📜
నమో తస్స భగవతో అరహతో సమ్మాసమ్బుద్ధస్స
మహాపణామపాఠ
(బుద్ధవన్దనా)
సో ¶ , కో; నే, సం;
సత్థా, నేసం; ఖేమం, దాతా;
హేళాత-క్కారో సో; జన్తూనం, నో మా ను;
సో లోకన్ధం, హన్త్వా నక్కో;
సత్తమ్బోజం, బోధేతా ను.
జినసూరియో, తిభవనభే;
ముహతిమిరం, అభితపయే.
జేనో జినమూలే, దిస్వా జనకాయం;
సంసారనిముగ్గం, సబ్బఞ్ఞుత మిచ్ఛం.
హిత్వా కరుపేతం, మోక్ఖం పణిధానం;
వత్తేసి దయాణా, యో తం ముని వన్దే.
సుతాయుభరియా మే, ధనఙ్గమపి చజ్జం.
చినం బుధినిదానే, అగా మునియం మేతం.
సో ససజాతియ దేహం, చజ్జియ దానవరఞ్చ;
నాగుసభో వరసీలం, పూరయి సమ్పరిచాగో.
నేక్ఖమ్మగ్గం రాజా హుత్వా, సేనబ్బిద్వా పఞ్ఞాసేట్ఠం;
వేదేహిన్దో వీరుక్కంసం, ఖన్తీవాదీ ఖన్తీసేట్ఠం.
సో సుతసోమో తథగం, తేమియ ధిట్ఠానవరం;
ఏకభుగో మేత్తవరం, లోమహసోపేక్ఖతరం.
పారమీ ¶ తిదుక్కరావ, పూరియాన సేట్ఠబోధి;
పాపుణిత్థ యో అనన్త-ధమ్మసారదం నమామి.
పహాయ చక్కవత్తికం, కరోపనీత మద్దియం;
భుసిధరే ససేనకం, అజేని పాపిమం నమే.
అథుత్తరం జయాకరం, బహూపకారతం జినో;
పటిచ్చ నిమ్మిసక్ఖిభి, ఉదిక్ఖతే నమామి తం.
చఙ్కమే మరువిమతి యో, ఛిన్దయం కమి రతనియే;
ఇద్ధిపాటిహిరణకరో, చక్ఖుమం తమభిపణమే.
అథ రతనఘరే బుద్ధో, ఛదిధితి జనయం సఙ్ఖ్యం;
సీమీసా తమభిధమ్మం యో, సురనరమహితం వన్దే.
నిగ్రోధన్తిక నుబ్భవీ సుఖం, ధమ్మం యో విచినం నధీవరో;
కిచ్ఛాలద్ధ మనఞ్ఞబోధియం, వన్దే తం సుగతం నిగ్రోచరం.
సబ్భోగేహి థ ముచలిన్దేన,
నాగిన్దేన రహసి పావుత్తో;
సోఖ్యం యో నుభవి విముత్తింతం,
వన్దే మారాజి అతులప్పఞ్ఞో.
కారుణికో రాజాయతనే యో,
భోజ ముళారం భోజ్జరసేకం;
వాస మకా నన్తగ్గుణధారో,
ఏకగతో వన్దామి మహేసీ.
కేయ్యం కేయ్యం అభిజయకేతుం,
జేయ్యం జేయ్యం వరజయపానం;
పేయ్యం పేయ్యం సువిచి నమే తం,
నేయ్యం నేయ్యం సమతముపేక్ఖిం.
సత్త చ సత్తాహే విజితావీ,
ఖేపియ నిగ్రోధం పున గన్త్వా;
ధమ్మసుదుద్దస్యం పతి జాతో,
ధమ్మకథా ప్పోసుక్క వితక్కో.
మరుగణేహి ¶ బ్రహ్మునా సమం,
రతనదామమేరుణా దదా;
సమభియాచితో పటిస్సవం,
దసబలో నమామి దేసితుం.
గన్త్వా ఇసిప్పాతక్కాననఞ్చ,
సత్థా మిగద్దాయం దేసయిత్థ;
సచ్చప్పకారం యో ధమ్మచక్క-
సుత్తం నమే ఛబ్బీధంసు తావ.
రఞ్ఞో మగధస్స కతప్పటిఞ్ఞో,
గన్త్వానథ రాజగహం వినేతి;
సత్తే మలరోగయుతే గదగ్గం,
పాయేతున తం పణమే భిసక్కం.
సక్యాధివాసే కపిలే సఞ్ఞతిం,
మానద్ధజం భిన్దియ మిద్ధివాతా;
ధమ్మామతం పాయి పితుప్పభుతి,
వన్దామి సక్యిన్ద మనోమదస్సిం.
అనాథపిణ్డోతి వ్హయేన నన్త-
ద్ధనం చజిత్వా సుకతే విహారే;
విహాసి భియ్యో జనతా హితత్థం,
సుధమ్మభేరిం వదయం భివన్దే.
ఉపేతపుఞ్ఞం వరలక్ఖణోకం-
ణోకం విసుద్ధం జలితప్పదీమం;
దీపం పజానం అనిఘం నవజ్జం-
నవజ్జవాచం సుగతం నమామి.
మునిభాను ధమ్మపభాహి జన-
మ్బుజ ముద్ధతన్ధతమో సుతపో;
కరుణారుణో సమబోధయి యో,
భవిసీతలత్తపనో పణమే.
ఇన్దు వియమ్బరమజ్ఝతలే యో,
రాజతి తారగణేన మునిన్దో;
అరియగణప్పరితో తిభవే తం,
సాదర ముగ్గతసోభ మవన్ది.
మూలామూలా ¶ తింసతిపారమియో,
సాఖాసాఖా మజ్ఝిమజ్ఝానకాయా;
పత్తాపత్తా బుద్ధచక్ఖుని యస్స,
పుప్ఫాపుప్ఫా కారుణా మగ్గఖన్ధో.
సారాసారా యమకా ఫేగ్గుభిఞ్ఞా,
సబ్బాలమ్బఙ్కురకం సీలవణ్టం;
సేసాధమ్మా మధుపక్కప్ఫలాని,
రంసీఛల్లీ సుతచా లక్ఖణాని.
ఛాయుపగా సుం పుథునరదేవా,
మారజిదీపఙ్కర మహిజాతం;
పత్థతనన్తఞ్చ కుసలబీజం,
ఏకరుహం పాదపముని వన్దే.
మారతిత్థియరిపుం తమఞ్చ యో,
ధంసయం నగరధమ్మ మాపయం;
సీలనీవరణ ద్వారకోట్ఠకం,
ఏసికాపరమసద్ధ ముత్తమం.
ద్వారపాలసుయతం సతిటాలం,
ఞాణచచ్చర సిఘాటపదిద్ధిం;
ధమ్మమగ్గకుటిసాల సహిత్తం,
ధమ్మసేనపతిసారిజభూతం.
దుతియసుతపరోహితం మహా-
ధుతగుణధరమగ్ఘ దస్సికం;
వినయచినక ధమ్మరక్ఖకం,
తిభవపతిక ధమ్మరాజియం.
సుతం సుతం సబ్బధి సజ్జనంజనం,
మితం మితం నన్తగుణాలయం లయం;
హుతం హుతం జన్తునమానమం నమం,
భవే భవే తేభవమఙ్గలం గలం.
లోకాభిరామం రమణేయ్యవేదురం,
లోకన్తగుం అన్తుభయానుపాగతం;
లోకద్ధజం మానధజప్పహారకం,
లోకగ్గరుం అగ్గరు పచ్చయే నమే.
మకుటగ్గఫలం ¶ నయనఞ్చనికం,
సవనబ్భుసనం వదనబ్భుసనం;
గలమణ్డనమిద్ధి మనఞ్ఞురసం,
కిరియఞ్ఞుదరం ద్విఖణఞ్ఞుకరం.
కటివిభూసన మజ్ఝిమఞ్ఞణకం,
దయవిలేపన ధారణమణ్డనం;
పటఖిలఞ్ఞునివత్థ మనుత్తరం,
మునిమరుత్తమ మేక మహం నమే.
సతివర సుచకం ఇబ్భగ్గపఞ్ఞం,
సువీరియవసువాహం పీతిసేలం;
గహపతిసమథగ్గం థీపసద్ధిం,
అసణియసునుపేక్ఖం సత్తభోగం.
చతుదిసికిద్ధిప్పద మసహాయం,
సుపరివుతం ఖత్తియవిరజానం;
సుచిపరిసం దేవనర మనాపం,
దసబలచక్కాధిపతి భివన్దే.
సమాధిబ్బహిద్ధం సతిచ్ఛట్ఠసేలం,
విరప్పఞ్చమా జీవమజ్ఝం సుకమ్మ-
త్తతియం సువాచాదుతియం భిసేట్ఠం,
సమాతక్కపుబ్బఞ్చ సత్తప్పవారం.
వివిధఞాణపభుతిబ్బసాకరం,
బహుమహిద్ధిక మరూన మాసయం;
ధుంవపభాజలితరామణేయ్యకం,
సుగతనేరునగరాజ మానమే.
సీలజ్జలం రతనధమ్మ మాకరం,
భిఞ్ఞావిచిం సతికులట్ఠి గమ్భిరం;
విత్థిణ్ణఞాణ మరియోదజాసయం,
అట్ఠమ్బీధచ్ఛరియకం అసన్దనం.
బహునజ్జమోసరణ మేకరసం,
దురుపగ్గమం అచితసమ్భరినం;
పుథుపోతపుఞ్ఞవతమేవ నమే,
ద్వీపదుత్తమణ్ణవ నదిన్దవరం.
అభినిహరధనుం ¶ గుణపారమిం,
నళమతిమనబాజరహమ్ముఖా;
ధితిసమితసరేన సుధారయం,
మలమ గగణ మేకపవేదనా.
యో పావేధేసిం అగ్గమగ్గఞ్చ తూణిం,
ధమ్మాలఙ్కారబ్బమ్మ మేకబ్బలం తం;
నేత్తింసానన్తఞాణ గీరేల్లిమన్తం,
సబ్బఞ్ఞుస్సాసం ఇద్ధిదణ్డం నమామి.
వరతపవుట్ఠి సుబీజకసద్ధా,
మతియుగనఙ్గల హీరుతపీసా;
సుసమథరజ్జు సతిద్విజతుత్తం,
వీరియదురావహ సచ్చనిదానం.
వతిసంవరం సోరతమోచనఞ్చం,
సరణా నివత్తబ్బహనత్థం యస్స;
అమతప్ఫలం నేకరసేహుపేతం,
సుగతం మహాకస్సక మాభివన్దే.
దేవగ్గో తిదసపురే వరాసనే యో,
దేవానం జనికపభుతినం భిధమ్మం;
బాలక్కోవ లళయమాచలే తిమాసం,
దేసేస్యా పరవిసయం నమే అజేయ్యో.
మహాయసో వివిధసుభప్పకాసకం,
కురూసు యో అమితగుణో తమోనుదో;
పరప్పవాదహరి సుభానుయోగినం,
నమామి తం కథయి సతిప్పఠానకం.
సమథకపలికో సస్నేహసమ్మాసతి,
పరమమతిగినీ సవట్టిపరక్కమో;
సకలజుతికరో సుధమ్మపదీపకో,
ఇమ ముపజలితో జినేన నమామహం.
విగతగతమలం మలగతవిగతం,
మహిత హితమనం మనహితమహితం;
విభవభవకరం కరభవవిభవం,
సుజన జనగుణం గుణజనసుజనం.
సీలగ్గదణ్డవిచితం ¶ సుసమాధిపత్తం,
సోభాసముజ్జల మనన్తగ ఞాణసీఖం;
సద్ధమ్మసేట్ఠరతనఞ్చ తిలోకకేతుం,
వన్దామి లోచనభిసేక సుసోభయుత్తం.
వినయనయ మనయవినయ మనమితం,
విజయజయ మజయవిజయ మతులితం;
విభజభజ మభజవిభజ మననకం,
విసమసమ మసమవిసమ మభినమే.
పరమరమ మరమపరమ మతిగుణం,
పగహగతి మగతిపగత మమమకం;
పచయచయ మచయపపయ మనణకం,
పకతకత మకతపకత మచలకం.
ఉజుక మయనమగ్గే మోక్ఖదేసం నియాసి,
వరరథకుజరేన చమ్మచక్కేన సత్థా;
హిరితపదుకపాలమ్బేన ధమ్మస్సుతేన,
సతినివరయుతేన ప్పాటిహిరద్ధజేన.
అవిహననక్ఖినా సుయమ నేముపక్ఖరా,
ఉదరియమబ్భినా పరిపురఙ్గసచ్చినా;
కుసలవిభూసినా నిమదకుప్పరేన యో,
అఖరనతేసినా గుపితసిలనన్దనా.
అనుసనుఘాతినా మతిపురేజవేన కాల-
ఞ్ఞుతమతిసారికే న చ విసారదత్థిదణ్డా;
సతితుద ధీతిరస్మి మనదమ్మసిన్ధవేన,
వినయగణే నమామి త మతుల్యసత్థవాహం.
యమక్కగ్గిజాలం పరవిసయ మచ్ఛేరసహితం,
దుదిట్ఠన్ధుబ్బాహం యుగగహణతిత్థీన మకరీ;
బహూనం మజ్ఝే యో రతనకమనే పాటిహరియం,
జయక్కేతుస్సాపి త మభినమి కణ్టమ్బసమిపే.
నఖజుతిరజం చక్కఙ్గోపేత పాదవరమ్బుజం,
సుభసిరిమతో రంసిజాలఙ్గులిదససంసుభిం;
పవరసిరసా దేవాదేవా సదా న పిలన్ధయుం,
త మతివ మనోరమ్మం తిత్తీకరా నమి యస్స కే.
బుద్ధోప్యేకో ¶ నిధనగుణినో వణ్ణయే యావజీవం,
కామం అఞ్ఞం కథమభణ మాసుం ఖియేథా యుకప్పో;
న త్వేవా యం ఖయ ముపవజ్జే యస్స వణ్ణో అనన్తో,
తం సబ్బఞ్ఞుం సకలరిరీ నేకనాథం నమామి.
పాదిదీపాదం ద్వినయనదిజం ధమ్మకాయం ధిసోణ్డం,
భాణీసోణ్డగ్గం సరణసిరసిం మగ్గావాలం సుభఙ్గం;
సీలాలఙ్కారం విమలిభవు తం సత్తతిట్ఠిధిదబ్బం,
నాథేభిన్దగ్గం ఫలకరిణుకం మోక్ఖభోజం నమామి.
మలాలోళుల్లోలం అతిభయజనం దుగ్గసంసారసిన్దుం,
ఫియబ్భానిగ్గాహో సివతటముఖో నావి కజ్జేట్ఠనాథో;
పదప్పారక్కామం బహుజనగణం ఏకమగ్గత్తరమ్హి,
సమారోపేత్వా మత్తరి త మతులసాదరఞ్చా భివన్దే.
బ్యామంసుగ్ఘనధార మక్కుళుసతబ్భాణుజ్జలన్తత్తనం,
ఉక్కంసజ్జుతి కేతుమాలవిచితం సద్ధమ్మజోతిన్ధరం;
బున్దిన్నిగ్గతపజ్జలన్త దిధితిం అజ్జత్థనా యావ చ,
వన్దేతం ముని సక్యపుఙ్గవ మహం పుణ్ణిన్దువత్తమ్పి చ.
సత్తమంతమం వినాసకంసకం దదం వినేయ్యకానమేవ,
భావనంవనం ధులీకరం కరం తిదుక్కరం పజాభిభుఞ్జ;
గారవంరవం మనోహరంహరం నరానరానయం నమామి,
సాదరందరం వినోదకందకం పవస్సకం పజానమివ.
బుద్ధో నిగ్రోధబిమ్బో ముదుకరచరణో బ్రహ్మఘోసేణిజఙ్ఘో,
కోసచ్ఛాదఙ్గజాతో పునరపి సుగతో సుప్పతిట్ఠితపాదో;
ముదోదాతుణ్ణలోమో అథమపి సుగతో బ్రహ్ముజుగ్గత్తభావో,
నీలక్ఖీ దీఘపణ్హీ సుఖుమమలఛవీ థోమ్యరస్సగ్గసగ్గీ.
చత్తాలీసగ్గదన్తో సమకలపనజో అన్తరంసప్పపీణో,
చక్కేనఙ్కీతపాదో అవిరళదసనో మారజుస్సఙ్ఖపాదో;
తిట్ఠన్తోనోమేన్తో భయకరముదునా జణ్ణుకానా మసన్తో,
వట్టక్ఖన్ధో జినో గోతరుణపఖుమకో సీహపుబ్బడ్ఢుకాయో.
సత్తప్పీణో చ దీఘఙ్గులం మథ సుగతో లోమకూపేకలోమో,
సమ్పన్నోదాతదాఠో కనకసమతచో నీలముద్ధగ్గలోమో;
సమ్బుద్ధో థూలజివ్హో అథ సీహహనుకో జాలికప్పాదహత్థో,
నాథో ఉణ్హీససీసో ఇతి గుణసహితం తం మహేసిం నమామి.
వట్టచితానుపుబ్బకసుభఙ్గులీ ¶ రుహిరమట్ఠతుఙ్గనఖకో,
నిగ్గుళగోప్ఫకో సమపదో సీహోసభిభ హంససన్నిభకమో;
దక్ఖిణతావతక్కమి సమన్తమణ్డల నిగణ్ఠి జాణుసుభకో,
బ్యఞ్జనపుణ్ణపోసతను నాభిగమ్భీర అఛిద్దదక్ఖిణవటో.
ద్విరదకరప్పకాసురుభుజో సువిబ్భజనుపుబ్బమట్ఠఅనునా-
నునఅలినానుపుబ్బరుచిర త్తిలాదిరహితబ్బిసుద్ధతనుకో;
దససతకోటి హత్థిబలధారణో కనకతుఙ్గనాసికసుభో,
సురుహిరదన్తమంసథ సుచిసినిద్ధదసనో థ లోకసరణో.
సుద్ధపసాదిన్ద్రి చ వట్టతరదాఠో రుహిరోట్ఠ చ సురనరనాథో,
ఆయతసోభబ్బదనో థ ముని గమ్భీరుజుకాయతసురుచిరలేఖో;
బ్యామపభామణ్డలబున్ది సుపురగ్గణ్ణి చ ఆయతవిసటసుభక్ఖీ,
పఞ్చపసాదక్ఖి చ కుఞ్చికసుభగ్గపఖుమో ముదుతనురుణజివ్హో.
సోమ్మసినిద్ధ త్యుజ్జలకోమల వరుణవిమలతను చ అమితగుణో,
కోమల దక్ఖిణావట అఞ్జనభిదసరిసనిలక ముదుతనురుహో;
దక్ఖిణవట్టకోమల సణుసమసునిల అలులిత సిరరుహి జినో,
సోభణసణ్ఠానో థ సినిద్ధసిరరుహి చ సుపచితసతకుసల జో.
నిగ్గుళోనిగ్గన్తిచ్ఛత్తస్సరిసఅతిసుభగసిర చాయతారుచి కణ్ణకో,
సోసణ్ఠానస్సణ్హాహారానుకమపహుతభముథ సుఆయతబ్భముకో చ సో;
సుగ్గన్ధగ్గత్తో ముద్ధిచాథ వదని చ పుథులకనలాట ఆయతసోభణో,
అస్సాసప్పస్సాసాతిస్సణు ధరమసమసమ నమి కేతుమాలవిచిత్తకం.
బుద్ధుప్పాదో కిమఙ్గం అతిదులభతరం ఘోసమత్తమ్పి లోకే,
తస్మా నానప్పకారం సపరహితసుఖం విద్ధసూ పత్థయన్తా;
యాతిట్ఠత్థావ హం తం సురనరసరణం అన్తరాయప్పహానం,
పుఞ్ఞక్ఖేత్తేకభూతం సుగతమవిరతం సాధు వన్దన్తు సన్తో.
ఖేత్తవరఙ్గతత్థుతిపురే జవపణమ తేజసా ఇధ భవే,
రోగభయాద్యుపద్దవహతో అనునసుఖ భోగపుఞ్ఞమతికో;
దేవమనుస్సభోగపవరం పరత్థనుభావఞ్చ అన్తిమభవే,
అఞ్ఞతరో తిబోధిపవరే భవిస్సతి యథాసయం కతనతో.
పుఞ్ఞేనానేన ¶ సోహం నిపుణజవమతి పేమవాచో సఖీలో,
సద్ధో కల్యాణమిత్తోతిసరణగమనో సీలవా చాగయోగో;
హిరోత్తప్పీ సుదక్ఖో అవితసుచరితో ధితిమా సచ్చభాణీ,
బాహుస్సచ్చి విభాగి సపరహితకరో వగ్గురావో భిరుపో.
దీఘజ్జీవి నిరోగో సుచికులపస్సుతో ధమ్మరత్తో విరత్తో,
నిచ్చాపల్యో కతఞ్ఞు అతిముదుజుమనో సాధుభావాదివిఞ్ఞూ;
ధమ్మాజీవో భవేయ్యం బహుకుసలరతో అప్పకోధో అలుద్ధో,
ఏవఞ్చఞ్ఞం కరేయ్యం పణిధి చరిమకే మోక్ఖనిబ్బానభాగీ.
(౧) మహాకథం బుద్ధఘోసో, తనుమేవ కరంఅపి;
చజం హేయ్యా దియా దేయ్యం, అకరిత్థ యథా తథా.
(౨) మహాపణామపోరాణం, కిఞ్చి ఏవ పునప్పునం;
కామోక్కమం దుధారఞ్చ, చజం దేయ్యా దియఞ్ఞత్థ.
(౩) సుతజ్జయ అనుభవ-ట్ఠపనత్థేన లఞ్ఛినా;
సుతేన గరునానేన, కతోయం పణామో నవో.
(౪) ఏకక్ఖరాయ గాథాయో, యావ ఛబ్బిసతక్ఖరా;
జాతియ పజ్జసత్తత్యా, సఙ్ఖతో చతురాధికా.
(౫) అట్ఠాధికా సహేవుయ్యో- జనాదీహి మిదం నతం;
యథావుత్తత్థకా కామా, యే నిచ్చం ధారయన్తు తే.
రాజాతిరాజాతిమనోహరో యో,
దేవాతిదేవాతిగుణోఘధారీ;
బ్రహ్మాతిబ్రహ్మాతిభవన్తగూ తం,
సఙ్ఘాతిసఙ్ఘాతివిరావ వన్దే.
అనఙ్గనఙ్గం నరదేవదేవం,
అనిఞ్జనిఞ్జం భయతాణతాణం;
అనణ్డనణ్డఞ్చ అనాథనాథం,
ఖయన్తయన్తం పణమామి మామి.
తమ్బసినిద్ధతుఙ్గనఖకో నుంవట్టసుచితురఙ్గులి చ మునిసో,
సీహుసభోభహంససమగో నిగూళసమ గోప్ఫకాయతముఖో;
కోమలదక్ఖాణావటతనురుహో సుచిమలుజ్జలాభసరిరో,
పఞ్చపసాదయుత్తనయనో సుగన్ధముఖతుఙ్గనాసికయుతో.
కోటిసహస్సనాగబలికో ¶ సురత్తమధరో సువట్టదసనో,
ఆయతసణులోమభమూకో ముదుత్తనుకరత్త జివ్హసహితో;
ఛత్తసమానసోభణసిరో సుకేసవర కేతుమాలవిచితో,
ఇచ్చనుబ్యఞ్జనేభి సహితం మునిన్దపవరం నమామి సిరసా.
సకలమలేహి సో ముని సుదూరతాయ చ మలారినిం హతతయా,
తిభవరథే సమానితమనారకాని చ నమాలయో నరవరో;
మలకరణే రహారహ మనన్తఞేయ్య మభిజాననా ముని తథా,
చరణయుతో తివిజ్జి చ సువాచతా సుగమనా జనేసు సుగతో.
లోకవిదూ సో నితలోకతయతా సాకలతో అసమనరదమా సో,
సారథి జినో అనుసాసనకరో సత్థవహో దుపథతరణసత్తా;
బుజ్ఝతి సామం చతుసచ్చమఖిలం బోధయి జన్తుగణమితి చ బుద్ధో,
భాకరఆభాఫుటపఙ్కజసమో మగ్గియఞాణఫువికసితో చ.
భగ్గకిలేసో సో భగవా తిభవ వమిత గమన సుజన భజనతో,
సో భజి సద్ధమ్మే పవిభత్త సరస ఛభగయుత గరుకరణియతో;
సత్తనికాయే కేనపితుల్యగుణమపమిత సిరిఘంనజుతిసుసుభం,
దేవనరానం ఏకపతిట్ఠ మవితథుతియస మసకి మభంనమే.
బుద్ధుప్పాదో కిమ్మఙ్గం భో అతిదులభతరమిధ భవే సుఘోస మపాపరో,
తస్మా పత్థేన్తా సబ్బఞ్ఞుం వివిధహితసుఖ మనధికం నమన్తు చ సాధవో;
పుఞ్ఞేనానేనేతే దిట్ఠే భయఅఘంపీళనట్ఠ విరహితా పరత్థ చుభో సుభే,
భుత్వానన్తే వే హేస్సన్తే అవికలసుఖసిరిమతికా అనుత్తర భాగినో.
సో చక్కోపేతపాదో ముదుభుజచరణో సుప్పతిట్ఠితపాదో,
ఏణీజఙ్ఘో చ బుద్ధో కనకనిభతచో ఆయతపణ్హి నాథో;
కోసోనద్ధఙ్గజాతో అతిసుధుమఛవీ జాలికప్పానహేట్ఠా,
ఉస్సఙ్ఖపాదయుత్తో అభినిలనయనో ఆయతఙ్గులియోగో.
ఠితో ¶ ఖో నో నమన్తో కిరుభయపుథునాజాణుయో ఆమసన్తో,
లోమకూపేకేకలోమో సమతలదసనో అఞ్జనుద్ధగ్గలోమో;
బ్రహ్మద్దేహుజ్జుగత్తో అవిరళముఖతో సత్తకఙ్గుస్సదో సో,
నిగ్రోధప్పారిబిమ్బో మిగపతిహనుకో సీహపుబ్బడ్ఢకాయో.
పుణ్ణత్తాలీసదన్తో సుపహుతరసనో సోభణోదాతదాఠో,
సణ్హోదాతుణ్ణలోమో సమవటలగలో అన్తరంసపిణో సో;
బ్రహ్మగ్ఘోసో మునిన్దో పునపి గుపఖుమో ఉణ్హిససమ్ఫుల్లసీసో,
బాత్తింసఙ్గోపసోభం ముదురసహణీ లోకజేట్ఠం నమే తం.
మహాపణామ నిట్ఠితా.
తిగుమ్బచేతియ థోమనా
నమో తస్స భగవతో అరహతో సమ్మాసమ్బుద్ధస్స
యో ¶ దీపఙ్కరమూలమ్హి, పదం హత్తగతం చజి;
సమ్మాసమ్బోధి మాకఙ్ఖం, వన్దే తస్స సిరోరుహం.
(పథ్యావత్తగాథా).
పూరేత్వా బోధిసమ్భార-మహేసం యో అనుత్తరం;
అలత్థ బుద్ధత్తం తస్స, కేసధాతువరం నమే.
(పథ్యావత్తగాథా).
లద్ధా బుద్ధత్తం ఛఠాన-మతిక్కమ్మ పవేదయి;
విముత్తిం రాజాయతనే, తస్స కేసవరం నమే.
(రకార భకారవిపులా పథ్యావత్తగాథా).
తత్థ సక్కదత్తియమ్పి, నాగలతం హరీతకం;
అనోతత్తోదకం భుఞ్జి, వన్దే తస్స సిరోరుహం.
(రకారవిపులా పథ్యావత్తగాథా).
తదా ¶ ముగ్గసేలపత్తం, మహారాజూహి దిన్నకం;
తథాగతో పటిగ్గణ్హి, వన్దామి తస్స సీసజం.
(రకారవిపులా పథ్యావత్తగాథా).
తదా ద్విన్నం ద్వేభాతిక-జనేహి మధుపిణ్డికం;
పరిభుఞ్జేసి మన్థమ్పి, తస్స సీససిరిం నమే.
(తకారవిపులా పథ్యావత్తగాథా).
యో తపుస్సభల్లికానం, తదా ద్విసరణం అదా;
లోకమ్హి సబ్బపఠమం, తస్స సీరివహం నమే.
(రకార నకార విపులాపథ్యావత్తగాథా).
తదా ¶ తత్థుపట్ఠకానం, తేసం కేసే అదా అఠ;
లోకహిత మపేక్ఖన్తో, నాథో యో తస్స తే నమే.
(రకారవిపులా పథ్యావత్తగాథా).
తేపి తం ఆహారిత్వాన, పోక్ఖరబ్బతియం కరుం;
సజీవకేస చేతియం, నమేతం సబ్బపుబ్బకం.
(మకారవిపులా పథ్యావత్తగాథా).
ఉపోసథుపోసథమ్హి, ముఞ్చన్తం నీలరస్మియో;
భగవావ లోకఅత్థం, కరోన్తం తం సదా నమే.
(రకారవిపులా పథ్యావత్తగాథా).
చూళామణిదుస్సచేత్యం ¶ , కాలమ్హి బోధిసత్తకే;
బుద్ధకాలే ఇదం సబ్బ-పఠమం తం నమామహం.
(రకారవిపులా పథ్యావత్తగాథా).
నమామహం వన్దామహం, పూజేమహం సిరోరుహం;
పుఞ్ఞమిదం భవతు మే, పచ్చయో ఆసవక్ఖయే.
(తకార నకారవిపులా పథ్యావత్తగాథా).
తిగుమ్బచేతియథోమనా నిట్ఠితా.
వాసమాలినీక్య
నమో తస్స భగవతో అరహతో సమ్మాసమ్బుద్ధస్స
వుడ్ఢోపి ¶ జినానం, బుద్ధోసి విజానం;
పుబ్బోదితి మాహం, కుబ్బోమి విమానం.
(తనుమజ్ఝాగాథా)
మహాసమతకూలం, నరాపవరపూజం;
జహా అభయపూరం, నమా కనకరూపం.
(కుమారలలితాగాథా)
నరాసభసుబుద్ధం ¶ , పజామతనురుత్తం;
దయాకరముదుత్తం, నమామ హ ఉసుక్కం.
(కుమారలలితాగాథా)
హితం వహసుసీలో, పమోదతి సుఖత్తే;
నమే తమపబుద్ధం, జినం గతసుఖన్తం.
(కుమారలలితాగాథా)
బన్ధు చ సన్తకిలేసో, యో పితవణ్ణపభాసో;
గోతమగోత్తసుఞ్ఞతో, తస్స నమో నరసీహో.
(చిత్రపదాగాథా)
బుద్ధం ¶ సుద్ధం లోకేసీతం, ఉక్కం యుత్తం యోగే హం;
వన్తాతీతం ఓఘే సీదం, వన్దాపీహం సోకేహీహం.
(విజ్జుమ్మాలాగాథా)
భోగవతీ యోపఖమీ, సీతదయా లోకసఖా;
ధాతుతయే కిత్తి స వే, దాతు జయే-తస్స చ మే;
(మాణవకగాథా)
మానితో లుఖో రుతోథ, సన్నిభో సుభో సుఖో చ;
జానితో ధరో నమో చ, తస్స యో థుతో గుణోవ.
(సమానికాగాథా)
జయం ¶ ధజం పజాపుగే, ఠితం లిలం మహాసుఖే;
సుభం ఫుటం పభం నమే, హితం సుఖం దదాతు మే.
(పమాణికాగాథా)
పుణ్ణపుఞ్ఞజనితసుభం, జాతిఞాతిథుతియగుణం;
భేదవేరవిమలజినం, ఞాణపాదచరణ-మహం.
(హలముఖీగాథా)
సతి మతి సుచి యో-భాసో, థుతి ముని సుఖితో కాయో;
మనుజపుమసుతో నాథో, జయవర ము-సభో దాతో.
(భుజగసుసుగాథా)
యో ¶ బుద్ధో పవరో లిలో పుగే,
లోకుత్తో అభయో ఠితో సుఖే;
ఉత్తిణ్ణం నిసభం హితం వహే,
మోనిన్దం విమలం జినం నమే.
(సుద్ధవిరాజితగాథా)
దేవిన్దం వరగణథేరిన్దం,
నిట్ఠానం భవజననిబ్బానం;
నిద్దోసం రణరజనిప్ఫోటం,
వన్దే-హం సుభముఖసోణ్ణేమం.
(పణవగాథా)
గోతమగోత్తే ¶ కేతువ ఞాతం,
లోకజఖేత్తే మేరువ జాతం;
థన్దిలజేట్ఠే భేదితమారం,
పణ్డితమజ్ఝే మేధివ భాణం;
మన్తియ వన్దే సేవితనాథం.
(రుమ్మవతీగాథా)
బుద్ధో సుక్కో అమితగుణీసో,
యుత్తో ముత్తో ససివ తిమీతో;
ఖే యో తేజో తపసివ అక్కో,
ఫేలో థేతో తవ నమకారో.
(మత్తాగాథా)
యో ¶ జితమారే వే అజి సబ్బం,
థో మితసారే హే-ధితపత్తం;
సంసితపుణ్ణో సో నమి తస్స,
పణ్డితఫుల్లో సో మతికస్స.
(చమ్పకమాలాగాథా)
కనకరూప ¶ మూపమేయ్యకం,
పవరసూర పూజసేవతం;
కమలభూమ ధూరదేసకం,
నరమరూప రూ నమే త-హం.
(మనోరమాగాథా)
దేవే గతే ద్వేవారా గమాసి,
సేలే చలే యే ఞాతా పచాయి;
ఉద్ధం తలే తేవాసం అకాసి,
బుద్ధం మతే ఏసాహం నమామి.
(ఉబ్భాసకన్తగాథా)
ఉక్కే సునుతం పుథుకఞ్చ థేరం,
వుత్తే సుఖుమం ఉజుకం తథేతం;
దిబ్బే పటిమం కిరియం వదేతం,
ఇద్ధే మహితం కథితం నమేహం.
(ఉపట్ఠితగాథా)
౨౦. దిబ్బస్స ¶ పూరే పవరేహి గుత్తో,
సిద్ధత్థ భూతే నగరేహి వుట్ఠో;
సఙ్కస్స పూరే మ-గణేహి బుద్ధో,
అఞ్ఞత్థ పూజే పనమే ని కుబ్బో.
(ఇన్దవజిరాగాథా)
సుభం థుతం యో రజతం బలత్థం,
యుగం హుతం సో కనకం కమత్థం;
చితం ఠితం లోహితకం మనాపం,
లిలం ఇతం సోరచి తం నమాహం.
(ఉపేన్దవజిరాగాథా)
పినితం ¶ విణం సఖిలం యజి తం,
సుసుఖం ధుజం బిలువం నియుతం;
ఠపియం సిమం థునుతం పుథులం,
నమి హం ఖిణం సుఖుమం ముదుకం.
(సుముఖీగాథా)
సోగతి ¶ బోధయిం గాహియ పత్తం,
ఓతరి సోనమి జానిత అత్థం;
భూపతి పూజయి సాకియ వంసం,
సూజధి ఊపధి భాసిత ధమ్మం.
(దోధకగాథా)
చత్తారో-మే యాచితే సో పవుత్థే,
లద్ధా భోగే కామితే ఓఘముత్తే;
కత్తా తోసే-తం నమే చోలయుత్తే,
తత్థా-లోకే తంపతే ఖో పదుక్కే.
(సాలినీగాథా)
సత్తా-లోకో ¶ సరితో యో ధజుక్కం,
తత్థా-గోపో రచియో-నోజ-ముద్ధం;
భద్దా-సోకో-పచితో-భో పబుద్ధం,
సద్ధాయోగో భజి సో-హో-నముచ్చం.
(వాతోమ్పీగాథా)
ఞాతమరూనం ఉపరి ఠితానం,
వాలపసూకం హువతి జినానం;
దేవసుయామో జినమితి ఞాతో,
తేన సుఖా-భో వినమి ఇదా సో.
(సిరీగాథా)
పుణ్ణకేన ¶ కుసుమేన సేవతం,
కుఞ్జరేవ థునుతేన ఖే గతం;
సున్దరేన నమి తేన మే జయం,
పుఞ్ఞతేజకరి-ధేస వే దదం.
(రథోద్ధతాగాథా)
మాతు ఆయు ఖిణు-కే ఇహ పుబ్బే,
తాసు సాధు విసుతే-దిసకుచ్చే;
వాత తాల ఖచితేని-ధ సోణ్ణే,
‘‘తాత తాత’’ యజి తే-తిస వన్దే.
(స్వాగతగాథా)
ఉపరి ¶ కమలయోని సోభితం,
జుహతి ధవలజోతి-దోసితం;
సుకరి య-మతబోధి-మోచితం,
సునమి చరణలోకి-ధో-రిమం.
(భద్దికాగాథా)
వనే ¶ జినో యో వినయం సుపేక్ఖి-మం,
మతే ఠితో-భో దిజకం దుబజ్జితం;
అఘే-నిధో ఖోభి-తరం మునే-చ్ఛి-దం,
నమే-భితో బోధిమహం లుఖ-జ్ఝితం.
(వంసట్ఠగాథా)
యో జాతి-దోమానీ-ముపాసి లమ్బి తం,
కోధేహి లోకేహి దుభాసి పణ్డితం;
పూరేపి మూలేపి పహాసి దిట్ఠికం,
సబ్బేహి పత్తేహి నమామి ఇచ్ఛితం.
(ఇన్దవంసాగాథా)
వేరఞ్జకే ¶ పూరవరే విభూసితే,
నేలఞ్జనే దూమవనే వికూజితే;
ఖేమఙ్కరే థూలతరే విదూ సితే,
ఏత-ఙ్గమే పూన నమే విరూపి వే.
(ఇన్దవంసాగాథా)
అధునాపి స సారిసుతో నిమలం,
తముపాసి మతాపి కుతో చి నయం;
కరుణాయి ధ యాచి బుధో వినయం,
గరుకాపి నమామి సు-యో జిత-హం.
(తోటకగాథా)
జనవరో ¶ ముని సో సరితో వనే,
వసభతో ఉదితో-పరి గోతమే;
గమనసో గుణికో గమి-తో నమే,
నగర-దో జుతి-మో ఘతితో-సథే.
(దుతవిలమ్బితగాథా)
భగవతి ¶ కుటిగారే యో నిసిన్నే,
ధనవతి సువిసాలే-కో ఇసిన్దే;
య-మలభి ముని లాభే మోలిఛిన్నే,
స పనమి జుతి-మాసే-తో కిలిన్నే.
(పుటగాథా)
పఠపిత-మిచ్చస్స సిదతు సబ్బం,
పఠమి-ధ సిక్ఖస్స హితసుఖత్థం;
పవదియ గిద్ధస్స ఖిణలుఖత్థం,
పనమి చ కిచ్చస్స సిఖముకప్పం.
(కుసుమవిచిత్తాగాథా)
నిలోభాసి ¶ ధూమేహి యు-చ్చో విలాసే,
ఠితో చా-భి భూ తేహి రుక్ఖో-దిగాహే;
యి-తో తాని పూరేపి లుద్ధో ద్వివారే,
జినో-కాసి పూజేమి బుద్ధో హితా-సే.
(భుజఙ్గప్పయాతగాథా)
జనరమే ¶ దససరే విసాలకే,
మునివరే కుటిఘరే-రియాపథే;
ధుతతరే-సుభకథే చజి స వే,
తతియకే-త-మిధ వే ఠపి నమే.
(పియంవదాగాథా)
వేసాలికే తు వసి కాతు చాతుకం,
తే ఞాహి తేసు లభి-ధా-ముకా-ముకం;
నేగామికేసు భజి ఫాసు సా-యుకం,
ఏతా-ధికేసు నమి-కాసు-దా-తులం.
(లలితాగాథా)
వది ¶ సుప్పియో దువచనం తమతో,
సహి ముత్తికో గుణకథం తథతో;
గమి మాణవో దురపథం చరతో,
నమి సాధవో బుధవరం పరసో.
(పమితక్ఖరాగాథా)
యు-పగమి విమలో సఖిలో తదా,
యువవతి-పివనో రమి యో బ్రహ్మా;
ఏకసయి ¶ ఠితతో కథి ఖో గుణే,
ఏస నమి జిన-మో పధి-దో-జుకే.
(ఉజ్జలాగాథా)
జానం సబ్బేసం దేసి యో ఖో-ధిముత్తం,
ఆనన్దత్థేరం వేదితో చోళిసుత్తం;
కాయస్సమ్ముఖే కాతునో-లోకియం-సే,
ఠాన-స్స-ప్పుగే కారుణో హోతి వన్దే.
(వేస్సదేవీ గాథా)
సుకథియ ¶ మజ్ఝిమసీల-మపరం,
యు-పచిత-మేత్థి-ధ చీర-మనయం;
బుధయి చ భజ్జిత-మీణవతరం,
సునమి పవజ్జిత-మీహ-మమలం.
(తామరసగాథా)
మహకఞ్హి సీలమ్పి అభాసి కన్తే,
బ్రహ్మథన్దిలీ మమ్హి మనాపి రమ్మే;
చలకమ్పి గీరమ్పి కదాచి అమ్బే,
వరపణ్డి ఖీణమ్పి నమామి తం వే.
(కమలాగాథా)
మోహన్తే ¶ జిని పఠమే జయే జితాయం,
సోరమ్మే ఇసిపతనే వనే నివాసం.
ఖోభన్తే కిరి సకలే వదే విలాసం,
ఘోరంవే వినిదమనే నమే జినా-హం.
(పహాసినీగాథా)
దివారకం బజనగరం ఫితం వసే,
నిసాయ తం జనగణనం ఠితం మతే;
విజానకం తమజటకం సితం వనే,
హితావహం నరపవరం ఇమం నమే.
(రుచిరగాథా)
రచిత-మవిరలం ¶ మనుస్స మథా పణం,
పసియ తతియకం చతుత్థ మకా సయం;
కరిత-మధికతం అఖుబ్భమలా సభం,
జహితగతిపరం పనుజ్జ నమామ-హం.
(పరాజితాగాథా)
నగర-మజయ-మేస నివసి థ పరే,
మహతి స మణికే సకుణకుజవనే;
యపతి వసతి వే హితసివవహనే,
సురత ముభయమే-సిత మిమ పనమే.
(పహరణకలికాగాథా)
ఛట్ఠం ¶ వసే అథు-ద తత్థ వనే మునే సం,
సబ్బం ధరే మకులపబ్బతకే ఉపేదం;
చత్తం మలే మనుజ మత్థవసే సుదేసం,
భత్తం నమే లహుక మప్ప మరే ధునే తం.
(వసన్తతిలకగాథా)
నున ¶ ఉపవసతి ఇధ థ పున పరిమే,
సుఖగుణమహతి తిదసపుర అజితే;
యుగనుత మవది వితథ ముఘతరి వే,
హుతథున మనమి సిమద తుల మరియే.
(ససికలాగాథా)
జినపతి సుసుమారం భేసకల్లావనే-సం,
నివసతి పుథుఞాణం ఖ్వే-స నన్దాలయే-తం;
విమల-మి ధు-జుకాయం భేదసన్తాప-సేసం,
విజహ-పి సుఖుమాలం ఏసమన్తా నమే-హం.
(మాలినీగాథా)
మహతి ¶ సుకన్తియే అథ చ తత్థ సీతలే,
వసతి కుసమ్బియే నవమవస్స-పీ-తరే;
అవహి సుఖ-న్తిమే పజహ-మత్థ-మీ-ధ వే,
పనమి నుదం హినే సకలసత్థవసయే.
(పభద్దకగాథా)
యుధవతి పాలిలేయ్యక వనే పహాయ నాగే,
ఉపఠహి నాగి-ధే-స దసమే జహాయ బాలే;
సుఖవసి కాయికే చ మనకే తదాస సాతే,
యుత-మధి వాహితే చ పనమే పయాత మారే.
(వాణినీగాథా)
ఇతో ¶ పత్తే నాళే వసతి దిజగామేపి దసమే,
హితోపత్థేనా-యేక అధికి-ధ వాదేహి వదకే;
విలోమత్థేహా-నేక-సహి ఠిత-మాఘేపి సమయే,
వియోగత్థే-తా-నేజ-మపి పిహవాసేహి పనమే.
(సిఖరణీగాథా)
ద్విఅధికి-తరే ¶ వేరఞ్జాయం తతో దసమం పరే,
నివసి నిలకే ఖేదఙ్ఘాతం కరో పరమం వనే;
కిలమి ఇధ వే వేహఙ్గానం మనోరమకం వసే,
విరజి-సిగణే మేధఙ్కారం అసోకదదం నమే.
(హిరిణీగాథా)
యో సమ్పుణ్ణే ఉపరి తిరసే చాలియే పబ్బతేపి,
సోభం ఫుల్లే సువసి ఇతరే కామితే అప్పమేహి;
సావత్థిక్కేను-ద చతుదసే కారితే ఆలయేపి,
కామో-చ్ఛిద్దే తు భయ మునమే ఞాతిమే ద్వారకేహి.
(మన్దక్కన్తాగాథా)
సక్కో ¶ కప్పిలే కరియ మదకే నిగ్గహో యోతి పఞ్చే,
దక్ఖో కప్పియే వసిధ యమకే ఇద్ధకో భోహి అఞ్ఞే;
యక్ఖో దబ్బికే దమియ నగరే సోళసే-తోపి వఙ్కే,
అగ్గో-ఘత్తితే పచియ పనమే బోధకే మోనిపఞ్ఞే.
(కుసుమితలతావేల్లితగాథా)
దులద్ధే ¶ పూరే యోపరి చ దసతో రాజగేహం భజన్తో,
తు సత్తే కూలే ఖో కరి ధ యపతో వాసమేజం జహన్తో;
దుమట్ఠే పూనేసో రమిత-చలతో ట్ఠారసేతం దదం సో,
గుణస్సే వూపేతో నమిధ కరభో కాయఖేదం సహన్తో.
(మేఘవిప్ఫుజ్జితగాథా)
చాలీయే ¶ పరిమే తథేవ అచలే-కూనేపి వీసే లిలం,
భాగీ చే స హితే పగేవ పవసే సూరేహి నిసేవితం;
కారితే రమికే పరే చ నగరే పూరేపి వీసే ఇమం,
హారితే వసిమే జహేన పనమే మూలేపి ఖీణే జితం.
(సద్దూలవిక్కీలితగాథా)
పఞ్చపఞ్చ-మాకరే తతోపి పిణ్డకేన జేతకాననే చ,
అఞ్ఞమఞ్ఞ-మాదరేన యో నిసిన్నకేన తే చ మాపయేవ;
పుబ్బపుబ్బఆరామే పయోజి-పాసికాయ వారమావసేధ,
సుద్ధసుద్ధ-మామలేన పోరియాతిమాయ మానసా నమేస.
(వుత్తగాథా)
పుఞ్ఞేనా’నేన ¶ సంసారముపధి సుచి సప్పూరిసే వో పసేవే,
తేహా దిన్నం సుగాహో సుచిపరిసఉపేతో అరోగో భవేయ్యం;
దీఘాయూకో మహాపఞ్ఞ యసధనసులాభో చ కల్యాణమిత్తో,
లోకాదిబ్బో చ మగ్గో సమమతిపరివారోవ నిబ్బానపత్తో.
(సద్ధరాగాథా)
క.
నస్సతి ¶ సాసనే ఛనవుతాధికే చ తివిసే సతే కలియుగే,
ద్వేసతచుద్దసాధికసహస్సకే సకలరట్ఠకం ఖుభి గతే;
భాతికయుద్ధకేన నగరం తదా భవతి ఛారికా యతిగణో,
దుక్ఖగతో మహాపహరణేహి జివితఖయమ్పి ఏతి పిటకే.
(భద్దకగాథా)
ఖ.
ఉదిసక ¶ చేత్యకేపి వికిరియ నాసతి ధ సో థిరో సగణతో,
విజహియ పురతో త్తరవనేక కుమ్భకరగామకం నివసయే;
సతగణకేహి తత్థ జనకోపి ‘‘భోత ఇధ వాస సబ్బయతినం,
ఉపట్ఠహమీ’’తి తమ్హి కతిపాహనం వసతి ఖో విమంసియ సుఖం.
(లలితగాథా)
గ.
తత్థ అరఞ్ఞే రమితో సుచరి సద్ధమ్మ-తిమాని సుయతీహి తిపీకో,
ధూరసుయుత్తో పరిగాహియ సుజాతో సుపట్ఠాతి కునదిత-ముయానం;
సో సతమచ్చేహి కతం నగరి దం తస్స చ పాచిన రహ ధికకోసే,
పచ్చయనాయాసు ద ఛాయబహుకో సుద్ధయతిపి ఇధ వసనకాలే.
(తనుగాథా)
ఘ.
ఫగ్గుణమాసే ఛదినే రచియ నిట్ఠంవ గతో పరమరి ఇమినా-యం,
సిజ్ఝతు పేమం వత రక్ఖతు సుదేవో ఉద వడ్ఢతు జినవచనే తం;
వాసమాలినీ నిట్ఠితా.