📜

නමො තස්ස භගවතො අරහතො සම්මාසම්බුද්ධස්ස

කමලාඤ්ජලි

1.

කමලාසන කමලාපති පමථාධිප වජිරා,

යුධදානව මනුජොරග භුජගාසන පතිනං;

මකුටාහිත මනිදීධිති භමරාවලි භජිතං,

පණමා’මහං අනඝං මුනි චරණාමල කමලං.

2.

කමලාලය සදි’සඞ්කිත කලමඞ්ගල රුචිරං,

ජුතිරඤ්ජිතං අභිනිජ්ජිත සුභකඤ්චන නලිනං;

ජනිතා චිර සමයෙ නිජ පිතු භූපති නමිතං,

පණමා’මහං අනඝං මුනි චරණාමල කමලං.

3.

සරණාගත රජනීපති දිනසෙඛර නමිතං,

භජිතාඛිල ජනපාවනං අභිකඞ්ඛිත සුඛදං;

වසුධාතල සයමුග්ගත සරසීරුහ මහිතං,

පණමා’මහං අනඝං මුනි චරණාමල කමලං.

4.

දිරදාසන තරුපන්තික ඝටිතාසනං අභයං,

විජයාසන සමධිට්ඨිත චතුරඞ්ගික විරියං;

ධරමානක සුරියෙහනි විජිතන්තක ධජිනිං,

පණමා’මහං අභිපාතිත නමුචිද්ධජ විභවං.

5.

සදයොදිත පියභාරති විජිතන්තක සමරං,

දසපාරමි බලකම්පිත සධරාධර ධරනිං;

ගිරිමෙඛල වරවාරන සිරසානත චරණං,

පණමා’මහං අභිනන්දිත සනරාමර භුවනං.

6.

නිඛිලාසව විගමෙ’නතිවිමලීකත හදයං,

තදනන්තර විදිතාඛිල මතිගොචර විසයං;

විසයීකත භුවනත්තයං අතිලොකිය චරිතං,

පණමා’මහං අපරාජිතං අරහං මුනිං අසමං.

7.

මුදුභාරති මධුපාසිත නලිනොපම වදනං,

රුචිරායත නලිනීදල නිභ ලොචන යුගලං;

උදයොදිත රවිමණ්ඩල ජලිතාමල නිටිලං,

පණමා’මහ අකුතොභයං අනඝං මුනි පමුඛං.

8.

අසිතම්බුද රුචිකුඤ්චිත මුදු කුන්තල ලලිතං,

භුවනොදර විතතාමිත ජුතිසඤ්චය ජලිතං;

මදමොදිත දිරදොපම ගතිවිබ්භම රුචිරං,

පණමා’මහං අමතන්දද මුනිපුඞ්ගවං අසමං.

9.

කරුණාරස පරිභාවිත සවණාමත වචනං,

විරුදාවලි සතඝොසිත යසපූරිත භුවනං;

සුමනොහර වරලක්ඛණ සිරිසඤ්චය සදනං,

පණමා’මහං උදිතාමල සසිමණ්ඩල වදනං.

10.

විනයාරහ ජනමානස කුමුදාකර සසිනං,

තසිනාපග පරිසොසන සතදීධිති තුලිතං;

තමනාසව මුනිසෙවිතං අපලොකිත සුඛදං,

පණමා’මහං අනිකෙතනං අඛිලාගති විගතං.

11.

සහිතාඛිල භයභෙරවං අභයාගත සරනං,

අජරාමර සුඛදායකං අනිරාකත කරුණං;

තමුපාසක ජනසෙවිත සුපතිට්ඨිත චරණං,

පණමා’මහං අහිතාපහං අනඝුත්තම චරණං.

12.

කරුණාමත රසපුරිත වීමලාඛිල හදයං,

විහිතාමිත ජනතාහිතං අනුකම්පිත භුවනං;

භුවනෙ සුතං අවනීපති සත සෙවිත චරණං,

පණමා’මහං අනඝං මුනිං අඝනාසන චතුරං.

13.

අරතීරති පරිපීලිත යතිමානස දමනං,

නිජසාසන විනිවාරිත පුථුතිත්ථිය සමණං;

පරවාදික ජනතාකත පරිභාසිත ඛමනං,

පණමා’මහං අතිදෙවත වර ගොතම සමණං.

14.

සරණාගත භයනාසන වජිරාලය පණිභං,

භවසාගර පතිතාමිත ජනතාරන නිරතං;

සිරසාවහං අමලඤ්ජලි පුටපඞ්කජ මකුලං,

පණමා’මහං අඛිලලාය විගතං මුනිං අතුලං.

15.

විමලීකත ජනමානස විගතාසව භගවං,

භවපාරග විභවාමත සුඛදායක සතතං;

පරමාදර ගරුගාරව විනතං ජින පයතං,

පදපඞ්කජ රජසා මම සමලඞ්කුරු සිරසං.

16.

පවනාහත දුමපල්ලවං ඉව නාරත චපලං,

භවලාලස මලිනීකතං අජිතින්ද්රිය නිවහං;

චිර සඤ්චිත දුරිතාහතං අනිවාරිත තිමිසං,

විමලීකුරු කරුණාභර සුතරං මම හදයං.

17.

අදයෙ දයං අනයෙ නයං අපි යො ගුණං අගුණෙ,

අහිතෙ හිතං අකරො ක්වචිද අපි කෙනචි නකතං;

සදයෙ ජින සුනයෙ ගුණසදනෙ තයි නිතරං,

සුහිතෙ හිතචරිතෙ’නඝ රමතෙ මම හදයං.

18.

භවසඞ්කට පතිතෙනපි භවතා චිර චරිතං,

විසමෙ සම චරණං ඛලු දසපාරමි භරණං;

සරතො’හනි සරතො නිසි සුපිනෙනපි සතතං,

රමතෙ ජින සුමතෙ ත්වයි සදයං මම හදයං.

19.

අතිදුද්දදං අදදී භවං අතිදුක්කරං අකරී;

අතිදුක්ඛමං අඛමී වත කරුණානිධි’රසමො,

ඉති තෙ ගුණං අනඝං මුනි සරතො මම හදයං,

රමතෙ’හනි රමතෙ නිසි රමතෙ ත්වයි සතතං.

20.

අතිදුච්චරං අචරී භවං අතිදුද්දමං අදමී,

අතිදුද්දයං අදයී වත සදයාපර හදයො;

ඉති තෙ ගුණං අනඝං මුනි සරතො මම හදයං,

රමතෙ’හනි රමතෙ නිසි රමතෙ ත්වයි සතතං.

21.

අතිදුග්ගමං අගමී භවං අතිදුජ්ජයං අජයී,

අතිදුස්සහං අසහී වත සමුපෙක්ඛිත මනසො;

ඉති තෙ ගුණං අනඝං මුනි සරතො මම හදයං,

රමතෙ’හනි රමතෙ නිසි රමතෙ ත්වයි සතතං.

22.

අතිදාරුන පලයානල සදිසානල ජලිතෙ,

නිරයෙ විනිපතිතො චිරං අඝතාපිත මනසො;

න සරිං සකිද අපි තෙ පිත භජිතුං පදනලිනං,

ඛම ගොතම නරසාරථි තමිදං මම ඛලිතං.

23.

තිරියග්ගත-ගතියං චිරං අනවට්ඨිත චරිතො,

අතිනිට්ඨුර වධතජ්ජිත භයකම්පිත හදයො;

න සරිං සකිදපි තෙ පිත භජිතුං පදනලිනං,

ඛම ගොතම පුරිසුත්තම තමිදං මම ඛලිතං.

24.

පරිදෙවන නිරතො චිරං අථ පෙත්තිය විසයෙ,

සුජිඝච්ඡිත සුපිපාසිත පරිසොසිත ජඨරෙ;

න සරිං සකිදපි තෙ පිත භජිතුං පදනලිනං,

ඛම ගොතම දිපදුත්තම තමිදං මම ඛලිතං.

25.

විවසො භුසං අඝදූසිත මනසාසුර විසයෙ,

ජනිතො ඝනතිමිරෙ චිරං අතිදුක්ඛිත හදයො;

න සරිං සකිදපි තෙ පිත භජිතුං පදනලිනං,

ඛම ගොතම වසිසත්තම තමිදං මම ඛලිතං.

26.

මනසා චිර විහිතං සරං අතිකිබ්බිස චරිතං,

සමථෙනථ සුවිරාජිය තං අසඤ්ඤිතං උපගො;

න සරිං සකිද අපි තෙ පිත භජිතුං පද නලිනං,

ඛම ගොතම වසිපුඞ්ගව තමිදං මම ඛලිතං.

27.

විජිගුච්ඡිය දුරිතං නිජ වපුසා කතං අමිතං,

තනු වජ්ජිතං උපගො භවං ඉහ භාවිත සමථො;

න සරිං සකිදපි තෙ පිත භජිතුං පදනලිනං,

ඛම ගොතම යතිකුඤ්ජර තමිදං මම ඛලිතං.

28.

රතනත්තය රහිතෙ භුස බහුලීකත දුරිතෙ,

ජනිතො පරවිසයෙ බුධජන නින්දිය චරිතෙ;

න සරිං සකිදපි තෙ පිත භජිතුං පදනලිනං,

ඛම ගොතම කරුණානිධි තමිදං මම ඛලිතං.

29.

ජනිතො යදි මනුජෙසුපි විකලින්ද්රිය නිවහො,

තනුනා කරචරණාදිහි විකතෙ’නිහ දුඛිතො;

න සරිං සකිදපි තෙ පිත භජිතුං පදනලිනං,

ඛම ගොතම මතිසාගර තමිදං මම ඛලිතං.

30.

විධිනාහිත මතිභාවන රහිතො තමපිහිතො,

විසදෙසුපි කුසලාදිසු තථදස්සන විමුඛො;

න සරිං සකිදපි තෙ පිත භජිතුං පදනලිනං,

ඛම ගොතම නරකෙසරි තමිදං මම ඛලිතං.

31.

සුචිරෙනපි භුවි දුල්ලභං අසමං ඛණං අලභං,

සනරාමර ජනතාහිත සුඛදං මුනි ජනනං;

න සරිං සකිදපි තෙ පිත භජිතුං පදනලිනං,

ඛම ගොතම වදතංවර තමිදං මම ඛලිතං.

32.

නිසිතායුධ වධසජ්ජිත ඛළනිද්දය හදයො,

පරහිංසන රුචි භිංසන යමසොදර සදිසො;

න සරිං සකිදපි තෙ පිත භජිතුං පදනලිනං,

ඛම ගොතම මුනිසත්තම තමිදං මම ඛලිතං.

33.

පරසන්තක හරණෙ කතමති බඤ්චන බහුලො,

ඝරසන්ධික පරිපන්ථික සහසාකති නිරතො;

න සරිං සකිදපි තෙ පිත භජිතුං පදනලිනං,

ඛම ගොතම මුනිපුඞ්ගව තමිදං මම ඛලිතං.

34.

නවයොබ්බන මදගබ්බිත පරිමුච්ඡිත හදයො,

සුචිසජ්ජන විජිගුච්ඡිය පරදාරික නිරතො;

න සරිං සකිදපි තෙ පිත භජිතුං පදනලිනං,

ඛම ගොතම කරුණාභර තමිදං මම ඛලිතං.

35.

මදිරාසවරත නාගරජන සන්තත භජිතො,

ගරුගාරව හිරිදූරිත තිරියග්ගත චරිතො;

න සරිං සකිදපි තෙ පිත භජිතුං පදනලිනං,

ඛම ගොතම විහතාසව තමිදං මම ඛලිතං.

36.

සපිතාමහ පපිතාමහ නිචිතං ධනං අමිතං,

පිතුසඤ්චිතමපි නාසිය කිතවො හතවිභවො;

න සරිං සකිදපි තෙ පිත භජිතුං පදනලිනං,

ඛම ගොතම විජිතන්තක තමිදං මම ඛලිතං.

37.

විතථාලික වචනො පරපියසුඤ්ඤත කරණො,

ඵරුසං භණං අතිනිප්ඵල බහුභාසන නිපුණො;

න සරිං සකිදපි තෙ පිත භජිතුං පදනලිනං,

ඛම ගොතම භුවනෙසුත තමිදං මම ඛලිතං.

38.

පරසම්පදං අභිඣායන නිරන්තර දුඛිතො,

නභිරජ්ඣන පරමො ක්වචි ඵලදස්සන රහිතො;

න සරිං සකිදපි තෙ පිත භජිතුං පදනලිනං,

ඛම ගොතම ගුණසාගර තමිදං මම ඛලිතං.

39.

භවතො භවං අපරාපරං අයතාචිරං ඉති මෙ,

වපුසා අථ වචසාපි ච මනසා කතං අමිතං;

ඛම ගොතම දුරිතාපහ දුරිතං බහුවිහිතං,

දද මෙ සිවපදං අච්චුතං අමතං භවවිගතං.

40.

තිමිරාවුත කුණපාකුල විජිගුච්ඡිය පවනෙ,

ජනිකාසුචි ජඨරෙ බහු කිමිසන්තති සදනෙ;

අසයිං භවගහණෙ චරං අහං අප්පටිසරණෙ,

සරනං භව භගවං මම භවනීරධි තරණෙ.

41.

බහි නික්ඛමං අසකිං භගතිරියං පථ පතිතො,

අගදඞ්කර කත සල්ලක සතඛණ්ඩිත කරණො;

අමරිං භවගහණෙ චරං අහං අප්පටිසරණෙ,

සරණං භව භගවං මම භවනීරධි තරනෙ.

42.

පතිතො බහි රතිපිල්ලක තනුරාමය මථිතො,

වදිතුං කිමු විදිතුම්පි ච න සහං මතිරහිතො;

අමරිං භවගහණෙ චරං අහං අප්පටිසරණෙ,

සරණං භව භගවං මම භවනීරධි තරණෙ.

43.

ජනිතො යදි සුඛිතො ජනදයිතො පියජනකො,

පුථුකො බහුවිධ-කීලනනිරතො ගදගහිතො;

අමරිං භවගහණෙ චරං අහං අප්පටිසරණෙ,

සරණං භව භගවං මම භවනීරධි තරණෙ.

44.

තරුනොපි හි ඝරබන්ධන ගථිතොමිත විභවො,

සහසා ගදගහිතො පියභරියාසුත වියුතො;

අමරිං භවගහණෙ චරං අහං අප්පටිසරණෙ,

සරණං භව භගවං මම භවනීරධි තරණෙ.

45.

අජරං තනුං අභිමඤ්ඤිය නවයොබ්බන වසිකො,

ජරසා පරිමථිතො පරං අනනුට්ඨිත කුසලො;

අමරිං භවගහණෙ චරං අහං අප්පටිසරණෙ,

සරණං භව භගවං මම භවනීරධි තරණෙ.

46.

නිරුජො ධුවං අරුජං තනුං අභිමඤ්ඤිය සමදො,

කුසලාසය විමුඛො භුසං අවසො ගදනිහතො;

අමරිං භවගහණෙ චරං අහං අප්පටිසරණෙ,

සරණං භව භගවං මම භවනීරධි තරණෙ.

47.

පවිචින්තිය සකජීවිතං අමරං ධුවං අනිඝං,

ඉති ජීවිතමදගබ්බිත මතිරුජ්ඣිත කුසලො;

අමරිං භවගහණෙ චරං අහං අප්පටිසරණෙ,

සරණං භව භගවං මම භවනීරධි තරණෙ.

48.

පරහිංසන ධනමොසන පරදාරික නිරතො,

ධරනීපති ගහිතො බහු වධබන්ධන නිහතො;

අමරිං භවගහණෙ චරං අහං අප්පටිසරණෙ,

සරණං භව භගවං මම භවනීරධි තරණෙ.

49.

නරකොදක පතිතො ගිරිතරුමත්ථක ගලිතො,

මිගවාළක ගහිතො විසධර ජාතිහි ඩසිතො;

අමරිං භවගහණෙ චරං අහං අප්පටිසරණෙ,

සරණං භව භගවං මම භවනීරධි තරණෙ.

50.

අභිචාරක විධිකොපිත නිසිචාරක ගහිතො,

සවිසොදන සහසාදන පභුතීහි ච ඛලිතො;

අමරිං භවගහණෙ චරං අහං අප්පටිසරණෙ,

සරණං භව භගවං මම භවනීරධි තරණෙ.

51.

සයමෙවච සජනොපරි කුපිතො මතිවියුතො,

සවිසාදන ගලකන්තන පභුතාමිත ඛලිතො;

අමරිං භවගහණෙ චරං අහං අප්පටිසරණෙ,

සරණං භව භගවං මම භවනීරධි තරණෙ.

52.

පිතුපූජන නිරතාසය සුඛිතො පිතුදයිතො,

මරණෙනච පිතුනො භුසං අනුසොචන නිරතො;

පරුදිං චිරං අතිදුස්සහ කසිරෙ භවගහණෙ,

සරණං භව භගවං මම භවනීරධි තරණෙ.

53.

සමුපට්ඨිය ජනිකං නිජං අභිවාදන පරමො,

මරණෙනච ජනිකායනුසරිතා ගුණමහිමං;

පරුදිං චිරං අතිදුස්සහ කසිරෙ භවගහණෙ,

සරණං භව භගවං මම භවනීරධි තරණෙ.

54.

ගුරුදෙවත පතිමානන පරමො පියසුවචො,

සමුපාසිතචරණො ගුරුමරණෙනතිදුඛිතො;

පරුදිං චිරං අතිදුස්සහ කසිරෙ භවගහණෙ,

සරණං භව භගවං මම භවනීරධි තරණෙ.

55.

ඝරමෙධිතං උපගොමිතවිභවො රතිබහුලො,

මරණෙ පියභරියාසුතදුහිතූ’නතිකරුණං;

පරුදිං චිරං අතිදුස්සහ කසිරෙ භවගහණෙ,

සරණං භව භගවං මම භවනීරධි තරණෙ.

56.

පියපුබ්බජ සහජානුජ භගිණිද්වය මරණෙ,

නිජ බන්ධව-සඛ-සිස්සක මරණෙ ප්යතිකරුණං;

පරුදිං චිරං අතිදුස්සහ කසිරෙ භවගහණෙ,

සරණං භව භගවං මම භවනීරධි තරණෙ.

57.

ජගතීපති ගහණා රිපුජනතක්කර හරණා,

සරිතොදක වහණා පුථුජලිතානල දහණා;

පරුදිං හතවිභවො චිරමිහ දුග්ගතිගහණෙ,

සරණං භව භගවං මම භවනීරධි තරණෙ.

58.

අතිදුග්ගම විසමාකුල භවසඞ්කට පතිතෙ,

බ්යසනං චිරමිති දුස්සහං අනුභූයපි විමිතං;

න ජහෙ සුඛලවවඤ්චිතහදයො භවතසිනං,

තමපාකුරු කරුණානිධි තසිනං මම කසිණං.

59.

ජනනාවධි මරණං විය මරණාවධි ජනනං,

උභයෙනපි භයමෙවහි භවතො මම නියතං;

සිවමෙවච ජනනාවධි මරණාවධි රහිතං,

දද මෙ සිවං අමතන්දද තං අනාසව භගවං.

60.

චිරදික්ඛිතමපි මෙ මනං අනිවාරිත තසිනං,

භවතො භව රතිපීලිතං අහහො කලිඝටිතං!

තමතො පිත භයතො මමමව මෙ භව සරණං,

භගවං පටිසරණං මම භවනීරධි තරණං.