📜

నమో తస్స భగవతో అరహతో సమ్మాసమ్బుద్ధస్స

జినాలఙ్కార

పణామదీపనీగాథా

౧.

యో లోకత్థాయ బుద్ధో ధనసుతభరియాఅఙ్గజీవే చజిత్వా పూరేత్వా ఆరమియో తిదసమనుపమే బోధిపక్ఖీయధమ్మే,

పత్వా బోధిం విసుద్ధం సకలగుణదదం సేట్ఠభూతో తిలోకే,

కత్వా దుక్ఖస్స అన్తం కతసుభజనతం దుక్ఖతో మోచయిత్థ.

౨.

నత్వానాహం జినన్తం సముపచితసుభం సబ్బలోకేకబన్ధుం,

నాహు యేనపి తుల్యో కుసలమహిమతో ఉత్తమో భూతలోకే తస్సేవాయం ఉవిమ్హం సువిపులమమలం బోధిసమ్భారభూతం,

హేతుం హేత్వానురూపం సుగతగతఫలం భాసతో మే సుణాథ.

యోగావచరసమ్పత్తిదీపనీగాథా

౩.

జాతో యో నవమే ఖణే సుతధరో సీలేన సుద్ధిన్ద్రియో సంసారం అయతో భవక్కయకరం దిస్వా సివం ఖేమతో,

తం సమ్పాపకమగ్గదేసకమునిం సమ్పూజయన్తో తతో ఉద్ధానుస్సతిభావనాదికమతో సమ్పాదయే తం సివం.

వత్థువిసోధనీగాథా

౪.

బుద్ధోతి కో బుద్ధగుణో తి కో సో,

అచిన్తయాదిత్తముపాగతో యో;

అనఞ్ఞసాధారణభూతమత్థం,

అకాసి కిం సో కిమవోచ బుద్ధో.

౫.

విసుద్ధఖన్ధసన్తానో బుద్ధోతి నియమో కతో,

ఖన్ధసన్తానసుద్ధీ తు గుణోతి నియమో కతో.

౬.

అకాసి కిచ్చాని దినేసు పఞ్చ,

పసాదయఞ్చిద్ధిబలేన సేన;

జనానసేసం చరియానుకూలం,

ఞత్వానవోచానుసయప్పహానం.

అనఞ్ఞసాధారణదీపనీగాథా

౭.

అబ్భుగ్గతా యస్స గుణా అనన్తా,

తిబుద్ధఖేత్తేకదివాకరోతి;

జానాతి సో లోకమిమం పరఞ్చ,

సచేతనఞ్చేవ అచేతనఞ్చ;

సకస్స సన్తానగతం పరేసం,

బ్యతీతమప్పత్తకమత్రభూతం.

౮.

అనన్తసత్తేసు చ లోకధాతుసు,

ఏకోవ సబ్బేపి సమా న తేన;

దిసాసు పుబ్బాదిసు చక్కవాళా,

సహస్ససఙ్ఖాయపి అప్పమేయ్యా;

యే తేసు దేవా మనుజా చ బ్రహ్మా,

ఏకత్థ సఙ్గమ్మ హి మన్తయన్తా.

౯.

అనాదికాలాగతనామరూపినం,

యథాసకం హేతుఫలత్తవుత్తినం;

తబ్భావభావిత్తమసమ్భుణన్తా,

నానావిపల్లాసమనుపవిట్ఠా.

౧౦.

కమ్మప్పవత్తిఞ్చ ఫలప్పవత్తిం,

ఏకత్తనానత్తనిరీహధమ్మతం;

విఞ్ఞత్తిసన్తానఘనేన ఛన్నతో,

సివఞ్జసం నో భణితుం సమత్థా.

౧౧.

ఏకో వ సో సన్తికరో పభఙ్కరో,

సఙ్ఖాయ ఞేయ్యాని అసేసితాని;

తేసఞ్హి మజ్ఝే పరమాసమ్భీవదం,

సివఞ్జసం దీపయితుం సమత్థో.

౧౨.

సో గోతమో సక్యసుతో మునిన్దో,

సబ్బస్స లోకస్స పదీపభూతో;

అనన్తసత్తే భవబన్ధనమ్హా,

మోచేసి కారుఞ్ఞఫలానుపేక్ఖీ.

అభినీహారదీపనీగాథా

౧౩.

వదేథ తస్సీధ అనప్పకం గుణం,

న తేన తుల్యో పరమో చ విజ్జతి;

కిం తం గుణం తం సదిసేన దిన్నం,

సయంకతం కిన్ను అధిచ్చలద్ధం.

౧౪.

నాధిచ్చలద్ధం న చ పుబ్బబుద్ధా,

బ్రహ్మాదినం సమ్ముతియా బహూనం;

సయంకతేనేవ అనోపమేన,

దానాదినా లద్ధమిదం విపాకం.

౧౫.

ఇతో చతున్నం అసఙ్ఖియానం,

సతంసహస్సానధికానమత్థకే;

కప్పే అతీతమ్హి సుమేధతాపసో,

వేహాయసం గచ్ఛతి ఇద్ధియా తదా.

౧౬.

దిపఙ్కరో నామ జినో ససఙ్ఘో,

రమ్మం పురం యాతి విరోచమానో;

మనుస్సదేవేహిభిపూజియన్తో,

సహస్సరంసి వియ భాణుమా నభే.

౧౭.

తస్సఞ్జసం కాతుబహుస్సహానం,

బుద్ధోతి సుత్వా సుమనో పతీతో;

మమజ్జ దేహం పనిమస్స దత్వా,

బుద్ధో అహం హేస్సమనాగతేదిసో.

౧౮.

తస్మిఞ్జసే కన్దరతమ్హి పఙ్కే,

కత్వాన సేతుం సయి సో సదేహం;

బుద్ధో అయం గచ్ఛతు పిట్ఠియా మమం,

బోధిస్సచే హేస్సతి మే అనాగతే.

౧౯.

ఉస్సీసకం యాతి జినో హి తస్స,

అజ్ఝాసయో సిజ్ఝతిమస్సనాగతే;

ఞత్వాన బ్యాకాసి అసేసతో హి,

బుద్ధో అయం హేస్సతినాగతేసు.

౨౦.

సుత్వాన పత్తో వ మహాభిసేకం,

లద్ధం వ బోధిం సమనుస్సరన్తో;

పూజేత్వా యాతే మునిదేవమానుసే,

ఉట్ఠాయ సో సమ్మసి పారమీ దస.

౨౧.

దళ్హం గహేత్వా సమతింసపారమీ,

సిక్ఖత్తయఞ్చస్స జినస్స సన్తికే;

కాతుం సమత్థో పి భవస్స పారం,

సత్తేసు కారుఞ్ఞబలా భవం గతో.

౨౨.

ఉప్పన్నుప్పన్నకే సో జినవరమతులే పూజయిత్వా అసేసం బుద్ధో ఏసో హి ఓసో భవతి నియమతో బ్యాకతో తేహి తేహి తేసం తేసం జినానం అచనమనుపమం పూజయిత్వా సిరేన,

తం తం దుక్ఖం సహిత్వా సకలగుణదదం పారమీ పూరయిత్థ.

బోధిసమ్భారదీపనీగాథా

౨౩.

సో దుక్ఖఖిన్నజనదస్సనదుక్ఖఖిన్నో,

కారుఞ్ఞమేవ జనతాయ అకాసి నిచ్చం;

తేసం హి మోచనముపాయమిదన్తి ఞత్వా,

తాదీపరాధమపి అత్తని రోపయీ సో.

౨౪.

దానాదినేకవరపారమిసాగరేసు,

ఓగాళ్హతాయపి పదుట్ఠజనేన దిన్నం;

దుక్ఖం తథా అతిమహన్తతరమ్పి కిఞ్చి,

నాఞ్ఞాసి సత్తహితమేవేఅ గవేసయన్తో.

౨౫.

ఛేత్వాన సీసం హి సకం దదన్తో,

మంసం పచిత్వాన సకం దదన్తో;

సో చత్తగత్తో పణిధానకాలే,

దుట్ఠస్స కిం దుస్సతి ఛేదనేన.

౨౬.

ఏవం అనన్తమపి జాతిసతేసు దుక్ఖం,

పత్వాన సత్తహితమేవ గవేసయన్తో;

దీపఙ్కరే గహితసీలసమాధిపఞ్ఞం,

పాలేసి యావ సకబోధితలే సునిట్ఠో.

౨౭.

యదాభినీహారమకా సుమేధో,

యదా చ మద్దిం అదదా సివిన్దో;

ఏత్థన్తరే జాతిసు కిఞ్చిపేకం,

నిరత్థకం నో అగమాసి తస్స.

౨౮.

మహాసముద్దే జలబిన్దుతోపి,

తదన్త్రే జాతి అనప్పకా వ;

నిరన్తరం పూరితపారమీనం,

కథం పమాణం ఉపమా కుహిం వా.

౨౯.

యో మగ్గపస్సే మధురమ్బబీజం,

ఛాయాఫలత్థాయ మహాజనానం;

రోపేసి తస్మిం హి ఖణేవ తేన,

ఛాయాఫలే పుఞ్ఞమలద్ధముద్ధం.

౩౦.

తథేవ సంసారపథే జనానం,

హితాయ అత్తనమభిరోపితక్ఖణే;

సిద్ధం వ పుఞ్ఞూపరి తస్స తస్మిం,

ధనఙ్గజీవం పి హరన్తి యే యే.

౩౧.

సో సాగరే జలధికం రుహిరం అదాసి,

భూమాపరాజియ సమంసమదాసి దానం;

మేరుప్పమాణమధికఞ్చ సమోళిసీసం,

ఖే తారకాధికతరం నయనం అదాసి.

గబ్భోక్కన్తిదీపనీగాథా

౩౨.

గమ్భీరపానదానాదిసాగరేసు హి థామసా;

తరన్తో మద్దిదానేన నిట్ఠాపేత్వాన పారమీ.

౩౩.

వసన్తో తుసీతే కాయే బోధిపరిపాకమాగమ్మ;

ఆయాచనాయ చ దేవానం మాతుగబ్భముపాగమి.

౩౪.

సతో చ సమ్పజానో చ మాతుకుచ్ఛిమ్హి ఓక్కమి;

తస్స ఓక్కన్తియం సబ్బా దససహస్సీ పకమ్పిత్థ.

౩౫.

తతో పుబ్బనిమిత్తాని ద్వత్తింసాని తదా సియుం;

తుట్ఠహట్ఠా వ సా మాతా పుత్తం పస్సతి కుచ్ఛియం.

విజాయనమఙ్గలదీపనీగాథా

౩౬.

సా పుణ్ణగబ్భా దసమాసతో పరం,

గన్త్వాన ఫుల్లం వరలుమ్బినీవనం;

ఠితా గహేత్వా వరసాలసాఖం,

విజాయి తం పుత్తవరం సుఖేన.

౩౭.

తదా సహస్సీదసలోకధాతుసు,

దేవా చ నాగా అసురా చ యక్ఖా;

నానాదిసా మఙ్గలచక్కవాళం,

సుమఙ్గలం మఙ్గలమాగమింసు.

౩౮.

అనేకసాఖఞ్చ సహస్సమణ్డలం,

ఛత్తం మరూ ధారయుమన్తలిక్ఖే;

సువణ్ణదణ్డా విపతన్తి చామరా,

ఖజ్జింసు భేరీ చ నదింసు సఙ్ఖా.

౩౯.

మలేనకేనాపి అనూపలిత్తో,

ఠితో వ పాదాని పసారయన్తో;

కథీ వ ధమ్మాసనతోతరన్తో,

జాతో యథాదిచ్చవరో నభమ్హా.

౪౦.

ఖీణాసవా బ్రహ్మగణోపగన్త్వా,

సువణ్ణజాలేన పటిగ్గహేసుం;

తతో చ దేవాజినచమ్మకేన,

తతో దుకూలేన చ తం మనుస్సా.

౪౧.

తేసం పి హత్థా వరభూమియం ఠితో,

దిసా విలోకేసి సబ్బా సమన్తతో;

వదింసు దేవా పి చ బ్రహ్మకాయికా,

తయా సమో కత్థచి నత్థి ఉత్తరో.

౪౨.

గన్త్వాన ఉత్తరం సత్త పదవారేహి విక్కమో,

సీహనాదం నదీ తేసం దేవతానం హి సావయం.

౪౩.

తతో పుత్తం గహేత్వాన గతా మాతా సకఙ్ఘరం,

మాతా సత్తమియం గన్త్వా దేఅపుత్తత్తమాగమి.

౪౪.

తే బ్రహ్మణా పఞ్చమియం సుభుత్తా,

నామం గహేతుం వరలక్ఖణాని;

దిస్వాన ఏకఙ్గులిముక్ఖిపింసు,

బుద్ధో అయం హేస్సతి వీతరాగో.

౪౫.

జిణ్ణఞ్చ దిస్వా బ్యాధికం మతఞ్చ,

అవ్హాయితం పబ్బజితఞ్చ దిస్వా;

ఓహాయ పబ్బజ్జముపేతి కామే,

బుద్ధో అయం హేస్సతి వీతరాగో.

అగారియసమ్పత్తిదీపనీగాథా

౪౬.

కాలక్కమేన చన్దో వ వడ్ఢన్తో వడ్ఢితే కులే,

పుఞ్ఞోదయేనుదేన్తో సో భాణుమా వియ అమ్బరే.

౪౭.

సిద్ధథకో హి సిద్ధత్థో లద్ధా దేవిం యసోధరం,

చత్తాలీససహస్సేహి పూరిత్థీహి పురక్ఖితో.

౪౮.

రమ్మసురమ్మసుభేసు ఘరేసు,

తిణ్ణముతూనమనుచ్ఛవికేసు;

దిబ్బసుఖం వియ భుఞ్జి సుఖం సో,

అచ్ఛరియబ్భుతరాజవిభూతిం.

నేక్ఖమ్మజ్ఝాసయదీపనీయమకగాథా

నమో తస్స యతో మహిమతో యస్స తమో న

౪౯.

దిస్వా నిమిత్తాని మదచ్ఛిదాని,

థీనం విరూపాని రతచ్ఛిదాని;

పాపాని కమ్మాని సుఖచ్ఛిదాని,

లద్ధాని ఞాణాని భవచ్ఛిదాని.

౫౦.

పదిత్తగేహా వియ భేరవం రవం,

రవం సమ్ముట్ఠాయ గతో మహేసి;

మహేసిమోలోకియపుత్తమత్తనో,

తనోసి నో పేమమహోఘమత్తనో.

౫౧.

ఉమ్మారఉమ్మారగతుద్ధరిత్వా,

పదం పదం యాతనరాసభస్స;

అలం అలంకారతరేన గన్తుం,

మతీ మతీవేతిమనఙ్గభఙ్గే.

౫౨.

ఉమ్మారఉమ్మారగతో మహేసి,

అనఙ్గభఙ్గం సమచిన్తయిత్థ;

కిం మే జరామచ్చుముఖే ఠితస్స,

న మే వసే కామవసే ఠితస్స.

౫౩.

కామేన కామేన న సాధ్యమోక్ఖం,

మానేన మానేన మమత్థి కిఞ్చి;

మారో ససేనో హి అవారణీయో,

యన్తేన ఉచ్ఛుం వియ మద్దతీ మం.

౫౪.

ఆదిత్తముయాతపయాతమూనం,

అతాణాలేణాసరణే జనే తే;

దిస్వాన దిస్వాన సివం మయా తే,

కామేన కామేన కథం వినేయ్య.

౫౫.

విజ్జావిజ్జాయ చుతఞ్చుపేతం,

అసారసారూపగతఞ్జనం జనం;

విజ్జాయవిజ్జాయ యుతో చుతోహం,

పహోమి తారేతుమసఙ్గహో గతో.

౫౬.

మగ్గన్తి నో దిట్ఠిగతాపవగ్గం,

అగ్గా తి తేవాహు జనా సమగ్గా;

నగ్గం అహో మోహతమస్స వగ్గం,

వగ్గం హనిస్సామి తమగ్గమగ్గా.

౫౭.

పసేయ్హకారేన అసేయ్హదుక్ఖం,

జనా జనేన్తీహ జనానమేవ;

పసేయ్హకారేనా అసేయ్హదుక్ఖం,

పాపం న జానన్తి తతో నిదానం.

౫౮.

తే ఓఘయోగాసవసంకిలేసా,

తమేవ నాసేన్తి తతో సముట్ఠితా;

ఏకన్తికం జాతి జరా చ మచ్చు,

నిరన్తరం తం బ్యసనఞ్చనేకం.

౫౯.

చీరం కిలేసానసముజ్జలన్తం,

దిస్వాన సత్తానుసయం సయమ్భూ;

సాధేమి బోధిం వినయామి సత్తే,

పచ్ఛాపి పస్సామి సుతం సుతన్తం.

౬౦.

తం దిబ్బచక్కం ఖురచక్కమాలం,

రజ్జం ససారజ్జసమజ్జమజ్జం;

తే బన్ధవా బన్ధనమాగతా పరే,

సుతో పసూతోయమనఙ్గదూతో.

౬౧.

సముజ్జలన్తం వసతీ సతీసిరీ,

సిరీసపాగారమిదం మహావిసం;

దద్దల్లమానా యువతీ వతీమా,

సకణ్టకాయేవ సమఞ్జసఞ్జసే.

౬౨.

యస్సా విరాజితసిరీ సిరియాపి నత్థి,

తస్సావలోకియ న తిత్తివసానమత్థి;

గచ్ఛామి హన్ద తవనఙ్గ సిరప్పభేదం,

మత్తేభకుమ్భుపరి సీహవిలాసగామిం.

౬౩.

భో భో అనఙ్గసుచిర పి పనుణ్ణబాణ,

బాణాని సంహర పనుణ్ణమితో నిరోధ;

రోధేన చాపదగతో మనసో న సోచ,

సోచం తవప్పనవలోకియ యామి సన్తిం.

౬౪.

రతీ రతీ కామగుణే వివేకే,

అలం అలన్తేవ విచిన్తయన్తో;

మనం మనఙ్గాలయసమ్పదాలయం,

తహిం తహిం దిట్ఠబాలా వ పక్కమి.

పాదుద్ధారవిమ్హయదీపనీగాథా

౬౫.

యావఞ్చయం రవి చరత్యచలేన రుద్ధే,

యావఞ్చ చక్కరతనఞ్చ పయాతి లోకే;

తావిస్సరో నభచరో జితచాతురన్తో,

హిత్వా కథం ను పదముద్ధరి సో నిరాసో.

౬౬.

దీపే మహా చ చతురాధికద్వేసహస్సే,

తత్రాపి సేట్ఠభజితం వరజమ్బుదీపం;

భూనాభికం కపిలవత్థుపురం సురమ్మం,

హిత్వా కథం ను పదముద్ధరి సో నిరాసో.

౬౭.

ఞాతీనసీతి కులతో హి సహస్స సాక్యే,

హత్థిస్సధఞ్ఞధనినో విజితారిసఙ్ఘే;

గోత్తేన గోతమభవం పితరఞ్జనగ్గం,

హిత్వా కథం ను పదముద్ధరి సో నిరాసో.

౬౮.

రమ్మం సురమ్మవసతిం రతనుజ్జలన్తం,

గిమ్హేపి విమ్హయకరం సురమన్దిరాభం;

ఉస్సాపితద్ధజపటాకసితాతపత్తం,

హిత్వా కథం ను పదముద్ధరి సో నిరాసో.

౬౯.

సపోక్ఖరా పోక్ఖరణీ చతస్సో,

సుపుప్ఫితా మన్దిరతో సమన్తా;

కోకా నదన్తూపరి కోకనాదే,

హిత్వా కథం ను పదముద్ధరి సో నిరాసో.

౭౦.

సరే సరోజే రుదితాళిపాళి,

సమన్తతో పస్సతి పఞ్జరఞ్జసా;

దిస్వారవిన్దాని ముఖారవిన్దం

నాథస్స లజ్జా వియ సంకుజన్తి.

౭౧.

మధురా మధురాభిరుతా,

చరితా పదుమే పదుమేళిగణా;

వసతిం అధునా మధునా,

అకరుం జహితం కిమిదం పతినా.

౭౨.

తమ్హా రసం మధుకరా భవనం హరిత్వా,

నిన్నాదినో సమధురం మధురం కరోన్తి;

నాదేన నాదమతిరిచ్చుపవీణయన్తి,

నచ్చన్తి తా సురపురే వణితా వ తావ.

౭౩.

సఞ్చోదితా పీణపయోధరాధరా,

విరాజితానఙ్గజమేఖలాఖలా;

సురఙ్గణా వఙ్గజఫస్సదా సదా,

రమా రమాపేన్తి వరఙ్గదాగదా.

౭౪.

కరాతిరత్తా రతిరత్తరామా,

తాళేన్తి తాళావచరే సమన్తా;

నచ్చుగ్గతానేకసహస్సహత్థా,

సక్కోపి కిం సక్యసమోతి చోదయుం.

౭౫.

విసాలనేత్తా హసులా సుమజ్ఝా,

నిమ్బత్థనీ విమ్హయగీతసద్దా;

అలఙ్కతా మల్లధరా సువత్థా,

నచ్చన్తి తాళావచరేహి ఘుట్ఠా.

౭౬.

యాసం హి లోకే ఉపమా నత్థి,

తాసం హి ఫస్సేసు కథావకాసా;

తం తాదిసం కామరతింనుభోన్తో,

హిత్వా కథం ను పదముద్ధరి సో నిరాసో.

౭౭.

పాదేపాదే వలయవిరవామేఖలావీణానాదా,

గీతంగీతం పతిరతికరం గాయతీ గాయతీ సా;

హత్థేహత్థే వలయచలితా సమ్భమం సమ్భమన్తి,

దిస్వాదిస్వా ఇతి రతికరం యాతి హాహా కిమీహా.

అపునరావత్తిగమనదీపనీయమకగాథా

౭౮.

అనన్తకాలోపచితేన తేన,

పుఞ్ఞేన నిబ్బత్తవిమానయానే;

తస్మిం దినే జాతసుతం పజాపతిం,

హిత్వా గతో సో సుగతో గతో వ.

౭౯.

తం జీవమానం పితరఞ్చ మాతరం,

తే ఞాతకే తాదిసియో చ ఇత్థియో;

తే తాదిసే రమ్మకరే నికేతే,

హిత్వా గతో సో సుగతో గతో వ.

౮౦.

ఖోమఞ్చ పత్తుణ్ణదుకూలచీనం,

సకాసికం సాధుసుగన్ధవాసితం;

నివాసితో సోభతి వాసవో వ,

హిత్వా గతో సో సుగతో గతో వ.

౮౧.

విధిప్పకాసా నిధియో చతస్సో,

సముగ్గతా భూతధరా వసున్ధరా;

సత్తావసత్తావసుధా సుధాసా,

హిత్వా గతో సో సుగతో గతో వ.

౮౨.

సువణ్ణథాలే సతరాజికే సుభే,

సాధుం సుగన్ధం సుచిసాలిభోజనం;

భుత్వా సవాసీహి విలాసినీహి,

హిత్వా గత సో సుగతో గతో వ.

౮౩.

మనుఞ్ఞగన్ధేన అసుఞ్ఞగన్ధో,

సుగన్ధగన్ధేన విలిత్తగత్తో;

సుగన్ధవాతేన సువిజ్జితఙ్గో,

హిత్వా గతో సో సుగతో గతో వ.

౮౪.

సులక్ఖణే హేవభిలక్ఖితఙ్గో,

పసాధితో దేవపసాధనేన;

విరోచమానో సమరాజినీహి,

హిత్వా గతో సో సుగతో గతో వ.

౮౫.

నానాసనాని సయనాని నివేసనాని,

భాభానిభాని రతనాకరసన్నిభాని;

తత్రుస్సితాని రతనద్ధజభూసితాని,

హిత్వా వ తాని హిమబిన్దుసమాని తాని.

౮౬.

నానావిధేహి రతనేహి సముజ్జలేహి,

నారీహి నిచ్చముపగాయితహమ్మియేహి;

రజ్జేహి చక్కరతనాదివిభూసితేహి,

యాతో తతో హి మహితో పురిసస్సరేహి.

ద్విపాదబ్యాసయమకగాథా

౮౭.

యసోధరం పీణపయోధరాధరం,

అనఙ్గరఙ్గద్ధజభూతమఙ్గం;

దేవచ్ఛరావుజ్జలితం పతిబ్బతం,

హిత్వా గతో సో సుగతో వ నూన.

౮౮.

సభావనిచ్ఛన్దమతిం పభావతిం,

భత్తో కుసో సంహరి భత్తకాజం;

తాయాభిరూపం పి యసోధరం వరం,

హిత్వా గతో సో సుగతో వ నూన.

౮౯.

పురే పురే సఞ్చరి ఖగ్గహత్థో,

వరం పరిత్థీనం అనిత్థిగన్ధో;

సిరిఞ్చ రిఞ్చాపి న రిఞ్చి నారిం,

హిత్వానిమన్దాని గతో తథాగతో.

౯౦.

హరిత్తచో రాగబలేన దేవియా,

అవత్థలిఙ్గేన న లిఙ్గనుస్సరి;

అసేవి కామం తమిదాని కామం,

హిత్వా గతో సో సుగతో వ నూన.

౯౧.

అపమేయ్యకప్పేసు వివేకసేవీ,

హిత్వా గతో రజ్జసిరిం వరిత్థిం;

అణుం కలిం వణ్ణయి తం పురాణం,

వత్థమ్హి ఛిద్దం వియ తున్నకారో.

౯౨.

తథాతి మన్త్వాన ఇదానినఙ్గో,

యసోధరం పగ్గహితో ధజం వ;

మత్తో జితోమ్హీ తి పమత్తబన్ధు,

న పస్సి ఞాణాసనిపాతమన్తరం.

౯౩.

దిస్వాన దుక్ఖానలసమ్భవంభవం,

కత్వా తదుప్పాదకనఙ్గభఙ్గం;

యసోధరం పీణపయోధరాధరం,

హిత్వా గతో బుద్ధబలప్పదం పదం.

౯౪.

అనన్తసత్తానమనన్తకాలే,

మనఙ్గహేత్వాన జితో అనఙ్గో;

పరాజితో నూన హి ఏకకస్స,

తథాగతో సో న పునాగతో వ.

౯౫.

దిస్వాన ఞాణాసనిపాతమన్తరం,

తథాగతో సో న పునాగతో వ;

తథాగతో సో న పునాగతో వ,

దిస్వానఞాణాసనిపాతమన్తరం.

తిపాదబ్యాసయమకగాథా

౯౬.

తథాగతచ్ఛేరమహోసి తస్స,

తథా హిమారోపితదాహసన్తిం;

తథా హి మారో పి తదాహ సన్తిం,

తథా హి మారోపి తదా హసన్తిం.

పాదబ్యాసమహాయమకగాథా

౯౭.

సకామదాతా వినయామనతగూ,

సకామదాతా వినయామనన్తగూ;

సకామదాతా వినయామనన్తగూ,

సకామదాతా వినయామనన్తగూ.

అబ్యాపేతాద్యన్తయమకగాథా

౯౮.

రవేరవేరోరభిమారభేరవే,

రవేరవేరివ భేరవే రవే;

రవే రవే సూదితగారవే రవే,

రవేరవేదేసి జినోరవే రవే.

పటిలోమయమకగాథా

౯౯.

లోకాయాతతయా కాలో విసేసం న న సంసేవి,

విసేసం న న సంసేవి లోకా యాతతయా కాలో.

౧౦౦.

రాజరాజయసోపేతవిసేసం రచితం మయా,

యామతం చిరసంసేవితపేసో యజరాజరా.

ఏకఠానికాదియమకగాథా

౧౦౧.

ఆకఙ్ఖక్ఖాకఙ్ఖఙ్గ కఙ్ఖాగఙ్గాఖాగహక,

కఙ్ఖాగాహకకఙ్ఖాఘ హా హా కఙ్ఖా కహం కహం.

౧౦౨.

అప్పగబ్భో అపగబ్భో అమోహో మా పమోహకో,

మగ్గముఖం మోఖమాహ మాహా మోహమూహక్ఖమం.

౧౦౩.

పాపాపాపభవం పస్సం పాపాపభవుగ్గతో,

పాపాపాపభవాసఙ్గా పాపాపాపభవాగతో.

౧౦౪.

కుసలాకుసలం పస్సం కుసలాకుసలం చజి,

కుసలాకుసలాసఙ్గ కుసలాకుసలా చుతో.

అక్ఖరుత్తరికయమకగాథా

౧౦౫.

నోనానినో ననూనాని ననేనాని ననానినో,

నున్నానేనాని నూన న నాననం నాననేన నో.

౧౦౬.

సారే సురాసురే సారీ రససారసరిస్సరో,

రససారరసే సారి సురాసురసరస్సిరే.

౧౦౭.

దేవానం నన్దనో దేవో దేవదేవ న నన్ది నో,

వేదదీనేన వేదన వేది వేదన వేదినో.

౧౦౮.

దేవాసనే నిసిన్నో సో దేవదేవో ససాసనే,

నిసిన్నానం సదేవానం దేసేసి దస్సనాసనం.

పహేళిగాథా

౧౦౯.

దసనావగతో సఞ్ఞో అన్ధస్స తమదో రవి,

అట్ఠమాపుణ్ణసఙ్కప్పో పాత్వనఞ్ఞమనఞ్ఞివ.

బ్యాపేతాదియమకగాథా

౧౧౦.

ఏకన్తమేవ సపరత్థపరో మహేసి,

ఏకన్తమేవ దసపారమితాబలేన;

ఏకన్తమేవ హతమారబలేన తేన,

ఏకన్తమేవ సువిసుద్ధమలత్థ బోధిం.

మహాపధానదీపనీగాథా

౧౧౧.

ఓరోహితోతోహితపాపధమ్మో,

ఛన్నేన స ఛన్నహయేన గన్త్వా;

అనోమతీరమ్హి అనోమసత్తో,

అనోమపబ్బజ్జముపాగతో సో.

౧౧౨.

నిరామిసం పీతిసుఖం అనూపమం,

అనూపియే అమ్బవనే అలత్థ;

సరూపసోభాయ విరూపసోభం,

సరాజికం రాజగహం కరిత్థ.

౧౧౩.

తతో అళార ఊదకతాపసానం,

ఝానేనసన్తుట్ఠమనో విహాయ;

మహాపధానాయ ఉరువేలభూమిం,

గతో సిఖప్పత్తమకాసి దుక్కరం.

౧౧౪.

న కామతో నేవతిదుక్కరమ్హి,

సబ్బఞ్ఞుతా సిజ్ఝతి మజ్ఝిమాయ;

ఞత్వాన తం పుబ్బగుణోపలద్ధం,

ధమ్మం సమానేతుమగా సుబోధిం.

మారపరాజయదీపనీగాథా

౧౧౫.

తిబుద్ధఖేత్తమ్హి తిసేతఛత్తం,

లద్ధాన లోకాధిపతీ భవేయ్య;

గన్త్వాన బోధిమ్హిపరాజితాసనే,

యుద్ధాయ మారేనచలో నిసీది.

౧౧౬.

దత్వాన మంసం రజ్జం పితా సుద్ధోదనో తదా,

నమస్సమానో సిరసా సేతఛత్తేన పూజయి.

౧౧౮.

సయం నారాయనబలో అభిఞ్ఞాబలపారగూ,

జేతుం సబ్బస్స లోకస్స బోధిమణ్డంఉపాగమి.

౧౧౯.

తదా వసవత్తీరాజా ఛకామవచరిస్సరో,

ససేనావాహనో బోధిమణ్డం యుద్ధాయుపాగమి.

౧౨౦.

ఏథ గణ్హథ బన్ధథ ఛట్టేథ చేటకం ఇమం,

మనుస్సకలలే జాతో కిమిహన్తి న మఞ్ఞతి.

౧౨౧.

జలన్తం నవవిధం వస్సం వస్సాపేతి అనప్పకం,

ధూమన్ధకారం కత్వాన పాతేసి అసినం బహుం.

౧౨౨.

చక్కావుధం ఖిపేన్తో పి నాసక్ఖి కిఞ్చి కాతవే,

గహేతబ్బం హి గహణం అపస్సన్తో ఇతిబ్రవి.

౧౨౩.

సిద్ధత్థ కస్మా ఆసి ను ఆసనే మమ సన్తకే,

ఉట్ఠేహి ఆసనా నో చే ఫాలేమి హదయం తవ.

౧౨౪.

సపాదమూలే కీళన్తం పస్సన్తో తరుణం సుతం,

పితా వుదిక్ఖి తం మారం మేత్తాయన్తో దయపరో.

౧౨౫.

తదా సో అసమ్భివాచం సీహనాదం నదీ ముని,

న జానాతి సయం మయ్హం దాసభావపియం ఖళో.

౧౨౬.

యేన కేనచి కమ్మేన జాతో దేవపురే వరే,

సకం గతిం అజానన్తో లోకజేట్ఠోతి మఞ్ఞతి.

౧౨౭.

అనన్తలోకఖాతుమ్హి సత్తానం హి కతం సుభం,

మయ్హేకపారమియా పి కలం నగ్ఘతి సోళసిం.

౧౨౮.

తిరచ్ఛానో ససో హుత్వా దిస్వా యాచకమాగతం,

పచిత్వాన సకం మంసం పతిఇఓగ్గిమ్హి దాతవే.

౧౨౯.

ఏవం అనన్తకాలేసు కతం దుక్కరకారికం,

కో హి నామ కరేయ్యఞ్ఞో అనుమ్మత్తో సచేతనో.

౧౩౦.

ఏవం అనన్తపుఞ్ఞేహి సిద్ధం దేహమిమం పన,

యథాభుతం అజానన్తో మనుస్సోసీ తి మఞ్ఞతి.

౧౩౧.

నాహం మనుస్సోమనుస్సో న బ్రహ్మా న చ దేవతా,

జరామరణం లోకస్స దస్సేతుం పనిధాగతో.

౧౩౨.

అనుపలిత్తో లోకేన జాతోనన్తజినో అహం,

బుద్ధో బోధితలే హుత్వా తారేమి జనతం బహుం.

౧౩౩.

సమన్తా ధజినం దిస్వా యుద్ధం మారం సవాహనం,

యుద్ధాయ పచ్చుగచ్ఛామి మా మం ఠానా అచావయి.

౧౩౪.

యన్తే తం నప్పసహతి సేనం లోకో సదేవకో,

తన్తే పఞ్ఞాయ గచ్ఛామి ఆమం పత్తం వ అస్మనా.

౧౩౫.

ఇచ్ఛన్తో సాసపే గబ్భే చఙ్కమామి ఇతో చితో,

ఇచ్ఛన్తో లోకధాతుమ్హి అత్తభావేన ఛాదయి.

౧౩౬.

ఏతే సబ్బే గహేత్వాన చుణ్ణేతుం అచ్ఛరాయపి,

అత్థి థామం బలం మయ్హం పాణఘాతో న వట్టతి.

౧౩౭.

ఇమస్స గణ్డుప్పాదస్స ఆయుధేన బలేన కిం,

మయ్హం హి తేన పాపేన సల్లాపో పి న యుజ్జతి.

౧౩౮.

పల్లఙ్కం మమ భావాయ కిమత్థఞ్ఞేన సక్ఖినా,

కమ్పితా మద్దియా దానా సక్ఖి హోతి అయం మహీ.

౧౩౯.

ఇతి వత్వా దక్ఖిణం బాహుం పథవియా పణమయి,

తదా కమ్పిత్థ పథవీ మహాఘోసో అజాయథ.

౧౪౦.

పథవీఘోసేన ఆకాసే గజ్జన్తో అసని ఫలి,

తస్మిం మజ్ఝే గతో మారో సపరిసో భయతజ్జితో.

౧౪౧.

మహావాతసముద్ధతభస్మం వ వికిరియ్యథ,

మహాఘోసో అజాయిత్థ సిద్ధతస్స జయో ఇతి.

అభిసమ్బోధిదీపనీగాథా

౧౪౨.

పురతో గచ్ఛతి చన్దో రజతచక్కం వ అమ్బరే,

సహస్సరంసి సురియో పచ్ఛిమేనుపగచ్ఛతి.

౧౪౩.

మజ్ఝే బోధిదుమచ్ఛత్తే పల్లఙ్కే అప్పరాజితే,

పల్లఙ్కేన నిసీదిత్వా ధమ్మం సమ్మసతే ముని.

౧౪౪.

సక్కో తస్మిం ఖణే సఙ్ఖం ధమన్తో అభిధావతి,

బ్రహ్మా తియోజనం ఛత్తం ధారేతి మునిముద్ధని.

౧౪౫.

మణితాలవణ్టం తుసీతో సుయామో వాళబీజనిం,

నానామఙ్గలభణ్డాని గహితో సేసదేవతా.

౧౪౬.

ఏవం దససహస్సమ్హి సక్కో బ్రహ్మా చ దేవతా,

సఙ్ఖాదీనీ ధమన్తా చ చక్కవాళమ్హి పూరయుం.

౧౪౭.

మఙ్గలాని గహేత్వాన తిట్ఠన్తి కాచి దేవతా,

ధజమాల గహేత్వాన తథా పుణ్ణఘటాదయో.

౧౪౮.

తత్థ నచ్చన్తి గాయన్తి సేళేన్తి వాదయన్తి చ,

దేవా దససహస్సమ్హి తుట్ఠహట్ఠా పమోదితా.

౧౪౯.

ధమ్మామతరసస్సాదం లభిస్సామస్స సన్తికే,

నయనామతరసస్సాదం పాటిహారియఞ్చ పస్సితుం.

౧౫౦.

జారమరణకన్తారా సోకోపాయాససల్లతో,

మోచేసి కామపాసమ్హా దేసేన్తో అమతం పదం.

౧౫౧.

ఇతి తుట్ఠేహి దేవేహి పూజియన్తో నరాసభో,

కిఞ్చి పూజం అచిన్తేన్తో చిన్తేన్తో ధమ్మముత్తమం.

౧౫౨.

సబ్బత్థసాధితో సన్తో సిద్ధత్థో అప్పరాజితో,

చక్కవాళసిలాసాణిపాకారేహి మనోరమే.

౧౫౩.

తారామణిఖచితాకాసవితానే చన్దదీపకే,

మానారతమపజ్జోతే మాలాగన్ధాదిపూజితే.

౧౫౪.

దిబ్బేహి ఛణభేరీహి ఘుట్ఠే మఙ్గలగీతియా,

చక్కవాళే సుప్పాసాదే బోధిమణ్డమహాతలే.

౧౫౫.

బోధిరుక్ఖమణిచ్ఛత్తే పల్లఙ్కే అప్పరాజితే,

నిస్సిన్నో పఠమే యామే పురిమం జాతిమనుస్సరి.

౧౫౬.

నమరూపామనుప్పత్తి సుదిట్ఠా హోతి తేనిధా,

సక్కాతదిట్ఠి తేనస్స పహీనా హోతి సబ్బసో.

౧౫౭.

తతో హి దుతియే యామే యథాయమ్ముపగే సరి,

సుదిట్ఠం హోతి తేనస్స కమ్మక్లేసేహి సమ్భవం.

౧౫౮.

కఙ్ఖావితరణీ నామ ఞాణన్తం సముపాగతం,

తేనసేస పహీయిత్థ కఙ్ఖా సోళసధా ఠితా.

౧౫౯.

తతో సో తతియే యామే ద్వాదసఙ్గే అసేసతో,

సో పటిచ్చసముప్పాదే ఞాణమోతారయీ ముని.

౧౬౦.

అవిజ్జవాద్యానులోమేన జరాదిపటిలోమతో,

సమ్మసన్తో యథాభూతం ఞాణదస్సనమాగమి.

౧౬౧.

కప్పకోటిసతేనాపి అప్పమేయ్యేసు జాతిసు,

లోభం అసేసదానేన వినాసేన్తో పునప్పునం.

౧౬౨.

సీలేన ఖన్తిమేత్తాయ కోఖదోసం నివారేసి,

పఞ్ఞాయ మోహం ఛేత్వాన మిచ్ఛాదిట్ఠి తథేవ చ.

౧౬౩.

గరూపసేవనాదీహి విచికిచ్ఛం వినోదయం,

మానుద్ధచ్చం వినోదేన్తో కులే జేట్ఠోపచాయినా.

౧౬౪.

నేక్ఖమ్మేన వినాసేన్తో కామరాగం పునప్పునం,

సచ్చేన విసంవాదం కోసజ్జం వీరియేన చ.

౧౬౫.

ఏవం దానాదినా తం తం కిలేసఙ్గం వినోదయం,

సువడ్ఢితా మహాపఞ్ఞా కథం సన్తిం న రూహతి.

౧౬౬.

సుదుక్కరం కరిత్వాన దానాదిపచ్చయం పురే,

న కిఞ్చి భవసమ్పత్తిం పత్థేసి బోధిముత్తమం.

౧౬౭.

పణిధానమ్హా పట్ఠాయ కతం పుఞ్ఞఞ్చ పత్థనం,

ఏక్కత్థ దాని సమ్పత్తిం దేతి బోధిం అసంసయం.

౧౬౮.

తతో సో సబ్బసఙ్ఖారే అనిచ్చదుక్ఖనత్తతో,

సమ్మసన్తోనులోమేన నిబ్బానం సముపాగమి.

౧౬౯.

సవాసనే కిలేసే సో ఝాపేన్తోనుమత్తం పి చ,

అరహత్తప్పత్తియా సుద్ధో బుద్ధో బోధితలే అహు.

౧౭౦.

పత్తో విమేత్తిం వరసేతఛత్తం,

సో పీతివేగేన ఉదానుదీరయి;

ఛేత్వాన మారే విజితారిసఙ్ఘో,

తిబుద్ధఖేత్తేకదివాకరో అహు.

౧౭౧.

రాజాధిరాజా వరమేవమాసి,

తిఛత్తధారి వరధమ్మరాజా;

మహాసహస్సం పి చ లోకధాతుం,

సరేన విఞ్ఞాపయితుం సమత్థో.

౧౭౨.

బుద్ధో లోకాలోకే లోకే,

జాతో సత్తో కోనుమ్మత్తో;

సుద్ధం బుద్ధం ఓఘా తిణ్ణం,

సద్ధో పఞ్ఞో కో నో వన్దే.

౧౭౩.

భజితం చజితం పవనం భవనం,

జహితం గహితం సమలం అమలం;

సుగతం అగతం సుగతిం అగతిం,

నమితం అమితం నమతిం సుమతిం.

ధమ్మచక్కపవత్తనదీపనీగాథా

౧౭౪.

సమ్మాసమ్బోధిఞానం హతసకలమలం సుద్ధతో చాతిసుద్ధం,

అద్ధా లద్ధా సులద్ధం వతమితి సతతం చిన్తయన్తో సుబోధిం;

సత్తాహం సత్తమేవం వివిధఫలసుఖం వితినామేసి కాలం,

బ్రహ్మేనాయాచితో సో ఇసిపతనవనే వత్తయీ ధమ్మచక్కం.

పాటిహారియదీపనీగాథా

౧౭౫.

బ్రహ్మస్స సద్దం కరవీకభాణిం,

యథిచ్ఛితం సావయితుం సమత్థం;

సచ్చం పియం భూతహితం వదన్తం,

న పూజయే కో హి నరో సచేతనో.

౧౭౬.

ఇద్ధి చ ఆదేసనానుసాసనీ,

పాటిహీరే భగవా వసీ అహు;

కత్వాన అచ్ఛేరసుపాటిహీరం,

దేసేసి ధమ్మం అనుకమ్పిమం పజం.

నవగుణదీపనీగాథా

౧౭౭.

ఏవం హి బుద్ధత్తముపాగతో సో,

దేసేసి ధమ్మం సనరామరానం;

నానానయేహీభిసమేసి సత్తే,

తస్మా హి ఝాతో తిభవేసు నాథో.

౧౭౮.

అద్ధా లద్ధా ధమ్మాలోకం,

దిట్ఠా పత్తా ఞాతా సచ్చం;

తిఞ్ఞారాగాదోసమోహా,

థోమేసుం తే దేవా బ్రహ్మా.

౧౭౯.

మునిరాజవరో నరరాజవరో,

దివిదేవవరో సుచిబ్రహ్మవరో;

సకపాపహరో పరపాపహరో,

సకవుడ్ఢికరో పరవుడ్ఢికరో.

౧౮౦.

సనరామరుబ్రహ్మగణేభి రుతా,

అరహాదిగుణా విపులా విమలా;

నవధా వసుధాగగణే,

సకలే తిదివే తిభవే విసటా.

౧౮౧.

యే పిస్స తే భగవతో చ అచిన్తియాదీ,

సుద్ధాతిసుద్ధతరబుద్ధగుణా హి సబ్బే;

సఙ్ఖేపతో నవవిధేసు పదేసు ఖిత్తా,

వక్ఖామి దాని అరహాదిగుణే అహం పి.

౧౮౨.

యో చీధ జాతో అరహం నిరాసో,

సమ్మాభిసమ్బుద్ధసమన్తచక్ఖు;

సమ్పన్నవిజ్జాచరణోఘతిణ్ణో,

సమ్మాగతో సో సుగతో గతో వ.

౧౮౩.

అవేది సో లోకమిమం పరఞ్చ,

అముత్తరో సారథిదమ్మసత్తే;

సదేవకానం వరసత్థుకిచ్చం,

అకాసి బుద్ధో భగవా విసుద్ధో.

గుణదీపనీగాథా

౧౮౪.

న తస్స అదిట్ఠనమిధత్థి కిఞ్చి,

అతో అవిఞ్ఞాతమజానితబ్బం;

సబ్బం అభిఞ్ఞాసి యదత్థి ఞేయ్యం,

తథాగతో తేన సమన్తచక్ఖు.

౧౮౫.

ఇతి మహితమనన్తాకిత్తిసమ్భారసారం,

సకలదససహస్సీలోకధాతుమ్హి నిచ్చం;

ఉపచితసుభహేతుపయుతానన్తకాలం,

తదిహ సుగతబోధిసాధుకం చిన్తనీయం;

౧౮౬.

తక్కబ్యాకరణఞ్చ ధమ్మవినయం సుత్వా పి యో పఞ్ఞవా,

తేనాయం సుచిసారభూతవచనం విఞ్ఞాయతే కేవలం;

హేతుఞ్చాపి ఫలేన తేన సఫలం సమ్పస్సమానో తతో బోధిం సద్దహతేవ తస్స మహతావాయమతో సమ్భవం.

౧౮౭.

యో సద్దహన్తో పన తస్స బోధిం,

వుత్తానుసారేన గుణేరహాదీ;

కథేతి చిన్తేన్తి చ సో ముహుత్తం,

ఓహాయ పాపాని ఉపేతి సన్తిం.

౧౮౮.

సద్ధేయ్యా తే చిన్తేయ్యా తే,

వన్దేయ్యా తే పూజేయ్యాతే;

బుద్ధోలోకాలోకే లోకే,

జాతే నేతం పత్థేన్తేన.

పూజానిధానదీపనీగాథా

౧౮౯.

తసమా హి జాతోవరకమ్హి తస్స,

ఆయత్తకే మఙ్గలచక్కవాళే;

భూతేహి వత్థూహి మనోరమేహి,

పూజేమి తం పూజిత్పూజితం పురే.

౧౯౦.

సోహం అజ్జ పనేతస్మిం చక్కవాళమ్హి పుప్ఫితే,

థలజే జలజే వాపి సుగన్ధే చ అగన్ధకే.

౧౯౧.

మనుస్సేసు అనేకత్థ తళాకుయ్యానవాపిసు,

పవనే హిమవన్తస్మిం తత్థ సత్త మహాసరే.

౧౯౨.

పరిత్తదీపే ద్విసహస్సే మహాదీపే సుపుప్ఫితే,

సత్తపరిభణ్డసేలేసు సినేరుపబ్బతుత్తమే.

౧౯౩.

కుముదుప్పలకాదీని నాగానం భవనేసుపి,

పాటలాదీని పుప్ఫాని అసురానం హి ఆలయే.

౧౯౪.

కోవిళారాదికాని తు దేవతానం హి ఆలయే,

ఏవమాదీ అనేకత్థ పుప్ఫితే ధరణీరుహే.

౧౯౫.

చమ్పకా సలలా నిమ్బా నాగపున్నాగకేతకా,

వస్సికా మల్లికా సాలా కోవిళారా చ పాటలి.

౧౯౬.

ఇన్దీవరా అసోకా చ కణికారా చ మకులా,

పదుమా పుణ్డరికా చ సోగన్ధికుముదుప్పలా.

౧౯౭.

ఏతే చఞ్ఞే చ రుక్ఖా చ వల్లియో చాపి పుప్ఫితా,

సుగన్ధా సుఖసమ్ఫస్సా నానావణ్ణనిభా సుభా.

౧౯౮.

విచిత్రా నీలానేకాని పీతా లోహితకాని చ,

కాళా సేతా చ మఞ్జట్ఠ నేకవణ్ణా సుపుప్ఫితా.

౧౯౯.

సోభతే పబ్బతే హేట్ఠా సరేహి వనరాజిహి,

సన్దమానాహి గఙ్గాహి హిమవా రతనాకరో.

౨౦౦.

పత్తకిఞ్జక్ఖరేణూహి ఓకిణ్ణం హోతి తం వనం,

భమరా పుప్ఫగన్ధేహి సమన్తా అభినాదితా.

౨౦౧.

అథేత్త సకుణా సన్తి దిజా మఞ్జుస్సరా సుభా,

కూజన్తముపకూజన్తి ఉతుసమ్పుప్ఫితే దుమే.

౨౦౨.

నిచ్ఛరానం నిపాతేన పబ్బతా అభినాదితా,

పఞ్చఙ్గికాని తూరియాని దిబ్బాని వియ సుయ్యరే.

౨౦౩.

తత్థ నచ్చన్తి తస్మిం జలన్తగ్గిసిఖూపమా,

తస్మిం హి కిన్నరా కిచ్చం పదీపేన కరీయతి.

౨౦౫.

ముత్తాజాలావ దిస్సన్తి నిచ్ఛరానం హి పాతకా,

పజ్జలన్తా వ తిట్ఠన్తి మణివేళురియాదయో.

౨౦౬.

కాళానుసారి తగ్గరం కప్పూరం హరిచన్దనం,

సకుణానం హి సద్దేన మయూరానం హి కేకయా.

౨౦౭.

భమరానం హి నిన్నాదా కోఞ్చనాదేన హత్థినం,

విజమ్భితేన వాళానం కిన్నరానం హి గీతియా;

౨౦౮.

పబ్బతానం హి ఓభాసా మణీనం జోతియాపి చ,

విచిత్రబ్భవితానేహి దుమానం పుప్ఫధూపియా;

ఏవం సబ్బఙ్గసమ్పన్నం కిం సియా నన్దనం వనం.

౨౦౯.

ఏవం సుసమ్ఫుల్లవనం హి యం యం,

తహిం తహిం పుప్ఫితపుప్ఫితం సుభం;

మాలం సుసద్దఞ్చ మనుఞ్ఞగన్ధం,

పూజేమి తం పూజితపూజితం పురా.

౨౧౦.

నాగలోకే మనుస్సే చ దేవే బ్రహ్మే చ యం సియా,

సాముద్దికం భూమిగతం ఆకాసట్ఠఞ్చ యం ధమం.

౨౧౧.

రజతం జాతరూపఞ్చ ముత్తా వేళురియా మణి,

మసారగల్లం ఫలికం లోహితఙ్గం పవాళకం.

౨౧౨.

యో సో అనన్తకప్పేసు పూరేత్వా దసపారమీ,

బుద్ధో బోధేసి సత్తానం తస్స పూజేమి తం ధనం.

౨౧౩.

ఖోమం కోసేయ్యం కప్పాసం సాణం భఙ్గఞ్చ కమ్బలం,

దుకూలాని చ దిబ్బాని దుస్సాని వివిధాని తే.

౨౧౪.

అనన్తవత్థదానేన హిరోత్తప్పాదిసంవరం,

యస్స సిద్ధం సియా తస్స దుస్సాని పుజయామహం.

౨౧౫.

పవనే జాతరుక్ఖానం నానాఫలరసుత్తమం,

అమ్బా కపిట్ఠా పన్సా చోచమోచాదినప్పకా.

౨౧౬.

తస్మిం గన్ధరసం ఓజం బుద్ధసేట్ఠస్స పూజితం,

వన్దామి సిరసా నిచ్చం విప్పసన్నేన చేతసా.

౨౧౭.

పూజేమి పఠమం తస్స పణిధానం అచిన్తియం,

చక్కవాళమ్హి సబ్బేహి విజ్జమానేహి వత్థుహి.

౨౧౮.

దసన్నం పారమీనన్తు పూరితట్ఠానముత్తమం,

తతో సాలవనే రమ్మే జాతట్ఠానం చరిమకం.

౨౧౯.

ఛబ్బసాని పధానస్మిం కరణం దుక్కరకారికం,

అప్పరాజితపల్లఙ్కం బుద్ధం బుద్ధగుణం నమే.

౨౨౦.

చుద్దస బుద్ధఞాణాని అట్ఠర్స ఆవేణికం,

పూజేమి దసబలఞాణం చతువేసారజ్జముత్తమం.

౨౨౧.

ఆసయానుసయఞాణం ఇన్ద్రియానం పరోపరం,

యమకపాటిహీరఞ్చ ఞాణం సబ్బఞ్ఞుతం పి చ.

౨౨౨.

మహాకరుణాపత్తిఞాణం అనావరణ్మితి చ,

ఛ అసాధారణానేతే ఞత్వాన పూజయామహం.

౨౨౩.

తతో చ సత్తసత్తాహే ధమ్మసమ్మసితం నమే,

బ్రహ్మునా యాచితట్ఠానం ధమ్మం దేసయితుం వరం.

౨౨౪.

ఇసిపతనే మిగదాయే ధమ్మచక్కపవత్తనం,

తతో వేళువనారామే వసితఠానఞ్చ పూజయే.

౨౨౫.

తతో జేతవనం రమ్మం చిరవుత్థం మహేసినా,

అసాధారణమఞ్ఞేసం యమకపాటిహరియం.

౨౨౬.

పారిచ్ఛత్తకమూలమ్హి అభిధమ్మఞ్చ దేసనం,

సఙ్కస్సనగరద్వారే దేవోరోహణకం పి చ.

౨౨౭.

తతో చ హిమవన్తస్మిం మహాసమయదేసనం,

వుత్తానేతాని ఠానాని నత్వాన పుజయామహం.

౨౨౮.

చతురాసీతిసహస్సేహి ధమ్మక్ఖన్ధేహి సఙ్గహం,

పిటకత్తయం యథావుత్తవిధినా పూజయామహం.

౨౨౯.

మారస్స అత్తనో ఆయుసఙ్ఖారోసజ్జనం నమే,

కుసినారాయ మల్లానం యమకసాలమన్తరే.

౨౩౦.

పణిధానమ్హి పట్ఠాయ కతం కిచ్చం అసేసతో,

నిట్ఠపేత్వాన సో సబ్బం పరినిబ్బాయినాసవో.

౨౩౧.

ఏవం నిబ్బాయమానస్స కతకిచ్చస్స తాదినో,

చిరగతా మహాకరుణా న నిబ్బాయిత్థ కిఞ్చిపి.

౨౩౨.

స్వాయం ధమ్మో వినయో చ దేసితో సాధుకం మయా,

మమచ్చయేన సో సత్థా ధాతు చాపి సరీరజా.

౨౩౩.

అప్పరాజితపల్లఙ్కం బోధిరుక్ఖఞ్చ ఉత్తమం,

మమచ్చయేన సత్థా తి అనుజాని మహాముని.

౨౩౪.

మమ ఠనే ఠపేత్వాన ధాతుబోధిఞ్చ పూజితం,

అనుజానామి తుమ్హాకం సాధనత్థం సివఞ్జసం.

౨౩౫.

తస్మా హి తస్స సద్ధమ్మం ఉగ్గణ్హిత్వా యథాతథం,

యో దేసేతి సమ్బుద్ధో తి నత్వాన పూజయామహం.

౨౩౬.

తస్మా సాసపమత్తం పి జినధాతుం అసేసియ,

విత్థిన్నచక్కవాళమ్హి నత్వాన పూజయామహం.

౨౩౭.

పరమ్పరాభతానం హి ఇమమ్హా బోద్ధిరుక్ఖతో,

సబ్బేసం బోధిరుక్ఖానం నత్వాన పూజయామహం.

౨౩౮.

యం యం పరిభుఞ్జి భగవా పత్తచీవరమాదికం,

సబ్బం పరిభోగధాతుం నత్వాన పూజయామహం.

౨౩౯.

యత్థ కత్థచి సయితో ఆసిన్నో చఙ్కమేపి వా,

పాదలఞ్ఛన్కం కత్వా ఠితో నత్వాన పూజయే.

౨౪౦.

న సఞ్జానన్తి యే బుద్ధం ఏవరూపో తి ఞాత్వే,

కతం తం పటిమం సబ్బం నత్వాన పూజయామహం.

౨౪౧.

ఏవం బుద్ధఞ్చ ధమ్మఞ్చ సఙ్ఘఞ్చ అనుత్తరం,

చక్కవాళమ్హి సబ్బేహి వత్థూహి పూజయామహం.

పత్థనాదీపనీగాథా

౨౪౨.

అస్మిం చ పుబ్బేపి చ అత్తభావే,

సబ్బేహి పుఞ్ఞేహి మయా కతేహి;

పూజావిధానేహి చ సఞ్ఞమేహి,

భవే భవే పేమనియో భవేయ్యం.

౨౪౩.

సద్ధా హిరోత్తప్పబహుస్సుతత్తం,

పరక్కమో చేవ సతిస్సమాధి;

నిబ్బేధభాగీ వజిరూపమాతి,

పఞ్ఞా చ మే సిజ్ఝతు యావ బోధిం.

౨౪౪.

రాగఞ్చ దోసఞ్చ పహాయ మోహం,

దిట్ఠిఞ్చ మానం విచికిచ్ఛితఞ్చ;

మచ్ఛేరేఇస్సామలవిప్పహీనో,

అనుద్ధతో అచ్చపలో భవేయ్యం.

౨౪౫.

భవేయ్యహం కేనచి నప్పసేయ్హో,

భోగో చ దిన్నేహి పటేహి;

భోగో చ కాయో చ మమేస లద్ధో,

పరూపకారాయ భవేయ్యం నూన.

౨౪౬.

ధమ్మేనా మాలాపితరో భరేయ్యం,

వుడ్ఢపచాయీ చ బహూపకారీ;

ఞాతీసు మిత్తేసు సపత్తకేసు,

వుడ్ఢిం కరేయ్యం హితమత్తనో చ.

౨౪౭.

మేత్తేయ్యనాథం ఉపసఙ్కమిత్వా,

తస్సత్తభావం అభిపూజయిత్వా;

లద్ధాన వేయ్యాకరణం అనూనం,

బుద్ధో అయం హేస్సతినాగతేసు.

౨౪౮.

లోకేన కేనాపి అనుపలిత్తో,

దానే రతో సీలగుణే సుసాణ్ఠితో;

నేక్ఖమ్మభాగి వరఞాణలాభీ,

భవేయ్యహం థామబలుపపన్నో.

౨౪౯.

సీసం సమంసమం మమ హత్థపాదే,

సంఛినదమానేపి కరేయ్యఖన్తిం;

సచ్చే ఠితో కాలుమధిట్ఠితే వ,

మేత్తాయుపేక్ఖాయ యుతో భవేయ్యం.

౨౫౦.

మహాపరిచ్చాగం కత్వా పఞ్చ,

సమ్బోధిమగ్గం అవిరాధయన్తో;

ఛేత్వా కిలేసే చితపఞ్చమారో,

బుద్ధో భవిస్సామి అనాగతేసు.