📜

තෙලකටාහගාථා ¶

නමො තස්ස භගවතො අරහතො සම්මාසම්බුද්ධස්ස

1.

ලංකිස්සරො ජයතු වාරණරාජගාමී

භොගින්දභොග රුචිරායත පීණ බාහු,

සාධුපචාරනිරතො ගුණසන්නිවාසො

ධම්මෙ ඨිතො වීගතකොධමදාවලෙපො;

2.

යො සබ්බලොකමහිතො කරුණාධිවාසො

මොක්ඛාකරො රවිකුලම්බර පුණ්ණ චන්දො,

ඤෙය්යොදධිං සුවිපුලං සකලං විබුද්ධො

ලොකුත්තමං නමථ තං සිරසා මුනින්දං;

3.

සොපානමාලමමලං තිදසාලයස්ස

සංසාර සාගරසමුත්තරණාය සෙතුං,

සබ්බාගතීභය විවජ්ජිත ඛෙම මග්ගං

ධම්මං නමස්සථ සදා මුනිනා පණීතං;

4. ¶

දෙය්යං තදප්පමපි යත්ථ පසන්න චිත්තා

දත්වා නරා ඵලමුළාරතරං ලභන්තෙ,

තං සබ්බදා දසබලෙනපි සුප්පසත්ථං

සඞ්ඝං නමස්සථ සදාමිතපුඤ්ඤඛෙත්තං;

5.

තෙජො බලෙන මහතා රතනත්තයස්ස

ලොකත්තයං සමධිගච්ඡති යෙන මොක්ඛං,

රක්ඛා න චත්ථි ච සමා රතනත්තයස්ස

තස්මා සදා භජථ තං රතනත්තයං භො;

6.

ලංකිස්සරො පරහිතෙකරතො නිරාසො

රත්තිම්පි ජාගරරතො කරුණාධිවාසො,

ලොකං විබොධයති ලොකහිතාය කාමං

ධම්මං සමාචරථ ජාගරියානුයුත්තා;

7. ¶

සත්තොපකාර නිරතා කුසලෙ සහායා

භො දුල්ලභා භුවි නරා විහතප්පමාදා,

ලංකාධිපං ගුණධනං කුසලෙ සහායං

ආගම්ම සංචරථ ධම්මමලං පමාදං;

8.

ධම්මො තිලොක සරණො පරමො රසානං

ධම්මො මහග්ඝරතනො රතනෙසු ලොකෙ,

ධම්මො භවෙ තිභවදුක්ඛ විනාසහෙතු

ධම්මං සමාචරථ ජාගරියානුයුත්තා;

9.

නිද්දං විනොදයථ භාවයථප්පමෙය්යං

දුක්ඛං අනිච්චම්පි චෙහ අනත්තතඤ්ච,

දෙහෙ රතිං ජහථ ජ ජජ්ජරභාජනාභො

ධම්මං සමාචරථ ජාගරියානුයුත්තා;

10. ¶

ඔකාස මජ්ජ මම නත්ථි සුවෙ කරිස්සං

ධම්මං ඉතීහලසතා කුසලප්පයොගෙ,

නා’ලං තියද්ධසු තථා භුවනත්තයෙ ච

කාමං න චත්ථි මනුජො මරණා පමුත්තො;

11.

ඛිත්තො යථා නභසි කෙනචිදෙව ලෙඩ්ඩු

භූමිං සමාපත්ති භාරතයා ඛණෙන,

ජාතත්තමෙව ඛලු කාරණමෙකමත්ර

ලොකං සදා නනු ධුවං මරණාය ගන්තුං;

12.

කාමං නරස්ස පතතො ගිරිමුද්ධනාතො

මජ්ඣෙ න කිඤ්චි භයනිස්සරණාය හෙතු,

කාමං වජන්ති මරණං තිභවෙසු සත්තා

භොගෙ රතිං පජහථාපි ච ජීවිතෙ ච;

13. ¶

කාමං පතන්ති මහියා ඛලු වස්සධාරා

විජ්ජුල්ලතා විතතමෙඝ මුඛා පමුත්තා,

එවං නරා මරණභීම පපාතමජ්ඣෙ

කාමං පතන්ති නහි කොචි භවෙසු නිච්චො;

14.

වෙලාතටෙ පටුතරොරු තරංගමාලා

නාසං වජන්ති සතතං සලිලාලයස්ස,

නාසං තථා සමුපයන්ති නරාමරානං

පාණානි දාරුණතරෙ මරණොදධිම්හි;

15.

රුද්ධොපි සො රථවරස්සගජාධිපෙහි

යොධෙහි චාපි සබලෙහි ච සායුධෙහි,

ලොකං විවංචිය සදා මරණූසභො සො

කාමං නිහන්ති භුවනත්තය සාලි දණ්ඩං;

16. ¶

භො මාරුතෙන මහතා විහතො පදීපො

ඛිප්පං විනාස මුඛමෙති මහප්පභොපි,

ලොකෙ තථා මරණචණ්ඩ සමීරණෙන

ඛිප්පං විනස්සති නරායුමහා පදීපො;

17

රාමජ්ජුනප්පභූති භූපති පුංගවා ච

සූරා පුරෙ රණමුඛෙ විජිතාරි සඞ්ඝා,

තෙපීහ චණ්ඩ මරණොඝ නිමුග්ගදෙහා

නාසං ගතා ජගති කෙ මරණා පමුත්තා?

18.

ලක්ඛී ච සාගරපටා සධරාධරා ච

සම්පත්තියො ච විවිධා අපි රූපසොභා,

සබ්බා ච තා අපි ච මිත්තසුතා ච දාරා

කෙ චාපි කං අනුගතා මරණං වජන්තං?

19. ¶

බ්රහ්මාසුරාසුරගණා ච මහානුභාවා

ගන්ධබ්බකින්නරමහොරගරක්ඛසා ච,

තෙ චා පරෙ ච මරණග්ගිසිඛාය සබ්බෙ

අන්තෙ පතන්ති සලභා ඉව ඛීණපුඤ්ඤා;

20.

යෙ සාරිපුත්තපමුඛා මුනිසාවකා ච

සුද්ධා සදාසවනුදා පරමිද්ධිපත්තා,

තෙ චාපි මච්චුවළභා මුඛ සන්නිමුග්ගා

දීපානිවානලහතා ඛයතං උපෙතා;

21.

බුද්ධාපි බුද්ධකමලාමලචාරුනෙත්තා

බත්තිංසලක්ඛණ විරාජිත රූපසොභා,

සබ්බාසචක්ඛයකරාපි ච ලොකනාථා

සම්මද්දිතා මරණමත්තමහාගජෙන;

22. ¶

රොගාතුරෙසු කරුණා න ජරාතුරෙසු

ඛිඩ්ඩාපරෙසු සුකුමාරකුමාරකෙසු,

ලොකං සදා හනති මච්චු මහාගජින්දො

දවානලො වනමිවාවරතං අසෙසං;

23.

ආපුණ්ණතා න සලිලෙ න ජලාසයස්ස

කට්ඨස්ස චාපි බහුතා න හුතාසනස්ස,

භුත්වාන සො තිභූවනම්පි තථා අසෙසං

භො නිද්දයො න ඛලු පීතිමුපෙති මච්චු;

24.

භො මොහ මොහිතතයා විවසො අධඤ්ඤො

ලොකො පතත්යපිපි මච්චුමුඛෙ සුභීමෙ,

භොගෙ රතිං සමුපයාති නිහීනපඤ්ඤො

දොලා තරඞ්ගචපලෙ සුපිනොපමෙය්යෙ;

25. ¶

එකොපි මච්චුරභිහන්තුමලං තිලොකං

කිං නිද්දයා අපි ජරාමරණානුයායී,

කො වා කරෙය්ය විභසුවෙසු ච ජීවිතාසං

ජාතො නරො සුපින සංගම සන්නිභෙසු;

26.

නිච්චාතුරං ජගදිදං සභයං සසොකං

දිස්වා ච කොධමදමොහජරාභිභූතං,

උබ්බෙගමත්තමපි යස්ස න විජ්ජතී චෙ

සො දාරුණොන මරණං වත තං ධිරත්ථු!

භො භො න පස්සථ ජරාසිධරඤ්හි මච්චු

මාහඤ්ඤමානමඛිලං සතතං තිලොකං,

කිං නිද්දයා නයථ වීතභයා තියාමං

ධම්මං සදා’සවනුදං චරථ’ප්පමත්තා;

28. ¶

භාවෙථ භො මරණමාරවිවජ්ජනාය

ලොකෙ සදා මරණ සඤ්ඤමිමං යතත්තා,

එවඤ්හි භාවනරතස්ස නරස්ස තස්ස

තණ්හා පහීයති සරීරගතා අසෙසා;

29.

රූපං ජරා පියතරං මලිනීකරොති

සබ්බං බලං හරති අත්තනි ඝොරරොගො,

නානූපභොග පරිරක්ඛිත මත්තභාවං

භො මච්චු සංහරති කිං ඵලමත්තභාවෙ?

30.

කම්මානිලාපහතරොගතරංගභංගෙ

සංසාර සාගර මුඛෙ විතතෙ විපන්නා,

මා මාපමාදමකරිත්ථ කරොථ මොක්ඛං

දුක්ඛොදයො නනු පමාදමයං නරානං;

31. ¶

භොගා ච මිත්තසුතපොරිස බන්ධවා ච

නාරී ච ජීවිතසමා අපි ඛෙත්තවත්ථු,

සබ්බානි තානි පරලොකමිතො වජන්තං

නානුබ්බජන්ති කුසලාකුසලංව ලොකෙ;

32.

භො විජ්ජුචංචලතරෙ භවසාගරම්හි

ඛිත්තා පුරා කතමහාපවනෙන තෙන,

කාමං විභිජ්ජති ඛණෙන සරීරනාවා

හත්ථෙ කරොථ පරමං ගුණහත්ථසාරං;

33.

නිච්චං විභිජ්ජතිහ ආමක භාජනංව

සංරක්ඛිතොපි බහුධා ඉහ අත්තභාවො,

ධම්මං සමාචරථ සග්ගපතිප්පතිට්ඨං

ධම්මො සුචිණ්ණමිහමෙව ඵලං දදාති;

34. ¶

රන්ත්වා සදා පියතරෙ දිවි දෙවරජ්ජෙ

නම්හා චවන්ති විබුධා අපි ඛීණපුඤ්ඤා,

සබ්බං සුඛං දිවි භුවීහ වියොගනිට්ඨං

කො පඤ්ඤවා භවසුඛෙසු රතිං කරෙය්ය?

35.

බුද්ධො සසාවකගණො ජගදෙකනාථො

තාරාවලීපරිවුතොපි ච පුණ්ණචන්දො,

ඉන්දොපි දෙවමකුටංකිත පාදකඤ්ජො

කො ඵෙණපිණ්ඩ-න-සමො තිභවෙසු ජාතො?

36.

ලීලාවතංසමපි යොබ්බන රූපසොභං

අත්තූපමං පියජනෙන ච සම්පයොගං,

දිස්වාපි විජ්ජුචපලං කුරුතෙ පමාදං

භො මොහමොහිතජනො භවරාගරත්තො;

37. ¶

පුත්තො පිතා භවති මාතු පතීහ පුත්තො

නාරී කදාචි ජනනී ච පිතා ච පුත්තො,

එවං සදා විපරිවත්තති ජීවලොකො

චිත්තෙ සදාතිචපලෙ ඛලු ජාතිරඞ්ගෙ;

38.

රන්ත්වා පුරෙ විවිධඵුල්ලලතාකුලෙහි

දෙවාපි නන්දනවනෙ සුරසුන්දරීහි,

තෙ වෙ’කදා විතතකණ්ටකසංකටෙසු

භො කොටිසිම්බලිවනෙසු ඵුසන්ති දුක්ඛං;

39.

භුත්වා සුධන්නමපි කඤ්චනභාජනෙසු

සග්ගෙ පුරෙ සුරවරා පරමිද්ධිපත්තා,

තෙ චාපි පජ්ජලිතලොහගුලං ගිලන්ති

කාමං කදාචි නරකාලය වාසභූතා;

40. ¶

භුත්වා නරිස්සරවරා ච මහිං අසෙසං

දෙවාධිපා ච දිවි දිබ්බසුඛං සුරම්මං,

වාසං කදාචි ඛුරසඤ්චිතභූතලෙසු

තෙ වා මහාරථගණානුගතා දිවීහ;

41.

දෙවඞ්ගනා ලලිතභින්නතරඞ්ගමාලෙ

රඞ්ගෙ මහිස්සරජටාමකුටානුයාතෙ,

රන්ත්වා පුරෙ සුරවරා පමදාසහායා

තෙ චාපි ඝොරතරවෙතරණිං පතන්ති;

42.

ඵුල්ලානි පල්ලවලතාඵලසංකුලානි

රම්මානි නන්දනවනානි මනොරමානි,

දිබ්බච්ඡරාලලිතපුණ්ණදරීමුඛානි

කෙලාසමෙරුසිඛරානි ච යන්ති නාසං;

43. ¶

දොලා’නිලා’නලතරංගසමා හි භොගා

විජ්ජුප්පභාතිචපලානි ච ජීවිතානි,

මායාමරීචිජලසොමසමං සරීරං

කො ජීවිතෙ ච විභවෙ ච කරෙය්ය රාගං?

44.

කිං දුක්ඛමත්ථි න භවෙසු ච දාරුණෙසු

සත්තොපි තස්ස විවිධස්ස න භාජනො කො,

ජාතො යථා මරණරොගජරාභිභූතො

කො සජ්ජනො භවරතිං පිහයෙය්ය’බාලො?

45.

කෙ වාපි පජ්ජලිතලොහගුලං ගිලන්ති

සක්කා කථඤ්චිදපි පාණිතලෙන භීමං,

දුක්ඛොදයං අසුචිනිස්සවනං අනන්තං

කො කාමයෙථ ඛලු දෙහමිමං අබාලො?

46. ¶

ලොකෙ න මච්චුසමමත්ථි භයං නරානං

න ව්යාධිදුක්ඛසමමත්ථි ච කිංචි දුක්ඛං,

එවං විරූපකරණං න ජරාසමානං

මොහෙන භො රතිමුපෙති තථාපි දෙහෙ;

47.

නිස්සාරතො නලකලීකදලීසමානං

අත්තානමෙව පරිහඤ්ඤති අත්තහෙතු,

සම්පොසිතොපි කුසහාය ඉවාකතඤ්ඤූ

කායො න යස්ස අනුගච්ඡති කාලකෙරා;

48.

තං ඵෙණපිණ්ඩසදිසං විසසූලකප්පං

තොයා’නිලා’නලමහීඋරගාධිවාසං,

ජිණ්ණාලයංව පරිදුබ්බලමත්තභාවං

දිස්වා නරො කථමුපෙති රතිං සපඤ්ඤො?

49. ¶

ආයුක්ඛයං සමුපයාති ඛණෙ ඛණෙපි

අන්වෙති මච්චු හනනාය ජරාසිපාණී,

කාලං තථා න පරිවත්තති තං අතීතං

දුක්ඛං ඉදං නනු භවෙසු අචින්තනීයං?

50.

අප්පායුකස්ස මරණං සුලභං භවෙසු

දීඝායුකස්ස ච ජරා ව්යසනං ච’නෙකං,

එවං භවෙ උභයතොපි ච දුක්ඛමෙව

ධම්මං සමාචරථ දුක්ඛවිනාසනාය;

51.

දුක්ඛග්ගිනා සුමහතා පරිපීළිතෙසු

ලොකත්තයස්ස වසතො භවවාරකෙසු,

සබ්බත්තතා සුචරිතස්ස පමාදකාලො

භො භො න හොති පරමං කුසලං චිණාථ;

52. ¶

අප්පං සුඛං ජලලවං විය භො තිණග්ගෙ

දුක්ඛන්තු සාගරජලං විය සබ්බලොකෙ,

සංකප්පනා තදපි හොති සභාවතො හි

සබ්බං තිලොකමපි කෙවලදුක්ඛමෙව;

53.

කායො න යස්ස අනුගච්ඡති කායහෙතු

බාලො අනෙකවිධමාචරතීහ දුක්ඛං,

කායො සදා කලි මලාකලිලඤ්හි ලොකෙ

කායෙ රතො’නවරතං ව්යසනං පරෙති

54.

මීළ්හාකරං කලිමලාකරමාමගන්ධං

සූළාසිසල්ලවිසපන්නගරොගභූතං,

දෙහං විපස්සථ ජරාමරණාධිවාසං

තුච්ඡං සදා විගතසාරමිමං විනින්ද්යං;

55. ¶

දුක්ඛං අනිච්චමසුභං වත අත්තභාවං

මා සංකිලෙසය න විජ්ජති ජාතු නිච්චො,

අම්භො න විජ්ජති හි අප්පමපීහ සාරං

සාරං සමාචරථ ධම්මමලං පමාදං;

56.

මායාමරීචිකදලීනලඵෙණපුඤ්ජ-

ගංගාතරඞ්ගජලබුබ්බුලසන්නිභෙසු,

ඛන්ධෙසු පඤ්චසු ඡළායතනෙසු තෙසු

අත්තා න විජ්ජති හි කො න වදෙය්ය’බාලො?

57.

වඤ්ඣාසුතො සසවිසාණමයෙ රථෙ තු,

ධාවෙය්ය චෙ චිරතරං සධුරං ගහෙත්වා,

දීපච්චිමාලමිව තං ඛණභඞ්ගභූතං

අත්තාති දුබ්බලතරන්තු වදෙය්ය දෙහං;

58. ¶

බාලො යථා සලිලබුබ්බුලභාජනෙන

ආකණ්ඨතො වත පිබෙය්ය මරීචිතොයං,

අත්තානි සාරරහිතං කදලීසමානං

මොහා භණෙය්ය ඛලු දෙහමිමං අනත්තං;

59.

යො’දුම්බරස්ස කුසුමෙන මරීචිතොයං

වාසං යදිච්ඡති ස ඛෙදමුපෙති බාලො,

අත්තානමෙව පරිහඤ්ඤති අත්තහෙතු

අත්තා න විජ්ජති කදාචිදපීහ දෙහෙ;

60.

පොසො යථා හි කදලී සුවිනිබ්භුජන්තො

සාරං තදප්පම්පි නොපලභෙය්ය කාමං,

ඛන්ධෙසු පංචසු ඡළායතනෙසු තෙසු

සුඤ්ඤෙසු කිඤ්චිදපි නොපලභෙය්ය සාරං;

61. ¶

සුත්තං විනා න පටභාවමිහත්ථි කිංචි

දෙහං විනා න ඛලු කොචි මිහත්ථි සත්තො,

දෙහො සභාවරහිතො ඛණභංගයුත්තො,

කො අත්තහෙතු අපරො භුවි විජ්ජතීහ?

62.

දිස්වා මරීචිසලිලඤ්හි සුදූරතො භො

බාලො මිගො සමුපධාවති තොයසඤ්ඤී,

එවං සභාවරහිතෙ විපරීතසිද්ධෙ

දෙහෙ පරෙති පරිකප්පනයා හි රාගං;

63.

දෙහෙ සභාවරහිතෙ පරිකප්පසිද්ධෙ

අත්තා න විජ්ජති හි විජ්ජුමිවන්තලික්ඛෙ,

භාවෙථ භාවනරතා විගතප්පමාදා

සබ්බාසවප්පහනනාය අනත්තසඤ්ඤං;

64. ¶

ලාලාකරීසරුධිරස්සුවසානුලිත්තං

දෙහං ඉමං කලිමලාකලිලං අසාරං,

සත්තා සදා පරිහරන්ති ජිගුච්ඡනීයං

නානාසුචීහි පරිපුණ්ණඝටං යථෙව;

65.

ණහාත්වා ජලඤ්හි සකලං චතුසාගරස්ස

මෙරුප්පමාණමපි ගන්ධමනුත්තරඤ්ච,

පප්පොති නෙව මනුජො හි සුචිං කදාචි

කිං භො විපස්සථ ගුණං කිමු අත්තභාවෙ?

66.

දෙහො ස එව විවිධාසුචිසන්නිධානො

දෙහො ස එව වධබන්ධනරොගභූතො,

දෙහො ස එව නවධා පරිභින්නගණ්ඩො

දෙහං විනා භයකරං න සුසානමත්ථි;

67. ¶

අන්තොගතං යදිව මුත්තකරීසභාගො

දෙහා බහිං අතිචරෙය්ය විනික්ඛමිත්වා,

මාතා පිතා විකරුණා ච විනට්ඨපෙමා

කාමං භවෙය්යු කිමු බන්ධුසුතා ච දාරා?

68.

දෙහං යථා නවමුඛං කිමිසඞ්ඝගෙහං

මංසට්ඨිසෙදරුධිරාකලිලං විගන්ධං,

පොසෙන්ති යෙ විවිධපාපමිහාචරිත්වා

තෙ මොහිතා මරණධම්මමහො වතෙවං!

69.

ගණ්ඩූපමෙ විවිධරොග නිවාසභූතෙ

කායෙ සදා රුධිරමුත්තකරීසපුණ්ණෙ,

යො එත්ථ නන්දති නරො සසිගාලභක්ඛෙ

කාමඤ්හි සොචති පරත්ථ ස බාලබුද්ධි;

70. ¶

භො ඵෙණපිණ්ඩසදිසො විය සාරහීනො

මීළ්හාලයො විය සදා පටිකූලගන්ධො,

ආසීවිසාලයනිභො සභයො සදුක්ඛො

දෙහො සදා සවති ලොණඝටොව භින්නො;

71.

ජාතං යථා න කමලං භුවි නින්දනීයං

පඞ්කෙසු භො අසුචිතොය සමාකුලෙසු,

ජාතං තථා පරහිතම්පි ච දෙහභූතං

තං නින්දනීයමිහ ජාතු න හොති ලොකෙ;

72.

ද්වත්තිංසභාගපරිපූරතරො විසෙසො

කායො යථා හි නරනාරි ගණස්ස ලොකෙ,

කායෙසු කිං ඵලමිහත්ථි ච පණ්ඩිතානං

කාමං තදෙව නනු හොති පරොපකාරං;

73. ¶

පොසොන පණ්ඩිතතරෙන තථාපි දෙහො

සබ්බත්තනා චිරතරං පරිපාලනීයො,

ධම්මං චරෙය්ය සුචිරං ඛලු ජීවමානො

ධම්මෙ හවෙ මණිවරො ඉව කාමදො භො

74.

ඛීරෙ යථා සුපරිභාවිතමොසධම්හි

ස්නෙහෙන ඔසධබලං පරිභාසතෙව,

ධම්මො තථා ඉහ සමාචරිතො හි ලොකෙ

ඡායාව යාති පරලොක මිතො වජන්තං;

75.

කායස්ස භො විරචිතස්ස යථානුකූලං

ඡායා විභාති රුචිරාමලදප්පණෙ තු,

කත්වා තථෙව පරමං කුසලං පරත්ථ

සම්භූසිතා ඉව භවන්ති ඵලෙන තෙන;

76. ¶

දෙහෙ තථා විවිධදුක්ඛ නිවාසභූතෙ

මොහා පමාදවසගා සුඛසඤ්ඤමූළ්හා,

තික්ඛෙ යථා ඛුරමුඛෙ මධුලෙහමානො

බාළ්හඤ්ච දුක්ඛමනුගච්ඡති හීනපඤ්ඤො;

77.

සංකප්පරාගවිගතෙ නිරතත්තභාවෙ

දුක්ඛං සදා සමධිගච්ඡති අප්පපඤ්ඤො,

මූළ්හස්ස චෙව සුඛසඤ්ඤමිහත්ථිලොකෙ

කිංපක්කමෙව නනු හොති විචාරමානෙ;

78.

සබ්බොපභොග ධනධඤ්ඤවිසෙසලාභී

රූපෙන භො ස මකරද්ධජසන්නිභොපි,

යො යොබ්බනෙපි මරණං ලභතෙ අකාමං

කාමං පරත්ථපරපාණහරො නරො හි;

79.

සො යාචකො භවති භින්නකපාලහත්ථො

මුණ්ඩො ධිගක්ඛරසතෙහි ච තජ්ජයන්තො,

භික්ඛං සදාරිභවනෙ සකුචෙලවාසො

දෙහෙ පරත්ථි පරචිත්තහරො නරො යො;

80. ¶

ඉත්ථී නමුඤ්චති සදා පුන ඉත්ථිභාවා

නාරී සදා භවති සො පුරිසො පරත්ථ,

යො ආචරෙය්ය පරදාරමලඞ්ඝනීයං

ඝොරඤ්ච වින්දති සදා ව්යසනඤ්ච නෙකං;

81.

දීනො විගන්ධවදනො ච ජළො අපඤ්ඤො

මූගො සදා භවති අප්පියදස්සනො ච,

පප්පොති දුක්ඛමතුලඤ්ච මනුස්සභූතො

වාචං මුසා භණති යො හි අපඤ්ඤසත්තො;

82.

උම්මත්තකා විගතලජ්ජගුණා භවන්ති

දීනා සදා ව්යසනසොකපරායණා ච,

ජාතා භවෙසු විවිධෙසු විරූපදෙහා

පීත්වා හලාහලවිසංව සුරං විපඤ්ඤා;

83.

පාපානි යෙන ඉහ ආචරිතානි යානි

යො වස්සකොටිනහුතානි අනප්පකානි,

ලද්ධාන ඝොරමතුලං නරකෙසු දුක්ඛං

පප්පොති චෙත්ථ විවිධව්යසනඤ්ච නෙකං;

84. ¶

ලොකත්තයෙසු සකලෙසු සමං න කිංචි

ලොකස්ස සන්තිකරණං රතනත්තයෙන,

තංතෙජසා සුමහතා ජිතසබ්බපාපො

සොහං සදාධිගතසබ්බසුඛො භවෙය්යං;

85.

ලොකත්තයෙසු සකලෙසු ච සබ්බසත්තා

මිත්තා ච මජ්ඣරිපුබන්ධුජනා ච සබ්බෙ,

තෙ සබ්බදා විගතරොගභයා විසොකා

සබ්බං සුඛං අධිගතා මුදිතා භවන්තු;

86.

කායො කරීසභරිතො විය භින්නකුම්භො

කායො සදා කලිමලව්යසනාධිවාසො,

කායෙ විහඤ්ඤති ච සබ්බසුඛන්ති ලොකො

කායො සදා මරණරොගජරාධිවාසො;

87. ¶

සො යොබ්බනොති ථවිරොති ච බාලකොති

සත්තෙ න පෙක්ඛති විහඤ්ඤතිරෙව මච්චු,

සොහං ඨිතොපි සයිතොපි ච පක්කමන්තො

ගච්ඡාමි මච්චුවදනං නියතං තථා හි;

88.

එවං යථා විහිතදොසමිදං සරීරං

නිච්චංව තග්ගතමනා හදයෙ කරොථ,

මෙත්තං පරිත්තමසුභං මරණස්සතිඤ්ච

භාවෙථ භාවනරතා සතතං යතත්තා;

89.

දානාදි පුඤ්ඤකිරියානි සුඛුද්රයානි

කත්වා ච තම්ඵලමසෙස මිහප්පමෙය්යං,

දෙය්යං සදා පරහිතාය සුඛාය චෙව

කිම්භො තදෙව නනු හත්ථගතඤ්හි සාරං?

90.

හෙතුං විනා න භවතී හි ච කිංචි ලොකෙ

සද්දොව පාණිතලඝට්ටනහෙතුජාතො,

එවඤ්ච හෙතුඵල භාවවිභාගභින්නො

ලොකො උදෙති ච විනස්සති තිට්ඨතී ච;

91. ¶

කම්මස්ස කාරණාමයඤ්හි යථා අවිජ්ජා

භො කම්මනා සමධිගච්ඡති ජාතිභෙදං,

ජාතිං පටිච්ච ච ජරාමරණාදිදුක්ඛං

සත්තා සදා පටිලභන්ති අනාදිකාලෙ;

92.

කම්මං යථා න භවතීහ ච මොහනාසා

කම්මක්ඛයාපි ච න හොති භවෙසු ජාති,

ජාතික්ඛයා ඉහ ජරාමරණාදිදුක්ඛං

සබ්බක්ඛයො භවති දීපෙවානිලෙන;

93.

යො පස්සතීහ සතතං මුනිධම්මකායං

බුද්ධං ස පස්සති නරො ඉති සො අවොච,

බුද්ධඤ්ච ධම්මමමලඤ්ච තිලොකනාථං

සම්පස්සිතුං විචිනථා’පි ච ධම්මතං භො;

94. ¶

සල්ලංව භො සුනිසිතං හදයෙ නිමුග්ගං

දොසත්තයං විවිධපාපමලෙන ලිත්තං,

නානාවිධබ්යසනභාජනමප්පසන්නං

පඤ්ඤාමයෙන බලිසෙන නිරාකරොථ;

95.

නාකම්පයන්ති සකලාපි ච ලොකධම්මා

චිත්තං සදාපගතපාපකිලෙසසල්ලං,

රූපාදයො ච විවිධා විසයා සමග්ගා

ඵුට්ඨංව මෙරුසිඛරං මහතානිලෙන;

96.

සංසාරදුක්ඛමගණෙය්ය යථා මුනින්දො

ගම්භිරපාරමිත සාගරමුත්තරිත්වා,

ඤෙය්යං අබොධි නිපුණං හතමොහජාලො

තස්මා සදා පරහිතං පරමං චිණාථ;

97.

ඔහාය සො’ධිගතමොක්ඛසුඛං පරෙසං

අත්ථාය සංචරි භවෙසු මහබ්භයෙසු,

එවං සදා පරහිතං පුරතො කරිත්වා

ධම්මො මයානුචරිතො ජගදත්ථමෙව;

98. ¶

ලද්ධාන දුල්ලභතරඤ්ච මනුස්සයොනිං

සබ්බං පපඤ්චරහිතං ඛණසම්පදඤ්ච,

ඤත්වාන ආසවනුදෙකහිතඤ්ච ධම්මං

කො පඤ්ඤවා අනවරං න භජෙය්ය ධම්මං?

99.

ලද්ධාන බුද්ධසමයං අතිදුල්ලභංච

සද්ධම්ම මග්ගමසමං සිවදං තථෙව,

කල්යාණමිත්තපවරෙ මතිසම්පදඤ්ච

කො බුද්ධිමා අනවරං න භජෙය්ය ධම්මං?

100.

එවම්පි දුල්ලභතරං විභවෙ සුලද්ධා

මච්ඡෙරදොස විරතා උභයත්ථකාමා,

සද්ධාදිධම්මසහිතා සතතප්පමත්තා

භො! භො! කරොථ අමතාධිගමාය පුඤ්ඤං;