📜

ᨶᨾᩮᩣ ᨲᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ.

ᩋᨽᩥᨵᩣᨶᨸ᩠ᨸᨴᩦᨸᩥᨠᩣᨭᩦᨠᩣ

ᨣᨶ᩠ᨳᩣᩁᨾ᩠ᨽ

ᨿᩔ ¶ ᨬᩣᨱᩴ ᩈᨴᩣ ᨬᩣᨱᩴ, ᨶᩣᨬ᩠ᨬᩮᨿ᩠ᨿᩣ ᨬᩣᨱᨠᩴ ᩅᩥᨶᩣ;

ᨶᩥᩔᩮᩈᨣᩩᨱᨿᩩᨲ᩠ᨲᩔ, ᨲᩔ ᨶᨲ᩠ᩅᩣ ᨾᩉᩮᩈᩥᨶᩮᩣ.

ᩈᨲ᩠ᨳᨶ᩠ᨲᩁᩣ ᩈᨾᩣᨴᩣᨿ, ᩈᩣᩁᩴ ᩈᨻ᩠ᨻᨵᩁᩣ ᨲᨳᩣ;

ᨠᩁᩥᨿ᩠ᨿᨲᩮ’ᨽᩥᨵᩣᨶᨸ᩠ᨸ-ᨴᩦᨸᨠᩔᨲ᩠ᨳᩅᨱ᩠ᨱᨶᩣ.

ᨸᨱᩣᨾᩣᨴᩥᩅᨱ᩠ᨱᨶᩣ

[ᨠ] ᩍᨵᩣᨿᩴ ᨣᨶ᩠ᨳᨠᩣᩁᩮᩣ ᨸᨮᨾᨾᨲ᩠ᨲᨶᩮᩣ ᨸᩁᩮᩈᨾ᩠ᨸᩥ ᩈᨾ᩠ᨾᩣ ᩉᩥᨲᨲ᩠ᨳᨶᩥᨸ᩠ᨹᩣᨴᨶᨲ᩠ᨳᩴ ᨸᩩᨬ᩠ᨬᩈᨾ᩠ᨸᨴ’ᨾᩣᨧᩥᨶᩮᩣᨲᩥ ‘‘ᨲᨳᩣᨣᨲᩮᩣ’’ᨧ᩠ᨧᩣᨴᩥᨶᩣ. ᨲᨲ᩠ᨳ ᨠᩁᩩᨱᩣᨠᩁᩮᩣ ᨾᩉᩣᨠᩁᩩᨱᩣᨿ ᩏᨸ᩠ᨸᨲ᩠ᨲᩥᨭ᩠ᨮᩣᨶᨽᩪᨲᩮᩣ ᨿᩮᩣ ᨲᨳᩣᨣᨲᩮᩣ ᨽᨣᩅᩣ ᨠᩁᩮᩣᨸᨿᩣᨲᩴ ᩋᨲ᩠ᨲᨶᩮᩣ ᩉᨲ᩠ᨳᨣᨲᩴ ᩈᩩᨡᨸ᩠ᨸᨴᩴ ᩈᩩᨡᩔ ᨸᨲᩥᨭ᩠ᨮᩣᨶᨽᩪᨲᩴ ᩈᩩᨡᨠᩣᩁᨱᩴ ᩅᩣ ᩈᩩᨡᨴᩣᨿᨠᩴ ᩅᩣ ᨸᨴᩴ ᨶᩥᨻ᩠ᨻᩣᨶᩴ ᩒᩈᨩ᩠ᨩ ᨧᨩᩥᨲ᩠ᩅᩣ ᨠᩃᩥᩈᨾ᩠ᨽᩅᩮ ᨴᩩᨠ᩠ᨡᨠᩣᩁᨱᨽᩪᨲᩮ ¶ ᨽᩅᩮ ᩈᩴᩈᩣᩁᩮ ᨠᩮᩅᩃᨴᩩᨠ᩠ᨠᩁᩴ ᩈᩩᨠᩁᩮᨶᩣᩈᨾ᩠ᨾᩥᩔᩴ ᩋᨧ᩠ᨧᨶ᩠ᨲᨴᩩᨠ᩠ᨠᩁᩴ ᨸᨬ᩠ᨧᩅᩥᨵᨸᩁᩥᨧ᩠ᨧᩣᨣᩣᨴᩥᨠᩴ ᨠᩁᩴ ᨠᩁᩮᩣᨶ᩠ᨲᩮᩣ ᨸᩁᨲ᩠ᨳᩴ ᨸᩁᩮᩈᨾᨲ᩠ᨳᩴᨿᩮᩅ ᩋᨠᩣ ᨠᨲᩅᩣ, ᨲᨾᩮᨴᩥᩈᩴ ᨲᨳᩣᨣᨲᩴ ᩋᩉᩴ ᨶᨾᩣᨾᩥ.

[ᨡ] ᨿᨬ᩠ᨧ ᨵᨾ᩠ᨾᩴ ᨩᩁᩣᩁᩩᨩᩣᨴᩥᨾᩩᨲ᩠ᨲᩣ ᨩᩁᩣᩁᩮᩣᨣᩣᨴᩦᩉᩥ ᩅᩥᨾᩩᨲ᩠ᨲᩣ ᨾᩩᨶᩥᨠᩩᨬ᩠ᨩᩁᩣ ᨾᩩᨶᩥᩈᩮᨭ᩠ᨮᩣ ᨽᨣᩅᨶ᩠ᨲᩮᩣ ᩋᨸᩪᨩᨿᩩᩴ ᨸᩪᨩᩥᨲᩅᨶ᩠ᨲᩮᩣ, ᨲᨳᩣ ᩏᨲ᩠ᨲᩁᩮ ᩏᨲ᩠ᨲᨾᩮ ᩈᨲ᩠ᨲᩣᨶᩴ ᩅᩣ ᩈᩴᩈᩣᩁᨾᩉᩮᩣᨥᨸᨠ᩠ᨡᨶ᩠ᨴᩣᨶᩴ ᨲᨲᩮᩣ ᩏᨲ᩠ᨲᩁᨱᩈᨾᨲ᩠ᨳᩮ ᨿᩉᩥᩴ ᨲᩁᩮ ᨿᩈ᩠ᨾᩥᩴ ᨵᨾ᩠ᨾᨸ᩠ᩃᩅᩮ ᨮᩥᨲᩣ ᩈᨾ᩠ᨾᩣᨸᨭᩥᨸᨩ᩠ᨩᨶᩅᩈᩮᨶ ᩌᩁᩪᩊ᩠ᩉᩣ ᨶᩁᩣᨶᩁᩣ ᨾᨶᩩᩔᩣ ᨧ ᨴᩮᩅᩣ ᨧ ᨲᩥᩅᨭ᩠ᨭᨾ᩠ᨻᩩᨶᩥᨵᩥᩴ ᨠᩥᩃᩮᩈᨠᨾ᩠ᨾᩅᩥᨸᩣᨠᩅᨭ᩠ᨭᩈᨦ᩠ᨡᩣᨲᩮᩉᩥ ᨲᩦᩉᩥ ᩅᨭ᩠ᨭᩮᩉᩥ ᩌᨠᩩᩃᩥᨲᩴ ᩈᩴᩈᩣᩁᨾᩉᨾ᩠ᨻᩩᩁᩣᩈᩥᩴ ᨲᩁᩥᩴᩈᩩ ᨲᩥᨱ᩠ᨱᩣ, ᩋᨥᨸ᩠ᨸᩉᩴ ᨠᩥᩃᩮᩈᨸ᩠ᨸᩉᩣᨶᨠᩁᩴ, ᩈᩴᩈᩣᩁᨴᩩᨠ᩠ᨡᨸ᩠ᨸᩉᩣᨶᨠᩁᩴ ᩅᩣ ᨲᩴ ᨵᨾ᩠ᨾᨾᨸᩥ ᩋᩉᩴ ᨶᨾᩣᨾᩥ.

[ᨣ] ᨾᩩᨶᩥᨶ᩠ᨴᩮᩣᩁᩈᩈᩪᨶᩩᨲᩴ ᨽᨣᩅᨲᩮᩣ ᩏᩁᩮ ᩈᨾ᩠ᨽᩅᨵᨾ᩠ᨾᨴᩮᩈᨶᩣᨿ ᩋᩁᩥᨿᨽᩣᩅᨸ᩠ᨸᨲ᩠ᨲᨲᩣᨿ ᨾᩩᨶᩥᨶ᩠ᨴᩔ ᩒᩁᩈᨸᩩᨲ᩠ᨲᨽᩣᩅᩴ ᨣᨲᩴ ᨸᨲ᩠ᨲᩴ ᨶᩩᨲᩴ ᨠᩥᩃᩮᩈᨡᩮᨸᨶᨠᩴ ᩈᩩᨸᩩᨬ᩠ᨬᨡᩮᨲ᩠ᨲᩴ ᨸᩩᨬ᩠ᨬᨲ᩠ᨳᩥᨠᩣᨶᩴ ᨸᩩᨬ᩠ᨬᨻᩦᨩᩅᩥᩁᩩᩉᨶᨭ᩠ᨮᩣᨶᩴ ᩈᩩᨡᩮᨲ᩠ᨲᨽᩪᨲᩴ ᨽᩩᩅᨶᩮ ᩃᩮᩣᨠᩮ ᩈᩩᨲᩴ ᩅᩥᩔᩩᨲᩴ ¶ , ᩈᩩᨲᨵᩁᩴ ᩅᩣ ᨠᩥᩃᩮᩈᩈᩅᨶᩣᨽᩣᩅᩮᨶ ᩋᩔᩩᨲᩴ ᩋᨸᩣᨱᩮᩣᨸᩥ ᨸᩣᨱᩮᩣ ᨠᩁᩦᨿᩥᨲ᩠ᨳᩣᨲᩥ ᨸᩣᨱᩦᨠᨲᩮᩣ, ᨸᩣᨲᩥᨾᩮᩣᨠ᩠ᨡᩈᩴᩅᩁᩮᩣ, ᩈᩮᩣᩅ ᩈᩴᩅᩁᩮᩣ ᩑᨲᩔᨲ᩠ᨳᩦᨲᩥ ᨸᩣᨱᩦᨠᨲᩈᩴᩅᩁᩮᩣ, ᨲᩴ ᨸᩣᨱᩦᨠᨲᩈᩴᩅᩁᩴ, ᩅᩁᩴ ᩈᩦᩃᩣᨴᩥᨣᩩᨱᩮᩉᩥ ᩈᨴᩮᩅᨠᩮᩉᩥ ᩃᩮᩣᨠᩮᩉᩥ ᨸᨲ᩠ᨳᨶᩦᨿᩴ. ‘‘ᨴᩮᩅᩣᨸᩥ ᨲᩔ ᨸᩥᩉᨿᨶ᩠ᨲᩥ ᨲᩣᨴᩥᨶᩮᩣ’’ᨲᩥ [ᩏᨴᩣ. ᪒᪗] ᩉᩥ ᩅᩩᨲ᩠ᨲᩴ. ᩈᨴᩣ ᩈᨻ᩠ᨻᩈ᩠ᨾᩥᩴ ᨠᩣᩃᩮ ᨣᩩᨱᩮᩣᨥᩮᨶ ᩈᩦᩃᩣᨴᩥᨣᩩᨱᩈᨾᩪᩉᩮᨶ ᨶᩥᩁᨶ᩠ᨲᩁᨶ᩠ᨲᩁᩴ ᩋᩅᩥᨧ᩠ᨨᩥᨶ᩠ᨶᨾᩣᨶᩈᩴ, ᨸᩁᩥᨸᩩᨱ᩠ᨱᨧᩥᨲ᩠ᨲᩴ ᩅᩣ ᨣᨱᨾ᩠ᨸᩥ ᩋᨭ᩠ᨮᨶ᩠ᨶᩴ ᩋᩁᩥᨿᨸᩩᨣ᩠ᨣᩃᩣᨶᩴ ᩈᨾᩪᩉᩴ ᩋᨸᩥ ᩋᩉᩴ ᨶᨾᩣᨾᩦᨲᩥ ᩑᩅᨾᩮᨲ᩠ᨳ ᨲᩥᨱ᩠ᨱᨾ᩠ᨸᩥ ᩈᨦ᩠ᨡᩮᨸᨲᩮᩣ ᩋᨲ᩠ᨳᨿᩮᩣᨩᨶᩣ ᨴᨭ᩠ᨮᨻ᩠ᨻᩣ.

[ᨥ-ᨦ] ᩑᩅᩴ ᨸᩩᨬ᩠ᨬᩈᨾ᩠ᨸᨴᨾᩣᨧᩥᨶᩥᨲ᩠ᩅᩣ ᨠᩥᨾᨽᩥᨾᨲᩴ ᩈᩣᨵᨶᩦᨿᨾᩥᨧ᩠ᨧᩣᩉ ‘‘ᨸᨠᩣᩈᩥᩔᨾᨽᩥᨵᩣᨶᨸ᩠ᨸᨴᩦᨸᩥᨠ’’ᨶ᩠ᨲᩥ. ᨻᩩᨴ᩠ᨵᩣᨴᩦᨶᨾᨽᩥᨵᩣᨶᩣᨶᩴ ᩈᩁᩪᨸᩅᩈᩮᨶ, ᩃᩥᨦ᩠ᨣᩅᩈᩮᨶ ᨧ ᨸᩁᩥᨴᩦᨸᨶᨲᩮᩣ ᨸᨠᩣᩈᨶᨲᩮᩣ ‘‘ᩋᨽᩥᨵᩣᨶᨸ᩠ᨸᨴᩦᨸᩥᨠ’’ᨶ᩠ᨲᩥ ᩃᨴ᩠ᨵᨶᩣᨾᩴ ᩈᨲ᩠ᨳᩴ ᨸᨠᩣᩈᩥᩔᩴ ᩋᨶ᩠ᨲᩮᩣᨽᩣᩅᩮᨶ ᨶᩥᨸ᩠ᨹᨶ᩠ᨶᩴ ᨻᩉᩥᨽᩣᩅᩮᨶ ᨸᨠᩣᩈᩥᩔᩴ. ᩋᨶ᩠ᨲᩮᩣᨽᩣᩅᩔ ᩉᩥ ᨻᩉᩥᨽᩣᩅᨾᨸᩮᨠ᩠ᨡᩥᨲ᩠ᩅᩣ ᨽᩣᩅᩥᨲᨾᩩᨸᨸᨶ᩠ᨶᩴ. ᨶᨶᩩ ᩈᨶ᩠ᨲᩮᩅ ᨸᩩᨻ᩠ᨻᩣᨧᩁᩥᨿᩣᨶᩴ ᨶᩣᨾᩃᩥᨦ᩠ᨣᨸ᩠ᨸᨠᩣᩈᨶᩣᨶ᩠ᨿᨾᩁᨠᩮᩣᩈᨲᩥᨠᨱ᩠ᨯᩮᩣᨸ᩠ᨸᩃᩥᨶ᩠ᨿᩣᨴ᩠ᨿᨽᩥᨵᩣᨶᩈᨲ᩠ᨳᩣᨶᩥ, ᨸᩣᨱᩥᨶᩥ ᨻ᩠ᨿᩣᨯᩥᩅᩁᩁᩩᨧᩥᨧᨶ᩠ᨴᨣᩮᩣᨾᩥ ᩁᩩᨴ᩠ᨴᩅᩣᨾᨶᩣᨴᩥᩅᩥᩉᩥᨲᩣᨶᩥ ᨧ ᩃᩥᨦ᩠ᨣᩈᨲ᩠ᨳᩣᨶᩥ, ᨲᨲᩮᩣ ᨠᩥᨾᩥᨴᨾᩩᨧ᩠ᨧᨲᩮ ᩍᨧ᩠ᨧᩣᩉ ‘‘ᨶᩣᨾᩃᩥᨦ᩠ᨣᩣᨶᩥ ᨻᩩᨴ᩠ᨵᨽᩣᩈᩥᨲᩔᩣᩁᩉᩣᨶᩥ ᨴᩔᨿᨶ᩠ᨲᩮᩣ’’ᨲᩥ. ᩑᨲᩮᨶ ᩈᨶ᩠ᨲᩮᩈ᩠ᩅᨸᩥ ᨸᩩᨻ᩠ᨻᩣᨧᩁᩥᨿᩣᨶᩴ ᩈᨲ᩠ᨳᩮᩈᩩ ᨿᩈ᩠ᨾᩣ ᨶ ᨲᩮᩈᩩ ᨶᩣᨾᩃᩥᨦ᩠ᨣᩣᨶᩥ ᨻᩩᨴ᩠ᨵᩅᨧᨶᩣᨶᩩᩁᩪᨸᩣᨶᩥ ᩉᩮᩣᨶ᩠ᨲᩥ ¶ , ᨲᩈ᩠ᨾᩣ ᨲᨴᨶᩩᩁᩪᨸᩣᨶᩥ ᨶᩣᨾᩃᩥᨦ᩠ᨣᩣᨶᩥ ᨴᩔᨿᨶ᩠ᨲᩮᩣ ᩋᨽᩥᨵᩣᨶᩈᨲ᩠ᨳᩴ ᨸᨠᩣᩈᩥᩔᩣᨾᩦᨲᩥ ᩑᨲᨾᨲ᩠ᨳᩴ ᨴᩦᨸᩮᨲᩥ. ᨶᨾ᩠ᨿᨲᩮ ᩋᨽᩥᨵᩦᨿᨲᩮ ᩋᨲ᩠ᨳᩮᩣ ᩋᨶᩮᨶᩣᨲᩥ ᨶᩣᨾᩴ, ᩈᨴ᩠ᨴᩈᨲ᩠ᨳᩮ ᨶᨾᩩᨵᩣᨲᩩᩅᩈᩮᨶ. ᩃᩥᨦ᩠ᨣᨿᨲᩮ ‘‘ᩍᨲ᩠ᨳᩥᨿᨾᨲᩮᩣ ᩌᨸᨧ᩠ᨧᨿᩮᩣ’’ᨲ᩠ᨿᩣᨴᩥᨶᩣ ᩅᩥᨽᨩ᩠ᨩᨲᩮᨲᩥ, ᩍᨲ᩠ᨳᩣᨴᨿᩮᩣ ᩅᩣᨶᩮᨶ ᩃᩥᨦ᩠ᨣᩦᨿᨶ᩠ᨲᩮ ᨻ᩠ᨿᨬ᩠ᨩᩦᨿᨶ᩠ᨲᩮᨲᩥ ᩃᩥᨦ᩠ᨣᩴ, ᩍᨲ᩠ᨳᩥᨸᩩᨾᨶᨸᩩᩴᩈᨠᩴ. ᨠᩥᨾᩮᨲᩔ ᩋᨽᩥᨵᩣᨶᩈᨲ᩠ᨳᩔ ᨠᩁᨱᩮ ᨸᨿᩮᩣᨩᨶᨶ᩠ᨲᩥ ᨸᩩᨧ᩠ᨨᩣᨿᩴ ᨿᩈ᩠ᨾᩥᩴ ᩈᨲᩥ ᨲᩴ ᩈᩮᩣᨲᩣᩁᩮᩣ ᩈᩮᩣᨲᩩᨾᩩᩔᩉᨶ᩠ᨲᩥ, ᨲᩴ ᨴᩔᩮᨲᩩᨾᩣᩉ ‘‘ᨶᩣᨾᩃᩥᨦ᩠ᨣᩮᩈ᩠ᩅᩥ’’ᨧ᩠ᨧᩣᨴᩥ. ᨿᨲᩮᩣ ᨻᩩᨴ᩠ᨵᩅᨧᨶᩮ ᨸᨭᩩᨶᩮᩣ ᨽᩣᩅᩮᩣ ᨸᩣᨭᩅᩴ, ᨲᨴᩮᩅ ᩋᨲ᩠ᨳᩮᩣ ᨸᨿᩮᩣᨩᨶᩴ, ᨲᩴ ᩍᨧ᩠ᨨᨶ᩠ᨲᩦᨲᩥ ᨸᩣᨭᩅᨲ᩠ᨳᩥᨶᩮᩣ, ᨲᩮᩈᩴ ᨸᩣᨭᩅᨲ᩠ᨳᩦᨶᩴ ᩈᩮᩣᨲᩪᨶᩴ ᨶᩣᨾᩃᩥᨦ᩠ᨣᩮᩈᩩ ᨠᩮᩣᩈᩃ᩠ᩃᩴ ᨠᩩᩈᩃᨲᩣ ᨨᩮᨠᨽᩣᩅᩮᩣ ᨻᩩᨴ᩠ᨵᩅᨧᨶᩮ ᨾᩉᨻ᩠ᨻᩃᩴ ᩋᨲ᩠ᨳᩔ ᨶᩥᨧ᩠ᨨᨿᨠᩣᩁᨱᩴ ᩉᩮᩣᨲᩥ, ᩋᨲᩮᩣ ᨲᩈ᩠ᨾᩣ ᨠᩣᩁᨱᩣ ᨻᩩᨴ᩠ᨵᨽᩣᩈᩥᨲᩔᩣᩁᩉᩣᨶᩥ ᨶᩣᨾᩃᩥᨦ᩠ᨣᩣᨶᩥ ᨴᩔᨿᨶ᩠ᨲᩮᩣ ᩋᨽᩥᨵᩣᨶᨸ᩠ᨸᨴᩦᨸᩥᨠᩴ ᩈᨲ᩠ᨳᩴ ᨸᨠᩣᩈᩥᩔᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

[ᨧ] ᩍᨴᩣᨶᩥ ᩈᨲ᩠ᨳᩃᩉᩩᨽᩣᩅᨲ᩠ᨳᨾᩣᩉ ‘‘ᨽᩥᨿ᩠ᨿᩮᩣ’’ᨧ᩠ᨧᩣᨴᩥ. ᨽᩥᨿ᩠ᨿᩮᩣ ᨻᩣᩉᩩᩃ᩠ᩃᩮᨶ ᩁᩪᨸᨶ᩠ᨲᩁᩣ ᩁᩪᨸᨽᩮᨴᩮᨶ ᩍᨲ᩠ᨳᩥᨸᨧ᩠ᨧᨿᨸᩩᨾ᩠ᨽᩣᩅᩣᨴᩥᨠᩣᩁᩥᨿᨠᨲᩮᨶ ᨳᩦᨸᩩᨶ᩠ᨶᨸᩩᩴᩈᨠᩴ ᨬᩮᨿ᩠ᨿᩴ, ᩈᩮᩣ ᨧ ᨶᩣᨾᩣᨶᩴ ᨶᩣᨾᩅᩥᩈᩮᩈᨶᩔ, ᨶᩣᨾᨸᩁᩣᨾᩈᩥᩈᨻ᩠ᨻᨶᩣᨾᩈᨴ᩠ᨴᩔ ᨧ ᨬᩮᨿ᩠ᨿᩮᩣ ᨸᨠᩣᩁᨶ᩠ᨲᩁᩣᨽᩣᩅᩣ. ᨲᨲᩕ ᨶᩣᨾᩣᨶᩴ ᩁᩪᨸᨽᩮᨴᩮᩣ ᨿᨳᩣ – ᨨᩩᩁᩥᨠᩣ ᩈᨲ᩠ᨿ’ᩈᩥᨸᩩᨲ᩠ᨲᩥ [ᩋᨽᩥᨵᩣᨶ ᪓᪙᪒ ᨣᩣᨳᩣ]. ᩋᩈᩥ ᨡᨣ᩠ᨣᩮᩣ ᨧ ᩈᩣᨿᨠᩮᩣ [ᩋᨽᩥᨵᩣᨶ ᪓᪙᪑ ᨣᩣᨳᩣ]. ᨸᩣᨶᩦᨿᩴ ᩈᩃᩥᩃᩴ ᨴᨠᨶ᩠ᨲᩥ [ᩋᨽᩥᨵᩣᨶ ᪖᪖᪑ ᨣᩣᨳᩣ]. ᨶᩣᨾᩅᩥᩈᩮᩈᨶᩔ ᨿᨳᩣ – ᨶᩥᩈᩦᨳᩮᩣ ᨾᨩ᩠ᨫᩥᨾᩣ ᩁᨲ᩠ᨲᩦᨲᩥ [ᩋᨽᩥᨵᩣᨶ ᪗᪐ ᨣᩣᨳᩣ]. ᨶᩣᨾᨸᩁᩣᨾᩈᩥᩈᨻ᩠ᨻᨶᩣᨾᩈᨴ᩠ᨴᩔ ᨿᨳᩣ – ¶ ᩌᨠᨦ᩠ᨡᩣ ᩁᩩᨧᩥ ᩅᩩᨲ᩠ᨲᩣ ᩈᩣ, ᨲ᩠ᩅᨵᩥᨠᩣ ᩃᩣᩃᩈᩣ ᨴ᩠ᩅᩥᩈᩪᨲᩥ [ᩋᨽᩥᨵᩣᨶ ᪑᪖᪓ ᨣᩣᨳᩣ]. ᩈᩣᩉᨧᩁᩥᨿᩮᨶ ᨶᩥᨿᨲᩃᩥᨦ᩠ᨣᩮᨶᩣᩅᩥᨸ᩠ᨸᨿᩮᩣᨣᨲᩮᩣ ᨳᩦᨸᩩᨶ᩠ᨶᨸᩩᩴᩈᨠᩴ ᨬᩮᨿ᩠ᨿᩴ. ᨠᨲ᩠ᨳᨧᩦᨲᩥ ᨿᨲᩕ ᩁᩪᨸᨽᩮᨴᩮᩣ ᨶᨲ᩠ᨳᩥ, ᨲᩴ ᨿᨳᩣ – ᨾᩁᩦᨧᩥ ᨾᩥᨣᨲᨱ᩠ᩉᩥᨠᩣ [ᩋᨽᩥᨵᩣᨶ ᪖᪕ ᨣᩣᨳᩣ]. ᩁᩴᩈᩥᨾᩣ ᨽᩣᨠᩁᩮᩣ ᨽᩣᨶᩩ [ᩋᨽᩥᨵᩣᨶ ᪖᪓ ᨣᩣᨳᩣ]. ᩌᨸᩮᩣ ᨸᨿᩮᩣ ᨩᩃᩴ ᩅᩣᩁᩥ [ᩋᨽᩥᨵᩣᨶ ᪖᪖᪑ ᨣᩣᨳᩣ]. ᨾᩁᩦᨫᩣᨴᨿᩮᩣ ᩉ᩠ᨿᨽᩥᨶ᩠ᨶᩁᩪᨸᨲ᩠ᨲᩣ ᩃᩥᨦ᩠ᨣᨶ᩠ᨲᩁᩮᨸᩥ ᩈᨾ᩠ᨽᩣᩅᩥᨿᨶ᩠ᨲᩮᩉᩥ ᨶᩥᨿᨲᩃᩥᨦ᩠ᨣᩮᩉᩥ ᨾᩥᨣᨲᨱ᩠ᩉᩥᨠᩣᨽᩣᨠᩁᨩᩃᩣᨴᩥᩈᨴ᩠ᨴᩮᩉᩥ ᩈᩣᩉᨧᩁᩥᨿᩮᨶ ᨲᩴᩃᩥᨦ᩠ᨣᩮ ᨶᩥᨧ᩠ᨨᩦᨿᨶ᩠ᨲᩮ. ᩌᩉᨧ᩠ᨧᩅᩥᨵᩣᨶᩮᨶ ᩍᨲ᩠ᨳᩥᨸᩩᨾᨶᨸᩩᩴᩈᨠᩣᨶᩴ ᩅᩥᩈᩮᩈᩮᨲ᩠ᩅᩣ ᨠᨳᨶᩮᨶ ᨳᩦᨸᩩᨶ᩠ᨶᨸᩩᩴᩈᨠᩴ ᨬᩮᨿ᩠ᨿᩴ. ᨠ᩠ᩅᨧᩦᨲᩥ ᨿᨲᩕ ᨶ ᩁᩪᨸᨽᩮᨴᩮᩣ ᩃᩥᨦ᩠ᨣᨶᩥᨱ᩠ᨱᨿᩔ ᨶᩥᨾᩥᨲ᩠ᨲᩴ, ᨶ ᨧ ᩈᩣᩉᨧᩁᩥᨿᩴ ᩃᩥᨦ᩠ᨣᨽᩮᨴᩮᩣᨽᩥᨾᨲᩮᩣ, ᨶᩮᨠᨾᩮᩅ ᩅᩣ ᩃᩥᨦ᩠ᨣᨾᩥᨧ᩠ᨨᨲᩮ, ᨲᩴ ᨿᨳᩣ – ᩅᩃ᩠ᩃᩁᩦ ᨾᨬ᩠ᨩᩁᩦ ᨶᩣᩁᩦ [ᩋᨽᩥᨵᩣᨶ ᪕᪕᪐ ᨣᩣᨳᩣ]. ᩅᩥᨭᨸᩮᩣ ᩅᩥᨭᨽᩦᨲ᩠ᨳᩥᨿᩴ [ᩋᨽᩥᨵᩣᨶ ᪕᪔᪗ ᨣᩣᨳᩣ]. ᨽᩦᨲᩥᨲ᩠ᨳᩦ ᨽᨿᨾᩩᨲ᩠ᨲᩣᩈᩮᩣ [ᩋᨽᩥᨵᩣᨶ ᪑᪖᪖ ᨣᩣᨳᩣ]. ᩅᨩᩥᩁᩴ ᨸᩩᨶ᩠ᨶᨸᩩᩴᩈᨠᩮᨧ᩠ᨧᩣᨴᩥ [ᩋᨽᩥᨵᩣᨶ ᪒᪔ ᨣᩣᨳᩣ].

[ᨨ] ᩍᨴᩣᨶᩥ ᩁᩪᨸᨽᩮᨴᩮᩣᨲᩥ ᩃᩥᨦ᩠ᨣᨶᩥᨱ᩠ᨱᨿᩔ ᨸᨭᩥᨸᨲ᩠ᨲᩥᩉᩮᨲᩩᨠᩮᩣ ᨿᩮᩣ ᨽᩥᨶ᩠ᨶᩃᩥᨦ᩠ᨣᩣᨶᩴ ᨴ᩠ᩅᨶ᩠ᨴᩮᩣ, ᨲᨠ᩠ᨠᩁᨱᨸᨭᩥᩈᩮᨵᩮᨶ ᩋᨽᩥᨶ᩠ᨶᩃᩥᨦ᩠ᨣᩣᨶᨾᩮᩅ ᨴ᩠ᩅᨶ᩠ᨴᩮᩣ ᨠᨲᩮᩣᨲᩥ ᨸᩁᩥᨽᩣᩈᩥᨲᩩᨾᩩᨸᨠ᩠ᨠᨾᨲᩮ ‘‘ᩋᨽᩥᨶ᩠ᨶᩃᩥᨦ᩠ᨣᩥᨶ’’ᨾᩥᨧ᩠ᨧᩣᨴᩥ. ᩋᨽᩥᨶ᩠ᨶᩃᩥᨦ᩠ᨣᩦᨶᩴᨿᩮᩅ ᨶᩣᨾᩣᨶᩴ ᨴ᩠ᩅᨶ᩠ᨴᩮᩣ ᨠᨲᩮᩣ, ᨶ ᨽᩥᨶ᩠ᨶᩃᩥᨦ᩠ᨣᩦᨶᩴ, ᨿᨳᩣ – ᩅᩥᨾᩩᨲ᩠ᨿᩈᨦ᩠ᨡᨲᨵᩣᨲᩩ, ᩈᩩᨴ᩠ᨵᩥᨶᩥᨻ᩠ᨻᩩᨲᩥᨿᩮᩣ ᩈᩥᨿᩩᨶ᩠ᨲᩥ [ᩋᨽᩥᨵᩣᨶ ᪙ ᨣᩣᨳᩣ]. ᨶ ᨠᩮᩅᩃᩴ ᨴ᩠ᩅᨶ᩠ᨴᩮᩣᨿᩮᩅ, ᩋᨳ ᨡᩮᩣ ᩑᨠᩈᩮᩈᩮᩣᨸ᩠ᨿᨽᩥᨶ᩠ᨶᩃᩥᨦ᩠ᨣᩣᨶᩴᨿᩮᩅ ᨠᨲᩮᩣ, ᨿᨳᩣ – ᨶᨣ᩠ᨣᩮᩣ ᨴᩥᨣᨾ᩠ᨻᩁᩣᩅᨲ᩠ᨳᩣ. [ᩋᨽᩥᨵᩣᨶ ᪗᪓᪔ ᨣᩣᨳᩣ] ᩈᨻ᩠ᨻᨵᩁᨠᨲᩮ ᨸᨶ ‘‘ᨩᩦᨾᩪᨲᩣ ᨾᩮᨥᨸᨻ᩠ᨻᨲᩣ’’ ᩍᨧ᩠ᨧᩩᨴᩣᩉᨭᩴ. ᨶᨶᩩ ᨧ ᨽᩥᨶ᩠ᨶᩃᩥᨦ᩠ᨣᩣᨶᨾ᩠ᨸᩥ ᩑᨠᩈᩮᩈᩮᩣ ᨠᨲᩮᩣ, ᨿᨳᩣ ¶ – ᨾᩣᨲᩣ ᨸᩥᨲᩣ ᨲᩩ ᨸᩥᨲᩁᩮᩣ, ᨸᩩᨲ᩠ᨲᩣ ᨲᩩ ᨸᩩᨲ᩠ᨲᨵᩦᨲᩁᩮᩣ [ᩋᨽᩥᨵᩣᨶ ᪒᪔᪙ ᨣᩣᨳᩣ]. ᩈᩈᩩᩁᩣ ᩈᩔᩩ ᩈᩈᩩᩁᩣ, ᨽᩣᨲᩩᨽᨣᩥᨶᩥ ᨽᩣᨲᩁᩮᩣᨲᩥ [ᩋᨽᩥᨵᩣᨶ ᪒᪕᪐ ᨣᩣᨳᩣ]. ᩑᨲ᩠ᨳ ᩉᩥ ᨾᩣᨲᩣ ᨧ ᨸᩥᨲᩣ ᨧ ᨸᩥᨲᩁᩮᩣ, ᨸᩩᨲ᩠ᨲᩮᩣ ᨧ ᨵᩦᨲᩣ ᨧ ᨸᩩᨲ᩠ᨲᩣ, ᩈᩔᩩ ᨧ ᩈᩈᩩᩁᩮᩣ ᨧ ᩈᩈᩩᩁᩣ, ᨽᩣᨲᩣ ᨧ ᨽᨣᩥᨶᩦ ᨧ ᨽᩣᨲᩁᩮᩣᨲᩥ ᨽᩥᨶ᩠ᨶᩃᩥᨦ᩠ᨣᩣᨶᨾ᩠ᨸᩥ ᩑᨠᩈᩮᩈᩮᩣ ᨴᩔᩥᨲᩮᩣᨲᩥ. ᨮᩣᨶᨶ᩠ᨲᩁᩮ ᨲᩮᩈᩴ ᨽᩥᨶ᩠ᨶᩃᩥᨦ᩠ᨣᨲᩣᨿ ᨴᩔᩥᨲᨲ᩠ᨲᩣ ᨶ ᨴᩮᩣᩈᩮᩣ. ᨲᩣᨲᩮᩣ ᨲᩩ ᨩᨶᨠᩮᩣ ᨸᩥᨲᩣ [ᩋᨽᩥᨵᩣᨶ ᪒᪔᪓ ᨣᩣᨳᩣ]. ᩋᨾ᩠ᨾᩣ’ᨾ᩠ᨻᩣ ᨩᨶᨶᩦ ᨾᩣᨲᩣ [ᩋᨽᩥᨵᩣᨶ ᪒᪔᪔ ᨣᩣᨳᩣ]. ᩋᨸᨧ᩠ᨧᩴ ᨸᩩᨲ᩠ᨲᩮᩣᨲᩕᨩᩮᩣ ᩈᩩᨲᩮᩣ [ᩋᨽᩥᨵᩣᨶ ᪒᪔᪐ ᨣᩣᨳᩣ]. ᨶᩣᩁᩥᨿᩴ ᨴᩩᩉᩥᨲᩣ ᨵᩦᨲᩣ [ᩋᨽᩥᨵᩣᨶ ᪒᪔᪑ ᨣᩣᨳᩣ]. ᨩᩣᨿᩣᨸᨲᩦᨶᩴ ᨩᨶᨶᩦ, ᩈᩔᩩ ᩅᩩᨲ᩠ᨲᩣᨳ ᨲᨸ᩠ᨸᩥᨲᩣ. ᩈᩈᩩᩁᩮᩣᨲᩥ ᩍᨧ᩠ᨧᩣᨴᩥᨠᨬ᩠ᩉᩥ ᨲᩮᩈᩴ [ᩋᨽᩥᨵᩣᨶ ᪒᪔᪖ ᨣᩣᨳᩣ] ᨮᩣᨶᨶ᩠ᨲᩁᨶ᩠ᨲᩥ. ᨲᨳᩣ ᩑᨲ᩠ᨳ ᨠᨾᩴ ᩅᩥᨶᩣ ᨽᩥᨶ᩠ᨶᩃᩥᨦ᩠ᨣᩣᨶᩴ ᨣᨱᨶᨸᩣᨮᩮᩣ ᩅᩥᨿ ᩈᨦ᩠ᨠᩁᩮᩣᨸᩥ ᨶ ᨠᨲᩮᩣ. ᨲᨲᩕ ᩉᩥ ᩈᨣ᩠ᨣᨴᩥᩈᩣᨴᨿᩮᩣ ᩋᨲ᩠ᨳᩣ ᨿᨳᩣᨠ᩠ᨠᨾᩴ ᨲᩴᩈᨾ᩠ᨻᨶ᩠ᨵᩣ ᨧ ᩈᨠ᩠ᨠᩅᩥᨴᩥᩈᩣᨴᨿᩮᩣ ᩋᨲ᩠ᨳᩣ ᩈᨠᩈᨠᩈᨾ᩠ᨻᨶ᩠ᨵᩈᩉᩥᨲᩣ ᨿᨳᩣᨽᩥᨵᩣᨶᩴ ᩈᩁᩪᨸᨸᨭᩥᨸᨲ᩠ᨿᨾᨲ᩠ᨳᨽᩥᨵᩮᨿ᩠ᨿᩣ, ᨲᨳᩣ ᨲᨸ᩠ᨸᩁᩥᨿᩣᨿᩈᨾ᩠ᨻᨶ᩠ᨵᩣᨶᩥ ᨧ ᨿᩣᨶᩥ ᨶᩣᨾᩣᨶᩥ, ᨲᩣᨶᩥ ᩈᨻ᩠ᨻᩣᨶᩥ ᨲᨴᨽᩥᨵᩣᨶᩣᩅᩈᩁᩮ ᩋᨽᩥᨵᩮᨿ᩠ᨿᩣᨶᩦᨲᩥ ᩈᩩᨡᩮᨶᩮᨠᨲᩕᩮᩅ ᩈᨠᩃᨶᩣᨾᨸᨭᩥᨸᨲ᩠ᨲᩥ ᩈᩁᩪᨸᨸᨭᩥᨸᨲ᩠ᨲᩥ ᨧ ᨿᨳᩣ ᩈᩥᨿᩣᨲᩥᨧ᩠ᨧᩮᨲᨴᨲ᩠ᨳᩴ ᨠᨾᩮᩣ ᩋᨽ᩠ᨿᩩᨸᨣᨾ᩠ᨿᨲᩮ, ᨲᨳᩣ ᨧ ᩈᨲ᩠ᨿᩣᩅᩔᩴ ᩈᨣ᩠ᨣᩣᨴᩥᨸᩁᩥᨿᩣᨿᩮ ᨴᩥᩅᩈᨴ᩠ᨴᩣᨴᨿᩮᩣ, ᩉᩁᩣᨴ᩠ᨿᩅᩈᩁᩮ ᨠᩩᨾᩣᩁᩣᨴᨿᩮᩣ ᩋᨽᩥᨵᩮᨿ᩠ᨿᩣ ᩍᨲᩥ ᨠᨾᩣᨶᩩᩁᩮᩣᨵᩮᨶ ᩃᩥᨦ᩠ᨣᩈᨦ᩠ᨠᩁᩮᩣ ᨸᩁᩥᩉᩁᩥᨲᩩᨾᩈᨠ᩠ᨠᩩᨱᩮᨿ᩠ᨿᩮᩣ, ᨿᨳᩣᩅᩩᨲ᩠ᨲᨶ᩠ᨲᩩ ᨠᨾᩴ ᩅᩥᨶᩣ ᨶᩮᩉ ᩈᨦ᩠ᨠᩁᩮᩣ ᨠᨲᩮᩣ, ᩍᨲᩥ ᨸᩁᩥᨿᩣᨿᩮᨶ ᩍᨲ᩠ᨳᩥᨸ᩠ᨸᨠᩁᨱᩣᨴᩥᨠ᩠ᨠᨾᩮᨶ ᨿᨳᩣᩈᨾ᩠ᨽᩅᨾᨽᩥᨵᩣᨶᨲᩮᩣ, ᨲᩴ ᨿᨳᩣ – ᩎᨲᩥ ᨲ᩠ᩅᩥᨲ᩠ᨳᩦ ᩋᨩᨬ᩠ᨬᨬ᩠ᨧ, ᩏᨸᩈᨣ᩠ᨣᩮᩣ ᩏᨸᨴ᩠ᨴᩅᩮᩣᨲᩥ [ᩋᨽᩥᨵᩣᨶ ᪔᪐᪑ ᨣᩣᨳᩣ]. ᩋᨲᩕ ᩉᩥ ᨿᩮ ᨲᩥᩃᩥᨦ᩠ᨣᩣ, ᨲᩮ ᨲᩥᩃᩥᨦ᩠ᨣᩣᩅᩈᩁᩮ ᩑᩅ ᨶᩥᨻᨴ᩠ᨵᩣ, ᨶ ᨣᨱᨶᨸᩣᨮᩣ ᩅᩥᨿ ᩏᨧ᩠ᨧᩣᩁᨱᩅᩈᩮᨶ, ᩑᩅᩴ ᩈᨻ᩠ᨻᨲᩕ ᨿᨳᩣᩈᨾ᩠ᨽᩅᩴ ᨶᩦᨿᨲᩮ. ᩅᩩᨲ᩠ᨲᨬ᩠ᨧ –

‘‘ᨽᩮᨴᩣᨡ᩠ᨿᩣᨶᩣᨿ ¶ ᨶ ᨴ᩠ᩅᨶ᩠ᨴᩮᩣ, ᨶᩮᨠᩈᩮᩈᩮᩣ ᨶ ᩈᨦ᩠ᨠᩁᩮᩣ;

ᨠᨲᩮᩣᨲᩕ ᨽᩥᨶ᩠ᨶᩃᩥᨦ᩠ᨣᩣᨶ-ᨾᩅᩩᨲ᩠ᨲᩣᨶᩴ ᨠᨾᩴ ᩅᩥᨶᩣ’’ᨲᩥ [ᩋᨾᩁ ᪑.᪔].

ᩍᨴᩣᨶᩥ ᩃᩥᨦ᩠ᨣᩅᩣᨧᨠᩣᨶᩴ ᨮᩣᨶᩅᩈᩮᨶᨲ᩠ᨳᩮᩈᩩ ᨣᨾᨶᩴ ᨴᩔᩮᨲᩩᨾᩣᩉ ‘‘ᩃᩥᨦ᩠ᨣᩅᩣᨧᨠᩮ’’ᨧ᩠ᨧᩣᨴᩥ. ᨣᩣᨳᩣᨸᩣᨴᨶ᩠ᨲᨾᨩ᩠ᨫᨭ᩠ᨮᩣ ᨣᩣᨳᩣᨶᩴ ᨸᩣᨴᩣᨶᨬ᩠ᨧ ᩋᨶ᩠ᨲᨾᨩ᩠ᨫᨭ᩠ᨮᩣ ᩃᩥᨦ᩠ᨣᩅᩣᨧᨠᩣ ᩋᨶᩮᨠᨲ᩠ᨳᩃᩥᨦ᩠ᨣᩅᩣᨧᨠᩣᨶᩥ ᨬᩣᨱᨴᩔᨶᩣᨴᩦᨶᩥ ᩃᩥᨦ᩠ᨣᩣᨶᩥ ᨸᩩᨻ᩠ᨻᨾᨲ᩠ᨳᩴ ᩅᩣᨧᨠᩅᩈᩮᨶ ᨿᨶ᩠ᨲᩥ ᨣᨧ᩠ᨨᨶ᩠ᨲᩥ. ᩋᨸᩁᩮ ᨣᩣᨳᩣᨸᩣᨴᩣᨶᨾᩣᨴᩥᨭ᩠ᨮᩣ ᩃᩥᨦ᩠ᨣᩅᩣᨧᨠᩣ ᨸᩁᨾᨲ᩠ᨳᩴ ᨿᨶ᩠ᨲᩥ ᨣᨧ᩠ᨨᨶ᩠ᨲᩥ. ᨲᩴ ᨿᨳᩣ –

ᨹᩃᩮ ᩅᩥᨸᩔᨶᩣᨴᩥᨻ᩠ᨻ-ᨧᨠ᩠ᨡᩩᩈᨻ᩠ᨻᨬ᩠ᨬᩩᨲᩣᩈᩩ ᨧ;

ᨸᨧ᩠ᨧᩅᩮᨠ᩠ᨡᨱᨬᩣᨱᨾ᩠ᩉᩥ, ᨾᨣ᩠ᨣᩮ ᨧ ᨬᩣᨱᨴᩔᨶᩴ [ᩋᨽᩥᨵᩣᨶ ᪗᪙᪔ ᨣᩣᨳᩣ].

ᨱᩣᨴᩮᩣ ᩈᨴ᩠ᨵᩣᨧᩦᩅᩁᩣᨴᩥ-ᩉᩮᨲ᩠ᩅᩣᨵᩣᩁᩮᩈᩩ ᨸᨧ᩠ᨧᨿᩮᩣ;

ᨠᩦᩊᩣᨴᩥᨻ᩠ᨻᩅᩥᩉᩣᩁᩣᨴᩮᩣ, ᩅᩥᩉᩣᩁᩮᩣ ᩈᩩᨣᨲᩣᩃᨿᩮ [ᩋᨽᩥᨵᩣᨶ ᪘᪕᪗ ᨣᩣᨳᩣ].

ᨡᨣ᩠ᨣᩮ ᨠᩩᩁᩪᩁᩮ ᨶᩮᨲ᩠ᨲᩥᩴᩈᩮᩣ, ᨸᩁᩈ᩠ᨾᩥᨬ᩠ᨧᩣᨲᩕ ᨲᩦᩈ᩠ᩅᨾᩩ [ᩋᨽᩥᨵᩣᨶ ᪑᪐᪘᪙ ᨣᩣᨳᩣ];

ᨠᩩᩈᩃᩮ ᩈᩩᨠᨲᩴ ᩈᩩᨭ᩠ᨮᩩ-ᨠᨲᩮ ᨧ ᩈᩩᨠᨲᩮᩣ ᨲᩥᩈᩩ [ᩋᨽᩥᨵᩣᨶ ᪙᪓᪘ ᨣᩣᨳᩣ].

ᩈᨾᨿᩮᩣ ᩈᨾᩅᩣᨿᩮ ᨧ, ᩈᨾᩪᩉᩮ ᨠᩣᩁᨱᩮ ᨡᨱᩮ;

ᨸᨭᩥᩅᩮᨵᩮ ᩈᩥᨿᩣ ᨠᩣᩃᩮ, ᨸᩉᩣᨶᩮ ᩃᩣᨽᨴᩥᨭ᩠ᨮᩥᩈᩩ [ᩋᨽᩥᨵᩣᨶ ᪗᪗᪘ ᨣᩣᨳᩣ].

ᨠᨶ᩠ᨲᩣᩁᩮᩣ ᩅᨶᨴᩩᨣ᩠ᨣᩮᩈᩩ [ᩋᨽᩥᨵᩣᨶ ᪑᪑᪐᪗ ᨣᩣᨳᩣ].

ᩑᨲ᩠ᨳ ᨧ –

ᨿᩮᨽᩩᨿ᩠ᨿᨲᩣᨻ᩠ᨿᩣᨾᩥᩔᩮᩈᩩ, ᩅᩥᩈᩴᨿᩮᩣᨣᩮ ᨧ ᨠᩮᩅᩃᩴ;

ᨴᩊ᩠ᩉᨲ᩠ᨳᩮᨶᨲᩥᩁᩮᨠᩮ ᨧᩣ-ᨶᩅᩈᩮᩈᨾ᩠ᩉᩥ ᨲᩴ ᨲᩥᩈᩩ [ᩋᨽᩥᨵᩣᨶ ᪗᪘᪖ ᨣᩣᨳᩣ].

ᩈᨾᩣᨵᩥᩈ᩠ᨾᩥᩴ ᨸᩩᨾᩮᨠᨣ᩠ᨣᩮᩣ-ᨶᩣᨠᩩᩃᩮ ᩅᩣᨧ᩠ᨧᩃᩥᨦ᩠ᨣᩥᨠᩮᩣ [ᩋᨽᩥᨵᩣᨶ ᪑᪐᪓᪕ ᨣᩣᨳᩣ].

ᨩᩊᩮ ᨳᩪᩃᩮᩣ ᨾᩉᨲ᩠ᨿᨸᩥ [ᩋᨽᩥᨵᩣᨶ ᪑᪐᪖᪖ ᨣᩣᨳᩣ] ᨧ᩠ᨧᩣᨴᩦᩈᩩ

ᨣᩣᨳᩣᨾᨩ᩠ᨫᨭ᩠ᨮᩣᨶᩴ ¶ , ᨸᩣᨴᨶ᩠ᨲᨾᨩ᩠ᨫᨭ᩠ᨮᩣᨶᨬ᩠ᨧ ᩃᩥᨦ᩠ᨣᩅᩣᨧᨠᩣᨶᩴ ᨸᩩᨻ᩠ᨻᨸᩁᨲ᩠ᨳᩮᩈ᩠ᩅᨸᩥ ᨣᨾᨶᨽᩣᩅᨲᩮᩣ ‘‘ᨸᩩᨻ᩠ᨻᩴ ᨿᨶ᩠ᨲᩦ’’ᨲᩥ ᩍᨴᩴ ᨿᩮᨽᩩᨿ᩠ᨿᩅᩈᩮᨶ ᩅᩩᨲ᩠ᨲᨶ᩠ᨲᩥ ᨴᨭ᩠ᨮᨻ᩠ᨻᩴ. ᩋᨳ ᩅᩣ ᨣᩣᨳᩣᨶᩴ ᨾᨩ᩠ᨫᨶ᩠ᨲᨭ᩠ᨮᩣ ᨸᩩᨻ᩠ᨻᩴ ᨿᨶ᩠ᨲᩥ, ᨣᩣᨳᩣᨾᨩ᩠ᨫᨭ᩠ᨮᩣ, ᨸᩣᨴᨶ᩠ᨲᨾᨩ᩠ᨫᨭ᩠ᨮᩣ ᨧ ᨸᩩᨻ᩠ᨻᩣᨸᩁᨬ᩠ᨧ ᨿᨶ᩠ᨲᩦᨲᩥ ᨿᨳᩣᩃᩣᨽᨿᩮᩣᨩᨶᩣ ᨴᨭ᩠ᨮᨻ᩠ᨻᩣ.

[ᨩ] ᩍᨴᩣᨶᩥ ᩅᩥᩈᩮᩈᩅᩥᨵᩥᨾ᩠ᩉᩥ ᩈᨲ᩠ᨳᩃᩉᩩᨽᩣᩅᨲ᩠ᨳᩴ ᨸᩁᩥᨽᩣᩈᨲᩮ ‘‘ᨸᩩᨾᩥᨲ᩠ᨳᩥᨿ’’ᨾᩥᨧ᩠ᨧᩣᨴᩥ. ᨸᩩᨾᩥᨲ᩠ᨳᩥᨿᩴ ‘‘ᨴ᩠ᩅᩦᩈᩪ’’ᨲᩥ ᨸᨴᩴ ᨬᩮᨿ᩠ᨿᩴ, ᨿᨳᩣ – ᩋᩈᨶᩥ ᨴ᩠ᩅᩦᩈᩩ [ᩋᨽᩥᨵᩣᨶ ᪒᪔ ᨣᩣᨳᩣ]. ᩈᨻ᩠ᨻᩃᩥᨦ᩠ᨣᩮ ᩃᩥᨦ᩠ᨣᨲ᩠ᨲᨿᩮ ‘‘ᨲᩦᩈᩪ’’ᨲᩥ ᨸᨴᩴ ᨬᩮᨿ᩠ᨿᩴ, ᨿᨳᩣ – ᩈᨲ᩠ᨲᨶ᩠ᨶᩴ ᨸᩪᩁᨱᩮ ᩈᩮᨭ᩠ᨮᩮ’ᨲᩥᩈᨶ᩠ᨲᩮ ᩈᨲ᩠ᨲᨾᩮᩣ ᨲᩥᩈᩩ [ᩋᨽᩥᨵᩣᨶ ᪙᪔᪒ ᨣᩣᨳᩣ]. ᩑᨲ᩠ᨳ ᨧ ᨶᩥᩈᩥᨴ᩠ᨵᩃᩥᨦ᩠ᨣᨶᩣᨾᩴ ᨸᩣᩁᩥᩈᩮᩈᨲᩮᩣ ‘‘ᩈᩮᩈᩃᩥᨦ᩠ᨣ’’ᨶ᩠ᨲᩥ ᨬᩮᨿ᩠ᨿᩴ [ᨶᩥᩈᩥᨴ᩠ᨵᩃᩥᨦ᩠ᨣ ᩈᩮᩈᨲ᩠ᨳᩴ (ᩋᨾᩁ ᪑.᪕.)], ᨿᨳᩣ – ᩅᩔ ᩈᩴᩅᨧ᩠ᨨᩁᩣ ᨶᩥᨲ᩠ᨳᩦᨲᩥ [ᩋᨽᩥᨵᩣᨶ ᪘᪑ ᨣᩣᨳᩣ]. ᩋᨲᩕ ᨧᩮᨠᩃᩥᨦ᩠ᨣᨶᩥᩈᩮᨵᨻ᩠ᨿᩣᨡ᩠ᨿᩣᨶᩮᨶ ᩃᩥᨦ᩠ᨣᨴ᩠ᩅᨿᩅᩥᨵᩣᨶᨶ᩠ᨲᩥ [ᩑᨠᩃᩥᨦ᩠ᨣᨶᩥᩈᩮᨵᨻ᩠ᨿᩣᨩᩮᨶ ᩃᩥᨦ᩠ᨣᨴ᩠ᩅᨿᩣᨽᩥᨵᩣᨶᨾᩥᨲᩥ (ᩋᨾᩁᨠᩮᩣᩈᨧᩥᨶ᩠ᨲᩣᨾᨱᩥᨭᩦᨠᩣ)].

ᨣᨶ᩠ᨳᩃᩣᩉᩅᩴ ᩅᩥᨵᩣᨿᩮᨴᩣᨶᩥ ᨸᨭᩥᨸᨲ᩠ᨲᩥᩃᩣᩉᩅᨲ᩠ᨳᨾᩣᩉ ‘‘ᩋᨽᩥᨵᩣᨶᨶ᩠ᨲᩁᩣᩁᨾ᩠ᨽᩮ’’ᩍᨧ᩠ᨧᩣᨴᩥ. ᩋᨽᩥᨵᩣᨶᨶ᩠ᨲᩁᩔ ᩋᨬ᩠ᨬᩔ ᩋᨽᩥᨵᩣᨶᩔ ᩌᩁᨾ᩠ᨽᩮ ᩈᨲᩥ, ᨲᩩ ᩋᨶ᩠ᨲᩮᩣ ᨿᩔ ᩋᨽᩥᨵᩣᨶᩔ, ᩋᨳ ᩌᨴᩥ ᨿᩔ ᩋᨽᩥᨵᩣᨶᩔᩣᨲᩥ ᩍᨴᩴ ᩋᨽᩥᨵᩣᨶᨴ᩠ᩅᨿᨬ᩠ᨧ ᨬᩮᨿ᩠ᨿᩴ. ᨲ᩠ᩅᨶ᩠ᨲᨾᨳᩣᨴᩥᨠᩴ ᨶᩣᨾᩣᨴᩥᨸᨴᩴ ᨸᩩᨻ᩠ᨻᩮᨶ ᨶ ᩈᨾ᩠ᨻᨩ᩠ᨫᨲᩮᨲᩥ ᨽᩣᩅᩮᩣ. ᨲᨲᩕ ᨶᩣᨾᨸᨴᩴ ᨿᨳᩣ – ᨩᩥᨶᩮᩣ ᩈᨠ᩠ᨠᩮᩣ ᨲᩩ ᩈᩥᨴ᩠ᨵᨲ᩠ᨳᩮᩣ [ᩋᨽᩥᨵᩣᨶ ᪔ ᨣᩣᨳᩣ]. ᨠᩮᩈᩅᩮᩣ ᨧᨠ᩠ᨠᨸᩣᨱ᩠ᨿᨳ [ᩋᨽᩥᨵᩣᨶ ᪑᪖ ᨣᩣᨳᩣ]. ᨾᩉᩥᩔᩁᩮᩣ ᩈᩥᩅᩮᩣ ᩈᩪᩃᩦ [ᩋᨽᩥᨵᩣᨶ ᪑᪖ ᨣᩣᨳᩣ]. ᩃᩥᨦ᩠ᨣᨸᨴᩴ ᨿᨳᩣ – ᨸᩩᨾᩮ ᨲᩩ ᨸᨱ᩠ᩉᩥ ᨸᩣᩈᨱᩥ [ᩋᨽᩥᨵᩣᨶ ᪒᪗᪗ ᨣᩣᨳᩣ]. ᨸᩩᨾᩮ ᨲᩪᨲᩩ ᩁᨩᩮᩣ ᨸᩩᨸ᩠ᨹᩴ [ᩋᨽᩥᨵᩣᨶ ᪒᪓᪘ ᨣᩣᨳᩣ]. ᩈᩣ ᨲᩥᩁᩮᩣᨠᩁᨱᩦᨸ᩠ᨿᨳ ¶ [ᩋᨽᩥᨵᩣᨶ ᪒᪙᪘ ᨣᩣᨳᩣ]. ᨸᩩᨶ᩠ᨶᨸᩩᩴᩈᨠᨾᩩᩃ᩠ᩃᩮᩣᨧᩴ [ᩋᨽᩥᨵᩣᨶ ᪒᪙᪙ ᨣᩣᨳᩣ]. ᩋᨲ᩠ᨳᨸᨴᩴ ᨿᨳᩣ – ᩏᨴᩁᩮ ᨲᩩ ᨲᨳᩣ ᨸᩣᨧᩣ’ᨶᩃᩈ᩠ᨾᩥᩴ ᨣᩉᨱᩦᨲ᩠ᨳᩥᨿᩴ [ᩋᨽᩥᨵᩣᨶ ᪙᪗᪓ ᨣᩣᨳᩣ]. ᨸᨱᩦᨲᩮᩣ ᨲᩦᩈᩩ ᨾᨵᩩᩁᩮ, ᩏᨲ᩠ᨲᨾᩮ ᩅᩥᩉᩥᨲᩮᨸ᩠ᨿᨳ. ᩋᨬ᩠ᨩᩈᩮ ᩅᩥᩈᩥᨡᩣᨿᨬ᩠ᨧ, ᨸᨶ᩠ᨲᩥᨿᩴ ᩅᩦᨳᩥ ᨶᩣᩁᩥᨿᩴ [ᩋᨽᩥᨵᩣᨶ ᪙᪔᪐ ᨣᩣᨳᩣ]. ᩋᨳᩈᨴ᩠ᨴᩮᨶ ᨧᨲᩕ ᩋᨶᨶ᩠ᨲᩁᩥᨿᨲ᩠ᨳᩮᨶ ᩈᨠᨸᩁᩥᨿᩣᨿᩮᩣᨸᩃᨠ᩠ᨡᨱᨲᩮᩣ ᩋᨳᩮᩣ ᩈᨴ᩠ᨴᩣᨴᩦᩈᩩ ᨧ ᨶ ᨸᩩᨻ᩠ᨻᩮᨶ ᩈᨾ᩠ᨻᨩ᩠ᨫᨲᩮ. ᨸᩣᨱᨠᩮᩣ ᨧᩣᨸ᩠ᨿᨳᩮᩣ ᩏᨧ᩠ᨧᩣᩃᩥᨦ᩠ᨣᩮᩣ ᩃᩮᩣᨾᩈᨸᩣᨱᨠᩮᩣᨲᩥ [ᩋᨽᩥᨵᩣᨶ ᪖᪒᪓ ᨣᩣᨳᩣ].

[ᨫ] ᩍᨴᩣᨶᩥ ᨻᩩᨴ᩠ᨵᩅᨧᨶᩣᨶᨾᨶᩩᩁᩪᨸᩣᨶᨾ᩠ᨸᩥ ᨸᨧᩩᩁᨸ᩠ᨸᨿᩮᩣᨣᩣᨶᨾᩮᩅ ᨠᩮᩈᨬ᩠ᨧᩥ ᨣᩉᨱᩴ ᩋᨲ᩠ᨲᨶᩮᩣ ᩈᨲ᩠ᨳᨶ᩠ᨲᩁᩣᨸᩈᨿ᩠ᩉᨲᩣᩅᩈᩮᨶ ᩋᩉᩴᨠᩣᩁᨸᩩᨻ᩠ᨻᩥᨠᩣᨽᩣᩅᨬ᩠ᨧ ᨴᩔᩮᨲᩩᨾᩣᩉ ‘‘ᨽᩥᨿ᩠ᨿᩮᩣ ᨸᨿᩮᩣᨣ’’ᨾᩥᨧ᩠ᨧᩣᨴᩥ. ᩈᩮᩣᨣᨲᩮ ᩈᩩᨣᨲᩔ ᩅᨧᨶᨽᩪᨲᩮ ᩌᨣᨾᩮ ᨸᩥᨭᨠᨲ᩠ᨲᨿᩮ, ᨲᨬ᩠ᩉᩥ ᩌᨣᨧ᩠ᨨᨶ᩠ᨲᩥ ᨲᩥᩅᩥᨵᩈᨾ᩠ᨸᨲ᩠ᨲᩥᨿᩮᩣ ᩑᨲᩮᨶᩣᨲᩥ ᩌᨣᨾᩮᩣᨲᩥ ᩅᩩᨧ᩠ᨧᨲᩥ. ᨲᩈ᩠ᨾᩥᩴ ᨽᩥᨿ᩠ᨿᩮᩣ ᨸᨿᩮᩣᨣᩴ ᨻᩣᩉᩩᩃ᩠ᩃᩮᨶ ᨸᨿᩩᨩ᩠ᨩᨲᩮᨲᩥ ᨸᨿᩮᩣᨣᩮᩣ, ᨲᩴ ᩌᨣᨾ᩠ᨾ ᨣᩉᩮᨲ᩠ᩅᩣ ᨠ᩠ᩅᨧᩥ ᩋᩁᨬ᩠ᨬᩅᨣ᩠ᨣᩣᨴᩦᩈᩩ ᨶᩥᨥᨱ᩠ᨭᩩᨿᩩᨲ᩠ᨲᩥᨬ᩠ᨧ ᨶᩥᨥᨱ᩠ᨭᩩᨶᩣᨾᨠᩮ ᩈᨲ᩠ᨳᩮ ᩌᨣᨲᩴ ᨻᩩᨴ᩠ᨵᩅᨧᨶᩣᨶᩩᩁᩪᨸᩴ ᨿᩩᨲ᩠ᨲᩥᨬ᩠ᨧ ᩌᨶᩦᨿ ᩌᨶᩮᨲ᩠ᩅᩣ ᨶᩣᨾᩃᩥᨦ᩠ᨣᩴ ᨠᨳᩦᨿᨲᩥ ᩋᨶ᩠ᨲᩮᩣᨽᩣᩅᩮᨶ ᨶᩥᨸ᩠ᨹᨶ᩠ᨶᩴ ᨻᩉᩥᨽᩣᩅᩮᨶ ᨸᨠᩣᩈᩦᨿᨲᩮ. ᩌᩅᩥᨽᩣᩅᨲ᩠ᨲᨾᩮᩅ ᩉᩥ ᨩᨬ᩠ᨬᨲ᩠ᨲᩴ ᩈᨶ᩠ᨲᨠᩣᩁᩥᨿᨠᩣᩁᩥᨶᩮᩣ. ᩌᩈᩦᩈᩣᨿᩴ ᩅᩣ ᩋᩅᩔᨾ᩠ᨽᩣᩅᩥᨶᩮᩣᨸᩥ ᩅᨧᨶᩔ ᩅᨲ᩠ᨲᨾᩣᨶᨲ᩠ᨳᩅᨲ᩠ᨲᩥᨧ᩠ᨨᩣᨿ ᩅᨲ᩠ᨲᨾᩣᨶᨲ᩠ᨲᩴ, ᨲᨳᩣ ᩉᩥ ᩃᩮᩣᨠᩮ ᩋᩅᩔᨾ᩠ᨽᩣᩅᩥᨶᩮᩣ ᩈᩥᨴ᩠ᨵᩥᨾᨽᩥᩈᨶ᩠ᨵᩣᨿ ᨽᩣᩅᩥᨶᨾᨸ᩠ᨸᨲ᩠ᨲᩴ ᩅᨲ᩠ᨲᨾᩣᨶᨲ᩠ᨲᩮᨶ ᩅᩣ ᩋᨲᩦᨲᨲ᩠ᨲᩮᨶ ᩅᩣ ᩅᨲ᩠ᨲᩩᨾᩥᨧ᩠ᨨᨲᩥ, ᨲᩴ ᨿᨳᩣ – ‘‘ᩍᨴᩴ ᨾᨾᨾᨸᩣᨸᨿᩮ’’ᨲᩥ ᨠᩮᩣᨧᩥ ᨠᩮᨶᨧᩣᨽᩥᩉᩥᨲᩮᩣ ᩈᨶ᩠ᨲᩮᩣ ᩋᩅᩔᩴ ᨲᩴ ᨽᩅᩥᩔᨲᩦᨲᩥ ᨾᨬ᩠ᨬᨾᩣᨶᩮᩣ ᨸᩣᨸᩥᨿᨾᩣᨶᩴ ᨸᨲ᩠ᨲᩴ ᩅᩣ ᩅᨲ᩠ᨲᩩᨾᩥᨧ᩠ᨨᨲᩥ ¶ , ᨲᨲᩮᩣᨿᩮᩅ ‘‘ᩌᩈᩦᩈᩣᨿᩴ ᨽᩪᨲᨾᩥᩅ ᨧᩮ’’ᨲᩥ [ᨸᩣᨱᩥᨶᩥ ᪓.᪓.᪑᪓᪒] ᨲᨴᨲᩥᨴᩮᩈᩅᨧᨶᩴ ᨸᨧ᩠ᨧᩣᨡ᩠ᨿᩣᨿᨲᩮ.

ᨸᨱᩣᨾᩣᨴᩥᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪑. ᩈᨣ᩠ᨣᨠᨱ᩠ᨯᩅᨱ᩠ᨱᨶᩣ

᪑. ᩍᨴᩣᨶᩥ ᨿᩈ᩠ᨾᩣ ᩋᨽᩥᨵᩮᨿ᩠ᨿᨲ᩠ᨳᩮᩣ ᨶᩣᨾ ᨸᨬ᩠ᨬᨲ᩠ᨲᩥᨸᩁᨾᨲ᩠ᨳᨲ᩠ᨳᩅᩈᩮᨶ ᨴᩩᩅᩥᨵᩮᩣ, ᨲᩮᩈᩩ ᨿᩮᨽᩩᨿ᩠ᨿᩮᨶ ᨸᨬ᩠ᨬᨲ᩠ᨲᨲ᩠ᨳᨲᩮᩣ ᨸᩁᨾᨲ᩠ᨳᨲ᩠ᨳᩮᩣᩅ ᩈᩮᨭ᩠ᨮᩮᩣ, ᨲᩮᩈᩩᨸᩥ ᩒᨵᩥᩈᩮᩣ ᨠᩥᩃᩮᩈᩣᨶᩴ ᩈᨾᩩᨧ᩠ᨨᩮᨴᨸᨭᩥᨸ᩠ᨸᩔᨴ᩠ᨵᩥᨠᩁᨲ᩠ᨲᩣ ᨿᨳᩣᨠ᩠ᨠᨾᩴ ᩋᨭ᩠ᨮ ᨵᨾ᩠ᨾᩣ ᩈᩮᨭ᩠ᨮᩣ, ᨲᨲᩮᩣᨸᩥ ᨶᩥᨻ᩠ᨻᩣᨶᨾᩮᩅ ᩈᩮᨭ᩠ᨮᩴ, ᨲᩮᩈᩴ ᩈᨻ᩠ᨻᩮᩈᨾ᩠ᨸᩥ ᨵᨾ᩠ᨾᩣᨶᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣᩅ ᩈᩮᨭ᩠ᨮᩮᩣ. ᩅᩩᨲ᩠ᨲᨬ᩠ᩉᩥ ᨽᨣᩅᨲᩣ ‘‘ᩅᩥᩁᩣᨣᩮᩣ ᩈᩮᨭ᩠ᨮᩮᩣ ᨵᨾ᩠ᨾᩣᨶᩴ, ᨴ᩠ᩅᩥᨸᨴᩣᨶᨬ᩠ᨧ ᨧᨠ᩠ᨡᩩᨾᩣ’’ᨲᩥ [ᨵ. ᨸ. ᪒᪗᪓; ᨶᩮᨲ᩠ᨲᩥ. ᪑᪒᪕]. ᩑᨲ᩠ᨳ ᩉᩥ ‘‘ᨿᩣᩅᨲᩣ, ᨽᩥᨠ᩠ᨡᩅᩮ, ᨵᨾ᩠ᨾᩣ ᩈᨦ᩠ᨡᨲᩣ ᩅᩣ ᩋᩈᨦ᩠ᨡᨲᩣ ᩅᩣ, ᩅᩥᩁᩣᨣᩮᩣ ᨲᩮᩈᩴ ᨵᨾ᩠ᨾᩣᨶᩴ ᩋᨣ᩠ᨣᨾᨠ᩠ᨡᩣᨿᨲᩦ’’ᨲᩥ [ᩋ. ᨶᩥ. ᪔.᪓᪔; ᪕.᪓᪒; ᩍᨲᩥᩅᩩ. ᪙᪐] ᩅᨧᨶᨲᩮᩣ ᩈᨻ᩠ᨻᩮᩈᨾ᩠ᨸᩥ ᩈᨦ᩠ᨡᨲᩣᩈᨦ᩠ᨡᨲᨵᨾ᩠ᨾᩣᨶᩴ ᩅᩥᩁᩣᨣᩈᨦ᩠ᨡᩣᨲᩮᩣ ᨶᩥᨻ᩠ᨻᩣᨶᨾᩮᩅ ᩈᩮᨭ᩠ᨮᩮᩣ, ᨧᨠ᩠ᨡᩩᨾᩣ ᨸᨶ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨲᩮᩈᩴ ᩈᨻ᩠ᨻᩮᩈᨾ᩠ᨸᩥ ᨵᨾ᩠ᨾᩣᨶᩴ, ᨴᩮᩅᨾᨶᩩᩔᩣᨴᩥᨽᩮᨴᩣᨶᩴ ᨴ᩠ᩅᩥᨸᨴᩣᨶᨬ᩠ᨧ ᨸᨬ᩠ᨬᨲ᩠ᨲᨲ᩠ᨳᩣᨶᩴ ᩈᩮᨭ᩠ᨮᩮᩣᨲᩥ ᩋᨿᨾᨲ᩠ᨳᩮᩣ ᩅᩩᨲ᩠ᨲᩮᩣ ᨽᨣᩅᨲᩣ, ᨲᩈ᩠ᨾᩣ ᩈᨻ᩠ᨻᨲ᩠ᨳᩈᩮᨭ᩠ᨮᨲ᩠ᨳᩣᨽᩥᨵᩣᨿᨠᩣᨽᩥᨵᩣᨶᨽᩪᨲᩴ ᨻᩩᨴ᩠ᨵᩣᨲᩥᨵᩣᨶᨾᩮᩅ ᨸᨮᨾᩴ ᩈᨣ᩠ᨣᨠᨱ᩠ᨯᩔ ᩌᨴᩥᨾ᩠ᩉᩥ ᨸᨲ᩠ᨳᩥᨿᩅᩈᩮᨶ [ᩈᨲ᩠ᨳᩥᨿᩅᩈᩮᨶ (ᨠ.)] ᨴᩔᩮᨲᩩᨾᩣᩉ ‘‘ᨻᩩᨴ᩠ᨵᩮᩣ’’ᨧ᩠ᨧᩣᨴᩥ. ᨲᨲ᩠ᨳ ᨩᩥᨶᩈᨴ᩠ᨴᨶ᩠ᨲᩴ ᩈᨻ᩠ᨻᨻᩩᨴ᩠ᨵᩔ ᨶᩣᨾᩴ. ᩈᨻ᩠ᨻᩴ ᨻᩩᨴ᩠ᨵᩅᩣᨲᩥ ᨻᩩᨴ᩠ᨵᩮᩣ, ᩈᨠᨾ᩠ᨾᨠᩣ ᨠᨲ᩠ᨲᩁᩥ ᨲᨸᨧ᩠ᨧᨿᩮᩣ. ᩅᩥᩈᩥᨭ᩠ᨮᩣ ᨻᩩᨴ᩠ᨵᩥ ᩋᩔᨲ᩠ᨳᩦᨲᩥ ᨻᩩᨴ᩠ᨵᩮᩣ, ᨸᩈᩴᩈᩣᨿᩴ ᨿᨴᩣᨴᩥᨶᩣ ᨱᨸᨧ᩠ᨧᨿᩮᩣ. ᨴᩣᨶᩈᩦᩃᨠ᩠ᨡᨶ᩠ᨵᩣᨴᨿᩮᩣ ᨮᩣᨶᩣᨭ᩠ᨮᩣᨶᨬᩣᨱᩣᨴᨿᩮᩣ ᩅᩣ ᨴᩈ ¶ ᨻᩃᩣᨶᩥ ᨿᩔᩮᨲᩥ ᨴᩈᨻᩃᩮᩣ. ᩈᩣᩈᨲᩥ ᩅᩥᨶᨿᨲᩥ ᩈᨲ᩠ᨲᩮᨲᩥ ᩈᨲ᩠ᨳᩣ. ᩈᨻ᩠ᨻᨵᨾ᩠ᨾᨩᩣᨶᨶᩈᩦᩃᨲᩣᨿ ᩈᨻ᩠ᨻᨬ᩠ᨬᩪ. ᨴ᩠ᩅᩥᨸᨴᩣᨶᩴ, ᨴ᩠ᩅᩥᨸᨴᩮᩈᩩ ᩅᩣ ᩏᨲ᩠ᨲᨾᩮᩣ ᨴ᩠ᩅᩥᨸᨴᩩᨲ᩠ᨲᨾᩮᩣ, ᨻᩩᨴ᩠ᨵᩅᩴᩈᩅᨱ᩠ᨱᨶᩣᨿᩴ [ᨻᩩ. ᩅᩴ. ᩋᨭ᩠ᨮ. ᪓᪗ ᨶᩥᨴᩣᨶᨠᨳᩣ] ᨶᩥᨴ᩠ᨵᩣᩁᨱᩃᨠ᩠ᨡᨱᩣᨿ ᨨᨭ᩠ᨮᩥᨿᩣ ᩈᨾᩣᩈᩔ ᨸᨭᩥᩈᩥᨴ᩠ᨵᨲ᩠ᨲᩣ ᨶᩮᨴᩥᩈᩦ ᨶᩥᨴ᩠ᨵᩣᩁᨱᩃᨠ᩠ᨡᨱᩣ ᨨᨭ᩠ᨮᩦ ᨣᨾ᩠ᨿᨲᩮ. ᨠᩈ᩠ᨾᩣ ᨸᨶ ᩈᩮᩣ ᨲᨲ᩠ᨳ ᨸᨭᩥᩈᩥᨴ᩠ᨵᩮᩣᨲᩥ? ᩈᨾᩣᩈᩮ ᨿᩮᨽᩩᨿ᩠ᨿᩮᨶ ᨶᩥᨴ᩠ᨵᩣᩁᨱᩃᨠ᩠ᨡᨱᨲ᩠ᨲᨿᩔ ᩅᩥᨠᩃᩣᨽᩣᩅᨲᩮᩣ. ᨠᩥᨬ᩠ᨧᩣᨸᩥ ᩉᩥ ᨲᨲ᩠ᨳ ᨨᨭ᩠ᨮᩥᨿᩣᨿᩮᩅ ᨸᨭᩥᩈᩥᨴ᩠ᨵᩮᩣ, ᩈᨲ᩠ᨲᨾᩥᨿᩣ ᨸᨶ ᨶᩥᨴ᩠ᨵᩣᩁᨱᩃᨠ᩠ᨡᨱᩣᨿ ᩅᩥᨩ᩠ᨩᨾᩣᨶᨲ᩠ᨲᩣ ᨲᩔᩣᨸᩥ ᩈᩮᩣ ᨸᨭᩥᩈᩮᨵᨶᩦᨿᩮᩣᨿᩮᩅ. ᨾᩩᨶᩦᨶᩴ ᩍᨶ᩠ᨴᩮᩣ ᩁᩣᨩᩣ ᨾᩩᨶᩥᨶ᩠ᨴᩮᩣ. ᨸᩩᨬ᩠ᨬᨬᩣᨱᨽᩣᨣ᩠ᨿᩣᨴᨿᩮᩣ ᨽᨣᩴ ᨶᩣᨾ, ᨲᩴᨿᩮᩣᨣᩣ ᨽᨣᩅᩣ. ᨶᩣᨳᨲᩥ ᩈᨲ᩠ᨲᩣᨶᩴ ᩉᩥᨲᩴ ᨿᩣᨧᨲᩥ, ᨠᩥᩃᩮᩈᩮ ᩅᩣ ᩏᨸᨲᩣᨸᩮᨲᩥ, ᩈᨲ᩠ᨲᩮᩈᩩ ᩅᩣ ᩍᩔᩁᩥᨿᩴ ᨠᩁᩮᩣᨲᩥ, ᨲᩮᩈᩴ ᩅᩣ ᩉᩥᨲᩴ ᩌᩈᩦᩈᨲᩦᨲᩥ ᨶᩣᨳᩮᩣ. ᨻᩩᨴ᩠ᨵᨵᨾ᩠ᨾᩈᨾᨶ᩠ᨲᨬᩣᨱᨴᩥᨻ᩠ᨻᨧᨠ᩠ᨡᩩᩈᨦ᩠ᨡᩣᨲᩮᩉᩥ ᨸᨬ᩠ᨧᩉᩥ ᨧᨠ᩠ᨡᩪᩉᩥ ᩈᨾᨶ᩠ᨶᩣᨣᨲᨲ᩠ᨲᩣ ᨧᨠ᩠ᨡᩩᨾᩣ. ᩈᨻ᩠ᨻᨴᩣ ᨻ᩠ᨿᩣᨾᨸ᩠ᨸᨽᩣᨿ ᨠᩣᨿᨲᩮᩣ ᨶᩥᨧ᩠ᨨᩁᨱᩅᩈᩮᨶ ᩋᨦ᩠ᨣᩦᩁᩈᩮᩣ. ᩈᨻ᩠ᨻᩣᨠᩣᩁᩮᨶ ᩈᨻ᩠ᨻᨵᨾ᩠ᨾᩣᨶᩴ ᨾᩩᨶᨶᨲᩮᩣ ᨾᩩᨶᩥ, ᨵᨾ᩠ᨾᩅᩣᨴᩮᩈᩩ ᩅᩣ ᨾᩮᩣᨶᨠᩁᨱᨲᩮᩣ ᨾᩩᨶᩥ.

᪒. ᩃᩮᩣᨠᩣᨶᩴ, ᩃᩮᩣᨠᩮᩈᩩ ᩅᩣ ᨶᩣᨳᩮᩣ ᩃᩮᩣᨠᨶᩣᨳᩮᩣ. ᩋᨲ᩠ᨲᨶᩮᩣ ᩋᨵᩥᨠᩔ ᨠᩔᨧᩥᨸᩥ ᩏᨲ᩠ᨲᨾᨸᩩᨣ᩠ᨣᩃᩔ ᩋᨽᩣᩅᨲᩮᩣ ᩋᨶᨵᩥᩅᩁᩮᩣ, ᩈᨻ᩠ᨻᨸᩁᩥᨿᨶ᩠ᨲᨣᨲᨲ᩠ᨲᨽᩣᩅᨲ᩠ᨲᩣ ᩅᩣ ᨶᨲ᩠ᨳᩥ ᩑᨲᩔ ᩍᨲᩮᩣ ᩋᨬ᩠ᨬᩮᩣ ᩋᨵᩥᨠᩮᩣ ᨸᨲ᩠ᨳᩮᨲᨻ᩠ᨻᩮᩣ ᩋᨲ᩠ᨲᨽᩣᩅᩮᩣᨲᩥ ᩋᨶᨵᩥᩅᩁᩮᩣ. ᨾᩉᨶ᩠ᨲᩣᨶᩴ ᩈᩦᩃᨠ᩠ᨡᨶ᩠ᨵᩣᨴᩦᨶᩴ ᩑᩈᨶᨲᩮᩣ ᨣᩅᩮᩈᨶᨲᩮᩣ ᨾᩉᩮᩈᩥ, ᨾᩉᨶ᩠ᨲᩮᩣ ᩅᩣ ᩎᩈᩮᩣ ᩅᩥᨽᩪᨲᩥ ᩑᨲᩔᩣᨲᩥ ᨾᩉᩮᩈᩥ. ᩉᩥᨲᩴ ᩅᩥᨶᨿᨲᩥ ᩋᨶᩩᩈᩣᩈᨲᩦᨲᩥ ᩅᩥᨶᩣᨿᨠᩮᩣ, ᩅᩥᩈᩥᨭ᩠ᨮᩴ ᩅᩣ ᨶᩥᨻ᩠ᨻᩣᨶᩴ ᩈᨲ᩠ᨲᩮ ᨶᩮᨲᩦᨲᩥ ᩅᩥᨶᩣᨿᨠᩮᩣ. ᩈᨻ᩠ᨻᨵᨾ᩠ᨾᨴᩔᨶᩈᩦᩃᨲᩣᨿ ¶ ‘‘ᩈᨾᨶ᩠ᨲᨧᨠ᩠ᨡᩪ’ᨲᩥ ᩃᨴ᩠ᨵᨶᩣᨾᩮᨶ ᩈᨻ᩠ᨻᨬ᩠ᨬᩩᨲᨬ᩠ᨬᩣᨱᩮᨶ ᩈᨾᨶ᩠ᨶᩣᨣᨲᨲ᩠ᨲᩣ ᩈᨾᨶ᩠ᨲᨧᨠ᩠ᨡᩩ. ᩈᩮᩣᨽᨶᩴ ᨣᨲᩴ ᨬᩣᨱᨾᩔ, ᩈᩴᩈᩣᩁᩣ ᩅᩣ ᩈᩩᨭ᩠ᨮᩩ ᩋᨸᩩᨶᩁᩣᩅᨲ᩠ᨲᩥᨿᩣ ᨣᨲᩅᩣᨲᩥ ᩈᩩᨣᨲᩮᩣ, ᩈᨸᩁᩈᩩᨡᩈᩥᨴ᩠ᨵᨲ᩠ᨳᩴ ᩅᩣ ᩈᨾ᩠ᨾᩣ ᨣᨲᩅᩣᨲᩥ ᩈᩩᨣᨲᩮᩣ. ᨽᩪᩁᩥ ᨻᩉᩩᨠᩣ ᨸᨬ᩠ᨬᩣ ᨿᩔ, ᩋᨶᨶ᩠ᨲᨲ᩠ᨲᩣ ᩅᩣ ᨽᩪᩁᩥᩈᨾᩣ ᨸᨬ᩠ᨬᩣ ᩑᨲᩔᩣᨲᩥ ᨽᩪᩁᩥᨸᨬ᩠ᨬᩮᩣ, ᩋᨶᨶ᩠ᨲᩣᨿ ᨾᩉᩣᨸᨳᩅᩥᨿᩣ ᩈᨴᩥᩈᨸᨬ᩠ᨬᩮᩣᨲ᩠ᨿᨲ᩠ᨳᩮᩣ. ᨠᩥᩃᩮᩈᩣᨴᩥᨸᨬ᩠ᨧᩅᩥᨵᩴ ᨾᩣᩁᩴ ᨩᩥᨲᩅᩣᨲᩥ ᨾᩣᩁᨩᩥ.

᪓. ᨶᩁᩣᨶᩴ ᩈᩦᩉᩮᩣ ᩈᩮᨭ᩠ᨮᩮᩣ, ᨸᩁᨸ᩠ᨸᩅᩣᨴᨾᨴ᩠ᨴᨶᩈᩉᨶᨲᩮᩣ ᩅᩣ ᨶᩁᩮᩣ ᨧ ᩈᩮᩣ ᩈᩦᩉᩮᩣ ᨧᩣᨲᩥ ᨶᩁᩈᩦᩉᩮᩣ, ᩈᩉᨲᩦᨲᩥ ᩈᩦᩉᩮᩣ, ᨶᩥᩁᩩᨲ᩠ᨲᩥᨶᨿᩮᨶ ᨸᩩᨻ᩠ᨻᩅᨱ᩠ᨱᩣᨠᩣᩁᩔᩦᨠᩣᩁᩮᩣ, ᩈᩦᩉᩈᨴᩥᩈᨲ᩠ᨲᩣ ᩅᩣ ᨶᩁᩮᩣ ᨧ ᩈᩮᩣ ᩈᩦᩉᩮᩣ ᨧᩣᨲᩥ ᨶᩁᩈᩦᩉᩮᩣ. ᨿᨳᩣ ᩉᩥ ᩈᩦᩉᩮᩣ ᨾᩥᨣᩁᩣᨩᩣ ᨧᨲᩪᩉᩥ ᨴᩣᨮᩣᩉᩥ ᩈᨻ᩠ᨻᩈᨲ᩠ᨲᩮ ᩉᩥᩴᩈᨲᩥ ᩋᨽᩥᨽᩅᨲᩥ, ᨲᨳᩣ ᨽᨣᩅᩣᨸᩥ ᩈᩦᩃᨸᨬ᩠ᨬᩣᨸᩩᨬ᩠ᨬᩥᨴ᩠ᨵᩥᩈᨦ᩠ᨡᩣᨲᩮᩉᩥ ᨧᨲᩪᩉᩥ ᨵᨾ᩠ᨾᩮᩉᩥ ᩈᨻ᩠ᨻᩴ ᩃᩮᩣᨠᩴ ᩉᩥᩴᩈᨲᩥ ᩋᨽᩥᨽᩅᨲᩦᨲᩥ ᩒᨸᨾ᩠ᨾᩈᩴᩈᨶ᩠ᨴᨶᩴ. ᩈᨻ᩠ᨻᨸᩩᩁᩥᩈᩣᨶᩴ ᩈᩮᨭ᩠ᨮᨲ᩠ᨲᩣ ᨶᩁᩅᩁᩮᩣ, ᨶᩁᩣᨶᩴ ᩅᩣ ᨴᩮᩅᨾᨶᩩᩔᩣᨶᩴ ᩈᩮᨭ᩠ᨮᨲ᩠ᨲᩣ ᨶᩁᩅᩁᩮᩣ, ‘‘ᩈᩦᩃᩮ ᨸᨲᩥᨭ᩠ᨮᩣᨿ ᨶᩁᩮᩣ ᩈᨸᨬ᩠ᨬᩮᩣ’’ᨲᩥ [ᩈᩴ. ᨶᩥ. ᪑.᪒᪓] ᩑᨲ᩠ᨳ ᩅᩥᨿ ᨶᩁᩈᨴ᩠ᨴᩮᨶ ᩈᨻ᩠ᨻᩮ ᨴᩮᩅᨾᨶᩩᩔᩣ ᩈᨦ᩠ᨣᩉᩥᨲᩣ. ᨵᨾ᩠ᨾᩔ ᩁᩣᨩᨸᩅᨲ᩠ᨲᨠᨲ᩠ᨲᩣ ᨵᨾ᩠ᨾᩁᩣᨩᩣ, ᨵᨾ᩠ᨾᨲᩮᩣ ᩅᩣ ᩈᨴᩮᩅᨠᩔ ᩃᩮᩣᨠᩔ ᩁᩣᨩᩣ ᨩᩣᨲᩮᩣ, ᨶᩣᨵᨾ᩠ᨾᨲᩮᩣᨲᩥ ᨵᨾ᩠ᨾᩁᩣᨩᩣ, ᨵᨾ᩠ᨾᩮᨶ ᩁᩣᨩᨲᩦᨲᩥ ᩅᩣ ᨵᨾ᩠ᨾᩁᩣᨩᩣ, ᨵᨾ᩠ᨾᨸᩣᩃᨠᩮᩣ ᩅᩣ ᩁᩣᨩᩣ ᨵᨾ᩠ᨾᩁᩣᨩᩣ. ᨾᩩᨶᩦᨶᩴ ᩈᩮᨭ᩠ᨮᨲ᩠ᨲᩣ ᨾᩉᩣᨾᩩᨶᩥ. ᨴᩮᩅᩣᨶᩴ ᩋᨲᩥᨴᩮᩅᩮᩣᨲᩥ ᨴᩮᩅᨴᩮᩅᩮᩣ, ᨴᩮᩅᩣᨶᩴ ᩋᨵᩥᨠᩮᩣ ᩅᩣ ᨴᩮᩅᩮᩣ ᨴᩮᩅᨴᩮᩅᩮᩣ. ᩃᩮᩣᨠᩣᨶᩴ ᨣᩁᩩ ᩌᨧᩁᩥᨿᩮᩣ ᩃᩮᩣᨠᨣᩁᩩ, ᩃᩮᩣᨠᩣᨶᩴ ᨣᩁᩩᨽᩣᨩᨶᨲ᩠ᨲᩣ ᩅᩣ ᩃᩮᩣᨠᨣᩁᩩ. ᨵᨾ᩠ᨾᩔ ᩈᩣᨾᩥ ᨿᨳᩣᩅᩩᨲ᩠ᨲᨶᨿᩮᨶ ᨵᨾ᩠ᨾᩔᩣᨾᩦ. ᨿᨳᩣ ᨸᩩᩁᩥᨾᨠᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ ¶ ᩈᨻ᩠ᨻᨬ᩠ᨬᩩᨽᩣᩅᩴ ᨣᨲᩣ, ᨲᨳᩣ ᩋᨿᨾ᩠ᨸᩥ ᨣᨲᩮᩣᨲᩥ ᨲᨳᩣᨣᨲᩮᩣ, ᨲᨳᩣ ᩅᩣ ᩈᨾ᩠ᨾᩣ ᨣᨲᩴ ᨬᩣᨱᨾᩔᩣᨲᩥ ᨲᨳᩣᨣᨲᩮᩣᨲ᩠ᨿᩣᨴᩥᨶᩣ ᨲᨳᩣᨣᨲᩈᨴ᩠ᨴᩔ ᩋᨲ᩠ᨳᨸᨸᨬ᩠ᨧᩮᩣ ᨲᨲ᩠ᨳ ᨲᨲ᩠ᨳ [ᨴᩦ. ᨶᩥ. ᩋᨭ᩠ᨮ. ᪑.᪗; ᨾ. ᨶᩥ. ᩋᨭ᩠ᨮ. ᪑.᪑᪒; ᩈᩴ. ᨶᩥ. ᩋᨭ᩠ᨮ. ᪒.᪓.᪗᪘; ᩋ. ᨶᩥ. ᩋᨭ᩠ᨮ. ᪑.᪑.᪗᪐; ᩏᨴᩣ. ᩋᨭ᩠ᨮ. ᪑᪘; ᩍᨲᩥᩅᩩ. ᩋᨭ᩠ᨮ. ᪓᪘; ᨳᩮᩁᨣᩣ. ᩋᨭ᩠ᨮ. ᪑.᪓; ᨻᩩ. ᩅᩴ. ᩋᨭ᩠ᨮ. ᪒ ᨶᩥᨴᩣᨶ ᨠᨳᩣ; ᨾᩉᩣᨶᩥ. ᩋᨭ᩠ᨮ. ᪑᪔; ᨸᨭᩥ. ᩈ. ᩋᨭ᩠ᨮ. ᪑.᪑.᪓᪗; ᨴᩦ. ᨶᩥ. ᨭᩦ. ᪑.᪗; ᨴᩦ. ᨶᩥ. ᩋᨽᩥ. ᨭᩦ. ᪑.᪗; ᨾ. ᨶᩥ. ᨭᩦ. ᪑.᪑᪒; ᩋ. ᨶᩥ. ᨭᩦ. ᪑.᪑.᪑᪗᪐] ᩅᩩᨲ᩠ᨲᨶᨿᩮᨶ ᩅᩮᨴᩥᨲᨻ᩠ᨻᩮᩣ.

᪔. ᩈᨿᨾᩮᩅ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨽᩅᨲᩥ, ᩋᨶᨬ᩠ᨬᨻᩮᩣᨵᩥᨲᩮᩣᨲᩥ ᩈᨿᨾ᩠ᨽᩪ. ᩈᨾ᩠ᨾᩣ ᩋᩅᩥᨸᩁᩦᨲᩮᨶ ᩈ’ᨾᨲ᩠ᨲᨶᩣᨿᩮᩅ ᩈᨻ᩠ᨻᨵᨾ᩠ᨾᩮ ᨻᩩᨩ᩠ᨫᨲᩥ ᩋᨻᩩᨩ᩠ᨫᩥ ᨻᩩᨩ᩠ᨫᩥᩔᨲᩦᨲᩥ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ. ᩈᩮᨭ᩠ᨮᨸᨬ᩠ᨬᩣᨿ ᩈᨾᨶ᩠ᨶᩣᨣᨲᨲ᩠ᨲᩣ ᩅᩁᨸᨬ᩠ᨬᩮᩣ. ᩈᨲ᩠ᨲᩮ ᩈᩴᩈᩣᩁᨱ᩠ᨱᩅᨲᩮᩣ ᨶᩥᨻ᩠ᨻᩣᨶᨸᩣᩁᩴ ᨶᩮᨲᩦᨲᩥ ᨶᩣᨿᨠᩮᩣ. ᨩᩥᨲᨸᨬ᩠ᨧᨾᩣᩁᨲ᩠ᨲᩣ ᨩᩥᨶᩮᩣ. ᩑᨲ᩠ᨳ ᨧ ᩈᨾᨶ᩠ᨲᨽᨴᩕ, ᩃᩮᩣᨠᨩᩥ, ᨨᩊᨽᩥᨬ᩠ᨬ, ᩋᨴ᩠ᩅᨿᩅᩣᨴᩦ, ᩈᩥᩁᩦᨥᨶ, ᩋᨠᨶᩥᨭ᩠ᨮᨣ [ᩋᨠᨶᩥᨭ᩠ᨮᨠ (ᨠ.)], ᨵᨾ᩠ᨾᨧᨠ᩠ᨠ, ᩁᩣᨣᩣᩈᨶᩥ [ᩁᩣᨣᩣᩁᩥ (ᨠ.)], ᨲᩥᩈᩁᨱ, ᨡᩈᨾ [ᨡᨱᩈᨾ (ᨠ.) ᨡᩮᨶ ᩌᨠᩣᩈᩮᨶ ᩈᨾᩣ ᨲᩩᩃ᩠ᨿᩣ ᨣᩩᨱᩣ ᨿᩔ ᩈᩮᩣ (ᨲᩥᨠᨱ᩠ᨯᩈᩮᩈᨭᩦᨠᩣ ᪑.᪑.᪘)], ᨣᩩᨱᩣᨠᩁ, ᨾᩉᩣᩈᩩᨡ, ᩅᨩᩥᩁ, ᨾᩮᨲ᩠ᨲᩣᨻᩃ, ᩋᩈᨾ, ᨩᩥᨲᩣᩁᩥ, ᨾᩉᩣᨻᩮᩣᨵᩥ, ᨵᨾ᩠ᨾᨵᩣᨲᩩ, ᩈᩮᨲᨠᩮᨲᩩ, ᨡᨩᩥ, ᨲᩥᨾᩩᨲ᩠ᨲᩥ [ᨡᨩᩥᩁᩅᩥᨾᩩᨲ᩠ᨲᩥ (ᨠ.) ᨡᩮᨶ ᩌᨠᩣᩈᨩ᩠ᨫᩣᨶᩮᨶ – ᩈᩩᨬ᩠ᨬᨽᩣᩅᨶᩣᨿᩣᨲᩥ ᨽᩣᩅᩮᩣ – ᨩᨿᨲᩥ ᩈᩴᩈᩣᩁᨽᩣᩅᩴ ᨿᩮᩣ, ᨩᩥ+ ᨠ᩠ᩅᩥᨸ ᩈᩩᨬ᩠ᨬᩅᩣᨴᩦᨶᩴ ᨻᩮᩣᨴ᩠ᨵᩣᨶᩴ ‘‘ᩈᩩᨬ᩠ᨬᩴ ᩈᨻ᩠ᨻᨾᩮᩅ’’ ᩍᨲ᩠ᨿᩣᨠᩣᩁᨽᩣᩅᨶᩣᨿ ᩈᩴᩈᩣᩁᨽᩣᩅᨩᨿᨶᨲᩮᩣ ᨲᨳᩣᨽᩣᩅᩮᩣ (ᩈᨴ᩠ᨴᨠᨸ᩠ᨸᨴ᩠ᨴᩩᨾ)], ᨴᩈᨽᩪᨾᩥᩔᩁ, ᨸᨬ᩠ᨧᨬᩣᨱ, ᨻᩉᩩᨠ᩠ᨡᨾ, ᩈᨾ᩠ᨻᩩᨴ᩠ᨵ, ᩈᨻ᩠ᨻᨴᩔᩦ, ᨾᩉᩣᨻᩃ, ᩈᨻ᩠ᨻᨻᩮᩣᨵ ¶ [ᩈᨾ᩠ᨻᩮᩣᨵᨵᨾ᩠ᨾ (ᨠ.)], ᨵᨾ᩠ᨾᨠᩣᨿ, ᩈᩴᨣᩩᨲ᩠ᨲ, ᩋᩁᩉ, ᨴ᩠ᩅᩣᨴᩈᨠ᩠ᨡ, ᩅᩦᨲᩁᩣᨣᩣᨴᩦᨶᩥᨸᩥ ᩋᨶᩮᨠᩣᨶᩥ ᨻᩩᨴ᩠ᨵᩔ ᨶᩣᨾᩣᨶᩥ [ᩍᨾᩣᨶᩥ ᨸᩁᩥᨿᩣᨿᩅᨧᨶᩣᨶᩥ ᨸᩣᨿᩈᩮᩣ ᩋᨾᩁᨠᩮᩣᩈᨲᩮᩣ, ᨲᩥᨠᨱ᩠ᨯᩈᩮᩈᩣᨽᩥᨵᩣᨶᨲᩮᩣ ᨧ ᨣᩉᩥᨲᩣᨶᩥ]. ᩈᨾᨶ᩠ᨲᨲᩮᩣ ᨸᩩᨬ᩠ᨬᩈᨾ᩠ᨽᩣᩁᨲᩮᩣ ᨧ ᨬᩣᨱᩈᨾ᩠ᨽᩣᩁᨲᩮᩣ ᨧ ᨽᨴᩕᩮᩣ ᩈᩮᨭ᩠ᨮᩮᩣᨲᩥ ᩈᨾᨶ᩠ᨲᨽᨴᩕᩮᩣᨲ᩠ᨿᩣᨴᩦᨶᩥ ᨧ ᨶᩥᨻ᩠ᨻᨧᨶᩣᨶᩥ ᩅᩮᨴᩥᨲᨻ᩠ᨻᩣᨶᩥ. ᩅᩩᨲ᩠ᨲᨬ᩠ᨧ –

‘‘ᩋᩈᨦ᩠ᨡ᩠ᨿᩮᨿ᩠ᨿᩣᨶᩥ ᨶᩣᨾᩣᨶᩥ, ᩈᨣᩩᨱᩮᨶ ᨾᩉᩮᩈᩥᨶᩮᩣ;

ᨣᩩᨱᩮᨶ ᨶᩣᨾᨾᩩᨴ᩠ᨵᩮᨿ᩠ᨿᩴ, ᩋᨸᩥ ᨶᩣᨾᩈᩉᩔᨲᩮᩣ’’ᨲᩥ [ᨵ. ᩈ. ᩋᨭ᩠ᨮ. ᪑᪓᪑᪓; ᩏᨴᩣ. ᩋᨭ᩠ᨮ. ᪕᪓; ᨸᨭᩥ. ᨾ. ᩋᨭ᩠ᨮ. ᪑.᪑.᪗᪖; ᨶᩮᨲ᩠ᨲᩥ. ᩋᨭ᩠ᨮ. ᪓᪘].

ᨲᨲ᩠ᨳ ᩏᨴ᩠ᨵᩮᨿ᩠ᨿᨶ᩠ᨲᩥ ᩏᨴ᩠ᨵᩁᩥᨲᨻ᩠ᨻᩴ. ᩋᨸᩥ ᨶᩣᨾᩈᩉᩔᨲᩮᩣᨲᩥ ᩋᨶᩮᨠᩮᩉᩥ ᨶᩣᨾᩈᩉᩔᩮᩉᩦᨲ᩠ᨿᨲ᩠ᨳᩮᩣ. ᩈᨻ᩠ᨻᨻᩩᨴ᩠ᨵᨶᩣᨾᨠᨳᩣ.

ᩈᨠ᩠ᨠᩣᨴᩥᩈᨲ᩠ᨲᨠᩴ ᩋᨾ᩠ᩉᩣᨠᩴ ᨻᩩᨴ᩠ᨵᩔ ᨶᩣᨾᩴ. ᨸᨬ᩠ᨧᨾᩣᩁᩮ ᨩᩮᨲᩩᩴ ᩈᨠ᩠ᨠᩮᩣᨲᩦᨲᩥ ᩈᨠ᩠ᨠᩮᩣ, ᨽᨣᩥᨶᩦᩉᩥ ᩈᨴ᩠ᨵᩥᩴ ᩈᩴᩅᩣᩈᨠᩁᨱᨲᩮᩣ ᩅᩣ ᩃᩮᩣᨠᨾᩁᩥᨿᩣᨴᩴ ᨨᩥᨶ᩠ᨴᩥᨲᩩᩴ ᩈᨠ᩠ᨠᩩᨱᨶ᩠ᨲᩦᨲᩥ ᩈᨠ᩠ᨠᩣ, ᩈᩣᨠᩥᨿᩁᩣᨩᩪᨶᩴ ᨸᩩᨻ᩠ᨻᩁᩣᨩᩣᨶᩮᩣ, ᨲᩮᩈᩴ ᩅᩴᩈᨽᩪᨲᨲ᩠ᨲᩣ ᨽᨣᩅᩣ ‘‘ᩈᨠ᩠ᨠᩮᩣ’’ᨲᩥ ᩅᩩᨧ᩠ᨧᨲᩥ. ᩋᩔ ᨧ ᨩᩣᨲᩥᩈᨾᨶᨶ᩠ᨲᩁᩴ ᨶᩥᨵᨿᩮᩣ ᩁᨲᨶᩣᨶᩥ ᨧ ᩏᨸ᩠ᨸᨶ᩠ᨶᩣᨶᩦᨲᩥ ᩈᩥᨴ᩠ᨵᨲ᩠ᨳᩮᩣᨲᩥ ᨶᩣᨾᩴ ᨠᨲᩴ, ᩈᨻ᩠ᨻᩮᩈᩴ ᩅᩣ ᩃᩮᩣᨠᩣᨶᩴ ᩈᩥᨴ᩠ᨵᩣ ᩋᨲ᩠ᨳᩣ ᩑᨲᩮᨶ ᩉᩮᨲᩩᨽᩪᨲᩮᨶᩣᨲᩥ ᩈᩥᨴ᩠ᨵᨲ᩠ᨳᩮᩣ. ᩈᩩᨴ᩠ᨵᩴ ᩒᨴᨶᩴ ᩋᩔᩣᨲᩥ ᩈᩩᨴ᩠ᨵᩮᩣᨴᨶᩮᩣ, ᨲᩔ ᩋᨸᨧ᩠ᨧᩴ ᩈᩩᨴ᩠ᨵᩮᩣᨴᨶᩥ. ᨣᩮᩣᨲᨾᩅᩴᩈᩔ ᨠᨸᩥᩃᩔ ᨾᩩᨶᩥᨶᩮᩣ ᩈᩥᩔᨲᩣᨿ ᩈᨠ᩠ᨿᩣ ᨣᩮᩣᨲᨾᩣ, ᨽᨣᩅᩣ ᨸᨶ ᨣᩮᩣᨲᨾᩅᩴᩈᩮ ᩏᨸ᩠ᨸᨶ᩠ᨶᨲ᩠ᨲᩣ ᨣᩮᩣᨲᨾᩔ ᨾᩩᨶᩥᨶᩮᩣ ᩋᨸᨧ᩠ᨧᩴ ᨣᩮᩣᨲᨾᩮᩣ.

᪕. ᩈᨠ᩠ᨿᩅᩴᩈᩣᩅᨲᩥᨱ᩠ᨱᩮᩣ [ᩈᨠ᩠ᨿᩅᩴᩈᩣ ᨸᩥᨲ᩠ᨳᩥᨱ᩠ᨱᩮᩣ (ᨠ.)] ᩈᨠ᩠ᨿᨾᩩᨶᩥ ᨿᩮᩣ ᨻᩩᨴ᩠ᨵᩮᩣ ᩈᩮᩣ ᩈᨠ᩠ᨿᩈᩦᩉᩮᩣ, ᩈᨠ᩠ᨿᩣᨶᩴ ᩅᩣ ᩈᩮᨭ᩠ᨮᨲ᩠ᨲᩣ ᩈᨠ᩠ᨿᩈᩦᩉᩮᩣ. ᩈᨠ᩠ᨿᨠᩩᩃᨲᩮᩣ ¶ ᨩᩣᨲᩮᩣ ᨾᩩᨶᩥ ᩈᨠ᩠ᨿᨾᩩᨶᩥ. ᩈᩪᩁᩥᨿᨴᩮᩅᨸᩩᨲ᩠ᨲᩔ ᩈᩮᩣᨲᩣᨸᨶ᩠ᨶᨲ᩠ᨲᩣ ᨽᨣᩅᩣ ᩌᨴᩥᨧ᩠ᨧᨻᨶ᩠ᨵᩪᨲᩥ ᩅᩩᨧ᩠ᨧᨲᩥ, ᩌᨴᩥᨧ᩠ᨧᩔ ᨻᨶ᩠ᨵᩩ ᨬᩣᨲᩦᨲᩥ ᨶᩥᨻ᩠ᨻᨧᨶᩴ ᨠᨲ᩠ᩅᩣ. ᩑᨲ᩠ᨳᨸᩥ ᨾᩣᨿᩣᨴᩮᩅᩦᩈᩩᨲ, ᨾᩉᩣᩈᨾᨱ, ᨠᩃᩥᩈᩣᩈᨶᩣᨴᩦᨶᩥ [ᨠᩩᩃᩥᩈᩣᩈᨶᩣᨴᩦᨶᩥ (ᨠ.) ᨠᩃᩥᨾ᩠ᩉᩥ ᨿᩩᨣᩮ ᩈᩣᩈᨶᩴ ᩋᨶᩩᩈᩣᩈᨶᩴ ᨿᩔ ᩈᩮᩣ, ᩋᨳᩅᩣ ᨠᩃᩥᨾ᩠ᩉᩥ ᨸᩣᨸᩮ ᩅᩥᩅᩣᨴᩮ ᩅᩣ ᩈᩣᩈᨶᩴ ᩉᩥᨲᩈᩣᨵᨶᩴ ᨿᩔ ᩈᩮᩣ (ᨲᩥᨠᨱ᩠ᨯᩈᩮᩈᨭᩦᨠᩣ ᪑.᪑.᪑᪑)] ᨣᩮᩣᨲᨾᨸᩁᩥᨿᩣᨿᩣᨶᩥ ᩅᩮᨴᩥᨲᨻ᩠ᨻᩣᨶᩥ.

᪖. ᨾᩮᩣᨠ᩠ᨡᩣᨴᩦᨶᩥ ᨶᩥᨻ᩠ᨻᩩᨲᩥᨸᩁᩥᨿᨶ᩠ᨲᩣᨶᩥ ᨨᨧᨲ᩠ᨲᩣᩃᩦᩈ ᨶᩣᨾᩣᨶᩥ ᨶᩥᨻ᩠ᨻᩣᨶᩔ ᨶᩣᨾᩣᨶᩥ. ᨾᩩᨧ᩠ᨧᨶ᩠ᨲᩥ ᩑᨲ᩠ᨳ, ᩑᨲᩮᨶ ᩅᩣ ᩁᩣᨣᩣᨴᩦᩉᩦᨲᩥ ᨾᩮᩣᨠ᩠ᨡᩮᩣ. ᨶᩥᩁᩩᨩ᩠ᨫᨶ᩠ᨲᩥ ᩑᨲ᩠ᨳ ᩁᩣᨣᩣᨴᨿᩮᩣᨲᩥ ᨶᩥᩁᩮᩣᨵᩮᩣ, ᩁᩩᨶ᩠ᨵᨲᩥ ᩅᩣ ᨶᩥᨻ᩠ᨻᩣᨶᨶ᩠ᨲᩥ ᩁᩮᩣᨵᩮᩣ, ᨠᩥᩃᩮᩈᩮᩣ, ᩈᩮᩣ ᩑᨲ᩠ᨳ ᨶᨲ᩠ᨳᩦᨲᩥ ᨶᩥᩁᩮᩣᨵᩮᩣ. ᩅᩣᨶᩈᨦ᩠ᨡᩣᨲᩣᨿ ᨲᨱ᩠ᩉᩣᨿ ᨶᩥᨠ᩠ᨡᨶ᩠ᨲᨲ᩠ᨲᩣ, ᨶᩥᨻ᩠ᨻᩣᨲᩥ ᩅᩣ ᩑᨲᩮᨶ ᩁᩣᨣᨣ᩠ᨣᩥᩌᨴᩥᨠᩮᩣᨲᩥ ᨶᩥᨻ᩠ᨻᩣᨶᩴ. ᨿᨳᩣ ᨸᨠᨲᩥᨴᩦᨸᩮᩣ ᨶᨴᩦᩈᩮᩣᨲᩮᨶ ᩅᩩᨿ᩠ᩉᨾᩣᨶᩣᨶᩴ ᨸᨲᩥᨭ᩠ᨮᩣ ᩉᩮᩣᨲᩥ, ᩑᩅᨾᩥᨴᨾ᩠ᨸᩥ ᨶᩥᨻ᩠ᨻᩣᨶᩴ ᩈᩴᩈᩣᩁᨾᩉᩮᩣᨥᩮᨶ ᩅᩩᨿ᩠ᩉᨾᩣᨶᩣᨶᩴ ᨸᨲᩥᨭ᩠ᨮᩣᨲᩥ ᨴᩦᨸᩮᩣ ᩅᩥᨿᩣᨲᩥ ᨴᩦᨸᩮᩣ, ᨶᩥᨠ᩠ᨠᩥᩃᩮᩈᩣᨶᩴ ᩅᩣ ᨸᨴᩦᨸᩈᨴᩥᩈᨽᩣᩅᨠᩁᨱᨲᩮᩣ ᨴᩦᨸᩮᩣ ᩅᩥᨿᩣᨲᩥ ᨴᩦᨸᩮᩣ, ‘‘ᨶᩥᨻ᩠ᨻᨶ᩠ᨲᩥ ᨵᩦᩁᩣ ᨿᨳᨿᩴ ᨸᨴᩦᨸᩮᩣ’’ᨲᩥ ᩉᩥ ᩅᩩᨲ᩠ᨲᩴ, ᨴᩥᨸ᩠ᨸᨲᩥ ᩅᩣ ᩋᩁᩥᨿᩣᨶᩴ ᨬᩣᨱᨧᨠ᩠ᨡᩩᩔᩮᩅ ᨸᨠᩣᩈᨲᩦᨲᩥ ᨴᩦᨸᩮᩣ. ᨲᨱ᩠ᩉᩣᨶᩴ ᨡᨿᩉᩮᨲᩩᨲ᩠ᨲᩣ ᨲᨱ᩠ᩉᨠ᩠ᨡᨿᩮᩣ. ᩁᩣᨣᩣᨴᩦᨶᩴ ᨸᨭᩥᨸᨠ᩠ᨡᨲ᩠ᨲᩣ, ᩏᨲ᩠ᨲᨾᨭ᩠ᨮᩮᨶ ᩅᩣ ᨸᩁᩴ. ᨲᩣᨿᨲᩥ ᩁᨠ᩠ᨡᨲᩥ ᩋᨸᩣᨿᩣᨴᩥᨲᩮᩣᨲᩥ ᨲᩣᨱᩴ. ᨶᩥᩃᩦᨿᨶ᩠ᨲᩥ ᩑᨲ᩠ᨳ ᩈᩴᩈᩣᩁᨽᨿᨽᩦᩁᩩᨠᩣᨲᩥ ᩃᩮᨱᩴ. ᨶᨲ᩠ᨳᩥ ᨴᩦᨥᩁᩔᩣᨴᩥᨠᩴ ᩁᩪᨸᩴ ᩈᨱ᩠ᨮᩣᨶᨾᩮᨲᩔᩣᨲᩥ ᩋᩁᩪᨸᩴ, ᩋᨸ᩠ᨸᨧ᩠ᨧᨿᨲ᩠ᨲᩣ ᩅᩣ ᩋᩁᩪᨸᩴ. ᩁᩣᨣᩣᨴᩦᨶᩴ ᩈᨶ᩠ᨲᨠᩁᨱᨲ᩠ᨲᩣ ᩈᨶ᩠ᨲᩴ. ᩁᩣᨣᨠ᩠ᨡᨿᩉᩮᨲᩩᨽᩣᩅᩮᨶ ᩋᩅᩥᨸᩁᩦᨲᨲ᩠ᨲᩣ, ᨧᨲᩩᩈᨧ᩠ᨧᨸᩁᩥᨿᩣᨸᨶ᩠ᨶᨲ᩠ᨲᩣ ¶ ᩅᩣ ᩈᨧ᩠ᨧᩴ. ᨶᨲ᩠ᨳᩥ ᩌᩃᨿᩮᩣ ᨲᨱ᩠ᩉᩣ ᩑᨲ᩠ᨳᩣᨲᩥ ᩋᨶᩣᩃᨿᩴ.

᪗. ᨸᨧ᩠ᨧᨿᩮᩉᩥ ᨶ ᩈᨦ᩠ᨠᩁᩦᨿᨲᩮᨲᩥ ᩋᩈᨦ᩠ᨡᨲᩴ. ᩈᩥᩅᩴ ᨡᩮᨾᨽᩣᩅᩴ ᨠᩁᩮᩣᨲᩦᨲᩥ ᩈᩥᩅᩴ, ᩈᩴᩈᩣᩁᨽᩦᩁᩩᨠᩮᩉᩥ ᩈᩮᩅᩥᨲᨻ᩠ᨻᨲ᩠ᨲᩣ ᩅᩣ ᩈᩥᩅᩴ, ᨿᨴᩣᨴᩥᨶᩣ ᩅᨸᨧ᩠ᨧᨿᩮᩣ. ᨶᨲ᩠ᨳᩥ ᩑᨲ᩠ᨳ ᨾᨲᩴ ᨾᩁᨱᩴ, ᩑᨲᩈ᩠ᨾᩥᩴ ᩅᩣ ᩋᨵᩥᨣᨲᩮ ᨸᩩᨣ᩠ᨣᩃᩔ ᨾᨲᨶ᩠ᨲᩥ ᩋᨾᨲᩴ. ᨸᩔᩥᨲᩩᩴ ᩈᩩᨴᩩᨠ᩠ᨠᩁᨲᩣᨿ ᩈᩩᨴᩩᨴ᩠ᨴᩈᩴ. ᨸᩁᩮᩉᩥ ᩏᨲ᩠ᨲᨾᩮᩉᩥ ᩋᩁᩥᨿᨸᩩᨣ᩠ᨣᩃᩮᩉᩥ ᩋᨿᩥᨲᨻ᩠ᨻᩴ ᨣᨶ᩠ᨲᨻ᩠ᨻᨶ᩠ᨲᩥ ᨸᩁᩣᨿᨱᩴ, ᨸᩁᨲᩮᩣ ᩅᩣ ᩋᨿᩥᨲᨻ᩠ᨻᩴ ᨣᨶ᩠ᨲᨻ᩠ᨻᨶ᩠ᨲᩥ ᨸᩁᩣᨿᨱᩴ, ᩈᩴᩈᩣᩁᩈᨽᩣᩅᨲᩮᩣ ᩋᨬ᩠ᨬᩈᨽᩣᩅᩅᩈᩮᨶ ᨻᩩᨩ᩠ᨫᩥᨲᨻ᩠ᨻᨶ᩠ᨲ᩠ᨿᨲ᩠ᨳᩮᩣ, ᨸᩁᩮᩈᩴ ᩅᩣ ᩋᩁᩥᨿᨸᩩᨣ᩠ᨣᩃᩣᨶᩴ ᨸᨲᩥᨭ᩠ᨮᩣᨶᨲ᩠ᨲᩣ ᨸᩁᩣᨿᨱᩴ. ᨿᩮᨶ ᨧᨲ᩠ᨲᩣᩁᩮᩣ ᨾᨣ᩠ᨣᩣ ᩒᨵᩥᩈᩮᩣ ᨠᩥᩃᩮᩈᩮ ᩈᩁᨶ᩠ᨲᩥ ᩉᩥᩴᩈᨶ᩠ᨲᩥ ᨲᩴ ᨵᨾ᩠ᨾᩴ ᩈᩁᨱᩴ, ᩋᩁᩥᨿᩣᨶᩴ ᩅᩈᩥᨲᨣᩮᩉᨲ᩠ᨲᩣ ᩅᩣ ᩈᩁᨱᩴ. ᩎᨲᩥ ᩏᨸᨴ᩠ᨴᩅᩮᩣ ᨸᩅᩣᩈᩮᩣ ᨧ ᨲᩮ ᨿᨲ᩠ᨳ ᨶ ᩈᨶ᩠ᨲᩥ, ᨲᩴ ᩋᨶᩦᨲᩥᨠᩴ, ᩈᨲ᩠ᨲᩮ ᩈᩴᩈᩣᩁᩴ ᨶᩮᨲᩦᨲᩥ ‘‘ᨶᩦᨲᩦ’’ᨲᩥ ᩃᨴ᩠ᨵᨶᩣᨾᩣᨿ ᨲᨱ᩠ᩉᩣᨿ ᩋᨽᩣᩅᨲᩮᩣ ᩅᩣ ᩋᨶᩦᨲᩥᨠᩴ. ᩌᩈᩅᩣᨶᩴ ᩋᨶᩣᩁᨾ᩠ᨾᨱᨲᩣᨿ ᩋᨶᩣᩈᩅᩴ. ᨶᩥᨧ᩠ᨧᨭ᩠ᨮᩮᨶ ᨵᩩᩅᩴ, ᨵᩅᨲᩥ ᩅᩣ ᨾᨣ᩠ᨣᩣᨶᨾᩣᩁᨾ᩠ᨾᨱᨽᩣᩅᩴ ᨣᨧ᩠ᨨᨲᩦᨲᩥ ᨵᩩᩅᩴ, ‘‘ᨵᩩ ᨣᨲᩥᨳᩮᩁᩥᨿᩮᩈᩪ’’ᨲᩥ ᩉᩥ ᨠᩣᨲᨶ᩠ᨲᨵᩣᨲᩩ. ᨴᨭ᩠ᨮᨻ᩠ᨻᩈᨽᩣᩅᩔ ᨶᨲ᩠ᨳᩥᨲᩣᨿ ᩋᨶᩥᨴᩔᨶᩴ. ᨸᨧ᩠ᨧᨿᩮᩉᩥ ᩋᨠᨲᨲ᩠ᨲᩣ ᩋᨠᨲᩴ. ᩈᨴᩣ ᩅᩥᨩ᩠ᨩᨾᩣᨶᨲ᩠ᨲᩣ ᩋᨸᩃᩩᨩ᩠ᨩᨶᩈᨽᩣᩅᩴ ᨣᨧ᩠ᨨᨲᩥ, ᨲᩮᨶ ᩅᩣ ᩅᩥᨬ᩠ᨬᩣᨿᨲᩦᨲᩥ ᩋᨸᩃᩮᩣᨠᩥᨲᩴ. ‘‘ᩍᨲᩴ ᨣᨲᩮ ᨧ ᩅᩥᨬ᩠ᨬᩣᨲᩮ’’ᨲᩥ ᩉᩥ ᨶᩣᨶᨲ᩠ᨳᩈᨦ᩠ᨣᩉᩮ ᩅᩩᨲ᩠ᨲᩴ. ᩃᩮᩣᨠᩈᨽᩣᩅᩮᨶ ᩅᩣ ᩅᩥᨬ᩠ᨬᩣᨿᨲᩦᨲᩥ ᩃᩮᩣᨠᩥᨲᩴ, ᨲᨻ᩠ᨽᩣᩅᩣᨸᨣᨾᨶᨲᩮᩣ ᩋᨸᩃᩮᩣᨠᩥᨲᩴ. ᩈᨱ᩠ᩉᨭ᩠ᨮᩮᨶ ᨶᩥᨸᩩᨱᩴ, ᨿᩮᨶ ᩅᩣ ᨧᨲ᩠ᨲᩣᩁᩮᩣ ᨾᨣ᩠ᨣᩣ ᩒᨵᩥᩈᩮᩣ ᨠᩥᩃᩮᩈᩮ ᨶᩥᩔᩮᩈᨲᩮᩣ ᨸᩩᨶᨶ᩠ᨲᩥ ᩈᩮᩣᨵᩮᨶ᩠ᨲᩥ, ᨲᩴ ᨶᩥᨸᩩᨱᩴ. ᨶ ᨠᨴᩣᨧᩥᨸᩥ ᨿᩔ ᩋᨶ᩠ᨲᩮᩣ ᩅᩥᨶᩣᩈᩮᩣ ᩋᨲ᩠ᨳᩥ, ᨲᩴ ᩋᨶᨶ᩠ᨲᩴ. ᨡᩁᨶ᩠ᨲᩥ ¶ ᩅᩥᨶᩔᨶ᩠ᨲᩦᨲᩥ ᨡᩁᩣ, ᩈᨦ᩠ᨡᨲᩣ, ᨲᩮ ᨿᨲ᩠ᨳ ᨶ ᩈᨶ᩠ᨲᩥ, ᨲᩴ ᩋᨠ᩠ᨡᩁᩴ, ᨡᩁᩈᨦ᩠ᨡᩣᨲᩣᨶᩴ ᩅᩣ ᩈᨦ᩠ᨡᨲᩣᨶᩴ ᨸᨭᩥᨸᨠ᩠ᨡᨲ᩠ᨲᩣ ᩋᨠ᩠ᨡᩁᩴ. ᩑᨲ᩠ᨳ ᨧ ᩋᩈᨦ᩠ᨡᨲᨶ᩠ᨲ᩠ᨿᩣᨴᩥᨠᩣ ᨣᩣᨳᩣ ᩁᩩᨧᩥᩁᩣ ᨶᩣᨾ.

᪘. ᩈᨻ᩠ᨻᨴᩩᨠ᩠ᨡᩣᨶᩴ ᨡᨿᨠᩣᩁᨱᨲ᩠ᨲᩣ ᨴᩩᨠ᩠ᨡᨠ᩠ᨡᨿᩮᩣ. ᨻ᩠ᨿᩣᨻᩣᨵᨲᩦᨲᩥ ᨻ᩠ᨿᩣᨻᩣᨵᩮᩣ, ᩈᩮᩣ ᩑᩅ ᨻ᩠ᨿᩣᨻᩣᨴᩮᩣ, ᨴᩩᨠ᩠ᨡᩈᨧ᩠ᨧᩴ, ᨲᩔ ᨽᩣᩅᩮᩣ ᨻ᩠ᨿᩣᨻᨩ᩠ᨩᩴ, ᨴᩩᨠ᩠ᨡᩔ ᨸᩦᩊᨶᩣᨴ᩠ᨿᨲ᩠ᨳᩮᩣ, ᨲᩴ ᨿᨲ᩠ᨳ ᨶᨲ᩠ᨳᩥ, ᨲᩴ ᩋᨻ᩠ᨿᩣᨻᨩ᩠ᨩᩴ, ᩋᨻ᩠ᨿᩣᨸᨩ᩠ᨫᨶ᩠ᨲᩥᨸᩥ ᨸᩣᨮᩮᩣ, ᨲᨲ᩠ᨳ ᨻ᩠ᨿᩣᨸᨩ᩠ᨩᨶ᩠ᨲᩥ ᩅᩥᨶᩔᨶ᩠ᨲᩦᨲᩥ ᨻ᩠ᨿᩣᨸᩣᨴᩣ, ᩈᨦ᩠ᨡᨲᩣ, ᨲᩮᩈᩴ ᨽᩣᩅᩮᩣ ᨻ᩠ᨿᩣᨸᨩ᩠ᨫᩴ, ᩈᨦ᩠ᨡᨲᩣᨶᩴ ᩅᩥᨶᩔᨶᨽᩣᩅᩮᩣ, ᨲᩴ ᨿᨲ᩠ᨳ ᨶᨲ᩠ᨳᩥ, ᨲᩴ ᩋᨻ᩠ᨿᩣᨸᨩ᩠ᨫᨶ᩠ᨲᩥ ᩑᩅᨾᨲ᩠ᨳᩮᩣ ᩅᩮᨴᩥᨲᨻ᩠ᨻᩮᩣ, ᨶᩥᩁᩩᨲ᩠ᨲᩥᨶᨿᩮᨶ ᨧ ᨴ᩠ᨿᩔ ᨩ᩠ᨫᨠᩣᩁᩮᩣ. ᨠᩥᩃᩮᩈᨠᨾ᩠ᨾᩅᩥᨸᩣᨠᩅᨭ᩠ᨭᩣᨶᨾᨽᩣᩅᨲᩮᩣ ᩅᩥᩅᨭ᩠ᨭᩴ. ᨶᩥᨻ᩠ᨽᨿᨭ᩠ᨮᩮᨶ ᨡᩮᨾᩴ, ᨡᨿᨶ᩠ᨲᩥ ᩅᩣ ᩑᨲᩮᨶ ᩁᩣᨣᨣ᩠ᨣᩥᩌᨴᨿᩮᩣᨲᩥ ᨡᩮᨾᩴ. ᩈᨦ᩠ᨡᩣᩁᩮᩉᩥ ᩋᩈᨾ᩠ᨾᩥᩔᨲᩣᨿ, ᩅᩥᩈᩴᨿᩮᩣᨣᨲᩣᨿ ᨧ ᨠᩮᩅᩃᩴ. ᩋᨸᩅᨩ᩠ᨩᨶ᩠ᨲᩥ ᩈᨦ᩠ᨡᩣᩁᩣ ᩑᨲᩈ᩠ᨾᩣᨲᩥ ᩋᨸᩅᨣ᩠ᨣᩮᩣ. ᨿᩈ᩠ᨾᩣ ᩁᩣᨣᩮᩣ ᩅᩥᨣᨲᩮᩣ, ᩈᩮᩣ ᩅᩥᩁᩣᨣᩮᩣ. ᨸᨵᩣᨶᨽᩣᩅᩴ ᨶᩦᨲᩴ ᨸᨱᩦᨲᩴ. ᨶᨲ᩠ᨳᩥ ᩑᨲᩈ᩠ᨾᩥᩴ ᩋᨵᩥᨣᨲᩮ ᩋᩁᩥᨿᩣᨶᩴ ᨧᩩᨲᩴ ᨧᩅᨶᨶ᩠ᨲᩥ ᩋᨧ᩠ᨧᩩᨲᩴ. ᩋᩁᩥᨿᩮᩉᩥ ᨸᨩ᩠ᨩᩥᨲᨻ᩠ᨻᨲ᩠ᨲᩣ ᨣᨶ᩠ᨲᨻ᩠ᨻᨲ᩠ᨲᩣ ᨸᨴᩴ.

᪙. ᨧᨲ᩠ᨲᩣᩁᩮᩣ ᨿᩮᩣᨣᩣ ᨡᨿᨶ᩠ᨲᩥ ᩑᨲᩮᨶᩣᨲᩥ ᨿᩮᩣᨣᨠ᩠ᨡᩮᨾᩮᩣ. ᨸᩣᩁᩮᨲᩥ ᩈᨠ᩠ᨠᩮᩣᨲᩥ ᩈᩴᩈᩣᩁᨴᩩᨠ᩠ᨡᩈᨶ᩠ᨲᩣᨸᩴ ᩈᨾᩮᨲᩩᨶ᩠ᨲᩥ ᨸᩣᩁᩴ, ‘‘ᩈᩴᩈᩣᩁᨴᩩᨠ᩠ᨡᩈᨶ᩠ᨲᩣᨸᨲᨲ᩠ᨲᩔᩣ’ᩃᩴ ᩈᨾᩮᨲᩅᩮ’’ᨲᩥ ᩉᩥ ᩅᩩᨲ᩠ᨲᩴ. ᨸᨣᨲᩣ ᩈᩴᩈᩣᩁᨧᨠ᩠ᨠᩔ ᩋᩁᩣ ᩑᨲᩈ᩠ᨾᩣᨲᩥ ᩅᩣ ᨸᩣᩁᩴ. ᨠᩥᩃᩮᩈᩮᩉᩥ ᨾᩩᨧ᩠ᨧᨶᨲᩮᩣ ᨾᩩᨲ᩠ᨲᩥ, ᨶᩥᨠᩣᨿᨶ᩠ᨲᩁᩥᨿᩣ ᨸᨶ ‘‘ᩈᩁᩦᩁᩮᨶ᩠ᨴᩕᩥᨿᩮᩉᩥ ᩋᨲ᩠ᨲᨶᩮᩣ ᨾᩩᨲ᩠ᨲᨲ᩠ᨲᩣ ᨾᩩᨲ᩠ᨲᩦ’’ᨲᩥ ᩅᨴᨶ᩠ᨲᩥ. ᨠᩥᩃᩮᩈᩈᨾᨶᨲᩮᩣ ᩈᨶ᩠ᨲᩥ. ᩅᩥᩈᩩᨩ᩠ᨫᨶ᩠ᨲᩥ ᩈᨲ᩠ᨲᩣ ᩑᨲᩣᨿ ᩁᩣᨣᩣᨴᩥᨾᩃᩮᩉᩦᨲᩥ ᩅᩥᩈᩩᨴ᩠ᨵᩥ ¶ . ᩈᨻ᩠ᨻᩈᨦ᩠ᨡᩣᩁᩣ ᩅᩥᨾᩩᨧ᩠ᨧᨶᨲᩮᩣ ᩅᩥᨾᩩᨲ᩠ᨲᩥ. ᩋᩈᨦ᩠ᨡᨲᨾᩮᩅ ᨶᩥᩔᨲ᩠ᨲᨶᩥᨩ᩠ᨩᩦᩅᨭ᩠ᨮᩮᨶ, ᩈᨶ᩠ᨲᩥᩃᨠ᩠ᨡᨱᨵᩣᩁᨱᨲᩮᩣ ᩅᩣ ᨵᩣᨲᩪᨲᩥ ᩋᩈᨦ᩠ᨡᨲᨵᩣᨲᩩ. ᩈᩩᨩ᩠ᨫᨶ᩠ᨲᩥ ᩈᨲ᩠ᨲᩣ ᩑᨲᩣᨿ ᩁᩣᨣᩣᨴᩥᨾᩃᩮᩉᩦᨲᩥ ᩈᩩᨴ᩠ᨵᩥ. ᩌᩅᩩᨱᩮᩣᨲᩥ ᩈᩴᩈᩣᩁᨲᩮᩣ ᨶᩥᨠ᩠ᨡᨶ᩠ᨲᩩᨾᨸ᩠ᨸᨴᩣᨶᩅᩈᩮᨶᩣᨲᩥ ᩅᩩᨲᩥ, ᨲᨱ᩠ᩉᩣ, ᨲᨲᩮᩣ ᨶᩥᨠ᩠ᨡᨶ᩠ᨲᨲ᩠ᨲᩣ ᨶᩥᨻ᩠ᨻᩩᨲᩥ.

᪑᪐. ᨡᩦᨱᩣᩈᩅᩣᨴᩥᨧᨲᩩᨠ᩠ᨠᩴ ᩋᩁᩉᨶ᩠ᨲᩮ. ᨡᩦᨱᩣ ᩌᩈᩅᩣ ᨿᩔ ᩈᩮᩣ ᨡᩦᨱᩣᩈᩅᩮᩣ. ᨲᨲᩮᩣ ᩏᨲ᩠ᨲᩁᩥ ᨠᩁᨱᩦᨿᩣᨽᩣᩅᨲᩮᩣ ᨶᨲ᩠ᨳᩥ ᩈᩥᨠ᩠ᨡᩣ ᩑᨲᩔᩣᨲᩥ ᩋᩈᩮᨠ᩠ᨡᩮᩣ. ᩅᩥᨣᨲᩮᩣ ᩁᩣᨣᩮᩣ ᨿᩈ᩠ᨾᩣᨲᩥ ᩅᩦᨲᩁᩣᨣᩮᩣ. ᩈᩴᩈᩣᩁᨧᨠ᩠ᨠᩔ ᩋᩁᩮ ᩉᨲᩅᩣᨲᩥ ᩋᩁᩉᩣ, ‘‘ᩋᩁᩉ’’ᨶ᩠ᨲᩥᨸᩥ ᨸᩣᨮᩮᩣ.

ᨴᩮᩅᩃᩮᩣᨠᩣᨴᩥᨸᨬ᩠ᨧᨠᩴ ᩈᨣ᩠ᨣᩔ ᨶᩣᨾᩴ. ᨴᩮᩅᩣᨶᩴ ᩃᩮᩣᨠᩮᩣ ᨽᩅᨶᩴ ᨴᩮᩅᩃᩮᩣᨠᩮᩣ. ᨴᩥᨻ᩠ᨻᨶ᩠ᨲ᩠ᨿᨲᩕ ᨴᩥᩅᩮᩣ. ᩋᨩ ᨣᨲᩥᨿᩴ, ᩋᨶᩮᨠᨲ᩠ᨳᨲ᩠ᨲᩣ ᨮᩥᨲᩥᨿᩴ, ᨧᩥᩁᩴ ᨮᩥᨿᨲᩮ ᩋᩈ᩠ᨾᩥᨶ᩠ᨲᩥ ᩋᨣ᩠ᨣᩮᩣ, ᨮᩣᨶᩴ, ᩈᩮᩣᨽᨶᩮᩣ ᩋᨣ᩠ᨣᩮᩣ ᩈᨣ᩠ᨣᩮᩣ, ᨸᩩᨬ᩠ᨬᩮᨶ ᩅᩣ ᩈᩩᨭ᩠ᨮᩩ ᩋᨩᩦᨿᨲᩮᨲᩥ ᩈᨣ᩠ᨣᩮᩣ. ᨲᨿᩮᩣ ᨴᩮᩅᩣ ᨴᩥᨻ᩠ᨻᨶ᩠ᨲ᩠ᨿᨲᩕᩮᨲᩥ ᨲᩥᨴᩥᩅᩮᩣ. ᨸᨵᩣᨶᨲᩮᩣ ᩉᩥ ᨲᩦᩉᩥ ᩉᩁᩥᩉᩁᨻᩕᩉ᩠ᨾᩮᩉᩥ ᨻ᩠ᨿᨸᨴᩮᩈᩮᩣ. ᨲᩥᨴᩈᩣᨶᩴ ᨴᩮᩅᩣᨶᩴ ᩌᩃᨿᩮᩣ ᨮᩣᨶᨶ᩠ᨲᩥ ᨲᩥᨴᩈᩣᩃᨿᩮᩣ. ᨠᩮᨧᩥ ᨸᨶ ‘‘ᨴᩮᩅᩃᩮᩣᨠᩣᨴᩥᨲ᩠ᨲᨿᩴ ᩈᨣ᩠ᨣᩈᩣᨾᨬ᩠ᨬᩔ ᨶᩣᨾᩴ, ᨲᩥᨴᩥᩅᩣᨴᩥᨴ᩠ᩅᨿᩴ ᨲᩣᩅᨲᩥᩴᩈᩔᩣ’’ᨲᩥ ᩅᨴᨶ᩠ᨲᩥ, ᨲᩴ ᩋᨾᩁᨠᩮᩣᩈᩣᨴᩦᩈᩩ ᩈᩣᨾᨬ᩠ᨬᩈ᩠ᨾᩥᩴᨿᩮᩅ ᨴ᩠ᩅᩥᨶ᩠ᨶᨾ᩠ᨸᩥ ᨣᩉᨱᨲᩮᩣ ᨶ ᩈᩣᩁᨲᩮᩣ ᨸᨧ᩠ᨧᩮᨲᨻ᩠ᨻᩴ. ᩑᨲ᩠ᨳᩣᨸᩥ ᨶᩣᨠ, ᩈᩩᩁᩃᩮᩣᨠ, ᨲᩥᨸᩥᨭ᩠ᨮᨸ [ᩅᩥᩈᨶ᩠ᨲᩥ ᩈᩩᨠᨲᩥᨶᩮᩣ ᩋᩈ᩠ᨾᩥᩴ ᩍᨲᩥ ᨸᩥᨭ᩠ᨮᨸᩴ ᨸᩥᩈᩮᩣᨴᩁᩣᨴᩥ ᨲᩥᨴᩈᩣᨶᩴ ᨸᩥᨭ᩠ᨮᨸᨵᩥᨲᩥ ᨴᩈᩈᨴ᩠ᨴᩃᩮᩣᨸᩮᩣ (ᨧᩥᨶ᩠ᨲᩣᨾᨱᩥᨭᩦᨠᩣ)], ᩋᩅᩁᩮᩣᩉ, ᨹᩃᩮᩣᨴᨿ ¶ [ᨹᩃᩔ ᨠᨾ᩠ᨾᨹᩃᩔ ᩏᨴᨿᩮᩣ ᨴᩥᨭ᩠ᨮᩥᨿᩮᩣᨣ᩠ᨿᨭ᩠ᨮᩣᨶᩴ (ᨲᩥᨠᨱ᩠ᨯᨭᩦᨠᩣ)], ᨾᨶ᩠ᨴᩁ, ᩈᩮᩁᩥᨠ, ᩈᨠ᩠ᨠᨽᩅᨶ, ᨡᩴ, ᨶᨽᩣᨴᩦᨶᩥ ᨴᩮᩅᩃᩮᩣᨠᩈᩣᨾᨬ᩠ᨬᩣᨶᩥ ᩍᨵᩣᨶᩣᨣᨲᩣᨶᩥᨸᩥ ᨣᩉᩮᨲᨻ᩠ᨻᩣᨶᩥ.

᪑᪑-᪑᪒. ᨲᩥᨴᩈᩣᨴᩥᨧᨲᩩᨴ᩠ᨴᩈᨠᩴ ᨴᩮᩅᨲᩣᩈᩣᨾᨬ᩠ᨬᩔ ᨶᩣᨾᩴ. ᨩᩣᨲᩦᩈᩩ [ᨩᩣᨲᩥᨩᩣᨲᩦᩈᩩ (ᨠ.)] ᩅᩩᨲ᩠ᨲᩣᩈᩩ ᨻ᩠ᨿᨲ᩠ᨲᩥᨸᩥ ᩅᩩᨧ᩠ᨧᨲᩦᨲᩥ ᨻ᩠ᨿᨲ᩠ᨲᩦᨶᩴ ᨻᩉᩩᨲ᩠ᨲᩣ ᨻᩉᩩᩅᨧᨶᨶᩥᨴ᩠ᨴᩮᩈᩮᩣ. ᨩᩣᨲᩥᩈᨲ᩠ᨲᩣᩅᩥᨶᩣᩈᩈᨦ᩠ᨡᩣᨲᩣ ᨲᩥᩔᩮᩣ ᨴᩈᩣ ᨸᩁᩥᨾᩣᨱᩣ ᩑᨲᩮᩈᨶ᩠ᨲᩥ ᨲᩥᨴᩈᩣ. ᩑᨲᩮ ᩉᩥ ᨾᨶᩩᩔᩣᨴᨿᩮᩣ ᩅᩥᨿ ᨻᩩᨴ᩠ᨵᩥᩅᩥᨸᩁᩥᨱᩣᨾᨡᨿᩮᩉᩥ ᨶ ᨿᩩᨩ᩠ᨩᨶ᩠ᨲᩥ, ᨸᨬ᩠ᨧᩅᩦᩈᨲᩥᩅᩔᩩᨴ᩠ᨴᩮᩈᩥᨿᩣ ᩑᩅ ᩏᨸ᩠ᨸᨩ᩠ᨩᨶ᩠ᨲᩥ ᩈᨶ᩠ᨲᩥ ᩅᩥᨶᩔᨶ᩠ᨲᩥ ᨧ. ᨾᩁᨱᩴ ᨾᩁᩮᩣ, ᩈᩮᩣ ᨿᩮᩈᩴ ᨶᨲ᩠ᨳᩥ, ᨲᩮ ᩋᨾᩁᩣ. ᨴᩥᨻ᩠ᨻᨶ᩠ᨲᩥ ᨸᨬ᩠ᨧᨠᩣᨾᨣᩩᨱᩣᨴᩦᩉᩥ ᨠᩦᩊᨶ᩠ᨲᩦᨲᩥ ᨴᩮᩅᩣ. ᩅᩥᨻᩩᨩ᩠ᨫᨶ᩠ᨲᩥ ᨶ ᩈᩩᨸᨶ᩠ᨲᩦᨲᩥ ᩅᩥᨻᩩᨵᩣ, ᩋᨲᩦᨲᩣᨶᩣᨣᨲᨩᩣᨲᩥᩴ ᩅᩥᨻᩩᨩ᩠ᨫᨶ᩠ᨲᩦᨲᩥ ᩅᩣ ᩅᩥᨻᩩᨵᩣ. ᩈᩩᨵᩣᨽᩮᩣᨩᨶᨽᩩᨬ᩠ᨩᨶᩈᩦᩃᨲᩣᨿ ᩈᩩᨵᩣᩈᩥᨶᩮᩣ. ᩈᨾᩩᨴ᩠ᨴᩩᨭ᩠ᨮᩣ [ᩋᨾᨲᨾᨳᨶᩮᩣᨭ᩠ᨮᩣ (ᨧᩥᨶ᩠ᨲᩣᨾᨱᩥᨭᩦᨠᩣ)] ᩈᩩᩁᩣ ᩋᨲ᩠ᨳᩥ ᨿᩮᩈᩴ, ᨲᩮ ᩈᩩᩁᩣ, ᩈᩩᩁᨶ᩠ᨲᩥ ᩅᩣ ᨠᩦᩊᨶ᩠ᨲᩦᨲᩥ ᩈᩩᩁᩣ, ᩈᩩᨡᩮᨶ ᩁᨾᨶ᩠ᨲᩦᨲᩥ ᩅᩣ ᩈᩩᩁᩣ. ᨴᩦᨥᩣᨿᩩᨠᩣᨸᩥ ᩈᨾᩣᨶᩣ ᨿᨳᩣᨸᩁᩥᨧ᩠ᨨᩮᨴᩴ ᩈᨾ᩠ᨸᨲ᩠ᨲᨠᩣᩃᩮ ᨾᩁᨶ᩠ᨲᩥ ᩈᩦᩃᩮᨶᩣᨲᩥ ᨾᩁᩪ. ᨴᩥᩅᩮᩣ ᨴᩮᩅᩃᩮᩣᨠᩮᩣ ᩒᨠᩮᩣ ᩌᩈᨿᩮᩣ ᨿᩮᩈᩴ ᨲᩮ ᨴᩥᩅᩮᩣᨠᩣ. ᩈᩩᨵᩣᩉᩣᩁᩔ ᨸᩣᨲᨻ᩠ᨻᩔᨸᩥ ᩈᨾ᩠ᨽᩅᨲᩮᩣ ᩋᨾᨲᩴ ᨸᩥᩅᨶ᩠ᨲᩦᨲᩥ ᩋᨾᨲᨸᩣ, ᩋᨾᨲᩮᩣᩈᨵᩴ ᩅᩣ ᨸᩥᩅᨶ᩠ᨲᩦᨲᩥ ᩋᨾᨲᨸᩣ. ᩈᨣ᩠ᨣᩮ ᩅᩈᨶᩈᩦᩃᨲ᩠ᨲᩣ ᩈᨣ᩠ᨣᩅᩣᩈᩥᨶᩮᩣ. ᩈᨴᩣ ᨸᨬ᩠ᨧᩅᩦᩈᨲᩥᩅᩔᩩᨴ᩠ᨴᩮᩈᩥᨿᨲ᩠ᨲᩣ ᨶᩥᩁᩣᨠᨲᩣ ᨩᩁᩣ ᩑᨲᩮᩈᨶ᩠ᨲᩥ ᨶᩥᨩ᩠ᨩᩁᩣ. ᨶ ᨶᩥᨾᩥᩈᨶ᩠ᨲᩦᨲᩥ ᩋᨶᩥᨾᩥᩈᩣ, ᨽᨾᩩᨠᩣ ᨶᩥᨧ᩠ᨧᩃᩴ ᨠᩁᩮᩣᨶ᩠ᨲᩦᨲ᩠ᨿᨲ᩠ᨳᩮᩣ. ᨴᩥᩅᩮ ᩅᩈᨶ᩠ᨲᩦᨲᩥ ᨴᩥᨻ᩠ᨻᩣ. ᨴᩮᩅᩣ ᩑᩅ ᨴᩮᩅᨲᩣ, ᩈᨠᨲ᩠ᨳᩮ ᨴᩮᩅᩈᨴ᩠ᨴᨲᩮᩣ ᨲᩣᨸᨧ᩠ᨧᨿᩮᩣ, ᨴᩮᩅᨲᩣ ᩑᩅ ᨴᩮᩅᨲᩣᨶᩥ, ᩈᨠᨲ᩠ᨳᩮ ᨶᩥᨸᨧ᩠ᨧᨿᩮᩣ. ‘‘ᩋᨸᩩᨾᩮ’’ᨲᩥ ᩑᨲ᩠ᨳ ᨸᨮᨾᩈᨠᨲ᩠ᨳᩥᨠᩅᩈᩮᨶ ᩍᨲ᩠ᨳᩥᩃᩥᨦ᩠ᨣᨲ᩠ᨲᩴ, ᨴᩩᨲᩥᨿᩈᨠᨲ᩠ᨳᩥᨠᩅᩈᩮᨶ ¶ ᨶᨸᩩᩴᩈᨠᩃᩥᨦ᩠ᨣᨲ᩠ᨲᩴ ᩅᩮᨴᩥᨲᨻ᩠ᨻᩴ, ᨴᩩᨲᩥᨿᩈᨠᨲ᩠ᨳᩥᨠᩅᩈᩮᨶᩮᩅ ᩅᩣ ᨴ᩠ᩅᩥᩃᩥᨦ᩠ᨣᨲ᩠ᨲᩴ, ᨲᨲ᩠ᨳ ᩍᨲ᩠ᨳᩥᩃᩥᨦ᩠ᨣᨸᨠ᩠ᨡᩮ ᨿᨴᩣᨴᩥᨶᩣ ᨶᩥᨠᩣᩁᩣᨴᩮᩈᩮᩣ. ᩋᨾᩁᨠᩮᩣᩈᩮ ᨸᨶ ‘‘ᨴᩮᩅᨲᩣᨶᩥ ᨸᩩᨾᩮ ᩅᩣ’’ᨲᩥ [ᩋᨾᩁ ᪑.᪙] ᩅᩩᨲ᩠ᨲᩴ. ᨲᩔᨲ᩠ᨳᩮᩣ – ᨴᩮᩅᨲᩣᨶᩥᩈᨴ᩠ᨴᩮᩣ ᩅᩥᨠᨸ᩠ᨸᩮᨶ ᨸᩩᩃ᩠ᩃᩥᨦ᩠ᨣᩮ, ᨶᩥᨧ᩠ᨧᩴ ᨶᨸᩩᩴᩈᨠᩮᨲᩥ. ᨭᩦᨠᩣᨿᨬ᩠ᨧ ‘‘ᩈᨠᨲ᩠ᨳᩥᨠᩣ ᨸᨠᨲᩥᨲᩮᩣ ᩃᩥᨦ᩠ᨣᩅᨧᨶᩣᨶᩥ ᩋᨲᩥᩅᨲ᩠ᨲᨶ᩠ᨲᩦᨲᩥ ᨸᩩᨶ᩠ᨶᨸᩩᩴᩈᨠᨲ᩠ᨲ’’ᨶ᩠ᨲᩥ [ᨴᩮᩅᩮᩣ ᩑᩅ ᨴᩮᩅᨲᩣ, ᩈᨠᨲ᩠ᨳᩮ ᨲᩣ, ᩈᨠᨲ᩠ᨳᩥᨠᩣ ᩋᨸᩥ ᨸᨧ᩠ᨧᨿᩣ ᨸᨠᨲᩥᨲᩮᩣ ᩃᩥᨦ᩠ᨣᩅᨧᨶᩣᨴ᩠ᨿᨲᩥᩅᨲ᩠ᨲᨶ᩠ᨲᩮ, ᩋᨸᩦᨲᩥ ᩍᨲ᩠ᨳᩥᨲ᩠ᨲᩴ ᨴᩮᩅᨲᩣ ᩑᩅ ᨴᩮᩅᨲᩴ ᨸᨬ᩠ᨬᩣᨴᩥᨲ᩠ᨲᩣ ᩋᨱ (ᨧᩥᨶ᩠ᨲᩣᨾᨱᩥᨭᩦᨠᩣ)] ᩅᩩᨲ᩠ᨲᩴ. ᨲᨲ᩠ᨳ ᩈᨠᨲ᩠ᨳᩥᨠᩣᨲᩥ ᨴᩩᨲᩥᨿᩈᨠᨲ᩠ᨳᩥᨠᩴ ᩅᩩᨲ᩠ᨲᩴ, ᨸᨠᨲᩥᨲᩮᩣᨲᩥ ᨸᨮᨾᩈᨠᨲ᩠ᨳᩥᨠᩴ. ᨲᩮᨶ ᩅᩩᨲ᩠ᨲᩴ ‘‘ᨸᩩᨶ᩠ᨶᨸᩩᩴᩈᨠᨲ᩠ᨲ’’ᨶ᩠ᨲᩥ, ᩍᨲᩁᨳᩣ ᨲᩣᨸᨧ᩠ᨧᨿᨶ᩠ᨲᩔ ᨶᩥᨧ᩠ᨧᩴ ᩍᨲ᩠ᨳᩥᩃᩥᨦ᩠ᨣᨲᩣᨿ ᩍᨲ᩠ᨳᩥᩃᩥᨦ᩠ᨣᨲ᩠ᨲᨾᩮᩅ ᩅᨴᩮᨿ᩠ᨿ. ᩈᩩᨸᨻ᩠ᨻᩣ, ᩈᩩᨾᨶᩣ, ᨲᩥᨴᩥᩅᩮᩈᩣ, ᩌᨴᩥᨲᩮᨿ᩠ᨿᩣ, ᨴᩥᩅᩥᩈᨴᩣ, ᩃᩮᨡᩣ, ᩋᨴᩥᨲᩥᨶᨶ᩠ᨴᨶᩣ, ᩌᨴᩥᨧ᩠ᨧᩣ, ᩁᩥᨽᩅᩮᩣ [ᩅᩥᨽᩅᩣ (ᨠ.), ᩁᩥᨠᩣᩁᩮᩣ ᨴᩮᩅᨾᩣᨲᩣ ᩈᩥᨿᩣ ᩍᨲᩥ ᨲᩥᨠᨱ᩠ᨯᩮ, ᨲᨲᩮᩣ ᨽᩅᨶ᩠ᨲᩦᨲᩥ (ᨧᩥᨶ᩠ᨲᩣᨾᨱᩥᨭᩦᨠᩣ)] ᩋᩈᩮᩣᨸ᩠ᨸᩣ, ᩋᨾᨧ᩠ᨧᩣ [ᨾᩁᨱᩴ ᨾᨲᩥ ᩍᨲᩥ ᨲᩥ, ᨾᨲᩥᨿᩴ ᨽᩅᩣ ᨾᨧ᩠ᨧᩣ… ᨶ ᨾᨧ᩠ᨧᩣ ᩋᨾᨧ᩠ᨧᩣ (ᨧᩥᨶ᩠ᨲᩣᨾᨱᩥᨭᩦᨠᩣ)], ᩋᨾᨲᩣᩈᨶᩣ, ᩋᨣ᩠ᨣᩥᨾᩩᨡᩣ, ᩉᩅᩥᨽᩮᩣᨩᨶᩣ, ᨣᩥᩁᨻ᩠ᨻᩣᨱᩣ, ᨴᩣᨶᩅᩣᩁᨿᩮᩣ, ᨻᩥᨶ᩠ᨴᩣᩁᨠᩣ, ᨸᩪᨩᩥᨿᩣ, ᨧᩥᩁᩣᨿᩩᨠᩣ, ᩈᨣ᩠ᨣᩥᨶᩮᩣ, ᨶᨽᩮᩣᩈᨴᩣᩍᨧ᩠ᨧᩣᨴᩦᨶᩥᨸᩥ ᨴᩮᩅᨲᩣᨶᩴ ᩈᩣᨾᨬ᩠ᨬᨶᩣᨾᩣᨶᩮᩅ.

᪑᪓. ᩈᩥᨴ᩠ᨵᩣᨴᨿᩮᩣ ᩍᨾᩮ ᨴᩮᩅᨿᩮᩣᨶᩥᨿᩮᩣ ᨴᩮᩅᨸ᩠ᨸᨽᩅᩣ ᨴᩮᩅᩅᩴᩈᩣ ᩑᨲᩮᩈᨾᩩᨸ᩠ᨸᨲ᩠ᨲᩥᨿᩴ ᨴᩮᩅᩣᨶᨾᩮᩅ ᩌᨴᩥᨠᩣᩁᨱᨲ᩠ᨲᩣ. ᩋᨱᩥᨾᩣᨴᩥᨣᩩᨱᩮᩣᨸᩮᨲᨲ᩠ᨲᩣ ᩈᩥᨩ᩠ᨫᨶ᩠ᨲᩥ ᩑᨲᩔ ᨿᨳᩥᨧ᩠ᨨᩥᨲᩣ ᩋᨲ᩠ᨳᩣᨲᩥ ᩈᩥᨴ᩠ᨵᩮᩣ. ᨿᩔ ᨽᩣᩈᩣᨿ ᨻᩕᩪᩉᨲᩥ ᨠᨳᩣ, ᩈᩮᩣ ᨽᩪᨲᩮᩣ ¶ , ᨸᩥᩈᩣᨧᨸ᩠ᨸᨽᩮᨴᩮᩣ ᩋᨵᩮᩣᨾᩩᨡᩣᨴᩥ. ᩅᨧᨶᨲ᩠ᨳᩮᩣ ᨸᨶ ᨽᩅᨶ᩠ᨲᩥ ᨻᩕᩪᩉᨶ᩠ᨲᩥ ᨠᨳᩣ ᩑᨲᩈ᩠ᨾᩣᨲᩥ ᨽᩪᨲᩮᩣᨲᩥ. ᨣᨶ᩠ᨵᩴ ᩋᨻ᩠ᨻᨲᩥ ᨸᩁᩥᨽᩩᨬ᩠ᨩᨲᩦᨲᩥ ᨣᨶ᩠ᨵᨻ᩠ᨻᩮᩣ, ᨴᩮᩅᨣᩣᨿᨶᩣ ‘‘ᩉᩣᩉᩣ ᩉᩪᩉᩪ’’ ᨸᨽᩩᨲᨿᩮᩣ [ᩋᨾᩁ ᪑.᪕᪕]. ᨶᩥᨵᨿᩮᩣ ᨣᩩᨿ᩠ᩉᨲᩦᨲᩥ ᨣᩩᨿ᩠ᩉᨠᩮᩣ, ᩈᨬ᩠ᨬᩣᨿᩴ ᨠᩮᩣ, ᨾᨱᩥᨽᨴᩕᩣᨴᩥᨠᩮᩣ ᨠᩩᩅᩮᩁᩣᨶᩩᨧᩁᩮᩣ. ᨿᨠ᩠ᨡ ᨸᩪᨩᩣᨿᩴ, ᨿᨠ᩠ᨡᩦᨿᨲᩮ ᨸᩪᨩᩦᨿᨲᩮᨲᩥ ᨿᨠ᩠ᨡᩮᩣ, ᨠᩩᩅᩮᩁᩣᨴᩥᨠᩮᩣ. ᩁᨠ᩠ᨡᨶ᩠ᨲᩥ ᩋᨲ᩠ᨲᩣᨶᩴ ᩑᨲᩈ᩠ᨾᩣᨲᩥ ᩁᨠ᩠ᨡᩈᩮᩣ, ᩅᩥᨽᩦᩈᨱᩣᨴᩥ. ᨠᩩᨾ᩠ᨽᨸ᩠ᨸᨾᩣᨱᨱ᩠ᨯᨲᩣᨿ ᨠᩩᨾ᩠ᨽᨱ᩠ᨯᩮᩣ. ᨸᩥᩈᩥᨲᩴ ᨾᩴᩈᩴ ᩋᩈᨲᩥ ᨽᨠ᩠ᨡᨲᩦᨲᩥ ᨸᩥᩈᩣᨧᩮᩣ, ᩈᨠᩩᨶᩥ ᩈᨠᩩᨶ᩠ᨲᩥᩌᨴᩥᨠᩮᩣ ᨠᩩᩅᩮᩁᩣᨶᩩᨧᩁᩮᩣ, ᨿᨴᩣᨴᩥᨶᩣ ᨸᩥᩈᩥᨲᩔ ᨸᩥᨽᩣᩅᩮᩣ, ᩋᩈᩔ ᨧ ᩈᩣᨧᩣᨴᩮᩈᨽᩣᩅᩮᩣ [ᨸᩣᨱᩥᨶᩥ ᪖.᪓.᪑᪐᪙; ᨾᩮᩣᨣ᩠ᨣᩃ᩠ᩃᩣᨶᨸᨬ᩠ᨧᩥᨠᩣ ᪑.᪔᪗]. ᩌᨴᩥᩈᨴ᩠ᨴᩮᨶ ᩅᩥᨩ᩠ᨩᩣᨵᩁ, ᩋᨸᩈᩁ, ᨠᩥᨶ᩠ᨶᩁᩮ ᨧ ᩈᨦ᩠ᨣᨱ᩠ᩉᩣᨲᩥ. ᩅᩥᨩ᩠ᨩᩴ ᨣᩩᩊᩥᨠᩣᨬ᩠ᨩᨶᨾᨶ᩠ᨲᩣᨴᩥᨠᩴ ᨵᩁᨲᩦᨲᩥ ᩅᩥᨩ᩠ᨩᩣᨵᩁᩮᩣ. ᩋᨸᩈᩣᩁᨿᨶ᩠ᨲᩥ ᨡᩃᨿᨶ᩠ᨲᩦᨲᩥ ᩋᨸᩈᩁᩣ, ᩏᨻ᩠ᨻᩈ᩠ᨿᩣᨴᩥᨠᩣ ᩈᩩᩁᩅᩮᩈᩥᨿᩮᩣ [ᩋᨾᩁ ᪑.᪕᪕], ᩋᨸᩈᩁᩈᨴ᩠ᨴᩔ ᨩᩣᨲᩥᨿᩴ ᩈᨿᩴ ᨻᩉᩩᨲ᩠ᨲᩴ, ᨻ᩠ᨿᨲ᩠ᨲᩥᨿᨶ᩠ᨲᩩ ᨲᨴᩅᨿᩅᩴ ᩅᩣ ᩈᨿᩴ, ᨲᨳᩣ ᨧ ᨻᩉᩩᨲ᩠ᨲᩴᩅ. ᩅᨶᩣᨴᩥᩈᨴ᩠ᨴᩮᩣ ᨠᨴᩣᨧᩥ ᨩᩣᨲᩥᨿᩴ ᨸᨿᩩᨩ᩠ᨩᨲᩮ, ᨠᨴᩣᨧᩥ ᨻ᩠ᨿᨲ᩠ᨲᩥᨿᩴ. ᨲᨲᩕ ᨿᨴᩣ ᨩᩣᨲᩥᨿᩴ, ᨲᨴᩣ ᨻ᩠ᨿᨲ᩠ᨲᩥᨣᨲᩴ ᩈᨦ᩠ᨡ᩠ᨿᨾᩣᨴᩣᨿ ᨸᩅᨲ᩠ᨲᨲᩥ. ᨿᨴᩣ ᨻ᩠ᨿᨲ᩠ᨲᩥᨿᩴ ᨸᨿᩩᨩ᩠ᨩᨲᩮ, ᨲᨴᩣ ᨲᩴᨻ᩠ᨿᨲ᩠ᨲᩣᩅᨿᩅᩣᨶᩴ ᨸᩣᨱᩥᨸᩣᨴᩣᨴᩦᨶᩴ ᨻᩉᩩᨲ᩠ᨲᩈᨦ᩠ᨡ᩠ᨿᨾᩣᨴᩣᨿ ᨸᩅᨲ᩠ᨲᨲᩥ. ᩅᨶᩈᨴ᩠ᨴᩮᩣ ᨲᩩ ᨩᩣᨲᩥᨣᨲᩮᨠᩈᨦ᩠ᨡ᩠ᨿᩣᩅᩥᩈᩥᨭ᩠ᨮᨴᨻ᩠ᨻᩣᨽᩥᨵᩣᨶᨲᩮᩣ ᨵᩅᩣᨴᩥᨻ᩠ᨿᨲ᩠ᨲᩥᨣᨲᨩᩣᨲ᩠ᨿᩣᨽᩥᨵᩣᨶᨲᩮᩣ ᩅᩣ ᩑᨠᩅᨧᨶᨶ᩠ᨲᩥ ᩋᨸᩈᩁᩈᨴ᩠ᨴᩮᩣ ᩅᩣᨾᨶᩣᨴᩥᨾᨲᩮᨶ ᩍᨲ᩠ᨳᩥᨿᩴ ᨻᩉᩩᩅᨧᨶᩮ ᨧ, ᨲᨴᨬ᩠ᨬᩮᩈᩴ ᨸᨶ ᨾᨲᩮᨶ ᨸᩩᨾᩥᨲ᩠ᨳᩥᨿᩴ ᩅᨧᨶᨴ᩠ᩅᨿᩮ ᨧ ᨴᨭ᩠ᨮᨻ᩠ᨻᩮᩣ. ᩋᩔᨾᩩᨡᨶᩁᩈᩁᩦᩁᨲ᩠ᨲᩣ ᨠᩩᨧ᩠ᨨᩥᨲᩮᩣ ᨶᩁᩮᩣ, ᨠᩥᨬ᩠ᨧᩥ ᩅᩣ ᨶᩁᩮᩣ, ᨶᩁᩈᨴᩥᩈᨲ᩠ᨲᩣ ᩅᩣ ᨠᩥᨶ᩠ᨶᩁᩮᩣ. ᩑᨲᩣ ᨴᩮᩅᨿᩮᩣᨶᩥᨿᩮᩣ. ᨣᨱᨴᩮᩅᨲᩣ ᨸᨶ –

‘‘ᩌᨴᩥᨧ᩠ᨧᩣ ᩅᩥᩈᩩ ᩅᩈᩅᩮᩣ, ᨲᩩᩈᩥᨲᩣ’ᨽᩔᩁᩣ’ᨶᩥᩃᩣ;

ᨾᩉᩣᩁᩣᨩᩥᨠᩣ ᩈᩣᨵ᩠ᨿᩣ ᨧ, ᩁᩩᨴ᩠ᨴᩣ ᨧ ᨣᨱᨴᩮᩅᨲᩣ’’ᨲᩥ [ᩋᨾᩁ ᪑.᪑᪐].

ᩋᨾᩁᨠᩮᩣᩈᩮ ¶ ᨠᨳᩥᨲᩣ.

ᨲᨲᩕᩣᨴᩥᨧ᩠ᨧᩣ ᨴ᩠ᩅᩣᨴᩈᨠᩣ, ᩅᩥᩈᩩᨴᩮᩅᩣ ᨴᩈ ᨮᩥᨲᩣ;

ᩅᩈᩅᩮᩣ ᩋᨭ᩠ᨮᩈᨦ᩠ᨡ᩠ᨿᩣᨲᩣ, ᨨᨲ᩠ᨲᩥᩴᩈ ᨲᩩᩈᩥᨲᩣ ᨾᨲᩣ.

ᩌᨽᩔᩁᩣ ᨧᨲᩩᩈᨭ᩠ᨮᩥ, ᩅᩣᨲᩣ ᨸᨱ᩠ᨱᩣᩈᩮᨠᩪᨶᨠᩣ;

ᨾᩉᩣᩁᩣᨩᩥᨠᨶᩣᨾᩣᨿᩮᩣ, ᨴ᩠ᩅᩥᩈᨲᩴ ᩅᩦᩈᨲᩣᨵᩥᨠᩣ.

ᩈᩣᨵ᩠ᨿᩣ ᨴ᩠ᩅᩣᨴᩈ ᩅᩥᨡ᩠ᨿᩣᨲᩣ, ᩁᩩᨴ᩠ᨴᩣ ᨧᩮᨠᩣᨴᩈ ᨮᩥᨲᩣ;

ᩈᨾᨿᨶ᩠ᨲᩁᨲᩮᩣ ᩑᨲᩣ, ᩅᩥᨬ᩠ᨬᩮᨿ᩠ᨿᩣ ᨣᨱᨴᩮᩅᨲᩣ.

᪑᪔. ᨸᩩᨻ᩠ᨻᨴᩮᩅᩣᨴᩥᨧᨲᩩᨠ᩠ᨠᩴ ᩋᩈᩩᩁᩮ. ᨸᩩᨻ᩠ᨻᩴ ᨴᩮᩅᩣ ᨸᩩᨻ᩠ᨻᨴᩮᩅᩣ, ᨴᩩᨲᩥᨿᩣᩈᨾᩣᩈᩮᩣ, ᨸᩩᨻ᩠ᨻᩮ ᩅᩣ ᨴᩮᩅᩣ ᨸᩩᨻ᩠ᨻᨴᩮᩅᩣ, ᨸᩩᨻ᩠ᨻᩮ ᩉ᩠ᨿᩮᨲᩮ ᨴᩮᩅᨸᩩᩁᩮ ᨮᩥᨲᩣ, ᩋᨶᨶ᩠ᨲᩁᩴ ᩈᨠ᩠ᨠᩣᨴᩦᩉᩥ ᨲᨲᩮᩣ ᨧᩣᩃᩥᨲᩣ. ᩈᩩᩁᩣᨶᩴ ᩁᩥᨸᩪ ᩈᨲ᩠ᨲᩅᩮᩣ ᩈᩩᩁᩁᩥᨸᩪ. ᩈᩩᩁᩣᨶᩴ ᨸᨭᩥᨸᨠ᩠ᨡᨽᩣᩅᨲᩮᩣ ᩋᩈᩩᩁᩣ, ᨴᩮᩅᩣ ᩅᩥᨿ ᨶ ᩈᩩᩁᨶ᩠ᨲᩥ ᨶ ᨠᩦᩊᨶ᩠ᨲᩦᨲᩥ ᩅᩣ ᩋᩈᩩᩁᩣ, ᩈᨾᩩᨴ᩠ᨴᩩᨭ᩠ᨮᩣ ᩅᩣ ᩈᩩᩁᩣ ᨴᩮᩅᩮᩉᩥ ᩋᨽ᩠ᨿᩩᨸᨣᨲᩣ, ᨶᩣᩈᩩᩁᩮᩉᩦᨲᩥ ᨶᨲ᩠ᨳᩥ ᩈᩩᩁᩣ ᩑᨲᩮᩈᨶ᩠ᨲᩥ ᩋᩈᩩᩁᩣᨲᩥ ᨶᩥᨠᩣᨿᨶ᩠ᨲᩁᩥᨿᩣ. ᨴᨶᩩᨶᩣᨾᩣᨿ ᨾᩣᨲᩩᨿᩣ ᩋᨸᨧ᩠ᨧᩴ ᨴᩣᨶᩅᩣ. ᨴᨶᩩ ᨶᩣᨾ ᨲᩮᩁᩈᩈᩩ ᩁᨠ᩠ᨡᩈᨴᩩᩉᩥᨲᩦᩈᩩ ᩑᨠᩥᩔᩣ ᨴᩩᩉᩥᨲᩩ ᨶᩣᨾᩴ. ᩑᨲᩮ ᨸᩩᨻ᩠ᨻᨴᩮᩅᩣᨴᨿᩮᩣ ᩈᨴᩣ ᨸᩩᨾᩮ ᨸᩩᩃ᩠ᩃᩥᨦ᩠ᨣᩮ ᩅᨲ᩠ᨲᨶ᩠ᨲᩥ. ᨴᩮᨧ᩠ᨧᩣ, ᨴᩮᨲᩮᨿ᩠ᨿᩣ, ᨴᨶᩩᨩᩣ, ᩍᨶ᩠ᨴᩣᩁᩦ, ᩈᩩᩁᨴᩥᩈᩣ, ᩈᩩᨠ᩠ᨠᩈᩥᩔᩣ, ᨴᩥᨲᩥᩈᩩᨲᩣ, ᨸᩩᨻ᩠ᨻᨩᩣᩍᨧ᩠ᨧᩣᨴᩦᨶᩥᨸᩥ ᩋᩈᩩᩁᩔ ᩈᩣᨾᨬ᩠ᨬᨶᩣᨾᩣᨶᩥ.

ᨲᨻ᩠ᨻᩥᩈᩮᩈᩣ ᩋᩈᩩᩁᨸ᩠ᨸᨽᩮᨴᩣ. ᩈᩩᩁᩮᩉᩥ ᩈᨴ᩠ᨵᩥᩴ ᩈᨦ᩠ᨣᩣᨾᨲ᩠ᨳᩴ ᩋᨲ᩠ᨲᨶᩮᩣ ᨻᩃᨠᩣᨿᩣᨶᩴ ᨸᩉᩣᩁᩴ ᩌᨿᩩᨵᩴ ᨴᨴᩣᨲᩦᨲᩥ ᨸᩉᩣᩁᨴᩮᩣ, ᩈᩮᩣ ᩑᩅ ᨸᩉᩣᩁᩣᨴᩮᩣ. ᩈᩴ ᨸᩈᨲ᩠ᨳᩮᩣ ᩅᩁᩮᩣ ᨩᩣᨾᩣᨲᩣ ᨿᩔ ¶ ᩈᩮᩣ ᩈᨾ᩠ᨻᩁᩮᩣ, ᨲᩔ ᩉᩥ ᩈᨠ᩠ᨠᩮᩣ ᨩᩣᨾᩣᨲᩣ [ᩈᩴ. ᨶᩥ. ᩋᨭ᩠ᨮ. ᪑.᪑.᪒᪕᪖], ᨸᩩᨬ᩠ᨬᩣᩉᩁᩦᩈᩩ ᩅᩣ ᩍᨶ᩠ᨴᩕᩥᨿᩣᨶᩥ ᩈᩴᩅᩩᨱᩮᩣᨲᩦᨲᩥ ᩈᨾ᩠ᨻᩁᩮᩣ. ᨻᩃᨾᩮᨲᩔᨲ᩠ᨳᩦᨲᩥ ᨻᩃᩦ, ᩋᨲᩥᩈᨿᨻᩃᨠᩣᨿᨲ᩠ᨲᩣ ᩅᩣ ᨻᩃᩦ, ᩈᩮᩣ ᩑᩅ ᨻᩃᩥ, ‘‘ᨻᩃᩥᩌᨴᨿᩮᩣ’’ᨲᩥ ᩍᨾᩥᨶᩣ ᩈᨾᩣᩈᩮᨸᩥ ᩈᨶ᩠ᨵᩥ ᨶᨲ᩠ᨳᩦᨲᩥ ᨴᩦᨸᩮᨲᩥ. ᩌᨴᩥᨶᩣ ᨾᨧ᩠ᨨᩈᨠᩩᨱᩣᨴᩥᨠᩮᨸᩥ ᨠᩩᨬ᩠ᨧᩣᨴᩥᨠᩮᨸᩥ ᩋᩈᩩᩁᨽᩮᨴᩮ ᩈᨦ᩠ᨣᨱ᩠ᩉᩣᨲᩥ.

᪑᪕. ᨸᩥᨲᩣᨾᩉᩣᨴ᩠ᨿᨭ᩠ᨮᨠᩴ ᨻᩕᩉ᩠ᨾᨶᩥ. ᨸᩥᨲᩪᨶᩴ ᨸᨩᩣᨸᨲᩦᨶᩴ ᩃᩮᩣᨠᨸᩥᨲᩪᨶᨾ᩠ᨸᩥ ᨸᩥᨲᩣ ᨸᩥᨲᩣᨾᩉᩮᩣ, ᩌᨾᩉᨸᨧ᩠ᨧᨿᩮᩣ [ᨾᩮᩣᨣ᩠ᨣᩃ᩠ᩃᩣᨶ ᪔.᪓᪘]. ᩈᨻ᩠ᨻᩃᩮᩣᨠᩣᨶᩴ ᨸᩥᨲᩩᨭ᩠ᨮᩣᨶᩥᨿᨲ᩠ᨲᩣ ᨸᩥᨲᩣ, ᩈᨻ᩠ᨻᩃᩮᩣᨠᩴ ᩅᩣ ᨸᩣᨲᩥ ᩁᨠ᩠ᨡᨲᩦᨲᩥ ᨸᩥᨲᩣ, ᩁᩥᨲᩩᨸᨧ᩠ᨧᨿᩮᩣ. ᨾᩉᨶ᩠ᨲᩈᩁᩦᩁᨲᩣᨿ ᨻᩕᩉ᩠ᨾᩣ, ᨻᩕᩉ ᩅᩩᨯ᩠ᨰᩥᨿᩴ ᨾᨸᨧ᩠ᨧᨿᩮᩣ. ᩃᩮᩣᨠᩣᨶᩴ ᩎᩈᩮᩣ ᩍᨶ᩠ᨴᩮᩣ ᩃᩮᩣᨠᩮᩈᩮᩣ. ᨠᨾᩃᩈᨾ᩠ᨽᩅᨲ᩠ᨲᩣ ᨠᨾᩃᩴ, ᨸᨴ᩠ᨾᩴ. ᨲᩴ ᩌᩈᨶᨾᩩᨸ᩠ᨸᨲ᩠ᨲᩥᨭ᩠ᨮᩣᨶᨾᩔ ᨠᨾᩃᩣᩈᨶᩮᩣ. ᩉᩥᩁᨬ᩠ᨬᩴ ᩈᩩᩅᨱ᩠ᨱᨾᨿᩴ ᩋᨱ᩠ᨯᩴ ᩉᩥᩁᨬ᩠ᨬᩴ, ᨲᩔ ᨣᨻ᩠ᨽᩮᩣ ᨽᩪᨱᩮᩣ [ᨣᩩᨱᩮᩣ (ᨠ.)] ᩉᩥᩁᨬ᩠ᨬᨣᨻ᩠ᨽᩮᩣ. ᨫᩣᨶᩣᨴᩥᨣᩩᨱᩮᩉᩥ ᩈᩩᩁᩣᨶᩴ ᨩᩮᨭ᩠ᨮᨲ᩠ᨲᩣ ᩈᩩᩁᨩᩮᨭ᩠ᨮᩮᩣ. ᨸᨩᩣᨶᩴ ᩈᨲ᩠ᨲᩣᨶᩴ ᨸᨲᩥ ᩈᩣᨾᩥᨽᩪᨲᩮᩣ ᨸᨩᩣᨸᨲᩥ, ᨸᨩᩴ ᨸᩣᩃᩮᨲᩦᨲᩥ ᩅᩣ ᨸᨩᩣᨸᨲᩥ. ᩋᨲ᩠ᨲᨽᩪ, ᨸᩁᨾᩮᨭ᩠ᨮᩥ, ᩈᨿᨾ᩠ᨽᩪ, ᨧᨲᩩᩁᩣᨶᨶᩮᩣ, ᨵᩣᨲᩣ, ᨠᨾᩃᨿᩮᩣᨶᩥ, ᨴᩩᩉᩥᨱᩮᩣ, ᩅᩥᩁᩥᨬ᩠ᨧᩥ, ᩈᨩᩥᨲᩣ, ᩅᩮᨵᩣ, ᩅᩥᨵᩣᨲᩣ, ᩅᩥᨵᩥ, ᩉᩴᩈᩁᨳᩮᩣ, ᩅᩥᩁᩥᨬ᩠ᨧᩮᩣ, ᨸᨸᩥᨲᩣᨾᩉᩮᩣ ᩍᨧ᩠ᨧᩣᨴᨿᩮᩣᨸᩥ ᨻᩕᩉ᩠ᨾᨶᩣᨾᩣᨶᩥ.

᪑᪖-᪑᪗. ᩅᩣᩈᩩᨴᩮᩅᩣᨴᩥᨸᨬ᩠ᨧᨠᩴ ¶ ᨠᨱ᩠ᩉᩮ. ᩅᩈᩩᨴᩮᩅᩔ ᩋᨸᨧ᩠ᨧᩴ ᩅᩣᩈᩩᨴᩮᩅᩮᩣ. ᨾᨧ᩠ᨧᩣᨶᩴ ᨩᩦᩅᩥᨲᩴ ᩉᩁᨲᩥ ᩈᩦᩃᩮᨶᩣᨲᩥ ᩉᩁᩥ. ᨠᨱ᩠ᩉᨣᩩᨱᨿᩮᩣᨣᨲᩮᩣ ᨠᨱ᩠ᩉᩮᩣ. ᨠᩮᩈᩥᩴ ᨶᩣᨾ ᩋᩈᩩᩁᩴ ᩉᨲᩅᩣᨲᩥ ᨠᩮᩈᩅᩮᩣ, ᩎᨠᩣᩁᩔ ᩋᨠᩣᩁᩮᩣ, ᩉᨶᩔ ᨧ ᩅᩮᩣ. ᩅᩩᨲ᩠ᨲᨬ᩠ᨧ –

‘‘ᨿᩈ᩠ᨾᩣ ᨲᨿᩣ ᩉᨲᩮᩣ ᨠᩮᩈᩦ,

ᨲᩈ᩠ᨾᩣ ᨾᩮ ᩈᩣᩈᨶᩴ ᩈᩩᨱ;

ᨠᩮᩈᩅᩮᩣ ᨶᩣᨾ ᨶᩣᨾᩮᨶ,

ᩈᩮᨿ᩠ᨿᩮᩣ ᩃᩮᩣᨠᩮ ᨽᩅᩥᩔᩈᩦ’’ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣᨿᨾ᩠ᨸᩥ].

ᨧᨠ᩠ᨠᩴ ᨸᩣᨱᩥᨾ᩠ᩉᩥ ᩋᩔ ᨧᨠ᩠ᨠᨸᩣᨱᩥ. ᩅᩥᩈᨱᩩ [ᨸᩥᨱ᩠ᩉᩩ (ᨠ.)], ᨶᩣᩁᩣᨿᨶᩮᩣ, ᩅᩮᨠᩩᨱ᩠ᨮᩮᩣ, ᨴᩣᨾᩮᩣᨴᩁᩮᩣ, ᨾᩣᨵᩅᩮᩣ, ᩈᨾ᩠ᨽᩪ, ᨴᩮᨧ᩠ᨧᩣᩁᩥ, ᨸᩩᨱ᩠ᨯᩁᩦᨠᨠ᩠ᨡᩮᩣ, ᨣᩮᩣᩅᩥᨶ᩠ᨴᩮᩣ, ᨣᩁᩩᩊᨴ᩠ᨵᨩᩮᩣ, ᨸᩦᨲᨾ᩠ᨻᩁᩮᩣ, ᩋᨧ᩠ᨧᩩᨲᩮᩣ, ᨾᨦ᩠ᨣᩃᩮᩣ, ᩈᩥᨦ᩠ᨣᩦ, ᨩᨶᩣᨴ᩠ᨴᨶᩮᩣ, ᩏᨸᩮᨶ᩠ᨴᩮᩣ, ᩍᨶ᩠ᨴᩣᩅᩁᨩᩮᩣ, ᨧᨲᩩᨽᩩᨩᩮᩣ, ᨸᨴ᩠ᨾᨶᩣᨽᩮᩣ, ᨾᨵᩩᩁᩥᨸᩩ, ᨲᩥᩅᩥᨠ᩠ᨠᨾᩮᩣ, ᨴᩮᩅᨠᩦᨶᨶ᩠ᨴᨶᩮᩣ, ᩈᩮᩣᩁᩦ, ᩈᩥᩁᩦᨸᨲᩥ, ᨸᩩᩁᩥᩈᩮᩣᨲ᩠ᨲᨾᩮᩣ, ᩅᨶᨾᩣᩃᩦ, ᨻᩃᩥᨵᩴᩈᩦ, ᨠᩴᩈᩣᩁᩣᨲᩥ, ᩋᨵᩮᩣᨠ᩠ᨡᨩᩮᩣ, ᩈᨻ᩠ᨻᨾ᩠ᨽᩁᩮᩣ, ᨠᩮᨭᨽᨩᩥ [ᨠᩮᨭᨽᩴ ᨩᩥᨲᩅᩣ (ᨧᩥᨶ᩠ᨲᩣᨾᨱᩥᨭᩦᨠᩣ)], ᩅᩥᨵᩩ, ᩈᩈᨻᩥᨶ᩠ᨴᩩ, ᩈᩥᩁᩦᨠᩁᩮᩣ, ᩈᩥᩁᩦᩅᩁᩣᩉᩮᩣ, ᩋᨩᩥᨲᩮᩣ, ᨸᩁᨸᩩᩁᩥᩈᩮᩣ, ᩈᩥᩁᩦᨣᨻ᩠ᨽᩮᩣ, ᨨᨻᩥᨶ᩠ᨴᩩ, ᩋᨶᨶ᩠ᨲᩮᩣ, ᨶᩁᨠᨩᩥ, ᨠᩮᩈᩁᩮᩣ, ᨩᩣᨲᩥᨠᩦᩃᩮᩣ, ᨶᩁᩈᩦᩉᩮᩣ, ᨸᩩᩁᩣᨱᨸᩩᩁᩥᩈᩮᩣ, ᨶᩃᩥᨶᩮᩈᨿᩮᩣ, ᩅᩣᩈᩩ, ᨶᩁᩣᨿᨶᩮᩣ, ᨸᩩᨶᨻ᩠ᨻᩈᩩ, ᩈᨻ᩠ᨻᩁᩪᨸᩮᩣ, ᨵᩁᨱᩦᨵᩁᩮᩣ, ᩅᩣᨾᨶᩮᩣ, ᩑᨠᩈᩥᨦ᩠ᨣᩮᩣ, ᩈᩮᩣᨾᨣᨻ᩠ᨽᩮᩣ, ᩌᨴᩥᨴᩮᩅᩮᩣ, ᩌᨴᩥᩅᩁᩣᩉᩮᩣ, ᩈᩩᩅᨱ᩠ᨱᨻᩥᨶ᩠ᨴᩩ, ᩈᨴᩣᨿᩮᩣᨣᩦ, ᩈᨶᩣᨲᨶᩮᩣ, ᩁᩣᩉᩩᨾᩩᨴ᩠ᨵᨽᩥᨴᩮᩣ ¶ , ᨠᩣᩊᨶᩮᨾᩥ, ᨸᨱ᩠ᨯᩅᩮᩣ, ᩅᨯ᩠ᨰᨾᩣᨶᩮᩣ, ᩈᨲᩣᨶᨶ᩠ᨴᩮᩣ, ᨸᨩᩣᨶᩣᨳᩮᩣ, ᩈᩩᨿᩣᨾᩩᨶᩮᩣᩍᨧ᩠ᨧᩣᨴᩦᨶᩥ ᩅᩥᩈᨱᩩᨶᩣᨾᩣᨶᩥ. ᩋᩔ ᨸᨶ ᨸᩥᨲᩩ ᨶᩣᨾᩣᨶᩥ ᩅᩈᩩᨴᩮᩅᩮᩣ, ᩌᨶᨠᨴᩩᨶ᩠ᨴᩩᨽᩥ [ᩋᨾᩁ ᪑.᪒᪓] ᩍᨧ᩠ᨧᩣᨴᩦᨶᩥ. ᩁᨳᩅᩣᩉᩮᩣ ᨸᨶᩔ ᨴᩣᩁᩩᨠᩮᩣ ᨶᩣᨾ [ᨲᩥᨠᨱ᩠ᨯᩈᩮᩈ ᪑.᪑.᪓᪔]. ᨾᨶ᩠ᨲᩦ ᨸᨶ ᨸᩅᨶᨻ᩠ᨿᩣᨵᩥ ᨶᩣᨾ [ᨾᨶ᩠ᨲᩦ ᨸᩅᨶᨻ᩠ᨿᩣᨾᩥ ᩏᨴ᩠ᨵᩅᩮᩣ (ᨲᩥᨲᨱ᩠ᨯᩈᩮᩈ ᪑.᪑.᪓᪕) ᨸᩅᨶᨻ᩠ᨿᩣᨵᩥ… ᩏᨴ᩠ᨵᩅᩮᩣ ᩍᨲᩥ ᨴ᩠ᩅᩮ ᨸᩥᨱ᩠ᩉᩩᩔ ᨾᨶ᩠ᨲᩥᨶᩮᩣ (ᨠᨭ᩠ᨭᩦᨠᩣ)].

ᨾᩉᩥᩔᩁᩣᨴᩥᨨᨠ᩠ᨠᩴ ᩉᩁᩮ. ᨾᩉᨶ᩠ᨲᩮᩣ ᩍᩔᩁᩮᩣ ᩅᩥᨽᩪᨲᩥ ᩑᨲᩔᩣᨲᩥ ᨾᩉᩥᩔᩁᩮᩣ. ᨣᩩᨱᩣᩅᨲ᩠ᨳᩣᩁᩉᩥᨲᩮᩣ ᩈᨾ᩠ᨸᨲᩥ ᨸᩁᨾᩣᨶᨶ᩠ᨴᩁᩪᨸᨲ᩠ᨲᩣ ᨶᩥᨻ᩠ᨻᩥᨠᩣᩁᩮᩣ ᩈᨾᨲᩥ ᨽᩅᨲᩦᨲᩥ ᩈᩥᩅᩮᩣ, ᨶᩥᩁᩩᨲ᩠ᨲᩥᨶᨿᩮᨶ ᩋᨠᩣᩁᩔ ᩍᨲ᩠ᨲᩴ, ᨾᩔ ᩅᩮᩣ ᨧ. ᩑᩅᩴ ᩈᨻ᩠ᨻᨲ᩠ᨳ ᨿᨴᩣᨴᩥᨶᩣ ᩅᩣ ᨶᩥᩁᩩᨲ᩠ᨲᩥᨶᨿᩮᨶ ᩅᩣ ᩈᨴ᩠ᨴᩈᩥᨴ᩠ᨵᩥ ᩅᩮᨴᩥᨲᨻ᩠ᨻᩣᨲᩥ. ᩈᩪᩃᨸᩣᨱᩥᨲ᩠ᨲᩣ ᩈᩪᩃᩦ. ᩍᨭ᩠ᨮᩮ ᨸᨽᩅᨲᩦᨲᩥ ᩍᩔᩁᩮᩣ, ᩍᩔᨲᩥ ᩋᨽᩥᨽᩅᨲᩦᨲᩥ ᩅᩣ ᩍᩔᩁᩮᩣ. ᨸᩈᩪᨶᩴ ᨸᨾᨳᩣᨶᩴ ᨸᨲᩥ ᨸᩈᩩᨸᨲᩥ. ‘‘ᨸᩈᩩ ᨾᩥᨣᩣᨴᩮᩣ ᨨᨣᩃᩮ, ᨸᨾᨳᩮᨸᩥ ᨸᩈᩩ ᨸᩩᨾᩮ’’ᨲᩥ ᩁᩩᨴ᩠ᨴᩮᩣ [ᩁᨽᩈᩮᩣ (ᨠ.)]. ( ) [(ᨣᩩᨱᩮ) (ᨠ.)] ᩅᩥᩈᩥᨭ᩠ᨮᨲᨾᩮᩣᨣᩩᨱᨲ᩠ᨲᩣ ᩈᨻ᩠ᨻᩴ ᩉᩁᨲᩦᨲᩥ ᩉᩁᩮᩣ. ᩅᩩᨲ᩠ᨲᩮᩣᨲᩥ ᨠᩕᩥᨿᩣᨸᨴᩴ. ᩈᨾ᩠ᨽᩩ, ᩎᩈᩮᩣ, ᩈᨻ᩠ᨻᩮᩣ, ᩎᩈᩣᨶᩮᩣ, ᩈᨦ᩠ᨠᩁᩮᩣ, ᨧᨶ᩠ᨴᩈᩮᨡᩁᩮᩣ, ᨽᩪᨲᩮᩈᩮᩣ, ᨡᨱ᩠ᨯᨸᩁᩈᩩ, ᨣᩥᩁᩦᩈᩮᩣ, ᨾᨧ᩠ᨧᩩᨬ᩠ᨩᨿᩮᩣ, ᨸᩥᨶᩣᨠᩦ, ᨸᨾᨳᩣᨵᩥᨸᩮᩣ, ᩏᨣ᩠ᨣᩮᩣ, ᨠᨸᨴ᩠ᨴᩥ, ᩈᩥᩁᩦᨠᨱ᩠ᨮᩮᩣ, ᨠᩣᩊᨠᨱ᩠ᨮᩮᩣ, ᨠᨸᩣᩃᨽᩁᩮᩣ, ᩅᩣᨾᨴᩮᩅᩮᩣ, ᨾᩉᩣᨴᩮᩅᩮᩣ, ᩅᩥᩁᩪᨸᨠ᩠ᨡᩮᩣ, ᨲᩥᩃᩮᩣᨧᨶᩮᩣ, ᩈᨻ᩠ᨻᨬ᩠ᨬᩪ, ᨶᩦᩃᩃᩮᩣᩉᩥᨲᩮᩣ, ᨾᩣᩁᩉᩁᩮᩣ, ᨽᨣ᩠ᨣᩮᩣ, ᨲ᩠ᨿᨾ᩠ᨻᨠᩮᩣ, ᨲᩥᨸᩩᩁᨶ᩠ᨲᨠᩮᩣ, ᨣᨦ᩠ᨣᩣᨵᩁᩮᩣ, ᩋᨶ᩠ᨵᨠᩁᩥᨸᩩ, ᨻ᩠ᨿᩮᩣᨾᨠᩮᩈᩮᩣ, ᨽᩅᩮᩣ, ᨽᩦᨾᩮᩣ, ᩁᩩᨴ᩠ᨴᩮᩣ, ᩏᨾᩣᨸᨲᩥ, ᨽᨣᩣᩃᩦ, ᨠᨸᩥᩈᨬ᩠ᨩᨶᩮᩣ, ᩉᩦᩁᩮᩣ, ᨸᨬ᩠ᨧᩣᨶᨶᩮᩣ, ᨡᨠᩩᨶ᩠ᨲᩃᩮᩣ, ᨣᩮᩣᨸᩣᩃᨠᩮᩣ, ᨸᩥᨦ᩠ᨣᨠ᩠ᨡᩮᩣ [ᩅᩥᨽᨦ᩠ᨣᩮᩣ (ᨠ.)], ᨠᩪᨭᨠᩁᩮᩣ, ᨧᨶ᩠ᨴᩣᨸᩦᩊᩮᩣ, ᨾᩉᩣᨶᨭᩮᩣ, ᩈᨾᩦᩁᩮᩣ, ᩉᩮᩣ, ᨶᨶ᩠ᨴᩥᩅᨯ᩠ᨰᨶᩮᩣ, ᨣᩩᩊᩣᨠᩮᩈᩮᩣ [ᨾᩥᨣᩪᩉᩮᩣ (ᨠ.)], ᨾᩥᩉᩥᩁᩣᨱᩮᩣ, ᨾᩮᨥᩅᩣᩉᨶᩮᩣ, ᩈᩩᨸ᩠ᨸᨲᩣᨸᩮᩣ [ᩈᩩᨸ᩠ᨸᩈᩣᨴᩮᩣ (ᨠ.)], ᩏ, ᨳᩣᨱᩩ [ᩏᨸᩣᨱ᩠ᨯᩮᩣ (ᨠ.)], ᩈᩥᨸᩥᩅᩥᨭ᩠ᨮᩮᩣ, ᨠᩦᩃᩮᩣ, ᨵᨾ᩠ᨾᩅᩣᩉᨶᩮᩣᩍᨧ᩠ᨧᩣᨴᩦᨶᩥᨸᩥ ᩉᩁᨶᩣᨾᩣᨶᩥ.

ᨠᩩᨾᩣᩁᩣᨴᩥᨲ᩠ᨲᨿᩴ ¶ ᩉᩁᩔ ᨸᩩᨲ᩠ᨲᩮ. ᨠᩩᨾᩣᩁ ᨠᩦᩊᩣᨿᩴ, ᨠᩩᨾᩣᩁᩮᨲᩥ ᨠᩦᩊᨲᩦᨲᩥ ᨠᩩᨾᩣᩁᩮᩣ, ᩈᩮᩣᩊᩈᩅᩔᩥᨠᩮᩣ, ᩋᨿᨬ᩠ᨧ ᩈᩮᩣᩊᩈᩅᩔᩥᨠᩮᩣ. ‘‘ᨻᩣᩃᩮᩣ ᨧ ᩈᩮᩣᩊᩈ ᨽᩅᩮ’’ᨲᩥ ᩉᩥ ᩅᩩᨲ᩠ᨲᩴ. ᨡᨱ᩠ᨯᨲᩥ ᨴᩣᨶᩅᨻᩃᨶ᩠ᨲᩥ ᨡᨶ᩠ᨴᩮᩣ, ᨱ᩠ᨯᩔ ᨶ᩠ᨴᩮᩣ. ᩈᨲ᩠ᨲᩥᩴᨸᩉᩁᨱᩅᩥᩈᩮᩈᩴ ᨵᩁᨲᩦᨲᩥ ᩈᨲ᩠ᨲᩥᨵᩁᩮᩣ, ᨸᨽᩣᩅᩩᩔᩣᩉᨾᨶ᩠ᨲᩈᨦ᩠ᨡᩣᨲᩴ ᩅᩣ ᩈᨲ᩠ᨲᩥᨲ᩠ᨲᨿᩴ ᨵᩁᨲᩦᨲᩥ ᩈᨲ᩠ᨲᩥᨵᩁᩮᩣ. ᩋᨾᩁᨠᩮᩣᩈᩮ ᨸᨶ –

‘‘ᨠᨲ᩠ᨲᩥᨠᩮᨿ᩠ᨿᩮᩣ ᨾᩉᩣᩈᩮᨶᩮᩣ,

ᩈᩁᨩᩣᨲᩮᩣ ᨨᩊᩣᨶᨶᩮᩣ;

ᨸᨻ᩠ᨻᨲᩦᨶᨶ᩠ᨴᨶᩮᩣ ᨡᨶ᩠ᨴᩮᩣ,

ᩈᩮᨶᩣᨶᩦ ᩋᨣ᩠ᨣᩥᨽᩪ ᨣᩩᩉᩮᩣ.

ᨻᩣᩉᩩᩃᩮᨿ᩠ᨿᩮᩣ ᨲᩣᩁᨠᨩᩥ,

ᩅᩥᩈᩣᨡᩮᩣ ᩈᩥᨡᩥᩅᩣᩉᨶᩮᩣ;

ᨨᨾᩣᨲᩩᩁᩮᩣ ᩈᨲ᩠ᨲᩥᨵᩁᩮᩣ,

ᨠᩩᨾᩣᩁᩮᩣ ᨠᩮᩣᨬ᩠ᨧᨴᩣᩁᨱᩮᩣ’’ᨲᩥ [ᩋᨾᩁ ᪑.᪔᪑-᪒] ᩅᩩᨲ᩠ᨲᩴ.

᪑᪘-᪒᪑. ᩈᨠ᩠ᨠᩣᨴᩦᨶᩥ ᩅᩦᩈᨲᩥ ᩈᨠ᩠ᨠᩔ ᨶᩣᨾᩣᨶᩥ. ᩋᩈᩩᩁᩮ ᨩᩮᨲᩩᩴ ᩈᨠ᩠ᨠᩩᨱᩣᨲᩦᨲᩥ ᩈᨠ᩠ᨠᩮᩣ. ᨸᩩᩁᩮ, ᨸᩩᩁᩴ ᩅᩣ ᨴᨴᩣᨲᩦᨲᩥ ᨸᩩᩁᩥᨶ᩠ᨴᨴᩮᩣ ¶ . ᨴᩮᩅᩣᨶᩴ ᩁᩣᨩᩣ ᨴᩮᩅᩁᩣᨩᩣ. ᩅᨩᩥᩁᩴ ᨸᩣᨱᩥᨾ᩠ᩉᩥ ᩋᩔ ᩅᨩᩥᩁᨸᩣᨱᩥ. ᩈᩩᨩᩣᨿ ᩋᩈᩩᩁᨠᨬ᩠ᨬᩣᨿ ᨸᨲᩥ ᩈᩩᨩᨾ᩠ᨸᨲᩥ. ᨻᩉᩪᨶᩴ ᨴᩮᩅᨾᨶᩩᩔᩣᨶᩴ ᨧᩥᨶ᩠ᨲᩥᨲᨲ᩠ᨳᩔ ᨴᩔᨶᩈᨾᨲ᩠ᨳᨲᩣᨿ ᩈᩉᩔᨠ᩠ᨡᩮᩣ. ᨾᩉᨲᩴ ᨴᩮᩅᩣᨶᩴ ᩍᨶ᩠ᨴᩮᩣ ᩁᩣᨩᩣ ᨾᩉᩥᨶ᩠ᨴᩮᩣ, ᨴᩮᩅᩮᩉᩥ ᨾᩉᩥᨲᨻ᩠ᨻᩮᩣ ᩅᩣ ᩍᨶ᩠ᨴᩮᩣ ᩁᩣᨩᩣ ᨾᩉᩥᨶ᩠ᨴᩮᩣ, ᨾᩉᨶ᩠ᨲᩮᩣ ᨧ ᩈᩮᩣ ᩍᨶ᩠ᨴᩮᩣ ᨧᩣᨲᩥ ᩅᩣ ᨾᩉᩥᨶ᩠ᨴᩮᩣ. ᩅᨩᩥᩁᩴ ᩌᩅᩩᨵᩴ ᨿᩔ ᩅᨩᩥᩁᩣᩅᩩᨵᩮᩣ, ‘‘ᩅᨩᩥᩁᩣᨿᩩᨵᩮᩣ’’ᨲᩥᨸᩥ ᨸᩣᨮᩮᩣ. ᩅᩈᩪᨶᩥ ᩁᨲᨶᩣᨶᩥ ᩈᨶ᩠ᨲ᩠ᨿᩔᩮᨲᩥ ᩅᩣᩈᩅᩮᩣ. ᨴᩈᩈᨲᩣᨶᩥ ᨶᨿᨶᩣᨶᩥ ᨿᩔ ᩈᩮᩣ ᨴᩈᩈᨲᨶᨿᨶᩮᩣ. ᨴ᩠ᩅᩥᨶ᩠ᨶᩴ ᨴᩮᩅᩃᩮᩣᨠᩣᨶᩴ ᩋᨵᩥᨸᨲᩥᨽᩪᨲᨲ᩠ᨲᩣ ᨲᩥᨴᩥᩅᩣᨵᩥᨽᩪ. ᩈᩩᩁᩣᨶᩴ ᨶᩣᨳᩮᩣ ᩈᩩᩁᨶᩣᨳᩮᩣ. ᩅᨩᩥᩁᩴ ᩉᨲ᩠ᨳᩮ ᨿᩔ ᩈᩮᩣ ᩅᨩᩥᩁᩉᨲ᩠ᨳᩮᩣ. ᨽᩪᨲᩣᨶᩴ ᩈᨲ᩠ᨲᩣᨶᩴ ᨸᨲᩥ ᨽᩪᨲᨸᨲᩥ. ᨾᩉᩥᨲᨻ᩠ᨻᨲ᩠ᨲᩣ ᨾᨥᩅᩣ. ᨾᩉ ᨸᩪᨩᩣᨿᩴ, ᩉᩔ ᨥᩅᩮᩣ. ᨠᩮᩣᩈᩈᨦ᩠ᨡᩣᨲᩣᨶᩥ ᨵᨶᩣᨶᩥ ᩈᨶ᩠ᨲᩥ ᨿᩔ, ᩈᩮᩣ ᨠᩮᩣᩈᩥᨿᩮᩣ, ‘‘ᨠᩮᩣᩈᩥᨿᨣᩮᩣᨲ᩠ᨲᨲᩣᨿ ᨠᩮᩣᩈᩥᨿᩮᩣ’’ᨲᩥ ᨧ ᩅᨴᨶ᩠ᨲᩥ. ᩍᨶ᩠ᨴᨲᩥ ᨸᩁᨾᩥᩔᩁᩥᨿᩮᨶ ᨿᩩᨩ᩠ᨩᨲᩮᨲᩥ ᩍᨶ᩠ᨴᩮᩣ. ᩅᨲᩕᩴ ᨶᩣᨾ ᩋᩈᩩᩁᩴ ᩋᨽᩥᨽᩅᨲᩦᨲᩥ ᩅᨲᩕᨽᩪ. ᨸᩣᨠᩮᩣ ᨶᩣᨾᩅᨲᩕᩣᩈᩩᩁᩔ ᨽᩣᨲᩣ, ᨲᩔ ᩈᩣᩈᨶᨲᩮᩣ ᨶᩥᨣ᩠ᨣᩉᨲᩮᩣ ᨸᩣᨠᩈᩣᩈᨶᩮᩣ. ᩅᩥᨯᩴ ᨻ᩠ᨿᩣᨸᨠᩴ ᩒᨩᩮᩣ ᩑᨲᩔ ᩅᩥᨯᩮᩣᨩᩮᩣ. ᩈᩩᨶᩣᩈᩦᩁᩮᩣ, ᨸᩩᩁᨶ᩠ᨴᩁᩮᩣ, ᩃᩮᨡᩣᩈᨽᩮᩣ [ᩃᩮᨡᨶᩴ ᨴᩮᩅᩣᨶᩴ ᩏᩈᨲᩮᩣ ᩏᨲ᩠ᨲᨾᩮᩣ (ᨧᩥᨶ᩠ᨲᩣᨾᨱᩥᨭᩦᨠᩣ)], ᨴᩥᩅᨸᨲᩥ, ᩈᩩᩁᨸᨲᩥ, ᨻᩃᩣᩁᩣᨲᩥ, ᩈᨧᩦᨸᨲᩥ, ᨩᨾ᩠ᨽᨽᩮᨴᩦ, ᩉᩁᩥᩉᨿᩮᩣ, ᨶᨾᩩᨧᩥᩈᩪᨴᨶᩮᩣ, ᩈᩴᨠᨶ᩠ᨴᨶᩮᩣ, ᨾᩮᨥᩅᩣᩉᨶᩮᩣ, ᩌᨡᨱ᩠ᨯᩃᩮᩣ [ᩌᨡᨱ᩠ᨯᨿᨲᩥ ᨸᩁᨻᩃᩴ ᩏᩈᩣᨴᩥᨲ᩠ᨲᩣ ᨠᩃᨧ (ᨧᩥᨶ᩠ᨲᩣᨾᨱᩥᨭᩦᨠᩣ)], ᨠᩮᩣᩈᩥᨠᩮᩣ, ᩈᩩᩁᨣᩣᨾᨱᩦ, ᨶᩣᨠᨶᩣᨳᩮᩣ, ᩉᩁᩦ ᩍᨧ᩠ᨧᩣᨴᩦᨶᩥᨸᩥ ᩈᨠ᩠ᨠᩔ ᨶᩣᨾᩣᨶᩥ.

ᩋᩔ ᩈᨠ᩠ᨠᩔ ᨽᩁᩥᨿᩣ ᩈᩩᨩᩣᨲᩣ ᨶᩣᨾ. ᩈᩩᨡᩮᨶ ᨩᩣᨲᩣ, ᩈᩩᨶ᩠ᨴᩁᩣ ᩅᩣ ᨩᩣᨲᩥ ᨿᩔᩣ ᩈᩣ ᩈᩩᨩᩣᨲᩣ. ᨸᩩᩃᩮᩣᨾᨩᩣ, ᩈᨧᩦ, ᩍᨶ᩠ᨴᩣᨶᩦ ᩍᨧ᩠ᨧᩣᨴᩦᨶᩥᨸᩥ ᩈᨠ᩠ᨠᨽᩁᩥᨿᩣᨿ ᨶᩣᨾᩣᨶᩥ.

ᩋᩔ ᩈᨠ᩠ᨠᩔ ᨸᩩᩁᩴ ᨾᩈᨠ᩠ᨠᩈᩣᩁᩣᨴᨿᩮᩣ ᨲᨿᩮᩣ ᨽᩅᩮ. ᨾᩮᩣ ᨧ ᩈᨠ᩠ᨠᩮᩣ ᨧ ᨾᩈᨠ᩠ᨠᩣ, ᨲᩮ ᩈᩁᨶ᩠ᨲᩥ ᨣᨧ᩠ᨨᨶ᩠ᨲᩥ ᩑᨲ᩠ᨳ ᨠᩦᩊᩣᩅᩈᩮᨶᩣᨲᩥ ᨾᩈᨠ᩠ᨠᩈᩣᩁᩣ, ᨾᩉᩥᩔᩁᩣᨴᩦᨶᩴ ᨸᩁᩥᩈᩣᨶᩴ, ᩈᨠ᩠ᨠᩔ ᨧ ᨠᩦᩊᩣᨶᩩᨽᩅᨶᨭ᩠ᨮᩣᨶᨶ᩠ᨲ᩠ᨿᨲ᩠ᨳᩮᩣᨲᩥ ¶ ᨧᩥᨶ᩠ᨲᩣᨾᨱᩥᨳᩩᨲᩥᨭᩦᨠᩣᨿᩴ ᩅᩩᨲ᩠ᨲᩴ. ᩈᨦ᩠ᨣᩉᨭᩦᨠᩣᨿᩴ ᨸᨶ ‘‘ᨾᩈᨠ᩠ᨠᨶ᩠ᨲᩥ ᩅᩣ ᩅᩈᩮᩣᨠᨶ᩠ᨲᩥ ᩅᩣ ᩋᩈᩩᩁᨸᩩᩁᩔ ᨶᩣᨾᩴ, ᩍᨴᩴ ᨸᨶ ᨲᩮᩈᩴ ᩏᨲ᩠ᨲᨾᨲ᩠ᨲᩣ ᨾᩈᨠ᩠ᨠᩈᩣᩁᩮᩣ, ᩅᩈᩮᩣᨠᩈᩣᩁᩮᩣᨲᩥ ᨧ ᩅᩩᨲ᩠ᨲ’’ᨶ᩠ᨲᩥ ᩅᩩᨲ᩠ᨲᩴ. ᩋᨾᩁᩣ ᩑᨲᩥᩔᩴ ᩈᨶ᩠ᨲᩥ ᩋᨾᩁᩅᨲᩦ, ᩈᩣ ᩑᩅ ᩋᨾᩁᩣᩅᨲᩦ, ᩁᩔᩔ ᨴᩦᨥᨲᩣ [ᨸᩣᨱᩥᨶᩦ ᪖.᪓.᪑᪑᪙].

ᩋᩔ ᩈᨠ᩠ᨠᩔ ᨸᩣᩈᩣᨴᩮᩣ ᩅᩮᨩᨿᨶ᩠ᨲᩮᩣ ᨶᩣᨾ. ᩅᩮᨩᨿᨶ᩠ᨲᩦ ᨸᨭᩣᨠᩣ ᨸᩈᨲ᩠ᨳᩣ, ᨽᩪᨲᩣ ᩅᩣ ᩋᩔ ᩋᨲ᩠ᨳᩦᨲᩥ ᩅᩮᨩᨿᨶ᩠ᨲᩮᩣ.

ᩋᩔ ᩈᨠ᩠ᨠᩔ ᩈᨽᩣ ᩈᩩᨵᨾ᩠ᨾᩣ ᨾᨲᩣ. ᩈᩮᩣᨽᨶᩮᩣ ᨵᨾ᩠ᨾᩮᩣ ᩋᩔᩣᨲᩥ ᩈᩩᨵᨾ᩠ᨾᩣ, ᨴᩮᩅᨾᨱ᩠ᨯᨸᩮᩣ.

᪒᪒. ᨲᩔ ᩈᨠ᩠ᨠᩔ ᩁᨳᩮᩣ ᩅᩮᨩᨿᨶ᩠ᨲᩮᩣ ᨶᩣᨾ. ᩅᩮᨩᨿᨶ᩠ᨲᩦᨶᩣᨾᩣᨿ ᨸᨭᩣᨠᩣᨿ ᨿᩮᩣᨣᨲᩮᩣ ᩅᩮᨩᨿᨶ᩠ᨲᩮᩣ. ᨲᩔ ᩈᨠ᩠ᨠᩔ ᩈᩣᩁᨳᩥ ᩈᩪᨲᩮᩣ ᨾᩣᨲᩃᩥᨶᩣᨾ. ᨾᨲᩃᩔ [ᨾᩣᨲᩃᩣᨿ (ᨠ.)] ᩋᨸᨧ᩠ᨧᩴ ᨾᩣᨲᩃᩥ, ᨲᩔ ᩈᨠ᩠ᨠᩔ ᨣᨩᩮᩣ ᩑᩁᩣᩅᨱᩮᩣ ᨶᩣᨾ, ᩍᩁᩣᩅᨱᩮᩣ ᩈᨾᩩᨴ᩠ᨴᩮᩣ, ᨲᨲᩕᨩᩣᨲᩮᩣ ᩑᩁᩣᩅᨱᩮᩣ [ᩍᩁᩣᩅᨲᩥ ᩈᨾᩩᨴ᩠ᨴᩮ ᨩᩣᨲᩮᩣ (ᩑᩁᩣᩅᨲᩮᩣ), ᩈᩮᩈᩮ ᩋᨱ… ᨸᩥᩈᩮᩣᨴᩁᩣᨴᩥᨲ᩠ᨲᩣ ᨱᨲ᩠ᨲᩮ ᩑᩁᩣᩅᨱᩮᩣ (ᨧᩥᨶ᩠ᨲᩣᨾᨱᩥᨭᩦᨠᩣ)]. ᨲᩔ ᩈᨠ᩠ᨠᩔ ᩈᩥᩃᩣᩈᨶᩴ ᨸᨱ᩠ᨯᩩᨠᨾ᩠ᨻᩃᩮᩣ ᨶᩣᨾ. ᨸᨱ᩠ᨯᩩᩅᨱ᩠ᨱᨠᨾ᩠ᨻᩃᩈᨴᩥᩈᨲ᩠ᨲᩣ ᨸᨱ᩠ᨯᩩᨠᨾ᩠ᨻᩃᩮᩣ. ᩈᩥᩃᩣ ᨸᩣᩈᩣᨱᩮᩣ ᩑᩅ ᩌᩈᨶᩴ ᩈᩥᩃᩣᩈᨶᩴ.

᪒᪓. ᨲᩔ ᩈᨠ᩠ᨠᩔ ᨸᩩᨲ᩠ᨲᩣ ᩈᩩᩅᩦᩁ, ᨩᨿᨶ᩠ᨲᩍᨧ᩠ᨧᩣᨴᨿᩮᩣ. ᩋᨲᩥᩈᨿᩮᨶ ᩈᩪᩁᨲ᩠ᨲᩣ ᩈᩩᩅᩦᩁᩮᩣ. ᩋᩈᩩᩁᩮ ᨩᨿᨲᩦᨲᩥ ᨩᨿᨶ᩠ᨲᩮᩣ. ᨲᩔ ᩈᨠ᩠ᨠᩔ ᨸᩮᩣᨠ᩠ᨡᩁᨱᩦ ᨶᨶ᩠ᨴᩣ ᨶᩣᨾ ᨽᩅᩮ. ᨶᨶ᩠ᨴᩦᨿᨲᩦᨲᩥ ᨶᨶ᩠ᨴᩣ. ᨸᩮᩣᨠ᩠ᨡᩁᩴ ᩅᩩᨧ᩠ᨧᨲᩥ ᨸᨴᩩᨾᩴ, ᩈᩃᩥᩃᨬ᩠ᨧ, ᨲᩮᩉᩥ ᩈᨲ᩠ᨲᩣᨶᩴ ¶ ᨾᨶᩴ ᩋᨲ᩠ᨲᩣᨶᩴ ᨶᨿᨲᩦᨲᩥ ᨸᩮᩣᨠ᩠ᨡᩁᨱᩦ, ᨸᩮᩣᨠ᩠ᨡᩁᩮᨶ ᩅᩣ ᩈᩩᨶ᩠ᨴᩁᩮᨶ ᩋᨱ᩠ᨱᩮᨶ ᨩᩃᩮᨶ ᩈᩉᩥᨲᨲ᩠ᨲᩣ ᨸᩮᩣᨠ᩠ᨡᩁᨱ᩠ᨱᩦ, ᩈᩣ ᩑᩅ ᨸᩮᩣᨠ᩠ᨡᩁᨱᩦ. ᨲᩔ ᩈᨠ᩠ᨠᩔ ᩅᨶᩣᨶᩥ ᩏᨿ᩠ᨿᩣᨶᩣᨶᩥ ᨶᨶ᩠ᨴᨶᩣᨴᩦᨶᩥ ᨧᨲ᩠ᨲᩣᩁᩥ. ᨶᨶ᩠ᨴᨿᨲᩦᨲᩥ ᨶᨶ᩠ᨴᨶᩴ. ᨶᩣᨶᩣᨴᩥᨻ᩠ᨻᩁᩩᨠ᩠ᨡᩮᩉᩥ ᨾᩥᩔᨠᨲ᩠ᨲᩣ ᨾᩥᩔᨠᩴ. ᨶᩣᨶᩣᩃᨲᩣᩉᩥ ᩅᩃ᩠ᩃᩦᩉᩥ ᨧᩥᨲ᩠ᨲᨲ᩠ᨲᩣ ᨧᩥᨲ᩠ᨲᩃᨲᩣ, ᨶᩣᨶᩣᩅᩥᩁᩣᨣᩅᨱ᩠ᨱᩅᩥᨧᩥᨲ᩠ᨲᩣᨿ ᩅᩣ ᩃᨲᩣᨿ ᩈᨾᨶ᩠ᨶᩣᨣᨲᨲ᩠ᨲᩣ ᨧᩥᨲ᩠ᨲᩃᨲᩣ, ᨴᩮᩅᨲᩣᨶᩴ ᩅᩣ ᨧᩥᨲ᩠ᨲᩣᩈᩣ ᩑᨲ᩠ᨳ ᩋᨲ᩠ᨳᩦᨲᩥ ᨧᩥᨲ᩠ᨲᩣ, ᩌᩈᩣᩅᨲᩦ ᨶᩣᨾ ᩃᨲᩣ, ᩈᩣ ᨿᩔ ᩋᨲ᩠ᨳᩥ, ᨲᩴ ᨧᩥᨲ᩠ᨲᩃᨲᩣ. ᨴᩮᩅᨲᩣᨶᩴ ᩅᩣ ᨧᩥᨲ᩠ᨲᩴ ᩃᨶ᩠ᨲᩥ ᨣᨱ᩠ᩉᨶ᩠ᨲᩦᨲᩥ ᨧᩥᨲ᩠ᨲᩃᩣ, ᨴᩥᨻ᩠ᨻᩁᩩᨠ᩠ᨡᩣ, ᨲᩮᩈᩴ ᩈᨾᩪᩉᩮᩣ ᨧᩥᨲ᩠ᨲᩃᨲᩣ, ᩍᨲ᩠ᨳᩥᩃᩥᨦ᩠ᨣᩮᨶ ᨲᩔ ᩅᨶᩔ ᨶᩣᨾᩴ, ᨿᨳᩣ ‘‘ᨡᩩᨴ᩠ᨴᩈᩥᨠ᩠ᨡᩣ’’ᨲᩥ. ᨹᩣᩁᩩᩈᨠᩣᨶᩥ ᨿᨲ᩠ᨳ ᩈᨶ᩠ᨲᩥ, ᨲᩴ ᨹᩣᩁᩩᩈᨠᩴ.

᪒᪔. ᩋᩈᨶ᩠ᨿᩣᨴᩥᨲ᩠ᨲᨿᩴ ᨲᩔ ᩈᨠ᩠ᨠᩔ ᩌᨿᩩᨵᩴ. ᩋᩔᨲᩮ ᨽᩩᨩ᩠ᨩᨲᩮ ᩃᩮᩣᨠᨵᩣᨲᩩᨠᨾᨶᩮᨶᩣᨿᩩᨵᩮᨶᩣᨲᩥ ᩋᩈᨶᩥ, ᩋᨿᩴ ᩋᩈᨶᩥᩈᨴ᩠ᨴᩮᩣ ᨴ᩠ᩅᩦᩈᩩ ᨸᩩᨾᩥᨲ᩠ᨳᩥᩃᩥᨦ᩠ᨣᩮᩈᩩ ᩅᨲ᩠ᨲᨲᩥ. ᨠᩩᩃᩥᨾ᩠ᩉᩥ ᩈᨠ᩠ᨠᩔ ᩉᨲ᩠ᨳᩮ ᩈᩮᨲᩥ ᨲᩥᨭ᩠ᨮᨲᩦᨲᩥ ᨠᩩᩃᩥᩈᩴ, ᨠᩩᩃᩥ ᩉᨲ᩠ᨳᩮᩣ ᨽᩩᨩᩣᨴᩃᩮᩣᨲᩥ ᩉᩥ ᨲᩥᨠᨱ᩠ᨯᩈᩮᩈᩮᩣ [ᨲᩥᨠᨱ᩠ᨯᩈᩮᩈ ᪒.᪖.᪒᪖]. ᨠᩩᨿᩴ ᩅᩣ ᨸᨳᩅᩥᨿᩴ ᩃᩥᩈᨲᩥ ᨲᨶᩩ ᨽᩅᨲᩦᨲᩥ ᨠᩩᩃᩥᩈᩴ. ᩅᨩ ᨣᨲᩥᨿᩴ, ᩅᨩᨲᩮᩅ ᨶ ᨸᨭᩥᩉᨬ᩠ᨬᨲᩮ ᨿᩔ ᨣᨾᨶᩴ ᨠᩮᨶᨧᩦᨲᩥ ᩅᨩᩥᩁᩴ, ᩍᩁᨸᨧ᩠ᨧᨿᩮᩣ. ᩅᨩᩥᩁᩈᩉᨧᩁᨱᨲᩮᩣ ᨠᩩᩃᩥᩈᩈᨴ᩠ᨴᩮᩣᨸᩥ ᨸᩩᨶ᩠ᨶᨸᩩᩴᩈᨠᩮ. ᨽᩥᨴᩩᩁᩴ, ᨸᩅᩥ, ᩈᨲᨠᩮᩣᨭᩥ, ᩈᩩᩁᩩ, ᩈᨾ᩠ᨻᩮᩣ, ᨴᨾ᩠ᨽᩮᩣᩃᩥᩍᨧ᩠ᨧᩣᨴᩦᨶᩥᨸᩥ ᩅᨩᩥᩁᩔ ᨶᩣᨾᩣᨶᩥ. ᨲᨲᩕ ᨽᩥᨴᩩᩁᩴ ᨸᩩᨶ᩠ᨶᨸᩩᩴᩈᨠᩮ, ᨸᩅᩥᩌᨴᨿᩮᩣ ᨸᩩᨾᩮ.

ᩁᨾ᩠ᨽᩣ ¶ ᨧ ᩋᩃᨾ᩠ᨻᩩᩈᩣ ᨧ ᩍᨧ᩠ᨧᩣᨴᩥᨠᩣ ᨴᩮᩅᩥᨲ᩠ᨳᩥᨿᩮᩣ ᩋᨧ᩠ᨨᩁᩣᨿᩮᩣ ᨶᩣᨾᩣᨲᩥ ᩅᩩᨲ᩠ᨲᩣ. ᩋᨧ᩠ᨨᩁᩣᩅᩥᩈᩮᩈᩣ ᩉᩥ ᩑᨲᩣ. ᩋᨧ᩠ᨨᩮᩣ ᨶᩥᨾ᩠ᨾᩃᩅᨱ᩠ᨱᩮᩣ ᩑᨲᩣᩈᨾᨲ᩠ᨳᩦᨲᩥ ᩋᨧ᩠ᨨᩁᩣᨿᩮᩣ. ‘‘ᩋᨸᩈᩁᩣ’’ᨲᩥᨸᩥ ᩑᨲᩣᩈᨾᩮᩅ ᩈᩣᨾᨬ᩠ᨬᩈᨬ᩠ᨬᩣ. ᨴᩮᩅᨸᩩᨲ᩠ᨲᩣᨶᩴ ᩁᨲᩥᩴ ᨽᩣᩅᩮᨶ᩠ᨲᩥ ᩅᨯ᩠ᨰᩮᨶ᩠ᨲᩦᨲᩥ ᩁᨾ᩠ᨽᩣ, ᩁᩴ ᨠᩣᨾᨣ᩠ᨣᩥᩴ ᨽᨶ᩠ᨲᩥ ᨴᩦᨸᨿᨶ᩠ᨲᩥ ᨩᩣᩃᩮᨶ᩠ᨲᩦᨲᩥ ᩅᩣ ᩁᨾ᩠ᨽᩣ, ᨶᩥᨣ᩠ᨣᩉᩦᨲᩣᨣᨾᩮᩣ. ᨠᩣᨾᩁᨲᩥᩅᩈᩮᨶ ᨴᩮᩅᨸᩩᨲ᩠ᨲᩮ ᩋᨲ᩠ᨲᨶᩥ ᩅᩈᩣᨸᩮᨲᩩᩴ ᩋᩃᩴ ᩈᨾᨲ᩠ᨳᩣᨲᩥ ᩋᩃᨾ᩠ᨻᩩᩈᩣ, ᩋᩔᩩᨠᩣᩁᩮᩣ. ᨴᩮᩅᩣᨶᩴ ᨴᩮᩅᨸᩩᨲ᩠ᨲᩣᨶᩴ, ᨴᩮᩅᩦᨽᩪᨲᩣ ᩅᩣ ᩍᨲ᩠ᨳᩥᨿᩮᩣ ᨴᩮᩅᩥᨲ᩠ᨳᩥᨿᩮᩣ.

‘‘ᨸᨬ᩠ᨧᩈᩥᨡᩮᩣ, ᩉᩣᩉᩣ, ᩉᩪᩉᩪ’’ᩍᨧ᩠ᨧᩣᨴᨿᩮᩣ ᨣᨶ᩠ᨵᨻ᩠ᨻᩣ ᨶᩣᨾ. ᨸᨬ᩠ᨧ ᩈᩥᨡᩣ ᨧᩪᩊᩣ ᨿᩔ ᩈᩮᩣ ᨸᨬ᩠ᨧᩈᩥᨡᩮᩣ. ‘‘ᩉᩣ’’ᨲᩥ ᩋᨶᨶ᩠ᨴᩥᨲᩴ ᨵᨶᩥᩴ [ᨶᩥᨶ᩠ᨴᩥᨽᨴ᩠ᨵᨶᩥᩴ (ᨧᩥᨶ᩠ᨲᩣᨾᨱᩥᨭᩦᨠᩣ)] ᨩᩉᨲᩦᨲᩥ ᩉᩣᩉᩣ. ‘‘ᩉᩪ’’ᨲᩥ ᨣᩦᨲᩅᩥᩈᩮᩈᩈᨴ᩠ᨴᩴ ᩉᩪᨿᨲᩮᨲᩥ ᩉᩪᩉᩪ. ᨣᨶ᩠ᨵᩴ ᩋᨻ᩠ᨻᨶ᩠ᨲᩥ ᨽᩩᨬ᩠ᨩᨶ᩠ᨲᩦᨲᩥ ᨣᨶ᩠ᨵᨻ᩠ᨻᩣ, ᨣᩣᨿᨶᩴ ᩅᩣ ᨵᨾ᩠ᨾᩮᩣ ᩑᨲᩮᩈᩴ ᨣᨶ᩠ᨵᨻ᩠ᨻᩣ, ᨾ᩠ᨾᩔ ᨻ᩠ᨻᩮᩣ.

᪒᪕. ᩅᩥᨾᩣᨶᩣᨴᩥᨴ᩠ᩅᨿᩴ ᩅᩥᨾᩣᨶᩮ. ᨴᩮᩅᩣᨶᨾᩣᨠᩣᩈᩮ ᨣᨾᨶᩴ ᨿᩮᨶ ᨲᩴ ᩅᩥᨾᩣᨶᩴ, ᩅᩥᨣᨲᩴ [ᩅᩥᨶᩣ (ᨠ.)] ᨾᩣᨶᩴ ᩏᨸᨾᩣᨶᨾᩔ ᩅᩥᨾᩣᨶᩴ. ᩅᩥᩉᩮ ᩌᨠᩣᩈᩮ ᨣᨧ᩠ᨨᨲᩦᨲᩥ ᨻ᩠ᨿᨾ᩠ᩉᩴ, ᩉᨠᩣᩁᨲᩮᩣ ᨸᩩᨻ᩠ᨻᩮ ᩋᨾᨸᨧ᩠ᨧᨿᩮᩣ. ᩑᨲ᩠ᨳ ᨧ ᩅᩥᨾᩣᨶᨻ᩠ᨿᨾ᩠ᩉᩈᨴ᩠ᨴᩣ ᨴ᩠ᩅᩮᨸᩥ ᩋᨶᩥᨲ᩠ᨳᩥᨿᩴ ᨸᩩᨶ᩠ᨶᨸᩩᩴᩈᨠᩮ ᩅᨲ᩠ᨲᨶ᩠ᨲᩥ.

ᨸᩦᨿᩩᩈᩣᨴᩥᨲ᩠ᨲᨿᩴ ᩋᨾᨲᩮ. ᨸᩦᨿᨲᩮᨲᩥ ᨸᩦᨿᩩᩈᩴ, ‘‘ᩋᨾᨲᨸᩣ’’ᨲᩥ ᩉᩥ ᩅᩩᨲ᩠ᨲᩴ, ᩏᩈᨸᨧ᩠ᨧᨿᩮᩣ [ᩏᨱᩣᨴᩥ ᪔.᪗᪖ ᨱ᩠ᩅᩣᨴᩥ ᪒᪑᪕ ᩈᩩᨲ᩠ᨲᩮᩈᩩ ᨸᨶ ‘‘ᨸᩦᨿᩪᩈ’’ᨾᩥᨲᩥ ᨴᩥᩔᨲᩥ]. ‘‘ᨸᩮᨿᩩᩈᩮᩣ’’ᨲᩥᨸᩥ ᨶᩣᨾᨾᩔ. ᨶ ᨾᨲᩴ ᨾᩁᨱᨾᨶᩮᨶ ᩋᨾᨲᩴ. ᩈᩩᨡᩮᨶ ᨵᨿᨶ᩠ᨲᩥ ᨸᩥᩅᨶ᩠ᨲᩥ ᨲᩴ ᩍᨲᩥ ᩈᩩᨵᩣ. ᩑᨲ᩠ᨳ ᨧ ᩋᨾᨲᩈᨴ᩠ᨴᩮᩣ ᨿᨬ᩠ᨬᩈᩮᩈᨸᩦᨿᩩᩈᩈᩃᩥᩃᨥᨲᩣᨴᩦᩈᩩ ᨶᨸᩩᩴᩈᨠᩮ ¶ , ᨵᨶ᩠ᩅᨶ᩠ᨲᩁᩥᨴᩮᩅᩣᨴᩦᩈᩩ ᨸᩩᩃ᩠ᩃᩥᨦ᩠ᨣᩮ, ᨣᩊᩮᩣᨫᩣᨽᨿᩣᨾᩃᨠ᩠ᨿᩣᨴᩦᩈᩩ ᩍᨲ᩠ᨳᩥᩃᩥᨦ᩠ᨣᩮᨲᩥ ᨲᩦᩈᩩ ᩅᨲ᩠ᨲᨲᩥ [ᩋᨾᨲᩴ ᨿᨬ᩠ᨬᩈᩮᩈᩮ ᨧ, ᨸᩦᨿᩪᩈᩮ ᩈᩃᩥᩃᩮ ᨥᨲᩮ ᩋᨿᩣᨧᩥᨲᩮ ᨧ ᨾᩮᩣᨠ᩠ᨡᩮ ᨧ, ᨶᩣ ᨵᨶ᩠ᩅᨶ᩠ᨲᩁᩥᨴᩮᩅᩈᩩ ᩋᨾᨲᩣ ᨾᩣᨣᨵᩦᨸᨳ᩠ᨿᩣ ᨣᩩᩊᩩᨧ᩠ᨿᩣᨾᩃᨠᩦᩈᩩ ᨧ (ᨾᩮᨴᩥᨶᩦᨠᩮᩣᩈ ᪑᪖ ᪗᪗-᪘)], ᨲᩴᩈᩉᨧᩁᨱᨲᩮᩣ ᨸᩦᨿᩩᩈᩈᨴ᩠ᨴᩮᩣᨸᩥ ᨲᩦᩈᩩ ᩃᩥᨦ᩠ᨣᩮᩈᩩ. ᩈᩩᨵᩣᩈᨴ᩠ᨴᩮᩣ ᨸᨶ ᩋᨾᨲᨶᩩᩉᩦᩃᩮᨸᩣᨴᩦᩈᩩᨸᩥ ᨶᩥᨧ᩠ᨧᨾᩥᨲ᩠ᨳᩥᩃᩥᨦ᩠ᨣᩮᩣᩅ [ᩈᩩᨵᩣ ᩃᩮᨸᩮᩣ’ᨾᨲᩴ ᨶᩩᩉᩦ (ᩋᨾᩁ ᪒᪓.᪑᪐᪑)].

ᩈᩥᨶᩮᩁᩩᩌᨴᩥᨸᨬ᩠ᨧᨠᩴ ᨸᨻ᩠ᨻᨲᩁᩣᨩᩮ. ᩈᩥᨶᩣ ᩈᩮᩣᨧᩮᨿ᩠ᨿᩮ, ᩈᩥᨶᩣᨲᩥ ᩈᩮᩣᨧᩮᨲᩥ ᨴᩮᩅᩮᨲᩥ ᩈᩥᨶᩮᩁᩩ, ᩑᩁᩩᨸᨧ᩠ᨧᨿᩮᩣ. ᨾᩦ ᩉᩥᩴᩈᩣᨿᩴ, ᨾᩥᨶᩣᨲᩥ ᩉᩥᩴᩈᨲᩥ ᩈᨻ᩠ᨻᩮ ᨸᨻ᩠ᨻᨲᩮ ᩋᨲ᩠ᨲᨶᩮᩣ ᩏᨧ᩠ᨧᨲᩁᨭ᩠ᨮᩮᨶᩣᨲᩥ ᨾᩮᩁᩩ, ᩁᩩᨸᨧ᩠ᨧᨿᩮᩣ. ᨲᩥᨴᩥᩅᩣᨶᩴ ᨴ᩠ᩅᩥᨶ᩠ᨶᩴ ᨴᩮᩅᩃᩮᩣᨠᩣᨶᩴ ᩌᨵᩣᩁᩮᩣ ᨸᨲᩥᨭ᩠ᨮᩣᨲᩥ ᨲᩥᨴᩥᩅᩣᨵᩣᩁᩮᩣ. ᨴᩮᩅᩮ ᨶᨿᨲᩦᨲᩥ ᨶᩮᩁᩩ. ᩈᩩᨾᩮᩁᩪᨲᩥ ᩏᨸᩈᨣ᩠ᨣᩮᨶ ᨶᩣᨾᩴ ᩅᨯ᩠ᨰᩥᨲᩴ. ᩉᩮᨾᨴ᩠ᨴᩥ, ᩁᨲᨶᩈᩣᨶᩩ, ᩈᩩᩁᩣᩃᨿᩣᨴᩦᨶᩥᨸᩥ ᨸᨻ᩠ᨻᨲᩁᩣᨩᩔ ᨶᩣᨾᩣᨶᩥ.

᪒᪖. ᨿᩩᨣᨶ᩠ᨵᩁᩣᨴᩦᨶᩥ ᩈᩥᨶᩮᩁᩩᩔ ᨸᩁᩥᩅᩣᩁᨽᩪᨲᩣᨶᩴ ᩈᨲ᩠ᨲᨶ᩠ᨶᩴ ᨸᩁᩥᨽᨱ᩠ᨯᨸᨻ᩠ᨻᨲᩣᨶᩴ ᨶᩣᨾᩣᨶᩥ. ᨧᨶ᩠ᨴᩈᩪᩁᩥᨿᩈᨦ᩠ᨡᩣᨲᩴ ᨿᩩᨣᩴ ᨵᩣᩁᩮᨲᩥ ᨲᨴᩩᨻ᩠ᨻᩮᨵᨾᨣ᩠ᨣᨧᩣᩁᩥᨲ᩠ᨲᩣᨲᩥ ᨿᩩᨣᨶ᩠ᨵᩁᩮᩣ. ᩎᩈᩴ ᨾᩉᩥᩔᩁᩴ ᨵᩣᩁᩮᨲᩥ ᨲᩔ ᨶᩥᩅᩣᩈᨭ᩠ᨮᩣᨶᨲ᩠ᨲᩣᨲᩥ ᩎᩈᨵᩁᩮᩣ. ᨠᩁᩅᩦᩁᩣ ᩋᩔᨾᩣᩁᨠᩣ ᨻᩉᩅᩮᩣ ᩑᨲ᩠ᨳ ᩈᨶ᩠ᨲᩦᨲᩥ ᨠᩁᩅᩦᩁᩮᩣ, ᨠᩮ ᩅᩣ ᨾᨿᩪᩁᩣ ᩁᩅᨶ᩠ᨲᩥ ᩑᨲ᩠ᨳᩣᨲᩥ ᨠᩁᩅᩦᩁᩮᩣ, ‘‘ᨠᩁᩅᩦᨠᩮᩣ’’ᨲᩥᨸᩥ ᨸᩣᨮᩮᩣ, ᩍᨵᩣᨸᩥ ᨸᨧ᩠ᨨᩥᨾᩮᩣᨿᩮᩅᨲ᩠ᨳᩮᩣ, ᨠᩁᩅᩦᨠᩈᨠᩩᨱᩣ ᩅᩣ ᨻᩉᩅᩮᩣ ᩑᨲ᩠ᨳ ᩈᨶ᩠ᨲᩦᨲᩥ ᨠᩁᩅᩦᨠᩮᩣ. ᩈᩩᨴᩔᨶᩣ ᩒᩈᨵᩥᩅᩥᩈᩮᩈᩣ ᨻᩉᩩᨠᩣ ᩑᨲ᩠ᨳ ᩈᨶ᩠ᨲᩦᨲᩥ ᩈᩩᨴᩔᨶᩮᩣ, ᩈᩩᨡᩮᨶ ᨸᩔᩥᨲᨻ᩠ᨻᨲ᩠ᨲᩣ ᩅᩣ ᩈᩩᨴᩔᨶᩮᩣ ¶ , ᩈᩩᨶ᩠ᨴᩁᩴ ᩅᩣ ᨴᩔᨶᩴ ᩑᨲ᩠ᨳᩣᨲᩥ ᩈᩩᨴᩔᨶᩮᩣ. ᨸᨬ᩠ᨧᨶ᩠ᨶᩴ ᨸᨻ᩠ᨻᨲᨧᨠ᩠ᨠᩣᨶᩴ ᨶᩮᨾᩥᩈᨴᩥᩈᩴ ᨠᨲ᩠ᩅᩣ ᩋᨲ᩠ᨲᩣᨶᩴ ᨵᩣᩁᩮᨲᩦᨲᩥ ᨶᩮᨾᩥᨶ᩠ᨵᩁᩮᩣ, ᨶᩮᨾᩥᨽᩣᩅᩮᨶ ᩅᩣ ᨵᩣᩁᩮᨲᨻ᩠ᨻᩮᩣ ᩏᨸᩃᨠ᩠ᨡᩮᨲᨻ᩠ᨻᩮᩣᨲᩥ ᨶᩮᨾᩥᨶ᩠ᨵᩁᩮᩣ, ᨶᩮᨾᩥᩴᩅᩣ ᩁᨳᨴ᩠ᨴᩩᨾᩴ ᨵᩣᩁᩮᨲᩥ ᨿᩮᨽᩩᨿ᩠ᨿᩮᨶᩣᨲᩥ ᨶᩮᨾᩥᨶ᩠ᨵᩁᩮᩣ. ᩅᩥᨶᨲᩣ ᨶᩣᨾ ᩈᩩᨸᨱ᩠ᨱᨾᩣᨲᩣ, ᨲᩔᩣ ᨶᩥᩅᩣᩈᨭ᩠ᨮᩣᨶᨲ᩠ᨲᩣ ᩅᩥᨶᨲᨠᩮᩣᨲᩥ ᨧᩥᨶ᩠ᨲᩣᨾᨱᩥᨭᩦᨠᩣ. ᩅᩥᨲ᩠ᨳᩥᨱ᩠ᨱᩣ ᩅᩣ ᨶᨲᩣ ᨶᨴᩥᨿᩮᩣ ᩑᨲ᩠ᨳᩣᨲᩥ ᩅᩥᨶᨲᨠᩮᩣ. ᩋᩔᨠᨱ᩠ᨱᩣ ᩈᨩ᩠ᨩᨴᩩᨾᩣ ᨻᩉᩅᩮᩣ ᩑᨲ᩠ᨳ ᩈᨶ᩠ᨲᩦᨲᩥ ᩋᩔᨠᨱ᩠ᨱᩮᩣ, ᩋᩔᨠᨱ᩠ᨱᩈᨴᩥᩈᨠᩪᨭᨲ᩠ᨲᩣ ᩅᩣ ᩋᩔᨠᨱ᩠ᨱᩮᩣ. ᨠᩩᩃᩣᨧᩃᩣᨲᩥ ᩑᨲᩮ ᩈᩥᨶᩮᩁᩩᩌᨴᨿᩮᩣ ᩋᨭ᩠ᨮ ᨸᨻ᩠ᨻᨲᩣ ᩋᨧᩃᩈᨦ᩠ᨡᩣᨲᩣᨶᩴ ᨸᨻ᩠ᨻᨲᩣᨶᩴ ᨠᩩᩃᩣᨶᩥ ᨿᩮᩣᨶᩥᨿᩮᩣ ᨸᨽᩅᩣ, ᩑᨲᩮ ᨧ ᩈᩥᨶᩮᩁᩩᩌᨴᨿᩮᩣ ᩋᨶᩩᨸᩩᨻ᩠ᨻᩈᨾᩩᨣ᩠ᨣᨲᩣ, ᩈᨻ᩠ᨻᨻᩣᩉᩥᩁᩮᩣ ᨧᩮᨲ᩠ᨳ ᩋᩔᨠᨱ᩠ᨱᩮᩣ. ᨶᩥᨾᩥᨩᩣᨲᨠᩮ ᨸᨶ –

‘‘ᩈᩩᨴᩔᨶᩮᩣ ᨠᩁᩅᩦᨠᩮᩣ, ᩎᩈᨵᩁᩮᩣ ᨿᩩᨣᨶ᩠ᨵᩁᩮᩣ;

ᨶᩮᨾᩥᨶ᩠ᨵᩁᩮᩣ ᩅᩥᨶᨲᨠᩮᩣ, ᩋᩔᨠᨱ᩠ᨱᩮᩣ ᨣᩥᩁᩥ ᨻᩕᩉᩣ’’ᨲᩥ [ᨩᩣ. ᪒.᪒᪒.᪕᪖᪘].

ᩅᨲ᩠ᩅᩣ ᩈᩥᨶᩮᩁᩩᩴ ᨸᩁᩥᨠ᩠ᨡᩥᨸᩥᨲ᩠ᩅᩣ ᩋᩔᨠᨱ᩠ᨱᩮᩣ ᨶᩣᨾ ᨸᨻ᩠ᨻᨲᩮᩣ ᨸᨲᩥᨭ᩠ᨮᩥᨲᩮᩣ, ᨲᩴ ᨸᩁᩥᨠ᩠ᨡᩥᨸᩥᨲ᩠ᩅᩣ ᩅᩥᨶᨲᨠᩮᩣ ᨶᩣᨾ ᨸᨻ᩠ᨻᨲᩮᩣᨲᩥ ᩑᩅᨾᨬ᩠ᨬᩮᩣᨿᩮᩅᩣᨶᩩᨠ᩠ᨠᨾᩮᩣ ᨠᨳᩥᨲᩮᩣ. ᨠᩥᨬ᩠ᨧᩣᨸᩥ ᨠᨳᩥᨲᩮᩣ, ᨶᩣᨾᨽᩮᨴᨾᨲ᩠ᨲᨠᨲᩮᩣᨿᩮᩅ ᨸᨶᩮᨲ᩠ᨳ ᨽᩮᨴᩮᩣ, ᨶᩣᨲ᩠ᨳᨽᩮᨴᨠᨲᩮᩣᨲᩥ ᨴᨭ᩠ᨮᨻ᩠ᨻᩴ.

᪒᪗. ᩌᨠᩣᩈᩅᩣᩉᩦᨣᨦ᩠ᨣᩣᨿᩴ ᨾᩮᩁᩩᩈᩥᨦ᩠ᨣᩮᩣᨻ᩠ᨽᩅᩣᨿᩴ ᨾᨶ᩠ᨴᩣᨠᩥᨶ᩠ᨿᩣᨴᩥᨶᩣᨾᨲ᩠ᨲᨿᩴ. ᨾᨶ᩠ᨴᩴ ᩋᨠᩥᨲᩩᩴ ᩈᩦᩃᨾᩔᩣᨲᩥ ᨾᨶ᩠ᨴᩣᨠᩥᨶᩦ. ᩌᨠᩣᩈᩮ ᩈᨶ᩠ᨴᨾᩣᨶᩣ ᨣᨦ᩠ᨣᩣ ᩌᨠᩣᩈᨣᨦ᩠ᨣᩣ. ᩈᩩᩁᩣᨶᩴ ᨴᩮᩅᩣᨶᩴ ᨶᨴᩦ ᩈᩩᩁᨶᨴᩦ. ᩈᩩᩁᨴᩦᨥᩥᨠᩣᨲᩥᨸᩥ ᩑᨲᩥᩔᩣ ᨶᩣᨾᩴ.

᪒᪘. ᨠᩮᩣᩅᩥᩊᩣᩁᩣᨴᩥᨲ᩠ᨲᨿᩴ ¶ ‘‘ᨹᩃᩉᩁᩮᩣ’’ᨲᩥᨡ᩠ᨿᩣᨲᩮ ᨸᩣᩁᩥᨧ᩠ᨨᨲ᩠ᨲᨠᩮ. ᨠᩩᩴ ᨸᨳᩅᩥᩴ ᩅᩥᨴᩣᩁᨿᨲᩥ ᨾᩪᩃᩮᨶᩣᨲᩥ ᨠᩮᩣᩅᩥᩊᩣᩁᩮᩣ, ᨴᩔ ᩊᩮᩣ. ᨸᩁᩥ ᩈᨾᨶ᩠ᨲᨲᩮᩣ ᨨᨲ᩠ᨲᩴ ᩅᩥᨿ ᨲᩥᨭ᩠ᨮᨲᩦᨲᩥ ᨸᩣᩁᩥᨧ᩠ᨨᨲ᩠ᨲᨠᩮᩣ. ᨸᩣᩁᩥᨶᩮᩣ ᩈᨾᩩᨴ᩠ᨴᩔ ᨩᩣᨲᩮᩣ ᩋᨸᨧ᩠ᨧᩴ ᨸᩣᩁᩥᨩᩣᨲᨠᩮᩣ, ᩈᨠᨲ᩠ᨳᩮ ᨠᩮᩣ. ᨸᩣᩁᩥᨽᨴ᩠ᨴᩮᩣ, ᨶᩥᨾ᩠ᨻᨲᩁᩩ, ᨾᨶ᩠ᨴᩣᩁᩮᩣᩍᨧ᩠ᨧᩣᨴᩦᨶᩥᨸᩥ ᨸᩣᩁᩥᨧ᩠ᨨᨲ᩠ᨲᨠᩔ ᨶᩣᨾᩣᨶᩥ.

ᨠᨸ᩠ᨸᩁᩩᨠ᩠ᨡᩮᩣ ᨧ ᩈᨶ᩠ᨲᩣᨶᩮᩣ ᨧ ᩌᨴᩥᨶᩣ ᨾᨶ᩠ᨴᩣᩁᩮᩣ ᨸᩣᩁᩥᨩᩣᨲᨠᩮᩣ ᨧ ᩉᩁᩥᨧᨶ᩠ᨴᨶᨬ᩠ᨧ ᩑᨲᩮ ᨸᨬ᩠ᨧ ᨴᩮᩅᨴ᩠ᨴᩩᨾᩣ [ᩋᨾᩁ ᪑.᪕᪓] ᨴᩮᩅᨲᩁᩅᩮᩣ ᨴᩮᩅᨽᩪᨾᩦᩈ᩠ᩅᩮᩅ ᩈᨾ᩠ᨽᩅᨲᩮᩣ. ᨠᨸ᩠ᨸᩮᩣ ᩈᨦ᩠ᨠᨸ᩠ᨸᩥᨲᩮᩣ ᩋᨲ᩠ᨳᩮᩣ, ᨲᩔ ᩁᩩᨠ᩠ᨡᩮᩣ ᨩᨬ᩠ᨬᨩᨶᨠᨽᩣᩅᩮᨶ ᩈᨾ᩠ᨻᨶ᩠ᨵᩮᩣ, ᨠᨸ᩠ᨸᩴ ᩅᩣ ᨮᩥᨲᩮᩣ ᩁᩩᨠ᩠ᨡᩮᩣ ᨠᨸ᩠ᨸᩁᩩᨠ᩠ᨡᩮᩣ. ᨲᨶᨶᩴ ᨲᩣᨶᩮᩣ, ᨽᩣᩅᩮ ᨱᩮᩣ. ᨣᨶ᩠ᨵᩔ ᩈᨾ᩠ᨾᩣ ᨲᩣᨶᩮᩣ ᩋᩔᩮᨲᩥ ᩈᨶ᩠ᨲᩣᨶᩮᩣ, ᩈᩥᩁᩦᩈᩁᩩᨠ᩠ᨡᩮᩣ. ᨾᨶ᩠ᨴᨶ᩠ᨲᩮ ᨾᩮᩣᨴᨶ᩠ᨲᩮ ᨴᩮᩅᩣ ᩋᨶᩮᨶᩣᨲᩥ ᨾᨶ᩠ᨴᩣᩁᩮᩣ, ᩌᩁᨸᨧ᩠ᨧᨿᩮᩣ. ᩉᩁᩥᨾᩥᨶ᩠ᨴᩴ ᨧᨴᨿᨲᩥ ᩈᩩᨡᨿᨲᩦᨲᩥ ᩉᩁᩥᨧᨶ᩠ᨴᨶᩴ. ᩑᨲᩮ ᨸᨬ᩠ᨧ ᨴᩮᩅᨲᩁᩅᩮᩣ ᩋᨾᩁᨠᩮᩣᩈᨶᨿᩮᨶ ᩅᩩᨲ᩠ᨲᩣ, ᩈᩮᩣᨣᨲᨶᨿᩮᨶ ᨸᨶ ᩈᨲ᩠ᨲ ᨴᩮᩅᨲᩁᩅᩮᩣ. ᩅᩩᨲ᩠ᨲᨬ᩠ᨧ –

‘‘ᨸᩣᨭᩃᩦ ᩈᩥᨾ᩠ᨻᩃᩦ ᨩᨾ᩠ᨻᩪ, ᨴᩮᩅᩣᨶᩴ ᨸᩣᩁᩥᨨᨲ᩠ᨲᨠᩮᩣ;

ᨠᨴᨾ᩠ᨻᩮᩣ ᨠᨸ᩠ᨸᩁᩩᨠ᩠ᨡᩮᩣ ᨧ, ᩈᩥᩁᩦᩈᩮᨶ ᨽᩅᨲᩥ ᩈᨲ᩠ᨲᨾ’’ᨶ᩠ᨲᩥ [ᨵ. ᩈ. ᩋᨭ᩠ᨮ. ᪕᪘᪔; ᩈᩣᩁᨲ᩠ᨳ. ᨭᩦ. ᪑.᪑ᩅᩮᩁᨬ᩠ᨩᨠᨱ᩠ᨯᩅᨱ᩠ᨱᨶᩣ].

ᨲᨲ᩠ᨳ ᨸᩣᨭᩃᩦᨲᩥ ᨧᩥᨲᩕᨸᩣᨭᩃᩦ, ᩈᩣ ᩋᩈᩩᩁᩃᩮᩣᨠᩮ ᨲᩥᨭ᩠ᨮᨲᩥ. ᨲᨳᩣ ᩈᩥᨾ᩠ᨻᩃᩦ ᨣᩁᩩᩊᩮᩈᩩ, ᨩᨾ᩠ᨻᩪ ᨩᨾ᩠ᨻᩩᨴᩦᨸᩮ, ᨸᩣᩁᩥᨧ᩠ᨨᨲ᩠ᨲᨠᩮᩣ ᨲᩣᩅᨲᩥᩴᩈᩮ, ᨠᨴᨾ᩠ᨻᩮᩣ ᩋᨸᩁᨣᩮᩣᨿᩣᨶᩮ. ᨠᨸ᩠ᨸᩁᩩᨠ᩠ᨡᩮᩣ ᩏᨲ᩠ᨲᩁᨠᩩᩁᩪᩈᩩ ¶ , ᩈᩥᩁᩦᩈᩮᩣ ᨸᩩᨻ᩠ᨻᩅᩥᨴᩮᩉᩮᨲᩥ. ᩑᨲᩮ ᩈᨲ᩠ᨲ ᨴᩮᩅᩣᨶᨾᩮᩅ ᨸᨲᩥᨭ᩠ᨮᩣᨶᨽᩪᨾᩦᩈᩩ ᩈᨾ᩠ᨽᩅᨲᩮᩣ ᨴᩮᩅᨲᩁᩅᩮᩣᨲ᩠ᩅᩮᩅ ᩅᩩᨧ᩠ᨧᨶ᩠ᨲᩥ.

ᩈᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪒᪙. ᨸᩩᨻ᩠ᨻᨸᨧ᩠ᨨᩥᨾᩏᨲ᩠ᨲᩁᩣ ᨴᩥᩈᩣ ᨿᨳᩣᨠ᩠ᨠᨾᩴ ᨸᩣᨧᩦ ᨸᨲᩦᨧᩦ ᩏᨴᩦᨧᩦ ᨶᩣᨾ ᨽᩅᨶ᩠ᨲᩥ. ᨸᨮᨾᩴ ᨸᩣᨲᩮᩣ ᩋᨶ᩠ᨧᨲᩥ ᩁᩅᩥ ᨿᩔᩴ ᩈᩣ ᨸᩣᨧᩦ, ᨶᨠᩣᩁᩃᩮᩣᨸᩮᩣ. ᨸᨧ᩠ᨨᩣ ᨴᩥᩅᩣᩅᩈᩣᨶᩮ ᩋᨶ᩠ᨧᨲᩥ ᩁᩅᩥ ᨿᩔᩴ ᩈᩣ ᨸᨲᩦᨧᩦ. ᩏᨴ᩠ᨵᩴ ᩋᨶ᩠ᨧᨲᩥ ᩁᩅᩥ ᨿᩔᩴ ᩈᩣ ᩏᨴᩦᨧᩦ, ᨿᩔᩴ ᩅᩣ ᩈᩦᨲᩅᩥᨿᩮᩣᨣᩴ ᨴᨲ᩠ᩅᩣ ᩋᨶ᩠ᨧᨲᩥ ᩈᩣ ᩏᨴᩦᨧᩦ, ᩅᩥᨿᩮᩣᨣᨲ᩠ᨳᩅᩣᨧᨠᩮᩣ ᩉᩮᨲ᩠ᨳ ᩏᨠᩣᩁᩮᩣ, ᨴᩈᨴ᩠ᨴᩮᩣ ᨴᩣᨶᨲ᩠ᨳᩮᩣ. ᩋᨳ ᩅᩣ ᨸᨶ᩠ᨧᨲᩥ ᨸᩩᨻ᩠ᨻᨽᩣᩅᨾᩣᨸᨩ᩠ᨩᨲᩮᨲᩥ ᨸᩣᨧᩦ. ᨸᨲᩥᨶ᩠ᨧᨲᩥ ᨸᨧ᩠ᨨᩣᨽᩣᩅᨾᩣᨸᨩ᩠ᨩᨲᩮᨲᩥ ᨸᨲᩦᨧᩦ. ᩏᨴᨬ᩠ᨧᨲᩥ ᩈᩦᨲᩅᩥᨿᩮᩣᨣᨴᩣᨶᨲ᩠ᨲᨾᩣᨸᨩ᩠ᨩᨲᩮᨲᩥ ᩏᨴᩦᨧᩦ. ᩑᨲ᩠ᨳ ᨧ ᩏᨴᩦᨧᩦᩈᩉᨧᩁᨱᨲᩮᩣ ᨸᨲᩦᨧᩦ ᩍᨲ᩠ᨳᩥᨿᩴ, ᨸᨲᩦᨧᩦᩈᩉᨧᩁᨱᨲᩮᩣ ᨸᩣᨧᩦ ᩍᨲ᩠ᨳᩥᨿᩴ ᩅᨲ᩠ᨲᨲᩦᨲᩥ ᨴᨭ᩠ᨮᨻ᩠ᨻᩴ. ᩑᩅᩴ ᨲᩴᨲᩴᩈᩉᨧᩁᨱᨽᩣᩅᩮᨶ ᨲᩔ ᨲᩔ ᨲᩴᨲᩴᩃᩥᨦ᩠ᨣᨲ᩠ᨲᨾᩩᨸᨶᩮᨿ᩠ᨿᩩᩴ. ᨸᩩᨻ᩠ᨻᨸᨧ᩠ᨨᩥᨾᩏᨲ᩠ᨲᩁᩣᨲᩥ ᩈᨻ᩠ᨻᨶᩣᨾᩔ ᩅᩩᨲ᩠ᨲᨾᨲ᩠ᨲᩮ ᨸᩩᨾ᩠ᨽᩣᩅᩮᩣ.

ᨴᨠ᩠ᨡᩥᨱᩣᨴᩥᨴ᩠ᩅᨿᩴ ᨴᨠ᩠ᨡᩥᨱᨴᩥᩈᩣᨿᩴ. ᨾᨩ᩠ᨫᩮ ᩋᨸᩣᨿᩴ ᩋᨬ᩠ᨧᨲᩥ ᨿᩔᩴ ᩁᩅᩥ, ᩈᩣ ᩋᨸᩣᨧᩦ. ᨾᨩ᩠ᨫᨲ᩠ᨳᩮᩣᨿᩴ ᩋᨸᩈᨴ᩠ᨴᩮᩣ, ᨿᨳᩣ ‘‘ᩋᨸᨴᩥᩈ’’ᨶ᩠ᨲᩥ, ‘‘ᩋᩅᩣᨧᩦ’’ᨲᩥᨸᩥ ᨸᩣᨮᩮᩣ, ᩋᩅᨸᩩᨻ᩠ᨻᩮᩣ ᩋᨬ᩠ᨧ ᩋᨵᩮᩣᨾᩩᨡᩦᨽᩣᩅᩮ. ᩋᩅᨬ᩠ᨧᨲᩥ ᩋᨵᩮᩣᨾᩩᨡᩦ ᨽᩅᨲᩥ ᨿᩔᩴ ᩁᩅᩥ, ᩈᩣ ᩋᩅᩣᨧᩦ. ᩏᨱ᩠ᩉᩣᨴᩥᨠᩮ ᩅᩣ ᨲᨻ᩠ᨻᩥᨿᩮᩣᨣᩮ ᨠᩁᩮᩣᨶ᩠ᨲᩮᩣ ᨿᩔᩴ ᩁᩅᩥ ᩋᨬ᩠ᨧᨲᩥ, ᩈᩣ ᩋᩅᩣᨧᩦ. ᩅᩥᨴᩥᩈᩣᨴᩥᨴ᩠ᩅᨿᩴ ᨴᩥᩈᩣᨾᨩ᩠ᨫᩮ. ᨴᩥᩈᩣᩉᩥ ᩅᩥᨶᩥᨣ᩠ᨣᨲᩣ ᩅᩥᨴᩥᩈᩣ. ᨴᩥᩈᩣᨶᨾᨶᩩᩁᩪᨸᩣ, ᩋᨶᩩᩅᨲ᩠ᨲᨠᩣ ᩅᩣ ᨴᩥᩈᩣ ᩋᨶᩩᨴᩥᩈᩣ. ᩋᨸᨴᩥᩈᨶ᩠ᨲᩥᨸᩥ ᩅᩥᨴᩥᩈᩣᨿ ᨶᩣᨾᩴ [ᨶᨸᩩᩴᩈᨠᩣᨻ᩠ᨿᨿᩴ ᨲ᩠ᩅ’ᨸᨴᩥᩈᩴ (ᩋᨾᩁ ᪓.᪖)].

᪓᪐. ᩑᩁᩣᩅᨲᩣᨴᨿᩮᩣ ¶ ᩋᨭ᩠ᨮ ᨣᨩᩣ ᨸᩩᨻ᩠ᨻᩣᨴᩦᨶᩴ ᨴᩥᩈᩣᨶᩴ ᩁᨠ᩠ᨡᨱᨲᩮᩣ ᨴᩥᩈᩣᨣᨩᩣ ᨶᩣᨾ, ᨸᩩᨱ᩠ᨯᩁᩦᨠᩴ ᨶᩣᨾ ᩈᩥᨲᨾ᩠ᨻᩮᩣᨩᩴ, ᨲᩴᩈᨴᩥᩈᩅᨱ᩠ᨱᨲᩣᨿ ᨸᩩᨱ᩠ᨯᩁᩦᨠᩮᩣ. ᩁᩔᩈᩁᩦᩁᨲᩣᨿ ᩅᩣᨾᨶᩮᩣ. ᨠᩩᨿᩴ ᨸᨳᩅᩥᨿᩴ ᨾᩮᩣᨴᨲᩮ ᨠᩩᨾᩩᨴᩮᩣ. ᩋᨬ᩠ᨩᨶᩅᨱ᩠ᨱᨲᩣᨿ ᩋᨬ᩠ᨩᨶᩮᩣ. ᨸᩩᨸ᩠ᨹᩣ ᨸᨠᩣᩈᨾᩣᨶᩣ ᨴᨶ᩠ᨲᩣ ᩋᩔ ᨸᩩᨸ᩠ᨹᨴᨶ᩠ᨲᩮᩣ. ᩈᨻ᩠ᨻᨽᩪᨾᩥᨿᩴ ᨧᩁᨲᩦᨲᩥ ᩈᨻ᩠ᨻᨽᩩᨾ᩠ᨾᩮᩣ, ᩈᨻ᩠ᨻᨽᩩᨾ᩠ᨾᩮᩣ ᩅᩣ ᨧᨠ᩠ᨠᩅᨲ᩠ᨲᩦ ᨲᩔᩣᨶᩩᩁᩪᨸᨲ᩠ᨲᩣ ᩈᨻ᩠ᨻᨽᩩᨾ᩠ᨾᩮᩣ. ᩈᩮᩣᨽᨶᨴᨶ᩠ᨲᩣᩅᨿᩅᨲ᩠ᨲᩣ ᩈᩩᨸ᩠ᨸᨲᩦᨠᩮᩣ [ᩈᩮᩣᨽᨶᩣ ᨸᨲᩦᨠᩣ ᩋᩅᨿᩅᩣ’ᩔ ᩈᩩᨸ᩠ᨸᨲᩦᨠᩮᩣ (ᨠ.)]. ‘‘ᩈᩩᨸ᩠ᨸᨲᩦᨠᩮᩣ ᩈᩮᩣᨽᨶᨦ᩠ᨣᩮ, ᨽᩅᩮ ᩎᩈᩣᨶᨴᩥᩈᩣᨣᨩᩮ’’ᨲᩥ ᩉᩥ ᨶᩣᨶᨲ᩠ᨳᩈᨦ᩠ᨣᩉᩮ ᩅᩩᨲ᩠ᨲᩴ. ᩑᩁᩣᩅᨲᩣᨴᩦᨶᩴ ᨴᩥᩈᩣᨶᩴ ᩈᨾ᩠ᨻᨶ᩠ᨵᨠᨳᨶᩴ ᨸᩣᨧᩦᩅᩣᩁᨱᩣᨴᩥᨶᩣᨾᩈᩪᨧᨶᨲ᩠ᨳᩴ, ᩑᩈᩴ ᨠᩁᩮᨱᩩᨿᩮᩣ ᨸᨶ –

ᩋᨻ᩠ᨽᨾᩩ ᨠᨸᩥᩃᩣ ᨧᩮᩅ, ᨸᩥᨦ᩠ᨣᩃᩣ ᨶᩩᨸᨾᩣ ᨾᨲᩣ;

ᨲᨾ᩠ᨻᨠᨱ᩠ᨱᩦ ᩈᩩᨽᨴᨶ᩠ᨲᩦ, ᩋᨦ᩠ᨣᨶᩣ ᩋᨬ᩠ᨩᨶᩣᩅᨲᩦ [ᩋᨾᩁ ᪓.᪕].

᪓᪑. ᨵᨲᩁᨭ᩠ᨮᩣᨴᩥᨴ᩠ᩅᨿᩴ ᨸᩩᨻ᩠ᨻᨴᩥᩈᩣᨵᩥᨸᨲᩥᨴᩮᩅᩮ. ᨵᩣᩁᩥᨲᩴ ᩁᨭ᩠ᨮᨾᨶᩮᨶᩣᨲᩥ ᨵᨲᩁᨭ᩠ᨮᩮᩣ, ᩁᩔ ᨲᩮᩣ. ᨸᨬ᩠ᨧᩈᩥᨡᩣᨴᩦᨶᩴ ᨣᨶ᩠ᨵᨻ᩠ᨻᩣᨶᩴ ᩋᨵᩥᨸᩮᩣ ᨶᩣᨿᨠᩮᩣ ᨣᨶ᩠ᨵᨻ᩠ᨻᩣᨵᩥᨸᩮᩣ. ᨠᩩᨾ᩠ᨽᨱ᩠ᨯᩈᩣᨾ᩠ᨿᩣᨴᩥᨴ᩠ᩅᨿᩴ ᨴᨠ᩠ᨡᩥᨱᨴᩥᩈᩣᨵᩥᨸᨲᩥᨴᩮᩅᩮ. ᨠᩩᨾ᩠ᨽᨱ᩠ᨯᩣᨶᩴ ᩈᩣᨾᩥ ᨶᩣᨿᨠᩮᩣ ᨠᩩᨾ᩠ᨽᨱ᩠ᨯᩈᩣᨾᩥ. ᩅᩥᩁᩩᩉᨶ᩠ᨲᩥ ᩅᩩᨯ᩠ᨰᩥᩴ ᩅᩥᩁᩪᩊ᩠ᩉᩥᨾᩣᨸᨩ᩠ᨩᨶ᩠ᨲᩥ ᩑᨲᩈ᩠ᨾᩥᩴ ᨠᩩᨾ᩠ᨽᨱ᩠ᨯᩣᨲᩥ ᩅᩥᩁᩪᩊ᩠ᩉᨠᩮᩣ. ᩅᩥᩁᩪᩊ᩠ᩉᩴ ᩅᩩᨯ᩠ᨰᩥᨸ᩠ᨸᨲ᩠ᨲᩴ ᩅᩣ ᨠᩴ ᩈᩩᨡᨾᩮᨲᩔᩣᨲᩥ ᩅᩥᩁᩪᩊ᩠ᩉᨠᩮᩣ. ᩅᩥᩁᩪᨸᨠ᩠ᨡᩣᨴᩥᨴ᩠ᩅᨿᩴ ᨸᨧ᩠ᨨᩥᨾᨴᩥᩈᩣᨵᩥᨸᨲᩥᨴᩮᩅᩮ. ᩅᩥᩁᩪᨸᩣᨶᩥ ᩋᨠ᩠ᨡᩦᨶᩥ ᨿᩔ ᩅᩥᩁᩪᨸᨠ᩠ᨡᩮᩣ, ᩅᩥᩅᩥᨵᩈᨱ᩠ᨮᩣᨶᩣᨶᩥ ᩋᨠ᩠ᨡᩦᨶᩥ ᨿᩔ ᩅᩣ ᩅᩥᩁᩪᨸᨠ᩠ᨡᩮᩣ. ᨶᩣᨣᩣᨶᩴ ᩋᨵᩥᨸᨲᩥ ᨶᩣᨣᩣᨵᩥᨸᨲᩥ.

᪓᪒. ᨿᨠ᩠ᨡᩣᨵᩥᨸᩣᨴᩥᨧᨲᩩᨠ᩠ᨠᩴ ¶ ᨠᩩᩅᩮᩁᩮ. ᩌᩊᩅᨠᩣᨴᩥᨿᨠ᩠ᨡᩣᨶᩴ ᩋᨵᩥᨸᩮᩣ ᨿᨠ᩠ᨡᩣᨵᩥᨸᩮᩣ. ᩅᩥᩔᩅᨱᩔ ᩋᨸᨧ᩠ᨧᩴ ᩅᩮᩔᩅᨱᩮᩣ. ᨲᩥᨧᩁᨱᩣᨭ᩠ᨮᨴᩣᨮᩣᨽᨿᩣᨶᨠᨾᨲ᩠ᨳᩥᨲᩣᨿ ᨠᩩᨧ᩠ᨨᩥᨲᩴ ᩅᩮᩁᩮᩣ ᩈᩁᩦᩁᨾᩔ ᨠᩩᩅᩮᩁᩮᩣ. ᨡᩩᨴ᩠ᨴᩮᨶᩣᩔ ᨶᩁᨿᩩᨲ᩠ᨲᩣ ᩈᩥᩅᩥᨠᩣᩁᨳᩮᨲᩥ ᨶᩁᩮᩣ ᩅᩣᩉᨶᨾᩔ ᨶᩁᩅᩣᩉᨶᩮᩣ. ᨲ᩠ᨿᨾ᩠ᨻᨠᩈᨡᩮᩣ, ᨿᨠ᩠ᨡᩁᩣᨩᩮᩣ, ᨣᩩᨿ᩠ᩉᨠᩮᩈᩁᩮᩣ, ᨾᨶᩩᩔᨵᨾ᩠ᨾᩣ, ᨵᨶᨴᩮᩣ, ᩁᩣᨩᩁᩣᨩᩮᩣ, ᨵᨶᩣᨵᩥᨸᩮᩣ, ᨠᩥᨶ᩠ᨶᩁᩮᩈᩮᩣ, ᨿᨠ᩠ᨡᩮᩣ, ᩑᨠᨸᩥᨦ᩠ᨣᩃᩮᩣ, ᩈᩥᩁᩥᨴᩮᩣ, ᨸᩩᨬ᩠ᨬᨩᨶᩮᩔᩁᩮᩣᩍᨧ᩠ᨧᩣᨴᩦᨶᩥᨸᩥ ᨠᩩᩅᩮᩁᩔ ᨶᩣᨾᩣᨶᩥ.

ᩋᩔ ᨠᩩᩅᩮᩁᩔ ᨸᩩᩁᩦ ‘‘ᩋᩊᨠᩣ, ᩋᩊᨠᨾᨶ᩠ᨴᩣ’’ᨲᩥ ᨧ ᩅᩩᨧ᩠ᨧᨲᩥ. ᩋᩃᩴ ᩅᩥᨽᩪᩈᨶᩮ, ᩋᩃᩴ ᩅᩥᨽᩪᩈᨶᩴ ᨠᩁᩮᩣᨲᩦᨲᩥ ᩋᩃᨠᩣ, ᩈᩣ ᩑᩅ ᩋᩊᨠᩣ. ᩋᩊᨠᩣ ᩑᩅ ᨾᩮᩣᨴᨠᩁᨱᨲᩮᩣ ᩋᩊᨠᨾᨶ᩠ᨴᩣ, ᩏᨠᩣᩁᩔ ᩋᨠᩣᩁᩮᩣ, ᨶᩣᨣᨾᩮᩣ ᨧ. ᨠᩮᩃᩣᩈᩮᩣᨲᩥᨸᩥ ᨲᩔ ᨶᩣᨾᩴ, ᨠᩮᩃᩥ ᨸᨿᩮᩣᨩᨶᩴ ᩋᩔ ᨠᩮᩃᩮᩣ, ᩌᩈᨲᩮ ᩋᩈ᩠ᨾᩥᨶ᩠ᨲᩥ ᩌᩈᩮᩣ, ᨠᩮᩃᩮᩣ ᨧ ᩈᩮᩣ ᩌᩈᩮᩣ ᨧᩮᨲᩥ ᨠᩮᩃᩣᩈᩮᩣ, ᨠᨱ᩠ᩉᩈᨸ᩠ᨸᩣᨴᩥ ᩅᩥᨿ ᨶᩥᨧ᩠ᨧᩴ ᨠᨾ᩠ᨾᨵᩣᩁᨿᩮᩣ. ᩋᩔ ᨠᩩᩅᩮᩁᩔ ᨸᩉᩁᨱᩴ ᩌᨿᩩᨵᩴ ᨣᨴᩣ, ᨣᩴ ᩅᩩᨧ᩠ᨧᨲᩥ ᩅᨩᩥᩁᩴ, ᨲᩴ ᩅᩥᨿ ᨴᩩᨠ᩠ᨡᩴ ᨴᨴᩣᨲᩦᨲᩥ ᨣᨴᩣ. ᩍᨾᩮ ᨧᨲ᩠ᨲᩣᩁᩮᩣ ᨿᨳᩣᩅᩩᨲ᩠ᨲᩣ ᨵᨲᩁᨭ᩠ᨮᩣᨴᨿᩮᩣ ᨴᩮᩅᩣ ᨠᨾᨲᩮᩣ ᨸᩩᨻ᩠ᨻᩣᨴᩦᨶᩴ ᨧᨲᩩᨴ᩠ᨴᩥᩈᩣᨶᩴ ᩋᨵᩥᨸᩣ ᩋᨵᩥᨸᨲᨿᩮᩣ ᨶᩣᨾ. ᩋᨾᩁᨠᩮᩣᩈᩮ ᨸᨶ –

‘‘ᩍᨶ᩠ᨴᩮᩣ ᩋᨣ᩠ᨣᩥ ᨸᩥᨲᩩᨸᨲᩥ, ᨶᩮᩁᩥᨲᩮᩣ ᩅᩁᩩᨱᩮᩣ’ᨶᩥᩃᩮᩣ;

ᨠᩩᩅᩮᩁᩮᩣ ᩎᩈᩮᩣ ᨸᨲᨿᩮᩣ, ᨸᩩᨻ᩠ᨻᩣᨴᩦᨶᩴ ᩍᨾᩮ ᨠᨾᩣ.

ᩁᩅᩥ ¶ ᩈᩩᨠ᩠ᨠᩮᩣ ᨾᩉᩦᩈᩪᨶᩩ, ᨲᨾᩮᩣ ᨧ ᨽᩣᨶᩩᨩᩮᩣ ᩅᩥᨵᩩ;

ᨻᩩᨵᩮᩣ ᩈᩩᩁᨣᩩᩁᩩ ᨧᩮᨲᩥ, ᨴᩥᩈᩣᨵᩥᨸᩣ ᨲᨳᩣ ᨣᩉᩣ’’ᨲᩥ [ᩋᨾᩁ ᪓.᪓-᪔].

ᩋᨬ᩠ᨬᩮᨿᩮᩅ ᨴᩥᩈᩣᨵᩥᨸᨲᨿᩮᩣ ᨠᨳᩥᨲᩣ, ᩍᨶ᩠ᨴᩁᩅᩥᨾᩣᨴᩦᨶᨬ᩠ᨧ ᨴᩥᩈᩣᨵᩥᨸᨧ᩠ᨧᨠᨳᨶᩴ ᨸᩣᨫᩣᨴᩦᨶᩴ ᩍᨶ᩠ᨴᨴᩥᩈᩣᩁᩅᩥᨴᩥᩈᩣᨴᩥᨶᩣᨾᩈᩪᨧᨶᨹᩃᩴ.

᪓᪓-᪓᪔. ᨩᩣᨲᩅᩮᨴᩣᨴ᩠ᨿᨭ᩠ᨮᩣᩁᩈᨠᩴ ᩋᨣ᩠ᨣᩥᨾ᩠ᩉᩥ. ᨩᩣᨲᩮ ᩏᨸ᩠ᨸᨶ᩠ᨶᩮ ᩅᩥᨶ᩠ᨴᨲᩥ ᨥᩣᨲᨿᨲᩦᨲᩥ ᨩᩣᨲᩅᩮᨴᩮᩣ. ᩋᨶ᩠ᨵᨠᩣᩁᩮ ᨩᩣᨲᩴ ᩅᩥᨩ᩠ᨩᨾᩣᨶᩴ ᩅᩥᨶ᩠ᨴᨲᩥ ᩃᨽᨲᩥ, ᩅᩥᨴᨲᩥ ᨩᩣᨶᩣᨲᩥ ᩑᨲᩮᨶᩣᨲᩥ ᩅᩣ ᨩᩣᨲᩅᩮᨴᩮᩣ, ᨩᨶᨶᩴ ᨩᩣᨲᩴ ᩅᩮᨴᩮᩣ ᨸᩣᨠᨭᩮᩣ ᨿᩔ ᩅᩣ ᩈᩮᩣ ᨩᩣᨲᩅᩮᨴᩮᩣ. ᩈᩥᨡᩣ ᩅᩩᨧ᩠ᨧᨲᩥ ᨩᩣᩃᩣ, ᨲᩣᨿ ᨿᩮᩣᨣᨲᩮᩣ ᩈᩥᨡᩦ. ᨩᩮᩣᨲᨲᩥ ᨴᩥᨸ᩠ᨸᨲᩦᨲᩥ ᨩᩮᩣᨲᩥ. ᨸᩩᨶᩣᨲᩦᨲᩥ ᨸᩣᩅᨠᩮᩣ, ᨱ᩠ᩅᩩ. ᨴᩉᨲᩦᨲᩥ ᨴᩉᨶᩮᩣ. ᩋᨶᨶ᩠ᨲᩥ ᨸᩣᩃᩮᨶ᩠ᨲ᩠ᨿᨶᩮᨶᩮᨲᩥ ᩋᨶᩃᩮᩣ, ᩋᩃᨸᨧ᩠ᨧᨿᩮᩣ. ᩅᩮᨴᩮ ᩉᩩᨲᩴ ᩅᩉᨲᩥ ᨸᩣᨸᨿᨲᩥ, ᩈᨿᩴ ᩅᩣ ᩃᨽᨲᩮᨲᩥ ᩉᩩᨲᩣᩅᩉᩮᩣ. ᩋᨧ᩠ᨧᩥ ᩅᩩᨧ᩠ᨧᨲᩥ ᨩᩣᩃᩣ, ᨲᩣᨿ ᨿᩮᩣᨣᨲᩮᩣ ᩋᨧ᩠ᨧᩥᨾᩣ. ᨵᩪᨾᩮᩣ ᨠᩮᨲᩩ ᨵᨩᩮᩣ ᨿᩔᩣᨲᩥ ᨵᩪᨾᨠᩮᨲᩩ. ᩋᨩᨲᩥ ᨩᩃᨾᩣᨶᩮᩣ ᨠᩩᨭᩥᩃᩴ ᨣᨧ᩠ᨨᨲᩦᨲᩥ ᩋᨣ᩠ᨣᩥ, ᩍ. ᨣᩮᩣ ᩁᩴᩈᩥ ᩑᨲᩔᨲ᩠ᨳᩦᨲᩥ ᨣᩥᨶᩥ, ᩋᩔᨲ᩠ᨳ᩠ᨿᨲ᩠ᨳᩮ ᩍᨶᩥ, ᩋᨣ᩠ᨣᩥᨶᩦᨲᩥᨸᩥ ᨸᩣᨮᩮᩣ, ᩈᩮᩣ ᩋᨣ᩠ᨣᩥᩈᨴᩥᩈᩮᩣ. ᨽᩣᨶᩩ ᨸᨽᩣ ᨿᩔᨲ᩠ᨳᩥ, ᩈᩮᩣ ᨽᩣᨶᩩᨾᩣ. ᨲᩮᨩᩮᨲᩥ ᩈᩮᩈᨽᩪᨲᩮᩣᨸᩣᨴᩣᩁᩪᨸᩣᨶᩦᨲᩥ ᨲᩮᨩᩮᩣ. ᨵᩪᨾᩮᩣ ᩈᩥᨡᩣ ᨧᩪᩊᩣ ᨿᩔ ᨵᩪᨾᩈᩥᨡᩮᩣ. ᩅᩣᨿᩩ ᩈᨡᩣ ᩋᩔ ᩅᩣᨿᩩᩈᨡᩮᩣ. ᨴᩉᩥᨲ᩠ᩅᩣ [ᨴᩉᨲᩮᩣ (ᨠ.)] ᨣᨧ᩠ᨨᨲᩮᩣ ᨠᨱ᩠ᩉᩣ ᩅᨲ᩠ᨲᨶᩦ ᨾᨣ᩠ᨣᩮᩣ ᨿᩔ ᨠᨱ᩠ᩉᩅᨲ᩠ᨲᨶᩦ. ᩅᩥᩔᩣᨶᩁᩔ ᩍᩈᩥᨶᩮᩣ ᩋᨸᨧ᩠ᨧᩴ ᩅᩮᩔᩣᨶᩁᩮᩣ. ᩉᩩᨲᩴ ¶ ᩉᩅᩥᩴ ᩋᩈᨲᩥ ᨽᩩᨬ᩠ᨩᨲᩦᨲᩥ ᩉᩩᨲᩣᩈᩮᩣ. ᨵᨶᨬ᩠ᨩᨿᩮᩣ, ᨩᩃᨶᩮᩣ, ᩌᩈᨿᩣᩈᩮᩣ, ᩁᩮᩣᩉᩥᨲᩔᩮᩣ, ᩈᨲ᩠ᨲᩣᨧ᩠ᨧᩥ, ᩈᩩᨠ᩠ᨠᩮᩣ, ᨧᩥᨲᩕᨽᩣᨶᩩ, ᩅᩥᨽᩣᩅᩈᩩ, ᩈᩩᨧᩥᩍᨧ᩠ᨧᩣᨴᩦᨶᩥᨸᩥ ᩋᨣ᩠ᨣᩥᩔ ᨶᩣᨾᩣᨶᩥ.

ᩈᩥᨡᩣᨴᩥᨲ᩠ᨲᨿᩴ ᩋᨣ᩠ᨣᩥᨩᩣᩃᩣᨿᩴ. ᩈᩥᨶᩮᩣᨲᩥ ᨶᩥᩈᩣᨶᩦ ᨽᩅᨲᩦᨲᩥ ᩈᩥᨡᩣ, ‘‘ᩈᩥ ᨶᩥᩈᩣᨶᩮ’’ᨲᩥ ᨠᩣᨲᨶ᩠ᨲ ᨵᩣᨲᩩ, ᨡᨸᨧ᩠ᨧᨿᩮᩣ. ᨩᩃᨲᩦᨲᩥ ᨩᩣᩃᩣ. ᩋᨧ᩠ᨧᨲᩮ ᨸᩩᨩ᩠ᨩᨲᩮ ᩋᨶᩮᨶᩮᨲᩥ ᩋᨧ᩠ᨧᩥ. ᩈᩥᨡᩣ ᨩᩣᩃᩣ ᨽᩥᨿ᩠ᨿᩮᩣ ᩁᩪᨸᨶ᩠ᨲᩁᩣ ᩍᨲ᩠ᨳᩥᨿᩴ, ᩋᨧ᩠ᨧᩥ ᨸᨶ ᩋᨸᩩᨾᩮ.

᪓᪕. ᨴ᩠ᩅᨿᩴ ᩋᨣ᩠ᨣᩥᨠᨱᩮ [ᨲᩦᩈᩩ ᨹᩩᩃᩥᨦ᩠ᨣᩮᩣ’ᨣ᩠ᨣᩥᨠᨱᩮᩣ (ᩋᨾᩁ ᪑.᪖᪐) ᨹᩩᩃᩥᨦ᩠ᨣᩣᨶᩦᨲᩥ ᩋᨣ᩠ᨣᩥᨠᨱᩣᨶᩥ (ᨾ. ᨶᩥ. ᨭᩦ. ᪓.᪖᪕)]. ᩅᩥᩅᩥᨵᩣᩈᩩ ᨴᩥᩈᩣᩈᩩ ᨹᩩᩃ᩠ᩃᩴ ᨣᨧ᩠ᨨᨲᩦᨲᩥ ᩅᩥᨸ᩠ᨹᩩᩃᩥᨦ᩠ᨣᩴ. ᨲᨳᩣ ᨹᩩᩃᩥᨦ᩠ᨣᩴ. ᩈᨻ᩠ᨻᨵᩁᨠᨲᩮ ᨸᨶ ‘‘ᨹᩩᩃᩥᩴ ᨣᨧ᩠ᨨᨲᩦᨲᩥ ᨹᩩᩃᩥᨦ᩠ᨣᩮᩣ’’ᨲᩥ ᩅᩩᨲ᩠ᨲᩴ. ᨲᩥᨠᩴ ᨨᩣᩁᩥᨠᩣᨿᩴ. ᨾᩃᩦᨶᨠᩴᩈᩅᨲ᩠ᨳᩣᨴᩦᨶᩴ ᨲᩴ ᨴᩥᨲ᩠ᨲᩥᩴ ᩈᩮᨲᩥ ᨸᩅᨲ᩠ᨲᩮᨲᩦᨲᩥ ᨽᩈ᩠ᨾᩴ, ᨾᨸᨧ᩠ᨧᨿᩮᩣ, ᨽᩈᨲᩥ ᩅᩣ ᩋᨵᩮᩣ ᨸᨲᨲᩥ ᩅᨲ᩠ᨳᩣᨴᩦᨶᩴ ᨾᩃᨾᩮᨲᩮᨶᩣᨲᩥ ᨽᩈ᩠ᨾᩴ. ᨠᩴᩈᩣᨴᩦᨶᩴ ᩈᩩᨠ᩠ᨠᨽᩣᩅᨲ᩠ᨳᩴ ᩍᨧ᩠ᨨᩥᨲᨻ᩠ᨻᨲ᩠ᨲᩣ ᩍᨭ᩠ᨮᩥ ᩋᨽᩥᩃᩣᩈᩮᩣ ᩈᩮᩣᨽᨶᩴ ᩑᨲᩔᩣ ᩋᨲ᩠ᨳᩦᨲᩥ ᩈᩮᨭ᩠ᨮᩥ, ‘‘ᩈᨸᨠ᩠ᨡᨠᩮᩣ ᩈᩃᩮᩣᨾᨠᩮᩣ’’ᨲ᩠ᨿᩣᨴᩦᩈᩩ ᩅᩥᨿ ᩈᩈᨴ᩠ᨴᩔ ᩅᩥᨩ᩠ᨩᨾᩣᨶᨲ᩠ᨳᨲ᩠ᨲᩣ. ᨾᩃᩔ ᩈᩁᨱᩴ ᨠᩁᩮᩣᨲᩦᨲᩥ ᩈᩣᩁᩥᨠᩣ, ᩈᩣ ᩑᩅ ᨨᩣᩁᩥᨠᩣ, ᨿᨳᩣ ‘‘ᩈᩊᩣᨿᨲᨶ’’ᨶ᩠ᨲ᩠ᨿᩣᨴᩦᩈᩩ.

᪓᪖. ᨴ᩠ᩅᨿᩴ ᩏᨱ᩠ᩉᨨᩣᩁᩥᨠᩣᨿᩴ. ᩏᨱ᩠ᩉᨲ᩠ᨲᩣ ᨠᩩᨠ᩠ᨠᩩᩴ ᨠᩩᨧ᩠ᨨᩥᨲᩴ ᩃᩣᨲᩦᨲᩥ ᨠᩩᨠ᩠ᨠᩩᩃᩮᩣ, ‘‘ᨠᩩᨠ᩠ᨠᩩ ᩅᩥᨴᨲ᩠ᨳᩥᨿᩴ ᩉᨲ᩠ᨳᩮ, ᨸᨠᩮᩣᨭ᩠ᨮᩮ ᨠᩩᨧ᩠ᨨᩥᨲᩮᨸᩥ ᨧᩮ’’ᨲᩥ ᩉᩥ ᨶᩣᨶᨲ᩠ᨳᩈᨦ᩠ᨣᩉᩮ ᩅᩩᨲ᩠ᨲᩴ. ᨠᩩᨠ᩠ᨠᩩᩴ ᩅᩣ ᩉᨲ᩠ᨳᩴ ᩃᩩᨶᩣᨲᩥ ᨨᩥᨶ᩠ᨴᨲᩥ ᨴᩉᨲᩦᨲᩥ ᨠᩩᨠ᩠ᨠᩩᩃᩮᩣ, ᩈᩮᩣ ᩑᩅ ᨠᩩᨠ᩠ᨠᩩᩊᩮᩣ ¶ . ᩏᨱ᩠ᩉᨾᩮᩅ ᨽᩈ᩠ᨾᩴ ᩏᨱ᩠ᩉᨽᩈ᩠ᨾᩴ, ᨲᩈ᩠ᨾᩥᩴ. ᨲᩥᨠᩴ ᨴᩥᨲ᩠ᨲᨠᨭ᩠ᨮᩣᨴᩥᨶ᩠ᨵᨶᩮ. ᩋᨦ᩠ᨣᨲᩥ ᩉᩣᨶᩥᩴ ᨣᨧ᩠ᨨᨲᩦᨲᩥ ᩋᨦ᩠ᨣᩣᩁᩮᩣ, ᩌᩁᨸᨧ᩠ᨧᨿᩮᩣ, ᨸᩩᨶ᩠ᨶᨸᩩᩴᩈᨠᩮᩣᨿᩴ. ‘‘ᩋᩃᩣᨲᩮ’ᨶᩥᨲ᩠ᨳᩥ ᨠᩩᨩᩮ’ᨦ᩠ᨣᩣᩁᩮᩣ’’ᨲᩥ ᩉᩥ ᨲᩥᨠᨱ᩠ᨯᩈᩮᩈᩮ [ᨲᩥᨠᨱ᩠ᨯᩈᩮᩈ ᪓.᪓᪒᪙] ᩅᩩᨲ᩠ᨲᩴ. ᩉᩣᨶᩥᨾᩮᩅ ᩃᩣᨲᩥ, ᨶ ᨮᩥᨲᩥᩴ ᩅᩥᩈᩮᩈᨬ᩠ᨧᩣᨲᩥ ᩋᩃᩣᨲᩴ. ᩏᨴ᩠ᨵᩴ ᨵᩪᨾᩴ ᨾᩩᨬ᩠ᨧᨲᩦᨲᩥ ᩏᨾ᩠ᨾᩩᨲᩴ, ᨲᨴᩮᩅ ᩏᨾ᩠ᨾᩩᨠᩴ. ᨸᨬ᩠ᨧᨠᩴ ᨠᨭ᩠ᨮᩣᨴᩥᨶ᩠ᨵᨶᩮ. ᩈᨶ᩠ᨲᨾᨣ᩠ᨣᩥᩴ ᩑᨵᨿᨲᩥ ᩅᨯ᩠ᨰᨿᨲᩦᨲᩥ ᩈᨾᩥᨵᩣ. ᩑᨵᨿᨲᩦᨲᩥ ᩍᨵᩩᨾᩴ, ᩏᨾᩮᩣ. ᩑᨵᨿᨲᩦᨲᩥ ᩍᨵᩮᩣ. ᩏᨸᩣᨴᩥᨿᨲᩮ ᩋᨣ᩠ᨣᩥᨶᩮᨲᩥ ᩏᨸᩣᨴᩣᨶᩴ. ᩑᨵᨿᨲᩦᨲᩥ ᩍᨶ᩠ᨵᨶᩴ.

᪓᪗. ᨸᨬ᩠ᨧᨠᩴ ᩌᩃᩮᩣᨠᩮ. ᩒᨽᩣᩈᨲᩥ ᨴᩥᨸ᩠ᨸᨲᩦᨲᩥ ᩒᨽᩣᩈᩮᩣ. ᨸᨠᩣᩈᨲᩥ ᨴᩥᨸ᩠ᨸᨲᩦᨲᩥ ᨸᨠᩣᩈᩮᩣ. ᩌᩃᩮᩣᨧᨿᨲᩥ ᨸᩔᨲᩥ ᩑᨲᩮᨶᩣᨲᩥ ᩌᩃᩮᩣᨠᩮᩣ, ᩌᩃᩮᩣᨠᩮᨲᩥ ᩅᩣ ᩑᨲᩮᨶᩣᨲᩥ ᩌᩃᩮᩣᨠᩮᩣ, ‘‘ᩃᩮᩣᨠ, ᩃᩮᩣᨧ ᨴᩔᨶᩮ’’ᨲᩥ ᨵᩣᨲᩩᨴ᩠ᩅᨿᨸᩣᨮᨲᩮᩣ. ᩏᨩ᩠ᨩᩮᩣᨲᨲᩦᨲᩥ ᩏᨩ᩠ᨩᩮᩣᨲᩮᩣ, ᩋᨶ᩠ᨵᨠᩣᩁᩴ ᩅᩥᨴ᩠ᨵᩴᩈᩮᨶ᩠ᨲᩮᩣ ᨩᩮᩣᨲᨲᩦᨲᩥ ᩅᩣ ᩏᨩ᩠ᨩᩮᩣᨲᩮᩣ. ᩌ ᩈᨾᨶ᩠ᨲᨲᩮᩣ ᨲᨸᨲᩥ ᨴᩥᨸ᩠ᨸᨲᩦᨲᩥ ᩌᨲᨸᩮᩣ. ᩈᨾᩣᨲᩥ ᩑᨲᩮ ᨸᨬ᩠ᨧ ᨲᩩᩃ᩠ᨿᨲ᩠ᨳᩣᨲᩥ ᨽᩣᩅᩮᩣ.

ᨴᩈᨠᩴ ᩅᩣᨲᩮ. ᩌᩉᩣᩁᩮᩣ ᩅᩥᨿ ᨸᩣᨱᨽᩪᨲᩮᩣᨸᩥ ᨠᨴᩣᨧᩥ ᩈᨲ᩠ᨲᩮ ᨾᩣᩁᩮᨲᩦᨲᩥ ᨾᩣᩁᩩᨲᩮᩣ, ᩈᩮᩣᩅ ᨾᩣᩃᩩᨲᩮᩣ. ᨸᩩᨶᩣᨲᩥ ᩈᨦ᩠ᨠᩣᩁᩣᨴᩥᨠᨶ᩠ᨲᩥ ᨸᩅᨶᩮᩣ. ᩅᩣᨿᨲᩥ ᨣᨧ᩠ᨨᨲᩦᨲᩥ ᩅᩣᨿᩩ, ᩅᩣᨿᨲᩥ ᩅᩣ ᨸᩩᨸ᩠ᨹᩣᨴᩦᨶᩴ ᨣᨶ᩠ᨵᩮᩣ ᨿᩮᨶ ᩈᩮᩣ ᩅᩣᨿᩩ. ᨲᨳᩣ ᩅᩣᨲᩮᩣ. ᩋᨶᨶ᩠ᨲᩥ ᨸᩣᨱᨶ᩠ᨲ᩠ᨿᨶᩮᨶᩮᨲᩥ ᩋᨶᩥᩃᩮᩣ, ᩍᩃᩮᩣ. ᩈᨶ᩠ᨲᩴ ᨶᩥᨧ᩠ᨧᩃᩴ ¶ ᩎᩁᨿᨲᩥ ᨠᨾ᩠ᨸᩮᨲᩦᨲᩥ ᩈᨾᩦᩁᨱᩮᩣ, ᩈᨾᩦᩁᩥᨲᩩᩴ ᨠᨾ᩠ᨸᩥᨲᩩᩴ ᩈᩦᩃᨾᩔᩣᨲᩥ ᩅᩣ ᩈᨾᩦᩁᨱᩮᩣ. ᨣᨶ᩠ᨵᩴ ᩅᩉᨲᩦᨲᩥ ᨣᨶ᩠ᨵᩅᩣᩉᩮᩣ, ᨱᩮᩣ. ᩅᩣᨿᩮᩣ ᩅᩣᨿᩩᩈᨴᩥᩈᩮᩣ, ᩏᨽᨿᨲᩕᩣᨸᩥ ᨿᩣᨣᨾᩮᩣ. ᩈᨾᨶ᩠ᨲᨲᩮᩣ ᩎᩁᨲᩥ ᨡᩥᨸᨲᩥ ᩁᩩᨠ᩠ᨡᩣᨴᨿᩮᩣᨲᩥ ᩈᨾᩦᩁᩮᩣ. ᩈᨴᩣ ᩈᨻ᩠ᨻᨴᩣ ᨣᨲᩥ ᨿᩔ ᩈᨴᩣᨣᨲᩥ. ᩈᩈᨶᩮᩣ, ᨣᨶ᩠ᨵᩅᩉᩮᩣ, ᩌᩈᩩᨣᩮᩣ, ᨾᩁᩩᨲᩮᩣ, ᨩᨣᨲᩥᨸᩣᨱᩮᩣ, ᨸᩅᨾᩣᨶᩮᩣ, ᨸᨽᨬ᩠ᨩᨶᩮᩣ ᩍᨧ᩠ᨧᩣᨴᩦᨶᩥᨸᩥ ᩅᩣᨲᨶᩣᨾᩣᨶᩥ.

᪓᪘. ᩍᨾᩮ ᨨ ᩅᨠ᩠ᨡᨾᩣᨶᩣ ᩅᩣᨿᩩᨽᩮᨴᩣ ᩅᩣᨿᩩᩅᩥᩈᩮᩈᩣ, ᩏᨴ᩠ᨵᩴ ᨣᨧ᩠ᨨᨲᩦᨲᩥ ᩏᨴ᩠ᨵᨦ᩠ᨣᨾᩮᩣ, ᩏᨧ᩠ᨧᩣᩁᨸᩔᩣᩅᩣᨴᩦᨶᩴ ᨶᩦᩉᩁᨱᩅᩈᩮᨶ ᩋᨵᩮᩣᨽᩣᨣᩴ ᨣᨧ᩠ᨨᨲᩦᨲᩥ ᩋᨵᩮᩣᨣᨾᩮᩣ. ᨠᩩᨧ᩠ᨨᩥᨾ᩠ᩉᩥ ᩏᨴᩁᩮ ᨲᩥᨭ᩠ᨮᨲᩦᨲᩥ ᨠᩩᨧ᩠ᨨᩥᨭ᩠ᨮᩮᩣ. ᨠᩮᩣᨭ᩠ᨮᩮ ᩋᨶ᩠ᨲᩮ ᩈᩮᨲᩥ ᨲᩥᨭ᩠ᨮᨲᩦᨲᩥ ᨠᩮᩣᨭ᩠ᨮᩣᩈᨿᩮᩣ. ᨸᩩᨶᨸ᩠ᨸᩩᨶᩴ ᩈᩈᨶ᩠ᨲᩥ ᨿᩮᨶ ᩋᩔᩣᩈᩮᩣ, ᨻᩉᩥᨶᩥᨠ᩠ᨡᨶ᩠ᨲᩅᩣᨲᩮᩣ. ᨸᩔᩣᩈᩮᩣᨲᩥ ᩋᨶ᩠ᨲᩮᩣᨸᩅᩥᩈᨶᨠᩅᩣᨲᩮᩣᨸᩥ ‘‘ᩋᩔᩣᩈᩮᩣ’’ᨲᩥ ᩑᨲᩮᨶ ᩈᨦ᩠ᨣᨿ᩠ᩉᨲᩮ ᩈᩉᨧᩣᩁᩥᨲᨲ᩠ᨲᩣ. ᩈᨻ᩠ᨻᨦ᩠ᨣᩮᩈᩩ ᩋᨶᩩᩈᩁᨲᩥ ᩈᩦᩃᩮᨶ ᩈᩮᨴᩃᩮᩣᩉᩥᨲᩣᨴᩥᩈᨾ᩠ᨸᩣᨴᨶᨲᩮᩣᨲᩥ ᩋᨦ᩠ᨣᩣᨶᩩᩈᩣᩁᩦ. ᩋᨾᩁᨠᩮᩣᩈᩮ ᨸᨶᩣᨿᩴ ᩅᩣᨲᩮᩣ ᨮᩣᨶᨻ᩠ᨿᩣᨸᩣᩁᨽᩮᨴᩮᨶ ᨸᨬ᩠ᨧᨵᩣ ᨠᨳᩥᨲᩮᩣ [ᨸᩣᨱᩮᩣ’ᨸᩣᨶᩮᩣ ᩈᨾᩣᨶᩮᩣᨧᩮᩣᨴᩣᨶᨻ᩠ᨿᩣᨶᩣ ᨧ ᩅᩣᨿᩅᩮᩣ ᩈᩁᩦᩁᨭ᩠ᨮᩣ ᩍᨾᩮ (ᩋᨾᩁ ᪑.᪖᪗)], ᨭᩦᨠᩣᨿᨬ᩠ᨧᩔ –

‘‘ᩉᨴᨿᩮ ᨸᩣᨱᩮᩣ ᨣᩩᨴᩮ’ᨸᩣᨶᩮᩣ, ᩈᨾᩣᨶᩮᩣ ᨶᩣᨽᩥᨾᨩ᩠ᨫᨭ᩠ᨮᩮᩣ;

ᩏᨴᩣᨶᩮᩣ ᨠᨱ᩠ᨮᨴᩮᩈᩮ ᨲᩩ, ᨻ᩠ᨿᩣᨶᩮᩣ ᩈᨻ᩠ᨻᨦ᩠ᨣᩈᨶ᩠ᨵᩥᩈᩩ [ᩉᨴᨿᩮ ᨸᩣᨱᩮᩣ ᨣᩩᨴᩮ’ᨸᩣᨶᩮᩣ, ᩈᨾᩣᨶᩮᩣ ᨶᩣᨽᩥᩈᨱ᩠ᨮᩥᨲᩮᩣ; ᩏᨴᩣᨶᩮᩣ ᨠᨱ᩠ᨮᨴᩮᩈᨭ᩠ᨮᩮᩣ, ᨻ᩠ᨿᩣᨶᩮᩣ ᩈᨻ᩠ᨻᩈᩁᩦᩁᨣᩮᩣ ᩍᨲᩥ ᨮᩣᨶᨶᩥᨱ᩠ᨱᨿᩮᩣ (ᨧᩥᨶ᩠ᨲᩣᨾᨱᩥᨭᩦᨠᩣ)].

ᨲᨲᩕᨸᩣᨱᩮᩣᩋᨶ᩠ᨶᨸ᩠ᨸᩅᩮᩈᩣᨴᩥᨠᩁᩮᩣ ¶ . ᩋᨸᩣᨶᩮᩣ ᨾᩩᨲ᩠ᨲᨠᩁᩦᩈᩈᩩᨠ᩠ᨠᩅᩥᩈᨭ᩠ᨮᩥᨠᩁᩮᩣ. ᩈᨾᩣᨶᩮᩣ ᨾᨩ᩠ᨫᩮ ᩋᨶ᩠ᨶᨸᨧᨶᩣᨴᩥᨠᩁᩮᩣ. ᩏᨴᩣᨶᩮᩣ ᨽᩣᩈᩥᨲᨣᩦᨲᩣᨴᩥᨠᩁᩮᩣ. ᨻ᩠ᨿᩣᨶᩮᩣ ᩈᩮᨴᩁᨲ᩠ᨲᩈᩅᨶᩩᨾ᩠ᨾᩮᩈᨶᩥᨾᩮᩈᨣᨲ᩠ᨿᩣᨴᩥᨠᩁᩮᩣ [ᨡᩮᨴᨧᩮᨭ᩠ᨮᩣᩏᨾ᩠ᨾᩮᩈᨶᩥᨾ᩠ᨾᩮᩈᨣᨲ᩠ᨿᩣᨴᩥᨠᩁᩮᩣ (ᨠ.)]. ᨸᨠᨭ᩠ᨮᩮᨶ ᩋᨶᨶ᩠ᨲ᩠ᨿᨶᩮᨶ ᨽᨲ᩠ᨲᩣᨴᩥᨸ᩠ᨸᩅᩮᩈᨶᨲᩮᩣᨲᩥ ᨸᩣᨱᩮᩣ. ᨾᩩᨲ᩠ᨲᩣᨴᩥᨠᩴ ᩋᨸᨶᩮᨲ᩠ᩅᩣ ᩋᨶᨶ᩠ᨲ᩠ᨿᨶᩮᨶᩣᨲᩥ ᩋᨸᩣᨶᩮᩣ. ᩈᨾ᩠ᨾᩣ ᩋᨶᨶ᩠ᨲᩥ ᩋᨶᩮᨶ ᨽᩩᨲ᩠ᨲᨸᩁᩥᨸᩣᨧᨶᨲᩮᩣᨲᩥ ᩈᨾᩣᨶᩮᩣ. ᩏᨴ᩠ᨵᨾᨶᨶ᩠ᨲ᩠ᨿᨶᩮᨶ ᨽᩣᩈᩥᨲᩣᨴᩮᩣ ᩈᩣᨾᨲ᩠ᨳᩥᨿᨩᨶᨶᨲᩮᩣᨲᩥ ᩏᨴᩣᨶᩮᩣ. ᩅᩥᩈᩮᩈᩮᨶ ᩋᨶᨶ᩠ᨲ᩠ᨿᨶᩮᨶ ᩈᩮᨴᩁᨲ᩠ᨲᩈᩮᨾ᩠ᩉᩣᨴᩥ [ᨡᩮᨴᨧᩮᨭ᩠ᨮᩣᨴᩥ (ᨧᩥᨶ᩠ᨲᩣᨾᨱᩥᨭᩦᨠᩣ)] ᩈᨾ᩠ᨸᩣᨴᨶᨲᩮᩣᨲᩥ ᨻ᩠ᨿᩣᨶᩮᩣ’’ᨲᩥ [ᨲᩴᨻ᩠ᨿᩣᨸᩣᩁᩣ ᨧ ᨿᨳᩣ – ᩋᨶ᩠ᨶᨸ᩠ᨸᩅᩮᩈᨶᩴ ᨾᩩᨲ᩠ᨲᩣ-ᨴ᩠ᨿᩩᩔᨣ᩠ᨣᩮᩣ’ᨶ᩠ᨶᩅᩥᨸᩣᨧᨶᩴ ᨽᩣᩈᨱᩣᨴᩥ ᨶᩥᨾᩮᩈᩣᨴᩥ, ᨲᩴᨻ᩠ᨿᩣᨸᩣᩁᩣ ᨠᨾᩣ ᩍᨾᩮ (ᨧᩥᨶ᩠ᨲᩣᨾᨱᩥᨭᩦᨠᩣ)] ᩅᩩᨲ᩠ᨲᩴ.

᪓᪙. ᨴ᩠ᩅᨿᩴ ᩋᨶ᩠ᨲᩮᩣᨸᩅᩥᩈᨶᨠᩅᩣᨲᩮ. ᩌᨶᩴ ᩅᩩᨧ᩠ᨧᨲᩥ ᨻᩉᩥᨶᩥᨠ᩠ᨡᨾᨶᩅᩣᨲᩮᩣ, ᨲᨲᩮᩣ ᩋᨸᨣᨲᩴ ᩋᨸᩣᨶᩴ. ᩋᩔᩣᩈᨲᩮᩣ ᩋᨸᨣᨲᩮᩣ ᨸᩔᩣᩈᩮᩣ. ᨴ᩠ᩅᨿᩴ ᨻᩉᩥᨶᩥᨠ᩠ᨡᨾᨶᩅᩣᨲᩮ. ᩌᨴᩥᨾ᩠ᩉᩥ ᨸᩅᨲ᩠ᨲᩮᩣ ᩈᩣᩈᩮᩣ ᩋᩔᩣᩈᩮᩣ. ᩋᨶᨶ᩠ᨲᩥ ᨸᩣᨱᨶ᩠ᨲ᩠ᨿᨶᩮᨶᩮᨲᩥ ᩌᨶᩴ, ᩌᨴᩥᨾ᩠ᩉᩥ ᨸᩅᨲ᩠ᨲᩴ ᩌᨶᩴ ᩌᨶᩴ, ᩑᨠᩔᩣᨠᩣᩁᩔ ᩃᩮᩣᨸᩮᩣ.

᪔᪐. ᩅᩮᨣᨡᩥᨸ᩠ᨸᩣᨴᨿᩮᩣ ᩅᩣᨲᨵᨾ᩠ᨾᨲ᩠ᨲᩮᨶ ᨶᩥᨧ᩠ᨧᨸ᩠ᨸᩅᨲ᩠ᨲᩥᨠᩣ ᩍᨲᩥ ᨲᨸ᩠ᨸᨠ᩠ᨠᨾᩮ [ᨲᨸ᩠ᨸᨠ᩠ᨠᨾᩮᨶ ᨲᨠ᩠ᨠᨾᩮᨶ (ᨠ.)] ᩏᨧ᩠ᨧᨶ᩠ᨲᩮ. ᨲᨲᩕ ᩁᨿᨶ᩠ᨲᩴ ᩅᩮᨣᩮ. ᩈᨻ᩠ᨻᨲᩕ ᨠᩁᨱᩈᩣᨵᨶᩴ. ᩍᨧ᩠ᨨᩥᨲᨭ᩠ᨮᩣᨶᩴ ᩅᨩᨶ᩠ᨲᩥ ᨸᩣᨸᩩᨱᨶ᩠ᨲᩥ ᩑᨲᩮᨶᩣᨲᩥ ᩅᩮᨣᩮᩣ.

‘‘ᨠᩕᩥᨿᩣᩅᩣᨧᩥᨲ᩠ᨲᨾᩣᨡ᩠ᨿᩣᨲᩩᩴ ¶ , ᩑᨠᩮᨠᨲ᩠ᨳᩮᩣ ᨶᩥᨴᩔᩥᨲᩮᩣ;

ᨸᨿᩮᩣᨣᨲᩮᩣᨶᩩᨣᨶ᩠ᨲᨻ᩠ᨻᩣ, ᩋᨶᩮᨠᨲ᩠ᨳᩣ ᩉᩥ ᨵᩣᨲᩅᩮᩣ’’ᨲᩥ [ᨧᨶ᩠ᨴᩕᨵᩣᨲᩩᨸᩣᨮᩮ].

ᩅᩩᨲ᩠ᨲᨲ᩠ᨲᩣ ᩅᨩᨵᩣᨲᩩ ᨸᩣᨸᩩᨱᨶᩮᨸᩥ ᨸᩅᨲ᩠ᨲᨲᩥ, ᩑᩅᩴ ᩈᨻ᩠ᨻᨲᩕ, ᩋᨠᩣᩁᩔ ᩑ. ᨩᩅᨶ᩠ᨲᩥ ᩑᨲᩮᨶᩣᨲᩥ ᨩᩅᩮᩣ, ᩁᨿᨶ᩠ᨲᩥ ᨣᨧ᩠ᨨᨶ᩠ᨲᩥ ᩑᨲᩮᨶᩣᨲᩥ ᩁᨿᩮᩣ.

ᨡᩥᨸ᩠ᨸᩣᨴᩥᨶᩅᨠᩴ ᩈᩦᨥᩮ. ᩋᨳ ᨩᩅᩈᩦᨥᩣᨶᩴ ᨠᩮᩣ ᨽᩮᨴᩮᩣ? ᩈᩅᩮᨣᨣᨲᩥᩅᨧᨶᩣ ᨩᩅᩣᨴᨿᩮᩣ, ᩈᩦᨥᩣᨴᨿᩮᩣ ᨲᩩ ᨵᨾ᩠ᨾᩅᨧᨶᩣ, ᨲᨳᩣ ᨧ ‘‘ᩈᩦᨥᩴ ᨸᨧᨲᩥ [ᨸᩔᨲᩥ (ᨠ.)], ᩈᩦᨥᩴ ᨣᨧ᩠ᨨᨲᩦ’’ᨲᩥ ᨸᨿᩮᩣᨣᩮᩣ, ᨶ ᨲᩩ ‘‘ᨩᩅᩴ ᨸᨧᨲᩥ, ᨩᩅᩴᨣᨧ᩠ᨨᨲᩦ’’ᨲᩥ ᨸᨶ ᨸᨿᩮᩣᨣᩮᩣ. ‘‘ᩅᩮᨣᩮᨶ ᨣᨧ᩠ᨨᨲᩥ, ᨩᩅᩮᨶ ᨣᨧ᩠ᨨᨲᩦ’’ᨲ᩠ᨿᩣᨴᩦᩈᩩ ᨠᨳᩴ? ᨲᨲᩕ ᨽᩮᨴᩔ ᩅᨲ᩠ᨲᩩᨾᩥᨧ᩠ᨨᩥᨲᨲ᩠ᨲᩣ ᨶ ᨴᩮᩣᩈᩮᩣ. ᨡᩥᨸ᩠ᨸᨲᩥ ᨸᩮᩁᨲᩦᨲᩥ ᨡᩥᨸ᩠ᨸᩴ, ᨡᩥᨸ ᨸᩮᩁᨱᩮ. ᩈᨿᨲᩦᨲᩥ ᩈᩦᨥᩴ, ᩈᩦ ᩈᨿᩮ, ᨥᨸᨧ᩠ᨧᨿᩮᩣ. ᨻ᩠ᨿᩩᨸ᩠ᨸᨲ᩠ᨲᩥ ᩉᩥ ᨿᨳᩣ ᨠᨳᨬ᩠ᨧᩥᨸᩥ ᨽᩅᨲᩥ, ᩈᨬ᩠ᨬᩣ ᨲᩩ ᩃᩮᩣᨠᨲᩮᩣᩅᩣᩅᨣᨶ᩠ᨲᨻ᩠ᨻᩣ, ᩈᨻ᩠ᨻᨲᩕᩮᩅᩴ. ᨲᩁᨲᩦᨲᩥ ᨲᩩᩁᩥᨲᩴ. ᩃᨦ᩠ᨥᨲᩦᨲᩥ ᩃᩉᩩ, ᩃᨦ᩠ᨥ ᨣᨲᩥᩈᩮᩣᩈᨶᩮᩈᩩ, ᨥᩔ ᩉᩮᩣ, ᨶᩥᨣ᩠ᨣᩉᩦᨲᩃᩮᩣᨸᩮᩣ, ᩏᨸᨧ᩠ᨧᨿᩮᩣ ᨧ, ᩃᩉᩩᨸᩁᩥᨿᩣᨿᩮᩣ ᩃᨥᩩᩈᨴ᩠ᨴᩮᩣᨸ᩠ᨿᨲ᩠ᨳᩥ. ᩋᩈᨲᩥ ᨡᩮᨸᨲᩦᨲᩥ ᩌᩈᩩ, ᩏ. ᨲᩁᨲᩦᨲᩥ ᨲᩩᨱ᩠ᨱᩴ, ᩁᩔ ᨱᩮᩣ. ᩋᩁᨲᩥ ᨣᨧ᩠ᨨᨲᩦᨲᩥ ᩋᩁᩴ. ᨶ ᩅᩥᩃᨾ᩠ᨻᩦᨿᨲᩥ ᨶ ᩒᩉᩦᨿᨲᩦᨲᩥ ᩋᩅᩥᩃᨾ᩠ᨻᩥᨲᩴ, ᩃᨻᩥ ᩋᩅᩈᩴᩈᨶᩮ. ᨲᩩᩅᨭ᩠ᨭᨲᩥ ᩈᨿᨲᩦᨲᩥ ᨲᩩᩅᨭ᩠ᨭᩴ, ᨲᩩᩁᩥᨲᨽᩣᩅᩮᨶ ᩅᨲ᩠ᨲᨲᩦᨲᩥ ᩅᩣ ᨲᩩᩅᨭ᩠ᨭᩴ, ᩁᩥᨲᩃᩮᩣᨸᩮᩣ.

᪔᪑. ᩋᩁᩥᨿᩣᩈᩣᨾᨬ᩠ᨬᩔ ᨸᩩᨻ᩠ᨻᨯ᩠ᨰᩴ ᩈᨶ᩠ᨲᨲᩮ. ᩑᨲ᩠ᨳ ᨧ ᩋᨭ᩠ᨮᩈᩩ ᨣᨱᩮᩈᩩ ᨨᨭ᩠ᨮᩮᩣ ᩈᨻ᩠ᨻᩃᩉᩩᨠᩮᩣ, ᨲᨲᩮᩣᨸᩁᩮ ᨨᨣ᩠ᨣᨱᩣ ᩈ ¶ , ᨽ, ᩈ, ᨽ, ᨽ, ᨽᩣ, ᩋᨭ᩠ᨮᨾᩮᩣ ᨣᩮᩣ. ᩈᨾᨶ᩠ᨲᨲᩮᩣ ᨲᨶᩮᩣᨲᩦᨲᩥ ᩈᨲᨲᩴ. ᨶᩣᩈᨽᩣᩅᩮᨶ ᨶ ᩍᨧ᩠ᨧᩴ ᨶ ᨣᨶ᩠ᨲᨻ᩠ᨻᩴ ᨶᩥᨧ᩠ᨧᩴ, ᨶᩣᩈᩴ ᩅᩣ ᨶ ᨣᨧ᩠ᨨᨲᩦᨲᩥ ᨶᩥᨧ᩠ᨧᩴ. ‘‘ᨶᩣᨣᩮᩣ’’ᨲ᩠ᨿᩣᨴᩦᩈᩩ ᩅᩥᨿᩣᨲᩥ ᩑᨲ᩠ᨳᩣᨸᩥ ᨶ ᨴᩮᩣᩈᩮᩣ, ᨲᩔ ᨧᩮᩣ. ᨶ ᩅᩥᩁᨾᨲᩦᨲᩥ ᩋᩅᩥᩁᨲᩴ. ᨶ ᩌᩁᨾᨲᩦᨲᩥ ᩋᨶᩣᩁᨲᩴ. ᩈᨾᨶ᩠ᨲᨲᩮᩣ, ᨸᩩᨶᨸ᩠ᨸᩩᨶᩴ ᩅᩣ ᨲᨶᩮᩣᨲᩦᨲᩥ ᩈᨶ᩠ᨲᨲᩴ. ᨶ ᩋᩅᩁᨾᨲᩦᨲᩥ ᩋᨶᩅᩁᨲᩴ. ᩈᨴᩣ ᨵᩅᨲᩥ ᨣᨧ᩠ᨨᨲᩦᨲᩥ ᨵᩩᩅᩴ. ‘‘ᨵᩩ ᨣᨲᩥᨳᩮᩁᩥᨿᩮᩈᩪ’’ᨲᩥ ᨠᩣᨲᨶ᩠ᨲᨵᩣᨲᩩ.

ᩅᩥᨸᩩᩃᩣᨯ᩠ᨰᩴ ᩋᨲᩥᩈᨿᩮ. ᩑᨲ᩠ᨳ ᩉᩥ ᩋᨿᩩᨣᨸᩣᨴᩮ ᨴ᩠ᩅᩣᨴᩈᨾᨲ᩠ᨲᩣ, ᨿᩩᨣᩮ ᩋᨭ᩠ᨮᩣᩁᩈᨾᨲ᩠ᨲᩣ, ᩈᨻ᩠ᨻᩣᩈᩩ ᩋᩁᩥᨿᩣᩈᩩ ᨸᨮᨾᩮ ᨸᩣᨴᩮ ᨴ᩠ᩅᩣᨴᩈᨾᨲ᩠ᨲᩣ, ᨴᩩᨲᩥᨿᩮ ᩋᨭ᩠ᨮᩣᩁᩈ, ᨲᨲᩥᨿᩮ ᨴ᩠ᩅᩣᨴᩈ, ᨧᨲᩩᨲ᩠ᨳᩮ ᨸᨬ᩠ᨧᨴᩈ. ᨿᨴᩣ ᨸᨶ ᨸᨮᨾᨲᨲᩥᨿᩮᩈᩩ ᨸᩁᩥᩉᩣᨿᨶ᩠ᨲᩥ, ᨲᨴᩣ ᨿᩩᨣᩮ ᩋᨵᩥᨠᩣ ᩉᩮᩣᨶ᩠ᨲᩥ, ᩍᨴᩴ ᩅᩥᨸᩩᩃᩣᩃᨠ᩠ᨡᨱᩴ. ᩋᨳ ᩈᨲᨲᩣᨲᩥᩈᨿᩣᨶᩴ ᨠᩮᩣ ᨽᩮᨴᩮᩣ? ᩈᨲᨲᩴ ᩈᨶ᩠ᨲᨲᩥ ᩋᩅᩥᨧ᩠ᨨᩮᨴᩮᩣᨠᩕᩥᨿᨶ᩠ᨲᩁᩮᩉᩥ ᩋᨻ᩠ᨿᩅᨵᩣᨶᩴ, ᩋᨲᩥᩈᨿᩮᩣ ᨲᩩ ᨸᩮᩣᨶᩮᩣᨸᩩᨬ᩠ᨬᩴ, ᨸᨠᨭ᩠ᨮᩮᩣ ᨧ. ᨲᩮᩈᩩ ᨸᩮᩣᨶᩮᩣᨸᩩᨬ᩠ᨬᩴ ᨠᩕᩥᨿᩣᨻ᩠ᨿᩣᩅᩩᨲ᩠ᨲᩥ, ᨸᨠᨭ᩠ᨮᩮᩣ ᨲᩩ ᨠᩕᩥᨿᩣᩅᨿᩅᩣᨶᩴ ᩏᨠ᩠ᨠᩴᩈᨲᩣ. ᨽᩣᩈᨲᩥ ᩈᨻ᩠ᨻᩮᩈᨶ᩠ᨲᩥ ᨽᩩᩈᩴ, ᩌᩔ ᩏ. ᨽᩔᨲᩥ ᩋᨵᩮᩣ ᨸᨲᨲᩦᨲᩥ ᩅᩣ ᨽᩩᩈᩴ. ᨽᩈ ᩋᨵᩮᩣᨸᨲᨶᩮ, ᩋᩔ ᩏ. ᩋᨲᩥᩈᨿᨶᩴ ᩋᨲᩥᩈᨿᩮᩣ, ᩋᨲᩥᨠ᩠ᨠᨾᩥᨲ᩠ᩅᩣ ᩅᩣᩈᨿᨶᩴ ᨸᩅᨲ᩠ᨲᨶᩴ ᩋᨲᩥᩈᨿᩮᩣ. ᨴᩉᨲᩥ ᩈᨻ᩠ᨻᨶ᩠ᨲᩥ ᨴᩊ᩠ᩉᩴ, ᩉᨲᩮᩣ ᨸᩩᨻ᩠ᨻᩮ ᩊᩮᩣ, ᨴᩃᨲᩥ ᩅᩥᨴᩣᩁᨿᨲᩦᨲᩥ ᩅᩣ ᨴᩊ᩠ᩉᩴ, ᩉᨸᨧ᩠ᨧᨿᩮᩣ, ᨴᩉᨶ᩠ᨲᩮᩣ ᩃᩣᨲᩦᨲᩥ ᩅᩣ ᨴᩊ᩠ᩉᩴ, ᩅᨱ᩠ᨱᩅᩥᨸᩁᩥᨿᨿᩮᩣ, ᩋᨽᩥᩈᨿᩮᩣ ᨧ ᨴᩊ᩠ᩉᨬ᩠ᨧ ᩋᨲᩥᩈᨿᨴᩊ᩠ᩉᩣ. ᨲᩁᨲᩥ ᩋᨲᩥᨠ᩠ᨠᨾᨲᩦᨲᩥ ᨲᩥᨻ᩠ᨻᩴ, ᩁᩔ ᩅᩮᩣ, ᩋᩔ ᩍ. ᩑᨲᩥ ᨣᨧ᩠ᨨᨲᩦᨲᩥ ᩑᨠᩮᩣ, ᩈᩮᩣ ᩑᩅ ᩑᨠᨶ᩠ᨲᩴ, ᩑᨠᩴ ᨲᩁᨲᩥ ᩋᨲᩥᨠ᩠ᨠᨾᨲᩦᨲᩥ ᩅᩣ ᩑᨠᨶ᩠ᨲᩴ. ᨾᨲ᩠ᨲᨲᩮᩣ ᩋᨲᩥᨠ᩠ᨠᨶ᩠ᨲᩴ ᩋᨲᩥᨾᨲ᩠ᨲᩴ. ᨻᩉᩩᩴ ᩃᩣᨲᩦᨲᩥ ᨻᩣᩊ᩠ᩉᩴ, ᩏᩃᩮᩣᨸᩮᩣ, ᩅᨱ᩠ᨱᩅᩥᨸᩁᩥᨿᨿᩮᩣ ᨧ ᩉᩈᨴ᩠ᨴᩮᩣ. ᩋᨲᩥᩅᩮᩃᩴ, ᩋᨧ᩠ᨧᨲ᩠ᨳᩴ, ᨶᩥᨻ᩠ᨽᩁᩴ, ᨶᩥᨲᨶ᩠ᨲᩴ, ᨣᩣᩊ᩠ᩉᩴᩍᨧ᩠ᨧᩣᨴᩦᨶᩥᨸᩥ ᩋᨲᩥᩈᨿᩮ.

ᨴᨻ᩠ᨻᩴ ᩈᨲ᩠ᩅᩴ, ᨲᩴᩅᩥᨸᩁᩦᨲᩮ ᨵᨾ᩠ᨾᨾᨲ᩠ᨲᩮ ᩅᨲ᩠ᨲᨾᩣᨶᩣ ᨻᩣᩊ᩠ᩉᨸᩁᩥᨿᨶ᩠ᨲᩣ ᨡᩥᨸ᩠ᨸᩣᨴᨿᩮᩣ ᩋᨲᩥᩈᨿᩴ ᩅᩥᨶᩣ ᨸᨱ᩠ᨯᨠᩮ ᨶᨸᩩᩴᩈᨠᩮ ᩅᨲ᩠ᨲᨶ᩠ᨲᩥ ¶ . ᨡᩥᨸ᩠ᨸᩴ ᨽᩅᨲᩥ [‘‘ᨡᩥᨸ᩠ᨸ ᨽᩅᨽᩦ’’ᨲᩥ ᨸᨴᨴ᩠ᩅᨿᩴ ᩋᨵᩥᨠᩴ ᩅᩥᨿ ᨴᩥᩔᨲᩥ], ᩋᨲᩥᩈᨿᩮᩣ ᨸᩩᩃ᩠ᩃᩥᨦ᩠ᨣᩮᩣ, ᩋᩔ ᨣᩩᨱᩔᩣᨲᩥᩈᨿᩮᩣ, ᩋᩔ ᨴᨻ᩠ᨻᩔᩣᨲᩥᩈᨿᩮᩣ ᩍᨲᩥ. ‘‘ᨡᩥᨸ᩠ᨸᩴ ᨽᩩᨬ᩠ᨩᨲᩥ, ᩈᨲᨲᩴ ᨩᩩᩉᩮᩣᨲᩥ, ᩈᨲᨲᩴ ᩁᨾᨱᩦᨿᩮᩣ’’ᩍᨧ᩠ᨧᨲᩕ ᨲᩩ ᨠᩕᩥᨿᩣᩅᩥᩈᩮᩈᨶᨲ᩠ᨲᩣᨿᩮᩅ ᨸᨱ᩠ᨯᨠᨲ᩠ᨲᩴ. ᨲᩮᩈᩩ ᨡᩥᨸ᩠ᨸᩣᨴᩦᩈᩩ ᨿᩮ ᨴᨻ᩠ᨻᨣᩣ ᨴᨻ᩠ᨻᩣᨽᩥᨵᩣᨿᩥᨶᩮᩣ, ᨲᩮ ᨲᩦᩈᩩ ᩃᩥᨦ᩠ᨣᩮᩈᩩ. ‘‘ᨴᨻ᩠ᨻᨵᨾ᩠ᨾᩮᩣ ᩃᩥᨦ᩠ᨣ’’ᨶ᩠ᨲᩥ ᨴᩔᨶᨶ᩠ᨲᩁᩴ. ᨿᨳᩣ ᨡᩥᨸ᩠ᨸᩣ ᨩᩁᩣ, ᨡᩥᨸ᩠ᨸᩮᩣ ᨾᨧ᩠ᨧᩩ, ᨡᩥᨸ᩠ᨸᩴ ᨣᨾᨶᩴ. ᩈᨶ᩠ᨲᨲᩣ ᨲᨱ᩠ᩉᩣ, ᩈᨶ᩠ᨲᨲᩴ ᨴᩩᨠ᩠ᨡᩴ, ᩈᨶ᩠ᨲᨲᩮᩣ ᩌᨠᩣᩈᩮᩣ. ᩋᨲᩥᨾᨲ᩠ᨲᩣ ᨠᩕᩥᨿᩣ, ᩋᨲᩥᨾᨲ᩠ᨲᩮᩣ ᨶᩁᩮᩣ, ᩋᨲᩥᨾᨲ᩠ᨲᩴ ᨸᨴᩴ ᩍᨧ᩠ᨧᩣᨴᩥ.

᪔᪒-᪔᪓. ᨴ᩠ᩅᩣᨴᩈᨠᩴ ᨾᩣᩁᩮ. ᩉᩁᨶᨿᨶᨣ᩠ᨣᩥᨴᨯ᩠ᨰᨲ᩠ᨲᩣ [ᨲᩥᨶᨿᨶᨣ᩠ᨣᩥᨴᨯ᩠ᨰᨲ᩠ᨲᩣ (ᨠ.)] ᨶᨲ᩠ᨳᩥ ᩅᩥᨣ᩠ᨣᩉᩮᩣ ᩈᩁᩦᩁᨾᩮᨲᩔ ᩋᩅᩥᨣ᩠ᨣᩉᩮᩣ. ᨠᩣᨾᨿᨲᩥ ᩁᨲᩥᨧ᩠ᨨᩴ ᩏᨸ᩠ᨸᩣᨴᨿᨲᩦᨲᩥ ᨠᩣᨾᩮᩣ, ᨠᩣᩁᩥᨲᨶ᩠ᨲᩣ ᩋᨸᨧ᩠ᨧᨿᩮᩣ. ᩈᩥᨦ᩠ᨣᩣᩁᩁᩪᨸᩮᨶ ᨸᩣᨱᩦᨶᩴ ᨾᨶᩈᩥ ᨽᩅᨲᩦᨲᩥ ᨾᨶᩮᩣᨽᩪ. ᨸᨬ᩠ᨧᨠᩣᨾᨣᩩᨱᩮᩈᩩ ᨾᨴᨿᨲᩦᨲᩥ ᨾᨴᨶᩮᩣ. ᩃᩮᩣᨠᩣᨶᩴ ᩋᨶ᩠ᨲᩴ ᩅᩥᨶᩣᩈᩴ ᨠᩁᩮᩣᨲᩦᨲᩥ ᩋᨶ᩠ᨲᨠᩮᩣ. ᩅᩈᩮ ᩅᨲ᩠ᨲᩮᨲᩥ ᩈᩦᩃᩮᨶᩣᨲᩥ ᩅᩈᩅᨲ᩠ᨲᩦ. ᨸᩣᨸᩴ ᩍᨧ᩠ᨨᨲᩥ ᨠᩁᩮᩣᨲᩥ, ᨲᩮᨶ ᨿᩩᨲ᩠ᨲᩮᩣᨲᩥ ᩅᩣ ᨸᩣᨸᩥᨾᩣ. ᨸᩁᨲᩮᩣ ᨩᩣᨿᨲᩦᨲᩥ ᨸᨩᩣ, ᩋᨧ᩠ᨨᨶ᩠ᨴᩥᨠᩣ, ᨲᩣᩈᩴ ᨸᨲᩥ ᨸᨩᩣᨸᨲᩥ. ᨿᩮ ᨠᩩᩈᩃᨵᨾ᩠ᨾᩮᩈᩩ ᨸᨾᨲ᩠ᨲᩣ, ᨲᩮᩈᨾᩮᩅ ᨻᨶ᩠ᨵᩩ ᨸᨾᨲ᩠ᨲᨻᨶ᩠ᨵᩩ. ᨠᨱ᩠ᩉᨵᨾ᩠ᨾᨿᩩᨲ᩠ᨲᨲᩣᨿ ᨠᨱ᩠ᩉᩮᩣ. ᨠᩩᩈᩃᨵᨾ᩠ᨾᩮ ᨾᩣᩁᩮᨲᩦᨲᩥ ᨾᩣᩁᩮᩣ. ᩋᨠᩩᩈᩃᨵᨾ᩠ᨾᩮ ᨶ ᨾᩩᨬ᩠ᨧᨲᩦᨲᩥ ᨶᨾᩩᨧᩥ. ᨾᩦᨶᨠᩮᨲᨶᩮᩣ, ᨠᨶ᩠ᨴᨸ᩠ᨸᩮᩣ, ᨴᨸ᩠ᨸᨠᩮᩣ, ᩋᨶᨦ᩠ᨣᩮᩣ, ᨸᨬ᩠ᨧᩈᩁᩮᩣ, ᩈᨾ᩠ᨻᩁᩣᩁᩥ, ᨾᨶᩈᩥᨩᩮᩣ, ᨠᩩᩈᩩᨾᩮᩈᩩ ¶ , ᩋᨶᨬ᩠ᨬᨩᩮᩣ, ᨸᩩᨸ᩠ᨹᨵᨶ᩠ᩅᩣ, ᩁᨲᩥᨸᨲᩥ, ᨾᨠᩁᨴ᩠ᨵᨩᩮᩣᩍᨧ᩠ᨧᩣᨴᩦᨶᩥᨸᩥ ᩅᩥᨱ᩠ᩉᩩᩈᩩᨲᩔ ᨠᩣᨾᩔ ᨶᩣᨾᩣᨶᩥ.

ᨲᨱ᩠ᩉᩣ ᩋᩁᨲᩦ ᩁᨣᩣ ᨧᩮᨲᩥ ᩑᨲᩣ ᨲᩥᩔᩮᩣ ᨲᩔ ᨾᩣᩁᩔ ᨵᩦᨲᩁᩮᩣ. ᨿᩮᩣ ᨲᩴ ᨸᩔᨲᩥ, ᨲᩴ ᨲᩈᩥᨲᩴ ᨠᩁᩮᩣᨲᩦᨲᩥ ᨲᨱ᩠ᩉᩣ, ᩈᩃᩮᩣᨸᩮᩣ, ᨱ᩠ᩉᩣ ᨧ. ᨸᩁᩮᩈᩴ ᨠᩩᩈᩃᨵᨾ᩠ᨾᩮᩈᩩ ᩋᩁᨲᩥᩴ ᨠᩁᩮᩣᨲᩦᨲᩥ ᩋᩁᨲᩦ. ᩁᨩ᩠ᨩᨶ᩠ᨲᩥ ᩑᨲ᩠ᨳᩣᨲᩥ ᩁᨣᩣ. ᨲᩔ ᨾᩣᩁᩔ ᩉᨲ᩠ᨳᩦ ᨣᩥᩁᩥᨾᩮᨡᩃᩮᩣ ᨶᩣᨾ. ᩈᩁᩦᩁᨾᩉᨶ᩠ᨲᨽᩣᩅᩮᨶ ᨣᩥᩁᩥᩈᨴᩥᩈᨲ᩠ᨲᩣ ᨣᩥᩁᩥ ᩅᩥᨿᩣᨲᩥ ᨣᩥᩁᩥ. ᨾᩣᩁᩮᨶ ᨾᨾᩣᨿᨶᩅᩈᩮᨶ ‘‘ᩋᨿᩴ ᨾᩮ ᩉᨲ᩠ᨳᩦ ᨾᩮᨡᩃᩮᩣ ᨶᩣᨾ ᩉᩮᩣᨲᩪ’’ᨲᩥ ᨠᨲᨶᩣᨾᨲ᩠ᨲᩣ ᨾᩮᨡᩃᩣ ᩅᩥᨿᩣᨲᩥ ᨾᩮᨡᩃᩮᩣᨲᩥ ᩈᨾᩩᨴᩥᨲᨶᩣᨾᨴ᩠ᩅᨿᩮᨶ ᩑᨠᨾᩮᩅ ᩉᨲ᩠ᨳᩥᩴ ᩅᨴᨲᩥ, ᨿᨳᩣ ‘‘ᩅᨩᩥᩁᩣᩈᨶᩥ, ᩈᩦᨲᩩᨱ᩠ᩉ’’ᨶ᩠ᨲᩥ.

᪔᪔. ᨲᩥᨠᩴ ᨿᨾᩮ. ᨸᨩᩣᩈᩴᨿᨾᨶᨲᩮᩣ ᨿᨾᩣ, ᨾᨧ᩠ᨧᩩᨸ᩠ᨸᨽᩩᨲᨿᩮᩣ ᩋᩔ ᨠᩥᨦ᩠ᨠᩣᩁᩣ, ᨲᩮᩈᩩ ᩁᩣᨩᨲᩮᨲᩥ ᨿᨾᩁᩣᨩᩣ. ᨲᩮᨵᩣᨲᩩᨠᩮᩈᩩᨸᩥ ᩌᨱᩣᨸᩅᨲ᩠ᨲᨠᨲ᩠ᨲᩣ ᨾᩉᨶ᩠ᨲᩮᩣ ᩅᩥᩈᨿᩮᩣ ᩑᨲᩔ ᩅᩥᩈᨿᩦ, ᨱᩦ, ᩈᩮᩣ ᩑᩅ ᩅᩮᩈᩣᨿᩦ. ᨿᨲ᩠ᨳ ᩃᨠ᩠ᨡᨱᩮᨶ ᨶ ᩈᩥᨩ᩠ᨫᨲᩥ, ᨲᨲ᩠ᨳ ᩈᨻ᩠ᨻᨲᩕ ‘‘ᨿᨴᩣᨴᩥᨶᩣ ᩅᩣ ᨶᩥᩁᩩᨲ᩠ᨲᩥᨶᨿᩮᨶ ᩅᩣ ᩈᨴ᩠ᨴᩈᩥᨴ᩠ᨵᩥ ᩅᩮᨴᩥᨲᨻ᩠ᨻᩣ’’ᨲᩥ ᩉᩥ ᨸᩩᨻ᩠ᨻᩮ ᩅᩩᨲ᩠ᨲᩴ, ᨴᩩᨠ᩠ᨡᨩᨶᨠᨲ᩠ᨲᩣ ᩅᩣ ᩅᩥᩈᨴᩥᩈᨭ᩠ᨮᩣᨶᩴ ᨣᨧ᩠ᨨᨶ᩠ᨲᩦᨲᩥ ᩅᩮᩈᩣ, ᨶᩮᩁᨿᩥᨠᩣ, ᨲᩮᩈᩴ ᩋᨵᩥᨸᨲᩥᨽᩣᩅᩮᨶ ᩋᨿᨲᩥ ᨸᩅᨲ᩠ᨲᨲᩦᨲᩥ ᩅᩮᩈᩣᨿᩦ, ᩎ. ᨿᨾᩣᨶᩴ ᩁᩣᨩᩣ ᨿᨾᩮᩣ. ᨵᨾ᩠ᨾᩁᩣᨩᩮᩣ, ᨠᨲᨶ᩠ᨲᩮᩣ, ᩈᨾᩅᨲ᩠ᨲᩦ, ᨠᩣᩃᩮᩣ, ᨴᨱ᩠ᨯᨵᩁᩮᩣ, ᩋᨶ᩠ᨲᨠᩮᩣᩍᨧ᩠ᨧᩣᨴᩦᨶᩥᨸᩥ ᨿᨾᩔ ᨶᩣᨾᩣᨶᩥ. ᩋᩔ ᨿᨾᩔ ᩌᩅᩩᨵᩴ ᨶᨿᨶᨾᩮᩅ. ᨲᩮᨶ ᨠᩥᩁ ᨠᩮᩣᨵᨧᩥᨲ᩠ᨲᩮᨶ ᩒᩃᩮᩣᨠᩥᨲᨾᨲ᩠ᨲᩮᨶ ᩈᨲ᩠ᨲᩣᨶᩴ ᩈᩁᩦᩁᩣᨶᩥ ᩌᨲᨸᩮ ᨡᩥᨲ᩠ᨲᨥᨲᨸᩥᨱ᩠ᨯᩣᨶᩥ ᩅᩥᨿ ᩅᩥᩃᩦᨿᨶ᩠ᨲᩦᨲᩥ.

ᨴ᩠ᩅᨿᩴ ¶ ᩋᩈᩩᩁᨽᩮᨴᩮ. ᩑᨲᩮᩈᨬ᩠ᩉᩥ ᩈᨲᩥᨸᩥ ᨴᩮᩅᨽᩣᩅᩮ ᩉᩮᨭ᩠ᨮᩣ ᨶᩥᩅᩣᩈᩥᨲᨽᩣᩅᩈᩣᨾᨬ᩠ᨬᨲᩮᩣ ᩑᨲ᩠ᨳ ᩅᨧᨶᩴ, ᨾᩣᩁᩔ ᨸᨶ ᩈᨲ᩠ᨲᩣᨶᨾᨶᨲ᩠ᨳᨠᩣᩁᨠᨲᩣᩈᩣᨾᨬ᩠ᨬᩮᨶ ᨿᨾᩮᨶ ᩈᨴ᩠ᨵᩥᩴ ᩅᨧᨶᩴ ᨲᨠ᩠ᨠᩁᨲ᩠ᨲᩣ. ᨿᩩᨴ᩠ᨵᩣᨴᩦᩈᩩ ᩅᩮᨸᩥᨲᩴ ᨠᨾ᩠ᨸᩥᨲᩴ ᨧᩥᨲ᩠ᨲᨾᩮᨲᩔ ᩅᩮᨸᨧᩥᨲ᩠ᨲᩥ [ᩈᩴ. ᨶᩥ. ᩋᨭ᩠ᨮ. ᪑.᪑.᪒᪕᪖]. ᨸᩩᨱ᩠ᨱᩴ ᩃᩮᩣᨾᩴ ᨿᩔ ᩈᩮᩣ ᨸᩩᩃᩮᩣᨾᩮᩣ, ᨸᩩᩃᩣᨾᩉᨲᩦ ᩏᨾᩣ ᨠᩥᨲ᩠ᨲᩥ, ᨠᨶ᩠ᨲᩥ ᩅᩣ ᨿᩔᩣᨲᩥ ᨸᩩᩃᩮᩣᨾᩮᩣ. ‘‘ᩏᨾᩣᨲᩈᩦᩉᩮᨾᩅᨲᩥ-ᩉᩃᩥᨴ᩠ᨴᩣᨠᩥᨲ᩠ᨲᩥᨠᨶ᩠ᨲᩥᩈᩪ’’ᨲᩥ ᩉᩥ ᨶᩣᨶᨲ᩠ᨳᩈᨦ᩠ᨣᩉᩮ ᩅᩩᨲ᩠ᨲᩴ. ᩋᨿᩴ ᨸᨶ ᩈᨠ᩠ᨠᩔ ᨽᩁᩥᨿᩣᨿ ᩈᩩᨩᩣᨲᩣᨿ ᨸᩥᨲᩣ. ᨴ᩠ᩅᨿᩴ ᨠᩥᨶ᩠ᨶᩁᩮ. ᩋᩔᨾᩩᨡᨶᩁᩈᩁᩦᩁᨲᩣᨿ ᨠᩩᨧ᩠ᨨᩥᨲᩮᩣ ᨸᩩᩁᩥᩈᩮᩣ, ᨠᩥᨬ᩠ᨧᩥ ᩅᩣ ᨸᩩᩁᩥᩈᩮᩣ, ᨸᩩᩁᩥᩈᩈᨴᩥᩈᩮᩣᨲᩥ ᩅᩣ ᨠᩥᨾ᩠ᨸᩩᩁᩥᩈᩮᩣ. ᩑᩅᩴ ᨠᩥᨶ᩠ᨶᩁᩮᩣ. ᨲᩩᩁᨦ᩠ᨣᩅᨴᨶ, ᩋᩔᨾᩩᨡᩣᨴᩦᨶᩥᨸᩥ ᨠᩥᨶ᩠ᨶᩁᩔ ᨶᩣᨾᩣᨶᩥ.

᪔᪕-᪔᪖. ᩋᨴ᩠ᨵᨸᨩ᩠ᨩᩮᨶ ᩌᨠᩣᩈᩔ ᨶᩣᨾᩣᨶᩥ. ᨲᩮᩈᩴ ᨲᩮᩈᩴ ᩅᨲ᩠ᨳᩪᨶᩴ ᩋᨶ᩠ᨲᩁᩴ ᨶᩣᨶᨲ᩠ᨲᩴ ᩍᨠ᩠ᨡᨲᩮ ᩃᩮᩣᨠᩮᩣ ᩑᨲ᩠ᨳ, ᩋᨶᩮᨶᩣᨲᩥ ᩅᩣ ᩋᨶ᩠ᨲᩃᩥᨠ᩠ᨡᩴ, ᩁᩔ ᩃᩮᩣ. ᩍᨠ᩠ᨡᨶᩴ ᩅᩣ ᨴᩔᨶᩴ ᩍᨠ᩠ᨡᩣ, ᨲᩔ ᩋᨶ᩠ᨲᩁᩴ ᨠᩣᩁᨱᩴ ᩋᨶ᩠ᨲᩃᩥᨠ᩠ᨡᩴ. ᨡᨶᨲᩥ ᨻ᩠ᨿᩅᨵᩣᨶᨶ᩠ᨲᩥ ᨡᩴ, ᨠ᩠ᩅᩥ. ᩈᨻ᩠ᨻᨣᩉᨣᩣᨾᨱᩥᨶᩮᩣ ᩌᨴᩥᨧ᩠ᨧᩔ ᨸᨳᩮᩣ ᨾᨣ᩠ᨣᩮᩣ ᩌᨴᩥᨧ᩠ᨧᨸᨳᩮᩣ. ᨶ ᨽᩅᨲᩦᨲᩥ ᩋᨻ᩠ᨽᩴ. ᨣᨧ᩠ᨨᨶ᩠ᨲ᩠ᨿᨶᩮᨶ ᨴᩮᩅᩣᨲᩥ ᨣᨣᨶᩴ, ᨿᩩ, ᨾᩔ ᨣᩮᩣ. ᩋᨾ᩠ᨻᨲᩮ ᩈᨴ᩠ᨴᩣᨿᨲᩮ ᩋᨲᩕᩣᨲᩥ ᩋᨾ᩠ᨻᩁᩴ, ᩁᩮᩣ. ᩉᨿ ᨣᨲᩥᨾ᩠ᩉᩥ, ᩅᩥᩈᩮᩈᩮᨶ ᩉᨿᨲᩥ ᨣᨧ᩠ᨨᨲᩥ ᩈᨻ᩠ᨻᨲᩕᩣᨲᩥ ᩅᩮᩉᩣᩈᩮᩣ, ᨿᩔ ᩈᩮᩣ, ᩅᩥᨣᨲᩮᩣ ᩅᩣ ᩉᩣᩈᩮᩣ ᨧᩥᨲ᩠ᨲᩔ ᩑᨲ᩠ᨳᩣᩁᨾ᩠ᨾᨱᩣᩃᩣᨽᨲᩮᩣᨲᩥ ᩅᩮᩉᩣᩈᩮᩣ. ᩋᨶᩥᩃᩔ ᩅᩣᨲᩔ ᨸᨳᩮᩣ ᩋᨶᩥᩃᨸᨳᩮᩣ. ᨽᩩᩈᩴ ᨠᩣᩈᨶ᩠ᨲᩮ ᨴᩥᨸ᩠ᨸᨶ᩠ᨲᩮ ᨸᨴᨲ᩠ᨳᩣ ᩑᨲᩮᨶᩣᨲᩥ ᩌᨠᩣᩈᩮᩣ, ᨶ ᨠᩔᨲᩥ ᨶ ᩅᩥᩃᩮᨡᩦᨿᨲᩦᨲᩥ ᩅᩣ ᩌᨠᩣᩈᩮᩣ. ᨶ ᨽᩅᨲᩥ ¶ ᩑᨲ᩠ᨳ ᨠᩥᨬ᩠ᨧᩥᨸᩥ ᩅᨲ᩠ᨳᩪᨲᩥ ᨶᨽᩴ, ᨶᨲ᩠ᨳᩥ ᨽᩪᨾᩥ ᩑᨲ᩠ᨳᩣᨲᩥ ᩅᩣ ᨶᨽᩴ, ᨶ ᨽᩣᨿᨶ᩠ᨲᩥ ᨸᨠ᩠ᨡᩥᨶᩮᩣ ᩋᨶᩮᨶ, ᩑᨲ᩠ᨳᩣᨲᩥ ᩅᩣ ᨶᨽᩴ. ᩅᩥᨶᩮᩣ ᨸᨠ᩠ᨡᩥᨶᩮᩣ ᩉᨿᨶ᩠ᨲᩥ ᨣᨧ᩠ᨨᨶ᩠ᨲᩥ ᩑᨲ᩠ᨳᩣᨲᩥ ᩅᩮᩉᩣᨿᩈᩴ, ᩋᩈᩮᩣ. ᨲᩣᩁᩣ ᩅᩩᨧ᩠ᨧᨶ᩠ᨲᩥ ᨶᨠ᩠ᨡᨲ᩠ᨲᩣᨴᨿᩮᩣ, ᨲᩮᩈᩴ ᨸᨳᩮᩣ ᨲᩣᩁᩣᨸᨳᩮᩣ. ᩈᩩᩁᩣᨶᩴ ᨴᩮᩅᩣᨶᩴ ᨸᨳᩮᩣ ᩈᩩᩁᨸᨳᩮᩣ. ᨶ ᩉᨬ᩠ᨬᨲᩮᨲᩥ ᩋᨥᩴ, ᩉᨶᩔ ᨥᩮᩣ. ᩋᨶᨶ᩠ᨲᩴ, ᩅᩥᩈᨱᩩᨸᨴᩴᩍᨧ᩠ᨧᩣᨴᩦᨶᩥᨸᩥ ᩌᨠᩣᩈᩔ ᨶᩣᨾᩣᨶᩥ.

᪔᪗-᪔᪘. ᨾᩮᨥᩣᨴ᩠ᨿᩮᨠᩣᨴᩈᨠᩴ ᨾᩮᨥᩮ. ᨾᩮᩉᨲᩥ ᨥᩁᨲᩥ ᩈᩮᨧᨲᩦᨲᩥ ᨾᩮᨥᩮᩣ. ᩅᩣᩁᩥᩴ ᩅᩉᨲᩦᨲᩥ ᩅᩃᩣᩉᨠᩮᩣ, ᩅᩣᩁᩥᩈᨴ᩠ᨴᩔ ᩅᩮᩣ, ᩅᩔ ᩃᩮᩣ [ᨸᩣᨱᩥᨶᩥ ᪖.᪓.᪑᪐᪙; ᨾᩮᩣᨣ᩠ᨣᩃ᩠ᩃᩣᨶᨸᨬ᩠ᨧᩥᨠᩣ ᪑.᪔᪗; ᨶᩦᨲᩥ-ᩈᩩᨲ᩠ᨲ ᪑᪓᪔᪐, ᪑᪓᪔᪓]. ᨴᩥᨻ᩠ᨻᨶ᩠ᨲᩥ ᩅᩩᨯ᩠ᨰᩥᩴ ᩅᩥᩁᩪᩊ᩠ᩉᩥᩴ ᨣᨧ᩠ᨨᨶ᩠ᨲᩥ ᩃᩮᩣᨠᩣ ᩋᨶᩮᨶᩣᨲᩥ ᨴᩮᩅᩮᩣ. ᨸᨩᩣᨶᩴ ᩃᩮᩣᨠᩣᨶᩴ ᩋᨶ᩠ᨶᩴ ᨽᩮᩣᨩᨶᩴ ᨽᩅᨲᩥ ᩑᨲᩮᨶᩣᨲᩥ ᨸᨩ᩠ᨩᩩᨶ᩠ᨶᩮᩣ, ᩋᨠᩣᩁᩔᩩᨠᩣᩁᩮᩣ. ᩋᨾ᩠ᨻᩩᩴ ᩏᨴᨠᩴ ᨵᩣᩁᩮᨲᩦᨲᩥ ᩋᨾ᩠ᨻᩩᨵᩁᩮᩣ. ᩃᩮᩣᨠᩣᨶᩴ ᩈᨶ᩠ᨲᩣᨸᩴ ᩉᨶ᩠ᨲᩦᨲᩥ ᨥᨶᩮᩣ, ᩉᩔ ᨥᩮᩣ. ᨩᩃᨵᩣᩁᩴ ᨵᩣᩁᩮᨲᩦᨲᩥ ᨵᩣᩁᩣᨵᩁᩮᩣ. ᨩᩦᩅᨶᩴ ᨩᩃᩴ ᨾᩪᨲᩴ ᨻᨶ᩠ᨵᨾᨶᩮᨶᩮᨲᩥ ᨩᩦᨾᩪᨲᩮᩣ, ᩅᨶᩈᨴ᩠ᨴᩃᩮᩣᨸᩮᩣ, ᩃᩮᩣᨠᩣᨶᩴ ᩅᩣ ᨩᩦᩅᩥᨲᩴ ᨾᩩᨶᩣᨲᩥ ᨻᨶ᩠ᨵᨲᩦᨲᩥ ᨩᩦᨾᩪᨲᩮᩣ, ᩅᩥᨲᩃᩮᩣᨸᩮᩣ, ᨩᩦᩅᩥᨲᩔ ᨩᩦ ᩌᨴᩮᩈᩮᩣ ᩅᩣ [ᨸᩣᨱᩥᨶᩥ ᪖.᪓.᪑᪐᪙; ᨾᩮᩣᨣ᩠ᨣᩃ᩠ᩃᩣᨶᨸᨬ᩠ᨧᩥᨠᩣ ᪑.᪔᪗; ᨶᩦᨲᩥ-ᩈᩩᨲ᩠ᨲ ᪑᪓᪔᪐, ᪑᪓᪔᪓]. ᩑᩅᩴ ᩋᨬ᩠ᨬᨲᩕ. ᩅᩣᩁᩥᩴ ᩅᩉᨲᩦᨲᩥ ᩅᩣᩁᩥᩅᩣᩉᩮᩣ. ᩋᨾ᩠ᨻᩩᩴ ᨴᨴᩣᨲᩦᨲᩥ ᩋᨾ᩠ᨻᩩᨴᩮᩣ. ᩌᨸᩴ ᨽᩁᨲᩦᨲᩥ ᩋᨻ᩠ᨽᩴ, ᨠ᩠ᩅᩥ, ᨸᩔ ᨻᩮᩣ.

ᨲᩥᨠᩴ ᩅᩩᨭ᩠ᨮᩥᨿᩴ. ᩅᩔᨲᩥ ᩈᩥᨬ᩠ᨧᨲᩦᨲᩥ ᩅᩔᩴ, ᩅᩔ ᩈᩮᨧᨶᩮ. ᩑᩅᩴ ᩅᩔᨶᩅᩩᨭ᩠ᨮᩥᨿᩮᩣ.

ᨸᨬ᩠ᨧᨠᩴ ¶ ᩅᩥᨩ᩠ᨩᩩᨿᩴ. ᩈᨲᨲᩴ ᩎᩁᨲᩥ ᨠᨾ᩠ᨸᨲᩦᨲᩥ ᩈᨲᩮᩁᩮᩣ, ᨲᩃᩮᩣᨸᩮᩣ, ᩈᩮᩣ ᩑᩅ ᩈᨲᩮᩁᩥᨲᩣ. ᨡᨱᨾᨲ᩠ᨲᨾ᩠ᨸᩥ ᨶ ᨲᩥᨭ᩠ᨮᨲᩦᨲᩥ ᩋᨠ᩠ᨡᨱᩣ. ᨠᩩᨭᩥᩃᩴ ᩋᨧᩥᩁᨭ᩠ᨮᩣᨿᩥᨲᨲ᩠ᨲᩣ ᩅᩥᩁᩪᨸᩴ ᩉᩩᨲ᩠ᩅᩣ ᨩᩅᨲᩦᨲᩥ ᩅᩥᨩ᩠ᨩᩩ. ᩅᩥᨩ᩠ᨩᩮᩣᨲᨲᩦᨲᩥ ᩅᩥᨩ᩠ᨩᩩᨲᩣ. ᩋᨧᩥᩁᩴ ᨸᨽᩣ ᨿᩔ ᩋᨧᩥᩁᨸ᩠ᨸᨽᩣ.

᪔᪙. ᨧᨲᩩᨠ᩠ᨠᩴ ᨾᩮᨥᨶᩣᨴᩮ. ᨾᩮᨥᩣᨶᩴ ᨶᩣᨴᩮᩣ ᨾᩮᨥᨶᩣᨴᩮᩣ. ᨵᨶᩦᨿᨲᩮ ᨵᨶᩥᨲᩴ[ᨳᨶᩥᨲᩴ (ᩈᩦ.)], ᨵᨶ ᩈᨴ᩠ᨴᩮ. ᨣᨩ᩠ᨩᨶᩴ ᨣᨩ᩠ᨩᩥᨲᩴ, ᨣᨩ᩠ᨩ ᩈᨴ᩠ᨴᩮ. ᩁᩈᩦᨿᨲᩮ ᩁᩈᩥᨲᩴ. ᩌᨴᩥᨶᩣ ᩉᩁᩣᨴᩣᨴᩥ [ᩈᨻ᩠ᨻᨲᩕ ᨶᨸᩩᩴᩈᨠᩮᨽᩣᩅᩮ ᨲᩮᩣ, ᩌᨴᩥᨶᩣ ᩈ᩠ᩅᨶᩥᨲᨵᨶᩥᨲᩣᨴᨿᩮᩣ (ᨧᩥᨶ᩠ᨲᩣᨾᨱᩥᨭᩦᨠᩣ), ᩌᨴᩥᨶᩣ ᨵᨶᩥᨲᩉᩁᩣᨴᩁᩣᩈᩣᨴᨿᩮᩣ (ᨻ᩠ᨿᩣᨡ᩠ᨿᩣᩈᩩᨵᩣᨭᩦᨠᩣ)]. ᨴ᩠ᩅᨿᩴ ᩈᨠ᩠ᨠᨵᨶᩩᨾ᩠ᩉᩥ. ᩍᨶ᩠ᨴᩔ ᩌᩅᩩᨵᩴ ᨵᨶᩩ ᨧ ᩍᨶ᩠ᨴᩣᩅᩩᨵᩴ, ᩍᨶ᩠ᨴᨵᨶᩩ ᨧ. ᩅᩣᨲᩮᨶ ᨡᩥᨲ᩠ᨲᨾᨾ᩠ᨻᩩ ᩅᩣᨲᨠ᩠ᨡᩥᨲ᩠ᨲᨾ᩠ᨻᩩ, ᨻᩥᨶ᩠ᨴᩩ. ᩈᩦᨲᩴ ᨠᩁᩮᩣᨲᩦᨲᩥ ᩈᩦᨠᩁᩮᩣ, ᩈᩥᨬ᩠ᨧᨲᩦᨲᩥ ᩅᩣ ᩈᩦᨠᩁᩮᩣ, ᨧᩔ ᨠᩮᩣ, ᩋᩁᩮᩣ ᨧ, ᩅᩣᨲᩅᩈᩮᨶ ᩅᩣ ᨲᨲᩮᩣ ᨲᨲᩮᩣ ᩈᩁᨲᩦᨲᩥ ᩈᩦᨠᩁᩮᩣ, ᩋᩔ ᩎ, ᨾᨩ᩠ᨫᩮ ᨠᩣᨣᨾᩮᩣ ᨧ.

᪕᪐. ᨲᩥᨠᩴ ᨩᩃᨵᩣᩁᩣᨿᩴ. ᩅᩮᨣᨲᩮᩣ ᨩᩃᨵᩣᩁᩣᨶᩴ ᩈᩴ ᨽᩩᩈᩴ ᨸᨲᨶᩴ ᩌᩈᩣᩁᩮᩣ, ᨸᩩᨶᨸ᩠ᨸᩩᨶᩴ ᩈᩁᨲᩦᨲᩥ ᩌᩈᩣᩁᩮᩣ. ᩅᩮᨣᩴ ᨵᩣᩁᩮᨲᩦᨲᩥ ᨵᩣᩁᩣ. ᩋᨵᩮᩣ ᨸᨲᨲᩦᨲᩥ ᩈᨾ᩠ᨸᩣᨲᩮᩣ, ᩈᩴᩈᨴ᩠ᨴᩮᩣ ᩋᨵᩮᩣᨽᩣᨣᩮ [ᩅᩮᨣᨲᩮᩣ ᨩᩃᨵᩣᩁᩣᨶᩴ ᩈᨾ᩠ᨽᩪᨿ ᨸᨲᨶᩴ ᨵᩣᩁᩣᩈᨾ᩠ᨸᩣᨲᩮᩣ, ᩈᩁ ᨣᨲᩥᨿᩴ ᨥᩏ ᩍᨲᩥ ᩌᩈᩣᩁᩮᩣ (ᨧᩥᨶ᩠ᨲᩣᨾᨱᩥᨭᩦᨠᩣ)]. ᨴ᩠ᩅᨿᩴ ᩅᩔᩮᩣᨸᩃᩮ. ᨠᩁᩮᨶ ᩉᨲ᩠ᨳᩮᨶ ᨣᨿ᩠ᩉᩩᨸᨣᨲ᩠ᨲᩣ ᨠᩁᨠᩣ, ᨩᩃᩴ ᨸᩥᨱ᩠ᨯᩴ ᨠᩁᩮᩣᨲᩦᨲᩥ ᩅᩣ ᨠᩁᨠᩣ, ‘‘ᩅᩔᩮᩣᨸᩃᩮ ¶ ᨲᩩ ᨠᩁᨠᩣ, ᨠᩁᨠᩮᩣᨸᩥ ᨧ ᨴᩥᩔᨲᩮ’’ᨲᩥ ᩁᩩᨴ᩠ᨴᩮᩣ, ᨠᩁᩈᨴ᩠ᨴᩮᩣᨲᩕ. ‘‘ᨠᩁᩮᩣ ᩅᩔᩮᩣᨸᩃᩮ ᨸᩣᨱᩥ-ᩈᩮᩣᨱ᩠ᨯᩣᨸᨧ᩠ᨧᩣᨿᩁᩴᩈᩥᩈᩪ’’ᨲᩥ ᨶᩣᨶᨲ᩠ᨳᩈᨦ᩠ᨣᩉᩮ ᩅᩩᨲ᩠ᨲᩴ. ᨥᨶᨲᩮᩣ, ᨥᨶᨠᩣᩃᩮ ᩅᩣ ᩈᨬ᩠ᨩᩣᨲᩴ ᩏᨸᩃᩴ ᩈᩥᩃᩣ ᨥᨶᩮᩣᨸᩃᩴ. ᨴᩩᨭ᩠ᨮᩩ ᨴᩥᨶᩴ ᨴᩩᨴ᩠ᨴᩥᨶᩴ, ᩋᨿᩴ ᨴᩩᨴ᩠ᨴᩥᨶᩈᨴ᩠ᨴᩮᩣ ᨾᩮᨥᨧ᩠ᨨᨶ᩠ᨶᩣᩉᩮ ᩅᨲ᩠ᨲᨲᩥ, ᩋᩈᩮᩣᨽᨶᨲ᩠ᨳᩮᩣᨸ᩠ᨿᨲ᩠ᨳᩥ ᨴᩩᨴ᩠ᨴᩥᨶᩈᨴ᩠ᨴᩮᩣ, ᩋᨣᩩᨱᩅᨧᨶᨲᩣᨿᩴ ᩅᩣᨧ᩠ᨧᩃᩥᨦ᩠ᨣᩮᩣ.

᪕᪑-᪕᪒. ᨨᨠ᩠ᨠᩴ ᨲᩥᩁᩮᩣᨵᩣᨶᩮ. ᨵᩁ ᩌᩅᩁᨱᩮ, ᩋᨸᩣᨴᩥᨸᩩᨻ᩠ᨻᩮᩣ. ᩋᨸᩥᨵᩁᨲᩥ ᩌᩅᩩᨱᩮᩣᨲᩦᨲᩥ ᨸᩥᨵᩣᨶᩴ, ᩋᩃᩮᩣᨸᩮᩣ. ᩋᨸᨵᩁᨲᩦᨲᩥ ᩋᨸᨵᩣᩁᨱᩴ. ᨲᩥᩁᩮᩣ ᨵᩁᨲᩥ ᨸᩥᨴᩉᨲᩦᨲᩥ ᨲᩥᩁᩮᩣᨵᩣᨶᩴ. ᩋᨶ᩠ᨲᩁᩴ ᨵᩁᨲᩦᨲᩥ ᩋᨶ᩠ᨲᩁᨵᩣᨶᩴ, ᨶᩥᨣ᩠ᨣᩉᩦᨲᩃᩮᩣᨸᩮᩣ. ᩋᨸᩥᨵᩁᨲᩦᨲᩥ ᩋᨸᩥᨵᩣᨶᩴ. ᩑᨲ᩠ᨳ ᨧ ᩋᨸᩣᨴᩥᩏᨸᩈᨣ᩠ᨣᩣ ᨵᩣᨲᩩᨶᩮᩣ ᩌᩅᩁᨱᨲ᩠ᨳᨩᩮᩣᨲᨠᩣ. ᨨᩣᨴᨿᨲᩦᨲᩥ ᨨᩣᨴᨶᩴ. ᨻ᩠ᨿᩅᨵᩣ, ᩋᨶ᩠ᨲᩁᨵᩥᩍᨧ᩠ᨧᩣᨴᨿᩮᩣᨸᩥ ᨲᩥᩁᩮᩣᨵᩣᨶᩮ.

ᩈᩣᨴ᩠ᨵᨸᨩ᩠ᨩᩮᨶ ᨧᨶ᩠ᨴᩔ ᨶᩣᨾᩣᨶᩥ. ᩍᨶ᩠ᨴᨲᩥ ᨶᨠ᩠ᨡᨲ᩠ᨲᩣᨶᩴ ᨸᩁᨾᩥᩔᩁᩥᨿᩴ ᨠᩁᩮᩣᨲᩦᨲᩥ ᩍᨶ᩠ᨴᩩ. ᨧᨶ᩠ᨴᨲᩥ ᩉᩥᩃᩣᨴᨿᨲᩥ ᩈᩩᨡᨿᨲᩥ ᨸᨩᨶ᩠ᨲᩥ ᨧᨶ᩠ᨴᩮᩣ. ᨶᨠ᩠ᨡᨲ᩠ᨲᩣᨶᩴ ᩁᩣᨩᩣ ᨶᨠ᩠ᨡᨲ᩠ᨲᩁᩣᨩᩣ. ᩏᨾᩣ ᨠᨶ᩠ᨲᩥ, ᨲᩣᨿ ᩈᩉ ᩅᩥᨩ᩠ᨩᨲᩦᨲᩥ ᩈᩮᩣᨾᩮᩣ, ᩈᩩᨡᩴ ᩋᨽᩥᩔᩅᨲᩦᨲᩥ ᩅᩣ ᩈᩮᩣᨾᩮᩣ, ᨾᨸᨧ᩠ᨧᨿᩮᩣ. ᨶᩥᩈᩴ ᩁᨲ᩠ᨲᩥᩴ ᨠᩁᩮᩣᨲᩥ, ᨲᨲ᩠ᨳ ᩅᩣ ᨠᩁᩮᩣ ᩁᩴᩈᩥ ᩑᨲᩔ ᨶᩥᩈᩣᨠᩁᩮᩣ. ᩋᨶ᩠ᨵᨠᩣᩁᩴ ᩏᩈᩮᨶ᩠ᨲᩥ ᨴᩉᨶ᩠ᨲᩥ ᩅᩥᨶᩣᩈᩮᨶ᩠ᨲᩦᨲᩥ ᩒᩈᩣ, ᩁᩴᩈᨿᩮᩣ, ᨲᩮ ᩑᨲ᩠ᨳ ᨵᩥᨿᨶ᩠ᨲᩥ ᨸᨲᩥᨭ᩠ᨮᩉᨶ᩠ᨲᩦᨲᩥ ᩒᩈᨵᩥ, ᨲᩣᩁᩣᩅᩥᩈᩮᩈᩮᩣ, ᨲᩔ ᩎᩈᩮᩣ ᨸᨲᩥ ᩒᩈᨵᩦᩈᩮᩣ. ᩉᩥᨾᩮᩣ ᩈᩦᨲᩃᩮᩣ ᩁᩴᩈᩥ ᨿᩔ ᩉᩥᨾᩁᩴᩈᩥ. ᩈᩈᩮᩣ ᩋᨦ᩠ᨠᩮᩣ ᩃᨠ᩠ᨡᨱᩴ ᨿᩔ ᩈᩈᨦ᩠ᨠᩮᩣ. ᨧᨶ᩠ᨴᩴ ᨠᨸ᩠ᨸᩪᩁᩴ ᨾᩣᨲᩥ ᩈᨴᩥᩈᩴ ᨶᨿᨲᩦᨲᩥ ᨧᨶ᩠ᨴᩥᨾᩣ. ᩍᨠᩣᩁᩣᨴᩮᩈᩮᩣ. ᩈᩈᩃᨠ᩠ᨡᨱᨾᩮᨲ᩠ᨳ ᩋᨲ᩠ᨳᩥ ᩈᩈᩦ ¶ . ᩈᩈᨲᩥ ᩅᩣ ᩉᩥᩴᩈᨲᩥ ᩏᨱ᩠ᩉᨣᩩᨱᨶ᩠ᨲᩥ ᩈᩈᩦ, ᩎᨸᨧ᩠ᨧᨿᩮᩣ ᨲᨴᩩᨸᩃᨠ᩠ᨡᩥᨲᩮ ᨲᨴᩩᨸᨧᩣᩁᩴ. ᩈᩦᨲᩣ ᩁᩴᩈᨿᩮᩣ ᨿᩔᨲ᩠ᨳᩦᨲᩥ ᩈᩦᨲᩁᩴᩈᩥ. ᨶᩥᩈᩣᨿ ᩁᨲ᩠ᨲᩥᨿᩣ ᨶᩣᨳᩮᩣ ᨲᨴᩣᩃᨦ᩠ᨠᩣᩁᨽᩣᩅᨲᩮᩣᨲᩥ ᨶᩥᩈᩣᨶᩣᨳᩮᩣ. ᩏᩊᩪᨶᩴ ᨲᩣᩁᩣᨶᩴ ᩁᩣᨩᩣ ᩏᩊᩩᩁᩣᨩᩣ. ᨾᩣᨲᩥ ᩋᨲ᩠ᨲᩣᨶᩴ ᨠᨸ᩠ᨸᩪᩁᩮᨶ ᩈᨴᩥᩈᩴ ᨠᩁᩮᩣᨲᩦᨲᩥ ᨾᩣ, ᨾᩣᩈᨴ᩠ᨴᩮᩣᨿᩴ ᨸᩩᨾᩮ, ᨲᩴᩈᩉᨧᩁᨱᨲᩮᩣ ᩏᩊᩩᩁᩣᨩᩣᨴᨿᩮᩣᨸᩥ. ᩉᩥᨾᩴᩈᩩ, ᨠᩩᨾᩩᨴᨻᨶ᩠ᨵᩩ, ᩅᩥᨵᩩ, ᩈᩩᨵᩴᩈᩩ, ᩈᩩᨻ᩠ᨽᩴᩈᩩ, ᨶᩥᩈᩣᨸᨲᩥ, ᨾᩥᨣᨦ᩠ᨠᩮᩣ, ᨠᩃᩣᨶᩥᨵᩥ, ᨴ᩠ᩅᩥᨩᩁᩣᨩᩮᩣ, ᩈᩈᨵᩁᩮᩣ, ᨶᨠ᩠ᨡᨲ᩠ᨲᩮᩈᩮᩣᩍᨧ᩠ᨧᩣᨴᩦᨶᩥᨸᩥ ᨧᨶ᩠ᨴᩔ ᨶᩣᨾᩣᨶᩥ.

᪕᪓-᪕᪔. ᩈᩮᩣᩊᩈᨶ᩠ᨶᩴ ᨽᩣᨣᩣᨶᩴ ᨸᩪᩁᨱᩮᩣ ᩈᩮᩣᩊᩈᨾᩮᩣ ᨽᩣᨣᩮᩣ ᨧᨶ᩠ᨴᩔ ᨠᩃᩣ, ᨠᩃ ᩈᨦ᩠ᨡ᩠ᨿᩣᨶᩮ, ᨠᩃᩦᨿᨲᩮ ᩑᨠᩣᨴᩥᨶᩣ ᩈᨦ᩠ᨡ᩠ᨿᩣᨿᨲᩮᨲᩥ ᨠᩃᩣ. ᨴ᩠ᩅᨿᩴ ᨧᨶ᩠ᨴᩔ ᩈᩁᩦᩁᩮ. ᨾᨬ᩠ᨬᨲᩮ ᨬᩣᨿᨲᩮ ᩋᨶᩮᨶᩮᨲᩥ ᨻᩥᨾ᩠ᨻᩴ. ᨾᨶᨲᩮᩣ ᩅᨸᨧ᩠ᨧᨿᩮᩣ, ᨶᩥᨸᩣᨲᨶᩣ ᨾᩔ ᨻᩮᩣ, ᩋᩔᩥ, ᨶᩔ ᨾᩮᩣ, ᩅᩔ ᨻᩮᩣ, ᨻᩥᨾ᩠ᨻᩈᨴ᩠ᨴᩮᩣ ᩋᨶᩥᨲ᩠ᨳᩥᨿᩴ. ᨾᨱ᩠ᨯᨿᨲᩮᨲᩥ ᨾᨱ᩠ᨯᩃᩴ, ᩋᩃᩮᩣ, ᩍᨲ᩠ᨳᩥᨿᩴ ᨾᨱ᩠ᨯᩃᩦ, ᩋᨿᩴ ᨲᩦᩈ᩠ᩅᨸᩥ [ᨻᩥᨾ᩠ᨻᩮᩣ ᩋᨶᩥᨲ᩠ᨳᩦ, ᨾᨱ᩠ᨯᩃᩴ ᨲᩦᩈᩩ (ᩋᨾᩁ ᪓.᪑᪕)].

ᨸᩣᨴᩉᩦᨶᨸᨩ᩠ᨩᩮᨶ ᩋᨴ᩠ᨵᨽᩣᨣᩮᩣ. ᩋᩈᨲᩥ ᨡᩮᨸᩮᨲᩥ ᩈᨾᩩᨴᩣᨿᨶ᩠ᨲᩥ ᩋᨯ᩠ᨰᩮᩣ, ᨲᩮᩣ. ᨲᨳᩣ ᩋᨴ᩠ᨵᩮᩣ. ᩏᨸᨯ᩠ᨰᩮᩣᨲᩥ ᩏᨸᩈᨣ᩠ᨣᩮᨶ ᨸᨴᩴ ᩅᨯ᩠ᨰᩥᨲᩴ, ᩑᨲᩮ ᨲᨿᩮᩣ ᨸᩩᨾᩮ. ᨡᨱ᩠ᨯᨿᨲᩥ ᩈᨾᩩᨴᩣᨿᨶ᩠ᨲᩥ ᨡᨱ᩠ᨯᩴ. ᩈᨠ᩠ᨿᨲᩮ ¶ ᩏᨻ᩠ᨻᩣᩉᨶᩣᨴᩦᩈᩩ ᨳᩮᩣᨠᨲ᩠ᨲᩣᨲᩥ ᩈᨠᩃᩴ, ᩋᩃᩮᩣ, ᨡᨱ᩠ᨯᩈᨠᩃᩣ ᩅᩣ ᨸᩩᨾᩮ, ᩈᨲ᩠ᨳᩮ ᩁᩪᨸᨽᩮᨴᨲᩮᩣ ᨶᨸᩩᩴᩈᨠᩮ. ᩑᨲᩮ ᨧ ᩋᨯ᩠ᨰᩣᨴᨿᩮᩣ ᨲᨿᩮᩣ ᩋᩈᨾᩮ ᨽᩣᨣᩮ ᨸᩩᨾᩮ, ᩈᨾᩮ ᨲᩩ ᨶᨸᩩᩴᩈᨠᩮᨲᩥ ᩁᩪᨸᨽᩮᨴᩮᨶᩣᩉ ‘‘ᩋᨴ᩠ᨵᩴ ᩅᩩᨲ᩠ᨲᩴ ᩈᨾᩮ ᨽᩣᨣᩮ’’ᨲᩥ. ᨡᨱ᩠ᨯᩣᨴᩥᨴ᩠ᩅᨿᩴ ᨸᨶ ᩋᩈᨾᩮᨸᩥ ᩅᨲ᩠ᨲᨾᩣᨶᩴ ᨸᩩᨶ᩠ᨶᨸᩩᩴᩈᨠᩮ ᩅᨲ᩠ᨲᨲᩥ, ᨲᩈ᩠ᨾᩣ ‘‘ᩋᨴ᩠ᨵᩴ ᩅᩩᨲ᩠ᨲᩴ ᩈᨾᩮ ᨽᩣᨣᩮ’’ᨲᩥ ᩑᨲ᩠ᨳ ‘‘ᩋᨯ᩠ᨰᩴ, ᩏᨸᨯ᩠ᨰ’’ᨶ᩠ᨲᩥ ᩍᨴᩴ ᨴ᩠ᩅᨿᨾ᩠ᨸᩥ ᩈᨦ᩠ᨣᩉᩥᨲᩴ [ᩋᩈᨾᨽᩣᨣᩮ ᨸᩩᨾᩣᨶᩥ, ᩈᨾᩮ ᩋᩴᩈᩮ ᨶᨸᩩᩴᩈᨠᨲ᩠ᨲᩴ ᩁᩪᨸᨽᩮᨴᨲᩮᩣ, ᩏᨸᨧᩣᩁᨲᩮᩣ ᨲᨻ᩠ᨽᩣᨣᩅᨲᩥ ᩅᩣᨧ᩠ᨧᩃᩥᨦ᩠ᨣᩮᩣ – ᩋᨴ᩠ᨵᩣ ᩈᩣᨭᩦ, ᩋᨴ᩠ᨵᩴ ᩅᨲ᩠ᨳᩴ ᩋᨴ᩠ᨵᩮᩣ ᨠᨾ᩠ᨻᩃᩮᩣ (ᨧᩥᨶ᩠ᨲᩣᨾᨱᩥᨭᩦᨠᩣ)].

ᨸᩈᩣᨴᩣᨴᨿᩮᩣ ᨧᨶ᩠ᨴᩮ ᩋᩅᩔᨾ᩠ᨽᩣᩅᩥᨶᩮᩣ, ᩋᨬ᩠ᨬᨲᩕ ᨲᩩ ᨸᩣᩈᨦ᩠ᨣᩥᨠᩣ ᩍᨲᩥ ᨧᨶ᩠ᨴᨸᨠ᩠ᨠᨾᩮ ᩏᨧ᩠ᨧᨶ᩠ᨲᩮ. ᩅᩥᩈᩮᩈᩮᨶ ᩈᩣᨴᨿᨲᩥ ᨸᩈᩣᨴᨿᨲᩦᨲᩥ ᨸᩈᩣᨴᩮᩣ. ᩑᩅᩴ ᨸᩈᨶ᩠ᨶᩮᩣ, ᩈᩮᩣ ᩑᩅ ᨸᩈᨶ᩠ᨶᨲᩣ.

ᨲᩥᨠᩴ ᨧᨶ᩠ᨴᨸ᩠ᨸᨽᩣᨿᩴ. ᨠᩩᨾᩩᨴᩔᩣᨿᩴ ᩅᩥᨠᩣᩈᩮᩣ [ᩅᩥᨠᩣᩁᩮᩣ (ᨠ.)] ᨠᩮᩣᨾᩩᨴᩦ. ᨧᨶ᩠ᨴᩴ ᩌᨧᩥᨠ᩠ᨡᨲᩥ ᨸᨭᩥᨸᩣᨴᨿᨲᩦᨲᩥ ᨧᨶ᩠ᨴᩥᨠᩣ. ᨩᩩᨲᩥ ᩋᩔᩣᨲ᩠ᨳᩦᨲᩥ ᨩᩩᨱ᩠ᩉᩣ. ᨲᩔ ᨱᩮᩣ, ᩉᨸᨧ᩠ᨧᨿᩮᩣ ᨧ, ᨧᨶ᩠ᨴᩔ ᩅᩣ ᨩᩩᨲᩥᩴ ᩈᩮᩣᨽᩴ ᨶᨿ᩠ᩉᨲᩥ ᨻᨶ᩠ᨵᨲᩦᨲᩥ ᨩᩩᨱ᩠ᩉᩣ.

ᨧᨲᩩᨠ᩠ᨠᩴ ᩈᩮᩣᨽᨶᨾᨲ᩠ᨲᩮ. ᨠᨶᨲᩥ ᨴᩥᨸ᩠ᨸᨲᩦᨲᩥ ᨠᨶ᩠ᨲᩥ, ᨠᨶ ᨴᩥᨲ᩠ᨲᩥᨿᩴ, ᨠᩣᨾᩦᨿᨲᩦᨲᩥ ᩅᩣ ᨠᨶ᩠ᨲᩥ. ᩈᩩᨶ᩠ᨴᩁᩴ ᨽᩣᨲᩥ ᨴᩥᨸ᩠ᨸᨲᩦᨲᩥ ᩈᩮᩣᨽᩣ. ᨩᩮᩣᨲᨿᨲᩦᨲᩥ ᨩᩩᨲᩥ. ᨨᩣᨴᨿᨲᩦᨲᩥ ᨨᩅᩥ. ᨨᨴ ᩈᩴᩅᩁᨱᩮ, ᩅᩥᨸᨧ᩠ᨧᨿᩮᩣ, ᨴᩃᩮᩣᨸᩮᩣ.

᪕᪕. ᩈᨲ᩠ᨲᨠᩴ ᩃᨠ᩠ᨡᨱᩮ. ᨠᩴ ᩋᨲ᩠ᨲᩣᨶᩴ ᩃᨦ᩠ᨠᨿᨲᩥ ᩉᩦᨶᩴ ᨠᩁᩮᩣᨲᩦᨲᩥ ᨠᩃᨦ᩠ᨠᩮᩣ. ᩃᨬ᩠ᨨᨲᩮ ᩃᨠ᩠ᨡᨲᩮ ᩋᨶᩮᨶᩮᨲᩥ ᩃᨬ᩠ᨨᨶᩴ ¶ . ᩃᨠ᩠ᨡ᩠ᨿᨲᩮ ᩋᨶᩮᨶᩮᨲᩥ ᩃᨠ᩠ᨡᩴ. ᨲᨳᩣ ᩃᨠ᩠ᨡᨱᩴ. ᩋᨦ᩠ᨠᩦᨿᨲᩮ ᩃᨠ᩠ᨡ᩠ᨿᨲᩮ ᩋᨶᩮᨶᩮᨲᩥ ᩋᨦ᩠ᨠᩮᩣ. ᩋᨽᩥ ᩅᩥᩈᩮᩈᩴ ᨩᩣᨶᩣᨲᩥ ᩑᨲᩮᨶᩣᨲᩥ ᩋᨽᩥᨬ᩠ᨬᩣᨱᩴ. ᨧᩥᩉᩦᨿᨲᩥ ᩃᨠ᩠ᨡᩦᨿᨲᩥ ᩋᨶᩮᨶᩮᨲᩥ ᨧᩥᩉᨶᩴ. ᨧᩥᩉ ᩃᨠ᩠ᨡᨱᩮ.

ᩈᨻ᩠ᨻᩣᩈᩴ ᩈᩮᩣᨽᩣᨶᩴ ᨾᨩ᩠ᨫᩮ ᨸᩁᨾᩣ ᩈᩮᩣᨽᩣ ᩈᩩᩈᨾᩣ ᨶᩣᨾ, ᩈᩮᩣᨽᨶᩴ ᩈᨾᩴ ᩈᨻ᩠ᨻᩴ ᩋᩔᩴ ᩈᩩᩈᨾᩣ, ᩈᩮᨭ᩠ᨮᩣ ᩈᩮᩣᨽᩣ.

᪕᪖. ᨣᩩᨱᩮ ᨹᩮᩣᨭ᩠ᨮᨻ᩠ᨻᩅᩥᩈᩮᩈᩮ ᩈᩦᨲᨶ᩠ᨲᩥ ᨶᨸᩩᩴᩈᨠᩴ ᨽᩅᨲᩥ. ᨴᩮᩅᨴᨲ᩠ᨲᩔ ᩈᩦᨲᩴ ᩅᨲ᩠ᨲᨲᩥ. ᩈᩦᨲᩣᨴᨿᩮᩣ ᨲᨿᩮᩣ ᨣᩩᨱᩦᩃᩥᨦ᩠ᨣᩣ ᨣᩩᨱᩥᨶᩮᩣ ᩃᩥᨦ᩠ᨣᩴ ᨣᨱ᩠ᩉᨶ᩠ᨲᩥ, ᨲᩴ ᨿᨳᩣ – ᩈᩦᨲᩃᩣ ᨽᩪᨾᩥ, ᩈᩦᨲᩃᩴ ᨩᩃᩴ, ᩈᩦᨲᩃᩮᩣ ᩅᩣᨲᩮᩣ. ᩏᨱ᩠ᩉᩣᨽᩥᨲᨲ᩠ᨲᩮᩉᩥ ᩈᩮᩅᩦᨿᨲᩦᨲᩥ ᩈᩦᨲᩴ, ᨲᩮᨶ ᨿᩩᨲ᩠ᨲᩮᩣ ᩈᩦᨲᩮᩣ. ᩈᩈ ᨣᨲᩥᨿᩴ, ᩍᩁᩮᩣ, ᩍᨲ᩠ᨲᨬ᩠ᨧ, ᩈᩦᨲᨲ᩠ᨳᩥᨠᩮᨶ ᩈᩁᩦᨿᨲᩦᨲᩥ ᩅᩣ ᩈᩥᩈᩥᩁᩴ. ᩈᩦᨲᩴ ᨣᩩᨱᩴ ᩃᩣᨲᩦᨲᩥ ᩈᩦᨲᩃᩮᩣ.

ᨾᩉᩥᨠᩣᨶ᩠ᨲᩴ ᩉᩥᨾᩮ. ᩉᩥᩴᩈᨲᩦᨲᩥ ᩉᩥᨾᩴ, ᩈᩔ ᨾᩮᩣ,ᨶᩥᨣ᩠ᨣᩉᩦᨲᩃᩮᩣᨸᩮᩣ ᨧ. ᨲᩩᩉ ᩋᨴᨶᩮ, ᨲᩮᩣᩉᨲᩥ ᩉᩥᩴᩈᨲᩦᨲᩥ ᨲᩩᩉᩥᨶᩴ, ᩍᨶᩮᩣ. ᩏᨸᩁᩥᨲᩮᩣ ᩈᩅᨲᩦᨲᩥ ᩏᩔᩣᩅᩮᩣ. ᨶᩦᩉᩁᨶ᩠ᨲᩥ ᨶᩥᩔᩈᨶ᩠ᨲ᩠ᨿᨶᩮᨶᩮᨲᩥ ᨶᩦᩉᩣᩁᩮᩣ, ᨶᨲ᩠ᨳᩥ ᩎᩉᩣ ᩅᩣ ᩑᨲᩈ᩠ᨾᩣ ᩉᩮᨲᩩᨽᩪᨲᩣᨲᩥ ᨶᩦᩉᩣᩁᩮᩣ, ᩌᩁᩮᩣ. ᨾᩉᩦᨿᨲᩮ ᩁᩣᨣᩦᩉᩦᨲᩥ [ᩅᩣᨧᩣᨽᩥ (ᨧᩥᨶ᩠ᨲᩣᨾᨱᩥᨭᩦᨠᩣ)] ᨾᩉᩥᨠᩣ, ᨱ᩠ᩅᩩ.

᪕᪗. ᨨᨠ᩠ᨠᩴ ᨶᨠ᩠ᨡᨲ᩠ᨲᩮ. ᨸᩩᨶᨸ᩠ᨸᩩᨶᩴ ᩏᨴᨿᨲ᩠ᨲᩣ ᨶ ᨡᩦᨿᨲᩮ ᨶᨠ᩠ᨡᨲ᩠ᨲᩴ, ᩋᨲ᩠ᨲᨶᩮᩣ ᨣᨾᨶᨭ᩠ᨮᩣᨶᩴ ᨶ ᨡᩁᨲᩥ ᨶ ᩅᩥᨶᩣᩈᩮᨲᩦᨲᩥ ᩅᩣ ᨶᨠ᩠ᨡᨲ᩠ᨲᩴ, ᩋᨳ ¶ ᩅᩣ ᨶᨠ᩠ᨡ ᨣᨲᩥᨿᩴ, ᨶᨠ᩠ᨡᨲᩦᨲᩥ ᨶᨠ᩠ᨡᨲ᩠ᨲᩴ. ᨩᩮᩣᨲᨲᩥ ᩈᩩᨽᩣᩈᩩᨽᨶᩥᨾᩥᨲ᩠ᨲᩴ ᨸᨠᩣᩈᩮᨲᩦᨲᩥ ᨩᩮᩣᨲᩥ, ᨶᨠ᩠ᨡᨲ᩠ᨲ ᨽᩴᩈᨴ᩠ᨴᩮᩉᩥ ᩈᩉᨧᩁᨱᨲᩮᩣ ᨶᨸᩩᩴᩈᨠᩮ. ᨿᨳᩣᩅᩩᨲ᩠ᨲᩴ ᨶᩥᨾᩥᨲ᩠ᨲᩴ ᨽᩣᨲᩥ ᨸᨠᩣᩈᩮᨲᩦᨲᩥ ᨽᩴ. ᨠᨲ᩠ᨲᨻ᩠ᨻᩴ ᨲᩁᨶ᩠ᨲᩥ ᩃᩮᩣᨠᩣ ᩑᨲᩣᨿᩣᨲᩥ ᨲᩣᩁᩣ, ᩋᨲ᩠ᨲᨶᩮᩣ ᩅᩦᨳᩥᩴ ᨲᩣᨿᨲᩥ ᩋᩁᨲᩥ ᨣᨧ᩠ᨨᨲᩦᨲᩥ ᩅᩣ ᨲᩣᩁᩣ, ᨲᩣᩁᩮᨲᩥ ᩅᩣ ᩃᩮᩣᨠᩮ ᩋᩉᩥᨲᨲᩮᩣᨲᩥ ᨲᩣᩁᩣ, ᩋᨿᨬ᩠ᨧ ᨲᩣᩁᨠᩣ, ᩏᩊᩩ ᨧ ᩑᨲᩮ ᨲᨿᩮᩣ ᩋᨸᩩᨾᩮ. ᨲᩁᩣ ᩑᩅ ᨱ᩠ᩅᩩ, ᨲᩣᩁᨠᩣ [ᨲᩣᩁᩣ ᩑᩅ ᨲᩣᩁᨠᩣ ᨱ᩠ᩅᩩ (ᨠ.)]. ᩏᨧ᩠ᨧᩴ ᩃᩅᨲᩥ [ᩏᩃᨿᨲᩥ (ᨠ.)] ᨣᨧ᩠ᨨᨲᩦᨲᩥ ᩏᩃᩩ. ᩈᩮᩣ ᩑᩅ ᩏᩊᩩ. ᨶ ᨠᩮᩅᩃᩴ ᨲᩣᩁᨠᩣ ᩑᩅ ᩋᨸᩩᨾᩮ, ᩋᨳ ᨡᩮᩣ ᩏᩊᩩ ᨧᩣᨲᩥ ᨧᩈᨴ᩠ᨴᨲ᩠ᨳᩮᩣ. ᩏᩊᩩᩈᩉᨧᩁᩥᨿᨲᩮᩣ ᨸᨠ᩠ᨡᩮ ᨶᨸᩩᩴᩈᨠᩮ ᨧ.

᪕᪘-᪖᪐. ᩋᩔᨿᩩᨩᩣᨴᨿᩮᩣ ᩁᩮᩅᨲ᩠ᨿᨶ᩠ᨲᩣ ᩈᨲ᩠ᨲᩣᨵᩥᨠᩅᩦᩈᨲᩣᩁᨠᩣ ᨶᨠ᩠ᨡᨲ᩠ᨲᩣ ᨶᩣᨾ ᩉᩮᩣᨶ᩠ᨲᩥ. ᨲᩣᨶᩥ ᨧ ᨶᨠ᩠ᨡᨲ᩠ᨲᩣᨶᩥ ᩌᨠᩣᩈᩮ ᨿᨳᩣᨮᩥᨲᩣᨶᩥ ᨠᨾᨲᩮᩣᨿᩮᩅ ᩑᨲ᩠ᨳ ᨠᨳᩥᨲᩣᨶᩥ, ᨶ ᩏᨸ᩠ᨸᨭᩥᨸᩣᨭᩥᨿᩣ. ᩅᨠ᩠ᨡᨲᩥ ᨧ ‘‘ᨠᨾᨲᩮᩣ ᩈᨲ᩠ᨲᩣᨵᩥᨠᩅᩦᩈᨲᩥ ᨶᨠ᩠ᨡᨲ᩠ᨲᩣ’’ᨲᩥ. ᩋᩔᩁᩪᨸᨿᩮᩣᨣᨲᩮᩣ ᩋᩔᨿᩩᨩᩮᩣ. ᨿᨾᩈᨴᩥᩈᨲ᩠ᨲᩣᩈᨻ᩠ᨻᨲᩕ ᨽᩁᨲᩦᨲᩥ ᨽᩁᨱᩦ. ᨿᩩ, ᩎ. ᩋᨣ᩠ᨣᩥᩈᨴᩥᩈᨲ᩠ᨲᩣ ᨠᨶ᩠ᨲᨲᩥ ᨨᩥᨶ᩠ᨴᨲᩦᨲᩥ ᨠᨲ᩠ᨲᩥᨠᩣ, ᨠᩁᩮᩣᨲᩥ ᨲᩈ᩠ᨾᩣ ᩅᩣ ᨠᨲ᩠ᨳᩥᨠᩣ, ᨠᨲ᩠ᨲᩥᨠᩣᨿ ᩈᩉᩥᨲᩣ ᩈᨠᨲ᩠ᨲᩥᨠᩣ. ᨽᩁᨱᩦ, ᩁᩮᩣᩉᩥᨱᩦ ᩅᩣ. ᨠᨾᩃᩈᨾ᩠ᨽᩅᨲ᩠ᨲᩣ ᨠᨾᩃᩮ ᩁᩩᩉᨲᩥ ᩅᨯ᩠ᨰᨲᩦᨲᩥ ᩁᩮᩣᩉᩥᨱᩦ. ᨾᩥᨣᩈᩦᩈᨱ᩠ᨮᩣᨶᨲ᩠ᨲᩣ ¶ ᨲᩣᩁᩣᨸᩩᨬ᩠ᨩᩮᩣ ᨾᩥᨣᩈᩥᩁᩴ, ᨨᨭ᩠ᨮᩦᩈᨾᩣᩈᩮᩣ ᩏᨲ᩠ᨲᩁᨸ᩠ᨸᨵᩣᨶᨲ᩠ᨲᩣ ᨶᨸᩩᩴᩈᨠᨲ᩠ᨲᩴ. ᩁᩩᨴ᩠ᨴᩁᩈᩣᩅᨭ᩠ᨮᩥᨲᨠᩮᩣᨵᩁᩩᨴ᩠ᨴᩈᨴᩥᩈᨲ᩠ᨲᩣ ᨠᨴᩣᨧᩥ ᩋᨴᨲᩥ ᨥᩈᨲᩦᨲᩥ ᩋᨴ᩠ᨴᩣ. ᨸᩩᨶᨸ᩠ᨸᩩᨶᩴ ᩈᨲ᩠ᨲᩮᩈᩩ ᩉᩥᨲᩴ ᩅᩔᨲᩦᨲᩥ ᨸᩩᨶᨻ᩠ᨻᩈᩩ, ᩅᩔ ᩈᩮᨧᨶᩮ. ᨸᩮᩣᩈᩮᨲᩥ ᨠᩕᩥᨿᩣᨶᩥ, ᨸᩮᩣᩈᩮᨶ᩠ᨲ᩠ᨿᩈ᩠ᨾᩥᨶ᩠ᨲᩥ ᩅᩣ ᨸᩩᩔᩮᩣ. ᨽᩩᨩᨣᩈᨴᩥᩈᨲ᩠ᨲᩣ ᨶ ᩈᩥᩃᩥᩈ᩠ᨿᨲᩮ ᨶᩣᩃᩥᨦ᩠ᨣ᩠ᨿᨲᩮᨲᩥ ᩋᩈᩥᩃᩮᩈᩮᩣ.

ᨾᩉᩦᨿᨲᩮ ᨠᩣᩁᩥᨿᨲ᩠ᨳᩥᨠᩮᩉᩦᨲᩥ ᨾᨥᩣ [ᨾᩣᨥᩣ (ᨠ.)], ᩉᩔ ᨥᩮᩣ. ᨹᩃᩴ ᨣᨱ᩠ᩉᩣᨸᩮᨲᩦᨲᩥ ᨹᨣ᩠ᨣᩩᨶᩦ, ᨿᩩ, ᩎ. ᨴ᩠ᩅᩮᨲᩥ ᨸᩩᨻ᩠ᨻᨹᨣ᩠ᨣᩩᨶᩦ, ᩏᨲ᩠ᨲᩁᨹᨣ᩠ᨣᩩᨶᩦ ᨧᩮᨲᩥ ᨴ᩠ᩅᩮ. ᩉᨲ᩠ᨳᩈᨱ᩠ᨮᩣᨶᨲᩣᨿ ᩉᨲ᩠ᨳᩮᩣ. ᨲᨧ᩠ᨨᨠᩈᨴᩥᩈᨲ᩠ᨲᩣ ᩅᩥᨧᩥᨲ᩠ᨲᩴ ᨹᩃᩴ ᨴᨴᩣᨲᩦᨲᩥ ᨧᩥᨲ᩠ᨲᩣ. ᩈᩮᩣᨽᨶᩣ ᩌᨲᩥ, ᩈᩣᨲᩥ ᩅᩣ ᨲᨶᩩᩴ ᨠᩁᩮᩣᨲᩥ ᩈᩩᨽᩣᩈᩩᨽᨶ᩠ᨲᩥ ᩈᩣᨲᩥ [ᩈ᩠ᩅᩣᨲᩥ (ᨠ.)], ᩈᩩᨽᩣᩈᩩᨽᨹᩃᨴᩣᨶᨲᩮᩣ ᩅᩣ ᩈᩣᨲᩥ, ‘‘ᩈᩣᨲᩥ ᨴᩣᨶᩣᩅᩈᩣᨶᩮᩈᩪ’’ᨲᩥ ᩉᩥ ᨶᩣᨶᨲ᩠ᨳᩈᨦ᩠ᨣᩉᩮ ᩅᩩᨲ᩠ᨲᩴ, ᩋᨿᩴ ᨴ᩠ᩅᩦᩈᩩ. ᩅᩥᩈᨴᩥᩈᩴ ᨹᩃᩴ ᨡᨱᨲᩦᨲᩥ ᩅᩥᩈᩣᨡᩣ, ᩅᩥᩅᩥᨵᩣ ᩅᩣ ᩈᨡᩣ ᨾᩥᨲ᩠ᨲᩣ ᨿᩔᩣ ᩈᩣ ᩅᩥᩈᩣᨡᩣ. ᩋᨶᩩᩁᩣᨵᨿᨲᩥ ᩈᩴᩈᩥᨩ᩠ᨫᨲᩥ ᩈᩩᨽᩣᩈᩩᨽᨹᩃᨾᩮᨲᩣᨿᩣᨲᩥ ᩋᨶᩩᩁᩣᨵᩣ. ᨣᩩᨱᩮᩉᩥ ᩈᨻ᩠ᨻᩣᩈᩴ ᩅᩩᨯ᩠ᨰᨲ᩠ᨲᩣ ᨩᩮᨭ᩠ᨮᩣ. ᨾᩪᩃᨲᩥ ᨸᨲᩥᨭ᩠ᨮᩣᨲᩥ ᩈᩩᨽᩣᩈᩩᨽᨹᩃᨾᩮᨲ᩠ᨳᩣᨲᩥ ᨾᩪᩃᩴ. ᩌᩈᩣᩊ᩠ᩉᩮᩣ ᨶᩣᨾ ᨽᨲᩦᨶᩴ ᨴᨱ᩠ᨯᩮᩣ, ᨲᩴᩈᨱ᩠ᨮᩣᨶᨲ᩠ᨲᩣ ᩌᩈᩣᩊ᩠ᩉᩣ ᨶᩣᨾ ᨴ᩠ᩅᩮ ᨶᨠ᩠ᨡᨲ᩠ᨲᩣ ᨸᩩᨻ᩠ᨻᩣᩈᩣᩊ᩠ᩉᩏᨲ᩠ᨲᩁᩣᩈᩣᩊ᩠ᩉᩅᩈᩮᨶ.

ᩈᩅᨲᩥ ᩈᩩᨽᩣᩈᩩᨽᨹᩃᨾᩮᨲᩮᨶᩣᨲᩥ ᩈᩅᨱᩮᩣ, ᩈᩅᨱᩴ ᩅᩣ. ᨵᨶᨾᩮᩈᨶ᩠ᨲᩥ ᩑᨲ᩠ᨳᩣᨲᩥ ᨵᨶᩥᨭ᩠ᨮᩣ, ᨵᨶᨲᩥ ᩅᩣ ᩅᩥᨽᩪᨲᩥ ᨶᩥᨵᩣᨶᩴ ᨵᨶᩥᨭ᩠ᨮᩣ. ᩈᨲᩴ ᨽᩥᩈᨩᩣ ᩑᨲ᩠ᨳ, ᩈᨲᨽᩥᩈᨩᩣᨶᩴ ᩅᩣ ᩋᨵᩥᨸᨲᩥ ᩈᨲᨽᩥᩈᨩᩮᩣ. ᨽᨴ᩠ᨴᩮᩣ ᨣᩮᩣ, ᨲᩔᩮᩅ ᨸᨴᩣᨶᩥ ᨸᩣᨴᩣ ᩋᩔᩴ ᨽᨴ᩠ᨴᨸᨴᩣ, ᨸᩩᨻ᩠ᨻᨽᨴ᩠ᨴᨸᨴᩣ ᨴ᩠ᩅᩮ, ᩏᨲ᩠ᨲᩁᨽᨴ᩠ᨴᨸᨴᩣ ᨴ᩠ᩅᩮ, ᩈᨾᩪᩉᩮᩣ ᨧᩮᩈᩴ ᨧᨲᩩᩈᨦ᩠ᨡ᩠ᨿᩣᨲᩥ ᨻᩉᩩᩅᨧᨶᩴ. ᩁᩣ ᩅᩩᨧ᩠ᨧᨲᩥ ᨵᨶᩴ, ᨲᨻ᩠ᨻᨶ᩠ᨲᨲᩣᨿ ᩁᩮᩅᨲᩦ, ᩌᨠᩣᩁᩔᩮ, ᩁᩮᩅᨲᩮᩣ ᩅᩣ ᩍᩈᩥᨽᩮᨴᩮᩣ, ᨲᩔ ᩋᨸᨧ᩠ᨧᩴ ᩁᩮᩅᨲᩦ.

᪖᪑. ᨴ᩠ᩅᨿᩴ ¶ ᩁᩣᩉᩩᨣ᩠ᨣᩉᩮ. ᩈᩮᩣ ᩅᩩᨧ᩠ᨧᨲᩥ ᩈᨣ᩠ᨣᩮᩣ, ᨲᨲ᩠ᨳ ᨽᩣᨲᩦᨲᩥ ᩈᩮᩣᨻ᩠ᨽᩣᨶᩩ. ᩁᩉᨲᩥ ᨧᨶ᩠ᨴᩣᨴᩦᨶᩴ ᩈᩮᩣᨽᩴ ᨩᩉᩣᨸᩮᨲᩦᨲᩥ ᩁᩣᩉᩩ. ᨲᨾᩮᩣ, ᩅᩥᨵᩩᨶ᩠ᨲᩩᨴᩮᩣ, ᨧᨶ᩠ᨴᩣᨴᩮᩣ, ᩈᩮᩉᩥᨠᩮᨿᩮᩣᨲᩥᨸᩥ ᩁᩣᩉᩩᩔ ᨶᩣᨾᩣᨶᩥ.

ᩈᩪᩁ, ᨧᨶ᩠ᨴ, ᩋᨦ᩠ᨣᩣᩁᨠ, ᨻᩩᨵ, ᨩᩦᩅ, ᩈᩩᨠ᩠ᨠ, ᩋᩈᩥᨲ, ᩁᩣᩉᩩ, ᨠᩮᨲᩪᨲᩥ ᩑᨲᩮ ᩈᩪᩁᩣᨴᨿᩮᩣ ᨶᩅᨣ᩠ᨣᩉᩣ ᨶᩣᨾ.

ᨾᩮᩈᩣᨴᩥᨠᩮᩣ ᨴ᩠ᩅᩣᨴᩈᨠᩮᩣᨭ᩠ᨮᩣᩈᩮᩣ ᩁᩣᩈᩥ ᨶᩣᨾ. ᩌᨴᩥᨶᩣ ᩏᩈᨽ, ᨾᩮᨳᩩᨶ, ᨠᨠ᩠ᨠᨭ, ᩈᩦᩉ, ᨠᨬ᩠ᨬᩣ, ᨲᩩᩃᩣ, ᩅᩥᨧ᩠ᨨᩥᨠ, ᨵᨶᩩ, ᨾᨠᩁ, ᨠᩩᨾ᩠ᨽ, ᨾᩦᨶᩮ ᩈᨦ᩠ᨣᨱ᩠ᩉᩣᨲᩥ.

ᨴ᩠ᩅᨿᩴ ᨽᨴ᩠ᨴᨸᨴᨶᨠ᩠ᨡᨲ᩠ᨲᩣᨶᩴ ᨶᩣᨾᩴ. ᨸᩮᩣᨭ᩠ᨮᩮᩣ ᨣᩮᩣ [ᨸᩣᨮᩮᩣ ᨽᨴ᩠ᨴᩮᩣ ᨣᩮᩣ (ᨠ.)], ᨲᩔᩮᩅ ᨸᨴᩣᨶᩥ ᨸᩣᨴᩣ ᩋᩔᩴ ᨸᩮᩣᨭ᩠ᨮᨸᨴᩣ.

᪖᪒-᪖᪓. ᨸᨩ᩠ᨩᨴ᩠ᩅᨿᩮᨶ ᩈᩪᩁᩥᨿᩔ ᨶᩣᨾᩣᨶᩥ. ᩌ ᨽᩩᩈᩮᩣ ᨴᩥᨸ᩠ᨸᨲᩦᨲᩥ ᩌᨴᩥᨧ᩠ᨧᩮᩣ, ᨸ᩠ᨸᩔ ᨧ᩠ᨧᩮᩣ. ᩃᩮᩣᨠᩣᨶᩴ ᩈᩪᩁᨽᩣᩅᩴ ᨩᨶᩮᨲᩦᨲᩥ ᩈᩪᩁᩥᨿᩮᩣ. ᨲᨳᩣ ᩈᩪᩁᩮᩣ. ᩈᨲᩴ ᨻᩉᩅᩮᩣ ᩁᩴᩈᨿᩮᩣ ᨿᩔ ᩈᨲᩁᩴᩈᩥ. ᨴᩥᩅᩣ ᨴᩥᩅᩈᩴ ᨠᩁᩮᩣᨲᩦᨲᩥ ᨴᩥᩅᩣᨠᩁᩮᩣ, ᨴᩥᩅᩈᩮ ᩅᩣ ᨠᩁᩮᩣ ¶ ᩌᨽᩣ ᨿᩔ ᨴᩥᩅᩣᨠᩁᩮᩣ, ᨴᩥᩅᩣᩈᨴ᩠ᨴᩮᩣᨿᩴ ᩈᨻ᩠ᨻᨠᩣᩁᨠᩅᨧᨶᩮᩣ, ᨶ ᨲᩩ ᩌᨵᩣᩁᩅᨧᨶᩮᩣ ᩑᩅ. ᩅᩥᩈᩮᩈᩮᨶ ᩁᩮᩣᨧᨲᩮ ᨴᩥᨸ᩠ᨸᨲᩮᨲᩥ ᩅᩮᩁᩮᩣᨧᨶᩮᩣ. ᨴᩥᨶᩴ ᨠᩁᩮᩣᨲᩥ, ᨠᩩᨾᩩᨴᩣᨶᩴ ᩅᩣ ᨴᩥᨶᩴ ᨾᩣᨠᩩᩃ᩠ᨿᩴ ᨠᩁᩮᩣᨲᩦᨲᩥ ᨴᩥᨶᨠᩁᩮᩣ, ᩏᨱ᩠ᩉᩮᩣ ᩁᩴᩈᩥ ᨿᩔ ᩏᨱ᩠ᩉᩁᩴᩈᩥ. ᨸᨽᩴ ᨠᩁᩮᩣᨲᩦᨲᩥ ᨸᨽᨦ᩠ᨠᩁᩮᩣ.

ᩋᩴᩈᩩᨶᩮᩣ ᨾᩣᩃᩣ, ᩈᩣ ᨿᨲ᩠ᨳ ᩋᨲ᩠ᨳᩥ ᩋᩴᩈᩩᨾᩣᩃᩦ. ᨴᩥᨶᩣᨶᩴ ᨸᨲᩥ ᨴᩥᨶᨸᨲᩥ. ᨲᨸᨲᩦᨲᩥ ᨲᨸᨶᩮᩣ. ᩁᩅᨶ᩠ᨲᩥ ᩑᨲᩮᨶ ᩈᨲ᩠ᨲᩣ ᨸᨽᩣᩅᩥᨲ᩠ᨲᩣᨲᩥ ᩁᩅᩥ. ᨽᩣᨶᩩ ᨿᩔ ᩋᨲ᩠ᨳᩦᨲᩥ ᨽᩣᨶᩩᨾᩣ. ᩁᩴᩈᩥ ᨿᩔ ᩋᨲ᩠ᨳᩦᨲᩥ ᩁᩴᩈᩥᨾᩣ. ᨽᩴ ᩌᨽᩴ ᨠᩁᩮᩣᨲᩥ, ᨲᩣᩈᩴ ᩅᩣ ᩌᨠᩁᩮᩣ ᩏᨸ᩠ᨸᨲ᩠ᨲᩥᨭ᩠ᨮᩣᨶᩴ ᨽᩣᨠᩁᩮᩣ. ᨽᩣᨲᩥ ᨴᩥᨸ᩠ᨸᨲᩦᨲᩥ ᨽᩣᨶᩩ. ᨴᩮᩅᩮᩉᩥᨸᩥ ᩋᨧ᩠ᨧᨲᩮ ᨸᩪᨩᩦᨿᨲᩮᨲᩥ ᩋᨠ᩠ᨠᩮᩣ. ᩈᩉᩔᩴ ᨻᩉᩅᩮᩣ ᩁᩴᩈᨿᩮᩣ ᨿᩔ ᩈᩉᩔᩁᩴᩈᩥ. ᨴ᩠ᩅᩣᨴᩈᨲ᩠ᨲᩣ, ᨸᨽᩣᨠᩁᩮᩣ, ᩅᩥᨽᩣᨠᩁᩮᩣ, ᩅᩥᨠᨲ᩠ᨲᨶᩮᩣ [ᩅᩥᩔᨠᨾ᩠ᨾᩩᨶᩣ ᩅᩥᨠᨲ᩠ᨲᩥᨲᩮᩣ, ᨠᨾ᩠ᨾᨶᩥ ᨿᩩ (ᨧᩥᨶ᩠ᨲᩣᨾᨱᩥᨭᩦᨠᩣ)], ᨾᨲ᩠ᨲᨱ᩠ᨯᩮᩣ, ᨴᩥᩅᨾᨱᩥ, ᨲᩁᨱᩥ, ᨾᩥᨲ᩠ᨲᩮᩣ, ᨧᩥᨲᩕᨽᩣᨶᩩ, ᩅᩥᨽᩣᩅᩈᩩ, ᨣᩉᨸ᩠ᨸᨲᩥ, ᩉᩴᩈᩮᩣ, ᩈᩅᩥᨲᩣᩍᨧ᩠ᨧᩣᨴᩦᨶᩥᨸᩥ ᩈᩪᩁᩥᨿᩔ ᨶᩣᨾᩣᨶᩥ.

᪖᪔. ᨸᨩ᩠ᨩᩮᨶ ᩈᩪᩁᩥᨿᩣᨴᩦᨶᩴ ᩁᩴᩈᩥᨸ᩠ᨸᨽᩣᨶᩴ ᨶᩣᨾᩣᨶᩥ. ᩁᩈᨶ᩠ᨲᩥ ᨲᩴ ᩈᨲ᩠ᨲᩣᨲᩥ ᩁᩴᩈᩥ. ᩌ ᨽᩩᩈᩮᩣ ᨽᩣᨲᩦᨲᩥ ᩌᨽᩣ. ᨸᨠᩣᩁᩮᨶ ᨽᩣᨲᩦᨲᩥ ᨸᨽᩣ. ᨴᩥᨸ᩠ᨸᨲᩦᨲᩥ ᨴᩥᨲ᩠ᨲᩥ. ᩁᩮᩣᨧᨲᩮ ᨴᩥᨸ᩠ᨸᨲᩮᨲᩥ ᩁᩩᨧᩥ. ᨴᩦᨵ᩠ᨿᨲᩥ ᨴᩥᨸ᩠ᨸᨲᩦᨲᩥ ᨴᩦᨵᩥᨲᩥ. ᨴᩥᨸ᩠ᨸᨲᩦᨲᩥ ᩅᩣ ᨴᩦᨵᩥᨲᩥ, ᨸᩔ ᨵᩮᩣ, ᩍᨠᩣᩁᩣᨣᨾᩮᩣ. ᨾᩥᨿ᩠ᨿᨶ᩠ᨲᩮ ᨡᩩᨴ᩠ᨴᨩᨶ᩠ᨲᩅᩮᩣ ᩋᨶᩮᨶᩮᨲᩥ ᨾᩁᩦᨧᩥ, ᩎᨧᩥ. ᩋᩈᨲᩥ ᨣᨧ᩠ᨨᨲᩥ ᨴᩥᩈᨶ᩠ᨲᨶ᩠ᨲᩥ ᩋᩴᩈᩩ, ᩏᩔᩣᨣᨾᩮᩣ. ᨾᩁᩦᨧᩥᩈᩉᨧᩁᨱᨲᩮᩣ ᨴᩦᨵᩥᨲ᩠ᨿᩣᨴᨿᩮᩣ [ᨡᩃᩥᨲᨸᩣᨮᩮᩣ (?), ᩈᩅᩁᩈᩣᨾᩦ ᨲᩩ ᩋᨦ᩠ᨣᩩᩃᩥ ᨠᩣᨠᩃᩥᩈᩣᩁᩥ ᩈᩁᩣᩁᩥ ᨲᩩᨾ᩠ᨻᩥᩋᩁᩥ ᩈᩩᩈᩥ ᨴᩦᨾᩥᨲ᩠ᨿᨲ᩠ᨲᨿᩮᩣ ᨳᩦᨸᩩᨾᩮᩈᩩ ᩍᨧ᩠ᨧᩣᩉ (ᨧᩥᨶ᩠ᨲᩣᨾᨱᩥᨭᩦᨠᩣ)] ᨽᩣᨶᩩ ᩋᩴᩈᩩ ᨧ ᨴ᩠ᩅᩦᩈᩩ. ᨾᨿ ᨣᨾᨶᨲ᩠ᨳᩮᩣ ¶ ᨴᨱ᩠ᨯᨠᩮᩣ ᨵᩣᨲᩩ [ᨴᨱ᩠ᨯᨠᨸ᩠ᨸᨠᩁᨱᩮ ᩌᨣᨲᨵᩣᨲᩪᨲᩥ ᩋᨲ᩠ᨳᩮᩣ, ᨶᩥᩁᩩᨲ᩠ᨲᩥᩈᩣᩁᨾᨬ᩠ᨩᩩᩈᩣᨭᩦᨠᩣᨿᩴ ᪒᪕᪓.᪔᪑᪓ ᨸᩥᨭ᩠ᨮᩮᩈᩩ ᨸᩔᩥᨲᨻ᩠ᨻᩴ], ᨡᨸᨧ᩠ᨧᨿᩮᩣ ᩐᨠᩣᩁᩣᨣᨾᩮᩣ, ᩋᨳ ᩅᩣ ᨾᩣ ᨾᩣᨶᩮ, ᩏᨡ ᨣᨲ᩠ᨿᨲ᩠ᨳᩮᩣ ᨴᨱ᩠ᨯᨠᩮᩣ ᨵᩣᨲᩩ [ᨴᨱ᩠ᨯᨠᨸ᩠ᨸᨠᩁᨱᩮ ᩌᨣᨲᨵᩣᨲᩪᨲᩥ ᩋᨲ᩠ᨳᩮᩣ, ᨶᩥᩁᩩᨲ᩠ᨲᩥᩈᩣᩁᨾᨬ᩠ᨩᩩᩈᩣᨭᩦᨠᩣᨿᩴ ᪒᪕᪓.᪔᪑᪓ ᨸᩥᨭ᩠ᨮᩮᩈᩩ ᨸᩔᩥᨲᨻ᩠ᨻᩴ], ᨾᩣᨿ ᨾᩣᨶᩣᨿ ᩏᨡᨲᩦᨲᩥ ᨾᨿᩪᨡᩮᩣ [ᨾᩣᨸᩈᩴ ᨣᨣᨶᩴ ᨸᨾᩣᨱᨿᩴ ᩏᨡᨲᩥ ᨣᨧ᩠ᨨᨲᩦᨲᩥ ᨸᩥᩈᩮᩣᨴᩁᩣᨴᩥ (ᨧᩥᨶ᩠ᨲᩣᨾᨱᩥᨭᩦᨠᩣ)]. ᨠᩥᩁᨲᩥ ᨲᩥᨾᩥᩁᩴ ᨠᩥᩁᨱᩮᩣ. ᨠᩥᩁᨲᩥ ᨲᩥᨾᩥᩁᩴ ᨠᩁᩮᩣ.

᪖᪕. ᨴ᩠ᩅᨿᩴ ᩌᨴᩥᨧ᩠ᨧᨾᨱ᩠ᨯᩃᩮᩣᨲᩥᨡ᩠ᨿᩣᨲᩮ ᩏᨸ᩠ᨸᩣᨲᩣᨴᩥᨩᩣᨲᩮ ᩁᩴᩈᩥᨾᨱ᩠ᨯᩃᩮ. ᩈᩪᩁᩥᨿᩔ ᨸᩁᩥ ᩈᨾᨶ᩠ᨲᨲᩮᩣ ᨵᩦᨿᨲᩮ ᨸᩁᩥᨵᩦ, ᨸᩁᩥ ᩈᨾᨶ᩠ᨲᨲᩮᩣ ᩅᩥᩈᨲᩦᨲᩥ ᨸᩁᩥᩅᩮᩈᩮᩣ, ᩈᩪᩁᩥᨿᩴ ᩅᩣ ᨸᩁᩥᩅᩮᨮᨿᨲᩦᨲᩥ ᨸᩁᩥᩅᩮᩈᩮᩣ. ᨮᩔ ᩈᩮᩣ. ᩏᨸᩈᩪᩁᩥᨿᨠᩴ, ᨾᨱ᩠ᨯᩃᨶ᩠ᨲᩥ ᨴ᩠ᩅᩮᨸᩥ ᨸᩁᩥᨵᩥᨶᩮᩣ ᨶᩣᨾᩣᨶᩥ.

ᨴ᩠ᩅᨿᩴ ᨾᩁᩦᨧᩥᨠᩣᨿᩴ. ᨾᩁᩦᨧᩥᩈᨴᩥᩈᨲᩣᨿ ᨾᩁᩦᨧᩥ. ᨾᩥᨣᩣᨶᩴ ᨲᨱ᩠ᩉᩣ ᨸᩥᨸᩣᩈᩣ ᨿᩔᩴ ᨩᩃᩣᨽᩣᩈᨲ᩠ᨲᩣ ᩈᩣ ᨾᩥᨣᨲᨱ᩠ᩉᩥᨠᩣ.

ᩈᩪᩁᩥᨿᩔ ᩏᨴᨿᨲᩮᩣ ᨸᩩᨻ᩠ᨻᩮ ᩏᨭ᩠ᨮᩥᨲᩁᩴᩈᩥ ᩏᨣ᩠ᨣᨲᩁᩴᩈᩥ ᩋᩁᩩᨱᩮᩣ ᨶᩣᨾ ᩈᩥᨿᩣ. ᩋᩁᩩᨱᩅᨱ᩠ᨱᨲᩣᨿ ᩋᩁᨲᩥ ᨣᨧ᩠ᨨᨲᩦᨲᩥ ᩋᩁᩩᨱᩮᩣ. ᩈᩪᩁᩈᩪᨲᩮᩣ, ᩋᨶᩪᩁᩩ, ᨠᩔᨸᩮᨿ᩠ᨿᩮᩣ, ᨠᩔᨸᩥ, ᨣᩁᩩᨯᩣᨣ᩠ᨣᨩᩮᩣᨲᩥᨸᩥ ᩋᩁᩩᨱᩔ ᨶᩣᨾᩣᨶᩦᨲᩥ. ᩌᨠᩣᩈᩅᨱ᩠ᨱᨶᩣ.

᪖᪖-᪖᪗. ᨧᨲᩩᨠ᩠ᨠᩴ ¶ ᨠᩣᩃᩮ. ᨠᩃ᩠ᨿᨶ᩠ᨲᩮ ᩈᨦ᩠ᨡ᩠ᨿᩣᨿᨶ᩠ᨲᩮ ᩌᨿᩩᨸ᩠ᨸᨾᩣᨱᩣᨴᨿᩮᩣ ᩋᨶᩮᨶᩣᨲᩥ ᨠᩣᩃᩮᩣ, ᨠᩁᨱᩴ ᩅᩣ ᨠᩣᩁᩮᩣ, ᨽᩣᩅᩮ ᨱᩮᩣ, ᩈᩮᩣ ᩑᩅ ᨠᩣᩃᩮᩣ, ᨶ ᩉᩥ ᨠᩕᩥᨿᩣᩅᩥᨶᩥᨾᩩᨲ᩠ᨲᩮᩣ ᨠᩣᩃᩮᩣ ᨶᩣᨾ ᨠᩮᩣᨧᩥ ᩋᨲ᩠ᨳᩥ, ᨾᩉᩣᨠᩣᩃᩔ ᨸᨶ ᩈᩔᨲᨽᩣᩅᨲᩮᩣ ᩋᨲᩦᨲᩣᨴᩥᩅᩮᩣᩉᩣᩁᩮᩣ ᨶᨲ᩠ᨳᩮᩅᩣᨲᩥ ᩋᩅᨿᩅᨠᩣᩃᩣᨶᩴ ᩈᨾᩪᩉᨽᩣᩅᨲᩮᩣ ᩈᩮᩣᨸᩥ ‘‘ᨠᩣᩃᩮᩣ’’ᨲᩥ ᩅᩩᨲ᩠ᨲᩮᩣ. ᩈᨲ᩠ᨲᩣᨶᩴ ᨩᩦᩅᩥᨲᩴ ᩋᩈᨲᩥ ᨡᩮᨸᩮᨲᩦᨲᩥ ᩋᨴ᩠ᨵᩣ, ᨲᩔ ᨵᩮᩣ, ᩌᨠᩣᩁᨶ᩠ᨲᩮᩣᨿᩴ ᩋᨴ᩠ᨵᩣᩈᨴ᩠ᨴᩮᩣ ᨸᩩᨾᩮ. ᨸᩩᨶᨸ᩠ᨸᩩᨶᩴ ᩑᨲᩦᨲᩥ ᩈᨾᨿᩮᩣ. ᩅᩥᨶᩣᩈᩴ ᩃᩣᨲᩦᨲᩥ ᩅᩮᩃᩣ, ᩅᨱ᩠ᨱᩃᩮᩣᨸᩮᩣ. ᨴᩥᨭ᩠ᨮᩮᩣ, ᩋᨶᩮᩉᩮᩣᨲᩥᨸᩥ ᨠᩣᩃᩔᩮᩅᨶᩣᨾᩣᨶᩥ.

ᨡᨱᩣᨴᨿᩮᩣ ᨸᨶ ᨲᨻ᩠ᨻᩥᩈᩮᩈᩣ ᨲᩔ ᨠᩣᩃᩔ ᩅᩥᩈᩮᩈᩣ ᨽᩮᨴᩣ. ᨠᩮ ᨲᩮ, ᨠᩥᨲ᩠ᨲᨠᨸ᩠ᨸᨾᩣᨱᩣ ᨧᩮᨲ᩠ᨿᩣᩉ ‘‘ᨡᨱᩮᩣ’’ᩍᨧ᩠ᨧᩣᨴᩥ. ᨴᩈᩉᩥ ᩋᨧ᩠ᨨᩁᩣᩉᩥ ᩋᨦ᩠ᨣᩩᩃᩥᨹᩮᩣᨭᨶᩮᩉᩥ ᩃᨠ᩠ᨡᩥᨲᩮᩣ ᨠᩣᩃᩮᩣ ᨡᨱᩮᩣ ᨶᩣᨾ, ᨡᨱᩩ ᩉᩥᩴᩈᩣᨿᩴ, ᨡᨱᩮᩣᨲᩦᨲᩥ ᨡᨱᩮᩣ, ᩋ. ᨴᩈ ᨡᨱᩣ ᩃᨿᩮᩣ ᨶᩣᨾ ᨽᩅᩮ ᨽᩅᨶ᩠ᨲᩥ, ᩑᨲᩮᨶ ᩅᩣ ᩅᨧᨶᩮᨶ ᩅᩥᨠᨽᩥᩈᨦ᩠ᨡ᩠ᨿᩣᨸᩮᨠ᩠ᨡᩥᨶᩮᩣᨸᩥ ᩅᩣᨧᨠᩣ ᩈᨶ᩠ᨲᩦᨲᩥ ᨣᨾ᩠ᨿᨲᩮ. ᩃᨿᨲᩥ ᨣᨧ᩠ᨨᨲᩥ, ᩈᨲ᩠ᨲᩣᨶᩴ ᨩᩦᩅᩥᨲᩴ ᩃᩩᨶᨶ᩠ᨲᩮᩣ ᩅᩣ ᩋᨿᨲᩥ ᨣᨧ᩠ᨨᨲᩦᨲᩥ ᩃᨿᩮᩣ. ᨴᩈ ᩃᨿᩣ ᨡᨱᩃᨿᩮᩣ ᨶᩣᨾ, ᨡᨱᩃᨿᩣᨶᩴ ᩈᨾᩪᩉᨽᩣᩅᨲᩮᩣ. ᨲᩮ ᨴᩈ ᨡᨱᩃᨿᩣ ᨾᩩᩉᩩᨲ᩠ᨲᩮᩣ ᨶᩣᨾ ᩈᩥᨿᩣ ᩈᩥᨿᩩᩴ ᩅᩣ, ᩋᨿᨾᨶᩥᨲ᩠ᨳᩦ. ᩉᩩᨧ᩠ᨨ ᨠᩮᩣᨭᩥᩃ᩠ᨿᩮ ¶ , ᨠᩩᨭᩥᩃᨿᨲᩥ ᩁᨲ᩠ᨲᩥᨴᩥᩅᩈᩮ ᩈᩩᨽᩣᩈᩩᨽᨴᩔᨶᨲᩮᩣᨲᩥ ᨾᩩᩉᩩᨲ᩠ᨲᩮᩣ, ᨲᩮᩣ, ᨵᩣᨲᩩᨿᩣᨴᩥᨾ᩠ᩉᩥ ᨾᩩᨠᩣᩁᩣᨣᨾᩮᩣ, ᨧ᩠ᨨᩃᩮᩣᨸᩮᩣ ᨧ. ᨲᩮ ᨴᩈ ᨾᩩᩉᩩᨲ᩠ᨲᩣ ᨡᨱᨾᩩᩉᩩᨲ᩠ᨲᩮᩣ ᨶᩣᨾ.

ᨲᩥᨠᩴ ᨴᩥᨶᩮ. ᨴᩥᨻ᩠ᨻᨶ᩠ᨲᩥ ᨠᩦᩊᨶ᩠ᨲ᩠ᨿᩈ᩠ᨾᩥᩴ ᨴᩥᩅᩈᩮᩣ, ᩈᩮᩣ. ᨶ ᨩᩉᩣᨲᩥ ᨸᨧ᩠ᨧᩣᨣᨾᨶᩴ ᩋᩉᩴ. ᩌᨴᨴᩣᨲᩥ ᨶᩥᨻ᩠ᨿᩣᨸᩣᩁᨶ᩠ᨲᩥ ᨴᩥᨶᩴ, ᩍᨶᩮᩣ, ᩌᩃᩮᩣᨸᩮᩣ ᨧ, ᨴᩥᨻ᩠ᨻᨲᩥ ᩅᩣ ᩑᨲ᩠ᨳᩣᨲᩥ ᨴᩥᨶᩴ, ᩅᩔ ᨶᩮᩣ. ᨥᩈᩁᩮᩣ [ᨥᩈᨲᩥ ᩋᨶ᩠ᨵᨠᩣᩁᩴ ᩁᩮᩣ (ᨧᩥᨶ᩠ᨲᩣᨾᨱᩥᨭᩦᨠᩣ)], ᩅᩣᩈᩁᩮᩣᨲᩥᨸᩥ ᨴᩥᨶᩔ ᨶᩣᨾᩣᨶᩥ.

᪖᪘. ᨠᩃ᩠ᩃᨶ᩠ᨲᩴ ᨸᨧ᩠ᨧᩪᩈᩮ. ᨸᨽᩣᨲ᩠ᨿᩈ᩠ᨾᩥᩴ ᩃᩮᩣᨠᩮᩣᨲᩥ ᨸᨽᩣᨲᩴ. ᨲᨳᩣ ᩅᩥᨽᩣᨲᩴ. ᩏᩈ ᩁᩩᨩᩣᨿᩴ, ᨸᨧ᩠ᨧᩪᩈᨲᩥ ᩅᩥᨶᩣᩈᩮᨲᩥ ᨲᩥᨾᩥᩁᨶ᩠ᨲᩥ ᨸᨧ᩠ᨧᩪᩈᩮᩣ. ᨠᩃ᩠ᨿᨶ᩠ᨲᩮ ᩈᨦ᩠ᨡ᩠ᨿᩣᨿᨶ᩠ᨲᩮ ᩋᨶᩮᨶ ᩈᨦ᩠ᨡ᩠ᨿᩣᨴᨿᩮᩣᨲᩥ ᨠᩃ᩠ᩃᩴ. ᩋᩉᩮᩣᨾᩩᨡᩴ, ᩐᩈᩮᩣᨲᩥᨸᩥ ᨸᨧ᩠ᨧᩪᩈᩔ ᨶᩣᨾᩣᨶᩥ.

ᨴ᩠ᩅᨿᩴ ᨸᨴᩮᩣᩈᩮ. ᨴᩮᩣᩈᩣᨿ ᩁᨲ᩠ᨲᩥᨿᩣ ᩌᩁᨾ᩠ᨽᩮᩣ ᩋᨽᩥᨴᩮᩣᩈᩮᩣ. ᨴᩮᩣᩈᩣᨿ ᩁᨲ᩠ᨲᩥᨿᩣ ᨸᩣᩁᨾ᩠ᨽᩮᩣ ᨸᨴᩮᩣᩈᩮᩣ. ᩋᨽᩥᨵᩣᨶᨲᩮᩣ ᨸᩣᩈᨴ᩠ᨴᩔ ᨸᩩᨻ᩠ᨻᨶᩥᨸᩣᨲᩮᩣ, ᩋᨸ᩠ᨸᨵᩣᨶᩁᩔᩮᩣ ᨧ, ᩋᨳ ᩅᩣ ᩋᨽᩥᨴᩩᩔᨶ᩠ᨲᩥ ᨸᨴᩩᩔᨶ᩠ᨲᩥ ᨧ ᨿᨲ᩠ᨳ ᩈᨻ᩠ᨻᨠᨾ᩠ᨾᩣᨶᩥ ᩋᨽᩥᨴᩮᩣᩈᩮᩣ ᨸᨴᩮᩣᩈᩮᩣ ᨧ.

ᨲᩥᨠᩴ ᩈᩣᨿᨶ᩠ᩉᩮ. ᩈᩣᨿᨲᩥ ᨴᩥᨶᩴ ᩋᩅᩈᩣᨿᨲᩦᨲᩥ ᩈᩣᨿᩮᩣ, ᩈᩣᨿᨶ᩠ᨲᩮᩣ ᩅᩣ ᨴᩥᨶᨶ᩠ᨲᩴ ᨠᩁᩮᩣᨶ᩠ᨲᩮᩣ ᩋᨿᨲᩦᨲᩥ ᩈᩣᨿᩮᩣ, ᨸᩩᨶ᩠ᨶᨸᩩᩴᩈᨠᩮ. ᩈᨾ᩠ᨾᩣᨫᩣᨿᨶ᩠ᨲᩥ ᨲᩴ ᩈᨬ᩠ᨫᩣ, (‘‘ᨻᩕᩉ᩠ᨾᩩᨶᩮᩣ ᨲᨶᩩ ᨸᩥᨲᩣ ᩃᩮᩣᨠᩔ ᨩᨶᩮᨲ᩠ᨲᩦ’’ᨲᩥ ᩉᩥ ᩌᨣᨾᩮᩣ ᨶᩥᨠᩣᨿᨶ᩠ᨲᩁᩥᨠᩣᨶᩴ.) ¶ [( ) ᩑᨲ᩠ᨳᨶ᩠ᨲᩁᩮ ᨸᩣᨮᩮᩣ ᩋᨵᩥᨠᩮᩣ ᩅᩥᨿ ᨴᩥᩔᨲᩥ] ᨴᩥᨶᩣᨶᩴ ᩋᨧ᩠ᨧᨿᩮᩣ ᩋᨲᩥᨠ᩠ᨠᨾᩮᩣ, ᩋᩅᩈᩣᨶᩴ ᩅᩣ ᨴᩥᨶᨧ᩠ᨧᨿᩮᩣ. ᨴᩥᨶᨶ᩠ᨲᩮᩣᨲᩥᨸᩥ ᨲᩔᩮᩅ ᨶᩣᨾᩴ.

ᨸᩩᨻ᩠ᨻᨱ᩠ᩉᩣᨸᩁᨱ᩠ᩉᨾᨩ᩠ᨫᨶ᩠ᩉᩅᩈᩮᨶ ᨲᩥᩅᩥᨵᩣ ᩈᨬ᩠ᨫᩣ [ᩋᨾᩁ ᪔.᪓]. ᨸᩩᨻ᩠ᨻᨬ᩠ᨧ ᨲᩴ ᩋᩉᨬ᩠ᨧᩣᨲᩥ ᨸᩩᨻ᩠ᨻᨱ᩠ᩉᩴ. ᩋᨸᩁᨬ᩠ᨧ ᨲᩴ ᨾᨩ᩠ᨫᨬ᩠ᨧ ᨲᩴ ᩋᩉᨬ᩠ᨧᩮᨲᩥ ᩋᨸᩁᨱ᩠ᩉᩴ ᨾᨩ᩠ᨫᨶ᩠ᩉᩴ. ᩈᨻ᩠ᨻᨲᩕᩣᩅᨿᩅᩮ ᩈᨾᩩᨴᩣᨿᩮᩣᨸᨧᩣᩁᨲᩮᩣ ᩋᩉᩔᩮᨠᨴᩮᩈᩮ ᩋᩉᩈᨴ᩠ᨴᩮᩣᨲᩥ ᨠᨾ᩠ᨾᨵᩣᩁᨿᩮᩣ, ᨲᩣᩈᩴ ᨲᩥᩔᨶ᩠ᨶᩴ ᩈᨬ᩠ᨫᩣᨶᩴ ᩈᨾᩣᩉᩣᩁᩮᩣᨲᩥ ᩈᨬ᩠ᨫᨾᩥᨲ᩠ᨿᩩᨧ᩠ᨧᨲᩮ. ᩈᨾᩣᩉᩁᨱᩴ ᩈᨾᩣᩉᩣᩁᩮᩣ, ᩑᨠᩦᨽᩣᩅᩮᩣ, ᩈᩮᩣ ᨧ ᨽᩥᨶ᩠ᨶᨠᩣᩃᩣᨶᩴ ᨶ ᨽᩅᨲᩦᨲᩥ ᨻᩩᨴ᩠ᨵᩥᨿᩣ ᩈᨾᨠᩣᩃᨣ᩠ᨣᩉᨱᨲᩮᩣ ᩑᨠᨠᩣᩃᨲ᩠ᨲᩣ ᨲᩈ᩠ᨾᩥᩴ ᩋᨽᩥᨵᩮᨿ᩠ᨿᩮ ᨴᩥᨣᩩᩈᨾᩣᩈᩮᩣ, ᨲᨳᩣ ᩉᩥ ᩈᨾᩣᩉᩣᩁᩮᩣ ᩈᨾᩪᩉᩮᩣ ᨲᩴᩈᨾ᩠ᨻᨶ᩠ᨵᩮ ᨨᨭ᩠ᨮᩥᨿᩣᨿᩮᩅ ᨽᩅᩥᨲᨻ᩠ᨻᨶ᩠ᨲᩥ ᨧᩥᨶ᩠ᨲᩮᨶ᩠ᨲᩮᩣ ᩌᨧᩁᩥᨿᩮᩣ ᨶ ᩋᨬ᩠ᨬᨸᨴᨲ᩠ᨳᩈᨾᩣᩈᩮᩣ ᩋᨿᨶ᩠ᨲᩥ ᩌᨠᩣᩁᩔᩣᨸ᩠ᨸᨵᩣᨶᩮ ᩁᩔᨲ᩠ᨲᨶ᩠ᨲᩥ ᩈᨬ᩠ᨫᩴ. ᩈᨾᩣᩉᩣᩁᩮᩣ ᨽᩣᩅᩮᩣ ᨲᩔᩮᨠᨲ᩠ᨲᩣ ᩑᨠᩅᨧᨶᩴ, ᨠᨾ᩠ᨾᩅᨧᨶᩮ ᨲᩩ ᩈᨾᩣᩉᩣᩁᩮ ᨲᩥᩔᩮᩣ ᩈᨬ᩠ᨫᩣ ᩈᨾᩣᩉᨭᩣᨲᩥ ᨸᨮᨾᨶ᩠ᨲᩣᨶᩴ ᩈᨾᩣᩈᩮ ᩈᨸᨴᨲ᩠ᨳᨸᩣᨵᩣᨶ᩠ᨿᩣ ᨻᩉᩩᩅᨧᨶᩴ, ᩁᩔᩣᨽᩣᩅᩮᩣ ᨧ.

᪖᪙. ᨸᨬ᩠ᨧᨠᩴ ᩁᨲ᩠ᨲᩥᨿᩴ. ᨶᩥᩈᨲᩥ ᨲᨶᩩᩴ ᨠᩁᩮᩣᨲᩥ ᩈᨻ᩠ᨻᨻ᩠ᨿᩣᨸᩣᩁᩴ ᨶᩥᩈᩣ. ᩁᨩ᩠ᨩᨶ᩠ᨲᩥ ᩁᩣᨣᩥᨶᩮᩣ ᩋᨲᩕ ᩁᨩᨶᩦ, ᨿᩩ, ᩎ. ᩁᩣᨲᩥ ᨣᨱ᩠ᩉᩣᨲᩥ ᩋᨻ᩠ᨿᩣᨸᩣᩁᨶ᩠ᨲᩥ ᩁᨲ᩠ᨲᩥ,ᨲᩥ, ᩁᨩ᩠ᨩᨶ᩠ᨲᩥ ᩅᩣ ᩑᨲ᩠ᨳ ᩁᨲ᩠ᨲᩥ. ᨸᨮᨾᨾᨩ᩠ᨫᩥᨾᨸᨧ᩠ᨨᩥᨾᨿᩣᨾᩅᩈᩮᨶ ᨲᨿᩮᩣ ᨿᩣᨾᩣ ᨸᩉᩣᩁᩣ ᨿᩔᩣ ᨲᩥᨿᩣᨾᩣ. ᩈᩴᩅᩩᨱᩮᩣᨲᩥ ᨴᩥᨶᩴ ᩈᩴᩅᩁᩦ. ᨶᩥᩈᩦᨳᩥᨶᩦ, ᨡᨱᨴᩣ, ᨡᨸᩣ, ᩅᩥᨽᩣᩅᩁᩦ, ᨲᨾᩔᩥᨶᩦ, ᨿᩣᨾᩥᨶᩦ, ᨲᨾᩦᩍᨧ᩠ᨧᩣᨴᩦᨶᩥᨸᩥ ᩁᨲ᩠ᨲᩥᨿᩣ ᨶᩣᨾᩣᨶᩥ.

ᨧᨶ᩠ᨴᩥᨠᩣᨿᩩᨲ᩠ᨲᩣ ¶ ᨧᨶ᩠ᨴᨸ᩠ᨸᨽᩣᨿ ᨿᩩᨲ᩠ᨲᩣ ᩁᨲ᩠ᨲᩥ ᨩᩩᨱ᩠ᩉᩣ ᨶᩣᨾ, ᨩᩩᨱ᩠ᩉᩣᨿᩮᩣᨣᨲᩮᩣ ᨩᩩᨱ᩠ᩉᩣ. ᨲᨾᩮᩣ ᩏᩔᨶ᩠ᨶᩮᩣ ᨿᩔᩴ ᩈᩣ ᨲᨾᩩᩔᨶ᩠ᨶᩣ ᩁᨲ᩠ᨲᩥ ᨲᩥᨾᩥᩈᩥᨠᩣ ᨶᩣᨾ, ᨲᩥᨾᩥᩈᩴ ᩏᩔᨶ᩠ᨶᩴ ᩑᨲ᩠ᨳᩣᨲᩥ ᨲᩥᨾᩥᩈᩥᨠᩣ, ᩏᨸᨵᩣᨿ ᩍᨲ᩠ᨲᨬ᩠ᨧ.

᪗᪐. ᨲᩥᨠᩴ ᩋᨯ᩠ᨰᩁᨲ᩠ᨲᩥᨿᩴ. ᨾᨩ᩠ᨫᩥᨾᩣᩁᨲ᩠ᨲᩥ ᨠᨾ᩠ᨾᨽᩪᨲᩣ ‘‘ᨶᩥᩈᩦᨳᩮᩣ, ᩋᨯ᩠ᨰᩁᨲ᩠ᨲᩮᩣ, ᨾᩉᩣᨶᩥᩈᩣ’’ᨲᩥ ᨧ ᩅᩩᨧ᩠ᨧᨲᩥ. ᨶᩥᩔᨲᩮ ᩈᨿᨲᩮ ᩋᩈ᩠ᨾᩥᩴ ᨶᩥᩈᩦᨳᩮᩣ. ᩋᨯ᩠ᨰᨬ᩠ᨧ ᨲᩴ ᩁᨲ᩠ᨲᩥ ᨧᩣᨲᩥ ᩋᨯ᩠ᨰᩁᨲ᩠ᨲᩮᩣ, ᩁᨲ᩠ᨲᩮᨠᨴᩮᩈᩮ ᩁᨲ᩠ᨲᩥᩈᨴ᩠ᨴᩮᩣ, ᩁᨲ᩠ᨲᩥᨿᩣ ᩋᨯ᩠ᨰᨶ᩠ᨲᩥ ᩅᩣ ᩋᨯ᩠ᨰᩁᨲ᩠ᨲᩮᩣ. ᨾᩉᨲᩦ ᨧ ᩈᩣ ᨶᩥᩈᩣ ᨧᩣᨲᩥ ᨾᩉᩣᨶᩥᩈᩣ.

ᨧᨲᩩᨠ᩠ᨠᩴ ᩋᨶ᩠ᨵᨠᩣᩁᩮ. ᩋᨶ᩠ᨵᩴ ᩉᨲᩴ ᨴᩥᨭ᩠ᨮᩈᨲ᩠ᨲᩥᨠᩴ ᩃᩮᩣᨠᩴ ᨠᩁᩮᩣᨲᩦᨲᩥ ᩋᨶ᩠ᨵᨠᩣᩁᩮᩣ. ᨲᨾᨲᩦᨲᩥ ᨲᨾᩮᩣ, ᩋᨳ ᩅᩣ ᨲᨾᨶ᩠ᨲᩥ ᩌᨠᨦ᩠ᨡᨶ᩠ᨲᩥ ᩁᨲᩥᩴ ᩃᩮᩣᨠᩣ ᩑᨲ᩠ᨳ ᨲᨾᩮᩣ, ᨲᨾᩩ ᩌᨠᨦ᩠ᨡᩣᨿᩴ, ᨲᨾᩈᨴ᩠ᨴᩮᩣ ᩋᨶᩥᨲ᩠ᨳᩦ, ᨲᩴᩈᩉᨧᩁᨱᨲᩮᩣ ᩋᨶ᩠ᨵᨠᩣᩁᩮᩣᨸᩥ. ᨲᩥᨾᩥᩈᩴ ᩍᩈᩮᩣ, ᩋᨳ ᩅᩣ ᨲᩥᨾᩩ ᨲᩮᨾᨶᩮ, ᨲᩥᨾᨶ᩠ᨲᩥ ᩑᨲ᩠ᨳ ᩁᩣᨣᩮᨶᩣᨲᩥ ᨲᩥᨾᩥᩈᩴ. ᨲᩥᨾᩥᩁᩴ, ᨸᩩᨻ᩠ᨻᩮᩅ ᩍᩁᨸᨧ᩠ᨧᨿᩮᩣ.

᪗᪑. ᨧᨲᩩᨴ᩠ᨴᩈᨶ᩠ᨶᩴ ᩁᨲ᩠ᨲᩦᨶᩴ ᨸᩪᩁᨱᩦ ᨧᨲᩩᨴ᩠ᨴᩈᩦᩈᨦ᩠ᨡᩣᨲᩮᩣ ᨠᩣᩊᨸᨠ᩠ᨡᩮᩣ ᨧ ᩑᨠᨣ᩠ᨥᨶᩮᩣ ᩅᨶᩈᨱ᩠ᨯᩮᩣ ᨧ ᨾᩮᨥᨸᨭᩃᨬ᩠ᨧ ᩋᨯ᩠ᨰᩁᨲ᩠ᨲᩥ ᨧ ᩑᨲᩮᩉᩥ ᨧᨲᩪᩉᩥ ᩈᨾᨶ᩠ᨶᩣᨣᨲᩮᩣ ᨲᨾᩮᩣ ᨧᨲᩩᩁᨦ᩠ᨣᨲᨾᩴ ᨶᩣᨾ.

᪗᪒. ᩋᨶ᩠ᨵᨬ᩠ᨧ ᨲᩴ ᨲᨾᨬ᩠ᨧᩣᨲᩥ ᩋᨶ᩠ᨵᨲᨾᩴ, ᨿᩴ ᩃᩮᩣᨠᩴ ᩋᨶ᩠ᨵᨠᩣᩁᩴ ᨠᩁᩮᩣᨲᩥ. ᩋᨿᩴ ᩋᨶ᩠ᨵᨲᨾᩈᨴ᩠ᨴᩮᩣ ᨥᨶᨲᨾᩮ ᨻᩣᩊ᩠ᩉᨲᨾᩮ ᩅᨲ᩠ᨲᨲᩥ.

ᨴ᩠ᩅᨿᩴ ¶ ᨸᩉᩣᩁᩮ. ᨸᩉᩁᩦᨿᨲᩮ ᨽᩮᩁᩥᨿᩣᨴᩥ ᩋᨲᩕᩣᨲᩥ ᨸᩉᩣᩁᩮᩣ, ᨸᩩᨾᩮ ᩈᨬ᩠ᨬᩣᨿᩴ ᩋᨸᨧ᩠ᨧᨿᩮᩣ. ᨿᩣ ᨸᩣᨸᩩᨱᩮ ᨾᩮᩣ, ᩏᨸᨿᨾᩮᨲᩥ ᩅᩣ ᩋᩉᩮᩣ ᩁᨲ᩠ᨲᩥ ᨧᩣᨶᩮᨶ ᨿᩣᨾᩮᩣ, ᨿᨾᩥᨲᩮᩣ ᨱᩮᩣ. ᨸᩉᩣᩁᩮᩣ ᩑᩅ ᨿᩣᨾᩮᩣ ᩍᨲᩥ ᩈᨬ᩠ᨬᩥᨲᩮᩣ ᨿᩣᨾᩈᨬ᩠ᨬᩥᨲᩮᩣ.

ᨴᩩᨲᩥᨿᩣ ᨲᩥᨳᩥ ᨸᩣᨭᩥᨸᨴᩮᩣ ᨶᩣᨾ. ᨸᨭᩥᨸᨩ᩠ᨩᨲᩮ ᨧᨶ᩠ᨴᩮᩣ ᨡᨿᩴ, ᩏᨴᨿᩴ ᩅᩣ ᨿᩔᩴ ᨸᩣᨭᩥᨸᨴᩮᩣ. ᨲᨲᩥᨿᩣᨴᩦ ᨲᩥᨳᩥᨿᩮᩅ, ᨶ ᨸᩣᨭᩥᨸᨴᩮᩣ. ᨲᨶᩮᩣᨲᩦᨲᩥ ᨲᩥᨳᩥ, ᩋᨳ ᩅᩣ ᨲᩣ ᨸᩣᩃᨶᩮ ᩍᨳᩥ. ᨲᩥᨳᩥᩈᨴ᩠ᨴᩮᩣ ᨴ᩠ᩅᩦᩈᩩ.

᪗᪓. ᨴ᩠ᩅᨿᩴ ᨸᨶ᩠ᨶᩁᩈᩥᨿᩴ, ᨸᨶ᩠ᨶᩁᩈᨶ᩠ᨶᩴ ᨲᩥᨳᩦᨶᩴ ᨸᩪᩁᨱᩦ ᨸᨶ᩠ᨶᩁᩈᩦ, ᨸᨱ᩠ᨱᩁᩈᩦᨲᩥᨸᩥ ᨸᩣᨮᩮᩣ ᩋᨲ᩠ᨳᩥ. ᨴ᩠ᩅᨿᩴ ᨸᩩᨱ᩠ᨱᨾᩣᨿᩴ ᨲᩥᨳᩥᨿᩴ. ᨾᩥᨿ᩠ᨿᨲᩮ ᨲᩥᨳᩦᨶᩴ ᨡᨿᩮᩣ ᩅᩩᨯ᩠ᨰᩥ ᨧᩣᨶᩮᨶ ᨾᩣᩈᩮᩣ, ᨧᨶ᩠ᨴᩮᩣ, ᨸᩩᨱ᩠ᨱᩮᩣ ᨧ ᩈᩮᩣ ᨾᩣᩈᩮᩣ ᨧᩣᨲᩥ ᨸᩩᨱ᩠ᨱᨾᩣᩈᩮᩣ, ᨲᩔᩣᨿᩴ ᨲᩥᨳᩥ, ᨸᩩᨱ᩠ᨱᨾᩣᩈᩮᩣ ᨿᩔᨾᨲ᩠ᨳᩦᨲᩥ ᩅᩣ ᨸᩩᨱ᩠ᨱᨾᩣᩈᩦ. ᨸᩩᨱ᩠ᨱᩮᩣ ᨾᩣ ᨧᨶ᩠ᨴᩮᩣ ᨿᨲ᩠ᨳ, ᨸᩩᨱ᩠ᨱᨾᩔᩣᨿᩴ ᩅᩣ ᨲᩥᨳᩥ ᨸᩩᨱ᩠ᨱᨾᩣ, ‘‘ᨸᩩᨱ᩠ᨱᩥᨾᩣ’’ᨲᩥ ᨸᩣᨮᩮ ᨸᨶ ᩈᨲᩥ ᨧᨶ᩠ᨴᩔ ᨸᩩᨱ᩠ᨱᨽᩣᩅᩮᩣ ᨸᩩᨱ᩠ᨱᩮᩣ, ᨲᩮᨶ ᨶᩥᨻ᩠ᨻᨲ᩠ᨲᩣ ᨽᩣᩅᨸᨧ᩠ᨧᨿᨶ᩠ᨲᩣ ᨲᩮᨶ ᨶᩥᨻ᩠ᨻᨲ᩠ᨲᩮ ᩍᨾᩮᩣ ᨴᩥᩔᨲᩥ, ᩃᩮᩣᨠᩣᩈᨿᨲ᩠ᨲᩣ ᩃᩥᨦ᩠ᨣᩔ ᩍᨲ᩠ᨳᩥᩃᩥᨦ᩠ᨣᨲ᩠ᨲᩴ, ᩈᩣ ᨸᩩᨱ᩠ᨱᨾᩣ ᩑᨠᨠᩃᩣᩉᩦᨶᩮ ᨧᨶ᩠ᨴᩮ ᩈᨲᩥ ᩋᨶᩩᨾᨲᩥ ᨶᩣᨾ, ᩋᨶᩩᨾᨬ᩠ᨬᨶ᩠ᨲᩮ ᩋᨶᩩᨣᨧ᩠ᨨᨶ᩠ᨲᩮ ᨴᩮᩅᨲᩣᨸᩥᨲᩪᩉᩥ ᩈᩉ ᨿᩔᩴ ᩈᩣ ᩋᨶᩩᨾᨲᩥ. ᨸᩩᨱ᩠ᨱᩮ ᨸᨶ ᨧᨶ᩠ᨴᩮ ᩈᩣ ᨸᩩᨱ᩠ᨱᨾᩣ ᩁᩣᨠᩣ ᨶᩣᨾ, ᩁᩣᨲᩥ ᨴᩔᨶᩣᩅᨠᩣᩈᩴ ᩁᩣᨠᩣ, ᨠᩮᩣ [ᨠᩃᩣᩉᩦᨶᩮ ᩈᩣ’ᨶᩩᨾᨲᩥ ᨸᩩᨱ᩠ᨱᩮ ᩁᩣᨠᩣ ᨶᩥᩈᩣᨠᩁᩮ (ᩋᨾᩁ ᪔.᪘)].

ᩋᨸᩁᩣ ᨠᩣᩊᨸᨠ᩠ᨡᩈᨾ᩠ᨽᩪᨲᩣᨸᨶ᩠ᨶᩁᩈᩦ ᨸᨶ ᩋᨾᩣᩅᩈᩦ, ᩋᨾᩣᩅᩣᩈᩦᨲᩥᨸᩥ ᩏᨧ᩠ᨧᨲᩮ. ᩋᨾᩣ ᩈᩉ ᩅᩈᨶ᩠ᨲᩥ ᩁᩅᩥᨧᨶ᩠ᨴᩣ ᨿᩔᩴ ᩋᨾᩣᩅᩈᩦ, ᩋᨾᩣᩅᩣᩈᩦ ᨧ ᨴᩦᨥᩴ ᨠᨲ᩠ᩅᩣ, ᩋᨾᩣᩈᨴ᩠ᨴᩮᩣ ᩈᩉᨲ᩠ᨳᩮᩣ ᩋᨻ᩠ᨿᨿᩴ. ᨴᩔᩮᩣ [ᨴᩔᩃᩣ (ᨠ.), ᨴᩥᩔᨶ᩠ᨲᩮ ᩁᩅᩥᨧᨶ᩠ᨴᩣ ᩋᨲᩕ, ‘‘ᨣᨱᨠᩮᩉᩦ’’ᨲᩥ ᨥ (ᨧᩥᨶ᩠ᨲᩣᨾᨱᩥᨭᩦᨠᩣ)], ᩈᩪᩁᩥᨿᩥᨶ᩠ᨴᩩᩈᨦ᩠ᨣᨾᩮᩣᨲᩥ ᨲᩔᩣᨿᩮᩅ ᨶᩣᨾᩣᨶᩥ.

᪗᪔. ᩈᨭ᩠ᨮᩥᨥᨭᩥᨠᩣᩉᩥ ¶ ᩃᨠ᩠ᨡᩥᨲᩮᩣ ᨠᩣᩃᩮᩣ ᩋᩉᩮᩣᩁᨲ᩠ᨲᩮᩣ ᨶᩣᨾ. ᨥᨭᩮᨶ᩠ᨲᩥ ᩋᩉᩮᩣᩁᨲ᩠ᨲᩥᨿᩮᩣᨲᩥ ᨥᨭᩥᨠᩣ. ᩋᩉᩮᩣ ᨧ ᩁᨲ᩠ᨲᩥ ᨧ ᩋᩉᩮᩣᩁᨲ᩠ᨲᩮᩣ, ᨸᩩᨾᩮ. ᩋᨴᩥᨣᩩᨲ᩠ᨲᩮᨸᩥ ᩋᩉᩮᩣᩁᨲ᩠ᨲᨶ᩠ᨲᩥ ᨶᨸᩩᩴᩈᨠᩮᨸᩥ. ᨲᩮ ᨸᨬ᩠ᨧᨴᩈ ᩋᩉᩮᩣᩁᨲ᩠ᨲᩣ ᨸᨠ᩠ᨡᩮᩣ ᨶᩣᨾ. ᨸᨧᨶ᩠ᨲᩥ ᨸᩁᩥᨱᨾᨶ᩠ᨲᩥ ᨽᩪᨲᩣᨶ᩠ᨿᨶᩮᨶᩮᨲᩥ ᨸᨠ᩠ᨡᩮᩣ. ᨸᩩᨻ᩠ᨻᩣᨸᩁᨽᩪᨲᩣ ᨲᩮ ᨧ ᨸᨠ᩠ᨡᩣ ᨿᨳᩣᨠ᩠ᨠᨾᩴ ᩈᩩᨠ᩠ᨠᨠᩣᩊᩣ ᩈᩩᨠ᩠ᨠᨸᨠ᩠ᨡᨠᩣᩊᨸᨠ᩠ᨡᩣ ᨶᩣᨾ. ᨩᩮᩣᨲᩥᩈᨲ᩠ᨳᨠ᩠ᨠᨾᩮᨶ ᩈᩩᨠ᩠ᨠᨸᨠ᩠ᨡᩮᩣ ᨸᩩᨻ᩠ᨻᩈᨬ᩠ᨬᩥᨲᩮᩣ, ᨠᨱ᩠ᩉᨸᨠ᩠ᨡᩮᩣ ᩋᨸᩁᩈᨬ᩠ᨬᩥᨲᩮᩣ. ᨲᨲᩮᩣ ᩑᩅ ᨾᩣᩈᩅᩥᩈᩮᩈᩮ ᩃᩮᩣᨠᩮ ᩈᨠᨸᩁᨸᨠ᩠ᨡᩮᩣᨲᩥ [ᩃᩮᩣᨠᩮᨸ᩠ᨿᨸᩁᨸᨠ᩠ᨡᩮᩣᨲᩥ (ᨠ.)] ᩁᩪᩊ᩠ᩉᩦ. ᩈᩩᨧ ᩈᩮᩣᨠᩮ, ᩈᩩᨠ᩠ᨠᩮᩣ, ᩈᩮᩣᨧᨶ᩠ᨲᩥ ᩑᨲ᩠ᨳ ᩋᨶ᩠ᨵᨠᩣᩁᩣᨽᩥᩃᩣᩈᩥᨶᩮᩣᨲᩥ ᨠᨲ᩠ᩅᩣ, ᩈᩪᨧᩮᨲᩥ ᨸᨠᩣᩈᩮᨲᩦᨲᩥ ᩅᩣ ᩈᩩᨠ᩠ᨠᩮᩣ. ᨠᩥᩁᨲᩥ ᩈᩩᨠ᩠ᨠᨶ᩠ᨲᩥ ᨠᩣᩁᩮᩣ, ᨱᩮᩣ, ᩈᩮᩣᩅ ᨠᩣᩊᩮᩣ, ᨠᩮᨶ ᩅᩣ ᨩᩮᩣᨲᩥᨶᩣ ᩋᩁᨲᩥ ᩑᨲ᩠ᨳ ᨠᩣᩁᩮᩣ, ᩈᩮᩣᩅ ᨠᩣᩊᩮᩣ. ᨲᩮ ᨴᩩᩅᩮ ᩈᩩᨠ᩠ᨠᨠᩣᩊᨸᨠ᩠ᨡᩣ ᩈᨾᩩᨴᩥᨲᩣ ᨾᩣᩈᩮᩣ ᨶᩣᨾ. ᨾᩈᩥ ᨸᩁᩥᨾᩣᨱᩮ, ᨠᨾ᩠ᨾᨶᩥᨱᩮᩣ.

᪗᪕-᪗᪖. ᩈᩣᨴ᩠ᨵᨸᨩ᩠ᨩᩮᨶ ᨴ᩠ᩅᩣᨴᩈᨾᩣᩈᩣᨶᩴ ᨶᩣᨾᩣᨶᩥ. ᨧᩥᨲ᩠ᨲᩣᨿ ᨸᩁᩥᨸᩩᨱ᩠ᨱᩮᨶ᩠ᨴᩩᨿᩩᨲ᩠ᨲᩣᨿ ᨿᩩᨲ᩠ᨲᩮᩣ, ᩏᨸᩃᨠ᩠ᨡᩥᨲᩮᩣ ᩅᩣ ᨾᩣᩈᩮᩣ ᨧᩥᨲ᩠ᨲᩮᩣ ¶ , ᩈᩴᨿᩮᩣᨣᨶ᩠ᨲᨲ᩠ᨲᩣ ᨶ ᩅᩩᨴ᩠ᨵᩥ, ᩑᩅᩴ ᩈᨻ᩠ᨻᨲᩕ. ᨸᩁᩥᨸᩩᨱ᩠ᨱᩮᨶ᩠ᨴᩩᨿᩩᨲ᩠ᨲᨲᩴᨲᩴᨶᨠ᩠ᨡᨲ᩠ᨲᨶᩣᨾᩅᩈᩮᨶ ᨴ᩠ᩅᩣᨴᩈᨶ᩠ᨶᩴ ᨾᩣᩈᩣᨶᩴ ᨶᩣᨾᩣᨶᩥ ᩅᩮᨴᩥᨲᨻ᩠ᨻᩣᨶᩥ. ᨧᩥᨲ᩠ᨲᨾᩣᩈᩣᨴᨿᩮᩣ ᨹᨣ᩠ᨣᩩᨶᨾᩣᩈᨸᩁᩥᨿᨶ᩠ᨲᩣ ᨴ᩠ᩅᩣᨴᩈ ᨠᩮᩣᨭ᩠ᨮᩣᩈᩣ ᨠᨾᩮᨶ ᨾᩣᩈᩣᨲᩥ ᨬᩮᨿ᩠ᨿᩣ. ᨸᩈᨲ᩠ᨳᨲᨾᨲ᩠ᨲᩣ ᨩᩮᨭ᩠ᨮᩣ, ᨲᩴᨿᩮᩣᨣᩣ ᨩᩮᨭ᩠ᨮᩮᩣ. ᩋᩈᨿ᩠ᩉᩮᩣ ᩁᩅᩥ ᩋᨲᩕᩮᨲᩥ ᩌᩈᩣᩊ᩠ᩉᩮᩣ. ᨿᩔ ᩊᩮᩣ, ᩈᩅᨶ᩠ᨲ᩠ᨿᩈ᩠ᨾᩥᩴ ᩈᩣᩅᨱᩮᩣ, ᨿᩩ. ᨹᩃᨶ᩠ᨲ᩠ᨿᨲᩕ ᨹᨣ᩠ᨣᩩᨶᩮᩣ, ᨿᩩ, ᩃᩔ ᨣᩮᩣ, ᩋᩔ ᩏ. ᨠᨲ᩠ᨲᩥᨠᨾᩣᩈᩮᩣ ᨸᨧ᩠ᨨᩥᨾᨠᨲ᩠ᨲᩥᨠᩮᩣ ᨶᩣᨾ. ᩋᩔᨿᩩᨩᨾᩣᩈᩮᩣ ᨸᩩᨻ᩠ᨻᨠᨲ᩠ᨲᩥᨠᩮᩣ ᨶᩣᨾ.

᪗᪗. ᨴ᩠ᩅᨿᩴ ᩈᩣᩅᨱᨾᩣᩈᩮ. ᩋᨶ᩠ᨲᩮᩣᩅᩦᨳᩥᨲᩮᩣ ᨻᩉᩥ ᨶᩥᨠ᩠ᨡᨾᨲᩥ ᩈᩪᩁᩥᨿᩮᩣ ᩑᨲ᩠ᨳ, ᩋᨵᩥᨠᩁᨱᩮ ᩋᨶᩦᨿᩮᩣ. ᨴ᩠ᩅᨿᩴ ᨧᩥᨲ᩠ᨲᨾᩣᩈᩮ. ᨶᩣᨶᩣᨸᩩᨸ᩠ᨹᨹᩃᩅᩥᨧᩥᨲ᩠ᨲᨲᩣᨿ ᩃᩮᩣᨠᩣᨶᩴ ᩁᨾ᩠ᨾᩴ ᨠᩁᩮᩣᨲᩥ, ᩁᨾᨶ᩠ᨲᩥ ᩅᩣ ᩑᨲ᩠ᨳᩣᨲᩥ ᩁᨾ᩠ᨾᨠᩮᩣ.

᪗᪘. ᨠᨲ᩠ᨲᩥᨠᨠᩣᩊᨸᨠ᩠ᨡᨲᩮᩣ ᨸᨧ᩠ᨨᩥᨾᨠᨲ᩠ᨲᩥᨠᨲᩮᩣ ᨸᨭ᩠ᨮᩣᨿ ᨧᨲᩩᩁᩮᩣ ᨧᨲᩩᩁᩮᩣ ᨾᩣᩈᩣ ᨠᨾᩣ ᨠᨾᨲᩮᩣ ᩉᩮᨾᨶ᩠ᨲᨣᩥᨾ᩠ᩉᩣᨶᩅᩔᩣᨶᩈᨬ᩠ᨬᩥᨲᩣ ᩏᨲᩩᨿᩮᩣ ᨶᩣᨾ ᩉᩮᩣᨶ᩠ᨲᩥ. ᩉᩥᨾᩣᨶᩥ ᩑᨲ᩠ᨳ ᩈᨶ᩠ᨲᩥ ᩉᩮᨾᩮᩣ, ᩈᩮᩣ ᩑᩅ ᩉᩮᨾᨶ᩠ᨲᩮᩣ, ‘‘ᩈᩩᨲ᩠ᨲᨶ᩠ᨲᩮᩣ ᩅᨶᨶ᩠ᨲᩮᩣ’’ᨲᩥ ᨿᨳᩣ, ᩉᩥᨶᩮᩣᨲᩥ ᩅᩣ ᩉᩣᨶᩥᩴ ᨣᨧ᩠ᨨᨲᩥ ᩈᨻ᩠ᨻᨾᩮᨲ᩠ᨳᩣᨲᩥ ᩉᩮᨾᨶ᩠ᨲᩮᩣ, ᩋᨶ᩠ᨲᨸᨧ᩠ᨧᨿᩮᩣ, ᨾᩣᨣᨾᩮᩣ ᨧ. ᨣᩥᩁᨲᩥ ᨸᩦᩊᨿᨲᩦᨲᩥ ᨣᩥᨾ᩠ᩉᩣᨶᩮᩣ, ᨾᩣᨶᩮᩣ, ᩁᩔ ᩉᩮᩣ, ᩅᨱ᩠ᨱᩅᩥᨸᩁᩥᨿᨿᩮᩣ ᨧ. ᩅᩔᨲᩥ ᩑᨲ᩠ᨳ ᩅᩔᩣᨶᩮᩣᨿᩩ. ᩏᨲᩩᨿᩮᩣ ᨴ᩠ᩅᩦᩈᩪᨲᩥ ᨸᨧ᩠ᨧᩣᩈᨲ᩠ᨿᩣ ᩏᨲᩩᩈᨴ᩠ᨴᩮᩣ ᩑᩅ ᨴ᩠ᩅᩦᩈᩩ, ᨶ ᩉᩮᨾᨶ᩠ᨲᩣᨴᨿᩮᩣ, ᩋᨾᩁᨠᩮᩣᩈᩮ ᨸᨶ ᩏᨲᩩᩈᨴ᩠ᨴᩮᩣ ᨸᩩᨾᩮ ᩅᩩᨲ᩠ᨲᩮᩣ [ᩋᨾᩁ ᪔.᪒᪐].

᪗᪙. ᩋᨬ᩠ᨬᨳᩣᨸᩥ ¶ ᩏᨲᩩᨽᩮᨴᩴ ᨴᩔᩮᨲᩩᩴ ᩋᩁᩥᨿᩈᩣᨾᨬ᩠ᨬᨾᩣᩉ ‘‘ᩉᩮᨾᨶ᩠ᨲᩮᩣ’’ᩍᨧ᩠ᨧᩣᨴᩥ. ᩅᩣ ᩋᨳ ᩅᩣ ᩅᩩᨲ᩠ᨲᩣᨶᩩᩈᩣᩁᩮᨶ ᩏᨲᩩᨲ᩠ᨲᨿᨸᨽᩮᨴᩮ ᩅᩩᨲ᩠ᨲᩅᨧᨶᩔᩣᨶᩩᩈᩣᩁᩮᨶ. ᩍᨴᩴ ᨸᨶ ‘‘ᨠᨲ᩠ᨲᩥᨠᨠᩣᩊᨸᨠ᩠ᨡᨲᩮᩣ’’ᨲᩥ ᩅᨧᨶᩴ ᩈᨶ᩠ᨵᩣᨿ ᩅᩩᨲ᩠ᨲᩴ, ᨲᩈ᩠ᨾᩣ ᨠᨲ᩠ᨲᩥᨠᨠᩣᩊᨸᨠ᩠ᨡᨲᩮᩣ ᨸᨽᩩᨲᩥ ᨴ᩠ᩅᩮ ᨴ᩠ᩅᩮ ᨾᩣᩈᩣ ᨠᨾᩣ ᨠᨾᨲᩮᩣ ᩉᩮᨾᨶ᩠ᨲᩮᩣ, ᩈᩥᩈᩥᩁᩮᩣ, ᩅᩈᨶ᩠ᨲᩮᩣ, ᨣᩥᨾ᩠ᩉᩮᩣ, ᩅᩔᩣᨶᩮᩣ, ᩈᩁᨴᩮᩣ ᩏᨲᩪᨲᩥ ᨨ ᩏᨲᩪ ᨽᩅᨶ᩠ᨲᩥ, ᨸᩩᨶᨸ᩠ᨸᩩᨶᩴ ᩑᨲᩦᨲᩥ ᨠᨲ᩠ᩅᩣ, ᨲᩩ, ᩍᩔ ᩏ. ᩈᩥᩈᩥᩁᩴ ᩈᩦᨲᩃᩴ, ᨲᩴᨿᩮᩣᨣᩣ ᩈᩥᩈᩥᩁᩴ, ᩅᩣᩅᩥᨵᩣᨶᨲᩮᩣ ᨶ ᩅᩩᨴ᩠ᨵᩥ, ᨾᨠᩣᩁᩮᩣ ᨸᨴᩈᨶ᩠ᨵᩥᨠᩁᩮᩣ. ᩅᩈ ᨠᨶ᩠ᨲᩥᨿᩴ. ᩅᩈᩦᨿᨲᩮᨲᩥ ᩅᩈᨶ᩠ᨲᩮᩣ. ᨸᩩᨸ᩠ᨹᨵᨶᩩᨲ᩠ᨲᩣ [ᨸᩩᨸ᩠ᨹᩅᨶ᩠ᨲᨲ᩠ᨲᩣ (ᨠ.)] ᩅᩣ ᩅᩈᨲᩥ ᨠᩣᨾᩮᩣ ᩑᨲ᩠ᨳ ᩅᩈᨶ᩠ᨲᩮᩣ. ᩈᩁᨲᩥ ᨸᩦᩊᨿᨲᩥ ᩋᩈ᩠ᨾᩥᨶ᩠ᨲᩥ ᩈᩁᨴᩮᩣ, ᨲᩔ ᨴᩮᩣ. ᩈᩣ ᩈᩩᨶᨡᩣ ᩁᨾᨶ᩠ᨲᩥ ᩑᨲ᩠ᨳᩣᨲᩥ ᩅᩣ ᩈᩁᨴᩮᩣ, ᨾᩔ ᨴᩮᩣ.

᪘᪐-᪘᪑. ᨲᩥᨠᩴ ᨣᩥᨾ᩠ᩉᩮ. ᩏᩈᨲᩥ ᨴᩉᨲᩦᨲᩥ ᩏᨱ᩠ᩉᩮᩣ, ᨱ᩠ᩉᩮᩣ, ᩈᩃᩮᩣᨸᩮᩣ ᨧ. ᨶᩥᨴᩉᨶ᩠ᨲᩮ ᨿᩈ᩠ᨾᩥᨶ᩠ᨲᩥ ᨶᩥᨴᩣᨥᩮᩣ, ᩉᩔ ᨥᩮᩣ. ᨣᩥᩁᨲᩥ ¶ ᨸᩦᩊᨿᨲᩦᨲᩥ ᨣᩥᨾ᩠ᩉᩮᩣ, ᨾᩮᩣ, ᩁᩔ ᩉᩮᩣ, ᩅᨱ᩠ᨱᩅᩥᨸᩁᩥᨿᨿᩮᩣ ᨧ. ᨲᩥᨠᩴ ᩅᩔᩣᨶᩮᩣᨲᩩᨾ᩠ᩉᩥ. ᩅᩔᨲᩥ ᨸᩅᩔᨲᩥ ᩑᨲ᩠ᨳᩣᨲᩥ ᩅᩔᩮᩣ, ᩅᩔᩣᨶᩮᩣ, ᨸᩣᩅᩩᩈᩮᩣ ᨧ. ᩋᩔ ᩏ, ᩈᩴᨿᩮᩣᨣᩃᩮᩣᨸᩮᩣ ᨧ.

ᩅᩔᩣᨶᩣᨴᩥᨠᩮᩉᩥ ᨲᩦᩉᩥ ᩏᨲᩪᩉᩥ ᨴᨠ᩠ᨡᩥᨱᩣᨿᨶᩴ ᩈᩪᩁᩥᨿᩔ ᨴᨠ᩠ᨡᩥᨱᨴᩥᩈᩣᨣᨾᨶᩴ ᨽᩅᨲᩥ, ᩋᨬ᩠ᨬᩮᩉᩥ ᨲᩦᩉᩥ ᩈᩥᩈᩥᩁᩅᩈᨶ᩠ᨲᨣᩥᨾ᩠ᩉᩮᩉᩥ ᩏᨲ᩠ᨲᩁᩣᨿᨶᩴ ᩏᨲ᩠ᨲᩁᨴᩥᩈᩣᨣᨾᨶᩴ ᨽᩅᨲᩥ. ᩍ ᨣᨲᩥᨿᩴ, ᨽᩣᩅᩮ ᨿᩩ, ᩋᨿᨶᩴ. ᨸᩩᩔᩈᨦ᩠ᨠᨶ᩠ᨲᩥᨾᩣᩁᨻ᩠ᨽ ᩌᩈᩣᩊ᩠ᩉᩴ ᨿᩣᩅ ᩌᨴᩥᨧ᩠ᨧᩔ ᩏᨲ᩠ᨲᩁᩣ ᨣᨲᩥ ᩏᨲ᩠ᨲᩁᩣᨿᨶᩴ. ᩌᩈᩣᩊ᩠ᩉᩈᨦ᩠ᨠᨶ᩠ᨲᩥᨾᩣᩁᨻ᩠ᨽ ᨸᩩᩔᩴ ᨿᩣᩅ ᨴᨠ᩠ᨡᩥᨱᩣ ᨣᨲᩥ ᨴᨠ᩠ᨡᩥᨱᩣᨿᨶᩴ. ᩅᩔᩮᩣᨿᨶᨴ᩠ᩅᨿᨶ᩠ᨲᩥ ᩍᨴᩴ ᩋᨿᨶᨴ᩠ᩅᨿᩴ ᩈᨾ᩠ᨸᩥᨱ᩠ᨯᩥᨲᩴ ᩅᩔᩮᩣ ᨶᩣᨾ. ᩅᩔᨶ᩠ᨲᩥ ᩑᨲ᩠ᨳᩣᨲᩥ ᩅᩔᩮᩣ, ᩅᩔᨠᩣᩃᩮᨶ ᩅᩣ ᩏᨸᩃᨠ᩠ᨡᩥᨲᩮᩣ ᩅᩔᩮᩣ, ‘‘ᨧᩥᨲ᩠ᨲᩮᩣ, ᨧᨠ᩠ᨡᩩᨴᩈᨠ’’ᨶ᩠ᨲᩥ ᨿᨳᩣ.

ᨸᨩ᩠ᨩᨴ᩠ᨵᩴ ᩅᩔᩮ. ᩈᩴᩅᩈᨲᩥ ᩑᨲ᩠ᨳ ᩈᩴᩅᨧ᩠ᨨᩁᩮᩣ, ᨨᩁᩮᩣ, ᩈᩔ ᨧᩮᩣ, ‘‘ᩅᨧ᩠ᨨᩁᩮᩣ’’ᨲᩥᨸᩥ ᨲᩔᩮᩅ ᨶᩣᨾᩴ. ᨶᨲ᩠ᨳᩥ ᩍᨲ᩠ᨳᩥᩃᩥᨦ᩠ᨣᨲ᩠ᨲᨾᩮᨲᩮᩈᩩ ᩋᨶᩥᨲ᩠ᨳᩦ. ᨸᨧ᩠ᨧᩣᩈᨲ᩠ᨿᩣ ᩈᩁᨴᩮᩣᨸᩥ ᨲᩴᨸᨧ᩠ᨧᩣᩈᨲ᩠ᨿᩣ ᩉᩣᨿᨶᩮᩣᨸᩥ. ᩈᩁᨴᨠᩣᩃᩮᨶ ᩃᨠ᩠ᨡᩥᨲᩮᩣ ᩈᩁᨴᩮᩣ, ᨿᨳᩣ ‘‘ᩈᩮᩣᨲᨴᩈᨠᩴ, ᩅᩮᩈᩣᨡᩮᩣ’’ᨲᩥ. ᨩᩉᩣᨲᩥ ᨽᩣᩅᩮᨲᩥ ᩉᩣᨿᨶᩮᩣ, ᨸᨴᨲ᩠ᨳᩮ ᩅᩣ ᨩᩉᨶ᩠ᨲᩮᩣ ᩋᨿᨲᩦᨲᩥ ᩉᩣᨿᨶᩮᩣ. ᩈᨾᨿᨲᩥ ᩅᩥᨠᩃᨿᨲᩥ ᨽᩣᩅᩮᨲᩥ ᩈᨾᩣ, ᩈᨾ ᩅᩮᨠᩃ᩠ᨿᩮ. ‘‘ᩈᨾᩣ ᩅᩔᩮ ᨳᩦᩃᩥᨦ᩠ᨣᩮᩣ ᨲᩩ, ᩈᨾᩴ ᩈᨻ᩠ᨻᩈᨾᩣᨶᩮᩈᩪ’’ᨲᩥ ᩁᩩᨴ᩠ᨴᩮᩣ.

ᩈᨻ᩠ᨻᩈᨲ᩠ᨲᩣᨶᩴ ᩈᨻ᩠ᨻᨸᩣᩁᩥᩈᨴᨲ᩠ᨲᩣ [ᩈᨻ᩠ᨻᨸᨭᩥᨸᨴᨲ᩠ᨲᩣ (ᨠ.)] ᩈᨻ᩠ᨻᩅᩮᩣᩉᩣᩁᨠᩩᩈᩃᨲ᩠ᨳᩴ ᨠᩣᩃᩣᨵᩥᨠᩣᩁᨲ᩠ᨲᩣ ᨸᩁᩈᨾᨿᩮ ᨠᨳᩥᨲᩴ ᨴᩮᩅᩣᨶᩴ ᩅᩔᨸ᩠ᨸᨾᩣᨱᨾ᩠ᨸᩥ ᩍᨵᩣᩉᩁᩥᨲ᩠ᩅᩣ ᨴᩦᨸᩮᨲᨻ᩠ᨻᩴ. ᨲᨳᩣ ᩉᩥ ᨾᨶᩩᩔᩣᨶᩴ ᨾᩣᩈᩮᨶ ᨸᩥᨲᩪᨶᩴ ᩋᩉᩮᩣᩁᨲ᩠ᨲᩮᩣ, ᩑᩅᩴ ᨾᨶᩩᩔᩣᨶᩴ ᩅᩔᩮᨶ ᨴᩮᩅᩣᨶᩴ ᩋᩉᩮᩣᩁᨲ᩠ᨲᩮᩣ, ᨲᨲᩕᩮᩣᨲ᩠ᨲᩁᩣᨿᨶᩴ ᨴᩮᩅᩣᨶᩴ ᨴᩥᨶᩴ, ᩁᨲ᩠ᨲᩥ ᨸᨶ ᨴᨠ᩠ᨡᩥᨱᩣᨿᨶᩴ, ᨴᩮᩅᨲᩣᨶᩴ ᩈᨭ᩠ᨮ᩠ᨿᩣᨵᩥᨠᩣᩉᩮᩣᩁᨲ᩠ᨲᩥᩈᨲᨲ᩠ᨲᨿᩮᨶ ᩅᩔᩮᨶ ᨴ᩠ᩅᩣᨴᩈᩅᩔᩈᩉᩔᩣᨶᩥ ᨴᩮᩅᩣᨶᩴ ᨿᩩᨣᩴ. ᨲᩮᨶ ᩅᩩᨲ᩠ᨲᩴ –

‘‘ᩑᩈᩣ ¶ ᨴ᩠ᩅᩣᨴᩈᩈᩉᩔᩦ, ᨿᩩᨣᩣᨡ᩠ᨿᩣ ᨸᩁᩥᨠᩥᨲ᩠ᨲᩥᨲᩣ;

ᩑᨲᩴ ᩈᩉᩔᨣᩩᨱᩥᨲᩴ, ᩋᩉᩮᩣ ᨻᩕᩉ᩠ᨾᨾᩩᨴᩣᩉᨭ’’ᨶ᩠ᨲᩥ [‘‘ᩅᩮᨴᨴᩦᨸᨠᨣᨶ᩠ᨳᩮ’’ᨲᩥ ᨶᩥᩔᨿᩮ].

ᨲᨬ᩠ᨧ ᨶᩁᩣᨶᩴ ᨧᨲᩩᨿᩩᨣᩴ ᨴᩥᨻ᩠ᨻᩈᩉᩔᨴ᩠ᩅᨿᩮᨶ ᨻᩕᩉ᩠ᨾᩩᨶᩮᩣ ᨴ᩠ᩅᩮ ᨴᩥᩅᩮᨲᩥ. ᨠᨲ, ᨲᩮᨲᩣ, ᨴ᩠ᩅᩣᨸᩁ, ᨠᩃᩥᩅᩈᩮᨶ ᨧᨲᩩᨿᩩᨣᩴ. ᨲᨲᩕ ᨠᨲᨿᩩᨣᩔ ᨾᨶᩩᩔᩈᨦ᩠ᨡ᩠ᨿᩣᨿ ᨸᨾᩣᨱᩴ ᩋᨭ᩠ᨮᩅᩦᩈᨲᩥᩈᩉᩔᩣᨵᩥᨠᩣᨶᩥ ᩈᨲ᩠ᨲᩁᩈᩅᩔᩃᨠ᩠ᨡᩣᨶᩥ, ᨲᩮᨲᩣᨿ ᨨᨶ᩠ᨶᩅᩩᨲᩥᩈᩉᩔᩣᨵᩥᨠᩣᨶᩥ ᨴ᩠ᩅᩣᨴᩈᩅᩔᩃᨠ᩠ᨡᩣᨶᩥ, ᨴ᩠ᩅᩣᨸᩁᩔ ᨧᨲᩩᩈᨭ᩠ᨮᩥᩈᩉᩔᩣᨵᩥᨠᩣᨶᩥ ᩋᨭ᩠ᨮᩅᩔᩃᨠ᩠ᨡᩣᨶᩥ, ᨠᩃᩥᩔ ᨻᩣᨲ᩠ᨲᩥᩴᩈᩈᩉᩔᩣᨵᩥᨠᩣᨶᩥ ᨧᨲ᩠ᨲᩣᩁᩥ ᩅᩔᩃᨠ᩠ᨡᩣᨶᩥ. ᩅᩩᨲ᩠ᨲᨬ᩠ᨧ –

‘‘ᩈᩩᨬ᩠ᨬᩴ ᩈᩩᨬ᩠ᨬᩴ ᨡᩴ ᨶᩣᨣᩣ, ᨠᩁᨾᩩᨶᩥᩈᩈᩥᨶᩮᩣ;

ᨾᩣᨶ’ᨾᩣᨴᩮᩣ ᨿᩩᨣᩔ, ᨲᩮᨲᩣᨿ ᨡᩴᨡᩴᩈᩩᨬ᩠ᨬᩴ.

ᩁᩈᨶᩅᩈᩪᩁᩥᨿᩣ, ᩅᩔᩈᨦ᩠ᨡ᩠ᨿᩣ ᨸᩈᩥᨴ᩠ᨵᩣ;

ᩈᩩᨬ᩠ᨬᩴ ᩈᩩᨬ᩠ᨬᩴ ᨡᩴ ᩅᩮᨴᩣ, ᩁᩈᨽᩩᨩᨣᨾᩥᨲᩥ.

ᨴ᩠ᩅᩣᨸᩁᩮ ᩅᩔᩈᨦ᩠ᨡ᩠ᨿᩣ, ᩈᩩᨬ᩠ᨬᩣᨠᩣᩈᩴᨡᩴᨶᩮᨲ᩠ᨲ-;

ᨣᩩᨱᨩᩃᨶᩥᨵᨿᩮᩣ, ᩅᩔᩈᨦ᩠ᨡ᩠ᨿᩣ ᨠᩃᩥᩔᩮ’’ᨲᩥ.

ᨸᩥᨱ᩠ᨯᩮᩣ ᨧᩮᩈ ᩅᩦᩈᨲᩥᩅᩔᩈᩉᩔᩣᨵᩥᨠᩣᨶᩥ ᨲᩮᨧᨲ᩠ᨲᩣᩃᩦᩈᩅᩔᩃᨠ᩠ᨡᩣᨶᩥ. ᩅᩩᨲ᩠ᨲᨬ᩠ᨧ ‘‘ᨡᩣᨠᩣᩈᩈᩩᨬ᩠ᨬᨾ᩠ᨻᩁᨴᨶ᩠ᨲᩈᩣᨣᩁᩣ ᨧᨲᩩᨿᩩᨣᩣᨶᩴ ᨸᩁᩥᨾᩣᨱᩈᨦ᩠ᨣᩉᩮᩣ’’ᨲᩥ. ᨻᩕᩉ᩠ᨾᩩᨶᩮᩣ ᩋᩉᩮᩣᩁᨲ᩠ᨲᩮᨶ ᨶᩁᩣᨶᩴ ᨴ᩠ᩅᩮ ᨠᨸ᩠ᨸᩣ.

ᨲᨲᩕ ᩋᨭ᩠ᨮ ᨶᩣᨣᩣ, ᨴ᩠ᩅᩮ ᨠᩁᩣ, ᩈᨲ᩠ᨲ ᨾᩩᨶᨿᩮᩣ, ᩑᨠᩮᩣ ᩈᩈᩦ, ᨨ ᩁᩈᩣ, ᨴ᩠ᩅᩣᨴᩈ ᩈᩪᩁᩥᨿᩣ, ᨧᨲ᩠ᨲᩣᩁᩮᩣ ᩅᩮᨴᩣ ᨩᩃᨶᩥᨵᨿᩮᩣ ᨧ. ᨴ᩠ᩅᩮ ᨶᩮᨲ᩠ᨲᩣᨶᩥ, ᨲᨿᩮᩣ ᨣᩩᨱᩣ, ᨻᩣᨲ᩠ᨲᩥᩴᩈ ᨴᨶ᩠ᨲᩣ, ᩈᨦ᩠ᨡ᩠ᨿᩣᨿ ᨸᩈᩥᨴ᩠ᨵᩮᩉᩮᨲᩮᩉᩥ ᩈᨦ᩠ᨡ᩠ᨿᩣ ᨣᩉᩮᨲᨻ᩠ᨻᩣ. ᨡᩣᨠᩣᩈᨾ᩠ᨻᩁᩈᨴ᩠ᨴᩣ ᩈᩩᨬ᩠ᨬᨸᩁᩥᨿᩣᨿᩣ. ᩈᩩᨬ᩠ᨬᨬ᩠ᨧ ᨣᨱᩥᨲᩮ ᨻᩥᨶ᩠ᨴᩩᨶᩣ ᩈᨦ᩠ᨣᩉᩥᨲᩴ. ᩈᨻ᩠ᨻᨬ᩠ᨧᩮᨲᩴ ᨸᨭᩥᨿᩩᨣᩴ ᨸᨭᩥᩃᩮᩣᨾᩮᨶ ᨸᨲ᩠ᨳᩣᩁᨿᩮ. ᨲᨲᩕ ᨠᨲᨿᩩᨣᩔ ᨸᨲ᩠ᨳᩣᩁᩮᩣ ᨿᨳᩣ – ᪑᪗᪒᪘᪐᪐᪐. ᨲᩮᨲᩣᨿ ᨿᨳᩣ – ᪑᪒᪙᪖᪐᪐᪐ ¶ . ᨴ᩠ᩅᩣᨸᩁᩔ ᨿᨳᩣ – ᪘᪖᪔᪐᪐᪐. ᨠᩃᩥᩔ ᨿᨳᩣ – ᪔᪓᪒᪐᪐᪐. ᨧᨲᩩᨿᩩᨣᨸᩥᨱ᩠ᨯᩔ ᨧ ᨿᨳᩣ – ᪔᪓᪒᪐᪐᪐᪐. ᨿᩩᨣᩣᨶᩴ ᨸᨭᩥᨸᨲ᩠ᨳᩣᩁᨬ᩠ᨧ ᨸᩥᨱ᩠ᨯᩔ ᨧ ᨿᨳᩣᨠ᩠ᨠᨾᩴ ᩋᨶ᩠ᨲᩥᨾᩴ ᨻᩥᨶ᩠ᨴᩩᨾᩣᨴᩣᨿ ᨸᨭᩥᩃᩮᩣᨾᩮᨶ ᨣᨱᨿᩮ. ᨲᩴ ᨿᨳᩣ –

‘‘ᩑᨠᩴ ᨴᩈ ᩈᨲᨬ᩠ᨧᩮᩅ, ᩈᩉᩔ’ᨾᨿᩩᨲᩴ ᨲᨳᩣ;

ᩃᨠ᩠ᨡᨬ᩠ᨧ ᨶᩥᨿᩩᨲᨬ᩠ᨧᩮᩅ, ᨠᨾᩣ ᨴᩈᨣᩩᨱᩮᩣᨲ᩠ᨲᩁ’’ᨶ᩠ᨲᩥ.

ᨲᨲᩕ ᨴᩈᩈᩉᩔᩣᨶᩥ ᩋᨿᩩᨲᩴ. ᨴᩈᩃᨠ᩠ᨡᩣᨶᩥ ᨶᩥᨿᩩᨲᩴ. ᨲᨬ᩠ᨧ ᨠᩃᩥᨴ᩠ᩅᩣᨸᩁᩮᩈᩩ ᨶᨲ᩠ᨳᩦᨲᩥ ᩃᨠ᩠ᨡᨸᩁᩥᨿᨶ᩠ᨲᨾᩮᩅ ᨲᨲᩕ ᨣᨱᨿᩮ, ᨲᨴᩮᩅᩴ ᨿᩩᨣᩣᨶᩴ, ᨲᩴᨸᩥᨱ᩠ᨯᩔ ᨧ ᩋᨦ᩠ᨠᨲᩮᩣ ᨸᩩᨻ᩠ᨻᩅᩩᨲ᩠ᨲᩣ ᩅᩔᩈᨦ᩠ᨡ᩠ᨿᩣ ᩈᨬ᩠ᨬᩣᨲᩣ ᨽᩅᨲᩦᨲᩥ.

ᨲᨲᩕ ᨻᩕᩉ᩠ᨾᩩᨶᩮᩣ ᨴᩥᨶᩴ ᨶᩁᩣᨶᩴ ᩏᨴᨿᨠᨸ᩠ᨸᩮᩣ, ᩁᨲ᩠ᨲᩥ ᨸᨶ ᨡᨿᨠᨸ᩠ᨸᩮᩣ. ᩑᨠᩈ᩠ᨾᩥᨬ᩠ᨧ ᨻᩕᩉ᩠ᨾᨴᩥᨶᩮ ᨾᨶᩩᩈᨬ᩠ᨬᩥᨲᩣ ᨧᨲᩩᨴ᩠ᨴᩈ ᨻᩕᩉ᩠ᨾᩈᩩᨲᩣ ᨽᩅᨶ᩠ᨲᩥ. ᨲᨲᩕᩮᨠᩔ ᨾᨶ᩠ᩅᨶ᩠ᨲᩁᩔ ᩑᨠᩈᨲ᩠ᨲᨲᩥᨴᩥᨻ᩠ᨻᨿᩩᨣᩣᨶᩥ ᨸᨾᩣᨱᩴ, ᨲᨬ᩠ᨧ ᨾᩣᨶᩩᩈᩴ ᨧᨲᩩᨴ᩠ᨴᩈᨽᩥ ᩏᨲ᩠ᨲᩁᩴ [ᨧᨲᩩᩁᩣᩈᩦᨲᩥᩏᨲ᩠ᨲᩁᩴ (?)] ᨿᩩᨣᩈᨲᨴ᩠ᩅᨿᩴ. ᨲᨴᩮᩅᩴ ᨧᨲᩩᨴ᩠ᨴᩈᨽᩥ ᨾᨶ᩠ᩅᨶ᩠ᨲᩁᩮᩉᩥ ᨧᨲᩩᨶᩅᩩᨲ᩠ᨿᩩᨲ᩠ᨲᩁᩣᨶᩥ ᨶᩅᨴᩥᨻ᩠ᨻᨿᩩᨣᩈᨲᩣᨶᩥ ᨽᩅᨶ᩠ᨲᩥ. ᨾᩣᨶᩩᩈᩴ ᨲᩩ ᨧᨲᩩᩅᩦᩈᨲᩥᨿᩩᨣᩈᩉᩔᨧᨲᩩᨠ᩠ᨠᩴ. ᩑᩈᨬ᩠ᨧ [ᨨᩈᨲ᩠ᨲᨲ᩠ᨿᩣᨵᩥᨠᨶᩅᨲᩥᩴᩈᨿᩩᨣᩈᨲᩴ (?)] ᨾᨶ᩠ᩅᨶ᩠ᨲᩁᩣᨶᩴ ᩋᨭ᩠ᨮᩅᩦᩈᩈᩉᩔᩣᨵᩥᨠᩈᨲ᩠ᨲᩁᩈᨾᩣᨶᩩᩈᩅᩔᩃᨠ᩠ᨡᩈᨦ᩠ᨡ᩠ᨿᩣ ᩅᩣ ᨠᨲᨿᩩᨣᨸ᩠ᨸᨾᩣᨱᨠᩣ ᨸᨬ᩠ᨧ ᩈᨶ᩠ᨵᨿᩮᩣ ᨽᩅᨶ᩠ᨲᩥ. ᨲᩮᨶ ᩅᩩᨲ᩠ᨲᩴ ᩈᩪᩁᩥᨿᩈᩥᨴ᩠ᨵᨶ᩠ᨲᩮ [᪑.᪑᪘-᪑᪙] –

‘‘ᨿᩩᨣᩣᨶᩴ ᩈᨲ᩠ᨲᨲᩥ ᩈᩮᨠᩣ, ᨾᨶ᩠ᩅᨶ᩠ᨲᩁ’ᨾᩥᩉᩮᩣ’ᨧ᩠ᨧᨲᩮ;

ᨠᨲᩔ ᩈᨦ᩠ᨡ᩠ᨿᩣ ᨲᩔᨶ᩠ᨲᩮ, ᩈᨶ᩠ᨵᩥ ᩅᩩᨲ᩠ᨲᩮᩣ ᨩᩃᨸ᩠ᩃᩅᩮᩣ.

ᩈᩈᨶ᩠ᨵᨿᩮᩣ ᨲᩮ ᨾᨶᩅᩮᩣ, ᨠᨸ᩠ᨸᩮ ᨬᩮᨿ᩠ᨿᩣ ᨧᨲᩩᨴ᩠ᨴᩈ;

ᨠᨲᨸ᩠ᨸᨾᩣᨱᩣ ᨠᨸ᩠ᨸᩣᨴᩮᩣ, ᩈᨶ᩠ᨵᩦ ᨸᨬ᩠ᨧᨴᩈᨭ᩠ᨮᩥᨲᩣ’’ᨲᩥ.

ᨠᨲᨿᩩᨣᩔ ᨧ ᨸᩣᨴᩮᨶ ᨠᩃᩥᨶᩮᩣ ᨸᨾᩣᨱᩴ, ᨸᩣᨴᨴ᩠ᩅᨿᩮᨶ ᨴ᩠ᩅᩣᨸᩁᩔ, ᨸᩣᨴᨲ᩠ᨲᨿᩮᨶ ᨲᩮᨲᩣᨿ. ᨧᨲᩩᨿᩩᨣᨬ᩠ᨧᩮᨲᩴ ᨧᨠ᩠ᨠᨾᩥᩅ ᨽᨾᨲᩦᨲᩥ ᨸᨬ᩠ᨧᨴᩈᩉᩥ ᩈᨶ᩠ᨵᩦᩉᩥ ᨶᩁᩣᨶᩴ ᨿᩩᨣᩣᨶᩥ ᨧᨲᩩᩅᩦᩈᨲᩥ ᨽᩅᨶ᩠ᨲᩥ. ᨴᩮᩅᩣᨶᩴ ¶ ᨲᩩ ᨿᩩᨣᨧᨠ᩠ᨠᩴ. ᩑᨲᩣᨶᩥ ᨧ ᩈᩈᨶ᩠ᨵᩥᨧᨲᩩᨴ᩠ᨴᩈᨾᨶ᩠ᩅᨶ᩠ᨲᩁᩣᨶ᩠ᨿᩮᨠᨲᩮᩣᨸᩥ ᨸᩥᨱ᩠ᨯᩥᨲᩣᨶᩥ ᨴᩮᩅᩣᨶᩴ ᨿᩩᨣᩈᩉᩔᩴ ᨽᩅᨲᩥ, ᨶᩁᩣᨶᩴ ᨧᨲᩩᨿᩩᨣᩈᩉᩔᩴ, ᨲᨬ᩠ᨧ ᨻᩕᩉ᩠ᨾᩩᨶᩮᩣ ᨴᩥᨶᨾᩮᨠᩴ. ᩋᨬ᩠ᨬᩮᩣ ᨾᨶᩩ ᩋᩈ᩠ᨾᩥᩴ ᨾᨶ᩠ᩅᨶ᩠ᨲᩁᩴ, ᨻᩕᩉ᩠ᨾᩈᩩᨲᩣ ᩑᩅ ᨾᨶᩅᩮᩣ.

᪘᪒. ᨸᨬ᩠ᨧᨠᩴ ᨡᨿᨠᨸ᩠ᨸᩮ. ᨠᨸ᩠ᨸᨲᩮ ᨩᨣᨲᩦ ᩅᩥᨶᩔᨲᩮᨲᩥ ᨠᨸ᩠ᨸᩮᩣ. ᨡᨿᨶ᩠ᨲᩥ ᩑᨲ᩠ᨳ ᨡᨿᩮᩣ. ᨠᨸ᩠ᨸᩮᩣ ᨧ ᨡᨿᩮᩣ ᨧᩣᨲᩥ ᨠᨸ᩠ᨸᨠ᩠ᨡᨿᩣ. ᩈᩴᩅᨲ᩠ᨲᨲᩮ ᩏᨸᩁᨾᨲᩮ, ᩅᩥᨶᩔᨲᩮ ᩅᩣ ᨩᨣᨲᩦ ᩋᩈ᩠ᨾᩥᨶ᩠ᨲᩥ ᩈᩴᩅᨭ᩠ᨭᩮᩣ. ᨧᨲᩩᨿᩩᨣᩣᨶᨾᨶ᩠ᨲᩮ ᨩᩣᨲᩮᩣ ᨿᩩᨣᨶ᩠ᨲᩮᩣ. ᨸᩃᩦᨿᨲᩮ ᨡᩦᨿᨲᩮ ᨿᨲ᩠ᨳ ᩃᩮᩣᨠᩮᩣᨲᩥ ᨸᩃᨿᩮᩣ, ᨸᩩᨾᩮ, ᩈᨬ᩠ᨬᩣᨿᩴ ᨱᩮᩣ. ᨠᩮᨧᩥ ᨸᨶᩮᨲ᩠ᨳ ‘‘ᨠᨸ᩠ᨸᨠ᩠ᨡᨿᩮᩣ ᨲᩪ’’ᨲᩥ ᨸᩣᨮᩴ ᩅᨲ᩠ᩅᩣ ᨴ᩠ᩅᩥᨶ᩠ᨶᨾᩮᨠᩣᨽᩥᨵᩣᨶᨲ᩠ᨲᩴ ᨠᨸ᩠ᨸᩮᨶ᩠ᨲᩥ, ᨲᩴ ᩋᨾᩁᨠᩮᩣᩈᩮᨶ ᨧ ᨲᨭ᩠ᨭᩦᨠᩣᨿ ᨧ ᨶ ᩈᨾᩮᨲᩥ. ᩅᩩᨲ᩠ᨲᨬ᩠ᩉᩥ ᨲᨲ᩠ᨳ ‘‘ᩈᩴᩅᨭ᩠ᨭᩮᩣ, ᨸᩃᨿᩮᩣ, ᨠᨸ᩠ᨸᩮᩣ, ᨡᨿᩮᩣ, ᨠᨸ᩠ᨸᨶ᩠ᨲᨾᩥᨧ᩠ᨧᨸᩦ’’ᨲᩥ [ᩋᨾᩁ ᪔.᪒᪒] ᨧ ‘‘ᨸᨬ᩠ᨧᨠᩴ ᨡᨿᨠᨸ᩠ᨸᩮ’’ᨲᩥ ᨧ.

ᨴ᩠ᩅᨿᩴ ᨠᩣᩊᨠᨱ᩠ᨱᩥᨿᩴ. ᨶᩥᨶ᩠ᨴᩥᨲᨻ᩠ᨻᨲ᩠ᨲᩣ ᨶ ᩃᨠ᩠ᨡᩦᨿᨲᩮᨲᩥ ᩋᩃᨠ᩠ᨡᩦ. ᩋᨲ᩠ᨲᨶᩮᩣ ᨶᩥᩔᨿᩴ ᨠᩣᩊᩅᨱ᩠ᨱᩈᨴᩥᩈᩴ ᨠᩁᩮᩣᨲᩥ ᩋᨸ᩠ᨸᨠᩣᩈᨠᨲ᩠ᨲᩣᨲᩥ ᨠᩣᩊᨠᨱ᩠ᨱᩦ, ᨠᩁᨲᩮᩣ ᨱᩮᩣ, ᩁᩔ ᨱᩮᩣ, ᩎ ᨧ. ᨴ᩠ᩅᨿᩴ ᩈᩥᩁᩥᨿᩴ. ᨸᩈᩴᩈᩥᨲᨻ᩠ᨻᨲ᩠ᨲᩣ ᩃᨠ᩠ᨡᩦᨿᨲᩮᨲᩥ ᩃᨠ᩠ᨡᩦ. ᨠᨲᨸᩩᨬ᩠ᨬᩮᩉᩥ ᩈᩮᩅᩦᨿᨲᩮ, ᨲᩮ ᩅᩣ ᩈᩮᩅᨲᩦᨲᩥ ᩈᩥᩁᩦ, ᩁᩮᩣ, ᩎ ᨧ.

᪘᪓. ᨴ᩠ᩅᨿᩴ ᨴᩣᨶᩅᩣᨶᩴ ᨾᩣᨲᩁᩥ. ᨴᩣ ᩋᩅᨡᨱ᩠ᨯᨶᩮ, ᨴᩣᨿᨲᩦᨲᩥ ᨴᨶᩩ. ᨴ᩠ᩅᨿᩴ ᨴᩮᩅᩣᨶᩴ ᨾᩣᨲᩁᩥ. ᨴᩥᨲᩦᨲᩥ ᩋᩈᩩᩁᩣᨶᨾᩮᩅ ᩅᩮᨾᩣᨲᩥᨠᩣ ᨾᩣᨲᩣ, ᨲᩔᩣ ᨸᨭᩥᨸᨠ᩠ᨡᨽᩣᩅᩮᨶ ᩋᨴᩥᨲᩥ.

᪘᪔. ᩌᨣᩩᨶ᩠ᨲᩴ ¶ ᨸᩣᨸᩮ. ᨸᩣᨶ᩠ᨲᩥ ᩁᨠ᩠ᨡᨶ᩠ᨲᩥ ᩋᨲ᩠ᨲᩣᨶᨾᩈ᩠ᨾᩣᨲᩥ ᨸᩣᨸᩴ, ᨸᨠᩣᩁᩅᨱ᩠ᨱᩣᨣᨾᩮᩣ, ᨴᩩᨣ᩠ᨣᨲᩥᩴ ᨸᩣᨸᨶᨲᩮᩣ ᩅᩣ ᨸᩣᨸᩴ. ᨠᩥᩃ᩠ᨿᨲᩮ ᩈᩥᨳᩥᩃᩦ ᨠᩁᩥᨿ᩠ᨿᨲᩮ ᨿᩮᨶᩮᨲᩥ ᨠᩥᨻ᩠ᨻᩥᩈᩴ, ᩃᩔ ᩅᩮᩣ, ᩍᩈᩮᩣ ᨧ, ᨠᩁᩮᩣᨲᩥ ᩋᨶᩥᨭ᩠ᨮᨹᩃᨶ᩠ᨲᩥ ᩅᩣ ᨠᩥᨻ᩠ᨻᩥᩈᩴ, ᩍᨻ᩠ᨻᩥᩈᩮᩣ. ᩅᩥᩁᩪᨸᩮᨶ ᨣᨧ᩠ᨨᨲᩦᨲᩥ ᩅᩮᩁᩴ. ᨶ ᩉᨶ᩠ᨲᩥ ᨵᨬ᩠ᨬᨶ᩠ᨲᩥ ᩋᨥᩴ, ᩉᨶᩔ ᨥᩮᩣ, ᩈᩣᨵᩪᩉᩥ ᩋᨣᨶ᩠ᨲᨻ᩠ᨻᨲ᩠ᨲᩣ ᩅᩣ ᩋᨥᩴ, ᩉᨶ ᨣᨲᩥᨿᩴ. ᨠᩩᨧ᩠ᨨᩥᨲᩴ ᨧᩁᩥᨲᩴ ᨴᩩᨧ᩠ᨧᩁᩥᨲᩴ. ᨴᩩ ᨶᩥᨶ᩠ᨴᩥᨲᩴ ᨠᩁᨱᨾᩔ ᨴᩩᨠ᩠ᨠᨭᩴ. ᨶ ᨸᩩᨶᩣᨲᩦᨲᩥ ᩋᨸᩩᨬ᩠ᨬᩴ. ᨠᩩᩈᩃᩣᨶᩴ ᨸᨭᩥᨸᨠ᩠ᨡᩴ ᩋᨠᩩᩈᩃᩴ. ᨠᩴ ᩈᩩᨡᩴ ᩉᨶᨲᩦᨲᩥ ᨠᨱ᩠ᩉᩴ, ᩅᨱ᩠ᨱᩅᩥᨸᩁᩥᨿᨿᩮᩣ. ᨠᩃ᩠ᨿᨲᩮ ᩋᨶᩮᨶ ᨠᩃᩩᩈᩴ, ᩏᩈᩮᩣ, ᨠᩴ ᩅᩣ ᩈᩩᨡᩴ ᩃᩩᨶᨶ᩠ᨲᩮᩣ ᩈᩮᨲᩦᨲᩥ ᨠᩃᩩᩈᩴ. ᨴᩩ ᨶᩥᨶ᩠ᨴᩥᨲᩴ ᩍᨲᩴ ᨣᨾᨶᨾᩔ ᨴᩩᩁᩥᨲᩴ. ᩋᨣᨶ᩠ᨲᨻ᩠ᨻᩴ ᨣᨧ᩠ᨨᨲᩥ ᩑᨲᩮᨶᩣᨲᩥ ᩌᨣᩩ, ᩌ ᨸᩦᩊᨿᩴ ᨣᨧ᩠ᨨᨲᩦᨲᩥ ᩅᩣ ᩌᨣᩩ, ‘‘ᩌ ᨲᩩ ᨠᩮᩣᨵᨾᩩᨴᩣᨭ᩠ᨭᩦᩈᩪ’’ᨲᩥ ᩉᩥ ᩑᨠᨠ᩠ᨡᩁᨠᩮᩣᩈᩮ ᩅᩩᨲ᩠ᨲᩴ.

᪘᪕-᪘᪖. ᨨᨠ᩠ᨠᩴ ᨵᨾ᩠ᨾᩮ. ᨠᩩᨧ᩠ᨨᩥᨲᩮᨶᩣᨠᩣᩁᩮᨶ ᩈᨶ᩠ᨲᩣᨶᩮ ᩈᩮᨶ᩠ᨲᩦᨲᩥ ᨠᩩᩈᩣ, ᩁᩣᨣᩣᨴᨿᩮᩣ, ᨲᩮ ᩃᩩᨶᩣᨲᩥ ᨨᩥᨶ᩠ᨴᨲᩦᨲᩥ ᨠᩩᩈᩃᩴ. ᩈᩩᨡᩴ ᨠᩁᩮᩣᨲᩥ, ᩈᩮᩣᨽᨶᩴ ᩅᩣ ᨠᩁᨱᨾᩔ ᩈᩩᨠᨲᩴ. ᩈᩩᨡᩴ ᨠᩁᩮᩣᨲᩦᨲᩥ ᩈᩩᨠ᩠ᨠᩴ. ᨸᩩᨶᩣᨲᩦᨲᩥ ᨸᩩᨬ᩠ᨬᩴ. ᨵᩁᨲᩥ ᩈᨻ᩠ᨻᨶ᩠ᨲᩥ ᨵᨾ᩠ᨾᩴ. ᩋᨸᩁᩮ ᨸᨶᩥᨴᩴ ‘‘ᨸᩩᨬ᩠ᨬᨵᨾ᩠ᨾ’’ᨾᩥᨲ᩠ᨿᩮᨠᨸᨴᩴ ᩅᨴᨶ᩠ᨲᩥ, ᨲᩴ ᩋᨾᩁᨠᩮᩣᩈᩮᨶ [ᩋᨾᩁ ᪔.᪒᪔] ᩅᩥᩁᩩᨩ᩠ᨫᨶᨲᩮᩣ ᨶ ᨣᩉᩮᨲᨻ᩠ᨻᩴ. ᩈᩩᨶ᩠ᨴᩁᩴ ᨧᩁᨱᨾᩔ ᩈᩩᨧᩁᩥᨲᩴ.

ᨲᩥᨠᩴ ¶ ᨴᩥᨭ᩠ᨮᨵᨾ᩠ᨾᩥᨠᩮ. ᨴᩥᨭ᩠ᨮᨵᨾ᩠ᨾᩮᩣ ᨶᩣᨾ ᨸᨧ᩠ᨧᨠ᩠ᨡᩮᩣ ᩋᨲ᩠ᨲᨽᩣᩅᩮᩣ, ᨲᨲ᩠ᨳ ᨶᩥᨻ᩠ᨻᨲ᩠ᨲᩴ ᨴᩥᨭ᩠ᨮᨵᨾ᩠ᨾᩥᨠᩴ. ᩍᩉᩃᩮᩣᨠᩮ ᨩᩣᨲᩴ ᩍᩉᩃᩮᩣᨠᩥᨠᩴ. ᩈᨶ᩠ᨴᩥᨭ᩠ᨮᩮ ᨸᨧ᩠ᨧᨠ᩠ᨡᩮ ᩋᨲ᩠ᨲᨽᩣᩅᩮ ᨩᩣᨲᩴ ᩈᨶ᩠ᨴᩥᨭ᩠ᨮᩥᨠᩴ. ᨴ᩠ᩅᨿᩴ ᩈᨾ᩠ᨸᩁᩣᨿᩥᨠᩮ. ᨲᩴ ᩅᨧᨶᨲ᩠ᨳᨲᩮᩣ ᩈᩩᩅᩥᨬ᩠ᨬᩮᨿ᩠ᨿᩴ.

ᨴ᩠ᩅᨿᩴ ᨲᨠ᩠ᨠᩣᩃᩮ. ᨲᩈ᩠ᨾᩥᩴᨿᩮᩅ ᨠᩣᩃᩮ ᨩᩣᨲᩴ, ᨶᩣᩈᨶ᩠ᨶᨠᩣᩃᩣᨴᩦᩈᩪᨲᩥ ᨲᨠ᩠ᨠᩣᩃᩴ. ᨲᨴᩣ ᨲᩈ᩠ᨾᩥᩴᨿᩮᩅ ᨠᩣᩃᩮ ᨩᩣᨲᩴ ᨲᨴᩣᨲ᩠ᩅᩴ, ᨲ᩠ᩅᩴ, ᨲᨴᩣᨲ᩠ᨲᨶ᩠ᨲᩥᨸᩥ ᨸᩣᨮᩮᩣ. ᨴ᩠ᩅᨿᩴ ᩌᨿᨲᩥᨠᩣᩃᩮ. ᩏᨲ᩠ᨲᩁᨠᩣᩃᩮᩣ ᨸᨧ᩠ᨨᩥᨾᩮᩣ ᨠᩣᩃᩮᩣ. ᩌᨣᨾᩥᩔᨲᩦᨲᩥ ᩌᨿᨲᩥ, ᩌᨸᩩᨻ᩠ᨻᩮᩣ ᩍ ᨣᨲᩥᨾ᩠ᩉᩥ. ᩑᨲ᩠ᨳ ᨧ ᨿᩴ ᩍᨾᩈ᩠ᨾᩥᩴ ᩋᨲ᩠ᨲᨽᩣᩅᩮ ᨴᩪᩁᨾᩣᩈᨶ᩠ᨶᩴ ᩅᩣ, ᨲᩴ ᨴᩥᨭ᩠ᨮᨵᨾ᩠ᨾᩥᨠᩴ. ᨿᩴ ᨸᨶ ᩍᨾᩈ᩠ᨾᩥᩴ ᩋᨲ᩠ᨲᨽᩣᩅᩮ ᩅᩣ ᩈᨾ᩠ᨸᩁᩣᨿᩮ ᩅᩣ ᨴᩪᩁᨲᩁᩴ, ᨲᩴ ᩌᨿᨲᩥ.

᪘᪗-᪘᪘. ᨸᨾᩮᩣᨴᨶ᩠ᨲᩴ ᨸᩣᨾᩮᩣᨩ᩠ᨩᩮ. ᩉᩈᨲᩥ ᨿᩮᨶᩣᨲᩥ ᩉᩣᩈᩮᩣ. ᩋᨲ᩠ᨲᩣ ᨾᨶᩮᩣ ᨿᩔ ᩋᨲ᩠ᨲᨾᨶᩮᩣ. ᨴᩩᨭ᩠ᨮᩔ ᩉᩥ ᨾᨶᩮᩣ ᩋᨲ᩠ᨲᩣ ᨶᩣᨾ ᨶ ᩉᩮᩣᨲᩥ, ᨲᩔ ᨽᩣᩅᩮᩣ ᩋᨲ᩠ᨲᨾᨶᨲᩣ, ᨸᩣᨾᩮᩣᨩ᩠ᨩᩴ. ᨸᩦᨱᩮᨲᩥ ᨲᨸ᩠ᨸᩮᨲᩦᨲᩥ ᨸᩦᨲᩥ. ᩅᩥᨶ᩠ᨴᨲᩥ ᩈᩩᨡᩴ ᩑᨲᩣᨿᩣᨲᩥ ᩅᩥᨲ᩠ᨲᩥ. ᨲᩩᩔᨶ᩠ᨲᩥ ᩑᨲᩣᨿᩣᨲᩥ ᨲᩩᨭ᩠ᨮᩥ, ᨲᩴᩈᩉᨧᩁᨱᨲᩮᩣ ᩅᩥᨲ᩠ᨲᩥ, ᨲᩴᩈᩉᨧᩁᨱᨲᩮᩣ ᨸᩦᨲᩥ ᨧ ᨶᩣᩁᩥᨿᩴ, ᩋᨲ᩠ᨲᨾᨶᨲᩣ ᨸᨶ ᨶᩥᨴ᩠ᨴᩮᩈᨲᩮᩣ ᩁᩪᨸᨽᩮᨴᩮᩣ. ᩌ ᨽᩩᩈᩮᩣ ᨶᨶ᩠ᨴᨿᨲᩦᨲᩥ ᩌᨶᨶ᩠ᨴᩮᩣ. ᨾᩩᨴ ᩉᩣᩈᩮ, ᨸᨾᩩᨴᩮᩣ, ᩌᨾᩮᩣᨴᩮᩣᨸᩥ. ᩈᨶ᩠ᨲᩩᩔᨶᩴ ᩈᨶ᩠ᨲᩮᩣᩈᩮᩣ ¶ . ᨶᨶ᩠ᨴᨶᩴ ᨶᨶ᩠ᨴᩥ. ᩈᨾ᩠ᨾᨴᩮᩣ ᩈᨾ᩠ᨾᨴᩣᨸᩥ [ᩈᨾ᩠ᨾᩩᨴᩮᩣ, ᩈᨾ᩠ᨾᨴᩮᩣᨸᩥ (?)], ᩏᨠᩣᩁᩔ ᩋ. ᨸᨾᩮᩣᨴᩥᨲᩔ ᨸᩩᨣ᩠ᨣᩃᩔ, ᨧᩥᨲ᩠ᨲᩔ ᩅᩣ ᨽᩣᩅᩮᩣ ᨸᩣᨾᩮᩣᨩ᩠ᨩᩴ.

ᨲᩥᨠᩴ ᩈᩩᨡᩮ. ᩈᩩᨭ᩠ᨮᩩ ᨡᨱᨲᩦᨲᩥ ᩈᩩᨡᩴ, ᨠ᩠ᩅᩥ. ᩈᩣᨴᩦᨿᨲᩥ ᩋᩔᩣᨴᩦᨿᨲᩦᨲᩥ ᩈᩣᨲᩴ. ᨹᩔᨲᩥ ᩈᩥᨶᩮᩉᨲᩦᨲᩥ ᨹᩣᩈᩩ, ᨹᩩᩈᨲᩥ ᩅᩣ ᨻᩣᨵᨲᩥ ᨴᩩᨠ᩠ᨡᨶ᩠ᨲᩥ ᨹᩣᩈᩩ. ᩈᨲ᩠ᨲᨠᩴ ᨠᩃ᩠ᨿᩣᨱᩮ. ᨽᨴᩥ ᨠᩃ᩠ᨿᩣᨱᩮ, ᨽᨴ᩠ᨴᨲᩦᨲᩥ ᨽᨴ᩠ᨴᩴ. ᨸᩈᨲ᩠ᨳᨲᩁᨲ᩠ᨲᩣ ᩈᩮᨿ᩠ᨿᩮᩣ. ᩈᩮᩣᨽᨲᩦᨲᩥ ᩈᩮᩣᨽᩴ. ᨡᩦ ᨡᨿᩮ, ᨡᩮᨸᩮᨲᩥ ᩋᩈᩩᨡᩴ ᨡᩮᨾᩴ, ᨾᩮᩣ. ᨠᩃ᩠ᨿᩴ ᨶᩥᩁᩮᩣᨣᩴ ᩋᨱᨲᩥ ᨣᨧ᩠ᨨᨲᩥ, ᨠᩃ᩠ᨿᩴ ᩅᩣ ᩉᩥᨲᩴ ᩋᨱᨿᨲᩥ ᨸᩣᨸᨿᨲᩦᨲᩥ ᨠᩃ᩠ᨿᩣᨱᩴ, ᨠᨾ᩠ᨾᨶᩥ ᨱᩮᩣ [ᨠᨾ᩠ᨾᨶᩥ ᩏᨸᨸᨴᩮ ᨱᨸᨧ᩠ᨧᨿᩮᩣᨲᩥ ᩋᨵᩥᨸ᩠ᨸᩣᨿᩮᩣ]. ᨾᨦ᩠ᨣ ᨣᨲ᩠ᨿᨲ᩠ᨳᩮᩣ, ᨾᨦ᩠ᨣᨲᩥ ᨵᨬ᩠ᨬᩴ ᨾᨦ᩠ᨣᩃᩴ, ᩋᩃᩮᩣ. ᩈᨾᩮᨲᩥ ᨴᩩᨠ᩠ᨡᨶ᩠ᨲᩥ ᩈᩥᩅᩴ, ᩅᩮᩣ.

᪘᪙. ᨨᨠ᩠ᨠᩴ ᨴᩩᨠ᩠ᨡᩮ. ᨴᩩᨠ᩠ᨠᩁᩴ ᨡᨾᨶᨾᩮᨲ᩠ᨳ ᨴᩩᨠ᩠ᨡᩴ. ᨠᩈ ᨣᨾᨶᩮ, ᨠᩈᨲᩥ ᩋᨸᩩᨬ᩠ᨬᨶ᩠ᨲᩥ ᨠᩈᩥᩁᩴ, ᩍᩁᩮᩣ, ᨠᩩᨧ᩠ᨨᩥᨲᩮᨶᩣᨠᩣᩁᩮᨶ ᩈᩮᨲᩦᨲᩥ ᩅᩣ ᨠᩈᩥᩁᩴ. ᨠᩥᩁ ᩅᩥᨠ᩠ᨡᩥᨸᨶᩮ, ᨠᩥᩁᨲᩥ ᩈᩩᨡᨶ᩠ᨲᩥ ᨠᩥᨧ᩠ᨨᩴ, ᨠᨲᩣ ᩅᩣ ᨸᩩᨬ᩠ᨬᨠᩁᨱᩥᨧ᩠ᨨᩣ ᨿᩮᨶᩣᨲᩥ ᨠᩥᨧ᩠ᨨᩴ, ‘‘ᨴᩩᨠ᩠ᨡᩪᨸᨶᩥᩈᩣ ᩈᨴ᩠ᨵᩣ’’ᨲᩥ ᩉᩥ ᩅᩩᨲ᩠ᨲᩴ. ᨶᨲ᩠ᨳᩥ ᩋᨵᩥᨣᨾᨶᨲ᩠ᨳᩴ ᩎᩉᩣ ᩑᨲ᩠ᨳᩣᨲᩥ ᨶᩦᨥᩮᩣ, ᩉᩔ ᨥᩮᩣ, ᩋᨳ ᩅᩣ ᨶᩥᩉᨶ᩠ᨲ᩠ᨿᨸᩩᨬ᩠ᨬᩴ ᩉᩥᩴᩈᨲᩥ ᨣᨧ᩠ᨨᨲᩦᨲᩥ ᩅᩣ ᨶᩦᨥᩮᩣ, ᨸᩩᨬ᩠ᨬᩴ ᩅᩣ ᨶ ᩉᨶ᩠ᨲᩥ ᨶ ᨣᨧ᩠ᨨᨲᩦᨲᩥ ᨶᩦᨥᩮᩣ. ᩅᩥᩁᩪᨸᨾᩈᨲᩥ ᨿᩮᨶᩣᨲᩥ ᨻ᩠ᨿᩈᨶᩴ, ᩅᩥᩈᩥᨭ᩠ᨮᩴ ᩅᩣ ᩋᩈᨲᩥ ᨡᩮᨸᩮᨲᩦᨲᩥ ᨻ᩠ᨿᩈᨶᩴ. ᨶ ᩉᨶ᩠ᨲᩥ ᨵᨬ᩠ᨬᨶ᩠ᨲᩥ ᩋᨥᩴ. ᩑᨲᩮ ᨸᩣᨸᩣᨴᨿᩮᩣ ᨣᩩᨱᩮ ᨿᨳᩣᩅᩩᨲ᩠ᨲᩃᩥᨦ᩠ᨣᩣ. ᨸᩣᨸᨸᩩᨬ᩠ᨬᩣᨶᩥ ᩈᩩᨡᩣᨴᩥ ᨧ ᩌᨠᩥᨧ᩠ᨨᩴ ᨠᩥᨧ᩠ᨨᨶ᩠ᨲᩴ ᨣᩩᨱᨿᩮᩣᨣᨲᩮᩣ ᨴᨻ᩠ᨻᩮ ᩅᩥᩈᩮᩈ᩠ᨿᩮ ᩅᨲ᩠ᨲᨾᩣᨶᩣᨶᩥ ᨲᩦᩈᩩ. ᨿᨳᩣ –

ᨸᩣᨸᩣ ᩏᨲᩩᨾᨲᩦ ᨠᨬ᩠ᨬᩣ, ᨸᩣᨸᩮᩣ ᩁᩣᨩᩣᨸ᩠ᨿᩁᨠ᩠ᨡᨠᩮᩣ;

ᨸᩣᨸᩴ ᨻ᩠ᨿᩣᨵᨠᩩᩃᩴ ᩉᩥᩴᩈᩴ, ᨸᩣᨸᩮᩣ ᩅᩥᨸ᩠ᨸᩮᩣ ᨧ ᩈᩮᩅᨠᩮᩣ;

ᨸᩩᨬ᩠ᨬᩴ ᨲᩥᨲ᩠ᨳᨾᩥᨴᩴ ᨸᩩᨬ᩠ᨬᩣ, ᨶᨴᩦ ᨸᩩᨬ᩠ᨬᩮᩣ’ᨿ’ᨾᩔᨾᩮᩣ.

ᩈᩩᨡᩴ ¶ ᨠᩣᨾᩥᨠᩩᩃᩴ ᨴᨻ᩠ᨻᩴ [ᩈᨻ᩠ᨻᩴ (?)], ᩈᩩᨡᩮᩣ ᩅᩣᩈᩮᩣ ᩈᩉᩣ’ᨾ᩠ᨻᨿᩣ [ᩈᩉᩣᨶ᩠ᩅᨿᩮᩣ (ᨠ.)];

ᩈᩩᨡᩣ ᨿᩩᩅᨲᩥ’ᩁᩥᨧ᩠ᨨᨶ᩠ᨲᩦ, ᩈᩩᨡᩣ ᩅᩮ ᨾᨥᩅᨣ᩠ᨣᩉᩣ [ᩈᩩᨡᩣ ᨿᩩᩅᨲᩥᨠᩣ ᨣᩉᩣ (ᨠ.)].

ᨿᨴᩣ ᨲᩩ ᩈᨠᨲ᩠ᨳᨸ᩠ᨸᨵᩣᨶᩴ ᩈᩩᨡᩣᨴᩥᨠᨾᩮᩅ ᩅᩥᩈᩮᩈ᩠ᨿᨲ᩠ᨲᩮᨶ ᩅᨲ᩠ᨲᩩᨾᩥᨧ᩠ᨨᨲᩮ, ᨶ ᨲᩩ ᨴᨻ᩠ᨻᩴ (ᨸᩩᨻ᩠ᨻᨾᩥᩅ ᩅᩥᩈᩮᩈᨶᩴ,) [( ) ᨧᩥᨶ᩠ᨲᩣᨾᨱᩥᨭᩦᨠᩣᨿᩴ ᨶ ᨴᩥᩔᨲᩥ] ᨲᨴᩣ ᩁᩪᨸᨽᩮᨴᩮᩣᨲ᩠ᨲᨾᩮᩅ ᩃᩥᨦ᩠ᨣᩴ. ᨿᨳᩣ –

‘‘ᨴᩣᩃᩥᨴ᩠ᨴᩮᨸᩥ [ᩅᩃᩥᨲ᩠ᨲᩮᨸᩥ (ᨠ.)] ᨵᨶᩥᨲ᩠ᨲᩮᨸᩥ, ᩅᩈᩮᩣ ᨸᩁᩥᨩᨶᩮᩣ ᩈᩩᨡᩴ;

ᩈᩩᨡᩴ ᩈᨩ᩠ᨩᨶᩅᩣᩈᩮᩣ ᨧ, ᩈᩩᨡᩴ ᩈᨶ᩠ᨲᩥ ᩋᨶᩩᨲ᩠ᨲᩁᩣ’’ᨲᩥ.

ᨶᨶᩩ ‘‘ᨴᩩᨠ᩠ᨠᨭᩮᩣᨿᩴ ᨻ᩠ᨿᩣᨸᩣᩁᩮᩣ, ᩈᩩᨠᨲᩴ ᨠᨾ᩠ᨾᩴ, ᨠᩃᩩᩈᩮᩣᨿᩴ ᨾᩮ ᨻ᩠ᨿᩣᨸᩣᩁᩮᩣ’’ᨲᩥ ᩋᨬ᩠ᨬᩮᩈᨾ᩠ᨸᩥ ᨲᩦᩈᩩ ᩅᩩᨲ᩠ᨲᩥ ᩋᨲ᩠ᨳᩮᩅᩮᨲᩥ ᨠᩥᩴ ᨸᩣᨸᨸᩩᨬ᩠ᨬᩣᨶᨾᩮᩅ ᨣᩉᨱᩴ ᨽᩅᨲᩦᨲᩥ? ᩅᩩᨧ᩠ᨧᨲᩮ – ‘‘ᨴᩩᨭ᩠ᨮᩩ ᨠᨲᩮᩣ ᨴᩩᨠ᩠ᨠᨭᩮᩣ, ᩈᩩᨭ᩠ᨮᩩ ᨠᨲᩴ ᩈᩩᨠᨲ’’ᨾᩥᨧ᩠ᨧᩮᩅᩴ ᨠᩕᩥᨿᩣᨶᩥᨻᨶ᩠ᨵᨶᩣᨸᩥ ᨲᩦᩈᩩ ᩅᩩᨲ᩠ᨲᩥ ᩈᨾ᩠ᨽᩅᨲᩥ, ᨶᩣᩅᩔᩴ ᨣᩩᨱᨶᩥᨻᨶ᩠ᨵᨶᩣ ᩑᩅ. ᨠᩃᩩᩈᩔᨸᩥ ᨿᨴᩣ ᩈᩥᨭ᩠ᨮᨸᨿᩮᩣᨣᩮᩈᩩ ᩅᩥᩈᩮᩈ᩠ᨿᩅᩩᨲ᩠ᨲᩥ ᨲᩥᩃᩥᨦ᩠ᨣᨲᩣ ᩏᨸᩃᨻ᩠ᨽᨲᩮ, ᨲᨴᩣ ᨸᩣᨸᨣ᩠ᨣᩉᨱ’ᨾᨲ᩠ᨳᨸ᩠ᨸᨵᩣᨶᩴ ᨻ᩠ᨿᩣᨡ᩠ᨿᩣᨲᨻ᩠ᨻᩴ.

᪙᪐. ᨸᨬ᩠ᨧᨠᩴ ᩈᩩᨽᩣᩈᩩᨽᨠᨾ᩠ᨾᨾᨲ᩠ᨲᩮ. ᩍᨭ᩠ᨮᩣᨶᩥᨭ᩠ᨮᩅᩥᨸᩣᨠᨽᩣᨣᩮᩣ ᨿᨲ᩠ᨳ ᩋᨲ᩠ᨳᩦᨲᩥ ᨽᩣᨣ᩠ᨿᩴ. ᩈᩩᨽᩣᩈᩩᨽᨹᩃᩴ ᨶᩮᨲᩦᨲᩥ ᨶᩥᨿᨲᩥ,ᨲᩥ. ᩈᩩᨽᩣᩈᩩᨽᨹᩃᩴ ᨽᩣᨩᩮᨲᩦᨲᩥ ᨽᩣᨣᩮᩣ. ᩍᨭ᩠ᨮᩣᨶᩥᨭ᩠ᨮᩅᩥᨽᩣᨣᨽᩣᨣᩮᩣᨵᩦᨿᨲᩥ ᩑᨲ᩠ᨳᩣᨲᩥ ᨽᩣᨣᨵᩮᨿ᩠ᨿᩴ. ᩈᩩᨽᩣᩈᩩᨽᨹᩃᩴ ᩅᩥᨴᨵᩣᨲᩦᨲᩥ ᩅᩥᨵᩥ. ᩋᨿᩮᩣ, ᩈᩩᨽᩣᩅᩉᩮᩣ, ᨴᩮᩅᩴ, ᨴᩥᨭ᩠ᨮᩴᩍᨧ᩠ᨧᩣᨴᩦᨶᩥᨸᩥ ᩈᩩᨽᩣᩈᩩᨽᨠᨾ᩠ᨾᨾᨲ᩠ᨲᩔ ᨶᩣᨾᩣᨶᩥ. ᨸᨬ᩠ᨧᨠᩴ ᨩᩣᨲᩥᨿᩴ. ᩏᨸ᩠ᨸᨩ᩠ᨩᨶᩴ ᩏᨸ᩠ᨸᨲ᩠ᨲᩥ, ᨶᩥᨸ᩠ᨸᨩ᩠ᨩᨶᩴ ᨶᩥᨻ᩠ᨻᨲ᩠ᨲᩥ, ᨸᨴ ᨣᨲᩥᨿᩴ, ᨶᩥᨸᩩᨻ᩠ᨻᩮᩣ,ᨲᩥ, ᨸᩔ ᨻᩮᩣ. ᨩᨶᨶᩴ ᨩᩣᨲᩥ. ᨩᨶᩦᨿᨲᩮ ᨩᨶᨶᩴ. ᩏᨴ᩠ᨵᩴ ᨽᩅᨶᩴ ᩏᨻ᩠ᨽᩅᩮᩣ.

᪙᪑. ᨸᨩ᩠ᨩᩴ ¶ ᩉᩮᨲᩩᨾ᩠ᩉᩥ. ᩋᨲ᩠ᨲᨶᩮᩣ ᨹᩃᩴ ᨶᩥᨾᩥᨶᩣᨲᩦᨲᩥ ᨶᩥᨾᩥᨲ᩠ᨲᩴ, ᨾᩣ ᨸᩁᩥᨾᩣᨱᩮ, ᨶᩥᨸᩩᨻ᩠ᨻᩮᩣ. ᨠᩁᩮᩣᨲᩥ ᨹᩃᨶ᩠ᨲᩥ ᨠᩣᩁᨱᩴ. ᨲᩥᨭ᩠ᨮᨲᩥ ᨹᩃᨾᩮᨲ᩠ᨳᩣᨲᩥ ᨮᩣᨶᩴ. ᨸᨩ᩠ᨩᨲᩥ ᨶᩥᨸᨩ᩠ᨩᨲᩥ ᨹᩃᨾᩮᨲᩮᨶᩣᨲᩥ ᨸᨴᩴ, ᩅᩥᩈᩮᩈᩮᨶ ᨩᩣᨿᨲᩮᨲᩥ ᨻᩦᨩᩴ, ᩁᩔᩔ ᨴᩦᨥᨲᩣ. ᨶᩥᩔᩮᩈᩮᨶ ᩋᨲ᩠ᨲᨶᩮᩣ ᨹᩃᩴ ᨻᨶ᩠ᨵᨲᩥ ᨸᩅᨲ᩠ᨲᩮᨲᩦᨲᩥ ᨶᩥᨻᨶ᩠ᨵᨶᩴ. ᨶᩥᨴᩦᨿᨲᩮ ᨶᩥᨧ᩠ᨨᩦᨿᨲᩮ ᩋᨶᩮᨶᩮᨲᩥ ᨶᩥᨴᩣᨶᩴ, ᨿᩩ, ᨶᩥᨴᨴᩣᨲᩥ ᨹᩃᨶ᩠ᨲᩥ ᩅᩣ ᨶᩥᨴᩣᨶᩴ. ᨸᨽᩅᨲᩥ ᨹᩃᨾᩮᨲᩈ᩠ᨾᩣᨲᩥ ᨸᨽᩅᩮᩣ, ᩉᩥᨶᩮᩣᨲᩥ ᨣᨧ᩠ᨨᨲᩥ ᨸᩁᩥᨱᨾᨲᩥ ᨠᩣᩁᩥᨿᩁᩪᨸᨲᨶ᩠ᨲᩥ ᩉᩮᨲᩩ, ᨲᩩ, ᩉᩥᨶᩮᩣᨲᩥ ᩅᩣ ᨸᨲᩥᨭ᩠ᨮᩣᨲᩥ ᨹᩃᨾᩮᨲ᩠ᨳᩣᨲᩥ ᩉᩮᨲᩩ, ᩉᩥ ᨸᨲᩥᨭ᩠ᨮᩣᨿᩴ. ᩈᨾ᩠ᨽᩅᨲᩥ ᨿᩮᨶ ᨹᩃᨶ᩠ᨲᩥ ᩈᨾ᩠ᨽᩅᩮᩣ. ᩈᩥᨶᩮᩣᨲᩥ ᨹᩃᩴ ᨻᨶ᩠ᨵᨲᩦᨲᩥ ᩈᩮᨲᩩ. ᨸᨭᩥᨧ᩠ᨧ ᨹᩃᨾᩮᨲᩈ᩠ᨾᩣ ᩑᨲᩦᨲᩥ ᨸᨧ᩠ᨧᨿᩮᩣ.

᪙᪒. ᨿᩴ ᨠᩣᩁᨱᩴ ᩈᨾᩣᩈᨶ᩠ᨶᩴ ᩌᩈᨶ᩠ᨶᨲᩁᩴ ᨹᩃᩮᨶ, ᨲᩴ ᨸᨴᨭ᩠ᨮᩣᨶᨶ᩠ᨲᩥ ᨾᨲᩴ. ᨸᨴᩣᨶᩴ ᩉᩮᨲᩪᨶᩴ ᨮᩣᨶᩴ ᨸᨴᨭ᩠ᨮᩣᨶᩴ, ᨿᨳᩣ ‘‘ᩁᩣᨩᩁᩣᨩᩣ’’ᨲᩥ. ᨲᩥᩅᩥᨵᩴ ᨠᩣᩁᨱᩴ ᩏᨸᩣᨴᩣᨶᨠᩣᩁᨱᩴ ᩈᩉᨠᩣᩁᩦᨠᩣᩁᨱᩴ ᨠᩣᩁᨱᨠᩣᩁᨱᨶ᩠ᨲᩥ. ᨿᨳᩣ ᨻᩦᨩᩴ ᩋᨦ᩠ᨠᩩᩁᩔ ᩏᨸᩣᨴᩣᨶᨠᩣᩁᨱᩈᨦ᩠ᨡᩣᨲᩴ ᨸᨴᨭ᩠ᨮᩣᨶᩴ, ᨽᩪᨾᩥᨩᩃᩣᨴᩥ ᩈᩉᨠᩣᩁᩦᨠᩣᩁᨱᩴ, ‘‘ᨠᨾ᩠ᨾᩔ [ᨠᨾ᩠ᨸᩔ (?)] ᨠᩣᩁᨱᩴ ᨩᩁᩮᩣ, ᨲᩔ ᨠᩣᩁᨱᩴ ᨠᨹᩮᩣ’’ᨲᩥ ᨠᨹᩮᩣ ᨠᩣᩁᨱᨠᩣᩁᨱᩴ ᨠᨾ᩠ᨾᩔ [ᨠᨾ᩠ᨸᩔ (?)].

ᨲᩥᨠᩴ ¶ ᩈᩁᩦᩁᩣᨵᩥᨸᨲᩥᨴᩮᩅᩮ. ᨩᩦᩅᨶ᩠ᨲᩥ ᩈᨲ᩠ᨲᩣ ᨿᩮᨶᩣᨲᩥ ᨩᩦᩅᩮᩣ. ᨸᩪᩁᩮᨲᩥ ᨶᩥᩔᨿᩔᩣᨽᩥᩃᩣᩈᨶ᩠ᨲᩥ ᨸᩩᩁᩥᩈᩮᩣ, ᩍᩈᩮᩣ. ᩋᨲᨶ᩠ᨲᩥ ᩈᨲᨲᩴ ᨣᨧ᩠ᨨᨶ᩠ᨲᩥ ᩈᨲ᩠ᨲᩣ ᨿᩮᨶᩣᨲᩥ ᩋᨲ᩠ᨲᩣ. ᨴ᩠ᩅᨿᩴ ᩈᨲ᩠ᨲᩁᨩᩮᩣᨲᨾᩮᩣᩈᩣᨾ᩠ᨿᩣᩅᨲ᩠ᨳᩣᨿᩴ. ᨸᨵᩦᨿᨶ᩠ᨲᩮ ᨸᩃᩦᨿᨶ᩠ᨲᩮ ᩋᨲᩕ ᨣᩩᨱᩣ ᩈᨲ᩠ᨲᩁᨩᩮᩣᨲᨾᩮᩣ ᩁᩪᨸᩣᨲᩥ ᨸᨵᩣᨶᩴ, ᨿᩩ. ᨸᨠᩁᩮᩣᨲᩥ ᨸᩩᩁᩥᩈᩮᩣᨸᨽᩮᩣᨣᨲ᩠ᨳᩴ ᩈᨴ᩠ᨴᩣᨴᩥᨠᩣᩁᩥᨿᨶ᩠ᨲᩥ ᨸᨠᨲᩥ,ᨲᩥ. ᨾᩮᩣᩉᩁᩣᨣᨴᩮᩣᩈᩣᨶᩴ ᨿᨳᩣᩈᨦ᩠ᨡ᩠ᨿᩴ ᩈᨲ᩠ᨲᩁᨩᩮᩣᨲᨾᩣᨶᩦᨲᩥ ᩈᨬ᩠ᨬᩣ. ᩈᨲᩮᩣ ᨽᩣᩅᩮᩣ ᩈᨲ᩠ᨲᩴ, ᨮᩥᨲᩥᨸᩁᨲᩣ. ᩁᨩ᩠ᨩᨶ᩠ᨲ᩠ᨿᨲᩕᩣᨲᩥ ᩁᨩᩮᩣ, ᩈᨭ᩠ᨮᩥᨸᩁᨲᩣ. ᨲᨾᨶ᩠ᨲ᩠ᨿᨲᩕᩣᨲᩥ ᨲᨾᩮᩣ, ᨸᩃᨿᨸᩁᨲᩣ.

᪙᪓. ᨸᨩ᩠ᨩᩮᨶ ᨸᩣᨱᩥᨶᩮᩣ ᨶᩣᨾᩣᨶᩥ. ᨸᨱᨶ᩠ᨲᩥ ᨩᩦᩅᨶ᩠ᨲᩥ ᩈᨲ᩠ᨲᩣ ᨿᩮᨶᩣᨲᩥ ᨸᩣᨱᩮᩣ, ᩈᩮᩣ ᨿᩔᨲ᩠ᨳᩥ, ᩈᩮᩣ ᨸᩣᨱᩮᩣ. ᩈᩁᩦᩁᩈᨦ᩠ᨡᩣᨲᩮᩣ ᨠᩣᨿᩮᩣ ᨿᩔᨲ᩠ᨳᩥ, ᩈᩮᩣ ᩈᩁᩦᩁᩦ. ᨠᨾ᩠ᨾᩮᨶ ᨽᩅᨲᩦᨲᩥ ᨽᩪᨲᩴ, ᨶᨸᩩᩴᩈᨠᩮ, ᨸᩩᨾᩮᩅᩣᨲᩥ ᩅᩣᩈᨴ᩠ᨴᨲ᩠ᨳᩮᩣ. ᩁᩪᨸᩣᨴᩦᩈᩩ ᩈᨬ᩠ᨩᨲᩦᨲᩥ ᩈᨲ᩠ᨲᩮᩣ, ᨶᩥᨧ᩠ᨨᨶ᩠ᨴᩁᩣᨣᩣᨸᩥ ᩁᩪᩊ᩠ᩉᩥᨿᩣ ᩈᨲ᩠ᨲᩣᨲᩥ ᩅᩩᨧ᩠ᨧᨶ᩠ᨲᩥ. ᨴᩮᩉᩮᩣ ᨠᩣᨿᩮᩣ ᨿᩔᨲ᩠ᨳᩦᨲᩥ ᨴᩮᩉᩦ. ᨸᩪᩁᩮᨲᩦᨲᩥ ᨸᩪᨲᩥ, ᨸᩪᨲᩥᩈᨦ᩠ᨡᩣᨲᩴ ᩌᩉᩣᩁᩴ ᨣᩥᩃᨲᩥ ᩋᨴᨲᩦᨲᩥ ᨸᩩᨣ᩠ᨣᩃᩮᩣ, ᨲᩥᩔ ᩃᩮᩣᨸᩮᩣ, ᩈᨲ᩠ᨲᩣᨶᩴ ᩌᨿᩩᩴ ᨸᩪᩁᩮᨶ᩠ᨲᩮᩣ ᨣᨧ᩠ᨨᨲᩦᨲᩥ ᨸᩩᨣ᩠ᨣᩮᩣ, ᨲᩴ ᩃᩣᨲᩥ ᨽᨠ᩠ᨡᨲᩦᨲᩥ ᨸᩩᨣ᩠ᨣᩃᩮᩣ. ᨩᩦᩅᨶ᩠ᨲᩥ ᨿᩮᨶᩣᨲᩥ ᨩᩦᩅᩴ, ᨲᨾᩔᨲ᩠ᨳᩦᨲᩥ ᨩᩦᩅᩮᩣ. ᨿᨳᩣᩅᩩᨲ᩠ᨲᨲ᩠ᨳᩮᩣ ᨸᩣᨱᩮᩣ ᨿᩔᨲ᩠ᨳᩦᨲᩥ ᨸᩣᨱᩦ. ᨸᨠᩣᩁᩮᨶ ᨩᩣᨲᨲ᩠ᨲᩣ ᨸᨩᩣ. ᨩᩣᨿᨲᩦᨲᩥ ᨩᨶ᩠ᨲᩩ, ᨲᩩ. ᨠᩩᩈᩃᩣᨠᩩᩈᩃᩴ ᨩᨶᩮᨲᩦᨲᩥ ᨩᨶᩮᩣ. ᩃᩩᨩ᩠ᨩᨲᩦᨲᩥ ᩃᩮᩣᨠᩮᩣ, ᩃᩩᨩ ᩅᩥᨶᩣᩈᩮ, ᨩᩔ ᨠᩮᩣ. ᨿᨳᩣ ᨸᩩᩁᩥᨾᨠᩣ ᩈᨲ᩠ᨲᩣ ᨩᩣᨲᩥᨩᩁᩣᨾᩁᨱᩴ ᨣᨧ᩠ᨨᨶ᩠ᨲᩥ, ᨲᨳᩣ ᩋᨿᨾ᩠ᨸᩥ ᨣᨧ᩠ᨨᨲᩦᨲᩥ ᨲᨳᩣᨣᨲᩮᩣ.

᪙᪔. ᩁᩪᨸᩣᨴᨿᩮᩣ ¶ ᨨ ᨧᨠ᩠ᨡᩣᨴᩥᨣᨿ᩠ᩉᩣ ᨵᨾ᩠ᨾᩣ ‘‘ᨣᩮᩣᨧᩁᩣ’’ᨲᩥ ‘‘ᩌᩃᨾ᩠ᨻᩣ’’ᨲᩥ ‘‘ᩅᩥᩈᨿᩣ’’ᨲᩥ ‘‘ᩌᩁᨾ᩠ᨾᨱᩣᨶᩦ’’ᨲᩥ ‘‘ᩌᩃᨾ᩠ᨻᨱᩣᨶᩦ’’ᨲᩥ ᨧ ᩅᩩᨧ᩠ᨧᨶ᩠ᨲᩮ. ᩁᩪᨸᨿᨲᩥ ᨸᨠᩣᩈᩮᨲᩥ ᩋᨲ᩠ᨲᨶᩮᩣ ᩈᨽᩣᩅᨶ᩠ᨲᩥ ᩁᩪᨸᩴ. ᩈᨸ᩠ᨸᨲᩥ ᩏᨧ᩠ᨧᩣᩁᩦᨿᨲᩦᨲᩥ ᩈᨴ᩠ᨴᩮᩣ, ᩈᨸ᩠ᨸ ᨣᨲᩥᨿᩴ ᩅᩣ, ᩈᨸ᩠ᨸᨲᩮ ᨬᩣᨿᨲᩮ ᨿᩮᨶᩮᨲᩥ ᩈᨴ᩠ᨴᩮᩣ. ᨣᨶ᩠ᨵ ᩋᨴ᩠ᨴᨶᩮ, ᩋᨴ᩠ᨴᨶᩴ ᩉᩥᩴᩈᨶᩴ, ᨿᩣᨧᨶᨬ᩠ᨧ, ᩉᩥᩴᩈᨲᩮ ᩋᨽᩥᩃᩈᩦᨿᨲᩮ ᩅᩣ ᨣᨶ᩠ᨵᩮᩣ, ᨣᨶ᩠ᨵᩮᨲᩥ ᩅᩣ ᩋᨲ᩠ᨲᨶᩮᩣ ᩅᨲ᩠ᨳᩩᩴ ᩈᩪᨧᩮᨲᩥ ᨸᨠᩣᩈᩮᨲᩥ ‘‘ᩍᨴᨾᩮᨲ᩠ᨳ ᩋᨲ᩠ᨳᩦ’’ᨲᩥ ᨸᩮᩈᩩᨬ᩠ᨬᩴ ᨠᩁᩮᩣᨶ᩠ᨲᩮᩣ ᩅᩥᨿ ᩉᩮᩣᨲᩦᨲᩥ ᨣᨶ᩠ᨵᩮᩣ. ᩁᩈᨶ᩠ᨲᩥ ᨲᩴ ᩈᨲ᩠ᨲᩣ ᩋᩔᩣᨴᩮᨶ᩠ᨲᩦᨲᩥ ᩁᩈᩮᩣ. ᨹᩩᩈᩦᨿᨲᩦᨲᩥ ᨹᩔᩮᩣ. ᨣᩣᩅᩮᩣ ᩍᨶ᩠ᨴᩕᩥᨿᩣᨶᩥ ᨧᩁᨶ᩠ᨲ᩠ᨿᩮᨲᩮᩈᩩ ᨣᩮᩣᨧᩁᩣ. ᨧᩥᨲ᩠ᨲᨧᩮᨲᩈᩥᨠᩮᩉᩥ ᩌᩃᨾ᩠ᨻᩦᨿᨶ᩠ᨲᩮᨲᩥ ᩌᩃᨾ᩠ᨻᩣ. ᩈᩥ ᨻᨶ᩠ᨵᨶᩮ ᩅᩥᨸᩩᨻ᩠ᨻᩮᩣ, ᩅᩥᩈᩥᨶᩮᩣᨶ᩠ᨲᩥ ᩅᩥᨻᨶ᩠ᨵᨶ᩠ᨲᩥ ᩍᨶ᩠ᨴᩕᩥᨿᩣᨶᩦᨲᩥ ᩅᩥᩈᨿᩣ. ᩌᨣᨶ᩠ᨲ᩠ᩅᩣ ᨧᩥᨲ᩠ᨲᨧᩮᨲᩈᩥᨠᩣ ᩁᨾᨶ᩠ᨲᩥ ᩑᨲ᩠ᨳᩣᨲᩥ ᩌᩁᨾ᩠ᨾᨱᩣᨶᩥ, ᨿᩩ. ᩑᨲᩮ ᩍᨶ᩠ᨴᩕᩥᨿᨲ᩠ᨳᩣᨲᩥᨸ᩠ᨿᩩᨧ᩠ᨧᨶ᩠ᨲᩮ, ᩍᨶ᩠ᨴᩕᩥᨿᩮᩉᩥ ᩋᨲ᩠ᨳ᩠ᨿᨶ᩠ᨲᩮ ᩋᨽᩥᩃᩈᩦᨿᨶ᩠ᨲᩮᨲᩥ ᨠᨲ᩠ᩅᩣ.

᪙᪕. ᨸᨩ᩠ᨩᨴ᩠ᨵᩴ ᩈᩩᨠ᩠ᨠᩮ. ᩈᩩᨧ ᩈᩮᩣᨠᩮ, ᩈᩮᩣᨧᨶ᩠ᨲᩥ ᩑᨲᩮᨶ ᨲᨴᨲ᩠ᨳᩥᨠᩣᨲᩥ ᩈᩩᨠ᩠ᨠᩮᩣ, ᩋ. ᨣᩩ ᩈᨴ᩠ᨴᩮ, ᨣᩩᨿᨲᩮ ᨠᩥᨲ᩠ᨲᩦᨿᨲᩮᨲᩥ ᨣᩮᩣᩁᩮᩣ, ᩁᩮᩣ. ᩈᩥ ᩈᩮᩅᩣᨿᩴ, ᩈᩮᩅᩦᨿᨲᩮᨲᩥ ᩈᩥᨲᩮᩣ, ᩈᩥᨶᩮᩣᨲᩥ ᩅᩣ ᨻᨶ᩠ᨵᨲᩥ ᨧᩥᨲ᩠ᨲᨶ᩠ᨲᩥ ᩈᩥᨲᩮᩣ. ᩋᩅᨴᩣᨿᨲᩥ ᩈᨻ᩠ᨻᩅᨱ᩠ᨱᩮᨲᩥ ᩒᨴᩣᨲᩮᩣ. ᨴᩣ ᩋᩅᨡᨱ᩠ᨯᨶᩮ ᩋᩅᨸᩩᨻ᩠ᨻᩮᩣ. ᨵᩣᩅᨲᩥ ᩈᩩᨩ᩠ᨫᨲ᩠ᨿᨶᩮᨶᩮᨲᩥ ᨵᩅᩃᩮᩣ, ᩋᩃᩮᩣ. ᩈᩥᨲ ᩅᨱ᩠ᨱᩮ, ᨱᩮᩣ, ᩈᩮᨲᩮᩣ ¶ . ᨸᨯᩥ ᨣᨲᩥᨿᩴ, ᨸᨱ᩠ᨯᨲᩥ ᨸᨠᩣᩈᩮᨲᩦᨲᩥ ᨸᨱ᩠ᨯᩁᩮᩣ, ᩋᩁᩮᩣ. ᩈᩩᨧᩥ, ᩅᩥᩈᨴᩮᩣ, ᩋᨩ᩠ᨩᩩᨶᩮᩣᨲᩥᨸᩥ ᩈᩩᨠ᩠ᨠᨶᩣᨾᩣᨶᩥ.

ᨨᨠ᩠ᨠᩴ ᩁᨲ᩠ᨲᩮ. ᩈᩮᩣᨱ ᩅᨱ᩠ᨱᩮ, ᨱᩮᩣ, ᩁᨲ᩠ᨲᩩᨸ᩠ᨸᩃᩅᨱ᩠ᨱᩮᩣ, ᩁᩩᩉ ᨩᨶᨶᩮ, ᩍᨲᩮᩣ, ᩃᨲ᩠ᨲᩮ ᩃᩮᩣᩉᩥᨲᩮᩣ. ᩁᨬ᩠ᨩᨶ᩠ᨲ᩠ᨿᨶᩮᨶᩮᨲᩥ ᩁᨲ᩠ᨲᩮᩣ, ᩁᨶ᩠ᨩ ᩁᨦ᩠ᨣᩮ. ᨲᨾ᩠ᨻᩮᩣ ᩏᨴᩩᨾ᩠ᨻᩁᩈᨦ᩠ᨡᩣᨲᩮᩣ ᩃᩮᩣᩉᩅᩥᩈᩮᩈᩮᩣ, ᨲᨻ᩠ᨻᨱ᩠ᨱᨲᩣᨿ ᨲᨾ᩠ᨻᩮᩣ. ᨾᨬ᩠ᨩᩮᨭ᩠ᨮᩣ ᨶᩣᨾ ᩁᨲ᩠ᨲᩅᩃ᩠ᩃᩥ, ᨿᩣᨿ ᩉᨲ᩠ᨳᩥᨴᨶ᩠ᨲᩣᨴᩥᩅᩥᨠᨲᩥᨿᩮᩣ ᩁᨲ᩠ᨲᩣ ᨽᩅᨶ᩠ᨲᩥ, ᨲᨻ᩠ᨻᨱ᩠ᨱᨲᩣᨿ ᨾᨬ᩠ᨩᩮᨭ᩠ᨮᩮᩣ. ᩁᩮᩣᩉᩥᨲᩮᩣ ᩃᩮᩣᩉᩥᨲᩈᨾᩮᩣ, ᩋᩃᨲ᩠ᨲᨾᩮᩅ ᩅᩥᩈᩮᩈᩮᩣ.

᪙᪖. ᩈᩣᨾᩃᨶ᩠ᨲᩴ ᨠᨱ᩠ᩉᩮ. ᨶᩦᩃ ᩅᨱ᩠ᨱᩮ, ᩋ. ᨠᩔᨲᩮᨲᩥ ᨠᨱ᩠ᩉᩮᩣ, ᨠᩈ ᩅᩥᩃᩮᨡᨶᩮ, ᨱ᩠ᩉᩮᩣ. ᨶ ᩈᩥᨲᩮᩣ ᩋᩈᩥᨲᩮᩣ. ᩅᨱ᩠ᨱᩮᩈᩩ ᩑᨠᨠᩮᩣᨭ᩠ᨮᩣᩈᨽᩣᩅᩮᨶ ᨠᩃ᩠ᨿᨲᩮᨲᩥ ᨠᩣᩃᩮᩣ, ᩈᩮᩣ ᩑᩅ ᨠᩣᩊᩮᩣ. ᨾᨧ, ᨾᨧᩥ ᨠᨠ᩠ᨠᨶᩮ, ᨠᨠ᩠ᨠᨶᩴ ᨸᩥᩈᨶᩴ, ᩈᩮᨲᩣᨴᩥᨠᩴ ᨾᨧᨲᩦᨲᩥ ᨾᩮᨧᨠᩮᩣ, ᨱ᩠ᩅᩩ, ᩋᩔᩮᨲ᩠ᨲᩴ. ᩈᩣ ᨲᨶᩩᨠᩁᨱᩮ, ᩈᩣᨿᨲᩥ ᨲᨶᩩᨠᩁᩦᨿᨲᩥ ᨸᨭᩥᨸᨠ᩠ᨡᩅᨱ᩠ᨱᩮᩉᩦᨲᩥ ᩈᩣᨾᩮᩣ. ᩈᩣᨾᩃᩮᩣ ᩈᩣᨾᩈᨴᩥᩈᩮᩣ, ᨾᩃᨸᨧ᩠ᨧᨿᩮᩣᩅ ᩅᩥᩈᩮᩈᩮᩣ.

ᨸᨱ᩠ᨯᩩᩈᨴ᩠ᨴᩮᩣ ᩈᩥᨲᨸᩦᨲᩮ ᩏᨲ᩠ᨲᩮᩣ, ᩈᩥᨲᨸᩦᨲᩈᨾ᩠ᨾᩥᩔᩥᨲᩅᨱ᩠ᨱᩮ ᨸᨱ᩠ᨯᩩᩈᨴ᩠ᨴᩮᩣ ᩅᩩᨲ᩠ᨲᩮᩣᨲ᩠ᨿᨲ᩠ᨳᩮᩣ. ᩅᩩᨲ᩠ᨲᨬ᩠ᨧ ‘‘ᩈᩥᨲᨸᩦᨲᩈᨾᩣᨿᩩᨲ᩠ᨲᩮᩣ, ᨸᨱ᩠ᨯᩩᩅᨱ᩠ᨱᩮᩣ ᨸᨠᩥᨲ᩠ᨲᩥᨲᩮᩣ’’ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪕.᪑᪓]. ᨸᨱ᩠ᨯᨲᩥ ᩑᨠᨣᨱᨶᩴ ᨣᨧ᩠ᨨᨲᩦᨲᩥ ᨸᨱ᩠ᨯᩩ, ᨸᨯᩥ ᨣᨲᩥᨿᩴ, ᩏ. ᩉᩁᩥᨱᩮᩣ, ᨸᨱ᩠ᨯᩩᩁᩮᩣᨲᩥᨸᩥ ᨸᨱ᩠ᨯᩩᩅᨱ᩠ᨱᨶᩣᨾᩣᨶᩥ. ᩎᩈᩴᨸᨱ᩠ᨯᩩ ᩋᨻ᩠ᨿᨲ᩠ᨲᨸᨱ᩠ᨯᩩᩅᨱ᩠ᨱᩮᩣ ᨵᩪᩈᩁᩮᩣ ᨶᩣᨾ, ᨿᨳᩣ ᨵᩪᩃᩥᩅᨱ᩠ᨱᩮᩣ. ᨵᩪᩈ ᨠᨶ᩠ᨲᩥᨠᩁᨱᩮ, ᨧᩩᩁᩣᨴᩥ, ᩋᩁᩮᩣ.

᪙᪗. ᨠᩥᨬ᩠ᨧᩥᩁᨲ᩠ᨲᩮᩣ ¶ ᩋᨻ᩠ᨿᨲ᩠ᨲᩁᨲ᩠ᨲᩅᨱ᩠ᨱᩮᩣ ᩋᩁᩩᨱᩮᩣ ᨶᩣᨾ, ᨿᨳᩣ ᨾᨧ᩠ᨨᩔ ᨧᨠ᩠ᨡᩩ [ᨿᨳᩣ ᨾᨴᨾᨲ᩠ᨲᩔ ᨧᨠ᩠ᨡᩩᩁᩣᨣᩮᩣ (ᨧᩥᨶ᩠ᨲᩣᨾᨱᩥᨭᩦᨠᩣ ᪕.᪑᪕)], ᩈᩪᩁᩥᨿᩣᨴᩮᩣ ᨲᩁᩩᨱᩮᩣ ᩅᩩᨲ᩠ᨲᩮᩣ.

ᩈᩮᨲᩃᩮᩣᩉᩥᨲᩮᩣ ᩈᩮᨲᩁᨲ᩠ᨲᨾᩥᩔᩮᩣ ᩅᨱ᩠ᨱᩮᩣ ᨸᩣᨭᩃᩮᩣ ᨶᩣᨾ, ᨿᨳᩣ ᨸᩣᨭᩃᨠᩩᩈᩩᨾᩴ. ᨸᩣᨭᨿᨲᩮᨲᩥ ᨸᩣᨭᩃᩮᩣ, ᩋᩃᩮᩣ, ᨸᨭ ᩅᩥᨽᩣᨩᨶᩮ.

ᨴ᩠ᩅᩥᨠᩴ ᨸᩦᨲᩮ. ᨸᩣ ᨸᩣᨶᩮ, ᨠᨾ᩠ᨾᨶᩥ ᨲᩮᩣ, ᩎᨲ᩠ᨲᨬ᩠ᨧ. ᩉᩃᩥᨴ᩠ᨴᩥᨿᩣ ᩍᩅ ᩌᨽᩣ ᨿᩔ ᩉᩃᩥᨴ᩠ᨿᩣᨽᩮᩣ.

ᨲᩥᨠᩴ ᨲᩥᨱᨸᨲ᩠ᨲᩣᨴᩥᨣᨲᩮ ᩅᨱ᩠ᨱᩮ. ᩃᩈ ᨠᨶ᩠ᨲᩥᨿᩴ, ᩋᨲᩥᩈᨿᩮᨶ ᩃᩈ᩠ᨿᨲᩮᨲᩥ ᨸᩃᩣᩈᩮᩣ. ‘‘ᨸᩣᩃᩣᩈᩮᩣ’’ᨲᩥ ᨸᩣᨮᩮ ᨲᩩ ᩁᩔᩔ ᨴᩦᨥᨲᩣ. ᩉᩁ ᩉᩁᨱᩮ, ᨾᨶᩴ ᩉᩁᨲᩦᨲᩥ ᩉᩁᩥᨲᩮᩣ, ᩍᨲᩮᩣ. ᩍ, ᩉᩁᩥ.

᪙᪘. ᨶᩦᩃᨸᩦᨲᩈᨾ᩠ᨾᩥᩔᩅᨱ᩠ᨱᩮ ᨠᩊᩣᩁᩮᩣ, ᨠᨸᩥᩃᩮᩣ ᨧ ᩅᨲ᩠ᨲᨶ᩠ᨲᩥ. ᨠᩃ ᩈᨦ᩠ᨡ᩠ᨿᩣᨶᩮ. ᩋᩁᩮᩣ, ᩃᩔ ᩊᩮᩣ, ᨠᩊᩣᩁᩮᩣ. ᨠᨻ ᩅᨱ᩠ᨱᩮ, ᩍᩃᩮᩣ, ᨻᩔ ᨸᩮᩣ, ᨠᨸᩥᩃᩮᩣ.

ᩁᩮᩣᨧᨶᨸ᩠ᨸᨽᩮ ᨣᩮᩣᩁᩮᩣᨧᨶᩈᨴᩥᩈᨸ᩠ᨸᨽᩣᨿᩴ ᨸᩥᨦ᩠ᨣᩮᩣ, ᨸᩥᩈᨦ᩠ᨣᩮᩣ ᨧ ᩅᨲ᩠ᨲᨶ᩠ᨲᩥ. ᨸᨽᩣᩈᨴ᩠ᨴᩔ ᨴ᩠ᩅᩥᩃᩥᨦ᩠ᨣᨲ᩠ᨲᨾᩮᩅ. ᨸᩥᨩᩥ ᨽᩣᩈᨲ᩠ᨳᩮᩣ, ᨸᩥᨦ᩠ᨣᩮᩣ. ᨸᩁᨲᩕ ᩈᨠᩣᩁᩅᨱ᩠ᨱᩣᨣᨾᩮᩣ, ᨸᩥᩈᨦ᩠ᨣᩮᩣ.

ᨠᩊᩣᩁᩣᨴᩦᨶᩴ ¶ ᨧᨲᩩᨶ᩠ᨶᩴ ᨸᩥᨦ᩠ᨣᩃᩅᩥᩈᩮᩈᨲ᩠ᨳᩅᩣᨧᨠᨲᩴ ᨴᩔᩮᨲ᩠ᩅᩣ ᨸᩥᨦ᩠ᨣᩃᩈᩣᨾᨬ᩠ᨬᨲ᩠ᨳᩅᩣᨧᨠᨲ᩠ᨲᨾ᩠ᨸᩥ ᨴᩔᩮᨲᩩᨾᩣᩉ ‘‘ᨠᩊᩣᩁᩣᨴᩥ’’ᨧ᩠ᨧᩣᨴᩥ. ᨲᩔᩣᨿᨾᨲ᩠ᨳᩮᩣ – ᨶ ᨠᩮᩅᩃᩴ ᨠᩊᩣᩁᩣᨴᨿᩮᩣ ᨸᩥᨦ᩠ᨣᩃᩅᩥᩈᩮᩈᨲ᩠ᨳᩮᨿᩮᩅ ᨸᩅᨲ᩠ᨲᨶ᩠ᨲᩥ, ᩋᨳ ᨡᩮᩣ ᨸᩥᨦ᩠ᨣᩃᩈᩣᨾᨬ᩠ᨬᨲ᩠ᨳᩮᨸᩥ ᩅᨲ᩠ᨲᨶ᩠ᨲᩦᨲᩥ. ᩅᩩᨲ᩠ᨲᨬ᩠ᩉᩥ ᩋᨾᩁᨠᩮᩣᩈᩮ ‘‘ᨠᩊᩣᩁᩮᩣ ᨠᨸᩥᩃᩮᩣ ᨸᩥᨦ᩠ᨣᩮᩣ, ᨸᩥᩈᨦ᩠ᨣᩮᩣ ᨠᨴ᩠ᨴᩩ ᨸᩥᨦ᩠ᨣᩃᩮᩣ’’ᨲᩥ [ᩋᨾᩁ ᪕.᪑᪖]. ᨠᩮᨧᩥ ᨸᨶ ᨠᩊᩣᩁᩣᨴᨿᩮᩣ ᨸᩥᩈᨦ᩠ᨣᨸᩁᩥᨿᨶ᩠ᨲᩣ ᨧᨲ᩠ᨲᩣᩁᩮᩣ ᩈᨴ᩠ᨴᩣ ᨸᩥᨦ᩠ᨣᩃᨣᩩᨱᩮ ᩅᨲ᩠ᨲᨾᩣᨶᩣ ᨸᩩᨾᩮ ᩅᨲ᩠ᨲᨶ᩠ᨲᩥ, ᨣᩩᨱᩥᨶᩥ ᨸᨶ ᩅᩣᨧ᩠ᨧᩃᩥᨦ᩠ᨣᩣᨲᩥ ᩑᩅᩴ ᨸᨧ᩠ᨨᩥᨾᩮᨶ ᩈᨾ᩠ᨻᨶ᩠ᨵᩴ ᨠᨲ᩠ᩅᩣ ᩅᨴᨶ᩠ᨲᩥ, ᨲᩴ ᩋᨾᩁᨠᩮᩣᩈᩮᨶ ᩅᩥᩁᩩᨩ᩠ᨫᨶᨲᩮᩣ ᩍᨵ ᨧ ‘‘ᩈᩩᨠ᩠ᨠᩣᨴᨿᩮᩣ’’ᨲᩥ ᩈᨻ᩠ᨻᩮᩈᩴᨿᩮᩅ ᨣᩉᨱᨲᩮᩣ ᨶ ᨣᩉᩮᨲᨻ᩠ᨻᩴ.

᪙᪙. ᨲᩥᨠᩴ ᩈᨻᩃᩮ ᨠᩮᩣᨠᩥᩃᨠᨱ᩠ᨮᩈᨴᩥᩈᩮ. ᨠᩃ᩠ᨿᨲᩮᨲᩥ ᨠᩃᩮᩣ, ᨾᩈᩥ ᨸᩁᩥᨾᩣᨱᩮ, ᨠᨾ᩠ᨾᨶᩥ ᨱᩮᩣ, ᨠᩃᩮᩣ ᩑᩅ ᨾᩣᩈᩮᩣ ᨠᨾ᩠ᨾᩣᩈᩮᩣ, ᩃᩔ ᨾᩮᩣ, ᨠᩃᨶᩴ ᩅᩣ ᨠᩃᩮᩣ, ᨲᩴ ᨾᩈᨲᩦᨲᩥ ᨠᨾ᩠ᨾᩣᩈᩮᩣ, ᨿᨳᩣ ‘‘ᨠᩩᨾ᩠ᨽᨠᩣᩁᩮᩣ’’ᨲᩥ. ᩈᨻ ᨣᨲᩥᨿᩴ, ᩈᨻᨲᩦᨲᩥ ᩈᨻᩃᩮᩣ, ᩋᩃᩮᩣ. ᨧᩥᨿ᩠ᨿᨲᩮᨲᩥ ᨧᩥᨲ᩠ᨲᩮᩣ, ᨲ. ᨲᩕᨱᨸᨧ᩠ᨧᨿᩮ ᨧᩥᨲᩕᩮᩣ. ᨠᨾ᩠ᨾᩦᩁᩮᩣ, ᨠᨻ᩠ᨻᩩᩁᩮᩣᨲᩥᨸᩥ ᩈᨻᩃᩔ ᨶᩣᨾᩣᨶᩥ.

ᨠᨱ᩠ᩉᨸᩦᨲᨾᩥᩔᩮ ᩈᩣᩅᩮᩣ ᩅᩩᨲ᩠ᨲᩮᩣ. ᩈᩮ ᨣᨲᩥᨾ᩠ᩉᩥ, ᩈᨿᨲᩦᨲᩥ ᩈᩣᩅᩮᩣ, ᩋᩅᩮᩣ. ᨠᨸᩥᩈᩮᩣᨲᩥᨸᩥ ᩈᩣᩅᩔ ᨶᩣᨾᩴ. ᨠᨱ᩠ᩉᩃᩮᩣᩉᩥᨲᨾᩥᩔᩮ ᨵᩪᨾᩣᨽᩮ ᨸᨶ ᨵᩪᨾ, ᨵᩪᨾᩃᩣ ᩅᨲ᩠ᨲᨶ᩠ᨲᩥ. ᨵᩪᨾᩮᩣ ᩅᩥᨿᩣᨲᩥ ᨵᩪᨾᩮᩣ. ᨵᩪᨾᩴ ᩃᩣᨲᩦᨲᩥ ᨵᩪᨾᩃᩮᩣ. ᩑᨲᩮ ᩈᩩᨠ᩠ᨠᩣᨴᨿᩮᩣ ᩈᩣᩅᨶ᩠ᨲᩣ ᨿᨴᩣ ᩋᨽᩮᨴᩮᩣᨸᨧᩣᩁᩣ ᨣᩩᨱᩥᨶᩥ ᨣᩩᨱᩥᨾ᩠ᩉᩥ ᩅᨲ᩠ᨲᨶ᩠ᨲᩥ, ᨲᨴᩣ ᩅᩣᨧ᩠ᨧᩃᩥᨦ᩠ᨣᩣ, ᨿᨳᩣ ᩈᩩᨠ᩠ᨠᩮᩣ ᩉᩴᩈᩮᩣ, ᩈᩩᨠ᩠ᨠᩣ ᩉᩴᩈᩦ ¶ , ᩈᩩᨠ᩠ᨠᩴ ᩉᩴᩈᨠᩩᩃᩴᩍᨧ᩠ᨧᩣᨴᩥ ᨿᩮᩣᨩ᩠ᨩᩴ. ᨿᨴᩣ ᨣᩩᨱᩮ ᨣᩩᨱᨾᨲ᩠ᨲᩮ ᩅᨲ᩠ᨲᨶ᩠ᨲᩥ, ᨲᨴᩣ ᨸᩩᨾᩮ, ᨿᨳᩣ ᩉᩴᩈᩔ ᩈᩩᨠ᩠ᨠᩮᩣ, ᨾᨿᩪᩁᩔ ᨧᩥᨲ᩠ᨲᩮᩣ ᩍᨧ᩠ᨧᩣᨴᩥ ᨿᩮᩣᨩ᩠ᨩᩴ.

᪑᪐᪐. ᩃᩣᩈᨶᨶ᩠ᨲᩴ ᨶᨧ᩠ᨧᩮ. ᨶᨲ ᨣᨲ᩠ᨲᩅᩥᨶᩣᨾᩮ, ᨸᨻ᩠ᨻᨩ᩠ᨩᩣᨴᩥᨲ᩠ᨲᩣ ᨶᨧ᩠ᨧᩣᨴᩮᩈᩮᩣ. ᨶᨲᨶᩴ ᨶᨧ᩠ᨧᩴ, ᨶᨭᨶᩴ ᩅᩣ ᨶᨧ᩠ᨧᩴ, ᩈᨻ᩠ᨻᨲᩕ ᨽᩣᩅᩈᩣᨵᨶᩴ. ᨶᨲᩦᨿᨲᩮ ᨶᨲ᩠ᨲᨶᩴ. ᩃᩈ᩠ᨿᨲᩮ ᩃᩣᩈᨶᩴ, ᩃᩈ ᨠᨶ᩠ᨲᩥᨿᩴ, ᩃᩈᩥᨲᨻ᩠ᨻᨶ᩠ᨲᩥ ᩅᩣ ᩃᩣᩈᨶᩴ.

ᨶᨧ᩠ᨧᩴ, ᩅᩣᨴᩥᨲᩴ, ᨣᩦᨲᩴ ᩍᨲᩥ ᩍᨴᩴ ᨽᩮᩣᩁᩥᨿᨲ᩠ᨲᩥᨠᩴ ᨶᩣᨭ᩠ᨿᩴ ᨶᩣᨾᩮᨲ᩠ᨿᩩᨧ᩠ᨧᨲᩮ [ᩋᨾᩁ ᪗.᪑᪐]. ᨲᩩᩁ ᨲᩩᩁᨱᩉᩥᩴᩈᩣᩈᩩ. ᨲᩩᩁᩦᨿᨶ᩠ᨲᩮᨶᩮᨶᩮᨲᩥ ᨲᩪᩁᩥᨿᩴ, ᨾᩩᩁᨩᩣᨴᩥ. ᨲᨻ᩠ᨽᩅᩮᩣ ᩈᨴ᩠ᨴᩮᩣ ᨲᩮᩣᩁᩥᨿᩮᩣ, ᨱᩮᩣ. ᨲᩮᨶ ᩃᨠ᩠ᨡᩥᨲᩴ ᨲᩥᨠᩴ ᨲᩮᩣᩁᩥᨿᨲ᩠ᨲᩥᨠᩴ. ᨶᨭᩔᩮᨴᩴ ᨶᩣᨭ᩠ᨿᩴ. ᨲᨲᩥᨿᩔ ᨲᩮᩣᩁᩥᨿᩈᩣᨾᨬ᩠ᨬᩔ ᨲᩩ ᨸᩣᩈᨦ᩠ᨣᩣ ᨶᩣᨭᨠᩣ.

᪑᪐᪑. ᨶᨧ᩠ᨧᨭ᩠ᨮᩣᨶᩴ ᩁᩣᨩᨦ᩠ᨣᨱᩣᨴᩥ ᩁᨦ᩠ᨣᩮᩣ ᨶᩣᨾ ᩈᩥᨿᩣ ‘‘ᩁᨾᨶ᩠ᨲᩣ ᨣᨧ᩠ᨨᨶ᩠ᨲᩥ ᩑᨲ᩠ᨳ, ᩁᨩ᩠ᨩᨶ᩠ᨲᩥ ᩑᨲ᩠ᨳᩣ’’ᨲᩥ ᩅᩣ ᨠᨲ᩠ᩅᩣ. ᩈᩪᨫᩈᩪᨧᨶᩴ ᩉᨲ᩠ᨳᩣᨴᩦᩉᩥ ᩈᩪᨧᩥᨲᨻ᩠ᨻᩔ ᨸᨠᩣᩈᩮᨲᨻ᩠ᨻᩔ ᩈᨲ᩠ᨳᨸ᩠ᨸᩉᩣᩁᩣᨴᩥᨶᩮᩣ ᩈᩪᨧᨶᩴ ᨸᨠᩣᩈᨶᩴ ᩋᨽᩥᨶᨿᩮᩣ ᨶᩣᨾ ‘‘ᨶᨿᨶᩴ ᨶᨿᩮᩣ, ᨸᩔᨶ᩠ᨲᩣᨶᩴ ᩋᨽᩥᨾᩩᨡᩴ ᨶᨿᩮᩣ’’ᨲᩥ ᨠᨲ᩠ᩅᩣ. ᨻ᩠ᨿᨬ᩠ᨩᨠᩮᩣᨲᩥᨸᩥ ᨲᩔᩮᩅ ᨶᩣᨾᩴ.

ᨽᩁᨲᩈᨲ᩠ᨳᩅᩩᨲ᩠ᨲᩋᨭ᩠ᨮᩩᨲ᩠ᨲᩁᩈᨲᨠᩁᨱᨶᩥᨸ᩠ᨹᨶ᩠ᨶᨳᩥᩁᩉᨲ᩠ᨳᨸᩁᩥᨿᨲ᩠ᨳᨠᩣᨴᩥᨶᩣᨾᨠᩮᩣ ᨴ᩠ᩅᨲ᩠ᨲᩥᩴ ᩈᨸ᩠ᨸᨠᩣᩁᩮᩣ [ᩅᩥᨲ᩠ᨳᩣᩁᩮᩣ ᨽᩁᨲᨾᩩᨶᩥᨠᨲᩮ ᨶᩣᨭ᩠ᨿᩈᨲ᩠ᨳᩮ ᨧᨲᩩᨲ᩠ᨳ ᩋᨩ᩠ᨫᩣᨿᩮ ᨸᩔᩥᨲᨻ᩠ᨻᩮᩣ] ᨶᨧ᩠ᨧᩅᩥᩈᩮᩈᩮᩣ ᩋᨦ᩠ᨣᩅᩥᨠ᩠ᨡᩮᨸᩮᩣ, ᩋᨦ᩠ᨣᩉᩣᩁᩮᩣ ᨶᩣᨾ ‘‘ᩋᨦ᩠ᨣᩔ ᩉᩣᩁᩮᩣ, ᩅᩥᨠ᩠ᨡᩮᨸᩮᩣ’’ᨲᩥ ᨠᨲ᩠ᩅᩣ ¶ . ᨲᩥᨠᩴ ᨶᨭᩮ. ᩈᨻ᩠ᨻᨲᩕ ᨠᨲ᩠ᨲᩩᩈᩣᨵᨶᩴ, ‘‘ᨶᨧ᩠ᨧᨲᩦᨲᩥ ᨶᨭ᩠ᨭᨠᩮᩣ’’ᨲ᩠ᨿᩣᨴᩥᨶᩣ.

᪑᪐᪒. ᩈᩥᨦ᩠ᨣᩣᩁᩣᨴᨿᩮᩣ ᨶᩅ ᩁᩈᩣ ᨶᩣᨭ᩠ᨿᩁᩈᩣ ᩋᩔᩣᨴᨶᩦᨿᨲ᩠ᨲᩣ. ᨿᨳᩣ ᩉᩥ ᨶᩣᨶᩣᨻ᩠ᨿᨬ᩠ᨩᨶᩈᨦ᩠ᨡᨲᨾᨶ᩠ᨶᩴ ᨽᩩᨬ᩠ᨩᨶ᩠ᨲᩣ ᩁᩈᩮ ᩋᩔᩣᨴᨿᨶ᩠ᨲᩥ ᩈᩩᨾᨶᩣ ᨸᩩᩁᩥᩈᩣ ᩉᩣᩈᩴᩅ ᩋᨵᩥᨣᨧ᩠ᨨᨶ᩠ᨲᩥ, ᨲᨳᩣ ᨶᩣᨶᩣᨽᩥᨶᨿᨻ᩠ᨿᨬ᩠ᨩᩥᨲᩮ ᩋᨦ᩠ᨣᩈᨲ᩠ᨲᩮᩣᨸᩮᨲᩮ ᨮᩣᨿᩦᨽᩣᩅᩮ ᩋᩔᩣᨴᨿᨶ᩠ᨲᩥ ᩈᩩᨾᨶᩣᨲᩥ [ᩈᩩᨻᩮᩣᨵᩣᩃᨦ᩠ᨠᩣᩁᩔ ᨾᩉᩣᩈᩣᨾᩥᨭᩦᨠᩣᨿ ᪓᪕᪒ ᨣᩣᨳᩣᩅᨱ᩠ᨱᨶᩣᨿᨾ᩠ᨸᩥ].

᪑᪐᪓. ᨲᩮᩈᩩ ᩈᩥᨦ᩠ᨣᩣᩁᩔᩮᩅ ᩈᩁᩪᨸᩴ, ᨸᨽᩮᨴᨬ᩠ᨧ ᨴᩔᩮᨲᩩᨾᩣᩉ ‘‘ᨸᩮᩣᩈᩔᩮ’’ᨧ᩠ᨧᩣᨴᩥ. ᨶᩣᩁᩥᨿᩴ ᩈᨦ᩠ᨣᨾᩴ ᨸᨭᩥᨧ᩠ᨧ ᨠᩣᩁᨱᩴ ᨠᨲ᩠ᩅᩣ ᨸᩮᩣᩈᩔ ᨸᩩᩁᩥᩈᩔ ᨿᩣ ᨸᩥᩉᩣ ᩍᨧ᩠ᨨᩣ ᨾᨶᩮᩣᩅᩥᨠᩣᩁᩅᩥᩈᩮᩈᩮᩣ ᨸᩮᩣᩈᩮ ᨧ ᨸᩩᩁᩥᩈᩮ ᩈᨦ᩠ᨣᨾᩴ ᨸᨭᩥᨧ᩠ᨧ ᨠᩣᩁᨱᩴ ᨠᨲ᩠ᩅᩣ ᩍᨲ᩠ᨳᩥᨿᩣ ᨿᩣ ᨸᩥᩉᩣ ᩍᨧ᩠ᨨᩣ ᨾᨶᩮᩣᩅᩥᨠᩣᩁᩅᩥᩈᩮᩈᩮᩣ, ᩑᩈᩮᩣ ᩁᨲᩥᨠᩦᩊᩣᨴᩦᨶᩴ ᨠᩣᩁᨱᨽᩪᨲᩮᩣ, ᩁᨲᩥᨠᩦᩊᩣᨴᩥᨠᩣᩁᨱᩈᩉᩥᨲᩮᩣ ᩅᩣ ᩁᩈᩮᩣ ᩈᩥᨦ᩠ᨣᩣᩁᩮᩣ ᨶᩣᨾ. ᩑᨲ᩠ᨳ ᨧ ᩍᨲ᩠ᨳᩥᨸᩩᩁᩥᩈᩣᨶᩴ ᨴᩔᨶᩈᩅᨶᨹᩩᩈᨶᩅᩈᩮᨶ ᩅᩣ ᩅᩥᨸ᩠ᨸᨿᩮᩣᨣᩅᩈᩮᨶ ᩅᩣ ᨿᩣ ᨸᩥᩉᩣ ᩈᨬ᩠ᨩᩣᨲᩣ, ᩈᩮᩣ ᩁᩈᩮᩣ ᨶᩣᨾ. ᨿᩴ ᨸᨶ ᨲᩴ ᨠᩣᩁᨱᩴ ᨠᨲ᩠ᩅᩣ ᨸᩅᨲ᩠ᨲᩴ ᨣᩦᨲᩴ, ᨲᨾᩮᩅ ᩃᩮᩣᨠᩣᨶᩴ ᩋᩔᩣᨴᨩᨶᨠᨲ᩠ᨲᩣ ᩁᩈᩮᩣ ᨶᩣᨾ. ᨹᩃᩪᨸᨧᩣᩁᩅᩈᩮᨶ ᨸᨶ ᨸᩥᩉᩣ ᩁᩈᩮᩣᨲᩥ ᩅᩩᨲ᩠ᨲᩣ, ᩈᨻ᩠ᨻᨲᩕᩮᩅᩴ.

᪑᪐᪔. ᩏᨲ᩠ᨲᨾᩣᨶᩴ ¶ ᩍᨲ᩠ᨳᩥᨸᩩᩁᩥᩈᩣᨶᩴ ᨸᨠᨲᩥ ᩈᩴᨿᩮᩣᨣᩅᩥᨿᩮᩣᨣᩈᨽᩣᩅᩮᩣ ᩈᩣ ᩑᨲ᩠ᨳ ᩈᩥᨦ᩠ᨣᩣᩁᩮ ᨸᩣᨿᩮᩣ ᨻᩉᩩᩃᨶ᩠ᨲᩥ ᩏᨲ᩠ᨲᨾᨸᨠᨲᩥᨸ᩠ᨸᩣᨿᩮᩣ, ᨿᩮᨽᩩᨿ᩠ᨿᩮᨶ ᩏᨲ᩠ᨲᨾᩣᨶᩴ ᩈᩴᨿᩮᩣᨣᩅᩥᨿᩮᩣᨣᨸ᩠ᨸᩅᨲ᩠ᨲᩴ ᨣᩦᨲᨾᩮᩅ ᩈᩥᨦ᩠ᨣᩣᩁᩮᩣ ᨶᩣᨾᩣᨲ᩠ᨿᨲ᩠ᨳᩮᩣ. ᩍᨲ᩠ᨳᩥᨸᩩᩁᩥᩈᩣᨶᩴ ᨸᩥᩉᩣ ᩉᩮᨲᩩ ᩑᨲᩔᩣᨲᩥ ᩍᨲ᩠ᨳᩥᨸᩩᩁᩥᩈᩉᩮᨲᩩᨠᩮᩣ. ᩈᩮᩣ ᩈᩥᨦ᩠ᨣᩣᩁᩮᩣ ᩈᨾ᩠ᨽᩮᩣᨣᩮᩣ, ᩅᩥᨿᩮᩣᨣᩮᩣᨲᩥ ᩍᨾᩥᨶᩣ ᨸᨽᩮᨴᩮᨶ ᨴᩩᩅᩥᨵᩮᩣ ᨾᨲᩮᩣ. ᨲᨲᩕ ᨧ –

ᩅᩣᨸᩥᩅᨶᨣᩮᩉᩩᨿ᩠ᨿᩣᨶ-ᨾᩣᩃᩣᨧᨶ᩠ᨴᨶᩣᨴᨿᩮᩣ;

ᩈᨾ᩠ᨽᩮᩣᨣᩔ ᩅᩥᨽᩣᩅᩣ ᨲᩮ, ᨿᩮ ᨧᨬ᩠ᨬᩮ ᩃᩃᩥᨲᨦ᩠ᨠᩁᩣ.

ᩅᩥᨿᩮᩣᨣᩔ ᨲᩩ ᨸᩥᨿᩣᨴᩔᨶᩴ ᩅᩥᨽᩣᩅᩮᩣ, ᩁᩈᨩᨶᨠᩮᩣ ᨧ ᩅᩥᨽᩣᩅᩮᩣ. ᩅᩩᨲ᩠ᨲᨬ᩠ᨧ –

‘‘ᨩᨿᨶ᩠ᨲᩮ ᨧ ᩁᩈᩣ ᨿᩮᨶ,

ᩈ ᩅᩥᨽᩣᩅᩮᩣ ᨸᨠᩥᨲ᩠ᨲᩥᨲᩮᩣ;

ᨲᩮᩈᨾᩮᩅᩣ’ᨶᩩᨽᩣᩅᩮᩣ’ᨿᩴ,

ᨡ᩠ᨿᩣᨲᩮᩣ ᨠᩅᩦᩉᩥ ᨻ᩠ᨿᨬ᩠ᨩᨠᩮᩣ’’ᨲᩥ.

ᩈᩉ ᨽᩩᨬ᩠ᨩᨶᨾᨶᩩᨽᩅᨶᩴ ᩈᨾ᩠ᨽᩮᩣᨣᩮᩣ. ᩅᩥᨿᩩᨩ᩠ᨩᨶᩴ ᨶᩣᨶᩣᨽᩅᨶᩴ ᩅᩥᨿᩮᩣᨣᩮᩣ. ᩈᩥᨦ᩠ᨣᩴ ᨶᩣᨾᨵᩣᨲᩩ, ᩅᩥᨩ᩠ᨫᨶᨭ᩠ᨮᩮᨶ ᩈᩥᨦ᩠ᨣᩴ, ᨶᩣᨣᩁᩥᨠᨽᩣᩅᩈᨦ᩠ᨡᩣᨲᩔ ᨠᩥᩃᩮᩈᩈᩥᨦ᩠ᨣᩔᩮᨲᩴ ᨶᩣᨾᩴ, ᨲᩴ ᨠᩁᩮᩣᨲᩥ, ᩈᩥᨦ᩠ᨣᩴ ᩅᩣ ᨸᨽᩩᨲ᩠ᨲᩴ, ᨲᩴ ᨠᩁᩮᩣᨲᩥ ᩁᩣᨣᩦᩈᩪᨲᩥ ᩈᩥᨦ᩠ᨣᩣᩁᩮᩣ, ᩌᩁᩮᩣ, ᨠᩥᩃᩮᩈᩈᩥᨦ᩠ᨣᨠᩁᨱᩴ ᩅᩥᩃᩣᩈᩮᩣᨲᩥ ᩅᩩᨲ᩠ᨲᩴ. ᩈᩩᨧᩥ, ᩏᨩ᩠ᨩᩃᩮᩣᨲᩥᨸᩥ ᩈᩥᨦ᩠ᨣᩣᩁᩔ ᨶᩣᨾᩣᨶᩥ.

ᩈᩮᩣᨠᩮᩣᨸᨧᨿᩈᨽᩣᩅᩮᩣ ¶ ᨠᩁᩩᨱᩮᩣ.

ᩍᨭ᩠ᨮᨶᩣᩈᨦ᩠ᨣᨶᩣᩈᩣᨿ [ᩍᨭ᩠ᨮᨶᩣᩈᨵᨶᩣᨸᩣᨿ (ᨧᩥᨶ᩠ᨲᩣᨾᨱᩥᨭᩦᨠᩣ)],

ᩅᨵᨻᨶ᩠ᨵᨶᨲᩣᩊᨶᩣ;

ᩈᩣᨸᨠ᩠ᩃᩮᩈᩮᩣᨸᨲᩣᨸᩮᩉᩥ,

ᨩᩣᨿᨲᩮ ᨠᩁᩩᨱᩮᩣ ᩁᩈᩮᩣ.

ᩏᩔᩣᩉᩅᨴ᩠ᨵᨶᩮᩣ ᩅᩦᩁᩮᩣ. ᩅᩥᨽᩣᩅᩣ ᨲᩔ ᩅᩥᨶᨿᩩᨸᨲᩣᨸᨻᩃᩅᩥᨠ᩠ᨠᨾᩣ. ᩈ ᨧᩣᨿᩴ ᨴᩣᨶᩅᩦᩁᩮᩣ ᨵᨾ᩠ᨾᩅᩦᩁᩮᩣ ᨿᩩᨴ᩠ᨵᩅᩦᩁᩮᩣᨲᩥ ᨲᩥᩅᩥᨵᩮᩣ.

ᩅᩥᨾ᩠ᩉᨿᩮᩣᨸᨧᨿᩈᨽᩣᩅᩮᩣ ᩋᨻ᩠ᨽᩩᨲᩮᩣ.

ᨸᩣᩈᩣᨴᩩᨿ᩠ᨿᩣᨶᩈᩮᩃᩣᨴᩥ-ᨣᨾᨶᩣ ᨴᩥᨻ᩠ᨻᨴᩔᨶᩣ;

ᩈᨽᩣᩅᩥᨾᩣᨶᨾᩣᨿᩮᨶ᩠ᨴ-ᨩᩣᩃᩈᩥᨸ᩠ᨸᩣᨴᩥᨴᩔᨶᩣ [ᨩᩣᩃᩅᩥᨩ᩠ᨩᩣᨴᩥᨴᩔᨶᩣ (ᨠ.)];

ᩉᨴᨿᩮᨧ᩠ᨨᩥᨲᩃᩣᨽᩮᩉᩥ, ᩅᩥᨽᩣᩅᩮᩉᩥᩔ ᩈᨾ᩠ᨽᩅᩮᩣ.

ᩉᩣᩈᩮᩣᨸᨧᨿᩈᨽᩣᩅᩮᩣ ᩉᩣᩈᩮᩣ.

ᩈᩣᨻᩉᩥᨲ᩠ᨳᩣ ᩈᩅᩥᨠᨲᩣ, ᨶᩮᨸᨳ᩠ᨿᩣ ᨻ᩠ᨿᨦ᩠ᨣᨴᩔᨶᩣ;

ᩋᩈᨾ᩠ᨻᨶ᩠ᨵᨠᨳᩣᩃᩣᨸᩣ, ᩉᩣᩈᩮᩣ ᩈᩮᩣ ᨠᩩᩉᨠᩣᨴᩥᨽᩥ.

ᨽᨿᩮᩣᨸᨧᨿᩈᨽᩣᩅᩮᩣ ᨽᨿᩣᨶᨠᩮᩣ.

ᩏᨧ᩠ᨧᨽᩮᩁᩅᩈᩴᩁᩣᩅ-ᨿᨠ᩠ᨡᨸᩮᨲᩣᨴᩥᨴᩔᨶᩣ;

ᩈᩩᨬ᩠ᨬᩣᨣᩣᩁᨾᩉᩣᩁᨬ᩠ᨬ-ᩅᨵᨻᨶ᩠ᨵᨶᨴᩔᨶᩣ.

ᨲᩣᩈᩣᨿᩣᩈᨦ᩠ᨠᨲᩮᩣᨻ᩠ᨻᩮᨣᩮᩣ, ᩈᩥᩅᩮᩣᩃᩪᨠᩁᩩᨱᩣᨴᩥᨽᩥ;

ᩅᩥᨽᩣᩅᩮᩉᩥ ᨧ ᩍᨲ᩠ᨳᩦᨶᩴ, ᨶᩦᨧᩣᨶᨬ᩠ᨧ ᨽᨿᩣᨶᨠᩮᩣ.

ᩈᨾᨱᩮᩣᨸᨧᨿᩈᨽᩣᩅᩮᩣ ᩈᨶ᩠ᨲᩮᩣ.

ᨴᩔᨶᩣ ᩈᨶ᩠ᨲᩅᩮᩈᩣᨶᩴ, ᩈᨶ᩠ᨲᨧᩥᨲ᩠ᨲᩣᨶ ᨲᩣᨴᩥᨶᩴ;

ᩈᨶ᩠ᨲᨠᩣᩁᨱᨵᨾ᩠ᨾᩣᨶᩴ, ᩈᨶ᩠ᨲᩮᩣ ᨶᩣᨾ ᩁᩈᩮᩣ ᨽᩅᩮ.

ᨩᩥᨣᩩᨧ᩠ᨨᩮᩣᨸᨧᨿᩈᨽᩣᩅᩮᩣ ¶ ᨻᩦᨽᨧ᩠ᨨᩮᩣ.

ᨸᩪᨲᩥᨾᩴᩈᩣᨴᩥᨠᩣᨶᩴ ᨲᩩ, ᨴᩔᨶᩈᩩᨲᩥᨠᩥᨲ᩠ᨲᨶᩣ;

ᩅᩥᨣᨲᩮᩉᩥ ᩅᩥᨽᩣᩅᩮᩉᩥ, ᨻᩦᨽᨧ᩠ᨧᩮᩣ ᨩᩣᨿᨲᩮ ᩁᩈᩮᩣ.

ᨠᩮᩣᨵᩮᩣᨸᨧᨿᩈᨽᩣᩅᩮᩣ ᩁᩩᨴ᩠ᨴᩴ.

ᨲᨬ᩠ᨧ ᩈᨦ᩠ᨣᩣᨾᩉᩮᨲᩩᨠᩴ, ᩏᨣ᩠ᨣᨠᨾ᩠ᨾᩏᨸᨥᩣᨲ-;

ᨾᩩᩈᩣᩅᩣᨴᩣᨴᩥᨹᩁᩩᩈᩣ, ᩅᨧᨶᩣᨴᩦᩉᩥ ᨽᩅᨲᩥ.

ᩑᨲᩮᩈᩩ ᨧ ᨻᩦᨽᨧ᩠ᨨᩁᩩᨴ᩠ᨴᩣᨶᩥ ᨶᨸᩩᩴᩈᨠᩮ, ᩋᨬ᩠ᨬᩮ ᨲᩩ ᨸᩩᨾᩮ ᩁᩪᨸᨽᩮᨴᩣ. ᩑᨲᩮ ᨧ ᨶᩅ ᨶᩣᨭ᩠ᨿᩁᩈᩣ ᩁᨲᨶᨠᩮᩣᩈᨶᨿᩮᨶ ᩅᩩᨲ᩠ᨲᩣ. ᩅᩩᨲ᩠ᨲᨬ᩠ᩉᩥ ᨲᨲ᩠ᨳ –

‘‘ᩈᩥᨦ᩠ᨣᩣᩁᩅᩦᩁ ᨻᩦᨽᨧ᩠ᨨ-ᩁᩩᨴ᩠ᨴ ᩉᩣᩈ ᨽᨿᩣᨶᨠᩣ;

ᨠᩁᩩᨱᩣ’ᨻ᩠ᨽᩩᨲ ᩈᨶ᩠ᨲᩣᨧ, ᨶᩅ ᨶᩣᨭ᩠ᨿᩁᩈᩣ ᩍᨾᩮ’’ᨲᩥ.

ᩋᨾᩁᨠᩮᩣᩈᩮ ᨸᨶ –

‘‘ᩈᩥᨦ᩠ᨣᩣᩁᩅᩦᩁ ᨠᩁᩩᨱᩣ-ᨻ᩠ᨽᩩᨲ ᩉᩣᩈ ᨽᨿᩣᨶᨠᩣ;

ᨻᩦᨽᨧ᩠ᨨ ᩁᩩᨴ᩠ᨴᩣᨲᩥ ᩁᩈᩣ’’ᨲᩥ [ᩋᨾᩁ ᪗.᪑᪗].

ᩋᨭ᩠ᨮᩮᩅ ᩁᩈᩣ ᩅᩩᨲ᩠ᨲᩣ. ᩋᨳᩮᩉ ᨶᩅᨾᩮᩣ ᩈᨶ᩠ᨲᩮᩣ ᩁᩈᩮᩣ ᨠᩈ᩠ᨾᩣ ᨶ ᩅᩩᨲ᩠ᨲᩮᩣᨲᩥ? ᩅᩩᨧ᩠ᨧᨲᩮ –

ᩉᩣᩈᩮᩣ ᩁᨲᩥ ᨧ ᨠᩣᩁᩩᨬ᩠ᨬᩴ,

ᨠᩮᩣᨵᩩᩔᩣᩉᨽᨿᩴ ᨲᨳᩣ;

ᨩᩥᨣᩩᨧ᩠ᨨᩣ ᩅᩥᨾ᩠ᩉᨿᩮᩣ ᨧᩮᨲᩥ,

ᨮᩣᨿᩦᨽᩣᩅᩣ ᨸᨠᩥᨲ᩠ᨲᩥᨲᩣ.

ᨮᩣᨿᩦ ᩑᩅ ᨲᩩ ᩁᩈᩦᨽᩅᨲᩥᨸ᩠ᨿᩣᨣᨾᩮᩣ, ᨲᩈ᩠ᨾᩣ ᨸᨠᨲᩥᨿᩣ ᩋᨭ᩠ᨮᩈᨦ᩠ᨡ᩠ᨿᨲ᩠ᨲᩣ ᩋᨭ᩠ᨮᩮᩅ ᨲᩩ ᨲᩮ ᩅᩩᨲ᩠ᨲᩣᨲᩥ ᨶ ᩅᩩᨲ᩠ᨲᩮᩣ. ᩈᨶ᩠ᨲᩁᩈᩮᩣ ᨧᩣᨿᩴ ᨵᨾ᩠ᨾᩈᩥᨦ᩠ᨣᩣᩁᨲ᩠ᨲᩣ ᩈᩥᨦ᩠ᨣᩣᩁᩁᩈᩮ ᩑᩅᩣᨶᩩᨸᩅᩥᨭ᩠ᨮᩮᩣ. ᨵᨾ᩠ᨾᨿᩩᨴ᩠ᨵᨠᩣᨾᨲ᩠ᨲᩮᨶ ᨲᩥᩅᩥᨵᩮᩣ ᩉᩥ ᩈᩥᨦ᩠ᨣᩣᩁᩮᩣ. ᨠᩮᨧᩥ ᨸᨶ ᨸᩥᨿᩈᨾᩣᨣᨾᩣᨴᩥᩅᩥᨽᩣᩅᨩᨸᩁᨾᩴ ᩅᩔᩃ᩠ᨿᩣᨡ᩠ᨿᩴ ᩁᩈᨾᩣᩉᩩ.

ᩁᨽᩈᩮᩣᨸ᩠ᨿᩣᩉ ¶ –

‘‘ᩈᩥᨦ᩠ᨣᩣᩁ ᩅᩦᩁ ᨻᩦᨽᨧ᩠ᨨ-ᩁᩩᨴ᩠ᨴ ᩉᩣᩈ ᨽᨿᩣᨶᨠᩣ;

ᨠᩁᩩᨱᩣ’ᨻ᩠ᨽᩩᨲᩈᨶ᩠ᨲᩣ ᨧ, ᩅᩔᩃ᩠ᨿᨬ᩠ᨧ ᩁᩈᩣ ᨴᩈᩮ’’ᨲᩥ.

ᩋᨬ᩠ᨬᩮ ᨲᩩ –

‘‘ᩈᩥᨦ᩠ᨣᩣᩁᩣᨶᩩᨣᨲᩮᩣ ᩉᩣᩈᩮᩣ,

ᨠᩁᩩᨱᩮᩣ ᩁᩩᨴ᩠ᨴᨠᨾ᩠ᨾᨩᩮᩣ;

ᩅᩦᩁᨲᩮᩣ ᩋᨻ᩠ᨽᩩᨲᩮᩣ ᨩᩣᨲᩮᩣ,

ᨻᩦᨽᨧ᩠ᨨᩣ ᨧ ᨽᨿᩣᨶᨠᩮᩣ’’ᨲᩥ –

ᨧᨲ᩠ᨲᩣᩁᩮᩣ ᩁᩈᩣ ᩍᨧ᩠ᨧᩣᩉᩩ.

ᨻᩦᨽᨧ᩠ᨨᨶ᩠ᨲᩥ ᩅᨵ ᨻᨶ᩠ᨵᨶᩮ, ᨨᩮᩣ, ᩋᨻ᩠ᨽᩣᩈᩥᨠᩣᩁᩔ ᨴᩦᨥᩮᩣ. ᩅᩔ ᨽᩮᩣ, ᨵᩔ ᨧᩮᩣ ᨻᩦᨽᨧ᩠ᨨᩮᩣ. ᩁᩩᨴ᩠ᨴᩮᩣ ᨴᩮᩅᨲᩣ ᩋᩔᩮᨲᩥ ᩁᩩᨴ᩠ᨴᩴ. ᩅᩩᨲ᩠ᨲᨬ᩠ᨧ –

‘‘ᩈᩥᨦ᩠ᨣᩣᩁᩮᩣ ᩉᩁᩥᨴᩮᩅᩮᩣᩉᩥ, ᩉᩣᩈᩮᩣ ᨸᨾᨳᨴᩮᩅᨲᩮᩣ;

ᨠᩁᩩᨱᩮᩣ ᨿᨾᨴᩮᩅᩮᩣ ᨲᩩ, ᩁᩩᨴ᩠ᨴᩮᩣ ᩁᩩᨴ᩠ᨴᩣᨵᩥᨴᩮᩅᨲᩮᩣ’’ᨲᩥ [ᩈᨴ᩠ᨴᨠᨸ᩠ᨸᨴ᩠ᨴᩩᨾᩮ ᩁᩮᩣᨴᩕᨸᨴᩮᨸᩥ].

ᩑᨲ᩠ᨳ ᨧ ᨠᩣᨾᨠᩮᩣᨵᩉᩣᩈᩣᨴᩥᨠᨲᩮᩣ ᨧᩥᨲ᩠ᨲᩅᩥᨠᩣᩁᩮᩣ ᨽᩣᩅᩮᩣ ‘‘ᨽᩣᩅᨿᨲᩥ ᨸᨠᩣᩈᨿᨲᩥ ᨠᩅᩥᨶᩮᩣ ᩋᨵᩥᨸ᩠ᨸᩣᨿ’’ᨶ᩠ᨲᩥ ᨠᨲ᩠ᩅᩣ. ᩈᩮᩣ ᨧ ᨮᩣᨿᩦ ᨻ᩠ᨿᨽᩥᨧᩣᩁᩦ ᩈᩣᨲ᩠ᨲᩥᨠᩮᩣ ᨧᩮᨲᩥ ᨲᩥᩅᩥᨵᩮᩣ. ᨲᨲᩕ –

ᩉᩣᩈᩮᩣ ᩁᨲᩥ ᨧ ᨠᩣᩁᩩᨬ᩠ᨬᩴ,

ᨠᩮᩣᨵᩩ’ᩔᩣᩉ ᨽᨿᩴ ᨲᨳᩣ;

ᨩᩥᨣᩩᨧ᩠ᨨᩣ ᩅᩥᨾ᩠ᩉᨿᩮᩣ ᨧᩮᨲᩥ,

ᨮᩣᨿᩦᨽᩣᩅᩣ ᨸᨠᩥᨲ᩠ᨲᩥᨲᩣ.

ᨻ᩠ᨿᨽᩥᨧᩣᩁᩦ ᨲᩩ ᨲᩮᨲ᩠ᨲᩥᩴᩈᨸ᩠ᨸᨽᩮᨴᩣ. ᨿᨳᩣ –

ᩈᨦ᩠ᨠᩣ ᨣᩥᩃᩣᨶᩥ ᨶᩥᨻ᩠ᨻᩮᨴᩮᩣ,

ᨲᨳᩣ ᩍᩔᩣ ᨾᨴᩮᩣ ᩈᨾᩮᩣ;

ᩌᩃᩈ᩠ᨿᩴ ᨴᩦᨶᨲᩣ ᨧᩥᨶ᩠ᨲᩣ,

ᨾᩮᩣᩉᩮᩣ ᩈᨲᩥ ᨾᨲᩦ ᨵᩥᨲᩥ.

ᨧᩣᨸᩃ᩠ᨿᩴ ¶ ᩉᩁᩥᩈᩮᩣ ᨸᩦᩊᩣ,

ᩌᩅᩮᨣᩮᩣ ᨩᩊᨲᩩ’ᨣ᩠ᨣᨲᩣ;

ᩈᩩᨲ᩠ᨲᩴ ᩅᩥᨲᨠ᩠ᨠᩮᩣ ᨲᩣᩈᩮᩣ ᨧ,

ᨣᨻ᩠ᨽᩩ’ᩔᩩᨠ᩠ᨠᩮᩣ ᩅᩥᩈᩣᨴᨲᩣ.

ᨶᩥᨴ᩠ᨴᩣ’ᨻᩉᩥᨲ᩠ᨳᩣ’ᨾᩁᩥᩈᩣ,

ᨾᩁᨱᩴ ᨻ᩠ᨿᩣᨵᩥᩁᩮᩅ ᨧ;

ᩋᨸᨾᩣᩁᩮᩣ ᨧ ᩏᨾ᩠ᨾᩣᨴᩮᩣ,

ᩅᩥᨻᩮᩣᨵᩮᩣ ᨲᩥᩴᩈ ᨲᩩᨲ᩠ᨲᩁᩣ.

ᩈᩣᨲ᩠ᨲᩥᨠᩮᩣ ᩋᨭ᩠ᨮᩅᩥᨵᩮᩣ. ᨿᨳᩣ –

ᨳᨾ᩠ᨽᩮᩣ ᩈᩮᨴᩮᩣ ᨧ ᩁᩮᩣᨾᨬ᩠ᨧᩮᩣ,

ᩈᩁᨽᩮᨴᩮᩣ ᨲᩩ ᩅᩮᨸᨳᩩ;

ᩅᩮᩅᨱ᩠ᨱ’ᨾᩔᩩᨸᩃᨿᩣ,

ᩍᨧ᩠ᨧᩮᨲᩮ ᩋᨭ᩠ᨮ ᩈᩣᨲ᩠ᨲᩥᨠᩣᨲᩥ.

ᨳᩥᩁᨲ᩠ᨲᩣ ᩑᨠᨶ᩠ᨲᩥᨠᨲ᩠ᨲᩣ ᨮᩣᨿᩦ. ᨻ᩠ᨿᨽᩥᨧᩣᩁᩦ ᩋᨶᩮᨠᨶ᩠ᨲᩥᨠᨲ᩠ᨲᩣ. ᨿᨳᩣ ᨶᩣᨭᩥᨠᩣᨿ ᩈᩥᨦ᩠ᨣᩣᩁᩮᩣ ᨮᩣᨿᩦ, ᨲᨴᩩᨸᨠᩣᩁᩣ ᩉᩣᩈᩣᨴᨿᩮᩣ ᨻ᩠ᨿᨽᩥᨧᩣᩁᩥᨶᩮᩣ, ᨾᩮᩣᩉᩁᩣᨣᨴᩮᩣᩈᩣ ᩑᩅ ᩈᨦ᩠ᨡ᩠ᨿᨽᩣᩈᩣᨿ ᩈᨲ᩠ᨲᩁᨩᩮᩣᨲᨾᩣᨶᩦᨲ᩠ᨿᩩᨧ᩠ᨧᨶ᩠ᨲᩮ. ᨲᨲᩕ ᩈᨲ᩠ᨲᩮᨶ ᩌᩈᨿᩮᨶ ᨶᩥᨻ᩠ᨻᨲ᩠ᨲᩮᩣ ᩈᩣᨲ᩠ᨲᩥᨠᩮᩣ. ᨽᩣᩅᩔ ᨻᩮᩣᨵᨠᩮᩣ ᩋᨽᩥᨶᨿᩮᩣ ᩋᨶᩩᨽᩣᩅᩮᩣ ‘‘ᩋᨶᩩ ᨸᨧ᩠ᨨᩣ ᨽᩣᩅᨿᨲᩥ ᨸᨠᩣᩈᨿᨲᩦ’’ᨲᩥ ᨠᨲ᩠ᩅᩣ.

ᨲᨲᩕ ᩈᨾ᩠ᨽᩮᩣᨣᩈᨽᩣᩅᩮᩣ ᨿᩮᩣ ᩁᨲ᩠ᨿᩣᨡ᩠ᨿᩮᩣ ᨽᩣᩅᩮᩣ, ᨲᩔ ᩃᩮᩣᨧᨶᨧᩣᨲᩩᩁᩥᨿᨽᨾᩩᨠ᩠ᨡᩮᨸᨾᩥᩉᩥᨲᩅᩥᨻ᩠ᨽᨾᨧᩥᨲ᩠ᨲᨦ᩠ᨣᩉᩣᩁᩥᩅᩣᨠ᩠ᨿᩣᨴᩥ ᩋᨶᩩᨽᩣᩅᩮᩣ. ᩅᩩᨲ᩠ᨲᨬ᩠ᨧ –

‘‘ᨲᩔ ᩃᩮᩣᨧᨶᨧᩣᨲᩩᩁ-ᨽᨾᩩᨠ᩠ᨡᩮᨸᩈᩥᨲᩅᩥᨻ᩠ᨽᨾᩮᩣ;

ᨧᩥᨲ᩠ᨲᨦ᩠ᨣᩉᩣᩁᩥᩅᩣᨠ᩠ᨿᩣᨴᩥ, ᩋᨶᩩᨽᩣᩅᩮᩣ ᨸᨠᩥᨲ᩠ᨲᩥᨲᩮᩣ’’ᨲᩥ.

ᩅᩥᨿᩮᩣᨣᩔ ¶ ᨲᩩ ᩋᨶᩩᨽᩣᩅᩮᩣ –

ᩋᨽᩥᩃᩣᨸᩮᩣ ᨲᨳᩣ ᨧᩥᨶ᩠ᨲᩣ,

ᨲᩔ ᩈᩁᨱᨠᩥᨲ᩠ᨲᨶᩣ;

ᩏᨻ᩠ᨻᩮᨣᩮᩣ ᨧ ᩅᩥᩃᩣᨸᩮᩣ ᨧ,

ᩏᨾ᩠ᨾᩣᨴᩮᩣ ᨻ᩠ᨿᩣᨵᩥᩁᩮᩅ ᨧ;

ᨩᩊᨲᩣ ᨾᩁᨱᨬ᩠ᨧᩮᩅ,

ᨴᩈᩮᩅᩮᨲ᩠ᨳ ᨸᨠᩥᨲ᩠ᨲᩥᨲᩣ.

ᩉᩣᩈᩔ ᨲᩩ ᩅᩥᨠᩣᩁᨠᩣᩃᩣᨴᩥ ᩋᨶᩩᨽᩣᩅᩮᩣ, ᨿᩮᩣ ᨲᩩ ᨠᩁᩩᨱᩮᩣ.

ᩋᩔᩩᩈᩣᩈᩮᩉᩥ ᩅᩮᩅᨱ᩠ᨱ-

ᨳᨾ᩠ᨽᨣᨲ᩠ᨲᩈᨲᩥᨠ᩠ᨡᨿᩣ;

ᨸᩁᩥᨴᩮᩅᩥᨲᩈᩮᩣᨠᩮᩉᩥ,

ᩋᨽᩥᨶᨿᩮᩣ ᩈᩈᩪᩁᩥᨽᩥ.

ᨠᩁᨧᩁᨱᩅᨴᨶᩅᩮᨸᨳᩩᨣᨲ᩠ᨲᨳᨾ᩠ᨽᩉᨴᨿᨠᨾ᩠ᨸᨶᩈᩩᨠ᩠ᨡᩮᩣᨭ᩠ᨮᨲᩣᩃᩩᨠᨱ᩠ᨮᩮᩉᩥ ᨽᨿᩣᨶᨠᩮᩣ ᨶᩥᨧ᩠ᨧᨾᨽᩥᨶᨿᩮᩣ.

ᩁᩩᨴ᩠ᨴᩔ ᨲᩩ ᨽᩪᨠᩩᨭ᩠ᨿᩣᨴᩥ ᩋᨶᩩᨽᩣᩅᩮᩣ.

ᩅᩦᩁᩮᩣ’ᨽᩥᨶᩦᨿᨲᩮ ᨧᩣᨣ-

ᩅᩮᩈᩣᩁᨩ᩠ᨩᩣᨴᩥᨲᩮᩣ ᨲᨳᩣ;

ᩋᨠ᩠ᨡᩮᨸᩈᩪᨧᨲᩣᨴᩦᩉᩥ,

ᨳᩮᩁᩈᩮᩣᩁᩣᨴᩥᨲᩮᩣ ᨽᩅᩮ.

ᨻᩦᨽᨧ᩠ᨨᩔ ᨲᩩ –

ᩋᨿᩴ ᨸᨧ᩠ᨨᩣᨴᨶᩣ ᨻ᩠ᨿᨲ᩠ᨲ-

ᨸᩣᨴᨻᩣᩉᨧ᩠ᨨᩥᨠᩪᩃᨶᩣ;

ᩏᨻ᩠ᨻᩮᨩᨶᩣᨴᩦᩉᩥ ᨾᨲᩮᩣ,

ᨲᨩ᩠ᨩᩮᩉᩥ’ᨽᩥᨶᨿᩮᩣ ᩈᨴᩣ.

ᩋᨻ᩠ᨽᩩᨲᩴ ¶ ᨸᨶ –

ᨴᨶ᩠ᨲᩃᩮᩣᨧᨶᩅᩥᨲ᩠ᨳᩣᩁᩣ,

ᨸᩈᩣᨴᩮᩣᨸᩈᨾᩣᨴᩥᩉᩥ;

ᩁᩮᩣᨾᨬ᩠ᨧᩈᩮᨴᨲᩣᩈᩔᩩ,

ᩈᩣᨵᩩᩅᩣᨴᩮᩉᩥ ᨴᩔᨿᩮ.

ᩈᩣᨲ᩠ᨲᩥᨠᩣᨶᩴ ᨲ᩠ᩅᨭ᩠ᨮᨶ᩠ᨶᩴ ᨳᨾ᩠ᨽᩈᩮᨴᩁᩮᩣᨾᨬ᩠ᨧᩈᩁᨽᩮᨴᩅᩮᨸᨳᩩᩅᩮᩅᨱ᩠ᨱᨾᩔᩩᨸᩃᨿᩣᨶᩴ ᨿᨳᩣᨠ᩠ᨠᨾᩴ ᨶᩥᨠᩕᩥᨿᨲᩣ, ᩅᩣᨲ, ᨧ᩠ᨧᩣᩈᩦᨲ, ᨴᩮᩣᨽᨣ᩠ᨣᩊᩣ’ᨸᩣᨦ᩠ᨣᨸᩪᩁᨱ, ᨾᩩᨡᨧ᩠ᨨᩣᨿᩣᩅᩥᨸᩃ᩠ᩃᩣᩈ, ᩃᩮᩣᨧᨶᨾᨩ᩠ᨩᨶ, ᨾᩉᩥᨸᩣᨲᩣᨴᨿᩮᩣ ᩋᨽᩥᨶᨿᩣ.

ᩑᩅᩴ ᨻ᩠ᨿᨽᩥᨧᩣᩁᩦᨶᨾ᩠ᨸᩥ ᨶᩥᨻ᩠ᨻᩮᨴ, ᨣᩥᩃᩣᨶᩥ, ᩈᨦ᩠ᨠᩥ’ᩔᩣ, ᨾᨴ, ᩈᨾᩣ’ᩃᩈ᩠ᨿᩣᨴᩦᨶᩴ ᨿᨳᩣᨠ᩠ᨠᨾᩴ ᩈᩣᩈ, ᩈᨶ᩠ᨲᩣᨸ, ᨴᩥᩈᩣᩅᩃᩮᩣᨠᨶ, ᨣᩩᨱᨾᨧ᩠ᨨᩮᩁ, ᨽᩦᨲ, ᨦ᩠ᨣᨾᨴ᩠ᨴᨶ, ᩈᨾᩣᨴᨿᩮᩣ ᩋᨽᩥᨶᨿᩣᨲᩥ.

ᨻ᩠ᨿᨽᩥᨧᩣᩁᩦᩈᩩ ᩈᨦ᩠ᨠᩣ ᨶᩣᨾ ᩌᩈᨦ᩠ᨠᨧᩥᨲ᩠ᨲᨲᩣ. ᨣᩥᩃᩣᨶᩥ ᨣᩮᩃᨬ᩠ᨬᨲᩣ. ᨶᩥᨻ᩠ᨻᩮᨴᩮᩣ ᩋᨲ᩠ᨲᩣᩅᨾᩣᨶᨶᩴ. ᨾᨴᩮᩣ ᨸᨾᩣᨴᩩᨠ᩠ᨠᩴᩈᩮᩣ. ᩈᨾᩮᩣ ᨡᩮᨴᩮᩣ. ᨴᩦᨶᨲᩣ ᨧᩮᨲᩈᩮᩣ ᨴᩩᨠ᩠ᨡᨲᩣ. ᨵᩥᨲᩥ ᩈᨶ᩠ᨲᩮᩣᩈᩮᩣ. ᩉᩁᩥᩈᩮᩣ ᨧᩮᨲᩮᩣᨸᩈᩣᨴᩮᩣ. ᨸᩦᩊᩣ ᩁᩩᨴ᩠ᨴᩣᨧᩣᩁᩣᨴᩦᩉᩥ ᨾᩩᨡᩅᩥᨠᩣᩁᩮᩣ. ᩌᩅᩮᨣᩮᩣ ᩈᨾ᩠ᨽᨾᩮᩣ. ᨩᩊᨲᩣ ᩋᨸ᩠ᨸᨭᩥᨸᨲ᩠ᨲᩥ, ᩏᨣ᩠ᨣᨲᩣ ᨴᩣᩁᩩᨱᨲ᩠ᨲᩴ. ᩈᩩᨲ᩠ᨲᩴ ᩈᩩᨸᨶᩴ. ᨲᩣᩈᩮᩣ ᨧᩥᨲ᩠ᨲᨠ᩠ᨡᩮᩣᨽᩮᩣ. ᩏᩔᩣᩉᩮᩣ ᩏᩔᩩᨠ᩠ᨠᩴ. ᩅᩥᩈᩣᨴᩮᩣ ᨡᩮᨴᩮᩣ. ᩋᨻᩉᩥᨲ᩠ᨳᩣ ᩌᨠᩣᩁᨣᩩᨲ᩠ᨲᨲᩣ. ᩋᨾᩁᩥᩈᩮᩣ ᩋᨠ᩠ᨡᨾᨲᩣ. ᩅᩥᨻᩮᩣᨵᩮᩣ ᩅᩥᨶᩥᨴ᩠ᨴᨲᩣ. ᩈᩮᩈᩣ ᨸᨸᨬ᩠ᨧᨽᨿᩣ ᨶ ᩅᩥᨲ᩠ᨳᩣᩁᩥᨲᩣᨲᩥ. ᩁᩈᩅᨱ᩠ᨱᨶᩣ.

᪑᪐᪕. ᩈᩥᩃᩮᩣᨠᩮᨶ ᩅᨧᩈᩮᩣ ᨶᩣᨾᩣᨶᩥ. ᨽᩣᩈᩥᨲᨻ᩠ᨻᨶ᩠ᨲᩥ ᨽᩣᩈᩥᨲᩴ. ᩃᨸ ᩅᨧᨶᩮ, ᩃᨸᩥᨲᩴ. ᨽᩣᩈᩦᨿᨲᩮᨲᩥ ᨽᩣᩈᩣ. ᩅᩮᩣᩉᩁᩦᨿᨲᩮᨲᩥ ¶ ᩅᩮᩣᩉᩣᩁᩮᩣ, ᩉᩁ ᩉᩁᨱᩮ ᩅᩥᨸᩩᨻ᩠ᨻᩮᩣ, ‘‘ᩅᩮᩣᩉᩣᩁ ᩅᨧᨶᩮ’’ᨲᩥ ᩅᩣ ᨵᩣᨲᩩ. ᩅᩩᨧ᩠ᨧᨲᩮᨲᩥ ᩅᨧᨶᩴ. ᩅᨧᩮᩣᨸᩥ, ᨾᨶᩮᩣᨣᨱᩮᩣᨿᩴ. ᩏᨧ᩠ᨧᨲᩮᨲᩥ ᩏᨲ᩠ᨲᩥ,ᨲᩥ. ᩅᩩᨧ᩠ᨧᨲᩮᨲᩥ ᩅᩣᨧᩣ, ᩋ. ᨣᩥᨱᨶ᩠ᨲᩥ ᩈᨴ᩠ᨴᩣᨿᨶ᩠ᨲᩥ ᨲᨶ᩠ᨲᩥ ᨣᩥᩁᩣ, ᨣᩮ ᩈᨴ᩠ᨴᩮ, ᩍᩁᩮᩣ, ᨣᩣᨿᩥᨲᨻ᩠ᨻᩣᨲᩥ ᩅᩣ ᨣᩥᩁᩣ. ᩅᩣᨿᨲᩮ ᩈᨴ᩠ᨴᩣᨿᨲᩮᨲᩥ ᩅᩣᨱᩦ, ᨿᩩ, ᩎ ᨧ, ᨸᩁᩮᩈᩴ ᨾᨾ᩠ᨾᩅᩥᨩ᩠ᨫᨶᨭ᩠ᨮᩮᨶ ᩅᩣᨱᩮᩣ ᩅᩥᨿᩣᨲᩥ ᩅᩣ ᩅᩣᨱᩦ, ᩎ. ᨽᩁᨲᩮᩣ ᨶᩣᨾ ᩈᨲ᩠ᨳᨠᩣᩁᩮᩣ ᩍᩈᩥ, ᨲᩔᩮᩈᩣ ᨽᩣᩁᨲᩦ. ᨠᨳᩦᨿᨲᩮᨲᩥ ᨠᨳᩥᨲᩣ. ᩅᩩᨧ᩠ᨧᨲᩮᨲᩥ ᩅᨧᩦ, ᩎ. ᨻᩕᩉ᩠ᨾᩦ, ᩈᩁᩮᩣᩅᨲᩦᨲᩥᨸᩥ ᩅᨧᩈᩮᩣ ᨶᩣᨾᩣᨶᩥ.

᪑᪐᪖. ᩑᨠᨾᩮᩅᩣᨡ᩠ᨿᩣᨲᨸᨴᩴ ᨿᨲ᩠ᨳ ᩑᨠᩣᨡ᩠ᨿᩣᨲᩮᩣ ᩈᩅᩥᩈᩮᩈᨶᩮᨶ ᨠᩣᩁᨠᨸᨴᩮᨶ ᩈᩉᩥᨲᨲ᩠ᨲᩣ ᩈᨠᩣᩁᨠᩮᩣ ᨸᨴᨧᨿᩮᩣ ᩈᨾ᩠ᨻᨶ᩠ᨵᨲ᩠ᨳᩮᩣ ᨸᨴᩈᨾᩩᨴᩣᨿᩮᩣ ᩅᩣᨠ᩠ᨿᩴ ᨶᩣᨾ ᩈᩥᨿᩣ, ᨿᨳᩣ – ᩅᩮᩔᨶ᩠ᨲᩁᩮᩣ ᩁᩣᨩᩣ ᩈᩩᨡᩅᩥᨸᩣᨠᩴ ᨠᨾ᩠ᨾᩴ ᨠᩁᩮᩣᨲᩥ, ᨸᩩᩁᩥᩈᩮᩣ ᨣᨧ᩠ᨨᨲᩥ. ᩌᨡ᩠ᨿᩣᨲᨣ᩠ᨣᩉᨱᨬ᩠ᨧᩮᨲ᩠ᨳ ᨠᩕᩥᨿᩣᩈᨴ᩠ᨴᩮᩣᨸᩃᨠ᩠ᨡᨱᩴ, ᨲᩮᨶ ᨴᩮᩅᨴᨲ᩠ᨲᩮᩣ ᨠᨭᩴ ᨠᨲᩅᩣ ᩍᨧ᩠ᨧᩣᨴᩦᨶᩥᨸᩥ ᩅᩣᨠ᩠ᨿᩴ ᨶᩣᨾ ᩈᩥᨿᩣ. ᩋᨾᩁᨠᩮᩣᩈᩮ ᨸᨶ – ‘‘ᨲᩥᩈ᩠ᨿᩣᨴ᩠ᨿᨶ᩠ᨲᨧᨿᩮᩣ ᩅᩣᨠ᩠ᨿᩴ, ᨠᩕᩥᨿᩣ ᩅᩣ ᨠᩣᩁᨠᩣᨶ᩠ᩅᩥᨲᩣ’’ᨲᩥ [ᩋᨾᩁ ᪖.᪒] ᨴ᩠ᩅᩦᩉᩥ ᩃᨠ᩠ᨡᨱᩮᩉᩥ ᩅᩣᨠ᩠ᨿᨾᩣᩉ. ᨲᩔᨲ᩠ᨳᩮᩣ – ᨲᩥᩈ᩠ᨿᩣᨴ᩠ᨿᨶ᩠ᨲᨧᨿᩮᩣ ᨲ᩠ᨿᩣᨴᩥᩈ᩠ᨿᩣᨴ᩠ᨿᨶ᩠ᨲᨸᨴᩣᨶᩴ ᨧᨿᩮᩣ ᩈᨾᩪᩉᩮᩣ ᩈᨾ᩠ᨻᨶ᩠ᨵᨲ᩠ᨳᩮᩣ ᩅᩣᨠ᩠ᨿᩴ, ᨲᩴ ᨿᨳᩣ – ᩏᨧ᩠ᨧᩴ ᨸᨮᨲᩥ, ᩒᨴᨶᩴ ᨸᨧᨲᩥ. ᨲᨳᩣ ᨧ ᨽᩣᩅᩣᨡ᩠ᨿᩴ ᩌᨡ᩠ᨿᩣᨲᩴ ᩈᩣᨻ᩠ᨿᨿᨠᩣᩁᨠᩅᩥᩈᩮᩈᨶᩴ ᩅᩣᨠ᩠ᨿᩴ, ᩌᨡ᩠ᨿᩣᨲᩴ ᨲ᩠ᨿᩣᨴ᩠ᨿᨶ᩠ᨲᩴ ᩈᩣᨻ᩠ᨿᨿᩴ ᩅᩣ ᩈᨠᩣᩁᨠᩴ ᩅᩣ ᩈᩅᩥᩈᩮᩈᨶᩴ ᩅᩣ ᩅᩣᨠ᩠ᨿᨾᩩᨧ᩠ᨧᨲᩮ. ᨲ᩠ᨿᩣᨴᩥᨣ᩠ᨣᩉᨱᩴ ᨠᩕᩥᨿᩣᩈᨴ᩠ᨴᩮᩣᨸᩃᨠ᩠ᨡᨱᩴ, ᨲᩮᨶ ᨴᩮᩅᨴᨲ᩠ᨲᩮᩣ ¶ ᨠᨭᩴ ᨠᨲᩅᩣ ᩍᨧ᩠ᨧᩣᨴᩦᨶᩥᨸᩥ ᩅᩣᨠ᩠ᨿᩴ. ᩏᨸᩃᨠ᩠ᨡᨱᨶᩥᩁᨸᩮᨠ᩠ᨡᩴ ᩋᨸᩁᩴ ᩅᩣᨠ᩠ᨿᩃᨠ᩠ᨡᨱᨾᩣᩉ ‘‘ᨠᩕᩥᨿᩣ ᩅᩣ ᨠᩣᩁᨠᩣᨶ᩠ᩅᩥᨲᩣ’’ᨲᩥ. ᨠᩕᩥᨿᩣᨸᨴᩴ ᩅᩣ ᨠᩣᩁᨠᩈᨾ᩠ᨻᨶ᩠ᨵᩴ ᩅᩣᨠ᩠ᨿᩴ, ᨿᨳᩣ – ᩁᩣᨩᩣ ᨣᨧ᩠ᨨᨲᩥ, ᩁᩣᨩᩣ ᨣᨲᩮᩣ. ᩍᨾᩈ᩠ᨾᩥᩴ ᨸᨠ᩠ᨡᩮ ᩈᩣᨻ᩠ᨿᨿᩔᨸᩥ ᩋᨶᨻ᩠ᨿᨿᩔᨸᩥ ᩈᨻ᩠ᨻᩔ ᨠᩕᩥᨿᩣᨠᩣᩁᨠᨸᨴᩈᨾᩪᩉᩔ ᩅᩣᨠ᩠ᨿᨲ᩠ᨲᨾᩣᩉ.

ᨽᨿᩣᨴᩦᩉᩥ ᨿᩴ ᨴ᩠ᩅᩥᨠ᩠ᨡᨲ᩠ᨲᩩᩴ ᩅᩣ ᨲᩥᨠ᩠ᨡᨲ᩠ᨲᩩᩴ ᩅᩣ ᩏᨴᩦᩁᨱᩴ ᨠᨳᨶᩴ ‘‘ᩈᨸ᩠ᨸᩮᩣ ᩈᨸ᩠ᨸᩮᩣ, ᩅᩥᨩ᩠ᨫ ᩅᩥᨩ᩠ᨫᩣ’’ᨲ᩠ᨿᩣᨴᩥᨠᩴ, ᨲᩴ ᩌᨾᩮᨯᩥᨲᩴ ᨬᩮᨿ᩠ᨿᩴ. ᨾᩮᨯᩥ ᩏᨾ᩠ᨾᩣᨴᨶᩮ, ᩌᨸᩩᨻ᩠ᨻᩮᩣ ᨴ᩠ᩅᨲ᩠ᨲᩥᨠ᩠ᨡᨲ᩠ᨲᩩᨾᩩᨧ᩠ᨧᩣᩁᨱᩮ ᩅᨲ᩠ᨲᨲᩥ. ᨿᨳᩣ ‘‘ᩑᨲᨴᩮᩅ ᨿᨴᩣ ᩅᩣᨠ᩠ᨿᩴ, ᩌᨾᩮᨯᨿᨲᩥ ᩅᩣᩈᩅᩮᩣ’’ [‘‘ᩉᩁᩥᩅᩴᩈᩮ’’ᨲᩥ ᨧᩥᨶ᩠ᨲᩣᨾᨱᩥᨭᩦᨠᩣᨿᩴ ᩅᩩᨲ᩠ᨲᩴ]. ‘‘ᨴᩮᩅᨴᨲ᩠ᨲᩮᨶᩣᨾᩮᨯᩮᩣ ᨠᨲᩮᩣ’’ ᩍᨧ᩠ᨧᨲᩕᩣᨸ᩠ᨿᨿᨾᩮᩅᨲ᩠ᨳᩮᩣ, ᩈᩮᩣᨠᩣᨴᩥᨶᩣ ᩉᩥ ‘‘ᨽᩣᨲᩣ ᨽᩣᨲᩣ’’ᩍᨲ᩠ᨿᩩᨧ᩠ᨧᩣᩁᩦᨿᨲᩮ, ᨽᩣᩅᩮ ᨠᨾ᩠ᨾᨶᩥ ᨧ ᨲᩮᩣ. ᨠᨾ᩠ᨾᨬ᩠ᨧ ᨸᨴᩴ ᩅᩣᨠ᩠ᨿᨾ᩠ᩉᩣ.

᪑᪐᪗. ᩌᨾᩮᨯᩥᨲᩔ ᩅᩥᩈᨿᩴ ᨴᩔᩮᨲᩩᨾᩣᩉ ‘‘ᨽᨿᩮ’’ᨧ᩠ᨧᩣᨴᩥ. ‘‘ᩈᨸ᩠ᨸᩮᩣ ᩈᨸ᩠ᨸᩮᩣ, ᨧᩮᩣᩁᩮᩣ ᨧᩮᩣᩁᩮᩣ’’ᨲ᩠ᨿᩣᨴᩦᩈᩩ ᨽᨿᩮ. ‘‘ᩅᩥᨩ᩠ᨫ ᩅᩥᨩ᩠ᨫ, ᨸᩉᩁ ᨸᩉᩁᩣ’’ᨲ᩠ᨿᩣᨴᩦᩈᩩ ᨠᩮᩣᨵᩮ. ‘‘ᩈᩣᨵᩩ ᩈᩣᨵᩪ’’ᨲ᩠ᨿᩣᨴᩦᩈᩩ ᨸᩈᩴᩈᩣᨿᩴ. ‘‘ᨣᨧ᩠ᨨ ᨣᨧ᩠ᨨ, ᩃᩩᨶᩣᩉᩥ ᩃᩩᨶᩣᩉᩦ’’ᨲ᩠ᨿᩣᨴᩦᩈᩩ ᨲᩩᩁᩥᨲᩮ. ‘‘ᩌᨣᨧ᩠ᨨ ᩌᨣᨧ᩠ᨨᩣ’’ᨲ᩠ᨿᩣᨴᩦᩈᩩ ᨠᩮᩣᨲᩪᩉᩃᩮ. ‘‘ᨻᩩᨴ᩠ᨵᩮᩣ ᨻᩩᨴ᩠ᨵᩮᩣᨲᩥ ᨧᩥᨶ᩠ᨲᨿᨶ᩠ᨲᩮᩣ’’ᨲ᩠ᨿᩣᨴᩦᩈᩩ ᩋᨧ᩠ᨨᩁᩮ. ‘‘ᩋᨽᩥᨠ᩠ᨠᨾᨳᩣᨿᩈ᩠ᨾᨶ᩠ᨲᩮᩣ ᩋᨽᩥᨠ᩠ᨠᨾᨳᩣᨿᩈ᩠ᨾᨶ᩠ᨲᩮᩣ’’ᨲ᩠ᨿᩣᨴᩦᩈᩩ ᩉᩣᩈᩮ. ‘‘ᨠᩉᩴ ᩑᨠᨸᩩᨲ᩠ᨲᨠ, ᨠᩉᩴ ᩑᨠᨸᩩᨲ᩠ᨲᨠᩣ’’ᨲ᩠ᨿᩣᨴᩦᩈᩩ ᩈᩮᩣᨠᩮ. ‘‘ᩋᩉᩮᩣ ᩈᩩᨡᩴ ᩋᩉᩮᩣ ᩈᩩᨡ’’ᨶ᩠ᨲ᩠ᨿᩣᨴᩦᩈᩩ ᨸᩈᩣᨴᩮ. ᨧᩈᨴ᩠ᨴᩮᩣ ᩋᩅᩩᨲ᩠ᨲᩈᨾᩩᨧ᩠ᨧᨿᨲ᩠ᨳᩮᩣ, ᨲᩮᨶ ᨣᩁᩉᩣ’ᩈᨾ᩠ᨾᩣᨶᩣᨴᩦᨶᩴ ᩈᨦ᩠ᨣᩉᩮᩣ ¶ ᨴᨭ᩠ᨮᨻ᩠ᨻᩮᩣ. ᨲᨲ᩠ᨳ ‘‘ᨸᩣᨸᩮᩣ ᨸᩣᨸᩮᩣ’’ᨲ᩠ᨿᩣᨴᩦᩈᩩ ᨣᩁᩉᩣᨿᩴ. ‘‘ᩋᨽᩥᩁᩪᨸᨠ, ᩋᨽᩥᩁᩪᨸᨠᩣ’’ᨲ᩠ᨿᩣᨴᩦᩈᩩ ᩋᩈᨾ᩠ᨾᩣᨶᩮ. ᩑᩅᨾᩮᨲᩮᩈᩩ ᨶᩅᩈᩩ, ᩋᨬ᩠ᨬᩮᩈᩩ ᨧ ᩌᨾᩮᨯᩥᨲᩅᨧᨶᩴ ᨻᩩᨵᩮᩣ ᨸᨱ᩠ᨯᩥᨲᩮᩣ ᨠᩁᩮ ᨠᩁᩮᨿ᩠ᨿ ᨿᩮᩣᨩᩮᨿ᩠ᨿ ᩌᨾᩮᨯᨶᩴ ᨸᩩᨶᨸ᩠ᨸᩩᨶᩩᨧ᩠ᨧᩣᩁᨱᩴ ᩌᨾᩮᨯᩥᨿᨲᩥ ᩅᩣ ᨸᩩᨶᨸ᩠ᨸᩩᨶᩩᨧ᩠ᨧᩣᩁᩦᨿᨲᩦᨲᩥ ᩌᨾᩮᨯᩥᨲᨶ᩠ᨲᩥ ᨠᨲ᩠ᩅᩣ.

᪑᪐᪘. ᩍᩁᩩ, ᨿᨩᩩ, ᩈᩣᨾᨶ᩠ᨲᩥ ᨲᨿᩮᩣ ᩅᩮᨴᩣ ᩈᩥᨿᩩᩴ, ᨲᨲᩕ ᩍᩁᩩᩈᨴ᩠ᨴᩮᩣ ᨶᩣᩁᩦ ᩍᨲ᩠ᨳᩥᩃᩥᨦ᩠ᨣᩮᩣ. ᩍᨧ ᨳᩩᨲᩥᨿᩴ, ᩍᨧ᩠ᨧᨶ᩠ᨲᩮ ᨴᩮᩅᩣ ᩑᨲᩣᨿᩣᨲᩥ ᩍᩁᩩ, ᩏ, ᨧᩔ ᩁᩮᩣ. ᨿᨩᨶ᩠ᨲᩮ ᩋᨶᩮᨶᩮᨲᩥ ᨿᨩᩩ, ᩏ. ᩈᩮᩣ ᩋᨶ᩠ᨲᨠᨾ᩠ᨾᨶᩥ, ᨠᩁᨱᩮ ᨾᩮᩣ, ᩈᩮᩣᨿᨶ᩠ᨲᩥ ᨸᩣᨸᨾᨶᩮᨶᩮᨲᩥ ᩈᩣᨾᩴ, ᩒᩔᩣ, ‘‘ᩈᩣ ᨲᨶᩩᨠᩁᨱᩣᩅᩈᩣᨶᩮᩈᩪ’’ᨲᩥ ᩅᩣ ᨵᩣᨲ᩠ᩅᨲ᩠ᨳᩮᩣ. ᩅᩥᨴᨶ᩠ᨲᩥ ᨵᨾ᩠ᨾᨾᩮᨲᩮᩉᩦᨲᩥ ᩅᩮᨴᩣ.

ᩑᨲᩮ ᩑᩅ ᨲᨿᩮᩣ ᩅᩮᨴᩣ ᨲᨿᩦ ᨶᩣᨾ, ᨲᨿᩮᩣ ᩋᩅᨿᩅᩣ ᩋᩔᩣᨲᩥ ᨲᨿᩦ. ᩋᨿᩴ ᨲᨿᩦᩈᨴ᩠ᨴᩮᩣ ᨶᩣᩁᩦ ᩍᨲ᩠ᨳᩥᩃᩥᨦ᩠ᨣᩮᩣ. ᨲᩥᨠᩴ ᩅᩮᨴᩮ. ᨾᩩᨶᩣᨲᩥ ᨩᩣᨶᩣᨲᩥ ᨵᨾ᩠ᨾᩴ ᩋᨶᩮᨶᩣᨲᩥ ᨾᨶ᩠ᨲᩮᩣ, ᨲᩮᩣ, ᩏᩔ ᩋ. ᩈᩩᨿ᩠ᨿᨲᩮ ᨵᨾ᩠ᨾᩴ ᩑᨲᩣᨿᩣᨲᩥ ᩈᩩᨲᩥ. ᩍᨲ᩠ᨳᩥᨿᩴ ᩈᩩᨲᩥᩈᨴ᩠ᨴᩮᩣ.

᪑᪐᪙. ᩅᩮᨴᩈᨲ᩠ᨳᨠᩣᩁᨠᩮ ᨴᩈ ᩍᩈᨿᩮᩣᨴᩔᩮᨲᩩᨾᩣᩉ ‘‘ᩋᨭ᩠ᨮᨠᩮᩣ’’ᨧ᩠ᨧᩣᨴᩥ. ᩋᨲ᩠ᨳᩴ ᩉᩥᨲᩴ, ᩋᨲ᩠ᨳᩮ ᩅᩣ ᩈᨲ᩠ᨳᩮ ᨠᩁᩮᩣᨲᩦᨲᩥ ᩋᨭ᩠ᨮᨠᩮᩣ. ᩅᩣᨾᩴ ᨠᩃ᩠ᨿᩣᨱᩅᨧᨶᩴ ᨠᩁᩮᩣᨲᩦᨲᩥ ᩅᩣᨾᨠᩮᩣ, ᩁᩔᩈᩁᩦᩁᨲ᩠ᨲᩣ ¶ ᩅᩣ ᩅᩣᨾᨶᩮᩣ, ᩈᩮᩣ ᩑᩅ ᩅᩣᨾᨠᩮᩣ, ᨶᩔ ᨠᨠᩣᩁᨲ᩠ᨲᩴ ᨠᨲ᩠ᩅᩣ. ᩅᩣᨾᩮᩣ ᨶᩣᨾ ᩉᩁᩮᩣ, ᩈᩮᩣ ᨴᩮᩅᩮᩣ ᩋᩔ ᩅᩣᨾᨴᩮᩅᩮᩣ.

‘‘ᩅᩣᨾᩴ ᩈᨻ᩠ᨿᩮ ᨸᨲᩦᨸᩮ [ᨸᨲᩦᨸᩮᨲᩥ ᨸᨭᩥᨠᩪᩃᩮ] ᨧ, ᨴᩅᩥᨱᩮ [ᨴᩅᩥᨱᩮᨲᩥ ᨵᨶᩮ] ᨧᩣᨲᩥᩈᩩᨶ᩠ᨴᩁᩮ;

ᨸᨿᩮᩣᨵᩁᩮ ᩉᩁᩮ ᨠᩣᨾᩮ, ᨩᨬ᩠ᨬᩣ ᩅᩣᨾ’ᨾᨸᩥᨲ᩠ᨳᩥᨿ’’ᨶ᩠ᨲᩥ.

ᩉᩥ ᨶᩣᨶᨲ᩠ᨳᩈᨦ᩠ᨣᩉᩮ.

ᩋᨦ᩠ᨣᩥᩁᩈᩔ ᩍᩈᩥᨶᩮᩣ ᩋᨸᨧ᩠ᨧᩴ ᩋᨦ᩠ᨣᩥᩁᩈᩮᩣ, ᨧᩥᨲᩕᩈᩥᨡᨱ᩠ᨯᩥᨶᩮᩣ ᩋᨸᨧ᩠ᨧᩴ ᨸᩩᨲ᩠ᨲᩮᩣ. ᩋᨳ ᩅᩣ ᩋᨦ᩠ᨣᩥᨾ᩠ᩉᩥ ᨠᩣᨿᩮ ᩁᩈᩮᩣ ᩈᩥᨴ᩠ᨵᩥᨸ᩠ᨸᨲ᩠ᨲᩮᩣ ᨸᩣᩁᨴᩮᩣ ᨿᩔᩣᨲᩥ ᩋᨦ᩠ᨣᩥᩁᩈᩮᩣ. ᨲᩮᨶᩮᩅ ᨲᩔ ᨸᩩᨲ᩠ᨲᩴ ᩈᩩᩁᩣᨧᩁᩥᨿᩴ ‘‘ᨩᩦᩅᩮᩣ’’ᨲᩥ ᩅᨴᨲᩥ. ᨩᩦᩅᨿᨲᩥ ᩁᨱᩮ ᩋᩈᩩᩁᨶᩥᩉᨲᩮ ᨴᩮᩅᩮᨲᩥ ᨩᩦᩅᩮᩣ [ᩋᨾᩁ ᪓.᪒᪔ ᨧᩥᨶ᩠ᨲᩣᨾᨱᩥᨭᩦᨠᩣ ᩒᩃᩮᩣᨠᩮᨲᨻ᩠ᨻᩣ]. ᨽᩁᨲᩦᨲᩥ ᨽᨣᩩ, ᨽᩴ ᩅᩣᨶᨠ᩠ᨡᨲ᩠ᨲᩴ ᨣᨧ᩠ᨨᨲᩥ ᨩᩣᨶᩣᨲᩦᨲᩥ ᨽᨣᩩ, ᩏ. ᨿᨾᩴ ᩈᩴᨿᨾᩴ ᨴᨴᩣᨲᩥ ᨸᩁᩮᩈᨶ᩠ᨲᩥ ᨿᨾᨴᩮᩣ ᨧ ᩈᩮᩣ ᨴᨠ᩠ᨡᩥᨱᩮᨿ᩠ᨿᨣ᩠ᨣᩥᨲ᩠ᨲᩣ ᩋᨣ᩠ᨣᩥ ᨧᩮᨲᩥ ᨿᨾᨴᨣ᩠ᨣᩥ, ᩁᩣᨾᩔ ᨸᩥᨲᩣ [ᨸᩁᩈᩩᩁᩣᨾᩔ ᨸᩥᨲᩣ (ᩈᨴ᩠ᨴᨠᨸ᩠ᨸᨴ᩠ᨴᩩᨾᩮ)]. ᩅᩈᩥᨭ᩠ᨮᩔ ᩋᨸᨧ᩠ᨧᩴ ᩅᩣᩈᩥᨭ᩠ᨮᩮᩣ. ᨽᩣᩁᨴ᩠ᩅᩣᨩᩔ ᩋᨸᨧ᩠ᨧᩴ ᨽᩣᩁᨴ᩠ᩅᩣᨩᩮᩣ. ᨠᩔᨸᩔ ᩋᨸᨧ᩠ᨧᩴ ᨠᩔᨸᩮᩣ. ᩅᩮᩔᩣᨾᩥᨲ᩠ᨲᩔ ᩋᨸᨧ᩠ᨧᩴ ᩅᩮᩔᩣᨾᩥᨲ᩠ᨲᩮᩣ. ᩍᨲᩥ ᩍᨾᩮ ᨴᩈ ᩍᩈᨿᩮᩣ ᨾᨶ᩠ᨲᩣᨶᩴ ᩅᩮᨴᩣᨶᩴ ᨠᨲ᩠ᨲᩣᩁᩮᩣ ᨠᩣᩁᨠᩣ.

᪑᪑᪐. ᩅᩮᨴᩮ ᨴᩔᩮᨲ᩠ᩅᩣ ᨲᩔ ᨨᩊᨦ᩠ᨣᩣᨶᩥ ᨴᩔᩮᨲᩩᨾᩣᩉ ‘‘ᨠᨸ᩠ᨸᩮᩣ’’ᨧ᩠ᨧᩣᨴᩥ. ᨿᨬ᩠ᨬᨠᨾ᩠ᨾᩣᨶᨾᩩᨸᨴᩮᩈᨠᩮᩣ ᨠᨸ᩠ᨸᩮᩣ ‘‘ᨠᨸ᩠ᨸᨲᩮ ᨸᨽᩅᨲᩦ’’ᨲᩥ ᨠᨲ᩠ᩅᩣ. ᩈᩣᨵᩩᩈᨴ᩠ᨴᩣᨶᨾᨶ᩠ᩅᩣᨡ᩠ᨿᩣᨿᨠᩴ ᨻ᩠ᨿᩣᨠᩁᨱᩴ ᩅᩥᩈᩮᩈᩮᨶ ᩌᨠᩁᩦᨿᨶ᩠ᨲᩮ ᨸᨠᨲᩥᨧ᩠ᨧᩣᨴᩥᨶᩣ ᩌᨻ᩠ᨿᩣᨸᩣᨴ᩠ᨿᨶ᩠ᨲᩮ ᩋᨶᩮᨶ ¶ ᩈᨴ᩠ᨴᩣᨲᩥ, ᨿᩩ. ᨩᩮᩣᨲᩥᩈᨲ᩠ᨳᩴ ᨣᨱᨶᩈᨲ᩠ᨳᩴ ᩈᩩᨽᩣᩈᩩᨽᨠᨾ᩠ᨾᨹᩃᨩᩮᩣᨲᨶᨠᩴ. ᩈᩥᨠ᩠ᨡ᩠ᨿᨶ᩠ᨲᩮ ᩋᨻ᩠ᨽᩈ᩠ᨿᨶ᩠ᨲᩮ [ᩋᨩ᩠ᨫᨿᨶ᩠ᨲᩮ (ᨠ.)] ᩑᨲᩣᨿᩣᨲᩥ ᩈᩥᨠ᩠ᨡᩣ, ᩋᨠᩣᩁᩣᨴᩥᩅᨱ᩠ᨱᩣᨶᩴ ᨮᩣᨶᨠᩁᨱᨸᨿᨲᨶᩣᨶᩴ ᨸᨭᩥᨸᩣᨴᩥᨠᩣ. ᨶᩥᨧ᩠ᨨᨿᩮᨶ, ᨶᩥᩔᩮᩈᨲᩮᩣ ᩅᩣ ᩏᨲ᩠ᨲᩥ ᨶᩥᩁᩩᨲ᩠ᨲᩥ, ᩅᨱ᩠ᨱᩣᨣᨾᩮᩣ ᩅᨱ᩠ᨱᩅᩥᨸᩁᩥᨿᨿᩮᩣᨧ᩠ᨧᩣᨴᩥᨠᩣ. ᨨᨶ᩠ᨴᩈᩥ ᩋᨶᩩᨭ᩠ᨮᩩᨽᩣᨴᩥᩅᩩᨲ᩠ᨲᩣᨶᩴ ᨸᨭᩥᨸᩣᨴᩥᨠᩣ ᨨᨶ᩠ᨴᩮᩣᩅᩥᨧᩥᨲᩥ, ᩑᨲᩣᨶᩥ ᨨ ᩅᩮᨴᩣᨶᩴ ᩋᨦ᩠ᨣᩣᨶᩦᨲᩥ ᩅᨴᨶ᩠ᨲᩥ.

᪑᪑᪑. ᨸᩩᩁᩣᩅᩩᨲ᩠ᨲᨶᩥᨻᨶ᩠ᨵᨶᨸᩣᨿᨲ᩠ᨲᩣ ᨸᩩᩁᩣᩅᩩᨲ᩠ᨲᩴ, ᨲᩔ ᨸᨻᨶ᩠ᨵᩮᩣ ᩅᩥᨲ᩠ᨳᩣᩁᩮᩣ, ᩈᨶ᩠ᨲᩣᨶᩮᩣ ᩅᩣ ᨽᩣᩁᨲᩣᨴᩥᨠᩮᩣ ᨽᩣᩁᨲᨿᩩᨴ᩠ᨵᨠᨳᩣᨴᩥᨠᩮᩣ ᨻ᩠ᨿᩣᩈᩣᨴᩥᨸᨠᨲᩮᩣ ᨣᨶ᩠ᨳᩮᩣ ᩍᨲᩥᩉᩣᩈᩮᩣ ᨶᩣᨾ, ᩍᨲᩥᩉᩈᨴ᩠ᨴᩮᩣ ᨸᩣᩁᨾ᩠ᨸᩁᩥᨿᩮᩣᨸᨴᩮᩈᩮ ᨶᩥᨸᩣᨲᩮᩣ, ᩍᨲᩥᩉᩣ’ᨲ᩠ᨳᩥ ᩋᩈ᩠ᨾᩥᨶ᩠ᨲᩥ ᩍᨲᩥᩉᩣᩈᩮᩣ.

ᩁᩩᨠ᩠ᨡᩣᨴᩦᨶᩴ ᨶᩣᨾᨸᩁᩥᨿᩣᨿᩮᩉᩥ ᨶᩣᨾᨸ᩠ᨸᨠᩣᩈᨠᩴ ᩁᨲᨶᨾᩣᩃᩣᨴᩥᨠᩴ ᩈᨲ᩠ᨳᩴ ᨶᩥᨥᨱ᩠ᨭᩩ ᨶᩣᨾ, ᩈᩮᩣᨲᩥᨾᩥᨶᩣ ᨶᩥᨥᨱ᩠ᨭᩩᩈᨴ᩠ᨴᩔ ᨸᩩᩃ᩠ᩃᩥᨦ᩠ᨣᨲ᩠ᨲᩴ ᨴᩦᨸᩮᨲᩥ, ᩈᨻ᩠ᨻᨲᩕᩮᩅᩴ. ᨲᨲ᩠ᨳ ᨲᨲ᩠ᨳᩣᨣᨲᩣᨶᩥ ᨶᩣᨾᩣᨶᩥ ᨶᩥᩔᩮᩈᨲᩮᩣ ᨥᨭᩮᨶ᩠ᨲᩥ ᩁᩣᩈᩦᨠᩁᩮᩣᨶ᩠ᨲᩥ ᩑᨲ᩠ᨳᩣᨲᩥ ᨶᩥᨥᨱ᩠ᨭᩩ, ᨻᩥᨶ᩠ᨴᩣᨣᨾᩮᩣ, ᩅᨧᨶᩦᨿᩅᩣᨧᨠᨽᩣᩅᩮᨶ ᩋᨲ᩠ᨳᩴ ᩈᨴ᩠ᨴᨬ᩠ᨧ ᨶᩥᨡᨱ᩠ᨯᨲᩥ ᨽᩥᨶ᩠ᨴᨲᩥ ᩅᩥᨽᨩ᩠ᨩ ᨴᩔᩮᨲᩦᨲᩥ ᩅᩣ ᨶᩥᨡᨱ᩠ᨭᩩ, ᩈᩮᩣ ᩑᩅ ᨡᩔ ᨥᨠᩣᩁᩴ ᨠᨲ᩠ᩅᩣ ᨶᩥᨥᨱ᩠ᨭᩪᨲᩥ ᩅᩩᨲ᩠ᨲᩮᩣ. ᩁᩩᨠ᩠ᨡᩣᨴᩦᨶᩴ ᨶᩣᨾᨸ᩠ᨸᨠᩣᩈᨠᨶ᩠ᨲᩥᨾᩥᨶᩣ ᩑᨠᩮᨠᩔ ᩋᨲ᩠ᨳᩔ ᩋᨶᩮᨠᨸᩁᩥᨿᩣᨿᨶᩣᨾᨸ᩠ᨸᨠᩣᩈᨠᨲ᩠ᨲᩴ ᩅᩩᨲ᩠ᨲᩴ, ᨶᩥᨴᩔᨶᨾᨲ᩠ᨲᨬ᩠ᨧᩮᨲᩴ, ᩋᨶᩮᨠᩮᩈᩴ ᩋᨲ᩠ᨳᩣᨶᩴ ᩑᨠᩈᨴ᩠ᨴᩅᨧᨶᩦᨿᨲᩣᨸᨠᩣᩈᨠᩅᩈᩮᨶᨸᩥ ¶ ᨲᩔ ᨣᨶ᩠ᨳᩔ ᨸᩅᨲ᩠ᨲᨲ᩠ᨲᩣ [ᨴᩦ. ᨶᩥ. ᨭᩦ. ᪑.᪒᪕᪖; ᨾ. ᨶᩥ. ᨭᩦ. ᪑.᪒᪒; ᩋ. ᨶᩥ. ᨭᩦ. ᪒.᪓.᪕᪙; ᩈᩣᩁᨲ᩠ᨳ. ᨭᩦ. ᪑.ᨲᨲᩥᨿᩈᨦ᩠ᨣᩦᨲᩥᨠᨳᩣᩅᨱ᩠ᨱᨶᩣ].

᪑᪑᪒. ᩃᩮᩣᨠᩮ ᨿᩴ ᩅᩥᨲᨱ᩠ᨯᩅᩣᨴᩦᨶᩴ ᩈᨲ᩠ᨳᩴ, ᨲᩴ ᩃᩮᩣᨠᩣᨿᨲᨶ᩠ᨲᩥ ᩅᩥᨬ᩠ᨬᩮᨿ᩠ᨿᩴ. ᨲᨶᩩ ᩅᩥᨲ᩠ᨳᩣᩁᩮ, ᩋᨬ᩠ᨬᨾᨬ᩠ᨬᩅᩥᩁᩩᨴ᩠ᨵᩴ, ᩈᨣ᩠ᨣᨾᩮᩣᨠ᩠ᨡᩅᩥᩁᩩᨴ᩠ᨵᩴ ᩅᩣ ᨲᨶᩮᩣᨶ᩠ᨲᩥ ᩑᨲ᩠ᨳᩣᨲᩥ ᩅᩥᨲᨱ᩠ᨯᩮᩣ, ᨯᩮᩣ, ᨱᨲ᩠ᨲᩴ, ᩅᩥᩁᩩᨴ᩠ᨵᩮᨶ ᩅᩣ ᩅᩣᨴᨴᨱ᩠ᨯᩮᨶ ᨲᩣᩊᩮᨶ᩠ᨲᩥ ᩑᨲ᩠ᨳ ᩅᩣᨴᩥᨶᩮᩣᨲᩥ ᩅᩥᨲᨱ᩠ᨯᩮᩣ, ᨲᨯᩥ ᨲᩣᩊᨶᩮ, ᩋᨴᩮᩈᨾ᩠ᨸᩥ ᩉᩥ ᨿᩴ ᨶᩥᩔᩣᨿ ᩅᩣᨴᩦᨶᩴ ᩅᩣᨴᩮᩣ ᨸᩅᨲ᩠ᨲᩮᩣ, ᨲᩴ ᨲᩮᩈᩴ ᨴᩮᩈᨲᩮᩣᨸᩥ ᩏᨸᨧᩣᩁᩅᩈᩮᨶ ᩅᩩᨧ᩠ᨧᨲᩥ, ᨿᨳᩣ ‘‘ᨧᨠ᩠ᨡᩩᩴ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᨸᩉᩦᨿᨾᩣᨶᩣ ᨸᩉᩦᨿᨲᩥ, ᩑᨲ᩠ᨳ ᨶᩥᩁᩩᨩ᩠ᨫᨾᩣᨶᩣ ᨶᩥᩁᩩᨩ᩠ᨫᨲᩦ’’ᨲᩥ [ᨴᩦ. ᨶᩥ. ᪒.᪔᪐᪑; ᨾ. ᨶᩥ. ᪑.᪑᪓᪔; ᩅᩥᨽ. ᪒᪐᪔]. ᩃᩮᩣᨠᩣᨲᩥ ᨻᩣᩃᩃᩮᩣᨠᩣ, ᨲᩮ ᩑᨲ᩠ᨳ ᩌᨿᨲᨶ᩠ᨲᩥ ᩏᩔᩉᨶ᩠ᨲᩥ ᩅᩣᨿᨾᨶ᩠ᨲᩥ ᩅᩣᨴᩔᩣᨴᩮᨶᩣᨲᩥ ᩃᩮᩣᨠᩣᨿᨲᩴ, ᩌᨿᨲᩥᩴ ᩉᩥᨲᩴ ᨲᩮᨶ ᩃᩮᩣᨠᩮᩣ ᨶ ᨿᨲᨲᩥ ᨶ ᩎᩉᨲᩦᨲᩥ ᩅᩣ ᩃᩮᩣᨠᩣᨿᨲᩴ, ᨲᨬ᩠ᩉᩥ ᨣᨶ᩠ᨳᩴ ᨶᩥᩔᩣᨿ ᩈᨲ᩠ᨲᩣ ᨸᩩᨬ᩠ᨬᨠᩕᩥᨿᩣᨿ ᨧᩥᨲ᩠ᨲᨾ᩠ᨸᩥ ᨶ ᩏᨸ᩠ᨸᩣᨴᩮᨶ᩠ᨲᩥ.

ᨿᩮᩣ ᨠᩅᩦᨶᩴ ᨸᨱ᩠ᨯᩥᨲᩣᨶᩴ ᩉᩥᨲᩮᩣ ᨠᩅᩥᨲ᩠ᨲᨽᩮᩣᨣᩈᨾ᩠ᨸᨲ᩠ᨲᩣᨴᩥᨸᨿᩮᩣᨩᨶᨠᩁᩮᩣ ᨠᩕᩥᨿᩣᨠᨸ᩠ᨸᩅᩥᨠᨸ᩠ᨸᩮᩣ ᨠᩅᩦᨶᩴ ᨠᩕᩥᨿᩣᩈᨦ᩠ᨡᩣᨲᨠᨸ᩠ᨸᨻᨶ᩠ᨵᨶᩅᩥᨵᩥᩅᩥᨵᩣᨿᨠᩮᩣ ᩈᩩᨻᩮᩣᨵᩣᩃᨦ᩠ᨠᩣᩁᩣᨴᩥᨠᩮᩣ ᨣᨶ᩠ᨳᩮᩣ, ᩈᩮᩣ ᨠᩮᨭᩩᨽᩴ ᨶᩣᨾ, ᨠᩥᨭᨶ᩠ᨲᩥ ᨣᨧ᩠ᨨᨶ᩠ᨲᩥ ᨠᩮᩣᩈᩃ᩠ᩃᩴ ᨠᩅᨿᩮᩣ ᨻᨶ᩠ᨵᨶᩮᩈᩩ ᩑᨲᩮᨶᩣᨲᩥ ᨠᩮᨭᩩᨽᩴ, ᨠᩥᨭ ᨣᨲᩥᨿᩴ, ᩋᨽᩮᩣ, ᩋᩔᩩᨠᩣᩁᩮᩣ, ᩋᨳ ᩅᩣ ᨠᩥᨭᨲᩥ ᨣᨾᩮᨲᩥ ᨠᩕᩥᨿᩣᨴᩥᩅᩥᨽᩣᨣᩴ, ᨲᩴ ᩅᩣ ᩋᨶᩅᩈᩮᩈᩮᨶ ᨸᩁᩥᨿᩣᨴᩣᨶᨲᩮᩣ ᨣᨾᩮᨶ᩠ᨲᩮᩣ ᨸᩪᩁᩮᨲᩦᨲᩥ ᨠᩮᨭᩩᨽᩴ, ᩏᨽ, ᩏᨾ᩠ᨽ ᨸᩪᩁᨱᩮ.

ᩅᨧᩦᨽᩮᨴᩣᨴᩥᩃᨠ᩠ᨡᨱᩣ ¶ ᨠᩕᩥᨿᩣ ᨠᨸ᩠ᨸᩦᨿᨲᩥ ᩅᩥᨠᨸ᩠ᨸᩦᨿᨲᩥ ᩑᨲᩮᨶᩣᨲᩥ ᨠᩕᩥᨿᩣᨠᨸ᩠ᨸᩮᩣ. ᩈᩮᩣ ᨸᨶ ᩅᨱ᩠ᨱᨸᨴᩈᨾ᩠ᨻᨶ᩠ᨵᨸᨴᨲ᩠ᨳᩣᨴᩥᩅᩥᨽᩣᨣᨲᩮᩣ ᩋᨲᩥᨻᩉᩩ ᩅᩥᨠᨸ᩠ᨸᩮᩣᨲᩥ ᩌᩉ ‘‘ᨠᩕᩥᨿᩣᨠᨸ᩠ᨸᩅᩥᨠᨸ᩠ᨸᩮᩣ’’ᨲᩥ, ᩍᨴᨬ᩠ᨧ ᨾᩪᩃᨠᩕᩥᨿᩣᨠᨸ᩠ᨸᨣᨶ᩠ᨳᩴ ᩈᨶ᩠ᨵᩣᨿ ᩅᩩᨲ᩠ᨲᩴ. ᩈᩮᩣ ᩉᩥ ᨾᩉᩣᩅᩥᩈᨿᩮᩣ ᩈᨲᩈᩉᩔᨸᩁᩥᨾᩣᨱᩮᩣ ᨶᨿᨧᩁᩥᨲᩣᨴᩥᨸᨠᩁᨱᩴ [ᨶᩃᨧᩁᩥᨲᩣᨴᩥᨸᨠᩁᨱᩴ (?)].

᪑᪑᪓. ᩏᨸᩃᨴ᩠ᨵᩮᩣ ᨠᩮᨶᨸ᩠ᨿᨲ᩠ᨳᩮᩣ ᨿᩔᩴ ᩈᩣ ᩏᨸᩃᨴ᩠ᨵᨲ᩠ᨳᩣ, ᩍᨲᩥ ᩌᨡ᩠ᨿᩣᨿᩥᨠᩣᨲ᩠ᨿᩩᨧ᩠ᨧᨲᩮ ᩌᨡ᩠ᨿᩣᨿᨲᩮ ᨶᩣᨿᨠᩣᨶᩩᩈᩣᩈᨠᨧᩁᩥᨲᨾᩔᨶ᩠ᨲᩥ, ᩈᨬ᩠ᨬᩣᨿᩴ ᨱ᩠ᩅᩩ.

ᨸᨻᨶ᩠ᨵᩮᨶᩮᩅ ᨧ ᩈᩅᩥᨲ᩠ᨳᩣᩁᩮᨶ ᨠᨸ᩠ᨸᨶᩴ ᨿᩔᩴ ᩈᩣ ᨸᨻᨶ᩠ᨵᨠᨸ᩠ᨸᨶᩣ, ᨠᩣᨴᨾ᩠ᨻᩁᩦᨸᨽᩩᨲᩥ. ᨠᨳᩦᨿᨲᩦᨲᩥ ᨠᨳᩣ.

ᩋᨲ᩠ᨳᩣ ᨽᩪᨾᩥᩉᩥᩁᨬ᩠ᨬᩣᨴᨿᩮᩣ, ᨲᨲᩕ ᨸᨵᩣᨶᩴ ᨽᩪᨾᩥ ᩍᨲᩁᩮᩈᩴ ᨲᨸ᩠ᨸᨽᩅᨲ᩠ᨲᩣ, ᨲᩮᩈᩴ ᩋᨩ᩠ᨩᨶᩮ ᨸᩣᩃᨶᩮ ᨧ ᩏᨸᩣᨿᨽᩪᨲᩴ ᩈᨲ᩠ᨳᩴ ᩋᨲ᩠ᨳᩈᨲ᩠ᨳᩴ, ᨸᨿᩣᨶᨠ᩠ᨿᩣᨴᩥᨸᨱᩦᨲᩴ [ᨻᩉᩈ᩠ᩅᨲᩥᨧᩣᨻ᩠ᨻᩦᨠ᩠ᨿᩣᨴᩥᨸᩕᨱᩦᨲᩴ (ᨧᩥᨶ᩠ᨲᩣᨾᨱᩥᨭᩦᨠᩣ ᪖.᪕)], ᨲᩈ᩠ᨾᩥᩴ ᨴᨱ᩠ᨯᨶᩦᨲᩥᩈᨴ᩠ᨴᩮᩣ ᨸᩅᨲ᩠ᨲᩮᩣ. ᩈᩣᨾᩣᨴᩦᨶᩴ ᨧᨲᩩᨲ᩠ᨳᩮᩣᨸᩣᨿᩮᩣ ᩅᨵᨻᨶ᩠ᨵᨶᩣᨴᩥᩃᨠ᩠ᨡᨱᩮᩣ ᨴᨱ᩠ᨯᩮᩣ, ᨲᩔ ᨶᩦᨲᩥ ᨸᨱᨿᨶᩴ ᨴᨱ᩠ᨯᨶᩦᨲᩥ, ᨸᩣᨿᩮᨶ ᨶᩦᨲᩥᩔ ᨴᨱ᩠ᨯᩮᨶ ᨻ᩠ᨿᨸ᩠ᨸᨴᩮᩈᩮᩣ, ᩅᨵᨴᩮᩣᩈᨻᩣᩉᩩᩃ᩠ᨿᩮᨶ ᨸᩣᨿᩈᩮᩣ ᨴᨱ᩠ᨯᩔ ᨸᨱᨿᨶᨲᩮᩣ, ᨴᨱ᩠ᨯᨶᩦᨲ᩠ᨿᨲ᩠ᨳᨲ᩠ᨲᩣ ᩈᨲ᩠ᨳᨬ᩠ᨧ ᨴᨱ᩠ᨯᨶᩦᨲᩥ.

ᨴ᩠ᩅᨿᩴ ᨠᨳᩣᨿᩴ. ᩅᩩᨲ᩠ᨲᩮᩣ ᩋᨶᩩᩅᨲ᩠ᨲᨶᩦᨿᩮᩣ ᩋᨶ᩠ᨲᩮᩣ ᨸᩁᩥᩈᨾᨲ᩠ᨲᩥ ᨿᩔ ᩋᨲ᩠ᨲᨶᩮᩣ ᨠᩣᩁᩥᨿᨽᩣᨣᩔ ᨸᩣᨸᨶᨲᩮᩣᨲᩥ ᩅᩩᨲ᩠ᨲᨶ᩠ᨲᩮᩣ. ᨸᩅᨲ᩠ᨲᨶ᩠ᨲᩮ ᨠᩣᩁᩥᨿᩣ ᨿᩔᩴ ᨸᩅᨲ᩠ᨲᩥ,ᨲᩥ. ᨧᨠᩣᩁᩮᨶ ᩅᩩᨲ᩠ᨲᩏᨴᨶ᩠ᨲᩣᨴᨿᩮᩣ ᨣᩉᩥᨲᩣ. ᨠᩣᩁᩥᨿᩔ ᩅᩩᨲ᩠ᨲᩥ ᩋᨲᩕᨲ᩠ᨳᩦᨲᩥ ᩋᩔᨲ᩠ᨳ᩠ᨿᨲ᩠ᨳᩮ ¶ ᨱᩮᩣ. ᩏᨣ᩠ᨣᨲᩮᩣ ᩋᨶ᩠ᨲᩮᩣ ᨸᩁᩥᩈᨾᨲ᩠ᨲᩥ ᨿᩔ ᩏᨴᨶ᩠ᨲᩮᩣ.

᪑᪑᪔. ᩋᨵᩥᩅᨧᨶᨶ᩠ᨲᩴ ᨶᩣᨾᩮ. ᩈᨬ᩠ᨩᩣᨶᨶ᩠ᨲᩥ ᩑᨲᩣᨿᩣᨲᩥ ᩈᨬ᩠ᨬᩣ, ᩋ. ᩌᨡ᩠ᨿᩣᨿᨲᩮ ᩑᨲᩣᨿᩣᨲᩥ ᩌᨡ᩠ᨿᩣ. ᩋᩉ᩠ᩅᨿᨲᩮ ᩑᨲᩣᨿᩣᨲᩥ ᩋᩅ᩠ᩉᩣ, ᩉᩩ ᩈᨴ᩠ᨴᩮ, ᩅ᩠ᩉᩮ ᩋᩅ᩠ᩉᩣᨶᩮᨲᩥ ᩅᩣ ᨵᩣᨲᩩ, ᩋ. ᩈᨾ᩠ᨾᩣ ᩌᨩᩣᨶᩣᨲᩥ, ᩈᨾᩴ ᩅᩣ ᨩᩣᨶᩣᨲᩥ ᩑᨲᩣᨿᩣᨲᩥ ᩈᨾᨬ᩠ᨬᩣ. ᩋᨽᩥᨵᩦᨿᨲᩮ ᨿᩮᨶ, ᨿᩩ. ᨶᨾ᩠ᨿᨲᩮ ᩋᨻ᩠ᨽᩔᨲᩮ ᩋᩈ᩠ᨾᩥᨶ᩠ᨲᩥ ᨶᩣᨾᩴ, ᨶᨾᨲᩥ ᨶᩣᨾᨿᨲᩦᨲᩥ ᩅᩣ ᨶᩣᨾᩴ. ᩋᩉ᩠ᩅᩣᨿᨲᩮᨲᩥ ᩋᩅ᩠ᩉᨿᩮᩣ, ᨠᨾ᩠ᨾᩮ ᨿᩮᩣ. ᨶᩣᨾᨾᩮᩅ ᨶᩣᨾᨵᩮᨿ᩠ᨿᩴ. ᨶᩣᨾᩁᩪᨸᩮᩉᩥ [ᨶᩣᨾᩈᨴ᩠ᨴᩮᩉᩥ (ᨠ.) ᨽᩣᨣᩁᩪᨸᨶᩣᨾᩮᩉᩥ ᨵᩮᨿ᩠ᨿᩮᩣ (ᨸᩣᨱᩥᨶᩥ ᪕.᪔.᪓᪖ ᩅᩣ)] ᩈᨠᨲ᩠ᨳᩮ ᨵᩮᨿ᩠ᨿᩮᩣ ᨿᨴᩣᨴᩥᨶᩣ, ᨲᩥᨭ᩠ᨮᨲᩥ ᩅᩣ ᩑᨲ᩠ᨳ ᩋᨲ᩠ᨳᩮᩣᨲᩥ ᨵᩮᨿ᩠ᨿᩴ, ᨵᩁᩦᨿᨲᩮ ᩏᨧ᩠ᨧᩣᩁᩥᨿᨲᩮᨲᩥ ᩅᩣ ᨵᩮᨿ᩠ᨿᩴ, ᨶᩣᨾᨾᩮᩅ ᨵᩮᨿ᩠ᨿᩴ ᨶᩣᨾᨵᩮᨿ᩠ᨿᩴ. ᩋᨵᩦᨶᩴ ᩅᨧᨶᩴ ᩋᨵᩥᩅᨧᨶᩴ, ᨠᩮᨶ ᩋᨵᩦᨶᩴ? ᩋᨲ᩠ᨳᩮᨶ. ᨸᩩᨭ᩠ᨮᩔ ᨸᨭᩥᩅᨧᨶᩴ ᨸᨭᩥᩅᩣᨠ᩠ᨿᩴ. ᨸᨭᩥᨣᨲᩴ ᨸᨧ᩠ᨨᩣᨣᨲᩴ ᩅᩣᨠ᩠ᨿᩴ ᨸᨭᩥᩅᩣᨠ᩠ᨿᩴ. ᩏᨲ᩠ᨲᩁᩦᨿᨲᩮ ᩋᨲᩥᨠ᩠ᨠᨾ᩠ᨿᨲᩮ ᨿᩮᨶᩣᨲᩥ ᩏᨲ᩠ᨲᩁᩴ.

᪑᪑᪕. ᨲᩥᨠᩴ ᨸᩩᨧ᩠ᨨᩣᨿᩴ. ᨸᩩᨧ᩠ᨨᩥᨲᨻ᩠ᨻᩮᩣᨲᩥ ᨸᨬ᩠ᩉᩮᩣ, ᨬᩣᨲᩩᨾᩥᨧ᩠ᨨᩥᨲᩮᩣ ᩉᩥ ᩋᨲ᩠ᨳᩮᩣ ᨸᨬ᩠ᩉᩮᩣ ᨶᩣᨾ. ᨸᩩᨧ᩠ᨨ ᨸᩩᨧ᩠ᨨᨶᩮ, ᨧᩔ ᨬᩮᩣ, ᨨᩔ ᩉᩮᩣ, ᩏᩔ ᩋ, ᨸᨬ᩠ᩉ ᨸᩩᨧ᩠ᨨᨶᩮᨲᩥᨸᩥ ᨵᩣᨲᩩ. ᨿᩩᨩ ᨿᩮᩣᨣᩮ, ᩋᨶᩩᨿᩩᨬ᩠ᨩᩥᨲᨻ᩠ᨻᩮᩣ ¶ ᨸᩩᨧ᩠ᨨᩥᨲᨻ᩠ᨻᩮᩣᨲᩥ ᩋᨶᩩᨿᩮᩣᨣᩮᩣ. ᨸᩩᨧ᩠ᨨᨶᩴ, ᨸᩩᨧ᩠ᨨᩥᨲᨻ᩠ᨻᩣᨲᩥ ᩅᩣ ᨸᩩᨧ᩠ᨨᩣ. ᩑᨲᩮᨶᩮᩅ ᨶᨿᩮᨶ ᨴ᩠ᩅᩦᩈᩩᨸᩥ ᨽᩣᩅᩈᩣᨵᨶᨾ᩠ᨸᩥ ᨠᨲ᩠ᨲᨻ᩠ᨻᨾᩮᩅ.

ᨧᨲᩩᨠ᩠ᨠᩴ ᨶᩥᨴᩔᨶᩮ. ᨸᨠᨲᩮᨶ ᩈᨴᩥᩈᩴ ᨶᩥᨴᩔᩮᨲᩥ ᩑᨲᩮᨶᩣᨲᩥ ᨶᩥᨴᩔᨶᩴ, ᨸᨠᨲᩔᩮᩣᨸᨸᩣᨴᨶᩴ ᩅᩣᨠ᩠ᨿᩴ. ᩏᨸᩮᩣᨣ᩠ᨥᨬ᩠ᨬᨲᩮ [ᩏᨸᩮᩣᩉᨬ᩠ᨬᨲᩮ (?)] ᨸᨭᩥᨸᩣᨴᩦᨿᨲᩮ ᩋᨶᩮᨶᩣᨲᩥ ᩏᨸᩮᩣᨣ᩠ᨥᩣᨲᩮᩣ. ᩏᨸ ᩏᨸᩩᨻ᩠ᨻᩮᩣ ᩉᨶᨵᩣᨲᩩ ᨸᨭᩥᨸᩣᨴᨶᨲ᩠ᨳᩮᩣ. ᨴᩔᩦᨿᨲᩮ ᩋᨶᩮᨶᩣᨲᩥ ᨴᩥᨭ᩠ᨮᨶ᩠ᨲᩮᩣ, ᩋᨶ᩠ᨲᩮᩣ, ᨴᩥᨭ᩠ᨮᩮᩣ ᩅᩣ ᨸᨠᨲᩔ ᩋᨶ᩠ᨲᩮᩣ ᨸᩁᩥᩈᨾᨲ᩠ᨲᩥ ᨿᩮᨶᩣᨲᩥ ᨴᩥᨭ᩠ᨮᨶ᩠ᨲᩮᩣ. ᩈᨻ᩠ᨻᨲᩕᩣᨸᩥ ᩅᩣ ᨠᨾ᩠ᨾᩈᩣᨵᨶᨾ᩠ᨸᩥ ᨠᨲ᩠ᨲᨻ᩠ᨻᩴ. ᩏᨴᩣᩉᩁᩦᨿᨲᩥ ᨸᨠᨲᩔᩮᩣᨸᨸᩣᨴᨶᩣᨿᩣᨲᩥ ᩏᨴᩣᩉᩁᨱᩴ.

᪑᪑᪖. ᨧᨲᩩᨠ᩠ᨠᩴ ᩈᨦ᩠ᨡᩮᨸᩮ. ᩈᨾᩣᨲᩥ ᨲᩩᩃ᩠ᨿᨲ᩠ᨳᩣ. ᩈᨦ᩠ᨡᩥᨸᩦᨿᨲᩮ ᩑᨠᨴᩮᩈᨲᩮᩣ ᨠᨳᩦᨿᨲᩦᨲᩥ ᩈᨦ᩠ᨡᩮᨸᩮᩣ, ᨡᩥᨸ ᨸᩮᩁᨱᩮ. ᩈᩴᩉᩁᩦᨿᨲᩮ ᩈᨦ᩠ᨡᩮᨸᩮᨶ ᨸᨧ᩠ᨧᩣᨡ᩠ᨿᩣᨿᨲᩮ ᩑᨲᩮᨶᩣᨲᩥ ᩈᩴᩉᩣᩁᩮᩣ. ᩈᨾᩈ᩠ᨿᨲᩮ ᩈᨦ᩠ᨡᩥᨸᩦᨿᨲᩮᨲᩥ ᩈᨾᩣᩈᩮᩣ, ᩋᩈᩩ ᨡᩮᨸᨶᩮ. ᩈᨦ᩠ᨡᩮᨸᩮᨶ ᨣᨿ᩠ᩉᨲᩮ ᩋᨶᩮᨶᩣᨲᩥ ᩈᨦ᩠ᨣᩉᩮᩣ.

‘‘ᨲ᩠ᩅᩴ ᩈᨲᩴ ᩈᩩᩅᨱ᩠ᨱᩴ ᨵᩣᩁᨿᩈᩥ’’ᩍᨲ᩠ᨿᩣᨴᩥᨠᩴ ᨲᩩᨧ᩠ᨨᨽᩣᩈᨶᩴ ᩋᨽᩪᨲᨽᩣᩈᨶᩴ ᩋᨻ᩠ᨽᨠ᩠ᨡᩣᨶᩴ ᨶᩣᨾ. ᩋᩈᨧ᩠ᨧᩮᨶ ᩋᨠ᩠ᨡᩣᨶᩴ ᨽᩣᩈᨶᩴ ᩋᨻ᩠ᨽᨠ᩠ᨡᩣᨶᩴ.

᪑᪑᪗. ᨴ᩠ᩅᨿᩴ ¶ ᩅᩥᩅᩣᨴᩣᨿ ᩅᩥᨽᩣᨣᩅᩥᩈᨿᩮ [ᩍᨱᩅᩣᨴᩣᨴᩥᩅᩥᩈᨿᩮ (ᨧᩥᨶ᩠ᨲᩣᨾᨱᩥᨭᩦᨠᩣ ᪖.᪙)]. ᩅᩥᩁᩩᨴ᩠ᨵᩴ ᨠᨲ᩠ᩅᩣ ᩋᩅᩉᩁᨲᩥ ᩅᨴᨲᩥ ᨿᨶ᩠ᨲᩥ ᩅᩮᩣᩉᩣᩁᩮᩣ. ᩅᩥᩁᩩᨴ᩠ᨵᩴ ᨠᨲ᩠ᩅᩣ ᩅᨴᨲᩥ ᨿᨶ᩠ᨲᩥ ᩅᩥᩅᩣᨴᩮᩣ. ᩈᨻ᩠ᨻᨲᩕ ᨽᩣᩅᩈᩣᨵᨶᩴ ᩅᩣ ᨿᩩᨩ᩠ᨩᨲᩥ. ‘‘ᨾᩩᩈᩣᩅᩣᨴᩴ ᩅᨴᨶ᩠ᨲᩮᩣ ᨥᩮᩣᩁᩣᨶᩥ ᨲ᩠ᩅᩴ ᨶᩁᨠᩣᨶᩥ ᨿᩔᩈᩦ’’ᨲ᩠ᨿᩣᨴᩥᩈᩁᩪᨸᩴ ᩈᨸᨶᩴ. ᩈᨸ ᩋᨠ᩠ᨠᩮᩣᩈᩮ, ᨳᩮᩣ, ᩈᨸᨳᩮᩣ.

ᨲᩥᨠᩴ ᨡ᩠ᨿᩣᨲᩮ. ᨿᨩᨲᩥ ᩑᨲᩮᨶᩣᨳᩥ ᨿᩈᩮᩣ, ᨩᩔ ᩈᩮᩣ, ᩈᨻ᩠ᨻᨲ᩠ᨳ ᨿᩣᨲᩦᨲᩥ ᩅᩣ ᨿᩈᩮᩣ, ᩈᩮᩣ, ᨿᩈᨲᩥ ᨸᨿᩈᨲᩦᨲᩥ ᩅᩣ ᨿᩈᩮᩣ. ᩈᩥᩃᩮᩣᨠᨲᩥ ᨸᨲ᩠ᨳᩁᨲᩦᨲᩥ ᩈᩥᩃᩮᩣᨠᩮᩣ, ᩈᩥᩃᩮᩣᨠ ᩈᨦ᩠ᨥᩣᨲᩮ. ᨠᩥᨲ᩠ᨲ ᩈᨴ᩠ᨴᨶᩮ, ᨠᩥᨲ᩠ᨲᩦᨿᨲᩮ ᨠᨳᩦᨿᨲᩮᨲᩥ ᨠᩥᨲ᩠ᨲᩥ, ᩍ. ᩈᨾᨬ᩠ᨬᩣ ᨧ ᨡ᩠ᨿᩣᨲᩮ, ᩈᩴ ᩌᨸᩩᨻ᩠ᨻᩮᩣ ᨩᩣᨶᩣᨲᩥ ᨡ᩠ᨿᩣᨲᩮ. ᨲᨳᩣ ᩉᩥ ‘‘ᨬᩣᨲᩮᩣ, ᩋᨽᩥᨬ᩠ᨬᩣᨲᩮᩣ, ᩈᨦ᩠ᨡ᩠ᨿᩣᨲᩮᩣ, ᩅᩥᩔᩩᨲᩮᩣ, ᩈᨾᨬ᩠ᨬᩣᨲᩮᩣ’’ᨲᩥ ᩁᨲᨶᨠᩮᩣᩈᩮ ᩅᩩᨲ᩠ᨲᩴ. ᩏᨧ᩠ᨧᨵᨶᩥᨶᩣ ᩈᨴ᩠ᨴᨶᩴ ᨥᩮᩣᩈᨶᩣ ᨶᩣᨾ, ᨥᩩᩈ ᩈᨴ᩠ᨴᩮ, ᨥᩩᩈᨶᩴ ᩈᨴ᩠ᨴᨶᩴ ᨥᩮᩣᩈᨶᩣ.

᪑᪑᪘-᪑᪑᪙. ᨴ᩠ᩅᨿᩴ ᨸᨭᩥᩈᨴ᩠ᨴᩮ. ᨥᩩᩈᨶᩴ ᨥᩮᩣᩈᩮᩣ, ᨲᩴ ᨸᨭᩥᨣᨲᩮᩣ, ᨴᩩᨲᩥᨿᩣᩈᨾᩣᩈᩮᩣ. ᩑᩅᩴ ᩁᩅᩴ ᨸᨭᩥᨣᨲᩮᩣ ᨸᨭᩥᩁᩅᩮᩣ. ᩋᨳ ¶ ᩅᩣ ᨥᩮᩣᩈᩔ ᨸᨲᩥᩁᩪᨸᩮᩣ ᨸᨭᩥᨥᩮᩣᩈᩮᩣ. ᩁᩅᩔ ᨸᨲᩥᩁᩪᨸᩮᩣ ᨸᨭᩥᩁᩅᩮᩣ. ᨸᨭᩥᩈᩩᨲᩥ, ᨸᨭᩥᨴ᩠ᨵᨶᩦᨲᩥᨸᩥ ᨸᨭᩥᩈᨴ᩠ᨴᩔ ᨶᩣᨾᩣᨶᩥ, ᩅᨧᩦᨾᩩᨡᩴ ᩅᨧᨶᩮᩣᨸᨠ᩠ᨠᨾᩮᩣ ᩏᨸᨬ᩠ᨬᩣᩈᩮᩣ ᨶᩣᨾ, ᩏᨸᨶᩥᨸᩩᨻ᩠ᨻᩮᩣ ᩌᩈ ᩏᨸᩅᩮᩈᨶᩮ, ᩏᨸ ᨸᨮᨾᩴ ᨸᩩᩁᩥᨾᩅᨧᨶᩔ ᩈᨾᩦᨸᩴ ᩅᩣ ᨶ᩠ᨿᩣᩈᩮᩣ ᨮᨸᨶᩴ ᩏᨸᨬ᩠ᨬᩣᩈᩮᩣ, ᨶ᩠ᨿᩔ ᨬᩮᩣ.

ᩈᨲ᩠ᨲᨠᩴ ᨳᩩᨲᩥᨿᩴ. ᨠᨲ᩠ᨳ ᩈᩥᩃᩣᨥᩣᨿᩴ, ᨿᩩ, ᨠᨳᨶᩴ ᩅᩣᩋᩈᩁᩪᨸᨴ᩠ᩅᩥᨽᩣᩅᩅᩈᩮᨶ ᨠᨲ᩠ᨳᨶᩣ. ᩈᩥᩃᩣᨥ ᨠᨲ᩠ᨳᨶᩮ, ᩈᩥᩃᩣᨥᩣ. ᩈᩦᩃᩔ ᩅᩣ ᩈᨽᩣᨣᨣᩩᨱᩔ ᩌᩉᨶᨶᩴ ᩈᩦᩃᩣᨥᩣ, ᩈᩣ ᩑᩅ ᩁᩔᩴ ᨠᨲ᩠ᩅᩣ ᩈᩥᩃᩣᨥᩣ. ᩅᨱ᩠ᨱ ᨸᩈᩴᩈᩣᨿᩴ, ᩅᨱ᩠ᨱᩦᨿᨲᩮᨲᩥ ᩅᨱ᩠ᨱᨶᩣ. ᨶᩩ ᨳᩩᨲᩥᨿᩴ,ᨲᩥ, ᨶᩩᨲᩥ. ᨳᩩ ᩋᨽᩥᨲ᩠ᨳᩅᩮ,ᨲᩥ, ᨳᩩᨲᩥ. ᨳᩮᩣᨾ ᩈᩥᩃᩣᨥᩣᨿᩴ, ᨳᩮᩣᨾᨶᩴ. ᨸᨸᩩᨻ᩠ᨻᩮᩣ ᩈᩴᩈ ᨸᩈᩴᩈᨶᩮ, ᩋ.

ᩈᩥᨡᨱ᩠ᨯᩦᨶᩴ ᨾᨿᩪᩁᩣᨶᩴ ᨶᩣᨴᩮᩣ ᨶᨴᩁᩅᩮᩣ ᨠᩮᨠᩣ ᨶᩣᨾ, ᨠᩣ ᩈᨴ᩠ᨴᩮ, ᨠᩮᩍᨲᩥ ᨠᩣᨿᨲᩦᨲᩥ ᨠᩮᨠᩣ, ᨠᨾ᩠ᨾᨶᩥ ᩋ, ᩋᨳ ᩅᩣ ᨠᩣᨿᨲᩥ, ᨠᩣᨿᨶᩴ ᩅᩣ ᨠᩣ, ᨠᩮ ᨾᨿᩪᩁᩮ ᨸᩅᨲ᩠ᨲᩣ ᨠᩣ ᨠᩮᨠᩣ, ᩋᩃᩩᨲ᩠ᨲᩈᨾᩣᩈᩮᩣ. ᨣᨩᩣᨶᩴ ᨶᩣᨴᩮᩣ ᨠᩮᩣᨬ᩠ᨧᨶᩣᨴᩮᩣ ᨶᩣᨾ, ᨠᩮᩣᨬ᩠ᨧᩈᨠᩩᨱᨶᩣᨴᩈᨴᩥᩈᩮᩣ ᨶᩣᨴᩮᩣ ᨠᩮᩣᨬ᩠ᨧᨶᩣᨴᩮᩣ. ᩉᨿᩣᨶᩴ ᩋᩔᩣᨶᩴ ᨵᨶᩥ ᩈᨴ᩠ᨴᩮᩣ ᩉᩮᩈᩣ ᨶᩣᨾ, ᩉᩮᩈ ᩋᨻᩕᨲ᩠ᨲᩈᨴ᩠ᨴᩮ, ᩉᩮᩈᨶᩴ ᩉᩮᩈᩣ, ᩉᩮ ᩍᨲᩥ ᨸᩅᨲ᩠ᨲᨲᩦᨲᩥ ᩅᩣ ᩉᩮᩈᩣ.

᪑᪒᪐-᪑᪒᪑. ᨴ᩠ᩅᨿᩴ ᨸᩁᩥᨿᩣᨿᩮ. ᨸᩁᩥᨻ᩠ᨿᨲ᩠ᨲᨾᨲ᩠ᨳᩴ ᩋᨿᨶ᩠ᨲᩥ ᨣᨧ᩠ᨨᨶ᩠ᨲᩥ ᨻᩩᨩ᩠ᨫᨶ᩠ᨲᩥ ᩑᨲᩮᨶᩣᨲᩥ ᨸᩁᩥᨿᩣᨿᩮᩣ. ᩑᨠᩮᩣ ᩋᨲ᩠ᨳᩮᩣ ᨸᩩᨶᨸ᩠ᨸᩩᨶᩴ ᩅᩩᨧ᩠ᨧᨲᩥ ¶ ᨿᩮᨶᩣᨲᩥ ᩅᩮᩅᨧᨶᩴ. ᨴ᩠ᩅᨿᩴ ᩈᩣᨠᨧ᩠ᨨᩣᨿᩴ. ᩈᩉ, ᩈᨾ᩠ᨾᩣ ᩅᩣ ᩋᩅᩥᩁᩮᩣᨵᩮᨶ ᨠᨳᩣ ᩈᩣᨠᨧ᩠ᨨᩣ, ᩈᩴᨠᨳᩣ ᨧ. ᨲᩮᩣ, ᨳᩔ ᨧᩮᩣ, ᨲᩔ ᨨᩮᩣ.

ᩈᩣᨴ᩠ᨵᨸᨩ᩠ᨩᩮᨶ ᨣᩁᩉᩔ ᨶᩣᨾᩣᨶᩥ. ᨴᩮᩣᩈᨠ᩠ᨡᩣᨶᩮᨶ ᩅᨴᨶᩴ ᩏᨸᩅᩣᨴᩮᩣ. ᨠᩩᩈ ᩋᩅ᩠ᩉᩣᨶᩮ ᨽᩮᨴᨶᩮ ᨧ, ᨠ᩠ᩅᨧᩥ ‘‘ᩋᨸᨠ᩠ᨠᩮᩣᩈᩮᩣ’’ᨲᩥ ᨸᩣᨮᩮᩣ, ᨱᩮᩣ. ᩅᨱ᩠ᨱᩮᩣ ᨳᩩᨲᩥ, ᨲᩔ ᩋᩅᨴᨶᩴ ᩋᩅᨱ᩠ᨱᩅᩣᨴᩮᩣ. ᩉᩦᩊᨶᩮᨶ ᩅᨴᨶᩴ ᩋᨶᩩᩅᩣᨴᩮᩣ. ᨩᨶᩣᨶᩴ ᩅᩣᨴᩮᩣ ᨣᩁᩉᨱᩴ ᨩᨶᩅᩣᨴᩮᩣ. ᨣᩁᩉᨱᩮᨶ ᩅᩣᨴᩮᩣ ᩋᨸᩅᩣᨴᩮᩣ. ᨸᩁᩥᩅᨴᨶᩴ ᨸᩁᩥᩅᩣᨴᩮᩣ, ᩁᩔᩔ ᨴᩦᨥᨲᩣ. ᩑᨲᩮ ᩏᨸᩅᩣᨴᩣᨴᨿᩮᩣ ᨲᩩᩃ᩠ᨿᨲ᩠ᨳᩣ ᩈᨾᩣᨶᨲ᩠ᨳᩣ. ᩅᩥᩈᨾᩅᩩᨲ᩠ᨲᨸ᩠ᨸᨽᩮᨴᩮᩈᩩ ᩅᨲ᩠ᨲᨾᩥᨴᩴ. ᨡᩥᨸ ᨸᩮᩁᨱᩮ, ᨡᩥᨸᨶᩴ ᨻᩉᩥᨠᩁᨱᩴ ᨡᩮᨸᩮᩣ. ᨶᩥᨴᩥ ᨠᩩᨧ᩠ᨨᩣᨿᩴ, ᩋ, ᨶᩥᨶ᩠ᨴᩣ. ᨿᨳᩣ ᩏᨸᩅᩣᨴᩣᨴᨿᩮᩣ ᨣᩁᩉᨲ᩠ᨳᩣ, ᨠᩩᨧ᩠ᨨᩣᨴᨿᩮᩣᨸᩥ ᨲᨳᩣᨲᩥ ᨲᨳᩣᨲ᩠ᨳᩮᩣ. ᨠᩩᨧ᩠ᨨ ᩋᩅᨠ᩠ᨡᩮᨸᨶᩮ, ᨧᩩᩁᩣᨴᩥ, ᨠᩩᩈ ᩋᨠ᩠ᨠᩮᩣᩈᩮᨲᩥᨾᩔ ᩅᩣ ᨸᨻ᩠ᨻᨩ᩠ᨩᩣᨴᩥᨲ᩠ᨲᩣ ‘‘ᨠᩩᨧ᩠ᨨᩣ’’ᨲᩥ ᩁᩪᨸᩴ ᨶᩥᨸ᩠ᨹᨩ᩠ᨩᨲᩥ. ᨣᩩᨸ, ᨣᩮᩣᨸ ᨠᩩᨧ᩠ᨨᨶᩮᩈᩩ, ‘‘ᨲᩥᨩᨣᩩᨸᨠᩥᨲᨾᩣᨶᩮᩉᩥ ᨡᨨᩈᩣ ᩅᩣ’’ᨲᩥ ᨨᩮᩣ. ᨣᩁᩉ ᨠᩩᨧ᩠ᨨᨶᩮ. ᨲᨲ᩠ᨳ ᨠᩮᨧᩥ ‘‘ᩏᨸᩅᩣᨴᩣᨴᨿᩮᩣ ᩋᨻ᩠ᨽᨠ᩠ᨡᩣᨶᨲ᩠ᨳᩣ, ᨡᩮᨸᩣᨴᨿᩮᩣ ᨶᩥᨶ᩠ᨴᨲ᩠ᨳᩣ’’ᨲᩥ ᩅᨴᨶ᩠ᨲᩥ, ᨲᩴ ᩋᨾᩁᨠᩮᩣᩈᩮᨶ ᩅᩥᩁᩩᨩ᩠ᨫᨶᨲᩮᩣ ᩋᨻ᩠ᨽᨠ᩠ᨡᩣᨶᨲ᩠ᨳᩔ ᨧ ᩅᩩᨲ᩠ᨲᨲ᩠ᨲᩣ ᨶ ᨣᩉᩮᨲᨻ᩠ᨻᩴ. ᩑᨲᩮ ᩏᨸᩅᩣᨴᩣᨴᨿᩮᩣ ᩈᨲ᩠ᨲ ᩋᨻ᩠ᨽᨠ᩠ᨡᩣᨶᩮᨸᩥ ᩅᨲ᩠ᨲᨶ᩠ᨲᩥ.

ᩅᩥᩅᩣᨴᨠᩣᨾᩔ ᨴᩩᨻ᩠ᨻᩣᨴᩮᩣ ᩏᨸᩣᩁᨾ᩠ᨽᩮᩣ, ᩈᩮᩣ ᨧ ᩎᨴᩥᩈᩮ ᩈᨻ᩠ᨻᩃᩮᩣᨠᨧᩪᩊᩣᨾᨱᩥᨽᩪᨲᩮ ᩈᨠ᩠ᨿᨠᩩᩃᩮ ᩈᨾ᩠ᨽᩪᨲᩔ ᨽᨣᩅᨲᩮᩣ ᨠᩥᨾᩥᨴᩴ ᨠᨾ᩠ᨾᨾᩩᨧᩥᨲᨶ᩠ᨲᩥ ᨣᩩᨱᩣᩅᩥᨠᩁᨱᨸᩩᨻ᩠ᨻᨠᩮᩣᨸ᩠ᨿᨲ᩠ᨳᩥ, ᨻᨶ᩠ᨵᨠᩦᩈᩩᨲᩔ ᨲᩅᩮᨴᨾᩩᨧᩥᨲᨾᩮᩅᩣᨲᩥ ᨶᩥᨶ᩠ᨴᩣᨸᩩᨻ᩠ᨻᨠᩮᩣᨸᩥ ᩏᨸᩣᩁᨾ᩠ᨽᩮᩣ. ᨲᨲᩕ ᨿᩮᩣ ᨶᩥᨶ᩠ᨴᩣᨸᩩᨻ᩠ᨻᩮᩣ ᩈᨶᩥᨶ᩠ᨴᩮᩣ ᩏᨸᩣᩁᨾ᩠ᨽᩮᩣ, ᩈᩮᩣ ᨸᩁᩥᨽᩣᩈᨶᨾᩩᨧ᩠ᨧᨲᩮ. ᩏᨸᨣᨶ᩠ᨲ᩠ᩅᩣ ᨸᩁᩮᩈᩴ ᨧᩥᨲ᩠ᨲᩔ ᩌᩁᨾ᩠ᨽᨶᩴ ᩅᩥᨠᩮᩣᨸᨶᩴ ᩏᨸᩣᩁᨾ᩠ᨽᩮᩣ. ᨴᩮᩣᩈᨠ᩠ᨡᩣᨶᩮᨶ ᨽᩣᩈᨶᩴ ᨸᩁᩥᨽᩣᩈᨶᩴ.

᪑᪒᪒. ᩋᨶᩁᩥᨿᩣᨶᩴ ¶ ᩃᩣᨾᨠᩣᨶᩴ ᩅᩮᩣᩉᩣᩁᨲᩮᩣ, ᩋᩁᩥᨿᩣᨶᩴ ᩏᨲ᩠ᨲᨾᨩᨶᩣᨶᩴ ᩅᩣ ᩋᩅᩮᩣᩉᩣᩁᨲᩮᩣ ᩋᨶᩁᩥᨿᩅᩮᩣᩉᩣᩁᩮᩣᨲᩥ ᩈᨦ᩠ᨡᩣᨲᩣᨶᩴ ᩋᨴᩥᨭ᩠ᨮᩮ ᨴᩥᨭ᩠ᨮᩅᩣᨴᩣᨴᩦᨶᩴ ᩋᨭ᩠ᨮᨶ᩠ᨶᩴ ᩅᩮᩣᩉᩣᩁᩣᨶᩴ ᩅᩈᩮᨶ ᨿᩣ ᩅᩣᨧᩣ ᩃᩣᨾᨠᨩᨶᩮᩉᩥ ᨸᩅᨲ᩠ᨲᩥᨲᩣ ᩅᩩᨲ᩠ᨲᩣ, ᩅᩦᨲᩥᨠ᩠ᨠᨾᨴᩦᨸᨶᩦ ᩋᨩ᩠ᨫᩣᨧᩣᩁᩅᩦᨲᩥᨠ᩠ᨠᨾᩈᩣᨵᨶᩦ ᩈᩣ ᩅᩣᨧᩣ ᩋᩁᩥᨿᨩᨶᩮᩉᩥ ᩅᨲ᩠ᨲᨻ᩠ᨻᨾᩁᩥᨿᩣᨴᩣᨲᩥᨠ᩠ᨠᨾᨲ᩠ᨲᩣ ᩋᨽᩥᩅᩣᨠ᩠ᨿᩴ ᨶᩣᨾ ᩈᩥᨿᩣ.

᪑᪒᪓. ᨾᩩᩉᩩᩴᨽᩣᩈᩣ ᨻᩉᩩᩈᩮᩣ ᩋᨽᩥᨵᩣᨶᩴ ᩋᨶᩩᩃᩣᨸᩮᩣ ᨶᩣᨾ, ᩋᨶᩩ ᨸᩩᨶᨸ᩠ᨸᩩᨶᩴ ᩃᩣᨸᩮᩣ ᩋᨶᩩᩃᩣᨸᩮᩣ. ᩋᨶᨲ᩠ᨳᩥᨠᩣ ᨣᩥᩁᩣ ᨶᩥᨸ᩠ᨸᨿᩮᩣᨩᨶᩴ ᩏᨾ᩠ᨾᨲ᩠ᨲᩣᨴᩥᩅᨧᨶᩴ ᨸᩃᩣᨸᩮᩣ, ᨸᨿᩮᩣᨩᨶᩁᩉᩥᨲᩮᩣ ᩃᩣᨸᩮᩣ ᨸᩃᩣᨸᩮᩣ, ᨸᩈᨴ᩠ᨴᩮᩣ ᩅᩥᨿᩮᩣᨣᨲ᩠ᨳᨩᩮᩣᨲᨠᩮᩣ.

ᨣᨾᨶᩣᨣᨾᨶᩣᨴᩥᩈᨾᨿᩮ ᩌᨴᩥᨾ᩠ᩉᩥ ᨽᩣᩈᨶᩴ ᨸᩥᨿᩅᨧᨶᩴ ᩌᩃᩣᨸᩮᩣ, ᩌᨴᩥᨾ᩠ᩉᩥ ᩃᩣᨸᩮᩣ ᩌᩃᩣᨸᩮᩣ, ᩌᨸᩩᨧ᩠ᨨᩣᩈᨴ᩠ᨴᩮᩣᨸ᩠ᨿᨲᩕ. ᨴᩮᩣᩈᩮᨶ ᨸᨲᩥᨭ᩠ᨮᩥᨲᩮᩣ ᨸᩁᩥᨴ᩠ᨴᩅᩮᩣ ᨸᩁᩥᨴᩮᩅᨶᩴ ᩋᨶᩩᩈᩮᩣᨧᨶᩴ ᩋᨲᩥᨠ᩠ᨠᨾᩃᩣᨸᩮᩣ ᩅᩥᩃᩣᨸᩮᩣ ᨶᩣᨾ, ᩅᩥᩅᩥᨵᩮᨶ, ᩅᩥᩅᩥᨵᩴ ᩅᩣ ᩃᩣᨸᩮᩣ ᩅᩥᩃᩣᨸᩮᩣ. ᨸᩁᩥᨴᩮᩅᨶᩴ ᨸᩁᩥᨴᩮᩅᩮᩣ, ᩈᩮᩣ ᩑᩅ ᨸᩁᩥᨴ᩠ᨴᩅᩮᩣ, ᨴᩮᩅ ᨸᩁᩥᨴᩮᩅᨶᩮ.

᪑᪒᪔. ᩅᩥᩁᩩᨴ᩠ᨵᩴ ¶ ᩅᨧᨶᩴ ᩅᩥᩁᩮᩣᨵᩮᩣᨲ᩠ᨲᩥ. ᩅᩥᩁᩩᨴ᩠ᨵᩴ ᨸᩃᩣᨸᩮᩣ ᩅᩥᨸ᩠ᨸᩃᩣᨸᩮᩣ. ᩈᨶ᩠ᨴᩥᩔᨲᩮᨲᩥ ᩈᨶ᩠ᨴᩮᩈᩮᩣ, ᩈᨶ᩠ᨴᩥᩔᨾᩣᨶᩮᩣ ᩋᨲ᩠ᨳᩮᩣ, ᨲᩔᩮᩣᨲ᩠ᨲᩥ. ᨿᩣᨿ ᩈᨶ᩠ᨴᩥᨭ᩠ᨮᩮᩣ ᩋᨲ᩠ᨳᩮᩣ ᩋᨽᩥᨵᩦᨿᨲᩮ, ᩈᩣ ᩈᨶ᩠ᨴᩮᩈᩮᩣᨲ᩠ᨲᩥ ᩅᩣᨧᩥᨠᨾᩩᨧ᩠ᨧᨲᩮ. ᩅᨧ ᩈᨶ᩠ᨴᩮᩈᩮ, ᩈᨠᨲ᩠ᨳᩮ ᨱᩥᨠᩮᩣ, ᩈᨶ᩠ᨴᩥᨭ᩠ᨮᨲ᩠ᨳᩣ ᩅᩣᨧᩣ ᩑᩅ ᩅᩣᨧᩥᨠᨾᩥᨧ᩠ᨧᨲ᩠ᨳᩮᩣ.

ᨾᩥᨳᩩ ᩋᨬ᩠ᨬᨾᨬ᩠ᨬᩴ ᩅᩥᩁᩮᩣᨵᩁᩉᩥᨲᩴ ᩅᨧᨶᩴ ‘‘ᩈᨾ᩠ᨽᩣᩈᨶᩴ, ᩈᩃ᩠ᩃᩣᨸᩮᩣ’’ᨲᩥ ᨧ ᩅᩩᨧ᩠ᨧᨲᩥ. ᨿᨳᩣ ᩑᨠᩮᩣ ᨻᩕᩪᨲᩮ ‘‘ᩋᨩ᩠ᨩ ᩈᩮᩣᨽᨶᩴ ᨶᨠ᩠ᨡᨲ᩠ᨲ’’ᨶ᩠ᨲᩥ, ᩍᨲᩁᩮᩣᨸ᩠ᨿᩣᩉ ‘‘ᨲᨳᩮᩅᩣ’’ᨲᩥ.

᪑᪒᪕. ᨶᩥᨭ᩠ᨮᩩᩁᩴ ᩅᩣᨠ᩠ᨿᩴ ᨠᨠ᩠ᨠᩈᩅᨧᨶᩴ ᨹᩁᩩᩈᩴ ᨶᩣᨾ, ᨸᩁᩮ ᨩᨶᩮ ᩏᩔᩣᨸᩮᨲᩥ ᨴᩣᩉᩮᨲᩦᨲᩥ ᨸᩁᩩᩈᩴ, ᨲᨴᩮᩅ ᨸᩔ ᨹᨠᩣᩁᩴ ᨠᨲ᩠ᩅᩣ ᨹᩁᩩᩈᩴ. ᩋᩈᩅᨶᩦᨿᨲ᩠ᨲᩣ ᨶ ᩍᨧ᩠ᨨᩥᨲᨻ᩠ᨻᨶ᩠ᨲᩥ ᨶᩥᨭ᩠ᨮᩩᩁᩴ, ᩏᩁᩮᩣ, ᨿᨳᩣ ‘‘ᨶᩣᨣᩮᩣ’’ᨲᩥ. ᨴ᩠ᩅᨿᩴ ᨠᨱ᩠ᨱᩈᩩᨡᩅᨧᨶᩮ. ᨾᨶᩴ ᩌ ᨽᩩᩈᩴ ᨬᩣᨸᩮᨲᩥ ᨲᩮᩣᩈᩮᨲᩦᨲᩥ ᨾᨶᩩᨬ᩠ᨬᩴ, ᨬᩣ ᨸᩁᩥᨾᩣᨱᨲᩮᩣᩈᨶᨶᩥᩈᩣᨶᩮᩈᩩ, ᩋᩔᩩᨠᩣᩁᩮᩣ. ᩉᨴᨿᩴ ᨾᨶᩴ ᨣᨧ᩠ᨨᨲᩥ ᨸᩅᩥᩈᨲᩦᨲᩥ ᩉᨴᨿᨦ᩠ᨣᨾᩴ.

ᩈᩴᨠᩩᩃᩣᨴᩥᨴ᩠ᩅᨿᩴ ᨸᩩᨻ᩠ᨻᩣᨸᩁᩅᩥᩁᩮᩣᨵᩥᨶᩥ ᨸᩩᨻ᩠ᨻᩣᨸᩁᩅᩥᩁᩩᨴ᩠ᨵᩮ ᩅᩣᨠ᩠ᨿᩮ, ᨿᨳᩣ –

ᨿᩣᩅᨩᩦᩅᨾᩉᩴ ᨾᩮᩣᨶᩦ, ᨻᩕᩉ᩠ᨾᨧᩣᩁᩦ ᨧ ᨾᩮ ᨸᩥᨲᩣ;

ᨾᩣᨲᩣ ᨧ ᨾᨾ ᩅᨬ᩠ᨫᩣᩈᩥ, ᩋᨸᩩᨲ᩠ᨲᩮᩣ ᨧ ᨸᩥᨲᩣᨾᩉᩮᩣ.

ᩈᩴᨠᩩᩃᨶ᩠ᨲᩥ ᨩᩊᩦᨽᩅᨶ᩠ᨲ᩠ᨿᨶᩮᨶᩣᨲᩥ ᩈᩴᨠᩩᩃᩴ. ᨠᩥᩃᩥᩔᨶ᩠ᨲᩮ ᩑᨲ᩠ᨳᩣᨲᩥ ᨠᩥᩃᩥᨭ᩠ᨮᩴ.

᪑᪒᪖. ᩈᨾᩩᨴᩣᨿᨲ᩠ᨳᩁᩉᩥᨲᩴ ¶ ᨴᩈᨴᩣᩊᩥᨾᩣᨴᩥᩅᩣᨠ᩠ᨿᩴ [ᨴᩈ ᨴᩣᨮᩥᨾᩣᨶᩥ ᨮᩊᨸᩪᨸᩣ ᨠᩩᨱ᩠ᨯ’ ᨾᨩᩣᨩᩥᨶᩴ ᨸᩃᩣᩃᨸᩥᨱ᩠ᨯᩣ (ᨶ᩠ᨿᩣᨿᨽᩣᩔ ᪕.᪒.᪑᪐ ᨾᩮᩣᨣ᩠ᨣᩃ᩠ᩃᩣᨶᨸᨬ᩠ᨧᩥᨠᩣᨭᩦᨠᩣ ᪑.᪑)] ᩋᩈᨾ᩠ᨻᨴ᩠ᨵᨲ᩠ᨲᩣ ᩋᨻᨴ᩠ᨵᨾᩥᨲᩥ ᨠᩥᨲ᩠ᨲᩥᨲᩴ ᨠᨳᩥᨲᩴ, ᨶ ᨻᨩ᩠ᨫᨲᩮ ᩉᨴᨿᨾᨲᩕᩣᨲᩥ ᩋᨻᨴ᩠ᨵᩴ, ᨲᩮᩣ.

ᨶᨲ᩠ᨳᩥ ᨲᨳᩴ ᩈᨧ᩠ᨧᨾᨲᩕᩣᨲᩥ ᩅᩥᨲᨳᩴ. ᨹᩁᩩᩈᩣᨴᨿᩮᩣ ᩅᩥᨲᨳᩈᨴ᩠ᨴᩴ ᨿᩣᩅ ᨲᩥᩃᩥᨦ᩠ᨣᩥᨠᩣ.

᪑᪒᪗. ᨸᨩ᩠ᨩᨴ᩠ᨵᩴ ᩈᨧ᩠ᨧᩅᨧᨶᩮ. ᩈᨾ᩠ᨾᩣᩈᨴ᩠ᨴᩮᩣᨿᩴ ᩋᨻ᩠ᨿᨿᩴ, ᩈᨻ᩠ᨻᩃᩥᨦ᩠ᨣᩅᩥᨽᨲ᩠ᨲᩥᩅᨧᨶᩮᩈᩩ ᨧ ᩈᨾᩣᨶᩮᩣ. ᨶ ᩅᩥᨲᨳᩴ ᩋᩅᩥᨲᨳᩴ. ᩈᨶ᩠ᨲᩮᩈᩩ ᩈᩣᨵᩪᩈᩩ ᨽᩅᩴ ᩈᨧ᩠ᨧᩴ. ᩈᨲ ᩈᩣᨲᨧ᩠ᨨᩮ ᩅᩣ, ᩅᨩᩣᨴᩥᨶᩣ ᨿᩮᩣ, ᩈᨧ᩠ᨧᩴ. ᨲᨳᩈᨴ᩠ᨴᩮᩣ ᨽᩪᨲᨸᩁᩥᨿᩣᨿᩮᩣ, ‘‘ᨲᨳᩮᨶ ᨾᨣ᩠ᨣᩮᨶ ᨿᨳᩣᨲ᩠ᨳᨽᩣᨩᩥᨶᩣ’’ᨲᩥ [ᨲᨳᩣᨣᨲᩣ ᨩᩥᨶᩣᨲᩥ (ᨠ.)] ᨸᨿᩮᩣᨣᩮᩣ. ᨲᨳᩮ ᩈᩣᨵᩩ ᨲᨧ᩠ᨨᩴ, ᩈᩣᨵ᩠ᩅᨲ᩠ᨳᩮ ᨿᩮᩣ. ᨿᨳᩣᨲᨳᩈᨴ᩠ᨴᩣᨸᩥ ᨧ ᩈᨧ᩠ᨧᨲ᩠ᨳᩣ ᩋᩃᩥᨦ᩠ᨣᩣ. ᨲᨻ᩠ᨻᨶ᩠ᨲᩣ ᩈᨧ᩠ᨧᩅᨧᨶᩅᨶ᩠ᨲᩅᩣᨧᨠᩣ ᩈᨾ᩠ᨾᩣ ᩈᨧ᩠ᨧᩴ ᨿᨳᩣᨲᨳᩴᩈᨴ᩠ᨴᩅᨩ᩠ᨩᩥᨲᩣ ᩈᩮᩈᩣ ᩋᩅᩥᨲᨳᩣᨴᨿᩮᩣ ᨲᩦᩈᩩ ᩃᩥᨦ᩠ᨣᩮᩈᩩ ᩅᨲ᩠ᨲᨶ᩠ᨲᩥ. ᩈᨧ᩠ᨧᩴᩈᨴ᩠ᨴᩮᩣ ᨲᩩ ᩋᩃᩥᨦ᩠ᨣᩮᩣ. ᩋᨾᩁᨠᩮᩣᩈᩮ ᨸᨶ ᩈᨾ᩠ᨾᩣ ᩈᨧ᩠ᨧᩈᨴ᩠ᨴᩣᨶᨾ᩠ᨸᩥ ᨲᨻ᩠ᨻᨲᩥ ᨲᩥᩃᩥᨦ᩠ᨣᨲ᩠ᨲᩴ ᩅᩩᨲ᩠ᨲᩴ, ᨿᨳᩣ – ᩈᨧ᩠ᨧᩴ ᨲᨧ᩠ᨨᩴ ᩁᩥᨲᩴ ᩈᨾ᩠ᨾᩣ, ᩋᨾᩪᨶᩥ ᨲᩦᩈᩩ ᨲᨻ᩠ᨻᨲᩥ [ᩋᨾᩁ ᪖.᪒᪒]. ᨿᨳᩣ – ᩈᨧ᩠ᨧᩮᩣ ᨻᩕᩣᩉ᩠ᨾᨱᩮᩣ, ᩈᨧ᩠ᨧᩣ ᨶᩣᩁᩦ, ᩈᨧ᩠ᨧᩴ ᩅᩥᨸ᩠ᨸᨠᩩᩃᩴ. ᩍᨵ ᨸᨶ ᩈᨻ᩠ᨻᩃᩥᨦ᩠ᨣᩅᨧᨶᩅᩥᨽᨲ᩠ᨲᩦᩈᩩ ᩁᩪᨸᨽᩮᨴᩣᨽᩣᩅᩣ ᩈᨾ᩠ᨾᩣᩈᨴ᩠ᨴᩔ ᩋᨻ᩠ᨿᨿᨲ᩠ᨲᩴ, ᨲᩥᩃᩥᨦ᩠ᨣᩮᩈ᩠ᩅᨸᩥ ᩁᩪᨸᨽᩮᨴᩣᨽᩣᩅᩣ ᩈᨧ᩠ᨧᩴᩈᨴ᩠ᨴᩔ ᩋᩃᩥᨦ᩠ᨣᨲ᩠ᨲᨬ᩠ᨧ ᩅᩩᨲ᩠ᨲᩴ. ᨿᨳᩣ – ᩈᨾ᩠ᨾᩣ ᩅᩣᨧᩣ, ᩈᨾ᩠ᨾᩣ ᩅᩮᩣᩉᩣᩁᩮᩣ, ᩈᨾ᩠ᨾᩣ ᩅᨧᨶᩴ. ᩈᨧ᩠ᨧᩴ ᨻᩕᩣᩉ᩠ᨾᨱᩮᩣ, ᩈᨧ᩠ᨧᩴ ᨶᩣᩁᩦ, ᩈᨧ᩠ᨧᩴ ᩅᩥᨸ᩠ᨸᨠᩩᩃᩴ. ᨾᩥᨧ᩠ᨨᩣᨾᩩᩈᩣᩈᨴ᩠ᨴᩣ ᨸᨶ ᩈᨻ᩠ᨻᨲᩕᩣᨸᩥ ᩋᨻ᩠ᨿᨿᨾᩮᩅ ᨽᩅᨶ᩠ᨲᩥ. ᨿᨳᩣ ¶ – ᨾᩥᨧ᩠ᨨᩣ ᩅᩣᨧᩣ, ᨾᩥᨧ᩠ᨨᩣ ᩅᩮᩣᩉᩣᩁᩮᩣ, ᨾᩥᨧ᩠ᨨᩣ ᩅᨧᨶᩴ. ᨾᩩᩈᩣ ᩅᩣᨧᩣ, ᨾᩩᩈᩣ ᩅᩮᩣᩉᩣᩁᩮᩣ, ᨾᩩᩈᩣ ᩅᨧᨶᩴ.

᪑᪒᪘. ᩈᩮᩣᩊᩈ ᩈᨴ᩠ᨴᨾᨲ᩠ᨲᨸᩁᩥᨿᩣᨿᩮ ᨴᩔᩮᨲᩩᩴ ᩏᨸᨩᩣᨲᩥᩴ ‘‘ᩁᩅᩮᩣ’’ᩍᨧ᩠ᨧᩣᨴᩥᨾᩣᩉ. ᩁᩩᨿᨲᩮ ᩈᨴ᩠ᨴᩣᨿᨲᩮᨲᩥ ᩁᩅᩮᩣ, ᩁᩩ ᩈᨴ᩠ᨴᩮ. ᨶᨴᨶᩴ ᨶᩣᨴᩮᩣ, ᨶᩥᩁᨲ᩠ᨳᩮᩣ ᨶᩣᨴᩮᩣ ᨶᩥᨶᩣᨴᩮᩣ, ᨶᨴ ᩋᨻ᩠ᨿᨲ᩠ᨲᩈᨴ᩠ᨴᩮ. ᩑᩅᩴ ᨶᩥᨶᨴᩮᩣ, ᩁᩔᨲ᩠ᨲᨾᩮᩅ ᩅᩥᩈᩮᩈᩮᩣ. ᩈᨸ᩠ᨸᨲᩥ ᩏᨧ᩠ᨧᩣᩁᩦᨿᨲᩦᨲᩥ ᩈᨴ᩠ᨴᩮᩣ. ᨥᩩᩈ ᩈᨴ᩠ᨴᩮ, ᨸᩣᨲᩩᨽᩣᩅᩮᩣ ᨥᩮᩣᩈᩮᩣ ᨶᩥᨣ᩠ᨥᩮᩣᩈᩮᩣ. ᨶᨴᨶᩴ ᨶᩣᨴᩮᩣ. ᨵᨶ ᩈᨴ᩠ᨴᩮ, ᨵᨶᩦᨿᨲᩦᨲᩥ ᨵᨶᩥ. ᨶᩥᨣ᩠ᨥᩮᩣᩈᩮᩣ ᨧ ᨶᩣᨴᩮᩣ ᨧ ᨵᨶᩥ ᨧ ᨶᩥᨣ᩠ᨥᩮᩣᩈᨶᩣᨴᨵᨶᨿᩮᩣ. ᩁᩅᩮᩣ ᩑᩅ ᩁᩣᩅᩮᩣ. ᩌᩁᩣᩅᩮᩣᨲᩥ ᩏᨸᩈᨣ᩠ᨣᩮᨶ ᨸᨴᩴ ᩅᨯ᩠ᨰᩥᨲᩴ. ᨲᨳᩣ ᩈᩴᩁᩣᩅᩅᩥᩁᩣᩅᩌᩁᩅᩣ. ᨥᩩᩈᨶᩴ ᨥᩮᩣᩈᩮᩣ. ᩌᩁᩣᩅᩮᩣ ᨧ ᩈᩴᩁᩣᩅᩮᩣ ᨧ ᩅᩥᩁᩣᩅᩮᩣ ᨧ ᨥᩮᩣᩈᩮᩣ ᨧ ᩌᩁᩅᩮᩣ ᨧᩣᨲᩥ ᨴ᩠ᩅᨶ᩠ᨴᩮᩣ. ᩈᩩ ᩈᩅᨶᩮ, ᩈᩩᨿ᩠ᨿᨲᩮᨲᩥ ᩈᩩᨲᩥ. ᩈᩁᨲᩥ ᩈᩩᨿ᩠ᨿᨾᩣᨶᨲᩴ ᨣᨧ᩠ᨨᨲᩦᨲᩥ ᩈᩁᩮᩣ. ᨶᩥᩔᨶᨲᩥ ᩑᨲᩮᨶᩣᨲᩥ ᨶᩥᩔᨶᩮᩣ, ᩈᨶ ᩈᨾ᩠ᨽᨲ᩠ᨲᩥᨿᩴ ᨶᩥᨸᩩᨻ᩠ᨻᩮᩣ. ᩈᩁᩮᩣ ᨧ ᨶᩥᩔᨶᩮᩣ ᨧᩣᨲᩥ ᨴ᩠ᩅᨶ᩠ᨴᩮᩣ.

᪑᪒᪙. ᩅᩥᩈᨩ᩠ᨩᩦᨿᨲᩮ ᨶ ᩃᨣ᩠ᨣᩦᨿᨲᩮ ᩈᩮᨾ᩠ᩉᩣᨴᩦᩉᩦᨲᩥ ᩅᩥᩈᨭ᩠ᨮᩮᩣ. ᨾᨶᩥᨲᨻ᩠ᨻᨶ᩠ᨲᩥ ᨾᨬ᩠ᨩᩩ, ᨩᩩ, ᨾᨶ ᨬᩣᨱᩮ, ᩈᩩᨱᨶ᩠ᨲᩣᨶᩴ ᩅᩣ ᨾᨶᩴ ᩁᨬ᩠ᨩᩮᨲᩦᨲᩥ ᨾᨬ᩠ᨩᩩ, ᩏ, ᨶ ᩁᩃᩮᩣᨸᩮᩣ. ᩈᩩᨡᩮᨶᩮᩅ ᩅᩥᨩᩣᨶᩥᨲᨻ᩠ᨻᨲ᩠ᨲᩣ ᩅᩥᨬ᩠ᨬᩮᨿ᩠ᨿᩮᩣ. ᩉᩥᨲᩈᩩᨡᨶᩥᨸ᩠ᨹᩣᨴᨶᨲᩮᩣ ᩈᩮᩣᨲᨻ᩠ᨻᩮᩣᨲᩥ ᩈᩅᨶᩦᨿᩮᩣ. ᨻᩉᩥᨴ᩠ᨵᩣᨸᩁᩥᩈᩣ ᩋᨦ᩠ᨣᩩᩃᩥᨾᨲ᩠ᨲᨾ᩠ᨸᩥ ᨶ ᩅᩥᩈᩁᨲᩥ ᨶ ᨣᨧ᩠ᨨᨲᩦᨲᩥ ᩋᩅᩥᩈᩣᩁᩦ ¶ , ᨲᩔᩦᩃᨲ᩠ᨳᩮ ᨱᩦ, ᩅᩥᩅᩥᨵᩮᨶ ᩅᩣ ᨶ ᩈᩁᨲᩦᨲᩥ ᩋᩅᩥᩈᩣᩁᩦ, ᨨᩥᨶ᩠ᨶᩔᩁᩣᨶᩴ ᩅᩥᨿ ᨴ᩠ᩅᩮᨵᩣ ᨶ ᩉᩮᩣᨲᩦᨲ᩠ᨿᨲ᩠ᨳᩮᩣ. ᩅᩥᨶ᩠ᨴ᩠ᨿᨲᩮ ᩃᨻ᩠ᨽᨲᩮᨲᩥ ᨻᩥᨶ᩠ᨴᩩ, ᩅᩔ ᨻᩮᩣ, ᨶᩥᨣ᩠ᨣᩉᩦᨲᩣᨣᨾᩮᩣ, ᩏ ᨧ, ᩅᨭ᩠ᨭᨲ᩠ᨲᩣ ᩅᩣ ᨻᩥᨶ᩠ᨴᩩ, ᩍᨾᩈ᩠ᨾᩥᩴ ᨸᨠ᩠ᨡᩮ ᨸᨻ᩠ᨻᨩ᩠ᨩᩣᨴᩥᨶᩣ ᩁᩪᨸᩈᩥᨴ᩠ᨵᩥ. ᨸᨬ᩠ᨧᨶ᩠ᨶᩴ ᨮᩣᨶᨣᨲᩦᨶᩴ ᨴᩪᩁᨭ᩠ᨮᩣᨶᨲᩮᩣ ᨩᩣᨲᨲ᩠ᨲᩣ ᨣᨾ᩠ᨽᩦᩁᩮᩣ. ᨸᩩᨶᨸ᩠ᨸᩩᨶᩴ ᨶᩣᨴᩮᩣ ᨶᩥᨶ᩠ᨶᩣᨴᩮᩣ, ᨠᩕᩥᨿᩣᨽᩥᨠ᩠ᨡᨬ᩠ᨬᨲ᩠ᨲᩣ ᨴ᩠ᩅᩥᨲ᩠ᨲᩴ, ᩋᩔ ᩍ, ᨶᩥᨣ᩠ᨣᩉᩦᨲᩣᨣᨾᩮᩣ, ᩈᩮᩣ ᩑᨲ᩠ᨳ ᩋᨲ᩠ᨳᩦᨲᩥ ᨶᩥᨶ᩠ᨶᩣᨴᩦ. ᩍᨧ᩠ᨧᩮᩅᩴ ᨽᨣᩅᨲᩮᩣ ᩋᨭ᩠ᨮᨦ᩠ᨣᩥᨠᩮᩣ ᩈᩁᩮᩣ ᩉᩮᩣᨲᩥ.

᪑᪓᪐. ᨡᨣ᩠ᨣᩣᨴᩦᨶᩴ ᨲᩥᩁᨧ᩠ᨨᩣᨶᨣᨲᩣᨶᩴ ᩁᩩᨲᩴ ᩅᩔᩥᨲᨶ᩠ᨲ᩠ᨿᩩᨧ᩠ᨧᨲᩮ. ᩁᩩ ᩈᨴ᩠ᨴᩮ, ᩁᩩᨲᩴ. ᩅᩔ ᩈᨴ᩠ᨴᩮ, ᩅᩔᨶᩴ ᩁᩅᨶᩴ ᩅᩔᩥᨲᩴ.

ᨠᩮᩣᩃᩣᩉᩃᩣᨴᩥᨴ᩠ᩅᨿᩴ ᨻᩉᩪᩉᩥ ᩈᨾ᩠ᨽᩪᨿ ᨠᨲᩮ ᩋᨻ᩠ᨿᨲ᩠ᨲᩈᨴ᩠ᨴᩮ. ᨠᩩᩃ ᩈᨦ᩠ᨥᩣᨲᩮ [ᩈᨦ᩠ᨡ᩠ᨿᩣᨶᩮ (ᨠ.)], ᨠᩮᩣᩃᨶᩴ ᨠᩮᩣᩃᩮᩣ, ᩑᨠᩦᨽᩣᩅᩮᩣ, ᨲᩴ ᩌᩉᩃᨲᩥ ᩅᩥᨶ᩠ᨴᨲᩦᨲᩥ ᨠᩮᩣᩃᩣᩉᩃᩮᩣ. ᨠᩁᩮᩣᨲᩥ ᩉᩥᩴᩈᨲᩥ ᨾᨵᩩᩁᨶ᩠ᨲᩥ ᨠᩃᩮᩣ, ᨲᩴ ᩉᩃᨲᩦᨲᩥ ᨠᩃᩉᩃᩮᩣ. ᩉᩃ ᩅᩥᩃᩮᨡᨶᩮ.

ᨲᩥᨠᩴ ᨣᩣᨿᨶᩮ. ᨣᩮ ᩈᨴ᩠ᨴᩮ, ᨣᩮᨲᨻ᩠ᨻᩴ ᨣᩦᨲᩴ ᨣᩣᨶᩴ ᨣᩦᨲᩥᨠᩣ ᨧ. ᩈᨻ᩠ᨻᨲᩕ ᨽᩣᩅᩈᩣᨵᨶᩴ.

᪑᪓᪑. ᨲᨶ᩠ᨲᩥᨠᨱ᩠ᨮᩮᩣᨭ᩠ᨮᩥᨲᩣ [ᩋᨾᩁ ᪗.᪑] ᩏᩈᨽᩣᨴᨿᩮᩣ ᩈᨲ᩠ᨲ ᩈᩁᩣ. ᨨᨩ᩠ᨩᩣᨴᨿᩮᩣ ᨲᨿᩮᩣ ᨣᩣᨾᩣ ᩈᨾᩪᩉᩣᨲ᩠ᨿᨲ᩠ᨳᩮᩣ. ᩅᩩᨲ᩠ᨲᨬ᩠ᨧ ‘‘ᨣᩣᨾᩮᩣ ᨶᩣᨾ ᩈᩁᩈᨾᩪᩉᩔ ᩈᨶ᩠ᨵᩣᨶ’’ᨶ᩠ᨲᩥ. ᨾᨶᩩᩔᩃᩮᩣᨠᩅᩣᨴᨶᩅᩥᨵᩥᨶᩣ ᩑᨠᩮᨠᩔ ¶ ᩈᩁᩔ ᩅᩈᩮᨶ ᨲᨿᩮᩣ ᨲᨿᩮᩣ ᨾᩩᨧ᩠ᨨᨶᩣ ᨠᨲ᩠ᩅᩣ ᩑᨠᩅᩦᩈᨲᩥ ᨾᩩᨧ᩠ᨨᨶᩣ, ᨴᩮᩅᩃᩮᩣᨠᩅᩣᨴᨶᩅᩥᨵᩥᨶᩣ ᨸᨶ ᩈᨾᨸᨬ᩠ᨬᩣᩈ ᨾᩩᨧ᩠ᨨᨶᩣ ᩅᨴᨶ᩠ᨲᩥ. ᨲᨲ᩠ᨳ ᩉᩥ ᩑᨠᩮᨠᩔ ᩈᩁᩔ ᩅᩈᩮᨶ ᩈᨲ᩠ᨲ ᩈᨲ᩠ᨲ ᨾᩩᨧ᩠ᨨᨶᩣ, ᩋᨶ᩠ᨲᩈᩁᩔ ᨧ ᩑᨠᩣᨲᩥ ᩈᨾᨸᨬ᩠ᨬᩣᩈ ᨾᩩᨧ᩠ᨨᨶᩣ ᩌᨣᨲᩣ, ᨲᩮᨶᩮᩅ ᩈᨠ᩠ᨠᨸᨬ᩠ᩉᩈᩩᨲ᩠ᨲᩈᩴᩅᨱ᩠ᨱᨶᩣᨿᩴ ‘‘ᩈᨾᨸᨬ᩠ᨬᩣᩈ ᨾᩩᨧ᩠ᨨᨶᩣ ᨾᩩᨧ᩠ᨨᩥᨲ᩠ᩅᩣ’’ᨲᩥ [ᨴᩦ. ᨶᩥ. ᩋᨭ᩠ᨮ. ᪒.᪓᪔᪕] ᨸᨬ᩠ᨧᩈᩥᨡᩔ ᩅᩦᨱᩣᩅᩣᨴᨶᩴ ᨴᩔᩮᨶ᩠ᨲᩮᨶ ᩅᩩᨲ᩠ᨲᩴ. ᨾᩩᨧ᩠ᨨ ᨾᩮᩣᩉᩈᨾᩩᩔᨿᩮᩈᩩ, ᨿᩩ, ᨾᩩᨧ᩠ᨨᨶᩣ. ᨿᨳᩣ ᨠᨾᩮᨶ ᩅᩦᨱᩣ ᩅᩣᨴᩥᨲᩩᩴ ᩈᨠ᩠ᨠᩣ, ᩑᩅᩴ ᩈᨩ᩠ᨩᨶᩣᩉᩥ ᨾᩩᨧ᩠ᨨᨶᨭ᩠ᨮᩣᨶᩣᨶᩥ ᩑᨠᩪᨶᨸᨬ᩠ᨬᩣᩈᩣᨲ᩠ᨿᨲ᩠ᨳᩮᩣ. ᩑᨠᩮᨠᩔ ᩈᩁᩔ ᩈᨲ᩠ᨲ ᩈᨲ᩠ᨲ ᨮᩣᨶᩣᨶᩥ. ᨿᨲᩮᩣ ᩈᩁᩔ ᨾᨶ᩠ᨴᨲᩣᩁᩅᩅᨲ᩠ᨳᩣᨶᩴ ᩉᩮᩣᨲᩥ, ᨲᩮᨶ ᩑᨠᩪᨶᨸᨬ᩠ᨬᩣᩈ ᨮᩣᨶᩣᨶᩥ. ᩍᨧ᩠ᨧᩮᨲᩴ ᩈᩁᨾᨱ᩠ᨯᩃᩴ ᩈᩁᩈᨾᩪᩉᩮᩣ.

᪑᪓᪒. ᩈᩁᩣᨴᩦᨶᩴ ᨶᩣᨾᩈᩁᩪᨸᨸ᩠ᨸᨽᩮᨴᩴ ᨴᩔᩮᨲᩩᨾᩣᩉ ‘‘ᩏᩈᨽᩮᩣ’’ᨧ᩠ᨧᩣᨴᩥ. ᩍᩈ ᨣᨲᩥᨿᩴ. ᩍᩈᨲᩥ ᨧᩥᨲ᩠ᨲᩴ ᨸᩅᩥᩈᨲᩦᨲᩥ ᩏᩈᨽᩮᩣ, ᩋᨽᩮᩣ, ᩍᩔᩩ ᨧ. ‘‘ᩏᩈ ᨴᩣᩉᩮ’’ᨲᩥ ᩅᩣ ᨵᩣᨲ᩠ᩅᨲ᩠ᨳᩮᩣ. ᨿᩈ᩠ᨾᩣ ᨸᨶ ᩈᩮᩣ ᩈᩁᩮᩣ ᩏᩈᨽᩮᩣ ᩅᩥᨿ ᨶᨴᨲᩥ, ᨲᩈ᩠ᨾᩣ ᩏᩈᨽᩮᩣᨲᩥ ᩅᩩᨧ᩠ᨧᨲᩥ. ᨵᩦᨾᨶ᩠ᨲᩮᩉᩥ ᨣᩦᨿᨲᩮᨲᩥ ᨵᩮᩅᨲᩮᩣ, ᩅᨱ᩠ᨱᩅᩥᨠᩣᩁᩮᩣ, ᩅᨲ᩠ᨲᩴ.

ᨶᩣᩈᩴ ᨠᨱ᩠ᨮᨾᩩᩁᩮᩣ ᨲᩣᩃᩩᩴ,

ᨩᩥᩅ᩠ᩉᩴ ᨴᨶ᩠ᨲᩮ ᨧ ᨶᩥᩔᩥᨲᩮᩣ;

ᨨᨵᩣ ᩈᨬ᩠ᨩᩣᨿᨲᩮ ᨿᩈ᩠ᨾᩣ,

ᨲᩈ᩠ᨾᩣ ᨨᨩ᩠ᨩᩮᩣ ᩈ ᩏᨧ᩠ᨧᨲᩮ [ᨧᩥᨶ᩠ᨲᩣᨾᨱᩥᨭᩦᨠᩣ ᪗.᪑].

ᨣᨶ᩠ᨵᩴ ¶ ᩃᩮᩈᩴ ᩋᩁᨲᩦᨲᩥ ᨣᨶ᩠ᨵᩁᩮᩣ, ᩁᩔᩔ ᨴᩦᨥᨲ᩠ᨲᩮ ᨣᨶ᩠ᨵᩣᩁᩮᩣ ᨧᩮᨲ᩠ᨿᨬ᩠ᨬᩮ [ᩋᨬ᩠ᨬᩮᩈᨾᨸᩦᨲᩥ (ᨸᩣᨱᩥᨶᩥ ᪓.᪑᪓᪗) ᨴᩦᨥᩮᩣ (ᨧᩥᨶ᩠ᨲᩣᨾᨱᩥᨭᩦᨠᩣ ᪗.᪑)], ᨣᨶ᩠ᨵᩣᩁᩣ ᨶᩣᨾ ᨩᨶᨸᨴᩣ, ᨲᩮᩉ᩠ᨿᨿᩴ ᨣᩦᨿᨲᩮᨲᩥ ᨣᨶ᩠ᨵᩣᩁᩮᩣ, ᨱᩮᩣ. ᨾᨩ᩠ᨫᩮ ᩃᨿᩅᩥᩈᩮᩈᩮ ᨽᩅᩮᩣ ᨾᨩ᩠ᨫᩥᨾᩮᩣ. ᨸᨬ᩠ᨧᨶ᩠ᨶᨾ᩠ᨸᩥ ᨵᩮᩅᨲᩣᨴᩦᨶᩴ ᨸᩪᩁᨱᩮᩣ ᨸᨬ᩠ᨧᨾᩮᩣ, (ᨸᨬ᩠ᨧᨶ᩠ᨶᩴ ᩅᩣ ᨾᩉᩣᨽᩪᨲᩣᨶᩴ ᨸᩪᩁᨱᩮᩣ ᨸᨬ᩠ᨧᨾᩮᩣ.) [( ) ᩑᨲ᩠ᨳᨶ᩠ᨲᩁᩮ ᨸᩣᨮᩮᩣ ᩋᨵᩥᨠᩮᩣ ᩅᩥᨿ ᨴᩥᩔᨲᩥ] ᨶᩥᩔᩮᩈᨲᩮᩣ ᩈᩦᨴᨶ᩠ᨲᩥ ᩈᩁᩣ ᨿᩈ᩠ᨾᩥᨶ᩠ᨲᩥ [ᨿᩈ᩠ᨾᩣᨲᩥ (ᨠ.) – ᩈᨴᨲᩮᩣ ᩋᨵᩥᨠᩁᨱᩮ ᨥᩏ (ᨧᩥᨶ᩠ᨲᩣᨾᨱᩥᨭᩦᨠᩣ ᪗.᪑)], ᨱᩮᩣ. ‘‘ᨶᩥᩈᩦᨴᨶ᩠ᨲᩥ ᩈᩁᩣ ᨿᩈ᩠ᨾᩥᩴ, ᨶᩥᩈᩣᨴᩮᩣ ᨲᩮᨶ ᩉᩮᨲᩩᨶᩣ’’ᨲᩥ ᩉᩥ ᩅᩩᨲ᩠ᨲᩴ. ᩑᨲᩮ ᩈᨲ᩠ᨲ ᩈᩁᩣᨲᩥ ᨣᨴᩥᨲᩣ ᨠᨳᩥᨲᩣ.

᪑᪓᪓-᪑᪓᪕. ᩏᩈᨽᩣᨴᨿᩮᩣ ᨿᩮ ᨶᨴᨶ᩠ᨲᩥ, ᨲᩮ ᨴᩔᩮᨲᩩᨾᩣᩉ ‘‘ᨶᨴᨶ᩠ᨲᩥ’’ᨧ᩠ᨧᩣᨴᩥ. ᩏᩈᨽᩴ ᨶᩣᨾ ᩈᩁᩴ ᨣᩣᩅᩮᩣ ᨶᨴᨶ᩠ᨲᩥ. ᨲᨳᩣ ᨵᩮᩅᨲᩴ ᨲᩩᩁᨦ᩠ᨣᩣ ᩋᩔᩣ, ᨨᨩ᩠ᨩᩴ ᨾᨿᩪᩁᩣ ᩈᩥᨡᨱ᩠ᨯᩥᨶᩮᩣ, ᨣᨶ᩠ᨵᩣᩁᩴ ᩋᨩᩣ, ᨾᨩ᩠ᨫᩥᨾᩴ ᨠᩮᩣᨬ᩠ᨧᩣ ᩈᨠᩩᨱᩅᩥᩈᩮᩈᩣ, ᨸᨬ᩠ᨧᨾᩴ ᨸᩁᨸᩩᨭ᩠ᨮᩣᨴᩦ ᨠᩮᩣᨠᩥᩃᩣᨴᨿᩮᩣ, ᨶᩥᩈᩣᨴᩴ ᩅᩣᩁᨱᩣ ᩉᨲ᩠ᨳᩥᨶᩮᩣ ᨶᨴᨶ᩠ᨲᩥ. ᩅᩩᨲ᩠ᨲᨬ᩠ᨧ ᨶᩣᩁᨴᨾᩩᨶᩥᨶᩣ –

‘‘ᨨᨩ᩠ᨩᩴ ¶ ᨶᨴᨲᩥ ᨾᨿᩪᩁᩮᩣ, ᨣᩣᩅᩮᩣ ᨶᨴᨶ᩠ᨲᩥ ᩏᩈᨽᩴ;

ᩋᨩᩮᩣ ᩁᩮᩣᨲᩥ ᨧ [ᩋᨩᩣᩅᩥᨠᩣ ᨲᩩ (ᨠ.)] ᨣᨶ᩠ᨵᩣᩁᩴ, ᨠᩮᩣᨬ᩠ᨧᩣ ᨶᨴᨶ᩠ᨲᩥ ᨾᨩ᩠ᨫᩥᨾᩴ.

ᨸᩩᨸ᩠ᨹᩈᩣᨵᩣᩁᨶᩮ ᨠᩣᩃᩮ, ᨠᩮᩣᨠᩥᩃᩮᩣ ᩁᩮᩣᨲᩥ ᨸᨬ᩠ᨧᨾᩴ;

ᩋᩔᩮᩣ ᨲᩩ ᨵᩮᩅᨲᩴ ᩁᩮᩣᨲᩥ, ᨶᩥᩈᩣᨴᩴ ᩁᩮᩣᨲᩥ ᨠᩩᨬ᩠ᨩᩁᩮᩣ’’ᨲᩥ.

ᨾᨿᩪᩁᩣᨴᨿᩮᩣᨸᩥ ᩈᨻ᩠ᨻᩮ ᩍᨾᩮ ᩈᨲ᩠ᨲᩣ ᩈᨾᨴᩣ [ᩈᨶ᩠ᨲᩮᩣ (ᨠ.) ᩑᨲᩮ ᨧ ᩈᨾᨴᩣ ᨸᨬ᩠ᨧᨾᩴ ᨣᩣᨿᨶ᩠ᨲᩥ (ᨧᩥᨶ᩠ᨲᩣᨾᨱᩥᨭᩦᨠᩣ ᪗.᪑)] ᨸᨬ᩠ᨧᨾᩴ ᨶᨴᨶ᩠ᨲᩥ.

ᨨᨩ᩠ᨩᩮᩣ ᨣᩣᨾᩮᩣ, ᨾᨩ᩠ᨫᩥᨾᩮᩣ ᨣᩣᨾᩮᩣ, ᩈᩣᨵᩣᩁᨱᩮᩣ ᨣᩣᨾᩮᩣᨲᩥ ᨲᨿᩮᩣ ᨣᩣᨾᩣ. ᨲᨲᩕ ᩅᩦᨱᩣᨴᨱ᩠ᨯᩴ ᩅᩥᨽᩣᨣᩴ ᨠᨲ᩠ᩅᩣ ᩋᨵᩮᩣᨽᩣᨣᩔ ‘‘ᨨᨩ᩠ᨩᨣᩣᨾᩮᩣ’’ᨲᩥ ᩈᨬ᩠ᨬᩣ, ᨾᨩ᩠ᨫᨽᩣᨣᩔ ‘‘ᨾᨩ᩠ᨫᩥᨾᨣᩣᨾᩮᩣ’’ᨲᩥ, ᩏᨸᩁᩥᨽᩣᨣᩔ ‘‘ᩈᩣᨵᩣᩁᨱᨣᩣᨾᩮᩣ’’ᨲᩥ ᩈᨬ᩠ᨬᩣ. ᨠᩥᩴ ᨸᨶ ᨣᩣᨾᨽᩮᨴᩮ ᨠᩣᩁᨱᩴ? ᨿᩈ᩠ᨾᩣ ᩑᨠᩔᩮᩅ ᩈᩁᩔ ᨣᩣᨾᨶ᩠ᨲᩁᩮ ᨽᩮᨴᩮᩣ, ᨲᩴᨽᩮᨴᩮ ᨣᩣᨾᩣᨶᨾ᩠ᨸᩥᨽᩮᨴᩮᩣ. ᨾᩣᨥᨭᩦᨠᩣᨿᩴ ᨸᨶ ᩈᩣᨵᩣᩁᨱᨣᩣᨾᨭ᩠ᨮᩣᨶᩮ ᨣᨶ᩠ᨵᩣᩁᨣᩣᨾᩮᩣ ᨠᨳᩥᨲᩮᩣ, ᩑᨠᩮᨠᩈ᩠ᨾᩥᨬ᩠ᨧ ᨣᩣᨾᩮ ᩈᨲ᩠ᨲ ᩈᨲ᩠ᨲ ᨾᩩᨧ᩠ᨨᨶᩣ. ᩍᨵ ᨸᨶ ᩏᩈᨽᩣᨴᩦᩈᩩ ᩈᨲ᩠ᨲᩈᩩ ᩈᩁᩮᩈᩩ ᨸᨧ᩠ᨧᩮᨠᩴ ᨲᩥᩔᩮᩣ ᨲᩥᩔᩮᩣ ᨾᩩᨧ᩠ᨨᨶᩣ ᨠᨳᩥᨲᩣ. ᨠᩥᩴᨠᩣᩁᨱᩣ? ᩍᨵ ᨾᨶᩩᩔᩃᩮᩣᨠᩅᩣᨴᨶᩅᩥᨵᩥᨶᩣ, ᨲᨲ᩠ᨳ ᨧ ᨴᩮᩅᩃᩮᩣᨠᩅᩣᨴᨶᩅᩥᨵᩥᨶᩣ ᨠᨳᩥᨲᨲ᩠ᨲᩣ ᨲᨳᩮᩅ ᨮᩣᨶᩣᨶᩥ ᩈᨲ᩠ᨲ ᩈᨲ᩠ᨲᩮᩅ ᩃᨻ᩠ᨽᩁᩮᨲᩥ. ᨿᨳᩣ ᩏᩈᨽᩣᨴᩦᩈᩩ ᨲᩮᩈᩩ ᨿᨳᩣᩅᩩᨲ᩠ᨲᩮᩈᩩ ᩈᩁᩮᩈᩩ ᨸᨧ᩠ᨧᩮᨠᩴ ᩑᨠᩮᨠᩈ᩠ᨾᩥᩴ ᩈᩁᩮ ᨲᩥᩔᩮᩣ ᨲᩥᩔᩮᩣ ᨾᩩᨧ᩠ᨨᨶᩣ ᩈᩥᨿᩩᩴ, ᨲᨳᩮᩅ ᨮᩣᨶᩣᨶᩥᨸᩥ ᩈᨲ᩠ᨲ ᩈᨲ᩠ᨲᩮᩅ ᩃᨻ᩠ᨽᩁᩮᨲ᩠ᨿᨲ᩠ᨳᩮᩣ.

᪑᪓᪖. ᩈᩁᩣᨶᩴ ᨣᩣᨾᩮᩈᩩ ᨽᩥᨶ᩠ᨶᩈᩩᨲᩥᨲ᩠ᨲᩴ ᨴᩔᩮᨲᩩᨾᩣᩉ ‘‘ᨲᩥᩔᩮᩣ’’ᩍᨧ᩠ᨧᩣᨴᩥ. ᩏᩈᨽᩔ ᩈᩁᩔ ᨲᩣᩁᨠᩃᨾᨶ᩠ᨴᩅᩈᩮᨶ ᨲᩥᩔᩮᩣ ᩈᩩᨲᩥᨿᩮᩣ. ᨵᩮᩅᨲᩔ ᩈᩁᩔ ᨲᩣᩁ ᨾᨶ᩠ᨴᩅᩈᩮᨶ ¶ ᨴᩩᩅᩮ. ᨨᨩ᩠ᨩᩔ ᨲᩣᩁᨠᩃ ᨾᨶ᩠ᨴ ᨠᩣᨠᩃᩦᩅᩈᩮᨶ ᨧᨲᩔᩮᩣ. ᨣᨶ᩠ᨵᩣᩁᩔ ᨧ ᨲᨳᩣ. ᨾᨩ᩠ᨫᩥᨾᩔ ᨲᩣᩁᨠᩃ ᨠᩣᨠᩃᩦᩅᩈᩮᨶ ᨲᩥᩔᩮᩣ. ᨸᨬ᩠ᨧᨾᩔ ᨠᩃ ᨠᩣᨠᩃᩦᩅᩈᩮᨶ ᨴᩩᩅᩮ. ᨶᩥᩈᩣᨴᩔ ᨲᩣᩁᩣᨴᩥᩅᩈᩮᨶ ᨧᨲᩔᩮᩣ ᩈᩩᨲᩥᨿᩮᩣ. ᩍᨧ᩠ᨧᩮᩅᩴ ᩈᨲ᩠ᨲᩈᩩ ᩈᩁᩮᩈᩩ ᨠᨾᨲᩮᩣ ᩈᨾ᩠ᨸᩥᨱ᩠ᨯᩥᨲᩣ ᨴ᩠ᩅᩣᩅᩦᩈᨲᩥ ᩈᩩᨲᩥᨿᩮᩣ ᩈᩥᨿᩩᩴ. ᨾᩣᨥᨭᩦᨠᩣᨿᩴ ᨸᨶ ᩋᨬ᩠ᨬᨳᩣ ᩈᩩᨲᩥᨽᩮᨴᩮᩣ ᩅᩩᨲ᩠ᨲᩮᩣ. ᩅᩩᨲ᩠ᨲᨬ᩠ᩉᩥ ᨲᨲ᩠ᨳ –

‘‘ᨧᨲᩩᩔᩩᨲᩥ ᩈᩩᩅᩥᨬ᩠ᨬᩮᨿ᩠ᨿᩮᩣ, ᨾᨩ᩠ᨫᩥᨾᩮᩣ ᨾᨩ᩠ᨩᩥᨾᨭ᩠ᨮᩥᨲᩮᩣ;

ᨴ᩠ᩅᩥᩔᩩᨲᩥ ᨧᩣᨸᩥ ᨣᨶ᩠ᨵᩣᩁᩮᩣ, ᨲᩥᩔᩩᨲᩥ ᩏᩈᨽᩮᩣ ᨲᨳᩣ.

ᨨᨩ᩠ᨩᩮᩣ ᨧᨲᩩᩔᩩᨲᩥ ᨬᩮᨿ᩠ᨿᩮᩣ, ᨶᩥᩈᩣᨴᩮᩣ ᨴ᩠ᩅᩥᩔᩩᨲᩦ ᨲᨳᩣ;

ᨧᨲᩩᩔᩩᨲᩥ ᨵᩮᩅᨲᩮᩣ ᨲᩩ, ᨸᨬ᩠ᨧᨾᩮᩣ ᨲᩥᩔᩩᨲᩦ ᨾᨲᩮᩣ’’ᨲᩥ.

ᩈᨻ᩠ᨻᨾᩮᨲᩴ ᨶᩣᨭᨠᩈᨲ᩠ᨳᨲᩮᩣ ᨣᩉᩮᨲᨻ᩠ᨻᩴ.

᪑᪓᪗. ‘‘ᩏᨧ᩠ᨧᨲᩁᩮ’’ᨲ᩠ᨿᩣᨴᩥᨶᩣ ᩈᩩᨲᩥᨽᩮᨴᩮ ᩈᩁᩪᨸᨲᩮᩣ ᨴᩔᩮᨲᩥ. ᩏᨧ᩠ᨧᨲᩁᩮ ᩁᩅᩮ ᩋᨲ᩠ᨿᩩᨧ᩠ᨧᨵᨶᩥᨾ᩠ᩉᩥ ᨲᩣᩁᩮᩣ, ᨲᩣᩁᨿᨲᩥ ᨻᩮᩣᨵᨿᨲᩦᨲᩥ ᨲᩣᩁᩮᩣ. ᩋᨻ᩠ᨿᨲ᩠ᨲᩮ ᩋᨻ᩠ᨿᨲ᩠ᨲᨠ᩠ᨡᩁᩮ ᨾᨵᩩᩁᩮ ᩈᩩᨲᩥᩈᩩᨡᩮ ᨠᩃᩮᩣ, ᨠᩃ ᨾᨴᩮ. ᨣᨾ᩠ᨽᩦᩁᩮ ᨵᨶᩥᨾ᩠ᩉᩥ ᨾᨶ᩠ᨴᩮᩣ. ᨾᨴᩥ ᨳᩩᨲᩥᨾᩮᩣᨴᨾᨴᨾᩮᩣᩉᩈᩩᨸᨶᨣᨲᩦᩈᩩ. ᨾᨶ᩠ᨴᨿᨲᩮ ᨻᩩᨩ᩠ᨫᨲᩮᨶᩮᨶᩣᨲᩥ ᨾᨶ᩠ᨴᩮᩣ.

ᨲᩣᩁᩣᨴᨿᩮᩣ ᨲᨿᩮᩣ ᩅᩣᨧ᩠ᨧᩃᩥᨦ᩠ᨣᨲ᩠ᨲᩣ ᨲᩦᩈᩩ. ᨲᩣᩁᩮᩣ ᨵᨶᩥ, ᨲᩣᩁᩣ ᩅᩣᨱᩦ, ᨲᩣᩁᩴ ᩁᩩᨲᩴ ᩍᨧ᩠ᨧᩣᨴᩥ. ᩋᨻ᩠ᨿᨲ᩠ᨲᨾᨵᩩᩁᩈᨴ᩠ᨴᩮᩣ ᨠᩃᩮᩣ. ᨲᨲᩕ ᨠᩃᩮ ᩈᩩᨡᩩᨾᩮ ᨠᩣᨠᩃᩦᩈᨴ᩠ᨴᩮᩣ, ᩎᨸᨧ᩠ᨧᨿᨶ᩠ᨲᩮᩣ, ᩎᩈᩴ ¶ ᨠᩃᩣ ᩅᩣᨱᩦ ᨠᩣᨠᩃᩦ ᨶᩣᨾ, ᨠᩣᩈᨴ᩠ᨴᩮᩣᨿᨾᩦᩈᨲ᩠ᨳᩮᩣ. ᨠᩕᩥᨿᩣᨴᩥᩈᨾᨲᩣᨲᩥ ᨣᩦᨲᩅᩣᨴᩥᨲᨸᩣᨴᨶ᩠ᨿᩣᩈᩣᨴᩥᨠᩕᩥᨿᩣᨶᩴ, ᨠᩣᩃᩔ ᨧ ᩈᨾᨲ᩠ᨲᩴ ᩃᨿᩮᩣ ᨶᩣᨾ, ᩃᨿ ᩈᩣᨾ᩠ᨿᨣᨲᩦᩈᩩ, ᩌᨵᩣᩁᩮ ᩋᨸᨧ᩠ᨧᨿᩮᩣ, ᩈᨻ᩠ᨻᩣᨽᩥᨶᨿᩣᨶᨾ᩠ᨸᩥ ᩈᩣᨾ᩠ᨿᩴ ᩃᨿᩮᩣᨲᩥ ᨠᩮᨧᩥ.

᪑᪓᪘. ᨴ᩠ᩅᨿᩴ ᩅᩦᨱᩣᨿᩴ. ᩅᩥ ᨩᨶᨶᩮ, ᨲᩮᩣ, ᩎᨱᨲ᩠ᨲᩴ, ᩅᩦᨱ ᩅᩮᨮᨶᩮᨲᩥ ᩅᩣ ᨵᩣᨲᩩ, ᩌ, ᩅᩦᨱᩣ. ᩅᩃ᩠ᩃ ᩈᩴᩅᩁᨱᩮ, ᩅᩃ᩠ᩃᨲᩮ ᨵᨶᩥᩅᩥᩈᩮᩈᩴ, ᨱ᩠ᩅᩩ, ᩅᩃ᩠ᩃᨠᩦ, ᨶᨴᩣᨴᩥ. ᩅᩥᨸᨬ᩠ᨧᩦᨲᩥᨸᩥ ᩅᩦᨱᩣᨿ ᨶᩣᨾᩴ. ᩅᩥᨸᨬ᩠ᨧᨿᨲᩦᨲᩥ ᩅᩥᨸᨬ᩠ᨧᩦ [ᩅᩥᨸᨬ᩠ᨧᨿᨲᩥ ᩅᩥᨲ᩠ᨳᩣᩁᨿᨲᩥᩈᨴ᩠ᨴᩴ (ᨧᩥᨶ᩠ᨲᩣᨾᨱᩥᨭᩦᨠᩣ ᪗.᪓)], ᨶᨴᩣᨴᩥ.

ᩈᩣ ᩅᩦᨱᩣ ᩈᨲ᩠ᨲᨲᨶ᩠ᨲᩦ ᩈᨲ᩠ᨲᩉᩥ ᨲᨶ᩠ᨲᩦᩉᩥ ᩅᩥᩈᩥᨭ᩠ᨮᩣ ᨸᩁᩥᩅᩣᨴᩥᨶᩦ ᨶᩣᨾ, ᨸᩁᩥᨲᩮᩣ ᩅᨴᨲᩦᨲᩥ ᨸᩁᩥᩅᩣᨴᩥᨶᩦ, ᩍᨶᩦ. ᩅᩦᨱᩣᨴᨿᩮᩣ ᨧᨲ᩠ᨲᩣᩁᩮᩣᨸᩥ ᩅᩦᨱᩣᩈᩣᨾᨬ᩠ᨬᩅᩣᨧᨠᩣ ᩍᨧ᩠ᨧᩮᨠᩮ, ᨲᩮᩈᩴ ᨾᨲᩮ ᩈᩣᩈᨴ᩠ᨴᩔ ᨧᨲᩩᨶ᩠ᨶᨾ᩠ᨸᩥ ᩍᨲ᩠ᨳᩥᩃᩥᨦ᩠ᨣᨲ᩠ᨳᨴᩦᨸᨠᨲᩣ ᩅᩥᨬ᩠ᨬᩮᨿ᩠ᨿᩣ, ᨲᨳᩣᨸᩥ ᩋᨾᩁᨠᩮᩣᩈᩮᨶ [ᩋᨾᩁ ᪗.᪓] ᩅᩥᩁᩩᨩ᩠ᨫᨶᨲᩮᩣ ᨲᩮᩈᩴ ᨾᨲᩴ ᨶ ᨣᩉᩮᨲᨻ᩠ᨻᩴ.

ᨠᨭ᩠ᨮᩣᨴᩦᩉᩥ ᨴᩮᩣᨱᩥᩈᨱ᩠ᨮᩣᨶᩮᨶ ᨠᨲᩴ ᩅᨩ᩠ᨩᨽᨱ᩠ᨯᩴ ᩅᩦᨱᩣᨿ ᨸᩮᩣᨠ᩠ᨡᩁᩮᩣ ᨶᩣᨾ, ᨸᩮᩣᩈᩮᨲᩥ ᩅᨯ᩠ᨰᩮᨲᩥ ᩈᨴ᩠ᨴᩮᨲᩥ ᨸᩮᩣᨠ᩠ᨡᩁᩮᩣ, ᨡᩁᩮᩣ, ᩅᩩᨴ᩠ᨵᩥ, ᩅᨱ᩠ᨱᩅᩥᨠᩣᩁᩮᩣ ᨧ. ᨴᩩ ᨣᨾᨶᩮ, ᨱᩥ, ᨴᩮᩣᨱᩥ. ᨠᨠᩩᨽᩮᩣ, ᨸᩈᩮᩅᨠᩮᩣᨲᩥᨸᩥ ᨸᩮᩣᨠ᩠ᨡᩁᩔ ᨶᩣᨾᩣᨶᩥ. ᨠᩴ ᩅᩣᨲᩴ ᨠᩩᨽᨲᩥ ᨻᨶ᩠ᨵᨲᩦᨲᩥ ᨠᨠᩩᨽᩮᩣ. ᨸᩈᩥᨻ᩠ᨻᨶ᩠ᨲᩥ ᨲᨾᩥᨲᩥ ᨸᩈᩮᩅᨠᩮᩣ.

ᨴ᩠ᩅᨿᩴ ᨸᩮᩣᨠ᩠ᨡᩁᩅᩮᨮᨠᩮ ᨧᨾ᩠ᨾᨶᩥ. ᩅᩦᨱᩣᨽᩣᩅᩴ ᩏᨸᨣᨧ᩠ᨨᨲᩥ ᨿᩮᨶᩣᨲᩥ ᩏᨸᩅᩦᨱᩮᩣ. ᩅᩮᨮᨲᩥ ᨸᩮᩣᨠ᩠ᨡᩁᨶ᩠ᨲᩥ ᩅᩮᨮᨠᩮᩣ, ᨱ᩠ᩅᩩ.

᪑᪓᪙. ᩌᨲᨲᩣᨴᩥᨸᨬ᩠ᨧᨠᩴ ¶ ᨸᨬ᩠ᨧᨦ᩠ᨣᩥᨠᨲᩪᩁᩥᨿᩔ ᨶᩣᨾᩣᨶᩥ.

᪑᪔᪐. ᨧᨾ᩠ᨾᩣᩅᨶᨴ᩠ᨵᩮᩈᩩ ᨧᨾ᩠ᨾᩮᨶ ᨻᨶ᩠ᨵᨶᩦᨿᩮᩈᩩ ᨽᩮᩁᩥᨿᩣᨴᩦᩈᩩ ᨾᨩ᩠ᨫᩮ ᨲᩃᩮᨠᩮᨠᨿᩩᨲᩴ ᩑᨠᩮᨠᩮᨶ ᨲᩃᩮᨶ ᨿᩩᨲ᩠ᨲᩴ ᨠᩩᨾ᩠ᨽᨳᩩᨱᨴᨴ᩠ᨴᩁᩥᨠᩣᨴᩥᨠᩴ ᨲᩪᩁᩥᨿᩴ ᩌᨲᨲᩴ ᨶᩣᨾ, ᩌᨲᨶᩮᩣᨲᩦᨲᩥ ᩌᨲᨲᩴ, ᨲᨶᩩ ᩅᩥᨲ᩠ᨳᩣᩁᩮ. ᨾᩉᨲᩦᩌᨴᩥᩅᩦᨱᩣᩅᩥᩈᩮᩈᩮᩣᨸᩥ [‘‘ᨾᩉᨲᩦ’’ᨲᩥ ᨶᩣᩁᨴᩔ ᩅᩦᨱᩣ (ᩈᨴ᩠ᨴᨠᨸ᩠ᨸᨴ᩠ᨴᩩᨾᩮ)] ᩌᨲᨲᨾᩮᩅᩣᨲᩥ ‘‘ᨧᨾ᩠ᨾᩣᩅᨶᨴ᩠ᨵᩮᩈᩪ’’ᨲᩥ ᩅᩥᩈᩮᩈᨶᩴ ᨠᨲᩴ. ᨠᩩᨾ᩠ᨽᩈᨱ᩠ᨮᩣᨶᨲ᩠ᨲᩣ ᨠᩩᨾ᩠ᨽᩮᩣ ᨧ ᨲᩴ ᨳᩩᨶᨶᨣᩁᩈᨾ᩠ᨽᩪᨲᨲ᩠ᨲᩣ ᨳᩩᨶᨬ᩠ᨧᩮᨲᩥ ᨠᩩᨾ᩠ᨽᨳᩩᨶᩴ. ᨲᨴᩮᩅ ᨠᩩᨾ᩠ᨽᨳᩩᨱᩴ, ᩋᨳ ᩅᩣ ᨳᩩ ᩋᨽᩥᨲ᩠ᨳᩅᩮ, ᨠᨾ᩠ᨾᨶᩥ ᨱᩮᩣ. ᨠᩩᨾ᩠ᨽᩮᩣ ᨧ ᩈᩮᩣ ᨳᩩᨱᩮᩣ ᨧᩮᨲᩥ ᨠᩩᨾ᩠ᨽᨳᩩᨱᩮᩣ, ᨳᩩᨱ ᨸᩪᩁᨱᩮᨲᩥ ᩅᩣ ᨵᩣᨲ᩠ᩅᨲ᩠ᨳᩮᩣ. ᨴᩁ ᩅᩥᨴᩣᩁᨱᨴᩣᩉᩮᩈᩩ, ᨴ᩠ᩅᩮᨽᩣᩅᩮᩣ, ᨠᩣᨸᩩᨻ᩠ᨻᩔᩥᨠᩣᩁᩮᩣ ᨧ, ᨴᨴ᩠ᨴᩁᩈᨴ᩠ᨴᩴ ᨠᩁᩮᩣᨲᩦᨲᩥ ᩅᩣ ᨴᨴ᩠ᨴᩁᩥᨠᩣ.

᪑᪔᪑. ᩏᨽᨿᨲᩃᩴ ᨾᩩᩁᨩᩣᨴᩥᨠᩴ ᨲᩪᩁᩥᨿᩴ ᩅᩥᨲᨲᩴ ᨶᩣᨾ, ᩅᩥᩈᩮᩈᩮᨶ ᩈᨴ᩠ᨴᩴ ᨲᨶᩮᩣᨲᩦᨲᩥ ᩅᩥᨲᨲᩴ, ᩈᨻ᩠ᨻᩅᩥᨶᨴ᩠ᨵᩴ ᩈᨻ᩠ᨻᨸᩔᩮᩈᩩ, ᨸᩩᨻ᩠ᨻᨸᨧ᩠ᨨᩣᨽᩣᨣᩮᩈᩩ ᨧ ᨸᩁᩥᨿᩮᩣᨶᨴ᩠ᨵᩴ ᨸᨱᩅᩣᨴᩥᨠᩴ, ᩌᨴᩥᨶᩣ ᨧᨲᩩᩁᩔᩌᩃᨾ᩠ᨻᩁᨣᩮᩣᨾᩩᨡᩦᩌᨴᨿᩮᩣ ᩌᨲᨲᩅᩥᨲᨲᩴ ᨶᩣᨾ, ‘‘ᨧᨾ᩠ᨾᨸᩁᩥᨿᩮᩣᨶᨴ᩠ᨵᩴ ᩉᩩᨲ᩠ᩅᩣ ᨲᨶ᩠ᨲᩥᨻᨴ᩠ᨵᩴ ᩌᨲᨲᩅᩥᨲᨲ’’ᨶ᩠ᨲᩥ ᩉᩥ ᩅᩩᨲ᩠ᨲᩴ. ᨸᨱ ᨻ᩠ᨿᩅᩉᩣᩁᨳᩩᨲᩦᩈᩩ, ᨸᨱᩦᨿᨲᩦᨲᩥ ᨸᨱᩅᩮᩣ, ᩋᩅᩮᩣ.

᪑᪔᪒. ᩅᩴᩈᩈᨦ᩠ᨡᩣᨴᩥᨠᩴ ¶ ᩈᩩᩈᩥᩁᩴ ᨶᩣᨾ, ᩁᨶ᩠ᨵᩴ ᩈᩩᩈᩥᩁᩴ, ᨲᩴᨿᩮᩣᨣᩣ ᩈᩩᩈᩥᩁᩴ. ᩅᨶ, ᩈᨶ ᩈᨾ᩠ᨽᨲ᩠ᨲᩥᨿᩴ, ᩈᩮᩣ, ᩅᩴᩈᩮᩣ. ᩈᨾ ᩏᨸᩈᨾᨡᩮᨴᩮᩈᩩ, ᨡᩮᩣ, ᩈᨦ᩠ᨡᩮᩣ. ᩈᨾ᩠ᨾᨲᩣᩊᩣᨴᩥᨠᩴ ᩋᨧ᩠ᨧᨶ᩠ᨲᩴ ᨸᩦᩊᨶᨲᩮᩣ, ᩋᨶᩃᩈᩴᨿᩮᩣᨣᨲᩮᩣ ᩅᩣ ᨴᩕᩅᩦᨽᩪᨲᩴ ᨸᩩᨶ ᨥᨶᩣᨿᨲᩮᨲᩥ ᨥᨶᩣᨡ᩠ᨿᩴ. ᩉᨶ ᩉᩥᩴᩈᩣᨿᩴ, ᨠᨾ᩠ᨾᨶᩥ ᨱᩮᩣ, ᩉᩔ ᨥᩮᩣ. ᨥᨶᨽᩣᩅᩮᨶ ᩈᨾᩴ ᨽᩅᨲᩦᨲᩥ ᩈᨾ᩠ᨾᩴ, ᨴᨱ᩠ᨯᩣᨴᩦᩉᩥ ᨲᩣᩊᩥᨲᨻ᩠ᨻᨲᩮᩣ ᨲᩣᩊᩴ, ᨲᩊ ᨲᩣᩊᨶᩮ, ᩈᨾ᩠ᨾᨬ᩠ᨧ ᨲᩴ ᨲᩣᩊᨬ᩠ᨧᩮᨲᩥ ᩈᨾ᩠ᨾᨲᩣᩊᩴ. ᩌᨴᩥᨶᩣ ᨠᩴᩈᨲᩣᩊᩈᩥᩃᩣᨲᩣᩊᩣᨴᩦᨶᩴ ᨣᩉᨱᩴ. ᨲᨲ᩠ᨳ ᩈᨾ᩠ᨾᨲᩣᩊᩴ ᨶᩣᨾ ᨠᨭ᩠ᨮᨾᨿᨲᩣᩊᩴ. ᨠᩴᩈᨲᩣᩊᩴ ᨶᩣᨾ ᩃᩮᩣᩉᨾᨿᩴ. ᩈᩥᩃᩣᨿ ᨧ ᩋᨿᩮᩣᨸᨭ᩠ᨭᩮᨶ ᨧ ᩅᩣᨴᨶᨲᩣᩊᩴ ᩈᩥᩃᩣᨲᩣᩊᩴ.

ᨧᨲᩩᨠ᩠ᨠᩴ ᩌᨲᨲᩣᨴᩦᨶᩴ ᨶᩣᨾᩴ. ᩌ ᩈᨾᨶ᩠ᨲᨲᩮᩣ ᨲᩩᨩ᩠ᨩᨲᩮ ᨲᩣᩊᩦᨿᨲᩮᨲᩥ ᩌᨲᩮᩣᨩ᩠ᨩᩴ. ᩅᩴᩈᩣᨴᩥᨠᩮᨸᩥ ᨾᩩᨡᩅᩣᨿᩩᨶᩣ ᩌᨲᩮᩣᨩ᩠ᨩᨶᨾᨲ᩠ᨳᩮᩅ. ᩅᩣᨴᨿᨶ᩠ᨲᩥ ᨵᨶᨿᨶ᩠ᨲᩥ ᨲᨶ᩠ᨲᩥ ᩅᩣᨴᩥᨲ᩠ᨲᩴ ᩅᩣᨴᩥᨲᨬ᩠ᨧ, ᩍᨲ᩠ᨲᩮᩣ, ᨲᩮᩣ ᨧ. ᩅᩣᨴᨿᨶ᩠ᨲᩥ ᨲᨶ᩠ᨲᩥ ᩅᨩ᩠ᨩᩴ, ᨿᩮᩣ.

᪑᪔᪓. ᨴ᩠ᩅᨿᩴ ᨽᩮᩁᩥᨿᩴ. ᨽᩣᨿᨶ᩠ᨲᩥ ᩈᨲ᩠ᨲᩩᨩᨶᩣ ᩑᨲᩮᨶᩣᨲᩥ ᨽᩮᩁᩥ, ᩁᩥ. ᩏᨽ ᨸᩪᩁᨱᩮ, ᩏᨽᨶᩴ ᩏᨽᩥ. ‘‘ᨴᩩᨶ᩠ᨴ’’ᩍᨲᩥ ᩈᨴ᩠ᨴᩮᨶ ᩏᨽᩥ ᨿᨲᩕ ᩈ ᨴᩩᨶ᩠ᨴᩩᨽᩥ. ᨸᩩᨾᩥᨲ᩠ᨳᩥᨿᨾᩮᨲᩮ ᨴ᩠ᩅᩮ [ᩈᩮᩁᩦ ᨳᩦ, ᨴᩩᨶ᩠ᨴᩩᨽᩥ ᨸᩩᨾᩣ (ᩋᨾᩁ ᪗.᪖)]. ᨴ᩠ᩅᨿᩴ ᨾᩩᨴᩥᨦ᩠ᨣᩮ. ᨾᩩᨴᩴ ᨾᩮᩣᨴᩴ ᩍᨦ᩠ᨣᨲᩥ ᨣᨧ᩠ᨨᨲᩥ ᨿᩮᨶᩣᨲᩥ ᨾᩩᨴᩥᨦ᩠ᨣᩮᩣ. ᨾᩩᩁᩣ ᩋᩈᩩᩁᩣ ᨩᩣᨲᩮᩣ ᨾᩩᩁᨩᩮᩣ.

ᩋᩔ ¶ ᨾᩩᩁᨩᩔ ᨽᩮᨴᩣ ᩅᩥᩈᩮᩈᩣ ᩌᩃᩥᨦ᩠ᨣᨦ᩠ᨠ᩠ᨿᩮᩣᨴ᩠ᨵᨠᩣ ᨽᩅᨶ᩠ᨲᩥ. ᩅᩩᨲ᩠ᨲᨬ᩠ᨧ –

‘‘ᩉᩁᩥᨲᨠ᩠ᨿᩣᨠᨲᩥ ᨲ᩠ᩅᨦ᩠ᨠ᩠ᨿᩮᩣ,

ᨿᩅᨾᨩ᩠ᨫᩮᩣ ᨲᨳᩮᩣ’ᨴ᩠ᨵᨠᩮᩣ;

ᩌᩃᩥᨦ᩠ᨣ᩠ᨿᩮᩣ ᨧᩮᩅ ᨣᩮᩣᨸᩩᨧ᩠ᨨᩮᩣ,

ᩌᨠᨲ᩠ᨿᩣ ᩈᨾ᩠ᨸᨠᩥᨲ᩠ᨲᩥᨲᩮᩣ’’ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣᨿᨾ᩠ᨸᩥ].

ᩌᩃᩥᨦ᩠ᨣ᩠ᨿᨲᩮᨲᩥ ᩌᩃᩥᨦ᩠ᨣᩮᩣ, ᨱᩮᩣ. ᩏᨧ᩠ᨨᨦ᩠ᨠᩮ ᨽᩅᩮᩣ ᩋᨠ᩠ᨿᩮᩣ. ᩏᨴ᩠ᨵᩴ ᨠᨲ᩠ᩅᩣ ᩑᨠᩮᨶ ᨾᩩᨡᩮᨶ ᩅᩣᨴᨶᨲᩮᩣ ᩏᨴ᩠ᨵᩮᩣ ᩈᨶ᩠ᨲᩮᩣ ᨠᩣᨿᨲᩥ ᩈᨴ᩠ᨴᩣᨿᨲᩦᨲᩥ ᩏᨴ᩠ᨵᨠᩮᩣ, ᩏᨴ᩠ᨵᩈᨴ᩠ᨴᩮᩣᨿᩴ ᨲᩥᩃᩥᨦ᩠ᨣᩥᨠᩮᩣ. ᩏᨣ᩠ᨣᨧ᩠ᨨᨲᩦᨲᩥ ᩏᨴ᩠ᨵᩮᩣ, ᨲᩮᩣ, ᨣᨾᩥᩔ ᨴᩮᩣ, ᨶᩮᩁᩩᨲ᩠ᨲᩮᩣ. ᨿᩮᩣ ᨲᩩ ᩏᨸᩁᩥᨸᩁᩥᨿᩣᨿᩮᩣ ᩏᨴ᩠ᨵᩴᩈᨴ᩠ᨴᩮᩣ, ᩈᩮᩣ ᩋᨻ᩠ᨿᨿᨾᩮᩅ.

ᨲᩥᨱᩅᩣᨴᩦᨶᩥ ᨧᨲ᩠ᨲᩣᩁᩥ ᨸᨱᩅᩔ ᨶᩣᨾᩣᨶᩥ. ᨲᨶᩩ ᩅᩥᨲ᩠ᨳᩣᩁᩮ, ᩋᩅᩮᩣ, ᩋᩔ ᩍᨲ᩠ᨲᩴ, ᨱᨲ᩠ᨲᨬ᩠ᨧ, ᨲᩥᨱᩅᩮᩣ. ᨾᩣ ᨾᩣᨶᩮ ᩈᨴ᩠ᨴᩮ ᨧ, ‘‘ᨯᩥᨱ᩠ᨯᩥ’’ᩍᨲᩥ ᨾᩣᨿᨲᩮ ᩈᨴ᩠ᨴᩣᨿᨲᩮᨲᩥ ᨯᩥᨱ᩠ᨯᩥᨾᩮᩣ, ᨱᩮᩣ.

᪑᪔᪔. ‘‘ᩌᩃᨾ᩠ᨻ’’ᩍᨲᩥ ᩈᨴ᩠ᨴᩣᨿᨲᩮᨲᩥ ᩌᩃᨾ᩠ᨻᩁᩮᩣ. ‘‘ᩌᩃᨾ᩠ᨻᩁᩮᩣ ᨲᩪᩁᩥᨿᩁᩅᩮ, ᨣᨩᩮᨶ᩠ᨴᩣᨶᨬ᩠ᨧ ᨣᨩ᩠ᨩᩥᨲᩮ’’ᨲᩥ [ᩋᨾᩁ ᪒᪓.᪑᪖᪗] ᩉᩥ ᩋᨾᩁᨠᩮᩣᩈ ᨶᩣᨶᨲ᩠ᨳᩈᨦ᩠ᨣᩉᩮᩈᩩ.

ᩅᩦᨱᩣᨴᩦᨶᩴ ᩅᩣᨴᨶᨠᨭ᩠ᨮᨠᩩᨭᩥᩃᩣᨴᩥᨠᩴ ᨠᩮᩣᨱᩮᩣ, ᨠᩩᨱ᩠ᨿᨲᩮ ᩈᨴ᩠ᨴᩣᨿᨲᩮᨶᩮᨶᩣᨲᩥ ᨠᩮᩣᨱᩮᩣ, ᨱᩮᩣ. ‘‘ᨴᨴ᩠ᨴ’’ᩍᨲᩥ ᩈᨴ᩠ᨴᩴ ᨠᩁᩮᩣᨲᩦᨲᩥ ᨴᨴ᩠ᨴᩁᩥ, ᨴᨴ᩠ᨴᨲᩥ ᩅᩣ ᩈᨴ᩠ᨴᩅᩥᩈᩮᩈᩮᨶ ᨸᩁᩥᨱᨾᨲᩦᨲᩥ ᨴᨴ᩠ᨴᩁᩥ, ᩁᩥ. ‘‘ᨸᨭ’’ᩍᨲᩥ ᩈᨴ᩠ᨴᩴ ᨩᩉᩣᨲᩦᨲᩥ ᨸᨭᩉᩮᩣ, ᨸᨭᩴ ᩉᨶ᩠ᨲᩦᨲᩥ ᩅᩣ ᨸᨭᩉᩮᩣ. ᩉᨶ ᩉᩥᩴᩈᩣᨣᨲᩦᩈᩩ, ᨠ᩠ᩅᩥ. ᩋᨸᩁᩮ ᨾᨴ᩠ᨴᩃᩣᨴᨿᩮᩣ ᨽᩮᩁᩥᨸ᩠ᨸᨽᩮᨴᩣ ¶ . ‘‘ᨾᨴ᩠ᨴ’’ᩍᨲᩥ ᩈᨴ᩠ᨴᩴ ᩃᩣᨲᩦᨲᩥ ᨾᨴ᩠ᨴᩃᩣ, ᩃᩣ ᩌᨴᩣᨶᩮ, ᩋ. ‘‘ᨾᨶ᩠ᨴᩃᩣ’’ᨲᩥᨸᩥ ᨸᩣᨮᩮᩣ, ᨾᨶ᩠ᨴᩴ ᩈᨴ᩠ᨴᩴ ᩃᩣᨲᩦᨲᩥ ᨾᨶ᩠ᨴᩃᩣ. ᩌᨴᩥᨶᩣ ᨯᨾᩁᩩᩌᨴᨿᩮᩣᨸᩥ ᨽᩮᩁᩥᨸ᩠ᨸᨽᩮᨴᩣ ᩅᩥᨬ᩠ᨬᩮᨿ᩠ᨿᩣ.

᪑᪔᪕. ᨩᨶᨸ᩠ᨸᩥᨿᩮ ᨩᨶᩮᩉᩥ ᨸᩥᨿᩣᨿᩥᨲᨻ᩠ᨻᩮ ᩅᩥᨾᨴ᩠ᨴᩮᩣᨭ᩠ᨮᩮ ᩅᩥᩃᩮᨸᨶᨠᩩᨦ᩠ᨠᩩᨾᩣᨴᩦᨶᩴ, ᨶᩣᨶᩣᨣᨶ᩠ᨵᨴᨻ᩠ᨻᩣᨶᨬ᩠ᨧ ᩅᩥᨾᨴ᩠ᨴᨶᩮᩣᨻ᩠ᨽᩪᨲᩮ ᨸᩁᩥᨾᩃᩮᩣ ᨽᩅᩮ, ᨸᩁᩥᨾᨩ᩠ᨩᨲᩥ ᨸᩅᨲ᩠ᨲᨿᨲ᩠ᨿᩣᩈᨿᨶ᩠ᨲᩥ, ᩋ, ᨶᩮᩁᩩᨲ᩠ᨲᩮᩣ, ᨾᩃ, ᨾᩃ᩠ᩃ ᨵᩣᩁᨱᩮ ᩅᩣ. ᨸᩁᩥᨾᩃ᩠ᨿᨲᩮ ᨵᩣᩁᩦᨿᨲᩮᨲᩥ, ᨱᩮᩣ. ᩅᩥᨾᨴ᩠ᨴᨣ᩠ᨣᩉᨱᩮᨶ ᩅᩣᨸᩥᨠᩪᨸᩣᨴᩥᨶᩮᩣ [ᩅᩥᨾᨴ᩠ᨴᨣᨶ᩠ᨵᩣᨴᩥᨶᩮᩣ (ᨠ.)] ᨶᩥᩁᩣᩈᩮᩣ, ᨩᨶᨣ᩠ᨣᩉᨱᩮᨶ ᨾᨠ᩠ᨡᩥᨠᩣᨴᩥᨶᩮᩣ. ᩈᩮᩣ ᨸᩁᩥᨾᩃᩮᩣ ᨣᨶ᩠ᨵᩮᩣ ᨴᩪᩁᨣᩣᨾᩦ ᩋᨲᩥᨶᩥᩉᩣᩁᩦ ᩋᨲᩥᨴᩪᩁᨸᩣᨲᩦ ᩌᨾᩮᩣᨴᩮᩣ ᩅᩩᨧ᩠ᨧᨲᩮ, ᩌᨾᩮᩣᨴᨶ᩠ᨲᩮ ᩋᨶᩮᨶ, ᨱᩮᩣ. ᩍᨲᩮᩣ ᨸᩁᩴ ᩍᨭ᩠ᨮᨣᨶ᩠ᨵᩣᨴᨿᩮᩣ ᩅᩥᩔᩈᨴ᩠ᨴᨸᩁᩥᨿᨶ᩠ᨲᩣ ᨲᩦᩈᩩ ᩃᩥᨦ᩠ᨣᩮᩈᩩ ᩅᨲ᩠ᨲᨶ᩠ᨲᩮ.

᪑᪔᪖. ᨧᨲᩩᨠ᩠ᨠᩴ ᩍᨭ᩠ᨮᨣᨶ᩠ᨵᩮ. ᩍᨭ᩠ᨮᩮᩣ ᨣᨶ᩠ᨵᩮᩣ ᩍᨭ᩠ᨮᨣᨶ᩠ᨵᩮᩣ, ᩋᨳ ᩅᩣ ᩍᨭ᩠ᨮᩮᩣ ᨣᨶ᩠ᨵᩮᩣ ᩋᩔ ᩍᨭ᩠ᨮᨣᨶ᩠ᨵᩮᩣ. ᩈᩩᨭ᩠ᨮᩩ ᩁᨽᨶ᩠ᨲᩥ ᨲᩩᩔᨶ᩠ᨲ᩠ᨿᨶᩮᨶᩣᨲᩥ ᩈᩩᩁᨽᩥ, ᩍ. ᩈᩩᨶ᩠ᨴᩁᩮᩣ ᨣᨶ᩠ᨵᩮᩣ ᩋᩔ ᩈᩩᨣᨶ᩠ᨵᩮᩣ, ᩈᩩᨣᨶ᩠ᨵᩥ ᨧ, ᩋᨶ᩠ᨲᩔᩥᨠᩣᩁᩣᨴᩮᩈᩮᩣ.

ᨴ᩠ᩅᨿᩴ ᨴᩩᨣ᩠ᨣᨶ᩠ᨵᩮ. ᨸᩪᨲᩥ ᨣᨶ᩠ᨵᩮᩣ ᩋᩔ, ᨸᩩᨻ᩠ᨻᩮ ᩅᩥᨿ ᩍᨠᩣᩁᩣᨴᩮᩈᩮᩣ, ᨠᨾ᩠ᨾᨵᩣᩁᨿᩈᨾᩣᩈᩴ ᩋᩔᨲ᩠ᨳ᩠ᨿᨲ᩠ᨳᩮᨸᩥ ᨠᨲ᩠ᨲᩩᨾᩥᨧ᩠ᨨᨶ᩠ᨲᩥ, ᨸᨠᩕᩥᨿᩣᩃᩣᨥᩅᨲ᩠ᨳᩴ ᨻᩉᩩᨻ᩠ᨻᩦᩉᩥᨿᩮᩅ ᨶ᩠ᨿᩣᨿᩮᩣᨲᩥ. ᨴᩩᨭ᩠ᨮᩩ ᨣᨶ᩠ᨵᩮᩣ ᩋᩔᩣᨲᩥ ¶ ᨴᩩᨣ᩠ᨣᨶ᩠ᨵᩮᩣ, ᨲᩮᨶ ᩅᩩᨲ᩠ᨲᩴ ᨠᨧ᩠ᨧᩣᨿᨶᩮᨶ – ‘‘ᨠᨾ᩠ᨾᨵᩣᩁᨿᨾᨶ᩠ᨲᨲ᩠ᨳᩥᨿᩮᩉᩥ ᨻᩉᩩᨻ᩠ᨻᩦᩉᩥ ᩃᨥᩩᨲᩁᩮᩣ’’ᨲᩥ. ᩋᨬ᩠ᨬᩮ ᨲᩩ ᩃᩣᨥᩅ’ᨾᨶᩣᨴᩁᨾᩣᨶᩣ ᩍᨧ᩠ᨨᨶ᩠ᨲᩮᩅ ᨾᨶ᩠ᨲᨲ᩠ᨳᩥᨿᩴ. ᨴᩩᩅᩥᨵᩮᩣ ᩅᩣ ᩅᩣᨧ᩠ᨧᨵᨾ᩠ᨾᩮᩣ ᩃᩉᩩ ᨣᩁᩩ ᨧ, ᨲᨲᩕ ᨻᩉᩩᨻ᩠ᨻᩦᩉᩥᨶᩣ ᩃᩉᩩ, ᨠᨾ᩠ᨾᨵᩣᩁᨿᨾᨶ᩠ᨲᨲ᩠ᨳᩥᨿᩮᨶᨣᩁᩩ. ᨠᩥᨬ᩠ᨧ ᨻᩉᩩᨻ᩠ᨻᩦᩉᩥᨶᩣ ᩋᨲᩥᩈᩣᨿᨶᩣᨴ᩠ᨿᨲ᩠ᨳᩮᩣ ᨶ ᨣᨾ᩠ᨿᨲᩮᨲᩥ ᩋᩅᩔᩴ ᨲᨸ᩠ᨸᨭᩥᨸᩣᨴᨶᩣᨿ ᨠᨾ᩠ᨾᨵᩣᩁᨿᨸᩩᨻ᩠ᨻᨠᩮᩣ ᨾᨶ᩠ᨲᨲ᩠ᨳᩥᨿᩮᩅ ᨴᨭ᩠ᨮᨻ᩠ᨻᩮᩣ.

ᨴ᩠ᩅᨿᩴ ᨧᩥᨲᩣᨵᩪᨾᩣᨴᩥᨣᨶ᩠ᨵᩮ. ᩅᩥᩈ ᩅᩥᨸ᩠ᨸᨿᩮᩣᨣᩮ, ᩈᩮᩣ. ᩌᨾᩔ ᩅᩈᩣᨴᩥᩅᨲ᩠ᨳᩩᨶᩮᩣ ᨣᨶ᩠ᨵᩮᩣ ᨲᩴᨿᩮᩣᨣᩣ, ᩍ, ᨿᩴᩈᨴ᩠ᨴᩮᩣ ᨲᩔ ᨶᨸᩩᩴᩈᨠᨲ᩠ᨲᨴᩦᨸᨠᩮᩣ.

᪑᪔᪗. ᨠᩩᨦ᩠ᨠᩩᨾᩣᨴᨿᩮᩣ ᨧᨲ᩠ᨲᩣᩁᩮᩣ ᨧᨲᩩᨩ᩠ᨩᩣᨲᩥᨣᨶ᩠ᨵᩮᩣ ᨶᩣᨾ. ᨠᩩᨠ, ᩅᨠ ᩌᨴᩣᨶᩮ, ᩏᨾᩮᩣ, ᨶᩥᨣ᩠ᨣᩉᩦᨲᩣᨣᨾᩮᩣ ᨧ, ᨠᩩᨦ᩠ᨠᩩᨾᩴ, ᩃᩮᩣᩉᩥᨲᨧᨶ᩠ᨴᨶᩴ, ᨿᩴ ‘‘ᨠᩈ᩠ᨾᩦᩁᨩ’’ᨶ᩠ᨲᩥ ᩅᩩᨧ᩠ᨧᨲᩥ, ᨠᨾᩥᩔ ᩅᩣ ᨠᩩᨦ᩠ᨠᩣᨴᩮᩈᩮᩣ, ᨠᩩᨦ᩠ᨠᩩᨾᩴ. ᨿᩩ ᨾᩥᩔᨶᩮ, ᨿᩩ, ᨿᩅᨶᩴ, ᨲᩔ ᨸᩩᨸ᩠ᨹᩴ ᨿᩅᨶᨸᩩᨸ᩠ᨹᩴ, ᨴᩮᩅᨠᩩᩈᩩᨾᩴ, ᨿᩅᨶᨴᩮᩈᩮ ᨩᩣᨲᩴ ᨸᩩᨸ᩠ᨹᨶ᩠ᨲᩥ ᩅᩣ ᨿᩅᨶᨸᩩᨸ᩠ᨹᩴ. ᨿᩴ ‘‘ᩃᩅᨦ᩠ᨣ’’ᨶ᩠ᨲᩥᨸᩥ ᩅᩩᨧ᩠ᨧᨲᩥ, ᨿᩴ ᨸᩩᨸ᩠ᨹᩴ ᨶᩩᩉᩦᨸᩩᨸ᩠ᨹᩈᨾᩣᨶᩴ. ᨲᨣᩥ ᨣᨲ᩠ᨿᨲ᩠ᨳᩮᩣ ᨴᨱ᩠ᨯᨠᩮᩣ ᨵᩣᨲᩩ, ᩋᩁᩮᩣ, ᨲᨣᩁᩴ, ᨠᩩᨭᩥᩃᩴ. ᨲᩁᩩᨲᩮᩣ ᨩᩣᨲᩮᩣ ᨲᩩᩁᩩᨠ᩠ᨡᩮᩣ, ᨡᩮᩣ, ᩏᨲ᩠ᨲᨬ᩠ᨧ, ᩈᩃ᩠ᩃᨠᩦᨴᩅᩮᩣ ᩉᩥ ‘‘ᨲᩩᩁᩩᨠ᩠ᨡᩮᩣ’’ᨲᩥ ᩅᩩᨲ᩠ᨲᩮᩣ.

᪑᪔᪘. ᨸᨩ᩠ᨩᩮᨶ ᨨᩁᩈᩣᨶᩴ ᨶᩣᨾᩣᨶᩥ. ᨠᩴ ᨸᩣᨶᩦᨿᩴ ᩈᩮᩅᨲᩮᨲᩥ ᨠᩈᩣᩅᩮᩣ, ᩋᩅᩮᩣ, ᩋᨳ ᩅᩣ ᨠᩴ ᩈᩅᩣᨸᩮᨲᩦᨲᩥ ᨠᩈᩣᩅᩮᩣ ᩈᩩ ¶ ᩈᩅᨶᩮ. ᨲᩩᩅᩁᩮᩣᨸᩥ ᨠᩈᩣᨿᩮᩣᨸᩥ ᨠᩈᩣᩅᨸᩁᩥᨿᩣᨿᩮᩣ. ᨲᩥᨩ ᨶᩥᩈᩣᨶᩮ, ᨲᩮᩣ, ᨲᩥᨲ᩠ᨲᩮᩣ, ᨠᨭᩩ. ᨾᨵᩩ ᨾᩣᨵᩩᩁᩥᨿᩴ, ᨲᩴᨿᩮᩣᨣᩣ ᨾᨵᩩᩁᩮᩣ. ᩃᩩᨶᩣᨲᩥ ᨩᩊᨲ᩠ᨲᨶ᩠ᨲᩥ ᩃᩅᨱᩮᩣ, ᨿᩩ. ᩋᨾ᩠ᨻᩈᨴ᩠ᨴᩮ, ᩋᩁᩮᩣ, ᩍᨲ᩠ᨲᩴ, ᩃᨲ᩠ᨲᨬ᩠ᨧ. ᨠᨭ ᨣᨲᩥᨿᩴ, ᨱ᩠ᩅᩩ, ᩏᨲ᩠ᨲᩴ. ᩍᨾᩮ ᨨ ᩁᩈᩣ ᨶᩣᨾ ᩅᩩᨧ᩠ᨧᨶ᩠ᨲᩥ. ᨲᨻ᩠ᨻᨲᩥ ᨴᨻ᩠ᨻᩮ ᨠᩈᩣᩅᩣᨴᩥᩈᨴ᩠ᨴᩣ ᨲᩦᩈᩩ ᩃᩥᨦ᩠ᨣᩮᩈᩩ ᩅᨲ᩠ᨲᨶ᩠ᨲᩥ.

᪑᪔᪙. ᨴ᩠ᩅᨿᩴ ᨹᩮᩣᨭ᩠ᨮᨻ᩠ᨻᩮ. ᨹᩩᩈᩥᨲᨻ᩠ᨻᩮᩣ ᨹᩔᩮᩣ, ᨹᩮᩣᨭ᩠ᨮᨻ᩠ᨻᩮᩣ ᨧ, ᨲᨻ᩠ᨻᩮᩣ, ᩈᩔ ᨭᩮᩣ, ᨲᩔ ᨮᩮᩣ. ᨲᩥᨠᩴ ᩅᩥᩈᨿᩥᨾ᩠ᩉᩥ. ᩅᩥᩈᨿᩮᩣ ᩋᩔ ᨣᨿ᩠ᩉᨭ᩠ᨮᩮᨶᩣᨲ᩠ᨳᩦᨲᩥ ᩅᩥᩈᨿᩥ. ᩏᨡᨲᩥ ᨣᨧ᩠ᨨᨲᩥ ᩅᩥᩈᨿᩮᨲᩥ ᩋᨠ᩠ᨡᩴ, ᩏᩔᨲ᩠ᨲᩴ ᨴ᩠ᩅᩥᨲ᩠ᨲᨬ᩠ᨧ, ᨶᨲ᩠ᨳᩥ ᨡᩴ ᩅᩮᨴᨶᩣ ᩑᨲ᩠ᨳᩣᨲᩥ ᩅᩣ ᩋᨠ᩠ᨡᩴ, ᨶ ᩉᩥ ᩈᩩᨡᩅᩮᨴᨶᩣᨴᨿᩮᩣ ᩈᨾ᩠ᨸᨿᩮᩣᨣᩅᩈᩮᨶ ᨸᨬ᩠ᨧᩈᩩ ᩍᨶ᩠ᨴᩕᩥᨿᩮᩈᩩ ᩏᨸ᩠ᨸᨩ᩠ᨩᨶ᩠ᨲᩥ, ᨩᩅᨶᩣᨴᩦᩈᩩ ᩑᩅ ᨸᨶ ᩏᨸ᩠ᨸᨩ᩠ᨩᨶ᩠ᨲᩦᨲᩥ ᨲᨳᩣ ᩅᩩᨲ᩠ᨲᩴ, ᨾᨶᩥᨶ᩠ᨴᩕᩥᨿᩮ ᨲᩪᨸᨧᩣᩁᩣ [ᨾᨶᩥᨶ᩠ᨴᩕᩥᨿᩮᩈᩩᨸᨧᩣᩁᩣ (ᨠ.)] ᩋᨠ᩠ᨡᩴ. ᩍᨶ᩠ᨴᩮᩣ ᩋᨲ᩠ᨲᩣ, ᨲᩔ ᩃᩥᨦ᩠ᨣᩴ ᩍᨶ᩠ᨴᩕᩥᨿᩴ, ᩍᨿᩮᩣ. ᨶᩣ’ᨶᨶ᩠ᨲᩁᩮᨶ ᨸᨿᩮᩣᨩᨠᩴ ᨧᨠ᩠ᨡᩣᨴᨿᩮᩣ ᨻ᩠ᨿᩣᨸᩣᩁᨿᨶ᩠ᨲᩮ, ᨲᩈ᩠ᨾᩣ ᩋᨲ᩠ᨳᩥ ᩋᨲ᩠ᨲᩣ ᨧᨠ᩠ᨡᩣᨴᩦᨶᩴ ᨸᨿᩮᩣᨩᨠᩮᩣᨲᩥ ᨧᨠ᩠ᨡᩣᨴᩥᨠᩴ ᩃᩥᨦ᩠ᨣᨾᨲ᩠ᨲᨶᩮᩣ ᨽᩅᨲᩦᨲᩥ ᨶᩥᨠᩣᨿᨶ᩠ᨲᩁᩥᨠᩣ. ᩈᨿᩴ ᨲᩥᨠ᩠ᨡᨾᨶ᩠ᨴᩣᨴᩥᨽᩣᩅᩮ ᨧᨠ᩠ᨡᩩᩅᩥᨬ᩠ᨬᩣᨱᩣᨴᩦᨶᩴ ᨲᩥᨠ᩠ᨡᨾᨶ᩠ᨴᩣᨴᩥᨽᩣᩅᩈᨾ᩠ᨽᩅᨲᩮᩣ ᨲᩮᩈᩩ ᩍᨶ᩠ᨴᨲᩥ ᨸᩁᨾᩥᩔᩁᩥᨿᩴ ᨠᩁᩮᩣᨲᩦᨲᩥ ᩅᩣ ᩍᨶ᩠ᨴᩕᩥᨿᩴ.

ᨨᨠ᩠ᨠᩴ ᨶᨿᨶᩮ. ᨶᩮᨲᩥ ᩋᨲ᩠ᨲᨶᩮᩣ ᨶᩥᩔᩥᨲᩴ ᨸᩩᨣ᩠ᨣᩃᨶ᩠ᨲᩥ ᨶᨿᨶᩴ, ᨿᩩ. ᩋᩈᩩ ᨻ᩠ᨿᩣᨸᨶᩮ, ᩋᩈᨲᩥ ᩅᩥᩈᨿᩮᩈᩩ ᨻ᩠ᨿᩣᨸᩦ ᩅᩥᨿ ᨽᩅᨲᩦᨲᩥ ᩋᨠ᩠ᨡᩥ, ᩈᩔ ᨠᩮᩣ, ᩋᨳ ᩅᩣ ᩋᨠ᩠ᨡ ᨻ᩠ᨿᩣᨸᨶᨴᩔᨶᩮᩈᩩ, ᩋᨠ᩠ᨡᨲᩥ ᩅᩥᩈᨿᩮᩈᩩ ᨻ᩠ᨿᩣᨸᩦᨽᩅᨲᩥ, ᩋᨠ᩠ᨡᨲᩥ ᩅᩣ ᨸᩔᨲᩥ ᩑᨲᩮᨶᩣᨲᩥ ¶ ᩋᨠ᩠ᨡᩥ. ᨶᩮᨲᩦᨲᩥ ᨶᩮᨲ᩠ᨲᩴ. ᩃᩮᩣᨧᨲᩥ ᨸᩔᨲᩥ ᩑᨲᩮᨶᩣᨲᩥ ᩃᩮᩣᨧᨶᩴ. ᩋᨧ᩠ᨨ ᨴᩔᨶᨻ᩠ᨿᩣᨸᨶᩮᩈᩩ, ᩍ, ᩋᨧ᩠ᨨᩥ. ᨧᨠ᩠ᨡᨲᩥ ᩋᩔᩣᨴᩮᨲᩥ ᩁᩪᨸᨶ᩠ᨲᩥ ᨧᨠ᩠ᨡᩩ, ᩏ, ᨧᨠ᩠ᨡᨲᩥ ᨸᩔᨲᩦᨲᩥ ᩅᩣ ᨧᨠ᩠ᨡᩩ.

᪑᪕᪐. ᨸᨬ᩠ᨧᨠᩴ ᩈᩮᩣᨲᩮ. ᩈᩩᨱᩣᨲᩥ ᩑᨲᩮᨶᩣᨲᩥ ᩈᩮᩣᨲᩴ. ᩈᨴ᩠ᨴᩮᩣ ᨣᨿ᩠ᩉᨲᩮ ᩋᨶᩮᨶᩣᨲᩥ ᩈᨴ᩠ᨴᨣ᩠ᨣᩉᩮᩣ. ᨠᩁ ᨠᩁᨱᩮ, ᨱᩮᩣ, ᨠᨱ᩠ᨱᩮᩣ, ᨠᨱ᩠ᨱᨲᩥ ᩈᩩᨱᩣᨲᩥ ᩑᨲᩮᨶᩣᨲᩥ ᩅᩣ ᨠᨱ᩠ᨱᩮᩣ, ᨠᨱ᩠ᨱ ᩈᩅᨶᩮ. ᩈᩩᨱᩣᨲᩥ ᨿᩮᨶᩣᨲᩥ ᩈᩅᨶᩴ, ᩈᩩᨲᩥ ᨧ, ᨿᩩ,ᨲᩥ ᨧ.

ᨧᨲᩩᨠ᩠ᨠᩴ ᨥᩣᨶᩮ. ᨶᩈᨶ᩠ᨲᩥ ᩑᨲᩣᨿᩣᨲᩥ ᨶᨲ᩠ᨳᩩ, ᨳᩩ, ᩌ, ᨶᩣᩈᩣ. ᨱ᩠ᩅᩩ, ᩋᨠ ᨧ ᩍᨠᩣᩁᩮᩣ ᨧ ᨶᩣᩈᩥᨠᩣ. ᨥᩣ ᨣᨶ᩠ᨵᩮᩣᨸᩣᨴᩣᨶᩮ, ᨥᩣᨿᨲᩥ ᨣᨶ᩠ᨵᩮᩣᨸᩣᨴᩣᨶᩴ ᨠᩁᩮᩣᨲᩦᨲᩥ ᨥᩣᨶᩴ, ᨿᩩ, ᨥᩣᨿᨶ᩠ᨲ᩠ᨿᨶᩮᨶᩣᨲᩥ ᩅᩣ ᨥᩣᨶᩴ.

ᨴ᩠ᩅᨿᩴ ᨩᩥᩅ᩠ᩉᩣᨿᩴ. ᨩᩦᩅᨲᩥ ᩑᨲᩣᨿᩣᨲᩥ ᨩᩥᩅ᩠ᩉᩣ, ᩉᩮᩣ, ᨩᩦᩅ ᨸᩣᨱᨵᩣᩁᨱᩮ. ᨩᩦᩅᩥᨲᨶᩥᨾᩥᨲ᩠ᨲᩴ ᩁᩈᩮᩣ ᨩᩦᩅᩥᨲᩴ ᨶᩣᨾ, ᨲᩴ ᩋᩅ᩠ᩉᩣᨿᨲᩦᨲᩥ ᩅᩣ ᨩᩥᩅ᩠ᩉᩣ, ᩅᨱ᩠ᨱᩃᩮᩣᨸᩮᩣ. ᩁᩈᨶ᩠ᨲᩥ ᩑᨲᩣᨿᩣᨲᩥ ᩁᩈᨶᩣ, ᩁᩈ ᩋᩔᩣᨴᨶᩮ, ᩁᩈᩴ ᨩᩣᨶᩣᨲᩦᨲᩥ ᩅᩣ ᩁᩈᨶᩣ, ᨬᩣᩔ ᨶᩣ, ᨶᩦ ᨶᨿᩮ ᩅᩣ, ᩋ.

᪑᪕᪑. ᨸᨩ᩠ᨩᩴ ᩈᩁᩦᩁᩮ. ᩈᩁᨲᩥ ᨣᨧ᩠ᨨᨲᩥ, ᩈᩁᨶ᩠ᨲᩥ ᩅᩣ ᨲᩴ ᩉᩥᩴᩈᨶ᩠ᨲᩦᨲᩥ ᩈᩁᩦᩁᩴ, ᩎᩁᩮᩣ. ᩅᨸ ᨻᩦᨩᩈᨶ᩠ᨲᩣᨶᩮ. ᩅᨸᨲᩥ ᨠᩩᩈᩃᩣᨠᩩᩈᩃᨻᩦᨩᨾᩮᨲ᩠ᨳᩣᨲᩥ ᩅᨸᩩ, ᩏ. ᨣᨧ᩠ᨨᨲᩥ, ᨣᨱ᩠ᩉᩣᨲᩥ ᩅᩣ ᨠᩩᩈᩃᩣᨠᩩᩈᩃᨾᩮᨲᩮᨶᩣᨲᩥ ¶ ᨣᨲ᩠ᨲᩴ, ᨣᨾᩩ ᨣᨲᩥᨿᩴ, ᨣᩉ ᩏᨸᩣᨴᩣᨶᩮ ᩅᩣ. ‘‘ᩋᨲ᩠ᨲᩣ’’ᨲᩥ ᩋᨽᩥᨵᩣᨶᩴ, ᨻᩩᨴ᩠ᨵᩥ ᨧ ᨽᩅᨶ᩠ᨲᩥ ᩑᨲᩈ᩠ᨾᩣᨲᩥ ᩋᨲ᩠ᨲᨽᩣᩅᩮᩣ. ᩅᩩᨱᩮᩣᨲᩥ ᩈᩴᩅᩁᨲᩥ ᩑᨲ᩠ᨳᩣᨲᩥ ᨻᩮᩣᨶ᩠ᨴᩥ, ᩅᩩ ᩈᩴᩅᩁᨱᩮ, ᨴᩥ, ᨶᩥᨣ᩠ᨣᩉᩦᨲᩣᨣᨾᩮᩣ. ᩅᩥᩅᩥᨵᩴ ᨣᨱ᩠ᩉᩣᨲᩥ ᩑᨲ᩠ᨳᩣᨲᩥ ᩅᩥᨣ᩠ᨣᩉᩮᩣ. ᨴᩥᩉ ᩏᨸᨧᨿᩮ, ᨴᩥᩉᨲᩥ ᩅᨯ᩠ᨰᨲᩥ ᩑᨲ᩠ᨳ ᨠᩩᩈᩃᩣᨠᩩᩈᩃᨶ᩠ᨲᩥ ᨴᩮᩉᩴ. ᩋᨿᩴ ᨴᩮᩉᩈᨴ᩠ᨴᩮᩣ ᨸᩩᩁᩥᩈᩮ ᨸᩩᩃ᩠ᩃᩥᨦ᩠ᨣᩮᩅᨲ᩠ᨲᨲᩥ. ᨠᩩᨧ᩠ᨨᩥᨲᩣᨶᩴ ᩌᨿᩮᩣ ᩏᨸ᩠ᨸᨲ᩠ᨲᩥᨭ᩠ᨮᩣᨶᨶ᩠ᨲᩥ ᨠᩣᨿᩮᩣ. ᨲᨶᩩ ᩅᩥᨲ᩠ᨳᩣᩁᩮ, ᩏ, ᨲᨶᩩ, ᨲᨶᩩᩈᨴ᩠ᨴᩮᩣᨿᩴ ᩍᨲ᩠ᨳᩥᨿᩴ. ᩑᨲ᩠ᨳᩣᨸᩥ ᩅᩣᩈᨴ᩠ᨴᩮᩣ ᩈᨾ᩠ᨻᨶ᩠ᨵᩥᨲᨻ᩠ᨻᩮᩣ. ‘‘ᩋᨦ᩠ᨣᩮᨶᩣᨦ᩠ᨣᩴ ᨲᨶᩩ ᨧ ᨲᨶᩩᨶᩣ ᨣᩣᩊ᩠ᩉᨲᨲ᩠ᨲᩮᨶ ᨲᨲ᩠ᨲ’’ᨶ᩠ᨲᩥ [ᩏᨲ᩠ᨲᩁᨾᩮᨥ ᪔᪒] ᩉᩥ ᨾᩮᨥᨴᩪᨲᩮ ᩅᩩᨲ᩠ᨲᩴ. ᨠᩊᩮ ᩁᩮᨲᩈᩥ ᩅᩁᩴ ᨠᩊᩮᩅᩁᩴ, ᩋᩃᩩᨲ᩠ᨲᩈᨾᩣᩈᩮᩣᨿᩴ.

᪑᪕᪒-᪑᪕᪔. ᨨᨠ᩠ᨠᩴ ᨧᩥᨲ᩠ᨲᩮ. ᨧᩥᨶ᩠ᨲᩮᨲᩦᨲᩥ ᨧᩥᨲ᩠ᨲᩴ. ᨧᩮᨲᩮᩣ ᨧ, ᨶᩃᩮᩣᨸᩮᩣ. ᨾᨶᨲᩥ ᨩᩣᨶᩣᨲᩦᨲᩥ ᨾᨶᩮᩣ. ᩅᩥᨩᩣᨶᩣᨲᩦᨲᩥ ᩅᩥᨬ᩠ᨬᩣᨱᩴ, ᨿᩩ. ᩉᩁᨲᩥ ᩋᨲ᩠ᨲᨶᩮᩣ ᩌᨵᩣᩁᨶ᩠ᨲᩥ ᩉᨴᨿᩴ, ᨿᩮᩣ, ᩁᩔ ᨴᩮᩣ ᨧ. ᨾᨶᩮᩣ ᩑᩅ ᨾᩣᨶᩈᩴ, ᩈᨠᨲ᩠ᨳᩮ ᩈᨱ.

ᨧᩩᨴ᩠ᨴᩈ ᨻᩩᨴ᩠ᨵᩣᨡ᩠ᨿᩔ ᨣᩩᨱᩔ ᨶᩣᨾᩣᨶᩥ. ᨫᩣᨿᨲᩦᨲᩥ ᨵᩦ, ᨫᩮ ᨧᩥᨶ᩠ᨲᩣᨿᩴ, ᨫᩔ ᨵᩮᩣ, ᨶᨴᩣᨴᩥ, ᨵᩦ, ᨵᩣᩁᩮᨲᩦᨲᩥ ᩅᩣ ᨵᩦ, ᨠ᩠ᩅᩥ, ᨶᨴᩣᨴᩥ, ᨵᩦ ¶ , ᩈᨦ᩠ᨡᩣᩁᩮᩈᩩ ᨵᩦᨠᩣᩁᩮᩣ ᨩᩣᨿᨲᩥ ᩑᨲᩣᨿᩣᨲᩥ ᩅᩣ ᨵᩦ, ᨶᨴᩣᨴᩥ. ᨸᨬ᩠ᨬᩣᨿᨲᩮ ᩑᨲᩣᨿᩣᨲᩥ ᨸᨬ᩠ᨬᩣ, ᩋ. ᨻᩩᨩ᩠ᨫᨲᩮ ᨲᩣᨿᩣᨲᩥ ᨻᩩᨴ᩠ᨵᩥ,ᨲᩥ. ᨾᩮᨵ ᩉᩥᩴ ᩈᩣᩈᨦ᩠ᨣᨾᩮᩈᩩ, ᨠᩁᨱᩮ ᩋ, ᨾᩥ ᩉᩥᩴᩈᩣᨿᩴ ᩅᩣ, ᨵᩮᩣ, ᨾᩮᨵᩣ. ᨾᨶᨲᩥ ᨩᩣᨶᩣᨲᩦᨲᩥ ᨾᨲᩥ, ᨾᩩᨲᩥ ᨧ, ᩏᨲ᩠ᨲᩴ, ᨾᩩᨶᩣᨲᩦᨲᩥ ᩅᩣ ᨾᩩᨲᩥ, ᨾᩩᨶ ᨬᩣᨱᩮ,ᨲᩥ, ᨾᩩᨲᩥ. ᨽᩪ ᩈᨲ᩠ᨲᩣᨿᩴ, ᩁᩥ, ᨶᨴᩣᨴᩥ, ᨽᩪᩁᩦ, ᨽᩪᩈᨦ᩠ᨡᩣᨲᩮ ᩋᨲ᩠ᨳᩮ ᩁᨾᨲᩦᨲᩥ ᩅᩣ ᨽᩪᩁᩦ, ᨠ᩠ᩅᩥ, ᨶᨴᩣᨴᩥ. ᨾᨶᨲᩥ ᨩᩣᨶᩣᨲᩦᨲᩥ ᨾᨶ᩠ᨲᩣ, ᩋᨶ᩠ᨲ, ᩌ. ᩅᩥᨴᨲᩥ ᨩᩣᨶᩣᨲᩦᨲᩥ ᩅᩥᨩ᩠ᨩᩣ, ᨸᨻ᩠ᨻᨩ᩠ᨩᩣᨴᩥᨶᩣ ᩈᩥᨴ᩠ᨵᩴ. ᨿᩩ ᨾᩥᩔᨶᩮ. ᨿᨾᨲᩥ ᨾᩥᩔᩦᨽᩅᨲᩥ ᨬᩮᨿ᩠ᨿᩮᩈᩪᨲᩥ ᨿᩮᩣᨶᩥ. ᨸᨭᩥᨾᩩᨡᩴ ᨽᨶ᩠ᨲᩥ ᩏᨸᨭ᩠ᨮᩉᨶ᩠ᨲᩥ ᨬᩮᨿ᩠ᨿᩣ ᩑᨲᩮᨶᩣᨲᩥ ᨸᨭᩥᨽᩣᨶᩴ, ᨿᩩ. ᨶ ᨾᩩᨿ᩠ᩉᨲᩥ ᩑᨲᩮᨶᩣᨲᩥ ᩋᨾᩮᩣᩉᩮᩣ. ᩅᩦᨾᩴᩈᩣ ᩅᩥᨧᨿᩮᩣ ᩈᨾᩩᨸᩮᨠ᩠ᨡᩣ ᩏᨸᩃᨴ᩠ᨵᩥ ᨸᨭᩥᨸᨲ᩠ᨲᩥ ᩏᨲ᩠ᨲᩥᨧᩮᨲᨶᩣᨴᩦᨶᩥᨸᩥ ᨻᩩᨴ᩠ᨵᩥᨶᩣᨾᩣᨶᩥ.

ᩅᩥᨸᩔᨶᩣᨴᨿᩮᩣ ᨶᩮᨸᨠ᩠ᨠᨶ᩠ᨲᩣ ᨸᩁᩥᨿᩣᨿᩣ ᨸᨬ᩠ᨬᩣᨽᩮᨴᩣ ᨸᨬ᩠ᨬᩣᩅᩥᩈᩮᩈᩣ. ᨲᨲ᩠ᨳ ᩅᩥᩅᩥᨵᩴ ᩋᨶᩥᨧ᩠ᨧᩣᨴᩥᨠᩴ ᩈᨦ᩠ᨡᩣᩁᩮᩈᩩ ᨸᩔᨲᩦᨲᩥ ᩅᩥᨸᩔᨶᩣ, ᨿᩩ. ᩈᨾ᩠ᨾᩣᨴᩔᨶᩃᨠ᩠ᨡᨱᩣ ᩈᨾ᩠ᨾᩣᨴᩥᨭ᩠ᨮᩥ, ᩈᩣ ᨴᩩᩅᩥᨵᩣ ᩃᩮᩣᨠᩥᨿᩃᩮᩣᨠᩩᨲ᩠ᨲᩁᩅᩈᩮᨶ. ᨲᨲ᩠ᨳ ᨸᩩᩁᩥᨾᩣ ᨨᨻ᩠ᨻᩥᩈᩩᨴ᩠ᨵᩥᨸ᩠ᨸᩅᨲ᩠ᨲᩥᨠᩣᩃᩮ, ᩍᨲᩁᩣ ᨬᩣᨱᨴᩔᨶᩅᩥᩈᩩᨴ᩠ᨵᩥᨠᩣᩃᩮ ᩃᨻ᩠ᨽᨲᩥ. ᩌᨴᩥᨸᩁᩥᨿᩣᨿᩮᨶ ᨸᨽᩩᨲᩥᨶᩣ ᩋᨶᨬ᩠ᨬᩣᨲᨬ᩠ᨬᩔᩣᨾᩦᨲᩥᨶ᩠ᨴᩕᩥᨿᩣᨴᨿᩮᩣ ᨣᩉᩥᨲᩣ. ᨲᨲ᩠ᨳ ᨲᨲ᩠ᨳ ᨠᩣᩁᩥᨿᩮᩈᩩ ᩅᩥᨧᩣᩁᨱᩣ. ᨾᩣᨶ ᩅᩦᨾᩴᩈᩣᨿᩴ, ᩈᩮᩣ, ᨧᩥᨲ᩠ᨲᩣᨽᩮᩣᨣᩣᨴᩥ. ᩅᩥᨧᩣᩁᨿᨲᩮ ᩑᨲᩣᨿᩣᨲᩥ ᩅᩥᨧᩣᩁᨱᩣ, ᨧᩁ ᩈᨬ᩠ᨧᨿᩮ, ᨧᩩᩁᩣᨴᩥᨣᨱᩮᩣ, ᨿᩩ. ᩈᨾ᩠ᨸᨩᩣᨶᩣᨲᩦᨲᩥ ᩈᨾ᩠ᨸᨩᩣᨶᩮᩣ, ᨸᩩᨣ᩠ᨣᩃᩮᩣ, ᨵᨾ᩠ᨾᩈᨾᩪᩉᩮᩣ ᩅᩣ, ᨬᩣᩔ ᨩᩣ, ᨲᩔ ᨽᩣᩅᩮᩣ ᩈᨾ᩠ᨸᨩᨬ᩠ᨬᩴ, ᨶ᩠ᨿᩔ ᨬᩮᩣ, ᨴ᩠ᩅᩥᨲ᩠ᨲᩴ, ᨲᩴ ᩈᩣᨲ᩠ᨳᨠᩈᨾ᩠ᨸᨩᨬ᩠ᨬᩣᨴᩥᩅᩈᩮᨶ ᨧᨲᩩᨻ᩠ᨻᩥᨵᩴ. ᨶᩥᩔᩮᩈᨲᩮᩣ ᨸᩣᨧᩮᨲᩥ ᨠᩩᩈᩃᨵᨾ᩠ᨾᩮᨲᩥ ᨶᩥᨸᨠᩮᩣ, ᨬᩣᨱᩦ ᨸᩩᨣ᩠ᨣᩃᩮᩣ, ᨲᩔ ᨽᩣᩅᩮᩣ ᨶᩮᨸᨠ᩠ᨠᩴ. ᨴ᩠ᩅᨿᩴ ᩅᩮᨴᨶᩣᨿᩴ. ᩅᩮᨴᨿᨲᩦᨲᩥ ᩅᩮᨴᨿᩥᨲᩴ, ᩅᩥᨴ ᩋᨶᩩᨽᩅᨶᩮ, ᨧᩩᩁᩣᨴᩥᨲ᩠ᨲᩣ ᨱᨿᩮᩣ, ᨲᩮᩣ, ᩍᨠᩣᩁᩣᨣᨾᩮᩣ ᨧ. ᩅᩮᨴᨿᨲᩦᨲᩥ ᩅᩮᨴᨶᩣ, ᨿᩩ.

᪑᪕᪕. ᨸᨬ᩠ᨧᨠᩴ ¶ ᩅᩥᨲᨠ᩠ᨠᩮ. ᨲᨠ᩠ᨠ ᩅᩥᨲᨠ᩠ᨠᩮ. ᨲᨠ᩠ᨠᩮᨲᩥ ᩈᨾ᩠ᨸᨿᩩᨲ᩠ᨲᨵᨾ᩠ᨾᩮ ᩌᩁᨾ᩠ᨾᨱᩴ ᩋᨽᩥᨶᩥᩁᩮᩣᨸᩮᨲᩦᨲᩥ ᨲᨠ᩠ᨠᩮᩣ. ᩅᩥᨲᨠ᩠ᨠᩮᩣᨲᩥ ᩏᨸᩈᨣ᩠ᨣᨾᨲ᩠ᨲᨾᩮᩅ ᩅᩥᩈᩮᩈᩮᩣ. ᩈᨦ᩠ᨠᨸ᩠ᨸᨶ᩠ᨲᩥ ᨸᨽᩅᨶ᩠ᨲ᩠ᨿᨶᩮᨶᩣᨲᩥ ᩈᨦ᩠ᨠᨸ᩠ᨸᩮᩣ, ᨱᩮᩣ, ᨠᨸ᩠ᨸ ᩅᩥᨲᨠ᩠ᨠᩮ, ᨠᨸ᩠ᨸ ᩈᩣᨾᨲ᩠ᨳᩥᨿᩮ ᩅᩣ, ᨽᩪᩅᩣᨴᩥ, ᩈᨦ᩠ᨠᨸ᩠ᨸᨿᨶ᩠ᨲᩥ ᨸᨽᩅᨶ᩠ᨲ᩠ᨿᨶᩮᨶᩣᨲᩥ ᩅᩣ ᩈᨦ᩠ᨠᨸ᩠ᨸᩮᩣ, ᨠᨸ᩠ᨸ ᩅᩥᨲᨠ᩠ᨠᩮ, ᨧᩩᩁᩣᨴᩥ. ᩋᨸ ᨸᩣᨸᩩᨱᨶᩮ, ᩋᨸ᩠ᨸᩮᨲᩥ ᩈᨾ᩠ᨸᨿᩩᨲ᩠ᨲᨵᨾ᩠ᨾᩮ ᨸᩣᨸᩮᨲᩥ ᩌᩁᨾ᩠ᨾᨱᨶ᩠ᨲᩥ ᩋᨸ᩠ᨸᨶᩣ, ᨿᩩ, ᩌ. ᩐᩉ ᩅᩥᨲᨠ᩠ᨠᩮ. ᩐᩉᨶ᩠ᨲ᩠ᨿᨶᩮᨶᩣᨲᩥ ᩐᩉᩮᩣ. ᨲᨠ᩠ᨠᩐᩉᩈᨴ᩠ᨴᩣ ᨧᩮᨲ᩠ᨳ ᩋᨩ᩠ᨫᩣᩉᩣᩁᩅᩣᨧᨠᩣᨸᩥ ᨽᩅᨶ᩠ᨲᩥ, ᩋᨩ᩠ᨫᩣᩉᩣᩁᩴ ᨶᩣᨾ ᩐᨶᨸᩪᩁᨱᨲ᩠ᨳᨾᨵᩥᨠᨸ᩠ᨸᨽᩮᨴᩣᩉᩁᨱᩴ [ᨾᨵᩥᨠᩮᩣᨸᩣᨴᩣᨶᩴ (ᨧᩥᨶ᩠ᨲᩣᨾᨱᩥᨭᩦᨠᩣ)]. ‘‘ᩋᨩ᩠ᨫᩣᩉᩣᩁᩮᩣ ᨲᨠ᩠ᨠ ᩐᩉᩣ’’ᨲᩥ [ᩋᨾᩁ ᪕.᪓] ᩉᩥ ᩋᨾᩁᨠᩮᩣᩈᩮ ᩅᩩᨲ᩠ᨲᩴ. ᨴ᩠ᩅᨿᩴ ᨩᩦᩅᩥᨲᩥᨶ᩠ᨴᩕᩥᨿᩮ. ᩋᨿᩍᨲᩥ ᨣᨾᨶᨲ᩠ᨳᩮᩣ ᨴᨱ᩠ᨯᨠᩮᩣ ᨵᩣᨲᩩ. ᩋᨿᨲᩥ ᩋᨴ᩠ᨵᩣᨶᩴ ᨣᨧ᩠ᨨᨲᩥ ᨿᩮᨶᩣᨲᩥ ᩌᨿᩩ, ᨱᩩ, ᩑᨲᩥ ᩑᨲᩮᨶᩣᨲᩥ ᩅᩣ ᩌᨿᩩ, ᩍ ᨣᨲᩥᨾ᩠ᩉᩥ, ᨱᩩ, ᩍᩔᩮ, ᩑ ᩋᨿ. ᨩᩦᩅᨶ᩠ᨲᩥ ᩋᨶᩮᨶᩣᨲᩥ ᨩᩦᩅᩥᨲᩴ, ᨩᩦᩅ ᨸᩣᨱᨵᩣᩁᨱᩮ.

ᨧᨲᩩᨠ᩠ᨠᩴ ᩈᨾᩣᨵᩥᨾ᩠ᩉᩥ. ᨶᩣᨶᩣᩃᨾ᩠ᨻᨱᩅᩥᩈᩣᩁᨱᩣᨽᩣᩅᨲᩮᩣ ᩑᨠᩴ ᩋᨣ᩠ᨣᩴ ᩌᩁᨾ᩠ᨾᨱᨾᩮᨲᩔᩣᨲᩥ ᩑᨠᨣ᩠ᨣᩴ, ᨧᩥᨲ᩠ᨲᩴ, ‘‘ᩋᨣ᩠ᨣᩈᨴ᩠ᨴᩮᩣ ᨧᩮᨲ᩠ᨳ ᩌᩃᨾ᩠ᨻᨱᩅᩣᨧᨠᩮᩣ’’ᨲᩥ ᩉᩥ ᩈᨴ᩠ᨵᨾ᩠ᨾᨭᩦᨠᩣᨿᩴ ᩅᩩᨲ᩠ᨲᩴ, ᨲᩔ ᨽᩣᩅᩮᩣ ᩑᨠᨣ᩠ᨣᨲᩣ, ᩑᨠᩴ ᩅᩣ ᩌᩁᨾ᩠ᨾᨱᩴ ᩋᨩᨲᩥ ᨣᨧ᩠ᨨᨲᩦᨲᩥ ᩑᨠᨣ᩠ᨣᩴ, ᨲᩔ ᨽᩣᩅᩮᩣ ᩑᨠᨣ᩠ᨣᨲᩣ. ᨠᩣᨾᨧ᩠ᨨᨶ᩠ᨴᩴ ᩈᨾᩮᨲᩦᨲᩥ ᩈᨾᨳᩮᩣ, ᨳᩮᩣ, ᩈᨾᩩ ᩏᨸᩈᨾᩮ, ‘‘ᩈᨾᩣᨵᩥ ᨠᩣᨾᨧ᩠ᨨᨶ᩠ᨴᩔ ᨸᨭᩥᨸᨠ᩠ᨡᩮᩣ’’ᨲᩥ [ᨸᩣᩁᩣ. ᩋᨭ᩠ᨮ. ᪑.᪑᪑; ᨵ. ᩈ. ᩋᨭ᩠ᨮ. ᪑᪖᪐] ᩉᩥ ᩅᩩᨲ᩠ᨲᩴ. ᩅᩥᨠ᩠ᨡᩥᨸᨶᩴ ᨶᩣᨶᩣᩁᨾ᩠ᨾᨱᨸᩮᩁᨱᩴ ᩅᩥᨠ᩠ᨡᩮᨸᩮᩣ, ᩈᩮᩣ ᨶᨲ᩠ᨳᩥ ᩑᨲ᩠ᨳᩣᨲᩥ ᩋᩅᩥᨠ᩠ᨡᩮᨸᩮᩣ. ᩑᨠᩣᩁᨾ᩠ᨾᨱᩮ ᩈᩩᨭ᩠ᨮᩩ ᩌᨵᩣᨶᩴ ¶ ᩈᨾᩣᨵᩥ, ᩈᨬ᩠ᨬᩣᨿᨾᩥ, ᨶᩣᨶᩣᩃᨾ᩠ᨻᨱᩅᩥᨠ᩠ᨡᩮᨸᩅᩈᨸ᩠ᨸᩅᨲ᩠ᨲᩴ ᩋᨵᩥᩈᨦ᩠ᨡᩣᨲᩴ ᨧᩥᨲ᩠ᨲᨻ᩠ᨿᨵᩴ ᩈᨾᩮᨲᩦᨲᩥ ᩅᩣ ᩈᨾᩣᨵᩥ, ᨶᩮᩁᩩᨲ᩠ᨲᩮᩣ.

᪑᪕᪖. ᨸᨩ᩠ᨩᩮᨶ ᩅᩦᩁᩥᨿᩔ ᨶᩣᨾᩣᨶᩥ. ᩏ ᨴᩩᨠ᩠ᨡᩃᩣᨽᩴ, ᩏᨴ᩠ᨵᩴ ᩅᩣ ᩈᩉᨲᩥ ᨡᨾᨲᩦᨲᩥ ᩏᩔᩣᩉᩮᩣ, ᨱᩮᩣ. ᩌ ᨽᩩᩈᩮᩣ ᨠᩣᨿᩴ, ᨧᩥᨲ᩠ᨲᨬ᩠ᨧ ᨲᩣᨸᩮᨲᩦᨲᩥ ᩌᨲᨸ᩠ᨸᩮᩣ [ᩌᨲᩣᨸᩮᩣ (?) ᩋᨽᩥᨵᩣᨶᨸ᩠ᨸᨴᩦᨸᩥᨠᩣᨭᩦᨠᩣ ᪑᪑᪓᪕ ᨣᩣᨳᩣᨿᩴ ᨸᩔᩥᨲᨻ᩠ᨻᩴ], ᨲᨸ ᩈᨶ᩠ᨲᩣᨸᩮ. ᩃᩦᨶᩴ ᨧᩥᨲ᩠ᨲᩴ ᨸᨣ᩠ᨣᨱ᩠ᩉᩣᨲᩥ ᩏᨠ᩠ᨡᩥᨸᨲᩦᨲᩥ ᨸᨣ᩠ᨣᩉᩮᩣ. ᩋᨲ᩠ᨲᨶᩮᩣ ᨶᩥᩔᨿᩴ ᨸᩁᨾᨲ᩠ᨳᩴ ᨣᨱ᩠ᩉᩣᨸᩮᨲᩦᨲᩥ ᩅᩣ ᨸᨣ᩠ᨣᩉᩮᩣ. ‘‘ᨸᩈᨴ᩠ᨴᩮᩣ ᨸᩁᨾᨲ᩠ᨳᩮᨸᩦ’’ᨲᩥ ᩉᩥ ᩑᨠᨠ᩠ᨡᩁᨠᩮᩣᩈᩮ ᩅᩩᨲ᩠ᨲᩴ. ᩅᩣᨿᨾᨶ᩠ᨲᩥ ᨿᩮᨶᩣᨲᩥ ᩅᩣᨿᩣᨾᩮᩣ, ᩅᩣᨿᨾ ᩏᩔᩣᩉᨶᩮ, ᩋᨳ ᩅᩣ ᩅᨿ ᨣᨾᨶᨲ᩠ᨳᩮᩣ ᨴᨱ᩠ᨯᨠᩮᩣ ᨵᩣᨲᩩ, ᩅᨿᨲᩥ ᩈᨻ᩠ᨻᨠᩣᩃᨶ᩠ᨲᩥ ᩅᩣᨿᩣᨾᩮᩣ, ᩋᨾᩮᩣ, ᩅᩣᨿᩮᩣ ᩅᩥᨿ ᩈᨴᩣ ᩋᨾᨲᩥ ᨣᨧ᩠ᨨᨲᩦᨲᩥ ᩅᩣ ᩅᩣᨿᩣᨾᩮᩣ. ᨸᩁᩴ ᨸᩁᩴ ᨮᩣᨶᩴ ᩋᨠ᩠ᨠᨾᨲᩦᨲᩥ ᨸᩁᨠ᩠ᨠᨾᩮᩣ, ᨸᩁᩴ ᨸᨧ᩠ᨧᨶᩦᨠᨽᩪᨲᩴ ᨠᩮᩣᩈᨩ᩠ᨩᩴ ᩋᨠ᩠ᨠᨾᨲᩦᨲᩥ ᩅᩣ ᨸᩁᨠ᩠ᨠᨾᩮᩣ. ᨸᨴᩉᨲᩥ ᨿᩮᨶᩣᨲᩥ ᨸᨵᩣᨶᩴ, ᨿᩩ. ᨴᩉᩔ ᨵᩮᩣ, ᨴᩉ ᨽᩈ᩠ᨾᩦᨠᩁᨱᩮ [ᨸᨸᩩᨻ᩠ᨻᨵᩣᨵᩣᨲᩩᨶᩣ ᩈᩣᨵᩮᨲᨻ᩠ᨻᩴ ᨾᨬ᩠ᨬᩮ]. ᩅᩦᩁᩮ ᩈᩣᨵᩩ, ᩅᩦᩁᩣᨶᩴ ᩅᩣ ᨠᨾ᩠ᨾᩴ, ᩅᩥᨵᩥᨶᩣ ᩅᩣ ᩎᩁᨿᩥᨲᨻ᩠ᨻᩴ ᨸᩅᨲ᩠ᨲᩮᨲᨻ᩠ᨻᨶ᩠ᨲᩥ ᩅᩦᩁᩥᨿᩴ, ᩎᩁ ᨣᨲᩥᨿᩴ, ᩎᩉᨲᩥ ᩑᨲᩥ ᩅᩣ ᨿᩣᨿ ᩈᩩᨽᩣᩈᩩᨽᨹᩃᨶ᩠ᨲᩥ ᩎᩉᩣ, ᩎᩉ ᨧᩮᨭ᩠ᨮᩣᨿᩴ, ᩍ ᩅᩣ ᨣᨲᩥᨾ᩠ᩉᩥ, ᨸᨧ᩠ᨨᩥᨾᩮ ᩉᨸᨧ᩠ᨧᨿᩮᩣ, ᩏᨴ᩠ᨵᩴ ᨿᨶ᩠ᨲᩥ ᨿᩮᨶᩣᨲᩥ ᩏᨿ᩠ᨿᩣᨾᩮᩣ, ᩋᨾᩮᩣ. ᨲᩥᨭ᩠ᨮᨲᩥ ᩑᨲ᩠ᨳ ᩈᩩᨽᩣᩈᩩᨽᨹᩃᨶ᩠ᨲᩥ ᨵᩥᨲᩥ,ᨲᩥ, ᨮᩣ ᨣᨲᩥᨶᩥᩅᨲ᩠ᨲᩥᨿᩴ.

᪑᪕᪗. ᨸᨩ᩠ᨩᩮᨶ ᩅᩩᨲ᩠ᨲᨸᩁᩥᨿᩣᨿᩔ ᩅᩦᩁᩥᨿᩔ ᨧᨲ᩠ᨲᩣᩁᩥ ᩋᨦ᩠ᨣᩣᨶᩥ ᨴᩔᩮᨲᩥ. ᨲᨧᩣᨴᩦᨶᩴ ᨲᩥᨱ᩠ᨱᩴ ᩋᩅᩈᩥᩔᨶᩴ ᩋᩅᩈᩮᩈᨲᩣ ᨾᩴᩈᩃᩮᩣᩉᩥᨲᩮᩉᩥ ᩋᩅᨵᩥᨽᩪᨲᩮᩉᩥ, ᨾᩴᩈᩃᩮᩣᩉᩥᨲᩣᨶᩴ ᨸᨶ ᩈᩩᩔᨶᩴ ᩈᩩᨠ᩠ᨡᨲᩣ ¶ . ᩑᨲᩣᨶᩥ ᨧᨲ᩠ᨲᩣᩁᩥ ᩋᨵᩥᨭ᩠ᨮᩣᨶᩅᩈᨸ᩠ᨸᩅᨲ᩠ᨲᩣᨶᩥ ᩅᩦᩁᩥᨿᩔ ᩋᨦ᩠ᨣᩣᨶᩥ ᨠᩣᩁᨱᩣᨶᩥ ᩉᩮᩣᨶ᩠ᨲᩥ. ᩋᨦ᩠ᨣ ᨣᨾᨶᨲ᩠ᨳᩮᩣ ᨴᨱ᩠ᨯᨠᩮᩣ ᨵᩣᨲᩩ. ᩋᨦ᩠ᨣᨲᩥ ᩈᩥᨴ᩠ᨵᩥᩴ ᨣᨧ᩠ᨨᨲᩥ ᩅᩦᩁᩥᨿᨹᩃᨾᩮᨲᩮᩉᩦᨲᩥ ᩋᨦ᩠ᨣᩣᨶᩥ. ᨲᨧ ᨸᩣᩃᨶᩮ, ᨱᩮᩣ, ᨲᨧᩮᩣ. ᨶᩉ ᨻᨶ᩠ᨵᨶᩮ ᩌᩁᩩ. ᨶ᩠ᩉᩣᩁᩪᨲᩥᨸᩥ ᨸᩣᨮᩮᩣ. ᨲᨲ᩠ᨳ ᨶᨶ᩠ᨲᩔ ᩃᩮᩣᨸᩮᩣ. ᩈᩥᩈ ᩋᩈᨻ᩠ᨻᨸ᩠ᨸᨿᩮᩣᨣᩮ, ᨿᩩ, ᨴ᩠ᩅᩥᨲ᩠ᨲᩴ. ᩋᩈᨲᩥ ᨡᩮᨸᩮᨲᩥ ᩋᨴ᩠ᨵᩣᨶᨶ᩠ᨲᩥ ᩋᨭ᩠ᨮᩥ,ᨲᩥ, ᨶᨸᩩᩴᩈᨠᩮ, ᨶᩮᩁᩩᨲ᩠ᨲᩮᩣ, ᩌ ᨽᩩᩈᩮᩣ ᨲᩥᨭ᩠ᨮᨲᩥ ᩑᨲᩮᨶᩣᨲᩥ ᩅᩣ ᩋᨭ᩠ᨮᩥ, ᩍ. ᨾᨶ ᨬᩣᨱᩮ, ᩈᩮᩣ, ᨶᩔ ᨶᩥᨣ᩠ᨣᩉᩦᨲᩴ, ᨾᩴᩈᩴ. ᩁᩩᩉ ᨩᨶᨶᩮ, ᩍᨲᩮᩣ, ᩃᨲ᩠ᨲᩴ, ᩃᩮᩣᩉᩥᨲᩴ.

᪑᪕᪘. ᩋᩈᩣᨫᩈᩣᨵᨶᩮᨸᩥ ᨿᩔᩣ ᩅᩈᩮᨶ ᩏᨿ᩠ᨿᩣᨾᩮᩣ, ᩈᩣ ᩋᨵᩥᨾᨲ᩠ᨲᩮᩉᩣ ᩋᨵᩥᨠᩈᨲ᩠ᨲᩥᨿᩩᨲ᩠ᨲᩣ ᩎᩉᩣ ᩏᩔᩮᩣᩊ᩠ᩉᩦ ᨶᩣᨾ, ᩏ ᨸᨻᩃᩴ ᨴᩩᨠ᩠ᨠᩁᨠᨾ᩠ᨾᩴ ᩈᩉᨲᩥ ᨿᩣᨿᩣᨲᩥ ᩏᩔᩮᩣᩊᩦ, ᩈᩉᩔ ᩈᩮᩣᩊ᩠ᩉᩮᩣ, ᨶᨴᩣᨴᩥ, ᩏᩔᩣᩉᩣᨶᩴ ᩐᩉᩣᨲᩥ ᩅᩣ ᩏᩔᩮᩣᩊᩦ, ᨿᨳᩣ ‘‘ᨸᨴᨭ᩠ᨮᩣᨶ’’ᨶ᩠ᨲᩥ, ᩌᨠᩣᩁᩔᩮᩣ, ᩉᩔ ᩊᩮᩣ, ᩐᩃᩮᩣᨸᩮᩣ, ᨶᨴᩣᨴᩥ, ᩅᩣᨿᩣᨾᨾᨲ᩠ᨲᩮᨸᩥ. ᨴ᩠ᩅᨿᩴ ᩈᨲᩥᨿᩴ. ᩈᩁᨲᩥ, ᩈᩁᨶ᩠ᨲᩥ ᩅᩣ ᨲᩣᨿ, ᩈᩁᨱᨾᨲ᩠ᨲᨾᩮᩅ ᩅᩣ ᩑᩈᩣᨲᩥ ᩈᨲᩥ,ᨲᩥ, ᨸᨾᩣᨴᩴ ᩅᩣ ᩈᩁᨲᩥ ᩉᩥᩴᩈᨲᩦᨲᩥ ᩈᨲᩥ. ᩋᨶᩩ ᨸᩩᨶᨸ᩠ᨸᩩᨶᩴ ᩈᨲᩥ ᩋᨶᩩᩔᨲᩥ, ᩏᨸᩈᨣ᩠ᨣᨾᨲ᩠ᨲᨾᩮᩅ ᩅᩣ ᩅᩥᩈᩮᩈᩮᩣ, ᨴ᩠ᩅᩮᨸᩥ ᩍᨲ᩠ᨳᩥᨿᩴ.

ᨴ᩠ᩅᨿᩴ ᩃᨩ᩠ᨩᩣᨿᩴ. ᩃᨩᩥ ᨸᩦᩊᩮ, ᨠᩣᨲᨶ᩠ᨲᨵᩣᨲᩩ. ᩃᨩ᩠ᨩ ᩃᨩ᩠ᨩᨶᩮ, ᨾᩮᩣᨣ᩠ᨣᩃ᩠ᩃᩣᨶᨵᩣᨲᩩ, ᩃᨩ᩠ᨩᨲᩥ ᨸᩣᨸᩣᨲᩥ ᩃᨩ᩠ᨩᩣ, ᩋ. ᩉᩥᩁᩦ ᩃᨩ᩠ᨩᩥᨿᩴ, ᩍ. ᩉᩥᩁᩥᨿᨲᩥ ᨸᩣᨸᩣᨲᩥ ᩉᩥᩁᩦ. ᩈᨾᩣᨶᩣ ᨲᩩᩃ᩠ᨿᨲ᩠ᨳᩣ ᨴ᩠ᩅᩮ. ᨴ᩠ᩅᨿᩴ ᩒᨲ᩠ᨲᨸ᩠ᨸᩮ. ᩒᨲ᩠ᨲᨸ᩠ᨸᨲᩥ ᨽᩣᨿᨲᩥ ᨸᩣᨸᨲᩮᩣᨲᩥ ᩒᨲ᩠ᨲᨸ᩠ᨸᩴ, ᨲᨸ ᨽᨿᩮ ᩋᩅᨸᩩᨻ᩠ᨻᩮᩣ. ᨸᩣᨸᨲᩮᩣ ᨽᩣᨿᨲᩥ ᩈᩦᩃᩮᨶᩣᨲᩥ ᨸᩣᨸᨽᩦᩁᩩ, ᨸᩩᨣ᩠ᨣᩃᩮᩣ, ᨧᩥᨲ᩠ᨲᩴ ᩅᩣ, ᨲᩔ ᨽᩣᩅᩮᩣ ᨲᨳᩣ.

᪑᪕᪙. ᨸᨩ᩠ᨩᨴ᩠ᨵᩮᨶ ¶ ᩏᨸᩮᨠ᩠ᨡᩣᨿ ᩅᩮᨴᨶᩣᨿ ᨶᩣᨾᩣᨶᩥ. ᨾᨩ᩠ᨫᨲ᩠ᨲᩮ ᨾᨩ᩠ᨫᨲ᩠ᨲᩈᨽᩣᩅᩮ ᨸᩅᨲ᩠ᨲᩣ ᨾᨩ᩠ᨫᨲ᩠ᨲᩥᨠᩣ. ᨴ᩠ᩅᩥᨶ᩠ᨶᩴ ᩅᩮᨴᨶᩣᨶᩴ ᩈᨾᩦᨸᩮ ᨸᩅᨲ᩠ᨲᩣ ᩍᨠ᩠ᨡᩣ ᩋᨶᩩᨽᩅᨶᨶ᩠ᨲᩥ ᩏᨸᩮᨠ᩠ᨡᩣ, ᩍᨠ᩠ᨡ ᨴᩔᨶᩮ. ᩋᨴᩩᨠ᩠ᨡᩣ ᨧ ᩈᩣ ᩋᩈᩩᨡᩣ ᨧᩮᨲᩥ ᩋᨴᩩᨠ᩠ᨡᨾᩈᩩᨡᩣ, ᨾᨠᩣᩁᩮᩣ ᨸᨴᩈᨶ᩠ᨵᩥᨠᩁᩮᩣ.

ᨴ᩠ᩅᨿᩴ ᨾᨶᩈᩥᨠᩣᩁᩮ. ᨽᩅᨦ᩠ᨣᩅᩈᩮᨶ ᨸᩅᨲ᩠ᨲᩔ ᨧᩥᨲ᩠ᨲᩔ ᩌᨽᩩᨩᨶᨲᩮᩣ ᩌᩅᨭ᩠ᨭᩣᨸᨶᨲᩮᩣ ᨧᩥᨲ᩠ᨲᩣᨽᩮᩣᨣᩮᩣ. ᨸᩣᩃᨶᨩ᩠ᨫᩮᩣᩉᩣᩁᨲ᩠ᨳᩮᩣ ᨧᩮᨲ᩠ᨳ ᨽᩩᨩᨵᩣᨲᩩ ᩌᩅᨭ᩠ᨭᨶᨲ᩠ᨳᩮᩣ ᩌᨸᩩᨻ᩠ᨻᨲ᩠ᨲᩣ, ᩍᨴᩴ ᨸᨶ ᩅᩦᨳᩥᨩᩅᨶᨸᨭᩥᨸᩣᨴᨠᩮ ᩈᨶ᩠ᨵᩣᨿ ᩅᩩᨲ᩠ᨲᩴ, ᨧᩥᨲ᩠ᨲᩔᩣᩁᨾ᩠ᨾᨱᩮ ᩌᨽᩩᨩᨶᩴ ᨸᩅᨲ᩠ᨲᨶᩴ ᩅᩣ ᨧᩥᨲ᩠ᨲᩣᨽᩮᩣᨣᩮᩣ, ᩍᨴᩴ ᨸᨶ ᩌᩁᨾ᩠ᨾᨱᨸᨭᩥᨸᩣᨴᨠᩅᩈᩮᨶ ᩅᩩᨲ᩠ᨲᩴ. ᨽᩅᨦ᩠ᨣᨾᨶᨲᩮᩣ ᩅᩥᩈᨴᩥᩈᩴ ᨾᨶᩴ ᨠᩁᩮᩣᨲᩦᨲᩥ ᨾᨶᨠ᩠ᨠᩣᩁᩮᩣ, ᨠᩁᨱᩴ ᩅᩣ ᨠᩣᩁᩮᩣ, ᨾᨶᩈ᩠ᨾᩥᩴ ᨠᩣᩁᩮᩣ ᨾᨶᨠ᩠ᨠᩣᩁᩮᩣ. ᩑᨲ᩠ᨳ ᨧ ᨸᨮᨾᩅᩥᨠᨸ᩠ᨸᩮᨶ ᨴ᩠ᩅᩮ ᨸᨭᩥᨸᩣᨴᨠᩣ ᩅᩩᨲ᩠ᨲᩣ, ᨸᨧ᩠ᨨᩥᨾᩮᨶ ᨲᩩ ᩍᨲᩁᩮᩣ.

ᨴ᩠ᩅᨿᩴ ᩋᨵᩥᨾᩮᩣᨠ᩠ᨡᩮ. ᨾᩩᨧ ᨾᩮᩣᨧᨶᩮ, ᩋᨵᩥᨾᩩᨧ᩠ᨧᨶᩴ ‘‘ᩍᨴᨾᩮᩅᩣ’’ᨲᩥ ᩈᨶ᩠ᨶᩥᨭ᩠ᨮᩣᨶᨠᩁᨱᩴ ᩋᨵᩥᨾᩮᩣᨠ᩠ᨡᩮᩣ. ᨶᩥᨧ᩠ᨨᨿᨶᩴ ᨶᩥᨱ᩠ᨱᨿᨶᩴ ᨶᩥᨧ᩠ᨨᨿᩮᩣ, ᨧᨿ ᨣᨾᨶᨲ᩠ᨳᩮᩣ ᨴᨱ᩠ᨯᨠᩮᩣ ᨵᩣᨲᩩ, ᨧᩔ ᨴ᩠ᩅᩥᨲ᩠ᨲᩴ, ᨨᨲ᩠ᨲᩴ, ᨶᩥ ᨽᩩᩈᩴ ᨨᩮᨴᨶᩴ ᩅᩣ ᨶᩥᨧ᩠ᨨᨿᩮᩣ, ᨨᩥᨴᩥ ᨴ᩠ᩅᩥᨵᩣᨠᩁᨱᩮ, ᩍᩔᨲ᩠ᨲᩴ, ᨴᩔ ᨿᩮᩣ, ᩋᩈᩁᩪᨸᨴ᩠ᩅᩥᨲ᩠ᨲᩴ.

᪑᪖᪐. ᨸᨩ᩠ᨩᨴ᩠ᨵᩴ ᨴᨿᩣᨿᩴ. ᨴᨿ ᨴᩣᨶᨣᨲᩥᩉᩥᩴᩈᩣᩁᨠ᩠ᨡᨱᩮᩈᩩ. ᨴᨿᨲᩥ ᨸᩁᨴᩩᨠ᩠ᨡᩴ, ᩋᨲ᩠ᨲᩈᩩᨡᨬ᩠ᨧ ᩉᩥᩴᩈᨲᩦᨲᩥ ᨴᨿᩣ, ᩋ. ᨠᨸᩥ ¶ ᨧᩃᨶᩮ, ᩋᨶᩩ ᨸᩩᨶᨸ᩠ᨸᩩᨶᩴ ᨠᨾ᩠ᨸᩮᨲᩥ ᩋᨲ᩠ᨲᩣᨵᩣᩁᩔ ᨧᩥᨲ᩠ᨲᨶ᩠ᨲᩥ ᩋᨶᩩᨠᨾ᩠ᨸᩣ. ᨠᩴ ᩈᩩᨡᩴ ᩁᩩᨶ᩠ᨵᨲᩦᨲᩥ ᨠᩁᩩᨱᩣ, ᩁᩩᨵᩥ ᩌᩅᩁᨱᩮ, ᨵᩔ ᨱᩮᩣ, ᩋᨳ ᩅᩣ ᨠᩁᩮᩣᨶ᩠ᨲᩥ ᩋᨲ᩠ᨲᩣᨶᨾᨵᩦᨶᨾᩮᨲᩣᨿᩣᨲᩥ ᨠᩁᩩᨱᩣ, ᨿᩩ, ᩌ, ᨠᩁᩩᨱᩣ, ᩈᩣ ᩑᩅ ᨠᩣᩁᩩᨬ᩠ᨬᩴ. ᩋᨶᩩᨴ᩠ᨴᨿᩣᨲᩥ ᩏᨸᩈᨣ᩠ᨣᩮᨶ ᨸᨴᩴ ᩅᨯ᩠ᨰᩥᨲᩴ.

ᨸᨩ᩠ᨩᨴ᩠ᨵᩴ ᩅᩥᩁᨲᩥᨿᩴ. ᩁᨾᩩ ᩏᨸᩁᨾᩮ ᩅᩥᨸᩩᨻ᩠ᨻᩮᩣ, ᩅᩥᩁᨾᨱᩴ ᩅᩮᩁᨾᨱᩦ, ᨿᩩ, ᨶᨴᩣᨴᩥ, ᩅᩮᩁᩴ ᨾᨱᨲᩥ ᩅᩥᨶᩣᩈᩮᨲᩦᨲᩥ ᩅᩣ ᩅᩮᩁᨾᨱᩦ. ᩅᩥᩁᨾᨱᩴ ᩅᩥᩁᨲᩥ,ᨲᩥ. ᨴᩪᩁᨲᩮᩣ ᩅᩥᩁᨾᨱᩴ ᩌᩁᨲᩥ.

᪑᪖᪑. ᨧᨲᩩᨠ᩠ᨠᩴ ᨡᨶ᩠ᨲᩥᨿᩴ. ᨲᩥᨲᩥᨠ᩠ᨡᨶᩴ ᨡᨾᨶᩴ ᨲᩥᨲᩥᨠ᩠ᨡᩣ, ᨲᩥᨩ ᨡᨶ᩠ᨲᩥᨿᩴ, ᨡᩮᩣ, ᨴ᩠ᩅᩥᨲ᩠ᨲᩴ, ᨠᨲ᩠ᨲᩣᨴᩥ, ᩌ. ᨡᨾᨶᩴ ᩈᩉᨶᩴ ᨡᨶ᩠ᨲᩥ,ᨲᩥ. ᨡᨾᨲᩮ ᨡᨾᨶᩴ, ᨡᨾᩣ ᨧ, ᨡᨾᩩ ᩈᩉᨶᩮ. ᨴ᩠ᩅᨿᩴ ᨾᩮᨲ᩠ᨲᩥᨿᩴ. ᨾᩥᨴ ᩈ᩠ᨶᩮᩉᩮ, ᨾᩥᨩ᩠ᨩᨲᩥ ᩈᩥᨶᩮᩉᨲᩦᨲᩥ ᨾᩮᨲ᩠ᨲᩣ, ᨲ, ᩌ. ᨾᩮᨲ᩠ᨲᩥ,ᨲᩥ. ᩋᨳ ᩅᩣ ᨾᩥᨲ᩠ᨲᩮ ᨽᩅᩣ ᨾᩮᨲ᩠ᨲᩣ, ᨾᩮᨲ᩠ᨲᩥ ᨧ.

ᨸᨩ᩠ᨩᨴ᩠ᨵᩴ ᨴᩥᨭ᩠ᨮᩥᨿᩴ. ᨴᩔᩦᨿᨲᩮ ᨴᩔᨶᩴ, ᨴᩥᩈ ᨸᩮᨠ᩠ᨡᨶᩮ, ᨿᩩ. ᨴᩔᨶᩴ ᨴᩥᨭ᩠ᨮᩥ. ᩃᨽ ᩃᩣᨽᩮ,ᨲᩥ, ᩃᨴ᩠ᨵᩥ, ᨾᩥᨧ᩠ᨨᩣᨴᩥᨭ᩠ᨮᩥᨿᨾᩮᩅ. ᩈᩮᩈᩣ ᨲᩩ ᩏᨽᨿᨲᩕ. ᨮᩥᨲᨸᨠ᩠ᨡᩮᩣ ᩈᩥᨴ᩠ᨵᨶ᩠ᨲᩮᩣ [ᨮᩥᨲᩮᩣ ᨸᨠ᩠ᨡᩮᩣ ᩈᩥᨴ᩠ᨵᨶ᩠ᨲᩮᩣ, ᨸᩩᨻ᩠ᨻᨸᨠ᩠ᨡᩴ ᨶᩥᩁᩈ᩠ᨿ ᩈᩥᨴ᩠ᨵᨸᨠ᩠ᨡᨭ᩠ᨮᩣᨸᨶᩮ ᩍᨲᩥ ᨽᩣᩅᩮᩣ (ᨧᩥᨶ᩠ᨲᩣᨾᨱᩥᨭᩦᨠᩣ)], ᩈᩥᨴ᩠ᨵᩮᩣ ᩋᨶ᩠ᨲᩮᩣ ᩋᨶᩮᨶᩣᨲᩥ ᩅᩥᨣ᩠ᨣᩉᩮᩣ. ᩈᨾᨶ᩠ᨲᨲᩮᩣ ᩋᨿᨶᩴ ᨣᨲᩥ ᩈᨾᨿᩮᩣ.

᪑᪖᪒. ᨴᩮᩣᩉᩊᨶ᩠ᨲᩴ ᨲᨱ᩠ᩉᩣᨿᩴ. ᨲᩈ ᨸᩥᨸᩣᩈᩣᨿᩴ, ᨿᩣᨿ ᨲᩈᨶ᩠ᨲᩥ, ᩈᩣ ᨲᨱ᩠ᩉᩣ, ᨱ᩠ᩉᩮᩣ. ᩍᨱᨾ᩠ᩉᩥ ᨲᩈᩥᨱᩣ. ᩑᨩ ᨠᨾ᩠ᨸᨶᩮ, ᩑᨩᩣ ¶ . ᩈᩴᩈᩣᩁᨲᩮᩣ ᨶᩥᩔᩁᩥᨲᩩᨾᨸ᩠ᨸᨴᩣᨶᩅᩈᩮᨶ ᨩᩣᩃᩈᨴᩥᩈᨲ᩠ᨲᩣ ᨩᩣᩃᩥᨶᩦ, ᩏᨸᨾᩣᨶᩮ ᩍᨶᩦ. ᩅᩥᩈ ᨸᩅᩮᩈᨶᩮ, ᩈᨻ᩠ᨻᨲᩕ ᩅᩥᩈᨲᩣ ᨸᨲ᩠ᨳᨲᩣᨲᩥ ᩅᩥᩈᨲ᩠ᨲᩥᨠᩣ, ᩈᨠᨲ᩠ᨳᩮ ᨱᩥᨠᩮᩣ. ᨨᨶ᩠ᨴ ᩍᨧ᩠ᨨᩣᨿᩴ, ᨨᨶ᩠ᨴᨶᩴ ᨨᨶ᩠ᨴᩮᩣ, ᨠᨲ᩠ᨲᩩᨠᨾ᩠ᨿᨲᩣᨸᩥ. ᨲᩮᩈᩩ ᨲᩮᩈ᩠ᩅᩣᩁᨾ᩠ᨾᨱᩮᩈᩩ ᩌᨠᩩᩃᩦᨽᩪᨲᨲ᩠ᨲᩣ ᨩᨭᩣ ᩅᩥᨿᩣᨲᩥ ᨩᨭᩣ. ᨠᨾᩩ ᩍᨧ᩠ᨨᩣᨿᩴ,ᨲᩥ, ᨶᩥᨠᨶ᩠ᨲᩥ. ᩍᩈᩩ ᩍᨧ᩠ᨨᩣᨿᩴ, ᩋ, ᩍᩔ ᩌ, ᩌᩈᩣ. ᩈᩥᩅᩩ ᨲᨶ᩠ᨲᩈᨶ᩠ᨲᩣᨶᩮ, ᨽᩅᩣᨴᩦᩉᩥ ᨽᩅᩣᨴᨿᩮᩣ ᩈᩥᨻ᩠ᨻᨲᩦᨲᩥ ᩈᩥᨻ᩠ᨻᩥᨶᩦ, ᩋ, ᩍᨶᩦ. ᩈᨲ᩠ᨲᩮ ᨽᩅᩴ ᨶᩮᨲᩦᨲᩥ ᨽᩅᨶᩮᨲ᩠ᨲᩥ,ᨲᩥ.

᪑᪖᪓. ᨫᩮᨧᩥᨶ᩠ᨲᩣᨿᩴ, ᩌᩁᨾ᩠ᨾᨱᩣᨽᩥᨾᩩᨡᩴ ᨫᩣᨿᨲᩦᨲᩥ ᩋᨽᩥᨩ᩠ᨫᩣ, ᩌ. ᩅᨶ ᩈᨾ᩠ᨽᨲ᩠ᨲᩥᨿᩴ, ᩅᨶᨲᩥ ᨿᩮᨶ ᩈᩮᩣ ᩅᨶᨳᩮᩣ, ᨳᩮᩣ. ᩅᩣ ᨣᨲᩥᨿᩴ, ᩅᩣᨲᩥ ᩌᩁᨾ᩠ᨾᨱᨶ᩠ᨲᩥ ᩅᩣᨶᩴ, ᨿᩩ. ᩃᩩᨽ ᩍᨧ᩠ᨨᩣᨿᩴ, ᩃᩩᨻ᩠ᨽᨶᩴ ᩃᩮᩣᨽᩮᩣ, ᨱᩮᩣ. ᩁᨶ᩠ᨩ ᩁᩣᨣᩮ, ᩁᨩ᩠ᨩᨶᩴ, ᩁᨩ᩠ᨩᨶ᩠ᨲᩥ ᩅᩣ ᨿᩮᨶ ᩈᩮᩣ ᩁᩣᨣᩮᩣ, ᨱᩮᩣ. ᩃᨿ ᨣᨲᩥᨿᩴ, ᩌ ᨸᩩᨶᨸ᩠ᨸᩩᨶᩴ ᩃᨿᨲ᩠ᨿᩣᩁᨾ᩠ᨾᨱᩮᩈᩪᨲᩥ ᩌᩃᨿᩮᩣ, ᨸᩩᨶᨸ᩠ᨸᩩᨶᩴ ᩃᨿᨲᩥ ᩈᩴᩈᩥᩃᩮᩈᨲᩥ ᨿᩮᨶᩣᨲᩥ ᩅᩣ ᩌᩃᨿᩮᩣ. ‘‘ᩃᨿᩮᩣ ᩅᩥᨶᩣᩈᩮ ᩈᩴᩈᩥᩃᩮᩈᩮ, ᩈᩣᨾ᩠ᨿᩮ ᨲᩮᩣᩁᩥᨿᨲ᩠ᨲᩥᨠᩔ ᨧᩮ’’ᨲᩥ ᨶᩣᨶᨲ᩠ᨳᩈᨦ᩠ᨣᩉᩮ. ᨸᩥᩉ ᩍᨧ᩠ᨨᩣᨿᩴ, ᨧᩩᩁᩣᨴᩥ, ᩋ, ᨸᩥᩉᨿᨲᩥ ᨿᩣᨿᩣᨲᩥ ᨸᩥᩉᩣ. ᨧᩥᨲ᩠ᨲᩔ ᨶᩣᨶᩣᩁᨾ᩠ᨾᨱᩮᩈᩩ ᩅᩥᨻ᩠ᨽᨾᨠᩁᨱᨲᩮᩣ ᨾᨶᩈᩮᩣ ᩁᨳᩮᩣ ᩍᩅ ᨾᨶᩮᩣᩁᨳᩮᩣ, ᨾᨶᩮᩣ ᩑᩅ ᩁᨳᩮᩣ ᩅᩥᨿᩣᨲᩥ ᩅᩣ ᨾᨶᩮᩣᩁᨳᩮᩣ. ᩍᩈᩩ ᩍᨧ᩠ᨨᩣᨿᩴ, ᩋ, ᩈᩔ ᨧ᩠ᨨᩣᨴᩮᩈᩮᩣ. ᩃᩈ ᨠᨶ᩠ᨲᩥᨿᩴ, ᩋᨽᩥᨾᩩᨡᩴ ᨠᨲ᩠ᩅᩣ ᩃᩈᨲᩥ ᨿᩮᨶᩣᨲᩥ ᩋᨽᩥᩃᩣᩈᩮᩣ, ᨱᩮᩣ. ᨠᨾᩩ ᩍᨧ᩠ᨨᩣᨿᩴ, ᨱᩮᩣ, ᨠᩣᨾᩮᩣ ¶ . ᨴᩩᩉ ᨸᨸᩪᩁᨱᩮ, ᨴᩩᩉᨶᩴ ᨴᩮᩣᩉᩮᩣ, ᨲᩴ ᩃᩣᨲᩦᨲᩥ ᨴᩮᩣᩉᩊᩮᩣ, ᨴᩩᨭ᩠ᨮᩴ ᩉᨴᨿᨾᩮᨲᩮᨶᩣᨲᩥ ᩅᩣ ᨴᩮᩣᩉᩊᩮᩣ, ᩉᨴᨿᩔ ᩉᩊᩮᩣ, ᩉᩃ ᨠᨾ᩠ᨸᨶᩮ ᨴ᩠ᩅᩥᩈᨴ᩠ᨴᩪᨸᨸᨴᩮᩣ, ᨴ᩠ᩅᩦᩉᩥ ᩉᩃᨲᩥ ᨠᨾ᩠ᨸᨲᩦᨲᩥ ᩅᩣ ᨴᩮᩣᩉᩊᩮᩣ, ᩋ, ᨴ᩠ᩅᩥᩔ ᨴᩮᩣ, ᩃᩔ ᩊᩮᩣ. ᨴ᩠ᩅᩮ ᩉᨴᨿᩣ ᩋᩔ ᨸᩁᨾᨲ᩠ᨳᩔᩣᨲᩥ ᩅᩣ ᨴᩮᩣᩉᩊᩮᩣ. ᩋ, ᨴ᩠ᩅᩥᩔ ᨴᩮᩣ, ᩉᨴᨿᩔ ᩉᩊᩮᩣ, ᨴᩔ ᩊᩮᩣ ᩅᩣ, ᨿᩃᩮᩣᨸᩮᩣ, ᩍᨧ᩠ᨨᩣᩅᩥᩈᩮᩈᨲ᩠ᨲᩮᨸᩥ ᨴᩮᩣᩉᩊᩔ ᩈᩣᨾᨬ᩠ᨬᩅᨲ᩠ᨲᩥᨧ᩠ᨨᩣᨿ ᨶᩥᨴ᩠ᨴᩮᩈᩮᩣ.

ᩋᨲᨱ᩠ᩉᩣᩈᨽᩣᩅᨾ᩠ᨸᩥ ᩁᩩᨧᩥᩴ ᩌᩃᨾ᩠ᨻᨱᩥᨧ᩠ᨨᩣᩈᨽᩣᩅᩈᩣᨾᨬ᩠ᨬᩮᨶ ᩍᨵᩮᩅ ᩅᨲ᩠ᨲᩩᨾᩣᩉ ‘‘ᩌᨠᨦ᩠ᨡᩣᨲᩩ’’ᩍᨧ᩠ᨧᩣᨴᩥ. ᨠᨦ᩠ᨡ ᩍᨧ᩠ᨨᩣᨿᩴ, ᩋ. ᩁᩩᨧ ᩁᩮᩣᨧᨶᩮ, ᩁᩮᩣᨧᨶᩴ ᨠᨲ᩠ᨲᩩᨠᩣᨾᨲᩣ, ᩍ, ᩁᩩᨧ ᨴᩥᨲ᩠ᨲᩥᨿᩴ ᩅᩣ, ᩁᩩᨧᩥ. ᨠᨲ᩠ᨲᩩᨠᩣᨾᨲᩮᩅ. ᩈᩣ ᩁᩩᨧᩥ ᩋᨵᩥᨠᩣ ᩃᩣᩃᩈᩣ ᨶᩣᨾ, ᩃᩈ ᨠᨶ᩠ᨲᩥᨿᩴ, ᨸᩩᨶᨸ᩠ᨸᩩᨶᩴ, ᩋᨲᩥᩈᨿᩴ ᩅᩣ ᩃᩈᨲᩦᨲᩥ ᩃᩣᩃᩈᩣ, ᨴ᩠ᩅᩥᨲ᩠ᨲᩴ, ᩋᩔᩣ. ‘‘ᨿᩣᨧᨶᩣᨿᩴ ᨾᩉᩥᨧ᩠ᨨᩣᨿᩴ [ᨲᨱ᩠ᩉᩣᨲᩥᩁᩮᨠᩮ ᨿᩣᨧᨶᩣᨿᩴ (ᨧᩥᨶ᩠ᨲᩣᨾᨱᩥᨭᩦᨠᩣ ᪗.᪒᪘)], ᩏᩔᩩᨠ᩠ᨠᩮ ᩃᩣᩃᩈᩣ ᨴ᩠ᩅᩥᩈᩪ’’ᨲᩥ ᩁᩩᨴ᩠ᨴᩮᩣ.

᪑᪖᪔. ᨲᩥᨠᩴ ᩅᩥᩁᩮᩣᨵᩮ. ᨸᩣᨿᩮᨶ ᩅᩦᩁᩮᩈᩩ ᨽᩅᩴ ᩅᩮᩁᩴ, ᨸᨭᩥᨥᨸᩣᨸᩮᩈᩩᨸᩥ. ᩁᩩᨵ ᨸᨭᩥᨥᩣᨲᩮ, ᩅᩥᩁᩩᨩ᩠ᨫᨶᩴ ᩅᩥᩁᩮᩣᨵᩮᩣ. ᨴᩥᩈ ᩋᨸ᩠ᨸᩦᨲᩥᨿᩴ, ᩅᩥᨴ᩠ᨴᩮᩈᨶᩴ ᩅᩥᨴ᩠ᨴᩮᩈᩮᩣ.

ᩁᩮᩣᩈᨶ᩠ᨲᩴ ᨠᩮᩣᨵᩮ. ᨴᩩᩈ ᩋᨸ᩠ᨸᩦᨲᩥᨿᩴ, ᨴᩩᩔᨶᩴ ᨴᩮᩣᩈᩮᩣ. ᩌᩁᨾ᩠ᨾᨱᩮ ᨸᨭᩥᩉᨬ᩠ᨬᨲᩦᨲᩥ ᨸᨭᩥᨥᩴ, ᩉᨶ ᩉᩥᩴᩈᩣᨿᩴ, ᨸᨭᩥᨥᩈᨴ᩠ᨴᩮᩣᨿᩴ ᨸᩩᩃ᩠ᩃᩥᨦ᩠ᨣᩮ ᩅᩣ ᨽᩅᨲᩥ. ᨠᩩᨵ ᨠᩮᩣᨸᩮ, ᨠᩩᨩ᩠ᨫᨶᩴ ᨠᩮᩣᨵᩮᩣ. ᩌᨣᨶ᩠ᨲ᩠ᩅᩣ ᩉᨬ᩠ᨬᨲᩦᨲᩥ ᩌᨥᩣᨲᩮᩣ. ᨠᩩᨸ ᨠᩮᩣᨸᩮ, ᨠᩩᨸ᩠ᨸᨲᩦᨲᩥ ᨠᩮᩣᨸᩮᩣ, ᨠᩮᩣᨸᨿᨲᩥ ᩅᩣ ᨧᩥᨲ᩠ᨲᨶ᩠ᨲᩥ ᨠᩮᩣᨸᩮᩣ. ᩁᩩᩈ ᩁᩮᩣᩈᨶᩮ, ᩁᩩᩈᨶᩴ ᨴᩩᩔᨶᩴ ᩁᩮᩣᩈᩮᩣ.

ᨴ᩠ᩅᨿᩴ ¶ ᨸᩁᩣᨶᨲ᩠ᨳᨧᩥᨶ᩠ᨲᨶᩮ. ᨻ᩠ᨿᩣᨸᨩ᩠ᨩᨲᩥ ᩅᩥᨶᩔᨲᩥ ᨧᩥᨲ᩠ᨲᨾᩮᨲᩮᨶᩣᨲᩥ ᨻ᩠ᨿᩣᨸᩣᨴᩮᩣ, ᨸᨭᩥᨥᩮᨸᩥ. ᨸᨴ ᨣᨲᩥᨾ᩠ᩉᩥ. ᨸᩁᩈᨾ᩠ᨸᨲ᩠ᨲᩦᩈᩩ ᨶᩣᨽᩥᩁᨾᨲᩦᨲᩥ ᩋᨶᨽᩥᩁᨲᩥ, ᩁᨾᩩ ᩁᨾᨱᩮ,ᨲᩥ.

᪑᪖᪕. ᨴ᩠ᩅᨿᩴ ᩏᨸᨶᩣᩉᩮ. ᨶᩉ ᨻᨶ᩠ᨵᨶᩮ, ᨸᩩᨶᨸ᩠ᨸᩩᨶᩴ, ᩏᨸᨣᨶ᩠ᨲ᩠ᩅᩣ ᩅᩣ ᨶᨿ᩠ᩉᨲᩥ ᨧᩥᨲ᩠ᨲᨶ᩠ᨲᩥ ᩏᨸᨶᩣᩉᩮᩣ. ᨻᨩ᩠ᨫᨲᩥ ᩅᩮᩁᨾᨶᩮᨶᩣᨲᩥ ᨻᨴ᩠ᨵᩅᩮᩁᩴ. ᨴ᩠ᩅᨿᩴ ᩈᩮᩣᨠᩮ. ᩈᩩᨧ ᩈᩮᩣᨠᩮ, ᨱᩮᩣ, ᩈᩩᨧᨶᩴ ᩈᩮᩣᨠᩮᩣ. ᩈᩩᨧᨲᩮ ᩈᩮᩣᨧᨶᩴ.

ᨲᩥᨠᩴ ᩁᩩᨴᩥᨲᩮ. ᩁᩩᨴᩥ ᩋᩔᩩᩅᩥᨾᩮᩣᨧᨶᩮ, ᩈᨻ᩠ᨻᨲᩕ ᨽᩣᩅᩮ ᨲᩮᩣ. ᨠᨴᩥ ᩋᩅ᩠ᩉᩣᨶᩮ, ᩁᩮᩣᨴᨶᩮ ᨧ, ᨲᨸᨧ᩠ᨧᨿᩔ ᩋᨱ᩠ᨱᩣᨴᩮᩈᩮ ᩁᩩᨱ᩠ᨱᩴ. ᨴ᩠ᩅᨿᩴ ᨸᩁᩥᨴᩮᩅᨶᩮ. ᨴᩮᩅᨶᩴ ᩈᩮᩣᨠᩮᨶ ᩅᩥᩃᩣᨸᩮᩣ, ᨸᩩᨶᨸ᩠ᨸᩩᨶᩴ, ᩈᨾᨶ᩠ᨲᨲᩮᩣ ᩅᩣ ᨴᩮᩅᩮᩣ ᨸᩁᩥᨴᩮᩅᩮᩣ, ᨸᩁᩥᨴ᩠ᨴᩅᩮᩣ ᨧ.

᪑᪖᪖. ᨲᩥᨠᩴ ᨽᨿᩮ ᨧᩥᨲ᩠ᨲᩩᨲᩕᩣᩈᩈᨦ᩠ᨡᩣᨲᩮ. ᩈᨻ᩠ᨻᨲᩕ ᨽᩣᩅᩈᩣᨵᨶᩴ. ᨽᩦ ᨽᨿᩮ, ᨽᩣᨿᨶᩴ ᨽᩦᨲᩥ,ᨲᩥ. ᨽᨿᩴ, ᨱᩮᩣ. ᨲᩈ ᩏᨻ᩠ᨻᩮᨩᩮ, ᩏᨲ᩠ᨲᩈᨲᩮ ᩏᨲ᩠ᨲᩣᩈᩮᩣ, ᨱᩮᩣ. ᨴ᩠ᩅᨿᩴ ᨾᩉᨲᩥ ᨽᨿᩮ. ᨽᩦᩁᩩᨶᩮᩣ ᩍᨴᩴ ᨽᩮᩁᩅᩴ, ᨱᩮᩣ. ᨾᩉᨶ᩠ᨲᨬ᩠ᨧ ᨲᩴ ᨽᨿᨩᨶᨠᨲ᩠ᨲᩣ ᨽᨿᨬ᩠ᨧᩣᨲᩥ ᨾᩉᨻ᩠ᨽᨿᩴ. ᨾᩉᩣᨽᨿᨶ᩠ᨲᩥᨸᩥ ᨸᩣᨮᩮᩣ.

᪑᪖᪗. ᨸᨩ᩠ᨩᩴ ᨽᩣᨿᩥᨲᨻ᩠ᨻᩈᩣᨾᨬ᩠ᨬᩮ. ᨽᩮᩁᩅᩈᨴ᩠ᨴᩮᩣᨿᩴ ᩈᩣᨾᨬ᩠ᨬᩅᩣᨧᨠᩮᩣᨸᩥ ᩋᨲ᩠ᨳᩦᨲᩥ ᩍᨵ ᨶᩥᨴ᩠ᨴᩮᩈᩮᩣ. ᨽᩣᨿᨲᩥ ᨿᩈ᩠ᨾᩣᨲᩥ ᨽᩥᩴᩈᨶᩴ, ᩈᩮᩣ, ᨿᩩ, ᨻᩥᨶ᩠ᨴᩣᨣᨾᩮᩣ. ᨽᩣᨿᨲᩥ ᨿᩈ᩠ᨾᩣᨲᩥ ᨽᩦᨾᩴ, ᨾᩮᩣ. ᨴᩁ ᩅᩥᨴᩣᩁᨱᩮ, ᨴᩁᩦᨿᨲᩦᨲᩥ ᨴᩣᩁᩩᨱᩴ, ᩏᨱᩮᩣ. ᨽᩣᨿᨲᩥ ᨿᩈ᩠ᨾᩣᨲᩥ ¶ ᨽᨿᩣᨶᨠᩴ, ᨱ᩠ᩅᩩ, ᩋᨶᨠᩣᨴᩮᩈᩮᩣ. ᨥᩩᩁ ᨽᩦᨾᩮ, ᨥᩩᩁᨲᩥ ᨽᩥᩴᩈᨲᩦᨲᩥ ᨥᩮᩣᩁᩴ, ᨱᩮᩣ. ᨸᨭᩥᩅᨲ᩠ᨲᨲᩥ ᨽᨿᩴ ᨧᩥᨲ᩠ᨲᩩᨲᩕᩣᩈᩮᩣ ᨿᩈ᩠ᨾᩣᨲᩥ ᨸᨭᩥᨽᨿᩴ. ᨽᩣᨿᨲᩥ ᨿᩈ᩠ᨾᩣᨲᩥ ᨽᩮᩈ᩠ᨾᩴ, ᩈ᩠ᨾᨸᨧ᩠ᨧᨿᩮᩣ. ᨽᨿᩴ ᨠᩁᩮᩣᨲᩦᨲᩥ ᨽᨿᨦ᩠ᨠᩁᩴ, ᩋᩃᩩᨲ᩠ᨲᩈᨾᩣᩈᩮᩣᨿᩴ. ᩍᨾᩮ ᨶᩅ ᨽᩮᩁᩅᩣᨴᨿᩮᩣ ᨽᨿᨽᩮᩁᩅᩣᨴᩥᩉᩮᨲᩩᨾ᩠ᩉᩥ ᨴᨻ᩠ᨻᩮ ᩅᩥᩈᩮᩈᨶᨽᩣᩅᩮᨶ ᩅᨲ᩠ᨲᨶ᩠ᨲᩮ, ᨲᨴᩣ ᨲᩦᩈᩩ ᩃᩥᨦ᩠ᨣᩮᩈᩩ, ᩈᩣᨾᨬ᩠ᨬᩮᨶ ᨲᩩ ᨶᨸᩩᩴᩈᨠᩮ.

᪑᪖᪘. ᨴ᩠ᩅᨿᩴ ᨸᩁᩣᨽ᩠ᨿᩩᨴᨿᩣᩈᩉᨶᩮ. ᩍᩔ ᩍᩔᨲ᩠ᨳᩮ, ᩍᩔ ᩍᩔᩣᨿᨶ᩠ᨲᩥ ᩅᩣ ᨵᩣᨲ᩠ᩅᨲ᩠ᨳᩮᩣ, ᩍᩔᨲᩥ ᩈᨶ᩠ᨲᩮᩈᩩᨸᩥ ᨣᩩᨱᩮᩈᩩ ᩅᨧᩈᩣ, ᨾᨶᩈᩣ ᩅᩣ ᨴᩮᩣᩈᩣᩁᩮᩣᨸᨶᩴ ᨠᩁᩮᩣᨲᩦᨲᩥ ᩍᩔᩣ, ᩋ. ᩏᩔᩩᨿ [ᩏᩈᩪᨿ (?)] ᨴᩮᩣᩈᩣᩅᩥᨠᩁᨱᩮ. ᨲᩥᨠᩴ ᨾᨧ᩠ᨨᩮᩁᩮ. ᨾᩈᩩ ᩌᨾᩈᨶᩮ, ᨧ᩠ᨨᩮᩁᨧ᩠ᨨᩁᨸᨧ᩠ᨧᨿᩣ, ᨾᨧ᩠ᨨᩁᨾᩮᩅ ᨾᨧ᩠ᨨᩁᩥᨿᩴ, ᩈᨠᨲ᩠ᨳᩮ ᩍᨿᩮᩣ, ᩋᨳ ᩅᩣ ᨾᩈᩩᩍᨧ᩠ᨧᩮᨲᩔ ᨸᩣᨭᩥᨸᨴᩥᨠᩔ ᩈᩩᩔ ᨱᨾ᩠ᩉᩥ ᨧ᩠ᨨᩮᩁᨧ᩠ᨨᩁᩣ, ᨾᩈᩩ ᨾᨧ᩠ᨨᩮᩁᩮᨲᩥᨸᩥ ᨵᩣᨲᩩ.

ᨲᩥᨠᩴ ᩋᨬ᩠ᨬᩣᨱᩮ. ᨾᩪᩉ ᩅᩮᨧᩥᨲ᩠ᨲᩮ, ᨾᩩᨿ᩠ᩉᨶ᩠ᨲᩥ ᨲᩮᨶ ᩈᨾ᩠ᨸᨿᩩᨲ᩠ᨲᨵᨾ᩠ᨾᩣ, ᩈᨿᩴ ᩅᩣ ᨾᩩᨿ᩠ᩉᨲᩥ, ᨾᩩᨿ᩠ᩉᨶᨾᨲ᩠ᨲᨾᩮᩅ ᩅᩣ ᨲᨶ᩠ᨲᩥ ᨾᩮᩣᩉᩮᩣ. ᩅᩥᨴ ᨬᩣᨱᩮ, ᨶ ᩅᩥᨴᨲᩦᨲᩥ ᩋᩅᩥᨩ᩠ᨩᩣ. ᨶ ᩅᩥᨩᩣᨶᩣᨲᩦᨲᩥ ᩋᨬ᩠ᨬᩣᨱᩴ. ᨲᩥᨠᩴ ᨾᩣᨶᩮ. ᨽᩪᨲᩮᨶᩣᨽᩪᨲᩮᨶ ᩅᩣ ᨸᩁᨲᩮᩣ ᩏᨠ᩠ᨠᩴᩈᨠᨸ᩠ᨸᨶᩮᨶ ᨧᩮᨲᩈᩮᩣ ᩏᨶ᩠ᨶᨲᩥ ᨾᩣᨶᩮᩣ, ᨿᨳᩣ ‘‘ᩈᩪᩁᩮᩣ ᩋᨲ᩠ᨳᩅᩣᩉ’ᨾᩈ᩠ᨾᩥ ᩈᩦᩃᩅᩣ ᨻᩩᨴ᩠ᨵᩥᩈᨾ᩠ᨸᨶ᩠ᨶᩮᩣ’’ᨲᩥ [ᩋᩅᩮᩉᩥ ᨽᩃᩅᩣ ᩋᩈ᩠ᨾᩥ, ᩈᩦᩃᩅᩣ ᨻᩩᨴ᩠ᨵᩥᩈᩴᨿᩩᨲᩮᩣ (ᨧᩥᨶ᩠ᨲᩣᨾᨱᩥᨭᩦᨠᩣ ᪗.᪒᪒)]. ᨾᩣᨶ ᨸᩪᨩᩣᨿᩴ, ᨧᩩᩁᩣᨴᩥ, ᩋ. ᨵᩣᩁᨱᨲ᩠ᨳᩮᩣ ᨵᩣᨵᩣᨲᩩ, ᨠᩁᩮᩣᨲ᩠ᨿᨲ᩠ᨳᩮ ᩅᩥᨸᩩᨻ᩠ᨻᩮᩣ, ᩈᩮᨿ᩠ᨿᩣᨴᩥᨽᩣᩅᩮ ᩋᨲ᩠ᨲᩣᨶᩴ ᩅᩥᨴᨵᩣᨲᩥ ᨿᩣᨿ ᩈᩣ ᩅᩥᨵᩣ, ᨲᩦᩈᩩ. ᩏᨴ᩠ᨵᩴ ᨶᨾᨲᩥ ᨿᩣᨿ ᩈᩣ ᩏᨶ᩠ᨶᨲᩥ, ᩍᨲ᩠ᨳᩥᨿᨶ᩠ᨲᩥ.

᪑᪖᪙. ᨴ᩠ᩅᨿᩴ ¶ ᩏᨴ᩠ᨵᨧ᩠ᨧᩮ. ᩉᨶ ᨣᨲᩥᨿᩴ, ᩏᨴ᩠ᨵᩴ ᩏᨴ᩠ᨵᩴ ᩉᨶᨲᩥ ᨣᨧ᩠ᨨᨲᩦᨲᩥ ᩏᨴ᩠ᨵᨲᩮᩣ, ᨲᩮᩣ, ᩉᨶᩔ ᨵᩮᩣ, ᩋᩈᩁᩪᨸᨴ᩠ᩅᩥᨲ᩠ᨲᩴ, ᨧᩥᨲ᩠ᨲᩴ, ᩏᨴ᩠ᨵᨲᩔ ᨽᩣᩅᩮᩣ ᩏᨴ᩠ᨵᨧ᩠ᨧᩴ. ᨵᩣᩅ ᨣᨲᩥᨿᩴ, ᩏᨴ᩠ᨵᩴ ᨵᩣᩅᨲᩥ ᨧᩥᨲ᩠ᨲᨾᩮᨲᩮᨶᩣᨲᩥ ᩏᨴ᩠ᨵᩅᩴ, ᩋ, ᩁᩔᩮᩣ.

ᨲᩣᨸᩣᨴᩥᨸᨬ᩠ᨧᨠᩴ ᨠᩩᨠ᩠ᨠᩩᨧ᩠ᨧᩮ. ᨲᨸ, ᨵᩩᨸ ᩈᨶ᩠ᨲᩣᨸᩮ, ᨲᨸᨲᩥ ᨧᩥᨲ᩠ᨲᨾᩮᨲᩮᨶᩣᨲᩥ ᨲᩣᨸᩮᩣ, ᨱᩮᩣ. ᨠᩩᨧ᩠ᨨᩥᨲᩴ ᨠᩁᩮᩣᨲᩦᨲᩥ ᨠᩩᨠ᩠ᨠᩩᨲᩴ, ᨧᩥᨲ᩠ᨲᩴ, ᨲᩴᩈᨾᨦ᩠ᨣᩦ ᩅᩣ, ᨲᩔ ᨽᩣᩅᩮᩣ ᨠᩩᨠ᩠ᨠᩩᨧ᩠ᨧᩴ. ᨸᨧ᩠ᨨᩣ ᨲᨸᨲᩥ ᩑᨲᩮᨶᩣᨲᩥ ᨸᨧ᩠ᨨᩣᨲᩣᨸᩮᩣ. ᩋᨶᩩ ᨸᨧ᩠ᨨᩣ ᨲᨸᨲᩥ ᨿᩮᨶ ᩈᩮᩣ ᩋᨶᩩᨲᩣᨸᩮᩣ. ᩈᩁ ᨣᨲᩥᨿᩴ, ᩅᩥᩁᩪᨸᩮᨶ ᨸᨲᩥ ᨸᩩᨶᨸ᩠ᨸᩩᨶᩴ ᩈᩁᨲᩥ ᨧᩥᨲ᩠ᨲᨾᩮᨲᩮᨶᩣᨲᩥ ᩅᩥᨸ᩠ᨸᨭᩥᩈᩣᩁᩮᩣ, ᨲᩔ ᨭᩮᩣ.

᪑᪗᪐. ᨸᨩ᩠ᨩᩴ ᩅᩥᨧᩥᨠᩥᨧ᩠ᨨᩣᨿᩴ. ᩃᩥᨡ ᩃᩮᨡᨶᩮ, ᨾᨶᩴ ᩅᩥᩃᩮᨡᨲᩥ ᨴ᩠ᩅᩥᨵᩣᨠᩁᨱᩅᩈᩮᨶᩣᨲᩥ ᨾᨶᩮᩣᩅᩥᩃᩮᨡᩮᩣ. ᨴᩥᩉ ᩏᨸᨧᨿᩮ. ᩍᨵ ᨸᨶ ᩈᩴᨸᩩᨻ᩠ᨻᨲ᩠ᨲᩣ ᩈᩴᩈᨿᩮ, ᨠᩁᨱᩮ ᨱᩮᩣ. ᩈᩦ ᩈᨿᩮ, ᩍᨵ ᩈᩴᨸᩩᨻ᩠ᨻᨲ᩠ᨲᩣ ᨠᨦ᩠ᨡᩣᨿᩴ, ᩈᨻ᩠ᨻᨲᩕᩮᩅᩴ. ‘‘ᨠᨳᨾᩥᨴ’’ᨾᩥᨲᩥ ᨠᨳᨿᨲᩥ ᨿᩣᨿ ᩈᩣ ᨠᨳᩴᨠᨳᩣ. ᨠᩥᨲ ᩁᩮᩣᨣᩣᨸᨶᨿᨶᩮ, ᨨᨸᨧ᩠ᨧᨿᩮᩣ, ᨴ᩠ᩅᩥᨲ᩠ᨲᩣᨴᩥ, ᩅᩥᨣᨲᩣ ᨧᩥᨠᩥᨧ᩠ᨨᩣ ᨬᩣᨱᨸ᩠ᨸᨭᩥᨠᩣᩁᩮᩣ ᩑᨲᩣᨿᩣᨲᩥ ᩅᩥᨧᩥᨠᩥᨧ᩠ᨨᩣ. ᩍᩃ ᨣᨲᩥᨠᨾ᩠ᨸᨶᩮᩈᩩ, ᨴ᩠ᩅᩥᨵᩣ ᩍᩃᨲᩥ ᨧᩥᨲ᩠ᨲᨾᩮᨲᩮᨶᩣᨲᩥ ᨴ᩠ᩅᩮᩊ᩠ᩉᨠᩴ, ᩉᨸᨧ᩠ᨧᨿᩮᩣ, ᩈᨠᨲ᩠ᨳᩮ ᨠᩮᩣ ᨧ. ᨠᨦ᩠ᨡ ᩅᩥᨧᩥᨠᩥᨧ᩠ᨨᩣᨿᩴ, ᩋ, ᩍᨲ᩠ᨳᩥᨿᩴ. ᩈᨦ᩠ᨠ ᩈᨦ᩠ᨠᩣᨿᩴ. ᩅᩥᩅᩥᨵᩮᨶᩣᨠᩣᩁᩮᨶ ᨾᨬ᩠ᨬᨲᩥ ᨿᩈ᩠ᨾᩣ, ᩈᩣ ᩅᩥᨾᨲᩥ. ᨾᨶ ᨬᩣᨱᩮ, ᩍᨲ᩠ᨳᩥᨿᨶ᩠ᨲᩥ.

᪑᪗᪑. ᨲᩥᨠᩴ ¶ ᨶᩦᨧᨸᨠᨲᩥᨴᩮᩣᩈᩈᨾ᩠ᨽᩪᨲᩁᩪᨸᩥᩔᩁᩥᨿᩣᨴᩥᨶᩥᨾᩥᨲ᩠ᨲᩥᨠᩮ ᨾᨴᩮ, ᨿᩈ᩠ᨾᩥᩴ ᩈᨲᩥ ᩏᨲ᩠ᨲᩁᨴᩣᨶᩈᩣᨴᩁᩮᩣᩃᩮᩣᨠᨶᩣᨴᩥᩅᩥᨾᩩᨡᩮᩣ ᨸᩩᩁᩥᩈᩮᩣ ᨩᩣᨿᨲᩮ. ᨾᨴᩮᩣᨸ᩠ᨿᨲᩕ ‘‘ᨠᨲ᩠ᨳᩪᩁᩦᨣᨻ᩠ᨻᩁᩮᨲᩮᩈᩩ, ᨾᨴᩮᩣᩉᩔᩮᨽᨴᩣᨶᩮᩈᩪ’’ᨲᩥ [ᨠᨲ᩠ᨲᩁᩥ ᨣᨻ᩠ᨽᩁᩮᨲᩮᩈᩩ, ᨾᨴᩮᩣ ᨸᩩᩁᩥᩈᨾᩣᨶᩮᩈᩪᨲᩥ (ᨶᩥᩔᨿ)] ᩁᨽᩈᩮᩣ. ᨣᨻ᩠ᨻ ᨾᩣᨶᩮ, ᨧᩩᩁᩣᨴᩥ, ᩋ, ᩋᨳ ᩅᩣ ᨣᩁ ᩈᩮᨧᨶᩮ, ᨻᩮᩣ. ᨾᩣᨶ ᨸᩪᨩᩣᨿᩴ, ᩅᩥᩈᩮᩈᨲᩮᩣ ᨾᩣᨶᩮᨲᩦᨲᩥ ᩋᨽᩥᨾᩣᨶᩮᩣ. ᩋᩉᩴᨠᩣᩁᩮ ᩋᩉᩴᩈᨴ᩠ᨴᩮᩣ ᨶᩥᨸᩣᨲᩮᩣ, ᩋᨾ᩠ᩉᩈᨴ᩠ᨴᩮᩣᨸ᩠ᨿᨲᩕ, ‘‘ᩋᩉ’’ᨾᩥᨲᩥ ᩋᨲ᩠ᨲᩣᨶᩴ ᨠᩁᩮᩣᨲᩥ ᨿᩮᨶᩣᨲᩥ ᩋᩉᩴᨠᩣᩁᩮᩣ. ᨴ᩠ᩅᨿᩴ ᨧᩥᨶ᩠ᨲᩣᨿᩴ. ᨧᩥᨶ᩠ᨲ ᨧᩥᨶ᩠ᨲᩣᨿᩴ, ᩋ. ᨫᩮ ᨧᩥᨶ᩠ᨲᩣᨿᩴ, ᨫᩣᨿᨲᩮ ᨫᩣᨶᩴ, ᨴ᩠ᩅᩦᩈᩩᨸᩥ ᨽᩣᩅᩈᩣᨵᨶᩴ, ᩋ. ᩅᩥᨲᨠ᩠ᨠᨧᩥᨶ᩠ᨲᩣᨶᩴ ᨠᩮᩣ ᨽᩮᨴᩮᩣ? ᩅᩥᨲᨠ᩠ᨠᩮᩣ ᨲᩣᩅ ᩅᩣᨧᩣᨿ ᨸᩩᨻ᩠ᨻᨽᩣᨣᨸ᩠ᨸᩅᨲ᩠ᨲᩮᩣ, ‘‘ᨸᩩᨻ᩠ᨻᩮᩅ ᨡᩮᩣ, ᨣᩉᨸᨲᩥ, ᩅᩥᨲᨠ᩠ᨠᩮᨲ᩠ᩅᩣ ᩅᩥᨧᩣᩁᩮᨲ᩠ᩅᩣ ᨸᨧ᩠ᨨᩣ ᩅᩣᨧᩴ ᨽᩥᨶ᩠ᨴᨲᩦ’’ᨲᩥ [ᩈᩴ. ᨶᩥ. ᪔.᪓᪔᪘] ᩉᩥ ᩅᩩᨲ᩠ᨲᩴ. ᩍᨲᩁᩣ ᨸᨶ ᨲᩔᩣ ᩋᨸᩩᨻ᩠ᨻᨽᩣᨣᨸ᩠ᨸᩅᨲ᩠ᨲᩣᨸᩦᨲᩥ ᩋᨿᨾᩮᨲᩣᩈᩴ ᩅᩥᩈᩮᩈᩮᩣ. ᩋᨳ ᩅᩣ ᩅᩥᨲᨠ᩠ᨠᩮᩣ ᨸᨠᩥᨱ᩠ᨱᨠᨸᩁᩥᨿᩣᨸᨶ᩠ᨶᩮᩣ ᩑᨠᩮᩣ ᨧᩮᨲᩈᩥᨠᨵᨾ᩠ᨾᩮᩣ, ᩍᨲᩁᩣ ᨸᨶ ᩈᨻ᩠ᨻᩈᩣᨵᩣᩁᨱᨸᩁᩥᨿᩣᨸᨶ᩠ᨶᩮᩣ ᨾᨶᩈᩥᨠᩣᩁᨶᩣᨾᨠᩮᩣ ᩑᨠᩮᩣ ᨧᩮᨲᩈᩥᨠᨵᨾ᩠ᨾᩮᩣᨲᩥ ᩋᨿᨾᩮᨲᩣᩈᩴ ᩅᩥᩈᩮᩈᩮᩣ.

ᨴ᩠ᩅᨿᩴ ᨶᩥᨧ᩠ᨨᨿᩮ. ᨶᨿ ᨣᨾᨶᨲ᩠ᨳᩮᩣ ᨴᨱ᩠ᨯᨠᩮᩣ ᨵᩣᨲᩩ, ᩌᩁᨾ᩠ᨾᨱᩴ ᨶᩥᨧ᩠ᨨᩥᨶᨶ᩠ᨲᩮᩣ ᨶᨿᨲᩦᨲᩥ ᨶᩥᨱ᩠ᨱᨿᩮᩣ, ᨶᩔ ᨱᨲ᩠ᨲᩴ. ᩋᨳ ᩋᨵᩥᨾᩮᩣᨠ᩠ᨡᨶᩥᨱ᩠ᨱᨿᩣᨶᩴ ᨠᩮᩣ ᨽᩮᨴᩮᩣ? ᩋᨵᩥᨾᩮᩣᨠ᩠ᨡᩮᩣ ᩌᩁᨾ᩠ᨾᨱᩴ ᩋᨩ᩠ᨫᩮᩣᨣᩣᩉᩮᨲ᩠ᩅᩣ ᨲᩥᨭ᩠ᨮᨲᩥ, ᨶᩥᨱ᩠ᨱᨿᩮᩣ ᩅᩥᨶᩥᨧ᩠ᨨᨿᨾᨲ᩠ᨲᨾᩮᩅᩣᨲᩥ ᩋᨿᨾᩮᨲᩮᩈᩴ ᩅᩥᩈᩮᩈᩮᩣ. ᩋᨳ ᩅᩣ ᩋᨵᩥᨾᩮᩣᨠ᩠ᨡᩮᩣ ᨸᩈᩣᨴᩮᨸᩥ ᩈᨾ᩠ᨽᩅᨲᩥ, ᩍᨲᩁᩮᩣ ᨸᨶ ᨶ ᨲᨳᩣᨲᩥ ᩋᨿᩴᨸ᩠ᨿᩮᨲᩮᩈᩴ ᨽᩮᨴᩮᩣ ¶ . ᨲᨲᩕ ᨶᩥᨧ᩠ᨨᨿᩈᨴ᩠ᨴᩮᩣ ᩍᨵᩣᨸᩥ ᨸᩅᨲ᩠ᨲᨲᩦᨲᩥ ᨴ᩠ᩅᩦᩈᩩᨸᩥ ᩅᩩᨲ᩠ᨲᩮᩣ.

ᨸᩣᨴᩮᨶ ᩋᨽ᩠ᨿᩩᨸᨣᨾᩔ ᨶᩣᨾᩣᨶᩥ. ᨸᨲᩥᨸᩩᨻ᩠ᨻᩮᩣ ᨩᩣᨶᩣᨲᩥ ᩋᨽ᩠ᨿᩩᨸᨣᨾᩮ, ᩍᨲ᩠ᨳᩥᨿᩴ ᩋ, ᨸᨭᩥᨬ᩠ᨬᩣ. ᨲᨳᩣ ᩈᩩᨱᩮᩣᨲᩥ ᨧ, ᩋ, ᨸᨭᩥᩔᩅᩮᩣ, ᨴ᩠ᩅᩦᩈᩩᨸᩥ ᨽᩣᩅᩈᩣᨵᨶᩴ. ᩈᩴᩅᩥᨴᩣ’ᨣᩪ, ᨸᨭᩥᨬ᩠ᨬᩣᨶᩴ, ᨶᩥᨿᨾᩮᩣ, ᩋᩔᩅᩮᩣ, ᩈᩴᩈᩅᩮᩣ, ᩋᨦ᩠ᨣᩦᨠᩣᩁᩮᩣ, ᩋᨽ᩠ᨿᩩᨸᨣᨾᩮᩣ, ᩈᨾᩣᨵᩥᩍᨧ᩠ᨧᩣᨴᩦᨶᩥᨸᩥ ᩋᨽ᩠ᨿᩩᨸᨣᨾᩔ ᨶᩣᨾᩣᨶᩥ [ᩋᨾᩁ ᪕.᪕].

᪑᪗᪒. ᨨᩉᩥ ᨸᨴᩮᩉᩥ ᩋᨶᩣᨴᩁᩔ ᨶᩣᨾᩣᨶᩥ. ᨾᩣᨶ ᨸᩪᨩᩣᨿᩴ, ᨧᩩᩁᩣᨴᩥ, ᨾᨶ ᨬᩣᨱᩮ ᩅᩣ, ᩉᩮᨭ᩠ᨮᩣ ᨠᨲ᩠ᩅᩣ ᨩᩣᨶᨶᩴ ᩋᩅᨾᩣᨶᩴ, ᨽᩣᩅᩮ ᨿᩩ. ᨿᩮᩣ ᨿᩮᨶᩣᨶᩣᨴᩁᩥᨲᩮᩣ, ᩈ ᨲᨲᩮᩣ ᩋᩅᩔᨾᩮᩅ ᨠᩣᨿᩅᨧᩦᨾᨶᩣᨶᩴ ᩋᨬ᩠ᨬᨲᩁᩮᨶᩣᩅᨵᩦᨿᨲᩮᨲᩥ ᩋᨶᩣᨴᩁᩮᨸᩥ ᨻ᩠ᨿᩅᨵᩣᨶᩣᨽᩥᨧᩣᩁᨲᩮᩣ ᨲᩥᩁᩈᨴ᩠ᨴᩮᩣ ᩋᨶ᩠ᨲᩁᨵᩣᨶᩮ ᩅᨲ᩠ᨲᨾᩣᨶᩮᩣ ᩈᨾ᩠ᨻᨩ᩠ᨫᨲᩮᨲᩥ ᨲᩥᩁᩮᩣᨵᩣᨶᨠᩁᨱᩴ ᨲᩥᩁᨠ᩠ᨠᩣᩁᩮᩣ. ᨸᩁᩥ ᨸᩁᩣᨸᩩᨻ᩠ᨻᩮᩣ ᨽᩪᨵᩣᨲᩩ ᩋᩅᨬ᩠ᨬᩣᨱᩮ, ᩋᩅᨸᩩᨻ᩠ᨻᩮᩣ ᨩᩣᨶᩣᨲᩥ ᨧ, ᩈᨻ᩠ᨻᨲᩕ ᨽᩣᩅᩮ ᨱᩮᩣ, ᩋ ᨧ. ᨴᩁ ᩌᨴᩁᩮ, ᩌᨴᩁᩮᩣ ᩈᨠ᩠ᨠᩣᩁᩮᩣ, ᨲᨻ᩠ᨻᩥᨸᩁᩦᨲᩮᩣ ᩋᨶᩣᨴᩁᩮᩣ. ᨸᩁᩣᨽᩅᨶᩴ ᨸᩁᩣᨽᩅᩮᩣ. ᩋᩅᨩᩣᨶᨶᩴ ᩋᩅᨬ᩠ᨬᩣ.

ᨴ᩠ᩅᨿᩴ ᩏᨾ᩠ᨾᩣᨴᩮ. ᨧᩥᨲ᩠ᨲᩔ ᩅᩥᨻ᩠ᨽᨾᩮᩣ ᨽᨶ᩠ᨲᩥ ᩏᨾ᩠ᨾᩣᨴᩮᩣ. ᨾᨴ ᩏᨾ᩠ᨾᩣᨴᩮ, ᩏᨣ᩠ᨣᨲᩮᩉᩥ, ᩏᨾ᩠ᨾᨣ᩠ᨣᩈᨱ᩠ᨮᩥᨲᩮᩉᩥ ᩅᩣ ᨴᩮᩣᩈᩮᩉᩥ ᨾᨴᨶᩴ ᩏᨾ᩠ᨾᩣᨴᩮᩣ.

᪑᪗᪓. ᩈ᩠ᨶᩮᩉᨶ᩠ᨲᩴ ¶ ᩈ᩠ᨶᩮᩉᩮ. ᨸᩥᨿᩔ ᨽᩣᩅᩮᩣ ᨸᩮᨾᩴ, ᩍᨾᩮᩣ, ᨸᩥᨿᩔ ᨸᨲ᩠ᨲᩴ, ᨸᩦᨶᨿᨲᩦᨲᩥ ᩅᩣᨸᩦ, ᨸᩥᨶᩮᩣ ᨽᩣᩅᩮᩣ ᨸᩮᨾᩴ, ᩍᨾᩮᩣ. ᩈᩥᨶᩥᩉ, ᩈ᩠ᨶᩥᩉ ᨸᩦᨲᩥᨿᩴ, ᨽᩣᩅᩮ ᨱᩮᩣ. ᨴ᩠ᩅᨿᩴ ᨾᩩᨧ᩠ᨨᩣᨿᩴ. ᨸᩦᩊ ᩅᩥᨻᩣᨵᩣᨿᩴ, ᨧᩥᨲ᩠ᨲᩔ ᨸᩦᩊᩣ ᨧᩥᨲ᩠ᨲᨸᩦᩊᩣ, ᩅᩥᨣᨲᩣ ᨶᩦᩃᩣᨴᩥᩈᨬ᩠ᨩᩣᨶᨶᩃᨠ᩠ᨡᨱᩣ ᩈᨬ᩠ᨬᩣ ᩑᨲᩈ᩠ᨾᩣᨲᩥ ᩅᩥᩈᨬ᩠ᨬᩦ, ᨲᩔ ᨽᩣᩅᩮᩣ ᩅᩥᩈᨬ᩠ᨬᩥᨲᩣ.

ᨴ᩠ᩅᨿᩴ ᨸᨾᩣᨴᩮ. ᨿᩮᨶ ᩈᨠ᩠ᨠᩮᩣ ᩈᨾᩣᨶᩮᩣ ᩈᨿᩴ ᨠᨲ᩠ᨲᨻ᩠ᨻᩴ ᨶ ᨠᩁᩮᩣᨲᩥ, ᩈᩮᩣ ᨸᨾᩣᨴᩮᩣ, ᨾᨴ ᨸᨾᩣᨴᩮ ᨸᨸᩩᨻ᩠ᨻᩮᩣ, ᨸᨾᨩ᩠ᨩᨶᩴ ᨸᨾᩣᨴᩮᩣ, ᨱᩮᩣ. ᩈᨩ ᩅᩥᩈᨩ᩠ᨩᨶᩣᩃᩥᨦ᩠ᨣᨶᨶᩥᨾ᩠ᨾᩣᨶᩮᩈᩩ. ᩈᨲᩥᨿᩣ ᩅᩥᩈᨩ᩠ᨩᨶᩴ ᩈᨲᩥᩅᩮᩣᩈᨣ᩠ᨣᩮᩣ, ᩍᩔ ᩒ. ᩋᨸᩩᨻ᩠ᨻᩅᨲ᩠ᨳᩩᨸᩁᩥᨠ᩠ᨡᩣᨲᩥᩈᨿᩮ ᨠᩮᩣᨲᩪᩉᩃᩣᨴᩥᨴ᩠ᩅᨿᩴ. ᨲᩩᨩ ᩉᩥᩴᩈᩣᨿᩴ, ᨠᩩᩴ ᨸᩣᨸᩴ ᨲᩮᩣᨩᨲᩦᨲᩥ ᨠᩮᩣᨲᩪᩉᩃᩴ, ᩋᩃᩮᩣ, ᩅᨱ᩠ᨱᩅᩥᨠᩣᩁᩮᩣ ᨧ. ᨲᩩᩃ ᨶᩥᨠ᩠ᨠᩈᩮ, ᨠᩩᩴ ᨸᩣᨸᩴ ᨲᩩᩃᨿᨲᩦᨲᩥ ᨠᩩᨲᩪᩉᩃᩴ, ᩋ, ᩉᨠᩣᩁᩅᨱ᩠ᨱᩣᨣᨾᩮᩣ. ᨠᩮᩣᨲᩩᨠᩴ, ᨠᩩᨲᩩᨠᨬ᩠ᨧ ᩑᨲᩮᩈᩴ ᨸᩁᩥᨿᩣᨿᩣᨶᩥ.

᪑᪗᪔. ᩅᩥᩃᩣᩈᩣᨴᨿᩮᩣ ᨠᩕᩥᨿᩣ ᨧᩮᨭ᩠ᨮᩣ, ᨠᩥᩴᩅᩥᩈᩥᨭ᩠ᨮᩣ? ᩈᩣ ᨠᩕᩥᨿᩣ ᨶᩣᩁᩥᩈᩥᨦ᩠ᨣᩣᩁᨽᩣᩅᨩᩣ ᩍᨲ᩠ᨳᩦᨶᩴ ᩁᨲᩥᨽᩣᩅᨩᩣ, ᨿᩣ ᩉᩣᩅᩈᨴ᩠ᨴᩮᨶᩮᩣᨧ᩠ᨧᨶ᩠ᨲᩮ. ᩉᩩᨿᨶ᩠ᨲᩮ ᩁᩣᨣᩥᨶᩮᩣ ᩋᨲᩕᩣᨲᩥ ᩉᩣᩅᩮᩣ, ᩉᩩ ᩉᩅᨶᩮ, ᨱᩮᩣ. ᩌᨴᩥᨶᩣ ᩅᩥᨧ᩠ᨨᩥᨲ᩠ᨲᩥᨸᨽᩩᨲᩦᨶᩴ ᨣᩉᨱᩴ, ᨲᨳᩣ ᩉᩥ ᩅᩩᨲ᩠ᨲᩴ ᨶᩣᨭᨠᩁᨲᨶᨠᩮᩣᩈᩮ –

‘‘ᩃᩦᩃᩣ ¶ ᩅᩥᩃᩣᩈᩮᩣ ᩅᩥᨧ᩠ᨨᩥᨲ᩠ᨲᩥ, ᩅᩥᨻ᩠ᨽᨾᩮᩣ ᨠᩥᩃᨠᩥᨬ᩠ᨧᩥᨲᩴ;

ᨾᩮᩣᨭ᩠ᨭᩣᨿᩥᨲᩴ ᨠᩩᨭ᩠ᨭᨾᩥᨲᩴ, ᩅᩥᨻ᩠ᨻᩮᩣᨠᩮᩣ ᩃᩃᩥᨲᩴ ᨲᨳᩣ.

ᩅᩥᨠᨲᨬ᩠ᨧᩮᨲᩥ ᩅᩥᨬ᩠ᨬᩮᨿ᩠ᨿᩣ, ᨴᩈ ᨳᩦᨶᩴ [ᨳᩦᨶᩴ ᨧᩮᨭ᩠ᨮᩣ (ᨠ.)] ᩈᨽᩣᩅᨩᩣ;

ᩉᩣᩅᩮᩣ ᨧ ᩉᩮᩃᩣ ᩅᩥᨠ᩠ᨡᩮᨸ-ᩈᨾ᩠ᨾᩪᩊ᩠ᩉᨾᨴᨠᨸᨱ᩠ᨿ’’ᨶ᩠ᨲᩥ.

ᨲᨲᩕ ᨸᩥᨿᩈᨾᩦᨸᨣᨾᨶᩮ ᨿᩮᩣ ᨮᩣᨶᩣᩈᨶᨣᨾᨶᩅᩥᩃᩮᩣᨠᩥᨲᩮᩈᩩ ᩅᩥᨠᩣᩁᩮᩣ, ᩋᨠᩈ᩠ᨾᩣ ᨧ ᨠᩮᩣᨵᨾᩥᩉᩥᨲᨧᨾᨠ᩠ᨠᩣᩁᨾᩩᨡᩅᩥᨠᩪᨱᨶᩴ, ᩈᩮᩣ ᩅᩥᩃᩣᩈᩮᩣ, ᩅᩥᨸᩩᨻ᩠ᨻᩣ ᩃᩈᨵᩣᨲᩩᨾ᩠ᩉᩣ ᨱᩮᩣ. ᩈᩩᨠᩩᨾᩣᩁᩅᩥᨵᩣᨶᩮᨶ ᨽᨾᩩᨠᨶᩮᨲ᩠ᨲᩣᨴᩥᨠᩕᩥᨿᩣᩈᨧᩥᩅᨠᩁᨧᩁᨱᨦ᩠ᨣᩅᩥᨶ᩠ᨿᩣᩈᩮᩣ ᩃᩃᩥᨲᩴ, ᩃᩃ ᩅᩥᩃᩣᩈᩮ, ᨲᩮᩣ. ᩋᩃᨴ᩠ᨵᨸᩥᨿᩈᨾᩣᨣᨾᩮᨶ ᨠᩩᨧᩥᨲ᩠ᨲᩅᩥᨶᩮᩣᨴᨶᨲ᩠ᨳᩴ ᨸᩥᨿᩔ ᨿᩣ ᩅᩮᩈᨣᨲᩥᨴᩥᨭ᩠ᨮᩥᩉᩈᩥᨲᨽᨱᩥᨲᩮᩉᩣᨶᩩᨠᨲᩥ ᨠᩁᩦᨿᨲᩮ, ᩈᩣ ᩃᩦᩃᩣ, ᩃᩃ ᩅᩥᩃᩣᩈᩮ, ᩃᩃ ᩏᨸᩈᩮᩅᩣᨿᨶ᩠ᨲᩥ ᩅᩣ ᨵᩣᨲ᩠ᩅᨲ᩠ᨳᩮᩣ, ᩋ. ᩈᩩᩁᨲᩮ ᨸᩅᨯ᩠ᨰᩮᨧ᩠ᨨᩣ ᩉᩮᩊᩣ, ᩉᩮᩃᩣ ᩅᩣ, ᩉᩥᩃ ᩉᩣᩅᨠᩁᨱᩮ, ᩋ. ᨾᨴᩁᩣᨣᩉᩔᨩᨶᩥᨲᩮᩣ ᩅᩥᨸᩁᩥᨿᩣᩈᩮᩣ ᩅᩥᨻ᩠ᨽᨾᩮᩣ. ᩌᨽᩁᨱᩅᩥᩃᩮᨸᨶᩣᨴᩦᨶᩴ ᨠᩩᨲᩮᩣᨧᩥ ᨸᩥᨿᩣᨸᩁᩣᨵᨲᩮᩣ ᩍᩔᩣᨿᩣᨶᩣᨴᩁᩮᨶ ᨧᨲ᩠ᨲᩣᨶᩴ ᩈᨡᩦᨶᩴ ᨸᨿᨲᨶᩮᨶ ᩅᩣᩁᨱᩴ ᩅᩥᨧ᩠ᨨᩥᨲ᩠ᨲᩥ, ᨨᩥᨴᩥ ᨴ᩠ᩅᩮᨵᩣᨠᩁᨱᩮ,ᨲᩥ. ᨸᩥᨿᩮᨶ ᨴᨲ᩠ᨲᩴ ᨸᩦᨲᩥᨶᩥᨻᨶ᩠ᨵᨶᩴ ᩈ᩠ᩅᨸ᩠ᨸᨾᨸᩥ ᨽᩪᩈᨶᩴ ᩅᩥᨧ᩠ᨨᩥᨲ᩠ᨲᩦᨲ᩠ᨿᨬ᩠ᨬᩮ. ᨠᩥᩃᨠᩥᨬ᩠ᨧᩥᨲᩣᨴᨿᩮᩣ ᨶᩣᨭᨠᩈᨲ᩠ᨳᩣᨶᩩᩈᩣᩁᨲᩮᩣ [ᨻ᩠ᨿᩣᨡ᩠ᨿᩣᩈᩩᨵᩣᨭᩦᨠᩣᨭᩦᨸ᩠ᨸᨱᩮ] ᨬᩮᨿ᩠ᨿᩣ.

᪑᪗᪕. ᨲᩥᨠᩴ ᩉᩈᩥᨲᩮ. ᩉᩈ ᩉᩈᨶᩮ, ᩈᨻ᩠ᨻᨲᩕ ᨽᩣᩅᩈᩣᨵᨶᩴ. ᩈᩮᩣ ᩉᩣᩈᩮᩣ ᨾᨶ᩠ᨴᩮᩣ ᩈᨾᩣᨶᩮᩣ ᨾᩥᩉᩥᨲᩴ, ᩈᩥᨲᨬ᩠ᨧᩩᨧ᩠ᨧᨲᩮ. ᨾᩥᩉ ᩎᩈᩴᩉᩈᨶᩮ. ᨾᨶ᩠ᨴᩔᩥᨲᩴ ᨾ᩠ᩉᩥᨲᨶ᩠ᨲᩥᨸᩥ ᨸᩣᨮᩮᩣ, ᨾ᩠ᩉᩥ ¶ ᩎᩈᩴᩉᩈᨶᩮᨲᩥᨸᩥ ᨵᩣᨲᩩ, ᨾ᩠ᩉᩥᩔ, ᨾᩥᩉᩥᩔ ᩅᩣ ᩈ᩠ᨿᩣᨴᩮᩈᩮᩣ, ᩈᩥᨲᩴ. ᩈᨻ᩠ᨻᨲᩕ ᨽᩣᩅᩮ ᨲᩮᩣ.

ᩎᩈᩴᨹᩩᩃ᩠ᩃᩥᨲᨴᨶ᩠ᨲᩮᩉᩥ, ᨠᨭᩣᨠ᩠ᨡᩮᩉᩥ ᩈᩮᩣᨭ᩠ᨮᩅᩮᩉᩥ ᨧ;

ᩋᩃᨠ᩠ᨡᩥᨲᨴ᩠ᩅᩥᨩᨴ᩠ᩅᩣᩁᩴ, ᩈᩥᨲᨾᩥᨧ᩠ᨨᨶ᩠ᨲᩥ ᩈᩪᩁᨿᩮᩣ [ᨧᩥᨶ᩠ᨲᩣᨾᨱᩥᨭᩦᨠᩣ ᪗.᪓᪔].

ᨴ᩠ᩅᨿᩴ ᨾᩉᩣᩉᩈᩥᨲᩮ. ᩋᨭ ᨣᨲᩥᨿᩴ, ᨴᩪᩁᨣᩣᨾᩥᩉᩣᩈᩮᩣ ᩋᨭᩉᩣᩈᩮᩣ, ᩋᨲᩥᨠ᩠ᨠᨶ᩠ᨲᩮᩣ ᩅᩣ ᩉᩣᩈᩮᩣ ᩋᨭᩉᩣᩈᩮᩣ, ᨲᩔ ᨭᩮᩣ, ᩍᨠᩣᩁᩔᨲ᩠ᨲᨬ᩠ᨧ. ᩈᩥᨲᩣᨲᩥᩉᩈᩥᨲᩣᨶᩴ ᩋᨶ᩠ᨲᩁᩣᩊᩥᨠᩴ ᩅᩥᩉᩈᩥᨲᩴ.

ᩌᨠᩩᨬ᩠ᨧᩥᨲᨠᨸᩮᩣᩃ’ᨠ᩠ᨡᩴ, ᩈᩔᨶᩴ ᨶᩥᩔᨶᩴ ᨲᨳᩣ;

ᨸᨲ᩠ᨳᩣᩅᩮᩣᨲ᩠ᨳᩴ ᩈᩣᨶᩩᩁᩣᨣᩴ, ᩌᩉᩩ ᩅᩥᩉᩈᩥᨲᩴ ᨻᩩᨵᩣ [ᨧᩥᨶ᩠ᨲᩣᨾᨱᩥᨭᩦᨠᩣ ᪗.᪓᪕].

ᨴ᩠ᩅᨿᩴ ᩃᩮᩣᨾᩩᨣ᩠ᨣᨾᩮ. ᩁᩮᩣᨾᩣᨶᩴ ᩋᨬ᩠ᨧᨶᩴ ᩁᩮᩣᨾᨬ᩠ᨧᩮᩣ, ᩋᨬ᩠ᨧ ᨣᨾᨶᩮ, ᨱᩮᩣ. ᩃᩮᩣᨾᩣᨶᩴ ᩉᩴᩈᨶᩴ ᩏᨴ᩠ᨵᨣ᩠ᨣᨽᩣᩅᩮᩣ ᩃᩮᩣᨾᩉᩴᩈᨶᩮᩣ.

᪑᪗᪖. ᨸᩁᩥᩉᩣᩈᩣᨴᩥᨨᨠ᩠ᨠᩴ ᩅᩃ᩠ᩃᨽᩣᨴᩦᨶᩴ ᨸᩁᩥᩉᩣᩈᩮ. ᨸᩁᩥᩉᩈᨶ᩠ᨲ᩠ᨿᨲᩕᩣᨲᩥ ᨸᩁᩥᩉᩣᩈᩮᩣ, ᨱᩮᩣ, ᨸᩁᩥᨽᩅᩥᨲᩩᨠᩣᨾᩮᨶ ᩉᩣᩈᩮᩣᨲᩥ ᩅᩣ ᨸᩁᩥᩉᩣᩈᩮᩣ. ᨴᩩ ᨸᩁᩥᩉᩣᩈᩮ, ᨴᩩ ᩋᨶᩣᨴᩁᩮᨲᩥ ᩅᩣ ᨵᩣᨲᩩ, ᩋ, ᨴᩅ ᨴᩣᩉᩮᨲᩥ ᩅᩣ ᨵᩣᨲᩩ. ᨡᩥᨯ ᨠᩦᩊᩣᨿᩴ, ᨡᩥᨯ᩠ᨯᩣ, ᨡᩥᨴ᩠ᨴᩣᨲᩥᨸᩥ ᨸᩣᨮᩮᩣ, ᩋᨳ ᩅᩣ ᨡᩴ ᨲᩩᨧ᩠ᨨᩴ ᩍᨯ᩠ᨯᩣ ᩅᩣᨧᩣ, ᩈᩣ ᩑᨲ᩠ᨳᩣᨲᩥ ᨡᩥᨯ᩠ᨯᩣ. ᨠᩦᩊ ᨸᩦᨲᩥᨿᨠᩦᩊᨶᩮᩈᩩ, ᨠᩦᩊ ᩅᩥᩉᩣᩁᩮᨲᩥ ᩅᩣ, ᨠᩦᩊᨶᩴ ᨠᩮᩊᩥ ᨠᩦᩊᩣ ᨧ ᨠᩦᩊᩥᨲᨬ᩠ᨧ. ᨸᩁᩥᩉᩣᩈᩣᨴᩥᨨᨠ᩠ᨠᩮᩈᩩᨸᩥ ᩋᨵᩥᨠᩁᨱᩈᩣᨵᨶᨾ᩠ᨸᩥ ᩌᨧᩁᩥᨿᩣ ᩅᨴᨶ᩠ᨲᩥ.

ᨲᩥᨠᩴ ¶ ᨶᩥᨴ᩠ᨴᩣᨿᩴ. ᨶᩥᨸᩩᨻ᩠ᨻᩮᩣ ᨴᩣ ᩈᩩᨸᨶᩮ, ᩋ. ᩈᩩᨸ ᩈᨿᩮ, ᩍᨶᩮᩣ, ᩈᩩᨸᩥᨶᩴ. ᩋ, ᩈᩮᩣᨸ᩠ᨸᩴ. ᩋᨧ᩠ᨧᨶ᩠ᨲᨸᩁᩥᩔᨾᩣᨴᩥᨠᩣᩁᨱᩣ ᩈᨻ᩠ᨻᨦ᩠ᨣᨶᩥᨾᩦᩃᨶᩴ ᨾᩥᨴ᩠ᨵᩴ. ᨾᩩᨧ᩠ᨨᩣᨸᩣᨿᩴ ᨾᩥᨴ᩠ᨵᩴ. ᨾᩥᨴ ᨠᩣᩁᩥᨿᨠ᩠ᨡᨾᨶᩮ, ᨲᩮᩣ. ᨾᩮᨵᨿᨲᩥ ᩅᩣ ᨾᩥᨴ᩠ᨵᩴ, ᩋᨠᨾ᩠ᨾᨬ᩠ᨬᨽᩣᩅᩮᨶ ᩅᩥᩉᩥᩴ ᩈᨲᩦᨲ᩠ᨿᨲ᩠ᨳᩮᩣ, ᨠᨾ᩠ᨸᨶᨲ᩠ᨳᩮᩣ ᨧᩃᨵᩣᨲᩩ ᨾᩩᨧ᩠ᨨᩣᨸᩣᨿᩮ ᨸᨸᩩᨻ᩠ᨻᩮᩣ. ᩋᨠ᩠ᨡᩥᨴᩃᩣᨶᩴ ᨸᨧᩃᨽᩣᩅᩮᨶ ᩋᨿᨲᩥ ᨸᩅᨲ᩠ᨲᨲᩦᨲᩥ ᨸᨧᩃᩣᨿᩥᨠᩣ, ᨱ᩠ᩅᩩ, ᩋᩔᩥᨲ᩠ᨲᩴ.

᪑᪗᪗-᪑᪗᪘. ᨠᩮᨲᩅᨶ᩠ᨲᩴ ᨠᩪᨭᩮ. ᨠᩁᨱᩴ ᨠᨲᩥ, ᨶᩥᨶ᩠ᨴᩥᨲᩣ ᨠᨲᩥ ᨶᩥᨠᨲᩥ. ᩋᨭ ᨣᨾᨶᩮ, ᨠᩩᨧ᩠ᨨᩥᨲᩮᨶᩣᨠᩣᩁᩮᨶ ᩋᨭᨲᩦᨲᩥ ᨠᩪᨭᩴ. ᨠᩩᨭ ᨨᩮᨴᨶᩮᨲᩥ ᩅᩣ ᨵᩣᨲᩩ [ᩈᨴ᩠ᨴᨶᩦᨲᩥᨵᩣᨲᩩᨾᩣᩃᩣᨿᩴ ᨸᨶ ‘‘ᨠᩪᨭ ᩋᨸ᩠ᨸᩈᩣᨴᩮ’’ᨲᩥ ᨵᩣᨲᩩᨶᩣ ᩈᩣᨵᩥᨲᩴ]. ᩁᨽᩥ ᨻ᩠ᨿᩣᨩᩮ, ᨻ᩠ᨿᩣᨩᩮᩣ ᨶᩣᨾ ᨠᩮᨲᩅᩴ. ᩈᨮ ᨠᩮᨲᩅᩮ, ᩈᨮᩴ, ᩈᨮᨿᨲᩥ ᨶ ᩈᨾ᩠ᨾᩣ ᨽᩣᩈᨲᩥ ᨿᩮᨶᩣᨲᩥ ᩅᩣ ᩈᨮᩴ. ᨠᩥᨲᩅᩔ ᨵᨾ᩠ᨾᩮᩣ ᨠᩮᨲᩅᩴ, ᨠᩥᨲᩅᩮᩣ ᨶᩣᨾ ᨩᩪᨲᨠᩣᩁᩮᩣ, ᨧᩮᩣᩁᩮᩣ ᩅᩣ, ᨠᩥᨲ ᨶᩥᩅᩣᩈᩮ, ᩋᩅᩮᩣ. ᨠᨸᨭᩮᩣ, ᨻ᩠ᨿᩣᨩᩮᩣ, ᩏᨸᨵᩥ, ᨠᩩᩈᨲᩥ ᩍᨧ᩠ᨧᩣᨴᩦᨶᩥᨸᩥ ᨠᩮᨲᩅᩔ ᨶᩣᨾᩣᨶᩥ.

ᩈᨲ᩠ᨲᨠᩴ ᩈᨽᩣᩅᩮ. ᨽᩅᨶᩴ ᨽᩣᩅᩮᩣ, ᩈᩔ ᩋᨲ᩠ᨲᨶᩮᩣ, ᩈᨶ᩠ᨲᩮᩣ ᩅᩣ ᩈᩴᩅᩥᨩ᩠ᨩᨾᩣᨶᩮᩣ ᨽᩣᩅᩮᩣ ᩈᨽᩣᩅᩮᩣ. ᩈᨩ ᩅᩥᩈᨩ᩠ᨩᨶᩣᩃᩥᨦ᩠ᨣᨶᨶᩥᨾ᩠ᨾᩣᨶᩮᩈᩩ, ᨶᨲ᩠ᨳᩥ ᩅᩥᩈᨩ᩠ᨩᨶᨾᩮᨲᩔᩣᨲᩥ ᨶᩥᩔᨣ᩠ᨣᩮᩣ. ᩁᩪᨸ ᨸᨠᩣᩈᨶᩮ, ᩈᩴᩅᩥᨩ᩠ᨩᨾᩣᨶᩴ ᩁᩪᨸᩴ ᩈᩁᩪᨸᩴ. ᨠᩁᨱᩴ ᨽᩅᨶᩴ ᨠᨲᩥ, ᨸᨮᨾᩴ ᨠᨲᩥ ᨸᨠᨲᩥ. ᨿᨳᩣ ᨸᨮᨾᨠᩣᩃᩮ ᩈᨾ᩠ᨽᩪᨲᩣ, ᨲᨳᩮᩅ ᩈᨻ᩠ᨻᨴᩣᨸᩦᨲ᩠ᨿᨲ᩠ᨳᩮᩣ. ᩈᩦᩃ ᩈᨾᩣᨵᩥᨾ᩠ᩉᩥ, ᩈᨾᩣᨵᩥ ᨶᩥᨿᨾᩮᩣ. ᩃᨠ᩠ᨡ ᨴᩔᨶᨦ᩠ᨠᩮᩈᩩ, ᨲᨳᩮᩅ ᩃᨠ᩠ᨡᩥᨲᨻ᩠ᨻᨶ᩠ᨲᩥ ᩃᨠ᩠ᨡᨱᩴ, ᨿᩩ. ᨲᨳᩮᩅ ᨽᩅᨲᩦᨲᩥ ᨽᩣᩅᩮᩣ.

ᨴ᩠ᩅᨿᩴ ¶ ᩏᩔᩅᩮ. ᩏᩈ ᨴᩣᩉᩮ. ᨠᩴ ᩏᩈᩅᨶ᩠ᨲᩥ ᩏᨣ᩠ᨣᩥᩁᨿᨶ᩠ᨲ᩠ᨿᨲᩕᩣᨲᩥ ᩏᩔᩅᩮᩣ, ᨶᩣᨶᩣᩈᨾᩥᨴ᩠ᨵᩦᩉᩥ ᩈᩅᨶ᩠ᨲᩥ ᩑᨲ᩠ᨳᩣᨲᩥ ᩅᩣ ᩏᩔᩅᩮᩣ. ᨨᩥ ᨨᩮᨴᨶᩮ, ᨨᩥᨶ᩠ᨴᨲᩥ ᩈᩮᩣᨠᨾᩮᨲ᩠ᨳᩣᨲᩥ ᨨᨱᩮᩣ. ᨿᩩ. ᩍᩔ ᩃᩮᩣᨸᩮᩣ. ᩈᩮᩣᨠᩴ, ᨸᩣᨸᨬ᩠ᨧ ᨨᩥᨶ᩠ᨴᨶ᩠ᨲᩣ ᩋᨱᨶ᩠ᨲᩥ ᩈᨴ᩠ᨴᩣᨿᨶ᩠ᨲᩥ ᩑᨲ᩠ᨳᩣᨲᩥ ᩅᩣ ᨨᨱᩮᩣ. ᨨᩥ ᨨᩮᨴᨶᩮ. ᩋᨱ ᩈᨴ᩠ᨴᨲ᩠ᨳᩮᩣ ᨴᨱ᩠ᨯᨠᩮᩣ ᨵᩣᨲᩩ.

᪑᪗᪙. ᨿᨳᩣ ᩈᩈ᩠ᨶᩮᩉᩴ ᨸᨠᨲᩥᨲᩥᩃᨲᩮᩃᩣᨴᩥᩈ᩠ᨶᩮᩉᩈᩉᩥᨲᩴ ᨴᩦᨸᨠᩴ ᨸᨩ᩠ᨩᩮᩣᨲᩴ ᨵᩣᩁᩮᨶ᩠ᨲᩮᩣ ᨩᨶ᩠ᨲᩩ ᨶᩁᩮᩣ ᩋᨲ᩠ᨿᨶ᩠ᨵᨠᩣᩁᨣᨻ᩠ᨽᩣᨴᩦᩈ᩠ᩅᨸᩥ ᨮᩥᨲᩣᨶᩥ ᨡᩩᨴ᩠ᨴᨠᩣᨶ᩠ᨿᨲ᩠ᨳᨩᩣᨲᩣᨶᩥ ᩋᨲᩥᩈᩩᨡᩩᨾᩣᨶᩥᨸᩥ ᨶᩣᨶᩣᨴᨻ᩠ᨻᩈᨾᩪᩉᩣᨶᩥ ᩈᩩᨡᩴᩅ ᩈᨾ᩠ᨸᩔᨲᩥ, ᨲᨳᩣ ᩈᩈ᩠ᨶᩮᩉᩴ ᨻᩩᨴ᩠ᨵᨸᩁᩥᨿᩣᨿᩣᨴᩥᩋᨶᩮᨠᨸᩁᩥᨿᩣᨿᩈ᩠ᨶᩮᩉᩈᩉᩥᨲᩴ ᩍᨾᩴ ᩋᨽᩥᨵᩣᨶᨸ᩠ᨸᨴᩦᨸᩥᨠᩴ ᨣᨶ᩠ᨳᩴ ᩏᨣ᩠ᨣᩉᨱᨵᩣᩁᨱᩣᨴᩥᨶᩣ ᨵᩣᩁᩮᨶ᩠ᨲᩮᩣ ᨩᨶ᩠ᨲᩩ ᩈᩮᩣᨲᩩᨩᨶᩮᩣ ᨡᩩᨴ᩠ᨴᨠᩣᨶᩥ ᩋᨲ᩠ᨳᨩᩣᨲᩣᨶᩥ ᨶᩣᨶᩣᩈᨲ᩠ᨳᩮᩈᩩ ᩌᨣᨲᩣᨶᩥ ᩋᨲᩥᨣᨾ᩠ᨽᩦᩁᩣᨶᩥ ᩋᨲ᩠ᨳᨩᩣᨲᩣᨶᩥ ᩈᩩᨡᩴ ᩈᨾ᩠ᨸᩔᨲᩦᨲᩥ ᨿᩮᩣᨩᨶᩣ.

ᩍᨲᩥ ᩈᨠᩃᨻ᩠ᨿᩣᨠᩁᨱᨾᩉᩣᩅᨶᩣᩈᨦ᩠ᨣᨬᩣᨱᨧᩣᩁᩥᨶᩣ ᨠᩅᩥᨠᩩᨬ᩠ᨩᩁᨠᩮᩈᩁᩥᨶᩣ ᩈᩥᩁᩥᨾᩉᩣᨧᨲᩩᩁᨦ᩠ᨣᨻᩃᩮᨶ ᨾᩉᩣᨾᨧ᩠ᨧᩮᨶ ᩅᩥᩁᨧᩥᨲᩣᨿᩴ ᩋᨽᩥᨵᩣᨶᨸ᩠ᨸᨴᩦᨸᩥᨠᩣᩅᨱ᩠ᨱᨶᩣᨿᩴ ᩈᨣ᩠ᨣᨠᨱ᩠ᨯᩅᨱ᩠ᨱᨶᩣ ᩈᨾᨲ᩠ᨲᩣ.

ᩈᨣ᩠ᨣᨠᨱ᩠ᨯᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪒. ᨽᩪᨠᨱ᩠ᨯ

᪑. ᨽᩪᨾᩥᩅᨣ᩠ᨣᩅᨱ᩠ᨱᨶᩣ

᪑᪘᪐. ᩍᨵ ¶ ᨽᩪᨠᨱ᩠ᨯᩮ ᩈᩣᨦ᩠ᨣᩮᩣᨸᩣᨦ᩠ᨣᩮᩉᩥ ᨽᩪᨾ᩠ᨿᩣᨴᩦᩉᩥ ᨴᩈᩉᩥ, ᨸᩣᨲᩣᩃᩮᨶ ᨧᩣᨲᩥ ᩑᨠᩣᨴᩈᩉᩥ ᨠᩮᩣᨭ᩠ᨮᩣᩈᩮᩉᩥ ᨠᨾᨲᩮᩣ ᩅᨣ᩠ᨣᩣ ᨽᩪᨾᩥᩅᨣ᩠ᨣᩣᨴᩥᨶᩣᨾᨠᩣ ᩅᨣ᩠ᨣᩣ ᩅᩩᨧ᩠ᨧᨶ᩠ᨲᩮ. ᩈᨸ᩠ᨸᨵᩣᨶᩮᩣᨸᨠᩣᩁᨠᩣᨶᩥ ᩋᨦ᩠ᨣᩣᨶᩥ ᨡᩣᩁᩣᨴᩦᨶᩥ, ᩋᨦ᩠ᨣᩣᨶᩴ ᩏᨸᨠᩣᩁᨠᩣᨶᩥ ᨧ ᩏᨸᨦ᩠ᨣᩣᨶᩥ ᩋᨴ᩠ᨵᩣᨴᩦᨶᩥ.

᪑᪘᪑. ᩈᩣᨴ᩠ᨵᨸᨩ᩠ᨩᩮᨶ ᨽᩪᨾᩥᨿᩣ ᨶᩣᨾᩣᨶᩥ. ᩅᩈᩪᨶᩥ ᩁᨲᨶᩣᨶᩥ ᨵᩣᩁᨿᨲᩦᨲᩥ ᩅᩈᩩᨶ᩠ᨵᩁᩣ. ᨡᨾᩩ ᩈᩉᨶᩮ, ᨡᩔ ᨨᩮᩣ, ᨨᨾᩣ, ᩋᨳ ᩅᩣ ᨨᩥ ᨨᩮᨴᨶᩮ, ᩈᨲ᩠ᨲᩣᨶᨾᨵᩮᩣᨸᨲᨶᩴ ᨨᩥᨶ᩠ᨴᨲᩦᨲᩥ ᨨᨾᩣ, ᨾᩮᩣ, ᩍᨲ᩠ᨳᩥᨿᨾᩣ ᨧ. ᨽᩅᨶ᩠ᨲ᩠ᨿᩔᩴ ᨽᩪᨲᩣᨶᩦᨲᩥ ᨽᩪᨾᩥ. ᨽᩪ ᩈᨲ᩠ᨲᩣᨿᩴ, ᨾᩥ. ᨸᩩᨳᩍᨲᩥ ᨸᩣᨭᩥᨸᨴᩥᨠᩮ ᨮᩥᨲᩮ ᨶᨴᩣᨴᩥ, ᩎ, ᨸᩩᨳᩔ ᨸᩩᨳᩩᩌᨴᩮᩈᩮ, ᩅᩩᨴ᩠ᨵᩥᨾ᩠ᩉᩥ ᨧ ᨠᨲᩮ ᨸᩩᨳᩅᩦ. ᩏᩔᩩᩅᩣᨴᩮᩈᩮ ᨸᩩᨳᩩᩅᩦ. ᨸᨳᩣᨴᩮᩈᩮ ᨲᩩ ᨸᨳᩅᩦ, ᩍᨾᩈ᩠ᨾᩥᩴ ᨸᨠ᩠ᨡᩮ ᩋᩅᩣᨣᨾᩮᩣ, ᩋᨳ ᩅᩣ ᨳᩅ ᨣᨲᩥᨿᩴ, ᨸᨳᩅᨲᩥ ᩑᨲ᩠ᨳᩣᨲᩥ ᨸᨳᩅᩦ, ᨶᨴᩣᨴᩥ, ᩈᨻ᩠ᨻᨲ᩠ᨳ ᨸᨲ᩠ᨳᩁᨲᩦᨲᩥ ᩅᩣ ᨸᨳᩅᩦ, ᨳᩁ ᩈᨶ᩠ᨳᩁᨱᩮ ᨸᨸᩩᨻ᩠ᨻᩮᩣ, ᩁᩔ ᩅᩮᩣ, ᨶᨴᩣᨴᩥ, ᨸᩩᨳᩅᩦ, ᩋᩔᩩ.

‘‘ᨾᨵᩩᨶᩮᩣ ᨠᩮᨭᨽᩔᩣᨸᩥ, ᨾᩮᨴᨾᩴᩈᨸᩁᩥᨸ᩠ᩃᩩᨲᩣ;

ᨲᩮᨶᩣᨿᩴ ᨾᩮᨴᩥᨶᩦ ᨴᩮᩅᩦ, ᩅᩩᨧ᩠ᨧᨲᩮ ᨻᩕᩉ᩠ᨾᩅᩣᨴᩥᨽᩦ’’ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪑.᪓]. –

ᩅᨧᨶᨲᩮᩣ ᨾᩮᨴᨿᩮᩣᨣᩣ ᨾᩮᨴᩥᨶᩦ, ᩎ, ᩍᨶᩦ ᨧ. ᨾᩥᨴ ᩈ᩠ᨶᩮᩉᨶᩮ ᩅᩣ, ᨿᩩ, ᨶᨴᩣᨴᩥ, ᩍᩔᩮᨲ᩠ᨲᨬ᩠ᨧ. ᨾᩉ ᨸᩪᨩᩣᨿᩴ, ᨶᨴᩣᨴᩥ. ᩅᩥᨲ᩠ᨳᩥᨱ᩠ᨱᨲ᩠ᨲᩣ ¶ ᩏᨻ᩠ᨻᩦ, ᨶᨴᩣᨴᩥ, ᩋᩅᨲᩥ ᨽᩪᨲᩣᨶᩦᨲᩥ ᩅᩣ ᩏᨻ᩠ᨻᩦ, ᩋᩔᩩ. ᩅᩈᩪᨶᩥ ᩈᨶ᩠ᨲ᩠ᨿᩔᩴ ᩅᩈᩩᨾᨲᩦ. ᨣᨧ᩠ᨨᨶ᩠ᨲᩥ ᨿᩔᩴ ᩃᩮᩣᨠᩣ, ᩈᩣ ᨣᩮᩣ, ᨸᩩᨾᩥᨲ᩠ᨳᩥᨿᩴ. ᨠᩣ ᩈᨴ᩠ᨴᩮ, ᨠᩣᨿᨲᩥ ᩑᨲ᩠ᨳ, ᨠᩣᨿᨲᩥ ᨾᩣᩁᩅᩥᨩᨿᨠᩣᩃᩮᨲᩥ ᩅᩣ ᨠᩩ, ᩏ. ᩅᩈᩪᨶᩥ ᨵᩣᩁᨿᨲᩦᨲᩥ ᩅᩈᩩᨵᩣ. ᩈᨻ᩠ᨻᩴ ᩃᩮᩣᨠᩴ ᨵᩁᨿᨲᩦᨲᩥ ᨵᩁᨱᩦ, ᨿᩩ, ᨶᨴᩣᨴᩥ. ᨵᩁᨲᩦᨲᩥ ᨵᩁᩣ, ᩍᨲ᩠ᨳᩥᨿᩴ ᩌ. ᨣᨾᩩ ᨣᨾᨶᩮ, ᨣᨧ᩠ᨨᨶ᩠ᨲ᩠ᨿᩔᩴ ᨩᨣᨲᩦ, ᩋᨶ᩠ᨲᨸᨧ᩠ᨧᨿᩮᩣ, ᨣᩔ ᨴ᩠ᩅᩥᨲ᩠ᨲᩴ, ᨩᨲ᩠ᨲᨬ᩠ᨧ, ᨶᩃᩮᩣᨸᩮᩣ, ᨶᨴᩣᨴᩥ. ᨽᩪ ᩈᨲ᩠ᨲᩣᨿᩴ, ᩁᩥ, ᨶᨴᩣᨴᩥ, ᨠ᩠ᩅᩥᨾ᩠ᩉᩥ ᨽᩪ. ᨽᩪᨲᩮ ᩈᨲ᩠ᨲᩮ ᨵᩁᨲᩦᨲᩥ ᨽᩪᨲᩁᩮᩣ. ᩋᩅ ᩁᨠ᩠ᨡᨱᩮ, ᨿᩩ, ᨶᨴᩣᨴᩥ, ᩋᩅᨶᩦ.

᪑᪘᪒. ᨡᩣᩁᩣ ᩃᩅᨱᩁᩈᩣ ᨾᨲ᩠ᨲᩥᨠᩣ ᩐᩈᩮᩣᨲ᩠ᨿᩩᨧ᩠ᨧᨲᩮ. ᨡᩣᨴᨲᩦᨲᩥ ᨡᩣᩁᩣ, ᨴᩔ ᩁᩮᩣ. ᨸᨴᩮᩈᨠᨲ᩠ᨲᩣ ᨾᨲ᩠ᨲᩮᨶ ᨸᨾᩣᨱᩮᨶ ᨿᩩᨲ᩠ᨲᩣ ᨾᨲ᩠ᨲᩥᨠᩣ. ᩐᩈ ᩁᩩᨩᩣᨿᩴ, ᩐᩈᩮᩣ. ᩐᩈᨿᩮᩣᨣᩣ ᩐᩈᩅᩣ, ᩅᨶ᩠ᨲᩩ. ᩁᨸᨧ᩠ᨧᨿᩮ ᩐᩈᩁᩮᩣ. ᨴ᩠ᩅᩮᨸᩥ ᨲᩦᩈᩩ ᩅᨲ᩠ᨲᨶ᩠ᨲᩮ.

ᨳᩃ ᨮᩣᨶᩮ, ᩋᨵᩥᨠᩁᨱᩮ ᩋ. ᨠᩥᨲ᩠ᨲᩥᨾᩴ ᨳᩃᩴ, ᩋᨠᩥᨲ᩠ᨲᩥᨾᩣ ᨳᩃᩦ, ᨶᨴᩣᨴᩥ. ᨳᨴ᩠ᨵᩃᩪᨡᨾ᩠ᩉᩥ ᨽᩪᨽᩣᨣᩮ ᨽᩪᨾᩥᨸ᩠ᨸᨴᩮᩈᩮ ᨩᨦ᩠ᨣᩃᩈᨴ᩠ᨴᩮᩣ ᩅᨲ᩠ᨲᨲᩥ. ᨲᨲ᩠ᨳ ᨶᩥᨩ᩠ᨩᩃᨲ᩠ᨲᩣ ᨠᨠ᩠ᨡᩊᨲ᩠ᨲᩣ ᨳᨴ᩠ᨵᩮᩣ. ᨲᩥᨠ᩠ᨡᩈᨠ᩠ᨡᩁᩣᨴᩥᩅᩥᨴᩣᩁᨣᩅᩣᨴᩥᨡᩩᩁᨣᨱ᩠ᨯᩩᨸ᩠ᨸᩣᨴᩅᨧ᩠ᨧᩣᨴᩥᩈᩉᩥᨲᨲ᩠ᨲᩣ ᩃᩪᨡᩮᩣ ᩅᩮᨴᩥᨲᨻ᩠ᨻᩮᩣ. ᨣᩃ ᨧᩅᨶᩣᨵᩮᩣᨸᨲᨶᩣᨴᨶᩮᩈᩩ. ᨩᩃᩴ ᨣᩃᨲᩥ ᩑᨲ᩠ᨳ, ᨩᩃᩮᨶ ᩅᩣ ᨣᩃᨶ᩠ᨲᩥ ᩑᨲ᩠ᨳᩣᨲᩥ ᨩᨦ᩠ᨣᩃᩮᩣ, ᨶᩥᨩ᩠ᨩᩃᩮᩣ ᨴᩮᩈᩮᩣ, ‘‘ᨩᨦ᩠ᨣᩃᩮᩣ ᨶᩥᨩ᩠ᨩᩃᩮ ᨴᩮᩈᩮ, ᨲᩥᩃᩥᨦ᩠ᨣᩮᩣ ᨸᩥᩈᩥᨲᩮ ᨳᩥᨿ’’ᨶ᩠ᨲᩥ [ᨲᩥᨠᨱ᩠ᨯᩈᩮᩈ ᪓.᪓.᪓᪙᪓] ᩉᩥ ᨲᩥᨠᨱ᩠ᨯᩈᩮᩈᩮᩣ, ᩃᩔ ᩃᩮᩣᨸᩮᩣ, ᨶᩥᨣ᩠ᨣᩉᩦᨲᩣᨣᨾᩮᩣ ᨧ.

᪑᪘᪓. ᩅᩮᨴᩮᨶ ¶ ᨸᨬ᩠ᨬᩣᨿ ᩎᩉᨶ᩠ᨲᩥ ᩑᨲ᩠ᨳᩣᨲᩥ ᩅᩮᨴᩮᩉᩮᩣ. ᩈᩮᩣ ᩑᩅ ᩅᩥᨴᩮᩉᩮᩣ, ᩍᨾᩴ ᨴᩦᨸᨾᩩᨸᩣᨴᩣᨿ ᩈᩥᨶᩮᩁᩩᨶᩮᩣ ᨸᩩᨻ᩠ᨻᨴᩥᩈᩣᨽᩣᨣᨲ᩠ᨲᩣ ᨸᩩᨻ᩠ᨻᩮᩣ ᨧ ᩈᩮᩣ ᩅᩥᨴᩮᩉᩮᩣ ᨧᩮᨲᩥ ᨸᩩᨻ᩠ᨻᩅᩥᨴᩮᩉᩮᩣ. ᩑᩅᨾᨸᩁᩩᨲ᩠ᨲᩁᩮᩈᩩ. ᨣᩅᩮᨶ ᨿᨶ᩠ᨲ᩠ᨿᩮᨲ᩠ᨳᩣᨲᩥ ᨣᩮᩣᨿᩣᨶᩮᩣ. ᩋᨸᩁᩮᩣ ᨧ ᩈᩮᩣ ᨣᩮᩣᨿᩣᨶᩮᩣ ᨧᩮᨲᩥ ᩋᨸᩁᨣᩮᩣᨿᩣᨶᩮᩣ. ᨩᨾ᩠ᨻᩩᨿᩣ ᩃᨠ᩠ᨡᩥᨲᩮᩣ, ᨠᨸ᩠ᨸᨭ᩠ᨮᩣᨿᩥᨲᩣᨴᩥᨸ᩠ᨸᨽᩣᩅᩮᨶ ᩅᩣ ᨲᨸ᩠ᨸᨵᩣᨶᩮᩣᨴᩦᨸᩮᩣᨲᩥ ᨩᨾ᩠ᨻᩩᨴᩦᨸᩮᩣ. ᨵᨾ᩠ᨾᨲᩣᩈᩥᨴ᩠ᨵᩔ ᨸᨬ᩠ᨧᩈᩦᩃᩔ ᩌᨶᩩᨽᩣᩅᩮᨶ ᨠᩴ ᩈᩩᨡᩴ ᩏᩁᩩ ᨾᩉᨶ᩠ᨲᨾᩮᨲ᩠ᨳᩣᨲᩥ ᨠᩩᩁᩩ, ᨠᩩᩴ ᨸᩣᨸᩴ ᩁᩩᨶ᩠ᨵᨶ᩠ᨲᩥ ᩑᨲ᩠ᨳᩣᨲᩥ ᩅᩣ ᨠᩩᩁᩩ, ᨠ᩠ᩅᩥ. ᨴᩦᨸ ᨴᩥᨲ᩠ᨲᩥᨸ᩠ᨸᨠᩣᩈᨶᩮᩈᩩ, ᨩᩃᨾᨩ᩠ᨫᩮ ᨴᩥᨸ᩠ᨸᨶ᩠ᨲᩦᨲᩥ ᨴᩦᨸᩣ, ᨴᩥᨸ᩠ᨸᨶ᩠ᨲᩥ ᩑᨲ᩠ᨳ ᩈᨴ᩠ᨵᨾ᩠ᨾᩣᨲᩥ ᩅᩣ ᨴᩦᨸᩣ, ᨸᨾᩣᨱᨲᩮᩣ ᨾᩉᨶ᩠ᨲᩣ ᨴᩦᨸᩣ ᨾᩉᩣᨴᩦᨸᩣ.

᪑᪘᪔. ᨠᩩᩁᩩᩌᨴᨿᩮᩣ ᩑᨠᩅᩦᩈᨲᩥ ᨩᨶᨸᨴᨶ᩠ᨲᩁᩣ ᨩᨶᨸᨴᩅᩥᩈᩮᩈᩣ, ᩌᨴᩥᨶᩣ ᩈᩩᩁᨾᩉᨸᨧ᩠ᨧᩩᨣ᩠ᨣᨲᩣ ᨲᩃᨠᩩᨭᩣ ᩋᩈ᩠ᨾᩣᨠᩣᨴᨿᩮᩣ ᨧ ᨸᩩᨾ᩠ᨻᩉᩩᨲ᩠ᨲᩮ ᨸᩩᩃ᩠ᩃᩥᨦ᩠ᨣᩮ ᨻᩉᩩᨲ᩠ᨲᩮ ᨧ ᩈᩥᨿᩩᩴ. ᨠᩩᩁᩩ ᨶᩣᨾ ᨩᩣᨶᨸᨴᩥᨶᩮᩣ ᩁᩣᨩᨠᩩᨾᩣᩁᩣ, ᨲᩮᩈᩴ ᨶᩥᩅᩣᩈᩮᩣ ᩑᨠᩮᩣᨸᩥ ᨩᨶᨸᨴᩮᩣ ᩁᩪᩊ᩠ᩉᩦᩈᨴ᩠ᨴᩮᨶ ‘‘ᨠᩩᩁᩪ’’ᨲᩥ ᨻᩉᩩᩅᨧᨶᩮᨶ ᩅᩩᨧ᩠ᨧᨲᩥ, ᩑᩅᩴ ᩈᨻ᩠ᨻᨲᩕ. ᨠᩩᩴ ᨸᩣᨸᩴ ᩁᩩᨶ᩠ᨵᨲᩦᨲᩥ ᨠᩩᩁᩩ, ᨡᨲ᩠ᨲᩥᨿᨠᩩᨾᩣᩁᩣ, ᨲᩮᩈᩴ ᨶᩥᩅᩣᩈᩮᩣ ᨠᩩᩁᩪ, ᨸᨧ᩠ᨧᨿᩃᩮᩣᨸᨲᩮᩣ ᨶ ᩅᩩᨴ᩠ᨵᩥ, ᩈᨻ᩠ᨻᨲᩕᩮᩅᩴ [ᨸᩣᨱᩥᨶᩥ ᪑.᪒.᪕᪒ ᪔.᪒.᪘᪑ ᩈᩩᨲ᩠ᨲᩮᩈᩩ ᨸᩔᩥᨲᨻ᩠ᨻᩴ]. ᩋᩁᩥᩅᩥᨩᨿᩃᩮᩣᨠᨾᩁᩥᨿᩣᨴᩣᨲᩥᨠ᩠ᨠᨾᩣᨴᩦᩈᩩ ᩈᨠ᩠ᨠᩮᩣᨶ᩠ᨲᩦᨲᩥ ᩈᨠ᩠ᨠᩣ. ᨠᩮᩣᩈᩴ ᩃᨶ᩠ᨲᩥ ᨣᨱ᩠ᩉᨶ᩠ᨲᩥ, ᨠᩩᩈᩃᩴ ᨸᩩᨧ᩠ᨨᨶ᩠ᨲᩦᨲᩥ ᩅᩣ ᨠᩮᩣᩈᩃᩣ. ᨾᨣᩮᨶ ᩈᨴ᩠ᨵᩥᩴ ᨵᩣᩅᨶ᩠ᨲᩦᨲᩥ ᨾᨣᨵᩣ, ᨠ᩠ᩅᩥ, ᨾᩴᩈᩮᩈᩩ ᨣᩥᨩ᩠ᨫᨶ᩠ᨲᩦᨲᩥ ᩅᩣ ᨾᨣᨵᩣ. ᨣᩥᨵ ᩋᨽᩥᨠᨦ᩠ᨡᩣᨿᩴ. ᩈᩮᩅᨶ᩠ᨲᩥ ᨿᩮᨶᩣᨲᩥ ᩈᩥᩅᩥ, ᩈᩥ ᩈᩮᩅᩣᨿᩴ, ᩅᩥ. ᩈᩥᩅᩴ ᨠᩁᩮᩣᨶ᩠ᨲᩦᨲᩥ ᩅᩣ ᩈᩥᩅᩦ, ᩋᨬ᩠ᨬᨲ᩠ᨳᩮ ᩍ. ᨠᩃ ᩈᨴ᩠ᨴᩮ, ᩍᨦ᩠ᨣᨸᨧ᩠ᨧᨿᩮᩣ, ᨠᩃᩥᨦ᩠ᨣᩣ ¶ , ᨲᩮᩈᩴ ᨶᩥᩅᩣᩈᩮᩣ ᨠᩃᩥᨦ᩠ᨣᩣ, ᩏᨲ᩠ᨲᩁᩣᨸᨳᩮᩣ [‘‘ᨩᨣᨶ᩠ᨶᩣᨳᩣ ᨸᩩᨻ᩠ᨻᨽᩣᨣᩮ ᨠᨱ᩠ᩉᩣᨲᩦᩁᨶ᩠ᨲᩁᩴ ᩈᩥᩅᩮ ᨠᩃᩥᨦ᩠ᨣᨴᩮᩈᩮᩣ ᩈᩴᩅᩩᨲ᩠ᨲᩮᩣ’’ ᩍᨲ᩠ᨿᩩᨲ᩠ᨲᨴᩮᩈᩮ (ᨳᩮᩣᨾᨶᩥᨵᩥ)], ᨠᩃᩥᩴ ᨣᨱ᩠ᩉᨶ᩠ᨲᩦᨲᩥ ᩅᩣ ᨠᩃᩥᨦ᩠ᨣᩣ, ᨠ᩠ᩅᩥ, ᨠᩃᩴ ᨾᨵᩩᩁᩈᨴ᩠ᨴᩴ ᨣᩣᨿᨶ᩠ᨲᩦᨲᩥᩅᩣ ᨠᩃᩥᨦ᩠ᨣᩣ, ᩋᩔᩥᨲ᩠ᨲᩴ, ᨠᩮᨶ ᩈᩩᨡᩮᨶ ᩃᩥᨦ᩠ᨣᨶ᩠ᨲᩦᨲᩥ ᩅᩣ ᨠᩃᩥᨦ᩠ᨣᩣ, ᩃᩥᨦ᩠ᨣ ᨣᨾᨶᨲ᩠ᨳᩮᩣ ᨴᨱ᩠ᨯᨠᩮᩣ ᨵᩣᨲᩩ. ᩋᨲ᩠ᨲᨶᩣ ᨡᩣᨴᩥᨲᩴ ᩃᨬ᩠ᨩᩴ ᨸᩁᩣᨩᩥᨲᩮᩉᩥ ᨿᩣᨧᩥᨲᩮᨸᩥ ᨸᩩᨶ ᨶ ᩅᨾᨶ᩠ᨲᩦᨲᩥ ᩋᩅᨶ᩠ᨲᩦ. ᨸᨬ᩠ᨧᩣᩃᩔ ᨸᩩᨲ᩠ᨲᩣ ᨸᨬ᩠ᨧᩣᩃᩣ. ᩅᨩ᩠ᨩᩮᨲᨻ᩠ᨻᩣᨲᩥ ᩅᨩ᩠ᨩᩦ, ‘‘ᩅᨩ᩠ᨩᩮᨲᨻ᩠ᨻᩣ ᩍᨾᩮ’’ᨲ᩠ᨿᩣᨴᩥᨶᩣ ᨸᩅᨲ᩠ᨲᩅᨧᨶᨾᩩᨸᩣᨴᩣᨿ ᩅᨩ᩠ᨩᩦᨲᩥ ᩃᨴ᩠ᨵᨶᩣᨾᩣ ᩁᩣᨩᩣᨶᩮᩣ. ᩅᨩ᩠ᨩᩦᩁᨭ᩠ᨮᩔ ᩅᩣ ᩁᩣᨩᩣᨶᩮᩣ ᩅᨩ᩠ᨩᩦ. ᩁᨭ᩠ᨮᩔ ᩅᩣ ᨸᨶ ᨲᩴᩈᨾᨬ᩠ᨬᩣ ᨲᩴᨶᩥᩅᩣᩈᩥᩁᩣᨩᨠᩩᨾᩣᩁᩅᩈᩮᨶ ᩅᩮᨴᩥᨲᨻ᩠ᨻᩣ. ᨣᩴ ᨸᨳᩅᩥᩴ ᨵᩣᩁᩮᨶ᩠ᨲᩦᨲᩥ ᨣᨶ᩠ᨵᩣᩁᩣ, ᨠᩥᨲ᩠ᨲᩥᨣᨶ᩠ᨵᩮᨶ ᩋᩁᨶ᩠ᨲᩦᨲᩥ ᩅᩣ ᨣᨶ᩠ᨵᩣᩁᩣ. ᨧᩥᨲ ᩏᩔᩣᩉᨶᩮ, ᨧᩮᨲᨶ᩠ᨲᩥ ᩏᩔᩉᨶ᩠ᨲᩥ ᨿᩩᨴ᩠ᨵᨠᨾ᩠ᨾᩣᨴᩦᩈᩪᨲᩥ ᨧᩮᨲᨿᩮᩣ.

᪑᪘᪕. ᩅᨦ᩠ᨣ ᨣᨾᨶᨲ᩠ᨳᩮᩣ ᨴᨱ᩠ᨯᨠᩮᩣ ᨵᩣᨲᩩ. ᩅᩥᩈᩥᨭ᩠ᨮᩣᨶᩥ ᨴᩮᩉᩣᨶᩥ ᨿᩮᩈᩴ ᩅᩥᨴᩮᩉᩣ, ᨸᩩᨻ᩠ᨻᩅᩥᨴᩮᩉᨴᩦᨸᨲᩮᩣ ᩌᨣᨲᨲ᩠ᨲᩣ ᩅᩣ ᩅᩥᨴᩮᩉᩣ. ᩒᨩ ᨴᩥᨲ᩠ᨲᩥᨿᩴ, ᨠᨾ᩠ᨻᩩᨶᩣ ᩈᨾ᩠ᨻᩩᨠᩮᨶ ᩒᨩᨶ᩠ᨲᩥ ᨲᩔᩴ ᩅᩮᩣᩉᩣᩁᨠᩁᨱᨲᩮᩣᨲᩥ ᨠᨾ᩠ᨻᩮᩣᨩᩣ, ᨠᨾ᩠ᨻᩩᨠᨩᩮᩣ ᩒᨩᩮᩣ ᨻᩃᨾᩮᨲᩮᩈᨶ᩠ᨲᩥ ᩅᩣ ᨠᨾ᩠ᨻᩮᩣᨩᩣ. ᨾᨴ ᨾᨴ᩠ᨴᨶᩮ, ᨾᨴ᩠ᨴᨶ᩠ᨲᩦᨲᩥ ᩅᩣ ᨾᨴ᩠ᨴᩣ, ᨾᩴ ᩈᩥᩅᩴ ᨴᨴᨶ᩠ᨲᩦᨲᩥ ᩅᩣ ᨾᨴ᩠ᨴᩣ, ᨸᨬ᩠ᨧᨠᩣᨾᨣᩩᨱᩣᨴᩦᩉᩥ ᨾᩮᩣᨴᨶ᩠ᨲᩦᨲᩥ ᩅᩣ ᨾᨴ᩠ᨴᩣ, ᨾᨴ ᩉᩣᩈᩮ. ᨽᨬ᩠ᨩ ᩋᩅᨾᨴ᩠ᨴᨶᩮ, ᨽᨣ᩠ᨣᩣ. ᩋᨦ᩠ᨣ ᨣᨾᨶᨲ᩠ᨳᩮᩣ ᨴᨱ᩠ᨯᨠᩮᩣ ᨵᩣᨲᩩ. ᩈᩦᩉᩴ ᩃᨶ᩠ᨲᩦᨲᩥ ᩈᩦᩉᩊᩣ. ᨠᩣᩈ ᨴᩥᨲ᩠ᨲᩥᨿᩴ, ᩈᨾ᩠ᨸᨲ᩠ᨲᩥᨿᩣ ᨠᩣᩈᨶ᩠ᨲᩦᨲᩥ ᨠᩈ᩠ᨾᩦᩁᩣ, ᨾᩦᩁᩮᩣ. ᨠᩣᩈ ᨴᩥᨲ᩠ᨲᩥᨿᩴ, ᩍ, ᨠᩣᩈᩦ. ᨸᨯᩥ ᨣᨲᩥᨿᩴ, ᨸᨱ᩠ᨯᩩ, ᩏ. ᩋᨳ ᩅᩣ ᨠᩩᩴ ᨸᩣᨸᩴ ᩁᩩᨶ᩠ᨵᨲᩥ ᩑᨲ᩠ᨳᩣᨲᩥ ᨠᩩᩁᩩ, ᩍᨲᩥ ᩑᨠᩮᩣᨸᩥ ᨩᨶᨸᨴᩮᩣ ᨶᩥᩔᩥᨲᩣᨶᩴ ᨻᩉᩩᨲ᩠ᨲᩣ ᨻᩉᩩᩅᨧᨶᩮᨶ ᩅᩩᨧ᩠ᨧᨲᩥ. ᩑᩅᩴ ᩈᨻ᩠ᨻᨲ᩠ᨳ.

᪑᪘᪖. ᨴ᩠ᩅᨿᩴ ¶ ᨽᩩᩅᨶᩮ. ᩃᩩᨩ ᩋᨴᩔᨶᩮ, ᩃᩩᨩ᩠ᨩᨲᩦᨲᩥ ᩃᩮᩣᨠᩮᩣ, ᨣᩔ ᨠᩮᩣ, ᨩᩔ ᩅᩮᩣ. ᨽᩅᨶ᩠ᨲᩥ ᩑᨲ᩠ᨳᩣᨲᩥ ᨽᩩᩅᨶᩴ, ᨿᩩ. ᨩᨣᨲᩥ, ᩅᩥᨭ᩠ᨮᨸᩣᨴᩦᨶᩥᨸᩥ ᨽᩩᩅᨶᨸᩁᩥᨿᩣᨿᩣᨶᩥ. ᨴ᩠ᩅᨿᩴ ᨴᩮᩈᩈᩣᨾᨬ᩠ᨬᩮ. ᨴᩥᩈ ᩋᨲᩥᩈᨩ᩠ᨩᨶᩮ, ᩋᨲᩥᩈᨩ᩠ᨩᨶᩴ ᨸᨻᩮᩣᨵᨶᩴ, ‘‘ᩋᨿᩴ ᩍᨲ᩠ᨳᨶ᩠ᨶᩣᨾᩮᩣ’’ᨲᩥ ᨴᩥᩈᨲᩥ ᩋᨸᨴᩥᩈᨲᩦᨲᩥ ᨴᩮᩈᩮᩣ. ᩈᩥ ᩈᩮᩅᩣᨿᩴ, ᩈᨬ᩠ᨬᩣᨿᩴ ᩋ, ᩅᩥᩈᨿᩮᩣ.

ᩈᩥᨭ᩠ᨮᩣᨧᩣᩁᩁᩉᩥᨲᩮᩣ ᨾᩥᩃᨠ᩠ᨡᨴᩮᩈᩮᩣ ᨠᩣᨾᩁᩪᨸᩣᨴᩥ ᨸᨧ᩠ᨧᨶ᩠ᨲᩮᩣ ᨶᩣᨾ. ᨾᩥᩃᨠ᩠ᨡ ᩋᨻ᩠ᨿᨲ᩠ᨲᩥᨿᩴ ᩅᩣᨧᩣᨿᩴ, ᨾᩥᩃᨠ᩠ᨡᨶ᩠ᨲᩥ ᩋᨻ᩠ᨿᨲ᩠ᨲᩅᩣᨧᩴ ᨽᩣᩈᨶ᩠ᨲᩦᨲᩥ ᨾᩥᩃᨠ᩠ᨡᩣ. ᩈᩥᨭ᩠ᨮᩣᨧᩣᩁᨾᨣ᩠ᨣᨴᩔᨶᨲ᩠ᨳᩣᨿ ᨸᨬ᩠ᨬᩣᨧᨠ᩠ᨡᩩᨶᩮᩣ ᩋᨽᩣᩅᩣ ᩁᩣᨣᩣᨴᩥᨾᩃᩴ ᩋᨠ᩠ᨡᩥᨾ᩠ᩉᩥ ᨿᩮᩈᨶ᩠ᨲᩥ ᩅᩣ ᨾᩥᩃᨠ᩠ᨡᩣ, ᩋᩔᩥᨲ᩠ᨲᩴ, ᨲᩮᩈᩴ ᨶᩥᩅᩣᩈᨭ᩠ᨮᩣᨶᩴ ᨾᩥᩃᨠ᩠ᨡᨴᩮᩈᩮᩣ. ᨸᨧ᩠ᨧᨶ᩠ᨲᩮ ᨾᨩ᩠ᨫᩥᨾᨴᩮᩈᩔ ᨻᩉᩥᨴ᩠ᨵᩣᨽᩣᨣᩮ ᨩᩣᨲᩮᩣ ᨸᨧ᩠ᨧᨶ᩠ᨲᩮᩣ.

ᨻ᩠ᨿᩅᨲ᩠ᨳᩣ ᨧᨲᩩᩅᨱ᩠ᨱᩣᨶᩴ, ᨿᩈ᩠ᨾᩥᩴ ᨴᩮᩈᩮ ᨶ ᩅᩥᨩ᩠ᨩᨲᩮ;

ᨾᩥᩃᨠ᩠ᨡᨴᩮᩈᩮᩣ ᩈᩮᩣ ᩅᩩᨲ᩠ᨲᩮᩣ, ᨾᨩ᩠ᨫᨽᩪᨾᩥ ᨲᨲᩮᩣ ᨸᩁᩴ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪑.᪗].

ᩋᩁᩥᨿᩣᨧᩣᩁᨽᩪᨾᩥᨲ᩠ᨲᩣ ᨾᨩ᩠ᨫᩮᩣ ᨧ ᩈᩮᩣ ᨴᩮᩈᩮᩣ ᨧᩮᨲᩥ ᨾᨩ᩠ᨫᨴᩮᩈᩮᩣ, ᨶᩅᨿᩮᩣᨩᨶᩈᨲᨸᩁᩥᨠ᩠ᨡᩮᨸᩮᩣ ᨾᨩ᩠ᨫᩥᨾᨴᩮᩈᩮᩣ.

᪑᪘᪗. ᩈᩃᩥᩃᨸ᩠ᨸᩣᨿᩮᩣ ᨻᩉᩪᨴᨠᩮᩣ ᨴᩮᩈᩮᩣ ᩋᨶᩪᨸᩮᩣ ᨶᩣᨾ, ᩋᨶᩩᨣᨲᩣ ᩌᨸᩣ ᩋᨲᩕᩣᨲᩥ ᩋᨶᩪᨸᩮᩣ, ᩌᨸᩔ ᩌᨴᩥᨶᩮᩣ ¶ ᩏᨲ᩠ᨲᩴ, ᨸᩁᩃᩮᩣᨸᩮᩣ ᩅᩣ. ᨠᨧ ᨻᨶ᩠ᨵᨶᩮ, ᨨᩮᩣ, ᨠᨧ᩠ᨨᩴ. ᩋᨶᩪᨸᨴᩮᩈᩮᩣ ᨧ. ᩋᨽᩥᨶᩅᩮᩣᨣ᩠ᨣᨾᨶᩮᨶ ᨲᩥᨱᩮᨶ ᩃᨠ᩠ᨡᩥᨲᩮ ᩉᩁᩥᨲᩮ ᨴᩮᩈᩮ ᩈᨴ᩠ᨴᩃᩮᩣ, ᨴᩃ ᨴᩥᨲ᩠ᨲᩥᨿᩴ, ᨽᩣᩅᩮ ᩋ. ᩅᩥᨩ᩠ᨩᨲᩥ ᨴᩃᩮᩣ ᨿᨲ᩠ᨳ ᩈᨴ᩠ᨴᩃᩮᩣ.

᪑᪘᪘. ᨶᨴᩥᨿᩣ ᩌᨽᨲᩮᨶ ᩋᨾ᩠ᨻᩩᨶᩣ ᩏᨴᨠᩮᨶ ᨩᩦᩅᨶ᩠ᨲᩥ ᩑᨲ᩠ᨳᩣᨲᩥ ᨶᨴ᩠ᨿᨾ᩠ᨻᩩᨩᩦᩅᨶᩮᩣ ᨴᩮᩈᩮᩣ ᨶᨴᩦ ᨾᩣᨲᩣ ᩋᩔᩣᨲᩥ ᨶᨴᩦᨾᩣᨲᩥᨠᩮᩣᨲᩥ ᩅᩩᨧ᩠ᨧᨲᩥ, ᨻᩉᩩᨻ᩠ᨻᩦᩉᩥᨾ᩠ᩉᩥ ᨠᩮᩣ. ᩅᩩᨭ᩠ᨮᩥᨿᩣ ᩅᩔᩮᨶ ᨶᩥᨸ᩠ᨹᨩ᩠ᨩᨲᩥ ᩈᩔᨾᩮᨲ᩠ᨳᩣᨲᩥ ᩅᩩᨭ᩠ᨮᩥᨶᩥᨸ᩠ᨹᨩ᩠ᨩᩈᩔᨠᩮᩣ ᨴᩮᩈᩮᩣ ᨴᩮᩅᩮᩣ ᨾᩣᨲᩣ ᩋᩔᩣᨲᩥ ᨴᩮᩅᨾᩣᨲᩥᨠᩮᩣᨲᩥ ᩅᩩᨧ᩠ᨧᨲᩥ, ᨻᩉᩩᨻ᩠ᨻᩦᩉᩥᨾ᩠ᩉᩥᨿᩮᩅ ᨠᩮᩣ, ᨴᩮᩅᩈᨴ᩠ᨴᩮᩣ ᨧᩮᨲ᩠ᨳ ᩅᩩᨭ᩠ᨮᩥᨾᩣᩉ.

᪑᪘᪙. ᩋᨶᩪᨸᩣᨴᨿᩮᩣ ᨴᩮᩅᨾᩣᨲᩥᨠᩣᨶ᩠ᨲᩣ ᨲᩦᩈᩩ ᩃᩥᨦ᩠ᨣᩮᩈᩩ. ᨧᨶ᩠ᨴᩈᩪᩁᩣᨴᩮᩣ ᨧᨶ᩠ᨴᩈᩪᩁᩥᨿᩈᩥᨶᩮᩁᩩᨸᨻ᩠ᨻᨲᩣᨴᩥᨾ᩠ᩉᩥ ᩈᩔᨲᩥᩈᨴ᩠ᨴᩮᩣ ᩎᩁᩥᨲᩮᩣ ᨠᨳᩥᨲᩮᩣ. ᩈᨻ᩠ᨻᨴᩣ ᩈᩁᨶ᩠ᨲᩥ ᨣᨧ᩠ᨨᨶ᩠ᨲᩦᨲᩥ ᩈᩔᨲᩥᨿᩮᩣ, ᩈᩁ ᨣᨲᩥᨿᩴ, ᩈᩁᩈᨴ᩠ᨴᩔ ᩈᩮᩣ,ᨲᩥ.

ᩁᨮ ᨣᨲᩥᨿᩴ, ᩁᨮᨶ᩠ᨲᩥ ᩑᨲ᩠ᨳ ᨶᨣᩁᩣᨴᨿᩮᩣᨲᩥ ᩁᨭ᩠ᨮᩴ, ᨲᩮᩣ. ᨶᩣᨣᩁᩮᩉᩥ ᩅᩥᨩᩥᨶᩥᨲᨻ᩠ᨻᨶ᩠ᨲᩥ ᩅᩥᨩᩥᨲᩴ. ᩌᩊᩥᨿᩴ ᨸᩅᨲ᩠ᨲᨾᩣᨶᩮᩣ ᨿᩮᩣ ᩈᩮᨲᩩ, ᩈᩮᩣ ᨸᩩᩁᩥᩈᩮ ᨸᩩᩃ᩠ᩃᩥᨦ᩠ᨣᩮ ᩅᨲ᩠ᨲᨲᩥ. ᩈᩥ ᨻᨶ᩠ᨵᨶᩮ, ᨲᩩ. ᩋᩃ ᨽᩪᩈᨶᩮ, ᩍ, ᩌᩊᩥ, ᨲᩔᩴ ᩌᩊᩥᨿᩴ.

ᨶᨣᩁᨸᨻ᩠ᨻᨲᩣᨴᩥᨶᩮᩣ ¶ ᩏᨸᩣᨶ᩠ᨲᨽᩪ ᩈᨾᩦᨸᨽᩪᨾᩥ ᨸᩁᩥᩈᩁᩮᩣ ᨸᩁᩥᨲᩮᩣ ᩈᩁᨶ᩠ᨲ᩠ᨿᨲᩕᩣᨲᩥ, ᨱᩮᩣ.

ᨲᩥᨠᩴ ᩅᨩᩮ. ᨣᩣᩅᩮᩣ ᨲᩥᨭ᩠ᨮᨶ᩠ᨲ᩠ᨿᨲᩕᩣᨲᩥ ᨣᩮᩣᨭ᩠ᨮᩴ. ᨠᩩᩃ ᩈᨦ᩠ᨡ᩠ᨿᩣᨶᩮ, ᨣᩣᩅᩮᩣ ᨠᩩᩃᨶ᩠ᨲ᩠ᨿᩮᨲ᩠ᨳᩣᨲᩥ ᨣᩮᩣᨠᩩᩃᩴ, ᨣᩩᨶ᩠ᨶᩴ ᨠᩩᩃᩴ ᨥᩁᨶ᩠ᨲᩥ ᩅᩣ ᨣᩮᩣᨠᩩᩃᩴ. ᩅᨩ ᨣᨲᩥᨿᩴ, ᩅᨩᨶ᩠ᨲᩥ ᨿᩴ ᨣᩣᩅᩮᩣ ᨶᩥᩅᩣᩈᨶᨲ᩠ᨳᩣᨿᩣᨲᩥ ᩅᨩᩮᩣ. ᨣᩮᩣᨭ᩠ᨮᩣᨶᨠᩴ, ᨣᩮᩣᨭ᩠ᨮᩣᨶᨶ᩠ᨲᩥᨸᩥ ᩅᨩᩔ ᨶᩣᨾᩣᨶᩥ.

᪑᪙᪐. ᩈᩥᩃᩮᩣᨠᩮᨶ ᨾᨣ᩠ᨣᩔ ᨶᩣᨾᩣᨶᩥ. ᨸᨳᩥᨠᩮᩉᩥ ᨾᨩ᩠ᨩᨲᩮ ᨶᩥᨲ᩠ᨲᩥᨱᩴ ᨠᩁᩦᨿᨲᩮᨲᩥ ᨾᨣ᩠ᨣᩮᩣ, ᨾᨩ᩠ᨩ ᩈᩩᨴ᩠ᨵᩥᨿᩴ, ᨱᩮᩣ, ᨩᩔ ᨣᨲ᩠ᨲᩴ, ᨸᨳᩥᨠᩮᩉᩥ ᨾᨣ᩠ᨣᩦᨿᨲᩮᨲᩥ ᩅᩣ ᨾᨣ᩠ᨣᩮᩣ, ᨾᨣ᩠ᨣ ᩋᨶ᩠ᩅᩮᩈᨶᩮ, ᨾᩴ ᩈᩥᩅᩴ ᨣᨧ᩠ᨨᨲᩥ ᩑᨲ᩠ᨳ, ᩑᨲᩮᨶᩣᨲᩥ ᩅᩣ ᨾᨣ᩠ᨣᩮᩣ, ‘‘ᨾᩮᩣ ᩈᩥᩅᩮ ᨸᩁᩥᩈᩣᨿᨬ᩠ᨧᩮ’’ᨲᩥ ᩉᩥ ᨶᩣᨶᨲ᩠ᨳᩈᨦ᩠ᨣᩉᩮ, ᩈᩥᩅᩴ ᨣᨾᨶᩴ ᨠᩁᩮᩣᨲᩦᨲ᩠ᨿᨲ᩠ᨳᩮᩣ, ᨠᩕᩥᨿᩣᩅᩥᩈᩮᩈᨶᨾᩮᨲᩴ. ᨸᨳᩥ ᨣᨲᩥᨿᩴ, ᨧᩩᩁᩣᨴᩥ, ᨶᩣᨣᨾᩮᩣ. ᨸᨶ᩠ᨳᨿᨶ᩠ᨲᩥ ᨿᨶ᩠ᨲ᩠ᨿᨶᩮᨶᩣᨲᩥ ᨸᨶ᩠ᨳᩮᩣ, ᩋ, ᨠᩣᩁᩥᨲᩃᩮᩣᨸᩮᩣ. ᨸᨳᨲᩥ ᨿᩣᨲ᩠ᨿᨶᩮᨶᩣᨲᩥ ᨸᨳᩮᩣ. ᩋᨴ ᨣᨾᨶᩮ, ᩋᨴᨲᩥ ᨿᨲ᩠ᨳ ᩈᩣ ᩋᨴ᩠ᨵᩣ, ᨵᩮᩣ, ᩋᨴ᩠ᨵᩣ ᨾᨣ᩠ᨣᩮᩣ, ᩋᨴ᩠ᨵᩣᩈᨴ᩠ᨴᩮᩣᨿᩴ ᨠᩣᩃᩮᨸᩥ, ᩈᨾᨽᩣᨣᨲ᩠ᨳᩅᨧᨶᩮ ᨲᩩ ᩋᨴ᩠ᨵᩴ, ᨲᩈ᩠ᨾᩣ ᩋᨴ᩠ᨵᩈᨴ᩠ᨴᩮᩣ ᨸᩩᨾᨶᨸᩩᩴᩈᨠᩅᩈᩮᨶ ᨴ᩠ᩅᩥᩃᩥᨦ᩠ᨣᩮᩣ, ᩁᩣᨩᩣᨴᩥᨲ᩠ᨲᩮ ᩋᨴ᩠ᨵᩣ, ᩋᩁᩣᨩᩣᨴᩥᨲ᩠ᨲᩮ ᩋᨴ᩠ᨵᩴ. ᩋᨬ᩠ᨩ ᨣᨲᩥᨿᩴ, ᩋᩈᩮᩣ. ᩅᨩ ᨣᨲᩥᨿᩴ, ᩏᨾᩮᩣ, ᨩᩔ ᨭᩮᩣ. ᨸᨴ ᨣᨲᩥᨿᩴ, ᩋ, ᨴᩔ ᨩᩮᩣ, ᨴ᩠ᩅᩥᨲ᩠ᨲᩴ, ᨸᨩ᩠ᨩᩮᩣ. ᩋᨿ ᨣᨲᩥᨿᩴ, ᨿᩩ, ᨸᨴ ᨣᨲᩥᨿᩴ, ᩋᩅᩮᩣ, ᨶᨴᩣᨴᩥ. ᩅᨲ᩠ᨲ ᩅᨲ᩠ᨲᨶᩮ, ᩅᨲ᩠ᨲᨶᩴ ᨣᨾᨶᩣᨴᩥ, ᩋᨶᩥ, ᨶᨴᩣᨴᩥ, ᩅᨲ᩠ᨲᨶᩦ. ᨠᨶ᩠ᨲᨶᨴᨱ᩠ᨯᩮ ᨸᩩᨶ᩠ᨶᨸᩩᩴᩈᨠᩴ. ᨸᨳᩥᨠᩮᩉᩥ ᨸᩣᨴᩮᩉᩥ ᩉᨬ᩠ᨬᨲᩮᨲᩥ ᨸᨴ᩠ᨵᨲᩥ. ᨸᩣᨴᩈᨴ᩠ᨴᩈᨾᩣᨶᨲ᩠ᨳᩮᨶ ᨸᨴᩈᨴ᩠ᨴᩮᨶ ᨶᩥᨿᨲᨸ᩠ᨸᨿᩮᩣᨣᨲᩮᩣ ᩅᩩᨲ᩠ᨲᩥᨶᩣ ᩈᩥᨴ᩠ᨵᩮᩣ, ᨸᨴᩈᨴ᩠ᨴᩪᨸᨸᨴᩮᩣ ᩉᨶᨵᩣᨲᩩ,ᨲᩥ, ᩉᨶᩔ ᨵᩮᩣ, ᩋᩃᩮᩣᨸᩮᩣ. ᨸᨴ᩠ᨵᨲᩥᩈᩉᨧᩁᨱᨲᩮᩣ ᩅᨲ᩠ᨲᨶᩦ, ᨲᩴᩈᩉᨧᩁᨱᨲᩮᩣ ᨸᨴᩅᩦ ᨧ ᩍᨲ᩠ᨳᩥᨿᩴ.

᪑᪙᪑-᪑᪙᪒. ᨲᨻ᩠ᨽᩮᨴᩣ ¶ ᨲᩔ ᨾᨣ᩠ᨣᩔ ᩅᩥᩈᩮᩈᩣ ᨩᨦ᩠ᨥᨾᨣ᩠ᨣᩣᨴᨿᩮᩣ ᩋᨸᨳᨶ᩠ᨲᩣ. ᨩᨦ᩠ᨥᩣᩉᩥ ᨣᨲᩮᩣ ᨾᨣ᩠ᨣᩮᩣ ᨩᨦ᩠ᨥᨾᨣ᩠ᨣᩮᩣ. ᩈᨠᨭᩮᩉᩥ ᨣᨲᩮᩣ ᨾᨣ᩠ᨣᩮᩣ ᩈᨠᨭᨾᨣ᩠ᨣᩮᩣ. ᨲᩮ ᨩᨦ᩠ᨥᨾᨣ᩠ᨣᩈᨠᨭᨾᨣ᩠ᨣᩣ ᨾᩉᩣᨾᨣ᩠ᨣᩮ ᩅᨲ᩠ᨲᨶ᩠ᨲᩥ.

ᩑᨲ᩠ᨳ ᨧ ‘‘ᨲᩮᨳᩣ’’ᨲᩥ ᩋᨳᩈᨴ᩠ᨴᩮᩣ ᨶ ᩅᨲ᩠ᨲᨻ᩠ᨻᩮᩣ, ‘‘ᨲᩮ ᨧᩣ’’ᨲᩥ ᨸᨶ ᩅᨲ᩠ᨲᨻ᩠ᨻᩮᩣ. ‘‘ᨾᨲᩣᨴ᩠ᨵᨶᩦ’’ᨲᩥ ᨸᩣᨮᩮ ᨸᨶ ᩈᨲᩥ ‘‘ᨲᩮᨳᩣ’’ᨲᩥ ᩅᨲ᩠ᨲᨻ᩠ᨻᩮᩣᨿᩮᩅ, ᨲᨴᩣ ᩑᨠᨸᨴᩥᨠᩮ ᩋᨴ᩠ᨵᨶᩥ ᨾᨣ᩠ᨣᩮ ᩑᨠᨸᨴᩦ ᨾᨲᩣᨲᩥ ᨿᩮᩣᨩᨶᩣ ᨠᩣᨲᨻ᩠ᨻᩣ. ᨣᨧ᩠ᨨᨲᩴ ᩑᨠᩮᩣ ᩋᩈᩉᩣᨿᩮᩣ ᨸᩣᨴᩮᩣ ᨿᩔᩴ, ᨶ ᨶᩥᩈᩥᨶ᩠ᨶᩔᩮᩅ ᨿᨾᨠᩮᩣᨲᩥ ᩑᨠᨸᨴᩦ, ᩈᨾᩣᩈᨶ᩠ᨲᩮ ᨶᩥᨧ᩠ᨧᨾᩦᨸᨧ᩠ᨧᨿᩮᩣ, ᨠᨸᨧ᩠ᨧᨿᩮ ᩑᨠᨸᨴᩥᨠᩮᩣ, ᩎᩔ ᩁᩔᨲ᩠ᨲᩴ.

ᨧᩮᩣᩁᨠᨱ᩠ᨭᨠᩣᨴᩥᨴᩮᩣᩈᩮ ᨴᩩᨣ᩠ᨣᨾᩮ ᨸᨳᩮ ᨠᨶ᩠ᨲᩣᩁᩮᩣ, ᨸᩩᨶ᩠ᨶᨸᩩᩴᩈᨠᩮ, ᨠᩮᨶ ᨸᩣᨶᩦᨿᩮᨶ ᨲᩁᨶ᩠ᨲᩥ ᩋᨲᩥᨠ᩠ᨠᨾᨶ᩠ᨲᩥ ᨿᨶ᩠ᨲᩥ ᨠᨶ᩠ᨲᩣᩁᩮᩣ, ᨲᩁ ᨲᩁᨱᩮ, ᨧᩮᩣᩁᨠᨶ᩠ᨲᩣᩁᩣᨴᩦᩈᩩ ᨸᨶᩣᨿᩴ ᩁᩪᩊ᩠ᩉᩥᩅᩈᩮᨶ ᩅᩩᨲ᩠ᨲᩮᩣ, ᩋᨳ ᩅᩣ ᨠᨲᩥ ᨨᩮᨴᨶᩮ, ᩈᨸ᩠ᨸᨭᩥᨽᨿᨲ᩠ᨲᩣ ᨠᨶ᩠ᨲᨲᩥ ᨶᩥᨧ᩠ᨧᨣᨾᨶᩣᨣᨾᨶᨾᩮᨲ᩠ᨳᩣᨲᩥ ᨠᨶ᩠ᨲᩣᩁᩮᩣ, ᩌᩁᩮᩣ, ᨶᩣᨣᨾᩮᩣ ᨧ. ᨴᩩᨠ᩠ᨡᩮᨶ ᨣᨧ᩠ᨨᨶ᩠ᨲ᩠ᨿᩮᨲ᩠ᨳᩣᨲᩥ ᨴᩩᨣ᩠ᨣᨾᩮᩣ.

᪑᪙᪓. ᨴ᩠ᩅᨿᩴ ᨸᨭᩥᨾᨣ᩠ᨣᩮ. ᨸᨭᩥ ᩋᨽᩥᨾᩩᨡᩮᨶ ᨣᨶ᩠ᨲᨻ᩠ᨻᩮᩣ ᨾᨣ᩠ᨣᩮᩣ, ᨸᨳᩮᩣ ᨧ ᨸᨭᩥᨾᨣ᩠ᨣᩮᩣ, ᨸᨭᩥᨸᨳᩮᩣ ᨧ. ᨴᩦᨥᨾᨬ᩠ᨩᩈᩴ ᩋᨲᩥᨴᩪᩁᩮᩣ ᨾᨣ᩠ᨣᩮᩣ ¶ ᩋᨴ᩠ᨵᩣᨶᨶ᩠ᨲᩥ ᩅᩩᨧ᩠ᨧᨲᩮ. ᩋᨴ᩠ᨵᩣᨶᩴ ᩋᨿᨶᩴ ᩋᨴ᩠ᨵᩣᨶᩴ, ᩋᨧ᩠ᨧᩣᨿᨲᩮᩣ ᨾᨣ᩠ᨣᩮᩣ, ᨿᨳᩣ ‘‘ᨸᨴᨭ᩠ᨮᩣᨶ’’ᨶ᩠ᨲᩥ, ᨿᩃᩮᩣᨸᩮᩣ.

ᨴ᩠ᩅᨿᩴ ᨸᩈᨲ᩠ᨳᩮᨴ᩠ᨵᨶᩥ. ᩈᩮᩣᨽᨶᩮᩣ ᨸᨳᩮᩣ, ᨸᨶ᩠ᨳᩮᩣ ᨧᩣᨲᩥ ᩅᩥᨣ᩠ᨣᩉᩮᩣ. ᨣᨶ᩠ᨲᨻ᩠ᨻᨸᨳᨽᩣᩅᨲᩮᩣ ᩋᨸᩮᨲᩴ ᩏᨸ᩠ᨸᨳᩴ, ᩋᨸᨳᨬ᩠ᨧ, ᩋᨻ᩠ᨿᨿᩦᨽᩣᩅᩈᨾᩣᩈᩮᩣ, ᩋᩈᨴ᩠ᨴᩮᩣ ᩋᨲᩕ ᨶᩥᨸᩣᨲᩮᩣ.

᪑᪙᪔-᪑᪙᪖. ᨸᩁᨾᩣᨱᩪᨶᩴ ᨨᨲ᩠ᨲᩥᩴᩈ ᩑᨠᩮᩣ ᩋᨱᩩ ᨶᩣᨾ, ᩋᨱᩩᨲᩮᩣᨸᩥ ᩋᨱᩩᨲᩁᨲ᩠ᨲᩣ ᨸᩁᨾᩮᩣ ᩋᨱᩩ, ᩋᨱᩩᨲᩮᩣ ᩅᩣ ᨸᩁᨾᩮᩣᨲᩥ ᨸᩁᨾᩣᨱᩩ, ᩋᨱ ᩈᨴ᩠ᨴᨲ᩠ᨳᩮᩣ ᨴᨱ᩠ᨯᨠᩮᩣ ᨵᩣᨲᩩ, ᩏ. ᨲᩮ ᩋᨱᩅᩮᩣ ᨨᨲ᩠ᨲᩥᩴᩈ ᨲᨩ᩠ᨩᩣᩁᩦ ᨶᩣᨾ, ᨲᩴ ᨲᩴ ᩋᨲ᩠ᨲᨶᩮᩣ ᨶᩥᩔᨿᩴ ᨾᩃᩦᨶᨠᩁᨱᩅᩈᩮᨶ ᨩᩁᩣᨸᩮᨲᩦᨲᩥ ᨲᨩ᩠ᨩᩣᩁᩦ, ᨩᩁ ᨩᩦᩁᨱᩮ, ᨩᩁ ᩅᨿᩮᩣᩉᩣᨶᩥᨾ᩠ᩉᩥ ᩅᩣ, ᩋ, ᨶᨴᩣᨴᩥ. ᨲᩣᨸᩥ ᨲᨩ᩠ᨩᩣᩁᩥᨿᩮᩣ ᨨᨲ᩠ᨲᩥᩴᩈ ᩁᨳᩁᩮᨱᩩ ᨶᩣᨾ, ᩁᨳᩣᨶᩴ ᩈᨬ᩠ᨧᩁᨱᩅᩈᩮᨶ ᨸᩅᨲ᩠ᨲᩮᩣ ᩁᩮᨱᩩ ᩁᨳᩁᩮᨱᩩ. ᨲᩮ ᩁᨳᩁᩮᨱᩅᩮᩣ ᨨᨲ᩠ᨲᩥᩴᩈ ᩃᩥᨠ᩠ᨡᩣ ᨶᩣᨾ. ᩃᨠ᩠ᨡ ᨴᩔᨶᩮ, ᨸᨠᨲᩥᨧᨠ᩠ᨡᩩᨶᩣᨸᩥ ᩃᨠ᩠ᨡ᩠ᨿᨲᩮᨲᩥ ᩃᩥᨠ᩠ᨡᩣ, ᩋᩔᩥᨲ᩠ᨲᩴ.

ᨲᩣ ¶ ᩃᩥᨠ᩠ᨡᩣ ᩈᨲ᩠ᨲ ᩐᨠᩣ ᨶᩣᨾ, ᩐᨠᩣᨲᩥ ᩅᩩᨧ᩠ᨧᨲᩥ ᩈᩥᩁᩮᩣᩅᨲ᩠ᨲᨠᩥᨾᩥ, ᨲᨸ᩠ᨸᨾᩣᨱᨲ᩠ᨲᩣ ᩐᨠᩣ. ᨲᩣ ᩈᨲ᩠ᨲ ᩐᨠᩣ ᨵᨬ᩠ᨬᨾᩣᩈᩮᩣ ᨶᩣᨾ, ᨵᨬ᩠ᨬᩮᩣ ᩅᩦᩉᩥᨿᩮᩅ ᨸᩁᩥᨾᩣᨱᩥᨲᨻ᩠ᨻᨲ᩠ᨲᩣ ᨾᩣᩈᩮᩣ ᨧᩣᨲᩥ ᨵᨬ᩠ᨬᨾᩣᩈᩮᩣ, ᨾᩈᩥ ᨸᩁᩥᨾᩣᨱᩮ. ᨲᩮ ᩈᨲ᩠ᨲ ᨵᨬ᩠ᨬᨾᩣᩈᩣ ᩋᨦ᩠ᨣᩩᩃᩴ ᨶᩣᨾ, ᩋᨦ᩠ᨣ ᨣᨾᨶᨲ᩠ᨳᩮᩣ, ᩏᩃᩮᩣ, ᩋᨦ᩠ᨣᩩᩃᩴ, ᨸᨾᩣᨱᩴ, ᩏᩃᩥᨸᨧ᩠ᨧᨿᩮ ᩋᨦ᩠ᨣᩩᩃᩥ, ᨠᩁᩈᩣᨡᩣ. ᩋᨾᩩᨴ᩠ᩅᩥᨧ᩠ᨨᩮᨲᩥ ᩋᨴᩩᩴ ᨴ᩠ᩅᩣᨴᩈᨦ᩠ᨣᩩᩃᩴ ᩅᩥᨴᨲ᩠ᨳᩥ ᨶᩣᨾ, ᨠᨱᩥᨭ᩠ᨮᩈᩉᩥᨲᩮᨶᨦ᩠ᨣᩩᨭ᩠ᨮᩮᨶ ᩅᩥᨲ᩠ᨳᩣᩁᩦᨿᨲᩮ, ᩅᩥᨵᩦᨿᨲᩮᨲᩥ ᩅᩣ ᩅᩥᨴᨲ᩠ᨳᩥ, ᩅᩥᨸᩩᨻ᩠ᨻᩮᩣ ᨲᨶᩩ ᩅᩥᨲ᩠ᨳᩣᩁᩮ. ᨵᩣ ᨵᩣᩁᨱᩮ, ᩏᨽᨿᨲᩕᩣᨸᩥᨲᩥ, ᨸᩩᨻ᩠ᨻᨸᨠ᩠ᨡᩮ ᨲᩔ ᨳᩮᩣ, ᨶᩔ ᨲᩮᩣ, ᨲᩔ ᨴᩮᩣ. ᨸᨧ᩠ᨨᩥᨾᩮ ᨵᩔ ᨴᩮᩣ, ᨲᩔ ᨳᩮᩣ, ᩋᩈᩁᩪᨸᨴ᩠ᩅᩥᨽᩣᩅᩮᩣ ᨧ. ᨲᩣ ᨴᩩᩅᩮ ᩅᩥᨴᨲ᩠ᨳᩦ ᩁᨲᨶᩴ ᩈᩥᨿᩩᩴ, ᩁᨾᩩ ᨠᩦᩊᩣᨿᩴ, ᨲᨶᩮᩣ, ᨾᩃᩮᩣᨸᩮᩣ. ᨲᩣᨶᩥ ᩈᨲ᩠ᨲᩮᩅ ᩁᨲᨶᩣᨶᩥ ᨿᨭ᩠ᨮᩥ ᨶᩣᨾ, ᨿᨲ ᨸᨿᨲᨶᩮ,ᨲᩥ, ᨲᩔ ᨮᩮᩣ, ᨲᩔ ᨭᩮᩣ. ᨲᩣ ᩅᩦᩈᨲᩥ ᨿᨭ᩠ᨮᩥᨿᩮᩣ ᩏᩈᨽᩴ ᨶᩣᨾ, ᩏᩈ ᨴᩣᩉᩮ, ᩋᨽᩮᩣ. ᩑᨲ᩠ᨳ ᨸᨶ ᩏᩈᨽᨶᨴᨶ᩠ᨲᩁᩴ ᩏᩈᨽᩴ. ᩏᩈᨽᩣᨶᩴ ᩋᩈᩦᨲᩥᨸ᩠ᨸᨾᩣᨱᩴ ᨣᩣᩅᩩᨲᩴ ᨶᩣᨾ, ᨣᩅᩴ, ᨣᩅᩮᩉᩥ ᩅᩣ ᨿᩩᨲᩴ ᨣᩣᩅᩩᨲᩴ. ᨿᩩᨩ ᩈᨾᩣᨵᩥᨾ᩠ᩉᩥ, ᨣᩮᩣᨶᨴᨶ᩠ᨲᩁᩮᩉᩥ ᨣᩉᩥᨲᨸ᩠ᨸᨾᩣᨱᩈᨾᩣᨵᩣᨶᨶ᩠ᨲ᩠ᨿᨲ᩠ᨳᩮᩣ, ᨲᩴ ᨧᨲᩩᨣᩣᩅᩩᨲᩴ ᨿᩮᩣᨩᨶᩴ ᨶᩣᨾ, ᨿᩩᨩ ᩈᨾᩣᨵᩥᨾ᩠ᩉᩥ, ᨿᩩ, ‘‘ᩑᨲ᩠ᨲᨠᩴ ᨿᩮᩣᨩᨶᩴ ᨶᩣᨾ ᩉᩮᩣᨲᩪ’’ᨲᩥ ᨧᨲᩩᨣᩣᩅᩩᨲᩮᩉᩥ ᩈᨾᩣᨵᩣᨶᨶ᩠ᨲ᩠ᨿᨲ᩠ᨳᩮᩣ.

᪑᪙᪗. ᩌᩁᩮᩣᨸᩥᨲᩣᨶᩴ ᩌᨧᩁᩥᨿᨵᨶᩪᨶᩴ ᨸᨬ᩠ᨧᩈᨲᩴ ᨠᩮᩣᩈᩮᩣ ᨶᩣᨾ, ᩋᨶᩣᩁᩮᩣᨸᩥᨲᩣᨶᨶ᩠ᨲ᩠ᨿᨸᩁᩮ. ᨠᩩᩈ ᩋᩅ᩠ᩉᩣᨶᩮ, ᨱᩮᩣ, ᨠᩩᩈᨶᩴ ᩋᩅ᩠ᩉᩣᨶᩴ ᨠᩮᩣᩈᩮᩣ, ᩍᨵ ᨸᨶ ᨠᩮᩣᩈᨸ᩠ᨸᨾᩣᨱᨲ᩠ᨲᩣ ᨠᩮᩣᩈᩮᩣ, ᨴ᩠ᩅᩥᩈᩉᩔᨠᩁᨸ᩠ᨸᨾᩣᨱᩮᩣ. ᩋᨬ᩠ᨬᨲ᩠ᨳ ᨸᨶ –

‘‘ᨧᨲᩩᨠ᩠ᨠᩣᨵᩥᩅᩦᩈᨲᩥᨿᩣ ¶ , ᩋᨦ᩠ᨣᩩᩃᩮᩉᩥ ᨠᩁᩮᩣ ᨽᩅᩮ;

ᨡ᩠ᨿᩣᨲᨾᨭ᩠ᨮᩈᩉᩔᩮᩉᩥ, ᨠᩮᩣᩈᨾᩣᨶᩴ ᩅᩥᨽᩣᩅᩥᨶᩣ’’ᨲ᩠ᨿᩩᨲ᩠ᨲᩴ.

ᨧᨲᩩᩁᨾ᩠ᨻᨱᨶ᩠ᨲᩥ ᨧᨲᩩᩁᨾ᩠ᨻᨱᩅᩦᩉᩥᨻᩦᨩᨩᩣᨲᩁᩮᩣᨸᨶᨿᩮᩣᨣ᩠ᨿᩮᩣ ᨽᩪᨾᩥᨸ᩠ᨸᨴᩮᩈᩮᩣ ᨠᩁᩦᩈᩴ ᨶᩣᨾ, ᨠᩁᩮᩣᨶ᩠ᨲᩥ ᩑᨲ᩠ᨳ ᨠᩈᨶᩁᩮᩣᨸᨶᩣᨴᩥᨠᨶ᩠ᨲᩥ ᨠᩁᩦᩈᩴ, ᩎᩈᩮᩣ. ᨧᨲᩩᩁᨾ᩠ᨻᨱᨻᩦᨩᨩᩣᨲᩣᨶᩥ ᩁᩮᩣᨸᩮᨶ᩠ᨲ᩠ᨿᩮᨲ᩠ᨳᩣᨲᩥ ᨧᨲᩩᩁᨾ᩠ᨻᨱᩴ, ᩋᨾ᩠ᨻᨱᩴ ᩑᨠᩣᨴᩈᨴᩮᩣᨱᨾᨲ᩠ᨲᩴ, ᩋᨬ᩠ᨬᩮ ᨸᨶ ‘‘ᨧᨲᩩᩁᨾ᩠ᨻᨱᩴ ᨧᨲᩩᨿᨭ᩠ᨮᩥᨠᩴ ᨮᩣᨶᩴ ᨠᩁᩦᩈᩴ ᨶᩣᨾᩣ’’ᨲᩥ ᩅᨴᨶ᩠ᨲᩥ, ᨲᩴ ᨠᩁᩦᩈᨻ᩠ᨽᨶ᩠ᨲᩁᩣᨶᩴ ᨸᩁᩥᨿᩣᨿᨽᩣᩅᨸ᩠ᨸᩈᨦ᩠ᨣᩣ ᨶ ᨣᩉᩮᨲᨻ᩠ᨻᩴ.

ᨸᨾᩣᨱᨲᩮᩣ ᩉᨲ᩠ᨳᩣᨶᨾᨭ᩠ᨮᩅᩦᩈᨸ᩠ᨸᨾᩣᨱᩴ ᨮᩣᨶᩴ ᩋᨻ᩠ᨽᨶ᩠ᨲᩁᩴ ᨶᩣᨾ, ᩋᨻ᩠ᨽᨶ᩠ᨲᩁᩮ ᩋᨶ᩠ᨲᩮᩣᨠᩮᩣᨭ᩠ᨮᩣᩈᩮ ᨩᩣᨲᩴ, ᨶ ᨻᩉᩥᨠᩮᩣᨭ᩠ᨮᩣᩈᩮᨲᩥ ᩋᨻ᩠ᨽᨶ᩠ᨲᩁᩴ. ᨿᨲ᩠ᨳ ᨿᨲ᩠ᨳ ᩉᩥ ᨿᩮᩣ ᨿᩮᩣ ᨮᩥᨲᩮᩣ, ᨶᩥᩈᩥᨶ᩠ᨶᩮᩣ ᩅᩣ, ᨲᨲ᩠ᨳ ᨲᨲ᩠ᨳ ᩈᨾᨶ᩠ᨲᩣ ᩋᨭ᩠ᨮᩅᩦᩈᨲᩥᩉᨲ᩠ᨳᨸ᩠ᨸᨾᩣᨱᩴ ᨮᩣᨶᩴ ᨲᩔ ᨲᩔ ᩋᨻ᩠ᨽᨶ᩠ᨲᩁᩴ ᨮᩣᨶᩴ ᨶᩣᨾ. ᨽᩪᨾ᩠ᨿᩣᨴᩥᨲ᩠ᨲᩣ ᨽᩪᨾᩥᩅᨣ᩠ᨣᩮᩣ, ᩋᨳ ᩅᩣ ᩋᨦ᩠ᨣᩣᨸᩮᨠ᩠ᨡᩣᨿ ᨽᩪᨾᩥᨿᩮᩅ ᨸᨵᩣᨶᩴ, ᨸᨵᩣᨶᩮᨶ ᨧ ᨻ᩠ᨿᨸ᩠ᨸᨴᩮᩈᩮᩣ ᨽᩅᨲᩦᨲᩥ ᨽᩪᨾᩥᩅᨣ᩠ᨣᨻ᩠ᨿᨸ᩠ᨸᨴᩮᩈᩮᩣ.

ᨽᩪᨾᩥᩅᨣ᩠ᨣᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪒. ᨸᩩᩁᩅᨣ᩠ᨣᩅᨱ᩠ᨱᨶᩣ

᪑᪙᪘. ᨨᨠ᩠ᨠᩴ ᨶᨣᩁᩮ.

‘‘ᨸᨭ᩠ᨭᨶᨬ᩠ᨧ ᩋᨵᩥᨭ᩠ᨮᩣᨶᩴ, ᨶᨣᩁᩴ ᨸᩩᨭᨽᩮᨴᨶᩴ;

ᨳᩥᨿᩮᩣ ᨸᩪ ᨶᨣᩁᩦ ᨸᩪᩁᩥᨿᩮᩣ, ᨮᩣᨶᩦᨿᩴ ᨠᨻ᩠ᨻᨭᩴ ᨸᩩᨭ’’ᨶ᩠ᨲᩥ.

ᩉᩥ ᩈᩥᩃᩮᩣᨠᨸᩁᩥᨿᩣᨿᩮᩈᩩ ᩅᩮᩣᨸᩣᩃᩥᨲᩮᩣ.

‘‘ᩅᩥᨧᩥᨲ᩠ᨲᨴᩮᩅᩣᨿᨲᨶᩴ ¶ , ᨸᩣᩈᩣᨴᩣᨸᨱᨾᨶ᩠ᨴᩥᩁᩴ;

ᨶᨣᩁᩴ ᨴᩔᨿᩮ ᩅᩥᨴ᩠ᩅᩣ, ᩁᩣᨩᨾᨣ᩠ᨣᩮᩣᨸᩈᩮᩣᨽᩥᨲ’’ᨶ᩠ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪑.᪒.᪑]. –

ᨶᨣᩁᩃᨠ᩠ᨡᨱᩴ. ᨸᩩ ᨸᩣᩃᨶᩮ, ᨸᩩᩁ ᨸᩣᩃᨶᩮᨲᩥ ᨧ, ᨸᩩᨶᩣᨲᩥ ᨸᩩᩁᩮᨲᩥ ᨧ ᩁᨠ᩠ᨡᨲᩥ ᨸᩁᨧᨠ᩠ᨠᩣ ᨴᩩᨣ᩠ᨣᨲᩣᨿᩣᨲᩥ ᨸᩩᩁᩴ, ᩁᩮᩣ, ᩋ ᨧ, ᨸᩩᩁ ᩋᨣ᩠ᨣᨣᨾᨶᩮᨲᩥᨸᩥ ᨵᩣᨲ᩠ᩅᨲ᩠ᨳᩮᩣ. ᨶᨣᩣ ᨸᩣᩈᩣᨴᩣᨴᨿᩮᩣ ᩋᩔ ᩈᨶ᩠ᨲᩥ ᨶᨣᩁᩴ, ᩁᩮᩣ. ᩅᩣᨠᩣᩁᩮᨶ ᨶᨣᩁᩈᨴ᩠ᨴᩔ ᨸᩩᩃ᩠ᩃᩥᨦ᩠ᨣᨲ᩠ᨲᩴ ᩈᨾᩩᨧ᩠ᨧᩥᨶᩮᩣᨲᩥ [ᨶᨣᩁᩥᨿᩮᩣ ᩅᩣ ᨸᨲ᩠ᨲᨶᩴ (ᩋᨾᩁ ᪑.᪒.᪑) ᨸᨠ᩠ᨡᩮ ᨸᨲ᩠ᨲᨶᩈᩣᩉᨧᩁᩥᨿᩣ ᨶᨸᩩᩴᩈᨠᨲ᩠ᨲᩴ. (ᨧᩥᨶ᩠ᨲᩣᨾᨱᩥᨭᩦᨠᩣ ᪑.᪒.᪑)], ᨸᩩᩁᩈᨴ᩠ᨴᩔᩣᨸᩦᨲ᩠ᨿᩣᨧᩁᩥᨿᩣ. ᩋᨠᩩᨲᩮᩣᨽᨿᨲ᩠ᨲᩣ ᨮᩣᨶᩣᨿ ᩉᩥᨲᩴ ᨮᩣᨶᩦᨿᩴ, ᩎᨿᩮᩣ. ᨸᨱᩥᨠᩣᨶᩴ ᨸᩩᨭᩣ ᨽᩥᨩ᩠ᨩᨶ᩠ᨲᩮ ᩋᨲᩕᩣᨲᩥ ᨸᩩᨭᨽᩮᨴᨶᩴ.

ᨶᩥᨧ᩠ᨧᨶᩥᩅᩣᩈᨶᨭ᩠ᨮᩣᨶᩴ ᨴᩔᩮᨲ᩠ᩅᩣ ᩍᨲᩁᩴ ᨴᩔᩮᨲᩩᨾᩣᩉ ‘‘ᨳᩥᨿ’’ᨾᩥᨧ᩠ᨧᩣᨴᩥ. ᩁᩣᨩᩣ ᨲᩥᨭ᩠ᨮᨲᩥ ᩑᨲ᩠ᨳᩣᨲᩥ ᩁᩣᨩᨮᩣᨶᩦ, ᨿᩩ, ᨶᨴᩣᨴᩥ, ᨶᩥᨧ᩠ᨧᨶᩥᩅᩣᩈᨶᨭ᩠ᨮᩣᨶᩮᨸᩥ ‘‘ᨧᨲᩩᩁᩣᩈᩦᨲᩥᨶᨣᩁᩈᩉᩔᩣᨶᩥ ᨠᩩᩈᩅᨲᩦᩁᩣᨩᨮᩣᨶᩦᨸᨾᩩᨡᩣᨶᩦ’’ᨲ᩠ᨿᩣᨴᩦᩈᩩ [ᨴᩦ. ᨶᩥ. ᪒.᪒᪖᪓]. ᨴᩣᩁᩩᨠ᩠ᨡᨶ᩠ᨵᩣᨴᩦᩉᩥ ᩌ ᩈᨾᨶ᩠ᨲᨲᩮᩣ ᩅᩁᨶ᩠ᨲᩥ ᨸᩁᩥᨠ᩠ᨡᩥᨸᩦᨿᨶ᩠ᨲᩥ ᩑᨲ᩠ᨳᩣᨲᩥ ᨡᨶ᩠ᨵᩣᩅᩣᩁᩮᩣ, ᨸᨲ᩠ᨳᨶᨲ᩠ᨳᩮᩣ ᩅᩁᨵᩣᨲᩩ ᩌᨸᩩᨻ᩠ᨻᨲ᩠ᨲᩣ ᨸᩁᩥᨠ᩠ᨡᩥᨸᨶᨲ᩠ᨳᩮᩣ ᩉᩮᩣᨲᩥ. ᨸᨬ᩠ᨧᨠᩴ ᨶᨣᩁᩮ, ‘‘ᨡᨶ᩠ᨵᩣᩅᩣᩁᩮᩣ’’ᨲᩥ ᨸᨶ ᩑᨠᨾᩮᩅ ᩋᨧᩥᩁᨶᩥᩅᩣᩈᨶᨭ᩠ᨮᩣᨶᩔ ᨶᩣᨾᩴ.

᪑᪙᪙. ᨾᩪᩃᨸᩩᩁᩣ ᩋᨬ᩠ᨬᨲᩕ ᨾᩪᩃᨸᩩᩁᩴ ᩅᨩ᩠ᨩᩮᨲ᩠ᩅᩣ ᨿᩴ ᨸᩩᩁᨾᨲ᩠ᨳᩥ ᨿᩮᩣᨩᨶᩅᩥᨲ᩠ᨳᩥᨱ᩠ᨱᨸᩣᨠᩣᩁᩣᨴᩥᨸᩁᩥᨠ᩠ᨡᩥᨲ᩠ᨲᩴ, ᨲᩴ ᨾᩪᩃᨸᩩᩁᩔ ᨲᩁᩩᨭ᩠ᨮᩣᨶᩥᨿᩔ ᩈᩣᨡᩣᩈᨴᩥᩈᨲ᩠ᨲᩣ ᩈᩣᨡᩣᨶᨣᩁᩴ ᨶᩣᨾ.

᪒᪐᪐-᪒᪐᪑. ᩈᩣᨴ᩠ᨵᨸᨩ᩠ᨩᨴ᩠ᩅᨿᩮᨶ ¶ ᨾᩪᩃᨸᩩᩁᩔ ᨶᩣᨾᩣᨶᩥ. ᩅᩣᨶᩁᩈᩦᩈᩴ, ᨲᩴᩈᨱ᩠ᨮᩣᨶᩮᩣ ᩅᩣ ᨸᩣᩈᩣᨱᩮᩣ ᩑᨲ᩠ᨳ ᩋᨲ᩠ᨳᩦᨲᩥ ‘‘ᩅᩣᨶᩁᩈᩦᩈ’’ᨶ᩠ᨲᩥ ᩅᨲ᩠ᨲᨻ᩠ᨻᩮ ᩅᩔ ᨻᨲ᩠ᨲᩴ, ᩅᨱ᩠ᨱᩅᩥᨸᩁᩥᨿᨿᩴ, ᨴᩦᨥᩴ, ᨱᨲ᩠ᨲᩴ, ᩈᩔ ᩃᩮᩣᨸᨬ᩠ᨧ ᨠᨲ᩠ᩅᩣ ‘‘ᨻᩣᩁᩣᨱᩈᩦ’’ᨲᩥ ᩅᩩᨲ᩠ᨲᩴ. ᩈᩅᨲ᩠ᨳᩔ ᩍᩈᩥᨶᩮᩣ ᨶᩥᩅᩣᩈᨶᨭ᩠ᨮᩣᨶᨲ᩠ᨲᩣ ᩈᩣᩅᨲ᩠ᨳᩥ, ᩈᨻ᩠ᨻᩴ ᨵᨶᨾᩮᨲ᩠ᨳ ᩋᨲ᩠ᨳᩦᨲᩥ ᩅᩣ ᩈᩣᩅᨲ᩠ᨳᩥ [ᨾ. ᨶᩥ. ᩋᨭ᩠ᨮ. ᪑.᪑᪔], ᩈᨻ᩠ᨻᩔ ᩈᩣᩅᩮᩣ, ᨵᨶᩅᩣᨧᨠᩮᩣ ᩋᨲ᩠ᨳᩈᨴ᩠ᨴᩮᩣ, ᩍ. ᨲᩥᨠ᩠ᨡᨲ᩠ᨲᩩᩴ ᩅᩥᩈᩣᩃᩦᨽᩪᨲᨲ᩠ᨲᩣ ᩅᩮᩈᩣᩃᩦ, ᩋᩔᨲ᩠ᨳᩩᨲ᩠ᨳᩮ ᩎ. ᨾᨳᩥ ᩉᩥᩴᩈᩣᨿᩴ, ᩍᩃᩮᩣ, ᩋᩔᩥᨲ᩠ᨲᩴ, ᨾᩥᨳᩥᩃᩣ. ᩋᩃᩴ ᨽᩪᩈᨶᨾᩮᨲ᩠ᨳᩣᨲᩥ ᩌᩊᩅᩦ, ᩅᩦ, ᩊᨲ᩠ᨲᨬ᩠ᨧ. ᨠᩩᩈ ᩋᩅ᩠ᩉᩣᨶᩮ, ‘‘ᨡᩣᨴᨳ ᨸᩥᩅᨳᩣ’’ᨲ᩠ᨿᩣᨴᩦᩉᩥ ᨴᩈᩉᩥ ᩈᨴ᩠ᨴᩮᩉᩥ ᨠᩮᩣᩈᨶ᩠ᨲᩥ ᩑᨲ᩠ᨳᩣᨲᩥ ᨠᩮᩣᩈᨾ᩠ᨻᩦ, ᨻᩮᩣ, ᨶᨴᩣᨴᩥ, ᨠᩩᩈᨾ᩠ᨻᩁᩩᨠ᩠ᨡᩅᨶ᩠ᨲᨲᩣᨿ ᩅᩣ ᨠᩮᩣᩈᨾ᩠ᨻᩦ, ᨠᩩᩈᨾ᩠ᨻᩔ ᩍᩈᩥᨶᩮᩣ ᩋᩔᨾᨲᩮᩣ ᩋᩅᩥᨴᩪᩁᩮ ᨾᩣᨸᩥᨲᨲ᩠ᨲᩣᨲᩥ ᩑᨠᩮ [ᩏᨴᩣ. ᩋᨭ᩠ᨮ. ᪓᪕; ᨾ. ᨶᩥ. ᨭᩦ. ᪑.᪑᪔; ᪒.᪒᪘᪔]. ᩏᨣ᩠ᨣᩴ ᩁᩥᨸᩩᩴ ᨩᨿᨲᩥ ᨿᨲ᩠ᨳ, ᩈᩣ ᩏᨩ᩠ᨩᩮᨶᩦ, ᨿᩩ, ᨶᨴᩣᨴᩥ. ᨲᨠ᩠ᨠ ᩐᩉᩮ, ᩐᩉᩮᩣ ᩐᨶᨸᩪᩁᨱᩴ, ᨲᨠ᩠ᨠᨶᩴ ᨲᨠ᩠ᨠᩮᩣ, ᩈᩮᩣ ᩈᩦᩃᩴ ᩈᨽᩣᩅᩮᩣ ᨿᨲ᩠ᨳ ᩈᩣ ᨲᨠ᩠ᨠᩈᩦᩃᩣ, ᨿᩮᩣ ᩉᩥ ᨸᩩᩁᩥᩈᨠᩣᩁᩮᨶ ᩐᨶᩮᩣ, ᩈᩮᩣ ᨲᨲ᩠ᨳ ᨣᨶ᩠ᨲ᩠ᩅᩣ ᨲᨾᩪᨶᩴ ᨸᩪᩁᩮᨲᩦᨲᩥ. ᨧᨾ ᩋᨴᨶᩮ, ᨸᩮᩣ, ᨧᨾ᩠ᨸᩣ. ᩈᩣᨶᩴ ᨵᨶᩣᨶᩴ ᩌᨠᩁᩴ ᩏᨸ᩠ᨸᨲ᩠ᨲᩥᨭ᩠ᨮᩣᨶᩴ ᩈᩣᨠᩁᩮᩣ, ᩈᩮᩣ ᩑᩅ ᩈᩣᨣᩃᩴ. ᩈᩴᩈᩩᨾᩣᩁᩈᨱ᩠ᨮᩣᨶᩮᩣ ᨣᩥᩁᩥ ᩑᨲ᩠ᨳᩣᨲᩥ ᩈᩴᩈᩩᨾᩣᩁᨣᩥᩁᩴ, ᩈᩴᩈᩩᨾᩣᩁᩮᩣ ᨣᩣᨿᨲᩥ ᩑᨲᩔ ᨾᩣᨸᩥᨲᨠᩣᩃᩮᨲᩥ ᩅᩣ ᩈᩴᩈᩩᨾᩣᩁᨣᩥᩁᩴ, ᨣᩮ ᩈᨴ᩠ᨴᩮ, ᩍᩁᩮᩣ. ᩁᩣᨩᩪᨶᨾᩮᩅ ᩌᨵᩥᨸᨧ᩠ᨧᩅᩈᩮᨶ ᨸᩁᩥᨣ᩠ᨣᩉᩥᨲᨻ᩠ᨻᨲ᩠ᨲᩣ ᩁᩣᨩᨣᩉᩴ. ᩌᨴᩥᨠᩣᩃᩮ ᨠᨸᩥᩃᨶᩣᨾᩔ ᩍᩈᩥᨶᩮᩣ ᨶᩥᩅᩣᩈᨶᨭ᩠ᨮᩣᨶᨲ᩠ᨲᩣ ᨠᨸᩥᩃᩅᨲ᩠ᨳᩩ, ᨸᩩᨾᨶᨸᩩᩴᩈᨠᩮ.

ᩈᩣᨠᩮᩣ ᩁᩣᨩᩪᨶᩴ ᨿᩩᨴ᩠ᨵᩣᨴᩦᩈᩩ ᩈᨲ᩠ᨲᩥ ᩈᨬ᩠ᨩᩣᨲᩣ ᩑᨲ᩠ᨳᩣᨲᩥ ᩈᩣᨠᩮᨲᩴ, ‘‘ᩈᩣᨠᩮᩣ ᩈᨲ᩠ᨲᩥᨾ᩠ᩉᩥ ᨽᩪᨸᩣᩃᩮ, ᨴᩩᨾᨴᩦᨸᨶ᩠ᨲᩁᩮᩈᩩ ᨧᩮ’’ᨲᩥ ᨶᩣᨶᨲ᩠ᨳᩈᨦ᩠ᨣᩉᩮ. ᩈᨬ᩠ᨩᩣᨲᨲ᩠ᨳᩮ ᩍᨲᩮᩣ, ᩈᩣᨠᩮᩣ ᨶᩣᨾ ᩁᩣᨩᩣ, ᨴᩩᨾᩮᩣ ᩅᩣ ᩑᨲ᩠ᨳ ᩌᨴᩥᨠᩣᩃᩮ ᩈᨬ᩠ᨩᩣᨲᩮᩣᨲᩥ ᩅᩣ ᩈᩣᨠᩮᨲᩴ. ᩍᨶ᩠ᨴᩴ ᨸᩁᨾᩥᩔᩁᩥᨿᨽᩣᩅᩴ ᨸᩣᨸᩩᨱᨶ᩠ᨲᩥ ᩑᨲ᩠ᨳᩣᨲᩥ ᩍᨶ᩠ᨴᨸᨲ᩠ᨲᩴ, ᩍᨶ᩠ᨴᩮᩣ ᩅᩣ ¶ ᩈᨠ᩠ᨠᩮᩣ ᨴᩮᩅᩁᩣᨩᩣ, ᩈᩮᩣ ᨸᨲ᩠ᨲᩮᩣ ᩑᨲ᩠ᨳᩣᨲᩥ ᩍᨶ᩠ᨴᨸᨲ᩠ᨲᩴ. ᩏᨠ᩠ᨠᩴ ᨵᩣᩁᨿᨲᩥ ᩑᨲᩔ ᨾᩣᨸᩥᨲᨠᩣᩃᩮᨲᩥ ᩏᨠ᩠ᨠᨭ᩠ᨮᩣ, ᩅᨱ᩠ᨱᩅᩥᨠᩣᩁᩮᩣ. ᨿᩔ ᨾᩣᨸᩥᨲᨭ᩠ᨮᩣᨶᩮ ᨸᩣᨭᩃᩦᨶᩣᨾᨠᩮᩣ ᩑᨠᩮᩣ ᨲᩁᩩᨱᩁᩩᨠ᩠ᨡᩮᩣ ᩋᨲ᩠ᨳᩦᨲᩥ ᨲᩴ ᨸᩣᨭᩃᩥᨸᩩᨲ᩠ᨲᨠᩴ, ᩋᨳ ᩅᩣ ᨸᨭᩃᩥ ᨶᩣᨾ ᩑᨠᩮᩣ ᨣᩣᨾᨱᩦ, ᨲᩔ ᨸᩩᨲ᩠ᨲᩮᩣ ᩑᨲ᩠ᨳ ᩅᩈᨲᩥᩌᨴᩥᨠᩣᩃᩮᨲᩥ ᨸᩣᨭᩃᩥᨸᩩᨲ᩠ᨲᨠᩴ. ᨧᩮᨲᩥᨿᩁᨭ᩠ᨮᩮ ᩏᨲ᩠ᨲᨾᨲ᩠ᨲᩣ ᨧᩮᨲᩩᨲ᩠ᨲᩁᩴ, ‘‘ᨩᩮᨲᩩᨲ᩠ᨲᩁ’’ᨶ᩠ᨲᩥ ᨸᩣᨮᩮ ᨸᨶ ᩅᨱ᩠ᨱᩅᩥᨠᩣᩁᩮᩣ, ᩅᩮᩁᩥᨩᨿᨭ᩠ᨮᩣᨶᨲ᩠ᨲᩣ ᨩᩮᨲᨬ᩠ᨧ ᨲᩴ ᩏᨲ᩠ᨲᨾᨲ᩠ᨲᩣ ᩏᨲ᩠ᨲᩁᨬ᩠ᨧᩮᨲᩥ ᩅᩣ ᨩᩮᨲᩩᨲ᩠ᨲᩁᩴ. ᨿᩔ ᨾᩣᨸᩥᨲᨠᩣᩃᩮ ᨴᩦᨸᩮᩣ ᨴᩥᨸ᩠ᨸᨲᩥ, ᨲᩴ ᩈᨦ᩠ᨠᩔᩴ, ᨠᩣᩈ ᨴᩥᨲ᩠ᨲᩥᨿᩴ, ᨴ᩠ᩅᩥᨲ᩠ᨲᩴ, ᩈᨾ᩠ᨾᩣ ᨠᩈᨶ᩠ᨲᩥ ᩑᨲ᩠ᨳᩣᨲᩥ ᩅᩣ ᩈᨦ᩠ᨠᩔᩴ, ᨠᩈ ᩅᩥᩃᩮᨡᨶᩮ, ᨿᩔ ᨾᩣᨸᩥᨲᨠᩣᩃᩮ ᨶᩥᨾᩥᨲ᩠ᨲᨾᩮᩣᩃᩮᩣᨠᩮᨶ᩠ᨲᩣ ᨻᩕᩣᩉ᩠ᨾᨱᩣ ᨠᩩᩈᩉᨲ᩠ᨳᩴ ᨶᩁᩴ ᨸᩔᩥᨲ᩠ᩅᩣ ᨾᩣᨸᩮᨶ᩠ᨲᩥ, ᨲᩴ ᨠᩩᩈᩥᨶᩣᩁᩴ. ᩌᨴᩥᨶᩣ ᨾᨳᩩᩁ [ᨾᨵᩩᩁ, ᨾᩣᨵᩩᩁ (ᨠ.)] ᨸᩣᩈᩣᨱᨸᩩᩁᩈᩮᩣᨱᩥᨠᩣᨴᨿᩮᩣᨸ᩠ᨿᨶᩮᨠᨸᩩᩁᩅᩥᩈᩮᩈᩣ ᩈᨦ᩠ᨣᩉᩥᨲᩣ.

᪒᪐᪒. ᨧᨲᩩᨠ᩠ᨠᩴ ᩋᨻ᩠ᨽᨶ᩠ᨲᩁᨣᩣᨾᨾᨣ᩠ᨣᩮ. ᩁᨳᩔ ᩉᩥᨲᩣ ᩁᨧ᩠ᨨᩣ, ᨸᨻ᩠ᨻᨩ᩠ᨩᩣᨴᩥ. ᩅᩥᩈᨿᨶ᩠ᨲᩮ ᨸᨠᩣᩈᨿᨶ᩠ᨲᩮ ᩅᩥᨠ᩠ᨠᨿᩮᨶ ᨴᨻ᩠ᨻᩣᨶᩥ ᨿᩔᩴ, ᩈᩣ ᩅᩥᩈᩥᨡᩣ, ᩅᩥᨸᩩᨻ᩠ᨻᩮᩣ ᩈᩥ ᩈᩮᩅᩣᨿᩴ, ᨡᩮᩣ, ᩅᩥᩈᨶ᩠ᨲᩥ ᩑᨲ᩠ᨳᩣᨲᩥ ᩅᩣ ᩅᩥᩈᩥᨡᩣ, ᩅᩥᩈ ᨸᩅᩮᩈᨶᩮ, ᨡᩮᩣ. ᩁᨳᩔ ᩉᩥᨲᩣ ᩁᨳᩥᨠᩣ, ᩍᨠᩮᩣ. ᩅᩦ ᨣᨾᨶᩮ, ᨳᩥ, ᩅᩦᨳᩥ.

ᩋᨶᩥᨻ᩠ᨻᩥᨴ᩠ᨵᩣ ᩁᨧ᩠ᨨᨶ᩠ᨲᩁᩮᨶ ᨾᨩ᩠ᨫᩮ ᩋᨶᩥᨻ᩠ᨻᩥᨴ᩠ᨵᩣ ᩁᨧ᩠ᨨᩣ ᨻ᩠ᨿᩪᩉᩮᩣ ᨶᩣᨾ. ᨻ᩠ᨿᩪᩉᩮᨲᩥ ᩈᨾ᩠ᨸᩥᨱ᩠ᨯᩮᨲᩥ ᨩᨶᩮ ᩋᨬ᩠ᨬᨲᩕ ᨣᨶ᩠ᨲᩩᨾᨸ᩠ᨸᨴᩣᨶᩅᩈᩮᨶᩣᨲᩥ ᨻ᩠ᨿᩪᩉᩮᩣ, ᩐᩉ ᩈᨾ᩠ᨸᩥᨱ᩠ᨯᨶᩮ ᩅᩥᨸᩩᨻ᩠ᨻᨲ᩠ᨲᩣ. ᨶ ᨶᩥᨻ᩠ᨻᩥᨩ᩠ᨫᨲᩮ ᩁᨧ᩠ᨨᨶ᩠ᨲᩁᩮᨶᩣᨲᩥ ᩋᨶᩥᨻ᩠ᨻᩥᨴ᩠ᨵᩮᩣ, ᩅᩥᨵ ᩈᨾ᩠ᨸᩉᩣᩁᩮ, ᩋ. ᨶᩥᨻ᩠ᨻᩥᨴ᩠ᨵᩣ ᩁᨧ᩠ᨨᨶ᩠ᨲᩁᩮᨶ ᩁᨧ᩠ᨨᩣ ᨸᨳᩮᩣ, ᩋᨴ᩠ᨵᩦᨲᩥ ᨧ ᩅᩩᨧ᩠ᨧᨲᩥ. ᨸᨳ ᨣᨾᨶᩮ, ᨸᨳᩮᩣ. ᩋᨴ ᨣᨾᨶᩮ,ᨲᩥ, ᩋᨴ᩠ᨵᩥ.

᪒᪐᪓. ᨧᨲᩩᨠ᩠ᨠᩴ ¶ ᨧᨧ᩠ᨧᩁᩮ. ᨧᨲᩩᨶ᩠ᨶᩴ ᨸᨳᩣᨶᩴ ᩈᨾᩣᩉᩣᩁᩮᩣ ᨧᨲᩩᨠ᩠ᨠᩴ, ᨧᩁ ᨣᨲᩥᨽᨠ᩠ᨡᨶᩮᩈᩩ, ᨧᩁᩮᩣ, ᩁᩔ ᨧᩮᩣ, ᨧᨧ᩠ᨧᩁᩴ, ᩋᨦ᩠ᨣᨱᩅᩣᨧᨠᩮᩣ ᨧᩣᨿᩴ. ᨴ᩠ᩅᩥᨶ᩠ᨶᩴ, ᨧᨲᩩᨶ᩠ᨶᩴ ᩅᩣ ᨾᨣ᩠ᨣᩣᨶᩴ ᩈᨶ᩠ᨵᩥ ᨾᨣ᩠ᨣᩈᨶ᩠ᨵᩥ. ᩈᩥᨦ᩠ᨥ ᨥᩣᨿᨶᩮ, ᩌᨭᨠᩮᩣ.

ᨴ᩠ᩅᨿᩴ ᩅᨸ᩠ᨸᩔᩮᩣᨸᩁᩥ ᩍᨭ᩠ᨮᨠᩣᨴᩥᩁᨧᩥᨲᩮ ᩅᩮᨮᨶᩮ. ᩅᨸ᩠ᨸᩴ ᨶᩣᨾ ᨴᩩᨣ᩠ᨣᨶᨣᩁᩮ ᨸᩁᩥᨡᩣᨾᨲ᩠ᨲᩥᨠᩴ ᨠᩪᨭᩴ [ᨠᩩᨭᩥᩴ (ᨠ.)] ᨠᨲ᩠ᩅᩣ ᨣᩮᩣᩉᩥ, ᩉᨲ᩠ᨳᩦᩉᩥ ᨧ ᩅᩥᨾᨴ᩠ᨴᩣᨸᩮᨲ᩠ᩅᩣ ᨲᩥᩴᩈᩉᨲ᩠ᨳᨸ᩠ᨸᨾᩣᨱᩴ ᨸᩣᨠᩣᩁᩔ ᩉᩮᨭ᩠ᨮᩥᨾᨲᩃᩴ, ᨲᨳᩣ ᩉᨲ᩠ᨳᩈᨲᩴ ᨲᨲᩮᩣ ᩏᨴ᩠ᨵᩁᩥᨲ᩠ᩅᩣ ᨸᩴᩈᩩᨶᩣ ᩅᨸ᩠ᨸᩴ ᨠᩣᩁᨿᩮ, ᨲᩔᩮᩣᨸᩁᩥ ᨸᩣᨠᩣᩁᨶ᩠ᨲᩥ, ᨸᨠᩩᨻ᩠ᨻᨶ᩠ᨲᩥ ᨲᨶ᩠ᨲᩥ ᨸᩣᨠᩣᩁᩮᩣ, ᩈᨾᨶ᩠ᨲᨲᩮᩣ ᨠᩁᩦᨿᨲᩮᨲᩥ ᩅᩣ ᨸᩣᨠᩣᩁᩮᩣ, ᩋᨠᨲ᩠ᨲᩁᩥ ᨧ ᨠᩣᩁᨠᩮ ᩈᨬ᩠ᨬᩣᨿᩴ ᨱᩮᩣ, ᩁᩔᩔ ᨴᩦᨥᨲᩣ. ᩅᩩ ᩈᩴᩅᩁᨱᩮ, ᩅᩩᨱᩮᩣᨲᩦᨲᩥ ᩅᩁᨱᩮᩣ, ᨿᩩ, ᩁᩣᨣᨾᩮᩣ ᨧ. ‘‘ᩈᩣᩃᩮᩣ’’ᨲᩥᨸᩥ ᨸᩣᨠᩣᩁᩔ ᨶᩣᨾᩴ.

ᨴ᩠ᩅᨿᩴ ᩁᩣᨩᨽᩅᨶᩈᩣᨾᨬ᩠ᨬᩮ. ᩈᨻ᩠ᨻᨣᩮᩉᩣᨶᩴ ᩅᩥᩈᩮᩈᩮᨶ ᨸᨠᩣᩈᨶᨲᩮᩣ ᩏᨴ᩠ᨴᩣᨸᩮᩣ, ᨴᩦᨸ ᨸᨠᩣᩈᨶᩮ, ᩎᩔᩣᨠᩣᩁᩮᩣ. ᩈᨦ᩠ᨣᨾ᩠ᨾ ᨠᩁᩮᩣᨶ᩠ᨲᩥ ᨲᨶ᩠ᨲᩥ ᩏᨸᨠᩣᩁᩥᨠᩣ, ᨱ᩠ᩅᩩ. ᨠᩮ ᨸᨧ᩠ᨧᨿᩮ ᨳᩦᨠᨲᩣᨠᩣᩁᨸᩁᩮ ᨸᩩᨻ᩠ᨻᩮᩣ ᩋᨠᩣᩁᩮᩣ ᨴᩦᨥᩴ [ᨠᩣᨲᨶ᩠ᨲ ᪒.᪒.᪖᪕], ᩋᨠᩣᨴᩮᩈᩮᩣᨸᩥ ᩉᩥ ‘‘ᨠᩮᩣ’’ᨲᩥ ᩅᩩᨧ᩠ᨧᨲᩥ, ᨿᨳᩣ ᨴᩮᩅᨴᨲ᩠ᨲᩮᩣ ‘‘ᨴᨲ᩠ᨲᩮᩣ’’ᨲᩥ. ᨠᨸᨧ᩠ᨧᨿᩮᩣ ᩅᩣ.

᪒᪐᪔. ᨴ᩠ᩅᨿᩴ ᨣᩮᩉᩣᨴᩥᨶᩮᩣ ᨾᨲ᩠ᨲᩥᨠᩮᨭ᩠ᨮᨠᩣᨴᩥᨾᨿᨽᩥᨲ᩠ᨲᩥᨿᩴ. ᨠᩩᨭ ᨨᩮᨴᨶᩮ, ᨠᩩᨭᨲᩥ ᨨᩥᨶ᩠ᨴᨲᩥ ᨾᨣ᩠ᨣᨶ᩠ᨲᩥ ᨠᩩᨭ᩠ᨭᩴ. ᨽᩥᨴᩥ ᨴ᩠ᩅᩥᨵᩣᨠᩁᨱᩮ,ᨲᩥ, ¶ ᨽᩥᨲ᩠ᨲᩥ. ᨣᩩᨶ᩠ᨶᩴ ᩅᩣᨧᩣᨶᩴ ᨸᩩᩁᩴ ᨣᩮᩣᨸᩩᩁᩴ. ᨴ᩠ᩅᩣᩁᩈᨾᩦᨸᩮ ᨠᨲᩮᩣ ᨠᩮᩣᨭ᩠ᨮᨠᩮᩣ ᨴ᩠ᩅᩣᩁᨠᩮᩣᨭ᩠ᨮᨠᩮᩣ, ᨠᩩᩈ ᩋᨠ᩠ᨠᩮᩣᩈᩮ, ᨮᨠᩮᩣ, ᨠᩮᩣᨭ᩠ᨮᨠᩮᩣᨲᩥ ᨣᩮᩉᩅᩥᩈᩮᩈᩮᩣ.

ᨴ᩠ᩅᨿᩴ ᩍᨶ᩠ᨴᨡᩦᩃᩮ. ᩍᩈ ᩍᨧ᩠ᨨᩣᨿᩴ, ᩑᩈ ᨣᩅᩮᩈᨶᩮ ᩅᩣ, ᩍᨠᩮᩣ. ᩍᨶ᩠ᨴᩔ ᩈᨠ᩠ᨠᩔ ᨡᩦᩃᩮᩣ ᨠᨱ᩠ᨭᨠᩮᩣ ᩍᨶ᩠ᨴᨡᩦᩃᩮᩣ. ᨴ᩠ᩅᨿᩴ ᨴ᩠ᩅᩣᩁᨸᩔᩮᩣᨸᩈᩣᩃᩣᨿᩴ’ᩉᨾ᩠ᨿᩣᨴᩥᨸᩥᨭ᩠ᨮᩮ ᨧ ᩅᩣᨲᨠᩩᨭᩥᨠᩣᨿᩴ. ᩋᨯ᩠ᨯ ᩋᨲᩥᨠ᩠ᨠᨾᩉᩥᩴᩈᩣᩈᩩ, ᩋ. ᩌᩃᨠᨸᨧ᩠ᨧᨿᩮ ᩋᨭ᩠ᨭᩣᩃᨠᩮᩣ.

᪒᪐᪕. ᩏᨸᩁᩥ ᨾᩣᩃᩣᨴᩥᨿᩩᨲ᩠ᨲᩴ ᩈᩮᩣᨽᨶᨳᨾ᩠ᨽᨴ᩠ᩅᨿᨾᩩᨽᨿᨲᩮᩣ ᨶᩥᨡᨶᩥᨲ᩠ᩅᩣ ᨿᩴ ᨻᩉᩥᨴ᩠ᩅᩣᩁᩴ ᨠᨸ᩠ᨸᩦᨿᨲᩮ, ᨲᩴ ᨲᩮᩣᩁᨱᩴ. ᨲᩩᩁ ᩅᩣᩁᨱᩮ, ᨿᩩ, ᨳᩅᨶ᩠ᨲᩣ ᩅᩣ ᩁᨱᨶ᩠ᨲ᩠ᨿᨲᩕᩣᨲᩥ ᨲᩮᩣᩁᨱᩴ, ᨲᩩ ᩋᨽᩥᨲ᩠ᨳᩅᩮ. ᩁᨱ ᩈᨴ᩠ᨴᨲ᩠ᨳᩮᩣ, ᩅᨱ᩠ᨱᩅᩥᨠᩣᩁᩮᩣ. ᨴ᩠ᩅᩣᩁᩔ ᨻᩉᩥ ᨻᩉᩥᨴ᩠ᩅᩣᩁᩴ. ᨸᩁᩥ ᩈᨾᨶ᩠ᨲᨲᩮᩣ ᨡᨬ᩠ᨬᨲᩮᨲᩥ ᨸᩁᩥᨡᩣ. ᨴᩦᨥᨽᩣᩅᩮᨶ ᨿᩩᨲ᩠ᨲᩣ ᨴᩦᨥᩥᨠᩣ.

᪒᪐᪖-᪒᪐᪗. ᩈᨴᩩᨾᨶ᩠ᨲᩴ ᨣᩮᩉᩮ. ᨾᨶ᩠ᨴ ᨾᩮᩣᨴᨶᨳᩩᨲᩥᨩᩊᨲ᩠ᨲᩮᩈᩩ, ᨾᨶ᩠ᨴᨶ᩠ᨲᩮ ᨿᨲ᩠ᨳᩣᨲᩥ ᨾᨶ᩠ᨴᩥᩁᩴ, ᩍᩁᩮᩣ. ᩈᩦᨴᨶ᩠ᨲᩥ ᨲᨲ᩠ᨳᩣᨲᩥ ᩈᨴᨶᩴ, ᨿᩩ. ᩈᨴ ¶ ᩅᩥᩈᩁᨱᨣᨲ᩠ᨿᩣᩅᩈᩣᨶᩮᩈᩩ. ᨶ ᨣᨧ᩠ᨨᨶ᩠ᨲᩦᨲᩥ ᩋᨣᩣ, ᨳᨾ᩠ᨽᩣᨴᨿᩮᩣ, ᨲᩮ ᩁᩣᨲᩥ ᨣᨱ᩠ᩉᩣᨲᩦᨲᩥ ᩋᨣᩣᩁᩴ. ᩁᩔᩔ ᨴᩦᨥᨲ᩠ᨲᩮ ᩌᨣᩣᩁᩴ. ᨧᩥ ᨧᨿᩮ, ᨶᩥᨧᩦᨿᨲᩮ ᨨᩣᨴᩦᨿᨲᩮᨲᩥ ᨶᩥᨠᩣᨿᩮᩣ, ᨿᨾ᩠ᩉᩥ ᨧᩥᩔ ᨠᩣᨴᩮᩈᩮᩣ ᨶᩥᨸᩣᨲᨶᩣ. ᩃᩦ ᩈᩥᩃᩮᩈᨶᩮ, ᨱᩮᩣ, ᨶᩥᩃᨿᩮᩣ, ᩌᩃᨿᩮᩣ ᨧ. ᩅᩈ ᨶᩥᩅᩣᩈᩮ, ᩌᩅᩈᨶ᩠ᨲ᩠ᨿᨲᩕᩣᨲᩥ ᩌᩅᩣᩈᩮᩣ, ᨱᩮᩣ. ᨽᩪ ᩈᨲ᩠ᨲᩣᨿᩴ, ᨽᩅᨶ᩠ᨲ᩠ᨿᨲᩕᩣᨲᩥ ᨽᩅᨶᩴ. ᩅᩥᩈᨶ᩠ᨲᩥ ᨲᨶ᩠ᨲᩥ ᩅᩮᩈ᩠ᨾᩴ, ᨾᩮᩣ. ᨠᩥᨲ ᨶᩥᩅᩣᩈᩮ, ᩋᨵᩥᨠᩁᨱᩮ ᨿᩩ, ᨶᩥᨠᩮᨲᨶᩴ. ᨶᩥᩅᩥᩈᨶ᩠ᨲᩥ, ᨶᩥᩅᩈᨶ᩠ᨲᩥ ᩅᩣ ᨿᨲᩕ, ᨲᩴ ᨶᩥᩅᩮᩈᨶᩴ. ᨥᩁ ᩈᩮᨧᨶᩮ, ᨥᩁᨲᩥ ᨠᩥᩃᩮᩈᨾᩮᨲ᩠ᨳᩣᨲᩥ ᨥᩁᩴ, ᨣᨿ᩠ᩉᨲᩦᨲᩥ ᩅᩣ ᨥᩁᩴ, ᨱᩮᩣ. ᨣᩉᩔ ᨥᩁᩣᨴᩮᩈᩮᩣ. ᨣᨱ᩠ᩉᩣᨲᩥ ᨸᩩᩁᩥᩈᩮᨶ ᩌᨶᩦᨲᩴ ᨵᨶᨶ᩠ᨲᩥ ᨣᩉᩴ. ᩋᨵᩥᨠᩁᨱᩮ ᨳᩮᩣ, ᩌᩅᩈᨳᩮᩣ. ᩈᩁ ᨣᨲᩥᨧᩥᨶ᩠ᨲᩣᩉᩥᩴᩈᩣᩈᩩ, ᩈᩁᨶ᩠ᨲᩥ ᨧᩥᨶ᩠ᨲᩮᨶ᩠ᨲᩥ ᩑᨲ᩠ᨳ ᩈᩩᨽᩣᩈᩩᨽᨠᨾ᩠ᨾᩣᨶᩥ, ᩈᩁᨲᩥ ᩅᩣ ᩈᩪᩁᩥᨿᩈᨶ᩠ᨲᩣᨸᩣᨴᩥᨠᨶ᩠ᨲᩥ ᩈᩁᨱᩴ. ᩈᩥ ᩈᩮᩅᩣᨿᩴ, ᨱᩮᩣ, ᨸᨲᩥᩔᨿᩮᩣ. ᩏᨧ ᩈᨾᩅᩣᨿᩮ, ᩒᨠᩴ. ᩈᩃ ᨣᨾᨶᩮ, ‘‘ᩍᨲ᩠ᨳᩥᨿᨾᨲᩥᨿᩅᩮᩣ ᩅᩣ’’ᨲᩥ ᩋ, ᩈᩣᩃᩣ, ᩈᩁᨵᩣᨲᩩᨾ᩠ᩉᩥ ᩈᨲᩥ ᩃᨲ᩠ᨲᨾᩮᩅ ᩅᩥᩈᩮᩈᩮᩣ. ᨧᩥ ᨧᨿᩮ, ᨠᨾ᩠ᨾᨶᩥ ᨱᩮᩣ, ᨧᨿᩮᩣ. ᨠᩩᨭ ᨨᩮᨴᨶᩮ, ᩍ. ᩅᩈ ᨶᩥᩅᩣᩈᩮ,ᨲᩥ. ᩏᨸᨵᩔ ᩑᨲ᩠ᨲᩮ ᨣᩮᩉᩴ. ᩈᨴᨵᩣᨲᩩᨾ᩠ᩉᩣ ᩏᨾᩮᩣ, ᩈᨴᩩᨾᩴ.

ᨴ᩠ᩅᨿᩴ ᨾᩩᨡᩁᩉᩥᨲᨴᩮᩅᨠᩩᩃᩈᨴᩥᩈᩮ ᨿᨬ᩠ᨬᩣᨿᨲᨶᩮ. ᨧᩥᨲ ᨸᩪᨩᩣᨿᩴ, ᨠᨾ᩠ᨾᨶᩥ ᩍᨿᩮᩣ. ᨿᨲ ᨿᨲᨶᩮ, ᩌᨿᨲᨶ᩠ᨲᩥ ᩅᩣᨿᨾᨶ᩠ᨲᩥ ᩑᨲ᩠ᨳ ᨹᩃᨠᩣᨾᩣᨲᩥ ᩌᨿᨲᨶᩴ, ᩋᨳ ᩅᩣ ᩌᨿᨶ᩠ᨲᩦᨲᩥ ᩌᨿᩣᨶᩥ, ᨲᩣᨶᩥ ᨲᨶᩮᩣᨲᩦᨲᩥ ᩌᨿᨲᨶᩴ, ᨹᩃᨠᩣᩁᨠᨶ᩠ᨲ᩠ᨿᨲ᩠ᨳᩮᩣ. ᩑᨲ᩠ᨳ ᨲᩩᩈᨴ᩠ᨴᩮᩣ ᩈᨾᩣᨣᨲᩣᨶᩴ ᨴ᩠ᩅᩥᨶ᩠ᨶᩴ ᨸᩩᨻ᩠ᨻᩣᨸᩁᨣᨾᨶᨲ᩠ᨳᩮᩣ. ‘‘ᨧᩮᨲᩥᨿᩣᨿᨲᨶᩣᨶᩥ ᨧᩣ’’ᨲᩥᨸᩥ ᨸᩣᨮᩮᩣ.

᪒᪐᪘. ᨴ᩠ᩅᨿᩴ ᨴᩮᩅᩣᨶᩴ, ᨶᩁᨸᨲᩦᨶᨬ᩠ᨧ ᩍᨭ᩠ᨮᨠᩣᨴᩥᨾᨿᩮ ᨽᩅᨶᩮ. ᩋᨬ᩠ᨬᩔᩣᨸᩥ ᩈᩣᨴᩥᩈ᩠ᨿᩣ. ᨸᩈᩦᨴᨶ᩠ᨲᩥ ᨶᨿᨶᨾᨶᩣᨶ᩠ᨿᨲᩕᩣᨲᩥ ᨸᩣᩈᩣᨴᩮᩣ. ᨿᩩ ¶ ᨾᩥᩔᨶᩮ, ᨸᩮᩣ, ᨴᩦᨥᩮᩣ ᨧ, ᨴᩦᨥᩅᩥᨵᩣᨶᩈᩣᨾᨲ᩠ᨳᩥᨿᩣ ᩒᨲ᩠ᨲᩣᨽᩣᩅᩮᩣ.

ᨴ᩠ᩅᨿᩴ ᩁᩣᨩᨲᩮᩣ ᩋᨬ᩠ᨬᩮᩈᩴ ᨵᨶᩦᨶᩴ ᨻ᩠ᨿᩅᩉᩣᩁᨠᩣᨴᩦᨶᩴ ᨽᩅᨶᩮ. ᨾᩩᨱ᩠ᨯᩮᩣ ᨨᨴᨶᨾᩮᨲᩔ, ᨶ ᨸᩣᩈᩣᨴᩔ ᩅᩥᨿᩣᨲᩥ ᨾᩩᨱ᩠ᨯᨧ᩠ᨨᨴᩮᩣ, ᨴ᩠ᩅᩥᨲ᩠ᨲᩴ. ᩉᩁ ᩉᩁᨱᩮ, ᨿᩮᩣ, ᨿᨾ᩠ᩉᩥ ᨾᩥᩌᨣᨾᩮᩣ ᨧ.

ᨴᩩᨣ᩠ᨣᨸᩩᩁᨴ᩠ᩅᩣᩁᩮ ᩅᩣ, ᨿᨲ᩠ᨳ ᨠᨲ᩠ᨳᨧᩥ ᩅᩣ ᨾᨲ᩠ᨲᩥᨠᩣᨴᩥᨾᨿᩮ ᨣᨩᨠᩩᨾ᩠ᨽᨾ᩠ᩉᩥ ᨿᩮᩣ ᨿᩪᨸᩮᩣ ᨸᩣᩈᩣᨴᩮᩣ ᨸᨲᩥᨭ᩠ᨮᩥᨲᩮᩣ, ᩈᩮᩣ ᩉᨲ᩠ᨳᩥᨶᨡᩮᩣ ᨶᩣᨾ, ᩉᨲ᩠ᨳᩥᩔᩮᩅ ᨶᨡᩮᩣ ᨿᩔᩣᨲᩥ ᩉᨲ᩠ᨳᩥᨶᨡᩮᩣ, ᨶᨡᩈᨴ᩠ᨴᩮᨶ ᩅᩣ ᨶᨡᩈᩉᩥᨲᩮᩣ ᨸᩣᩈᩣᨴᩮᩣ ᨣᨿ᩠ᩉᨲᩮ.

᪒᪐᪙. ᩈᩩᨸᨱ᩠ᨱᩔ ᨣᩁᩩᩊᩔ ᩅᨦ᩠ᨠᩮᨶ ᨸᨠ᩠ᨡᩮᨶ ᩈᨴᩥᩈᨨᨴᨶᩴ ᨣᩮᩉᩴ ᩈᩩᩅᨱ᩠ᨱᩅᨦ᩠ᨠᨧ᩠ᨨᨴᨶᩴ. ᩅᨦ᩠ᨠ ᨣᨾᨶᩮ. ᩑᨠᨸᩔᩮᨿᩮᩅ ᨨᨴᨶᨲᩮᩣ ᩋᨯ᩠ᨰᨿᩮᩣᨣᩮᩣ.

ᩑᨠᩮᨶᩮᩅ ᨠᩪᨭᩮᨶ ᨿᩩᨲ᩠ᨲᩮᩣ ᩋᨶᩮᨠᨠᩮᩣᨱᩮᩣ ᨸᨲᩥᩔᨿᩅᩥᩈᩮᩈᩮᩣ ᨾᩣᩊᩮᩣ ᨶᩣᨾ, ᩅᨭ᩠ᨭᩣᨠᩣᩁᩮᨶ ᨠᨲᩈᩮᨶᩣᩈᨶᨶ᩠ᨲᩥ ᨠᩮᨧᩥ. ᨾᩣ ᨾᩣᨶᩮ, ᩊᩮᩣ, ᨾᩣᩊᩮᩣ.

ᨧᨲᩩᩁᩔᩮᩣ ᨸᨲᩥᩔᨿᩅᩥᩈᩮᩈᩮᩣ ᨸᩣᩈᩣᨴᩮᩣ ᨶᩣᨾ, ᩌᨿᨲᨧᨲᩩᩁᩔᨸᩣᩈᩣᨴᩮᩣᨲᩥ ᨠᩮᨧᩥ.

᪒᪑᪐. ᩈᨶ᩠ᨲᩮᩉᩥ ᨽᩣᨲᩥ ᨴᩥᨻ᩠ᨻᨲᩦᨲᩥ ᩈᨽᩣᨿᩴ, ᩈᨽᩣ ᨧ, ᨸᩩᩁᩥᨾᩮ ᨿᨸᨧ᩠ᨧᨿᩮᩣ, ᩈᨶ᩠ᨲᩔ ᩈᩣᨴᩮᩈᩮᩣ ᨲᩪᨽᨿᨲᩕ. ᨾᨱ᩠ᨯᩣ ᩁᩅᩥᩁᩴᩈᨿᩮᩣ, ᨲᩮ ᨸᩥᩅᨲᩥ ᨶᩣᩈᨿᨲᩦᨲᩥ ᨾᨱ᩠ᨯᨸᩮᩣ, ᩅᩣᩈᨴ᩠ᨴᩮᨶ ᨾᨱ᩠ᨯᨸᨸᨴᩔ ¶ ᨸᩩᩃ᩠ᩃᩥᨦ᩠ᨣᨲ᩠ᨲᩴ ᩈᨾᩩᨧ᩠ᨧᩥᨶᩮᩣᨲᩥ, ᨩᨶᩣᨶᩴ ᩌᩃᨿᩮᩣ ᩈᨶ᩠ᨶᩥᨸᩣᨲᨭ᩠ᨮᩣᨶᩴ ᨩᨶᩣᩃᨿᩮᩣ. ᩌᩈᨶᨲ᩠ᨳᩣᨿ ᨠᨲᩣ ᩈᩣᩃᩣ ᩌᩈᨶᩈᩣᩃᩣ. ᨸᨭᩥᨠ᩠ᨠᨾᨶ᩠ᨲᩥ ᩑᨲ᩠ᨳᩣᨲᩥ ᨸᨭᩥᨠ᩠ᨠᨾᨶᩴ, ᨠᨾᩩ ᨸᨴᩅᩥᨠ᩠ᨡᩮᨸᩮ, ᩋᨵᩥᨠᩁᨱᩮ ᨿᩩ.

᪒᪑᪑. ᨩᩥᨶᩔ ᩅᩣᩈᨽᩪᨲᩴ ᨽᩅᨶᩴ ᨣᨶ᩠ᨵᨠᩩᨭᩥ ᨶᩣᨾ, ᨴᩥᨻ᩠ᨻᨣᨶ᩠ᨵᩮᩉᩥ ᨸᩁᩥᨽᩣᩅᩥᨲᩣ ᨠᩩᨭᩥ ᨣᨶ᩠ᨵᨠᩩᨭᩥ.

ᨲᩥᨠᩴ ᨸᩣᨠᨭ᩠ᨮᩣᨶᩮ. ᩁᩈᩣᨶᩥ ᩈᨶ᩠ᨲ᩠ᨿᩔᩴ ᩁᩈᩅᨲᩦ, ᨸᨧᨶᩴ ᨸᩣᨠᩮᩣ, ᨲᩔ ᨮᩣᨶᩴ ᨸᩣᨠᨭ᩠ᨮᩣᨶᩴ. ᨾᩉᨶ᩠ᨲᩣᨶᩥ ᨻᩉᩪᨶᩥ ᩋᩈᩥᨲᨻ᩠ᨻᩣᨶᩥ ᩈᨶ᩠ᨲᩮᨲ᩠ᨳ ᨾᩉᩣᨶᩈᩴ, ᩋᩈ ᨽᨠ᩠ᨡᨶᩮ, ᨿᩩ, ᩅᨱ᩠ᨱᩅᩥᨸᩁᩥᨿᨿᩮᩣ.

᪒᪑᪒. ᩈᩩᩅᨱ᩠ᨱᨠᩣᩁᩣᨴᩥᩈᩥᨸ᩠ᨸᩦᨶᩴ ᨠᨾ᩠ᨾᩈᩣᩃᩣ ᩌᩅᩮᩈᨶᩴ. ᩌᩅᩥᩈᨶ᩠ᨲ᩠ᨿᩈ᩠ᨾᩥᩴ ᩌᩅᩮᩈᨶᩴ, ᨿᩩ. ᨸᩣᨶᨾᨶ᩠ᨴᩥᩁᩴ ᩈᩩᩁᩣᨸᩣᨶᨲ᩠ᨳᩴ ᨠᨲᨾᨶ᩠ᨴᩥᩁᩴ ᩈᩮᩣᨱ᩠ᨯᩣ ᨶᩣᨾ, ᨠᨲ᩠ᨲᨻ᩠ᨻᩣᨠᨲ᩠ᨲᨻ᩠ᨻᩴ ᩅᩥᨧᩣᩁᩮᨲ᩠ᩅᩣ ᩋᨲ᩠ᨲᨶᩣ ᩍᨧ᩠ᨨᩥᨲᩅᨲ᩠ᨳᩩᨠᩣᩁᨱᩣ ᩈᨻ᩠ᨻᩴ ᨴᩮᨿ᩠ᨿᨵᨾ᩠ᨾᩴ ᩈᨶᩮᩣᨶ᩠ᨲᩦᨲᩥ ᩈᩮᩣᨱ᩠ᨯᩣ, ᩈᨶ ᨴᩣᨶᩮ, ᨲᨶᩣᨴᩥ. ᨯᩮᩣ, ᩋᩔᩮᩣᨲ᩠ᨲᩴ, ᩅᨱ᩠ᨱᩅᩥᨠᩣᩁᩮᩣ ᨧ, ᨲᩮᩈᩴ ᩑᩈᩣ ᩅᩈᨲᩥ ᩈᩮᩣᨱ᩠ᨯᩣ. ᨸᩣᨶᩈᨴ᩠ᨴᩈᨶ᩠ᨶᩥᨵᩣᨶᩣ ᩈᩩᩁᩣᩈᩮᩣᨱ᩠ᨯᩣᨿᩮᩅᩥᨵ ᨣᩉᩥᨲᩣ. ᩅᨧ᩠ᨧᩔ ᨣᩪᨳᩔ ᩅᩥᩈᨩ᩠ᨩᨶᨭ᩠ᨮᩣᨶᩴ ᩅᨧ᩠ᨧᨭ᩠ᨮᩣᨶᩴ. ᩅᨧ᩠ᨧᩔ ᩅᩥᩈᨩ᩠ᨩᨶᨭ᩠ᨮᩣᨶᩣ ᨠᩩᨭᩥ ᩅᨧ᩠ᨧᨠᩩᨭᩥ. ᨾᩩᨶᩦᨶᩴ ᩍᩈᩦᨶᩴ ᩅᩈᨶᨭ᩠ᨮᩣᨶᩴ ᩋᩔᨾᩮᩣ ᨶᩣᨾ, ᩌ ᨠᩮᩣᨵᩴ ᩈᨾᩮᨶ᩠ᨲᩥ ᩑᨲ᩠ᨳᩣᨲᩥ ᩋᩔᨾᩮᩣ, ᩌ ᨽᩩᩈᩮᩣ ᩈᨾᩮᨶ᩠ᨲᩥ ᩑᨲ᩠ᨳ ᩁᩣᨣᩣᨴᨿᩮᩣᨲᩥ ᩅᩣ ᩋᩔᨾᩮᩣ.

᪒᪑᪓. ᨲᩥᨠᩴ ¶ ᨸᨱ᩠ᨿᩅᩥᨠ᩠ᨠᨿᩈᩣᩃᩣᨿᩴ. ᨸᨱ ᨻ᩠ᨿᩅᩉᩣᩁᩮ, ᨸᨱᩥᨲᨻ᩠ᨻᩣᨲᩥ ᨸᨱ᩠ᨿᩣ, ᩅᨲ᩠ᨳᩣᨴᨿᩮᩣ, ᨲᩮ ᩑᨲ᩠ᨳ ᩅᩥᨠ᩠ᨠᩥᨱᨶ᩠ᨲᩦᨲᩥ ᨸᨱ᩠ᨿᩅᩥᨠ᩠ᨠᨿᩮᩣ, ᨠᩦ ᨴᨻ᩠ᨻᩅᩥᨶᩥᨾᨿᩮ, ᩈᩮᩣ ᩑᩅ ᩈᩣᩃᩣ ᨣᩮᩉᨶ᩠ᨲᩥ ᨸᨱ᩠ᨿᩅᩥᨠ᩠ᨠᨿᩈᩣᩃᩣ. ᩌᨸᨱᨿᨶ᩠ᨲᩮ ᨻ᩠ᨿᩅᩉᩁᨶ᩠ᨲᩮ ᩋᩈ᩠ᨾᩥᨶ᩠ᨲᩥ ᩌᨸᨱᩮᩣ, ᨱᩮᩣ. ᨸᨱ᩠ᨿᩣᨶᩴ ᩅᩥᨠ᩠ᨠᨿᩣᨿ ᨶᩦᨿᨾᩣᨶᩣᨶᩴ ᩅᩦᨳᩥ ᨸᨶ᩠ᨳᩮᩣ ᨸᨱ᩠ᨿᩅᩦᨳᩥᨠᩣ. ᩅᩈ ᩋᨧ᩠ᨨᩣᨴᨶᩮ, ᨲᩮᩣ, ᩏᨴᨠᩴ ᩅᩈᩥᨲᩴ ᩋᨧ᩠ᨨᩣᨴᨶᩴ ᨠᨲᨾᨶᩮᨶᩣᨲᩥ ᩏᨴᩮᩣᩈᩥᨲᩮᩣ, ᩅᩔᩮᩣᨲ᩠ᨲᩴ, ᨽᨱ᩠ᨯᨭ᩠ᨮᨸᨶᩔ ᩈᩣᩃᩣ ᨽᨱ᩠ᨯᩈᩣᩃᩣ. ᨠᨾᩩ ᨸᨴᩅᩥᨠ᩠ᨡᩮᨸᩮ, ᨧᨦ᩠ᨠᨾᨲ᩠ᨿᨲᩕᩣᨲᩥ ᨧᨦ᩠ᨠᨾᨶᩴ, ᨧᨦ᩠ᨠᨾᩮᩣ ᨧ, ᨴ᩠ᩅᩥᨲ᩠ᨲᩣᨴᩥ.

᪒᪑᪔. ᨩᩃᨶ᩠ᨲᩥ ᩑᨲ᩠ᨳᩣᨲᩥ ᨩᨶ᩠ᨲᩣ, ᨩᩃ ᨴᩥᨲ᩠ᨲᩥᨿᩴ, ᩋᨶ᩠ᨲᩮᩣ, ‘‘ᩍᨲ᩠ᨳᩥᨿᨾᨲᩥᨿᩅᩮᩣ ᩅᩣ’’ᨲᩥ ᩋ, ᩌ, ᩃᩃᩮᩣᨸᩮᩣ, ᨩᨶᩮᨲ᩠ᨿᨲᩕ ᩋᨣ᩠ᨣᩥᨶ᩠ᨲᩥ ᩅᩣ ᨩᨶ᩠ᨲᩣ, ᨩᨶ ᨩᨶᨶᩮ, ᩋᨶ᩠ᨲᩮᩣ, ᩈᩣ ᩑᩅ ᨥᩁᩴ ᨩᨶ᩠ᨲᩣᨥᩁᩴ. ᩋᨣ᩠ᨣᩥᨶᩮᩣ ᩈᩣᩃᩣ ᩋᨣ᩠ᨣᩥᩈᩣᩃᩣ. ᨸᩣ ᨸᩥᩅᨶᩮ, ᨸᨸᩥᩅᨶ᩠ᨲ᩠ᨿᩔᨶ᩠ᨲᩥ ᨸᨸᩣ, ᩋ. ᨸᩣᨶᩦᨿᨭ᩠ᨮᩣ ᩈᩣᩃᩣ ᨸᩣᨶᩦᨿᩈᩣᩃᩣ, ᩈᩣ ᩑᩅ ᨸᩣᨶᩦᨿᩈᩣᩃᩥᨠᩣ.

ᨣᩈ ᨣᨾᨶᩮ, ᨽᩮᩣ, ᩈᩔ ᨻᩮᩣ. ᩋᩅᨲᩥ ᩁᨠ᩠ᨡᨲᩦᨲᩥ ᩒᩅᩁᨠᩮᩣ, ᩋᩁᩮᩣ, ᩈᨠᨲ᩠ᨳᩮ ᨠᩮᩣ, ᩋᩔᩮᩣᨲ᩠ᨲᨬ᩠ᨧ. ᩅᩈᨶᩴ ᩅᩣᩈᩮᩣ, ᨲᨴᨲ᩠ᨳᩴ ᩋᨣᩣᩁᩴ ᩅᩣᩈᩣᨣᩣᩁᩴ. ᩈᨿᨲᩥ ᩑᨲ᩠ᨳᩣᨲᩥ ᩈᨿᨶᩦ, ᨿᩩ, ᨶᨴᩣᨴᩥ, ᩈᩣ ᩑᩅ ᨣᩉᩴ ᩈᨿᨶᩥᨣ᩠ᨣᩉᩴ.

᪒᪑᪕. ᨧᨲᩩᨠ᩠ᨠᩴ ¶ ᩁᩣᨩᩥᨲ᩠ᨳᩣᨣᩣᩁᩮ, ᨲᨴᨲ᩠ᨳᩥᨿᨲᩮᩣ [ᨲᨴᨭ᩠ᨮᩥᨿᨲᩮᩣ (ᨠ.)] ᩏᨸᨧᩣᩁᩮᨶ ᩁᩣᨩᩥᨲ᩠ᨳᩦᩈᩩᨸᩥ. ᩁᩣᨩᩥᨲ᩠ᨳᩦᨶᨾᨣᩣᩁᩴ ᩍᨲ᩠ᨳᩣᨣᩣᩁᩴ. ᩋᩅᩁᩩᨶ᩠ᨵᩦᨿᨶ᩠ᨲᩮ ᩁᩣᨩᩥᨲ᩠ᨳᩥᨿᩮᩣ ᩋᨶᩮᨶᩣᨲᩥ ᩒᩁᩮᩣᨵᩮᩣ, ᩁᩩᨵ ᩌᩅᩁᨱᩮ. ᩈᩩᨴ᩠ᨵᩣ ᨠᩣᨾᩣᨸᨣᨾᨲ᩠ᨲᩣ ᨸᩁᩥᩈᩩᨴ᩠ᨵᩣ ᩁᨠ᩠ᨡᨠᩣ ᩋᨶ᩠ᨲᩮ ᩈᨾᩦᨸᩮ ᨿᩔᩣᨲᩥ ᩈᩩᨴ᩠ᨵᨶ᩠ᨲᩮᩣ. ᩋᨶ᩠ᨲᩮ ᩋᨻ᩠ᨽᨶ᩠ᨲᩁᩮ ᨸᩩᩁᩴ ᨣᩮᩉᩴ ᩋᨶ᩠ᨲᩮᨸᩩᩁᩴ, ᨸᩩᩁᩔ ᩋᨶ᩠ᨲᩮᨲᩥ ᩅᩣ ᩋᨶ᩠ᨲᩮᨸᩩᩁᩴ. ‘‘ᩋᨶ᩠ᨲᩮᩣᨸᩩᩁ’’ᨶ᩠ᨲᩥᨸᩥ ᨸᩣᨮᩮᩣ.

ᩁᨬ᩠ᨬᩴ ᩁᩣᨩᩪᨶᩴ ᩋᩈᨻ᩠ᨻᩅᩥᩈᨿᨭ᩠ᨮᩣᨶᩴ ᩈᨻ᩠ᨻᩮᩉ᩠ᨿᩈᩣᨵᩣᩁᨱᨭ᩠ᨮᩣᨶᩴ ‘‘ᨠᨧ᩠ᨨᨶ᩠ᨲᩁ’’ᨶ᩠ᨲᩥ ᨾᨲᩴ ᨠᨳᩥᨲᩴ, ᨿᩴ ‘‘ᨸᨾᨴᩅᨶ’’ᨶ᩠ᨲᩥ ᩅᩩᨧ᩠ᨧᨲᩥ, ᨸᨾᨴᩅᨶᩴ ᨶᩣᨾ ᩏᨸᨠᩣᩁᩥᨠᩣᩈᨶ᩠ᨶᩥᩉᩥᨲᩴ ᩅᩣ ᨸᩩᩁᩈᨶ᩠ᨶᩥᩉᩥᨲᩴ ᩅᩣ ᩋᨶ᩠ᨲᩮᨸᩩᩁᩮᩣᨧᩥᨲᩴ, ᨿᨲᩕ ᩋᨶ᩠ᨲᩮᨸᩩᩁᩈᩉᩥᨲᩮᩣ ᩑᩅ ᩁᩣᨩᩣ ᩅᩥᩉᩁᨲᩥ, ᨶᩣᨬ᩠ᨬᨩᨶᨸ᩠ᨸᩅᩮᩈᩮᩣ [ᩋᨾᩁ ᪑᪔.᪓]. ᨸᨾᨴᩣᨶᩴ ᩅᨶᩴ ᨸᨾᨴᩅᨶᩴ. ᨶᩥᨸᩣᨲᨶᩣ ᨿᩣᨠᩣᩁᩣᨶᩴ [ᩎᨠᩣᩁ ᩌᨠᩣᩁᩣᨶᨶ᩠ᨲᩥ ᩋᨲ᩠ᨳᩮᩣ] ᩍᨲ᩠ᨳᩥᨣᨲᩣᨶᩴ ᩁᩔᩮᩣ ᨠ᩠ᩅᨧᩦᨲᩥᩁᩔᩮᩣ. ᨠᨧ᩠ᨨᩔ ᨸᨠᩮᩣᨭ᩠ᨮᩔ ᩋᨶ᩠ᨲᩁᩴ ᩋᨻ᩠ᨽᨶ᩠ᨲᩁᩴ ᨠᨧ᩠ᨨᨶ᩠ᨲᩁᩴ. ᨸᨠᩮᩣᨭ᩠ᨮᩴ ᨶᩣᨾ ᩋᨻ᩠ᨽᨶ᩠ᨲᩁᨴ᩠ᩅᩣᩁᩴ.

᪒᪑᪖. ᨴ᩠ᩅᨿᩴ ᩍᨭ᩠ᨮᨠᩣᨴᩥᩁᨧᩥᨲᩮ ᩌᩁᩮᩣᩉᨶᩮ. ᩏᨸᩣᨶᩮᨶ ᩈᩉ ᩅᨲ᩠ᨲᨲᩮᨲᩥ ᩈᩮᩣᨸᩣᨶᩮᩣ, ᩈᩮᩣᨸᩣᨶᩴ ᩅᩣ ᨶᨸᩩᩴᩈᨠᩮᨸᩥ. ᩌᩁᩪᨿ᩠ᩉᨲᩮ ᨿᩮᨶ ᨲᩴ ᩌᩁᩮᩣᩉᨶᩴ, ᨿᩩ, ᩁᩩᩉ ᨩᨶᨶᩮ.

ᨴ᩠ᩅᨿᩴ ᨠᨭ᩠ᨮᩣᨴᩥᩁᨧᩥᨲᩣᨿᩴ. ᨶᩥᨧ᩠ᨨᨿᩮᨶ ᩈᨿᨶ᩠ᨲᩥ ᨸᩣᨠᩣᩁᩣᨴᩥᨠᨾᩮᨲᩣᨿᩣᨲᩥ ᨶᩥᩔᩮᨱᩦ, ᩈᩥ ᩈᩮᩅᩣᨿᩴ, ᨱᩦ, ᨶᨴᩣᨴᩥ. ᩏᨴ᩠ᨵᨾᩣᩁᩮᩣᩉᨲᩮ ᩑᨲᩣᨿᩣᨲᩥ ᩋᨵᩥᩁᩮᩣᩉᩥᨱᩦ, ᩈᩣᩈᨴ᩠ᨴᩮᩣ ᨴ᩠ᩅᩥᨶ᩠ᨶᨾ᩠ᨸᩥ ᩍᨲ᩠ᨳᩥᩃᩥᨦ᩠ᨣᨲ᩠ᨲᩴ ᨩᩮᩣᨲᩮᨲᩥ.

᪒᪑᪗. ᨸᨬ᩠ᨧᨠᩴ ¶ ᨩᩣᩃᨠᩮ. ᩅᩣᨲᩴ ᨸᩥᩅᨲᩦᨲᩥ ᩅᩣᨲᨸᩣᨶᩴ. ᨣᩅᩴ ᩋᨠ᩠ᨡᩥ ᨣᩅᨠ᩠ᨡᩮᩣ, ᩈᨾᩣᩈᨶ᩠ᨲᨲ᩠ᨲᩣ ᩋ, ᩈᨬ᩠ᨬᩣᩈᨴ᩠ᨴᨲᩮᩣ ᨸᩩᩃ᩠ᩃᩥᨦ᩠ᨣᨲ᩠ᨲᩴ, ᩋᨠ᩠ᨡᩥ ᩈᨴ᩠ᨴᩮ ᩅᩣ, ᨣᩅᩴ ᩋᨠ᩠ᨡᩥ ᨣᩅᨠ᩠ᨡᩦᨲᩥ ᩅᩥᨣ᩠ᨣᩉᩮᩣ. ᨩᩃ ᨴᩥᨲ᩠ᨲᩥᨿᩴ, ᨩᩣᩃᩴ. ᩈᩦᩉᩁᩪᨸᨿᩩᨲ᩠ᨲᩴ ᨸᨬ᩠ᨩᩁᩴ ᩈᩦᩉᨸᨬ᩠ᨩᩁᩴ. ᩌᩃᩮᩣᨠᩣᨶᩴ ᩌᨲᨸᩣᨶᩴ ᨸᩅᩥᩈᨶᨭ᩠ᨮᩣᨶᩴ ᩈᨶ᩠ᨵᩥ ᨨᩥᨴ᩠ᨴᨶ᩠ᨲᩥ ᩌᩃᩮᩣᨠᩈᨶ᩠ᨵᩥ, ᩌᩃᩮᩣᨠᩦᨿᨶ᩠ᨲᩥ ᩑᨲᩮᨶᩣᨲᩥ ᩌᩃᩮᩣᨠᩮᩣ, ᩈᩮᩣ ᩑᩅ ᩈᨶ᩠ᨵᩦᨲᩥ ᩅᩣ ᩌᩃᩮᩣᨠᩈᨶ᩠ᨵᩥ.

ᨴ᩠ᩅᨿᩴ ᩃᨦ᩠ᨣᩥᨿᩴ. ᩃᨣᩥ ᨣᨲ᩠ᨿᨲ᩠ᨳᩮᩣ, ᩋ, ᨶᨴᩣᨴᩥ. ᨸᩁᩥ ᨸᩩᨶᨸ᩠ᨸᩩᨶᩴ ᨣᨾᨶᩣᨣᨾᨶᩅᩈᩮᨶ ᩉᨶ᩠ᨲᩦᨲᩥ ᨸᩃᩥᨥᩮᩣ, ᨱᩮᩣ. ᨠᨸᩥᩁᩪᨸᨾᨲ᩠ᨳᨠᨲ᩠ᨲᩣ ᨠᨸᩥᩈᩦᩈᩮᩣ. ᩋᨣ᩠ᨣᩊᩴ ᨶᩣᨾ ᨠᩅᩣᨭᨠᩮᩣ [ᨠᩅᩣᨭᨹᩃᩅᩥᨵᩣᩁᨱᩮᩣ (ᨠ.)], ᨲᩔ ᨳᨾ᩠ᨽᩮᩣ ᩋᨣ᩠ᨣᩊᨲ᩠ᨳᨾ᩠ᨽᩮᩣ, ‘‘ᩋᨣ᩠ᨣᩊᩴ ᨲᩦᩈᩩ ᨠᩃ᩠ᩃᩮᩣᩃᩮ, ᨴᨱ᩠ᨯᩮ ᨧᩣᨶ᩠ᨲᨠᩅᩣᨭᩮᩈᩪ’’ᨲᩥ ᩁᨽᩈᩮᩣ, ᩍᨲ᩠ᨳᩥᨿᨾᨲᩮᩣ ᩌᨸᨧ᩠ᨧᨿᩮᩣ, ᩋᨣ᩠ᨣᩊᩣ. ᨶᩥᩔᩮᩈᨲᩮᩣ ᩋᨻ᩠ᨻᨲᩥ ᩅᩔᩮᩣᨴᨠᨾᨶᩮᨶᩣᨲᩥ ᨶᩥᨻ᩠ᨻᩴ, ᩋᨻ᩠ᨻ ᨣᨲᩥᩉᩥᩴᩈᩣᩈᩩ. ᨨᨴ᩠ᨴᩔ ᨨᨴᨶᩔ ᨠᩮᩣᨭᩥ ᩉᩮᨭ᩠ᨮᩥᨾᩣᩅᩈᩣᨶᩴ ᨨᨴ᩠ᨴᨠᩮᩣᨭᩥ, ᨲᩔᩴ.

᪒᪑᪘. ᨲᩥᨠᩴ ᨣᩮᩉᨧ᩠ᨨᨴᨶᩮ. ᨨᩣᨴᩮᨲᩥ ᩑᨲᩮᨶᩣᨲᩥ ᨨᨴᨶᩴ, ᨨᨴ ᩈᩴᩅᩁᨱᩮ, ᨧᩩᩁᩣᨴᩥ. ᨸᨭᨣᨾᨶᩮ, ‘‘ᨸᨭ᩠ᨿᩣᨴᩦᩉ᩠ᨿᩃ’’ᨶ᩠ᨲᩥ ᩋᩃᩮᩣ. ᨨᩣᨴᩮᨲᩥ ᩑᨲᩮᨶᩣᨲᩥ ᨨᨴ᩠ᨴᩴ, ᨴ᩠ᩅᩥᨲ᩠ᨲᩣᨴᩥ.

ᨲᩥᨠᩴ ¶ ᨣᩮᩉᨦ᩠ᨣᨱᩮ. ᩋᨩ ᨣᨲᩥᨾ᩠ᩉᩥ, ᩍᩁᩮᩣ, ᩋᨩᩥᩁᩴ. ᨧᩁ ᨣᨲᩥᨽᨠ᩠ᨡᨶᩮᩈᩩ, ᨧᩁᩮᩣ. ᩋᨦ᩠ᨣ ᨣᨾᨶᩮ, ᨠᩁᨱᩣᨵᩥᨠᩁᨱᩮᩈᩩ ᨿᩩ, ᩅᨱ᩠ᨱᩅᩥᨠᩣᩁᩮᩣ, ᨱᨲ᩠ᨲᩴ.

ᨸᨬ᩠ᨧᨠᩴ ᨣᩮᩉᨴ᩠ᩅᩣᩁᨲᩮᩣ ᨻᩉᩥᨸᨠᩮᩣᨭ᩠ᨮᨠᩮ, ᩅᩦᨳᩥᨿᩴ ᨴ᩠ᩅᩣᩁᨸᩥᨱ᩠ᨯᨠᩮ ᨧ. ᩋᩃᩥᨶ᩠ᨴᩮᩣ ᨲ᩠ᩅᨬ᩠ᨬᨸᩥᨱ᩠ᨯᨠᩮᨸᩥᨧ᩠ᨨᨲᩮ. ᨸᨮᨾᩴ ᩉᨶᨶ᩠ᨲᩥ ᨣᨧ᩠ᨨᨶ᩠ᨲᩥ ᩑᨲ᩠ᨳᩣᨲᩥ ᨸᨥᩣᨱᩮᩣ, ᨸᨥᨱᩮᩣ ᨧ, ᩉᨶᩔ ᨥᨱᩣᨴᩮᩈᩮᩣ. ᩋᩃᩥ ᩈᨡᩣ ᩍᨶ᩠ᨴᩮᩣ ᩑᨲ᩠ᨳᩣᨲᩥ ᩋᩃᩥᨶ᩠ᨴᩮᩣ, ‘‘ᨣᩮᩉᩮᨠᨴᩮᩈᩮ ᩋᩃᩥᨶ᩠ᨴᩮᩣ, ᨸᨥᩣᨱᩮᩣ ᨸᨥᨱᩮᩣᨽᩅᩮ’’ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪒.᪑᪒] ᩋᨾᩁᨾᩣᩃᩣᨿᩴ. ᩌᩃᩥᨶ᩠ᨴᩮᩣ, ᨴᩦᨥᩣᨴᩥ. ᨸᨵᩣᨶᩴ ᨾᩩᨡᩴ ᨸᨾᩩᨡᩴ, ᨣᩮᩉᩔ ᩉᩥ ᨧᨲᩪᩈᩩ ᨾᩩᨡᩮᩈᩩ ᨲᨴᩮᩅ ᨸᨵᩣᨶᩴ, ᨿᨲ᩠ᨳ ᩈᩣᨵᩩᨩᨶᩣᨸᩥ ᩌᨣᨶ᩠ᨲᩩᨠᩣᨸᩥ ᨶᩥᩈᩦᨴᨶ᩠ᨲᩥ. ᨴ᩠ᩅᩣᩁᩴ ᨻᨶ᩠ᨵᨲᩥ ᨸᩥᨴᩉᨲᩥ ᩑᨲ᩠ᨳᩣᨲᩥ ᨴ᩠ᩅᩣᩁᨻᨶ᩠ᨵᨶᩴ.

᪒᪑᪙. ᨴ᩠ᩅᨿᩴ ᨴ᩠ᩅᩣᩁᨻᩣᩉᩣᨿᩴ. ᨸᩦᨮᩣᨶᩥ ᩃᩮᩣᩉᩅᩥᨠᨲᩥᩌᨴᩦᩉᩥ ᩈᨦ᩠ᨥᨭᩦᨿᨶ᩠ᨲᩥ ᩑᨲ᩠ᨳᩣᨲᩥ ᨸᩦᨮᩈᨦ᩠ᨥᩣᨭᨠᩴ, ᨸᩦᨮᩮᩉᩥ ᩈᨦ᩠ᨥᨭᩦᨿᨲᩦᨲᩥ ᩅᩣ ᨸᩦᨮᩈᨦ᩠ᨥᩣᨭᨠᩴ, ᨥᨭ ᨥᨭᨶᩮ. ᨴ᩠ᩅᩥᨽᩣᨣᩮᨶ ᨻᩣᩉᩣᩈᨴᩥᩈᨲ᩠ᨲᩣ ᨻᩣᩉᩣ, ᨴ᩠ᩅᩣᩁᩔ ᨻᩣᩉᩣ ᨴ᩠ᩅᩣᩁᨻᩣᩉᩣ. ‘‘ᨠᨸᩣᨭᩴ, ᨠᩅᩣᨭ’’ᨶ᩠ᨲᩥᨸᩥ ᨴ᩠ᩅᩣᩁᨻᩣᩉᩣᨿ ᨶᩣᨾᩣᨶᩥ, ᨠᩴ ᩅᩣᨲᩴ ᨸᩣᨭᨿᨲᩥ, ᩅᩣᨭᨿᨲᩥ ᨧᩮᨲᩥ ᨠᨾ᩠ᨾᨶᩥ ᨱᩮᩣ, ᩍᨲ᩠ᨳᩥᨿᩴ ᨠᨸᩣᨭᩦ.

ᨴ᩠ᩅᨿᩴ ᨣᩮᩉᩣᨴᩦᨶᩴ ᨠᩪᨭᩮ. ᨠᩩᨭ ᨨᩮᨴᨶᩮ, ᨠᨾ᩠ᨾᨶᩥ ᨱᩮᩣ. ᨶᨿ ᨣᨾᨶᨲ᩠ᨳᩮᩣ, ᨠᩮ ᩈᩦᩈᩮ ᨶᨿᨲᩦᨲᩥ ᨠᨱ᩠ᨱᩦᨠᩣ, ᨱ᩠ᩅᩩ, ᩍᨲ᩠ᨲᩴ, ᨱᨲ᩠ᨲᨬ᩠ᨧ.

᪒᪒᪐. ᨴ᩠ᩅᨿᩴ ¶ ᨴ᩠ᩅᩣᩁᩮ. ᨴ᩠ᩅᩮ ᩋᩁᨶ᩠ᨲ᩠ᨿᨲᩕᩣᨲᩥ ᨴ᩠ᩅᩣᩁᩴ, ᨴᩩᨩ᩠ᨩᨶᩮ ᩅᩣᩁᨿᨶ᩠ᨲ᩠ᨿᩈ᩠ᨾᩣ ᩁᨠ᩠ᨡᨠᩣᨲᩥ ᩅᩣ ᨴ᩠ᩅᩣᩁᩴ, ᩏᩃᩮᩣᨸᩮᩣ. ᨸᨭᩥᩉᩁᨶ᩠ᨲᩥ ᩋᨸᨶᩮᨶ᩠ᨲᩥ ᩑᨲᩈ᩠ᨾᩣ ᩁᨠ᩠ᨡᨠᩣ ᩋᨬ᩠ᨬᩣᨲᨶ᩠ᨲᩥ ᨸᨭᩥᩉᩁᩮᩣ, ᨸᨭᩥᨸᨠ᩠ᨡᩮ ᩉᩁᨲᩥ ᩑᨲᩈ᩠ᨾᩣᨲᩥ ᩅᩣ ᨸᨭᩥᩉᩁᩮᩣ, ᩁᩔᩔ ᨴᩦᨥᨲ᩠ᨲᩮ ᨸᨭᩥᩉᩣᩁᩮᩣ.

ᨧᨲᩩᨠ᩠ᨠᩴ ᩏᨾ᩠ᨾᩣᩁᩮ, ᨿᩴ ‘‘ᨴ᩠ᩅᩣᩁᨸᩥᨱ᩠ᨯᩥᨠᩣ’’ᨲᩥ ᩅᩩᨧ᩠ᨧᨲᩥ. ᩏᩁ ᨣᨲᩥᨾ᩠ᩉᩥ, ᨾᩣᩁᩮᩣ ᨠᩁᨱᩮ. ᨴᩮᩉᩴ ᨶᩮᨲᩥ ᨸᩅᩮᩈᩮᨶᩣᨲᩥ ᨴᩮᩉᨶᩦ, ‘‘ᨴᩮᩉᩃᩦ’’ᨲᩥᨸᩥ ᨸᩣᨮᩮᩣ, ᨴᩮᩉᩴ ᩃᩣᨲᩥ ᨸᩅᩮᩈᩮᨶᩣᨲᩥ ᨴᩮᩉᩃᩦ. ᩍᩃ ᨣᨲᩥᨾ᩠ᩉᩥ, ᨱ᩠ᩅᩩ. ᩍᨶ᩠ᨴᩮᩣ ᩑᩅ ᨸᩣᨴᩴ ᨡᩥᨸᨲᩥ ᩑᨲ᩠ᨳᩣᨲᩥ ᩍᨶ᩠ᨴᨡᩦᩃᩮᩣ, ᨡᩥᨸ ᨸᩮᩁᨱᩮ. ᨸᩔ ᩃᩮᩣᨸᩮᩣ, ᩋᨳ ᩅᩣ ᩍᩴ ᨣᨾᨶᩴ ᨴᨴᩣᨲᩦᨲᩥ ᩍᨶ᩠ᨴᩮᩣ, ᨴ᩠ᩅᩣᩁᩴ, ᨲᨲ᩠ᨳ ᨮᨸᩥᨲᩮᩣ ᨡᩦᩃᩮᩣ ᨠᨱ᩠ᨭᨠᩮᩣᨲᩥ ᩍᨶ᩠ᨴᨡᩦᩃᩮᩣ, ᩅᩮᨣᨣᨽᩥᨥᩣᨲᨶᨲᩮᩣ ᩉᩥ ᩈᩮᩣ ᨡᩦᩃᩮᩣ ᩅᩥᨿ ᩉᩮᩣᨲᩥ.

ᨳᨾ᩠ᨽ ᨸᨭᩥᨻᨶ᩠ᨵᨶᩮ, ᨳᨾ᩠ᨽᩮᩣ, ᨵᩣᩁᩮᨲᩦᨲᩥ ᩅᩣ ᨳᨾ᩠ᨽᩮᩣ, ᨵᩁ ᨵᩁᨱᩮ, ᩁᨾ᩠ᨽᨸᨧ᩠ᨧᨿᩮᩣ, ᩅᨱ᩠ᨱᩅᩥᨠᩣᩁᩮᩣ ᨧ. ᨳᩩ ᩋᨽᩥᨲ᩠ᨳᩅᩮ, ᩏᨱᩮᩣ, ᨿᩩ ᩅᩣ, ᨵᩣᩁᩮᨲᩦᨲᩥ ᩅᩣ ᨳᩪᨱᩮᩣ, ᨿᩩ, ᩁᩃᩮᩣᨸᩮᩣ, ᩋᩔᩪ.

ᩋᨯ᩠ᨰᩮᨶ᩠ᨴᩩᨸᩣᩈᩣᨱᩮ ᩋᨴ᩠ᨵᨧᨶ᩠ᨴᩣᨠᩣᩁᩮ ᨸᩣᩈᩣᨱᩮ ᨸᨭᩥᨠᩣᩈᨴ᩠ᨴᩮᩣ ᩅᨲ᩠ᨲᨲᩥ. ᨸᨭ ᨣᨲᩥᨿᩴ, ᨱ᩠ᩅᩩ. ᩍᨲ᩠ᨳᩥᨠᨲᩣᨠᩣᩁᨸᩁᩮ ᨠᩮ ᩋᩔᩥᨲ᩠ᨲᩴ. ᨣᨩᩥ ᩈᨴ᩠ᨴᩮ, ᨱ᩠ᩅᩩ, ᩋᩔᩥᨲ᩠ᨲᩴ, ᨻᩥᨶ᩠ᨴᩣᨣᨾᩮᩣ ᨧ. ᩍᩈ ᩍᨧ᩠ᨨᩣᨿᩴ, ᨮᨠᩮᩣ.

᪒᪒᪑. ᩅᩃᨽᩦᨲᩥ ¶ ᨧᩪᩊᩣ, ‘‘ᩈᩥᨡᩣᨿᩴ ᩅᩃᨽᩦ ᨧᩪᩊᩮ’’ᨲᩥ ᩁᩩᨴ᩠ᨴᩮᩣ [ᩁᩔᨶ᩠ᨲᩣ ᨧ, ᩈᩥᨡᩣᨿᩴ ᩅᩊᨽᩥᨿᩴ ᨧᩪᩊᩮᨲᩥ ᩁᩩᨴ᩠ᨴᩮᩣ (ᨧᩥᨶ᩠ᨲᩣᨾᨱᩥᨭᩦᨠᩣ ᪑᪒.᪑᪕)]. ᨲᨧ᩠ᨨᩣᨴᨶᩮ ᨴᩣᩁᩩᨾ᩠ᩉᩥ ᨠᨭ᩠ᨮᩮ ᨣᩮᩣᨸᩣᨶᩈᩦ ᨾᨲᩣ. ᩅᨦ᩠ᨠᩮᨲᩥ ᨴᩣᩁᩩᩅᩥᩈᩮᩈᨶᩴ. ᨣᩴ ᩅᩔᩮᩣᨴᨠᩴ, ᩈᩪᩁᩥᨿᩣᨴᩥᨠᩥᩁᨱᨬ᩠ᨧ ᨸᩥᩅᨶ᩠ᨲᩥ ᩅᩥᨶᩣᩈᨿᨶ᩠ᨲᩥ ᩋᨻ᩠ᨽᨶ᩠ᨲᩁᨾᨸ᩠ᨸᩅᩮᩈᨶᩅᩈᩮᨶᩣᨲᩥ ᨣᩮᩣᨸᩣᨶᩣ, ᩍᨭ᩠ᨮᨠᩣᨴᨿᩮᩣ, ᨲᩣᨶᩥ ᩈᩥᨶᩮᩣᨶ᩠ᨲᩥ ᨻᨶ᩠ᨵᨶ᩠ᨲᩥ ᩑᨲ᩠ᨳᩣᨲᩥ ᨣᩮᩣᨸᩣᨶᩈᩦ.

ᩈᩮᩣᨵᩣᨴᩥᨣᩮᩉᩮᩈᩩ ᨨᩮᨠᨸᨠ᩠ᨡᩣᩅᩣᩈᨲ᩠ᨳᩴ ᨿᩮᩣ ᨻᩉᩥ ᨠᩁᩥᨿ ᨠᨭ᩠ᨮᩮᨠᨴᩮᩈᩮᩣ ᨮᨸᩦᨿᨲᩮ, ᩈᩮᩣ ᩅᩥᨭᨦ᩠ᨠᩮᩣ. ᨠᨸᩮᩣᨲᩮ ᨸᩣᩃᨿᨲᩦᨲᩥ ᨠᨸᩮᩣᨲᨸᩣᩃᩥᨠᩣ, ᨠᨾ᩠ᨾᨶᩥ ᨱ᩠ᩅᩩ. ᨭᨠᩥ ᨶᩥᩅᩣᩈᨣᨲᩦᩈᩩ. ᩅᩥᨶᩮᩣ ᨸᨠ᩠ᨡᩥᨶᩮᩣ ᨭᨦ᩠ᨠᨶ᩠ᨲᩥ ᩑᨲ᩠ᨳᩣᨲᩥ ᩅᩥᨭᨦ᩠ᨠᩮᩣ. ᨱᩮᩣ.

᪒᪒᪒. ᨴ᩠ᩅᨿᩴ ᨠᩩᨬ᩠ᨧᩥᨠᩣᨨᩥᨴ᩠ᨴᩮ. ᨠᩩᨬ᩠ᨧᩥᨠᩣᨿ ᩅᩥᩅᩁᩴ ᨨᩥᨴ᩠ᨴᩴ ᨠᩩᨬ᩠ᨧᩥᨠᩣᩅᩥᩅᩁᩴ. ᨲᩣᩊᩔ ᨸᩅᩮᩈᨶᨭ᩠ᨮᩣᨶᨽᩪᨲᩮᩣ ᨨᩥᨣ᩠ᨣᩊᩮᩣ ᨨᩥᨴ᩠ᨴᩴ ᨲᩣᩊᨧ᩠ᨨᩥᨣ᩠ᨣᩊᩮᩣ.

ᨲᩥᨠᩴ ᨠᩩᨬ᩠ᨧᩥᨠᩣᨿᩴ. ᨠᩩᨬ᩠ᨧ ᨠᩮᩣᨭᩥᩃ᩠ᨿᩮ, ᨱ᩠ᩅᩩ. ᨲᩣᨿᨲᩥ ᩁᨠ᩠ᨡᨲᩦᨲᩥ ᨲᩣᩃᩮᩣ. ᩋᩃᩮᩣ, ᨲᩃᨲᩥ ᨲᩥᨭ᩠ᨮᨲᩥ ᩑᨲᩮᨶᩣᨲᩥ ᩅᩣ ᨲᩣᩃᩮᩣ, ᨲᩃ ᨸᨲᩥᨭ᩠ᨮᩣᨿᩴ. ᩋᩅᩣᨸᩩᩁᨲᩥ ᩅᩥᩅᩁᨲᩥ ᨿᩮᨶᩣᨲᩥ ᩋᩅᩣᨸᩩᩁᨱᩴ, ᩅᩁ ᩈᩴᩅᩁᨱᩮ, ᨿᩩ, ᩅᩔ ᨸᩮᩣ, ᩏᨲ᩠ᨲᩴ, ᩏᨸᩈᨣ᩠ᨣᩔ ᨴᩦᨥᨲᩣ ᨧ, ‘‘ᩋᨸᩣᩁᩩᨲᩣ ᨲᩮᩈᩴ ᩋᨾᨲᩔ ¶ ᨴ᩠ᩅᩣᩁᩣ’’ᨲᩥ [ᨴᩦ. ᨶᩥ. ᪒.᪗᪑; ᨾ. ᨶᩥ. ᪑.᪒᪘᪓] ᩅᨧᨶᨲᩮᩣ ᨸᩩᩁ, ᨸᩣᩁ ᩈᩴᩅᩁᨱᩮᨲᩥᨸᩥ ᨵᩣᨲ᩠ᩅᨲ᩠ᨳᩴ ᨸᨮᨶ᩠ᨲᩥ. ᩋᩅᨸᩩᨻ᩠ᨻᩮᩣ ᩅᩩ ᩈᩴᩅᩁᨱᩮᨲᩥᨸᩥ ᨵᩣᨲ᩠ᩅᨲ᩠ᨳᩮ ᨸᨶ ᩈᨲᩥ ᩅᩔ ᩁᨲ᩠ᨲᩴ, ᩏᨸᩈᨣ᩠ᨣᩔ ᨴᩦᨥᨲᩣ ᨧ, ‘‘ᩋᨸᩣᩁᩩᨲᩣ, ᩈᨦ᩠ᨥᩣᨭᩥᩴ ᨸᩣᩁᩩᨸᩥᨲ᩠ᩅᩣ’’ᨲ᩠ᨿᩣᨴᩦᩈᩩ ᨸᨶ ᨸᨠᩣᩁᩅᨱ᩠ᨱᩣᨣᨾᩮᨶ ᩈᩥᨴ᩠ᨵᩮᩣ. ᩅᩥᨴ ᩃᩣᨽᩮ, ᩍᨾ᩠ᩉᩥ ᩅᩮᨴᩥᨠᩣ, ᩈᨠᨲ᩠ᨳᩮ ᨠᩮᩣ. ᩍᨲᩁᨲ᩠ᨳ ᩍᨿᩮᩅ.

᪒᪒᪓. ᩈᨦ᩠ᨥᩣᨭᩣᨴᨿᩮᩣ ᨾᨶ᩠ᨴᩥᩁᨦ᩠ᨣᩣ ᨣᩮᩉᨦ᩠ᨣᩅᩥᩈᩮᩈᩣ. ᩈᨾ᩠ᨾᩣ ᨥᨭᩮᨶ᩠ᨲᩥ ᩑᨲ᩠ᨳ ᨣᩮᩣᨸᩣᨶᩈ᩠ᨿᩣᨴᨿᩮᩣᨲᩥ ᩈᨦ᩠ᨥᩣᨭᩮᩣ, ᨸᩩᨻ᩠ᨻᨸᨧ᩠ᨨᩥᨾᨴᨠ᩠ᨡᩥᨱᩩᨲ᩠ᨲᩁᩣᨿᩣᨾᩅᩈᩮᨶ ᨳᨾ᩠ᨽᩣᨶᨾᩩᨸᩁᩥ ᨮᩥᨲᩮᩣ ᨠᨭ᩠ᨮᩅᩥᩈᩮᩈᩮᩣ, ᨲᩮ ᨸᨶ ᨸᩩᨻ᩠ᨻᨸᨧ᩠ᨨᩥᨾᨿᩣᨾᩣ ᨲᨿᩮᩣ ᨠᨭ᩠ᨮᩣ, ᨴᨠ᩠ᨡᩥᨱᩩᨲ᩠ᨲᩁᨿᩣᨾᩣ ᨸᨶ ᩉᩮᨭ᩠ᨮᩥᨾᨸᩁᩥᨧ᩠ᨨᩮᨴᨲᩮᩣ ᨲᨿᩮᩣ ᨠᨭ᩠ᨮᩣ, ᩏᨠ᩠ᨠᨭ᩠ᨮᨸᩁᩥᨧ᩠ᨨᩮᨴᩮᨶ ᨸᨶ ᨸᨬ᩠ᨧᩈᨲ᩠ᨲᨶᩅᩣᨴᨿᩮᩣᨸᩥ. ᨴ᩠ᩅᩥᨶ᩠ᨶᩴ ᨸᨠ᩠ᨡᩣᨶᩴ ᩋᨸᨲᨶᨲ᩠ᨳᩴ ᨻᨶ᩠ᨵᨶᨲᩮᩣ ᨸᩣᩈᩮᩣ ᩅᩥᨿᩣᨲᩥ ᨸᨠ᩠ᨡᨸᩣᩈᩮᩣ. ᨲᩩᩃᨲᩥ ᩈᨦ᩠ᨥᩣᨭᩮᩈᩩ ᨸᨲᩥᨭ᩠ᨮᨲᩦᨲᩥ ᨲᩩᩃᩣ, ᨲᩃ ᨸᨲᩥᨭ᩠ᨮᩣᨿᩴ, ᩋᩔᩩᨲ᩠ᨲᩴ, ᨸᨠ᩠ᨡᩣᨶᩴ ᩅᩣ ᩈᨾᩅᩣᩉᩥᨲᨽᩣᩅᨠᩁᨱᨲᩮᩣ ᨲᩩᩃᨿᨲᩥ ᨾᩥᨶᩣᨲᩥ ᩑᨲᩣᨿᩣᨲᩥ ᨲᩩᩃᩣ, ᨲᩩᩃ ᩏᨾ᩠ᨾᩣᨶᩮ.

ᨲᩥᨠᩴ ᩈᨾ᩠ᨾᨩ᩠ᨩᨶᩥᨿᩴ. ᨾᩩᨩᩥ ᩈᩮᩣᨵᨶᩮ, ᨿᩩ. ᨾᨩ᩠ᨩ ᩈᩴᩈᩩᨴ᩠ᨵᩥᨿᩴ, ᨿᩩ. ᩈᩩᨵ ᩈᩩᨴ᩠ᨵᩥᨿᩴ, ᩈᨻ᩠ᨻᨲᩕ ᨠᩁᨱᩮ ᨿᩩ.

᪒᪒᪔. ᨲᩥᨠᩴ ᩈᨦ᩠ᨠᩣᩁᨨᨯ᩠ᨯᨶᨸ᩠ᨸᨴᩮᩈᩮ. ᨠᨭ ᨨᨯ᩠ᨯᨶᨾᨴ᩠ᨴᨶᩮᩈᩩ, ᩈᨦ᩠ᨠᨭᨶ᩠ᨲᩥ ᩑᨲ᩠ᨳᩣᨲᩥ ᩈᨦ᩠ᨠᨭᩦᩁᩴ, ᩎᩁᩮᩣ, ‘‘ᩈᨦ᩠ᨠᨭᩮᩣ’’ᨲᩥ ᩅᩣ ᩈᨦ᩠ᨠᩣᩁᩮᩣ ᩅᩩᨧ᩠ᨧᨲᩥ, ᨲᩴ ᩎᩁᨿᨶ᩠ᨲᩥ ᨡᩥᨸᨶ᩠ᨲᩥ ᩑᨲ᩠ᨳᩣᨲᩥ ᩈᨦ᩠ᨠᨭᩦᩁᩴ, ᩎᩁ ᨡᩮᨸᩮ. ᩈᨦ᩠ᨠᩣᩁᩔ ᨮᩣᨶᩴ ᩈᨦ᩠ᨠᩣᩁᨭ᩠ᨮᩣᨶᩴ. ᩈᨦ᩠ᨠᩣᩁᩴ ᨠᨭᨲᩥ ¶ ᨨᨯ᩠ᨯᩮᨲᩥ ᩑᨲ᩠ᨳᩣᨲᩥ ᩈᨦ᩠ᨠᩣᩁᨠᩪᨭᩴ, ᩋᩔᩪ, ᩈᨠᨲ᩠ᨳᩮ ᨠᩮᩣ.

ᨧᨲᩩᨠ᩠ᨠᩴ ᩈᨾ᩠ᨾᨩ᩠ᨩᨶᩥᨿᩣ ᨶᩥᩁᩣᨠᨲᩮ [ᨶᩥᩁᩔᨲᩮ (ᨠ.)] ᨳᩩᩈᩣᨴᩥᨾ᩠ᩉᩥ. ᨶᩣᨶᩣᩅᩥᨵᩮ ᩈᨦ᩠ᨠᩣᩁᩮ ᩁᩣᩈᩦᨠᩁᨱᩅᩈᩮᨶ ᨠᨧᨲᩥ ᨻᨶ᩠ᨵᨲᩥ ᩑᨲᩮᨶᩣᨲᩥ ᨠᨧᩮᩣ, ᩈᩮᩣ ᩑᨲ᩠ᨳ ᩍᨧ᩠ᨨᩥᨲᨻ᩠ᨻᩮᩣᨲᩥ ᨠᨧᩅᩁᩮᩣ, ᩅᩁ ᩍᨧ᩠ᨨᩣᨿᩴ. ᩏᨧ᩠ᨨᩥᨭ᩠ᨮᩮᩣ ᨠᩃᩣᨸᩮᩣ ᩈᨾᩪᩉᩮᩣ ᩏᨠ᩠ᩃᩣᨸᩮᩣ, ᨠᩔᩣᨠᩣᩁᩃᩮᩣᨸᩮᩣ. ᨶᩣᨶᩣᩅᩥᨵᩮᩉᩥ ᨲᩥᨱᩣᨴᩦᩉᩥ ᩈᨦ᩠ᨠᩁᩦᨿᨲᩮ ᨾᩥᩔᩦᨠᩁᩦᨿᨲᩮᨲᩥ ᩈᨦ᩠ᨠᩣᩁᩮᩣ, ᨱᩮᩣ. ᩋᩅᨠᩁᩮᩣᨲᩥᨸ᩠ᨿᨲᩕ. ᩋᩅᨠᩁᩦᨿᨲᩮ ᨶᩥᩁᩔᨲᩮᨲᩥ, ᩋ. ‘‘ᩈᨾ᩠ᨾᨩ᩠ᨩᩮᩣ ᨾᨩ᩠ᨩᨶᩦ ᨧᩮᩅ, ᩈᨦ᩠ᨠᩣᩁᩮᩣ’ᩅᨠᩁᩮᩣ ᨾᨲᩮᩣ’’ᨲᩥ ᩉᩃᩣᨿᩩᨵᩮᩣ. ᨠᩈ ᩅᩥᩃᩮᨡᨶᩮ, ᩋᨾ᩠ᨻᩩ.

᪒᪒᪕. ᨥᩁᩣᨴᩥᨽᩪᨾᩥ ᨥᩁᨡᩮᨲ᩠ᨲᩅᩥᩉᩣᩁᩣᨴᩦᨶᩴ ᨿᩮᩣ ᨽᩪᨾᩥᨸ᩠ᨸᨴᩮᩈᩮᩣ ᩅᨲ᩠ᨳᩩ ᨶᩣᨾ, ᨲᩴ ᨶᨸᩩᩴᩈᨠᩮ, ᩅᩈᨶ᩠ᨲᩥ ᩑᨲ᩠ᨳᩣᨲᩥ ᩅᨲ᩠ᨳᩩ, ᩁᨲ᩠ᨳᩩ. ᨣᩈ ᨾᨴᨶᩮ, ᨣᩈᨶ᩠ᨲᩥ ᩑᨲ᩠ᨳᩣᨲᩥ ᨣᩣᨾᩮᩣ, ᨾᩮᩣ. ᩈᩴᩅᩈᨶ᩠ᨲ᩠ᨿᨲᩕᩣᨲᩥ ᩈᩴᩅᩈᨳᩮᩣ, ᩋᨳᩮᩣ.

ᨸᩣᨠᨭᩮᩣ ᨡ᩠ᨿᩣᨲᩮᩣ ᨣᩣᨾᩮᩣ, ᩈᩮᩣ ᨶᩥᨣᨾᩮᩣ ᨶᩣᨾ, ᩋᨲᩥᩁᩮᨠᩮᩣ ᨣᩣᨾᩮᩣ ᨶᩥᨣᨾᩮᩣ, ᨽᩩᩈᨲ᩠ᨳᩮᩣ ᨶᩥ, ᩈᨬ᩠ᨬᩣᩈᨴ᩠ᨴᨲ᩠ᨲᩣ ᩁᩔᩮᩣ.

ᩏᨸᨽᩩᨬ᩠ᨩᩥᨲᨻ᩠ᨻᨽᩮᩣᨣᨾᨶᩩᩔᩣᨴᩦᩉᩥ ( ) [(ᩍᨽ᩠ᨿᩮᩣ) (?)] ᩅᨯ᩠ᨰᩥᨲᩮᩣ ᩋᨵᩥᨠᩮᩣ ᨣᩣᨾᩮᩣ ᨶᩥᨣᨾᨲᩮᩣᨸᩥ ᩋᨵᩥᨠᨲᩁᨲ᩠ᨲᩣ ‘‘ᩋᨵᩥᨽᩪ’’ᨲᩥ ᩎᩁᩥᨲᩮᩣ ᨠᨳᩥᨲᩮᩣ, ᩋᨵᩥᨠᩮᩣ ᨽᩅᨲᩦᨲᩥ ᩋᨵᩥᨽᩪ.

᪒᪒᪖. ᨴ᩠ᩅᨿᩴ ¶ ᨣᩣᨾᩣᨴᩥᨸᩁᩥᨿᨶ᩠ᨲᨽᩣᨣᩮ. ᩈᩥ ᨻᨶ᩠ᨵᨶᩮ, ᨾᩮᩣ. ᨸᩁᩥᨧ᩠ᨨᩥᨶ᩠ᨴᩥᨲ᩠ᩅᩣ ᩌᨴᩦᨿᨲᩮᨲᩥ ᨾᩁᩥᨿᩣᨴᩣ, ᨸᩔ ᨾᩮᩣ.

ᨴ᩠ᩅᨿᩴ ᩌᨽᩦᩁᨠᩩᨭᩥᨿᩴ [ᨥᩮᩣᩈᩮᩣ ᩌᨽᩦᩁᨸᩃ᩠ᩃᩦ ᩈᩥᨿᩣ (ᩋᨾᩁ ᪑᪒.᪒᪐)]. ᨥᩩ ᩈᨴ᩠ᨴᩮ, ᨥᩮᩣᩈᨶ᩠ᨲ᩠ᨿᨲᩕᩣᨲᩥ ᨥᩮᩣᩈᩮᩣ. ᨣᩮᩣᨸᩣᩃᩣᨶᩴ ᨣᩣᨾᩮᩣ ᨣᩮᩣᨸᩣᩃᨣᩣᨾᨠᩮᩣ, ᩈᨠᨲ᩠ᨳᩮ ᨠᩮᩣ.

ᨸᩩᩁᩅᨣ᩠ᨣᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪓. ᨶᩁᩅᨣ᩠ᨣᩅᨱ᩠ᨱᨶᩣ

᪒᪒᪗-᪒᪒᪘. ᨸᩮᩣᩁᩥᩈᨶ᩠ᨲᩣᨶᩥ ᨾᨶᩩᩔᨩᩣᨲᩥᨿᩣ ᨶᩣᨾᩣᨶᩥ. ᨾᨶᩮᩣ ᩏᩔᨶ᩠ᨶᨾᩔᩣᨲᩥ ᨾᨶᩩᩔᩮᩣ, ᩈᨲᩥᩈᩪᩁᨽᩣᩅᨻᩕᩉ᩠ᨾᨧᩁᩥᨿᨿᩮᩣᨣ᩠ᨿᨲᩣᨴᩥᨣᩩᨱᩅᩈᩮᨶ ᩏᨸᨧᩥᨲᨾᩣᨶᩈᩣ ᩏᨠ᩠ᨠᨭ᩠ᨮᨣᩩᨱᨧᩥᨲ᩠ᨲᩣ, ᨠᩮ ᨸᨶ ᨲᩮ? ᨩᨾ᩠ᨻᩩᨴᩦᨸᩅᩣᩈᩥᨶᩮᩣ ᩈᨲ᩠ᨲᩅᩥᩈᩮᩈᩣ. ᨲᩮᨶᩣᩉ ᨽᨣᩅᩣ – ¶ ‘‘ᨲᩦᩉᩥ, ᨽᩥᨠ᩠ᨡᩅᩮ, ᨮᩣᨶᩮᩉᩥ ᨩᨾ᩠ᨻᩩᨴᩦᨸᨠᩣ ᨾᨶᩩᩔᩣ ᩏᨲ᩠ᨲᩁᨠᩩᩁᩩᨠᩮ ᨾᨶᩩᩔᩮ ᩋᨵᩥᨣ᩠ᨣᨱ᩠ᩉᨶ᩠ᨲᩥ ᨴᩮᩅᩮ ᨧ ᨲᩣᩅᨲᩥᩴᩈᩮ. ᨠᨲᨾᩮᩉᩥ ᨲᩦᩉᩥ, ᩈᩪᩁᩣ ᩈᨲᩥᨾᨶ᩠ᨲᩮᩣ ᩍᨵ ᨻᩕᩉ᩠ᨾᨧᩁᩥᨿᩅᩣᩈᩮᩣ’’ᨲᩥ [ᩋ. ᨶᩥ. ᪙.᪒᪑]. ᨲᨳᩣ ᩉᩥ ᨻᩩᨴ᩠ᨵᩣ ᨽᨣᩅᨶ᩠ᨲᩮᩣ ᨸᨧ᩠ᨧᩮᨠᨻᩩᨴ᩠ᨵᩣ ᩋᨣ᩠ᨣᩈᩣᩅᨠᨾᩉᩣᩈᩣᩅᨠᨧᨠ᩠ᨠᩅᨲ᩠ᨲᩥᨶᩮᩣ ᨧ ᩋᨬ᩠ᨬᩮ ᨧ ᨾᩉᩣᨶᩩᨽᩣᩅᩣ ᩈᨲ᩠ᨲᩣ ᨲᨲ᩠ᨳᩮᩅ ᩏᨸ᩠ᨸᨩ᩠ᨩᨶ᩠ᨲᩥ. ᩈᨾᩣᨶᩁᩪᨸᩣᨴᩥᨲᩣᨿ ᨸᨶ ᩈᨴ᩠ᨵᩥᩴ ᨸᩁᩥᨲ᩠ᨲᨴᩦᨸᩅᩣᩈᩦᩉᩥ ᩍᨲᩁᨾᩉᩣᨴᩦᨸᩅᩣᩈᩥᨶᩮᩣᨸᩥ ᨾᨶᩩᩔᩣᨲ᩠ᩅᩮᩅ ᨸᨬ᩠ᨬᩣᨿᩥᩴᩈᩪᨲᩥ ᩑᨠᩮ, ᩋᨸᩁᩮ ᨸᨶ ᨽᨱᨶ᩠ᨲᩥ ‘‘ᩃᩮᩣᨽᩣᨴᩦᩉᩥ, ᩋᩃᩮᩣᨽᩣᨴᩦᩉᩥ ᨧ ᩈᩉᩥᨲᩔ ᨾᨶᩔ ᩏᩔᨴᨲᩣᨿ ᨾᨶᩩᩔᩣ, ᨿᩮ ᩉᩥ ᩈᨲ᩠ᨲᩣ ᨾᨶᩩᩔᨩᩣᨲᩥᨠᩣ, ᨲᩮᩈᩩ ᩅᩥᩈᩮᩈᨲᩮᩣ ᩃᩮᩣᨽᩣᨴᨿᩮᩣ, ᩋᩃᩮᩣᨽᩣᨴᨿᩮᩣ ᨧ ᩏᩔᨴᩣ, ᨲᩮ ᩃᩮᩣᨽᩣᨴᩦᩉᩥ ᩏᩔᨴᨲᩣᨿ ᩋᨸᩣᨿᨾᨣ᩠ᨣᩴ, ᩋᩃᩮᩣᨽᩣᨴᩦᩉᩥ ᩏᩔᨴᨲᩣᨿ ᩈᩩᨣᨲᩥᨾᨣ᩠ᨣᩴ, ᨶᩥᨻ᩠ᨻᩣᨶᨣᩣᨾᩥᨾᨣ᩠ᨣᨬ᩠ᨧ ᨸᩪᩁᩮᨶ᩠ᨲᩥ, ᨲᩈ᩠ᨾᩣ ᩃᩮᩣᨽᩣᨴᩦᩉᩥ, ᩋᩃᩮᩣᨽᩣᨴᩦᩉᩥ ᨧ ᩈᩉᩥᨲᩔ ᨾᨶᩔ ᩏᩔᨴᨲᩣᨿ ᨸᩁᩥᨲ᩠ᨲᨴᩦᨸᩅᩣᩈᩦᩉᩥ ᩈᨴ᩠ᨵᩥᩴ ᨧᨲᩩᨾᩉᩣᨴᩦᨸᩅᩣᩈᩥᨶᩮᩣ ᩈᨲ᩠ᨲᩅᩥᩈᩮᩈᩣ ᨾᨶᩩᩔᩣᨲᩥ ᩅᩩᨧ᩠ᨧᨶ᩠ᨲᩦ’’ᨲᩥ. ᩃᩮᩣᨠᩥᨿᩣ ᨸᨶ ᨾᨶᩩᨶᩮᩣ ᩋᨸᨧ᩠ᨧᨽᩣᩅᩮᨶ ᨾᨶᩩᩔᩣᨲᩥ ᩅᨴᨶ᩠ᨲᩥ, ᨾᨶᩩ ᨶᩣᨾ ᨸᨮᨾᨠᨸ᩠ᨸᩥᨠᩮᩣ ᩃᩮᩣᨠᨾᩁᩥᨿᩣᨴᩣᨿ ᩌᨴᩥᨽᩪᨲᩮᩣ ᩉᩥᨲᩣᩉᩥᨲᩅᩥᨵᩣᨿᨠᩮᩣ ᩈᨲ᩠ᨲᩣᨶᩴ ᨸᩥᨲᩩᨭ᩠ᨮᩣᨶᩥᨿᩮᩣ, ᨿᩮᩣ ᩈᩣᩈᨶᩮ ‘‘ᨾᩉᩣᩈᨾ᩠ᨾᨲᩮᩣ’’ᨲᩥ ᩅᩩᨧ᩠ᨧᨲᩥ, ᨸᨧ᩠ᨧᨠ᩠ᨡᨲᩮᩣ, ᨸᩁᨾ᩠ᨸᩁᨲᩣᨿ ᨧ ᨲᩔ ᩒᩅᩣᨴᩣᨶᩩᩈᩣᩈᨶᩥᨿᩴ ᨮᩥᨲᩣ ᨲᩔ ᨸᩩᨲ᩠ᨲᩈᨴᩥᩈᨲᩣᨿ ᨾᨶᩩᩔᩣᨲᩥ ᩅᩩᨧ᩠ᨧᨶ᩠ᨲᩥ, ᨲᨲᩮᩣ ᩑᩅ ᩉᩥ ᨲᩮ ‘‘ᨾᩣᨶᩅᩣ, ᨾᨶᩩᨩᩣ’’ᨲᩥ ᨧ ᩅᩮᩣᩉᩁᩦᨿᨶ᩠ᨲᩥ, ᩏᩔᨸᨧ᩠ᨧᨿᩮᩣ. ᨾᨶᩩᨶᩮᩣ ᩋᨸᨧ᩠ᨧᩴ ᨾᩣᨶᩩᩈᩮᩣ, ᩏᩈᩮᩣ. ᨾᩁ ᨸᩣᨱᨧᩣᨣᩮ, ᨧᩮᩣ, ᨾᨧ᩠ᨧᩮᩣ, ᨸᨻ᩠ᨻᨩ᩠ᨩᩣᨴᩥᨶᩣ ᩅᩣ ᨲ᩠ᨿᨸᨧ᩠ᨧᨿᩮᩣ, ᨵᩣᨲ᩠ᩅᨶ᩠ᨲᩔ ᩃᩮᩣᨸᩮᩣ ᨧ. ᨲᨲᩮᩣ ‘‘ᨿᩅᨲ’’ᨾᩥᨧ᩠ᨧᩣᨴᩥᨶᩣ ᨧᩮᩣ, ᨴ᩠ᩅᩥᨲ᩠ᨲᩴ. ᨾᨶᩩᨶᩮᩣ ᩋᨸᨧ᩠ᨧᩴ ᨾᩣᨶᩅᩮᩣ. ᨾᩣᨱᩅᩮᩣᨸ᩠ᨿᨲᩕ, ᨱᩅᩮᩣ. ᨾᨶᩩᨾ᩠ᩉᩣ ᨩᩣᨲᩮᩣ ᨾᨶᩩᨩᩮᩣ. ᨶᩦ ᨶᨿᩮ, ᨶᩮᨲᩦᨲᩥ ᨶᩁᩮᩣ, ᩋᩁᩮᩣ. ᨸᩩᩈ ᨸᩮᩣᩈᨶᩮ, ᨱᩮᩣ, ᨸᩩᩁᩮᨲᩦᨲᩥ ᩅᩣ ᨸᩮᩣᩈᩮᩣ. ᨸᩩᩁ ᨸᩪᩁᨱᩮ, ᩈᩮᩣ, ᩏᩔᩮᩣᨲ᩠ᨲᩴ, ᩁᩃᩮᩣᨸᩮᩣ. ᨸᩩᨶᩣᨲᩦᨲᩥ ᨸᩩᨾᩣ, ᨸᩩ ¶ ᨸᩅᨶᩮ, ᨾᩮᩣ, ᩈᩥᩔᩣ. ᨸᩩᩁᩮᨲᩦᨲᩥ ᨸᩩᩁᩥᩈᩮᩣ, ᨸᩮᩣᩁᩥᩈᩮᩣ ᨧ, ᩍᩈᩮᩣ, ᩁᩔᩔ ᨴᩦᨥᨲᩣᨿ ᨸᩪᩁᩥᩈᩮᩣ ᨧ. ᩑᨲ᩠ᨳ ᨧ ᨾᨶᩩᩔᩣᨴᩥᨸᨬ᩠ᨧᨠᩴ ᩍᨲ᩠ᨳᩥᨿᨾ᩠ᨸᩥ ᩅᨲ᩠ᨲᨲᩮ, ᨶᩁᩣᨴᨿᩮᩣ ᨲᩩ ᨸᩩᨾᩮᨿᩮᩅ ᩅᩥᩈᩥᨭ᩠ᨮᩃᩥᨦ᩠ᨣᨲ᩠ᨲᩣ. ᨲᨲᩕ ᨾᨶᩩᩔ ᨾᩣᨶᩩᩈ ᨾᨶᩩᨩ ᨾᩣᨱᩅᩮᩉᩥ ᨶᨴᩣᨴᩥᨲ᩠ᨲᩣ ᩎᨸᨧ᩠ᨧᨿᩮᩣ, ᩑᨠᩈᨠᩣᩁᩃᩮᩣᨸᩮᩣ, ᨾᨶᩩᩈᩦ, ᨾᩣᨶᩩᩈᩦ, ᨾᨶᩩᨩᩦ, ᨾᩣᨱᩅᩦ. ᨾᨧ᩠ᨧᩣ, ᩍᨲ᩠ᨳᩥᨿᨾᨲᩮᩣ ᩌᨸᨧ᩠ᨧᨿᩮᩣ.

ᩅᩥᨴ᩠ᨴᩈᩩᨸᩁᩥᨿᨶ᩠ᨲᩴ ᨸᨱ᩠ᨯᩥᨲᩮ. ᨸᨱ᩠ᨯᩣ ᨻᩩᨴ᩠ᨵᩥ ᩈᨬ᩠ᨩᩣᨲᩣ ᩋᩔᩣᨲᩥ ᨸᨱ᩠ᨯᩥᨲᩮᩣ, ᨲᩁᨲ᩠ᨿᩣᨴᩥ. ᨸᨯᩥ ᨣᨲᩥᨿᩴ ᩅᩣ, ᨲᩮᩣ. ᨻᩩᨩ᩠ᨫᨲᩦᨲᩥ ᨻᩩᨵᩮᩣ. ᩅᩥᨴᨲᩥ ᨩᩣᨶᩣᨲᩦᨲᩥ ᩅᩥᨴ᩠ᩅᩣ, ᩅᩥᨴ ᨬᩣᨱᩮ, ᩅᩮᩣ, ᩈᩥᩔᩣ. ᨽᩪ ᩈᨲ᩠ᨲᩣᨿᩴ, ᩋᨲ᩠ᨳᩮ ᩅᩥᨽᩣᩅᩮᨲᩥ ᨸᨠᩣᩈᩮᨲᩥ ᩈᩦᩃᩮᨶᩣᨲᩥ ᩅᩥᨽᩣᩅᩦ, ᨱᩦ. ᩁᩣᨣᩣᨴᨿᩮᩣ ᩈᨾᩮᨲᩦᨲᩥ ᩈᨶ᩠ᨲᩮᩣ, ᨲᩮᩣ, ᩈᩩᨶ᩠ᨴᩁᩮᩣ ᩋᨶ᩠ᨲᩮᩣ ᩋᩅᩈᩣᨶᨾᩮᨲᩔᩣᨲᩥ ᩅᩣ ᩈᨶ᩠ᨲᩮᩣ. ᩈᩩᨶ᩠ᨴᩁᩣ ᨸᨬ᩠ᨬᩣ ᨿᩔ ᩈᨸ᩠ᨸᨬ᩠ᨬᩮᩣ. ᨠᩥᨶ᩠ᨶᩣᨾ ᨶ ᩅᩥᨶ᩠ᨴᨲᩦᨲᩥ ᨠᩮᩣᩅᩥᨴᩮᩣ, ᨶᩮᩁᩩᨲ᩠ᨲᩮᩣ, ᨠᩩᩴ ᨸᩣᨸᩴ ᩅᩥᨶ᩠ᨴᨲᩦᨲᩥ ᩅᩣ ᨠᩮᩣᩅᩥᨴᩮᩣ. ᨵᩦ ᨸᨬ᩠ᨬᩣ ᨿᩔᨲ᩠ᨳᩦᨲᩥ ᩈᩮᩣ ᨵᩦᨾᩣ, ᩈᩮᩣᨽᨶᩴ ᨫᩣᨿᨲᩦᨲᩥ ᩈᩩᨵᩦ, ᨫᩮ ᨧᩥᨶ᩠ᨲᩣᨿᩴ. ᨫᩔ ᨵᩮᩣ, ᩎ, ᩈᩩᨶ᩠ᨴᩁᩣ ᨵᩦ ᨿᩔᩣᨲᩥ ᩅᩣ ᩈᩩᨵᩦ. ᨠᩅᩥ ᩅᨱ᩠ᨱᩮ, ᩍ, ᩍᨲ᩠ᨳᩥᨿᩴ ᨠᩅᩦ ᨧ, ᨠᩩ ᩈᨴ᩠ᨴᩮ ᩅᩣ, ᩍ, ᨠᩅᩥ. ᨻ᩠ᨿᨬ᩠ᨩᨿᨲᩦᨲᩥ ᨻ᩠ᨿᨲ᩠ᨲᩮᩣ, ᩋᨬ᩠ᨩ ᨣᨲᩥᨿᩴ, ᨲᩮᩣ. ᨽᩩᨩᩣᨴᩦᨶᨾᨶ᩠ᨲᩮᩣ ᨶᩮᩣ ᨴ᩠ᩅᩥ ᨧ. ᩅᩥᩈᩥᨭ᩠ᨮᩮᩣ ᩋᨲ᩠ᨲᩣ ᨿᩔᩣᨲᩥ ᩅᩣ ᨻ᩠ᨿᨲ᩠ᨲᩮᩣ. ᨧᨠ᩠ᨡ ᨴᩔᨶᩮ, ᨿᩩ, ᩅᩥᨧᨠ᩠ᨡᨱᩮᩣ, ᩅᩥᨧᩣᩁᩮᨲᩦᨲᩥ ᩅᩣ ᩅᩥᨧᨠ᩠ᨡᨱᩮᩣ, ᨶᩮᩁᩩᨲ᩠ᨲᩮᩣ. ᩅᩥᨣᨲᩮᩣ ᩈᩣᩁᨴᩮᩣ ᩑᨲᩈ᩠ᨾᩣᨲᩥ ᩅᩥᩈᩣᩁᨴᩮᩣ.

᪒᪒᪙. ᨾᩮᨵᩣ ᨵᩣᩁᨱᩣ ᨾᨲᩥ ᨸᨬ᩠ᨬᩣ ᨿᩔᩣᨲᩥ ᨾᩮᨵᩣᩅᩦ, ᩅᩦ. ᩋᨲᩥᩈᨿᨾᨲᩥᨿᩩᨲ᩠ᨲᨲᩣᨿ ᨾᨲᩥᨾᩣ. ᨸᨬ᩠ᨬᩣᨿ ᨿᩮᩣᨣᨲᩮᩣ ᨸᨬ᩠ᨬᩮᩣ. ᩅᩥᩈᩮᩈᩴ ᨩᩣᨶᩣᨲᩥ ᩈᩦᩃᩮᨶᩣᨲᩥ ᩅᩥᨬ᩠ᨬᩪ, ᩁᩪ. ᩅᩥᨴ ᨬᩣᨱᩮ, ᩏᩁᩮᩣ, ᩅᩥᨴᩩᩁᩮᩣ [ᩅᩥᨴᩪᩁᩮᩣ (ᨠ.)]. ᩁᩪᨸᨧ᩠ᨧᨿᩮ ᩅᩥᨴᩪ. ᨵᩦᨿᩮᩣᨣᩣ ᨵᩦᩁᩮᩣ, ᩁᩮᩣ. ᩅᩥᩈᩥᨭ᩠ᨮᨴᩔᨶᩈᩦᩃᨲᩣᨿ ¶ ᩅᩥᨸᩔᩦ, ᨱᩦ. ᨴᩮᩣᩈᩴ ᨩᩣᨶᩣᨲᩦᨲᩥ ᨴᩮᩣᩈᨬ᩠ᨬᩪ, ᩁᩪ. ᨻᩩᨩ᩠ᨫᨲᩦᨲᩥ ᨻᩩᨴ᩠ᨵᩮᩣ, ᨲᩮᩣ. ᨴᩩ ᨣᨲᩥᨿᩴ, ᩋ, ᩏᩔᩣᩅᩮᩣ [ᨴᩩ ᨣᨲᩥᨿᩴ ᩋᨻ᩠ᨻᩮᩣ (ᩈᩪᨧᩥ)], ᨴᨻ᩠ᨻᩮᩣ. ᩅᩥᨴ ᨬᩣᨱᩮ, ᨴᩈᩩ.

᪒᪓᪐-᪒᪓᪑. ᨾᩉᩥᩃᩣᨶ᩠ᨲᩴ ᩍᨲ᩠ᨳᩥᩈᩣᨾᨬ᩠ᨬᩮ. ᩍᩈᩩ ᩍᨧ᩠ᨨᩣᨿᩴ, ᨲᩮᩣ, ᨶᨴᩣᨴᩥ. ᩈᩦᨾᩔ ᩋᨶ᩠ᨲᩮᩣ ᩈᩦᨾᨶ᩠ᨲᩮᩣ, ᨠᩮᩈᩅᩮᩈᩮᩣ, ᨲᩴᨿᩮᩣᨣᩣ ᩈᩦᨾᨶ᩠ᨲᩥᨶᩦ, ᩍᨶᩦ. ᨶᩁᩔᩣᨿᩴ ᨶᩣᩁᩦ, ᩍᨴᨾᨲ᩠ᨳᩮ ᨱᩮᩣ. ᨲᩥᨭ᩠ᨮᨲᩥ ᨣᨻ᩠ᨽᩮᩣ ᨿᩔᩴ, ᩈᩣ ᨳᩦ. ᨵᩣ ᨵᩣᩁᨱᩮ ᩅᩣ, ᩅᨱ᩠ᨱᩅᩥᨠᩣᩁᩮᩣ, ᩎ. ᨻᨶ᩠ᨵ ᨻᨶ᩠ᨵᨶᩮ, ᩐ, ᨻᨶ᩠ᨵᩔ ᩅᨵᩣᨴᩮᩈᩮᩣ ᨧ [ᨱ᩠ᩅᩣᨴᩥ ᪓], ᩅᨵᩪᩈᨴ᩠ᨴᩮᩣ ᩈᩩᨱᩥᩈᩣᨽᩁᩥᨿᩣᨶᨾ᩠ᨸᩥ ᩅᩣᨧᨠᩮᩣ. ᩅᨶ ᩈᨾ᩠ᨽᨲ᩠ᨲᩥᨿᩴ, ᨲᩮᩣ, ᩍᨠᩣᩁᩣᨣᨾᩮᩣ ᨧ. ᩋᨦ᩠ᨣ ᨣᨾᨶᨲ᩠ᨳᩮᩣ, ᨿᩩ, ᩋᨦ᩠ᨣᨶᩣ, ᩅᩥᩈᩥᨭ᩠ᨮᨶᩣᩁᩥᨿᨾ᩠ᨸᩥ ᩋᨦ᩠ᨣᨶᩣ, ᨲᨴᩣ ᨠᩃ᩠ᨿᩣᨱᨦ᩠ᨣᨶᩣᩁᩦᩃᨠ᩠ᨡᨱᩮᩣᨸᩮᨲᩴ ᨸᩈᨲ᩠ᨳᩴ ᩉᨲ᩠ᨳᨸᩣᨴᩣᨴᩥᨠᨾᨦ᩠ᨣᨾᩔᨲ᩠ᨳᩦᨲᩥ ᩋᩔᨲ᩠ᨳ᩠ᨿᨲ᩠ᨳᩮ ᩋᨦ᩠ᨣᩣ ᨠᩃ᩠ᨿᩣᨱᩮ ᨶᨸᨧ᩠ᨧᨿᩮᩣ [ᨾᩮᩣᨣ᩠ᨣᩃ᩠ᩃᩣᨶ ᪔.᪙᪒]. ᩅᩥᩁᩪᨸᩮᩈᩩᨸᩥ ᨾᨴᩮᩣ ᩁᩣᨣᨾᨴᩮᩣ ᨿᩔᩣ ᩈᩣ ᨸᨾᨴᩣ, ᩅᩥᩈᩥᨭ᩠ᨮᨶᩣᩁᩥᨿᩴᨸ᩠ᨿᨲᩕ ᨸᨾᨴᩣ, ᨲᨴᩣ ᨸᨠᨭ᩠ᨮᩮᩣ ᨾᨴᩮᩣ ᩁᩪᨸᩈᩮᩣᨽᨣ᩠ᨣᨩᨶᩥᨲᩮᩣ ᨧᩮᨲᩮᩣᩅᩥᨠᩣᩁᩮᩣ ᨿᩔᩣ ᩈᩣ ᨸᨾᨴᩣ. ᩁᩪᨸᩃᩣᩅᨱ᩠ᨿᩈᨾ᩠ᨸᨶ᩠ᨶᨲᩣᨿ ᩈᩩᨶ᩠ᨴᩁᩦ, ᩅᩥᩈᩥᨭ᩠ᨮᩣᨿᨾ᩠ᨸᩥ. ᨠᨾᨶᩦᨿᩅᩩᨲ᩠ᨲᩥᨲᩣᨿ ᨠᨶ᩠ᨲᩣ, ᨠᨾᩩ ᨠᨶ᩠ᨲᩥᨿᩴ, ᨲᩮᩣ. ᨠᨶ᩠ᨲᩥᨿᩮᩣᨣᩣ ᩅᩣ ᨠᨶ᩠ᨲᩣ, ᩅᩥᩈᩥᨭ᩠ᨮᩣᨿᨾ᩠ᨸᩥ. ᩁᨾᨿᨲᩥ ᩅᩥᨶᩮᩣᨴᨿᨲᩥ ᨶᩣᨿᨠᩴ, ᩈᩣ ᩁᨾᨱᩦ, ᨶᨶ᩠ᨴᩣᨴᩦᩉᩥ ᨿᩩ, ᨶᨴᩣᨴᩥ, ᩅᩥᩈᩥᨭ᩠ᨮᩣᨿᨾ᩠ᨸᩥ. ᨴᨿ ᩁᨠ᩠ᨡᨱᩮ, ᨠᨾ᩠ᨾᨶᩥ ᨲᩮᩣ. ᩋᨸ᩠ᨸᩴ ᨻᩃᩴ ᨿᩔᩣ ᩈᩣ ᩋᨻᩃᩣ, ᩋᨸ᩠ᨸᨲ᩠ᨳᩮᩣᨿᩴ ᩋᨠᩣᩁᩮᩣ. ᨾᩣᨲᩩᨿᩣ ᨣᩣᨾᩮᩣ ᩅᩥᨿ ᨣᩣᨾᩮᩣ ᨿᩔᩣ ¶ ᩈᩣ ᨾᩣᨲᩩᨣᩣᨾᩮᩣ, ᨾᩣᨲᩣ ᩅᩥᨿ ᨣᨧ᩠ᨨᨲᩦᨲᩥ ᩅᩣ ᨾᩣᨲᩩᨣᩣᨾᩮᩣ, ᨣᨾᩩ ᨣᨾᨶᩮ, ᨱᩮᩣ, ᨾᩣᨲᩣ ᩅᩥᨿ ᨣᩈᨲᩦᨲᩥ ᩅᩣ ᨾᩣᨲᩩᨣᩣᨾᩮᩣ, ᨣᩈ ᩋᨴᨶᩮ, ᨾᩮᩣ, ᨾᩣᨲᩣ ᩅᩥᨿ ᨣᩣᨿᨲᩦᨲᩥ ᩅᩣ ᨾᩣᨲᩩᨣᩣᨾᩮᩣ, ᨣᩣ ᩈᨴ᩠ᨴᩮ, ᨾᩮᩣ. ᨾᩉᩦ ᩅᩥᨿ ᩈᩩᨧᩥᩴ ᩋᩈᩩᨧᩥᨾ᩠ᨸᩥ ᩃᩣᨲᩦᨲᩥ ᨾᩉᩥᩃᩣ, ᨾᩉᨶ᩠ᨲᩮᩈᩩ ᨻᩉᩪᩈᩩᨸᩥ ᩁᨲ᩠ᨲᨧᩥᨲ᩠ᨲᩮᩈᩩ ᩍᩃᨲᩥ ᨣᨧ᩠ᨨᨲᩦᨲᩥ ᩅᩣ ᨾᩉᩥᩃᩣ, ᩍᩃ ᨣᨾᨶᩮ, ᨾᩉ ᨸᩪᨩᩣᨿᩴ ᩅᩣ, ᩍᩁᩮᩣ, ᩃᨲ᩠ᨲᩴ, ᩌ, ᨾᩉᩥᩃᩣ. ᨾᩉᩮᩃᩣᨸ᩠ᨿᨲᩕ.

ᨲᩥᨠᩴ ᩅᩥᩈᩥᨭ᩠ᨮᨶᩣᩁᩥᨿᨾᩮᩅ. ᩃᩃ ᩅᩥᩃᩣᩈᩮ, ᨶᨶ᩠ᨴᩣᨴᩦᩉᩥ ᨿᩩ. ᩃᩃ ᩍᨧ᩠ᨨᩣᨿᨶ᩠ᨲᩥ ᨧᩩᩁᩣᨴᩥᨣᨱᨲᩮᩣ ᩅᩣ ᨿᩩ. ᨽᨿᨸᨠᨲᩥ ᨽᩦᩁᩩ, ᨽᩦ ᨽᨿᩮ, ᩁᩩ, ‘‘ᨽᩦᩁᩩ ᩋᨲ᩠ᨲᩮ ᨩᨶᩮ’ᨲ᩠ᨳᩥᨿ’’ᨶ᩠ᨲᩥ ᩁᨽᩈᩮᩣ. ᩋᨲᩥᩈᨿᩥᨲᨠᩣᨾᩣ ᨠᩣᨾᩥᨶᩦ, ᨠᩣᨾᩮᩣ ᩈᩥᨦ᩠ᨣᩣᩁᩁᩪᨸᩮᩣ ᨾᨴᩮᩣ ᨿᩔᩣᨲ᩠ᨳᩦᨲᩥ ᩍᨶᩦ, ᩈᨻ᩠ᨻᨲᩕᩮᩅᩴ. ᩅᩣᨾᩃᩮᩣᨧᨶᩣ, ᨽᩣᩅᩥᨶᩦ, ᨶᩥᨲᨾ᩠ᨻᩥᨶᩦ, ᩁᩣᨾᩣᩍᨧ᩠ᨧᩣᨴᩦᨶᩥᨸᩥ ᩅᩥᩈᩥᨭ᩠ᨮᨶᩣᩁᩦᨶᩣᨾᩣᨶᩥ.

ᨴ᩠ᩅᨿᩴ ᨸᨮᨾᩅᨿᩈᩥ ᩅᨲ᩠ᨲᨾᩣᨶᩣᨿᩴ.

ᩋᨭ᩠ᨮᩅᩔᩣ ᨽᩅᩮ ᨣᩮᩣᩁᩦ, ᨴᩈᩅᩔᩣ ᨲᩩ ᨠᨬ᩠ᨬᨠᩣ;

ᩈᨾ᩠ᨸᨲ᩠ᨲᩮ ᨴ᩠ᩅᩣᨴᩈᩮ ᩅᩔᩮ, ᨠᩩᨾᩣᩁᩦᨲ᩠ᨿ’ᨽᩥᨵᩦᨿᨲᩮ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪖.᪘].

ᩍᩉ ᨲ᩠ᩅᨽᩮᨴᩮᩣᨸᨧᩣᩁᩮᨶᩮᨠᨲ᩠ᨲᩴ. ᩋᨬ᩠ᨬᩮ ᨸᨶᩣᩉᩩ ‘‘ᨠᨬ᩠ᨬᩣᩈᨴ᩠ᨴᩮᩣᨿᩴ ᨸᩩᨾᩩᨶᩣᨽᩥᩈᨾ᩠ᨻᨶ᩠ᨵᨸᩩᨻ᩠ᨻᨠᩮ ᩈᨾ᩠ᨸᨿᩮᩣᨣᩮ ᨶᩥᩅᨲ᩠ᨲᩮᨲᩦ’’ᨲᩥ. ᨠᩩᨾᩣᩁ ᨠᩦᩊᩣᨿᩴ, ᨧᩩᩁᩣᨴᩥ, ᨠᩩᨾᩣᩁᨿᨲᩦᨲᩥ ᨠᩩᨾᩣᩁᩦ, ᩋ, ᨶᨴᩣᨴᩥ, ᩈᨠᨲ᩠ᨳᩮ ᨠᩮᩣ, ᨱ᩠ᩅᩩᨶᩣ ᩅᩣ ᩈᩥᨴ᩠ᨵᩮᩣ. ᨠᨾᨶᩦᨿᨲᩮᨲᩥ ᨠᨬ᩠ᨬᩣ, ᨠᨶ ᨴᩥᨲ᩠ᨲᩥᨠᨶ᩠ᨲᩥᨣᨲᩦᩈᩩ, ᨿᩮᩣ, ᨶ᩠ᨿᩔ ᨬᨲ᩠ᨲᩴ, ᩋ, ᩌ.

ᨿᩩᩅᩈᨴ᩠ᨴᨲᩮᩣ ¶ ᨸᩣᨭᩥᨸᨴᩥᨠᨲᩮᩣᨲᩥ, ᨿᩩᩅᨲᩥ. ᩅᩁᩥᨲ᩠ᨳᩥᨸᩁᩥᨿᩣᨿᩈᩣᨾᨬ᩠ᨬᩮᨸᩥ ᨿᩩᩅᨲᩥᩈᨴ᩠ᨴᩮᩣ ᨸᨠᨲ᩠ᨿᨶ᩠ᨲᩁᨾᨲ᩠ᨳᩦᨲᩥ. ᨲᩁ ᨲᩁᨱᩮ, ᨿᩩ, ᩏᨲ᩠ᨲᩴ, ᩎ ᨧ.

᪒᪓᪒. ᩈᩣᨽᩥᩈᩮᨠᩣ ᩃᨴ᩠ᨵᩣᨽᩥᩈᩮᨠᩣ ᩁᩣᨩᩥᨲ᩠ᨳᩦ ᨾᩉᩮᩈᩦ ᨶᩣᨾ, ᨾᩉ ᨸᩪᨩᩣᨿᩴ, ᨠᨾ᩠ᨾᨶᩥ ᩍᩈᩮᩣ, ᩍᩔᩮ, ᨲᨲᩮᩣ ᩎ, ᨾᩉᨲᩥᨿᩮᩣ ᩁᩣᨩᩥᨲ᩠ᨳᩥᨿᩮᩣ ᩎᩈᨲᩥ ᩋᨽᩥᨽᩅᨲᩦᨲᩥ ᩅᩣ ᨾᩉᩮᩈᩦ, ᩎᩈ ᩍᩔᩁᩥᨿᩮ, ᩎ. ᨾᩉᩮᩈᩥᨲᩮᩣ ᩋᨬ᩠ᨬᩣ ᩁᩣᨩᨶᩣᩁᩥᨿᩮᩣ ᨽᩮᩣᨣᩥᨶᩥᨿᩮᩣ ᨽᩮᩣᨣᨿᩮᩣᨣᩣ, ᩎ, ᩍᨶᩦ ᨧ. ᨿᩣᨶᩣᩁᩦ ᨸᩩᩁᩥᩈᩔ ᩈᨦ᩠ᨠᩮᨲᩴ ᨿᩣᨲᩥ, ᩈᩣ ‘‘ᨵᩅᨲ᩠ᨳᩥᨶᩦ, ᩋᨽᩥᩈᩣᩁᩥᨠᩣ’’ᨲᩥ ᨧᩮᩣᨧ᩠ᨧᨲᩮ. ᨵᩅᩴ ᨸᨲᩥᩴ ᩋᨲ᩠ᨳᨿᨲᩥ ᩍᨧ᩠ᨨᨲᩦᨲᩥ ᨵᩅᨲ᩠ᨳᩥᨶᩦ, ᩋᨲ᩠ᨳ ᨿᩣᨧᨶᩥᨧ᩠ᨨᩣᩈᩩ, ᩍᨶᩦ, ᩋᩈᨲᩦᩅᩥᩈᩮᩈᩮᩣ. ᩈᩁ ᨣᨲᩥᨿᩴ, ᩋᨽᩥᩈᩁᨲᩥ ᩈᨦ᩠ᨠᩮᨲᨶ᩠ᨲᩥ, ᨱ᩠ᩅᩩ.

᪒᪓᪓. ᨨᨠ᩠ᨠᩴ ᩅᩮᩈᩥᨿᩴ. ᨧᨲᩩᩈᨭ᩠ᨮᩥᨠᩃᩣᨠᩩᩈᩃᨲᩣᨿ, ᩈᩦᩃᩁᩪᨸᩣᨴᩥᨾᨲ᩠ᨲᩣᨿ ᨧ ᨣᨱ᩠ᨿᨲᩮ ᩌᨴᩦᨿᨲᩮ ᨣᨱᩥᨠᩣ, ᨣᨱ ᩈᨦ᩠ᨡ᩠ᨿᩣᨶᩮ, ᨱ᩠ᩅᩩ. ᩅᩮᩈᩮᩣ ᩌᨠᨸ᩠ᨸᩮᩣ, ᨲᩮᨶᩣᨲᩥᩈᩮᩣᨽᨲᩮ, ᨠᨾ᩠ᨾᩅᩮᩈᩮᩉᩥ ᩅᩣ ᩍᨧ᩠ᨨᩦᨿᨲᩮᨲᩥ. ᩋᨲᩥᩈᩮᩣᨽᨶᩮ, ᩍᨧ᩠ᨨᨲ᩠ᨳᩮ ᩅᩣ ᨿᨸᨧ᩠ᨧᨿᩮᩣ. ᩅᨱ᩠ᨱᩈᨾ᩠ᨸᨶ᩠ᨶᩣ ᨴᩣᩈᩦ ᩅᨱ᩠ᨱᨴᩣᩈᩦ, ᨴᩣᩈᩥᨾ᩠ᨸᩥ ᩉᩥ ᩅᨱ᩠ᨱᩈᨾ᩠ᨸᨶ᩠ᨶᩴ ᨠᩮᨧᩥ ᩈᩣᨾᩥᨠᩣ ᨵᨶᩃᩮᩣᨽᩮᨶ ᨣᨱᩥᨠᩴ ᨠᩁᩮᩣᨶ᩠ᨲᩥ. ᨶᨣᩁᩴ ᩈᩮᩣᨽᩮᨲᩦᨲᩥ ᨶᨣᩁᩈᩮᩣᨽᩥᨶᩦ. ᩁᩪᨸᩮᨶ ᩏᨸᨩᩦᩅᨲᩦᨲᩥ ᩁᩪᨸᩪᨸᨩᩦᩅᩥᨶᩦ. ᩋᨲᩥᩈᨿᩅᩮᩈᨿᩩᨲ᩠ᨲᨲᩣᨿ ᩅᩮᩈᩦ.

ᨴ᩠ᩅᨿᩴ ᩋᩈᨲᩦᩈᩣᨾᨬ᩠ᨬᩮ. ᨠᩩᩃᩣᨶᩥ ᩋᨭᨲᩥ ᨶᩣᩈᨿᨲᩦᨲᩥ ᨠᩩᩃᨭᩣ. ᨻᨶ᩠ᨵᨾᨶᩩᨻᨶ᩠ᨵᩴ ᨠᩣᨿᨲᩦᨲᩥ ᨻᨶ᩠ᨵᨠᩦ, ᨶᨴᩣᨴᩥ.

᪒᪓᪔. ᨧᨲᩩᨠ᩠ᨠᩴ ᩏᨲ᩠ᨲᨾᨶᩣᩁᩥᨿᩴ. ᩅᩁᩮᩣ ᩌᩁᩮᩣᩉᩮᩣ ᩈᩮᩣᨱᩥ ᨿᩔᩣ ᩈᩣ ᩅᩁᩣᩁᩮᩣᩉᩣ. ᩏᨲ᩠ᨲᨾᨣᩩᨱᨿᩮᩣᨣᩣ ᩏᨲ᩠ᨲᨾᩣ. ᩈᩮᩣᨱᩥᨣᩣᩁᩅᩮᨶ ¶ ᨾᨲ᩠ᨲᨣᨩᩮᩣ ᩅᩥᨿ ᨻᨶ᩠ᨵᨶᨣᩣᨾᩥᨶᩦ ᨾᨲ᩠ᨲᨠᩣᩈᩥᨶᩦ, ᨠᩈ ᨣᨲᩥᨿᩴ. ᩅᩁᩅᨱ᩠ᨱᨿᩮᩣᨣᩣ ᩅᩁᩅᨱ᩠ᨱᩥᨶᩦ, ᩍᨶᩦ.

‘‘ᩈᩦᨲᩮ ᩈᩩᨡᩮᩣᨱ᩠ᩉᩈᨻ᩠ᨻᨦ᩠ᨣᩦ, ᨣᩥᨾ᩠ᩉᩮ ᨿᩣ ᩈᩩᨡᩈᩦᨲᩃᩣ;

ᨽᨲ᩠ᨲᩩ ᨽᨲ᩠ᨲᩣ ᨧ ᨿᩣ ᨶᩣᩁᩦ, ᩈᩣ ᨽᩅᩮ ᩅᩁᩅᨱ᩠ᨱᩥᨶᩦ’’ᨲᩥ. ᩁᩩᨴ᩠ᨴᩮᩣ;

ᨴ᩠ᩅᨿᩴ ᩋᨡᨱ᩠ᨯᩥᨲᨧᩁᩥᨲᩕᩣᨿᩴ. ᨸᨲᩥ ᩈᩣᨾᩥᨠᩮᩣᩅ ᨠᨾᨶᩦᨿᩮᩣ ᨿᩔᩣ ᨸᨲᩥᨻ᩠ᨻᨲᩣ, ᨸᨲᩥᨾ᩠ᩉᩥ ᩅᨲᨾᩔᩣᨲᩥ ᩅᩣ ᨸᨲᩥᨻ᩠ᨻᨲᩣ. ᩋᩈ ᨽᩩᩅᩥ, ᩋᨶ᩠ᨲᩮᩣ, ᩎ, ᩌᨴᩥᩃᩮᩣᨸᩮᩣ. ᩈᨾᩮᨲᩦᨲᩥ ᩅᩣ ᩈᨲᩦ, ᩈᨾᩩ ᩏᨸᩈᨾᩮ, ᩋᨶ᩠ᨲᩮᩣ, ᩎ.

ᨴ᩠ᩅᨿᩴ ᨠᩣᨾᩁᨲ᩠ᨲᩁᩣᨩᨸᩩᨲ᩠ᨲᩣᨴᩥᨶᩮᩣ ᨠᩩᩃᩔ ᨶᩥᨿᨲᨸᨲᩥᨿᩴ. ᨠᩩᩃᩣᨶᩩᩁᩪᨸᩣ ᩍᨲ᩠ᨳᩦ ᨠᩩᩃᩥᨲ᩠ᨳᩦ, ᨠᩩᩃᩴ ᨸᩣᩃᩮᨲᩥ ᩁᨠ᩠ᨡᨲᩦᨲᩥ ᨠᩩᩃᨸᩣᩃᩥᨠᩣ, ᨱ᩠ᩅᩩ.

᪒᪓᪕. ᨴ᩠ᩅᨿᩴ ᨾᨲᨽᨲ᩠ᨲᩥᨠᩣᨿᩴ. ᩅᩥᨣᨲᩮᩣ ᨵᩅᩮᩣ ᨽᨲ᩠ᨲᩣ ᨿᩔᩣ ᩅᩥᨵᩅᩣ. ᨸᨲᩥ ᩈᩩᨬ᩠ᨬᩮᩣ ᨶᨭ᩠ᨮᩮᩣ ᨿᩔᩣᨲᩥ ᨸᨲᩥᩈᩩᨬ᩠ᨬᩣ.

ᨴ᩠ᩅᨿᩴ ᩋᨲ᩠ᨲᩥᨧ᩠ᨨᩣᨿ ᨸᨲ᩠ᨿᨶ᩠ᩅᩮᩈᩥᨶᩥᨿᩴ ᨠᨬ᩠ᨬᩣᨿᩴ. ᨸᨲᩥᩴ ᩅᩁᨲᩥ ᨣᩅᩮᩈᨲᩦᨲᩥ ᨸᨲᩥᨾ᩠ᨻᩁᩣ, ᨴᩩᨲᩥᨿᩣᨿᩣᩃᩮᩣᨸᩮᩣ. ᩈᨿᨾᩮᩅ ᨸᨲᩥᩴ ᩅᩁᨲᩦᨲᩥ ᩈᨿᨾ᩠ᨻᩁᩣ, ᨸᨮᨾᩣᨿᩣᩃᩮᩣᨸᩮᩣ, ᩅᩁ ᨸᨲ᩠ᨳᨶᩣᨿᩴ.

ᨧᨲᩩᨠ᩠ᨠᩴ ᩅᩥᨩᩣᨲᩣᨿᩴ. ᩅᩥᨩᨶᩦ ᨣᨻ᩠ᨽᩅᩥᨾᩮᩣᨠ᩠ᨡᨶᩮ, ᨲᩮᩣ, ᩅᩥᨩᩣᨿᩥᨲ᩠ᨳᩣᨲᩥ ᩅᩥᨩᩣᨲᩣ. ᩈᩪ ᩋᨽᩥᩈᩅᩮ, ᨲᩮᩣ. ᨩᩣᨲᩴ ᩋᨸᨧ᩠ᨧᩴ ᨸᩩᨲ᩠ᨲᩮᩣ ᩑᨲᩥᩔᩣᨲᩥ ᨩᩣᨲᩣᨸᨧ᩠ᨧᩣ. ᨸᩈᩪᨲᩣᩅ ᨸᩈᩪᨲᩥᨠᩣ, ᨠᨸᨧ᩠ᨧᨿᩮᩣ, ᩍᨲ᩠ᨲᨬ᩠ᨧ.

᪒᪓᪖. ᨴ᩠ᩅᨿᩴ ¶ ᨴᩪᨲᩥᨿᩴ. ᨿᩣ ᨸᩮᩈᩦᨿᨲᩮ, ᩈᩣ ᨴᩪᨲᩦ, ᨴᩩ ᨣᨾᨶᩮ,ᨲᩥ, ᩎᨾ᩠ᩉᩥ ᨴᩪᨲᩦ. ᩈᨬ᩠ᨧᩣᩁᨿᨲᩥ ᨿᨳᩣᨽᩥᨾᨲᨶ᩠ᨲᩥ, ᨱ᩠ᩅᩩ.

ᨲᩥᨠᩴ ᨴᩣᩈᩥᨿᩴ. ᨴᩩ ᨠᩩᨧ᩠ᨨᩥᨲᩴ ᩋᩈᨲᩥ ᨽᨠ᩠ᨡᨲᩦᨲᩥ ᨴᩣᩈᩦ, ᩎ, ᨴᩦᨿᨶ᩠ᨲᩮ ᨲᩣᨿᩣᨲᩥ ᩅᩣ ᨴᩣᩈᩦ, ᨴᩣ ᨴᩣᨶᩮ, ᩈᩮᩣ, ᩎ ᨧ. ᨧᩥᨭ ᨸᩮᩈᨶᩮ, ᨠᨾ᩠ᨾᨶᩥ ᨱᩮᩣ, ᩎ. ᨠᩩᨭᩴ ᩏᨴᨠᨠᩩᨾ᩠ᨽᩴ ᨵᩣᩁᩮᨲᩦᨲᩥ ᨠᩩᨭᨵᩣᩁᩥᨠᩣ, ᨱ᩠ᩅᩩ.

ᨴ᩠ᩅᨿᩴ ᩈᩩᨽᩣᩈᩩᨽᨶᩥᩁᩪᨸᩥᨶᩥᨿᩴ ᩈᩴᩅᩁᩥᨠᩣᨴᩥᨾ᩠ᩉᩥ. ᩅᩁ ᨣᨲᩥᨿᩴ, ᨠᨲ᩠ᨲᩁᩥ ᩍᨶᩦ. ᩈᩩᨽᩣᩈᩩᨽᩔ ᩍᨠ᩠ᨡᨱᩴ ᨶᩥᩁᩪᨸᨶᩴ ᨿᩔᩣᨲ᩠ᨳᩦᨲᩥ, ᩍ, ᩈᨠᨲ᩠ᨳᩮ ᨠᩮᩣ. ᩍᨾᩮ ᨴ᩠ᩅᩮ ᩈᨴ᩠ᨴᩣ ᨲᩩᩃ᩠ᨿᨲ᩠ᨳᩣ.

ᨿᩣ ᩈᨿᩴ ᨡᨲ᩠ᨲᩥᨿᨩᩣᨲᩥ ᨿᩔ ᨠᩔᨧᩥ ᨽᩁᩥᨿᩣ, ᩈᩣ ᨡᨲ᩠ᨲᩥᨿᩣᨶᩦ, ᨡᨲ᩠ᨲᩥᨿᩣ ᨧ. ᨡᨲ᩠ᨲᩥᨿᩔᩣᨸᨧ᩠ᨧᩴ ᨡᨲ᩠ᨲᩥᨿᩣᨶᩦ, ᩌᨶᩮᩣ, ᩎ. ᨱᨾ᩠ᩉᩥ ᨡᨲ᩠ᨲᩥᨿᩣ.

᪒᪓᪗. ᨸᨩ᩠ᨩᩴ ᩋᨣ᩠ᨣᩥᩈᨠ᩠ᨡᩥᨸᩩᨻ᩠ᨻᨠᨲᨸᩣᨱᩥᨣᩉᩥᨲᩣᨿᩴ ᨽᩁᩥᨿᩣᨿᩴ, ᩋᨬ᩠ᨬᨲᩕ ᨲᩪᨸᨧᩣᩁᩣ. ᨴᩣᩁᨿᨶ᩠ᨲᩮ ᨿᩮᨶᩣᨲᩥ ᨴᩣᩁᩮᩣ, ᨴᩁ ᩅᩥᨴᩣᩁᨱᩮ, ᩋᨠᨲ᩠ᨲᩁᩥ ᨧ ᨠᩣᩁᨠᩮ ᩈᨬ᩠ᨬᩣᨿᩴ ᨱᩮᩣ. ᨩᩣᨿᨲᩥ ᨸᩩᨲ᩠ᨲᩮᩣ ᨿᩣᨿᩣᨲᩥ ᨩᩣᨿᩣ, ᨩᨶ ᨩᨶᨶᩮ, ᨿᩮᩣ, ᨩᨶᩥᩔ ᨩᩣ ᨧ, ᩌ, ᨩᨿᨲᩦᨲᩥ ᩅᩣ ᨩᩣᨿᩣ, ᨩᩥ ᨩᨿᩮ, ᨿᩮᩣ, ᨩᩥᩔ ᨩᩣ, ᩌ, ᨩᩣᨿᩣ. ᨠᩃ ᩈᨦ᩠ᨡ᩠ᨿᩣᨶᩮ, ᩋᨲ᩠ᨲᩮᩣ. ᨥᩁᩴ ᨶᩮᨲᩦᨲᩥ ᨥᩁᨱᩦ, ᨱᨲ᩠ᨲᩴ. ᨽᩁᩥᨲᨻ᩠ᨻᨲᩮᩣ ᨽᩁᩥᨿᩣ, ᨽᩁ ᨽᩁᨱᩮ, ᨿᩮᩣ. ᨸᩥᨿᩣᨿᩥᨲᨻ᩠ᨻᨲᩮᩣ ᨸᩥᨿᩣ,ᨸᩦ ᨲᨸ᩠ᨸᨶᨠᨶ᩠ᨲᩦᩈᩩ, ᨿᩮᩣ. ᨸᨩᩴ ᨸᩩᨲ᩠ᨲᩴ ᨸᩣᩃᩮᨲᩦᨲᩥ ᨸᨩᩣᨸᨲᩥ, ᨸᩣ ᨸᩣᩃᨶᩮ,ᨲᩥ, ᩌᨲ᩠ᨲᩴ, ᩁᩔᨲ᩠ᨲᨬ᩠ᨧ ¶ . ᨴ᩠ᩅᩥᨶ᩠ᨶᩴ ᨸᩪᩁᨱᩦ ᨴᩩᨲᩥᨿᩣ. ᨸᨮᨾᩮᩣ ᨽᨲ᩠ᨲᩣ, ᨽᩁᩥᨿᩣ ᨴᩩᨲᩥᨿᩣ. ᩈᩣᨾᩥᨠᩔ ᨸᩣᨴᩮ ᨸᩁᩥᨧᩁᨲᩦᨲᩥ ᨸᩣᨴᨸᩁᩥᨧᩣᩁᩥᨠᩣ, ᨱ᩠ᩅᩩ. ᨸᨲᩥᨶᩦ, ᨸᩣᨱᩥᨣᩉᩥᨲᩣ, ᩈᩉᨵᨾ᩠ᨾᩥᨶᩦᨲᩥᨸᩥ ᨲᩔᩣᨿᩮᩅ ᨶᩣᨾᩣᨶᩥ.

᪒᪓᪘. ᨲᩥᨠᩴ ᩈᨡᩥᨿᩴ. ᨲᩮᩈᩩ ᨲᩮᩈᩩ ᨠᩥᨧ᩠ᨧᩮᩈᩩ ᩈᩉ ᨡᩣᨿᨲᩥ ᨸᨠᩣᩈᨲᩦᨲᩥ ᩈᨡᩦ, ᩈᩉᨸᩩᨻ᩠ᨻᩮᩣ ᨡᩣ ᨸᨠᩣᩈᨶᨠᨳᨶᩮᩈᩩ, ᩎ. ᩋᩃ ᨽᩪᩈᨶᩮ ᩌᨸᩩᨻ᩠ᨻᩮᩣ, ᩍ. ᩅᨿᩈᩣ ᨲᩩᩃ᩠ᨿᩣ ᩅᨿᩈᩣ, ᨲᩩᩃ᩠ᨿᩮ ᩈᨬ᩠ᨬᩣᨿᩴ ᩈᩮᩣ [ᨸᩣᨱᩥᨶᩥ ᪔.᪔.᪙᪑ ᩈᩩᨲ᩠ᨲᩮ ᨿᨸᨧ᩠ᨧᨿᩮᩣ ᨴᩥᩔᨲᩥ].

ᨩᩁᩮᩣᩅᩩᨧ᩠ᨧᨲᩥ ᨧᩮᩣᩁᩔᩣᨾᩥᨠᩮᩣ, ᨲᩔᩣᨿᩴ ᨩᩣᩁᩦ, ᨱᩮᩣ, ᩎ. ᩈᩣᨾᩥᨠᩴ ᩋᨲᩥᨠ᩠ᨠᨾ᩠ᨾ ᩋᨬ᩠ᨬᨲᩕ ᨧᩁᨲᩦᨲᩥ, ᩍᨶᩦ.

᪒᪓᪙. ᨸᩩᨾᩮ ᨲᩪᨲᩥ ᩃᩥᨦ᩠ᨣᨶ᩠ᨲᩮᩣ ᨲᩩᩈᨴ᩠ᨴᩮᩣ ᨶ ᨸᩩᨻ᩠ᨻᩴ ᨽᨩᨲᩮ. ᩋᩁ ᨣᨾᨶᩮ, ᨲᩩ, ᩋᩁᩔᩩᨲ᩠ᨲᩴ. ᩁᨲᩥᨿᩣ ᨩᩣᨿᨲᩦᨲᩥ ᩁᨩᩮᩣ, ᨲᩥᩃᩮᩣᨸᩮᩣ. ᨸᩩᨸ᩠ᨹ ᩅᩥᨠᩈᨶᩮ, ᨸᩩᨸ᩠ᨹᩴ.

ᨲᩥᨠᩴ ᩁᨩᩔᩃᩣᨿᩴ. ᩏᨲᩩᨿᩮᩣᨣᩣᩏᨲᩩᨶᩦ, ᩍᨶᩦ. ᩁᨩᨿᩮᩣᨣᩣ ᩁᨩᩔᩃᩣ, ᩈᩃᩮᩣ. ᨸᩩᨸ᩠ᨹᩅᨶ᩠ᨲᨲᩣᨿ ᨸᩩᨸ᩠ᨹᩅᨲᩦ. ᨳᩦᨵᨾ᩠ᨾᩥᨶᩦ, ᩋᩅᩦ, ᩋᨲ᩠ᨲᩮᨿᩦ, ᨾᩃᩥᨶᩦ, ᩏᨲᩩᨾᨲᩦ, ᩏᨴᨠᩦᩍᨧ᩠ᨧᩣᨴᩦᨶᩥᨸᩥ ᨲᩔᩣ ᨶᩣᨾᩣᨶᩥ.

ᨲᩥᨠᩴ ᨣᨻ᩠ᨽᩥᨶᩥᨿᩴ. ᨣᩁᩩ ᩋᩃᩉᩩᨠᩮᩣ ᨣᨻ᩠ᨽᩮᩣ ᨠᩩᨧ᩠ᨨᩥ ᩑᨲᩥᩔᩣᨲᩥ ᨣᩁᩩᨣᨻ᩠ᨽᩣ. ᩌᨸᨶ᩠ᨶᩮᩣ ᨸᨲ᩠ᨲᩮᩣ ᨣᨻ᩠ᨽᨭ᩠ᨮᩮᩣ ᩈᨲ᩠ᨲᩮᩣ ᩑᨲᩣᨿᩣᨲᩥ ᩌᨸᨶ᩠ᨶᩈᨲ᩠ᨲᩣ. ᨣᨻ᩠ᨽᨿᩮᩣᨣᩣ ᨣᨻ᩠ᨽᩥᨶᩦ.

ᨲᩥᨠᩴ ¶ ᨿᩮᨶ ᩅᩮᨮᩥᨲᩮᩣ ᨣᨻ᩠ᨽᩮᩣ ᨠᩩᨧ᩠ᨨᩥᨿᩴ ᨲᩥᨭ᩠ᨮᨲᩥ, ᨲᨲᩕᩣᩈᨿᩮᨲᩥ ᨡ᩠ᨿᩣᨲᩮ. ᨣᨻ᩠ᨽᩮᩣ ᩌᩈᨿᨲᩮ ᨲᩥᨭ᩠ᨮᨲ᩠ᨿᨲᩕᩣᨲᩥ, ᨱᩮᩣ. ᨩᩁᩴ ᩑᨲᩦᨲᩥ ᨩᩃᩣᨻᩩ. ᩏ, ᩁᩔ ᩃᩮᩣ, ᨿᩔ ᨻᩮᩣ, ᨩᩁᩣᨸᩩᨻ᩠ᨻᩮᩣ ᩍ ᨣᨲᩥᨿᩴ. ᨠᩃᩴ ᨩᩁᨲᩴ ᩃᩣᨲᩦᨲᩥ ᨠᩃᩃᩮᩣ, ᨠᩃ ᩈᨦ᩠ᨡ᩠ᨿᩣᨶᩮ ᩅᩣ, ᩋᩃᩮᩣ.

᪒᪔᪐-᪒᪔᪑. ᩈᨲ᩠ᨲᨠᩴ ᨽᨲ᩠ᨲᩁᩥ. ᨵᩪ ᨠᨾ᩠ᨸᨶᩮ, ᩈᨶ᩠ᨲᩣᩈᩴ ᨵᩩᨶᩮᩣᨲᩦᨲᩥ ᨵᩅᩮᩣ, ᩋ. ᩈᩴ ᩑᨲᩔᨲ᩠ᨳᩦᨲᩥ ᩈᩣᨾᩥᨠᩮᩣ, ᩌᨾᩥᨸᨧ᩠ᨧᨿᩮᩣ, ᩈᨠᨲ᩠ᨳᩮ ᨠᩮᩣ, ᩍᨸᨧ᩠ᨧᨿᩮᩣ ᩅᩣ, ᨶᩥᨣ᩠ᨣᩉᩦᨲᩔ ᨾᩮᩣ, ᩋᩔ ᨧ ᨴᩦᨥᩮᩣ, ᩈᩣᨾᩥᨠᩮᩣ. ᨽᩁ ᨽᩁᨱᩮ, ᨽᩁᨲᩦᨲᩥ ᨽᨲ᩠ᨲᩣ, ᩁᩥᨲᩩ. ᨠᨾᩩ ᩍᨧ᩠ᨨᩣᨿᩴ, ᨲᩮᩣ, ‘‘ᨸᨠ᩠ᨠᨾᩣᨴᩦᩉᩥ ᨶ᩠ᨲᩮᩣ ᨧᩣ’’ᨲᩥ ᨶ᩠ᨲᨲ᩠ᨲᩴ. ᨸᩣ ᩁᨠ᩠ᨡᨱᩮ, ᩋᨲᩥ, ᨸᨲᩥ. ᩅᩁ ᩍᨧ᩠ᨨᩣᨿᩴ, ᩋ, ᩅᩁᩮᩣ. ᨸᩦ ᨲᨸ᩠ᨸᨶᨠᨶ᩠ᨲᩦᩈᩩ, ᨿᩮᩣ.

ᩁᨲᩥᨠᩣᩁᨱᨲ᩠ᨲᩣ ᨸᨲᩥᨶᩮᩣ ᩏᨸ ᩏᨸᨸᨲᩥ, ᩈᨾᩣᩈᩮ ᨠᨲᩮ ᩋᨽᩥᨵᩣᨶᨲᩮᩣ ᨸᩩᨻ᩠ᨻᨶᩥᨸᩣᨲᩮᩣ, ᩋᨸ᩠ᨸᨵᩣᨶᨽᩪᨲᩮᩣ ᩅᩣ ᨸᨲᩥ ᩏᨸᨸᨲᩥ. ᨩᩁ ᩅᨿᩮᩣᩉᩣᨶᩥᨾ᩠ᩉᩥ, ᨩᩦᨿᨶ᩠ᨲᩮ ᩋᨶᩮᨶᩣᨲᩥ ᨩᩣᩁᩮᩣ, ᨴᩣᩁᩮᩣ ᨧ.

ᩈᨲ᩠ᨲᨠᩴ ᨸᩩᨲ᩠ᨲᩮ. ᨶᩁᨠᩮ ᨶ ᨸᨲᨶ᩠ᨲ᩠ᨿᨶᩮᨶ ᨩᩣᨲᩮᨶᩣᨲᩥ ᩋᨸᨧ᩠ᨧᩴ, ᨸᨲ ᨣᨲᩥᨿᩴ, ᨿᩮᩣ, ᨲ᩠ᨿᩔ ᨧᩮᩣ, ᨶ ᨸᨲᨲᩥ ᨶ ᩅᩥᨧ᩠ᨨᩥᨶ᩠ᨴᨲᩥ ᩅᩴᩈᩮᩣ ¶ ᩑᨲᩮᨶᩣᨲᩥ ᩅᩣ ᩋᨸᨧ᩠ᨧᩴ, ᨸᩩᨲ᩠ᨲᩮ, ᨵᩦᨲᩁᩥ ᨧ ᨶᩥᨧ᩠ᨧᨶᨸᩩᩴᩈᨠᩮᩣᨿᩴ. ᨸᩪ ᨸᩅᨶᩮ. ᨸᩩᨶᩣᨲᩥ ᨸᩥᨲᩁᩮᩣ ᨲᩮᨶᩣᨲᩥ ᨸᩩᨲ᩠ᨲᩮᩣ. ‘‘ᨨᨴᩣᨴᩦᩉᩥ ᨲᨲᩕᨱ’’ᨲᩥ ᨲᩮᩣ. ᨸᩪᩁᩮᨲᩦᨲᩥ ᩅᩣ ᨸᩩᨲ᩠ᨲᩮᩣ. ᩋᨲ᩠ᨲᨲᩮᩣ ᨩᩣᨲᩮᩣ ᩋᨲᩕᨩᩮᩣ, ‘‘ᩋᨲ᩠ᨲᨩᩮᩣ’’ᨲᩥᨸᩥ ᨸᩣᨮᩮᩣ. ᩈᩩᨿᨲᩮᨲᩥ ᩈᩩᨲᩮᩣ. ᩈᩩ ᩋᨽᩥᩈᩅᩮ, ᩈᩩᨱᩣᨲᩦᨲᩥ ᩅᩣ ᩈᩩᨲᩮᩣ, ᨲᩮᩣ, ᩈᩩ ᩈᩅᨶᩮ. ᨲᨶᩩᨾ᩠ᩉᩣ ᨩᩣᨲᩮᩣ ᨲᨶᩩᨩᩮᩣ, ᨲᨶᨿᩮᩣ ᨧ, ᨿᩮᩣ, ᨲᨶᩮᩣᨲᩥ ᨾᩩᨴᨶ᩠ᨲᩥ ᩅᩣ ᨲᨶᨿᩮᩣ, ᩋᨿᩮᩣ. ᩈᩪᨿᨲᩮᨲᩥ ᩈᩪᨶᩩ, ᨠᨾ᩠ᨾᨶᩥ ᨶᩩ, ᩈᩪ ᨸᩈᩅᩮ.

ᨸᩩᨲ᩠ᨲᩣᨴᨿᩮᩣ ᩈᩪᨶᩩᨸᩁᩥᨿᨶ᩠ᨲᩣ ᨵᩦᨲᩁᩥ ᩅᨲ᩠ᨲᨾᩣᨶᩣ ᩍᨲ᩠ᨳᩥᨿᩴ ᩅᨲ᩠ᨲᨶ᩠ᨲᩥ. ᨴᩩᩉᩥᨲᩣ, ᨵᩦᨲᩣ ᨧ ᩈᨴᩣ ᨶᩣᩁᩥᨿᨾᩮᩅ. ᨴᩩᩉ ᨸᨸᩪᩁᨱᩮ, ᩁᩣᨲᩩ, ᩒᨲ᩠ᨲᩣᨽᩣᩅᩮᩣ, ᩍᨠᩣᩁᩣᨣᨾᩮᩣ ᨧ. ᨵᩣ ᨵᩣᩁᨱᩮ, ᩁᩣᨲᩩ, ᩌᩔᩦ. ᨸᩩᨲ᩠ᨲᩣᨴᨿᩮᩣ ᨧ ᨲᩮ ᩈᩣᨾᨬ᩠ᨬᩮᨶᩮᩅ ᨠᩩᨱ᩠ᨯᨣᩮᩣᩃᨠᩣᨴᩦᨶᩴ ᩅᩣᨧᨠᩣ. ᩈᩅᨱ᩠ᨱᩣᨿᩴ ᨲᩩ ᩐᨰᩣᨿᩴ ᩈᨩᩣᨲᩮᩣ ᩈᨿᩴ ᨩᨶᩥᨲᩮᩣ ᩈᩩᨲᩮᩣ ᩒᩁᩈᩮᩣ ᨶᩣᨾ. ᩈᨩᩣᨲᩈᨴ᩠ᨴᩮᨶ ᨠᩩᨱ᩠ᨯᨠᨣᩮᩣᩃᨠᨡᨲ᩠ᨲᩣᨴᩥᨻ᩠ᨿᩅᨧ᩠ᨨᩮᨴᩮᩣ. ᨩᩦᩅᨲᩥ ᨽᨲ᩠ᨲᩁᩥ ᨩᩣᩁᨩᩮᩣ ᩈᩩᨲᩮᩣ ᨠᩩᨱ᩠ᨯᩣᨡ᩠ᨿᩮᩣ. ᨾᨲᩮ ᨽᨲ᩠ᨲᩁᩥ ᨩᩣᩁᨩᩮᩣ ᨣᩮᩣᩃᨠᩣᨡ᩠ᨿᩮᩣ. ᩋᩁᩥᨿᩣᩈᩩᨴ᩠ᨴᨩᩮᩣ ᩈᩩᨲᩮᩣ ᨡᨲ᩠ᨲᩣ ᨶᩣᨾ [ᨡᨲ᩠ᨲᩣ ᩋᩁᩥᨿᩣᩈᩩᨴ᩠ᨴᩣᨶᩴ (ᩋᨾᩁ ᪒᪐.᪓)]. ᩌᨴᩥᨶᩣ ᨾᩣᨣᨵᩣᨴᩦᨶᩴ ᨣᩉᨱᩴ. ᩅᩩᨲ᩠ᨲᨬ᩠ᩉᩥ –

‘‘ᩋᨾᨲᩮ ᨩᩣᩁᨩᩮᩣ ᨠᩩᨱ᩠ᨯᩮᩣ,

ᨾᨲᩮ ᨽᨲ᩠ᨲᩁᩥ ᨣᩮᩣᩃᨠᩮᩣ’’ᨲᩥ [ᩋᨾᩁ ᪑᪖.᪓᪖].

‘‘ᨾᩣᨣᨵᩮᩣ ᩈᩩᨴ᩠ᨴᨡᨲ᩠ᨲᩣᨩᩮᩣ’’ᨲᩥ [ᩋᨽᩥᨵᩣᨶᩩ ᪕᪐᪓ ᨣᩣᨳᩣ] ᨧ.

ᩏᩁᩈᩣ ᨾᨶᩈᩣ ᨶᩥᨾ᩠ᨾᩥᨲᩮᩣ, ᩏᩁᩈᨴ᩠ᨴᩣ ᨲᨲᩥᨿᨶ᩠ᨲᩣ ᨶᩥᨾ᩠ᨾᩥᨲᨲ᩠ᨳᩮ ᨱᩮᩣ, ᨶᩥᩅᩥᨭ᩠ᨮᨲ᩠ᨲᩣ ᨲᩮᨶ ᨶᩥᨾ᩠ᨾᩥᨲᩮᩣᨲᩥ ᩅᩩᨧ᩠ᨧᨲᩥ. ᩏᩁᩈᩥ ᨽᩅᩮᩣᨲᩥ ᩅᩣ ᩒᩁᩈᩮᩣ.

᪒᪔᪒. ᨧᨲᩩᨠ᩠ᨠᩴᨸᨲᩥᨸᨲᩥᨶᩦᨶᩴ ¶ ᨿᩩᨣᩮ, ‘‘ᨴᩣᩁᩣ ᨸᩩᨾᩮ ᨻᩉᩩᨲ᩠ᨲᩮ ᨧ, ᨴᩴ ᨠᩃᨲᩕᩮ ᨶᨸᩩᩴᩈᨠᩮ’’ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪖.᪓᪘] ᩋᨾᩁᨾᩣᩃᩣ, ᨩᩴᩈᨴ᩠ᨴᩮᩣ ᨲ᩠ᩅᨻ᩠ᨿᨿᩮᩣ ᨴᩣᩁᩅᨧᨶᩮᩣ. ᨲᩈ᩠ᨾᩣ ‘‘ᨩᨾ᩠ᨸᨲᩥ, ᨴᨾ᩠ᨸᨲᩦ’’ᨲᩥᨸᩥ ᨽᩅᩥᨲᨻ᩠ᨻᩴ, ᩍᨵ ᨸᨶ ᨠᨧ᩠ᨧᩣᨿᨶᨾᨲᩮᨶᩮᩣᨴᩣᩉᨭᩣ. ᨩᩣᨿᩣ ᨧ ᨸᨲᩥ ᨧ ᨩᩣᨿᩣᨸᨲᩥ. ᩍᨲᩁᩦᨲᩁᨿᩮᩣᨣᨴ᩠ᩅᨶ᩠ᨴᩮᩣ. ᨩᩣᨿᩣ ᨧ ᨸᨲᩥ ᨧ ᨩᩣᨶᩥᨸᨲᩥ, ᨲᨳᩣ ᨩᩣᨿᨾ᩠ᨸᨲᩥᩌᨴᨿᩮᩣ, ᨩᩣᨿᩣᩈᨴ᩠ᨴᩔ ᨸᨲᩥᨾ᩠ᩉᩥ ᨸᩁᩮ ᨩᩣᨶᩥ, ᨲᩩᨴᨬ᩠ᨧ, ᨩᩣᨿᨬ᩠ᨧ ᨿᨴᩣᨴᩥᨶᩣ.

ᨲᩥᨠᩴ ᨶᨸᩩᩴᩈᨠᩮ. ᩅᩥᨣᨲᩮᩣ ᩁᩣᨣᩔᩅᩮᩣ ᨿᩈ᩠ᨾᩣ ᩅᩔᩅᩁᩮᩣ. ᩈᩩ ᩈᩅᨶᩮ, ᩋᩁᩮᩣ. ᨸᨱ ᨻ᩠ᨿᩅᩉᩣᩁᩮ, ᨯᩮᩣ, ᨸᨯᩥ ᩃᩥᨦ᩠ᨣᩅᩮᨠᩃ᩠ᨿᩮ ᩅᩣ, ᨽᩪᩅᩣᨴᩥ. ᨶ ᩍᨲ᩠ᨳᩦ ᨶ ᨸᩩᨾᩣ ᨶᨸᩩᩴᩈᨠᩴ, ᨶᩥᩁᩩᨲ᩠ᨲᩥᨶᨿᩮᨶ ᩍᨲ᩠ᨳᩥᨸᩩᨾᩣᨶᩴ ᨸᩩᩴᩈᨠᨽᩣᩅᩮᩣ, ᨶᩔ ᨧ ᨸᨠᨲᩥ. ᨲᨲᩥᨿᩣᨸᨠᨲᩥ, ᩈᨱ᩠ᨯᩮᩣ, ᨠᩃᩦᨻᨶ᩠ᨲᩥᨸᩥ ᨲᩔ ᨶᩣᨾᩣᨶᩥ. ᨲᨲᩥᨿᩣ ᨸᨠᨲᩥ ᨲᨲᩥᨿᨸ᩠ᨸᨠᩣᩁᩮᩣ, ᩈᨾᨩᩣᨲᩥᨠᩮ ᩍᨲ᩠ᨳᩥᨸᩩᩁᩥᩈᩮ ᩋᨸᩮᨠ᩠ᨡᩥᨲ᩠ᩅᩣ ᨲᨲᩥᨿᨲ᩠ᨲᩴ ᨸᨠᩣᩁᩔ. ᨸᨮᨾᩣ ᩉᩥ ᨸᨠᨲᩥ ᩍᨲ᩠ᨳᩦ, ᨴᩩᨲᩥᨿᩣ ᨸᨠᨲᩥ ᨸᩩᩁᩥᩈᩮᩣ, ᩍᨲᩁᨸᨠᨲᩥ ᨲᨲᩥᨿᩣ ᨸᨠᨲᩥ.

᪒᪔᪓. ᨨᨠ᩠ᨠᩴ ᨬᩣᨲᩥᨾᨲ᩠ᨲᩮ, ᨻᨶ᩠ᨵᩩᨿᩮᩅ ᨻᨶ᩠ᨵᩅᩮᩣ, ᩋ, ᩏᩔᩣᩅᩮᩣ. ᨻᨶ᩠ᨵᨲᩦᨲᩥ ᨻᨶ᩠ᨵᩩ, ᩏ. ᩈᩔ ᩋᨲ᩠ᨲᨶᩮᩣ ᨩᨶᩮᩣ ᩈᨩᨶᩮᩣ. ᩈᨾᩣᨶᩴ ᨣᩮᩣᨲ᩠ᨲᩴ ᨠᩩᩃᩴ ᩋᩔᩣᨲᩥ ᩈᨣᩮᩣᨲ᩠ᨲᩮᩣ, ᩈᨾᩣᨶᩔ ᩈᨽᩣᩅᩮᩣ. ᨬᩣ ᩋᩅᨻᩮᩣᨵᨶᩮ, ᨠᨾ᩠ᨾᩮᨲᩥ, ᨬᩣᨲᩥᨿᩮᩅ ᨬᩣᨲᨠᩮᩣ, ᩋᨲ᩠ᨲᩴ, ᩈᨠᨲ᩠ᨳᩮ ᨠᩮᩣ ᨧ. ᩈᩩᩈᨴ᩠ᨴᩮᩣᨸ᩠ᨿᨲᩕ [ᩈ᩠ᩅ (ᩋᨾᩁ ᪑᪖.᪓᪖)].

ᨴ᩠ᩅᨿᩴ ¶ ᩈᨲ᩠ᨲᨸᩩᩁᩥᩈᩣᩅᨵᩥᨠᩮᩈᩩ ᨶᩥᨠᨭᨬᩣᨲᩦᩈᩩ. ᩃᩮᩣᩉᩥᨲᩮᨶ ᩈᨾ᩠ᨻᨶ᩠ᨵᩮᩣ ᩈᩣᩃᩮᩣᩉᩥᨲᩮᩣ, ᩈᨾ᩠ᨻᨶ᩠ᨵᩔ ᩈᩣᨴᩮᩈᩮᩣ, ᨸᩩᨻ᩠ᨻᨶᩥᨸᩣᨲᩮᩣ ᨧ, ᩈᨾᩣᨶᩴ ᨸᩥᨱ᩠ᨯᨴᩣᨶᩴ ᨿᩔ ᩈᨸᩥᨱ᩠ᨯᩮᩣ, ᩈᨶᩣᨽᨿᩮᩣᨸ᩠ᨿᨲᩕ [ᨶᩣᨽᩥ ᩈᨲ᩠ᨲᨸᩩᩁᩥᩈᩣᩅᨵᩥᨠᨠᩩᩃᩮ (ᨧᩥᨶ᩠ᨲᩣᨾᨱᩥᨭᩦᨠᩣ ᪑᪖.᪓᪓)]. ᨲᩥᨠᩴ ᨸᩥᨲᩁᩥ. ᨲᩣ ᨸᩣᩃᨶᩮ, ᨲᩮᩣ ᨠᨲ᩠ᨲᩁᩥ. ᨩᨶᨿᨲᩦᨲᩥ ᨩᨶᨠᩮᩣ, ᨱ᩠ᩅᩩ. ᨸᩣ ᩁᨠ᩠ᨡᨱᩮ, ᩁᩥᨲᩩ, ᩋᩔᩥᨲ᩠ᨲᩴ.

᪒᪔᪔. ᨨᨠ᩠ᨠᩴ ᨾᩣᨲᩁᩥ. ᩋᨾ ᨸᩪᨩᩣᨿᩴ, ᨠᨾ᩠ᨾᨶᩥ ᨾᩮᩣ, ᨻᩮᩣ ᨧ, ᩋᨾ᩠ᨾᩣ, ᩋᨾ᩠ᨻᩣ. ᨩᨶᨿᨲᩦᨲᩥ ᨩᨶᨶᩦ, ᨿᩩ, ᨶᨴᩣᨴᩥ. ᨾᩣᨶ ᨸᩪᨩᩣᨿᩴ, ᨸᩩᨲ᩠ᨲᩴ ᨾᩣᨶᩮᨲᩦᨲᩥ ᨾᩣᨲᩣ, ᩁᩣᨲᩩ, ᨸᩣᨲᩦᨲᩥ ᩅᩣ ᨾᩣᨲᩣ, ᨸᩣᨲᩥᩔ ᨾᩮᩣ. ᨩᨶᩮᨲᩦᨲᩥ ᨩᨶᩮᨲ᩠ᨲᩥ,ᨲᩥ. ᨩᨶᩮᨲᩦᨲᩥ ᨩᨶᩥᨠᩣ, ᨱ᩠ᩅᩩ, ᩍᨲ᩠ᨲᩴ.

ᩋᨸ᩠ᨸᨵᩣᨶᨽᩪᨲᩣ ᨾᩣᨲᩣ ᩏᨸᨾᩣᨲᩣ, ᨠᩩᨾᩣᩁᩮ ᨵᩣᩁᩮᨲᩦᨲᩥ ᨵᩣᨲᩥ. ᨵᩣ ᨵᩣᩁᨱᩮ,ᨲᩥ. ᨩᩣᨿᩣᨿ ᨽᩁᩥᨿᩣᨿ ᨽᩣᨲᩥᨠᩮᩣ ᨠᨶᩥᨭ᩠ᨮᩮᩣ ᨧ ᨩᩮᨭ᩠ᨮᩮᩣ ᨧ ᩈᩣᩃᩮᩣ ᨶᩣᨾ, ᩈᩔ ᩋᨲ᩠ᨲᨶᩮᩣ ᩑᩈᩣ ᩈᩣ, ᨽᩁᩥᨿᩣ, ᨲᩔᩣ ᨽᩣᨲᩣ ᩈᩣᩃᩮᩣ, ᨩᩣᨿᩣᨿ ᨽᩣᨲᩁᩥ ᩋᩃᩮᩣ. ᩈᩁ ᨣᨲᩥᨧᩥᨶ᩠ᨲᩣᩉᩥᩴᩈᩣᩈᩩ ᩅᩣ, ᨱᩮᩣ, ᩃᨲ᩠ᨲᩴ, ᩈᩣᩃ ᩅᩥᨲᨠ᩠ᨠᩮ ᩅᩣ, ᨧᩩᩁᩣᨴᩥ.

᪒᪔᪕. ᩈᩣᨾᩥᨶᩮᩣ ᨽᨲ᩠ᨲᩩ ᨽᨣᩥᨶᩦ ᨶᨶᨶ᩠ᨴᩣ ᨶᩣᨾ, ᨶ ᨶᨶ᩠ᨴᨲᩦᨲᩥ ᨶᨶᨶ᩠ᨴᩣ, ᩋᨲ᩠ᨲᩣᨽᩣᩅᩮᩣ ᨶᩔ ᩅᩥᨽᩣᩈᩣᨵᩥᨠᩣᩁᩣ. ᨶᨶ᩠ᨴ ᩈᨾᩥᨴ᩠ᨵᩥᨿᩴ, ᨽᩪᩅᩣᨴᩥ.

ᨴ᩠ᩅᨿᩴ ¶ ᩋᨿ᩠ᨿᩥᨠᩣᨿᩴ. ᨾᩣᨲᩩᨿᩣ ᨾᩣᨲᩣ ᨾᩣᨲᩣᨾᩉᩦ. ᨸᩥᨲᩪᨶᩴ ᨸᩥᨲᩁᩥ ᨧ ᨾᩣᨲᩁᩥ ᨧ ᩌᨾᩉᩴ ᨿᨴᩣᨴᩥᨶᩣ, ᨶᨴᩣᨴᩥ. ᩋᩁᩉ ᨸᩪᨩᩣᨿᩴ, ᨱ᩠ᩅᩩ, ᩁᩉᩔ ᨿᩮᩣ, ᩋᨿ ᨣᨲᩥᨾ᩠ᩉᩥ ᩅᩣ, ᨱ᩠ᩅᩩ, ᩋᨿ᩠ᨿᩥᨠᩣ.

ᨾᩣᨲᩩᨿᩣ ᨽᩣᨲᩣ ᨾᩣᨲᩩᩃᩮᩣ ᨶᩣᨾ, ᨾᩣᨲᩩᨿᩣ ᨽᩣᨲᩣ ᨾᩣᨲᩩᩃᩮᩣ, ᨾᩣᨲᩩ ᨽᩣᨲᩁᩥ ᩏᩃᨸᨧ᩠ᨧᨿᩮᩣ. ᩋᩔ ᨾᩣᨲᩩᩃᩔ ᨸᨩᩣᨸᨲᩥ ᨩᩣᨿᩣ ᨾᩣᨲᩩᩃᩣᨶᩦ ᨶᩣᨾ, ᨾᩣᨲᩩᩃᩔ ᨽᩁᩥᨿᩣ ᨾᩣᨲᩩᩃᩣᨶᩦ, ᨾᩣᨲᩩᩃᨽᩁᩥᨿᩣᨿᩴ ᩌᨶᩮᩣ, ᨶᨴᩣᨴᩥ, ᩋᨳ ᩅᩣ ᨾᩣᨲᩩᩃᩔ ᩑᩈᩣ ᨾᩣᨲᩩᩃᩣᨶᩦ, ᩎ, ᩋᩔ ᩌᨶᩮᩣ.

᪒᪔᪖. ᨩᩣᨿᩣᨸᨲᩦᨶᩴ ᨴ᩠ᩅᩥᨶ᩠ᨶᩴ ᨩᨶᨶᩦ ᨾᩣᨲᩣ ᩈᩔᩩ ᩅᩩᨲ᩠ᨲᩣ, ᩈᩈ ᨣᨲᩥᩉᩥᩴᩈᩣᨸᩣᨶᩮᩈᩩ. ᨲᨸ᩠ᨸᩥᨲᩣ ᨲᩮᩈᩴ ᨩᩣᨿᩣᨸᨲᩦᨶᩴ ᨸᩥᨲᩣ ᨸᨶ ᩈᩈᩩᩁᩮᩣ ᨶᩣᨾ, ᩈᩈᨵᩣᨲᩩᨾ᩠ᩉᩣ ᩏᩁᩮᩣ. ᨽᨣᩥᨶᩥᨿᩣ ᨸᩩᨲ᩠ᨲᩮᩣ ᨸᨶ ᨽᩣᨣᩥᨶᩮᨿ᩠ᨿᩮᩣ ᨶᩣᨾ, ᨽᨣᩥᨶᩥᨿᩣ ᩋᨸᨧ᩠ᨧᩴ ᨽᩣᨣᩥᨶᩮᨿ᩠ᨿᩮᩣ, ᨱᩮᨿ᩠ᨿᩮᩣ.

᪒᪔᪗. ᨴ᩠ᩅᨿᩴ ᩈᩩᨲᩔ, ᩈᩩᨲᩣᨿ ᨧ ᨸᩩᨲ᩠ᨲᩮᩈᩩ. ᨶᩉ ᨻᨶ᩠ᨵᨶᩮ, ᩁᩥᨲᩩ, ᨶᩦ ᨶᨿᩮ ᩅᩣ. ᨸᩩᨲ᩠ᨲᩔ ᨸᩩᨲ᩠ᨲᩮᩣ ᨸᨸᩩᨲ᩠ᨲᩮᩣ, ᨲ᩠ᨲᩃᩮᩣᨸᩮᩣ, ᩏᩔᨲ᩠ᨲᨬ᩠ᨧ. ᩈᩣᨾᩥᨽᩣᨲᩣ ᨴᩮᩅᩁᩮᩣ ᨶᩣᨾ, ᩋᨳ ᩅᩣ ᩈᩣᨾᩥᨽᩣᨲᩣ ᨠᨶᩥᨭ᩠ᨮᩮᩣ ᩈᩣᨾᩥᨶᩮᩣ ᨽᩣᨲᩣ ᨴᩮᩅᩁᩮᩣ ᨶᩣᨾ. ᨩᩮᨭ᩠ᨮᩮᩣ ᨲᩩ ᩈᩈᩩᩁᩮᩣ ᩑᩅᩮᩣᨧ᩠ᨧᨲᩮ. ᨴᩥᩅᩩ ᨠᩦᩊᩣᨿᩴ, ᩋᩁᩮᩣ.

ᨴ᩠ᩅᨿᩴ ¶ ᨵᩦᨲᩩᨸᨲᩥᨾ᩠ᩉᩥ. ᨩᨶ ᨩᨶᨶᩮ, ᩁᩥᨲᩩ, ᩋᩔᩣᨲ᩠ᨲᩴ, ᨶᩔ ᨾᩣᨴᩮᩈᩮᩣ ᨧ. ᨴ᩠ᩅᨿᩴ ᨸᩥᨲᩩᨸᩥᨲᩁᩥ. ᨸᩥᨲᩩᨶᩮᩣ ᨸᩥᨲᩣ ᨸᩥᨲᩣᨾᩉᩮᩣ.

᪒᪔᪘. ᩉᩩᩈᩣᨶ᩠ᨲᩣᨶᩥ ᨸᨴᩮᨶ ᨸᨴᩮᨶ ᨶᩣᨾᩣᨶᩥ. ᨾᩣᨲᩩᨿᩣ ᨽᨣᩥᨶᩦ ᨾᩣᨲᩩᨧ᩠ᨨᩣ, ᨧ᩠ᨨᩮᩣ. ᨸᩥᨲᩩᨶᩮᩣ ᨽᨣᩥᨶᩦ ᨸᩥᨲᩩᨧ᩠ᨨᩣ, ᨸᩥᨲᩩᨽᨣᩥᨶᩦ ᨸᩥᨲᩩᨧ᩠ᨨᩣ ᨽᩅᩮᨲ᩠ᨿᨲ᩠ᨳᩮᩣ.

ᨸᩥᨲᩣᨾᩉᩈᨴ᩠ᨴᩮᩣ ᨶ ᨠᩮᩅᩃᩴ ᨩᨶᨠᨸᩥᨲᩁᨾᩮᩅ ᩅᨴᨲᩥ, ᩋᨳ ᨡᩮᩣ ᨩᨶᨠᨸᩥᨲᩩᨸᩥᨲᩣᨴᨿᩮᩣᨸᩦᨲᩥ ᩑᨲ᩠ᨳᩣᨸᩥ ‘‘ᨸᨸᩥᨲᩣᨾᩉᩮᩣ’’ ᩍᨧ᩠ᨧᩩᨴᩣᩉᨭᩮᩣ. ᨸᩥᨲᩩᨶᩮᩣ ᩋᨿ᩠ᨿᨠᩮᩣ ᨸᨿ᩠ᨿᨠᩮᩣ, ᨲᩩᩃᩮᩣᨸᩮᩣ. ᩈᩩ ᩈᩅᨶᩮ, ᨱ᩠ᩉᩣ. ᨱᩥᩈᨾ᩠ᩉᩥ ᩈᩩᨱᩥᩈᩣ. ᩈᨾ᩠ᩉᩥ ᩉᩩᩈᩣ, ᩉᨲ᩠ᨲᩴ. ᩈᨻ᩠ᨻᨲᩕ ‘‘ᩍᨲ᩠ᨳᩥᨿᨾᨲᩮᩣ ᩌᨸᨧ᩠ᨧᨿᩮᩣ’’ᨲᩥ ᩌ.

᪒᪔᪙. ᨧᨲᩩᨠ᩠ᨠᩴ ᩑᨠᩮᩣᨴᩁᩮ ᨽᩣᨲᩁᩥ. ᩈᨾᩣᨶᩮᩣᨴᩁᩮ ᨮᩥᨲᩮᩣ ᩈᩮᩣᨴᩁᩥᨿᩮᩣ, ᩈᨾᩣᨶᩔ ᩈᩮᩣ. ᩈᨾᩣᨶᩮᩣ ᨣᨻ᩠ᨽᩮᩣ ᩈᨣᨻ᩠ᨽᩮᩣ, ᨲᨲᩕ ᨽᩅᩮᩣ ᩈᨣᨻ᩠ᨽᩮᩣ, ᨱᩮᩣ. ᩈᨾᩣᨶᩮᩣᨴᩁᩮ ᨩᩣᨲᩮᩣ ᩈᩮᩣᨴᩁᩮᩣ. ᩈᨾᩣᨶᩮᩣᨴᩁᩮ ᨩᩣᨲᩮᩣ ᩈᩉᨩᩮᩣ. ᩈᩉᩈᨴ᩠ᨴᩮᩣ ᨲᩩᩃ᩠ᨿᩅᨧᨶᩮᩣ.

ᨾᩣᨲᩣᨸᩥᨲᩪ ᨲᩮ ᨴ᩠ᩅᩮ ᨩᨶᩣ ᨸᩥᨲᩁᩮᩣ ᩅᩩᨧ᩠ᨧᨶ᩠ᨲᩮ. ᩏᨽᩥᨶ᩠ᨶᨾ᩠ᨸᩥ ᨩᨶᨠᨻ᩠ᨿᨸ᩠ᨸᨴᩮᩈᨶᩥᨿᨲᨲ᩠ᨲᩣ ᩋᨽᩮᨴᩅᨧᨶᩥᨧ᩠ᨨᩣᨿᩴ ᨸᩥᨲᩩᨲ᩠ᨲᨾᨲ᩠ᨳᩮᩅ. ᨶᨶ᩠ᩅᨽᩮᨴᩣ ᨩᩣᨲᩥ, ᨲᩔᩣ ᨧᩮᩣᨽᨿᨲᩕ ᩈᨲ᩠ᨲᩣᨴᩮᨠᨲ᩠ᨲᩴ, ᨶ ᨧ ᨩᩣᨲᩥᨿᩣ ¶ ᩃᩥᨦ᩠ᨣᩈᨦ᩠ᨡ᩠ᨿᩣ ᨽᩅᨶ᩠ᨲᩥ, ᩋᨴᨻ᩠ᨻᨲ᩠ᨲᩣ ᨻᩉᩩᩅᨧᨶᩴ ᨶ ᩈᩥᨿᩣᨲᩥ? ᨶᩮᩈ ᨴᩮᩣᩈᩮᩣ, ᨶ ᩉᩥ ᨩᩣᨲᩥᨸᨴᨲ᩠ᨳᩥᨠᩔ ᨶ ᨴᨻ᩠ᨻᩴ, ᨴᨻ᩠ᨻᨸᨴᨲ᩠ᨳᩥᨠᩔ ᩅᩣ ᨶ ᨩᩣᨲᩦᨲᩥ. ᨠᩥᨶ᩠ᨲᩩᨽᨿᩮᩈᩴᨸ᩠ᨿᩩᨽᨿᨸᨴᨲ᩠ᨳᩮᩣ ᩍᩉᩣᨲ᩠ᨳᩅᩥᩈᩮᩈᩮᩣ. ᨩᩣᨲᩥᨸᨴᨲ᩠ᨳᩥᨠᩔ ᨩᩣᨲᩥ ᨸᨵᩣᨶᨽᩪᨲᩣ ᨴᨻ᩠ᨻᩴ ᨣᩩᨱᨽᩪᨲᩴ, ᨴᨻ᩠ᨻᨸᨴᨲ᩠ᨳᩥᨠᩔ ᨲᩩ ᩅᩥᨸᩁᩥᨿᨿᩮᩣ, ᨲᨲᩕ ᨩᩣᨲᩥᩅᨧᨶᩥᨧ᩠ᨨᩣᨿᩴ ᨴᨻ᩠ᨻᩮ ᩅᩥᨿ ᩃᩥᨦ᩠ᨣᩈᨦ᩠ᨡ᩠ᨿᩣ ᩅᨲ᩠ᨲᨻ᩠ᨻᩣ, ᨲᩔ ᨧ ᨻᩉᩩᨲ᩠ᨲᩣ ᨻᩉᩩᩅᨧᨶᩴ. ᨸᩩᨻ᩠ᨻᩮ ᩅᩥᨿᩣᨽᩮᨴᩅᨧᨶᩥᨧ᩠ᨨᩣᨿᩴ ᨸᩩᨲ᩠ᨲᩮᩣ ᨧ ᨵᩦᨲᩣ ᨧ ᨸᩩᨲ᩠ᨲᩣ ᩅᩩᨧ᩠ᨧᨶ᩠ᨲᩮ, ᨩᨬ᩠ᨬᨲ᩠ᨲᨬ᩠ᩉᩥ ᨸᩩᨲ᩠ᨲᨻ᩠ᨿᨸᨴᩮᩈᨶᩥᨿᨲᩴ ᨵᩦᨲᩁᩥᨸ᩠ᨿᨲ᩠ᨳᩥ, ᩅᩥᨸᩁᩥᨿᨿᩮ ᨲᩩ ᨶ ᨽᩅᨲ᩠ᨿᨶᨽᩥᨵᩣᨶᨲᩮᩣ. ᨽᩮᨴᩅᨧᨶᩥᨧ᩠ᨨᩣᨿᩴ ᨸᩩᨲ᩠ᨲᨵᩦᨲᩁᩮᩣᨲᩥ ᨽᩅᨲᩥ.

᪒᪕᪐. ᩈᩔᩩ ᨧ ᩈᩈᩩᩁᩮᩣ ᨧ ᩈᩈᩩᩁᩣᨲᩥ ᩅᩩᨧ᩠ᨧᨶ᩠ᨲᩮ. ᨲᨴᨸᨧ᩠ᨧᩮᩣᩉᨶᩈᨾ᩠ᨻᨶ᩠ᨵᩥᨶᩥᨻᨶ᩠ᨵᨶᩣ ᩉᩥ ᨻ᩠ᨿᨸ᩠ᨸᨴᩮᩈᩮᩣ ᩈᩔᩩᨿᨾ᩠ᨸᩥ ᨮᩥᨲᩮᩣ. ᨽᩮᨴᩅᨧᨶᩥᨧ᩠ᨨᩣᨿᩴ ᨲᩩ ᨸᩩᨻ᩠ᨻᩮ ᩅᩥᨿ ᨸᨧ᩠ᨧᨲ᩠ᨳᩴ ᩈᨴ᩠ᨴᨶᩥᩅᩮᩈᩮᩣ. ᨽᩣᨲᩣ ᨧ ᨽᨣᩥᨶᩦ ᨧ ᨽᩣᨲᩁᩮᩣ ᩅᩩᨧ᩠ᨧᨶ᩠ᨲᩮ. ᩑᨠᨣᨻ᩠ᨽᩮᩣᩈᩥᨲᨲ᩠ᨲᩴ ᨽᩣᨲᩩᨻ᩠ᨿᨸ᩠ᨸᨴᩮᩈᨶᩥᨿᨲᩴ ᨽᨣᩥᨶᩥᨿᩴᨸ᩠ᨿᨲ᩠ᨳᩥ. ᨲᨲᩮᩣ ᩑᨠᨣᨻ᩠ᨽᩮᩣᩈᩥᨲᨲ᩠ᨲᩔᩣᨽᩮᨴᩅᨧᨶᩥᨧ᩠ᨨᩣᨿᩴ ᩏᨽᩮᩣ ᨽᩣᨲᩁᩮᩣ ᩅᩩᨧ᩠ᨧᨶ᩠ᨲᩮ. ᩑᨲ᩠ᨳ ᨧ ᩈᨻ᩠ᨻᨲᩕᩣᨸᩥ ᩅᩥᩁᩪᨸᩮᨠᩈᩮᩈᩮᩣ ᨴᨭ᩠ᨮᨻ᩠ᨻᩮᩣ. ᨴᩩᩅᩥᨵᩮᩣ ᩉᩥ ᩑᨠᩈᩮᩈᩮᩣ ᩈᩁᩪᨸᩣᩈᩁᩪᨸᩅᩈᩮᨶ. ᨲᨲᩕ ᩈᩁᩪᨸᩮᨠᩈᩮᩈᩮ ᨻᩉᩩᩅᨧᨶᨾᩮᩅ, ᩍᨲᩁᨲᩕ ᨸᨶ ᨴ᩠ᩅᩥᩅᨧᨶᩴ, ᨿᨳᩣ ᨸᩩᩁᩥᩈᩮᩣ ᨧ ᨸᩩᩁᩥᩈᩮᩣ ᨧ ᨸᩩᩁᩥᩈᩣ, ᨶᩣᨾᨬ᩠ᨧ ᩁᩪᨸᨬ᩠ᨧ ᨶᩣᨾᩁᩪᨸᨬ᩠ᨧ ᨶᩣᨾᩁᩪᨸᩴ, ᨾᩣᨲᩣ ᨧ ᨸᩥᨲᩣ ᨧ ᨸᩥᨲᩁᩮᩣᨲᩥ.

ᨻᩣᩃ᩠ᨿᨿᩮᩣᨻ᩠ᨻᨶᩅᩩᨯ᩠ᨰᨲ᩠ᨲᩣᨶᩥ ᨲᩦᨱᩥ ᩅᨿᩣᨶᩥ. ᨲᨲᩕ ᨲᩥᨠᩴ ᨻᩣᩃ᩠ᨿᩮ. ᨴ᩠ᩅᨿᩴ ᨿᩮᩣᨻ᩠ᨻᨶᩮ. ᨻᩣᩃᩔ ᨽᩣᩅᩮᩣ ᨻᩣᩃᨲ᩠ᨲᩴ, ᨲ᩠ᨲᩴ. ᨲᩣᨸᨧ᩠ᨧᨿᩮ ᨻᩣᩃᨲᩣ. ᨱ᩠ᨿᨾ᩠ᩉᩥ ᨻᩣᩃ᩠ᨿᩴ, ᩋᨳ ᩅᩣ ᨻᩃ ᨸᩣᨱᨶᩮ, ᨻᩃᨶ᩠ᨲᩥ ᩋᩔᩈᩥᨲᨸᩔᩈᩥᨲᨾᨲ᩠ᨲᩮᨶ ¶ ᨸᨱᨶ᩠ᨲᩦᨲᩥ ᨻᩣᩃᩣ, ᨻᩃ᩠ᨿᨶ᩠ᨲᩮ ᩈᩴᩅᩁᩦᨿᨶ᩠ᨲᩮᨲᩥ ᩅᩣ ᨻᩣᩃᩣ, ᨻᩃ ᩈᩴᩅᩁᨱᩮ. ᨲᩮᩈᩴ ᨽᩣᩅᩮᩣ ᨻᩣᩃᨲ᩠ᨲᩣᨴᩥ. ᨿᩩᩅᩔ ᨽᩣᩅᩮᩣ ᨿᩮᩣᨻ᩠ᨻᨬ᩠ᨬᩴ, ᨿᩮᩣᨻ᩠ᨻᨶᨬ᩠ᨧ, ᨽᩣᩅᩮ ᨱ᩠ᨿᩮᩣ, ᨱᩮᩣ ᨧ, ᩋᨳ ᩅᩣ ᨿᩩ ᨾᩥᩔᨶᩮ, ᨿᩩ, ᩏᩔ ᩏᩅᩣᨴᩮᩈᩮᩣ, ᩅᩩᨴ᩠ᨵᩥ. ᨲᩮᩈᩴ ᨽᩣᩅᩮᩣ ᨿᩮᩣᨻ᩠ᨻᨬ᩠ᨬᩣᨴᩥ.

᪒᪕᪑. ᨿᩮ ᨩᩁᩣᨠᨲᩣ ᩈᩩᨠ᩠ᨠᩣ ᨠᩮᩈᩣᨴᨿᩮᩣ, ᨲᩮ ᨸᩃᩥᨲᩴ ᨶᩣᨾ ᩈᩥᨿᩩᩴ, ᨲᩮᩈᩴ ᩅᩣ ᨿᩴ ᩈᩩᨠ᩠ᨠᨲ᩠ᨲᩴ, ᨲᩴ ᨸᩃᩥᨲᩴ ᨶᩣᨾ. ᨸᨧ ᨸᩣᨠᩮ, ᩍᨲᩮᩣ, ᨧᩔ ᩃᨲ᩠ᨲᨬ᩠ᨧ.

ᨴ᩠ᩅᨿᩴ ᩅᩃᩥᨸᩃᩥᨲᩣᨴᩥᨾᨲᩥ ᨠᩣᨿᨸᩁᩥᨸᩣᨠᩮ. ᨩᩦᨿᨶ᩠ᨲᩥ ᩅᩩᨯ᩠ᨰᩣ ᨽᩅᨶ᩠ᨲᩥ ᩋᩔᩴ ᨩᩁᩣ, ᨩᩁ ᩅᨿᩮᩣᩉᩣᨶᩥᨾ᩠ᩉᩥ, ᨩᩁᩣ ᩑᩅ ᨩᩁᨲᩣ, ᩈᨠᨲ᩠ᨳᩮ ᨲᩣᨸᨧ᩠ᨧᨿᩮᩣ. ᩅᩥᩔᩈᩣᨲᩥᨸᩥ ᨩᩁᩣᨿ ᨶᩣᨾᩴ. ᩅᩥᩈᩮᩈᩮᨶ ᩈᩴᩈᨲᩮ ᩋᨵᩮᩣ ᨸᩣᨲᨿᨲᩦᨲᩥ ᩅᩥᩔᩈᩣ. ᩈᩴᩈᨲᩥ’ᩁᨿᩴ ᨸᨾᩣᨴᨲ᩠ᨳᩮᩣ, ᩋᩅᩈᩴᩈᨶᨲ᩠ᨳᩮᩣ ᨧ, ᩍᩉ ᩋᩅᩈᩴᩈᨶᨲ᩠ᨳᩮᩣ, ᨶᩥᨣ᩠ᨣᩉᩦᨲᩃᩮᩣᨸᩮᩣ, ᨴ᩠ᩅᩥᨲ᩠ᨲᨬ᩠ᨧ.

ᨻᩣᩃ᩠ᨿᨿᩮᩣᨻ᩠ᨻᨶᩅᩩᨯ᩠ᨰᨲ᩠ᨲᩣᨶᩥ ᨸᩩᨻ᩠ᨻᩮ ᩅᩩᨲ᩠ᨲᩣᨶᩥ. ᩍᨴᩣᨶᩥ ᨲᨻ᩠ᨻᨲᩥᨶᩣᨾᩣᨶ᩠ᨿᩣᩉ. ᨲᨲᩕ ᩋᨴ᩠ᨵᩴ ᨨᩣᨸᩈᩣᨾᨬ᩠ᨬᩮ. ᨸᩩᨳ, ᨸᨳ ᩅᩥᨲ᩠ᨳᩣᩁᩮ, ᩏᨠᩮᩣ, ᨸᩩᨳᩩᨠᩮᩣ, ᨸᩃ ᨣᨾᨶᩮ, ᨱ᩠ᩅᩩ, ᩋᩔᩥᨲ᩠ᨲᩴ, ᨴ᩠ᩅᩥᨲ᩠ᨲᨬ᩠ᨧ, ᨸᩥᩃ᩠ᩃᨠᩮᩣ. ᨨᩩᨸ ᩈᨾ᩠ᨹᩔᩮ, ᩏᩔᩣᨲ᩠ᨲᩴ, ᨨᩣᨸᩮᩣ. ᨠᩩᨾᩣᩁ ᨠᩦᩊᩣᨿᩴ, ᨠᩩᨾᩣᩁᩮᩣ. ᨻᩃ ᨸᩣᨱᨶᩮ, ᨱᩮᩣ, ᨻᩣᩃᩮᩣ, ᨸᩪ ᨸᩅᨶᩮ, ᨲᩮᩣ, ᩈᨠᨲ᩠ᨳᩮ ᨠᩮᩣ, ᨸᩮᩣᨲᨠᩮᩣ, ᩍᨲ᩠ᨳᩥᨿᩴ ᨸᩮᩣᨲᨠᩦ. ᨸᩮᩣᨲᩮᩣ, ᩈᩣᩅᩮᩣ, ᩈᩣᩅᨠᩮᩣ, ᩋᨻ᩠ᨽᨠᩮᩣ, ᨯᩥᨾ᩠ᨽᩮᩣ, ᩈᩩᩈᩩᨠᩮᩣ, ᩈᩩᩈᩩᩍᨧ᩠ᨧᩣᨴᩦᨶᩥᨸᩥ ᨨᩣᨸᩈᩣᨾᨬ᩠ᨬᨲ᩠ᨳᩣᨶᩥ.

᪒᪕᪒. ᨻᩣᩃᩈᩣᨾᨬ᩠ᨬᩅᩣᨧᨠᩣᨶᩥ ¶ ᨴᩔᩮᨲ᩠ᩅᩣ ᩅᩥᩈᩮᩈᨻᩣᩃᨶᩣᨾᩣᨶᩥ ᨴᩔᩮᨲᩩᨾᩣᩉ ‘‘ᩋᨳᩩ’’ᨧ᩠ᨧᩣᨴᩥ. ᩏᨲ᩠ᨲᩣᨶᩮᩣ, ᩏᨲ᩠ᨲᩣᨶᩴ ᩅᩣ ᩈᨿᨲᩦᨲᩥ ᩏᨲ᩠ᨲᩣᨶᩈᨿᩮᩣ. ᨠᨸᨧ᩠ᨧᨿᩮ ᩏᨲ᩠ᨲᩣᨶᩈᩮᨿ᩠ᨿᨠᩮᩣ. ᨳᨶᩴ ᨸᩥᩅᨲᩦᨲᩥ ᨳᨶᨸᩮᩣ, ᨯᩥᨾ᩠ᨽᩈᨴ᩠ᨴᩮᩣᨸ᩠ᨿᨲᩕ.

᪒᪕᪓. ᩈᨲ᩠ᨲᨠᩴ ᨲᩁᩩᨱᩮ.

ᩌᩈᩮᩣᩊᩈᩣ ᨽᩅᩮ ᨻᩣᩃᩮᩣ,

ᨲᩁᩩᨱᩮᩣ ᨲᩩ ᨲᨲᩮᩣ ᨽᩅᩮ;

ᩅᩩᨴ᩠ᨵᩮᩣ ᨲᩩ ᩈᨲ᩠ᨲᨲ᩠ᨿᩣᨿᩩᨾ᩠ᩉᩣ,

ᨲᩦᨱᩥ ᩅᨿᩣᨶᩥ ᩃᨠ᩠ᨡᨿᩮ.

ᨲᩁ ᨲᩁᨱᩮ, ᩏᨱᩮᩣ. ᩅᨿᩈᩥ ᨿᩮᩣᨻ᩠ᨻᨶᩮ ᨲᩥᨭ᩠ᨮᨲᩦᨲᩥ ᩅᨿᨭ᩠ᨮᩮᩣ, ᨲᩮᩣ, ‘‘ᩅᨿᩮᩣ ᨻᩣᩃ᩠ᨿᩣᨴᩥ ᨸᨠ᩠ᨡᩦ ᨧ, ᨿᩮᩣᨻ᩠ᨻᨶᨬ᩠ᨧ ᩅᨿᩮᩣ ᨠ᩠ᩅᨧᩦ’’ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪖.᪔᪒] ᩁᩩᨴ᩠ᨴᩮᩣ, ᨴᩉ ᨽᩈ᩠ᨾᩦᨠᩁᨱᩮ, ᩋᩁᩮᩣ, ᨿᩩ ᨾᩥᩔᨶᩮ, ᩋ, ᩏᩅᩣᨴᩮᩈᩮᩣ, ᩈᩥᩔᩣᨠᩣᩁᩮᩣ. ᩈᩈ ᨸ᩠ᩃᩩᨲᨣᨲᩥᨾ᩠ᩉᩥ, ᩏ, ᩋᩔᩩᨲ᩠ᨲᩴ, ᩈᩩᩈᩩ, ᨲᩁᩩᨱᩔ ᩅᩣ ᨸᩣᨭᩥᨸᨴᩥᨠᩔ ᩈᩩᩈ᩠ᩅᩣᨴᩮᩈᩮᩣ. ᨾᨶᩩᨶᩮᩣ ᩋᨸᨧ᩠ᨧᩴ ᨾᩣᨶᩅᩮᩣ, ᩅᨱ᩠ᨱᩅᩥᨠᩣᩁᩮᩣ, ᨶᩔ ᨱᨲ᩠ᨲᩴ, ᨾᩣᨱᩅᩮᩣ. ᨠᩩᨧ᩠ᨨᩣᨿᩴ ᨠᨸᨧ᩠ᨧᨿᩮᩣ, ᨾᩣᨱᩅᨠᩮᩣᨲᩥ ᩈᩥᨴ᩠ᨵᩴ. ᩅᩩᨲ᩠ᨲᨬ᩠ᨧ –

‘‘ᩋᨸᨧ᩠ᨧᩮ ᨠᩩᨧ᩠ᨨᩥᨲᩮ ᨾᩪᩊ᩠ᩉᩮ, ᨾᨶᩩᨲᩮᩣᩔᨣ᩠ᨣᩥᨠᩮᩣ ᨾᨲᩮᩣ’’ᨲᩥ [ᨾᩉᩣᨽᩣᩔ ᪔.᪑.᪑᪖᪑] ᨴᩁ ᩅᩥᨴᩣᩁᨱᩮ, ᨱ᩠ᩅᩩ.

ᨴ᩠ᩅᨿᩴ ᩈᩩᨡᩅᨯ᩠ᨰᩥᨲᩮ ᨠᩩᨾᩣᩁᩮ, ᩈᩩᨡᩮᩣ ᨠᩩᨾᩣᩁᩮᩣ ᩈᩩᨠᩩᨾᩣᩁᩮᩣ, ᨡᩃᩮᩣᨸᩮᩣ, ᩈᩩᨡᩮᨶ ᩑᨵᨲᩥ ᩅᨴ᩠ᨵᨲᩦᨲᩥ ᩈᩩᨡᩮᨵᩥᨲᩮᩣ. ‘‘ᩈᩩᨡᩮᩣᨧᩥᨲᩮᩣ’’ᨲᩥᨸᩥ ¶ ᨸᩣᨮᩮᩣ, ᩈᩩᨡᩴ ᩏᨧᩥᨲᩴ ᩈᨾ᩠ᨸᩥᨱ᩠ᨯᩥᨲᩴ ᩑᨲ᩠ᨳᩣᨲᩥ ᩈᩩᨡᩮᩣᨧᩥᨲᩮᩣ, ᩏᨧ ᩈᨾᩅᩣᨿᩮ.

᪒᪕᪔-᪒᪕᪕. ᨴ᩠ᩅᩥᨸᩣᨴᩮᨶ ᩅᩩᨯ᩠ᨰᩔ ᨶᩣᨾᩣᨶᩥ. ᩌᨿᩩᨾᩉᨲ᩠ᨲᩴ ᩃᩣᨲᩦᨲᩥ ᨾᩉᩃ᩠ᩃᨠᩮᩣ, ᨱ᩠ᩅᩩ, ᨴ᩠ᩅᩥᨲ᩠ᨲᩴ. ᩅᨯ᩠ᨰ ᩅᨯ᩠ᨰᨶᩮ, ᨠᨲ᩠ᨲᩁᩥ ᨲᩮᩣ, ᨲᩔ ᨰᩮᩣ, ᨯ᩠ᨰᩔ ᨯᩮᩣ, ᩋᩔᩩᨲ᩠ᨲᩴ, ᨵᩣ ᨣᨲᩥᨶᩥᩅᨲ᩠ᨲᩥᨿᩴ, ᩍᩁᩮᩣ, ᨵᩔ ᨳᨲ᩠ᨲᩴ, ᩍᩔ ᩑᨲ᩠ᨲᩴ. ᨩᩁ ᩅᨿᩮᩣᩉᩣᨶᩥᨾ᩠ᩉᩥ, ᨠᨲ᩠ᨲᩁᩥ ᨲᩮᩣ, ᨲᩔ ᩍᨶ᩠ᨶᩣᨴᩮᩈᩮᩣ, ᨵᩣᨲ᩠ᩅᨶ᩠ᨲᩃᩮᩣᨸᩮᩣ, ᨱᨲ᩠ᨲᨬ᩠ᨧ, ᨩᩥᨱ᩠ᨱᩮᩣ, ᩈᨠᨲ᩠ᨳᩮ ᨠᨾ᩠ᩉᩥ ᨩᩥᨱ᩠ᨱᨠᩮᩣ. ᨸᨠᨲᩴ ᩅᨿᩮᩣ ᨿᩮᩣᨻ᩠ᨻᨶᨾᩔᩣᨲᩥ ᨸᩅᨿᩮᩣᨲᩥᨸᩥ ᩅᩩᨯ᩠ᨰᩔ ᨶᩣᨾᩴ.

ᩅᩃᩥᨶᨶ᩠ᨲᩣᨶᩥ ᨸᩣᨴᩮᨶ ᨶᩣᨾᩣᨶᩥ. ᨲᨲᩕ ᨲᩥᨠᩴ ᨩᩮᨭ᩠ᨮᨽᩣᨲᩁᩥ. ᩋᨣ᩠ᨣᩮ ᨸᩩᩁᩮ ᨠᩣᩃᩮ, ᨸᩩᨻ᩠ᨻᩮ ᨧ ᨠᩣᩃᩮ ᨩᩣᨿᨲᩦᨲᩥ ᩋᨣ᩠ᨣᨩᩮᩣ, ᨸᩩᨻ᩠ᨻᨩᩮᩣ ᨧ. ᩋᨿᨬ᩠ᨧ ᩅᩩᨯ᩠ᨰᩮᩣ ᩋᨿᨬ᩠ᨧ ᩅᩩᨯ᩠ᨰᩮᩣ, ᩋᨿᨾᩥᨾᩮᩈᩴ ᩅᩥᩈᩮᩈᩮᨶ ᩅᩩᨯ᩠ᨰᩮᩣᨲᩥ ᨩᩮᨭ᩠ᨮᩮᩣ, ᩅᩩᨯ᩠ᨰᩈᨴ᩠ᨴᩣ ᩍᨭ᩠ᨮᨸᨧ᩠ᨧᨿᩮᩣ, ‘‘ᩅᩩᨯ᩠ᨰᩔ ᨩᩮᩣ ᩍᨿᩥᨭ᩠ᨮᩮᩈᩪ’’ᨲᩥ ᩅᩩᨯ᩠ᨰᩔ ᨩᩮᩣ. ᩋᩃᩮᩣᨸᩮ ᨸᩁᩔᩣᩈᩅᨱ᩠ᨱᨲ᩠ᨲᩴ.

ᨲᩥᨠᩴ ᨸᨧ᩠ᨨᩣᨩᩣᨲᩮ ᨽᩣᨲᩁᩥ. ᩋᨿᨬ᩠ᨧ ᨿᩩᩅᩣ ᩋᨿᨬ᩠ᨧ ᨿᩩᩅᩣ, ᩋᨿᨾᩥᨾᩮᩈᩴ ᩅᩥᩈᩮᩈᩮᨶ ᨿᩩᩅᩣᨲᩥ ᨠᨶᩥᨭ᩠ᨮᩮᩣ, ᨠᨶᩥᨿᩮᩣ [ᨠᨱᩥᨭ᩠ᨮᩮᩣ ᨠᨱᩥᨿᩮᩣ (ᨠ.)] ᨧ. ᩍᨿᩥᨭ᩠ᨮᩮᩈᩩ ᨿᩩᩅᩈᨴ᩠ᨴᩔ ᨠᨶᩣᨴᩮᩈᩮᩣ [ᨠᨱᩣᨴᩮᩈᩮᩣ (ᨠ.)]. ᩋᨶᩩ ᨸᨧ᩠ᨨᩣᨠᩣᩃᩮ ᨩᩣᨲᩮᩣ ᩋᨶᩩᨩᩮᩣ. ᨩᨥᨬ᩠ᨬᩮ ᨸᨧ᩠ᨨᩣᨠᩣᩃᩮ ᨩᩣᨲᩮᩣ ᨩᨥᨬ᩠ᨬᨩᩮᩣ. ᩋᨸᩁᩈ᩠ᨾᩥᩴ ᨸᨧ᩠ᨨᩣᨠᩣᩃᩮ ᨩᩣᨲᩮᩣ ᩋᨸᩁᨩᩮᩣᨲᩥ ᨴ᩠ᩅᩮᨸ᩠ᨿᨲᩕ.

ᩅᩃᩥ ¶ ᩈᩥᨳᩥᩃᩴ ᨲᨧᩮᩣ ᨧᨾ᩠ᨾᩴ ᨿᩔ ᩅᩃᩥᨲ᩠ᨲᨧᩮᩣ, ᨴ᩠ᩅᩥᨲ᩠ᨲᩴ. ᩅᩃᩥ ᨧᨾ᩠ᨾᨾᩮᨲᩔᨲ᩠ᨳᩦᨲᩥ ᩅᩃᩥᨶᩮᩣ, ᩍᨶᩮᩣ. ᩏᨲ᩠ᨲᩣᨶᩈᨿᩣᨴᨿᩮᩣ ᩅᩃᩥᨶᨶ᩠ᨲᩣ ᩅᩣᨧ᩠ᨧᩃᩥᨦ᩠ᨣᨲ᩠ᨲᩣ ᨲᩦᩈᩩ ᩃᩥᨦ᩠ᨣᩮᩈᩩ ᩅᨲ᩠ᨲᨶ᩠ᨲᩥ, ᨿᨳᩣ – ᩏᨲ᩠ᨲᩣᨶᩈᨿᩮᩣ ᨻᩣᩃᩮᩣ, ᩏᨲ᩠ᨲᩣᨶᩈᨿᩣ ᨠᩩᨾᩣᩁᩦ, ᩏᨲ᩠ᨲᩣᨶᩈᨿᩴ ᨶᨸᩩᩴᩈᨠᩴ.

᪒᪕᪖. ᨸᨬ᩠ᨧᨠᩴ ᨾᨲ᩠ᨳᨠᩮ. ᩈᩥ ᩈᨿᩮ, ᩈᩮᩣ, ᨴᩦᨥᩮᩣ ᨧ, ᩋᨦ᩠ᨣᩮᩈᩩ ᩏᨲ᩠ᨲᨾᨦ᩠ᨣᨲ᩠ᨲᩣ ᩏᨲ᩠ᨲᨾᨦ᩠ᨣᩴ, ᩏᨲ᩠ᨲᨾᩮᩣ ᨧ ᨲᩴ ᩋᨦ᩠ᨣᨬ᩠ᨧᩣᨲᩥᨸᩥ ᩏᨲ᩠ᨲᨾᨦ᩠ᨣᩴ. ᩈᩦᩈᨬ᩠ᨧ ᩏᨲ᩠ᨲᨾᨦ᩠ᨣᨬ᩠ᨧ ᩈᩦᩈᩮᩣᨲ᩠ᨲᨾᨦ᩠ᨣᩣᨶᩥ. ᩈᩥ ᩈᩮᩅᩣᨿᩴ, ᩁᩮᩣ, ᩈᩮᩅᨶ᩠ᨲᩥ ᩑᨲᩮᨶᩣᨲᩥ ᩈᩥᩁᩮᩣ. ᨾᩩᨴ ᨲᩮᩣᩈᩮ, ᨵᩮᩣ. ᩈᩥᩔᩣᨠᩣᩁᩮᩣ. ᨾᩈ ᩌᨾᩈᨶᩮ, ᨲ᩠ᨳᩮᩣ, ᩈᨠᨲ᩠ᨳᩮ ᨠᩮᩣ ᨧ, ᨾᩈᩥ ᨸᩁᩥᨾᩣᨱᩮ ᩅᩣ.

ᨸᨩ᩠ᨩᨴ᩠ᨵᩴ ᨠᩮᩈᩮ. ᨠᩮ ᨾᨲ᩠ᨳᨠᩮ ᩈᩮᨲᩥ ᨲᩥᨭ᩠ᨮᨲᩦᨲᩥ ᨠᩮᩈᩮᩣ. ᩈᨲ᩠ᨲᨾᩥᨿᩣᩃᩮᩣᨸᩮᩣ, ᨠᨲᩥ ᨨᩮᨴᨶᩮ, ᩋᩃᩮᩣ, ᩋᩔᩩᨲ᩠ᨲᩴ. ᩅᩃ ᩈᩴᩅᩁᨱᩮ, ᨠᨾ᩠ᨾᨶᩥ ᨱᨸᨧ᩠ᨧᨿᩮᩣ, ᩅᩣᩃᩮᩣ. ᩏᨲ᩠ᨲᨾᨦ᩠ᨣᩮ ᩈᩦᩈᩮ ᩁᩩᩉᨲᩦᨲᩥ ᩏᨲ᩠ᨲᨾᨦ᩠ᨣᩁᩩᩉᩮᩣ. ᨾᩩᨴ᩠ᨵᨶᩥ ᨩᩣᨿᨲᩦᨲᩥ ᨾᩩᨴ᩠ᨵᨩᩮᩣ. ᩅᩣᩃᩮᩣ ᨧ ᩏᨲ᩠ᨲᨾᨦ᩠ᨣᩁᩩᩉᩮᩣ ᨧ ᨾᩩᨴ᩠ᨵᨩᩮᩣ ᨧᩮᨲᩥ ᩍᨲᩁᩦᨲᩁᨿᩮᩣᨣᨴ᩠ᩅᨶ᩠ᨴᩮᩣ. ᨧᩥᨠᩩᩁᩮᩣ, ᨠᨧᩮᩣᨲᩥᨸ᩠ᨿᨲᩕ. ᨧᩥ ᨧᨿᨶᩮ, ᨠᩩᩁ ᩈᨴ᩠ᨴᩮ, ᩋᨶᩮᨠᨲ᩠ᨳᨲ᩠ᨲᩣ ᨨᩮᨴᨶᩮ. ᩅᨯ᩠ᨰᨾᩣᨶᩮᩣ ᨧᩥᨠᩁᩦᨿᨲᩮᨲᩥ ᨧᩥᨠᩩᩁᩮᩣ, ᨠᨧ ᨻᨶ᩠ᨵᨶᩮ, ᩋ.

᪒᪕᪗. ᨠᩩᩈᩩᨾᨣᨻ᩠ᨽᩣ ᨠᩮᩈᩣ ᨠᩮᩈᨧᩪᩊᩣ ᨾᩩᨲ᩠ᨲᩥᨠᩣᨴᩥᨶᩣ ᨻᩉᩥ ᩈᩴᨿᨲᩣ ᩈᨶ᩠ᨳᨲᩣ ᨵᨾ᩠ᨾᩥᩃᩮᩣ ᨶᩣᨾ. ᩑᨠᨲᩮᩣ ᨠᨲ᩠ᩅᩣ ᨵᩁᩦᨿᨲᩥ ¶ ᨻᨶ᩠ᨵᩦᨿᨲᩦᨲᩥ ᨵᨾ᩠ᨾᩥᩃᩮᩣ, ᨠᨾ᩠ᨾᨶᩥ ᩍᩃᩮᩣ. ᨵᨾ᩠ᨾᩮᨶ ᨶᩣᨶᩣᨴᩮᩈᩥᨿᨾᨶᩩᩔᩣᨶᩴ ᩈᨾᩣᨧᩣᩁᩮᨶ ᩍᩃᨲᩦᨲᩥ ᩅᩣ ᨵᨾ᩠ᨾᩥᩃᩮᩣ, ᩍᩃ ᨣᨾᨶᩮ.

ᨴ᩠ᩅᨿᩴ ᨠᩩᨾᩣᩁᩣᨶᩴ ᩈᩥᨡᩣᨸᨬ᩠ᨧᨠᩮ, ᨧᩪᩊᨲ᩠ᨲᨿᩮᨲᩥ ᨠᩮᨧᩥ. ᨠᩣᨠᩣᨶᩴ ᨸᨠ᩠ᨡᩈᨱ᩠ᨮᩣᨶᨲ᩠ᨲᩣ ᨠᩣᨠᨸᨠ᩠ᨡᩮᩣ. ᩈᩥᨡᩣ ᩑᩅ ᩈᩥᨡᨱ᩠ᨯᨠᩮᩣ, ᩈᨠᨲ᩠ᨳᩮ ᨠᩮᩣ. ᩈᩥᨡᩣᩈᩥᨡᨱ᩠ᨯᩈᨴ᩠ᨴᩣᨶᨾᨽᩮᨴᨲ᩠ᨲᩣᨿᩮᩅ ᩉᩥ ‘‘ᩈᩥᨡᨱ᩠ᨯᩦ, ᩈᩥᨡᩦ ᨧᩣ’’ᨲᩥ ᨾᩮᩣᩁᩮᩣ ᩅᩩᨲ᩠ᨲᩮᩣ.

ᨸᩣᩈᩮᩣ, ᩉᨲ᩠ᨳᩮᩣ ᨧ ᩍᨾᩮ ᨴ᩠ᩅᩮ ᨠᩮᩈᨧᨿᩮ ᨠᩮᩈᨸᩁᩥᨿᩣᨿᨲᩮᩣ ᨸᩁᩮ ᩉᩩᨲ᩠ᩅᩣ ᨠᩮᩈᩣᨶᩴ ᨠᩃᩣᨸᩮ ᩅᨲ᩠ᨲᨶ᩠ᨲᩥ, ᨶ ᨠᩮᩅᩃᩣ, ᨿᨳᩣ – ᨠᩮᩈᨸᩣᩈᩮᩣ ᨠᩮᩈᩉᨲ᩠ᨳᩮᩣ ᩍᨧ᩠ᨧᩣᨴᩥ. ᨸᩣ ᩁᨠ᩠ᨡᨱᩮ, ᨸᩣᨲᩥ ᩁᨠ᩠ᨡᨲᩥ ᩋᩅᨿᩅᩮᨲᩥ ᨸᩣᩈᩮᩣ, ᩈᩮᩣ, ᨸᩈ ᨻᨶ᩠ᨵᨶᩮᨲᩥ ᨠᩮᨧᩥ, ᨱᩮᩣ. ᩉᨶ ᨣᨲᩥᨿᩴ, ᩋᩅᨿᩅᩣ ᨶᩥᩉᨶᨶ᩠ᨲᩥ ᩑᨲ᩠ᨳᩣᨲᩥ ᩉᨲ᩠ᨳᩮᩣ, ᨳᩮᩣ, ᨸᨠ᩠ᨡᩮᩣᨸ᩠ᨿᨲᩕ.

ᨲᩣᨸᩈᩣᨶᩴ ᩅᨲᩦᨶᩴ ᨲᩉᩥᩴ ᨠᩮᩈᨧᨿᩮ ᨩᨭᩣᩈᨴ᩠ᨴᩮᩣ ᩅᩩᨧ᩠ᨧᨲᩥ, ᨩᨭ ᨩᨭᨶᩮ, ᨩᨭ ᩈᨦ᩠ᨥᩣᨲᩮ ᩅᩣ, ‘‘ᩍᨲ᩠ᨳᩥᨿᨾᨲᩥᨿᩅᩮᩣ ᩅᩣ’’ᨲᩥ ᩋ.

᪒᪕᪘. ᨸᩮᩣᩈᩥᨲᨽᨲ᩠ᨲᩣᨴᩦᩉᩥ ᨿᩣ ᨻᨶ᩠ᨫᨲᩮ, ᨲᨲᩕ ᩅᩮᨱᩦ, ᨸᩅᩮᨱᩦ ᨧ. ᩅᩦ ᨸᨩᨶᩮ, ᨸᨩᨶᩴ ᨣᨻ᩠ᨽᩅᩥᨾᩮᩣᨠ᩠ᨡᩮᩣ, ᩅᩦ ᨲᨶ᩠ᨲᩈᨶ᩠ᨲᩣᨶᩮ ᩅᩣ, ᨱᩦ. ᨸᨠ᩠ᨡᩮ ᨸᩅᩮᨱᩦ.

ᨴ᩠ᩅᨿᩴ ᩈᩦᩈᨾᨩ᩠ᨫᨭ᩠ᨮᨧᩪᩊᩣᨿᩴ. ᨧᩪᩊ ᩈᨬ᩠ᨧᩮᩣᨴᨶᩮ, ᨧᩪᩊ ᩉᩣᩅᨠᩁᨱᩮ ᩅᩣ, ᩋ. ᩈᩥᨡᩣ ᩅᩩᨲ᩠ᨲᩣ. ᨠᩮᩈᨸᩣᩈᩦᨸ᩠ᨿᨲᩕ, ᨶᨴᩣᨴᩥ.

ᨶᩣᩁᩦᨶᩴ ¶ ᨠᩮᩈᨾᨩ᩠ᨫᨾ᩠ᩉᩥ ᨸᨴ᩠ᨵᨲᩥ ᩏᨩᩩᨣᨲᨾᨣ᩠ᨣᩮᩣ ᩈᩦᨾᨶ᩠ᨲᩮᩣᨲᩥ ᨾᨲᩮᩣ ᨠᨳᩥᨲᩮᩣ. ᩈᩦᨾᩔ ᩋᨶ᩠ᨲᩮᩣ ᩈᩦᨾᨶ᩠ᨲᩮᩣ, ᩈᩦ ᩈᨿᩮ ᩅᩣ, ᩋᨶ᩠ᨲᩮᩣ, ᨾᨩ᩠ᨫᩮ ᨾᨠᩣᩁᩅᨱ᩠ᨱᩣᨣᨾᩮᩣ.

᪒᪕᪙. ᨲᩥᨠᩴ ᩃᩮᩣᨾᩮ. ᩃᩪ ᨨᩮᨴᨶᩮ, ᩅᨯ᩠ᨰᨾᩣᨶᩴ ᩃᩪᨿᨲᩮᨲᩥ ᩃᩮᩣᨾᩴ, ᨾᩮᩣ. ᨲᨶᩩᨾ᩠ᩉᩥ ᩁᩩᩉᨲᩦᨲᩥ ᨲᨶᩩᩁᩩᩉᩴ, ᩋ. ᩁᩩᩉ ᨩᨶᨶᩮ, ᩁᩪᩉ ᨸᩣᨲᩩᨽᩣᩅᩮ ᩅᩣ, ᨾᩮᩣ, ᩉᩃᩮᩣᨸᩮᩣ, ᩒᨲ᩠ᨲᨬ᩠ᨧ, ᩃᩪ ᨨᩮᨴᨶᩮ ᩅᩣ, ᨾᩮᩣ, ᩃᩔ ᩁᨲ᩠ᨲᩴ, ᩁᩮᩣᨾᩴ. ᩋᨠ᩠ᨡᩥᨾ᩠ᩉᩥ ᨩᩣᨲᩴ ᩃᩮᩣᨾᩴ ᨸᨾ᩠ᩉᩴ, ᨸᨡᩩᨾᨬ᩠ᨧᩮᩣᨧ᩠ᨧᨲᩮ. ᨸᨾᩥᨶᩮᩣᨲᩥ ᨲᩮᨶᩣᨲᩥ ᨸᨾ᩠ᩉᩴ, ᨸᨸᩩᨻ᩠ᨻᩮᩣ ᨾᩣ ᨸᩁᩥᨾᩣᨱᩮ, ᩉᨸᨧ᩠ᨧᨿᩮᩣ. ᩋᨠ᩠ᨡᩥᨶᩮᩣ ᨸᨠ᩠ᨡᨴ᩠ᩅᨿᩮ ᨩᩣᨲᩴ ᨸᨡᩩᨾᩴ, ᩏᨾᩮᩣ, ᨠᩃᩮᩣᨸᩮᩣ ᨧ.

ᨸᩩᨾᨾᩩᨡᩮ ᨸᩩᩁᩥᩈᩣᨶᩴ ᨾᩩᨡᩮ ᩅᩩᨲ᩠ᨲᩴ [ᨸᩅᩩᨭ᩠ᨮᩴ (ᨠ.)] ᩃᩮᩣᨾᩴ ᨾᩔᩩ ᨶᩣᨾ, ᨾᩈ ᩌᨾᩈᨶᩮ, ᩈᩩ, ᨾᩔᩩ.

ᨲᩥᨠᩴ ᨽᨾᩩᨾ᩠ᩉᩥ. ᨽᨾ ᩋᨶᩅᨭ᩠ᨮᩣᨶᩮ, ᩐ, ᨾᩃᩮᩣᨸᩮᩣ, ᨽᩪ. ᩏᨾ᩠ᩉᩥ ᨽᨾᩩ, ᨠᨸᨧ᩠ᨧᨿᩮ ᨽᨾᩩᨠᩮᩣ. ᨽᨾᩩᨠᩈᩉᨧᩁᨱᨲᩮᩣ ᨽᨾᩩ ᨸᩩᩃ᩠ᩃᩥᨦ᩠ᨣᩮᩣ.

᪒᪖᪐. ᨲᩥᨠᩴ ᨶᩮᨲ᩠ᨲᩮᩣᨴᨠᩮ. ᨡᩥᨸ ᨸᩮᩁᨱᩮ, ᨸᩮᩣ, ᩍᩔᨲ᩠ᨲᩴ. ᨶᩮᨲ᩠ᨲᩮ ᨩᩣᨲᩴ ᨩᩃᩴ ᨶᩮᨲ᩠ᨲᨩᩃᩴ. ᩋᩈ ᩋᨵᩮᩣᨸᨲᨶᩮ, ᩈᩩ, ᩋᩔᩩ. ᨶᩮᨲ᩠ᨲᨩᩃᨬ᩠ᨧ ᩋᩔᩩ ᨧᩣᨲᩥ ᨴ᩠ᩅᨶ᩠ᨴᩮᩣ. ᩋᩔᩩ ᨶᨸᩩᩴᩈᨠᩮ.

ᨴ᩠ᩅᨿᩴ ¶ ᩋᨠ᩠ᨡᩥᨸᩩᨲ᩠ᨲᩃᩥᨠᩣᨿᩴ. ᨶᩮᨲ᩠ᨲᩮ ᨴᩥᩔᨾᩣᨶᩣ ᨲᩣᩁᩣ ᨶᩮᨲ᩠ᨲᨲᩣᩁᩣ. ᨠᨬ᩠ᨬᩣᩈᨴ᩠ᨴᨲᩮᩣ ᨲᨴ᩠ᨵᩥᨲᩮᩣ ᩋᨸᨧ᩠ᨧᨿᩮᩣ, ᨠᨬ᩠ᨬᩣᩈᨴ᩠ᨴᩔ ᨠᨶᩦᨶᩣᨴᩮᩈᩮᩣ, ᩍᨲ᩠ᨳᩥᨠᨲᩣᨠᩣᩁᨸᩁᩮ ᨠᩮ ᨸᩩᨻ᩠ᨻᩮᩣ ᩋᨠᩣᩁᩮᩣ ᩍᨠᩣᩁᨾᩣᨸᨩ᩠ᨩᨲᩮ [ᨠᩣᨲᨶ᩠ᨲ ᪒.᪒.᪖᪕], ᨠᨶᩦᨶᩥᨠᩣ. ᨲᩣᩁᨠᩣᨸ᩠ᨿᨲᩕ.

ᨨᨠ᩠ᨠᩴ ᨾᩩᨡᩅᩥᩅᩁᩮ, ᨠᩅᨿᩮᩣ ᨸᨶ ᨲᨴᩩᨸᩃᨠ᩠ᨡᩥᨲᩮᨸᩥ ᩈᨾᩩᨴᩣᨿᩮ ᨿᩩᨩ᩠ᨩᨶ᩠ᨲᩮ. ᩅᨴ ᩅᩥᨿᨲ᩠ᨲᩥᨿᩴ ᩅᩣᨧᩣᨿᩴ, ᨠᩁᨱᩮ ᨿᩩ. ᨾᩩ ᨻᨶ᩠ᨵᨶᩮ, ᨡᩮᩣ, ᩒᨲ᩠ᨲᩣᨽᩣᩅᩮᩣ ᨶᩥᨸᩣᨲᨶᩣ, ᨾᩩᨡᩴ. ᩈᨻ᩠ᨻᨵᩁᨠᨲᩮ ᨸᨶ ᨡᨬ᩠ᨬᨲᩮᨲᩥ ᨵᩣᨲᩩᨶᩣ ᨾᩩᨡᨶ᩠ᨲᩥ ᨶᩥᨸᩣᨲᩥᨲᩴ, ᨡᨶᩩ ᩋᩅᨴᩣᩁᨱᩮ. ᨲᩩᨯᩥ ᨲᩮᩣᨯᨶᩮ, ᩋ. ᨲᨶᩩ ᩅᩥᨲ᩠ᨳᩣᩁᩮ ᩅᩣ, ᨯᩮᩣ, ᩋᩔᩩᨲ᩠ᨲᩴ. ᩅᨴᨲᩥ ᨲᩮᨶᩣᨲᩥ ᩅᨲ᩠ᨲᩴ, ᨲᩮᩣ, ᩅᩩᨧ᩠ᨧᨲᩮ ᩋᨶᩮᨶᩣᨲᩥ ᩅᩣ ᩅᨲ᩠ᨲᩴ. ᩅᨴ ᩅᩥᨿᨲ᩠ᨲᩥᨿᩴ ᩅᩣᨧᩣᨿᩴ, ᨲᩮᩣ. ᩃᨸ ᩅᨧᨶᩮ, ᨠᩁᨱᩮ ᨿᩩ. ᩌᨶᨶ᩠ᨲᩥ ᩋᩈᨶ᩠ᨲᩥ ᩋᨶᩮᨶᩣᨲᩥ ᩌᨶᨶᩴ, ᩋᨶ ᨸᩣᨱᨶᩮ, ᨿᩩ. ᩋᩔᩴᨸ᩠ᨿᨲᩕ. ᩋᩈ ᨽᨠ᩠ᨡᨶᩮ. ᨠᩁᨱᩮ ᩈᩮᩣ.

᪒᪖᪑. ᩋᨯ᩠ᨰᩴ ᨴᨶ᩠ᨲᩮ. ᨴ᩠ᩅᩦᩈᩩ ᨮᩣᨶᩮᩈᩩ ᨴ᩠ᩅᩥᨠ᩠ᨡᨲ᩠ᨲᩩᩴ ᩅᩣ ᨩᩣᨿᨲᩮᨲᩥ ᨴ᩠ᩅᩥᨩᩮᩣ. ᩃᨸᨶᩮ ᨾᩩᨡᩮ ᨩᩣᨿᨲᩦᨲᩥ ᩃᨸᨶᨩᩮᩣ. ᨴᩣ ᩋᩅᨡᨱ᩠ᨯᨶᩮ, ᨴᩣᨿᨲᩥ ᨽᨠ᩠ᨡᨾᨶᩮᨶᩣᨲᩥ ᨴᨶ᩠ᨲᩮᩣ, ᩋᨶ᩠ᨲᩮᩣ, ᨴᩈ ᩋᨴᨶᩮ ᩅᩣ, ᨴᩈᨶ᩠ᨲᩥ ᨽᩮᩣᨩ᩠ᨩᨾᨶᩮᨶᩣᨲᩥ ᨴᨶ᩠ᨲᩮᩣ, ᩋᨶ᩠ᨲᩮᩣ, ᨵᩣᨲ᩠ᩅᨶ᩠ᨲᩃᩮᩣᨸᩮᩣ. ᨴᨾᩩ ᨴᨾᨶᩮ ᩅᩣ, ᨲᩮᩣ. ᨴᩴᩈ ᨴᩴᩈᨶᩮ, ᨴᩴᩈᨲᩮ ᩅᩥᩃᩥᨡ᩠ᨿᨲᩮ ᨽᨠ᩠ᨡᨾᨶᩮᨶᩣᨲᩥ ᨴᩴᩈᨶᩮᩣ, ᨿᩩ. ᩁᨴ ᩅᩥᩃᩮᨡᨶᩮ, ᨿᩩ, ᩁᨴᨶᩮᩣ. ᩋᨾ᩠ᩉᩥ ᩁᨴᩮᩣ.

ᨴᨶ᩠ᨲᨽᩮᨴᩈ᩠ᨾᩥᩴ ᨴᨶ᩠ᨲᩅᩥᩈᩮᩈᩮ ᨴᩣᨮᩣᩈᨴ᩠ᨴᩮᩣ. ᩍᨲ᩠ᨳᩥᩃᩥᨦ᩠ᨣᩮᩣᨿᩴ. ᨴᩴᩈᨵᩣᨲᩩᨲᩮᩣ ᨮᩮᩣ, ᨴᩴᩈᩥᩔ ᨧ ᨴᩣ, ᨴᩣᨮᩣ, ᨾᩩᨴ᩠ᨵᨩᨴᩩᨲᩥᨿᩮᩣᨿᩴ. ᩋᨠ᩠ᨡᩥᨠᩮᩣᨭᩦᩈᩩ ¶ ᩅᩣᨾᨴᨠ᩠ᨡᩥᨱᨶᩮᨲ᩠ᨲᩣᨶᩴ ᩋᨶ᩠ᨲᩮᩈᩩ ᩋᨸᩣᨦ᩠ᨣᩮᩣ ᩅᨲ᩠ᨲᨲᩥ, ᩈᩁᩦᩁᨦ᩠ᨣᩈᨦ᩠ᨡᩣᨲᩔ ᨠᨱ᩠ᨱᩔ ᩋᨸ ᩈᨾᩦᨸᩴ ᩋᨸᩣᨦ᩠ᨣᩮᩣ.

᪒᪖᪒. ᨧᨲᩩᨠ᩠ᨠᩴ ᩒᨭ᩠ᨮᩮ. ᨴᨶ᩠ᨲᩮ ᩌᩅᩁᨲᩥ ᨨᩣᨴᨿᨲᩦᨲᩥ ᨴᨶ᩠ᨲᩣᩅᩁᨱᩴ. ᩏᩈ ᨴᩣᩉᩮ, ᨲᩮᩣ, ‘‘ᩈᩣᨴᩥᩈᨶ᩠ᨲᨸᩩᨧ᩠ᨨᨽᨶ᩠ᨩᩉᩴᩈᩣᨴᩦᩉᩥ ᨭ᩠ᨮᩮᩣ’’ᨲᩥ ᩈᩉᩣᨴᩥᨻ᩠ᨿᨬ᩠ᨩᨶᩮᨶ ᨭ᩠ᨮᩮᩣ, ᩒᨲ᩠ᨲᨴ᩠ᩅᩥᨲ᩠ᨲᩣᨶᩥ, ᩒᨭ᩠ᨮᩮᩣ. ᨣᨴᩕᨽᩮᨸ᩠ᨿᨿᩴ. ᩋᨳ ᩅᩣ ᩏᩈ ᨴᩣᩉᩮ, ᨭ᩠ᨮᩮᩣ, ᩒᨲ᩠ᨲᨴ᩠ᩅᩥᨲ᩠ᨲᩣᨴᩥ, ᩏᨽᨿᨲᩕᩣᨸᩥ ᨾᩩᨴ᩠ᨵᨩᨴᩩᨲᩥᨿᩮᩣ, ᩎᩈᩴ ᨠᩥᨬ᩠ᨧᩥ ᨠᩣᩃᩴ ᨵᩣᩁᩮᨲᩥ ᨽᨠ᩠ᨡᨾᩮᨲ᩠ᨳᩣᨲᩥ ᩋᨵᩁᩮᩣ, ᩎᩈᨲ᩠ᨳᩮᩣ ᩉ᩠ᨿᨲᩕ ᩋᨠᩣᩁᩮᩣ.

‘‘ᩋ ᨸᩩᨾᩮ ᨾᩣᨵᩅᩮ ᨬᩮᨿ᩠ᨿᩮᩣ,

ᨸᨭᩥᩈᩮᨵᩮ ᨲᨴᨻ᩠ᨿᨿᩴ;

ᩎᩈᨲ᩠ᨳᩮ ᨧ ᩅᩥᩁᩩᨴ᩠ᨵᨲ᩠ᨳᩮ,

ᩈᨴᩥᩈᨲ᩠ᨳᩮ ᨸᨿᩮᩣᨣᨲᩮᩣ’’ᨲᩥ. –

ᩉᩥ ᩑᨠᨠ᩠ᨡᩁᨠᩮᩣᩈᩮ ᩅᩩᨲ᩠ᨲᩴ. ᨴᩈᨶᩮ ᨴᨶ᩠ᨲᩮ ᨨᩣᨴᨿᨲᩦᨲᩥ ᨴᩈᨶᨧ᩠ᨨᨴᩮᩣ. ᩑᨲ᩠ᨳ ᨠᩮᨧᩥ ᩋᨵᩁᩈᨴ᩠ᨴᩮᨶ ᩉᩮᨭ᩠ᨮᩥᨾᩮᩣᨭ᩠ᨮᨾᩮᩅᩣᩉᩩ, ᨲᩮᩈᩴ ᩅᨧᨶᩴ ‘‘ᨶᩮᨲ᩠ᨲᨶ᩠ᨲᩣᨵᩁᨸᩣᨱᩥᨸᩣᨴᨿᩩᨣᩃᩮᩉᩥ’’ᨧ᩠ᨧᩣᨴᩦᩉᩥ ᨾᩉᩣᨠᩅᩥᨸᨿᩮᩣᨣᩮᩉᩥ ᩋᩈᩴᩈᨶ᩠ᨴᨶᨲᩮᩣ ᨶ ᨣᩉᩮᨲᨻ᩠ᨻᩴ.

ᨲᩥᨠᩴ ᨠᨸᩮᩣᩃᩮ. ᨣᨯᩥ ᩅᨴᨶᩮᨠᨴᩮᩈᩮ, ᩋ, ᨵᩣᨲᩩᨸ᩠ᨸᨠᩕᩥᨿᨲ᩠ᨳᨬ᩠ᩉᩥ ᨵᩣᨲᩩᨸᩣᨮᩅᨧᨶᩴ, ᩈᨻ᩠ᨻᨲᩕᩣᨸ᩠ᨿᩮᩅᩴ. ᨠᩮᨶ ᨩᩃᩮᨶ ᨸᩪᩁᩥᨿᨲᩮᨲᩥ ᨠᨸᩮᩣᩃᩮᩣ, ᩋᩃᩮᩣ, ᨠᨸ ᩋᨧ᩠ᨨᩣᨴᨶᩮ ᩅᩣ, ᩒᩃᩮᩣ, ᨠᨸᩮᩣᩃᩮᩣ, ᨶᨴᩣᨴᩥ. ᨣᨱ᩠ᨯᩦ. ᩋᨵᩁᩣ ᩋᨵᩮᩣᨽᩣᨣᩮᩣ ᨧᩩᨻᩩᨠᩴ ᨶᩣᨾ, ᨧᩥᨻᩩᨠᩴᨸ᩠ᨿᨲᩕ. ᨧᩥᨻᩩ ᩒᩃᨾ᩠ᨻᨠᩮ, ᨱ᩠ᩅᩩ, ᩋᩔᩩᨲ᩠ᨲᩴ.

᪒᪖᪓. ᨴ᩠ᩅᨿᩴ ¶ ᨣᩦᩅᩣᨿ ᨸᩩᩁᩮᩣᨽᩣᨣᩮ. ᨣᩃ ᩋᨴᨶᩮ, ᨠᩁᨱᩮ ᩋ, ᨣᩥᩃ ᨣᩥᩃᨶᩮ ᩅᩣ, ᨣᩥᩃᨲᩥ ᩋᨶᩮᨶᩣᨲᩥ ᨣᩃᩮᩣ, ᩍᩔᨲ᩠ᨲᩴ. ᨠᨱ ᩈᨴ᩠ᨴᨲ᩠ᨳᩮᩣ ᨴᨱ᩠ᨯᨠᩮᩣ ᨵᩣᨲᩩ, ᨮᩮᩣ, ᨠᨱ᩠ᨮᩮᩣ, ᨾᩩᨴ᩠ᨵᨩᨴᩩᨲᩥᨿᩮᩣᨿᩴ.

ᨲᩥᨠᩴ ᩑᨠᨲ᩠ᨳᩴ. ᨣᩣ ᩈᨴ᩠ᨴᩮ, ᩎᩅᩮᩣ. ᨠᩴ ᩈᩦᩈᩴ ᨵᩁᨲᩦᨲᩥ ᨠᨶ᩠ᨵᩁᩣ. ᩈᩥᩁᩴ ᨵᩁᨲᩦᨲᩥ ᩈᩥᩁᩮᩣᨵᩁᩣ, ᩈᩥᩁᩮᩣ ᨵᩥᨿ᩠ᨿᨲᩮ ᩋᩔᨶ᩠ᨲᩥ ᩅᩣ ᩈᩥᩁᩮᩣᨵᩁᩣ, ᨵᩣ ᨣᨲᩥᨶᩥᩅᨲ᩠ᨲᩥᨿᩴ, ᩋᩁᩮᩣ.

ᩈᩩᩅᨱ᩠ᨱᨾᨿᩮᩣ ᩌᩃᩥᨦ᩠ᨣᩮᩣ ᨾᩩᩁᨩᨽᩮᨴᩮᩣ, ᨲᩮᨶ ᩈᨶ᩠ᨶᩥᨽᩣ ᩈᨴᩥᩈᩣ ᨿᩣ ᨣᩦᩅᩣ, ᩈᩣ ᨠᨾ᩠ᨻᩩᨣᩦᩅᩣ ᨾᨲᩣ, ᨾᩉᩣᨸᩩᩁᩥᩈᩃᨠ᩠ᨡᨱᨾᩮᨲᩴ. ᩋᨳ ᩅᩣ ᨿᩣ ᨣᩦᩅᩣ ᨲᩦᩉᩥ ᩃᩮᨡᩣᩉᩥ ᩋᨦ᩠ᨠᩥᨲᩣ ᩃᨠ᩠ᨡᩥᨲᩣ, ᩈᩣ ᨠᨾ᩠ᨻᩩᨣᩦᩅᩣ ᨾᨲᩣ, ᨾᩉᩣᨸᩩᩁᩥᩈᩃᨠ᩠ᨡᨱᨾᩮᨲᨬ᩠ᨧ. ᨠᨾ᩠ᨻᩩ ᩅᩩᨧ᩠ᨧᨲᩥ ᩈᩩᩅᨱ᩠ᨱᩴ, ᨠᨾ᩠ᨻᩩᨾᨿᩮᨶ ᩌᩃᩥᨦ᩠ᨣᩮᨶ ᩈᨶ᩠ᨶᩥᨽᩣ ᨣᩦᩅᩣ ᨠᨾ᩠ᨻᩩᨣᩦᩅᩣ, ᨠᨾ᩠ᨻ ᩈᩴᩅᩁᨱᩮ, ᩏ, ᨠᨾ᩠ᨻᩩ.

᪒᪖᪔. ᨲᩥᨠᩴ ᨡᨶ᩠ᨵᩮ. ᩋᨶ ᨣᨲᩥᨿᩴ, ᩈᩮᩣ. ᨽᩩᨩᩣᨶᩴ ᩈᩥᩁᩮᩣ ᨾᨲ᩠ᨳᨠᩴ ᨽᩩᨩᩈᩥᩁᩮᩣ. ᨠᩴ ᨾᨲ᩠ᨳᨠᩴ ᨴᨵᩣᨲᩦᨲᩥ ᨠᨶ᩠ᨵᩮᩣ, ᩈᩮᩣ ᩑᩅ ᨡᨶ᩠ᨵᩮᩣ ᨠᨠᩣᩁᩔ ᨡᨠᩣᩁᨠᩁᨱᩅᩈᩮᨶ, ᨡᨾᨲᩥ ᨽᩣᩁᨶ᩠ᨲᩥ ᩅᩣ ᨡᨶ᩠ᨵᩮᩣ, ᨡᨾᩩ ᩈᩉᨶᩮ, ᨲᩮᩣ, ᨲᩔ ᨵᩮᩣ, ᨾᩔ ᨶᩮᩣ, ᨶᩥᨣ᩠ᨣᩉᩦᨲᩴ ᩅᩣ ¶ . ᨲᩔᨶ᩠ᨵᩥ ᨲᩔ ᨡᨶ᩠ᨵᩔ ᨾᨩ᩠ᨫᩴ ᨩᨲ᩠ᨲᩩ ᨶᩣᨾ, ᨿᩴ ᨡᨶ᩠ᨵᩣᨶᩴ ᨾᨩ᩠ᨫᩮ ᨲᩥᨭ᩠ᨮᨲᩥ. ᨩᨶ ᨩᨶᨶᩮ, ᨩᩁ ᩅᨿᩮᩣᩉᩣᨶᩥᨾ᩠ᩉᩥ ᩅᩣ, ᨲᩩ, ᨩᨲ᩠ᨲᩩ, ᨲᩴ ᨶᨸᩩᩴᩈᨠᩴ.

ᨴ᩠ᩅᨿᩴ ᨻᩣᩉᩩᨾᩪᩃᩮ. ᨻᩣᩉᩪᨶᩴ ᨽᩩᨩᩣᨶᩴ ᨾᩪᩃᩴ ᨻᩣᩉᩩᨾᩪᩃᩴ. ᨠᨧ ᨻᨶ᩠ᨵᨶᩮ, ᨨᩮᩣ. ᩋᩔ ᨠᨧ᩠ᨨᩔ ᩋᨵᩮᩣᨽᩣᨣᨭ᩠ᨮᩣᨶᩴ ᨸᩔᩴ ᩅᩩᨧ᩠ᨧᨲᩥ, ᨴᩥᩈ ᨸᩮᨠ᩠ᨡᨶᩮ, ᩋᨸᨧ᩠ᨧᨿᩮᩣ, ᨴᩥᩈᩔ ᨸᩔᩣᨴᩮᩈᩮᩣ.

᪒᪖᪕. ᨲᩥᨠᩴ ᨻᩣᩉᩩᨾ᩠ᩉᩥ. ᩅᩉᨲᩥ ᩋᨶᩮᨶᩣᨲᩥ ᩅᩣᩉᩩ, ᩅᩣᩉᩩ ᩑᩅ ᨻᩣᩉᩩ, ᨠᩩ [ᨱ᩠ᩅᩣᨴᩥ ᪖]. ᨽᩩᨬ᩠ᨩᨲᩮ ᩋᨶᩮᨶᩣᨲᩥ ᨽᩩᨩᩮᩣ. ᨽᩩᨩ ᨸᩣᩃᨶᨩ᩠ᨫᩮᩣᩉᩣᩁᩮᩈᩩ. ᨻᩣᩉᩩ ᨧ ᨽᩩᨩᩮᩣ ᨧᩮᨲᩥ ᨴ᩠ᩅᨶ᩠ᨴᩮᩣ, ᩑᨲᩮ ᨴ᩠ᩅᩮ ᨴ᩠ᩅᩦᩈᩩ, ᩍᨲ᩠ᨳᩥᨿᩴ ᨽᩩᨩᩣ. ᩅᩉᨲᩥ ᨿᩣᨿᩣᨲᩥ ᨻᩣᩉᩣ. ᩋᨸᩁᩮᩣᩈᨴ᩠ᨴᩮᩣᨸ᩠ᨿᨲᩕ [ᩋ ᨸᩣᩁᩮᩣᩈᨴ᩠ᨴᩮᩣᨸ᩠ᨿᨲᩕ (ᨠ.), ᩋ ᨸᩅᩮᨭ᩠ᨮᩈᨴ᩠ᨴᩮᩣᨸ᩠ᨿᨲᩕ (?)].

ᨲᩥᨠᩴ ᩉᨲ᩠ᨳᩮ. ᩉᩈ ᩉᩈᨶᩮ, ᨳᩮᩣ. ᩉᩁ ᩉᩁᨱᩮ ᩅᩣ. ᨶᨠ᩠ᨡᨲ᩠ᨲᩮᨸ᩠ᨿᨿᩴ. ᨠᩁ ᨠᩁᨱᩮ, ᩋ. ᨸᨱ ᨻ᩠ᨿᩅᩉᩣᩁᨳᩩᨲᩦᩈᩩ, ᩍ. ᨸᩣ ᩁᨠ᩠ᨡᨶᩮ ᩅᩣ, ᨱᩥ. ᨠᩁᩮᩣ ᨧ ᨸᩣᨱᩥ ᨧ ᨠᩁᨸᩣᨱᨿᩮᩣ. ᨸᨬ᩠ᨧᩈᩣᨡᩮᩣ, ᩈᨿᩮᩣᨸ᩠ᨿᨲᩕ.

ᨸᨠᩮᩣᨭ᩠ᨮᨶ᩠ᨲᩮᩣ ᩉᨲ᩠ᨳᨣᨱ᩠ᨮᩥ ᨾᨱᩥᨻᨶ᩠ᨵᩮᩣ ᨶᩣᨾ. ᨸᨠᩮᩣᨭ᩠ᨮᩮᩣ ᨶᩣᨾ ᩌᨾᨱᩥᨻᨶ᩠ᨵᩴ ᨠᨸ᩠ᨸᩁᩔ ᩋᨵᩮᩣᨽᩣᨣᩮᩣ. ᨾᨱᩥᩅᩥᨠᨲᩥᩴ ᨻᨶ᩠ᨵᨲᩥ ᩑᨲ᩠ᨳᩣᨲᩥ ᨾᨱᩥᨻᨶ᩠ᨵᩮᩣ. ᨠᩩᩈ ᩋᨠ᩠ᨠᩮᩣᩈᩮ, ᨮᩮᩣ, ᨸᨠᩮᩣᨭ᩠ᨮᩮᩣ.

ᨴ᩠ᩅᨿᩴ ᨽᩩᨩᨾᨩ᩠ᨫᨣᨱ᩠ᨮᩥᨾ᩠ᩉᩥ. ᨠᨸᩩ ᩉᩥᩴᩈᩣᨿᩴ, ᩋᩁᩮᩣ. ᨠᩩᨸ᩠ᨸᩁᩮᩣᨲᩥᨸᩥ ᨸᩣᨮᩮᩣ, ᨲᨴᩣ ᩋᩔᩩᨲ᩠ᨲᩴ. ᨠᨸᩩ ᩉᩥᩴᩈᩣᨿᩴ, ᩒᨱᩥ, ᨠᨸᩮᩣᨱᩥ, ᩍᨲ᩠ᨳᩥᨿᩴ. ᨠᨹᩮᩣᨱᩦᨸ᩠ᨿᨲᩕ, ᨲᨲ᩠ᨳ ᨸᩔ ᨹᨲ᩠ᨲᩴ.

᪒᪖᪖. ᨸᩣᨱᩥᩔ ¶ ᨸᩣᨱᩥᨲᩃᩔ ᩈᨾ᩠ᨻᨶ᩠ᨵᩦᨶᩴ ᨾᨱᩥᨻᨶ᩠ᨵᨠᨶᩥᨭ᩠ᨮᩣᨶᩴ ᨴ᩠ᩅᩥᨶ᩠ᨶᩴ ᩋᨶ᩠ᨲᩁᩴ ᨻᩉᩥᨭ᩠ᨮᩣᨶᩴ ᨠᩁᨽᩮᩣ ᩅᩩᨧ᩠ᨧᨲᩥ, ᨿᩮᨶ ᨠᩩᨾᩣᩁᨠᩣ ᩈᨲ᩠ᨳᩴ ᨠᨲ᩠ᩅᩣ ᩋᨬ᩠ᨬᨾᨬ᩠ᨬᩴ ᨸᩉᩁᨶ᩠ᨲᩥ, ᨠᩁ ᩉᩥᩴᩈᩣᨿᩴ, ᩋᨽᩮᩣ, ᨠᩁ ᨠᩁᨱᩮ ᩅᩣ.

ᨴ᩠ᩅᨿᩴ ᩋᨦ᩠ᨣᩩᩃᩥᨾᨲ᩠ᨲᩮ. ᨠᩁᩔ ᨸᩣᨱᩥᩔ ᩈᩣᨡᩣ ᨠᩁᩈᩣᨡᩣ. ᩋᨣᩥ ᨣᨲ᩠ᨿᨲ᩠ᨳᩮᩣ, ᩋᨦ᩠ᨣ ᨣᨾᨶᨲ᩠ᨳᩮᩣ ᩅᩣ, ᩏᩃᩥ. ᩍᨲ᩠ᨳᩥᩃᩥᨦ᩠ᨣᩮᩣᨿᩴ [(ᨶᨴᩣᨴᩥ) (ᨠ.)], ᩋᨦ᩠ᨣᩩᩃᩥ.

ᨲᩣ ᩋᨦ᩠ᨣᩩᩃᩥᨿᩮᩣ ᨸᨬ᩠ᨧᨸ᩠ᨸᨽᩮᨴᩣ, ᨿᨳᩣ – ᩋᨦ᩠ᨣᩩᨭ᩠ᨮᩮᩣ ᨲᨩ᩠ᨩᨶᩦ ᨾᨩ᩠ᨫᩥᨾᩣ ᩋᨶᩣᨾᩥᨠᩣ ᨠᨶᩥᨭ᩠ᨮᩣ ᨧᩮᨲᩥ ᨠᨾᩣ ᩈᩥᨿᩩᩴ. ᩋᨦ᩠ᨣ ᨣᨾᨶᨲ᩠ᨳᩮᩣ, ᩋᩔᩩᨲ᩠ᨲᩴ, ᩋᨣ᩠ᨣᩮ ᨸᩩᩁᩮ ᨲᩥᨭ᩠ᨮᨲᩦᨲᩥ ᩅᩣ ᩋᨦ᩠ᨣᩩᨭ᩠ᨮᩮᩣ, ᨶᩥᨣ᩠ᨣᩉᩦᨲᩣᨣᨾᩮᩣ, ᩋᩔᩩᨲ᩠ᨲᨬ᩠ᨧ. ᨲᨩ᩠ᨩ ᩉᩥᩴᩈᩣᨿᩴ, ᨲᨩ᩠ᨩᩮᨲᩥ ᨿᩣᨿ, ᩈᩣ ᨲᨩ᩠ᨩᨶᩦ, ᨿᩩ, ᨶᨴᩣᨴᩥ. ᨾᨩ᩠ᨫᩮ ᨲᩥᨭ᩠ᨮᨲᩦᨲᩥ ᨾᨩ᩠ᨫᩥᨾᩣ. ᨶᨲ᩠ᨳᩥ ᨶᩣᨾᨾᩔᩣᨲᩥ ᩋᨶᩣᨾᩥᨠᩣ, ᩈᨠᨲ᩠ᨳᩮ ᨠᩮᩣ. ᩋᨲᩥᩈᨿᩮᨶ ᨡᩩᨴ᩠ᨴᨠᩣᨲᩥ ᨠᨶᩥᨭ᩠ᨮᩣ. ᨿᩩᩅᨸ᩠ᨸᩣᨶᩴ ᨠᨶ, ᨠᨱ ᩅᩣ ᩍᨿᩥᨭ᩠ᨮᩮᩈᩩ.

᪒᪖᪗. ᨲᨩ᩠ᨩᨶ᩠ᨿᩣᨴᩦᩉᩥ ᨿᩩᨲᩮ ᩋᨦ᩠ᨣᩩᨭ᩠ᨮᩮ ᨲᨲᩮ ᨸᩈᩣᩁᩥᨲᩮ ᩈᨲᩥ ᨸᨴᩮᩈᩣᨴᩥᨠᩣ ᨧᨲᩔᩮᩣ ᩈᨬ᩠ᨬᩣ ᨠᨾᨲᩮᩣ ᩈᩥᨿᩩᩴ, ᨿᨳᩣ – ᨲᨩ᩠ᨩᨶᩦᨿᩩᨲᩮ ¶ ᩋᨦ᩠ᨣᩩᨭ᩠ᨮᩮ ᨲᨲᩮ ᨸᨴᩮᩈᩮᩣ. ᨴᩥᩈ ᨸᩮᨠ᩠ᨡᨶᩮ. ᨾᨩ᩠ᨫᩥᨾᨿᩩᨲᩮ ᩋᨦ᩠ᨣᩩᨭ᩠ᨮᩮ ᨲᨲᩮ ᨲᩣᩃᩮᩣ, ᨲᩃ ᨸᨲᩥᨭ᩠ᨮᩣᨿᩴ. ᩋᨶᩣᨾᩥᨠᩣᩈᩉᩥᨲᩮ ᩋᨦ᩠ᨣᩩᨭ᩠ᨮᩮ ᨲᨲᩮ ᨣᩮᩣᨠᨱ᩠ᨱᩮᩣ, ᨣᩮᩣᨠᨱ᩠ᨱᩈᨴᩥᩈᨲ᩠ᨲᩣ, ᨲᨸ᩠ᨸᨾᩣᨱᨲ᩠ᨲᩣ ᩅᩣ ᨣᩮᩣᨠᨱ᩠ᨱᩮᩣ, ᩋᨳ ᩅᩣ ᨣᩮᩣᨠᨱ᩠ᨱᩮᩣ ᨶᩣᨾ ᩑᨠᩮᩣ ᨾᩥᨣᩅᩥᩈᩮᩈᩮᩣ, ᨲᨠ᩠ᨠᨱ᩠ᨱᩈᨴᩥᩈᨸ᩠ᨸᨾᩣᨱᨲ᩠ᨲᩣ ᨣᩮᩣᨠᨱ᩠ᨱᩮᩣ, ᨲᩣᩃᩮᩣ ᨧ ᨣᩮᩣᨠᨱ᩠ᨱᩮᩣ ᨧ ᨲᩣᩃᨣᩮᩣᨠᨱ᩠ᨱᩣ. ᩃᩥᨦ᩠ᨣᨽᩮᨴᩣ ‘‘ᨲᩣᩃᨣᩮᩣᨠᨱ᩠ᨱᩅᩥᨴᨲ᩠ᨳᩦ’’ᨲᩥ ᨶ ᩅᩩᨲ᩠ᨲᩴ, ᨠᨶᩥᨭ᩠ᨮᩣᨿᩩᨲᩮ ᩋᨦ᩠ᨣᩩᨭ᩠ᨮᩮ ᨲᨲᩮ ᩅᩥᨴᨲ᩠ᨳᩥ, ᩅᩥᨲᨶᩮᩣᨲᩦᨲᩥ ᩅᩥᨲᨲ᩠ᨳᩥ, ᩅᩥᨲᨲ᩠ᨳᩥ ᩑᩅ ᩅᩥᨴᨲ᩠ᨳᩥ, ᨲᨶᩩ ᩅᩥᨲ᩠ᨳᩣᩁᩮ,ᨲᩥ, ᨲᩔ ᨳᩮᩣ. ᩅᩥᨴᨲ᩠ᨳᩥ. ‘‘ᨠᨾᩣ ᨲᨲᩮᩣ’’ᨲᩥᨸᩥ ᨸᩣᨮᩮᩣ.

ᨠᩩᨬ᩠ᨧᩥᨲᩮᩣ ᩈᨦ᩠ᨠᩮᩣᨧᩥᨲᩮᩣ ᨸᩣᨱᩥ ᨸᩈᨲᩣᨡ᩠ᨿᩮᩣ, ᨸᨸᩩᨻ᩠ᨻᩮᩣ ᩈᩁ ᨣᨲᩥᨿᩴ, ᨲᩮᩣ. ᨸᨾᩣᨱᨸ᩠ᨸᨠᩁᨱᨲᩮᩣ ᩅᩥᨲᨲᨬ᩠ᨩᩃᩥᨿᩮᩅᩣᨿᩴ ᨠᩅᩦᩉᩥ ᩍᨧ᩠ᨨᩥᨲᩮᩣ. ᩈᨾ᩠ᨸᩩᨭᨬ᩠ᨩᩃᩥ ᨸᨶᩣᨿᩴ, ᨸᩈᩣᩁᩥᨲᩈᩉᩥᨲᩣ [ᨸᩈᩣᩁᩥᨲᩈᩉᩥᨲᨲ᩠ᨲᩣ (ᨠ.)] ᨿᩔ ᩋᨦ᩠ᨣᩩᩃᩥᨿᩮᩣ ᨽᩅᨶ᩠ᨲᩦᨲᩥ.

ᨠᩩᨬ᩠ᨧᩥᨲᩮᩣ ᨧ ᨲᨲᨦ᩠ᨣᩩᨭ᩠ᨮᩮᩣ, ᩈᨸᨲᩣᨠᩮᩣᨲᩥ ᩈᨾ᩠ᨾᨲᩮᩣ;

ᨸᨲᩣᨠᩮᩉᩥ ᨲᩩ ᩉᨲ᩠ᨳᩮᩉᩥ, ᩈᨾ᩠ᨸᩩᨭᨬ᩠ᨩᩃᩥ ᩍᨧ᩠ᨨᩥᨲᩮᩣ.

ᨴᩮᩅᨲᩣᨶᩴ ᨣᩁᩪᨶᨬ᩠ᨧ, ᨸᩥᨲᩪᨶᨬ᩠ᨧᩮ’ᨧ᩠ᨨᩥᨲᩮᩣ ᨸᩩᩁᩮ;

ᩋᨲ᩠ᨳᨸ᩠ᨸᨠᩁᨱᩣᨴᩦᩉᩥ, ᨽᩮᨴᩮᩣ ᨬᩮᨿ᩠ᨿᩮᩣ ᨲᩉᩥᩴ ᨲᩉᩥᩴ.

ᨿᨳᩣ ᨩᩃᨬ᩠ᨩᩃᩥᩴ ᨴᨴᩣᨲᩥ, ᩋᨬ᩠ᨩᩃᩥᨶᩣ ᨸᩥᩅᨲᩥ, ᨴᩮᩅᩮᩣᨿᩴ ᨠᨲᨬ᩠ᨩᩃᩥᩁᩥᨲᩥ. ᨸᩩᨭᨬ᩠ᨩᩃᩥᩔ ᩅᩣ ᩅᨠ᩠ᨡᨾᩣᨶᨲ᩠ᨲᩣ ᩍᨵ ᩅᩥᨲᨲᨬ᩠ᨩᩃᩥᨿᩮᩅ.

᪒᪖᪘. ᨲᩥᨠᩴ ᩈᨸ᩠ᨸᨠᩮᩣᨭ᩠ᨮᩮ ᩅᩥᨲᨲᨠᩁᩮ. ᩁᨾᩩ ᨠᩦᩊᩣᨿᩴ, ᨲᨶᩮᩣ, ᨾᩃᩮᩣᨸᩮᩣ, ᩁᨲᨶᩴ, ᨾᨱᩥᨻᩩᨴ᩠ᨵᩣᨴᩦᩈᩩ ᨧ. ᨠᩩᨠ ᩌᨴᩣᨶᩮ, ᩏ ¶ , ᨴ᩠ᩅᩥᨲ᩠ᨲᩴ. ᩉᩈ ᨵᩣᨲᩩᨾ᩠ᩉᩣ ᨳᩮᩣ, ᨲᩮᩣ ᩅᩣ, ᩉᨲ᩠ᨳᩮᩣ, ᩉᨲ᩠ᨳᩈᩉᩥᨲᨲ᩠ᨲᩣ ᩅᩣ ᨸᨠᩮᩣᨭ᩠ᨮᩮᩣ ᩉᨲ᩠ᨳᩮᩣ.

ᨴ᩠ᩅᨿᩴ ᩈᨾ᩠ᨸᩩᨭᨬ᩠ᨩᩃᩥᨾ᩠ᩉᩥ. ᨠᩁᨾᨿᩮᩣ ᨸᩩᨭᩮᩣ ᨠᩁᨸᩩᨭᩮᩣ, ᩋᨬ᩠ᨩ ᨻ᩠ᨿᨲ᩠ᨲᩥᨣᨲᩥᨠᨶ᩠ᨲᩦᩈᩩ, ᩋᩃᩥ, ᩋᨬ᩠ᨩᩃᩥ. ᨠᩁᨸᩩᨭᩮᩣ ᨧ ᩋᨬ᩠ᨩᩃᩥ ᨧᩮᨲᩥ ᨠᩁᨸᩩᨭᨬ᩠ᨩᩃᩦ.

ᨴ᩠ᩅᨿᩴ ᨶᨡᩮ. ᨠᩁᩮ ᨩᩣᨿᨲᩥ ᩁᩩᩉᨲᩦᨲᩥ ᨠᩁᨩᩮᩣ. ᨶᨲ᩠ᨳᩥ ᨡᩴ ᩍᨶ᩠ᨴᩕᩥᨿᩴ ᩑᨲ᩠ᨳᩣᨲᩥ ᨶᨡᩮᩣ, ᩈᨬ᩠ᨬᩣᩈᨴ᩠ᨴᨲ᩠ᨲᩣ ᨶ ᩋᨲ᩠ᨲᩴ, ᩋᩅᩥᩈᨿᨲ᩠ᨲᩣ ᩅᩣ. ᨸᩩᨶᨻ᩠ᨽᩅᩮᩣ, ᨠᩁᩁᩩᩉᩮᩣ, ᨶᨡᩁᩮᩣᨲᩥᨸᩥ ᨶᨡᩔ ᨶᩣᨾᩣᨶᩥ.

ᨴ᩠ᩅᨿᩴ ᨸᩩᨭᨦ᩠ᨣᩩᩃᩥᨠᩁᩮᨲᩥᨡ᩠ᨿᩣᨲᩮ ᨾᩩᨭ᩠ᨮᩥᨾ᩠ᩉᩥ. ᨡᨭ ᩍᨧ᩠ᨨᩣᨿᩴ, ᨱ᩠ᩅᩩ, ᨡᨴ ᩉᩥᩴᩈᩣᨿᩴ ᩅᩣ, ᨴᩔ ᨭᩮᩣ. ᨾᩩ ᨻᨶ᩠ᨵᨶᩮ,ᨲᩥ, ᨲᩔ ᨮᩮᩣ, ᨴ᩠ᩅᩥᨲ᩠ᨲᩴ.

᪒᪖᪙. ᨸᩔᨴ᩠ᩅᨿᩅᩥᨲ᩠ᨳᨲᩣ ᨸᩔᨴ᩠ᩅᨿᩮᨸᩥ ᩅᩥᨲᨲᩣ ᨸᩈᩣᩁᩥᨲᩣ ᩈᩉᨠᩁᩣ ᩈᨸᩣᨱᨿᩮᩣ ᨴ᩠ᩅᩮ ᨻᩣᩉᩪ ᨻ᩠ᨿᩣᨾᩮᩣ ᨶᩣᨾ, ᨻ᩠ᨿᩣᨾᩦᨿᨲᩮ ᩋᨶᩮᨶᩣᨲᩥ ᨻ᩠ᨿᩣᨾᩮᩣ, ᩅᩥᨸᩩᨻ᩠ᨻᩮᩣ ᨿᩣᨾ ᩋᨬ᩠ᨨᩮ. ᩏᨴ᩠ᨵᩴ ᩏᨸᩁᩥ ᨲᨲᩣ ᩅᩥᨲᨲᩣ ᨽᩩᨩᩣ ᨧ ᨸᩮᩣᩈᩮᩣ ᨧ ᨲᩮᩈᩴ ᩈᨾᩩᨴᩥᨲᩣᨶᩴ ᨸᨾᩣᨱᩈᨴᩥᩈᩴ ᨸᨾᩣᨱᩴ ᨿᩔ ᨲᩈ᩠ᨾᩥᩴ ᩏᨴ᩠ᨵᨶ᩠ᨲᨲᨽᩩᨩᨸᩮᩣᩈᨸ᩠ᨸᨾᩣᨱᩮ ᨸᩮᩣᩁᩥᩈᩈᨴ᩠ᨴᩮᩣ ᩅᨲ᩠ᨲᨲᩥ. ᨽᩩᨩᩈᨴ᩠ᨴᩮᨶ ᩈᩉᨠᩁᩣ ᨽᩩᨩᩣ ᨣᨿ᩠ᩉᨲᩮ, ᩑᨠᩔ ᨸᨾᩣᨱᩈᨴ᩠ᨴᩔ ᩃᩮᩣᨸᩮᩣ, ᨸᩩᩁᩥᩈᩔ ᨸᨾᩣᨱᩴ ᨸᩮᩣᩁᩥᩈᩴ. ᨸᩩᩁᩥᩈᩈᨴ᩠ᨴᩮᩣ ᨧᩮᨲ᩠ᨳ ᩈᨠᩁᨽᩩᨩᨸᩩᩁᩥᩈᩴ ᩅᨴᨲᩥ, ᨲᩦᩈᩩ, ᨿᨳᩣ – ᨸᩮᩣᩁᩥᩈᩴ ᨩᩃᩴ, ᨸᩮᩣᩁᩥᩈᩮᩣ ᩉᨲ᩠ᨳᩦ, ᨸᩮᩣᩁᩥᩈᩦ ᨿᨭ᩠ᨮᩥ.

᪒᪗᪐. ᨴ᩠ᩅᨿᩴ ᩏᩁᩈᩥ. ᩏᩈ ᨴᩣᩉᩮ, ᩁᩮᩣ, ᩈᩃᩮᩣᨸᩮᩣ, ᩋᩁ ᨣᨲᩥᨾ᩠ᩉᩥ ᩅᩣ, ᩋᩔᩩᨠᩣᩁᩮᩣ. ᩉᩁ ᩉᩁᨱᩮ, ᨿᩮᩣ, ᩁᩔ ᨴᩮᩣ. ᨠᩮᩣᩊᩴ [ᨠᩮᩣᨭ᩠ᨮ (ᨠ.)] ¶ , ᨽᩩᨩᨶ᩠ᨲᩁᩴ, ᩅᨠ᩠ᨡᩮᩣᨲᩥᨸᩥ ᩏᩁᩮᩣᨶᩣᨾᩣᨶᩥ. ᨲᩥᨠᩴ ᩏᩁᩮᩣᨩᩮ. ᨲᨶᩩ ᩅᩥᨲ᩠ᨳᩣᩁᩮ, ᨲᨶᩮᩣᨲᩥ ᩍᨧ᩠ᨨᨶ᩠ᨲᩥ ᨳᨶᩮᩣ, ᨲᩔ ᨳᩮᩣ, ᨳᨶ ᨴᩮᩅᩈᨴ᩠ᨴᩮ, ᨳᨶ ᨧᩮᩣᩁᩥᨿᩮ ᩅᩣ. ᨠᩩᨧ ᩈᨦ᩠ᨠᩮᩣᨧᨶᩮ, ᨠᩩᨧᩮᩣ. ᨸᨿᩮᩣ ᨡᩦᩁᩴ ᨵᩣᩁᩮᨲᩦᨲᩥ ᨸᨿᩮᩣᨵᩁᩮᩣ. ᨠᩩᨧᩮᩣ ᨧ ᨸᨿᩮᩣᨵᩁᩮᩣ ᨧᩣᨲᩥ ᨴ᩠ᩅᨶ᩠ᨴᩮᩣ.

ᨳᨶᨣ᩠ᨣᩈ᩠ᨾᩥᩴ ᨳᨶᩔ ᩋᨣ᩠ᨣᩮ ᨧᩪᨧᩩᨠᩴ, ᨶᨸᩩᩴᩈᨠᩮ. ‘‘ᨧᩪᨧᩩᨠᩮᩣ ᩈᩮᩣ ᨠᩩᨧᩣᨶᨶ’’ᨶ᩠ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪖.᪗᪗] ᨲᩩ ᩁᨲᨶᨠᩮᩣᩈᩮᩣ, ᨧᩩ ᨧᩅᨶᩮ, ᩏᨠᩮᩣ, ᨴ᩠ᩅᩥᨲ᩠ᨲᩴ, ᨴᩦᨥᩮᩣ ᨧ, ᨧᩪᨧᩩᨠᩴ, ᨧᨶ᩠ᨧᩩ ᨣᨲᩥᨿᩴ ᩅᩣ, ᩏᨠᩮᩣ, ᨶᩃᩮᩣᨸᩮᩣ, ᩋᩔᩪᨠᩣᩁᩮᩣ, ᨧᩪᨧᩩᨠᩴ.

ᨴ᩠ᩅᨿᩴ ᨸᩥᨭ᩠ᨮᩮ ᨠᩣᨿᩔ ᨸᨧ᩠ᨨᩣᨽᩣᨣᩮ. ᨸᩥᨭ ᩈᨴ᩠ᨴᩈᨦ᩠ᨥᩣᨲᩮᩈᩩ, ᨲᩮᩣ. ᩍᨲᩁᨲᩕ ᨲᩥ, ᨸᩥᩈᩩ ᩈᩮᨧᨶᩮ ᩅᩣ.

᪒᪗᪑. ᨲᩥᨠᩴ ᨲᨶᩩᨾᨩ᩠ᨫᩮ. ᨾᨩ᩠ᨫᩮ ᨽᩅᩮᩣ ᨾᨩ᩠ᨫᩮᩣ. ᩃᨣ ᩈᨦ᩠ᨣᩮ, ᩋ. ᨾᨩ᩠ᨫᩮ ᨽᩅᩴ ᨾᨩ᩠ᨫᩥᨾᩴ. ᨧᨲᩩᨠ᩠ᨠᩴ ᩏᨴᩁᩮ. ᨠᩩᩈ ᩋᨠ᩠ᨠᩮᩣᩈᩮ, ᨨᩥ, ᩈᩔ ᨧᩮᩣ. ᨣᩉ ᩏᨸᩣᨴᩣᨶᩮ, ᩋᨶᩥ, ᩎᨾ᩠ᩉᩥ ᨣᩉᨱᩦ, ᨣᨻ᩠ᨽᩴ ᨣᨱ᩠ᩉᩣᨲᩥ ᨵᩣᩁᩮᨲᩦᨲᩥ ᩅᩣ ᨣᩉᨱᩦ, ᨣᨻ᩠ᨽᩣᩈᨿᩈᨬ᩠ᨬᩥᨲᩮᩣ ᨾᩣᨲᩩᨠᩩᨧ᩠ᨨᩥᨸ᩠ᨸᨴᩮᩈᩮᩣ, ᨲᩮᨩᩮᩣᨵᩣᨲᩩᨾ᩠ᩉᩥ ᨸᨶ ᨿᨳᩣᨽᩩᨲ᩠ᨲᩣᩉᩣᩁᩔ ᩅᩥᨸᩣᨧᨶᩅᩈᩮᨶ ᨣᨱ᩠ᩉᨶᨲᩮᩣ ᩋᨨᨯ᩠ᨯᨶᨲᩮᩣ ᨣᩉᨱᩦ. ᩏᨸᩩᨻ᩠ᨻᩮᩣ ᨴᩁ ᨣᨾᨶᩮ. ᩏᨴᩁᨲᩥ ᩏᨴ᩠ᨵᩴ ᨣᨧ᩠ᨨᨲᩥ ᩅᩣᨿᩩ ᨿᨲᩕᩣᨲᩥ ᩏᨴᩁᩴ. ᨣᩩ ᩈᨴ᩠ᨴᩮ, ᩋᨽᩮᩣ, ᨴ᩠ᩅᩥᨲ᩠ᨲᩣᨴᩥ, ᨣᨻ᩠ᨽᩮᩣ. ᨸᩥᨧᨱ᩠ᨯ ᨩᨮᩁ ᨲᩩᨶ᩠ᨴᩣᨸ᩠ᨿᨲᩕ.

ᨠᩩᨧ᩠ᨨᩥᩈᨾ᩠ᨽᩅᩮ ᨠᩩᨧ᩠ᨨᩥᨭ᩠ᨮᩮ ᨠᩮᩣᨭ᩠ᨮᩮᩣ, ᩋᨶ᩠ᨲᩮᩣ ᨧᩣᨲᩥ ᩍᨾᩮ ᨴ᩠ᩅᩮ ᩅᨲ᩠ᨲᨶ᩠ᨲᩥ, ᨠᩩᩈ ᩋᨠ᩠ᨠᩮᩣᩈᩮ, ᨲᩮᩣ, ᨮᩮᩣ ᩅᩣ. ᩋᨾ ᨣᨾᨶᨲ᩠ᨳᩮᩣ, ᨲᩮᩣ.

᪒᪗᪒. ᨧᨲᩩᨠ᩠ᨠᩴ ¶ ᨠᨭᩥᨿᩴ. ᩉᨶᨵᩣᨲᩩᨾ᩠ᩉᩣ ᨿᩩ, ᩉᩔ ᨴ᩠ᩅᩥᨲ᩠ᨲᩴ, ᩉᩔ ᨩᩮᩣ, ᩉᨶᩔ ᨥᩮᩣ ᨧ, ᨩᨥᨶᩴ. ᨶᩥᨧ᩠ᨨᨿᩮᨶ ᨲᨾᨲᩦᨲᩥ ᨶᩥᨲᨾ᩠ᨻᩮᩣ, ᨲᨾᩩᨵᩣᨲᩩᨾ᩠ᩉᩣ ᨻᩮᩣ. ᩈᩪ ᨸᩈᩅᩮ, ᨱᩥ. ᨠᨭ ᩅᩔᩣᩅᩁᨱᩮᩈᩩ, ᨠᨭ᩠ᨿᨲᩮ ᩌᩅᩁᩦᨿᨲᩮ ᩅᨲ᩠ᨳᩣᨴᩦᩉᩥ ᨠᨭᩥ, ᩍ, ᩑᨲᩮ ᨴ᩠ᩅᩮ ᨶᩣᩁᩥᨿᩴ. ᩑᨲ᩠ᨳ ᨧ ᨩᨥᨶᩈᨴ᩠ᨴᩮᨶ ᩍᨲ᩠ᨳᩥᨠᨭᩥᨿᩣ ᩋᨣ᩠ᨣᨽᩣᨣᩮᩣ, ᨶᩥᨲᨾ᩠ᨻᩈᨴ᩠ᨴᩮᨶ ᩍᨲ᩠ᨳᩥᨠᨭᩥᨿᩣ ᨸᨧ᩠ᨨᩣᨽᩣᨣᩮᩣ, ᩈᩮᩈᨴ᩠ᩅᨿᩮᨶ ᨠᨭᩥᩈᩣᨾᨬ᩠ᨬᩴ ᩅᩩᨲ᩠ᨲᨶ᩠ᨲᩥ ᨴᨭ᩠ᨮᨻ᩠ᨻᩴ, ᩅᩩᨲ᩠ᨲᨬ᩠ᨧ ‘‘ᨸᨧ᩠ᨨᩣ ᨶᩥᨲᨾ᩠ᨻᩮᩣ ᨳᩦᨠᨭ᩠ᨿᩣ, ᨩᨥᨶᩴ ᨲᩩ ᨸᩩᩁᩮᩣ ᨽᩅᩮ’’ᨲᩥ [ᩋᨾᩁ ᪑᪖.᪗᪔].

᪒᪗᪓. ᩃᩥᨦ᩠ᨣᨶ᩠ᨲᩴ ᩃᩥᨦ᩠ᨣᩈᩣᨾᨬ᩠ᨬᩮ. ᩋᨦ᩠ᨣᩮ ᩈᩁᩦᩁᩮ ᨩᩣᨿᨲᩦᨲᩥ ᩋᨦ᩠ᨣᨩᩣᨲᩴ, ᩋᨦ᩠ᨣᩈᨴ᩠ᨴᩮᩣ ᩈᩁᩦᩁᩅᩣᨧᨠᩮᩣ, ᩋᨦ᩠ᨣᨾᩮᨲᩔᨲ᩠ᨳᩦᨲᩥ ᨠᨲ᩠ᩅᩣ. ᩁᩉᩈᩥ ᨮᩣᨶᩮ ᨩᩣᨲᩴ ᩋᨦ᩠ᨣᩴ ᩁᩉᩔᨦ᩠ᨣᩴ, ᩈᨲ᩠ᨲᨾᩥᨿᩣᩃᩮᩣᨸᩮᩣ, ᩍᩔᨲ᩠ᨲᩴ, ᩈᩔ ᨴ᩠ᩅᩥᨲ᩠ᨲᨬ᩠ᨧ. ᩅᨲ᩠ᨳᩮᨶ ᨣᩩᨿ᩠ᩉᩥᨲᨻ᩠ᨻᨶ᩠ᨲᩥ ᩅᨲ᩠ᨳᨣᩩᨿ᩠ᩉᩴ. ᨾᩥᩉ ᩈᩮᨧᨶᩮ, ᨠᩁᨱᩮ ᨿᩩ, ᨾᩥᩉᨲᩥ ᩁᩮᨲᩮᩣᨾᩩᨲ᩠ᨲᩣᨶᩥ ᨿᩮᨶᩣᨲᩥ ᨾᩮᩉᨶᩴ. ᨶᩥᨸᩩᨻ᩠ᨻᩮᩣ ᨾᩥᩉ ᩈᩮᨧᨶᩮ, ᨲᩮᩣ, ᨶᩥᨾᩥᨲ᩠ᨲᩴ. ᩏᨲ᩠ᨲᨾᨦ᩠ᨣᨲ᩠ᨲᩣ ᩅᩁᨦ᩠ᨣᩴ. ᩅᨩ ᨣᨲᩥᨿᩴ, ᩋᩔᩦᨠᩣᩁᩮᩣ, ᨸᨧ᩠ᨧᨿᩮᩉᩥ ᩅᩥᨶᩣ ᨩᩣᨿᨲᩦᨲᩥ ᩅᩣ ᨻᩦᨩᩴ, ᩅᩥᩁᩉᨲ᩠ᨲᨩᩮᩣᨲᨠᩮᩣ ᩉ᩠ᨿᩮᨲ᩠ᨳ ᩅᩥᨠᩣᩁᩮᩣ. ᨹᩃ ᨶᩥᨸ᩠ᨹᨲ᩠ᨲᩥᨿᩴ, ᨹᩃᨲᩥ ᩑᨲᩮᨶ ᨸᩩᨲ᩠ᨲᨶ᩠ᨲᩥ ᨹᩃᩴ. ᩃᩥᨦ᩠ᨣᨲᩥ ‘‘ᩍᨲ᩠ᨳᩦ, ᨸᩩᩁᩥᩈᩮᩣ’’ᨲᩥ ᩅᩥᨽᩣᨣᩴ ᨣᨧ᩠ᨨᨲᩥ ᨿᩮᨶᩣᨲᩥ ᩃᩥᨦ᩠ᨣᩴ. ᩃᩥᨦ᩠ᨣ ¶ ᨣᨾᨶᩮ, ᩃᩦᨶᩴ ᩋᨸᩣᨠᨭᩴ ᩋᨦ᩠ᨣᨶ᩠ᨲᩥ ᩅᩣ ᩃᩥᨦ᩠ᨣᩴ. ᩑᨲᩮᩈᩩ ᨻᩦᨩᨹᩃᩈᨴ᩠ᨴᩣ ᩋᨱ᩠ᨯᩮᨸᩥ ᩅᨲ᩠ᨲᨶ᩠ᨲᩥ.

ᨴ᩠ᩅᨿᩴ ᨸᩩᩁᩥᩈᩃᩥᨦ᩠ᨣᨸᩈᩥᨻ᩠ᨻᨠᩮ. ᩋᨾ ᨣᨾᨶᩮ, ᨯᩮᩣ, ᩋᨱᩈᨴ᩠ᨴᨲ᩠ᨳᩮᩣ ᩅᩣ, ᨯᩮᩣ, ᩋᨯᩥ ᩋᨱ᩠ᨯᨲ᩠ᨳᩮ ᩅᩣ, ᨲᩮᩣ. ᨠᩩᩈ ᩋᨠ᩠ᨠᩮᩣᩈᩮ, ᨱᩮᩣ. ᩋᨱ᩠ᨯᩈᨴ᩠ᨴᩮᩣ ᨧᩮᨲ᩠ᨳ ᨻᩦᨩᩮᨸᩥ, ᩋᨱ᩠ᨯᨠᩮᩣᩈᩮᩣᨲᩥ ᩈᨾᩩᨴᩥᨲᨾ᩠ᨸᩥ ᨠᩮᩣᩈᩔ ᨶᩣᨾᩴ, ‘‘ᨠᩩᨠ᩠ᨠᩩᨭᨧ᩠ᨨᩣᨸᨠᩔᩮᩅ ᩋᨱ᩠ᨯᨠᩮᩣᩈᨾ᩠ᩉᩣ’’ᨲᩥ [ᨸᩣᩁᩣ. ᪑᪓, ᪑᪔] ᩉᩥ ᩅᩩᨲ᩠ᨲᩴ, ᩋᨾᩁᨠᩮᩣᩈᩮᨸᩥ [ᩋᨾᩁᨠᩮᩣᩈᩮ ᪑᪖.᪗᪖] ᩋᨱ᩠ᨯᨠᩮᩣᩈᩮᩣᨲᩥ ᩈᨾᩩᨴᩥᨲᩮᨶᩮᩅ ᨶᩣᨾᩴ ᩅᩩᨲ᩠ᨲᩴ. ᩑᨲ᩠ᨳ ᨧ ᩋᨱ᩠ᨯᩔ ᨻᩦᨩᩔ ᨠᩮᩣᩈᩮᩣ ᩋᨱ᩠ᨯᨠᩮᩣᩈᩮᩣᨲᩥ ᩅᩥᨣ᩠ᨣᩉᩮᩣ ᨠᩣᨲᨻ᩠ᨻᩮᩣ.

ᨴ᩠ᩅᨿᩴ ᩍᨲ᩠ᨳᩥᨿᩣ ᩋᨦ᩠ᨣᨩᩣᨲᩮ. ᨿᩩ ᨾᩥᩔᨶᩮ, ᩋᨵᩥᨠᩁᨱᩮᨶᩥ, ᨿᩮᩣᨶᩥ, ᩍᨲ᩠ᨳᩥᨿᩴ ᨸᩩᨾᩮ ᨧᩣᨿᩴ, ᩍᨲ᩠ᨳᩦ ᨧ ᨸᩩᨾᩣ ᨧ ᩍᨲ᩠ᨳᩥᨸᩩᨾᩴ, ᨲᩈ᩠ᨾᩥᩴ. ᨽᨩᨶ᩠ᨲᩥ ᩋᩈ᩠ᨾᩥᨶ᩠ᨲᩥ ᨽᨣᩴ. ᨾᩣᩁᨾᨶ᩠ᨴᩥᩁ ᨾᩣᩁᨠᩪᨸᩣ ᨧᩣᨲᩕ.

᪒᪗᪔-᪒᪗᪕. ᨲᩥᨠᩴ ᩍᨲ᩠ᨳᩥᨸᩩᩁᩥᩈᩣᨶᩴ ᩈᨾ᩠ᨽᩅᩮ. ᩈᩩᨧᩥᩔ ᨸᨭᩥᨸᨠ᩠ᨡᩮᩣ ᩋᩈᩩᨧᩥ, ᩍᨠᩣᩁᨶ᩠ᨲᩮᩣ, ᨴ᩠ᩅᩦᩈᩩ, ᩈᨾ᩠ᨽᩅᩃᩥᨦ᩠ᨣᩮᩣ ᩅᩣ. ᩈᩴᨸᩩᨻ᩠ᨻᩣ ᨽᩪᨵᩣᨲᩩᨾ᩠ᩉᩣ ᩋ. ᩈᨠ ᩈᩣᨾᨲ᩠ᨳᩥᨿᩴ, ᨲᩮᩣ, ᨲᩔ ᨠᩮᩣ, ᩋᩔᩩᨲ᩠ᨲᩴ, ᩈᩩᨧ ᩈᩮᩣᨠᩮ ᩅᩣ, ᨠᩮᩣ.

ᨴ᩠ᩅᨿᩴ ᩅᨧ᩠ᨧᨾᨣ᩠ᨣᩮ. ᨸᩩᨶᨶ᩠ᨲᩥ ᩋᨶᩮᨶᩣᨲᩥ ᨸᩣᨿᩩ. ᨸᩪ ᨸᩅᨶᩮ, ᩏ, ᩐᩔᩣᨿᩮᩣ, ᨸᨿ ᨣᨾᨶᨲ᩠ᨳᩮᩣ ᩅᩣ, ᨸᨿᨲᩥ ᩅᨧ᩠ᨧᨾᨶᩮᨶᩣᨲᩥ ᨸᩣᨿᩩ, ¶ ᨠᩁᨱᩮ ᩏ, ᩋᨿᩴ ᨸᩩᩁᩥᩈᩮ ᨸᩩᩃ᩠ᩃᩥᨦ᩠ᨣᩮ ᩅᨲ᩠ᨲᨲᩥ. ᨣᩩᨴ ᨠᩦᩊᩣᨿᩴ, ᩋ. ᩋᨸᩣᨶᩴᨸ᩠ᨿᨲᩕ.

ᩋᨭ᩠ᨮᨠᩴ ᩅᨧ᩠ᨧᩮ. ᨣᩪᨳ ᨠᩁᩦᩈᩮᩣᩔᨣ᩠ᨣᩮ, ᨣᩩᨸ ᨣᩮᩣᨸᨶᩮ ᩅᩣ, ᨳᩮᩣ. ᨠᩥᩁ ᩅᩥᨠᩥᩁᨱᩮ, ᩎᩈᩮᩣ, ᨠᩁᩦᩈᩴ. ᩅᩁ ᩅᩁᨱᩈᨾ᩠ᨽᨲ᩠ᨲᩦᩈᩩ, ᨧᩮᩣ, ᨣᩪᨳᨬ᩠ᨧ ᨠᩁᩦᩈᨬ᩠ᨧ ᩅᨧ᩠ᨧᨬ᩠ᨧᩮᨲᩥ ᨴ᩠ᩅᨶ᩠ᨴᩮᩣ, ᨲᩣᨶᩥ ᩅᩥᨠᨸ᩠ᨸᩮᨶ ᨸᩩᨾᩮ ᩅᨲ᩠ᨲᨶ᩠ᨲᩥ, ᨶᩥᨧ᩠ᨧᩴ ᨶᨸᩩᩴᩈᨠᩮ, ᨸᩩᩃ᩠ᩃᩥᨦ᩠ᨣᨲ᩠ᨲᩴ ᨲᩮᩈᩴ ᨠᨲ᩠ᨳᨧᩥᨿᩮᩅ, ᩈᨻ᩠ᨻᨲᩕ ᨶᨸᩩᩴᩈᨠᨲ᩠ᨲᨾᩮᩅ ᨻᩉᩩᩃᨶ᩠ᨲ᩠ᨿᨲ᩠ᨳᩮᩣ. ᨾᩃ ᨧᩃᨶᩮ, ᩋ, ᨾᩃ ᨵᩣᩁᨱᩮ ᩅᩣ. ᩈᨠ ᩈᨲ᩠ᨲᩥᨿᩴ, ᩈᩔ ᨨᩮᩣ. ᩏᨧ᩠ᨧᩣᩁᩦᨿᨲᩮ ᨩᩉ᩠ᨿᨲᩮᨲᩥ ᩏᨧ᩠ᨧᩣᩁᩮᩣ, ᩏᨸᩩᨻ᩠ᨻᩮᩣ ᨧᩁᨵᩣᨲᩩ ᨧᨩᨶᩮ, ᩏᨠ᩠ᨡᩥᨸᨶᩮ ᨧ ᩅᨲ᩠ᨲᨲᩥ. ᨾᩥᩉ ᩈᩮᨧᨶᩮ, ᩃᩮᩣ, ᩅᨱ᩠ᨱᩅᩥᨸᩁᩥᨿᨿᩮᩣ, ᩊᨲ᩠ᨲᨬ᩠ᨧ. ᩋᩅᨠᩁᩦᨿᨲᩮᨲᩥ ᩏᨠ᩠ᨠᩣᩁᩮᩣ, ᩋᩅᩔᩩᨲ᩠ᨲᩴ, ᨠᩥᩁ ᩅᩥᨠ᩠ᨡᩥᨸᨶᩮ. ᩈᨾᩃᩴᨸ᩠ᨿᨲᩕ. ᩈᨾᩩ ᩏᨸᩈᨾᩮ, ᩋᩃᩮᩣ.

ᨴ᩠ᩅᨿᩴ ᨾᩩᨲ᩠ᨲᩮ. ᩈᩩ ᩈᩅᨶᩮ, ᩈᩅᨶᩴ ᩈᨶ᩠ᨴᨶᩴ, ᨧᩩᩁᩣᨴᩥ, ᨱᩮᩣ. ᨾᩩᨧ ᨾᩮᩣᨧᨶᩮ, ᨲᩮᩣ, ᨾᩩᨲ᩠ᨲ ᨸᩔᩣᩅᩮ ᩅᩣ. ᩏᨧ᩠ᨧᨲᩮ ᨠᨳᩦᨿᨲᩮ. ᨣᩮᩣᨾᩩᨲ᩠ᨲᩮ ᨣᩅᩴ ᩈᨾ᩠ᨻᨶ᩠ᨵᩥᨶᩥ ᨾᩩᨲ᩠ᨲᩮ ᨸᩪᨲᩥᨾᩩᨲ᩠ᨲᩈᨴ᩠ᨴᩮᩣ ᩅᨲ᩠ᨲᨲᩥ. ᩋᨩ᩠ᨩ ᨸᩅᨲ᩠ᨲᨾ᩠ᨸᩥ ᩉᩥ ᨲᩴ ᨴᩩᨣ᩠ᨣᨶ᩠ᨵᨽᩣᩅᩮᨶ ᨸᩪᨲᩥᨾᩩᨲ᩠ᨲᨶ᩠ᨲ᩠ᩅᩮᩅ ᩅᩩᨧ᩠ᨧᨲᩥ, ᨿᨳᩣ ‘‘ᨸᩪᨲᩥᨠᩣᨿᩮᩣ’’ᨲᩥ. ᩋᩔᩣᨴᩦᨶᩴ ᨾᩃᩮ ᨨᨠᨱᩈᨴ᩠ᨴᩮᩣ, ᩈᨠ ᩈᨲ᩠ᨲᩥᨿᩴ, ᨿᩩ, ᩈᩔ ᨨᩮᩣ.

᪒᪗᪖. ᨶᩣᨽᩥᨿᩣ ᩋᨵᩮᩣᨽᩣᨣᩮᩣ ᩅᨲ᩠ᨳᩥ ᨶᩣᨾ, ᩈᩮᩣ ᨴ᩠ᩅᩦᩈᩩ. ᩅᨲ᩠ᨳᩥ ᨾᩩᨲ᩠ᨲᨸᩩᨭᩴ. ‘‘ᨾᩩᨲ᩠ᨲᩣᩈᨿᨸᩩᨭᩮᩣ ᩅᨲ᩠ᨳᩥ’’ᩁᩥᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪖.᪗᪓] ᩁᨲᨶᨾᩣᩃᩣ. ᩅᩈᨲᩥ ᨾᩩᨲ᩠ᨲᨾᩮᨲ᩠ᨳᩣᨲᩥ ᩅᨲ᩠ᨳᩥ, ᩅᩈ ᨶᩥᩅᩣᩈᩮ,ᨲᩥ, ᨲᩔ ᨳᩮᩣ, ᨲ᩠ᨳᩥᨸᨧ᩠ᨧᨿᩮᨶ ᩅᩣ ᩈᩥᨴ᩠ᨵᩴ. ᩏᨧ᩠ᨨᨦ᩠ᨣᩴ ᩋᨦ᩠ᨠᨬ᩠ᨧ ᩍᨾᩮ ᨴ᩠ᩅᩮ ᩏᨽᩮᩣ ᩈᨴ᩠ᨴᩣ ¶ ᨸᩩᨾᩮ ᩅᨲ᩠ᨲᨶ᩠ᨲᩥ. ᩏᩔᨩ᩠ᨩᨲᩥ ᩑᨲ᩠ᨳᩣᨲᩥ ᩏᨧ᩠ᨨᨦ᩠ᨣᩴ, ᩈᨩ ᩈᨦ᩠ᨣᩮ, ᩈᩔ ᨨᩮᩣ, ᨴ᩠ᩅᩥᨲ᩠ᨲᩴ. ᩋᨦ᩠ᨠ ᨣᨾᨶᨲ᩠ᨳᩮᩣ, ᩋ, ᩋᨦ᩠ᨠᩮᩣ, ᩋᨳ ᩅᩣ ᩋᨦ᩠ᨠ ᩃᨠ᩠ᨡᨱᩮ, ᩋ, ᩋᨦ᩠ᨠᩮᩣ, ‘‘ᩏᨧ᩠ᨨᨦ᩠ᨣᨧᩥᩉᨶᩮᩈ᩠ᩅ’ᨦ᩠ᨠᩮᩣ’’ᨲᩥ ᩋᨾᩁᨠᩮᩣᩈᩮ [ᩋᨾᩁ ᨠᩮᩣᩈᩮ ᪒᪓.᪔].

ᨴ᩠ᩅᨿᩴ ᨩᩣᨱᩪᨸᩁᩥᨽᩣᨣᩮ. ᩋᩁ ᨣᨾᨶᩮ, ᩏ, ᩋᩔᩪᨠᩣᩁᩮᩣ. ᩈᨶ᩠ᨩ ᩈᨦ᩠ᨣᩮ, ᩌᩈᨩ᩠ᨩᨲᩥ ᩅᨲ᩠ᨳᨾᨲᩕᩣᨲᩥ ᩈᨲ᩠ᨳᩥ, ᨳᩥ. ᩐᩁᩩ ᨧ ᩈᨲ᩠ᨳᩥ ᨧᩮᨲᩥ ᨴ᩠ᩅᨶ᩠ᨴᩮᩣ, ᨶᨸᩩᩴᩈᨠᩮᨸᩥ.

ᨲᩥᨠᩴ ᨩᩣᨱᩩᨾ᩠ᩉᩥ, ᩐᩁᩩᨶᩮᩣ ᨸᨻ᩠ᨻᩴ ᨣᨱ᩠ᨮᩥ ᩐᩁᩩᨸᨻ᩠ᨻᩴ. ᨩᨶ ᨩᨶᨶᩮ, ᨱᩩ. ᨴ᩠ᩅᩥᨲ᩠ᨲᩮ ᨩᨱ᩠ᨱᩩ.

᪒᪗᪗. ᨴ᩠ᩅᨿᩴ ᨸᩣᨴᨣᨱ᩠ᨮᩥᨾ᩠ᩉᩥ. ᨣᩩᨸ ᩁᨠ᩠ᨡᨱᩮ ᨹᩮᩣ, ᩈᨠᨲ᩠ᨳᩮ ᨠᩮᩣ. ᨸᩣᨴᩔ ᨣᨱ᩠ᨮᩥ ᨸᩣᨴᨣᨱ᩠ᨮᩥ. ᨥᩩᨭᩥᨠᩣᨸ᩠ᨿᨲᩕ. ᨥᩩᨭ ᨸᩁᩥᩅᨲ᩠ᨲᨶᩮ, ᨥᩩᨭ᩠ᨿᨲᩮ ᩋᨶᩮᨶᩮᨲᩥ ᨥᩩᨭᩥᨠᩣ, ᨱ᩠ᩅᩩ.

ᨴ᩠ᩅᨿᩴ ᨸᩣᨴᩔ ᨸᨧ᩠ᨨᩣᨽᩣᨣᩮ ᨣᩮᩣᨸ᩠ᨹᨠᩔᩣᨵᩮᩣ ᨽᩣᨣᩮ. ᨸᩩᨾᩮ ᨲᩪᨲᩥ ᨲ᩠ᩅᨶ᩠ᨲᩴ ᩃᩥᨦ᩠ᨣᨸᨴᩴ. ᨸᩈ ᨻᩣᨵᨶᨹᩩᩈᨶᩮᩈᩩ,ᨲᩥ, ᨲᩔ ᨱᩮᩣ, ᩈᩔ ᩉᩮᩣ, ᩅᨱ᩠ᨱᩅᩥᨸᩁᩥᨿᨿᩮᩣ, ᨱᩥᨸᨧ᩠ᨧᨿᩮᨶ ᩅᩣ ᩈᩥᨴ᩠ᨵᩴ. ᩈᨠᩣᩁᩅᨱ᩠ᨱᩣᨣᨾᩮ ᩅᩩᨴ᩠ᨵᩥᨿᨬ᩠ᨧ ᨸᩣᩈᨱ᩠ᩉᩥ. ᩑᩃᩥᨸ᩠ᨿᨲᩕ, ᩍᩃ ᨣᨲᩥᨿᩴ,ᨲᩥ, ᨲᩃᩮᩣᨸᩮᩣ.

ᨴ᩠ᩅᨿᩴ ᨸᩣᨴᨣ᩠ᨣᩮ. ᨸᩣᨴᩔ ᩋᨣ᩠ᨣᩴ ᨸᩣᨴᨣ᩠ᨣᩴ. ᨸᨠᨭ᩠ᨮᩴ ᨸᨴᩴ ᨸᨸᨴᨶ᩠ᨲᩥ ᨠᨾ᩠ᨾᨵᩣᩁᨿᩮᩣ. ‘‘ᨸᨸᨴᩮᩣ’’ᨲᩥᨸᩥ ᨸᩣᨮᩮᩣ. ᨲᩥᨠᩴ ᨸᩣᨴᩮ. ᨸᨴ ᨣᨲᩥᨾ᩠ᩉᩥ, ᨱᩮᩣ, ᨸᨩ᩠ᨩᨲᩮᨲᩥ ᨸᩣᨴᩮᩣ. ᨸᨩ᩠ᨩᨲᩮ ᨣᨧ᩠ᨨᨲᩦᨲᩥ, ᩋ. ᨧᩁᨾ᩠ᩉᩣ ᨠᩁᨱᩮ ᨿᩩ, ᨧᩁᨱᩴ, ᩍᨴᩴ ᨸᩩᨾᩮ ᩅᩥᨠᨸ᩠ᨸᩮᨶ, ᨶᩥᨧ᩠ᨧᩴ ᨶᨸᩩᩴᩈᨠᩮ. ᩋᨦ᩠ᨥᩥᨸ᩠ᨿᨲᩕ, ᩋᩉᩥ ᨣᨲᩥᨿᩴ. ᩍ, ᩉᩔ ᨥᩮᩣ.

᪒᪗᪘. ᨴ᩠ᩅᨿᩴ ¶ ᩉᨲ᩠ᨳᩣᨴ᩠ᨿᩅᨿᩅᩮ. ᩋᨦ᩠ᨣᩥ ᨣᨲ᩠ᨿᨲ᩠ᨳᩮᩣ, ᩋ. ᩋᩅᨸᩩᨻ᩠ᨻᩮᩣ ᨿᩩ ᨾᩥᩔᨶᩮ, ᩋ. ᨸᨲᩦᨠᩮᩣ, ᩋᨸᨥᨶᩮᩣᨸ᩠ᨿᨲᩕ. ᨸᨲᩥᨸᩩᨻ᩠ᨻᩣ ᩍᨾ᩠ᩉᩣ ᨠᩮᩣ. ᩋᨸᨸᩩᨻ᩠ᨻᩣ ᩉᨶᩥᨾ᩠ᩉᩣ ᩋ, ᨥᨶᩣᨴᩮᩈᩮᩣ ᨧ.

ᨴ᩠ᩅᨿᩴ ᨸᩔᨭ᩠ᨮᩥᨾ᩠ᩉᩥ. ᨸᩣ ᩁᨠ᩠ᨡᨱᩮ, ᩈᩩ, ᩊᩥᨠᩣᩁᩅᨱ᩠ᨱᩣᨣᨾᩮᩣ, ᩈᨠᨲ᩠ᨳᩮ ᨠᩮᩣ, ᨸᩔ ᨹᩮᩣ. ᩋᩊᩣᨣᨾᩮ ᨹᩣᩈᩩᨠᩣ. ‘‘ᨸᩣᩈᩩᩊᩥᨠᩣ, ᨸᩣᩈᩩᨠᩣ’’ᨲᩥᨸᩥ ᨸᩣᨮᩮᩣ. ᨹᩩᩈ ᩈᨾ᩠ᨹᩔᩮᨲᩥᨸᩥ ᨵᩣᨲᩩ, ᨲᨴᩣ ᩏᨸᨧ᩠ᨧᨿᩣᨴᩥ.

ᨴ᩠ᩅᨿᩴ ᩋᨭ᩠ᨮᩥᨾᨲ᩠ᨲᩮ. ᩋᩈᩩ ᨡᩮᨸᨶᩮ, ᩍ, ᩈᩔ ᨭ᩠ᨮᩮᩣ, ᩋᨭ᩠ᨮᩥ, ᩍᨴᩴ ᨸᨱ᩠ᨯᨠᩮ ᨶᨸᩩᩴᩈᨠᩮ ᩅᨲ᩠ᨲᨲᩥ. ᨵᩣ ᨵᩣᩁᨱᩮ, ᨲᩩ, ᩍᨲ᩠ᨳᩦ. ᨠᩦᨠᩈᩴ, ᨠᩩᩃ᩠ᩃᩴᨸ᩠ᨿᨲᩕ. ᨣᩃᩔ ᨠᨱ᩠ᨮᩔ ᩉᩮᨭ᩠ᨮᩥᨾᨶ᩠ᨲᩮ ᨩᩣᨲᨾᨭ᩠ᨮᩥ ᨣᩃᨶ᩠ᨲᨭ᩠ᨮᩥ. ᩋᨠ ᨣᨾᨶᩮ, ᨡᩮᩣ, ᩈᨠᨲ᩠ᨳᩮ ᨠᩮᩣ.

᪒᪗᪙-᪒᪘᪐. ᨴ᩠ᩅᨿᩴ ᩈᩥᩁᩈᩮᩣᨭ᩠ᨮᩥᨡᨱ᩠ᨯᩮ. ᩈᨾᩩᨴᩥᨲᩮ ᨲᩩ ᨠᩁᩮᩣᨭᩥ, ᩍᨲ᩠ᨳᩦ [ᩋᨾᩁ ᪑᪖.᪖᪙]. ᨠᨸᩩ ᩈᩣᨾᨲ᩠ᨳᩥᨿᩮ, ᩋᩁᩮᩣ, ᨠᩴ ᩈᩦᩈᩴ ᨸᩣᩃᩮᨲᩦᨲᩥ ᩅᩣ ᨠᨸ᩠ᨸᩁᩮᩣ, ᩁᩔᩮᩣ, ᩃᩔ ᩁᨲ᩠ᨲᨬ᩠ᨧ. ᨠᩴ ᨸᩣᩃᨿᨲᩦᨲᩥ ¶ , ᨠᨾ᩠ᨾᩣᨴᩥᨾ᩠ᩉᩥ ᨱᩮᩣ. ‘‘ᩈᩥᩁᩮᩣᨭ᩠ᨮᩥᨾ᩠ᩉᩥ ᨠᨸᩣᩃᩮᩣ’ᨳᩦ, ᨥᨭᩣᨴᩥᩈᨠᩃᩮᨸᩥᨧᩮ’’ᨲᩥ ᩁᩩᨴ᩠ᨴᩮᩣ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪖.᪖᪘]. ᨠᨸᩣᩃᩮᩣ ᩋᨳᩦᨲᩥ [ᩋᨶᩥᨲ᩠ᨳᩦᨲᩥ ᩋᨲ᩠ᨳᩮᩣ] ᨨᩮᨴᩮᩣ. ᨠᨸᩣᩃᩈᨴ᩠ᨴᩮᩣ ᩅᩥᨠᨸ᩠ᨸᩮᨶ ᨸᩩᩃ᩠ᩃᩥᨦ᩠ᨣᩮᩣ. ᨠᨯᩥ ᨨᩮᨴᩮ, ᩋᩁᩮᩣ. ᨾᩉᨲᩦ ᩈᩥᩁᩣ ᨾᩉᩣᩈᩥᩁᩣ, ᩈᩥᩁᩣᨲᩥ ᨧ. ᩈᩥ ᨻᨶ᩠ᨵᨶᩮ, ᩁᩮᩣ.

ᨲᩥᨠᩴ ᩈᩩᩈᩥᩁᩅᨲ᩠ᨿᩴ ᩅᩣᨿᩩᩅᩉᨶ᩠ᨲᩈᩥᩁᩣᨿᩴ. ᨲᩥᩅᩥᨵᩣ ᩉᩥ ᨠᩣᨿᩈᩥᩁᩣ ᩑᨠᩣ ᩅᩣᨿᩩᩅᩉᩣ, ᩋᨸᩁᩣ ᩈᩩᨲ᩠ᨲᨾᩥᩅᩣᨭ᩠ᨮᩥᨻᨶ᩠ᨵᩥᨶᩦ, ᩋᨬ᩠ᨬᩣ ᩌᩉᩣᩁᩅᩣᩉᩥᨶᩦ ᩋᨶ᩠ᨲᨡ᩠ᨿᩣ. ᨲᨲᩕ ᨲᨲᩥᨿᩮᨶ ᨸᨮᨾᩣ, ᨸᨮᨾᨴᩩᨲᩥᨿᩮᩉᩥ ᨴᩩᨲᩥᨿᩣ ᨧ ᨴᩦᨸᩥᨲᩣ, ᨲᨲᩥᨿᩣ ᨸᨶ ᨸᩁᨲᩮᩣ ᩅᨠ᩠ᨡᨲᩥ. ᨶᩉ ᨻᨶ᩠ᨵᨶᩮ, ᩋᩁᩩ. ᩈᩥ ᨻᨶ᩠ᨵᨶᩮ, ᩁᩮᩣ. ᨵᨾ ᩈᨴ᩠ᨴᩮ, ᨿᩩ. ᨶᨴᩣᨴᩥ, ᩋᨶᩥ ᩅᩣ, ᨵᨾᨶᩦ.

ᨲᨲᩥᨿᩴ ᨴᩔᩮᨲᩩᨾᩣᩉ ‘‘ᩁᩈᨣ᩠ᨣᩈᩣ’’ᨲ᩠ᨿᩣᨴᩥ. ᩁᩈᩴ ᨣᩈᨲᩦᨲᩥ ᩁᩈᨣ᩠ᨣᩈᩣ, ᨣᩈ ᩋᨴᨶᩮ. ᩁᩈᩴ ᩉᩁᨲᩥ ᨶᩮᨲᩦᨲᩥ ᩁᩈᩉᩁᨱᩦ, ᨿᩩ, ᨶᨴᩣᨴᩥ.

ᨲᩥᨠᩴ ᨾᩴᩈᩮ. ᨾᨶ ᨬᩣᨱᩮ, ᩈᩮᩣ. ᨾᩥᩈ ᩈᨴ᩠ᨴᩮ, ᩌᨸᩩᨻ᩠ᨻᩮᩣ ᩌᨾᩈᨶᩮ ᩅᩣ. ᨸᩥᩈ ᩋᩅᨿᩅᩮ, ᨲᩮᩣ. ᨸᩃᩃᩴ, ᨠᨻ᩠ᨻᩴᨸ᩠ᨿᨲᩕ.

ᨴ᩠ᩅᨿᩴ ᩌᨲᨸᩣᨴᩥᨶᩣ ᩈᩩᨠ᩠ᨡᨾᩴᩈᩮ. ᨲᩥᩃᩥᨦ᩠ᨣᨠᨶ᩠ᨲᩪᨲᩥ ᨲ᩠ᩅᨶ᩠ᨲᩴ ᩃᩥᨦ᩠ᨣᨸᨴᩴ. ᩅᩃ, ᩅᩃ᩠ᩃ ᩈᩴᩅᩁᨱᩮ, ᩐᩁᩮᩣ, ᩍᨲ᩠ᨳᩥᨿᩴ ‘‘ᩍᨲ᩠ᨳᩥᨿᨾᨲᩮᩣ ᩌᨸᨧ᩠ᨧᨿᩮᩣ’’ᨲᩥ ᩌ, ᩅᩃ᩠ᩃᩪᩁᩣ. ᩏᨴ᩠ᨵᩴ ᨲᨲ᩠ᨲᩴ ᩏᨲ᩠ᨲᨲ᩠ᨲᩴ. ᨲᨸ ᩈᨶ᩠ᨲᩣᨸᩮ, ᨲᩮᩣ.

᪒᪘᪑. ᨧᨲᩩᨠ᩠ᨠᩴ ᩃᩮᩣᩉᩥᨲᩮ. ᩁᩩᩉ ᨩᨶᨶᩮ, ᨲᩮᩣ, ᩍᨲᩮᩣ ᩅᩣ. ᩁᩩᨶ᩠ᨫᨲᩮ ᨧᨾ᩠ᨾᩮᨶᩣᨲᩥ ᩁᩩᨵᩥᩁᩴ, ᩍᩁᩮᩣ. ᩈᩮᩣᨱ ᩅᨱ᩠ᨱᩮ, ᨲᩮᩣ. ᩁᨬ᩠ᨩ ᩁᩣᨣᩮ, ᨲᩮᩣ. ᩋᩈᩴ, ᨡᨲᨩᩴᨸ᩠ᨿᨲᩕ [ᨡᨲᩣ ᨩᩣᨿᨲᩮ (ᨧᩥᨶ᩠ᨲᩣᨾᨱᩥᨭᩦᨠᩣ ᪑᪖.᪖᪔)].

ᨲᩥᨠᩴ ¶ ᨡᩮᩊᩮ. ᩃᩣ ᩌᨴᩣᨶᩮ, ᩋᩃᩮᩣ, ᩍᨲ᩠ᨳᩥᨿᨾᩣ, ᩃᩃ ᩍᨧ᩠ᨨᩣᨿᩴ ᩅᩣ, ᩍᨲ᩠ᨳᩥᨿᨾᩣ. ᨡᩮᩃ ᨣᨲᩥᨿᩴ, ᩋ. ᨡᩃ ᨧᩃᨶᩮ, ᩈᨬ᩠ᨧᨿᩮ ᩅᩣ, ᨱᩮᩣ, ᩊᨲ᩠ᨲᩴ, ᨡᩴ ᩅᩣ ᩌᨠᩣᩈᩴ ᩍᩃᨲᩦᨲᩥ ᨡᩮᩊᩮᩣ. ᩍᩃ ᨣᨲᩥᨿᩴ, ᨠᨾ᩠ᨾᨶᩥ ᨱᩮᩣ, ᩍᩃ ᨣᨲᩥᨾ᩠ᩉᩥ ᩅᩣ, ᩋ, ᩍᩔᩮ.

ᨴ᩠ᩅᨿᩴ ᨸᩥᨲ᩠ᨲᩮ. ᨾᩣ ᨸᩁᩥᨾᩣᨱᩮ, ᨵᩩ. ᨾᨴ ᩏᨾ᩠ᨾᩣᨴᩮ ᩅᩣ, ᨱᩩ, ᨴᩔ ᨵᩮᩣ. ᨾᩣᨿᩪᨲᩥ ᨸᩣᨮᩮ ᨾᨿ ᨣᨲᩥᨿᩴ, ᨱᩩ. ᨾᩣᨵᩩᨾᩣᨿᩩᩈᨴ᩠ᨴᩣ ᨴ᩠ᩅᩮ ᨸᩩᩁᩥᩈᩮ ᨸᩩᩃ᩠ᩃᩥᨦ᩠ᨣᩮ. ᩋᨸᩥᨴᨵᩣᨲᩦᨲᩥ ᨸᩥᨲ᩠ᨲᩴ. ᩋᨸᩥᨸᩩᨻ᩠ᨻᩮᩣ ᨵᩣ ᨸᩥᨵᩣᨶᩮ, ᨲᩮᩣ, ᩋᩃᩮᩣᨸᩮᩣ, ᨽᩩᨩᩣᨴᩥ, ᨸᩥᨲ᩠ᨲᩴ, ᨶᨸᩩᩴᩈᨠᩮ.

ᨴ᩠ᩅᨿᩴ ᩈᩮᨾ᩠ᩉᩮ. ᩈᩥᩃᩥᩈ ᩈᩥᩃᩮᩈᨶᩮ, ᨧᩩᩁᩣᨴᩥ, ᩈᩥᩃᩥᩈ᩠ᨿᨲᩮ ᩋᨲᩕᩮᨲᩥ ᩈᩮᨾ᩠ᩉᩮᩣ, ᨾᨶ, ᩃᩥᩈᩔ ᩉᩮᩣ, ᩅᨱ᩠ᨱᩅᩥᨸᩁᩥᨿᨿᩮᩣ. ᩍᨲᩁᨲᩕ ᩏᨾᩮᩣ, ᩈᩥᩃᩮᩈᩩᨾᩮᩣ. ᨠᨹᩮᩣᨸ᩠ᨿᨲᩕ, ᨠᩮᨶ ᨲᩮᩣᨿᩮᨶ ᨹᩣᨲᩥ ᩅᩩᨴ᩠ᨵᩥ ᨿᩔ ᨠᨹᩮᩣ, ᨶᩮᩁᩩᨲ᩠ᨲᩮᩣ.

᪒᪘᪒-᪒᪘᪓. ᩅᩥᩃᩦᨶᩮᩣ ᩅᩥᨽᩪᨲᩮᩣ ᩈ᩠ᨶᩮᩉᩮᩣ ᩅᩈᩣᨲ᩠ᨿᩩᨧ᩠ᨧᨲᩮ, ᩅᩈ ᨶᩥᩅᩣᩈᩮ, ᩌ. ᨴ᩠ᩅᨿᩴ ᩋᩅᩥᩃᩦᨶᩈ᩠ᨶᩮᩉᩮ. ᨾᩥᨴ ᩈ᩠ᨶᩮᩉᨶᩮ, ᨱᩮᩣ. ᩅᨸ ᨻᩦᨩᩈᨶ᩠ᨲᩣᨶᩮ, ᩋ, ᩅᨸᩣ. ‘‘ᩅᨸᩣ ᩅᩥᩅᩁᨾᩮᨴᩮᩈᩪ’’ᨲᩥ ᨶᩣᨶᨲ᩠ᨳᩈᨦ᩠ᨣᩉᩮ, ᩋᨾᩁᨠᩮᩣᩈᩮ ᨸᨶ ᨾᩮᨴᩣᨴᩦᨶᨾᩮᨠᨲ᩠ᨳᨲᩣ ᨴᩦᨸᩥᨲᩣ, ᩅᩩᨲ᩠ᨲᨬ᩠ᩉᩥ ᨲᨲ᩠ᨳ ‘‘ᨾᩮᨴᩮᩣ ᨲᩩ ᩅᨸᩣ ᩅᩈᩣ’’ᨲᩥ [ᩋᨾᩁ ᪑᪖.᪖᪔].

ᨲᩥᨠᩴ ᨧᨶ᩠ᨴᨶᩈᩩᩅᨱ᩠ᨱᩣᨴ᩠ᨿᩃᨦ᩠ᨠᩣᩁᨠᨲᩈᩁᩦᩁᩈᩮᩣᨽᩣᨿᩴ. ᨠᨸᩩ ᩈᩣᨾᨲ᩠ᨳᩥᨿᩮ, ᩌᨠᨸ᩠ᨸᨶᩴ ᩌᨠᨸ᩠ᨸᩮᩣ, ᨱᩮᩣ. ‘‘ᨶᩮᨸᨧ᩠ᨨᩮ ᨣᩮᩉᨾᨲ᩠ᨲᩮ ¶ ᨧ, ᩅᩮᩈᩮᩣ ᩅᩮᩈ᩠ᨿᩣᨣᩉᩮᨸᩥ [ᩅᩮᩔᨣᩉᩮᨸᩥ (ᨠ.)] ᨧᩮ’’ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪖.᪙᪙] ᩁᨽᩈᩮᩣ. ᩅᩈ ᨠᨶ᩠ᨲᩥᨿᩴ, ᩅᩥᩈᩥ ᨻ᩠ᨿᩣᨸᨶᩮ ᩅᩣ, ᨱᩮᩣ. ᨶᩥᩔᩮᩈᨲᩮᩣ ᨸᨳᨶᩴ ᨸᨡ᩠ᨿᩣᨶᩴ ᨶᩮᨸᨧ᩠ᨨᩴ, ᨸᨳ ᨸᨡ᩠ᨿᩣᨶᩮ ᨥ᩠ᨿᨱ. ᨸᨭᩥᨠᨾ᩠ᨾᩴ, ᨸᩈᩣᨵᨶᩴᨸ᩠ᨿᨲᩕ.

ᨨᨠ᩠ᨠᩴ ᩉᩣᩁᩣᨴ᩠ᨿᩣᨽᩁᨱᩮ. ᨾᨯᩥ ᨽᩪᩈᩣᨿᩴ, ᨠᩁᨱᩮ ᨿᩩ. ᩈᩣᨵ ᩈᩴᩈᩥᨴ᩠ᨵᩥᨿᩴ, ᨿᩩ, ᩈᩣᨮ ᩈᨦ᩠ᨡᩣᩁᨣᨲᩦᩈᩩ ᩅᩣ, ᨸᩈᩣᨮᨶᩴ, ᨾᩩᨴ᩠ᨵᨩᨴᩩᨲᩥᨿᩮᩣᨲᩕ. ᨽᩪᩈ ᩋᩃᨦ᩠ᨠᩣᩁᩮ, ᨠᩁᨱᩮᨿᩮᩅ ᨿᩩ. ᩌᨽᩁᩥᨿ᩠ᨿᨲᩮ ᨲᨶ᩠ᨲᩥ ᩌᨽᩁᨱᩴ, ᨽᩁ ᨽᩁᨱᩮ, ᨠᨾ᩠ᨾᨶᩥ ᨿᩩ. ᩋᩃᩴ ᩅᩥᨽᩪᩈᨶᩴ ᨠᩁᩥᨿ᩠ᨿᨲᩮᨶᩮᨶᩮᨲᩥ ᩋᩃᨦ᩠ᨠᩣᩁᩮᩣ, ᨱᩮᩣ. ᨸᩥᩊᨶ᩠ᨵ ᨽᩪᩈᨶᩮ, ᨠᩁᨱᩮ ᨿᩩ. ᨸᩁᩥᨠ᩠ᨡᩣᩁᩮᩣᨸ᩠ᨿᨲᩕ [ᨸᩁᩥᨠᩁᩮᩣᨸ᩠ᨿᨲᩕ (ᨠ.)].

ᨴ᩠ᩅᨿᩴ ᨾᨠᩩᨭᩮ. ᨠᩥᩁ ᩅᩥᨠᩥᩁᨱᩮ, ᩎᨭᩮᩣ. ᨾᨠᩥ ᨾᨱ᩠ᨯᨶᩮ, ᩏᨭᩮᩣ. ᨾᩩᨠᩩᨭᩮᩣᨲᩥᨸᩥ ᨸᩣᨮᩮᩣ, ᩑᨲᩮ ᨴ᩠ᩅᩮ ᩋᨶᩥᨲ᩠ᨳᩦ.

ᨴ᩠ᩅᨿᩴ ᨾᨠᩩᨭᨣ᩠ᨣᨭ᩠ᨮᩮ ᨶᩣᨿᨠᨾᨱᩥᨾ᩠ᩉᩥ. ᨾᨠᩩᨭᨧᩪᩊᩣᨿᩴ ᨧᩩᨾ᩠ᨻᩥᨲᩣ ᨾᨱᩥ ᨧᩪᩊᩣᨾᨱᩥ. ᨾᨠᩩᨭᩈᩥᩁᩈᩥ ᨧᩩᨾ᩠ᨻᩥᨲᩣ ᨾᨱᩥ ᩈᩥᩁᩮᩣᨾᨱᩥ.

᪒᪘᪔. ᨴ᩠ᩅᨿᩴ ᩏᨱ᩠ᩉᩦᩈᨸᨭ᩠ᨭᩮ. ᩈᩥᩁᩈᩮᩣ ᩅᩮᨮᨶᩴ ᩈᩥᩁᩮᩣᩅᩮᨮᨶᩴ. ᩏᨸᩩᨻ᩠ᨻᩮᩣ ᨶᩉ ᨻᨶ᩠ᨵᨶᩮ, ᩎᩈᩮᩣ, ᩅᨱ᩠ᨱᩅᩥᨠᩣᩁᩮᩣ. ᨿᩴ ᨻᩉᩩᨠᩣᩃᩴ ᨴᩮᨻ᩠ᨿᩣᨾᨶᩩᩔᩮᩈ᩠ᩅᨸᩥ ᨽᩅᨲᩥ, ᨲᨲᩕ ᨠᨱ᩠ᨱᩣᨽᩁᨱᩮ ᨠᩩᨱ᩠ᨯᩃᩣᨴᩥᨴ᩠ᩅᨿᩴ. ᨠᩩᨯᩥ ᨴᩣᩉᩮ, ᩋᩃᩮᩣ. ᩅᩮᨮ ᩅᩮᨮᨶᩮ, ᨠᨱ᩠ᨱᩔ ᩅᩮᨮᨶᩴ ᨠᨱ᩠ᨱᩅᩮᨮᨶᩴ, ᨾᩩᨴ᩠ᨵᨩᨴᩩᨲᩥᨿᩮᩣᨿᩴ.

ᨲᩥᨠᩴ ᨲᩣᩊᨠᩣᨡ᩠ᨿᩮ ᨠᨱ᩠ᨱᩣᨽᩁᨱᩮ. ᨠᨱ᩠ᨱᩣᨶᩴ ᨽᩪᩈᨶᩴ ᨠᨱ᩠ᨱᩥᨠᩣ, ᨠᨱ᩠ᨱᩣ ᨽᩪᩈᨶᩮ ᨻᩉᩩᩃᩃᨠ᩠ᨡᨱᩮ ᨱᩥᨠᩮᩣ. ᨠᨱ᩠ᨱᨧ᩠ᨨᨴᨶᩴ ¶ ᨸᩪᩁᨲᩥ ᨿᩮᨶ ᩈᩮᩣ ᨠᨱ᩠ᨱᨸᩪᩁᩮᩣ. ᨠᨱ᩠ᨱᩔ ᩅᩥᨽᩪᩈᨶᩴ ᨠᨱ᩠ᨱᩅᩥᨽᩪᩈᨶᩴ, ᨠᩁᨱᩮ ᨿᩩ. ᨲᩣᩃᨸᨲ᩠ᨲᩴᨸ᩠ᨿᨲᩕ.

᪒᪘᪕. ᨴ᩠ᩅᨿᩴ ᨣᩦᩅᩣᨽᩁᨱᩮ. ᨠᨱ᩠ᨮᩔ ᨽᩪᩈᩣ ᨠᨱ᩠ᨮᨽᩪᩈᩣ, ᨳᩦ. ᨣᩦᩅᩣᨿᩴ ᨽᩅᩴ ᨣᩦᩅᩮᨿ᩠ᨿᩴ, ᨽᩅᨲ᩠ᨳᩮ ᩑᨿ᩠ᨿᩮᩣ, ᨣᩦᩅᩣᨿ ᩌᨽᩁᨱᩴ ᩅᩣ ᨣᩦᩅᩮᨿ᩠ᨿᩴ, ᨣᩦᩅᨲᩮᩣ ᩌᨽᩁᨱᩮ ᩑᨿ᩠ᨿᩮᩣ.

ᨴ᩠ᩅᨿᩴ ᨾᩩᨲ᩠ᨲᩣᩅᩃᩥᨿᩴ. ᩉᩁᩦᨿᨲᩮ ᨾᨶᩮᩣ ᨿᩮᨶ ᩉᩣᩁᩮᩣ. ᨾᩩᨲ᩠ᨲᩣᨶᩴ ᩌᩅᩃᩥ ᨸᨶ᩠ᨲᩥ ᨾᩩᨲ᩠ᨲᩣᩅᩃᩥ. ᩉᩣᩁᩣᩈᨴ᩠ᨴᩮᩣᨸ᩠ᨿᨲᩕ.

ᨧᨲᩩᨠ᩠ᨠᩴ ᨸᨠᩮᩣᨭ᩠ᨮᩣᨽᩁᨱᩮ. ᨸᨠᩮᩣᨭ᩠ᨮᩮᩣ ᨶᩣᨾ ᨠᨸ᩠ᨸᩁᩔᩣᨵᩮᩣᨽᩣᨣᩮᩣ. ᨶᩦ ᨶᨿᩮ, ᩏᩁᩮᩣ, ᩍᨿᩣᨴᩮᩈᩮᩣ. ᩅᩃ ᩈᩴᩅᩁᨱᩮ, ᩋᨿᩮᩣ, ᩋᨶᩥᨲ᩠ᨳᩦ, ᨶᩥᨿᩩᩁᩮᩣᨸᩥ. ᨠᨭ ᩅᩈᩣᩅᩁᨱᨣᨲᩦᩈᩩ, ᨱ᩠ᩅᩩ. ᨸᩁᩥ ᩈᨾᨶ᩠ᨲᨲᩮᩣ ᩉᩁᨲᩥ ᨧᩥᨲ᩠ᨲᩴ ᨿᨶ᩠ᨲᩥ ᨸᩁᩥᩉᩣᩁᨠᩴ, ᨱ᩠ᩅᩩ. ᩋᩅᩣᨸᨠᩮᩣᨸ᩠ᨿᨲᩕ.

᪒᪘᪖-᪒᪘᪗. ᨴ᩠ᩅᨿᩴ ᨾᩩᨲ᩠ᨲᩣᨴᩥᨥᨭᩥᨲᩅᩃᨿᩅᩥᨠᨲ᩠ᨿᩣᨽᩁᨱᩮ. ᨠᩣ ᩈᨴ᩠ᨴᩮ, ᨠᨱᨸᨧ᩠ᨧᨿᩮᩣ, ᨠᨱ ᩈᨴ᩠ᨴᩮ ᩅᩣ, ᨴ᩠ᩅᩥᨲ᩠ᨲᩴ, ᨠᨦ᩠ᨠᨱᩴ, ᨠᨠᩥ ᨣᨲ᩠ᨿᨲ᩠ᨳᩮ ¶ ᩅᩣ, ᨿᩩ, ᨠᨠᩥ ᩃᩮᩣᩃ᩠ᨿᩮ ᩅᩣ, ᨠᨦ᩠ᨠᨲᩥ ᨿᩮᨶᩣᨲᩥ ᨠᨦ᩠ᨠᨱᩴ, ᨠᩁᨱᩮ ᨿᩩ. ᨠᩁᩔ ᨽᩪᩈᩣ ᨠᩁᨽᩪᩈᩣ, ᨳᩦ.

ᨴ᩠ᩅᨿᩴ ᨡᩩᨴ᩠ᨴᨥᨱ᩠ᨭᩥᨠᩣᨿᩴ. ᨠᩥᩴ ᨠᩩᨧ᩠ᨨᩥᨲᩴ ᨠᨱᨲᩦᨲᩥ ᨠᩥᨦ᩠ᨠᨱᩦ, ᨶᨴᩣᨴᩥ. ᨠᩥᨦ᩠ᨠᩥᨱᩦᨲᩥᨸᩥ ᨸᩣᨮᨶ᩠ᨲᩁᩴ, ᨲᨴᩣ ᨿᨴᩣᨴᩥ. ᨡᩩᨴ᩠ᨴᩣ ᩑᩅ ᨥᨱ᩠ᨭᩣ ᨡᩩᨴ᩠ᨴᨥᨱ᩠ᨭᩥᨠᩣ, ᩈᨠᨲ᩠ᨳᩮ ᨠᩮᩣ, ᨥᨭ ᨧᩃᨶᩮ.

ᨴ᩠ᩅᨿᩴ ᩋᨦ᩠ᨣᩩᩃ᩠ᨿᩣᨽᩁᨱᩮ. ᩋᨦ᩠ᨣᩩᩃᩥᨿᩴ ᨽᩅᩴ ᩋᨦ᩠ᨣᩩᩃᩦᨿᨠᩴ, ᩎᨿᩮᩣ, ᩈᨠᨲ᩠ᨳᩮ ᨠᩮᩣ, ᩋᨦ᩠ᨣᩩᩃᩦᨶᨾᩣᨽᩁᨱᩴ ᩋᨦ᩠ᨣᩩᩃ᩠ᨿᩣᨽᩁᨱᩴ. ᩏᨾ᩠ᨾᩥᨠᩣᨸ᩠ᨿᨲᩕ. ᨲᨾᩮᩅᩣᨦ᩠ᨣᩩᩃᩦᨿᨠᩴ ᩈᩣᨠ᩠ᨡᩁᨾᨠ᩠ᨡᩁᩅᨶ᩠ᨲᩴ ‘‘ᨾᩩᨴ᩠ᨴᩥᨠᩣ, ᩋᨦ᩠ᨣᩩᩃᩥᨾᩩᨴ᩠ᨴᩣ’’ᨲᩥ ᨧᩮᩣᨧ᩠ᨧᨲᩮ. ᨾᩩᨴ ᨲᩮᩣᩈᩮ, ᨱ᩠ᩅᩩ, ᩌ, ᨾᩩᨴ᩠ᨴᩥᨠᩣ, ᨹᩃᩅᩥᩈᩮᩈᩮᨸ᩠ᨿᨿᩴ. ᩋᨦ᩠ᨣᩩᩃᩥᨿᩴ ᨽᩅᩣ ᨾᩩᨴ᩠ᨴᩣ ᩋᨦ᩠ᨣᩩᩃᩥᨾᩩᨴ᩠ᨴᩣ.

ᨴ᩠ᩅᨿᩴ ᩍᨲ᩠ᨳᩥᨠᨭ᩠ᨿᩣᨽᩁᨱᩮ. ᩁᩈ ᩈᨴ᩠ᨴᩮ, ᨠᨲ᩠ᨲᩁᩥ ᨿᩩ, ᩌ, ᩁᩈᨶᩣ. ᩈᩣᨿᩮᩅ ᩍᨶᩦᨾ᩠ᩉᩥ ᩁᩈᨶᩦ. ‘‘ᩈᩣᩁᩮ ᨵᨶᩥᨾ᩠ᩉᩥ ᩁᩈᨶᩴ, ᨩᩥᩅ᩠ᩉᩣᨿᩴ ᩁᩈᨶᩣ ᨶ ᩈᩮᩣ’’ᨲᩥ ᩁᩩᨴ᩠ᨴᩮᩣ. ᨾᩮᩉᨶᩔ ᨡᩔ ᨾᩣᩃᩣ ᨾᩮᨡᩃᩣᨲᩥ ᨶᩥᩁᩩᨲ᩠ᨲᩥ, ᨾᩮᩉᨶᩥᨶ᩠ᨴᩕᩥᨿᩔ ᨾᩣᩃᩣᨲ᩠ᨿᨲ᩠ᨳᩮᩣ. ᨠᩣᨬ᩠ᨧᩦ ᩈᨲ᩠ᨲᨠᩦ, ᩈᩣᩁᩈᨶᩴᨸ᩠ᨿᨲᩕ.

ᩑᨠᨿᨭ᩠ᨮᩥ ᨽᩅᩮ ᨠᩣᨬ᩠ᨧᩦ, ᨾᩮᨡᩃᩣ ᨲ᩠ᩅ’ᨭ᩠ᨮᨿᨭ᩠ᨮᩥᨠᩣ;

ᩁᩈᨶᩣ ᩈᩮᩣᩊᩈᩣ ᨬᩮᨿ᩠ᨿᩣ, ᨠᩃᩣᨸᩣ ᨸᨬ᩠ᨧᩅᩦᩈᨲᩥ [ᨠᩃᩣᨸᩮᩣ ᨸᨬ᩠ᨧᩅᩦᩈᨠᩮᩣ (ᨧᩥᨶ᩠ᨲᩣᨾᨱᩥᨭᩦᨠᩣ ᪑᪖.᪑᪐᪘)].

ᨲᩥᨠᩴ ᩈᩮᩣᩅᨱ᩠ᨱᩮ ᨸᨣᨱ᩠ᨯᨽᩪᩈᨶᩮ. ᨸᨣᨱ᩠ᨯᩮᩣ ᨶᩣᨾ ᨠᨸ᩠ᨸᩁᩔᩮᩣᨸᩁᩥᨽᩣᨣᩮᩣ. ᨠᩮ ᩈᨴ᩠ᨴᩮ, ᩏᩁᩮᩣ, ᨿᩣᨣᨾᩮᩣ. ᩋᨦ᩠ᨣ ᨣᨾᨶᩮ. ᨴᩮᩣ. ᨻᩣᩉᩩᨾᩪᩃᩔ, ᨻᩣᩉᩩᨾᩪᩃᩮ ᩅᩣ ᨽᩅᩴ ᩅᩥᨽᩪᩈᨶᩴ ᨻᩣᩉᩩᨾᩪᩃᩅᩥᨽᩪᩈᨶᩴ.

᪒᪘᪘. ᨧᨲᩩᨠ᩠ᨠᩴ ᩍᨲ᩠ᨳᩥᨧᩁᨱᩅᩥᨽᩪᩈᨶᩮ. ᩋᨦ᩠ᨣᨴᩣᨠᩣᩁᩴ ᨸᩣᨴᨽᩪᩈᨶᩴ ᨸᩣᨴᨦ᩠ᨣᨴᩴ. ᨾᨩᩥ ᩈᨴ᩠ᨴᨲ᩠ᨳᩮᩣ, ᩎᩁᩮᩣ, ᨸᩣᨴᩮ ᨠᨭᨠᩴ ᨸᩣᨴᨠᨭᨠᩴ. ᩐᨶᩴ ᨸᩣᨴᩴ ᨸᩪᩁᩮᨲᩦᨲᩥ ᨶᩪᨸᩩᩁᩮᩣ, ᩅᨱ᩠ᨱᩅᩥᨸᩁᩥᨿᨿᩮᩣ. ᨸᩣᨴᨠᨭᨠᩮᩣ ᨧ ᨶᩪᨸᩩᩁᩮᩣ ᨧᩮᨲᩥ ᨠᨭᨠᩈᨴ᩠ᨴᩔ ᨸᩩᩃ᩠ᩃᩥᨦ᩠ᨣᩮᨸᩥ ᨸᩅᨲ᩠ᨲᨶᨲᩮᩣ ¶ ᨴ᩠ᩅᨶ᩠ᨴᩈᨾᩣᩈᩮᩣ. ᨲᩩᩃᩣᨠᩮᩣᨭᩥ, ᩉᩴᩈᨠᩮᩣᨸ᩠ᨿᨲᩕ. ᨲᩩᩃ ᨣᨲᩥᨠᩮᩣᨭᩥᩃ᩠ᨿᩮ. ᨠᩩᨭᩥᩃᨠᩮᩣᨭᩥᨲ᩠ᨲᩣ ᨲᩩᩃᩣᨠᩮᩣᨭᩥ, ᨸᩩᨾᩮ. ᩉᩴᩈᨣᨲᩥᨲ᩠ᨲᩣ ᩉᩴᩈᨠᩮᩣ.

᪒᪘᪙. ᨾᩩᨡᨹᩩᩃ᩠ᩃᩣᨴᨿᩮᩣ ᩋᩃᨦ᩠ᨠᩣᩁᨸ᩠ᨸᨽᩮᨴᩣ ᩈᩥᨿᩩᩴ. ᨾᩩᨡᨹᩩᩃ᩠ᩃᩴ ᨶᩣᨾ ᩈᩩᩅᨱ᩠ᨱᨾᨿᩮᩣ ᨾᩩᨡᩣᩃᨦ᩠ᨠᩣᩁᩮᩣ, ᨾᩩᨡᩮ ᨹᩩᩃ᩠ᩃᨲᩦᨲᩥ ᨾᩩᨡᨹᩩᩃ᩠ᩃᩴ, ᨹᩩᩃ᩠ᩃ ᩅᩥᨠᩈᨶᩮ, ᨴᨶ᩠ᨲᩣᨴᩦᩈᩩ ᩈᩩᩅᨱ᩠ᨱᨾᨿᩣᩃᨦ᩠ᨠᩣᩁᩮᩣᨸᩥ ᨾᩩᨡᨹᩩᩃ᩠ᩃᨾᩮᩅ. ᩏᨱ᩠ᨱᨲᩴ ᩈᩩᩅᨱ᩠ᨱᩣᨴᩥᩁᨧᩥᨲᩴ ᨶᩃᩣᨭᩣᨽᩁᨱᩴ, ᩏᨸᩩᨻ᩠ᨻᩮᩣ ᨶᨾᩩ ᨶᨾᨶᩮ. ᩑᨲ᩠ᨳ ᨧ ᨾᩩᨡᨹᩩᩃ᩠ᩃᩩᨱ᩠ᨱᨲᩣᨶᩴ ᩅᩥᩈᩮᩈᩴ ᩅᩥᨸᩁᩥᨿᨿᩮᨶᩣᨸᩦᨲᩥ ᩅᨴᨶ᩠ᨲᩥ. ᨣᩣᩅᩦᨶᩴ ᨳᨶᩣᨠᩣᩁᨲ᩠ᨲᩣ ᨣᨲ᩠ᨳᨶᩴ, ᩒᩔᨲ᩠ᨲᩴ, ᨲᨾᩮᩅ ᩏᨲ᩠ᨲᨾᨲ᩠ᨲᩣ ᩏᨣ᩠ᨣᨲ᩠ᨳᨶᩴ, ᨧᨲᩩᨿᨭ᩠ᨮᩥᨠᩮᩣ ᩉᩣᩁᨽᩮᨴᩮᩣ. ᨣᨾᩩ ᨣᨾᨶᩮ, ᨱ᩠ᩅᩩ, ᨴ᩠ᩅᩥᨲ᩠ᨲᩴ, ᩋᩔᩥᨲ᩠ᨲᨬ᩠ᨧ, ᨣᩥᨦ᩠ᨣᨾᨠᩴ, ᨻᩣᨲ᩠ᨲᩥᩴᩈᨿᨭ᩠ᨮᩥᨠᩮᩣ ᩉᩣᩁᨽᩮᨴᩮᩣᩅ. ᩌᨴᩥᨶᩣ ᩋᨴ᩠ᨵᩉᩣᩁᩮᩣ, ᨾᩣᨱᩅᨠᩮᩣ, ᩑᨠᩣᩅᩃᩦ, ᨶᨠ᩠ᨡᨲ᩠ᨲᨾᩣᩃᩣᨴᨿᩮᩣ ᩉᩣᩁᨽᩮᨴᩣ ᨧ ᩈᨦ᩠ᨣᨿ᩠ᩉᨶ᩠ᨲᩥ [ᩋᨾᩁ ᪑᪖.᪑᪐᪖].

᪒᪙᪐. ᨸᨩ᩠ᨩᩴ ᩅᨲ᩠ᨳᨾᨲ᩠ᨲᩮ. ᨧᩥᩃ ᩅᩔᨶᩮ, ᨧᩥᩃ᩠ᨿᨲᩮ ᩋᨧ᩠ᨨᩣᨴᩦᨿᨲᩮᨲᩥ, ᨱᩮᩣ, ᨳᩥᨿᩴ ᨧᩮᩃᩦ. ᨨᨴ ᩈᩴᩅᩁᨱᩮ, ᩌᨸᩩᨻ᩠ᨻᩮᩣ ᨠᩁᨱᩮ, ᨿᩩ. ᩅᩈ ᩋᨧ᩠ᨨᩣᨴᨶᩮ, ᩅᩈ᩠ᨿᨲᩮ ᩋᨧ᩠ᨨᩣᨴᩦᨿᨲᩮᨲᩥ ᩅᨲ᩠ᨳᩴ, ᨳᩮᩣ. ᨱᨾ᩠ᩉᩥ ᩅᩣᩈᩮᩣ. ᨿᩩᨾ᩠ᩉᩥ ᩅᩈᨶᩴ. ᩋᨾ ᨣᨾᨶᩮ, ᨠᩁᨱᩮ ᨿᩩ, ᩋᩴᩈᩩᨠᩴ, ᩁᩴᩈᩥᨸᩁᩥᨿᩣᨿᩮᩣᨸ᩠ᨿᨿᩴ. ᩋᨾ᩠ᨻ ᩈᨴ᩠ᨴᩮ, ᨠᨲ᩠ᨲᩁᩥ ᩋᩁᩮᩣ. ᨸᨭ ᨣᨾᨶᩮ, ᨠᩁᨱᩮ ᩋ, ᩈᩮᩣᨽᨶᨧᩮᩃᩮᨸ᩠ᨿᨿᩴ. ᨴᩩ ᨣᨾᨶᩮ, ᨠᩁᨱᩮ ᩈᩮᩣ, ᨴ᩠ᩅᩥᨲ᩠ᨲᩴ, ᨴᩩᩁᩪᨸᩴ ᩋᩈᨲᩥ ᨡᩮᨸᨲᩦᨲᩥ ᩅᩣ ᨴᩩᩔᩴ, ᨴᩩᩁᩪᨸᩴ ᩋᩈᨲᩥ ᨴᩦᨸᩮᨲᩦᨲᩥ ᩅᩣ ᨴᩩᩔᩴ, ᨴᩩᨸᩩᨻ᩠ᨻᩮᩣ ᩋᩈ ᨴᩥᨲ᩠ᨲᩥᨿᩴ ¶ . ᨧᩃ ᩅᩈᨶᩮ, ᩋᩔᩮᩣᨲ᩠ᨲᩴ, ᩊᨲ᩠ᨲᨬ᩠ᨧ. ᩈᨭ ᩁᩩᨩᩣᩅᩥᩈᩁᨱᨣᨲ᩠ᨿᩣᩅᩈᩣᨶᩮᩈᩩ, ᨱ᩠ᩅᩩ.

᪒᪙᪑. ᨸᨩ᩠ᨩᩴ ᩅᨲ᩠ᨳᨽᩮᨴᩮ. ᨲᨲᩕᩣᨴᩥᨴ᩠ᩅᨿᩴ ᨴᩩᨠᩪᩃᨡ᩠ᨿᩮ ᩅᨲ᩠ᨳᩮ. ᨡᩩ ᩈᨴ᩠ᨴᩮ, ᨾᩮᩣ, ᨡᩩᨾᩈᨴ᩠ᨴᩣ ᩅᩥᨠᩣᩁᩮ ᨱᩮᩣ, ᨡᩩᨾᩣᨿ ᩅᩥᨠᩣᩁᩮᩣ ᨡᩮᩣᨾᩴ, ᨡᩩᨾᩣ ᨶᩣᨾ ᩋᨲᩈᩦ, ᨲᨻ᩠ᨻᨠ᩠ᨠᩃᩈᨾ᩠ᨽᩅᩴ ᩅᨲ᩠ᨳᩴ, ᩅᩣᨧ᩠ᨧᩃᩥᨦ᩠ᨣᩮᩣᨿᩴ. ᨠᩪᩃ ᩌᩅᩁᨱᩮ, ᨴᩩᨠ᩠ᨡᩮᨶ ᨠᩩᩃ᩠ᨿᨲᩮᨲᩥ ᨴᩩᨠᩪᩃᩴ, ᨴᩩᨾᩮᩉᩥ ᨩᩣᨲᩴ ᨠᩪᩃᨶ᩠ᨲᩥ ᩅᩣ ᨴᩩᨠᩪᩃᩴ. ᨠᩮᨧᩥ ᨸᨶ ‘‘ᨴᩩᨠᩪᩃᨾ᩠ᨸᩥ ᩑᨠᩴ ᩅᨲ᩠ᨳᨶ᩠ᨲᩁᩴ, ᨶ ᨡᩮᩣᨾᨶᩣᨾ’’ᨶ᩠ᨲᩥ ᩅᨴᨶ᩠ᨲᩥ. ᨲᩴ ‘‘ᨡᩮᩣᨾ’ᨾᨭ᩠ᨭᩮ ᨴᩩᨠᩪᩃᩮ ᨧ, ᩋᨲᩈᩦᩅᩈᨶᩮᨸᩥ ᨧ’’, ‘‘ᨡᩮᩣᨾ’ᨾᨭ᩠ᨭᩮ ᨴᩩᨠᩪᩃᩮᨧᩣ’’ᨲᩥ ᨶᩣᨶᨲ᩠ᨳᩈᨦ᩠ᨣᩉᨲᩥᨠᨱ᩠ᨯᩈᩮᩈᩮᩈᩩ [ᨶᩣᨶᨲ᩠ᨳᩈᨦ᩠ᨣᩉ ᪓.᪓.᪒᪙᪕] ᩅᩩᨲ᩠ᨲᨲ᩠ᨲᩣ ᨶ ᨣᩉᩮᨲᨻ᩠ᨻᩴ. ᨠᩮᩣᩈᩮᩣ ᨶᩣᨾ ᨠᩥᨾᩥᨣᨻ᩠ᨽᩮᩣ, ᨲᨲᩮᩣ ᨩᩣᨲᨲ᩠ᨲᩣ ᨠᩮᩣᩈᩮᨿ᩠ᨿᩴ, ᩑᨿ᩠ᨿᩮᩣ, ‘‘ᨠᩮᩣᩈᩮᨿ᩠ᨿᩴ ᨠᩥᨾᩥᨠᩮᩣᩈᩮᩣᨲ᩠ᨳ’’ᨶ᩠ᨲᩥ [ᩋᨾᩁ ᪑᪖.᪑᪑᪑] ᩉᩥ ᩅᩩᨲ᩠ᨲᩴ. ᨠᩮᩣᩈᩮᨿ᩠ᨿᨾᩮᩅ ᨵᩮᩣᨲᩴ ᨸᨭ᩠ᨭᩩᨱ᩠ᨱᩴ ᨶᩣᨾ, ᩅᩩᨲ᩠ᨲᨬ᩠ᨧ ‘‘ᨸᨭ᩠ᨭᩩᨱ᩠ᨱᩴ ᨵᩮᩣᨲᨠᩮᩣᩈᩮᨿ᩠ᨿ’’ᨶ᩠ᨲᩥ [ᩋᨾᩁ ᪑᪖.᪑᪑᪓]. ᨸᨲ᩠ᨲᩩᨱ᩠ᨱᨶ᩠ᨲᩥᨸᩥ ᨸᩣᨮᨶ᩠ᨲᩁᩴ. ᨸᨭ᩠ᨭᩩᨱ᩠ᨱᩁᨭ᩠ᨮᩮ ᨩᩣᨲᨲ᩠ᨲᩣ ᨸᨭ᩠ᨭᩩᨱ᩠ᨱᨶ᩠ᨲᩥᨸᩥ ᩅᨴᨶ᩠ᨲᩥ. ᨠᨾᩩ ᨠᨶ᩠ᨲᩥᨿᩴ, ᨠᨾᨶᩦᨿᨲ᩠ᨲᩣ ᨠᨾ᩠ᨻᩃᩮᩣ, ᩁᨦ᩠ᨠᩩᨶᩣᨾᨠᩔ ᩉᩁᩥᨱᩅᩥᩈᩮᩈᩔ ᩃᩮᩣᨾᩮᨶᩈᨬ᩠ᨩᩣᨲᩅᨲ᩠ᨳᩴ [ᩁᩣᨦ᩠ᨠᩅᩴ ᩅᩥᨣᩁᩮᩣᨾᨩᩴ (ᩋᨾᩁ ᪑᪖.᪑᪑᪑)], ᩋᩃᩮᩣ, ᩅᩣᨣᨾᩮᩣ ᨧ ᨾᨩ᩠ᨫᩮ. ᩅᩣᩈᨴ᩠ᨴᩮᩣ ᨠᨾ᩠ᨻᩃᩈᨴ᩠ᨴᩔ ᨶᨸᩩᩴᩈᨠᨲ᩠ᨲᩴ ᩈᨾᩩᨧ᩠ᨧᩥᨶᩮᩣᨲᩥ. ᩁᩃ᩠ᩃᨠᩮᩣᨸᩥ [ᩋᨾᩁ ᪑᪖.᪑᪑᪖] ᨠᨾ᩠ᨻᩃᨸᩁᩥᨿᩣᨿᩮᩣ. ᩈᨱ ᩈᨴ᩠ᨴᩮ, ᨠᨲ᩠ᨲᩁᩥ ᩋ, ᩈᨱᩮᩣ ᨶᩣᨾ ᨳᩥᩁᨲ᩠ᨲᨧᩮᩣ ᩑᨠᩮᩣ ᩁᩩᨠ᩠ᨡᨿᩮᩣᨶᩥ, ᨿᩔ ᨲᨧᩮᨶ ᨠᩮᩅᨭ᩠ᨭᩣᨴᨿᩮᩣ ᨩᩣᩃᩣᨴᩦᨶᩥ ᨠᩁᩮᩣᨶ᩠ᨲᩥ, ᩈᨱᩔ ᩅᩥᨠᩣᩁᩮᩣ ᩈᩣᨱᩴ, ᩅᨲ᩠ᨳᩴ. ᨾᩥᨣᩃᩮᩣᨾᩣᨶᩥ ᨠᩮᩣᨭ᩠ᨭᩮᨲ᩠ᩅᩣ ᩈᩩᨡᩩᨾᩣᨶᩥ ᨠᨲ᩠ᩅᩣ ᨠᨲᨾᨾ᩠ᨻᩁᩴ ᨠᩮᩣᨭᩩᨾ᩠ᨻᩁᩴ, ᨠᩩᨭ ᨨᩮᨴᨶᩮ, ᩏᩔᩮᩣ, ᩋᩔᩩ, ᨠᩮᩣᨭᩩᨾ᩠ᨻᩁᨭ᩠ᨮᩮᨩᩣᨲᨲ᩠ᨲᩣ ᩅᩣ ᨠᩮᩣᨭᩩᨾ᩠ᨻᩁᩴ. ᨽᨦ᩠ᨣᩴ ᨶᩣᨾ ᨡᩮᩣᨾᩣᨴᩦᨶᩥ ᩈᨻ᩠ᨻᩣᨶᩥ ¶ ᩑᨠᨩ᩠ᨫᩣᨶᩥ ᩅᩮᩣᨾᩥᩔᩮᨲ᩠ᩅᩣ ᨠᨲᩅᨲ᩠ᨳᩴ, ᨽᨶ᩠ᨩ ᩋᩅᨾᨴ᩠ᨴᨶᩮ, ᩋᨳ ᩅᩣ ᨽᨦ᩠ᨣᩴ ᨶᩣᨾ ᩈᩣᨱᨹᩃᩴ, ᨲᨻ᩠ᨻᩥᨠᩣᩁᨲ᩠ᨲᩣ ᩅᨲ᩠ᨳᩴ ᨽᨦ᩠ᨣᩴ, ᩅᩩᨲ᩠ᨲᨬ᩠ᨧ ᨶᩣᨶᨲ᩠ᨳᩈᨦ᩠ᨣᩉᩮ ‘‘ᨽᨦ᩠ᨣᩣ ᩈᩣᨱᩣᨡ᩠ᨿᩈᩔᩮᨸᩦ’’ᨲᩥ. ᩈᩔᩈᨴ᩠ᨴᩮᨶ ᨧᩮᨲ᩠ᨳ ᨹᩃᩴ ᩅᩩᨲ᩠ᨲᩴ, ‘‘ᩁᩩᨠ᩠ᨡᩣᨴᩦᨶᩴ ᨹᩃᩴ ᩈᩔ’’ᨶ᩠ᨲᩥ [ᩋᨾᩁ ᪑᪔.᪑᪕] ᩅᨧᨶᨲᩮᩣ. ᨽᨦ᩠ᨣᨾ᩠ᨸᩥ ᩅᩣᨠᨾᨿᨾᩮᩅᩣᨲᩥ ᨠᩮᨧᩥ. ᩅᨲ᩠ᨳᨶ᩠ᨲᩁᩴ ᩅᨲ᩠ᨳᩅᩥᩈᩮᩈᩮᩣ. ᩌᨴᩥᨶᩣ ᨠᨸ᩠ᨸᩣᩈᩣᨴᨿᩮᩣᨸᩥ ᨣᩉᩥᨲᩣ.

᪒᪙᪒-᪒᪙᪓. ᨧᨲᩩᨠ᩠ᨠᩴ ᨸᩁᩥᨵᩣᨶᨽᩪᨲᩮ ᩋᨵᩮᩣᩅᨲ᩠ᨳᩮ. ᩋᨵᩮᩣᨽᩣᨣᩮ ᩅᩈᩦᨿᨲᩮᨲᩥ ᨶᩥᩅᩣᩈᨶᩴ, ᨶᩥᩈᨴ᩠ᨴᩮᩣ ᩋᨵᩮᩣᨽᩣᨣᩔ ᨩᩮᩣᨲᨠᩮᩣ. ᩅᩈ ᩋᨧ᩠ᨨᩣᨴᨶᩮ, ᨠᨾ᩠ᨾᨶᩥ ᨿᩩ. ᨻᩣᩉᩩᩃ᩠ᨿᩮᨶ ᩋᨶ᩠ᨲᩁᩮ ᨾᨩ᩠ᨫᩮ ᨽᩅᩴ ᩋᨶ᩠ᨲᩁᩦᨿᩴ, ᩎᨿᩮᩣ. ᩈᨾᩣᨶᩃᩥᨦ᩠ᨣᨲ᩠ᨲᩣ ᨴ᩠ᩅᨶ᩠ᨴᩮᩣ. ᩋᨶ᩠ᨲᩁᩮ ᨽᩅᩴ ᩋᨶ᩠ᨲᩁᩴ, ᨱᩮᩣ. ᩋᨶ᩠ᨲᩁᩮ ᨾᨩ᩠ᨫᩮ ᨽᩅᩮᩣ ᩅᩣᩈᩮᩣ ᩋᨶ᩠ᨲᩁᩅᩣᩈᨠᩮᩣ, ᩈᨠᨲ᩠ᨳᩮ ᨠᩮᩣ. ᩏᨸᩈᩴᨻ᩠ᨿᩣᨶᩴᨸ᩠ᨿᨲᩕ [ᩋᨾᩁ ᪑᪖.᪑᪑᪗].

ᨸᨬ᩠ᨧᨠᩴ ᩏᨸᩁᩥᨵᩣᨶᩮ. ᩅᩁ ᩋᨧ᩠ᨨᩣᨴᨶᩮ, ᨸᨸᩩᨻ᩠ᨻᩮᩣ, ᨠᨾ᩠ᨾᨶᩥ ᨱᩮᩣ, ᩏᨽᨿᨲᩕᩣᨸᩥ ᩅᩩᨴ᩠ᨵᩥ, ᨸᩣᩅᩣᩁᩮᩣ. ᩏᨲ᩠ᨲᩁᩈ᩠ᨾᩥᩴ ᨴᩮᩉᨽᩣᨣᩮ ᩌᩈᨩ᩠ᨩᨲᩮᨲᩥ ᩏᨲ᩠ᨲᩁᩣᩈᨦ᩠ᨣᩮᩣ, ᩌ ᨸᩩᨻ᩠ᨻᩮᩣ ᩈᨬ᩠ᨩ ᩈᨦ᩠ᨣᩮ. ᩏᨸᩁᩥ ᩈᩴᩅᩦᨿᨲᩮ ᨸᩥᨵᩦᨿᨲᩮ ᨻᩣᩉᩩᩃ᩠ᨿᩮᨶᩣᨲᩥ, ᨿᩩ. ᩏᨸᩈᩴᨸᩩᨻ᩠ᨻᩮᩣ ᩅᩦ ᨲᨶ᩠ᨲᩈᨶ᩠ᨲᩣᨶᩮ. ᩏᨲ᩠ᨲᩁᩈ᩠ᨾᩥᩴ ᨴᩮᩉᨽᩣᨣᩮ ᨽᩅᩴ ᩅᩥᨩ᩠ᨩᨾᩣᨶᩴ ᩏᨲ᩠ᨲᩁᩴ, ᩏᨲ᩠ᨲᩁᩦᨿᨬ᩠ᨧ, ᨱᩮᩣ, ᩎᨿᩮᩣ ᨧ. ᩈᩴᨻ᩠ᨿᩣᨶᩴᨸ᩠ᨿᨲᩕ.

ᨶᩅᩴ ᩅᨲ᩠ᨳᩴ ᩋᩉᨲᨶ᩠ᨲᩥ ᨾᨲᩴ ᨠᨳᩥᨲᩴ, ᨶ ᩉᨬ᩠ᨬᨲᩥ ᨿᩴ ᨸᩣᩈᩣᨱᩣᨴᩦᩉᩦᨲᩥ ᩋᩉᨲᩴ. ᨲᨶ᩠ᨲᨲᩮᩣ ᩋᨧᩥᩁᨾᩣᩉᩁᩥᨲᩴ ᩅᨲ᩠ᨳᩴ. ᩋᨶᩣᩉᨲᩴ, ᨶᩥᨸ᩠ᨸᩅᩣᨱᩥ, ᨲᨶ᩠ᨲᨠᩴᨸ᩠ᨿᨲᩕ. ᩅᩩᨲ᩠ᨲᨬ᩠ᨧ ‘‘ᩋᨶᩣᩉᨲᩴ ᨶᩥᨸ᩠ᨸᩅᩣᨱᩥ, ᨲᨶ᩠ᨲᨠᨬ᩠ᨧ ᨶᩅᨾ᩠ᨻᩁᩮ’’ᨲᩥ [ᩋᨾᩁ ᪑᪖.᪑᪑᪒].

ᨴ᩠ᩅᨿᩴ ¶ ᨧᩥᩁᨠᩣᩃᨲ᩠ᨲᩣ ᨶᩥᨴ᩠ᨴᩈᩮ ᨩᩥᨱ᩠ᨱᩅᨲ᩠ᨳᩮ. ᨶᨲ᩠ᨳᩥ ᩋᨶ᩠ᨲᩮᩣ ᨴᩈᩣ ᨿᩔ ᨶᨶ᩠ᨲᨠᩴ, ᩈᨠᨲ᩠ᨳᩮ ᨠᩮᩣ. ᨠᩩᨧ᩠ᨨᩥᨲᩮᩣ ᨸᨭᩮᩣ ᨠᨸ᩠ᨸᨭᩮᩣ, ᨠᨸ᩠ᨸ ᩅᩥᨲᨠ᩠ᨠᩮ ᩅᩣ, ᩋᨭᩮᩣ. ᨴ᩠ᩅᨿᩴ ᩋᨳᩥᩁᩅᨲ᩠ᨳᩮ, ᨩᩥᨱ᩠ᨱᩅᩈᨶᩴ ᩋᨳᩥᩁᩴ ᩅᨲ᩠ᨳᩴ. ‘‘ᨸᨭ’’ᩍᨲᩥ ᨧᩁᨲᩥ ᨹᩮᩣᨭᨲᩦᨲᩥ ᨸᨭᨧ᩠ᨧᩁᩴ, ᨸᨭᨧ᩠ᨧᩁᨾᩮᩅ ᨸᩊᨧ᩠ᨧᩁᩴ, ᩊᨲ᩠ᨲᩴ.

᪒᪙᪔. ᨴ᩠ᩅᨿᩴ ᨠᩮᩣᨭᩥᨠᩣᨴᩥᩈᨶ᩠ᨶᩣᩉᩮ, ᨧᩮᩣᩊᩮ ᨧ. ᨠᨧ ᨻᨶ᩠ᨵᨶᩮ, ᩏᨠᩮᩣ, ᨶᩥᨣ᩠ᨣᩉᩦᨲᩣᨣᨾᩮᩣ ᨧ. ᩅᩣᨱᩴ ᩈᩁᩴ ᩅᩣᩁᨿᨲᩦᨲᩥ ᩅᩣᩁᩅᩣᨱᩮᩣ, ᨠᨾ᩠ᨾᨶᩥ ᨱᩮᩣ, ᩋᨽᩥᨵᩣᨶᨲᩮᩣ ᩅᩣᩁᩔ ᨸᩩᨻ᩠ᨻᨶᩥᨸᩣᨲᩮᩣ, ᩋᨶᩥᨲ᩠ᨳᩥᨿᨾᩮᨲᩮ. ᩅᨲ᩠ᨳᩔ ᩋᩅᨿᩅᩮ ᨴᩈᩣᩈᨴ᩠ᨴᩮᩣ ᩍᨲ᩠ᨳᩦ. ‘‘ᨴᩈᩣ ᩅᨲ᩠ᨿᨾᩅᨲ᩠ᨳᩣᨿᩴ, ᩅᨲ᩠ᨳᩴᩈᩮ ᨻᩉᩩᨾ᩠ᩉᩥ ᨴ᩠ᩅᩥᩈᩪ’’ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪖.᪑᪑᪔] ᩁᨽᩈᩮᩣ. ᨴᩣ ᨨᩮᨴᨶᩮ, ᨠᨾ᩠ᨾᨶᩥ ᩈᩮᩣ, ᩁᩔᩮᩣ.

ᩏᨲ᩠ᨲᨾᨦ᩠ᨣᨾ᩠ᩉᩥ ᩈᩦᩈᩮ ᨿᩮᩣ ᨠᨬ᩠ᨧᩩᨠᩮᩣ ᩈᩩᩅᨱ᩠ᨱᩣᨴᩥᨾᨿᩮᩣ, ᩈᩮᩣ ‘‘ᨶᩣᩊᩥᨸᨲ᩠ᨲᩮᩣ’’ᨲᩥ ᨠᨳᩥᨲᩮᩣ. ᨶᩣᩊᩥᨸᨲ᩠ᨲᩮᩣ ᨲᩴᩈᨱ᩠ᨮᩣᨶᩮᩣ ᩈᩩᩅᨱ᩠ᨱᩣᨴᩥᨸᨭᩮᩣ ᨶᩣᩊᩥᨸᨲ᩠ᨲᩮᩣ. ᩈᩦᩈᨠᩴ, ᩈᩥᩁᩥᨿᩴ, ᩈᩥᩁᩮᩣᩉᨶ᩠ᨲᩥᨸᩥ ᨲᩔ ᨶᩣᨾᩣᨶᩥ.

᪒᪙᪕. ᨲᩥᨠᩴ ᨴᩦᨥᨲ᩠ᨲᩮ. ᩌᨸᩩᨻ᩠ᨻᩮᩣ ᨿᨾᩩ ᩏᨸᩁᨾᩮ, ᨱᩮᩣ. ᩌ ᨽᩩᩈᩮᩣ ᨿᩣᨲᩥ ᨣᨧ᩠ᨨᨲᩦᨲᩥ ᩅᩣ ᩌᨿᩣᨾᩮᩣ, ᨿᩣ ᨣᨲᩥᨸᩣᨸᩩᨱᩮᩈᩩ, ᨾᩮᩣ. ᨴᩦᨥᩔ ᨽᩣᩅᩮᩣ ᨴᩦᨥᨲᩣ. ᩁᩩᩉ ᨩᨶᨶᩮ, ᨱᩮᩣ.

ᨴ᩠ᩅᨿᩴ ¶ ᩅᩥᨲ᩠ᨳᩣᩁᩮ. ᩅᨲ᩠ᨳᩅᩥᩈᨿᩮ ‘‘ᩒᩈᩣᩁᩮᩣ’’ᨲᩥ ᩁᩪᩊ᩠ᩉᩮ. ᩈᨾᨶ᩠ᨲᨲᩮᩣ ᨶᨿ᩠ᩉᨲᩦᨲᩥ ᨸᩁᩥᨱᩣᩉᩮᩣ, ᨶᩉ ᨻᨶ᩠ᨵᨶᩮ, ᨱᩮᩣ. ᩅᩥᨲ᩠ᨳᩣᩁᩮᨶ ᩈᩁᨱᩴ ᩅᩥᩈᩣᩁᩮᩣ, ᩈᩮᩣ ᩑᩅ ᩅᩥᩈᩣᩃᨲᩣ.

᪒᪙᪖. ᨧᨲᩩᨠ᩠ᨠᩴ ᨧᩦᩅᩁᩮ. ᩋᩁᩉᨲᩴ ᨵᨩᩮᩣ ᩋᩁᩉᨴ᩠ᨵᨩᩮᩣ, ᩁᩪᩊ᩠ᩉᩥᨿᩣ ᨲᨴᨬ᩠ᨬᨧᩦᩅᩁᩮᩈᩩ. ᨠᩈᩣᨿᩮᨶ, ᨠᩈᩣᩅᩮᨶ ᨧ ᩁᨲ᩠ᨲᩴ ᨠᩣᩈᩣᨿᩴ, ᨠᩣᩈᩣᩅᨬ᩠ᨧ, ᩈᨾᩣᨶᩃᩥᨦ᩠ᨣᨲ᩠ᨲᩣ ᨴ᩠ᩅᨶ᩠ᨴᩮᩣ. ᨧᩥ ᨧᨿᩮ, ᩎᩅᩁᩮᩣ. ᩅᨲ᩠ᨳᨡᨶ᩠ᨵᩮᩉᩥ ᨧᩦᨿᨲᩮᨲᩥ ᨧᩦᩅᩁᩴ.

ᨾᨱ᩠ᨯᩃᩣᨴᨿᩮᩣ ᨲᨴᨦ᩠ᨣᩣᨶᩥ ᩈᨾᩪᩉᨽᩪᨲᩔ ᨧᩦᩅᩁᩔ ᩋᩅᨿᩅᩣᨶᩥ. ᨾᨯᩥ ᨽᩪᩈᩣᨿᩴ, ᩋᩃᩮᩣ, ᨾᨱ᩠ᨯᩃᩴ. ᨧᩦᩅᩁᨸᩁᩥᨿᨶ᩠ᨲᩮᩣᨿᩴ ᨾᩉᩣᨸᨳᩅᩥᨿᩣ ᨧᨠ᩠ᨠᩅᩣᩊᨸᨻ᩠ᨻᨲᩮᩣ ᩅᩥᨿ ᨧᩦᩅᩁᩔ ᩈᨾᨶ᩠ᨲᨲᩮᩣ ᨲᩥᨭ᩠ᨮᨲᩥ. ᩅᩥᩅᨭ᩠ᨭᩮᩣ ᨶᩣᨾ ᨧᩦᩅᩁᨾᨩ᩠ᨫᨣᨲᨾᨣ᩠ᨣᩮᩣ, ᩈᩮᩣ ᩉᩥ ᩅᩥᩈᩩᩴ ᩅᩥᩈᩩᩴ ᩅᨭ᩠ᨭᨲᩦᨲᩥ ᩅᩥᩅᨭ᩠ᨭᩮᩣᨲᩥ ᩅᩩᨧ᩠ᨧᨲᩥ, ᩅᨭ᩠ᨭ ᩌᩅᨭ᩠ᨭᨶᩮ. ᨠᩩᩈᩥ ᨶᩣᨾ ᨾᨣ᩠ᨣᩣᨶᩴ ᨾᨩ᩠ᨫᨣᨲᩅᨲ᩠ᨳᨡᨱ᩠ᨯᩴ, ᨠᩩᩈ ᨨᩮᨴᨶᩮ, ᨠᨾ᩠ᨾᨶᩥ ᩍ, ᨠᩩᩈᩥ, ᨸᩩᨾᩥᨲ᩠ᨳᩥᨿᩴ.

᪒᪙᪗. ᨹᩃᩣᨴᩦᨶᩴ ᨿᩣᨶᩥ ᨧᨲ᩠ᨲᩣᩁᩥ ᩈᨶ᩠ᨲᩥ, ᩑᨲᩣ ᩅᨲ᩠ᨳᩔ ᨿᩮᩣᨶᩥᨿᩮᩣ ᨠᩣᩁᨱᩣᨶᩥ ᨲᨲᩮᩣ ᨲᨴᩩᨸ᩠ᨸᨲ᩠ᨲᩥᨲᩮᩣ. ᨠᨸ᩠ᨸᩣᩈᩥᨠᩴ ᩅᨲ᩠ᨳᩴ ᨹᩣᩃᩴ ᨶᩣᨾ ᨹᩃᩅᩥᨠᩣᩁᨲ᩠ᨲᩣ, ᩅᩥᨠᩣᩁᩮ ᨱᩮᩣ, ᨲᩦᩈᩩ. ᨿᨳᩣ – ᨹᩣᩃᩮᩣ ᨸᨭᩮᩣ, ᨹᩣᩃᩣ ᨧᩮᩃᩦ, ᨹᩣᩃᩴ ᩅᨲ᩠ᨳᩴ. ᨡᩮᩣᨾᩣᨴᨿᩮᩣ ᨸᨶ ᨸᨭᩣ ᨲᨧᨻ᩠ᨽᩅᩣ ᨲᨧᨲᩮᩣ ᩈᨬ᩠ᨩᩣᨲᩣ.

᪒᪙᪘. ᨠᩮᩣᩈᩮᨿ᩠ᨿᩴ ¶ ᩅᨲ᩠ᨳᩴ ᨠᩥᨾᩥᨩᩴ ᨶᩣᨾ. ᨾᩥᨣᩃᩮᩣᨾᨾᨿᨶ᩠ᨲᩩ ᨠᨾ᩠ᨻᩃᩴ. ᨴ᩠ᩅᨿᩴ ᨻ᩠ᨿᩅᨵᩣᨿᨠᨸᨭᩮ, ᨠᨱ᩠ᨯᨸᨭᩮᨸᩦᨲᩥ ᨠᩮᨧᩥ. ᩈᨾᩣᨶᨲ᩠ᨳᩣ ᩑᨲᩮ ᨴ᩠ᩅᩮ ᨲᩩᩃ᩠ᨿᨲ᩠ᨳᩣᨲ᩠ᨿᨲ᩠ᨳᩮᩣ. ᨩᩩ ᨣᨲᩥᨿᩴ, ᨽᩪᩅᩣᨴᩥ, ᨩᩩ ᨻᨶ᩠ᨵᨶᩮ ᩅᩣ, ᨿᩩ, ᩋᨶᨠᩣᨴᩮᩈᩮᩣ, ᩈᩣ ᩍᨲ᩠ᨳᩦ. ᨲᩥᩁᩮᩣ ᨠᩁᩦᨿᨲᩥ ᨸᩥᨵᩦᨿᨲᩥ ᨿᩣᨿ, ᩈᩣ ᨲᩥᩁᩮᩣᨠᩁᨱᩦ, ᨿᩩ. ᨸᨲᩥᩈᩦᩁᩣᨸ᩠ᨿᨲᩕ. ᨸᨲᩥᨸᩩᨻ᩠ᨻᩮᩣ ᩈᩥ ᨻᨶ᩠ᨵᨶᩮ, ᩁᩮᩣ.

᪒᪙᪙. ᨴ᩠ᩅᨿᩴ ᩏᨸᩁᩥᨻᨶ᩠ᨵᨸᨭᩮ, ᩋᨳᩈᨴ᩠ᨴᩮᩣᨲᩕ ᩃᩥᨦ᩠ᨣᩣᨴᩥᨩᩮᩣᨲᨠᩮᩣ. ᩏᨴ᩠ᨵᩴ ᩃᩮᩣᨧᨲᩮ ᨻᨶ᩠ᨵᩦᨿᨲᩮᨲᩥ ᩏᩃ᩠ᩃᩮᩣᨧᩴ, ᩃᩩᨧ ᨴᩔᨶᩮ. ᨧᨶ᩠ᨴᩣᨲᨸᩮ ᩅᩥᨲᨶ᩠ᨿᨲᩮᨲᩥ ᩅᩥᨲᩣᨶᩴ, ᨲᨶᩩ ᩅᩥᨲ᩠ᨳᩣᩁᩮ, ᨱᩮᩣ, ᨧᩩᩁᩣᨴᩥ. ᨴ᩠ᩅᨿᨾ᩠ᨸᩥ ᨸᩩᨶ᩠ᨶᨸᩩᩴᩈᨠᨶ᩠ᨲᩥ ᩎᩁᩥᨲᩴ ᨠᨳᩥᨲᩴ.

ᨴ᩠ᩅᨿᩴ ᩈᩥᨶᩣᨶᩮ. ᨶᩉ ᩈᩮᩣᨧᩮ, ᨠᩁᨱᩮ ᨿᩩ, ᩈᩥᨶᩣ ᩈᩮᩣᨧᩮ, ᨠᩁᨱᩮ ᨿᩩ, ‘‘ᩈᩥᨶᩣᨶᩮ’’ᨲᩥ ᩈᨲ᩠ᨲᨾ᩠ᨿᨶ᩠ᨲᩴ ᨸᨴᩴ. ᨴ᩠ᩅᨿᩴ ᨠᩩᩃ᩠ᨿᩣᨴᩥᨶᩣ [ᨠᩩᨭ᩠ᨿᩣᨴᩥᨶᩣ (ᨠ.), ᨠᩩᨩ᩠ᨩᨶᩣᨴᩥᨶᩣ (ᨶᩥᩔᨿ), ᨠᩩᨦ᩠ᨠᩩᨾᩉᩃᩥᨴ᩠ᨴᩣᨴᩥᨶᩣ (ᨧᩥᨶ᩠ᨲᩣᨾᨱᩥᨭᩦᨠᩣ ᪑᪖.᪑᪒᪑)] ᩋᨦ᩠ᨣᨶᩥᨾ᩠ᨾᩃᩦᨠᩁᨱᩮ. ᩏᨻ᩠ᨻᨲ᩠ᨲᩦᨿᨲᩮ ᩅᩥᩈᩣᩁᩦᨿᨲᩮ ᨾᩃᨾᨶᩮᨶᩮᨲᩥ ᩏᨻ᩠ᨻᨲ᩠ᨲᨶᩴ, ᩅᨲᩩ ᩅᨲ᩠ᨲᨶᩮ, ᨽᩪᩅᩣᨴᩥ. ᨾᨩ᩠ᨩ ᩈᩩᨴ᩠ᨵᩥᨿᩴ, ᨿᩩ. ᩈᨾᨶ᩠ᨲᩥ ᨴ᩠ᩅᨿᨾᩥᨴᩴ ᩈᨾᩣᨶᨲ᩠ᨳᩴ.

᪓᪐᪐. ᨲᩥᨠᩴ ᨶᩃᩣᨭᨠᨲᩮ ᨧᩥᨲ᩠ᨲᨠᩮ. ᨲᩥᩃᨠᩣᨠᨲᩥ ᨲᩥᩃᨠᩮᩣ. ᨧᩥᨲ᩠ᨲᨠᩣᨠᨲᩥ ᨧᩥᨲ᩠ᨲᨠᩴ. ᨧᨠᩣᩁᩮᨶ ᨲᨾᩣᩃᨸᨲ᩠ᨲᩣᨠᨲᩥ ᨲᨾᩣᩃᨸᨲ᩠ᨲᩴ ¶ . ᩈᩣᨾᨬ᩠ᨬᩮᨶ ᩅᩥᩈᩮᩈᨠᩴ, ᩏᨽᩮᩣ ᩅᩥᩈᩮᩈᨠᨲᩥᩃᨠᩣ ᩋᨶᩥᨲ᩠ᨳᩦ, ᩈᩮᩈᨴ᩠ᩅᨿᩴ ᨶᨸᩩᩴᩈᨠᩴ [ᩋᨾᩁ ᪑᪖.᪑᪒᪓].

ᨲᩥᨠᩴ ᨧᨶ᩠ᨴᨶᩮ, ᨧᨴᩥ ᩉᩥᩃᩣᨴᨶᩮ, ᩉᩥᩃᩣᨴᨶᩴ ᩈᩩᨡᩣᨸᨶᩴ, ᨿᩩ. ᨣᨶ᩠ᨵᩣᨶᩴ ᩈᩣᩁᩮᩣ ᩏᨲ᩠ᨲᨾᩮᩣ ᨣᨶ᩠ᨵᩈᩣᩁᩮᩣ, ᨣᨶ᩠ᨵᨿᩩᨲ᩠ᨲᩮᩣ ᩈᩣᩁᩮᩣ ᨳᩥᩁᩴᩈᩮᩣ ᩅᩣ ᨣᨶ᩠ᨵᩈᩣᩁᩮᩣ. ᨾᩃᨿᨴᩦᨸᨣᩥᩁᩥᨾ᩠ᩉᩥ ᨩᩣᨿᨲᩦᨲᩥ ᨾᩃᨿᨩᩮᩣ. ᨽᨴ᩠ᨴᩈᩥᩁᩦᨸ᩠ᨿᨲᩕ.

᪓᪐᪑. ᨲᩥᨠᩴ ᨸᩦᨲᨧᨶ᩠ᨴᨶᩮ. ‘‘ᨣᩮᩣᩈᩦᩈ’’ᩍᨲᩥ ᨸᨻ᩠ᨻᨲᩮ ᨾᩃᨿᩮ ᨴᩮᩈᩮ ᨩᩣᨲᩴ ᨣᩮᩣᩈᩦᩈᩴ, ᨣᩮᩣ ᩅᩥᨿ ᨩᩃᩴ ᩅᩥᨿ ᩈᩦᨲᨶ᩠ᨲᩥ ᩅᩣ ᨣᩮᩣᩈᩦᨲᩴ, ᨲᨴᩮᩅ ᨲᩔ ᩈᨠᩣᩁᩴ ᨠᨲ᩠ᩅᩣ ᨣᩮᩣᩈᩦᩈᩴ. ᨲᩥᩃᨸᨱ᩠ᨱᨸ᩠ᨸᨾᩣᨱᨸᨱ᩠ᨱᨿᩩᨲ᩠ᨲᨲᩣᨿ ᨲᩮᩃᨸᨱ᩠ᨱᩥᨠᩴ. ᨾᨶᩴ ᩉᩁᨲᩦᨲᩥ ᩉᩁᩥ, ᨲᨾᩮᩅ ᨧᨶ᩠ᨴᨶᨶ᩠ᨲᩥ ᩉᩁᩥᨧᨶ᩠ᨴᨶᩴ. ᨸᩦᨲᩈᩣᩁᩩ, ᩈᩩᩈᩦᨲᩴᨸ᩠ᨿᨲᩕ. ᨣᩮᩣᩈᩦᩈᩣᨴᨿᩮᩣ ᨲᨿᩮᩣ ᨸᩩᨾᩮ, ᨶᨸᩩᩴᩈᨠᩮ ᨧ ᩅᨲ᩠ᨲᨶ᩠ᨲᩥ.

ᨧᨲᩩᨠ᩠ᨠᩴ ᩁᨲ᩠ᨲᨧᨶ᩠ᨴᨶᩮ. ᨲᩥᩃᨸᨱ᩠ᨱᨸ᩠ᨸᨾᩣᨱᨸᨱ᩠ᨱᨿᩩᨲ᩠ᨲᨲᩣᨿ ᨲᩥᩃᨸᨱ᩠ᨱᩦ. ᨸᩩᩁᩥᨾᩮᨶ ᨽᩮᨴᨠᩁᨱᨲ᩠ᨳᩴ ᨶ ᩅᩩᨴ᩠ᨵᩥ. ᨸᨲ᩠ᨲᨾᨦ᩠ᨣᨾᩔᩮᨲᩥ ᨸᨲ᩠ᨲᨦ᩠ᨣᩴ, ᨡᩩᨴ᩠ᨴᨸᨱ᩠ᨱᨲᩣᨿ ᩋᨸ᩠ᨸᨵᩣᨶᨸᨲ᩠ᨲᨾᩥᨧ᩠ᨧᨲ᩠ᨳᩮᩣ. ‘‘ᩋᨦ᩠ᨣᩴ ᨣᨲ᩠ᨲᨶ᩠ᨲᩥ ᨠᩮᩣᨸᩣᨿ-ᨸᨲᩦᨠᩮᩈ᩠ᩅᨸ᩠ᨸᨵᩣᨶᨠᩮ’’ᨲᩥ ᩉᩥ ᨶᩣᨶᨲ᩠ᨳᩈᨦ᩠ᨣᩉᩮ. ᩁᨬ᩠ᨩ ᩁᩣᨣᩮ, ᩉᩮᨲᩩᨠᨲ᩠ᨲᩁᩥ ᨿᩩ. ᩁᨲ᩠ᨲᩅᨱ᩠ᨱᨲᩣᨿ ᩁᨲ᩠ᨲᨬ᩠ᨧ ᨲᩴ ᨧᨶ᩠ᨴᨶᨬ᩠ᨧᩮᨲᩥ ᩁᨲ᩠ᨲᨧᨶ᩠ᨴᨶᩴ, ᩋᨾᩁᨠᩮᩣᩈᩮ ᨸᨶ ‘‘ᨣᩮᩣᩈᩦᩈᩣᨴᩦᨶᩥ ᩁᨲ᩠ᨲᨧᨶ᩠ᨴᨶᨶ᩠ᨲᩣᨶᩥ ᩅᩥᩈᩮᩈᩮ ᩅᨲ᩠ᨲᨶ᩠ᨲᩦ’’ᨲᩥ [ᩋᨾᩁ ᪑᪖.᪑᪓᪑] ᩅᩩᨲ᩠ᨲᩣᨶᩥ. ᨲᨲᩕ ᨣᩮᩣᩈᩦᩈᩔ ᨿᨳᩣᩅᩩᨲ᩠ᨲᩮᩣᨿᩮᩅᨲ᩠ᨳᩮᩣ. ᨵᩅᩃᩴ, ᩈᩩᩈᩦᨲᩃᩴ, ᨧᨶ᩠ᨴᨶᩴ, ᨲᩮᩃᨸᨱ᩠ᨱᩥᨠᩴ ᨾᩃᨿᨸᨻ᩠ᨻᨲᨴᩮᩈᨩᨾᩮᩅ. ᩉᩁᩥ ᨾᨱ᩠ᨯᩪᨠᩮᩣ, ᨲᨴᩣᨠᩣᩁᩮ ᨸᨻ᩠ᨻᨲᩮ ᨩᩣᨲᩴ ᨧᨶ᩠ᨴᨶᩴ ᩉᩁᩥᨧᨶ᩠ᨴᨶᩴ. ᨸᨠ᩠ᨠᨾ᩠ᨻᨹᩃᨣᨶ᩠ᨵᩥ ᨸᩦᨲᩅᨱ᩠ᨱᩴ. ᨲᩥᩃᨸᨱ᩠ᨱᩦᨸᨲ᩠ᨲᨦ᩠ᨣᩣᨶᩥ ᩁᨲ᩠ᨲᨧᨶ᩠ᨴᨶᩈᨴᩥᩈᩔ ᩁᨲ᩠ᨲᩈᩣᩁᩔ ᩑᨠᩔ ᨧᨶ᩠ᨴᨶᩔ ᨶᩣᨾᩣᨶᩥ.

ᨴ᩠ᩅᨿᩴ ¶ ᩁᨲ᩠ᨲᨧᨶ᩠ᨴᨶᩮ. ᩋᨳ ᩅᩣ ᨲᩥᩃᨸᨱ᩠ᨿᩣᨴᩦᨶᩥ ᨧᨲ᩠ᨲᩣᩁᩥ ᩃᩮᩣᩉᩥᨲᨧᨶ᩠ᨴᨶᩈᨴᩥᩈᩔ ᩁᨲ᩠ᨲᩈᩣᩁᩔ ᩑᨠᩔ ᨧᨶ᩠ᨴᨶᩅᩥᩈᩮᩈᩔ ᨶᩣᨾᩣᨶᩥ. ᨠᩩᨧᨶ᩠ᨴᨶᩴᨸ᩠ᨿᨲᩕ. ‘‘ᨸᨲ᩠ᨲᨦ᩠ᨣᩴ ᩁᨬ᩠ᨩᨶᩴ ᩁᨲ᩠ᨲᩴ, ᨸᨲᩕᨦ᩠ᨣᨬ᩠ᨧ ᨠᩩᨧᨶ᩠ᨴᨶ’’ᨶ᩠ᨲᩥ ᩁᨲᨶᨾᩣᩃᩣᨿᩴ.

᪓᪐᪒. ᨴ᩠ᩅᨿᩴ ᩅᨱᩥᨩᩣᨴᩦᨶᩴ ‘‘ᨠᩣᩊᩮᨿᩣ’’ᩍᨲᩥ ᩁᩪᩊ᩠ᩉᩮᨸᩦᨲᨠᨭ᩠ᨮᩮ. ᨠᩣᩊᩅᨱ᩠ᨱᩴ ᩋᨶᩩᩈᩁᨲᩥ ᩈᩦᩃᩮᨶᩣᨲᩥ ᨠᩣᩊᩣᨶᩩᩈᩣᩁᩦ, ᨠᩣᩊᩅᨱ᩠ᨱᨩᨶᨠᩮᩣᨲ᩠ᨿᨲ᩠ᨳᩮᩣ. ᨠᩣᩊᩴ ᨩᨶᩮᨲᩦᨲᩥ ᨠᩣᩊᩥᨿᩴ, ‘‘ᨠᩣᩊᩦᨿᨠᨶ᩠ᨲᩩ ᨠᩣᩊᩮᨿᩴ, ᩅᨱ᩠ᨱᨴᩴ ᨠᨶ᩠ᨲᩥᨩᩣᩈᨠ’’ᨶ᩠ᨲᩥ [ᨩᩣᩈᨠᩴ ᨠᨶ᩠ᨲᩥᨴᩣᨿᨠᩴ (ᨧᩥᨶ᩠ᨲᩣᨾᨱᩥᨭᩦᨠᩣ ᪑᪖.᪑᪒᪖)] ᨻ᩠ᨿᩣᨯᩥ.

ᨲᩥᨠᩴ ᩋᨣᩁᩩᩈᩣᨾᨬ᩠ᨬᩮ. ᩃᩪ ᨨᩮᨴᨶᩮ, ᩉᩮᩣ. ᩃᩉᩩᨶᩣᨾᨲ᩠ᨲᩣ ᩋᨣᩁᩩ. ᩁᩔ ᩃᨲ᩠ᨲᩮ ᩋᨣᩃᩩ, ᨴ᩠ᩅᨿᩴ ᨸᩩᨾᩮ. ᩅᩴᩈᩥᨠᩴ, ᩁᩣᨩᩣᩁᩉᩴ, ᨠᩥᨾᩥᨩᩴ, ᨩᩮᩣᨦ᩠ᨣᨠᩴᨸ᩠ᨿᨲᩕ.

ᩋᩈ᩠ᨾᩥᩴ ᩋᨣᩁᩩᨾ᩠ᩉᩥ ᨠᩣᩊᩮ ᩈᨲᩥ ‘‘ᨠᩣᩊᩣᨣᩁᩪ’’ᨲ᩠ᨿᩩᨧ᩠ᨧᨲᩮ. ᨾᩃ᩠ᩃᩥᨠᩣᨸᩩᨸ᩠ᨹᨣᨶ᩠ᨵᩥ ᩋᨣᩁᩩ ᨸᨶ ᨾᨦ᩠ᨣᩃ᩠ᨿᩮᩣᨧ᩠ᨧᨲᩮ.

ᨴ᩠ᩅᨿᩴ ᩈᩃ᩠ᩃᨠᩦᨴᩅᩮ. ᨲᩩᩁᩩᨠ᩠ᨡᩮᩣ ᩅᩩᨲ᩠ᨲᩮᩣ. ᨸᩥᨯᩥ ᩈᨦ᩠ᨥᩣᨲᩮ, ᨱ᩠ᩅᩩ. ᩈᩥᩉᩃᩮᩣ, ᨿᩣᩅᨱᩮᩣᨸ᩠ᨿᨲᩕ.

᪓᪐᪓. ᨴ᩠ᩅᨿᩴ ᨾᩥᨣᨶᩣᨽᩥᨿᩴ. ᨠᨲ᩠ᨳ ᩈᩥᩃᩣᨥᩣᨿᩴ, ᩐᩁᩮᩣ, ᨶᨴᩣᨴᩥ, ᩈᨠᨲ᩠ᨳᩮ ᨠᩮᩣ. ᨾᩥᨣᩔ ᨾᨴᩮᩣ ᨾᩥᨣᨾᨴᩮᩣ, ᨾᩥᨣᩮᩣ ᨾᩁᨲᩥ ᨿᩮᨶᩣᨲᩥ ᩅᩣ ᨾᩥᨣᨾᩁᩮᩣ, ᩈᩮᩣ ᩑᩅ ᨾᩥᨣᨾᨴᩮᩣ.

ᨴ᩠ᩅᨿᩴ ¶ ᨠᩩᨭ᩠ᨮᩮ. ᨠᩩᨭ ᨨᩮᨴᨶᩮ, ᨮᩮᩣ, ᨲᩮᩣ ᩅᩣ, ‘‘ᨠᩩᨭᩣᨴᩦᩉᩥ ᨮᩮᩣ’’ᨲᩥ ᨮᩮᩣ, ᨠᩩᨭ᩠ᨮᩴ, ᩁᩮᩣᨣᨽᩮᨴᩮᨸᩥ. ᩋᨲ᩠ᨲᨶᩮᩣ ᨨᩣᨿᩪᨸᨣᨲᩮ ᩋᨩᩮ ᨸᩣᩃᩮᨲᩦᨲᩥ ᩋᨩᨸᩣᩃᨠᩴ, ᨱ᩠ᩅᩩ. ᨸᩣᩁᩥᨽᩣᨻ᩠ᨿᩴ, ᨸᩣᨠᩃᩴ [ᨹᩣᩃᨠᩦ (ᨠ.)], ᩏᨸ᩠ᨸᩃᩴ, ᩅᩣᨸ᩠ᨸᩴᨸ᩠ᨿᨲᩕ.

ᨴ᩠ᩅᨿᩴ ᨸᩥᨯᨦ᩠ᨣᩮ. ᩁᩮᩣᨣᩴ ᩃᩩᨶᨶ᩠ᨲᩮᩣ ᩋᨦ᩠ᨣᨲᩥ ᨣᨧ᩠ᨨᨲᩦᨲᩥ ᩃᩅᨦ᩠ᨣᩮᩣ. ᨴᩮᩅᩣᨶᩴ ᨠᩩᩈᩩᨾᩴ ᨸᩩᨸ᩠ᨹᩴ ᨴᩮᩅᨠᩩᩈᩩᨾᩴ. ᩈᩥᩁᩥᩈᨬ᩠ᨬᩴᨸ᩠ᨿᨲᩕ.

ᨴ᩠ᩅᨿᩴ ᨠᩩᨦ᩠ᨠᩩᨾᩮ. ᨠᩈ᩠ᨾᩦᩁᩁᨭ᩠ᨮᩮ ᨩᩣᨲᩴ ᨠᩈ᩠ᨾᩦᩁᨩᩴ. ᩋᨣ᩠ᨣᩥᩈᩥᨡᩴ, ᩅᩁᩴ, ᩅᩃ᩠ᩃᩦᨠᩴ, ᨸᩦᨲᨶᩴ, ᩁᨲ᩠ᨲᩈᨦ᩠ᨠᩮᩣᨧᩴ, ᨸᩥᩈᩩᨶᩴ, ᨵᩦᩁᩴ ᩃᩮᩣᩉᩥᨲᨧᨶ᩠ᨴᨶᩴᨸ᩠ᨿᨲᩕ.

᪓᪐᪔. ᨴ᩠ᩅᨿᩴ ᨵᩩᨶᨠᩮ. ᨿᨠ᩠ᨡᩮᩉᩥ ᨠᨲᩮᩣ ᨵᩪᨸᩮᩣ ᨿᨠ᩠ᨡᨵᩪᨸᩮᩣ, ᨿᨠ᩠ᨡᩮᩣ ᨴᩮᩅᩮᩣ. ᩈᨩ᩠ᨩᩁᩩᨠ᩠ᨡᩔ ᩈᩥᩃᩮᩈᩮᩣ ᩈᨩ᩠ᨩᩩᩃᩈᩮᩣ. ᩋᩔᩩ, ᩈᩥᩃᩮᩣᨸᩮᩣ, ᩑᩔᨲ᩠ᨲᨬ᩠ᨧ, ᩈᨩ᩠ᨩᩔ ᩁᩈᩮᩣ ᨴᩅᩮᩣ ᩈᨩ᩠ᨩᩩᩃᩈᩮᩣ, ᩋᩔᩩ, ᩃᨲ᩠ᨲᨬ᩠ᨧ. ᩈᨩ᩠ᨩᩁᩈᩮᩣᨲᩥᨸᩥ ᨸᩣᨮᩮᩣ. ᩁᩣᩃᩮᩣ, ᩈᨻ᩠ᨻᩁᩈᩮᩣ, ᨻᩉᩩᩁᩪᨸᩮᩣᨸ᩠ᨿᨲᩕ.

ᨲᩥᨠᩴ ᨲᨠ᩠ᨠᩮᩣᩃᩮ. ᨲᨠ᩠ᨠ ᩅᩥᨲᨠ᩠ᨠᩮ, ᩒᩃᩮᩣ. ᨠᩩᩃ ᩈᨦ᩠ᨡ᩠ᨿᩣᨶᩮ, ᨱ᩠ᩅᩩ. ᨠᩮᩣᩈᨿᩩᨲ᩠ᨲᩴ ᨹᩃᨾᩮᨲᩔᩣᨲᩥ ᨠᩮᩣᩈᨹᩃᩴ. ᨴ᩠ᩅᨿᩴ ᨩᩣᨲᩥᨹᩃᩮ. ᨠᩮᩣᩈᩈᩉᩥᨲᩴ ᨩᩣᨲᩥᨹᩃᨾᩮᨲᩔᩣᨲᩥ ᨩᩣᨲᩥᨠᩮᩣᩈᩴ. ᨩᩣᨲᩥᨹᩃᨾᩮᨲᩔ, ᨶ ᨠᩥᨲ᩠ᨲᩥᨾᨶ᩠ᨲᩥ ᨩᩣᨲᩥᨹᩃᩴ.

᪓᪐᪕. ᨸᨩ᩠ᨩᨴ᩠ᨵᩴ ᨠᨸ᩠ᨸᩪᩁᩮ, ᨥᨶᩮᩣ ᩉᩩᨲ᩠ᩅᩣ ᩈᩁᨲᩦᨲᩥ ᨥᨶᩈᩣᩁᩮᩣ. ᩋᨻ᩠ᨽᨾᩥᩅ ᩈᩥᨲᩴ ᩈᩥᨲᨻ᩠ᨽᩮᩣ, ᩋᨽᩥᨵᩣᨶᨲᩮᩣ ᨸᩩᨻ᩠ᨻᨶᩥᨸᩣᨲᩮᩣ, ᨠᨸ᩠ᨸ ¶ ᩈᩣᨾᨲ᩠ᨳᩥᨿᩮ, ᩐᩁᩮᩣ. ᨧᨶ᩠ᨴᩈᨬ᩠ᨬᩮᩣ, ᩉᩥᨾᩅᩣᩃᩩᨠᩮᩣ, ᩉᩥᨾᩣᩅ᩠ᩉᨿᩮᩣᨸ᩠ᨿᨲᩕ.

ᨸᨩ᩠ᨩᨴ᩠ᨵᩴ ᩃᩣᨡᩣᨿᩴ, ᩌ ᨽᩩᩈᩮᩣ ᩁᨲ᩠ᨲᩴ ᨠᩁᩮᩣᨲᩦᨲᩥ ᩋᩃᨲ᩠ᨲᨠᩮᩣ, ᩃᨲ᩠ᨲᩴ, ᨠ᩠ᩅᩥ. ᨿᩩ ᨾᩥᩔᨶᩮ, ᨱ᩠ᩅᩩ. ᩃᩣᨡ ᩈᩮᩣᩈᨶᩮ, ᩋ, ᩃᩣ ᩌᨴᩣᨶᩮ ᩅᩣ, ᨡᩮᩣ. ᨩᨶ ᨩᨶᨶᩮ, ᨲᩩ, ᨶᩃᩮᩣᨸᩮᩣ. ᨴᩩᨾᩣᨾᨿᩮᩣᨸ᩠ᨿᨲᩕ.

᪓᪐᪖. ᨴ᩠ᩅᨿᩴ ᩈᩁᩃᨴ᩠ᨴᩅᩮ. ᩈᩥᩁᩥᨿᩣ ᩃᨠ᩠ᨡᩥᨿᩣ ᩌᩅᩣᩈᩮᩣ ᩈᩥᩁᩥᩅᩣᩈᩮᩣ. ᩈᩁᩃᨶᩣᨾᨠᩔ ᩁᩩᨠ᩠ᨡᩔ ᨴᩅᩮᩣ ᩁᩈᩮᩣ ᩈᩁᩃᨴ᩠ᨴᩅᩮᩣ. ᨸᩣᨿᩈᩮᩣ, ᩅᨠᨵᩪᨸᩮᩣ, ᩈᩥᩁᩥᩅᩮᨭ᩠ᨮᩮᩣᨸ᩠ᨿᨲᩕ. ‘‘ᩈᩥᩁᩥᩅᩣᩈᩮ ᨸᩁᨾᨶ᩠ᨶᩮ ᨧ, ᨸᩣᨿᩈᩮᩣ ᩈᨾ᩠ᨾᨲᩮᩣ ᨸᩩᨾᩮ’’ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪖.᪑᪒᪙] ᩁᩩᨴ᩠ᨴᩮᩣ. ᨴ᩠ᩅᨿᩴ ᩋᨬ᩠ᨩᨶᩮ. ᩋᨬ᩠ᨩᩩ ᨻ᩠ᨿᨲ᩠ᨲᩥᨾᨠ᩠ᨡᨶᨣᨲᩥᨠᨶ᩠ᨲᩦᩈᩩ, ᨿᩩ. ᨠᨩ᩠ᨩ ᨻ᩠ᨿᩈᨶᩮ. ᨠᨩ᩠ᨩᨲᩥ ᩁᩮᩣᨣᨶ᩠ᨲᩥ ᨠᨩ᩠ᨩᩃᩴ, ᩋᩃᩮᩣ.

ᨴ᩠ᩅᨿᩴ ᨣᨶ᩠ᨵᨣᩣᩉᩣᨸᨶᨧᩩᨱ᩠ᨱᩮ, ᩅᩈ ᩉᩥᩴᩈᨲ᩠ᨳᩮᩣ, ᩅᩈᨲᩥ ᨴᩩᨣ᩠ᨣᨶ᩠ᨵᨶ᩠ᨲᩥ ᩅᩣᩈᩮᩣ, ᨱᩮᩣ, ᩅᩣᩈ ᩏᨸᩈᩮᩅᩣᨿᩴ ᩅᩣ, ᩅᩈ ᨶᩥᩅᩣᩈᩮ ᩅᩣ. ᩈᩮᩣ ᩑᩅ ᨧᩩᨱ᩠ᨱᩴ. ᨿᩩᨩ ᨿᩮᩣᨣᩮ, ᨠᨾ᩠ᨾᨶᩥ ᨱᩮᩣ, ᩅᩣᩈᩮᩣ ᩑᩅ ᨿᩮᩣᨣᩮᩣ ᩅᩣᩈᨿᩮᩣᨣᩮᩣ. ᨴ᩠ᩅᨿᩴ ᩅᩥᩃᩮᨸᨶᨾᨲ᩠ᨲᩮ. ᩅᨱ᩠ᨱ ᩅᨱ᩠ᨱᨠᩕᩥᨿᩣᩅᩥᨲ᩠ᨳᩣᩁᨣᩩᨱᩅᨧᨶᩮᩈᩩ, ᨧᩩᩁᩣᨴᩥ. ᩅᨱ᩠ᨱᨿᨲᩦᨲᩥ ᩅᨱ᩠ᨱᨠᩴ. ᨱ᩠ᩅᩩ. ᩃᩥᨸ ᩏᨸᨴᩮᩉᩮ. ᩅᩥᩃᩮᨸᩦᨿᨲᩮᨲᩥ ᩅᩥᩃᩮᨸᨶᩴ, ᨠᨾ᩠ᨾᨶᩥ ᨿᩩ.

᪓᪐᪗. ᨿᩮᩣ ᨣᨶ᩠ᨵᨾᩣᩃ᩠ᨿᨵᩪᨸᩣᨴᩦᩉᩥ ᩅᨲ᩠ᨳᨲᨾ᩠ᨻᩩᩃᩣᨴᩦᨶᩴ ᩈᨦ᩠ᨡᩣᩁᩮᩣ, ᨲᩴ ‘‘ᩅᩣᩈᨶ’’ᨾᩥᨲ᩠ᨿᩩᨧ᩠ᨧᨲᩮ, ᩅᩣᩈ ᩏᨸᩈᩮᩅᩣᨿᩴ, ᩅᩣᩈᩦᨿᨲᩮ ᩈᨦ᩠ᨡᩁᩦᨿᨲᩮᨲᩥ ᩅᩣᩈᨶᩴ, ᨿᩩ.

ᨲᩥᨠᩴ ¶ ᨸᩩᨸ᩠ᨹᨴᩣᨾᩮ. ᨾᩣ ᨾᩣᨶᩮ, ᩃᩮᩣ, ᨾᩃ ᨵᩣᩁᨱᩮ ᩅᩣ, ᩋ. ᨾᩣᩃᩮᩣᩅ ᨾᩣᩃ᩠ᨿᩴ. ᨴᨾ ᨣᨲᩥᨿᩴ, ᨸᩩᨸ᩠ᨹᩣᨶᩥ ᨴᨾᨶ᩠ᨲ᩠ᨿᨲᩕᩮᨲᩥ ᨸᩩᨸ᩠ᨹᨴᩣᨾᩴ, ᨸᩩᨸ᩠ᨹᩣᨶᩴ ᩁᩣᩈᩥᨠᩁᨱᨭ᩠ᨮᩣᨶᨾᩥᨧ᩠ᨧᨲ᩠ᨳᩮᩣ. ᨴᩣ ᩃᩅᨶᩮ ᩅᩣ, ᨾᩮᩣ. ᩋᨾᩁᨠᩮᩣᩈᩮ ᨸᨶ ‘‘ᨾᩣᩃᩣᨾᩣᩃ᩠ᨿᩣᨶᩥ ᨾᩩᨴ᩠ᨵᨶᩥ ᨸᩅᨲ᩠ᨲᩣᨿ ᨾᩣᩃᩣᨿ ᨶᩣᨾᩣᨶᩦ’’ᨲᩥ [ᩋᨾᩁ ᪑᪖.᪑᪓᪕] ᩅᨴᨲᩥ. ᨾᩣᩃᨾᩣᩃ᩠ᨿᩈᨴ᩠ᨴᩣ ᨸᩩᨸ᩠ᨹᩮᨸᩥ, ‘‘ᨾᩣᩃᩣ ᨾᩣᩃ᩠ᨿᩴ ᨸᩈᩩᨶᩮ’’ᨲᩥ ᩉᩥ ᨶᩣᨶᨲ᩠ᨳᩈᨦ᩠ᨣᩉᩮ. ᨴ᩠ᩅᨿᩴ ᨣᨶ᩠ᨵᨣ᩠ᨣᩣᩉᩥᨲᩮ ᩅᨲ᩠ᨳᩣᨴᩮᩣ. ᨽᩪ ᩈᨲ᩠ᨲᩣᨿᩴ, ᨠᨾ᩠ᨾᨶᩥ ᨲᩮᩣ, ᩅᩩᨴ᩠ᨵᩣᨴᩥ. ᩅᩣᩈᩣᨸᩮᨲᩥ ᨣᨶ᩠ᨵᩴ ᨣᩣᩉᩣᨸᩮᨲᩥ ᨿᨶ᩠ᨲᩥ ᩅᩣᩈᩥᨲᩴ, ᩅᩈ ᨶᩥᩅᩣᩈᩮ, ᨠᨾ᩠ᨾᩮ ᨲᩮᩣ, ᨲᩦᩈᩩ, ᨿᨳᩣ – ᨽᩣᩅᩥᨲᩮᩣ ᨸᨭᩮᩣ, ᨽᩣᩅᩥᨲᩣ ᨧᩮᩃᩦ, ᨽᩣᩅᩥᨲᩴ ᩅᨲ᩠ᨳᩴ. ᩅᩣᩈᩥᨲᩮᩣ, ᩅᩣᩈᩥᨲᩣ, ᩅᩣᩈᩥᨲᩴ ᩅᨲ᩠ᨳᩴ.

᪓᪐᪘. ᨸᨬ᩠ᨧᨠᩴ ᨾᩩᨴ᩠ᨵᨾᩣᩃᩣᨿᩴ. ᨲᩈᩥ ᩋᩃᨦ᩠ᨠᩣᩁᩮ, ᨽᩪᩅᩣᨴᩥ. ᩏᨴ᩠ᨵᩴ ᨲᩈᩦᨿᨲᩮᨲᩥ ᩏᨲ᩠ᨲᩴᩈᩮᩣ. ᩈᩥᨡᩣᨿᩴ ᨩᩣᨲᩮᩣ ᩈᩮᨡᩁᩮᩣ, ᩁᩮᩣ. ᨾᩩᨴ᩠ᨵᩴ ᩋᩅᨲᩥ ᩁᨠ᩠ᨡᨲᩦᨲᩥ ᩋᩅᩮᩊᩣ, ᩋᩅ ᩁᨠ᩠ᨡᨱᩮ, ᩑᩃᩮᩣ, ᩊᨲ᩠ᨲᩴ. ‘‘ᩌᩅᩮᩊᩣ’’ᨲᩥᨸᩥ ᨸᩣᨮᩮᩣ, ᨴᩦᨥᨲ᩠ᨲᩴ. ᩈᩮᨡᩁᩮᩣ ᨧ ᩌᩅᩮᩊᩣ ᨧᩣᨲᩥ ᨴ᩠ᩅᨶ᩠ᨴᩮᩣ. ᨾᩩᨴ᩠ᨵᨶᩥ ᩋᩃᨦ᩠ᨠᨲᩴ ᨾᩣᩃ᩠ᨿᩴ ᨾᩩᨴ᩠ᨵᨾᩣᩃ᩠ᨿᩴ, ᨲᩈ᩠ᨾᩥᩴ. ᩋᩅᨸᩩᨻ᩠ᨻᩮᩣ ᨲᩈᩥ ᩋᩃᨦ᩠ᨠᩣᩁᩮ, ᩏᨴ᩠ᨵᩴ ᨲᩈᩦᨿᨲᩮᨲᩥ ᩋᩅᨲᩴᩈᩮᩣ, ᩈᩮᩣ ᩑᩅ ᩅᨭᩴᩈᨠᩮᩣ, ᩈᨠᨲ᩠ᨳᩮ ᨠᩮᩣ, ᨲᩔ ᨭᩮᩣ, ᩋᨶᩮᨠᨲ᩠ᨳᨲ᩠ᨲᩣ ᩏᨸᩈᨣ᩠ᨣᨶᩥᨸᩣᨲᩣᨶᩴ ᩏᨴ᩠ᨵᩴᨽᩣᩅᨩᩮᩣᨲᨠᩮᩣ ᨧᩮᨲ᩠ᨳ ᩋᩅᩈᨴ᩠ᨴᩮᩣᨲᩥ ᨲᨳᩮᩣᨲ᩠ᨲᩴ.

ᨲᩥᨠᩴ ᩈᩮᨿ᩠ᨿᩣᨿᩴ. ᩈᨿᨶ᩠ᨲ᩠ᨿᩔᩴ ᩈᩮᨿ᩠ᨿᩣ, ᨿᩮᩣ. ᩈᨿᨶ᩠ᨲ᩠ᨿᨲᩕᩮᨲᩥ ᩈᨿᨶᩴ, ᩈᩮᨶᨬ᩠ᨧ. ᩏᨽᨿᨲᩕᨸᩥ ᩋᨵᩥᨠᩁᨱᩮ ᨿᩩ, ᩍᩔᩮ, ᩑ ᩋᨿ, ᩍᨲᩁᨲᩕ ᩑᨲ᩠ᨲᩴ, ‘‘ᩅᩣ ᨸᩁᩮᩣ ᩋᩈᩁᩪᨸᩣ’’ᨲᩥ ᩋᩃᩮᩣᨸᩮᩣ ᨧ, ᩈᨿᨶᩦᨸ᩠ᨿᨲᩕ.

ᨴ᩠ᩅᨿᩴ ¶ ᨾᨬ᩠ᨧᩮ. ᨸᩁᩥᨸᩩᨻ᩠ᨻᩮᩣ ᩋᨠᩥ ᩃᨠ᩠ᨡᨱᩮ, ᨱᩮᩣ, ᩍᩃᩮᩣᨸᩮᩣ, ᩁᩔ ᩃᨲ᩠ᨲᩴ. ᨾᨧᩥ ᨵᩣᩁᨱᩮᩣᨧ᩠ᨨᩣᨿᨸᩪᨩᨶᩮᩈᩩ, ᨽᩪᩅᩣᨴᩥ ᩋ, ᩈᨠᨲ᩠ᨳᩮ ᨠᩮᩣ. ᨡᨭᩣᨸ᩠ᨿᨲᩕ, ᨡᨭ᩠ᨿᨲᩮ ᩌᨠᨦ᩠ᨡᨲᩮ ᩈᨿᨶᨲ᩠ᨳᩥᨠᩮᩉᩦᨲᩥ ᨡᨭᩣ, ᨡᨭ ᩌᨠᨦ᩠ᨡᩣᨿᩴ.

᪓᪐᪙. ᨴ᩠ᩅᨿᩴ ᨾᨬ᩠ᨧᩣᨵᩣᩁᩮ. ᨾᨬ᩠ᨧᩔ ᩌᨵᩣᩁᩮᩣ ᨾᨬ᩠ᨧᩣᨵᩣᩁᩮᩣ. ᨸᨭᩥᨸᨩ᩠ᨩᨲᩥ ᨸᩅᨲ᩠ᨲᨲᩥ ᩈᩮᨿ᩠ᨿᩣ ᨿᩮᨶ, ᩈᩮᩣ ᨸᨭᩥᨸᩣᨴᩮᩣ. ᨾᨬ᩠ᨧᨦ᩠ᨣᩮ ᨾᨬ᩠ᨧᩣᩅᨿᩅᩮ ᩋᨭᨶᩥᩈᨴ᩠ᨴᩮᩣ ᩍᨲ᩠ᨳᩥᨿᩴ, ᩋᨭ ᨣᨾᨶᨲ᩠ᨳᩮᩣ, ᩋᨶᩥ, ᨿᩩ ᩅᩣ, ᨶᨴᩣᨴᩥ, ᩁᩔᩮᩣ.

᪓᪑᪐. ᨠᩩᩊᩦᩁᨸᩣᨴᩣᨴᨿᩮᩣ ᩍᨾᩮ ᨧᨲ᩠ᨲᩣᩁᩮᩣ ᨾᨬ᩠ᨧᨶ᩠ᨲᩁᩣ ᨾᨬ᩠ᨧᨽᩮᨴᩣ ᩈᩥᨿᩩᩴ. ᨲᨲ᩠ᨳ ᨠᩩᩊᩦᩁᩮᩣ ᨠᨠ᩠ᨠᨭᨠᩮᩣ ᨲᩔ ᩈᨱ᩠ᨮᩣᨶᨸᩣᨴᨲ᩠ᨲᩣ ᨠᩩᩊᩦᩁᨸᩣᨴᩮᩣ. ᩋᨭᨶᩥᨿᩴ ᩌᩉᨧ᩠ᨧᩮᩣ, ᩌᩉᨧ᩠ᨧ ᩅᩣ ᨸᩣᨴᩮᩣ ᨲᩥᨭ᩠ᨮᨲᩥ ᨿᩔᩣᨲᩥ ᩌᩉᨧ᩠ᨧᨸᩣᨴᩮᩣ, ᨸᩩᨻ᩠ᨻᨸᨠ᩠ᨡᩮ ‘‘ᩁᩥᨧ᩠ᨧᩣ’’ᨲᩥ ᨿᩮᩣᨣᩅᩥᨽᩣᨣᩮᨶ ᩁᩥᨧ᩠ᨧᨸᨧ᩠ᨧᨿᨶ᩠ᨲᩮᩣ ᩌᩉᨧ᩠ᨧᩈᨴ᩠ᨴᩮᩣ, ᨸᩁᨸᨠ᩠ᨡᩮ ᨲᩩ ᨲ᩠ᩅᩣᨸᨧ᩠ᨧᨿᨶ᩠ᨲᩮᩣ, ᨿᩔ ᩋᨭᨶᩥᨨᩥᨴ᩠ᨴᩮ ᨸᩣᨴᩮᩣ ᨸᩅᩥᩈᩥᨲ᩠ᩅᩣ ᨲᩥᨭ᩠ᨮᨲᩥ, ᩈᩮᩣ ᩌᩉᨧ᩠ᨧᨸᩣᨴᩮᩣ. ᨾᩈ ᩌᨾᩈᨶᩮ, ᩌᩁᩮᩣ, ᩈᨠᨲ᩠ᨳᩮ ᨠᩮᩣ. ᨿᩔ ᨸᩣᨴᨧ᩠ᨨᩥᨴ᩠ᨴᩮ ᩋᨭᨶᩥ ᨸᩅᩥᩈᩥᨲ᩠ᩅᩣ ᨲᩥᨭ᩠ᨮᨲᩥ, ᩈᩮᩣ ᨾᩈᩣᩁᨠᩮᩣ. ᨻᩩᨶ᩠ᨴᩮᨶ ᨸᩣᨴᩮᨶ ᩈᩉ ᩑᨠᩣᨻᨴ᩠ᨵᩣ ᩋᨭᨶᩥ ᨿᩔ ᩈᩮᩣ ᨻᩩᨶ᩠ᨴᩥᨠᩣᨻᨴ᩠ᨵᩮᩣ, ᩑᨠᩣᩁᩔᩥᨲ᩠ᨲᩴ. ᩑᨲ᩠ᨳ ᨧ ᨾᨩ᩠ᨫᩮ ᨴ᩠ᩅᩥᨶ᩠ᨶᩴ ᨾᨬ᩠ᨧᩣᨶᩴ ᩃᨠ᩠ᨡᨱᩴ ᩅᩥᨸᩁᩥᨿᨿᩮᨶᩣᨸᩥ ᩅᨴᨶ᩠ᨲᩥ.

᪓᪑᪑. ᨴ᩠ᩅᨿᩴ ᩈᩦᩈᩣᨵᩣᩁᩮ. ᩅᩥᩈᩮᩈᩮᨶ ᩈᩦᩈᩴ ᩅᩉᨲᩦᨲᩥ ᨻᩥᨻ᩠ᨻᩮᩣᩉᨶᩴ, ᨿᩩ, ᨻᨲ᩠ᨲᩴ, ᩋᩔᩮᩣᨲ᩠ᨲᨬ᩠ᨧ. ᩏᨸᨵᩦᨿᨲᩮ ᩈᩦᩈᩣᩈᨶᩴ ᨠᩁᩦᨿᨲᩮᨲᩥ ᩏᨸᨵᩣᨶᩴ, ᨿᩩ, ᨵᩣ ᨵᩣᩁᨱᩮ.

ᨲᩥᨠᩴ ¶ ᩈᩣᨾᨬ᩠ᨬᨸᩦᨮᩮ. ᨸᩦᨮ ᩉᩥᩴᩈᩣᩈᩴᨠᩥᩃᩮᩈᩮᩈᩩ, ᨽᩪᩅᩣᨴᩥ, ᨱ᩠ᩅᩩ, ᩌ. ᨿᨴᩣᨴᩥᨶᩣ ᨠᩮ ᨸᨧ᩠ᨧᨿᩮ ᩍᨲ᩠ᨳᩥᨠᨲᩣᨠᩣᩁᩮ ᨸᩁᩮ ᨸᩩᨻ᩠ᨻᩮᩣ ᩋᨠᩣᩁᩮᩣ ᩍᨠᩣᩁᨾᩣᨸᨩ᩠ᨩᨲᩮ, ‘‘ᨠᩮ’’ᨲᩥ ᨠᩥᩴ? ᨧᩮᨲᨶᩣ. ‘‘ᨸᨧ᩠ᨧᨿᩮ’’ᨲᩥ ᨠᩥᩴ? ᨻᨠᩣ. ‘‘ᩍᨲ᩠ᨳᩦ’’ᨲᩥ ᨠᩥᩴ? ᨸᩣᨧᨠᩣ. ‘‘ᨠᨲ’’ᩍᨲᩥ ᨠᩥᩴ? ᩅᩩᨲ᩠ᨲᨠᨾ᩠ᨾᩣ, ᨠᨾ᩠ᨾᨸᨧ᩠ᨧᨿᩮᩣᨿᩴ, ᨲᨸᨧ᩠ᨧᨿᩮ ᨸᩦᨮᩴ [ᨾᩮᩣᨣ᩠ᨣᩃ᩠ᩃᩣᨶ ᪔.᪑᪔᪒ ᩈᩩᨲ᩠ᨲᨾ᩠ᨸᩥ ᨸᩔᩥᨲᨻ᩠ᨻᩴ]. ᩌᩈᨲᩮ ᩋᩈ᩠ᨾᩥᨶ᩠ᨲᩥ ᩌᩈᨶᩴ.

ᨴ᩠ᩅᨿᩴ ᩏᨲ᩠ᨲᨾᩣᩁᩉᨸᩦᨮᩮ. ᨠᩩᨧ ᩈᩴᨸᨧ᩠ᨧᨶᨠᩮᩣᨭᩥᩃ᩠ᨿᨸᨲᩥᨳᨾ᩠ᨽᩅᩥᩃᩮᨡᨶᩮᩈᩩ, ᨨᩮᩣ. ᨽᨴ᩠ᨴᩴ ᨠᩃ᩠ᨿᩣᨱᩴ ᨸᩦᨮᩴ ᨽᨴ᩠ᨴᨸᩦᨮᩴ. ᨣᨩᨴᨶ᩠ᨲᩣᨴᩥᨾᨿᨠᩮᩈᨾᨩ᩠ᨩᨶᩥᨿᨾ᩠ᨸᩥ ᨴ᩠ᩅᨿᨾᩥᨴᨾᩣᩉᩩ. ᨲᨴᩣ ᨸᩈᩣᨵᨶᩦ, ᨠᨦ᩠ᨠᨲᩥᨠᩣᨸ᩠ᨿᨲᩕ. ᨸᩦᨮᨶ᩠ᨲᩁᩮ ᨴᩦᨥᨸᩦᨮᩮ ᩌᩈᨶ᩠ᨴᩦ ᨾᨲᩣ. ᩈᨴ ᩅᩥᩈᩁᨱᨣᨲ᩠ᨿᩣᩅᩈᩣᨶᩮᩈᩩ, ᨶᨴᩣᨴᩥ, ᨻᩥᨶ᩠ᨴᩣᨣᨾᩮᩣ ᨧ.

᪓᪑᪒. ᩌᨿᩣᨾᩅᩥᨲ᩠ᨳᩣᩁᩅᩈᩮᨶ ᨾᩉᨶ᩠ᨲᩮᩣ ᩌᩈᨶᨸ᩠ᨸᨽᩮᨴᩮᩣ ‘‘ᨠᩮᩣᨩᩅᩮᩣ’’ᨲᩥ ᨾᨲᩮᩣ, ᨠᩩᨩᩩ ᨳᩮᨿ᩠ᨿᨠᩁᨱᩮ, ᨱᩮᩣ, ᨠᩩᨿᩴ ᨸᨳᩅᩥᨿᩴ ᨩᩅᨲᩦᨲᩥ ᩅᩣ ᨠᩮᩣᨩᩅᩮᩣ, ᨩᩩ ᨣᨲᩥᨿᩴ. ᨴᩦᨥᩮᨶ ᩃᩮᩣᨾᩮᨶ ᨿᩩᨲ᩠ᨲᩮᩣ ᩌᩈᨶᨸ᩠ᨸᨽᩮᨴᩮᩣ ‘‘ᨣᩮᩣᨶᨠᩮᩣ’’ᨲᩥ ᨾᨲᩮᩣ, ᨣᩩ ᩈᨴ᩠ᨴᩮ, ᨿᩩ, ᩈᨠᨲ᩠ᨳᩮ ᨠᩮᩣ, ᩏᩔᩮᩣᨲ᩠ᨲᩴ.

ᨴ᩠ᩅᨿᩴ ᩋᨲ᩠ᨳᩁᨱᩮ. ᨾᩥᨣᩃᩮᩣᨾᨸᩩᨱ᩠ᨱᨲᩣᨿ ᨩᩣᨲᩴ ᩏᨱ᩠ᨱᩣᨾᨿᩴ. ᨳᩁ ᩈᨶ᩠ᨳᩁᨱᩮ, ᨸᩣᨴᩥᨸᩩᨻ᩠ᨻᩮᩣᩅ, ᨶ ᨠᨴᩣᨧᩥᨸᩥ ᨸᩣᨴᩥᩁᩉᩥᨲᩮᩣ, ᩌ ᨽᩩᩈᩮᩣ ᨳᩁᩦᨿᨲᩮᨲᩥ ᩋᨲ᩠ᨳᩁᨱᩴ, ᨿᩩ.

ᨴ᩠ᩅᨿᩴ ᩈᩴᩈᩥᨻ᩠ᨻᨶᨧᩥᨲ᩠ᨲᨠᩮ. ᨧᩥᨲ᩠ᨲᩁᩪᨸᨾᩔᨲ᩠ᨳᩦᨲᩥ ᨧᩥᨲ᩠ᨲᨠᩴ. ᨻᩣᩉᩩᩃ᩠ᨿᩮᨶ ᨶ ᩍᨠᩣᩁᩣᨣᨾᩮᩣ. ᩅᩣᨶᩮᨶ ᩈᩴᩈᩥᨻ᩠ᨻᨶᩮᨶ ᩈᨬ᩠ᨩᩣᨲᩴ ᨧᩥᨲ᩠ᨲᩁᩪᨸᨾᩔᩣᨲᩥ ᩅᩣᨶᨧᩥᨲ᩠ᨲᨠᩴ, ᩈᨠᨲ᩠ᨳᩮ ᨠᩮᩣ.

᪓᪑᪓. ᨴ᩠ᩅᨿᩴ ¶ ᨶᩥᩁᨶ᩠ᨲᩁᨸᩩᨸ᩠ᨹᨸᨭᩮ. ᨥᨶᩴ ᩈᨶ᩠ᨵᩥᨽᩪᨲᩴ ᨸᩩᨸ᩠ᨹᩁᩪᨸᨾᩮᨲ᩠ᨳᩣᨲᩥ ᨥᨶᨸᩩᨸ᩠ᨹᩴ. ᨸᨭᩃᨾᩮᨲᩥᩔᩣᨲ᩠ᨳᩦᨲᩥ ᨸᨭᩃᩥᨠᩣ, ᩍᨠᩮᩣ. ᨴ᩠ᩅᨿᩴ ᨻᩉᩩᨾᩩᨴᩩᩃᩮᩣᨾᩮ ᩈᩮᨲᩅᨲ᩠ᨳᩮ. ᩈᩥ ᩈᩮᩅᩣᨿᩴ, ᩈᩥᩅᨲ᩠ᨳᩥᨠᩮᩉᩥ ᩈᩮᩅᩦᨿᨲᩮᨲᩥ ᩈᩮᨲᩮᩣ, ᨲᩮᩣ. ᨸᨭ ᨣᨾᨶᩮ, ᨱ᩠ᩅᩩ, ᨸᨭᩥᨠᩣ, ᩋᨴ᩠ᨵᩮᨶ᩠ᨴᩩᨸᩣᩈᩣᨱᩮᨸᩥ.

ᨴ᩠ᩅᩦᩈᩩᨸᩥ ᨸᩁᩥᨿᨶ᩠ᨲᩮᩈᩩ ᨿᩔᩣ ᨴᩈᩣ ᩈᨶ᩠ᨲᩥ, ᩈᩣ ᩏᨴ᩠ᨴᩃᩮᩣᨾᩦ, ᩏᨴᩥᨲᩴ ᨴ᩠ᩅᩦᩈᩩ ᩃᩮᩣᨾᩴ ᨴᩈᩣ ᨿᩔᩣ ᩈᩣ ᩏᨴ᩠ᨴᩃᩮᩣᨾᩦ, ᩍᩔᨲ᩠ᨲᩴ, ᨴ᩠ᩅᩥᨲ᩠ᨲᨬ᩠ᨧ. ᩑᨠᩈ᩠ᨾᩥᩴ ᨸᩁᩥᨿᨶ᩠ᨲᩮᨿᩮᩅ ᨴᩈᩣ ᨿᩔᩣ ᩑᨠᨶ᩠ᨲᩃᩮᩣᨾᩦ, ᩑᨠᩈ᩠ᨾᩥᩴ ᩋᨶ᩠ᨲᩮ ᨸᩁᩥᨿᨶ᩠ᨲᩮ ᩃᩮᩣᨾᩴ ᨴᩈᩣ ᨿᩔᩣᨲ᩠ᨳᩦᨲᩥ ᩑᨠᨶ᩠ᨲᩃᩮᩣᨾᩦ, ᩏᨴ᩠ᨴᩃᩮᩣᨾᩦ ᨧ ᩑᨠᨶ᩠ᨲᩃᩮᩣᨾᩦ ᨧᩮᨲᩥ ᩏᨴ᩠ᨴᩃᩮᩣᨾᩥᩑᨠᨶ᩠ᨲᩃᩮᩣᨾᩥᨶᩮᩣ, ‘‘ᨸᨴᩣᨶᩴ ᩈᨶ᩠ᨵᩥ ᩅᨲ᩠ᨲᩥᨧ᩠ᨨᩣᨲᩮᩣ, ᨶ ᩈᨾᩣᩈᨶ᩠ᨲᩁᨣᩮᩈᩪ’’ᨲᩥ ᩅᩩᨲ᩠ᨲᩮᨸᩥ ᨣᩣᨳᩣᨽᩣᩅᨲᩮᩣ ᨨᨶ᩠ᨴᩮᩣᩉᩣᨶᩥᨽᨿᩣ ᩅᩥᩈᨶ᩠ᨵᩥ. ᨿᨲ᩠ᨳ ᨸᨶ ᨣᩣᨳᩣᨿᨾ᩠ᨸᩥ [ᩋᨣᩣᨳᩣᨿᨾ᩠ᨸᩥ (?)] ᩅᩥᩈᨶ᩠ᨵᩥ ‘‘ᨵᨾ᩠ᨾᩈᩴᩅᨱ᩠ᨱᨶᩣᨿ’ᨶ᩠ᨲᩥᩌᨴᩥᨾᩣᩉᩣ’’ᨲ᩠ᨿᩣᨴᩦᩈᩩ, ᨲᨲ᩠ᨳ ᨠᨳᨶ᩠ᨲᩥ? ‘‘ᨶ ᩈᨾᩣᩈᨶ᩠ᨲᩁᨦ᩠ᨣᩮᩈᩪ’’ᨲᩥ ᩍᨾᩔᩣᨶᩥᨧ᩠ᨧᨲ᩠ᨲᩣ ᨲᨲ᩠ᨳᩣᨸᩥ ᨶ ᨴᩮᩣᩈᩮᩣ, ‘‘ᨶᩮᨶ ᨶᩥᨴ᩠ᨴᩥᨭ᩠ᨮᨾᨶᩥᨧ᩠ᨧ’’ᨶ᩠ᨲᩥ ᩉᩥ ᨸᩁᩥᨽᩣᩈᩥᨲᩴ [ᨶᨥᨭᩥᨲᩴ ᩋᨶᩥᨧ᩠ᨧᩴ (ᨸᩁᩥᨽᩣᩈᩮᨶ᩠ᨴᩩᩈᩮᨡᩁ ᪙᪗)].

᪓᪑᪔. ᨲᨴᩮᩅ ᨿᨳᩣᩅᩩᨲ᩠ᨲᨴ᩠ᩅᨿᨾᩮᩅ ᩈᩮᩣᩊᩈᨶ᩠ᨶᩴ ᩍᨲ᩠ᨳᩦᨶᩴ ᨶᨧ᩠ᨧᨿᩮᩣᨣ᩠ᨣᩴ ᨶᨧ᩠ᨧᩔ ᨿᩮᩣᨣ᩠ᨿᨭ᩠ᨮᩣᨶᨽᩪᨲᩴ ‘‘ᨠᩩᨲ᩠ᨲᨠ’’ᨾᩥᨲ᩠ᨿᩩᨧ᩠ᨧᨲᩮ. ᩉᩥ ᨸᨴᨸᩪᩁᨱᩮ. ‘‘ᨶᨧ᩠ᨧᨿᩮᩣᨣ᩠ᨿᨾ᩠ᩉᩦ’’ᨲᩥᨸᩥ ᨸᩣᨮᩮᩣ, ᨲᨴᩣ ᨽᩣᩅᩈᨲ᩠ᨲᨾᩦ. ᨠᩁᩮᩣᨶ᩠ᨲᩥ ¶ ᩑᨲ᩠ᨳ ᨶᨧ᩠ᨧᨶ᩠ᨲᩥ ᨠᩩᨲ᩠ᨲᨠᩴ, ᨠᩁ ᨠᩁᨱᩮ, ᨲᩮᩣ, ᩋᩔᩩ, ᨽᩩᨩᩣᨴᩥ, ᩈᨠᨲ᩠ᨳᩮ ᨠᩮᩣ.

ᩈᩦᩉᩣᨴᩥᩁᩪᨸᩮᩉᩥ ᩅᩥᨧᩥᨲ᩠ᨲᩁᩪᨸᩴ ᩅᨲ᩠ᨳᩴ, ᩌᩈᨶᩴ ᩅᩣ ᩅᩥᨠᨲᩥᨠᩣ ᨶᩣᨾ ᨽᩅᩮ, ᩑᨠᩔᩮᩅ ᩉᩥ ᨠᨲ᩠ᨲᩩᨶᩮᩣ ᨸᨠᨲᩥᩅᩥᨠᨲᩥᩈᨦ᩠ᨡᩣᨲᩣᩅᨲ᩠ᨳᩣᩅᩈᩮᨶ ᨴ᩠ᩅᩥᨲ᩠ᨲᩴ, ᩅᨲ᩠ᨲᩥᨧ᩠ᨨᩣᩅᩈᩮᨶ ᩃᩥᨦ᩠ᨣᩈᨦ᩠ᨡ᩠ᨿᩣᩅᩥᨽᨲ᩠ᨲᩥᨽᩮᨴᨬ᩠ᨧ ᩉᩮᩣᨲᩥ, ᨿᨳᩣ – ᨾᨶᩩᩔᩣ ᨿᨠ᩠ᨡᨽᨲ᩠ᨲᩴ ᩋᩉᩮᩈᩩᩴ, ᩈᨲ᩠ᨲᨸ᩠ᨸᨠᩁᨱᩣᨶᩥ ᩋᨽᩥᨵᨾ᩠ᨾᩮᩣ ᨶᩣᨾ ᨽᩅᨶ᩠ᨲᩥ, ᨴᩮᩅᨴᨲ᩠ᨲᩮᩣ ᩁᨩ᩠ᨩᩴ ᨸᩣᨸᩩᨱᩣᨲᩦᨲᩥ. ᨿᨲᩕ ᩉᩥ ᨸᨠᨲᩥᨿᩣ ᩅᩣ ᩅᩥᨠᨲᩥᨿᩣ ᩅᩣᨲᩥ ᨴ᩠ᩅᩥᨶ᩠ᨶᨾ᩠ᨸᩥ ᩅᩩᨲ᩠ᨲᨲᩣ ᩈᩥᨿᩣ, ᨲᨲᩕ ᩅᩣᨧᨠᩮᩣ ᨸᨠᨲᩥᨿᩣᨿᩮᩅ ᩈᨦ᩠ᨡ᩠ᨿᩴ ᨣᨱ᩠ᩉᩣᨲᩥ, ᨶᩮᨲᩁᩔ ᨲᨶ᩠ᨶᩥᩔᩥᨲᨽᩣᩅᩮᨶᩣᨸ᩠ᨸᨵᩣᨶᨲᩮᩣ [ᨠᨧ᩠ᨧᩣᨿᨶᩈᩣᩁᩮ ᪖-᪗ ᨣᩣᨳᩣᩈᩩ ᨸᩔᩥᨲᨻ᩠ᨻᩴ]. ᨿᨴᩣ ᨸᨶ ᨸᨠᨲᩥᨿᩣ ᩈᨾ᩠ᨻᨶ᩠ᨵᩣᨴᩥᨽᩣᩅᩴ ᩅᨲ᩠ᨲᩩᨾᩥᨧ᩠ᨨᨲᩥ, ᨲᨴᩣ ᩋᨲ᩠ᨲᨶᩣ ᩅᨲ᩠ᨲᨻ᩠ᨻᩔ ᩋᨬ᩠ᨬᨲ᩠ᨳᩔᩣᨽᩣᩅᩣ ᩅᩥᨠᨲᩥᨸ᩠ᨿᩩᨧ᩠ᨧᨲᩮ ᩅᩣᨧᨠᩮᨶ, ᨿᨳᩣ – ᨴᩮᩅᨴᨲ᩠ᨲᩔ ᩁᨩ᩠ᨩᩴ ᨸᩣᨸᩩᨱᩣᨲᩥ, ᩍᨵ ᨸᨶ ᩃᩥᨦ᩠ᨣᨽᩮᨴᩮᨶᩮᩅ ᩅᩩᨲ᩠ᨲᩴ ‘‘ᨧᩥᨲ᩠ᨲᩴ ᩅᩥᨠᨲᩥᨠᩣ ᨽᩅᩮ’’ᨲᩥ. ᩅᩥᨠᩁᩦᨿᨲᩮᨲᩥ ᩅᩥᨠᨲᩥ.

᪓᪑᪕. ᨠᨭ᩠ᨭᩥᩔᨠᩮᩣᩈᩮᨿ᩠ᨿᩈᨦ᩠ᨡᩣᨲᩣᨶᩴ ᨴ᩠ᩅᩥᨶ᩠ᨶᨾᨲ᩠ᨳᩁᨱᩣᨶᩴ ᨠᩁᨱᨸ᩠ᨸᨠᩣᩁᩴ ᨴᩔᩮᨲᩩᩴ ᩋᩁᩥᨿᩣᩈᩣᨾᨬ᩠ᨬᨾᩣᩉ ‘‘ᨠᨭ᩠ᨭᩥᩔ’’ᨾᩥᨧ᩠ᨧᩣᨴᩥ. ᨠᩮᩣᩈᩥᨿᨠᨭ᩠ᨭᩥᩔᨾᨿᩴ ᨠᩮᩣᩈᩥᨿᩈᩩᨲ᩠ᨲᨠᨭ᩠ᨭᩥᩔᩅᩣᨠᩮᩉᩥ ᨸᨠᨲᨾᨲ᩠ᨳᩁᨱᩴ ᨠᨭ᩠ᨭᩥᩔᩴ ᨶᩣᨾ, ᩅᩥᩁᩪᨸᩮᨠᩈᩮᩈᩅᩈᩮᨶ ᨠᩮᩣᩈᩥᨿᨬ᩠ᨧ ᨠᨭ᩠ᨭᩥᩔᨬ᩠ᨧ ᨠᨭ᩠ᨭᩥᩔᩣᨶᩥ, ᨲᩮᩉᩥ ᨸᨠᨲᩴ ᩋᨲ᩠ᨳᩁᨱᩴ ᨠᨭ᩠ᨭᩥᩔᩴ. ᨠᩮᩣᩈᩥᨿᩈᩩᨲ᩠ᨲᩮᨶ ᨸᨠᨲᨶ᩠ᨲᩩ ᩋᨲ᩠ᨳᩁᨱᩴ ᨠᩮᩣᩈᩮᨿ᩠ᨿᩴ ᨶᩣᨾ. ᩁᨲᨶᨸᨲᩥᩈᩥᨻ᩠ᨻᩥᨲᨶ᩠ᨲᩥ ᩍᨴᩴ ᨴ᩠ᩅᩥᨶ᩠ᨶᨾ᩠ᨸᩥ ᩅᩥᩈᩮᩈᨶᩴ, ᩋᨲ᩠ᨳᩁᨱᨬ᩠ᨧ ᩍᨲᩥ ᨠᨾᩣ ᨠᨾᨲᩮᩣ ‘‘ᨽᩅᩮ’’ᨲᩥ ᩋᨩ᩠ᨫᩣᩉᩁᩥᨲᨻ᩠ᨻᩴ. ᩋᨲ᩠ᨳᩁᨱᩈᨴ᩠ᨴᩔᩣᨶᩩᨱ᩠ᨱᩣᨾᨿᩮᩈ᩠ᩅᨸᩥ ᨸᩅᨲ᩠ᨲᨶᨲᩮᩣ ᩑᨲ᩠ᨳᩣᨸᩥ ‘‘ᩋᨲ᩠ᨳᩁᨱ’’ᨶ᩠ᨲᩥ ¶ ᩅᩩᨲ᩠ᨲᩴ, ᨿᨳᩣ – ᩈᩩᨲ᩠ᨲᩴ ᨠᨾ᩠ᨾᨶ᩠ᨲᩥ. ᩑᨲ᩠ᨳ ᨧ ᨧᨠᩣᩁᩮᩣ ᨸᩣᨴᨶ᩠ᨲᨲ᩠ᨲᩣ ᨣᩁᩪᩈᩩ ᨣᨱ᩠ᩉᩥᨲᨻ᩠ᨻᩮᩣ, ᨲᩮᨶᩮᩅ ᩉᩥ ᩈᨲ᩠ᨲᨸᨬ᩠ᨬᩣᩈᨾᨲ᩠ᨲᩣ ᨸᩁᩥᨸᩩᨱ᩠ᨱᩣ ᩉᩮᩣᨶ᩠ᨲᩥ, ᩋᩁᩥᨿᩣᨿ ᩉᩥ ᨸᨮᨾᨸᩣᨴᩮ ᨴ᩠ᩅᩣᨴᩈᨾᨲ᩠ᨲᩣ, ᨲᨳᩣ ᨲᨲᩥᨿᩮ, ᨴᩩᨲᩥᨿᩮ ᩋᨭ᩠ᨮᩣᩁᩈ, ᨧᨲᩩᨲ᩠ᨳᩮ ᨸᨶ᩠ᨶᩁᩈᨾᨲ᩠ᨲᩣᨲᩥ ᩈᨾ᩠ᨸᩥᨱ᩠ᨯᩥᨲᩣ ᩈᨲ᩠ᨲᨸᨬ᩠ᨬᩣᩈᨾᨲ᩠ᨲᩣ ᩉᩮᩣᨶ᩠ᨲᩥ.

᪓᪑᪖. ᨲᩥᨠᩴ ᨴᩦᨸᩮ. ᨴᩦᨸ ᨴᩥᨲ᩠ᨲᩥᨿᩴ, ᨴᩥᩅᩣᨴᩥ. ᨴᩥᨸ᩠ᨸᨲᩦᨲᩥ ᨴᩦᨸᩮᩣ, ᨱᩮᩣ. ‘‘ᨸᨴᩦᨸᩮᩣ’’ᨲᩥ ᩋᨬ᩠ᨬᨸᨴᨶᩥᩅᨲ᩠ᨲᨶᨲ᩠ᨳᩴ ᩏᨸᩈᨣ᩠ᨣᩮᨶ ᨸᨴᩴ ᩅᨯ᩠ᨰᩥᨲᩴ. ᨩᩩᨲᩥ ᨴᩥᨲ᩠ᨲᩥᨿᩴ, ᨽᩪᩅᩣᨴᩥ, ᨱᩮᩣ.

ᨴ᩠ᩅᨿᩴ ᩌᨴᩣᩈᩮ. ‘‘ᨸᩩᨾᩮ ᨲᩪ’’ᨲᩥ ᨲ᩠ᩅᨶ᩠ᨲᩴ ᩃᩥᨦ᩠ᨣᨸᨴᩴ. ᩌᨴᩥᩔᨲᩮ ᩋᩈ᩠ᨾᩥᨶ᩠ᨲᩥ ᩌᨴᩣᩈᩮᩣ, ᨱᩮᩣ, ᩌᨸᩩᨻ᩠ᨻᩮᩣ ᨴᩥᩈ ᨸᩮᨠ᩠ᨡᨶᩮ, ᩍᩔᩣ. ᨴᩥᨸ᩠ᨸᨲᩥ ᩑᨲ᩠ᨳᩣᨲᩥ ᨴᨸ᩠ᨸᨱᩮᩣ, ᨿᩩ, ᩍᩔᨲ᩠ᨲᩴ. ᨾᨠᩩᩁᩮᩣᨸ᩠ᨿᨲᩕ.

ᨴ᩠ᩅᨿᩴ ᨧᨾ᩠ᨾᨾᨿᨠᩦᩊᩣᨣᩩᩊᨠᩮ. ᩅᩣᩈᨽᩅᨶᩮᩉᩥ ᨿᩩᩅᨲᩦᩉᩥ ᩈᩉ ᨠᩦᩊᩣᩈᨾ᩠ᨽᩅᩣ ᨬᩮᨿ᩠ᨿᩣ, ᨲᨸ᩠ᨸᨠ᩠ᨠᨾᩮᨶᩔᩣᨽᩥᨵᩣᨶᩴ. ᨣᩩᨯᩥ ᩅᩮᨵᨶᩮ, ᨱᩩᨠᩮᩣ, ᩏᩔᩮ, ᨣᩩᨴ᩠ᨴ ᨠᩦᩊᩣᨿᨾᩮᩅ ᩅᩣ, ᨲᨴᩣ ᨴᩔ ᨱ᩠ᨯᩮᩣ. ᨠᨴᩥ ᩋᩅ᩠ᩉᩣᨶᩮ ᩁᩮᩣᨴᨶᩮ ᨧ, ᨱᩩᨠᩮᩣ, ᨠᩩᨴ᩠ᨴ ᨠᩦᩊᩣᨿᨾᩮᩅ ᩅᩣ, ᩏᩔᨲ᩠ᨲᩴ, ᨸᩩᨻ᩠ᨻᨴᩔ ᨶᩮᩣ.

ᨴ᩠ᩅᨿᩴ ᨻᩦᨩᨶᩦᨾᨲ᩠ᨲᩮ. ᩅᨭᩥ ᩅᩥᨽᩣᨩᨶᩮ, ᨲᩣᩃᩅᨱ᩠ᨭᩮᩉᩥ ᨠᨲᨲ᩠ᨲᩣ ᨲᩣᩃᩅᨱ᩠ᨭᩴ. ᩅᨱ᩠ᨭᩴ ᨶᩣᨾ ᨻᩦᨩᨶᩣᨴᩥᨠᩁᨱᨲ᩠ᨳᩴ ᩅᩥᩈᩩᩴ ᨽᩣᨩᩥᨲᩮᩣ ᨲᩣᩃᨸᨲ᩠ᨲᩣᩅᨿᩅᩮᩣ, ᨲᩣᩃᩅᨱ᩠ᨭᩈᨴ᩠ᨴᩔ ᨿᨳᩣᩅᩩᨲ᩠ᨲᩅᨧᨶᨲ᩠ᨳᨿᩮᩣᨣᩮᨸᩥ ᩈᨲᩥ ᩈᨬ᩠ᨬᩣᩈᨴ᩠ᨴᨲ᩠ᨲᩣ ᨻᩦᨩᨶᩦᩈᩣᨾᨬ᩠ᨬᩮ ᨸᩅᨲ᩠ᨲᩥ ᩅᩮᨴᩥᨲᨻ᩠ᨻᩣ. ᨿᨴᩣ ᨸᨶ ᨲᩣᩃᩅᨱ᩠ᨭᩮᩉᩥ ᨠᨲᨻᩦᨩᨶᩥᨾᩮᩅ ᩅᨲ᩠ᨲᩩᨾᩥᨧ᩠ᨨᨲᩥ, ᨲᨴᩣ ᩑᨠᩮᨶ ᨲᩣᩃᩈᨴ᩠ᨴᩮᨶ ᩅᩥᩈᩮᩈᩮᨲ᩠ᩅᩣ ‘‘ᨲᩣᩃᨲᩣᩃᩅᨱ᩠ᨭ’’ᨶ᩠ᨲᩥ ᩅᨲ᩠ᨲᨻ᩠ᨻᩴ. ᨿᨳᩣ – ᨲᩥᩃᩔ ᨲᩮᩃᩴ, ᩈᩩᨣᨲᩔ ᩈᩩᨣᨲᨧᩦᩅᩁᨶ᩠ᨲᩥ. ᨻᩥᨩᨶ᩠ᨲᩥ ᩅᩣᨿᩩᨶᩣ ᨿᩮᩣᨩᨿᨶ᩠ᨲᩥ ᨿᩣᨿ ¶ , ᩈᩣ ᨻᩦᨩᨶᩦ, ᨿᩩ, ᨶᨴᩣᨴᩥ, ᨿᩩᨩ ᨿᩮᩣᨣᩮ, ᨿᩔ ᩅᩮᩣ, ᩏᩔᩦ, ᩅᨩ ᨣᨲᩥᨿᩴ ᩅᩣ ᩋᩔᩦ. ᨻ᩠ᨿᨩᨶᩴᨸ᩠ᨿᨲᩕ.

᪓᪑᪗. ᨴ᩠ᩅᨿᩴ ᨧᨦ᩠ᨠᩮᩣᨭᨠᩮ. ᨠᩩᨭ ᨨᩮᨴᨶᩮ, ᩈᨠᨲ᩠ᨳᩮ ᨠᩮᩣ. ᨠᩁᨯᩥ ᨽᩣᨩᨶᨲ᩠ᨳᩮ, ᨠᩮᩣ. ᨴ᩠ᩅᨿᩴ ᨠᨸ᩠ᨸᩪᩁᩣᨴᩥᩈᨾ᩠ᨸᩩᨭᩮ [ᩈᩁᩪᨸᨠᩣᨴᩥᩈᨾ᩠ᨸᩩᨭᩮ (ᨠ.)]. ᩈᨾᩩᨣ᩠ᨣᨧ᩠ᨨᨲᩦᨲᩥ ᩈᨾᩩᨣ᩠ᨣᩮᩣ, ᨠ᩠ᩅᩥ. ᨸᩩᨭ ᩈᩴᩈᩥᩃᩮᩈᨶᩮ, ᨽᩪᩅᩣᨴᩥ, ᩋ.

ᨸᨩ᩠ᨩᨴ᩠ᨵᩴ ᨾᩮᨳᩩᨶᩮ. ᨣᩣᨾᩅᩣᩈᩦᨶᩴ ᨵᨾ᩠ᨾᩮᩣ ᩌᨧᩣᩁᩮᩣ ᨣᩣᨾᨵᨾ᩠ᨾᩮᩣ, ᨣᩣᨾᩈᨴ᩠ᨴᩮᨶ ᨧᩮᨲ᩠ᨳ ᨣᩣᨾᩅᩣᩈᩥᨶᩮᩣ ᩅᩩᨲ᩠ᨲᩣ, ᨿᨳᩣ ‘‘ᨣᩣᨾᩮᩣ ᩌᨣᨲᩮᩣ’’ᨲᩥ. ᩋᩈᨲᩴ ᩋᩈᨸ᩠ᨸᩩᩁᩥᩈᩣᨶᩴ ᨵᨾ᩠ᨾᩮᩣ, ᩈᨴ᩠ᨵᨾ᩠ᨾᨸᨭᩥᨸᨠ᩠ᨡᨲ᩠ᨲᩣ ᩅᩣ ᩋᩈᨴ᩠ᨵᨾ᩠ᨾᩮᩣ. ᨻ᩠ᨿᨿ ᨡᨿᩮ, ᨻ᩠ᨿᨿᨲᩥ ᨻᩃᨾᩮᨲᩮᨶᩣᨲᩥ ᨻ᩠ᨿᩅᩣᨿᩮᩣ, ᨾᨩ᩠ᨫᩮ ᩅᩣᨣᨾᩮᩣ, ᩋᨳ ᩅᩣ ᩅᩥᨣᨲᩮᩣ ᩋᨿᩮᩣ ᩅᩩᨯ᩠ᨰᩥ ᨲᩈ᩠ᨾᩣᨲᩥ ᩋᩅᩣᨿᩮᩣ, ᩋᨲᩥᩈᨿᩮᩣ ᩋᩅᩣᨿᩮᩣ ᨻ᩠ᨿᩅᩣᨿᩮᩣ. ᨾᩥᨳᩩᨶᩣᨶᩴ ᩍᨲ᩠ᨳᩥᨸᩩᩁᩥᩈᩣᨶᩴ ᩈᨾᩣᨶᨧ᩠ᨨᨶ᩠ᨴᩣᨶᩴ ᩌᨧᩣᩁᩮᩣ ᨾᩮᨳᩩᨶᩴ, ᨲᨴᨬ᩠ᨬᩮᩈᩩ ᩏᨸᨧᩣᩁᩮᩣ, ᩁᨾᩩ ᩁᨾᨶᩮ, ᨽᩣᩅᩮ, ᨠᩁᨱᩮ ᩅᩣᨲᩥ.

᪓᪑᪘. ᨧᨲᩩᨠ᩠ᨠᩴ ᩅᩥᩅᩣᩉᩮ. ᩅᩉ ᨸᩣᨸᩩᨱᩮ, ᨱᩮᩣ. ᩏᨸᨸᩩᨻ᩠ᨻᩮᩣ ᨿᨾᩩ ᩏᨸᩁᨾᩮ, ᩋ. ᩋᨬ᩠ᨬᨾᨬ᩠ᨬᩔ ᨸᩣᨱᩥᨶᩮᩣ ᨣᩉᨱᩴ ᨸᩣᨱᩥᨣ᩠ᨣᩉᩮᩣ. ᨶᩦ ᨶᨿᩮ, ᩋ. ᩏᨻ᩠ᨻᩣᩉᩮᩣ, ᨸᩣᨱᩥᨸᩦᩊᨶᩴᨸ᩠ᨿᨲᩕ.

ᨵᨾ᩠ᨾᨠᩣᨾᨲ᩠ᨳᩣ ᨲᨿᩮᩣ ᩅᨣ᩠ᨣᩣ ᩅᩩᨧ᩠ᨧᨶ᩠ᨲᩮ. ᩌᨣᨾᨶᩥᨴ᩠ᨴᩥᨭ᩠ᨮᩮᩣ ᩈᨾᩣᨧᩣᩁᩮᩣ ᨵᨾ᩠ᨾᩮᩣ. ᩅᩥᩈᨿᩅᩥᩈᨿᩥᩈᨶ᩠ᨶᩥᨸᩣᨲᨩᩴ ᩈᩩᨡᩴ ᨠᩣᨾᩮᩣ. ᩈᨻ᩠ᨻᩮᩣᨸᨠᩁᨱᩴ ¶ ᩋᨲ᩠ᨳᩮᩣ. ᩈᨾᩮᩣᨠ᩠ᨡᨠᩣ ᨾᩮᩣᨠ᩠ᨡᩈᩉᩥᨲᩣ ᨵᨾ᩠ᨾᨠᩣᨾᨲ᩠ᨳᩣ ᨧᨲᩩᨻ᩠ᨻᨣ᩠ᨣᩮᩣ ᩅᩩᨧ᩠ᨧᨶ᩠ᨲᩮ. ᨲᩥᩅᨣ᩠ᨣᩮᨶ ᩅᩥᩈᩴᨿᩩᨲ᩠ᨲᩮᩣ ᨾᩮᩣᨠ᩠ᨡᩮᩣ ᨶᩥᨻ᩠ᨻᩣᨶᩴ. ᨲᩩᩃ᩠ᨿᨻᩃᩮᩉᩥ ᨸᨶ ᨵᨾ᩠ᨾᩣᨴᩦᩉᩥ ᨧᨲᩪᩉᩥ ᨸᨵᩣᨶᩮᩉᩥ ᨧᨲᩩᨽᨴᩕ [ᩋᨾᩁ ᪑᪗.᪕᪗] ᨾᩩᨧ᩠ᨧᨲᩮ.

᪓᪑᪙-᪓᪒᪐. ᨴ᩠ᩅᨿᩴ ᨡᩩᨩ᩠ᨩᩮ. ᨠᩩᨧ᩠ᨨᩥᨲᩴ ᩅᨩ᩠ᨩᨲᩦᨲᩥ ᨡᩩᨩ᩠ᨩᩮᩣ, ᨠᩔ ᨡᩮᩣ, ᩅᩃᩮᩣᨸᩮᩣ, ᨱᩮᩣ. ᨣᨯᩥ ᨶᩥᨶ᩠ᨴᩣᨿᩴ, ᩏᩃᩮᩣ.

ᨲᩥᨠᩴ ᩁᩔᩈᩁᩦᩁᩮ ᨸᩩᨣ᩠ᨣᩃᩮ. ᩁᩈ ᩈᨴ᩠ᨴᩮ, ᩈᩮᩣ. ᨻ᩠ᨿᩣᨾᨸ᩠ᨸᨾᩣᨱᩴ ᨶ ᩃᩣᨲᩦᨲᩥ ᩅᩣᨾᨶᩮᩣ, ᨶᩮᩁᩩᨲ᩠ᨲᩮᩣ. ᩁᩔᩮᩣ ᨧ ᩅᩣᨾᨶᩮᩣ ᨧᩮᨲᩥ ᨴ᩠ᩅᨶ᩠ᨴᩮᩣ. ᩃᨠᩩᨯᩥ ᩅᩣᨾᨶᨲ᩠ᨳᩮ, ᩋ, ᩈᨠᨲ᩠ᨳᩮ ᨠᩮᩣ, ᩃᨠᩩ ᩅᩥᨿ ᨥᨭᩥᨠᩣ ᩅᩥᨿ ᨯᩮᨲᩥ ᨸᩅᨲ᩠ᨲᩮᨲᩦᨲᩥ ᩅᩣ ᩃᨠᩩᨱ᩠ᨯᨠᩮᩣ.

ᨸᨬ᩠ᨧᨠᩴ ᨸᨦ᩠ᨣᩩᩊᨩᨶᩮ. ᨸᩁᩮᨶ ᩋᨦ᩠ᨣᨲᩦᨲᩥ ᨸᨦ᩠ᨣᩩᩊᩮᩣ, ᩏᩃᩮᩣ. ᨸᩦᨮᩮᨶ ᩈᨸ᩠ᨸᨲᩥ ᩈᩦᩃᩮᨶᩣᨲᩥ ᨸᩦᨮᩈᨸ᩠ᨸᩦ, ᩈᨸ᩠ᨸ ᨣᨾᨶᩮ, ᩏᨸᨧ᩠ᨧᨿᩮ ᨸᨦ᩠ᨣᩩ, ᨴ᩠ᩅᩦᩈᩩ. ᨨᩥᨶ᩠ᨶᩮᩣ ᨣᨾᨶᩣᨴᩥᩍᩁᩥᨿᩣᨸᨳᩮᩣ ᨿᩔᩣᨲᩥ ᩈᩮᩣ ᨨᩥᨶ᩠ᨶᩥᩁᩥᨿᩣᨸᨳᩮᩣ. ᩅᩥᨣᨲᩣ ᩋᨠ᩠ᨡᩈᨴᩥᩈᩣ ᨩᨦ᩠ᨥᩣ ᨿᩔᩣᨲᩥ ᨸᨠ᩠ᨡᩮᩣ, ᨿᨳᩣ ᩉᩥ ᩁᨳᩔ ᩋᨠ᩠ᨡᩮ ᨽᩥᨶ᩠ᨶᩮ ᨣᨾᨶᩴ ᨶ ᩈᩥᨩ᩠ᨫᨲᩥ, ᨲᨳᩮᩅ ᨲᩔᩣᨸᩥ ᩋᨠ᩠ᨡᨩᨦ᩠ᨥᩣᨿ ᨽᩥᨶ᩠ᨶᩣᨿᩣᨲᩥ ᩒᨸᨾ᩠ᨾᩈᩴᩈᨶ᩠ᨴᨶᩴ.

ᨴ᩠ᩅᨿᩴ ᨡᨬ᩠ᨩᩮ. ᨡᨩᩥ ᨣᨲᩥᩅᩮᨠᩃ᩠ᨿᩮ, ᨽᩪᩅᩣᨴᩥ, ᨡᨬ᩠ᨩᨲᩦᨲᩥ, ᩋ. ᨡᩮᩣᨯᩥ ᨣᨲᩥᨸᨭᩥᨥᩣᨲᩮ, ᨠᩮᩣ.

ᨴ᩠ᩅᨿᩴ ¶ ᩋᩅᩣᨠ᩠ᨿᩮ. ᩅᨲ᩠ᨲᩩᨾᩈᨠ᩠ᨠᩩᨱᩮᨿ᩠ᨿᨲ᩠ᨲᩣ ᨾᩥᨣᩈᨴᩥᩈᩮᩣᨲᩥ ᨾᩪᨣᩮᩣ, ᩍᩔᩪ. ᩈᩩᨬ᩠ᨬᩴ ᩅᨧᩮᩣ ᨿᩔᩣᨲᩥ ᩈᩮᩣ ᩈᩩᨬ᩠ᨬᩅᨧᩮᩣ.

ᩉᨲ᩠ᨳᩣᨴᩥᩅᨦ᩠ᨠᩮᩣ ᨸᩩᩁᩥᩈᩮᩣ ‘‘ᨠᩩᨱᩦ’’ᨲ᩠ᨿᩩᨧ᩠ᨧᨲᩮ. ᨠᩩᨱᨶᩴ ᨠᩩᨱᩮᩣ ᩉᨲ᩠ᨳᩣᨴᩥᩅᩮᨠᩃ᩠ᨿᩴ, ᨲᨾᩮᨲᩔᨲ᩠ᨳᩦᨲᩥ ᨠᩩᨱᩦ, ᩋᨳ ᩅᩣ ᨠᩩᨱ ᩈᨦ᩠ᨠᩮᩣᨧᨶᩮ, ᩎ, ᨠᩩᨧ᩠ᨨᩥᨲᩴ ᨶᨿᨲᩦᨲᩥ ᩅᩣ ᨠᩩᨱᩦ, ᨱᨲ᩠ᨲᩴ, ‘‘ᩉᨲ᩠ᨳᩮᨶ ᨠᩩᨱᩦ, ᨸᩣᨴᩮᨶ ᨠᩩᨱᩦ’’ᩍᨧ᩠ᨧᩣᨴᩥᨸᨿᩮᩣᨣᩣ. ᨴ᩠ᩅᨿᩴ ᩋᨸᩣᨦ᩠ᨣᨴᩔᨶᩮ ᨩᨶᩮ. ᩅᩃ ᩈᩴᩅᩁᨱᩮ, ᩍᩁᩮᩣ. ᨠᩩᨧ᩠ᨨᩥᨲᩴ ᨠᩁᩮᩣᨲᩦᨲᩥ ᨠᩮᨠᩁᩮᩣ, ᩏᩔᩮ.

᪓᪒᪑. ᨴ᩠ᩅᨿᩴ ᨶᩥᨠ᩠ᨠᩮᩈᩈᩦᩈᩮ. ᨶᩥᨠ᩠ᨠᩮᩈᩴ ᩈᩦᩈᨾᩮᨲᩔ, ᨡᩃ ᨡᩃᨶᩮ, ᩈᨬ᩠ᨧᨿᩮ ᨧ, ᩌᨭᩮᩣ, ᨶᩥᨠ᩠ᨠᩮᩈᨲ᩠ᨲᩣ ᨡᩴ ᨲᩩᨧ᩠ᨨᩴ ᩈᩦᩈᩴ ᩃᩣᨲᩦᨲᩥ ᨡᩃ᩠ᩃᩣᨭᩮᩣ, ᨭᩮᩣ.

ᨲᩥᨠᩴ ᨡᩩᩁᨾᩩᨱ᩠ᨯᩈᩦᩈᩮ. ᨾᩩᨱ᩠ᨯ ᨡᨱ᩠ᨯᨶᩮ, ᨽᩪᩅᩣᨴᩥ, ᩋ. ᨽᨱ᩠ᨯ ᨸᩁᩥᨽᩣᩈᨶᩮ, ᩏ, ᩈᨠᨲ᩠ᨳᩮ ᨠᩮᩣ, ᨾᩩᨱ᩠ᨯᨠᩮᩣ, ᨾᩩᨱ᩠ᨯᩥᨠᩮᩣᨸ᩠ᨿᨲᩕ.

ᩋᨠ᩠ᨡᩦᨶᩴ ᨾᨩ᩠ᨫᩮ ᩑᨠᩮᨶᩣᨠ᩠ᨡᩥᨶᩣ ᩈᩩᨬ᩠ᨬᩮᩣ ᨠᩣᨱᩮᩣ ᨶᩣᨾ, ᨠᨱ ᩈᨴ᩠ᨴᨣᨲᩥᨶᩥᨾᩦᩃᨶᩮᩈᩩ, ᨱᩮᩣ, ᨠᨱᨲᩥ ᨶᩥᨾᩦᩃᨲᩦᨲᩥ ᨠᩣᨱᩮᩣ, ᨲᩴ ᨸᨶᩔ ᨶᩥᨾᩦᩃᨶᩴ ᩑᨠᩮᨶᩮᩅᨠ᩠ᨡᩥᨶᩣ. ᩋᨭ᩠ᨮᨠᨳᩣᨴᩦᩈᩩ ᨸᨶ ‘‘ᨠᩣᨱᩮᩣᨲᩥ ᩑᨠᨧ᩠ᨨᩥᨠᩣᨱᩮᩣ, ᩏᨽᨿᨧ᩠ᨨᩥᨠᩣᨱᩮᩣ ᩅᩣ’’ᨲᩥ [ᩈᩴ. ᨶᩥ. ᩋᨭ᩠ᨮ. ᪑.᪑.᪑᪓᪒] ᩅᩩᨲ᩠ᨲᩴ. ᨴ᩠ᩅᨿᩮᨶ ᩋᨠ᩠ᨡᩥᨴ᩠ᩅᨿᩮᨶ ᩈᩩᨬ᩠ᨬᩮᩣ ᩋᨶ᩠ᨵᩮᩣ ᨶᩣᨾ, ᩋᨶ᩠ᨵ ᨴᩔᨶᩪᨸᩈᩴᩉᩣᩁᩮ, ᩋ.

᪓᪒᪒. ᨴ᩠ᩅᨿᩴ ¶ ᨶᨭ᩠ᨮᩈᩮᩣᨲᨸ᩠ᨸᩈᩣᨴᩮ. ᨻᨶ᩠ᨵ ᨻᨶ᩠ᨵᨶᩮ, ᩍᩁᩮᩣ. ᨶᩃᩮᩣᨸᩮᩣ. ᩈᩩᨲᩥ ᨠᨱ᩠ᨱᩮᩣ ᩉᩦᨶᩮᩣ ᩅᩥᨠᩃᩮᩣ ᨿᩔᩣᨲᩥ ᩈᩩᨲᩥᩉᩦᨶᩮᩣ. ᩑᩊᩮᩣᨸ᩠ᨿᨲᩕ.

ᨲᩥᨠᩴ ᨣᩥᩃᩣᨶᩈᩣᨾᨬ᩠ᨬᩮ. ᨣᩥᩃ ᩉᩣᩈᨠ᩠ᨡᨿᩮ, ᨿᩩ, ᨻ᩠ᨿᩣᨵᩥᩁᩮᩣᨣᩮᩣᩈᨬ᩠ᨩᩣᨲᩮᩣ ᨿᩔ ᨻ᩠ᨿᩣᨵᩥᨲᩮᩣ. ᩋᨲ ᩈᩣᨲᨧ᩠ᨧᨣᨾᨶᩮ, ᩋᨵᩥᨠᩁᨱᩮ, ᨠᨲ᩠ᨲᩁᩥ ᩅᩣ ᩏᩁᩮᩣ, ᩌᨲᩩᩁᩮᩣ, ᨴᩦᨥᩣᨴᩥ. ᩌᨾᨿᩣᩅᩦ, ᩅᩥᨠᨲᩮᩣ, ᩋᨸᨭᩩ, ᩋᨻ᩠ᨽᨾᩥᨲᩮᩣ, ᩋᨻ᩠ᨽᩣᨶ᩠ᨲᩮᩣᨸ᩠ᨿᨲᩕ.

ᩏᨾ᩠ᨾᩣᨴᩮᩣ ᩅᩣᨲᩣᨴᩥᨸᨠᩮᩣᨸᩮᩣ ᩁᩮᩣᨣᩅᩥᩈᩮᩈᩮᩣ, ᨲᨻ᩠ᨻᨲᩥ ᩏᨾ᩠ᨾᨲ᩠ᨲᩮᩣ, ᨾᨴ ᩏᨾ᩠ᨾᩣᨴᩮ, ᩏᨣ᩠ᨣᨲᩮᩉᩥ ᩅᩣᨲᩣᨴᩥᨴᩮᩣᩈᩮᩉᩥ ᨾᨴᨿᨲᩦᨲᩥ ᩏᨾ᩠ᨾᩣᨴᩮᩣ, ᨱᩮᩣ. ᨡᩩᨩ᩠ᨩᩣᨴᨿᩮᩣ ᩏᨾ᩠ᨾᨲ᩠ᨲᨶ᩠ᨲᩣ ᩅᩣᨧ᩠ᨧᩃᩥᨦ᩠ᨣᩮ ᨿᩩᨲ᩠ᨲᨲᩣᨿ ᩅᩣᨧ᩠ᨧᩃᩥᨦ᩠ᨣᩥᨠᩣ, ᨿᨳᩣ – ᨡᩩᨩ᩠ᨩᩮᩣ ᨸᩩᩁᩥᩈᩮᩣ, ᨡᩩᨩ᩠ᨩᩣ ᩍᨲ᩠ᨳᩦ, ᨡᩩᨩ᩠ᨩᩴ ᨶᨸᩩᩴᩈᨠᩴ. ᩏᨾ᩠ᨾᨲ᩠ᨲᩮᩣ ᨸᩩᩁᩥᩈᩮᩣ, ᩏᨾ᩠ᨾᨲ᩠ᨲᩣ ᩍᨲ᩠ᨳᩦ, ᩏᨾ᩠ᨾᨲ᩠ᨲᩴ ᨶᨸᩩᩴᩈᨠᩴ.

᪓᪒᪓. ᨶᩅᨠᩴ ᩁᩮᩣᨣᨾᨲ᩠ᨲᩮ. ᨲᨠᩥ ᨠᩥᨧ᩠ᨨᨩᩦᩅᨶᩮ, ᨽᩪᩅᩣᨴᩥ, ᩌ ᨽᩩᩈᩮᩣ ᨲᨦ᩠ᨠᨲᩦᨲᩥ ᩌᨲᨦ᩠ᨠᩮᩣ, ᩋ. ᩋᨾ ᩁᩮᩣᨣᩮ, ᨿᩮᩣ, ᨾᨿ ᨣᨲᩥᨾ᩠ᩉᩥ ᩅᩣ, ᩋᨳ ᩅᩣ ᩋᨾ ᩁᩮᩣᨣᩮ, ᨧᩩᩁᩣᨴᩥ, ᩌᨾᨿᨲᩥ ᩁᩩᨩ᩠ᨩᨲᩦᨲᩥ ᩌᨾᨿᩮᩣ, ᩋ, ᨠᩣᩁᩥᨲᩃᩮᩣᨸᩣᨽᩣᩅᩮᩣ. ᩅᩥᨵ ᩅᩥᨩ᩠ᨫᨶᩮ, ᩅᩥᨩ᩠ᨫᨲᩦᨲᩥ ᨻ᩠ᨿᩣᨵᩥ, ᩍ, ᩋᨠᩣᩁᩅᨱ᩠ᨱᩣᨣᨾᩮᩣ, ᨻᩣᨵ ᩅᩥᨻᩣᨵᩣᨿᩴ ᩅᩣ, ᨲᨴᩣ ᨿᩣᨣᨾᩮᩣ, ᩅᩥᩅᩥᨵᩣ ᩅᩣ ᩌᨵᨿᩮᩣ ᨾᨶᩮᩣᨸᩦᩊᩣ ᨿᩈ᩠ᨾᩥᩴᩈ ¶ ᨻ᩠ᨿᩣᨵᩥ, ‘‘ᨸᩩᨾᩮ ᩌᨵᩥ ᨾᩣᨶᩈᩦ ᨻ᩠ᨿᨳᩣ’’ᨲᩥ [ᩋᨾᩁ ᪘.᪒᪘] ᩉᩥ ᩋᨾᩁᨠᩮᩣᩈᩮ ᩅᩩᨲ᩠ᨲᩴ. ᩁᩮᩣᨣᩮᨣᨴᩮᩣ, ᨠᩩᩅᩮᩁᩣᨿᩩᨵᩮ ᨣᨴᩣ, ᨣᨴᩮᩣ ᨽᩣᨳᩁᩥᨠᨱ᩠ᩉᩔ, ‘‘ᩌᨾᨿᩮ ᨧᩣᨿᩩᨵᩮ ᨣᨴᩣ’’ᨲᩥ ᩉᩥ ᨶᩣᨶᨲ᩠ᨳᩈᨦ᩠ᨣᩉᩮ. ᩁᩩᨩ ᩁᩮᩣᨣᩮ, ᨠᨲ᩠ᨲᩁᩥ ᨱᩮᩣ, ᩁᩩᨩᩣ ᩍᨲ᩠ᨳᩦ. ᨣᩥᩃᩣᨶᩔ ᨽᩣᩅᩮᩣ ᨣᩮᩃᨬ᩠ᨬᩴ. ᨠᩃ ᨣᨲᩥᩈᨦ᩠ᨡ᩠ᨿᩣᨶᩮᩈᩩ, ᨶ ᨠᩃᨲᩥ ᨿᩮᨶ ᨲᩴ ᩋᨠᩃᩴ, ᨲᨾᩮᩅ ᩋᨠᩃ᩠ᩃᩴ, ᩃᩮᩣ. ᨻᩣᨵ ᩅᩥᨻᩣᨵᩣᨿᩴ, ᨽᩪᩅᩣᨴᩥ, ᩋ. ᩏᨸᨲᩣᨸᩮᩣᨸ᩠ᨿᨲᩕ.

ᨴ᩠ᩅᨿᩴ ᨡᨿᩁᩮᩣᨣᩮ, ᩁᩈᩣᨴᩥᩈᨲ᩠ᨲᨵᩣᨲᩩᨿᩮᩣ ᩈᩮᩣᩈᨿᨲᩦᨲᩥ ᩈᩮᩣᩈᩮᩣ, ᩈᩩᩈ ᩈᩮᩣᩈᨶᩮ, ᨴᩥᩅᩣᨴᩥ, ᨱᩮᩣ. ᨡᩥ ᨡᨿᩮ, ᨡᨿᨲᩦᨲᩥ, ᩋ. ᨿᨠ᩠ᨡᩣ, ᩁᩣᨩᨿᨠ᩠ᨡᩣᨸ᩠ᨿᨲᩕ. ᨿᨠ᩠ᨡ ᨸᩪᨩᩣᨿᩴ, ᨧᩩᩁᩣᨴᩥ.

᪓᪒᪔. ᨴ᩠ᩅᨿᩴ ᨶᩣᩈᩁᩮᩣᨣᩮ. ᩋᨸᩥᩉᩥᨲᩣ ᨶᩣᩈᩣ ᩋᨶᩮᨶᩣᨲᩥ ᨸᩦᨶᩣᩈᩮᩣ, ᨸᩦᨶᩈᩮᩣᨸᩥ. ᩏᨸᩈᨣ᩠ᨣᨲᩮᩣ ᨶᩣᩈᩣᨿ ᨻᩉᩩᨻ᩠ᨻᩦᩉᩥᨾ᩠ᩉᩥ ᨶᩈᩣᨴᩮᩈᩴ ᨠᩩᨻ᩠ᨻᨶ᩠ᨲᩥ [ᨸᩣᨱᩥᨶᩥ ᪕.᪔.᪑᪑᪙], ᩋᨸᩥᩔᩣᨠᩣᩁᩃᩮᩣᨸᩮᩣ ᩅᨱ᩠ᨱᨶᩣᩈᩮᩣ, ᩁᩔᩔ ᨴᩦᨥᨲᩣ. ‘‘ᩈᩮᩣᩈᩮᩣ ᨿᨠ᩠ᨡᩣ ᩁᩣᨩᨿᨠ᩠ᨡᩣ, ᨸᨲᩦᩔᩣᨿᩮᩣ ᨲᩩ ᨸᩦᨶᩈᩮᩣ, ᩌᨸᩦᨶᩈᩮᩣ ᨸᨲᩥᩔᩣᨿᩮᩣ’’ᨲᩥ ᩁᨽᩈᩮᩣ. ᨸᨲᩥᩔᨿᩮᩣᨸ᩠ᨿᨲᩕ. ᩅᩮᨩ᩠ᨩᨣᨶ᩠ᨳᩮ ᩍᨾᩮᩈᩴ ᨸᩦᨶᩈᨸᨲᩥᩔᩣᨿᩣᨶᩴ ᨽᩮᨴᩮᩣ ᩋᨽᩥᩉᩥᨲᩮᩣ –

ᩌᨶᩉ᩠ᨿᨲᩮ ᨿᩔ ᩅᩥᩈᩩᩔᨲᩮ ᨧ,

ᨠᩥᩃᩥᨴ᩠ᨿᨲᩮ ᨵᩪᨸᨲᩥ ᨧᩮᩅ ᨶᩣᩈᩣ;

ᨶ ᨬᩣᨿᨲᩮ ᨣᨶ᩠ᨵᩁᩈᩮ ᨧ ᨩᨶ᩠ᨲᩩ,

ᨴᩩᨭ᩠ᨮᩴ ᩅᩥᨩᨬ᩠ᨬᩣ ᨲᨾᨸᩦᨶᩈᩮᨶᩣᨲᩥ.

ᩌᨶᨴ᩠ᨵᩣ ¶ ᨸᩥᩉᩥᨲᩣ ᨶᩣᩈᩣ,

ᨲᨶᩩᩈᩣᩅᨸ᩠ᨸᩈᩮᨠᩥᨶᩦ;

ᨣᩃᨲᩣᩃᩮᩣᨭ᩠ᨮᩈᩮᩣᩈᩮᩣ ᨧ,

ᨶᩥᨲ᩠ᨲᩮᩣᨴᩮᩣ ᩈᨦ᩠ᨡᨠᨴ᩠ᩅᨿᩮ;

ᨽᩅᩮ ᩈᩁᩮᩣ ᨸᨥᩣᨲᩮᩣ ᨧ,

ᨸᨲᩥᩔᩣᨿᩮᩣᨲᩥ ᩃᨠ᩠ᨡᩥᨲᩮᩣᨲᩥ.

ᩍᩉ ᨲ᩠ᩅᨽᩮᨴᩮᨶᩮᩣᨲ᩠ᨲᩴ. ᨸᨲᩥᨸᩩᨻ᩠ᨻᩮᩣ ᩈᩥᨵᩣᨲᩩ ᩁᩩᨩᨲ᩠ᨿᨲ᩠ᨳᩮᩣ. ᨶᩣᩈᩥᨠᩣᨿ ᨩᩣᨲᩮᩣ ᩁᩮᩣᨣᩮᩣ ᨶᩣᩈᩥᨠᩣᩁᩮᩣᨣᩮᩣ.

ᨥᩣᨶᩮ ᨸᩅᨲ᩠ᨲᩮᩣ ᩋᩔᩅᩮᩣ ᩈᩥᨦ᩠ᨥᩣᨶᩥᨠᩣ ᨶᩣᨾ, ᩈᩥᨦ᩠ᨥ ᩌᨥᩣᨶᩮ, ᨽᩪᩅᩣᨴᩥ, ᩈᩥᨦ᩠ᨥᨲᩦᨲᩥ ᩈᩥᨦ᩠ᨥᩣᨶᩴ, ᨿᩩ, ᨲᨲ᩠ᨳ ᨩᩣᨲᩣ ᩈᩥᨦ᩠ᨥᩣᨶᩥᨠᩣ. ᩌ ᨸᩩᨶᨸ᩠ᨸᩩᨶᩴ ᩈᩅᨲᩥ ᩈᨶ᩠ᨴᨲᩦᨲᩥ ᩋᩔᩅᩮᩣ, ᩈᩪ ᩋᨽᩥᩈᩅᩮ. ᨴ᩠ᩅᨿᩴ ᩅᨱᨾᨲ᩠ᨲᩮ. ᩋᩁ ᨣᨾᨶᩮ, ᩏ, ᩋᩁᩩ, ᨶᨸᩩᩴᩈᨠᩮᨿᩮᩅ. ᩅᨱ ᨣᨲ᩠ᨲᩅᩥᨧᩩᨱ᩠ᨱᨶᩮ, ᨧᩩᩁᩣᨴᩥ, ᩋ, ᩅᨱᩮᩣ, ᩋᨶᩥᨲ᩠ᨳᩦ. ᨴ᩠ᩅᨿᩴ ᨹᩮᩣᨭᩮ. ᨹᩩᨭ ᩈᩴᩈᩥᩃᩮᩈᨶᩮ, ᨽᩪᩅᩣᨴᩥ, ᨹᩮᩣᨭᩮᩣ, ᨱᩮᩣ. ᨸᩦᩊ ᩅᩥᨻᩣᨵᩣᨿᩴ, ᨧᩩᩁᩣᨴᩥ, ᨱ᩠ᩅᩩ, ‘‘ᩍᨲ᩠ᨳᩥᨿᨾᨲᩮᩣ ᩌᨸᨧ᩠ᨧᨿᩮᩣ’’ᨲᩥ ᩌ, ᨸᩦᩊᨠᩮᩣ, ᨸᩦᩊᨠᩣ, ᨸᩦᩊᨠᩴ, ᨲᩦᩈ᩠ᩅᨸᩥ, ᨲᨳᩣ ᨹᩮᩣᨭᩮᩣ.

᪓᪒᪕. ᨴ᩠ᩅᨿᩴ ᨸᨠ᩠ᨠᩅᨱᩣᨴᩦᩈᩩ ᩈᨬ᩠ᨩᩣᨲᨴᩩᨣ᩠ᨣᨶ᩠ᨵᩅᩥᩈᩮᩈᩮ. ᨸᩩᨻ᩠ᨻ ᨸᩪᩁᨱᩮ, ᨽᩪᩅᩣᨴᩥ, ᩋ. ᨸᩪᨿ ᩅᩥᩈᩁᨱᩮ, ᨴᩩᨣ᩠ᨣᨶ᩠ᨵᩮ ᨧ, ᨽᩪᩅᩣᨴᩥ.

ᨴ᩠ᩅᨿᩴ ᩃᩮᩣᩉᩥᨲᨶᩥᩔᩁᨱᩁᩮᩣᨣᩮ. ᩁᨲ᩠ᨲᩔ ᩃᩮᩣᩉᩥᨲᩔ ᩈᨱ᩠ᨮᩣᨶᨾᨲᩥᨠ᩠ᨠᨾᩥᨲ᩠ᩅᩣ ᩈᩁᨱᩴ ᨣᨾᨶᩴ ᩁᨲ᩠ᨲᩣᨲᩥᩈᩣᩁᩮᩣ. ᨸᨠ᩠ᨡᨶ᩠ᨴᨲᩥ ᨶᩥᩔᩁᨲᩦᨲᩥ ᨸᨠ᩠ᨡᨶ᩠ᨴᩥᨠᩣ. ᨠᨾᩩ ᨸᨴᩅᩥᨠ᩠ᨡᩮᨸᩮ. ‘‘ᩍᨲ᩠ᨳᩥᨿᨾᨲᩥᨿᩅᩮᩣ ᩅᩣ’’ᨲᩥᨲᩥ. ‘‘ᨸᨠ᩠ᨠᨾᩣᨴᩦᩉᩥᨶ᩠ᨲᩮᩣ ᨧᩮ’’ᨲᩥ ᩑᨲ᩠ᨳ ᨧᨠᩣᩁᩮᨶ ᨲᩥᩔᨶ᩠ᨲᩥ, ᨵᩣᨲ᩠ᩅᨶ᩠ᨲᩃᩮᩣᨸᩮᩣ ᨧ, ᩈᨠᨲ᩠ᨳᩮ ᨠᩮᩣ. ᨴ᩠ᩅᩥᨲ᩠ᨲᩮ. ᨿᨴᩣᨴᩥᨶᩣ ᨸᩁᨠᨠᩣᩁᩔ ᨡᩮᩣ, ᨸᨠ᩠ᨡᨶ᩠ᨴᩥᨠᩣ.

ᨴ᩠ᩅᨿᩴ ¶ ᩋᨸᨾᩣᩁᩮ. ᩈᩁᨱᩴ ᩈᩣᩁᩮᩣ, ᩋᨸᨣᨲᩮᩣ ᩈᩣᩁᩮᩣ ᨿᩮᨶ ᩋᨸᨾᩣᩁᩮᩣ, ᩈᩔ ᨾᩮᩣ. ᩍᨲᩁᨲᩕ ᨾᨠᩣᩁᩣᨣᨾᩮᩣ. ᨴ᩠ᩅᨿᩴ ᨸᩣᨴᨽᩮᨴᩮ. ᨸᩣᨴᩔ ᨹᩮᩣᨭᩮᩣ ᨽᩮᨴᨶᩴ ᨴᩁᨱᩴ ᨸᩣᨴᨹᩮᩣᨭᩮᩣ, ᨹᩩᨭ ᨽᩮᨴᩮ. ᩅᩥᩁᩪᨸᩮᩣ ᨸᩣᨴᩮᩣ ᩑᨲᩣᨿ ᩉᩮᨲᩩᨽᩪᨲᩣᨿᩣᨲᩥ ᩅᩥᨸᩣᨴᩥᨠᩣ. ᩈᨾᩣᩈᨶ᩠ᨲᩮ ᨠᩮᩣ, ᨸᩩᨻ᩠ᨻᩣᨠᩣᩁᩔᩥᨲ᩠ᨲᩴ, ᩅᩥᨴᩣᩁᩦᨿᨾᩣᨶᨲ᩠ᨲᩣ ᩅᩥᨸᨩ᩠ᨩᨾᩣᨶᩮᩣ ᨸᩣᨴᩮᩣ ᩋᩔᨶ᩠ᨲᩥ ᩅᩣ ᩅᩥᨸᩣᨴᩥᨠᩣ.

᪓᪒᪖. ᨴ᩠ᩅᨿᩴ ᩅᩩᨯ᩠ᨰᩥᨸ᩠ᨸᨲ᩠ᨲᨱ᩠ᨯᨠᩮᩣᩈᩁᩮᩣᨣᩮ. ᩅᩩᨯ᩠ᨰᩥᨸ᩠ᨸᨲ᩠ᨲᩮᩣ ᩁᩮᩣᨣᩮᩣ ᩅᩩᨯ᩠ᨰᩥᩁᩮᩣᨣᩮᩣ. ᩅᩣᨲᨸᩪᩁᩥᨲᩴ ᩋᨱ᩠ᨯᩴ ᨠᩮᩣᩈᩮᩣ ᩅᩣᨲᨱ᩠ᨯᩴ. ᨴ᩠ᩅᨿᩴ ᨳᩪᩃᨸᩣᨴᩁᩮᩣᨣᩮ. ᨥᨶᩣᨽᩣᩅᨲᩮᩣ ᩈᩥᨳᩥᩃᩴ ᨸᨴᩴ ᩈᩦᨸᨴᩴ, ᩅᨱ᩠ᨱᨶᩣᩈᩮᩣ, ᨴᩦᨥᩣᨴᩥ. ᨽᩣᩁᩮᩣ ᨸᩣᨴᩮᩣ ᨿᩔ, ᨲᩔ ᨽᩣᩅᩮᩣ ᨽᩣᩁᨸᩣᨴᨲᩣ.

ᨸᨬ᩠ᨧᨠᩴ ᨠᨱ᩠ᨯᩩᨿᩴ. ᨠᨱ᩠ᨯ ᨽᩮᨴᨶᩮ, ᩏ, ᨴᩦᨥᩮ ᨠᨱ᩠ᨯᩪ, ᩅᨵᩪᩈᨴ᩠ᨴᩮᩣᩅ. ᨲᩥᨾ᩠ᩉᩥ ᨠᨱ᩠ᨯᩪᨲᩥ, ᩋᩔᩪ, ᨧᩩᩁᩣᨴᩥᨲ᩠ᨲᩣ ᨿᨾ᩠ᩉᩥ ᨠᨱ᩠ᨯᩪᨿᩣ, ᨿᩃᩮᩣᨸᩣᨽᩣᩅᩮᩣ. ᨡᨩ᩠ᨩ ᨳᩮᨿ᩠ᨿᨠᩁᨱᨻ᩠ᨿᨳᨶᩮᩈᩩ, ᨽᩪᩅᩣᨴᩥ, ᩏ. ᨿᩩᨾ᩠ᩉᩥ ᨠᨱ᩠ᨯᩪᩅᨶᩴ, ᩋᩔᩪ. ᩏᩅᩣᨴᩮᩈᩮᩣ, ᨴᩦᨥᩮᩣ ᨧ.

᪓᪒᪗. ᨲᩥᨠᩴ ᨠᨧ᩠ᨨᩩᨿᩴ. ᨿᩣ ‘‘ᨡᩈᩩᩁᩮᩣᨣᩮᩣ’’ᨲᩥ ᩅᩩᨧ᩠ᨧᨲᩥ. ᨸᩣᨲ᩠ᨿᨲ᩠ᨲᩣᨶᨶ᩠ᨲᩥ ᨸᩣᨾᩴ, ᨾᨶ, ᨸᩣᨾᩣᨸ᩠ᨿᨲ᩠ᨳᩥ, ᨸᩩᩃ᩠ᩃᩥᨦ᩠ᨣᩮᩣ, ᩁᩣᨩᩣᨴᩥ, ᩅᩥᩈᩮᩈᩮᨶ ᨲᨧ᩠ᨨᨲᩥ ᨠᩣᩈᨶ᩠ᨲᩥ ᩅᩥᨲᨧ᩠ᨨᩥᨠᩣ, ᨲᨧ᩠ᨨ ᨲᨶᩩᨠᩁᨱᩮ, ᨱ᩠ᩅᩩ ¶ , ‘‘ᩅᩥᩅᨧ᩠ᨨᩥᨠᩣ’’ [ᩅᩥᨧ᩠ᨧᨧ᩠ᨧᩥᨠᩣ (ᩋᨾᩁ ᪑᪖.᪕᪓)] ᨲᩥᨸᩥ ᨸᩣᨮᩮᩣ. ᩅᨧ᩠ᨨ ᨸᩁᩥᨽᩣᩈᨶᨲᨩ᩠ᨩᨶᩮᩈᩩ, ᨽᩪᩅᩣᨴᩥ. ᨠᨧ ᨻᨶ᩠ᨵᨶᩮ, ᩏ, ᨧᩔ ᨨᨲ᩠ᨲᩴ, ᨴ᩠ᩅᩥᨲ᩠ᨲᩣᨴᩥ. ᨲᩥᩃᨠᩣᩊᨠᨶ᩠ᨲᩴ ᨴ᩠ᩅᨿᩴ ᨴ᩠ᩅᨿᩴ ᩈᨾᨲ᩠ᨳᩴ. ᨲᨲᩕ ᨴ᩠ᩅᨿᩴ ᩈᩮᩣᨳᩮ. ᩈᩩ ᨣᨲᩥᩅᩩᨯ᩠ᨰᩦᩈᩩ, ᨽᩪᩅᩣᨴᩥ, ᨳᩮᩣ. ᨳᩩᨸᨧ᩠ᨧᨿᩮ ᩈᨿᨳᩩ, ᩏᩔᨲ᩠ᨲᩴ, ᨿᩣᨣᨾᩮᩣ ᨧ. ᩈᩮᩣᨹᩮᩣᨸ᩠ᨿᨲᩕ. ᩈᩮᩣᨠᩴ ᨹᩣᨿᨲᩥ ᨻᩉᩩᩃᩴ ᨠᩁᩮᩣᨲᩦᨲᩥ ᩈᩮᩣᨹᩮᩣ, ᨹᩣᨿ ᩅᩩᨯ᩠ᨰᩥᨿᩴ, ᨹᩣᨿᩔ ᨹᩮᩣ, ᨶᩮᩁᩩᨲ᩠ᨲᩮᩣ.

ᨴ᩠ᩅᨿᩴ ᩋᩁᩥᩈᩁᩮᩣᨣᩮ. ᩋᨾᨦ᩠ᨣᩃᨲᩣᨿ ᨴᩩ ᨶᩥᨶ᩠ᨴᩥᨲᩴ ᨶᩣᨾᨾᩔ ᨴᩩᨶ᩠ᨶᩣᨾᩴ, ᩈᨠᨲ᩠ᨳᩮ, ᨠᩩᨧ᩠ᨨᩣᨿᩴ ᩅᩣ ᨠᩮᩣ, ᨴᩦᨥᨠᩮᩣᩈᩥᨠᩣᨿᩴ ᨴᩩᨶ᩠ᨶᩣᨾᩣ, ᩍᨲ᩠ᨳᩦ. ᩋᩁᩥ ᩅᩥᨿ ᩈᩈᨲᩥ ᩉᩥᩴ ᩈᨲᩦᨲᩥ ᩋᩁᩥᩈᩴ, ᩈᩈ ᩉᩥᩴᩈᩣᨿᩴ, ᨠ᩠ᩅᩥ, ᩋᩁ ᨣᨾᨶᩮ ᩅᩣ, ᩍᩈᩮᩣ. ᨴ᩠ᩅᨿᩴ ᩅᨾᨶᩁᩮᩣᨣᩮ. ᨨᨴ᩠ᨴ ᩅᨾᨶᩮ, ᨧᩩᩁᩣᨴᩥ, ᨱ᩠ᩅᩩ. ᩅᨾᩩ ᩏᨣ᩠ᨣᩥᩁᨱᩮ, ᨳᩩ. ᩅᨾᩥᨵᩩᨸ᩠ᨿᨲᩕ. ᨨᨴ᩠ᨴᩥᨠᩣ, ᩅᨾᩥ ᩍᨲ᩠ᨳᩥᨿᩴ, ᩅᨾᨳᩩ ᨸᩩᨾᩮ.

᪓᪒᪘-᪓᪒᪙. ᨴ᩠ᩅᨿᩴ ᨸᩁᩥᨲᩣᨸᩮ. ᨴᩩ ᨸᩁᩥᨲᩣᨸᩮ, ᨲᨶᩣᨴᩥ, ᨳᩩ. ᨸᩁᩥᨲᨸᨶᩴ ᩈᨶ᩠ᨲᩣᨸᨶᩴ ᨸᩁᩥᨲᩣᨸᩮᩣ. ᨴ᩠ᩅᨿᩴ ᨲᩥᩃᨠᩣᩊᨠᩮ. ᨲᩥᩃᩈᨱ᩠ᨮᩣᨶᩴ ᩅᩥᨿ ᨩᩣᨿᨲᩦᨲᩥ ᨲᩥᩃᨠᩮᩣ. ᨲᩥᩃᩴ ᩅᩥᨿ ᨠᩣᩊᩮᩣ ᩉᩩᨲ᩠ᩅᩣ ᨩᩣᨿᨲᩦᨲᩥ ᨲᩥᩃᨠᩣᩊᨠᩮᩣ.

ᨾᩉᩣᩅᩥᩁᩮᨠᩮᩣ ‘‘ᩅᩥᩈᩪᨧᩥᨠᩣ’’ᨲ᩠ᨿᩩᨧ᩠ᨧᨲᩮ. ᨶᩥᩔᩮᩈᨲᩮᩣ ᩈᩩᨧᨲᩥ ᨣᨧ᩠ᨨᨲᩦᨲᩥ ᩈᩪᨧᩥᨠᩣ. ᩈᩩᨧᩥ, ᩈᩩᨧ ᨣᨲᩥᨿᩴ, ᨽᩪᩅᩣᨴᩥ. ᩈᩩᨧ ᩈᩮᩣᨧᩮᨿ᩠ᨿᩮ ¶ ᩅᩣ, ᨶᩥᩔᩮᩈᨲᩮᩣ ᩈᩮᩣᨧᩮᨲᩦᨲᩥ ᩅᩥᩈᩪᨧᩥᨠᩣ, ᩅᩥᩈᩮᩈᩮᨶ ᩈᩪᨧᩥ ᩅᩥᨿ ᩅᩥᨩ᩠ᨫᨲᩦᨲᩥ ᩅᩣ ᩅᩥᩈᩪᨧᩥᨠᩣ. ᨻᩉᩩᨾᩮᩣᩈᩁᨱᨲ᩠ᨲᩣ ᨾᩉᨶ᩠ᨲᩮᩣ ᩅᩥᩁᩮᨠᩮᩣ ᨾᩉᩣᩅᩥᩁᩮᨠᩮᩣ, ᩁᩥᨧ ᩅᩥᨿᩮᩣᨩᨶᩈᨾ᩠ᨸᩩᨧ᩠ᨨᨶᩮᩈᩩ, ᨱᩮᩣ.

ᨽᨣᨶ᩠ᨴᩃᩣᨴᨿᩮᩣ ᩈᨲ᩠ᨲ ᩌᨾᨿᨶ᩠ᨲᩁᩣ ᩁᩮᩣᨣᨽᩮᨴᩣ ᨽᩅᨶ᩠ᨲᩥ. ᨲᨲᩕ ᨣᩩᨴᩈᨾᩦᨸᨩᩮᩣ ᩅᨱᩅᩥᩈᩮᩈᩮᩣ ᨽᨣᨶ᩠ᨴᩃᩣ, ᩍᨲ᩠ᨳᩦ. ᨽᨣᩴ ᨿᩮᩣᨶᩥ, ᨲᩴ ᨴᩣᩁᨿᨲᩦᨲᩥ ᩁᩪᩊ᩠ᩉᩦᨲᩮᩣ ᩋᨸᨧ᩠ᨧᨿᨶ᩠ᨲᩮᩣ ᨶᩥᨸᩣᨲᩥᨲᩮᩣ. ᨴᩁ ᩅᩥᨴᩣᩁᨱᩮ, ᨽᩪᩅᩣᨴᩥ, ᩃᨲ᩠ᨲᩮ ᨽᨣᨶ᩠ᨴᩃᩣ. ᨽᨣᨶ᩠ᨴᩁᩮᩣᨸ᩠ᨿᨲᩕ. ᨾᩮᩉᩮᩣ ᨾᩩᨲ᩠ᨲᨾᩮᩉᩮᩣ, ᩈᩮᩣ ᨧ ᨻᩉᩩᨾᩩᨲ᩠ᨲᨲᩣᨿ ᨾᨵᩩᨾᩮᩉᩮᩣ, ᩁᨲ᩠ᨲᨾᩮᩉᩮᩣ, ᩈᩩᨠ᩠ᨠᨾᩮᩉᩮᩣᨲ᩠ᨿᨶᩮᨠᩅᩥᨵᩮᩣ. ᨾᩥᩉ ᩈᩮᨧᨶᩮ, ᨽᩪᩅᩣᨴᩥ, ᨾᩥᩉᨲᩥ ᨾᩩᨲ᩠ᨲᨶ᩠ᨲᩥ ᨾᩮᩉᩮᩣ, ᨱᩮᩣ. ᨩᩁ ᩁᩮᩣᨣᩮ. ᨽᩪᩅᩣᨴᩥ, ᨩᩁᨲᩦᨲᩥ, ᩋ. ᨩᩁᩮᩣ ᨸᩈᩥᨴ᩠ᨵᩮᩣ. ᨠᩣᩈ ᩈᨴ᩠ᨴᨠᩩᨧ᩠ᨨᩣᨿᩴ, ᨴᩥᨲ᩠ᨲᩥᨿᨬ᩠ᨧ, ᨽᩪᩅᩣᨴᩥ, ᨠᩣᩈᨲᩦᨲᩥ ᨠᩣᩈᩮᩣ, ᨱᩮᩣ, ᨠᩩᨧ᩠ᨨᩥᨲᩴ ᩋᩈᨲᩦᨲᩥ ᩅᩣ ᨠᩣᩈᩮᩣ, ᨠᩩᩌᨸᩩᨻ᩠ᨻᩮᩣ. ᩈᩈ ᨸᩣᨱᨶᩮ, ᩈᩈᨶᩴ ᩈᩣᩈᩮᩣ, ᨽᩩᩈᩴ ᩈᩈᨶᨾᩮᨲᩔᨲ᩠ᨳᩦᨲᩥ ᩅᩣ ᩈᩣᩈᩮᩣ, ᨠᩩᨭ ᨨᩮᨴᨶᩮ, ᨮᩮᩣ, ᨠᩩᨭ᩠ᨮᩴ. ᩈᩣᨾᨬ᩠ᨬᩮᨶ ᨲᨧᩮᩣᩅᩥᨠᩣᩁᩮ. ᩈᩩᨠ᩠ᨠᩮ ᨲᩩ ᩈᩥᨲ᩠ᨲᩴ. ᩈᩪᩃ ᩁᩩᨩᩣᨿᩴ, ᨽᩪᩅᩣᨴᩥ, ᩈᩪᩃᩴ. ᩅᩥᨴ᩠ᨴᨵᩥ, ᩋᩈ᩠ᨾᩁᩦ, ᨾᩩᨲ᩠ᨲᨠᩥᨧ᩠ᨨᩣᨴᨿᩮᩣᨸ᩠ᨿᨶᩮᨠᩣ ᩁᩮᩣᨣᨽᩮᨴᩣ.

ᨸᨩ᩠ᨩᨴ᩠ᨵᩴ ᩅᩮᨩ᩠ᨩᩮ. ᩌᨿᩩᨻ᩠ᨻᩮᨴᩈᨦ᩠ᨡᩣᨲᩴ ᩅᩥᨩ᩠ᨩᩴ ᨩᩣᨶᩣᨲᩦᨲᩥ ᩅᩮᨩ᩠ᨩᩮᩣ, ‘‘ᨱ ᩁᩣᨣᩣ ᨲᩔᩮᨴᨾᨬ᩠ᨬᨲ᩠ᨳᩮᩈᩩ ᨧᩣ’’ᨲᩥ ᨱᩮᩣ, ᩅᩥᨴ ᨬᩣᨱᩮ ᩅᩣ, ᩅᩥᨶ᩠ᨴᨲᩦᨲᩥ ᩅᩮᨩ᩠ᨩᩮᩣ, ᨱ᩠ᨿᩮᩣ, ᨴ᩠ᨿᩔ ᨩᩮᩣ. ᨽᩥᩈᨩ᩠ᨩᨲᩥ ᨧᩥᨠᩥᨧ᩠ᨨᨲᩦᨲᩥ ᨽᩥᩈᨠ᩠ᨠᩮᩣ, ᩋ, ᨩᩔ ᨠᩮᩣ. ᩁᩮᩣᨣᩴ ᩉᩁᨲᩥ ᩈᩦᩃᩮᨶᩣᨲᩥ ᩁᩮᩣᨣᩉᩣᩁᩦ, ᨱᩦ. ᩉᩁᩈᨴ᩠ᨴᩮᩣᨿᩴ ᨠᩮᩅᩃᩮᩣᨸᩥ ᩌᨶᨿᨶᩣᨸᨶᨿᨶᩮᩈᩩ ᩅᨲ᩠ᨲᨲᩥ ‘‘ᨾᨶᩮᩣᩉᩁᩮᩣ, ᨴᩩᨠ᩠ᨡᩉᩁᩮᩣ’’ᩍᨧ᩠ᨧᩣᨴᩦᩈᩩ, ᩍᨵ ᩋᨸᨶᨿᨶᩮ. ᨠᩥᨲ ᩁᩮᩣᨣᩣᨸᨶᨿᨶᩮ, ᨽᩪᩅᩣᨴᩥ. ᨲᩥᨠᩥᨧ᩠ᨨᨲᩦᨲᩥ ᨲᩥᨠᩥᨧ᩠ᨨᨠᩮᩣ, ᨨᨸᨧ᩠ᨧᨿᩮᩣ, ᨱ᩠ᩅᩩ, ᨴ᩠ᩅᩥᨲ᩠ᨲᩣᨴᩥ. ᩋᨣᨴᨠᩁᩮᩣᨸ᩠ᨿᨲᩕ, ᩋᨣᨴᩴ ᩋᩁᩮᩣᨣᩴ ᨸᩣᨱᩦᨶᩴ ᨠᩁᩮᩣᨲᩦᨲᩥ ᩋᨣᨴᨠᩁᩮᩣ, ᨠᨾ᩠ᨾᩣᨴᩥᨾ᩠ᩉᩥ ᨱᩮᩣ.

᪓᪓᪐. ᨴ᩠ᩅᨿᩴ ¶ ᩈᩃ᩠ᩃᨶᩦᩉᩁᨱᩮ ᩅᩮᨩ᩠ᨩᩮ. ᨠᩣᨿᩮ ᨸᩅᩥᨭ᩠ᨮᩈᩁᩣᨴᩥᩈᩃ᩠ᩃᩔ ᨶᩦᩉᩁᨱᩮᩣ ᩅᩮᨩ᩠ᨩᩮᩣ ᩈᩃ᩠ᩃᩅᩮᨩ᩠ᨩᩮᩣ. ᨿᨳᩣᩅᩩᨲ᩠ᨲᩴ ᩈᩃ᩠ᩃᩴ ᨶᩦᩉᩁᨱᩅᩈᩮᨶ ᨠᨶ᩠ᨲᨲᩥ ᨨᩥᨶ᩠ᨴᨲᩦᨲᩥ ᩈᩃ᩠ᩃᨠᨲ᩠ᨲᩮᩣ, ᨠᨲᩥ ᨨᩮᨴᨶᩮ, ᨲᩮᩣ. ᨴ᩠ᩅᨿᩴ ᨸᨭᩥᨠᩣᩁᩮ. ᨲᩥᨠᩥᨧ᩠ᨨᨶᩴ ᨲᩥᨠᩥᨧ᩠ᨨᩣ, ᨽᩣᩅᩮ ᩋ. ᨸᨲᩥᨸᩩᨻ᩠ᨻᩮᩣ ᨠᩁᩮᩣᨲᩥ ᨲᩥᨠᩥᨧ᩠ᨨᩣᨿᩴ, ᨠᩁᨲᩮᩣ ᩁᩥᩁᩥᨿᩣ.

ᨧᨲᩩᨠ᩠ᨠᩴ ᩒᩈᨵᩮ. ᨽᩥᩈᨩᩣᨶᨾᩥᨴᩴ ᨽᩮᩈᨩ᩠ᨩᩴ, ᨱ᩠ᨿ. ᨶ ᩅᩥᨩ᩠ᨩᨲᩮ ᨣᨴᩮᩣ ᨿᩈ᩠ᨾᩥᨶ᩠ᨲᩥ ᩋᨣᨴᩮᩣ. ᨽᩥᩈᨩᩣᨶᨾᩥᨴᩴ ᨽᩮᩈᨩᩴ, ᨱᩮᩣ. ᩏᩈ ᨴᩣᩉᩮ. ᩁᩮᩣᨣᨾᩮᩣᩈᩣᨸᩮᨲᩦᨲᩥ ᩒᩈᨵᩴ, ᨵᩮᩣ, ᩋᨳ ᩅᩣ ᩒᩈᨵᩦ ᨶᩣᨾ ᩋᩈᩴᨿᩮᩣᨣᨴᨻ᩠ᨻᩴ, ᨲᩮᩉᩥ ᩈᩴᨿᩮᩣᨩᩥᨲᩴ ᩒᩈᨵᩴ. ᨩᩣᨿᩩᨸ᩠ᨿᨲᩕ. ᨩᩥ ᨩᨿᩮ, ᨱᩩ.

᪓᪓᪑. ᨲᩥᨠᩴ ᩌᩁᩮᩣᨣ᩠ᨿᩮ. ᩋᨶᨲ᩠ᨳᨠᩣᩁᨠᨲ᩠ᨲᩣ ᨠᩩᨧ᩠ᨨᩥᨲᩣᨠᩣᩁᩮᨶ ᩈᩁᩦᩁᩮ ᩈᩮᨶ᩠ᨲᩦᨲᩥ ᨠᩩᩈᩣ, ᩁᩮᩣᨣᩣ, ᨲᩮ ᩃᩩᨶᩣᨲᩥ ᨨᩥᨶ᩠ᨴᨲᩦᨲᩥ ᨠᩩᩈᩃᩴ. ᩌᨾᨿᩔᩣᨽᩣᩅᩮᩣ ᩋᨶᩣᨾᨿᩴ, ᩋᨻ᩠ᨿᨿᩦᨽᩣᩅᩮᩣ. ᩋᩁᩮᩣᨣᩔ ᨽᩣᩅᩮᩣ ᩌᩁᩮᩣᨣ᩠ᨿᩴ. ᨠᩩᩈᩃᩣᨶᩣᨾᨿᩣᩁᩮᩣᨣ᩠ᨿᨶ᩠ᨲᩥ ᩈᨾᩣᩉᩣᩁᨴ᩠ᩅᨶ᩠ᨴᩮᩣ. ᨴ᩠ᩅᨿᩴ ᩋᨶᩣᨾᨿᨩᨶᩮ. ᨠᩃ ᨣᨲᩥᩈᨦ᩠ᨡ᩠ᨿᩣᨶᩮᩈᩩ. ᨠᩃᨲᩥ ᨿᨳᩣᩈᩩᨡᩴ ᩈᨻ᩠ᨻᩥᩁᩥᨿᩣᨸᨳᩮᩈᩪᨲᩥ ᨠᩃ᩠ᩃᩮᩣ, ᩃᩮᩣ. ‘‘ᨠᩣᩃᩴ ᨡᨾᨲᩦᨲᩥ ᨠᩃ᩠ᨿᩴ, ᩋᩁᩮᩣᨣᨲᩣ, ᨲᩔᩴ ᨶᩥᨿᩩᨲ᩠ᨲᩮᩣ ᨠᩃ᩠ᨿᩮᩣ’’ᨲᩥ ᩋᨦ᩠ᨣᩩᨲ᩠ᨲᩁᨶᩥᨠᩣᨿᨭᩦᨠᩣᨿᩴ. ᨶᨲ᩠ᨳᩥ ᩌᨾᨿᩮᩣ ᨿᩈ᩠ᨾᩥᩴ ᨶᩥᩁᩣᨾᨿᩮᩣ. ᩅᩩᨲ᩠ᨲᩮᩣᨸ᩠ᨿᨲᩕ. ᩅᩩᨲ᩠ᨲᩥ ᨩᩦᩅᩥᨲᩅᩩᨲ᩠ᨲᩥ ᨸᩈᨲ᩠ᨳᩣ ᩋᩔᨲ᩠ᨳᩦᨲᩥ ᩅᩩᨲ᩠ᨲᩮᩣ. ᩁᩮᩣᨣᨲᩮᩣ ᨶᩥᨣ᩠ᨣᨲᨩᨶᩮ ᨸᨶ ᩏᩃ᩠ᩃᩣᨥᩮᩣ, ᩃᩣᨥ ᩈᩣᨾᨲ᩠ᨳᩥᨿᩮ, ᩏᩈᨴ᩠ᨴᩮᩣᨿᩴ ᩁᩮᩣᨣᩅᩥᨾᩩᨲ᩠ᨿᨲ᩠ᨳᩮᩣ. ᨶᩁᩣᨴᩥᨲ᩠ᨲᩣ, ᨶᩁᨸ᩠ᨸᨵᩣᨶᨲ᩠ᨲᩣ ᨧ ᨶᩁᩅᨣ᩠ᨣᩮᩣ.

ᨶᩁᩅᨣ᩠ᨣᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪔. ᨧᨲᩩᨻ᩠ᨻᨱ᩠ᨱᩅᨣ᩠ᨣᩅᨱ᩠ᨱᨶᩣ

᪓᪓᪒. ᩈᨶ᩠ᨲᨲᩥᨸᩁᩥᨿᨶ᩠ᨲᩴ ᩅᩴᩈᩮ. ᨠᩩᩃ ᩈᨶ᩠ᨲᩣᨶᨻᨶ᩠ᨵᩪᩈᩩ, ᨽᩪᩅᩣᨴᩥ, ᨱᩮᩣ, ᨠᩩᩃᩴ, ᩅᨶ ᩈᨾ᩠ᨽᨲ᩠ᨲᩥᨿᩴ, ᩈᩮᩣ. ᩈᩴᨲᨶᩩ ᩅᩥᨲ᩠ᨳᩣᩁᩮ, ᨱᩮᩣ. ᩋᨽᩥᨾᩩᨡᩴ ᨩᨶᩮᨲᩦᨲᩥ ᩋᨽᩥᨩᨶᩮᩣ, ᨱᩮᩣ. ᨣᩮᩣ ᩅᩩᨧ᩠ᨧᨲᩥ ᩋᨽᩥᨵᩣᨶᩴ, ᨻᩩᨴ᩠ᨵᩥ ᨧ, ᨲᩮ ᨲᩣᨿᨲᩦᨲᩥ ᨣᩮᩣᨲ᩠ᨲᩴ. ᨣᩮᩣᨲᩕᨾ᩠ᨸᩥ. ᨣᩅᩴ ᩈᨴ᩠ᨴᩴ ᨲᩣᨿᨲᩦᨲᩥ ᩅᩣ ᨣᩮᩣᨲ᩠ᨲᩴ, ᨲᩣ ᨸᩣᩃᨶᩮ. ᩋᨶᩩᨸᩩᨻ᩠ᨻᩮᩣ ᩍ ᨣᨲᩥᨿᩴ, ᨠᩁᨱᩮ ᩋ. ᨲᨶᩮᩣᨲᩥᩈ᩠ᨾᩣᨲᩥ, ᩈᨶ᩠ᨲᨲᩥ, ᨶᩃᩮᩣᨸᩮᩣ, ᩍᨲ᩠ᨳᩥᨿᩴ.

ᩈᨶ᩠ᨲᨲᩥ ᨸᨶ᩠ᨲᩥᩅᩥᨲ᩠ᨳᩣᩁ-ᨣᩮᩣᨲ᩠ᨲᩮᩈᩩ ᨠᩅᩥᨽᩦ ᨾᨲᩣ;

ᨸᩁᨾ᩠ᨸᩁᩣ ᨽᩅᩮ ᨧᩣᨸᩥ, ᨸᩩᨲ᩠ᨲᨠᨬ᩠ᨬᩣᩈᩩ ᩈᨶ᩠ᨲᨲᩥ.

ᨡᨲ᩠ᨲᩥᨿᩣᨴᨿᩮᩣ ᨡᨲ᩠ᨲᩥᨿᨻᩕᩣᩉ᩠ᨾᨱᩅᩮᩔᩈᩩᨴ᩠ᨴᩣ ᨧᨲ᩠ᨲᩣᩁᩮᩣ ᩅᨱ᩠ᨱᩣ ᨠᩩᩃᩣᨶᩥ ᨽᩅᨶ᩠ᨲᩥ, ᩑᨲᩮ ᩉᩥ ᩋᨬ᩠ᨬᨾᨬ᩠ᨬᨾᩈᨦ᩠ᨠᩁᨲᩮᩣ ᩅᨱ᩠ᨱᩮᨲᨻ᩠ᨻᨲᩮᩣ ᨮᨸᩮᨲᨻ᩠ᨻᨲᩮᩣ ᩅᨱ᩠ᨱᩣᨲᩥ ᩅᩩᨧ᩠ᨧᨶ᩠ᨲᩮ. ᩅᨱ᩠ᨱ ᨮᨸᨶᩮ.

᪓᪓᪓-᪓᪓᪔. ᨨᨠ᩠ᨠᩴ ¶ ᨠᩩᩃᩦᨶᩮ. ᨠᩩᩃᩔᩣᨸᨧ᩠ᨧᩴ ᨠᩩᩃᩥᨶᩮᩣ, ᩍᨶᩮᩣ ᩋᨸᨧ᩠ᨧᩮ. ᩈᩮᩣᨽᨶᩮᩣ ᨩᨶᩮᩣ ᩈᨩ᩠ᨩᨶᩮᩣ. ᩈᨸᩁᨲ᩠ᨳᩴ ᩈᩣᨵᩮᨲᩦᨲᩥ ᩈᩣᨵᩩ, ᩈᩣᨵ ᩈᩴᩈᩥᨴ᩠ᨵᩥᨾ᩠ᩉᩥ, ᩏ. ᩈᨽᩣᨿᩴ ᩈᩣᨵᩩ ᩈᨽ᩠ᨿᩮᩣ. ᩈᩣᨵ᩠ᩅᨲ᩠ᨳᩮ ᨿᩮᩣ. ᩋᨿ ᨣᨲᩥᨿᩴ. ᩋᨿᩥᨲᨻ᩠ᨻᩮᩣ ᩏᨸᨣᨶ᩠ᨲᨻ᩠ᨻᩮᩣᨲᩥ ᩋᨿ᩠ᨿᩮᩣ, ᨠᨾ᩠ᨾᨶᩥ ᨿᩮᩣ. ᨾᩉᩣᨠᩩᩃᩔᩣᨸᨧ᩠ᨧᩴ ᨾᩉᩣᨠᩩᩃᩮᩣ, ᨱᩮᩣ.

ᨽᩪᨽᩩᨩᨶ᩠ᨲᩴ ᩁᩣᨩᩈᩣᨾᨬ᩠ᨬᩮ. ᩋᨲᩥᨲᩮᨩᩅᨶ᩠ᨲᨲᩣᨿ ᩅᩥᩈᩮᩈᩮᨶ ᩁᩣᨩᨲᩮ ᨴᩥᨻ᩠ᨻᨲᩮᨲᩥ ᩁᩣᨩᩣ, ᩁᩣᨩ ᨴᩥᨲ᩠ᨲᩥᨿᩴ. ᨽᩩᨿᩣ ᨽᩪᨾᩥᨿᩣ ᨸᨲᩥ ᨽᩪᨸᨲᩥ, ᨽᩩᩴ ᨸᩣᩃᩮᨲᩦᨲᩥ ᩅᩣ ᨽᩪᨸᨲᩥ, ᨸᩣ ᩁᨠ᩠ᨡᨱᩮ,ᨲᩥ, ᩁᩔᩮᩣ. ᨸᨳᩅᩥᨿᩣ ᩍᩔᩁᩮᩣ ᨸᨲ᩠ᨳᩥᩅᩮᩣ, ᨱᩮᩣ, ᨴ᩠ᩅᩥᨲ᩠ᨲᩴ, ᩍᨲ᩠ᨲᨬ᩠ᨧ. ᨩᨣᨲᩥᩴ ᨽᩪᨾᩥᩴ ᨸᩣᩃᩮᨲᩦᨲᩥ ᨩᨣᨲᩥᨸᩣᩃᩮᩣ, ᨠᨾ᩠ᨾᨶᩥ ᨱᩮᩣ. ᨴᩥᩈᩣᨶᩴ ᨸᨲᩥ ᨴᩥᩈᨾ᩠ᨸᨲᩥ, ᨴᩥᩈᩣ, ᨴᩥᩈᨭ᩠ᨮᩮ ᩅᩣ ᨸᩣᩃᩮᨲᩦᨲᩥ ᨴᩥᩈᨾ᩠ᨸᨲᩥ, ᩁᩔᨲ᩠ᨲᩴ, ᨶᩥᨣ᩠ᨣᩉᩦᨲᩣᨣᨾᩮᩣ ᨧ. ᨽᩩᩴ ᨽᩪᨾᩥᩴ ᨽᩩᨬ᩠ᨩᨲᩦᨲᩥ ᨽᩪᨽᩩᨩᩮᩣ, ᨽᩩᨩ ᨸᩣᩃᨶᨩ᩠ᨫᩮᩣᩉᩁᨱᩮᩈᩩ, ᩍᨵ ᨸᩣᩃᨶᩮ, ᩁᩩᨵᩣᨴᩥ. ᨾᩉᩥᨡᩥᨲᩮᩣᨸ᩠ᨿᨲᩕ. ᨡᩥ ᨶᩥᩅᩣᩈᨣᨲᩦᩈᩩ, ᨾᩉᩥᩴ ᩋᨡᩥ ᨣᨲᩅᩣ ᨾᩉᩦᨡᩥᨲᩮᩣ.

᪓᪓᪕. ᨸᨩ᩠ᨩᨴ᩠ᨵᩴ ᨾᩩᨴ᩠ᨵᩣᨽᩥᩈᩥᨲ᩠ᨲᩮ ᨩᩣᨲᩥᨡᨲ᩠ᨲᩥᨿᩮ, ‘‘ᩁᩣᨩᨩᨧ᩠ᨧᩮ ᨧ ᨡᨲ᩠ᨲᩥᨿᩮ’’ᨲᩥ ᩅᨧᨶᨲᩮᩣ. ᩁᨬ᩠ᨬᩮᩣ ᨡᨲ᩠ᨲᩥᨿᩔᩣᨸᨧ᩠ᨧᩴ ᩁᩣᨩᨬ᩠ᨬᩮᩣ, ᨬ᩠ᨬᩮᩣ ¶ ᩋᨸᨧ᩠ᨧᩮ. ‘‘ᨡᨲ᩠ᨲᩥᨿᩮᩣ ᨲᩩ ᩅᩥᩁᩣ ᨡᨲ᩠ᨲᩴ, ᩁᩣᨩᨬ᩠ᨬᨴ᩠ᩅᩥᨩᩃᩥᨦ᩠ᨣᨶᩮᩣ’’ᨲᩥ ᩁᨽᩈ, ᩁᨲᨶᨠᩮᩣᩈᩮᩈᩩ ᨸᩁᩥᨿᩣᨿᩣ. ᨡᨲ᩠ᨲᩔᩣᨸᨧ᩠ᨧᩴ ᨡᨲ᩠ᨲᩥᨿᩮᩣ, ᩋᨸᨧ᩠ᨧᩮ ᩍᨿᨸᨧ᩠ᨧᨿᩮᩣ ᨴᩥᩔᨲᩮ, ᨡᩮᨲ᩠ᨲᩣᨶᩴ ᩋᨵᩥᨸᨲᩥᨽᩪᨲᨲ᩠ᨲᩣ ᩅᩣ ᨡᨲ᩠ᨲᩥᨿᩮᩣᨲᩥᩌᨴᩥᨠᨸ᩠ᨸᩥᨠᩁᩣᨩᩣ ᩅᩩᨧ᩠ᨧᨲᩥ, ᨲᨸ᩠ᨸᨽᩅᨲ᩠ᨲᩣ ᨸᨶ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩈ᩠ᩅᨸᩥ ᨲᩴᩈᨾᨬ᩠ᨬᩣ, ᩑᩔᨲ᩠ᨲᩴ. ᨡᨲ᩠ᨲᩔᩣᨸᨧ᩠ᨧᩴ ᨡᨲ᩠ᨲᩴ, ᨱᩮᩣ. ᩁᨩ᩠ᨩᩣᩁᩮᩣᨸᨶᩈᨾᨿᩮ ᨴᨠ᩠ᨡᩥᨱᩣᩅᨭ᩠ᨭᩈᨦ᩠ᨡᩮᩣᨴᨠᩮᨶ ᨣᨦ᩠ᨣᩣᨶᩦᨲᩮᨶ ᨾᩩᨴ᩠ᨵᨶᩥ ᨡᨲ᩠ᨲᩥᨿᨠᨬ᩠ᨬᩣᨴᩦᩉᩥ ᩋᨽᩥᩈᩥᨲ᩠ᨲᨲ᩠ᨲᩣ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩣ, ᨸᨮᨾᨡᨲ᩠ᨲᩥᨿᩮᩣ. ᨲᨸ᩠ᨸᨽᩅᨲᩣᨿ ᨸᨶ ᩋᨶᨽᩥᩈᩥᨲ᩠ᨲᩣ ᨧ ᨾᩩᨴ᩠ᨵᩣᨽᩥᩈᩥᨲ᩠ᨲᩣᨡ᩠ᨿᩣ, ᨿᨳᩣ – ᨻᩕᩉ᩠ᨾᨻᩣᩉᩩᨩᩔ ᩅᩴᩈᩮ ᨩᩣᨲᩔᩣᨸᩥ ᨻᩕᩉ᩠ᨾᨻᩣᩉᩩᨩᩮᩣ. ᨻᩕᩉ᩠ᨾᨻᩣᩉᩩᨲᩮᩣ ᨩᩣᨲᨲ᩠ᨲᩣ ᨻᩣᩉᩩᨩᩮᩣᨲᩥ ᩉᩥ ᨶᩥᨠᩣᨿᨶ᩠ᨲᩁᩥᨠᩣᨶᩴ ᩃᨴ᩠ᨵᩥ. ᨿᩈ᩠ᨾᩥᩴ ᨸᨶ ᩁᩣᨩᩥᨶᩥ ᩋᩈᩮᩈᩣ ᩈᩣᨾᨶ᩠ᨲᩣ ᨸᨱᨾᨶ᩠ᨲᩥ, ᩈᩮᩣ ᩋᨵᩥᩔᩁᩣᨡ᩠ᨿᩮᩣ [ᩋᨾᩁ ᪑᪘.᪒]. ᩈᩴ ᩈᨲ᩠ᨲᩮᩣ ᩃᨣ᩠ᨣᩮᩣ ᩋᨶ᩠ᨲᩮᩣ ᨿᩔᩣ ᩈᩣ ᩈᨾᨶ᩠ᨲᩣ, ᩈᩅᩥᩈᨿᩣᨶᨶ᩠ᨲᩁᩣ ᨽᩪᨾᩥ, ᩈᨾᨶ᩠ᨲᩣᨿ ᩍᨾᩮ ᩈᩣᨾᨶ᩠ᨲᩣ, ᩋᨶᨶ᩠ᨲᩁᩁᩣᨩᩣᨶᩮᩣ.

ᨴ᩠ᩅᨿᩴ ᨧᨠ᩠ᨠᩅᨲ᩠ᨲᩥᨶᩥ. ᩈᨻ᩠ᨻᨽᩪᨾᩥᨿᩣ ᩍᩔᩁᩮᩣ ᩈᨻ᩠ᨻᨽᩩᨾ᩠ᨾᩮᩣ, ᨱ᩠ᨿᩮᩣ. ᨸᩩᨬ᩠ᨬᩮᩣᨸᨶᩦᨲᩮᨶ ᨧᨠ᩠ᨠᩁᨲᨶᩮᨶ ᩅᨲ᩠ᨲᨲᩮ ᩋᩈᩣᨵᩩᨴᨾᨶᩥᨠᩣᨴᩥᩁᩣᨩᩅᨲ᩠ᨲᩴ ᩋᨶᩩᨲᩥᨭ᩠ᨮᨲᩦᨲᩥ ᨧᨠ᩠ᨠᩅᨲ᩠ᨲᩦ, ᨱᩦ, ᨧᨠ᩠ᨠᩁᨲᨶᩴ ᩅᨲ᩠ᨲᩮᨲᩥ ᩌᨠᩣᩈᩮ ᩋᨲ᩠ᨲᨶᩮᩣ ᨸᩩᩁᨲᩮᩣ ᨣᨾᨿᨲᩦᨲᩥ ᩅᩣ ᨧᨠ᩠ᨠᩅᨲ᩠ᨲᩦ, ᨸᩩᨬ᩠ᨬᨧᨠ᩠ᨠᩴ, ᨧᨲᩩᨧᨠ᩠ᨠᩴ ᩅᩣ ᩈᨲ᩠ᨲᩮᩈᩩ ᩅᨲ᩠ᨲᩮᨲᩥ, ᨲᩮ ᩅᩣ ᩋᩈ᩠ᨾᩥᩴ ᩅᨲ᩠ᨲᩮᨲᩦᨲᩥ ᨧᨠ᩠ᨠᩅᨲ᩠ᨲᩦ, ᨧᨠ᩠ᨠᩁᨲᨶᩩᨸ᩠ᨸᩣᨴᨶᨲ᩠ᨳᩴ ᨴ᩠ᩅᩣᨴᩈᩅᩔᨧᩁᩥᨲᩴ ᨴᩈᩁᩣᨩᨵᨾ᩠ᨾᩴ ᩅᨲ᩠ᨲᨾᩮᨲᩔᨲ᩠ᨳᩦᨲᩥ ᩅᩣ ᨧᨠ᩠ᨠᩅᨲ᩠ᨲᩦ. ᨲᨲ᩠ᨳ ᩋᨶ᩠ᨲᩮᩣᨩᨶᩈ᩠ᨾᩥᩴ ᨻᩃᨠᩣᨿᩮ ᨵᨾ᩠ᨾᩥᨠᩣᩁᨠ᩠ᨡᩣᩅᩁᨱᨣᩩᨲ᩠ᨲᩥᨿᩣ ᩈᩴᩅᩥᨵᩣᨶᩴ, ᨡᨲ᩠ᨲᩥᨿᩮᩈᩩ, ᩋᨶᩩᨿᩩᨲ᩠ᨲᩮᩈᩩ, ᨻᩕᩣᩉ᩠ᨾᨱᨣᩉᨸᨲᩥᨠᩮᩈᩩ, ᨶᩮᨣᨾᨩᩣᨶᨸᨴᩮᩈᩩ, ᩈᨾᨱᨻᩕᩣᩉ᩠ᨾᨱᩮᩈᩩ, ᨾᩥᨣᨸᨠ᩠ᨡᩦᩈᩩ, ᩋᨵᨾ᩠ᨾᨠᩣᩁᨸᨭᩥᨠ᩠ᨡᩮᨸᩮᩣ, ᩋᨵᨶᩣᨶᩴ ᨵᨶᩩᨸ᩠ᨸᩣᨴᨶᩴ, ᩈᨾᨱᨻᩕᩣᩉ᩠ᨾᨱᩮ ᩏᨸᩈᨦ᩠ᨠᨾᩥᨲ᩠ᩅᩣ ᨸᨬ᩠ᩉᨸᩩᨧ᩠ᨨᨶᨶ᩠ᨲᩥ ᩍᨴᩴ ᨴᩈᩅᩥᨵᩴ ᨧᨠ᩠ᨠᩅᨲ᩠ᨲᩥᩅᨲ᩠ᨲᩴ, ᩍᨴᨾᩮᩅ ᨧ ᨣᩉᨸᨲᩥᨠᩮ, ᨸᨠ᩠ᨡᩥᨩᩣᨲᩮ ᨧ ᩅᩥᩈᩩᩴ ᨠᨲ᩠ᩅᩣ ᨣᩉᨱᩅᩈᩮᨶ ᨴ᩠ᩅᩣᨴᩈᩅᩥᨵᨾ᩠ᨸᩥ ᨴᩦᨸᩮᩈᩩ. ᨧᨲᩪᩈ᩠ᩅᨸᩥ ᨴᩦᨸᩮᩈᩩ ᩌᨱᩣᨵᨾ᩠ᨾᨧᨠ᩠ᨠᩣᨶᩥ ᩈᨲ᩠ᨲᩮᩈᩩ ¶ ᨸᩅᨲ᩠ᨲᩮᨲᩦᨲᩥ ᩅᩣ ᨧᨠ᩠ᨠᩅᨲ᩠ᨲᩦ. ᩋᨬ᩠ᨬᩮᩣ ᩋᩈᨻ᩠ᨻᨽᩩᨾ᩠ᨾᩮᩣ ᩋᨶᩅᨠᩣᩈᩮᩣ ᩈᩣᨾᨶ᩠ᨲᩮᩣ ᨽᩪᨸᩮᩣ ᨾᨱ᩠ᨯᩃᩥᩔᩁᩮᩣ ᨶᩣᨾ. ᩈᨿᨾᩣᨱᩣᨸᩅᨲ᩠ᨲᩥᨭ᩠ᨮᩣᨶᩅᩈᩮᨶ ᨸᩁᩥᨧ᩠ᨨᩥᨶ᩠ᨶᩔᩮᩅ ᨾᨱ᩠ᨯᩃᩔ ᩍᩔᩁᩮᩣ, ᨶ ᩈᨻ᩠ᨻᨾᨱ᩠ᨯᩃᩔᩣᨲᩥ ᨾᨱ᩠ᨯᩃᩥᩔᩁᩮᩣᨲᩥᨸᩥ. ᩑᨲ᩠ᨳ ᨧ ‘‘ᩈᨻ᩠ᨻᨽᩩᨾ᩠ᨾᩮᩣ, ᨧᨠ᩠ᨠᩅᨲ᩠ᨲᩦ’’ᨲᩥ ᨴ᩠ᩅᩦᩉᩥ ᨶᩣᨾᩮᩉᩥ ᨧᨲᩩᨴᩦᨸᩥᩔᩁᩮᩣ ᩁᩣᨩᩣ ᨴᩦᨸᩥᨲᩮᩣ, ᩍᨵᩣᨶᩣᨣᨲᩮᨸᩥ ᩈᨦ᩠ᨣᩉᩮᨲ᩠ᩅᩣ ᨠᨳᩥᨲᩮᨶ ᩋᨵᩥᩔᩁᨸᨴᩮᨶ ᩑᨠᨴᩦᨸᩥᩔᩁᩮᩣ ᩁᩣᨩᩣ, ᨾᨱ᩠ᨯᩃᩥᩔᩁᨸᨴᩮᨶ ᨸᨴᩮᩈᩥᩔᩁᩮᩣ ᩁᩣᨩᩣ ᨴᩦᨸᩥᨲᩮᩣ. ᩋᨳ ᩅᩣ ᨾᨱ᩠ᨯᩃᩥᩔᩁᨸᨴᩮᨶ ᩑᨠᨴᩦᨸᩥᩔᩁᩮᩣ ᩁᩣᨩᩣ, ᩈᩮᩈᩮᩉᩥ ᩁᩣᨩᩁᩣᨩᨬ᩠ᨬᩣᨴᩦᩉᩥ ᨻᩣᩉᩩᨩᨸᩁᩥᨿᨶ᩠ᨲᩮᩉᩥ ᨸᨴᩮᩈᩥᩔᩁᩮᩣ ᨴᩦᨸᩥᨲᩮᩣ.

᪓᪓᪖. ᨴ᩠ᩅᨿᩴ ᩁᩣᨩᨽᩮᨴᩮ. ᩈᩩᨡᩩᨾᨲᩣᨿ ᩃᩦᨶᩣ ᩋᨸᩣᨠᨭᩣ ᨨᩅᩥᨿᩮᩣ ᨿᩮᩈᩴ ᨲᩮ ᩃᩥᨧ᩠ᨨᩅᩥᨶᩮᩣ. ᩃᩥᨧ᩠ᨨᩅᩦ ᨧ ᩅᨩ᩠ᨩᩦ ᨧᩣᨲᩥ ᨴ᩠ᩅᨶ᩠ᨴᩮᩣ. ᨴ᩠ᩅᨿᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᨠᩩᩃᩮ ᩁᩣᨩᩥᨶᩥ. ᨸᩩᩁᩥᨾᨲᩁᩈᨾ᩠ᨽᩪᨲᩮ ᩈᨠ᩠ᨿᨠᩩᩃᩮ ᩈᨬ᩠ᨩᩣᨲᨲ᩠ᨲᩣ ᩈᨠ᩠ᨿᩮᩣ, ᨱᩮᩣ. ᩈᨠ᩠ᨠᩮᩣᨸᩥ. ᩈᨠ᩠ᨿᩮ ᨽᩅᩮᩣ ᩈᩣᨠᩥᨿᩮᩣ, ᩍᨿᩮᩣ, ᨿᩃᩮᩣᨸᩮᩣ, ᨴᩦᨥᩮᩣ ᨧ.

ᨸᨬ᩠ᨧᨠᩴ ᨻᩩᨴ᩠ᨵᨸᩩᨲ᩠ᨲᩔᩣᨿᩈ᩠ᨾᨲᩮᩣ ᩁᩣᩉᩩᩃᩔ ᨾᩣᨲᩁᩥ. ᨽᨴ᩠ᨴ ᨠᩃ᩠ᨿᩣᨱᩮ, ᩈᩮᩣᨡ᩠ᨿᩮ ᨧ. ᨠᩩᩃᩣᨧᩣᩁᩁᩪᨸᩣᨴᩥᩅᩈᩮᨶ ᨠᩃ᩠ᨿᩣᨱᨲ᩠ᨲᩣ ᨽᨴ᩠ᨴᩣ. ᨠᨧ᩠ᨧᩔᩣᨸᨧ᩠ᨧᩴ ᨠᨧ᩠ᨧᩣᨶᩣ, ᩋᨸᨧ᩠ᨧᩈᨴ᩠ᨴᩮᩣᨿᩴ ᨶᩥᨧ᩠ᨧᩴ ᨶᨸᩩᩴᩈᨠᩮ ᨸᩩᨲ᩠ᨲᩮ, ᨸᩩᨲ᩠ᨲᩥᨿᨬ᩠ᨧ ᨽᩅᨲᩦᨲᩥ. ‘‘ᩁᩣᩉᩩ ᩅᩥᨿ ᨧᨶ᩠ᨴᩴ ᨾᨾ ᨶᩥᨠ᩠ᨡᨾᨶᩴ ᩃᩣᨲᩩᨠᩣᨾᩮᩣ ᨧᩣᨿᩴ ᨾᩮ ᨸᩩᨲ᩠ᨲᩮᩣᨲᩥ ᩁᩣᩉᩩᩃᩮᩣᨲᩥ ᨶᩣᨾᩮᨶ ᨽᩅᩥᨲᨻ᩠ᨻ’’ᨶ᩠ᨲᩥ ᨾᨶᩈᩥ ᨠᨲ᩠ᩅᩣ ‘‘ᩁᩣᩉᩩ ᨩᩣᨲᩮᩣ, ᨻᨶ᩠ᨵᨶᩴ ᨩᩣᨲ’’ᨶ᩠ᨲᩥ ᨸᩥᨲᩁᩣ ᩅᩩᨲ᩠ᨲᩮᩣ ᩈᩥᨠ᩠ᨡᩣᨠᩣᨾᩮᩣ ᩌᨿᩈ᩠ᨾᩣ ᩁᩣᩉᩩᩃᩮᩣᨿᩮᩅᩮᨲ᩠ᨳ ᩁᩣᩉᩩᩃᩮᩣ, ᨲᩔ ᨾᩣᨲᩣ ᩁᩣᩉᩩᩃᨾᩣᨲᩣ, ᨻᩥᨾ᩠ᨻᩴ ᩅᩩᨧ᩠ᨧᨲᩥ ᩈᩁᩦᩁᩴ, ᩋᨲᩥᩈᨿᩅᨱ᩠ᨱᩈᩁᩦᩁᨿᩩᨲ᩠ᨲᨲᩣᨿ ᨻᩥᨾ᩠ᨻᩣ, ᩅᨾᩥᨵᩣᨲᩩᨾ᩠ᩉᩣ ᩅᩣ ¶ ᨻᩮᩣ, ᩅᩔ ᨻᨲ᩠ᨲᩴ. ᨿᩈᩮᩣ ᩅᩩᨧ᩠ᨧᨲᩥ ᨸᩁᩥᩅᩣᩁᩮᩣ, ᨠᩥᨲ᩠ᨲᩥ ᨧ, ᨲᩮ ᨵᩣᩁᩮᨲᩦᨲᩥ ᨿᩈᩮᩣᨵᩁᩣ, ᨾᨶᩣᨴᩥᨲ᩠ᨲᩣ ᩋᩔᩮᩣ.

᪓᪓᪗-᪓᪓᪙. ᨿᩮᩈᩴ ᨡᨲ᩠ᨲᩥᨿᩣᨶᩴ ᨵᨶᩴ ᩈᨲᩴ ᩉᩮᩣᨲᩥ, ᨠᩦᨴᩥᩈᩴ ᨲᩴ ᨵᨶᩴ? ᨶᩥᨵᩣᨶᨣᩴ ᨸᨳᩅᩣᨴᩦᩈᩩ ᨶᩥᨵᩣᨶᩅᩈᩮᨶ ᨣᨲᩴ ᨸᩅᨲ᩠ᨲᩴ, ᨲᩮᩈᩴ ᨵᨶᩣᨶᩴ ᩈᨲᩴ ᨠᩉᩣᨸᨱᩣᨶᩴ, ᨠᩥᨲ᩠ᨲᨠᨸ᩠ᨸᨾᩣᨱᩣᨶᩴ? ᨠᩮᩣᨭᩦᨶᩴ ᩈᨲᩴ. ᨠᩮᨶ ᨸᩁᩥᨧ᩠ᨨᩮᨴᩮᨶ? ᩉᩮᨭ᩠ᨮᩥᨾᨶ᩠ᨲᩮᨶ ᩉᩮᨭ᩠ᨮᩥᨾᨠᩮᩣᨭ᩠ᨮᩣᩈᩮᨶ, ᩉᩮᨭ᩠ᨮᩥᨾᨸᩁᩥᨧ᩠ᨨᩮᨴᩮᨶ ᩅᩣ ᨠᩮᩣᨭᩦᨶᩴ ᩈᨲᩴ ᩉᩮᩣᨲᩥ. ᨴᩥᩅᩈᩅᩊᨬ᩠ᨩᩮᩣ ᨴᩥᩅᩈᩮ ᨴᩥᩅᩈᩮ ᩅᩊᨬ᩠ᨩᩥᨲᨻ᩠ᨻᩮᩣ ᨸᨶ ᨠᩉᩣᨸᨱᩮᩣ ᩅᩦᩈᨲᨾ᩠ᨻᨱᨾᨲ᩠ᨲᩴ ᩉᩮᩣᨲᩥ, ᨲᩮ ᨡᨲ᩠ᨲᩥᨿᩣ ‘‘ᨡᨲ᩠ᨲᩥᨿᨾᩉᩣᩈᩣᩃᩣ’’ᨲ᩠ᨿᩩᨧ᩠ᨧᨶ᩠ᨲᩮ. ᨾᩉᨶ᩠ᨲᩮᩣ ᨵᨶᩈᩣᩁᩮᩣ ᨿᩮᩈᨶ᩠ᨲᩮ ᨾᩉᩣᩈᩣᩃᩣ, ᩃᨲ᩠ᨲᩴ, ᩋᨾ᩠ᨻᨱᨾᨲᩕ ᩑᨠᩣᨴᩈᨴᩮᩣᨱᨾᨲ᩠ᨲᩴ.

ᨿᩮᩈᩴ ᨴ᩠ᩅᩥᨩᩣᨶᩴ ᨻᩕᩣᩉ᩠ᨾᨱᩣᨶᩴ ᨶᩥᨵᩣᨶᨣᩣᨶᩥ ᨶᩥᨵᩣᨶᩅᩈᩮᨶ ᨸᩅᨲ᩠ᨲᩣᨶᩥ ᩋᩈᩦᨲᩥᨠᩮᩣᨭᩥᨵᨶᩣᨶᩥ ᩉᩮᩣᨶ᩠ᨲᩥ, ᨴᩥᩅᩈᩅᩊᨬ᩠ᨩᩮᩣ ᨸᨶ ᨠᩉᩣᨸᨱᩮᩣ ᨴᩈᨾ᩠ᨻᨱᨾᨲ᩠ᨲᩴ ᩉᩮᩣᨲᩥ, ᨲᩮ ᨴ᩠ᩅᩥᨩᩣ ‘‘ᨴ᩠ᩅᩥᨩᨾᩉᩣᩈᩣᩃᩣ’’ᨲ᩠ᨿᩩᨧ᩠ᨧᨶ᩠ᨲᩮ.

ᨶᩥᨵᩣᨶᨣᩮ, ᩅᩊᨬ᩠ᨩᩮ ᨧ ᨵᨶᩮ ᨲᨴᩩᨸᨯ᩠ᨰᩮ ᨲᩮᩈᩴ ᨴ᩠ᩅᩥᨩᨾᩉᩣᩈᩣᩃᩣᨶᩴ ᨵᨶᩔ ᩏᨸᨯ᩠ᨰᨽᩣᨣᩮ ᩈᨲᩥ ᨣᩉᨸᨲᩥᨾᩉᩣᩈᩣᩃᩣ ᨶᩣᨾ ᩈᩥᨿᩩᩴ, ᩏᨽᨿᨲᩕᩣᨸᩥ ᩉᩮᨭ᩠ᨮᩥᨾᨶ᩠ᨲᩮᨶᩮᩅ ᨵᨶᨸᩁᩥᨧ᩠ᨨᩮᨴᩮᩣ.

᪓᪔᪐. ᨿᩮᩣ ¶ ᨶ ᩉᩦᨶᩮᩣ, ᨶ ᨧᩩᨠ᩠ᨠᨭ᩠ᨮᩮᩣ, ᨾᨩ᩠ᨫᩥᨾᩣᨵᩥᨠᩣᩁᨻ᩠ᨿᩅᨭ᩠ᨮᩥᨲᩮᩣ ᩁᩣᨩᨸᩩᨲ᩠ᨲᩈᩮᨶᩣᨸᨲᩥᨾᩉᩣᨠᨱᩥᨲ᩠ᨳᩁᩣᨴᩥ, ᩈᩮᩣ ᨾᩉᩣᨾᨲ᩠ᨲᩮᩣ. ᨾᩉᨲᩦ ᨾᨲ᩠ᨲᩣ ᨸᩁᩥᨧ᩠ᨨᩮᨴᩮᩣ ᨿᩔ ᨾᩉᩣᨾᨲ᩠ᨲᩮᩣ, ᩁᩪᨸᨽᩮᨴᩮᨶ ᨸᨭ᩠ᨮᩣᨶᩴ ᨠ᩠ᩃᩦᩅᩴ.

‘‘ᨸᨠᨲᩥᨿᩴ ᨾᩉᩣᨾᨲ᩠ᨲᩮ, ᨸᨬ᩠ᨬᩣᨿᩴ ᨸᩁᨾᨲ᩠ᨲᨶᩥ;

ᨶᨸᩩᩴᩈᨠᩴ ᨸᨵᩣᨶᩴ ᨲᩴ, ᩑᨠᨲ᩠ᨲᩮ ᨲᩩ’ᨲ᩠ᨲᨾᩮ ᩈᨴᩣ’’ᨲᩥ.

ᩁᨽᩈᩮᩣ ᨧ. ‘‘ᨾᩉᩣᨾᨲ᩠ᨲᩮᩣ, ᨸᨭ᩠ᨮᩣᨶᩮᩣ ᨧᩣ’’ᨲᩥ ᨲᩩ ᨸᩩᩴᩈᨠᨱ᩠ᨯᩮ ᩅᩮᩣᨸᩣᩃᩥᨲᩮᩣ. ᨸᨠᨭ᩠ᨮᩮ ᨲᩥᨭ᩠ᨮᨲᩦᨲᩥ ᨸᨭ᩠ᨮᩣᨶᩴ, ᨿᩩ [ᩋᨽᩥᨵᩣᨶᨸ᩠ᨸᨴᩦᨸᩥᨠᩣ ᨭᩦᨠᩣ ᪙᪘᪓, ᪑᪑᪒᪓ ᨣᩣᨳᩣᩈᩩᨸᩥ ᨸᩔᩥᨲᨻ᩠ᨻᩴ].

ᨸᨬ᩠ᨧᨠᩴ ᨾᨶ᩠ᨲᩥᨶᩥᨾ᩠ᩉᩥ. ᨾᨲᩥᨸ᩠ᨸᨵᩣᨶᩮᩣ ᩈᨧᩥᩅᩮᩣ ᩈᩉᩣᨿᩮᩣ. ᩍᨲᩥᨠᨲ᩠ᨲᨻ᩠ᨻᨲᩣᩅᨵᩣᩁᨱᩴ ᨾᨶ᩠ᨲᩮᩣ, ᨲᩴᨿᩮᩣᨣᩣ ᨾᨶ᩠ᨲᩥᨶᩦ. ᩋᩔᨲ᩠ᨳ᩠ᨿᨲ᩠ᨳᩮ ᩍᨶᩦ, ᩋᨳ ᩅᩣ ᨾᨶ᩠ᨲᩮᨶ ᨶᨿᨲᩦᨲᩥ ᨾᨶ᩠ᨲᩥᨶᩦ, ᩋᨳ ᩅᩣ ᨾᨶ᩠ᨲᨿᩮᩣᨣᩣ ᨾᨶ᩠ᨲᩥ, ᨶᩮᨲᩦᨲᩥ ᨶᩦ, ᨾᨶ᩠ᨲᩥ ᨧ ᨶᩦ ᨧᩣᨲᩥ ᨾᨶ᩠ᨲᩥᨶᩦ. ‘‘ᨾᨲᩥᩈᨧᩥᩅᨾᨶ᩠ᨲᩥᨶᩦ’’ᨲᩥᨸᩥ ᨸᩣᨮᩮᩣ, ᨲᨴᩣ ᨴ᩠ᩅᩥᨶ᩠ᨶᩴ ᨲᩥᨱ᩠ᨱᩴ ᩅᩣ ᨴ᩠ᩅᨶ᩠ᨴᩮᩣ. ᩁᨬ᩠ᨬᩣ ᩈᩉ ᨩᩦᩅᨲᩦᨲᩥ ᩈᨩᩦᩅᩮᩣ. ᩈᨧᨲᩮ ᩈᨾᩅᩮᨲᩮᩣ ᨽᩅᨲᩦᨲᩥ ᩈᨧᩥᩅᩮᩣ. ᩈᨧ ᩈᨾᩅᩣᨿᩮ, ᩅᩮᩣ, ᩍᨠᩣᩁᩣᨣᨾᩮᩣ ᨧ. ᩈᨻ᩠ᨻᨠᩥᨧ᩠ᨧᩮᩈᩩ ᩁᨬ᩠ᨬᩣ ᨾᨶ᩠ᨲᩮᨶ ᩋᨾᩣ ᩈᩉ ᨽᩅᨲᩦᨲᩥ ᩋᨾᨧ᩠ᨧᩮᩣ, ᩋᨾᩣᩈᨴ᩠ᨴᩮᩣᨿᩴ ᨶᩥᨸᩣᨲᩮᩣ ᩈᩉᨲ᩠ᨳᩮ ᨧ᩠ᨧᨸᨧ᩠ᨧᨿᩮᩣ. ᩈᨩᩦᩅᨾᨲ᩠ᨲᩮ ᨧᩣᨾᨧ᩠ᨧᩈᨴ᩠ᨴᩮᩣ ᩅᨲ᩠ᨲᨲᩥ. ᨴ᩠ᩅᨿᩴ ᩈᩮᨶᩣᨸᨲᩥᨾ᩠ᩉᩥ. ᩈᩮᨶᩴ ᨶᨿᨲᩦᨲᩥ ᩈᩮᨶᩣᨶᩦ. ᨧᨾᩪᨶᩴ ᩈᩮᨶᩣᨶᩴ ᨸᨲᩥ ᨧᨾᩪᨸᨲᩥ.

᪓᪔᪑. ᨶ᩠ᨿᩣᩈᩣᨴᩦᨶᩴ ¶ ᩍᨱᩣᨴᩣᨶᨴᩣᨿᩅᩥᨽᩣᨣᩣᨴᩦᨶᩴ ᩅᩥᩅᩣᨴᩣᨶᩴ ᩅᩮᩣᩉᩣᩁᩣᨶᩴ ᩏᨸᨴᨭ᩠ᨮᩁᩥ ᩏᨸᨴᩔᩥᨲᩮ ᩋᨠ᩠ᨡᨴᩔᩮᩣ, ᩋᨠ᩠ᨡᩮ ᩅᩮᩣᩉᩣᩁᩮ ᨸᩔᨲᩦᨲᩥ ᩋᨠ᩠ᨡᨴᩔᩮᩣ, ᨱᩮᩣ, ᨵᨾ᩠ᨾᩣᨵᩥᨠᩁᨱᩥᨿᩮᩣ. ᨸᩩᨧ᩠ᨨᩣᩅᩥᩅᩣᨠᩮᩣ, ᨸᨬ᩠ᩉᩅᩥᩅᩣᨠᩮᩣᨸ᩠ᨿᨲᩕ.

ᨸᨩ᩠ᨩᨯ᩠ᨰᩴ ᨸᨭᩥᩉᩣᩁᩮ. ᨴ᩠ᩅᩣᩁᩮ ᨶᩥᨿᩩᨲ᩠ᨲᩮᩣ ᨴᩮᩣᩅᩣᩁᩥᨠᩮᩣ, ᨱᩥᨠᩮᩣ, ᩒᨠᩣᩁᩣᨣᨾᩮᩣ. ᨸᨭᩥᩉᩁᨲᩥ ᩅᩥᨬ᩠ᨬᩣᨿᨲᩥ ᨲᩮᨶᩣᨲᩥ ᨸᨭᩥᩉᩣᩁᩮᩣ, ᨱᩮᩣ. ᨴ᩠ᩅᩣᩁᩮ ᨲᩥᨭ᩠ᨮᨲᩦᨲᩥ ᨴ᩠ᩅᩣᩁᨭ᩠ᨮᩮᩣ, ᩈᨠᨲ᩠ᨳᩮ ᨠᩮᩣ. ᨴ᩠ᩅᩣᩁᨸᩣᩃᨠᩮᩣ. ᨴ᩠ᩅᩣᩁᨭ᩠ᨮᩥᨲᩮᩣ, ᨴᩔᨠᩮᩣᨸ᩠ᨿᨲᩕ.

᪓᪔᪒. ᩁᩣᨩᩪᨶᩴ ᩋᨦ᩠ᨣᩁᨠ᩠ᨡᨣᨱᩮᩣ ᩋᨶᩦᨠᨭ᩠ᨮᩮᩣᨲᩥ ᨾᨲᩮᩣ. ‘‘ᩁᨠ᩠ᨡᩥᩅᨣ᩠ᨣᩮᩣ ᨲᩩ ᨿᩮᩣ ᩁᨬ᩠ᨬᩴ, ᩈᩮᩣ’ᨶᩦᨠᨭ᩠ᨮᩮᩣ’ᨽᩥᨵᩦᨿᨲᩮ’’ᨲᩥ ᩋᨾᩁᨾᩣᩃᩣᨿᨬ᩠ᨧ, ᩋᨶᩦᨠᩮᨶ ᩈᨾᩪᩉᩮᨶ ᨲᩥᨭ᩠ᨮᨲᩦᨲᩥ ᩋᨶᩦᨠᨭ᩠ᨮᩮᩣ, ᨱᩮᩣ.

ᨴ᩠ᩅᨿᩴ ᨾᩉᩃ᩠ᩃᨠᩮ. ᨠᨬ᩠ᨧᩩᨠᩴ ᨧᩮᩣᩊᩴ, ᨲᩴᨿᩮᩣᨣᩣ ᨠᨬ᩠ᨧᩩᨠᩦ. ᩈᩮᩣᨠᩴ ᩅᩥᨶ᩠ᨴᨲᩦᨲᩥ ᩈᩮᩣᩅᩥᨴᩃ᩠ᩃᩮᩣ. ᩅᩥᨴ ᩃᩮᩣᨽᩮ, ᩃᩮᩣ, ᨠᩃᩮᩣᨸᩮᩣ. ᨳᩣᨸᨲᩥ, ᩈᩮᩣᩅᩥᨴᩮᩣᨸ᩠ᨿᨲᩕ. ᨴ᩠ᩅᨿᩴ ᩈᩮᩅᨠᩮ. ᨸᨽᩩᨶᩮᩣ ᨸᨧ᩠ᨨᩣ ᨩᩦᩅᨲᩦᨲᩥ ᩋᨶᩩᨩᩦᩅᩦ, ᨱᩦ. ᩈᩮᩅ ᩈᩮᩅᨶᩮ, ᨽᩪ, ᨱ᩠ᩅᩩ. ᩋᨲ᩠ᨳᩦᨸ᩠ᨿᨲᩕ. ᩋᨲ᩠ᨳ ᨿᩣᨧᨶᩣᨿᩴ. ᩋᨲ᩠ᨳᨶᨾᨲ᩠ᨳᩮᩣ, ᩌᩈᩦᩈᩮᩣ, ᨲᩴᨿᩮᩣᨣᩣ ᩋᨲ᩠ᨳᩦ.

᪓᪔᪓. ᨴ᩠ᩅᨿᩴ ¶ ᩋᨵᩥᨠᨾᨲ᩠ᨲᩮ. ᨣᩣᨾᩮᩈᩩ ᩋᨵᩥᨠᨲ᩠ᨲᩣ ᩋᨵᩥᨠᩣ ᩍᨠ᩠ᨡᩣ ᩋᨶᩩᨽᩅᨶᨾᩮᨲᩔ ᩋᨩ᩠ᨫᨠ᩠ᨡᩮᩣ, ᩍᩔᨲ᩠ᨲᩴ. ᩋᨵᩥᨠᩴ ᨠᩁᩮᩣᨲᩦᨲᩥ ᩋᨵᩥᨠᨲᩮᩣ. ᩍᨴᩴ ᨴ᩠ᩅᨿᩴ ᨳᩣᨿᩩᨠᨣᩮᩣᨸᩣᨶᩴ ᨴ᩠ᩅᩥᨶ᩠ᨶᨾ᩠ᨸᩥ ᨶᩣᨾᩴ. ᨲᨲᩕ ᩑᨠᨣᩣᨾᩮ ᩋᨵᩥᨠᨲᩮᩣ ᨳᩣᨿᩩᨠᩮᩣ, ᨻᩉᩪᩈᩩ ᨣᩣᨾᩮᩈ᩠ᩅᨵᩥᨠᨲᩮᩣ ᨣᩮᩣᨸᩮᩣ. ᩅᩩᨲ᩠ᨲᨬ᩠ᨧᩣᨾᩁᨠᩮᩣᩈᩮ ‘‘ᨳᩣᨿᩩᨠᩮᩣᨵᩥᨠᨲᩮᩣ ᨣᩣᨾᩮ, ᨣᩮᩣᨸᩮᩣ ᨣᩣᨾᩮᩈᩩ ᨽᩪᩁᩥᩈᩪ’’ᨲᩥ. [ᩋᨾᩁ ᪑᪘.᪗] ᩁᩩᨴ᩠ᨴᩮᨶᩣᨸᩥ ᩅᩩᨲ᩠ᨲᩴ ‘‘ᨣᩣᨾᩮᩈ᩠ᩅᨵᩥᨠᨲᩮ ᨣᩮᩣᨸᩮᩣ, ᨣᩮᩣᨭ᩠ᨮᨩ᩠ᨫᨠ᩠ᨡᩮᨸᩥ ᩅᩃ᩠ᩃᨽᩮᩣ’’ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪘.᪗].

ᨴ᩠ᩅᨿᩴ ᩈᩩᩅᨱ᩠ᨱᩁᨩᨲᨩ᩠ᨫᨠ᩠ᨡᩣᨶᩴ ᨴ᩠ᩅᩥᨶ᩠ᨶᨾ᩠ᨸᩥ ᨶᩣᨾᩴ. ᩉᩥᩁᨬ᩠ᨬᩴ ᩅᩩᨧ᩠ᨧᨲᩥ ᩋᨠᨲᩈᩩᩅᨱ᩠ᨱᩣᨴᩥ, ᨲᨲᩕ ᨶᩥᨿᩩᨲ᩠ᨲᩮᩣ ᩉᩮᩁᨬ᩠ᨬᩥᨠᩮᩣ. ᨠᨶ ᨴᩥᨲ᩠ᨲᩥᨣᨲᩥᨠᨶ᩠ᨲᩦᩈᩩ, ᨶᩥᨸᩩᨻ᩠ᨻᩮᩣ, ᨡᩮᩣ, ᨶᩥᨠ᩠ᨡᩮᩣ, ᩈᩩᩅᨱ᩠ᨱᩣᨴᩥᩅᩥᨠᩣᩁᩮᩣ, ᨲᨲᩕ ᨶᩥᨿᩮᩣᨣᩮᩣ ᨶᩥᨠ᩠ᨡᩥᨠᩮᩣ. ᩅᩥᩈᩮᩈᨲᩮᩣ ᨸᨶ ᩈᩩᩅᨱ᩠ᨱᨩ᩠ᨫᨠ᩠ᨡᩮ ᨽᩮᩣᩁᩥᨠᩮᩣ. ᨽᩪᩁᩥᩈᨴ᩠ᨴᩮᩣ ᩈᩩᩅᨱ᩠ᨱᩮ, ᨲᩴᨿᩮᩣᨣᩣ ᨽᩮᩣᩁᩥᨠᩮᩣ. ᩁᩪᨸ᩠ᨿᩣᨩ᩠ᨫᨠ᩠ᨡᩮᨶᩥᨠ᩠ᨡᩥᨠᩮᩣ, ᨲᩈ᩠ᨾᩣ’ᨿ’ᨾᩩᨽᨿᨲᩕᩣᨸᩥ ᩉᩮᩁᨬ᩠ᨬᩥᨠᩮᩣᨲᩥ ᩈᩣᨾᨬ᩠ᨬᩈ᩠ᨾᩥᩴᨿᩮᩅ. ᩅᩩᨲ᩠ᨲᨬ᩠ᨧ –

‘‘ᨽᩮᩣᩁᩥᨠᩮᩣ ᨠᨶᨠᩣᨩ᩠ᨫᨠ᩠ᨡᩮᩣ,

ᩁᩪᨸ᩠ᨿᩣ’ᨩ᩠ᨫᨠ᩠ᨡᩮᩣ ᨲᩩ ᨶᩥᨠ᩠ᨡᩥᨠᩮᩣ’’ᨲᩥ [ᩋᨾᩁ ᪑᪘.᪗].

ᩈᩔ ᩋᨲ᩠ᨲᨶᩮᩣ ᩅᩥᨩᩥᨣᩦᩈᨽᩪᨲᩔ ᨴᩮᩈᩣᨶᨶ᩠ᨲᩁᩮᩣ ᩈᨾᨶ᩠ᨲᨲᩮᩣ ᨾᨱ᩠ᨯᩃᩦᨽᩪᨲᩮᩣ ᩁᩣᨩᩣ ᩈᨲ᩠ᨲᩩᩁᩩᨧ᩠ᨧᨲᩮ ᩑᨠᨲ᩠ᨳᩣᨽᩥᨶᩥᩅᩮᩈᩥᨲᨲ᩠ᨲᩣ. ᨲᨲᩮᩣ ᨸᩁᩴ ᩅᩥᨩᩥᨣᩦᩈᨽᩪᨾ᩠ᨿᩮᨠᨶ᩠ᨲᩁᩥᨠᩮᩣ ᨾᩥᨲ᩠ᨲᩮᩣ ᩑᨠᨲ᩠ᨳᨠᩣᩁᩥᨲ᩠ᨲᨶᩮᩣᨸᨠᩣᩁᨲ᩠ᨲᩣ. ᩋᩁᩥᩅᩥᨩᩥᨣᩦᩈᨾᩥᨲ᩠ᨲᩣᨶᩴ ᨸᨶ ᨾᨱ᩠ᨯᩃᩣᨶᩴ ᨻᩉᩥᨽᩪᨲᩮᩣ ᨴᩪᩁᨾᨱ᩠ᨯᩃᨭ᩠ᨮᩮᩣ ᩅᩥᨩᩥᨣᩦᩈᨽᩪᨾᩥᨿᩣ ᩋᨧ᩠ᨧᨶ᩠ᨲᨻ᩠ᨿᩅᩉᩥᨲᩮᩣ ᨻᩃᩣᨵᩥᨠᩮᩣᨸᩥ ᨿᩮᩣ ᨶᩣᨸᨠᩁᩮᩣᨲ᩠ᨿᩩᨸᨠᩣᩁᩮᩣᨲᩥ ᩅᩣ, ᩈ ᩏᨴᩣᩈᩦᨶᩮᩣ ᨴᩪᩁᨾᨱ᩠ᨯᩃᨲ᩠ᨲᩮᨶᩮᩣᨸᨠᩣᩁᨲ᩠ᨲᩣ. ᨴᩪᩁᨾᨱ᩠ᨯᩃᩮ ¶ ᩌᩈᨲᩦᨲᩥ ᩏᨴᩣᩈᩦᨶᩮᩣ, ᩏᨸᩩᨻ᩠ᨻᩮᩣ ᩌᩈ ᩏᨸᩈᩮᩅᨶᩮ, ᨿᩩ, ᩋᩔᩥ, ᨴᩣᨣᨾᩮᩣ ᨧ. ᩈᨲ᩠ᨲᩩᨾᨽᩥᨿᩩᨬ᩠ᨩᨾᩣᨶᩔ ᩅᩥᨩᩥᨣᩦᩈᩔ ᩈᨲ᩠ᨲᩩᩉᩥᨲᩣᨿ ᨿᩮᩣ ᨸᨱ᩠ᩉᩥᩴ ᨣᨱ᩠ᩉᨲᩥ ᨸᩥᨭ᩠ᨮᩥᨲᩮᩣ ᩅᨲ᩠ᨲᨲᩥ, ᩈᩮᩣ ᨸᨱ᩠ᩉᩥᨣ᩠ᨣᩣᩉᩮᩣ. ‘‘ᨸᨱ᩠ᩉᩥ ᨸᨧ᩠ᨨᩣ ᨸᨴᩴ ᩅᩥᨩᩥᨣᩦᩈᩔᩣ’’ᨲᩥ ᩁᨲᨶᨠᩮᩣᩈᩮ. ‘‘ᨸᨱ᩠ᩉᩥᨸᩣᨴᩮ ᨻ᩠ᨿᩪᩉᨸᩥᨭ᩠ᨮᩮ’’ᨲᩥ [ᨲᩥᨠᨱ᩠ᨯᩈᩮᩈ ᪓.᪓.᪑᪓᪔] ᨲᩥᨠᨱ᩠ᨯᩈᩮᩈᩮᩣ. ‘‘ᨸᨱ᩠ᩉᩥ ᨸᨧ᩠ᨨᩥᨾᨽᩣᨣᩮ ᨧ, ᨸᩣᨴᨾᩪᩃᩮᩣᨾᨴᩥᨭ᩠ᨮᩥᩈᩩ. ᩈᩮᨶᩣᨸᩥᨭ᩠ᨮᩮ ᨠᩩᨾ᩠ᨽᩥᨿᨬ᩠ᨧᩮ’’ᨲᩥ ᨲᩩ ᨶᩣᨶᨲ᩠ᨳᩈᨦ᩠ᨣᩉᩮ.

᪓᪔᪔-᪓᪔᪕. ᨴᩥᨭ᩠ᨮᨶ᩠ᨲᩴ ᩁᩥᨸᩩᨾ᩠ᩉᩥ. ᨾᩥᨲ᩠ᨲᨸᨭᩥᨸᨠ᩠ᨡᨲ᩠ᨲᩣ ᩋᨾᩥᨲ᩠ᨲᩮᩣ, ᩁᨸᨲ᩠ᨿᩅᨱ᩠ᨱᩴ ᩁᨩᨲᩮᨲᩥ ᩁᩥᨸᩩ, ᩏ, ᩍᨲ᩠ᨲᩴ, ᩁᨸ, ᩃᨸ, ᨩᨸ, ᨩᨸ᩠ᨸ ᩅᨧᨶᩮ ᩅᩣ. ᩅᩮᩁᩴ ᩅᩥᩁᩮᩣᨵᩮᩣ ᨿᩔᨲ᩠ᨳᩦᨲᩥ ᩅᩮᩁᩦ, ᩎ, ᨴᩩᨠ᩠ᨡᩉᩮᨲᩩᨲ᩠ᨲᩣ ᩈᨸᨲ᩠ᨲᩥ ᩍᩅ ᩈᨸᨲ᩠ᨲᩮᩣ, ᩍᩅᨲ᩠ᨳᩮ ᩋᨠᩣᩁᨸᨧ᩠ᨧᨿᩮᩣ. ᩋᩁ ᨣᨾᨶᩮ,ᨲᩥ, ᨽᩪᩅᩣᨴᩥᨲ᩠ᨲᩣ ᩌᨣᨾᩮᩣ. ᩈᨴ ᩈᩣᨴᨶᩮ, ᨲᩩ, ᨽᩪᩅᩣᨴᩥ, ᩈᨲ᩠ᨲᩩ, ᨿᩅᩣᨴᩥᨧᩩᨱ᩠ᨱᩮᨸᩥ. ᩋᩁ ᨣᨾᨶᩮ, ᩅᩮᩁᨾᩁᨲᩦᨲᩥ ᩋᩁᩥ, ᩁᩔᨶ᩠ᨲᩮᩣ ᩍ. ᩈᨸᨲ᩠ᨲᩣᨴᩦᨶᩴ ᨧᨲᩩᨶ᩠ᨶᩴ ᨴ᩠ᩅᨶ᩠ᨴᩮᩣ, ‘‘ᨻ᩠ᨿᨬ᩠ᨩᨶᩮᩣ ᨧ ᩅᩥᩈᩴᨿᩮᩣᨣᩮᩣ’’ᨲᩥ ᩈᩩᨲ᩠ᨲᩮ ᨧᨣ᩠ᨣᩉᨱᩮᨶ ᩑᨠᨲᨠᩣᩁᩔ ᩃᩮᩣᨸᩮᩣ ᨧ. ᨸᨲᩥᨿᨾᨲ᩠ᨳᨶᩴ ᨸᨧ᩠ᨧᨲ᩠ᨳᩮᩣ, ᨲᩴᨿᩮᩣᨣᩣ ᨸᨧ᩠ᨧᨲ᩠ᨳᩥᨠᩮᩣ, ᨸᨲᩥᨿᩴ ᩅᩥᨸᩁᩦᨲᨣᨾᨶᩴ. ᨸᨶ᩠ᨳ ᨣᨲᩥᨿᩴ, ᨧᩩᩁᩣᨴᩥ. ᨸᩁᩥᨸᨶ᩠ᨳᩮᩣ ᨸᩁᩥᩔᩅᨭ᩠ᨮᩣᨶᩴ, ᨲᩴᨿᩮᩣᨣᩣ ᨸᩁᩥᨸᨶ᩠ᨳᩦ. ᨸᨭᩥᩅᩥᩁᩩᨴ᩠ᨵᩮᩣ ᨸᨠ᩠ᨡᩮᩣ ᩈᩉᩣᨿᩮᩣ ᨸᨭᩥᨸᨠ᩠ᨡᩮᩣ, ᨲᨳᩣ ᩅᩥᨸᨠ᩠ᨡᩮᩣ. ᨶ ᩉᩥᨲᩮᩣ ᩋᩉᩥᨲᩮᩣ. ᩉᩥᩴᩈᩣᨿᩴ ᩁᨾᨲᩦᨲᩥ [ᨸᩁᨲᩦᨲᩥ (?)] ᨸᩁᩮᩣ, ᨠ᩠ᩅᩥ. ᨸᨭᩥᨸᨠ᩠ᨡᨽᩣᩅᩮᨶ ᩋᨾᨲᩥ ᨣᨧ᩠ᨨᨲᩦᨲᩥ ᨸᨧ᩠ᨧᩣᨾᩥᨲ᩠ᨲᩮᩣ, ᩋᨾ ᨣᨾᨶᩮ, ᨲᩮᩣ, ᨴ᩠ᩅᩥᨲ᩠ᨲᩴ. ᨶᨲ᩠ᨳᩥ ᩑᨲᩈ᩠ᨾᩣ ᩎᨲᩥ ᩏᨸᨴ᩠ᨴᩅᩮᩣᨲᩥ ᩋᨶᩦᨲᩮᩣ ¶ , ᨾᩥᨲ᩠ᨲᩮᩣ, ᨲᨸ᩠ᨸᨭᩥᨸᨠ᩠ᨡᩮᩣ ᨸᨧ᩠ᨧᨶᩦᨲᩮᩣ, ᩈᩮᩣ ᩑᩅ ᨸᨧ᩠ᨧᨶᩦᨠᩮᩣ, ᨲᩔ ᨠᩮᩣ, ᨿᨳᩣ ᨶᩥᨿᨠᩮᩣ. ᩅᩥᩁᩮᩣᨵᩮᩣᩔᨲ᩠ᨳᩦᨲᩥ ᩅᩥᩁᩮᩣᨵᩦ, ᩎ. ᨴᩥᩈ, ᨴᩩᩈ ᩋᨸ᩠ᨸᩦᨲᩥᨿᩴ, ᨴᩥᩅᩣᨴᩥ. ᩅᩥᨴᩩᩔᨶᩈᩦᩃᨲᩣᨿ ᩅᩥᨴ᩠ᨴᩮᩈᩦ, ᨴ᩠ᩅᩥᨲ᩠ᨲᩴ, ᩍᩔᩮᨲ᩠ᨲᩴ. ᨴᩩᩔᨲᩦᨲᩥ ᨴᩥᩈᩮᩣ, ᩋ. ᨲᨸᨧ᩠ᨧᨿᩮ ᨴᩥᨭ᩠ᨮᩮᩣ, ᨵᩣᨲ᩠ᩅᨶ᩠ᨲᩮᨶ ᩈᩉ ᨭ᩠ᨮᩣᨴᩮᩈᩮᩣ. ᨴ᩠ᩅᩮᩈᨱᩮᩣ, ᨴᩩᩉᨴᨿᩮᩣ, ᨴᩔᩩ, ᩈᩣᨲ᩠ᨲᩅᩮᩣ, ᩋᨽᩥᨥᩣᨲᩦᨸ᩠ᨿᨲᩕ.

ᨴ᩠ᩅᨿᩴ ᩋᨶᩩᨠᩪᩃᨶᩮ. ᩋᨶᩩᩁᩮᩣᨵᨶᩴ ᩋᨶᩩᩁᩮᩣᨵᩮᩣ, ᨱᩮᩣ. ᩁᩩᨵ ᩌᩅᩁᨱᩮ. ᩋᨶᩩᩁᩪᨸᩴ ᨸᩅᨲ᩠ᨲᨶᩴ ᩋᨶᩩᩅᨲ᩠ᨲᨶᩴ, ᩅᨲᩩ ᩅᨲ᩠ᨲᨶᩮ, ᨽᩪ, ᨿᩩ.

᪓᪔᪖. ᨸᨬ᩠ᨧᨠᩴ ᨾᩥᨲ᩠ᨲᩈᩣᨾᨬ᩠ᨬᩮ. ᨾᩥᨴ ᩈ᩠ᨶᩮᩉᩮ, ᨽᩪᩅᩣᨴᩥ, ᨲᩮᩣ, ᩅᨿᩈᩣ ᨲᩩᩃ᩠ᨿᩮᩣ ᩅᨿᩈᩮᩣ, ᨾᩪᩃᩅᨿᩮᩣᩈᨴ᩠ᨴᩮᩉᩥ ᩈᨬ᩠ᨬᩣᨿᩴ ᩈᨸᨧ᩠ᨧᨿᩮᩣ [ᨿᨸᨧ᩠ᨧᨿᩮᩣ (?) ᨸᩣᨱᩥᨶᩥ ᪔.᪔.᪙᪑ ᩈᩩᨲ᩠ᨲᩴ ᨸᩔᩥᨲᨻ᩠ᨻᩴ], ᩈᨻ᩠ᨻᨠᩣᩁᩥᨿᩮᩈᩩ ᩈᩉ ᩅᨿᨲᩦᨲᩥ ᩅᩣ ᩅᨿᩈᩮᩣ, ᩅᨿ ᨣᨾᨶᩮ, ᩈᩉᩔ ᩈᩮᩣ ᩅᨱ᩠ᨱᩅᩥᨸᩁᩥᨿᨿᩮᩣ. ᩈᩉ ᩋᨿᨲᩥ ᨠᩥᨧ᩠ᨧᩮᩈᩪᨲᩥ ᩈᩉᩣᨿᩮᩣ, ᩋᨿ ᨣᨾᨶᩮ, ᩈᩉᩔ ᩈᩣᨽᩣᩅᩮᩣ, ᨿᨳᩣ ᩈᩉᨵᨾ᩠ᨾᩥᨠᩮᩣ. ᩈᩉ ᩅᩣ ᩉᩣᨶᩥ, ᩋᨿᩮᩣ ᩅᩣ ᩅᩩᨯ᩠ᨰᩥ ᨿᩔ ᩈᩉᩣᨿᩮᩣ, ᨲᩥᨸᨴᨻᩉᩩᨻ᩠ᨻᩦᩉᩥ, ᨿᨳᩣ ᨸᩁᨠ᩠ᨠᨾᩣᨵᩥᨣᨲᩈᨾ᩠ᨸᨴᩣ. ᩋᨳ ᩅᩣ ᩉᩣᨶᩥ ᨧ ᩌᨿᩮᩣ ᨧ ᩉᩣᨿᩣ, ᨶᩥᩃᩮᩣᨸᩮᩣ, ᨲᩮ ᨿᩔ ᩋᨲ᩠ᨳᩥ, ᩈᩮᩣ ᩈᩉᩣᨿᩮᩣ, ‘‘ᩈᨸᨠ᩠ᨡᨠᩮᩣ, ᩈᩃᩮᩣᨾᨠᩮᩣ’’ᨲ᩠ᨿᩣᨴᩦᩈᩩ ᩅᩥᨿ ᩈᩈᨴ᩠ᨴᩔ ᩅᩥᨩ᩠ᨩᨾᩣᨶᨲ᩠ᨳᨲ᩠ᨲᩣ. ᩈᩩᨶ᩠ᨴᩁᩴ ᩉᨴᨿᨾᩮᨲᩔᩣᨲᩥ ᩈᩩᩉᨴᨿᩮᩣ, ᩋᩃᩮᩣᨸᩮᩣ, ᨴ᩠ᨿᩔ ᨩᩮᩣ, ᩈᩮᩣᩅ ᩈᩩᩉᨩ᩠ᨩᩮᩣ. ᩈᩉ ᨸᩁᩥᩈᩉᨶᩮ. ᨸᩁᩥᩈᩉᨶᩴ ᩋᨴᩩᩔᨶᩴ, ᨡᩮᩣ, ᩉᩃᩮᩣᨸᩮᩣ, ᩈᨡᩣ, ᩁᩣᨩᩣᨴᩥ, ᩈᨾᩣᨶᩮᩣ ᨡ᩠ᨿᩣᨲᩮᩣ ᨸᨲᩦᨲᩮᩣ ᩅᩣ ᩈᨡᩣ, ᨿᩃᩮᩣᨸᩮᩣ, ᩈᨾᩣᨶᩔ ¶ ᨧ ᩈᨽᩣᩅᩮᩣ. ᩈᩥᨶᩥᨴ᩠ᨵᩮᩣ, ᩈ᩠ᨶᩥᨴ᩠ᨵᩮᩣ, ᩈᩅᨿᩮᩣᨸ᩠ᨿᨲᩕ. ᩈᨡ᩠ᨿᩈᨲ᩠ᨲᨸᨴᩥᨶᩣ ᨸᨶ ᨾᩮᨲ᩠ᨲᩥᨿᩴ ᩅᨲ᩠ᨲᨶ᩠ᨲᩥ. ᩈᨡᩥᨾ᩠ᩉᩥ ᨽᩅᩴ ᩈᨡ᩠ᨿᩴ. ᩈᨲ᩠ᨲᩉᩥ ᨸᨴᩮᩉᩥ ᩋᩅᨣᨾ᩠ᨿᨲᩮᨲᩥ ᩈᨲ᩠ᨲᨸᨴᩥᨶᩴ [ᩈᨲ᩠ᨲᨸᨴᩦᨶ (ᩋᨾᩁ ᪑᪘.᪑᪒)], ᩍᨶᩮᩣ.

ᨴ᩠ᩅᨿᩴ ᩋᨽᩮᨩ᩠ᨩᨾᩥᨲ᩠ᨲᩮ. ᩈᨻ᩠ᨻᨠᩣᩃᩴ ᨽᨩᨲᩦᨲᩥ ᩈᨾ᩠ᨽᨲ᩠ᨲᩮᩣ, ᨽᨩ ᩈᩮᩅᩣᨿᩴ, ᨽᩪᩅᩣᨴᩥ. ᨴᩊ᩠ᩉᩮᩣ ᨳᩥᩁᩮᩣ ᨾᩥᨲ᩠ᨲᩮᩣ ᨴᩊ᩠ᩉᨾᩥᨲ᩠ᨲᩮᩣ. ᨴ᩠ᩅᨿᩴ ᨴᩥᨭ᩠ᨮᨾᨲ᩠ᨲᨾᩥᨲ᩠ᨲᩮ. ᨠᩥᨬ᩠ᨧᩥ ᨠᩣᩃᩴ ᨸᩔᩥᨲᨻ᩠ᨻᩮᩣᨲᩥ ᩈᨶ᩠ᨴᩥᨭ᩠ᨮᩮᩣ. ᩈᩴᩈᨴ᩠ᨴᩮᩣᨿᨾᨸ᩠ᨸᨲ᩠ᨳᩮᩣ. ᨴᩥᩈ ᨸᩮᨠ᩠ᨡᨶᩮ, ᨴᩔᨶᩴ ᨴᩥᨭ᩠ᨮᩴ, ᨲᩴ ᨾᨲ᩠ᨲᩣ ᨸᨾᩣᨱᨾᩮᨲᩔ ᨴᩥᨭ᩠ᨮᨾᨲ᩠ᨲᨠᩮᩣ, ᩈᨠᨲ᩠ᨳᩮ ᨠᩮᩣ.

᪓᪔᪗. ᨴ᩠ᩅᨿᩴ ᨧᩁᨸᩩᩁᩥᩈᩮ ᨲᩣᨸᩈᩣᨴᩥᩁᩪᨸᩮᨶ ᨧᩁᨾᨲ᩠ᨲᩮ. ᨧᩁᨲᩥ ᨩᩣᨶᩣᨲᩥ ᨸᩁᨧᨠ᩠ᨠᨶ᩠ᨲᩥ ᨧᩁᩮᩣ, ᩋ, ᨧᩣᩁᩮᩣᨸᩥ, ᨱᩮᩣ. ᨣᩩᩊ᩠ᩉᨸᩩᩁᩥᩈᩮᩣ ᨣᩩᨲ᩠ᨲᨸᩩᩁᩥᩈᩮᩣ. ᨿᨳᩣᩁᩉᩅᨱ᩠ᨱᩮᩣ, ᨸᨱᩥᨵᩥ, ᩋᨸ᩠ᨸᩈᨸᩮᩣ, ᨹᩔᩮᩣᨸ᩠ᨿᨲᩕ. ᨲᨲᩕᩣᨴᩥᨴ᩠ᩅᨿᩴ ᩅᩣᨱᩥᨩᨠᩈᩥᨻᩃᩃᩥᨦ᩠ᨣᨽᩥᨠ᩠ᨡᩩᨠᨧ᩠ᨧᩣᨿᨶᩣᨴᩥᩃᩮᩈᩮᨶ ᨳᩣᨿᩥᨶᩥᨧᩁᩮ. ᩍᨲᩁᩮ ᩍᨵᩣᨣᨲᩈᨴᩥᩈᨲ᩠ᨳᩮ. ᩅᨱ᩠ᨱᩮᩣ ᨸᨠᩣᩁᩮᩣ, ᨿᨳᩣᩁᩉᩅᨱ᩠ᨱᩮᩣ ᨿᨳᩣᩁᩉᨸ᩠ᨸᨠᩣᩁᩮᩣ. ᨿᩮᨶ ᨸᩁᨧᨠ᩠ᨠᩴ ᩈᨠ᩠ᨠᩣ ᨬᩣᨲᩩᩴ ᨲᨸ᩠ᨸᨠᩣᩁᩅᩣ ᩍᨧ᩠ᨧᨲ᩠ᨳᩮᩣ. ᨸᨱᩥᨵᩥᨿ᩠ᨿᨲᩮ ᨬᩮᨿ᩠ᨿᨾᩈ᩠ᨾᩥᩴ ᨸᨱᩥᨵᩥ, ᩍ. ᩋᨸᨠᨭ᩠ᨮᩴ ᩈᨸ᩠ᨸᨲᩥ ᨧᩁᨲᩦᨲᩥ ᩋᨸᩈᨸ᩠ᨸᩮᩣ, ᩋ. ᨹᩩᩈ ᨻᩣᨵᨶᨹᩩᩈᨶᩮᩈᩩ, ᩋ, ᨹᩔᩮᩣ.

ᨲᩥᨠᩴ ᨸᨳᩥᨠᩮ. ᨸᨳᩮ ᨣᨧ᩠ᨨᨲᩦᨲᩥ ᨸᨳᩣᩅᩦ, ᩅᩦ, ᨴᩦᨥᩮᩣ. ᩍᨠᩮᩣ, ᨸᨳᩥᨠᩮᩣ. ᩋᨴ᩠ᨵᨶᩥ ᨾᨣ᩠ᨣᩮ ᨣᨧ᩠ᨨᨲᩥ ᩈᩦᩃᩮᨶᩣᨲᩥ ᩋᨴ᩠ᨵᨣᩪ. ᩋᨴ᩠ᨵᨣᩮᩣᨸ᩠ᨿᨲᩕ.

ᨴ᩠ᩅᨿᩴ ᨴᩪᨲᩮ. ᨴᩩ ᨸᩁᩥᨲᩣᨸᩮ, ᨲᩮᩣ. ᩈᨶ᩠ᨴᩮᩈᩴ ᩅᩣᨧᩥᨠᩴ ᩉᩁᨲ᩠ᨿᨶᩮᨶᩮᨲᩥ [ᩉᩁᨲᩦᨲᩥ (?)].

ᨴ᩠ᩅᨿᩴ ¶ ᨩᩮᩣᨲᩥᩈᩥᨠᩮ. ᨣᨱᨿᨲᩦᨲᩥ ᨣᨱᨠᩮᩣ, ᨱ᩠ᩅᩩ. ᨾᩩᩉᩩᨲ᩠ᨲᩴ ᨠᩣᩃᩅᩥᩈᩮᩈᩴ ᨩᩣᨶᩣᨲᩦᨲᩥ ᨾᩩᩉᩩᨲ᩠ᨲᩥᨠᩮᩣ, ᩅᩣᨣ᩠ᨣᩉᨱᩮᨶ ᨶ ᩅᩩᨴ᩠ᨵᩥ. ᩈᩴᩅᨧ᩠ᨨᩁᩮᩣ, ᨩᩮᩣᨲᩥᩈᩥᨠᩮᩣ, ᨴᩮᩅᨬ᩠ᨬᩪ, ᨾᩮᩣᩉᩩᨲ᩠ᨲᩮᩣ, ᨬᩣᨱᩥᨠᩮᩣ, ᨠᩣᨲᨶ᩠ᨲᩥᨠᩮᩣᨸ᩠ᨿᨲᩕ. ᨠᨲᨶ᩠ᨲᩮᩣ ᨴᩮᩅᨾᨲ᩠ᨲᩴ, ᨲᩴ ᨩᩣᨶᩣᨲᩦᨲᩥ ᨠᩣᨲᨶ᩠ᨲᩥᨠᩮᩣ.

᪓᪔᪘. ᨴ᩠ᩅᨿᩴ ᩃᩮᨡᨠᩮ. ᩃᩥᨡ ᩃᩮᨡᨶᩮ, ᨽᩪ, ᨱ᩠ᩅᩩ. ᩃᩥᨸᩮᨶ ᨾᩈ᩠ᨿᩮᩣᨸᨴᩮᩈᩮᨶ ᨽᩅᨲᩦᨲᩥ ᩃᩥᨸᩥ, ᩍ, ᩅᨱ᩠ᨱᩈᨱ᩠ᨮᩣᨶᩮᩣ, ᨲᩴ ᨠᩁᩮᩣᨲᩦᨲᩥ ᩃᩥᨸᩥᨠᩣᩁᩮᩣ. ᩋᨠ᩠ᨡᩁᨧᨱᩮᩣ, ᩋᨠ᩠ᨡᩁᨧᩩᨬ᩠ᨧᩩᨸ᩠ᨿᨲᩕ. ᨧᨶ ᨴᩣᨶᩮ, ᨽᩪ. ᨧᨬ᩠ᨧᩩ ᨣᨲᩥᨿᩴ.

ᨾᩮᩃᩣᨶᨶ᩠ᨴᩣ ᨾᩈᩥᨾᨱᩥ, ᨾᩮᩃᨶ᩠ᨵᩩ ᩅᨱ᩠ᨱᨠᩪᨸᩥᨠᩣ;

ᨾᩈᩥᨩᩃᨶ᩠ᨲᩩ ᨾᩮᩃᩣ ᨧ, ᨸᨲ᩠ᨲᨬ᩠ᨩᨶᩴ ᨾᩈᩥ ᨴ᩠ᩅᩥᩈᩩ.

ᩃᩮᨡᨶᩦ ᩅᨱ᩠ᨱᨲᩪᩃᩦ ᨧ, ᩅᨱ᩠ᨱᨠᨠ᩠ᨡᩁᨲᩪᩃᩥᨠᩣ;

ᩅᨱ᩠ᨱᨴᩪᨲᩮᩣ ᩈᩮᩣᨲ᩠ᨳᩥᨾᩩᨡᩮᩣ, ᩃᩮᨡᩮᩣ ᩅᩣᨧᩥᨠᩉᩣᩁᨠᩮᩣ.

ᨠᩣᨧᨶᨠᩥᨲᩃᩥᨠᩮᩣ ᨧ, ᨠᩣᨧᨶᩴ ᨲᨶ᩠ᨶᩥᨻᨶ᩠ᨵᨶᩴ;

ᩃᩮᨡ᩠ᨿᨭ᩠ᨮᩣᨶᩴ ᨣᨶ᩠ᨳᨠᩩᨭᩥ, ᨾᩩᨴ᩠ᨴᩣ ᨸᨧ᩠ᨧᨿᨠᩣᩁᩥᨶᩦ [ᨲᩥᨠᨱ᩠ᨯᩈᩮᩈ ᪒.᪘.᪒᪗, ᪒᪘, ᪒᪙].

ᨴ᩠ᩅᨿᩴ ᩅᨱ᩠ᨱᩮ. ᩅᨱ᩠ᨱᩦᨿᨲᩥ ᨸᨠᩣᩈᩦᨿᨲᩥ ᩋᨲ᩠ᨳᩮᩣ ᨿᩮᨶ, ᩈᩮᩣ ᩅᨱ᩠ᨱᩮᩣ, ᩅᨱ᩠ᨱ ᨸᨠᩣᩈᨶᩮ. ᨶ ᨡᩁᨲᩥ ᨶ ᨡᩦᨿᨲᩦᨲᩥ ᩋᨠ᩠ᨡᩁᩮᩣ, ᨡᩁ ᩅᩥᨶᩣᩈᩮ, ᨡᩥ ᨡᨿᩮ ᩅᩣ, ᨲᨴᩣ ᩋᩁᩮᩣ. ᩃᩥᨡᨶᩴ, ᩃᩥᨸᩥ, ᩃᩥᨡᩥ ᩍᨾᩮ ᩅᨱ᩠ᨱᩈᨱ᩠ᨮᩣᨶᩮ ᩅᨲ᩠ᨲᨶ᩠ᨲᩥ. ᩃᩥᨸᩥᩃᩥᨡᩥᨿᩮᩣ ᩍᨲ᩠ᨳᩥᨿᩴ.

ᨽᩮᨴᩣᨴᨿᩮᩣ ᩍᨾᩮ ᨧᨲᩩᩁᩮᩣ ᩏᨸᩣᨿᩣ ᩈᨲ᩠ᨲᩩᩅᩥᨩᨿᨠᩣᩁᨱᩣᨶᩥ. ᩈᨲ᩠ᨲᩩᩅᩥᨩᨿᨾᩩᨸᨣᨧ᩠ᨨᨶ᩠ᨲᩥ ᩑᨲᩮᩉᩦᨲᩥ ᩏᨸᩣᨿᩣ. ᨸᩁᩈ᩠ᨾᩣ ᩅᩥᩈᩥᩃᩮᩈᨶᩴ ᨽᩮᨴᩮᩣ.

ᩈ᩠ᨶᩮᩉᩁᩣᨣᩣᨸᨶᨿᨶᩴ ¶ , ᩈᩴᩉᩣᩈᩮᩣᨸ᩠ᨸᩣᨴᨶᩴ ᨲᨳᩣ;

ᩈᨶ᩠ᨲᨩ᩠ᨩᨶᨬ᩠ᨧ ᨽᩮᨴᩮᩣᨿᩴ, ᩅᩥᨬ᩠ᨬᩪᩉᩥ ᨲᩥᩅᩥᨵᩮᩣ ᨾᨲᩮᩣ [ᨠᩣᨾᨶ᩠ᨴᨠᩦᨿᨶᩦᨲᩥᩈᩣᩁ ᪑᪗.᪘].

ᨲᨲᩕᩣᨿᩴ ᨲᩅᩣᨶᩩᨣ᩠ᨣᨲᩮᨶ ᨸᩅᩩᨴ᩠ᨵᩮᩣ ᨸᩣᩈᩣᨴᨲᩁᩅᩮᩣ ᩅᩥᨿ ᩋᨲ᩠ᨲᩣᨶᨬ᩠ᨧᩮᩣᨧ᩠ᨨᩥᨶ᩠ᨴᩥᩔᨲᩦᨲᩥ ᩈᨦ᩠ᨠᩣᨿᩴ ᨩᨶᩥᨲᩣᨿᩴ ᩈ᩠ᨶᩮᩉᨽᨲ᩠ᨲᩥᨬ᩠ᨧᩣᨸᨶᨿᨲᩥ. ᩋᨽᩥᨽᩅᨶᨬ᩠ᨧᩮᩣᨸᩣᨴᨿᨲᩥ [ᨸᨴ᩠ᨵᨬ᩠ᨧᩮᩣᨸᩣᨴᨿᨲᩥ (ᨠ.)]. ᩋᨬ᩠ᨬᩔ ᨧ ᨸᩁᩥᨿᨸᨧ᩠ᨧᩣᨾᩥᨲ᩠ᨲᩣᨶᩩᨣ᩠ᨣᩉᨱᩔ ᨾᩁᨱᨾᩮᩅᨶ᩠ᨲᩮᩣ ᨽᩅᩥᩔᨲᩦᨲ᩠ᨿᩮᩅᩴᨸᨠᩣᩁᨾᨽᩥᨽᨿᨶᩴ ᩈᨶ᩠ᨲᨩ᩠ᨩᨶᩴ.

ᩅᨵᩮᩣᨲ᩠ᨳᨣ᩠ᨣᩉᨱᨬ᩠ᨧᩮᩅ, ᨸᩁᩥᨠ᩠ᩃᩮᩈᩮᩣ ᨲᨳᩮᩅ ᨧ;

ᩍᨲᩥ ᨴᨱ᩠ᨯᩅᩥᨵᨬ᩠ᨬᩪᩉᩥ, ᨴᨱ᩠ᨯᩮᩣᨸᩥ ᨲᩥᩅᩥᨵᩮᩣ ᨾᨲᩮᩣ [ᨠᩣᨾᨶ᩠ᨴᨠᩦᨿᨶᩦᨲᩥᩈᩣᩁ ᪑᪗.᪙].

ᨸᩁᩥᨠ᩠ᩃᩮᩈᩮᩣ ᨻᨶ᩠ᨵᨶᨲᩣᩊᨶᩣᨴᩥ.

ᩋᨬ᩠ᨬᨾᨬ᩠ᨬᩮᩣᨸᨠᩣᩁᩣᨶᩴ, ᨴᩔᨶᩴ ᨣᩩᨱᨠᩥᨲ᩠ᨲᨶᩴ;

ᩈᨾ᩠ᨻᨶ᩠ᨵᩔ ᩈᨾᨠ᩠ᨡᩣᨶᩴ, ᩌᨿᨲᩥᩴ ᩈᨾ᩠ᨸᨠᩣᩈᨶᩴ.

ᩅᩣᨧᩣ ᨸᩮᩈᩃᨿᩣ ᩈᩣᨵᩩ, ᨲᩅᩣᩉᨾᩥᨲᩥ ᨧᨸ᩠ᨸᨱᩴ;

ᩍᨲᩥ ᩈᩣᨾᩅᩥᨵᨬ᩠ᨬᩪᩉᩥ, ᩈᩣᨾᩴ ᨸᨬ᩠ᨧᩅᩥᨵᩴ ᨾᨲᩴ [ᨠᩣᨾᨶ᩠ᨴᨠᩦᨿᨶᩦᨲᩥᩈᩣᩁ ᪑᪗.᪔-᪕].

‘‘ᩋᩈ᩠ᨾᩥᩴ ᩑᩅᩴ ᨠᨲᩮ ᩍᨴᩴ ᩋᨾ᩠ᩉᩣᨠᩴ ᨽᩅᩥᩔᨲᩦ’’ᨲᩥ ᩌᩈᩣᨴᩔᨶᩴ ᩌᨿᨲᩥᩈᨾ᩠ᨸᨠᩣᩈᨶᩴ. ᩋᨸ᩠ᨸᨱᨾᩥᨲ᩠ᨿᨦ᩠ᨣᩔ ᨴᩣᨶᩴ.

ᨴᩣᨶᨬ᩠ᨧ ᨸᨬ᩠ᨧᨵᩣ ᩈᩣᩁᩔᩣᩈᩣᩁᩔ ᨧ ᨴᨻ᩠ᨻᩔ ᨣᩉᩥᨲᩔ ᩈᨾᨸ᩠ᨸᨱᩴ, ᨲᨳᩣᨣᩉᩥᨲᩔᩣᨶᩩᨾᩮᩣᨴᨶᩴ, ᨲᨳᩣ ᩋᨸᩩᨻ᩠ᨻᨴᩣᨶᩴ, ᨲᨳᩣ ‘‘ᩋᨾᩩᩔ ᨴᨻ᩠ᨻᩴ ᨣᨱ᩠ᩉᩣᩉᩥ, ᨲᨳᩮᩅ ᨽᩅᩥᩔᨲᩦ’’ᨲᩥ ᨸᩁᩈᩮᩈᩩ ᩈᨿᩴ ᨣᩣᩉᨸ᩠ᨸᩅᨲ᩠ᨲᨶᩴ, ᨲᨳᩣ ᩍᨱᨸ᩠ᨸᨾᩮᩣᨧᨶᨬ᩠ᨧᩮᨲᩥ. ᨿᨳᩣᩉ –

‘‘ᨿᩮᩣ ᩈᨾ᩠ᨸᨲ᩠ᨲᨵᨶᩮᩣᩔᨣ᩠ᨣᩮᩣ, ᩏᨲ᩠ᨲᨾᨾᨩ᩠ᨫᩥᨾᩣᨵᨾᩮᩣ;

ᨸᨲᩥᨴᩣᨶᩴ ᨲᨳᩣ ᨲᩔ, ᨣᩉᩥᨲᩔᩣᨶᩩᨾᩮᩣᨴᨶᩴ.

ᨴᨻ᩠ᨻᨴᩣᨶ’ᨾᨸᩩᨻ᩠ᨻᨬ᩠ᨧ ¶ , ᩈᨿᩴ ᨣᩣᩉᨸ᩠ᨸᩅᨲ᩠ᨲᨶᩴ;

ᨴᩮᨿ᩠ᨿᩔ ᨸᨭᩥᨾᩮᩣᨠ᩠ᨡᩮᩣ ᨧ, ᨴᩣᨶᩴ ᨸᨬ᩠ᨧᩅᩥᨵᩴ ᨾᨲ’’ᨶ᩠ᨲᩥ [ᨠᩣᨾᨶ᩠ᨴᨠᩦᨿᨶᩦᨲᩥᩈᩣᩁ ᪑᪗.᪖-᪗].

ᩑᨲᩮ ᨧᨲ᩠ᨲᩣᩁᩮᩣ ᩏᨸᩣᨿᩣ ᨾᩣᨿᩣᨴᩦᩈ᩠ᩅᩮᩅᨶ᩠ᨲᩮᩣᨣᨵᩣ, ᨲᨳᩣ ᩉᩥ ᨾᩣᨿᩮᩣᨸᩮᨠ᩠ᨡᩣ ᨧ ᨴᨱ᩠ᨯᨶ᩠ᨲᩮᩣᨣᨵᩣ. ᩍᨶ᩠ᨴᨩᩣᩃᨬ᩠ᨧ ᨽᩮᨴᩮ ᩋᨶ᩠ᨲᩮᩣᨣᨵᩴ. ᨠᩮᨧᩥ ᨸᨶᩣᩉᩩ

‘‘ᩈᩣᨾᩴ ᨴᩣᨶᨬ᩠ᨧ ᨽᩮᨴᩮᩣ ᨧ, ᨴᨱ᩠ᨯᩮᩣ ᨧᩮᨲᩥ ᨧᨲᩩᨠ᩠ᨠᨠᩴ;

ᨾᩣᨿᩮᩣᨸᩮᨠ᩠ᨡᩥᨶ᩠ᨴᨩᩣᩃᨬ᩠ᨧ, ᩈᨲ᩠ᨲᩮᩣᨸᩣᨿᩣ ᨸᨠᩥᨲ᩠ᨲᩥᨲᩣ’’ᨲᩥ [ᨠᩣᨾᨶ᩠ᨴᨠᩦᨿᨶᩦᨲᩥᩈᩣᩁ ᪑᪗.᪓].

᪓᪔᪙. ᨶᩣᨾᨾᨲ᩠ᨲᩮᨶ ᩅᩩᨲ᩠ᨲᩣᨶᩴ ᨽᩮᨴᩣᨴᩦᨶᨾᩥᨴᩣᨶᩥ ᨸᩁᩥᨿᩣᨿᩣᨶ᩠ᨿᩣᩉ. ᨲᨲᩕ ᨴ᩠ᩅᨿᩴ ᨽᩮᨴᩮ. ᨩᨸ ᨾᩣᨶᩈᩮ ᨧ [ᨩᨸᩮᩣ ᨧᩥᨶ᩠ᨲᨶᩅᩣᨧᩣᩈᩩ (ᨵᩣᨲ᩠ᩅᨲ᩠ᨳᩈᨦ᩠ᨣᩉ, ᪑᪓᪕ ᨣᩣᨳᩣ)], ᨽᩪ, ᨱᩮᩣ. ᨽᩥᨴᩥ ᨴ᩠ᩅᩥᨵᩣᨠᩁᨱᩮ, ᨱᩮᩣ.

ᨲᩥᨠᩴ ᨴᨱ᩠ᨯᩮ. ᨴᨱ᩠ᨯ ᨶᩥᨸᩣᨲᨶᩮ, ᨧᩩᩁᩣᨴᩥ. ᩈᩉᩮᩣ ᩅᩩᨧ᩠ᨧᨲᩥ ᨻᩃᩴ, ᨲᨻ᩠ᨽᩅᩴ ᩈᩣᩉᩈᩴ. ᨴᨾᨶᩴ ᨴᨾᩮᩣ, ᨴᩦᨥᨸᨭᩥᩈᩮᨵᩮᩣ.

᪓᪕᪐. ᩈᩣᨾᩴ ᩈᩩᨴ᩠ᨴᩅᨣ᩠ᨣᩮ, ᨴᩣᨶᨬ᩠ᨧ ᨻᩕᩣᩉ᩠ᨾᨱᩅᨣ᩠ᨣᩮ ᨠᨳᩮᩔᨲᩥ. ᩈᩣᨾ᩠ᨿᩣᨴᨿᩮᩣ ᩈᨲ᩠ᨲᩁᩮᩅᩣᨧᩁᩥᨿᨾᨲᩮ. ᨸᩁᨾ᩠ᨸᩁᩮᩣᨸᨠᩣᩁᩥᨲ᩠ᨲᩣ ᩁᨩ᩠ᨩᩔᨦ᩠ᨣᩣᨶᩥ. ᨸᨠᨭ᩠ᨮᨾᩩᨸᨠᩩᨻ᩠ᨻᨶ᩠ᨲᩥ ᩁᨩ᩠ᨩᨶ᩠ᨲᩥ ᨸᨠᨲᩥᨿᩮᩣᨲᩥ ᨧᩮᩣᨧ᩠ᨧᨶ᩠ᨲᩮ. ᩅᩩᨲ᩠ᨲᨬ᩠ᨧ ᨠᩣᨾᨶ᩠ᨴᨠᩦᨿᩮ –

‘‘ᩈᩣᨾ᩠ᨿ’ᨾᨧ᩠ᨧᨬ᩠ᨧ ᩁᨭ᩠ᨮᨬ᩠ᨧ, ᨴᩩᨣ᩠ᨣᩴ ᨠᩮᩣᩈᩮᩣ ᨻᩃᩴ ᩈᨡᩣ;

ᨸᩁᨾ᩠ᨸᩁᩮᩣᨸᨠᩣᩁᩦᨴᩴ, ᩈᨲ᩠ᨲᨦ᩠ᨣᩴ ᩁᨩ᩠ᨩᨾᩩᨧ᩠ᨧᨲᩮ [ᨠᩣᨾᨶ᩠ᨴᨠᩦᨿᨶᩦᨲᩥᩈᩣᩁ ᪔.᪑].

ᩋᨾᨧ᩠ᨧᩁᨭ᩠ᨮᨴᩩᨣ᩠ᨣᩣᨶᩥ ¶ , ᨠᩮᩣᩈᩮᩣ ᨴᨱ᩠ᨯᩮᩣ ᨧ ᨸᨬ᩠ᨧᨾᩮᩣ;

ᩑᨲᩣ ᨸᨠᨲᩥᨿᩮᩣ ᩅᩩᨲ᩠ᨲᩣ, ᩅᩥᨩᩥᨣᩦᩈᩔ ᩁᩣᨩᩥᨶᩮᩣ.

ᩑᨲᩣ ᨸᨬ᩠ᨧ ᨲᨳᩣ ᨾᩥᨲ᩠ᨲᩴ, ᩈᨲ᩠ᨲᨾᩮᩣ ᨸᨳᩅᩦᨸᨲᩥ;

ᩈᨲ᩠ᨲᨸ᩠ᨸᨠᨲᩥᨠᩴ ᩁᨩ᩠ᨩᩴ, ᩍᨧ᩠ᨧᩣᩉ ᩈᩪᩁᨸᩪᨩᩥᨲᩮᩣ’’ᨲᩥ.

ᨲᨲᩕ ᨸᩮᩣᩁᩈᩮᨱᩦᨶᩴ ᨸᨵᩣᨶᨽᩣᩅᩮᨸᩥ ᩈᨲᩥ ᩁᨭ᩠ᨮᨣ᩠ᨣᩉᨱᩮᨶ, ᨻᩃᨣ᩠ᨣᩉᨱᩮᨶ ᩅᩣ ᨣᩉᨱᩈᩥᨴ᩠ᨵᨶ᩠ᨲᩥ ᨶᩮᩉ ᩅᩥᩈᩩᩴ ᨣᩉᨱᩴ ᨠᨲᩴ, ᩋᨾᩁᨠᩮᩣᩈᩮ ᨸᨶ ᨴ᩠ᩅᩦᩉᩥ ᨣᩉᨱᩮ ᩈᩥᨴ᩠ᨵᩮᨸᩥ ᨸᨵᩣᨶᨲ᩠ᨲᩣᨡ᩠ᨿᩣᨸᨶᨲ᩠ᨳᩴ ᩅᩥᩈᩩᩴ ᨣᩉᩥᨲᩣ. ᩅᩩᨲ᩠ᨲᨬ᩠ᩉᩥ ᨲᨲᩕ –

‘‘ᩈᩣᨾ᩠ᨿ’ᨾᨧ᩠ᨧᩮᩣ ᩈᨡᩣ ᨠᩮᩣᩈᩮᩣ, ᩁᨩ᩠ᨩᨴᩩᨣ᩠ᨣᨻᩃᩣᨶᩥ ᨧ;

ᩁᨩ᩠ᨩᨦ᩠ᨣᩣᨶᩥ ᨸᨠᨲᨿᩮᩣ, ᨸᩮᩣᩁᩣᨶᩴ ᩈᩮᨱᩥᨿᩮᩣᨸᩥ ᨧᩮ’’ᨲᩥ [ᩋᨾᩁ ᪑᪘.᪑᪗].

ᩑᩈᨬ᩠ᨧ ᩈᩣᨾ᩠ᨿᨾᨧ᩠ᨧᩁᨭ᩠ᨮᨴᩩᨣ᩠ᨣᨠᩮᩣᩈᨻᩃᩈᨡᩦᨶᩴ ᨸᩩᨻ᩠ᨻᨲᩁᩔ ᨣᩁᩩᨲ᩠ᨲᩴ ᩅᩥᨬ᩠ᨬᩮᨿ᩠ᨿᩴ, ᩍᩉ ᨲᩩ ᨶᩣᨾᩃᩥᨦ᩠ᨣᩣᨶᩩᩈᩣᩈᨶᩮ ᩋᨽᩥᨵᩣᨶᩈᨲ᩠ᨳᩮ ᩋᨶᩩᨸᨿᩮᩣᨣᨲᩮᩣ ᨿᨳᩣᨠ᩠ᨠᨾᩴ ᨣᩁᩩᨲ᩠ᨲᩴ ᨶ ᩅᨲ᩠ᨲᩩᨾᩥᨧ᩠ᨨᨲᩦᨲᩥ ᨻ᩠ᨿᨲᩥᨠ᩠ᨠᨾᩮᨶᩮᩣᨸᨬ᩠ᨬᩣᩈᩮᩣ ᨠᨲᩮᩣ.

ᩈᩩᩅᨱ᩠ᨱᩣᨴᩥᨾᨿᨽᨱ᩠ᨯᩣᨣᩣᩁᩴ ᨠᩮᩣᩈᩮᩣ, ᨸᨻ᩠ᨻᨲᩮᩣᨴᨠᩁᩩᨠ᩠ᨡᩣᨴᩦᩉᩥ ᨴᩩᨣ᩠ᨣᨾᩴ ᨸᩩᩁᩴ ᨴᩩᨣ᩠ᨣᩴ, ᩅᩥᨩᩥᨲᩴ ᨩᨶᨸᨴᩅᨲᩦ ᨽᩪᨾᩥ, ᨻᩃᩴ ᨧᨠ᩠ᨠᩴ, ᨲᨬ᩠ᨧ ᨾᩮᩣᩃᨽᨲᩈᩮᨱᩥᩈᩉᩣᨿᩣᨾᩥᨲ᩠ᨲᩣᨭᩅᩥᨠᨽᩮᨴᩮᨶ ᨨᨻ᩠ᨻᩥᨵᩴ. ᨲᨲᩕ ᨠᨾᩣᨣᨲᩴ ᨾᩮᩣᩃᩴ, ᩅᩮᨲᨶᩈᨾ᩠ᨻᨶ᩠ᨵᩴ ᨽᨲᩴ, ᨸᩮᩣᩁᩴ ᨻᩃᩴ ᩈᩮᨱᩦ, ᩈᩉᩣᨿᨽᩪᨲᩴ ᩈᩉᩣᨿᩮᩣ, ᩋᨾᩥᨲ᩠ᨲᨽᩪᨲᩴ ᩋᨾᩥᨲ᩠ᨲᩴ, ᩋᨭᩅᩥᨠᩴ ᩋᨭᩅᩥᩈᩉᩣᨿᩮᩣ ᨾᩥᨲ᩠ᨲᩴ. ᨲᨴᨸᩥ ᩈᩉᨩ᩠ᨩᩴ, ᨸᩣᨠᨲᩴ, ᨠᩥᨲ᩠ᨲᩥᨾᨬ᩠ᨧᩮᨲᩥ ᨲᩥᩅᩥᨵᩴ. ‘‘ᩃᩥᨦ᩠ᨣᩮ ᩈᨽᩣᩅᩮ ᨸᨠᨲᩥ, ᨸᩮᩣᩁᩣᨾᨧ᩠ᨧᩣᨴᩥᨿᩮᩣᨶᩥᩈᩩ. ᨲᩥᩃᩥᨦ᩠ᨣᩴ ᨣᩩᨱᩈᩣᨾ᩠ᨿᩮᨸᩦ’’ᨲᩥ [ᨻ᩠ᨿᩣᨡ᩠ᨿᩣᩈᩩᨵᩣ ᪑.᪔.᪒᪙] ᩁᩩᨴ᩠ᨴᩮᩣ.

᪓᪕᪑. ᨸᨽᩣᩅᩣᨴᩦᨶᩴ ¶ ᩅᩈᩣ ᩈᨲ᩠ᨲᩥᨿᩮᩣ ᨶᩣᨾ ᨲᩥᩔᩮᩣ ᨽᩅᨶ᩠ᨲᩥ. ᩈᨠ ᩈᨲ᩠ᨲᩥᨿᩴ,ᨲᩥ. ᨲᨲᩕ ᨿᩴ ᩈᨶ᩠ᨵᩣᨴᩦᨶᩴ, ᨽᩮᨴᩣᨴᩦᨶᨬ᩠ᨧ ᨿᩣᨳᩣᩅᨲᩮᩣ ᩋᩅᨭ᩠ᨮᩣᨸᨶᩴ, ᨲᩴ ᨬᩣᨱᨻᩃᩴ ᨾᨶ᩠ᨲᩈᨲ᩠ᨲᩥ, ᩈᨠᩈᨾ᩠ᨸᨲ᩠ᨲᩩᨸ᩠ᨸᨲ᩠ᨲᩥᨿᩴ ᨠᩮᩣᩈᨴᨱ᩠ᨯᩣ ᨸᨽᩪᩈᨲ᩠ᨲᩥ, ᨲᩮᩈᩴᨿᩮᩅ ᨸᨽᩩᨲ᩠ᨲᩈᨾ᩠ᨸᩣᨴᨶᩮ ᩈᩣᨾᨲ᩠ᨳᩥᨿᨲᩮᩣ. ᩅᩩᨲ᩠ᨲᨬ᩠ᨧ ‘‘ᨠᩮᩣᩈᨴᨱ᩠ᨯᨻᩃᩴ ᨸᨽᩪᩈᨲ᩠ᨲᩥ’’ᩁᩥᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣᨿᨾ᩠ᨸᩥ]. ᨻᩃᩅᨲᩦ ᩏᩔᩣᩉᨧᩮᨭ᩠ᨮᩣ ᩏᩔᩣᩉᩈᨲ᩠ᨲᩥ. ᩅᩩᨲ᩠ᨲᨬ᩠ᨧ ‘‘ᩅᩥᨠ᩠ᨠᨾᨻᩃᨾᩩᩔᩣᩉᩈᨲ᩠ᨲᩥ’’ᩁᩥᨲᩥ [ᨻ᩠ᨿᩣᨡ᩠ᨿᩣᩈᩩᨵᩣ ᪒.᪘.᪑᪙ ᨧᩥᨶ᩠ᨲᩣᨾᨱᩥᨭᩦᨠᩣᨿᨾ᩠ᨸᩥ].

ᨸᨽᩣᩅᩣᨴᩦᨶᩴ ᩈᨠᩣᩁᨱᩴ ᩈᩁᩪᨸᩴ ᨴᩔᩮᨲᩩᨾᩣᩉ ‘‘ᨸᨽᩣᩅᩮᩣ’’ᨧ᩠ᨧᩣᨴᩥ. ᨴᨾᨶᩴ ᨴᨱ᩠ᨯᩮᩣ, ᨲᨴᨲ᩠ᨳᩥᨿᩣ ᨻᩃᨾ᩠ᨸᩥ ᨴᨱ᩠ᨯᩮᩣ. ᨲᨲᩮᩣ ᨩᩣᨲᩴ ᨿᩴ ᨲᩮᨩᩮᩣ, ᨲᩴ ᨸᨽᩣᩅᩮᩣ. ᨲᨲᩮᩣ ᨩᩣᨲᩮᩣ ᨿᩮᩣ ᨲᩮᨩᩮᩣ, ᩈᩮᩣ ‘‘ᨸᨽᩣᩅᩮᩣ’’ᨲᩥᨸᩥ ᨸᩩᩃ᩠ᩃᩥᨦ᩠ᨣᩮᨶ ᨿᩮᩣᨩᨶᩦᨿᩴ. ᨸᨽᩅᨶ᩠ᨲᩥ ᨲᩮᨩᩔᩥᨶᩮᩣ ᩋᨶᩮᨶᩮᨲᩥ ᨸᨽᩣᩅᩮᩣ, ᨱᩮᩣ. ᨸᨠᨭ᩠ᨮᩮᩣ ᩅᩣ ᨽᩣᩅᩮᩣ ᨸᨽᩣᩅᩮᩣ. ᨠᩮᩣᩈᩮᩣ ᨵᨶᩴ, ᨲᨲᩮᩣ ᨩᩣᨲᩮᩣ ᨿᩮᩣ ᨲᩮᨩᩮᩣ, ᩈᩮᩣ ᨸᨽᩣᩅᩮᩣ ᨶᩣᨾ. ᨲᨳᩣ ᨠᩮᩣᩈᨩᩮᩣ ᨲᩮᨩᩮᩣ ᨵᨶᩮᨶ ᩈᨲ᩠ᨲᩪᨶᨾᩩᨸᨠᩁᨱᩴ. ᨸᨲᨸᨶ᩠ᨲᩥ ᨲᩮᨩᩔᩥᨶᩮᩣ ᨽᩅᨶ᩠ᨲ᩠ᨿᨶᩮᨶᩮᨲᩥ ᨸᨲᩣᨸᩮᩣ, ᨱᩮᩣ.

᪓᪕᪒. ᨴ᩠ᩅᨿᩴ ᨾᨶ᩠ᨲᩮ. ᨾᨶ᩠ᨲᩣ ᩅᩩᨧ᩠ᨧᨲᩥ ᨸᨬ᩠ᨬᩣ, ᩈᩣ ᩑᨲᩈ᩠ᨾᩥᩴ ᩅᩥᨩ᩠ᨩᨲᩥ ᨲᩣᨿ ᨶᩥᨸ᩠ᨹᩣᨴᩮᨲᨻ᩠ᨻᨲ᩠ᨲᩣᨲᩥ ᨾᨶ᩠ᨲᩮᩣ, ᩋᨳ ᩅᩣ ᨾᨶ᩠ᨲ ᨣᩩᨲ᩠ᨲᨽᩣᩈᨶᩮ, ᨽᩣᩅᩮ ᨱᩮᩣ. ᩍᨲᩁᨲᩕ ᨽᩣᩅᩮ ᨿᩩ.

ᩈᩮᩣ ¶ ᨾᨶ᩠ᨲᩮᩣ ᨴ᩠ᩅᩥᨣᩮᩣᨧᩁᩮᩣ ᨴ᩠ᩅᩥᨶ᩠ᨶᩴ ᨩᨶᩣᨶᩴ ᩅᩥᩈᨿᨽᩪᨲᩮᩣ ᨧᨲᩩᨠ᩠ᨠᨱ᩠ᨱᩮᩣ ᨶᩣᨾ. ᨧᨲ᩠ᨲᩣᩁᩮᩣ ᨠᨱ᩠ᨱᩣ ᩑᨲ᩠ᨳ ᨧᨲᩩᨠ᩠ᨠᨱ᩠ᨱᩮᩣ. ᩈᩮᩣ ᨾᨶ᩠ᨲᩮᩣ ᨲᩥᨣᩮᩣᨧᩁᩮᩣ ᨲᩥᨱ᩠ᨱᩴ ᨩᨶᩣᨶᩴ ᩅᩥᩈᨿᨽᩪᨲᩮᩣ ᨨᨠ᩠ᨠᨱ᩠ᨱᩮᩣ ᨶᩣᨾ. ᨾᨶ᩠ᨲᩮᩣ ᨶᩣᨾ ᨧᨲᩩᨠ᩠ᨠᨱ᩠ᨱᩮᩣ ᩅᩣ ᨨᨠ᩠ᨠᨱ᩠ᨱᩮᩣ ᩅᩣ ᨠᨲ᩠ᨲᨻ᩠ᨻᩮᩣ, ᨶ ᨲᨲᩮᩣ ᨸᩁᨶ᩠ᨲᩥ ᨴ᩠ᩅᩥᨶ᩠ᨶᨾᩮᩅᩮᨲ᩠ᨳ ᨣᩉᨱᩴ. ᩋᨾᩁᨠᩮᩣᩈᩮ ᨸᨶ ᨨᨠ᩠ᨠᨱ᩠ᨱᩮᩣᨸᩥ ᨸᨭᩥᨠ᩠ᨡᩥᨲ᩠ᨲᩮᩣ. ᩅᩩᨲ᩠ᨲᨬ᩠ᩉᩥ ᨲᨲ᩠ᨳ ‘‘ᩋᨨᨠ᩠ᨠᨱ᩠ᨱᩮᩣ, ᨿᩮᩣ ᨲᨲᩥᨿᩣᨴ᩠ᨿᨣᩮᩣᨧᩁᩮᩣ’’ᨲᩥ [ᩋᨾᩁ ᪑᪘.᪒᪒].

ᩈᨻ᩠ᨻᨸᩣᩁᩥᩈᨴᨲ᩠ᨲᩣ [ᩈᨻ᩠ᨻᨸᩣᨮᩥᨸᨴᨲ᩠ᨲᩣ (ᨠ.)] ᨻ᩠ᨿᩣᨠᩁᨱᩔ ᩈᩮᩣᨲᩪᨶᩴ ᩈᨾᨿᨶ᩠ᨲᩁᩮᩈ᩠ᩅᨸᩥ ᨸᨭᩩᨽᩣᩅᨩᨶᨶᨲ᩠ᨳᩴ ᩍᨵᩣᨶᩣᨣᨲᩣᨸᩥ ᨨᨣ᩠ᨣᩩᨱᩣᨴᨿᩮᩣ ᩌᨶᩮᨲ᩠ᩅᩣ ᨠᨳᩮᨲᨻ᩠ᨻᩣ. ᩅᩩᨲ᩠ᨲᨬ᩠ᩉᩥ –

‘‘ᩈᨻ᩠ᨻᨸᩣᩁᩥᩈᨴᩴ [ᩈᨻ᩠ᨻᨸᩣᨭᩥᨸᨴᩴ (ᨠ.)] ᩉᩥᨴᩴ, ᩈᨻ᩠ᨻᩈᨲ᩠ᨳ’ᨾᨲᩮᩣ ᨾᨲᩴ;

ᨶᩥᩔᩦᨿᨲᩮ ᨠ᩠ᩅᨧᩥ ᨠᩥᨬ᩠ᨧᩥ, ᩈᨻ᩠ᨻᩮᩈ’ᨾᨲᩕ ᩅᩣᨴᩥᨶ’’ᨶ᩠ᨲᩥ.

ᨿᨳᩣ ᨨᨣ᩠ᨣᩩᨱᩣ ᩈᨶ᩠ᨵᩥ ᩅᩥᨣ᩠ᨣᩉᨿᩣᨶᩣᩈᨶᨴ᩠ᩅᩮᨵᩣᩈᨿᩣ [ᩋᨾᩁ ᪑᪘.᪑᪘-᪙]. ᨲᨲᩕ ᩈᨶ᩠ᨵᩥ ᩏᨸᩉᩣᩁᩃᨠ᩠ᨡᨱᩮᩣ ᨲᩥᩅᩥᨵᩮᩣ ᨠᩮᩣᩈᨴᨱ᩠ᨯᨽᩪᨾᩥᨸ᩠ᨸᨴᩣᨶᩉᩮᨲᩩᨠᩮᩣ. ᩋᨸᩉᩣᩁᩃᨠ᩠ᨡᨱᩮᩣ ᩅᩥᨣ᩠ᨣᩉᩮᩣ, ᩈᩮᩣᨸᩥ ᨲᩥᩅᩥᨵᩮᩣ ᨸᨠᩣᩈᨿᩩᨴ᩠ᨵᩴ ᨠᩪᨭᨿᩩᨴ᩠ᨵᩴ ᨲᩩᨱ᩠ᩉᩥᨿᩩᨴ᩠ᨵᨶ᩠ᨲᩥ.

ᨸᩁᨻ᩠ᨿᩈᨶᨲᩣᩈᨸᨲ᩠ᨲᩥᨴᩮᩈᨠᩣᩃᩣᨲ᩠ᨿᩩᨴᨿᩣᩅᩣᨸᨿᩣᨶᨾᨲ᩠ᨲᩮᨶ ᩈᩣᨴ᩠ᨵᩮ ᨸᩁᩈ᩠ᨾᩥᩴ ᨠᨲᩣᨧᩁᩔ ᨣᩩᨱᩣᨶᩩᩁᨲ᩠ᨲᨸᨠᨲᩥᩔ ᩅᩥᨩᩥᨣᩦᩈᩔ ᨿᩣᨲᩕᩣ ᨿᩣᨶᩴ [ᨠᩣᨾᨶ᩠ᨴᨠᩦᨿᨶᩦᨲᩥᩈᩣᩁᩮ ᪑᪑ ᩈᨣ᩠ᨣᩮ ᨸᩔᩥᨲᨻ᩠ᨻᩴ], ᨲᨬ᩠ᨧ ᩅᩥᨣ᩠ᨣᨿ᩠ᩉᨿᩣᨶᩴ ᩈᨶ᩠ᨵᩣᨿᨿᩣᨶᩴ ᩈᨾ᩠ᨽᩪᨿᨿᩣᨶᩴ ᨸᩈᨦ᩠ᨣᨿᩣᨶᩴ ᩏᨸᩮᨠ᩠ᨡᩥᨿᨿᩣᨶᨾᩥᨲᩥ ᨸᨬ᩠ᨧᩅᩥᨵᩴ. ᨸᨲᩥᨣ᩠ᨣᩣᩉᩦᨶᩴ ᨶᩥᨣ᩠ᨣᨿ᩠ᩉ, ᩈᨶ᩠ᨵᩣᨿ, ᩏᨸᩮᨠ᩠ᨡᩥᨿ ᩅᩣ ᨿᩴ ᨿᩣᨶᩴ, ᨲᩴ ᩅᩥᨣ᩠ᨣᨿ᩠ᩉᨿᩣᨶᩣᨴᩥ. ᨿᨴᩣ ᨶ ᩈᨠ᩠ᨠᩮᩣᨲᩥ, ᨲᨴᩣ ᩈᩣᨾᨶ᩠ᨲᩮᩉᩥ ᩈᩉᩮᨠᩦᨽᩪᨿ ᨿᩣᨶᩴ ᩈᨾ᩠ᨽᩪᨿᨿᩣᨶᩴ. ᩋᨬ᩠ᨬᨲᩕ ᨣᨶ᩠ᨲᨻ᩠ᨻᩮ ᩋᨬ᩠ᨬᩈ᩠ᨾᩥᩴ ᨸᩈᨦ᩠ᨣᨲᩮᩣ ᨣᨾᨶᩴ ᨸᩈᨦ᩠ᨣᨿᩣᨶᩴ.

‘‘ᨶ ᨾᩴ ᨸᩁᩮᩣ ᩉᨶ᩠ᨲᩩᩴ ᩈᨾᨲ᩠ᨳᩮᩣ, ᨶᩣᩉᨾ᩠ᨸᩥ ᨸᩁ’’ᨾᩥᨲᩥ ᨠᩣᩃᩣᨴᩥᨠᩮ ᨸᩁᩥᨠ᩠ᨡᩥᨲ᩠ᩅᩣ ᩅᩥᨩᩥᨣᩦᩈᩔ ᨴᩩᨣ᩠ᨣᩣᨴᩦᨶᩥ ᩅᨯ᩠ᨰᨿᨲᩮᩣ ᨮᩥᨲᩥ ᩌᩈᨶᩴ, ᨲᨴᨸᩥ ᩅᩥᨣ᩠ᨣᨿ᩠ᩉᩣᩈᨶᩈᨶ᩠ᨵᩣᨿᩣᩈᨶᩣᨴᩥᨽᩮᨴᩮᨶ ᨸᨬ᩠ᨧᩅᩥᨵᩴ. ᨻᩃᩦᨶᩴ ¶ ᩈᨲ᩠ᨲᩪᨶᩴ ᨾᨩ᩠ᨫᩮ ᨠᩣᨠᨠ᩠ᨡᩥᩅᩣ’ᩃᨠ᩠ᨡᩥᨲᩔᩮᩣ’ᨽᨿᨲᩕ ᩅᨧᨶᩮᨶᨲ᩠ᨲᨶᩮᩣ ᩈᨾᨸ᩠ᨸᨱᩴ ᨴ᩠ᩅᩮᨵᩴ. ᩋᨬ᩠ᨬᨲᩁᩮᨶ ᩅᩣ ᨻᩃᩅᨲᩁᩮᨶ ᩈᨶ᩠ᨵᩥ, ᩋᨬ᩠ᨬᨲᩁᩮᨶ ᩋᨻᩃᩮᨶ ᩅᩥᨣ᩠ᨣᩉᩮᩣ ᨴ᩠ᩅᩮᨵᩴ. ᩈᨲ᩠ᨲᩩᨶᩮᩣ ᩅᩣ ᨸᨠᨲᩦᩉᩥ ᩈᨶ᩠ᨵᩣᨿ ᨿᩮᩣ ᨲᩮᨶ ᩅᩥᨣ᩠ᨣᩉᩮᩣ, ᩈᨲ᩠ᨲᩩᨶᩮᩅ ᩅᩣ ᨿᩮᩣ ᩈᨶ᩠ᨵᩥᩅᩥᨣ᩠ᨣᩉᩈᨾᩩᨴᩣᨿᩉᩮᨲᩩᨠᩮᩣ [ᩈᨲ᩠ᨲᩩᨶᩮᩣᩅ ᩅᩣ ᩈᨶ᩠ᨵᩥᩅᩥᨣ᩠ᨣᩉᩈᨾᩩᨴᩣᨿᩉᩮᨲᩩᨶᩮᩣ (ᨻ᩠ᨿᩣᨡ᩠ᨿᩣᩈᩩᨵᩣ ᪑.᪘.᪑᪘)] ᨴᩩᨣ᩠ᨣᩣᩈᨿᩔ ᨻ᩠ᨿᩣᨸᩣᩁᩮᩣ, ᩈᩮᩣᨸᩥ ᨴ᩠ᩅᩮᨵᩴ. ᨸᩁᩈᨶ᩠ᨲᩣᨶᨾᨸ᩠ᨿᩮᩣᨽᨿᩅᩮᨴᨶᩣᨶᩴ ᩏᨽᨿᨲᩮᩣ ᩅᩩᨲ᩠ᨲᩥ ᨴ᩠ᩅᩮᨵᨾᩩᨧ᩠ᨧᨲᩮ.

‘‘ᩏᨧ᩠ᨨᩥᨩ᩠ᨩᨾᩣᨶᩮᩣ ᩁᩥᨸᩩᨶᩣ ᨶᩥᩁᩩᨸᩣᨿ ᨸᨲᩥᨠᩕᩥᨿᩮᩣ. ᩈᨲ᩠ᨲᩥᩉᩦᨶᩮᩣ ᩈᨾᩣᩈᩥᨿᨲᩮ’’ᨲᩥ [ᨻ᩠ᨿᩣᨡ᩠ᨿᩣᩈᩩᨵᩣ ᪑.᪘.᪑᪘] ᩉᩦᨶᩮᨶᩣᨬ᩠ᨬᩔ ᨻᩃᩅᨲᩁᩔ ᨵᨾ᩠ᨾᩅᩥᨩᨿᩥᨶᩮᩣ ᩈᨾᩣᩈᨿᨶᩴ [ᨻᩃᩅᨲᩣ ᩋᩁᩥᨶᩣ ᩏᨧ᩠ᨨᩥᨩ᩠ᨩᨾᩣᨶᩔ ᩉᩦᨶᩈᨲ᩠ᨲᩥᨶᩮᩣ ᨿᩴ ᨻᩃᩅᨵᨾ᩠ᨾᩅᩥᨩᨿᩥᩈᨾᩣᩈᨿᨶᩴ (ᨻ᩠ᨿᩣᨡ᩠ᨿᩣᩈᩩᨵᩣ ᪑.᪘.᪑᪘)], ᨲᩔᩮᩅ ᩅᩣ ᨻᩃᩥᨶᩮᩣ ᩈᨲ᩠ᨲᩩᨶᩮᩣ ᨠᩮᩣᩈᩣᨴᩥᨸ᩠ᨸᨴᩣᨶᩮᨶ ᩌᩈᨿᨶᩴ ᩌᩈᨿᩮᩣ ᩅᩩᨧ᩠ᨧᨲᩮ. ᩑᨲᩮ ᨨᨣ᩠ᨣᩩᨱᩣ.

ᨿᩈ᩠ᨾᩥᨬ᩠ᨧ ᨣᩩᨱᩮ ᨮᩥᨲᩮᩣ ᩅᩥᨩᩥᨣᩦᩈᩮᩣ ᩈᨠ᩠ᨠᩮᩣᨲ᩠ᨿᨲ᩠ᨲᨶᩮᩣ ᩋᨭ᩠ᨮᩅᨣ᩠ᨣᩥᨿᨠᨾ᩠ᨾᩣᨶᩥ ᨸᩅᨲ᩠ᨲᨿᩥᨲᩩᩴ, ᨸᩁᩔ ᨧᩮᨲᩣᨶ᩠ᨿᩩᨸᩉᨶ᩠ᨲᩩᩴ, ᨣᩩᨱᨾᩣᨵᩥᨭ᩠ᨮᩮᨿ᩠ᨿ, ᩈᩣ ᩅᩩᨯ᩠ᨰᩥ.

ᨠᩈᩥ ᩅᨱᩥᨩ᩠ᨩᩴ ᨸᨳᩮᩣ ᨴᩩᨣ᩠ᨣᩴ, ᩈᩮᨲᩩ ᨠᩩᨬ᩠ᨩᩁᨻᨶ᩠ᨵᨶᩴ;

ᨡᨶ᩠ᨿᩣᨠᩁᨵᨶᩣᨴᩣᨶᩴ, ᩈᩩᨬ᩠ᨬᩣᨶᨬ᩠ᨧ ᨶᩥᩅᩮᩈᨶᩴ [ᨠᩣᨾᨶ᩠ᨴᨠᩦᨿᨶᩦᨲᩥᩈᩣᩁ ᪕.᪗᪘].

ᩍᨲ᩠ᨿᩮᩈᩮᩣ ᩋᨭ᩠ᨮᩅᨣ᩠ᨣᩮᩣ.

ᨿᩈ᩠ᨾᩥᩴ ᩅᩣ ᨣᩩᨱᩮ ᨮᩥᨲᩮᩣ ᩈᨠᨾ᩠ᨾᩣᨶᩴ ᩅᩩᨯ᩠ᨰᩥ, ᨡᨿᩴ ᩅᩣ ᨶᩣᨽᩥᨸᩔᨲᩥ, ᨲᩴ ᨮᩣᨶᩴ, ᨿᩈ᩠ᨾᩥᩴ ᩅᩣ ᨣᩩᨱᩮ ᨮᩥᨲᩮᩣ ᩈᨠᨾ᩠ᨾᩣᨶᨾᩩᨸᨥᩣᨲᩴ ᨸᩔᨲᩥ, ᨲᩈ᩠ᨾᩥᩴ ᨶ ᨲᩥᨭ᩠ᨮᩮᨿ᩠ᨿ, ᩈᩮᩣ ᨡᨿᩮᩣ, ᩋᨿᩴ ᨶᩦᨲᩥᩅᩮᨴᩦᨶᩴ ᨲᩥᩅᨣ᩠ᨣᩮᩣ [ᩋᨾᩁ ᪑᪘.᪑᪙]. ᩍᨲᩁᩮᩈᩴ ᨵᨾ᩠ᨾᨲ᩠ᨳᨠᩣᨾᩣ ᨲᩥᩅᨣ᩠ᨣᩮᩣ.

ᨴ᩠ᩅᨿᩴ ¶ ᨣᩩᨿ᩠ᩉᩮ. ᩁᩉᩈᩥ ᨽᩅᩴ ᩁᩉᩔᩴ, ᩈᩮᩣ, ᩁᩉᩮ ᩅᩣ ᨽᩅᩴ ᩁᩉᩔᩴ. ᨣᩩᩉ ᩈᩴᩅᩁᨱᩮ, ᨠᨾ᩠ᨾᨶᩥ ᨿᩮᩣ. ᩍᨴᩴ ᨴ᩠ᩅᨿᩴ ᨲᩦᩈᩩ. ᩁᩉᩔᩮᩣ ᨾᨶ᩠ᨲᩮᩣ, ᩁᩉᩔᩣ ᩅᩣᨧᩣ, ᩁᩉᩔᩴ ᨾᨶ᩠ᨲᨶᩴ.

᪓᪕᪓. ᨸᨬ᩠ᨧᨠᩴ ᩅᩥᨩᨶᩮ. ᩅᩥᨩᩥ ᨸᩩᨳᨽᩣᩅᩮ, ᨽᩪ, ᨲᩮᩣ ᨧ. ᩅᩥᨧᩥ ᩅᩥᩅᩮᨧᨶᩮ, ᨸᩩᨳᩩᨽᩣᩅᩮ ᨧ ᩅᩣ. ‘‘ᩅᩥᩅᩥᨲ᩠ᨲᩴ ᨲᩦᩈᩩ ᩅᩥᨩᨶᩮ, ᩋᩈᩴᨸᨠ᩠ᨠᨸᩅᩥᨲ᩠ᨲᩮᩈᩪ’’ᨲᩥ ᩁᩩᨴ᩠ᨴᩮᩣ. ᩅᩥᨣᨲᩮᩣ ᨩᨶᩮᩣ ᩋᩈ᩠ᨾᩣᨲᩥ ᩅᩥᨩᨶᩮᩣ. ᨨᩣᨴᩮᨲᩦᨲᩥ ᨨᨶ᩠ᨶᩮᩣ. ᨨᨴ ᩈᩴᩅᩁᨱᩮ. ᩅᩥᨲ᩠ᨲᨾᩁᩉᨲᩦᨲᩥ ᩁᩉᩮᩣ, ᩁᩉ ᨧᩣᨣᩮ, ᩁᨾᨶ᩠ᨲᩮ ᩋᩈ᩠ᨾᩥᨶ᩠ᨲᩥ ᩅᩣ ᩁᩉᩮᩣ, ᩅᨱ᩠ᨱᩅᩥᨠᩣᩁᩮᩣ. ‘‘ᩁᩉᩮᩣ ᨶᩥᨵᩩᩅᨶᩮ ᨧᩣᨸᩥ, ᩁᩉᩮᩣ ᨣᩩᨿ᩠ᩉᩮ ᨶᨸᩩᩴᩈᨠ’’ᨶ᩠ᨲᩥ [ᨻ᩠ᨿᩣᨡ᩠ᨿᩣᩈᩩᨵᩣ ᪒.᪘.᪒᪒] ᩁᨽᩈᩮᩣ. ᨴᩩᨲᩥᨿᩮᩣ ᩁᩉᩮᩣᩈᨴ᩠ᨴᩮᩣ ᩋᨻ᩠ᨿᨿᩴ. ᨶᩥᩔᩃᩣᨠᩣ, ᩏᨸᩣᩈᩩᨸ᩠ᨿᨲᩕ. ᨶᩥᩔᩃᩣᨠᩣ ᨳᩦ, ᩏᨸᩣᩈᩩ ᩋᨻ᩠ᨿᨿᩴ.

ᨴ᩠ᩅᨿᩴ ᩅᩥᩔᩣᩈᩮ. ᩈᩈ ᨸᩣᩃᨶᩮ, ᨱᩮᩣ. ᩈᨾ᩠ᨽ ᩅᩥᩔᩣᩈᩮ. ‘‘ᩅᩥᩔᨾ᩠ᨽᩮᩣ ᨠᩮᩃᩥᨠᩃᩉᩮ, ᩅᩥᩔᩣᩈᩮ’ᨸᨱᨿᩮᨸᩥ ᨧᩮ’’ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣᨿᨾ᩠ᨸᩥ] ᩁᩩᨴ᩠ᨴᩮᩣ.

ᨴ᩠ᩅᨿᩴ ᨶ᩠ᨿᩣᨿᩮ. ᨿᩩᨩ ᩈᨾᩣᨵᩥᨾ᩠ᩉᩥ, ᩈᨾᩣᨵᩥ ᩋᨽ᩠ᨿᩩᨸᨣᨾᩮᩣ, ᨲᩮᩣ. ᩏᨸᨣᨶ᩠ᨲᨻ᩠ᨻᨲ᩠ᨲᩣ ᩏᨸᩣᨿᩥᨠᩴ. ᩏᨸᩣᨿᩣ ᩈᨠᨲ᩠ᨳᩮ ᩍᨠᩮᩣ, ᩒᨸᩣᨿᩥᨠᩴ, ᩒᨸᨿᩥᨠᨾ᩠ᨸᩥ [ᨸᩣᨱᩥᨶᩥ ᪕.᪔.᪓᪔ (ᨣᨱ)], ᩃᨻ᩠ᨽᩴ, ᨽᨩᨾᩣᨶᩴ, ᩋᨽᩥᨶᩦᨲᩴ, ᨶ᩠ᨿᩣᨿᩴ, ᨬᩣᨿᩴᨸ᩠ᨿᨲᩕ.

᪓᪕᪔. ᩈᩥᩃᩮᩣᨠᩴ ᩒᩅᩣᨴᩮ. ᩋᩅᨸᩩᨻ᩠ᨻᩮᩣ ᩅᨴ ᩅᩥᨿᨲ᩠ᨲᩥᨿᩴ ᩅᩣᨧᩣᨿᩴ, ᨽᩣᩅᩮ ᨱᩮᩣ. ᩈᩣᩈ ᩋᨶᩩᩈᩥᨭ᩠ᨮᩥᨾ᩠ᩉᩥ,ᨲᩥ, ᩌᩔᩥ, ᩋᨶᩩᩈᩥᨭ᩠ᨮᩥ ¶ . ᩋᨶᩩᩈᩣᩈᨲᩮ ᩋᨶᩩᩈᩣᩈᨶᩴ. ᨸᩩᨾᩅᨩ᩠ᨩᩮ ᩍᨲ᩠ᨳᩥᨿᩴ, ᨶᨸᩩᩴᩈᨠᩮ ᨧ. ᩑᨲ᩠ᨳ ᨧ ᩑᨠᩔᩮᩅᨲ᩠ᨳᩔ ᨽᩥᨶ᩠ᨶᩃᩥᨦ᩠ᨣᩮᩉᩥ ᨲᩦᩉᩥ ᨶᩣᨾᩮᩉᩥ ᨠᨳᨶᩴ ᨶ ᨠᩮᩅᩃᩴ ᩅᩣᨧ᩠ᨧᩃᩥᨦ᩠ᨣᩮᩣᨿᩮᩅ ᩈᨴ᩠ᨴᩮᩣ, ᩋᨳ ᨡᩮᩣ ᩅᩣᨧᨠᩃᩥᨦ᩠ᨣᩮᩣᨸ᩠ᨿᨲ᩠ᨳᩦᨲᩥ ᨴᩦᨸᨶᨲ᩠ᨳᩴ.

ᨴ᩠ᩅᨿᩴ ᩌᨱᩣᨿᩴ. ᩌᨱ ᨸᩮᩈᨶᩮ, ᨽᩣᩅᩮ ᩋ, ᩌᨱᩣ, ᩍᨲ᩠ᨳᩦ. ᩋᩅᩅᩣᨴᩮᩣ, ᨶᩥᨴ᩠ᨴᩮᩈᩮᩣ, ᩈᩥᨭ᩠ᨮᩥᨸ᩠ᨿᨲᩕ. ᨴ᩠ᩅᨿᩴ ᨻᨶ᩠ᨵᨶᩮ. ᨴᩣ ᨴᩣᨶᩮ, ᨽᩣᩅᩮ ᨿᩩ, ᨴᩣ ᩋᩅᨡᨱ᩠ᨯᨶᩮ ᩅᩣ, ᩅᩥᨿᩮᩣᨣᨴᩣᨶᨲᩮᩣ ᩏᨴ᩠ᨴᩣᨶᩴ.

᪓᪕᪕-᪓᪕᪖. ᨴ᩠ᩅᨿᩴ ᩋᨸᩁᩣᨵᩮ. ᩋᨸᨣᨧ᩠ᨨᨶ᩠ᨲ᩠ᨿᨶᩮᨶᩣᨲᩥ ᩌᨣᩩ, ᨱᩩ, ᨸᩃᩮᩣᨸᩮᩣ, ᩁᩔᩔ ᨴᩦᨥᨲᩣ, ᨶᨸᩩᩴᩈᨠᩮ ᩌᨣᩩ. ᩋᨸᨣᨲᩮᩣ ᩁᩣᨵᩮᩣ ᨿᩮᨶ ᩋᨸᩁᩣᨵᩮᩣ, ᩁᩣᨵ ᩈᩴᩈᩥᨴ᩠ᨵᩥᨾ᩠ᩉᩥ. ᨴ᩠ᩅᨿᩴ ᩁᩣᨩᨣᨿ᩠ᩉᩮ. ᨠᩥᩁ ᩅᩥᨠᩥᩁᨱᩮ, ᨠᨲ᩠ᨲᩁᩥ ᩋ, ᩋᨲ᩠ᨲᩴ. ᨻᩃ ᨸᩣᨱᨶᩮ, ᩍ. ᨠᩁᩈᩣᩉᨧᩁᩥᨿᨲᩮᩣ ᨻᩃᩥ ᨸᩩᩃ᩠ᩃᩥᨦ᩠ᨣᩮ. ᨽᩣᨣᨵᩮᨿ᩠ᨿᩮᩣᨸ᩠ᨿᨲᩕ. ᨽᩣᨣᩣᩈᨠᨲ᩠ᨳᩮ ᨵᩮᨿ᩠ᨿᩮᩣ [ᨸᩣᨱᩥᨶᩥ ᪕.᪔.᪓᪖ (ᩅᩣ.)], ᨽᩣᨣᨲ᩠ᨲᩮᨶ ᨲᩥᨭ᩠ᨮᨲᩦᨲᩥ ᩅᩣ ᨽᩣᨣᨵᩮᨿ᩠ᨿᩮᩣ, ᩍᨿᩮᩣ.

ᨴ᩠ᩅᨿᩴ ᨲᩩᨭ᩠ᨮᩥᨴᩣᨿᩮ. ᨾᨶᩮᩣᩁᨳᨸᩩᨱ᩠ᨱᨲ᩠ᨲᩣ ᨸᨲ᩠ᨲᨻ᩠ᨻᩮᩣ ᨽᩣᨣᩮᩣ ᨸᩩᨱ᩠ᨱᨸᨲ᩠ᨲᩮᩣ. ᨲᩩᩔᨶᩴ ᨲᩩᨭ᩠ᨮᩮᩣ, ᩈᩮᩣᩔᨲ᩠ᨳᩦᨲᩥ ᨲᩩᨭ᩠ᨮᩦ, ᨲᩮᨶ ᨴᩣᨲᨻ᩠ᨻᩮᩣ ᨴᩣᨿᩮᩣ ᨲᩩᨭ᩠ᨮᩥᨴᩣᨿᩮᩣ, ᩌᨠᩣᩁᨶ᩠ᨲᩣᨶᨾᩣᨿᩮᩣ.

ᨨᨠ᩠ᨠᩴ ¶ ᨸᩣᨽᨲᩮ. ᨲᨳᩣ ᩉᩥ –

‘‘ᩉᩮᨾᩴ ᩈᩦᩉᩣᩈᨶᩴ ᩅᩮᩈᩴ, ᩅᩩᨲ᩠ᨲᩴ ᨽᨴ᩠ᨴᩣᩈᨶᩴ ᨲᨳᩣ;

ᩏᨸᩣᨿᨶ’ᨾᩩᨸᨣ᩠ᨣᨿ᩠ᩉᩴ, ᨸᩣᨽᨲᨬ᩠ᨧᩮᩣ’ᨸᨴᩣ ᨳᩥᨿ’’ᨶ᩠ᨲᩥ.

ᩈᩥᩃᩮᩣᨠᩣᨴ᩠ᨵᩴ ᨶᩣᨾ ᩋᨾᩁᨾᩣᩃᩣ.

ᩏᨸᨣᨶ᩠ᨲ᩠ᩅᩣᨴᩣᨲᨻ᩠ᨻᩣᨲᩥ ᩏᨸᨴᩣ, ᩋ, ᩍᨲ᩠ᨳᩦ, ᨲᩴ ᨲᨾᨲ᩠ᨳᩴ ᨸᨲ᩠ᨳᩮᨶ᩠ᨲᩮᩉᩥ ᩌᨽᩁᩦᨿᨲᩮ ᩌᨶᩦᨿᨲᩮᨲᩥ ᨸᩣᨽᨲᩴ, ᨸᨲ᩠ᨳᨶᨲ᩠ᨳᨩᩮᩣᨲᨠᩮᩣᨿᩴ ᨸᩈᨴ᩠ᨴᩮᩣ. ᩏᨸᩮᨿ᩠ᨿᨲᩮᨲᩥ ᩏᨸᩣᨿᨶᩴ, ᩍᨲᩮᩣ ᨿᩩ, ᩏᨸᨣᨧ᩠ᨨᨲᩥ ᨿᩮᨶᩣᨲᩥ ᩅᩣ ᩏᨸᩣᨿᨶᩴ. ᨠᩩᨧ ᩈᨦ᩠ᨠᩮᩣᨧᨶᩮ, ᨱᩮᩣ, ᩅᩥᨣᨲᩮᩣ ᨠᩮᩣᨧᩮᩣ ᨿᩮᨶ ᩏᨠ᩠ᨠᩮᩣᨧᩮᩣ. ᨸᨱ᩠ᨱᩮᨶ ᩈᨲ᩠ᨳᨸᨱ᩠ᨱᩮᨶ ᩈᨴ᩠ᨵᩥᩴ ᩌᨠᩁᩦᨿᨲᩮ ᩌᨶᩦᨿᨲᩮᨲᩥ ᨸᨱ᩠ᨱᩣᨠᩣᩁᩮᩣ, ᩋᨬ᩠ᨬᨲᩕ ᩏᨸᨧᩣᩁᩣ. ᨸᩉᩥᨱᨶ᩠ᨲ᩠ᨿᨶᩮᨶᩮᨲᩥ ᨸᩉᩮᨱᨠᩴ, ᩉᩥ ᨣᨲᩥᨿᩴ, ᨿᩩ, ᩈᨠᨲ᩠ᨳᩮ ᨠᩮᩣ. ᨸᨴᩮᩈᨶᩴ, ᩏᨸᨣ᩠ᨣᨿ᩠ᩉᩴ, ᩏᨸᩉᩣᩁᩮᩣᨸ᩠ᨿᨲᩕ.

ᨣᩩᨾ᩠ᨻᩣᨴᩥᨴᩮᨿ᩠ᨿᩮᩣ ᨣᩩᨾ᩠ᨻᨥᨭᩣᨴᩥᨠᩮᩣ [ᨣᩩᨾ᩠ᨻᨥᨭᩣᨴᩥᨲᩮᩣ (?)] ᨴᩮᨿ᩠ᨿᩮᩣᩈᩩᨦ᩠ᨠᩴ, ᩋᨶᩥᨲ᩠ᨳᩦ, ᨣᩩᨾ᩠ᨻᩮᩣ ᨶᩣᨾ ᨩᩃᨳᩃᨾᨣ᩠ᨣᩣᨴᩦᩈᩩ ᩃᨴ᩠ᨵᨻ᩠ᨻᨽᩣᨣᩮᩣ, ᨲᨳᩣ ᨥᨭ᩠ᨭᩮᩣᨸᩥ, ᩈᨾᩣᨶᨲ᩠ᨳᩣ ᩉᩮᨲᩮ. ᩌᨴᩥᨶᩣ ᨸᩣᨽᨲᨾ᩠ᨸᩥ ᩈᨦ᩠ᨣᨱ᩠ᩉᩣᨲᩥ. ᩈᩩᨦ᩠ᨠ ᨣᨾᨶᩮ, ᩈᩩᨦ᩠ᨠᨲᩥ ᨿᩮᨶ, ᨲᩴ ᩈᩩᨦ᩠ᨠᩴ. ᨣᨾᩩ ᨣᨾᨶᩮ, ᨻᩮᩣ, ᩋᩔᩩ, ᨣᩩᨾ᩠ᨻᩮᩣ. ᨴ᩠ᩅᨿᩴ ᨣᩣᨾᨩᨶᨸᨴᩣᨴᩥᨲᩮᩣ ᩃᨴ᩠ᨵᨻ᩠ᨻᨽᩣᨣᩮ. ᩋᨿ ᨣᨾᨶᩮ, ᨱᩮᩣ, ᩌᨿᩮᩣ. ᩋᨸᨧ᩠ᨧᨿᩮ ᩋᨿᩮᩣ. ᨵᨶᩣᨶᩴ ᩈᨾ᩠ᨸᨲ᩠ᨲᨠᩣᩃᩮ ᩌᨣᨾᩮᩣ ᨵᨶᩣᨣᨾᩮᩣ.

᪓᪕᪗. ᨴ᩠ᩅᨿᩴ ᨨᨲ᩠ᨲᩈᩣᨾᨬ᩠ᨬᩮ. ᩌᨲᨸᨲᩮᩣ ᩈᩪᩁᩥᨿᩣᩃᩮᩣᨠᨲᩮᩣ ᨲᩣᨿᨲᩦᨲᩥ ᩌᨲᨸᨲ᩠ᨲᩴ, ᨲᩮᩣ. ᨨᩣᨴᨿᨲᩦᨲᩥ ᨨᨲ᩠ᨲᩴ, ᨨᨴ ¶ ᩋᨸᩅᩣᩁᨱᩮ, ᨲᩮᩣ, ᨲᩕᨱᨸᨧ᩠ᨧᨿᩮ ᨨᨲᩕᩴ, ᩉᩮᨾᩴ ᩈᩩᩅᨱ᩠ᨱᨡᨧᩥᨲᩴ ᩁᨬ᩠ᨬᩴ ᩁᩣᨩᩪᨶᩴ ᩌᩈᨶᩴ ᩈᩦᩉᩣᩈᨶᩣᨡ᩠ᨿᩴ. ᩈᩦᩉᩣᨠᨲᩥᨸ᩠ᨸᨵᩣᨶᨲ᩠ᨲᩣ ᩈᩦᩉᩣᨠᨲᩥᨸ᩠ᨸᨵᩣᨶᩴ ᩌᩈᨶᨶ᩠ᨲᩥ ᩅᩥᨣ᩠ᨣᩉᩮᩣ.

ᨴ᩠ᩅᨿᩴ ᨧᩣᨾᩁᩮ. ᩅᩣᩃᩮᨶ ᨠᨲᩣ ᨻᩦᨩᨶᩦ ᩅᩣᩃᨻᩦᨩᨶᩦ. ᨧᨾᩁᩮᩣ ᨾᩥᨣᩮᩣ ᨲᩔᩮᨴᩴ ᨧᩣᨾᩁᩦ. ‘‘ᨧᩣᨾᩁᩣ ᨧᩣᨾᩁᩴ ᩁᩮᩣᨾᩴ, ᨣᩩᨧ᩠ᨨᨠᨬ᩠ᨧᩣᩅᨧᩪᩃᨠ’’ᨶ᩠ᨲᩥ [ᨲᩥᨠᨱ᩠ᨯᩈᩮᩈ ᪒.᪘.᪔᪐᪖] ᨲᩥᨠᨱ᩠ᨯᩈᩮᩈᩮᩣ. ᨸᨠᩥᨱ᩠ᨱᨠᩴᨸ᩠ᨿᨲᩕ. ᨸᨠᩁᩦᨿᨲᩮ ᩅᩥᨠ᩠ᨡᩥᨸᨲᩮ ᨸᨠᩥᨱ᩠ᨱᨠᩴ, ᩈᨠᨲ᩠ᨳᩮ ᨠᩮᩣ.

᪓᪕᪘. ᨡᨣ᩠ᨣᩣᨴᨿᩮᩣ ᩍᨾᩮ ᨸᨬ᩠ᨧ ᩁᩣᨩᩪᨶᩴ ᨠᨠᩩᨵᨽᨱ᩠ᨯᩣᨶᩥ ᨽᩅᨶ᩠ᨲᩥ. ᨠᩩᨠ ᩌᨴᩣᨶᩮ, ᨵᩮᩣ, ᩅᨱ᩠ᨱᩅᩥᨸᩁᩥᨿᨿᩮᩣ. ᩁᨬ᩠ᨬᩮᩣ ᨣᨾᨶᨠᩣᩃᩮ ᩈᨴᩣ ᩌᨴᩣᨲᨻ᩠ᨻᨲᩮᩣ ᨠᨠᩩᨵᩣᨶᩥ ᨧ ᨲᩣᨶᩥ ᩁᩣᨩᨵᨶᨲ᩠ᨲᩣ ᨽᨱ᩠ᨯᩣᨶᩥ ᨧᩮᨲᩥ ᨠᨠᩩᨵᨽᨱ᩠ᨯᩣᨶᩥ.

᪓᪕᪙. ᨴ᩠ᩅᨿᩴ ᨸᩩᨱ᩠ᨱᨥᨭᩮ. ᨩᩃᨸᩩᨱ᩠ᨱᨲ᩠ᨲᩣ ᨽᨴ᩠ᨴᩮᩣ ᨠᩃ᩠ᨿᩣᨱᩮᩣ ᨠᩩᨾ᩠ᨽᩮᩣ ᨽᨴ᩠ᨴᨠᩩᨾ᩠ᨽᩮᩣ. ᨴ᩠ᩅᨿᩴ ᩉᩮᨾᨽᩣᨩᨶᩮ. ᨽᩁ ᨽᩁᨱᩮ, ᨽᩁᨱᩴ ᨵᩣᩁᨱᩴ ᨸᩮᩣᩈᨶᨬ᩠ᨧ, ᨵᩣᩁᨱᨲ᩠ᨳᩔ ᨽᩁᨲᩥᩔ ᨽᩥᨦ᩠ᨣᩣᨴᩮᩈᩮᩣ, ᨽᩁᨲᩥ ᨴᨵᩣᨲᩥ ᩏᨴᨠᨶ᩠ᨲᩥ ᨽᩥᨦ᩠ᨣᩣᩁᩮᩣ, ᩌᩁᩮᩣ. ᨠᩁᨠᩮᩣ, ᨠᩩᨱ᩠ᨯᩥᨠᩣᨸ᩠ᨿᨲᩕ.

ᩉᨲ᩠ᨳᩦ ¶ ᨧ ᩋᩔᩮᩣ ᨧ ᩁᨳᩮᩣ ᨧ ᨸᨲ᩠ᨲᩥ ᨧ, ᨲᩮᩈᩴ ᩈᨾᩪᩉᩮᩣ ᩉᨲ᩠ᨳᩥᩔᩁᨳᨸᨲ᩠ᨲᩥ ᨧᨲᩩᩁᨦ᩠ᨣᩥᨶᩦ ᩈᩮᨶᩣᨲ᩠ᨿᩩᨧ᩠ᨧᨲᩮ, ᩈᩮᨶᨦ᩠ᨣᨲ᩠ᨲᩣ ᩈᨾᩣᩉᩣᩁᨴ᩠ᩅᨶ᩠ᨴᩮᩣᨿᩴ. ᨧᨲ᩠ᨲᩣᩁᩥ ᩋᨦ᩠ᨣᩣᨶᩥ ᨿᩔᩴ ᩈᩴᩅᩥᨩ᩠ᨩᨶ᩠ᨲᩥ, ᩈᩣ ᨧᨲᩩᩁᨦ᩠ᨣᩥᨶᩦ, ᩎ, ᩍᨶᩦ.

᪓᪖᪐. ᨴᨶ᩠ᨲ᩠ᨿᨶ᩠ᨲᩴ ᩉᨲ᩠ᨳᩥᨶᩥ. ᨠᩩᨬ᩠ᨩᩮᩣ ᩉᨶᩩ, ᨴᨶ᩠ᨲᩮᩣ ᨧ, ᨲᩴᨿᩮᩣᨣᩣ ᨠᩩᨬ᩠ᨩᩁᩮᩣ, ᩋᨲᩥᩈᨿᩮ ᩁᩮᩣ, ᨠᩩᩴ ᨸᨳᩅᩥᩴ ᨩᩁᩣᨸᩮᨲᩦᨲᩥ ᩅᩣ ᨠᩩᨬ᩠ᨩᩁᩮᩣ, ᩋᩃᩩᨲ᩠ᨲᩈᨾᩣᩈᩮᩣ, ᨠᩩᨬ᩠ᨩᩮ ᩅᩣ ᨣᩥᩁᩥᨠᩪᨭᩮ ᩁᨾᨲᩥ, ᨠᩮᩣᨬ᩠ᨧᨶᩣᨴᩴ ᨶᨴᨶ᩠ᨲᩮᩣ ᩅᩣ ᨧᩁᨲᩥ, ᨠᩩᩴ ᩅᩣ ᨸᨳᩅᩥᩴ ᨲᨴᩣᨥᩣᨲᩮᨶ ᨩᩁᨿᨲᩦᨲᩥ ᨠᩩᨬ᩠ᨩᩁᩮᩣ. ᩅᩣᩁᨿᨲᩥ ᨸᩁᨻᩃᩴ ᩅᩣᩁᨱᩮᩣ, ᨶᨶ᩠ᨴᩣᨴᩦᩉᩥ ᨿᩩ. ᩉᨲ᩠ᨳᨿᩮᩣᨣᩣ ᩉᨲ᩠ᨳᩦ. ᨾᨲᨦ᩠ᨣᩔ ᩍᩈᩥᨶᩮᩣ ᩋᨸᨧ᩠ᨧᩴ ᨾᩣᨲᨦ᩠ᨣᩮᩣ, ᨾᩉᨶ᩠ᨲᩴ ᩋᨦ᩠ᨣᩴ ᩈᩁᩦᩁᨾᩮᨲᩔᩣᨲᩥ ᩅᩣ ᨾᩣᨲᨦ᩠ᨣᩮᩣ, ᩉ ᨶᩃᩮᩣᨸᩮᩣ, ᩋᩔᩣᨠᩣᩁᩮᩣ ᨧ. ᨴ᩠ᩅᩮ ᩁᨴᩣ ᨴᨶ᩠ᨲᩣ ᨿᩔ ᨴ᩠ᩅᩥᩁᨴᩮᩣ, ‘‘ᩁᨴ ᩅᩥᩃᩮᨡᨶᩮ ᨴᨶ᩠ᨲᩮ’’ᨲᩥ ᩉᩥ ᨶᩣᨶᨲ᩠ᨳᩈᨦ᩠ᨣᩉᩮ. ᨣᨩ ᩈᨴ᩠ᨴᩮ, ᨣᨩᨲᩦᨲᩥ, ᩋ. ᨶᨣᩮᩣ ᨸᨻ᩠ᨻᨲᩮᩣ, ᩈᩮᩣ ᩅᩥᨿ ᨴᩥᩔᨲᩦᨲᩥ ᨶᩣᨣᩮᩣ, ᨱᩮᩣ. ᨠᩁᩮᨶ, ᨾᩩᨡᩮᨶ ᨧᩣᨲᩥ ᨴ᩠ᩅᩦᩉᩥ ᨸᩥᩅᨲᩦᨲᩥ ᨴ᩠ᩅᩥᨸᩮᩣ. ᩍ ᨣᨾᨶᩮ, ᨽᩮᩣ. ᨴᨶ᩠ᨲᨿᩮᩣᨣᩣ ᨴᨶ᩠ᨲᩦ. ᩈᨭ᩠ᨮᩥᩉᩣᨿᨶᩮᩣ, ᨴᨶ᩠ᨲᩣᩅᩃᩮᩣ, ᩋᨶᩮᨠᨸᩮᩣ, ᨾᨲᨦ᩠ᨣᨩᩮᩣ, ᨠᩁᩦ, ᨳᨾ᩠ᨽᩮᩁᨾᩮᩣ, ᨸᨴ᩠ᨾᩦ, ᨾᩉᩣᨾᩥᨣᩮᩣ, ᨸᩦᩃᩩ, ᩈᩥᨶ᩠ᨵᩩᩁᩮᩣ, ᨴᩦᨥᨾᩣᩁᩩᨲᩮᩣ, ᩁᩣᨩᩦᩅᩮᩣ, ᨩᩃᨠᨠ᩠ᨡᩮᩣ, ᨶᩥᩃ᩠ᩃᩩᩁᩮᩣ, ᨠᩁᨭᩦ, ᩅᩁᨦ᩠ᨣᩮᩣ, ᩈᩩᨸ᩠ᨸᨠᨱ᩠ᨱᩮᩣ ᩍᨧ᩠ᨧᩣᨴᩦᨶᩥᨸᩥ ᩉᨲ᩠ᨳᩥᨶᩮᩣ ᨶᩣᨾᩣᨶᩥ. ᩈᨭ᩠ᨮᩥᩅᩔᩥᨠᨲ᩠ᨲᩣ, ᨩᩣᨲᩥᨿᩣ ᩈᨭ᩠ᨮᩥᩅᩔᨠᩣᩃᩮ ᨳᩣᨾᩮᨶ ᩉᩣᨿᨶᨲᩮᩣ ᩅᩣ ᩈᨭ᩠ᨮᩥᩉᩣᨿᨶᩮᩣ.

ᩅᨶᨠᩁᩦᨶᩴ ᨿᩮᩣ ᨿᩪᨳᨩᩮᨭ᩠ᨮᩮᩣ, ᩈᩮᩣ ᩈᨿᩪᨳᩣᨶᩴ ᨩᩮᨭ᩠ᨮᨲ᩠ᨲᩣ ᨿᩪᨳᨩᩮᨭ᩠ᨮᩮᩣ. ᩈᨿᩪᨳᩮ ᨸᩣᨲᩥ ᩁᨠ᩠ᨡᨲᩦᨲᩥ ᨿᩪᨳᨸᩮᩣᨲᩥ ᨧᩮᩣᨧ᩠ᨧᨲᩮ.

᪓᪖᪑. ᨠᩣᩊᩣᩅᨠᩣᨴᩦᨶᩥ ¶ ᩑᨲᩣᨶᩥ ᩉᨲ᩠ᨳᩥᩁᩣᨩᩣᨶᩴ ᨠᩩᩃᩣᨶᩥ. ᨠᩃᨾ᩠ᨻᨲᩮ ᩈᨴ᩠ᨴᩣᨿᨲᩮᨲᩥ ᨠᩣᩊᩣᩅᨠᩮᩣ, ᨱ᩠ᩅᩩ, ᨾᩃᩮᩣᨸᩮᩣ. ᨣᨦ᩠ᨣᩣᨿᩴ ᨩᩣᨲᩮᩣ ᨣᨦ᩠ᨣᩮᨿ᩠ᨿᩮᩣ, ᨮᩣᨶᩅᩈᩮᨶ ᩈᩣ ᩈᨬ᩠ᨬᩣ. ᨸᨱ᩠ᨯᩁᩅᨱ᩠ᨱᨲᩣᨿ ᨸᨱ᩠ᨯᩁᩮᩣ. ᩅᨱ᩠ᨱᩅᩈᩮᨶ ᨲᨾ᩠ᨻᩅᨱ᩠ᨱᨲᩣᨿ ᨲᨾ᩠ᨻᩮᩣ. ᨸᩥᨦ᩠ᨣᩃᩅᨱ᩠ᨱᨲᩣᨿ ᨸᩥᨦ᩠ᨣᩃᩮᩣ. ᨣᨶ᩠ᨵᨿᩩᨲ᩠ᨲᨲᩣᨿ ᨣᨶ᩠ᨵᩮᩣ. ᨾᨦ᩠ᨣ ᨣᨾᨶᨲ᩠ᨳᩮᩣ, ᩈᩮᩣᨽᨶᨣᨾᨶᨿᩩᨲ᩠ᨲᨲᩣᨿ ᨾᨦ᩠ᨣᩃᩮᩣ, ᩋᨲᩥᩈᩣᨿᨶᩮ, ᨸᩈᩴᩈᩣᨿᩴ ᩅᩣ ᩃᩮᩣ. ᩉᩮᨾᩅᨱ᩠ᨱᨲᩣᨿ ᩉᩮᨾᩮᩣ. ᩏᨸᩮᩣᩈᨳᨠᩩᩃᩮ ᨩᩣᨲᨲ᩠ᨲᩣ ᩏᨸᩮᩣᩈᨳᩮᩣ, ᩏᨸᨣᨶ᩠ᨲ᩠ᩅᩣ ᩋᩁᨿᩮᩣ ᩏᩈᨲᩦᨲᩥ ᩅᩣ ᩏᨸᩮᩣᩈᨳᩮᩣ, ᨳᩮᩣ, ᩏᩈ ᨴᩣᩉᩮ, ᩏᨸᨸᩩᨻ᩠ᨻᩮᩣ ᩅᩈ ᨶᩥᩅᩣᩈᩮ ᩅᩣ, ᩅᩔᩮᩣ, ᩏᨸᩮᩣᩈᨳᩮᩣ, ᨲᩥᨳᩦᩅᩥᩈᩮᩈᩮᩣ ᨧ. ᨨᨻ᩠ᨻᨱ᩠ᨱᨴᨶ᩠ᨲᨲᩣᨿ ᨨᨴ᩠ᨴᨶ᩠ᨲᩮᩣ. ᩑᨲᩮᩈᨬ᩠ᨧ ᨠᩣᩊᩣᩅᨠᩮᩣ ᨴᩈᨶ᩠ᨶᩴ ᨸᩩᩁᩥᩈᩣᨶᩴ ᨻᩃᩴ ᨵᩣᩁᩮᨲᩥ, ᨣᨦ᩠ᨣᩮᨿ᩠ᨿᩮᩣ ᨴᩈᨶ᩠ᨶᩴ ᨠᩣᩊᩣᩅᨠᩣᨶᩴ, ᩑᩅᩴ ᨿᩣᩅᨨᨴ᩠ᨴᨶ᩠ᨲᩣ ᨶᩮᨲᨻ᩠ᨻᩮᩣ, ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨸᨶ ᨴᩈᨶ᩠ᨶᩴ ᨨᨴ᩠ᨴᨶ᩠ᨲᩣᨶᩴ ᨻᩃᩴ ᨵᩣᩁᩮᨲᩥ, ᨲᩮᨶᩮᩅ ᨽᨣᩅᩣ ᨠᩣᩊᩣᩅᨠᩉᨲ᩠ᨳᩥᨣᨱᨶᩣᨿ ᨠᩮᩣᨭᩥᩈᩉᩔᨻᩃᩴ ᨵᩣᩁᩮᨲᩥ, ᨸᩩᩁᩥᩈᨣᨱᨶᩣᨿ ᨴᩈᨶ᩠ᨶᩴ ᨸᩩᩁᩥᩈᨠᩮᩣᨭᩥᩈᩉᩔᩣᨶᩴ ᨻᩃᩴ.

᪓᪖᪒. ᨸᩣᨴᩮᩣ ᨠᩁᩥᨸᩮᩣᨲᩮ. ᨸᨬ᩠ᨧᩅᩔᩣᨶᩥ ᨿᩣᩅ ᨠᩃᨽᩮᩣ, ᨠᩃ ᩈᨦ᩠ᨡ᩠ᨿᩣᨶᩮ, ᩋᨽᩮᩣ, ᨠᩃᨽᩮᩣ, ᩊᨲ᩠ᨲᩮ ᨠᩊᨽᩮᩣ, ᨾᩣᨲᩣᨸᩥᨲᩪᩉᩥ ¶ ᨽᩁᩥᨲᨻ᩠ᨻᨲ᩠ᨲᩣ ᨽᩥᨦ᩠ᨠᩮᩣ, ᨽᩁᨲᩥᩔ ᨽᩥᨦ᩠ᨠᩮᩣ. ᨠᩁᩥᩈᩣᩅᨠᩮᩣᨸ᩠ᨿᨲᩕ. ᨸᩣᨴᩮᩣ ᨾᨲ᩠ᨲᨾᩣᨲᨦ᩠ᨣᩮ. ᨴᩣᨶᩴ ᨸᨽᩥᨶ᩠ᨶᩮᩣ ᨿᩔ ᨸᨽᩥᨶ᩠ᨶᩮᩣ. ᨾᨩ᩠ᨩᨲᩦᨲᩥ ᨾᨲ᩠ᨲᩮᩣ, ᨾᨴ ᩏᨾ᩠ᨾᩣᨴᩮ. ᨣᨩᩮ ᨩᩣᨿᨲᩦᨲᩥ ᨣᨩ᩠ᨩᩮᩣ, ᨱ᩠ᨿᩮᩣ, ᨾᨴᩮᩣ. ᩈᩮᩣ ᩈᨬ᩠ᨩᩣᨲᩮᩣ ᨿᩔ ᨣᨩ᩠ᨩᩥᨲᩮᩣ.

ᨴ᩠ᩅᨿᩴ ᩉᨲ᩠ᨳᩥᩈᨾᩪᩉᩮ. ᩉᨲ᩠ᨳᩦᨶᩴ ᩈᨾᩪᩉᩮᩣ ᩉᨲ᩠ᨳᩥᨥᨭᩣ. ᨣᨩᩣᨶᩴ ᩈᨾᩪᩉᩮᩣ ᨣᨩᨲᩣ, ᨣᩣᨾᨩᨶᨻᨶ᩠ᨵᩩᩈᩉᩣᨿᩣᨴᩦᩉᩥ ᨲᩣ. ᨸᩣᨴᩮᩣ ᩉᨲ᩠ᨳᩥᨶᩥᨿᩴ. ᩉᨲ᩠ᨳᨿᩮᩣᨣᩣ ᩉᨲ᩠ᨳᩥᨶᩦ, ᩎ, ᩍᨶᩦ. ᨠᨱ ᩈᨴ᩠ᨴᩮ, ᩍᩁᩩ, ᩈᨠᨲ᩠ᨳᩮ ᨠᩮᩣ. ᨠᩁᩮᨱᩩᨠᩣᨲᩥᨸᩥ, ᨲᨴᩣ ᨠᩁᨿᩮᩣᨣᩣ ᨠᩁᩮᨱᩩᨠᩣ, ᩍᨱᩩ. ᨠᩁᩥᨱᩦ, ᨵᩮᨶᩩᨠᩣ, ᩅᩈᩣ, ᨠᩁᩮᨱᩩᨸ᩠ᨿᨲᩕ.

᪓᪖᪓. ᩉᨲ᩠ᨳᩥᩈᩥᩁᩮᩣᨸᩥᨱ᩠ᨯᩣ ᩉᨲ᩠ᨳᩥᨶᩮᩣ ᩈᩥᩁᩈᩥ ᨴ᩠ᩅᩮ ᨸᩥᨱ᩠ᨯᩣ ᨠᩩᨾ᩠ᨽᩣᨡ᩠ᨿᩣ. ᨠᩮ ᩈᩥᩁᩈᩥ ᨽᩅᨲᩦᨲᩥ ᨠᩩᨾ᩠ᨽᩮᩣ, ᩋᩔᩩ, ᨶᩥᨣ᩠ᨣᩉᩦᨲᩣᨣᨾᩮᩣ ᨧ. ᨴ᩠ᩅᩥᨶ᩠ᨶᩴ ᨸᨶ ᨠᩩᨾ᩠ᨽᩣᨶᩴ ᨾᨩ᩠ᨫᩥᨾᩴ ᩅᩥᨴᩩ ᨶᩣᨾ [ᩋᨾᩁ ᪑᪘.᪓᪗]. ᩋᨦ᩠ᨠᩩᩈᩈᨦ᩠ᨥᩣᨲᩴ ᩅᩥᨶ᩠ᨴᨲ᩠ᨿᩈ᩠ᨾᩥᨶ᩠ᨲᩥ ᩅᩥᨴᩩ, ᨸᩩᨾᩮ, ᩏ. ᨴ᩠ᩅᨿᩴ ᨠᨱ᩠ᨱᨾᩪᩃᩮ. ᨧᩪᩊ ᨶᩥᨾᨩ᩠ᨩᨶᩮ, ᨱ᩠ᩅᩩ, ᨧᩪᩊᩥᨠᩣ, ᨧᩩᨴ ᩈᨬ᩠ᨧᩮᩣᨴᨶᩮ ᩅᩣ, ᨧᩮᩣᨴᩮᨶ᩠ᨲᩥ ᩑᨲ᩠ᨳ ᩋᨦ᩠ᨠᩩᩈᩣᨴᩦᩉᩥ ᩋᨴᨶ᩠ᨲᨶ᩠ᨲᩥ ᨧᩪᩊᩥᨠᩣ, ᨴᩔ ᩊᩮᩣ, ᨱ᩠ᩅᩩ.

ᩌᩈᨲᩮ ᩋᩈ᩠ᨾᩥᨶ᩠ᨲᩥ ᩌᩈᨶᩴ, ᨡᨶ᩠ᨵᨴᩮᩈᩮᩣ. ᨡᨶ᩠ᨵᩮᩣ ᩑᩅ ᨴᩮᩈᩮᩣ ᨡᨶ᩠ᨵᨴᩮᩈᩮᩣ, ᨲᩈ᩠ᨾᩥᩴ. ᨴ᩠ᩅᨿᩴ ᨸᩩᨧ᩠ᨨᨾᩪᩃᩮ. ᨸᩩᨧ᩠ᨨᩔ ᨾᩪᩃᩴ ᩉᩮᨭ᩠ᨮᩥᨾᨽᩣᨣᩮᩣ.

᪓᪖᪔. ᨲᩥᨠᩴ ᨣᨩᨻᨶ᩠ᨵᨶᨳᨾ᩠ᨽᩮ. ᩌᩃᨶ᩠ᨲ᩠ᨿᩈ᩠ᨾᩥᩴ, ᩋᨶᩮᨶ ᩅᩣ ᨻᨶ᩠ᨵᨶ᩠ᨲᩥ ᩌᩃᩣᨶᩴ, ᨿᩩ. ᩌᨸᩩᨻ᩠ᨻᩮᩣ ᨻᨶ᩠ᨵᨶᨲ᩠ᨳᩮᩣ ᩃᩣᨵᩣᨲᩩ. ᩌᩉᨶᨶ᩠ᨲᩥ ¶ ᨻᨶ᩠ᨵᨶ᩠ᨲ᩠ᨿᩈ᩠ᨾᩥᩴ, ᩋᨶᩮᨶ ᩅᩣ ᩌᩊ᩠ᩉᨠᩮᩣ, ᩉᨶᨵᩣᨲᩩ, ᨶᩔ ᩊᩮᩣ, ᩅᨱ᩠ᨱᩅᩥᨸᩁᩥᨿᨿᩮᩣ ᨧ, ᨱ᩠ᩅᩩ. ᨳᨾ᩠ᨽ ᨸᨭᩥᨻᨶ᩠ᨵᨶᩮ. ᨻᨶ᩠ᨵᩮᩣᨸ᩠ᨿᨲᩕ.

ᨲᩥᨠᩴ ᩈᨦ᩠ᨡᩃᩮ. ᩋᨶᩥᨲ᩠ᨳᩦ ᨲᩪᨲᩥ ᨲ᩠ᩅᨶ᩠ᨲᩴ ᩃᩥᨦ᩠ᨣᨸᨴᩴ. ᨣᩃ ᩈᩮᨧᨶᩮ. ᨶᩥᨣᩊᨲᩥ ᨻᨶ᩠ᨵᨲᩥ ᨿᩮᨶᩣᨲᩥ ᨶᩥᨣᩊᩮᩣ, ᩋ, ᨠᨲ᩠ᨲᩩᩈᩣᨵᨶᩴ ᩅᩣ. ᩋᨴᩥ ᨻᨶ᩠ᨵᨶᩮ, ᩋᨶ᩠ᨴᨲᩦᨲᩥ ᩋᨶ᩠ᨴᩩᨠᩮᩣ. ᨱ᩠ᩅᩩ, ᩋᩔᩩ. ᨽᩩᩈᩴ ᨡᩃᨲ᩠ᨿᨶᩮᨶ ᩈᨦ᩠ᨡᩃᩴ, ᨠᨭᩥ ᩅᨲ᩠ᨳᨻᨶ᩠ᨵᨶᩮᨸᩥ, ‘‘ᨳᩦᨠᨭᩦᩅᨲ᩠ᨳᨻᨶ᩠ᨵᩮᨸᩥ, ᨶᩥᨣᩊᩮ ᩈᨦ᩠ᨡᩃᩴ ᨲᩥᩈᩪ’’ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪘.᪔᪑] ᩁᨽᩈᩮᩣ. ᩈᨦ᩠ᨡᩃᩥᨠᩣᨸ᩠ᨿᨲᩕ.

ᨴ᩠ᩅᨿᩴ ᨣᨩᨣᨱ᩠ᨯᩮ. ᨣᨱ᩠ᨯ ᩅᨴᨶᩮᨠᨴᩮᩈᩮ, ᩋᨵᩣᨲᩪᨶᨾ᩠ᨸᩥ ᨵᩣᨲᩪᩈᩩ ᨸᩣᨮᩮᩣ, ᨵᩣᨲᩩ ᩉᩥ ᨠᩕᩥᨿᨲ᩠ᨳᩮᩣ. ᨣᨱ᩠ᨯᩮᩣ ᨠᨸᩮᩣᩃᩈᩣᨾᨬ᩠ᨬᩮᨸᩥ. ᨠᨭ ᩅᩔᩣᩅᩁᨱᩮᩈᩩ, ᩋ. ᨴ᩠ᩅᨿᩴ ᨠᩁᩥᨾᨴᨩᩃᩮ. ᨴᩦᨿᨲᩮᨲᩥ ᨴᩣᨶᩴ. ᨾᨴ ᩏᨾ᩠ᨾᩣᨴᩮ, ᨠᩁᨱᩮ ᩋ.

᪓᪖᪕. ᨴ᩠ᩅᨿᩴ ᩉᨲ᩠ᨳᩥᨠᩁᩮ. ᩈᩮᩣᨱ ᩅᨱ᩠ᨱᨣᨲᩦᩈᩩ, ᨯᩮᩣ, ᩈᩮᩣᨯ ᨣᨻ᩠ᨻᩮ ᩅᩣ, ᨶᩥᨣ᩠ᨣᩉᩦᨲᩣᨣᨾᩮᩣ, ᨱᩮᩣ ᨧ. ᨴ᩠ᩅᩦᩈᩩ ᨴ᩠ᩅᩮᨸᩥ.

ᨴ᩠ᩅᨿᩴ ᩈᩮᩣᨱ᩠ᨯᨣ᩠ᨣᩮ. ᨠᩁᩔ ᩈᩮᩣᨱ᩠ᨯᩔ ᩋᨣ᩠ᨣᩴ. ᨸᩩᩈ ᨸᩮᩣᩈᨶᩮ. ᨡᩁᩮᩣ, ᩈᩔ ᨠᩮᩣ, ᩏᩔᩮᩣᨲ᩠ᨲᩴ, ᨸᩩᩈ ᩅᩩᨯ᩠ᨰᩥᨾ᩠ᩉᩥ ᩅᩣ, ᨽᩪ, ᨸᩩᩈ ᩈ᩠ᨶᩮᩉᩈᩮᨧᨶᨸᩪᩁᨱᩮᩈᩩ ᩅᩣ, ᨠᩥᨿᩣᨴᩥ, ᨸᩩᩈ ᨵᩣᩁᨱᩮ ᩅᩣ, ᨧᩩᩁᩣᨴᩥ.

ᩉᨲ᩠ᨳᩥᩔ ᨠᩣᨿᨾᨩ᩠ᨫᨾ᩠ᩉᩥ ᨻᨶ᩠ᨵᨶᩁᨩ᩠ᨩᩩ ᨠᨧ᩠ᨨᩣ ᨶᩣᨾ. ᨠᨧ ᨻᨶ᩠ᨵᨶᩮ, ᨨᩮᩣ. ᨴᩪᩈᩣ, ᩅᩁᨲᩕᩣᨸ᩠ᨿᨲᩕ. ᨠᩩᨳᩮᩣ ᨶᩣᨾ ᩉᨲ᩠ᨳᩥᨸᩥᨭ᩠ᨮᨲ᩠ᨳᩁᩥᨲᨧᩥᨲᩕᨠᨾ᩠ᨻᩃᩴ, ᩈᩮᩣ ᩌᨴᩥ ᨿᩮᩈᨶ᩠ᨲᩮ ᨠᩩᨳᩣᨴᨿᩮᩣ. ᨠᩩᨳᩣᨴᨿᩮᩣ ᩑᩅ ᨠᨸ᩠ᨸᨶᩮᩣ ᨶᩣᨾ ᨽᩅᨶ᩠ᨲᩥ. ᨠᨸ᩠ᨸ ᩈᩣᨾᨲ᩠ᨳᩥᨿᩮ, ᩈᨩ᩠ᨩᨶᩣᨿᨬ᩠ᨧ ¶ , ᨠᩁᨱᩮ ᨿᩩ. ᨠᨸ᩠ᨸᨶᩣᨸᩥ. ᨠᨧ ᩈᨩ᩠ᨩᨶᩣᨿᩴ, ᨳᩮᩣ, ᨠᩩᨳᩮᩣ, ᨲᩦᩈᩩ. ‘‘ᨶᨸᩩᩴᩈᨠᨾᨲ᩠ᨳᩁᨱᩴ, ᨳᩦ ᨸᩅᩮᨱᩦ ᨠᩩᨳᩴ ᨲᩥᩈᩪ’’ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪘.᪔᪒] ᩉᩥ ᩅᩮᩣᨸᩣᩃᩥᨲᩮᩣ. ᨸᩅᩮᨱᩦ, ᩋᨲ᩠ᨳᩁᨱᩴ, ᩅᨱ᩠ᨱᩮᩣ, ᨸᩁᩥᨲ᩠ᨳᩮᩣᨾᩮᩣᨲᩥ ᩑᨲᩮ ᨠᩩᨳᨸᩁᩥᨿᩣᨿᩣ.

᪓᪖᪖. ᨴ᩠ᩅᨿᩴ ᩁᩣᨩᩣᩁᩉᩮ ᩉᨲ᩠ᨳᩥᨶᩥ. ᩁᩣᨩᩣᨶᨾᩩᨸᨣᨶ᩠ᨲ᩠ᩅᩣ ᩅᩉᩥᨲᩩᨾᩁᩉᨲᩦᨲᩥ ᩒᨸᩅᨿ᩠ᩉᩮᩣ, ᩋᩁᩉᨲ᩠ᨳᩮ ᨱ᩠ᨿᩮᩣ. ᩁᩣᨩᩣᨶᩴ ᩅᩉᩥᨲᩩᩴ ᩋᩁᩉᨲᩦᨲᩥ ᩁᩣᨩᩅᨿ᩠ᩉᩮᩣ, ᨱ᩠ᨿᩮᩣ. ᨴ᩠ᩅᨿᩴ ᨠᨸ᩠ᨸᩥᨲᩉᨲ᩠ᨳᩥᨶᩥ. ᩈᨩ᩠ᨩᩣ ᩈᨩ᩠ᨩᨶᩣ ᩈᨬ᩠ᨩᩣᨲᩣ ᨿᩈ᩠ᨾᩥᩴ ᩈᨩ᩠ᨩᩥᨲᩮᩣ. ᨠᨸ᩠ᨸᩣ ᨠᨸ᩠ᨸᨶᩣ ᩈᨬ᩠ᨩᩣᨲᩣ ᨿᩈ᩠ᨾᩥᩴ ᨠᨸ᩠ᨸᩥᨲᩮᩣ. ᩑᨲᩈ᩠ᨾᩣᨿᩮᩅ ᨸᩣᨮᩣ ᩈᨩ᩠ᨩᨠᨸ᩠ᨸᩣ ᩈᨩ᩠ᨩᨶᩣᨠᨸ᩠ᨸᨶᩣᨶᩴ ᨸᩁᩥᨿᩣᨿᩣᨲᩥ ᨬᩮᨿ᩠ᨿᩣ.

ᩉᨲ᩠ᨳᩥᨶᩮᩣ ᨸᩣᨴᩮ ᩅᩥᨩ᩠ᨫᨶᨠᨱ᩠ᨭᨠᩮᩣ ‘‘ᨲᩮᩣᨾᩁᩮᩣ’’ᨲ᩠ᨿᩩᨧ᩠ᨧᨲᩮ. ᨲᩩᨩ᩠ᨩᨲᩮᨶᩮᨶᩮᨲᩥ ᨲᩮᩣᨾᩁᩮᩣ, ᨲᩩᨴ ᨻ᩠ᨿᨳᨶᩮ, ᩋᩁᩮᩣ, ᨴᩔ ᨾᩮᩣ, ᩒᨲ᩠ᨲᩴ. ᩅᩮᨱᩩᨠᩴᨸ᩠ᨿᨲᩕ [ᨠᩮᩣᨲᩕᩴ ᩅᩮᨱᩩᨠᨾᩣᩃᩣᨶᩴ (ᩋᨾᩁ ᪑᪘.᪔᪑)], ᨠ᩠ᩅᨧᩥ ᩅᩮᩊᩩᨠᨶ᩠ᨲᩥᨸᩥ ᨸᩣᨮᩮᩣ.

᪓᪖᪗. ᩉᨲ᩠ᨳᩥᨶᩮᩣ ᨠᨱ᩠ᨱᨾᩪᩃᨾ᩠ᩉᩥ ᩅᩥᨩ᩠ᨫᨶᨠᨱ᩠ᨭᨠᩮᩣ ‘‘ᨲᩩᨲ᩠ᨲ’’ᨾᩥᨲ᩠ᨿᩩᨧ᩠ᨧᨲᩮ. ᨲᩩᨩ᩠ᨩᨲᩮᨶᩮᨶᩮᨲᩥ ᨲᩩᨲ᩠ᨲᩴ, ᨲᩮᩣ. ᩉᨲ᩠ᨳᩥᨶᩮᩣ ᨾᨲ᩠ᨳᨠᨾ᩠ᩉᩥ ᩅᩥᨩ᩠ᨫᨶᨠᨱ᩠ᨭᨠᩮᩣ ‘‘ᩋᨦ᩠ᨠᩩᩈᩮᩣ’’ᨲ᩠ᨿᩩᨧ᩠ᨧᨲᩮ. ᩋᨦ᩠ᨠᨲᩮ ᩋᨶᩮᨶᩮᨲᩥ ᩋᨦ᩠ᨠᩩᩈᩮᩣ, ᩋᨦ᩠ᨠ ᩃᨠ᩠ᨡᨱᩮ, ᩈᩮᩣ, ᩋᩔᩩ.

ᨸᨩ᩠ᨩᨴ᩠ᨵᩴ ¶ ᩉᨲ᩠ᨳᩣᩁᩮᩣᩉᩮ. ᨾᨯᩥ ᨽᩪᩈᩣᨿᩴ, ᩉᨲ᩠ᨳᩥᩴ ᨾᨱ᩠ᨯᨿᨲᩥ ᩁᨠ᩠ᨡᨲᩦᨲᩥ ᩉᨲ᩠ᨳᩥᨾᨱ᩠ᨯᩮᩣ, ᩈᩮᩣᩅ ᩉᨲ᩠ᨳᩥᨾᩮᨱ᩠ᨯᩮᩣ, ᨾᩥ ᩉᩥᩴᩈᩣᨿᩴ ᩅᩣ, ᨯᩮᩣ, ᨶᩥᨣ᩠ᨣᩉᩦᨲᩣᨣᨾᩮᩣ. ᩉᨲ᩠ᨳᩥᩴ ᨸᩣᨲᩥ ᩁᨠ᩠ᨡᨲᩦᨲᩥ ᩉᨲ᩠ᨳᩥᨸᩮᩣ, ᨠᨾ᩠ᨾᨶᩥ ᨱᩮᩣ. ᩉᨲ᩠ᨳᩥᩴ ᨣᩮᩣᨸᨿᨲᩥ ᩁᨠ᩠ᨡᨲᩦᨲᩥ ᩉᨲ᩠ᨳᩥᨣᩮᩣᨸᨠᩮᩣ. ᨣᩩᨸ ᩁᨠ᩠ᨡᨱᩮ, ᩈᨠᨲ᩠ᨳᩮ ᨠᩮᩣ. ᩌᨵᩮᩣᩁᨱᩮᩣ, ᨶᩥᩈᩣᨴᩥᨶᩮᩣᨸ᩠ᨿᨲᩕ.

᪓᪖᪘. ᨾᩣᨲᨦ᩠ᨣᩉᨿᩣᨴᩦᨶᩴ ᨣᨾᨶᩣᨴᩥᨠᩕᩥᨿᩣᩈᩥᨠ᩠ᨡᩣᨸᨠᩮᩣ ᩌᨧᩁᩥᨿᩮᩣ ‘‘ᨣᩣᨾᨱᩦᨿᩮᩣ’’ᨲ᩠ᨿᩩᨧ᩠ᨧᨲᩮ. ᨣᨾᨶᩴ ᨣᩣᨾᩮᩣ, ᨽᩣᩅᩮ ᨱᩮᩣ. ᩉᨲ᩠ᨳᩣᨴᩦᨶᩴ ᨣᨾᨶᨠᩕᩥᨿᩣ ᨣᩣᨾᩮᩣ, ᨲᩴ ᨶᩮᨲᩥ ᩈᩥᨠ᩠ᨡᩣᨸᩮᨲᩦᨲᩥ ᨣᩣᨾᨱᩦᨿᩮᩣ, ᩋᨬ᩠ᨬᨠᩕᩥᨿᩣᩈᩥᨠ᩠ᨡᩣᨸᨶᩮᨲᩪᨸᨧᩣᩁᩣ, ᨣᩣᨾᩴ ᩅᩣ ᩉᨲ᩠ᨳᩣᨴᩥᩈᨾᩪᩉᩴ ᨶᩮᨲᩦᨲᩥ ᨣᩣᨾᨱᩦᨿᩮᩣ, ᨣᨾᨶᩴ ᩅᩣ ᩈᩥᨠ᩠ᨡᩣᨸᩮᨲᩦᨲᩥ ᨣᩣᨾᨱᩦᨿᩮᩣ, ᩈᨻ᩠ᨻᨲᩕ ᨶᩔ ᨱᨲ᩠ᨲᩴ.

ᨸᩣᨴᨴ᩠ᩅᨿᩴ ᩋᩔᩮ. ᩉᨿ ᨣᨲᩥᨿᩴ, ᩋ. ᨲᩩᩁᩴ ᩈᩦᨥᩴ ᨣᨧ᩠ᨨᨲᩦᨲᩥ ᨲᩩᩁᨦ᩠ᨣᩮᩣ, ᨠ᩠ᩅᩥ, ᨻᩥᨶ᩠ᨴᩣᩃᩮᩣᨸᩮᩣ, ᩃᩮᩣᨸᩮ ᩈᨲᩥ ᨲᩩᩁᨣᩮᩣ. ᩅᩣᩉ ᨸᨿᨲᨶᩮ, ᩋ. ᩋᩈ ᨽᨠ᩠ᨡᨶᩮ, ᩋ. ᩈᩥᨶ᩠ᨵᩪᨶᨾᨴᩪᩁᨽᩅᩮᩣ ᨩᨶᨸᨴᩮᩣᨸᩥ ᩈᩥᨶ᩠ᨵᩅᩮᩣ, ᨲᨲᩕ ᨽᩅᩮᩣ ᩈᩥᨶ᩠ᨵᩅᩮᩣ, ᩈᩴᨿᩮᩣᨣᨶ᩠ᨲᨲ᩠ᨲᩣ ᨶ ᩅᩩᨴ᩠ᨵᩥ. ᨥᩮᩣᨭᨠᩮᩣ, ᨸᩦᨲᩥ, ᨲᩩᩁᨦ᩠ᨣᨾᩮᩣ, ᩅᩣᨩᩦ, ᨣᨶ᩠ᨵᨻ᩠ᨻᩮᩣ, ᩈᨲ᩠ᨲᩥᩁᩥᨧ᩠ᨧᩣᨴᩦᨶᩥᨸᩥ ᩋᩔᩮ. ᨥᩩᨭ ᨸᩁᩥᩅᨲ᩠ᨲᨶᩮ, ᨱ᩠ᩅᩩ. ᨸᩣ ᨸᩣᨶᩮ,ᨲᩥ. ‘‘ᨸᩣᨶᩮ ᨳᩦ ᨸᩦᨲᩥ ᩋᩔᩮ ᩈᩮᩣ’’ᨲᩥ ᩁᩩᨴ᩠ᨴᩮᩣ. ᩅᩣᨩᨿᩮᩣᨣᩣ ᩅᩣᨩᩦ, ᩎ. ‘‘ᩑᩈᨬ᩠ᨧ ᨸᩩᨻ᩠ᨻᩴ ᨸᨠ᩠ᨡᩮᩣ ᩌᩈᩥ, ᩈ ᨲᩩ ᨴᩮᩅᩮᨲ᩠ᨿᨲ᩠ᨿᨲ᩠ᨳᩥᨲᩮᨶ ᩈᩣᩃᩦᨽᩪᨲᨾᩩᨶᩥᨶᩣ ᩈᨠ᩠ᨠᩴ ᨸᨿᩮᩣᨩᩮᨲ᩠ᩅᩣ ᩅᨩᩥᩁᨨᩮᨴᩥᨲᩮᩣ’’ᨲᩥ ᨶᩥᨠᩣᨿᨶ᩠ᨲᩁᩥᨿᩣ. ᩈᨸ ᩈᨾᩅᩣᨿᩮ,ᨲᩥ, ᩈᨲ᩠ᨲᩥ, ᩈᩣᨾᨲ᩠ᨳᩥᨿᩮᨸᩥ.

᪓᪖᪙. ᨲᩔ ¶ ᩋᩔᩔ ᨽᩮᨴᩮᩣ ᩅᩥᩈᩮᩈᩮᩣ ᩋᩔᨲᩁᩮᩣ, ᩋᩔᩴ ᨲᩁᨲᩦᨲᩥ ᩋᩔᨲᩁᩮᩣ, ᨲᩁ ᩋᨲᩥᨠ᩠ᨠᨾᨶᩮ, ᨲᩁᨸᨧ᩠ᨧᨿᩮᨶᩣᨸᩥ ᩈᩥᨴ᩠ᨵᩴ. ᨸᨵᩣᨶᩔᨽᩪᨾᩥᨽᩅᩮᩣ ᩈᩩᨩᩣᨲᩥᨠᩮᩣ ᩋᩅᩥᨠᩣᩁᩦ ᨠᩩᩃᩦᨶᨠᩮᩣ ᩋᩔᩮᩣ ᩌᨩᩣᨶᩦᨿᩮᩣ ᨶᩣᨾ, ᩌ ᨽᩩᩈᩮᩣ ᨠᩣᩁᨱᩣᨠᩣᩁᨱᩴ ᨩᩣᨶᩣᨲᩦᨲᩥ ᩌᨩᩣᨶᩦᨿᩮᩣ, ᩋᨶᩦᨿᩮᩣ, ᨱ᩠ᨿᨸᨧ᩠ᨧᨿᩮᨶ ᩅᩣ ᩈᩥᨴ᩠ᨵᩴ, ᨲᨴᩣ ‘‘ᨠᩥᨿᩣᨴᩥᨲᩮᩣ ᨶᩣ’’ᨲᩥ ᨶᩣᨣᨾᩮᩣ, ᩎᨠᩣᩁᩣᨣᨾᩮᩣ ᨧ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪘.᪔᪔ ᨣᩣᨳᩣᨿᨾ᩠ᨸᩥ ᨸᩔᩥᨲᨻ᩠ᨻᩴ]. ᨠᩩᩃᩮ ᩈᨾ᩠ᨽᩪᨲᩮᩣ ᨠᩩᩃᩦᨶᨠᩮᩣ, ᩎᨶᩮᩣ, ᩈᨠᨲ᩠ᨳᩮ ᨠᩮᩣ. ᩈᨦ᩠ᨣᩣᨾᩮ ᨣᩁᩩᩈᨲ᩠ᨳᨸ᩠ᨸᩉᩣᩁᩮᨶ ᨶᩥᩉᨲᩮᩣ ᩈᨶ᩠ᨲᩮᩣ ᨸᩥᨿᩮᩣ ᩈᩣᨾᩥᨠᩴ ᨶ ᨩᩉᨲᩥ ᩈᩩᨡᩴ ᩅᩉᨶᩈᩦᩃᩮᩣ ᨿᩮᩣ ᩋᩔᩮᩣ, ᩈᩮᩣ ᩅᩥᨶᩦᨲᩈᨴ᩠ᨴᩮᨶᩮᩣᨧ᩠ᨧᨲᩮ. ᩅᩥᩈᩮᩈᩮᨶ ᨴᨾ᩠ᨾᨲᩴ ᨶᩮᨲᩥ ᨿᨶ᩠ᨲᩥ ᩅᩥᨶᩦᨲᩮᩣ.

ᨴ᩠ᩅᨿᩴ ᩋᩔᨸᩮᩣᨲᩮ. ᨠᩈ ᨣᨾᨶᩮ, ᩒᩁᩮᩣ, ᩋᩔᩥ, ᨠᩥᨬ᩠ᨧᩥ ᩈᩁᨲᩦᨲᩥ ᩅᩣ ᨠᩥᩈᩮᩣᩁᩮᩣ, ᨻᩥᨶ᩠ᨴᩩᩃᩮᩣᨸᩮᩣ, ᩋᩔᩮᩣ ᨧ, ᩉᨿᩮᩣ ᩑᩅ ᨻᩣᩃᨲ᩠ᨲᩣ ᩉᨿᨸᩮᩣᨲᨠᩮᩣ, ᩋᨸ᩠ᨸᨲ᩠ᨳᩮ ᨠᩮᩣ.

᪓᪗᪐. ᨴ᩠ᩅᨿᩴ ᩋᨳᩣᨾᩔᩮ. ᨥᩩᨭ ᨸᩁᩥᩅᨲ᩠ᨲᨶᩮ, ᨱ᩠ᩅᩩ, ᨥᩮᩣᨭᨠᩮᩣ, ᩋᩔᩈᩣᨾᨬ᩠ᨬᩮᨸ᩠ᨿᨿᩴ, ᨡᩁᩴ ᨣᨧ᩠ᨨᨲᩦᨲᩥ ᨡᩃᩩᨦ᩠ᨣᩮᩣ, ᩈᩮᩣ ᩑᩅ ᨡᩊᩩᨦ᩠ᨠᩮᩣ, ᨣᨠᩣᩁᩔ ᨠᨠᩣᩁᩴ ᨠᨲ᩠ᩅᩣ, ᩁᩔ ᩃᩮᩣ, ᩊᨲ᩠ᨲᨾᩩᨲ᩠ᨲᨬ᩠ᨧ, ᨡᩊᩩᨠᩮᩣᨲᩥᨸᩥ. ᨩᩅᩮᨶ ᩈᨻ᩠ᨻᩮᩈᨾᨵᩥᨠᩮᩣ ᩋᩔᩮᩣ ᨩᩅᨶᩮᩣ, ᨿᩩ.

ᨴ᩠ᩅᨿᩴ ¶ ᨠᩅᩦᨲᩥᨡ᩠ᨿᩣᨲᩮ ᨾᩩᨡᨻᨶ᩠ᨵᨶᩮ. ᨾᩩᨡᨾᩣᨲᩥᨭ᩠ᨮᨲᩦᨲᩥ ᨾᩩᨡᩣᨮᩣᨶᩴ. ᨡᩮ ᨾᩩᨡᩅᩥᩅᩁᩮ ᩃᩦᨶᩮᩣ ᨡᩃᩦᨶᩮᩣ. ‘‘ᨠᩅᩥᨠᩣ ᨲᩩ ᨡᩃᩦᨶᩮᩣᨲᩥ [ᨡᩃᩦᨶᩮ ᨳᩦ (?)], ᨠᩅᩥᨿᩴ ᨠᨳᨶᩴᨲ᩠ᨿᨸᩦ’’ᨲᩥ ᩁᨽᩈᩮᩣ. ᨠᩅᩥ, ᨠᩅᩥᨠᩣᨸ᩠ᨿᨲᩕ. ᨠᩩ ᩈᨴ᩠ᨴᩮ. ᩍ, ᩎ ᨧ, ᩈᨠᨲ᩠ᨳᩮ ᨠᩮᩣ. ᩅᩣᩈᨴ᩠ᨴᩮᨶ ᨶᨸᩩᩴᩈᨠᨲ᩠ᨲᩴ ᩈᨾᩩᨧ᩠ᨧᩥᨶᩮᩣᨲᩥ. ᩅᩩᨲ᩠ᨲᨬ᩠ᨧ ᩋᨾᩁᨠᩮᩣᩈᩮ ‘‘ᨠᩅᩥᨠᩣ ᨲᩩ ᨡᩃᩦᨶᩮᩣ’ᨶᩥᨲ᩠ᨳᩦ’’ᨲᩥ [ᩋᨾᩁ ᪑᪘.᪔᪙].

ᩋᩔᩣᨽᩥᨲᩣᩊᩥᨶᩦ ᩅᩮᨲ᩠ᨲᩅᩥᨠᨲᩣᨴᩥ ᨠᩈᩣ ᨶᩣᨾ. ᨠᩈ ᨣᨾᨶᩮ, ᩋ, ᨠᩁᨱᩈᩣᨵᨶᩴ.

᪓᪗᪑. ᩋᩔᩔ ᨶᩣᩈᩣᨣᨲᩁᨩ᩠ᨩᩩᨾ᩠ᩉᩥ ᨠᩩᩈᩣ, ᨠᩩᩈ ᩈᩥᩃᩮᩈᨶᩮ. ᨴ᩠ᩅᨿᩴ ᩋᩔᩣᨿᩴ. ᩅᩃ ᩈᩴᩅᩁᨱᩮ, ᩅᩮᩣ, ᩊᨲ᩠ᨲᩴ, ᩌ, ᩅᩊᩅᩣ. ᩋᩈᨲᩦᨲᩥ ᩋᩔᩣ, ‘‘ᩍᨲ᩠ᨳᩥᨿᨾᨲᩥᨿᩅᩮᩣ ᩅᩣ’’ᨲᩥ ᩋ, ᩌ ᨧ, ᩋᩔᩣ. ᩅᩣᨾᩦᨸ᩠ᨿᨲᩕ. ᨴ᩠ᩅᨿᩴ ᨡᩩᩁᩮ. ᨡᩩᩁ ᨨᩮᨴᨶᩮ. ᩈᩴ ᩈᩩᨡᩴ ᨹᩁᨲ᩠ᨿᨶᩮᨶ ᩈᨹᩴ, ᨶᩮᩁᩩᨲ᩠ᨲᩮᩣ. ‘‘ᩈᨹᩴ ᨠ᩠ᩃᩦᩅᩮ ᨡᩩᩁᩮᩣ ᨸᩩᨾᩣ’’ᨲᩥ [ᩋᨾᩁ ᪑᪘.᪔᪙] ᩋᨾᩁᨠᩮᩣᩈᩮᩣ.

ᨴ᩠ᩅᨿᩴ ᨸᩩᨧ᩠ᨨᨾᨲ᩠ᨲᩮ. ᨸᩩᨧ᩠ᨨ ᨸᨾᩣᨴᩮ. ᨶ ᨣᨧ᩠ᨨᨲᩦᨲᩥ ᨶᨦ᩠ᨣᩩᨭ᩠ᨮᩮᩣ, ᩋᨦ᩠ᨣ ᨣᨾᨶᩮ, ᨮᩮᩣ, ᩋᩔᩩ, ᨴ᩠ᩅᩮᨸᩥ ᩋᨶᩥᨲ᩠ᨳᩥᨿᩴ. ᩃᩪᨾᩴᨸ᩠ᨿᨲᩕ. ᨴ᩠ᩅᨿᩴ ᨠᩮᩈᩅᨲᩥ ᨶᨦ᩠ᨣᩩᨭ᩠ᨮᨾᨲ᩠ᨲᩮ, ᨶ ᨲᩩ ᩉᨲ᩠ᨳᩥᨶᩮᩣ ᩑᩅ. ᩅᩣᩃᩈᨾᩪᩉᨿᩮᩣᨣᩣ ᩅᩣᩃᩉᨲ᩠ᨳᩮᩣ, ᨿᨳᩣ ᨠᩮᩈᩉᨲ᩠ᨳᩮᩣ ᨧᨿᩮ, ᨲᨳᩣᨲᩕᩣᨸᩥ. ᩅᩣᩃᩮᩣ ᨵᩥᨿ᩠ᨿᨲᩮ ᩋᩈ᩠ᨾᩥᨶ᩠ᨲᩥ ᩅᩣᩃᨵᩥ, ᩍ.

ᩑᨲ᩠ᨳᩣᨶᩣᨣᨲᩣᨸᩥ ᩋᩔᩔ ᨵᩣᩁᩣᨡ᩠ᨿᩣ [ᨵᩣᩅᩣᨡ᩠ᨿᩣ (ᨠ.)] ᨸᨬ᩠ᨧ ᨣᨲᩥᨿᩮᩣ ᨠᨳᩮᨲᨻ᩠ᨻᩣ. ᨿᨳᩣ –

ᩋᨠ᩠ᨠᨶ᩠ᨴᩥᨲᩴ ¶ ᨵᩮᩣᩁᩥᨲᨠᩴ, ᩁᩮᨧᩥᨲᩴ ᩅᨣ᩠ᨣᩥᨲᩴ ᨸ᩠ᩃᩩᨲᩴ;

ᨣᨲᩥᨿᩮᩣᨾᩮ ᨸᨬ᩠ᨧ ᨵᩣᩁᩣ [ᨵᩣᩅᩣ (ᨠ.)], ᩋᩔᩣᨶᩴ ᩅᩥᨬ᩠ᨬᩩᨶᩣ ᨾᨲᩣ [ᩋᨾᩁ ᪑᪘.᪔᪘-᪙].

ᨲᨲ᩠ᨳ ᩅᩥᨲ᩠ᨳᨾ᩠ᨽᩣ ᩈᨾᩣᩅᨣᨲᩥ ᩋᨠ᩠ᨠᨶ᩠ᨴᩥᨲᩴ, ᨠᨶ᩠ᨴᩥ ᨣᨲᩥᩈᩮᩣᩈᨶᩮᩈᩩ, ᨲᩮᩣ. ᨲᨲᩮᩣ ᩋᨵᩥᨠᩣ ᨧᨲᩩᩁᩣᨣᨲᩥ ᨵᩮᩣᩁᩥᨲᨠᩴ, ᨵᩮᩣᩁ ᨣᨲᩥᨧᩣᨲᩩᩁᩥᨿᩮ, ᨲᩮᩣ, ᩈᨠᨲ᩠ᨳᩮ ᨠᩮᩣ. ᨾᨱ᩠ᨯᩃᩥᨠᩣᨿᩣᨶᩮᨶ ᨣᨾᨶᩴ ᩁᩮᨧᩥᨲᩴ, ᩁᩥᨧ ᩅᩥᨿᩮᩣᨩᨶᩈᨾ᩠ᨻᨩ᩠ᨫᨶᩮᩈᩩ, ᩈᨾ᩠ᨻᨩ᩠ᨫᨶᩴ ᨾᩥᩔᨶᩴ. ᩅᩮᨣᩮᨶ ᨸᩁᩥᨠ᩠ᨡᩥᨲ᩠ᨲᩮᩣ ᨸᩁᩥᨧᩁᨱᩴ ᩅᨣ᩠ᨣᩥᨲᩴ, ᩅᨣ᩠ᨣ ᨣᨾᨶᨲ᩠ᨳᩮᩣ. ᨲᩩᩁᩴ ᩈᨾᩮᨶ ᨣᨾᨶᩴ ᨸ᩠ᩃᩩᨲᩴ, ᨸ᩠ᩃᩩ ᨣᨲᩥᨿᩴ. ᨲ’ᨴᩩᨲ᩠ᨲ’ᨾᩔᩈᨲ᩠ᨳᩮ ‘‘ᩈᨾᩮᩣ’ᨵᩥᨠᩮᩣ ᩃᨿᩮᩣ ᩅᩮᨣᩦ, ᨲᩩᩁᩥᨲᩔᩮᩣ ᨽᩅᩮ ᨠᨾᩣ’’ᨲᩥ.

᪓᪗᪒. ᨴ᩠ᩅᨿᩴ ᨿᩩᨴ᩠ᨵᨲ᩠ᨳᩮ ᨧᨠ᩠ᨠᨿᩩᨲ᩠ᨲᨿᩣᨶᩮ. ᩈᨶ᩠ᨴ ᨣᨾᨶᩮ, ᩈᨶ᩠ᨴᨲᩮ ᨣᨾ᩠ᨿᨲᩮᨶᩮᨶᩮᨲᩥ ᩈᨶ᩠ᨴᨶᩮᩣ, ᨿᩩ. ᩁᨾᨲᩮᨶᩮᨶᩮᨲᩥ ᩁᨳᩮᩣ, ᨳᩮᩣ, ᨾᩃᩮᩣᨸᩮᩣ. ᩈᨲᨦ᩠ᨣᩮᩣᨸ᩠ᨿᨲᩕ. ᩈᨲᨾᨦ᩠ᨣᩣᨶ᩠ᨿᩔ.

ᨿᩴ ᨶ ᩁᨱᩣᨿ ᨿᩩᨴ᩠ᨵᨲ᩠ᨳᩴ ᨧᨠ᩠ᨠᨿᩩᨲ᩠ᨲᩴ ᨿᩣᨶᩴ, ᩋᨸᩥ ᨲᩩ ᨠᩦᩊᩣᨽᨾᨶᩣᨴ᩠ᨿᨲ᩠ᨳᩴ, ᩈᩮᩣ ᨸᩩᩔᩁᨳᩮᩣ. ᩅᩩᨲ᩠ᨲᨬ᩠ᨧ ᩋᨾᩁᨠᩮᩣᩈᩮ ‘‘ᩋᨿᩴ ᨸᩩᩔᩁᨳᩮᩣ ᨧᨠ᩠ᨠ-ᨿᩣᨶᩴ ᨶ ᩈᨾᩁᩣᨿ ᨿ’’ᨶ᩠ᨲᩥ [ᩋᨾᩁ ᪑᪘.᪕᪑]. ᨸᩩᩈ ᨸᩣᩈᨶᩮ, ᩈᩮᩣ, ᨸᩩᩈᨶᩣᨾᨠᩮᨶ ᨹᩃᩅᩥᩈᩮᩈᩮᨶ ᨿᩩᨲ᩠ᨲᩮᩣ ᩁᨳᩮᩣ ᨸᩩᩔᩁᨳᩮᩣ, ᨸᩩᩔᨶᨠ᩠ᨡᨲ᩠ᨲᩮᨶ ᨠᨲᩮᩣ, ᩈᨩ᩠ᨩᩥᨲᩮᩣ ᩅᩣ ᩁᨳᩮᩣᨲᩥ ᨸᩩᩔᩁᨳᩮᩣ.

ᨻ᩠ᨿᨣ᩠ᨥᩔ ᨧᨾ᩠ᨾᩣᩅᩩᨲᩮᩣ ᨸᩁᩥᨠ᩠ᨡᩥᨲ᩠ᨲᩮᩣ ᩁᨳᩮᩣ ᩅᩮᨿ᩠ᨿᨣ᩠ᨥᩮᩣ ᨶᩣᨾ, ᨻ᩠ᨿᨣ᩠ᨥᩔ ᩅᩥᨠᩣᩁᩮᩣ ᨧᨾ᩠ᨾᩴ ᩅᩮᨿ᩠ᨿᨣ᩠ᨥᩴ, ᨱᩮᩣ, ᨲᩮᨶ ᨸᩁᩥᩅᩩᨲᩮᩣ ᩁᨳᩮᩣ ᩅᩮᨿ᩠ᨿᨣ᩠ᨥᩮᩣ, ᨱᩮᩣ, ᩏᨽᨿᨲᩕᩣᨸᩥ ᩅᩩᨯ᩠ᨰᩣᨣᨾᩮᩣ. ‘‘ᨸᨧ᩠ᨧᨲ᩠ᨲᩴ [ᨸᨧ᩠ᨧᨲ᩠ᨳᩴ (ᨠ.)] ᩋᨿᨶ᩠ᨲᩥ ¶ ᨣᨧ᩠ᨨᨶ᩠ᨲᩦᨲᩥ ᨸᨧ᩠ᨧᨿᩣ’’ᨲᩥ ᩅᨧᨶᨲ᩠ᨳᨲᩮᩣ ᨸᨧ᩠ᨧᨲ᩠ᨲᨾᩮᩅ [ᨸᨧ᩠ᨧᨲ᩠ᨳᨾᩮᩅ (?)] ᨸᨧ᩠ᨧᨿᩣ ᨽᩅᨶ᩠ᨲᩥ, ᨿᨳᩣ ᨠᩣᩁᩥᨲᨶ᩠ᨲᩈ᩠ᨾᩣᨸᩥ ᨸᨿᩮᩣᨩᨠᩅᩈᩮᨶ ᩋᨶᩮᨠᨠᩣᩁᩥᨲᨸᨧ᩠ᨧᨿᩣ. ᨴᩦᨸᩥᨶᩮᩣ ᨧᨾ᩠ᨾᩣᩅᩩᨲᩮᩣ ᩁᨳᩮᩣ ᨴᩦᨸᩮᩣ ᨶᩣᨾ, ᨴᩦᨸᩥᨶᩮᩣ ᩅᩥᨠᩣᩁᩮᩣ ᨧᨾ᩠ᨾᩴ ᨴᩦᨸᩴ, ᨱᩮᩣ, ᨲᩮᨶ ᨸᩁᩥᩅᩩᨲᩮᩣ ᩁᨳᩮᩣ ᨴᩦᨸᩮᩣ, ᨱᩮᩣ.

᪓᪗᪓. ᨴ᩠ᩅᨿᩴ ᨸᩩᩁᩥᩈᨿᩩᨲ᩠ᨲᨿᩣᨶᩮ. ᩈᩥ ᩈᩮᩅᩣᨿᩴ. ᩈᩩᨡᨲ᩠ᨳᩥᨠᩮᩉᩥ ᩈᩮᩅᩦᨿᨲᩮᨲᩥ ᩈᩥᩅᩥᨠᩣ, ᨱ᩠ᩅᩩ, ᩅᩣᨣᨾᩮᩣ, ᩍᨲ᩠ᨲᩴ, ᨠᩥᨲᨸᨧ᩠ᨧᨿᩣ ᩉᩥ ᨿᩮᨽᩩᨿ᩠ᨿᩮᨶ ᨠᨾ᩠ᨾᩣᨴᩦᩈᩩᨸᩥ ᩅᨲ᩠ᨲᨶ᩠ᨲᩥ, ᨠᩥᨧ᩠ᨧᨸᨧ᩠ᨧᨿᩣ ᨧ ᨠᨲ᩠ᨲᩁᩥᨸᩥ, ᨿᨳᩣ ‘‘ᩅᩥᨶᨿᩮᩣ, ᨶᩥᩔᨿᩮᩣ, ᨲᨸᨶᩦᨿᩣ ᨵᨾ᩠ᨾᩣ’’ᨲ᩠ᨿᩣᨴᩦᩈᩩ, ᨾᩉᩣᨸᨴᩮᩈᩮᨶ ᩅᩣ ᨠᩥᨲᨠᩥᨧ᩠ᨧᨸᨧ᩠ᨧᨿᩣᨶᩴ ᨠᨲ᩠ᨲᩩᨠᨾ᩠ᨾᩣᨴᩦᩈ᩠ᩅᨸᩥ ᨸᩅᨲ᩠ᨲᩥ ᩅᩮᨴᩥᨲᨻ᩠ᨻᩣ, ᩈᩥᩅᩴ ᨠᩁᩮᩣᨲᩦᨲᩥ ᩅᩣ ᩈᩥᩅᩥᨠᩣ, ᩍᨠᩮᩣ. ᨿᩣᨸ᩠ᨿᩮᩉᩥ ᩋᨵᨾᩮᩉᩥ ᨿᩣᨿᨲᩮ ᨶᩥᨿ᩠ᨿᨲᩮᨲᩥ ᨿᩣᨸ᩠ᨿᨿᩣᨶᩴ. ‘‘ᨿᩣᨸ᩠ᨿ ᨸᩣᨶᩦᨿᨠᩮ ᨶᩥᨶ᩠ᨴ᩠ᨿᩮ’’ᨲᩥ ᩉᩥ ᨶᩣᨶᨲ᩠ᨳᩈᨦ᩠ᨣᩉᩮ.

ᨴ᩠ᩅᨿᩴ ᩈᨠᨭᩮ. ᩋᨶᩥᨲ᩠ᨳᩦ ᨲᩪᨲᩥ ᨲ᩠ᩅᨶ᩠ᨲᩴ ᩃᩥᨦ᩠ᨣᨸᨴᩴ. ᩈᨠ ᩈᨲ᩠ᨲᩥᨿᩴ, ᩋᨭᩮᩣ. ᩋᨶ ᨸᩣᨱᨶᩮ, ᨠᩁᨱᩈᩣᨵᨶᩴ, ᨶᨲ᩠ᨳᩥ ᨶᩣᩈᩣ ᨿᩔᩣᨲᩥ ᩅᩣ ᩋᨶᩴ, ᩈᩣᩃᩮᩣᨸᩮᩣ, ᩁᩔᩮᩣ ᨧ. ᨠ᩠ᩃᩦᩅᩮ’ᨶᩴ, ᩈᨠᨭᩮᩣ, ᨶᩥᨲ᩠ᨳᩦᨲ᩠ᨿᨾᩁᨠᩮᩣᩈᩮᩣ [ᩋᨾᩁ ᪑᪘.᪕᪒].

ᨴ᩠ᩅᨿᩴ ᨧᨠ᩠ᨠᩮ. ᨠᩁᩮᩣᨲᩥ ᨣᨾᨶᨾᨶᩮᨶᩮᨲᩥ ᨧᨠ᩠ᨠᩴ, ᨴ᩠ᩅᩥᨲ᩠ᨲᩴ, ᨧᨠ᩠ᨠᩣᨴᩥ. ᩁᨳᩔ ᩋᨦ᩠ᨣᩴ ᩁᨳᨦ᩠ᨣᩴ. ᨲᩔ ᨧᨠ᩠ᨠᩔ ᩋᨶ᩠ᨲᩮᩣ ᩋᩅᩈᩣᨶᩴ ᨶᩮᨾᩥ, ᩈᩣ ᨶᩣᩁᩥᨿᩴ ᩍᨲ᩠ᨳᩥᨿᩴ. ᨶᨿᨲᩥ ᨧᨠ᩠ᨠᩴ ᨶᩮᨾᩥ. ᨿᩣ ᨽᩪᨾᩥᩴ ᨹᩩᩈᨲᩥ, ᨶᩦ ᨶᨿᩮ, ᨾᩥ, ᩎᨸᨧ᩠ᨧᨿᩮ ᨶᩮᨾᩦ ᨧ. ᨸᨵᩥᨸ᩠ᨿᨲᩕ.

᪓᪗᪔. ᨲᨾ᩠ᨾᨩ᩠ᨫᩮ ¶ ᨲᩔ ᩁᨳᩔ, ᨧᨠ᩠ᨠᩔ ᩅᩣ ᨾᨩ᩠ᨫᩮ ᨧᨠ᩠ᨠᩣᨠᩣᩁᩮᩣ ᨸᩥᨱ᩠ᨯᩥᨠᩣ, ᨿᩔᩴ ᩈᨻ᩠ᨻᩣᨶᩥ ᨠᨭ᩠ᨮᩣᨶᩥ ᩌᩈᨩ᩠ᨩᨶ᩠ᨲᩮ. ᨸᩥᨱ᩠ᨯᩥᨠᩣᩈᩣᩉᨧᩁᩥᨿᩣ ᨶᩣᨽᩥ ᩍᨲ᩠ᨳᩦ, ᩎᨸᨧ᩠ᨧᨿᩮ ᨶᩣᨽᩦ ᨧ. ᩈᨻ᩠ᨻᩣᨶᩥ ᨠᨭ᩠ᨮᩣᨶᩥ ᨸᩥᨱ᩠ᨯᩮᨲᩦᨲᩥ ᨸᩥᨱ᩠ᨯᩥᨠᩣ, ᨸᩥᨱ᩠ᨯ ᩈᨦ᩠ᨥᩣᨲᩮ, ᩋ, ᩈᨠᨲ᩠ᨳᩮ ᨠᩮᩣ. ᨸᩥᨱ᩠ᨯᩦᨸᩥ, ᨶᩣᨽᩥ ᩅᩥᨿᩣᨲᩥ ᨶᩣᨽᩥ.

ᩁᨳᩔ ᨿᩩᨣᨠᨭ᩠ᨮᩴ ᨿᨲᩕ ᩌᩈᨩ᩠ᨩᨲᩮ, ᩈ ᨿᩩᨣᨶ᩠ᨵᩁᩮᩣ. ᨠᩩᩴ ᨸᨳᩅᩥᩴ ᩅᩩᨱᩮᩣᨲᩥ ᩋᨧ᩠ᨨᩣᨴᨿᨲᩦᨲᩥ ᨠᩩᨻ᩠ᨻᩁᩮᩣ, ᩅᩩ ᩈᩴᩅᩁᨱᩮ, ᩁᩮᩣ, ᩏᩔᨲ᩠ᨲᩴ. ᨿᩩᨣᩴ ᨵᩣᩁᩮᨲᩦᨲᩥ ᨿᩩᨣᨶ᩠ᨵᩁᩮᩣ, ᩈᨬ᩠ᨬᩣᨿᩴ ᩋ, ᩋᨽᩥᨵᩣᨶᩣ ᩁᩔᩮᩣ.

ᩋᨠ᩠ᨡᩮᩣ ᩈᨠᨭᩴ, ᨲᨴᩅᨿᩅᩮᩣ ᩅᩣ, ᨲᨳᩣ ᨧᩣᩉᩣᨩᨿᩣᨧᩁᩥᨿᩮᩣ –

‘‘ᩋᨠ᩠ᨡᩮᩣ ᩅᩥᨽᩦᨭᨠᩮ ᨶᩥᨾ᩠ᨻᩮ, ᩈᨠᨭᩮ ᨧ ᨻ᩠ᨿᩅᩉᩣᩁᩮ;

ᩁᨳᩔᩣᩅᨿᩅᩮ ᨠᩔᩮ, ᨸᩣᩈᨠᩮᨸ᩠ᨿ’ᨠ᩠ᨡ’ᨾᩥᨶ᩠ᨴᩕᩥᨿᩮ’’ᨲᩥ.

ᨲᩔᨣ᩠ᨣᨣᨲᩮ ᨠᩦᩃᩮ ᩌᨱᩦ, ᩍᨲ᩠ᨳᩦ. ᩋᨱᩥᨸᩥ, ‘‘ᩈᩦᨾᩣᩔᩥᨠ᩠ᨡᨣ᩠ᨣᨠᩦᩃᩮᩈᩩ, ᩋᨱᩦ ᩌᨱᩦ ᩍᨾᩮ ᨴ᩠ᩅᩥᩈᩪ’’ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪘.᪕᪖] ᩉᩥ ᩁᩩᨴ᩠ᨴᩮᩣ ᨴ᩠ᩅᩥᨵᩣ ᨸᨮᨲᩥ. ‘‘ᩋᨱᩦ ᩌᨱᩦ ᨧ ᩋᨠ᩠ᨡᨣ᩠ᨣᨠᩦᩃᩮ ᩈᩦᨾᩣᩔᩥᩈᩩ ᨾᨲᩣ’’ᨲᩥ ᨧ ᨶᩣᨶᨲ᩠ᨳᩈᨦ᩠ᨣᩉᩮᩣᨸᩥ. ᩋᩔᩥ ᨠᩮᩣᨱᩮᩣ. ᩋᨱ ᩈᨴ᩠ᨴᩮ, ᨱᩥ. ᨸᩩᨻ᩠ᨻᨸᨠ᩠ᨡᩮ ᨶ ᩅᩩᨯ᩠ᨰᩥ, ᩋᨶ ᨸᩣᨱᨶᩮ ᩅᩣ, ᨱᨲ᩠ᨲᩴ. ᨠᨱ᩠ᨯᨠᩣᨴᩥᩈᨲ᩠ᨳᩮᩉᩥ ᨸᩁᩥᩁᨠ᩠ᨡᨱᨲ᩠ᨳᩴ ᨠᨲᩮᩣ ᩁᨳᩣᩅᩁᨱᩮᩣ ᩅᩁᩩᨳᩮᩣ, ᨿᩮᩣ ‘‘ᩁᨳᨣᩩᨲ᩠ᨲᩦ’’ᨲᩥ ᨡ᩠ᨿᩣᨲᩮᩣ. ᩅᩁ ᩅᩁᨱᩮ, ᩅᩁᨱᨾᩮᨲ᩠ᨳᩣᩅᩁᨱᩴ, ᨿᨳᩣ ᩁᨳᩴ ᨳᩥᩁᨲ᩠ᨳᩴ ᨲᨭ᩠ᨮᨬ᩠ᨧ ᨣᩮᩣᨸᨲᩦᨲᩥ ᩁᨳᨣᩩᨲ᩠ᨲᩥ, ᩍᨲ᩠ᨳᩦ, ‘‘ᨣᩩᨲ᩠ᨲᩥ ᨠᩣᩁᩣᨣᩣᩁᩮ ᩅᩩᨲ᩠ᨲᩣ, ᨽᩪᨣᨲᩮ ᩁᨠ᩠ᨡᨱᩮ ᨿᨾᩮ’’ᨲᩥ ᨶᩣᨶᨲ᩠ᨳᩈᨦ᩠ᨣᩉᩮ.

᪓᪗᪕. ᩁᨳᩣᨴᩦᨶᩴ ¶ ᨸᩩᩁᩮᩣᨽᩣᨣᩈᨦ᩠ᨡᩣᨲᩮ ᨾᩩᨡᩮ ᨵᩩᩁᩮᩣ. ᨵᩁ ᨵᩣᩁᨱᩮ, ᩋᩔᩩ, ᨿᩣᨶᨾᩩᨡᩴᨸ᩠ᨿᨲᩕ. ᩋᨠ᩠ᨡᩮᩣᨸᨠ᩠ᨡᩁᩣᨴᨿᩮᩣ ᩁᨳᩔ ᩋᨦ᩠ᨣᩣ ᨶᩣᨾ. ᩋᨠ ᨣᨾᨶᩮ, ᨡᩮᩣ, ᩋᨠ᩠ᨡᩮᩣ, ᨴ᩠ᩅᩥᨶ᩠ᨶᩴ ᩁᨳᨧᨠ᩠ᨠᩣᨶᩴ ᩋᨶ᩠ᨲᩁᨣᨲᩮᩣ ᨠᨭ᩠ᨮᩅᩥᩈᩮᩈᩮᩣ. ᩏᨸᩁᩥ ᨠᩁᩦᨿᨲᩮᨲᩥ ᩏᨸᨠ᩠ᨡᩁᩮᩣ, ᩋᨠ᩠ᨡᩔᩮᩣᨸᩁᩥ ᨠᨭ᩠ᨮᩅᩥᩈᩮᩈᩮᩣ. ᩋᨾᩁᨠᩮᩣᩈᩮ ᨸᨶ ᩏᨸᨠ᩠ᨡᩁᩈᨴ᩠ᨴᩔ ᩈᨻ᩠ᨻᩁᨳᩣᩅᨿᩅᩅᩣᨧᨠᨲ᩠ᨲᩴ ᩅᩩᨲ᩠ᨲᩴ ‘‘ᩁᨳᨦ᩠ᨣᨶ᩠ᨲᩩ ᩏᨸᨠ᩠ᨡᩁᩮᩣ’’ᨲᩥ [ᩋᨾᩁ ᪑᪘.᪕᪕]. ‘‘ᩋᨸᨠ᩠ᨡᩁᩮᩣ’’ᨲᩥᨸᩥ ᨸᩣᨮᩮᩣ.

ᩈᨻ᩠ᨻᩈ᩠ᨾᩥᩴ ᩉᨲ᩠ᨳᩣᨴᩥᨠᩮ ᩅᩣᩉᨶᩮ ᨿᩣᨶᩣᨴᩥᨲ᩠ᨲᨿᩴ, ᩈᨻ᩠ᨻᨲᩕ ᨠᩁᨱᩈᩣᨵᨶᩴ. ᨿᩮᩣᨩᨶᩦᨿᩴ ᨿᩩᨩ᩠ᨩᨲᩮᨶᩮᨶᩣᨲᩥ ᨿᩮᩣᨣ᩠ᨣᩴ, ᨱ᩠ᨿᩮᩣ. ᨸᨲ᩠ᨲᩴ ᨵᩮᩣᩁᨱᨬ᩠ᨧᩣᨲᩕ. ᨸᨲ ᨣᨲᩥᨿᩴ. ᨵᩮᩣᩁ ᨣᨲᩥᨧᩣᨲᩩᩁᩥᨿᩮ, ᩑᨲ᩠ᨳᩣᨸᩥ ᨠᩁᨱᩈᩣᨵᨶᩴ.

᪓᪗᪖. ᨧᨲᩩᨠ᩠ᨠᩴ ᩈᩣᩁᨳᩥᨾ᩠ᩉᩥ. ᩁᨳᩮᨶ ᨧᩁᨲᩥ ᩈᩦᩃᩮᨶᩣᨲᩥ ᩁᨳᨧᩣᩁᩦ. ᩈᩅᨲᩥ ᨸᩮᩁᨿᨲᩦᨲᩥ ᩈᩪᨲᩮᩣ, ᩈᩪ ᨸᩮᩁᨱᩮ, ᨲᩮᩣ. ᩋᨩ ᨣᨾᨶᩮ. ᨸᩣᨩᩮᨲᩦᨲᩥ ᨸᩣᨩᩥᨲᩣ, ᩁᩥᨲᩩ, ᨴᩦᨥᩣᨴᩥ. ᩈᩁ ᨣᨲᩥᨿᩴ, ᨳᩥ, ᩁᨳᩮᨶ ᩈᩉ ᨣᨧ᩠ᨨᨲᩦᨲᩥ ᩅᩣ ᩈᩣᩁᨳᩥ, ᩍᨱ, ᩋᨬ᩠ᨬᨲᩕᩮᩣᨸᨧᩣᩁᩣ. ᨶᩥᨿᨶ᩠ᨲᩣ, ᨿᨶ᩠ᨲᩣ, ᨡᨲ᩠ᨲᩣ, ᩈᨻ᩠ᨿᨭ᩠ᨮᩮᩣ, ᨴᨠ᩠ᨡᩥᨱᨲ᩠ᨳᩮᩣ, ᩁᨳᨠᩩᨭᩩᨾ᩠ᨻᩦᨸ᩠ᨿᨲᩕ.

‘‘ᨶᩥᨿᨶ᩠ᨲᩣ ᨸᩣᨩᩥᨲᩣ ᨿᨶ᩠ᨲᩣ, ᩈᩪᨲᩮᩣ ᨡᨲ᩠ᨲᩣ ᨧ ᩈᩣᩁᨳᩥ;

ᩈᨻ᩠ᨿᨭ᩠ᨮᩮᩣ ᨴᨠ᩠ᨡᩥᨱᨲ᩠ᨳᩮᩣ ᨧ, ᩈᨬ᩠ᨬᩣ ᩁᨳᨠᩩᨭᩩᨾ᩠ᨻᩥᨶᩮᩣ’’ᨲᩥ [ᩋᨾᩁ ᪑᪘.᪕᪖-᪖᪐]. –

ᩅᩩᨲ᩠ᨲᩴ ¶ . ᩋᨲ᩠ᨳᨲᩮᩣ ᩈᩣᩁᨳᩥᨶᩮᩣ ᩁᨳᨠᩩᨭᩩᨾ᩠ᨻᩦ ᨧ ᨶᩣᨾᩴ. ᩁᨳᨶᩣᨿᨠᩮ ᨲᩩ ‘‘ᩁᨳᩣᩁᩮᩣᩉᩮᩣ ᨧ ᩁᨳᩥᨠᩮᩣ ᩁᨳᩦ’’ᨲᩥ ᨸᨧ᩠ᨨᩣ ᩅᨠ᩠ᨡᨲᩥ. ᨡᩩᨴᩥ ᩈᩴᨸᩮᩈᨶᩮ, ᨲᩩ, ᨴᩔ ᨲᩮᩣ, ᩏᩔᨲ᩠ᨲᨬ᩠ᨧ, ᨡᨲ᩠ᨲᩣ.

ᨲᩥᨠᩴ ᩁᨳᩮ ᨸᩣᨩᩥᨲᨲᩁᩣ ᩋᨬ᩠ᨬᩮ ᨿᩮᩣᨵᩣ, ᩋᨲᩕ ᨿᩮ ‘‘ᩁᨳᨶᩣᨿᨠᩣ’’ᨲᩥᨸ᩠ᨿᩩᨧ᩠ᨧᨶ᩠ᨲᩮ. ᩁᨳᨾᩣᩁᩮᩣᩉᨲᩦᨲᩥ ᩁᨳᩥᨠᩮᩣ, ᩁᨳᩦ ᨧ. ᩁᨳᩮᨶ ᨿᩩᨩ᩠ᨩᨲᩦᨲᩥ ᩅᩣ ᩁᨳᩥᨠᩮᩣ, ᩁᨳᩦ ᨧ. ᩁᨳᩥᨶᩮᩣ, ᩈᨶ᩠ᨴᨶᩣᩁᩮᩣᩉᩮᩣᨸ᩠ᨿᨲᩕ. ᨴ᩠ᩅᨿᩴ ᨿᩮᩣᨵᩮ. ᨿᩩᨵ ᩈᨾ᩠ᨸᩉᩣᩁᩮ, ᨱᩮᩣ. ᨽᨭᨲᩥ ᨿᩩᨩ᩠ᨩᨲᩦᨲᩥ ᨽᨭᩮᩣ, ᩋ. ᨠ᩠ᩅᨧᩥ ᨿᩮᩣᨴ᩠ᨵᩮᩣᨸᩥ.

᪓᪗᪗-᪓᪗᪙. ᨧᨲᩩᨠ᩠ᨠᩴ ᨸᨴᩣᨲᩥᨠᩮ. ᨸᨴᩮᩉᩥ ᩋᨲᨲᩥ ᩋᨩᨲᩦᨲᩥ ᨸᨴᩣᨲᩥ, ᩋᨲ ᩈᩣᨲᨧ᩠ᨧᨣᨾᨶᩮ, ᩍ. ᨸᨴ ᨣᨾᨶᩮ. ᨸᨴᨲᩦᨲᩥ ᨸᨲ᩠ᨲᩥ, ᩍ, ᨴ᩠ᩅᩥᨲ᩠ᨲᩴ. ᨸᨴᩮᨶ ᩋᨴᨲᩦᨲᩥ ᩅᩣ ᨸᨲ᩠ᨲᩥ, ᩋᩃᩮᩣᨸᩮᩣ, ᨴᩔ ᨲᩮᩣ, ᩍᨾᩮ ᨴ᩠ᩅᩮ, ᩅᨠ᩠ᨡᨾᩣᨶᩣ ᨴ᩠ᩅᩮ ᨧ ᨸᩩᨾᩮ. ᨸᨴᩮᩉᩥ ᨣᨧ᩠ᨨᨲᩦᨲᩥ ᨸᨴᨣᩮᩣ, ᨸᨴᩥᨠᩮᩣ. ᨸᩣᨴᩣᨲᩥᨠᩮᩣ, ᨸᨴᩣᨩᨿᩮᩣᨸ᩠ᨿᨲᩕ [ᨸᩣᨴᩮᩉᩥ ᩋᨩᨲᩥ ᩎ, ᩁᩔᩮᩣ ᨧ ᨸᨴᩣᨩᩥᩴ (ᨧᩥᨶ᩠ᨲᩣᨾᨱᩥᨭᩦᨠᩣ ᪑᪘.᪖᪖)].

ᨨᨠ᩠ᨠᩴ ¶ ᨠᩅᨧᩮ. ᨶᩉ ᨻᨶ᩠ᨵᨶᩮ, ᨠᩁᨱᩮ ᨱᩮᩣ. ᨠᨦ᩠ᨠ ᨣᨲ᩠ᨿᨲ᩠ᨳᩮᩣ, ᩋᨭᩮᩣ. ᩅᩁᩦᨿᨲᩮ ᨲᨶ᩠ᨲᩥ ᩅᨾ᩠ᨾᩴ, ᩅᩁ ᩅᩁᨱᩮ, ᩅᩁ ᩍᨧ᩠ᨨᩣᨿᩴ ᩅᩣ, ᨾᩮᩣ, ᩁᩔ ᨾᩮᩣ. ᨠᨧ ᨻᨶ᩠ᨵᨶᩮ, ᩋ, ᩅᨠᩣᩁᩅᨱ᩠ᨱᩣᨣᨾᩮᩣ. ᩏᩁᩮᩣ ᨨᩣᨴᨿᨶ᩠ᨲ᩠ᨿᨶᩮᨶᩣᨲᩥ ᩏᩁᨧ᩠ᨨᨴᩮᩣ. ᩅᩣᩈᨴ᩠ᨴᩮᩣ ᨴ᩠ᩅᩥᨶ᩠ᨶᩴ ᨸᩩᨶ᩠ᨶᨸᩩᩴᩈᨠᨲ᩠ᨲᩴ ᩈᨾ᩠ᨸᩥᨱ᩠ᨯᩮᨲᩥ. ᨩᩃ ᨴᩥᨲ᩠ᨲᩥᨿᩴ, ᨱ᩠ᩅᩩ. ᨲᨶᩩᨲ᩠ᨲᩴ, ᨴᩴᩈᨶᩴ, ᨩᨣᩁᩮᩣᨸ᩠ᨿᨲᩕ. ‘‘ᨩᨣᩁᩮᩣ ᨠᨦ᩠ᨠᨭᩮᩣ ᨿᩮᩣᨣᩮᩣ, ᩈᨶ᩠ᨶᩣᩉᩮᩣ ᨧ ᩏᩁᨧ᩠ᨨᨴᩮᩣ’’ᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪘.᪖᪔ ᨻ᩠ᨿᩣᨡ᩠ᨿᩣᩈᩩᨵᩣ ᪒.᪘.᪖᪔] ᩅᩮᩣᨸᩣᩃᩥᨲᩮᩣ.

ᨲᩥᨠᩴ ᨠᨲᩈᨶ᩠ᨶᩣᩉᩮ. ᨧᨾ᩠ᨾᩮᨶ ᩈᨾ᩠ᨾᩣ ᨶᨴ᩠ᨵᩅᩣᨲᩥ ᩈᨶ᩠ᨶᨴ᩠ᨵᩮᩣ, ᨵᩮᩣ. ᩈᨩ᩠ᨩᩩ ᨣᨲᩥᨿᩴ, ᩋ. ᩅᨾ᩠ᨾᩮᨶ ᨶᨴ᩠ᨵᩅᩣ ᩅᨾ᩠ᨾᩥᨠᩮᩣ. ᨴᩴᩈᩥᨲᩮᩣ, ᩏᩁᨧ᩠ᨨᨴᩥᨠᩮᩣ, ᨻ᩠ᨿᩪᩊ᩠ᩉᨠᨦ᩠ᨠᨭᩮᩣ, ᨩᨣᩁᩥᨠᩮᩣᨸ᩠ᨿᨲᩕ.

ᨴ᩠ᩅᨿᩴ ᨸᩁᩥᨴᩉᩥᨲᩮ ᩅᨲ᩠ᨳᩣᨴᩮᩣ. ᩌᨸᨲᩥᨸᩩᨻ᩠ᨻᩮᩣ ᨾᩩᨧᨵᩣᨲᩩ ᨸᩁᩥᨴᩉᨶᩮ, ᩏᨽᨿᨲ᩠ᨳ ᨲᩮᩣ, ᨽᩪᨩᩣᨴᩥ. ᨸᨠ᩠ᨡᩮ ‘‘ᩈᩩᩈᨸᨧᩈᨠᨲᩮᩣ ᨠ᩠ᨡᨠ᩠ᨠᩣ ᨧᩮ’’ᨲᩥ ᩈᩩᨲ᩠ᨲᩮ ᨧᨠᩣᩁᩮᨶ ᨲᨸᨧ᩠ᨧᨿᩔ ᨠ᩠ᨠᩮᩣ, ᨵᩣᨲ᩠ᩅᨶ᩠ᨲᩃᩮᩣᨸᩮᩣ ᨧ. ᨸᩥᨶᨴ᩠ᨵᩮᩣ, ᩋᨸᩥᨶᨴ᩠ᨵᩮᩣᨸ᩠ᨿᨲᩕ. ᨸᩩᨻ᩠ᨻᨸᨠ᩠ᨡᩮ ᩋᨸᩥᩔᩣᨠᩣᩁᩃᩮᩣᨸᩮᩣ.

ᨧᨲᩩᨠ᩠ᨠᩴ ᩋᨽᩥᨧᩣᩁᨸᨴᩣᨲᩥᨾ᩠ᩉᩥ. ᨸᩩᩁᩮ ᨧᩁᨱᩈᩦᩃᩮᩣ, ᩈᨲ᩠ᨲᨾᩥᨿᩣ ᩋᩃᩮᩣᨸᩮᩣ ᩏᨽᨿᨲᩕᩣᨸᩥ. ᨸᩩᨻ᩠ᨻᩮ ᨱᩦ. ᨸᩁᨸᨠ᩠ᨡᩮ ᩋ, ᨸᩩᨻ᩠ᨻᩴ, ᨸᩩᨻ᩠ᨻᩮ ᩅᩣ ᨣᨧ᩠ᨨᨲᩦᨲᩥ ᨸᩩᨻ᩠ᨻᨦ᩠ᨣᨾᩮᩣ, ᨴᩩᨲᩥᨿᩣᨿᩣᩃᩮᩣᨸᩮᩣ. ᨸᩩᩁᩮᩣᨣᩮᩣ, ᩋᨣ᩠ᨣᩮᩈᩁᩮᩣ, ᨸᨭ᩠ᨮᩮᩣ, ᩋᨣ᩠ᨣᨲᩮᩣᩈᩁᩮᩣ, ᨸᩩᩁᩔᩁᩮᩣ, ᨸᩩᩁᩮᩣᨣᨾᩮᩣᨸ᩠ᨿᨲᩕ.

ᨴ᩠ᩅᨿᩴ ᩋᩈᩦᨥᨣᩣᨾᩥᨶᩥ. ᨾᨶ᩠ᨴᩴ ᨣᨧ᩠ᨨᨲᩥ ᩈᩦᩃᩮᨶᩣᨲᩥ ᨾᨶ᩠ᨴᨣᩣᨾᩦ, ᨱᩦ. ᨾᨶ᩠ᨳ ᩅᩥᩃᩮᩣᩊᨶᩮ, ᩋᨶᩮᨠᨲ᩠ᨳᨲ᩠ᨲᩣ ᩈᩴᨠᩥᩃᩮᩈᩮ ᨧ. ᩈᩴᨠᩥᩃᩥᩔᨲᩮᨲᩥ ᨾᨶ᩠ᨳᩁᩮᩣ, ᩋᩁᩮᩣ.

ᨲᩥᨠᩴ ᩅᩮᨣᩥᨶᩥ. ᨲᩩᩁᨾᩮᨲᩥ ᨣᨧ᩠ᨨᨲᩦᨲᩥ ᨲᩩᩁᩥᨲᩮᩣ, ᩍ ᨣᨲᩥᨿᩴ, ᨲᩮᩣ. ᨲᩩᩁᩔᩥ, ᨸᨩᩅᩦ, ᨩᩅᩮᩣᨸ᩠ᨿᨲᩕ. ᨴ᩠ᩅᨿᩴ ᨩᩮᨲᩩᨿᩮᩣᨣ᩠ᨣᨲᩣᨾᨲ᩠ᨲᩮ. ᨩᩥ ᨩᨿᩮ, ᨲᨻ᩠ᨻᩮᩣ, ᨩᩮᨲᨻ᩠ᨻᩴ, ᨱ᩠ᨿᨸᨧ᩠ᨧᨿᩮ ᨩᩮᨿ᩠ᨿᩴ.

᪓᪘᪐. ᨲᩥᨠᩴ ¶ ᩈᩪᩁᩮ. ᩈᩩᩁ ᩅᩦᩁ ᩅᩥᨠ᩠ᨠᨶ᩠ᨲᩮᨲᩥ ᨧᩩᩁᩣᨴᩥᨵᩣᨲᩩ. ᩈᩩᩁᨿᨲᩥ, ᩅᩦᩁᨿᨲᩦᨲᩥ ᩈᩪᩁᩮᩣ, ᩅᩦᩁᩮᩣ ᨧ, ᩋ, ᨴᩦᨥᩣᨴᩥ, ᨠᨶ᩠ᨲ ᨨᩮᨴᨶᩮ. ᩅᩥᨠ᩠ᨠᨶ᩠ᨲᩮᩣ. ᨴ᩠ᩅᨿᩴ ᩈᩉᩣᨿᨾᨲ᩠ᨲᩮ. ᩈᩉ ᩑᨲᩥ ᨣᨧ᩠ᨨᨲᩦᨲᩥ ᩈᩉᩣᨿᩮᩣ, ᩈᨻ᩠ᨻᨲᩕ ᨠᨲ᩠ᨲᩁᩥ ᨧ ᩋ. ᩋᨶᩩᩈᨴ᩠ᨴᩮᩣ ᨸᨧ᩠ᨨᩣᨲ᩠ᨳᩮᩣ. ᩈᨾᩣᨲᩥ ᩑᨲᩮ ᨴ᩠ᩅᩮ ᨲᩩᩃ᩠ᨿᨲ᩠ᨳᩣ. ᩋᨶᩩᨸ᩠ᩃᨸᩮᩣ, ᩋᨽᩥᩈᩁᩮᩣᨸᩥ. ᩈᨶ᩠ᨶᨴ᩠ᨵᨸ᩠ᨸᨽᩩᨲᩦ ᩈᨶ᩠ᨶᨴ᩠ᨵᩈᨴ᩠ᨴᩣᨴᨿᩮᩣ ᩋᨶᩩᨧᩁᨶ᩠ᨲᩣ ᨲᩦᩈᩩ.

ᨸᩣᨳᩮᨿ᩠ᨿᩴ ᨶᩣᨾ ᩁᩣᨩᩣᨴᩦᨶᩴ ᨿᩣᨲᩕᩣᩈ᩠ᩅᩮᩅ ᨻᩉᩩᩃᩴ ᨸᩅᨲ᩠ᨲᨲᩦᨲᩥ ᩍᨵ ᨲᩴ ᩅᩩᨲ᩠ᨲᩴ, ᨸᨳᩮ ᩉᩥᨲᩴ ᨸᩣᨳᩮᨿ᩠ᨿᩴ, ᩑᨿ᩠ᨿᩮᩣ. ᩈᨾ᩠ᨻ ᨾᨱ᩠ᨯᩃᩮ, ᩋᩃᩮᩣ, ᩈᨾᩮᨲᩥ ᩋᨴ᩠ᨵᩣᨶᨸᩁᩥᩔᨾᨾᩮᨲᩮᨶᩣᨲᩥ ᩅᩣ ᩈᨾ᩠ᨻᩃᩴ, ᩋᩃᩮᩣ, ᨻᩣᨣᨾᩮᩣ ᨧ.

᪓᪘᪑. ᨧᨲᩩᨠ᩠ᨠᩴ ᩈᩮᨶᩣᨿᩴ. ᩅᩣᩉᨿᩮᩣᨣᩣ ᩅᩣᩉᩥᨶᩦ. ᨵᨩᨿᩮᩣᨣᩣ ᨵᨩᩥᨶᩦ. ᩈᩥ ᨻᨶ᩠ᨵᨶᩮ, ᨶᩮᩣ, ᩈᩮᨶᩣ. ᨧᨾᩩ ᩋᨴᨶᩮ, ᩐ. ᨧᨾᨲᩥ ᨽᩦᩁᩩᨶ᩠ᨲᩥ ᨧᨾᩪ. ᨸᩩᨲᨶᩣ, ᩋᨶᩦᨠᩥᨶᩦ, ᩅᩁᩪᨳᩥᨶᩦᨸ᩠ᨿᨲᩕ. ᩑᨲ᩠ᨳ ᨧ ᨸᩩᨲᨶᩣ ᩋᨶᩦᨠᩥᨶᩦ ᩅᩣᩉᩥᨶᩦ ᨧᨾᩪ ᩈᩮᨶᩣᨽᩮᨴᩮᨸᩥ. ‘‘ᨸᩩᨲᨶᩣ’ᨶᩦᨠᩥᨶᩦ ᨧᨾᩪ, ᩈᩮᨶᩣ ᩈᩮᨶᩣᨶ᩠ᨲᩁᩮᨸᩥ ᨧᩮ’’ᨲᩥ ᩁᩩᨴ᩠ᨴᩮᩣ, ‘‘ᩈᩮᨶᩣᨸᨽᩮᨴᩮ ᩈᩮᨶᩣᨿᩴ, ᩈᩅᨶ᩠ᨲ᩠ᨿᨾᨸᩥ ᩅᩣᩉᩥᨶᩦ’’ᨲᩥ ᩁᨽᩈᩮᩣ ᨧ. ᨧᨠ᩠ᨠᩣᨴᩥᨲᩥᨠᩴ ᩈᩣᨾᨬ᩠ᨬᩮᨶ ᩈᩮᨶᩣᨿᩴ, ᩈᩮᨶᨦ᩠ᨣᩮ ᨧ. ᨧᩣᨱᨠ᩠ᨿᩮ ᨲᩩ ᩈᩮᨶᩣᩅᩥᩈᩮᩈᩮ ᩋᨶᩦᨠᩮᩣ ᩅᩩᨲ᩠ᨲᩮᩣ ‘‘ᨲᩦᨱᩥ ᨲᩥᨠᩣᨶ᩠ᨿᨶᩦᨠ’’ᨶ᩠ᨲᩥ.

ᩋᩔᩮᩅ ¶ ᨠᩣᨾᨶ᩠ᨴᨠᩦᨿᩮ ᩅᩥᩅᩁᨱᩴ, ᨿᨳᩣ –

‘‘ᩋᩔᩔ ᨸᨲ᩠ᨲᩥᨿᩮᩣᨵᩣ ᨿᩮ, ᨽᩅᩮᨿ᩠ᨿᩩᩴ ᨸᩩᩁᩥᩈᩣ ᨲᨿᩮᩣ;

ᩍᨲᩥ ᨠᨸ᩠ᨸᩣ ᨲᩩ ᨸᨬ᩠ᨧᩔᩣ, ᩅᩥᨵᩮᨿ᩠ᨿᩣ ᨠᩩᨬ᩠ᨩᩁᩔ ᨲᩩ;

ᨸᩣᨴᨦ᩠ᨣᩮᩣ ᨸᩣᨩᩥᨲᩣᩅᨶ᩠ᨲᩮᩣ, ᨸᩩᩁᩥᩈᩣ ᨴᩈ ᨸᨬ᩠ᨧ ᨧ;

ᩅᩥᨵᩣᨶᨾᩥᨲᩥ ᨶᩣᨣᩔ, ᨧᨲᩩᨠ᩠ᨠᩴ ᩈᨶ᩠ᨴᨶᩔ ᨧ;

ᩋᨶᩦᨠᨾᩥᨲᩥ ᩅᩥᨬ᩠ᨬᩮᨿ᩠ᨿ-ᨾᩥᨲᩥ ᨠᨸ᩠ᨸᩣ ᨶᩅ ᨴ᩠ᩅᩥᨸᩣ’’ᨲᩥ.

ᨠᩁᩦᨿᨲᩮ ᩅᩥᨣ᩠ᨣᩉᩮᩣ ᨿᩮᨶᩮᨲᩥ ᨧᨠ᩠ᨠᩴ. ᨻᩃ ᩈᩴᩅᩁᨱᩮ, ᩋ. ᩋᨱ ᩈᨴ᩠ᨴᩮ, ᩍᨠᩮᩣ. ᩅᩣᨠᩣᩁᩮᩣ ᨶᨸᩩᩴᩈᨠᨲ᩠ᨲᩴ ᩈᨾᩩᨧ᩠ᨧᩥᨶᩮᩣᨲᩥ.

ᨧᨲᩩᩁᨦ᩠ᨣᨻᩃᩣᨿ ᩈᩩᩈᨶ᩠ᨶᨴ᩠ᨵᩣᨿ ᩈᩮᨶᩣᨿ ᨿᩩᨴ᩠ᨵᨲ᩠ᨳᩴ ᨴᩮᩈᩅᩥᨴᩮᩈᩮ ᩅᩥᨶ᩠ᨿᩣᩈᩮᩣ ᩅᩥᨽᨩᩥᨲ᩠ᩅᩣ ᨶ᩠ᨿᩈᨶᩴ ᨮᨸᨶᩴ ᨻ᩠ᨿᩪᩉᩮᩣ ᨠᨳ᩠ᨿᨲᩮ. ᩅᩥᨽᨩᩥᨲ᩠ᩅᩣ ᩐᩉᨶᩴ ᨮᨸᨶᩴ ᨻ᩠ᨿᩪᩉᩮᩣ. ᨲᨻ᩠ᨽᩮᨴᩣ ᨴᨱ᩠ᨯᨽᩮᩣᨣᨾᨱ᩠ᨯᩃᩣᩈᩴᩉᨲᩣ ᨧᨲ᩠ᨲᩣᩁᩮᩣ ᨸᨠᨲᩥᨻ᩠ᨿᩪᩉᩣ. ᨲᨲᩕ ᩋᨶᩦᨠᩣᨶᩴ ᨲᩥᩁᩥᨿᨲᩮᩣ ᩅᩩᨲ᩠ᨲᩥ ᨴᨱ᩠ᨯᩮᩣ. ᩈᨾᨲ᩠ᨳᩣᨶᨾᨶᩦᨠᩣᨶᨾᨶ᩠ᩅᩣᩅᩩᨲ᩠ᨲᩥ ᩋᨬ᩠ᨬᩮᩣᨬ᩠ᨬᨲᩮᩣ ᩅᩩᨲ᩠ᨲᩥ ᨽᩮᩣᨣᩮᩣ. ᨾᨱ᩠ᨯᩃᩁᨧᨶᩣᨿ ᩈᩁᨶ᩠ᨲᩣᨶᨾᨶᩦᨠᩣᨶᩴ ᩈᨻ᩠ᨻᨲᩮᩣ ᩅᩩᨲ᩠ᨲᩥ ᩈᨸ᩠ᨸᩈᩁᩦᩁᨾᩥᩅ ᨾᨱ᩠ᨯᩃᩮᩣ. ᨮᩥᨲᩣᨶᨾᩥᨲᩁᩮᨲᩁᩣᩈᩴ ᩉᨲᩣᨶᩴ ᩅᩥᩈᩥᩃᩥᨭ᩠ᨮᨲᩁᩣᨶᩴ ᩋᨶᩦᨠᩣᨶᩴ ᨸᩩᨳᩩᩅᩩᨲ᩠ᨲᩥ ᩋᩈᩴᩉᨲᩮᩣ. ᨲᨴᩩᨲ᩠ᨲᩴ ᨠᩣᨾᨶ᩠ᨴᨠᩮᨶ –

‘‘ᨲᩥᩁᩥᨿᨲᩮᩣ ᩅᩩᨲ᩠ᨲᩥ ᨴᨱ᩠ᨯᩣᨡ᩠ᨿᩣ, ᨽᩮᩣᨣᩮᩣᨶ᩠ᩅᩣᩅᩩᨲ᩠ᨲᩥᩁᩮᩅ ᨧ;

ᨾᨱ᩠ᨯᩃᩮᩣ ᩈᨻ᩠ᨻᨲᩮᩣᩅᩩᨲ᩠ᨲᩥ, ᨸᩩᨳᩩᩅᩩᨲ᩠ᨲᩥ ᩋᩈᩴᩉᨲᩮᩣ’’ᨲᩥ.

ᨻ᩠ᨿᩪᩉᩈᨾᩅᩮᨲᩮᩣ ᩑᩅ ᨻ᩠ᨿᩪᩉᩔᩮᨠᨴᩮᩈᩮᩣ ᨸᨧ᩠ᨨᩣᨽᩣᨣᩮᩣ ᨻ᩠ᨿᩪᩉᨸᨱ᩠ᩉᩥ, ᨻ᩠ᨿᩪᩉᩔ ᨸᨧ᩠ᨨᩣ, ᨻ᩠ᨿᩪᩉᨶ᩠ᨲᩁᨾᩮᩅ ᩅᩣ. ᨿᨲᩕ ᨮᩥᨲᩮᩣ ᩁᩣᨩᩣ ᩈᩈᩮᨶᩴ ᨸᨭᩥᨣ᩠ᨣᨱ᩠ᩉᨲᩥ, ᨲᩴ ᩈᩮᨶᩣᨿ ᨸᨧ᩠ᨨᩣ ᨵᨶᩩᩈᨲᨴ᩠ᩅᨿᨶ᩠ᨲᩁᩮᨶ ᨮᩥᨲᨸᩁᩥᩈᩈᩉᩥᨲᩴ ᩋᨶᩦᨠᩴ ‘‘ᨸᨭᩥᨣ᩠ᨣᩉᩮᩣ’’ᨲ᩠ᨿᩩᨧ᩠ᨧᨲᩮ.

᪓᪘᪒-᪓᪘᪓. ᩑᨠᩮᩣ ¶ ᩉᨲ᩠ᨳᩦ ᨴ᩠ᩅᩣᨴᩈᨸᩩᩁᩥᩈᩈᩉᩥᨲᩮᩣ ‘‘ᩑᨠᩮᩣ ᩉᨲ᩠ᨳᩦ’’ᨲ᩠ᨿᩩᨧ᩠ᨧᨲᩮ, ᩑᨲᩮᨶ ᩃᨠ᩠ᨡᨱᩮᨶ ᩋᨵᨾᨶ᩠ᨲᨲᩮᩣ ᩉᩮᨭ᩠ᨮᩥᨾᨸᩁᩥᨧ᩠ᨨᩮᨴᩮᨶ ᨲᨿᩮᩣ ᩉᨲ᩠ᨳᩥᨶᩮᩣ ᩉᨲ᩠ᨳᩣᨶᩦᨠᩴ ᨶᩣᨾ, ᨲᨳᩣ ᩑᨠᩮᩣ ᨲᩩᩁᨦ᩠ᨣᩮᩣ ᨲᩥᨸᩩᩁᩥᩈᩈᩉᩥᨲᩮᩣ, ᩑᨠᩮᩣ ᨧ ᩁᨳᩮᩣ ᨧᨲᩩᨸᩩᩁᩥᩈᩈᩉᩥᨲᩮᩣ ᩑᨠᩮᩣ ᩉᨿᩮᩣ, ᩑᨠᩮᩣ ᩁᨳᩮᩣᨲᩥ ᩑᨲᩮᨶ ᩃᨠ᩠ᨡᨱᩮᨶ ᩋᨵᨾᨶ᩠ᨲᨲᩮᩣ ᨲᨿᩮᩣ ᩉᨿᩣ ᨧ ᨲᨿᩮᩣ ᩁᨳᩣ ᨧ ᩉᨿᩣᨶᩦᨠᩴ, ᩁᨳᩣᨶᩦᨠᩴ ᨶᩣᨾ, ᨲᩮᨶᩣᩉ ‘‘ᨲᨿᩮᩣ ᨲᨿᩮᩣ ᨣᨩᩣᨴᨿᩮᩣ’’ᨲᩥ. ᩈᩈᨲ᩠ᨳᩣ ᨡᨣ᩠ᨣᩣᨴᩥᩈᨲ᩠ᨳᩉᨲ᩠ᨳᩣ ᨧᨲᩩᨩ᩠ᨩᨶᩣ ᨧᨲ᩠ᨲᩣᩁᩮᩣ ᨸᩩᩁᩥᩈᩣ ᨸᨲ᩠ᨲᩣᨶᩦᨠᩴ ᨶᩣᨾ ᩅᩩᨲ᩠ᨲᩣ. ᩉᩮᨭ᩠ᨮᩥᨾᨶ᩠ᨲᨲᩮᩣᨿᩮᩅᩮᨲ᩠ᨳᩣᨸᩥ ᨸᩁᩥᨧ᩠ᨨᩮᨴᩮᩣ. ᩋᨾᩁᨠᩮᩣᩈᩮ ᨲ᩠ᩅᨬ᩠ᨬᨳᩣ ᨠᨳᩥᨲᩣ –

‘‘ᩑᨠᨠᩮᨽᩁᨳᩣ ᨲ᩠ᨿᩔᩣ, ᨸᨲ᩠ᨲᩥ ᨸᨬ᩠ᨧᨸᨴᩣᨲᩥᨠᩣ;

ᨸᨲ᩠ᨿᨦ᩠ᨣᩮᩉᩥ ᨲᩥᨣᩩᨱᩮᩉᩥ, ᨠᨾᩣ ᩈᨬ᩠ᨬᩣ ᨿᨳᩮᩣᨲ᩠ᨲᩁᩴ.

ᩈᩮᨶᩣᨾᩩᨡᩴ ᨣᩩᨾ᩠ᨻᨣᨱᩣ, ᩅᩣᩉᩥᨶᩦ ᨸᩩᨲᨶᩣ ᨧᨾᩪ;

ᩋᨶᩦᨠᩥᨶᩦ ᨧ ᨲᩣᩈᨶ᩠ᨲᩩ, ᨴᩈ ᩋᨠ᩠ᨡᩮᩣᨽᩥᨶᩦ ᨾᨲ’’ᨶ᩠ᨲᩥ [ᩋᨾᩁ ᪑᪘.᪘᪐-᪑].

ᨲᩔᨲ᩠ᨳᩮᩣ – ᨲᩦᩉᩥ ᩋᩔᩮᩉᩥ ᨣᨩᩮᨶᩮᨠᩮᨶ ᩁᨳᩮᨶ ᨧ ᨸᨴᩣᨲᩦᨽᩥ ᨧ ᨸᨬ᩠ᨧᩉᩥ ᨸᨲ᩠ᨲᩥ ᨶᩣᨾ ᩈᩮᨶᨶ᩠ᨲᩁᩴ. ᨸᨲ᩠ᨿᨦ᩠ᨣᩮᩉᩥ ᩈᨻ᩠ᨻᩮᩉᩥ ᨣᨩᩣᨴᩦᩉᩥ ¶ ᨿᨳᩣᨸᩩᨻ᩠ᨻᩴ ᨣᩩᨱᩮᩉᩥ ᨿᨳᩮᩣᨲ᩠ᨲᩁᩴ ᨠᨾᩮᨶ ᩈᩮᨶᩣᨾᩩᨡᩣᨴᩥᨠᩣ ᩈᨬ᩠ᨬᩣ ᨽᩅᨲᩥ. ᨿᨳᩮᩣᨲ᩠ᨲᩁᨶ᩠ᨲᩥ ᩅᨧᨶᩮᨶ ᨿᨳᩣᨸᩩᨻ᩠ᨻᨾᩥᨲ᩠ᨿᨲ᩠ᨳᨾᩣᩉ, ᨲᩮᨶᩮᨴᩴ ᩅᩩᨲ᩠ᨲᩴ ‘‘ᨽᩅᨲᩥ ᨲᨿᩮᩣ ᨸᨲ᩠ᨲᩥᨶᩮᩣ ᩈᩮᨶᩣᨾᩩᨡᩴ. ᨲᩦᩉᩥ ᩈᩮᨶᩣᨾᩩᨡᩮᩉᩥ ᨣᩩᨾ᩠ᨻᩮᩣ. ᨣᩩᨾ᩠ᨻᨲ᩠ᨲᨿᩮᨶ ᨣᨱᩮᩣ. ᨣᨱᨲ᩠ᨲᨿᩴ ᩅᩣᩉᩥᨶᩦ. ᩅᩣᩉᩥᨶᩥᨲ᩠ᨲᨿᩴ ᨸᩩᨲᨶᩣ. ᨸᩩᨲᨶᨲ᩠ᨲᨿᩴ ᨧᨾᩪ. ᨧᨾᩩᨲ᩠ᨲᨿᩴ ᩋᨶᩦᨠᩥᨶᩦ. ᨲᩣᩈᩴ ᩋᨶᩦᨠᩥᨶᩦᨶᩴ ᨴᩈ ᩋᨠ᩠ᨡᩮᩣᨽᩥᨶᩦ’’ᨲᩥ.

ᨲᨲᩕ ᩁᨳᩣᨶᩴ ᩈᨦ᩠ᨡ᩠ᨿᩣ ᩈᨲ᩠ᨲᨲᩥᩈᩉᩥᨲᩮᩉᩥ ᩋᨭ᩠ᨮᩈᨲᩮᩉᩣᨵᩥᨠᩣᨶ᩠ᨿᩮᨠᩅᩦᩈᨲᩥᩈᩉᩔᩣᨶᩥ, ᩑᩅᨾᩮᩅ ᨣᨩᩣᨶᨾ᩠ᨸᩥ ᩈᨦ᩠ᨡ᩠ᨿᩣ, ᨲᨳᩣ ᨧ –

ᨸᨬ᩠ᨧᩈᨭ᩠ᨮᩥᩈᩉᩔᩣᨶᩥ, ᨨᩈᨲᩣᨶᩥ ᨴᩈᩮᩅ ᨲᩩ;

ᩈᨦ᩠ᨡ᩠ᨿᩣ ᨲᩣ ᨲᩩᩁᨦ᩠ᨣᩣᨶᨬ᩠ᩉᩥ, ᩅᩥᨶᩣ ᩁᨳᩮ ᨲᩩᩁᨦ᩠ᨣᨾᩮ.

ᨶᩁᩣᨶᩴ ᩈᨲᩈᩉᩔᩴ, ᩈᩉᩔᩣᨶᩥ ᨶᩅᩮᩅ ᨧ;

ᩈᨲᩣᨶᩥ ᨲᩦᨱᩥ ᨧ’ᨬ᩠ᨬᩣᨶᩥ, ᨸᨬ᩠ᨬᩣᩈᨬ᩠ᨧ ᨸᨴᩣᨲᨿᩮᩣᨲᩥ [ᨻ᩠ᨿᩣᨡ᩠ᨿᩣᩈᩩᨵᩣ ᪒.᪘.᪘᪐].

᪓᪘᪔. ᩉᩮᨭ᩠ᨮᩥᨾᨸᩁᩥᨧ᩠ᨨᩮᨴᩮᨶ ᩈᩮᨶᩴ ᨴᩔᩮᨲ᩠ᩅᩣ ᩏᨠ᩠ᨠᨭ᩠ᨮᨸᩁᩥᨧ᩠ᨨᩮᨴᩮᨶ ᨴᩔᩮᨲᩩᨾᩣᩉ ‘‘ᩈᨭ᩠ᨮᩥ…ᨸᩮ… ᨿᨶ᩠ᨲᩥ’’ᨧ᩠ᨧᩣᨴᩥ. ᨿᨶ᩠ᨲᩥᨿᩣ ᨿᩣᨶᩴ ᨠᩩᨻ᩠ᨻᨶ᩠ᨲᩥᨿᩣ ᩈᩮᨶᩣᨿ ᨠᨲ᩠ᨲᩩᨽᩪᨲᩣᨿ ᨵᩪᩃᩦᨠᨲᩮᩈᩩ ᩈᨶ᩠ᨲᩮᩈᩩ. ᨠᩮᩈᩩ? ᩈᨭ᩠ᨮᩥᩅᩴᩈᨠᩃᩣᨸᩮᩈᩩ. ᨠᩥᨲ᩠ᨲᨠᨸ᩠ᨸᨾᩣᨱᩮᩈᩩ? ᨸᨧ᩠ᨧᩮᨠᩴ ᩈᨭ᩠ᨮᩥᨴᨱ᩠ᨯᩅᨶ᩠ᨲᩮᩈᩩ, ᩑᩈᩣ ᩋᨠ᩠ᨡᩮᩣᨽᩥᨶᩦ ᨶᩣᨾ ᩈᩮᨶᩣ ᩏᨠ᩠ᨠᨭ᩠ᨮᨸᩁᩥᨧ᩠ᨨᩮᨴᩮᨶ. ᨠᩮᨶᨧᩥ ᨡᩮᩣᨽᩮᨲᩩᨾᩈᨠ᩠ᨠᩩᨱᩮᨿ᩠ᨿᨲᩣᨿ ᩋᨠ᩠ᨡᩮᩣᨽᩥᨶᩦ, ᨿᩩ, ᨶᨴᩣᨴᩥ. ᨡᩩᨽ ᨧᩃᨶᩮ.

᪓᪘᪕. ᨧᨲᩩᨠ᩠ᨠᩴ ¶ ᩈᨾ᩠ᨸᨲ᩠ᨲᩥᨿᩴ. ᨵᨶᩩᨠ᩠ᨠᩴᩈᩮᩣ ᩈᨾ᩠ᨸᨲ᩠ᨲᩥ. ᨸᨴ ᨣᨾᨶᩮ, ᨽᩣᩅᩮᨲᩥ. ᨿᩩᨸᨠ᩠ᨡᩮ ‘‘ᩍᨲ᩠ᨳᩥᨿᨾᨲᩥᨿᩅᩮᩣ ᩅᩣ’’ᨲᩥ ᩋ. ᩃᨠ᩠ᨡ ᨴᩔᨶᨦ᩠ᨠᩮᩈᩩ, ᩎ, ᩃᨠ᩠ᨡᩦ, ᩈᩥᩁᩦ ᨧ ᨸᩩᨻ᩠ᨻᩮ ᨴᩮᩅᨲᩣᩅᩈᩮᨶ ᩅᩩᨲ᩠ᨲᩣ, ᩍᨵ ᨵᨶᩩᨠ᩠ᨠᩴᩈᩅᩈᩮᨶ.

ᨴ᩠ᩅᨿᩴ ᩈᨾ᩠ᨸᨲ᩠ᨲᩥᩅᩥᨸᩁᩦᨲᩣᨿᩴ. ᩅᩥᩁᩪᨸᩴ ᨸᨩ᩠ᨩᨲᩦᨲᩥ ᩅᩥᨸᨲ᩠ᨲᩥ, ᨸᨴᩥᨾ᩠ᩉᩣ ᨠᨲ᩠ᨲᩁᩥᨲᩥ. ᩅᩥᩁᩪᨸᩴ ᨸᨩ᩠ᨩᨶᩴ ᩅᩣ ᩅᩥᨸᨲ᩠ᨲᩥ, ᨽᩣᩅᩮᨲᩥ. ᩌᨸᨴᩣᩈᩉᨧᩁᨱᨲᩮᩣ ᩅᩥᨸᨲ᩠ᨲᩥ ᨳᩥᨿᩴ.

ᨧᨲᩩᨠ᩠ᨠᩴ ᩈᨲ᩠ᨳᨾᨲ᩠ᨲᩮ. ᩌᨴᩣᨿ ᨿᩩᨩ᩠ᨫᨶ᩠ᨲᩮ ᨿᨶ᩠ᨲᩥ ᩌᩅᩩᨵᩴ, ᨿᩔ ᩅᩮᩣ. ᩌᨿᩩᨵᩴ ᩅᩣ. ᩉᩁ ᩉᩁᨱᩮ. ᩉᩁᨲᩥ ᨩᩦᩅᩥᨲᨶ᩠ᨲᩥ ᩉᩮᨲᩥ,ᨲᩥ, ᩋᩔᩮ, ᩁᩃᩮᩣᨸᩮᩣ, ᩉᨶᨲᩥᩅᩈᩮᨶ ᩅᩣ ᩈᩥᨴ᩠ᨵᩴ. ᩈᩈ ᩉᩥᩴᩈᩣᨿᩴ, ᨳᩮᩣ. ᩋᨲ᩠ᨳᩴᨸ᩠ᨿᨲᩕ. ᩋᩈᩩ ᨡᩮᨸᨶᩮ.

᪓᪘᪖-᪓᪘᪗. ᩈᨦ᩠ᨡᩮᨸᩮᨶᩣᨿᩩᨵᩴ ᨴᩔᩮᨲᩩᨾᩣᩉ. ᨾᩩᨲ᩠ᨲᩣᨾᩩᨲ᩠ᨲᨬ᩠ᨧ ᩋᨾᩩᨲ᩠ᨲᨬ᩠ᨧ ᨸᩣᨱᩥᨲᩮᩣ ᨾᩩᨲ᩠ᨲᨬ᩠ᨧ ᨿᨶ᩠ᨲᨾᩩᨲ᩠ᨲᨬ᩠ᨧᩮᨲᩥ ᩈᨠᩃᩴ ᨲᩴ ᩌᨿᩩᨵᩴ ᨧᨲᩩᨻ᩠ᨻᩥᨵᩴ ᨻᩉᩪᨶᨾ᩠ᨸᩥ ᨲᨻ᩠ᨽᩮᨴᩣᨶᨲᩥᩅᨲ᩠ᨲᨶᨲᩮᩣ.

ᨧᨲᩩᨶ᩠ᨶᩴ ᩈᩁᩪᨸᨾᩣᩉ ‘‘ᨾᩩᨲ᩠ᨲᩣᨾᩩᨲ᩠ᨲᨬ᩠ᨧᩣ’’ᨴᩥ. ᨿᨭ᩠ᨮᩥ ᨶᩣᨾ ᩈᨲ᩠ᨳᩅᩥᩈᩮᩈᩮᩣ, ᨶ ᨠᨲ᩠ᨲᩁᨴᨱ᩠ᨯᩮᩣ.

‘‘ᨿᨭ᩠ᨮᩥ ᩉᩣᩁᩃᨲᩣᩈᨲ᩠ᨳ-ᨽᩮᨴᩮᩈᩩ ᨵᨶᩩᨴᨱ᩠ᨯᨠᩮ’’ᨲᩥ ᩉᩥ ᨶᩣᨶᨲ᩠ᨳᩈᨦ᩠ᨣᩉᩮ.

ᨲᨴᩣᨴᩥ ¶ ᩌᨿᩩᨵᩴ ᨾᩩᨲ᩠ᨲᨬ᩠ᨧ ᨲᩴ ᩋᨾᩩᨲ᩠ᨲᨬ᩠ᨧᩮᨲᩥ ᨾᩩᨲ᩠ᨲᩣᨾᩩᨲ᩠ᨲᩴ, ᨠᨾ᩠ᨾᨵᩣᩁᨿᩮᩣ, ᨿᨳᩣ ᨠᨲᩣᨠᨲᩴ. ᨨᩩᩁᩥᨠᩣ ᩋᩈᩥᨸᩩᨲ᩠ᨲᩥ, ᨲᨴᩣᨴᩥᨠᩴ ᩋᨾᩩᨲ᩠ᨲᩴ. ᨿᨶ᩠ᨲ ᩈᨦ᩠ᨠᩮᩣᨧᨶᩮ, ᨿᨶ᩠ᨲᩴ, ᨵᨶ᩠ᩅᩣᨴᩥ.

᪓᪘᪘-᪓᪘᪙. ᨸᨬ᩠ᨧᨠᩴ ᨵᨶᩩᨾ᩠ᩉᩥ. ᩏᩈᩩᩴ ᩋᩈᨲᩥ ᨡᩥᨸᨲᩦᨲᩥ, ᨠᨾ᩠ᨾᨶᩥ ᨱᩮᩣ, ᩏᩔᩥ. ᨵᨶ ᨵᨬ᩠ᨬᩮ, ᩏ, ᩉᨶ ᩉᩥᩴᩈᩣᨿᩴ ᩅᩣ, ᩏ, ᩉᩔ ᨵᩮᩣ, ᨵᨶᩩ. ‘‘ᨵᨶᩩ ᩅᩴᩈᩅᩥᩈᩩᨴ᩠ᨵᩮᩣᨸᩥ, ᨶᩥᨣ᩠ᨣᩩᨱᩮᩣ ᨠᩥᩴ ᨠᩁᩥᩔᨲᩦ’’ᨲᩥ [ᩉᩥᨲᩮᩣᨸᨴᩮᩈ ᨠᨳᩣᨾᩩᨡ ᪒᪓] ᨸᩩᨾᩮ ᨸᨿᩮᩣᨣᩮᩣ. ‘‘ᩈᩁᩣ ᩅᩣᨸᩮᩣ ᨵᨶᩩ ᩍᨲ᩠ᨳᩦ, ᨲᩩᨱᨲᩣ ᨲᩥᨱᨲᩣᨸᩥᨧᩮ’’ᨲᩥ [ᨲᩥᨠᨱ᩠ᨯᩈᩮᩈ ᪒.᪘.᪕᪑] ᨲᩥᨠᨱ᩠ᨯᩈᩮᩈᩮᩣ. ᨠᩥᩴ ᨶᩣᨾᩮᨶ ᨴᨱ᩠ᨯᨿᨲᩦᨲᩥ ᨠᩮᩣᨴᨱ᩠ᨯᩴ, ᨴᨱ᩠ᨯ ᨶᩥᨸᩣᨲᨶᩮ, ᨠᩥᩴ ᨶᩣᨾᩮᨶ ᨴᨾ᩠ᨿᨲᩦᨲᩥ ᩅᩣ ᨠᩮᩣᨴᨱ᩠ᨯᩴ, ᨴᨾᩩᨵᩣᨲᩩᨾ᩠ᩉᩣ ᨯᩮᩣ, ᨠᩥᩴ ᨶᩣᨾᩮᨶ ᨴᩩᨶᩮᩣᨲᩦᨲᩥ ᩅᩣ ᨠᩮᩣᨴᨱ᩠ᨯᩴ, ᨴᩩ ᨸᩁᩥᨲᩣᨸᩮ, ᨯᩮᩣ ᨶᩥᨸᩣᨲᩥᨲᩮᩣ, ᨠᩩᨭᩥᩃᨲ᩠ᨲᩣ ᩅᩣ ᨠᩩᨧ᩠ᨨᩥᨲᩮᩣ ᨴᨱ᩠ᨯᩮᩣ ᨿᩔᨲ᩠ᨳᩦᨲᩥ ᨠᩮᩣᨴᨱ᩠ᨯᩴ. ᨧᨸ ᩈᨶ᩠ᨲᩣᨸᩮ, ᩋ, ᨧᨸᩮᩣ, ᩅᩴᩈᨽᩮᨴᩮᩣ, ᨲᨻ᩠ᨻᩥᨠᩣᩁᩮᩣ ᨧᩣᨸᩮᩣ, ᨱᩮᩣ. ᩈᩁᨾᩈᨲᩥ ᨡᩥᨸᨲᩦᨲᩥ ᩈᩁᩣᩈᨶᩴ. ᨠᨾ᩠ᨾᩩᨠᨾ᩠ᨸᩥ. ᨠᨾ᩠ᨾᩣᨿ ᨸᨽᩅᨲᩦᨲᩥ ᨠᨾ᩠ᨾᩩᨠᩴ.

ᨲᩥᨠᩴ ᨣᩩᨱᩮ. ᨣᨧ᩠ᨨᨲᩥ ᩈᩁᩮᩣ ᨿᩮᨶᩣᨲᩥ ᨣᩩᨱᩮᩣ, ᨾᩔ ᨱᩮᩣ, ᩋᩔᩩ, ᨣᩩ ᩈᨴ᩠ᨴᩮ ᩅᩣ, ᨣᩅᨲᩥ ᩑᨲᩮᨶᩣᨲᩥ ᨣᩩᨱᩮᩣ, ᨿᩩ, ᨱᨲ᩠ᨲᩴ. ᨩᩁ ᩅᨿᩮᩣᩉᩣᨶᩥᨾ᩠ᩉᩥ, ᩋ, ᨩᩥᨿᩣᨴᩮᩈᩮᩣ. ᨸᨠ᩠ᨡᩮ ᩍᨠᩣᩁᩃᩮᩣᨸᩮᩣ, ᨩᨿᩣ. ‘‘ᨩᩥᨿᩣ ᨧᩣᨳᩣ’’ᨲᩥᨸᩥ ᨸᩣᨮᩮᩣ, ᨲᨴᩣ ᨴ᩠ᩅᨿᩴ ¶ ᨣᩩᨱᩮ. ᨾᩩᨻ᩠ᨻᩦ, ᩈᩥᨬ᩠ᨩᩥᨶᩦᨸ᩠ᨿᨲᩕ. ᨾᩩᨻ᩠ᨻᩅᩥᨠᩣᩁᩮᩣ ᨾᩩᨻ᩠ᨻᩦ. ᩈᩥᨬ᩠ᨩ ᩋᨻ᩠ᨿᨲ᩠ᨲᩈᨴ᩠ᨴᩮ, ᩍᨶᩦ.

ᨲᩥᨸᩣᨴᩮᩣ ᨠᨱ᩠ᨯᩮ. ᩈᩁ ᩉᩥᩴᩈᩣᨿᩴ. ᩈᩁᨶ᩠ᨲ᩠ᨿᨶᩮᨶᩣᨲᩥ, ᨸᩩᨾᩮ, ᩈᨬ᩠ᨬᩣᨿᩴ ᨱᩮᩣ. ᨸᨲ᩠ᨲᩴ ᩅᩣᨩᩮᩣ, ᨲᩴᨿᩮᩣᨣᩣ ᨸᨲ᩠ᨲᩦ, ᩎ. ᩈᩣ ᨲᨶᩩᨠᩁᨱᩣᩅᩈᩣᨶᩮᩈᩩ, ᨴᩥᩅᩣᨴᩥ, ᨱ᩠ᩅᩩ, ᨿᩔᩣᩃᩮᩣᨸᩮᩣ. ᩅᨱ᩠ᨿᨲᩮ ᩈᨴ᩠ᨴᩣᨿᨲᩮᨶᩮᨶᩮᨲᩥ ᩅᩣᨱᩮᩣ, ᨱᩮᩣ, ᩅᨱ ᩈᨴ᩠ᨴᩮ. ᨠᨱ᩠ᨿᨲᩮᨶᩮᨶᩮᨲᩥ ᨠᨱ᩠ᨯᩴ, ᨠᨱ ᩈᨴ᩠ᨴᩮ, ᨯᩮᩣ, ᨠᨱ᩠ᨯ ᨽᩮᨴᩮ ᩅᩣ. ᩍᩈ ᨣᨾᨶᩮ, ᩏ, ᩍᩔᩩ, ᩏᩈ ᨴᩣᩉᩮ ᩅᩣ. ᨡᩩᩁ ᨨᩮᨴᨶᩮ, ᩋᨸᩮᩣ, ᩋᨳ ᩅᩣ ᨡᩮ ᩋᩁᨲᩥ ᨣᨧ᩠ᨨᨲᩦᨲᩥ ᨡᩩᩁᩮᩣ, ᩋᩔᩩ, ᨲᩴ ᨸᩣᨲᩦᨲᩥ ᨡᩩᩁᨸ᩠ᨸᩮᩣ. ᨲᩥᨩ ᨶᩥᩈᩣᨶᩮ, ᨿᩩ. ᩋᩈ ᨡᩥᨸᨶᩮ, ᨠᨾ᩠ᨾᩮ ᨿᩩ. ᩅᩥᩈᩥᨡᩮᩣ, ᩋᨩᩥᨾ᩠ᩉᨣᩮᩣ, ᨡᨣᩮᩣ, ᩌᩈᩩᨣᩮᩣ, ᨠᩃᨾ᩠ᨻᩮᩣ, ᨾᨣ᩠ᨣᨱᩮᩣ, ᩁᩮᩣᨸᩮᩣᨸ᩠ᨿᨲᩕ. ᩅᩥᩈᨶ᩠ᨲᩮᩣ ᨡᨱᨲᩦᨲᩥ ᩅᩥᩈᩥᨡᩮᩣ. ᨠᩃ ᨾᨴᩮ, ᩋᨾ᩠ᨻᩮᩣ. ᨾᨣ᩠ᨣ ᩋᨶ᩠ᩅᩮᩈᨶᩮ, ᨿᩩ. ᩁᩩᨸ ᩅᩥᨾᩮᩣᩉᨶᩮ, ᨴᩥᩅᩣᨴᩥ, ᩋ, ᩁᩮᩣᨸᩮᩣ. ‘‘ᨳᩪᩃᨡᩮᨯᩮᩣ ᩅᩥᨸᩣᨭᩮᩣ ᨧ, ᨧᩥᨲᩕᨸᩩᨦ᩠ᨡᩮᩣ ᩈᩁᩮᩣᨸᩥ ᨧᩮ’’ᨲᩥ [ᨲᩥᨠᨱ᩠ᨯᩈᩮᩈ ᪒.᪘.᪕᪒] ᨲᩥᨠᨱ᩠ᨯᩈᩮᩈᩮ.

ᨸᨬ᩠ᨧᨠᩴ ᨠᩃᩣᨸᩮ. ᨲᩪᨱ ᨸᩪᩁᨱᩮ, ᨧᩩᩁᩣᨴᩥ, ᨶᨴᩣᨴᩥ. ‘‘ᨲᩪᨱᩮᩣ ᨶᩥᩈᨦ᩠ᨣᩮᩣ ᨲᩪᨱᩥᩁᩮᩣ, ᩏᨸᩣᩈᨦ᩠ᨣᩮᩣ ᨧ ᩅᩣᨱᨵᩥ’’ᩁᩥᨲᩥ [ᨧᩥᨶ᩠ᨲᩣᨾᨱᩥᨭᩦᨠᩣ ᪑᪘.᪘᪘] ᩋᨾᩁᨾᩣᩃᩣᨿᩴ ᨸᩩᩴᩈᨠᨱ᩠ᨯᩮ. ‘‘ᨲᩪᨱᩣ’’ᨲᩥᨸᩥ ᩍᨲ᩠ᨳᩥᩃᩥᨦ᩠ᨣᨸ᩠ᨸᨠᩁᨱᩮ ᩅᩩᨲ᩠ᨲᩮᩣ, ᩍᨵ ᨸᨶ ‘‘ᨲᩩᨱᩦ, ᨲᩪᨱᩮᩣ’’ᨲᩥ ᨴ᩠ᩅᩦᩈᩩ, ᩈᩁᩈᨾᩪᩉᩣᨶᩴ ᨮᩣᨶᨲ᩠ᨲᩣ ᨠᩃᩣᨸᩮᩣ. ᩍᩁᨸᨧ᩠ᨧᨿᩮ ᨲᩪᨱᩥᩁᩮᩣ. ᩅᩣᨱᩣ ᩈᩁᩣ ᨵᩥᨿᨶ᩠ᨲᩮᨲᩕᩮᨲᩥ ᩅᩣᨱᨵᩥ. ‘‘ᨲᩪᨱᩮᩣ ᨸᩈᨦ᩠ᨣ ᨲᩪᨱᩥᩁ-ᨶᩥᩈᨦ᩠ᨣᩣ ᩅᩣᨱᨵᩥ ᨴ᩠ᩅᩥᩈᩪ’’ᨲ᩠ᨿᨾᩁᩈᩦᩉᩮ.

᪓᪙᪐. ᨴ᩠ᩅᨿᩴ ᩅᩣᨩᩮ, ᨿᩴ ‘‘ᨠᨱ᩠ᨯᨸᨲ᩠ᨲ’’ᨾᩥᨲ᩠ᨿᩩᨧ᩠ᨧᨲᩮ. ᨸᨲ ᨣᨾᨶᩮ, ᨠᩁᨱᩮ ᨡᩮᩣ, ᨲᩔ ᨠᩮᩣ, ᨸᨠ᩠ᨡᩮᨶ ᨠᨲᨲ᩠ᨲᩣ ᩅᩣ ᨸᨠ᩠ᨡᩮᩣ ¶ . ᩅᨩᨲ᩠ᨿᨶᩮᨶᩣᨲᩥ ᩅᩣᨩᩮᩣ, ᨱᩮᩣ. ᩅᩥᩈᨾᨸᩥᩅᩥᨲ᩠ᨳᩣᨲᩥ ᩅᩥᩈᨸ᩠ᨸᩦᨲᩮᩣ ᩈᩁᩮᩣ ᨴᩥᨴ᩠ᨵᩮᩣ ᨶᩣᨾ. ᨴᩥᩈ ᩋᨸ᩠ᨸᩦᨲᩥᨿᩴ, ᨲᩮᩣ. ᩃᩥᨲ᩠ᨲᩮᩣᨸ᩠ᨿᨲᩕ.

ᨲᩥᨠᩴ ᩅᩥᨩ᩠ᨫᩥᨲᨻ᩠ᨻᩮ. ᩅᩥᨩ᩠ᨫᨶᨲ᩠ᨳᩴ ᩃᨠ᩠ᨡ᩠ᨿᨲᩮᨲᩥ ᩃᨠ᩠ᨡᩴ. ᩅᩥᨩ᩠ᨫᩥᨲᨻ᩠ᨻᨶ᩠ᨲᩥ ᩅᩮᨩ᩠ᨫᩴ, ᨱ᩠ᨿᩮᩣ, ᨫᩔ ᨩ᩠ᨫᩮᩣ, ᩍᩔᩮ. ᩈᩁᩮᩣ ᩅᨿᨲᩥ ᨣᨧ᩠ᨨᨲᩥ ᨿᩈ᩠ᨾᩥᩴ ᩈᩁᨻ᩠ᨿᩴ, ᩅᩔᩣᨠᩣᩁᩃᩮᩣᨸᩮᩣ. ᨶᩥᨧ᩠ᨧᩴ ᩈᩁᩣᨶᨾᨽ᩠ᨿᩣᩈᨶᩴ ᩅᩈᩦᨠᩁᨱᩴ ᩈᩁᩣᨽ᩠ᨿᩣᩈᩮᩣ. ‘‘ᨻ᩠ᨿᩣᨵᩮᨸ᩠ᨿᩩᨸᩣᩈᨶᩣᨿᨬ᩠ᨧ, ᩅᩣᨱᩣᨽ᩠ᨿᩣᩈᩮᨸ᩠ᨿᩩᨸᩣᩈᨶ’’ᨶ᩠ᨲᩥ ᩁᩩᨴ᩠ᨴᩮᩣ. ᩃᨠ᩠ᨡᨾᩩᨸᨣᨶ᩠ᨲ᩠ᩅᩣ ᩋᩈᨶᩴ ᨡᩥᨸᨶᩴ ᩏᨸᩣᩈᨶᩴ.

᪓᪙᪑. ᨸᨬ᩠ᨧᨠᩴ ᨡᨣ᩠ᨣᩮ. ᨾᨱ᩠ᨯᩃᩴ ᩋᨣ᩠ᨣᩴ ᨿᩔ. ᨶᩥᨣ᩠ᨣᨲᩮᩣ ᨲᩥᩴᩈᨲᩮᩣ’ᨦ᩠ᨣᩩᩃᩥᨲᩮᩣ ᨶᩮᨲ᩠ᨲᩥᩴᩈᩮᩣ. ᩋᩈ ᨡᩮᨸᨶᩮ, ᩋᩈᨲᩮ ᨡᩥᨸ᩠ᨸᨲᩮᨲᩥ ᩋᩈᩥ, ᩍ. ᨡᨣ᩠ᨣ ᨡᨱ᩠ᨯᨽᩮᨴᩮ. ᩈᩣᨿᨠᩮᩣ ᩈᩁᩮᨸᩥ. ᨧᨶ᩠ᨴᩉᩣᩈᩮᩣ, ᩁᩥᨭ᩠ᨮᩥ, ᨠᨠ᩠ᨡᩃᨠᩮᩣ, ᨠᩁᩅᩣᩃᩮᩣᨸ᩠ᨿᨲᩕ. ᨲᩔ ᨡᨣ᩠ᨣᩔ ᨸᩥᨵᩣᨶᩮ ᨠᩮᩣᩈᩥ, ᩍᨲ᩠ᨳᩦ. ᨠᩩᩈ ᩈᩥᩃᩮᩈᨶᩮ, ᩍ, ᨠᩮᩣᩈᩥ, ᩁᩔᨶ᩠ᨲᩮᩣ. ᨡᨣ᩠ᨣᨨᩩᩁᩥᨠᩣᨴᩦᨶᩴ ᨾᩩᨭ᩠ᨮᩥᨿᩴ ᨳᩁᩩᩈᨴ᩠ᨴᩮᩣ. ᨳᩁ ᩈᨲ᩠ᨳᨣᨲᩥᨿᩴ, ᩏ.

᪓᪙᪒. ᨲᩥᨠᩴ ᨡᨣ᩠ᨣᩣᨴᩦᨶᩴ ᩈᨲ᩠ᨳᩣᨶᩴ ᩅᩣᩁᨱᨹᩃᨠᩮ. ᨡᩮᨭ ᨽᨠ᩠ᨡᨶᩮ, ᨱ᩠ᩅᩩ. ᨹᩃ ᩅᩥᩈᩣᩁᨱᩮ, ᨱ᩠ᩅᩩ. ᨹᩃᨲᩦᨲᩥ ᨹᩃᨠᩴ, ᩋᨶᩥᨲ᩠ᨳᩦ. ᨧᩁ ᨣᨲᩥᨽᨠ᩠ᨡᨶᩮᩈᩩ, ᨾᩮᩣ, ᨧᨾᩩ ᩋᨴᨶᩮ ᩅᩣ, ᩋ. ᨹᩃᨾ᩠ᨸᩥ.

ᩅᨱ᩠ᨭᩣᨶᩥᩉᩣᩁᩔᩣᨡᨣ᩠ᨣᩣᨠᨲᩥ ¶ ᩉᨲ᩠ᨳᨠᩩᨱ᩠ᨯᩣᨴᩥ ᩍᩃ᩠ᩃᩦ, ᩍᩃᩦᨸᩥ, ᩍᩃ ᨣᨲᩥᨿᩴ, ᨶᨴᩣᨴᩥ. ᨠᩁᩴ ᨸᩣᩃᨿᨲᩦᨲᩥ ᨠᩁᨸᩣᩃᩥᨠᩣ, ᨱ᩠ᩅᩩ.

ᨴ᩠ᩅᨿᩴ ᩋᩈᩥᨸᩩᨲ᩠ᨲᩥᨿᩴ. ᨨᩩᩁ ᨨᩮᨴᨶᩮ, ᨱ᩠ᩅᩩ. ᩈᩈᩩ ᩉᩥᩴᩈᩣᨿᩴ,ᨲᩥ, ᨶᨴᩣᨴᩥ. ᩋᩈᩥᨶᩮᩣ ᨸᩩᨲ᩠ᨲᩦ, ᩋᩈᩥᨵᩮᨶᩩᨠᩣᨸᩥ.

ᨴ᩠ᩅᨿᩴ ᩅᨯ᩠ᨰᨠᩦᨶᩴ ᨾᩩᨣ᩠ᨣᩁᩮᩉᩥ ᩈᨾᩣᨶᩣᨠᩣᩁᩣᨿᩩᨵᨽᩮᨴᩮ. ᩃᨣ ᩈᨦ᩠ᨣᩮ, ᩋᩃᩮᩣ, ᩋᩔᩩ, ᩊᨲ᩠ᨲᨬ᩠ᨧ. ᨾᩩᩁᩴ ᨣᩥᩁᨲᩦᨲᩥ ᨾᩩᨣ᩠ᨣᩁᩮᩣ, ᩁᩔ ᨣᩮᩣ, ᨣᩥᩁ ᨶᩥᨣ᩠ᨣᩥᩁᨱᩮ, ᨾᩩᨧ᩠ᨧᨲᩦᨲᩥ ᩅᩣ ᨾᩩᨣ᩠ᨣᩁᩮᩣ, ᩋᩁᩮᩣ. ᨴᩩᨥᨱᩮᩣ, ᨥᨶᩮᩣᨸᩥ.

᪓᪙᪓. ᨴ᩠ᩅᨿᩴ ᩈᩃ᩠ᩃᩮ. ᩈᩃ ᩌᩈᩩᨣᨲᩥᨿᩴ, ᩋ, ᩈᩁ ᩉᩥᩴᩈᩣᨿᩴ ᩅᩣ, ᩃᩮᩣ, ᩁᩔ ᩃᩮᩣ. ᩈᨦ᩠ᨠ ᩈᨦ᩠ᨠᩣᨿᩴ, ᩏ. ᩈᩪᩃᨾ᩠ᨸᩥ. ᩈᩪᩃ ᩁᩩᨩᩣᨿᩴ.

ᨴ᩠ᩅᨿᩴ ᩅᩣᩈᩥᨿᩴ. ᩅᩈ ᨨᩮᨴᨶᩈ᩠ᨶᩮᩉᩣᩅᩉᩣᩁᨱᩮᩈᩩ, ᨱᩦ. ᨲᨧ᩠ᨨ ᨲᨶᩩᨠᩁᨱᩮ, ᨿᩩ, ᨶᨴᩣᨴᩥ.

ᨴ᩠ᩅᨿᩴ ᨹᩁᩈᩩᨾ᩠ᩉᩥ. ᨨᩮᨴᨠᨲ᩠ᨲᩣ ᨠᩩᨧ᩠ᨨᩥᨲᩣ ᨵᩣᩁᩣ ᨿᩔᩣᨲᩥ ᨠᩩᨵᩣᩁᩦ. ᨠᩩᨵᩣᩁᩮᩣᨸᩥ. ᨸᩁᩴ ᩈᩈᨲᩥ ᩉᩥᩴᩈᨲᩦᨲᩥ ᨹᩁᩈᩩ. ᩏ, ᨸᩔ ᨹᩮᩣ, ᩈᩃᩮᩣᨸᩮᩣ ᨧ. ᨸᩁᩈᩩᨸᩥ, ᩈᩮᩣ ᨸᩁᩈᩩᩈᨴ᩠ᨴᩮᩣ ᨶᨸᩩᩴᩈᨠᩮᩣ. ᨸᩁᩈᩩᨵᩮᩣᨸ᩠ᨿᨲᩕ.

ᨴ᩠ᩅᨿᩴ ᨸᩣᩈᩣᨱᩅᩥᨴᩣᩁᨱᩮ. ᨭᨦ᩠ᨠ ᨻᨶ᩠ᨵᨶᩮ. ᨴᩁ ᩅᩥᨴᩣᩁᨱᩮ. ᨸᩣᩈᩣᨱᩴ ᨴᩣᩁᨿᨲᩦᨲᩥ ᨸᩣᩈᩣᨱᨴᩣᩁᨱᩮᩣ, ᨿᩩ. ᨸᩣᩈᩣᨱᨴᩣᩁᨠᩮᩣᨸᩥ.

᪓᪙᪔. ᨴ᩠ᩅᨿᩴ ¶ ᩉᨲ᩠ᨳᨸ᩠ᨸᨾᩣᨱᩮ ᨠᨱᨿᩮ [ᨠᨱ᩠ᨯᩮ (ᨧᩥᨶ᩠ᨲᩣᨾᨱᩥᨭᩦᨠᩣ)]. ᨧᨠ᩠ᨠᨸᩪᩁᨱᩣᨴᩥᩅᩣᨿᩩᩅᩈᩮᨶ ᨡᩥᨸ᩠ᨸᨲᩮ. ᨠᨱ ᩈᨴ᩠ᨴᩮ, ᩋᨿᩮᩣ. ᨽᩥᨶ᩠ᨴᨶᩈᩦᩃᨲᩣᨿ ᨽᩥᨶ᩠ᨴᩦ, ᩅᩣᨲᩥ ᨣᨧ᩠ᨨᨲᩥ ᨲᩮᨶᩣᨲᩥ ᩅᩣᩃᩮᩣ, ᩋᩃᩮᩣ, ᨽᩥᨶ᩠ᨴᩦ ᨧ ᩈᩮᩣ ᩅᩣᩃᩮᩣ ᨧᩣᨲᩥ ᨽᩥᨶ᩠ᨴᩥᩅᩣᩃᩮᩣ, ᩊᨲ᩠ᨲᩮ ᨽᩥᨶ᩠ᨴᩥᩅᩣᩊᩮᩣ, ᩁᩔᩮᩣ.

ᨧᨠ᩠ᨠᩣᨴᨿᩮᩣ ᩈᨲ᩠ᨳᨽᩮᨴᩣ. ᨲᨲᩕ ᨧᨠ᩠ᨠᩣᨠᩣᩁᩮᩣ ᩌᨿᩩᨵᩅᩥᩈᩮᩈᩮᩣ ᨧᨠ᩠ᨠᩴ. ᨠᨶ᩠ᨲ ᨨᩮᨴᨶᩮ, ᩋᩔᩩ, ᨠᩩᨶ᩠ᨲᩮᩣ ᨴᩦᨥᨴᨱ᩠ᨯᩮᩣ. ᨣᨴᩣ, ᩈᨲ᩠ᨲᩥ ᨧ ᨸᩈᩥᨴ᩠ᨵᩣ.

ᨲᩥᨠᩴ ᨠᩮᩣᨱᨽᩣᨣᩮ. ᨠᩩᨱ ᩈᨴ᩠ᨴᩮᩣᨸᨠᩁᨱᩮᩈᩩ, ᨠᩩᨱ ᩈᨦ᩠ᨠᩮᩣᨧᨶᩮ ᩅᩣ, ᨱᩮᩣ. ᩈᩥ ᩈᩮᩅᩣᨿᩴ, ᩋ, ᩁᩔᩮᩣ, ᩋᩔᩮᩣ. ᨠᩩᨭ ᨠᩮᩣᨭᩥᩃ᩠ᩃᩮ, ᩍᨱ.

᪓᪙᪕. ᨴ᩠ᩅᩥᨸᩣᨴᩴ ᩅᩥᨩᩥᨣᩦᩈᩔ ᨿᩣᨲᩕᩣᨿᩴ, ᩈᨻ᩠ᨻᨲᩕ ᨽᩣᩅᩈᩣᨵᨶᩴ. ᨿᩣ ᨸᩣᨸᩩᨱᩮ, ᨶᩥᨠ᩠ᨡᨾᩥᨲ᩠ᩅᩣ ᨿᩣᨿᨲᩮ ᨶᩥᨿ᩠ᨿᩣᨶᩴ, ᨿᩩ. ‘‘ᨨᨴᩣᨴᩦᩉᩥ ᨲᨲᩕᨱ’’ᨲᩥ ᨲᩕᨱ. ᨿᩣᨲᩕᩣ, ᩌ. ᨶᨴᩣᨴᩥᨶᩮᩣ ᩌᨠᨲᩥᨣᨱᨲ᩠ᨲᩣ ᩎᨸᨧ᩠ᨧᨿᩣᨽᩣᩅᩮᩣ. ᨮᩣ ᨣᨲᩥᨶᩥᩅᨲ᩠ᨲᩥᨿᩴ, ᨸᨸᩩᨻ᩠ᨻᩮᩣ ᨿᩣᨶᩮ, ᨿᩩ, ᨸᨲᩥᨭ᩠ᨮᩦᨿᨲᩮ ᨸᨭ᩠ᨮᩣᨶᩴ, ᨸᩩᩁᩮᨧᩣᩁᩥᨾ᩠ᩉᩥ ᨸᨭ᩠ᨮᩮᩣ.

ᨸᨬ᩠ᨧᨠᩴ ᨵᩪᩃᩦᨾᨲ᩠ᨲᩮ. ᨲᨳᩣ ᨧ ‘‘ᨸᩴᩈᩩ ᨡᩮᩣᨴᩮᩣ ᨾᨲᩮᩣ ᩁᩮᨱᩩ, ᨧᩩᨱ᩠ᨱᩮᩣ ᨵᩪᩃᩥ’ᨲ᩠ᨳᩥᨿᩴ ᨽᩅᩮ’’ᨲ᩠ᨿᨾᩁᨾᩣᩃᩣ. ᨧᩩᨱ᩠ᨱ ᨸᩥᩈᨶᩮ, ᨧᩩᨱ᩠ᨱ ᩈᨬ᩠ᨧᩩᨱ᩠ᨱᨶᩮ ᩅᩣ. ᨸᩴᩈ ᨶᩣᩈᨶᩮ, ᩏ. ᩁᨶ᩠ᨩ ᩁᩣᨣᩮ, ᩁᨩᩮᩣ, ᨾᨶᩮᩣᨣᨱᩮᩣᨸᩥ ᨶᨸᩩᩴᩈᨠᩮ, ᨲᩴᩈᩉᨧᩁᨱᨲᩮᩣ ᨸᩴᩈᩩᨸᩥ. ‘‘ᨠ᩠ᩃᩥᩅᩴ’ᨸᩁᩣᨵᩮ ᩁᩮᨱᩩᨾ᩠ᩉᩦ’’ᨲᩥ ¶ ᩁᨽᩈᩮᩣ. ᩋᨳ ᩅᩣ ᨧᩩᨱ᩠ᨱᩁᨩᩮᩣᩈᩉᨧᩁᨱᨲᩮᩣ ᨸᩴᩈᩩ ᨶᨸᩩᩴᩈᨠᩮ. ᨵᩪ ᩅᩥᨵᩩᨶᨶᩮ, ᨵᩪ ᨠᨾ᩠ᨸᨶᩮ ᩅᩣ, ᩃᩥ, ᨶᨴᩣᨴᩥ. ᩁᩥ ᨣᨲᩥᨿᩴ, ᨱᩩ, ᩍᩔᩮ.

᪓᪙᪖. ᩅᩴᩈᨠ᩠ᨠᨾᩅᩮᨴᩦᩅᩴᩈᨳᩩᨲᩥᩴ ᨿᩮᩣ ᨠᩩᨻ᩠ᨻᨲᩥ, ᩈᩮᩣ ᨾᩣᨣᨵᩮᩣ. ᨲᩈ᩠ᨾᩥᩴ ᨾᨵᩩᨠᩮᩣ ᩅᩩᨲ᩠ᨲᩮᩣ. ᩈᩮᩣ ᨧ ᨡᨲ᩠ᨲᩥᨿᩣᩅᩮᩔᩈᨾ᩠ᨽᩅᩮᩣ ᨽᩅᨲᩥ, ᩅᩴᩈᨾᨣ᩠ᨣᩴ ᨳᩅᨲᩦᨲᩥ ᨾᩣᨣᨵᩮᩣ, ᨳᩔ ᨵᩮᩣ. ᨾᨣ᩠ᨣᩴ ᨵᩅᨲᩦᨲᩥ ᨾᨵᩩᨠᩮᩣ, ᨱ᩠ᩅᩩ, ᨣ᩠ᨣᩃᩮᩣᨸᩮᩣ.