అఞ్ఞ > సఙ్గాయన-పుచ్ఛ విస్సజ్జనా

పుచ్ఛా – సాధు ¶ సాధు ఆవుసో మయమ్పి దాని తతోయేవ పట్ఠాయ సంగాయితుం పుబ్బకిచ్చాని సమారభామ…, తేనావుసో భగవతా జానతా పస్సతా అరహతా సమ్మాసమ్బుద్ధేన బ్రహ్మజాలసుత్తం కత్థ భాసితం.

విస్సజ్జనా – అన్తరా చ భన్తే రాజగహం అన్తరా చ నాళన్దం అమ్బలట్ఠికాయం రాజాగారకే భాసితం.

పుచ్ఛా – కం ¶ ఆవుసో ఆరబ్భ భాసితం.

విస్సజ్జనా – సుప్పియఞ్చ భన్తే పరిబ్బాజకం బ్రహ్మదత్తఞ్చ మాణవం ఆరబ్భ భాసితం.

పుచ్ఛా – కిస్మిం ఆవుసో వత్థుస్మిం భాసితం.

విస్సజ్జనా – వణ్ణావణ్ణే భన్తే, సుప్పియో హి భన్తే అనేకపరియాయేన బుద్ధస్స అవణ్ణం భాసతి ధమ్మస్స అవణ్ణం భాసతి సఙ్ఘస్స అవణ్ణం భాసతి, సుప్పియస్స పన పరిబ్బాజకస్స అన్తేవాసీ బ్రహ్మదత్తో మాణవో అనేకపరియాయేన బుద్ధస్స వణ్ణం భాసతి ధమ్మస్స వణ్ణం భాసతి సఙ్ఘస్స వణ్ణం భాసతి, తస్మిం భన్తే వత్థుస్మిం భాసితం.

పుచ్ఛా – కతి ¶ ఆవుసో తత్థ అనుసన్ధయో.

విస్సజ్జనా – తయో భన్తే తత్థ అనుసన్ధయో, ఏకో అవణ్ణానుసన్ధి, ద్వే వణ్ణానుసన్ధియో.

పుచ్ఛా – తత్థావుసో పఠమే అనుసన్ధిమ్హి కథం భగవతా భాసితం, తం సంఖేపతో కథేహి.

విస్సజ్జనా – పఠమే భన్తే అనుసన్ధిమ్హి అవణ్ణే మనోపదోసం నివారేత్వా, తత్థ చ ఆదీనవం దస్సేత్వా, తత్థ పటిపజ్జితబ్బాకారో భగవతా భాసితో.

మమం ¶ వా భిక్ఖవే పరే అవణ్ణం భాసేయ్యుం, ధమ్మస్స వా అవణ్ణం భాసేయ్యుం సఙ్ఘస్స వా అవణ్ణం భాసేయ్యుం, తత్ర తుమ్హేహి న ఆఘాతో అప్పచ్చయో న చేతసో అనభిరద్ధి కరణీయా…

పుచ్ఛా – సాధు ¶ సాధు ఆవుసో, సాధు ఖో భగవా అత్తనా పరముక్కం సాగతఖన్తీగుణసమన్నాగతో అత్తనో సావకభూతే అమ్హేపి తత్థ సమాదాపేసి, అత్తనా చ లోకధమ్మేసు అనిఞ్జనసభావో అమ్హాకమ్పి తథత్తాయ ఓవాదమదాసి, దుతియేపనావుసో అనుసన్ధిమ్హి కథం భగవతా భాసితం, తమ్పి సంఖేపతో పకాసేహి.

విస్సజ్జనా – దుతియే పన భన్తే అనుసన్ధిమ్హి వణ్ణే చేతసో ఉప్పిలావితత్తం నిసేధేత్వా, తత్థ చ ఆదీనవం దస్సేత్వా, తత్థ చ పటిపజ్జనాకారం దస్సేత్వా, పుథుజ్జనస్స వణ్ణభూమిభూతాని తీణి సీలాని విత్థారతో భగవతా భాసితాని.

మమం ¶ వా భిక్ఖవే పరే వణ్ణం భాసేయ్యుం, ధమ్మస్స వా వణ్ణం భాసేయ్యుం, సఙ్ఘస్స వా వణ్ణం భాసేయ్యుం, తత్ర తుమ్హేహి న ఆనన్దో న సోమనస్సం న చేతసో అభిరద్ధి కరణీయా –

పుచ్ఛా – సాధు ¶ సాధు ఆవుసో, సాధు ఖో భగవా అత్తనా పరముక్కంసగతసుపరిసుద్ధసీలసమన్నాగతో, తం అత్తనో సుపరిసుద్ధసీలం దస్సేత్వా పరేపి తత్థ నియోజేసి, తతియే పనావుసో అనుసన్ధిమ్హి కథం భగవతా భాసితం, తం సంఖేపతో పకాసేహి.

విస్సజ్జనా – తతియే పన భన్తే అనుసన్ధిమ్హి ద్వాసట్ఠి దిట్ఠియో సబ్బఞ్ఞుత ఞాణేన విత్థారతో విభజిత్వా, తాసఞ్చ ఛ ఫస్సాయతనపదట్ఠానభావం విభావేత్వా, మిచ్ఛాదిట్ఠిగతికాధిట్ఠా నఞ్చ వట్టం కథేత్వా, యుత్తయోగభిక్ఖుఅధిట్ఠానఞ్చ వివట్టం కథేత్వా, మిచ్ఛాదిట్ఠిగతికస్స దేసనాజాలతో అవిముత్తభావం ¶ దేసనాజాలతో విముత్తస్స నత్థికభావఞ్చ విభావేత్వా, అత్తనో చ కత్థచి అపరియాపన్నభావం దస్సేత్వా, ఉపాదిసేసనిబ్బానధాతుం పాపేత్వా దేసనా భగవతా నిట్ఠాపితా.

ఉచ్ఛిన్నభావనేత్తికో ¶ భిక్ఖవే తథాగతస్స కాయో తిట్ఠతి, యావస్స కాయో ఠస్సతి తావ నం దక్ఖన్తి దేవమనుస్సా, కాయస్స భేదా ఉద్ధం జీవితపరియాదానా న నం దక్ఖన్తి దేవమనుస్సా.

పుచ్ఛా – సాధు ¶ సాధు ఆవుసో, సాధు ఖో భగవా అత్తనా ద్వాసట్ఠి దిట్ఠియో చ ఛ ఫస్సాయతనాని చ ద్వాదస పటిచ్చసముప్పాదఙ్గాని చ సబ్బసో పరిజానిత్వా తేసం పరిజాననత్థాయ పరేసమ్పి తథత్తాయ ధమ్మం పకాసేతి, సుత్తఞ్చ నామ ఆవుసో చతున్నం సుత్తనిక్ఖేపానం అఞ్ఞతరవసేనేవ నిక్ఖిత్తం, తస్మా తేసు ఇదం సుత్తం కతరేన సుత్తనిక్ఖేపేన భగవతా నిక్ఖిత్తం.

విస్సజ్జనా – చతూసు భన్తే సుత్తనిక్ఖేపేసు అట్ఠుప్పత్తినిక్ఖేపన ఇదం సుత్తం నిక్ఖిత్తం.

విస్సజ్జనా – భగవతో భన్తే వచనం అరహతో సమ్మాసమ్బుద్ధస్స.

విస్సజ్జనా – పరమ్పరాయ భన్తే ఆభతం.

పుచ్ఛా – అత్థి ను ఖో ఆవుసో ఏత్థ కోచి విరద్ధదోసా, యేన పచ్ఛిమా జనా మిచ్ఛాఅత్థం గణ్హేయ్యుం.

పుచ్ఛా – తేనావుసో ¶ భగవతా…పే… సమ్మాసమ్బుద్ధేన సామఞ్ఞఫలసుత్తం కత్థ భాసితం.

విస్సజ్జనా – రాజగహే భన్తే జీవకస్స కోమారభచ్చస్స అమ్బవనే భాసితం.

పుచ్ఛా – కేనావుసో సద్ధిం భగవతా భాసితం.

విస్సజ్జనా – రఞ్ఞా భన్తే మాగధేన అజాతసత్తునా వేదేహిపుత్తేన సద్ధిం భాసితం.

పుచ్ఛా – తం ¶ పనావుసో సుత్తం చతున్నం సుత్తనిక్ఖేపానం కతరేన సుత్తనిక్ఖేపేన భగవతా నిక్ఖిత్తం.

విస్సజ్జనా – చతున్నం భన్తే సుత్తనిక్ఖేపానం పుచ్ఛావసికేన సుత్తనిక్ఖేపేన నిక్ఖితం భగవతా.

పుచ్ఛా – సా పనావుసో పుచ్ఛా కేనాకారేన సముప్పన్నా.

విస్సజ్జనా – రాజా భన్తే మాగధో అజాసత్తు వేదేహిపుత్తో తదహుపోసథే పన్నరసే కోముదియా చాతుమాసినియా పుణ్ణాయ పుణ్ణమాయ రత్తియా యేన భగవా తేనుపసంకమి, ఉపసంకమిత్వా భగవన్తం దిట్ఠేవ ధమ్మే సందిట్ఠికం సామఞ్ఞఫలం పుచ్ఛి, ఏవం ఖో సా భన్తే పుచ్ఛా ఉప్పన్నా.

రమ్మణీయా ¶ వత భో దోసినా రత్తి, అభిరూపా వత భో దోసినా రత్తి, దస్సనీయా వత భో దోసినా రత్తి, పాసాదికా వత భో దోసినా రత్తి, లక్ఖఞ్ఞా వత భో దోసినా రత్తి….

కం నుఖ్వజ్జ సమణం వా బ్రాహ్మణం వా పయిరుపాసేయ్యామ….

యం ¶ నో పయిరుపసతో చిత్తం పసీదేయ్య….

త్వం పన సమ్మ జీవక కిం తుణ్హీసి –

అయం ¶ దేవ అమ్హాకం భగవా అరహం సమ్మాసమ్బుద్ధో అమ్హాకం అమ్బవనే విహరతి.

తం ఖో పన భగవన్తం ఏవం కల్యాణో కిత్తిసద్దో అబ్భుగ్గతో ‘‘ఇతిపి సో భగవా అరహం సమ్మాసమ్బుద్ధో విజ్జాచరణసమ్పన్నో సుగతో లోకవిదూ అనుత్తరోపురిసదమ్మసారథి సత్థాదేవమనుస్సానం బుద్ధో భగవా’’తి.

తం దేవో భగవన్తం పయిరుపాసతు, అప్పేవనామ దేవస్స భగవన్తం పయిరుపాసతో చిత్తం పసీదేయ్య.

తేన హి సమ్మ జీవక హత్థియానాని కప్పాపేహి.

కప్పితాని ¶ ఖో తే దేవ హత్థియానాని, యస్స దాని కాలం మఞ్ఞసి.

కిచ్చి మం సమ్మ జీవక న వఞ్చేసి, కచ్చి మం సమ్మ జీవక న పలమ్భేసి….

మా భాయి మహారాజ, మా భాయి మహారాజ….

న తం దేవ వఞ్చేమి, న తం దేవ పలమ్భామి….

ఏసో ¶ మహారాజ భగవా, ఏసో మహారాజ భగవా మజ్ఝిమం థమ్భం నిస్సాయ పురత్థాభిముఖో నిసిన్నో పురక్ఖతో భిక్ఖుసఙ్ఘస్స….

ఇమినా మే ఉపసమేన ఉదయభద్దో కుమారో సమన్నాగతో హోతు…

పుచ్ఛేయ్యామహం భన్తే భగవన్తం కిఞ్చిదేవ దేసం సచే మే భగవా ఓకాసం కరోతి పఞ్హస్స వేయ్యాకరణాయ.

యథా ¶ ను ఖో ఇమాని భన్తే పుథుసిప్పాయతనాని, సేయ్యథిదం, హత్థారోహా అస్సారోహా రథికా ధనుగ్గహా చేలకా చలకా పిణ్డదాయకా (పేయ్యాల) గణకా ముద్దికా, అఞ్ఞానిపి ఏవం గతికాని పుథుసిప్పాయతనాని, తే తేన సిప్పేన సన్దిట్ఠికం సిప్పఫలం జీవన్తి, తే తేన అత్తానం సుఖేన్తి పీణేన్తి, మాతాపితరో సుఖేన్తి, పీణేన్తి, పుత్తదారం సుఖేన్తి పీణేన్తి, మిత్తామచ్చే సుఖేన్తి పీణేన్తి సమణబ్రాహ్మణేసు ఉద్ధగ్గికం దక్ఖిణం పతిట్ఠపేన్తి సోవగ్గికం సుఖవిపాకం సగ్గసంవత్తనికం, సక్కా ను ఖో భన్తే ఏవమేవ దిట్ఠేవ ధమ్మే సన్దిట్ఠికం సామఞ్ఞఫలం పఞ్ఞపేతుం.

పుచ్ఛా – తదా ¶ ఆవుసో కథం భగవతా రాజా అజాతసత్తు వేదేహి పుత్తో పటిపుచ్ఛితో కథఞ్చ తేన భగవతో ఆరోచితం.

విస్సజ్జనా – ‘‘అభిజానాసి నో త్వం మహారాజ ఇమం పఞ్హం అఞ్ఞే సమణబ్రాహ్మణే పుచ్ఛితాతి, అభిజానామహం భన్తే అఞ్ఞే సమణబ్రాహ్మణే పుచ్ఛితాతి, యథాకథం పన తే మహారాజ బ్యాకరింసు, సచే తే అగరు, భాసస్సూతి న ఖో మే భన్తే గరు, యత్థస్స భగవా నిసిన్నో భవన్తరూపో వాతి, తేనేహి మహారాజ భాసస్సూ’’తి, ఏవం ఖో భన్తే తదా భగవతా రాజా మాగధో అజాతసత్తు వేదేహి పుత్తో పటిపుచ్ఛితో, ఏవం ఖో భన్తే తేన తదా భగవతో ఆరోచితం.

పుచ్ఛా – కథఞ్చావుసో ¶ పూరణకస్సపస్స సన్తికే పుచ్ఛావిస్సజ్జనా అహోసి.

విస్సజ్జనా – ఏకమిదం భన్తే సమయం రాజా మాగధో అజాతసత్తు వేదేహిపుత్తో యేన పూరణో కస్సపో తేనుపసఙ్కమి, ఉపసఙ్కమిత్వా పూరణం కస్సపం సన్దిట్ఠికం సామఞ్ఞఫలం పుచ్ఛి, అథ ఖో భన్తే పూరణో కస్సపో కరోతో ఖో మహారాజ కారయతో, ఛిన్దతో ఛేదాపయతో, పచతో పాచాపయతో, సోచయతో సోచాపయతో (పేయ్యాల) కరోతో న కరీయతి పాపం త్యాదినా రఞ్ఞో మాగధస్స అజాతసత్తుస్స వేదేహిపుత్తస్స సందిట్ఠి కం సామఞ్ఞఫలం పుట్ఠో సమానో అకిరియం బ్యాకాసి, ఏవం ఖో భన్తే పూరణస్స కస్సపస్స సన్తికే పుచ్ఛావిస్సజ్జనా అహోసి.

నిస్సిరికో ¶ వత ఆవుసో పూరణస్స కస్సపస్స వాదో అనత్థసంహితో జిగుచ్ఛనీయో అతివియ భయానకో, యే తస్స వచనం సోతబ్బం సద్ధాతబ్బం మఞ్ఞేయ్యుం, తేసం తం అస్స దీఘరత్తం అహితాయ దుక్ఖాయ, ఏత్తకేనేవ అజ్జ మయం పుచ్ఛావిస్సజ్జనం థపేస్సామ.

పుచ్ఛా – పురిమదివసే ఆవుసో మయా సామఞ్ఞఫలసుత్తస్స నిదానపరియాపన్నాని పుచ్ఛితబ్బట్ఠానాని కానిచి కానిచి పుచ్ఛితాని, తయా చ సుట్ఠు విస్సజ్జితాని, అజ్జ పన యథానుప్పత్తమక్ఖలిగోసాయ వాదతో పట్ఠాయ పుచ్ఛిస్సామి, మక్ఖలి పన ఆవుసో

గోసాలో ¶ రఞ్ఞా మాగధేన అజాతసత్తునా వేదేహిపుత్తేన సన్దిట్ఠికం సామఞ్ఞఫలం పుట్ఠో కథం బ్యాకాసి.

విస్సజ్జనా – ఏకమిదం భన్తే సమయం రాజా మాగధో అజాతసత్తు వేదేహిపుత్తో యేన మక్ఖలిగోసాలో తేనుపసంకమి, ఉపసంకమిత్వా మక్ఖలిం గోసాలం సన్దిట్ఠికం సామఞ్ఞఫలం పుచ్ఛి, అథ ఖో భన్తే మక్ఖలిగోసాలో రాజానం మాగధం అజాతసత్తుం వేదేహిపుత్తం ఏతదవోచ ‘‘నత్థి మహారాజ హేతు నత్థి పచ్చయో సత్తానం సంకిలేసాయ, అహేతూ అపచ్చయా సత్తా సంకిలిస్సన్తి. నత్థి మహారాజ హేతు నత్థి పచ్చయో సత్తానం విసుద్ధియా, అహేతూ అపచ్చయా సత్తా విసుజ్ఝన్తి, (పేయ్యాల) చుల్లాసీతి మహాకప్పినో సతసహస్సాని, యాని బాలే చ పణ్డితే చ సన్ధావిత్వా సంసరిత్వా దుక్ఖస్సన్తం కరిస్సన్తి, తత్థ నత్థి ‘ఇమినాహం సీలేన వా వతేన వా తపేన వా బ్రహ్మచరియేన వా అపరిపక్కం వా కమ్మం పరిపాచేస్సామి, పరిపక్కం వా కమ్మం ఫుస్స ఫుస్స బ్యన్తిం కరిస్సామీ’తి హేవం నత్థి. దోణమితే సుఖదుక్ఖే, పరియన్తకతే సంసారే నత్థి హాయనవడ్ఢనే, నత్థి ఉక్కంసావకంసే. సేయ్యథాపి నామ సుత్తపుట్ఠే ఖిత్తే నిబ్బేఠియమానమేవ పలేతి, ఏవమేవ బాలే చ పణ్డితే చ సన్ధావిత్వా సంసరిత్వా దుక్ఖస్సన్తం కరిస్సన్తీ’’తి, ఇత్థం ఖో భన్తే రఞ్ఞో మాగధస్స అజాతసత్తుస్స వేదేహిపుత్తస్స మక్ఖలిగోసాలో సన్దిట్ఠికం సామఞ్ఞఫలం పుట్ఠో సమానో సంసారసుద్ధిం బ్యాకాసి.

అయమ్పి ¶ ఆవుసో వాదో నిస్సిరికోయేవ అనత్థసంహితో జిగుచ్ఛనీయో అతి వియ భయానకో, యే తస్స వచనం సోతబ్బం సద్ధాతబ్బం మఞ్ఞేయ్యుం, తేసం తం అస్స దీఘరత్తం అహితాయ దుక్ఖాయ.

పుచ్ఛా – అథాపరమ్పి ¶ పుచ్ఛామి, అజితో పన ఆవుసో కేసకమ్బలో రఞ్ఞా మాగధేన అజాతసత్తునా వేదేహిపుత్తేన సన్దిట్ఠికం సామఞ్ఞఫలం పుట్ఠో కథం బ్యాకాసి.

విస్సజ్జనా – ఏకమిదం భన్తే సమయం రాజా మాగధో అజాతసత్తు వేదేహిపుత్తో యేన అజితో కేసకమ్బలో తేనుపసఙ్కమి, ఉపసఙ్కమిత్వా అజితం కేసకమ్బలం సన్దిట్ఠికం సామఞ్ఞఫలం పుచ్ఛి, అథ ఖో భన్తే అజితో కేసకమ్బలో రాజానం మాగధం అజాతసత్తుం వేదేహిపుత్తం ఏతదవోచ ‘‘నత్థి మహారాజ దిన్నం, నత్థి యిట్ఠం, నత్థి హుతం, నత్థి సుకతదుక్కటానం కమ్మానం ఫలం విపాకో, నత్థి అయం లోకో, నత్థి పరో లోకో, నత్థి మాతా, నత్థి పితా, నత్థి సత్తా ఓపపాతికా, నత్థి లోకే సమణబ్రాహ్మణా సమ్మగ్గతా సమ్మాపటిపన్నా, యే ఇమఞ్చ లోకం పరఞ్చ లోకం సయం అభిఞ్ఞా సచ్ఛికత్వా పవేదేన్తి. (పేయ్యాల) బాలే చ పణ్డితే చ కాయస్స భేదా ఉచ్ఛిజ్జన్తి వినస్సన్తీ’’తి. ఇత్థం ఖో భన్తే రఞ్ఞో మాగధస్స అజాతసత్తుస్స వేదేహిపుత్తస్స అజితో కేసకమ్బలో ¶ సన్దిట్ఠికం సామఞ్ఞఫలం పుట్ఠో సమానో ఉచ్ఛేదం బ్యాకాసి.

అయమ్పి ¶ ఖో ఆవుసో నిస్సిరికోయేవ, అనత్థసంహితో జిగుచ్ఛనీయో అతి వియ భయానకో, యే తస్స వచనం సోతబ్బం సద్ధాతబ్బం మఞ్ఞేయ్యుం, తేసం తం అస్స దీఘరత్తం అహితాయ దుక్ఖాయ.

పుచ్ఛా – అథాపరమ్పి ¶ పుచ్ఛామి, పకుధో పన ఆవుసో కచ్చాయనో రఞ్ఞా మాగధేన అజాతసత్తునా వేదేహిపుత్తేన సన్దిట్ఠికం సామఞ్ఞఫలం పుట్ఠో కథం బ్యాకాసి.

విస్సజ్జనా – ఏకమిదం భన్తే సమయం రాజా మాగధో అజాతసత్తు వేదేహిపుత్తో యేన పకుధో కచ్చాయనో తేనుపసఙ్కమి, ఉపసఙ్కమిత్వా పకుధం కచ్చాయనం సన్దిట్ఠికం సామఞ్ఞఫలం పుచ్ఛి, అథ ఖో భన్తే పకుధో కచ్చాయనో రాజానం మాగధం అజాసత్తుం వేదేహిపుత్తం ఏతదవోచ ‘‘సత్తిమే మహారాజ కాయా అకటా అకటవిధా అనిమ్మితా అనిమ్మాతా వఞ్చా కూటట్ఠా ఏసికట్ఠాయితా, తే న ఇఞ్జన్తి, న విపరిణామేన్తి, న అఞ్ఞమఞ్ఞం బ్యాబాధేన్తి, నాలం అఞ్ఞమఞ్ఞస్స సుఖాయ వా దుక్ఖాయ వా సుఖదుక్ఖాయ వా. కతమే సత్త, పథవీకాయో, ఆపోకాయో, తేజోకాయో ¶ వాయోకాయో, సుఖే, దుక్ఖే, జీవే సత్తమే. ఇమే సత్తకాయా అకటా అకటవిధా అనిమ్మితా అనిమ్మాతా వఞ్చ్యా కూటట్ఠా ఏసికట్ఠాయితా, తే న ఇఞ్జన్తి, న విపరిణామేన్తి, న అఞ్ఞమఞ్ఞం బ్యాబాధేన్తి, నాలం అఞ్ఞమఞ్ఞస్స సుఖాయ వా దుక్ఖాయ వా సుఖదుక్ఖాయ వా. తత్థ నత్థి హన్తా వా ఘాతేతా వా, సోతా వా సావేతా వా, విఞ్ఞాతా వా విఞ్ఞాపేతా వా, యోపి తిణ్హేన సత్థేన సీసం ఛిన్దతి, న కోచి కిఞ్చి జివితా వోరోపేతి, సత్తన్నంత్వేవ కాయానమన్తరేన సత్థం వివరమనుపతతీ’’తి. ఇత్థం ఖో భన్తే రఞ్ఞో మాగధస్స అజాతసత్తుస్స వేదేహిపుత్తస్స పకుధో కచ్చాయనో సామఞ్ఞఫలం పుట్ఠో సమానో అఞ్ఞేన అఞ్ఞం బ్యాకాసి.

అయమ్పి ¶ ఖో ఆవుసో వాదో పురిమవాదోవియ నిస్సిరికోయేవ అనత్థసంహితో జిగుచ్ఛనీయో అతివియ భయానకో.

పుచ్ఛా – అథాపరమ్పి పుచ్ఛామి, నిగణ్ఠో పనావుసో నాటపుత్తో రఞ్ఞా మాగధేన అజాతసత్తునా వేదేహిపుత్తేన సన్దిట్ఠికం సామఞ్ఞఫలం పుట్ఠో కథం బ్యాకాసి.

విస్సజ్జనా – ఏకమిదం భన్తే సమయం రాజా మాగధో అజాతసత్తు వేదేహిపుత్తో యేన నిగణ్ఠో నాటపుత్తో తేనుపసంకమి, ఉపసంకమిత్వా నిగణ్ఠం నాటపుత్తం సన్దిట్ఠికం సామఞ్ఞఫలం పుచ్ఛి, అథ ఖో నిగణ్ఠో నాటపుత్తో రాజానం మాగధం అజాతసత్తుం వేదేహిపుత్తం ఏతదవోచ, ‘‘ఇధ మహారాజ నిగణ్ఠో చాతుయామసంవరసంవుతో హోతి, కథఞ్చ మహారాజ

నిగణ్ఠో ¶ చాతుయామసంవరసంవుతో హోతి, ఇధ మహారాజ నిగణ్ఠో సబ్బవారివారితో చ హోతి, సబ్బవారియుత్తో చ, సబ్బవారిధుతో చ, సబ్బవారిఫుటో చ. ఏవం ఖో మహారాజ నిగణ్ఠో చాతుయామసంవరసంవుతో హోతి, యతో ఖో మహారాజ నిగణ్ఠో ఏవం చాతుయామసంవరసంవుతో హోతి. అయం వుచ్చతి మహారాజ నిగణ్ఠో గతత్తో చ యతత్తో చ ఠితత్తో చా’’తి. ఇత్థం ఖో భన్తే రఞ్ఞో మాగధస్స అజాతసత్తుస్స వేదేహిపుత్తస్స నిగణ్ఠో నాటపుత్తో సన్దిట్ఠికం సామఞ్ఞఫలం పుట్ఠో సమానో చాతుయామసంవరం బ్యాకాసి.

ఏతస్స ¶ పనావుసో వాదే కోచి సాసనానులోమవాదో అత్థి, అసుద్ధలద్ధితాయ పన ఏసోపి వాదో జిగుచ్ఛనీయోయేవ, సేయ్యథాపి భోజనం గూథమిస్సం గారయ్హోయేవ ఆరకా పరివజ్జితబ్బోయేవ, సేయ్యథాపి విససంసట్ఠో ఆపానీయకంసో.

పుచ్ఛా – అథాపరమ్పి ¶ పుచ్ఛామి, సఞ్చయో పనావుసో బేలట్ఠపుత్తో సన్దిట్ఠికం సామఞ్ఞఫలం పుట్ఠో కథం బ్యాకాసి.

విస్సజ్జనా – ఏకమిదం భన్తే సమయం రాజా మాగధో అజాతసత్తు వేదేహిపుత్తో యేన సఞ్చయో బేలట్ఠపుత్తో తేనుపసఙ్కమి, ఉపసఙ్కమిత్వా సఞ్చయం బేలట్ఠపుత్తం ఏతదవోచ, ‘‘యథా ను ఖో ఇమాని భో సఞ్చయ పుథుసిప్పాయతనాని, సేయ్యథిదం, హత్థారోహా అస్సరోహా…పే… సక్కా ను ఖో భో సఞ్చయ ఏవమేవ దిట్ఠేవ ధమ్మే సన్దిట్ఠికం సామఞ్ఞఫలం పఞ్ఞపేతు’’న్తి, ఏవం వుత్తే భన్తే సఞ్చయో బేలట్ఠపుత్తో రాజానం మాగధం అజాతసత్తుం వేదేహిపుత్తం ఏతదవోచ.

‘‘అత్థి పరోలోకోతి ఇతి చే మం పుచ్ఛసి, అత్థి పరో లోకోతి ఇతి చే మే అస్స, అత్థి పరో

లోకోతి ¶ ఇతి తే నం బ్యాకరేయ్యం, ఏవన్తిపి మే నో, తథాతిపి మే నో, అఞ్ఞథాతిపి మే నో, నోతిపి మే నో, నో నోతిపి మే నో…పే… నేవ హోతి న న హోతి తథాగతో పరం మరణాతి ఇతి చే మం పుచ్ఛసి, నేవ హోతి న న హోతి తథాగతో పరం మరణాతి ఇతి చే మే అస్స, నేవ హోతి న న హోతి తథాగతో పరం మరణాతి ఇతి తే నం బ్యాకరేయ్యం, ఏవన్తిపి మే నో, తథాతిపి మే నో, అఞ్ఞథాతిపి మే నో, నోతిపి మే నో, నో నోతిపి మే నో’’తి. ఇత్థం ఖో భన్తే రఞ్ఞో మాగధస్స అజాతసత్తుస్స వేదేహిపుత్తస్స సఞ్చయో బేలట్ఠపుత్తో సన్దిట్ఠికం సామఞ్ఞఫలం పుట్ఠో సమానో విక్ఖేపం బ్యాకాసి.

సబ్బేపి ¶ ఆవుసో ఏతే ఛన్నం సత్థారానం వాదా నిస్సిరికాయేవ జిగుచ్ఛనీయాయేవ అనత్థసంహితాయేవ, బాలానం భియ్యోసో మత్తాయ సమ్మోహాయ సంవత్తన్తి అనత్థాయ.

అజ్జ ¶ పన ఆవుసో కాలో అతిక్కన్తో, స్వేయేవ భగవతా వుత్తం పణీతం పసట్ఠం సన్దిట్ఠికఫలం పుచ్ఛామ.

పుచ్ఛా – పురిమదివసేసు ఆవుసో సామఞ్ఞఫలసుత్తస్స పుబ్బభాగే యావ ఛసత్థారమిచ్ఛావాదపరియోసానం పుచ్ఛనవిస్సజ్జనం అమ్హేహి కతం, అజ్జ పన యథానుప్పత్తం భగవతా దేసితసామఞ్ఞఫలసుత్తాధికారే పుచ్ఛావిస్సజ్జనం కరిస్సామ. భగవా పన ఆవుసో రఞ్ఞా మాగధేన అజాతసత్తునా వేదేహిపుత్తేన సన్దిట్ఠికం సామఞ్ఞఫలం పుట్ఠో కథం బ్యాకాసి.

విస్సజ్జనా – భగవా భన్తే తిధా విభజిత్వా రఞ్ఞో మాగధస్స అజాతసత్తుస్స వేదేహిపుత్తస్స సన్దిట్ఠికం సామఞ్ఞఫలం పుట్ఠో బ్యాకాసి.

పుచ్ఛా – కథఞ్చావుసో ¶ భగవా రఞ్ఞో మాగధస్స అజాతసత్తునో వేదేహిపుత్తస్స పఠమం సన్దిట్ఠికం సామఞ్ఞఫలం దేసేసి.

విస్సజ్జనా – దాసం భన్తే పబ్బజితం ఉపమాభావేన నిద్దిసిత్వా రఞ్ఞో మాగధస్స అజాతసత్తుస్స వేదేహిపుత్తస్స భగవా పఠమం సన్దిట్ఠికం సామఞ్ఞఫలం దేసేసి.

సోహం ¶ భన్తే భగవన్తమ్పి పుచ్ఛామి, యథా ను ఖో ఇమాని భన్తే పుథుసిప్పాయతనాని సేయ్యథిదం…పే… సక్కా ను ఖో భన్తే ఏవ మేవ దిట్ఠేవ ధమ్మే సన్దిట్ఠికం సామఞ్ఞఫలం పఞ్ఞపేతుం –

అచ్ఛరియం ¶ ఆవుసో అబ్భుతం ఆవుసో, యావ స్వాఖాతస్స బుద్ధసాసనస్స మహిద్ధికతా మహానుభావతా, యత్రహి నామ దాసోపి నిహీనజచ్చో ఏవం స్వాఖాతే బుద్ధసాసనే పబ్బజిత్వా అత్తనో ఇస్సరభూతేన రఞ్ఞాపి వన్దనీయత్తం గరుకరణీయత్తం పాపుణిస్సతి, సుపఞ్ఞత్తమేతం భగవతా పఠమం సన్దిట్ఠికఫలం.

పుచ్ఛా – కథం ¶ పనావుసో భగవా రఞ్ఞో మాగధస్స అజాతసత్తునో వేదేహిపుత్తస్స దుతియం సన్దిట్ఠికం సామఞ్ఞఫలం దేసేసి.

విస్సజ్జనా – కస్సకం భన్తే పబ్బజితం ఉపమాభావేన దస్సేత్వా భగవా రఞ్ఞో మాగధస్స అజాతసత్తుస్స వేదేహిపుత్తస్స సన్దిట్ఠికం సామఞ్ఞఫలం దేసేసి.

అచ్ఛరియం ¶ ఆవుసో అబ్భుతం ఆవుసో, యావ బుద్ధసాసనస్స స్వాఖాతతా మహిద్ధికతా మహానుభావతా, యత్రహి నామ కస్స కోపి గుణరహితో ఏవం స్వాఖాతే బుద్ధసాసనే పబ్బజిత్వా రట్ఠధిపతినా మనుస్సలోకే దేవభూతేన రఞ్ఞాపి గరుకరణీయతం వన్దనీయతం పాపుణిస్సతి, సుపఞ్ఞత్తమేతం ఆవుసో భగవతా దుతియం సన్దిట్ఠికఫలం.

పుచ్ఛా – కథఞ్చా ¶ పనావుసో భగవా పురిమేహి సన్దిట్ఠికసామఞ్ఞఫలేహి అభిక్కన్తతరఞ్చ పణీతతరఞ్చ సన్దిట్ఠికం సామఞ్ఞఫలం రఞ్ఞో దేసేసి.

విస్సజ్జనా – భగవా భన్తే బుద్ధుప్పాదతో పట్ఠాయ కులపుత్తస్స పబ్బజిత భావం, తస్స చ సీలసమ్పదం, తస్స చ ఇన్ద్రియేసు గుత్తద్వారతం, అరియఞ్చసతిసమ్పజఞ్ఞం, అరియఞ్చ సన్తుట్ఠిం, పఞ్చన్నఞ్చ నీవరణానం పహానం, చత్తారి చ ఝానాని, అట్ఠ చ విజ్జాయో, తాహి తాహి ఉపమాహి విత్థారతో విభజిత్వా రఞ్ఞో మాగధస్స అజాతసత్తుస్స వేదేహిపుత్తస్స సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ దేసేసి.

సక్కా ¶ పన భన్తే దిట్ఠేవ ధమ్మే సన్దిట్ఠికం సామఞ్ఞఫలం, పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ పఞ్ఞపేతుం.

సక్కా మహారాజా, తేన హి మహారాజ సుణోహి సాధుకం మనసికరోహి భాసిస్సామి.

పుచ్ఛా – కథఞ్చ ¶ పనావుసో భిక్ఖు సీలసమ్పన్నో హోతి, కథఞ్చ భగవా రఞ్ఞో మాగధస్స అజాతసత్తునో వేదేహిపుత్తస్స చూళసీలం విభజిత్వా దేసేసి.

విస్సజ్జనా – ‘‘కథఞ్చ ¶ మహారాజ భిక్ఖు సీలసమ్పన్నో హోతి. ఇధ మహారాజ భిక్ఖు పాణాతిపాతం పహాయ పాణాతిపాతా పటివిరతో హోతి నిహితదణ్డో నిహితసత్థో లజ్జీ దయాపన్నో, సబ్బపాణభూతహితానుకమ్పీ విహరతి. ఇదమ్పిస్స హోతి సీలస్మిం’’ ఏవమాదినా భన్తే భగవా రఞ్ఞో మాగధస్స అజాతసత్తుస్స వేదేహిపుత్తస్స ఛబ్బీసతియా ఆకారేహి చూళసీలం విభజిత్వా దేసేసి.

సాధు ¶ సాధు ఆవుసో, సాధు సాధు ఆవుసో యం భిక్ఖు ఏవం స్వాఖాతే బుద్ధసాసనే సద్ధాపబ్బాజితో ఇమినా చ చూళసీలేన సమన్నాగతో విహరేయ్య.

సువే యథానుప్పత్తట్ఠానతో పట్ఠాయ పుచ్ఛావిస్సజ్జనం కరిస్సామ.

పుచ్ఛా – కథం పనావుసో రఞ్ఞో మాగధస్స అజాతసత్తునో వేదేహిపుత్తస్స మజ్ఝిమసీలఞ్చ మహాసీలఞ్చ విభజిత్వా దేసేసి.

విస్సజ్జనా – ‘‘యథా వా పనేకే భోన్తో సమణబ్రాహ్మణా సద్ధాదేయ్యాని భోజనాని భుఞ్జిత్వా తే ఏవరూపం బీజగామభూతగామసమారమ్భం అనుయుత్తా విహరన్తి. సేయ్యథిదం. మూలబీజం ఖన్ధబీజం ఫళుబీజం అగ్గబీజం బీజబీజమేవ పఞ్చమం, ఇతి ఏవరూపా బీజగామభూతగామసమారమ్భా పటివిరతో హోతి. ఇదమ్పిస్స హోతి సీలస్మిం’’ ఏవమాదినా భన్తే భగవా రఞ్ఞో మాగధస్స అజాతసత్తుస్స వేదేహిపుత్తస్స మజ్ఝిమసీలఞ్చ మహాసీలఞ్చ విత్థారతో విభజిత్వా దేసేసి.

సాధు ¶ సాధు ఆవుసో, సాధు ఖో ఆవుసో యం భిక్ఖు ఏవం స్వాఖాతే బుద్ధసాసనే సద్ధాపబ్బజితో ఏవం అరియేన సీలేన సమన్నాగతో విహరేయ్య.

పుచ్ఛా – కథం పనావుసో అరియం ఇన్ద్రియసంవరఞ్చ అరియం సతిసమ్పజఞ్ఞఞ్చ అరియం సన్తోసఞ్చ భగవా రఞ్ఞో మాగధస్స అజాతసత్తుస్స విభజిత్వా దేసేసి.

విస్సజ్జనా – ఇధ మహారాజ భిక్ఖు చక్ఖునా రూపం దిస్వా న నిమిత్తగ్గాహీ హోతి ననుబ్యఞ్జనగ్గాహీ, యత్వాధికరణమేనం చక్ఖున్ద్రియం అసంవుతం విహరన్తం అభిజ్ఝాదోమనస్సా పాపకా అకుసలా ధమ్మా అన్వాస్సవేయ్యుం, తస్స సంవరాయ పటిపజ్జతి, రక్ఖతి చక్ఖున్ద్రియం, చక్ఖున్ద్రియే సంవరం ఆపజ్జతి, ఏవమాదినా చ.

ఇధ మహారాజ భిక్ఖు సతిసమ్పజఞ్ఞేన సమన్నాగతో హోతి, అభిక్కన్తే పటిక్కన్తే సమ్పజనకారీ హోతి,

ఆలోకితే ¶ విలోకితే సమ్పజానకారీ హోతి, సమిఞ్జితే పసారితే సమ్పజానకారీ హోతి, సఙ్ఘాటిపత్తచీవరధారణే సమ్పజానకారీ హోతి, అసితే పీతే ఖాయితే సాయితే సమ్పజానకారీ హోతి, ఉచ్చారపస్సావకమ్మే సమ్పజానకారీ హోతి, గతే ఠితే నిసిన్నే సుత్తే జాగరితే భాసితే తుణ్హీభావే సమ్పజానకారీ హోతి, ఏవం ఖో మహారాజ భిక్ఖు సతిసమ్పజఞ్ఞేన సమన్నాగతో హోతి.

కథఞ్చ మహారాజ భిక్ఖు సన్తుట్ఠో హోతి, ఇధ మహారాజ భిక్ఖు సన్తుట్ఠో హోతి కాయపరిహారికేన చీవరేన కుచ్ఛిపరిహారికేన పిణ్డపాతేన.

ఏవమాదినా భన్తే భగవా రఞ్ఞో మాగధస్స అజాతసత్తుస్స వేదేహిపుత్తస్స అరియఞ్చ ఇన్ద్రియేసుగుత్తద్వారతం అరియఞ్చ సతిసమ్పజఞ్ఞం అరియఞ్చ సన్తోసం విభజిత్వా దేసేసి.

సాధు ¶ సాధు ఆవుసో, సాధు ఖో ఆవుసో యం భిక్ఖు ఏవం స్వాఖాతే బుద్ధసాసనే సద్ధాపబ్బజితో ఇమినా చ అరియేన ఇన్ద్రియసంవరేన సమన్నాగతో, ఇమినా చ అరియేన సతిసమ్పజఞ్ఞేన

సమన్నాగతో ¶ , ఇమాయ చ అరియాయ సన్తుట్ఠియా సమన్నాగతో విహరేయ్య.

పుచ్ఛా – కథం పనావుసో భగవా రఞ్ఞో మాగధస్స అజాతసత్తుస్స వేదేహిపుత్తస్స నీవరణపహానం విభజిత్వా దేసేసి.

విస్సజ్జనా – సో ఏవం అరియేన సీలక్ఖన్ధేన సమన్నాగతో, అరియేన ఇన్ద్రియసంవరేన సమన్నాగతో, అరియేన సతిసమ్పజఞ్ఞేన సమన్నాగతో, అరియాయ సన్తుట్ఠియా సమన్నాగతో, వివిత్తం సేనాసనం భజతి అరఞ్ఞం రుక్ఖమూలం పబ్బతం కన్దరం గిరిగుహం సుసానం వనపత్తం అబ్భోకాసం పలాలపుఞ్జం. సో పచ్ఛాభత్తం పిణ్డపాతపటిక్కన్తో నిసీదతి పల్లఙ్కం ఆభుఞ్జిత్వా ఉజుం కాయం పణిధాయ పరిముఖం సతిం ఉపట్ఠపేత్వా. సో అభిజ్ఝం లోకే పహాయ విగతాభిజ్ఝేన చేతసా విహరతి…పే… తస్సిమే పఞ్చ నీవరణే పహీనే అత్తని సమనుపస్సతో పామోజ్జం జాయతి, పముదితస్స పీతి జాయతి, పీతిమనస్స కాయో పస్సమ్భతి, పస్సద్ధకాయో ¶ సుఖం వేదేహి, సుఖినో చిత్తం సమాధియతి. ఏవం ఖో భన్తే భగవా రఞ్ఞో మాగధస్స అజాతసత్తుస్స వేదేహిపుత్తస్స నీవరణప్పహానం విభజిత్వా విత్థారతో దేసేసి.

సాధు ¶ సాధు ఆవుసో, సాధు ఖో ఆవుసో యం భిక్ఖు ఏవం స్వాఖాతే బుద్ధసాసనే సద్ధాపబ్బజితో ఏవం పఞ్చనీవరణే పజహిత్వా తేహి చిత్తం విసోధేత్వా విహరేయ్య.

పుచ్ఛా – కథఞ్చావుసో ¶ భగవా రఞ్ఞో మాగధస్స అజాతసత్తుస్స వేదేహిపుత్తస్స పఠమం సన్దిట్ఠికం సామఞ్ఞఫలం దేసేసి, పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ.

విస్సజ్జనా – సో వివిచ్చేవ కామేహి వివిచ్చ అకుసలేహి ధమ్మేహి సవితక్కం సవిచారం వివేకజం పీతిసుఖం పఠమం ఝానం ఉపసమ్పజ్జ విహరతి…పే… ఇదమ్పి ఖో మహారాజ సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ

పణీతతరఞ్చ ¶ . ఏవం ఖో భన్తే భగవా రఞ్ఞో మాగధస్స అజాతసత్తుస్స వేదేహిపుత్తస్స పఠమం సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ దేసేసి.

సాధు ¶ సాధు ఆవుసో, సాధు ఖో ఆవుసో యం భిక్ఖు ఏవం స్వాఖాతే బుద్ధసాసనసఙ్ఖాతే ధమ్మవినయే పబ్బజిత్వా ఏవం పఠమం ఝానం

ఉపసమ్పజ్జ ¶ వివేకజేన పీతిసుఖేన అత్తనో కాయం అభిసన్దేయ్య పరిసన్దేయ్య పరిపూరేయ్య.

పుచ్ఛా – కథఞ్చావుసో ¶ భగవా దుతియఞ్చ తతియఞ్చ చతుత్థఞ్చ సన్దిట్ఠికం సామఞ్ఞఫలం దేసేసి, పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ.

విస్సజ్జనా – పున చ పరం మహారాజ భిక్ఖు వితక్కవిచారానం వూపసమా అజ్ఝత్తం సమ్పసాదనం చేతసో ఏకోదిభావం అవితక్కం అవిచారం సమాధిజం పీతిసుఖం దుతియంఝానం ఉపసమ్పజ్జ విహరతి ఏవమాదినా భన్తే భగవా రఞ్ఞో మాగధస్స అజాతసత్తుస్స వేదేహిపుత్తస్స దుతియఞ్చ తతియఞ్చ చతుత్థఞ్చ సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ దేసేసి.

సాధు ¶ సాధు ఆవుసో, సాధు ఖో ఆవుసో యం భిక్ఖు ఏవం స్వాఖాతే బుద్ధసాసనసఙ్ఖాతే ధమ్మవినయే సద్ధాపబ్బజితో ఏవం దుతియఝానఞ్చ తతియఝానఞ్చ చతుత్థఝానఞ్చ ఉపసమ్పజ్జ తేహి ఝానసుఖేహి అత్తనో కాయం అభిసన్దేత్వా పరిసన్దేత్వా పరిపూరేత్వా విహరేయ్య.

పుచ్ఛా – కథఞ్చ ¶ పనావుసో భగవా రఞ్ఞో మాగధస్స అజాతసత్తుస్స వేదేహిపుత్తస్స అపరమ్పి సన్దిట్ఠికం సామఞ్ఞఫలం దేసేసి, పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ.

విస్సజ్జనా – సో ఏవం సమాహితే చిత్తే పరిసుద్ధే పరియోదాతే అనఙ్గణే విగతూపక్కిలేసే ముదుభూతే కమ్మనియే ఠితే ఆనఞ్జప్పత్తే ఞాణదస్సనాయ చిత్తం అభినీహరతి అభినిన్నామేతి, సో ఏవం పజానాతి ‘‘అయం ఖో మే కాయో రూపీ చాతుమహాభూతికో మాతాపేత్తికసమ్భవో ఓదనకుమ్మాసూపచయో అనిచ్చుచ్ఛాదనపరిమద్దనభేదనవిద్ధంసనధమ్మో, ఇదఞ్చ పన మే విఞ్ఞాణం ఏత్థ సితం ఏత్థ పటిబన్ధన్తి…పే… ఇదమ్పి ఖో మహారాజ సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ. ఏవం ఖో భన్తే భగవా రఞ్ఞో మాగధస్స అజాతసత్తుస్స వేదేహిపుత్తస్స అపరమ్పి సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ దేసేసి.

సుఞ్ఞారంగా ¶ పవిట్ఠస్స, సన్తచిత్తస్స భిక్ఖునో. అమానుసీ రతీ హోతి, సమ్మాధమ్మం విపస్సతో.

సాధు ¶ సాధు ఆవుసో, సాధు ఖో ఆవుసో యం భిక్ఖు ఏవం స్వాఖాతే బుద్ధసాసనసఙ్ఖాతే ధమ్మవినయే సద్ధాపబ్బజితో ఏవం ఞాణదస్సనం ఉప్పాదేత్వా ఏవం ఞాణదస్సనేన సమన్నాగతో హుత్వా విహరేయ్య.

పుచ్ఛా – కథఞ్చావుసో ¶ భగవా అపరమ్పి సన్దిట్ఠికం సామఞ్ఞఫలం దేసేసి, పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ.

విస్సజ్జనా – సో ఏవం సమాహితే చిత్తే పరిసుద్ధే పరియోదాతే అనఙ్గణే విగతూపక్కిలేసే ముదుభూతే కమ్మనియే ఠితే ఆనఞ్జప్పత్తే మనోమయం కాయం అభినిమ్మానాయ చిత్తం అభినీహరతి అభినిన్నామేతి, సో ఇమమ్హా కాయా అఞ్ఞం కాయం అభినిమ్మినాతి రూపిం మనోమయం సబ్బఙ్గపచ్చఙ్గిం అహీనిన్ద్రియం ఏవమాదినా భన్తే భగవా రఞ్ఞో మాగధస్స అజాతసత్తుస్స వేదేహిపుత్తస్స అపరమ్పి సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ దేసేసి.

సాధు ¶ సాధు ఆవుసో, సాధు ఖో ఆవుసో యం భిక్ఖు ఏవం స్వాఖాతే బుద్ధసాసనసఙ్ఖాతే ధమ్మవినయే సద్ధాపబ్బజితో ఏవం విసేసేన మనోమయఞాణేన సమన్నాగతో విహరేయ్య.

పుచ్ఛా – భగవా ¶ ఆవుసో రఞ్ఞో మాగధస్స అజాతసత్తుస్స వేదేహిపుత్తస్స ఝానచతుక్కసఙ్ఖాతఞ్చ పఠమ దుతియ విజ్జాసఙ్ఖాతఞ్చ సన్దిట్ఠికం సామఞ్ఞఫలం దస్సేత్వా, అపరం కీదిసం సంన్దిట్ఠికం సామఞ్ఞఫలం దేసేసి, పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ.

విస్సజ్జనా – సో ఏవం సమాహితే చిత్తే పరిసుద్ధే పరియోదాతే అనఙ్గణే విగతూపక్కిలేసే ముదుభూతే కమ్మనియే ఠితే ఆనఞ్జప్పత్తే ఇద్ధివిధాయ చిత్తం అభినీహరతి అభినిన్నామేతి, సో అనేకవిహితం ఇద్ధివిధం పచ్చనుభోతి, ఏకోపి హుత్వా బహుధా హోతి, బహుధాపి హుత్వా ఏకో హోతి…పే… ఇదమ్పి ఖో మహారాజ సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చాతి. ఇత్థం ఖో భన్తే భగవా రఞ్ఞో మాగధస్స అజాతసత్తుస్స వేదేహిపుత్తస్స అపరమ్పి సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ దేసేసి.

అచ్ఛరియం ¶ ఆవుసో అబ్భుతం ఆవుసో, యావ బుద్ధసాసనస్స స్వాఖాతతా, యత్రహి నామ ఏవం స్వాఖాతే బుద్ధసాసనే పబ్బజిత్వా సావకోపి సమ్మాపటిపన్నో ఏవం మహిద్ధికం ఏవం మహానుభావం ఇద్ధివిధఞాణమ్పి పచ్చనుభోస్సతి.

పుచ్ఛా – కథం ¶ పనావుసో భగవా అపరమ్పి సన్దిట్ఠికం సామఞ్ఞఫలం దేసేసి, పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ.

విస్సజ్జనా – సో ఏవం సమాహితే చిత్తే పరిసుద్ధే పరియోదాతే అనఙ్గణే విగతూపక్కిలేసే ముదుభూతే కమ్మనియే ఠితే ఆనఞ్జప్పత్తే దిబ్బాయ సోతధాతుయా చిత్తం అభినీహరతి అభినిన్నామేతి, సో దిబ్బాయ సోతధాతుయా విసుద్ధాయ అతిక్కన్త మానుసికాయ ఉభో సద్దే సుణాతి దిబ్బే చ మానుసే చ యే దూరే సన్తికే చ…పే… ఇదమ్పి ఖో మహారాజ సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ. ఏవం ఖో భన్తే భగవా రఞ్ఞో మాగధస్స అజాతసత్తుస్స వేదేహిపుత్తస్స అపరమ్పి సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ దేసేసి.

అచ్ఛరియం ¶ ఆవుసో, అబ్భుతం ఆవుసో, యావ బుద్ధసాసనస్స స్వాఖాతతా, యత్రహి నామ ఏవం స్వాఖాతే బుద్ధసాసనే సద్ధాపబ్బజితో సమ్మాపటిపన్నో సావకోపి ఏవం విసేసం దిబ్బసోతఞాణం పటిలభిస్సతి.

పుచ్ఛా – కథం పనావుసో భగవా అపరమ్పి సన్దిట్ఠికం సామఞ్ఞఫలం దేసేసి, పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ.

విస్సజ్జనా – సో ఏవం సమాహితే చిత్తే పరిసుద్ధే పరియోదాతే. అనఙ్గణే విగతూపక్కిలేసే ముదుభూతే కమ్మనియే ఠితే

ఆనఞ్జప్పత్తే ¶ చేతోపరియఞాణాయ చిత్తం అభినీహరతి అభినిన్నామేతి, సో పరసత్తానం పరపుగ్గలానం చేతసా చేతో పరిచ్చ పజానాతి, సరాగం వా చిత్తం సరాగం చిత్తన్తి పజానాతి, వీతరాగం వా చిత్తం వీతరాగం చిత్తన్తి పజానాతి…పే… ఇదమ్పి ఖో మహారాజ సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ. ఏవం ఖో భన్తే భగవా రఞ్ఞో మాగధస్స అజాతసత్తుస్స వేదేహిపుత్తస్స అపరమ్పి సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ దేసేసి.

అచ్ఛరియం ¶ ఆవుసో, అబ్భుతం ఆవుసో, యావ బుద్ధసాసనస్స స్వాఖాతతా, యత్రహి నామ ఏవం స్వాఖాతే బుద్ధసాసనే పబ్బజితో సమ్మాపటిపన్నో సావకోపి ఏవం విసేసం చేతోపరియఞాణం పటిలభిస్సతి.

విస్సజ్జనా – సో ఏవం సమాహితే చిత్తే పరిసుద్ధే పరియోదాతే అనఙ్గణే విగతూపక్కిలేసే ముదుభూతే కమ్మనియే ఠితే ఆనఞ్జప్పత్తే పుబ్బేనివాసానుస్సతిఞాణాయ చిత్తం అభినీహరతి అభినిన్నామేతి, సో అనేకవిహితం పుబ్బేనివాసం అనుస్సరతి, సేయ్యథిదం, ఏకమ్పిజాతిం ద్వేపి జాతియో…పే… ఇదమ్పి ఖో మహారాజ సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ. ఏవం ఖో భన్తే భగవా రఞ్ఞో మాగధస్స అజాతసత్తుస్స వేదేహిపుత్తస్స అపరమ్పి సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ దేసేసి.

అచ్ఛరియం ¶ ఆవుసో, అబ్భుతం ఆవుసో, యావ బుద్ధసాసనస్స స్వాఖాతతా, యత్రహి నామ ఏవం స్వాఖాతే బుద్ధసాసనే పబ్బజిత్వా సావకోపి సమ్మాపటిపన్నో ఏవం విసేసం పుబ్బేనివాసఞాణం పటిలభిస్సతి.

పుచ్ఛా – కథఞ్చ పనావుసో భగవా సన్దిట్ఠికం సామఞ్ఞఫలం దేసేసి, పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ.

విస్సజ్జనా – సో ఏవం సమాహితే చిత్తే పరిసుద్ధే పరియోదాతే అనఙ్గణే విగతూపక్కిలేసే ముదుభూతే కమ్మనియే ఠితే ఆనేఞ్జప్పత్తే సత్తానం చుతూపపాతఞాణాయ చిత్తం అభినీహరతి ¶ అభినిన్నామేతి, సో దిబ్బేన చక్ఖునా విసుద్ధేన అతిక్కన్తమానుసకేన సత్తే పస్సతి చవమానే ఉపపజ్జమానే హీనే పణీతే సువణ్ణే దుబ్బణ్ణే సుగతే దుగ్గతే యథాకమ్ముపగే సత్తే పజానాతి…పే… ఇదమ్పి ఖో మహారాజ సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ. ఇత్థం ఖో భన్తే భగవా రఞ్ఞో మాగధస్స అజాతసత్తుస్స వేదేహిపుత్తస్స అపరమ్పి సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ దేసేసి.

అచ్ఛరియం ¶ ఆవుసో, అబ్భుతం ఆవుసో, యావ బుద్ధసాసనస్స స్వాఖాతతా, యత్రహి నామ ఏవం స్వాఖాతే బుద్ధసాసనే పబ్బజితో సావకోపి సమ్మాపటిపన్నో ఏవం విసేసం దిబ్బచక్ఖుఞాణం పటిలభిస్సతి.

పుచ్ఛా – కథం ¶ పనావుసో భగవా పరియోసానే ఉత్తరితరం సామఞ్ఞఫలం దేసేసి.

విస్సజ్జనా – సో ఏవం సమాహితే చిత్తే పరిసుద్ధే పరియోదాతే అనఙ్గణే విగతూపక్కిలేసే ముదుభూతే కమ్మనియే ఠితే ఆనేఞ్జప్పత్తే ఆసవానం ఖయఞాణాయ చిత్తం అభినీహరతి అభినిన్నామేతి…పే… ఇదం ఖో మహారాజ సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ. ఇమస్మా చ పన మహారాజ సన్దిట్ఠికా సామఞ్ఞఫలా అఞ్ఞం సన్దిట్ఠికం సామఞ్ఞఫలం ఉత్తరితరం వా పణీతతరం వా నత్థీతి. ఇత్థం ఖో భన్తే భగవా రఞ్ఞో మాగధస్స అజాతసత్తుస్స వేదేహిపుత్తస్స పరియోసానం సన్దిట్ఠికం సామఞ్ఞఫలం పురిమేహి సన్దిట్ఠికేహి సామఞ్ఞఫలేహి అభిక్కన్తతరఞ్చ పణీతతరఞ్చ దేసేసి.

సాధు ¶ సాధు ఆవుసో, సాధు ఖో ఆవుసో, యం భిక్ఖు బుద్ధసాసనే సద్ధాపబ్బజితో ఏవం స్వాఖాతే ధమ్మవినయే సమ్మాపటిపన్నో ఆసవక్ఖయఞాణం పాపుణిత్వా దుక్ఖస్సన్తం కరోతి.

పుచ్ఛా – కథం ¶ పనావుసో రాజా మాగధో అజాతసత్తు వేదేహిపుత్తో ఇమిస్సా దేసనాయ పరియోసానే భగవతి చ దేసనాయఞ్చ పసన్నో పసన్నాకారం అకాసి, కీదిసఞ్చ ఆనిసంసం పటిలభి.

విస్సజ్జనా – ఏవం వుత్తే భన్తే మాగధో అజాతసత్తు వేదేహిపుత్తో భగవన్తం ఏతదవోచ, అభిక్కన్తం భన్తే, అభిక్కన్తం భన్తే, సేయ్యథాపి భన్తే నిక్కుజ్జితం వా ఉక్కుజ్జేయ్య, పటిచ్ఛన్నం వా వివరేయ్య…పే… అజ్జతగ్గే పాణ్ణుపేతం సరణం గతన్తి, అయఞ్హి భన్తే రాజా పితుమారితకాలతో పట్ఠాయ నేవ రత్తిం న దివా నిద్దం పటిలభతి, సత్థారం పన ఉపసఙ్కమిత్వా ఇమాయ మధురాయ ఓజవన్తియా ధమ్మదేసనాయ సుతకాలతో పట్ఠాయ నిద్దం పటిలభతి, తిణ్ణం రతనానం మహాసక్కారమకాసి, పుథుజ్జనికాయ సద్ధాయ సమన్నాగతో నామ ఇమినా రఞ్ఞా సదిసో నాహోసి, అనాగతే పన విజితావీ నామ పచ్చేకబుద్ధో హుత్వా పరినిబ్బాయిస్సతి. ఏవం ఖో భన్తే రాజా మాగధో అజాతసత్తు వేదేహిపుత్తో ¶ దేసనాపరియోసానే పసన్నో పసన్నాకారమకాసి, ఇదిసఞ్చ భన్తే మహానిసంసం పటిలభి.

పుచ్ఛా – తేనావుసో ¶ భగవా జానతా అరహతా పస్సతా సమ్మాసమ్బుద్ధేన అమ్బట్ఠం టామ సుత్తం కత్థ కం ఆరబ్భ భాసితం.

విస్సజ్జనా – కోసలేసు భన్తే జనపదే ఇచ్ఛానఙ్గలే నామ కోసలానం బ్రాహ్మణగామే అమ్బట్ఠం నామ మాణవం బ్రాహ్మణస్స పోక్ఖరసాతిస్స అన్తేవాసిం ఆరబ్భ భాసితం.

పుచ్ఛా – సోణదణ్డం ¶ పనావుసో సుత్తం భగవతా కత్థ కం ఆరబ్భ భాసితం.

విస్సజ్జనా – అఙ్గేసు భన్తే జనపదే చమ్పాయం సోణదణ్డం బ్రాహ్మణం ఆరబ్భ భాసితం.

పుచ్ఛా – కూటదన్తం ¶ పనావుసో సుత్తం భగవతా కత్థ కం ఆరబ్భ భాసితం.

విస్సజ్జనా – మగధేసు భన్తే ఖాణుమతే నామ బ్రాహ్మణగామే కూటదన్త బ్రాహ్మణం ఆరబ్భ భాసితం.

పుచ్ఛా – మహాలిం ¶ పనావుసో సుత్తం భగవతా కత్థ కం ఆరబ్భ భాసితం.

విస్సజ్జనా – వేసాలియం భన్తే ఓట్ఠద్ధం నామ లిచ్ఛవిం ఆరబ్భ భాసితం.

పుచ్ఛా – జాలియం ¶ పనావుసో సుత్తం భగవతా కత్థ కం ఆరబ్భ భాసితం.

విస్సజ్జనా – కోసమ్బియం భన్తే ద్వే పబ్బజితే ఆరబ్భ భాసితం.

పుచ్ఛా – మహాసీహనాదం ¶ పనావుసో సుత్తం భగవతా కత్థ కం ఆరబ్భ భాసితం.

విస్సజ్జనా – ఉరుఞ్ఞాయం భన్తే కణ్ణకథలే అచేలం కస్సపం ఆరబ్భ భాసితం.

పుచ్ఛా – పోట్ఠపాదం ¶ పనావుసో సుత్తం భగవతా కత్థ కం ఆరబ్భ భాసితం.

విస్సజ్జనా – సావత్థియం భన్తే పోట్ఠపాదఞ్చ పరిబ్బాజకం చిత్తఞ్చ హత్థిసారిపుత్తం ఆరబ్భ భాసితం.

పుచ్ఛా – సుభసుత్తం ¶ పనావుసో కత్థ కం ఆరబ్భ కేన భాసితం.

విస్సజ్జనా – సావత్థియం భన్తే ఆయస్మతా ఆనన్దేన ధమ్మభణ్డాగారికేన సుభం మాణవం తోదేయ్యపుత్తం ఆరబ్భ భాసితం.

పుచ్ఛా – కేవట్టం ¶ పనావుసో సుత్తం భగవతా కత్థ కం ఆరబ్భ భాసితం.

విస్సజ్జనా – నాళన్దా యం భన్తే కేవట్టం గహపతిపుత్తం ఆరబ్భ భాసితం.

పుచ్ఛా – లోహిచ్చసుత్త ¶ పనావుసో భగవతా కత్థ కం ఆరబ్భ భాసితం.

విస్సజ్జనా – కోసలేసు భన్తే జనపదే సాలవతికాయం లోహిచ్చం బ్రాహ్మణం ఆరబ్భ భాసితం.

పుచ్ఛా – తేవిజ్జసుత్తం ¶ పనావుసో భగవతా కత్థ కం ఆరబ్భ భాసితం.

విస్సజ్జనా – కోసలేసు భన్తే మనసాకటే నామ కోసలానం బ్రాహ్మణగామే వాసేట్ఠం భారద్వాజం మాణవం ఆరబ్భ భాసితం.

పుచ్ఛా – తేన ¶ ఆవుసో భగవతా జానతా పస్సతా అరహతా సమ్మాసమ్బుద్ధేన మహాపదానసుత్తం దీఘనికాయే మహావగ్గే పోరాణకేహి సఙ్గితికారేహి పఠమం సఙ్గితం భగవతా కత్థ కం ఆరబ్భ కిస్మిం వత్థుస్మిం భాసితం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ భాసితం, సమ్బహులానం భన్తే భిక్ఖూనం పచ్ఛాభత్తం పిణ్డపాతపటిక్కన్తానం మణ్డలమాళే సన్నిసిన్నానం సన్నిపతితానం పుబ్బేనివాసపటిసంయుత్తా ధమ్మీకథా ఉదపాది, ఇతిపి పుబ్బేనివాసో ఇతిపి పుబ్బేనివాసోతి, తస్మిం భన్తే వత్థుస్మిం భాసితం.

పుచ్ఛా – మహానిదానసుత్తం ¶ పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.

విస్సజ్జనా – కురూసు భన్తే కమ్మాసధమ్మే నామ కురూనం నిగమే ఆయస్మన్తం ఆనన్దం ఆరబ్భ భాసితం, ఆయస్మా భన్తే ఆనన్దో భగవన్తం ఉపసఙ్కమిత్వా ఏతదవోచ ‘‘అచ్ఛరియం భన్తే, అబ్భుతం భన్తే, యావ గమ్భీరోచాయం భన్తే పటిచ్చసముప్పాదో

గమ్భీరావభాసో ¶ చ, అథ చ పన మే ఉత్తానకుత్తానకో వియ ఖాయతీ’’తి, తస్మిం భన్తే వత్థుస్మిం భాసితం.

పుచ్ఛా – మహాపరినిబ్బానసుత్తం ¶ పనావుసో బహుఅనుసన్ధికం, బహుదేసనా సఙ్గహం, బుద్ధస్స భగవతో పరినిబ్బానాసన్నవస్సే పవత్తఅట్ఠుప్పత్తిదీపకవచనపబన్ధభూతం, తస్మా తం అన్తరాభేదవసేన విభజ్జ పరిచ్ఛిజ్జ పరిచ్ఛిజ్జ పుచ్ఛిస్సామి, తత్థావుసో భగవతా పఠమం

రాజూనం ¶ అపరిహానియధమ్మదేసనా కత్థ కం ఆరబ్భ కిస్మిం వత్థుస్మిం భాసితా.

విస్సజ్జనా – రాజగహే భన్తే వస్సకారం బ్రాహ్మణం మగధమహామత్తం ఆరబ్భ భాసితా, వస్సకారో భన్తే బ్రాహ్మణో మగధమహామత్తో భగవన్తం ఉపసఙ్కమిత్వా ఏతదవోచ ‘‘రాజా భో గోతమ మాగధో అజాతసత్తు వేదేహిపుత్తో వజ్జీ అభియాతుకామో సో ఏవమాహ అహం హిమే వజ్జీ ఏవం మహిద్ధికే ఏవం మహానుభావే ఉచ్ఛేచ్ఛామి వజ్జీ వినాసేస్సామి వజ్జీ అనయబ్యసనం ఆపాదేస్సామీ వజ్జీ’’తి తస్మిం భన్తే వత్థుస్మిం భాసితా.

పుచ్ఛా – భిక్ఖూనం ¶ పనావుసో అపరిహానియధమ్మదేసనా భగవతా కత్థ కిస్మిం వత్థుస్మిం భాసితా.

విస్సజ్జనా – తస్మింయేవ భన్తే రాజగహే తస్మింయేవ వత్థుస్మిం భాసితా.

పుచ్ఛా – ధమ్మాదాసో ¶ ఆవుసో ధమ్మపరియాయో భగవతా కత్థ కం ఆరబ్భ కిస్మిం వత్థుస్మిం భాసితో.

విస్సజ్జనా – నాతికే భన్తే గిఞ్జకావసథే ఆయస్మన్తం ఆనన్ద ఆరబ్భ భాసితో, ఆయస్మా భన్తే ఆనన్దో భగవన్తం ఉపసఙ్కమిత్వా నాతికియానం ద్వాదసన్నం పుగ్గలానం గతిఅభిసమ్పరాయం పుచ్ఛి, తస్మిం భన్తే వత్థుస్మిం భాసితో.

పుచ్ఛా – అత్తదీపధమ్మదేసనా ¶ పనావుసో భగవతా కత్థ కం ఆరబ్భ కిస్మిం వత్థుస్మిం భాసితా.

విస్సజ్జనా – వేసాలియం భన్తే వేళువగామకే ఆయస్మన్తం ఆనన్దం ఆరబ్భ భాసితా, ఆయస్మా భన్తే ఆనన్దో భగవతో గిలానవుట్ఠితస్స అచిరవుట్ఠితస్స గేలఞ్ఞా భగవతో గేలఞ్ఞేన అత్తనో ఖేదపత్తకారణం ఆరోచేసి, తస్మిం భన్తే వత్థుస్మిం భాసితా.

‘‘తస్మాతిహానన్ద ¶ అత్తదీపా విహరథ అత్తసరణా అనఞ్ఞసరణా’’.

పుచ్ఛా – భగవతా ఆవుసో పురిమ దుతియదివసే పుచ్ఛితవిస్సజ్జితక్కమేన అత్తదీపధమ్మదేసనఞ్చ అఞ్ఞాని చ ధమ్మదేసనాని కథేత్వా పరినిట్ఠిత సబ్బబుద్ధకిచ్చేన ఆయుసఙ్ఖారో కత్థ ఓస్సట్ఠో.

విస్సజ్జనా – వేసాలియం భన్తే చాపాలే చేతియే మారేన పాపిమతా యాచితో భగవా సతేన సమ్పజానేన ఆయుసఙ్ఖారో ఓస్సట్ఠో.

‘‘పరినిబ్బాతు ¶ దాని భన్తే భగవా, పరినిబ్బాతు సుగతో, పరినిబ్బాన కాలో దాని భన్తే భగవతో.

అప్పోసుక్కో త్వం పాపిమ హోతి, న చిరం తథాగతస్స పరినిబ్బానం భవిస్సతి, ఇతో తిణ్ణం మాసానం అచ్చయేన తథాగతో పరినిబ్బాయిస్సతి.

పుచ్ఛా – చతుమహాపదేసధమ్మదేసనా ¶ పనావుసో భగవతా కత్థ భాసితా.

విస్సజ్జనా – భోగనగరే భన్తే ఆనన్దే చేతియే భాసితా.

పరిపక్కో ¶ వయో మయ్హం, పరిత్తం మమ జీవితం. పహాయ వో గమిస్సామి, కతం మే సరణమత్తనో.

పుచ్ఛా – చతుసంవేజనీయకథా ¶ పనావుసో భగవతా కత్థ కం ఆరబ్భ కిస్మిం వత్థుస్మిం భాసితా.

విస్సజ్జనా – కుసినారాయం భన్తే ఆయస్మన్తం ఆనన్దం ఆరబ్భ భాసితా, ఆయస్మా భన్తే ఆనన్దో భగవన్తం ఏతదవోచ ‘‘పుబ్బే భన్తే దిసాసు వస్సంవుట్ఠా భిక్ఖూ ఆగచ్ఛన్తి తథాగతం దస్సనాయ, తే మయం లభామ మనోభావనీయే భిక్ఖూ దస్సనాయ, లభామ పయిరుపాసనాయ. భగవతో పన మయం భన్తే అచ్చయేన న లభిస్సామ మనోభావనీయే భిక్ఖూ దస్సనాయ, న లభిస్సామ పయిరుపాసనాయా’’తి, తస్మిం భన్తే వత్థుస్మిం భాసితా.

యేహి ¶ కేచి ఆనన్ద చేతియచారికం ఆహిణ్డన్తా పసన్నచిత్తా కాలం కరిస్సన్తి, సబ్బేతే కాయస్స భేదా పరం మరణా సుగతిం సగ్గం లోకం ఉపపజ్జిస్సన్తి హు –

పుచ్ఛా – కథఞ్చావుసో ¶ భగవా భిక్ఖూనం మాతుగామేసు పటిపజ్జితబ్బవత్తం కథేసి.

విస్సజ్జనా – అదస్సనం ఆనన్దాతి చ అనాలాపో ఆనన్దాతి చ సతి ఆనన్ద ఉపట్ఠబ్బేతబ్బాతి చ ఏవం ఖో భన్తే భగవా మాతుగామేసు పటిపజ్జితబ్బాకారం కథేసి.

పుచ్ఛా – మహాసుదస్సనసుత్తం ¶ పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.

విస్సజ్జనా – తిస్సంయేవ భన్తే కుసినారాయం ఆయస్మన్తం ఆనన్దం ఆరబ్భ భాసితం, ఆయస్మా భన్తే ఆనన్దో భగవన్తం ఏతదవోచ ‘‘మా భన్తే భగవా ఇమస్మిం ఖుద్దకనగరకే

ఉజ్జఙ్గలనగరకే ¶ సాఖానగరకే పరినిబ్బాయి. సన్తి భన్తే అఞ్ఞాని మహానగరాని. సేయ్యథిదం, చమ్పా, రాజగహం, సావత్థీ, సాకేతం, కోసమ్బీ, బారాణసీ, ఏత్థ భగవా పరినిబ్బాయతు, ఏత్థ బహూ ఖత్తియమహాసాలా బ్రాహ్మణ మహాసాలా గహపతి మహాసాలా తథాగతే అభిప్పసన్నా. తే తథాగతస్స సరీరపూజం కరిస్సన్తీ’’తి, తస్మిం భన్తే వత్థుస్మిం భాసితం.

పుచ్ఛా – భగవా ¶ ఆవుసో పురిమదివసే పుచ్ఛిత విస్సజ్జితక్కమేన మహాసుదస్సన సుత్తన్తం దేసేత్వా సుభద్దంనామ పరిబ్బాజకం బుద్ధవేనేయ్యేసు పచ్ఛిమసావకభూతం కథం వినేసి.

విస్సజ్జనా – యస్మిం ఖో సుభద్ద ధమ్మవినయే అరియో అట్ఠఙ్గికో మగ్గో న ఉపలబ్భతి, సమణోపి తత్థ న ఉపలబ్భతి, దుతియోపి తత్థ సమణో న ఉపలబ్భతి, తతియోపి తత్థ సమణో న ఉపలబ్భతి, చతుత్థోపి తత్థ సమణో న ఉపలబ్భతి (పేయ్యాల). ఇమే చ సుభద్ద భిక్ఖూ సమ్మా విహరేయ్యుం, అసుఞ్ఞో లోకో అరహన్తేహి అస్స, ఏవం ఖో భన్తే భగవా సుభద్దం పరిబ్బాజకం బుద్ధవేనేయ్యేసు పచ్ఛిమం సక్ఖిసావకం వినేసి.

పుచ్ఛా – పచ్ఛిమే ¶ పనావుసో కాలే భగవా ఆయస్మతో ఆనన్దస్స కీదిసం వచనం కథేత్వా, కథఞ్చ భిక్ఖూ పవారేత్వా, కీదిసఞ్చ భిక్ఖూనం వచనం ఆమన్తేత్వా, కథఞ్చ అనుపాదిసేసాయ నిబ్బానధాతుయా పరినిబ్బాయి.

విస్సజ్జనా – భగవా భన్తే పచ్ఛిమే కాలే ఆయస్మతో ఆనన్దస్స సియా ఖో పనానన్ద తుమ్హాకం ఏవమస్స అతీతసత్థుకం పావచనం నత్థి నో సత్థాతి ఏవమాదికం వచనం కథేత్వా, సియా ఖో పన భిక్ఖవే ఏకభిక్ఖుస్సాపి కఙ్ఖా వా విమతి వా బుద్ధే వా ధమ్మే వా సఙ్ఘే వా మగ్గే వా పటిపదాయ వాతి ఏవమాదినా భిక్ఖూ పవారేత్వా, హన్దదాని భిక్ఖవే ఆమన్తయామి వో, వయధమ్మా సఙ్ఖారా అప్పమాదేన సమ్పాదేథాతి పచ్ఛిమఞ్చ ఓవాదవచనం భిక్ఖూనం ఆమన్తేత్వా, నవ అనుపుబ్బసమాపత్తియో అనులోమం పటిలోమం సమాపజ్జిత్వా, చతుత్థజ్ఝానా వుట్ఠహిత్వా సమనన్తరా అనుపాదిసేసాయ నిబ్బానధాతుయా పరినిబ్బాయి.

నావుసో ¶ ఆనన్ద భగవా పరినిబ్బుతో, సఞ్ఞావేదయిత నిరోధం సమాపన్నో.

పుచ్ఛా – మహాసుదస్సనసుత్తం ¶ పనావుసో పురిమదివసే పుచ్ఛితఞ్చ విస్సజ్జితఞ్చ, జనవసభసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.

విస్సజ్జనా – నాతికే భన్తే గిఞ్జకావసథే ఆయస్మన్తం ఆనన్దం ఆరబ్భ భాసితం, ఆయస్మా భన్తే ఆనన్దో మాగధకే పరిచారకే ఆరబ్భ భగవతో సమ్ముఖా పరికథం కథేసి, తస్మిం భన్తే వత్థుస్మిం భాసితం.

పుచ్ఛా – మహాగోవిన్దసుత్తం ¶ పనావుసో భగవతా కత్థ భాసితం.

విస్సజ్జనా – రాజగహే భన్తే భాసితం.

పుచ్ఛా – మహాసమయసుత్తం ¶ పనావుసో భగవతా కత్థ భాసితం.

విస్సజ్జనా – సక్కేసు భన్తే కపిలవత్థుస్మిం భాసితం.

పుచ్ఛా – సక్కపఞ్హసుత్తం ¶ పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.

విస్సజ్జనా – మగధేసు భన్తే పాచీనతో రాజగహస్స అమ్బసణ్డా నామ బ్రాహ్మణగామో, తస్సుత్తరతో వేదియకే పబ్బతే ఇన్దసాలగుహాయం సక్కం దేవానమిన్దం ఆరబ్భ భాసితం, సక్కో భన్తే దేవానమిన్దో భగవన్తం ఉపసఙ్కమిత్వా పఞ్హం పుచ్ఛి, తస్మిం భన్తే వత్థుస్మిం భాసితం.

పుచ్ఛా – మహాసతిపట్ఠానసుత్తం ¶ పనావుసో భగవతా కత్థ భాసితం.

విస్సజ్జనా – కురూసు భన్తే కమ్మాసధమ్మే నామ కురూనం నిగమే భాసితం.

పుచ్ఛా – పాయాసి ¶ సుత్తం పనావుసో కత్థ కం ఆరబ్భ కిస్మిం వత్థుస్మిం కేన భాసితం.

విస్సజ్జనా – కోసలేసు భన్తే సేతబ్యానామ కోసలానం నగరం ఉత్తరేన సేతబ్యం సింసపావనే ఆయస్మతా కుమారకస్సపేన పాయాసిం రాజఞ్ఞం ఆరబ్భ భాసితం, పాయాసిస్స భన్తే రాజఞ్ఞస్స ఏవరూపం పాపకం దిట్ఠిగతం ఉప్పన్నం హోతి, ఇతిపి నత్థి పరోలోకో నత్థి సత్తా ఓపపాతికా నత్థి సుకతదుక్కటానం కమ్మానం ఫలం విపాకోతి, తస్మిం భన్తే వత్థుస్మిం భాసితం.

పుచ్ఛా – తత్థావుసో ¶ పాయాసిస్స రాజఞ్ఞస్స దిట్ఠిపకాసనాచ ఆయస్మతో కుమారకస్సపత్థేరస్స దిట్ఠివినివేట్ఠనకథా చ అనేకవారం ఆగతా, తత్థావుసో పఠమం పాయాసి రాజఞ్ఞో అత్తనో దిట్ఠిం కథం పకాసేసి, కథఞ్చాయస్మా కుమారకస్సపో తం మిచ్ఛాదిట్ఠిం వినివేఠేసి.

విస్సజ్జనా – పాయాసి భన్తే రాజఞ్ఞో ఆయస్మన్తం కుమారకస్సపం ఉపసఙ్కమిత్వా ఏతదవోచ ‘‘అహఞ్హి భో కస్సప ఏవం వాదీ ఏవం దిట్ఠీ ఇతిపి నత్థి పరోలోకో, నత్థి సత్తా ఓపపాతికా, నత్థి సుకతదుక్కటానం కమ్మానం ఫలం విపాకో’’కి, ఏవం ఖో భన్తే పాయాసిరాజఞ్ఞో అత్తనో మిచ్ఛాదిట్ఠిం ఆయస్మతో కుమారకస్సపస్స సన్తికే పకాసేసి. ఆయస్మా చ కుమారకస్సపో సక్ఖికారణం చన్దిమసూరియఉపమం దస్సేత్వా పాయాసిస్స రాజఞ్ఞస్స తం పాపకం దిట్ఠిగతం వినివేఠేసి.

సాధు ¶ సాధు ఆవుసో, సాధు ఖో ఆవుసో ఆయస్మా కుమారకస్సపో పాయాసిస్స రాజఞ్ఞస్స మిచ్ఛాదిట్ఠికస్స సద్ధమ్మవిముఖిభూతస్స పచ్చక్ఖతో పరలోకం దస్సేత్వా తం మిచ్ఛాదిట్ఠిం వినివేఠేసి.

పుచ్ఛా – అథ పనావుసో పాయాసిరాజఞ్ఞో దుతియమ్పి కీదిసం సాధకపరియాయం దస్సేత్వా అత్తనో వాదం పతిట్ఠాపేసి, కథఞ్చాయస్మా కుమారకస్సపో తం మిచ్ఛావాదం సహధమ్మేన సునిగ్గహం నిగ్గహేత్వా ధమ్మవాదం పతిట్ఠాపేసి.

విస్సజ్జనా – దుతియే పన భన్తే పాయాసిరాజఞ్ఞో అత్తనో మిత్తామచ్చే ఞాతిసాలోహితే దుచ్చరితసమఙ్గినో కాలంకతే సాధకపరియాయం దస్సేత్వా అత్తనో మిచ్ఛావాదం పతిట్ఠాపేసి ¶ , ఆయస్మా చ కుమారకస్సపో చోరఉపమాయ తం మిచ్ఛావాదం సహధమ్మేన సునిగ్గహం నిగ్గహేత్వా ధమ్మవాదం పతిట్ఠాపేసి.

సాధు ¶ సాధు ఆవుసో, సాధు ఖో ఆవుసో యం ఆయస్మా కుమారకస్సపో ఉప్పన్నం పరప్పవాదం సహధమ్మేన సునిగ్గహం నిగ్గహేత్వా ధమ్మవాదం పతిట్ఠాపేసి.

పుచ్ఛా – అథ పనావుసో పాయాసిరాజఞ్ఞో తతియమ్పి కీదిసం సాధక పరియాయం దస్సేత్వా అత్తనోవాదం పతిట్ఠాపేసి, కథఞ్చాయస్మా కుమారకస్సపో తం మిచ్ఛావాదం సహధమ్మేన సునిగ్గహ నిగ్గహేత్వా ధమ్మవాదం పతిట్ఠాపేసి.

విస్సజ్జనా – తతియమ్పన ¶ భన్తే పాయాసిరాజఞ్ఞో అత్తనో మిత్తామచ్చే ఞాతిసాలోహితే సుచరితసమఙ్గినో కాలంకతే దస్సేత్వా అత్తనో మిచ్ఛావాదం పతిట్ఠాపేసి, ఆయస్మా చ కుమారకస్సపో గూథకూపే పతపురిసోపమాయ తం మిచ్ఛావాదం సహధమ్మేన సునిగ్గహితం నిగ్గహేత్వా ధమ్మవాదం పతిట్ఠాపేసి.

పుచ్ఛా – ఆయస్మతా ఆవుసో కుమారకస్సపేన పురిమదివసే పుచ్ఛితవిస్సజ్జితక్కమేన గూథకూపపురిసఉపమాయ మిచ్ఛావాదం పటిక్ఖిపిత్వా ధమ్మవాదే పతిట్ఠాపియమానే పియాసిరాజఞ్ఞో

చతుత్థం ¶ వా పఞ్చమం వా కీదిసం సాధకపరియాయం దస్సేత్వా అత్తనోవాదం పతిట్ఠాపేసి, కథఞ్చాయస్మా కుమారకస్సపో సహధమ్మేన తం మిచ్ఛావాదం పటిక్ఖిపిత్వా ధమ్మవాదం పతిట్ఠాపేసి.

విస్సజ్జనా – పాయాసి భన్తే రాజఞ్ఞో ఆయస్మతా కుమారకస్సపేన గూథకూపే నిముగ్గపురిసో పమాయ మిచ్ఛావాదం సునిగ్గహితం నిగ్గహేత్వా ధమ్మవాదే పతిట్ఠాపితే చతుత్థం వా పఞ్చమం వా అత్తనో మిత్తామచ్చే ఞాతిసాలోహితే సమాదిన్న పఞ్చసీలే సాధకపరియాయం దస్సేత్వా అత్తనో మిచ్ఛావాదం పతిట్ఠాపేసి. ఆయస్మా చ కుమారకస్సపో తావతింసదేవోపమాయ చ జచ్చన్ధోపమాయ చాతి ద్వీహి ఉపమాహి తం పాపకం దిట్ఠిగతం సహధమ్మేన సునిగ్గహితం నిగ్గహేత్వా, ధమ్మవాదం పతిట్ఠాపేసి.

సాధు ¶ సాధు ఆవుసో, సాధు ఖో ఆవుసో యం కుమారకస్సపో పాయాసిస్స రాజఞ్ఞస్స ద్వే ఉపమాయో దస్సేత్వా ఉప్పన్నం పాపకం మిచ్ఛావాదం సహధమ్మేన సనిగ్గహం నిగ్గహేత్వా ధమ్మవాదం పతిట్ఠాపేసి.

పుచ్ఛా – అథ పనావుసో పాయాసిరాజఞ్ఞో ఛట్ఠంపి కీదిసం సాధకపరియాయం దస్సేత్వా అత్తనో వాదం పతిట్ఠాపేసి, కథఞ్చాయస్మా కుమారకస్సపో సహధమ్మేన తం మిచ్ఛావాదం సునిగ్గహం నిగ్గహేత్వా ధమ్మవాదం పతిట్ఠాపేసి.

విస్సజ్జనా – ఛట్ఠం పన భన్తే పాయాసిరాజఞ్ఞో సీలవన్తే సమణబ్రాహ్మణే కల్యాణధమ్మే జీవితుకామే అమరితుకామే

సుఖకామే ¶ దుక్ఖపటికూలే సాధకపరియాయం దస్సేత్వా అత్తనో వాదం పతిట్ఠాపేసి, ఆయస్మాచ కుమారకస్సపో గబ్భినీ ఉపమాయ తం మిచ్ఛావాదం సహధమ్మేన సునిగ్గహితం నిగ్గహేత్వా ధమ్మవాదం పతిట్ఠాపేసి.

సాధు ¶ సాధు ఆవుసో, సాధు ఖో ఆవుసో యం ఆయస్మా కుమారకస్సపో గబ్భినీఉపమం దస్సేత్వా తం మిచ్ఛావాదం పటిక్ఖిపిత్వా ధమ్మవాదం పతిట్ఠాపేసి.

పుచ్ఛా – అథ పనావుసో పాయాసిరాజఞ్ఞో సత్తమంపి కీదిసం సాధకపరియాయం దస్సేత్వా అత్తనో వాదం పతిట్ఠాపేసి, కథఞ్చాయస్మా కుమారకస్సపో తం మిచ్ఛావాదం సహధమ్మేన సునిగ్గహం నిగ్గహేత్వా ధమ్మవాదం పతిట్ఠాపేసి.

విస్సజ్జనా – సత్తమం పన భన్తే పాయాసిరాజఞ్ఞో కుబ్భియం పక్ఖిపిత్వా మారితపురిసం సాధకపరియాయం దస్సేత్వా అత్తనో వాదం పతిట్ఠాపేసి, ఆయస్మాచ కుమారకస్సపో సుపినకూపమాయ తం మిచ్ఛావాదం సహధమ్మేన సునిగ్గహితం నిగ్గహేత్వా ధమ్మవాదం పతిట్ఠాపేసి.

సాధు ¶ సాధు ఆవుసో, సాధు ఖో ఆవుసో యం ఆయస్మా కుమారకస్సపో సుపినకూపమం దస్సేత్వా ఉప్పన్నం మిచ్ఛావాదం సహధమ్మేన సునిగ్గహం నిగ్గహేత్వా ధమ్మవాదం పతిట్ఠాపేసి.

పుచ్ఛా – అథ ¶ పనావుసో పాయాసిరాజఞ్ఞో అట్ఠమమ్పి నవమమ్పి కథేతబ్బం కథేత్వా దసమం కీదిసం సాధకపరియాయం దస్సేత్వా అత్తనో వాదం పతిట్ఠాపేసి, కథఞ్చాయస్మా కుమారకస్సపో సహధమ్మేన తం మిచ్ఛావాదం పటినిస్సజ్జాపేసి.

విస్సజ్జనా – అట్ఠమమ్పి భన్తే నవమమ్పి పాయాసిరాజఞ్ఞో యం వా తం వా పరియాయం దస్సేత్వా అత్తనో వాదం పతిట్ఠాపేసి, దసమం పన భన్తే పాయాసిరాజఞ్ఞో ఛవిఆదీని ఛిన్దిత్వా మారితపురిసం సాధకపరియాయం దస్సేత్వా అత్తనో వాదం పతిట్ఠాపేసి, ఆయస్మా చ కుమారకస్సపో అగ్గికజటిలోపమాయ తం మిచ్ఛావాదం సహధమ్మేన సునిగ్గహితం నిగ్గహేత్వా ధమ్మవాదం పతిట్ఠాపేసి.

పటినిస్సజ్జేతం ¶ రాజఞ్ఞ పాపకం దిట్ఠిగతం. పటినిస్సజ్జేతం రాజఞ్ఞ పాపకం దిట్ఠిగతం.

సాధు ¶ సాధు ఆవుసో, సాధు ఖో ఆవుసో యం ఆయస్మా కుమారకస్సపో ఓపాయికం ఉపమం దస్సేత్వా తం పాపికం మిచ్ఛాదిట్ఠిం పటినిస్సజ్జాపేసి, యం తస్స భవేయ్య దీఘరత్తం హితాయ సుఖాయ.

పుచ్ఛా – ఆయస్మతా ఆవుసో కుమారకస్సపేన పురిమదివసే పుచ్ఛితవిస్సజ్జితాకారేన పాయాసిస్స రాజఞ్ఞస్స అగ్గికజటిలోపమం దస్సేత్వా తస్మిం పాపకే దిట్ఠిగతే పటినిస్సజ్జాపితే సో తావ థేరస్స వచనం అనాదియిత్వా కీదిసఞ్చ పచ్చనీకకథం కథేసి, కథఞ్చ థేరో కరుణాసీతలహదయో హుత్వా అపరమ్పి ఉపమం దస్సేత్వా తం పాపకం దిట్ఠిగతం పటినిస్సజ్జాపేసి.

విస్సజ్జనా – పాయాసి భన్తే రాజఞ్ఞో ఆయస్మతా కుమారకస్సపేన అగ్గికజటిలోపమం దస్సేత్వా తం పాపకం దిట్ఠిగతం పటినిస్సజ్జాపితే కిఞ్చాపి భవం కస్సపో ఏవమాహ, అథ ఖో నేవాహం సక్కోమి ఇదం పాపకం దిట్ఠిగతం పటినిస్సజ్జితున్తి ఏవమాదికం పచ్చనీకకథం కథేసి, థేరో చ భన్తే కుమారకస్సపో ద్వే సత్థవాహోపమం దస్సేత్వా తం పాపకం మిచ్ఛావాదం పటినిస్సజ్జాపేసి.

సాధు ¶ సాధు ఆవుసో, సాధు ఖో ఆవుసో యం ఆయస్మా కుమారకస్సపో పాయాసిస్స రాజఞ్ఞస్స ద్వే సత్థవాహోపమమ్పి దస్సేత్వా తం పాపకం దిట్ఠిగతం పటినిస్సజ్జాపేసి, తఞ్హి తస్స చ తదనుయాయీనఞ్చ భవేయ్య దీఘరత్తం హితాయ సుఖాయ.

పుచ్ఛా – ఏవం ¶ పనావుసో ఆయస్మతా కుమారకస్సపేన యథా వుత్తాహి బహూహి ఉపమాహి చ అపరాహి గూథభారికఅక్ఖధుత్తకోపమాహి చ తస్మిం పాపకే దిట్ఠిగతే విస్సజ్జాపితే సో తావ థేరస్స వచనం అనాదియిత్వావ పచ్ఛిమపటిక్ఖేపవసేన కీదిసం పచ్చనీకకథం కథేసి, కథఞ్చ థేరో కరుణాసీతలహదయో హుత్వా పచ్ఛిమమ్పి ఉపమం దస్సేత్వా తం పాపకం దిట్ఠిగతం పటినిస్సజ్జాపేసి.

విస్సజ్జనా – పాయాసి భన్తే రాజఞ్ఞో ఏవం థేరేన నానాఉపమాహి తస్మిం పాపకే దిట్ఠిగతే పటినిస్సజ్జాపితేపి పురిమనయేనేవ థేరస్స పచ్చనీకకథం కథేసి, థేరోపి చ భన్తే పచ్ఛిమం సాణభారికూపమం దస్సేత్వా కరుణాసీతలహదయో తం పాపకం దిట్ఠిగతం పటినిస్సజ్జాపేసి.

సాధు ¶ సాధు ఆవుసో, సాధు ఖో ఆవుసో యం ఆయస్మా కుమారకస్సపో పాయాసిస్స రాజఞ్ఞస్స సాణభారికోపమమ్పి దస్సేత్వా తం పాపకం దిట్ఠిగతం పటినిస్సజ్జాపేసి, తఞ్హి తస్స చ తదనుయాయీనఞ్చ భవేయ్య దీఘరత్తం హితాయ సుఖాయ.

పుచ్ఛా – ఇమాయ ¶ పనావుసో పచ్ఛిమికాయ సాణభారికోపమాయ దస్సితాయ పాయాసిరాజఞ్ఞో థేరస్స ధమ్మదేసనానుభావేన ఇమస్మిం ధమ్మవినయే పసన్నో హుత్వా కీదిసం పసన్నాకారమకాసి, కథఞ్చ ఆయస్మన్తం కుమారకస్సపం అనుసాసనిం యాచి, కథఞ్చాయస్మా కుమారకస్సపో అనుసాసి.

విస్సజ్జనా – ఇమాయ చ పన భన్తే ఉపమాయ దస్సితాయ పాయాసి రాజఞ్ఞో ‘‘పురిమేనేవ అహం ఓపమ్మేన భోతో కస్సపస్స అత్తమనో అభిరద్ధో ఏవమాదినా భన్తే పాయాసిరాజఞ్ఞో ఇమస్మిం ధమ్మవినయే ఆయస్మతో కుమారకస్సపస్స ధమ్మదేసనాయ పసన్నో పసన్నాకారమకాసి. ఇచ్ఛామి చాహం భో కస్సప మహాయఞ్ఞం యజితుం, అనుసాసతు మం భవం కస్సపో యం మమస్స దీఘరత్తం హితాయ సుఖాయాతి పాయాసి రాజఞ్ఞో ఆయస్మన్తం కుమారకస్సపం అనుసాసనిం యాచి, ఆయస్మా చ భన్తే కుమారకస్సపో దుక్ఖేత్తే దుబ్భూమే పవుత్తబీజోపమాయ దుస్సీలేసు దిన్నదానస్స న మహప్ఫలభావం దస్సేత్వా సుఖేత్తే సుభూమే పవుత్తబీజోపమాయ సీలవన్తేసు దిన్నదానస్స మహప్ఫలభావం దస్సేత్వా పాయాసిం రాజఞ్ఞమనుసాసి.

పుచ్ఛా – కథఞ్చావుసో ¶ పాయాసిరాజఞ్ఞో దానం అదాసి, కథఞ్చస్స సమ్పరాయో అహోసి.

విస్సజ్జనా – పాయాసి భన్తే రాజఞ్ఞో అసక్కచ్చం దానమదాసి, అసహత్థా దానమదాసి, అచిత్తీకతం దానమదాసి, అపవిద్ధం దానమదాసి, సో అసక్కచ్చం దానం దత్వా అసహత్థా దానం దత్వా అచిత్తీకతం దానం దత్వా అపవిద్ధం దానం దత్వా కాయస్సభేదా పరం మరణా చాతుమహారాజికానం దేవానం సహబ్యతం ఉపపజ్జి సుఞ్ఞం సేరీసకం విమానం.

పుచ్ఛా – తేనావుసో ¶ భగవతా జానతా పస్సతా అరహతా సమ్మాసమ్బుద్ధేన పాథియవగ్గే పఠమం పాథియసుత్తం కత్థ కం ఆరబ్భ కిస్మిం వత్థుస్మిం భాసితం.

విస్సజ్జనా – మల్లేసు భన్తే అనుపియే నామ మల్లానం నిగమే భగ్గవగోత్తం పరిబ్బాజకం ఆరబ్భ భాసితం, భగ్గవగోత్తో భన్తే పరిబ్బాజకో భగవన్తం ఏతదవోచ ‘‘పురిమాని భన్తే దివసాని పురిమతరాని సునక్ఖత్తో లిచ్ఛవిపుత్తో యేనాహం తేనుపసఙ్కమి, ఉపసఙ్కమిత్వా మం ఏతదవోచ ‘‘పచ్చక్ఖాతో దాని మయా భగ్గవ భగవా, న దానాహం భగవన్తం ఉద్దిస్స విహరామీ’తి, కచ్చే తం భన్తే తథేవ, యథా సునక్ఖత్తో, లిచ్ఛవిపుత్తో అవచా’’తి, తస్మిం భన్తే వత్థుస్మిం భాసితం.

పుచ్ఛా – ఉదుమ్బరికసుత్తం ¶ పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.

విస్సజ్జనా – రాజగహే భన్తే నిగ్రోధం పరిబ్బాజకం ఆరబ్భ భాసితం, నిగ్రోధో భన్తే పరిబ్బాజకో భగవతో పరమ్ముఖా భగవన్తంయేవ ఆరబ్భ అనేకవిహితం అభూతకథం కథేసి, తస్మిం వత్థుస్మిం భాసితం.

పుచ్ఛా – చక్కవత్తిసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.

విస్సజ్జనా – మగధేసు భన్తే మాతులాయం సమ్బహులే భిక్ఖూ ఆరబ్భ అత్తజ్ఝాసయేన సుత్తనిక్ఖేపేన భగవతా భాసితం.

పుచ్ఛా – అగ్గఞ్ఞసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.

విస్సజ్జనా – సావత్థియం భన్తే పుబ్బారామే మిగారమాతుపాసాదే వాసేట్ఠం పబ్బజితం ఆరబ్భ భాసితం, బ్రాహ్మణా భన్తే వాసేట్ఠ భారద్వాజే పబ్బజితే అక్కోసన్తి పరిభాసన్తి అత్తరూపాయ

పరిభాసాయ ¶ పరిపుణ్ణాయ నో అపరిపుణ్ణాయ, తస్మిం భన్తే వత్థుస్మిం భాసితం.

పుచ్ఛా – సమ్పసాదనీయ సుత్తం పనావుసో కత్థ కేన భాసితం.

విస్సజ్జనా – నాళన్దాయం భన్తే పావారికమ్బవనే ఆయస్మతా సారిపుత్తేన భాసితం.

పుచ్ఛా – పాసాదికసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.

విస్సజ్జనా – సక్కేసు భన్తే వేధఞ్ఞానామ సక్యానం అమ్బవనే పాసాదే చున్దం సమణుద్దేసం ఆరబ్భ భాసితం, చున్దో భన్తే సమణుద్దేసో పావాయం నిగణ్ఠస్స నాటపుత్తస్స కాలం కిరియాయ భిన్నానం నిగణ్ఠానం ద్వేధికజాతానం భణ్డనజాతానం కలహజాతానం వివాదాపన్నానం అఞ్ఞమఞ్ఞం ముఖసత్తీహి వితుజ్జనకారణం ఆయస్మతో ఆనన్దస్స ఆరోచేసి, ఆయస్మా చ భన్తే ఆనన్దో భగవతో ఏతమత్థం ఆరోచేసి, తస్మిం భన్తే వత్థుస్మిం భాసితం.

పుచ్ఛా – లక్ఖణసుత్తం ¶ పనావుసో భగవతా కత్థ భాసితం.

విస్సజ్జనా – సావత్థియం భన్తే జేతవనమహావిహారే భాసితం.

పుచ్ఛా – సిఙ్గాలసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం భాసితం.

విస్సజ్జనా – రాజగహే భన్తే సిఙ్గాలం గహపతిపుత్తం ఆరబ్భ భాసితం, సిఙ్గాలో భన్తే గహపతిపుత్తో కాలస్సేవ ఉట్ఠాయ రాజగహా నిక్ఖమిత్వా అల్లవత్థో అల్లకేసో పఞ్జలికో పుథుదిసా నమస్సతి పురత్థిమం దిసం దక్ఖిణం దిసం పచ్ఛిమం దిసం ఉత్తరం దిసం హేట్ఠిమం దిసం ఉపరిమం దిసం, తస్మిం భన్తే వత్థుస్మిం భాసితం.

పుచ్ఛా – ఆటానాటియసుత్తం ¶ పనావుసో భగవతా కత్థ కిస్మిం వత్థుస్మిం భాసితం.

విస్సజ్జనా – రాజగహే ¶ భన్తే గిజ్ఝకూటే పబ్బతే భాసితం, భగవతి భన్తే రాజగహే విహరతి చత్తారో మహారాజానో చతుద్దిసం రక్ఖం ఠపేత్వా చతుద్దిసం గుమ్బం ఠపేత్వా చతుద్దిసం ఓవరణం ఠపేత్వా కేవలకప్పం గిజ్ఝకూటపబ్బతం ఓభాసేత్వా యేన భగవా తేనుపసఙ్కమింసు, ఉపసఙ్కమిత్వా భగవన్తం అభివాదేత్వా ఏకమన్తం నిసీదింసు, ఏకమన్తం నిసిన్నో ఖో భన్తే వేస్సవణో మహారాజా ఆటానాటియం రక్ఖం భగవతో ఆరోచేసి భిక్ఖూనం భిక్ఖునీనం ఉపాసకానం ఉపాసికానం ఫాసువిహారాయ, తస్మిం భన్తే వత్థుస్మిం భాసితం.

పుచ్ఛా – సఙ్గీతి ¶ సుత్తం పనావుసో కత్థ కేన భాసితం.

విస్సజ్జనా – పావాయం భన్తే ఆయస్మతా సారిపుత్తేన భాసితం.

పుచ్ఛా – దసుత్తరసుత్తం పనావుసో కత్థ కేన భాసితం.

విస్సజ్జనా – దసుత్తరసుత్తం భన్తే చమ్పాయం గగ్గరాయ పోక్ఖరణియా తీరే ఆయస్మతా సారిపుత్తేన భాసితం.

పుచ్ఛా – కే ¶ ఆవుసో సిక్ఖన్తి.

విస్సజ్జనా – సేక్ఖా చ భన్తే పుథుజ్జనకల్యాణకా చ సిక్ఖన్తి.

పుచ్ఛా – కే ఆవుసో సిక్ఖితసిక్ఖా.

విస్సజ్జనా – అరహన్తో భన్తే సిక్ఖితసిక్ఖా.

విస్సజ్జనా – భగవతో భన్తే వచనం అరహతో సమ్మాసమ్బుద్ధస్స.

విస్సజ్జనా – పరమ్పరాయ భన్తే ఆభతం.