝသိတုကာမော ဟောတိ၊ တဿ တိစီဝရာဓိဋ္ဌာနံ ပစ္စုဒ္ဓရိတွာ ဝိပ္ပဝါသသုခတ္ထံ ဝိကပ္ပနာယ ဩကာသော ဒိန္နော ဟောတိ၊ ဒသာဟာတိက္ကမေ စ အနာပတ္တီတိ။ ဧတေန ဥပါယေန သဗ္ဗတ္ထ ဝိကပ္ပနာယ အပဋိသိဒ္ဓဘာဝေါ ဝေဒိတဗ္ဗောတိ လိခိတံ။

ဣမဿ ပန သိက္ခာပဒဿ အယံ သင်္ခေပဝိနိစ္ဆယော – အနတ္ထတေ ကထိနေ ဟေမန္တာနံ ပဌမဒိဝသတော ပဋ္ဌာယ၊ အတ္ထတေ ကထိနေ ဂိမှာနံ ပဌမဒိဝသတော ပဋ္ဌာယ ဥပ္ပန္နစီဝရံ သန္ဓာယ ‘‘နိဋ္ဌိတစီဝရသ္မိ’’န္တိအာဒိ ဝုတ္တံ။ ဧတ္ထာဟ – ‘‘ရဇကေဟိ ဓောဝါပေတွာ သေတကံ ကာရာပေန္တဿာပိ အဓိဋ္ဌာနံ အဓိဋ္ဌာနမေဝါ’’တိ (ပါရာ။ အဋ္ဌ။ ၂။၄၆၅) ဝစနတော အရဇိတေပိ အဓိဋ္ဌာနံ ရုဟတီတိ။ တေန သူစိကမ္မံ ကတွာ ရဇိတွာ ကပ္ပဗိန္ဒုံ ဒတွာ အဓိဋ္ဌာတဗ္ဗန္တိ နိယမော ကာတဗ္ဗော၊ န ကာတဗ္ဗောတိ? ကတ္တဗ္ဗောဝ။ ပတ္တော ဝိယ အဓိဋ္ဌိတော ယထာ ပုန သေတဘာဝံ ဝါ တမ္ဗဘာဝံ ဝါ ပတ္တော အဓိဋ္ဌာနံ န ဝိဇဟတိ၊ န စ ပန တာဒိသော ¶ ယံ အဓိဋ္ဌာနံ ဥပဂစ္ဆတိ၊ ဧဝမေတံ ဒဋ္ဌဗ္ဗန္တိ။ ‘‘သွေ ကထိနံ ဥဒ္ဓရိဿတီ’’တိ လဒ္ဓစီဝရံ သစေ အဇ္ဇေဝ န အဓိဋ္ဌာတိ၊ အရုဏုဂ္ဂမနေ ဧဝ နိဿဂ္ဂိယံ ဟောတိ။ ကသ္မာ? ‘‘နိဋ္ဌိတစီဝရသ္မိ’’န္တိအာဒိနာ (ပါရာ။ ၄၆၂-၄၆၃၊) သိက္ခာပဒဿ ဝုတ္တတ္တာ။ ကထိနဗ္ဘန္တရေ ဒသာဟတော ဥတ္တရိပိ ပရိဟာရံ လဘတိ၊ ကထိနတော ပန ပစ္ဆာ ဧကဒိဝသမ္ပိ န လဘတိ။ ယထာ ကိံ – ယထာ အတ္ထတကထိနော သင်္ဃော တိစီဝရံ အတ္ထတဒိဝသတော ပဋ္ဌာယ ယာဝ ဥဗ္ဘာရာ အာနိသံသံ လဘတိ၊ န တတော ပရံ၊ ဧဝံ အတ္ထတဒိဝသတော ပဋ္ဌာယ ယာဝ ဥဗ္ဘာရာ လဘတိ၊ ဥဒ္ဓတေ ပန ကထိနေ ဧကဒိဝသမ္ပိ န လဘတိ။ ဧတ္ထာဟ – ဥဗ္ဘတဒိဝသတော ပဋ္ဌာယ ပုန ဒသာဟံ လဘတီတိ? န၊ ကသ္မာ? ‘‘အနုဇာနာမိ၊ ဘိက္ခဝေ၊ ဒသာဟပရမံ အတိရေကစီဝရံ ဓာရေတု’’န္တိ ဝစနတော။ ကထိနဗ္ဘန္တရေပိ ဧကာဒသေ အရုဏုဂ္ဂမနေ နိဿဂ္ဂိယန္တိ အာပန္နံ။ တံ ပန အတိပ္ပသင်္ဂံ နိဝါရေတုံ ‘‘နိဋ္ဌိတစီဝရသ္မိ’’န္တိအာဒိ ဝုတ္တံ၊ န ကထိနဒိဝသာနိ အဒိဝသာနီတိ ဒီပနတ္ထံ။ အယမတ္ထော တတ္ထ တတ္ထ အာဝိဘဝိဿတိ။ အထ ဝါ ဝဿိကသာဋိကာ အနတိရိတ္တပ္ပမာဏာ နာမံ ဂဟေတွာ ဝုတ္တနယေနေဝ စတ္တာရော ဝဿိကေ မာသေ အဓိဋ္ဌာတဗ္ဗာ၊ တတော ပရံ ပစ္စုဒ္ဓရိတွာ ဝိကပ္ပေတဗ္ဗာတိ ဝုတ္တံ။ ဧတ္ထ ‘‘ပစ္စုဒ္ဓရိတွာ’’တိ ဝစနေ ဥပေါသထဒိဝသေ ဧဝ ပစ္စုဒ္ဓရိတွာ ဝိကပ္ပေတွာ ဌပိတံ ဟောတိ၊ တတော ပရံ ဟေမန္တဿ ပဌမဒိဝသတော ပဋ္ဌာယ ပစ္စုဒ္ဓရဏာဘာဝါ။ ဧဝံ ကထိနဗ္ဘန္တရေ ဥပ္ပန္နစီဝရမ္ပိ ဝေဒိတဗ္ဗန္တိ လိခိတံ။

ကထိနသိက္ခာပဒဝဏ္ဏနာ နိဋ္ဌိတာ။

၂။ ဥဒေါသိတသိက္ခာပဒဝဏ္ဏနာ

‘‘အတ္ထတကထိနဿ ¶ ပဉ္စ မာသေ ဗဒ္ဓသီမာယံ ယတ္ထ ကတ္ထစိ စီဝရံ နိက္ခိပိတွာ ပက္ကမန္တဿ အနာပတ္တီ’’တိ အဋ္ဌကထာယံ ဝုတ္တံ။ ‘‘အဗဒ္ဓသီမာယပိ ဝဋ္ဋတီ’’တိ ဣဒံ အဗဒ္ဓသီမာယံ ကထိနတ္ထာရဉ္စ အာရညကသိက္ခာပဒဉ္စ သာဓေတီတိ လိခိတံ။ ဣဒါနိ –

‘‘ဆိန္နံ ဓုတင်္ဂံ သာသင်္က-သမ္မတော သန္တရုတ္တရံ၊

အစီဝရဿာနာပတ္တိ၊ ပစ္စုဒ္ဓါရာဒိသိဒ္ဓိတော’’တိ။ (ဝဇိရ။ ဋီ။ ပါရာဇိက ၄၇၉) –

ဣဒံ ပကိဏ္ဏကံ ဝေဒိတဗ္ဗံ။

တတြာယံ ¶ စောဒနာပုဗ္ဗင်္ဂမဝိနိစ္ဆယော – ကေစိ ‘‘ဒိဂုဏံ သင်္ဃာဋိ’’န္တိ (မဟာဝ။ ၃၄၈) ဝစနတော ‘‘ဧကစ္စိကာ သင်္ဃာဋိ နာဓိဋ္ဌာတဗ္ဗာ။ သစေ အဓိဋ္ဌာတိ၊ န ရုဟတီ’’တိ ဝတွာ ဥပသမ္ပဒါပေက္ခာနမ္ပိ ဒိဂုဏံယေဝ သင်္ဃာဋိံ ဒတွာ ဥပသမ္ပာဒေန္တိ၊ တေ ဣမိနာ သုတ္တလေသေန သညာပေတဗ္ဗာ။ ဘဂဝတာ ဟိ ‘‘ဆိန္နကံ သင်္ဃာဋိံ၊ ဆိန္နကံ ဥတ္တရာသင်္ဂံ၊ ဆိန္နကံ အန္တရဝါသက’’န္တိ ပဌမံ အနုညာတံ။ တတော ‘‘အညတရဿ ဘိက္ခုနော တိစီဝရေ ကရိယမာနေ သဗ္ဗံ ဆိန္နကံ နပ္ပဟောတိ။ ဒွေ ဆိန္နကာနိ ဧကံ အဆိန္နကံ နပ္ပဟောတိ၊ ဒွေ အဆိန္နကာနိ ဧကံ ဆိန္နကံ နပ္ပဟောတီ’’တိ ဣမသ္မိံ ဝတ္ထုသ္မိံ ‘‘အနုဇာနာမိ၊ ဘိက္ခဝေ၊ အနွာဓိကမ္ပိ အာရောပေတု’’န္တိ (မဟာဝ။ ၃၆၀) အနုညာတံ၊ တသ္မာ ဧကစ္စိကာပိ သင်္ဃာဋိ ဝဋ္ဋတီတိ သိဒ္ဓံ။ ယာ ဆိဇ္ဇမာနာပိ နပ္ပဟောတိ၊ တဿာ ကုတော ဒိဂုဏတာတိ? အဋ္ဌကထာယမ္ပိဿ ဝုတ္တံ ‘‘အနွာဓိကမ္ပိ အာရောပေတုန္တိ အာဂန္တုကပတ္တမ္ပိ ဒါတုံ၊ ဣဒံ ပန အပ္ပဟောနကေ အာရောပေတဗ္ဗံ။ သစေ ပဟောတိ၊ အာဂန္တုကပတ္တံ န ဝဋ္ဋတိ၊ ဆိန္ဒိတဗ္ဗမေဝါ’’တိ (မဟာဝ။ အဋ္ဌ။ ၃၆၀)။ ကထိနံ ပန ဆိန္နကမေဝ ဝဋ္ဋတိ၊ အာဝေဏိကလက္ခဏတ္တာ၊ ‘‘ဆိန္နကံ ဒိဂုဏံ နပ္ပဟောတီ’’တိ ဝစနာဘာဝတော စာတိ သန္နိဋ္ဌာနမေတ္ထ ဂန္တဗ္ဗန္တိ။

ဓုတင်္ဂန္တိ အနုပသမ္ပန္နာနံ တေစီဝရိကဓုတင်္ဂါဘာဝတော တိစီဝရေနေဝ တေစီဝရိကောတိ၊ တေသံ အဓိဋ္ဌာနာဘာဝတော ‘‘အဓိဋ္ဌိတေနေဝါ’’တိ ဝတ္တဗ္ဗံ ဟောတူတိ စေ? န၊ ဓုတင်္ဂဘေဒေန ဝိရောဓပ္ပသင်္ဂတော။ စတုတ္ထစီဝရသာဒိယနေန ဟိ ဓုတင်္ဂဘေဒေါ၊ န တိစီဝရဝိပ္ပဝါသေန၊ နာပိ အတိရေကစီဝရသာဒိယနေန၊ နာပိ အတိရေကစီဝရဓာရဏေန။ ယသ္မာ ပန ဘိက္ခူနံ ဧဝ ဘဂဝတာ အဓိဋ္ဌာနဝသေန နဝ စီဝရာနိ ¶ အနုညာတာနိ၊ ဇာတိဝသေန စ ဝုတ္တာနိ၊ န ဧဝံ အနုပသမ္ပန္နာနံ၊ တသ္မာ နေသံ စီဝရနိယမာဘာဝါ န တံ ဓုတင်္ဂံ အနုညာတံ ဂဟဋ္ဌာနံ ဝိယ။ တသ္မာ တဿ သမာဒါနဝိဓာနေ အဝစနတော စ သန္နိဋ္ဌာနမေတ္ထ ဂန္တဗ္ဗန္တိ။

သာသင်္ကသမ္မတောတိ ကင်္ခါဝိတရဏိယံ (ကင်္ခါ။ အဋ္ဌ။ သာသင်္ကသိက္ခာပဒဝဏ္ဏနာ) သာသင်္ကသိက္ခာပဒေ ဝိသုံ အင်္ဂါနိ န ဝုတ္တာနိ၊ ‘‘သေသမေတ္ထ စီဝရဝဂ္ဂဿ ဒုတိယသိက္ခာပဒေ ဝုတ္တနယေနေဝ ဝေဒိတဗ္ဗ’’န္တိ ဝုတ္တံ၊ န စ ပနေတံ ဝုတ္တံ။ တတ္ထ ရတ္တိဝိပ္ပဝါသော စတုတ္ထမင်္ဂံ၊ ဣဓ ဆာရတ္တဝိပ္ပဝါသော၊ အယမေတ္ထ ဝိသေသောတိ။ တသ္မာ အင်္ဂသာမညတော စ သမ္မုတိသာမညတော စ သာသင်္ကသိက္ခာပဒမေဝိဒန္တိ ဣဒံ ¶ နိပ္ပဒေသံ၊ တံ သပ္ပဒေသံ မာသပရမတ္တာ။ တတ္ထ ဗဟိဂါမေပိ ဂါမသီမံ ဩက္ကမိတွာ ဝသိတွာ ပက္ကမန္တဿ အနာပတ္တိ၊ ဣဓ န တထာ။ ဣဓ အနန္တရေ အနန္တရေ အရုဏုဂ္ဂမနေ နိဿဂ္ဂိယံ၊ တတ္ထ သတ္တမေတိ အယံ ဣမေသံ ဒွိန္နံ ဝိသေသော။ အင်္ဂါနိ ပန စီဝရနိက္ခေပနင်္ဂသမ္ပတ္တိတော ဝိပရိယာယေန၊ ဣဓ ဝုတ္တနယေန စ သိဒ္ဓတ္တာ န ဝုတ္တာနိ။ တာနိ ကာမံ န ဝုတ္တာနိ၊ တထာပိ စတုတ္ထမင်္ဂံ ဝိသေသိတဗ္ဗံ၊ န ပန ဝိသေသိတံ။ ကိံ ကာရဏံ? ဣဓ ဝုတ္တနိဿဇ္ဇနက္ကမေန နိဿဇ္ဇိတွာ အာပတ္တိဒေသနတော၊ တတ္ထာပန္နာပတ္တိဝိမောက္ခဒီပနတ္ထံ။ သံဝစ္ဆရဝိပ္ပဝုတ္ထမ္ပိ ရတ္တိဝိပ္ပဝုတ္ထမေဝ၊ ပဂေဝ ဆာရတ္တဝိပ္ပဝုတ္ထံ။ ဧဝံ သန္တေပိ တတ္ထ ယထာဝုတ္တအင်္ဂသမ္ပတ္တိယာ သတိ တတ္ထ ဝုတ္တနယေနေဝ နိဿဇ္ဇိတဗ္ဗံ။ ဟေမန္တေ၊ ဂိမှေ ဝါ နိဿဇ္ဇတိ စေ? ဣဓ ဝုတ္တနယေနာပိ နိဿဇ္ဇိတုံ ဝဋ္ဋတီတိ ဉာပနတ္ထံ စတုတ္ထမင်္ဂံ န ဝိသေသိတန္တိ နော တက္ကောတိ အာစရိယော။ မာသာတိက္ကန္တံ၊ ဒသာဟာတိက္ကန္တမ္ပိ စီဝရံ ‘‘ဒသာဟာတိက္ကန္တ’’န္တိ ဝတွာ နိဿဋ္ဌမေဝ၊ န ဦနမာသံ ဟုတွာ ‘‘ဒသာဟာတိက္ကန္တ’’န္တိ ဝတွာ၊ မာသာတိက္ကန္တ’’န္တိ ဝတွာတိ ဧကေ။ တထာပိ သစေ ပစ္စာသာစီဝရံ ဟောတိ၊ နိဿဂ္ဂိယံ။ ‘‘ဒသာဟာတိက္ကန္တ’’န္တိ ဝတွာ မူလစီဝရံ ပန ‘‘မာသာတိက္ကန္တ’’န္တိ ဝတွာ နိဿဇ္ဇိတဗ္ဗံ။

‘‘သန္တရုတ္တရ’’န္တိ ဝါ ‘‘သင်္ဃာဋိ’’န္တိ ဝါ ‘‘စီဝရ’’န္တိ ဝါ ကိံ တိစီဝရံ၊ ဥဒါဟု အညမ္ပီတိ? ကိဉ္စေတ္ထ – ယဒိ တိစီဝရမေဝ ပဋိသိဒ္ဓံ၊ ပရိယာပန္နဝသေန အစ္ဆိန္နစီဝရအအဆန္ဒနဓောဝါပနဝိညတ္တိအာဒိဝိရောဓော။ အထ အညမ္ပိ ‘‘နိဋ္ဌိတစီဝရသ္မိ’’န္တိ ဧဝမာဒိနာ ဝိရောဓောတိ? ဝုစ္စတေ – န နိယမတော ဝေဒိတဗ္ဗံ ယထာသမ္ဘဝံ ဂဟေတဗ္ဗတော။ တထာ ဟိ ‘‘စီဝရံ နိက္ခိပိတွာ သန္တရုတ္တရေန ဇနပဒစာရိကံ ပက္ကမန္တီ’’တိ (ပါရာ။ ၄၇၁) ဧဝမာဒီသု တိစီဝရမေဝ၊ ‘‘န၊ ဘိက္ခဝေ၊ သန္တရုတ္တရေန ဂါမော ပဝိသိတဗ္ဗော (မဟာဝ။ ၃၆၂)၊ သန္တရုတ္တရပရမံ တတော စီဝရံ သာဒိတဗ္ဗ’’န္တိ (ပါရာ။ ၅၂၃-၅၂၄) ဧဝမာဒီသု ယံ ကိဉ္စိ၊ တထာ ‘‘သဂုဏံ ကတွာ သင်္ဃာဋိယော ဒါတဗ္ဗာ၊ နိဝါသနံ ဒါတဗ္ဗံ၊ သင်္ဃာဋိ ဒါတဗ္ဗာ၊ ဟန္ဒ တေ၊ အာဝုသော ¶ ၊ သင်္ဃာဋိ၊ ဒေဟိ မေ ပဋ’’န္တိ ဧဝမာဒီသု။ ဝုတ္တဉှေတံ ‘‘သဗ္ဗဉှိ စီဝရံ သင်္ဃဋိတဋ္ဌေန ‘သင်္ဃာဋီ’တိ ဝုစ္စတီ’’တိ (ပါစိ။ အဋ္ဌ။ ၈၉၈)။ တထာ ‘‘နိဋ္ဌိတစီဝရသ္မိ’’န္တိ ဧတ္ထာပီတိ ဧကေ။ အန္တောသမယေ ယာဝဒတ္ထံ စီဝရံ အနုညာတံ၊ တံ သဗ္ဗံ ကရိယမာနံ ကဒါ နိဋ္ဌာနံ ဂစ္ဆိဿတိ၊ တသ္မာ တိစီဝရမေဝါတိ ဧကေ။

အစီဝရဿာနာပတ္တိ ¶ ပစ္စုဒ္ဓါရာဒိသိဒ္ဓိတောတိ ကိံ ဝုတ္တံ ဟောတိ – ဥဒေါသိတသိက္ခာပဒဿ နိပ္ပယောဇနဘာဝပ္ပသင်္ဂတော တိစီဝရဝိပ္ပဝါသေ တေစီဝရဿ အာပတ္တီတိ ဧကေ။ တတ္ထေတံ ဝုစ္စတိ န ဟောတိ အာပတ္တိ ပစ္စုဒ္ဓါရာဒိသိဒ္ဓိတော။ ‘‘အနာပတ္တိ အန္တောအရုဏေ ပစ္စုဒ္ဓရတိ ဝိဿဇ္ဇေတီ’’တိ (ပါရာ။ ၄၉၆) ဟိ ဝုတ္တံ။ အညထာ ပစ္စုဒ္ဓရန္တဿ၊ အန္တောအရုဏေ ဝိဿဇ္ဇေန္တဿ စ ယာဝ အညော နာဓိဋ္ဌာတိ၊ တာဝ အာပတ္တိံ အာပဇ္ဇတိ ယထာဝုတ္တနယေနေဝ။ အညထာ သတ္တဗ္ဘန္တရေန ဝိပ္ပဝါသဿာတိ ဝိပ္ပဝါသတော ယထာရုတံယေဝ သတိ ဝိပ္ပဝါသေ ဝိပ္ပဝါသတော၊ အဝိပ္ပဝါသေ သတိ အဝိပ္ပဝါသတောတိ။

ဥဒေါသိတသိက္ခာပဒဝဏ္ဏနာ နိဋ္ဌိတာ။

၃။ အကာလစီဝရသိက္ခာပဒဝဏ္ဏနာ

အပရိက္ခိတ္တဿ ပရိက္ခေပါရဟဋ္ဌာနဿ ဒုဗ္ဗိဇာနတ္တာ တံ ဒဿေတုံ ‘‘အပိစ ဘိက္ခူန’’န္တိအာဒိ ဝုတ္တံ။ ဝိဟာရပရိယန္တေ နိဝိဋ္ဌဓုဝသန္နိပါတဋ္ဌာနတော ဝါ ပရိယန္တေ ဌိတဘောဇနသာလတော ဝါ နိဗဒ္ဓဝသနကအာဝါသတော ဝါတိ ဧဝံ ဂဟေတဗ္ဗံ။ သစေ ဝိဟာရေ သန္နိပတိတဘိက္ခူဟိ သဒ္ဓိံ ဧကာဗဒ္ဓါ ဟုတွာ ယောဇနသတမ္ပိ ပူရေတွာ နိသီဒန္တိ၊ ယောဇနသတမ္ပိ ဥပစာရသီမာ ဟောတီတိ အတ္ထော။ ‘‘သမာနသံဝါသကသီမာယာ’’တိ ဝုတ္တေ ခဏ္ဍသီမာဒီသု ဌိတာနံ န ပါပုဏာတိ၊ တာသံ ဝိသုံ သမာနသံဝါသကသီမတ္တာတိ စ သမာနသံဝါသကအဝိပ္ပဝါသသီမာနံ ဣဒံ နာနတ္တံ။ ‘‘အဝိပ္ပဝါသသီမာယ ဒမ္မီ’’တိ ဒိန္နံ ပန ဂါမေ ဌိတာနံ န ပါပုဏာတိ။ ကသ္မာ? ‘‘ဌပေတွာ ဂါမဉ္စ ဂါမူပစာရဉ္စာ’’တိ (မဟာဝ။ ၁၄၄) ဝစနတော။ ‘‘သမာနသံဝါသကသီမာယာ’’တိ ဒိန္နံ ပန ယသ္မိံ ဌာနေ အဝိပ္ပဝါသသီမာ အတ္ထိ၊ တတ္ထ ဌိတာနမ္ပိ။ ‘‘တတြ ဌိတာနဉ္စ ပါပုဏာတီ’’တိ စ၊ ‘‘ခဏ္ဍသီမာယံ ဌတွာ ‘သီမဋ္ဌကသင်္ဃော ဂဏှာတူ’တိ ဝုတ္တေ ဥပစာရသီမာယ ဧဝ ပရိစ္ဆိန္ဒိတွာ ဒါတဗ္ဗ’’န္တိ စ၊ ‘‘တေသံ ဗဟိသီမဋ္ဌာနမ္ပိ ပါပုဏာတိ ယာဝ ကထိနဿုဗ္ဘာရာတိ အတ္ထော’’တိ စ၊ ‘‘အနတ္ထတေ ပန ကထိနေ အန္တောဟေမန္တေ သစေ ဝိဟာရံ ပဝိသိတွာ ‘ဝဿံဝုဋ္ဌသင်္ဃဿ ဒမ္မီ’တိ ဝဒတိ၊ ယေ တတ္ထ ဝဿစ္ဆေဒံ အကတွာ ပစ္ဆိမဝဿံဝုဋ္ဌာ၊ တေသံ ဗဟိသီမဋ္ဌာနမ္ပိ ပါပုဏာတီ’’တိ ဝိနယဓရာ ¶ ပရိစ္ဆိန္ဒန္တိ၊ အဋ္ဌကထာယံ ပန အနာဂတံ။ တသ္မာ သမန္တပါသာဒိကာယံ ‘‘လက္ခဏညူ ဝဒန္တီ’’တိ (မဟာဝ။ အဋ္ဌ။ ၃၇၉) ဝုတ္တန္တိ စ၊ ‘‘‘စီဝရမာသတော ပဋ္ဌာယ ယာဝ ¶ ဟေမန္တဿ ပစ္ဆိမော ဒိဝသော၊ တာဝ ဝဿာဝါသိကံ ဒေမာ’တိ ဝုတ္တေ ကထိနံ အတ္ထတံ ဝါ ဟောတု၊ အနတ္ထတံ ဝါတိ ယံ သမန္တပါသာဒိကာဝစနံ (မဟာဝ။ အဋ္ဌ။ ၃၇၉)၊ ဧတ္ထာပိ ယဒိ အတ္ထတံ၊ ပုရိမဝဿံဝုဋ္ဌာ ပဉ္စ မာသေ။ ယဒိ အနတ္ထတံ၊ ပစ္ဆိမဝဿံဝုဋ္ဌာ စတ္တာရော မာသေ လဘန္တီတိ ဝိနိစ္ဆယော’’တိ စ လိခိတံ။

‘‘ယေဟိ မယှံ ယာဂု ပီတာတိ ယေဟိ နိမန္တိတေဟိ မယှံ ယာဂု ပီတာတိ အဓိပ္ပာယော။ တသ္မာ ယေဟိ နိမန္တိတေဟိ ယာဂု ပီတာ၊ တေသံယေဝ ပါပုဏာတီတိ ဝုတ္တံ။ အညထာ ‘ယေဟိ မယှံ ယာဂု ပီတာ’တိ ဝုတ္တေ နိမန္တိတာ ဝါ ဟောန္တု၊ အနိမန္တိတာ ဝါ၊ ယေဟိ ပီတာ၊ တေသံ ပါပုဏိတဗ္ဗာနီ’’တိ ဝဒန္တိ။ ဧတ္ထ ‘‘နိဋ္ဌိတစီဝရသ္မိံ ဘိက္ခုနာ ဥဗ္ဘတသ္မိံ ကထိနေ’’တိ ဝဒန္တော ဉာပေတိ ဧတ္ထန္တရေ တိဏ္ဏမ္ပိ အကာလစီဝရာနံ ဥပ္ပတ္တိအဘာဝန္တိ။ ကသ္မာ ပန ပဒဘာဇနေ ဝိတ္ထာရိတာနီတိ? ဝုစ္စတေ – ဣဒံ ပန သိက္ခာပဒံ အဓိဋ္ဌာနံ သန္ဓာယ န ဝုတ္တံ ကိန္တု ပဌမသိက္ခာပဒေ ဒသာဟပရမံ အနုဇာနိတွာ တသ္မိံ အပ္ပဟောန္တေ သစေ ပစ္စာသာ အတ္ထိ၊ တမေဝ ဝဍ္ဎေတွာ မာသမနုဇာနန္တော ဣမမ္ပိ အတ္ထဝိသေသံ ဒီပေတိ။ အကာလစီဝရံ နာမ သမ္မုခီဘူတေန ဘာဇေတဗ္ဗံ။ တံ ပန ‘‘အာကင်္ခမာနေန ဘိက္ခုနာ ပဋိဂ္ဂဟေတဗ္ဗ’’န္တိ ဣမိနာ သိက္ခာပဒေန ဝဍ္ဎေတွာ ဝုတ္တန္တိ။ တသ္မာ တီဏိပိ ပဒဘာဇနေ ဝိတ္ထာရိတာနီတိ။

‘‘ခိပ္ပမေဝ ကာရေတဗ္ဗန္တိ သီဃံ အန္တောဒသာဟေယေဝ ကာရေတဗ္ဗ’’န္တိ ဣဒံ ပန ပဟောနကဘာဝေ ပုရိမသိက္ခာပဒလက္ခဏေနာတိ ဒီပေတုံ ဝုတ္တံ။ တသ္မာ ဧဝံ ‘‘သီဃ’’န္တိ ဝါ ‘‘လဟု’’န္တိ ဝါ အာဒိနာ အဝတွာပိ ‘‘ဒသာဟာ’’တိ ဝုတ္တန္တိ။ အတ္ထတကထိနဿ ဧဝံ ဟောတု၊ အနတ္ထတေ ပန ကထိနေ ကထန္တိ ဝုတ္တေ အနတ္ထတဿ ပဋိက္ခေပတံ ဒဿေတီတိ ဝုတ္တော အပဿန္တော ဝိဃာတံ အာပဇ္ဇတီတိ (ဝဇိရ။ ဋီ။ ပါရာဇိက ၄၉၉-၅၀၀) လိခိတံ။

အကာလစီဝရသိက္ခာပဒဝဏ္ဏနာ နိဋ္ဌိတာ။

၄။ ပုရာဏစီဝရသိက္ခာပဒဝဏ္ဏနာ

‘‘သာကိယာနိယော ဝိယ သုဒ္ဓဘိက္ခုသင်္ဃေ ဝါ’’တိ ဣဒံ ‘‘ဘိက္ခုနီ နာမ ဥဘတောသင်္ဃေ ဥပသမ္ပန္နာ’’တိ ¶ (ပါရာ။ ၅၀၅) ဣမိနာ ဝိရုဇ္ဈတီတိ စေ? န၊ အဓိပ္ပာယာဇာနနတော ¶ ။ ဘိက္ခူနံ သန္တိကေ ဥပသမ္ပဒါယ ပဋိက္ခိတ္တတ္တာ တဒနုပ္ပသင်္ဂဘယာ ဧဝံ ဝုတ္တန္တိ ဝေဒိတဗ္ဗံ။

ဧကေန ဝတ္ထုနာတိ ယေန ကေနစိ ပဌမေန။ အဝုတ္တာ ဝါ ဓောဝတီတိ အဝုတ္တာ ဓောဝတိ၊ ရဇတိ အာကောဋေတီတိ အတ္ထော။ ‘‘‘အဝုတ္တာ’တိ ဝစနတော အဝါဒါပေတွာ ဓောဝနာဒီသု အနာပတ္တီ’’တိ လိခိတံ။ ဣဓ စီဝရံ နာမ နိဝါသနပါရုပနူပဂမေဝ။ ယဒိ ဧဝံ ‘‘နိဝါသနပါရုပနူပဂမေဝ ဝတ္တဗ္ဗ’’န္တိ စေ? တံ န ဝတ္တဗ္ဗံ ‘‘ပုရာဏစီဝရ’’န္တိ ဣမိနာဝ သိဒ္ဓတ္တာ။ ဝုတ္တဉှေတံ ‘‘ပုရာဏစီဝရံ နာမ သကိံ နိဝတ္ထမ္ပိ သကိံ ပါရုတမ္ပီ’’တိ (ပါရာ။ ၅၀၅)။

ပုရာဏစီဝရသိက္ခာပဒဝဏ္ဏနာ နိဋ္ဌိတာ။

၅။ စီဝရပ္ပဋိဂ္ဂဟဏသိက္ခာပဒဝဏ္ဏနာ

ဥပစာရော ဒွါဒသဟတ္ထော။ အစိတ္တကတ္တာ ကထံ ပံသုကူလံ ဝဋ္ဋတီတိ စေ? တာယ တဿ ဘိက္ခုနော အဒိန္နတ္တာ၊ ဘိက္ခုနာ စ တတော ဘိက္ခုနိတော အဂ္ဂဟိတတ္တာ စ။

စီဝရပ္ပဋိဂ္ဂဟဏသိက္ခာပဒဝဏ္ဏနာ နိဋ္ဌိတာ။

၆။ အညာတကဝိညတ္တိသိက္ခာပဒဝဏ္ဏနာ

ဉာတကပ္ပဝါရိတေ ဝါ ဝိညာပေန္တဿာတိ ဧတ္ထ စ သင်္ဃဝသေန ပဝါရိတေသု ပမာဏမေဝ ဝဋ္ဋတိ။ ပုဂ္ဂလိကပ္ပဝါရဏာယ ယံ ယံ ပဝါရေတိ၊ တံ တံယေဝ ဝိညာပေတဗ္ဗန္တိ လိခိတံ။

အညာတကဝိညတ္တိသိက္ခာပဒဝဏ္ဏနာ နိဋ္ဌိတာ။

၇။ တတုတ္တရိသိက္ခာပဒဝဏ္ဏနာ

ပကတိယာ သန္တရုတ္တရေန စရတိ ကထိနပလိဗောဓဝသေန ဝါ သာသင်္ကသိက္ခာပဒဝသေန ဝါ။ ဧတ္ထ သိယာ – ‘‘န မတ္တံ ဇာနိတွာ ဗဟုံ စီဝရံ ဝိညာပေဿန္တိ၊ ဒုဿဝါဏိဇ္ဇံ ဝါ’’တိအာဒိနာ (ပါရာ။ ၅၂၂) ဥဇ္ဈာယန္တာနံ သုတွာ ဘဂဝါပိ ဆဗ္ဗဂ္ဂိယေ ဘိက္ခူ ¶ ‘‘ကထဉှိ နာမ တုမှေ မောဃပုရိသာ ¶ န မတ္တံ ဇာနိတွာ ဗဟုံ စီဝရံ ဝိညာပေဿထာ’’တိ (ပါရာ။ ၅၂၂) ဝတွာ သိက္ခာပဒဿ ပညတ္တတ္တာ စ ဣမိဿံ ကင်္ခါဝိတရဏိယံ ‘‘ဗဟုစီဝရဝိညာပနဝတ္ထုသ္မိံ ပညတ္တ’’န္တိ ဝုတ္တတ္တာ၊ သမန္တပါသာဒိကာယံ ‘‘န ဟိ အနစ္ဆိန္နစီဝရာ အတ္တနော အတ္ထာယ သာခါပလာသံ ဘဉ္ဇိတုံ လဘန္တိ၊ အစ္ဆိန္နစီဝရာနံ ပန အတ္ထာယ လဘန္တီ’’တိ ဝုတ္တတ္တာ စ အညဿတ္ထာယ ပမာဏံ ဝိညာပေတုံ ဝဋ္ဋတီတိ စေ? န၊ ကသ္မာ? အညာတကဝိညတ္တိသိက္ခာပဒဿ အဋ္ဌုပ္ပတ္တိယာ ဧဝ အညာတကဝိညတ္တိ ဝါရိတာ။ တဿ သိက္ခာပဒဿ အနာပတ္တိ။ ပါဠိယံ (ပါရာ။ ၅၂၁) ‘‘အညဿတ္ထာယာ’’တိ ဣမိဿာ အနာပတ္တိပါဠိယာ အညဿတ္ထာယ ဝိညာပေန္တော တဿ ဉာတကပ္ပဝါရိတေ ဧဝ ဝိညာပေတိ၊ န အညေတိ ဝစနတော စ ဝါရိတာ။ တသ္မာ ဘဂဝါပိ ‘‘ဗဟုံ စီဝရံ ဝိညာပေဿထာ’’တိ (ပါရာ။ ၅၂၂) ဝိဂရဟိတွာ သိက္ခာပဒံ ပညာပေန္တော ‘‘အဘိဟဋ္ဌုံ ပဝါရေယျာ’’တိ ဝုတ္တနယေနေဝ ပမာဏတော ဂဟဏံ အနုဇာနိ၊ န အညဿတ္ထာယ ပမာဏတော ဝိညာပနံ။ ယသ္မာ ပနိမံ သိက္ခာပဒံ အညဿတ္ထာယ ဝိညာပနဝတ္ထုသ္မိံယေဝ ပညတ္တံ၊ တသ္မာ ဣဓ ‘‘အညဿတ္ထာယာ’’တိ န ဝုတ္တံ၊ န န လဗ္ဘတီတိ ကတွာ။

အဋ္ဌကထာသု ‘‘အညာတကပ္ပဝါရိတဋ္ဌာနေ ပကတိယာ ဗဟုမ္ပိ ဝဋ္ဋတိ၊ အစ္ဆိန္နကာရဏာ ပမာဏမေဝ ဝဋ္ဋတီ’’တိ ဝုတ္တံ။ တံ ‘‘အနာပတ္တိ ဉာတကာနံ ပဝါရိတာန’’န္တိ (ပါရာ။ ၅၂၆) ဝုတ္တအနာပတ္တိပါဠိယာ န သမေတီတိ သမန္တပါသာဒိကာယံ (ပါရာ။ အဋ္ဌ။ ၂။၅၂၆) ဝုတ္တတ္တာ ဣဓာပိ ဝုတ္တနယေနေဝ ဉာတကပ္ပဝါရိတေ ဝိညာပေန္တဿ အတ္တနော ဓနေန ဂဏှန္တဿ အနာပတ္တီတိ လိခိတံ။ ‘‘အညဿတ္ထာယာ’’တိ နိဒါနဝိရောဓတော န ဝုတ္တံ၊ တထာပိ အနန္တရေ ဝုတ္တနယေနေဝ လဗ္ဘတိ ဧဝါတိ ဝဒန္တိ။

တတုတ္တရိသိက္ခာပဒဝဏ္ဏနာ နိဋ္ဌိတာ။

၈။ ဥပက္ခဋသိက္ခာပဒဝဏ္ဏနာ

ပဌမဥပက္ခဋေ ‘‘ပုဗ္ဗေ အပ္ပဝါရိတော’’တိ (ပါရာ။ ၅၂၈) ဝစနတော တသ္မိံ ခဏေ ပဝါရိတောပိ အပ္ပဝါရိတောဝ ဟောတီတိ ဝေဒိတဗ္ဗံ။

ဥပက္ခဋသိက္ခာပဒဝဏ္ဏနာ နိဋ္ဌိတာ။

၉။ ဒုတိယဥပက္ခဋသိက္ခာပဒဝဏ္ဏနာ

ဒုတိယဥပက္ခဋေန ¶ ¶ ကိံ ပယောဇနန္တိ စေ? နတ္ထိ ပယောဇနံ၊ ကေဝလံ အဋ္ဌုပ္ပတ္တိဝသေန ပန ပညတ္တံ ဘိက္ခုနိယာ ရဟောနိသဇ္ဇသိက္ခာပဒံ ဝိယ။ ဧဝံ သန္တေ သင်္ဂီတိကာရကေဟိ သင်္ဂီတိံ အနာရောပေတဗ္ဗံ ဘဝေယျ ဝိနာပိ တေန တဒတ္ထသိဒ္ဓိတော၊ အနိဿရတ္တာ၊ အနာရောပေတုံ အနုညာတတ္တာ စ။ ဝုတ္တဉှေတံ ‘‘အာကင်္ခမာနော၊ အာနန္ဒ၊ သင်္ဃော…ပေ… သမူဟနေယျာ’’တိ (ဒီ။ နိ။ ၂။၂၁၆၊ စူဠဝ။ ၄၄၁)။ ဣဒံ သဗ္ဗမကာရဏံ။ န ဟိ ဗုဒ္ဓါ အပ္ပယောဇနံ ဝစနံ နိစ္ဆာရေန္တိ၊ ပဂေဝ သိက္ခာပဒံ။ တေနေဝါဟ အဋ္ဌကထာယံ ‘‘ဣမိနာဝ နယေန အတ္ထော ဝေဒိတဗ္ဗော။ ဣဒဉှိ ပုရိမဿ အနုပညတ္တိသဒိသ’’န္တိအာဒိ။ အနုပညတ္တိ စ နိပ္ပယောဇနံ နတ္ထိ။ တံသဒိသဉ္စေတံ၊ န နိပ္ပယောဇနန္တိ ဒဿိတံ ဟောတိ။ ဧဝံ သန္တေ ကော ပနေတ္ထ အတ္ထဝိသေသောတိ? တတော အာဟ ‘‘ကေဝလံ တတ္ထ ဧကဿ ပီဠာ ကတာ၊ ဣဓ ဒွိန္နံ၊ အယမေတ္ထ ဝိသေသော’’တိ။ ဣမိနာ အတ္ထဝိသေသေန ကော ပနညော အတိရေကတ္ထော ဒဿိတောတိ? ပေါရာဏဂဏ္ဌိပဒေ တာဝ ဝုတ္တံ ‘‘ဧကသ္မိမ္ပိ ဝတ္ထုသ္မိံ ဥဘိန္နမ္ပိ ပီဠာ ကာတုံ န ဝဋ္ဋတီတိ အယမတိရေကတ္ထော ဒဿိတော’’တိ။ တေနေတံ ဒီပေတိ ‘‘န ကေဝလံ ပဋိလဒ္ဓစီဝရဂဏနာယ ဧဝ အာပတ္တိဂဏနာ၊ ပီဠိတပုဂ္ဂလသင်္ခါတဝတ္ထုဂဏနာယပီ’’တိ။

ဟောန္တိ စေတ္ထ –

‘‘ဝတ္ထုတော ဂဏနာယပိ၊ သိယာ အာပတ္တိ နေကတာ၊

ဣတိ သန္ဒဿနတ္ထဉ္စ၊ ဒုတိယူပက္ခဋံ ဣဓ။

‘‘ကာယသံသဂ္ဂသိက္ခာယ၊ ဝိဘင်္ဂေ ဝိယ ကိန္တေတံ၊

ဧကိတ္ထိယာပိ နေကတာ၊ အာပတ္တီနံ ပယောဂတော’’တိ။ (ဝဇိရ။ ဋီ။ ပါရာဇိက ၅၃၂)၊

အပိစေတံ သိက္ခာပဒံ တံဇာတိကေသု သိက္ခာပဒေသု သဗ္ဗေသုပိ ဂဟေတဗ္ဗဝိနိစ္ဆယဿ ဒဿနပ္ပယောဇနန္တိ ဝေဒိတဗ္ဗံ။ အာဟ စ –

‘‘အညာတိကာယ ဗဟုတာယ ဝိမိဿတာယ၊

အာပတ္တိယာပိ ဗဟုတာ စ ဝိမိဿတာ စ၊

ဣစ္စေဝမာဒိဝိဓိသမ္ဘဝဒဿနတ္ထံ ¶ ၊

သတ္ထာ ဥပက္ခဋမိဒံ ဒုတိယံ အဝေါစာ’’တိ။ (ဝဇိရ။ ဋီ။ ပါရာဇိက ၅၃၂)၊

တဿာယံ ¶ သင်္ခေပတော အဓိပ္ပာယပုဗ္ဗင်္ဂမာ ဝိစာရဏာ – ပုရာဏစီဝရံ ဧကမေဝ ဘိက္ခု ဘိက္ခုနီဟိ ဒွီဟိ၊ ဗဟူဟိ ဝါ ဓောဝါပေတိ၊ ဘိက္ခုနိဂဏနာယ ပါစိတ္တိယဂဏနာ။ တထာ ဒွိန္နံ၊ ဗဟူနံ ဝါ သာဓာရဏံ ဧကမေဝ စီဝရံ အညတြ ပါရိဝတ္တကာ ပဋိဂ္ဂဏှာတိ၊ ဣဓာပိ တထာ ဒွိန္နံ၊ ဗဟူနံ ဝါ သာဓာရဏမေကံ ဝိညာပေတိ၊ ဝိညတ္တပုဂ္ဂလဂဏနာယ အာပတ္တိဂဏနာ။ တထာ အညေသုပိ ဧဝရူပေသု သိက္ခာပဒေသု နယော နေတဗ္ဗော။ အယံ တာဝ ဗဟုတာယ နယော။

ဝိမိဿတာယ ပန ဉာတိကာယ၊ အညာတိကာယ စ ဧကံ ဓောဝါပေတိ၊ ဧကတော နိဋ္ဌာပနေ ဧကံ ပါစိတ္တိယံ။ အထ ဉာတိကာ ပဌမံ ထောကံ ဓောဝိတွာ ဌိတာ၊ ပုန အညာတိကာ သုဓောတံ ကရောတိ၊ နိဿဂ္ဂိယံ ပါစိတ္တိယံ။ အထ အညာတိကာ ပဌမံ ဓောဝတိ၊ ပစ္ဆာ ဉာတိကာ သုဓောတံ ကရောတိ၊ အညာတိကာယ ပယောဂဝသေန ဘိက္ခုနော ဒုက္ကဋမေဝ။ အညာတိကာယ၊ ဉာတိကာယ စ အညာတိကသညီ၊ ဝေမတိကော၊ ဉာတိကသညီ ဝါ ဓောဝါပေတိ၊ ယထာဝုတ္တနယေန နိဿဂ္ဂိယဒုက္ကဋာဒိအာပတ္တိဘေဒဂဏနာ ဝေဒိတဗ္ဗာ။ တထာ အညာတိကာယ၊ ဉာတိကာယ စ သန္တကံ စီဝရံ ဥဘောဟိ ဧကတော ဒိယျမာနံ ပဋိဂ္ဂဏှာတိ၊ နိဿဂ္ဂိယမေဝ။ အထ အညာတိကာယ ဧဝ ဟတ္ထတော ပဋိဂ္ဂဏှာတိ၊ နိဿဂ္ဂိယမေဝ။ အထ ဉာတိကာယ ဟတ္ထတော ပဋိဂ္ဂဏှာတိ၊ အနာပတ္တိ။ အထ ဥဘောသု အညာတိကာဒိသညီ၊ ဝုတ္တနယေနေဝ နိဿဂ္ဂိယဒုက္ကဋာဒိအာပတ္တိဘေဒဂဏနာ ဝေဒိတဗ္ဗာ။ တထာ အညာတိကဝိညတ္တိအာဒီသုပိ ယထာသမ္ဘဝံ နယော နေတဗ္ဗော။ အယံ ဝိမိဿတာယ နယော။

အာဒိသဒ္ဒေန ပန အနေကေ အညာတိကာ ဝိညတ္တာ၊ ဝိညတ္တပုဂ္ဂလဂဏနာယ ဒုက္ကဋံ။ ဧကော ဒေတိ၊ ဧကော န ဒေတိ၊ နိဿဂ္ဂိယံ။ အထ အဝိညတ္တော ဒေတိ၊ န နိသဂ္ဂိယံ။ အထ ဝိညတ္တာဝိညတ္တာနံ သာဓာရဏံ ဝိညတ္တော ဒေတိ၊ နိဿဂ္ဂိယံ။ ဥဘော ဒေန္တိ၊ နိဿဂ္ဂိယမေဝ။ အဝိညတ္တော ဒေတိ၊ နိဿဂ္ဂိယေန အနာပတ္တိ။ ဝိညတ္တဿ ဝစနေန အဝိညတ္တော ဒေတိ၊ အနာပတ္တိ ဧဝ။ တထာ ဥပက္ခဋာဒီသုပိ ယထာသမ္ဘဝံ နယော နေတဗ္ဗော။

ဧတ္တာဝတာ သင်္ခေပတော အညာတိကာယာဒိဂါထာ ဝုတ္တာဓိပ္ပာယာ ဟောတိ။ ယံ ပနေတ္ထ ဘိက္ခုနိယာ ရဟောနိသဇ္ဇသိက္ခာပဒံ နိပ္ပယောဇနတာယ နိဒဿနံ ¶ ဝုတ္တံ၊ တဿ ပယောဇနဝိသေသော တသ္မိံယေဝ အာဝိဘဝိဿတီတိ ¶ ။ ဧဝမေဝ အညတ္ထပိ ဝစနေန၊ ဝိသေသအဋ္ဌုပ္ပတ္တိဝသေန စ သိက္ခာပဒေသု ဉာတဗ္ဗံ ဝိသေသပ္ပယောဇနန္တိ။

ဒုတိယဥပက္ခဋသိက္ခာပဒဝဏ္ဏနာ နိဋ္ဌိတာ။

၁၀။ ရာဇသိက္ခာပဒဝဏ္ဏနာ

‘‘ဌာနံ ဘဉ္ဇတိ၊ အာဂတကာရဏံ ဝိနာသေတီ’’တိ ဝုတ္တတ္တာ ပုန စောဒနံ န လဘတီတိ ဧကေ။ အာဂမနဿ သာတ္ထကံ န ဟောတိ၊ စီဝရံ န လဘိဿတိ ပဋိသန္ထာရဿ ကတတ္တာတိ ဧကေ။ စောဒနာလက္ခဏံ န ဟောတီတိ ကတွာ ဝုတ္တန္တိ ဧကေ။ ‘‘ဓမ္မဒေသနာဓိပ္ပာယာဒိနာ န ပဋိသန္ထာရော ကာတဗ္ဗော’’တိ ဥပတိဿတ္ထေရော ‘‘‘အာဂတကာရဏံ ဝိနာသေတီ’တိ စောဒနာဌာနာနိ ဘဉ္ဇတိ၊ စောဒေတုကာမော အကတ္တဗ္ဗမကာသိ၊ တပ္ပစ္စယာ ဝတ္တဘေဒေ ဒုက္ကဋ’’န္တိ စ ဝဒတိ။ ဓမ္မသိရိတ္ထေရော ပန ‘‘အာသနေ စေ နိသီဒတိ၊ ဧကာယ နိသဇ္ဇာယ ဒွေ ဌာနာနိ ဘဉ္ဇတိ။ အာမိသံ စေ ပဋိဂ္ဂဏှာတိ၊ ဧကေန ပဋိဂ္ဂဟဏေန ဒွေ ဌာနာနိ ဘဉ္ဇတိ။ ဓမ္မံ စေ ဘာသတိ၊ ဓမ္မဒေသနာသိက္ခာပဒေ ဝုတ္တပရိစ္ဆေဒါယ ဧကာယ ဝါစာယ ဒွေ ဌာနာနိ ဘဉ္ဇတိ။ တံ သန္ဓာယ ‘အာဂတကာရဏံ ဝိနာသေတီ’တိ ဝုတ္တ’’န္တိ ဝဒတိ။ ‘‘ဧသော ခေါ’’တိ ဝုတ္တေန သညတ္တော ဧကော၊ ‘‘အယံ ဝေယျာဝစ္စကရောတိ…ပေ… အဝုတ္တေပိ စောဒေတုံ ဝဋ္ဋတီ’’တိ ဝုတ္တော ဒုတိယော၊ သစေ ပန ဒူတော ဂစ္ဆန္တောဝ ‘‘အဟံ တဿ ဟတ္ထေ ဒဿာမီ’’တိအာဒိနာ ဝုတ္တော တတိယော၊ ‘‘အညံ ဝါ ပေသေတွာ အာရောစာပေတီ’’တိ ဝုတ္တော စတုတ္ထောတိ ယထာ ဘိက္ခုနာ နိဒ္ဒိဋ္ဌာ စတ္တာရော၊ တထေဝ ဒူတေန နိဒ္ဒိဋ္ဌာ စတ္တာရော။ မုခဝေဝဋိကကပ္ပိယကာရကော၊ ပရမ္မုခကပ္ပိယကာရကော စေတိ ဧတေသု အညာတကအပ္ပဝါရိတေသု ဝိယ ပဋိပဇ္ဇိတဗ္ဗန္တိ လိခိတံ။

ရာဇသိက္ခာပဒဝဏ္ဏနာ နိဋ္ဌိတာ။

စီဝရဝဂ္ဂေါ ပဌမော။

၂။ ဧဠကလောမဝဂ္ဂေါ

၁။ ကောသိယသိက္ခာပဒဝဏ္ဏနာ

ကာရာပေယျာတိ ¶ ¶ အတ္တနော စ ပရဿ စ ဥဘိန္နဉ္စ ကောသိယံ ဧကတော ဂဏှိတွာ ဝုတ္တံ၊ ဥဘော ဝါ ဧကတော ကရောန္တီတိ အတ္ထတော ဝေဒိတဗ္ဗံ။ တတ္ထ အတ္တနာ ကတံ စေ၊ ‘‘နိဿဇ္ဇနကာလေ သယံ ကတံ နိဿဂ္ဂိယ’’န္တိ ဝတ္တဗ္ဗံ။ ဥဘောဟိ စေ ကတံ၊ ယထာပါဠိမေဝ။

ကောသိယသိက္ခာပဒဝဏ္ဏနာ နိဋ္ဌိတာ။

၂။ သုဒ္ဓကာဠကသိက္ခာပဒဝဏ္ဏနာ

ယထာ ပဌမေ ‘‘ဧကေနပိ ကောသိယံသုနာ’’တိ (ကင်္ခါ။ အဋ္ဌ။ ကောသိယသိက္ခာပဒဝဏ္ဏနာ) ဝုတ္တံ၊ တထာ ဣဓ ‘‘ဧကေနပိ အညေန အမိဿိတာန’’န္တိ ဝစနာဘာဝတော အညေန မိဿဘာဝေ သတိပိ အပညာယမာနရူပကံ စေ၊ ‘‘သုဒ္ဓကာဠက’’မိစ္စေဝ ဝုစ္စတီတိ ဝဒန္တိ။

သုဒ္ဓကာဠကသိက္ခာပဒဝဏ္ဏနာ နိဋ္ဌိတာ။

၃။ ဒွေဘာဂသိက္ခာပဒဝဏ္ဏနာ

‘‘တုလယိတွာ’’တိ ဝစနတော ယထာ တုလာဓာရဏာယ ကာဠကာဓိကာ န ဟောန္တိ၊ တထာ ကာဠကာနံ ဒွေ ဘာဂါ ဂဟေတဗ္ဗာ ဥက္ကဋ္ဌပရိစ္ဆေဒေန။ ‘‘ဧကဿာပိ ကာဠကလောမဿ အတိရေကဘာဝေ နိဿဂ္ဂိယန္တိ ဝစနံ တုလာဓာရဏာယ ကိဉ္စာပိ န သမေတိ၊ အစိတ္တကတ္တာ ပန သိက္ခာပဒဿ ပုဗ္ဗေ တုလာယ ဓာရယိတွာ ဌပိတေသု ဧကမ္ပိ လောမံ တတ္ထ ပတေယျ၊ နိဿဂ္ဂိယန္တိ အယမဓိပ္ပာယောတိ နော တက္ကော’’တိ အာစရိယော။ ဝုတ္တပရိစ္ဆေဒေန အဂ္ဂဟဏံ အကိရိယာ၊ သန္ထတကရဏံ ကိရိယာ။

ဒွေဘာဂသိက္ခာပဒဝဏ္ဏနာ နိဋ္ဌိတာ။

၄။ ဆဗ္ဗဿသိက္ခာပဒဝဏ္ဏနာ

‘‘ဩရေန ¶ ¶ စေ ဆန္နံ ဝဿာန’’န္တိ ဝုတ္တတ္တာ ဆဗ္ဗဿေ ပရိပုဏ္ဏေ ကာတုံ ဝဋ္ဋတီတိ နိဋ္ဌာနဒိဝသတော ပဋ္ဌာယ ဆန္နံ ဝဿာနံ ပရိစ္ဆေဒေါ ဝေဒိတဗ္ဗော။ ယာနိ ပနေတ္ထ အတိရေကဆဗ္ဗဿဝသေန ဝါ သမ္မုတိဝသေန ဝါ ကတာနိ၊ သဗ္ဗာနိ တာနိ ဧကတော ပရိဘုဉ္ဇိတုံ ဝဋ္ဋန္တီတိ။ ဂိလာနဿ စ ဧကံ နပ္ပဟောတီတိ အနေကမ္ပိ ဝဋ္ဋတိ။ ယတော ပဋ္ဌာယ ရောဂဿ မန္ဒတာယ သန္ထတံ အာဒါယ ဂန္တုံ သက္ကောတိ၊ တတော ပဋ္ဌာယ သမ္မုတိ ဝါ ရောဂေါ ဝါ န ရက္ခတီတိ ဧကေ။ အပိစ ဆဝဿဗုဒ္ဓနိမ္မလံ သိက္ခာပဒံ ဝိစာရေတုံ ဂမ္ဘီရတ္တာ။ တသ္မာ ဆဝဿေ ကမ္မံ ကတန္တိ။

ဆဗ္ဗဿသိက္ခာပဒဝဏ္ဏနာ နိဋ္ဌိတာ။

၅။ နိသီဒနသိက္ခာပဒဝဏ္ဏနာ

ကသ္မာ ပနေတ္ထ ‘‘သန္ထတံ ပန ဘိက္ခုနာ’’တိ သိက္ခာပဒံ အပညပေတွာ ‘‘နိသီဒနသန္ထတ’’န္တိ ပညတ္တံ၊ နနု ဧတ္ထ ကာရဏေန ဘဝိတဗ္ဗန္တိ? အတ္ထိ ကာရဏံ၊ စီဝရသညိတာယ သန္ထတာနံ ဥဇ္ဈိတတ္တာ တေသံ အစီဝရဘာဝဒဿနတ္ထံ တထာ ပညတ္တံ ဘဂဝတာတိ ဝုတ္တံ ဟောတိ။ တသ္မာ တေ ဘိက္ခူ တေစီဝရိကဓုတင်္ဂဘေဒဘယာ သန္ထတေ စတုတ္ထစီဝရသညိတာယ သန္ထတာနိ ဥဇ္ဈိတွာ တေရသ ဓုတင်္ဂါနိ သမာဒယိံသု၊ ဘဂဝါ စ တေသံ သန္ထတံ အနုဇာနိ။ တတော တေသံ ဘိက္ခူနံ ဧဝံ ဟောတိ ‘‘နိသီဒနစီဝရသဏ္ဌာနမ္ပေတံ နိသီဒနသန္ထတံ နော ဘဂဝတာ အနုညာတံ စတုတ္ထစီဝရဘာဝေန၊ ပဂေဝ ကတသန္ထတံ ဝါ’’တိ။ တတော ‘‘သန္ထတေ တေသံ စီဝရသညိတာ န ဘဝိဿတီ’’တိ တဒတ္ထံ ဘဂဝတာ ‘‘သန္ထတ’’န္တိ အပညပေတွာ ‘‘နိသီဒနသန္ထတ’’န္တိ ပညတ္တန္တိ အဓိပ္ပာယော။ ဣမေသု ပန ပဉ္စသု သန္ထတေသု ပုရိမာနိ တီဏိ ဝိနယကမ္မံ ကတွာ ပဋိလဘိတွာပိ ပရိဘုဉ္ဇိတုံ န ဝဋ္ဋန္တိ အကပ္ပိယတ္တာ၊ ပစ္ဆိမာနိ ဒွေ ဝဋ္ဋန္တီတိ (ဝဇိရ။ ဋီ။ ပါရာဇိက ၅၆၆-၅၆၇) လိခိတံ။ ကထံ ပညာယတီတိ စေ? ‘‘အနာပတ္တိ အညေန ကတံ ပဋိလဘိတွာ ပရိဘုဉ္ဇတီ’’တိ (ပါရာ။ ၅၇၀) ဝစနတောတိ ဝေဒိတဗ္ဗံ။

နိသီဒနသိက္ခာပဒဝဏ္ဏနာ နိဋ္ဌိတာ။

၆။ ဧဠကလောမသိက္ခာပဒဝဏ္ဏနာ

‘‘အဒ္ဓါနမဂ္ဂပ္ပဋိပန္နဿာ’’တိ ¶ ¶ ဣမိနာ ပကတိယာ ဒီဃမဂ္ဂံ ပဋိပန္နဿ ဥပ္ပန္နာနိပိ တိယောဇနပရမမေဝ ဟရိတဗ္ဗာနိ၊ ပဂေဝ အပ္ပဋိပန္နဿာတိ ဒဿေတိ။ ပဋိပန္နဿ စေ၊ အဒ္ဓါနံ နာမ ပဋိပန္နဿ အကာမာ ဝဿံဝုဋ္ဌဘိက္ခုနိယာ မဂ္ဂပ္ပဋိပတ္တိ ဝိယာတိ ဒဿေတိ။ အဒ္ဓါနမဂ္ဂပ္ပဋိပန္နဿ နိဿဂ္ဂိယန္တိ ဝါ သမ္ဗန္ဓော။ တေနေဝ ဝါသာဓိပ္ပာယဿ ပဋိပ္ပဿဒ္ဓဂမနုဿာဟတ္တာ ‘‘အပ္ပဋိပန္နော’’တိ သင်္ခံ ဂတဿ အနာပတ္တီတိ သိဒ္ဓံ။ ဣမသ္မိံ ပန အတ္ထဝိကပ္ပေ ‘‘ဘိက္ခုနော ပနေဝ ဧဠကလောမာနိ ဥပ္ပဇ္ဇေယျုံ…ပေ… အသန္တေပိ ဟာရကေ အဒ္ဓါနမဂ္ဂပ္ပဋိပန္နဿ နိဿဂ္ဂိယံ ပါစိတ္တိယ’’န္တိ ယောဇနာ ဝေဒိတဗ္ဗာ။ ယသ္မာ ဝါ ဧဠကလောမာနံ ဥပ္ပတ္တိဋ္ဌာနတော ပဋ္ဌာယ တိယောဇနပရမတာ အဓိပ္ပေတာ၊ မဂ္ဂံ အပ္ပဋိပန္နဿ စ တိယောဇနပရမတာ နတ္ထိ၊ တသ္မာ ‘‘အဒ္ဓါနမဂ္ဂပ္ပဋိပန္နဿ ဥပ္ပဇ္ဇေယျု’’န္တိ ဝုတ္တံ။ တေန အစ္ဆိန္နံ ပဋိလဘိတွာ ဟရတော စ အနာပတ္တီတိ သိဒ္ဓံ။ ပဋိလာဘော ဟိ တေသံ ဥပ္ပတ္တိ နာမာတိ။

‘‘အာကင်္ခမာနေန ဘိက္ခုနာ ပဋိဂ္ဂဟေတဗ္ဗာနီ’’တိ ဣမိနာ အတ္တနာ ပဋိဂ္ဂဟိတာနံယေဝ တိယောဇနာတိက္ကမေ အာပတ္တီတိ ဒဿေတိ။ တေန အနာကင်္ခမာနေန ပရသန္တကာနိ ပဋိဂ္ဂဟိတာနိ ဟရန္တဿ အနာပတ္တီတိ သိဒ္ဓံ။

အင်္ဂေသု ‘‘အတ္တနော သန္တကတာ’’တိ နတ္ထိ၊ အယမတ္ထော ‘‘ဘိက္ခုနော ဥပ္ပဇ္ဇေယျု’’န္တိ ဣမိနာ၊ ‘‘အစ္ဆိန္နံ ပဋိလဘိတွာ’’တိ ဣမိနာ စ ဒီပိတော ဟောတီတိ ဝေဒိတဗ္ဗော။ ပေါရာဏဂဏ္ဌိပဒေ စ ‘‘အညံ ဘိက္ခုံ ဟရာပေန္တော ဂစ္ဆတိ စေ၊ ဒွိန္နမ္ပိ အနာပတ္တီ’’တိ ဝုတ္တံ။ တသ္မာ ဒွေ ဘိက္ခူ တိယောဇနပရမံ ပတွာ အညမညဿ ဘဏ္ဍံ ပရိဝတ္တေတွာ စေ ဟရန္တိ၊ အနာပတ္တီတိ သိဒ္ဓံ။

တိယောဇနပရမံ သဟတ္ထာ ဟရိတဗ္ဗာနီတိ တိယောဇနပရမမေဝ အတ္တနာ ဟရိတဗ္ဗာနိ၊ တံ ကိမတ္ထန္တိ? သီမာယ ဧတပရမတော။ ဝုတ္တဉှေတံ ‘‘အနုဇာနာမိ၊ ဘိက္ခဝေ၊ တိယောဇနပရမံ သီမံ သမ္မန္နိတု’’န္တိ (မဟာဝ။ ၁၄၀)။ ဝါသာဓိပ္ပာယေန၊ ပစ္စာဂမနာဓိပ္ပာယေန ဝါ ဂစ္ဆတော ဧတပရမတာ စ။ ဝုတ္တဉှေတံ ‘‘ဆဗ္ဗဂ္ဂိယာ ဘိက္ခူ အတိမဟတိယော သီမာယော သမ္မန္နန္တိ…ပေ… ဘိက္ခူ ဥပေါသထံ အာဂစ္ဆန္တာ ဥဒ္ဒိဿမာနေပိ ပါတိမောက္ခေ အာဂစ္ဆန္တိ၊ ဥဒ္ဒိဋ္ဌမတ္တေပိ အာဂစ္ဆန္တိ၊ အန္တရာပိ ပရိဝသန္တီ’’တိ (မဟာဝ။ ၁၄၀)။

အသန္တေ ¶ ဟာရကေတိ အာဏတ္တိယာ ဟာရကေ အသတိ။ ကမ္ဗလဿ ဥပရိ နိသီဒိတွာ ဂစ္ဆန္တဿ ¶ သစေ ဧကမ္ပိ လောမံ စီဝရေ လဂ္ဂံ ဟောတိ၊ တိယောဇနာတိက္ကမေ အာပတ္တိ ဧဝ ကမ္ဗလတော ဝိဇဋိတတ္တာတိ လိခိတံ။ တံ ကမ္ဗလဿ ပဋိဂ္ဂဟိတတ္တာ အတ္တနော အတ္ထာယ ပဋိဂ္ဂဟိတမေဝ ဟောတီတိ ယုတ္တံ။

ဧဠကလောမသိက္ခာပဒဝဏ္ဏနာ နိဋ္ဌိတာ။

၈။ ဇာတရူပသိက္ခာပဒဝဏ္ဏနာ

‘‘နိဗ္ဗတ္တရုက္ခစ္ဆာယာပိ ရုက္ခပရိစ္ဆေဒံ အနတိက္ကန္တာ’’တိ လိခိတံ။

ဇာတရူပသိက္ခာပဒဝဏ္ဏနာ နိဋ္ဌိတာ။

၉။ ရူပိယသံဝေါဟာရသိက္ခာပဒဝဏ္ဏနာ

ဇာတရူပရဇတပရိဝတ္တနန္တိ ဥက္ကဋ္ဌပရိစ္ဆေဒေန ဝုတ္တံ။

ရူပိယသံဝေါဟာရသိက္ခာပဒဝဏ္ဏနာ နိဋ္ဌိတာ။

၁၀။ ကယဝိက္ကယသိက္ခာပဒဝဏ္ဏနာ

အသန္တေ ပါစိတ္တိယံ ဒေသေတဗ္ဗမေဝါတိ ဧတ္ထ ကိံ သုဒ္ဓိကံ ပါစိတ္တိယံ၊ ဥဒါဟု နိဿဂ္ဂိယန္တိ? နိဿဂ္ဂိယံ ပါစိတ္တိယမေဝ။

ကယဝိက္ကယသိက္ခာပဒဝဏ္ဏနာ နိဋ္ဌိတာ။

တတြိဒံ ပကိဏ္ဏကံ

အဋ္ဌမသိက္ခာပဒံ ပရေန အတ္တနော အတ္ထာယ ဒိယျမာနဿ ဝါ ပါရိဝတ္တကဘာဝေန ဒိယျမာနဿ ဝါ ပံသုကူလဿ ဝါ ရူပိယဿ ဥဂ္ဂဏှနဥဂ္ဂဏှာပနသာဒိယနာနိ ပဋိက္ခိပတိ။

နဝမံ ပရဿ ဝါ အတ္တနော ဝါ ရူပိယပရိဝတ္တနံ ပဋိက္ခိပတိ။

ဒသမံ ¶ ¶ အရူပိယပရိဝတ္တနံ။ ‘‘အရူပိယေ အရူပိယသညီ ပဉ္စန္နံ သဟ အနာပတ္တီ’’တိ (ပါရာ။ ၅၉၁၊ ဝိ။ ဝိ။ ဋီ။ ၁။၅၉၁၊ ဝဇိရ။ ဋီ။ ပါရာဇိက ၅၈၇) စ ဝစနံ ဣတရေဟိ သဟ အာပတ္တီတိ ဒီပေတိ။ အရူပိယဉ္စ ဒုက္ကဋဝတ္ထု။ တသ္မာ တဿ ပရိဝတ္တနေ သတိ နိဿဂ္ဂိယန္တိ ဧကန္တေန ဝုတ္တံ။ ပဉ္စန္နံ သဟ ဒုက္ကဋဝတ္ထူနံ ပရိဝတ္တနေ အနာပတ္တိပ္ပသင်္ဂတော အနာပတ္တိ ဧဝါတိ ပေါရာဏာတိ စေ? န၊ ကပ္ပိယဝတ္ထူနံယေဝ တတ္ထ အာဂတတ္တာ။ ယဒိ ကပ္ပိယဝတ္ထု နိဿဂ္ဂိယံ၊ ပဂေဝ ဒုက္ကဋဝတ္ထူတိ စေ? န၊ အာပတ္တိဂရုကလဟုကဘာဝေန ဝတ္ထုဂရုကလဟုကနိယမာဘာဝတော။

နိဿဂ္ဂိယဝတ္ထုတော ဟိ မုတ္တာမဏိဝေဠုရိယာဒိ မဟဂ္ဃပ္ပဟောနကမ္ပိ ဒုက္ကဋဝတ္ထူတိ ကတွာ နိဿဂ္ဂိယဝတ္ထုတော မုတ္တာဒိ လဟုကံ ဟောတိ။ လဟုကေပိ ဝတ္ထုသ္မိံ ယထေဝ ဒုက္ကဋဝတ္ထုနော ပဋိဂ္ဂဟဏေ ဒုက္ကဋံ၊ တထေဝ တဿ ဝါ တေန ဝါ စေတာပနေပိ ဒုက္ကဋံ ယုတ္တန္တိ (ပါရာ။ အဋ္ဌ။ ၂။၅၈၉) အဋ္ဌကထာစရိယာ။

အထ ဝါ ယံ ဝုတ္တံ ‘‘ကပ္ပိယဝတ္ထူနံယေဝ တတ္ထ အာဂတတ္တာ’’တိ၊ တတ္ထ ကိဉ္စာပိ ဒုက္ကဋဝတ္ထူနိပိ အဓိပ္ပေတာနိ၊ န ပန ပါဠိယံ ဝုတ္တာနိ အနာပတ္တိဝါရပ္ပသင်္ဂဘယာတိ ဝုတ္တံ ဟောတိ။ မုတ္တာဒီသုပိ ဝုတ္တေသု အနာပတ္တိယံ ကပ္ပိယကာရကဿ အာစိက္ခတိ၊ ‘‘ဣဒံ မုတ္တာဒိ အမှာကံ အတ္ထိ၊ အမှာကဉ္စ ဣမိနာ စ ဣမိနာ စ ဝေဠုရိယာဒိနာ အတ္ထော’’တိ ဘဏတိ၊ ဒသမေန အာပဇ္ဇတီတိ အဓိပ္ပာယော သိယာ။ ယသ္မာ စ ဣဒံ ကပ္ပိယကာရကဿ အာစိက္ခနာဒိသံဝေါဟာရော စ၊ တသ္မာ တံ နဝမေန ဝုတ္တန္တိ ဝေဒိတဗ္ဗံ။ ကိဉ္စာပိ ကယဝိက္ကယေဝ ဟောတိ ကပ္ပိယဝတ္ထူဟိ အနုညာတံ၊ ဣမိနာဝ နယေန ကိဉ္စာပိ ဒုက္ကဋဝတ္ထုပိ ဒသမေ အဓိပ္ပေတံ အာပဇ္ဇတိ၊ အဋ္ဌကထာဝိရောဓတော ပန နာဓိပ္ပေတမိစ္စေဝ ဂဟေတဗ္ဗော။

ကာ ပနေတ္ထ ကာရဏစ္ဆာယာတိ၊ ပဉ္စန္နံ သဟ တတ္ထ အနာပတ္တိပ္ပသင်္ဂတော အနာပတ္တိ ဧဝါတိ စေ? န၊ တတ္ထ အနာဂတတ္တာ။ အနာဂတကာရဏာ ဝုတ္တန္တိ စေ? န၊ ပဉ္စန္နံ သဟ အာပတ္တိဝတ္ထုကဿ အနာပတ္တိဝါရလာဘေ ဝိသေသကာရဏာဘာဝါ၊ အကပ္ပိယတ္တာ ပဉ္စန္နံ သဟာပိ အာပတ္တိယာ ဘဝိတဗ္ဗန္တိ သိဒ္ဓါ အဋ္ဌကထာဝါဒေါ။

အပရော နယော – ယဒိ ဒုက္ကဋဝတ္ထုနာ ကယဝိက္ကယေ နိဿဂ္ဂိယံ၊ ကပ္ပိယဝတ္ထုမှိ ဝုတ္တပရိယာယော တတ္ထ လဗ္ဘေယျ၊ န ပန လဗ္ဘတီတိ နဝမေ ဧဝ တာနိ ဝတ္တဗ္ဗာနိ။ တသ္မာ သံဝေါဟာရော နာမ ကယဝိက္ကယောပိ အညထာ ပရိဝတ္တနံ ¶ ပရိယာဒိယိတွာ ပဝတ္တော၊ ကယဝိက္ကယဉ္စ မောစေတွာ ¶ ‘‘ဣမိနာ ဣမံ ဒေဟီ’တိ စေတာပေတိ၊ ဝဋ္ဋတီ’’တိ အဝတွာ ဒသမဿ အနာပတ္တိဝါရေ ဝုတ္တနယေနေဝ တေသံ ပရိဝတ္တနေ နိဿဂ္ဂိယာနုမတိဝိရောဓတော အဋ္ဌကထာယံ ဝုတ္တနယေနေဝ ဒုက္ကဋဝတ္ထုနာ စေတာပနေ ဒုက္ကဋမေဝ။ နေသံ ကယဝိက္ကယေန နိဿဂ္ဂိယန္တိ စေ? န၊ သဗ္ဗဿပိ ကယဝိက္ကယတ္တာ။ တေနေဝ ဝုတ္တံ ‘‘အန္ဓကဋ္ဌကထာယံ ပန ‘သစေ ကယဝိက္ကယံ သမာပဇ္ဇေယျ၊ နိဿဂ္ဂိယံ ပါစိတ္တိယ’န္တိ ဘာသိတံ၊ တံ ဒုဗ္ဘာသိတံ။ ကသ္မာ? န ဟိ ဒါနဂ္ဂဟဏတော အညော ကယဝိက္ကယော နာမ အတ္ထီ’’တိ (ပါရာ။ အဋ္ဌ။ ၂။၅၈၉)၊ အတ္တနော မတိယာ ကယဝိက္ကယလက္ခဏသမ္မတေ ဒသမဿ အနာပတ္တိဝါရေ ဝုတ္တနယေနေဝ တေသံ ပရိဝတ္တနေ နိဿဂ္ဂိယာနုမတိဝိရောဓတော စ။ ဘဝတု ဝါ အတ္တနော ပဋိသိဒ္ဓမိဒံ ကာရဏံ၊ ဒသမေ အဝဿမေဝ ဇာနိတဗ္ဗာနီတိ တာနိ ကယဝိက္ကယာနေဝါတိ တေသံ နိဿဂ္ဂိယဘာဝဉ္စ ဂတာနီတိ ဧဝမ္ပိ သိဒ္ဓါ အဋ္ဌကထာဝါဒေါ။

ဧတ္ထာဟု ပေါရာဏာ – ‘‘အတ္တနော သန္တကံ ရူပိယံ ပရဟတ္ထဂတံ ကရောတိ အဇ္ဈာစရတိ၊ ဒုက္ကဋံ။ ပရဿ ရူပိယံ အတ္တနော ဟတ္ထဂတံ ကရောတိ၊ အဋ္ဌမေန နိဿဂ္ဂိယံ။ ဥဂ္ဂဟိတဝတ္ထုပရိဝတ္တနေ ကထံ ဇာတံ? အဗ္ဗောဟာရိကံ ဇာတံ။ အထ ပရဿ ရူပိယံ အတ္တနော ဟတ္ထဂတံ ပဌမံ ကရောတိ၊ ရူပိယပ္ပဋိဂ္ဂဟဏဿ ကတတ္တာ အဋ္ဌမေန နိဿဂ္ဂိယံ။ အတ္တနော သန္တကံ ရူပိယံ ပရဿ ဟတ္ထဂတံ ပစ္ဆာ ကရောတိ၊ သံဝေါဟာရေန နိဿဂ္ဂိယ’’န္တိ။ ‘‘ရူပိယဿ ဂဟဏမတ္တေန အဋ္ဌမေန အာပတ္တိ၊ ပစ္ဆာ ပရိဝတ္တနေ နဝမေနာ’’တိ ဟိ တတ္ထ ဝုတ္တံ၊ တံ ပန ယုတ္တံ။ ‘‘အဇ္ဈာစရတိ၊ ဒုက္ကဋ’’န္တိ ဒုဝုတ္တံ။ ဒုက္ကဋဿ အနိယမပ္ပသင်္ဂတော နိဿဇ္ဇနဝိဓာနေသု ဒဿိတောဝ။ ကိံ ဝုတ္တံ ဟောတိ – ယဒိ ဒွီဟိ နိဿဂ္ဂိယေဟိ ဘဝိတဗ္ဗံ၊ နိဿဇ္ဇနဝိဓာနေ ‘‘အဟံ၊ ဘန္တေ၊ ရူပိယံ ပဋိဂ္ဂဟေသိံ၊ နာနာပ္ပကာရကဉ္စ ရူပိယသံဝေါဟာရံ သမာပဇ္ဇိ’’န္တိ ဝတ္တဗ္ဗံ ဘဝေယျ ‘‘ရူပိယံ စေတာပေတီ’’တိ သဗ္ဗတ္ထ ပါဠိယံ ရူပိယပ္ပဋိဂ္ဂဟဏဿ ဝုတ္တတ္တာ။

ဧတ္တာဝတာ ယံ ပေါရာဏဂဏ္ဌိပဒေ ဝုတ္တံ ‘‘ဒုက္ကဋဝတ္ထုနာ ကယဝိက္ကယံ ပရိဟရန္တေန စတူသု နိဿဂ္ဂိယဝတ္ထူသု ဧကေကသ္မိံ ဂဟိတေ အဋ္ဌမေန နိဿဂ္ဂိယံ ဟောတိ။ ဒုက္ကဋဝတ္ထုနာ ဒုက္ကဋဝတ္ထုန္တိ ‘‘ဣမိနာ ဣဒံ ဒေဟီ’’တိ ဂဟိတေ တေနေဝ နိဿဂ္ဂိယံ ဟောတိ။ ‘‘ကယဝိက္ကယမ္ပိ နီဟရိတွာ ဂဟိတေ ဒုက္ကဋံ၊ စေတာပိတရူပိယဂ္ဂဟဏေ အဋ္ဌမေန၊ ပရိဝတ္တနေ နဝမေနာတိအာဒိနာ အတ္တနာ အနုဂ္ဂဟေတွာ ကပ္ပိယဝသေန နီဟရိတွာ ပဉ္စဟိ သဟဓမ္မိကေဟိ သဒ္ဓိံ ပရိဝတ္တေတုံ ¶ ဝဋ္ဋတီ’’တိ၊ တံ ဝိသောဓိတံ ဟောတိ။ အပရမ္ပိ တတ္ထ ဝုတ္တံ ‘‘နိဿဇ္ဇိတဗ္ဗေ အသတိ ကထံ ပါစိတ္တိယံ၊ ဒုန္နိဿဋ္ဌရူပိယမ္ပိ ‘န ဆဍ္ဍေတီ’တိ ဝဒန္တဿ ဝိဿဋ္ဌော ဥပါသကော တံ ဂဟေတွာ အညံ စေ ဘိက္ခုနော ဒေတိ၊ ကပ္ပတီ’’တိ၊ တဉ္စ ဒုဝုတ္တံ။ န ဟိ ဂဟိတတ္တာ တတော အညံ ဝတ္ထု ဟောတိ။ ပုန အပရဉ္စ တတ္ထ ဝုတ္တံ ‘‘ဣမံ ‘ဂဏှာဟီ’တိ ¶ ဝဒန္တဿ သဒ္ဓါဒေယျဝိနိပါတဒုက္ကဋံ၊ ‘ဧတံ ဒေဟီ’တိ ဝဒန္တဿ ဝိညတ္တိဒုက္ကဋ’’န္တိ၊ တဉ္စ ဒုဝုတ္တံ။ တတ္ထ ဟိ ပယောဂဒုက္ကဋံ ယုတ္တံ ဝိယ ပညာယတိ။

ပကိဏ္ဏကံ နိဋ္ဌိတံ။

ဧဠကလောမဝဂ္ဂေါ ဒုတိယော။

၃။ ပတ္တဝဂ္ဂေါ

၁။ ပတ္တသိက္ခာပဒဝဏ္ဏနာ

ဒွေ အပတ္တာ၊ တသ္မာ ဧတေ ဘာဇနပရိဘောဂေန ပရိဘုဉ္ဇိတဗ္ဗာ၊ နအဓိဋ္ဌာနူပဂါနဝိကပ္ပနူပဂတာတိ အတ္ထောတိ စ။ သမဏသာရုပ္ပေန ပက္ကန္တိ အယောပတ္တော ပဉ္စဟိ ပါကေဟိ ပက္ကော ဟောတိ၊ မတ္တိကာပတ္တော ဒွီဟိ။ ‘‘ဘိက္ခုနိယာ ပတ္တသန္နိစ္စယဿ ဝါရိတတ္တာ (ဝဇိရ။ ဋီ။ ပါရာဇိက ၆၀၂) ဘိက္ခုဿပိ တံ ‘အနနုရူပ’န္တိ ကတွာ ‘ပုရာဏပတ္တံ ပစ္စုဒ္ဓရိတွာ’တိ ဝုတ္တ’’န္တိ စ လိခိတံ၊ တံ န ယုတ္တံ ပါဠိယံ ‘‘သန္နိစ္စယံ ကရေယျာတိ အနဓိဋ္ဌိတော အဝိကပ္ပိတော’’တိ (ပါစိ။ ၇၃၅) ဝုတ္တတ္တာ။ သော ဟိ ကထိနက္ခန္ဓကေ (မဟာဝ။ ၃၀၆ အာဒယော) နိစ္စယသန္နိဓိ ဝိယ ဧကောပိ ပုနဒိဝသေ ‘‘သန္နိစ္စယော’’တိ ဝုစ္စတိ။ အနန္တရသိက္ခာပဒေ ပန ‘‘ဒုတိယော ဝါရိတော’’တိ အဓိဋ္ဌာနံ နိယတံ။ တသ္မာ ဒွေ ပတ္တေ အဓိဋ္ဌာတုံ န လဘတိ။ သစေ ဧကတော အဓိဋ္ဌာတိ၊ ဒွေပိ အနဓိဋ္ဌိတာ ဟောန္တိ။ ဝိသုံ ဝိသုံ အဓိဋ္ဌာတိ၊ ဒုတိယော အနဓိဋ္ဌိတော။ ဝိကပ္ပေတုံ ပန ဗဟူပိ လဘတိ။ ကာကဏိကမတ္တမ္ပီတိ ဧတ္ထ ပိ-ကာရော ‘‘ဧကပါကမ္ပိ ဇနေတီ’’တိ ပါကံ သမ္ပိဏ္ဍေတိ။ အထ ဝါ သစေ ဧကပါကေနေဝ သာရုပ္ပော၊ ဝဋ္ဋတီတိ ပါကပရိမာဏံ န ဝုတ္တန္တိ ဂဟေတဗ္ဗံ။ အပတ္တတ္တာ အဓိဋ္ဌာနူပဂေါ ¶ န ဟောတိ။ အပစ္စုဒ္ဓရန္တေန ဝိကပ္ပေတဗ္ဗောတိ ပုရာဏပတ္တံ အပစ္စုဒ္ဓရန္တေန သော ပတ္တော ဝိကပ္ပေတဗ္ဗောတိ အတ္ထောတိ လိခိတံ။

ပတ္တသိက္ခာပဒဝဏ္ဏနာ နိဋ္ဌိတာ။

၂။ ဦနပဉ္စဗန္ဓနသိက္ခာပဒဝဏ္ဏနာ

ပဝါရိတေတိ ¶ ဧတ္ထ သင်္ဃဝသေန ပဝါရိတဋ္ဌာနေ ပဉ္စဗန္ဓနေနေဝ ဝဋ္ဋတိ၊ ပုဂ္ဂလိကဝသေန ပဝါရိတဋ္ဌာနေ ဦနပဉ္စဗန္ဓနေနာပိ ဝဋ္ဋတီတိ လိခိတံ။

ယော ဦနပဉ္စဗန္ဓနတ္ထံ၊ ဝုတ္တမ္ပိ စေတံ ကရော သော၊

ဦနပဉ္စဗန္ဓနတ္ထံ၊ ပတွာန သန္တိကေ။

ဦနပဉ္စဗန္ဓနသိက္ခာပဒဝဏ္ဏနာ နိဋ္ဌိတာ။

၃။ ဘေသဇ္ဇသိက္ခာပဒဝဏ္ဏနာ

‘‘ပဋိသာယနီယာနိ ပဋိဂ္ဂဟေတွာ’’တိ ဝဒန္တေန ပါဒမက္ခနာဒီနံ အတ္ထာယ ပဋိဂ္ဂဟေတွာ ဌပေတုံ ဝဋ္ဋတီတိ ဒီပိတန္တိ လိခိတံ။ ‘‘ယေသံ မံသံ ကပ္ပတီ’’တိ ဝစနေန ယေသံ မံသံ န ကပ္ပတိ၊ တေသံ သပ္ပိအာဒိ န ကပ္ပတီတိ ဝဒန္တာ အဇာနိတွာ ဝဒန္တိ။ ယေသဉှိ မံသံ ကပ္ပတိ၊ တေသံ သပ္ပီတိအာဒိ သတ္တာဟကာလိကနိဿဂ္ဂိယဝတ္ထုပရိစ္ဆေဒဒဿနတ္ထံ ဝုတ္တံ။ တထာ ပဏီတဘောဇနသိက္ခာပဒေ ယေသံ မံသံ ကပ္ပတိ၊ တေသံယေဝ ခီရာဒိ ပဏီတဘောဇနံ၊ နေတရန္တိ ဒဿေတုံ ဝုတ္တန္တိ။ မဓု နာမ မဓုကရိဘမရမက္ခိကာနံ အာသယေသု နိယျာသသဒိသံ မဟာမဓု ဟောတိ၊ တံ ယာဝဇီဝိကန္တိ စ လိခိတံ။

ဘေသဇ္ဇသိက္ခာပဒဝဏ္ဏနာ နိဋ္ဌိတာ။

ပတ္တဝဂ္ဂေါ တတိယော။

နိဿဂ္ဂိယပါစိတ္တိယဝဏ္ဏနာ နိဋ္ဌိတာ။

ပါစိတ္တိယကဏ္ဍံ

၄။ ဘောဇနဝဂ္ဂေါ

၂။ ဂဏဘောဇနသိက္ခာပဒဝဏ္ဏနာ

ဒေဝဒတ္တော ¶ ¶ ကာလေ ဝိညာပေတွာ ဘုဉ္ဇတိ၊ တပ္ပစ္စယာ ဘဂဝတာ ‘‘ဂဏဘောဇနေ ပါစိတ္တိယ’’န္တိ (ပါစိ။ ၂၀၉) သိက္ခာပဒံ ပညတ္တံ။ ပဒဘာဇနေ ပန ‘‘နိမန္တိတာ ဘုဉ္ဇန္တီ’’တိ (ပါစိ။ ၂၁၈) နိမန္တနမေဝ ဂဟေတွာ ဝိဘတ္တံ။ အန္ဓကဋ္ဌကထာယံ ပန ဝတ္ထုဝသေန ဝိညတ္တိယာ ယာစနမ္ပိ ဝုတ္တန္တိ လိခိတံ။ ကသ္မာ? ပရိဝါရေ ဧဝ ‘‘ဂဏဘောဇနံ ဒွီဟာကာရေဟိ ပသဝတိ ဝိညတ္တိတော ဝါ နိမန္တနတော ဝါ’’တိ (ပရိ။ ၃၂၂) ဝုတ္တတ္တာ။ တသ္မာ အဋ္ဌုပ္ပတ္တိယံယေဝ ပါကဋတ္တာ ပဒဘာဇနေ န ဝုတ္တန္တိ ဝေဒိတဗ္ဗံ။ ‘‘‘ဧကတော ဂဏှန္တီ’တိ စ ဂဟိတဘတ္တာပိ အညေ ယာဝ ဂဏှန္တိ၊ တာဝ စေ တိဋ္ဌန္တိ၊ ဧကတော ဂဏှန္တိ ဧဝ နာမာ’’တိ စ၊ ‘‘ယော ကောစိ ပဗ္ဗဇိတောတိ သဟဓမ္မိကေသု၊ တိတ္ထိယေသု ဝါတိ အတ္ထော’’တိ စ၊ ‘‘သမယာဘာဝေါတိ သတ္တန္နံ အနာပတ္တိသမယာနံ အဘာဝေါ’’တိ စ၊ ‘‘သမယလဒ္ဓကေန သဟ စတ္တာရော ဟောန္တီ’’တိ စ၊ ‘‘သမယလဒ္ဓကော သယမေဝ မုစ္စတိ၊ သေသာနံ ဂဏပူရကတ္တာ အာပတ္တိကရော ဟောတီ’’တိ စ လိခိတံ။

ဧတ္ထာဟ – ‘‘ပဋိဂ္ဂဟဏမေဝ ဟေတ္ထ ပမာဏ’’န္တိ ဝုတ္တံ၊ အထ ကသ္မာ ပါဠိယံ ‘‘ဂဏဘောဇနံ နာမ ယတ္ထ စတ္တာရော…ပေ… ဘုဉ္ဇန္တီ’’တိ (ပါစိ။ ၂၁၈) ဝုတ္တန္တိ? ဝုစ္စတေ – တတ္ထ ‘‘ဘုဉ္ဇန္တီ’’တိ ပဋိဂ္ဂဟဏနိယမဝစနံ။ န ဟိ အပ္ပဋိဂ္ဂဟိတကံ ဘိက္ခူ ဘုဉ္ဇန္တီတိ။

ဂဏဘောဇနသိက္ခာပဒဝဏ္ဏနာ နိဋ္ဌိတာ။

၃။ ပရမ္ပရဘောဇနသိက္ခာပဒဝဏ္ဏနာ

အညတြ ¶ သမယာတိ ပန နိမန္တနတော ပသဝနတော ဘောဇနာပေက္ခံ ပါစိတ္တိယန္တိ ဧကေ။ ဧကော ဘိက္ခု ပိဏ္ဍာယ စရန္တော ဘတ္တံ လဘတိ၊ တမညော စူပါသကော နိမန္တေတွာ ဃရေ နိသီဒါပေသိ၊ န စ တာဝ ဘတ္တံ သမ္ပဇ္ဇတိ ¶ ။ သစေ သော ဘိက္ခု ပိဏ္ဍာယ စရိတွာ လဒ္ဓဘတ္တံ ဘုဉ္ဇတိ၊ အာပတ္တိ။ ကသ္မာတိ စေ? ‘‘ပရမ္ပရဘောဇနံ နာမ ပဉ္စန္နံ ဘောဇနာနံ အညတရေန ဘောဇနေန နိမန္တိတော တံ ဌပေတွာ အညံ ပဉ္စန္နံ ဘောဇနာနံ အညတရံ ဘောဇနံ ဘုဉ္ဇတိ၊ ဧတံ ပရမ္ပရဘောဇနံ နာမာ’’တိ (ပါစိ။ ၂၂၇) ဝုတ္တတ္တာ။ ပဌမကထိနသဒိသာနိ၊ ဣဒံ ပန ကိရိယာကိရိယ’’န္တိ ပါဌော။

ပရမ္ပရဘောဇနသိက္ခာပဒဝဏ္ဏနာ နိဋ္ဌိတာ။

၄။ ကာဏမာတာသိက္ခာပဒဝဏ္ဏနာ

ဒွတ္တိပတ္တပူရာ ပဋိဂ္ဂဟေတဗ္ဗာတိ တထာနီတပူဝေဟိ အတ္ထိကေန ဥက္ကဋ္ဌပတ္တပ္ပမာဏဝသေန ဂဟေတဗ္ဗာ။ ‘‘မာ ခေါ တွံ ဧတ္ထ ပဋိဂ္ဂဏှီ’’တိ အပါထေယျာဒိအတ္ထာယ သဇ္ဇိတသညာယ အတိရေကပ္ပဋိဂ္ဂဟဏေန အာရောစနေ၊ အသံဝိဘာဂေ စ န မုစ္စတိ အစိတ္တကတ္တာ သိက္ခာပဒဿ။ အထ ဥဂ္ဂဟိတကံ ဂဏှာတိ၊ န မုစ္စတိ ဧဝ။ အသံဝိဘာဂေ ပန အနာပတ္တိ အကပ္ပိယတ္တာ။ အစိတ္တကတာ ပဏ္ဏတ္တိဇာနနာဘာဝေနေဝ၊ န ဝတ္ထုဇာနနာဘာဝေနာတိ ဧကေ။ ‘‘န ပါထေယျာဒိအတ္ထာယ သဇ္ဇိတဘာဝဇာနန’’န္တိ အင်္ဂေသု အဝုတ္တတ္တာ သစေ သဉ္စိစ္စ န ဝဒတိ၊ ပါစိတ္တိယန္တိ ပေါရာဏာ ဝဒန္တိ။ အတိရေကပ္ပဋိဂ္ဂဟဏန္တိ တတ္ထ ပဉ္စမံဝ အင်္ဂံ ဝုတ္တံ၊ တသ္မာ အပ္ပဋိဂ္ဂဟိတတ္တာ န ပါစိတ္တိယံ၊ ကတ္တဗ္ဗာကရဏတော ပန ဒုက္ကဋံ။ အညထာ ကိရိယာကိရိယံ ဣဒံ အာပဇ္ဇတိ။ အနိဝါရဏံ၊ အနာရောစနံ ဝါ ဆဋ္ဌမင်္ဂံ ဝတ္တဗ္ဗံ သိယာ။

ကာဏမာတာသိက္ခာပဒဝဏ္ဏနာ နိဋ္ဌိတာ။

၅။ ပဌမပဝါရဏာသိက္ခာပဒဝဏ္ဏနာ

ဘုတ္တာဝီ ပဝါရဏံ နာမ ပဉ္စင်္ဂိကံ။ တေသု ‘‘အသနံ ပညာယတ္တီ’’တိ ဧတေနေဝ ‘‘ဘုတ္တာဝီ’’တိ ဧတဿ သိဒ္ဓတ္တာ ဝိသုံ အတ္ထသိဒ္ဓိ န ဒိဿတိ။ ဒိဿတိ စေ၊ အင်္ဂါနံ ဆက္ကတ္တဒဿနန္တိ ¶ (ဝဇိရ။ ဋီ။ ပါစိတ္တိယ ၂၃၈-၂၃၉) လိခိတံ။ ‘‘ဘောဇနံ ပညာယတီ’’တိ အဘိဟဋံ သန္ဓာယ ဝုတ္တံ။

ကောဋ္ဋေတွာ ¶ ကတစုဏ္ဏမ္ပီတိ ပိ-ကာရေန ကုဏ္ဍကံ သမ္ပိဏ္ဍေတိ။ သမပါကဘဇ္ဇိတာနံ ပန အာတပသုက္ခာနံ ဝါ ကုဏ္ဍကံ ဝါ ယေ ကေစိ တဏ္ဍုလာ ဝါတိ ဧတ္တကမေဝ ဝုတ္တတ္တာ သမပါကဘဇ္ဇိတာနံ ဝီဟီနံ၊ ဝီဟိပလာသာနံ ဝါ တဏ္ဍုလစုဏ္ဏံ ပဝါရေတိ။ တထာ ခရပါကဘဇ္ဇိတာနံ ကုဏ္ဍကမ္ပိ ပဝါရေတိ။ ဘဇ္ဇိတသတ္တုယော ပိဏ္ဍေတွာ ကတော အပက္ကသတ္တုမောဒကောပိ ပဝါရေတီတိ လိခိတံ။ သစေ အဝသိဋ္ဌံ နတ္ထိ၊ န ပဝါရေတိ။ ကသ္မာ? အသနသင်္ခါတဿ ဝိပ္ပကတဘောဇနဿ အဘာဝတော။

အကပ္ပိယမံသံ ပန ကိဉ္စာပိ ပဋိက္ခိပိတဗ္ဗဋ္ဌာနေ ဌိတံ၊ ခါဒိယမာနံ ပန မံသဘာဝံ န ဇဟာတိ၊ တသ္မာ ပဝါရေတိ။ ဘောဇနသာလာယ ဘုဉ္ဇန္တော စေ အတ္တနော အပါပုဏနကောဋ္ဌာသံ အဘိဟဋံ ပဋိက္ခိပတိ၊ န ပဝါရေတိ။ ကာမံ ပဋိက္ခိပတိ၊ ပတ္တေ ပန အာရာမိကာ အာကိရန္တိ၊ တံ ဘုဉ္ဇိတုံ န ဝဋ္ဋတိ။ ဣဒဉှိ ဗုဒ္ဓပ္ပဋိကုဋ္ဌာယ အနေသနာယ ဥပ္ပန္နေယေဝ သင်္ခံ ဂစ္ဆတိ။ ယထာ ဟိ သင်္ဃတော လဒ္ဓံ ပိဏ္ဍံ ဒုဿီလော ဒေတိ၊ တဉ္စေ ပဋိက္ခိပတိ၊ န ပဝါရေတိ၊ ဧဝံသမ္ပဒမိဒန္တိ စ၊ ဝိဘာဂေါ လဇ္ဇီ စေ ဒေတိ၊ တံ သော န အဇ္ဈောဟရိတုကာမတာယ ပဋိက္ခိပတိ၊ ပဝါရေတီတိ စ၊ ‘‘သမံသရသံ သမစ္ဆရသ’’န္တိ အာပဇ္ဇနတော ‘‘မံသရသ’’န္တိ ဝုတ္တေ ပန ပဋိက္ခိပတော ဟောတိ၊ ‘‘မံသဿ ရသံ မံသရသ’’န္တိ အယံ ဝိဂ္ဂဟော နာဓိပ္ပေတောတိ စ ဝုတ္တံ။ ဘတ္တမိဿကံ ယာဂုံ အာဟရိတွာ ‘‘ယာဂုံ ဂဏှထာ’’တိ ဝဒတိ၊ န ပဝါရေတိ။ ‘‘ဘတ္တံ ဂဏှထာ’’တိ ဝုတ္တေ ပဝါရေတိ။ ကသ္မာ? ယေနာပုစ္ဆိတော၊ တဿ အတ္ထိတာယ။ ဧတ္ထ ပန ‘‘ယာဂုမိဿကံ ဂဏှထာ’’တိ ဝဒတိ၊ တတြ စေ ယာဂု ဗဟုတရာ ဝါ ဟောတိ၊ သမသမာ ဝါ။ ဘတ္တံ မန္ဒံ၊ န ပဝါရေတိ။ ယာဂု စေ မန္ဒာ၊ ဘတ္တံ ဗဟုတရံ၊ ပဝါရေတိ။ ဣဒဉ္စ သဗ္ဗအဋ္ဌကထာသု ဝုတ္တတ္တာ န သက္ကာ ပဋိက္ခိပိတုံ။ ကာရဏံ ပနေတ္ထ ဒုဒ္ဒသံ။ ‘‘ဘတ္တမိဿကံ ဂဏှထာ’’တိ ဝဒတိ။ တတြ ဘတ္တံ ဗဟုတရံ ဝါ သမကံ ဝါ အပ္ပတရံ ဝါ ဟောတိ၊ ပဝါရေတိ ဧဝ။ ဘတ္တံ ဝါ ယာဂုံ ဝါ အနာမသိတွာ ‘‘မိဿကံ ဂဏှထာ’’တိ ဝဒတိ။ တတြ စေ ဘတ္တံ ဗဟုတရံ၊ သမကံ ဝါ ဟောတိ၊ ပဝါရေတိ။ အပ္ပတရံ န ပဝါရေတိ။ တံ သဗ္ဗံ ဝီမံသိတဗ္ဗန္တိ။

ဖလံ ¶ ဝါ ကန္ဒမူလာဒိ ဝါ ပဉ္စဟိ သမဏကပ္ပေဟိ ကပ္ပိယံ အကတန္တိ ဧတ္ထ ကပ္ပိယံ အကာရာပိတေဟိ ကဒလိဖလာဒီဟိ သဒ္ဓိံ အတိရိတ္တံ ကာရာပေတွာပိ တံ ကဒလိဖလာဒိံ ဌပေတွာ အဝသေသံ ဘုဉ္ဇိတုံ ဝဋ္ဋတိ။ အမိဿကရသတ္တာ ပုန တာနိ ကပ္ပိယံ ကာရာပေတွာ အညသ္မိံ ဘာဇနေ ဌပေတွာ ¶ ကာရေတွာ ဘုဉ္ဇိတုံ ဝဋ္ဋတိ။ ကသ္မာ? ပုဗ္ဗေ တေသု ဝိနယကမ္မဿ အနာရုဠှတ္တာတိ ဝဒန္တိ။

ပတ္တေ ရဇံ ပတိတံ အပ္ပဋိဂ္ဂဟိတမေဝ ဟောတိ။ တသ္မာ ပဋိဂ္ဂဟေတွာဝ ဘိက္ခာ ဂဏှိတဗ္ဗာ။ ‘‘အပဋိဂ္ဂဟေတွာ ဂဏှတော ဝိနယဒုက္ကဋ’’န္တိ (ပါစိ။ အဋ္ဌ။ ၂၆၅) ဝုတ္တတ္တာ ဧတမညေသမ္ပိ န ဝဋ္ဋတီတိ ဝဒန္တိ။ ‘‘တံ ပန ပုန ပဋိဂ္ဂဟေတွာ ဘုဉ္ဇန္တဿ အနာပတ္တီ’’တိ ဧတ္ထာပိ ဧဝမေဝ။ ဣမသ္မိံ ပန ‘‘အတိရိတ္တံ ကတံ အနတိရိတ္တကတံ ဟောတီ’’တိ ဧတ္ထာပိ ဧဝမေဝ။ ဣမသ္မိံ ပန ‘‘အတိရိတ္တံ ကတံ၊ အနတိရိတ္တံ ကတံ ဟောတီ’’တိအာဒီဟိ ဥပပရိက္ခိတွာ ဝိနိစ္ဆယော ဝေဒိတဗ္ဗောတိ ဒီပိတံ။ အလမေတံ သဗ္ဗန္တိ ဣဒမ္ပိ တေ အဓိကံ၊ ဣတော အညံ န လစ္ဆသီတိ အတ္ထော။

အာဟာရတ္ထာယာတိ ဝိကာလေ ဧဝါတိ ဧကေ။ ‘‘ပဌမကထိနသဒိသာနိ။ ဣဒံ ပန ကိရိယာကိရိယ’’န္တိ ပါဌော။ ကာယကမ္မံ အဇ္ဈောဟရဏတော။ ဝစီကမ္မံ ဝါစာယ ‘‘အတိရိတ္တံ ကရောထ၊ ဘန္တေ’’တိ အကာရာပနတောတိ ဝေဒိတဗ္ဗံ။

ပဌမပဝါရဏာသိက္ခာပဒဝဏ္ဏနာ နိဋ္ဌိတာ။

၆။ ဒုတိယပဝါရဏာသိက္ခာပဒဝဏ္ဏနာ

‘‘ဘုတ္တသ္မိံ ပါစိတ္တိယ’’န္တိ (ပါစိ။ ၂၄၃) မာတိကာယံ ဝုတ္တတ္တာ ‘‘ဘောဇနပရိယောသာနေ ပါစိတ္တိယ’’န္တိ ဝုတ္တံ၊ န အဇ္ဈောဟာရေ အဇ္ဈောဟာရေ။

ဒုတိယပဝါရဏာသိက္ခာပဒဝဏ္ဏနာ နိဋ္ဌိတာ။

၇။ ဝိကာလဘောဇနသိက္ခာပဒဝဏ္ဏနာ

ဇမ္ဗုဒီပဿ ¶ ကာလေန ပရိစ္ဆေဒေါတိ ဧဝံ ကိရ။

ဝိကာလဘောဇနသိက္ခာပဒဝဏ္ဏနာ နိဋ္ဌိတာ။

၈။ သန္နိဓိကာရကသိက္ခာပဒဝဏ္ဏနာ

‘‘ဒုဒ္ဓါတော ¶ ဟောတီ’’တိအာဒိနာ နယေန ဣဓ ဝုတ္တတ္တာ၊ ‘‘ဒုဒ္ဓါတံ ပတ္တံ ဓောဝိတွာ ပုန

တတ္ထ အစ္ဆောဒကံ ဝါ အာသိဉ္စိတွာ၊ အင်္ဂုလိယာ ဝါ ဃံသိတွာ နိသ္နေဟဘာဝေါ ဇာနိတဗ္ဗော’’တိ (ပါစိ။ အဋ္ဌ။ ၂၅၃) သမန္တပါသာဒိကာယံ ဝုတ္တတ္တာ စ မတ္တိကာပတ္တဿ ကပါလေန ပီတော သ္နေဟော သန္နိဓိံ ကရောတီတိ သိဒ္ဓန္တိ လိခိတံ။ သယံ ပဋိဂ္ဂဟေတွာ အပရိစ္စတ္တမေဝါတိ ဧတ္ထ အပရိစ္စတ္တံ နာမ အနုပသမ္ပန္နာနံ နိရပေက္ခအပရိစ္စတ္တံ အဝိဇဟိတံ။ ‘‘ပဋိဂ္ဂဟဏန္တိ ဧတ္ထ ပဋိဂ္ဂဟိတဘာဝမဝိဇဟိတမေဝ သန္နိဓိံ ဇနေတီ’’တိ ဓမ္မသိရိတ္ထေရော၊ တံ ‘‘ပဋိဂ္ဂဏှာတိ၊ အာပတ္တိ ဒုက္ကဋဿာ’’တိ (ပါစိ။ ၂၅၅) ပါဠိယာ ဝိရုဇ္ဈတိ။ တဿ ပန ပုန ပဋိဂ္ဂဏှနကိစ္စာဘာဝတော ဝီမံသိတဗ္ဗံ။

သန္နိဓိကာရကသိက္ခာပဒဝဏ္ဏနာ နိဋ္ဌိတာ။

၉။ ပဏီတဘောဇနသိက္ခာပဒဝဏ္ဏနာ

‘‘တေသံ မံသဉ္စ ခီရဒဓီနိ စ ဣဓ အဓိပ္ပေတာနီ’’တိ ဣဒံ ပါစိတ္တိယဝတ္ထုပရိစ္ဆေဒေါ၊ န ပန ကပ္ပိယခီရာဒိပရိစ္ဆေဒေါ၊ တသ္မာ ယဿ ကဿစိ ခီရာဒီနိ ဝဋ္ဋန္တီတိ စ၊ ‘‘မဟာနာမသိက္ခာပဒေန ကာရေတဗ္ဗော’’တိ သင်္ဃဝသေန ပဝါရိတေ ဘေသဇ္ဇတ္ထာယ သပ္ပိအာဒိဘေသဇ္ဇပဉ္စကံ ဝိညာပေတိ စေ၊ တတ္ထ ‘‘န ဘေသဇ္ဇကရဏီယေန ဘေသဇ္ဇံ ဝိညာပေတီ’’တိ ဧတ္ထ သင်္ဂဟံ ဂစ္ဆတိ၊ တသ္မာ ‘‘တေန ပါစိတ္တိယ’’န္တိ (ဝဇိရ။ ဋီ။ ပါစိတ္တိယ ၂၆၁) စ လိခိတံ။

ပဏီတဘောဇနသိက္ခာပဒဝဏ္ဏနာ နိဋ္ဌိတာ။

၁၀။ ဒန္တပေါနသိက္ခာပဒဝဏ္ဏနာ

‘‘သရီရာဝယဝေနာ’’တိ ¶ ဝုတ္တတ္တာ မုခေန ပဋိဂ္ဂဟဏံ အနုညာတံ။ ‘‘စိဉ္စာဒိပတ္တေသု ဘူမိယံ အတ္ထတေသု န ဝဋ္ဋတိ၊ ကလ္လခေတ္တေ တတ္ထ ဝဋ္ဋတီ’’တိ စ၊ ‘‘သာမံ ဂဟေတွာ’’တိ ဣမိနာ န ကေဝလံ သပ္ပဒဋ္ဌံယေဝ၊ အညမ္ပိ ဒဋ္ဌံ ဝိသေသေတိ။ သာမံ ဂဟေတွာ ပရိဘုဉ္ဇိတုံ ဝဋ္ဋတီ’’တိ စ လိခိတံ။

ဒန္တပေါနသိက္ခာပဒဝဏ္ဏနာ နိဋ္ဌိတာ။

ဘောဇနဝဂ္ဂေါ စတုတ္ထော။

၅။ အစေလကဝဂ္ဂေါ

၁။ အစေလကသိက္ခာပဒဝဏ္ဏနာ

အစေလကာဒယော ¶ ယသ္မာ၊ တိတ္ထိယာဝ မတာ ဣဓ၊

တသ္မာ တိတ္ထိယနာမေန၊ တိကစ္ဆေဒေါ ကတော တတော။

အတိတ္ထိယဿ နဂ္ဂဿ၊ တထာ တိတ္ထိယလိင်္ဂိနော၊

ဂဟဋ္ဌဿာပိ ဘိက္ခုဿ၊ ကပ္ပတီတိ ဝိနိစ္ဆယော။

အတိတ္ထိယဿ စိတ္တေန၊ တိတ္ထိယဿ စ လိင်္ဂိနော၊

သောတာပန္နာဒိနော ဒါတုံ၊ ကပ္ပတီတီဓ နော မတိ။

အစေလကသိက္ခာပဒဝဏ္ဏနာ နိဋ္ဌိတာ။

၃။ သဘောဇနသိက္ခာပဒဝဏ္ဏနာ

အနုပဝိသိတွာ နိသီဒနစိတ္တေန သစိတ္တကတာတိ ဝေဒိတဗ္ဗာ။

သဘောဇနသိက္ခာပဒဝဏ္ဏနာ နိဋ္ဌိတာ။

၄-၅။ ရဟောပဋိစ္ဆန္နရဟောနိသဇ္ဇသိက္ခာပဒဝဏ္ဏနာ

စတုတ္ထံ ပဌမာနိယတေ၊ ပဉ္စမံ ဒုတိယာနိယတေ ဝုတ္တနယမေဝ။ ဣဓ ပဉ္စမံ ဥပနန္ဒဿ စတုတ္ထံ ဟောတိ။

ရဟောပဋိစ္ဆန္နရဟောနိသဇ္ဇသိက္ခာပဒဝဏ္ဏနာ နိဋ္ဌိတာ။

၆။ စာရိတ္တသိက္ခာပဒဝဏ္ဏနာ

သဘတ္တော ¶ ¶ သမာနောတိ နိမန္တနဘတ္တောတိ ပေါရာဏာ။ သန္တံ ဘိက္ခုံ၊ အနာပုစ္ဆာ၊ ပုရေဘတ္တံ ပစ္ဆာဘတ္တံ၊ အညတြ သမယာတိ အယမေတ္ထ စတုဗ္ဗိဓာ အနုပညတ္တိ။ တတ္ထ သမယာ ဒွေ သမယာ။ ဘတ္တိယဃရန္တိ နိမန္တိတဿ ဃရံ ဝါ သလာကာဘတ္တာဒိဒါယကာနံ ဝါ ဃရံ။ ‘‘သမုဋ္ဌာနာဒီနိ ပဌမကထိနသဒိသာနိ၊ ဣဒံ ပန ကိရိယာကိရိယ’’န္တိ ပါဌော၊ ‘‘ဣဓ နိမန္တနာ အကပ္ပိယနိမန္တနာ’’တိ ဧကေ။

ပုရေဘတ္တဉ္စ ပိဏ္ဍာယ၊ စရိတွာ ယဒိ ဘုဉ္ဇတိ၊

သိယာ ပရမ္ပရာပတ္တိ၊ ပစ္ဆာဘတ္တံ န သာ သိယာ။

ပစ္ဆာဘတ္တဉ္စ ဂမိကော၊ ပုဗ္ဗဂေဟံ ယဒိ ဂစ္ဆေ၊

ဧကေ အာပတ္တိယေဝါတိ၊ အနာပတ္တီတိ ဧကစ္စေ။

ကုလန္တရဿောက္ကမနေ၊ အာပတ္တိမတယော ဟိ တေ၊

သမာနဘတ္တပစ္စာသာ၊ ဣတိ အာဟု ဣဓာပရေ။

မတာ ဂဏိကဘတ္တေန၊ သမေန္တိ နံ နိမန္တနေ၊

ဝိဿဇ္ဇနံ သမာနန္တိ၊ ဧကေ သမ္မုခတာပရေ။

သန္နိဋ္ဌာနတ္ထိကေဟေဝ၊ ဝိစာရေတဗ္ဗဘေဒတော၊

ဝိညူ စာရိတ္တမိစ္စေဝ၊ သိက္ခာပဒမိဒံ ဝိဒူ။ (ဝဇိရ။ ဋီ။ ပါစိတ္တိယ ၂၉၄)၊

စာရိတ္တသိက္ခာပဒဝဏ္ဏနာ နိဋ္ဌိတာ။

၇။ မဟာနာမသိက္ခာပဒဝဏ္ဏနာ

ပဏီတဘောဇနသိက္ခာပဒေ ‘‘မဟာနာမသိက္ခာပဒေန ကာရေတဗ္ဗော’’တိ (ကင်္ခါ။ အဋ္ဌ။ ပဏီတဘောဇနသိက္ခာပဒဝဏ္ဏနာ) ယံ ဝုတ္တံ၊ တဿတ္ထော သင်္ဃဝသေန ပဝါရိတေ ဘေသဇ္ဇတ္ထာယ သပ္ပိအာဒိဘေသဇ္ဇပဉ္စကံ ¶ ဝိညာပေတိ စေ၊ ‘‘နဘေသဇ္ဇေန ကရဏီယေန ဘေသဇ္ဇံ ဝိညာပေတီ’’တိ (ပါစိ။ ၃၀၉) ဝစနေန ပါစိတ္တိယန္တိ (ဝဇိရ။ ဋီ။ ပါစိတ္တိယ ၃၁၀) လိခိတံ။ ‘‘တယာ ဣမိနာဝ ပဝါရိတမှာ၊ အမှာကဉ္စ ဣမိနာ စ ဣမိနာ စ အတ္ထော’’တိ ယထာဘူတံ အာစိက္ခိတွာ ဝိညာပေတုံ ဂိလာနောဝ လဘတိ၊ န ဣတရောတိ စ၊ ‘‘အညဿ အတ္ထာယာ’’တိ ¶ အဿ ဉာတကပ္ပဝါရိတေ၊ အတ္တနော ဝါ ဉာတကပ္ပဝါရိတေတိ အတ္ထောတိ စ၊ ‘‘အပရိယန္တပ္ပဝါရဏာယ ပဝါရိတေ’’တိ သင်္ဃဝသေန၊ ပုဂ္ဂလဝသေန စ ပဝါရေတွာ ဒါယကာ။ တသ္မာ ‘‘သင်္ဃပ္ပဝါရဏတာ’’တိ ဝတွာ ‘‘ပုဂ္ဂလပ္ပဝါရဏတာ’’တိ န ဝုတ္တန္တိ စ၊ ‘‘ပရိယန္တာတိက္ကမော’’တိ ဝစနေန ဂိလာနော ဂဟိတော၊ တသ္မာ ‘‘ဂိလာနာဂိလာနတာ’’တိ န ဝုတ္တံ။ ဧဝံ သန္တေပိ ‘‘သင်္ဃပ္ပဝါရဏာယ ပဝါရဏတာ’’တိ ပါဌောတိ စ လိခိတံ၊ ဝီမံသိတဗ္ဗံ။

မဟာနာမသိက္ခာပဒဝဏ္ဏနာ နိဋ္ဌိတာ။

၈။ ဥယျုတ္တသေနာသိက္ခာပဒဝဏ္ဏနာ

ဟတ္ထိအာဒီသု ဧကမေကန္တိ အန္တမသော ဧကပုရိသာရုဠှဟတ္ထိမ္ပိ၊ ဧကံ သရဟတ္ထံ ပုရိသမ္ပိ။ သမုဋ္ဌာနာဒီနိ ဧဠကလောမသဒိသာနိ၊ ဣဒံ ပန လောကဝဇ္ဇံ၊ အကုသလစိတ္တံ တိဝေဒန’’န္တိ ပါဌော။

ဥယျုတ္တသေနာသိက္ခာပဒဝဏ္ဏနာ နိဋ္ဌိတာ။

၉။ သေနာဝါသသိက္ခာပဒဝဏ္ဏနာ

ကေနစိ ပလိဗုဒ္ဓဿာတိ ဝေရိကေန ဝါ ဣဿရေန ဝါ ကေနစိ ရုဒ္ဓဿ။ သေနာပရိက္ခေပေန ဝါ ပရိက္ခေပါရဟဋ္ဌာနေန ဝါ သဉ္စရဏဋ္ဌာနပရိယန္တေန ဝါ ပရိစ္ဆိန္ဒိတဗ္ဗာ။

သေနာဝါသသိက္ခာပဒဝဏ္ဏနာ နိဋ္ဌိတာ။

အစေလကဝဂ္ဂေါ ပဉ္စမော။

၆။ သုရာပါနဝဂ္ဂေါ

၁။ သုရာပါနသိက္ခာပဒဝဏ္ဏနာ

‘‘သုရာ’’တိ ¶ ဝါ ‘‘န ဝဋ္ဋတီ’’တိ ဝါ ဇာနိတွာ ပိဝနေ အကုသလမေဝါတိ လိခိတံ။ အကုသလစိတ္တန္တိ ယေဘုယျေန တံ သန္ဓာယ ကိရ ဝုတ္တံ။ အထ ကသ္မာ ¶ ဝိနယဋ္ဌကထာယံ ‘‘အကုသလေနေဝ ပါတဗ္ဗတာယာ’’တိ (ပါစိ။ အဋ္ဌ။ ၃၂၉) ဝုတ္တန္တိ စေ? သစိတ္တကပက္ခေ အကုသလေနေဝ ပါတဗ္ဗတာယာတိ။

သုရာပါနသိက္ခာပဒဝဏ္ဏနာ နိဋ္ဌိတာ။

၂။ အင်္ဂုလိပတောဒကသိက္ခာပဒဝဏ္ဏနာ

ကာယသံသဂ္ဂသင်္ဃာဒိသေသာပတ္တိဘာဝေ သမာနေပိ ဘိက္ခုနိယာပိ အနုပသမ္ပန္နေပိ ဒုက္ကဋံ၊ ဥပသမ္ပန္နေ ဧဝ ပါစိတ္တိယန္တိ ဧဝံ ပုဂ္ဂလာပေက္ခံ ဒဿေတုံ ‘‘အင်္ဂုလိပတောဒကေ ပါစိတ္တိယ’’န္တိ ဝုတ္တံ။ သတိ ကရဏီယေတိ ဧတ္ထ ပုရိသံ သတိ ကရဏီယေ အာမသတောတိ အဓိပ္ပာယော၊ န ဣတ္ထိံ။

အင်္ဂုလိပတောဒကသိက္ခာပဒဝဏ္ဏနာ နိဋ္ဌိတာ။

၃။ ဟသဓမ္မသိက္ခာပဒဝဏ္ဏနာ

‘‘စိက္ခလ္လံ ဝါ’’တိ ဝစနတော သက္ခရမ္ပိ ခိပနကီဠာယ ကီဠတော ဒုက္ကဋမေဝ။ ဥပရိဂေါပ္ဖကေ ပါစိတ္တိယံ၊ အညတ္ထ ဒုက္ကဋန္တိ ပါစိတ္တိယဝတ္ထုအတ္ထဝသေန ‘‘ဥဒကေ ဟသဓမ္မေ ပါစိတ္တိယ’’န္တိ ဝုတ္တံ။

ဣဒံ သညာဝိမောက္ခံ စေ၊ တိကပါစိတ္တိယံ ကထံ၊

ကီဠိတံဝ အကီဠာတိ၊ မိစ္ဆာဂါဟေန တံ သိယာ။

ဧတ္တာဝတာ ¶ ကထံ ကီဠာ၊ ဣတိ ကီဠာယံ ဧဝါယံ၊

အကီဠာသညီ ဟောတေတ္ထ၊ ဝိနယတ္ထံ သမာဒယေ။

ဧကန္တာကုသလော ယသ္မာ၊ ကီဠာယာဘိရတမနော၊

တသ္မာ အကုသလံ စိတ္တံ၊ ဧကမေဝေတ္ထ လဗ္ဘတီတိ။ (ဝဇိရ။ ဋီ။ ပါစိတ္တိယ ၃၃၆)၊

ဟသဓမ္မသိက္ခာပဒဝဏ္ဏနာ နိဋ္ဌိတာ။

၄။ အနာဒရိယသိက္ခာပဒဝဏ္ဏနာ

တဿ ¶ ဝစနန္တိ ‘‘အယံ ဥက္ခိတ္တကော ဝါ ဝမ္ဘိတော ဝါ ဂရဟိတော ဝါ ဣမဿ ဝစနံ အကတံ ဘဝိဿတီ’’တိ အနာဒရိယံ ကရောတိ။ ဓမ္မန္တိ ကထာယံ ဓမ္မော နဿေယျ ဝါ ဝိနဿေယျ ဝါ အန္တရဓာယေယျ ဝါ၊ တံ ဝါ အသိက္ခိတုကာမော အနာဒရိယံ ကရောတိ။ ‘‘လောကဝဇ္ဇံ အတိက္ကမိတွာ ‘ဣဒံ အမှာကံ အာစရိယုဂ္ဂဟော’တိ ဝဒန္တဿ န ဝဋ္ဋတီ’’တိ (ဝဇိရ။ ဋီ။ ပါစိတ္တိယ ၃၄၄) လိခိတံ။

အနာဒရိယသိက္ခာပဒဝဏ္ဏနာ နိဋ္ဌိတာ။

၆။ ဇောတိသိက္ခာပဒဝဏ္ဏနာ

‘‘ဝိသိဗ္ဗနာပေက္ခော’’တိ ဝုတ္တတ္တာ အညဿ ဝဋ္ဋတိ၊ အညေသဉ္စ။

ဇောတိနေကမနေကေ ဝါ၊ ဇာလေန္တိ မုနယော သဟ၊

ဧကော သောပေတိ နာနေကော၊ အဓိပ္ပာယဝိသေသတော။

ဇောတိသိက္ခာပဒဝဏ္ဏနာ နိဋ္ဌိတာ။

၈။ ဒုဗ္ဗဏ္ဏကရဏသိက္ခာပဒဝဏ္ဏနာ

မောရက္ခိမဏ္ဍလမင်္ဂုလပိဋ္ဌီနန္တိ ¶ န ဧကန္တတော၊ အဓိကံ၊ ဩရဉ္စာတိ ဝဒန္တိ။ ဧကကောဏေပိ ဝဋ္ဋတိ၊ ဧဝံ ယတ္ထ ကတ္ထစိ ဧကဗိန္ဒုပိ ဝဋ္ဋတီတိ။

ဒုဗ္ဗဏ္ဏကရဏသိက္ခာပဒဝဏ္ဏနာ နိဋ္ဌိတာ။

၉။ ဝိကပ္ပနသိက္ခာပဒဝဏ္ဏနာ

‘‘သမုဋ္ဌာနာဒီနိ ပဌမကထိနသဒိသာနိ၊ ဣဒံ ပန ကိရိယာကိရိယ’’န္တိ ပါဌော။ ဧတ္ထ ပရိဘောဂေန ကာယကမ္မံ။ အပစ္စုဒ္ဓရဏေန ဝစီကမ္မံ။

ဝိကပ္ပနသိက္ခာပဒဝဏ္ဏနာ နိဋ္ဌိတာ။

၁၀။ အပနိဓာနသိက္ခာပဒဝဏ္ဏနာ

သသူစိကေ ¶ သူစိဃရေ သူစိဂဏနာယ အာပတ္တိယောတိ ပေါရာဏာ။

အပနိဓာနသိက္ခာပဒဝဏ္ဏနာ နိဋ္ဌိတာ။

သုရာပါနဝဂ္ဂေါ ဆဋ္ဌော။

၇။ သပ္ပာဏကဝဂ္ဂေါ

၁။ သဉ္စိစ္စသိက္ခာပဒဝဏ္ဏနာ

ဝတ္ထုဂဏနာယ ကမ္မဗန္ဓဂဏနာစေတနာမာရဏာနံ၊ န ကမ္မဗန္ဓဂဏနာယ စေတနာမာရဏာ။ ဧတ္ထ ဧကစေတနာယ ဗဟုပါဏကာ မရန္တီတိ အယံ ဝိဘာဂေါ ဝေဒိတဗ္ဗော။

သဉ္စိစ္စသိက္ခာပဒဝဏ္ဏနာ နိဋ္ဌိတာ။

၂။ သပ္ပာဏကသိက္ခာပဒဝဏ္ဏနာ

သပ္ပာဏကန္တိ ¶ ပါဏကာနံ မရဏဝသေန ပါစိတ္တိယံ၊ န သပ္ပာဏကဥဒကပရိဘောဂဝသေန ပါစိတ္တိယံ၊ တသ္မာ ဧဝ ‘‘ပဏ္ဏတ္တိဝဇ္ဇ’’န္တိ ဝုတ္တံ။ အသုဒ္ဓစိတ္တတ္တာ ပါစိတ္တိယံ၊ သုဒ္ဓစိတ္တေ အနာပတ္တိ။ ပဒီပုဇ္ဇလနေ ဝိယ ပဏ္ဏတ္တိဝဇ္ဇတာ ဝုတ္တာတိ လိခိတံ။

ဇလေ ပက္ခိပနံ ပုဗ္ဗံ၊ ဇလပ္ပဝေသနံ ဣဒံ၊

ဧဝံ ဥဘိန္နံ နာနာတ္တံ၊ ဉေယျံ ဉာဏဝတာ သဒါတိ။ (ဝဇိရ။ ဋီ။ ပါစိတ္တိယ ၃၈၇)

သပ္ပာဏကသိက္ခာပဒဝဏ္ဏနာ နိဋ္ဌိတာ။

၅။ ဦနဝီသတိဝဿသိက္ခာပဒဝဏ္ဏနာ

အညံ ဥပသမ္ပာဒေတီတိ –

ဥပဇ္ဈာယော သစေ သာမံ၊ ကမ္မဝါစဉ္စ သာဝေတိ၊

ကမ္မံ ရုဟတိ ဣစ္စေကေ၊ နေတိ ဝိနယကောဝိဒေါ။

ဒုက္ကဋံ ¶ ဝိဟိတံ ယသ္မာ၊ အာစရိယဿ ဂဏဿ စ၊

တသ္မာ ဘိန္နာဝ အာစရိယ-ဥပဇ္ဈာယာ ဝိသုံ ဣဓာတိ။

ဦနဝီသတိဝဿသိက္ခာပဒဝဏ္ဏနာ နိဋ္ဌိတာ။

၇။ သံဝိဓာနသိက္ခာပဒဝဏ္ဏနာ

ဣဓ ဧကတောဥပသမ္ပန္နာ၊ သိက္ခမာနာ၊ သာမဏေရီတိ ဣမာ တိဿောပိ သင်္ဂဟံ ဂစ္ဆန္တိ၊ ဣမာသံ ပန တိဿန္နံ သမယော ရက္ခတိ၊ အယမိမာသံ၊ မာတုဂါမဿ စ ဝိသေသောတိ ဝေဒိတဗ္ဗံ။

သံဝိဓာနသိက္ခာပဒဝဏ္ဏနာ နိဋ္ဌိတာ။

၉။ ဥက္ခိတ္တသမ္ဘောဂသိက္ခာပဒဝဏ္ဏနာ

‘‘တံ ¶ ဒိဋ္ဌိံ အပ္ပဋိနိဿဋ္ဌေနာတိ လဒ္ဓိနာနာသံဝါသကံ သန္ဓာယာ’’တိ လိခိတံ။ တိစိတ္တန္တိ ဧတ္ထ ဝိပါကာဗျာကတစိတ္တေန သဟသေယျံ ကပ္ပေယျာတိ ဧဝမတ္ထော ဒဋ္ဌဗ္ဗော။ အညထာ သစိတ္တကတ္တာ သိက္ခာပဒဿ ကိရိယာဗျာကတံ သန္ဓာယ န ယုဇ္ဇတိ။

ဥက္ခိတ္တသမ္ဘောဂသိက္ခာပဒဝဏ္ဏနာ နိဋ္ဌိတာ။

၁၀။ ကဏ္ဋကသိက္ခာပဒဝဏ္ဏနာ

‘‘အယံ သမဏုဒ္ဒေသော ပါရာဇိကော ဟောတိ။ သစေ တံ ဒိဋ္ဌိံ ပဋိနိဿဇ္ဇတိ၊ သင်္ဃဿ အာရောစေတွာ သင်္ဃာနုမတိယာ ပဗ္ဗာဇေတဗ္ဗော’’တိ ပေါရာဏဂဏ္ဌိပဒေ ဝုတ္တံ၊ တံ န ယုတ္တံ။ ဒဏ္ဍကမ္မနာသနာ ဟိ ဣဓာဓိပ္ပေတာ။ ယဒိ သော ပါရာဇိကော ဟောတိ၊ လိင်္ဂနာသနာ နာမ သိယာ။ ‘‘တေ ပဋိသေဝတော နာလံ အန္တရာယာယာ’’တိ စ ဒိဋ္ဌိ သတ္ထရိ အသတ္ထာဒိဒိဋ္ဌိ န ဟောတိ။ သစေ သာ ယဿ ဥပ္ပဇ္ဇတိ၊ သော ပါရာဇိကော ဟောတိ၊ တသ္မိမ္ပိ ဧဝမေဝ ¶ ပဋိပဇ္ဇိတဗ္ဗံ၊ သံဝရေ အတိဋ္ဌန္တော လိင်္ဂနာသနာယ နာသေတဗ္ဗောတိ (ဝဇိရ။ ဋီ။ ပါစိတ္တိယ ၄၂၈) အာစရိယဿ တက္ကော။

ကဏ္ဋကသိက္ခာပဒဝဏ္ဏနာ နိဋ္ဌိတာ။

သပ္ပာဏကဝဂ္ဂေါ သတ္တမော။

၈။ သဟဓမ္မိကဝဂ္ဂေါ

၄။ ပဟာရသိက္ခာပဒဝဏ္ဏနာ

အင်္ဂေသု န မောက္ခာဓိပ္ပာယတာ ဝိယ အမရဏာဓိပ္ပာယတာ ဝတ္တဗ္ဗာတိ စေ? န ဝတ္တဗ္ဗာ။ ကသ္မာ? ယော ဘိက္ခု သယံ ပဟာရံ ဒါတုကာမော၊ သော အဓိပ္ပာယေန တဿ မရဏေ ပယောဂဝိရဟောဝါတိ ကတွာ ¶ အမရဏာဓိကာရတ္တာ ကေဝလံ အမရဏာဓိပ္ပာယော ဧဝ သောတိ တာ ဝိယ တာ န ဝုတ္တာ။ မောက္ခာဓိပ္ပာယဿ ပန ကောပေါ နတ္ထိ၊ တသ္မာ အနာပတ္တီတိ ဝုတ္တံ။

ပဟာရသိက္ခာပဒဝဏ္ဏနာ နိဋ္ဌိတာ။

၅။ တလသတ္တိကသိက္ခာပဒဝဏ္ဏနာ

တလမေဝ တလသတ္တိကံ။ ‘‘ပေါထနသမတ္ထဋ္ဌေန သတ္တိက’’န္တိ ဧကေ။ ယသ္မာ ပဟရိတုကာမတာယ ပဟရတော ပုရိမေန ပါစိတ္တိယံ၊ ကေဝလံ ဥစ္စာရေတုကာမတာယ ဥဂ္ဂိရဏမတ္တေ ကတေ ဣမိနာ ပါစိတ္တိယံ။ ဣမိနာ ပန ဝိရဇ္ဈိတွာ ပဟာရော ဒိန္နော၊ တသ္မာ နပဟရိတုကာမတာယ ဒိန္နတ္တာ ဒုက္ကဋံ။ ကိမိဒံ ဒုက္ကဋံ ပဟာရပစ္စယာ၊ ဥဒါဟု ဥဂ္ဂိရဏပစ္စယာတိ? ပဟာရပစ္စယာ ဧဝ ဒုက္ကဋံ၊ ပုရိမံ ဥဂ္ဂိရဏပစ္စယာ ပါစိတ္တိယန္တိ သဒုက္ကဋံ ပါစိတ္တိယံ ယုဇ္ဇတိ။ ပုရိမဉှိ ဥဂ္ဂိရဏံ၊ ပစ္ဆာ ပဟာရော။ န စ ပစ္ဆိမံ ပဟာရံ နိဿာယ ပုရိမံ ဥဂ္ဂိရဏံ အနာပတ္တိဝတ္ထုကံ ဘဝိတုမရဟတီတိ နော တက္ကောတိ (ဝဇိရ။ ဋီ။ ပါစိတ္တိယ ၄၅၆) အာစရိယော။

တလသတ္တိကသိက္ခာပဒဝဏ္ဏနာ နိဋ္ဌိတာ။

၇။ သဉ္စိစ္စသိက္ခာပဒဝဏ္ဏနာ

ပရော ¶ ကုက္ကုစ္စံ ဥပ္ပာဒေတု ဝါ၊ မာ ဝါ၊ တံ အပ္ပမာဏံ။ ‘‘ကုက္ကုစ္စုပါဒန’’န္တိ တတိယမင်္ဂံ တဿ အဓိပ္ပာယဝသေန ဝုတ္တန္တိ ဝေဒိတဗ္ဗံ။

သဉ္စိစ္စသိက္ခာပဒဝဏ္ဏနာ နိဋ္ဌိတာ။

၈။ ဥပဿုတိသိက္ခာပဒဝဏ္ဏနာ

ဥပဿုတိန္တိ ယထာ ဥပကုဇ္ဈံ ‘‘သမီပကုဇ္ဈ’’န္တိ ဝုစ္စတိ၊ တထာ ဥပဿုတိ ‘‘သမီပဿုတီ’’တိ ဝေဒိတဗ္ဗာ။ ယတ္ထ ဌိတော သုဏာတိ၊ တံ ဌာနန္တိ အတ္ထော။ သုတီတိ ပနေတ္ထ ပရေသံ ဝစနသဒ္ဒေါ စ။ သော ဟိ သုယျတီတိ သုတိ နာမ။ ဥပသုယျတိ ဝါ ဧတ္ထာတိ ဥပဿုတိ။ ဩကာသော ဟိ သုတိ နာမ။ ဣမေသံ သုတွာတိ ဧတ္ထ ‘‘ဝစန’’န္တိ ပါဌသေသော။

သမုဋ္ဌာနာဒီနိ ¶ အတီတဒွယသဒိသာနီတိ န ဂဟေတဗ္ဗာနိ။ ထေယျသတ္ထသမုဋ္ဌာနံ။ သိယာ ကိရိယံ ဂန္တွာ သဝနေ။ သိယာ အကိရိယံ ဌိတဋ္ဌာနံ အာဂန္တွာ ဝဒန္တာနံ အဇာနာပနဝသေန သမုဋ္ဌာနတော။ ‘‘သညာဝိမောက္ခံ၊ သစိတ္တကံ၊ လောကဝဇ္ဇံ၊ ကာယကမ္မံ၊ ဝစီကမ္မံ၊ အကုသလစိတ္တံ၊ ဒုက္ခဝေဒန’’န္တိ လိခိတံ။

ဥပဿုတိသိက္ခာပဒဝဏ္ဏနာ နိဋ္ဌိတာ။

၉။ ကမ္မပ္ပဋိဗာဟနသိက္ခာပဒဝဏ္ဏနာ

အပ္ပမတ္တကဝိဿဇ္ဇနကေန ပန စီဝရံ ကရောန္တဿ သေနာသနက္ခန္ဓကဝဏ္ဏနာယံ (စူဠဝ။ ၃၂၈) ဝုတ္တပ္ပဘေဒါနိ သူစိအာဒီနိ အနပလောကေတွာပိ ဒါတဗ္ဗာနိ။ တတော အတိရေကံ ဒေန္တေန အပလောကနကမ္မံ ကာတဗ္ဗံ။ ဧဝံ ကတံ ပန အပလောကနံ ကမ္မလက္ခဏမေဝါတိ အဓိပ္ပာယော။ ဧဝံ သဗ္ဗတ္ထ ကမ္မလက္ခဏံ ဝေဒိတဗ္ဗံ။ ဂါမသီမာဝိဟာရေသု ဩသာရဏာဒီနိ သင်္ဃကမ္မာနိယေဝ န ဝဋ္ဋန္တိ။ ဝိဿဇ္ဇိယဝေဘင်္ဂိယာနိ ပန ဝဋ္ဋန္တိ။ ‘‘သင်္ဃဿ သန္တက’’န္တိ သာမညတော အဝတွာ ‘‘ဣမသ္မိံ ဝိဟာရေ သင်္ဃဿ သန္တက’’န္တိ အပလောကေတဗ္ဗန္တိ စ၊ ‘‘သမုဋ္ဌာနာဒီနိ အဒိန္နာဒါနသဒိသာနိ၊ ဣဒံ ပန ဒုက္ခဝေဒန’’န္တိ ပါဌောတိ စ လိခိတံ။

ကမ္မပ္ပဋိဗာဟနသိက္ခာပဒဝဏ္ဏနာ နိဋ္ဌိတာ။

၁၀။ ဆန္ဒံအဒတွာဂမနသိက္ခာပဒဝဏ္ဏနာ

သန္နိပါတံ ¶ အနာဂန္တွာ စေ ဆန္ဒံ န ဒေတိ၊ အနာပတ္တီတိ ဧကေ။ ဒုက္ကဋန္တိ ဧကေ ဓမ္မကမ္မန္တရာယကရဏာဓိပ္ပာယတ္တာ။

ဆန္ဒံအဒတွာဂမနသိက္ခာပဒဝဏ္ဏနာ နိဋ္ဌိတာ။

၁၁။ ဒုဗ္ဗလသိက္ခာပဒဝဏ္ဏနာ

အကပ္ပိယေန ဝါတိ သုဝဏ္ဏရဇတမယမဉ္စာဒိနာ။ ကပ္ပိယမဉ္စော သမ္ပဋိစ္ဆိတဗ္ဗောတိ ‘‘သင်္ဃဿ ဒေမာ’’တိ ဒိန္နံ သန္ဓာယ ဝုတ္တံ၊ တေဟိ ပန ‘‘ဝိဟာရဿ ဒေမာ’’တိ ဝုတ္တေ သုဝဏ္ဏရဇတမယာဒိအကပ္ပိယမဉ္စာပိ ¶ သမ္ပဋိစ္ဆိတဗ္ဗာတိ စ၊ ‘‘အရဉ္ဇရော ဗဟုဥဒကဂဏှနကော’’တိ စ၊ ‘‘သင်္ဃိကပအဘောဂေန ဝါတိ သစေ အာရာမိကာဒယော ပဋိသာမေတွာ ပဋိဒေန္တိ၊ ပရိဘုဉ္ဇိတုံ ဝဋ္ဋတီ’’တိ စ၊ ‘‘ကံသလောဟာဒိဘာဇနံ သင်္ဃဿ ဒိန္နမ္ပိ ပါရိဟာရိယံ န ဝဋ္ဋတီ’’တိ (စူဠဝ။ အဋ္ဌ။ ၃၂၁) သမန္တပါသာဒိကာယံ ဝုတ္တတ္တာ အတ္တနော ဟတ္ထေန ဂဟေတွာ ပဋိသာမိတုံ န လဘတီတိ စ၊ ‘‘ဝေဓကော ကာယဗန္ဓနဿာတိ ဝဒန္တီ’’တိ စ၊ ‘‘ဟိင်္ဂု ဟိင်္ဂုလိဟရိတာလမနောသိလာ အဉ္ဇနာနီ’’တိ ပါဌောတိ စ၊ ‘‘ဒါရုမယော ဝါ…ပေ… အပါဒကောပိ သမုဂ္ဂေါ’’တိ ပါဌောတိ စ၊ ‘‘ဒါရုမယော တုမ္ဗောတိ ဒါရုမယော ဥဒကတုမ္ဗော’’တိ စ၊ ‘‘ထမ္ဘတုလာသောပါနဖလကာဒီသူ’’တိ စ လိခိတံ။

ဒုဗ္ဗလသိက္ခာပဒဝဏ္ဏနာ နိဋ္ဌိတာ။

၁၂။ ပရိဏာမနသိက္ခာပဒဝဏ္ဏနာ

ဧကော ဘိက္ခု ဥက္ခိတ္တကဿ ဒါတုကာမော ဟောတိ၊ တဿ ဒါနံ နိဝါရေတွာ အညဿ ဒါပေတိ၊ အနာပတ္တိ။ တထာ သဒ္ဓါဒေယျဝိနိပါတနံ ကရောန္တဿ ဒါပေတိ၊ အတ္တနော နိဿိတကာ ဣတ္ထန္နာမဿ ပတ္တံ ဒါတုကာမာ အာပုစ္ဆန္တိ၊ ‘‘ဝိသဘာဂေါ ဧသော၊ သဘာဂဿ ဒေဟီ’’တိ ဝဒတိ။ အနာပတ္တိ အတ္တနော ဘာရဘူတတ္တာ။ တဿ ပန ဒါတုကာမံ အညဿ ဒါပေတိ ¶ ၊ အာပတ္တိ ဧဝ။ သဗ္ဗတ္ထ အာပုစ္ဆိတွာ ဒါတုကာမံ ယထာသုခံ ဝိစာရေတုံ လဘတိ။

ပရိဏာမနသိက္ခာပဒဝဏ္ဏနာ နိဋ္ဌိတာ။

သဟဓမ္မိကဝဂ္ဂေါ အဋ္ဌမော။

၉။ ရတနဝဂ္ဂေါ

၁။ အန္တေပုရသိက္ခာပဒဝဏ္ဏနာ

အသယနိဃရေတိ ပရိက္ခိတ္တဿ ဗဟိဘူတေသု ရုက္ခမူလာဒီသု။ ‘‘သစေ ခတ္တိယောဝ ဟောတိ၊ နာဘိသိတ္တော၊ အဘိသိတ္တောဝ ဟောတိ၊ န ခတ္တိယော၊ ရက္ခတီ’’တိ အာစရိယော ‘‘ခတ္တိယတာ၊ အဘိသိတ္တတာ’’တိ ¶ အာပတ္တိယာ အင်္ဂဘာဝေန ဝုတ္တတ္တာ။ သမုဋ္ဌာနာဒီနိ ပဌမကထိနသဒိသာနိ၊ ဣဒံ ပန ကိရိယာကိရိယ’’န္တိ ပါဌော။

အန္တေပုရသိက္ခာပဒဝဏ္ဏနာ နိဋ္ဌိတာ။

၂။ ရတနသိက္ခာပဒဝဏ္ဏနာ

သဗ္ဗောပိ ကထာမဂ္ဂေါ ဘဏ္ဍာဂါရိကသီသေန နိက္ခိပနံ၊ ဂေါပနဉ္စ ပဋိက္ခိပိတွာ ပဝတ္တော။

ရတနသိက္ခာပဒဝဏ္ဏနာ နိဋ္ဌိတာ။

၃။ ဝိကာလဂါမပ္ပဝေသနသိက္ခာပဒဝဏ္ဏနာ

‘‘သန္တံ ဘိက္ခု’’န္တိ စ ‘‘အနာပုစ္ဆာ’’တိ စ ‘‘တထာရူပါ အစ္စာယိကာတိ စ ဣမာတိ ဧတ္ထ တိဿော’’တိ ပါဌော။ ‘‘သမုဋ္ဌာနာဒီနိ ကထိနသဒိသာနိ၊ ဣဒံ ပန ကိရိယာကိရိယ’’န္တိ ပါဌော။

ဝိကာလဂါမပ္ပဝေသနသိက္ခာပဒဝဏ္ဏနာ နိဋ္ဌိတာ။

၄။ သူစိဃရသိက္ခာပဒဝဏ္ဏနာ

တံ ¶ အဿာတိ တံ ဘေဒနကံ အဿ ပါစိတ္တိယဿ အတ္ထိ ပဌမံ ဘေဒနံ ကတွာ ပစ္ဆာ ဒေသေတဗ္ဗတ္တာ။ ဧသ နယော ဣတရေသုပိ။ ဝါသိဇဋေတိ ဝါသိဒဏ္ဍကေ။

သူစိဃရသိက္ခာပဒဝဏ္ဏနာ နိဋ္ဌိတာ။

၅။ မဉ္စပီဌသိက္ခာပဒဝဏ္ဏနာ

အဋ္ဌင်္ဂုလပါဒကန္တိ ဘာဝနပုံသကံ။ တုလာသင်္ဃာတေ ဌပနမေဝ အဋ္ဋကရဏံ။

မဉ္စပီဌသိက္ခာပဒဝဏ္ဏနာ နိဋ္ဌိတာ။

၆။ တူလောနဒ္ဓသိက္ခာပဒဝဏ္ဏနာ

ကိဉ္စာပိ ¶ ပဋိလာဘေယေဝ ပါစိတ္တိယံ ဝိယ ဒိဿတိ၊ ပရိဘောဂေ ဧဝ ပန အာပတ္တိ ဒဋ္ဌဗ္ဗာ။ ‘‘အညေန ကတံ ပဋိလဘိတွာ ပရိဘုဉ္ဇတိ၊ အာပတ္တိ ဒုက္ကဋဿာ’’တိ (ပါစိ။ ၅၂၉) ဝစနံ ဧတ္ထ သာဓကံ။

တူလောနဒ္ဓသိက္ခာပဒဝဏ္ဏနာ နိဋ္ဌိတာ။

၇။ နိသီဒနသိက္ခာပဒဝဏ္ဏနာ

ကိဉ္စာပိ နိသီဒနဿ ဇာတိ န ဒိဿတိ ဧတ္ထ၊ တထာပိ စီဝရက္ခန္ဓကေ အနုညာတတ္တာ၊ ‘‘နဝ စီဝရာနိ အဓိဋ္ဌာတဗ္ဗာနီ’’တိ ဧတ္ထ စ ပရိယာပန္နတ္တာ စီဝရဇာတိ ဧဝဿ ဇာတီတိ ဝေဒိတဗ္ဗံ။ ‘‘လာဘေ သဒသံ၊ အလာဘေ အဒသမ္ပိ ဝဋ္ဋတီ’’တိ ဧကေ၊ တံ န ယုတ္တံ ‘‘နိသီဒနံ နာမ သဒသံ ဝုစ္စတီ’’တိ (ပါစိ။ ၅၃၁-၅၃၂) တဿ သဏ္ဌာနနိယမနတော။

နိသီဒနသိက္ခာပဒဝဏ္ဏနာ နိဋ္ဌိတာ။

ရတနဝဂ္ဂေါ နဝမော။

သုဒ္ဓပါစိတ္တိယဝဏ္ဏနာ နိဋ္ဌိတာ။

ပါဋိဒေသနီယကဏ္ဍံ

၁။ ပဌမပါဋိဒေသနီယသိက္ခာပဒဝဏ္ဏနာ

ယာမကာလိကာဒီသု ¶ ¶ အာဟာရတ္ထာယ ဧဝ ဒုက္ကဋံ။ တမ္ပိ အာမိသေန အသမ္ဘိန္နရသေ၊ သမ္ဘိန္နေ ပန ဧကရသေ ပါဋိဒေသနီယမေဝ။

ပဌမပါဋိဒေသနီယသိက္ခာပဒဝဏ္ဏနာ နိဋ္ဌိတာ။

၂။ ဒုတိယပါဋိဒေသနီယသိက္ခာပဒဝဏ္ဏနာ

‘‘သမုဋ္ဌာနာဒီနိ ကထိနသဒိသာနိ၊ ဣဒံ ပန ကိရိယာကိရိယ’’န္တိ ပါဌော။

ဒုတိယပါဋိဒေသနီယသိက္ခာပဒဝဏ္ဏနာ နိဋ္ဌိတာ။

၄။ စတုတ္ထပါဋိဒေသနီယသိက္ခာပဒဝဏ္ဏနာ

အာရာမေ ဝါ အာရာမူပစာရေ ဝါ ပဋိဂ္ဂဟေတွာ အဇ္ဈောဟရန္တဿာတိ အာရာမေ ဝါ အာရာမူပစာရေ ဝါ ပဋိဂ္ဂဟေတွာ အာရာမေ ဝါ အာရာမူပစာရေ ဝါ အဇ္ဈောဟရန္တဿာတိ အတ္ထော။

ဗဟာရာမေ ပဋိဂ္ဂဟိတံ အဇ္ဈာရာမေ ဘုဉ္ဇန္တဿ အနာပတ္တိ။ အင်္ဂေသု စ ‘‘အဇ္ဈာရာမေ ဝါ အာရာမူပစာရေ ဝါ ပဋိဂ္ဂဟဏ’’န္တိ ဂဟေတဗ္ဗံ။ အဇ္ဈာရာမေ ဟိ ဒဿိတေ အာရာမူပစာရံ ဒဿိတမေဝါတိ။ ‘‘သမုဋ္ဌာနာဒီနိ ကထိနသဒိသာနိ၊ ဣဒံ ပန ကိရိယာကိရိယ’’န္တိ ပါဌော။

စတုတ္ထပါဋိဒေသနီယသိက္ခာပဒဝဏ္ဏနာ နိဋ္ဌိတာ။

ပါဋိဒေသနီယဝဏ္ဏနာ နိဋ္ဌိတာ။

သေခိယကဏ္ဍံ

သေခိယေသု ¶ ¶ သတိပိ ဝီတိက္ကမေ အနာဒရိယာပေက္ခဿေဝ အာပတ္တီတိ ဒဿနတ္ထံ ကာရကော န ဝုတ္တော။ အယဉှိ ဝိနယဓမ္မတာ၊ ယဒိဒံ သာပေက္ခေ ကာရကနိဒ္ဒေသော၊ သော ဝုတ္တနိယမေ ဝိဓိ၊ ဘုမ္မကရဏဉ္စ။ အဋ္ဌင်္ဂုလာဓိကမ္ပိ ဩတာရေတွာ နိဝါသေတုံ ဝဋ္ဋတိ။ တတော ပရံ ဩတာရေန္တဿ ဒုက္ကဋန္တိ မဟာအဋ္ဌကထာယံ ဝုတ္တံ။ အာရာမေ ဝါတိ ဗုဒ္ဓုပဋ္ဌာနာဒိကာလေ။ ပါရုပိတဗ္ဗန္တိ ဥတ္တရာသင်္ဂကိစ္စဝသေန ဝုတ္တံ။

ဌတွာတိ ဧတ္ထ ဂစ္ဆန္တောပိ ပရိဿယာဘာဝံ ဩလောကေတုံ လဘတိယေဝါတိ (ဝဇိရ။ ဋီ။ ပါစိတ္တိယ ၅၈၂) လိခိတံ။ ယထာ ဝါသူပဂတဿ အန္တရဃရေ ကာယံ ဝိဝရိတွာ နိသီဒိတုံ ဝဋ္ဋတိ၊ တထာ တဿ သန္တိကေ ဂန္တုကာမဿပိ ကာယဗန္ဓနံ အဗန္ဓိတွာ သင်္ဃာဋိံ အပါရုပိတွာ ဂါမပ္ပဝေသနမနာရောစေတွာ ယထာကာမံ ဂန္တုံ ဝဋ္ဋတိ။ တသ္မာ အဒ္ဓါနမဂ္ဂဂမနကာလေ ဧကော ဘိက္ခု ဂါမပ္ပဝေသနဝတ္တံ ပူရေတွာ ဂါမံ ပဝိသိတွာ ဧကံ အာဝသထံ ပုရတောဝ ဌိတံ ပတွာ ပရိက္ခာရံ ဌပေတွာ ဝါသူပဂတော စေ ဟောတိ၊ ဣတရေဟိ တဿ သန္တိကံ ယထာသုခံ ဂန္တုံ ဝဋ္ဋတိ။ ကော ပန ဝါဒေါ စတူဟပဉ္စာဟံ ဝါသမဓိဋ္ဌာယ ဝသိတဘိက္ခူနံ သန္တိကံ ဂန္တုဉ္စ ဝါသူပဂတာနံ သန္တိကံ ဂန္တုဉ္စ ဝဋ္ဋတီတိ။ ဗုဒ္ဓပူဇမ္ပိ ယထာသုခံ ဂန္တုံ ဝဋ္ဋတိ။ ဝုတ္တမ္ပိ စေတံ အဋ္ဌကထာယံ ‘‘အနာပတ္တိ ကာရဏံ ပဋိစ္စ တဟံ တဟံ ဩလောကေတီ’’တိ။ တတ္ထ ကာရဏံ နာမ အာမိသပူဇာတိ ဝေဒိတဗ္ဗာတိ လိခိတံ။

ဆဗ္ဗီသတိသာရုပ္ပဝဏ္ဏနာ နိဋ္ဌိတာ။

ယသ္မာ ‘‘သမတိတ္တိကော ပိဏ္ဍပါတော ပဋိဂ္ဂဟေတဗ္ဗော’’တိ (ပါစိ။ ၆၀၂-၆၀၃) ဝစနံ ပိဏ္ဍပါတော သမပုဏ္ဏော ပဋိဂ္ဂဟေတဗ္ဗောတိ ဒီပေတိ၊ တသ္မာ အတ္တနော ဟတ္ထဂတေ ပတ္တေ ပိဏ္ဍပါတော ဒိယျမာနော ထူပီကတောပိ စေ ဟောတိ၊ ဝဋ္ဋတီတိ ဒီပိတော ဟောတိ။ သူပေါဒနဝိညတ္တိယံ မုခေ ပက္ခိပိတွာ ဝိပ္ပဋိသာရေ ဥပ္ပန္နေ ပုန ဥဂ္ဂိရိတုကာမဿာပိ သဟသာ စေ ပဝိသတိ၊ ဧတ္ထ အသဉ္စိစ္စ ¶ ဘုဉ္ဇတိ နာမ။ ဝိညတ္တိကတဉ္စ အကတဉ္စ ဧကသ္မိံ ဌာနေ ဌိတံ သဟသာ အနုပဓာရေတွာ ဂဟေတွာ ဘုဉ္ဇတိ၊ အဿတိယာ ဘုဉ္ဇတိ နာမ။

သယံ ¶ ယာနဂတော ဟုတွာ၊ ယထာ ယာနဂတဿ စေ၊

အလံ ဝတ္ထုံ တထာ နာလံ၊ သဆတ္တော ဆတ္တပါဏိနော။

‘‘သူပေါဒနဝိညတ္တိသိက္ခာပဒံ ထေယျသတ္ထသမုဋ္ဌာနံ၊ ကိရိယံ၊ သညာဝိမောက္ခံ၊ သစိတ္တကံ၊ လောကဝဇ္ဇံ၊ ကာယကမ္မံ၊ ဝစီကမ္မံ၊ အကုသလစိတ္တံ၊ ဒုက္ခဝေဒန’’န္တိ ပါဌော။

သေခိယဝဏ္ဏနာ နိဋ္ဌိတာ။

ဘိက္ခုပါတိမောက္ခဝဏ္ဏနာ နိဋ္ဌိတာ။

နမော တဿ ဘဂဝတော အရဟတော သမ္မာသမ္ဗုဒ္ဓဿ

ဘိက္ခုနီပါတိမောက္ခဝဏ္ဏနာ

ပါရာဇိကကဏ္ဍံ

အဘိလာပမတ္တမေဝါတိ ¶ ¶ ဧတ္ထ ဒဟရဝသေန ‘‘ဘန္တေ’’တိ စ ဝုဍ္ဎဝသေန ‘‘အာဝုသော’’တိ စ တတ္ထ ဒုဝိဓော အဘိလာပေါ၊ ဣဓ ပန ဝုဍ္ဎဒဟရာနံ ‘‘အယျာ’’တိ ဧကမေဝ။

ကာယသံသဂ္ဂေ ဝုတ္တနယေနာတိ ဧတ္ထ တဗ္ဗဟုလနယေန ကိရိယသမုဋ္ဌာနတာ ဝုတ္တာ။ ‘‘ကာယသံသဂ္ဂံ သမာပဇ္ဇေယျာ’’တိ အဝတွာ ပန ‘‘သာဒိယေယျာ’’တိ ဝုတ္တတ္တာ အကိရိယတောပိ သမုဋ္ဌာတီတိ ဝေဒိတဗ္ဗံ။ ယထာ စေတ္ထ၊ ဧဝံ ဟေဋ္ဌာ ‘‘မနုဿိတ္ထိယာ တယော မဂ္ဂေ မေထုနံ ဓမ္မံ ပဋိသေဝန္တဿ အာပတ္တိ ပါရာဇိကဿာ’’တိအာဒိနာ (ပါရာ။ ၅၆) နယေန ကိရိယသမုဋ္ဌာနတံ ဝတွာ တဒနန္တရံ ‘‘ဘိက္ခုပစ္စတ္ထိကာ မနုဿိတ္ထိံ ဘိက္ခုဿ သန္တိကံ အာနေတွာ ဝစ္စမဂ္ဂေန အင်္ဂဇာတံ အဘိနိသီဒေန္တိ၊ သော စေ ပဝေသနံ သာဒိယတီ’’တိအာဒိနာ (ပါရာ။ ၅၈) နယေန အကိရိယသမုဋ္ဌာနဿပိ ဝုတ္တတ္တာ ပဌမပါရာဇိကာယပိ တဗ္ဗဟုလနယေနေဝ ကိရိယသမုဋ္ဌာနတာ ဝေဒိတဗ္ဗာ။ န ဟိ ပဝေသနသာဒိယနာဒိမှိ ကိရိယသမုဋ္ဌာနတာ ဒိဿတိ။

အင်္ဂဇာတစလနဉ္စေတ္ထ ¶ န သာရတော ဒဋ္ဌဗ္ဗံ ‘‘သော စေ ပဝေသနံ န သာဒိယတိ၊ ပဝိဋ္ဌံ န သာဒိယတိ၊ ဌိတံ န သာဒိယတိ၊ ဥဒ္ဓရဏံ သာဒိယတိ၊ အာပတ္တိ ပါရာဇိကဿာ’’တိ (ပါရာ။ ၅၈) ဧတ္ထ ဌိတနသာဒိယနေ ပကတိယာပိ ပရိပုဏ္ဏစလနတ္တာ။ သာဒိယနပစ္စယာ ပဋိသေဝနစလနဉ္စေတ္ထ န ဒိဿတေဝါတိ တဗ္ဗဟုလနယေနေဝ ကိရိယသမုဋ္ဌာနတာ ဂဟေတဗ္ဗာ။

အပိစ ဘိက္ခုနိယာပိ ပဌမပါရာဇိကေ တဿ သာဒိယနဿ သရူပေန ဝုတ္တတ္တာ တဒနုရူပဝသေန ဝိဘင်္ဂနယမနောလောကေတွာ ‘‘ကိရိယသမုဋ္ဌာန’’မိစ္စေဝ ဝုတ္တံ။ ယထာ စေတေသု တဗ္ဗဟုလနယေန ကိရိယသမုဋ္ဌာနတာ ဝုတ္တာ၊ တထာ သုရာဒီနံ အကုသလေနေဝ ပါတဗ္ဗတာ။ ဣတရထာ ‘‘ယံ အကုသလေနေဝ ¶ အာပဇ္ဇတိ၊ အယံ လောကဝဇ္ဇာ၊ သေသာ ပဏ္ဏတ္တိဝဇ္ဇာ’’တိ ဝုတ္တေ လောကဝဇ္ဇပဏ္ဏတ္တိဝဇ္ဇာနံ နိယမလက္ခဏသိဒ္ဓိ ဟောတိ၊ တထာ တံ အဝတွာ ‘‘ယဿာ သစိတ္တကပက္ခေ စိတ္တံ အကုသလမေဝ ဟောတိ၊ အယံ လောကဝဇ္ဇာ၊ သေသာ ပဏ္ဏတ္တိဝဇ္ဇာ’’တိ (ကင်္ခါ။ အဋ္ဌ။ ပဌမပါရာဇိကဝဏ္ဏနာ) ဝုတ္တေ လောကဝဇ္ဇဝစနံ နိရတ္ထကံ သိယာ ဝတ္ထုအဇာနနပက္ခေပိ အကုသလေနေဝ ပါတဗ္ဗတ္တာ။ ယသ္မာ တတ္ထ သုရာပါနဝီတိက္ကမဿ အကုသလစိတ္တုပ္ပာဒေါ နတ္ထိ၊ တသ္မာ ခန္ဓကဋ္ဌကထာယံ ‘‘မဇ္ဇပါနေ ပန ဘိက္ခုနော အဇာနိတွာပိ ဗီဇတော ပဋ္ဌာယ မဇ္ဇံ ပိဝန္တဿ ပါစိတ္တိယံ။ သာမဏေရော ဇာနိတွာဝ ပိဝန္တော သီလဘေဒံ အာပဇ္ဇတိ၊ န အဇာနိတွာ’’တိ (မဟာဝ။ အဋ္ဌ။ ၁၀၈) ဝုတ္တံ၊ န ဝုတ္တံ ‘‘ဝတ္ထုအဇာနနပက္ခေ ပါဏာတိပါတာဒီနံ သိဒ္ဓိကရအကုသလစိတ္တုပ္ပာဒသဒိသေ စိတ္တုပ္ပာဒေ သတိပိ သာမဏေရော သီလဘေဒံ နာပဇ္ဇတီ’’တိ။ အဘိနိဝေသဝစနံ ပါဏာတိပါတာဒီဟိ သမာနဂတိကတ္တာ သာမဏေရာနံ သုရာပါနဿ။ ‘‘သုရာမေရယိမေ’’တိ ဝတ္ထုံ ဇာနိတွာ ပါတဗ္ဗတာဒိဝသေန ဝီတိက္ကမန္တဿ အကုသလဿ အသမ္ဘဝေါ နတ္ထိ။ တေန ဝုတ္တံ ‘‘ယဿာ သစိတ္တကပက္ခေ’’တိအာဒိ။

ကိဉ္စေတ္ထ – ယုတ္တိဝစနေန အရဟန္တာနံ အပ္ပဝိသနတော သစိတ္တကာစိတ္တကပက္ခေသု အကုသလနိယမောတိ စေ? န၊ ဓမ္မတာဝသေန သေက္ခာနမ္ပိ အပ္ပဝိသနတော။ အစိတ္တကပက္ခေ အကုသလနိယမာဘာဝဒဿနတ္ထံ သုပန္တဿ မုခေ ပက္ခိတ္တဇလဗိန္ဒုမိဝ သုရာဗိန္ဒုအာဒယော ဥဒါဟရိတဗ္ဗာ။ တဗ္ဗဟုလနယေန ဟိ အတ္ထေ ဂဟိတေ ပုဗ္ဗေနာပရံ အဋ္ဌကထာယ သမေတိ သဒ္ဓိံ ပါဠိယာ စာတိ။ အာစရိယာပိ သုရာပါနေ အကုသလနိယမာဘာဝမေဝ ဝဒန္တိ။ ဧကစ္စေ ပန ကိရိယသမုဋ္ဌာနတာ ပနဿ တဗ္ဗဟုလနယမေဝ၊ န ပဌမပါရာဇိကေ။ ကထံ? ကာယသံသဂ္ဂသိက္ခာပဒံ ပဌမပါရာဇိကသမုဋ္ဌာနံ။ ဧတ္ထ ဘိက္ခုဿ စ ဘိက္ခုနိယာ စ ကာယသံသဂ္ဂဘာဝေ သတိ ဘိက္ခုနီ ကာယင်္ဂံ အစောပယမာနာပိ စိတ္တေနေဝ အဓိဝါသေတိ၊ အာပဇ္ဇတိ၊ န ဧဝံ ဘိက္ခု။ ဘိက္ခု ပန စောပယမာနောဝ အာပဇ္ဇတိ၊ ဧဝမေဝ ပဌမပါရာဇိကေပိ စောပနေ သတိ ဧဝ အာပဇ္ဇတိ၊ နာသတိ။ ပဝေသနံ ¶ သာဒိယတီတိ ဧတ္ထ ပဝေသနသာဒိယနံ နာမ သေဝနစိတ္တုပ္ပာဒနံ၊ မဂ္ဂေန ဝါ မဂ္ဂပ္ပဋိပန္နမ္ပိ ဣစ္ဆန္တိ။ တဿာပိ ကာယစလနံ ဧကန္တံ အတ္ထိ ဧဝ။ ဧဝံ သန္တေပိ ဝီမံသိတွာ ဂဟေတဗ္ဗန္တိ ဝဒန္တီတိ လိခိတံ

ပါရာဇိကဝဏ္ဏနာ နိဋ္ဌိတာ။

သင်္ဃာဒိသေသကဏ္ဍံ

၁။ ဥဿယဝါဒိကာသိက္ခာပဒဝဏ္ဏနာ

ဘိက္ခုနီနံ ¶ ¶ သင်္ဃာဒိသေသံ ပတွာ ဝုဋ္ဌာနဝိဓယော သန္ဒဿနတ္ထံ ‘‘အယံ ဘိက္ခုနီ…ပေ… အာပန္နာ’’တိ ပုဂ္ဂလနိယမံ ကတွာ ပါရာဇိကတော အဓိပ္ပာယန္တိ ‘‘နိဿာရဏီယံ သင်္ဃာဒိသေသ’’န္တိ အာပတ္တိနာမဂ္ဂဟဏဉ္စ ကတံ။ ‘‘သမုဋ္ဌာနာဒီနိ ပဌမကထိနသဒိသာနိ၊ ဣဒံ ပန ကိရိယမေဝါ’’တိ ပါဌော။

ဥဿယဝါဒိကာသိက္ခာပဒဝဏ္ဏနာ နိဋ္ဌိတာ။

၂။ စောရိဝုဋ္ဌာပိကာသိက္ခာပဒဝဏ္ဏနာ

ကတ္ထစိ အဂန္တွာ နိသိန္နဋ္ဌာနေ ဧဝ နိသီဒိတွာ ကရောန္တိယာ ဝါစာစိတ္တတော၊ ခဏ္ဍသီမာဒိဂတာယ ကာယဝါစာစိတ္တတော။

စောရိဝုဋ္ဌာပိကာသိက္ခာပဒဝဏ္ဏနာ နိဋ္ဌိတာ။

၃။ ဧကဂါမန္တရဂမနသိက္ခာပဒဝဏ္ဏနာ

‘‘အာဘောဂံ ဝိနာ’’တိ ဝုတ္တတ္တာ အာဘောဂေ သတိ အနာပတ္တိ၊ ဣမသ္မိံ ပန သိက္ခာပဒေ သမန္တပါသာဒိကာယံ ဥပစာရာတိက္ကမေ အာပတ္တိ ဝုတ္တာ၊ ဣဓ ဩက္ကမေ။ ဒွီသုပိ ဝုတ္တံ အတ္ထတော ဧကမေဝ ဂါမန္တရဂမနသင်္ဃာဒိသေသံ ဥပစာရဿ သန္ဓာယ ဝုတ္တတ္တာ။ ဂဏမှာ ဩဟီယနဿ ဝိရောဓော။ ‘‘အရညေ’’တိ ဣဒံ အတ္ထဝသေန ဝုတ္တံ၊ ဂါမန္တရေပိ ဟောတိ ဧဝ။

သိက္ခာပဒါ ¶ ဗုဒ္ဓဝရေန ဝဏ္ဏိတာတိ ဂါထာယ ဝသေန၊ အဋ္ဌကထာယမ္ပိ ဂါမန္တရပရိယာပန္နံ နဒိပါရန္တိ ဝုတ္တံ။

ဧကဂါမန္တရဂမနသိက္ခာပဒဝဏ္ဏနာ နိဋ္ဌိတာ။

‘‘ဆာဒနပစ္စယာ ¶ ပန ဒုက္ကဋံ အာပဇ္ဇတီ’’တိ ဣဒံ –

‘‘အာပဇ္ဇတိ ဂရုကံ သာဝသေသံ၊

ဆာဒေတိ အနာဒရိယံ ပဋိစ္စ၊

န ဘိက္ခုနီ နော စ ဖုသေယျ ဝဇ္ဇံ၊

ပဉှာမေသာ ကုသလေဟိ စိန္တိတာ’’တိ။ (ပရိ။ ၄၈၁) –

ဣမာယ ဝိရုဇ္ဈတိ။ တသ္မာ ပမာဒလေခါ ဝိယ ဒိဿတီတိ ဂဝေသိတဗ္ဗော ဧတ္ထ အတ္ထော။ ဘိက္ခူနံ မာနတ္တကထာယံ ‘‘ပရိက္ခိတ္တဿ ဝိဟာရဿ ပရိက္ခေပတော၊ အပရိက္ခိတ္တဿ ပရိက္ခေပါရဟဋ္ဌာနတော ဒွေ လေဍ္ဍုပါတေ အတိက္ကမိတွာ’’တိ (ကင်္ခါ။ အဋ္ဌ။ နိဂမနဝဏ္ဏနာ) ဝုတ္တံ၊ ဣဓ ပန ‘‘ဂါမူပစာရတော စ ဘိက္ခူနံ ဝိဟာရူပစာရတော စ ဒွေ လေဍ္ဍုပါတေ’’တိအာဒိ ဝုတ္တံ။ တတြ ဘိက္ခူနံ ဝုတ္တပ္ပကာရပ္ပဒေသံ အတိက္ကမိတွာ ဂါမေပိ တံ ကမ္မံ ကာတုံ ဝဋ္ဋတိ၊ ဘိက္ခုနီနံ ပန ဂါမေ န ဝဋ္ဋတိ။ တသ္မာ ဧဝံ ဝုတ္တန္တိ ဧကေ။ အပရေ ပန ဘိက္ခူနမ္ပိ ဂါမေ န ဝဋ္ဋတိ။ ဘိက္ခုဝိဟာရော နာမ ပုဗ္ဗေ ဧဝ ဂါမူပစာရံ အတိက္ကမိတွာ ဌိတော၊ တသ္မာ ဂါမံ အဝတွာ ဝိဟာရူပစာရမေဝ ဟေဋ္ဌာ ဝုတ္တံ။ ဘိက္ခုနီနံ ဝိဟာရော ဂါမေ ဧဝ ဝဋ္ဋတိ၊ န ဗဟိ၊ တသ္မာ ဂါမူပစာရဉ္စ ဝိဟာရူပစာရဉ္စ ဥဘယမေဝေတ္ထ ဒဿိတံ။ တသ္မာ ဥဘယတ္ထာပိ အတ္ထတော နာနာတ္တံ နတ္ထီတိ ဝဒန္တိ။ ယံ ယုဇ္ဇတိ၊ တံ ဂဟေတဗ္ဗံ။

သင်္ဃာဒိသေသဝဏ္ဏနာ နိဋ္ဌိတာ။

နိဿဂ္ဂိယကဏ္ဍံ

ဒုတိယေ ¶ ¶ ဣဓ ဘာဇာပိတာယ လဒ္ဓစီဝရံ နိဿဂ္ဂိယံ ဟောတိ၊ တံ ဝိနယကမ္မံ ကတွာပိ အတ္တနာ န လဗ္ဘတိ။

တတိယေ ‘‘သမုဋ္ဌာနာဒီနိ အဒိန္နာဒါနသဒိသာနိ၊ ဣဒံ ပန ဒုက္ခဝေဒန’’န္တိ ပါဌော။

စတုတ္ထေ ပဌမံ ဝိညတ္တံ အလဘိတွာ အညံ တတော ဦနတရမ္ပိ လဘေယျ၊ နိဿဂ္ဂိယမေဝ အင်္ဂသမ္ပတ္တိတော။

နိဿဂ္ဂိယဝဏ္ဏနာ နိဋ္ဌိတာ။

ပါစိတ္တိယကဏ္ဍံ

၁။ ပဌမဝဂ္ဂဝဏ္ဏနာ

ပဌမေ ¶ ¶ ဟရိတပတ္တဝဏ္ဏော ဟရိတကော။ စာပလသုဏံ အမိဉ္ဇကော။ အင်္ကုရမတ္တမေဝ ဟိ တဿ ဟောတိ။ ပလဏ္ဍုကာဒယော သဘာဝေနေဝ ဝဋ္ဋန္တိ။ သူပသမ္ပာကာဒီ ဝိနာပိ အန္တမသော ယာဂုဘတ္တေပိ ပက္ခိပိတုံ ဝဋ္ဋတီတိ လိခိတံ၊ ‘‘ဘိက္ခုနိယာပိ ဂိလာနာယ ပုရေဘတ္တမေဝ လသုဏံ ကပ္ပတိ၊ န အဂိလာနာယာ’’တိ အဘယဂိရီနံ ဥဂ္ဂဟောတိ။

ဒုတိယေ အာဗာဓပစ္စယာ ဘိက္ခုနိသင်္ဃံ အာပုစ္ဆိတွာ သံဟရာပေတုံ ဝဋ္ဋတိ၊ ဘိက္ခုဿ ဧတ္ထ စ လသုဏေ စ ဒုက္ကဋံ။

သတ္တမေ ‘‘သမုဋ္ဌာနာဒီနိ အဒ္ဓါနမဂ္ဂသိက္ခာပဒသဒိသာနီ’’တိ ပါဌော။

နဝမေ ကုဋ္ဋော နာမ ဃရကုဋ္ဋော။ ပါကာရော နာမ ပရိက္ခေပပါကာရော။

ဆဍ္ဍိတခေတ္တေတိ ပုရာဏခေတ္တေ။ သင်္ဃသန္တကေ ဘိက္ခုဿ ဆဍ္ဍေတုံ ဝဋ္ဋတိ သင်္ဃပရိယာပန္နတ္တာ။ ဘိက္ခုနီနမ္ပိ သင်္ဃသန္တကေ ဘိက္ခုသင်္ဃသန္တကေ ဝုတ္တနယေနေဝ ဝဋ္ဋတိ။ ဧဝံ သန္တေပိ သာရုပ္ပဝသေန ကာတဗ္ဗန္တိ လိခိတံ။

ဒသမေ ‘‘သယံ တာနိ ဝတ္ထူနိ ကရောန္တိယာ’’တိအာဒိ ဣဓ သိက္ခာပဒေ နတ္ထိ။ ကသ္မာ? ဧဠကလောမသမုဋ္ဌာနတ္တာ။ ယဒိ ဧဝံ ကသ္မာ ဝုတ္တန္တိ စေ? သုတ္တာနုလောမမဟာပဒေသတော။ ယဒိ နစ္စာဒီနိ ပဿိတုံ ဝါ သုဏိတုံ ဝါ န လဘတိ၊ ပဂေဝ အတ္တနာ ကာတုန္တိ နယတော လဗ္ဘမာနတ္တာ ဝုတ္တံ။ ဣတရထာ မဟာပဒေသာ နိရတ္ထကာ သိယုံ။ ‘‘ဧဝံ အညတ္ထပိ နယော နေတဗ္ဗော။ သမုဋ္ဌာနမ္ပိ ဣဓ ဝုတ္တမေဝ ¶ အဂ္ဂဟေတွာ ဆသမုဋ္ဌာနဝသေန ဂဟေတဗ္ဗ’’န္တိ အာစရိယာ။ ဣဓ ဝုတ္တံ သမုဋ္ဌာနံ နာမ မူလဘူတဿ အန္တရာ ဝုတ္တာပတ္တိယာ၊ တသ္မာ ဧဠကလောမသမုဋ္ဌာနမေဝါတိ အပရေ။ အာရာမေ ဌတွာတိ န ကေဝလံ ဌတွာ၊ တတော ဂန္တွာ ပန သဗ္ဗိရိယာပထေဟိပိ လဘတိ။ အာရာမေ ဌိတာတိ ပန အာရာမပရိယာပန္နာတိ အတ္ထော။ ဣတရထာ နိသိန္နာပိ န လဘေယျာတိ။

ပဌမဝဂ္ဂဝဏ္ဏနာ နိဋ္ဌိတာ။

၂။ ဒုတိယဝဂ္ဂဝဏ္ဏနာ

ပဉ္စမေ ¶ ဥပစာရော ဒွါဒသဟတ္ထော။ ‘‘သမုဋ္ဌာနာဒီနိ ကထိနသဒိသာနိ၊ ဣဒံ ပန ကိရိယာကိရိယ’’န္တိ ပါဌော။

သတ္တမေ ဓုဝပညတ္တေတိ ဘိက္ခုနီနံ အတ္ထာယ။ ကုလာနီတိ ကုလဃရာနိ။

ဒုတိယဝဂ္ဂဝဏ္ဏနာ နိဋ္ဌိတာ။

၃။ တတိယဝဂ္ဂဝဏ္ဏနာ

စတုတ္ထေ သင်္ဃာဋိအာဒိဝသေန အဓိဋ္ဌိတာနံ သင်္ဃာဋိစာရံ။

ပဉ္စမေ ‘‘ဣဒံ ပန ကိရိယာကိရိယ’’န္တိ ပါဌော။

ဆဋ္ဌေ အညသ္မိံ ပရိက္ခာရေ ဒုက္ကဋန္တိ ထာလကာဒီနံ ဝါ သပ္ပိတေလာဒီနံ ဝါ အညတရသ္မိံ။

တတိယဝဂ္ဂဝဏ္ဏနာ နိဋ္ဌိတာ။

၄။ စတုတ္ထဝဂ္ဂဝဏ္ဏနာ

ဆဋ္ဌေ သံသဋ္ဌဝိဟာရသိက္ခာပဒေ ‘‘သေသမေတ္ထ ပဌမအရိဋ္ဌသိက္ခာပဒေ ဝုတ္တဝိနိစ္ဆယသဒိသမေဝါ’’တိ ပါဌော။

စတုတ္ထဝဂ္ဂဝဏ္ဏနာ နိဋ္ဌိတာ။

၅။ ပဉ္စမဝဂ္ဂဝဏ္ဏနာ

‘‘စိတ္တာဂါရံ ¶ နာမ ယတ္ထ ကတ္ထစိ မနုဿာနံ ကီဠိတုံ ရမိတုံ ကတံ ဟောတီ’’တိအာဒိနာ (ပါစိ။ ၉၇၉) ပါဠိယံ ဝုတ္တတ္တာ စိတ္တာဂါရာဒီနိ သဗ္ဗေသံ အတ္ထာယ ကတာနိ၊ န ရညော ဧဝ။

သတ္တမေ ဧတေန နိဿဇ္ဇိတုံ ကပ္ပိယံ ဝုတ္တံ။ ‘‘နိဿဇ္ဇိတွာ ပရိဘုဉ္ဇတီ’’တိ (ပါစိ။ ၁၀၀၇) ပါဠိ စ အတ္ထိ။ ‘‘သမုဋ္ဌာနာဒီနိ ကထိနသဒိသာနိ၊ ဣဒံ ပန ကိရိယာကိရိယ’’န္တိ ပါဌော။ အဋ္ဌမေပိ ဧသောဝ ပါဌော။

ပဉ္စမဝဂ္ဂဝဏ္ဏနာ နိဋ္ဌိတာ။

၆။ ဆဋ္ဌဝဂ္ဂဝဏ္ဏနာ

ဒသမေ ¶ ‘‘သမုဋ္ဌာနာဒီနိ ကထိနသဒိသာနိ၊ ဣဒံ ပန ကိရိယာကိရိယ’’န္တိ ပါဌော။

ဆဋ္ဌဝဂ္ဂဝဏ္ဏနာ နိဋ္ဌိတာ။

၈။ အဋ္ဌမဝဂ္ဂဝဏ္ဏနာ

ပဌမဒုတိယတတိယေသု ‘‘ဂိဟိဂတာ’’တိ ဝါ ‘‘ကုမာရိဘူတာ’’တိ ဝါ န ဝတ္တဗ္ဗာ။ ဝဒန္တိ စေ၊ ကမ္မံ ကုပ္ပတိ။

ဧကာဒသမေ ဆန္ဒံ အဝိဿဇ္ဇေတွာတိ ‘‘ယထာသုခ’’န္တိ အဝတွာ။ ဧတ္ထ ပန အယံ ဝိနိစ္ဆယော – ‘‘ပါရိဝါသိကဆန္ဒဒါနေနာ’’တိ ဣဒံ ဥဒ္ဓရိတွာ ‘‘ဝုဋ္ဌိတာယ ပရိသာယာ’’တိ (ပါစိ။ ၁၁၆၈) ပဒဘာဇနံ ဝုတ္တံ။ ဧတဿ ပန သမန္တပါသာဒိကာယံ ‘‘ဝုဋ္ဌိတာယ ပရိသာယာတိ ဆန္ဒံ ဝိဿဇ္ဇေတွာ ကာယေန ဝါ ဝါစာယ ဝါ ဆန္ဒဝိဿဇ္ဇနမတ္တေန ဝါ ဝုဋ္ဌိတာယာ’’တိ (ပါစိ။ အဋ္ဌ။ ၁၁၆၇) ဝုတ္တံ။ ဣဓ ဆန္ဒဿ ပန အဝိဿဋ္ဌတ္တာ ကမ္မံ ကာတုံ ဝဋ္ဋတီတိ ဝုတ္တံ။ တသ္မာ ဆန္ဒံ အဝိဿဇ္ဇေတွာဝ ဒွါဒသဟတ္ထပါသေ ဝိဟရိတွာ ပုန သန္နိပါတကရဏဉ္စ ဝဋ္ဋတီတိ လိခိတံ။

အဋ္ဌမဝဂ္ဂဝဏ္ဏနာ နိဋ္ဌိတာ။

၉။ နဝမဝဂ္ဂဝဏ္ဏနာ

တတိယေ ¶ ‘‘သေသံ ဝုတ္တနယေန ဝေဒိတဗ္ဗံ၊ ဣဒံ ပန အကုသလစိတ္တ’’န္တိ ပါဌော။

စတုတ္ထေ ဝုတ္တနယေနာတိ တတိယေ ဝုတ္တနယေန။

ဧကာဒသမေ ‘‘သမုဋ္ဌာနာဒီနိ ကထိနသဒိသာနိ၊ ဣဒံ ပန ကိရိယာကိရိယ’’န္တိ ပါဌော။

ဒွါဒသမေ ‘‘သမုဋ္ဌာနာဒီနိ ပဒသောဓမ္မသဒိသာနိ၊ ဣဒံ ပန ကိရိယာကိရိယ’’န္တိ ပါဌော။

တေရသမေ ‘‘သံကစ္စိကံ နာမ အဓက္ခကံ ဥဗ္ဘနာဘိ၊ တဿာ ပဋိစ္ဆာဒနတ္ထာယာ’’တိ (ပါစိ။ ၁၂၂၆) ပါဠိယံ ဝုတ္တတ္တာ ဣဓာပိ ‘‘အဓက္ခကဥဗ္ဘနာဘိသင်္ခါတဿ သရီရဿ ပဋိစ္ဆာဒနတ္ထ’’န္တိ ¶ ပါဌော။ အပရိက္ခေပေ အာပတ္တိပရိစ္ဆေဒံ သမန္တပါသာဒိကဝသေန အဂ္ဂဟေတွာ ဣဓ ဝုတ္တနယေန ဂဟေတဗ္ဗန္တိ လိခိတံ။

နဝမဝဂ္ဂဝဏ္ဏနာ နိဋ္ဌိတာ။

သုဒ္ဓပါစိတ္တိယဝဏ္ဏနာ နိဋ္ဌိတာ။

သမုဋ္ဌာနဝိနိစ္ဆယဝဏ္ဏနာ

သမုဋ္ဌာနာနံ ဝိနိစ္ဆယေ ပန ဂိရဂ္ဂသမဇ္ဇာဒီနိ ‘‘အစိတ္တကာနိ လောကဝဇ္ဇာနီ’’တိ ဝုတ္တတ္တာ ‘‘နစ္စ’’န္တိ ဝါ ‘‘ဂန္ဓ’’န္တိ ဝါ အဇာနိတွာပိ ဒဿနေန၊ ဝိလိမ္ပနေန ဝါ အာပဇ္ဇနတော ဝတ္ထုအဇာနနစိတ္တေန အစိတ္တကာနိ။ ‘‘နစ္စ’’န္တိ ဝါ ‘‘ဂန္ဓ’’န္တိ ဝါ ဇာနိတွာ ပဿန္တိယာ၊ ဝိလိမ္ပန္တိယာ ဝါ အကုသလတ္တာ ဧဝ လောကဝဇ္ဇာနိ။ စောရိဝုဋ္ဌာပနာဒီနိ ‘‘စောရီ’’တိအာဒိနာ ဝတ္ထုံ ဇာနိတွာ ကရဏေယေဝ အာပဇ္ဇနတ္တာ သစိတ္တကာနိ။ ဥပသမ္ပဒါဒီနံ ဧကန္တာကုသလစိတ္တေနေဝ အကတ္တဗ္ဗတ္တာ ပဏ္ဏတ္တိဝဇ္ဇာနိ။ ‘‘ဣဓ သစိတ္တကာစိတ္တကတာ ပဏ္ဏတ္တိဇာနနာဇာနနတာယ အဂ္ဂဟေတွာ ဝတ္ထုဇာနနာဇာနနတာယ ဂဟေတဗ္ဗ’’န္တိ လိခိတံ။ အဓိပ္ပေတတ္တာ သင်္ခေပတော ဒဿနာဘာဝါ –

အစိတ္တကတ္တံ ¶ ဒွိဓာ မတံ၊ ဝတ္ထုပဏ္ဏတ္တိအညာဏာ၊

ဝုတ္တံ ဉာဏံ ဒွိဓာ ဣဓ၊ သကနာမေန အညာတံ။

ပရနာမဉ္စ ဇာနနံ၊ ဝတ္ထုဿေကံ ဗလက္ကာရေ၊

ဧကဓာ သမစာရိကေ၊ တသ္မိံ တပ္ပဋိဗန္ဓောတိ။

ပရနာမေန ဇာနနံ၊ ဒွိဓာ မုတ္တာဒိကေ ဧကံ၊

ဧကံ လောမာဒိကေ မတန္တိ၊ အယံ ဘေဒေါ ဝေဒိတဗ္ဗော။

သေသမေတ္ထ ဥတ္တာနံ၊ အနုတ္တာနတ္ထေ ဝုတ္တဝိနိစ္ဆယတ္တာ န ဥဒ္ဓဋန္တိ၊

သမုဋ္ဌာနဝိနိစ္ဆယဝဏ္ဏနာ နိဋ္ဌိတာ။

ဘိက္ခုနီပါတိမောက္ခဝဏ္ဏနာ နိဋ္ဌိတာ။

ကင်္ခါဝိတရဏီပုရာဏဋီကာ နိဋ္ဌိတာ။

နမော တဿ ဘဂဝတော အရဟတော သမ္မာသမ္ဗုဒ္ဓဿ

ကင်္ခါဝိတရဏီ-အဘိနဝဋီကာ

ဂန္ထာရမ္ဘကထာ

တိလောကတိလကံ ¶ ¶ ဗုဒ္ဓံ၊ ဝန္ဒေ သုဒ္ဓဂုဏာကရံ၊

ကရုဏာသီတလီဘူတ-ဟဒယံ မဟိတောဒယံ။

တေနာပိ ဓမ္မရာဇေန၊ လောကေကာစရိယေန ယော၊

ပူဇိတော တဉ္စ သဒ္ဓမ္မံ၊ ဝန္ဒေ ဂမ္ဘီရမုတ္တမံ။

မုနိန္ဒစန္ဒသဒ္ဓမ္မ-ရံသီဟိ ဝိမလေဟိ ယော၊

ဗောဓိတောဟံ သဒါ ဝန္ဒေ၊ တံ သင်္ဃံ ကုမုဒါကရံ။

ဝိနယေ ¶ နယဂမ္ဘီရေ၊ သဗ္ဗထာ ပါရဒဿိနာ၊

ဝါဒိနာ ဒုတ္တရာဂါဓ-သဗ္ဗသတ္ထမဟဏ္ဏဝေ။

ယာ ကတာ ဗုဒ္ဓဃောသေန၊ ထေရေန ထိရစေတသာ၊

ကင်္ခါဝိတရဏီ နာမ၊ မာတိကဋ္ဌကထာ သုဘာ။

ထိရာနေကဂုဏောဃေန၊ ထေရေန ဝိနယညုနာ၊

ကလျာဏာစာရယုတ္တေန၊ ဓီမတာ မုနိသူနုနာ၊

ဝိနယဋ္ဌိတိကာမေန၊ သုမေဓေနာဘိယာစိတော။

တမဟံ ဝဏ္ဏယိဿာမိ၊ သုဝိသုဒ္ဓမနာကုလံ၊

သာဓဝေါ တံ နိသာမေထ၊ သက္ကစ္စံ မမ ဘာသတောတိ။

ဂန္ထာရမ္ဘကထာဝဏ္ဏနာ

သဗ္ဗကုသလဓမ္မပ္ပမုခဿ ဝိပုလောဠာရဂုဏဝိသေသာဝဟဿ ပရမဂမ္ဘီရဿ ပါတိမောက္ခဿ အတ္ထသံဝဏ္ဏနံ ကတ္တုကာမောယမာစရိယော ပဌမံ တာဝ ‘‘ဗုဒ္ဓံ ဓမ္မ’’န္တိအာဒိနာ ရတနတ္တယပ္ပဏာမကရဏေန အတ္တနော စိတ္တသန္တာနံ ပုနာတိ။ ဝိသုဒ္ဓစိတ္တသန္တာနနိဿယာ ဟိ ပညာ တိက္ခဝိသဒဘာဝပ္ပတ္တိယာ ယထာဓိပ္ပေတသံဝဏ္ဏနာယ ပရိယောသာနဂမနသမတ္ထာ ဟောတီတိ ¶ ။ အပိစ ရတနတ္တယပ္ပဏာမေန ဝိဓုတသဗ္ဗကိဗ္ဗိသေ စိတ္တသန္တာနေ ဘဝန္တရူပစိတာနိပိ အန္တရာယိကကမ္မာနိ ပစ္စယဝေကလ္လတော ယထာဓိပ္ပေတာယ အတ္ထသံဝဏ္ဏနာယ နာလမန္တရာယကရဏာယာတိပိ အာစရိယဿ ရတနတ္တယဝန္ဒနာ။

တတ္ထ ဗုဒ္ဓသဒ္ဒဿ တာဝ ‘‘ဗုဇ္ဈိတာ သစ္စာနီတိ ဗုဒ္ဓါ၊ ဗောဓေတာ ပဇာယာတိ ဗုဒ္ဓါ’’တိအာဒိနာ (မဟာနိ။ ၁၉၂၊ စူဠနိ။ ပါရာယနတ္ထုတိဂါထာနိဒ္ဒေသ ၉၇၊ ပဋိ။ မ။ ၁။၁၆၂) နိဒ္ဒေသနယေန အတ္ထော ဝေဒိတဗ္ဗော။ အထ ဝါ သဝါသနာယ အညာဏနိဒ္ဒါယ အစ္စန္တဝိဂမတော၊ ဗုဒ္ဓိယာ ဝါ ဝိကသိတဘာဝတော ဗုဒ္ဓဝါတိ ဗုဒ္ဓါ ဇာဂရဏဝိကသနတ္ထဝသေန။ အထ ဝါ ကဿစိပိ ဉေယျဓမ္မဿ အနဝဗုဒ္ဓဿ အဘာဝေန၊ ဉေယျဝိသေသဿ စ ကမ္မဘာဝေန အဂ္ဂဟဏတော ¶ ကမ္မဝစနိစ္ဆာယ အဘာဝေန အဝဂမနတ္ထဝသေနေဝ ကတ္တုနိဒ္ဒေသော လဗ္ဘတီတိ ဗုဒ္ဓဝါတိ ဗုဒ္ဓါ ယထာ ‘‘ဒိက္ခိတော န ဒဒါတီ’’တိ။ အတ္ထတော ပန ပါရမိတာပရိဘာဝိတေန သယမ္ဘုဉာဏေန သဟဝါသနာယ ဝိဂတဝိဒ္ဓသ္တနိရဝသေသုပက္ကိလေသော မဟာကရုဏာသဗ္ဗညုတညာဏာဒိအပရိမေယျဂုဏဂဏာဓာရောဝ ခန္ဓသန္တာနော ဗုဒ္ဓါ။ ယထာဟ –

‘‘ဗုဒ္ဓါတိ ယော သော ဘဂဝါ သယမ္ဘူ အနာစရိယကော ပုဗ္ဗေ အနနုဿုတေသု ဓမ္မေသု သာမံ သစ္စာနိ အဘိသမ္ဗုဇ္ဈိ၊ တတ္ထ စ သဗ္ဗညုတံ ပတ္တော၊ ဗလေသု စ ဝသီဘာဝ’’န္တိ (မဟာနိ။ ၁၉၂၊ စူဠနိ။ ပါရာယနတ္ထုတိဂါထာနိဒ္ဒေသ ၉၇၊ ပဋိ။ မ။ ၁။၁၆၁)၊

တံ ဗုဒ္ဓံ။

ဓာရေတီတိ ဓမ္မော။ အယဉှိ ယထာနုသိဋ္ဌံ ပဋိပဇ္ဇမာနေ အပါယဒုက္ခေ၊ သံသာရဒုက္ခေ စ အပတမာနေ ဓာရေတီတိ၊ တန္နိဗ္ဗတ္တကကိလေသဝိဒ္ဓံသနဉ္စေတ္ထ ဓာရဏံ။ ဧဝဉ္စ ကတွာ အရိယမဂ္ဂေါ၊ တဿ တဒတ္ထသိဒ္ဓိဟေတုတာယ နိဗ္ဗာနဉ္စာတိ ဥဘယမေဝ နိပ္ပရိယာယတော ဓာရေတိ။ အရိယဖလဉ္စ ပန တံသမုစ္ဆိန္နကိလေသပဋိပ္ပဿမ္ဘနေန တဒနုကူလတာယ၊ ပရိယတ္တိဓမ္မော စ တဒဓိဂမဟေတုတာယာတိ ဥဘယမ္ပိ ပရိယာယတော ဓာရေတီတိ ဝေဒိတဗ္ဗံ၊ တံ ဓမ္မံ။ စ-သဒ္ဒေါ သမုစ္စယတ္ထော။ တေန ယထာဝုတ္တံ ဗုဒ္ဓံ၊ ဣမဉ္စ ဓမ္မံ ဝန္ဒိတွာတိ ဗုဒ္ဓရတနေန သဟ ဝန္ဒနကိရိယာယ ဓမ္မရတနံ သမုစ္စိနောတိ။

န ကေဝလံ ဣဒံ ဒွယမေဝါတိ အာဟ ‘‘သင်္ဃဉ္စာ’’တိ။ အရိယေန ဒိဋ္ဌိသီလသာမညေန သံဟတော ဃဋိတောတိ သင်္ဃော၊ အဋ္ဌအရိယပုဂ္ဂလသမူဟော။ တေဟိ ¶ တေဟိ ဝါ မဂ္ဂဖလေဟိ ကိလေသဒရထာနံ သမုစ္ဆေဒပဋိပ္ပဿမ္ဘနဝသေန သမ္မဒေဝ ဃာတိတတ္တာ သင်္ဃော၊ ပေါထုဇ္ဇနိကသင်္ဃဿာပိ ပုဗ္ဗဘာဂပ္ပဋိပဒါယ ဌိတတ္တာ ပုရိမစေတနာယ ဝိယ ဒါနေ ဧတ္ထေဝ သင်္ဂဟော ဒဋ္ဌဗ္ဗော။ သောပိ ဟိ ကိဉ္စာပိ အရိယေန ဒိဋ္ဌိသီလသာမညေန အသံဟတော၊ နိယျာနိကပက္ခိယေန ပန ပေါထုဇ္ဇနိကေန သံဟတတ္တာ ဒက္ခိဏေယျပဏိပါတာရဟော သင်္ဃောယေဝါတိ၊ တံ သင်္ဃံ။ စ-သဒ္ဒဿတ္ထော ဧတ္ထာပိ ဝုတ္တနယေနေဝ ဝေဒိတဗ္ဗော။

ကိံဝိသိဋ္ဌံ ဗုဒ္ဓံ၊ ဓမ္မံ၊ သင်္ဃဉ္စာတိ အာဟ ‘‘ဝန္ဒနာမာနပူဇာသက္ကာရဘာဇန’’န္တိ။ ဣဒဉ္စ ဝိသေသနံ ပစ္စေကံ ယောဇေတဗ္ဗံ ‘‘ဝန္ဒနာမာနပူဇာသက္ကာရဘာဇနံ။ ဗုဒ္ဓံ…ပေ… ဝန္ဒနာမာနပူဇာသက္ကာရဘာဇနံ သင်္ဃဉ္စာ’’တိ။ တတ္ထ သဒေဝကေန လောကေန အရဟတာဒီဟိ ဂုဏေဟိ သေဋ္ဌဘာဝေန ကရိယမာနော ပဏာမော ဝန္ဒနာ၊ သမ္မာနော မာနော၊ ဂန္ဓပုပ္ဖာဒီဟိ ဥပဟာရော ပူဇာ၊ အဘိသင်္ခတပစ္စယဒါနံ ¶ သက္ကာရော၊ ဝန္ဒနာ စ မာနော စ ပူဇာ စ သက္ကာရော စ ဝန္ဒနာမာနပူဇာသက္ကာရာ၊ တေသံ မဟပ္ဖလဘာဝကရဏေန ဘာဇနတ္တာ အာဓာရတ္တာ ဝန္ဒနာမာနပူဇာသက္ကာရဘာဇနံ။ ဣမိနာ ရတနတ္တယဿ အရဟတာဒီဟိ ဂုဏေဟိ အသမဘာဝံ ဒဿေတိ။ တန္ဒဿနမ္ပိ တက္ကတဿ နိပစ္စကာရဿ သသန္တာနပဝနာဒိဝသေန ယထာဓိပ္ပေတာယ အတ္ထသံဝဏ္ဏနာယ နိပ္ဖာဒနသမတ္ထဘာဝဒီပနတ္ထန္တိ ဝေဒိတဗ္ဗံ။

ဝိပ္ပသန္နေန စေတသာ ဝန္ဒိတွာတိ အရဟတာဒိအနေကပ္ပကာရဂုဏဝိသေသာနုဿရဏဝသေန ဝိဝိဓေန၊ ဝိသေသေန ဝါ ပသန္နေန မနသာ သဒ္ဓိံ ကာယဝါစာဟိ ကရဏဘူတာဟိ အဘိဝန္ဒိယာတိ အတ္ထော၊ တီဟိ ဒွါရေဟိ နမဿိတွာတိ ဝုတ္တံ ဟောတိ။ တိဝိဓာ စာယံ ဝန္ဒနာ ကာယဝစီမနောဝန္ဒနာနံ ဝသေန။ တတ္ထ ဗုဒ္ဓါဒိဂုဏာရမ္မဏာ ကာမာဝစရကုသလကိရိယာနံ အညတရစေတနာ ကာယဝစီဝိညတ္တိယော သမုဋ္ဌာပေတွာ ကာယဝစီဒွါရဝသေန ဥပ္ပန္နာ ကာယဝစီဝန္ဒနာတိ ဝုစ္စတိ၊ ဥဘယဝိညတ္တိယော ပန အသမုဋ္ဌာပေတွာ မနောဒွါရဝသေန ဥပ္ပန္နာ မနောဝန္ဒနာတိ။ ဣမဿ ပဒဿ ‘‘ဝဏ္ဏနံ ဝဏ္ဏယိဿာမီ’’တိ ဣမိနာ သမ္ဗန္ဓော။

ဧဝံ ရတနတ္တယဿ ပဏာမံ ဒဿေတွာ ဣဒါနိ အတ္တနော နိဿယဘူတာနံ အဋ္ဌကထာစရိယာနဉ္စ ပဏာမံ ဒဿေန္တော ‘‘ထေရဝံသပ္ပဒီပါန’’န္တိအာဒိမာဟ။ တတ္ထ ကတဉ္ဇလီ ပုဗ္ဗာစရိယသီဟာနံ နမော ကတွာတိ သမ္ဗန္ဓော။ ကတော အဉ္ဇလိ ကရပုဋော ဧတေနာတိ ကတဉ္ဇလီ။ ဆန္ဒာနုရက္ခဏတ္ထဉှေတ္ထ ဒီဃော ¶ ၊ ကတဉ္ဇလီ ဟုတွာတိ ဝုတ္တံ ဟောတိ။ ပုဗ္ဗာစရိယာ ပေါရာဏဋ္ဌကထာကာရာ တမ္ဗပဏ္ဏိယာ မဟာထေရာ၊ တေ ဧဝ ပရိဿယသဟနတော၊ ပဋိပက္ခဘူတကိလေသဟနနတော၊ ပရဝါဒိမိဂေဟိ အပဓံသနီယတော စ သီဟသဒိသတ္တာ သီဟာတိ ပုဗ္ဗာစရိယသီဟာ၊ တေသံ ပုဗ္ဗာစရိယသီဟာနံ။ ကီဒိသာ တေ ပုဗ္ဗာစရိယသီဟာ၊ ယေသံ တယာ နမော ကရီယတီတိ အာဟ ‘‘ထေရဝံသပ္ပဒီပါန’’န္တိအာဒိ။ တတ္ထ ထေရဝံသပ္ပဒီပါနန္တိ ထိရေဟိ သီလက္ခန္ဓာဒီဟိ သမန္နာဂတာတိ ထေရာ၊ မဟာကဿပါဒယော၊ တေသံ ဝံသော အနွယောတိ ထေရဝံသော။ ဧတေန ဘိန္နလဒ္ဓိကာနံ သတ္တရသဘေဒါနံ မဟာသင်္ဃိကာဒီနံ ဝံသံ ပဋိက္ခိပတိ၊ ထေရဝံသပရိယာပန္နာ ဟုတွာ ပန အာဂမာဓိဂမသမ္ပန္နတ္တာ ပညာပဇ္ဇောတေန တဿ ထေရဝံသဿ ဒီပနတော ထေရဝံသပ္ပဒီပါ၊ ပုဗ္ဗာစရိယသီဟာ၊ တေသံ ထေရဝံသပ္ပဒီပါနံ။ အသံဟီရတ္တာ ထိရာနံ။ ဝိနယက္ကမေတိ အာရမ္ဘာနုရူပဝစနမေတံ၊ တေ ပန သုတ္တာဘိဓမ္မေသုပိ ထိရာ ဧဝ။

ဧဝံ အဋ္ဌကထာစရိယာနမ္ပိ ပဏာမံ ဒဿေတွာ ဣဒါနိ သံဝဏ္ဏေတဗ္ဗဓမ္မဝိသေသဿ အဘိဓာနာနိသံသံ၊ ဒေသကသမ္ပတ္တိယော စ ဒဿေန္တော ‘‘ပါမောက္ခ’’န္တိအာဒိမာဟ။ တတ္ထ မဟေသိနာ ယံ ပါတိမောက္ခံ ပကာသိတန္တိ သမ္ဗန္ဓော။ တတ္ထ မဟေသိနာတိ မဟန္တေ သီလာဒိကေ ပဉ္စ ဓမ္မက္ခန္ဓေ ဧသီ ¶ ဂဝေသီတိ မဟေသိ။ မဟန္တေဟိ ဧသိတောတိ ဝါ ပုထုဇ္ဇနသေခါသေခဣသီဟိ ဝိသိဋ္ဌတ္တာ မဟန္တော ဣသီတိ ဝါ မဟေသိ၊ သမ္မာသမ္ဗုဒ္ဓါ၊ တေန မဟေသိနာ။ ပါတိမောက္ခန္တိ သတ္တာပတ္တိက္ခန္ဓသံဝရဘူတံ သိက္ခာပဒသီလံ၊ တဒ္ဒီပနတော ဥဘတောဝိဘင်္ဂသုတ္တသင်္ခါတံ ဂန္ထပါတိမောက္ခမေဝ ဝါ။ ကိမ္ဘူတန္တိ အာဟ ‘‘ပါမောက္ခ’’န္တိအာဒိ။ ပမုခေ သာဓူတိ ပမောက္ခံ၊ ပမောက္ခမေဝ ပါမောက္ခံ၊ ဝဇ္ဇပဋိပက္ခတ္တာ အနဝဇ္ဇာနံ သမာဓိပညာသင်္ခါတာနံ ပရိတ္တမဟဂ္ဂတလောကုတ္တရာနံ ကုသလာနံ ဓမ္မာနံ အာဒိ ပတိဋ္ဌာဘူတန္တိ အတ္ထော။ ‘‘သီလေ ပတိဋ္ဌာယ နရော သပညော၊ စိတ္တံ ပညဉ္စ ဘာဝယ’’န္တိ (သံ။ နိ။ ၁။၂၃၊ ၁၉၂၊ ပေဋကော။ ၂၂၊ မိ။ ပ။ ၂။၁။၉) ဟိ ဝုတ္တံ။ မုခမိဝါတိ မုခံ၊ ဒွါရံ။ ယထာ ဟိ သတ္တာနံ ခဇ္ဇဘောဇ္ဇလေယျပေယျဝသေန စတုဗ္ဗိဓောပိ အာဟာရော မုခေန ပဝိသိတွာ အင်္ဂပစ္စင်္ဂါနိ ဖရတိ၊ ဧဝံ ယောဂိနောပိ စာတုဘူမကကုသလံ သီလမုခေန ပဝိသိတွာ အတ္ထသိဒ္ဓိံ သမ္ပာဒေတိ။ တေန ဝုတ္တံ ‘‘မုခမိဝါတိ မုခ’’န္တိ။ အထ ဝါ မုခံ ဒွါရံ မောက္ခပ္ပဝေသာယ နိဗ္ဗာနသစ္ဆိကိရိယာယာတိ အတ္ထော။ ဝုတ္တဉှိ –

‘‘အဝိပ္ပဋိသာရတ္ထာနိ ¶ ခေါ၊ အာနန္ဒ၊ ကုသလာနိ သီလာနီ’’တိ (အ။ နိ။ ၁၁။၁)။

တထာ –

‘‘အဝိပ္ပဋိသာရော ပါမောဇ္ဇတ္ထာယ၊ ပါမောဇ္ဇံ ပီတတ္ထာယ၊ ပီတိ ပဿဒ္ဓတ္ထာယ၊ ပဿဒ္ဓိ သုခတ္ထာယ၊ သုခံ သမာဓတ္ထာယ၊ သမာဓိ ယထာဘူတဉာဏဒဿနတ္ထာယ၊ ယထာဘူတဉာဏဒဿနံ နိဗ္ဗိဒတ္ထာယ၊ နိဗ္ဗိဒါ ဝိရာဂတ္ထာယ၊ ဝိရာဂေါ ဝိမုတ္တတ္ထာယ၊ ဝိမုတ္တိ ဝိမုတ္တိဉာဏဒဿနတ္ထာယ၊ ဝိမုတ္တိဉာဏဒဿနံ အနုပါဒါပရိနိဗ္ဗာနတ္ထာယာ’’တိ (ပရိ။ ၃၆၆) စ။

ဧဝံ သံဝဏ္ဏေတဗ္ဗဓမ္မဿ အဘိဓာနာဒိံ ဒဿေတွာ ဣဒါနိ သံဝဏ္ဏနာယ နိမိတ္တံ ဒဿေတုံ ‘‘သူရတေနာ’’တိအာဒိနာ စတုတ္ထဂါထမာဟ။ တတ္ထ သူရတေနာတိ သောဘနေ ရတောတိ သူရတော ဥ-ကာရဿ ဒီဃံ ကတွာ၊ တေန သူရတေန၊ သောဘနေ ကာယိကဝါစသိကကမ္မေ ရတေနာတိ အတ္ထော၊ ဝိနီတေနာတိ ဝုတ္တံ ဟောတိ။ နိဝါတေနာတိ နီစဝုတ္တိနာ။ သုစိသလ္လေခဝုတ္တိနာတိ သုစိဘူတာ ကိလေသသလ္လိခနသမတ္ထာ ဝုတ္တိ ပဋိပတ္တိ ဧတဿာတိ သုစိသလ္လေခဝုတ္တိ၊ တေန သုစိသလ္လေခဝုတ္တိနာ၊ ပရိသုဒ္ဓါယ အပ္ပိစ္ဆဝုတ္တိယာ သမန္နာဂတေနာတိ အတ္ထော။ ဝိနယာစာရယုတ္တေနာတိ ဝါရိတ္တစာရိတ္တသီလသမ္ပန္နေန။ အထ ဝါ ဝိနယောတိ စေတ္ထ ပါတိမောက္ခသံဝရာဒိဘေဒေါ သံဝရဝိနယော။ အာစာရောတိ အာစာရဂေါစရနိဒ္ဒေသေ အာဂတသမဏသာရုပ္ပာစာရော ¶ ။ သောဏတ္ထေရေနာတိ ဧတ္ထ သောဏောတိ တဿ နာမံ။ ထိရေဟိ သီလက္ခန္ဓာဒီဟိ သမန္နာဂတတ္တာ ထေရော။ ယာစိတောတိ အဘိယာစိတော။ ထေရော ဟိ ပါတိမောက္ခဿ ဂမ္ဘီရတာယ ဒုရဝဂါဟတံ၊ အာစရိယဿ စ တံသံဝဏ္ဏနာယ သာမတ္ထိယံ ဉတွာ ‘‘ပါတိမောက္ခဿ တယာ အတ္ထသံဝဏ္ဏနာ ကာတဗ္ဗာ။ ဧဝဉှိ သာသနဿ သုစိရဋ္ဌိတိကတာ ဟောတီ’’တိ သာနိသံသဂါရဝေန ယာစနံ အကာသိ။ တဒဿ ယာစနံ အတ္တနော သံဝဏ္ဏနာယ နိဒါနဘူတံ ဒဿေန္တော ‘‘ယာစိတော’’တိ အာဟ။

ဧတ္ထ စ ‘‘သူရတေနာ’’တိ ဣမိနာဿ သောရစ္စံ ဝုစ္စတိ။ ‘‘နိဝါတေနာ’’တိ ဣမိနာ နီစမနတာ နိဝါတဝုတ္တိတာ၊ ယာယ နိဝါတဝုတ္တိတာယ သမန္နာဂတော ပုဂ္ဂလော နိဟတမာနော၊ နိဟတဒပ္ပော၊ ပါဒပုဉ္ဆနစောဠကသမော၊ ဘိန္နဝိသာဏူသဘသမော၊ ဥဒ္ဓဋဒါဌသပ္ပသမော စ ဟုတွာ သဏှော သခိလော သုခသမ္ဘာသော ¶ ဟောတိ။ ‘‘သုစိသလ္လေခဝုတ္တိနာ’’တိ ဣမိနာ ဣန္ဒြိယသံဝရပစ္စယသန္နိဿိတအာဇီဝပါရိသုဒ္ဓိသီလံ။ ‘‘ဝိနယာစာရယုတ္တေနာ’’တိ ဣမိနာ ပါတိမောက္ခသံဝရသီလံ ဝုတ္တန္တိ ဝေဒိတဗ္ဗံ။ ဧဝမနေကဂုဏေဟိ တဿ အဘိတ္ထဝနံ ယထာဝုတ္တဂုဏသမန္နာဂတဿ သဗြဟ္မစာရိနော အဇ္ဈေသနံ န သက္ကာ ပဋိဗာဟိတုန္တိ ပရမဂမ္ဘီရဿာပိ ပါတိမောက္ခဿ အတ္ထသံဝဏ္ဏနာယံ ပဝတ္တာတိ ဒဿနတ္ထံ။ ကိဉ္စ – တာဒိသဿ အဇ္ဈေသနံ နိဿာယ ကရိယမာနာ အတ္ထသံဝဏ္ဏနာ တဿ အဇ္ဈေသနာဓိပစ္စေန၊ မမဉ္စ ဥဿာဟသမ္ပတ္တိယာ န စိရေန ပရိယောသာနံ ဂစ္ဆတီတိ ကတန္တိ ဝေဒိတဗ္ဗံ။

ဧဝံ သံဝဏ္ဏနာယ နိမိတ္တံ ဒဿေတွာ ဣဒါနိ တဿဝနေ သောတုဇနဿာဒရံ ဇနေတုံ တပ္ပယောဇနကရဏပ္ပကာရနိဿယာဘိဓာနာဒိံ ဒဿေန္တော ‘‘တတ္ထာ’’တိအာဒိဂါထာဒွယမာဟ။ တတ္ထ တတ္ထာတိ ‘‘ယံ မဟေသိနာ ပါတိမောက္ခံ ပကာသိတ’’န္တိ ဝုတ္တံ၊ တသ္မိံ ပါတိမောက္ခေ။ သဉ္ဇာတကင်္ခါနန္တိ ပဒပဒတ္ထဝိနိစ္ဆယဝသေန သဉ္ဇာတကင်္ခါနံ၊ သမုပ္ပန္နသံသယာနန္တိ အတ္ထော။ ကင်္ခါဝိတရဏတ္ထာယာတိ ယထာဝုတ္တသံသယဿ အတိက္ကမနတ္ထာယ။ တဿာတိ ပါတိမောက္ခဿ။ ဝဏ္ဏီယတိ အတ္ထော ကထီယတိ ဧတာယာတိ ဝဏ္ဏနာ၊ အဋ္ဌကထာ၊ တံ ဝဏ္ဏနံ။ ဣမဿ စ ‘‘ဝဏ္ဏယိဿာမီ’’တိ ဣမိနာ သမ္ဗန္ဓော။ ကိံဘူတန္တိ အာဟ ‘‘ပရိပုဏ္ဏဝိနိစ္ဆယ’’န္တိအာဒိ။ ပရိပုဏ္ဏဝိနိစ္ဆယန္တိ ခန္ဓကပရိဝါရပဒဘာဇနာဒိဝသေန အသာဓာရဏဝိနိစ္ဆယဿ စ နိဒါနာဒိဝသေန သတ္တရသပ္ပဘေဒဿ စ သဗ္ဗသိက္ခာပဒသာဓာရဏဝိနိစ္ဆယဿ ပကာသနတော သမ္ပုဏ္ဏဝိနိစ္ဆယံ။

မဟာဝိဟာရဝါသီနန္တိ မဟာမေဃဝနုယျာနဘူမိဘာဂေ ပတိဋ္ဌိတော ဝိဟာရော မဟာဝိဟာရော၊ ယော သတ္ထုနော မဟာဗောဓိနာ ဝိဘူသိတော၊ တတ္ထ ဝသန္တိ သီလေနာတိ မဟာဝိဟာရဝါသိနော၊ တေသံ မဟာဝိဟာရဝါသီနံ ¶ ။ ဝါစနာမဂ္ဂနိဿိတန္တိ ကထာမဂ္ဂနိဿိတံ၊ အဋ္ဌကထာနိဿိတန္တိ အတ္ထော၊ မဟာဝိဟာရဝါသီနံ သီဟဠဋ္ဌကထာနယံ ဣဓ နိဿာယာတိ ဝုတ္တံ ဟောတိ။ ဝဏ္ဏယိဿာမီတိ ပဝတ္တယိဿာမိ။ နာမေနာတိ အတ္တနော ဂုဏနာမေန။ ကင်္ခါဝိတရန္တိ ဧတာယာတိ ကင်္ခါဝိတရဏီ၊ တံ ကင်္ခါဝိတရဏိံ။ သုဘန္တိ အတ္ထဗျဉ္ဇနသမ္ပန္နတ္တာ သုန္ဒရံ၊ သဒ္ဒလက္ခဏသုဘတော၊ ဝိနိစ္ဆယသုဘတော၊ ဝိညေယျသုဘတော စ သုဘံ ပရိသုဒ္ဓံ။ ဧတ္ထ စ ‘‘ကင်္ခါဝိတရဏတ္ထာယာ’’တိ ဣမိနာ ပယောဇနံ ဒဿေတိ၊ ပုရိပုဏ္ဏဝိနိစ္ဆယ’’န္တိ ဣမိနာ ¶ သံဝဏ္ဏနာပ္ပကာရံ၊ ‘‘မဟာဝိဟာရဝါသီနံ ဝါစနာမဂ္ဂနိဿိတ’’န္တိ ဣမိနာ သံဝဏ္ဏနာယ နိဿယဝိသုဒ္ဓိံ နိကာယန္တရလဒ္ဓိသင်္ကရဒေါသဝိဝဇ္ဇနတော၊ ‘‘ဝဏ္ဏယိဿာမီ’’တိ ဣမိနာ အတ္တနော အဇ္ဈာသယံ ဒဿေတီတိ ဒဋ္ဌဗ္ဗံ။ ‘‘ဝတ္တယိဿာမီ’’တိပိ ပါဌော။

ဂန္ထာရမ္ဘကထာဝဏ္ဏနာ နိဋ္ဌိတာ။

နိဒါနဝဏ္ဏနာ

ဧဝံ ရတနတ္တယပဏာမာဒိသဟိတံ သညာဒိကံ ဒဿေတွာ ဣဒါနိ ‘‘ပါတိမောက္ခဿ ဝဏ္ဏနံ ဝဏ္ဏယိဿာမီ’’တိ ဝုတ္တတ္တာ ပါတိမောက္ခံ တာဝ ဝစနတ္ထတော၊ သရူပဘေဒတော၊ ဂန္ထဘေဒတော၊ ဥဒ္ဒေသဝိဘာဂတော၊ ဥဒ္ဒေသပရိစ္ဆေဒတော စ ဝဝတ္ထပေတွာ တဒုဒ္ဒေသက္ကမေနာယံ ဝဏ္ဏနာ ဘဝိဿတီတိ ဒဿေတုံ ‘‘တတ္ထ ပါတိမောက္ခ’’န္တိအာဒိ အာရဒ္ဓံ။

တတ္ထ တတ္ထာတိ တသ္မိံ ဂါထာပဒေ။ ပအတိမောက္ခန္တိ ပကာရတော အတိဝိယ သီလေသု မုခဘူတံ။ အတိပမောက္ခန္တိ တမေဝ ပဒံ ဥပသဂ္ဂဗျတ္တယေန ဝဒတိ။ အထ ဝါ ပ အတိ မောက္ခန္တိ ပဒစ္ဆေဒေါ၊ တဿ ဥပသဂ္ဂဗျတ္တယေနတ္ထမာဟ ‘‘အတိပမောက္ခ’’န္တိ။ ဧဝံ ပဘေဒတော ပဒဝဏ္ဏနံ ကတွာ သဒ္ဒတ္ထတော ဝဒတိ ‘‘အတိသေဋ္ဌံ အတိဥတ္တမန္တိ အတ္ထော’’တိ။ ဧတ္ထ စ သီလပါတိမောက္ခံ သဗ္ဗဂုဏာနံ မူလဘာဝတော သေဋ္ဌံ၊ ဂန္ထပါတိမောက္ခံ ပန သေဋ္ဌဂုဏသဟစရဏတော သေဋ္ဌန္တိ ဝေဒိတဗ္ဗံ။ ဥတ္တမန္တိ ဧတ္ထာပိ ဧသေဝ နယော။ ဣတီတိ ဧဝံ။ ဣမိနာ ယထာဝုတ္တဝစနတ္ထံ နိဒဿေတိ။ နိဒဿနတ္ထော ဟိ အယံ ဣတိ-သဒ္ဒေါ ‘‘သဗ္ဗမတ္ထီတိ ခေါ၊ ကစ္စာန၊ အယမေကော အန္တော၊ သဗ္ဗံ နတ္ထီတိ ခေါ၊ ကစ္စာန၊ အယံ ဒုတိယော အန္တော’’တိအာဒီသု (သံ။ နိ။ ၂။၁၅၊ ၃။၉၀) ဝိယ။ ဣမိနာတိ အာသန္နပစ္စက္ခဝစနံ ဣတိ-သဒ္ဒေန အနန္တရနိဒဿိတဿ၊ ပဋိဂ္ဂါဟကေဟိ စ သောတဝိညာဏာဒိဝီထိယာ ¶ ပဋိပန္နဿ ဝစနတ္ထဿ ဝစနတော။ အထ ဝါ ဣမိနာတိ အာသန္နပစ္စက္ခဘာဝကရဏဝစနံ ယထာဝုတ္တဿ ဝစနတ္ထဿ အဘိမုခီကရဏတော။ ဝစနတ္ထေနာတိ ‘‘အတိသေဋ္ဌ’’န္တိ သဒ္ဒတ္ထေန။ ဧကဝိဓမ္ပီတိ ဧကကောဋ္ဌာသမ္ပိ။ သီလဂန္ထဘေဒတော ဒုဝိဓံ ဟောတီတိ ပုန သီလဂန္ထသင်္ခါတေန ပဘေဒေန ဒုဝိဓံ ဟောတိ၊ သီလပါတိမောက္ခံ၊ ဂန္ထပါတိမောက္ခဉ္စာတိ ဒုဝိဓံ ဟောတီတိ အတ္ထော။

ဣဒါနိ ¶ တဒုဘယဿာပိ သုတ္တေ အာဂတဘာဝံ ဒဿေတုံ ‘‘တထာ ဟီ’’တိအာဒိ ဝုတ္တံ။ တတ္ထ ပါတိ ရက္ခတီတိ ပါတိ၊ တံ မောက္ခေတိ မောစေတိ အာပါယိကာဒီဟိ ဒုက္ခေဟီတိ ပါတိမောက္ခံ၊ သံဝရဏံ သံဝရော၊ ကာယဝါစာဟိ အဝီတိက္ကမော၊ ပါတိမောက္ခမေဝ သံဝရော ပါတိမောက္ခသံဝရော၊ ပါတိမောက္ခသံဝရေန သံဝုတော သမန္နာဂတော ပါတိမောက္ခသံဝရသံဝုတော။ ဝိဟရတီတိ ဝတ္တတိ။

အာဒိမေတန္တိ ဧတံ သိက္ခာပဒသီလံ ပုဗ္ဗုပ္ပတ္တိအတ္ထေန အာဒိ။ ဝုတ္တမ္ပိ စေတံ –

‘‘တသ္မာတိဟ တွံ၊ ဥတ္တိယ၊ အာဒိမေဝ ဝိသောဓေဟိ ကုသလေသု ဓမ္မေသု။ ကော စာဒိ ကုသလာနံ ဓမ္မာနံ? သီလဉ္စ သုဝိသုဒ္ဓံ၊ ဒိဋ္ဌိ စ ဥဇုကာ’’တိ (သံ။ နိ။ ၅။၃၈၂)။

ယထာ ဟိ နဂရဝဍ္ဎကီ နဂရံ မာပေတုကာမော ပဌမံ နဂရဋ္ဌာနံ သောဓေတိ၊ တတော အပရဘာဂေ ဝီထိစတုက္ကသိင်္ဃာဋကာဒိပရိစ္ဆေဒေန ဝိဘဇိတွာ နဂရံ မာပေတိ၊ ယထာ ဝါ ပန ရဇကော ပဌမံ တီဟိ ခါရေဟိ ဝတ္ထံ ဓောဝိတွာ ပရိသုဒ္ဓေ ဝတ္ထေ ယဒိစ္ဆကံ ရင်္ဂဇာတံ ဥပနေတိ၊ ယထာ ဝါ ပန ဆေကော စိတ္တကာရော ရူပံ လိခိတုကာမော အာဒိတောဝ ဘိတ္တိပရိကမ္မံ ကရောတိ၊ တတော အပရဘာဂေ ရူပံ သမုဋ္ဌာပေတိ၊ ဧဝမေဝ ယောဂါဝစရော အာဒိတောဝ သီလံ ဝိသောဓေတွာ အပရဘာဂေ သမထဝိပဿနာဒယော ဓမ္မေ သစ္ဆိကရောတိ။ တသ္မာ သီလံ ‘‘အာဒီ’’တိ ဝုတ္တံ။ ‘‘မုခမေတ’’န္တိအာဒီနိ ဝုတ္တတ္ထာနေဝ။ အာဒိသဒ္ဒေန ‘‘ပါတိမောက္ခေ စ သံဝရော’’တိအာဒိပါဠိံ (ဒီ။ နိ။ ၂။၉၀၊ ဓ။ ပ။ ၁၈၅) သင်္ဂဏှာတိ။

သီလန္တိ စာရိတ္တဝါရိတ္တဝသေန ဒုဝိဓံ ဝိနယပိဋကပရိယာပန္နံ သိက္ခာပဒသီလံ၊ ဓမ္မတော ပန သီလံ နာမ ပါဏာတိပါတာဒီဟိ ဝါ ဝိရမန္တဿ၊ ဝတ္တပဋိပတ္တိံ ဝါ ပူရေန္တဿ စေတနာဒယော ဓမ္မာ ဝေဒိတဗ္ဗာ။ ဝုတ္တဉှေတံ ပဋိသမ္ဘိဒါယံ ‘‘ကိံ သီလန္တိ စေတနာ သီလံ စေတသိကံ သီလံ သံဝရော သီလံ အဝီတိက္ကမော သီလ’’န္တိ (ပဋိ။ မ။ ၁။၃၉) ‘‘ဥဘယာနိ ခေါ ပနဿ ပါတိမောက္ခာနီ’’တိ ဘိက္ခုဘိက္ခုနီပါတိမောက္ခဝသေန ဥဘယာနိ ပါတိမောက္ခာနိ၊ ဒွေ မာတိကာတိ အတ္ထော။ အဿာတိ ဘိက္ခုနောဝါဒကဿ ¶ ။ ဝိတ္ထာရေနာတိ ဥဘတောဝိဘင်္ဂေန သဒ္ဓိံ။ သွာဂတာနီတိ သုဋ္ဌု အာဂတာနိ။ အာဒိသဒ္ဒေန ‘‘ပါတိမောက္ခံ ဥဒ္ဒိသေယျာ’’တိအာဒိပါဠိံ (မဟာဝ။ ၁၃၄) သင်္ဂဏှာတိ။ တတ္ထာတိ တေသု သီလဂန္ထပါတိမောက္ခေသု။ ယောတိ ¶ အနိယမနိဒ္ဒေသော၊ ယော ကောစိ ပုဂ္ဂလော။ နန္တိ ဝိနယပရိယာပန္နသီလံ။ ရက္ခတီတိ သမာဒိယိတွာ အဝိကောပေန္တော ပါလေတိ။ တံ ‘‘ပါတီ’’တိ လဒ္ဓနာမံ ပါတိမောက္ခသီလေ ဌိတံ။ မောစေတီတိ သဟကာရိကာရဏဘာဝတော မောက္ခေတိ။ အပါယေ ဇာတံ အာပါယိကံ၊ ဒုက္ခံ၊ တံ အာဒိ ယေသံ တာနိ အာပါယိကာဒီနိ။ အာဒိသဒ္ဒေန တဒညံ သဗ္ဗံ သံသာရဒုက္ခံ သင်္ဂဏှာတိ။ အတ္တာနုဝါဒါဒီဟီတိ အတ္တာနံ အနုဝါဒေါ အတ္တာနုဝါဒေါ၊ သော အာဒိ ယေသံ တာနိ အတ္တာနုဝါဒါဒီနိ၊ တေဟိ အတ္တာနုဝါဒါဒီဟိ။ အာဒိသဒ္ဒေန ပရာနုဝါဒဒဏ္ဍဒုဂ္ဂတိဘယာနိ သင်္ဂဏှာတိ။ တဿ ပါတိမောက္ခဿ ဇောတကတ္တာတိ တဿ သီလပါတိမောက္ခဿ ဒီပနတ္တာ။ အာဒိမှိ ပန ဝုတ္တော ဝစနတ္ထောတိ ‘‘အတိသေဋ္ဌ’’န္တိအာဒိနာ အာဒိမှိ ဝုတ္တော ဝစနတ္ထော။ ဥဘိန္နမ္ပိ သာဓာရဏော ဟောတိ သီလပါတိမောက္ခံ သဗ္ဗဂုဏာနံ မူလဘာဝတော သေဋ္ဌံ၊ ဂန္ထပါတိမောက္ခံ သေဋ္ဌဂုဏသဟစရဏတော သေဋ္ဌန္တိ။

တတ္ထာတိ တေသု သီလပါတိမောက္ခဂန္ထပါတိမောက္ခေသု။ ‘‘အယံ ဝဏ္ဏနာ’’တိ ဝက္ခမာနဝဏ္ဏနမာဟ။ ဂန္ထပါတိမောက္ခဿ တာဝ ယုဇ္ဇတု၊ ကထံ သီလပါတိမောက္ခဿ ယုဇ္ဇတီတိ အာဟ ‘‘ဂန္ထေ ဟီ’’တိအာဒိ။ ဟီတိ ကာရဏတ္ထေ နိပါတော။ တဿာတိ ဂန္ထဿ။ အတ္ထောတိ သီလံ။ ဝဏ္ဏိတောဝ ဟောတီတိ ဂန္ထဝဏ္ဏနာမုခေန အတ္ထဿေဝ ဝဏ္ဏနတော။ ဣဒံ ဝုတ္တံ ဟောတိ – ယသ္မာ ဂန္ထေ ဝဏ္ဏိတေ တဒဝိနာဘာဝတော တဿတ္ထော ဝဏ္ဏိတော ဟောတိ၊ တသ္မာ သီလပါတိမောက္ခဿပိ ယုဇ္ဇတီတိ။

ဧဝံ သရူပဘေဒတော ဝဝတ္ထပေတွာ ဣဒါနိ ဂန္ထဘေဒတော ဝဝတ္ထပေတုံ ‘‘တံ ပနေတ’’န္တိအာဒိမာဟ။ တတ္ထာတိ တေသု ဘိက္ခုပါတိမောက္ခဘိက္ခုနီပါတိမောက္ခေသု ဒွီသု။ ဥဒ္ဒေသာ ပရိစ္ဆိဇ္ဇန္တိ ယေဟိ ဝက္ခမာနဝစနပ္ပဗန္ဓေဟိ၊ တေ ဥဒ္ဒေသပရိစ္ဆေဒါ၊ တေဟိ။ ဝဝတ္ထိတန္တိ အသင်္ကရတော ဌိတံ။

ဧဝံ ဂန္ထဘေဒတော ဝဝတ္ထပေတွာ ဣဒါနိ ဥဒ္ဒေသဝိဘာဂတော ဝဝတ္ထပေတုံ ‘‘တတ္ထာ’’တိအာဒိမာဟ။ ဥဒ္ဒိသီယတိ သရူပေန ကထီယတိ ဧတ္ထ၊ ဧတေနာတိ ဝါ ဥဒ္ဒေသော၊ နိဒါနဿ ဥဒ္ဒေသောတိ နိဒါနုဒ္ဒေသော။ ဧဝံ သေသေသုပိ။ ဝိတ္ထာရောဝ ဥဒ္ဒေသော ဝိတ္ထာရုဒ္ဒေသော။

ဣဒါနိ နိဒါနုဒ္ဒေသာဒီနံ ပရိစ္ဆေဒဒဿနတ္ထံ ‘‘တတ္ထ နိဒါနုဒ္ဒေသော’’တိအာဒိ အာရဒ္ဓံ။ တတ္ထ တတ္ထာတိ တေသု ပဉ္စသု ဥဒ္ဒေသေသု။ နိဒါနုဒ္ဒေသော ဥဒ္ဒိဋ္ဌော ¶ ဟောတီတိ သမ္ဗန္ဓော။ ယံ ပနေတ္ထ နိဒါနုဒ္ဒေသပရိစ္ဆေဒံ ဒဿေန္တေန ‘‘သုဏာတု မေ၊ ဘန္တေ၊ သင်္ဃော…ပေ… အာဝိကတာ ဟိဿ ဖာသု ဟောတီ’’တိ ¶ ဣဓာဂတနိဒါနပါဠိံ ဒဿေတွာ တဒနန္တရံ ဥဒ္ဒေသကာလေ ဝတ္တဗ္ဗဿာပိ ‘‘ဥဒ္ဒိဋ္ဌံ ခေါ အာယသ္မန္တော နိဒါန’’န္တိ ဣမဿ ပါဌဿ ယောဇနံ အကတွာ ‘‘တတ္ထာယသ္မန္တေ ပုစ္ဆာမီ’’တိအာဒိနာ အနုသာဝနာဒိကမေဝ ယောဇေတွာ ဒဿိတံ၊ တံ ပန အပရိပုဏ္ဏနိဒါနပါဠိဒဿနပုဗ္ဗကနိဒါနုဒ္ဒေသပရိစ္ဆေဒဒဿနတ္ထံ၊ ခုဒ္ဒကပေယျာလဝသေန ဝါ ပါကဋတ္တာ တဿ အယောဇနံ ကတန္တိ ဝေဒိတဗ္ဗံ၊ ဥဒ္ဒေသကာလေ ပန ယောဇေတွာဝ ဝတ္တဗ္ဗံ။ ဝက္ခတိ ဟိ ‘‘တံ ပနေတံ ပါရာဇိကာဒီနံ အဝသာနေ ဒိဿတိ၊ န နိဒါနာဝသာနေ။ ကိဉ္စာပိ န ဒိဿတိ၊ အထ ခေါ ဥဒ္ဒေသကာလေ ‘အာဝိကတာ ဟိဿ ဖာသု ဟောတီ’တိ ဝတွာ ‘ဥဒ္ဒိဋ္ဌံ ခေါ အာယသ္မန္တော နိဒါနံ၊ တတ္ထာယသ္မန္တေ ပုစ္ဆာမီ’တိအာဒိနာ နယေန ဝတ္တဗ္ဗမေဝါ’’တိအာဒိ။ အဝသေသေ သုတေန သာဝိတေတိ အဝသိဋ္ဌံ ပါရာဇိကုဒ္ဒေသာဒိစတုက္ကံ ‘‘သုတာ ခေါ ပနာယသ္မန္တေဟိ စတ္တာရော ပါရာဇိကာ ဓမ္မာ…ပေ… အဝိဝဒမာနေဟိ သိက္ခိတဗ္ဗ’’န္တိ ဧဝံ သုတဝသေန သာဝိတေ။

ဧတေနေဝ နယေန သေသာ တယော ပါတိမောက္ခုဒ္ဒေသပရိစ္ဆေဒါ ဝေဒိတဗ္ဗာတိ ဒဿေတုံ ‘‘ပါရာဇိကုဒ္ဒေသာဒီန’’န္တိအာဒိမာဟ။ ပါရာဇိကုဒ္ဒေသာဒီနံ ပရိစ္ဆေဒါ ယောဇေတဗ္ဗာတိ သမ္ဗန္ဓော။ နိဒါနဿ အာဒိတော ပဋ္ဌာယ ပါရာဇိကာဒီနိ ဩသာပေတွာတိ နိဒါနံ၊ ပါရာဇိကဉ္စ၊ တဒုဘယံ သင်္ဃာဒိသေသဉ္စ၊ တံတိကံ အနိယတဉ္စာတိ ဧဝံ ယထာက္ကမံ ဥဒ္ဒိသိတွာ ပါရာဇိကာဒီနိ ပရိယောသာပေတွာ။ ယောဇေတဗ္ဗာတိ ‘‘အဝသေသေ သုတေန သာဝိတေ ဥဒ္ဒိဋ္ဌော ဟောတိ ပါရာဇိကုဒ္ဒေသော’’တိအာဒိနာ ယောဇေတဗ္ဗာ။ အဝသေသံ သုတေန သာဝေတဗ္ဗန္တိ ဝစနတောတိ ဥပေါသထက္ခန္ဓကေ –

‘‘ပဉ္စိမေ၊ ဘိက္ခဝေ၊ ပါတိမောက္ခုဒ္ဒေသာ နိဒါနံ ဥဒ္ဒိသိတွာ အဝသေသံ သုတေန သာဝေတဗ္ဗံ၊ အယံ ပဌမော ပါတိမောက္ခုဒ္ဒေသော။ နိဒါနံ ဥဒ္ဒိသိတွာ စတ္တာရိ ပါရာဇိကာနိ ဥဒ္ဒိသိတွာ အဝသေသံ သုတေန သာဝေတဗ္ဗံ၊ အယံ ဒုတိယော ပါတိမောက္ခုဒ္ဒေသော’’တိအာဒီသု (မဟာဝ။ ၁၅၀) –

ဧဝံ ဝုတ္တတ္တာ။ ယသ္မိံ ဝိပ္ပကတေတိ ယသ္မိံ ဥဒ္ဒေသေ အပရိယောသိတေ။ အန္တရာယော ဥပ္ပဇ္ဇတီတိ ဒသသု အန္တရာယေသု ယော ကောစိ အန္တရာယော ဥပ္ပဇ္ဇတိ ¶ ။ ဒသ အန္တရာယာ နာမ – ရာဇန္တရာယော၊ စောရန္တရာယော၊ အဂျန္တရာယော၊ ဥဒကန္တရာယော၊ မနုဿန္တရာယော၊ အမနုဿန္တရာယော၊ ဝါဠန္တရာယော၊ သရီသပန္တရာယော၊ ဇီဝိတန္တရာယော၊ ဗြဟ္မစရိယန္တရာယောတိ။ တတ္ထ သစေ ဘိက္ခူသု ‘‘ဥပေါသထံ ကရိဿာမာ’’တိ (မဟာဝ။ အဋ္ဌ။ ၁၅၀) နိသိန္နေသု ရာဇာ အာဂစ္ဆတိ၊ အယံ ရာဇန္တရာယော။ စောရာ အာဂစ္ဆန္တိ၊ အယံ စောရန္တရာယော။ ဒဝဒါဟော ဝါ အာဂစ္ဆတိ၊ အာဝါသေ ဝါ အဂ္ဂိ ဥဋ္ဌဟတိ၊ အယံ ¶ အဂျန္တရာယော။ မေဃော ဝါ ဥဋ္ဌဟတိ၊ ဩဃော ဝါ အာဂစ္ဆတိ၊ အယံ ဥဒကန္တရာယော။ ဗဟူ မနုဿာ အာဂစ္ဆန္တိ၊ အယံ မနုဿန္တရာယော။ ဘိက္ခုံ ယက္ခော ဂဏှာတိ၊ အယံ အမနုဿန္တရာယော။ ဗျဂ္ဃာဒယော စဏ္ဍမိဂါ အာဂစ္ဆန္တိ၊ အယံ ဝါဠန္တရာယော။ ဘိက္ခုံ သပ္ပာဒယော ဍံသန္တိ၊ အယံ သရီသပန္တရာယော။ ဘိက္ခု ဂိလာနော ဝါ ဟောတိ၊ ကာလံ ဝါ ကရောတိ၊ ဝေရိနော ဝါ တံ မာရေတုကာမာ ဂဏှန္တိ၊ အယံ ဇီဝိတန္တရာယော။ မနုဿာ ဧကံ ဝါ ဗဟူ ဝါ ဘိက္ခူ ဗြဟ္မစရိယာ စာဝေတုကာမာ ဂဏှန္တိ၊ အယံ ဗြဟ္မစရိယန္တရာယော။ ဣတိ ယံ ဝုတ္တံ ‘‘အန္တရာယော ဥပ္ပဇ္ဇတီတိ ဒသသု အန္တရာယေသု ယော ကောစိ အန္တရာယော ဥပ္ပဇ္ဇတီ’’တိ၊ တဿတ္ထော ပကာသိတော ဟောတီတိ။

တေန သဒ္ဓိန္တိ ဝိပ္ပကတုဒ္ဒေသေန သဒ္ဓိံ။ အဝသေသံ သုတေန သာဝေတဗ္ဗံ ဥဒ္ဒိဋ္ဌဥဒ္ဒေသာပေက္ခတ္တာ အဝသေသဝစနဿ။ ယထာဟ ‘‘နိဒါနံ ဥဒ္ဒိသိတွာ’’တိအာဒိ (မဟာဝ။ ၁၅၀)။ တေနာဟ ‘‘နိဒါနုဒ္ဒေသေ ပနာ’’တိအာဒိ။ သုတေန သာဝေတဗ္ဗံ နာမ နတ္ထိ ဥပေါသထဿ အန္တရာယောဝ ဟောတီတိ အဓိပ္ပာယော။ အနိယတုဒ္ဒေသော ပရိဟာယတီတိ ဘိက္ခုနီနံ အနိယတသိက္ခာပဒပညတ္တိယာ အဘာဝတော။ တဒဘာဝေါ စ ‘‘ဣဒမေဝ လက္ခဏံ တတ္ထာပိ အနုဂတ’’န္တိ ကတွာတိ ဝေဒိတဗ္ဗံ။ သေသန္တိ အဝသေသုဒ္ဒေသပရိစ္ဆေဒဒဿနံ။ ဧတေသံ ဒွိန္နံ ပါတိမောက္ခာနန္တိ သမ္ဗန္ဓော။ တာဝါတိ ပဌမံ။ ဣဒန္တိ ဣဒါနိ ဝတ္တဗ္ဗံ ဗုဒ္ဓိယံ ဝိပရိဝတ္တမာနံ သာမညေန ဒဿေတိ၊ ဣဒံ အက္ခရပဒနိယမိတဂန္ထိတံ ဝစနံ ဝုစ္စတိ ကထီယတီတိ အတ္ထော။ ကိံ တန္တိ အာဟ၊ ‘‘သုဏာတု မေတိအာဒီန’’န္တိအာဒိ။

တတ္ထ သုဏာတု မေတိအာဒီနန္တိ ‘‘သုဏာတု မေ၊ ဘန္တေ၊ သင်္ဃော အဇ္ဇုပေါသထော’’တိအာဒီနံ ဘိက္ခုပါတိမောက္ခေ အာဂတာနံ သုတ္တပဒါနံ။ အတ္ထနိစ္ဆယန္တိ ¶ အဘိဓေယျတ္ထဿ စေဝ အဓိပ္ပာယတ္ထဿ စ နိစ္ဆယနံ၊ ဝဝတ္ထာပနန္တိ အတ္ထော။ ဣမာယ ဟိ အဋ္ဌကထာယ တေသံ အဘိဓေယျတ္ထော စေဝ အဓိပ္ပာယတ္ထော စ အနေကဓာ ဝဝတ္ထာပီယတိ။ အထ ဝါ နိစ္ဆိန္နောတိ နိစ္ဆယော။ ဂဏ္ဌိဋ္ဌာနေသု ခီလမဒ္ဒနာကာရေန ပဝတ္တာ ဝိမတိစ္ဆေဒကထာ၊ အတ္ထော စ နိစ္ဆယော စ အတ္ထနိစ္ဆယော၊ တံ အတ္ထနိစ္ဆယံ၊ မယာ ဝုစ္စမာနံ အတ္ထဉ္စ ဝိနိစ္ဆယဉ္စာတိ ဝုတ္တံ ဟောတိ။ သီလသမ္ပန္နာတိ သမန္တတော ပန္နံ ပတ္တံ ပုဏ္ဏန္တိ သမ္ပန္နံ၊ သီလံ သမ္ပန္နမေတေသန္တိ သီလသမ္ပန္နာ၊ ပရိပုဏ္ဏသီလာတိ အတ္ထော။ အထ ဝါ သမ္မဒေဝ ပန္နာ ဂတာ ဥပါဂတာတိ သမ္ပန္နာ၊ သီလေန သမ္ပန္နာ သီလသမ္ပန္နာ၊ ပါတိမောက္ခသံဝရေန ဥပေတာတိ အတ္ထော။ အဓိသီလအဓိစိတ္တအဓိပညာသင်္ခါတာ တိဿောပိ သိက္ခိတဗ္ဗဋ္ဌေန သိက္ခာ၊ တံ ကာမေန္တီတိ သိက္ခာကာမာ။ သုဏန္တု မေတိ တေ သဗ္ဗေပိ ဘိက္ခဝေါ မမ သန္တိကာ နိသာမေန္တု။ ဣမိနာ အတ္တနော သံဝဏ္ဏနာယ သက္ကစ္စံ သဝနေ နိယောဇေတိ။ သက္ကစ္စသဝနပဋိဗဒ္ဓါ ဟိ သဗ္ဗာပိ သာသနသမ္ပတ္တီတိ။ ဧတ္ထ စ သီလသမ္ပန္နာနံ သိက္ခာကာမာနံယေဝ ဘိက္ခူနံ ဂဟဏံ တဒညေသံ ¶ ဣမိဿာ သံဝဏ္ဏနာယ အဘာဇနဘာဝတော။ န ဟိ တေ ဝိနယံ သောတဗ္ဗံ၊ ပဋိပဇ္ဇိတဗ္ဗဉ္စ မညိဿန္တိ။

ဧတ္ထာတိ ဧတသ္မိံ ဂါထာပဒေ၊ ဧတေသံ ဝါ ဂါထာယ သင်္ဂဟိတာနံ ‘‘သုဏာတု မေ’’တိအာဒီနံ ပဒါနမန္တရေ။ သဝနေ အာဏတ္တိဝစနံ သဝနာဏတ္တိဝစနံ။ ကိဉ္စာပိ သဝနာဏတ္တိဝစနံ၊ တထာပိ ပါတိမောက္ခုဒ္ဒေသကေန ဧဝံ ဝတ္တဗ္ဗန္တိ ဘဂဝတာ ဝုတ္တတ္တာ ဘဂဝတော အာဏတ္တိ၊ န ဥဒ္ဒေသကဿာတိ နဝကတရေနာပိ ဣဒံ ဝတ္တုံ ဝဋ္ဋတိ သင်္ဃဂါရဝေန၊ သင်္ဃဗဟုမာနေန စ သဟိတတ္တာ သဂါရဝသပ္ပတိဿဝစနံ။ သင်္ဃော ဟိ သုပ္ပဋိပန္နတာဒိဂုဏဝိသေသယုတ္တတ္တာ ဥတ္တမံ ဂါရဝပ္ပတိဿဝဋ္ဌာနံ။ ဣဒဉ္စ သဗ္ဗံ ကေန ကတ္ထ ကဒါ ဝုတ္တန္တိ အာဟ ‘‘သဗ္ဗမေဝ စေတ’’န္တိအာဒိ။ ပါတိမောက္ခုဒ္ဒေသံ အနုဇာနန္တေနာတိ –

‘‘အနုဇာနာမိ၊ ဘိက္ခဝေ၊ ပါတိမောက္ခံ ဥဒ္ဒိသိတုံ၊ ဧဝဉ္စ ပန၊ ဘိက္ခဝေ၊ ဥဒ္ဒိသိတဗ္ဗံ၊ ဗျတ္တေန ဘိက္ခုနာ ပဋိဗလေန သင်္ဃော ဉာပေတဗ္ဗော ‘သုဏာတု မေ၊ ဘန္တေ၊ သင်္ဃော’’’တိ (မဟာဝ။ ၁၃၃-၁၃၄) –

ဧဝမာဒိနာ ¶ အနုဇာနန္တေန။ ရာဇဂဟေတိ ဧဝံနာမကေ နဂရေ။ တဉှိ မန္ဓာတုမဟာဂေါဝိန္ဒာဒီဟိ ပရိဂ္ဂဟိတတ္တာ ‘‘ရာဇဂဟ’’န္တိ ဝုစ္စတိ။ တံ ပနေတံ ဗုဒ္ဓကာလေ၊ စက္ကဝတ္တိကာလေ စ နဂရံ ဟောတိ၊ သေသကာလေ သုညံ ဟောတိ ယက္ခပရိဂ္ဂဟိတံ၊ တေသံ ဝသနဋ္ဌာနံ ဟုတွာ တိဋ္ဌတိ။ တသ္မာတိ ယသ္မာ ဣဒံ ပါတိမောက္ခုဒ္ဒေသကေန ဝတ္တဗ္ဗဝစနံ၊ တသ္မာ။ ကိံ တေ ဥဘောပိ ပါတိမောက္ခံ ဥဒ္ဒိသန္တိ၊ ယေနေဝံ ဝတ္တဗ္ဗန္တိ အာဟ ‘‘သင်္ဃတ္ထေရော ဝါ ဟီ’’တိအာဒိ။ ထေရာဓိကန္တိ ထေရာဓီနံ၊ ထေရာယတ္တံ ဘဝိတုန္တိ အတ္ထော။ ‘‘ထေရာဓေယျ’’န္တိ ဝါ ပါဌော၊ သောယေဝတ္ထော။ တတ္ထာတိ တိဿံ ပရိသာယံ။ ဗျတ္တောတိ ပညာဝေယျတ္တိယေန သမန္နာဂတော၊ ပဂုဏမာတိကောတိ အတ္ထော။ ပဋိဗလောတိ ဝတ္တုံ သမတ္ထော၊ အဘီတောတိ ဝုတ္တံ ဟောတိ။ ဧတ္ထ စ ကိဉ္စာပိ ဒဟရဿာပိ ဗျတ္တဿ ပါတိမောက္ခော အနုညာတော၊ အထ ခေါ ဧတ္ထာယံ အဓိပ္ပာယော – သစေ ထေရဿ ပဉ္စ ဝါ စတ္တာရော ဝါ တယော ဝါ ပါတိမောက္ခုဒ္ဒေသာ နာဂစ္ဆန္တိ၊ ဒွေ ပန အက္ခဏ္ဍာ သုဝိသဒါ ဝါစုဂ္ဂတာ ဟောန္တိ၊ ထေရာယတ္တောဝ ပါတိမောက္ခော။ သစေ ပန ဧတ္တကမ္ပိ ဝိသဒံ ကာတုံ န သက္ကောတိ၊ ဗျတ္တဿ ဘိက္ခုနော အာယတ္တောတိ။

ဣဒါနိ ‘‘သင်္ဃော’’တိ အဝိသေသေန ဝုတ္တတ္တာ ဣဓာဓိပ္ပေတသင်္ဃံ ဝိသေသေတွာ ဒဿေတုံ ‘‘သင်္ဃောတိ ဣမိနာ ပန ပဒေနာ’’တိအာဒိမာဟ ကိဉ္စာပီတိ အနုဂ္ဂဟတ္ထေ နိပါတော၊ တဿ ယဒိ နာမာတိ အတ္ထော ဝေဒိတဗ္ဗော။ ဒက္ခန္တိ ဧတာယ သတ္တာ ယထာဓိပ္ပေတာဟိ သမ္ပတ္တီဟိ ဝဍ္ဎန္တီတိ ဒက္ခိဏာ၊ ပရလောကံ သဒ္ဒဟိတွာ ¶ ဒါတဗ္ဗံ ဒါနံ၊ တံ ဒက္ခိဏံ အရဟတိ၊ ဒက္ခိဏာယ ဝါ ဟိတော၊ ယသ္မာ နံ မဟပ္ဖလကာရိတာယ ဝိသောဓေတီတိ ဒက္ခိဏေယျော၊ ဒိဋ္ဌိသီလသင်္ဃာတေန သံဟတောတိ သင်္ဃော၊ ဒက္ခိဏေယျော စ သော သင်္ဃော စာတိ ဒက္ခိဏေယျသင်္ဃော။ သမ္မုတိယာ စတုဝဂ္ဂါဒိဝိနယပညတ္တိယာ သိဒ္ဓါ သင်္ဃော သမ္မုတိသင်္ဃော။ အဝိသေသေနာတိ ‘‘အရိယာ’’တိ ဝါ ‘‘ပုထုဇ္ဇနာ’’တိ ဝါ အဝိသေသေတွာ သာမညေန။ သောတိ သမ္မုတိသင်္ဃော။ ဣဓာတိ ဣမိဿံ ဥပေါသထဉတ္တိယံ။ အဓိပ္ပေတော ဥပေါသထဉတ္တိယာ အဝိသေသတ္တာ။ နနု စ သောပိ ပဉ္စဝိဓော ဟောတိ၊ တတ္ထ ကတမော ဣဓာဓိပ္ပေတောတိ အနုယောဂံ သန္ဓာယာဟ ‘‘သော ပနေသာ’’တိအာဒိ။ ကမ္မဝသေနာတိ ဝိနယကမ္မဝသေန။ ပဉ္စ ဝိဓာ ပကာရာ အဿ သမ္မုတိသင်္ဃဿာတိ ပဉ္စဝိဓော။ တထာ ဟိ ဝိဓယုတ္တဂတပ္ပကာရသဒ္ဒေ သမာနတ္ထေ ဝဏ္ဏယန္တိ။ စတုန္နံ ¶ ဝဂ္ဂေါ သမူဟောတိ စတုဝဂ္ဂေါ၊ စတုပရိမာဏယုတ္တော ဝါ ဝဂ္ဂေါ စတုဝဂ္ဂေါ။ ဧဝံ ပဉ္စဝဂ္ဂါဒိ။

ဣဒါနိ ယေသံ ကမ္မာနံ ဝသေနာယံ ပဉ္စဝိဓော ဟောတိ၊ တံ ဝိသေသေတွာ ဒဿေတုံ ‘‘တတ္ထာ’’တိအာဒိမာဟ။ တတ္ထ တတ္ထာတိ ပဉ္စဝိဓေ သင်္ဃေ။ မဇ္ဈိမေသု ဇနပဒေသု ဥပသမ္ပဒကမ္မဿ ဒသဝဂ္ဂကရဏီယတ္တာ ဝုတ္တံ ‘‘ဌပေတွာ…ပေ… ဥပသမ္ပဒဉ္စာ’’တိ။ ‘‘တထာ’’တိ ဣမိနာ ‘‘န ကိဉ္စိ သင်္ဃကမ္မံ ကာတုံ န ဝဋ္ဋတီ’’တိ ဣမမတ္ထံ အတိဒိသတိ။ ယဒိ ဧဝံ ကိမတ္ထံ အတိရေကဝီသတိဝဂ္ဂေါ ဝုတ္တောတိ အာဟ ‘‘သော ပနာ’’တိအာဒိ။ အတိရေကတရေနာတိ စတုဝဂ္ဂါဒိကရဏီယံ ပဉ္စဝဂ္ဂါဒိနာ အတိရေကတရေန၊ ဒသဝဂ္ဂကရဏီယဉ္စ ဧကာဒသဝဂ္ဂါဒိနာ အတိရေကတရေန။ ဒဿနတ္ထန္တိ ဉာပနတ္ထံ။ ဣဒမေဝ စာနေန ကတ္တဗ္ဗံ ကမ္မန္တိ ‘‘ကမ္မဝသေန ပဉ္စဝိဓော’’တိ ဝုတ္တံ။ ကမ္မဿာနိယမေ ကထမေတံ ယုဇ္ဇေယျာတိ ဤဒိသီ စောဒနာ အနဝကာသာတိ ဒဋ္ဌဗ္ဗံ။ ဣမသ္မိံ ပနတ္ထေတိ ဥပေါသထေ။

ဥပေါသထသဒ္ဒေါ ပနာယံ ပါတိမောက္ခုဒ္ဒေသသီလဥပဝါသပညတ္တိဒိဝသေသု ဝတ္တတိ။ တထာ ဟေသ ‘‘အာယာမာဝုသော ကပ္ပိန၊ ဥပေါသထံ ဂမိဿာမာ’’တိအာဒီသု (ဒီ။ နိ။ အဋ္ဌ။ ၁။၁၅၀၊ မ။ နိ။ အဋ္ဌ။ ၃။၈၅) တိမောက္ခုဒ္ဒေသေ အာဂတော၊ ‘‘ဧဝံ အဋ္ဌင်္ဂသမန္နာဂတော ခေါ၊ ဝိသာခေ၊ ဥပေါသထော ဥပဝုတ္ထော’’တိအာဒီသု (အ။ နိ။ ၈။၄၃) သီလေ၊ ‘‘သုဒ္ဓဿ ဝေ သဒါ ဖဂ္ဂု၊ သုဒ္ဓဿုပေါသထော သဒါ’’တိအာဒီသု (မ။ နိ။ ၁။၇၉) ဥပဝါသေ၊ ‘‘ဥပေါသထော နာမ နာဂရာဇာ’’တိအာဒီသု (ဒီ။ နိ။ ၂။၂၄၆) ပညတ္တိယံ၊ ‘‘န၊ ဘိက္ခဝေ၊ တဒဟုပေါသထေ သဘိက္ခုကာ အာဝါသာ’’တိအာဒီသု (မဟာဝ။ ၁၈၁) ဒိဝသေ၊ ဣဓာပိ ဒိဝသေယေဝ ဝတ္တမာနော အဓိပ္ပေတောတိ အာဟ ‘‘အဇ္ဇ ဥပေါသထဒိဝသော’’တိအာဒိ။ ဥပဝသန္တိ ဧတ္ထာတိ ဥပေါသထော။ ဥပဝသန္တီတိ သီလေန ဝါ သဗ္ဗသော အာဟာရဿ အဘုဉ္ဇနသင်္ခါတေန အနသနေန ဝါ ခီရပါနမဓုပါနာဒိမတ္တေန ဝါ ဥပေတာ ဟုတွာ ဝသန္တီတိ အတ္ထော။

သဗ္ဗေသမ္ပိ ¶ ဝါကျာနံ ဧဝ-ကာရတ္ထသဟိတတ္တာ ‘‘ဥပေါသထော’’တိ ဧတဿ ‘‘ဥပေါသထော ဧဝါ’’တိ အယမတ္ထော လဗ္ဘတီတိ အာဟ ‘‘ဧတေန အနုပေါသထဒိဝသံ ပဋိက္ခိပတီ’’တိ။ ဣမိနာ အဝဓာရဏေန နိရာကတံ ဒဿေတိ၊ အထ ဝါ သဒ္ဒန္တရတ္ထာပေါဟနဝသေန သဒ္ဒေါ အတ္ထံ ဝဒတီတိ ‘‘ဥပေါသထော’’တိ ဧတဿ ‘‘အနုပေါသထော န ဟောတီ’’တိ အယမတ္ထောတိ ဝုတ္တံ ‘‘ဧတေန အနုပေါသထဒိဝသံ ပဋိက္ခိပတီ’’တိ။ ‘‘ဧသ နယော ပန္နရသော’’တိ ဣမိနာ အညံ ဥပေါသထဒိဝသံ ¶ ပဋိက္ခိပတီတိ ဧတ္ထာပိ။ ဧတေနာတိ ‘‘ဥပေါသထော’’တိ ဧတေန သဒ္ဒေန။ ပဉ္စဒသန္နံ တိထီနံ ပူရဏဝသေန ပန္နရသော။ ပန္နရသောတိ ဣမိနာ အညံ ဥပေါသထဒိဝသံ ပဋိက္ခိပတီ’’တိ သံခိတ္တေန ဝုတ္တမတ္ထံ ဝိတ္ထာရတော ဒဿေတုံ ‘‘ဒိဝသဝသေန ဟီ’’တိအာဒိမာဟ။ စတုဒ္ဒသိယံ နိယုတ္တော စာတုဒ္ဒသိကော။ ဧဝံ ပန္နရသိကော။ သာမဂ္ဂိဥပေါသထော နာမ သင်္ဃသာမဂ္ဂိကတဒိဝသေ ကာတဗ္ဗဥပေါသထော။ ဟေမန္တဂိမှဝဿာနာနံ တိဏ္ဏံ ဥတူနန္တိ ဧတ္ထ ဟေမန္တဥတု နာမ အပရကတ္တိကဿ ကာဠပက္ခပါဋိပဒတော ပဋ္ဌာယ ဖဂ္ဂုနပုဏ္ဏမပရိယောသာနာ စတ္တာရော မာသာ၊ ဂိမှဥတု နာမ ဖဂ္ဂုနဿ ကာလပက္ခပါဋိပဒတော ပဋ္ဌာယ အာသာဠှပုဏ္ဏမပရိယောသာနာ စတ္တာရော မာသာ၊ ဝဿာနဥတု နာမ အာသာဠှဿ ကာဠပက္ခပါဋိပဒတော ပဋ္ဌာယ အပရကတ္တိကပုဏ္ဏမပရိယောသာနာ စတ္တာရော မာသာ။ တတိယသတ္တမပက္ခေသု ဒွေ ဒွေ ကတွာ ဆ စာတုဒ္ဒသိကာတိ ဟေမန္တဿ ဥတုနော တတိယေ စ သတ္တမေ စ ပက္ခေ ဒွေ စာတုဒ္ဒသိကာ၊ ဧဝမိတရေသံ ဥတူနန္တိ ဆ စာတုဒ္ဒသိကာ။ သေသာ ပန္နရသိကာတိ သေသာ အဋ္ဌာရသ ပန္နရသိကာ။ ဟောန္တိ စေတ္ထ –

‘‘ကတ္တိကဿ စ ကာဠမှာ၊ ယာဝ ဖဂ္ဂုနပုဏ္ဏမာ၊

‘ဟေမန္တကာလော’တိ ဝိညေယျော၊ အဋ္ဌ ဟောန္တိ ဥပေါသထာ။

‘‘ဖဂ္ဂုနဿ စ ကာဠမှာ၊ ယာဝ အာသာဠှပုဏ္ဏမာ၊

‘ဂိမှကာလော’တိ ဝိညေယျော၊ အဋ္ဌ ဟောန္တိ ဥပေါသထာ။

‘‘အာသာဠှဿ စ ကာဠမှာ၊ ယာဝ ကတ္တိကပုဏ္ဏမာ၊

‘ဝဿကာလော’တိ ဝိညေယျော၊ အဋ္ဌ ဟောန္တိ ဥပေါသထာ။

‘‘ဥတူနံ ပန တိဏ္ဏန္နံ၊ ပက္ခေ တတိယသတ္တမေ၊

‘စာတုဒ္ဒသော’တိ ပါတိမောက္ခံ၊ ဥဒ္ဒိသန္တိ နယညုနော’’တိ။

ပကတိယာ နဗဟုတရာဝါသိကာဒိပစ္စယေန ကာတဗ္ဗံ ပကတိစာရိတ္တံ။ ဗဟုတရာဝါသိကာဒိပစ္စယေ ပန သတိ အညသ္မိံ စာတုဒ္ဒသေပိ ကာတုံ ဝဋ္ဋတိ။ တေနာဟ ‘‘သကိ’’န္တိအာဒိ။ သကိန္တိ ဧကသ္မိံ ဝါရေ ¶ ။ အာဝါသိကာနံ အနုဝတ္တိတဗ္ဗန္တိ အာဝါသိကေဟိ ‘‘အဇ္ဇုပေါသထော စာတုဒ္ဒသော’’တိ ပုဗ္ဗကိစ္စေ ကရိယမာနေ အနုဝတ္တိတဗ္ဗံ၊ န ပဋိက္ကောသိတဗ္ဗံ။ အာဒိသဒ္ဒေန ‘‘အာဝါသိကေဟိ အာဂန္တုကာနံ အနုဝတ္တိတဗ္ဗ’’န္တိ (မဟာဝ။ ၁၇၈) ဝစနံ၊ ‘‘အနုဇာနာမိ၊ ဘိက္ခဝေ၊ တေဟိ ¶ ဘိက္ခူဟိ ဒွေ တယော ဥပေါသထေ စာတုဒ္ဒသိကေ ကာတုံ၊ ကထံ မယံ တေဟိ ဘိက္ခူဟိ ပဌမတရံ ပဝါရေယျာမာ’’တိ (မဟာဝ။ ၂၄၀) ဝစနဉ္စ သင်္ဂဏှာတိ။ ဧတ္ထ စ ပဌမသုတ္တဿ ဧကေကဿ ဥတုနော တတိယသတ္တမပက္ခဿ စာတုဒ္ဒသေ ဝါ အဝသေသဿ ပန္နရသေ ဝါ သကိံ ပါတိမောက္ခံ ဥဒ္ဒိသိတဗ္ဗန္တိ ပကတိစာရိတ္တဝသေနပိ အတ္ထသမ္ဘဝတော ‘‘အာဂန္တုကေဟီ’’တိအာဒီနိ သုတ္တာနိ ဒဿိတာနီတိ ဝေဒိတဗ္ဗံ။ တထာရူပပစ္စယေ သတီတိ အညသ္မိမ္ပိ စာတုဒ္ဒသိကေ ဥပေါသထံ ကာတုံ အနုရူပေ ‘‘အာဝါသိကာ ဗဟုတရာ ဟောန္တီ’’တိ ဧဝမာဒိကေ ပစ္စယေ သတိ။ အညသ္မိမ္ပိ စာတုဒ္ဒသေတိ တိဏ္ဏံ ဥတူနံ တတိယသတ္တမပက္ခစာတုဒ္ဒသတော အညသ္မိံ စာတုဒ္ဒသေ။

န ကေဝလံ ဥပေါသထဒိဝသာဝ ဟောန္တီတိ အာဟ ‘‘ပုရိမဝဿံဝုဋ္ဌာနံ ပနာ’’တိအာဒိ။ မာ ဣတိ စန္ဒော ဝုစ္စတိ တဿ ဂတိယာ ဒိဝသဿ မိနိတဗ္ဗတော၊ သော ဧတ္ထ သဗ္ဗကလာပါရိပူရိယာ ပုဏ္ဏောတိ ပုဏ္ဏမာ၊ ပုဗ္ဗကတ္တိကာယ ပုဏ္ဏမာ ပုဗ္ဗကတ္တိကပုဏ္ဏမာ၊ အဿယုဇပုဏ္ဏမာ။ သာ ဟိ ပစ္ဆိမကတ္တိကံ နိဝတ္တေတုံ ဧဝံ ဝုတ္တာ။ တေသံယေဝါတိ ပုရိမဝဿံဝုဋ္ဌာနံယေဝ။ ဘဏ္ဍနကာရကေဟီတိ ကလဟကာရကေဟိ။ ပစ္စုက္ကဍ္ဎန္တီတိ ဥက္ကဍ္ဎန္တိ။ ဘဏ္ဍနကာရကေဟိ အနုဝါဒဝသေန အဿယုဇပုဏ္ဏမာဒိံ ပရိစ္စဇန္တာ ပဝါရဏံ ကာဠပက္ခံ၊ ဇုဏှပက္ခန္တိ ဥဒ္ဓံ ကဍ္ဎန္တီတိ အတ္ထော။ ‘‘သုဏန္တု မေ အာယသ္မန္တော အာဝါသိကာ၊ ယဒါယသ္မန္တာနံ ပတ္တကလ္လံ၊ ဣဒါနိ ဥပေါသထံ ကရေယျာမ၊ ပါတိမောက္ခံ ဥဒ္ဒိသေယျာမ၊ အာဂမေ ကာဠေ ပဝါရေယျာမာ’’တိ (မဟာဝ။ ၂၄၀) ‘‘သုဏန္တု မေ အာယသ္မန္တော အာဝါသိကာ၊ ယဒါယသ္မန္တာနံ ပတ္တကလ္လံ၊ ဣဒါနိ ဥပေါသထံ ကရေယျာမ၊ ပါတိမောက္ခံ ဥဒ္ဒိသေယျာမ၊ အာဂမေ ဇုဏှေ ပဝါရေယျာမာ’’တိ စ ဧဝံ ဉတ္တိယာ ပဝါရဏံ ဥက္ကဍ္ဎန္တီတိ ဝုတ္တံ ဟောတိ။

အထာတိ အနန္တရတ္ထေ နိပါတော။ စတုဒ္ဒသန္နံ ပူရဏော စာတုဒ္ဒသော၊ ဒိဝသော။ ယံ သန္ဓာယ ‘‘အာဂမေ ဇုဏှေ ပဝါရေယျာမာ’’တိ ဉတ္တိံ ဌပယိံသု၊ တသ္မိံ ပန အာဂမေ ဇုဏှေ ကောမုဒိယာ စာတုမာသိနိယာ အဝဿံ ပဝါရေတဗ္ဗံ။ န ဟိ တံ အတိက္ကမိတွာ ပဝါရေတုံ လဗ္ဘတိ။ ဝုတ္တဉှေတံ –

‘‘တေ စေ၊ ဘိက္ခဝေ၊ ဘိက္ခူ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သင်္ဃေ အဓိကရဏကာရကာ တမ္ပိ ဇုဏှံ အနုဝသေယျုံ၊ တေဟိ၊ ဘိက္ခဝေ၊ ဘိက္ခူဟိ သဗ္ဗေဟေဝ ¶ အာဂမေ ¶ ဇုဏှေ ကောမုဒိယာ စာတုမာသိနိယာ အကာမာ ပဝါရေတဗ္ဗ’’န္တိ (မဟာဝ။ ၂၄၀)။

တေနေဝါဟ ‘‘ပစ္ဆိမဝဿံဝုဋ္ဌာနဉ္စ ပစ္ဆိမကတ္တိကပုဏ္ဏမာ ဧဝါ’’တိ။ ယဒိ ဟိ တံ အတိက္ကမိတွာ ပဝါရေယျ၊ ဒုက္ကဋာပတ္တိံ အာပဇ္ဇေယျ။ ဝုတ္တဉှေတံ ‘‘န စ၊ ဘိက္ခဝေ၊ အပဝါရဏာယ ပဝါရေတဗ္ဗံ အညတြ သင်္ဃသာမဂ္ဂိယာ’’တိ (မဟာဝ။ ၂၃၃)။ ဝိသုဒ္ဓိပဝါရဏာယောဂတော ပဝါရဏာဒိဝသာ။ ပိသဒ္ဒေန န ကေဝလံ ပဝါရဏာဒိဝသာယေဝ၊ အထ ခေါ ဥပေါသထဒိဝသာပိ ဟောန္တီတိ ဒဿေတိ။ ဣဒါနိ ယော သော သာမဂ္ဂိဥပေါသထဒိဝသော ဝုတ္တော၊ တဉ္စ တပ္ပသင်္ဂေန သာမဂ္ဂိပဝါရဏာဒိဝသဉ္စ ဒဿေန္တော ‘‘ယဒါ ပနာ’’တိအာဒိမာဟ။ ဩသာရိတေ တသ္မိံ ဘိက္ခုသ္မိန္တိ ဥက္ခိတ္တကေ ဘိက္ခုသ္မိံ ဩသာရိတေ၊ တံ ဂဟေတွာ သီမံ ဂန္တွာ အာပတ္တိံ ဒေသာပေတွာ ကမ္မဝါစာယ ကမ္မပ္ပဋိပ္ပဿဒ္ဓိဝသေန ပဝေသိတေတိ ဝုတ္တံ ဟောတိ။ တဿ ဝတ္ထုဿာတိ တဿ အဓိကရဏဿ။ တဒါ ဌပေတွာ…ပေ… ဥပေါသထဒိဝသော နာမ ဟောတီတိ သမ္ဗန္ဓော။ ကိံ ကာရဏန္တိ အာဟ ‘‘တာဝဒေဝါ’’တိအာဒိ။ တတ္ထ တာဝဒေဝါတိ တံ ဒိဝသမေဝ။ ဝစနတောတိ ကောသမ္ဗကက္ခန္ဓကေ (မဟာဝ။ ၄၇၅) ဝုတ္တတ္တာ။ ယတ္ထ ပန ပတ္တစီဝရာဒီနံ အတ္ထာယ အပ္ပမတ္တကေန ကာရဏေန ဝိဝဒန္တာ ဥပေါသထံ ဝါ ပဝါရဏံ ဝါ ဌပေန္တိ၊ တတ္ထ တသ္မိံ အဓိကရဏေ ဝိနိစ္ဆိတေ ‘‘သမဂ္ဂါ ဇာတမှာ’’တိ အန္တရာ သာမဂ္ဂိဥပေါသထံ ကာတုံ န လဘန္တိ။ ကရောန္တေဟိ အနုပေါသထေ ဥပေါသထော ကတော နာမ ဟောတိ။ ကတ္တိကမာသဗ္ဘန္တရေတိ ဧတ္ထ ကတ္တိကမာသော နာမ ပုဗ္ဗကတ္တိကမာသဿ ကာဠပက္ခပါဋိပဒတော ပဋ္ဌာယ ယာဝ အပရကတ္တိကပုဏ္ဏမာ၊ တာဝ ဧကူနတိံသရတ္တိဒိဝေါ၊ တဿဗ္ဘန္တရေ၊ တတော ပစ္ဆာ ဝါ ပန ပုရေ ဝါ န ဝဋ္ဋတိ။ အယမေဝ ယော ကောစိ ဒိဝသောယေဝ။ ဣဓာပိ ကောသမ္ဗကက္ခန္ဓကေ သာမဂ္ဂိယာ သဒိသာဝ သာမဂ္ဂီ ဝေဒိတဗ္ဗာ။ ယေ ပန ကိသ္မိဉ္စိဒေဝ အပ္ပမတ္တကေ ပဝါရဏံ ဌပေတွာ သမဂ္ဂါ ဟောန္တိ၊ တေဟိ ပဝါရဏာယမေဝ ပဝါရဏာ ကာတဗ္ဗာ၊ တာဝဒေဝ န ကာတဗ္ဗာ။ ကရောန္တေဟိ အပ္ပဝါရဏာယ ပဝါရဏာ ကတာ ဟောတိ။ န ကာတဗ္ဗောယေဝါတိ နိယမေန ယဒိ ကရောတိ၊ ဒုက္ကဋန္တိ ဒဿေတိ။ တတ္ထ ဟိ ဥပေါသထကရဏေ ဒုက္ကဋံ။ ဝုတ္တဉှေတံ ‘‘န၊ ဘိက္ခဝေ၊ အနုပေါသထေ ဥပေါသထော ကာတဗ္ဗော အညတြ သင်္ဃသာမဂ္ဂိယာ’’တိ (မဟာဝ။ ၁၈၃)။

‘‘ပတ္တကာလမေဝ ¶ ပတ္တကလ္လ’’န္တိ ဣမိနာ သကတ္ထေ ဘာဝပ္ပစ္စယောတိ ဒဿေတိ။ နာသတီတိ အနွယတော ဝုတ္တမေဝ ဗျတိရေကတော ဒဠှံ ကရောတိ။

အနုရူပါတိ အရဟာ အနုစ္ဆဝိကာ၊ သာမိနောတိ ဝုတ္တံ ဟောတိ။ သဗ္ဗန္တိမေနာတိ သဗ္ဗဟေဋ္ဌိမေန စတ္တာရော၊ န တေဟိ ဝိနာ တံ ဥပေါသထကမ္မံ ကရီယတိ၊ န တေသံ ဆန္ဒော ဝါ ပါရိသုဒ္ဓိ ဝါ ဧတိ။ အဝသေသာ ¶ ပန သစေပိ သဟဿမတ္တာ ဟောန္တိ၊ သစေ သမာနသံဝါသကာ၊ သဗ္ဗေ ဆန္ဒာရဟာဝ ဟောန္တိ၊ ဆန္ဒပါရိသုဒ္ဓိံ ဒတွာ အာဂစ္ဆန္တု ဝါ၊ မာ ဝါ၊ ကမ္မံ န ကုပ္ပတိ။ ပကတတ္တာတိ အနုက္ခိတ္တာ၊ ပါရာဇိကံ အနဇ္ဈာပန္နာ စ။ ဟတ္ထပါသော နာမ ဒိယဍ္ဎဟတ္ထပ္ပမာဏော။

သီမာ စ နာမေသာ ကတမာ၊ ယတ္ထ ဟတ္ထပါသံ အဝိဇဟိတွာ ဌိတာ ကမ္မပ္ပတ္တာ နာမ ဟောန္တီတိ အနုယောဂံ သန္ဓာယ သီမံ ဒဿေန္တော ဝိဘာဂဝန္တာနံ သဘာဝဝိဘာဝနံ ဝိဘာဂဒဿနမုခေနေဝ ဟောတီတိ ‘‘သီမာ စ နာမေသာ’’တိအာဒိမာဟ။ သမ္ဘိန္ဒန္တေနာတိ မိဿီကရောန္တေန။ အဇ္ဈောတ္ထရန္တေနာတိ မဒ္ဒန္တေန၊ အန္တော ကရောန္တေနာတိ ဝုတ္တံ ဟောတိ။ ဣမာ ဝိပတ္တိသီမာယော နာမာတိ သမ္ဗန္ဓော။ ကသ္မာ ဝိပတ္တိသီမာယော နာမာတိ အာဟ ‘‘ဧကာဒသဟီ’’တိအာဒိ။ အာကာရေဟီတိ ကာရဏေဟိ။ ဝစနတောတိ ကမ္မဝဂ္ဂေ (ပရိ။ ၄၈၂ အာဒယော) ကထိတတ္တာ။ သင်္ဃကမ္မံ နာမေတံ ဝီသတိဝဂ္ဂကရဏီယပရမန္တိ အာဟ ‘‘ယတ္ထ ဧကဝီသတိ ဘိက္ခူ နိသီဒိတုံ န သက္ကောန္တီ’’တိ။ ယဿံ သီမာယံ ဟေဋ္ဌိမပရိစ္ဆေဒေန ကမ္မာရဟေန သဒ္ဓိံ ဧကဝီသတိ ဘိက္ခူ ပရိမဏ္ဍလာကာရေန နိသီဒိတုံ န သက္ကောန္တိ၊ အယံ အတိခုဒ္ဒကာ နာမာတိ အတ္ထော။ ဧဝရူပါ စ သီမာ သမ္မတာပိ အသမ္မတာ၊ ဂါမခေတ္တသဒိသာဝ ဟောတိ၊ တတ္ထ ကတံ ကမ္မံ ကုပ္ပတိ။ ဧသ နယော သေသသီမာသုပိ။

သမ္မတာတိ ဗဒ္ဓါ၊ ဝါစိတကမ္မဝါစာတိ အတ္ထော။ ကမ္မဝါစာယ ဝါစနမေဝ ဟိ ဗန္ဓနံ နာမ။ နိမိတ္တံ န ဥပဂစ္ဆတီတိ အနိမိတ္တုပဂေါ၊ တံ အနိမိတ္တုပဂံ၊ အနိမိတ္တာရဟန္တိ ဝုတ္တံ ဟောတိ။ တစသာရရုက္ခော နာမ တာလနာဠိကေရာဒိကာ။ ပံသုပုဉ္ဇဝါလုကာပုဉ္ဇာနန္တိ ပံသုရာသိဝါလုကာရာသီနံ မဇ္ဈေ။ နိဒ္ဓါရဏေ စေတံ သာမိဝစနံ။ ပေါတ္ထကေသု ပန ကတ္ထစိ ‘‘ပံသုပုဉ္ဇံ ဝါ ဝါလုကာပုဉ္ဇံ ဝါ အညတရ’’န္တိ ပါဌော ဒိဿတိ၊ သော ပန အပါဌော။ န ဟိ သော ‘‘အညတရ’’န္တိ ဣမိနာ ယုဇ္ဇတီတိ။ အန္တရာတိ နိမိတ္တုပဂနိမိတ္တာနမန္တရာ။ ဧတ္ထ ¶ စ ယာ တီဟိ နိမိတ္တေဟိ ဗဇ္ဈမာနာ အနိမိတ္တုပဂေသု တစသာရရုက္ခာဒီသု အညတရံ အန္တရာ ဧကံ နိမိတ္တံ ကတွာ သမ္မတာ၊ သာ ခဏ္ဍနိမိတ္တာ နာမ ဟောတိ။ ယာ ပန စတုပဉ္စနိမိတ္တာဒီဟိ ဗဇ္ဈမာနာ ဣမေသု တစသာရရုက္ခာဒီသု အညတရံ အန္တရာ ဧကံ နိမိတ္တံ ကတွာ သမ္မတာ၊ သာ ခဏ္ဍနိမိတ္တာ နာမ န ဟောတီတိ ဝိညာယတိ နိမိတ္တုပဂါနံ နိမိတ္တာနံ တိဏ္ဏံ သဗ္ဘာဝတော။ အဋ္ဌကထာသု ပန အဝိသေသေန ဝုတ္တံ၊ တသ္မာ ဥပပရိက္ခိတွာ ဂဟေတဗ္ဗံ။ သဗ္ဗေန သဗ္ဗန္တိ သဗ္ဗပ္ပကာရေန။ နိမိတ္တာနံ ဗဟိ ဌိတေန သမ္မတာတိ တေသံ ဗဟိ ဌိတေန ဝါစိတကမ္မဝါစာ။ နိမိတ္တာနိ ပန အန္တော စ ဗဟိ စ ဌတွာ ကိတ္တေတုံ ဝဋ္ဋန္တိ။

ဧဝံ သမ္မတာပီတိ နိမိတ္တာနိ ကိတ္တေတွာ ကမ္မဝါစာယ သမ္မတာပိ။ ဣမဿ ‘‘အသမ္မတာဝ ဟောတီ’’တိ ¶ ဣမိနာ သမ္ဗန္ဓော။ သဗ္ဗာ၊ ဘိက္ခဝေ၊ နဒီ အသီမာတိ ယာ ကာစိ နဒီလက္ခဏပ္ပတ္တာ နဒီ နိမိတ္တာနိ ကိတ္တေတွာ ‘‘ဧတံ ဗဒ္ဓသီမံ ကရောမာ’’တိ ကတာပိ အသီမာ၊ ဗဒ္ဓသီမာ န ဟောတီတိ အတ္ထော။ အတ္တနော သဘာဝေန ပန သာ ဗဒ္ဓသီမာသဒိသာ။ သဗ္ဗတ္ထ သင်္ဃကမ္မံ ကာတုံ ဝဋ္ဋတိ။ သမုဒ္ဒဇာတဿရေသုပိ ဧသေဝ နယော။ ‘‘သံသဋ္ဌဝိဋပါ’’တိ ဣမိနာ အညမညဿ အာသန္နတံ ဒီပေတိ။ ဗဒ္ဓါ ဟောတီတိ ပစ္ဆိမဒိသာဘာဂေ သီမံ သန္ဓာယ ဝုတ္တံ။ တဿာ ပဒေသန္တိ တဿာ ဧကဒေသံ။ ယတ္ထ ဌတွာ ဘိက္ခူဟိ ကမ္မံ ကာတုံ သက္ကာ ဟောတိ၊ တာဒိသံ ဧကဒေသန္တိ ဝုတ္တံ ဟောတိ။ ယတ္ထ ပန ဌိတေဟိ ကမ္မံ ကာတုံ န သက္ကာ၊ တာဒိသံ ပဒေသံ အန္တော ကရိတွာ ဗန္ဓန္တာ သီမာယ သီမံ သမ္ဘိန္ဒန္တိ နာမ၊ န တု အဇ္ဈောတ္ထရန္တိ နာမာတိ ဂဟေတဗ္ဗံ။ ဂဏ္ဌိပဒေသု ပန ‘‘သမ္ဘိန္ဒနံ ပရေသံ သီမာယ ဧကံ ဝါ ဒွေ ဝါ နိမိတ္တေ ကိတ္တေတွာ လေခါမတ္တံ ဂဟေတွာ ဗန္ဓနံ။ အဇ္ဈောတ္ထရဏံ နာမ ပရေသံ သီမာယ နိမိတ္တေ ကိတ္တေတွာ တံ သကလံ ဝါ တဿေကဒေသံ ဝါ အန္တော ကရောန္တေန တဿာ ဗဟိ ဧကိဿံ ဒွီသု ဝါ ဒိသာသု နိမိတ္တေ ကိတ္တေတွာ ဗန္ဓန’’န္တိ ဝုတ္တံ။

ပဗ္ဗတာဒီနံ နိမိတ္တာနံ သမ္ပဒါ နိမိတ္တသမ္ပတ္တိ။ ပဗ္ဗတောဝ နိမိတ္တံ ပဗ္ဗတနိမိတ္တံ။ ဧဝံ သေသေသုပိ။ ဧဝံ ဝုတ္တေသူတိ ဥပေါသထက္ခန္ဓကေ (မဟာဝ။ ၁၃၈ အာဒယော) သီမာသမ္မုတိယံ ဝုတ္တေသု။ ဣမေဟိ စ ပန အဋ္ဌဟိ နိမိတ္တေဟိ အသမ္မိဿေဟိပိ အညမညမိဿေဟိပိ သီမံ သမ္မန္နိတုံ ဝဋ္ဋတိ။ တေနာဟ ‘‘တသ္မိံ တသ္မိံ ဒိသာဘာဂေ ယထာလဒ္ဓါနိ နိမိတ္တုပဂါနိ နိမိတ္တာနီ’’တိ။ ဧကေန၊ ပန ဒွီဟိ ဝါ နိမိတ္တေဟိ သမ္မန္နိတုံ ¶ န ဝဋ္ဋတိ၊ တီဏိ ပန အာဒိံ ကတွာ ဝုတ္တပ္ပကာရာနံ နိမိတ္တာနံ သတေနာပိ ဝဋ္ဋတိ။ ‘‘ပုရတ္ထိမာယ ဒိသာယ ကိံ နိမိတ္တ’’န္တိ ဝိနယဓရေန ပုစ္ဆိတဗ္ဗံ၊ ‘‘ပဗ္ဗတော၊ ဘန္တေ’’တိ ဝုတ္တေ ပုန ဝိနယဓရေနေဝ ‘‘ဧသော ပဗ္ဗတော နိမိတ္တ’’န္တိ ဧဝံ နိမိတ္တံ ကိတ္တေတဗ္ဗံ။ ‘‘ဧတံ ပဗ္ဗတံ နိမိတ္တံ ကရောမ၊ နိမိတ္တံ ကရိဿာမ၊ နိမိတ္တံ ကတော၊ နိမိတ္တံ ဟောတု၊ ဟောတိ ဘဝိဿတီ’’တိ ဧဝံ ပန ကိတ္တေတုံ န ဝဋ္ဋတိ။ ပါသာဏာဒီသုပိ ဧသေဝ နယော။ တေနာဟ ‘‘ပုရတ္ထိမာယ ဒိသာယ ကိံ နိမိတ္တ’’န္တိအာဒိ။ ‘‘ပဗ္ဗတော၊ ဘန္တေ၊ ဥဒကံ၊ ဘန္တေ’’တိ ဧဝံ ပန ဥပသမ္ပန္နော ဝါ အာစိက္ခတု၊ အနုပသမ္ပန္နော ဝါ၊ ဝဋ္ဋတိယေဝ။ အာဒိသဒ္ဒေန ‘‘ပုရတ္ထိမာယ အနုဒိသာယ ကိံ နိမိတ္တံ? ပါသာဏော၊ ဘန္တေ၊ ဧသော ပါသာဏော နိမိတ္တံ။ ဒက္ခိဏာယ ဒိသာယ၊ ဒက္ခိဏာယ အနုဒိသာယ၊ ပစ္ဆိမာယ ဒိသာယ၊ ပစ္ဆိမာယ အနုဒိသာယ၊ ဥတ္တရာယ ဒိသာယ၊ ဥတ္တရာယ အနုဒိသာယ ကိံ နိမိတ္တံ? ဥဒကံ၊ ဘန္တေ၊ ဧတံ ဥဒကံ နိမိတ္တ’’န္တိ ဣဒံ သင်္ဂဏှာတိ။ ဧတ္ထ ပန အဋ္ဌတွာ ပုန ‘‘ပုရတ္ထိမာယ ဒိသာယ ကိံ နိမိတ္တံ? ပဗ္ဗတော၊ ဘန္တေ၊ ဧသော ပဗ္ဗတော နိမိတ္တ’’န္တိ ဧဝံ ပဌမံ ကိတ္တိတနိမိတ္တံ ကိတ္တေတွာဝ ဌပေတဗ္ဗံ။ ဧဝဉှိ နိမိတ္တေန နိမိတ္တံ ဃဋိတံ ဟောတိ။ သမ္မာ ကိတ္တေတွာတိ အညမညနာမဝိပရိယာယေန၊ အနိမိတ္တာနံ နာမေန စ အကိတ္တေတွာ ယထာဝုတ္တေနေဝ နယေန ကိတ္တေတွာ။ သမ္မတာတိ ‘‘သုဏာတု မေ၊ ဘန္တေ’’တိအာဒိနာ နယေန ဥပေါသထက္ခန္ဓကေ (မဟာဝ။ ၁၃၉ အာဒယော) ¶ ဝုတ္တာယ ပရိသုဒ္ဓါယ ဉတ္တိဒုတိယကမ္မဝါစာယ ဗဒ္ဓါ။ တတ္ထ နိမိတ္တာနိ သကိံ ကိတ္တိတာနိပိ ကိတ္တိတာနေဝ ဟောန္တိ။ အန္ဓကဋ္ဌကထာယံ ပန တိက္ခတ္တုံ သီမမဏ္ဍလံ သမ္ဗန္ဓန္တေန နိမိတ္တံ ကိတ္တေတဗ္ဗ’’န္တိ (မဟာဝ။ အဋ္ဌ။ ၁၃၈) ဝုတ္တံ။

တတြာတိ တေသု အဋ္ဌသု နိမိတ္တေသု။ နိမိတ္တုပဂတာတိ နိမိတ္တယောဂျတာ။ ‘‘ဟတ္ထိပ္ပမာဏတော ပဋ္ဌာယာ’’တိ ဝစနတော ဟတ္ထိပ္ပမာဏောပိ နိမိတ္တုပဂေါယေဝ။ ဟတ္ထီ ပန သတ္တရတနော ဝါ အဍ္ဎဋ္ဌရတနော (သာရတ္ထ။ ဋီ။ မဟာဝဂ္ဂ ၃။၁၃၈) ဝါ။ တတော ဩမကတရောတိ တတော ဟတ္ထိပ္ပမာဏတော ခုဒ္ဒကတရော။ သစေ စတူသု ဒိသာသု စတ္တာရော ဝါ တီသု ဝါ တယော ပဗ္ဗတာ ဟောန္တိ၊ စတူဟိ၊ တီဟိ ဝါ ပဗ္ဗတနိမိတ္တေဟေဝ သမ္မန္နိတုမ္ပိ ဝဋ္ဋတိ၊ ဒွီဟိ ပန နိမိတ္တေဟိ၊ ဧကေန ဝါ သမ္မန္နိတုံ န ဝဋ္ဋတိ။ ဣတော ပရေသု ပါသာဏနိမိတ္တာဒီသုပိ ဧသေဝ နယော။ တသ္မာ ပဗ္ဗတနိမိတ္တံ ကရောန္တေန ပုစ္ဆိတဗ္ဗံ ‘‘ဧကာဗဒ္ဓါ၊ န ဧကာဗဒ္ဓါ’’တိ။ သစေ ¶ ဧကာဗဒ္ဓါ ဟောတိ၊ န ကာတဗ္ဗော။ တဉှိ စတူသု ဝါ အဋ္ဌသု ဝါ ဒိသာသု ကိတ္တေန္တေနာပိ ဧကမေဝ နိမိတ္တံ ကိတ္တိတံ ဟောတိ။ တသ္မာ ယော ဧဝံ စက္ကသဏ္ဌာနေန ဝိဟာရံ ပရိက္ခိပိတွာ ဌိတော ပဗ္ဗတော၊ တံ ဧကဒိသာယ ကိတ္တေတွာ အညာသု ဒိသာသု တံ ဗဟိဒ္ဓါ ကတွာ အန္တော အညာနိ နိမိတ္တာနိ ကိတ္တေတဗ္ဗာနိ။ သစေ ပဗ္ဗတဿ တတိယဘာဂံ ဝါ ဥပဍ္ဎံ ဝါ အန္တောသီမာယ ကတ္တုကာမာ ဟောန္တိ၊ ပဗ္ဗတံ အကိတ္တေတွာ ယတ္တကံ ပဒေသံ အန္တော ကတ္တုကာမာ၊ တဿ ပရတော တသ္မိံယေဝ ပဗ္ဗတေ ဇာတရုက္ခဝမ္မိကာဒီသု အညတရံ နိမိတ္တံ ကိတ္တေတဗ္ဗံ။ သစေ ယောဇနဒွိယောဇနပ္ပမာဏံ သဗ္ဗံ ပဗ္ဗတံ အန္တော ကတ္တုကာမာ ဟောန္တိ၊ ပဗ္ဗတဿ ပရတော ဘူမိယံ ဇာတရုက္ခဝမ္မိကာဒီနိ နိမိတ္တာနိ ကိတ္တေတဗ္ဗာနိ (မဟာဝ။ အဋ္ဌ။ ၁၃၈၊ ဝိ။ သင်္ဂ။ အဋ္ဌ။ ၁၅၈)။

သင်္ခံ ဂစ္ဆတီတိ ဂဏနံ ဝေါဟာရံ ဂစ္ဆတီတိ အတ္ထော။ ဒွတ္တိံသပလဂုဠပိဏ္ဍပရိမာဏောတိ ထူလတာယ၊ န တုလဂဏနာယ။ တတ္ထ ‘‘ဧကပလံ နာမ ဒသကလဉ္ဇ’’န္တိ ဝဒန္တိ။ ဣဋ္ဌကာ မဟန္တာပိ န ဝဋ္ဋတိ။ တထာ အနိမိတ္တုပဂပါသာဏာနံ ရာသိ၊ ပဂေဝ ပံသုဝါလုကာရာသိ။ ဘူမိသမော ခလမဏ္ဍလသဒိသော ပိဋ္ဌိပါသာဏော ဝါ ဘူမိတော ခါဏုကော ဝိယ ဥဋ္ဌိတပါသာဏော ဝါ ဟောတိ၊ သောပိ ပမာဏူပဂေါ စေ၊ ဝဋ္ဋတိ။ ‘‘ပိဋ္ဌိပါသာဏော ပန အတိမဟန္တောပိ ပါသာဏသင်္ခမေဝ ဂစ္ဆတီတိ အာဟ ‘‘ပိဋ္ဌိပါသာဏော ပနာ’’တိအာဒိ။ တသ္မာ သစေ မဟတော ပိဋ္ဌိပါသာဏဿ ဧကံ ပဒေသံ အန္တောသီမာယံ ကတ္တုကာမာ ဟောန္တိ၊ တံ အကိတ္တေတွာ တဿုပရိ အညော ပါသာဏော ကိတ္တေတဗ္ဗော။ သစေ ပိဋ္ဌိပါသာဏုပရိ ဝိဟာရံ ကရောန္တိ၊ ဝိဟာရမဇ္ဈေန စ ပိဋ္ဌိပါသာဏော ဝိနိဝိဇ္ဈိတွာ ဂစ္ဆတိ၊ ဧဝရူပေါ ပိဋ္ဌိပါသာဏော န ဝဋ္ဋတိ။ သစေ ဟိ တံ ကိတ္တေန္တိ၊ နိမိတ္တဿုပရိ ဝိဟာရော ဟောတိ၊ နိမိတ္တဉ္စ ¶ နာမ ဗဟိသီမာယံ ဟောတိ၊ ဝိဟာရောပိ ဗဟိသီမာယံ အာပဇ္ဇတိ။ ဝိဟာရံ ပရိက္ခိပိတွာ ဌိတပိဋ္ဌိပါသာဏော ပန ဧကတ္ထ ကိတ္တေတွာ အညတ္ထ န ကိတ္တေတဗ္ဗော။

ဝနနိမိတ္တေ တိဏဝနံ ဝါ တစသာရရုက္ခဝနံ ဝါ န ဝဋ္ဋတီတိ အာဟ ‘‘အန္တောသာရေဟီ’’တိအာဒိ။ အန္တောသာရာ နာမ အမ္ဗဇမ္ဗုပနသာဒယော။ အန္တောသာရမိဿကေဟီတိ အန္တော သာရော ယေသံ တေ အန္တောသာရာ၊ တေဟိ မိဿကာ အန္တောသာရမိဿကာ၊ တေဟိ။ စတုပဉ္စရုက္ခမတ္တမ္ပီတိ ဟေဋ္ဌိမပရိစ္ဆေဒနာဟ ¶ ။ ဥက္ကံသတော ပန ယောဇနသတိကမ္ပိ ဝနံ ဝဋ္ဋတိ။ ဧတ္ထ ပန စတုရုက္ခမတ္တဉ္စေ၊ တယော သာရတော၊ ဧကော အသာရတော။ ပဉ္စရုက္ခမတ္တဉ္စေ၊ တယော သာရတော၊ ဒွေ အသာရတောတိ ဂဟေတဗ္ဗံ။ သစေ ပန ဝနမဇ္ဈေ ဝိဟာရံ ကရောန္တိ၊ တံ ဝနံ န ကိတ္တေတဗ္ဗံ။ ဧကဒေသံ အန္တောသီမာယံ ကတ္တုကာမေဟိပိ ဝနံ အကိတ္တေတွာ တတ္ထ ရုက္ခပါသာဏာဒယော ကိတ္တေတဗ္ဗာ၊ ဝိဟာရံ ပရိက္ခိပိတွာ ဌိတဝနံ ဧကတ္ထ ကိတ္တေတွာ အညတ္ထ န ကိတ္တေတဗ္ဗံ (မဟာဝ။ အဋ္ဌ။ ၁၃၈)။

ရုက္ခနိမိတ္တေပိ တစသာရရုက္ခော န ဝဋ္ဋတီတိ အာဟ ‘‘အန္တောသာရော’’တိ။ ‘‘ဘူမိယံ ပတိဋ္ဌိတော’’တိ ဣမိနာ ကုဋသရာဝါဒီသု ဌိတံ ပဋိက္ခိပတိ။ တတော အပနေတွာ ပန တင်္ခဏမ္ပိ ဘူမိယံ ရောပေတွာ ကောဋ္ဌကံ ကတွာ ဥဒကံ အာသိဉ္စိတွာ ကိတ္တေတုံ ဝဋ္ဋတိ၊ နဝမူလသာခါနိဂ္ဂမနံ အကာရဏံ။ ခန္ဓံ ဆိန္ဒိတွာ ရောပိတေ ပန ဧတံ ယုဇ္ဇတိ။ သူစိဒဏ္ဍကပ္ပမာဏောတိ ‘‘သီဟဠဒီပေ လေခနဒဏ္ဍပ္ပမာဏော’’တိ ဝဒန္တိ (သာရတ္ထ။ ဋီ။ မဟာဝဂ္ဂ ၃။၁၃၈)၊ သော စ ကနိဋ္ဌင်္ဂုလိပရိမာဏောတိ ဒဋ္ဌဗ္ဗော။ ဣဒံ ပန ရုက္ခနိမိတ္တံ ကိတ္တေန္တေန ‘‘ရုက္ခော’’တိပိ၊ ‘‘သာကရုက္ခော၊ သာလရုက္ခော’’တိပိ ဝတ္တုံ ဝဋ္ဋတိ။ ဧကာဗဒ္ဓံ ပန သုပ္ပတိဋ္ဌိတနိဂြောဓသဒိသံ ရုက္ခံ ဧကတ္ထ ကိတ္တေတွာ အညတ္ထ ကိတ္တေတုံ န ဝဋ္ဋတိ။

မဂ္ဂနိမိတ္တေ အရညခေတ္တနဒီတဠာကမဂ္ဂါဒယော န ဝဋ္ဋန္တီတိ အာဟ ‘‘ဇင်္ဃမဂ္ဂေါ ဝါ ဟောတူ’’တိအာဒိ။ ယော ပန ဇင်္ဃမဂ္ဂေါ သကဋမဂ္ဂတော ဩက္ကမိတွာ ပုန သကဋမဂ္ဂမေဝ ဩတရတိ၊ ယေ ဝါ ဇင်္ဃမဂ္ဂသကဋမဂ္ဂါ အဝလဉ္ဇိတာ၊ တေ န ဝဋ္ဋန္တိ။ တေနာဟ ‘‘ဇင်္ဃသတ္ထသကဋသတ္ထေဟီ’’တိအာဒိ။ ဧတ္ထ စ သစေ သကဋမဂ္ဂဿ အန္တိမစက္ကမဂ္ဂံ နိမိတ္တံ ကရောန္တိ၊ မဂ္ဂေါ ဗဟိသီမာယ ဟောတိ။ သစေ ဗာဟိရစက္ကမဂ္ဂံ နိမိတ္တံ ကရောန္တိ၊ ဗာဟိရစက္ကမဂ္ဂေါဝ ဗဟိသီမာယ ဟောတိ၊ သေသံ အန္တောသီမံ ဘဇတီတိ ဝေဒိတဗ္ဗံ။ သစေပိ ဒွေ မဂ္ဂါ နိက္ခမိတွာ ပစ္ဆာ သကဋဓုရမိဝ ဧကီဘဝန္တိ၊ ဒွိဓာ ဘိန္နဋ္ဌာနေ ဝါ သမ္ဗန္ဓဋ္ဌာနေ ဝါ သကိံ ကိတ္တေတွာ ပုန န ကိတ္တေတဗ္ဗာ။ ဧကာဗဒ္ဓနိမိတ္တဉှေတံ ဟောတိ။

သစေ ¶ ဝိဟာရံ ပရိက္ခိပိတွာ စတ္တာရော မဂ္ဂါ စတူသု ဒိသာသု ဂစ္ဆန္တိ၊ မဇ္ဈေ ဧကံ ကိတ္တေတွာ အပရံ ကိတ္တေတုံ န ဝဋ္ဋတိ။ ဧကာဗဒ္ဓနိမိတ္တဉှေတံ။ ကောဏံ ဝိနိဝိဇ္ဈိတွာ ဂတံ ပန ပရဘာဂေ ကိတ္တေတုံ ဝဋ္ဋတိ။ ဝိဟာရမဇ္ဈေန ¶ ဝိနိဝိဇ္ဈိတွာ ဂတမဂ္ဂေါ ပန န ကိတ္တေတဗ္ဗော။ ကိတ္တိတေ ပန နိမိတ္တဿ ဥပရိ ဝိဟာရော ဟောတိ။ ဣမဉ္စ မဂ္ဂံ ကိတ္တေန္တေန ‘‘မဂ္ဂေါ ပဇ္ဇော ပထော’’တိအာဒိနာ (စူဠနိ။ ပါရာယနတ္ထုတိဂါထာနိဒ္ဒေသ ၁၀၁) ဝုတ္တေသု ဒသသု နာမေသု ယေန ကေနစိ နာမေန ကိတ္တေတုံ ဝဋ္ဋတိ။ ပရိခါသဏ္ဌာနေန ဝိဟာရံ ပရိက္ခိပိတွာ ဂတမဂ္ဂေါ ဧကတ္ထ ကိတ္တေတွာ အညတ္ထ ကိတ္တေတုံ န ဝဋ္ဋတိ။

ယံ ပန အဗဒ္ဓသီမာလက္ခဏေ နဒိံ ဝက္ခာမာတိ ‘‘ယဿာ ဓမ္မိကာနံ ရာဇူနံ ကာလေ’’တိအာဒိနာ (ကင်္ခါ။ အဋ္ဌ။ နိဒါနဝဏ္ဏနာ) ဥဒကုက္ခေပသီမာယံ နဒိယာ ဝက္ခမာနတ္တာ ဝုတ္တံ။ ယာ ပန နဒီ မဂ္ဂေါ ဝိယ သကဋဓုရသဏ္ဌာနေန ဝါ ပရိခါသဏ္ဌာနေန ဝါ ဝိဟာရံ ပရိက္ခိပိတွာ ဂတာ၊ နံ ဧကတ္ထ ကိတ္တေတွာ အညတ္ထ ကိတ္တေတုံ န ဝဋ္ဋတိ။ ဝိဟာရဿ စတူသု ဒိသာသု အညမညံ ဝိနိဝိဇ္ဈိတွာ ဂတေ နဒီစတုက္ကေပိ ဧသေဝ နယော။ အသမ္မိဿနဒိယော ပန စတဿောပိ ကိတ္တေတုံ ဝဋ္ဋတိ။ သစေ ဝတိံ ကရောန္တော ဝိယ ရုက္ခပါဒေ နိခဏိတွာ ဝလ္လိပလာလာဒီဟိ နဒီသောတံ ရုမ္ဘန္တိ၊ ဥဒကမ္ပိ အဇ္ဈောတ္ထရိတွာ အာဝရဏံ ပဝတ္တတိယေဝ၊ နိမိတ္တံ ကာတုံ ဝဋ္ဋတိ။ ယထာ ပန ဥဒကံ နပ္ပဝတ္တတိ၊ ဧဝံ သေတုမှိ ကတေ အပ္ပဝတ္တမာနာ နဒီ နိမိတ္တံ ကာတုံ န ဝဋ္ဋတိ။ ပဝတ္တနဋ္ဌာနေ နဒီနိမိတ္တံ၊ အပ္ပဝတ္တနဋ္ဌာနေ ဥဒကနိမိတ္တံ ကာတုံ ဝဋ္ဋတိ။

ယာ ပန ဒုဗ္ဗုဋ္ဌိကာလေ ဝါ ဂိမှေ ဝါ နိရုဒကဘာဝေန နပ္ပဝတ္တတိ၊ သာ ဝဋ္ဋတိ။ မဟာနဒိတော ဥဒကမာတိကံ နီဟရန္တိ၊ သာ ကုန္နဒီသဒိသာ ဟုတွာ တီဏိ သဿာနိ သမ္ပာဒေန္တီ နိစ္စံ ပဝတ္တတိ။ ကိဉ္စာပိ ပဝတ္တတိ၊ နိမိတ္တံ ကာတုံ န ဝဋ္ဋတိ။ ယာ ပန မူလေ မဟာနဒိတော နိဂ္ဂတာပိ ကာလန္တရေန တေနေဝ နိဂ္ဂတမဂ္ဂေန နဒိံ ဘိန္ဒိတွာ သယမေဝ ဂစ္ဆတိ၊ ဂစ္ဆန္တီ စ ပရတော သုသုမာရာဒိသမာကိဏ္ဏာ နာဝါဒီဟိ သဉ္စရိတဗ္ဗာ နဒီ ဟောတိ၊ တံ နိမိတ္တံ ကာတုံ ဝဋ္ဋတိ။

အသန္ဒမာနန္တိ အပ္ပဝတ္တမာနံ။ သန္ဒမာနံ နာမ ဩဃနဒီဥဒကဝါဟကမာတိကာသု ဥဒကံ။ ဝုတ္တပရိစ္ဆေဒကာလံ အတိဋ္ဌန္တန္တိ ‘‘ယာဝ ကမ္မဝါစာပရိယောသာနာ သဏ္ဌမာနက’’န္တိ ဝုတ္တပရိစ္ဆေဒကာလံ အတိဋ္ဌန္တံ။ ဘာဇနဂတန္တိ နာဝါစာဋိအာဒီသု ဘာဇနေသု ဂတံ။ ယံ ပန အန္ဓကဋ္ဌကထာယံ ‘‘ဂမ္ဘီရေသု အာဝါဋာဒီသု ဥက္ခေပိမံ ဥဒကံ နိမိတ္တံ န ကာတဗ္ဗ’’န္တိ (မဟာဝ။ အဋ္ဌ။ ၁၃၈၊ ဝိ။ သင်္ဂ။ အဋ္ဌ။ ၁၅၈) ဝုတ္တံ၊ တံ ဒုဝုတ္တံ ¶ ၊ အတ္တနော မတိမတ္တမေဝ။ ဌိတံ ပန အန္တမသော သူကရခတာယပိ ဂါမဒါရကာနံ ကီဠနဝါပိယမ္ပိ သစေ ယာဝ ကမ္မဝါစာပရိယောသာနံ တိဋ္ဌတိ၊ အပ္ပံ ဝါ ¶ ဟောတု၊ ဗဟု ဝါ၊ ဝဋ္ဋတိယေဝ။ တသ္မိံ ပန ဌာနေ နိမိတ္တသညာကရဏတ္ထံ ပါသာဏဝါလိကာပံသုအာဒိရာသိ ဝါ ပါသာဏတ္ထမ္ဘော ဝါ ဒါရုတ္ထမ္ဘော ဝါ ကာတဗ္ဗော။

ဧဝံ နိမိတ္တသမ္ပတ္တိယုတ္တတံ ဒဿေတွာ ဣဒါနိ ယေဟိ အာကာရေဟိ ဗဒ္ဓါ ပရိသာသမ္ပတ္တိယုတ္တာ နာမ ဟောတိ၊ တံ ဒဿေတုံ ‘‘ပရိသာသမ္ပတ္တိယာ ယုတ္တာ နာမာ’’တိအာဒိမာဟ။ ဣမဿ ပန ကမ္မဿ စတုဝဂ္ဂကရဏီယတ္တာ ‘‘စတူဟိ ဘိက္ခူဟီ’’တိ ဝုတ္တံ။ ဣမဉ္စ သီမံ ဗန္ဓိတုကာမေဟိ သာမန္တဝိဟာရေသု ဘိက္ခူ တဿ တဿ ဝိဟာရဿ သီမာပရိစ္ဆေဒံ ပုစ္ဆိတွာ ဗဒ္ဓသီမဝိဟာရာနံ သီမာယ သီမန္တရိကံ၊ အဗဒ္ဓသီမဝိဟာရာနံ သီမာယ ဥပစာရံ ဌပေတွာ ဒိသာစာရိကဘိက္ခူနံ နိဿဉ္စာရသမယေ သစေ ဧကသ္မိံ ဂါမခေတ္တေ သီမံ ဗန္ဓိတုကာမာ၊ ယေ တတ္ထ ဗဒ္ဓသီမဝိဟာရာ၊ တေသု ဘိက္ခူနံ ‘‘မယံ အဇ္ဇ သီမံ ဗန္ဓိဿာမ၊ တုမှေ သကသကသီမာပရိစ္ဆေဒတော မာ နိက္ခမိတ္ထာ’’တိ ပေသေတဗ္ဗံ။ ယေ အဗဒ္ဓသီမဝိဟာရာ၊ တေသု ဘိက္ခူ ဧကဇ္ဈံ သန္နိပါတာပေတဗ္ဗာ၊ ဆန္ဒာရဟာနံ ဆန္ဒော အာဟရာပေတဗ္ဗော။ တေန ဝုတ္တံ ‘‘ယာဝတိကာ တသ္မိံ ဂါမခေတ္တေ’’တိအာဒိ။ တသ္မိံ ဂါမခေတ္တေတိ ယသ္မိံ ဂါမခေတ္တေ ဌတွာ ကမ္မဝါစံ ဝါစေန္တိ၊ တသ္မိံ ဂါမခေတ္တေ။ ‘‘သစေ အညာနိပိ ဂါမခေတ္တာနိ အန္တော ကတ္တုကာမာ၊ တေသု ဂါမေသု ယေ ဘိက္ခူ ဝသန္တိ၊ တေဟိပိ အာဂန္တဗ္ဗံ၊ အနာဂစ္ဆန္တာနံ ဆန္ဒော အာဟရိတဗ္ဗော’’တိ မဟာသုမတ္ထေရော အာဟ။ မဟာပဒုမတ္ထေရော ပနာဟ ‘‘နာနာဂါမခေတ္တာနိ နာမ ပါဋိယေက္ကံ ဗဒ္ဓသီမာသဒိသာနိ၊ န တတော ဆန္ဒပါရိသုဒ္ဓိ အာဂစ္ဆတိ။ အန္တောနိမိတ္တဂတေဟိ ပန ဘိက္ခူဟိ အာဂန္တဗ္ဗ’’န္တိ ဝတွာ ပုန အာဟ ‘‘သမာနသံဝါသကသီမာသမ္မန္နနကာလေ အာဂမနမ္ပိ အနာဂမနမ္ပိ ဝဋ္ဋတိ၊ အဝိပ္ပဝါသသီမာသမ္မန္နနကာလေ ပန အန္တောနိမိတ္တဂတေဟိ အာဂန္တဗ္ဗံ။ အနာဂစ္ဆန္တာနံ ဆန္ဒော အာဟရိတဗ္ဗော’’တိ (မဟာဝ။ အဋ္ဌ။ ၁၃၈)။

ဣဒါနိ ယေဟိ အာကာရေဟိ သမ္မတာ ကမ္မဝါစာသမ္ပတ္တိယုတ္တာ နာမ ဟောတိ၊ တံ ဒဿေတုံ ‘‘ကမ္မဝါစာသမ္ပတ္တိယာ ယုတ္တာ နာမာ’’တိအာဒိမာဟ။ အာဒိသဒ္ဒေန။ ‘‘ယဒိ သင်္ဃဿ ပတ္တကလ္လံ၊ သင်္ဃော ဧတေဟိ နိမိတ္တေဟိ သီမံ သမ္မန္နေယျ သမာနသံဝါသံ ဧကူပေါသထံ၊ ဧသာ ဉတ္တိ။ သုဏာတု ¶ မေ၊ ဘန္တေ၊ သင်္ဃော၊ ယာဝတာ သမန္တာ နိမိတ္တာ ကိတ္တိတာ၊ သင်္ဃော ဧတေဟိ နိမိတ္တေဟိ သီမံ သမ္မန္နတိ သမာနသံဝါသံ ဧကူပေါသထံ၊ ယဿာယသ္မတော ခမတိ ဧတေဟိ နိမိတ္တေဟိ သီမာယ သမ္မုတိ သမာနသံဝါသာယ ဧကူပေါသထာယ၊ သော တုဏှဿ။ ယဿ နက္ခမတိ၊ သော ဘာသေယျ။ သမ္မတာ သီမာ သင်္ဃေန ဧတေဟိ နိမိတ္တေဟိ သမာနသံဝါသာ ဧကူပေါသထာ၊ ခမတိ သင်္ဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ (မဟာဝ။ ၁၃၉) ဣမံ ပါဠိသေသံ သင်္ဂဏှာတိ။ ဝုတ္တာယာတိ ဥပေါသထက္ခန္ဓကေ ဝုတ္တာယ။ ဉတ္တိဒေါသအနုဿာဝနဒေါသေဟိ ဝိရဟိတတ္တာ ပရိသုဒ္ဓါယ။

ခဏ္ဍသီမာ (မဟာဝ။ အဋ္ဌ။ ၁၃၈၊ သာရတ္ထ။ ဋီ။ မဟာဝဂ္ဂ ၃။၁၃၈၊ ဝဇိရ။ ဋီ။ မဟာဝဂ္ဂ ၁၃၈) ¶ နာမ ခုဒ္ဒကသီမာ။ သမာနသံဝါသကတ္ထံ သမ္မတာ သီမာ သမာနသံဝါသကသီမာ။ အဝိပ္ပဝါသတ္ထံ သမ္မတာ သီမာ အဝိပ္ပဝါသသီမာ။ ဣမာသု ပန တီသု သီမံ သမ္မန္နန္တေဟိ ပဗ္ဗဇ္ဇုပသမ္ပဒါဒီနံ သင်္ဃကမ္မာနံ သုခကရဏတ္ထံ ပဌမံ ခဏ္ဍသီမာ ဗန္ဓိတဗ္ဗာ။ တံ ပန ဗန္ဓန္တေဟိ ဝတ္တံ ဇာနိတဗ္ဗံ။ သစေ ဟိ ဗောဓိစေတိယဘတ္တသာလာဒီနိ သဗ္ဗဝတ္ထူနိ ပတိဋ္ဌာပေတွာ ကတဝိဟာရေ ဗန္ဓန္တိ၊ ဝိဟာရမဇ္ဈေ ဗဟူနံ သမောသရဏဋ္ဌာနေ အဗန္ဓိတွာ ဝိဟာရပစ္စန္တေ ဝိဝိတ္တောကာသေ ဗန္ဓိတဗ္ဗာ။ အကတဝိဟာရေ ဗန္ဓန္တေဟိ ဗောဓိစေတိယာဒီနံ သဗ္ဗဝတ္ထူနံ ဌာနံ သလ္လက္ခေတွာ ယထာ ပတိဋ္ဌိတေသု ဝတ္ထူသု ဝိဟာရပစ္စန္တေ ဝိဝိတ္တောကာသေ ဟောတိ၊ ဧဝံ ဗန္ဓိတဗ္ဗာ။ သာ ဟေဋ္ဌိမပရိစ္ဆေဒေန သစေ ဧကဝီသတိဘိက္ခူ ဂဏှာတိ၊ ဝဋ္ဋတိ။ တတော ဩရံ န ဝဋ္ဋတိ။ ပရံ ဘိက္ခုသဟဿံ ဂဏှန္တီပိ ဝဋ္ဋတိ။ တံ ဗန္ဓန္တေဟိ သီမာမာဠကဿ သမန္တာ နိမိတ္တုပဂါ ပါသာဏာ ဌပေတဗ္ဗာ၊ န ခဏ္ဍသီမာယ ဌိတေဟိ မဟာသီမာ ဗန္ဓိတဗ္ဗာ၊ န မဟာသီမာယ ဌိတေဟိ ခဏ္ဍသီမာ။ ခဏ္ဍသီမာယမေဝ ပန ဌတွာ ခဏ္ဍသီမာ ဗန္ဓိတဗ္ဗာ၊ မဟာသီမာယမေဝ ဌတွာ မဟာသီမာ။

တတြာယံ ဗန္ဓနဝိဓိ – သမန္တာ ‘‘ဧသော ပါသာဏော နိမိတ္တ’’န္တိ ဧဝံ နိမိတ္တာနိ ကိတ္တေတွာ ကမ္မဝါစာယ သီမာ သမ္မန္နိတဗ္ဗာ။ အထ တဿာ ဧဝ ဒဠှီကမ္မတ္ထံ အဝိပ္ပဝါသကမ္မဝါစာ ကာတဗ္ဗာ။ ဧဝဉှိ ‘‘သီမံ သမူဟနိဿာမာ’’တိ အာဂတာ သမူဟနိတုံ န သက္ခိဿန္တိ။ သီမံ သမ္မန္နိတွာ ဗဟိ သီမန္တရိကပါသာဏာ ဌပေတဗ္ဗာ၊ သီမန္တရိကာ ပစ္ဆိမကောဋိယာ စတုရင်္ဂုလပ္ပမာဏာပိ (မဟာဝ။ အဋ္ဌ။ ၁၃၈၊ ဝိ။ သင်္ဂ။ အဋ္ဌ။ ၁၆၃) ဝဋ္ဋတိ။ သစေ ပန ဝိဟာရော မဟာ ဟောတိ၊ ဒွေပိ တိဿောပိ တတုတ္တရိပိ ခဏ္ဍသီမာယော ဗန္ဓိတဗ္ဗာ။

ဧဝံ ¶ ခဏ္ဍသီမံ သမ္မန္နိတွာ မဟာသီမာသမ္မုတိကာလေ ခဏ္ဍသီမတော နိက္ခမိတွာ မဟာသီမာယံ ဌတွာ သမန္တာ အနုပရိယာယန္တေဟိ သီမန္တရိကပါသာဏာ ကိတ္တေတဗ္ဗာ။ တတော အဝသေသနိမိတ္တေ ကိတ္တေတွာ ဟတ္ထပါသံ အဝိဇဟန္တေဟိ ကမ္မဝါစာယ သမာနသံဝါသကသီမံ သမ္မန္နိတွာ တဿာ ဒဠှီကမ္မတ္ထံ အဝိပ္ပဝါသကမ္မဝါစာပိ ကာတဗ္ဗာ။ ဧဝဉှိ ‘‘သီမံ သမူဟနိဿာမာ’’တိ အာဂတာ သမူဟနိတုံ န သက္ခိဿန္တိ။ သစေ ပန ခဏ္ဍသီမာယ နိမိတ္တာနိ ကိတ္တေတွာ တတော သီမန္တရိကာယ နိမိတ္တာနိ ကိတ္တေတွာ မဟာသီမာယ နိမိတ္တာနိ ကိတ္တေန္တိ၊ ဧဝံ တီသု ဌာနေသု နိမိတ္တာနိ ကိတ္တေတွာ ယံ သီမံ ဣစ္ဆန္တိ၊ တံ ပဌမံ ဗန္ဓိတုံ ဝဋ္ဋတိ။ ဧဝံ သန္တေပိ ယထာဝုတ္တနယေန ခဏ္ဍသီမတောဝ ပဋ္ဌာယ ဗန္ဓိတဗ္ဗာ။ ဧဝံ ဗဒ္ဓါသု ပန သီမာသု ခဏ္ဍသီမာယံ ဌိတာ ဘိက္ခူ မဟာသီမာယံ ကမ္မံ ကရောန္တာနံ န ကောပေန္တိ၊ မဟာသီမာယံ ဝါ ဌိတာ ခဏ္ဍသီမာယံ ကရောန္တာနံ။ သီမန္တရိကာယ ပန ဌိတာ ဥဘိန္နမ္ပိ န ကောပန္တိ။ ဂါမခေတ္တေ ဌတွာ ကမ္မံ ကရောန္တာနံ ¶ ပန သီမန္တရိကာယ ဌိတာ ကောပေန္တိ။ သီမန္တရိကာ ဟိ ဂါမခေတ္တံ ဘဇတိ။ အဝိပ္ပဝါသသီမာသမ္မန္နနေ ကတေ သတိ သာ စ အဝိပ္ပဝါသသီမာ နာမ ဟောတိ။ တေနာဟ ‘‘တဿာယေဝ ပဘေဒေါ’’တိ။ တဿာယေဝါတိ ဗဒ္ဓသီမာယ ဧဝ။

အယံ ပန ဝိသေသော – ‘‘ဌပေတွာ ဂါမဉ္စ ဂါမူပစာရဉ္စာ’’တိ (မဟာဝ။ ၁၄၄) ဝစနတော အဝိပ္ပဝါသသီမာ ဂါမဉ္စ ဂါမူပစာရဉ္စ န ဩတရတိ၊ သမာနသံဝါသကသီမာ ပန တတ္ထာပိ ဩတရတိ။ သမာနသံဝါသကသီမာ စေတ္ထ အတ္တနော ဓမ္မတာယ ဂစ္ဆတိ၊ အဝိပ္ပဝါသသီမာ ပန ယတ္ထ သမာနသံဝါသကသီမာ၊ တတ္ထေဝ ဂစ္ဆတိ။ န ဟိ တဿာ ဝိသုံ နိမိတ္တကိတ္တနံ အတ္ထိ။ တတ္ထ သစေ အဝိပ္ပဝါသာယ သမ္မုတိကာလေ ဂါမော အတ္ထိ၊ တံ သာ န ဩတရတိ။ သစေ ပန သမ္မတာယ သီမာယ ပစ္ဆာ ဂါမော နိဝိသတိ၊ သောပိ သီမာသင်္ခမေဝ ဂစ္ဆတိ။ ယထာ စ ပစ္ဆာ နိဝိဋ္ဌော၊ ဧဝံ ပဌမံ နိဝိဋ္ဌဿ ပစ္ဆာ ဝဍ္ဎိတပ္ပဒေသောပိ သီမာသင်္ခမေဝ ဂစ္ဆတိ။ သစေပိ သီမာသမ္မုတိကာလေ ဂေဟာနိ ကတာနိ၊ ‘‘ပဝိသိဿာမာ’’တိ အာလယောပိ အတ္ထိ၊ မနုဿာ ပန အပ္ပဝိဋ္ဌာ၊ ပေါရာဏဂါမံ ဝါ သဂေဟမေဝ ဆဍ္ဍေတွာ အညတ္ထ ဂတာ၊ အဂါမောယေဝ ဧသ၊ သီမာ ဩတရတိ။ သစေ ပန ဧကမ္ပိ ကုလံ ပဝိဋ္ဌံ ဝါ အဂတံ ဝါ အတ္ထိ၊ ဂါမောယေဝ၊ သီမာ န ဩတရတိ။

ဧဝံ ¶ ဗဒ္ဓသီမံ ဒဿေတွာ ဣဒါနိ အဗဒ္ဓသီမံ ဒဿေန္တော ‘‘အဗဒ္ဓသီမာ ပနာ’’တိအာဒိမာဟ။ ဂါမော ဧဝ သီမာ ဂါမသီမာ။ ဂါမဂ္ဂဟဏေန စေတ္ထ နိဂမနဂရာနမ္ပိ သင်္ဂဟော ဝေဒိတဗ္ဗော။ ယတ္တကေ ပဒေသေ တဿ ဂါမဿ ဂါမဘောဇကာ ဗလိံ လဘန္တိ၊ သော ပဒေသော အပ္ပော ဝါ ဟောတု၊ မဟန္တော ဝါ၊ ဧကံ ဂါမခေတ္တံ နာမ။ ယမ္ပိ ဧကသ္မိံယေဝ ဂါမခေတ္တေ ဧကံ ပဒေသံ ‘‘အယံ ဝိသုံ ဂါမော ဟောတူ’’တိ ပရိစ္ဆိန္ဒိတွာ ရာဇာ ကဿစိ ဒေတိ၊ သောပိ ဝိသုံဂါမသီမာ ဟောတိယေဝ။ တသ္မာ သာ စ ဣတရာ စ ပကတိဂါမသီမာ ဗဒ္ဓသီမာသဒိသာဝ ဟောတိ။ ကေဝလံ ပန တိစီဝရဝိပ္ပဝါသပရိဟာရံ န လဘတီတိ (မဟာဝ။ အဋ္ဌ။ ၁၄၇)။

အဂါမကေ အရညေတိ ဝိဉ္ဈာဋဝိသဒိသေ အရညေ။ တေနာဟ ‘‘အဂါမကံ နာမာ’’တိအာဒိ။ အယံ ပန သီမာ တိစီဝရဝိပ္ပဝါသပရိဟာရမ္ပိ လဘတိ။ မစ္ဆဗန္ဓာနန္တိ ကေဝဋ္ဋာနံ။ အဂမနပထေသူတိ ဂန္တုံ အသက္ကုဏေယျပထေသု။ ယတ္ထ တဒဟေဝ ဂန္တွာ တဒဟေဝ ပစ္စာဂန္တုံ န သက္ကာ ဟောတိ၊ တာဒိသေသူတိ ဝုတ္တံ ဟောတိ။ တေသံ ဂမနပရိယန္တဿ ဩရတော ပန ဂါမသီမာသင်္ခံ ဂစ္ဆတိ။ တတ္ထ ဂါမသီမံ အသောဓေတွာ ကမ္မံ ကာတုံ န ဝဋ္ဋတိ။ မဇ္ဈေ ဌိတာနံ သဗ္ဗဒိသာသု သတ္တဗ္ဘန္တရာတိ မဇ္ဈေ ဌိတာနံ ဘိက္ခူနံ ဌိတောကာသတော သဗ္ဗဒိသာသု သတ္တဗ္ဘန္တရာ။ တတ္ထာတိ တေသု အဗ္ဘန္တရေသု။ တသ္မာတိ ယသ္မာ ပရိသဝသေန ဝဍ္ဎတိ၊ တသ္မာ။ ဥပစာရတ္ထာယာတိ သီမောပစာရတ္ထာယ။ သီမာဘာဝံ ပဋိက္ခိပိတွာတိ ¶ ဗဒ္ဓသီမာဘာဝံ ပဋိက္ခိပိတွာ။ သမာနော သံဝါသော ဧတ္ထာတိ သမာနသံဝါသာ။ ဧကော ဥပေါသထော ဧတ္ထာတိ ဧကူပေါသထာ။ ဧတ္ထ စ ဥပေါသထဿ ဝိသုံ ဂဟိတတ္တာ အဝသေသကမ္မဝသေန သမာနသံဝါသတာ ဝေဒိတဗ္ဗာ။ ဝုတ္တာတိ အဗဒ္ဓသီမာပရိစ္ဆေဒံ ဒဿေတုံ ဥပေါသထက္ခန္ဓကေ (မဟာဝ။ ၁၄၉) ဝုတ္တာ။ အနု အနု အဍ္ဎမာသံ အနွဍ္ဎမာသံ၊ အဍ္ဎမာသေ အဍ္ဎမာသေတိ အတ္ထော။ ဧဝံ ‘‘အနုဒသာဟ’’န္တိအာဒီသုပိ။ ဒေဝေတိ မေဃေ။ ဝလာဟကေသု ဝိဂတမတ္တေသူတိ ဘာဝေနဘာဝလက္ခဏေ ဘုမ္မံ။ သောတန္တိ ဥဒကပ္ပဝါဟော ဝုစ္စတိ။ တိတ္ထေန ဝါ အတိတ္ထေန ဝါ ဩတရိတွာတိ ပါဌသေသော။ တိမဏ္ဍလံ ပဋိစ္ဆာဒေတွာတိ ယထာ တိမဏ္ဍလပဋိစ္ဆာဒနံ ဟောတိ၊ ဧဝံ နိဝါသေတွာ။ ဥတ္တရန္တိယာတိ ယတ္ထ ကတ္ထစိ ဥတ္တရန္တိယာ။ ဘိက္ခုနီဝိဘင်္ဂေ (ပါစိ။ ၆၉၂) ဘိက္ခုနိယာ ဝသေန နဒီလက္ခဏဿ ပါဠိယံ အာဂတတ္တာ ‘‘ဘိက္ခုနိယာ’’တိ ဝုတ္တံ၊ န ပန ဝိသေသသဗ္ဘာဝတော။

ကေနစိ ¶ ခဏိတွာ အကတောတိ အန္တမသော တိရစ္ဆာနေနပိ ခဏိတွာ အကတော။ နဒိံ ဝါ သမုဒ္ဒံ ဝါ ဘိန္ဒိတွာတိ နဒီကူလံ ဝါ သမုဒ္ဒဝေလံ ဝါ ဘိန္ဒိတွာ။ ဧတံ လက္ခဏန္တိ ‘‘ယတ္ထ နဒိယံ ဝုတ္တပ္ပကာရေ ဝဿကာလေ ဥဒကံ သန္တိဋ္ဌတီ’’တိ (ကင်္ခါ။ အဋ္ဌ။ နိဒါနဝဏ္ဏနာ) ဝုတ္တပ္ပကာရလက္ခဏံ။ လောဏီပိ ဇာတဿရသင်္ခမေဝ ဂစ္ဆတိ။ ယတ္ထ ပန ဝုတ္တပ္ပကာရေ ဝဿကာလေ ဝဿေ ပစ္ဆိန္နမတ္တေ ပိဝိတုံ ဝါ ဟတ္ထပါဒေ ဓောဝိတုံ ဝါ ဥဒကံ န ဟောတိ သုက္ခတိ၊ အယံ ဇာတဿရော ဂါမခေတ္တသင်္ခမေဝ ဂစ္ဆတိ။

ဥဒကုက္ခေပါတိ ကရဏတ္ထေ နိဿက္ကဝစနန္တိ အာဟ ‘‘ဥဒကုက္ခေပေနာ’’တိ။ ကထံ ပန ဥဒကံ ခိပိတဗ္ဗန္တိ အာဟ ‘‘တတ္ထာ’’တိအာဒိ။ မဇ္ဈိမေန ပုရိသေနာတိ ထာမမဇ္ဈိမေန ပုရိသေန။ အယံ ဥဒကုက္ခေပေါ နာမာတိ အယံ ဥဒကုက္ခေပေန ပရိစ္ဆိန္နာ သီမာ နာမာတိ အတ္ထော။ ယာဝ ပရိသာ ဝဍ္ဎတိ၊ တာဝ အယံ သီမာပိ ဝဍ္ဎတိ၊ ပရိသပရိယန္တတော ဥဒကုက္ခေပေါယေဝ ပမာဏံ။ သစေ ပန နဒီ နာတိဒီဃာ ဟောတိ၊ ပဘဝတော ပဋ္ဌာယ ယာဝ မုခဒွါရံ သဗ္ဗတ္ထ သင်္ဃော နိသီဒတိ၊ ဥဒကုက္ခေပသီမာကမ္မံ နတ္ထိ။ သကလာပိ နဒီ ဧတေသံယေဝ ဘိက္ခူနံ ပဟောတိ။

ပကတိဝဿကာလေတိ ပုဗ္ဗေ ဝုတ္တပ္ပကာရေ ပကတိဝဿကာလေ။ စတူသု မာသေသူတိ ဝဿာနဿ စတူသု မာသေသု။ အတိဝုဋ္ဌိကာလေ ဩဃေန ဩတ္ထတောကာသော န ဂဟေတဗ္ဗော။ သော ဟိ ဂါမသီမာသင်္ခမေဝ ဂစ္ဆတိ။ အန္တောနဒိယံ ဇာတဿရေ ဇာတပိဋ္ဌိပါသာဏဒီပကေသုပိ အယမေဝ ဝိနိစ္ဆယော ဝေဒိတဗ္ဗော။ သစေ ပန နဒီ ပရိပုဏ္ဏာ ဟောတိ သမတိတ္ထိကာ၊ ဥဒကသာဋိကံ နိဝါသေတွာပိ အန္တောနဒိယံယေဝ ကမ္မံ ကာတဗ္ဗံ။ သစေ န သက္ကောန္တိ၊ နာဝါယပိ ဌတွာ ကာတဗ္ဗံ။ ဂစ္ဆန္တိယာ ပန နာဝါယ ကာတုံ န ဝဋ္ဋတိ။ ကသ္မာ? ဥဒကုက္ခေပမတ္တမေဝ ဟိ သီမာ၊ တံ ¶ နာဝါ သီဃမေဝ အတိက္ကာမေတိ။ ဧဝံ သတိ အညိဿာ သီမာယ ဉတ္တိ၊ အညိဿာ အနုဿာဝနာ ဟောတိ၊ တသ္မာ နာဝံ အရိတ္တေန ဝါ ဌပေတွာ၊ ပါသာဏေ ဝါ လမ္ဗိတွာ၊ အန္တောနဒိယံ ဇာတရုက္ခေ ဝါ ဗန္ဓိတွာ ကမ္မံ ကာတဗ္ဗံ။ အန္တောနဒိယံ ဗဒ္ဓအဋ္ဋကေပိ အန္တောနဒိယံ ဇာတရုက္ခေပိ ဌိတေဟိ ကမ္မံ ကာတုံ ဝဋ္ဋတိ။

သစေ ပန ရုက္ခဿ သာခါ ဝါ တတော နိက္ခန္တပါရောဟော ဝါ ဗဟိနဒီတီရေ ဝိဟာရသီမာယ ဝါ ဂါမသီမာယ ဝါ ပတိဋ္ဌိတော၊ သီမံ ဝါ သောဓေတွာ၊ သာခံ ¶ ဝါ ဆိန္ဒိတွာ ကမ္မံ ကာတဗ္ဗံ။ ဗဟိနဒီတီရေ ဇာတရုက္ခဿ အန္တောနဒိယံ ပဝိဋ္ဌသာခါယ ဝါ ပါရောဟေ ဝါ နာဝံ ဗန္ဓိတွာ ကမ္မံ ကာတုံ န ဝဋ္ဋတိ။ ကရောန္တေဟိ သီမာ ဝါ သောဓေတဗ္ဗာ၊ သာခံ ဆိန္ဒိတွာ ဝါ တဿ ဗဟိပတိဋ္ဌိတဘာဂေါ နာသေတဗ္ဗော။ နဒီတီရေ ပန ခါဏုကံ ကောဋ္ဋေတွာ တတ္ထ ဗန္ဓနာဝါယ န ဝဋ္ဋတိယေဝ။

နဒိယံ သေတုံ ကရောန္တိ၊ သစေ အန္တောနဒိယံယေဝ သေတု ဝါ သေတုပါဒါ ဝါ၊ သေတုမှိ ဌိတေဟိ ကမ္မံ ကာတုံ ဝဋ္ဋတိ။ သစေ ပန သေတု ဝါ သေတုပါဒါ ဝါ ဗဟိတီရေ ပတိဋ္ဌိတာ၊ ကမ္မံ ကာတုံ န ဝဋ္ဋတိ၊ သီမံ သောဓေတွာ ကမ္မံ ကာတဗ္ဗံ။ အထ သေတုပါဒါ အန္တော၊ သေတု ပန ဥဘိန္နမ္ပိ တီရာနံ ဥပရိအာကာသေ ဌိတော၊ ဝဋ္ဋတိ။ ဇာတဿရေပိ ဧသေဝ နယော။

‘‘ယသ္မိံ ပဒေသေ ပကတိဝီစိယော ဩတ္ထရိတွာ သဏ္ဌဟန္တီ’’တိ ဧတေန ယံ ပဒေသံ ဥဒ္ဓံ ဝဍ္ဎနကဥဒကံ ဝါ ပကတိဝီစိယော ဝါ ဝေဂေန အာဂန္တွာ ဩတ္ထရန္တိ၊ တတ္ထ ကမ္မံ ကာတုံ န ဝဋ္ဋတီတိ (မဟာဝ။ အဋ္ဌ။ ၁၄၇) ဒဿေတိ။ သစေ ဦမိဝေဂေါ ဗာဓတိ၊ နာဝါယ ဝါ အဋ္ဋကေ ဝါ ဌတွာ ကာတဗ္ဗံ။ တေသု ဝိနိစ္ဆယော နဒိယံ ဝုတ္တနယေနေဝ ဝေဒိတဗ္ဗော။ သစေ ပန သမုဒ္ဒေါ ဂါမသီမံ ဝါ နိဂမသီမံ ဝါ ဩတ္ထရိတွာ တိဋ္ဌတိ၊ သမုဒ္ဒေါဝ ဟောတိ။ တတ္ထ ကမ္မံ ကာတုံ ဝဋ္ဋတိ။ တတော ပဋ္ဌာယ ကပ္ပိယဘူမီတိ ဩတ္ထရိတွာ သဏ္ဌိတဥဒကန္တတော ပဋ္ဌာယ အန္တော နဒီဇာတဿရသမုဒ္ဒေါ နာမာတိ အတ္ထော။ ဒုဗ္ဗုဋ္ဌိကာလေတိ ဝဿာနဟေမန္တေ သန္ဓာယ ဝုတ္တံ။ သုက္ခေသုပီတိ နိရုဒကေသုပိ။ ယထာ စ ဝါပိခဏနေ၊ ဧဝံ အာဝါဋပေါက္ခရဏီအာဒီနံ ခဏနေပိ ဂါမခေတ္တံ ဟောတိယေဝါတိ ဒဋ္ဌဗ္ဗံ။ ဝပ္ပံ ဝါ ကရောန္တီတိ လာဗုတိပုသကာဒိဝပ္ပံ ဝါ ကရောန္တိ။ တံ ဌာနန္တိ ယတ္ထ ဝါပိအာဒိကံ ကတံ၊ တံ ဌာနံ။ အညံ ပန ကပ္ပိယဘူမိ။ သစေ ပန ဇာတဿရံ ပူရေတွာ ထလံ ကရောန္တိ၊ ဧကသ္မိံ ဒိသာဘာဂေ ပါဠိံ ဗန္ဓိတွာ သဗ္ဗမေဝ နံ မဟာတဠာကံ ဝါ ကရောန္တိ၊ သဗ္ဗောပိ အဇာတဿရော ဟောတိ။ ဂါမသီမာသင်္ခမေဝ ဂစ္ဆတိ။

သစေ ¶ နဒိမ္ပိ ဝိနာသေတွာ တဠာကံ ကရောန္တိ၊ ဟေဋ္ဌာ ပါဠိ ဗဒ္ဓါ၊ ဥဒကံ အာဂန္တွာ တဠာကံ ပူရေတွာ တိဋ္ဌတိ၊ ဧတ္ထ ကမ္မံ ကာတုံ န ဝဋ္ဋတိ။ ဥပရိ ပဝတ္တနဋ္ဌာနေ ဆဍ္ဍိတံ ဥဒကံ နဒိံ ဩတ္ထရိတွာ သန္ဒနဋ္ဌာနတော ပဋ္ဌာယ ဝဋ္ဋတိ။ ကာစိ နဒီ ကာလန္တရေန ဥပ္ပတိတွာ ဂါမနိဂမသီမံ ဩတ္ထရိတွာ ပဝတ္တတိ၊ နဒီယေဝ ¶ ဟောတိ၊ ကမ္မံ ကာတုံ ဝဋ္ဋတိ။ သစေ ဝိဟာရသီမံ ဩတ္ထရတိ ‘‘ဝိဟာရသီမာ’’တွေဝ သင်္ခံ ဂစ္ဆတိ။ တသ္မာတိ ယသ္မာ အန္တော ဂစ္ဆတိ၊ တသ္မာ။ သမန္တာ ဥဒကုက္ခေပပရိစ္ဆေဒေါ ကာတဗ္ဗောတိ ပဟောနကဋ္ဌာနံ သန္ဓာယ ဝုတ္တံ။ ယတ္ထ ပန ကုန္နဒီအာဒီသု နပ္ပဟောတိ၊ တတ္ထ ပဟောနကဋ္ဌာနတော ဥဒကုက္ခေပပရိစ္ဆေဒေါ ကာတဗ္ဗော။ ဥပစာရတ္ထာယာတိ သီမောပစာရတ္ထာယ။

ကသ္မာ ပန အညမေကံ သတ္တဗ္ဘန္တရံ၊ အညော ဧကော ဥဒကုက္ခေပေါ စ ဥပစာရတ္ထာယ ဌပေတဗ္ဗောတိ အာဟ ‘‘အယံ ဟီ’’တိအာဒိ။ ဣဒံ ဝုတ္တံ ဟောတိ (သာရတ္ထ။ ဋီ။ မဟာဝဂ္ဂ ၃။၁၄၇၊ ဝိ။ ဝိ။ ဋီ။ မဟာဝဂ္ဂ ၂။၁၄၇) – ယသ္မာ အယံ သတ္တဗ္ဘန္တရသီမာ စ ဥဒကုက္ခေပသီမာ စ ဘိက္ခူနံ ဌိတောကာသတော ပဋ္ဌာယ လဗ္ဘတိ၊ တေ စ ဘိက္ခူ န သဗ္ဗဒါ ဧကသဒိသာ၊ ကဒါစိ ဝဍ္ဎန္တိ၊ ကဒါစိ ပရိဟာယန္တိ။ ယဒါ စ ဝဍ္ဎန္တိ၊ တဒါ သီမာသင်္ကရော ဟောတိ။ တသ္မာ အညမေကံ သတ္တဗ္ဘန္တရံ၊ အညော ဧကော ဥဒကုက္ခေပေါ စ ဥပစာရတ္ထာယ ဌပေတဗ္ဗောတိ။ ယံ ပန မဟာအဋ္ဌကထာယံ ‘‘တတော အဓိကံ ဝဋ္ဋတိယေဝ၊ ဦနကံ ပန န ဝဋ္ဋတီ’’တိ (မဟာဝ။ အဋ္ဌ။ ၁၄၇) ဝုတ္တံ၊ တမ္ပိ ဧတဒတ္ထမေဝ၊ န ပန တတ္ထ ကတဿ ကမ္မဿ ကုပ္ပတ္တာတိ ဂဟေတဗ္ဗံ။ ပရိစ္ဆေဒတော ဗဟိ အညံ တတ္တကံယေဝ ပရိစ္ဆေဒံ အနတိက္ကမိတွာ ဌိတောပီတိ အတ္တနော သတ္တဗ္ဘန္တရေန၊ ဥဒကုက္ခေပေန ဝါ ယော တေသံ သတ္တဗ္ဘန္တရဿ၊ ဥဒကုက္ခေပဿ ဝါ ပရိစ္ဆေဒေါ၊ တတော ဗဟိ အညံ တတ္တကံယေဝ ပရိစ္ဆေဒံ အနတိက္ကမိတွာ ဌိတောပီတိ အတ္ထော။ ကထမေတံ ဝိညာယတီတိ အာဟ ‘‘ဣဒံ သဗ္ဗအဋ္ဌကထာသု သန္နိဋ္ဌာန’’န္တိ၊ ဣဒံ ‘‘ကမ္မံ ကောပေတီ’’တိ မဟာအဋ္ဌကထာဒီသု ဝဝတ္ထာနန္တိ အတ္ထော။ ‘‘ဣတိ ဣမ’’န္တိအာဒိ ယထာဝုတ္တဿ နိဂမနံ။ ဟောတိ စေတ္ထ –

‘‘ဗဒ္ဓါဗဒ္ဓဝသေနေဓ၊ သီမာ နာမ ဒွိဓာ တဟိံ၊

တိသမ္ပတ္တိယုတ္တာ ဝဇ္ဇိ-တေကာဒသ ဝိပတ္တိကာ၊

ဗဒ္ဓသီမာ တိဓာ ခဏ္ဍာ-ဒိတော ဂါမာဒိတော ပရာ’’တိ။

သဘာဂါပတ္တိ စ နာမေသာ ဒုဝိဓာ ဝတ္ထုသဘာဂါ၊ အာပတ္တိသဘာဂါတိ။ တတ္ထ ဣဓ ဝတ္ထုသဘာဂါ အဓိပ္ပေတာ၊ နေတရာတိ ဒဿေတုံ ‘‘ယံ သဗ္ဗော သင်္ဃော ဝိကာလဘောဇနာဒိနာ’’တိအာဒိမာဟ။ လဟုကာပတ္တိန္တိ လဟုကေန ဝိနယကမ္မေန ဝိသုဇ္ဈနတော လဟုကာ ထုလ္လစ္စယပါစိတ္တိယပါဋိဒေသနီယဒုက္ကဋဒုဗ္ဘာသိတသင်္ခါတာ ပဉ္စာပတ္တိယော။ ဝတ္ထုသဘာဂါယ သင်္ဃာဒိသေသာပတ္တိယာပိ သတိ ဥပေါသထကမ္မံ ပတ္တကလ္လံ ¶ န ဟောတိယေဝ။ ယထာဟ ¶ ‘‘သဘာဂသင်္ဃာဒိသေသံ အာပန္နဿ ပန သန္တိကေ အာဝိ ကာတုံ န ဝဋ္ဋတိ။ သစေ အာဝိ ကရောတိ၊ အာပတ္တိ အာဝိကတာ ဟောတိ၊ ဒုက္ကဋာ ပန န မုစ္စတီ’’တိ (စူဠဝ။ အဋ္ဌ။ ၁၀၂)။ တဿာ ပန အဒေသနာဂါမိနိတော ဧဝံ ဝုတ္တံ။ ဝတ္ထုသဘာဂါတိ ဝတ္ထုဝသေန သမာနဘာဂါ၊ ဧကကောဋ္ဌာသာတိ ဝုတ္တံ ဟောတိ။ ဣမမေဝ ဝတ္ထုသဘာဂံ ဒေသေတုံ န ဝဋ္ဋတိ ‘‘န၊ ဘိက္ခဝေ၊ သဘာဂါ အာပတ္တိ ဒေသေတဗ္ဗာ၊ ယော ဒေသေယျ၊ အာပတ္တိ ဒုက္ကဋဿာ’’တိ (မဟာဝ။ ၁၆၉) ဝုတ္တတ္တာ၊ န ပန အာပတ္တိသဘာဂံ။ တေနာဟ ‘‘ဝိကာလဘောဇနပစ္စယာ အာပန္နံ ပနာ’’တိအာဒိ။ အာပတ္တိသဘာဂန္တိ အာပတ္တိယာ သမာနဘာဂံ။

သာမန္တာ အာဝါသာတိ သာမန္တအာဝါသံ၊ သမီပဝိဟာရန္တိ အတ္ထော။ သဇ္ဇုကန္တိ တဒဟေဝါဂမနတ္ထာယ။ ပါဟေတဗ္ဗောတိ ပေသေတဗ္ဗော။ ဣစ္စေတံ ကုသလန္တိ ဣတိ ဧတံ သုန္ဒရံ ဘဒ္ဒကံ၊ လဒ္ဓကပ္ပန္တိ ဝုတ္တံ ဟောတိ။ နော စေ လဘေထာတိ ဝိဟာရာနံ ဒူရတာယ ဝါ မဂ္ဂေ ပရိပန္ထာဒိနာ ဝါ ယဒိ န လဘေထ။ ‘‘တဿ သန္တိကေ ပဋိကရိဿတီ’’တိ ဣမိနာ ဝစနေန သဘာဂါပတ္တိ အာဝိ ကာတုမ္ပိ န လဗ္ဘတီတိ ဒီပိတံ ဟောတိ။ ယဒိ လဘေယျ၊ အာဝိ ကတွာပိ ဥပေါသထံ ကရေယျ။ ယဒိ ပန သဗ္ဗော သင်္ဃော သဘာဂံ သင်္ဃာဒိသေသံ အာပန္နော ဟောတိ၊ ဉတ္တိံ ဌပေတွာ ဥပေါသထံ ကာတုံ န ဝဋ္ဋတိ၊ ဥပေါသထဿ အန္တရာယောဝ ဟောတိ။ ဥဘောပိ ဒုက္ကဋံ အာပဇ္ဇန္တိ ‘‘န၊ ဘိက္ခဝေ၊ သဘာဂါ အာပတ္တိ ဒေသေတဗ္ဗာ၊ ယော ဒေသေယျ၊ အာပတ္တိ ဒုက္ကဋဿ။ န၊ ဘိက္ခဝေ၊ သဘာဂါ အာပတ္တိ ပဋိဂ္ဂဟေတဗ္ဗာ၊ ယော ပဋိဂ္ဂဏှေယျ၊ အာပတ္တိ ဒုက္ကဋဿာ’’တိ (မဟာဝ။ ၁၆၉) ဝုတ္တတ္တာ။ ဝိမတိ သံသယော၊ တတ္ထ နိယုတ္တော ဝေမတိကော။ ‘‘ပုန နိဗ္ဗေမတိကော ဟုတွာ ဒေသေတဗ္ဗမေဝါ’’တိ နေဝ ပါဠိယံ၊ န စ အဋ္ဌကထာယံ အတ္ထိ၊ ဒေသိတေ ပန ဒေါသော နတ္ထိ။ ဝုတ္တနယေနေဝါတိ ‘‘ပါရိသုဒ္ဓိံ အာယသ္မန္တော အာရောစေထာ’’တိအာဒိနာ နယေန သာပတ္တိကဿ ဥပေါသထကရဏေ ပညတ္တံ ဒုက္ကဋံ အာပဇ္ဇန္တီတိ ဝုတ္တနယေနေဝ။ ကသ္မာ သဘာဂါပတ္တိယေဝ ဝုတ္တာတိ အာဟ ‘‘ဧတာသု ဟီ’’တိအာဒိ။ ဝိသဘာဂါပတ္တီသု ဝိဇ္ဇမာနာသုပိ ပတ္တကလ္လံ ဟောတိယေဝါတိ ဝိသဘာဂါသု ပန ဝိဇ္ဇမာနာသု တေသံယေဝ ပုဂ္ဂလာနံ အာပတ္တိ၊ န သင်္ဃဿာတိ သင်္ဃဿ ပတ္တကလ္လံ ဟောတိယေဝ။

အန္တိမဝတ္ထုအဇ္ဈာပန္နကော နာမ စတုန္နံ ပါရာဇိကာနံ အညတရံ အဇ္ဈာပန္နကော။ ပဏ္ဍကာဒီနံ ဝိနိစ္ဆယော ပရတော ပါရာဇိကုဒ္ဒေသေ အာဝိ ဘဝိဿတိ ¶ ။ တိရစ္ဆာနဂတောတိ အန္တမသော သက္ကံ ဒေဝရာဇာနံ ဥပါဒါယ ယော ကောစိ နာဂမာဏဝကာဒိကော အမနုဿဇာတိကော ဝေဒိတဗ္ဗော၊ န အဿဂေါဏာဒယော။ တေနာဟ ‘‘ဧတ္ထ စာ’’တိအာဒိ။ တတ္ထ ဧတ္ထာတိ ဧတိဿံ ဝဇ္ဇနီယပုဂ္ဂလကထာယံ။ ယဿ ဥပသမ္ပဒါ ပဋိက္ခိတ္တာတိ ‘‘တိရစ္ဆာနဂတော၊ ဘိက္ခဝေ၊ အနုပသမ္ပန္နော၊ န ဥပသမ္ပာဒေတဗ္ဗော’’တိ (မဟာဝ။ ၁၁၁) ယဿ နာဂသုပဏ္ဏာဒိနော တိရစ္ဆာနဂတဿ ဥပသမ္ပဒါ ပဋိက္ခိတ္တာ ¶ ၊ သော ဣဓာပိ တိရစ္ဆာနဂတော နာမာတိ အတ္ထော။ တတ္ထ ဟိ အန္တမသော ဒေဝေ ဥပါဒါယ နာဂမာဏဝကာဒိကော ယော ကောစိ အမနုဿဇာတိကော ‘‘တိရစ္ဆာနဂတော’’တိ အဓိပ္ပေတော။ ဝုတ္တဉှိ သမန္တပါသာဒိကာယံ ‘‘တိရစ္ဆာနဂတော၊ ဘိက္ခဝေတိ ဧတ္ထ နာဂေါ ဝါ ဟောတု သုပဏ္ဏမာဏဝကာဒီနံ ဝါ အညတရော၊ အန္တမသော သက္ကံ ဒေဝရာဇာနံ ဥပါဒါယ ယော ကောစိ အမနုဿဇာတိယော၊ သော သဗ္ဗောဝ ဣမသ္မိံ အတ္ထေ ‘တိရစ္ဆာနဂတော’တိ ဝေဒိတဗ္ဗော’’တိ (မဟာဝ။ အဋ္ဌ။ ၁၁၁)။ တိတ္ထံ ဝုစ္စတိ လဒ္ဓိ၊ တံ ဧတေသံ အတ္ထီတိ တိတ္ထိကာ၊ တိတ္ထိကာ ဧဝ တိတ္ထိယာ၊ ဣတော အညလဒ္ဓိကာတိ အတ္ထော။

သုတ္တဿ ဥဒ္ဒေသော သုတ္တုဒ္ဒေသော။ ပါရိသုဒ္ဓိ ဧဝ ဥပေါသထော ပါရိသုဒ္ဓိဥပေါသထော။ ဧသေဝ နယော အဓိဋ္ဌာနုပေါသထောတိ ဧတ္ထာပိ။ သောတိ ပါတိမောက္ခုဒ္ဒေသော။ ဩဝါဒေါဝ ပါတိမောက္ခံ၊ တဿ ဥဒ္ဒေသော သရူပေန ကထနံ ဩဝါဒပါတိမောက္ခုဒ္ဒေသော။ ‘‘ဣမသ္မိံ ဝီတိက္ကမေ အယံ နာမ အာပတ္တီ’’တိ ဧဝံ အာပတ္တိဝသေန အာဏာပနံ ပညာပနံ အာဏာ၊ သေသံ အနန္တရသဒိသမေဝ။

ခန္တီ ပရမံ တပေါ တိတိက္ခာ…ပေ… ဝုတ္တာ တိဿော ဂါထာယော နာမ –

‘‘ခန္တီ ပရမံ တပေါ တိတိက္ခာ၊

နိဗ္ဗာနံ ပရမံ ဝဒန္တိ ဗုဒ္ဓါ၊

န ဟိ ပဗ္ဗဇိတော ပရူပဃာတီ၊

န သမဏော ဟောတိ ပရံ ဝိဟေဌယန္တော။

‘‘သဗ္ဗပါပဿ အကရဏံ၊ ကုသလဿ ဥပသမ္ပဒါ၊

သစိတ္တပရိယောဒပနံ၊ ဧတံ ဗုဒ္ဓါန သာသနံ။

‘‘အနူပဝါဒေါ ¶ အနူပဃာတော၊ ပါတိမောက္ခေ စ သံဝရော၊

မတ္တညုတာ စ ဘတ္တသ္မိံ၊ ပန္တဉ္စ သယနာသနံ၊

အဓိစိတ္တေ စ အာယောဂေါ၊ ဧတံ ဗုဒ္ဓါန သာသန’’န္တိ။(ဒီ။ နိ။ ၂။၉၀၊ ဓ။ ပ။ ၁၈၃-၁၈၅) –

ဣမာ တိဿော ဂါထာယော။

တတ္ထ ခန္တီ ပရမံ တပေါတိ (ဒီ။ နိ။ အဋ္ဌ။ ၂။၉၀၊ ဓ။ ပ။ အဋ္ဌ။ ၂။၁၈၅) အဓိဝါသနခန္တိ ¶ နာမ ပရမံ တပေါ။ တိတိက္ခာတိ ခန္တိယာ ဧဝ ဝေဝစနံ၊ တိတိက္ခာသင်္ခါတာ အဓိဝါသနခန္တိ ဥတ္တမံ တပေါတိ အတ္ထော။ နိဗ္ဗာနံ ပရမံ ဝဒန္တီတိ သဗ္ဗာကာရေန ပန နိဗ္ဗာနံ ‘‘ပရမ’’န္တိ ဝဒန္တိ ဗုဒ္ဓါ။ န ဟိ ပဗ္ဗဇိတော ပရူပဃာတီတိ ယော အဓိဝါသနခန္တိဝိရဟိတတ္တာ ပရံ ဥပဃာတေတိ ဗာဓတိ ဝိဟိံသတိ၊ သော ပဗ္ဗဇိတော နာမ န ဟောတိ။ စတုတ္ထပါဒေါ ပန တဿေဝ ဝေဝစနံ။ ‘‘န ဟိ ပဗ္ဗဇိတော’’တိ ဧတဿ ဟိ ‘‘နသမဏော ဟောတီ’’တိ ဝေဝစနံ။ ‘‘ပရူပဃာတီ’’တိ ဧတဿ ‘‘ပရံ ဝိဟေဌယန္တော’’တိ ဝေဝစနံ။ အထ ဝါ ပရူပဃာတီတိ သီလူပဃာတီ။ သီလဉှိ ဥတ္တမဋ္ဌေန ‘‘ပရ’’န္တိ ဝုစ္စတိ။ ယော စ သမဏော ပရံ ယံ ကဉ္စိ သတ္တံ ဝိဟေဌယန္တော ပရူပဃာတီ ဟောတိ၊ အတ္တနော သီလဝိနာသကော၊ သော ပဗ္ဗဇိတော နာမ န ဟောတီတိ အတ္ထော။ အထ ဝါ ယော အဓိဝါသနခန္တိယာ အဘာဝါ ပရူပဃာတီ ဟောတိ၊ ပရံ အန္တမသော ဍံသမကသမ္ပိ သဉ္စိစ္စ ဇီဝိတာ ဝေါရောပေတိ၊ သော န ဟိ ပဗ္ဗဇိတော။ ကိံ ကာရဏာ? မလဿ အပဗ္ဗာဇိတတ္တာ။ ‘‘ပဗ္ဗာဇယမတ္တနော မလံ၊ တသ္မာ ‘ပဗ္ဗဇိတော’တိ ဝုစ္စတီ’’တိ (ဓ။ ပ။ ၃၈၈) ဣဒဉှိ ပဗ္ဗဇိတလက္ခဏံ။ ယောပိ န ဟေဝ ခေါ ဥပဃာတေတိ န မာရေတိ၊ အပိစ ဒဏ္ဍာဒီဟိ ဝိဟေဌေတိ၊ သော ပရံ ဝိဟေဌယန္တော သမဏော န ဟောတိ။ ကိံ ကာရဏာ? ဝိဟေသာယ အသမိတတ္တာ။ ‘‘သမိတတ္တာ ဟိ ပါပါနံ၊ ‘သမဏော’တိ ပဝုစ္စတီ’’တိ (ဓ။ ပ။ ၂၆၅) ဣဒဉှိ သမဏလက္ခဏံ။

ဒုတိယဂါထာယ သဗ္ဗပါပဿာတိ သဗ္ဗာကုသလဿ။ အကရဏန္တိ အနုပ္ပာဒနံ။ ကုသလဿာတိ စတုဘူမကကုသလဿ။ ဥပသမ္ပဒါတိ ဥပသမ္ပာဒနံ ပဋိလာဘော။ သစိတ္တပရိယောဒပနန္တိ အတ္တနော စိတ္တဿ ဝေါဒါပနံ ပဘဿရဘာဝကရဏံ သဗ္ဗသော ပရိသောဓနံ၊ တံ ပန အရဟတ္တေန ဟောတိ။ ဣတိ သီလသံဝရေန သဗ္ဗပါပံ ပဟာယ လောကိယလောကုတ္တရာဟိ သမထဝိပဿနာဟိ ကုသလံ သမ္ပာဒေတွာ အရဟတ္တဖလေန စိတ္တံ ပရိယောဒါပေတဗ္ဗန္တိ ဧတံ ဗုဒ္ဓါနံ သာသနံ ဩဝါဒေါ အနုသိဋ္ဌိ။

တတိယဂါထာယ ¶ အနူပဝါဒေါတိ ဝါစာယ ကဿစိ အနုပဝဒနံ။ အနူပဃာတောတိ ကာယေန ကဿစိ ဥပဃာတဿ အကရဏံ။ ပါတိမောက္ခေတိ ယံ တံ ပါတိမောက္ခံ ပအတိမောက္ခံ အတိပမောက္ခံ ဥတ္တမံ သီလံ၊ ပါတိ ဝါ အဂတိဝိသေသေဟိ၊ မောက္ခေတိ ဒုဂ္ဂတိဘယေဟိ။ ယော ဝါ နံ ပါတိ၊ တံ မောက္ခေတီတိ ‘‘ပါတိမောက္ခ’’န္တိ ဝုစ္စတိ၊ တသ္မိံ ပါတိမောက္ခေ စ။ သံဝရောတိ သတ္တန္နံ အာပတ္တိက္ခန္ဓာနံ အဝီတိက္ကမလက္ခဏော သံဝရော။ မတ္တညုတာတိ ပဋိဂ္ဂဟဏပရိဘောဂဝသေန ပမာဏညုတာ။ ပန္တဉ္စ သယနာသနန္တိ ဇနသင်္ဃဋ္ဋနဝိရဟိတံ နိဇ္ဇနသမ္ဗာဓံ ဝိဝိတ္တံ၊ သေနာသနဉ္စ။ ဧတ္ထ စ ဒွိဟိယေဝ ပစ္စယေဟိ စတုပစ္စယသန္တောသော ဒီပိတောတိ ဝေဒိတဗ္ဗော ပစ္စယသန္တောသသာမညေန ဣတရဒွယဿာပိ လက္ခဏဟာရနယေန ဇောတိတတ္တာ။ အဓိစိတ္တေ စ အာယောဂေါတိ ဝိပဿနာပါဒကံ ¶ အဋ္ဌသမာပတ္တိစိတ္တံ၊ တတောပိ မဂ္ဂဖလစိတ္တမေဝ အဓိစိတ္တံ၊ တသ္မိံ ယထာဝုတ္တေ အဓိစိတ္တေ အာယောဂေါ စ အနုယောဂေါ စာတိ အတ္ထော။ ဧတံ ဗုဒ္ဓါန သာသနန္တိ ဧတံ ပရဿ အနုပဝဒနံ၊ အနုပဃာတနံ၊ ပါတိမောက္ခေ သံဝရော၊ ပဋိဂ္ဂဟဏပရိဘောဂေသု မတ္တညုတာ၊ အဋ္ဌသမာပတ္တိဝသိဘာဝါယ ဝိဝိတ္တသေနာသနသေဝနဉ္စ ဗုဒ္ဓါနံ သာသနံ ဩဝါဒေါ အနုသိဋ္ဌီတိ။ ဣမာ ပန တိဿော ဂါထာ သဗ္ဗဗုဒ္ဓါနံ ပါတိမောက္ခုဒ္ဒေသဂါထာယော ဟောန္တီတိ ဝေဒိတဗ္ဗာ။ တံ ဗုဒ္ဓါ ဧဝ ဥဒ္ဒိသန္တိ၊ န သာဝကာ။

‘‘သုဏာတု မေ၊ ဘန္တေ၊ သင်္ဃော’’တိအာဒိနာ (မဟာဝ။ ၁၃၄) နယေန ဝုတ္တံ အာဏာပါတိမောက္ခံ နာမ။ တံ သာဝကာ ဧဝ ဥဒ္ဒိသန္တိ၊ န ဗုဒ္ဓါ သင်္ဃကမ္မံ ကရောန္တိ၊ န စ တတ္ထ ပရိယာပန္နာတိ အာဟ ‘‘တံ သာဝကာ ဧဝ ဥဒ္ဒိသန္တိ၊ န ဗုဒ္ဓါ’’တိ။ ဣမသ္မိံ အတ္ထေတိ ‘‘ပါတိမောက္ခံ ဥဒ္ဒိသေယျာ’’တိ ဧတသ္မိံ အတ္ထေ။

အနုပဂတော နာမ တတ္ထေဝ ဥပသမ္ပန္နော၊ အသတိယာ ပုရိမိကာယ အနုပဂတော ဝါ။ စာတုမာသိနိယန္တိ စာတုမာသိယံ။ သာ ဟိ စတုန္နံ မာသာနံ ပါရိပူရိဘူတာတိ စာတုမာသီ၊ သာ ဧဝ ‘‘စာတုမာသိနီ’’တိ ဝုစ္စတိ၊ တဿံ စာတုမာသိနိယံ။ ပစ္ဆိမကတ္တိကပုဏ္ဏမာသိနိယန္တိ အတ္ထော။ ကာယသာမဂ္ဂိန္တိ ကာယေန သမဂ္ဂဘာဝံ၊ ဟတ္ထပါသူပဂမနန္တိ ဝုတ္တံ ဟောတိ။

အယံ ပနေတ္ထ ဝိနိစ္ဆယော – သစေ ပုရိမိကာယ ပဉ္စ ဘိက္ခူ ဝဿံ ဥပဂတာ၊ ပစ္ဆိမိကာယပိ ပဉ္စ၊ ပုရိမေဟိ ဉတ္တိံ ဌပေတွာ ပဝါရိတေ ပစ္ဆိမေဟိ ¶ တေသံ သန္တိကေ ပါရိသုဒ္ဓိဥပေါသထော ကာတဗ္ဗော၊ န ဧကသ္မိံ ဥပေါသထဂ္ဂေ ဒွေ ဉတ္တိယော ဌပေတဗ္ဗာ။ သစေပိ ပစ္ဆိမိကာယ ဥပဂတာ စတ္တာရော၊ တယော၊ ဒွေ၊ ဧကော ဝါ ဟောတိ၊ ဧသေဝ နယော။ အထ ပုရိမိကာယ စတ္တာရော၊ ပစ္ဆိမိကာယပိ စတ္တာရော၊ တယော၊ ဒွေ၊ ဧကော ဝါ၊ ဧသေဝ နယော။ အထ ပုရိမိကာယ တယော၊ ပစ္ဆိမိကာယ တယော၊ ဒွေ ဝါ၊ ဧသေဝ နယော။ ဣဒဉှေတ္ထ လက္ခဏံ – သစေ ပုရိမိကာယ ဥပဂတေဟိ ပစ္ဆိမိကာယ ဥပဂတာ ထောကတရာ စေဝ ဟောန္တိ သမသမာ စ၊ သင်္ဃပ္ပဝါရဏာယ စ ဂဏံ ပူရေန္တိ၊ သင်္ဃပ္ပဝါရဏာဝသေန ဉတ္တိံ ဌပေတွာ ပုရိမေဟိ ပဝါရေတဗ္ဗာ။ သစေ ပန ပုရိမိကာယ တယော၊ ပစ္ဆိမိကာယ ဧကော ဟောတိ၊ တေန သဒ္ဓိံ တေ စတ္တာရော ဟောန္တိ၊ စတုန္နံ သင်္ဃဉတ္တိံ ဌပေတွာ ပဝါရေတုံ န ဝဋ္ဋတိ။ ဂဏဉတ္တိယာ ပန သော ဂဏပူရကော ဟောတိ၊ တသ္မာ ဂဏဝသေန ဉတ္တိံ ဌပေတွာ ပုရိမေဟိ ပဝါရေတဗ္ဗံ၊ ဣတရေန တေသံ သန္တိကေ ပါရိသုဒ္ဓိဥပေါသထော ကာတဗ္ဗော။ သစေ ပုရိမိကာယ ဒွေ၊ ပစ္ဆိမိကာယ ဒွေ ဝါ ဧကော ဝါ၊ ဧတ္ထာပိ ဧသေဝ နယော။ သစေ ပုရိမိကာယ ဧကော၊ ပစ္ဆိမိကာယပိ ဧကော၊ ဧကေန ဧကဿ သန္တိကေ ပဝါရေတဗ္ဗံ၊ ဧကေန ပါရိသုဒ္ဓိဥပေါသထော ကာတဗ္ဗော ¶ ။ သစေ ပုရိမဝဿူပဂတေဟိ ပစ္ဆိမဝဿူပဂတာ ဧကေနပိ အဓိကတရာ ဟောန္တိ၊ ပဌမံ ပါတိမောက္ခံ ဥဒ္ဒိသိတွာ ပစ္ဆာ ထောကတရေဟိ တေသံ သန္တိကေ ပဝါရေတဗ္ဗံ။ ကတ္တိကစာတုမာသိနိပဝါရဏာယ ပန သစေ ပဌမံ ဝဿူပဂတေဟိ မဟာပဝါရဏာယ ပဝါရိတေဟိ ပစ္ဆာ ဥပဂတာ အဓိကတရာ ဝါ သမသမာ ဝါ ဟောန္တိ၊ ပဝါရဏာဉတ္တိံ ဌပေတွာ ပဝါရေတဗ္ဗံ။ တေဟိ ပဝါရိတေ ပစ္ဆာ ဣတရေဟိ ပါရိသုဒ္ဓိဥပေါသထော ကာတဗ္ဗော။ အထ မဟာပဝါရဏာယ ပဝါရိတာ ဗဟူ ဟောန္တိ၊ ပစ္ဆာ ဝဿူပဂတာ ထောကာ ဝါ ဧကော ဝါ၊ ပါတိမောက္ခေ ဥဒ္ဒိဋ္ဌေ ပစ္ဆာ တေသံ သန္တိကေ တေန ပဝါရေတဗ္ဗန္တိ။

ဧကံသံ ဥတ္တရာသင်္ဂံ ကရိတွာတိ ဧကသ္မိံ အံသေ သာဓုကံ ဥတ္တရာသင်္ဂံ ကရိတွာတိ အတ္ထော။ အဉ္ဇလိံ ပဂ္ဂဟေတွာတိ ဒသနခသမောဓာနသမုဇ္ဇလံ အဉ္ဇလိံ ဥက္ခိပိတွာ။ သစေ ပန တတ္ထ ပါရိဝါသိကောပိ အတ္ထိ၊ သင်္ဃနဝကဋ္ဌာနေ နိသီဒိတွာ တတ္ထေဝ နိသိန္နေန အတ္တနော ပါဠိယာ ပါရိသုဒ္ဓိဥပေါသထော ကာတဗ္ဗော။ ပါတိမောက္ခေ ဥဒ္ဒိသိယမာနေ ပန ပါဠိယာ အနိသီဒိတွာ ပါဠိံ ဝိဟာယ ဟတ္ထပါသံ အမုဉ္စန္တေန နိသီဒိတဗ္ဗံ။ ပဝါရဏာယပိ ဧသေဝ နယော။

သဗ္ဗံ ¶ ပုဗ္ဗကရဏီယန္တိ သမ္မဇ္ဇနာဒိံ နဝဝိဓံ ပုဗ္ဗကိစ္စံ။ ယထာ စ သဗ္ဗော သင်္ဃော သဘာဂါပတ္တိံ အာပဇ္ဇိတွာ ‘‘သုဏာတု မေ၊ ဘန္တေ၊ သင်္ဃော…ပေ… ပဋိကရိဿတီ’’တိ (မဟာဝ။ ၁၇၁) ဉတ္တိံ ဌပေတွာ ဥပေါသထံ ကာတုံ လဘတိ၊ ဧဝမေတ္ထာပိ တီဟိ ‘‘သုဏန္တု မေ အာယသ္မန္တာ ဣမေ ဘိက္ခူ သဘာဂံ အာပတ္တိံ အာပန္နာ၊ ယဒါ အညံ ဘိက္ခုံ သုဒ္ဓံ အနာပတ္တိကံ ပဿိဿန္တိ၊ တဒါ တဿ သန္တိကေ တံ အာပတ္တိံ ပဋိကရိဿန္တီ’’တိ ဂဏဉတ္တိံ ဌပေတွာ၊ ဒွီဟိပိ ‘‘အညံ သုဒ္ဓံ ပဿိတွာ ပဋိကရိဿာမာ’’တိ ဝတွာ ဥပေါသထံ ကာတုံ ဝဋ္ဋတိ။ ဧကေနာပိ ‘‘ပရိသုဒ္ဓံ လဘိတွာ ပဋိကရိဿာမီ’’တိ အာဘောဂံ ကတွာ ကာတုံ ဝဋ္ဋတိ။ တဒဟူတိ တသ္မိံ အဟု၊ တသ္မိံ ဒိဝသေတိ အတ္ထော။ နာနာသံဝါသကေဟီတိ လဒ္ဓိနာနာသံဝါသကေဟိ။ အနာဝါသော နာမ နဝကမ္မသာလာဒိကော ယော ကောစိ ပဒေသော။ အညတြ သင်္ဃေနာတိ သင်္ဃပ္ပဟောနကေဟိ ဘိက္ခူဟိ ဝိနာ။ အညတြ အန္တရာယာတိ ပုဗ္ဗေ ဝုတ္တံ ဒသဝိဓမန္တရာယံ ဝိနာ။ သဗ္ဗန္တိမေန ပန ပရိစ္ဆေဒေန အတ္တစတုတ္ထေန အန္တရာယေ ဝါ သတိ ဂန္တုံ ဝဋ္ဋတိ။ ယထာ စ အာဝါသာဒယော န ဂန္တဗ္ဗာ၊ ဧဝံ သစေ ဝိဟာရေ ဥပေါသထံ ကရောန္တိ၊ ဥပေါသထာဓိဋ္ဌာနတ္ထံ သီမာပိ နဒီပိ န ဂန္တဗ္ဗာ။ သစေ ပနေတ္ထ ကောစိ ဘိက္ခု ဟောတိ၊ တဿ သန္တိကံ ဂန္တုံ ဝဋ္ဋတိ။ ဝိဿဋ္ဌဥပေါသထာပိ အာဝါသာ ဂန္တုံ ဝဋ္ဋတိ။ ဧဝံ ဂတော အဓိဋ္ဌာတုမ္ပိ လဘတိ။ အာရညကေနာပိ ဘိက္ခုနာ ဥပေါသထဒိဝသေ ဂါမေ ပိဏ္ဍာယ စရိတွာ အတ္တနော ဝိဟာရမေဝ အာဂန္တဗ္ဗံ။ သစေ အညံ ဝိဟာရံ ဩက္ကမတိ၊ တတ္ထ ဥပေါသထံ ကတွာဝ အာဂန္တဗ္ဗံ၊ အကတွာ အာဂန္တုံ န ဝဋ္ဋတိ။ ယံ ဇညာ ‘‘အဇ္ဇေဝ တတ္ထ ဂန္တုံ သက္ကောမီ’’တိ (မဟာဝ။ အဋ္ဌ။ ၁၈၁) ¶ ဧဝရူပေါ ပန အာဝါသော ဂန္တဗ္ဗော။ တတ္ထ ဘိက္ခူဟိ သဒ္ဓိံ ဥပေါသထံ ကရောန္တေနာပိ ဟိ ဣမိနာ နေဝ ဥပေါသထန္တရာယော ကတော ဘဝိဿတီတိ။

ဥဒကံ အာသနေန စာတိ အာသနေန သဟ ပါနီယပရိဘောဇနီယံ ဥဒကဉ္စာတိ အတ္ထော။ သင်္ဃသန္နိပါတတော ပဌမံ ကတ္တဗ္ဗံ ပုဗ္ဗကရဏံ။ ပုဗ္ဗကရဏတော ပစ္ဆာ ကတ္တဗ္ဗမ္ပိ ဥပေါသထကမ္မတော ပဌမံ ကတ္တဗ္ဗတ္တာ ပုဗ္ဗကိစ္စံ။ ဥဘယမ္ပိ စေတံ ဥပေါသထကမ္မတော ပဌမံ ကတ္တဗ္ဗတ္တာ ‘‘ပုဗ္ဗကိစ္စ’’မိစ္စေဝ ဧတ္ထ ဝုတ္တန္တိ အာဟ ‘‘ဧဝံ ဒွီဟိ နာမေဟိ နဝဝိဓံ ပုဗ္ဗကိစ္စံ ဒဿိတ’’န္တိ။ ကိံ တံ ကတန္တိ ပုစ္ဆတီတိ အာဟ ‘‘န ဟီ’’တိအာဒိ။ တံ အကတွာ ဥပေါသထံ ကာတုံ န ဝဋ္ဋတိ ‘‘န၊ ဘိက္ခဝေ၊ ထေရေန အာဏတ္တေန အဂိလာနေန န ¶ သမ္မဇ္ဇိတဗ္ဗံ၊ ယော န သမ္မဇ္ဇေယျ၊ အာပတ္တိ ဒုက္ကဋဿာ’’တိအာဒိ (မဟာဝ။ ၁၅၉) ဝစနတော။ တေနေဝါဟ ‘‘တသ္မာ ထေရေန အာဏတ္တေနာ’’တိအာဒိ။

သစေ ပန အာဏတ္တော သမ္မဇ္ဇနိံ တာဝကာလိကမ္ပိ န လဘတိ၊ သာခါဘင်္ဂံ ကပ္ပိယံ ကာရေတွာ သမ္မဇ္ဇိတဗ္ဗံ။ တမ္ပိ အလဘန္တဿ လဒ္ဓကပ္ပိယံ ဟောတိ။ ပါနီယံ ပရိဘောဇနီယံ ဥပဋ္ဌာပေတဗ္ဗန္တိ အာဂန္တုကာနံ အတ္ထာယ ပါနီယပရိဘောဇနီယံ ဥပဋ္ဌာပေတဗ္ဗံ။ အာသနံ ပညာပေတဗ္ဗန္တိ ပီဌဖလကာဒိအာသနံ ပညာပေတဗ္ဗံ။ သစေ ဥပေါသထာဂါရေ အာသနာနိ နတ္ထိ၊ သံဃိကာဝါသတောပိ အာဟရိတွာ ပညာပေတွာ ပုန ဟရိတဗ္ဗာနိ။ အာသနေသု အသတိ ကဋသာရကေပိ တဋ္ဋိကာယောပိ ပညာပေတုံ ဝဋ္ဋတိ။ တဋ္ဋိကာသုပိ အသတိ သာခါဘင်္ဂါနိ ကပ္ပိယံ ကာရေတွာ ပညာပေတဗ္ဗာနိ။ ကပ္ပိယကာရကံ အလဘန္တဿ လဒ္ဓကပ္ပိယံ ဟောတိ။ ပဒီပေါ ကာတဗ္ဗောတိ ပဒီပေတဗ္ဗော၊ ပဒီပုဇ္ဇလနံ ကာတဗ္ဗန္တိ ဝုတ္တံ ဟောတိ။ အာဏာပေန္တေန ပန ‘‘အသုကသ္မိံ နာမ ဩကာသေ တေလံ ဝါ ဝဋ္ဋိ ဝါ ကပလ္လိကာ ဝါ အတ္ထိ၊ တံ ဂဟေတွာ ကရောဟီ’’တိ ဝတ္တဗ္ဗော။ သစေ တေလာဒီနိ နတ္ထိ၊ ပရိယေသိတဗ္ဗာနိ။ ပရိယေသိတွာ အလဘန္တဿ လဒ္ဓကပ္ပိယံ ဟောတိ။ အပိစ ကပါလေ အဂ္ဂိပိ ဇာလေတဗ္ဗော။ အာဏာပေန္တေန စ ကိဉ္စိ ကမ္မံ ကရောန္တော ဝါ သဒါကာလမေဝ ဧကော ဝါ ဘာရနိတ္ထရဏကော ဝါ သရဘာဏကဓမ္မကထိကာဒီသု အညတရော ဝါ န အာဏာပေတဗ္ဗော၊ အဝသေသာ ပန ဝါရေန အာဏာပေတဗ္ဗာ။ တေနာဟ ‘‘ထေရေနာပိ ပတိရူပံ ဉတွာ အာဏာပေတဗ္ဗ’’န္တိ။

ဗဟိ ဥပေါသထံ ကတွာ အာဂတေနာတိ နဒိယာ ဝါ သီမာယ ဝါ ယတ္ထ ကတ္ထစိ ဥပေါသထံ ကတွာ အာဂတေန ဆန္ဒော ဒါတဗ္ဗော၊ ‘‘ကတော မယာ ဥပေါသထော’’တိ အစ္ဆိတုံ န လဘတီတိ အဓိပ္ပာယော။ ကိစ္စပ္ပသုတော ဝါတိ ဂိလာနုပဋ္ဌာကာဒိကိစ္စပ္ပသုတော ဝါ။ သစေ ဂိလာနော ဆန္ဒပါရိသုဒ္ဓိံ ဒါတုံ န သက္ကောတိ၊ မဉ္စေန ဝါ ပီဌေန ဝါ သင်္ဃမဇ္ဈံ အာနေတွာ ဥပေါသထော ကာတဗ္ဗော။ သစေ ဂိလာနုပဋ္ဌာကာနံ ¶ ဘိက္ခူနံ ဧဝံ ဟောတိ ‘‘သစေ ခေါ မယံ ဣမံ ဂိလာနံ ဌာနာ စာဝေဿာမ၊ အာဗာဓော ဝါ အဘိဝဍ္ဎိဿတိ၊ ကာလကိရိယာ ဝါ ဘဝိဿတီ’’တိ၊ န တွေဝ သော ဂိလာနော ဌာနာ စာဝေတဗ္ဗော၊ သင်္ဃေန တတ္ထ ဂန္တွာ ဥပေါသထော ကာတဗ္ဗော၊ န တွေဝ ဝဂ္ဂေန သင်္ဃေန ဥပေါသထော ကာတဗ္ဗော။ ကရေယျ စေ၊ အာပတ္တိ ဒုက္ကဋဿ။ သစေ ဗဟူ တာဒိသာ ဂိလာနာ ဟောန္တိ၊ သင်္ဃေန ပဋိပါဋိယာ ဌတွာ ¶ သဗ္ဗေ ဟတ္ထပါသေ ကာတဗ္ဗာ။ သစေ ဒူရေ ဒူရေ ဟောန္တိ၊ သင်္ဃော နပ္ပဟောတိ၊ တံ ဒိဝသံ ဥပေါသထော န ကာတဗ္ဗော၊ န တွေဝ ဝဂ္ဂေန သင်္ဃေန ဥပေါသထော ကာတဗ္ဗော။ ‘‘အနုဇာနာမိ၊ ဘိက္ခဝေ၊ တဒဟုပေါသထေ ပါရိသုဒ္ဓိံ ဒေန္တေန ဆန္ဒမ္ပိ ဒါတုံ၊ သန္တိ သင်္ဃဿ ကရဏီယ’’န္တိ (မဟာဝ။ ၁၆၅) ဝုတ္တတ္တာ ဘဂဝတော အာဏံ ကရောန္တေန ‘‘ဆန္ဒံ ဒမ္မီ’’တိ ဝုတ္တံ။ ‘‘ဆန္ဒဟာရကော စေ၊ ဘိက္ခဝေ၊ ဒိန္နေ ဆန္ဒေ တတ္ထေဝ ပက္ကမတိ၊ အညဿ ဒါတဗ္ဗော ဆန္ဒော’’တိအာဒိဝစနတော (မဟာဝ။ ၁၆၅) ပုန အတ္တနော ဆန္ဒဒါနပရိဿမဝိနောဒနတ္ထံ ‘‘ဆန္ဒံ မေ ဟရာ’’တိ ဝုတ္တံ။ ‘‘ဆန္ဒဟာရကော စေ၊ ဘိက္ခဝေ၊ ဒိန္နေ ဆန္ဒေ သင်္ဃပ္ပတ္တော သဉ္စိစ္စ န အာရောစေတိ၊ အာဟဋော ဟောတိ ဆန္ဒော၊ ဆန္ဒဟာရကဿ အာပတ္တိ ဒုက္ကဋဿာ’’တိ (မဟာဝ။ ၁၆၅) ဝုတ္တတ္တာ ဒုက္ကဋတော တံ မောစေတုံ ‘‘ဆန္ဒံ မေ အာရောစေဟီ’’တိ ဝုတ္တံ။

ကာယေန ဝါ ဝါစာယ ဝါ ဥဘယေန ဝါ ဝိညာပေတဗ္ဗောတိ မနသာ စိန္တေတွာ ကာယပ္ပယောဂံ ကရောန္တေန ယေန ကေနစိ အင်္ဂပစ္စင်္ဂေန ဝါ၊ ဝါစံ ပန နိစ္ဆာရေတုံ သက္ကောန္တေန တထေဝ ဝါစာယ ဝါ၊ ဥဘယထာပိ သက္ကောန္တေန ကာယဝါစာဟိ ဝါ ဝိညာပေတဗ္ဗော၊ ဇာနာပေတဗ္ဗောတိ အတ္ထော။ ‘‘အယံ အတ္ထော’’တိ ဝစနတော ပန ယာယ ကာယစိပိ ဘာသာယ ဝိညာပေတုံ ဝဋ္ဋတိ၊ ပါရိသုဒ္ဓိဒါနေပိ ဆန္ဒဒါနေ ဝုတ္တသဒိသောဝ ဝိနိစ္ဆယော။ တံ ပန ဒေန္တေန ပဌမံ သန္တီ အာပတ္တိ ဒေသေတဗ္ဗာ။ န ဟိ သာပတ္တိကော သမာနော ‘‘ပါရိသုဒ္ဓိံ ဒမ္မိ၊ ပါရိသုဒ္ဓိံ မေ ဟရ၊ ပါရိသုဒ္ဓိံ မေ အာရောစေဟီ’’တိ (မဟာဝ။ ၁၆၄) ဝတ္တုံ လဘတိ။ ‘‘သန္တိ သင်္ဃဿ ကရဏီယာနီ’’တိ ဝတ္တဗ္ဗေ ဝစနဝိပလ္လာသေန ‘‘သန္တိ သင်္ဃဿ ကရဏီယ’’န္တိ ဝုတ္တံ။ တေသဉ္စ အတ္တနော စ ဆန္ဒပါရိသုဒ္ဓိံ ဒေတီတိ ဧတ္ထ ဆန္ဒော စ ဆန္ဒပါရိသုဒ္ဓိ စ ဆန္ဒပါရိသုဒ္ဓိ၊ တံ ဒေတီတိ သရူပေကသေသနယေန အတ္ထော ဒဋ္ဌဗ္ဗော။ ဣတရာတိ အညေသံ ဆန္ဒပါရိသုဒ္ဓိ။ ဗိဠာလသင်္ခလိကာ ဆန္ဒပါရိသုဒ္ဓီတိ ဧတ္ထ ဗိဠာလသင်္ခလိကာ နာမ ဗိဠာလဗန္ဓနံ။ တတ္ထ ဟိ သင်္ခလိကာယ ပဌမဝလယံ ဒုတိယဝလယံယေဝ ပါပုဏာတိ၊ န တတိယံ၊ ဧဝမယမ္ပိ ဆန္ဒပါရိသုဒ္ဓိ ဒါယကေန ယဿ ဒိန္နာ၊ တတော အညတ္ထ န ဂစ္ဆတီတိ (သာရတ္ထ။ ဋီ။ မဟာဝဂ္ဂ ၃။၁၆၄၊ ဝိ။ ဝိ။ ဋီ။ မဟာဝဂ္ဂ ၂။၁၆၄)။ တသ္မာ သာ ဗိဠာလသင်္ခလိကသဒိသတ္တာ ‘‘ဗိဠာလသင်္ခလိကာ’’တိ ဝုတ္တာ။ ဗိဠာလသင်္ခလိကဂ္ဂဟဏဉ္စေတ္ထ ယာသံ ကာသဉ္စိ သင်္ခလိကာနံ ဥပလက္ခဏမတ္တန္တိ ဒဋ္ဌဗ္ဗံ။

ဥတုက္ခာနန္တိ ¶ ¶ တံ တံ ကိရိယံ အရတိ ဝတ္တေတီတိ ဥတု၊ တဿ အက္ခာနံ ဥတုက္ခာနံ၊ ဥတုအာစိက္ခနန္တိ အတ္ထော။ ယထာ စ တဿ အာစိက္ခနံ၊ တံ သရူပတော ဒဿေတုံ ‘‘ဟေမန္တာဒီန’’န္တိအာဒိ ဝုတ္တံ။ ဂဏနာတိ ကလနာ။ ဘိက္ခုနီနံ အဋ္ဌဂရုဓမ္မေဟိ ဩဝဒနံ ဘိက္ခုနောဝါဒေါ။ သွေ ဥပေါသထောတိ အာဂန္တွာတိ ‘‘သွေ ဥပေါသထော ဟောတီ’’တိ ဝုတ္တေ အဇ္ဇေဝ အာဂန္တွာ ပန္နရသိကေ ဥပေါသထေ ပက္ခဿ စာတုဒ္ဒသိယံ၊ စာတုဒ္ဒသိကေ တေရသိယံ အာဂန္တွာတိ ဝုတ္တံ ဟောတိ။ မဟာပစ္စရိယံ ပန ‘‘ပက္ခဿ တေရသိယံယေဝ အာဂန္တွာ ‘အယံ ဥပေါသထော စာတုဒ္ဒသိကော ဝါ ပန္နရသိကော ဝါ’တိ ပုစ္ဆိတဗ္ဗ’’န္တိ (ပါစိ။ အဋ္ဌ။ ၁၄၉) ဝုတ္တံ။ ဧဝံ ပုစ္ဆိတေန စ ဘိက္ခုနာ သစေ စာတုဒ္ဒသိယံ ဥပေါသထံ ကရောန္တိ၊ ‘‘စာတုဒ္ဒသိကော ဘဂိနီ’’တိ ဝတ္တဗ္ဗံ။ သစေ ပန္နရသိယံ ကရောန္တိ၊ ‘‘ပန္နရသိကော ဘဂိနီ’’တိ ဝတ္တဗ္ဗံ။ ‘‘အနုဇာနာမိ၊ ဘိက္ခဝေ၊ ဌပေတွာ ဗာလံ၊ ဌပေတွာ ဂိလာနံ၊ ဌပေတွာ ဂမိကံ အဝသေသေဟိ ဩဝါဒံ ဂဟေတု’’န္တိ (စူဠဝ။ ၄၁၄) ဝုတ္တတ္တာ ‘‘တံ ဌပေတွာ’’တိအာဒိမာဟ။ တတ္ထ အာရောစနဝိဓာနံ အဇာနန္တော ဗာလော။ စာတုဒ္ဒသိကပန္နရသိကေသု ဥပေါသထေသု ဝါ ပါဋိပဒေ ဝါ ဂန္တုကာမော ဂမိယော၊ ဒုတိယပက္ခဒိဝသတော ပန ပဋ္ဌာယ တတော ဥဒ္ဓံ ဂစ္ဆန္တော ဣဓ ဂမိယော နာမ န ဟောတိ။ အရညေ နိဝါသော အဿာတိ အာရညိကော။ သောပိ ‘‘အဟံ အရညဝါသီ၊ သွေ ဥပေါသထော၊ ဝိဟာရေ န ဝသာမီ’’တိ အပ္ပဋိဂ္ဂဟိတုံ န လဘတိ။ ယဒိ န ဂဏှေယျ၊ ဒုက္ကဋံ အာပဇ္ဇေယျ။ ဝုတ္တဉှေတံ ‘‘န၊ ဘိက္ခဝေ၊ ဩဝါဒေါ န ဂဟေတဗ္ဗော၊ ယော န ဂဏှေယျ၊ အာပတ္တိ ဒုက္ကဋဿာ’’တိ (စူဠဝ။ ၄၁၄)။ တေန ပန ပစ္စာဟရဏတ္ထာယ သင်္ကေတော ကာတဗ္ဗော။ ဝုတ္တဉှေတံ ‘‘အနုဇာနာမိ၊ ဘိက္ခဝေ၊ အာရညိကေန ဘိက္ခုနာ ဩဝါဒံ ဂဟေတုံ၊ သင်္ကေတဉ္စ ကာတုံ အတြ ပတိဟရိဿာမီ’’တိ (စူဠဝ။ ၄၁၅)။ တသ္မာ အာရညိကေန ဘိက္ခုနာ သစေ ဘိက္ခုနီနံ ဝသနဂါမေ ဘိက္ခာ လဗ္ဘတိ၊ တတ္ထေဝ စရိတွာ ဘိက္ခုနိယော ဒိသွာ အာရောစေတွာ ဂန္တဗ္ဗံ။ နော စဿ တတ္ထ ဘိက္ခာ သုလဘာ ဟောတိ၊ သာမန္တဂါမေ စရိတွာ ဘိက္ခုနီနံ ဂါမံ အာဂမ္မ တထေဝ ကာတဗ္ဗံ။ သစေ ဒူရံ ဂန္တဗ္ဗံ ဟောတိ၊ သင်္ကေတော ကာတဗ္ဗော ‘‘အဟံ အသုကံ နာမ တုမှာကံ ဂါမဒွါရေ သဘံ ဝါ မဏ္ဍပံ ဝါ ရုက္ခမူလံ ဝါ ဥပသင်္ကမိဿာမိ၊ တတြ အာဂစ္ဆေယျာထာ’’တိ။ ဘိက္ခုနီဟိ တတြ ဂန္တဗ္ဗံ၊ အဂန္တုံ န လဗ္ဘတိ။ ဝုတ္တဉှေတံ ‘‘န၊ ဘိက္ခဝေ၊ ဘိက္ခုနိယာ သင်္ကေတံ ¶ န ဂန္တဗ္ဗံ၊ ယာ န ဂစ္ဆေယျ၊ အာပတ္တိ ဒုက္ကဋဿာ’’တိ (စူဠဝ။ ၄၁၅)။ ဥပေါသထဂ္ဂေတိ ဥပေါသထကရဏဋ္ဌာနေ။ အဋ္ဌဟိ အင်္ဂေဟီတိ –

‘‘သီလဝါ ဟောတိ၊ ပါတိမောက္ခသံဝရသံဝုတော ဝိဟရတိ အာစာရဂေါစရသမ္ပန္နော၊ အဏုမတ္တေသု ဝဇ္ဇေသု ဘယဒဿာဝီ သမာဒါယ သိက္ခတိ သိက္ခာပဒေသု။ ဗဟုဿုတော ဟောတိ သုတဓရော သုတသန္နိစယော၊ ယေ တေ ဓမ္မာ အာဒိကလျာဏာ မဇ္ဈေကလျာဏာ ပရိယောသာနကလျာဏာ သာတ္ထံ သဗျဉ္ဇနံ ကေဝလပရိပုဏ္ဏံ ပရိသုဒ္ဓံ ဗြဟ္မစရိယံ အဘိဝဒန္တိ၊ တထာရူပါဿ ဓမ္မာ ဗဟုဿုတာ ¶ ဟောန္တိ၊ ဓာတာ ဝစသာ ပရိစိတာ၊ မနသာ အနုပေက္ခိတာ၊ ဒိဋ္ဌိယာ သုပ္ပဋိဝိဒ္ဓါ။ ဥဘယာနိ ခေါ ပနဿ ပါတိမောက္ခာနိ ဝိတ္ထာရေန သွာဂတာနိ ဟောန္တိ သုဝိဘတ္တာနိ သုပ္ပဝတ္တီနိ သုဝိနိစ္ဆိတာနိ သုတ္တသော အနုဗျဉ္ဇနသော။ ကလျာဏဝါစော ဟောတိ ကလျာဏဝါက္ကရဏော။ ယေဘုယျေန ဘိက္ခုနီနံ ပိယော ဟောတိ မနာပေါ။ ပဋိဗလော ဟောတိ ဘိက္ခုနိယော ဩဝဒိတုံ။ န ခေါ ပနေတံ ဘဂဝန္တံ ဥဒ္ဒိဿ ပဗ္ဗဇိတာယ ကာသာယဝတ္ထဝသနာယ ဂရုဓမ္မံ အဇ္ဈာပန္နပုဗ္ဗော ဟောတိ။ ဝီသတိဝဿော ဝါ ဟောတိ အတိရေကဝီသတိဝဿော ဝါ’’တိ (ပါစိ။ ၁၄၇) –

ဣမေဟိ အဋ္ဌဟိ အင်္ဂေဟိ။ ပါသာဒိကေနာတိ ပသာဒါဝဟေန နိဒ္ဒေါသေန ကာယဝစီမနောကမ္မေန။ သမ္ပာဒေတူတိ တိဝိဓံ သိက္ခံ သမ္ပာဒေတု။ ယဒါ ပန တာဟိ ဘိက္ခုနီဟိ ပါတိမောက္ခုဒ္ဒေသကံယေဝ ဒိသွာ ဩဝါဒေါ ယာစိတော၊ တဒါ ဥပေါသထဂ္ဂေ သန္နိပတိတေဟိ ဘိက္ခုသင်္ဃေဟိ ပုဗ္ဗကိစ္စဝသေန ‘‘အတ္ထိ ကာစိ ဘိက္ခုနိယော ဩဝါဒံ ယာစမာနာ’’တိ ပုစ္ဆိတေ ‘‘ဧဝံ ဝဒေဟီ’’တိ အတ္တနာ ဝတ္တဗ္ဗဝစနံ အညေန ကထာပေတွာ ‘‘အတ္ထိ ကောစိ ဘိက္ခု ဘိက္ခုနောဝါဒကော သမ္မတော’’တိအာဒိံ သယံ ဝတွာ ပုန သယမေဝ ဂန္တွာ ဘိက္ခုနီနံ အာရောစေတဗ္ဗံ။ အညေန ဝါ ဘိက္ခုနာ တသ္မိံ ဒိဝသေ ပါတိမောက္ခံ ဥဒ္ဒိသာပေတဗ္ဗံ။ ဣဒန္တိ ‘‘တာဟီ’’တိ ဗဟုဝစနံ။ ဧကတော သဟေဝ။

ဉတ္တိဋ္ဌပကေန ဝါတိ ယတ္ထ တိဏ္ဏံ ဝသနဋ္ဌာနေ ပါတိမောက္ခုဒ္ဒေသော နတ္ထိ၊ တတ္ထ ဉတ္တိဋ္ဌပနကေန ဝါ။ ဣတရေန ဝါတိ ယတ္ထ ဒွေ ဘိက္ခူ ဝသန္တိ၊ ဧကော ဝါ၊ တတ္ထ ဣတရေန ဝါ ဘိက္ခုနာ သစေ သယမေဝ သမ္မတော၊ ‘‘အဟ’’န္တိ ဝတ္တဗ္ဗံ ¶ ။ တထေဝါတိ ဥပေါသထဂ္ဂေ ဝုတ္တသဒိသမေဝ။ ‘‘အာရောစေတွာဝါ’’တိ ဣမိနာ အနာရောစနံ ပဋိက္ခိပတိ။ ‘‘န၊ ဘိက္ခဝေ၊ ဩဝါဒေါ န အာရောစေတဗ္ဗော၊ ယော န အာရောစေယျ၊ အာပတ္တိ ဒုက္ကဋဿာ’’တိ (စူဠဝ။ ၄၁၅) ဝစနတော ဩဝါဒံ ဂဟေတွာ ဥပေါသထဂ္ဂေ အနာရောစေတုံ န ဝဋ္ဋတိ။

ပရိသုဒ္ဓဘာဝန္တိ အာပတ္တိယာ ပရိသုဒ္ဓတံ။ အာရောစေထာတိ အာဝိ ကရောထ။ ဧတ္ထ သိယာတိ ‘‘ပါတိမောက္ခံ ဥဒ္ဒိသိဿာမီ’’တိ ဧတသ္မိံ ပဒေ အယမနုယောဂေါ ဘဝေယျ။ ကိံ တံ၊ ယံ သိယာတိ အာဟ ‘‘သင်္ဃော ဥပေါသထံ ကရေယျာ’’တိအာဒိ။ ပုဗ္ဗေနာပရံ သန္ဓိယတီတိ ပုဗ္ဗဝစနေန အပရံ ဝစနံ သန္ဓာနံ ဂစ္ဆတိ။ သာမဂ္ဂိယာတိ ကာယစိတ္တေဟိ သဟိတတာယ။ ဂဏဿာတိ ဥဒ္ဒေသကံ ဌပေတွာ စတုဝဂ္ဂေ သေသဘိက္ခူနံ။ သင်္ဃဿ ဥဒ္ဒိဋ္ဌံ ဟောတီတိ သင်္ဃေန ဥဒ္ဒိဋ္ဌံ ဟောတိ။ ကရဏတ္ထေ စေတံ သာမိဝစနံ။ ဧတ္ထာတိ ပါတိမောက္ခုဒ္ဒေသေ။ လက္ခဏန္တိ သဘာဝေါ။

ထေရာ ¶ စ နဝါ စ မဇ္ဈိမာ စာတိ ဧတ္ထ ဒသဝဿာ၊ အတိရေကဒသဝဿာ စ ထေရာ။ ဦနပဉ္စဝဿာ နဝါ။ ပဉ္စဝဿာ၊ အတိရေကပဉ္စဝဿာ စ မဇ္ဈိမာ။ အဋ္ဌိံ ကတွာတိ အတ္တာနံ တေန ပါတိမောက္ခေန အတ္ထိကံ ကတွာ၊ တံ ဝါ ပါတိမောက္ခံ ‘‘ဣဒံ မယှံ ပါတိမောက္ခ’’န္တိ အတ္ထိံ ကတွာ။ မနသိ ကရိတွာတိ စိတ္တေ ဌပေတွာ။ သောတဒွါရဝသေနာတိ သောတဒွါရိကဇဝနဝိညာဏဝသေန။ သဗ္ဗစေတသာ သမန္နာဟရာမာတိ စိတ္တဿ ထောကမ္ပိ ဗဟိ ဂန္တုံ အဒေန္တာ သဗ္ဗေန စိတ္တေန အာဝဇ္ဇေမ၊ သလ္လက္ခေမာတိ အတ္ထော။ မနသိ ကရောမာတိ အာဝဇ္ဇေမ၊ သမန္နာဟရာမာတိ အတ္ထော။ သော စ ခေါ မနသိကာရော န ဧတ္ထ အာရမ္မဏပ္ပဋိပါဒနလက္ခဏော၊ အထ ခေါ ဝီထိပ္ပဋိပါဒနဇဝနပ္ပဋိပါဒနမနသိကာရပုဗ္ဗကစိတ္တေ ဌပနလက္ခဏောတိ အာဟ ‘‘ဧကဂ္ဂစိတ္တာ ဟုတွာ စိတ္တေ ဌပေယျာမာ’’တိ။ န သမေတီတိ န သံဂစ္ဆတိ။ ကသ္မာ န သံဂစ္ဆတီတိ အာဟ ‘‘သမဂ္ဂဿ ဟီ’’တိအာဒိ။ ကိဉ္စ ဘိယျောတိ အာဟ ‘‘ပါတိမောက္ခုဒ္ဒေသကော စာ’’တိအာဒိ။ သင်္ဃပရိယာပန္နောတိ သင်္ဃေ ပရိယာပန္နော အန္တောဂဓော။

ဣဒါနိ တံ ဒဿေတုန္တိ သမ္ဗန္ဓော။ အာယသ္မန္တောတိ သန္နိပတိတာနံ ပိယဝစနေန အာလပနံ။

အလဇ္ဇိတာတိ ¶ အလဇ္ဇိတာယ၊ အလဇ္ဇနဘာဝေနာတိ အတ္ထော။ တတိယတ္ထေ ဟိ ဣဒံ ပစ္စတ္တဝစနံ။ ‘‘အညာဏတာ’’တိအာဒီသုပိ ဧသေဝ နယော။ ကုက္ကုစ္စပ္ပကတတာတိ ကုက္ကုစ္စေန အဘိဘူတတာယ။ သတိသမ္မောသာတိ သတိဝိပ္ပဝါသတော။ ဝီတိက္ကမန္တိ သိက္ခာပဒဝီတိက္ကမနံ။

သဉ္စိစ္စာတိ သဉ္စေတေတွာ၊ အကပ္ပိယဘာဝံ ဇာနန္တောယေဝ ဝီတိက္ကမစိတ္တံ ပေသေတွာတိ အတ္ထော။ ပရိဂူဟတီတိ နိဂူဟတိ န ဒေသေတိ န ဝုဋ္ဌာတိ။ လဇ္ဇာယ ပရိဂူဟန္တော အလဇ္ဇီ န ဟောတိ၊ ‘‘ကိံ ဣမိနာ’’တိ အနာဒရိယေန ပရိဂူဟန္တော အလဇ္ဇီ ဟောတီတိ ဒဿေတိ။ အဂတိဂမနဉ္စ ဂစ္ဆတီတိ ဘဏ္ဍဘာဇနီယဋ္ဌာနာဒီသု ဆန္ဒာဂတိအာဒိဘေဒံ အဂတိဂမနဉ္စ ဂစ္ဆတိ။ အလဇ္ဇိပုဂ္ဂလောတိ အဇ္ဈတ္တိကသမုဋ္ဌာနလဇ္ဇာဝိရဟိတော ပုဂ္ဂလော။ ဧတ္ထ စ ‘‘သဉ္စိစ္စာ’’တိ ဣမိနာ အနာဒရိယဝသေနေဝ အာပတ္တိံ အာပဇ္ဇန္တော၊ အာပန္နဉ္စ အာပတ္တိံ ပရိဂူဟန္တော၊ ဘဏ္ဍဘာဇနီယဋ္ဌာနာဒီသု အဂတိဂမနံ ဂစ္ဆန္တော စ အလဇ္ဇီ ဟောတိ၊ န ဣတရောတိ ဒဿေတိ။

မန္ဒောတိ မန္ဒပညော၊ အပညဿေဝေတံ နာမံ။ မောမူဟောတိ အတိသံမူဠှော။ ဝိရာဓေတီတိ န ရာဓေတိ န သာဓေတိ။ ကုက္ကုစ္စေတိ ဝိနယသံသယေ။ ကပ္ပိယံ စေ ကတ္တဗ္ဗံ သိယာတိ ဝိနယဓရံ ပုစ္ဆိတွာ တေန ဝတ္ထုံ ဩလောကေတွာ မာတိကံ၊ ပဒဘာဇနံ၊ အန္တရာပတ္တိံ၊ အနာပတ္တိဉ္စ ဩလောကေတွာ ‘‘ကပ္ပတိ၊ အာဝုသော၊ မာ ဧတ္ထ ကင်္ခီ’’တိ ဝုတ္တေ ကတ္တဗ္ဗံ ဘဝေယျ။

သဟသေယျစီဝရဝိပ္ပဝါသာဒီနီတိ ¶ ဧတ္ထ သဟသေယျာ နာမ အနုပသမ္ပန္နေန ဥတ္တရိဒိရတ္တတိရတ္တံ သဟသေယျာပတ္တိ၊ ဝိပ္ပဝါသော နာမ ဧကရတ္တဆာရတ္တဝသေန ဝိပ္ပဝါသော။ အာဒိသဒ္ဒေန သတ္တာဟာတိက္ကမာဒီသု အာပတ္တိံ သင်္ဂဏှာတိ။ သတ္တန္နံ အာပတ္တိက္ခန္ဓာနန္တိ ပါရာဇိကသင်္ဃာဒိသေသထုလ္လစ္စယပါစိတ္တိယပါဋိဒေသနီယဒုက္ကဋဒုဗ္ဘာသိတသင်္ခါတာနံ သတ္တန္နံ အာပတ္တိက္ခန္ဓာနံ။

ဒေသေတု ဝါ ပကာသေတု ဝါတိ သင်္ဃမဇ္ဈေ ဝါ ဂဏမဇ္ဈေ ဝါ ဧကပုဂ္ဂလေ ဝါ ဒေသေတု ဝါ ပကာသေတု ဝါ။ ဧတ္ထ စ ပါရာဇိကာပတ္တိဒေသနာ နာမ ဘိက္ခုဘာဝဿ ပရိစ္စာဂေါ။ ဝုဋ္ဌာနံ ပန ဒေသနာဝိသေသတ္တာ ‘‘ဒေသနာ’’တိ ဒဋ္ဌဗ္ဗံ။ ပကာသေတု ဝါတိ အာရောစေတု ဝါ။

ဧဝံ အနာပန္နာ ဝါတိ ဧဝံ ဆန္နံ အာကာရာနံ အညတရေန အနာပန္နာ ဝါ။ ဝုဋ္ဌိတာ ဝါတိ ပရိဝါသာဒိနာ ဝုဋ္ဌိတာ ဝါ။ အာရောစိတာ ဝါတိ အာဝိကတာ ¶ ဝါ။ အာရောစေန္တော စ ‘‘တုယှံ သန္တိကေ ဧကံ အာပတ္တိံ အာဝိကရောမီ’’တိ ဝါ ‘‘အာစိက္ခာမီ’’တိ ဝါ ‘‘အာရောစေမီ’’တိ ဝါ ‘‘မမ ဧကံ အာပတ္တိံ အာပန္နဘာဝံ ဇာနာဟီ’’တိ ဝါ ဝဒတု၊ ‘‘ဧကံ ဂရုကံ အာပတ္တိံ အာဝိကရောမီ’’တိ ဝါ အာဒိနာ နယေန ဝဒတု၊ သဗ္ဗေဟိပိ အာကာရေဟိ အာရောစိတာဝ ဟောတိ။ သစေ ပန ဂရုကာပတ္တိံ အာဝိကရောန္တော ‘‘လဟုကာပတ္တိံ အာဝိကရောမီ’’တိအာဒိနာ နယေန ဝဒတိ၊ အနာဝိကတာ ဟောတိ အာပတ္တိ။ ဝတ္ထုံ အာရောစေတိ၊ အာပတ္တိံ အာရောစေတိ၊ ဥဘယံ အာရောစေတိ၊ တိဝိဓေနာပိ အာရောစိတာဝ ဟောတိ။ အသန္တိယာ အာပတ္တိယာတိ ဘာဝေနဘာဝလက္ခဏေ ဘုမ္မံ။ တုဏှီဘာဝေနာပိ ဟီတိ ဧတ္ထ န ကေဝလံ ‘‘အာမ၊ မယံ ပရိသုဒ္ဓါ’’တိ ဝုတ္တေယေဝ၊ အထ ခေါ တုဏှီဘာဝေနာပီတိ အပိသဒ္ဒဿ အတ္ထော ဝေဒိတဗ္ဗော။

ကိံ တံ ယာဝတတိယာနုသာဝိတံ နာမ၊ ကထဉ္စေတံ ယာဝတတိယာနုသာဝိတံ ဟောတီတိ ဝိစာရဏာယံ အာစရိယာနံ မတိဘေဒမုခေန တမတ္ထံ ဒဿေတုံ ‘‘ယာဝတတိယံ အနုသာဝိတံ ဟောတီတိ ဧတ္ထာ’’တိအာဒိ ဝုတ္တံ။ တတ္ထ ယဒေတံ တိက္ခတ္တုံ အနုသာဝိတန္တိ သမ္ဗန္ဓော။ အတ္ထဗျဉ္ဇနဘေဒတောတိ အရီယတိ ဉာယတီတိ အတ္ထော၊ အဘိဓေယျံ၊ ဗျဉ္ဇီယတိ အတ္ထော အနေနာတိ ဗျဉ္ဇနံ၊ အက္ခရံ၊ အတ္ထော စ ဗျဉ္ဇနဉ္စ အတ္ထဗျဉ္ဇနာနိ၊ တေသံ ဘေဒေါ အတ္ထဗျဉ္ဇနဘေဒေါ၊ တတော၊ အတ္ထဿ စ ဗျဉ္ဇနဿ စ ဝိသဒိသတ္တာတိ အတ္ထော။

ဣဒါနိ တမေဝတ္ထံ ဝိဘာဝေတုံ ‘‘အနုသာဝနဉှိ နာမာ’’တိအာဒိမာဟ။ ဟီတိ ကာရဏတ္ထေ နိပါတော။ တဿ ပန ‘‘အဘိန္န’’န္တိ ဣမိနာ သမ္ဗန္ဓော ဝေဒိတဗ္ဗော။ တေနာတိ ဘိန္နတ္တာ။ အဿာတိ ‘‘ယဿ သိယာ’’တိအာဒိဝစနတ္တယဿ။ အဝဿဉ္စေတမေဝံ သမ္ပဋိစ္ဆိတဗ္ဗံ၊ အညထာ အတိပ္ပသင်္ဂေါပိ ¶ သိယာတိ ဒဿေတုံ ‘‘ယဒိ စေတ’’န္တိအာဒိမာဟ။ ဧတန္တိ ‘‘ယဿ သိယာ’’တိအာဒိဝစနတ္တယံ။ အပရေ ‘‘အနုသာဝိတ’’န္တိ ပဒံ န အတီတတ္ထံ ဒီပေတိ၊ အထ ခေါ အနာဂတတ္ထံ။ ဓာတွတ္ထသမ္ဗန္ဓော ကာလန္တရဝိဟိတောပိ ပစ္စယော ကာလန္တရေ သာဓု ဟောတီတိ ဝိကပ္ပေသုံ။ တေနာဟ ‘‘အပရေ ‘အနုသာဝိတ’န္တိ ပဒဿာ’’တိအာဒိ။ ဥပရိ ဥဒ္ဒေသာဝသာနေတိ ပါရာဇိကုဒ္ဒေသာဝသာနေ။ အတ္ထယုတ္တီနံ အဘာဝတောတိ အနာဂတတ္ထဿ စ ကာရဏဿ စ အဘာဝတော။ ဣဒါနိ တမေဝ ဝိဘာဝေတုံ ‘‘ဣဒံ ဟီ’’တိအာဒိမာဟ။ ကထမေတံ ဝိညာယတီတိ အာဟ ‘‘ယဒိ စဿာ’’တိအာဒိ။ အယန္တိ ¶ အနာဂတကာလော။ အနုသာဝိတံ ဟေဿတီတိ ဝဒေယျာတိ အနုပ္ပယောဂံ အနာဂတကာလံ ကတွာ ‘‘အနုသာဝိတံ ဟေဿတီ’’တိ ဗုဒ္ဓါ ဝဒေယျ။ အယံ ဟေတ္ထာဓိပ္ပာယော – ယဒိ စေတ္ထ ဓာတွတ္ထသမ္ဗန္ဓော တ-ပစ္စယော သိယာ၊ တထာ သတိ ဓာတွတ္ထသမ္ဗန္ဓော နာမ ဝိသေသနဝိသေသျဘာဝေါ၊ သော စ အနုပ္ပယောဂဿ သမာနတ္ထဘာဝေ သတိ ဥပ္ပဇ္ဇတိ၊ နာသတီတိ ‘‘ဟေဿတီ’’တိ အနုပ္ပယောဂံ ဝဒေယျ၊ န စ ဝုတ္တံ။ တသ္မာ အနာဂတံ န ဒီပေတိ၊ အတီတကာလမေဝ ဒီပေတီတိ။ အနုသာဝိယမာနေတိ ဝစနတောတိ ‘‘အနုသာဝိယမာနေ’’တိ ဝတ္တမာနကာလဝစနတော။ ယဒိ ဧဝံ ‘‘ယာဝတတိယံ အနုသာဝိတံ ဟောတီ’’တိ ကိမိဒန္တိ အာဟ ‘‘ယာဝတတိယ’’န္တိအာဒိ။ ကိံ တေန လက္ခီယတိ၊ ယေနေတံ လက္ခဏဝစနမတ္တံ သိယာတိ အာဟ ‘‘တေနာ’’တိအာဒိ။ တေနာတိ လက္ခဏဝစနမတ္တေန ဟေတုနာ။

တဒေတန္တိ ပါတိမောက္ခံ။ တံ ပနေတန္တိ ‘‘တတ္ထာယသ္မန္တေ ပုစ္ဆာမီ’’တိအာဒိကံ ယာဝတတိယာနုသာဝနံ။ န ဒိဿတီတိ နောပလဗ္ဘတိ။ ဣမမေဝ စ အတ္ထန္တိ ဣမံ အမှေဟိ ဝုတ္တမေဝတ္ထံ။ ယဒိ ဟိ ‘‘ယဿ သိယာ အာပတ္တီ’’တိအာဒိဝစနတ္တယံ ယာဝတတိယာနုသာဝနံ သိယာ၊ တဒေဝ ဥပေါသထက္ခန္ဓကေ (မဟာဝ။ ၁၃၂ အာဒယော) ဝဒေယျ၊ န ပန ‘‘သကိမ္ပိ အနုသာဝိတံ ဟောတီ’’တိအာဒိကန္တိ အဓိပ္ပာယော။ နနု စာယံ ဝိနိစ္ဆယော အဋ္ဌကထာသု န အာဂတော၊ အထ ကုတော လဒ္ဓါတိ အာဟ ‘‘အယမေတ္ထာ’’တိအာဒိ။ ဝိနယဋ္ဌာနေသု ကတပရိစယာနံ အာစရိယာနံ တံ တံ အတ္ထံ ဉာပေန္တီ ပဝေဏိ အာစရိယပရမ္ပရာ၊ တာယ အာဘတော အာနီတော အာစရိယပရမ္ပရာဘတော။

နနု သမ္ပဇာနမုသာဝါဒေ ပါစိတ္တိယေန ဘဝိတဗ္ဗံ၊ အထ ကထံ ဒုက္ကဋာပတ္တိ ဟောတီတိ အာဟ ‘‘သာ စ ခေါ န မုသာဝါဒလက္ခဏေနာ’’တိအာဒိ။ သမ္ပဇာနမုသာဝါဒေ ကိံ ဟောတီတိ ယွာယံ ‘‘သမ္ပဇာနမုသာဝါဒေါ အဿ ဟောတီ’’တိ ဝုတ္တော၊ သော အာပတ္တိတော ကိံ ဟောတိ၊ ကတရာ အာပတ္တိ ဟောတီတိ အတ္ထော။ ဒုက္ကဋံ ဟောတီတိ ဒုက္ကဋာပတ္တိ ဟောတိ။ ဝစီဒွါရေ အကိရိယသမုဋ္ဌာနာပတ္တိ ဟောတီတိ အဿ ဟိ ဘိက္ခုနော အဓမ္မိကာယ ပဋိညာယ တုဏှီဘူတဿ နိသိန္နဿ မနောဒွါရေ အာပတ္တိ နာမ နတ္ထိ။ ယသ္မာ ပန အာဝိကာတဗ္ဗံ နာဝိကာသိ၊ တေနဿ ဝစီဒွါရေ အကိရိယတော အယံ ¶ အာပတ္တိ သမုဋ္ဌာတီတိ ¶ ဝေဒိတဗ္ဗာ။ ဣဒါနိ ဝုတ္တမေဝတ္ထံ ပါဠိယာ သာဓေတုံ ‘‘ဝုတ္တမ္ပိ စေတ’’န္တိအာဒိမာဟ။ ဧတံ ဥပါလိတ္ထေရေန ပရိဝါရေ သေဒမောစနဂါထာသု (ပရိ။ ၄၇၉) ဝုတ္တမ္ပိ စာတိ အတ္ထော။

အနာလပန္တော မနုဇေန ကေနစိ ဝါစာတိ ကေနစိ မနုဇေန ဝါစာယ အနာလပန္တော။ ဂိရံ နော စ ပရေ ဘဏေယျာတိ ‘‘ဣတိ ဣမေ သောဿန္တီ’’တိ ပရပုဂ္ဂလေ သန္ဓာယ သဒ္ဒမ္ပိ န နိစ္ဆာရေယျ။ အာပဇ္ဇေယျ ဝါစသိကန္တိ ဝါစတော သမုဋ္ဌိတံ အာပတ္တိံ အာပဇ္ဇေယျ။ ပဉှာမေသာ ကုသလေဟိ စိန္တိတာတိ ဧတ္ထ ပဉှာမေသာတိ လိင်္ဂဗျတ္တယေန ဝုတ္တံ၊ ဧသော ပဉှော ကုသလေဟိ စိန္တိတောတိ အတ္ထော။ အယံ ပဉှော ဣမမေဝ မုသာဝါဒံ သန္ဓာယ ဝုတ္တော။

တံတံသမ္ပတ္တိယာ ဝိဗန္ဓနဝသေန သတ္တသန္တာနဿ အန္တရေ ဝေမဇ္ဈေ ဧတိ အာဂစ္ဆတီတိ အန္တရာယော၊ ဒိဋ္ဌဓမ္မိကာဒိအနတ္ထော၊ အတိက္ကမနဋ္ဌေန တသ္မိံ အန္တရာယေ နိယုတ္တော၊ အန္တရာယံ ဝါ ဖလံ အရဟတိ၊ အန္တရာယဿ ဝါ ကရဏသီလောတိ အန္တရာယိကော။ တေနာဟ ‘‘ဝိပ္ပဋိသာရဝတ္ထုတာယာ’’တိအာဒိ။ တတ္ထ ဝိပ္ပဋိသာရဝတ္ထုတာယာတိ ဝိပ္ပဋိသာရော နာမ ပစ္ဆာနုတာပဝသေန စိတ္တဝိပ္ပဋိသာရော၊ တဿ ကာရဏတာယာတိ အတ္ထော။ ပဌမဇ္ဈာနာဒိပစ္စယဘူတအအပ္ပဋိသာရဝိရုဒ္ဓဿ ဝိပ္ပဋိသာရဿ ပစ္စယတ္တာတိ ဝုတ္တံ ဟောတိ။ ပါမောဇ္ဇာဒိသမ္ဘဝန္တိ ဒုဗ္ဗလတရုဏာ ပီတိ ပါမောဇ္ဇံ၊ တံ အာဒိ ယေသံ တေ ပါမောဇ္ဇာဒယော၊ တေသံ သမ္ဘဝေါ ပဋိလာဘော ပါမောဇ္ဇာဒိသမ္ဘဝေါ၊ တံ။ အာဒိသဒ္ဒေန ပီတိပ္ပဿဒ္ဓါဒီနံ ဂဟဏံ။ ပဌမဇ္ဈာနာဒီနန္တိ ဧတ္ထာဒိသဒ္ဒေန ပန ‘‘ဒုတိယဿ ဈာနဿ အဓိဂမာယ အန္တရာယိကော၊ တတိယဿ ဈာနဿ အဓိဂမာယ အန္တရာယိကော၊ စတုတ္ထဿ ဈာနဿ အဓိဂမာယ အန္တရာယိကော၊ ဈာနာနံ၊ ဝိမောက္ခာနံ၊ သမာဓီနံ၊ သမာပတ္တီနံ၊ နေက္ခမ္မာနံ၊ နိဿရဏာနံ၊ ပဝိဝေကာနံ၊ ကုသလာနံ ဓမ္မာနံ အဓိဂမာယ အန္တရာယိကော’’တိ (မဟာဝ။ ၁၃၅) ဝုတ္တဒုတိယဇ္ဈာနာဒီနံ သင်္ဂဟော ဒဋ္ဌဗ္ဗော။ ‘‘တသ္မာ’’တိ ဝုတ္တေ ယံတံသဒ္ဒါနံ အဗျဘိစာရိတသမ္ဗန္ဓတာယ ‘‘ယသ္မာ’’တိ အယမတ္ထော ဥပဋ္ဌိတောယေဝ ဟောတီတိ အာဟ ‘‘တသ္မာတိ ယသ္မာ’’တိအာဒိ။ ဇာနန္တေနာတိ ဇာနမာနေန။ ဣမိနာဿ သမ္ပဇာနမုသာဝါဒဿ သစိတ္တကတံ ဒဿေတိ။ ဝိသုဒ္ဓိံ အပေက္ခတီတိ ဝိသုဒ္ဓါပေက္ခော၊ တေန ¶ ဝိသုဒ္ဓါပေက္ခေန။ သာ စ ဝိသုဒ္ဓိ ဣဓ ဝုဋ္ဌာနာဒီတိ အာဟ ‘‘ဝုဋ္ဌာတုကာမေန ဝိသုဇ္ဈိတုကာမေနာ’’တိ။ ဝုဋ္ဌာနဂါမိနိတော သင်္ဃာဒိသေသတော ဝုဋ္ဌာတုကာမေန၊ ဒေသနာဂါမိနိတော ဝိသုဇ္ဈိတုကာမေနာတိ အတ္ထော။ သင်္ဃမဇ္ဈေ ဝါ ဂဏမဇ္ဈေ ဝါ ဧကပုဂ္ဂလေ ဝါတိ ဥပေါသထဂ္ဂေ သင်္ဃဿ အာရောစနဝသေန သင်္ဃမဇ္ဈေ ဝါ တတ္ထေဝ ဥဘတော နိသိန္နာနံ အာရောစနဝသေန ဂဏမဇ္ဈေ ဝါ အနန္တရဿ အာရောစနဝသေန ဧကပုဂ္ဂလေ ဝါ ပကာသေတဗ္ဗာ။ ဣတော ဝုဋ္ဌဟိတွာတိ ဣတော ဥပေါသထဂ္ဂတော ဝုဋ္ဌာယ။ ဧတ္ထ ပန သဘာဂေါယေဝ ဝတ္တဗ္ဗော။ ဝိသဘာဂဿ ဟိ ဝုစ္စမာနေ ဘဏ္ဍနကလဟသင်္ဃဘေဒါဒီနိပိ ဟောန္တိ။ တသ္မာ တဿ အဝတွာ ‘‘ဣတော ဝုဋ္ဌဟိတွာ ¶ ပဋိကရိဿာမီ’’တိ အာဘောဂံ ကတွာ ဥပေါသထော ကာတဗ္ဗောတိ အန္ဓကဋ္ဌကထာယံ (မဟာဝ။ အဋ္ဌ။ ၁၇၀) ဝုတ္တံ။

ကရဏတ္ထေတိ တတိယာဝိဘတ္တိအတ္ထေ။ ကတ္တရိ ဟေတံ ပစ္စတ္တဝစနံ ဟောတိ ဖာသုသဒ္ဒါပေက္ခာယ။ ပစ္စတ္တဝစနန္တိ ပဌမာဝစနံ။ ပဌမဇ္ဈာနာဒီနံ အဓိဂမာယ ဖာသု ဟောတီတိ အဓိဂမတ္ထံ တဿ ဘိက္ခုနော ဖာသု ဟောတိ သုခံ ဟောတိ သံဝရဿ အဝိပ္ပဋိသာရဟေတုတ္တာ။ တေနာဟ ‘‘အဝိပ္ပဋိသာရမူလကာန’’န္တိအာဒိ။ ပါပပုညာနံ ကတာကတဝသေန စိတ္တဝိပ္ပဋိသာရာဘာဝေါ အဝိပ္ပဋိသာရော၊ သော မူလံ ကာရဏံ ယေသံ တေ အဝိပ္ပဋိသာရမူလာ၊ အဝိပ္ပဋိသာရမူလာယေဝ အဝိပ္ပဋိသာရမူလကာ၊ တေသံ အဝိပ္ပဋိသာရမူလကာနံ။ သုခပ္ပဋိပဒါ သမ္ပဇ္ဇတီတိ သုခါ ပဋိပဒါ သမိဇ္ဈတိ၊ ပဌမဇ္ဈာနာဒီနံ သုခေန အဓိဂမော ဟောတီတိ အဓိပ္ပာယော။ ဟောတိ စေတ္ထ –

‘‘နိဒါနေ ဉတ္တိဋ္ဌပနံ၊ ပုဗ္ဗကိစ္စဿ ပုစ္ဆနံ၊

နိဒါနုဒ္ဒေသသဝနေ၊ ဝိသုဒ္ဓါရောစနေ ဝိဓိ၊

အနာရောစနေ စာပတ္တိ၊ ဉေယျံ ပိဏ္ဍတ္ထပဉ္စက’’န္တိ။

ဣတိ ကင်္ခါဝိတရဏိယာ ပါတိမောက္ခဝဏ္ဏနာယ

ဝိနယတ္ထမဉ္ဇူသာယံ လီနတ္ထပ္ပကာသနိယံ

နိဒါနဝဏ္ဏနာ နိဋ္ဌိတာ။

ပါရာဇိကကဏ္ဍံ

ဣဒါနိ ¶ ¶ နိဒါနုဒ္ဒေသာနန္တရံ ဝုတ္တဿ ပါရာဇိကုဒ္ဒေသဿ အတ္ထံ သံဝဏ္ဏေတုံ ‘‘ဣဒါနီ’’တိအာဒိ အာရဒ္ဓံ။ နိဒါနာနန္တရန္တိ ဘာဝနပုံသကနိဒ္ဒေသော၊ နိဒါနံ အနန္တရံ ကတွာတိ ဝုတ္တံ ဟောတိ။ တတ္ထာတိ ပါရာဇိကကဏ္ဍေ။ ပါတိမောက္ခေတိ ဘိက္ခုပါတိမောက္ခေ။ စတ္တာရောတိ ဂဏနပရိစ္ဆေဒေါ ဦနာတိရေကဘာဝနိဝတ္တနတော။ ပါရာဇိကာတိ သဇာတိနာမံ။ အာပတ္တိယောတိ သဗ္ဗသာဓာရဏနာမံ။ ဥဒ္ဒိသီယတီတိ ဥဒ္ဒေသော။ ဘာဝပ္ပဓာနောယံ နိဒ္ဒေသော။ တေနာဟ ‘‘ဥဒ္ဒိသိတဗ္ဗတ’’န္တိ။

၁။ ပဌမပါရာဇိကဝဏ္ဏနာ

ယော ပနာတိ (ပါရာ။ အဋ္ဌ။ ၁။၄၅ ဘိက္ခုပဒဘာဇနီယဝဏ္ဏနာ) ဧတ္ထ ယသ္မာ ပနာတိ နိပါတမတ္တံ၊ ယောတိ အတ္ထပဒံ၊ တဉ္စ အနိယမေန ပုဂ္ဂလံ ဒီပေတိ။ တသ္မာ တဿ အတ္ထံ ဒဿေန္တော ‘‘ယော ကောစီ’’တိ အာဟ။ ယသ္မာ ပန ယော ယောကောစိ နာမ၊ သော အဝဿံ လိင်္ဂယုတ္တဇာတိနာမဂေါတ္တသီလဝိဟာရဂေါစရဝယေသု ဧကေနာကာရေန ပညာယတိ၊ တသ္မာ တံ တထာ ဉာပေတုံ ‘‘ရဿဒီဃာဒိနာ’’တိအာဒိမာဟ။ အာဒိသဒ္ဒေန နဝကမ္မာဒီနံ ဂဟဏံ။ လိင်္ဂါဒိဘေဒေနာတိ လိင်္ဂီယတိဉာယတိ ဧတေနာတိ လိင်္ဂံ၊ တံ အာဒိ ယေသံ တေတိ လိင်္ဂါဒယော၊ တေသံ ဘေဒေါ လိင်္ဂါဒိဘေဒေါ၊ တေန လိင်္ဂါဒိဘေဒေန။ ဧတ္ထာဒိသဒ္ဒေန ပန ယုတ္တာဒီနံ ဂဟဏံ။ ဣဒံ ဝုတ္တံ ဟောတိ – လိင်္ဂဝသေန ယာဒိသော ဝါ တာဒိသော ဝါ ဟောတု၊ ဒီဃော ဝါ ရဿော ဝါ ကာဠော ဝါ ဩဒါတော ဝါ မင်္ဂုရစ္ဆဝိ ဝါ ကိသော ဝါ ထူလော ဝါ။ ယောဂဝသေန ယေန ဝါ တေန ဝါ ယုတ္တော ဟောတု၊ နဝကမ္မယုတ္တော ဝါ ဥဒ္ဒေသယုတ္တော ဝါ ဝါသဓုရယုတ္တော ဝါ။ ဇာတိဝသေန ယံဇစ္စော ဝါ တံဇစ္စော ဝါ ဟောတု၊ ခတ္တိယော ဝါ ဗြာဟ္မဏော ဝါ ဝေဿော ဝါ သုဒ္ဓါ ဝါ။ နာမဝသေန ယထာနာမော ဝါ တထာနာမော ဝါ ဟောတု၊ ဗုဒ္ဓရက္ခိတော ဝါ ဓမ္မရက္ခိတော ဝါ သင်္ဃရက္ခိတော ဝါ။ ဂေါတ္တဝသေန ယထာဂေါတ္တော ဝါ တထာဂေါတ္တော ဝါ ဟောတု၊ ကစ္စာယနော ဝါ ဝါသိဋ္ဌော ဝါ ကောသိယော ဝါ။ သီလေသု ယထာသီလော ဝါ တထာသီလော ဝါ ဟောတု၊ နဝကမ္မသီလော ဝါ ဥဒ္ဒေသသီလော ဝါ ဝါသဓုရသီလော ဝါ။ ဝိဟာရေသုပိ ယထာဝိဟာရီ ဝါ တထာဝိဟာရီ ဝါ ¶ ဟောတု၊ နဝကမ္မဝိဟာရီ ဝါ ဥဒ္ဒေသဝိဟာရီ ဝါ ဝါသဓုရဝိဟာရီ ဝါ ¶ ။ ဂေါစရေသုပိ ယထာဂေါစရော ဝါ တထာဂေါစရော ဝါ ဟောတု၊ နဝကမ္မဂေါစရော ဝါ ဥဒ္ဒေသဂေါစရော ဝါ ဝါသဓုရဂေါစရော ဝါ။ ဝယေသုပိ ယော ဝါ သော ဝါ ဟောတု ထေရော ဝါ နဝေါ ဝါ မဇ္ဈိမော ဝါ၊ အထ ခေါ သဗ္ဗောဝ ဣမသ္မိံ အတ္ထေ ‘‘ယော’’တိ ဝုစ္စတီတိ။

ဣဒါနိ ‘‘ဘိက္ခူ’’တိ ပဒံ သံဝဏ္ဏေတုံ ‘‘ဧဟိဘိက္ခူပသမ္ပဒါ’’တိအာဒိမာဟ။ တတ္ထ ‘‘ဧဟိ ဘိက္ခူ’’တိ ဘဂဝတော ဝစနမတ္တေန ဘိက္ခုဘာဝေါ ဧဟိဘိက္ခူပသမ္ပဒါ။ ‘‘ဗုဒ္ဓံ သရဏံ ဂစ္ဆာမီ’’တိအာဒိနာ (မဟာဝ။ ၁၀၅) နယေန တိက္ခတ္တုံ ဝါစံ ဘိန္ဒိတွာ ဝုတ္တေဟိ တီဟိ သရဏဂမနေဟိ ဥပသမ္ပဒါ သရဏဂမနူပသမ္ပဒါ။ ဩဝါဒပ္ပဋိဂ္ဂဟဏူပသမ္ပဒါ (ပါရာ။ အဋ္ဌ။ ၁။၄၅) နာမ –

‘‘တသ္မာတိဟ တေ၊ ကဿပ၊ ဧဝံ သိက္ခိတဗ္ဗံ ‘တိဗ္ဗံ မေ ဟိရောတ္တပ္ပံ ပစ္စုပဋ္ဌိတံ ဘဝိဿတိ ထေရေသု နဝေသု မဇ္ဈိမေသူ’တိ၊ ဧဝဉှိ တေ ကဿပ သိက္ခိတဗ္ဗံ။ တသ္မာတိဟ တေ၊ ကဿပ၊ ဧဝံ သိက္ခိတဗ္ဗံ ‘ယံ ကိဉ္စိ ဓမ္မံ သုဏိဿာမိ ကုသလူပသံဟိတံ၊ သဗ္ဗံ တံ အဋ္ဌိံ ကတွာ မနသိ ကရိတွာ သဗ္ဗစေတသာ သမန္နာဟရိတွာ ဩဟိတသောတော ဓမ္မံ သုဏိဿာမီ’တိ၊ ဧဝဉှိ တေ၊ ကဿပ၊ သိက္ခိတဗ္ဗံ။ တသ္မာတိဟ တေ၊ ကဿပ၊ ဧဝံ သိက္ခိတဗ္ဗံ ‘သာတသဟဂတာ စ မေ ကာယဂတာသတိ န ဝိဇဟိဿတီ’တိ၊ ဧဝဉှိ တေ၊ ကဿပ၊ သိက္ခိတဗ္ဗ’’န္တိ (သံ။ နိ။ ၂။၁၅၄) –

ဣမိနာ ဩဝါဒပ္ပဋိဂ္ဂဟဏေန မဟာကဿပတ္ထေရဿ အနုညာတဥပသမ္ပဒါ။

ပဉှာဗျာကရဏူပသမ္ပဒါ နာမ သောပါကဿ အနုညာတဥပသမ္ပဒါ။ ဘဂဝါ ကိရ ပုဗ္ဗာရာမေ အနုစင်္ကမန္တံ သောပါကသာမဏေရံ ‘‘‘ဥဒ္ဓုမာတကသညာ’တိ ဝါ သောပါက ‘ရူပသညာ’တိ ဝါ ဣမေ ဓမ္မာ နာနတ္ထာ နာနာဗျဉ္ဇနာ၊ ဥဒါဟု ဧကတ္ထာ ဗျဉ္ဇနမေဝ နာန’’န္တိ (ပါရာ။ အဋ္ဌ။ ၁။၄၅) ဒသ အသုဘနိဿိတေ ပဉှေ ပုစ္ဆိ။ သော တေ ဗျာကာသိ။ ဘဂဝါ တဿ သာဓုကာရံ ဒတွာ ‘‘ကတိဝဿော တွံ၊ သောပါကာ’’တိ ပုစ္ဆိ။ သတ္တဝဿောဟံ ဘဂဝါတိ။ ‘‘သောပါက၊ တွံ မမ သဗ္ဗညုတညာဏေန သဒ္ဓိံ သံသန္ဒိတွာ ပဉှေ ဗျာကာသီ’’တိ အာရဒ္ဓစိတ္တော ဥပသမ္ပဒံ အနုဇာနိ၊ အယံ ပဉှာဗျာကရဏူပသမ္ပဒါ။

အဋ္ဌဂရုဓမ္မပဋိဂ္ဂဟဏူပသမ္ပဒါ ¶ နာမ မဟာပဇာပတိယာ အဋ္ဌဂရုဓမ္မပ္ပဋိဂ္ဂဟဏေန အနုညာတဥပသမ္ပဒါ။

ဒူတေနူပသမ္ပဒါ ¶ နာမ အဍ္ဎကာသိယာ ဂဏိကာယ အနုညာတဥပသမ္ပဒါ။

အဋ္ဌဝါစိကူပသမ္ပဒါ နာမ ဘိက္ခုနိယာ ဘိက္ခုနိသင်္ဃတော ဉတ္တိစတုတ္ထေန၊ ဘိက္ခုသင်္ဃတော ဉတ္တိစတုတ္ထေနာတိ ဣမေဟိ ဒွီဟိ ကမ္မေဟိ ဥပသမ္ပဒါ။

ဉတ္တိစတုတ္ထကမ္မူပသမ္ပဒါ နာမ ဘိက္ခူနံ ဧတရဟိ ဥပသမ္ပဒါ။ ဉတ္တိစတုတ္ထေနာတိ တီဟိ အနုဿာဝနာဟိ၊ ဧကာယ စ ဉတ္တိယာတိ ဧဝံ ဉတ္တိစတုတ္ထေန။ ကိဉ္စာပိ ဟိ ဉတ္တိ သဗ္ဗပဌမံ ဝုစ္စတိ၊ တိဿန္နံ ပန အနုဿာဝနာနံ အတ္ထဗျဉ္ဇနဘေဒါဘာဝတော အတ္ထဗျဉ္ဇနဘိန္နံ ဉတ္တိံ တာသံ စတုတ္ထန္တိ ကတွာ ‘‘ဉတ္တိစတုတ္ထ’’န္တိ ဝုစ္စတိ။ အကုပ္ပေနာတိ အကောပေတဗ္ဗတံ၊ အပ္ပဋိက္ကောသိတဗ္ဗတဉ္စ ဥပဂတေန။ ဌာနာရဟေနာတိ ကာရဏာရဟေန သတ္ထု သာသနာရဟေန။ ဥပသမ္ပန္နော နာမ ဥပရိဘာဝံ သမာပန္နော၊ ပတ္တောတိ အတ္ထော။ ဘိက္ခုဘာဝေါ ဟိ ဥပရိဘာဝေါ၊ တဉ္စေသ ယထာဝုတ္တေန ကမ္မေန သမာပန္နတ္တာ ‘‘ဥပသမ္ပန္နော’’တိ ဝုစ္စတိ။ ကသ္မာ ပနေတ္ထ ဣမိနာဝ ဥပသမ္ပန္နော ဣဓ ဂဟိတော၊ နာညေဟီတိ? ဝုစ္စတေ – ဧဟိဘိက္ခူပသမ္ပဒါ အန္တိမဘဝိကာနမေဝ၊ သရဏဂမနူပသမ္ပဒါ ပရိသုဒ္ဓါနံ၊ ဩဝါဒပ္ပဋိဂ္ဂဟဏပဉှာဗျာကရဏူပသမ္ပဒါ မဟာကဿပသောပါကာနံ၊ န စ တေ ဘဗ္ဗာ ပါရာဇိကာဒိလောကဝဇ္ဇံ အာပဇ္ဇိတုံ၊ အဋ္ဌဂရုဓမ္မပ္ပဋိဂ္ဂဟဏာဒယော စ ဘိက္ခုနီနံယေဝ အနုညာတာ။ အယဉ္စ ဘိက္ခု၊ တသ္မာ ဉတ္တိစတုတ္ထေနေဝ ဥပသမ္ပဒါကမ္မေန ဥပသမ္ပန္နော ဣဓ ဂဟိတော၊ နာညေဟီတိ ဝေဒိတဗ္ဗော။ ပဏ္ဏတ္တိဝဇ္ဇေသု ပန သိက္ခာပဒေသု အညေပိ ဧဟိဘိက္ခူပသမ္ပဒါယ ဥပသမ္ပန္နာဒယော သင်္ဂယှန္တိ (သာရတ္ထ။ ဋီ။ ၂။၄၅ ဘိက္ခုပဒဘာဇနီယဝဏ္ဏနာ)။ ဝက္ခတိ ဟိ ‘‘ပဏ္ဏတ္တိဝဇ္ဇေသု ပန အညေပိ သင်္ဂဟံ ဂစ္ဆန္တီ’’တိ။ ဣဒါနိ ‘‘အကုပ္ပေန ဌာနာရဟေန ဥပသမ္ပန္နော’’တိ သံခိတ္တေန ဝုတ္တမတ္ထံ ဝိတ္ထာရေတွာ ဒဿေတုံ ‘‘တဿ ပနာ’’တိအာဒိမာဟ။

တတ္ထာတိ တေသု ပဉ္စသု။ ဝသတိ ဧတ္ထာတိ ဝတ္ထု၊ အာဓာရော ပတိဋ္ဌာ။ တေနာဟ ‘‘ဥပသမ္ပဒါပေက္ခော ပုဂ္ဂလော’’တိ။ ဦနာနိ အပရိပုဏ္ဏာနိ ဝီသတိ ဝဿာနိ အဿာတိ ဦနဝီသတိဝဿော။ ဧတ္ထ ယံ ဝတ္တဗ္ဗံ၊ တံ ဥပရိ သပ္ပာဏကဝဂ္ဂေ ဦနဝီသတိသိက္ခာပဒေ (ကင်္ခါ။ အဋ္ဌ။ ဦနဝီသတိဝဿသိက္ခာပဒဝဏ္ဏနာ) ဝဏ္ဏယိဿာမ။ တေသူတိ ပဏ္ဍကာဒီသု ဧကာဒသသု အဘဗ္ဗပုဂ္ဂလေသု။ ပဏ္ဍကော (မဟာဝ။ အဋ္ဌ။ ၁၀၉) ပနေတ္ထ ပဉ္စဝိဓော ဟောတိ အာသိတ္တပဏ္ဍကော၊ ဥသူယပဏ္ဍကော ¶ ၊ ဩပက္ကမိကပဏ္ဍကော၊ နပုံသကပဏ္ဍကော၊ ပက္ခပဏ္ဍကောတိ။ တေသု အာသိတ္တပဏ္ဍကဿ စ ဥသူယပဏ္ဍကဿ ¶ စ ပဗ္ဗဇ္ဇာ န ဝါရိတာ၊ ဣတရေသံ တိဏ္ဏံ ဝါရိတာ။ တေသုပိ ပက္ခပဏ္ဍကဿ ယသ္မိံ ပက္ခေ ပဏ္ဍကော ဟောတိ၊ တသ္မိံယေဝဿ ပက္ခေ ပဗ္ဗဇ္ဇာ ဝါရိတာတိ။ တယော စေတ္ထ ပဗ္ဗဇ္ဇူပသမ္ပဒါနံ အဘဗ္ဗတာယ အဝတ္ထူ။ တေနာဟ ‘‘အာသိတ္တပဏ္ဍကဉ္စာ’’တိအာဒိ။ တတ္ထ ယဿ ပရေသံ အင်္ဂဇာတံ မုခေန ဂဟေတွာ အသုစိနာ အာသိတ္တဿ ပရိဠာဟော ဝူပသမ္မတိ၊ အယံ အာသိတ္တပဏ္ဍကော။ ယဿ ပရေသံ အဇ္ဈာစာရံ ပဿတော ဥသူယာယ ဥပ္ပန္နာယ ပရိဠာဟော ဝူပသမ္မတိ၊ အယံ ဥသူယပဏ္ဍကော။ ယဿ ဥပက္ကမေန ဗီဇာနိ အပနီတာနိ၊ အယံ ဩပက္ကမိကပဏ္ဍကော (ဝိ။ သင်္ဂ။ အဋ္ဌ။ ၁၃၅၊ ဝိ။ ဝိ။ ဋီ။ မဟာဝဂ္ဂ ၂။၁၀၉)။ ယော ပန ပဋိသန္ဓိယံယေဝ အဘာဝကော ဥပ္ပန္နော၊ အယံ နပုံသကပဏ္ဍကော။ ဧကစ္စော ပန အကုသလဝိပါကာနုဘာဝေန ကာဠပက္ခေ ပဏ္ဍကော ဟောတိ၊ ဇုဏှပက္ခေ ပနဿ ပရိဠာဟော ဝူပသမ္မတိ၊ အယံ ပက္ခပဏ္ဍကောတိ ဝေဒိတဗ္ဗော။

ထေယျေန သံဝါသော ဧတဿာတိ ထေယျသံဝါသကော။ သော စ န သံဝါသမတ္တဿေဝ ထေနကော ဣဓာဓိပ္ပေတော၊ အထ ခေါ လိင်္ဂဿ၊ တဒုဘယဿ စ ထေနကောပီတိ အာဟ ‘‘ထေယျသံဝါသကော ပန တိဝိဓော’’တိအာဒိ။ န ဘိက္ခုဝဿာနိ ဂဏေတီတိ (မဟာဝ။ အဋ္ဌ။ ၁၁၀) ‘‘အဟံ ဒသဝဿော ဝါ ဝီသတိဝဿော ဝါ’’တိ မုသာ ဝတွာ ဘိက္ခုဝဿာနိ န ဂဏေတိ။ န ယထာဝုဍ္ဎံ ဘိက္ခူနံ ဝါ သာမဏေရာနံ ဝါ ဝန္ဒနံ သာဒိယတီတိ အတ္တနာ မုသာဝါဒံ ကတွာ ဒဿိတဝဿာနုရူပေန ယထာဝုဍ္ဎံ ဝန္ဒနံ နာဓိဝါသေတိ။ န အာသနေန ပဋိဗာဟတီတိ ‘‘အပေဟိ၊ မေ ဧတံ ပါပုဏာတီ’’တိ အာသနေန နပ္ပဋိဗာဟတိ။ န ဥပေါသထာဒီသု သန္ဒိဿတီတိ ဥပေါသထပ္ပဝါရဏာဒီသု န သန္ဒိဿတိ။ လိင်္ဂမတ္တဿေဝါတိ ဧဝသဒ္ဒေန သံဝါသံ နိဝတ္တေတိ။ သမာနောတိ သန္တော။ လိင်္ဂါနုရူပဿ သံဝါသဿာတိ သာမဏေရလိင်္ဂါနုရူပဿ သာမဏေရသံဝါသဿ။ သစေ ပန ကာသာယေ ဓုရံ နိက္ခိပိတွာ နဂ္ဂေါ ဝါ ဩဒါတဝတ္ထနိဝတ္ထော ဝါ မေထုနသေဝနာဒီဟိ အဿမဏော ဟုတွာ ကာသာယာနိ နိဝါသေတိ၊ လိင်္ဂတ္ထေနကော ဟောတိ။ သစေ ဂိဟိဘာဝံ ပတ္ထယမာနော ကာသာယံ ဩဝဋ္ဋိကံ ကတွာ၊ အညေန ဝါ အာကာရေန ဂိဟိနိဝါသနေန နိဝါသေတိ ‘‘သောဘတိ နု ခေါ မေ ဂိဟိလိင်္ဂံ၊ န သောဘတီ’’တိ ဝီမံသနတ္ထံ၊ ရက္ခတိ တာဝ၊ ‘‘သောဘတီ’’တိ သမ္ပဋိစ္ဆိတွာ ပုန လိင်္ဂံ သာဒိယတိ၊ လိင်္ဂတ္ထေနကော ဟောတိ။ ဩဒါတံ နိဝါသေတွာ ဝီမံသနသမ္ပဋိစ္ဆနေသုပိ ဧသေဝ နယော ¶ ။ သစေပိ နိဝတ္ထကာသာဝဿ ဥပရိ ဩဒါတံ နိဝါသေတွာ ဝီမံသတိ ဝါ သမ္ပဋိစ္ဆတိ ဝါ၊ ရက္ခတိ ဧဝ။

အန္တိမဝတ္ထုအဇ္ဈာပန္နကေပိ ဧသေဝ နယောတိ ပါရာဇိကံ အာပန္နကေ ဘိက္ခုမှိပိ ဧသေဝ နယောတိ အတ္ထော။ ဣဒံ ဝုတ္တံ ဟောတိ – သစေ ကောစိ ဘိက္ခု ကာသာယေ သဥဿာဟောဝ ဩဒါတံ နိဝါသေတွာ ¶ မေထုနံ ပဋိသေဝိတွာ ပုန ကာသာယာနိ နိဝါသေတွာ ဝဿဂဏနာဒိဘေဒံ သဗ္ဗံ ဝိဓိံ အာပဇ္ဇတိ၊ အယံ ဘိက္ခူဟိ ဒိန္နလိင်္ဂဿ အပရိစ္စတ္တတ္တာ န လိင်္ဂတ္ထေနကော၊ လိင်္ဂါနုရူပဿ သံဝါသဿ သာဒိတတ္တာ နာပိ သံဝါသတ္ထေနကောတိ။ ဝိဒေသန္တိ ပရဒေသံ။ ဣဒဉ္စ ဝဉ္စေတုံ သက္ကုဏေယျဋ္ဌာနံ ဒဿေတုံ ဝုတ္တံ။ ယော ပန သဒေသေပိ ဧဝံ ကရောတိ၊ သောပိ သံဝါသတ္ထေနကောဝ။ ‘‘သံဝါသမတ္တဿေဝါ’’တိ ဣမိနာ လိင်္ဂံ ပဋိက္ခိပတိ။ သစေ ကောစိ ဝုဍ္ဎပဗ္ဗဇိတော (မဟာဝ။ အဋ္ဌ။ ၁၁၀) ဘိက္ခုဝဿာနိ ဂဏေတွာ မဟာပေဠာဒီသု ဒိယျမာနဘတ္တံ ဂဏှာတိ၊ သောပိ ထေယျသံဝါသကော ဟောတိ။ သယံ သာမဏေရောဝ သာမဏေရပ္ပဋိပါဋိယာ ကူဋဝဿာနိ ဂဏေတွာ ဂဏှန္တော ထေယျသံဝါသကော န ဟောတိ။ ဘိက္ခု ပန ဘိက္ခုပဋိပါဋိယာ ကူဋဝဿာနိ ဂဏေတွာ ဂဏှန္တော ဘဏ္ဍဂ္ဃေန ကာရေတဗ္ဗော။

နနု သံဝါသော နာမ ဧကကမ္မံ ဧကုဒ္ဒေသော သမသိက္ခတာတိ အာဟ ‘‘ဘိက္ခုဝဿဂဏနာဒိကော ဟီ’’တိအာဒိ။ ဣမိနာ န ကေဝလံ ဧကကမ္မာဒိကောဝ ကိရိယဘေဒေါ သံဝါသောတိ ဣဓာဓိပ္ပေတော၊ အထ ခေါ တဒညော ဘိက္ခုဝဿဂဏနာဒိကောပီတိ ဒဿေတိ။ ဣမသ္မိံ အတ္ထေတိ ထေယျသံဝါသကာဓိကာရေ။ သိက္ခံ ပစ္စက္ခာယာတိ သိက္ခံ ပရိစ္စဇိတွာ။ ဣဒံ ဝုတ္တံ ဟောတိ – သစေ ကောစိ ဘိက္ခု သိက္ခံ ပစ္စက္ခာယ လိင်္ဂံ အနပနေတွာ ဒုဿီလကမ္မံ ကတွာ ဝါ အကတွာ ဝါ ‘‘န မံ ကောစိ ဇာနာတီ’’တိ ပုန သဗ္ဗံ ပုဗ္ဗေ ဝုတ္တံ ဝဿဂဏနာဒိဘေဒံ ဝိဓိံ ပဋိပဇ္ဇတိ၊ သော ထေယျသံဝါသကော ဟောတီတိ။

သစေ ပန ကဿစိ ရာဇာ ကုဒ္ဓါ ဟောတိ၊ သော ‘‘ဧဝံ မေ သောတ္ထိ ဘဝိဿတီ’’တိ သယမေဝ လိင်္ဂံ ဂဟေတွာ ပလာယတိ။ တံ ဒိသွာ ရညော အာရောစေန္တိ။ ရာဇာ ‘‘သစေ ပဗ္ဗဇိတော၊ န တံ လဗ္ဘာ ကိဉ္စိ ကာတု’’န္တိ တသ္မိံ ကောဓံ ပဋိဝိနေတိ။ သော ‘‘ဝူပသန္တံ မေ ရာဇဘယ’’န္တိ သင်္ဃမဇ္ဈံ အနောသရိတွာဝ ¶ ဂိဟိလိင်္ဂံ ဂဟေတွာ အာဂတော ပဗ္ဗာဇေတဗ္ဗော။ အထာပိ ‘‘သာသနံ နိဿာယ မယာ ဇီဝိတံ လဒ္ဓံ၊ ဟန္ဒ ဒါနိ အဟံ ပဗ္ဗဇာမီ’’တိ ဥပ္ပန္နသံဝေဂေါ တေနေဝ လိင်္ဂေန အာဂန္တွာ အာဂန္တုကဝတ္တံ န သာဒိယတိ၊ ဘိက္ခူဟိ ပုဋ္ဌော ဝါ အပုဋ္ဌော ဝါ ယထာဘူတမတ္တာနံ အာဝိကတွာဝ ပဗ္ဗဇ္ဇံ ယာစတိ၊ လိင်္ဂံ အပနေတွာ ပဗ္ဗာဇေတဗ္ဗော။ သစေ ပန ဝတ္တံ သာဒိယတိ၊ ပဗ္ဗဇိတာလယံ ဒဿေတိ၊ သဗ္ဗံ ပုဗ္ဗေ ဝုတ္တံ ဝဿဂဏနာဒိဘေဒံ ပဋိပဇ္ဇတိ၊ အယံ ပန န ပဗ္ဗာဇေတဗ္ဗော။

ဣဓ ပနေကစ္စော ဒုဗ္ဘိက္ခေ ဇီဝိတုံ အသက္ကောန္တော သယမေဝ လိင်္ဂံ ဂဟေတွာ သဗ္ဗပါသဏ္ဍိယဘတ္တာနိ ¶ ဘုဉ္ဇန္တော ဒုဗ္ဘိက္ခေ ဝီတိဝတ္တေ သင်္ဃမဇ္ဈံ အနောသရိတွာဝ ဂိဟိလိင်္ဂံ ဂဟေတွာ အာဂတောတိ သဗ္ဗံ ပုရိမသဒိသမေဝ။

အပရော မဟာကန္တာရံ နိတ္ထရိတုကာမော ဟောတိ၊ သတ္ထဝါဟော စ ပဗ္ဗဇိတေ ဂဟေတွာ ဂစ္ဆတိ။ သော ‘‘ဧဝံ မံ သတ္ထဝါဟော ဂဟေတွာ ဂမိဿတီ’’တိ သယမေဝ လိင်္ဂံ ဂဟေတွာ သတ္ထဝါဟေန သဒ္ဓိံ ကန္တာရံ နိတ္ထရိတွာ ခေမန္တံ ပတွာ သင်္ဃမဇ္ဈံ အနောသရိတွာဝ ဂိဟိလိင်္ဂံ ဂဟေတွာ အာဂတောတိ သဗ္ဗံ ပုရိမသဒိသမေဝ။

အပရော ရောဂဘယေ (မဟာဝ။ အဋ္ဌ။ ၁၁၀၊ ဝိ။ သင်္ဂ။ အဋ္ဌ။ ၁၃၈) ဥပ္ပန္နေ ဇီဝိတုံ အသက္ကောန္တော သယမေဝ လိင်္ဂံ ဂဟေတွာ သဗ္ဗပါသဏ္ဍိယဘတ္တာနိ ဘုဉ္ဇန္တော ရောဂဘယေ ဝူပသန္တေ သင်္ဃမဇ္ဈံ အနောသရိတွာဝ ဂိဟိလိင်္ဂံ ဂဟေတွာ အာဂတောတိ သဗ္ဗံ ပုရိမသဒိသမေဝ။

အပရဿ ဧကော ဝေရိကော ကုဒ္ဓါ ဟောတိ၊ ဃာတေတုကာမော နံ ဝိစရတိ။ သော ‘‘ဧဝံ မေ သောတ္ထိ ဘဝိဿတီ’’တိ သယမေဝ လိင်္ဂံ ဂဟေတွာ ပလာယတိ။ ဝေရိကော ‘‘ကုဟိံ သော’’တိ ပရိယေသန္တော ‘‘ပဗ္ဗဇိတွာ ပလာတော’’တိ သုတွာ ‘‘သစေ ပဗ္ဗဇိတော၊ န တံ လဗ္ဘာ ကိဉ္စိ ကာတု’’န္တိ တသ္မိံ ကောဓံ ပဋိဝိနေတိ။ သော ‘‘ဝူပသန္တံ မေ ဝေရိဘယ’’န္တိ သင်္ဃမဇ္ဈံ အနောသရိတွာဝ ဂိဟိလိင်္ဂံ ဂဟေတွာ အာဂတောတိ သဗ္ဗံ ပုရိမသဒိသမေဝ။

အပရော ဉာတိကုလံ ဂန္တွာ သိက္ခံ ပစ္စက္ခာယ ဂိဟီ ဟုတွာ ‘‘ဣမာနိ စီဝရာနိ ဣဓ ဝိနဿိဿန္တိ၊ သစေပိ ဣမာနိ ဂဟေတွာ ဝိဟာရံ ဂမိဿာမိ၊ အန္တရာမဂ္ဂေ မံ ‘စောရော’တိ ဂဟေဿန္တိ၊ ယံနူနာဟံ ကာယပရိဟာရိယာနိ ကတွာ ဂစ္ဆေယျ’’န္တိ စီဝရာဟရဏတ္ထံ နိဝါသေတွာ စ ပါရုပိတွာ စ ဝိဟာရံ ဂစ္ဆတိ။ တံ ဒူရတောဝ အာဂစ္ဆန္တံ ဒိသွာ သာမဏေရာ စ ဒဟရာ စ အဗ္ဘုဂ္ဂစ္ဆန္တိ၊ ဝတ္တံ ¶ ဒဿေန္တိ။ သော န သာဒိယတိ၊ ယထာဘူတမတ္တာနံ အာဝိကရောတိ။ သစေ ဘိက္ခူ ‘‘န ဒါနိ မယံ တံ မုဉ္စိဿာမာ’’တိ ဗလက္ကာရေန ပဗ္ဗာဇေတုကာမာ ဟောန္တိ၊ ကာသာယာနိ အပနေတွာ ပုန ပဗ္ဗာဇေတဗ္ဗော။ သစေ ပန ‘‘န ဣမေ မမ ဟီနာယာဝတ္တဘာဝံ ဇာနန္တီ’’တိ တံယေဝ ဘိက္ခုဘာဝံ ပဋိဇာနိတွာ သဗ္ဗံ ပုဗ္ဗေ ဝုတ္တဝဿဂဏနာဒိဘေဒံ ဝိဓိံ ပဋိပဇ္ဇတိ၊ အယံ န ပဗ္ဗာဇေတဗ္ဗော။ တေနာဟ ‘‘ရာဇဒုဗ္ဘိက္ခကန္တာရ-ရောဂဝေရီဘယေန ဝါ’’တိအာဒိ။ ဘယသဒ္ဒေါ စေတ္ထ ပစ္စေကံ ယောဇေတဗ္ဗော ‘‘ရာဇဘယေန၊ ဒုဗ္ဘိက္ခဘယေနာ’’တိအာဒိနာ။ လိင်္ဂံ အာဒိယတီတိ ဝေသံ ဂဏှာတိ။ ဣဓာတိ ဣမသ္မိံ သာသနေ။ သံဝါသံ နာဓိဝါသေတိ၊ ယာဝ သော သုဒ္ဓမာနသောတိ ဘိက္ခူနံ ဝဉ္စေတုကာမတာယ အဘာဝတော ယော သုဒ္ဓမာနသော ယာဝ သံဝါသံ နာဓိဝါသေတိ၊ တာဝ ဧသ ‘‘ဂိဟီ မံ ¶ ‘သမဏော’တိ ဇာနန္တူ’’တိ ဝဉ္စနစိတ္တေ သတိပိ ဘိက္ခူနံ ဝဉ္စေတုကာမတာယ အဘာဝတော ဒေါသော နတ္ထီတိ ထေယျသံဝါသကော နာမာတိ န ဝုစ္စတီတိ အတ္ထော။

တိတ္ထိယေသု ပက္ကန္တကော ပဝိဋ္ဌောတိ တိတ္ထိယပက္ကန္တကော။ သော စ န ကေဝလံ တတ္ထ ပဝိဋ္ဌမတ္တေနေဝ တိတ္ထိယပက္ကန္တကော ဟောတိ၊ အထ ခေါ တေသံ လဒ္ဓိဂ္ဂဟဏေန။ တေနာဟ ‘‘ယော ပနာ’’တိအာဒိ။ ‘‘ဥပသမ္ပန္နော’’တိ ဣမိနာ အနုပသမ္ပန္နော တိတ္ထိယပက္ကန္တကော န ဟောတီတိ ဒဿေတိ။ ဝုတ္တဉှေတံ ကုရုန္ဒိအဋ္ဌကထာယံ ‘‘အယဉ္စ တိတ္ထိယပက္ကန္တကော နာမ ဥပသမ္ပန္နဘိက္ခုနာ ကထိတော၊ တသ္မာ သာမဏေရော သလိင်္ဂေန တိတ္ထာယတနံ ဂတောပိ ပုန ပဗ္ဗဇ္ဇဉ္စ ဥပသမ္ပဒဉ္စ လဘတီ’’တိ (မဟာဝ။ အဋ္ဌ။ ၁၁၀)။ ကုသစီရာဒိကန္တိ ဧတ္ထာဒိသဒ္ဒေန ဖလကက္ခဏ္ဍဇဋာဒီနံ ဂဟဏံ။ သစေပိ ‘‘အယံ ပဗ္ဗဇ္ဇာ သေဋ္ဌာ’’တိ သေဋ္ဌဘာဝံ ဝါ ဥပဂစ္ဆတိ၊ န မုစ္စတိ၊ တိတ္ထိယပက္ကန္တကောဝ ဟောတိ။ ဝတာနီတိ ဥက္ကုဋိကပ္ပဓာနာဒီနိ ဝတာနိ။ သစေ ပန ‘‘သောဘတိ နု ခေါ မေ တိတ္ထိယပဗ္ဗဇ္ဇာ၊ နနု ခေါ သောဘတီ’’တိ ဝီမံသနတ္ထံ ကုသစီရာဒီနိ နိဝါသေတိ၊ ဇဋံ ဝါ ဗန္ဓတိ၊ ခါရိကာဇံ ဝါ အာဒိယတိ၊ ယာဝ န သမ္ပဋိစ္ဆတိ တံ လဒ္ဓိံ၊ တာဝ ရက္ခတိ၊ သမ္ပဋိစ္ဆိတမတ္တေ တိတ္ထိယပက္ကန္တကော ဟောတိ။ အစ္ဆိန္နစီဝရော ပန ကုသစီရာဒီနိ နိဝါသေန္တော၊ ရာဇဘယာဒီဟိ ဝါ တိတ္ထိယလိင်္ဂံ ဂဏှန္တော လဒ္ဓိယာ အဘာဝေန နေဝ တိတ္ထိယပက္ကန္တကော ဟောတိ။

အဝသေသော သဗ္ဗောပီတိ နာဂသုပဏ္ဏယက္ခဂန္ဓဗ္ဗာဒိကော။ ယဉှေတ္ထ ဝတ္တဗ္ဗံ၊ တံ ဟေဋ္ဌာ ဝုတ္တမေဝ။

ယထာ ¶ သမာနဇာတိကဿ (သာရတ္ထ။ ဋီ။ မဟာဝဂ္ဂ ၃။၁၁၂) ဝိကောပနေ ကမ္မံ ဂရုတရံ၊ န တထာ ဝိဇာတိကဿာတိ အာဟ ‘‘မနုဿဇာတိကာ’’တိ။ ပုတ္တသမ္ဗန္ဓေန မာတာပိတုသမညာ၊ ဒတ္တကိတ္တိမာဒိဝသေနပိ ပုတ္တဝေါဟာရော လောကေ ဒိဿတိ၊ သော စ ခေါ ပရိယာယတောတိ နိပ္ပရိယာယသိဒ္ဓတံ ဒဿေတုံ ‘‘ဇနေတ္တီ’’တိ ဝုတ္တံ။ ဇနေတ္တီတိ ဇနိကာ၊ မာတာတိ အတ္ထော။ ယထာ မနုဿတ္တဘာဝေ ဌိတဿေဝ ကုသလဓမ္မာနံ တိက္ခဝိသဒသူရဘာဝါပတ္တိ၊ ယထာ တံ တိဏ္ဏမ္ပိ ဗောဓိသတ္တာနံ ဗောဓိတ္တယနိပ္ဖတ္တိယံ၊ ဧဝံ မနုဿတ္တဘာဝေ ဌိတဿေဝ အကုသလဓမ္မာနမ္ပိ တိက္ခဝိသဒသူရဘာဝါပတ္တီတိ အာဟ ‘‘မနုဿဘူတေနေဝါ’’တိ။ သဉ္စိစ္စာတိ ‘‘ပါဏော’’တိ သညာယ သဒ္ဓိံ ဝဓကစေတနာယ စေတေတွာ။ အယံ မာတုဃာတကော နာမာတိ အယံ အာနန္တရိယေန မာတုဃာတကကမ္မေန မာတုဃာတကော နာမ။ ယေန ပန မနုဿိတ္ထိဘူတာပိ အဇနိကာ ပေါသာဝနိကမာတာ ဝါ မဟာမာတာ ဝါ စူဠမာတာ ဝါ ဇနိကာပိ ဝါ အမနုဿိတ္ထိဘူတာ မာတာ ဃာတိတာ၊ တဿ ပဗ္ဗဇ္ဇာ န ဝါရိတာ၊ န စ အာနန္တရိကော ဟောတိ။ ယေန သယံ တိရစ္ဆာနဘူတေန မနုဿိတ္ထိဘူတာ ¶ မာတာ ဃာတိတာ၊ သောပိ အာနန္တရိကော န ဟောတိ။ တိရစ္ဆာနဂတတ္တာ ပနဿ ပဗ္ဗဇ္ဇာ ပဋိက္ခိတ္တာ၊ ကမ္မံ ပနဿ ဘာရိယံ ဟောတိ၊ အာနန္တရိယံ အာဟစ္စေဝ တိဋ္ဌတိ။

ယေန မနုဿဘူတော ဇနကော ပိတာ သယမ္ပိ မနုဿဇာတိကေနေဝ သတာ သဉ္စိစ္စ ဇီဝိတာ ဝေါရောပိတော၊ အယံ အာနန္တရိယေန ပိတုဃာတကကမ္မေန ပိတုဃာတကော နာမာတိ ဣမမတ္ထံ အတိဒိသန္တော ‘‘ပိတုဃာတကေပိ ဧသေဝ နယော’’တိ အာဟ။ သစေပိ ဟိ ဝေသိယာ ပုတ္တော ဟောတိ၊ ‘‘အယံ မေ ပိတာ’’တိ န ဇာနာတိ၊ ယဿ သမ္ဘဝေန နိဗ္ဗတ္တော၊ သော စ တေန ဃာတိတော၊ ‘‘ပိတုဃာတကော’’တွေဝ သင်္ခံ ဂစ္ဆတိ၊ အာနန္တရိယဉ္စ ဖုသတိ (မဟာဝ။ အဋ္ဌ။ ၁၁၄)။

ဧဠကစတုက္ကံ (မ။ နိ။ အဋ္ဌ။ ၃။၁၂၈၊ အ။ နိ။ အဋ္ဌ။ ၁။၁။၂၇၅၊ ဝိဘ။ အဋ္ဌ။ ၈၀၉၊ သာရတ္ထ။ ဋီ။ မဟာဝဂ္ဂ ၃။၁၁၂)၊ သင်္ဂါမစတုက္ကံ၊ စောရစတုက္ကဉ္စေတ္ထ ကထေတဗ္ဗံ။ ‘‘ဧဠကံ မာရေမီ’’တိ အဘိသန္ဓိနာပိ ဟိ ဧဠကဋ္ဌာနေ ဌိတံ မနုဿဘူတံ မာတရံ ဝါ ပိတရံ ဝါ မာရေန္တော အာနန္တရိယံ ဖုသတိ မာရဏာဓိပ္ပာယေနေဝ အာနန္တရိယဝတ္ထုနော ဝိကောပိတတ္တာ။ ဧဠကာဘိသန္ဓိနာ၊ ပန မာတာပိတိအဘိသန္ဓိနာ ဝါ ဧဠကံ မာရေန္တော အာနန္တရိယံ န ဖုသတိ အာနန္တရိယဝတ္ထုအဘာဝတော။ မာတာပိတိအဘိသန္ဓိနာ မာတာပိတရော မာရေန္တော ဖုသတေဝ ¶ ။ ဧသေဝ နယော ဣတရသ္မိမ္ပိ စတုက္ကဒွယေ။ သဗ္ဗတ္ထ ဟိ ပုရိမံ အဘိသန္ဓိစိတ္တံ အပ္ပမာဏံ၊ ဝဓကစိတ္တံ၊ ပန တဒါရမ္မဏဇီဝိတိန္ဒြိယဉ္စ အာနန္တရိယာနာနန္တရိယဘာဝေ ပမာဏံ။

အရဟန္တဃာတကောပိ မနုဿအရဟန္တဝသေနေဝ ဝေဒိတဗ္ဗောတိ အာဟ ‘‘ယေန အန္တမသော ဂိဟိလိင်္ဂေ ဌိတောပီ’’တိအာဒိ။ အမနုဿဇာတိကံ ပန အရဟန္တံ၊ မနုဿဇာတိကံ ဝါ အဝသေသံ အရိယပုဂ္ဂလံ ဃာတေတွာ အာနန္တရိကော န ဟောတိ၊ ပဗ္ဗဇ္ဇာပိဿ န ဝါရိတာ၊ ကမ္မံ ပန ဗလဝံ ဟောတိ။ တိရစ္ဆာနော မနုဿအရဟန္တမ္ပိ ဃာတေတွာ အာနန္တရိကော န ဟောတိ၊ ကမ္မံ ပန ဘာရိယန္တိ အယမေတ္ထ ဝိနိစ္ဆယော။ ယထာ မာတာပိတူသု၊ ဧဝံ အရဟန္တေပိ ဧဠကစတုက္ကာဒီနိ ဝေဒိတဗ္ဗာနိ။

ပကတတ္တံ ဘိက္ခုနိန္တိ ပရိသုဒ္ဓသီလံ ဥဘတောသင်္ဃေ ဥပသမ္ပန္နံ ဘိက္ခုနိံ။ ယော (မဟာဝ။ အဋ္ဌ။ ၁၁၅) ပန ကာယသံသဂ္ဂေန သီလဝိနာသံ ပါပေတိ၊ တဿ ပဗ္ဗဇ္ဇာ စ ဥပသမ္ပဒါ စ န ဝါရိတာ။ ဗလက္ကာရေန ဩဒါတဝတ္ထဝသနံ ကတွာ အနိစ္ဆမာနံယေဝ ဒူသေန္တောပိ ဘိက္ခုနိဒူသကောယေဝ၊ ဗလက္ကာရေန ပန ဩဒါတဝတ္ထဝသနံ ကတွာ ဣစ္ဆမာနံ ဒူသေန္တော ဘိက္ခုနိဒူသကော န ဟောတိ။ ကသ္မာ? ယသ္မာ ဂိဟိဘာဝေ သမ္ပဋိစ္ဆိတမတ္တေယေဝ သာ အဘိက္ခုနီ ဟောတိ ¶ ။ သကိံ သီလဝိပန္နံ ပန ပစ္ဆာ ဒူသေန္တော သိက္ခမာနသာမဏေရီသု စ ဝိပ္ပဋိပဇ္ဇန္တော နေဝ ဘိက္ခုနိဒူသကော ဟောတိ၊ ပဗ္ဗဇ္ဇံ၊ ဥပသမ္ပဒဉ္စ လဘတီတိ။

ဓမ္မတော ဥဂ္ဂတံ အပဂတံ ဥဒ္ဓမ္မံ။ ဥဗ္ဗိနယန္တိ ဧတ္ထာပိ ဧသေဝ နယော။ စတုန္နံ ကမ္မာနန္တိ အပလောကနဉတ္တိဉတ္တိဒုတိယဉတ္တိစတုတ္ထသင်္ခါတာနံ စတုန္နံ ကမ္မာနံ။ ဣမေသဉှိ အညတရံ သင်္ဃကမ္မံ ဧကသီမာယံ ဝိသုံ ဝိသုံ ကရောန္တေန သင်္ဃော ဘိန္နော နာမ ဟောတိ။ တေန ဝုတ္တံ ‘‘စတုန္နံ ကမ္မာနံ အညတရဝသေန သင်္ဃံ ဘိန္ဒတီ’’တိ။

‘‘ဒုဋ္ဌစိတ္တေနာ’’တိ ဝုတ္တမေဝတ္ထံ ဝိဘာဝေတုံ ‘‘ဝဓကစိတ္တေနာ’’တိ ဝုတ္တံ။ ဝဓကစေတနာယ ဟိ ဒူသိတံ စိတ္တံ ဣဓ ဒုဋ္ဌစိတ္တံ နာမ။ လောဟိတံ ဥပ္ပာဒေတီတိ အန္တောသရီရေယေဝ လောဟိတံ ဥပ္ပာဒေတိ၊ သဉ္စိတံ ကရောတီတိ အဓိပ္ပာယော။ န ဟိ တထာဂတဿ အဘေဇ္ဇကာယတာယ ပရူပက္ကမေန ဓမ္မံ ဘိန္ဒိတွာ လောဟိတံ ပဂ္ဃရတိ၊ သရီရဿ ပန အန္တောယေဝ ဧကသ္မိံ ဌာနေ လောဟိတံ သမောသရတိ၊ အာဃာတေန ပကုပ္ပမာနံ သဉ္စိတံ ဟောတိ၊ တံ သန္ဓာယေတံ ¶ ဝုတ္တံ။ ယော ပန ရောဂဝူပသမနတ္ထံ ဇီဝကော ဝိယ သတ္ထေန ဖာလေတွာ ပူတိမံသဉ္စ လောဟိတဉ္စ နီဟရိတွာ ဖာသုကံ ကရောတိ၊ အယံ လောဟိတုပ္ပာဒကော န ဟောတိ၊ ဗဟုံ ပန သော ပုညံ ပသဝတိ (မဟာဝ။ အဋ္ဌ။ ၁၁၅)။

ဒုဝိဓမ္ပိ ဗျဉ္ဇနန္တိ ယထာဝုတ္တကမ္မဒွယတော သမုဋ္ဌိတံ ဣတ္ထိနိမိတ္တံ၊ ပုရိသနိမိတ္တဉ္စာတိ ဒုဝိဓမ္ပိ ဗျဉ္ဇနံ။ ဣမိနာ စ ဝိဂ္ဂဟေန ‘‘ဥဘတောဗျဉ္ဇနကော’’တိ အသမာနာဓိကရဏဝိသယော ဗာဟိရတ္ထသမာသောယံ၊ ပုရိမပဒေ စ ဝိဘတ္တိအလောပေါတိ ဒဿေတိ။ သော ဒုဝိဓော ဟောတိ ဣတ္ထိဥဘတောဗျဉ္ဇနကော၊ ပုရိသဥဘတောဗျဉ္ဇနကော စာတိ။ တတ္ထ ဣတ္ထိဥဘတောဗျဉ္ဇနကဿ ဣတ္ထိနိမိတ္တံ ပါကဋံ ဟောတိ၊ ပုရိသနိမိတ္တံ ပဋိစ္ဆန္နံ။ ပုရိသဥဘတောဗျဉ္ဇနကဿ ပုရိသနိမိတ္တံ ပါကဋံ၊ ဣတ္ထိနိမိတ္တံ ပဋိစ္ဆန္နံ။ ဣတ္ထိဥဘတောဗျဉ္ဇနကဿ ဣတ္ထီသု ပုရိသတ္တံ ကရောန္တဿ ဣတ္ထိနိမိတ္တံ ပဋိစ္ဆန္နံ ဟောတိ၊ ပုရိသနိမိတ္တံ ပါကဋံ ဟောတိ။ ပုရိသဥဘတောဗျဉ္ဇနကဿ ပုရိသာနံ ဣတ္ထိဘာဝံ ဥပဂစ္ဆန္တဿ ပုရိသနိမိတ္တံ ပဋိစ္ဆန္နံ ဟောတိ၊ ဣတ္ထိနိမိတ္တံ ပါကဋံ ဟောတိ။ ဣတ္ထိဥဘတောဗျဉ္ဇနကော သယဉ္စ ဂဗ္ဘံ ဂဏှာတိ၊ ပရဉ္စ ဂဏှာပေတိ။ ပုရိသဥဘတောဗျဉ္ဇနကော ပန သယံ န ဂဏှာတိ၊ ပရံ ဂဏှာပေတီတိ ဣဒမေတေသံ နာနာကရဏံ။

အပရာမသနာနီတိ အဂ္ဂဟဏာနိ အဝစနာနိ။ ‘‘အယံ ဣတ္ထန္နာမော’’တိ ဥပသမ္ပဒါပေက္ခဿ အကိတ္တနန္တိ ယဿ ဥပသမ္ပဒါ ကရီယတိ၊ တဿ အကိတ္တနံ၊ ‘‘သုဏာတု မေ၊ ဘန္တေ၊ သင်္ဃော၊ အယံ ဓမ္မရက္ခိတော အာယသ္မတော ဗုဒ္ဓရက္ခိတဿ ဥပသမ္ပဒါပေက္ခော’’တိ ဝတ္တဗ္ဗေ ‘‘အယံ ဓမ္မရက္ခိတော’’တိ (ပရိ။ အဋ္ဌ။ ၄၈၄) ¶ အဝစနန္တိ ဝုတ္တံ ဟောတိ။ ‘‘ဣတ္ထန္နာမဿ ဥပသမ္ပဒါပေက္ခော’’တိ ဥပဇ္ဈာယဿ အကိတ္တနန္တိ ‘‘သုဏာတု မေ၊ ဘန္တေ၊ သင်္ဃော၊ အယံ ဓမ္မရက္ခိတော အာယသ္မတော ဗုဒ္ဓရက္ခိတဿ ဥပသမ္ပဒါပေက္ခော’’တိ ဝတ္တဗ္ဗေ ‘‘သုဏာတု မေ၊ ဘန္တေ၊ သင်္ဃော၊ အယံ ဓမ္မရက္ခိတော ဥပသမ္ပဒါပေက္ခော’’တိ ဝတွာ ‘‘အာယသ္မတော ဗုဒ္ဓရက္ခိတဿာ’’တိ အဝစနံ။ သဗ္ဗေန သဗ္ဗံ ဉတ္တိယာ အနုစ္စာရဏန္တိ ဉတ္တိံ အဋ္ဌပေတွာ စတုက္ခတ္တုံ ကမ္မဝါစာယ ဧဝ အနုဿာဝနကမ္မဿ ကရဏံ။ သမ္ပန္နန္တိ ဥပေတံ။

ဟာပနံ ပရိစ္စဇနံ။ ယောပိ ဧကံ ဉတ္တိံ ဌပေတွာ သကိံယေဝ ဝါ ဒွိက္ခတ္တုံ ဝါ အနုဿာဝနံ ကရောတိ၊ အယမ္ပိ သာဝနံ ဟာပေတိယေဝ။ ဒုရုစ္စာရဏံ နာမ အညသ္မိံ ¶ အက္ခရေ ဝတ္တဗ္ဗေ အညဿ ဝစနံ။ တသ္မာ ကမ္မဝါစံ ကရောန္တေန ဘိက္ခုနာ ယွာယံ –

‘‘သိထိလံ ဓနိတဉ္စ ဒီဃရဿံ၊

ဂရုကံ လဟုကဉ္စေဝ နိဂ္ဂဟီတံ၊

သမ္ဗန္ဓဝဝတ္ထိတံ ဝိမုတ္တံ၊

ဒသဓာ ဗျဉ္ဇနဗုဒ္ဓိယာ ပဘေဒေါ’’တိ။ (ဒီ။ နိ။ အဋ္ဌ။ ၁။၁၉၀၊ မ။ နိ။ အဋ္ဌ။ ၁။၂၉၁၊ အ။ နိ။ အဋ္ဌ။ ၂။၃။၆၄၊ ပရိ။ အဋ္ဌ။ ၄၈၅၊ ဝိ။ သင်္ဂ။ အဋ္ဌ။ ၂၅၂) –

ဝုတ္တော၊ အယံ သုဋ္ဌု ဥပလက္ခေတဗ္ဗော။ ဧတ္ထ ဟိ သိထိလံ နာမ ပဉ္စသု ဝဂ္ဂေသု ပဌမတတိယံ။ ဓနိတံ နာမ တေသွေဝ ဒုတိယစတုတ္ထံ။ ဒီဃန္တိ ဒီဃေန ကာလေန ဝတ္တဗ္ဗံ အာ-ကာရာဒိ။ ရဿန္တိ တတော ဥပဍ္ဎကာလေန ဝတ္တဗ္ဗံ အ-ကာရာဒိ။ ဂရုကန္တိ ဒီဃမေဝ၊ ယံ ဝါ ‘‘အာယသ္မတော ဗုဒ္ဓရက္ခိတတ္ထေရဿ ယဿ နက္ခမတီ’’တိ ဧဝံ သံယောဂပရံ ကတွာ ဝုစ္စတိ။ လဟုကန္တိ ရဿမေဝ၊ ယံ ဝါ ‘‘အာယသ္မတော ဗုဒ္ဓရက္ခိတတ္ထေရဿ ယဿ န ခမတီ’’တိ ဧဝံ အသံယောဂပရံ ကတွာ ဝုစ္စတိ။ နိဂ္ဂဟီတန္တိ ယံ ကရဏာနိ နိဂ္ဂဟေတွာ အဝိဿဇ္ဇေတွာ အဝိဝဋေန မုခေန သာနုနာသိကံ ကတွာ ဝတ္တဗ္ဗံ။ သမ္ဗန္ဓန္တိ ယံ ပရပဒေန သမ္ဗန္ဓိတွာ ‘‘တုဏှိဿာ’’တိ ဝါ ‘‘တုဏှဿာ’’တိ ဝါ ဝုစ္စတိ။ ဝဝတ္ထိတန္တိ ယံ ပရပဒေန သမ္ဗန္ဓံ အကတွာ ဝိစ္ဆိန္ဒိတွာ ‘‘တုဏှီ အဿာ’’တိ ဝါ ‘‘တုဏှ အဿာ’’တိ ဝါ ဝုစ္စတိ။ ဝိမုတ္တန္တိ ယံ ကရဏာနိ အနိဂ္ဂဟေတွာ ဝိဿဇ္ဇေတွာ ဝိဝဋေန မုခေန အနုနာသိကံ အကတွာ ဝုစ္စတိ။

တတ္ထ ‘‘သုဏာတု မေ’’တိ ဝတ္တဗ္ဗေ တ-ကာရဿ ထ-ကာရံ ကတွာ ‘‘သုဏာထု မေ’’တိ ဝစနံ သိထိလဿ ¶ ဓနိတကရဏံ နာမ၊ တထာ ‘‘ပတ္တကလ္လံ ဧသာ ဉတ္တီ’’တိ ဝတ္တဗ္ဗေ ‘‘ပတ္ထကလ္လံ ဧသာ ဉတ္တီ’’တိအာဒိဝစနဉ္စ။ ‘‘ဘန္တေ၊ သင်္ဃော’’တိ ဝတ္တဗ္ဗေ ဘ-ကာရ ဃ-ကာရာနံ ဗ-ကာရ ဂ-ကာရေ ကတွာ ‘‘ဗန္တေ သံဂေါ’’တိ ဝစနံ ဓနိတဿ သိထိလကရဏံ နာမ။ ‘‘သုဏာတု မေ’’တိ ဝိဝဋေန မုခေန ဝတ္တဗ္ဗေ ‘‘သုဏံတု မေ’’တိ ဝါ ‘‘ဧသာ ဉတ္တီ’’တိ ဝတ္တဗ္ဗေ ‘‘ဧသံ ဉတ္တီ’’တိ ဝါ အဝိဝဋေန မုခေန အနုနာသိကံ ကတွာ ဝစနံ ဝိမုတ္တဿ နိဂ္ဂဟိတဝစနံ နာမ။ ‘‘ပတ္တကလ္လ’’န္တိ အဝိဝဋေန မုခေန အနုနာသိကံ ကတွာ ဝတ္တဗ္ဗေ ‘‘ပတ္တကလ္လာ’’တိ ဝိဝဋေန မုခေန အနုနာသိကံ အကတွာ ဝစနံ နိဂ္ဂဟိတဿ ဝိမုတ္တဝစနံ နာမ။ ဣတိ သိထိလေ ကတ္တဗ္ဗေ ဓနိတံ၊ ဓနိတေ ကတ္တဗ္ဗေ သိထိလံ၊ ဝိမုတ္တေ ကတ္တဗ္ဗေ နိဂ္ဂဟိတံ၊ နိဂ္ဂဟိတေ ကတ္တဗ္ဗေ ဝိမုတ္တန္တိ ဣမာနိ စတ္တာရိ ဗျဉ္ဇနာနိ ¶ အန္တောကမ္မဝါစာယ ကမ္မံ ဒူသေန္တိ။ ဧဝံ ဝဒန္တော ဟိ အညသ္မိံ အက္ခရေ ဝတ္တဗ္ဗေ အညံ ဝဒတိ၊ ဒုရုတ္တံ ကရောတီတိ ဝုစ္စတိ။

ဣတရေသု ပန ဒီဃရဿာဒီသု ဆသု ဗျဉ္ဇနေသု ဒီဃဋ္ဌာနေ ဒီဃမေဝ။ ရဿဋ္ဌာနေ စ ရဿမေဝါတိ ဧဝံ ယထာဌာနေ တံ တဒေဝ အက္ခရံ ဘာသန္တေန အနုက္ကမာဂတံ ပဝေဏိံ အဝိနာသေန္တေန ကမ္မဝါစာ ကာတဗ္ဗာ။ သစေ ပန ဧဝံ အကတွာ ဒီဃေ ဝတ္တဗ္ဗေ ရဿံ၊ ရဿေ ဝါ ဝတ္တဗ္ဗေ ဒီဃံ ဝဒတိ၊ တထာ ဂရုကေ ဝတ္တဗ္ဗေ လဟုကံ၊ လဟုကေ ဝါ ဝတ္တဗ္ဗေ ဂရုကံ ဝဒတိ၊ သမ္ဗန္ဓေ ဝါ ပန ဝတ္တဗ္ဗေ ဝဝတ္ထိတံ၊ ဝဝတ္ထိတေ ဝါ ဝတ္တဗ္ဗေ သမ္ဗန္ဓံ ဝဒတိ၊ ဧဝံ ဝုတ္တေပိ ကမ္မဝါစာ န ကုပ္ပတိ။ ဣမာနိ ဟိ ဆ ဗျဉ္ဇနာနိ ကမ္မံ န ကောပေန္တိ။

ယံ ပန သုတ္တန္တိကတ္ထေရာ ‘‘ဒ-ကာရော တ-ကာရမာပဇ္ဇတိ၊ တ-ကာရော ဒ-ကာရမာပဇ္ဇတိ၊ စ-ကာရော ဇ-ကာရမာပဇ္ဇတိ၊ ဇ-ကာရော စ-ကာရမာပဇ္ဇတိ၊ ယ-ကာရော က-ကာရမာပဇ္ဇတိ၊ က-ကာရော ယ-ကာရမာပဇ္ဇတိ၊ တသ္မာ ဒ-ကာရာဒီသု ဝတ္တဗ္ဗေသု တ-ကာရာဒီနံ ဝစနံ န ဝိရုဇ္ဈတီ’’တိ ဝဒန္တိ၊ တံ ကမ္မဝါစံ ပတွာ န ဝဋ္ဋတိ။ တသ္မာ ဝိနယဓရေန နေဝ ဒ-ကာရော တ-ကာရော ကာတဗ္ဗော…ပေ… န က-ကာရော ယ-ကာရော။ ယထာပါဠိယာ နိရုတ္တိံ သောဓေတွာ ဒသဝိဓာယ ဗျဉ္ဇနနိရုတ္တိယာ ဝုတ္တဒေါသေ ပရိဟရန္တေန ကမ္မဝါစာ ကာတဗ္ဗာ။ ဣတရထာ ဟိ သာဝနံ ဟာပေတိ နာမ။ ဉတ္တိံ အဋ္ဌပေတွာ ပဌမံ အနုဿာဝနကရဏန္တိ သမ္ဗန္ဓော။

ယာဝတိကာ ဘိက္ခူ ကမ္မပ္ပတ္တာတိ ယတ္တကာ ဘိက္ခူ တဿ ဥပသမ္ပဒါကမ္မဿ ပတ္တာ ယုတ္တာ အနုရူပါ။ တေ စ ခေါ သဗ္ဗန္တိမေန ပရိယာယေန ဟတ္ထပါသံ အဝိဇဟိတွာ ဧကသီမဋ္ဌာ ပဉ္စ ပကတတ္တာ ဘိက္ခူ။ န ဟိ တေဟိ ဝိနာ တံ ကမ္မံ ကရီယတိ၊ န တေသံ ဆန္ဒော ဧတိ။ အဝသေသာ ပန သစေပိ သဟဿမတ္တာ ဟောန္တိ၊ သစေ ဧကသီမဋ္ဌာ ဧကသ္မိံ ဌာနေ သမာနသံဝါသကာ၊ သဗ္ဗေ ဆန္ဒာရဟာဝ ¶ ဟောန္တိ၊ ဆန္ဒံ ဒတွာ အာဂစ္ဆန္တု ဝါ၊ မာ ဝါ၊ ကမ္မံ န ကုပ္ပတိ။ ပဋိက္ကောသနန္တိ နိဝါရဏံ။ တိဋ္ဌတိ ဧတ္ထ ဖလံ တဒါယတ္တဝုတ္တိတာယာတိ ဌာနံ၊ ကာရဏံ။ ဣဓ ပန ဥပသမ္ပဒါကမ္မကရဏဿ ကာရဏတ္တာ ဥပသမ္ပဒါကမ္မဝါစာသင်္ခါတံ ဘဂဝတော ဝစနံ ဝုစ္စတိ။ တေနာဟ ‘‘ကာရဏာရဟတ္တာ ပန သတ္ထု သာသနာရဟတ္တာ’’တိ။ ယထာ စ ‘‘တံ ကတ္တဗ္ဗ’’န္တိ ဘဂဝတာ အနုသိဋ္ဌံ၊ တထာကရဏံ ဥပသမ္ပဒါကမ္မဿ ကာရဏံ ဟောတီတိ ¶ ဌာနာရဟံ နာမ။ ကေစိ (သာရတ္ထ။ ဋီ။ ၂။၄၅) ပန ‘‘ဌာနာရဟေနာတိ ဧတ္ထ ‘န၊ ဘိက္ခဝေ၊ ဟတ္ထစ္ဆိန္နော ပဗ္ဗာဇေတဗ္ဗော’တိအာဒိ (မဟာဝ။ ၁၁၉) သတ္ထုသာသနံ ဌာန’’န္တိ ဝဒန္တိ။ ဣဓာတိ ဣမသ္မိံ ပါရာဇိကေ။ ယထာ စ ဣဓ၊ ဧဝံ သဗ္ဗတ္ထာပိ လောကဝဇ္ဇသိက္ခာပဒေသု အယမေဝ အဓိပ္ပေတောတိ ဝေဒိတဗ္ဗံ။ တေနာဟ ‘‘ပဏ္ဏတ္တိဝဇ္ဇေသု ပနာ’’တိအာဒိ။ အညေပီတိ ဧဟိဘိက္ခူပသမ္ပန္နာဒယောပိ။ ကထမေတံ ဝိညာယတိ ပဏ္ဏတ္တိဝဇ္ဇေသု သိက္ခာပဒေသု အညေပိ သင်္ဂဟံ ဂစ္ဆန္တီတိ? အတ္ထတော အာပန္နတ္တာ။ တထာ ဟိ ‘‘ဒွေ ပုဂ္ဂလာ အဘဗ္ဗာ အာပတ္တိံ အာပဇ္ဇိတုံ ဗုဒ္ဓါ စ ပစ္စေကဗုဒ္ဓါ စ၊ ဒွေ ပုဂ္ဂလာ ဘဗ္ဗာ အာပတ္တိံ အာပဇ္ဇိတုံ ဘိက္ခူ စ ဘိက္ခုနိယော စာ’’တိ (ပရိ။ ၃၂၂) သာမညတော ဝုတ္တတ္တာ။ ဧဟိဘိက္ခူပသမ္ပန္နာဒယောပိ အသဉ္စိစ္စ အဿတိယာ အစိတ္တကံ သဟသေယျာပတ္တိအာဒိဘေဒံ ပဏ္ဏတ္တိဝဇ္ဇံ အာပဇ္ဇန္တီတိ (သာရတ္ထ။ ဋီ။ ၂။၄၅) အတ္ထတော အာပန္နံ။

ဣဒါနိ ‘‘ဘိက္ခူန’’န္တိ ဣမံ ပဒံ ဝိသေသတ္ထာဘာဝတော ဝိသုံ အဝဏ္ဏေတွာဝ ယံ သိက္ခဉ္စ သာဇီဝဉ္စ သမာပန္နတ္တာ ဘိက္ခူနံ သိက္ခာသာဇီဝသမာပန္နော ဟောတိ၊ တံ ဒဿေန္တော ‘‘ဘိက္ခူနံ သိက္ခာသာဇီဝသမာပန္နော’’တိအာဒိမာဟ။ သိက္ခိတဗ္ဗာတိ သိက္ခာ၊ ပါတိမောက္ခသံဝရသီလံ၊ သဟ ဇီဝန္တိ ဧတ္ထာတိ သာဇီဝံ၊ မာတိကာဒိဘေဒါ ပဏ္ဏတ္တိ၊ သိက္ခာ စ သာဇီဝဉ္စ သိက္ခာသာဇီဝံ၊ တဒုဘယံ သမာပန္နော ဥပဂတောတိ သိက္ခာသာဇီဝသမာပန္နော။ တေနာဟ ‘‘ယာ ဘိက္ခူန’’န္တိအာဒိ။ ဧတ္ထ စ ‘‘သိက္ခာ’’တိ သာဇီဝသဟစရိယတော အဓိသီလသိက္ခာဝ အဓိပ္ပေတာတိ အာဟ ‘‘အဓိသီလသင်္ခါတာ’’တိ။ အဓိကံ ဥတ္တမံ သီလန္တိ အဓိသီလံ၊ ‘‘အဓိသီလ’’န္တိ သင်္ခါတာ အဓိသီလသင်္ခါတာ။

ကတမံ ပနေတ္ထ သီလံ၊ ကတမံ အဓိသီလန္တိ? ဝုစ္စတေ – ပဉ္စင်္ဂဒသင်္ဂသီလံ တာဝ သီလမေဝ၊ န တံ အဓိသီလံ။ ပါတိမောက္ခသံဝရသီလံ ပန အဓိသီလ’’န္တိ ဝုစ္စတိ။ တဉှိ သူရိယော ဝိယ ပဇ္ဇောတာနံ၊ သိနေရု ဝိယ စ ပဗ္ဗတာနံ သဗ္ဗလောကိယသီလာနံ အဓိကဉ္စေဝ ဥတ္တမဉ္စ၊ ဗုဒ္ဓုပ္ပာဒေယေဝ စ ပဝတ္တတိ၊ န ဝိနာ ဗုဒ္ဓုပ္ပာဒါ။ န ဟိ တံ ပညတ္တိံ ဥဒ္ဓရိတွာ အညော သတ္တော ပညာပေတုံ သက္ကောတိ၊ ဗုဒ္ဓါယေဝ ပနဿ သဗ္ဗသော ကာယဝစီဒွါရဇ္ဈာစာရသောတံ ဆိန္ဒိတွာ တဿ တဿ ဝီတိက္ကမဿ အနုစ္ဆဝိကံ တံ တံ သီလသံဝရံ ပညာပေန္တိ။ ပါတိမောက္ခသံဝရသီလတောပိ ¶ စ မဂ္ဂဖလသမ္ပယုတ္တမေဝ သီလံ အဓိသီလံ၊ တံ ပန ဣဓ န အဓိပ္ပေတံ။ န ဟိ တံ သမာပန္နော မေထုနဓမ္မံ ပဋိသေဝတိ။

ဧတေတိ ¶ နာနာဒေသဇာတိဂေါတ္တာဒိဘေဒဘိန္နာ ဘိက္ခူ။ သဟ ဇီဝန္တီတိ ဧကုဒ္ဒေသာဒိဝသေန သဟ ပဝတ္တန္တိ။ တေနာဟ ‘‘ဧကဇီဝိကာ သဘာဂဝုတ္တိနော’’တိ။ သိက္ခာပဒသင်္ခါတန္တိ ပဏ္ဏတ္တိသင်္ခါတံ။ သာပိ ဟိ ဝိရတိအာဒီနံ ဒီပနတော ‘‘သိက္ခာပဒ’’န္တိ ဝုစ္စတိ။ ဝုတ္တမ္ပိ စေတံ ‘‘သိက္ခာပဒန္တိ ယော တတ္ထ နာမကာယော ပဒကာယော နိရုတ္တိကာယော ဗျဉ္ဇနကာယော’’တိ။ တတ္ထာတိ တေသု။ သိက္ခံ ပရိပူရေန္တောတိ အကတ္တဗ္ဗပရိဝဇ္ဇနကတ္တဗ္ဗကရဏဝသေန ဝါရိတ္တစာရိတ္တသင်္ခါတံ ဒုဝိဓံ သီလံ ပရိပူရေန္တောတိ အတ္ထော၊ ဝါရိတ္တသီလဝသေန ဝိရတိသမ္ပယုတ္တစေတနံ၊ စာရိတ္တသီလဝသေန ဝိရတိဝိပ္ပယုတ္တစေတနဉ္စ အတ္တနိ ပဝတ္တေန္တောတိ ဝုတ္တံ ဟောတိ။ သာဇီဝဉ္စ အဝီတိက္ကမန္တောတိ သိက္ခာပဒဉ္စ အမဒ္ဒန္တော၊ သီလသံဝရဏံ၊ သာဇီဝါနတိက္ကမနဉ္စာတိ ဣဒမေဝ ဒွယံ ဣဓ သမာပဇ္ဇနံ နာမာတိ အဓိပ္ပာယော။ တတ္ထ သာဇီဝါနတိက္ကမော သိက္ခာပါရိပူရိယာ ပစ္စယော။ တဿာနတိက္ကမနတော ဟိ ယာဝ မဂ္ဂါ သိက္ခာ ပရိပူရတိ။ အပိစေတ္ထ ‘‘သိက္ခံ ပရိပူရေန္တော’’တိ ဣမိနာ ဝိရတိစေတနာသင်္ခါတဿ သီလသံဝရဿ ဝိသေသတော သန္တာနေ ပဝတ္တနကာလောဝ ဂဟိတော၊ ‘‘အဝီတိက္ကမန္တော’’တိ ဣမိနာ ပန အပ္ပဝတ္တနကာလောပိ။ သိက္ခဉှိ ပရိပူရဏဝသေန အတ္တနိ ပဝတ္တေန္တောပိ နိဒ္ဒါဒိဝသေန အပ္ပဝတ္တေန္တောပိ ဝီတိက္ကမာဘာဝါ သိက္ခနဝသေန သမာပန္နောတိ ဝုစ္စတိ။

ယသ္မာ သိက္ခာပစ္စက္ခာနဿ ဧကစ္စံ ဒုဗ္ဗလျာဝိကမ္မံ အတ္ထော ဟောတိ၊ တသ္မာ တံ သန္ဓာယ ‘‘သိက္ခံ အပစ္စက္ခာယာ’’တိ ပဒဿ အတ္ထံ ဝိဝရန္တော ‘‘ဒုဗ္ဗလျံ အနာဝိကတွာ’’တိ အာဟာတိ ဒဿေတုံ ‘‘သိက္ခံ အပစ္စက္ခာယ ဒုဗ္ဗလျံ အနာဝိကတွာ’’တိအာဒိမာဟ။ တတ္ထ သိယာ (ပါရာ။ အဋ္ဌ။ ၁။၄၅ သိက္ခာပစ္စက္ခာနဝိဘင်္ဂဝဏ္ဏနာ)၊ ယသ္မာ န သဗ္ဗံ ဒုဗ္ဗလျာဝိကမ္မံ သိက္ခာပစ္စက္ခာနံ၊ တသ္မာ ‘‘ဒုဗ္ဗလျံ အနာဝိကတွာ’’တိ ပဌမံ ဝတွာ တဿ အတ္ထနိယမနတ္ထံ ‘‘သိက္ခံ အပစ္စက္ခာယာ’’တိ ဝတ္တဗ္ဗန္တိ? တံ န၊ ကသ္မာ? အတ္ထာနုက္ကမာဘာဝတော။ ‘‘သိက္ခာသာဇီဝသမာပန္နော’’တိ ဟိ ဝုတ္တတ္တာ ယံ သိက္ခံ သမာပန္နော၊ တံ အပစ္စက္ခာယ၊ ယဉ္စ သာဇီဝံ သမာပန္နော၊ တတ္ထ ဒုဗ္ဗလျံ အနာဝိကတွာတိ ဝုစ္စမာနေ အနုက္ကမေနေဝ အတ္ထော ဝုတ္တော ဟောတိ၊ န အညထာ။ တသ္မာ ဣဒမေဝ ပဌမံ ဝုတ္တန္တိ။

ဣဒါနိ တဒုဘယမေဝ ပါကဋံ ကတွာ ဒဿေတုံ ‘‘တတ္ထာ’’တိအာဒိမာဟ။ တဒဘာဝေနာတိ တေသံ စိတ္တာဒီနံ အဘာဝေန။ စဝိတုကာမတာစိတ္တေနာတိ အပဂန္တုကာမတာစိတ္တေန ¶ ။ ဒဝါတိ သဟသာ။ ယော ဟိ ¶ အညံ ဘဏိတုကာမော သဟသာ ‘‘ဗုဒ္ဓံ ပစ္စက္ခာမီ’’တိ ဘဏတိ၊ အယံ ဒဝါ ဝဒတိ နာမ။ ရဝါတိ ဝိရဇ္ဈိတွာ။ ယော ဟိ အညံ ဘဏိတုကာမော ဝိရုဇ္ဈိတွာ ‘‘ဗုဒ္ဓံ ပစ္စက္ခာမီ’’တိ ဘဏတိ၊ အယံ ရဝါ ဘဏတိ နာမ။ ပုရိမေန ကော ဝိသေသောတိ စေ? ပုရိမံ ပဏ္ဍိတဿာပိ သဟသာဝသေန အညဘဏနံ၊ ဣဒံ ပန မန္ဒတ္တာ မောမူဟတ္တာ ပက္ခလန္တဿ ‘‘အညံ ဘဏိဿာမီ’’တိ အညဘဏနံ။ ‘‘အက္ခရသမယာနဘိညာတတာယ ဝါ ကရဏသမ္ပတ္တိယာ အဘာဝတော ဝါ ကထေတဗ္ဗံ ကထေတုမသက္ကောန္တော ဟုတွာ အညံ ကထေန္တော ရဝါ ဘဏတိ နာမာ’’တိ (သာရတ္ထ။ ဋီ။ ၂။၅၄) ဧကေ။

ဝဇ္ဇာဝဇ္ဇံ ဥပနိဇ္ဈာယတီတိ ဥပဇ္ဈာယော၊ တံ ဥပဇ္ဈာယံ။ ‘‘ဧဝံ သဇ္ဈာယိတဗ္ဗံ၊ ဧဝံ အဘိက္ကမိတဗ္ဗ’’န္တိအာဒိနာ အာစာရသိက္ခာပနကော အာစရိယော။ အန္တေ သမီပေ ဝသတိ သီလေနာတိ အန္တေဝါသီ၊ ဝိဘတ္တိအလောပေန ယထာ ‘‘ဝနေကသေရုကာ’’တိ။ သမာနော ဥပဇ္ဈာယော အဿာတိ သမာနုပဇ္ဈာယကော။ ဧဝံ သမာနာစရိယကော။ သဗြဟ္မစာရိန္တိ ဘိက္ခုံ။ သော ဟိ ‘‘ဧကကမ္မံ၊ ဧကုဒ္ဒေသော၊ သမသိက္ခတာ’’တိ ဣမံ ဗြဟ္မံ သမာနံ စရတိ၊ တသ္မာ ‘‘သဗြဟ္မစာရီ’’တိ ဝုစ္စတိ။ ဧဝံ ဝုတ္တာနန္တိ ဧဝံ ပဒဘာဇနီယေ ဝုတ္တာနံ။ ယထာ ဟိ လောကေ သဿာနံ ဝိရုဟနဋ္ဌာနံ ‘‘ခေတ္တ’’န္တိ ဝုစ္စတိ၊ ဧဝမိမာနိပိ ဗုဒ္ဓါဒီနိ ပဒါနိ သိက္ခာပစ္စက္ခာနဿ ဝိရုဟနဋ္ဌာနတ္ထာ ‘‘ခေတ္တ’’န္တိ ဝုစ္စန္တီတိ အာဟ ‘‘ဣမေသံ ဒွါဝီသတိယာ ခေတ္တပဒါန’’န္တိ။ ယသ္မာ ပနေတေသံ ဝေဝစနေဟိပိ သိက္ခာပစ္စက္ခာနံ ဟောတိ၊ တသ္မာ ‘‘သဝေဝစနဿာ’’တိ ဝုတ္တံ။ ဝိဝိဓံ ဧကသ္မိံယေဝ အတ္ထေ ဝစနံ ဝိဝစနံ၊ ဝိဝစနမေဝ ဝေဝစနံ၊ ပရိယာယနာမံ၊ သဟ ဝေဝစနေဟီတိ သဝေဝစနံ၊ တဿ သဝေဝစနဿ။ ဧတ္ထ စ ဝဏ္ဏပဋ္ဌာနေ (သာရတ္ထ။ ဋီ။ ၂။၅၂၊ ဝိ။ ဝိ။ ဋီ။ ၁။၅၃၊ ဝဇိရ။ ဋီ။ ၅၃) အာဂတံ နာမသဟဿံ၊ ဥပါလိဂါထာသု (မ။ နိ။ ၂။၇၆) နာမသတံ၊ အညာနိ စ ဂုဏတော လဗ္ဘမာနာနိ နာမာနိ ‘‘ဗုဒ္ဓဝေဝစနာနီ’’တိ ဝေဒိတဗ္ဗာနိ။ သဗ္ဗာနိပိ ဓမ္မဿ နာမာနိ ‘‘ဓမ္မဝေဝစနာနီ’’တိ ဝေဒိတဗ္ဗာနိ။ ဧသ နယော သဗ္ဗတ္ထ။

တေသု ယံ ကိဉ္စိ ဝတ္တုကာမဿ ယံ ကိဉ္စိ ဝဒတော သိက္ခာပစ္စက္ခာနံ ဟောတီတိ တေသု ဒွါဝီသတိယာ ခေတ္တပဒေသု ယံ ကိဉ္စိ ဧကံ ပဒံ ဝတ္တုကာမဿ တတော အညံ ယံ ကိဉ္စိ ပဒမ္ပိ ဝစီဘေဒံ ကတွာ ဝဒတော ခေတ္တပဒန္တောဂဓတ္တာ သိက္ခာပစ္စက္ခာနံ ¶ ဟောတီတိ အတ္ထော။ ဣဒံ ဝုတ္တံ ဟောတိ – သစေ ပနာယံ ‘‘ဗုဒ္ဓံ ပစ္စက္ခာမီ’’တိ ဝတ္တုကာမော ပဒပစ္စာဘဋ္ဌံ ကတွာ ‘‘ပစ္စက္ခာမိ ဗုဒ္ဓ’’န္တိ ဝါ ဝဒေယျ၊ မိလက္ခဘာသာဒီသု ဝါ အညတရဘာသာယ တမတ္ထံ ဝဒေယျ၊ ‘‘ဗုဒ္ဓံ ပစ္စက္ခာမီ’’တိ ဝတ္တုကာမော ဥပ္ပဋိပါဋိယာ ‘‘ဓမ္မံ ပစ္စက္ခာမီ’’တိ ဝါ ‘‘သဗြဟ္မစာရိံ ပစ္စက္ခာမီ’’တိ ဝါ ဝဒေယျ၊ သေယျထာပိ ဥတ္တရိမနုဿဓမ္မဝိဘင်္ဂေ ‘‘ပဌမံ ဈာနံ သမာပဇ္ဇာမီ’’တိ ¶ ဝတ္တုကာမော ‘‘ဒုတိယံ ဈာန’’န္တိ ဝဒတိ။ သစေ ‘‘ယဿ ဝဒတိ၊ သော အယံ ဘိက္ခုဘာဝံ စဇိတုကာမော ဧတမတ္ထံ ဝဒတီ’’တိ ဧတ္တကမတ္တမ္ပိ ဇာနာတိ၊ ဝိရဒ္ဓံ နာမ နတ္ထိ၊ ခေတ္တမေဝ ဩတိဏ္ဏံ၊ ပစ္စက္ခာတာဝ ဟောတိ သိက္ခာ။ သက္ကတ္တာ ဝါ ဗြဟ္မတ္တာ ဝါ စုတသတ္တော ဝိယ စုတောဝ ဟောတိ သာသနာတိ။

အလန္တိ (ပါရာ။ အဋ္ဌ။ ၁။၅၂) ဟောတု၊ ပရိယတ္တန္တိ အတ္ထော။ ကိံ နု မေတိ ကိံ မယှံ ကိစ္စံ၊ ကိံ ကရဏီယံ၊ ကိံ သာဓေတဗ္ဗန္တိ အတ္ထော။ န မမတ္ထောတိ နတ္ထိ မမ အတ္ထော။ သုမုတ္တာဟန္တိ သုဋ္ဌု မုတ္တော အဟံ။ ပုရိမေဟိ စုဒ္ဒသဟိ ပဒေဟီတိ ဗုဒ္ဓါဒီဟိ သဗြဟ္မစာရိပရိယန္တေဟိ ပုရိမေဟိ စုဒ္ဒသဟိ ပဒေဟိ။ ယန္နူနာဟံ ပစ္စက္ခေယျန္တိ ဧတ္ထ ‘‘ယန္နူနာ’’တိ ပရိဝိတက္ကဒဿနေ နိပါတော။ ဣဒံ ဝုတ္တံ ဟောတိ – ‘‘သစာဟံ ဗုဒ္ဓံ ပစ္စက္ခေယျံ၊ သာဓု ဝတ မေ သိယာ’’တိ။ အာဒိသဒ္ဒေန ‘‘ပစ္စက္ခိ’’န္တိ ဝါ ‘‘ပစ္စက္ခိဿာမီ’’တိ ဝါ ‘‘ဘဝိဿာမီ’’တိ ဝါ ‘‘ဟောမီ’’တိ ဝါ ‘‘ဇာတောမှီ’’တိ ဝါ ‘‘အမှီ’’တိ ဝါ ဧဝံဘူတာနံ ဂဟဏံ။ သစေ ပန ‘‘အဇ္ဇ ပဋ္ဌာယ ‘ဂိဟီ’တိ မံ ဓာရေဟီ’’တိ ဝါ ‘‘ဇာနာဟီ’’တိ ဝါ ‘‘သဉ္ဇာနာဟီ’’တိ ဝါ ‘‘မနသိ ကရောဟီ’’တိ ဝါ ဝဒတိ၊ အရိယကေန ဝါ ဝဒတိ၊ မိလက္ခကေန ဝါ။ ဧဝမေတသ္မိံ အတ္ထေ ဝုတ္တေ ယဿ ဝဒတိ၊ သစေ သော ဇာနာတိ၊ ပစ္စက္ခာတာ ဟောတိ သိက္ခာ။ ဧသ နယော သေသေသုပိ ‘‘ဥပါသကော’’တိအာဒီသု သတ္တသု ပဒေသု။ ဧတ္ထ စ အရိယကံ နာမ မာဂဓဝေါဟာရော။ မိလက္ခကံ နာမ အနရိယကော အန္ဓဒမိဠာဒိ။

အက္ခရလိခနန္တိ ‘‘ဗုဒ္ဓံ ပစ္စက္ခာမီ’’တိအာဒိနာ အညေသံ ဒဿနတ္ထံ အက္ခရလိခနံ။ အဓိပ္ပာယဝိညာပကော အင်္ဂုလိသင်္ကောစနာဒိကော ဟတ္ထဝိကာရော ဟတ္ထမုဒ္ဒါ၊ ဟတ္ထသဒ္ဒေါ စေတ္ထ တဒေကဒေသေသု အင်္ဂုလီသု ဒဋ္ဌဗ္ဗော ‘‘န ဘုဉ္ဇမာနော သဗ္ဗံ ဟတ္ထံ မုခေ ပက္ခိပိဿာမီ’’တိအာဒီသု (ပါစိ။ ၆၁၈) ဝိယ။ တသ္မာ အဓိပ္ပာယဝိညာပကဿ အင်္ဂုလိသင်္ကောစနာဒိနော ဟတ္ထဝိကာရဿ ဒဿနံ ဟတ္ထမုဒ္ဒါဒိဒဿနန္တိ ¶ (သာရတ္ထ။ ဋီ။ ၂။၅၁) ဧဝမေတ္ထ အတ္ထော ဒဋ္ဌဗ္ဗော။ အာဒိသဒ္ဒေန သီသကမ္ပနဒဿနာဒိံ သင်္ဂဏှာတိ။

ဥမ္မတ္တကခိတ္တစိတ္တဝေဒနာဋ္ဋာနန္တိ ဧတ္ထ ဥမ္မတ္တကောတိ ပိတ္တုမ္မတ္တကော။ ခိတ္တစိတ္တောတိ ယက္ခေဟိ ကတစိတ္တဝိက္ခေပေါ၊ ယက္ခုမ္မတ္တကောတိ ဝုတ္တံ ဟောတိ။ ဥဘိန္နံ ပန ဝိသေသော အနာပတ္တိဝါရေ အာဝိဘဝိဿတိ။ ဝေဒနာဋ္ဋောတိ ဗလဝတိယာ ဒုက္ခဝေဒနာယ ဖုဋ္ဌော မုစ္ဆာပရေတော၊ တေန ဝိပ္ပလပန္တေန ပစ္စက္ခာတာပိ အပစ္စက္ခာတာဝ ဟောတိ။ မနုဿဇာတိကော ဟောတီတိ သဘာဂေါ ဝါ ဝိသဘာဂေါ ဝါ ဂဟဋ္ဌော ဝါ ပဗ္ဗဇိတော ဝါ ဝိညူ ယောကောစိ မနုဿော ဟောတိ။ ဥမ္မတ္တကာဒီနန္တိ ဧတ္ထာဒိသဒ္ဒေန ခိတ္တစိတ္တဝေဒနာဋ္ဋဒေဝတာတိရစ္ဆာနဂတာနံ ဂဟဏံ။ တတြ ဥမ္မတ္တကခိတ္တစိတ္တဝေဒနာဋ္ဋတိရစ္ဆာနဂတာနံ သန္တိကေ ပစ္စက္ခာတာပိ အဇာနနဘာဝေန အပစ္စက္ခာတာဝ ဟောတိ။ ဒေဝတာယ ပန သန္တိကေ အတိခိပ္ပံ ဇာနနဘာဝေန။ ဒေဝတာ နာမ မဟာပညာ တိဟေတုကပ္ပဋိသန္ဓိကာ အတိခိပ္ပံ ဇာနန္တိ၊ စိတ္တဉ္စ နာမေတံ လဟုပရိဝတ္တံ၊ တသ္မာ ‘‘စိတ္တလဟုကဿ ပုဂ္ဂလဿ စိတ္တဝသေနေဝ မာ အတိခိပ္ပံ ဝိနာသော အဟောသီ’’တိ ဒေဝတာယ သန္တိကေ ¶ သိက္ခာပစ္စက္ခာနံ ပဋိက္ခိပိ။ တေန ဝုတ္တံ ‘‘န စ ဥမ္မတ္တကာဒီနံ အညတရော’’တိ။ ဒူတေန ဝါတိ ‘‘မမ သိက္ခာပစ္စက္ခာနဘာဝံ ကထေဟီ’’တိ မုခသာသနဝသေန ဒူတေန ဝါ။ ပဏ္ဏေန ဝါတိ ပဏ္ဏေ လိခိတွာ ပဟိဏဝသေန ပဏ္ဏေန ဝါ။

သစေ တေ သိက္ခာပစ္စက္ခာနဘာဝံ ဇာနန္တီတိ သမ္ဗန္ဓော။ အာဝဇ္ဇနသမယေတိ အတ္ထာဘောဂသမယေ။ ဣမိနာ တံ ခဏံယေဝ ပန အပုဗ္ဗံ အစရိမံ ဒုဇ္ဇာနန္တိ ဒဿေတိ။ ဝစနာနန္တရမေဝါတိ ဝစနဿ အနန္တရမေဝ၊ အာဝဇ္ဇနသမယေဝါတိ အတ္ထော။ ဧဝ-သဒ္ဒေန ပန စိရေန ဇာနနံ ပဋိက္ခိပတိ။ ဥက္ကဏ္ဌိတောတိ အနဘိရတိယာ ဣမသ္မိံ သာသနေ ကိစ္ဆဇီဝိကံ ပတ္တော။ အထ ဝါ ‘‘အဇ္ဇ ယာမိ၊ သွေ ယာမိ၊ ဣတော ယာမိ၊ ဧတ္ထ ယာမီ’’တိ ဥဒ္ဓံ ကဏ္ဌံ ကတွာ ဝိဟရမာနော ဝိက္ခိတ္တော၊ အနေကဂ္ဂေါတိ ဝုတ္တံ ဟောတိ။ ဣဒဉ္စ ‘‘အနဘိရတော သာမညာ စဝိတုကာမော’’တိအာဒီနံ (ပါရာ။ ၄၅) ဥပလက္ခဏံ။ ယေန ကေနစိ…ပေ… ဇာနန္တီတိ သစေ တေ‘‘ဥက္ကဏ္ဌိတော’’တိ ဝါ ‘‘ဂိဟိဘာဝံ ပတ္ထေတီ’’တိ ဝါ ‘‘အနဘိရတော’’တိ ဝါ ‘‘သာမညာ စဝိတုကာမော’’တိ ဝါ ယေန ကေနစိ အာကာရေန သိက္ခာပစ္စက္ခာနဘာဝံ ဇာနန္တိ။ ဣဒဉှိ သိက္ခာပစ္စက္ခာနဉ္စ ဥပရိ ¶ အဘူတာရောစနဒုဋ္ဌုလ္လဝါစာအတ္တကာမဒုဋ္ဌဒေါသဘူတာရောစနသိက္ခာပဒါနိ စ ဧကပရိစ္ဆေဒါနိ၊ အာဝဇ္ဇနသမယေ ဉာတေ ဧဝ သီသံ ဧန္တိ။ ‘‘ကိံ အယံ ဘဏတီ’’တိ ကင်္ခတာ စိရေန ဉာတေ သီသံ န ဧန္တိ။ တေနာဟ ‘‘အထ အပရဘာဂေ’’တိအာဒိ။ အထ ဒွိန္နံ ဌိတဋ္ဌာနေ ဒွိန္နမ္ပိ နိယမေတွာ ‘‘ဧတေသံ အာရောစေမီ’’တိ ဝဒတိ၊ တေသု ဧကသ္မိံ ဇာနန္တေပိ ဒွီသု ဇာနန္တေသုပိ ပစ္စက္ခာတာဝ ဟောတိ သိက္ခာ။ ဧဝံ သမ္ဗဟုလေသုပိ ဝေဒိတဗ္ဗံ။ ဝုတ္တနယေနာတိ ‘‘တဿ ဝစနာနန္တရ’’န္တိအာဒိနာ ဝုတ္တေန နယေန။ ယော ကောစိ မနုဿဇာတိကောတိ အန္တမသော နဝကမ္မိကံ ဥပါဒါယ ယော ကောစိ မနုဿော။ ဝုတ္တဉှေတံ သမန္တပါသာဒိကာယံ –

‘‘သစေ ပန အနဘိရတိယာ ပီဠိတော သဘာဂေ ဘိက္ခူ ပရိသင်္ကမာနော ‘ယော ကောစိ ဇာနာတူ’တိ ဥစ္စာသဒ္ဒံ ကရောန္တော ‘ဗုဒ္ဓံ ပစ္စက္ခာမီ’တိ ဝဒတိ၊ တဉ္စ အဝိဒူရေ ဌိတော နဝကမ္မိကော ဝါ အညော ဝါ သမယညူ ပုရိသော သုတွာ ‘ဥက္ကဏ္ဌိတော အယံ သမဏော ဂိဟိဘာဝံ ပတ္ထေတိ၊ သာသနတော စုတော’တိ ဇာနာတိ၊ ပစ္စက္ခာတာဝ ဟောတိ သိက္ခာ’’တိ (ပါရာ။ အဋ္ဌ။ ၁။၅၁)။

သစေ ¶ ဝစနတ္ထံ ဉတွာပိ ‘‘အယံ ဥက္ကဏ္ဌိတော’’တိ ဝါ ‘‘ဂိဟိဘာဝံ ပတ္ထေတီ’’တိ ဝါ န ဇာနာတိ၊ အပစ္စက္ခာတာဝ ဟောတိ သိက္ခာ။ သစေ ပန ဝစနတ္ထံ အဇာနိတွာပိ ‘‘ဥက္ကဏ္ဌိတော’’တိ ဝါ ‘‘ဂိဟိဘာဝံ ပတ္ထေတီ’’တိ ဝါ ဇာနာတိ၊ ပစ္စက္ခာတာဝ ဟောတိ သိက္ခာ။ ဒဝါယပီတိ ကီဠာဓိပ္ပာယေနပိ။ စိတ္တာဒီနံ ဝါ ဝသေနာတိ စိတ္တာဒီနံ ဝါ ဆဠင်္ဂါနံ ဝသေန။ ဟောတိ စေတ္ထ –

‘‘စိတ္တံ ခေတ္တဉ္စ ကာလော စ၊ ပယောဂေါ ပုဂ္ဂလော တထာ၊

ဝိဇာနနန္တိ သိက္ခာယ၊ ပစ္စက္ခာနံ ဆဠင်္ဂိက’’န္တိ။

သဗ္ဗသော ဝါ ပန အပစ္စက္ခာနေနာတိ ‘‘ဗုဒ္ဓံ ပစ္စက္ခာမီ’’တိအာဒီသု ယေန ယေန ပရိယာယေန သိက္ခာပစ္စက္ခာနံ ဟောတိ၊ တတော ဧကဿပိ ပစ္စက္ခာနဿ အဘာဝေန။ ဣမိနာ ပန ‘‘ဣဒံ ပဒံ သာဝေဿာမိ၊ သိက္ခံ ပစ္စက္ခာမီ’’တိ ဧဝံ ပဝတ္တစိတ္တုပ္ပာဒဿ အဘာဝံ ဒဿေတိ။ ယဿ ဟိ ဧဝရူပေါ စိတ္တုပ္ပာဒေါ နတ္ထိ၊ သော သဗ္ဗသော န ပစ္စက္ခာတိ နာမာတိ။ သိက္ခာပစ္စက္ခာနဿာတိ ‘‘ဗုဒ္ဓံ ပစ္စက္ခာမီ’’တိအာဒိသိက္ခာပစ္စက္ခာနဿ။ အတ္ထဘူတံ ဧကစ္စံ ဒုဗ္ဗလျန္တိ ‘‘ဗုဒ္ဓံ ပစ္စက္ခာမီ’’တိ ဝဒတိ ဝိညာပေတိ၊ ဧဝမ္ပိ၊ ဘိက္ခဝေ၊ ဒုဗ္ဗလျာဝိကမ္မဉ္စေဝ ဟောတိ၊ သိက္ခာ ¶ စ ပစ္စက္ခာတာ’’တိအာဒိနာ (ပါရာ။ ၅၃) ဝုတ္တေဟိ ယေဟိ ဝစနေဟိ သိက္ခာပစ္စက္ခာနဉ္စေဝ ဟောတိ ဒုဗ္ဗလျာဝိကမ္မဉ္စ၊ တံ ‘‘ဗုဒ္ဓံ ပစ္စက္ခာမီ’’တိအာဒိကံ အတ္ထဘူတံ ဒုဗ္ဗလျံ အနာဝိကတွာ။ ‘‘ဗုဒ္ဓံ ပစ္စက္ခာမီ’’တိအာဒိမှိ ပန ဝုတ္တေ သိက္ခာပရိပူရဏေ ဒုဗ္ဗလဘာဝဿာပိ ဂမျမာနတ္တာ သိက္ခာပစ္စက္ခာနဿ ဣဒံ ဒုဗ္ဗလျာဝိကမ္မံ အတ္ထောတိ ဒဋ္ဌဗ္ဗံ။ ဧတ္ထ စ ‘‘အတ္ထဘူတ’’န္တိ ဣမိနာ ‘‘ယန္နူနာဟံ ဗုဒ္ဓံ ပစ္စက္ခေယျ’’န္တိအာဒိကံ ဒုဗ္ဗလျာဝိကမ္မံ ပဋိက္ခိပတိ။ ယေန ဟိ သိက္ခာပစ္စက္ခာနဉ္စေဝ ဟောတိ ဒုဗ္ဗလျာဝိကမ္မဉ္စ၊ တဒေဝ သိက္ခာပစ္စက္ခာနဿ အတ္ထဘူတံ။ ယေန ပန ဒုဗ္ဗလျာဝိကမ္မမေဝ ဟောတိ၊ န သိက္ခာပစ္စက္ခာနံ၊ န တံ တဿ အတ္ထဘူတန္တိ။

ရာဂပရိယုဋ္ဌာနေန သဒိသဘာဝါပတ္တိယာ မိထုနာနံ အယန္တိ ‘‘မေထုနော’’တိ ဓမ္မောဝ ဝုစ္စတီတိ အာဟ ‘‘ရာဂပရိယုဋ္ဌာနေနာ’’တိအာဒိ။ တတ္ထ ရာဂပရိယုဋ္ဌာနေနာတိ ရာဂဿ ပရိယုဋ္ဌာနေန၊ မေထုနရာဂဿ ပဝတ္တိယာ ပရိယောနဒ္ဓစိတ္တတာယာတိ အတ္ထော။ ဓမ္မောတိ အဇ္ဈာစာရော။ ‘‘ပလမ္ဗတေ ဝိလမ္ဗတေ’’တိအာဒီသု ဝိယ ဥပသဂ္ဂဿ ကောစိ အတ္ထဝိသေသော နတ္ထီတိ အာဟ ‘‘သေဝေယျာ’’တိ။ အဇ္ဈာပဇ္ဇေယျာတိ အဘိဘုယျ ပဇ္ဇေယျ။ သဗ္ဗန္တိမေနာတိ ပရနိမ္မိတဝသဝတ္တိ…ပေ… စာတုမဟာရာဇိကမနုဿိတ္ထိနာဂဂရုဠမာဏဝိကာဒီနံ သဗ္ဗာသံ အန္တိမေန။ တိရစ္ဆာနဂတာယာတိ တိရစ္ဆာနေသု ¶ ဥပ္ပန္နာယ။ တေနာဟ ‘‘ပဋိသန္ဓိဝသေနာ’’တိ။ ပါရာဇိကာယ ဝတ္ထုဘူတာ ဧဝ စေတ္ထ တိရစ္ဆာနဂတိတ္ထီ ‘‘တိရစ္ဆာနဂတာ’’တိ ဂဟေတဗ္ဗာ၊ န သဗ္ဗာ။ တတြာယံ ပရိစ္ဆေဒေါ –

‘‘အပဒါနံ အဟိမစ္ဆာ၊ ဒွိပဒါနဉ္စ ကုက္ကုဋီ၊

စတုပ္ပဒါနံ မဇ္ဇာရီ၊ ဝတ္ထု ပါရာဇိကဿိမာ’’တိ။ (ပါရာ။ အဋ္ဌ။ ၁။၅၅)

တတ္ထ အဟိဂ္ဂဟဏေန သဗ္ဗာပိ အဇဂရဂေါနသာဒိဘေဒါ ဒီဃဇာတိ သင်္ဂဟိတာ။ တသ္မာ ဒီဃဇာတီသု ယတ္ထ တိဏ္ဏံ မဂ္ဂါနံ အညတရသ္မိံ သက္ကာ တိလဖလမတ္တမ္ပိ ပဝေသေတုံ၊ သာ ပါရာဇိကဝတ္ထု၊ အဝသေသာ ဒုက္ကဋဝတ္ထူတိ ဝေဒိတဗ္ဗာ။ မစ္ဆဂ္ဂဟဏေန သဗ္ဗာပိ မစ္ဆကစ္ဆပမဏ္ဍူကာဒိဘေဒါ ဩဒကဇာတိ သင်္ဂဟိတာ။ တတြာပိ ဒီဃဇာတိယံ ဝုတ္တနယေနေဝ ပါရာဇိကဝတ္ထု စ ဒုက္ကဋဝတ္ထု စ ဝေဒိတဗ္ဗံ။ အယံ ပန ဝိသေသော – ပတင်္ဂမုခမဏ္ဍူကာ နာမ ဟောန္တိ၊ တေသံ မုခသဏ္ဌာနံ မဟန္တံ၊ ဆိဒ္ဒံ အပ္ပကံ၊ တတ္ထ ပဝေသနံ နပ္ပဟောတိ၊ မုခသဏ္ဌာနံ ပန ဝဏသင်္ခေပံ ဂစ္ဆတိ၊ တသ္မာ တံ ထုလ္လစ္စယဝတ္ထူတိ ဝေဒိတဗ္ဗံ ¶ ။ ကုက္ကုဋိဂ္ဂဟဏေန သဗ္ဗာပိ ကာကကပေါတာဒိဘေဒါ ပက္ခိဇာတိ သင်္ဂဟိတာ။ တတြာပိ ဝုတ္တနယေနေဝ ပါရာဇိကဝတ္ထု စ ဒုက္ကဋဝတ္ထု စ ဝေဒိတဗ္ဗံ။ မဇ္ဇာရိဂ္ဂဟဏေန သဗ္ဗာပိ ရုက္ခသုနခမင်္ဂုသဂေါဓာဒိဘေဒါ စတုပ္ပဒဇာတိ သင်္ဂဟိတာ။ တတြာပိ ဝုတ္တနယေနေဝ ပါရာဇိကဝတ္ထု စ ဒုက္ကဋဝတ္ထု စ ဝေဒိတဗ္ဗံ။

ပါရာဇိကော ဟောတီတိ (ပါရာ။ အဋ္ဌ။ ၁။၅၅) ပရာဇိတော ဟောတိ ပရာဇယံ အပန္နော။ အယဉှိ ပါရာဇိကသဒ္ဒေါ သိက္ခာပဒါပတ္တိပုဂ္ဂလေသု ဝတ္တတိ။ တတ္ထ ‘‘အဋ္ဌာနမေတံ၊ အာနန္ဒ၊ အနဝကာသော၊ ယံ တထာဂတော ဝဇ္ဇီနံ ဝါ ဝဇ္ဇိပုတ္တကာနံ ဝါ ကာရဏာ သာဝကာနံ ပါရာဇိကံ သိက္ခာပဒံ ပညတ္တံ သမူဟနေယျာ’’တိ (ပါရာ။ ၄၃) ဧဝံ သိက္ခာပဒေ ဝတ္တမာနော ဝေဒိတဗ္ဗော။ ‘‘အာပတ္တိံ တွံ ဘိက္ခု အာပန္နော ပါရာဇိက’’န္တိ (ပါရာ။ ၆၇) ဧဝံ အာပတ္တိယံ။ ‘‘န မယံ ပါရာဇိကာ၊ ယော အဝဟဋော၊ သော ပါရာဇိကော’’တိ (ပါရာ။ ၁၅၅) ဧဝံ ပုဂ္ဂလေ ဝတ္တမာနော ဝေဒိတဗ္ဗော။ ‘‘ပါရာဇိကေန ဓမ္မေန အနုဒ္ဓံသေယျာ’’တိအာဒီသု (ပါရာ။ ၃၈၄) ပန ဓမ္မေ ဝတ္တတီတိ ဝဒန္တိ။ ယသ္မာ ပန တတ္ထ ‘‘ဓမ္မော’’တိ ကတ္ထစိ အာပတ္တိ၊ ကတ္ထစိ သိက္ခာပဒမေဝ အဓိပ္ပေတံ၊ တသ္မာ သော ဝိသုံ န ဝတ္တဗ္ဗော။ တတ္ထ သိက္ခာပဒံ ယော တံ အတိက္ကမတိ၊ တံ ပရာဇေတိ၊ တသ္မာ ‘‘ပါရာဇိက’’န္တိ ဝုစ္စတိ။ အာပတ္တိ ပန ယော နံ အဇ္ဈာပဇ္ဇတိ၊ တံ ပရာဇေတိ၊ တသ္မာ ‘‘ပါရာဇိကာ’’တိ ဝုစ္စတိ။ ပုဂ္ဂလော ယသ္မာ ပရာဇိတော ပရာဇယမာပန္နော၊ တသ္မာ ‘‘ပါရာဇိကော’’တိ ဝုစ္စတိ။ ဣဓ ပန ပုဂ္ဂလော ဝေဒိတဗ္ဗောတိ အာဟ ‘‘ပါရာဇိကော ဟောတီ’’တိအာဒိ။ ဣမိနာပိ ¶ ဣဒံ ဒဿေတိ – ‘‘ပရာဇိတသဒ္ဒေ ဥပသဂ္ဂဿ ဝုဒ္ဓိံ ကတွာ၊ တ-ကာရဿ စ က-ကာရံ ကတွာ ပါရာဇိကော ဟောတီတိ နိဒ္ဒိဋ္ဌော’’တိ။

အပလောကနာဒိ စတုဗ္ဗိဓမ္ပိ သင်္ဃကမ္မံ သီမာပရိစ္ဆိန္နေဟိ ပကတတ္တေဟိ ဘိက္ခူဟိ ဧကတော ကတ္တဗ္ဗတ္တာ ဧကကမ္မံ နာမ။ အာဒိသဒ္ဒေန ဧကုဒ္ဒေသသမသိက္ခတာနံ ဂဟဏံ။ တတ္ထ ပဉ္စဝိဓောပိ ပါတိမောက္ခုဒ္ဒေသော ဧကတော ဥဒ္ဒိသိတဗ္ဗတ္တာ ဧကုဒ္ဒေသော နာမ။ နဟာပိတပုဗ္ဗကာဒီနံ ဝိယ ဩဒိဿ အနုညာတံ ဌပေတွာ အဝသေသံ သဗ္ဗမ္ပိ သိက္ခာပဒံ သဗ္ဗေဟိပိ လဇ္ဇိပုဂ္ဂလေဟိ သမံ သိက္ခိတဗ္ဗဘာဝတော သမသိက္ခတာ နာမ။ ယသ္မာ သဗ္ဗေပိ လဇ္ဇိနော ဧတေသု ¶ ဧကကမ္မာဒီသု သဟ ဝသန္တိ၊ န ဧကောပိ တတော ဗဟိဒ္ဓါ သန္ဒိဿတိ၊ တသ္မာ တာနိ သဗ္ဗာနိပိ ဂဟေတွာ ဧကကမ္မာဒိကော တိဝိဓောပိ သံဝါသော နာမာတိ အာဟ ‘‘သော စ ဝုတ္တပ္ပကာရော သံဝါသော တေန ပုဂ္ဂလေန သဒ္ဓိံ နတ္ထိ၊ တေန ကာရဏေန သော ပါရာဇိကော ပုဂ္ဂလော ‘အသံဝါသော’တိ ဝုစ္စတီ’’တိ (ပါရာ။ အဋ္ဌ။ ၁။၅၅)။

ဣဒါနိ ယသ္မာ န ကေဝလံ မနုဿိတ္ထိယာ ဧဝ နိမိတ္တံ ပါရာဇိကဝတ္ထု၊ အထ ခေါ အမနုဿိတ္ထိတိရစ္ဆာနဂတိတ္ထီနမ္ပိ။ န စ ဣတ္ထိယာ ဧဝ။ အထ ခေါ ဥဘတောဗျဉ္ဇနကပဏ္ဍကပုရိသာနမ္ပိ၊ တသ္မာ တေ သတ္တေ၊ တေသဉ္စ ယံ ယံ နိမိတ္တံ ဝတ္ထု ဟောတိ၊ တံ တံ နိမိတ္တံ၊ တတ္ထ စ ယထာ ပဋိသေဝန္တော ပါရာဇိကော ဟောတိ၊ တဉ္စ သဗ္ဗံ ဝိတ္ထာရေတွာ ဒဿေတုံ ‘‘အယံ ပနေတ္ထ ဝိနိစ္ဆယော’’တိအာဒိမာဟ။ ဧတ္ထာတိ ဣမသ္မိံ သိက္ခာပဒေ။ တေသူတိ ယေ တိံသမဂ္ဂါ ဝုတ္တာ၊ တေသု။ အတ္တနော ဝါတိ လမ္ဗိမုဒုပိဋ္ဌိကေ သန္ဓာယ ဝုတ္တံ။ သန္ထတဿ ဝါတိ ယေန ကေနစိ ဝတ္ထေန ဝါ ပဏ္ဏေန ဝါ ဝါကပဋ္ဋေန ဝါ စမ္မေန ဝါ တိပုသီသာဒီနံ ပဋ္ဋေန ဝါ ပလိဝေဌေတွာ၊ အန္တော ဝါ ပဝေသေတွာ ပဋိစ္ဆန္နဿ။ အက္ခာယိတဿ ဝါတိ သောဏသိင်္ဂါလာဒီဟိ အက္ခာဒိတဿ။ ယေဘုယျေန အက္ခာယိတဿာတိ ယာဝ ဥပဍ္ဎက္ခာယိတော နာမ န ဟောတိ၊ ဧဝံ အက္ခာယိတဿ။ အလ္လောကာသေတိ တိန္တောကာသေ။ သန္ထတန္တိ တေသံယေဝ ဝတ္ထာဒီနံ ယေန ကေနစိ ပဋိစ္ဆန္နံ။ အယဉှေတ္ထ သင်္ခေပတ္ထော – န ဟေတ္ထ အနုပါဒိန္နကံ အနုပါဒိန္နကေန ဆုပတိ၊ မုတ္တိ အတ္ထိ၊ အထ ခေါ ဥပါဒိန္နကေန ဝါ အနုပါဒိန္နကံ ဃဋ္ဋိယတု၊ အနုပါဒိန္နကေန ဝါ ဥပါဒိန္နကံ၊ အနုပါဒိန္နကေန ဝါ အနုပါဒိန္နကံ၊ ဥပါဒိန္နကေန ဝါ ဥပါဒိန္နကံ။ သစေ ယတ္တကေ ပဝိဋ္ဌေ ပါရာဇိကံ ဟောတီတိ ဝုတ္တံ၊ တတ္တကံ သေဝနစိတ္တေန ပဝေသေတိ၊ သဗ္ဗတ္ထာယံ ပါရာဇိကာပတ္တိံ အာပန္နော နာမ ဟောတီတိ။

ဧဝံ သေဝနစိတ္တေနေဝ ပဝေသေန္တဿ အာပတ္တိံ ဒဿေတွာ ဣဒါနိ ယသ္မာ တံ ပဝေသနံ နာမ န ကေဝလံ အတ္တူပက္ကမေနေဝ၊ ပရူပက္ကမေနာပိ ဟောတိ။ တတြာပိ သာဒိယန္တဿေဝ အာပတ္တိ ပဋိသေဝနစိတ္တသမင်္ဂိဿ ¶ ၊ န ဣတရဿာတိ ဒဿေတုံ ‘‘ပရေန ဝါ’’တိအာဒိမာဟ။ တတ္ထ ပရေနာတိ ဘိက္ခုပစ္စတ္ထိကာဒိနာ ယေန ကေနစိ အညေန။ ပဝေသနပဝိဋ္ဌဋ္ဌိတဥဒ္ဓရဏေသူတိ ဧတ္ထ အဂ္ဂတော (သာရတ္ထ။ ဋီ။ ၂။၅၈) ယာဝ မူလာ ပဝေသနံ ပဝေသနံ နာမ။ အင်္ဂဇာတဿ ယတ္တကံ ဌာနံ ပဝေသနာရဟံ၊ တတ္တကံ အနဝသေသတော ပဝိဋ္ဌံ ပဝိဋ္ဌံ နာမ။ ဧဝံ ¶ ပဝိဋ္ဌဿ ဥဒ္ဓရဏာရမ္ဘတော အန္တရာ ဌိတကာလော ဌိတံ နာမ။ သမန္တပါသာဒိကာယံ ပန မာတုဂါမဿ သုက္ကဝိသဋ္ဌိံ ပတွာ သဗ္ဗထာ ဝါယာမတော ဩရမိတွာ ဌိတကာလံ သန္ဓာယ ‘‘သုက္ကဝိသဋ္ဌိသမယေ’’တိ ဝုတ္တံ။ ဥဒ္ဓရဏံ နာမ ယာဝ အဂ္ဂါ နီဟရဏကာလော။ သာဒိယတီတိ သေဝနစိတ္တံ ဥပဋ္ဌပေတိ။ အသာဓာရဏဝိနိစ္ဆယောတိ အဒိန္နာဒါနာဒီဟိ သဗ္ဗေဟိ သိက္ခာပဒေဟိ အသာဓာရဏော ဝိနိစ္ဆယော။

သာဓာရဏဝိနိစ္ဆယတ္ထန္တိ ပရိဝါရဝသေန သာဓာရဏဝိနိစ္ဆယတ္ထံ။ မာတိကာတိ မာတာ၊ ဇနေတ္တီတိ အတ္ထော။ နိဒဒါတိ ဒေသနံ ဒေသဝသေန အဝိဒိတံ ဝိဒိတံ ကတွာ နိဒဿေတီတိ နိဒါနံ။ ပညာပီယတီတိ ပညတ္တိ၊ တဿာ ပကာရော ပညတ္တိဝိဓိ အင်္ဂေတိ ဂမေတိ ဉာပေတီတိ အင်္ဂံ၊ ကာရဏံ။ သမုဋ္ဌဟန္တိ အာပတ္တိယော ဧတေနာတိ သမုဋ္ဌာနံ၊ ဥပ္ပတ္တိကာရဏံ၊ တဿ ဝိဓိ သမုဋ္ဌာနဝိဓိ။ ဝဇ္ဇကမ္မပ္ပဘေဒဉ္စာတိ ဧတ္ထ ပဘေဒသဒ္ဒေါ ပစ္စေကံ ယောဇေတဗ္ဗော ‘‘ဝဇ္ဇပ္ပဘေဒံ၊ ကမ္မပ္ပဘေဒဉ္စာ’’တိ။ တတ္ထ တတ္ထာတိ တသ္မိံ တသ္မိံ သိက္ခာပဒေ။

ပညတ္တိဋ္ဌာနန္တိ ပညတ္တိဋ္ဌပနဿ ဌာနံ၊ သိက္ခာပဒါနံ ပညတ္တိဒေသောတိ အတ္ထော။ ပုဂ္ဂလောတိ ဧတ္ထ အာဒိကမ္မိကောယေဝ အဓိပ္ပေတောတိ အာဟ ‘‘ပုဂ္ဂလော နာမ ယံ ယံ အာရဗ္ဘ တံ တံ သိက္ခာပဒံ ပညတ္တ’’န္တိ၊ သော သော ပုဂ္ဂလောတိ အဓိပ္ပာယော။ ဟောန္တိ စေတ္ထ –

‘‘သုဒိန္နော ဓနိယော သမ္ဗဟုလာ ဝဂ္ဂုမုဒန္တိကာ၊

သေယျသကော ဥဒါယိ စာ-ဠဝကာ ဆန္နမေတ္တိယာ။

‘‘ဒေဝဒတ္တဿဇိပုနဗ္ဗသု-ဆဗ္ဗဂ္ဂိယောပနန္ဒညတရောပိ စ၊

ဟတ္ထကော စာနုရုဒ္ဓါ စ၊ သတ္တရသ စူဠပန္ထကော။

‘‘ဗေလဋ္ဌသီသော စာနန္ဒော၊ သာဂတောရိဋ္ဌနာမကော၊

နန္ဒတ္ထေရေန တေဝီသ၊ ဘိက္ခူနံ အာဒိကမ္မိကာ။

‘‘သုန္ဒရီနန္ဒာ ¶ ထုလ္လနန္ဒာ၊ ဆဗ္ဗဂ္ဂိယညတရာပိ စ၊

စဏ္ဍကာဠီ သမ္ဗဟုလာ၊ ဒွေ စ ဘိက္ခုနိယော ပရာ၊

ဘိက္ခုနီနံ တု သတ္တေဝ၊ ဟောန္တိ တာ အာဒိကမ္မိကာ’’တိ။

တဿ တဿ ပုဂ္ဂလဿာတိ ယံ ယံ သုဒိန္နာဒိကံ ပုဂ္ဂလံ အာရဗ္ဘ သိက္ခာပဒံ ပညတ္တံ၊ တဿ တဿ ပုဂ္ဂလဿ။ ပညတ္တီတိ ပဌမပညတ္တိ။ ပဌမပညတ္တိယာ ပစ္ဆာ ¶ ဌပိတာ ပညတ္တိ အနုပညတ္တိ။ အနုပ္ပန္နေ ဒေါသေ ဌပိတာ ပညတ္တိ အနုပ္ပန္နပညတ္တိ။ သဗ္ဗတ္ထ မဇ္ဈိမဒေသေ စေဝ ပစ္စန္တိမေသု ဇနပဒေသု စာတိ သဗ္ဗေသု ပဒေသေသု ဌပိတာ ပညတ္တိ သဗ္ဗတ္ထပညတ္တိ။ မဇ္ဈိမဒေသေယေဝ ဌပိတာ ပညတ္တိ ပဒေသပညတ္တိ။ ဘိက္ခူနဉ္စေဝ ဘိက္ခုနီနဉ္စ သာဓာရဏဘူတာ ပညတ္တိ သာဓာရဏပညတ္တိ။ သုဒ္ဓဘိက္ခူနမေဝ၊ သုဒ္ဓဘိက္ခုနီနံ ဝါ ပညတ္တံ သိက္ခာပဒံ အသာဓာရဏပညတ္တိ။ ဥဘိန္နမ္ပိ ပညတ္တိ ဥဘတောပညတ္တိ။ ဝိနယဓရပဉ္စမေနာတိ အနုဿာဝနကာစရိယပဉ္စမေန။ ဂုဏင်္ဂုဏူပါဟနာတိ စတုပ္ပဋလတော ပဋ္ဌာယ ကတာ ဥပါဟနာ၊ န ဧကဒွိတိပဋလာ။ စမ္မတ္ထရဏန္တိ အတ္ထရိတဗ္ဗံ စမ္မံ။ ဧတေသံ ဝသေန စတုဗ္ဗိဓာ ပဒေသပညတ္တိ နာမာတိ ဧတေသံ ဝသေန စတုဗ္ဗိဓာ ပညတ္တိ မဇ္ဈိမဒေသေယေဝ ပညတ္တာတိ ပဒေသပညတ္တိ နာမ။ တေနေဝါဟ ‘‘မဇ္ဈိမဒေသေယေဝ ဟီ’’တိအာဒိ။ ယသ္မာ မဇ္ဈိမဒေသေယေဝ ယထာဝုတ္တဝတ္ထုဝီတိက္ကမေ အာပတ္တိ ဟောတိ၊ န ပစ္စန္တိမဇနပဒေ၊ တသ္မာ ပဒေသပညတ္တီတိ အတ္ထော။ ဓုဝနှာနံ ပဋိက္ခေပမတ္တန္တိ နိစ္စနဟာနပ္ပဋိသေဓနမေဝ။ ဧတ္ထ စ မတ္တသဒ္ဒေန အညာနိ တီဏိ သိက္ခာပဒါနိ ပဋိက္ခိပတိ။ တာနိ ဟိ ‘‘အနုဇာနာမိ၊ ဘိက္ခဝေ၊ သဗ္ဗပစ္စန္တိမေသု ဇနပဒေသု ဝိနယဓရပဉ္စမေန ဂဏေန ဥပသမ္ပဒ’’န္တိအာဒိနာ (မဟာဝ။ ၂၅၉) စမ္မက္ခန္ဓကေ အာဂတာနိ။ တေနေဝါဟ ‘‘တတော အညာ ပဒေသပညတ္တိ နာမ နတ္ထီ’’တိ။ သဗ္ဗာနီတိ တတော အဝသေသာနိ သဗ္ဗာနိ သိက္ခာပဒါနိ။ တသ္မာတိ ယသ္မာ အနုပ္ပန္နပညတ္တိ အဋ္ဌဂရုဓမ္မဝသေန ဘိက္ခုနီနံယေဝ အာဂတာ၊ ယသ္မာ စ ဓုဝနှာနံ ပဋိက္ခေပမတ္တံ ဌပေတွာ ပါတိမောက္ခေ သဗ္ဗာနိ သိက္ခာပဒါနိ သဗ္ဗတ္ထပညတ္တိယေဝ ဟောန္တိ၊ ယသ္မာ စ သာဓာရဏပညတ္တိဒုကဉ္စ ဧကတောပညတ္တိဒုကဉ္စ ဗျဉ္ဇနမတ္တံ နာနံ၊ အတ္ထတော ဧကံ၊ တသ္မာ။ သဗ္ဗတ္ထာတိ သဗ္ဗေသု သိက္ခာပဒေသု။ အာပတ္တိဘေဒေါ ဟေတ္ထ ဥတ္တရပဒလောပေန ‘‘အာပတ္တီ’’တိ ဝုတ္တောတိ အာဟ ‘‘အာပတ္တီတိ ပုဗ္ဗပ္ပယောဂါဒိဝသေန အာပတ္တိဘေဒေါ’’တိ။ သီလအာစာရဒိဋ္ဌိအာဇီဝဝိပတ္တီနန္တိ ဧတ္ထ ပဌမာ ဒွေ အာပတ္တိက္ခန္ဓာ သီလဝိပတ္တိ နာမ၊ အဝသေသာ ပဉ္စ အာစာရဝိပတ္တိ နာမ၊ မိစ္ဆာဒိဋ္ဌိ စ အန္တဂ္ဂါဟိကာဒိဋ္ဌိ စ ဒိဋ္ဌိဝိပတ္တိ နာမ၊ အာဇီဝဟေတု ပညတ္တာနိ ဆ သိက္ခာပဒါနိ အာဇီဝဝိပတ္တိ နာမ၊ ဣတိ ဣမာသံ သီလအာစာရဒိဋ္ဌိအာဇီဝဝိပတ္တီနံ အညတရာတိ အတ္ထော။

န ¶ ကေဝလံ ယထာဝုတ္တနယေနေဝ ဝုစ္စန္တီတိ အာဟ ‘‘ယာနိ သိက္ခာပဒသမုဋ္ဌာနာနီတိပိ ဝုစ္စန္တီ’’တိ။ ဧတာနိ ဟိ ကိဉ္စာပိ အာပတ္တိယာ သမုဋ္ဌာနာနိ၊ န ¶ သိက္ခာပဒဿ၊ ဝေါဟာရသုခတ္ထံ ပနေဝံ ဝုစ္စန္တီတိ။ တတ္ထာတိ တေသု ဆသု သမုဋ္ဌာနေသု။ တေသူတိ သစိတ္တကာစိတ္တကေသု။ ဧကံ သမုဋ္ဌာနံ ဥပ္ပတ္တိကာရဏံ ဧတိဿာတိ ဧကသမုဋ္ဌာနာ၊ ဧကေန ဝါ သမုဋ္ဌာနံ ဧတိဿာတိ ဧကသမုဋ္ဌာနာ။ ‘‘ဒွိသမုဋ္ဌာနာ’’တိအာဒီသုပိ ဧသေဝ နယော။

သမုဋ္ဌာနဝသေနာတိ သမုဋ္ဌာနသီသဝသေန။ ပဌမပါရာဇိကံ သမုဋ္ဌာနံ ဧတိဿာတိ ပဌမပါရာဇိကသမုဋ္ဌာနာ။ တထာ အဒိန္နာဒါနသမုဋ္ဌာနာ’’တိအာဒီသုပိ။

သယံ ပထဝိခဏနေ ကာယေန၊ ပရေ အာဏာပေတွာ ခဏာပနေ ဝါစာယ စ အာပတ္တိသမ္ဘဝတော ‘‘ပထဝိခဏနာဒီသု ဝိယာ’’တိ ဝုတ္တံ။ အာဒိသဒ္ဒေန အဒိန္နာဒါနာဒီနံ ပရိဂ္ဂဟော။ ပဌမကထိနာပတ္တိ ကာယဝါစတော ကတ္တဗ္ဗံ အဓိဋ္ဌာနံ ဝါ ဝိကပ္ပနံ ဝါ အကရောန္တဿ ဟောတိ၊ နော ကရောန္တဿာတိ အာဟ ‘‘ပဌမကထိနာပတ္တိ ဝိယာ’’တိ။ အညာတိကာယ ဘိက္ခုနိယာ ဟတ္ထတော စီဝရပ္ပဋိဂ္ဂဟဏာပတ္တိ တဿာ ဟတ္ထတော စီဝရံ ပဋိဂ္ဂဏှန္တဿ၊ ပရိဝတ္တကံ အဒေန္တဿ စ ဟောတီတိ ကိရိယာကိရိယတော သမုဋ္ဌာတိ။ ‘‘သိယာ ကရောန္တဿာ’’တိအာဒီသု သိယာတိ ‘‘သိယာ ခေါ ပန တေ ဗြာဟ္မဏ ဧဝမဿာ’’တိအာဒီသု ဝိယ ‘‘ကဒါစီ’’တိ ဣမိနာ သမာနတ္ထော နိပါတော။ ရူပိယပ္ပဋိဂ္ဂဟဏာပတ္တိ သိယာ ကိရိယာ ဂဟဏေန အာပဇ္ဇနတော၊ သိယာ အကိရိယာ ပဋိက္ခေပဿ အကရဏတောတိ အာဟ ‘‘ရူပိယပ္ပဋိဂ္ဂဟဏာပတ္တိ ဝိယာ’’တိ။ ကုဋိကာရာပတ္တိ ဝတ္ထုံ ဒေသာပေတွာ ပမာဏာတိက္ကန္တကရဏေ ကရောန္တဿ သိယာ၊ အဒေသာပေတွာ ပန ပမာဏာတိက္ကန္တကရဏေ ပမာဏယုတ္တံ ဝါ ကရောန္တဿ စ အကရောန္တဿ စ သိယာတိ အာဟ ‘‘ကုဋိကာရာပတ္တိ ဝိယာ’’တိ။

သညာယ အဘာဝေန ဝိမောက္ခော အဿာတိ သညာဝိမောက္ခောတိ မဇ္ဈေပဒလောပသမာသော ဒဋ္ဌဗ္ဗောတိ အာဟ ‘‘ယတော ဝီတိက္ကမသညာယာ’’တိအာဒိ။ ဣတရာ နာမ ယတော ဝီတိက္ကမသညာယ အဘာဝေန န မုစ္စတိ၊ သာ ဣတရသဒ္ဒဿ ဝုတ္တပ္ပဋိယောဂိဝိသယတ္တာ။ ယာ အစိတ္တကေန ဝါ သစိတ္တကမိဿကေန ဝါ သမုဋ္ဌာတီတိ ယာ အာပတ္တိ ကဒါစိ အစိတ္တကေန ဝါ ကဒါစိ သစိတ္တကမိဿကေန ဝါ သမုဋ္ဌာနေန သမုဋ္ဌာတိ။ ဧတ္ထ စ သညာဒုကံ အနာပတ္တိမုခေန ဝုတ္တံ၊ သစိတ္တကဒုကံ အာပတ္တိမုခေနာတိ ဒဋ္ဌဗ္ဗံ။

ယဿာ ¶ သစိတ္တကပက္ခေ စိတ္တံ အကုသလမေဝ ဟောတီတိ ယဿာ သစိတ္တကာယ အာပတ္တိယာ စိတ္တံ အကုသလမေဝ ဟောတိ၊ ယဿာ စ သစိတ္တကာစိတ္တကသင်္ခါတာယ သုရာပါနာဒိအစိတ္တကာယ အာပတ္တိယာ ဝတ္ထုဝိဇာနနစိတ္တေန ¶ သစိတ္တကပက္ခေ စိတ္တံ အကုသလမေဝ ဟောတိ၊ အယံ လောကဝဇ္ဇာ။ ‘‘သစိတ္တကပက္ခေ’’တိ ဟိ ဣဒံ ဝစနံ သစိတ္တကာစိတ္တကံ သန္ဓာယ ဝုတ္တံ။ န ဟိ ဧကံသတော သစိတ္တကဿ ‘‘သစိတ္တကပက္ခေ’’တိ ဝိသေသနေ ပယောဇနံ အတ္ထီတိ။ ယံ ပနေတ္ထ ဂဏ္ဌိပဒေ ‘‘သုရာပါနသ္မိဉှိ ‘သုရာ’တိ ဝါ ‘န ဝဋ္ဋတီ’တိ ဝါ ဇာနိတွာ ပိဝနေ အကုသလမေဝါ’’တိ ဝုတ္တံ။ တတ္ထ ‘‘န ဝဋ္ဋတီတိ ဝါ ဇာနိတွာ’’တိ ဝုတ္တဝစနံ န ယုဇ္ဇတိ ပဏ္ဏတ္တိဝဇ္ဇဿာပိ လောကဝဇ္ဇဘာဝပ္ပသင်္ဂတော။ ယဿာ ပန ‘‘သစိတ္တကပက္ခေ စိတ္တံ အကုသလမေဝါ’’တိ နိယမော နတ္ထိ၊ သာ ပဏ္ဏတ္တိဝဇ္ဇာတိ ဣမမတ္ထံ ဒဿေန္တော အာဟ ‘‘သေသာ ပဏ္ဏတ္တိဝဇ္ဇာ’’တိ။ တထာ ဟိ တဿာ ဝတ္ထုဝိဇာနနစိတ္တေန သစိတ္တကပက္ခေ စိတ္တံ သိယာ ကုသလံ၊ သိယာ အကုသလံ၊ သိယာ အဗျာကတန္တိ ‘‘အကုသလမေဝါ’’တိ နိယမော နတ္ထိ။ ဥဘယတ္ထ အာပဇ္ဇိတဗ္ဗာတိ ကာယဒွါရေ၊ ဝစီဒွါရေ စာတိ ဥဘယတ္ထ အာပဇ္ဇိတဗ္ဗာ အာပတ္တိ၊ တာ ပန အဒိန္နာဒါနာဒယော။ ‘‘မနောဒွါရေ အာပတ္တိ နာမ နတ္ထီ’’တိ ဣဒံ ယေဘုယျဝသေန ဝုတ္တံ ဥပနိက္ခိတ္တသာဒိယနာဒီသု အာပတ္တိသမ္ဘဝတောတိ ဒဋ္ဌဗ္ဗံ။

အကုသလစိတ္တော ဝါ အာပဇ္ဇတီတိ ပါရာဇိကသုက္ကဝိသဋ္ဌိကာယသံသဂ္ဂဒုဋ္ဌုလ္လအတ္တကာမပါရိစရိယဒုဋ္ဌဒေါသသင်္ဃဘေဒပ္ပဟာရဒါနတလသတ္တိကာဒိဘေဒံ အာပတ္တိံ အကုသလစိတ္တော အာပဇ္ဇတိ။ အနုပသမ္ပန္နံ ပဒသောဓမ္မံ ဝါစေန္တော၊ မာတုဂါမဿ ဓမ္မံ ဒေသေန္တောတိ ဧဝရူပံ အာပတ္တိံ ကုသလစိတ္တော အာပဇ္ဇတိ။ အသဉ္စိစ္စသဟသေယျာဒိံ အဗျာကတစိတ္တော အာပဇ္ဇတိ။ ယံ အရဟာ အာပဇ္ဇတိ၊ သဗ္ဗံ အဗျာကတစိတ္တောဝ အာပဇ္ဇတိ။ တေနာဟ ‘‘ကုသလာဗျာကတစိတ္တော ဝါ’’တိ။

ဒုက္ခဝေဒနာသမင်္ဂီ ဝါတိ ဒုဋ္ဌဒေါသာဒိဘေဒံ အာပတ္တိံ အာပဇ္ဇန္တော ဒုက္ခဝေဒနာသမင်္ဂီ အာပဇ္ဇတိ။ မေထုနဓမ္မာဒိဘေဒံ ပန သုခဝေဒနာသမင်္ဂီ အာပဇ္ဇတိ။ ယံ သုခဝေဒနာသမင်္ဂီ အာပဇ္ဇတိ၊ တံယေဝ မဇ္ဈတ္တော ဟုတွာ အာပဇ္ဇန္တော အဒုက္ခမသုခဝေဒနာသမင်္ဂီ အာပဇ္ဇတိ။ တေနာဟ ‘‘ဣတရဝေဒနာဒွယသမင်္ဂီ ဝါ’’တိ။ ဣဒမ္ပိ စ တိကဒွယံ ယေဘုယျဝသေနေဝ ဝုတ္တံ။ နိပဇ္ဇိတွာ ¶ နိရောဓသမာပန္နော ဟိ အစိတ္တကော အဝေဒနော သဟသေယျာပတ္တိံ အာပဇ္ဇတီတိ။ ကိဉ္စာပိ ဧဝံ အနိယမေန ဝုတ္တံ၊ ဝိသေသော ပနေတ္ထ အတ္ထီတိ ဒဿေတုံ ‘‘ဧဝံ သန္တေပီ’’တိအာဒိ ဝုတ္တံ။ ဧဝံ သန္တေပီတိ ဟိ ဝိသေသာဘိဓာနနိမိတ္တာဘျူပဂမေဝ ယုဇ္ဇတိ။ သဗ္ဗေသံ ဝသေန တီဏိ စိတ္တာနီတိ ကုသလာကုသလာဗျာကတာနံ ဝသေန ပဒသောဓမ္မာဒီသု တီဏိ စိတ္တာနိ။

ဣဒါနိ တံ ယထာဝုတ္တနိဒါနာဒိဝေဒနာတ္တိကပရိယောသာနံ သတ္တရသပ္ပကာရံ ဣမသ္မိံ သိက္ခာပဒေ ယောဇေတုံ ‘‘ဣဓ ပနာ’’တိအာဒိမာဟ။ ဣဓာတိ ဣမသ္မိံ ပဌမပါရာဇိကသိက္ခာပဒေ။ ဝေသာလိယန္တိ ဧဝံနာမကေ ¶ ဣတ္ထိလိင်္ဂဝသေန ပဝတ္တဝေါဟာရေ နဂရေ။ တဉှိ နဂရံ တိက္ခတ္တုံ ပါကာရပရိက္ခေပဝဍ္ဎနေန ဝိသာလီဘူတတ္တာ ‘‘ဝေသာလီ’’တိ ဝုစ္စတိ။ ဣဒမ္ပိ စ နဂရံ သဗ္ဗညုတံ သမ္ပတ္တေယေဝ သမ္မာသမ္ဗုဒ္ဓေ သဗ္ဗာကာရဝေပုလ္လတ္တံ ပတ္တန္တိ ဝေဒိတဗ္ဗံ။ ‘‘သိက္ခံ အပစ္စက္ခာယာ’’တိ စ ‘‘အန္တမသော တိရစ္ဆာနဂတာယပီ’’တိ စ ဒွေ အနုပညတ္တိယောတိ မက္ကဋိဝဇ္ဇိပုတ္တကဝတ္ထူနံ ဝသေန ဝုတ္တာ။ ‘‘အန္တမသော တိရစ္ဆာနဂတာယာ’’တိ စ ‘‘သိက္ခံ အပစ္စက္ခာယာ’’တိ စ ဣမာ ဒွေ အနုပညတ္တိယော။ အာပတ္တိကရာ စ ဟောတီတိ ပဌမပညတ္တိတော ဝိသုံယေဝါပတ္တိကရာ စ ဟောတိ။ အညဝါဒကသိက္ခာပဒါဒီသု ဝိယာတိ အညဝါဒကသိက္ခာပဒါဒီသု ‘‘ဝိဟေသကေ’’တိအာဒိကာ (ပါစိ။ ၉၈) ဝိယာတိ အတ္ထော။ အာဒိသဒ္ဒေန ဥဇ္ဈာပနကဿ ပရိဂ္ဂဟော။ ဧတ္ထ ဟိ အညဝါဒကာဒိတော ဝိသုံယေဝ ဝိဟေသကာဒီသုပိ ပါစိတ္တိယံ ဟောတိ။ ယထာဟ ‘‘ရောပိတေ ဝိဟေသကေ သင်္ဃမဇ္ဈေ ဝတ္ထုသ္မိံ ဝါ အာပတ္တိယာ ဝါ အနယုဉ္ဇိယမာနော တံ နကထေတုကာမော တံ နဥဂ္ဃာဋေတုကာမော တုဏှီဘူတော သင်္ဃံ ဝိဟေသေတိ၊ အာပတ္တိ ပါစိတ္တိယဿာ’’တိအာဒိ (ပါရာ။ ၁၀၀)။ သုပိနန္တေ ဝိဇ္ဇမာနာပိ မောစနဿာဒစေတနာ အဗ္ဗောဟာရိကတ္တာ အနာပတ္တိကရာတိ အာဟ ‘‘အညတြ သုပိနန္တာတိအာဒိကာ ဝိယာ’’တိ။ တထာ ဟိ ထိနမိဒ္ဓေန အဘိဘူတတ္တာ သုပိနေ စိတ္တံ အဗ္ဗောဟာရိကံ၊ စိတ္တဿ အဗ္ဗောဟာရိကတ္တာ ဩပက္ကမနကိရိယာပဝတ္တနိကာပိ စေတနာ အဗ္ဗောဟာရိကာ။ ဝုတ္တဉှေတံ ‘‘အတ္ထေသာ၊ ဘိက္ခဝေ၊ စေတနာ၊ သာ စ ခေါ အဗ္ဗောဟာရိကာ’’တိ (ပါရာ။ ၂၃၅)၊ တသ္မာ ‘‘အညတြ သုပိနန္တာ’’တိ အယံ အနုပညတ္တိ အနာပတ္တိကရာ ဇာတာ။ အာဒိသဒ္ဒေန ‘‘အညတြ အဓိမာနာ’’တိအာဒိကံ (ပါရာ။ ၁၉၇) သင်္ဂဏှာတိ။ အဒိန္နာဒါနာဒီသု ဝိယာတိ အဒိန္နာဒါနာဒီသု ¶ ‘‘အရညာ ဝါ’’တိအာဒိကာ (ပါရာ။ ၉၁) ဝိယာတိ အတ္ထော။ ဧတ္ထ ပန အာဒိသဒ္ဒေန ပဌမပါရာဇိကာဒီနံ သင်္ဂဟော။ ဧတ္ထ ဟိ ‘‘တဉ္စ ခေါ ဂါမေ၊ နော အရညေ’’တိအာဒိနာ (ပါရာ။ ၉၀) နယေန လေသံ ဩဍ္ဍေန္တာနံ လေသပိဒဟနတ္ထံ ‘‘အရညာ ဝါ’’တိအာဒိကာ အနုပညတ္တိ ဝုတ္တာတိ ဥပတ္ထမ္ဘကရာဝ ဟောတိ။ တေနေဝ ဟိ ‘‘နနု၊ အာဝုသော၊ တထေဝေတံ ဟောတီ’’တိ (ပါရာ။ ၉၀) ဘိက္ခူဟိ ဝုတ္တံ။

ဝုတ္တပ္ပကာရေ မဂ္ဂေတိ ‘‘မနုဿာမနုဿတိရစ္ဆာနဂတဝသေနာ’’တိအာဒိနာ (ကင်္ခါ။ အဋ္ဌ။ ပဌမပါရာဇိကဝဏ္ဏနာ) ဝုတ္တပ္ပကာရေ တိံသမဂ္ဂေ။ ဣမဿ ပန ‘‘ဆိန္နေ’’တိ ဣမိနာ သမ္ဗန္ဓော။ တစာဒီနိ အနဝသေသေတွာတိ နိမိတ္တပ္ပဒေသေ ဗဟိ ဌိတာနိ ဆဝိစမ္မာနိ အနဝသေသေတွာ။ နိမိတ္တသဏ္ဌာနမတ္တံ ပညာယတီတိ နိမိတ္တမံသဿ ပန အဗ္ဘန္တရေ ဆဝိစမ္မဿ စ ဝိဇ္ဇမာနတ္တာ ဝုတ္တံ။ စမ္မခိလန္တိ စမ္မက္ခဏ္ဍံ။ ‘‘ဥဏ္ဏိဂဏ္ဍော’’တိပိ (သာရတ္ထ။ ဋီ။ ၂။၅၅၊ ဝိ။ ဝိ။ ဋီ။ ၁။၅၅) ဝဒန္တိ။ တဉှိ နိမိတ္တေ ဇာတတ္တာ နိမိတ္တမေဝ။ တေနာဟ ‘‘သေဝနစိတ္တေ သတိ ပါရာဇိက’’န္တိ။ သေဝနစိတ္တေတိ မေထုနသေဝနစိတ္တေ။ ကာယသံသဂ္ဂသေဝနစိတ္တေ ပန သတိ သင်္ဃာဒိသေသောဝ ¶ ။ နဋ္ဌော ကာယပ္ပသာဒေါ ဧတ္ထာတိ နဋ္ဌကာယပ္ပသာဒံ၊ သုက္ခပီဠကံ ဝါ မတစမ္မံ ဝါတိ အတ္ထော။ မတေ အက္ခာယိတေ၊ ယေဘုယျေန အက္ခာယိတေ စ ပါရာဇိကာပတ္တိဝစနတော (ပါရာ။ ၆၁) ပန နဋ္ဌကာယပ္ပသာဒေပိ ဣတ္ထိနိမိတ္တေ ပဝေသေန္တဿ ပါရာဇိကာပတ္တိယေဝ။ နိမိတ္တသဏ္ဌာနမတ္တမ္ပိ အနဝသေသေတွာတိ နိမိတ္တာကာရေန ဌိတံ ယထာဝုတ္တနိမိတ္တမံသာဒိမ္ပိ အနဝသေသေတွာ။ ဝဏသင်္ခေပဝသေနာတိ ဝဏသင်္ဂဟဝသေန။ ဝဏေ ထုလ္လစ္စယဉ္စ ‘‘အမဂ္ဂေန အမဂ္ဂံ ပဝေသေတိ၊ အာပတ္တိ ထုလ္လစ္စယဿာ’’တိ (ပါရာ။ ၆၆) ဣမဿ သုတ္တဿ ဝသေန ဝေဒိတဗ္ဗံ။ တသ္မိဉှိ သုတ္တေ ဒွီသု သမ္ဘိန္နဝဏေသု ဧကေန ဝဏေန ပဝေသေတွာ ဒုတိယေန နီဟရန္တဿ ထုလ္လစ္စယံ ဝုတ္တံ။ ဝုတ္တဉှိ သမန္တပါသာဒိကာယံ ‘‘ဣမဿ သတ္တဿ အနုလောမဝသေန သဗ္ဗတ္ထ ဝဏသင်္ခေပေ ထုလ္လစ္စယံ ဝေဒိတဗ္ဗ’’န္တိ (ပါရာ။ အဋ္ဌ။ ၁။၆၆)။ မနုဿာနံ ပန အက္ခိအာဒယောပိ ဝဏသင်္ဂဟံ ဂစ္ဆန္တီတိ ဝဏေန ဧကပရိစ္ဆေဒံ ကတွာ ဒဿေန္တော ‘‘တထာ’’တိအာဒိမာဟ။ တေသံ ဝဏသင်္ဂဟော ‘‘နဝဒွါရော မဟာဝဏော’’တိ (မိ။ ပ။ ၂။၆။၁) ဧဝမာဒိသုတ္တာနုသာရေန ဝေဒိတဗ္ဗော။ တတ္ထ မနုဿာနန္တိ ဣတ္ထိပုရိသပဏ္ဍကဥဘတောဗျဉ္ဇနကဝသေန စတုဗ္ဗိဓာနံ မနုဿာနံ။ ဝတ္ထိကောသေသူတိ ¶ ဝတ္ထိပုဋေသု ပုရိသာနံ အင်္ဂဇာတကောသေသု။ ဟတ္ထိအဿာဒီနဉ္စ တိရစ္ဆာနာနန္တိ ဟတ္ထိအဿဂေါဏဂဒြဘဩဋ္ဌမဟိံသာဒီနံ တိရစ္ဆာနဂတာနံ။ တိရစ္ဆာနာနံ ပနာတိ သဗ္ဗေသမ္ပိ တိရစ္ဆာနဂတာနံ။ သဗ္ဗေသန္တိ ယထာဝုတ္တမနုဿာဒီနံ သဗ္ဗေသံ။

ဧဝံ ဇီဝမာနကသရီရေ လဗ္ဘမာနံ အာပတ္တိဝိသေသံ ဒဿေတွာ ဣဒါနိ မတသရီရေ လဗ္ဘမာနံ အာပတ္တိဝိသေသံ ဒဿေတုံ ‘‘မတသရီရေ’’တိအာဒိမာဟ။ ဝစ္စမဂ္ဂပဿာဝမဂ္ဂမုခမဂ္ဂါနံ စတူသု ကောဋ္ဌာသေသု ဒွေ ကောဋ္ဌာသေ ဌပေတွာ ယဒါ အပရေ ဒွေ ကောဋ္ဌာသာ ခါဒိတာ၊ တဒါ ဥပဍ္ဎက္ခာယိတံ နာမ ဟောတိ။ န ကုထိတံ ဟောတီတိ ဥဒ္ဓုမာတကာဒိဘာဝေန ကုထိတံ န ဟောတိ၊ အလ္လန္တိ အတ္ထော။ ယဒါ ပန သရီရံ ဥဒ္ဓုမာတကံ ဟောတိ ကုထိတံ နီလမက္ခိကသမာကိဏ္ဏံ ကိမိကုလသမာကုလံ နဝဟိ ဝဏမုခေဟိ ပဂ္ဂဠိတပုဗ္ဗကုဏပဘာဝေန ဥပဂန္တုမ္ပိ အသက္ကုဏေယျံ (ပါရာ။ အဋ္ဌ။ ၁။၅၉-၆၀)၊ တဒါ ပါရာဇိကဝတ္ထုဉ္စ ထုလ္လစ္စယဝတ္ထုဉ္စ ဝိဇဟတိ၊ ဒုက္ကဋဝတ္ထုမေဝ ဟောတီတိ အာဟ ‘‘ကုထိတေ ဒုက္ကဋ’’န္တိ။ ကုထိတေတိ ဥဒ္ဓုမာတကဘာဝပ္ပတ္တေ။ ဤဒိသေ ဟိ သရီရေ ယတ္ထ ကတ္ထစိ ဥပက္ကမတော ဒုက္ကဋံ။ တထာ ဝဋ္ဋကတေ မုခေ အစ္ဆုပန္တံ အင်္ဂဇာတံ ပဝေသေန္တဿာတိ (ပါရာ။ အဋ္ဌ။ ၁။၇၃) ဝိဝဋ္ဋေ မုခေ စတ္တာရိ ပဿာနိ၊ တာလုကဉ္စ အပ္ဖုသန္တံ အင်္ဂဇာတံ ပဝေသေန္တဿ ဒုက္ကဋန္တိ အတ္ထော။ သစေ ပန ဟေဋ္ဌာ ဝါ ဥပရိ ဝါ ဥဘယပဿေဟိ ဝါ ဆုပန္တံ ပဝေသေတိ၊ ပါရာဇိကံ။ စတူဟိ ပဿေဟိ အစ္ဆုပန္တံ ပဝေသေတွာ အဗ္ဘန္တရေ တာလုကံ ဆုပတိ၊ ပါရာဇိကမေဝ။ ဗဟိ နိက္ခန္တဇိဝှာယ ဝါ ဒန္တေသု ဝါ အင်္ဂဇာတံ ပဝေသေန္တဿ ထုလ္လစ္စယန္တိ သမ္ဗန္ဓော။ ဇီဝမာနကသရီရေပိ ဗဟိ နိက္ခန္တဇိဝှာယ ထုလ္လစ္စယမေဝ။ ယဒိ ပန ဗဟိ ဇိဝှာယ ပလိဝေဌေတွာ အန္တောမုခံ ပဝေသေတိ၊ ပါရာဇိကမေဝ။ ယဒိ ပန ဒန္တာ သုဖုသိတာ၊ အန္တောမုခေ ဩကာသော ¶ နတ္ထိ၊ ဒန္တာ စ ဗဟိ ဩဋ္ဌမံသေန ပဋိစ္ဆန္နာ၊ တတ္ထ ဝါတေန အသမ္ဖုဋ္ဌံ အလ္လောကာသံ တိလဖလမတ္တမ္ပိ ပဝေသေန္တဿ ပါရာဇိကမေဝ။ ဥပ္ပာဋိတေ ပန ဩဋ္ဌမံသေ ဒန္တေသုယေဝ ဥပက္ကမန္တဿ ထုလ္လစ္စယံ။ ယောပိ ဒန္တော ဗဟိ နိက္ခမန္တော တိဋ္ဌတိ၊ န သက္ကာ ဩဋ္ဌေဟိ ပိဒဟိတုံ၊ တတ္ထာပိ ဧသေဝ နယော။

ဝေဒနာယ အဋ္ဋော ပီဠိတော ဝေဒနာဋ္ဋော။ ဥမ္မတ္တကောတိ စေတ္ထ ပိတ္တုမ္မတ္တကော အဓိပ္ပေတောတိ အာဟ ‘‘ယော ပိတ္တဝသေနာ’’တိအာဒိ။ ပိတ္တဝသေနာတိ ¶ ဗဒ္ဓပိတ္တဝသေန။ တသ္မိဉှိ ဗဒ္ဓပိတ္တေ ပိတ္တကောသတော စလိတွာ ဗဟိ နိက္ခမန္တေ သတ္တာ ဥမ္မတ္တကာ ဟောန္တိ၊ ဝိပလ္လတ္ထသညာ ဟိရောတ္တပ္ပံ ဆဍ္ဍေတွာ အသာရုပ္ပစရိယံ စရန္တိ၊ လဟုကဂရုကာနိ သိက္ခာပဒါနိ မဒ္ဒန္တာပိ န ဇာနန္တိ၊ ဘေသဇ္ဇကိရိယာယပိ အတေကိစ္ဆာ ဟောန္တိ၊ ဧဝရူပဿ ဥမ္မတ္တကဿ အနာပတ္တိ။ အဗဒ္ဓပိတ္တံ ပန လောဟိတံ ဝိယ သဗ္ဗင်္ဂဂတံ၊ တမှိ ကုပိတေ သတ္တာနံ ကဏ္ဍုကစ္ဆုသရီရကမ္ပာဒီနိ ဟောန္တိ၊ တာနိ ဘေသဇ္ဇကိရိယာယ ဝူပသမန္တိ။ တေန ဝုတ္တံ ‘‘ဗဒ္ဓပိတ္တဝသေနာ’’တိ။ ခိတ္တစိတ္တော နာမ ဝိဿဋ္ဌစိတ္တော ယက္ခုမ္မတ္တကော ဝုစ္စတီတိ အာဟ ‘‘ယက္ခေဟိ ကတစိတ္တဝိက္ခေပေါ ခိတ္တစိတ္တော’’တိ။ ယက္ခာ ကိရ ဘေရဝါနိ အာရမ္မဏာနိ ဒဿေတွာ မုခေန ဟတ္ထံ ပဝေသေတွာ၊ ဟဒယရူပံ ဝါ မဒ္ဒန္တာ သတ္တေ ဝိက္ခိတ္တစိတ္တေ ဝိပလ္လတ္ထသညေ ကရောန္တိ၊ ဧဝရူပဿ ခိတ္တစိတ္တဿ အနာပတ္တိ။ တေသံ ပန ဥဘိန္နံ အယံ ဝိသေသော – ပိတ္တုမ္မတ္တကော နိစ္စမေဝ ဥမ္မတ္တကော ဟောတိ၊ ပကတိသညံ န လဘတိ။ ယက္ခုမ္မတ္တကော အန္တရန္တရာ ပကတိသညံ ပဋိလဘတိ။ ဣဓ ပန ပိတ္တုမ္မတ္တကော ဝါ ဟောတု၊ ယက္ခုမ္မတ္တကော ဝါ၊ ယော သဗ္ဗသော မုဋ္ဌဿတိ ကိဉ္စိ န ဇာနာတိ၊ အဂ္ဂိမ္ပိ သုဝဏ္ဏမ္ပိ ဂူထမ္ပိ စန္ဒနမ္ပိ ဧကသဒိသံ မဒ္ဒန္တောဝ ဝိစရတိ၊ ဧဝရူပဿ အနာပတ္တိ။ အန္တရန္တရာ ပကတိသညံ ပဋိလဘိတွာ ဉတွာ ကရောန္တဿ ပန အာပတ္တိယေဝ။ တေနာဟ ‘‘ဒွိန္နမ္ပိ စ ဧတေသ’’န္တိအာဒိ။

အဓိမတ္တဝေဒနာယာတိ အဓိကပ္ပမာဏာယ ဒုက္ခဝေဒနာယ။ အာဒိကမ္မေ နိယုတ္တော အာဒိကမ္မိကော၊ ယော စ အာဒိကမ္မေ နိယုတ္တော၊ သော တသ္မိံ ကမ္မေ အာဒိဘူတော ဟောတီတိ အာဟ ‘‘ယော’’တိအာဒိ။ ဣဓ ပန သုဒိန္နတ္ထေရော အာဒိကမ္မိကော၊ တဿ အနာပတ္တိ။ အဝသေသာနံ မက္ကဋိသမဏဝဇ္ဇိပုတ္တကာဒီနံ အာပတ္တိယေဝ။ ပဋိပါဒနံ သမ္ပာဒနံ။ ကရောန္တောယေဝ ဟိ တံ အာပဇ္ဇတီတိ ကိရိယံ။ ဣဒံ (သာရတ္ထ။ ဋီ။ ၂။၆၆) ပန ယေဘုယျဝသေန ဝုတ္တံ မေထုနဓမ္မေ ပရူပက္ကမေ သတိ သာဒိယန္တဿ အကိရိယသမုဋ္ဌာနဘာဝတော။ မေထုနပ္ပဋိသံယုတ္တာယ ဟိ ကာမသညာယ အဘာဝေန မုစ္စနတော သညာဝိမောက္ခံ။ ‘‘အနာပတ္တိ အဇာနန္တဿ၊ အသာဒိယန္တဿာ’’တိ (ပါရာ။ ၆၆) ဟိ ဝုတ္တံ။ မေထုနစိတ္တေနေဝ နံ အာပဇ္ဇတိ၊ န ဝိနာ စိတ္တေနာတိ သစိတ္တကံ။ ရာဂဝသေနေဝ အာပဇ္ဇိတဗ္ဗတော လောကဝဇ္ဇံ။ ကာယဒွါရေနေဝ သမုဋ္ဌာနတော ကာယကမ္မံ။ စိတ္တံ ပနေတ္ထ အင်္ဂမတ္တံ ဟောတိ ¶ ၊ န တဿ ဝသေန ကမ္မဘာဝေါ လဗ္ဘတိ။ လောဘစိတ္တေနေဝ ¶ အာပဇ္ဇိတဗ္ဗတော အကုသလစိတ္တံ။ သုခသမင်္ဂီ ဝါ ဥပေက္ခာသမင်္ဂီ ဝါ အာပဇ္ဇတီတိ ဒွိဝေဒနံ။ နနု သမုဋ္ဌာနာဒီနိ အာပတ္တိယာ ဟောန္တိ၊ န သိက္ခာပဒဿ၊ အထ ကသ္မာ သိက္ခာပဒဿ သမုဋ္ဌာနာဒီနိ ဝုတ္တာနီတိ အာဟ ‘‘ဣမာနိ စ သမုဋ္ဌာနာဒီနိ နာမာ’’တိအာဒိ။ အာပတ္တိယာ ဟောန္တီတိ အဇ္ဈာစာရဿ ဟောန္တိ။

မုနနတော အနုမုနနတော မုတိ၊ ဉာဏံ၊ တံ ဧတဿ အတ္ထီတိ မုတိမာ၊ ဉာဏဝါတိ အတ္ထော။

ပဌမပါရာဇိကဝဏ္ဏနာ နိဋ္ဌိတာ။

၂။ ဒုတိယပါရာဇိကဝဏ္ဏနာ

ဧတ္ထာတိ ဧတေသု ဒွီသု။ ဧကကုဋိကာဒိဘေဒေါ သဗ္ဗောပိ ဂါမောတိ ဝေဒိတဗ္ဗောတိ သမ္ဗန္ဓော။ တတ္ထ ဧကကုဋိကာဒိဘေဒေါတိ ယသ္မိံ ဂါမေ ဧကာ ဧဝ ကုဋိ ဧကံ ဂေဟံ သေယျထာပိ မလယဇနပဒေ၊ အယံ ဧကကုဋိကော ဂါမော နာမ။ အာဒိသဒ္ဒေန ‘‘ဒွိကုဋိကောပိ ဂါမော၊ တိကုဋိကောပိ ဂါမော၊ စတုက္ကုဋိကောပိ ဂါမော’’တိ (ပါရာ။ ၉၂) ဝုတ္တပ္ပဘေဒံ သင်္ဂဏှာတိ။ အဘိနဝနိဝိဋ္ဌော ဧကကုဋိကာဒိဂါမော ပန ယာဝ မနုဿာ ပဝိသိတွာ ဝါသံ န ကပ္ပေန္တိ၊ တာဝ ဂါမသင်္ခံ န ဂစ္ဆတိ။ ကိံဘူတောတိ အာဟ ‘‘ပရိက္ခိတ္တော ဝါ’’တိအာဒိ။ တတ္ထ ပရိက္ခိတ္တော နာမ ဣဋ္ဌကပါကာရံ အာဒိံ ကတွာ အန္တမသော ကဏ္ဋကသာခါဟိပိ ပရိက္ခိတ္တော။ တဗ္ဗိပရီတော အပရိက္ခိတ္တော။ အမနုဿော နာမ ယော သဗ္ဗသော ဝါ မနုဿာနံ အဘာဝေန ယက္ခပရိဂ္ဂဟဘူတော၊ ယတော ဝါ မနုဿာ ကေနစိ ကရဏီယေန ပုနပိ အာဂန္တုကာမာ ဧဝ အပက္ကန္တာ၊ ယတော ပန နိရပေက္ခာ ဟုတွာ ပက္ကမန္တိ၊ သော ဂါမသင်္ခံ န ဂစ္ဆတိ။ န ကေဝလံ ဧကကုဋိကာဒိဘေဒေါဝါတိ အာဟ ‘‘အန္တမသော’’တိအာဒိ။ ယော ကောစိ သတ္ထောပီတိ ဇင်္ဃသတ္ထသကဋသတ္ထာဒီသု ယော ကောစိ သတ္ထောပိ။ ဣမသ္မိံ သိက္ခာပဒေ နိဂမနဂရာနိ ဝိယ ဂါမဂ္ဂဟဏေနေဝ ဂါမူပစာရောပိ သင်္ဂဟိတောတိ အာဟ ‘‘ဌပေတွာ ဂါမဉ္စ ဂါမူပစာရဉ္စာ’’တိ။ အညထာ ပန မာတိကာယ အနဝသေသတော အဝဟာရဋ္ဌာနပရိဂ္ဂဟော ကတော နာမ န ဟောတိ၊ န စ ဗုဒ္ဓါ သာဝသေသံ ပါရာဇိကံ ပညာပေန္တိ။

တတ္ထာတိ တေသု ဂါမဂါမူပစာရေသု။ ဒွါရေတိ နိဗ္ဗကောသဿ ဥဒကပတနဋ္ဌာနတော အဗ္ဘန္တရေ။ အန္တောဂေဟေတိ ပမုခဿ အဗ္ဘန္တရေ။ ကတပရိက္ခေပေါတိ ¶ ပါကာရဝတိအာဒီဟိ ကတပရိက္ခေပေါ။ သုပ္ပပတနာဒိပရိစ္ဆေဒေါ ပနေတ္ထ အပရိက္ခိတ္တဃရံ သန္ဓာယ ဝုတ္တော။ န ကေဝလံ ဃရဿ ပုရတော၊ အထ ခေါ သမန္တတော တတ္တကောဝ ပရိစ္ဆေဒေါ ဃရူပစာရော နာမာတိ ဂဟေတဗ္ဗံ။ ‘‘ပုရတော’’တိအာဒိကံ ပန လောကိယေဟိ ¶ တထာကရဏတော ဝုတ္တံ။ ထာမမဇ္ဈိမဿာတိ မဇ္ဈိမထာမဿ၊ နေဝ အပ္ပထာမဿ၊ န မဟာထာမဿာတိ ဝုတ္တံ ဟောတိ။ ‘‘ယထာ တရုဏမနုဿာ’’တိအာဒိနာ ယထာ မာတုဂါမော ကာကေ ဥဍ္ဍာပေန္တော ဥဇုကမေဝ ဟတ္ထံ ဥက္ခိပိတွာ လေဍ္ဍုံ ခိပတိ၊ ယထာ စ ဥဒကုက္ခေပေ ဥဒကံ ခိပန္တိ၊ ဧဝံ ခိတ္တဿ လေဍ္ဍုဿ ပတိတဋ္ဌာနံ ပဋိက္ခိပတိ။ ပဝတ္တိတွာတိ လုဌိတွာ၊ ပရိဝတ္တိတွာတိ ဝုတ္တံ ဟောတိ။ တဿ သစေ ဒွေ ဣန္ဒခီလာ ဟောန္တီတိ (ပါရာ။ အဋ္ဌ။ ၁။၉၂) တဿ ပရိက္ခိတ္တဿ ဂါမဿ သစေ အနုရာဓပုရဿေဝ ဒွေ ဥမ္မာရာ ဟောန္တိ။ ယဿ ပန ဧကော၊ တဿ ဂါမဒွါရဗာဟာနံ ဝေမဇ္ဈေ ဌိတဿ လေဍ္ဍုပါတဗ္ဘန္တရံ ဂါမူပစာရော နာမ။ ယတြ ပန ဣန္ဒခီလော နတ္ထိ၊ တတြ ဂါမဒွါရဗာဟာနံ ဝေမဇ္ဈံ။ ယတြ ဒွါရဗာဟာပိ နတ္ထိ၊ တတ္ထ ဥဘောသု ပဿေသု ဝတိယာ ဝါ ပါကာရဿ ဝါ ကောဋိဝေမဇ္ဈံဝ ဣန္ဒခီလဋ္ဌာနိယတ္တာ ဣန္ဒခီလောတိ ဂဟေတဗ္ဗံ။ ယော ပန ဂါမော ပုဗ္ဗေ မဟာ ဟုတွာ ပစ္ဆာ ကုလေသု နဋ္ဌေသု အပ္ပကော ဟောတိ၊ သော ဃရူပစာရတော လေဍ္ဍုပါတေနေဝ ပရိစ္ဆိန္ဒိတဗ္ဗော။ ပုရိမပရိစ္ဆေဒေါ ပနဿ ပရိက္ခိတ္တဿာပိ အပရိက္ခိတ္တဿာပိ အပ္ပမာဏမေဝါတိ။ နနု စေတံ အပရိက္ခိတ္တဿ ဥပစာရဒဿနံ ပဒဘာဇနေန ဝိရုဒ္ဓမိဝ ဒိဿတိ။ တတ္ထ ဟိ ‘‘ဂါမူပစာရော နာမ ပရိက္ခိတ္တဿ ဂါမဿ ဣန္ဒခီလေ ဌိတဿ မဇ္ဈိမဿ ပုရိသဿ လေဍ္ဍုပါတော’’တိ (ပါရာ။ ၉၂) ဝတွာ ‘‘အပရိက္ခိတ္တဿ ဂါမဿ ဃရူပစာရေ ဌိတဿ မဇ္ဈိမဿ ပုရိသဿ လေဍ္ဍုပါတော’’တိ (ပါရာ။ ၉၂) ဧတ္တကမေဝ ဝုတ္တံ၊ န ပန တံ လေဍ္ဍုပါတံ ဂါမသင်္ခေပံ ကတွာ တတော ပရံ ဂါမူပစာရောတိ ဝုတ္တောတိ အာဟ ‘‘ပဒဘာဇနေပိ ဟိ ဣမိနာဝ နယေန အတ္ထော ဝေဒိတဗ္ဗော’’တိ။

အယမေတ္ထ အဓိပ္ပာယော – ဣဓ ဂါမော နာမ ဒုဝိဓော ဟောတိ ပရိက္ခိတ္တော စ အပရိက္ခိတ္တော စ (ပါရာ။ အဋ္ဌ။ ၁။၉၂)။ တတြ ပရိက္ခိတ္တဿ ပရိက္ခေပေါယေဝ ပရိစ္ဆေဒေါ။ တသ္မာ တဿ ဝိသုံ ပရိစ္ဆေဒံ အဝတွာ ‘‘ဂါမူပစာရော နာမ ပရိက္ခိတ္တဿ ဂါမဿ ဣန္ဒခီလေ ဌိတဿ မဇ္ဈိမဿ ပုရိသဿ လေဍ္ဍုပါတော’’တိ ပါဠိယံ ဝုတ္တံ။ အပရိက္ခိတ္တဿ ပန ဂါမဿ ဂါမပရိစ္ဆေဒေါ ဝတ္တဗ္ဗော။ တသ္မာ တဿ ¶ ဂါမဿ ဂါမပရိစ္ဆေဒဒဿနတ္ထံ ‘‘အပရိက္ခိတ္တဿ ဂါမဿ ဃရူပစာရေ ဌိတဿ မဇ္ဈိမဿ ပုရိသဿ လေဍ္ဍုပါတော’’တိ (ပါရာ။ ၉၂) ဝုတ္တံ။ ဂါမပရိစ္ဆေဒေ စ ဒဿိတေ ဂါမူပစာရလက္ခဏံ ပုဗ္ဗေ ဝုတ္တနယေနေဝ သက္ကာ ဉာတုန္တိ ပုန ‘‘တတ္ထ ဌိတဿ မဇ္ဈိမဿ ပုရိသဿ လေဍ္ဍုပါတော’’တိ န ဝုတ္တံ၊ အတ္ထော ပန တတ္ထာပိ အယမေဝ ယထာဝုတ္တောတိ။ ယော ပန ဃရူပစာရေ ဌိတဿ လေဍ္ဍုပါတံယေဝ ‘‘ဂါမူပစာရော’’တိ ဝဒတိ၊ တဿ ဃရူပစာရော ‘‘ဂါမော’’တိ အာပဇ္ဇတိ။ တတော ဃရံ ဃရူပစာရော၊ ဂါမော ဂါမူပစာရောတိ ဧသ ဝိဘာဂေါ သင်္ကရီယတိ။ အသံကရတော စေတ္ထ ဝိနိစ္ဆယော ဝေဒိတဗ္ဗော။ တသ္မာ ပါဠိဉ္စ အဋ္ဌကထဉ္စ သံသန္ဒိတွာ ဝုတ္တနယေနေဝေတ္ထ ဂါမော၊ ဂါမူပစာရော စ ဝေဒိတဗ္ဗောတိ။

တတ္ထာတိ ¶ တေသု ဒွီသု ဥပစာရေသု။ ယွာယံ ဥပစာရော ဒဿိတောတိ သမ္ဗန္ဓော။ ဝိကာလေ ဂါမပ္ပဝေသနာဒီသူတိ ဧတ္ထ အာဒိသဒ္ဒေန အသံကစ္စိကာဂါမပ္ပဝေသနံ (ပါစိ။ ၁၂၂၅) သင်္ဂဏှာတိ။ ယော ပန ပရိက္ခိတ္တဿ ဂါမဿ ဥပစာရော ဝုတ္တော၊ သော န ကတ္ထစိ ဝိနယပိဋကေ ဥပယောဂံ ဂတော။ ကေဝလံ အပရိက္ခိတ္တဿ ပရိက္ခေပေါကာသတော အပရော ဧကော လေဍ္ဍုပါတော ဂါမူပစာရော နာမာတိ ဉာပနတ္ထံ ဝုတ္တော။ ဧဝံ ဝုတ္တေ ဟိ ဉာယတိ ‘‘ပရိက္ခိတ္တဿာပိ စေ ဂါမဿ ဧကော လေဍ္ဍုပါတော ကပ္ပိယဘူမိ သမာနော ဥပစာရောတိ ဝုတ္တော၊ ပဂေဝ အပရိက္ခိတ္တဿ ပရိက္ခေပေါကာသတော ဧကော’’တိ။ ဣမေသံ ပရိစ္ဆေဒဒဿနတ္ထန္တိ ဣမေသံ ဂါမာရညာနံ ပရိစ္ဆေဒဒဿနတ္ထံ ဝုတ္တာ အဋ္ဌကထာယံ။ ပါရာဇိကဝတ္ထုန္တိ ပါဒဂ္ဃနကံ။ အဝဟရန္တဿာတိ ဂဏှန္တဿ။

အဒိန္နန္တိ (ပါရာ။ အဋ္ဌ။ ၉၂) ဒန္တပေါနသိက္ခာပဒေ အတ္တနော သန္တကမ္ပိ အပ္ပဋိဂ္ဂဟိတကံ ကပ္ပိယံ အဇ္ဈောဟရဏီယံ ဝုစ္စတိ၊ ဣဓ ပန ယံ ကိဉ္စိ ပရပရိဂ္ဂဟိတံ သသာမိကံ ဘဏ္ဍံ၊ တဒေတံ တေဟိ သာမိကေဟိ ကာယေန ဝါ ဝါစာယ ဝါ န ဒိန္နန္တိ အဒိန္နံ။ အဝဟာရပ္ပဟောနကမေဝ ပန ဒဿေတုံ ‘‘အညဿ မနုဿဇာတိကဿ သန္တက’’န္တိ ဝုတ္တံ။ သင်္ခါသဒ္ဒဿေဝ တ-ကာရေန ဝဍ္ဎေတွာ ဝုတ္တတ္တာ ‘‘သင်္ခါ သင်္ခါတန္တိ အတ္ထတော ဧက’’န္တိ ဝုတ္တံ။ တတ္ထ အတ္ထတော ဧကန္တိ ပဒတ္ထတော ဧကံ၊ အနတ္ထန္တရန္တိ ဝုတ္တံ ဟောတိ။ ကောဋ္ဌာသဿေတံ နာမံ ဘာဂတော ¶ သင်္ခါယတိ ဥပဋ္ဌာတီတိ ကတွာ။ ပပဉ္စသင်္ခါတိ သတ္တာနံ သံသာရေ ပပဉ္စေန္တိ စိရာယန္တီတိ ပပဉ္စာ၊ တဏှာမာနဒိဋ္ဌိယော၊ ယဿ ဝါ ဥပ္ပန္နာ၊ တံ ‘‘ရတ္တော’’တိ ဝါ ‘‘မတ္တော’’တိ ဝါ ‘‘မိစ္ဆာဒိဋ္ဌိနိဝိဋ္ဌော’’တိ ဝါ ပပဉ္စေန္တိ ဗျဉ္ဇေန္တီတိ ပပဉ္စာ၊ သင်္ခါ ဝုစ္စတိ ကောဋ္ဌာသော၊ ပပဉ္စာဝ သင်္ခါ ပပဉ္စသင်္ခါ၊ ပပဉ္စကောဋ္ဌာသာတိ အတ္ထော၊ တဏှာမာနဒိဋ္ဌိယောတိ ဝုတ္တံ ဟောတိ။ ထေယျစိတ္တသင်္ခါတောတိ ‘‘ထေယျစိတ္တော’’တိ ကထိတော။ ဧကော စိတ္တကောဋ္ဌာသောတိ ဝိဿာသတာဝကာလိကာဒိဂ္ဂါဟဝသပ္ပဝတ္တအထေယျစိတ္တကောဋ္ဌာသတော အညော စိတ္တကောဋ္ဌာသော။ ထေယျသင်္ခါတေနာတိ ထေယျဘူတစိတ္တကောဋ္ဌာသေန။ ယဒိ ဧဝံ အထ ကသ္မာ ဧတဿ ဝိဘင်္ဂေ ‘‘ထေယျစိတ္တော အဝဟရဏစိတ္တော’’တိ (ပါရာ။ ၉၂) ဝုတ္တန္တိ အာဟ ‘‘ယော စာ’’တိအာဒိ။ ဗျဉ္ဇနံ အနာဒိယိတွာတိ ဗျဉ္ဇနေ အာဒရံ အကတွာတိ အတ္ထော၊ သဒ္ဒတ္ထမနပေက္ခိတွာတိ ဝုတ္တံ ဟောတိ။ အတ္ထမေဝါတိ ဘာဝတ္ထမေဝ။

တေ ပန အဝဟာရာတိ တေ ပဉ္စဝီသတိ အဝဟာရာ။ သဝိညာဏကာဝိညာဏကဝသေန နာနာဝိဓော ဘဏ္ဍော ဧတဿ ပဉ္စကဿာတိ နာနာဘဏ္ဍံ၊ ပဉ္စန္နံ အဝဟာရာနံ သမူဟော ပဉ္စကံ၊ ပဉ္စပရိမာဏမဿာတိ ဝါ ပဉ္စကံ၊ နာနာဘဏ္ဍမေဝ ပဉ္စကံ နာနာဘဏ္ဍပဉ္စကံ။ သဝိညာဏကဝသေန ဧကော ဘဏ္ဍော ဧတဿာတိ ဧကဘဏ္ဍံ။ သေသံ ဝုတ္တနယမေဝ။ သာဟတ္ထိကောဝ ပဉ္စကံ ¶ သာဟတ္ထိကပဉ္စကံ။ အာဒိပဒဝသေန စေတံ နာမံ ကုသလာဒိတ္တိကဿ ကုသလတ္တိကဝေါဟာရော ဝိယ။ တသ္မာ သာဟတ္ထိကာဒိပဉ္စကန္တိ အတ္ထတော ဒဋ္ဌဗ္ဗံ။ ဧသ နယော သေသေသု ပဉ္စကဒွယေသု။ ဧတဿေဝါတိ ‘‘အာဒိယေယျာ’’တိ ဧတဿေဝ မာတိကာပဒဿ။ ဣမေသံ ပဒါနံ ဝသေနာတိ ဣမေသံ ပဉ္စန္နံ ပဒါနံ ဝသေန။ ဧတ္ထ စ ပဌမပဒံ အဘိယောဂဝသေန ဝုတ္တံ၊ ဒုတိယပဒံ အညေသံ ဘဏ္ဍံ ဟရန္တဿ ဂစ္ဆတော ဝသေန၊ တတိယပဒံ ဥပနိက္ခိတ္တဘဏ္ဍဝသေန၊ စတုတ္ထံ သဝိညာဏကဝသေန၊ ပဉ္စမံ ထလေ နိက္ခိတ္တာဒိဝသေန ဝုတ္တန္တိ ဝေဒိတဗ္ဗံ။

ဣဒါနိ နေသံ အတ္ထယောဇနံ ဒဿေတုံ ‘‘တတ္ထာ’’တိအာဒိမာဟ။ တတ္ထ တတ္ထာတိ တေသု ဒွီသု ပဉ္စကေသု။ ဣတရန္တိ ဧကဘဏ္ဍပဉ္စကံ။ အာရာမန္တိ ပုပ္ဖာရာမဖလာရာမံ။ အဘိယုဉ္ဇတီတိ (ပါရာ။ အဋ္ဌ။ ၁။၁၀၂) ပရသန္တကံ ‘‘မမ သန္တကောဝ အယ’’န္တိ မုသာ ဘဏိတွာ အဘိယုဉ္ဇတိ စောဒေတိ၊ အဋ္ဋံ ကရောတီတိ အတ္ထော။ သမ္ပဇာနမုသာဝါဒေပိ အဒိန္နာဒါနဿ ပုဗ္ဗပယောဂတ္တာ ဒုက္ကဋန္တိ အာဟ ‘‘အာပတ္တိ ¶ ဒုက္ကဋဿာ’’တိ၊ ဒုက္ကဋသင်္ခါတာ အာပတ္တိ ဘဝေယျာတိ အတ္ထော။ အထ ဝါ ဒုက္ကဋသညိတဿ ဝီတိက္ကမဿ အာပဇ္ဇနန္တိ အတ္ထော။ ဧသ နယော ‘‘အာပတ္တိ ထုလ္လစ္စယဿာ’’တိအာဒီသု။ သာမိကဿ ဝိမတိံ ဥပ္ပာဒေတီတိ ဝိနိစ္ဆယကုသလတာယ၊ ဗလဝနိဿိတာဒိဘာဝေန ဝါ အာရာမသာမိကဿ သံသယံ ဇနေတိ။ ကထံ? တဉှိ တထာ ဝိနိစ္ဆယပ္ပသုတံ ဒိသွာ သာမိကော စိန္တေတိ ‘‘သက္ခိဿာမိ နု ခေါ အဟံ ဣမံ အာရာမံ အတ္တနော ကာတုံ၊ န သက္ခိဿာမိ နု ခေါ’’တိ။ ဧဝံ တဿ ဝိမတိ ဥပ္ပဇ္ဇမာနာ တေန ဥပ္ပာဒိတာ ဟောတိ။ ဓုရံ နိက္ခိပတီတိ ယဒါ ပန သာမိကော ‘‘အယံ ထဒ္ဓါ ကက္ခဠော ဇီဝိတဗြဟ္မစရိယန္တရာယမ္ပိ မေ ကရေယျ၊ အလံ ဒါနိ မယှံ ဣမိနာ အာရာမေနာ’’တိ ဓုရံ နိက္ခိပတိ၊ ဥဿာဟံ ဌပေတိ၊ အတ္တနော သန္တကကရဏေ နိရုဿာဟော ဟောတီတိ အတ္ထော။ အာပတ္တိ ပါရာဇိကဿ သစေ သယမ္ပိ ကတဓုရနိက္ခေပေါ စာတိ အဓိပ္ပာယော။ အထ ပန သာမိကေန ဓုရေ နိက္ခိတ္တေပိ အဘိယုဉ္ဇကော ဓုရံ အနိက္ခိပိတွာဝ ‘‘ဣမံ သုဋ္ဌု ပီဠေတွာ မမ အာဏာပဝတ္တိံ ဒဿေတွာ ကိင်္ကာရပ္ပဋိဿာဝိဘာဝေ ဌပေတွာ ဒဿာမီ’’တိ ဒါတဗ္ဗဘာဝေ သဥဿာဟော၊ ရက္ခတိ တာဝ။ အထာပိ အဘိယုဉ္ဇကော အစ္ဆိန္ဒိတွာ ‘‘န ဒါနိ ဣမံ ဣမဿ ဒဿာမီ’’တိ ဓုရံ နိက္ခိပတိ၊ သာမိကော ပန ဓုရံ န နိက္ခိပတိ၊ ပက္ခံ ပရိယေသတိ၊ ကာလံ အာဂမေတိ၊ ‘‘လဇ္ဇိပရိသံ တာဝ လဘာမိ၊ ပစ္ဆာ ဇာနိဿာမီ’’တိ ဂဟဏေယေဝ သဥဿာဟော ဟောတိ၊ ရက္ခတိယေဝ။ ယဒါ ပန ‘‘သောပိ န ဒဿာမီ’’တိ၊ ‘‘သာမိကောပိ န လစ္ဆာမီ’’တိ ဧဝံ ဥဘော ဓုရံ နိက္ခိပန္တိ၊ တဒါ အဘိယုဉ္ဇကဿ ပါရာဇိကံ။

အညဿ ဘဏ္ဍံ ဟရန္တောတိ ဝေတနေန ဝါ မိတ္တဘာဝေန ဝါ အညဿ ဘဏ္ဍံ ဟရန္တော။ သီသေ ဘာရန္တိ ¶ သီသေ ဌိတဘာရံ။ သီသဿ တာဝ ပုရိမဂလေ ဂလဝါဋကော၊ ပိဋ္ဌိဂလေ ကေသဉ္စိ ကေသန္တေ အာဝဋ္ဋော ဟောတိ၊ ဂလဿေဝ ဥဘောသု ပဿေသု ကေသဉ္စိ ကေသာ ဩရုယှ ဇာယန္တိ၊ ယေ ‘‘ကဏ္ဏစူဠိကာ’’တိ ဝုစ္စန္တိ၊ တေသံ အဓောဘာဂေါ စာတိ အယံ ဟေဋ္ဌိမကော ပရိစ္ဆေဒေါ၊ တတော ဥပရိ သီသံ၊ ဧတ္ထန္တရေ ဌိတဘာရန္တိ ဝုတ္တံ ဟောတိ။ ခန္ဓံ ဩရောပေတီတိ ဥဘောသု ပဿေသု ကဏ္ဏစူဠိကာဟိ ပဋ္ဌာယ ဟေဋ္ဌာ၊ ကပ္ပရေဟိ ပဋ္ဌာယ ဥပရိ၊ ပိဋ္ဌိဂလာဝဋ္ဋတော စ ဂလဝါဋကတော စ ပဋ္ဌာယ ဟေဋ္ဌာ၊ ပိဋ္ဌိဝေမဇ္ဈာဝဋ္ဋတော စ ဥရပရိစ္ဆေဒမဇ္ဈေ၊ ဟဒယာဝါဋကတော စ ပဋ္ဌာယ ဥပရိ ခန္ဓော၊ တံ ဩရောပေတိ။

အယံ ¶ ပနေတ္ထ ဝိနိစ္ဆယော – ယော ဘိက္ခု ‘‘ဣဒံ ဂဟေတွာ ဧတ္ထ ယာဟီ’’တိ (ပါရာ။ အဋ္ဌ။ ၁။၁၀၁) သာမိကေဟိ အနာဏတ္တော သယမေဝ ‘‘မယှံ ဣဒံ နာမ ဒေထ၊ အဟံ ဝေါ ဘဏ္ဍံ ဝဟာမီ’’တိ တေသံ ဘဏ္ဍံ သီသေန အာဒါယ ဂစ္ဆန္တော ထေယျစိတ္တေန တံ ဘဏ္ဍံ အာမသတိ၊ ဒုက္ကဋံ။ ယထာဝုတ္တသီသပရိစ္ဆေဒံ အနတိက္ကမန္တောဝ ဣတော စိတော စ ဃံသန္တော သာရေတိပိ ပစ္စာသာရေတိပိ၊ ထုလ္လစ္စယံ။ ခန္ဓံ ဩရောပိတမတ္တေ ကိဉ္စာပိ သာမိကာနံ ‘‘ဝဟတူ’’တိ စိတ္တံ အတ္ထိ၊ တေဟိ ပန အနာဏတ္တတ္တာ ပါရာဇိကံ။ ခန္ဓံ ပန အနောရောပေတွာပိ သီသတော ကေသဂ္ဂမတ္တမ္ပိ စာဝေန္တဿ ပါရာဇိကံ။ ယမကဘာရဿ ပန ဧကော ဘာဂေါ သီသေ ပတိဋ္ဌာတိ၊ ဧကော ပိဋ္ဌိယံ၊ တတ္ထ ဒွိန္နံ ဌာနာနံ ဝသေန ဝိနိစ္ဆယော ဝေဒိတဗ္ဗော။ အယံ ပန သုဒ္ဓသီသဘာရဿေဝ ဝသေန ဝုတ္တော။ ယော စာယံ သီသဘာရေ ဝုတ္တော၊ ခန္ဓဘာရာဒီသုပိ အယမေဝ ဝိနိစ္ဆယော ဝေဒိတဗ္ဗော။

ဥပနိက္ခိတ္တံ ဘဏ္ဍန္တိ သင်္ဂေါပနတ္ထာယ အတ္တနော ဟတ္ထေ ပရေဟိ ဌပိတဘဏ္ဍံ။ အဟံ န ဂဏှာမီတိ သမ္ဗန္ဓော။ အတီတတ္ထေ စေတံ ဝတ္တမာနဝစနံ၊ နာဟံ ဂဟေသိန္တိ အတ္ထော။ ဒုက္ကဋံ (ပါရာ။ အဋ္ဌ။ ၁။၁၁၁) သမ္ပဇာနမုသာဝါဒေပိ အဒိန္နာဒါနဿ ပုဗ္ဗပယောဂတ္တာ။ ‘‘ကိံ တုမှေ ဘဏထ၊ နေဝိဒံ မယှံ အနုရူပံ၊ န တုမှာက’’န္တိအာဒီနိ ဝဒန္တဿာပိ ဒုက္ကဋမေဝ။ သာမိကဿ ဝိမတိံ ဥပ္ပာဒေတီတိ ‘‘ရဟော မယာ ဧတဿ ဟတ္ထေ ဌပိတံ၊ န အညော ကောစိ ဇာနာတိ၊ ဒဿတိ နု ခေါ မေ၊ နော’’တိ သာမိကဿ ဝိမတိံ ဥပ္ပာဒေတိ။ ဓုရံ နိက္ခိပတီတိ တဿ ဖရုသာဒိဘာဝံ ဒိသွာ ဥဿာဟံ ဌပေတိ။ တတြ သစာယံ ဘိက္ခု ‘‘ကိလမေတွာ နံ ဒဿာမီ’’တိ ဒါနေ သဥဿာဟော၊ ရက္ခတိ တာဝ။ သစေ သော ဒါနေ နိရုဿာဟော၊ ဘဏ္ဍသာမိကော ပန ဂဟဏေ သဥဿာဟော၊ ရက္ခတေဝ။ ယဒိ ပန သော တသ္မိံ ဒါနေ နိရုဿာဟော၊ ဘဏ္ဍသာမိကောပိ ‘‘န မယှံ ဒဿတီ’’တိ ဓုရံ နိက္ခိပတိ၊ ဧဝံ ဥဘိန္နံ ဓုရနိက္ခေပေန ဘိက္ခုနော ပါရာဇိကံ။ ယဒိပိ မုခေန ‘‘ဒဿာမီ’’တိ ဝဒတိ၊ စိတ္တေန ပန အဒါတုကာမော၊ ဧဝမ္ပိ သာမိကဿ ဓုရနိက္ခေပေန ဘိက္ခုနော ပါရာဇိကံ။

သဟဘဏ္ဍဟာရကံ ¶ နေဿာမီတိ ‘‘သဟဘဏ္ဍဟာရကံ ဘဏ္ဍံ နေဿာမီ’’တိ စိန္တေတွာ။ ပဌမံ ပါဒံ အတိက္ကာမေတီတိ ဘဏ္ဍဟာရကံ တဇ္ဇေတွာ တဿ ဂမနပထံ ဝါရေတွာ အတ္တနာ ရုစိတမဂ္ဂံ ဧကပါဒံ အတိက္ကာမေတိ။ ထလဋ္ဌန္တိ (ပါရာ။ အဋ္ဌ။ ၁။၉၅) ထလေ နိက္ခိတ္တံ၊ ဘူမိတလေ ဝါ ပါသာဏပဗ္ဗတတလာဒီသု ဝါ ယတ္ထ ကတ္ထစိ ပဋိစ္ဆန္နေ ဝါ အပ္ပဋိစ္ဆန္နေ ဝါ ဌပိတန္တိ အတ္ထော။ ဖန္ဒာပေတိ၊ ထုလ္လစ္စယန္တိ ယော ဖန္ဒာပေတိ ¶ ၊ တဿ ပယောဂေ ပယောဂေ ထုလ္လစ္စယံ၊ အာမသနေ ဒုက္ကဋံ၊ ဖန္ဒာပနေ ထုလ္လစ္စယဉ္စ ဝိသုံ ဝိသုံ ထေယျစိတ္တေန အာမသနဖန္ဒာပနပယောဂေ ကရောန္တဿေဝ ဟောတိ။ ‘‘ဧကပယောဂေန ဂဏှန္တဿ ပန ဥဒ္ဓါရေ ပါရာဇိကမေဝ၊ န ဒုက္ကဋထုလ္လစ္စယာနီ’’တိ ဝဒန္တိ။ ဌာနာတိ ဌိတဋ္ဌာနတော။ သစေ တံ ထလဋ္ဌံ ရာသိကတံ ဟောတိ၊ အန္တောကုမ္ဘိယံ ဘာဇနဂတကရဏမုဋ္ဌိစ္ဆေဒနဝိနိစ္ဆယေန ဝိနိစ္ဆိနိတဗ္ဗံ။ သစေ ဧကာဗဒ္ဓံ သိလေသနိယျာသာဒိ၊ ပက္ကမဓုဖာဏိတဝိနိစ္ဆယေန ဝိနိစ္ဆိနိတဗ္ဗံ။ သစေ ဂရုကံ ဟောတိ ဘာရဗဒ္ဓံ လောဟပိဏ္ဍိတေလမဓုဃဋာဒိ ဝါ၊ ကုမ္ဘိယံ ဌာနာစာဝနဝိနိစ္ဆယေန ဝိနိစ္ဆိနိတဗ္ဗံ။ သင်္ခလိကာဗဒ္ဓဿ စ ဌာနဘေဒေါ သလ္လက္ခေတဗ္ဗော။ ပတ္ထရိတွာ ဌပိတံ ပန ပါဝါရတ္ထရဏကဋသာရကာဒိံ ဥဇုကံ ဂဟေတွာ အာကဍ္ဎတိ၊ ပါရိမန္တေ ဩရိမန္တေန ဖုဋ္ဌောကာသံ အတိက္ကန္တေ ပါရာဇိကံ။ တထေဝ ဂဟေတွာ ပရတော ပေလ္လတိ၊ ပါရိမန္တေ ဖုဋ္ဌောကာသံ ဩရိမန္တေ အတိက္ကန္တေ ပါရာဇိကံ။ ဝါမတော ဝါ ဒက္ခိဏတော ဝါ အပနာမေန္တဿ ဝါမန္တေန ဝါ ဒက္ခိဏန္တေန ဝါ ဖုဋ္ဌောကာသံ ဒက္ခိဏန္တေ ဝါ ဝါမန္တေ ဝါ အတိက္ကန္တေ ပါရာဇိကံ။ ဝေဌေတွာ ဥဒ္ဓရတိ၊ ကေသဂ္ဂမတ္တံ အာကာသဂတံ ကရောန္တဿ ပါရာဇိကံ။

သကော ဟတ္ထော သဟတ္ထော၊ တေန နိဗ္ဗတ္တော၊ တဿ ဝါ သမ္ဗန္ဓီတိ သာဟတ္ထိကော၊ အဝဟာရော။ အာဏာပနံ အာဏတ္တိ၊ တာယ အာဏတ္တိယာ နိဗ္ဗတ္တော အဝဟာရော အာဏတ္တိကော။ နိဿဇ္ဇနံ နိဿဂ္ဂေါ၊ သုင်္ကဃာတဋ္ဌာနေ၊ ပရိကပ္ပိတောကာသေ စ ဌတွာ ဘဏ္ဍဿ ဗဟိ နိပါတနံ၊ နိဿဂ္ဂေါဝ နိဿဂ္ဂိယော။ ကိရိယာသိဒ္ဓိတော ပုရေတရမေဝ ပါရာဇိကာပတ္တိသင်္ခါတံ အတ္ထံ သာဓေတီတိ အတ္ထသာဓကော။ ဓုရဿ အာလယသင်္ခါတဿ ဘာရဿ နိက္ခိပနံ ပရိစ္စဇနံ နိရုဿာဟဘာဝါပဇ္ဇနံ ဓုရနိက္ခေပေါ။ ဣဒါနိ ဗျဉ္ဇနေ အာဒရံ အကတွာ တေသံ အတ္ထမတ္တမေဝ ဒဿေန္တော ‘‘တတ္ထ သာဟတ္ထိကော နာမာ’’တိအာဒိမာဟ။ သဟတ္ထာတိ သဟတ္ထေန။ ကရဏတ္ထေ ဟိ ဣဒံ နိဿက္ကဝစနံ။ ‘‘အသုကဿ ဘဏ္ဍံ အဝဟရာ’’တိ အညံ အာဏာပေတီတိ ဧတ္ထာပိ အာဏတ္တိက္ခဏေ ဧဝ အာပတ္တိ ဒဋ္ဌဗ္ဗာ။ ယဒိ ဧဝံ ဣမဿ၊ အတ္ထသာဓကဿ စ ကော ဝိသေသောတိ? တံ ခဏံ ဧဝ ဂဟဏေ နိယုဉ္ဇနံ အာဏတ္တိကပယောဂေါ၊ ကာလန္တရေန ဂဟဏတ္ထံ နိယောဂေါ အတ္ထသာဓကောတိ (သာရတ္ထ။ ဋီ။ ၂။၉၂၊ ဝိ။ ဝိ။ ဋီ။ ၁။၉၂) အယမေတေသံ ဝိသေသောတိ။ တေနေဝါဟ ‘‘အသုကဿ ဘဏ္ဍံ ယဒါ သက္ကောသိ၊ တဒါ တံ အဝဟရာတိ အာဏာပေတီ’’တိ။

သုင်္ကဃာတပရိကပ္ပိတောကာသာနန္တိ ¶ သုင်္ကဃာတဉ္စ ပရိကပ္ပိတောကာသော စ သုင်္ကဃာတပရိကပ္ပိတောကာသာ၊ ¶ တေသံ။ တတ္ထ သုင်္ကဃာတန္တိ (ပါရာ။ အဋ္ဌ။ ၁။၁၁၃) ရုက္ခပဗ္ဗတာဒိသညာဏေန နိယမိတဿ သုင်္ကဋ္ဌာနဿေတံ အဓိဝစနံ။ တဉှိ ယသ္မာ တတော ရာဇဒေယျဘာဂံ သုင်္ကံ အဒတွာ နီဟရန္တာ ရညော သုင်္ကံ ဟနန္တိ ဝိနာသေန္တိ၊ တသ္မာ ‘‘သုင်္ကဃာတ’’န္တိ ဝုတ္တံ။

ကောစိ ပရပရိဝေဏာဒီနိ ပဝိဋ္ဌော ကိဉ္စိ လောဘနေယျဘဏ္ဍံ ဒိသွာ ဒွါရပ္ပမုခါဒိဝသေန ယံ ဌာနံ ‘‘သစေ မံ ဧတ္ထန္တရေ ပဿိဿန္တိ၊ ဒဋ္ဌုကာမတာယ ဂဟေတွာ ဝိစရန္တော ဝိယ ဒဿာမိ၊ နော စေ ပဿိဿန္တိ၊ ဟရိဿာမီ’’တိ ပရိကပ္ပေတိ၊ အယံ ပရိကပ္ပိတောကာသော။ အာဏတ္တိက္ခဏေယေဝ ပါရာဇိကန္တိ (ပါရာ။ အဋ္ဌ။ ၁။၁၂၁) အတ္ထသာဓကစေတနာက္ခဏေယေဝ ပါရာဇိကံ။ သစေပိ အဝဟာရကော သဋ္ဌိဝဿာတိက္ကမေနပိ တံ ဘဏ္ဍံ အဝဟရတိ၊ အာဏာပကော စ အန္တရာယေဝ ကာလံ ကရောတိ၊ ဟီနာယ ဝါ အာဝတ္တတိ၊ အဿမဏောဝ ဟုတွာ ကာလံ ဝါ ကရိဿတိ၊ ဟီနာယ ဝါ အာဝတ္တိဿတိ၊ အဝဟာရကဿ ပန အဝဟာရက္ခဏေယေဝ ပါရာဇိကံ။ ပါဒဂ္ဃနကတေလန္တိ (ပါရာ။ အဋ္ဌ။ ၁။၉၄) ဧတ္ထ ပါဒေါ နာမ ကဟာပဏဿ စတုတ္ထော ဘာဂေါ၊ တံ အဂ္ဃတီတိ ပါဒဂ္ဃနကံ၊ ပါဒဂ္ဃနကဉ္စ တံ တေလဉ္စာတိ ပါဒဂ္ဃနကတေလံ။ ဥပါဟနာ အာဒိ ယေသံ ဝတ္ထူနံ တာနိ ဥပါဟနာဒီနိ။ အာဒိသဒ္ဒေန ဒုကူလသာဋကစမ္မက္ခဏ္ဍာဒီနံ ဂဟဏံ။ ပက္ခိပတီတိ ထေယျစိတ္တေန ပက္ခိပတိ။ တေနာဟ ‘‘ဟတ္ထတော မုတ္တမတ္တေယေဝ ပါရာဇိက’’န္တိ သစေ ပန အတ္တနောပိ ကုမ္ဘိယံ အညော သပ္ပိံ ဝါ တေလံ ဝါ အာကိရတိ၊ တတြ စာယံ ထေယျစိတ္တေန တေလပိဝနကံ ဘဏ္ဍံ ပက္ခိပတိ၊ ဝုတ္တနယေနေဝ ပါရာဇိကံ။

ကာယေန ဝါ ဝါစာယ ဝါ ပယုဉ္ဇနံ အာဏာပနံ ပယောဂေါ၊ အာဏတ္တဿ ဘဏ္ဍဂ္ဂဟဏတော ပုဗ္ဗတ္တာ ပုဗ္ဗော၊ ဣတိ ပုဗ္ဗော စ သော ပယောဂေါ စာတိ ပုဗ္ဗပယောဂေါ။ ပယောဂေန သဟ ဝတ္တမာနော အဝဟာရော သဟပယောဂေါ။ သမံ ဧကီ ဟုတွာ ဝိဒဟိတွာ မန္တေတွာ အဝဟရဏံ သံဝိဓာဝဟာရော၊ အညမညံ သညုပ္ပတ္တိယာ ကတာဝဟာရောတိ ဝုတ္တံ ဟောတိ။ ပုဗ္ဗဏှာဒိကာလပရိစ္ဆေဒေန သဉ္ဇာနနံ သင်္ကေတော၊ တဿ ကမ္မံ သင်္ကေတကမ္မံ။ နိမိတ္တဿ ကမ္မံ နိမိတ္တကမ္မံ၊ သညုပ္ပာဒနတ္ထံ ကဿစိ နိမိတ္တဿ ကရဏန္တိ အတ္ထော။ တတ္ထာတိ ယထာဝုတ္တေသု ပုဗ္ဗပယောဂါဒီသု ပဉ္စသု။ ခိလာဒီနိ သင်္ကာမေတွာ ခေတ္တာဒိဂ္ဂဟဏဝသေနာတိ ခိလံ၊ ရဇ္ဇုံ၊ ဝတိံ၊ မရိယာဒံ ဝါ ပါကာရံ ¶ ဝါ သင်္ကာမေတွာ ခေတ္တဂ္ဂဟဏဝသေန၊ ခိလံ၊ ရဇ္ဇုံ၊ ဝတိံ၊ မရိယာဒံ ဝါ ပါကာရံ ဝါ သင်္ကာမေတွာ ဝတ္ထုဂ္ဂဟဏဝသေန။ သစေ ပန ဒွီဟိ ခိလေဟိ ဂဟေတဗ္ဗံ ဟောတိ၊ ပဌမေ ခိလေ ထုလ္လစ္စယံ၊ ဒုတိယေ ပါရာဇိကံ (ပါရာ။ အဋ္ဌ။ ၁။၁၀၄)။ သစေ တီဟိ ဂဟေတဗ္ဗံ ဟောတိ၊ ပဌမေ ဒုက္ကဋံ၊ ဒုတိယေ ထုလ္လစ္စယံ၊ တတိယေ ပါရာဇိကံ။ ဧဝံ ဗဟုကေသုပိ အဝသာနေ ဒွေ ဌပေတွာ ပုရိမေဟိ ဒုက္ကဋံ၊ အဝသာနေ ဒွိန္နံ ဧကေန ထုလ္လစ္စယံ ¶ ၊ ဣတရေန ပါရာဇိကံ။ ရဇ္ဇုပသာရဏာဒီသုပိ ဧသေဝ နယော။ ယံ ပန သမန္တပါသာဒိကာယံ ‘‘တဉ္စ ခေါ သာမိကာနံ ဓုရနိက္ခေပေနာ’’တိ (ပါရာ။ အဋ္ဌ။ ၁။၁၀၄) ဝုတ္တံ၊ တံ ‘‘ခေတ္တံ အဘိယုဉ္ဇတိ၊ အာပတ္တိ ဒုက္ကဋဿာ’’တိအာဒိ (ပါရာ။ ၁၀၄) -အဓိကာရေ ဝုတ္တတ္တာ အဘိယောဂဝသေန ဂဟဏံ သန္ဓာယာတိ ဒဋ္ဌဗ္ဗံ။ သံဝိဒဟိတွာတိ ဧတဿေဝ ဝေဝစနံ။ သံမန္တယိတွာတိ ဧကစ္ဆန္ဒတာယ ဧကဇ္ဈာသယတာယ ဘဏိတွာတိ အတ္ထော။ ဣမသ္မိံ အဝဟာရေ အသမ္မောဟတ္ထံ ‘‘ဧဝံ သံဝိဒဟိတွာ ဂတေသု ဟီ’’တိအာဒိမာဟ။ သဉ္ဇာနနကမ္မန္တိ ပုဗ္ဗဏှာဒိကာလပရိစ္ဆေဒဝသေန သညာဏကရဏံ။ တေနာဟ ‘‘သစေ ဟီ’’တိအာဒိ။

ဧတ္ထ စ ‘‘ပုရေဘတ္တံ အဝဟရာ’’တိ ဝုတ္တေ (ပါရာ။ အဋ္ဌ။ ၁။၁၁၉) အဇ္ဇ ဝါ ပုရေဘတ္တံ အဝဟရတု၊ သွေ ဝါ၊ အနာဂတေ ဝါ သံဝစ္ဆရေ၊ နတ္ထိ ဝိသင်္ကေတော၊ ဥဘိန္နမ္ပိ ပါရာဇိကံ။ သစေ ပန ‘‘အဇ္ဇ ပုရေဘတ္တံ အဝဟရာ’’တိ ဝုတ္တေ သွေ အဝဟရတိ။ ‘‘အဇ္ဇာ’’တိ နိယမိတံ သင်္ကေတံ အတိက္ကမ္မ ပစ္ဆာ အဝဟဋံ ဟောတိ။ သစေ ‘‘သွေ ပုရေဘတ္တံ အဝဟရာ’’တိ ဝုတ္တေ အဇ္ဇ ပုရေဘတ္တံ အဝဟရတိ၊ ‘‘သွေ’’တိ နိယမိတံ တံ သင်္ကေတံ အပတွာ ပုရေ အဝဟဋံ ဟောတိ၊ ဧဝံ အဝဟရန္တဿ အဝဟာရကဿေဝ ပါရာဇိကံ၊ မူလဋ္ဌဿ အနာပတ္တိ။ ‘‘သွေဝ ပုရေဘတ္တ’’န္တိ ဝုတ္တေ တဒဟေဝ ဝါ၊ သွေ ပစ္ဆာဘတ္တံ ဝါ အဝဟရန္တောပိ တံသင်္ကေတတော ပုရေ စ ပစ္ဆာ စ အဝဟရတိ။ ယော ပန ဧဝံအကတွာ ယထာပရိစ္ဆိန္နကာလမေဝ အဝဟရတိ၊ အယံ သင်္ကေတတော အပုရေ အပစ္ဆာ တံ အဝဟရတီတိ ဝေဒိတဗ္ဗော။ ဧသ နယော ပစ္ဆာဘတ္တရတ္တိန္ဒိဝေသုပိ၊ ပုရိမယာမမဇ္ဈိမယာမပစ္ဆိမယာမကာဠဇုဏှမာသဥတုသံဝစ္ဆရာဒိဝသေနာပိ ဧတ္ထ သင်္ကေတဝိသင်္ကေတတာ ဝေဒိတဗ္ဗာ။ ပရဘဏ္ဍာဝဟာရသညုပ္ပာဒဿ ဟေတုတ္တာ အက္ခိနိခဏာဒီနေဝ နိမိတ္တန္တိ အက္ခိနိခဏာဒိနိမိတ္တံ၊ တဿ ကရဏံ အက္ခိနိခဏာဒိနိမိတ္တကရဏံ။ အာဒိသဒ္ဒေန ဘမုကုက္ခေပသီသကမ္ပနဟတ္ထလင်္ဃနပါဏိပ္ပဟာရအင်္ဂုလိဖောဋနဂီဝုန္နာမနဥက္ကာသနာဒိအနေကပ္ပကာရံ သင်္ဂဏှာတိ။ သေသမေတ္ထ သင်္ကေတကမ္မေ ဝုတ္တနယမေဝ။

ထေနော ¶ ဝုစ္စတိ စောရော၊ တဿ ဘာဝေါ ထေယျံ၊ တေန အဝဟရဏံ ထေယျာဝဟာရော။ ပသယှ အဘိဘဝိတွာ အဝဟရဏံ ပသယှာဝဟာရော။ ဝတ္ထသုတ္တာဒိကံ ပရိစ္ဆိဇ္ဇ ကပ္ပနံ ပရိကပ္ပော၊ တေန အဝဟရဏံ ပရိကပ္ပာဝဟာရော။ တိဏပဏ္ဏာဒီဟိ ပဋိစ္ဆန္နဿ အဝဟာရော ပဋိစ္ဆန္နာဝဟာရော။ ကုသေန အဝဟာရော ကုသာဝဟာရော။ ကူဋမာနကူဋကဟာပဏာဒီဟီတိ ဧတ္ထ ကူဋမာနံ (ဒီ။ နိ။ အဋ္ဌ။ ၁။၁၀၊ မ။ နိ။ အဋ္ဌ။ ၁။၂၉၃၊ ပု။ ပ။ အဋ္ဌ။ ၁၇၉) နာမ ဟဒယဘေဒသိခါဘေဒရဇ္ဇုဘေဒဝသေန တိဝိဓံ မာနကူဋံ။ တတ္ထ ဟဒယန္တိ နာဠိအာဒိမာနဘာဇနာနံ အဗ္ဘန္တရံ၊ တဿ ဘေဒေါ ဆိဒ္ဒကရဏံ ဟဒယဘေဒေါ၊ သော သပ္ပိတေလာဒိမိနနကာလေ လဗ္ဘတိ။ တာနိ ဟိ ဂဏှန္တော ဟေဋ္ဌာဆိဒ္ဒေန မာနေန ‘‘သဏိကံ ¶ အာသိဉ္စာ’’တိ ဝတွာ အန္တောဘာဇနေ ဗဟုံ ပဂ္ဃရာပေတွာ ဂဏှာတိ၊ ဒဒန္တော စ ဆိဒ္ဒံ ပိဓာယ သီဃံ ပူရေတွာ ဒေတိ။

သိခါဘေဒေါ ပန တိလတဏ္ဍုလာဒိမိနနကာလေ လဗ္ဘတိ။ တာနိ ဟိ ဂဏှန္တော သဏိကံ သိခံ ဥဿာပေတွာ ဂဏှာတိ၊ ဒဒန္တော ဝေဂေန ပူရေတွာ သိခံ ဆိန္ဒန္တော ဒေတိ။

ရဇ္ဇုဘေဒေါ ခေတ္တဝတ္ထုမိနနကာလေ လဗ္ဘတိ။ ခေတ္တာဒိံ မိနန္တာ ဟိ အမဟန္တမ္ပိ မဟန္တံ ကတွာ မိနန္တိ၊ မဟန္တမ္ပိ အမဟန္တံ။

တမ္ဗကံသာဒိမယော ကူဋော ကဟာပဏော ကူဋကဟာပဏော။ အာဒိသဒ္ဒေန တုလာကူဋကံသကူဋဝဉ္စနာဒိံ သင်္ဂဏှာတိ။ တတ္ထ တုလာကူဋံ ရူပကူဋံ၊ အင်္ဂကူဋံ၊ ဂဟဏကူဋံ၊ ပဋိစ္ဆန္နကူဋန္တိ စတုဗ္ဗိဓံ ဟောတိ။ တတ္ထ ရူပကူဋံ နာမ ဒွေ တုလာ သမရူပါ ကတွာ ဂဏှန္တော မဟတိယာ ဂဏှာတိ၊ ဒဒန္တော ခုဒ္ဒိကာယ ဒေတိ။ အင်္ဂကူဋံ နာမ ဂဏှန္တော ပစ္ဆာဘာဂေ ဟတ္ထေန တုလံ အက္ကမတိ၊ ဒဒန္တော ပုဗ္ဗဘာဂေ အက္ကမတိ။ ဂဟဏကူဋံ နာမ ဂဏှန္တော မူလေ ရဇ္ဇုံ ဂဏှာတိ၊ ဒဒန္တော အဂ္ဂေ။ ပဋိစ္ဆန္နကူဋံ နာမ တုလံ သုသိရံ ကတွာ အန္တော အယစုဏ္ဏံ ပက္ခိပိတွာ ဂဏှန္တော တံ ပစ္ဆာဘာဂေ ကရောတိ၊ ဒဒန္တော အဂ္ဂဘာဂေ။

ကံသော ဝုစ္စတိ သုဝဏ္ဏပါတိ၊ တာယ ဝဉ္စနံ ကံသကူဋံ။ ကထံ? ဧကံ သုဝဏ္ဏပါတိံ ကတွာ အညာ ဒွေ တိဿော လောဟပါတိယော သုဝဏ္ဏဝဏ္ဏာ ကရောန္တိ။ တတော ဇနပဒံ ဂန္တွာ ကိဉ္စိဒေဝ အဍ္ဎံ ကုလံ ပဝိသိတွာ ‘‘သုဝဏ္ဏဘာဇနာနိ ကိဏာထာ’’တိ ဝတွာ အဂ္ဃေ ပုစ္ဆိတေ သမဂ္ဃတရံ ဒါတုကာမာ ဟောန္တိ ¶ ။ တတော တေဟိ ‘‘ကထံ ဣမေသံ သုဝဏ္ဏဘာဝေါ ဇာနိတဗ္ဗော’’တိ ဝုတ္တေ ‘‘ဝီမံသိတွာ ဂဏှထာ’’တိ သုဝဏ္ဏပါတိံ ပါသာဏေ ဃံသိတွာ သဗ္ဗာ ပါတိယော ဒတွာ ဂစ္ဆတိ။

ဝဉ္စနံ နာမ တေဟိ တေဟိ ဥပါယေဟိ ပရေသံ ဝဉ္စနံ။ တတြိဒမေကံ ဝတ္ထု – ဧကော ကိရ လုဒ္ဒကော မိဂဉ္စ မိဂပေါတကဉ္စ ဂဟေတွာ အာဂစ္ဆတိ၊ တမေကော ဓုတ္တော ‘‘ကိံ ဘော မိဂေါ အဂ္ဃတိ၊ ကိံ မိဂပေါတကော’’တိ အာဟ။ ‘‘မိဂေါ ဒွေ ကဟာပဏေ၊ မိဂပေါတကော ဧက’’န္တိ ဝုတ္တေ ဧကံ ကဟာပဏံ ဒတွာ မိဂပေါတကံ ဂဟေတွာ ထောကံ ဂန္တွာ နိဝတ္တေန္တော ‘‘န မေ ဘော မိဂပေါတကေန အတ္ထော၊ မိဂံ မေ ဒေဟီ’’တိ အာဟ။ ‘‘တေန ဟိ ဒွေ ကဟာပဏေ ဒေဟီ’’တိ အာဟ။ သော အာဟ ‘‘နနု ဘော မယာ ပဌမံ ဧကော ကဟာပဏော ဒိန္နော’’တိ။ အာမ ဒိန္နော၊ ဣမံ မိဂပေါတကံ ဂဏှ၊ ဧဝံ သော စ ကဟာပဏော ¶ ၊ အယဉ္စ ကဟာပဏဂ္ဃနကော မိဂပေါတကောတိ ဒွေ ကဟာပဏာ ဘဝိဿန္တီတိ။ သော ‘‘ကာရဏံ ဝဒတီ’’တိ သလ္လက္ခေတွာ မိဂပေါတကံ ဂဟေတွာ မိဂံ အဒါသီတိ။

ပသယှာတိ (ပါရာ။ အဋ္ဌ။ ၁။၁၃၈) ပရေ အဘိဘုယျ။ ဂါမံ ဃာတေန္တီတိ ဂါမဃာတကာ၊ ဂါမံ ပဟရန္တာ စောရာ၊ တေ အာဒိ ယေသံ တေ ဂါမဃာတကာဒယော။ အာဒိသဒ္ဒေန စေတ္ထ ပန္ထဃာတကာဒီနံ ဂဟဏံ။ ဥဒ္ဓါရေယေဝ ပါရာဇိကန္တိ ‘‘သစေ သာဋကော ဘဝိဿတိ၊ ဂဏှိဿာမီ’’တိ ပရိကပ္ပဿ ပဝတ္တတ္တာ၊ သာဋကဿ စ တတ္ထ သဗ္ဘာဝတော။ ပဒဝါရေန ကာရေတဗ္ဗောတိ ဘူမိယံ အနိက္ခိပိတွာဝ ဝီမံသိတတ္တာ ဝုတ္တံ။ ဘဏ္ဍဒေယျန္တိ ယံ ပရဿ နဋ္ဌံ၊ တဿ မူလံ ဝါ တဒေဝ ဝါ ဘဏ္ဍံ ဒါတဗ္ဗန္တိ အတ္ထော။

တဿာတိ ယော ဧဝံ ပရိကပ္ပေတိ၊ တဿ။ ဣမဿ ‘‘အဝဟာရော ဟောတီ’’တိ ဣမိနာ သမ္ဗန္ဓော။

ပရေသန္တိ ကီဠန္တာနံ၊ ပဝိသန္တာနံ ဝါ ပရေသံ မနုဿာနံ။ ‘‘ပစ္ဆာ ဂဏှိဿာမီ’’တိ ပံသုနာ ဝါ ပဏ္ဏေန ဝါ ပဋိစ္ဆာဒေတီတိ ‘‘သစေ ဣဒါနေဝ ဩနမိတွာ ဂဏှိဿာမိ၊ ‘ကိံ သမဏော ဂဏှာတီ’တိ မံ ဇာနိတွာ ဝိဟေဌေယျုံ ပစ္ဆာ ဂဏှိဿာမီ’’တိ ပံသုနာ ဝါ ပဏ္ဏေန ဝါ ပဋိစ္ဆာဒေတိ။ ဥဒ္ဓါရော နတ္ထီတိ ဌာနာစာဝနံ နတ္ထီတိ အတ္ထော။ သာမိကာတိ အန္တာဂါမံ ပဝိသိတုကာမာ ဘဏ္ဍသာမိကာ မနုဿာ။ ဥဒ္ဓါရေတိ ဥဒ္ဓရဏေ၊ ဌာနာစာဝနေတိ အတ္ထော ¶ ။ ဌာနာစာဝနဉ္စေတ္ထ ဟေဋ္ဌာ ဝုတ္တနယာနုသာရေန ဝေဒိတဗ္ဗံ။ ပဝေသေတီတိ ဌာနာစာဝနဝသေန ပဝေသေတိ၊ ဟေဋ္ဌိမန္တေန ဖုဋ္ဌောကာသံ ကေသဂ္ဂမတ္တမ္ပိ ဥပရိမန္တေန အတိက္ကာမေန္တော ပဝေသေတီတိ အတ္ထော။

သမဂ္ဃတရန္တိ အပ္ပဂ္ဃတရံ။ ဥဒ္ဓဋမတ္တေ အဝဟာရောတိ သကဘာဝပ္ပယောဂဿ နိဋ္ဌာပိတတ္တာ၊ န အတ္ထသာဓကဝသေန။ ဥဒ္ဓါရေ ရက္ခတိ အတ္တနော ကောဋ္ဌာသေ ပါတေတုကာမတာယ ဥဒ္ဓဋတ္တာ။ ဧသေဝ နယော ပါတနေပိ ရက္ခတီတိ ဧတ္ထာပိ။ ‘‘ဥဒ္ဓါရေယေဝ ရက္ခတီ’’တိ ဣမိနာဝ ပါတနေ န ရက္ခတီတိ အတ္ထေ သိဒ္ဓေပိ အတ္ထသာဓကဝသေန အတ္ထံ ဒဿေတုံ ‘‘တံ ဥဒ္ဓရိတွာ’’တိအာဒိ ဝုတ္တံ။ သစေ ပန ဒွီသုပိ ကောဋ္ဌာသေသု ပတိတဒဏ္ဍကေ အဒဿနံ ဂမေတိ (ပါရာ။ အဋ္ဌ။ ၁။၁၃၈)၊ တတော အဝသေသဘိက္ခူသု ဂတေသု ဣတရော ‘‘မယှံ၊ ဘန္တေ၊ ဒဏ္ဍကော န ပညာယတီ’’တိ၊ ‘‘မယှမ္ပိ၊ အာဝုသော၊ န ပညာယတီ’’တိ၊ ‘‘ကတမော ပန၊ ဘန္တေ၊ မယှံ ဘာဂေါ’’တိ။ ‘‘အယံ တုယှံ ဘာဂေါ’’တိ အတ္တနော ဘာဂံ ဒဿေတိ။ တသ္မိံ ဝိဝဒိတွာ ဝါ အဝိဝဒိတွာ ဝါ တံ ဂဏှိတွာ ဂတေ ဣတရော တဿ ဘာဂံ ဥဒ္ဓရတိ၊ ဥဒ္ဓါရေ ¶ ပါရာဇိကံ။ သစေပိ တေန ‘‘အဟံ မမ ဘာဂံ တုယှံ န ဒေမိ၊ တွံ ပန အတ္တနော ဘာဂံ ဉတွာ ဂဏှာ’’တိ ဝုတ္တေပိ ‘‘နာယံ မမာ’’တိ ဇာနန္တောပိ တဿေဝ ဘာဂံ ဂဏှာတိ၊ ဥဒ္ဓါရေ ပါရာဇိကံ။ သစေ ပန ဣတရော ‘‘အယံ တုယှံ ဘာဂေါ၊ အယံ မယှံ ဘာဂေါတိ ကိံ ဣမိနာ ဝိဝါဒေနာ’’တိ စိန္တေတွာ ‘‘မယှံ ဝါ ပတ္တော ဟောတု၊ တုမှာကံ ဝါ၊ ယော ဝရဘာဂေါ၊ တံ တုမှေ ဂဏှထာ’’တိ ဝဒတိ၊ ဒိန္နကံ နာမ ဂဟိတံ ဟောတိ၊ နတ္ထေတ္ထ အဝဟာရော။ သစေ သော ဝိဝါဒဘီရုကော ဘိက္ခု ‘‘ယံ တုယှံ ရုစ္စတိ၊ တံ ဂဏှာ’’တိ ဝုတ္တော အတ္တနော ပတ္တံ ဝရဘာဂံ ဌပေတွာ လာမကံယေဝ ဂဟေတွာ ဂစ္ဆတိ၊ တတော ဣတရဿ ဝိစိနိတာဝသေသံ ဂဏှန္တဿာပိ အဝဟာရော နတ္ထေဝ။ ဧဝမိမာနိ ပဉ္စ ပဉ္စကာနိ သမောဓာနေတွာ ဣမေ ပဉ္စဝီသတိ အဝဟာရာ ဝေဒိတဗ္ဗာ။ နိဋ္ဌိတော ‘‘အာဒိယေယျာ’’တိ ဣမဿ ပဒဿ ဝိနိစ္ဆယော။ တေနာဟ ‘‘ဣတိ ယံ ဝုတ္တံ…ပေ… ယဿတ္ထော ပကာသိတော ဟောတီ’’တိ။

ရာဇာနောတိ ကိဉ္စာပိ အဝိသေသေန ဝုတ္တံ၊ အပရာဓာနုရူပံ ပန ဆေဇ္ဇဘေဇ္ဇာနုသာသကော ပမာဏဘူတောဝ ဣဓာဓိပ္ပေတောတိ အာဟ ‘‘ရာဇာနောတိ ဣဒံ ဗိမ္ဗိသာရံယေဝ သန္ဓာယ ဝုတ္တ’’န္တိ။ သော ဟိ ဓမ္မိကရာဇတ္တာ ယထာပဝေဏိယာဝ ကရောတိ။ အညေ ပန ကာကဏိကမတ္တဿပိ သီသံ ဆိန္ဒေယျုံ ¶ ၊ ဗဟုကဿာပိ န ဝါ ကိဉ္စိ ကရေယျုံ။ တေနာဟ ‘‘အညေ ပနာ’’တိအာဒိ။ ဟနနံ နာမ ပေါထနဉ္စေဝ ဆေဒနဉ္စာတိ အာဟ ‘‘ဟတ္ထာဒီဟိ ဝါ’’တိအာဒိ။ အာဒိသဒ္ဒေန ပါဒကသာဝေတ္တအဍ္ဎဒဏ္ဍကာနံ ဂဟဏံ။ ရဇ္ဇုဗန္ဓနာဒီဟီတိ အာဒိသဒ္ဒေန အန္ဒုဗန္ဓနသင်္ခလိကာဗန္ဓနဃရဗန္ဓနနဂရဗန္ဓနပုရိသဂုတ္တီနံ ဂဟဏံ။ နီဟရေယျုန္တိ ရဋ္ဌတော နိက္ခာမေယျုံ။ စောရောသိ…ပေ… ထေနောသီတိ ဧတ္ထ ‘‘ပရိဘာသေယျု’’န္တိ ပဒံ အဇ္ဈာဟရိတဗ္ဗံ ဦနတ္တာ ပဒပ္ပယောဂဿ။ တေနာဟ ‘‘ဣမေဟိ ဝစနေဟိ ပရိဘာသေယျု’’န္တိ။ ယထာရူပံ ပန ယသ္မာ ပါဒတော ပဋ္ဌာယ ဟောတိ၊ တသ္မာ ‘‘ပါဒဿ ဝါ ပါဒါရဟဿ ဝါ’’တိ အာဟ။ ပေါရာဏကဿ ကဟာပဏဿ စတုတ္ထော ဘာဂေါ ပါဒေါ၊ ပါဒံ အရဟတီတိ ပါဒါရဟော၊ တဿ ပါဒဿ ဝါ ပါဒါရဟဿ ဝါ။ ဧတ္ထ စ ပါဒေန ကဟာပဏဿ စတုတ္ထဘာဂံ အကပ္ပိယဘဏ္ဍမေဝ ဒဿေတိ၊ ပါဒါရဟေန ပါဒဂ္ဃနကံ ကပ္ပိယဘဏ္ဍံ။ ဧတ္တာဝတာ ဟေဋ္ဌိမန္တဒဿနေန သဗ္ဗာကာရေန ဒုတိယပါရာဇိကပ္ပဟောနကဝတ္ထု ဒဿိတံ ဟောတီတိ ဒဋ္ဌဗ္ဗံ။ ပေါရာဏကဿာတိ (သာရတ္ထ။ ဋီ။ ၂။၈၈၊ ဝိ။ ဝိ။ ဋီ။ ၁။၈၈) ပေါရာဏသတ္ထာနုရူပံ ဥပ္ပာဒိတဿ လက္ခဏသမ္ပန္နဿ နီလကဟာပဏသဒိသဿ ကဟာပဏဿ။ ဧတေန ရုဒြဒါမကာဒီနိ ပဋိက္ခိပတိ။

ဧဝံ အသာဓာရဏဝိနိစ္ဆယံ ဒဿေတွာ ဣဒါနိ သာဓာရဏဝိနိစ္ဆယံ ဒဿေတုံ ‘‘ရာဇဂဟေ’’တိအာဒိမာဟ။ ရညောတိ ဗိမ္ဗိသာရရညော။ မာသကော နာမ ပေါရာဏကဿ ကဟာပဏဿ ဝီသတိမော ဘာဂေါ။ ယော လောကေ ‘‘မဉ္ဇေဋ္ဌီ’’တိပိ ဝုစ္စတိ။ ဣဒါနိ ဣမသ္မိံ အဒိန္နာဒါနေ ဝိနိစ္ဆယံ ဒဿေတုံ ‘‘သဗ္ဗတ္ထာ’’တိအာဒိ ဝုတ္တံ။ သဗ္ဗတ္ထာတိ ဦနမာသကာတိရေကမာသကပဉ္စမာသကေသု။ ပရိဟီနာပရိဟီနဝသေနာတိ အဂ္ဃဿ ပရိဟီနာပရိဟီနဝသေန။ အယမေတ္ထ သင်္ခေပေါ ¶ ၊ ဝိတ္ထာရော ပန ဧဝံ ဝေဒိတဗ္ဗော – ဣဒဉှိ အဒိန္နာဒါနံ ဝိနိစ္ဆိနန္တေန ဩတိဏ္ဏေ ဝတ္ထုသ္မိံ သဟသာ အဝိနိစ္ဆိနိတွာ ပဉ္စ ဌာနာနိ ဩလောကေတဗ္ဗာနိ။ ယာနိ သန္ဓာယ ပေါရာဏာ အာဟု –

‘‘ဝတ္ထုံ ကာလဉ္စ ဒေသဉ္စ၊ အဂ္ဃံ ပရိဘောဂပဉ္စမံ၊

တုလယိတွာ ပဉ္စဌာနာနိ၊ ဓာရေယျတ္ထံ ဝိစက္ခဏော’’တိ။ (ပါရာ။ အဋ္ဌ။ ၁။၉၂)၊

တတ္ထ စ ဝတ္ထူတိ ဘဏ္ဍံ။ အဝဟာရကေန ဟိ ‘‘မယာ ဣဒံ နာမ အဝဟဋ’’န္တိ ဝုတ္တေပိ အာပတ္တိံ အနာရောပေတွာဝ တံ ဘဏ္ဍံ သသာမိကံ ဝါ အသာမိကံ ဝါတိ ¶ ဥပပရိက္ခိတဗ္ဗံ။ သသာမိကေပိ သာမိကာနံ သာလယဘာဝေါ ဝါ နိရာလယဘာဝေါ ဝါ ဥပပရိက္ခိတဗ္ဗော။ သစေ တေသံ သာလယကာလေ အဝဟဋံ၊ ဘဏ္ဍံ အဂ္ဃာပေတွာ အာပတ္တိ ကာရေတဗ္ဗာ။ သစေ နိရာလယကာလေ၊ န ပါရာဇိကေန ကာရေတဗ္ဗော။ ဘဏ္ဍသာမိကေသု ပန ဘဏ္ဍံ အာဟရာပေန္တေသု ဘဏ္ဍံ ဒါတဗ္ဗံ။ အယမေတ္ထ သာမီစိ။ ဧဝံ ဝတ္ထု ဩလောကေတဗ္ဗံ။

ကာလောတိ အဝဟာရကာလော။ တဒေဝ ဟိ ဘဏ္ဍံ ကဒါစိ သမဂ္ဃံ ဟောတိ၊ ကဒါစိ မဟဂ္ဃံ။ တသ္မာ တံ ဘဏ္ဍံ ယသ္မိံ ကာလေ အဝဟဋံ၊ တသ္မိံယေဝ ကာလေ ယော တဿ အဂ္ဃော၊ တေန အဂ္ဃေန အာပတ္တိ ကာရေတဗ္ဗာ။ ဧဝံ ကာလော ဩလောကေတဗ္ဗော။

ဒေသောတိ အဝဟာရဒေသော။ တဉှိ ဘဏ္ဍံ ယသ္မိံ ဒေသေ အဝဟဋံ၊ တသ္မိံယေဝ ဒေသေ ယော တဿ အဂ္ဃော၊ တေန အဂ္ဃေန အာပတ္တိ ကာရေတဗ္ဗာ။ ဘဏ္ဍုဋ္ဌာနဒေသေ ဟိ ဘဏ္ဍံ သမဂ္ဃံ ဟောတိ၊ အညတ္ထ မဟဂ္ဃံ။ ဧဝံ ဒေသော ဩလောကေတဗ္ဗော။

အဂ္ဃောတိ (ပါရာ။ အဋ္ဌ။ ၁။၉၂) ဘဏ္ဍဂ္ဃော။ နဝဘဏ္ဍဿ ဟိ ယော အဂ္ဃော၊ သော ပစ္ဆာ ပရိဟာယတိ။ ယထာ နဝဓောတော ပတ္တော အဋ္ဌ ဝါ ဒသ ဝါ အဂ္ဃတိ၊ သော ပစ္ဆာ ဘိန္နော ဝါ ဆိဒ္ဒေါ ဝါ အာဏိဂဏ္ဌိကာဟတော ဝါ အပ္ပဂ္ဃော ဟောတိ၊ တသ္မာ န သဗ္ဗဒါ ဘဏ္ဍံ ပကတိအဂ္ဃေနေဝ ကာတဗ္ဗန္တိ။ ဧဝံ အဂ္ဃော ဩလောကေတဗ္ဗော။

ပရိဘောဂေါတိ ဘဏ္ဍဿ ပရိဘောဂေါ။ ပရိဘောဂေနာပိ ဟိ ဝါသိအာဒိဘဏ္ဍဿ အဂ္ဃော ပရိဟာယတိ၊ တသ္မာ ဧဝံ ဥပပရိက္ခိတဗ္ဗံ – သစေ ကောစိ ကဿစိ ပါဒဂ္ဃနကံ ဝါသိံ ဟရတိ၊ တတြ ¶ ဝါသိသာမိကော ပုစ္ဆိတဗ္ဗော ‘‘တယာ အယံ ဝါသိ ကိတ္တကေန ကီတာ’’တိ။ ‘‘ပါဒေန၊ ဘန္တေ’’တိ။ ‘‘ကိံ ပန တေ ကိဏိတွာဝ ဌပိတာ၊ ဥဒါဟု တံ ဝလဉ္ဇေသီ’’တိ? သစေ ဝဒတိ ‘‘ဧကဒိဝသံ မေ ဒန္တကဋ္ဌံ ဝါ ရဇနဆလ္လိ ဝါ ပတ္တပစနဒါရု ဝါ ဆိန္နံ၊ ဃံသိတွာ ဝါ နိသိတာ’’တိ။ အထဿ ပေါရာဏော အဂ္ဃော ဘဋ္ဌောတိ ဝေဒိတဗ္ဗော။ ယထာ စ ဝါသိယာ၊ ဧဝံ အဉ္ဇနိယာ ဝါ အဉ္ဇနိသလာကာယ ဝါ ကုဉ္စိကာယ ဝါ ပလာလေန ဝါ ထုသေဟိ ဝါ ဣဋ္ဌကစုဏ္ဏေန ဝါ ဧကဝါရံ ဃံသိတွာ ဓောဝနမတ္တေနာပိ အဂ္ဃော ဘဿတိ။ တိပုမဏ္ဍလဿ မကရဒန္တစ္ဆေဒနေနာပိ ပရိမဒ္ဒနမတ္တေနာပိ၊ ဥဒကသာဋိကာယ သကိံ နိဝါသနပါရုပနေနာပိ၊ ပရိဘောဂသီသေန ¶ အံသေ ဝါ သီသေ ဝါ ဌပနမတ္တေနာပိ၊ တဏ္ဍုလာဒီနံ ပပ္ဖောဋနေနာပိ တတော ဧကံ ဝါ ဒွေ ဝါ အပနယနေနပိ၊ အန္တမသော ဧကံ ပါသာဏသက္ခရံ ဥဒ္ဓရိတွာ ဆဍ္ဍိတမတ္တေနာပိ၊ သပ္ပိတေလာဒီနံ ဘာဇနန္တရပရိဝတ္တနေနပိ၊ အန္တမသော တတော မက္ခိကံ ဝါ ကိပိလ္လိကံ ဝါ ဥဒ္ဓရိတွာ ဆဍ္ဍိတမတ္တေနပိ၊ ဂုဠပိဏ္ဍကဿ မဓုရဘာဝဇာနနတ္ထံ နခေန ဝိဇ္ဈိတွာ အဏုမတ္တံ ဂဟိတမတ္တေနပိ အဂ္ဃော ဘဿတိ။ တသ္မာ ယံ ကိဉ္စိ ပါဒဂ္ဃနကံ ဝုတ္တနယေနေဝ သာမိကေန ပရိဘောဂေန ဦနံ ကတံ ဟောတိ၊ န တံ အဝဟာရကော ဘိက္ခု ပါရာဇိကေန ကာရေတဗ္ဗောတိ။ ဧဝံ ပရိဘောဂေါ ဩလောကေတဗ္ဗော။

ဧဝံ ဣမာနိ တုလယိတွာ ပဉ္စ ဌာနာနိ ဓာရေယျ အတ္ထံ ဝိစက္ခဏော အာပတ္တိံ ဝါ အနာပတ္တိံ ဝါ ဂရုကံ ဝါ လဟုကံ ဝါ အာပတ္တိံ ယထာဌာနေ ဌပေယျာတိ။

ဧဝံ တတ္ထ ဝိနိစ္ဆယံ ဒဿေတွာ ဣဒါနိ အနာပတ္တိံ ဒဿေန္တော ‘‘သကသညိဿာ’’တိအာဒိမာဟ။ တတ္ထ သကသညိဿာတိ ‘‘မယှံ သန္တကံ ဣဒံ ဘဏ္ဍ’’န္တိ ဧဝံ သကသညိဿ ပရဘဏ္ဍမ္ပိ ဂဏှတော ဂဟဏေ အနာပတ္တိ၊ ဂဟိတံ ပန ပုန ဒါတဗ္ဗံ။ သစေ သာမိကေဟိ ‘‘ဒေဟီ’’တိ ဝုတ္တော န ဒေတိ၊ တေသံ ဓုရနိက္ခေပေ ပါရာဇိကံ။ ဝိဿာသဂ္ဂါဟေတိ (ပါရာ။ အဋ္ဌ။ ၁။၁၃၁) ဝိဿာသဂ္ဂဟဏေပိ အနာပတ္တိ။ ဝိဿာသဂ္ဂါဟလက္ခဏံ ပန ဣမိနာ သုတ္တေန ဇာနိတဗ္ဗံ –

‘‘အနုဇာနာမိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဝိဿာသံ ဂဟေတုံ၊ သန္ဒိဋ္ဌော စ ဟောတိ၊ သမ္ဘတ္တော စ အာလပိတော စ ဇီဝတိ စ ဇာနာတိ စ ‘ဂဟိတေ မေ အတ္တမနော’’’တိ (မဟာဝ။ ၃၅၆)။

တတ္ထ သန္ဒိဋ္ဌောတိ ဒိဋ္ဌမတ္တကမိတ္တော။ သမ္ဘတ္တောတိ ဒဠှမိတ္တော။ အာလပိတောတိ ‘‘မမ သန္တကံ ယံ ဣစ္ဆသိ၊ တံ ဂဏှေယျာသိ၊ အာပုစ္ဆိတွာ ဂဟဏေ ကာရဏံ နတ္ထီ’’တိ ဝုတ္တော။ ဇီဝတီတိ အနုဋ္ဌာနသေယျာယ ¶ သယိတောပိ ယာဝ ဇီဝိတိန္ဒြိယုပစ္ဆေဒံ န ပါပုဏာတိ။ ဂဟိတေ စ အတ္တမနောတိ ဂဟိတေ တုဋ္ဌစိတ္တော။ ဧဝရူပဿ သန္တကံ ‘‘ဂဟိတေ မေ အတ္တမနော ဘဝိဿတီ’’တိ ဇာနန္တေန ဂဟေတုံ ဝဋ္ဋတိ။ အနဝသေသပရိယာဒါနဝသေန စေတာနိ ပဉ္စင်္ဂါနိ ဝုတ္တာနိ။ ဝိဿာသဂ္ဂါဟော ပန တီဟိ အင်္ဂေဟိ ရုဟတိ။ ကထံ? သန္ဒိဋ္ဌော၊ ဇီဝတိ၊ ဂဟိတေ အတ္တမနော၊ သမ္ဘတ္တော၊ ဇီဝတိ၊ ဂဟိတေ အတ္တမနော၊ အာလပိတော၊ ဇီဝတိ၊ ဂဟိတေ အတ္တမနောတိ ဧဝံ။

ယော ¶ ပန ဇီဝတိ၊ န စ ဂဟိတေ အတ္တမနော ဟောတိ၊ တဿ သန္တကံ ဝိဿာသဘာဝေန ဂဟိတမ္ပိ ပုန ဒါတဗ္ဗံ။ ဒဒန္တေန စ မတကဓနံ တာဝ ယေ တဿ ဓနေ ဣဿရာ ဂဟဋ္ဌာ ဝါ ပဗ္ဗဇိတာ ဝါ၊ တေသံ ဒါတဗ္ဗံ။ အနတ္တမနဿ သန္တကံ တဿေဝ ဒါတဗ္ဗံ။ ယော ပန ပဌမံယေဝ ‘‘သုဋ္ဌု ကတံ တယာ မမ သန္တကံ ဂဏှန္တေနာ’’တိ ဝစီဘေဒေန ဝါ စိတ္တုပ္ပာဒမတ္တေန ဝါ အနုမောဒိတွာ ပစ္ဆာ ကေနစိ ကာရဏေန ကုပိတော၊ သော ပစ္စာဟရာပေတုံ န လဘတိ။ ယော စ အဒါတုကာမော၊ စိတ္တေန ပန အဓိဝါသေတိ၊ န ကိဉ္စိ ဝဒတိ၊ သောပိ ပုန ပစ္စာဟရာပေတုံ န လဘတိ။ ယော ပန ‘‘မယာ တုမှာကံ သန္တကံ ဂဟိတ’’န္တိ ဝါ ‘‘ပရိဘုတ္တ’’န္တိ ဝါ ဝုတ္တော ဂဟိတံ ဝါ ဟောတု၊ ပရိဘုတ္တံ ဝါ၊ ‘‘မယာ ပန တံ ကေနစိဒေဝ ကရဏီယေန ဌပိတံ၊ ပါကတိကံ ကာတုံ ဝဋ္ဋတီ’’တိ ဝဒတိ၊ အယံ ပစ္စာဟရာပေတုံ လဘတိ။

တာဝကာလိကေတိ ‘‘ပဋိဒဿာမိ ပဋိကရိဿာမီ’’တိ ဧဝံ ဂဏှန္တဿ တာဝကာလိကေပိ ဂဟဏေ အနာပတ္တိ။ ဂဟိတံ ပန သစေ ဘဏ္ဍသာမိကော ပုဂ္ဂလော ဝါ ဂဏော ဝါ ‘‘တုယှေဝေတံ ဟောတူ’’တိ အနုဇာနာတိ၊ ဣစ္စေတံ ကုသလံ။ နော စေ အနုဇာနာတိ၊ အာဟရာပေန္တေ ဒါတဗ္ဗံ။ သင်္ဃသန္တကံ ပန ပဋိဒါတုမေဝ ဝဋ္ဋတိ။

ပေတပရိဂ္ဂဟေတိ ဧတ္ထ ပန ပေတ္တိဝိသယေ ဥပပန္နာပိ၊ ကာလံ ကတွာ တသ္မိံယေဝ အတ္တဘာဝေ နိဗ္ဗတ္တာပိ၊ စာတုမဟာရာဇိကာဒယော ဒေဝါပိ သဗ္ဗေ ‘‘ပေတာ’’တွေဝ သင်္ချံ ဂတာ၊ တေသံ ပရိဂ္ဂဟေ အနာပတ္တိ။ ဒေဝတာယ ပန ဥဒ္ဒိဿ ဗလိကမ္မံ ကရောန္တေဟိ ရုက္ခာဒီသု လဂ္ဂိတသာဋကေ ဝတ္တဗ္ဗမေဝ နတ္ထိ။ တဉ္စ ခေါ အာရက္ခကေဟိ အပရိဂ္ဂဟိတေ၊ ပရိဂ္ဂဟိတံ ပန ဂဟေတုံ န ဝဋ္ဋတိ (သာရတ္ထ။ ဋီ။ ၂။၁၃၁)။

တိရစ္ဆာနဂတပရိဂ္ဂဟေတိ နာဂသုပဏ္ဏာဒီနံ တိရစ္ဆာနဂတာနံ ပရိဂ္ဂဟေ။ သစေပိ ဟိ ဒေဝေါ ဝါ နာဂသုပဏ္ဏော ဝါ မနုဿရူပေန အာပဏံ ပသာရေတိ၊ တတော စဿ သန္တကံ ကောစိ ဒိဗ္ဗစက္ခုကော ဘိက္ခု တံ ဉတွာ ဂဟေတွာ ဂစ္ဆတိ၊ ဝဋ္ဋတိ။

ပံသုကူလသညိဿာတိ ¶ ‘‘အသာမိကံ ဣဒံ ပံသုကူလ’’န္တိ ဧဝသညိဿာပိ ဂဟဏေ အနာပတ္တိ။ သစေ ပန တံ သသာမိကံ ဟောတိ၊ အာဟရာပေန္တေ ဒါတဗ္ဗံ။ ဥမ္မတ္တကာဒီနိ ပုဗ္ဗေ ဝုတ္တပ္ပကာရာနေဝ။ အာဒိကမ္မိကော ပနေတ္ထ ဓနိယော ¶ ။ အဝသေသာနံ ပန ရဇကဘဏ္ဍိကာဒိစောရာနံ ဆဗ္ဗဂ္ဂိယာဒီနံ အာပတ္တိယေဝ။

သစိတ္တကေဟိ တီဟိ သမုဋ္ဌာနေဟိ ဣဒံ သမုဋ္ဌာတီတိ အာဟ ‘‘အဒိန္နာဒါနသမုဋ္ဌာန’’န္တိ။ တထာ ဟိ သာဟတ္ထိကံ ကာယစိတ္တတော သမုဋ္ဌာတိ။ အာဏတ္တိကံ ဝါစာစိတ္တတော သမုဋ္ဌာတိ။ သာဟတ္တိကာဏတ္တိကံ ကာယဝါစာစိတ္တတော သမုဋ္ဌာတိ၊ တဉ္စ ခေါ ‘‘ဘာရိယမိဒံ၊ တွံ ဧကပဿံ ဂဏှ၊ အဟံ ဧကပဿ’’န္တိ သံဝိဓာယ ဥဘယေသံ ပယောဂေန ဧကဿ ဝတ္ထုနော ဌာနာစာဝနေ လဗ္ဘတိ။ ‘‘ကာယဝစီကမ္မ’’န္တိ အဝစနံ ပန ကာယဝါစာနံ ဤဒိသေ ဌာန