📜

නමො තස්ස භගවතො අරහතො සම්මාසම්බුද්ධස්ස

සුත්තන්තනීති

1.

පරා ¶ භවන්තං පුරිසං,

මයං පුච්ඡාම ගොතමං;

භවන්තං පුට්ඨු මාගම්ම,

කිං පරාභවතො මුඛං.

2.

සුවිජානො ¶ භවංහොති,

දුවිජානො පරාභවො;

ධම්මකාමො භවං හොති,

ධම්මදෙස්සී පරාභවො.

3.

ඉතිහෙ ¶ තං විජානාම,

පථමො සො පරාභවො;

දුතීයං භගවා බ්රූහි,

කිං පරාභවතො මුඛං.

4.

අසන්තස්ස ¶ පියො හොති,

සන්තෙ න කුරුතෙ පියං;

අසතං ධම්මං රොචෙති,

තං පරාභවතො මුඛං.

කම්මාපරාධසත්තානං ¶ ,

විනාසෙ පච්චුපට්ඨිතෙ;

අනයො නයරූපෙන,

බුද්ධිමාකම්ය තිට්ඨති.

5.

නිද්දාසීලී ¶ සභාසීලී,

අනුට්ඨාතා ච යො නරො;

අලසො කොධපඤ්ඤාණො,

තං පරාභවතො මුඛං.

6.

යො ¶ මාතරං පිතරං වා,

ජිණ්ණකං ගතයොබ්බනං;

පහුසන්තො න භරති,

තං පරාභවතො මුඛං.

7.

යො ¶ බ්රාහ්මණං සමණං වා,

අඤ්ඤං වාපි වණිබ්බකං;

මුසාවාදෙන වඤ්චෙති,

තං පරාභවතො මුඛං.

8.

පහුතවිත්තො ¶ පුරිසො,

සහිරඤ්ඤො සභොජනො;

එකො භුඤ්ජති සාදූනි,

තං පරාභවතො මුඛං.

9.

ජාතිථද්ධො ¶ ධනථද්ධො,

ගොත්තථද්ධො ච යො නරො;

සඤාතිං අතිමඤ්ඤෙති,

තං පරාභවතො මුඛං.

10.

ඉත්ථිධුත්තො ¶ සුරාධුත්තො,

අක්ඛධුත්තො ච යො නරො;

ලද්ධංලද්ධං විනාසෙති,

තං පරාභවතො මුඛං.

න ¶ බාළ්හං ඉත්ථිං ගච්ඡෙය්ය,

සම්පස්සං තෙජසඞ්ඛයං;

කාසං සාසං දරං බාල්යං,

ඛීණමෙදො නිගච්ඡති.

(ක)

මායාචෙතා ¶ මරීචී ච,

සොකො රොගො උපද්දවො;

ඛරා ච බන්ධනාචෙතා,

මච්චුපාසො ගුහාසයො.

(ඛ)

බලවන්තො දුබ්බලා හොන්ති,

ථාමවන්තොපි හායරෙ;

චක්ඛුමා අන්ධකා හොන්ති,

මාතුගාමවසංගතා.

(ග)

ගුණවන්තො ¶ නිග්ගුණා හොන්ති,

පඤ්ඤවන්තොපි හායරෙ;

පමුත්තා බන්ධනා සෙන්ති,

මාතුගාමවසංගතා.

(ඝ)

යසං ¶ කිත්තිං ධිතිං සූරං;

බාහුස්සච්චං පජානනං;

හාපයන්ති පමත්තස්ස;

කට්ඨපුඤ්චංව පාවකො.

11.

සෙහි ¶ දාරෙහි සන්තුට්ඨො,

වෙසියාසු පදුස්සති;

දුස්සති පරදාරෙසු,

තං පරාභවතො මුඛං.

(ක)

මයඤ්ච ¶ භරියං නාතික්කමාම,

අම්හෙච භරියා නාතික්කමන්ති;

අඤ්ඤත්ර තාහි බ්රහ්මචරියං චරාම,

තස්මා හි අම්හං දහරා න මිය්යරෙ.

(ඛ)

එතාසු ¶ ජායරෙ සුත්තමාසු,

මෙධාවිනො හොන්ති පහුතපඤ්ඤා;

බහුස්සුතා ථෙරගුණා ච හොන්ති,

තස්මා හි අම්හං දහරා න මිය්යරෙ.

12.

අතීතයොබ්බනො ¶ පොසො,

ආනෙති තිම්බරුත්ථනිං;

තස්ස ඉස්සා න සුපති,

තං පරාභවතො මුඛං.

(ක)

න ¶ දුක්ඛං අහිනා දට්ඨං,

න දුක්ඛං සත්තියා හතං;

තඤ්ච දුක්ඛඤ්ච තිබ්බඤ්ච,

යං පස්සෙ ජිණ්ණකං පතිං.

(ඛ)

නත්ථි ¶ ඛිට්ටා නත්ථි රති,

ජිණ්ණෙන පතිනා සහ;

නත්ථි අල්ලාපසල්ලාපො,

ජග්ඝිතුංපි න සොභති.

(ග)

යදා ච දහරො දහරී,

මන්තයිංසු රහොගතා;

සබ්බෙ සොකා විනස්සන්ති,

යෙකෙචි හදයස්සිතා.

13.

ඉත්ථිං ¶ සොණ්ඩිං විකිරණිං,

පුරිසං වාපි තාදිසං;

ඉස්සරියස්මිං ථපෙති,

තං පරාභවතො මුඛං.

14.

අප්පභොගො ¶ මහාතණ්හො,

ඛත්තියෙ ජායතෙ කුලෙ;

සො ච රජ්ජං පත්ථයති,

තං පරාභවතො මුඛං.

‘‘සුවිජානො ¶ භවංහොති,

දුවිජානො පරාභවො’’;

අප්පභොගො මහාතණ්හො.

15.

එතෙ ¶ පරාභවෙ ලොකෙ,

පණ්ඩිතො සමවෙක්ඛිය;

අරියො දස්සනසම්පන්නො,

ස ලොකං භජතෙ සිවං.

වසලසුත්ත

1.

කොධනො ¶ උපනාහීච,

පාපමක්ඛී ච යො නරො;

විපන්නදිට්ඨී මායාවී,

තං ජඤ්ඤා වසලො ඉති.

2.

එකජං ¶ වා ද්විජං වාපි,

යොධ පාණං විහිංසති;

යස්ස පාණෙ දයා නත්ථි,

තං ජඤ්ඤා වසලො ඉති.

3.

යො ¶ හන්ති උපරුන්ධති,

ගාමානි නිගමානි ච;

නිග්ගාහකො සමඤ්ඤාතො,

තං ජඤ්ඤා වසලො ඉති.

4.

ගාමෙ ¶ වා යදි වා රඤ්ඤෙ,

යං පරෙසං මමායිතං;

ථෙය්යා අදින්නං ආදෙති,

තං ජඤ්ඤා වසලො ඉති.

5.

යො ¶ හවෙ ඉණමාදාය,

වුච්චමානො පලායති;

න හි තෙ ඉණමත්ථීති,

තං ජඤ්ඤා වසලො ඉති.

6.

යොධ කිඤ්චික්ඛකම්යතා,

පථස්මිං වජතං ජනං;

හන්ත්වා කිඤ්චික්ඛ මාදෙති;

තං ජඤ්ඤා වසලො ඉති.

7.

යො ¶ අත්තහෙතු පරහෙතු,

ධනහෙතු ච යො නරො;

සක්ඛිපුට්ඨො මුසාබ්රූති,

තං ජඤ්ඤා වසලො ඉති.

8.

යො ¶ ඤාතීනං සඛීනං වා,

දාරෙසු පටිදිස්සති;

සහසා සම්පියෙන වා,

තං ජඤ්ඤා වසලො ඉති.

9.

යො ¶ 4 මාතරං පිතරං වා,

ජිණ්ණකං ගතයොබ්බනං;

පහුසන්තො න භරති,

තං ජඤ්ඤා වසලො ඉති.

10.

යො ¶ මාතරං පිතරං වා,

භාතරං භගිනිං සස්සුං;

හන්ති රොසෙති වාචාය,

තං ජඤ්ඤා වසලො ඉති.

11.

යො ¶ අත්ථං පුච්ඡිතො සන්තො,

අනත්ථ මනුසාසති;

පටිච්ඡන්නෙන මන්තෙති,

තං ජඤ්ඤා වසලො ඉති.

12.

යො ¶ කත්වා පාපකං කම්මං,

මාමං ජඤ්ඤාති ඉච්ඡති;

යො පටිච්ඡන්නකම්මන්තො,

තං ජඤ්ඤා වසලො ඉති.

13.

යො ¶ වෙ පරකුලං ගන්ත්වා,

භුත්වාන සුචිභොජනං;

ආගතං නප්පටිපූජෙති,

තං ජඤ්ඤා වසලො ඉති.

14.

යො ¶ සමණං වා බ්රාහ්මණං,

අඤ්ඤං වාපි වණිබ්බකං;

මුසාවාදෙන වඤ්චෙති,

තං ජඤ්ඤා වසලො ඉති.

15.

යො සමණං වා බ්රාහ්මණං,

භත්තකාලෙ උපට්ඨිතං;

රොසෙති වා න ච දෙති,

තං ජඤ්ඤා වසලො ඉති.

16.

අසන්තං ¶ යොධ පබ්රූති,

මොහෙන පලිගුණ්ඨිතො;

කිඤ්චනං නිජිගීසානො,

තං ජඤ්ඤා වසලො ඉති.

17.

යොචත්තානං ¶ සමුක්කංසෙ,

පරෙච මවජානාති;

නිහීනො සෙන මානෙන,

තං ජඤ්ඤා වසලො ඉති.

18.

රොසකො ¶ කදරීයො ච,

පාපිච්ඡො මච්ඡරී සඨො;

අහිරීකො අනොත්තප්පී,

තං ජඤ්ඤා වසලො ඉති.

19.

යො ¶ බුද්ධං පරිභාසති,

අථවා තස්ස සාවකං;

පරිබ්බජං ගහට්ඨං වා,

තං ජඤ්ඤා වසලො ඉති.

අට්ඨහි ¶ භික්ඛවෙ අඞ්ගෙහි සම්පන්නාගතස්ස උපාසකස්ස පත්තො නිකුජ්ජිතබ්බො. භික්ඛූනං අලාභාය පරිසක්කති, භික්ඛූනං අනත්ථාය පරිසක්කති, භික්ඛූනං අනාවාසාය පරිසක්කති, භික්ඛූනං අක්කොසති පරිභාසති, භික්ඛූභික්ඛූහි භෙදෙති, බුද්ධස්ස අවණ්ණං භාසති, ධම්මස්ස අවණ්ණං භාසති, සඞ්ඝස්ස අවණ්ණං භාසති, අනුජානාමි භික්ඛවෙ ඉමෙහි අට්ඨහි අඞ්ගෙහි සම්පන්නාගතස්ස උපාසකස්ස පත්තං නිකුජ්ජිතුං.

20.

යො ¶ අනරහං සන්තො,

අරහාති පටිජානාති;

චොරො සබ්රහ්මකෙ ලොකෙ,

තං ජඤ්ඤා වසලො ඉති.

21.

එතෙ ¶ ඛො වසලා වුත්තා,

මයා යෙ තෙ පකාසිතා;

න ජච්චා වසලො හොති,

න ජච්චා හොති බ්රාහ්මණො.

22.

කම්මුනා වසලො හොති,

කම්මුනා හොති බ්රාහ්මණො.

23.

තදමිනාපි ¶ ජානාථ,

යථාහෙතං නිදස්සනං;

චණ්ඩාලපුත්තො සොපාකො,

මාතඞ්ගො ඉති විස්සුතො.

24.

සො ¶ යසං පරමං පත්තො,

මාතඞ්ගො යං සුදුල්ලභං;

ආගච්ඡුං තස්සුපට්ඨානං,

ඛත්තියා බ්රාහ්මණා බහූ.

25.

සො ¶ දෙවයානං අභිරුය්හ,

විරජං සො මහාපථං;

කාමරාගං විරාජෙත්වා,

බ්රහ්මලොකූපගො අහු.

ගිරිං ¶ නඛෙන ඛණසි,

අයො දන්තෙභි ඛාදසි;

ජාතවෙදං පදහසි,

යො ඉසිං පරිභාසති.

ආවෙලිතං ¶ පිට්ඨිතො උත්තමඞ්ගං,

බාහුං පසාරෙති අකම්පණෙය්යං;

සෙතානි අක්ඛීනි යථා මතස්ස,

කො මෙ ඉමං පුත්තමකාසි එවං.