📜
నమో తస్స భగవతో అరహతో సమ్మాసమ్బుద్ధస్స
సుత్తన్తనీతి
పరా ¶ భవన్తం పురిసం,
మయం పుచ్ఛామ గోతమం;
భవన్తం పుట్ఠు మాగమ్మ,
కిం పరాభవతో ముఖం.
సువిజానో ¶ భవంహోతి,
దువిజానో పరాభవో;
ధమ్మకామో భవం హోతి,
ధమ్మదేస్సీ పరాభవో.
ఇతిహే ¶ తం విజానామ,
పథమో సో పరాభవో;
దుతీయం భగవా బ్రూహి,
కిం పరాభవతో ముఖం.
అసన్తస్స ¶ పియో హోతి,
సన్తే న కురుతే పియం;
అసతం ధమ్మం రోచేతి,
తం పరాభవతో ముఖం.
కమ్మాపరాధసత్తానం ¶ ,
వినాసే పచ్చుపట్ఠితే;
అనయో నయరూపేన,
బుద్ధిమాకమ్య తిట్ఠతి.
నిద్దాసీలీ ¶ సభాసీలీ,
అనుట్ఠాతా చ యో నరో;
అలసో కోధపఞ్ఞాణో,
తం పరాభవతో ముఖం.
యో ¶ మాతరం పితరం వా,
జిణ్ణకం గతయోబ్బనం;
పహుసన్తో న భరతి,
తం పరాభవతో ముఖం.
యో ¶ బ్రాహ్మణం సమణం వా,
అఞ్ఞం వాపి వణిబ్బకం;
ముసావాదేన వఞ్చేతి,
తం పరాభవతో ముఖం.
పహుతవిత్తో ¶ పురిసో,
సహిరఞ్ఞో సభోజనో;
ఏకో భుఞ్జతి సాదూని,
తం పరాభవతో ముఖం.
జాతిథద్ధో ¶ ధనథద్ధో,
గోత్తథద్ధో చ యో నరో;
సఞాతిం అతిమఞ్ఞేతి,
తం పరాభవతో ముఖం.
ఇత్థిధుత్తో ¶ సురాధుత్తో,
అక్ఖధుత్తో చ యో నరో;
లద్ధంలద్ధం వినాసేతి,
తం పరాభవతో ముఖం.
న ¶ బాళ్హం ఇత్థిం గచ్ఛేయ్య,
సమ్పస్సం తేజసఙ్ఖయం;
కాసం సాసం దరం బాల్యం,
ఖీణమేదో నిగచ్ఛతి.
(క)
మాయాచేతా ¶ మరీచీ చ,
సోకో రోగో ఉపద్దవో;
ఖరా చ బన్ధనాచేతా,
మచ్చుపాసో గుహాసయో.
(ఖ)
బలవన్తో దుబ్బలా హోన్తి,
థామవన్తోపి హాయరే;
చక్ఖుమా అన్ధకా హోన్తి,
మాతుగామవసంగతా.
(గ)
గుణవన్తో ¶ నిగ్గుణా హోన్తి,
పఞ్ఞవన్తోపి హాయరే;
పముత్తా బన్ధనా సేన్తి,
మాతుగామవసంగతా.
(ఘ)
యసం ¶ కిత్తిం ధితిం సూరం;
బాహుస్సచ్చం పజాననం;
హాపయన్తి పమత్తస్స;
కట్ఠపుఞ్చంవ పావకో.
సేహి ¶ దారేహి సన్తుట్ఠో,
వేసియాసు పదుస్సతి;
దుస్సతి పరదారేసు,
తం పరాభవతో ముఖం.
(క)
మయఞ్చ ¶ భరియం నాతిక్కమామ,
అమ్హేచ భరియా నాతిక్కమన్తి;
అఞ్ఞత్ర తాహి బ్రహ్మచరియం చరామ,
తస్మా హి అమ్హం దహరా న మియ్యరే.
(ఖ)
ఏతాసు ¶ జాయరే సుత్తమాసు,
మేధావినో హోన్తి పహుతపఞ్ఞా;
బహుస్సుతా థేరగుణా చ హోన్తి,
తస్మా హి అమ్హం దహరా న మియ్యరే.
అతీతయోబ్బనో ¶ పోసో,
ఆనేతి తిమ్బరుత్థనిం;
తస్స ఇస్సా న సుపతి,
తం పరాభవతో ముఖం.
(క)
న ¶ దుక్ఖం అహినా దట్ఠం,
న దుక్ఖం సత్తియా హతం;
తఞ్చ దుక్ఖఞ్చ తిబ్బఞ్చ,
యం పస్సే జిణ్ణకం పతిం.
(ఖ)
నత్థి ¶ ఖిట్టా నత్థి రతి,
జిణ్ణేన పతినా సహ;
నత్థి అల్లాపసల్లాపో,
జగ్ఘితుంపి న సోభతి.
(గ)
యదా చ దహరో దహరీ,
మన్తయింసు రహోగతా;
సబ్బే సోకా వినస్సన్తి,
యేకేచి హదయస్సితా.
ఇత్థిం ¶ సోణ్డిం వికిరణిం,
పురిసం వాపి తాదిసం;
ఇస్సరియస్మిం థపేతి,
తం పరాభవతో ముఖం.
అప్పభోగో ¶ మహాతణ్హో,
ఖత్తియే జాయతే కులే;
సో చ రజ్జం పత్థయతి,
తం పరాభవతో ముఖం.
‘‘సువిజానో ¶ భవంహోతి,
దువిజానో పరాభవో’’;
అప్పభోగో మహాతణ్హో.
ఏతే ¶ పరాభవే లోకే,
పణ్డితో సమవేక్ఖియ;
అరియో దస్సనసమ్పన్నో,
స లోకం భజతే సివం.
వసలసుత్త
కోధనో ¶ ఉపనాహీచ,
పాపమక్ఖీ చ యో నరో;
విపన్నదిట్ఠీ మాయావీ,
తం జఞ్ఞా వసలో ఇతి.
ఏకజం ¶ వా ద్విజం వాపి,
యోధ పాణం విహింసతి;
యస్స పాణే దయా నత్థి,
తం జఞ్ఞా వసలో ఇతి.
యో ¶ హన్తి ఉపరున్ధతి,
గామాని నిగమాని చ;
నిగ్గాహకో సమఞ్ఞాతో,
తం జఞ్ఞా వసలో ఇతి.
గామే ¶ వా యది వా రఞ్ఞే,
యం పరేసం మమాయితం;
థేయ్యా అదిన్నం ఆదేతి,
తం జఞ్ఞా వసలో ఇతి.
యో ¶ హవే ఇణమాదాయ,
వుచ్చమానో పలాయతి;
న హి తే ఇణమత్థీతి,
తం జఞ్ఞా వసలో ఇతి.
యోధ కిఞ్చిక్ఖకమ్యతా,
పథస్మిం వజతం జనం;
హన్త్వా కిఞ్చిక్ఖ మాదేతి;
తం జఞ్ఞా వసలో ఇతి.
యో ¶ అత్తహేతు పరహేతు,
ధనహేతు చ యో నరో;
సక్ఖిపుట్ఠో ముసాబ్రూతి,
తం జఞ్ఞా వసలో ఇతి.
యో ¶ ఞాతీనం సఖీనం వా,
దారేసు పటిదిస్సతి;
సహసా సమ్పియేన వా,
తం జఞ్ఞా వసలో ఇతి.
యో ¶ ౪ మాతరం పితరం వా,
జిణ్ణకం గతయోబ్బనం;
పహుసన్తో న భరతి,
తం జఞ్ఞా వసలో ఇతి.
యో ¶ మాతరం పితరం వా,
భాతరం భగినిం సస్సుం;
హన్తి రోసేతి వాచాయ,
తం జఞ్ఞా వసలో ఇతి.
యో ¶ అత్థం పుచ్ఛితో సన్తో,
అనత్థ మనుసాసతి;
పటిచ్ఛన్నేన మన్తేతి,
తం జఞ్ఞా వసలో ఇతి.
యో ¶ కత్వా పాపకం కమ్మం,
మామం జఞ్ఞాతి ఇచ్ఛతి;
యో పటిచ్ఛన్నకమ్మన్తో,
తం జఞ్ఞా వసలో ఇతి.
యో ¶ వే పరకులం గన్త్వా,
భుత్వాన సుచిభోజనం;
ఆగతం నప్పటిపూజేతి,
తం జఞ్ఞా వసలో ఇతి.
యో ¶ సమణం వా బ్రాహ్మణం,
అఞ్ఞం వాపి వణిబ్బకం;
ముసావాదేన వఞ్చేతి,
తం జఞ్ఞా వసలో ఇతి.
యో సమణం వా బ్రాహ్మణం,
భత్తకాలే ఉపట్ఠితం;
రోసేతి వా న చ దేతి,
తం జఞ్ఞా వసలో ఇతి.
అసన్తం ¶ యోధ పబ్రూతి,
మోహేన పలిగుణ్ఠితో;
కిఞ్చనం నిజిగీసానో,
తం జఞ్ఞా వసలో ఇతి.
యోచత్తానం ¶ సముక్కంసే,
పరేచ మవజానాతి;
నిహీనో సేన మానేన,
తం జఞ్ఞా వసలో ఇతి.
రోసకో ¶ కదరీయో చ,
పాపిచ్ఛో మచ్ఛరీ సఠో;
అహిరీకో అనోత్తప్పీ,
తం జఞ్ఞా వసలో ఇతి.
యో ¶ బుద్ధం పరిభాసతి,
అథవా తస్స సావకం;
పరిబ్బజం గహట్ఠం వా,
తం జఞ్ఞా వసలో ఇతి.
అట్ఠహి ¶ భిక్ఖవే అఙ్గేహి సమ్పన్నాగతస్స ఉపాసకస్స పత్తో నికుజ్జితబ్బో. భిక్ఖూనం అలాభాయ పరిసక్కతి, భిక్ఖూనం అనత్థాయ పరిసక్కతి, భిక్ఖూనం అనావాసాయ పరిసక్కతి, భిక్ఖూనం అక్కోసతి పరిభాసతి, భిక్ఖూభిక్ఖూహి భేదేతి, బుద్ధస్స అవణ్ణం భాసతి, ధమ్మస్స అవణ్ణం భాసతి, సఙ్ఘస్స అవణ్ణం భాసతి, అనుజానామి భిక్ఖవే ఇమేహి అట్ఠహి అఙ్గేహి సమ్పన్నాగతస్స ఉపాసకస్స పత్తం నికుజ్జితుం.
యో ¶ అనరహం సన్తో,
అరహాతి పటిజానాతి;
చోరో సబ్రహ్మకే లోకే,
తం జఞ్ఞా వసలో ఇతి.
ఏతే ¶ ఖో వసలా వుత్తా,
మయా యే తే పకాసితా;
న జచ్చా వసలో హోతి,
న జచ్చా హోతి బ్రాహ్మణో.
కమ్మునా వసలో హోతి,
కమ్మునా హోతి బ్రాహ్మణో.
తదమినాపి ¶ జానాథ,
యథాహేతం నిదస్సనం;
చణ్డాలపుత్తో సోపాకో,
మాతఙ్గో ఇతి విస్సుతో.
సో ¶ యసం పరమం పత్తో,
మాతఙ్గో యం సుదుల్లభం;
ఆగచ్ఛుం తస్సుపట్ఠానం,
ఖత్తియా బ్రాహ్మణా బహూ.
సో ¶ దేవయానం అభిరుయ్హ,
విరజం సో మహాపథం;
కామరాగం విరాజేత్వా,
బ్రహ్మలోకూపగో అహు.
గిరిం ¶ నఖేన ఖణసి,
అయో దన్తేభి ఖాదసి;
జాతవేదం పదహసి,
యో ఇసిం పరిభాసతి.
ఆవేలితం ¶ పిట్ఠితో ఉత్తమఙ్గం,
బాహుం పసారేతి అకమ్పణేయ్యం;
సేతాని అక్ఖీని యథా మతస్స,
కో మే ఇమం పుత్తమకాసి ఏవం.