📜

నమో తస్స భగవతో అరహతో సమ్మాసమ్బుద్ధస్స

ఖుద్దకనికాయే

బుద్ధవంసపాళి

౧. రతనచఙ్కమనకణ్డం

౧.

బ్రహ్మా ¶ ¶ ¶ ¶ చ లోకాధిపతీ సహమ్పతీ [సహమ్పతి (స్యా. కం.)], కతఞ్జలీ అనధివరం అయాచథ;

‘‘సన్తీధ సత్తాప్పరజక్ఖజాతికా, దేసేహి ధమ్మం అనుకమ్పిమం పజం’’.

౨.

సమ్పన్నవిజ్జాచరణస్స తాదినో, జుతిన్ధరస్సన్తిమదేహధారినో;

తథాగతస్సప్పటిపుగ్గలస్స, ఉప్పజ్జి కారుఞ్ఞతా సబ్బసత్తే.

౩.

‘‘న హేతే జానన్తి సదేవమానుసా, బుద్ధో అయం కీదిసకో నరుత్తమో;

ఇద్ధిబలం పఞ్ఞాబలఞ్చ కీదిసం, బుద్ధబలం లోకహితస్స కీదిసం.

౪.

‘‘న ¶ హేతే జానన్తి సదేవమానుసా, బుద్ధో అయం ఏదిసకో నరుత్తమో;

ఇద్ధిబలం పఞ్ఞాబలఞ్చ ఏదిసం, బుద్ధబలం లోకహితస్స ఏదిసం.

౫.

‘‘హన్దాహం ¶ ¶ దస్సయిస్సామి, బుద్ధబలమనుత్తరం;

చఙ్కమం మాపయిస్సామి, నభే రతనమణ్డితం’’.

౬.

భుమ్మా మహారాజికా తావతింసా, యామా చ దేవా తుసితా చ నిమ్మితా;

పరనిమ్మితా యేపి చ బ్రహ్మకాయికా, ఆనన్దితా విపులమకంసు ఘోసం.

౭.

ఓభాసితా ¶ చ పథవీ సదేవకా, పుథూ చ లోకన్తరికా అసంవుతా;

తమో చ తిబ్బో విహతో తదా అహు, దిస్వాన అచ్ఛేరకం పాటిహీరం.

౮.

సదేవగన్ధబ్బమనుస్సరక్ఖసే, ఆభా ఉళారా విపులా అజాయథ;

ఇమస్మిం ¶ లోకే పరస్మిఞ్చోభయస్మిం [పరస్మిం చూభయే (స్యా. కం.)], అధో చ ఉద్ధం తిరియఞ్చ విత్థతం.

౯.

సత్తుత్తమో అనధివరో వినాయకో, సత్థా అహూ దేవమనుస్సపూజితో;

మహానుభావో సతపుఞ్ఞలక్ఖణో, దస్సేసి అచ్ఛేరకం పాటిహీరం.

౧౦.

సో యాచితో దేవవరేన చక్ఖుమా, అత్థం సమేక్ఖిత్వా తదా నరుత్తమో;

చఙ్కమం [చఙ్కమం తత్థ (సీ.)] మాపయి లోకనాయకో, సునిట్ఠితం సబ్బరతననిమ్మితం.

౧౧.

ఇద్ధీ చ ఆదేసనానుసాసనీ, తిపాటిహీరే భగవా వసీ అహు;

చఙ్కమం మాపయి లోకనాయకో, సునిట్ఠితం సబ్బరతననిమ్మితం.

౧౨.

దససహస్సీలోకధాతుయా, సినేరుపబ్బతుత్తమే;

థమ్భేవ దస్సేసి పటిపాటియా, చఙ్కమే రతనామయే.

౧౩.

దససహస్సీ ¶ అతిక్కమ్మ, చఙ్కమం మాపయీ జినో;

సబ్బసోణ్ణమయా పస్సే, చఙ్కమే రతనామయే.

౧౪.

తులాసఙ్ఘాటానువగ్గా ¶ , సోవణ్ణఫలకత్థతా;

వేదికా సబ్బసోవణ్ణా, దుభతో పస్సేసు నిమ్మితా.

౧౫.

మణిముత్తావాలుకాకిణ్ణా, నిమ్మితో రతనామయో;

ఓభాసేతి దిసా సబ్బా, సతరంసీవ ఉగ్గతో.

౧౬.

తస్మిం చఙ్కమనే ధీరో, ద్వత్తింసవరలక్ఖణో;

విరోచమానో సమ్బుద్ధో, చఙ్కమే చఙ్కమీ జినో.

౧౭.

దిబ్బం మన్దారవం పుప్ఫం, పదుమం పారిఛత్తకం;

చఙ్కమనే ఓకిరన్తి, సబ్బే దేవా సమాగతా.

౧౮.

పస్సన్తి తం దేవసఙ్ఘా, దససహస్సీ పమోదితా;

నమస్సమానా నిపతన్తి, తుట్ఠహట్ఠా పమోదితా.

౧౯.

తావతింసా ¶ చ యామా చ, తుసితా చాపి దేవతా;

నిమ్మానరతినో దేవా, యే దేవా వసవత్తినో;

ఉదగ్గచిత్తా సుమనా, పస్సన్తి లోకనాయకం.

౨౦.

సదేవగన్ధబ్బమనుస్సరక్ఖసా, నాగా సుపణ్ణా అథ వాపి కిన్నరా;

పస్సన్తి ¶ తం లోకహితానుకమ్పకం, నభేవ అచ్చుగ్గతచన్దమణ్డలం.

౨౧.

ఆభస్సరా ¶ సుభకిణ్హా, వేహప్ఫలా అకనిట్ఠా చ దేవతా;

సుసుద్ధసుక్కవత్థవసనా, తిట్ఠన్తి పఞ్జలీకతా.

౨౨.

ముఞ్చన్తి పుప్ఫం పన పఞ్చవణ్ణికం, మన్దారవం చన్దనచుణ్ణమిస్సితం;

భమేన్తి చేలాని చ అమ్బరే తదా, ‘‘అహో జినో లోకహితానుకమ్పకో.

౨౩.

‘‘తువం సత్థా చ కేతూ చ, ధజో యూపో చ పాణినం;

పరాయనో పతిట్ఠా చ, దీపో చ ద్విపదుత్తమో [దిపదుత్తమో (సీ. స్యా.)].

౨౪.

‘‘దససహస్సీలోకధాతుయా, దేవతాయో మహిద్ధికా;

పరివారేత్వా నమస్సన్తి, తుట్ఠహట్ఠా పమోదితా.

౨౫.

‘‘దేవతా దేవకఞ్ఞా చ, పసన్నా తుట్ఠమానసా;

పఞ్చవణ్ణికపుప్ఫేహి, పూజయన్తి నరాసభం.

౨౬.

‘‘పస్సన్తి ¶ తం దేవసఙ్ఘా, పసన్నా తుట్ఠమానసా;

పఞ్చవణ్ణికపుప్ఫేహి, పూజయన్తి నరాసభం.

౨౭.

‘‘అహో అచ్ఛరియం లోకే, అబ్భుతం లోమహంసనం;

న మేదిసం భూతపుబ్బం, అచ్ఛేరం లోమహంసనం’’.

౨౮.

సకసకమ్హి భవనే, నిసీదిత్వాన దేవతా;

హసన్తి తా మహాహసితం, దిస్వానచ్ఛేరకం నభే.

౨౯.

ఆకాసట్ఠా చ భూమట్ఠా, తిణపన్థనివాసినో;

కతఞ్జలీ నమస్సన్తి, తుట్ఠహట్ఠా పమోదితా.

౩౦.

యేపి ¶ దీఘాయుకా నాగా, పుఞ్ఞవన్తో మహిద్ధికా;

పమోదితా నమస్సన్తి, పూజయన్తి నరుత్తమం.

౩౧.

సఙ్గీతియో పవత్తేన్తి, అమ్బరే అనిలఞ్జసే;

చమ్మనద్ధాని వాదేన్తి, దిస్వానచ్ఛేరకం నభే.

౩౨.

సఙ్ఖా చ పణవా చేవ, అథోపి డిణ్డిమా [డేణ్డిమా (సీ.)] బహూ;

అన్తలిక్ఖస్మిం వజ్జన్తి, దిస్వానచ్ఛేరకం నభే.

౩౩.

అబ్భుతో ¶ వత నో అజ్జ, ఉప్పజ్జి లోమహంసనో;

ధువమత్థసిద్ధిం లభామ, ఖణో నో పటిపాదితో.

౩౪.

బుద్ధోతి తేసం సుత్వాన, పీతి ఉప్పజ్జి తావదే;

బుద్ధో బుద్ధోతి కథయన్తా, తిట్ఠన్తి పఞ్జలీకతా.

౩౫.

హిఙ్కారా సాధుకారా చ [హిఙ్కారం సాధుకారఞ్చ (సీ. స్యా.)], ఉక్కుట్ఠి సమ్పహంసనం [సమ్పసాదనం (సీ.), సమ్పనాదనం (స్యా.)];

పజా చ వివిధా గగనే, వత్తేన్తి పఞ్జలీకతా.

౩౬.

గాయన్తి సేళేన్తి చ వాదయన్తి చ, భుజాని పోథేన్తి చ నచ్చయన్తి చ;

ముఞ్చన్తి పుప్ఫం పన పఞ్చవణ్ణికం, మన్దారవం చన్దనచుణ్ణమిస్సితం.

౩౭.

‘‘యథా ¶ తుయ్హం మహావీర, పాదేసు చక్కలక్ఖణం;

ధజవజిరపటాకా, వడ్ఢమానఙ్కుసాచితం.

౩౮.

‘‘రూపే ¶ సీలే సమాధిమ్హి, పఞ్ఞాయ చ అసాదిసో;

విముత్తియా అసమసమో, ధమ్మచక్కప్పవత్తనే.

౩౯.

‘‘దసనాగబలం ¶ కాయే, తుయ్హం పాకతికం బలం;

ఇద్ధిబలేన అసమో, ధమ్మచక్కప్పవత్తనే.

౪౦.

‘‘ఏవం సబ్బగుణూపేతం, సబ్బఙ్గసముపాగతం;

మహామునిం కారుణికం, లోకనాథం నమస్సథ.

౪౧.

‘‘అభివాదనం థోమనఞ్చ, వన్దనఞ్చ పసంసనం;

నమస్సనఞ్చ పూజఞ్చ, సబ్బం అరహసీ తువం.

౪౨.

‘‘యే కేచి లోకే వన్దనేయ్యా, వన్దనం అరహన్తి యే;

సబ్బసేట్ఠో మహావీర, సదిసో తే న విజ్జతి.

౪౩.

‘‘సారిపుత్తో మహాపఞ్ఞో, సమాధిజ్ఝానకోవిదో;

గిజ్ఝకూటే ఠితోయేవ, పస్సతి లోకనాయకం.

౪౪.

‘‘సుఫుల్లం సాలరాజంవ, చన్దంవ గగనే యథా;

మజ్ఝన్హికేవ [మజ్ఝన్తికేవ (సబ్బత్థ)] సూరియం, ఓలోకేసి నరాసభం.

౪౫.

‘‘జలన్తం దీపరుక్ఖంవ, తరుణసూరియంవ ఉగ్గతం;

బ్యామప్పభానురఞ్జితం, ధీరం పస్సతి లోకనాయకం.

౪౬.

‘‘పఞ్చన్నం భిక్ఖుసతానం, కతకిచ్చాన తాదినం;

ఖీణాసవానం విమలానం, ఖణేన సన్నిపాతయి.

౪౭.

‘‘లోకప్పసాదనం ¶ నామ, పాటిహీరం నిదస్సయి;

అమ్హేపి తత్థ గన్త్వాన, వన్దిస్సామ మయం జినం.

౪౮.

‘‘ఏథ సబ్బే గమిస్సామ, పుచ్ఛిస్సామ మయం జినం;

కఙ్ఖం వినోదయిస్సామ, పస్సిత్వా లోకనాయకం’’.

౪౯.

సాధూతి ¶ తే పటిస్సుత్వా, నిపకా సంవుతిన్ద్రియా;

పత్తచీవరమాదాయ, తరమానా ఉపాగముం.

౫౦.

ఖీణాసవేహి విమలేహి, దన్తేహి ఉత్తమే దమే;

సారిపుత్తో మహాపఞ్ఞో, ఇద్ధియా ఉపసఙ్కమి.

౫౧.

తేహి ¶ భిక్ఖూహి పరివుతో, సారిపుత్తో మహాగణీ;

లళన్తో దేవోవ గగనే, ఇద్ధియా ఉపసఙ్కమి.

౫౨.

ఉక్కాసితఞ్చ ఖిపితం [ఉక్కాసితఞ్చ ఖిపితఞ్చ (స్యా. అట్ఠ.)], అజ్ఝుపేక్ఖియ సుబ్బతా;

సగారవా సప్పతిస్సా, సమ్బుద్ధం ఉపసఙ్కముం.

౫౩.

ఉపసఙ్కమిత్వా పస్సన్తి, సయమ్భుం లోకనాయకం;

నభే అచ్చుగ్గతం ధీరం, చన్దంవ గగనే యథా.

౫౪.

జలన్తం దీపరుక్ఖంవ, విజ్జుంవ గగనే యథా;

మజ్ఝన్హికేవ సూరియం, పస్సన్తి లోకనాయకం.

౫౫.

పఞ్చభిక్ఖుసతా సబ్బే, పస్సన్తి లోకనాయకం;

రహదమివ విప్పసన్నం, సుఫుల్లం పదుమం యథా.

౫౬.

అఞ్జలిం ¶ పగ్గహేత్వాన, తుట్ఠహట్ఠా పమోదితా;

నమస్సమానా నిపతన్తి, సత్థునో చక్కలక్ఖణే.

౫౭.

సారిపుత్తో మహాపఞ్ఞో, కోరణ్డసమసాదిసో;

సమాధిజ్ఝానకుసలో, వన్దతే లోకనాయకం.

౫౮.

గజ్జితా కాలమేఘోవ, నీలుప్పలసమసాదిసో;

ఇద్ధిబలేన అసమో, మోగ్గల్లానో మహిద్ధికో.

౫౯.

మహాకస్సపోపి ¶ చ థేరో, ఉత్తత్తకనకసన్నిభో;

ధుతగుణే అగ్గనిక్ఖిత్తో, థోమితో సత్థువణ్ణితో.

౬౦.

దిబ్బచక్ఖూనం యో అగ్గో, అనురుద్ధో మహాగణీ;

ఞాతిసేట్ఠో భగవతో, అవిదూరేవ తిట్ఠతి.

౬౧.

ఆపత్తిఅనాపత్తియా ¶ , సతేకిచ్ఛాయ కోవిదో;

వినయే అగ్గనిక్ఖిత్తో, ఉపాలి సత్థువణ్ణితో.

౬౨.

సుఖుమనిపుణత్థపటివిద్ధో, కథికానం పవరో గణీ;

ఇసి మన్తానియా పుత్తో, పుణ్ణో నామాతి విస్సుతో.

౬౩.

ఏతేసం చిత్తమఞ్ఞాయ, ఓపమ్మకుసలో ముని;

కఙ్ఖచ్ఛేదో మహావీరో, కథేసి అత్తనో గుణం.

౬౪.

‘‘చత్తారో ¶ తే అసఙ్ఖేయ్యా, కోటి యేసం న నాయతి;

సత్తకాయో చ ఆకాసో, చక్కవాళా చనన్తకా;

బుద్ధఞాణం అప్పమేయ్యం, న సక్కా ఏతే విజానితుం.

౬౫.

‘‘కిమేతం అచ్ఛరియం లోకే, యం మే ఇద్ధివికుబ్బనం;

అఞ్ఞే బహూ అచ్ఛరియా, అబ్భుతా లోమహంసనా.

౬౬.

‘‘యదాహం తుసితే కాయే, సన్తుసితో నామహం తదా;

దససహస్సీ సమాగమ్మ, యాచన్తి పఞ్జలీ మమం.

౬౭.

‘‘‘కాలో ఖో తే [కాలో దేవ (సీ.), కాలోయం తే (స్యా. క.)] మహావీర, ఉప్పజ్జ మాతుకుచ్ఛియం;

సదేవకం తారయన్తో, బుజ్ఝస్సు అమతం పదం’.

౬౮.

‘‘తుసితా ¶ కాయా చవిత్వాన, యదా ఓక్కమి కుచ్ఛియం;

దససహస్సీలోకధాతు, కమ్పిత్థ ధరణీ తదా.

౬౯.

‘‘యదాహం మాతుకుచ్ఛితో, సమ్పజానోవ నిక్ఖమిం;

సాధుకారం పవత్తేన్తి, దససహస్సీ పకమ్పథ.

౭౦.

‘‘ఓక్కన్తిం మే సమో నత్థి, జాతితో అభినిక్ఖమే;

సమ్బోధియం అహం సేట్ఠో, ధమ్మచక్కప్పవత్తనే.

౭౧.

‘‘అహో అచ్ఛరియం లోకే, బుద్ధానం గుణమహన్తతా;

దససహస్సీలోకధాతు, ఛప్పకారం పకమ్పథ;

ఓభాసో చ మహా ఆసి, అచ్ఛేరం లోమహంసనం’’.

౭౨.

భగవా తమ్హి [భగవా చ తమ్హి (సీ. స్యా. క.)] సమయే, లోకజేట్ఠో నరాసభో;

సదేవకం దస్సయన్తో, ఇద్ధియా చఙ్కమీ జినో.

౭౩.

చఙ్కమే చఙ్కమన్తోవ, కథేసి లోకనాయకో;

అన్తరా న నివత్తేతి, చతుహత్థే చఙ్కమే యథా.

౭౪.

సారిపుత్తో ¶ ¶ మహాపఞ్ఞో, సమాధిజ్ఝానకోవిదో;

పఞ్ఞాయ పారమిప్పత్తో, పుచ్ఛతి లోకనాయకం.

౭౫.

‘‘కీదిసో తే మహావీర, అభినీహారో నరుత్తమ;

కమ్హి కాలే తయా ధీర, పత్థితా బోధిముత్తమా.

౭౬.

‘‘దానం ¶ సీలఞ్చ నేక్ఖమ్మం, పఞ్ఞావీరియఞ్చ కీదిసం;

ఖన్తిసచ్చమధిట్ఠానం, మేత్తుపేక్ఖా చ కీదిసా.

౭౭.

‘‘దస ¶ పారమీ తయా ధీర, కీదిసీ లోకనాయక;

కథం ఉపపారమీ పుణ్ణా, పరమత్థపారమీ కథం’’.

౭౮.

తస్స పుట్ఠో వియాకాసి, కరవీకమధురగిరో;

నిబ్బాపయన్తో హదయం, హాసయన్తో సదేవకం.

౭౯.

అతీతబుద్ధానం జినానం దేసితం, నికీలితం [నికీళితం (క.)] బుద్ధపరమ్పరాగతం;

పుబ్బేనివాసానుగతాయ బుద్ధియా, పకాసయీ లోకహితం సదేవకే.

౮౦.

‘‘పీతిపామోజ్జజననం, సోకసల్లవినోదనం;

సబ్బసమ్పత్తిపటిలాభం, చిత్తీకత్వా సుణాథ మే.

౮౧.

‘‘మదనిమ్మదనం సోకనుదం, సంసారపరిమోచనం;

సబ్బదుక్ఖక్ఖయం మగ్గం, సక్కచ్చం పటిపజ్జథా’’తి.

రతనచఙ్కమనకణ్డో నిట్ఠితో.

౨. సుమేధపత్థనాకథా

౧.

కప్పే ¶ చ సతసహస్సే, చతురో చ అసఙ్ఖియే;

అమరం నామ నగరం, దస్సనేయ్యం మనోరమం.

౨.

దసహి సద్దేహి అవివిత్తం, అన్నపానసమాయుతం;

హత్థిసద్దం అస్ససద్దం, భేరిసఙ్ఖరథాని చ;

ఖాదథ పివథ చేవ, అన్నపానేన ఘోసితం.

౩.

నగరం ¶ సబ్బఙ్గసమ్పన్నం, సబ్బకమ్మముపాగతం;

సత్తరతనసమ్పన్నం, నానాజనసమాకులం;

సమిద్ధం దేవనగరంవ, ఆవాసం పుఞ్ఞకమ్మినం.

౪.

నగరే అమరవతియా, సుమేధో నామ బ్రాహ్మణో;

అనేకకోటిసన్నిచయో, పహూతధనధఞ్ఞవా.

౫.

అజ్ఝాయకో ¶ ¶ మన్తధరో, తిణ్ణం వేదాన పారగూ;

లక్ఖణే ఇతిహాసే చ, సధమ్మే పారమిం గతో.

౬.

రహోగతో నిసీదిత్వా, ఏవం చిన్తేసహం తదా;

‘‘దుక్ఖో పునబ్భవో నామ, సరీరస్స చ భేదనం.

౭.

‘‘జాతిధమ్మో జరాధమ్మో, బ్యాధిధమ్మో సహం [చహం (సీ. స్యా.)] తదా;

అజరం అమతం ఖేమం, పరియేసిస్సామి నిబ్బుతిం.

౮.

‘‘యంనూనిమం పూతికాయం, నానాకుణపపూరితం;

ఛడ్డయిత్వాన గచ్ఛేయ్యం, అనపేక్ఖో అనత్థికో.

౯.

‘‘అత్థి హేహితి సో మగ్గో, న సో సక్కా న హేతుయే;

పరియేసిస్సామి తం మగ్గం, భవతో పరిముత్తియా.

౧౦.

‘‘యథాపి దుక్ఖే విజ్జన్తే, సుఖం నామపి విజ్జతి;

ఏవం భవే విజ్జమానే, విభవోపి ఇచ్ఛితబ్బకో.

౧౧.

‘‘యథాపి ఉణ్హే విజ్జన్తే, అపరం విజ్జతి సీతలం;

ఏవం తివిధగ్గి విజ్జన్తే, నిబ్బానం ఇచ్ఛితబ్బకం.

౧౨.

‘‘యథాపి పాపే విజ్జన్తే, కల్యాణమపి విజ్జతి;

ఏవమేవ జాతి విజ్జన్తే, అజాతిపిచ్ఛితబ్బకం.

౧౩.

‘‘యథా గూథగతో పురిసో, తళాకం దిస్వాన పూరితం;

న గవేసతి తం తళాకం, న దోసో తళాకస్స సో.

౧౪.

‘‘ఏవం కిలేసమలధోవ, విజ్జన్తే అమతన్తళే;

న గవేసతి తం తళాకం, న దోసో అమతన్తళే.

౧౫.

‘‘యథా అరీహి పరిరుద్ధో, విజ్జన్తే గమనమ్పథే;

న పలాయతి సో పురిసో, న దోసో అఞ్జసస్స సో.

౧౬.

‘‘ఏవం ¶ కిలేసపరిరుద్ధో, విజ్జమానే సివే పథే;

న గవేసతి తం మగ్గం, న దోసో సివమఞ్జసే.

౧౭.

‘‘యథాపి ¶ బ్యాధితో పురిసో, విజ్జమానే తికిచ్ఛకే;

న తికిచ్ఛాపేతి తం బ్యాధిం, న దోసో సో తికిచ్ఛకే.

౧౮.

‘‘ఏవం ¶ కిలేసబ్యాధీహి, దుక్ఖితో పరిపీళితో;

న గవేసతి తం ఆచరియం, న దోసో సో వినాయకే.

౧౯.

‘‘యథాపి కుణపం పురిసో, కణ్ఠే బన్ధం జిగుచ్ఛియ;

మోచయిత్వాన గచ్ఛేయ్య, సుఖీ సేరీ సయంవసీ.

౨౦.

‘‘తథేవిమం పూతికాయం, నానాకుణపసఞ్చయం;

ఛడ్డయిత్వాన గచ్ఛేయ్యం, అనపేక్ఖో అనత్థికో.

౨౧.

‘‘యథా ఉచ్చారట్ఠానమ్హి, కరీసం నరనారియో;

ఛడ్డయిత్వాన గచ్ఛన్తి, అనపేక్ఖా అనత్థికా.

౨౨.

‘‘ఏవమేవాహం ఇమం కాయం, నానాకుణపపూరితం;

ఛడ్డయిత్వాన గచ్ఛిస్సం, వచ్చం కత్వా యథా కుటిం.

౨౩.

‘‘యథాపి జజ్జరం నావం, పలుగ్గం ఉదగాహినిం [ఉదకగాహిణిం (సీ.), ఉదకగాహినిం (స్యా.)];

సామీ ఛడ్డేత్వా గచ్ఛన్తి, అనపేక్ఖా అనత్థికా.

౨౪.

‘‘ఏవమేవాహం ¶ ఇమం కాయం, నవచ్ఛిద్దం ధువస్సవం;

ఛడ్డయిత్వాన గచ్ఛిస్సం, జిణ్ణనావంవ సామికా.

౨౫.

‘‘యథాపి పురిసో చోరేహి, గచ్ఛన్తో భణ్డమాదియ;

భణ్డచ్ఛేదభయం దిస్వా, ఛడ్డయిత్వాన గచ్ఛతి.

౨౬.

‘‘ఏవమేవ అయం కాయో, మహాచోరసమో వియ;

పహాయిమం గమిస్సామి, కుసలచ్ఛేదనా భయా’’.

౨౭.

ఏవాహం ¶ చిన్తయిత్వాన, నేకకోటిసతం ధనం;

నాథానాథానం దత్వాన, హిమవన్తముపాగమిం.

౨౮.

హిమవన్తస్సావిదూరే, ధమ్మికో నామ పబ్బతో;

అస్సమో సుకతో మయ్హం, పణ్ణసాలా సుమాపితా.

౨౯.

చఙ్కమం తత్థ మాపేసిం, పఞ్చదోసవివజ్జితం;

అట్ఠగుణసమూపేతం, అభిఞ్ఞాబలమాహరిం.

౩౦.

సాటకం పజహిం తత్థ, నవదోసముపాగతం;

వాకచీరం నివాసేసిం, ద్వాదసగుణముపాగతం.

౩౧.

అట్ఠదోససమాకిణ్ణం ¶ ¶ , పజహిం పణ్ణసాలకం;

ఉపాగమిం రుక్ఖమూలం, గుణే దసహుపాగతం.

౩౨.

వాపితం రోపితం ధఞ్ఞం, పజహిం నిరవసేసతో;

అనేకగుణసమ్పన్నం, పవత్తఫలమాదియిం.

౩౩.

తత్థప్పధానం పదహిం, నిసజ్జట్ఠానచఙ్కమే;

అబ్భన్తరమ్హి సత్తాహే, అభిఞ్ఞాబలపాపుణిం.

౩౪.

ఏవం మే సిద్ధిప్పత్తస్స, వసీభూతస్స సాసనే;

దీపఙ్కరో నామ జినో, ఉప్పజ్జి లోకనాయకో.

౩౫.

ఉప్పజ్జన్తే చ జాయన్తే, బుజ్ఝన్తే ధమ్మదేసనే;

చతురో నిమిత్తే నాద్దసం, ఝానరతిసమప్పితో.

౩౬.

పచ్చన్తదేసవిసయే, నిమన్తేత్వా తథాగతం;

తస్స ఆగమనం మగ్గం, సోధేన్తి తుట్ఠమానసా.

౩౭.

అహం ¶ తేన సమయేన, నిక్ఖమిత్వా సకస్సమా;

ధునన్తో వాకచీరాని, గచ్ఛామి అమ్బరే తదా.

౩౮.

వేదజాతం జనం దిస్వా, తుట్ఠహట్ఠం పమోదితం;

ఓరోహిత్వాన గగనా, మనుస్సే పుచ్ఛి తావదే.

౩౯.

‘‘తుట్ఠహట్ఠో పముదితో, వేదజాతో మహాజనో;

కస్స సోధీయతి మగ్గో, అఞ్జసం వటుమాయనం’’.

౪౦.

తే మే పుట్ఠా వియాకంసు, ‘‘బుద్ధో లోకే అనుత్తరో;

దీపఙ్కరో నామ జినో, ఉప్పజ్జి లోకనాయకో;

తస్స సోధీయతి మగ్గో, అఞ్జసం వటుమాయనం’’.

౪౧.

బుద్ధోతివచనం [బుద్ధోతి మమ (సీ. స్యా. క.)] సుత్వాన, పీతి ఉప్పజ్జి తావదే;

బుద్ధో బుద్ధోతి కథయన్తో, సోమనస్సం పవేదయిం.

౪౨.

తత్థ ఠత్వా విచిన్తేసిం, తుట్ఠో సంవిగ్గమానసో;

‘‘ఇధ ¶ బీజాని రోపిస్సం, ఖణో వే మా ఉపచ్చగా.

౪౩.

‘‘యది బుద్ధస్స సోధేథ, ఏకోకాసం దదాథ మే;

అహమ్పి సోధయిస్సామి, అఞ్జసం వటుమాయనం’’.

౪౪.

అదంసు ¶ తే మమోకాసం, సోధేతుం అఞ్జసం తదా;

బుద్ధో బుద్ధోతి చిన్తేన్తో, మగ్గం సోధేమహం తదా.

౪౫.

అనిట్ఠితే ¶ మమోకాసే, దీపఙ్కరో మహాముని;

చతూహి సతసహస్సేహి, ఛళభిఞ్ఞేహి తాదిహి;

ఖీణాసవేహి విమలేహి, పటిపజ్జి అఞ్జసం జినో.

౪౬.

పచ్చుగ్గమనా ¶ వత్తన్తి, వజ్జన్తి భేరియో బహూ;

ఆమోదితా నరమరూ, సాధుకారం పవత్తయుం.

౪౭.

దేవా మనుస్సే పస్సన్తి, మనుస్సాపి చ దేవతా;

ఉభోపి తే పఞ్జలికా, అనుయన్తి తథాగతం.

౪౮.

దేవా దిబ్బేహి తురియేహి, మనుస్సా మానుసేహి చ [మానుస్సకేహి చ మానుసకేహి చ (స్యా. క.)];

ఉభోపి తే వజ్జయన్తా, అనుయన్తి తథాగతం.

౪౯.

దిబ్బం మన్దారవం పుప్ఫం, పదుమం పారిఛత్తకం;

దిసోదిసం ఓకిరన్తి, ఆకాసనభగతా మరూ.

౫౦.

దిబ్బం చన్దనచుణ్ణఞ్చ, వరగన్ధఞ్చ కేవలం;

దిసోదిసం ఓకిరన్తి, ఆకాసనభగతా [ఆకాసే నభగా (స్యా.)] మరూ.

౫౧.

చమ్పకం సరలం నీపం, నాగపున్నాగకేతకం;

దిసోదిసం ఉక్ఖిపన్తి, భూమితలగతా నరా.

౫౨.

కేసే ముఞ్చిత్వాహం తత్థ, వాకచీరఞ్చ చమ్మకం;

కలలే పత్థరిత్వాన, అవకుజ్జో నిపజ్జహం.

౫౩.

‘‘అక్కమిత్వాన మం బుద్ధో, సహ సిస్సేహి గచ్ఛతు;

మా నం కలలే అక్కమిత్థ, హితాయ మే భవిస్సతి’’.

౫౪.

పథవియం నిపన్నస్స, ఏవం మే ఆసి చేతసో;

‘‘ఇచ్ఛమానో అహం అజ్జ, కిలేసే ఝాపయే మమ.

౫౫.

‘‘కిం మే అఞ్ఞాతవేసేన, ధమ్మం సచ్ఛికతేనిధ;

సబ్బఞ్ఞుతం పాపుణిత్వా, బుద్ధో హేస్సం సదేవకే.

౫౬.

‘‘కిం ¶ మే ఏకేన తిణ్ణేన, పురిసేన థామదస్సినా;

సబ్బఞ్ఞుతం పాపుణిత్వా, సన్తారేస్సం సదేవకం.

౫౭.

‘‘ఇమినా ¶ మే అధికారేన, కతేన పురిసుత్తమే;

సబ్బఞ్ఞుతం పాపుణిత్వా, తారేమి జనతం బహుం.

౫౮.

‘‘సంసారసోతం ఛిన్దిత్వా, విద్ధంసేత్వా తయో భవే;

ధమ్మనావం సమారుయ్హ, సన్తారేస్సం సదేవకం’’.

౫౯.

మనుస్సత్తం ¶ లిఙ్గసమ్పత్తి, హేతు సత్థారదస్సనం;

పబ్బజ్జా గుణసమ్పత్తి, అధికారో చ ఛన్దతా;

అట్ఠధమ్మసమోధానా, అభినీహారో సమిజ్ఝతి.

౬౦.

దీపఙ్కరో లోకవిదూ, ఆహుతీనం పటిగ్గహో;

ఉస్సీసకే మం ఠత్వాన, ఇదం వచనమబ్రవి.

౬౧.

‘‘పస్సథ ఇమం తాపసం, జటిలం ఉగ్గతాపనం;

అపరిమేయ్యితో ¶ కప్పే, బుద్ధో లోకే భవిస్సతి.

౬౨.

‘‘అహు కపిలవ్హయా రమ్మా, నిక్ఖమిత్వా తథాగతో;

పధానం పదహిత్వాన, కత్వా దుక్కరకారికం.

౬౩.

‘‘అజపాలరుక్ఖమూలస్మిం, నిసీదిత్వా తథాగతో;

తత్థ పాయాసం పగ్గయ్హ, నేరఞ్జరముపేహితి.

౬౪.

‘‘నేరఞ్జరాయ తీరమ్హి, పాయాసం అద సో జినో;

పటియత్తవరమగ్గేన, బోధిమూలముపేహితి.

౬౫.

‘‘తతో పదక్ఖిణం కత్వా, బోధిమణ్డం అనుత్తరో [అనుత్తరం (స్యా. కం.)];

అస్సత్థరుక్ఖమూలమ్హి, బుజ్ఝిస్సతి మహాయసో.

౬౬.

‘‘ఇమస్స జనికా మాతా, మాయా నామ భవిస్సతి;

పితా సుద్ధోదనో నామ, అయం హేస్సతి గోతమో.

౬౭.

‘‘అనాసవా వీతరాగా, సన్తచిత్తా సమాహితా;

కోలితో ¶ ఉపతిస్సో చ, అగ్గా హేస్సన్తి సావకా;

ఆనన్దో నాముపట్ఠాకో, ఉపట్ఠిస్సతిమం [ఉపట్ఠిస్సతి తం (సీ.)] జినం.

౬౮.

‘‘ఖేమా ఉప్పలవణ్ణా చ, అగ్గా హేస్సన్తి సావికా;

అనాసవా వీతరాగా, సన్తచిత్తా సమాహితా;

బోధి తస్స భగవతో, అస్సత్థోతి పవుచ్చతి.

౬౯.

‘‘చిత్తో ¶ చ హత్థాళవకో [హత్థాలవకో (సీ.)], అగ్గా హేస్సన్తుపట్ఠకా;

ఉత్తరా నన్దమాతా చ, అగ్గా హేస్సన్తుపట్ఠికా’’.

౭౦.

ఇదం సుత్వాన వచనం, అసమస్స మహేసినో;

ఆమోదితా నరమరూ, బుద్ధబీజం కిర [బుద్ధబీజఙ్కురో (సీ. స్యా.)] అయం.

౭౧.

ఉక్కుట్ఠిసద్దా వత్తన్తి, అప్ఫోటేన్తి [అప్ఫోఠేన్తి (సీ.)] హసన్తి చ;

కతఞ్జలీ నమస్సన్తి, దససహస్సీ సదేవకా.

౭౨.

‘‘యదిమస్స ¶ లోకనాథస్స, విరజ్ఝిస్సామ సాసనం;

అనాగతమ్హి అద్ధానే, హేస్సామ సమ్ముఖా ఇమం.

౭౩.

‘‘యథా మనుస్సా నదిం తరన్తా, పటితిత్థం విరజ్ఝియ;

హేట్ఠాతిత్థే గహేత్వాన, ఉత్తరన్తి మహానదిం.

౭౪.

‘‘ఏవమేవ మయం సబ్బే, యది ముఞ్చామిమం జినం;

అనాగతమ్హి అద్ధానే, హేస్సామ సమ్ముఖా ఇమం’’.

౭౫.

దీపఙ్కరో ¶ లోకవిదూ, ఆహుతీనం పటిగ్గహో;

మమ కమ్మం పకిత్తేత్వా, దక్ఖిణం పాదముద్ధరి.

౭౬.

యే తత్థాసుం జినపుత్తా, పదక్ఖిణమకంసు [సబ్బే పదక్ఖిణమకంసు (స్యా. క.)] మం;

దేవా మనుస్సా అసురా చ, అభివాదేత్వాన పక్కముం.

౭౭.

దస్సనం మే అతిక్కన్తే, ససఙ్ఘే లోకనాయకే;

సయనా వుట్ఠహిత్వాన, పల్లఙ్కం ఆభుజిం తదా.

౭౮.

సుఖేన సుఖితో హోమి, పామోజ్జేన పమోదితో;

పీతియా చ అభిస్సన్నో, పల్లఙ్కం ఆభుజిం తదా.

౭౯.

పల్లఙ్కేన నిసీదిత్వా, ఏవం చిన్తేసహం తదా;

‘‘వసీభూతో ¶ అహం ఝానే, అభిఞ్ఞాసు పారమింగతో [అభిఞ్ఞాపారమిం గతో (సీ.)].

౮౦.

‘‘సహస్సియమ్హి లోకమ్హి, ఇసయో నత్థి మే సమా;

అసమో ఇద్ధిధమ్మేసు, అలభిం ఈదిసం సుఖం.

౮౧.

‘‘పల్లఙ్కాభుజనే మయ్హం, దససహస్సాధివాసినో;

మహానాదం పవత్తేసుం, ‘ధువం బుద్ధో భవిస్ససి.

౮౨.

‘‘‘యా ¶ పుబ్బే బోధిసత్తానం, పల్లఙ్కవరమాభుజే;

నిమిత్తాని పదిస్సన్తి, తాని అజ్జ పదిస్సరే.

౮౩.

‘‘‘సీతం బ్యపగతం హోతి, ఉణ్హఞ్చ ఉపసమ్మతి;

తాని అజ్జ పదిస్సన్తి, ధువం బుద్ధో భవిస్ససి.

౮౪.

‘‘‘దససహస్సీ లోకధాతూ, నిస్సద్దా హోన్తి నిరాకులా;

తాని అజ్జ పదిస్సన్తి, ధువం బుద్ధో భవిస్ససి.

౮౫.

‘‘‘మహావాతా ¶ న వాయన్తి, న సన్దన్తి సవన్తియో;

తాని అజ్జ పదిస్సన్తి, ధువం బుద్ధో భవిస్ససి.

౮౬.

‘‘‘థలజా ¶ దకజా పుప్ఫా, సబ్బే పుప్ఫన్తి తావదే;

తేపజ్జ పుప్ఫితా [పుప్ఫితాని (అట్ఠ.)] సబ్బే, ధువం బుద్ధో భవిస్ససి.

౮౭.

‘‘‘లతా వా యది వా రుక్ఖా, ఫలభారా హోన్తి తావదే;

తేపజ్జ ఫలితా సబ్బే, ధువం బుద్ధో భవిస్ససి.

౮౮.

‘‘‘ఆకాసట్ఠా చ భూమట్ఠా, రతనా జోతన్తి తావదే;

తేపజ్జ రతనా జోతన్తి, ధువం బుద్ధో భవిస్ససి.

౮౯.

‘‘‘మానుస్సకా చ దిబ్బా చ, తురియా వజ్జన్తి తావదే;

తేపజ్జుభో అభిరవన్తి, ధువం బుద్ధో భవిస్ససి.

౯౦.

‘‘‘విచిత్రపుప్ఫా గగనా, అభివస్సన్తి తావదే;

తేపి అజ్జ పవస్సన్తి, ధువం బుద్ధో భవిస్ససి.

౯౧.

‘‘‘మహాసముద్దో ఆభుజతి, దససహస్సీ పకమ్పతి;

తేపజ్జుభో అభిరవన్తి, ధువం బుద్ధో భవిస్ససి.

౯౨.

‘‘‘నిరయేపి దససహస్సే, అగ్గీ నిబ్బన్తి తావదే;

తేపజ్జ నిబ్బుతా అగ్గీ, ధువం బుద్ధో భవిస్ససి.

౯౩.

‘‘‘విమలో హోతి సూరియో, సబ్బా దిస్సన్తి తారకా;

తేపి అజ్జ పదిస్సన్తి, ధువం బుద్ధో భవిస్ససి.

౯౪.

‘‘‘అనోవట్ఠేన [అనోవుట్ఠేన (స్యా. క.)] ఉదకం, మహియా ఉబ్భిజ్జి తావదే;

తమ్పజ్జుబ్భిజ్జతే మహియా, ధువం బుద్ధో భవిస్ససి.

౯౫.

‘‘‘తారాగణా ¶ ¶ విరోచన్తి, నక్ఖత్తా గగనమణ్డలే;

విసాఖా చన్దిమా యుత్తా, ధువం బుద్ధో భవిస్ససి.

౯౬.

‘‘‘బిలాసయా దరీసయా, నిక్ఖమన్తి సకాసయా;

తేపజ్జ ఆసయా ఛుద్ధా, ధువం బుద్ధో భవిస్ససి.

౯౭.

‘‘‘న హోన్తి అరతీ సత్తానం, సన్తుట్ఠా హోన్తి తావదే;

తేపజ్జ సబ్బే సన్తుట్ఠా, ధువం బుద్ధో భవిస్ససి.

౯౮.

‘‘‘రోగా తదుపసమ్మన్తి, జిఘచ్ఛా చ వినస్సతి;

తాని ¶ అజ్జ పదిస్సన్తి, ధువం బుద్ధో భవిస్ససి.

౯౯.

‘‘‘రాగో తదా తను హోతి, దోసో మోహో వినస్సతి;

తేపజ్జ విగతా సబ్బే, ధువం బుద్ధో భవిస్ససి.

౧౦౦.

‘‘‘భయం ¶ తదా న భవతి, అజ్జపేతం పదిస్సతి;

తేన లిఙ్గేన జానామ, ధువం బుద్ధో భవిస్ససి.

౧౦౧.

‘‘‘రజోనుద్ధంసతి ఉద్ధం, అజ్జపేతం పదిస్సతి;

తేన లిఙ్గేన జానామ, ధువం బుద్ధో భవిస్ససి.

౧౦౨.

‘‘‘అనిట్ఠగన్ధో పక్కమతి, దిబ్బగన్ధో పవాయతి;

సోపజ్జ వాయతి గన్ధో, ధువం బుద్ధో భవిస్ససి.

౧౦౩.

‘‘‘సబ్బే దేవా పదిస్సన్తి, ఠపయిత్వా అరూపినో;

తేపజ్జ సబ్బే దిస్సన్తి, ధువం బుద్ధో భవిస్ససి.

౧౦౪.

‘‘‘యావతా నిరయా నామ, సబ్బే దిస్సన్తి తావదే;

తేపజ్జ సబ్బే దిస్సన్తి, ధువం బుద్ధో భవిస్ససి.

౧౦౫.

‘‘‘కుట్టా ¶ [కుడ్డా (సీ.)] కవాటా సేలా చ, న హోన్తావరణా తదా;

ఆకాసభూతా తేపజ్జ, ధువం బుద్ధో భవిస్ససి.

౧౦౬.

‘‘‘చుతీ చ ఉపపత్తి చ, ఖణే తస్మిం న విజ్జతి;

తానిపజ్జ పదిస్సన్తి, ధువం బుద్ధో భవిస్ససి.

౧౦౭.

‘‘‘దళ్హం పగ్గణ్హ వీరియం, మా నివత్త అభిక్కమ;

మయమ్పేతం విజానామ, ధువం బుద్ధో భవిస్ససి’’’.

౧౦౮.

బుద్ధస్స ¶ వచనం సుత్వా, దససహస్సీనచూభయం;

తుట్ఠహట్ఠో పమోదితో, ఏవం చిన్తేసహం తదా.

౧౦౯.

‘‘అద్వేజ్ఝవచనా బుద్ధా, అమోఘవచనా జినా;

వితథం నత్థి బుద్ధానం, ధువం బుద్ధో భవామహం.

౧౧౦.

‘‘యథా ఖిత్తం నభే లేడ్డు, ధువం పతతి భూమియం;

తథేవ బుద్ధసేట్ఠానం, వచనం ధువసస్సతం;

వితథం నత్థి బుద్ధానం, ధువం బుద్ధో భవామహం.

౧౧౧.

‘‘యథాపి సబ్బసత్తానం, మరణం ధువసస్సతం;

తథేవ బుద్ధసేట్ఠానం, వచనం ధువసస్సతం;

వితథం నత్థి బుద్ధానం, ధువం బుద్ధో భవామహం.

౧౧౨.

‘‘యథా రత్తిక్ఖయే పత్తే, సూరియుగ్గమనం ధువం;

తథేవ బుద్ధసేట్ఠానం, వచనం ధువసస్సతం;

వితథం నత్థి బుద్ధానం, ధువం బుద్ధో భవామహం.

౧౧౩.

‘‘యథా ¶ నిక్ఖన్తసయనస్స, సీహస్స నదనం ధువం;

తథేవ బుద్ధసేట్ఠానం, వచనం ధువసస్సతం;

వితథం నత్థి బుద్ధానం, ధువం బుద్ధో భవామహం.

౧౧౪.

‘‘యథా ¶ ఆపన్నసత్తానం, భారమోరోపనం ధువం;

తథేవ ¶ బుద్ధసేట్ఠానం, వచనం ధువసస్సతం;

వితథం నత్థి బుద్ధానం, ధువం బుద్ధో భవామహం.

౧౧౫.

‘‘హన్ద బుద్ధకరే ధమ్మే, విచినామి ఇతో చితో;

ఉద్ధం అధో దస దిసా, యావతా ధమ్మధాతుయా’’.

౧౧౬.

విచినన్తో తదా దక్ఖిం, పఠమం దానపారమిం;

పుబ్బకేహి మహేసీహి, అనుచిణ్ణం మహాపథం.

౧౧౭.

‘‘ఇమం త్వం పఠమం తావ, దళ్హం కత్వా సమాదియ;

దానపారమితం గచ్ఛ, యది బోధిం పత్తుమిచ్ఛసి.

౧౧౮.

‘‘యథాపి కుమ్భో సమ్పుణ్ణో, యస్స కస్సచి అధో కతో;

వమతే వుదకం నిస్సేసం, న తత్థ పరిరక్ఖతి.

౧౧౯.

‘‘తథేవ ¶ యాచకే దిస్వా, హీనముక్కట్ఠమజ్ఝిమే;

దదాహి దానం నిస్సేసం, కుమ్భో వియ అధో కతో.

౧౨౦.

‘‘నహేతే ఏత్తకాయేవ, బుద్ధధమ్మా భవిస్సరే;

అఞ్ఞేపి విచినిస్సామి, యే ధమ్మా బోధిపాచనా’’.

౧౨౧.

విచినన్తో తదా దక్ఖిం, దుతియం సీలపారమిం;

పుబ్బకేహి మహేసీహి, ఆసేవితనిసేవితం.

౧౨౨.

‘‘ఇమం త్వం దుతియం తావ, దళ్హం కత్వా సమాదియ;

సీలపారమితం గచ్ఛ, యది బోధిం పత్తుమిచ్ఛసి.

౧౨౩.

‘‘యథాపి చమరీ వాలం, కిస్మిఞ్చి పటిలగ్గితం;

ఉపేతి మరణం తత్థ, న వికోపేతి వాలధిం.

౧౨౪.

‘‘తథేవ ¶ త్వం చతూసు భూమీసు, సీలాని పరిపూరయ;

పరిరక్ఖ సబ్బదా సీలం, చమరీ వియ వాలధిం.

౧౨౫.

‘‘నహేతే ఏత్తకాయేవ, బుద్ధధమ్మా భవిస్సరే;

అఞ్ఞేపి విచినిస్సామి, యే ధమ్మా బోధిపాచనా’’.

౧౨౬.

విచినన్తో ¶ తదా దక్ఖిం, తతియం నేక్ఖమ్మపారమిం;

పుబ్బకేహి మహేసీహి, ఆసేవితనిసేవితం.

౧౨౭.

‘‘ఇమం త్వం తతియం తావ, దళ్హం కత్వా సమాదియ;

నేక్ఖమ్మపారమితం గచ్ఛ, యది బోధిం పత్తుమిచ్ఛసి.

౧౨౮.

‘‘యథా అన్దుఘరే పురిసో, చిరవుత్థో దుఖట్టితో;

న తత్థ రాగం జనేసి, ముత్తింయేవ గవేసతి.

౧౨౯.

‘‘తథేవ త్వం సబ్బభవే, పస్స అన్దుఘరే వియ;

నేక్ఖమ్మాభిముఖో హోహి, భవతో పరిముత్తియా.

౧౩౦.

‘‘నహేతే ఏత్తకాయేవ, బుద్ధధమ్మా భవిస్సరే;

అఞ్ఞేపి విచినిస్సామి, యే ధమ్మా బోధిపాచనా’’.

౧౩౧.

విచినన్తో తదా దక్ఖిం, చతుత్థం పఞ్ఞాపారమిం;

పుబ్బకేహి మహేసీహి, ఆసేవితనిసేవితం.

౧౩౨.

‘‘ఇమం త్వం చతుత్థం తావ, దళ్హం కత్వా సమాదియ;

పఞ్ఞాపారమితం ¶ గచ్ఛ, యది బోధిం పత్తుమిచ్ఛసి.

౧౩౩.

‘‘యథాపి ¶ భిక్ఖు భిక్ఖన్తో, హీనముక్కట్ఠమజ్ఝిమే;

కులాని న వివజ్జేన్తో, ఏవం లభతి యాపనం.

౧౩౪.

‘‘తథేవ ¶ త్వం సబ్బకాలం, పరిపుచ్ఛం బుధం జనం;

పఞ్ఞాపారమితం గన్త్వా, సమ్బోధిం పాపుణిస్ససి.

౧౩౫.

‘‘నహేతే ఏత్తకాయేవ, బుద్ధధమ్మా భవిస్సరే;

అఞ్ఞేపి విచినిస్సామి, యే ధమ్మా బోధిపాచనా’’.

౧౩౬.

విచినన్తో తదా దక్ఖిం, పఞ్చమం వీరియపారమిం;

పుబ్బకేహి మహేసీహి, ఆసేవితనిసేవితం.

౧౩౭.

‘‘ఇమం త్వం పఞ్చమం తావ, దళ్హం కత్వా సమాదియ;

వీరియపారమితం గచ్ఛ, యది బోధిం పత్తుమిచ్ఛసి.

౧౩౮.

‘‘యథాపి సీహో మిగరాజా, నిసజ్జట్ఠానచఙ్కమే;

అలీనవీరియో హోతి, పగ్గహితమనో సదా.

౧౩౯.

‘‘తథేవ త్వం [త్వంపి (సీ.)] సబ్బభవే, పగ్గణ్హ వీరియం దళ్హం;

వీరియపారమితం గన్త్వా, సమ్బోధిం పాపుణిస్ససి.

౧౪౦.

‘‘నహేతే ¶ ఏత్తకాయేవ, బుద్ధధమ్మా భవిస్సరే;

అఞ్ఞేపి విచినిస్సామి, యే ధమ్మా బోధిపాచనా’’.

౧౪౧.

విచినన్తో తదా దక్ఖిం, ఛట్ఠమం ఖన్తిపారమిం;

పుబ్బకేహి మహేసీహి, ఆసేవితనిసేవితం.

౧౪౨.

‘‘ఇమం త్వం ఛట్ఠమం తావ, దళ్హం కత్వా సమాదియ;

తత్థ అద్వేజ్ఝమానసో, సమ్బోధిం పాపుణిస్ససి.

౧౪౩.

‘‘యథాపి పథవీ నామ, సుచిమ్పి అసుచిమ్పి చ;

సబ్బం సహతి నిక్ఖేపం, న కరోతి పటిఘం తయా.

౧౪౪.

‘‘తథేవ ¶ త్వమ్పి సబ్బేసం, సమ్మానావమానక్ఖమో;

ఖన్తిపారమితం గన్త్వా, సమ్బోధిం పాపుణిస్ససి.

౧౪౫.

‘‘నహేతే ఏత్తకాయేవ, బుద్ధధమ్మా భవిస్సరే;

అఞ్ఞేపి విచినిస్సామి, యే ధమ్మా బోధిపాచనా’’.

౧౪౬.

విచినన్తో ¶ తదా దక్ఖిం, సత్తమం సచ్చపారమిం;

పుబ్బకేహి మహేసీహి, ఆసేవితనిసేవితం.

౧౪౭.

‘‘ఇమం త్వం సత్తమం తావ, దళ్హం కత్వా సమాదియ;

తత్థ అద్వేజ్ఝవచనో, సమ్బోధిం పాపుణిస్ససి.

౧౪౮.

‘‘యథాపి ఓసధీ నామ, తులాభూతా సదేవకే;

సమయే ఉతువస్సే వా, న వోక్కమతి వీథితో.

౧౪౯.

‘‘తథేవ త్వమ్పి సచ్చేసు, మా వోక్కమ హి వీథితో;

సచ్చపారమితం గన్త్వా, సమ్బోధిం పాపుణిస్ససి.

౧౫౦.

‘‘నహేతే ఏత్తకాయేవ, బుద్ధధమ్మా భవిస్సరే;

అఞ్ఞేపి విచినిస్సామి, యే ధమ్మా బోధిపాచనా’’.

౧౫౧.

విచినన్తో తదా దక్ఖిం, అట్ఠమం అధిట్ఠానపారమిం;

పుబ్బకేహి ¶ మహేసీహి, ఆసేవితనిసేవితం.

౧౫౨.

‘‘ఇమం త్వం అట్ఠమం తావ, దళ్హం కత్వా సమాదియ;

తత్థ త్వం అచలో హుత్వా, సమ్బోధిం పాపుణిస్ససి.

౧౫౩.

‘‘యథాపి పబ్బతో సేలో, అచలో సుప్పతిట్ఠితో;

న కమ్పతి భుసవాతేహి, సకట్ఠానేవ తిట్ఠతి.

౧౫౪.

‘‘తథేవ ¶ ¶ త్వమ్పి అధిట్ఠానే, సబ్బదా అచలో భవ;

అధిట్ఠానపారమితం గన్త్వా, సమ్బోధిం పాపుణిస్ససి.

౧౫౫.

‘‘నహేతే ఏత్తకాయేవ, బుద్ధధమ్మా భవిస్సరే;

అఞ్ఞేపి విచినిస్సామి, యే ధమ్మా బోధిపాచనా’’.

౧౫౬.

విచినన్తో తదా దక్ఖిం, నవమం మేత్తాపారమిం;

పుబ్బకేహి మహేసీహి, ఆసేవితనిసేవితం.

౧౫౭.

‘‘ఇమం త్వం నవమం తావ, దళ్హం కత్వా సమాదియ;

మేత్తాయ అసమో హోహి, యది బోధిం పత్తుమిచ్ఛసి.

౧౫౮.

‘‘యథాపి ఉదకం నామ, కల్యాణే పాపకే జనే;

సమం ఫరతి సీతేన, పవాహేతి రజోమలం.

౧౫౯.

‘‘తథేవ త్వం హితాహితే, సమం మేత్తాయ భావయ;

మేత్తాపారమితం గన్త్వా, సమ్బోధిం పాపుణిస్ససి.

౧౬౦.

‘‘నహేతే ¶ ఏత్తకాయేవ, బుద్ధధమ్మా భవిస్సరే;

అఞ్ఞేపి విచినిస్సామి, యే ధమ్మా బోధిపాచనా’’.

౧౬౧.

విచినన్తో తదా దక్ఖిం, దసమం ఉపేక్ఖాపారమిం;

పుబ్బకేహి మహేసీహి, ఆసేవితనిసేవితం.

౧౬౨.

‘‘ఇమం త్వం దసమం తావ, దళ్హం కత్వా సమాదియ;

తులాభూతో దళ్హో హుత్వా, సమ్బోధిం పాపుణిస్ససి.

౧౬౩.

‘‘యథాపి పథవీ నామ, నిక్ఖిత్తం అసుచిం సుచిం;

ఉపేక్ఖతి ఉభోపేతే, కోపానునయవజ్జితా.

౧౬౪.

‘‘తథేవ ¶ త్వం సుఖదుక్ఖే, తులాభూతో సదా భవ;

ఉపేక్ఖాపారమితం గన్త్వా, సమ్బోధిం పాపుణిస్ససి.

౧౬౫.

‘‘ఏత్తకాయేవ తే లోకే, యే ధమ్మా బోధిపాచనా;

తతుద్ధం నత్థి అఞ్ఞత్ర, దళ్హం తత్థ పతిట్ఠహ’’.

౧౬౬.

ఇమే ధమ్మే సమ్మసతో, సభావసరసలక్ఖణే;

ధమ్మతేజేన వసుధా, దససహస్సీ పకమ్పథ.

౧౬౭.

చలతీ రవతీ పథవీ, ఉచ్ఛుయన్తంవ పీళితం;

తేలయన్తే యథా చక్కం, ఏవం కమ్పతి మేదనీ.

౧౬౮.

యావతా పరిసా ఆసి, బుద్ధస్స పరివేసనే;

పవేధమానా సా తత్థ, ముచ్ఛితా సేతి భూమియం.

౧౬౯.

ఘటానేకసహస్సాని, కుమ్భీనఞ్చ సతా బహూ;

సఞ్చుణ్ణమథితా తత్థ, అఞ్ఞమఞ్ఞం పఘట్టితా.

౧౭౦.

ఉబ్బిగ్గా ¶ తసితా భీతా, భన్తా బ్యాథితమానసా;

మహాజనా ¶ సమాగమ్మ, దీపఙ్కరముపాగముం.

౧౭౧.

‘‘కిం భవిస్సతి లోకస్స, కల్యాణమథ పాపకం;

సబ్బో ఉపద్దుతో లోకో, తం వినోదేహి చక్ఖుమ’’.

౧౭౨.

తేసం తదా సఞ్ఞపేసి, దీపఙ్కరో మహాముని;

‘‘విసట్ఠా హోథ మా భేథ [భాథ (సబ్బత్థ)], ఇమస్మిం పథవికమ్పనే.

౧౭౩.

‘‘యమహం ¶ అజ్జ బ్యాకాసిం, బుద్ధో లోకే భవిస్సతి;

ఏసో సమ్మసతి ధమ్మం, పుబ్బకం జినసేవితం.

౧౭౪.

‘‘తస్స ¶ సమ్మసతో ధమ్మం, బుద్ధభూమిం అసేసతో;

తేనాయం కమ్పితా పథవీ, దససహస్సీ సదేవకే’’.

౧౭౫.

బుద్ధస్స వచనం సుత్వా, మనో నిబ్బాయి తావదే;

సబ్బే మం ఉపసఙ్కమ్మ, పునాపి అభివన్దిసుం.

౧౭౬.

సమాదియిత్వా బుద్ధగుణం, దళ్హం కత్వాన మానసం;

దీపఙ్కరం నమస్సిత్వా, ఆసనా వుట్ఠహిం తదా.

౧౭౭.

దిబ్బం మానుసకం పుప్ఫం, దేవా మానుసకా ఉభో;

సమోకిరన్తి పుప్ఫేహి, వుట్ఠహన్తస్స ఆసనా.

౧౭౮.

వేదయన్తి చ తే సోత్థిం, దేవా మానుసకా ఉభో;

‘‘మహన్తం పత్థితం తుయ్హం, తం లభస్సు యథిచ్ఛితం.

౧౭౯.

‘‘సబ్బీతియో వివజ్జన్తు, సోకో రోగో వినస్సతు;

మా తే భవన్త్వన్తరాయా [భవత్వన్తరాయో (సీ. స్యా.)], ఫుస ఖిప్పం బోధిముత్తమం.

౧౮౦.

‘‘యథాపి సమయే పత్తే, పుప్ఫన్తి పుప్ఫినో దుమా;

తథేవ త్వం మహావీర, బుద్ధఞాణేన పుప్ఫసి.

౧౮౧.

‘‘యథా యే కేచి సమ్బుద్ధా, పూరయుం దస పారమీ;

తథేవ త్వం మహావీర, పూరయ దస పారమీ.

౧౮౨.

‘‘యథా యే కేచి సమ్బుద్ధా, బోధిమణ్డమ్హి బుజ్ఝరే;

తథేవ త్వం మహావీర, బుజ్ఝస్సు జినబోధియం.

౧౮౩.

‘‘యథా యే కేచి సమ్బుద్ధా, ధమ్మచక్కం పవత్తయుం;

తథేవ త్వం మహావీర, ధమ్మచక్కం పవత్తయ.

౧౮౪.

‘‘పుణ్ణమాయే ¶ ¶ యథా చన్దో, పరిసుద్ధో విరోచతి;

తథేవ త్వం పుణ్ణమనో, విరోచ దససహస్సియం.

౧౮౫.

‘‘రాహుముత్తో యథా సూరియో, తాపేన అతిరోచతి;

తథేవ లోకా ముఞ్చిత్వా, విరోచ సిరియా తువం.

౧౮౬.

‘‘యథా ¶ యా కాచి నదియో, ఓసరన్తి మహోదధిం;

ఏవం సదేవకా లోకా, ఓసరన్తు తవన్తికే’’.

౧౮౭.

తేహి థుతప్పసత్థో సో, దస ధమ్మే సమాదియ;

తే ధమ్మే పరిపూరేన్తో, పవనం పావిసీ తదాతి.

సుమేధపత్థనాకథా నిట్ఠితా.

౩. దీపఙ్కరబుద్ధవంసో

౧.

తదా ¶ తే భోజయిత్వాన, ససఙ్ఘం లోకనాయకం;

ఉపగచ్ఛుం సరణం తస్స, దీపఙ్కరస్స సత్థునో.

౨.

సరణాగమనే కఞ్చి, నివేసేసి తథాగతో;

కఞ్చి పఞ్చసు సీలేసు, సీలే దసవిధే పరం.

౩.

కస్సచి దేతి సామఞ్ఞం, చతురో ఫలముత్తమే;

కస్సచి అసమే ధమ్మే, దేతి సో పటిసమ్భిదా.

౪.

కస్సచి వరసమాపత్తియో, అట్ఠ దేతి నరాసభో;

తిస్సో కస్సచి విజ్జాయో, ఛళభిఞ్ఞా పవేచ్ఛతి.

౫.

తేన యోగేన జనకాయం, ఓవదతి మహాముని;

తేన విత్థారికం ఆసి, లోకనాథస్స సాసనం.

౬.

మహాహనుసభక్ఖన్ధో ¶ , దీపఙ్కరస్స నామకో;

బహూ జనే తారయతి, పరిమోచేతి దుగ్గతిం.

౭.

బోధనేయ్యం జనం దిస్వా, సతసహస్సేపి యోజనే;

ఖణేన ఉపగన్త్వాన, బోధేతి తం మహాముని.

౮.

పఠమాభిసమయే ¶ బుద్ధో, కోటిసతమబోధయి;

దుతియాభిసమయే నాథో, నవుతికోటిమబోధయి.

౯.

యదా చ దేవభవనమ్హి, బుద్ధో ధమ్మమదేసయి;

నవుతికోటిసహస్సానం, తతియాభిసమయో అహు.

౧౦.

సన్నిపాతా తయో ఆసుం, దీపఙ్కరస్స సత్థునో;

కోటిసతసహస్సానం, పఠమో ఆసి సమాగమో.

౧౧.

పున ¶ నారదకూటమ్హి, పవివేకగతే జినే;

ఖీణాసవా వీతమలా, సమింసు సతకోటియో.

౧౨.

యమ్హి కాలే మహావీరో, సుదస్సనసిలుచ్చయే;

నవకోటిసహస్సేహి, పవారేసి మహాముని.

౧౩.

దసవీససహస్సానం, ధమ్మాభిసమయో అహు;

ఏకద్విన్నం అభిసమయా, గణనాతో అసఙ్ఖియా.

౧౪.

విత్థారికం బాహుజఞ్ఞం, ఇద్ధం ఫీతం అహూ తదా;

దీపఙ్కరస్స భగవతో, సాసనం సువిసోధితం.

౧౫.

చత్తారి ¶ సతసహస్సాని, ఛళభిఞ్ఞా మహిద్ధికా;

దీపఙ్కరం లోకవిదుం, పరివారేన్తి సబ్బదా.

౧౬.

యే కేచి తేన సమయేన, జహన్తి మానుసం భవం;

అపత్తమానసా సేఖా, గరహితా భవన్తి తే.

౧౭.

సుపుప్ఫితం పావచనం, అరహన్తేహి తాదిహి;

ఖీణాసవేహి విమలేహి, ఉపసోభతి సబ్బదా.

౧౮.

నగరం రమ్మవతీ నామ, సుదేవో నామ ఖత్తియో;

సుమేధా నామ జనికా, దీపఙ్కరస్స సత్థునో.

౧౯.

దసవస్ససహస్సాని ¶ , అగారం అజ్ఝ సో వసి [అజ్ఝావసీ జినో (స్యా. క.)];

హంసా కోఞ్చా మయూరా చ, తయో పాసాదముత్తమా.

౨౦.

తీణిసతసహస్సాని, నారియో సమలఙ్కతా;

పదుమా నామ సా నారీ, ఉసభక్ఖన్ధో అత్రజో.

౨౧.

నిమిత్తే చతురో దిస్వా, హత్థియానేన నిక్ఖమి;

అనూనదసమాసాని, పధానే పదహీ జినో.

౨౨.

పధానచారం ¶ చరిత్వాన, అబుజ్ఝి మానసం ముని;

బ్రహ్మునా యాచితో సన్తో, దీపఙ్కరో మహాముని.

౨౩.

వత్తి చక్కం మహావీరో, నన్దారామే సిరీఘరే [సిరీధరే (సీ.)];

నిసిన్నో సిరీసమూలమ్హి, అకా తిత్థియమద్దనం.

౨౪.

సుమఙ్గలో ¶ చ తిస్సో చ, అహేసుం అగ్గసావకా;

సాగతో [సోభితో (క.)] నాముపట్ఠాకో, దీపఙ్కరస్స సత్థునో.

౨౫.

నన్దా ¶ చేవ సునన్దా చ, అహేసుం అగ్గసావికా;

బోధి తస్స భగవతో, పిప్ఫలీతి పవుచ్చతి.

౨౬.

తపుస్సభల్లికా [తపస్సుభల్లికా (సీ.)] నామ, అహేసుం అగ్గుపట్ఠకా;

సిరిమా కోణా ఉపట్ఠికా, దీపఙ్కరస్స సత్థునో.

౨౭.

అసీతిహత్థముబ్బేధో, దీపఙ్కరో మహాముని;

సోభతి దీపరుక్ఖోవ, సాలరాజావ ఫుల్లితో.

౨౮.

సతసహస్సవస్సాని, ఆయు తస్స మహేసినో;

తావతా తిట్ఠమానో సో, తారేసి జనతం బహుం.

౨౯.

జోతయిత్వాన సద్ధమ్మం, సన్తారేత్వా మహాజనం;

జలిత్వా అగ్గిక్ఖన్ధోవ, నిబ్బుతో సో ససావకో.

౩౦.

సా చ ఇద్ధి సో చ యసో, తాని చ పాదేసు చక్కరతనాని;

సబ్బం తమన్తరహితం [సమన్తరహితం (సీ. స్యా. క.)], నను రిత్తా సబ్బసఙ్ఖారా [సబ్బసఙ్ఖారాతి (సబ్బత్థ)].

౩౧.

దీపఙ్కరో జినో సత్థా, నన్దారామమ్హి నిబ్బుతో;

తత్థేవస్స జినథూపో, ఛత్తింసుబ్బేధయోజనోతి.

దీపఙ్కరస్స భగవతో వంసో పఠమో.

౪. కోణ్డఞ్ఞబుద్ధవంసో

౧.

దీపఙ్కరస్స ¶ ¶ అపరేన, కోణ్డఞ్ఞో నామ నాయకో;

అనన్తతేజో అమితయసో, అప్పమేయ్యో దురాసదో.

౨.

ధరణూపమో ¶ ఖమనేన, సీలేన సాగరూపమో;

సమాధినా మేరూపమో, ఞాణేన గగనూపమో.

౩.

ఇన్ద్రియబలబోజ్ఝఙ్గ-మగ్గసచ్చప్పకాసనం;

పకాసేసి సదా బుద్ధో, హితాయ సబ్బపాణినం.

౪.

ధమ్మచక్కం ¶ పవత్తేన్తే, కోణ్డఞ్ఞే లోకనాయకే;

కోటిసతసహస్సానం, పఠమాభిసమయో అహు.

౫.

తతో పరమ్పి దేసేన్తే, నరమరూనం సమాగమే;

నవుతికోటిసహస్సానం, దుతియాభిసమయో అహు.

౬.

తిత్థియే అభిమద్దన్తో, యదా ధమ్మమదేసయి;

అసీతికోటిసహస్సానం, తతియాభిసమయో అహు.

౭.

సన్నిపాతా తయో ఆసుం, కోణ్డఞ్ఞస్స మహేసినో;

ఖీణాసవానం విమలానం, సన్తచిత్తాన తాదినం.

౮.

కోటిసతసహస్సానం, పఠమో ఆసి సమాగమో;

దుతియో కోటిసహస్సానం, తతియో నవుతికోటినం.

౯.

అహం తేన సమయేన, విజితావీ నామ ఖత్తియో;

సముద్దం అన్తమన్తేన, ఇస్సరియం వత్తయామహం.

౧౦.

కోటిసతసహస్సానం ¶ , విమలానం మహేసినం;

సహ లోకగ్గనాథేన, పరమన్నేన తప్పయిం.

౧౧.

సోపి మం బుద్ధో బ్యాకాసి, కోణ్డఞ్ఞో లోకనాయకో;

‘‘అపరిమేయ్యితో కప్పే, బుద్ధో లోకే భవిస్సతి.

౧౨.

‘‘పధానం పదహిత్వాన, కత్వా దుక్కరకారికం;

అస్సత్థమూలే సమ్బుద్ధో, బుజ్ఝిస్సతి మహాయసో.

౧౩.

‘‘ఇమస్స జనికా మాతా, మాయా నామ భవిస్సతి;

పితా సుద్ధోదనో నామ, అయం హేస్సతి గోతమో.

౧౪.

‘‘కోలితో ఉపతిస్సో చ, అగ్గా హేస్సన్తి సావకా;

ఆనన్దో నాముపట్ఠాకో, ఉపట్ఠిస్సతిమం జినం.

౧౫.

‘‘ఖేమా ఉప్పలవణ్ణా చ, అగ్గా హేస్సన్తి సావికా;

బోధి ¶ తస్స భగవతో, అస్సత్థోతి పవుచ్చతి.

౧౬.

‘‘చిత్తో ¶ చ హత్థాళవకో, అగ్గా హేస్సన్తుపట్ఠకా;

నన్దమాతా చ ఉత్తరా, అగ్గా హేస్సన్తుపట్ఠికా;

ఆయు ¶ వస్ససతం తస్స, గోతమస్స యసస్సినో’’.

౧౭.

ఇదం సుత్వాన వచనం, అసమస్స మహేసినో;

ఆమోదితా నరమరూ, బుద్ధబీజం కిర అయం.

౧౮.

ఉక్కుట్ఠిసద్దా ¶ వత్తన్తి, అప్ఫోటేన్తి హసన్తి చ;

కతఞ్జలీ నమస్సన్తి, దససహస్సిదేవతా.

౧౯.

‘‘యదిమస్స లోకనాథస్స, విరజ్ఝిస్సామ సాసనం;

అనాగతమ్హి అద్ధానే, హేస్సామ సమ్ముఖా ఇమం.

౨౦.

‘‘యథా మనుస్సా నదిం తరన్తా, పటితిత్థం విరజ్ఝియ;

హేట్ఠాతిత్థే గహేత్వాన, ఉత్తరన్తి మహానదిం.

౨౧.

‘‘ఏవమేవ మయం సబ్బే, యది ముఞ్చామిమం జినం;

అనాగతమ్హి అద్ధానే, హేస్సామ సమ్ముఖా ఇమం’’.

౨౨.

తస్సాహం వచనం సుత్వా, భియ్యో చిత్తం పసాదయిం;

తమేవ అత్థం సాధేన్తో, మహారజ్జం జినే అదం;

మహారజ్జం దదిత్వాన [చజిత్వా (సీ.)], పబ్బజిం తస్స సన్తికే.

౨౩.

సుత్తన్తం వినయఞ్చాపి, నవఙ్గం సత్థుసాసనం;

సబ్బం పరియాపుణిత్వాన, సోభయిం జినసాసనం.

౨౪.

తత్థప్పమత్తో ¶ విహరన్తో, నిసజ్జట్ఠానచఙ్కమే;

అభిఞ్ఞాపారమిం గన్త్వా, బ్రహ్మలోకమగఞ్ఛహం.

౨౫.

నగరం రమ్మవతీ నామ, సునన్దో నామ ఖత్తియో;

సుజాతా నామ జనికా, కోణ్డఞ్ఞస్స మహేసినో.

౨౬.

దసవస్ససహస్సాని, అగారం అజ్ఝ సో వసి [అగారమజ్ఝే చ సో వసి (స్యా.)];

సుచి సురుచి సుభో చ, తయో పాసాదముత్తమా.

౨౭.

తీణిసతసహస్సాని, నారియో సమలఙ్కతా;

రుచిదేవీ నామ నారీ, విజితసేనో అత్రజో.

౨౮.

నిమిత్తే చతురో దిస్వా, రథయానేన నిక్ఖమి;

అనూనదసమాసాని, పధానం పదహీ జినో.

౨౯.

బ్రహ్మునా ¶ యాచితో సన్తో, కోణ్డఞ్ఞో ద్విపదుత్తమో;

వత్తి చక్కం మహావీరో, దేవానం నగరుత్తమే.

౩౦.

భద్దో చేవ సుభద్దో చ, అహేసుం అగ్గసావకా;

అనురుద్ధో నాముపట్ఠాకో, కోణ్డఞ్ఞస్స మహేసినో.

౩౧.

తిస్సా ¶ చ ఉపతిస్సా చ, అహేసుం అగ్గసావికా;

సాలకల్యాణికో బోధి, కోణ్డఞ్ఞస్స మహేసినో.

౩౨.

సోణో చ ఉపసోణో చ, అహేసుం అగ్గుపట్ఠకా;

నన్దా చేవ సిరీమా చ, అహేసుం అగ్గుపట్ఠికా.

౩౩.

సో అట్ఠాసీతి హత్థాని, అచ్చుగ్గతో మహాముని;

సోభతే ఉళురాజావ సూరియో మజ్ఝన్హికే యథా.

౩౪.

వస్ససతసహస్సాని ¶ , ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౩౫.

ఖీణాసవేహి ¶ విమలేహి, విచిత్తా ఆసి మేదనీ;

యథా గగనముళూహి, ఏవం సో ఉపసోభథ.

౩౬.

తేపి నాగా అప్పమేయ్యా, అసఙ్ఖోభా దురాసదా;

విజ్జుపాతంవ దస్సేత్వా, నిబ్బుతా తే మహాయసా.

౩౭.

సా చ అతులియా జినస్స ఇద్ధి, ఞాణపరిభావితో చ సమాధి;

సబ్బం తమన్తరహితం, నను రిత్తా సబ్బసఙ్ఖారా.

౩౮.

కోణ్డఞ్ఞో పవరో బుద్ధో, చన్దారామమ్హి నిబ్బుతో;

తత్థేవ చేతియో చిత్తో, సత్త యోజనముస్సితోతి.

కోణ్డఞ్ఞస్స భగవతో వంసో దుతియో.

౫. మఙ్గలబుద్ధవంసో

౧.

కోణ్డఞ్ఞస్స అపరేన, మఙ్గలో నామ నాయకో;

తమం లోకే నిహన్త్వాన, ధమ్మోక్కమభిధారయి.

౨.

అతులాసి ¶ పభా తస్స, జినేహఞ్ఞేహి ఉత్తరిం;

చన్దసూరియపభం హన్త్వా, దససహస్సీ విరోచతి.

౩.

సోపి బుద్ధో పకాసేసి, చతురో సచ్చవరుత్తమే;

తే తే సచ్చరసం పీత్వా, వినోదేన్తి మహాతమం.

౪.

పత్వాన ¶ బోధిమతులం, పఠమే ధమ్మదేసనే;

కోటిసతసహస్సానం, ధమ్మాభిసమయో అహు.

౫.

సురిన్దదేవభవనే ¶ , బుద్ధో ధమ్మమదేసయి;

తదా కోటిసహస్సానం [నవకోటిసహస్సానం (సీ.)], దుతియో సమయో అహు.

౬.

యదా సునన్దో చక్కవత్తీ, సమ్బుద్ధం ఉపసఙ్కమి;

తదా ఆహని సమ్బుద్ధో, ధమ్మభేరిం వరుత్తమం.

౭.

సునన్దస్సానుచరా జనతా, తదాసుం నవుతికోటియో;

సబ్బేపి తే నిరవసేసా, అహేసుం ఏహి భిక్ఖుకా.

౮.

సన్నిపాతా తయో ఆసుం, మఙ్గలస్స మహేసినో;

కోటిసతసహస్సానం, పఠమో ఆసి సమాగమో.

౯.

దుతియో కోటిసతసహస్సానం, తతియో నవుతికోటినం;

ఖీణాసవానం విమలానం, తదా ఆసి సమాగమో.

౧౦.

అహం తేన సమయేన, సురుచీ నామ బ్రాహ్మణో;

అజ్ఝాయకో మన్తధరో, తిణ్ణం వేదాన పారగూ.

౧౧.

తమహం ¶ ఉపసఙ్కమ్మ, సరణం గన్త్వాన సత్థునో;

సమ్బుద్ధప్పముఖం సఙ్ఘం, గన్ధమాలేన పూజయిం;

పూజేత్వా గన్ధమాలేన, గవపానేన తప్పయిం.

౧౨.

సోపి మం బుద్ధో బ్యాకాసి, మఙ్గలో ద్విపదుత్తమో;

‘‘అపరిమేయ్యితో కప్పే, అయం బుద్ధో భవిస్సతి.

౧౩.

‘‘పధానం ¶ పదహిత్వాన…పే… ¶ హేస్సామ సమ్ముఖా ఇమం’’.

౧౪.

తస్సాపి వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దస పారమిపూరియా.

౧౫.

తదా పీతిమనుబ్రూహన్తో, సమ్బోధివరపత్తియా;

బుద్ధే దత్వాన మం గేహం, పబ్బజిం తస్స సన్తికే.

౧౬.

సుత్తన్తం ¶ వినయఞ్చాపి, నవఙ్గం సత్థుసాసనం;

సబ్బం పరియాపుణిత్వా, సోభయిం జినసాసనం.

౧౭.

తత్థప్పమత్తో విహరన్తో, బ్రహ్మం భావేత్వ భావనం;

అభిఞ్ఞాపారమిం గన్త్వా, బ్రహ్మలోకమగచ్ఛహం.

౧౮.

ఉత్తరం ¶ నామ నగరం, ఉత్తరో నామ ఖత్తియో;

ఉత్తరా నామ జనికా, మఙ్గలస్స మహేసినో.

౧౯.

నవవస్ససహస్సాని ¶ , అగారం అజ్ఝ సో వసి;

యసవా సుచిమా సిరీమా, తయో పాసాదముత్తమా.

౨౦.

సమతింససహస్సాని, నారియో సమలఙ్కతా;

యసవతీ నామ నారీ, సీవలో నామ అత్రజో.

౨౧.

నిమిత్తే చతురో దిస్వా, అస్సయానేన నిక్ఖమి;

అనూనఅట్ఠమాసాని, పధానం పదహీ జినో.

౨౨.

బ్రహ్మునా యాచితో సన్తో, మఙ్గలో నామ నాయకో;

వత్తి చక్కం మహావీరో, వనే సిరీవరుత్తమే.

౨౩.

సుదేవో ధమ్మసేనో చ, అహేసుం అగ్గసావకా;

పాలితో నాముపట్ఠాకో, మఙ్గలస్స మహేసినో.

౨౪.

సీవలా చ అసోకా చ, అహేసుం అగ్గసావికా;

బోధి తస్స భగవతో, నాగరుక్ఖోతి వుచ్చతి.

౨౫.

నన్దో చేవ విసాఖో చ, అహేసుం అగ్గుపట్ఠకా;

అనులా చేవ సుతనా చ, అహేసుం అగ్గుపట్ఠికా.

౨౬.

అట్ఠాసీతి రతనాని, అచ్చుగ్గతో మహాముని;

తతో నిద్ధావతీ రంసీ, అనేకసతసహస్సియో.

౨౭.

నవుతివస్ససహస్సాని, ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౨౮.

యథాపి సాగరే ఊమీ, న సక్కా తా గణేతుయే;

తథేవ సావకా తస్స, న సక్కా తే గణేతుయే.

౨౯.

యావ ¶ అట్ఠాసి సమ్బుద్ధో, మఙ్గలో లోకనాయకో;

న ¶ తస్స సాసనే అత్థి, సకిలేసమరణం [సంకిలేసమరణం (సీ.)] తదా.

౩౦.

ధమ్మోక్కం ¶ ధారయిత్వాన, సన్తారేత్వా మహాజనం;

జలిత్వా ధూమకేతూవ, నిబ్బుతో సో మహాయసో.

౩౧.

సఙ్ఖారానం ¶ సభావత్థం, దస్సయిత్వా సదేవకే;

జలిత్వా అగ్గిక్ఖన్ధోవ, సూరియో అత్థఙ్గతో యథా.

౩౨.

ఉయ్యానే వస్సరే నామ, బుద్ధో నిబ్బాయి మఙ్గలో;

తత్థేవస్స జినథూపో, తింసయోజనముగ్గతోతి.

మఙ్గలస్స భగవతో వంసో తతియో.

౬. సుమనబుద్ధవంసో

౧.

మఙ్గలస్స అపరేన, సుమనో నామ నాయకో;

సబ్బధమ్మేహి అసమో, సబ్బసత్తానముత్తమో.

౨.

తదా అమతభేరిం సో, ఆహనీ మేఖలే పురే;

ధమ్మసఙ్ఖసమాయుత్తం, నవఙ్గం జినసాసనం.

౩.

నిజ్జినిత్వా కిలేసే సో, పత్వా సమ్బోధిముత్తమం;

మాపేసి నగరం సత్థా, సద్ధమ్మపురవరుత్తమం.

౪.

నిరన్తరం అకుటిలం, ఉజుం విపులవిత్థతం;

మాపేసి సో మహావీథిం, సతిపట్ఠానవరుత్తమం.

౫.

ఫలే ¶ చత్తారి సామఞ్ఞే, చతస్సో పటిసమ్భిదా;

ఛళభిఞ్ఞాట్ఠసమాపత్తీ, పసారేసి తత్థ వీథియం.

౬.

యే అప్పమత్తా అఖిలా, హిరివీరియేహుపాగతా;

తే తే ఇమే గుణవరే, ఆదియన్తి యథా సుఖం.

౭.

ఏవమేతేన యోగేన, ఉద్ధరన్తో మహాజనం;

బోధేసి పఠమం సత్థా, కోటిసతసహస్సియో.

౮.

యమ్హి కాలే మహావీరో, ఓవదీ తిత్థియే గణే;

కోటిసహస్సాభిసమింసు [కోటిసతసహస్సాని (స్యా. కం.), కోటిసతసహస్సానం (క.)], దుతియే ధమ్మదేసనే.

౯.

యదా దేవా మనుస్సా చ, సమగ్గా ఏకమానసా;

నిరోధపఞ్హం పుచ్ఛింసు, సంసయఞ్చాపి మానసం.

౧౦.

తదాపి ¶ ¶ ధమ్మదేసనే, నిరోధపరిదీపనే;

నవుతికోటిసహస్సానం, తతియాభిసమయో అహు.

౧౧.

సన్నిపాతా తయో ఆసుం, సుమనస్స మహేసినో;

ఖీణాసవానం విమలానం, సన్తచిత్తాన తాదినం.

౧౨.

వస్సంవుత్థస్స ¶ భగవతో, అభిఘుట్ఠే పవారణే;

కోటిసతసహస్సేహి, పవారేసి తథాగతో.

౧౩.

తతోపరం సన్నిపాతే, విమలే కఞ్చనపబ్బతే;

నవుతికోటిసహస్సానం, దుతియో ఆసి సమాగమో.

౧౪.

యదా సక్కో దేవరాజా, బుద్ధదస్సనుపాగమి;

అసీతికోటిసహస్సానం, తతియో ఆసి సమాగమో.

౧౫.

అహం ¶ తేన సమయేన, నాగరాజా మహిద్ధికో;

అతులో నామ నామేన, ఉస్సన్నకుసలసఞ్చయో.

౧౬.

తదాహం నాగభావనా, నిక్ఖమిత్వా సఞాతిభి;

నాగానం దిబ్బతురియేహి, ససఙ్ఘం జినముపట్ఠహిం.

౧౭.

కోటిసతసహస్సానం, అన్నపానేన తప్పయిం;

పచ్చేకదుస్సయుగం దత్వా, సరణం తముపాగమిం.

౧౮.

సోపి మం బుద్ధో బ్యాకాసి, సుమనో లోకనాయకో;

‘‘అపరిమేయ్యితో కప్పే, అయం బుద్ధో భవిస్సతి.

౧౯.

‘‘పధానం పదహిత్వాన…పే… ¶ హేస్సామ సమ్ముఖా ఇమం’’.

౨౦.

తస్సాపి వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దసపారమిపూరియా.

౨౧.

నగరం మేఖలం నామ [మేఖలం నామ నగరం (సీ. స్యా.)], సుదత్తో నామ ఖత్తియో;

సిరిమా నామ జనికా, సుమనస్స మహేసినో.

౨౨.

నవవస్ససహస్సాని ¶ , అగారం అజ్ఝ సో వసి;

చన్దో సుచన్దో వటంసో చ, తయో పాసాదముత్తమా.

౨౩.

తేసట్ఠిసతసహస్సాని, నారియో సమలఙ్కతా;

వటంసికా నామ నారీ, అనూపమో నామ అత్రజో.

౨౪.

నిమిత్తే ¶ చతురో దిస్వా, హత్థియానేన నిక్ఖమి;

అనూనదసమాసాని, పధానం పదహీ జినో.

౨౫.

బ్రహ్మునా ¶ యాచితో సన్తో, సుమనో లోకనాయకో;

వత్తి చక్కం మహావీరో, మేఖలే పురముత్తమే.

౨౬.

సరణో భావితత్తో చ, అహేసుం అగ్గసావకా;

ఉదేనో నాముపట్ఠాకో, సుమనస్స మహేసినో.

౨౭.

సోణా చ ఉపసోణా చ, అహేసుం అగ్గసావికా;

సోపి బుద్ధో అమితయసో, నాగమూలే అబుజ్ఝథ.

౨౮.

వరుణో చేవ సరణో చ, అహేసుం అగ్గుపట్ఠకా;

చాలా చ ఉపచాలా చ, అహేసుం అగ్గుపట్ఠికా.

౨౯.

ఉచ్చత్తనేన [ఉచ్చతరేన (క.)] సో బుద్ధో, నవుతిహత్థముగ్గతో;

కఞ్చనగ్ఘియసఙ్కాసో, దససహస్సీ విరోచతి.

౩౦.

నవుతివస్ససహస్సాని, ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౩౧.

తారణీయే ¶ తారయిత్వా, బోధనీయే చ బోధయి;

పరినిబ్బాయి సమ్బుద్ధో, ఉళురాజావ అత్థమి.

౩౨.

తే ¶ చ ఖీణాసవా భిక్ఖూ, సో చ బుద్ధో అసాదిసో;

అతులప్పభం దస్సయిత్వా, నిబ్బుతా యే మహాయసా.

౩౩.

తఞ్చ ఞాణం అతులియం, తాని చ అతులాని రతనాని;

సబ్బం తమన్తరహితం, నను రిత్తా సబ్బసఙ్ఖారా.

౩౪.

సుమనో యసధరో బుద్ధో, అఙ్గారామమ్హి నిబ్బుతో;

తత్థేవ తస్స జినథూపో, చతుయోజనముగ్గతోతి.

సుమనస్స భగవతో వంసో చతుత్థో.

౭. రేవతబుద్ధవంసో

౧.

సుమనస్స అపరేన, రేవతో నామ నాయకో;

అనూపమో అసదిసో, అతులో ఉత్తమో జినో.

౨.

సోపి ధమ్మం ¶ ¶ పకాసేసి, బ్రహ్మునా అభియాచితో;

ఖన్ధధాతువవత్థానం, అప్పవత్తం భవాభవే.

౩.

తస్సాభిసమయా తీణి, అహేసుం ధమ్మదేసనే;

గణనాయ న వత్తబ్బో, పఠమాభిసమయో అహు.

౪.

యదా అరిన్దమం రాజం [రాజానం (క.)], వినేసి రేవతో ముని;

తదా కోటిసహస్సానం, దుతియాభిసమయో అహు.

౫.

సత్తాహం పటిసల్లానా, వుట్ఠహిత్వా నరాసభో;

కోటిసతం నరమరూనం, వినేసి ఉత్తమే ఫలే.

౬.

సన్నిపాతా ¶ తయో ఆసుం, రేవతస్స మహేసినో;

ఖీణాసవానం విమలానం, సువిముత్తాన తాదినం.

౭.

అతిక్కన్తా గణనపథం, పఠమం యే సమాగతా;

కోటిసతసహస్సానం, దుతియో ఆసి సమాగమో.

౮.

యోపి [యో సో (స్యా. కం. క.)] పఞ్ఞాయ అసమో, తస్స చక్కానువత్తకో;

సో తదా బ్యాధితో ఆసి, పత్తో జీవితసంసయం.

౯.

తస్స గిలానపుచ్ఛాయ, యే తదా ఉపగతా మునీ;

కోటిసహస్సా అరహన్తో, తతియో ఆసి సమాగమో.

౧౦.

అహం తేన సమయేన, అతిదేవో నామ బ్రాహ్మణో;

ఉపగన్త్వా రేవతం బుద్ధం, సరణం తస్స గఞ్ఛహం.

౧౧.

తస్స సీలం సమాధిఞ్చ, పఞ్ఞాగుణమనుత్తమం;

థోమయిత్వా యథాథామం, ఉత్తరీయమదాసహం.

౧౨.

సోపి ¶ మం బుద్ధో బ్యాకాసి, రేవతో లోకనాయకో;

‘‘అపరిమేయ్యితో కప్పే, అయం బుద్ధో భవిస్సతి.

౧౩.

‘‘పధానం పదహిత్వాన…పే… ¶ హేస్సామ సమ్ముఖా ఇమం’’.

౧౪.

తస్సాపి వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దసపారమిపూరియా.

౧౫.

తదాపి తం బుద్ధధమ్మం, సరిత్వా అనుబ్రూహయిం;

ఆహరిస్సామి తం ధమ్మం, యం మయ్హం అభిపత్థితం.

౧౬.

నగరం ¶ సుధఞ్ఞవతీ నామ [సుధమ్మకం నామ (సీ.), సుధఞ్ఞకం నామ (స్యా.)], విపులో నామ ఖత్తియో;

విపులా నామ జనికా, రేవతస్స మహేసినో.

౧౭.

ఛ ¶ చ వస్ససహస్సాని [ఛబ్బస్ససహస్సాని (సీ. స్యా.)], అగారం అజ్ఝ సో వసి;

సుదస్సనో రతనగ్ఘి, ఆవేళో చ విభూసితో;

పుఞ్ఞకమ్మాభినిబ్బత్తా, తయో పాసాదముత్తమా.

౧౮.

తేత్తింస చ సహస్సాని, నారియో సమలఙ్కతా;

సుదస్సనా నామ నారీ, వరుణో నామ అత్రజో.

౧౯.

నిమిత్తే చతురో దిస్వా, రథయానేన నిక్ఖమి;

అనూనసత్తమాసాని, పధానం పదహీ జినో.

౨౦.

బ్రహ్మునా యాచితో సన్తో, రేవతో లోకనాయకో;

వత్తి చక్కం మహావీరో, వరుణారామే సిరీఘరే.

౨౧.

వరుణో ¶ బ్రహ్మదేవో చ, అహేసుం అగ్గసావకా;

సమ్భవో నాముపట్ఠాకో, రేవతస్స మహేసినో.

౨౨.

భద్దా చేవ సుభద్దా చ, అహేసుం అగ్గసావికా;

సోపి బుద్ధో అసమసమో, నాగమూలే అబుజ్ఝథ.

౨౩.

పదుమో కుఞ్జరో చేవ, అహేసుం అగ్గుపట్ఠికా;

సిరీమా చేవ యసవతీ, అహేసుం అగ్గుపట్ఠికా.

౨౪.

ఉచ్చత్తనేన సో బుద్ధో, అసీతిహత్థముగ్గతో;

ఓభాసేతి దిసా సబ్బా, ఇన్దకేతువ ఉగ్గతో.

౨౫.

తస్స సరీరే నిబ్బత్తా, పభామాలా అనుత్తరా;

దివా వా యది వా రత్తిం, సమన్తా ఫరతి యోజనం.

౨౬.

సట్ఠివస్ససహస్సాని, ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౨౭.

దస్సయిత్వా బుద్ధబలం, అమతం లోకే పకాసయం;

నిబ్బాయి అనుపాదానో, యథగ్గుపాదానసఙ్ఖయా.

౨౮.

సో చ కాయో రతననిభో, సో చ ధమ్మో అసాదిసో;

సబ్బం తమన్తరహితం, నను రిత్తా సబ్బసఙ్ఖారా.

౨౯.

రేవతో ¶ యసధరో బుద్ధో, నిబ్బుతో సో మహాపురే;

ధాతువిత్థారికం ఆసి, తేసు తేసు పదేసతోతి.

రేవతస్స భగవతో వంసో పఞ్చమో.

౮. సోభితబుద్ధవంసో

౧.

రేవతస్స ¶ ¶ ¶ అపరేన, సోభితో నామ నాయకో;

సమాహితో సన్తచిత్తో, అసమో అప్పటిపుగ్గలో.

౨.

సో జినో సకగేహమ్హి, మానసం వినివత్తయి;

పత్వాన కేవలం బోధిం, ధమ్మచక్కం పవత్తయి.

౩.

యావ హేట్ఠా అవీచితో, భవగ్గా చాపి ఉద్ధతో;

ఏత్థన్తరే ఏకపరిసా, అహోసి ధమ్మదేసనే.

౪.

తాయ పరిసాయ సమ్బుద్ధో, ధమ్మచక్కం పవత్తయి;

గణనాయ న వత్తబ్బో, పఠమాభిసమయో అహు.

౫.

తతో పరమ్పి దేసేన్తే, మరూనఞ్చ సమాగమే;

నవుతికోటిసహస్సానం, దుతియాభిసమయో అహు.

౬.

పునాపరం రాజపుత్తో, జయసేనో నామ ఖత్తియో;

ఆరామం రోపయిత్వాన, బుద్ధే నియ్యాదయీ తదా.

౭.

తస్స యాగం పకిత్తేన్తో, ధమ్మం దేసేసి చక్ఖుమా;

తదా కోటిసహస్సానం, తతియాభిసమయో అహు.

౮.

సన్నిపాతా తయో ఆసుం, సోభితస్స మహేసినో;

ఖీణాసవానం విమలానం, సన్తచిత్తాన తాదినం.

౯.

ఉగ్గతో నామ సో రాజా, దానం దేతి నరుత్తమే;

తమ్హి దానే సమాగఞ్ఛుం, అరహన్తా [అరహతం (క.)] సతకోటియో.

౧౦.

పునాపరం ¶ పురగణో [పుగగణో (క.)], దేతి దానం నరుత్తమే;

తదా నవుతికోటీనం, దుతియో ఆసి సమాగమో.

౧౧.

దేవలోకే ¶ వసిత్వాన, యదా ఓరోహతీ జినో;

తదా అసీతికోటీనం, తతియో ఆసి సమాగమో.

౧౨.

అహం తేన సమయేన, సుజాతో నామ బ్రాహ్మణో;

తదా ససావకం బుద్ధం, అన్నపానేన తప్పయిం.

౧౩.

సోపి మం బుద్ధో బ్యాకాసి, సోభితో లోకనాయకో;

‘‘అపరిమేయ్యితో కప్పే, అయం బుద్ధో భవిస్సతి.

౧౪.

‘‘పధానం ¶ పదహిత్వాన…పే… ¶ హేస్సామ సమ్ముఖా ఇమం’’.

౧౫.

తస్సాపి వచనం సుత్వా, హట్ఠో సంవిగ్గమానసో;

తమేవత్థమనుప్పత్తియా, ఉగ్గం ధితిమకాసహం.

౧౬.

సుధమ్మం నామ నగరం, సుధమ్మో నామ ఖత్తియో;

సుధమ్మా నామ జనికా, సోభితస్స మహేసినో.

౧౭.

నవవస్ససహస్సాని ¶ ¶ , అగారం అజ్ఝ సో వసి;

కుముదో నాళినో పదుమో, తయో పాసాదముత్తమా.

౧౮.

సత్తతింససహస్సాని, నారియో సమలఙ్కతా;

మణిలా [మఖిలా (అట్ఠ.), సమఙ్గీ (సీ.), మకిలా (స్యా. కం.)] నామ సా నారీ, సీహో నామాసి అత్రజో.

౧౯.

నిమిత్తే చతురో దిస్వా, పాసాదేనాభినిక్ఖమి;

సత్తాహం పధానచారం, చరిత్వా పురిసుత్తమో.

౨౦.

బ్రహ్మునా యాచితో సన్తో, సోభితో లోకనాయకో;

వత్తి చక్కం మహావీరో, సుధమ్ముయ్యానముత్తమే.

౨౧.

అసమో చ సునేత్తో చ, అహేసుం అగ్గసావకా;

అనోమో నాముపట్ఠాకో, సోభితస్స మహేసినో.

౨౨.

నకులా చ సుజాతా చ, అహేసుం అగ్గసావికా;

బుజ్ఝమానో చ సో బుద్ధో, నాగమూలే అబుజ్ఝథ.

౨౩.

రమ్మో చేవ సుదత్తో చ, అహేసుం అగ్గుపట్ఠకా;

నకులా చేవ చిత్తా చ, అహేసుం అగ్గుపట్ఠికా.

౨౪.

అట్ఠపణ్ణాసరతనం, అచ్చుగ్గతో మహాముని;

ఓభాసేతి దిసా సబ్బా, సతరంసీవ ఉగ్గతో.

౨౫.

యథా ¶ సుఫుల్లం పవనం, నానాగన్ధేహి ధూపితం;

తథేవ తస్స పావచనం, సీలగన్ధేహి ధూపితం.

౨౬.

యథాపి సాగరో నామ, దస్సనేన అతప్పియో;

తథేవ తస్స పావచనం, సవణేన అతప్పియం.

౨౭.

నవుతివస్ససహస్సాని ¶ , ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౨౮.

ఓవాదం అనుసిట్ఠిఞ్చ, దత్వాన సేసకే జనే;

హుతాసనోవ తాపేత్వా, నిబ్బుతో సో ససావకో.

౨౯.

సో ¶ చ బుద్ధో అసమసమో, తేపి సావకా బలప్పత్తా;

సబ్బం తమన్తరహితం, నను రిత్తా సబ్బసఙ్ఖారా.

౩౦.

సోభితో వరసమ్బుద్ధో, సీహారామమ్హి నిబ్బుతో;

ధాతువిత్థారికం ఆసి, తేసు తేసు పదేసతోతి.

సోభితస్స భగవతో వంసో ఛట్ఠో.

౯. అనోమదస్సీబుద్ధవంసో

౧.

సోభితస్స ¶ అపరేన, సమ్బుద్ధో ద్విపదుత్తమో;

అనోమదస్సీ అమితయసో, తేజస్సీ దురతిక్కమో.

౨.

సో ఛేత్వా బన్ధనం సబ్బం, విద్ధంసేత్వా తయో భవే;

అనివత్తిగమనం మగ్గం, దేసేసి దేవమానుసే.

౩.

సాగరోవ అసఙ్ఖోభో, పబ్బతోవ దురాసదో;

ఆకాసోవ అనన్తో సో, సాలరాజావ ఫుల్లితో.

౪.

దస్సనేనపి తం బుద్ధం, తోసితా హోన్తి పాణినో;

బ్యాహరన్తం గిరం సుత్వా, అమతం పాపుణన్తి తే.

౫.

ధమ్మాభిసమయో ¶ తస్స, ఇద్ధో ఫీతో తదా అహు;

కోటిసతాని అభిసమింసు, పఠమే ధమ్మదేసనే.

౬.

తతో పరం అభిసమయే, వస్సన్తే ధమ్మవుట్ఠియో;

అసీతికోటియోభిసమింసు, దుతియే ధమ్మదేసనే.

౭.

తతోపరఞ్హి ¶ వస్సన్తే, తప్పయన్తే చ పాణినం;

అట్ఠసత్తతికోటీనం, తతియాభిసమయో అహు.

౮.

సన్నిపాతా తయో ఆసుం, తస్సాపి చ మహేసినో;

అభిఞ్ఞాబలప్పత్తానం, పుప్ఫితానం విముత్తియా.

౯.

అట్ఠసతసహస్సానం, సన్నిపాతో తదా అహు;

పహీనమదమోహానం, సన్తచిత్తాన తాదినం.

౧౦.

సత్తసతసహస్సానం ¶ , దుతియో ఆసి సమాగమో;

అనఙ్గణానం విరజానం, ఉపసన్తాన తాదినం.

౧౧.

ఛన్నం సతసహస్సానం, తతియో ఆసి సమాగమో;

అభిఞ్ఞాబలప్పత్తానం, నిబ్బుతానం తపస్సినం.

౧౨.

అహం తేన సమయేన, యక్ఖో ఆసిం మహిద్ధికో;

నేకానం యక్ఖకోటీనం, వసవత్తిమ్హి ఇస్సరో.

౧౩.

తదాపి తం బుద్ధవరం, ఉపగన్త్వా మహేసినం;

అన్నపానేన తప్పేసిం, ససఙ్ఘం లోకనాయకం.

౧౪.

సోపి మం తదా బ్యాకాసి, విసుద్ధనయనో ముని;

‘‘అపరిమేయ్యితో కప్పే, అయం బుద్ధో భవిస్సతి.

౧౫.

‘‘పధానం ¶ పదహిత్వాన…పే… ¶ హేస్సామ సమ్ముఖా ఇమం’’.

౧౬.

తస్సాపి వచనం సుత్వా, హట్ఠో సంవిగ్గమానసో;

ఉత్తరిం వతమధిట్ఠాసిం, దసపారమిపూరియా.

౧౭.

నగరం ¶ చన్దవతీ నామ, యసవా నామ ఖత్తియో;

మాతా యసోధరా నామ, అనోమదస్సిస్స సత్థునో.

౧౮.

దసవస్ససహస్సాని, అగారం అజ్ఝ సో వసి;

సిరీ ఉపసిరీ వడ్ఢో, తయో పాసాదముత్తమా.

౧౯.

తేవీసతిసహస్సాని, నారియో సమలఙ్కతా;

సిరిమా నామ సా నారీ, ఉపవాణో నామ అత్రజో.

౨౦.

నిమిత్తే చతురో దిస్వా, సివికాయాభినిక్ఖమి;

అనూనదసమాసాని, పధానం పదహీ జినో.

౨౧.

బ్రహ్మునా ¶ ¶ యాచితో సన్తో, అనోమదస్సీ మహాముని;

వత్తి చక్కం మహావీరో, ఉయ్యానే సో సుదస్సనే [సుదస్సనుయ్యానముత్తమే (స్యా. కం.)].

౨౨.

నిసభో చ అనోమో చ [అసోకో చ (సీ.)], అహేసుం అగ్గసావకా;

వరుణో నాముపట్ఠాకో, అనోమదస్సిస్స సత్థునో.

౨౩.

సున్దరీ చ సుమనా చ, అహేసుం అగ్గసావికా;

బోధి తస్స భగవతో, అజ్జునోతి పవుచ్చతి.

౨౪.

నన్దివడ్ఢో సిరివడ్ఢో, అహేసుం అగ్గుపట్ఠకా;

ఉప్పలా చేవ పదుమా చ, అహేసుం అగ్గుపట్ఠికా.

౨౫.

అట్ఠపణ్ణాసరతనం ¶ , అచ్చుగ్గతో మహాముని;

పభా నిద్ధావతీ తస్స, సతరంసీవ ఉగ్గతో.

౨౬.

వస్ససతసహస్సాని, ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౨౭.

సుపుప్ఫితం పావచనం, అరహన్తేహి తాదిహి;

వీతరాగేహి విమలేహి, సోభిత్థ జినసాసనం.

౨౮.

సో చ సత్థా అమితయసో, యుగాని తాని అతులియాని;

సబ్బం తమన్తరహితం, నను రిత్తా సబ్బసఙ్ఖారా.

౨౯.

అనోమదస్సీ జినో సత్థా, ధమ్మారామమ్హి నిబ్బుతో;

తత్థేవస్స జినథూపో, ఉబ్బేధో పఞ్చవీసతీతి.

అనోమదస్సిస్స భగవతో వంసో సత్తమో.

౧౦. పదుమబుద్ధవంసో

౧.

అనోమదస్సిస్స ¶ ¶ అపరేన, సమ్బుద్ధో ద్విపదుత్తమో;

పదుమో నామ నామేన, అసమో అప్పటిపుగ్గలో.

౨.

తస్సాపి అసమం సీలం, సమాధిపి అనన్తకో;

అసఙ్ఖేయ్యం ఞాణవరం, విముత్తిపి అనూపమా.

౩.

తస్సాపి ¶ అతులతేజస్స, ధమ్మచక్కప్పవత్తనే;

అభిసమయా తయో ఆసుం, మహాతమపవాహనా.

౪.

పఠమాభిసమయే బుద్ధో, కోటిసతమబోధయి;

దుతియాభిసమయే ధీరో, నవుతికోటిమబోధయి.

౫.

యదా చ పదుమో బుద్ధో, ఓవదీ సకమత్రజం;

తదా అసీతికోటీనం, తతియాభిసమయో అహు.

౬.

సన్నిపాతా తయో ఆసుం, పదుమస్స మహేసినో;

కోటిసతసహస్సానం, పఠమో ఆసి సమాగమో.

౭.

కథినత్థారసమయే ¶ , ఉప్పన్నే కథినచీవరే;

ధమ్మసేనాపతిత్థాయ, భిక్ఖూ సిబ్బింసు [యాచింసు (క.)] చీవరం.

౮.

తదా తే విమలా భిక్ఖూ, ఛళభిఞ్ఞా మహిద్ధికా;

తీణి సతసహస్సాని, సమింసు అపరాజితా.

౯.

పునాపరం సో నరాసభో [నరవుసభో (స్యా. కం.)], పవనే వాసం ఉపాగమి;

తదా సమాగమో ఆసి, ద్విన్నం సతసహస్సినం.

౧౦.

అహం తేన సమయేన, సీహో ఆసిం మిగాధిభూ;

వివేకమనుబ్రూహన్తం ¶ , పవనే అద్దసం జినం.

౧౧.

వన్దిత్వా సిరసా పాదే, కత్వాన తం పదక్ఖిణం;

తిక్ఖత్తుం అభినాదిత్వా, సత్తాహం జినముపట్ఠహం.

౧౨.

సత్తాహం వరసమాపత్తియా, వుట్ఠహిత్వా తథాగతో;

మనసా చిన్తయిత్వాన, కోటిభిక్ఖూ సమానయి.

౧౩.

తదాపి సో మహావీరో, తేసం మజ్ఝే వియాకరి;

‘‘అపరిమేయ్యితో కప్పే, అయం బుద్ధో భవిస్సతి.

౧౪.

‘‘పధానం పదహిత్వాన…పే… ¶ హేస్సామ సమ్ముఖా ఇమం’’.

౧౫.

తస్సాపి వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దసపారమిపూరియా.

౧౬.

చమ్పకం నామ నగరం, అసమో నామ ఖత్తియో;

అసమా నామ జనికా, పదుమస్స మహేసినో.

౧౭.

దసవస్ససహస్సాని ¶ ¶ , అగారం అజ్ఝ సో వసి;

నన్దావసుయసుత్తరా ¶ , తయో పాసాదముత్తమా.

౧౮.

తేత్తింస చ సహస్సాని, నారియో సమలఙ్కతా;

ఉత్తరా నామ సా నారీ, రమ్మో నామాసి అత్రజో.

౧౯.

నిమిత్తే చతురో దిస్వా, రథయానేన నిక్ఖమి;

అనూనఅట్ఠమాసాని, పధానం పదహీ జినో.

౨౦.

బ్రహ్మునా యాచితో సన్తో, పదుమో లోకనాయకో;

వత్తి చక్కం మహావీరో, ధనఞ్చుయ్యానముత్తమే.

౨౧.

సాలో చ ఉపసాలో చ, అహేసుం అగ్గసావకా;

వరుణో నాముపట్ఠాకో, పదుమస్స మహేసినో.

౨౨.

రాధా ¶ చేవ సురాధా చ, అహేసుం అగ్గసావికా;

బోధి తస్స భగవతో, మహాసోణోతి వుచ్చతి.

౨౩.

భియ్యో చేవ అసమో చ, అహేసుం అగ్గుపట్ఠకా;

రుచీ చ నన్దరామా చ, అహేసుం అగ్గుపట్ఠికా.

౨౪.

అట్ఠపణ్ణాసరతనం, అచ్చుగ్గతో మహాముని;

పభా నిద్ధావతీ తస్స, అసమా సబ్బసో దిసా.

౨౫.

చన్దప్పభా సూరియప్పభా, రతనగ్గిమణిప్పభా;

సబ్బాపి తా హతా హోన్తి, పత్వా జినపభుత్తమం.

౨౬.

వస్ససతసహస్సాని, ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౨౭.

పరిపక్కమానసే ¶ సత్తే, బోధయిత్వా అసేసతో;

సేసకే అనుసాసిత్వా, నిబ్బుతో సో ససావకో.

౨౮.

ఉరగోవ తచం జిణ్ణం, వద్ధపత్తంవ పాదపో;

జహిత్వా సబ్బసఙ్ఖారే, నిబ్బుతో సో యథా సిఖీ.

౨౯.

పదుమో జినవరో సత్థా, ధమ్మారామమ్హి నిబ్బుతో;

ధాతువిత్థారికం ఆసి, తేసు తేసు పదేసతోతి.

పదుమస్స భగవతో వంసో అట్ఠమో.

౧౧. నారదబుద్ధవంసో

౧.

పదుమస్స ¶ ¶ అపరేన, సమ్బుద్ధో ద్విపదుత్తమో;

నారదో నామ నామేన, అసమో అప్పటిపుగ్గలో.

౨.

సో బుద్ధో చక్కవత్తిస్స, జేట్ఠో దయితఓరసో;

ఆముక్కమాలాభరణో, ఉయ్యానం ఉపసఙ్కమి.

౩.

తత్థాసి రుక్ఖో యసవిపులో, అభిరూపో బ్రహా సుచి;

తమజ్ఝపత్వా ఉపనిసీది, మహాసోణస్స హేట్ఠతో.

౪.

తత్థ ¶ ఞాణవరుప్పజ్జి, అనన్తం వజిరూపమం;

తేన విచిని సఙ్ఖారే, ఉక్కుజ్జమవకుజ్జకం [కుజ్జతం (స్యా. కం.)].

౫.

తత్థ సబ్బకిలేసాని, అసేసమభివాహయి;

పాపుణీ కేవలం బోధిం, బుద్ధఞాణే చ చుద్దస.

౬.

పాపుణిత్వాన ¶ సమ్బోధిం, ధమ్మచక్కం పవత్తయి;

కోటిసతసహస్సానం, పఠమాభిసమయో అహు.

౭.

మహాదోణం నాగరాజం, వినయన్తో మహాముని;

పాటిహేరం తదాకాసి, దస్సయన్తో సదేవకే.

౮.

తదా దేవమనుస్సానం, తమ్హి ధమ్మప్పకాసనే;

నవుతికోటిసహస్సాని, తరింసు సబ్బసంసయం.

౯.

యమ్హి కాలే మహావీరో, ఓవదీ సకమత్రజం;

అసీతికోటిసహస్సానం, తతియాభిసమయో అహు.

౧౦.

సన్నిపాతా తయో ఆసుం, నారదస్స మహేసినో;

కోటిసతసహస్సానం, పఠమో ఆసి సమాగమో.

౧౧.

యదా బుద్ధో బుద్ధగుణం, సనిదానం పకాసయి;

నవుతికోటిసహస్సాని, సమింసు విమలా తదా.

౧౨.

యదా వేరోచనో నాగో, దానం దదాతి సత్థునో;

తదా సమింసు జినపుత్తా, అసీతిసతసహస్సియో.

౧౩.

అహం ¶ తేన సమయేన, జటిలో ఉగ్గతాపనో;

అన్తలిక్ఖచరో ఆసిం, పఞ్చాభిఞ్ఞాసు పారగూ.

౧౪.

తదాపాహం అసమసమం, ససఙ్ఘం సపరిజ్జనం;

అన్నపానేన తప్పేత్వా, చన్దనేనాభిపూజయిం.

౧౫.

సోపి మం తదా బ్యాకాసి, నారదో లోకనాయకో;

‘‘అపరిమేయ్యితో ¶ కప్పే, అయం బుద్ధో భవిస్సతి.

౧౬.

‘‘పధానం పదహిత్వాన…పే… ¶ హేస్సామ సమ్ముఖా ఇమం’’.

౧౭.

తస్సాపి ¶ వచనం సుత్వా, భియ్యో హాసేత్వ మానసం;

అధిట్ఠహిం వతం ఉగ్గం, దసపారమిపూరియా.

౧౮.

నగరం ధఞ్ఞవతీ నామ, సుదేవో నామ ఖత్తియో;

అనోమా నామ జనికా, నారదస్స మహేసినో.

౧౯.

నవవస్ససహస్సాని ¶ , అగారం అజ్ఝ సో వసి;

జితో విజితాభిరామో, తయో పాసాదముత్తమా.

౨౦.

తిచత్తారీససహస్సాని, నారియో సమలఙ్కతా;

విజితసేనా నామ నారీ, నన్దుత్తరో నామ అత్రజో.

౨౧.

నిమిత్తే చతురో దిస్వా, పదసా గమనేన నిక్ఖమి;

సత్తాహం పధానచారం, అచరీ పురిసుత్తమో [లోకనాయకో (సీ. క.)].

౨౨.

బ్రహ్మునా ¶ యాచితో సన్తో, నారదో లోకనాయకో;

వత్తి చక్కం మహావీరో, ధనఞ్చుయ్యానముత్తమే.

౨౩.

భద్దసాలో జితమిత్తో, అహేసుం అగ్గసావకా;

వాసేట్ఠో నాముపట్ఠాకో, నారదస్స మహేసినో.

౨౪.

ఉత్తరా ఫగ్గునీ చేవ, అహేసుం అగ్గసావికా;

బోధి తస్స భగవతో, మహాసోణోతి వుచ్చతి.

౨౫.

ఉగ్గరిన్దో వసభో చ, అహేసుం అగ్గుపట్ఠకా;

ఇన్దావరీ చ వణ్డీ [ఉన్దీ (సీ.), గణ్డీ (స్యా. కం.)] చ, అహేసుం అగ్గుపట్ఠికా.

౨౬.

అట్ఠాసీతిరతనాని ¶ , అచ్చుగ్గతో మహాముని;

కఞ్చనగ్ఘియసఙ్కాసో, దససహస్సీ విరోచతి.

౨౭.

తస్స బ్యామప్పభా కాయా, నిద్ధావతి దిసోదిసం;

నిరన్తరం దివారత్తిం, యోజనం ఫరతే సదా.

౨౮.

న కేచి తేన సమయేన, సమన్తా యోజనే జనా;

ఉక్కాపదీపే ఉజ్జాలేన్తి, బుద్ధరంసీహి ఓత్థటా.

౨౯.

నవుతివస్ససహస్సాని, ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౩౦.

యథా ఉళూహి గగనం, విచిత్తం ఉపసోభతి;

తథేవ సాసనం తస్స, అరహన్తేహి సోభతి.

౩౧.

సంసారసోతం తరణాయ, సేసకే పటిపన్నకే;

ధమ్మసేతుం ¶ దళ్హం కత్వా, నిబ్బుతో సో నరాసభో.

౩౨.

సోపి బుద్ధో అసమసమో, తేపి ఖీణాసవా అతులతేజా;

సబ్బం తమన్తరహితం, నను రిత్తా సబ్బసఙ్ఖారా.

౩౩.

నారదో జినవసభో, నిబ్బుతో సుదస్సనే పురే;

తత్థేవస్స థూపవరో, చతుయోజనముగ్గతోతి.

నారదస్స భగవతో వంసో నవమో.

౧౨. పదుముత్తరబుద్ధవంసో

౧.

నారదస్స ¶ ¶ అపరేన, సమ్బుద్ధో ద్విపదుత్తమో;

పదుముత్తరో నామ జినో, అక్ఖోభో సాగరూపమో.

౨.

మణ్డకప్పోవ సో ఆసి, యమ్హి బుద్ధో అజాయథ;

ఉస్సన్నకుసలా జనతా, తమ్హి కప్పే అజాయథ.

౩.

పదుముత్తరస్స భగవతో, పఠమే ధమ్మదేసనే;

కోటిసతసహస్సానం, ధమ్మాభిసమయో అహు.

౪.

తతో పరమ్పి వస్సన్తే, తప్పయన్తే చ పాణినే;

సత్తతింససతసహస్సానం, దుతియాభిసమయో అహు.

౫.

యమ్హి ¶ కాలే మహావీరో, ఆనన్దం ఉపసఙ్కమి;

పితుసన్తికం ఉపగన్త్వా, ఆహనీ అమతదున్దుభిం.

౬.

ఆహతే అమతభేరిమ్హి, వస్సన్తే ధమ్మవుట్ఠియా;

పఞ్ఞాససతసహస్సానం, తతియాభిసమయో అహు.

౭.

ఓవాదకో ¶ విఞ్ఞాపకో, తారకో సబ్బపాణినం;

దేసనాకుసలో బుద్ధో, తారేసి జనతం బహుం.

౮.

సన్నిపాతా తయో ఆసుం, పదుముత్తరస్స సత్థునో;

కోటిసతసహస్సానం, పఠమో ఆసి సమాగమో.

౯.

యదా బుద్ధో అసమసమో, వసి వేభారపబ్బతే;

నవుతికోటిసహస్సానం, దుతియో ఆసి సమాగమో.

౧౦.

పున చారికం పక్కన్తే, గామనిగమరట్ఠతో;

అసీతికోటిసహస్సానం, తతియో ఆసి సమాగమో.

౧౧.

అహం తేన సమయేన, జటిలో నామ రట్ఠికో;

సమ్బుద్ధప్పముఖం సఙ్ఘం, సభత్తం దుస్సమదాసహం.

౧౨.

సోపి మం బుద్ధో బ్యాకాసి, సఙ్ఘమజ్ఝే నిసీదియ;

‘‘సతసహస్సితో కప్పే, అయం బుద్ధో భవిస్సతి.

౧౩.

‘‘పధానం ¶ పదహిత్వాన…పే… ¶ హేస్సామ సమ్ముఖా ఇమం’’.

౧౪.

తస్సాపి వచనం సుత్వా, ఉత్తరిం వతమధిట్ఠహిం;

అకాసిం ఉగ్గదళ్హం ధితిం, దసపారమిపూరియా.

౧౫.

బ్యాహతా తిత్థియా సబ్బే, విమనా దుమ్మనా తదా;

న తేసం కేచి పరిచరన్తి, రట్ఠతో నిచ్ఛుభన్తి తే.

౧౬.

సబ్బే ¶ తత్థ సమాగన్త్వా, ఉపగచ్ఛుం బుద్ధసన్తికే;

తువం నాథో మహావీర, సరణం హోహి చక్ఖుమ.

౧౭.

అనుకమ్పకో కారుణికో, హితేసీ సబ్బపాణినం;

సమ్పత్తే తిత్థియే సబ్బే, పఞ్చసీలే పతిట్ఠపి.

౧౮.

ఏవం నిరాకులం ఆసి, సుఞ్ఞతం తిత్థియేహి తం;

విచిత్తం అరహన్తేహి, వసీభూతేహి తాదిహి.

౧౯.

నగరం ¶ హంసవతీ నామ, ఆనన్దో నామ ఖత్తియో;

సుజాతా నామ జనికా, పదుముత్తరస్స సత్థునో.

౨౦.

దసవస్ససహస్సాని, అగారం అజ్ఝ సో వసి;

నరవాహనో యసో వసవత్తీ [నారివాహనో యసవతీ (స్యా. కం.)], తయో పాసాదముత్తమా.

౨౧.

తిచత్తారీససహస్సాని, నారియో సమలఙ్కతా;

వసుదత్తా నామ నారీ, ఉత్తమో నామ అత్రజో.

౨౨.

నిమిత్తే చతురో దిస్వా, పాసాదేనాభినిక్ఖమి;

సత్తాహం పధానచారం, అచరీ పురిసుత్తమో.

౨౩.

బ్రహ్మునా ¶ యాచితో సన్తో, పదుముత్తరో వినాయకో;

వత్తి చక్కం మహావీరో, మిథిలుయ్యానముత్తమే.

౨౪.

దేవలో చ సుజాతో చ, అహేసుం అగ్గసావకా;

సుమనో నాముపట్ఠాకో, పదుముత్తరస్స మహేసినో.

౨౫.

అమితా చ అసమా చ, అహేసుం అగ్గసావికా;

బోధి తస్స భగవతో, సలలోతి పవుచ్చతి.

౨౬.

వితిణ్ణో చేవ [అమితో చేవ (స్యా.)] తిస్సో చ, అహేసుం అగ్గుపట్ఠకా;

హట్ఠా చేవ విచిత్తా చ, అహేసుం అగ్గుపట్ఠికా.

౨౭.

అట్ఠపణ్ణాసరతనం, అచ్చుగ్గతో మహాముని;

కఞ్చనగ్ఘియసఙ్కాసో, ద్వత్తింసవరలక్ఖణో.

౨౮.

కుట్టా ¶ కవాటా భిత్తీ చ, రుక్ఖా నగసిలుచ్చయా;

న తస్సావరణం అత్థి, సమన్తా ద్వాదసయోజనే.

౨౯.

వస్ససతసహస్సాని, ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౩౦.

సన్తారేత్వా బహుజనం, ఛిన్దిత్వా సబ్బసంసయం;

జలిత్వా అగ్గిక్ఖన్ధోవ నిబ్బుతో సో ససావకో.

౩౧.

పదుముత్తరో జినో బుద్ధో, నన్దారామమ్హి నిబ్బుతో;

తత్థేవస్స థూపవరో, ద్వాదసుబ్బేధయోజనోతి.

పదుముత్తరస్స భగవతో వంసో దసమో.

౧౩. సుమేధబుద్ధవంసో

౧.

పదుముత్తరస్స ¶ ¶ ¶ అపరేన, సుమేధో నామ నాయకో;

దురాసదో ఉగ్గతేజో, సబ్బలోకుత్తమో ముని.

౨.

పసన్ననేత్తో సుముఖో, బ్రహా ఉజు పతాపవా;

హితేసీ సబ్బసత్తానం, బహూ మోచేసి బన్ధనా.

౩.

యదా బుద్ధో పాపుణిత్వా, కేవలం బోధిముత్తమం;

సుదస్సనమ్హి నగరే, ధమ్మచక్కం పవత్తయి.

౪.

తస్సాపి అభిసమయా తీణి, అహేసుం ధమ్మదేసనే;

కోటిసతసహస్సానం, పఠమాభిసమయో అహు.

౫.

పునాపరం కుమ్భకణ్ణం, యక్ఖం సో దమయీ జినో;

నవుతికోటిసహస్సానం, దుతియాభిసమయో అహు.

౬.

పునాపరం అమితయసో, చతుసచ్చం పకాసయి;

అసీతికోటిసహస్సానం, తతియాభిసమయో అహు.

౭.

సన్నిపాతా తయో ఆసుం, సుమేధస్స మహేసినో;

ఖీణాసవానం విమలానం, సన్తచిత్తాన తాదినం.

౮.

సుదస్సనం ¶ నామ నగరం, ఉపగఞ్ఛి జినో యదా;

తదా ఖీణాసవా భిక్ఖూ, సమింసు సతకోటియో.

౯.

పునాపరం దేవకూటే, భిక్ఖూనం కథినత్థతే;

తదా నవుతికోటీనం, దుతియో ఆసి సమాగమో.

౧౦.

పునాపరం ¶ దసబలో, యదా చరతి చారికం;

తదా అసీతికోటీనం, తతియో ఆసి సమాగమో.

౧౧.

అహం తేన సమయేన, ఉత్తరో నామ మాణవో;

అసీతికోటియో మయ్హం, ఘరే సన్నిచితం ధనం.

౧౨.

కేవలం సబ్బం దత్వాన, ససఙ్ఘే లోకనాయకే;

సరణం తస్సుపగఞ్ఛిం, పబ్బజ్జఞ్చాభిరోచయిం.

౧౩.

సోపి మం బుద్ధో బ్యాకాసి, కరోన్తో అనుమోదనం;

‘‘తింసకప్పసహస్సమ్హి, అయం బుద్ధో భవిస్సతి.

౧౪.

‘‘పధానం ¶ పదహిత్వాన…పే… ¶ హేస్సామ సమ్ముఖా ఇమం’’.

౧౫.

తస్సాపి వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దసపారమిపూరియా.

౧౬.

సుత్తన్తం వినయఞ్చాపి, నవఙ్గం సత్థుసాసనం;

సబ్బం పరియాపుణిత్వాన, సోభయిం జినసాసనం.

౧౭.

తత్థప్పమత్తో ¶ ¶ విహరన్తో, నిసజ్జట్ఠానచఙ్కమే;

అభిఞ్ఞాసు పారమిం గన్త్వా, బ్రహ్మలోకమగఞ్ఛహం.

౧౮.

సుదస్సనం నామ నగరం, సుదత్తో నామ ఖత్తియో;

సుదత్తా నామ జనికా, సుమేధస్స మహేసినో.

౧౯.

నవవస్ససహస్సాని, అగారం అజ్ఝ సో వసి;

సుచన్దకఞ్చనసిరివడ్ఢా, తయో పాసాదముత్తమా.

౨౦.

తిసోళససహస్సాని, నారియో సమలఙ్కతా;

సుమనా నామ సా నారీ, పునబ్బసు నామ అత్రజో.

౨౧.

నిమిత్తే చతురో దిస్వా, హత్థియానేన నిక్ఖమి;

అనూనకం అడ్ఢమాసం, పధానం పదహీ జినో.

౨౨.

బ్రహ్మునా యాచితో సన్తో, సుమేధో లోకనాయకో;

వత్తి చక్కం మహావీరో, సుదస్సనుయ్యానముత్తమే.

౨౩.

సరణో ¶ సబ్బకామో చ, అహేసుం అగ్గసావకా;

సాగరో నాముపట్ఠాకో, సుమేధస్స మహేసినో.

౨౪.

రామా చేవ సురామా చ, అహేసుం అగ్గసావికా;

బోధి తస్స భగవతో, మహానీపోతి వుచ్చతి.

౨౫.

ఉరువేలా యసవా చ, అహేసుం అగ్గుపట్ఠకా;

యసోధరా సిరిమా చ [యసా నామ సిరిమా చ (స్యా. కం.)], అహేసుం అగ్గుపట్ఠికా.

౨౬.

అట్ఠాసీతిరతనాని, అచ్చుగ్గతో మహాముని;

ఓభాసేతి దిసా సబ్బా, చన్దో తారగణే యథా.

౨౭.

చక్కవత్తిమణీ ¶ నామ, యథా తపతి యోజనం;

తథేవ తస్స రతనం, సమన్తా ఫరతి యోజనం.

౨౮.

నవుతివస్ససహస్సాని ¶ , ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౨౯.

తేవిజ్జఛళభిఞ్ఞేహి, బలప్పత్తేహి తాదిహి;

సమాకులమిదం ఆసి, అరహన్తేహి సాధుహి.

౩౦.

తేపి సబ్బే అమితయసా, విప్పముత్తా నిరూపధీ;

ఞాణాలోకం దస్సయిత్వా, నిబ్బుతా తే మహాయసా.

౩౧.

సుమేధో జినవరో బుద్ధో, మేధారామమ్హి నిబ్బుతో;

ధాతువిత్థారికం ఆసి, తేసు తేసు పదేసతోతి.

సుమేధస్స భగవతో వంసో ఏకాదసమో.

౧౪. సుజాతబుద్ధవంసో

౧.

తత్థేవ ¶ మణ్డకప్పమ్హి, సుజాతో నామ నాయకో;

సీహహనుసభక్ఖన్ధో, అప్పమేయ్యో దురాసదో.

౨.

చన్దోవ విమలో సుద్ధో, సతరంసీవ పతాపవా;

ఏవం సోభతి సమ్బుద్ధో, జలన్తో సిరియా సదా.

౩.

పాపుణిత్వాన ¶ సమ్బుద్ధో, కేవలం బోధిముత్తమం;

సుమఙ్గలమ్హి నగరే, ధమ్మచక్కం పవత్తయి.

౪.

దేసేన్తే ¶ [దేసేన్తో (స్యా. కం.)] పవరం ధమ్మం, సుజాతే లోకనాయకే [సుజాతో లోకనాయకో (స్యా. కం.)];

అసీతికోటీ అభిసమింసు, పఠమే ధమ్మదేసనే.

౫.

యదా సుజాతో అమితయసో, దేవే వస్సం ఉపాగమి;

సత్తతింససతసహస్సానం, దుతియాభిసమయో అహు.

౬.

యదా సుజాతో అసమసమో, ఉపగచ్ఛి పితుసన్తికం;

సట్ఠిసతసహస్సానం [సత్తతింససహస్సానం (సీ.)], తతియాభిసమయో అహు.

౭.

సన్నిపాతా తయో ఆసుం, సుజాతస్స మహేసినో;

ఖీణాసవానం విమలానం, సన్తచిత్తాన తాదినం.

౮.

అభిఞ్ఞాబలప్పత్తానం ¶ , అప్పత్తానం భవాభవే;

సట్ఠిసతసహస్సాని, పఠమం సన్నిపతింసు తే.

౯.

పునాపరం సన్నిపాతే, తిదివోరోహణే జినే;

పఞ్ఞాససతసహస్సానం, దుతియో ఆసి సమాగమో.

౧౦.

ఉపసఙ్కమన్తో నరాసభం, తస్స యో అగ్గసావకో;

చతూహి సతసహస్సేహి, సమ్బుద్ధం ఉపసఙ్కమి.

౧౧.

అహం తేన సమయేన, చతుదీపమ్హి ఇస్సరో;

అన్తలిక్ఖచరో ఆసిం, చక్కవత్తీ మహబ్బలో.

౧౨.

లోకే అచ్ఛరియం దిస్వా, అబ్భుతం లోమహంసనం;

ఉపగన్త్వాన వన్దిం సో, సుజాతం లోకనాయకం.

౧౩.

చతుదీపే మహారజ్జం, రతనే సత్త ఉత్తమే;

బుద్ధే నియ్యాదయిత్వాన, పబ్బజిం తస్స సన్తికే.

౧౪.

ఆరామికా జనపదే, ఉట్ఠానం పటిపిణ్డియ;

ఉపనేన్తి ¶ భిక్ఖుసఙ్ఘస్స, పచ్చయం సయనాసనం.

౧౫.

సోపి మం బుద్ధో [తదా (స్యా. కం.)] బ్యాకాసి, దససహస్సిమ్హి ఇస్సరో;

‘‘తింసకప్పసహస్సమ్హి, అయం బుద్ధో భవిస్సతి.

౧౬.

‘‘పధానం ¶ పదహిత్వాన…పే… హేస్సామ సమ్ముఖా ఇమం’’.

౧౭.

తస్సాపి వచనం సుత్వా, భియ్యో హాసం జనేసహం;

అధిట్ఠహిం వతం ఉగ్గం, దసపారమిపూరియా.

౧౮.

సుత్తన్తం ¶ వినయఞ్చాపి, నవఙ్గం సత్థుసాసనం;

సబ్బం పరియాపుణిత్వాన, సోభయిం జినసాసనం.

౧౯.

తత్థప్పమత్తో విహరన్తో, బ్రహ్మం భావేత్వ భావనం;

అభిఞ్ఞాపారమిం గన్త్వా, బ్రహ్మలోకమగఞ్ఛహం.

౨౦.

సుమఙ్గలం నామ నగరం, ఉగ్గతో నామ ఖత్తియో;

మాతా పభావతీ నామ, సుజాతస్స మహేసినో.

౨౧.

నవవస్ససహస్సాని ¶ , అగారం అజ్ఝ సో వసి;

సిరీ ఉపసిరీ నన్దో, తయో పాసాదముత్తమా.

౨౨.

తేవీసతిసహస్సాని ¶ , నారియో సమలఙ్కతా;

సిరినన్దా నామ నారీ, ఉపసేనో నామ అత్రజో.

౨౩.

నిమిత్తే చతురో దిస్వా, అస్సయానేన నిక్ఖమి;

అనూననవమాసాని, పధానం పదహీ జినో.

౨౪.

బ్రహ్మునా యాచితో సన్తో, సుజాతో లోకనాయకో;

వత్తి చక్కం మహావీరో, సుమఙ్గలుయ్యానముత్తమే.

౨౫.

సుదస్సనో సుదేవో చ, అహేసుం అగ్గసావకా;

నారదో నాముపట్ఠాకో, సుజాతస్స మహేసినో.

౨౬.

నాగా చ నాగసమాలా చ, అహేసుం అగ్గసావికా;

బోధి తస్స భగవతో, మహావేళూతి వుచ్చతి.

౨౭.

సో చ రుక్ఖో ఘనక్ఖన్ధో [ఘనరుచిరో (సీ. క.)], అచ్ఛిద్దో హోతి పత్తికో;

ఉజు వంసో బ్రహా హోతి, దస్సనీయో మనోరమో.

౨౮.

ఏకక్ఖన్ధో పవడ్ఢిత్వా, తతో సాఖా పభిజ్జతి;

యథా సుబద్ధో మోరహత్థో, ఏవం సోభతి సో దుమో.

౨౯.

న తస్స కణ్టకా హోన్తి, నాపి ఛిద్దం మహా అహు;

విత్థిణ్ణసాఖో అవిరలో, సన్దచ్ఛాయో మనోరమో.

౩౦.

సుదత్తో చేవ చిత్తో చ, అహేసుం అగ్గుపట్ఠకా;

సుభద్దా చ పదుమా చ, అహేసుం అగ్గుపట్ఠికా.

౩౧.

పఞ్ఞాసరతనో ¶ ఆసి, ఉచ్చత్తనేన సో జినో;

సబ్బాకారవరూపేతో, సబ్బగుణముపాగతో.

౩౨.

తస్స పభా అసమసమా, నిద్ధావతి సమన్తతో;

అప్పమాణో అతులియో, ఓపమ్మేహి అనూపమో.

౩౩.

నవుతివస్ససహస్సాని ¶ , ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౩౪.

యథాపి సాగరే ఊమీ, గగనే తారకా యథా;

ఏవం తదా పావచనం, అరహన్తేహి చిత్తితం [చిత్తకం (స్యా. కం.)].

౩౫.

సో ¶ ¶ చ బుద్ధో అసమసమో, గుణాని చ తాని అతులియాని;

సబ్బం తమన్తరహితం, నను రిత్తా సబ్బసఙ్ఖారా.

౩౬.

సుజాతో జినవరో బుద్ధో, సిలారామమ్హి నిబ్బుతో;

తత్థేవ తస్స చేతియో [తత్థేవ చేతియో సత్థు (స్యా. కం.)], తీణిగావుతముగ్గతోతి.

సుజాతస్స భగవతో వంసో ద్వాదసమో.

౧౫. పియదస్సీబుద్ధవంసో

౧.

సుజాతస్స అపరేన, సయమ్భూ లోకనాయకో;

దురాసదో అసమసమో, పియదస్సీ మహాయసో.

౨.

సోపి ¶ బుద్ధో అమితయసో, ఆదిచ్చోవ విరోచతి;

సబ్బం తమం నిహన్త్వాన, ధమ్మచక్కం పవత్తయి.

౩.

తస్సాపి అతులతేజస్స, అహేసుం అభిసమయా తయో;

కోటిసతసహస్సానం, పఠమాభిసమయో అహు.

౪.

సుదస్సనో దేవరాజా, మిచ్ఛాదిట్ఠిమరోచయి;

తస్స దిట్ఠిం వినోదేన్తో, సత్థా ధమ్మమదేసయి.

౫.

జనసన్నిపాతో అతులో, మహాసన్నిపతీ తదా;

నవుతికోటిసహస్సానం, దుతియాభిసమయో అహు.

౬.

యదా దోణముఖం హత్థిం, వినేసి నరసారథి;

అసీతికోటిసహస్సానం, తతియాభిసమయో అహు.

౭.

సన్నిపాతా తయో ఆసుం, తస్సాపి పియదస్సినో;

కోటిసతసహస్సానం, పఠమో ఆసి సమాగమో.

౮.

తతో ¶ పరం నవుతికోటీ, సమింసు ఏకతో మునీ;

తతియే సన్నిపాతమ్హి, అసీతికోటియో అహూ.

౯.

అహం తేన సమయేన, కస్సపో నామ బ్రాహ్మణో [మానవో (స్యా. కం.)];

అజ్ఝాయకో మన్తధరో, తిణ్ణం వేదాన పారగూ.

౧౦.

తస్స ¶ ధమ్మం సుణిత్వాన, పసాదం జనయిం అహం;

కోటిసతసహస్సేహి, సఙ్ఘారామం అమాపయిం.

౧౧.

తస్స దత్వాన ఆరామం, హట్ఠో సంవిగ్గమానసో;

సరణే పఞ్చ సీలే చ [సరణం పఞ్చసీలఞ్చ (సీ.)], దళ్హం కత్వా సమాదియిం.

౧౨.

సోపి ¶ మం బుద్ధో బ్యాకాసి, సఙ్ఘమజ్ఝే నిసీదియ;

‘‘అట్ఠారసే కప్పసతే, అయం బుద్ధో భవిస్సతి.

౧౩.

‘‘పధానం ¶ పదహిత్వాన…పే… ¶ హేస్సామ సమ్ముఖా ఇమం’’.

౧౪.

తస్సాపి వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దసపారమిపూరియా.

౧౫.

సుధఞ్ఞం నామ నగరం, సుదత్తో నామ ఖత్తియో;

చన్దా నామాసి జనికా, పియదస్సిస్స సత్థునో.

౧౬.

నవవస్ససహస్సాని, అగారం అజ్ఝ సో వసి;

సునిమ్మలవిమలగిరిగుహా, తయో పాసాదముత్తమా.

౧౭.

తేత్తింససహస్సాని చ, నారియో సమలఙ్కతా;

విమలా నామ నారీ చ, కఞ్చనావేళో నామ అత్రజో.

౧౮.

నిమిత్తే ¶ చతురో దిస్వా, రథయానేన నిక్ఖమి;

ఛమాసం పధానచారం, అచరీ పురిసుత్తమో.

౧౯.

బ్రహ్మునా యాచితో సన్తో, పియదస్సీ మహాముని;

వత్తి చక్కం మహావీరో, ఉసభుయ్యానే మనోరమే.

౨౦.

పాలితో సబ్బదస్సీ చ, అహేసుం అగ్గసావకా;

సోభితో నాముపట్ఠాకో, పియదస్సిస్స సత్థునో.

౨౧.

సుజాతా ధమ్మదిన్నా చ, అహేసుం అగ్గసావికా;

బోధి తస్స భగవతో, కకుధోతి పవుచ్చతి.

౨౨.

సన్ధకో ధమ్మకో చేవ, అహేసుం అగ్గుపట్ఠకా;

విసాఖా ధమ్మదిన్నా చ, అహేసుం అగ్గుపట్ఠికా.

౨౩.

సోపి ¶ ¶ బుద్ధో అమితయసో, ద్వత్తింసవరలక్ఖణో;

అసీతిహత్థముబ్బేధో, సాలరాజావ దిస్సతి.

౨౪.

అగ్గిచన్దసూరియానం, నత్థి తాదిసికా పభా;

యథా అహు పభా తస్స, అసమస్స మహేసినో.

౨౫.

తస్సాపి దేవదేవస్స, ఆయు తావతకం అహు;

నవుతివస్ససహస్సాని, లోకే అట్ఠాసి చక్ఖుమా.

౨౬.

సోపి బుద్ధో అసమసమో, యుగానిపి తాని అతులియాని;

సబ్బం తమన్తరహితం, నను రిత్తా సబ్బసఙ్ఖారా.

౨౭.

పియదస్సీ మునివరో, అస్సత్థారామమ్హి నిబ్బుతో;

తత్థేవస్స జినథూపో, తీణియోజనముగ్గతోతి.

పియదస్సిస్స భగవతో వంసో తేరసమో.

౧౬. అత్థదస్సీబుద్ధవంసో

౧.

తత్థేవ ¶ ¶ మణ్డకప్పమ్హి, అత్థదస్సీ మహాయసో;

మహాతమం నిహన్త్వాన, పత్తో సమ్బోధిముత్తమం.

౨.

బ్రహ్మునా యాచితో సన్తో, ధమ్మచక్కం పవత్తయి;

అమతేన తప్పయీ లోకం, దససహస్సిసదేవకం.

౩.

తస్సాపి లోకనాథస్స, అహేసుం అభిసమయా తయో;

కోటిసతసహస్సానం, పఠమాభిసమయో అహు.

౪.

యదా బుద్ధో అత్థదస్సీ, చరతే దేవచారికం;

కోటిసతసహస్సానం, దుతియాభిసమయో అహు.

౫.

పునాపరం యదా బుద్ధో, దేసేసి పితుసన్తికే;

కోటిసతసహస్సానం, తతియాభిసమయో అహు.

౬.

సన్నిపాతా తయో ఆసుం, తస్సాపి చ మహేసినో;

ఖీణాసవానం విమలానం, సన్తచిత్తాన తాదినం.

౭.

అట్ఠనవుతిసహస్సానం ¶ , పఠమో ఆసి సమాగమో;

అట్ఠాసీతిసహస్సానం, దుతియో ఆసి సమాగమో.

౮.

అట్ఠసత్తతిసతసహస్సానం ¶ , తతియో ఆసి సమాగమో;

అనుపాదా విముత్తానం, విమలానం మహేసినం.

౯.

అహం తేన సమయేన, జటిలో ఉగ్గతాపనో;

సుసీమో నామ నామేన, మహియా సేట్ఠసమ్మతో.

౧౦.

దిబ్బం ¶ మన్దారవం పుప్ఫం, పదుమం పారిఛత్తకం;

దేవలోకాహరిత్వాన, సమ్బుద్ధమభిపూజయిం.

౧౧.

సోపి మం బుద్ధో బ్యాకాసి, అత్థదస్సీ మహాముని;

‘‘అట్ఠారసే కప్పసతే, అయం బుద్ధో భవిస్సతి.

౧౨.

‘‘పధానం పదహిత్వాన…పే… హేస్సామ సమ్ముఖా ఇమం’’.

౧౩.

తస్సాపి వచనం సుత్వా, హట్ఠో [తుట్ఠో (స్యా. కం.)] సంవిగ్గమానసో;

ఉత్తరిం వతమధిట్ఠాసిం, దసపారమిపూరియా.

౧౪.

సోభణం నామ నగరం, సాగరో నామ ఖత్తియో;

సుదస్సనా నామ జనికా, అత్థదస్సిస్స సత్థునో.

౧౫.

దసవస్ససహస్సాని, అగారం అజ్ఝ సో వసి;

అమరగిరి సుగిరి వాహనా, తయో పాసాదముత్తమా.

౧౬.

తేత్తింసఞ్చ ¶ సహస్సాని, నారియో సమలఙ్కతా;

విసాఖా నామ నారీ చ, సేలో నామాసి అత్రజో.

౧౭.

నిమిత్తే ¶ చతురో దిస్వా, అస్సయానేన నిక్ఖమి;

అనూనఅట్ఠమాసాని, పధానం పదహీ జినో.

౧౮.

బ్రహ్మునా యాచితో సన్తో, అత్థదస్సీ మహాయసో;

వత్తి చక్కం మహావీరో, అనోముయ్యానే నరాసభో.

౧౯.

సన్తో చ ఉపసన్తో చ, అహేసుం అగ్గసావకా;

అభయో నాముపట్ఠాకో, అత్థదస్సిస్స సత్థునో.

౨౦.

ధమ్మా చేవ సుధమ్మా చ, అహేసుం అగ్గసావికా;

బోధి తస్స భగవతో, చమ్పకోతి పవుచ్చతి.

౨౧.

నకులో చ నిసభో చ, అహేసుం అగ్గుపట్ఠకా;

మకిలా చ సునన్దా చ, అహేసుం అగ్గుపట్ఠికా.

౨౨.

సోపి ¶ ¶ బుద్ధో అసమసమో, అసీతిహత్థముగ్గతో;

సోభతే సాలరాజావ, ఉళురాజావ పూరితో.

౨౩.

తస్స పాకతికా రంసీ, అనేకసతకోటియో;

ఉద్ధం అధో దస దిసా, ఫరన్తి యోజనం సదా.

౨౪.

సోపి బుద్ధో నరాసభో, సబ్బసత్తుత్తమో ముని;

వస్ససతసహస్సాని, లోకే అట్ఠాసి చక్ఖుమా.

౨౫.

అతులం దస్సేత్వా ఓభాసం, విరోచేత్వా సదేవకే [అతులం దస్సయిత్వాన, ఓభాసేత్వా సదేవకే (సీ. క.)];

సోపి అనిచ్చతం పత్తో, యథగ్గుపాదానసఙ్ఖయా.

౨౬.

అత్థదస్సీ ¶ జినవరో, అనోమారామమ్హి నిబ్బుతో;

ధాతువిత్థారికం ఆసి, తేసు తేసు పదేసతోతి.

అత్థదస్సిస్స భగవతో వంసో చుద్దసమో.

౧౭. ధమ్మదస్సీబుద్ధవంసో

౧.

తత్థేవ ¶ మణ్డకప్పమ్హి, ధమ్మదస్సీ మహాయసో;

తమన్ధకారం విధమిత్వా, అతిరోచతి సదేవకే.

౨.

తస్సాపి అతులతేజస్స, ధమ్మచక్కప్పవత్తనే;

కోటిసతసహస్సానం, పఠమాభిసమయో అహు.

౩.

యదా బుద్ధో ధమ్మదస్సీ, వినేసి సఞ్జయం ఇసిం;

తదా నవుతికోటీనం, దుతియాభిసమయో అహు.

౪.

యదా సక్కో ఉపాగఞ్ఛి, సపరిసో వినాయకం;

తదా అసీతికోటీనం, తతియాభిసమయో అహు.

౫.

తస్సాపి దేవదేవస్స, సన్నిపాతా తయో అహుం [ఆసుం (సీ. స్యా.)];

ఖీణాసవానం విమలానం, సన్తచిత్తాన తాదినం.

౬.

యదా బుద్ధో ధమ్మదస్సీ, సరణే వస్సం ఉపాగమి;

తదా కోటిసతసహస్సానం [కోటిసహస్సానం (సీ. స్యా. కం.)], పఠమో ఆసి సమాగమో.

౭.

పునాపరం ¶ యదా బుద్ధో, దేవతో ఏతి మానుసం;

తదాపి సతకోటీనం, దుతియో ఆసి సమాగమో.

౮.

పునాపరం ¶ ¶ యదా బుద్ధో, పకాసేసి ధుతే గుణే;

తదా అసీతికోటీనం, తతియో ఆసి సమాగమో.

౯.

అహం తేన సమయేన, సక్కో ఆసిం పురిన్దదో;

దిబ్బేన గన్ధమాలేన, తురియేనాభిపూజయిం.

౧౦.

సోపి మం బుద్ధో బ్యాకాసి, దేవమజ్ఝే నిసీదియ;

‘‘అట్ఠారసే కప్పసతే, అయం బుద్ధో భవిస్సతి.

౧౧.

‘‘పధానం పదహిత్వాన…పే… ¶ హేస్సామ సమ్ముఖా ఇమం’’.

౧౨.

తస్సాపి వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దసపారమిపూరియా.

౧౩.

సరణం నామ నగరం, సరణో నామ ఖత్తియో;

సునన్దా నామ జనికా, ధమ్మదస్సిస్స సత్థునో.

౧౪.

అట్ఠవస్ససహస్సాని ¶ , అగారం అజ్ఝ సో వసి;

అరజో విరజో సుదస్సనో, తయో పాసాదముత్తమా.

౧౫.

తిచత్తారీససహస్సాని [చత్తాలీససహస్సాని (స్యా. కం.)], నారియో సమలఙ్కతా;

విచికోళి నామ నారీ, అత్రజో పుఞ్ఞవడ్ఢనో.

౧౬.

నిమిత్తే ¶ చతురో దిస్వా, పాసాదేనాభినిక్ఖమి;

సత్తాహం పధానచారం, అచరీ పురిసుత్తమో.

౧౭.

బ్రహ్మునా యాచితో సన్తో, ధమ్మదస్సీ నరాసభో;

వత్తి చక్కం మహావీరో, మిగదాయే నరుత్తమో.

౧౮.

పదుమో ఫుస్సదేవో చ, అహేసుం అగ్గసావకా;

సునేత్తో [సుదత్తో (స్యా. కం.)] నాముపట్ఠాకో, ధమ్మదస్సిస్స సత్థునో.

౧౯.

ఖేమా చ సచ్చనామా చ, అహేసుం అగ్గసావికా;

బోధి తస్స భగవతో, బిమ్బిజాలోతి వుచ్చతి.

౨౦.

సుభద్దో కటిస్సహో చేవ, అహేసుం అగ్గుపట్ఠకా;

సాళియా [సాలిసా (స్యా. కం.)] చ కళియా చ, అహేసుం అగ్గుపట్ఠికా.

౨౧.

సోపి ¶ బుద్ధో అసమసమో, అసీతిహత్థముగ్గతో;

అతిరోచతి తేజేన, దససహస్సిమ్హి ధాతుయా.

౨౨.

సుఫుల్లో ¶ సాలరాజావ, విజ్జూవ గగనే యథా;

మజ్ఝన్హికేవ సూరియో, ఏవం సో ఉపసోభథ.

౨౩.

తస్సాపి అతులతేజస్స, సమకం ఆసి జీవితం;

వస్ససతసహస్సాని, లోకే అట్ఠాసి చక్ఖుమా.

౨౪.

ఓభాసం ¶ దస్సయిత్వాన, విమలం కత్వాన సాసనం;

చవి చన్దోవ గగనే, నిబ్బుతో సో ససావకో.

౨౫.

ధమ్మదస్సీ మహావీరో, సాలారామమ్హి నిబ్బుతో;

తత్థేవస్స థూపవరో, తీణియోజనముగ్గతోతి.

ధమ్మదస్సిస్స భగవతో వంసో పన్నరసమో.

౧౮. సిద్ధత్థబుద్ధవంసో

౧.

ధమ్మదస్సిస్స ¶ అపరేన, సిద్ధత్థో నామ నాయకో;

నిహనిత్వా తమం సబ్బం, సూరియో అబ్భుగ్గతో యథా.

౨.

సోపి పత్వాన సమ్బోధిం, సన్తారేన్తో సదేవకం;

అభివస్సి ధమ్మమేఘేన, నిబ్బాపేన్తో సదేవకం.

౩.

తస్సాపి అతులతేజస్స, అహేసుం అభిసమయా తయో;

కోటిసతసహస్సానం, పఠమాభిసమయో అహు.

౪.

పునాపరం భీమరథే [హిమరట్ఠే (క.)], యదా ఆహని దున్దుభిం;

తదా నవుతికోటీనం, దుతియాభిసమయో అహు.

౫.

యదా బుద్ధో ధమ్మం దేసేసి, వేభారే సో పురుత్తమే;

తదా నవుతికోటీనం, తతియాభిసమయో అహు.

౬.

సన్నిపాతా తయో ఆసుం, తస్మిమ్పి ద్విపదుత్తమే;

ఖీణాసవానం విమలానం, సన్తచిత్తాన తాదినం.

౭.

కోటిసతానం ¶ ¶ నవుతీనం [నవుతియా (స్యా. కం.)], అసీతియాపి చ కోటినం;

ఏతే ఆసుం తయో ఠానా, విమలానం సమాగమే.

౮.

అహం ¶ తేన సమయేన, మఙ్గలో నామ తాపసో;

ఉగ్గతేజో దుప్పసహో, అభిఞ్ఞాబలసమాహితో.

౯.

జమ్బుతో ఫలమానేత్వా [ఫలమాహత్వా (సీ. స్యా.)] సిద్ధత్థస్స అదాసహం;

పటిగ్గహేత్వా సమ్బుద్ధో, ఇదం వచనమబ్రవి.

౧౦.

‘‘పస్సథ ఇమం తాపసం, జటిలం ఉగ్గతాపనం;

చతున్నవుతితో కప్పే, అయం బుద్ధో భవిస్సతి.

౧౧.

‘‘పధానం పదహిత్వాన…పే… ¶ హేస్సామ సమ్ముఖా ఇమం’’.

౧౨.

తస్సాపి వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దసపారమిపూరియా.

౧౩.

వేభారం నామ నగరం, ఉదేనో నామ ఖత్తియో;

సుఫస్సా నామ జనికా, సిద్ధత్థస్స మహేసినో.

౧౪.

దసవస్ససహస్సాని ¶ , అగారం అజ్ఝ సో వసి;

కోకాసుప్పలకోకనదా, తయో పాసాదముత్తమా.

౧౫.

తిసోళససహస్సాని, నారియో సమలఙ్కతా;

సోమనస్సా నామ సా నారీ, అనుపమో నామ అత్రజో.

౧౬.

నిమిత్తే చతురో దిస్వా, సివికాయాభినిక్ఖమి;

అనూనదసమాసాని, పధానం పదహీ జినో.

౧౭.

బ్రహ్మునా యాచితో సన్తో, సిద్ధత్థో లోకనాయకో;

వత్తి ¶ చక్కం మహావీరో, మిగదాయే నరుత్తమో.

౧౮.

సమ్బలో చ సుమిత్తో చ, అహేసుం అగ్గసావకా;

రేవతో నాముపట్ఠాకో, సిద్ధత్థస్స మహేసినో.

౧౯.

సీవలా చ సురామా చ, అహేసుం అగ్గసావికా;

బోధి తస్స భగవతో, కణికారోతి వుచ్చతి.

౨౦.

సుప్పియో చ సముద్దో చ, అహేసుం అగ్గుపట్ఠకా;

రమ్మా చేవ సురమ్మా చ, అహేసుం అగ్గుపట్ఠికా.

౨౧.

సో ¶ బుద్ధో సట్ఠిరతనం, అహోసి నభముగ్గతో;

కఞ్చనగ్ఘియసఙ్కాసో, దససహస్సీ విరోచతి.

౨౨.

సోపి బుద్ధో అసమసమో, అతులో అప్పటిపుగ్గలో;

వస్ససతసహస్సాని, లోకే అట్ఠాసి చక్ఖుమా.

౨౩.

విపులం ¶ పభం దస్సయిత్వా, పుప్ఫాపేత్వాన సావకే;

విలాసేత్వా సమాపత్యా, నిబ్బుతో సో ససావకో.

౨౪.

సిద్ధత్థో ¶ మునివరో బుద్ధో, అనోమారామమ్హి నిబ్బుతో;

తత్థేవస్స థూపవరో, చతుయోజనముగ్గతోతి.

సిద్ధత్థస్స భగవతో వంసో సోళసమో.

౧౯. తిస్సబుద్ధవంసో

౧.

సిద్ధత్థస్స అపరేన, అసమో అప్పటిపుగ్గలో;

అనన్తతేజో అమితయసో, తిస్సో లోకగ్గనాయకో.

౨.

తమన్ధకారం విధమిత్వా, ఓభాసేత్వా సదేవకం;

అనుకమ్పకో మహావీరో, లోకే ఉప్పజ్జి చక్ఖుమా.

౩.

తస్సాపి అతులా ఇద్ధి, అతులం సీలం సమాధి చ;

సబ్బత్థ పారమిం గన్త్వా, ధమ్మచక్కం పవత్తయి.

౪.

సో బుద్ధో దససహస్సిమ్హి, విఞ్ఞాపేసి గిరం సుచిం;

కోటిసతాని అభిసమింసు, పఠమే ధమ్మదేసనే.

౫.

దుతియో నవుతికోటీనం, తతియో సట్ఠికోటియో;

బన్ధనాతో పమోచేసి, సత్తే [సమ్పత్తే (క.)] నరమరూ తదా.

౬.

సన్నిపాతా తయో ఆసుం, తిస్సే లోకగ్గనాయకే;

ఖీణాసవానం విమలానం, సన్తచిత్తాన తాదినం.

౭.

ఖీణాసవసతసహస్సానం, పఠమో ఆసి సమాగమో;

నవుతిసతసహస్సానం, దుతియో ఆసి సమాగమో.

౮.

అసీతిసతసహస్సానం ¶ ¶ ¶ , తతియో ఆసి సమాగమో;

ఖీణాసవానం విమలానం, పుప్ఫితానం విముత్తియా.

౯.

అహం తేన సమయేన, సుజాతో నామ ఖత్తియో;

మహాభోగం ఛడ్డయిత్వా, పబ్బజిం ఇసిపబ్బజం.

౧౦.

మయి ¶ పబ్బజితే సన్తే, ఉప్పజ్జి లోకనాయకో;

బుద్ధోతి సద్దం సుత్వాన, పీతి మే ఉపపజ్జథ.

౧౧.

దిబ్బం మన్దారవం పుప్ఫం, పదుమం పారిఛత్తకం;

ఉభో హత్థేహి పగ్గయ్హ, ధునమానో ఉపాగమిం.

౧౨.

చతువణ్ణపరివుతం, తిస్సం లోకగ్గనాయకం;

తమహం పుప్ఫం గహేత్వా, మత్థకే ధారయిం జినం.

౧౩.

సోపి మం బుద్ధో బ్యాకాసి, జనమజ్ఝే నిసీదియ;

‘‘ద్వేనవుతే ఇతో కప్పే, అయం బుద్ధో భవిస్సతి.

౧౪.

‘‘పధానం ¶ పదహిత్వాన…పే… హేస్సామ సమ్ముఖా ఇమం’’.

౧౫.

తస్సాపి వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దసపారమిపూరియా.

౧౬.

ఖేమకం నామ నగరం, జనసన్ధో నామ ఖత్తియో;

పదుమా నామ జనికా, తిస్సస్స చ మహేసినో.

౧౭.

సత్తవస్ససహస్సాని, అగారం అజ్ఝ సో వసి;

గుహాసేల నారిసయ నిసభా [కుముదో నాళియో పదుమో (క.)], తయో పాసాదముత్తమా.

౧౮.

సమతింససహస్సాని, నారియో సమలఙ్కతా;

సుభద్దానామికా నారీ, ఆనన్దో నామ అత్రజో.

౧౯.

నిమిత్తే చతురో దిస్వా, అస్సయానేన నిక్ఖమి;

అనూనఅట్ఠమాసాని, పధానం పదహీ జినో.

౨౦.

బ్రహ్మునా యాచితో సన్తో, తిస్సో లోకగ్గనాయకో;

వత్తి చక్కం మహావీరో, యసవతియముత్తమే.

౨౧.

బ్రహ్మదేవో ఉదయో చ, అహేసుం అగ్గసావకా;

సమఙ్గో నాముపట్ఠాకో, తిస్సస్స చ మహేసినో.

౨౨.

ఫుస్సా ¶ చేవ సుదత్తా చ, అహేసుం అగ్గసావికా;

బోధి తస్స భగవతో, అసనోతి పవుచ్చతి.

౨౩.

సమ్బలో చ సిరిమా చేవ, అహేసుం అగ్గుపట్ఠకా;

కిసాగోతమీ ఉపసేనా, అహేసుం అగ్గుపట్ఠికా.

౨౪.

సో ¶ బుద్ధో సట్ఠిరతనో, అహు ఉచ్చత్తనే జినో;

అనూపమో అసదిసో, హిమవా వియ దిస్సతి.

౨౫.

తస్సాపి అతులతేజస్స, ఆయు ఆసి అనుత్తరో;

వస్ససతసహస్సాని, లోకే అట్ఠాసి చక్ఖుమా.

౨౬.

ఉత్తమం ¶ పవరం సేట్ఠం, అనుభోత్వా మహాయసం;

జలిత్వా అగ్గిక్ఖన్ధోవ, నిబ్బుతో సో ససావకో.

౨౭.

వలాహకోవ ¶ అనిలేన, సూరియేన వియ ఉస్సవో;

అన్ధకారోవ పదీపేన, నిబ్బుతో సో ససావకో.

౨౮.

తిస్సో జినవరో బుద్ధో, నన్దారామమ్హి నిబ్బుతో;

తత్థేవస్స జినథూపో, తీణియోజనముగ్గతోతి.

తిస్సస్స భగవతో వంసో సత్తరసమో.

౨౦. ఫుస్సబుద్ధవంసో

౧.

తత్థేవ మణ్డకప్పమ్హి, అహు సత్థా అనుత్తరో;

అనుపమో అసమసమో, ఫుస్సో లోకగ్గనాయకో.

౨.

సోపి సబ్బం తమం హన్త్వా, విజటేత్వా మహాజటం;

సదేవకం తప్పయన్తో, అభివస్సి అమతమ్బునా.

౩.

ధమ్మచక్కం పవత్తేన్తే, ఫుస్సే నక్ఖత్తమఙ్గలే;

కోటిసతసహస్సానం, పఠమాభిసమయో అహు.

౪.

నవుతిసతసహస్సానం ¶ , దుతియాభిసమయో అహు;

అసీతిసతసహస్సానం, తతియాభిసమయో అహు.

౫.

సన్నిపాతా తయో ఆసుం, ఫుస్సస్సాపి మహేసినో;

ఖీణాసవానం విమలానం, సన్తచిత్తాన తాదినం.

౬.

సట్ఠిసతసహస్సానం ¶ , పఠమో ఆసి సమాగమో;

పఞ్ఞాససతసహస్సానం, దుతియో ఆసి సమాగమో.

౭.

చత్తారీససతసహస్సానం, తతియో ఆసి సమాగమో;

అనుపాదా విముత్తానం, వోచ్ఛిన్నపటిసన్ధినం.

౮.

అహం తేన సమయేన, విజితావీ నామ ఖత్తియో;

ఛడ్డయిత్వా మహారజ్జం, పబ్బజిం తస్స సన్తికే.

౯.

సోపి ¶ మం బుద్ధో బ్యాకాసి, ఫుస్సో లోకగ్గనాయకో;

‘‘ద్వేనవుతే ఇతో కప్పే, అయం బుద్ధో భవిస్సతి.

౧౦.

‘‘పధానం పదహిత్వాన…పే… ¶ హేస్సామ సమ్ముఖా ఇమం’’.

౧౧.

తస్సాపి వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దసపారమిపూరియా.

౧౨.

సుత్తన్తం ¶ వినయఞ్చాపి, నవఙ్గం సత్థుసాసనం;

సబ్బం పరియాపుణిత్వా, సోభయిం జినసాసనం.

౧౩.

తత్థప్పమత్తో ¶ విహరన్తో, బ్రహ్మం భావేత్వ భావనం;

అభిఞ్ఞాసు పారమిం గన్త్వా, బ్రహ్మలోకమగఞ్ఛహం.

౧౪.

కాసికం నామ నగరం, జయసేనో నామ ఖత్తియో;

సిరిమా నామ జనికా, ఫుస్సస్సాపి మహేసినో.

౧౫.

నవవస్ససహస్సాని, అగారం అజ్ఝ సో వసి;

గరుళపక్ఖ హంస సువణ్ణభారా, తయో పాసాదముత్తమా.

౧౬.

తింసఇత్థిసహస్సాని, నారియో సమలఙ్కతా;

కిసాగోతమీ నామ నారీ, అనూపమో నామ అత్రజో.

౧౭.

నిమిత్తే చతురో దిస్వా, హత్థియానేన నిక్ఖమి;

ఛమాసం పధానచారం, అచరీ పురిసుత్తమో.

౧౮.

బ్రహ్మునా యాచితో సన్తో, ఫుస్సో లోకగ్గనాయకో;

వత్తి చక్కం మహావీరో, మిగదాయే నరుత్తమో.

౧౯.

సురక్ఖితో ధమ్మసేనో, అహేసుం అగ్గసావకా;

సభియో నాముపట్ఠాకో, ఫుస్సస్సాపి మహేసినో.

౨౦.

చాలా ¶ చ ఉపచాలా చ, అహేసుం అగ్గసావికా;

బోధి తస్స భగవతో, ఆమణ్డోతి పవుచ్చతి.

౨౧.

ధనఞ్చయో విసాఖో చ, అహేసుం అగ్గుపట్ఠకా;

పదుమా చేవ నాగా చ, అహేసుం అగ్గుపట్ఠికా.

౨౨.

అట్ఠపణ్ణాసరతనం ¶ , సోపి అచ్చుగ్గతో ముని;

సోభతే సతరంసీవ, ఉళురాజావ పూరితో.

౨౩.

నవుతివస్ససహస్సాని, ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౨౪.

ఓవదిత్వా ¶ బహూ సత్తే, సన్తారేత్వా బహూ జనే;

సోపి సత్థా అతులయసో, నిబ్బుతో సో ససావకో.

౨౫.

ఫుస్సో జినవరో సత్థా, సేనారామమ్హి నిబ్బుతో;

ధాతువిత్థారికం ఆసి, తేసు తేసు పదేసతోతి.

ఫుస్సస్స భగవతో వంసో అట్ఠారసమో.

౨౧. విపస్సీబుద్ధవంసో

౧.

ఫుస్సస్స ¶ చ అపరేన, సమ్బుద్ధో ద్విపదుత్తమో;

విపస్సీ నామ నామేన, లోకే ఉప్పజ్జి చక్ఖుమా.

౨.

అవిజ్జం సబ్బం పదాలేత్వా, పత్తో సమ్బోధిముత్తమం;

ధమ్మచక్కం పవత్తేతుం, పక్కామి బన్ధుమతీపురం.

౩.

ధమ్మచక్కం పవత్తేత్వా, ఉభో బోధేసి నాయకో;

గణనాయ న వత్తబ్బో, పఠమాభిసమయో అహు.

౪.

పునాపరం అమితయసో, తత్థ సచ్చం పకాసయి;

చతురాసీతిసహస్సానం, దుతియాభిసమయో అహు.

౫.

చతురాసీతిసహస్సాని ¶ , సమ్బుద్ధం అనుపబ్బజుం;

తేసమారామపత్తానం, ధమ్మం దేసేసి చక్ఖుమా.

౬.

సబ్బాకారేన ¶ భాసతో, సుత్వా ఉపనిసాదినో [ఉపనిస్సా జినో (స్యా. కం.)];

తేపి ధమ్మవరం గన్త్వా, తతియాభిసమయో అహు.

౭.

సన్నిపాతా తయో ఆసుం, విపస్సిస్స మహేసినో;

ఖీణాసవానం విమలానం, సన్తచిత్తాన తాదినం.

౮.

అట్ఠసట్ఠిసతసహస్సానం, పఠమో ఆసి సమాగమో;

భిక్ఖుసతసహస్సానం, దుతియో ఆసి సమాగమో.

౯.

అసీతిభిక్ఖుసహస్సానం, తతియో ఆసి సమాగమో;

తత్థ భిక్ఖుగణమజ్ఝే, సమ్బుద్ధో అతిరోచతి.

౧౦.

అహం ¶ తేన సమయేన, నాగరాజా మహిద్ధికో;

అతులో నామ నామేన, పుఞ్ఞవన్తో జుతిన్ధరో.

౧౧.

నేకానం నాగకోటీనం, పరివారేత్వానహం తదా;

వజ్జన్తో దిబ్బతురియేహి, లోకజేట్ఠం ఉపాగమిం.

౧౨.

ఉపసఙ్కమిత్వా సమ్బుద్ధం, విపస్సిం లోకనాయకం;

మణిముత్తరతనఖచితం, సబ్బాభరణవిభూసితం;

నిమన్తేత్వా ధమ్మరాజస్స, సువణ్ణపీఠమదాసహం.

౧౩.

సోపి మం బుద్ధో బ్యాకాసి, సఙ్ఘమజ్ఝే నిసీదియ;

‘‘ఏకనవుతితో కప్పే, అయం బుద్ధో భవిస్సతి.

౧౪.

‘‘అహు ¶ కపిలవ్హయా రమ్మా, నిక్ఖమిత్వా తథాగతో;

పధానం పదహిత్వాన, కత్వా దుక్కరకారికం.

౧౫.

‘‘అజపాలరుక్ఖమూలస్మిం ¶ , నిసీదిత్వా తథాగతో;

తత్థ పాయాసం పగ్గయ్హ, నేరఞ్జరముపేహితి.

౧౬.

‘‘నేరఞ్జరాయ తీరమ్హి, పాయాసం అద సో జినో;

పటియత్తవరమగ్గేన, బోధిమూలముపేహితి.

౧౭.

‘‘తతో పదక్ఖిణం కత్వా, బోధిమణ్డం అనుత్తరో;

అస్సత్థమూలే సమ్బోధిం, బుజ్ఝిస్సతి మహాయసో.

౧౮.

‘‘ఇమస్స జనికా మాతా, మాయా నామ భవిస్సతి;

పితా సుద్ధోదనో నామ, అయం హేస్సతి గోతమో.

౧౯.

‘‘అనాసవా ¶ వీతరాగా, సన్తచిత్తా సమాహితా;

కోలితో ఉపతిస్సో చ, అగ్గా హేస్సన్తి సావకా;

ఆనన్దో నాముపట్ఠాకో, ఉపట్ఠిస్సతిమం జినం.

౨౦.

‘‘ఖేమా ఉప్పలవణ్ణా చ, అగ్గా హేస్సన్తి సావికా;

అనాసవా వీతరాగా, సన్తచిత్తా సమాహితా;

బోధి తస్స భగవతో, అస్సత్థోతి పవుచ్చతి.

౨౧.

‘‘చిత్తో చ హత్థాళవకో, అగ్గా హేస్సన్తుపట్ఠకా;

నన్దమాతా చ ఉత్తరా, అగ్గా హేస్సన్తుపట్ఠికా;

ఆయు వస్ససతం తస్స, గోతమస్స యసస్సినో.

౨౨.

‘‘ఇదం ¶ ¶ సుత్వాన వచనం…పే… హేస్సామ సమ్ముఖా ఇమం’’.

౨౩.

తస్సాహం వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దసపారమిపూరియా.

౨౪.

నగరం బన్ధుమతీ నామ, బన్ధుమా నామ ఖత్తియో;

మాతా బన్ధుమతీ నామ, విపస్సిస్స మహేసినో.

౨౫.

అట్ఠవస్ససహస్సాని, అగారం అజ్ఝ సో వసి;

నన్దో సునన్దో సిరిమా, తయో పాసాదముత్తమా.

౨౬.

తిచత్తారీససహస్సాని, నారియో సమలఙ్కతా;

సుదస్సనా నామ సా నారీ, సమవత్తక్ఖన్ధో నామ అత్రజో.

౨౭.

నిమిత్తే చతురో దిస్వా, రథయానేన నిక్ఖమి;

అనూనఅట్ఠమాసాని, పధానం పదహీ జినో.

౨౮.

బ్రహ్మునా ¶ యాచితో సన్తో, విపస్సీ లోకనాయకో;

వత్తి చక్కం మహావీరో, మిగదాయే నరుత్తమో.

౨౯.

ఖణ్డో చ తిస్సనామో చ, అహేసుం అగ్గసావకా;

అసోకో నాముపట్ఠాకో, విపస్సిస్స మహేసినో.

౩౦.

చన్దా చ చన్దమిత్తా చ, అహేసుం అగ్గసావికా;

బోధి తస్స భగవతో, పాటలీతి పవుచ్చతి.

౩౧.

పునబ్బసుమిత్తో నాగో చ, అహేసుం అగ్గుపట్ఠకా;

సిరిమా ఉత్తరా చేవ, అహేసుం అగ్గుపట్ఠికా.

౩౨.

అసీతిహత్థముబ్బేధో ¶ , విపస్సీ లోకనాయకో;

పభా నిద్ధావతి తస్స, సమన్తా సత్తయోజనే.

౩౩.

అసీతివస్ససహస్సాని, ఆయు బుద్ధస్స తావదే;

తావతా తిట్ఠమానో సో, తారేసి జనతం బహుం.

౩౪.

బహుదేవమనుస్సానం, బన్ధనా పరిమోచయి;

మగ్గామగ్గఞ్చ ఆచిక్ఖి, అవసేసపుథుజ్జనే.

౩౫.

ఆలోకం ¶ దస్సయిత్వాన, దేసేత్వా అమతం పదం;

జలిత్వా అగ్గిక్ఖన్ధోవ, నిబ్బుతో సో ససావకో.

౩౬.

ఇద్ధివరం పుఞ్ఞవరం, లక్ఖణఞ్చ కుసుమితం;

సబ్బం తమన్తరహితం, నను రిత్తా సబ్బసఙ్ఖారా.

౩౭.

విపస్సీ ¶ జినవరో బుద్ధో, సుమిత్తారామమ్హి నిబ్బుతో;

తత్థేవస్స థూపవరో, సత్తయోజనముస్సితోతి.

విపస్సిస్స భగవతో వంసో ఏకూనవీసతిమో.

౨౨. సిఖీబుద్ధవంసో

౧.

విపస్సిస్స ¶ అపరేన, సమ్బుద్ధో ద్విపదుత్తమో;

సిఖివ్హయో ఆసి జినో, అసమో అప్పటిపుగ్గలో.

౨.

మారసేనం పమద్దిత్వా, పత్తో సమ్బోధిముత్తమం;

ధమ్మచక్కం పవత్తేసి, అనుకమ్పాయ పాణినం.

౩.

ధమ్మచక్కం పవత్తేన్తే, సిఖిమ్హి జినపుఙ్గవే [మునిపుఙ్గవే (సీ.)];

కోటిసతసహస్సానం, పఠమాభిసమయో అహు.

౪.

అపరమ్పి ధమ్మం దేసేన్తే, గణసేట్ఠే నరుత్తమే;

నవుతికోటిసహస్సానం, దుతియాభిసమయో అహు.

౫.

యమకపాటిహారియఞ్చ [యమకం పాటిహీరఞ్చ (సీ.)], దస్సయన్తే సదేవకే;

అసీతికోటిసహస్సానం, తతియాభిసమయో అహు.

౬.

సన్నిపాతా ¶ తయో ఆసుం, సిఖిస్సాపి మహేసినో;

ఖీణాసవానం విమలానం, సన్తచిత్తాన తాదినం.

౭.

భిక్ఖుసతసహస్సానం, పఠమో ఆసి సమాగమో;

అసీతిభిక్ఖుసహస్సానం, దుతియో ఆసి సమాగమో.

౮.

సత్తతిభిక్ఖుసహస్సానం, తతియో ఆసి సమాగమో;

అనుపలిత్తో పదుమంవ, తోయమ్హి సమ్పవడ్ఢితం.

౯.

అహం తేన సమయేన, అరిన్దమో నామ ఖత్తియో;

సమ్బుద్ధప్పముఖం సఙ్ఘం, అన్నపానేన తప్పయిం.

౧౦.

బహుం ¶ దుస్సవరం దత్వా, దుస్సకోటిం అనప్పకం;

అలఙ్కతం హత్థియానం, సమ్బుద్ధస్స అదాసహం.

౧౧.

హత్థియానం ¶ నిమ్మినిత్వా, కప్పియం ఉపనామయిం;

పూరయిం మానసం మయ్హం, నిచ్చం దళ్హముపట్ఠితం.

౧౨.

సోపి ¶ మం బుద్ధో బ్యాకాసి, సిఖీ లోకగ్గనాయకో;

‘‘ఏకతింసే ఇతో కప్పే, అయం బుద్ధో భవిస్సతి.

౧౩.

‘‘అహు కపిలవ్హయా రమ్మా…పే… ¶ హేస్సామ సమ్ముఖా ఇమం’’.

౧౪.

తస్సాహం వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దసపారమిపూరియా.

౧౫.

నగరం అరుణవతీ నామ, అరుణో నామ ఖత్తియో;

పభావతీ నామ జనికా, సిఖిస్సాపి మహేసినో.

౧౬.

సత్తవస్ససహస్సాని ¶ , అగారం అజ్ఝ సో వసి;

సుచన్దకో గిరి వసభో [సుచన్దో గిరివహనో (సీ.)], తయో పాసాదముత్తమా.

౧౭.

చతువీససహస్సాని, నారియో సమలఙ్కతా;

సబ్బకామా నామ నారీ, అతులో నామ అత్రజో.

౧౮.

నిమిత్తే చతురో దిస్వా, హత్థియానేన నిక్ఖమి;

అట్ఠమాసం పధానచారం, అచరీ పురిసుత్తమో.

౧౯.

బ్రహ్మునా ¶ యాచితో సన్తో, సిఖీ లోకగ్గనాయకో;

వత్తి చక్కం మహావీరో, మిగదాయే నరుత్తమో.

౨౦.

అభిభూ సమ్భవో చేవ, అహేసుం అగ్గసావకా;

ఖేమఙ్కరో నాముపట్ఠాకో, సిఖిస్సాపి మహేసినో.

౨౧.

సఖిలా చ పదుమా చ, అహేసుం అగ్గసావికా;

బోధి తస్స భగవతో, పుణ్డరీకోతి వుచ్చతి.

౨౨.

సిరివడ్ఢో చ నన్దో చ, అహేసుం అగ్గుపట్ఠకా;

చిత్తా చేవ సుగుత్తా చ, అహేసుం అగ్గుపట్ఠికా.

౨౩.

ఉచ్చత్తనేన సో బుద్ధో, సత్తతిహత్థముగ్గతో;

కఞ్చనగ్ఘియసఙ్కాసో, ద్వత్తింసవరలక్ఖణో.

౨౪.

తస్సాపి బ్యామప్పభా కాయా, దివారత్తిం నిరన్తరం;

దిసోదిసం నిచ్ఛరన్తి, తీణియోజనసో పభా.

౨౫.

సత్తతివస్ససహస్సాని, ఆయు తస్స మహేసినో;

తావతా తిట్ఠమానో సో, తారేసి జనతం బహుం.

౨౬.

ధమ్మమేఘం ¶ ¶ పవస్సేత్వా, తేమయిత్వా సదేవకే;

ఖేమన్తం పాపయిత్వాన, నిబ్బుతో సో ససావకో.

౨౭.

అనుబ్యఞ్జనసమ్పన్నం, ద్వత్తింసవరలక్ఖణం;

సబ్బం తమన్తరహితం, నను రిత్తా సబ్బసఙ్ఖారా.

౨౮.

సిఖీ మునివరో బుద్ధో, అస్సారామమ్హి నిబ్బుతో;

తత్థేవస్స థూపవరో, తీణియోజనముగ్గతోతి.

సిఖిస్స భగవతో వంసో వీసతిమో.

౨౩. వేస్సభూబుద్ధవంసో

౧.

తత్థేవ ¶ మణ్డకప్పమ్హి, అసమో అప్పటిపుగ్గలో;

వేస్సభూ నామ నామేన, లోకే ఉప్పజ్జి నాయకో [సో జినో (స్యా. కం. క.)].

౨.

ఆదిత్తం ¶ వత రాగగ్గి, తణ్హానం విజితం తదా;

నాగోవ బన్ధనం ఛేత్వా, పత్తో సమ్బోధిముత్తమం.

౩.

ధమ్మచక్కం పవత్తేన్తే, వేస్సభూలోకనాయకే;

అసీతికోటిసహస్సానం, పఠమాభిసమయో అహు.

౪.

పక్కన్తే చారికం రట్ఠే, లోకజేట్ఠే నరాసభే;

సత్తతికోటిసహస్సానం, దుతియాభిసమయో అహు.

౫.

మహాదిట్ఠిం వినోదేన్తో, పాటిహేరం కరోతి సో;

సమాగతా నరమరూ, దససహస్సీ సదేవకే.

౬.

మహాఅచ్ఛరియం ¶ దిస్వా, అబ్భుతం లోమహంసనం;

దేవా చేవ మనుస్సా చ, బుజ్ఝరే సట్ఠికోటియో.

౭.

సన్నిపాతా తయో ఆసుం, వేస్సభుస్స మహేసినో;

ఖీణాసవానం విమలానం, సన్తచిత్తాన తాదినం.

౮.

అసీతిభిక్ఖుసహస్సానం, పఠమో ఆసి సమాగమో;

సత్తతిభిక్ఖుసహస్సానం, దుతియో ఆసి సమాగమో.

౯.

సట్ఠిభిక్ఖుసహస్సానం ¶ , తతియో ఆసి సమాగమో;

జరాదిభయభీతానం, ఓరసానం మహేసినో.

౧౦.

అహం తేన సమయేన, సుదస్సనో నామ ఖత్తియో;

నిమన్తేత్వా మహావీరం, దానం దత్వా మహారహం;

అన్నపానేన వత్థేన, ససఙ్ఘం జిన పూజయిం.

౧౧.

తస్స బుద్ధస్స అసమస్స, చక్కం వత్తితముత్తమం;

సుత్వాన పణితం ధమ్మం, పబ్బజ్జమభిరోచయిం.

౧౨.

మహాదానం పవత్తేత్వా, రత్తిన్దివమతన్దితో;

పబ్బజ్జం గుణసమ్పన్నం, పబ్బజిం జినసన్తికే.

౧౩.

ఆచారగుణసమ్పన్నో, వత్తసీలసమాహితో;

సబ్బఞ్ఞుతం గవేసన్తో, రమామి జినసాసనే.

౧౪.

సద్ధాపీతిం ఉపగన్త్వా, బుద్ధం వన్దామి సత్థరం;

పీతి ఉప్పజ్జతి మయ్హం, బోధియాయేవ కారణా.

౧౫.

అనివత్తమానసం ¶ ఞత్వా, సమ్బుద్ధో ఏతదబ్రవి;

‘‘ఏకతింసే ఇతో కప్పే, అయం బుద్ధో భవిస్సతి.

౧౬.

‘‘అహు ¶ కపిలవ్హయా రమ్మా…పే… హేస్సామ సమ్ముఖా ఇమం’’.

౧౭.

తస్సాహం ¶ వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దసపారమిపూరియా.

౧౮.

అనోమం నామ నగరం, సుప్పతీతో నామ ఖత్తియో;

మాతా యసవతీ నామ, వేస్సభుస్స మహేసినో.

౧౯.

ఛ చ వస్ససహస్సాని, అగారం అజ్ఝ సో వసి;

రుచి సురుచి రతివడ్ఢనో, తయో పాసాదముత్తమా.

౨౦.

అనూనతింససహస్సాని, నారియో సమలఙ్కతా;

సుచిత్తా నామ సా నారీ, సుప్పబుద్ధో నామ అత్రజో.

౨౧.

నిమిత్తే చతురో దిస్వా, సివికాయాభినిక్ఖమి;

ఛమాసం పధానచారం, అచరీ పురిసుత్తమో.

౨౨.

బ్రహ్మునా ¶ యాచితో సన్తో, వేస్సభూలోకనాయకో;

వత్తి చక్కం మహావీరో, అరుణారామే నరుత్తమో.

౨౩.

సోణో ¶ చ ఉత్తరో చేవ, అహేసుం అగ్గసావకా;

ఉపసన్తో నాముపట్ఠాకో, వేస్సభుస్స మహేసినో.

౨౪.

రామా [దామా (సీ.)] చేవ సమాలా చ, అహేసుం అగ్గసావికా;

బోధి తస్స భగవతో, మహాసాలోతి వుచ్చతి.

౨౫.

సోత్థికో చేవ రమ్భో చ, అహేసుం అగ్గుపట్ఠకా;

గోతమీ సిరిమా చేవ, అహేసుం అగ్గుపట్ఠికా.

౨౬.

సట్ఠిరతనముబ్బేధో, హేమయూపసమూపమో;

కాయా నిచ్ఛరతి రస్మి, రత్తింవ పబ్బతే సిఖీ.

౨౭.

సట్ఠివస్ససహస్సాని, ఆయు తస్స మహేసినో;

తావతా తిట్ఠమానో సో, తారేసి జనతం బహుం.

౨౮.

ధమ్మం ¶ విత్థారికం కత్వా, విభజిత్వా మహాజనం;

ధమ్మనావం ఠపేత్వాన, నిబ్బుతో సో ససావకో.

౨౯.

దస్సనేయ్యం సబ్బజనం, విహారం ఇరియాపథం;

సబ్బం తమన్తరహితం, నను రిత్తా సబ్బసఙ్ఖారా.

౩౦.

వేస్సభూ జినవరో సత్థా, ఖేమారామమ్హి నిబ్బుతో;

ధాతువిత్థారికం ఆసి, తేసు తేసు పదేసతోతి.

వేస్సభుస్స భగవతో వంసో ఏకవీసతిమో.

౨౪. కకుసన్ధబుద్ధవంసో

౧.

వేస్సభుస్స ¶ ¶ అపరేన, సమ్బుద్ధో ద్విపదుత్తమో;

కకుసన్ధో నామ నామేన, అప్పమేయ్యో దురాసదో.

౨.

ఉగ్ఘాటేత్వా సబ్బభవం, చరియాయ పారమిం గతో;

సీహోవ పఞ్జరం భేత్వా, పత్తో సమ్బోధిముత్తమం.

౩.

ధమ్మచక్కం పవత్తేన్తే, కకుసన్ధే లోకనాయకే;

చత్తారీసకోటిసహస్సానం, ధమ్మాభిసమయో అహు.

౪.

అన్తలిక్ఖమ్హి ¶ ఆకాసే, యమకం కత్వా వికుబ్బనం;

తింసకోటిసహస్సానం, బోధేసి దేవమానుసే.

౫.

నరదేవస్స యక్ఖస్స, చతుసచ్చప్పకాసనే;

ధమ్మాభిసమయో తస్స, గణనాతో అసఙ్ఖియో.

౬.

కకుసన్ధస్స భగవతో, ఏకో ఆసి సమాగమో;

ఖీణాసవానం విమలానం, సన్తచిత్తాన తాదినం.

౭.

చత్తాలీససహస్సానం, తదా ఆసి సమాగమో;

దన్తభూమిమనుప్పత్తానం, ఆసవారిగణక్ఖయా.

౮.

అహం తేన సమయేన, ఖేమో నామాసి ఖత్తియో;

తథాగతే జినపుత్తే, దానం దత్వా అనప్పకం.

౯.

పత్తఞ్చ చీవరం దత్వా, అఞ్జనం మధులట్ఠికం;

ఇమేతం పత్థితం సబ్బం, పటియాదేమి వరం వరం.

౧౦.

సోపి ¶ ¶ మం బుద్ధో బ్యాకాసి, కకుసన్ధో వినాయకో;

‘‘ఇమమ్హి భద్దకే కప్పే, అయం బుద్ధో భవిస్సతి.

౧౧.

‘‘అహు కపిలవ్హయా రమ్మా…పే… ¶ హేస్సామ సమ్ముఖా ఇమం’’.

౧౨.

తస్సాపి వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దసపారమిపూరియా.

౧౩.

నగరం ఖేమావతీ నామ, ఖేమో నామాసహం తదా;

సబ్బఞ్ఞుతం గవేసన్తో, పబ్బజిం తస్స సన్తికే.

౧౪.

బ్రాహ్మణో అగ్గిదత్తో చ, ఆసి బుద్ధస్స సో పితా;

విసాఖా నామ జనికా, కకుసన్ధస్స సత్థునో.

౧౫.

వసతే తత్థ ఖేమే పురే, సమ్బుద్ధస్స మహాకులం;

నరానం పవరం సేట్ఠం, జాతిమన్తం మహాయసం.

౧౬.

చతువస్ససహస్సాని, అగారం అజ్ఝ సో వసి;

కామ ¶ -కామవణ్ణ-కామసుద్ధినామా [సుచి సురుచి రతివద్ధననామకా (సీ.)], తయో పాసాదముత్తమా.

౧౭.

సమతింససహస్సాని ¶ , నారియో సమలఙ్కతా;

రోచినీ నామ సా నారీ, ఉత్తరో నామ అత్రజో.

౧౮.

నిమిత్తే చతురో దిస్వా, రథయానేన నిక్ఖమి;

అనూనఅట్ఠమాసాని, పధానం పదహీ జినో.

౧౯.

బ్రహ్మునా ¶ యాచితో సన్తో, కకుసన్ధో వినాయకో;

వత్తి చక్కం మహావీరో, మిగదాయే నరుత్తమో.

౨౦.

విధురో చ సఞ్జీవో చ, అహేసుం అగ్గసావకా;

బుద్ధిజో నాముపట్ఠాకో, కకుసన్ధస్స సత్థునో.

౨౧.

సామా చ చమ్పానామా చ, అహేసుం అగ్గసావికా;

బోధి తస్స భగవతో, సిరీసోతి పవుచ్చతి.

౨౨.

అచ్చుతో చ సుమనో చ, అహేసుం అగ్గుపట్ఠకా;

నన్దా చేవ సునన్దా చ, అహేసుం అగ్గుపట్ఠికా.

౨౩.

చత్తాలీసరతనాని ¶ , అచ్చుగ్గతో మహాముని;

కనకప్పభా నిచ్ఛరతి, సమన్తా దసయోజనం.

౨౪.

చత్తాలీసవస్ససహస్సాని, ఆయు తస్స మహేసినో;

తావతా తిట్ఠమానో సో, తారేసి జనతం బహుం.

౨౫.

ధమ్మాపణం పసారేత్వా, నరనారీనం సదేవకే;

నదిత్వా ¶ సీహనాదంవ, నిబ్బుతో సో ససావకో.

౨౬.

అట్ఠఙ్గవచనసమ్పన్నో, అచ్ఛిద్దాని నిరన్తరం;

సబ్బం తమన్తరహితం, నను రిత్తా సబ్బసఙ్ఖారా.

౨౭.

కకుసన్ధో జినవరో, ఖేమారామమ్హి నిబ్బుతో;

తత్థేవస్స థూపవరో, గావుతం నభముగ్గతోతి.

కకుసన్ధస్స భగవతో వంసో ద్వావీసతిమో.

౨౫. కోణాగమనబుద్ధవంసో

౧.

కకుసన్ధస్స ¶ అపరేన, సమ్బుద్ధో ద్విపదుత్తమో;

కోణాగమనో నామ జినో, లోకజేట్ఠో నరాసభో.

౨.

దసధమ్మే పూరయిత్వాన, కన్తారం సమతిక్కమి;

పవాహియ మలం సబ్బం, పత్తో సమ్బోధిముత్తమం.

౩.

ధమ్మచక్కం ¶ పవత్తేన్తే, కోణాగమననాయకే;

తింసకోటిసహస్సానం, పఠమాభిసమయో అహు.

౪.

పాటిహీరం కరోన్తే చ, పరవాదప్పమద్దనే;

వీసతికోటిసహస్సానం, దుతియాభిసమయో అహు.

౫.

తతో వికుబ్బనం కత్వా, జినో దేవపురం గతో;

వసతే తత్థ సమ్బుద్ధో, సిలాయ పణ్డుకమ్బలే.

౬.

పకరణే సత్త దేసేన్తో, వస్సం వసతి సో ముని;

దసకోటిసహస్సానం, తతియాభిసమయో అహు.

౭.

తస్సాపి ¶ దేవదేవస్స, ఏకో ఆసి సమాగమో;

ఖీణాసవానం విమలానం, సన్తచిత్తాన తాదినం.

౮.

తింసభిక్ఖుసహస్సానం ¶ , తదా ఆసి సమాగమో;

ఓఘానమతిక్కన్తానం, భిజ్జితానఞ్చ మచ్చుయా.

౯.

అహం తేన సమయేన, పబ్బతో నామ ఖత్తియో;

మిత్తామచ్చేహి సమ్పన్నో, అనన్తబలవాహనో.

౧౦.

సమ్బుద్ధదస్సనం గన్త్వా, సుత్వా ధమ్మమనుత్తరం;

నిమన్తేత్వా సజినసఙ్ఘం, దానం దత్వా యదిచ్ఛకం.

౧౧.

పట్టుణ్ణం చీనపట్టఞ్చ, కోసేయ్యం కమ్బలమ్పి చ;

సోవణ్ణపాదుకఞ్చేవ, అదాసిం సత్థుసావకే.

౧౨.

సోపి మం బుద్ధో బ్యాకాసి, సఙ్ఘమజ్ఝే నిసీదియ;

‘‘ఇమమ్హి భద్దకే కప్పే, అయం బుద్ధో భవిస్సతి.

౧౩.

‘‘అహు కపిలవ్హయా రమ్మా…పే… ¶ హేస్సామ సమ్ముఖా ఇమం’’.

౧౪.

తస్సాపి వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దసపారమిపూరియా.

౧౫.

సబ్బఞ్ఞుతం గవేసన్తో, దానం దత్వా నరుత్తమే;

ఓహాయాహం మహారజ్జం, పబ్బజిం జినసన్తికే [తస్స సన్తికే (సీ.)].

౧౬.

నగరం సోభవతీ నామ, సోభో నామాసి ఖత్తియో;

వసతే తత్థ నగరే, సమ్బుద్ధస్స మహాకులం.

౧౭.

బ్రాహ్మణో ¶ యఞ్ఞదత్తో చ, ఆసి బుద్ధస్స సో పితా;

ఉత్తరా నామ జనికా, కోణాగమనస్స సత్థునో.

౧౮.

తీణి ¶ వస్ససహస్సాని, అగారం అజ్ఝ సో వసి;

తుసితసన్తుసితసన్తుట్ఠా, తయో పాసాదముత్తమా.

౧౯.

అనూనసోళససహస్సాని, నారియో సమలఙ్కతా;

రుచిగత్తా నామ నారీ, సత్థవాహో నామ అత్రజో.

౨౦.

నిమిత్తే చతురో దిస్వా, హత్థియానేన నిక్ఖమి;

ఛమాసం పధానచారం, అచరీ పురిసుత్తమో.

౨౧.

బ్రహ్మునా ¶ యాచితో సన్తో, కోణాగమననాయకో;

వత్తి చక్కం మహావీరో, మిగదాయే నరుత్తమో.

౨౨.

భియ్యసో ఉత్తరో నామ, అహేసుం అగ్గసావకా;

సోత్థిజో నాముపట్ఠాకో, కోణాగమనస్స సత్థునో.

౨౩.

సముద్దా ¶ ఉత్తరా చేవ, అహేసుం అగ్గసావికా;

బోధి తస్స భగవతో, ఉదుమ్బరోతి పవుచ్చతి.

౨౪.

ఉగ్గో చ సోమదేవో చ, అహేసుం అగ్గుపట్ఠకా;

సీవలా చేవ సామా చ, అహేసుం అగ్గుపట్ఠికా.

౨౫.

ఉచ్చత్తనేన సో బుద్ధో, తింసహత్థసముగ్గతో;

ఉక్కాముఖే యథా కమ్బు, ఏవం రంసీహి మణ్డితో.

౨౬.

తింసవస్ససహస్సాని, ఆయు బుద్ధస్స తావదే;

తావతా తిట్ఠమానో సో, తారేసి జనతం బహుం.

౨౭.

ధమ్మచేతిం సముస్సేత్వా, ధమ్మదుస్సవిభూసితం;

ధమ్మపుప్ఫగుళం కత్వా, నిబ్బుతో సో ససావకో.

౨౮.

మహావిలాసో తస్స జనో, సిరిధమ్మప్పకాసనో;

సబ్బం తమన్తరహితం, నను రిత్తా సబ్బసఙ్ఖారా.

౨౯.

కోణాగమనో సమ్బుద్ధో, పబ్బతారామమ్హి నిబ్బుతో;

ధాతువిత్థారికం ఆసి, తేసు తేసు పదేసతోతి.

కోణాగమనస్స భగవతో వంసో తేవీసతిమో.

౨౬. కస్సపబుద్ధవంసో

౧.

కోణాగమనస్స ¶ ¶ అపరేన, సమ్బుద్ధో ద్విపదుత్తమో;

కస్సపో నామ గోత్తేన, ధమ్మరాజా పభఙ్కరో.

౨.

సఞ్ఛడ్డితం ¶ కులమూలం, బహ్వన్నపానభోజనం;

దత్వాన యాచకే దానం, పూరయిత్వాన మానసం;

ఉసభోవ ఆళకం భేత్వా, పత్తో సమ్బోధిముత్తమం.

౩.

ధమ్మచక్కం ¶ పవత్తేన్తే, కస్సపే లోకనాయకే;

వీసకోటిసహస్సానం, పఠమాభిసమయో అహు.

౪.

చతుమాసం యదా బుద్ధో, లోకే చరతి చారికం;

దసకోటిసహస్సానం, దుతియాభిసమయో అహు.

౫.

యమకం వికుబ్బనం కత్వా, ఞాణధాతుం పకిత్తయి;

పఞ్చకోటిసహస్సానం, తతియాభిసమయో అహు.

౬.

సుధమ్మా దేవపురే రమ్మే, తత్థ ధమ్మం పకిత్తయి;

తీణికోటిసహస్సానం, దేవానం బోధయీ జినో.

౭.

నరదేవస్స యక్ఖస్స, అపరే ధమ్మదేసనే;

ఏతేసానం అభిసమయా, గణనాతో అసఙ్ఖియా.

౮.

తస్సాపి దేవదేవస్స, ఏకో ఆసి సమాగమో;

ఖీణాసవానం విమలానం, సన్తచిత్తాన తాదినం.

౯.

వీసభిక్ఖుసహస్సానం, తదా ఆసి సమాగమో;

అతిక్కన్తభవన్తానం, హిరిసీలేన తాదినం.

౧౦.

అహం తదా మాణవకో, జోతిపాలోతి విస్సుతో;

అజ్ఝాయకో మన్తధరో, తిణ్ణం వేదాన పారగూ.

౧౧.

లక్ఖణే ¶ ఇతిహాసే చ, సధమ్మే పారమిం గతో;

భూమన్తలిక్ఖకుసలో, కతవిజ్జో అనావయో.

౧౨.

కస్సపస్స భగవతో, ఘటికారో నాముపట్ఠాకో;

సగారవో సప్పతిస్సో, నిబ్బుతో తతియే ఫలే.

౧౩.

ఆదాయ ¶ మం ఘటీకారో, ఉపగఞ్ఛి కస్సపం జినం;

తస్స ధమ్మం సుణిత్వాన, పబ్బజిం తస్స సన్తికే.

౧౪.

ఆరద్ధవీరియో హుత్వా, వత్తావత్తేసు కోవిదో;

న క్వచి పరిహాయామి, పూరేసిం జినసాసనం.

౧౫.

యావతా బుద్ధభణితం, నవఙ్గం జినసాసనం;

సబ్బం పరియాపుణిత్వాన, సోభయిం జినసాసనం.

౧౬.

మమ అచ్ఛరియం దిస్వా, సోపి బుద్ధో వియాకరి;

‘‘ఇమమ్హి భద్దకే కప్పే, అయం బుద్ధో భవిస్సతి.

౧౭.

‘‘అహు ¶ ¶ కపిలవ్హయా రమ్మా, నిక్ఖమిత్వా తథాగతో;

పధానం పదహిత్వాన, కత్వా దుక్కరకారికం.

౧౮.

‘‘అజపాలరుక్ఖమూలే, నిసీదిత్వా తథాగతో;

తత్థ పాయాసం పగ్గయ్హ, నేరఞ్జరముపేహితి.

౧౯.

‘‘నేరఞ్జరాయ తీరమ్హి, పాయాసం పరిభుఞ్జియ;

పటియత్తవరమగ్గేన, బోధిమూలముపేహితి.

౨౦.

‘‘తతో పదక్ఖిణం కత్వా, బోధిమణ్డం అనుత్తరో;

అపరాజితట్ఠానమ్హి [అపరాజితనిసభట్ఠానే (క.)], బోధిపల్లఙ్కముత్తమే;

పల్లఙ్కేన నిసీదిత్వా, బుజ్ఝిస్సతి మహాయసో.

౨౧.

‘‘ఇమస్స ¶ జనికా మాతా, మాయా నామ భవిస్సతి;

పితా సుద్ధోదనో నామ, అయం హేస్సతి గోతమో.

౨౨.

‘‘అనాసవా వీతరాగా, సన్తచిత్తా సమాహితా;

కోలితో ఉపతిస్సో చ, అగ్గా హేస్సన్తి సావకా;

ఆనన్దో నాముపట్ఠాకో, ఉపట్ఠిస్సతిమం జినం.

౨౩.

‘‘ఖేమా ఉప్పలవణ్ణా చ, అగ్గా హేస్సన్తి సావికా;

అనాసవా సన్తచిత్తా, వీతరాగా సమాహితా;

బోధి తస్స భగవతో, అస్సత్థోతి పవుచ్చతి.

౨౪.

‘‘చిత్తో హత్థాళవకో చ, అగ్గా హేస్సన్తుపట్ఠకా;

నన్దమాతా చ ఉత్తరా, అగ్గా హేస్సన్తుపట్ఠికా’’.

౨౫.

ఇదం సుత్వాన వచనం, అస్సమస్స మహేసినో;

ఆమోదితా నరమరూ, బుద్ధబీజం కిర అయం.

౨౬.

ఉక్కుట్ఠిసద్దా ¶ పవత్తన్తి, అప్ఫోటేన్తి హసన్తి చ;

కతఞ్జలీ నమస్సన్తి, దససహస్సీ సదేవకా.

౨౭.

‘‘యదిమస్స లోకనాథస్స, విరజ్ఝిస్సామ సాసనం;

అనాగతమ్హి అద్ధానే, హేస్సామ సమ్ముఖా ఇమం.

౨౮.

‘‘యథా మనుస్సా నదిం తరన్తా, పటితిత్థం విరజ్ఝియ;

హేట్ఠా తిత్థే గహేత్వాన, ఉత్తరన్తి మహానదిం.

౨౯.

‘‘ఏవమేవ ¶ ¶ మయం సబ్బే, యది ముఞ్చామిమం జినం;

అనాగతమ్హి అద్ధానే, హేస్సామ సమ్ముఖా ఇమం’’.

౩౦.

తస్సాపి వచనం సుత్వా, భియ్యో చిత్తం పసాదయిం;

ఉత్తరిం వతమధిట్ఠాసిం, దసపారమిపూరియా.

౩౧.

ఏవమహం సంసరిత్వా, పరివజ్జేన్తో అనాచరం;

దుక్కరఞ్చ కతం మయ్హం, బోధియాయేవ కారణా.

౩౨.

నగరం బారాణసీ నామ, కికీ నామాసి ఖత్తియో;

వసతే తత్థ నగరే, సమ్బుద్ధస్స మహాకులం.

౩౩.

బ్రాహ్మణో బ్రహ్మదత్తోవ, ఆసి బుద్ధస్స సో పితా;

ధనవతీ నామ జనికా, కస్సపస్స మహేసినో.

౩౪.

దువే ¶ వస్ససహస్సాని, అగారం అజ్ఝ సో వసి;

హంసో యసో సిరినన్దో, తయో పాసాదముత్తమా.

౩౫.

తిసోళససహస్సాని, నారియో సమలఙ్కతా;

సునన్దా నామ సా నారీ, విజితసేనో నామ అత్రజో.

౩౬.

నిమిత్తే చతురో దిస్వా, పాసాదేనాభినిక్ఖమి;

సత్తాహం పధానచారం, అచరీ పురిసుత్తమో.

౩౭.

బ్రహ్మునా యాచితో సన్తో, కస్సపో లోకనాయకో;

వత్తి చక్కం మహావీరో, మిగదాయే నరుత్తమో.

౩౮.

తిస్సో చ భారద్వాజో చ, అహేసుం అగ్గసావకా;

సబ్బమిత్తో నాముపట్ఠాకో, కస్సపస్స మహేసినో.

౩౯.

అనుళా ¶ ఉరువేళా చ, అహేసుం అగ్గసావికా;

బోధి తస్స భగవతో, నిగ్రోధోతి పవుచ్చతి.

౪౦.

సుమఙ్గలో ¶ ఘటికారో చ, అహేసుం అగ్గుపట్ఠకా;

విచితసేనా భద్దా [భద్రా (క.)] చ, అహేసుం అగ్గుపట్ఠికా.

౪౧.

ఉచ్చత్తనేన సో బుద్ధో, వీసతిరతనుగ్గతో;

విజ్జులట్ఠీవ ఆకాసే, చన్దోవ గహపూరితో.

౪౨.

వీసతివస్ససహస్సాని ¶ , ఆయు తస్స మహేసినో;

తావతా తిట్ఠమానో సో, తారేసి జనతం బహుం.

౪౩.

ధమ్మతళాకం మాపయిత్వా, సీలం దత్వా విలేపనం;

ధమ్మదుస్సం నివాసేత్వా, ధమ్మమాలం విభజ్జియ.

౪౪.

ధమ్మవిమలమాదాసం, ఠపయిత్వా మహాజనే;

కేచి నిబ్బానం పత్థేన్తా, పస్సన్తు మే అలఙ్కరం.

౪౫.

సీలకఞ్చుకం దత్వాన, ఝానకవచవమ్మితం;

ధమ్మచమ్మం పారుపిత్వా, దత్వా సన్నాహముత్తమం.

౪౬.

సతిఫలకం దత్వాన, తిఖిణఞాణకున్తిమం;

ధమ్మఖగ్గవరం దత్వా, సీలసంసగ్గమద్దనం.

౪౭.

తేవిజ్జాభూసనం దత్వాన, ఆవేళం చతురో ఫలే;

ఛళభిఞ్ఞాభరణం దత్వా, ధమ్మపుప్ఫపిళన్ధనం.

౪౮.

సద్ధమ్మపణ్డరచ్ఛత్తం, దత్వా పాపనివారణం;

మాపయిత్వాభయం పుప్ఫం, నిబ్బుతో సో ససావకో.

౪౯.

ఏసో ¶ హి సమ్మాసమ్బుద్ధో, అప్పమేయ్యో దురాసదో;

ఏసో హి ధమ్మరతనో, స్వాక్ఖాతో ఏహిపస్సికో.

౫౦.

ఏసో హి సఙ్ఘరతనో, సుప్పటిపన్నో అనుత్తరో;

సబ్బం తమన్తరహితం, నను రిత్తా సబ్బసఙ్ఖారా.

౫౧.

మహాకస్సపో జినో సత్థా, సేతబ్యారామమ్హి నిబ్బుతో;

తత్థేవస్స జినథూపో, యోజనుబ్బేధముగ్గతోతి.

కస్సపస్స భగవతో వంసో చతువీసతిమో.

౨౭. గోతమబుద్ధవంసో

౧.

అహమేతరహి ¶ ¶ సమ్బుద్ధో [బుద్ధో (సీ.)], గోతమో సక్యవడ్ఢనో;

పధానం పదహిత్వాన, పత్తో సమ్బోధిముత్తమం.

౨.

బ్రహ్మునా ¶ యాచితో సన్తో, ధమ్మచక్కం పవత్తయిం;

అట్ఠారసన్నం కోటీనం, పఠమాభిసమయో అహు.

౩.

తతో పరఞ్చ దేసేన్తే, నరదేవసమాగమే;

గణనాయ న వత్తబ్బో, దుతియాభిసమయో అహు.

౪.

ఇధేవాహం ఏతరహి, ఓవదిం మమ అత్రజం;

గణనాయ న వత్తబ్బో, తతియాభిసమయో అహు.

౫.

ఏకోసి సన్నిపాతో మే, సావకానం మహేసినం;

అడ్ఢతేళససతానం, భిక్ఖూనాసి సమాగమో.

౬.

విరోచమానో విమలో, భిక్ఖుసఙ్ఘస్స మజ్ఝగో;

దదామి పత్థితం సబ్బం, మణీవ సబ్బకామదో.

౭.

ఫలమాకఙ్ఖమానానం ¶ , భవచ్ఛన్దజహేసినం;

చతుసచ్చం పకాసేమి, అనుకమ్పాయ పాణినం.

౮.

దసవీససహస్సానం, ధమ్మాభిసమయో అహు;

ఏకద్విన్నం అభిసమయో, గణనాతో అసఙ్ఖియో.

౯.

విత్థారికం బాహుజఞ్ఞం, ఇద్ధం ఫీతం సుఫుల్లితం;

ఇధ మయ్హం సక్యమునినో, సాసనం సువిసోధితం.

౧౦.

అనాసవా వీతరాగా, సన్తచిత్తా సమాహితా;

భిక్ఖూనేకసతా సబ్బే, పరివారేన్తి మం సదా.

౧౧.

ఇదాని యే ఏతరహి, జహన్తి మానుసం భవం;

అప్పత్తమానసా సేఖా, తే భిక్ఖూ విఞ్ఞుగరహితా.

౧౨.

అరియఞ్చ సంథోమయన్తా, సదా ధమ్మరతా జనా;

బుజ్ఝిస్సన్తి సతిమన్తో, సంసారసరితం గతా.

౧౩.

నగరం కపిలవత్థు మే, రాజా సుద్ధోదనో పితా;

మయ్హం జనేత్తికా మాతా, మాయాదేవీతి వుచ్చతి.

౧౪.

ఏకూనతింసవస్సాని ¶ , అగారం అజ్ఝహం వసిం;

రమ్మో సురమ్మో సుభకో, తయో పాసాదముత్తమా.

౧౫.

చత్తారీససహస్సాని, నారియో సమలఙ్కతా;

భద్దకఞ్చనా నామ నారీ, రాహులో నామ అత్రజో.

౧౬.

నిమిత్తే ¶ చతురో దిస్వా, అస్సయానేన నిక్ఖమిం;

ఛబ్బస్సం ¶ పధానచారం, అచరిం దుక్కరం అహం.

౧౭.

బారాణసియం ¶ ఇసిపతనే, చక్కం పవత్తితం మయా;

అహం గోతమసమ్బుద్ధో, సరణం సబ్బపాణినం.

౧౮.

కోలితో ఉపతిస్సో చ, ద్వే భిక్ఖూ అగ్గసావకా;

ఆనన్దో నాముపట్ఠాకో, సన్తికావచరో మమ;

ఖేమా ఉప్పలవణ్ణా చ, భిక్ఖునీ అగ్గసావికా.

౧౯.

చిత్తో హత్థాళవకో చ, అగ్గుపట్ఠాకుపాసకా;

నన్దమాతా చ ఉత్తరా, అగ్గుపట్ఠికుపాసికా.

౨౦.

అహం అస్సత్థమూలమ్హి, పత్తో సమ్బోధిముత్తమం;

బ్యామప్పభా సదా మయ్హం, సోళసహత్థముగ్గతా.

౨౧.

అప్పం వస్ససతం ఆయు, ఇదానేతరహి విజ్జతి;

తావతా తిట్ఠమానోహం, తారేమి జనతం బహుం.

౨౨.

ఠపయిత్వాన ధమ్ముక్కం, పచ్ఛిమం జనబోధనం;

అహమ్పి నచిరస్సేవ, సద్ధిం సావకసఙ్ఘతో;

ఇధేవ పరినిబ్బిస్సం, అగ్గీ వాహారసఙ్ఖయా.

౨౩.

తాని చ అతులతేజాని, ఇమాని చ దసబలాని [యసబలాని (అట్ఠ.)];

అయఞ్చ గుణధారణో దేహో, ద్వత్తింసవరలక్ఖణవిచిత్తో.

౨౪.

దస దిసా పభాసేత్వా, సతరంసీవ ఛప్పభా;

సబ్బం తమన్తరహిస్సన్తి, నను రిత్తా సబ్బసఙ్ఖారాతి.

గోతమస్స భగవతో వంసో పఞ్చవీసతిమో.

౨౮. బుద్ధపకిణ్ణకకణ్డం

౧.

అపరిమేయ్యితో ¶ ¶ కప్పే, చతురో ఆసుం వినాయకా;

తణ్హఙ్కరో మేధఙ్కరో, అథోపి సరణఙ్కరో;

దీపఙ్కరో చ సమ్బుద్ధో, ఏకకప్పమ్హి తే జినా.

౨.

దీపఙ్కరస్స ¶ అపరేన, కోణ్డఞ్ఞో నామ నాయకో;

ఏకోవ ఏకకప్పమ్హి, తారేసి జనతం బహుం.

౩.

దీపఙ్కరస్స భగవతో, కోణ్డఞ్ఞస్స చ సత్థునో;

ఏతేసం అన్తరా కప్పా, గణనాతో అసఙ్ఖియా.

౪.

కోణ్డఞ్ఞస్స అపరేన, మఙ్గలో నామ నాయకో;

తేసమ్పి అన్తరా కప్పా, గణనాతో అసఙ్ఖియా.

౫.

మఙ్గలో చ సుమనో చ, రేవతో సోభితో ముని;

తేపి బుద్ధా ఏకకప్పే, చక్ఖుమన్తో పభఙ్కరా.

౬.

సోభితస్స ¶ అపరేన, అనోమదస్సీ మహాయసో;

తేసమ్పి అన్తరా కప్పా, గణనాతో అసఙ్ఖియా.

౭.

అనోమదస్సీ పదుమో, నారదో చాపి నాయకో;

తేపి బుద్ధా ఏకకప్పే, తమన్తకారకా మునీ.

౮.

నారదస్స అపరేన, పదుముత్తరో నామ నాయకో;

ఏకకప్పమ్హి ఉప్పన్నో, తారేసి జనతం బహుం.

౯.

నారదస్స భగవతో, పదుముత్తరస్స సత్థునో;

తేసమ్పి అన్తరా కప్పా, గణనాతో అసఙ్ఖియా.

౧౦.

కప్పసతసహస్సమ్హి ¶ , ఏకో ఆసి మహాముని;

పదుముత్తరో లోకవిదూ, ఆహుతీనం పటిగ్గహో.

౧౧.

తింసకప్పసహస్సమ్హి, దువే ఆసుం వినాయకా [ఆసింసు నాయకా (స్యా. క.)];

సుమేధో చ సుజాతో చ, ఓరతో పదుముత్తరా.

౧౨.

అట్ఠారసే కప్పసతే, తయో ఆసుం వినాయకా [ఆసింసు నాయకా (స్యా. క.)];

పియదస్సీ అత్థదస్సీ, ధమ్మదస్సీ చ నాయకా.

౧౩.

ఓరతో ¶ చ సుజాతస్స, సమ్బుద్ధా ద్విపదుత్తమా;

ఏకకప్పమ్హి తే బుద్ధా, లోకే అప్పటిపుగ్గలా.

౧౪.

చతున్నవుతితో కప్పే, ఏకో ఆసి మహాముని;

సిద్ధత్థో సో లోకవిదూ, సల్లకత్తో అనుత్తరో.

౧౫.

ద్వేనవుతే ¶ ఇతో కప్పే, దువే ఆసుం వినాయకా;

తిస్సో ఫుస్సో చ సమ్బుద్ధా, అసమా అప్పటిపుగ్గలా.

౧౬.

ఏకనవుతితో కప్పే, విపస్సీ నామ నాయకో;

సోపి బుద్ధో కారుణికో, సత్తే మోచేసి బన్ధనా.

౧౭.

ఏకతింసే ఇతో కప్పే, దువే ఆసుం వినాయకా;

సిఖీ చ వేస్సభూ చేవ, అసమా అప్పటిపుగ్గలా.

౧౮.

ఇమమ్హి భద్దకే కప్పే, తయో ఆసుం వినాయకా;

కకుసన్ధో కోణాగమనో, కస్సపో చాపి నాయకో.

౧౯.

అహమేతరహి సమ్బుద్ధో, మేత్తేయ్యో చాపి హేస్సతి;

ఏతేపిమే ¶ పఞ్చ బుద్ధా, ధీరా లోకానుకమ్పకా.

౨౦.

ఏతేసం ధమ్మరాజూనం, అఞ్ఞేసంనేకకోటినం;

ఆచిక్ఖిత్వాన తం మగ్గం, నిబ్బుతా తే ససావకాతి.

బుద్ధపకిణ్ణకకణ్డం నిట్ఠితం.

౨౯. ధాతుభాజనీయకథా

౧.

మహాగోతమో ¶ జినవరో, కుసినారమ్హి నిబ్బుతో;

ధాతువిత్థారికం ఆసి, తేసు తేసు పదేసతో.

౨.

ఏకో అజాతసత్తుస్స, ఏకో వేసాలియా పురే;

ఏకో కపిలవత్థుస్మిం, ఏకో చ అల్లకప్పకే.

౩.

ఏకో చ రామగామమ్హి, ఏకో చ వేఠదీపకే;

ఏకో పావేయ్యకే మల్లే, ఏకో చ కోసినారకే.

౪.

కుమ్భస్స ¶ థూపం కారేసి, బ్రాహ్మణో దోణసవ్హయో;

అఙ్గారథూపం కారేసుం, మోరియా తుట్ఠమానసా.

౫.

అట్ఠ సారీరికా థూపా, నవమో కుమ్భచేతియో;

అఙ్గారథూపో దసమో, తదాయేవ పతిట్ఠితో.

౬.

ఉణ్హీసం చతస్సో దాఠా, అక్ఖకా ద్వే చ ధాతుయో;

అసమ్భిన్నా ఇమా సత్త, సేసా భిన్నావ ధాతుయో.

౭.

మహన్తా ¶ ముగ్గమత్తా చ [ముగ్గమాసావ (క.)], మజ్ఝిమా భిన్నతణ్డులా;

ఖుద్దకా సాసపమత్తా చ, నానావణ్ణా చ ధాతుయో.

౮.

మహన్తా సువణ్ణవణ్ణా చ, ముత్తవణ్ణా చ మజ్ఝిమా;

ఖుద్దకా మకులవణ్ణా చ, సోళసదోణమత్తికా.

౯.

మహన్తా పఞ్చ నాళియో, నాళియో పఞ్చ మజ్ఝిమా;

ఖుద్దకా ఛ నాళీ చేవ, ఏతా సబ్బాపి ధాతుయో.

౧౦.

ఉణ్హీసం సీహళే దీపే, బ్రహ్మలోకే చ వామకం;

సీహళే దక్ఖిణక్ఖఞ్చ, సబ్బాపేతా పతిట్ఠితా.

౧౧.

ఏకా దాఠా తిదసపురే, ఏకా నాగపురే అహు;

ఏకా గన్ధారవిసయే, ఏకా కలిఙ్గరాజినో.

౧౨.

చత్తాలీససమా ¶ దన్తా, కేసా లోమా చ సబ్బసో;

దేవా హరింసు ఏకేకం, చక్కవాళపరమ్పరా.

౧౩.

వజిరాయం భగవతో, పత్తో దణ్డఞ్చ చీవరం;

నివాసనం కులఘరే, పచ్చత్థరణం కపిలవ్హయే [సిలవ్హయే (స్యా.)].

౧౪.

పాటలిపుత్తపురమ్హి, కరణం కాయబన్ధనం;

చమ్పాయుదకసాటియం, ఉణ్ణలోమఞ్చ కోసలే.

౧౫.

కాసావం బ్రహ్మలోకే చ, వేఠనం తిదసే పురే;

నిసీదనం అవన్తీసు, రట్ఠే [దేవరట్ఠే (స్యా.)] అత్థరణం తదా.

౧౬.

అరణీ చ మిథిలాయం, విదేహే పరిసావనం;

వాసి ¶ సూచిఘరఞ్చాపి, ఇన్దపత్థపురే తదా.

౧౭.

పరిక్ఖారా అవసేసా, జనపదే అపరన్తకే;

పరిభుత్తాని మునినా, అకంసు మనుజా తదా.

౧౮.

ధాతువిత్థారికం ¶ ఆసి, గోతమస్స మహేసినో;

పాణీనం అనుకమ్పాయ, అహు పోరాణికం తదాతి.

ధాతుభాజనీయకథా నిట్ఠితా.

బుద్ధవంసోనిట్ఠితో.