📜

ᨶᨾᩮᩣ ᨲᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ

ᨴᩦᨥᨶᩥᨠᩣᨿᩮᩣ

ᨾᩉᩣᩅᨣ᩠ᨣᨸᩣᩊᩥ

᪑. ᨾᩉᩣᨸᨴᩣᨶᩈᩩᨲ᩠ᨲᩴ

ᨸᩩᨻ᩠ᨻᩮᨶᩥᩅᩣᩈᨸᨭᩥᩈᩴᨿᩩᨲ᩠ᨲᨠᨳᩣ

᪑. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᩈᩣᩅᨲ᩠ᨳᩥᨿᩴ ᩅᩥᩉᩁᨲᩥ ᨩᩮᨲᩅᨶᩮ ᩋᨶᩣᨳᨸᩥᨱ᩠ᨯᩥᨠᩔ ᩌᩁᩣᨾᩮ ᨠᩁᩮᩁᩥᨠᩩᨭᩥᨠᩣᨿᩴ. ᩋᨳ ᨡᩮᩣ ᩈᨾ᩠ᨻᩉᩩᩃᩣᨶᩴ ᨽᩥᨠ᩠ᨡᩪᨶᩴ ᨸᨧ᩠ᨨᩣᨽᨲ᩠ᨲᩴ ᨸᩥᨱ᩠ᨯᨸᩣᨲᨸᨭᩥᨠ᩠ᨠᨶ᩠ᨲᩣᨶᩴ ᨠᩁᩮᩁᩥᨾᨱ᩠ᨯᩃᨾᩣᩊᩮ ᩈᨶ᩠ᨶᩥᩈᩥᨶ᩠ᨶᩣᨶᩴ ᩈᨶ᩠ᨶᩥᨸᨲᩥᨲᩣᨶᩴ ᨸᩩᨻ᩠ᨻᩮᨶᩥᩅᩣᩈᨸᨭᩥᩈᩴᨿᩩᨲ᩠ᨲᩣ ᨵᨾ᩠ᨾᩦ ᨠᨳᩣ ᩏᨴᨸᩣᨴᩥ – ‘‘ᩍᨲᩥᨸᩥ ᨸᩩᨻ᩠ᨻᩮᨶᩥᩅᩣᩈᩮᩣ, ᩍᨲᩥᨸᩥ ᨸᩩᨻ᩠ᨻᩮᨶᩥᩅᩣᩈᩮᩣ’’ᨲᩥ.

᪒. ᩋᩔᩮᩣᩈᩥ ᨡᩮᩣ ᨽᨣᩅᩣ ᨴᩥᨻ᩠ᨻᩣᨿ ᩈᩮᩣᨲᨵᩣᨲᩩᨿᩣ ᩅᩥᩈᩩᨴ᩠ᨵᩣᨿ ᩋᨲᩥᨠ᩠ᨠᨶ᩠ᨲᨾᩣᨶᩩᩈᩥᨠᩣᨿ ᨲᩮᩈᩴ ᨽᩥᨠ᩠ᨡᩪᨶᩴ ᩍᨾᩴ ᨠᨳᩣᩈᩃ᩠ᩃᩣᨸᩴ. ᩋᨳ ᨡᩮᩣ ᨽᨣᩅᩣ ᩏᨭ᩠ᨮᩣᨿᩣᩈᨶᩣ ᨿᩮᨶ ᨠᩁᩮᩁᩥᨾᨱ᩠ᨯᩃᨾᩣᩊᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨸᨬ᩠ᨬᨲ᩠ᨲᩮ ᩌᩈᨶᩮ ᨶᩥᩈᩦᨴᩥ, ᨶᩥᩈᨩ᩠ᨩ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᨠᩣᨿᨶᩩᨲ᩠ᨳ, ᨽᩥᨠ᩠ᨡᩅᩮ, ᩑᨲᩁᩉᩥ ᨠᨳᩣᨿ ᩈᨶ᩠ᨶᩥᩈᩥᨶ᩠ᨶᩣ; ᨠᩣ ᨧ ᨸᨶ ᩅᩮᩣ ᩋᨶ᩠ᨲᩁᩣᨠᨳᩣ ᩅᩥᨸ᩠ᨸᨠᨲᩣ’’ᨲᩥ?

ᩑᩅᩴ ᩅᩩᨲ᩠ᨲᩮ ᨲᩮ ᨽᩥᨠ᩠ᨡᩪ ᨽᨣᩅᨶ᩠ᨲᩴ ᩑᨲᨴᩅᩮᩣᨧᩩᩴ – ‘‘ᩍᨵ, ᨽᨶ᩠ᨲᩮ, ᩋᨾ᩠ᩉᩣᨠᩴ ᨸᨧ᩠ᨨᩣᨽᨲ᩠ᨲᩴ ᨸᩥᨱ᩠ᨯᨸᩣᨲᨸᨭᩥᨠ᩠ᨠᨶ᩠ᨲᩣᨶᩴ ᨠᩁᩮᩁᩥᨾᨱ᩠ᨯᩃᨾᩣᩊᩮ ᩈᨶ᩠ᨶᩥᩈᩥᨶ᩠ᨶᩣᨶᩴ ᩈᨶ᩠ᨶᩥᨸᨲᩥᨲᩣᨶᩴ ᨸᩩᨻ᩠ᨻᩮᨶᩥᩅᩣᩈᨸᨭᩥᩈᩴᨿᩩᨲ᩠ᨲᩣ ᨵᨾ᩠ᨾᩦ ᨠᨳᩣ ᩏᨴᨸᩣᨴᩥ – ‘ᩍᨲᩥᨸᩥ ᨸᩩᨻ᩠ᨻᩮᨶᩥᩅᩣᩈᩮᩣ ᩍᨲᩥᨸᩥ ᨸᩩᨻ᩠ᨻᩮᨶᩥᩅᩣᩈᩮᩣ’ᨲᩥ. ᩋᨿᩴ ᨡᩮᩣ ᨶᩮᩣ, ᨽᨶ᩠ᨲᩮ, ᩋᨶ᩠ᨲᩁᩣᨠᨳᩣ ᩅᩥᨸ᩠ᨸᨠᨲᩣ. ᩋᨳ ᨽᨣᩅᩣ ᩋᨶᩩᨸ᩠ᨸᨲ᩠ᨲᩮᩣ’’ᨲᩥ.

᪓. ‘‘ᩍᨧ᩠ᨨᩮᨿ᩠ᨿᩣᨳ ᨶᩮᩣ ᨲᩩᨾ᩠ᩉᩮ, ᨽᩥᨠ᩠ᨡᩅᩮ, ᨸᩩᨻ᩠ᨻᩮᨶᩥᩅᩣᩈᨸᨭᩥᩈᩴᨿᩩᨲ᩠ᨲᩴ ᨵᨾ᩠ᨾᩥᩴ ᨠᨳᩴ ᩈᩮᩣᨲᩩ’’ᨶ᩠ᨲᩥ? ‘‘ᩑᨲᩔ, ᨽᨣᩅᩣ, ᨠᩣᩃᩮᩣ; ᩑᨲᩔ, ᩈᩩᨣᨲ, ᨠᩣᩃᩮᩣ; ᨿᩴ ᨽᨣᩅᩣ ᨸᩩᨻ᩠ᨻᩮᨶᩥᩅᩣᩈᨸᨭᩥᩈᩴᨿᩩᨲ᩠ᨲᩴ ᨵᨾ᩠ᨾᩥᩴ ᨠᨳᩴ ᨠᩁᩮᨿ᩠ᨿ, ᨽᨣᩅᨲᩮᩣ ᩈᩩᨲ᩠ᩅᩣ [ᨽᨣᩅᨲᩮᩣ ᩅᨧᨶᩴ ᩈᩩᨲ᩠ᩅᩣ (ᩈ᩠ᨿᩣ.)] ᨽᩥᨠ᩠ᨡᩪ ᨵᩣᩁᩮᩔᨶ᩠ᨲᩦ’’ᨲᩥ. ‘‘ᨲᩮᨶ ᩉᩥ, ᨽᩥᨠ᩠ᨡᩅᩮ, ᩈᩩᨱᩣᨳ,ᩈᩣᨵᩩᨠᩴ ᨾᨶᩈᩥ ᨠᩁᩮᩣᨳ, ᨽᩣᩈᩥᩔᩣᨾᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩩᩴ. ᨽᨣᩅᩣ ᩑᨲᨴᩅᩮᩣᨧ –

᪔. ‘‘ᩍᨲᩮᩣ ᩈᩮᩣ, ᨽᩥᨠ᩠ᨡᩅᩮ, ᩑᨠᨶᩅᩩᨲᩥᨠᨸ᩠ᨸᩮ ᨿᩴ [ᩑᨠᨶᩅᩩᨲᩮᩣ ᨠᨸ᩠ᨸᩮᩣ (ᩈ᩠ᨿᩣ. ᨠᩴ. ᨸᩦ.)] ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩏᨴᨸᩣᨴᩥ. ᩍᨲᩮᩣ ᩈᩮᩣ, ᨽᩥᨠ᩠ᨡᩅᩮ, ᩑᨠᨲᩥᩴᩈᩮ ᨠᨸ᩠ᨸᩮ [ᩑᨠᨲᩥᩴ ᩈᨠᨸ᩠ᨸᩮᩣ (ᩈᩦ.) ᩑᨠᨲᩥᩴ ᩈᩮᩣ ᨠᨸ᩠ᨸᩮᩣ (ᩈ᩠ᨿᩣ. ᨠᩴ. ᨸᩦ.)] ᨿᩴ ᩈᩥᨡᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩏᨴᨸᩣᨴᩥ. ᨲᩈ᩠ᨾᩥᨬ᩠ᨬᩮᩅ ᨡᩮᩣ, ᨽᩥᨠ᩠ᨡᩅᩮ, ᩑᨠᨲᩥᩴᩈᩮ ᨠᨸ᩠ᨸᩮ ᩅᩮᩔᨽᩪ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩏᨴᨸᩣᨴᩥ. ᩍᨾᩈ᩠ᨾᩥᨬ᩠ᨬᩮᩅ [ᩍᨾᩈ᩠ᨾᩥᩴ (ᨠᨲ᩠ᨳᨧᩦ)] ᨡᩮᩣ, ᨽᩥᨠ᩠ᨡᩅᩮ, ᨽᨴ᩠ᨴᨠᨸ᩠ᨸᩮ ᨠᨠᩩᩈᨶ᩠ᨵᩮᩣ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩏᨴᨸᩣᨴᩥ. ᩍᨾᩈ᩠ᨾᩥᨬ᩠ᨬᩮᩅ ᨡᩮᩣ, ᨽᩥᨠ᩠ᨡᩅᩮ, ᨽᨴ᩠ᨴᨠᨸ᩠ᨸᩮ ᨠᩮᩣᨱᩣᨣᨾᨶᩮᩣ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩏᨴᨸᩣᨴᩥ. ᩍᨾᩈ᩠ᨾᩥᨬ᩠ᨬᩮᩅ ᨡᩮᩣ, ᨽᩥᨠ᩠ᨡᩅᩮ, ᨽᨴ᩠ᨴᨠᨸ᩠ᨸᩮ ᨠᩔᨸᩮᩣ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩏᨴᨸᩣᨴᩥ. ᩍᨾᩈ᩠ᨾᩥᨬ᩠ᨬᩮᩅ ᨡᩮᩣ, ᨽᩥᨠ᩠ᨡᩅᩮ, ᨽᨴ᩠ᨴᨠᨸ᩠ᨸᩮ ᩋᩉᩴ ᩑᨲᩁᩉᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩏᨸ᩠ᨸᨶ᩠ᨶᩮᩣ.

᪕. ‘‘ᩅᩥᨸᩔᩦ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨡᨲ᩠ᨲᩥᨿᩮᩣ ᨩᩣᨲᩥᨿᩣ ᩋᩉᩮᩣᩈᩥ, ᨡᨲ᩠ᨲᩥᨿᨠᩩᩃᩮ ᩏᨴᨸᩣᨴᩥ. ᩈᩥᨡᩦ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨡᨲ᩠ᨲᩥᨿᩮᩣ ᨩᩣᨲᩥᨿᩣ ᩋᩉᩮᩣᩈᩥ, ᨡᨲ᩠ᨲᩥᨿᨠᩩᩃᩮ ᩏᨴᨸᩣᨴᩥ. ᩅᩮᩔᨽᩪ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨡᨲ᩠ᨲᩥᨿᩮᩣ ᨩᩣᨲᩥᨿᩣ ᩋᩉᩮᩣᩈᩥ, ᨡᨲ᩠ᨲᩥᨿᨠᩩᩃᩮ ᩏᨴᨸᩣᨴᩥ. ᨠᨠᩩᩈᨶ᩠ᨵᩮᩣ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨻᩕᩣᩉ᩠ᨾᨱᩮᩣ ᨩᩣᨲᩥᨿᩣ ᩋᩉᩮᩣᩈᩥ, ᨻᩕᩣᩉ᩠ᨾᨱᨠᩩᩃᩮ ᩏᨴᨸᩣᨴᩥ. ᨠᩮᩣᨱᩣᨣᨾᨶᩮᩣ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨻᩕᩣᩉ᩠ᨾᨱᩮᩣ ᨩᩣᨲᩥᨿᩣ ᩋᩉᩮᩣᩈᩥ, ᨻᩕᩣᩉ᩠ᨾᨱᨠᩩᩃᩮ ᩏᨴᨸᩣᨴᩥ. ᨠᩔᨸᩮᩣ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨻᩕᩣᩉ᩠ᨾᨱᩮᩣ ᨩᩣᨲᩥᨿᩣ ᩋᩉᩮᩣᩈᩥ, ᨻᩕᩣᩉ᩠ᨾᨱᨠᩩᩃᩮ ᩏᨴᨸᩣᨴᩥ. ᩋᩉᩴ, ᨽᩥᨠ᩠ᨡᩅᩮ, ᩑᨲᩁᩉᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨡᨲ᩠ᨲᩥᨿᩮᩣ ᨩᩣᨲᩥᨿᩣ ᩋᩉᩮᩣᩈᩥᩴ, ᨡᨲ᩠ᨲᩥᨿᨠᩩᩃᩮ ᩏᨸ᩠ᨸᨶ᩠ᨶᩮᩣ.

᪖. ‘‘ᩅᩥᨸᩔᩦ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨠᩮᩣᨱ᩠ᨯᨬ᩠ᨬᩮᩣ ᨣᩮᩣᨲ᩠ᨲᩮᨶ ᩋᩉᩮᩣᩈᩥ. ᩈᩥᨡᩦ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨠᩮᩣᨱ᩠ᨯᨬ᩠ᨬᩮᩣ ᨣᩮᩣᨲ᩠ᨲᩮᨶ ᩋᩉᩮᩣᩈᩥ. ᩅᩮᩔᨽᩪ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨠᩮᩣᨱ᩠ᨯᨬ᩠ᨬᩮᩣ ᨣᩮᩣᨲ᩠ᨲᩮᨶ ᩋᩉᩮᩣᩈᩥ. ᨠᨠᩩᩈᨶ᩠ᨵᩮᩣ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨠᩔᨸᩮᩣ ᨣᩮᩣᨲ᩠ᨲᩮᨶ ᩋᩉᩮᩣᩈᩥ. ᨠᩮᩣᨱᩣᨣᨾᨶᩮᩣ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨠᩔᨸᩮᩣ ᨣᩮᩣᨲ᩠ᨲᩮᨶ ᩋᩉᩮᩣᩈᩥ. ᨠᩔᨸᩮᩣ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨠᩔᨸᩮᩣ ᨣᩮᩣᨲ᩠ᨲᩮᨶ ᩋᩉᩮᩣᩈᩥ. ᩋᩉᩴ, ᨽᩥᨠ᩠ᨡᩅᩮ, ᩑᨲᩁᩉᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨣᩮᩣᨲᨾᩮᩣ ᨣᩮᩣᨲ᩠ᨲᩮᨶ ᩋᩉᩮᩣᩈᩥᩴ.

᪗. ‘‘ᩅᩥᨸᩔᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩋᩈᩦᨲᩥᩅᩔᩈᩉᩔᩣᨶᩥ ᩌᨿᩩᨸ᩠ᨸᨾᩣᨱᩴ ᩋᩉᩮᩣᩈᩥ. ᩈᩥᨡᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩈᨲ᩠ᨲᨲᩥᩅᩔᩈᩉᩔᩣᨶᩥ ᩌᨿᩩᨸ᩠ᨸᨾᩣᨱᩴ ᩋᩉᩮᩣᩈᩥ. ᩅᩮᩔᨽᩩᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩈᨭ᩠ᨮᩥᩅᩔᩈᩉᩔᩣᨶᩥ ᩌᨿᩩᨸ᩠ᨸᨾᩣᨱᩴ ᩋᩉᩮᩣᩈᩥ. ᨠᨠᩩᩈᨶ᩠ᨵᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨧᨲ᩠ᨲᩣᩃᩦᩈᩅᩔᩈᩉᩔᩣᨶᩥ ᩌᨿᩩᨸ᩠ᨸᨾᩣᨱᩴ ᩋᩉᩮᩣᩈᩥ. ᨠᩮᩣᨱᩣᨣᨾᨶᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨲᩥᩴᩈᩅᩔᩈᩉᩔᩣᨶᩥ ᩌᨿᩩᨸ᩠ᨸᨾᩣᨱᩴ ᩋᩉᩮᩣᩈᩥ. ᨠᩔᨸᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩅᩦᩈᨲᩥᩅᩔᩈᩉᩔᩣᨶᩥ ᩌᨿᩩᨸ᩠ᨸᨾᩣᨱᩴ ᩋᩉᩮᩣᩈᩥ. ᨾᨿ᩠ᩉᩴ, ᨽᩥᨠ᩠ᨡᩅᩮ, ᩑᨲᩁᩉᩥ ᩋᨸ᩠ᨸᨠᩴ ᩌᨿᩩᨸ᩠ᨸᨾᩣᨱᩴ ᨸᩁᩥᨲ᩠ᨲᩴ ᩃᩉᩩᨠᩴ; ᨿᩮᩣ ᨧᩥᩁᩴ ᨩᩦᩅᨲᩥ, ᩈᩮᩣ ᩅᩔᩈᨲᩴ ᩋᨸ᩠ᨸᩴ ᩅᩣ ᨽᩥᨿ᩠ᨿᩮᩣ.

᪘. ‘‘ᩅᩥᨸᩔᩦ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨸᩣᨭᩃᩥᨿᩣ ᨾᩪᩃᩮ ᩋᨽᩥᩈᨾ᩠ᨻᩩᨴ᩠ᨵᩮᩣ. ᩈᩥᨡᩦ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨸᩩᨱ᩠ᨯᩁᩦᨠᩔ ᨾᩪᩃᩮ ᩋᨽᩥᩈᨾ᩠ᨻᩩᨴ᩠ᨵᩮᩣ. ᩅᩮᩔᨽᩪ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩈᩣᩃᩔ ᨾᩪᩃᩮ ᩋᨽᩥᩈᨾ᩠ᨻᩩᨴ᩠ᨵᩮᩣ. ᨠᨠᩩᩈᨶ᩠ᨵᩮᩣ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩈᩥᩁᩦᩈᩔ ᨾᩪᩃᩮ ᩋᨽᩥᩈᨾ᩠ᨻᩩᨴ᩠ᨵᩮᩣ. ᨠᩮᩣᨱᩣᨣᨾᨶᩮᩣ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩏᨴᩩᨾ᩠ᨻᩁᩔ ᨾᩪᩃᩮ ᩋᨽᩥᩈᨾ᩠ᨻᩩᨴ᩠ᨵᩮᩣ. ᨠᩔᨸᩮᩣ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨶᩥᨣᩕᩮᩣᨵᩔ ᨾᩪᩃᩮ ᩋᨽᩥᩈᨾ᩠ᨻᩩᨴ᩠ᨵᩮᩣ. ᩋᩉᩴ, ᨽᩥᨠ᩠ᨡᩅᩮ, ᩑᨲᩁᩉᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩋᩔᨲ᩠ᨳᩔ ᨾᩪᩃᩮ ᩋᨽᩥᩈᨾ᩠ᨻᩩᨴ᩠ᨵᩮᩣ.

᪙. ‘‘ᩅᩥᨸᩔᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨡᨱ᩠ᨯᨲᩥᩔᩴ ᨶᩣᨾ ᩈᩣᩅᨠᨿᩩᨣᩴ ᩋᩉᩮᩣᩈᩥ ᩋᨣ᩠ᨣᩴ ᨽᨴ᩠ᨴᨿᩩᨣᩴ. ᩈᩥᨡᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩋᨽᩥᨽᩪᩈᨾ᩠ᨽᩅᩴ ᨶᩣᨾ ᩈᩣᩅᨠᨿᩩᨣᩴ ᩋᩉᩮᩣᩈᩥ ᩋᨣ᩠ᨣᩴ ᨽᨴ᩠ᨴᨿᩩᨣᩴ. ᩅᩮᩔᨽᩩᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩈᩮᩣᨱᩩᨲ᩠ᨲᩁᩴ ᨶᩣᨾ ᩈᩣᩅᨠᨿᩩᨣᩴ ᩋᩉᩮᩣᩈᩥ ᩋᨣ᩠ᨣᩴ ᨽᨴ᩠ᨴᨿᩩᨣᩴ. ᨠᨠᩩᩈᨶ᩠ᨵᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩅᩥᨵᩩᩁᩈᨬ᩠ᨩᩦᩅᩴ ᨶᩣᨾ ᩈᩣᩅᨠᨿᩩᨣᩴ ᩋᩉᩮᩣᩈᩥ ᩋᨣ᩠ᨣᩴ ᨽᨴ᩠ᨴᨿᩩᨣᩴ. ᨠᩮᩣᨱᩣᨣᨾᨶᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨽᩥᨿ᩠ᨿᩮᩣᩈᩩᨲ᩠ᨲᩁᩴ ᨶᩣᨾ ᩈᩣᩅᨠᨿᩩᨣᩴ ᩋᩉᩮᩣᩈᩥ ᩋᨣ᩠ᨣᩴ ᨽᨴ᩠ᨴᨿᩩᨣᩴ. ᨠᩔᨸᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨲᩥᩔᨽᩣᩁᨴ᩠ᩅᩣᨩᩴ ᨶᩣᨾ ᩈᩣᩅᨠᨿᩩᨣᩴ ᩋᩉᩮᩣᩈᩥ ᩋᨣ᩠ᨣᩴ ᨽᨴ᩠ᨴᨿᩩᨣᩴ. ᨾᨿ᩠ᩉᩴ, ᨽᩥᨠ᩠ᨡᩅᩮ, ᩑᨲᩁᩉᩥ ᩈᩣᩁᩥᨸᩩᨲ᩠ᨲᨾᩮᩣᨣ᩠ᨣᩃ᩠ᩃᩣᨶᩴ ᨶᩣᨾ ᩈᩣᩅᨠᨿᩩᨣᩴ ᩋᩉᩮᩣᩈᩥ ᩋᨣ᩠ᨣᩴ ᨽᨴ᩠ᨴᨿᩩᨣᩴ.

᪑᪐. ‘‘ᩅᩥᨸᩔᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨲᨿᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩣ ᩋᩉᩮᩈᩩᩴ. ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩋᨭ᩠ᨮᩈᨭ᩠ᨮᩥᨽᩥᨠ᩠ᨡᩩᩈᨲᩈᩉᩔᩴ, ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᨽᩥᨠ᩠ᨡᩩᩈᨲᩈᩉᩔᩴ, ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩋᩈᩦᨲᩥᨽᩥᨠ᩠ᨡᩩᩈᩉᩔᩣᨶᩥ. ᩅᩥᨸᩔᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩍᨾᩮ ᨲᨿᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩣ ᩋᩉᩮᩈᩩᩴ ᩈᨻ᩠ᨻᩮᩈᩴᨿᩮᩅ ᨡᩦᨱᩣᩈᩅᩣᨶᩴ.

‘‘ᩈᩥᨡᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨲᨿᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩣ ᩋᩉᩮᩈᩩᩴ. ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᨽᩥᨠ᩠ᨡᩩᩈᨲᩈᩉᩔᩴ, ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩋᩈᩦᨲᩥᨽᩥᨠ᩠ᨡᩩᩈᩉᩔᩣᨶᩥ, ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩈᨲ᩠ᨲᨲᩥᨽᩥᨠ᩠ᨡᩩᩈᩉᩔᩣᨶᩥ. ᩈᩥᨡᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩍᨾᩮ ᨲᨿᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩣ ᩋᩉᩮᩈᩩᩴ ᩈᨻ᩠ᨻᩮᩈᩴᨿᩮᩅ ᨡᩦᨱᩣᩈᩅᩣᨶᩴ.

‘‘ᩅᩮᩔᨽᩩᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨲᨿᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩣ ᩋᩉᩮᩈᩩᩴ. ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩋᩈᩦᨲᩥᨽᩥᨠ᩠ᨡᩩᩈᩉᩔᩣᨶᩥ, ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩈᨲ᩠ᨲᨲᩥᨽᩥᨠ᩠ᨡᩩᩈᩉᩔᩣᨶᩥ, ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩈᨭ᩠ᨮᩥᨽᩥᨠ᩠ᨡᩩᩈᩉᩔᩣᨶᩥ. ᩅᩮᩔᨽᩩᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩍᨾᩮ ᨲᨿᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩣ ᩋᩉᩮᩈᩩᩴ ᩈᨻ᩠ᨻᩮᩈᩴᨿᩮᩅ ᨡᩦᨱᩣᩈᩅᩣᨶᩴ.

‘‘ᨠᨠᩩᩈᨶ᩠ᨵᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᨧᨲ᩠ᨲᩣᩃᩦᩈᨽᩥᨠ᩠ᨡᩩᩈᩉᩔᩣᨶᩥ. ᨠᨠᩩᩈᨶ᩠ᨵᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩋᨿᩴ ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩈᨻ᩠ᨻᩮᩈᩴᨿᩮᩅ ᨡᩦᨱᩣᩈᩅᩣᨶᩴ.

‘‘ᨠᩮᩣᨱᩣᨣᨾᨶᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᨲᩥᩴᩈᨽᩥᨠ᩠ᨡᩩᩈᩉᩔᩣᨶᩥ. ᨠᩮᩣᨱᩣᨣᨾᨶᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩋᨿᩴ ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩈᨻ᩠ᨻᩮᩈᩴᨿᩮᩅ ᨡᩦᨱᩣᩈᩅᩣᨶᩴ.

‘‘ᨠᩔᨸᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩅᩦᩈᨲᩥᨽᩥᨠ᩠ᨡᩩᩈᩉᩔᩣᨶᩥ. ᨠᩔᨸᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩋᨿᩴ ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩈᨻ᩠ᨻᩮᩈᩴᨿᩮᩅ ᨡᩦᨱᩣᩈᩅᩣᨶᩴ.

‘‘ᨾᨿ᩠ᩉᩴ, ᨽᩥᨠ᩠ᨡᩅᩮ, ᩑᨲᩁᩉᩥ ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩋᨯ᩠ᨰᨲᩮᩊᩈᩣᨶᩥ ᨽᩥᨠ᩠ᨡᩩᩈᨲᩣᨶᩥ. ᨾᨿ᩠ᩉᩴ, ᨽᩥᨠ᩠ᨡᩅᩮ, ᩋᨿᩴ ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩈᨻ᩠ᨻᩮᩈᩴᨿᩮᩅ ᨡᩦᨱᩣᩈᩅᩣᨶᩴ.

᪑᪑. ‘‘ᩅᩥᨸᩔᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩋᩈᩮᩣᨠᩮᩣ ᨶᩣᨾ ᨽᩥᨠ᩠ᨡᩩ ᩏᨸᨭ᩠ᨮᩣᨠᩮᩣ ᩋᩉᩮᩣᩈᩥ ᩋᨣ᩠ᨣᩩᨸᨭ᩠ᨮᩣᨠᩮᩣ. ᩈᩥᨡᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨡᩮᨾᨦ᩠ᨠᩁᩮᩣ ᨶᩣᨾ ᨽᩥᨠ᩠ᨡᩩ ᩏᨸᨭ᩠ᨮᩣᨠᩮᩣ ᩋᩉᩮᩣᩈᩥ ᩋᨣ᩠ᨣᩩᨸᨭ᩠ᨮᩣᨠᩮᩣ. ᩅᩮᩔᨽᩩᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩏᨸᩈᨶ᩠ᨲᩮᩣ ᨶᩣᨾ ᨽᩥᨠ᩠ᨡᩩ ᩏᨸᨭ᩠ᨮᩣᨠᩮᩣ ᩋᩉᩮᩣᩈᩥ ᩋᨣ᩠ᨣᩩᨸᨭ᩠ᨮᩣᨠᩮᩣ. ᨠᨠᩩᩈᨶ᩠ᨵᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨻᩩᨴ᩠ᨵᩥᨩᩮᩣ ᨶᩣᨾ ᨽᩥᨠ᩠ᨡᩩ ᩏᨸᨭ᩠ᨮᩣᨠᩮᩣ ᩋᩉᩮᩣᩈᩥ ᩋᨣ᩠ᨣᩩᨸᨭ᩠ᨮᩣᨠᩮᩣ. ᨠᩮᩣᨱᩣᨣᨾᨶᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩈᩮᩣᨲ᩠ᨳᩥᨩᩮᩣ ᨶᩣᨾ ᨽᩥᨠ᩠ᨡᩩ ᩏᨸᨭ᩠ᨮᩣᨠᩮᩣ ᩋᩉᩮᩣᩈᩥ ᩋᨣ᩠ᨣᩩᨸᨭ᩠ᨮᩣᨠᩮᩣ. ᨠᩔᨸᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩈᨻ᩠ᨻᨾᩥᨲ᩠ᨲᩮᩣ ᨶᩣᨾ ᨽᩥᨠ᩠ᨡᩩ ᩏᨸᨭ᩠ᨮᩣᨠᩮᩣ ᩋᩉᩮᩣᩈᩥ ᩋᨣ᩠ᨣᩩᨸᨭ᩠ᨮᩣᨠᩮᩣ. ᨾᨿ᩠ᩉᩴ, ᨽᩥᨠ᩠ᨡᩅᩮ, ᩑᨲᩁᩉᩥ ᩌᨶᨶ᩠ᨴᩮᩣ ᨶᩣᨾ ᨽᩥᨠ᩠ᨡᩩ ᩏᨸᨭ᩠ᨮᩣᨠᩮᩣ ᩋᩉᩮᩣᩈᩥ ᩋᨣ᩠ᨣᩩᨸᨭ᩠ᨮᩣᨠᩮᩣ.

᪑᪒. ‘‘ᩅᩥᨸᩔᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨻᨶ᩠ᨵᩩᨾᩣ ᨶᩣᨾ ᩁᩣᨩᩣ ᨸᩥᨲᩣ ᩋᩉᩮᩣᩈᩥ. ᨻᨶ᩠ᨵᩩᨾᨲᩦ ᨶᩣᨾ ᨴᩮᩅᩦ ᨾᩣᨲᩣ ᩋᩉᩮᩣᩈᩥ ᨩᨶᩮᨲ᩠ᨲᩥ [ᨩᨶᩮᨲ᩠ᨲᩦ (ᩈ᩠ᨿᩣ.)]. ᨻᨶ᩠ᨵᩩᨾᩔ ᩁᨬ᩠ᨬᩮᩣ ᨻᨶ᩠ᨵᩩᨾᨲᩦ ᨶᩣᨾ ᨶᨣᩁᩴ ᩁᩣᨩᨵᩣᨶᩦ ᩋᩉᩮᩣᩈᩥ.

‘‘ᩈᩥᨡᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩋᩁᩩᨱᩮᩣ ᨶᩣᨾ ᩁᩣᨩᩣ ᨸᩥᨲᩣ ᩋᩉᩮᩣᩈᩥ. ᨸᨽᩣᩅᨲᩦ ᨶᩣᨾ ᨴᩮᩅᩦ ᨾᩣᨲᩣ ᩋᩉᩮᩣᩈᩥ ᨩᨶᩮᨲ᩠ᨲᩥ. ᩋᩁᩩᨱᩔ ᩁᨬ᩠ᨬᩮᩣ ᩋᩁᩩᨱᩅᨲᩦ ᨶᩣᨾ ᨶᨣᩁᩴ ᩁᩣᨩᨵᩣᨶᩦ ᩋᩉᩮᩣᩈᩥ.

‘‘ᩅᩮᩔᨽᩩᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩈᩩᨸ᩠ᨸᨲᩥᨲᩮᩣ ᨶᩣᨾ [ᩈᩩᨸ᩠ᨸᨲᩦᨲᩮᩣ ᨶᩣᨾ (ᩈ᩠ᨿᩣ.)] ᩁᩣᨩᩣ ᨸᩥᨲᩣ ᩋᩉᩮᩣᩈᩥ. ᩅᩔᩅᨲᩦ ᨶᩣᨾ [ᨿᩈᩅᨲᩦ ᨶᩣᨾ (ᩈ᩠ᨿᩣ. ᨸᩦ.)] ᨴᩮᩅᩦ ᨾᩣᨲᩣ ᩋᩉᩮᩣᩈᩥ ᨩᨶᩮᨲ᩠ᨲᩥ. ᩈᩩᨸ᩠ᨸᨲᩥᨲᩔ ᩁᨬ᩠ᨬᩮᩣ ᩋᨶᩮᩣᨾᩴ ᨶᩣᨾ ᨶᨣᩁᩴ ᩁᩣᨩᨵᩣᨶᩦ ᩋᩉᩮᩣᩈᩥ.

‘‘ᨠᨠᩩᩈᨶ᩠ᨵᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩋᨣ᩠ᨣᩥᨴᨲ᩠ᨲᩮᩣ ᨶᩣᨾ ᨻᩕᩣᩉ᩠ᨾᨱᩮᩣ ᨸᩥᨲᩣ ᩋᩉᩮᩣᩈᩥ. ᩅᩥᩈᩣᨡᩣ ᨶᩣᨾ ᨻᩕᩣᩉ᩠ᨾᨱᩦ ᨾᩣᨲᩣ ᩋᩉᩮᩣᩈᩥ ᨩᨶᩮᨲ᩠ᨲᩥ. ᨲᩮᨶ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩈᨾᨿᩮᨶ ᨡᩮᨾᩮᩣ ᨶᩣᨾ ᩁᩣᨩᩣ ᩋᩉᩮᩣᩈᩥ. ᨡᩮᨾᩔ ᩁᨬ᩠ᨬᩮᩣ ᨡᩮᨾᩅᨲᩦ ᨶᩣᨾ ᨶᨣᩁᩴ ᩁᩣᨩᨵᩣᨶᩦ ᩋᩉᩮᩣᩈᩥ.

‘‘ᨠᩮᩣᨱᩣᨣᨾᨶᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨿᨬ᩠ᨬᨴᨲ᩠ᨲᩮᩣ ᨶᩣᨾ ᨻᩕᩣᩉ᩠ᨾᨱᩮᩣ ᨸᩥᨲᩣ ᩋᩉᩮᩣᩈᩥ. ᩏᨲ᩠ᨲᩁᩣ ᨶᩣᨾ ᨻᩕᩣᩉ᩠ᨾᨱᩦ ᨾᩣᨲᩣ ᩋᩉᩮᩣᩈᩥ ᨩᨶᩮᨲ᩠ᨲᩥ. ᨲᩮᨶ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩈᨾᨿᩮᨶ ᩈᩮᩣᨽᩮᩣ ᨶᩣᨾ ᩁᩣᨩᩣ ᩋᩉᩮᩣᩈᩥ. ᩈᩮᩣᨽᩔ ᩁᨬ᩠ᨬᩮᩣ ᩈᩮᩣᨽᩅᨲᩦ ᨶᩣᨾ ᨶᨣᩁᩴ ᩁᩣᨩᨵᩣᨶᩦ ᩋᩉᩮᩣᩈᩥ.

‘‘ᨠᩔᨸᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨻᩕᩉ᩠ᨾᨴᨲ᩠ᨲᩮᩣ ᨶᩣᨾ ᨻᩕᩣᩉ᩠ᨾᨱᩮᩣ ᨸᩥᨲᩣ ᩋᩉᩮᩣᩈᩥ. ᨵᨶᩅᨲᩦ ᨶᩣᨾ ᨻᩕᩣᩉ᩠ᨾᨱᩦ ᨾᩣᨲᩣ ᩋᩉᩮᩣᩈᩥ ᨩᨶᩮᨲ᩠ᨲᩥ. ᨲᩮᨶ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩈᨾᨿᩮᨶ ᨠᩥᨠᩦ ᨶᩣᨾ [ᨠᩥᩴ ᨠᩦ ᨶᩣᨾ (ᩈ᩠ᨿᩣ.)] ᩁᩣᨩᩣ ᩋᩉᩮᩣᩈᩥ. ᨠᩥᨠᩥᩔ ᩁᨬ᩠ᨬᩮᩣ ᨻᩣᩁᩣᨱᩈᩦ ᨶᩣᨾ ᨶᨣᩁᩴ ᩁᩣᨩᨵᩣᨶᩦ ᩋᩉᩮᩣᩈᩥ.

‘‘ᨾᨿ᩠ᩉᩴ, ᨽᩥᨠ᩠ᨡᩅᩮ, ᩑᨲᩁᩉᩥ ᩈᩩᨴ᩠ᨵᩮᩣᨴᨶᩮᩣ ᨶᩣᨾ ᩁᩣᨩᩣ ᨸᩥᨲᩣ ᩋᩉᩮᩣᩈᩥ. ᨾᩣᨿᩣ ᨶᩣᨾ ᨴᩮᩅᩦ ᨾᩣᨲᩣ ᩋᩉᩮᩣᩈᩥ ᨩᨶᩮᨲ᩠ᨲᩥ. ᨠᨸᩥᩃᩅᨲ᩠ᨳᩩ ᨶᩣᨾ ᨶᨣᩁᩴ ᩁᩣᨩᨵᩣᨶᩦ ᩋᩉᩮᩣᩈᩦ’’ᨲᩥ. ᩍᨴᨾᩅᩮᩣᨧ ᨽᨣᩅᩣ, ᩍᨴᩴ ᩅᨲ᩠ᩅᩣᨶ ᩈᩩᨣᨲᩮᩣ ᩏᨭ᩠ᨮᩣᨿᩣᩈᨶᩣ ᩅᩥᩉᩣᩁᩴ ᨸᩣᩅᩥᩈᩥ.

᪑᪓. ᩋᨳ ᨡᩮᩣ ᨲᩮᩈᩴ ᨽᩥᨠ᩠ᨡᩪᨶᩴ ᩋᨧᩥᩁᨸᨠ᩠ᨠᨶ᩠ᨲᩔ ᨽᨣᩅᨲᩮᩣ ᩋᨿᨾᨶ᩠ᨲᩁᩣᨠᨳᩣ ᩏᨴᨸᩣᨴᩥ – ‘‘ᩋᨧ᩠ᨨᩁᩥᨿᩴ, ᩌᩅᩩᩈᩮᩣ, ᩋᨻ᩠ᨽᩩᨲᩴ, ᩌᩅᩩᩈᩮᩣ, ᨲᨳᩣᨣᨲᩔ ᨾᩉᩥᨴ᩠ᨵᩥᨠᨲᩣ ᨾᩉᩣᨶᩩᨽᩣᩅᨲᩣ. ᨿᨲᩕ ᩉᩥ ᨶᩣᨾ ᨲᨳᩣᨣᨲᩮᩣ ᩋᨲᩦᨲᩮ ᨻᩩᨴ᩠ᨵᩮ ᨸᩁᩥᨶᩥᨻ᩠ᨻᩩᨲᩮ ᨨᩥᨶ᩠ᨶᨸᨸᨬ᩠ᨧᩮ ᨨᩥᨶ᩠ᨶᩅᨭᩩᨾᩮ ᨸᩁᩥᨿᩣᨴᩥᨶ᩠ᨶᩅᨭ᩠ᨭᩮ ᩈᨻ᩠ᨻᨴᩩᨠ᩠ᨡᩅᩦᨲᩥᩅᨲ᩠ᨲᩮ ᨩᩣᨲᩥᨲᩮᩣᨸᩥ ᩋᨶᩩᩔᩁᩥᩔᨲᩥ, ᨶᩣᨾᨲᩮᩣᨸᩥ ᩋᨶᩩᩔᩁᩥᩔᨲᩥ, ᨣᩮᩣᨲ᩠ᨲᨲᩮᩣᨸᩥ ᩋᨶᩩᩔᩁᩥᩔᨲᩥ, ᩌᨿᩩᨸ᩠ᨸᨾᩣᨱᨲᩮᩣᨸᩥ ᩋᨶᩩᩔᩁᩥᩔᨲᩥ, ᩈᩣᩅᨠᨿᩩᨣᨲᩮᩣᨸᩥ ᩋᨶᩩᩔᩁᩥᩔᨲᩥ, ᩈᩣᩅᨠᩈᨶ᩠ᨶᩥᨸᩣᨲᨲᩮᩣᨸᩥ ᩋᨶᩩᩔᩁᩥᩔᨲᩥ – ‘ᩑᩅᩴᨩᨧ᩠ᨧᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩥ, ᩑᩅᩴᨶᩣᨾᩣ ᩑᩅᩴᨣᩮᩣᨲ᩠ᨲᩣ ᩑᩅᩴᩈᩦᩃᩣ ᩑᩅᩴᨵᨾ᩠ᨾᩣ ᩑᩅᩴᨸᨬ᩠ᨬᩣ ᩑᩅᩴᩅᩥᩉᩣᩁᩦ ᩑᩅᩴᩅᩥᨾᩩᨲ᩠ᨲᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩦ’’’ᨲᩥ.

‘‘ᨠᩥᩴ ᨶᩩ ᨡᩮᩣ, ᩌᩅᩩᩈᩮᩣ, ᨲᨳᩣᨣᨲᩔᩮᩅ ᨶᩩ ᨡᩮᩣ ᩑᩈᩣ ᨵᨾ᩠ᨾᨵᩣᨲᩩ ᩈᩩᨸ᩠ᨸᨭᩥᩅᩥᨴ᩠ᨵᩣ, ᨿᩔᩣ ᨵᨾ᩠ᨾᨵᩣᨲᩩᨿᩣ ᩈᩩᨸ᩠ᨸᨭᩥᩅᩥᨴ᩠ᨵᨲ᩠ᨲᩣ ᨲᨳᩣᨣᨲᩮᩣ ᩋᨲᩦᨲᩮ ᨻᩩᨴ᩠ᨵᩮ ᨸᩁᩥᨶᩥᨻ᩠ᨻᩩᨲᩮ ᨨᩥᨶ᩠ᨶᨸᨸᨬ᩠ᨧᩮ ᨨᩥᨶ᩠ᨶᩅᨭᩩᨾᩮ ᨸᩁᩥᨿᩣᨴᩥᨶ᩠ᨶᩅᨭ᩠ᨭᩮ ᩈᨻ᩠ᨻᨴᩩᨠ᩠ᨡᩅᩦᨲᩥᩅᨲ᩠ᨲᩮ ᨩᩣᨲᩥᨲᩮᩣᨸᩥ ᩋᨶᩩᩔᩁᨲᩥ, ᨶᩣᨾᨲᩮᩣᨸᩥ ᩋᨶᩩᩔᩁᨲᩥ, ᨣᩮᩣᨲ᩠ᨲᨲᩮᩣᨸᩥ ᩋᨶᩩᩔᩁᨲᩥ, ᩌᨿᩩᨸ᩠ᨸᨾᩣᨱᨲᩮᩣᨸᩥ ᩋᨶᩩᩔᩁᨲᩥ, ᩈᩣᩅᨠᨿᩩᨣᨲᩮᩣᨸᩥ ᩋᨶᩩᩔᩁᨲᩥ, ᩈᩣᩅᨠᩈᨶ᩠ᨶᩥᨸᩣᨲᨲᩮᩣᨸᩥ ᩋᨶᩩᩔᩁᨲᩥ – ‘ᩑᩅᩴᨩᨧ᩠ᨧᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩥ, ᩑᩅᩴᨶᩣᨾᩣ ᩑᩅᩴᨣᩮᩣᨲ᩠ᨲᩣ ᩑᩅᩴᩈᩦᩃᩣ ᩑᩅᩴᨵᨾ᩠ᨾᩣ ᩑᩅᩴᨸᨬ᩠ᨬᩣ ᩑᩅᩴᩅᩥᩉᩣᩁᩦ ᩑᩅᩴᩅᩥᨾᩩᨲ᩠ᨲᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩦ’ᨲᩥ, ᩏᨴᩣᩉᩩ ᨴᩮᩅᨲᩣ ᨲᨳᩣᨣᨲᩔ ᩑᨲᨾᨲ᩠ᨳᩴ ᩌᩁᩮᩣᨧᩮᩈᩩᩴ, ᨿᩮᨶ ᨲᨳᩣᨣᨲᩮᩣ ᩋᨲᩦᨲᩮ ᨻᩩᨴ᩠ᨵᩮ ᨸᩁᩥᨶᩥᨻ᩠ᨻᩩᨲᩮ ᨨᩥᨶ᩠ᨶᨸᨸᨬ᩠ᨧᩮ ᨨᩥᨶ᩠ᨶᩅᨭᩩᨾᩮ ᨸᩁᩥᨿᩣᨴᩥᨶ᩠ᨶᩅᨭ᩠ᨭᩮ ᩈᨻ᩠ᨻᨴᩩᨠ᩠ᨡᩅᩦᨲᩥᩅᨲ᩠ᨲᩮ ᨩᩣᨲᩥᨲᩮᩣᨸᩥ ᩋᨶᩩᩔᩁᨲᩥ, ᨶᩣᨾᨲᩮᩣᨸᩥ ᩋᨶᩩᩔᩁᨲᩥ, ᨣᩮᩣᨲ᩠ᨲᨲᩮᩣᨸᩥ ᩋᨶᩩᩔᩁᨲᩥ, ᩌᨿᩩᨸ᩠ᨸᨾᩣᨱᨲᩮᩣᨸᩥ ᩋᨶᩩᩔᩁᨲᩥ, ᩈᩣᩅᨠᨿᩩᨣᨲᩮᩣᨸᩥ ᩋᨶᩩᩔᩁᨲᩥ, ᩈᩣᩅᨠᩈᨶ᩠ᨶᩥᨸᩣᨲᨲᩮᩣᨸᩥ ᩋᨶᩩᩔᩁᨲᩥ – ‘ᩑᩅᩴᨩᨧ᩠ᨧᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩥ, ᩑᩅᩴᨶᩣᨾᩣ ᩑᩅᩴᨣᩮᩣᨲ᩠ᨲᩣ ᩑᩅᩴᩈᩦᩃᩣ ᩑᩅᩴᨵᨾ᩠ᨾᩣ ᩑᩅᩴᨸᨬ᩠ᨬᩣ ᩑᩅᩴᩅᩥᩉᩣᩁᩦ ᩑᩅᩴᩅᩥᨾᩩᨲ᩠ᨲᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩦ’’’ᨲᩥ. ᩋᨿᨬ᩠ᨧ ᩉᩥᨴᩴ ᨲᩮᩈᩴ ᨽᩥᨠ᩠ᨡᩪᨶᩴ ᩋᨶ᩠ᨲᩁᩣᨠᨳᩣ ᩅᩥᨸ᩠ᨸᨠᨲᩣ ᩉᩮᩣᨲᩥ.

᪑᪔. ᩋᨳ ᨡᩮᩣ ᨽᨣᩅᩣ ᩈᩣᨿᨶ᩠ᩉᩈᨾᨿᩴ ᨸᨭᩥᩈᩃ᩠ᩃᩣᨶᩣ ᩅᩩᨭ᩠ᨮᩥᨲᩮᩣ ᨿᩮᨶ ᨠᩁᩮᩁᩥᨾᨱ᩠ᨯᩃᨾᩣᩊᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨸᨬ᩠ᨬᨲ᩠ᨲᩮ ᩌᩈᨶᩮ ᨶᩥᩈᩦᨴᩥ. ᨶᩥᩈᨩ᩠ᨩ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᨠᩣᨿᨶᩩᨲ᩠ᨳ, ᨽᩥᨠ᩠ᨡᩅᩮ, ᩑᨲᩁᩉᩥ ᨠᨳᩣᨿ ᩈᨶ᩠ᨶᩥᩈᩥᨶ᩠ᨶᩣ; ᨠᩣ ᨧ ᨸᨶ ᩅᩮᩣ ᩋᨶ᩠ᨲᩁᩣᨠᨳᩣ ᩅᩥᨸ᩠ᨸᨠᨲᩣ’’ᨲᩥ?

ᩑᩅᩴ ᩅᩩᨲ᩠ᨲᩮ ᨲᩮ ᨽᩥᨠ᩠ᨡᩪ ᨽᨣᩅᨶ᩠ᨲᩴ ᩑᨲᨴᩅᩮᩣᨧᩩᩴ – ‘‘ᩍᨵ, ᨽᨶ᩠ᨲᩮ, ᩋᨾ᩠ᩉᩣᨠᩴ ᩋᨧᩥᩁᨸᨠ᩠ᨠᨶ᩠ᨲᩔ ᨽᨣᩅᨲᩮᩣ ᩋᨿᩴ ᩋᨶ᩠ᨲᩁᩣᨠᨳᩣ ᩏᨴᨸᩣᨴᩥ – ‘ᩋᨧ᩠ᨨᩁᩥᨿᩴ, ᩌᩅᩩᩈᩮᩣ, ᩋᨻ᩠ᨽᩩᨲᩴ, ᩌᩅᩩᩈᩮᩣ, ᨲᨳᩣᨣᨲᩔ ᨾᩉᩥᨴ᩠ᨵᩥᨠᨲᩣ ᨾᩉᩣᨶᩩᨽᩣᩅᨲᩣ, ᨿᨲᩕ ᩉᩥ ᨶᩣᨾ ᨲᨳᩣᨣᨲᩮᩣ ᩋᨲᩦᨲᩮ ᨻᩩᨴ᩠ᨵᩮ ᨸᩁᩥᨶᩥᨻ᩠ᨻᩩᨲᩮ ᨨᩥᨶ᩠ᨶᨸᨸᨬ᩠ᨧᩮ ᨨᩥᨶ᩠ᨶᩅᨭᩩᨾᩮ ᨸᩁᩥᨿᩣᨴᩥᨶ᩠ᨶᩅᨭ᩠ᨭᩮ ᩈᨻ᩠ᨻᨴᩩᨠ᩠ᨡᩅᩦᨲᩥᩅᨲ᩠ᨲᩮ ᨩᩣᨲᩥᨲᩮᩣᨸᩥ ᩋᨶᩩᩔᩁᩥᩔᨲᩥ, ᨶᩣᨾᨲᩮᩣᨸᩥ ᩋᨶᩩᩔᩁᩥᩔᨲᩥ, ᨣᩮᩣᨲ᩠ᨲᨲᩮᩣᨸᩥ ᩋᨶᩩᩔᩁᩥᩔᨲᩥ, ᩌᨿᩩᨸ᩠ᨸᨾᩣᨱᨲᩮᩣᨸᩥ ᩋᨶᩩᩔᩁᩥᩔᨲᩥ, ᩈᩣᩅᨠᨿᩩᨣᨲᩮᩣᨸᩥ ᩋᨶᩩᩔᩁᩥᩔᨲᩥ, ᩈᩣᩅᨠᩈᨶ᩠ᨶᩥᨸᩣᨲᨲᩮᩣᨸᩥ ᩋᨶᩩᩔᩁᩥᩔᨲᩥ – ‘‘ᩑᩅᩴᨩᨧ᩠ᨧᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩥ, ᩑᩅᩴᨶᩣᨾᩣ ᩑᩅᩴᨣᩮᩣᨲ᩠ᨲᩣ ᩑᩅᩴᩈᩦᩃᩣ ᩑᩅᩴᨵᨾ᩠ᨾᩣ ᩑᩅᩴᨸᨬ᩠ᨬᩣ ᩑᩅᩴᩅᩥᩉᩣᩁᩦ ᩑᩅᩴᩅᩥᨾᩩᨲ᩠ᨲᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩦ’’ᨲᩥ. ᨠᩥᩴ ᨶᩩ ᨡᩮᩣ, ᩌᩅᩩᩈᩮᩣ, ᨲᨳᩣᨣᨲᩔᩮᩅ ᨶᩩ ᨡᩮᩣ ᩑᩈᩣ ᨵᨾ᩠ᨾᨵᩣᨲᩩ ᩈᩩᨸ᩠ᨸᨭᩥᩅᩥᨴ᩠ᨵᩣ, ᨿᩔᩣ ᨵᨾ᩠ᨾᨵᩣᨲᩩᨿᩣ ᩈᩩᨸ᩠ᨸᨭᩥᩅᩥᨴ᩠ᨵᨲ᩠ᨲᩣ ᨲᨳᩣᨣᨲᩮᩣ ᩋᨲᩦᨲᩮ ᨻᩩᨴ᩠ᨵᩮ ᨸᩁᩥᨶᩥᨻ᩠ᨻᩩᨲᩮ ᨨᩥᨶ᩠ᨶᨸᨸᨬ᩠ᨧᩮ ᨨᩥᨶ᩠ᨶᩅᨭᩩᨾᩮ ᨸᩁᩥᨿᩣᨴᩥᨶ᩠ᨶᩅᨭ᩠ᨭᩮ ᩈᨻ᩠ᨻᨴᩩᨠ᩠ᨡᩅᩦᨲᩥᩅᨲ᩠ᨲᩮ ᨩᩣᨲᩥᨲᩮᩣᨸᩥ ᩋᨶᩩᩔᩁᨲᩥ, ᨶᩣᨾᨲᩮᩣᨸᩥ ᩋᨶᩩᩔᩁᨲᩥ, ᨣᩮᩣᨲ᩠ᨲᨲᩮᩣᨸᩥ ᩋᨶᩩᩔᩁᨲᩥ, ᩌᨿᩩᨸ᩠ᨸᨾᩣᨱᨲᩮᩣᨸᩥ ᩋᨶᩩᩔᩁᨲᩥ, ᩈᩣᩅᨠᨿᩩᨣᨲᩮᩣᨸᩥ ᩋᨶᩩᩔᩁᨲᩥ, ᩈᩣᩅᨠᩈᨶ᩠ᨶᩥᨸᩣᨲᨲᩮᩣᨸᩥ ᩋᨶᩩᩔᩁᨲᩥ – ‘‘ᩑᩅᩴᨩᨧ᩠ᨧᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩥ, ᩑᩅᩴᨶᩣᨾᩣ ᩑᩅᩴᨣᩮᩣᨲ᩠ᨲᩣ ᩑᩅᩴᩈᩦᩃᩣ ᩑᩅᩴᨵᨾ᩠ᨾᩣ ᩑᩅᩴᨸᨬ᩠ᨬᩣ ᩑᩅᩴᩅᩥᩉᩣᩁᩦ ᩑᩅᩴᩅᩥᨾᩩᨲ᩠ᨲᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩦ’’ᨲᩥ. ᩏᨴᩣᩉᩩ ᨴᩮᩅᨲᩣ ᨲᨳᩣᨣᨲᩔ ᩑᨲᨾᨲ᩠ᨳᩴ ᩌᩁᩮᩣᨧᩮᩈᩩᩴ, ᨿᩮᨶ ᨲᨳᩣᨣᨲᩮᩣ ᩋᨲᩦᨲᩮ ᨻᩩᨴ᩠ᨵᩮ ᨸᩁᩥᨶᩥᨻ᩠ᨻᩩᨲᩮ ᨨᩥᨶ᩠ᨶᨸᨸᨬ᩠ᨧᩮ ᨨᩥᨶ᩠ᨶᩅᨭᩩᨾᩮ ᨸᩁᩥᨿᩣᨴᩥᨶ᩠ᨶᩅᨭ᩠ᨭᩮ ᩈᨻ᩠ᨻᨴᩩᨠ᩠ᨡᩅᩦᨲᩥᩅᨲ᩠ᨲᩮ ᨩᩣᨲᩥᨲᩮᩣᨸᩥ ᩋᨶᩩᩔᩁᨲᩥ, ᨶᩣᨾᨲᩮᩣᨸᩥ ᩋᨶᩩᩔᩁᨲᩥ, ᨣᩮᩣᨲ᩠ᨲᨲᩮᩣᨸᩥ ᩋᨶᩩᩔᩁᨲᩥ, ᩌᨿᩩᨸ᩠ᨸᨾᩣᨱᨲᩮᩣᨸᩥ ᩋᨶᩩᩔᩁᨲᩥ, ᩈᩣᩅᨠᨿᩩᨣᨲᩮᩣᨸᩥ ᩋᨶᩩᩔᩁᨲᩥ, ᩈᩣᩅᨠᩈᨶ᩠ᨶᩥᨸᩣᨲᨲᩮᩣᨸᩥ ᩋᨶᩩᩔᩁᨲᩥ – ‘ᩑᩅᩴᨩᨧ᩠ᨧᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩥ, ᩑᩅᩴᨶᩣᨾᩣ ᩑᩅᩴᨣᩮᩣᨲ᩠ᨲᩣ ᩑᩅᩴᩈᩦᩃᩣ ᩑᩅᩴᨵᨾ᩠ᨾᩣ ᩑᩅᩴᨸᨬ᩠ᨬᩣ ᩑᩅᩴᩅᩥᩉᩣᩁᩦ ᩑᩅᩴᩅᩥᨾᩩᨲ᩠ᨲᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩦ’ᨲᩥ? ᩋᨿᩴ ᨡᩮᩣ ᨶᩮᩣ, ᨽᨶ᩠ᨲᩮ, ᩋᨶ᩠ᨲᩁᩣᨠᨳᩣ ᩅᩥᨸ᩠ᨸᨠᨲᩣ, ᩋᨳ ᨽᨣᩅᩣ ᩋᨶᩩᨸ᩠ᨸᨲ᩠ᨲᩮᩣ’’ᨲᩥ.

᪑᪕. ‘‘ᨲᨳᩣᨣᨲᩔᩮᩅᩮᩈᩣ, ᨽᩥᨠ᩠ᨡᩅᩮ, ᨵᨾ᩠ᨾᨵᩣᨲᩩ ᩈᩩᨸ᩠ᨸᨭᩥᩅᩥᨴ᩠ᨵᩣ, ᨿᩔᩣ ᨵᨾ᩠ᨾᨵᩣᨲᩩᨿᩣ ᩈᩩᨸ᩠ᨸᨭᩥᩅᩥᨴ᩠ᨵᨲ᩠ᨲᩣ ᨲᨳᩣᨣᨲᩮᩣ ᩋᨲᩦᨲᩮ ᨻᩩᨴ᩠ᨵᩮ ᨸᩁᩥᨶᩥᨻ᩠ᨻᩩᨲᩮ ᨨᩥᨶ᩠ᨶᨸᨸᨬ᩠ᨧᩮ ᨨᩥᨶ᩠ᨶᩅᨭᩩᨾᩮ ᨸᩁᩥᨿᩣᨴᩥᨶ᩠ᨶᩅᨭ᩠ᨭᩮ ᩈᨻ᩠ᨻᨴᩩᨠ᩠ᨡᩅᩦᨲᩥᩅᨲ᩠ᨲᩮ ᨩᩣᨲᩥᨲᩮᩣᨸᩥ ᩋᨶᩩᩔᩁᨲᩥ, ᨶᩣᨾᨲᩮᩣᨸᩥ ᩋᨶᩩᩔᩁᨲᩥ, ᨣᩮᩣᨲ᩠ᨲᨲᩮᩣᨸᩥ ᩋᨶᩩᩔᩁᨲᩥ, ᩌᨿᩩᨸ᩠ᨸᨾᩣᨱᨲᩮᩣᨸᩥ ᩋᨶᩩᩔᩁᨲᩥ, ᩈᩣᩅᨠᨿᩩᨣᨲᩮᩣᨸᩥ ᩋᨶᩩᩔᩁᨲᩥ, ᩈᩣᩅᨠᩈᨶ᩠ᨶᩥᨸᩣᨲᨲᩮᩣᨸᩥ ᩋᨶᩩᩔᩁᨲᩥ – ‘ᩑᩅᩴᨩᨧ᩠ᨧᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩥ, ᩑᩅᩴᨶᩣᨾᩣ ᩑᩅᩴᨣᩮᩣᨲ᩠ᨲᩣ ᩑᩅᩴᩈᩦᩃᩣ ᩑᩅᩴᨵᨾ᩠ᨾᩣ ᩑᩅᩴᨸᨬ᩠ᨬᩣ ᩑᩅᩴᩅᩥᩉᩣᩁᩦ ᩑᩅᩴᩅᩥᨾᩩᨲ᩠ᨲᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩦ’ᨲᩥ. ᨴᩮᩅᨲᩣᨸᩥ ᨲᨳᩣᨣᨲᩔ ᩑᨲᨾᨲ᩠ᨳᩴ ᩌᩁᩮᩣᨧᩮᩈᩩᩴ, ᨿᩮᨶ ᨲᨳᩣᨣᨲᩮᩣ ᩋᨲᩦᨲᩮ ᨻᩩᨴ᩠ᨵᩮ ᨸᩁᩥᨶᩥᨻ᩠ᨻᩩᨲᩮ ᨨᩥᨶ᩠ᨶᨸᨸᨬ᩠ᨧᩮ ᨨᩥᨶ᩠ᨶᩅᨭᩩᨾᩮ ᨸᩁᩥᨿᩣᨴᩥᨶ᩠ᨶᩅᨭ᩠ᨭᩮ ᩈᨻ᩠ᨻᨴᩩᨠ᩠ᨡᩅᩦᨲᩥᩅᨲ᩠ᨲᩮ ᨩᩣᨲᩥᨲᩮᩣᨸᩥ ᩋᨶᩩᩔᩁᨲᩥ, ᨶᩣᨾᨲᩮᩣᨸᩥ ᩋᨶᩩᩔᩁᨲᩥ, ᨣᩮᩣᨲ᩠ᨲᨲᩮᩣᨸᩥ ᩋᨶᩩᩔᩁᨲᩥ, ᩌᨿᩩᨸ᩠ᨸᨾᩣᨱᨲᩮᩣᨸᩥ ᩋᨶᩩᩔᩁᨲᩥ, ᩈᩣᩅᨠᨿᩩᨣᨲᩮᩣᨸᩥ ᩋᨶᩩᩔᩁᨲᩥ, ᩈᩣᩅᨠᩈᨶ᩠ᨶᩥᨸᩣᨲᨲᩮᩣᨸᩥ ᩋᨶᩩᩔᩁᨲᩥ – ‘ᩑᩅᩴᨩᨧ᩠ᨧᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩥ, ᩑᩅᩴᨶᩣᨾᩣ ᩑᩅᩴᨣᩮᩣᨲ᩠ᨲᩣ ᩑᩅᩴᩈᩦᩃᩣ ᩑᩅᩴᨵᨾ᩠ᨾᩣ ᩑᩅᩴᨸᨬ᩠ᨬᩣ ᩑᩅᩴᩅᩥᩉᩣᩁᩦ ᩑᩅᩴᩅᩥᨾᩩᨲ᩠ᨲᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩦ’ᨲᩥ.

‘‘ᩍᨧ᩠ᨨᩮᨿ᩠ᨿᩣᨳ ᨶᩮᩣ ᨲᩩᨾ᩠ᩉᩮ, ᨽᩥᨠ᩠ᨡᩅᩮ, ᨽᩥᨿ᩠ᨿᩮᩣᩈᩮᩣᨾᨲ᩠ᨲᩣᨿ ᨸᩩᨻ᩠ᨻᩮᨶᩥᩅᩣᩈᨸᨭᩥᩈᩴᨿᩩᨲ᩠ᨲᩴ ᨵᨾ᩠ᨾᩥᩴ ᨠᨳᩴ ᩈᩮᩣᨲᩩ’’ᨶ᩠ᨲᩥ? ‘‘ᩑᨲᩔ, ᨽᨣᩅᩣ, ᨠᩣᩃᩮᩣ; ᩑᨲᩔ, ᩈᩩᨣᨲ, ᨠᩣᩃᩮᩣ; ᨿᩴ ᨽᨣᩅᩣ ᨽᩥᨿ᩠ᨿᩮᩣᩈᩮᩣᨾᨲ᩠ᨲᩣᨿ ᨸᩩᨻ᩠ᨻᩮᨶᩥᩅᩣᩈᨸᨭᩥᩈᩴᨿᩩᨲ᩠ᨲᩴ ᨵᨾ᩠ᨾᩥᩴ ᨠᨳᩴ ᨠᩁᩮᨿ᩠ᨿ, ᨽᨣᩅᨲᩮᩣ ᩈᩩᨲ᩠ᩅᩣ ᨽᩥᨠ᩠ᨡᩪ ᨵᩣᩁᩮᩔᨶ᩠ᨲᩦ’’ᨲᩥ. ‘‘ᨲᩮᨶ ᩉᩥ, ᨽᩥᨠ᩠ᨡᩅᩮ, ᩈᩩᨱᩣᨳ, ᩈᩣᨵᩩᨠᩴ ᨾᨶᩈᩥ ᨠᩁᩮᩣᨳ, ᨽᩣᩈᩥᩔᩣᨾᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩩᩴ. ᨽᨣᩅᩣ ᩑᨲᨴᩅᩮᩣᨧ –

᪑᪖. ‘‘ᩍᨲᩮᩣ ᩈᩮᩣ, ᨽᩥᨠ᩠ᨡᩅᩮ, ᩑᨠᨶᩅᩩᨲᩥᨠᨸ᩠ᨸᩮ ᨿᩴ ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩏᨴᨸᩣᨴᩥ. ᩅᩥᨸᩔᩦ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨡᨲ᩠ᨲᩥᨿᩮᩣ ᨩᩣᨲᩥᨿᩣ ᩋᩉᩮᩣᩈᩥ, ᨡᨲ᩠ᨲᩥᨿᨠᩩᩃᩮ ᩏᨴᨸᩣᨴᩥ. ᩅᩥᨸᩔᩦ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨠᩮᩣᨱ᩠ᨯᨬ᩠ᨬᩮᩣ ᨣᩮᩣᨲ᩠ᨲᩮᨶ ᩋᩉᩮᩣᩈᩥ. ᩅᩥᨸᩔᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩋᩈᩦᨲᩥᩅᩔᩈᩉᩔᩣᨶᩥ ᩌᨿᩩᨸ᩠ᨸᨾᩣᨱᩴ ᩋᩉᩮᩣᩈᩥ. ᩅᩥᨸᩔᩦ, ᨽᩥᨠ᩠ᨡᩅᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨸᩣᨭᩃᩥᨿᩣ ᨾᩪᩃᩮ ᩋᨽᩥᩈᨾ᩠ᨻᩩᨴ᩠ᨵᩮᩣ. ᩅᩥᨸᩔᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨡᨱ᩠ᨯᨲᩥᩔᩴ ᨶᩣᨾ ᩈᩣᩅᨠᨿᩩᨣᩴ ᩋᩉᩮᩣᩈᩥ ᩋᨣ᩠ᨣᩴ ᨽᨴ᩠ᨴᨿᩩᨣᩴ. ᩅᩥᨸᩔᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨲᨿᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩣ ᩋᩉᩮᩈᩩᩴ. ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩋᨭ᩠ᨮᩈᨭ᩠ᨮᩥᨽᩥᨠ᩠ᨡᩩᩈᨲᩈᩉᩔᩴ, ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᨽᩥᨠ᩠ᨡᩩᩈᨲᩈᩉᩔᩴ, ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩋᩈᩦᨲᩥᨽᩥᨠ᩠ᨡᩩᩈᩉᩔᩣᨶᩥ. ᩅᩥᨸᩔᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩍᨾᩮ ᨲᨿᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩣ ᩋᩉᩮᩈᩩᩴ ᩈᨻ᩠ᨻᩮᩈᩴᨿᩮᩅ ᨡᩦᨱᩣᩈᩅᩣᨶᩴ. ᩅᩥᨸᩔᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩋᩈᩮᩣᨠᩮᩣ ᨶᩣᨾ ᨽᩥᨠ᩠ᨡᩩ ᩏᨸᨭ᩠ᨮᩣᨠᩮᩣ ᩋᩉᩮᩣᩈᩥ ᩋᨣ᩠ᨣᩩᨸᨭ᩠ᨮᩣᨠᩮᩣ. ᩅᩥᨸᩔᩥᩔ, ᨽᩥᨠ᩠ᨡᩅᩮ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨻᨶ᩠ᨵᩩᨾᩣ ᨶᩣᨾ ᩁᩣᨩᩣ ᨸᩥᨲᩣ ᩋᩉᩮᩣᩈᩥ. ᨻᨶ᩠ᨵᩩᨾᨲᩦ ᨶᩣᨾ ᨴᩮᩅᩦ ᨾᩣᨲᩣ ᩋᩉᩮᩣᩈᩥ ᨩᨶᩮᨲ᩠ᨲᩥ. ᨻᨶ᩠ᨵᩩᨾᩔ ᩁᨬ᩠ᨬᩮᩣ ᨻᨶ᩠ᨵᩩᨾᨲᩦ ᨶᩣᨾ ᨶᨣᩁᩴ ᩁᩣᨩᨵᩣᨶᩦ ᩋᩉᩮᩣᩈᩥ.

ᨻᩮᩣᨵᩥᩈᨲ᩠ᨲᨵᨾ᩠ᨾᨲᩣ

᪑᪗. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨻᩮᩣᨵᩥᩈᨲ᩠ᨲᩮᩣ ᨲᩩᩈᩥᨲᩣ ᨠᩣᨿᩣ ᨧᩅᩥᨲ᩠ᩅᩣ ᩈᨲᩮᩣ ᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨾᩥ. ᩋᨿᨾᩮᨲ᩠ᨳ ᨵᨾ᩠ᨾᨲᩣ.

᪑᪘. ‘‘ᨵᨾ᩠ᨾᨲᩣ, ᩑᩈᩣ, ᨽᩥᨠ᩠ᨡᩅᩮ, ᨿᨴᩣ ᨻᩮᩣᨵᩥᩈᨲ᩠ᨲᩮᩣ ᨲᩩᩈᩥᨲᩣ ᨠᩣᨿᩣ ᨧᩅᩥᨲ᩠ᩅᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨾᨲᩥ. ᩋᨳ ᩈᨴᩮᩅᨠᩮ ᩃᩮᩣᨠᩮ ᩈᨾᩣᩁᨠᩮ ᩈᨻᩕᩉ᩠ᨾᨠᩮ ᩈᩔᨾᨱᨻᩕᩣᩉ᩠ᨾᨱᩥᨿᩣ ᨸᨩᩣᨿ ᩈᨴᩮᩅᨾᨶᩩᩔᩣᨿ ᩋᨸ᩠ᨸᨾᩣᨱᩮᩣ ᩏᩊᩣᩁᩮᩣ ᩒᨽᩣᩈᩮᩣ ᨸᩣᨲᩩᨽᩅᨲᩥ ᩋᨲᩥᨠ᩠ᨠᨾ᩠ᨾᩮᩅ ᨴᩮᩅᩣᨶᩴ ᨴᩮᩅᩣᨶᩩᨽᩣᩅᩴ. ᨿᩣᨸᩥ ᨲᩣ ᩃᩮᩣᨠᨶ᩠ᨲᩁᩥᨠᩣ ᩋᨥᩣ ᩋᩈᩴᩅᩩᨲᩣ ᩋᨶ᩠ᨵᨠᩣᩁᩣ ᩋᨶ᩠ᨵᨠᩣᩁᨲᩥᨾᩥᩈᩣ, ᨿᨲ᩠ᨳ ᨸᩥᨾᩮ ᨧᨶ᩠ᨴᩥᨾᩈᩪᩁᩥᨿᩣ ᩑᩅᩴᨾᩉᩥᨴ᩠ᨵᩥᨠᩣ ᩑᩅᩴᨾᩉᩣᨶᩩᨽᩣᩅᩣ ᩌᨽᩣᨿ ᨶᩣᨶᩩᨽᩮᩣᨶ᩠ᨲᩥ, ᨲᨲ᩠ᨳᨸᩥ ᩋᨸ᩠ᨸᨾᩣᨱᩮᩣ ᩏᩊᩣᩁᩮᩣ ᩒᨽᩣᩈᩮᩣ ᨸᩣᨲᩩᨽᩅᨲᩥ ᩋᨲᩥᨠ᩠ᨠᨾ᩠ᨾᩮᩅ ᨴᩮᩅᩣᨶᩴ ᨴᩮᩅᩣᨶᩩᨽᩣᩅᩴ. ᨿᩮᨸᩥ ᨲᨲ᩠ᨳ ᩈᨲ᩠ᨲᩣ ᩏᨸᨸᨶ᩠ᨶᩣ, ᨲᩮᨸᩥ ᨲᩮᨶᩮᩣᨽᩣᩈᩮᨶ ᩋᨬ᩠ᨬᨾᨬ᩠ᨬᩴ ᩈᨬ᩠ᨩᩣᨶᨶ᩠ᨲᩥ – ‘ᩋᨬ᩠ᨬᩮᨸᩥ ᨠᩥᩁ, ᨽᩮᩣ, ᩈᨶ᩠ᨲᩥ ᩈᨲ᩠ᨲᩣ ᩍᨵᩪᨸᨸᨶ᩠ᨶᩣ’ᨲᩥ. ᩋᨿᨬ᩠ᨧ ᨴᩈᩈᩉᩔᩦ ᩃᩮᩣᨠᨵᩣᨲᩩ ᩈᨦ᩠ᨠᨾ᩠ᨸᨲᩥ ᩈᨾ᩠ᨸᨠᨾ᩠ᨸᨲᩥ ᩈᨾ᩠ᨸᩅᩮᨵᨲᩥ. ᩋᨸ᩠ᨸᨾᩣᨱᩮᩣ ᨧ ᩏᩊᩣᩁᩮᩣ ᩒᨽᩣᩈᩮᩣ ᩃᩮᩣᨠᩮ ᨸᩣᨲᩩᨽᩅᨲᩥ ᩋᨲᩥᨠ᩠ᨠᨾ᩠ᨾᩮᩅ ᨴᩮᩅᩣᨶᩴ ᨴᩮᩅᩣᨶᩩᨽᩣᩅᩴ. ᩋᨿᨾᩮᨲ᩠ᨳ ᨵᨾ᩠ᨾᨲᩣ.

᪑᪙. ‘‘ᨵᨾ᩠ᨾᨲᩣ ᩑᩈᩣ, ᨽᩥᨠ᩠ᨡᩅᩮ, ᨿᨴᩣ ᨻᩮᩣᨵᩥᩈᨲ᩠ᨲᩮᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨶ᩠ᨲᩮᩣ ᩉᩮᩣᨲᩥ, ᨧᨲ᩠ᨲᩣᩁᩮᩣ ᨶᩴ ᨴᩮᩅᨸᩩᨲ᩠ᨲᩣ ᨧᨲᩩᨴ᩠ᨴᩥᩈᩴ [ᨧᩣᨲᩩᨴ᩠ᨴᩥᩈᩴ (ᩈ᩠ᨿᩣ.)] ᩁᨠ᩠ᨡᩣᨿ ᩏᨸᨣᨧ᩠ᨨᨶ᩠ᨲᩥ – ‘ᨾᩣ ᨶᩴ ᨻᩮᩣᨵᩥᩈᨲ᩠ᨲᩴ ᩅᩣ ᨻᩮᩣᨵᩥᩈᨲ᩠ᨲᨾᩣᨲᩁᩴ ᩅᩣ ᨾᨶᩩᩔᩮᩣ ᩅᩣ ᩋᨾᨶᩩᩔᩮᩣ ᩅᩣ ᨠᩮᩣᨧᩥ ᩅᩣ ᩅᩥᩉᩮᨮᩮᩈᩦ’ᨲᩥ. ᩋᨿᨾᩮᨲ᩠ᨳ ᨵᨾ᩠ᨾᨲᩣ.

᪒᪐. ‘‘ᨵᨾ᩠ᨾᨲᩣ ᩑᩈᩣ, ᨽᩥᨠ᩠ᨡᩅᩮ, ᨿᨴᩣ ᨻᩮᩣᨵᩥᩈᨲ᩠ᨲᩮᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨶ᩠ᨲᩮᩣ ᩉᩮᩣᨲᩥ, ᨸᨠᨲᩥᨿᩣ ᩈᩦᩃᩅᨲᩦ ᨻᩮᩣᨵᩥᩈᨲ᩠ᨲᨾᩣᨲᩣ ᩉᩮᩣᨲᩥ, ᩅᩥᩁᨲᩣ ᨸᩣᨱᩣᨲᩥᨸᩣᨲᩣ, ᩅᩥᩁᨲᩣ ᩋᨴᩥᨶ᩠ᨶᩣᨴᩣᨶᩣ, ᩅᩥᩁᨲᩣ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ, ᩅᩥᩁᨲᩣ ᨾᩩᩈᩣᩅᩣᨴᩣ, ᩅᩥᩁᨲᩣ ᩈᩩᩁᩣᨾᩮᩁᨿᨾᨩ᩠ᨩᨸ᩠ᨸᨾᩣᨴᨭ᩠ᨮᩣᨶᩣ. ᩋᨿᨾᩮᨲ᩠ᨳ ᨵᨾ᩠ᨾᨲᩣ.

᪒᪑. ‘‘ᨵᨾ᩠ᨾᨲᩣ ᩑᩈᩣ, ᨽᩥᨠ᩠ᨡᩅᩮ, ᨿᨴᩣ ᨻᩮᩣᨵᩥᩈᨲ᩠ᨲᩮᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨶ᩠ᨲᩮᩣ ᩉᩮᩣᨲᩥ, ᨶ ᨻᩮᩣᨵᩥᩈᨲ᩠ᨲᨾᩣᨲᩩ ᨸᩩᩁᩥᩈᩮᩈᩩ ᨾᩣᨶᩈᩴ ᩏᨸ᩠ᨸᨩ᩠ᨩᨲᩥ ᨠᩣᨾᨣᩩᨱᩪᨸᩈᩴᩉᩥᨲᩴ, ᩋᨶᨲᩥᨠ᩠ᨠᨾᨶᩦᨿᩣ ᨧ ᨻᩮᩣᨵᩥᩈᨲ᩠ᨲᨾᩣᨲᩣ ᩉᩮᩣᨲᩥ ᨠᩮᨶᨧᩥ ᨸᩩᩁᩥᩈᩮᨶ ᩁᨲ᩠ᨲᨧᩥᨲ᩠ᨲᩮᨶ. ᩋᨿᨾᩮᨲ᩠ᨳ ᨵᨾ᩠ᨾᨲᩣ.

᪒᪒. ‘‘ᨵᨾ᩠ᨾᨲᩣ ᩑᩈᩣ, ᨽᩥᨠ᩠ᨡᩅᩮ, ᨿᨴᩣ ᨻᩮᩣᨵᩥᩈᨲ᩠ᨲᩮᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨶ᩠ᨲᩮᩣ ᩉᩮᩣᨲᩥ, ᩃᩣᨽᩥᨶᩦ ᨻᩮᩣᨵᩥᩈᨲ᩠ᨲᨾᩣᨲᩣ ᩉᩮᩣᨲᩥ ᨸᨬ᩠ᨧᨶ᩠ᨶᩴ ᨠᩣᨾᨣᩩᨱᩣᨶᩴ. ᩈᩣ ᨸᨬ᩠ᨧᩉᩥ ᨠᩣᨾᨣᩩᨱᩮᩉᩥ ᩈᨾᨸ᩠ᨸᩥᨲᩣ ᩈᨾᨦ᩠ᨣᩦᨽᩪᨲᩣ ᨸᩁᩥᨧᩣᩁᩮᨲᩥ. ᩋᨿᨾᩮᨲ᩠ᨳ ᨵᨾ᩠ᨾᨲᩣ.

᪒᪓. ‘‘ᨵᨾ᩠ᨾᨲᩣ ᩑᩈᩣ, ᨽᩥᨠ᩠ᨡᩅᩮ, ᨿᨴᩣ ᨻᩮᩣᨵᩥᩈᨲ᩠ᨲᩮᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨶ᩠ᨲᩮᩣ ᩉᩮᩣᨲᩥ, ᨶ ᨻᩮᩣᨵᩥᩈᨲ᩠ᨲᨾᩣᨲᩩ ᨠᩮᩣᨧᩥᨴᩮᩅ ᩌᨻᩣᨵᩮᩣ ᩏᨸ᩠ᨸᨩ᩠ᨩᨲᩥ. ᩈᩩᨡᩥᨶᩦ ᨻᩮᩣᨵᩥᩈᨲ᩠ᨲᨾᩣᨲᩣ ᩉᩮᩣᨲᩥ ᩋᨠᩥᩃᨶ᩠ᨲᨠᩣᨿᩣ, ᨻᩮᩣᨵᩥᩈᨲ᩠ᨲᨬ᩠ᨧ ᨻᩮᩣᨵᩥᩈᨲ᩠ᨲᨾᩣᨲᩣ ᨲᩥᩁᩮᩣᨠᩩᨧ᩠ᨨᩥᨣᨲᩴ ᨸᩔᨲᩥ ᩈᨻ᩠ᨻᨦ᩠ᨣᨸᨧ᩠ᨧᨦ᩠ᨣᩥᩴ ᩋᩉᩦᨶᩥᨶ᩠ᨴᩕᩥᨿᩴ. ᩈᩮᨿ᩠ᨿᨳᩣᨸᩥ, ᨽᩥᨠ᩠ᨡᩅᩮ, ᨾᨱᩥ ᩅᩮᩊᩩᩁᩥᨿᩮᩣ ᩈᩩᨽᩮᩣ ᨩᩣᨲᩥᨾᩣ ᩋᨭ᩠ᨮᩴᩈᩮᩣ ᩈᩩᨸᩁᩥᨠᨾ᩠ᨾᨠᨲᩮᩣ ᩋᨧ᩠ᨨᩮᩣ ᩅᩥᨸ᩠ᨸᩈᨶ᩠ᨶᩮᩣ ᩋᨶᩣᩅᩥᩃᩮᩣ ᩈᨻ᩠ᨻᩣᨠᩣᩁᩈᨾ᩠ᨸᨶ᩠ᨶᩮᩣ. ᨲᨲᩕᩣᩔ [ᨲᨲᩕᩔ (ᩈ᩠ᨿᩣ.)] ᩈᩩᨲ᩠ᨲᩴ ᩌᩅᩩᨲᩴ ᨶᩦᩃᩴ ᩅᩣ ᨸᩦᨲᩴ ᩅᩣ ᩃᩮᩣᩉᩥᨲᩴ ᩅᩣ ᩒᨴᩣᨲᩴ ᩅᩣ ᨸᨱ᩠ᨯᩩᩈᩩᨲ᩠ᨲᩴ ᩅᩣ. ᨲᨾᩮᨶᩴ ᨧᨠ᩠ᨡᩩᨾᩣ ᨸᩩᩁᩥᩈᩮᩣ ᩉᨲ᩠ᨳᩮ ᨠᩁᩥᨲ᩠ᩅᩣ ᨸᨧ᩠ᨧᩅᩮᨠ᩠ᨡᩮᨿ᩠ᨿ – ‘ᩋᨿᩴ ᨡᩮᩣ ᨾᨱᩥ ᩅᩮᩊᩩᩁᩥᨿᩮᩣ ᩈᩩᨽᩮᩣ ᨩᩣᨲᩥᨾᩣ ᩋᨭ᩠ᨮᩴᩈᩮᩣ ᩈᩩᨸᩁᩥᨠᨾ᩠ᨾᨠᨲᩮᩣ ᩋᨧ᩠ᨨᩮᩣ ᩅᩥᨸ᩠ᨸᩈᨶ᩠ᨶᩮᩣ ᩋᨶᩣᩅᩥᩃᩮᩣ ᩈᨻ᩠ᨻᩣᨠᩣᩁᩈᨾ᩠ᨸᨶ᩠ᨶᩮᩣ. ᨲᨲᩕᩥᨴᩴ ᩈᩩᨲ᩠ᨲᩴ ᩌᩅᩩᨲᩴ ᨶᩦᩃᩴ ᩅᩣ ᨸᩦᨲᩴ ᩅᩣ ᩃᩮᩣᩉᩥᨲᩴ ᩅᩣ ᩒᨴᩣᨲᩴ ᩅᩣ ᨸᨱ᩠ᨯᩩᩈᩩᨲ᩠ᨲᩴ ᩅᩣ’ᨲᩥ. ᩑᩅᨾᩮᩅ ᨡᩮᩣ, ᨽᩥᨠ᩠ᨡᩅᩮ, ᨿᨴᩣ ᨻᩮᩣᨵᩥᩈᨲ᩠ᨲᩮᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨶ᩠ᨲᩮᩣ ᩉᩮᩣᨲᩥ, ᨶ ᨻᩮᩣᨵᩥᩈᨲ᩠ᨲᨾᩣᨲᩩ ᨠᩮᩣᨧᩥᨴᩮᩅ ᩌᨻᩣᨵᩮᩣ ᩏᨸ᩠ᨸᨩ᩠ᨩᨲᩥ, ᩈᩩᨡᩥᨶᩦ ᨻᩮᩣᨵᩥᩈᨲ᩠ᨲᨾᩣᨲᩣ ᩉᩮᩣᨲᩥ ᩋᨠᩥᩃᨶ᩠ᨲᨠᩣᨿᩣ, ᨻᩮᩣᨵᩥᩈᨲ᩠ᨲᨬ᩠ᨧ ᨻᩮᩣᨵᩥᩈᨲ᩠ᨲᨾᩣᨲᩣ ᨲᩥᩁᩮᩣᨠᩩᨧ᩠ᨨᩥᨣᨲᩴ ᨸᩔᨲᩥ ᩈᨻ᩠ᨻᨦ᩠ᨣᨸᨧ᩠ᨧᨦ᩠ᨣᩥᩴ ᩋᩉᩦᨶᩥᨶ᩠ᨴᩕᩥᨿᩴ. ᩋᨿᨾᩮᨲ᩠ᨳ ᨵᨾ᩠ᨾᨲᩣ.

᪒᪔. ‘‘ᨵᨾ᩠ᨾᨲᩣ ᩑᩈᩣ, ᨽᩥᨠ᩠ᨡᩅᩮ, ᩈᨲ᩠ᨲᩣᩉᨩᩣᨲᩮ ᨻᩮᩣᨵᩥᩈᨲ᩠ᨲᩮ ᨻᩮᩣᨵᩥᩈᨲ᩠ᨲᨾᩣᨲᩣ ᨠᩣᩃᨦ᩠ᨠᩁᩮᩣᨲᩥ ᨲᩩᩈᩥᨲᩴ ᨠᩣᨿᩴ ᩏᨸᨸᨩ᩠ᨩᨲᩥ. ᩋᨿᨾᩮᨲ᩠ᨳ ᨵᨾ᩠ᨾᨲᩣ.

᪒᪕. ‘‘ᨵᨾ᩠ᨾᨲᩣ ᩑᩈᩣ, ᨽᩥᨠ᩠ᨡᩅᩮ, ᨿᨳᩣ ᩋᨬ᩠ᨬᩣ ᩍᨲ᩠ᨳᩥᨠᩣ ᨶᩅ ᩅᩣ ᨴᩈ ᩅᩣ ᨾᩣᩈᩮ ᨣᨻ᩠ᨽᩴ ᨠᩩᨧ᩠ᨨᩥᨶᩣ ᨸᩁᩥᩉᩁᩥᨲ᩠ᩅᩣ ᩅᩥᨩᩣᨿᨶ᩠ᨲᩥ, ᨶ ᩉᩮᩅᩴ ᨻᩮᩣᨵᩥᩈᨲ᩠ᨲᩴ ᨻᩮᩣᨵᩥᩈᨲ᩠ᨲᨾᩣᨲᩣ ᩅᩥᨩᩣᨿᨲᩥ. ᨴᩈᩮᩅ ᨾᩣᩈᩣᨶᩥ ᨻᩮᩣᨵᩥᩈᨲ᩠ᨲᩴ ᨻᩮᩣᨵᩥᩈᨲ᩠ᨲᨾᩣᨲᩣ ᨠᩩᨧ᩠ᨨᩥᨶᩣ ᨸᩁᩥᩉᩁᩥᨲ᩠ᩅᩣ ᩅᩥᨩᩣᨿᨲᩥ. ᩋᨿᨾᩮᨲ᩠ᨳ ᨵᨾ᩠ᨾᨲᩣ.

᪒᪖. ‘‘ᨵᨾ᩠ᨾᨲᩣ ᩑᩈᩣ, ᨽᩥᨠ᩠ᨡᩅᩮ, ᨿᨳᩣ ᩋᨬ᩠ᨬᩣ ᩍᨲ᩠ᨳᩥᨠᩣ ᨶᩥᩈᩥᨶ᩠ᨶᩣ ᩅᩣ ᨶᩥᨸᨶ᩠ᨶᩣ ᩅᩣ ᩅᩥᨩᩣᨿᨶ᩠ᨲᩥ, ᨶ ᩉᩮᩅᩴ ᨻᩮᩣᨵᩥᩈᨲ᩠ᨲᩴ ᨻᩮᩣᨵᩥᩈᨲ᩠ᨲᨾᩣᨲᩣ ᩅᩥᨩᩣᨿᨲᩥ. ᨮᩥᨲᩣᩅ ᨻᩮᩣᨵᩥᩈᨲ᩠ᨲᩴ ᨻᩮᩣᨵᩥᩈᨲ᩠ᨲᨾᩣᨲᩣ ᩅᩥᨩᩣᨿᨲᩥ. ᩋᨿᨾᩮᨲ᩠ᨳ ᨵᨾ᩠ᨾᨲᩣ.

᪒᪗. ‘‘ᨵᨾ᩠ᨾᨲᩣ ᩑᩈᩣ, ᨽᩥᨠ᩠ᨡᩅᩮ, ᨿᨴᩣ ᨻᩮᩣᨵᩥᩈᨲ᩠ᨲᩮᩣ ᨾᩣᨲᩩᨠᩩᨧ᩠ᨨᩥᨾ᩠ᩉᩣ ᨶᩥᨠ᩠ᨡᨾᨲᩥ, ᨴᩮᩅᩣ ᨸᨮᨾᩴ ᨸᨭᩥᨣ᩠ᨣᨱ᩠ᩉᨶ᩠ᨲᩥ, ᨸᨧ᩠ᨨᩣ ᨾᨶᩩᩔᩣ. ᩋᨿᨾᩮᨲ᩠ᨳ ᨵᨾ᩠ᨾᨲᩣ.

᪒᪘. ‘‘ᨵᨾ᩠ᨾᨲᩣ ᩑᩈᩣ, ᨽᩥᨠ᩠ᨡᩅᩮ, ᨿᨴᩣ ᨻᩮᩣᨵᩥᩈᨲ᩠ᨲᩮᩣ ᨾᩣᨲᩩᨠᩩᨧ᩠ᨨᩥᨾ᩠ᩉᩣ ᨶᩥᨠ᩠ᨡᨾᨲᩥ, ᩋᨸ᩠ᨸᨲ᩠ᨲᩮᩣᩅ ᨻᩮᩣᨵᩥᩈᨲ᩠ᨲᩮᩣ ᨸᨳᩅᩥᩴ ᩉᩮᩣᨲᩥ, ᨧᨲ᩠ᨲᩣᩁᩮᩣ ᨶᩴ ᨴᩮᩅᨸᩩᨲ᩠ᨲᩣ ᨸᨭᩥᨣ᩠ᨣᩉᩮᨲ᩠ᩅᩣ ᨾᩣᨲᩩ ᨸᩩᩁᨲᩮᩣ ᨮᨸᩮᨶ᩠ᨲᩥ – ‘ᩋᨲ᩠ᨲᨾᨶᩣ, ᨴᩮᩅᩥ, ᩉᩮᩣᩉᩥ; ᨾᩉᩮᩈᨠ᩠ᨡᩮᩣ ᨲᩮ ᨸᩩᨲ᩠ᨲᩮᩣ ᩏᨸ᩠ᨸᨶ᩠ᨶᩮᩣ’ᨲᩥ. ᩋᨿᨾᩮᨲ᩠ᨳ ᨵᨾ᩠ᨾᨲᩣ.

᪒᪙. ‘‘ᨵᨾ᩠ᨾᨲᩣ ᩑᩈᩣ, ᨽᩥᨠ᩠ᨡᩅᩮ, ᨿᨴᩣ ᨻᩮᩣᨵᩥᩈᨲ᩠ᨲᩮᩣ ᨾᩣᨲᩩᨠᩩᨧ᩠ᨨᩥᨾ᩠ᩉᩣ ᨶᩥᨠ᩠ᨡᨾᨲᩥ, ᩅᩥᩈᨴᩮᩣᩅ ᨶᩥᨠ᩠ᨡᨾᨲᩥ ᩋᨾᨠ᩠ᨡᩥᨲᩮᩣ ᩏᨴᩮᨶ [ᩏᨴ᩠ᨴᩮᨶ (ᩈ᩠ᨿᩣ.), ᩏᨴᩁᩮᨶ (ᨠᨲ᩠ᨳᨧᩥ)] ᩋᨾᨠ᩠ᨡᩥᨲᩮᩣ ᩈᩮᨾ᩠ᩉᩮᨶ ᩋᨾᨠ᩠ᨡᩥᨲᩮᩣ ᩁᩩᩉᩥᩁᩮᨶ ᩋᨾᨠ᩠ᨡᩥᨲᩮᩣ ᨠᩮᨶᨧᩥ ᩋᩈᩩᨧᩥᨶᩣ ᩈᩩᨴ᩠ᨵᩮᩣ [ᩅᩥᩈᩩᨴ᩠ᨵᩮᩣ (ᩈ᩠ᨿᩣ.)] ᩅᩥᩈᨴᩮᩣ. ᩈᩮᨿ᩠ᨿᨳᩣᨸᩥ, ᨽᩥᨠ᩠ᨡᩅᩮ, ᨾᨱᩥᩁᨲᨶᩴ ᨠᩣᩈᩥᨠᩮ ᩅᨲ᩠ᨳᩮ ᨶᩥᨠ᩠ᨡᩥᨲ᩠ᨲᩴ ᨶᩮᩅ ᨾᨱᩥᩁᨲᨶᩴ ᨠᩣᩈᩥᨠᩴ ᩅᨲ᩠ᨳᩴ ᨾᨠ᩠ᨡᩮᨲᩥ, ᨶᩣᨸᩥ ᨠᩣᩈᩥᨠᩴ ᩅᨲ᩠ᨳᩴ ᨾᨱᩥᩁᨲᨶᩴ ᨾᨠ᩠ᨡᩮᨲᩥ. ᨲᩴ ᨠᩥᩔ ᩉᩮᨲᩩ? ᩏᨽᩥᨶ᩠ᨶᩴ ᩈᩩᨴ᩠ᨵᨲ᩠ᨲᩣ. ᩑᩅᨾᩮᩅ ᨡᩮᩣ, ᨽᩥᨠ᩠ᨡᩅᩮ, ᨿᨴᩣ ᨻᩮᩣᨵᩥᩈᨲ᩠ᨲᩮᩣ ᨾᩣᨲᩩᨠᩩᨧ᩠ᨨᩥᨾ᩠ᩉᩣ ᨶᩥᨠ᩠ᨡᨾᨲᩥ, ᩅᩥᩈᨴᩮᩣᩅ ᨶᩥᨠ᩠ᨡᨾᨲᩥ ᩋᨾᨠ᩠ᨡᩥᨲᩮᩣ, ᩏᨴᩮᨶ ᩋᨾᨠ᩠ᨡᩥᨲᩮᩣ ᩈᩮᨾ᩠ᩉᩮᨶ ᩋᨾᨠ᩠ᨡᩥᨲᩮᩣ ᩁᩩᩉᩥᩁᩮᨶ ᩋᨾᨠ᩠ᨡᩥᨲᩮᩣ ᨠᩮᨶᨧᩥ ᩋᩈᩩᨧᩥᨶᩣ ᩈᩩᨴ᩠ᨵᩮᩣ ᩅᩥᩈᨴᩮᩣ. ᩋᨿᨾᩮᨲ᩠ᨳ ᨵᨾ᩠ᨾᨲᩣ.

᪓᪐. ‘‘ᨵᨾ᩠ᨾᨲᩣ ᩑᩈᩣ, ᨽᩥᨠ᩠ᨡᩅᩮ, ᨿᨴᩣ ᨻᩮᩣᨵᩥᩈᨲ᩠ᨲᩮᩣ ᨾᩣᨲᩩᨠᩩᨧ᩠ᨨᩥᨾ᩠ᩉᩣ ᨶᩥᨠ᩠ᨡᨾᨲᩥ, ᨴ᩠ᩅᩮ ᩏᨴᨠᩔ ᨵᩣᩁᩣ ᩋᨶ᩠ᨲᩃᩥᨠ᩠ᨡᩣ ᨸᩣᨲᩩᨽᩅᨶ᩠ᨲᩥ – ᩑᨠᩣ ᩈᩦᨲᩔ ᩑᨠᩣ ᩏᨱ᩠ᩉᩔ ᨿᩮᨶ ᨻᩮᩣᨵᩥᩈᨲ᩠ᨲᩔ ᩏᨴᨠᨠᩥᨧ᩠ᨧᩴ ᨠᩁᩮᩣᨶ᩠ᨲᩥ ᨾᩣᨲᩩ ᨧ. ᩋᨿᨾᩮᨲ᩠ᨳ ᨵᨾ᩠ᨾᨲᩣ.

᪓᪑. ‘‘ᨵᨾ᩠ᨾᨲᩣ ᩑᩈᩣ, ᨽᩥᨠ᩠ᨡᩅᩮ, ᩈᨾ᩠ᨸᨲᩥᨩᩣᨲᩮᩣ ᨻᩮᩣᨵᩥᩈᨲ᩠ᨲᩮᩣ ᩈᨾᩮᩉᩥ ᨸᩣᨴᩮᩉᩥ ᨸᨲᩥᨭ᩠ᨮᩉᩥᨲ᩠ᩅᩣ ᩏᨲ᩠ᨲᩁᩣᨽᩥᨾᩩᨡᩮᩣ [ᩏᨲ᩠ᨲᩁᩮᨶᩣᨽᩥᨾᩩᨡᩮᩣ (ᩈ᩠ᨿᩣ.) ᩏᨲ᩠ᨲᩁᩮᨶᨾᩩᨡᩮᩣ (ᨠ.)] ᩈᨲ᩠ᨲᨸᨴᩅᩦᨲᩥᩉᩣᩁᩮᨶ ᨣᨧ᩠ᨨᨲᩥ ᩈᩮᨲᨾ᩠ᩉᩥ ᨨᨲ᩠ᨲᩮ ᩋᨶᩩᨵᩣᩁᩥᨿᨾᩣᨶᩮ, ᩈᨻ᩠ᨻᩣ ᨧ ᨴᩥᩈᩣ ᩋᨶᩩᩅᩥᩃᩮᩣᨠᩮᨲᩥ, ᩌᩈᨽᩥᩴ ᩅᩣᨧᩴ ᨽᩣᩈᨲᩥ ‘ᩋᨣ᩠ᨣᩮᩣᩉᨾᩈ᩠ᨾᩥ ᩃᩮᩣᨠᩔ, ᨩᩮᨭ᩠ᨮᩮᩣᩉᨾᩈ᩠ᨾᩥ ᩃᩮᩣᨠᩔ, ᩈᩮᨭ᩠ᨮᩮᩣᩉᨾᩈ᩠ᨾᩥ ᩃᩮᩣᨠᩔ, ᩋᨿᨾᨶ᩠ᨲᩥᨾᩣ ᨩᩣᨲᩥ, ᨶᨲ᩠ᨳᩥᨴᩣᨶᩥ ᨸᩩᨶᨻ᩠ᨽᩅᩮᩣ’ᨲᩥ. ᩋᨿᨾᩮᨲ᩠ᨳ ᨵᨾ᩠ᨾᨲᩣ.

᪓᪒. ‘‘ᨵᨾ᩠ᨾᨲᩣ ᩑᩈᩣ, ᨽᩥᨠ᩠ᨡᩅᩮ, ᨿᨴᩣ ᨻᩮᩣᨵᩥᩈᨲ᩠ᨲᩮᩣ ᨾᩣᨲᩩᨠᩩᨧ᩠ᨨᩥᨾ᩠ᩉᩣ ᨶᩥᨠ᩠ᨡᨾᨲᩥ, ᩋᨳ ᩈᨴᩮᩅᨠᩮ ᩃᩮᩣᨠᩮ ᩈᨾᩣᩁᨠᩮ ᩈᨻᩕᩉ᩠ᨾᨠᩮ ᩈᩔᨾᨱᨻᩕᩣᩉ᩠ᨾᨱᩥᨿᩣ ᨸᨩᩣᨿ ᩈᨴᩮᩅᨾᨶᩩᩔᩣᨿ ᩋᨸ᩠ᨸᨾᩣᨱᩮᩣ ᩏᩊᩣᩁᩮᩣ ᩒᨽᩣᩈᩮᩣ ᨸᩣᨲᩩᨽᩅᨲᩥ, ᩋᨲᩥᨠ᩠ᨠᨾ᩠ᨾᩮᩅ ᨴᩮᩅᩣᨶᩴ ᨴᩮᩅᩣᨶᩩᨽᩣᩅᩴ. ᨿᩣᨸᩥ ᨲᩣ ᩃᩮᩣᨠᨶ᩠ᨲᩁᩥᨠᩣ ᩋᨥᩣ ᩋᩈᩴᩅᩩᨲᩣ ᩋᨶ᩠ᨵᨠᩣᩁᩣ ᩋᨶ᩠ᨵᨠᩣᩁᨲᩥᨾᩥᩈᩣ, ᨿᨲ᩠ᨳ ᨸᩥᨾᩮ ᨧᨶ᩠ᨴᩥᨾᩈᩪᩁᩥᨿᩣ ᩑᩅᩴᨾᩉᩥᨴ᩠ᨵᩥᨠᩣ ᩑᩅᩴᨾᩉᩣᨶᩩᨽᩣᩅᩣ ᩌᨽᩣᨿ ᨶᩣᨶᩩᨽᩮᩣᨶ᩠ᨲᩥ, ᨲᨲ᩠ᨳᨸᩥ ᩋᨸ᩠ᨸᨾᩣᨱᩮᩣ ᩏᩊᩣᩁᩮᩣ ᩒᨽᩣᩈᩮᩣ ᨸᩣᨲᩩᨽᩅᨲᩥ ᩋᨲᩥᨠ᩠ᨠᨾ᩠ᨾᩮᩅ ᨴᩮᩅᩣᨶᩴ ᨴᩮᩅᩣᨶᩩᨽᩣᩅᩴ. ᨿᩮᨸᩥ ᨲᨲ᩠ᨳ ᩈᨲ᩠ᨲᩣ ᩏᨸᨸᨶ᩠ᨶᩣ, ᨲᩮᨸᩥ ᨲᩮᨶᩮᩣᨽᩣᩈᩮᨶ ᩋᨬ᩠ᨬᨾᨬ᩠ᨬᩴ ᩈᨬ᩠ᨩᩣᨶᨶ᩠ᨲᩥ – ‘ᩋᨬ᩠ᨬᩮᨸᩥ ᨠᩥᩁ, ᨽᩮᩣ, ᩈᨶ᩠ᨲᩥ ᩈᨲ᩠ᨲᩣ ᩍᨵᩪᨸᨸᨶ᩠ᨶᩣ’ᨲᩥ. ᩋᨿᨬ᩠ᨧ ᨴᩈᩈᩉᩔᩦ ᩃᩮᩣᨠᨵᩣᨲᩩ ᩈᨦ᩠ᨠᨾ᩠ᨸᨲᩥ ᩈᨾ᩠ᨸᨠᨾ᩠ᨸᨲᩥ ᩈᨾ᩠ᨸᩅᩮᨵᨲᩥ ᩋᨸ᩠ᨸᨾᩣᨱᩮᩣ ᨧ ᩏᩊᩣᩁᩮᩣ ᩒᨽᩣᩈᩮᩣ ᩃᩮᩣᨠᩮ ᨸᩣᨲᩩᨽᩅᨲᩥ ᩋᨲᩥᨠ᩠ᨠᨾ᩠ᨾᩮᩅ ᨴᩮᩅᩣᨶᩴ ᨴᩮᩅᩣᨶᩩᨽᩣᩅᩴ. ᩋᨿᨾᩮᨲ᩠ᨳ ᨵᨾ᩠ᨾᨲᩣ.

ᨴ᩠ᩅᨲ᩠ᨲᩥᩴᩈᨾᩉᩣᨸᩩᩁᩥᩈᩃᨠ᩠ᨡᨱᩣ

᪓᪓. ‘‘ᨩᩣᨲᩮ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩅᩥᨸᩔᩥᨾ᩠ᩉᩥ ᨠᩩᨾᩣᩁᩮ ᨻᨶ᩠ᨵᩩᨾᨲᩮᩣ ᩁᨬ᩠ᨬᩮᩣ ᨸᨭᩥᩅᩮᨴᩮᩈᩩᩴ – ‘ᨸᩩᨲ᩠ᨲᩮᩣ ᨲᩮ, ᨴᩮᩅ [ᨴᩮᩅ ᨲᩮ (ᨠ.)], ᨩᩣᨲᩮᩣ, ᨲᩴ ᨴᩮᩅᩮᩣ ᨸᩔᨲᩪ’ᨲᩥ. ᩋᨴ᩠ᨴᩈᩣ ᨡᩮᩣ, ᨽᩥᨠ᩠ᨡᩅᩮ, ᨻᨶ᩠ᨵᩩᨾᩣ ᩁᩣᨩᩣ ᩅᩥᨸᩔᩥᩴ ᨠᩩᨾᩣᩁᩴ, ᨴᩥᩈ᩠ᩅᩣ ᨶᩮᨾᩥᨲ᩠ᨲᩮ ᨻᩕᩣᩉ᩠ᨾᨱᩮ ᩌᨾᨶ᩠ᨲᩣᨸᩮᨲ᩠ᩅᩣ ᩑᨲᨴᩅᩮᩣᨧ – ‘ᨸᩔᨶ᩠ᨲᩩ ᨽᩮᩣᨶ᩠ᨲᩮᩣ ᨶᩮᨾᩥᨲ᩠ᨲᩣ ᨻᩕᩣᩉ᩠ᨾᨱᩣ ᨠᩩᨾᩣᩁ’ᨶ᩠ᨲᩥ. ᩋᨴ᩠ᨴᩈᩴᩈᩩ ᨡᩮᩣ, ᨽᩥᨠ᩠ᨡᩅᩮ, ᨶᩮᨾᩥᨲ᩠ᨲᩣ ᨻᩕᩣᩉ᩠ᨾᨱᩣ ᩅᩥᨸᩔᩥᩴ ᨠᩩᨾᩣᩁᩴ, ᨴᩥᩈ᩠ᩅᩣ ᨻᨶ᩠ᨵᩩᨾᨶ᩠ᨲᩴ ᩁᩣᨩᩣᨶᩴ ᩑᨲᨴᩅᩮᩣᨧᩩᩴ – ‘ᩋᨲ᩠ᨲᨾᨶᩮᩣ, ᨴᩮᩅ, ᩉᩮᩣᩉᩥ, ᨾᩉᩮᩈᨠ᩠ᨡᩮᩣ ᨲᩮ ᨸᩩᨲ᩠ᨲᩮᩣ ᩏᨸ᩠ᨸᨶ᩠ᨶᩮᩣ, ᩃᩣᨽᩣ ᨲᩮ, ᨾᩉᩣᩁᩣᨩ, ᩈᩩᩃᨴ᩠ᨵᩴ ᨲᩮ, ᨾᩉᩣᩁᩣᨩ, ᨿᩔ ᨲᩮ ᨠᩩᩃᩮ ᩑᩅᩁᩪᨸᩮᩣ ᨸᩩᨲ᩠ᨲᩮᩣ ᩏᨸ᩠ᨸᨶ᩠ᨶᩮᩣ. ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᨴ᩠ᩅᨲ᩠ᨲᩥᩴᩈᨾᩉᩣᨸᩩᩁᩥᩈᩃᨠ᩠ᨡᨱᩮᩉᩥ ᩈᨾᨶ᩠ᨶᩣᨣᨲᩮᩣ, ᨿᩮᩉᩥ ᩈᨾᨶ᩠ᨶᩣᨣᨲᩔ ᨾᩉᩣᨸᩩᩁᩥᩈᩔ ᨴ᩠ᩅᩮᩅ ᨣᨲᩥᨿᩮᩣ ᨽᩅᨶ᩠ᨲᩥ ᩋᨶᨬ᩠ᨬᩣ. ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ ᨵᨾ᩠ᨾᩥᨠᩮᩣ ᨵᨾ᩠ᨾᩁᩣᨩᩣ ᨧᩣᨲᩩᩁᨶ᩠ᨲᩮᩣ ᩅᩥᨩᩥᨲᩣᩅᩦ ᨩᨶᨸᨴᨲ᩠ᨳᩣᩅᩁᩥᨿᨸ᩠ᨸᨲ᩠ᨲᩮᩣ ᩈᨲ᩠ᨲᩁᨲᨶᩈᨾᨶ᩠ᨶᩣᨣᨲᩮᩣ. ᨲᩔᩥᨾᩣᨶᩥ ᩈᨲ᩠ᨲᩁᨲᨶᩣᨶᩥ ᨽᩅᨶ᩠ᨲᩥ. ᩈᩮᨿ᩠ᨿᨳᩥᨴᩴ – ᨧᨠ᩠ᨠᩁᨲᨶᩴ ᩉᨲ᩠ᨳᩥᩁᨲᨶᩴ ᩋᩔᩁᨲᨶᩴ ᨾᨱᩥᩁᨲᨶᩴ ᩍᨲ᩠ᨳᩥᩁᨲᨶᩴ ᨣᩉᨸᨲᩥᩁᨲᨶᩴ ᨸᩁᩥᨱᩣᨿᨠᩁᨲᨶᨾᩮᩅ ᩈᨲ᩠ᨲᨾᩴ. ᨸᩁᩮᩣᩈᩉᩔᩴ ᨡᩮᩣ ᨸᨶᩔ ᨸᩩᨲ᩠ᨲᩣ ᨽᩅᨶ᩠ᨲᩥ ᩈᩪᩁᩣ ᩅᩦᩁᨦ᩠ᨣᩁᩪᨸᩣ ᨸᩁᩈᩮᨶᨸ᩠ᨸᨾᨴ᩠ᨴᨶᩣ. ᩈᩮᩣ ᩍᨾᩴ ᨸᨳᩅᩥᩴ ᩈᩣᨣᩁᨸᩁᩥᨿᨶ᩠ᨲᩴ ᩋᨴᨱ᩠ᨯᩮᨶ ᩋᩈᨲ᩠ᨳᩮᨶ ᨵᨾ᩠ᨾᩮᨶ ᩋᨽᩥᩅᩥᨩᩥᨿ ᩋᨩ᩠ᨫᩣᩅᩈᨲᩥ. ᩈᨧᩮ ᨡᩮᩣ ᨸᨶ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨲᩥ, ᩋᩁᩉᩴ ᩉᩮᩣᨲᩥ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩅᩥᩅᨭᨧ᩠ᨨᨴᩮᩣ.

᪓᪔. ‘ᨠᨲᨾᩮᩉᩥ ᨧᩣᨿᩴ, ᨴᩮᩅ, ᨠᩩᨾᩣᩁᩮᩣ ᨴ᩠ᩅᨲ᩠ᨲᩥᩴᩈᨾᩉᩣᨸᩩᩁᩥᩈᩃᨠ᩠ᨡᨱᩮᩉᩥ ᩈᨾᨶ᩠ᨶᩣᨣᨲᩮᩣ, ᨿᩮᩉᩥ ᩈᨾᨶ᩠ᨶᩣᨣᨲᩔ ᨾᩉᩣᨸᩩᩁᩥᩈᩔ ᨴ᩠ᩅᩮᩅ ᨣᨲᩥᨿᩮᩣ ᨽᩅᨶ᩠ᨲᩥ ᩋᨶᨬ᩠ᨬᩣ. ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ ᨵᨾ᩠ᨾᩥᨠᩮᩣ ᨵᨾ᩠ᨾᩁᩣᨩᩣ ᨧᩣᨲᩩᩁᨶ᩠ᨲᩮᩣ ᩅᩥᨩᩥᨲᩣᨸᩦ ᨩᨶᨸᨴᨲ᩠ᨳᩣᩅᩁᩥᨿᨸ᩠ᨸᨲ᩠ᨲᩮᩣ ᩈᨲ᩠ᨲᩁᨲᨶᩈᨾᨶ᩠ᨶᩣᨣᨲᩮᩣ. ᨲᩔᩥᨾᩣᨶᩥ ᩈᨲ᩠ᨲᩁᨲᨶᩣᨶᩥ ᨽᩅᨶ᩠ᨲᩥ. ᩈᩮᨿ᩠ᨿᨳᩥᨴᩴ – ᨧᨠ᩠ᨠᩁᨲᨶᩴ ᩉᨲ᩠ᨳᩥᩁᨲᨶᩴ ᩋᩔᩁᨲᨶᩴ ᨾᨱᩥᩁᨲᨶᩴ ᩍᨲ᩠ᨳᩥᩁᨲᨶᩴ ᨣᩉᨸᨲᩥᩁᨲᨶᩴ ᨸᩁᩥᨱᩣᨿᨠᩁᨲᨶᨾᩮᩅ ᩈᨲ᩠ᨲᨾᩴ. ᨸᩁᩮᩣᩈᩉᩔᩴ ᨡᩮᩣ ᨸᨶᩔ ᨸᩩᨲ᩠ᨲᩣ ᨽᩅᨶ᩠ᨲᩥ ᩈᩪᩁᩣ ᩅᩦᩁᨦ᩠ᨣᩁᩪᨸᩣ ᨸᩁᩈᩮᨶᨸ᩠ᨸᨾᨴ᩠ᨴᨶᩣ. ᩈᩮᩣ ᩍᨾᩴ ᨸᨳᩅᩥᩴ ᩈᩣᨣᩁᨸᩁᩥᨿᨶ᩠ᨲᩴ ᩋᨴᨱ᩠ᨯᩮᨶ ᩋᩈᨲ᩠ᨳᩮᨶ ᨵᨾ᩠ᨾᩮᨶ ᩋᨽᩥᩅᩥᨩᩥᨿ ᩋᨩ᩠ᨫᩣᩅᩈᨲᩥ. ᩈᨧᩮ ᨡᩮᩣ ᨸᨶ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨲᩥ, ᩋᩁᩉᩴ ᩉᩮᩣᨲᩥ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩅᩥᩅᨭᨧ᩠ᨨᨴᩮᩣ.

᪓᪕. ‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩈᩩᨸ᩠ᨸᨲᩥᨭ᩠ᨮᩥᨲᨸᩣᨴᩮᩣ. ᨿᩴ ᨸᩣᨿᩴ, ᨴᩮᩅ, ᨠᩩᨾᩣᩁᩮᩣ ᩈᩩᨸ᩠ᨸᨲᩥᨭ᩠ᨮᩥᨲᨸᩣᨴᩮᩣ. ᩍᨴᨾ᩠ᨸᩥᩔ ᨾᩉᩣᨸᩩᩁᩥᩈᩔ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨽᩅᨲᩥ.

‘ᩍᨾᩔ, ᨴᩮᩅ [ᩍᨾᩔ ᩉᩥ ᨴᩮᩅ (?)], ᨠᩩᨾᩣᩁᩔ ᩉᩮᨭ᩠ᨮᩣ ᨸᩣᨴᨲᩃᩮᩈᩩ ᨧᨠ᩠ᨠᩣᨶᩥ ᨩᩣᨲᩣᨶᩥ ᩈᩉᩔᩣᩁᩣᨶᩥ ᩈᨶᩮᨾᩥᨠᩣᨶᩥ ᩈᨶᩣᨽᩥᨠᩣᨶᩥ ᩈᨻ᩠ᨻᩣᨠᩣᩁᨸᩁᩥᨸᩪᩁᩣᨶᩥ. ᨿᨾ᩠ᨸᩥ, ᩍᨾᩔ ᨴᩮᩅ, ᨠᩩᨾᩣᩁᩔ ᩉᩮᨭ᩠ᨮᩣ ᨸᩣᨴᨲᩃᩮᩈᩩ ᨧᨠ᩠ᨠᩣᨶᩥ ᨩᩣᨲᩣᨶᩥ ᩈᩉᩔᩣᩁᩣᨶᩥ ᩈᨶᩮᨾᩥᨠᩣᨶᩥ ᩈᨶᩣᨽᩥᨠᩣᨶᩥ ᩈᨻ᩠ᨻᩣᨠᩣᩁᨸᩁᩥᨸᩪᩁᩣᨶᩥ, ᩍᨴᨾ᩠ᨸᩥᩔ ᨾᩉᩣᨸᩩᩁᩥᩈᩔ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨽᩅᨲᩥ.

‘ᩋᨿᨬ᩠ᩉᩥ ᨴᩮᩅ, ᨠᩩᨾᩣᩁᩮᩣ ᩌᨿᨲᨸᨱ᩠ᩉᩦ…ᨸᩮ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᨴᩦᨥᨦ᩠ᨣᩩᩃᩦ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᨾᩩᨴᩩᨲᩃᩩᨶᩉᨲ᩠ᨳᨸᩣᨴᩮᩣ…

‘ᩋᨿᨬ᩠ᩉᩥ, ᨴᩮᩅ ᨠᩩᨾᩣᩁᩮᩣ ᨩᩣᩃᩉᨲ᩠ᨳᨸᩣᨴᩮᩣ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩏᩔᨦ᩠ᨡᨸᩣᨴᩮᩣ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩑᨱᩥᨩᨦ᩠ᨥᩮᩣ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᨮᩥᨲᨠᩮᩣᩅ ᩋᨶᩮᩣᨶᨾᨶ᩠ᨲᩮᩣ ᩏᨽᩮᩣᩉᩥ ᨸᩣᨱᩥᨲᩃᩮᩉᩥ ᨩᨱ᩠ᨱᩩᨠᩣᨶᩥ ᨸᩁᩥᨾᩈᨲᩥ [ᨸᩁᩣᨾᩈᨲᩥ (ᨠ.)] ᨸᩁᩥᨾᨩ᩠ᨩᨲᩥ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᨠᩮᩣᩈᩮᩣᩉᩥᨲᩅᨲ᩠ᨳᨣᩩᨿ᩠ᩉᩮᩣ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩈᩩᩅᨱ᩠ᨱᩅᨱ᩠ᨱᩮᩣ ᨠᨬ᩠ᨧᨶᩈᨶ᩠ᨶᩥᨽᨲ᩠ᨲᨧᩮᩣ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩈᩩᨡᩩᨾᨧ᩠ᨨᩅᩦ; ᩈᩩᨡᩩᨾᨲ᩠ᨲᩣ ᨨᩅᩥᨿᩣ ᩁᨩᩮᩣᨩᩃ᩠ᩃᩴ ᨠᩣᨿᩮ ᨶ ᩏᨸᩃᩥᨾ᩠ᨸᨲᩥ [ᩏᨸᩃᩥᨸ᩠ᨸᨲᩥ (ᩈ᩠ᨿᩣ.)] …

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩑᨠᩮᨠᩃᩮᩣᨾᩮᩣ; ᩑᨠᩮᨠᩣᨶᩥ ᩃᩮᩣᨾᩣᨶᩥ ᩃᩮᩣᨾᨠᩪᨸᩮᩈᩩ ᨩᩣᨲᩣᨶᩥ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩏᨴ᩠ᨵᨣ᩠ᨣᩃᩮᩣᨾᩮᩣ; ᩏᨴ᩠ᨵᨣ᩠ᨣᩣᨶᩥ ᩃᩮᩣᨾᩣᨶᩥ ᨩᩣᨲᩣᨶᩥ ᨶᩦᩃᩣᨶᩥ ᩋᨬ᩠ᨩᨶᩅᨱ᩠ᨱᩣᨶᩥ ᨠᩩᨱ᩠ᨯᩃᩣᩅᨭ᩠ᨭᩣᨶᩥ ᨴᨠ᩠ᨡᩥᨱᩣᩅᨭ᩠ᨭᨠᨩᩣᨲᩣᨶᩥ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᨻᩕᩉ᩠ᨾᩩᨩᩩᨣᨲ᩠ᨲᩮᩣ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩈᨲ᩠ᨲᩩᩔᨴᩮᩣ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩈᩦᩉᨸᩩᨻ᩠ᨻᨴ᩠ᨵᨠᩣᨿᩮᩣ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᨧᩥᨲᨶ᩠ᨲᩁᩴᩈᩮᩣ [ᨸᩥᨲᨶ᩠ᨲᩁᩴᩈᩮᩣ (ᩈ᩠ᨿᩣ.)] …

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᨶᩥᨣᩕᩮᩣᨵᨸᩁᩥᨾᨱ᩠ᨯᩃᩮᩣ ᨿᩣᩅᨲᨠ᩠ᩅᩔ ᨠᩣᨿᩮᩣ ᨲᩣᩅᨲᨠ᩠ᩅᩔ ᨻ᩠ᨿᩣᨾᩮᩣ, ᨿᩣᩅᨲᨠ᩠ᩅᩔ ᨻ᩠ᨿᩣᨾᩮᩣ, ᨲᩣᩅᨲᨠ᩠ᩅᩔ ᨠᩣᨿᩮᩣ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩈᨾᩅᨭ᩠ᨭᨠ᩠ᨡᨶ᩠ᨵᩮᩣ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩁᩈᨣ᩠ᨣᩈᨣ᩠ᨣᩦ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩈᩦᩉᩉᨶᩩ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᨧᨲ᩠ᨲᩣᩃᩦᩈᨴᨶ᩠ᨲᩮᩣ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩈᨾᨴᨶ᩠ᨲᩮᩣ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩋᩅᩥᩁᩊᨴᨶ᩠ᨲᩮᩣ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩈᩩᩈᩩᨠ᩠ᨠᨴᩣᨮᩮᩣ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᨸᩉᩪᨲᨩᩥᩅ᩠ᩉᩮᩣ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᨻᩕᩉ᩠ᨾᩔᩁᩮᩣ ᨠᩁᩅᩦᨠᨽᩣᨱᩦ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩋᨽᩥᨶᩦᩃᨶᩮᨲ᩠ᨲᩮᩣ…

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᨣᩮᩣᨸᨡᩩᨾᩮᩣ…

ᩍᨾᩔ, ᨴᩮᩅ, ᨠᩩᨾᩣᩁᩔ ᩏᨱ᩠ᨱᩣ ᨽᨾᩩᨠᨶ᩠ᨲᩁᩮ ᨩᩣᨲᩣ ᩒᨴᩣᨲᩣ ᨾᩩᨴᩩᨲᩪᩃᩈᨶ᩠ᨶᩥᨽᩣ. ᨿᨾ᩠ᨸᩥ ᩍᨾᩔ ᨴᩮᩅ ᨠᩩᨾᩣᩁᩔ ᩏᨱ᩠ᨱᩣ ᨽᨾᩩᨠᨶ᩠ᨲᩁᩮ ᨩᩣᨲᩣ ᩒᨴᩣᨲᩣ ᨾᩩᨴᩩᨲᩪᩃᩈᨶ᩠ᨶᩥᨽᩣ, ᩍᨴᨾ᩠ᨸᩥᨾᩔ ᨾᩉᩣᨸᩩᩁᩥᩈᩔ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨽᩅᨲᩥ.

‘ᩋᨿᨬ᩠ᩉᩥ, ᨴᩮᩅ, ᨠᩩᨾᩣᩁᩮᩣ ᩏᨱ᩠ᩉᩦᩈᩈᩦᩈᩮᩣ. ᨿᩴ ᨸᩣᨿᩴ, ᨴᩮᩅ, ᨠᩩᨾᩣᩁᩮᩣ ᩏᨱ᩠ᩉᩦᩈᩈᩦᩈᩮᩣ, ᩍᨴᨾ᩠ᨸᩥᩔ ᨾᩉᩣᨸᩩᩁᩥᩈᩔ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨽᩅᨲᩥ.

᪓᪖. ‘ᩍᨾᩮᩉᩥ ᨡᩮᩣ ᩋᨿᩴ, ᨴᩮᩅ, ᨠᩩᨾᩣᩁᩮᩣ ᨴ᩠ᩅᨲ᩠ᨲᩥᩴᩈᨾᩉᩣᨸᩩᩁᩥᩈᩃᨠ᩠ᨡᨱᩮᩉᩥ ᩈᨾᨶ᩠ᨶᩣᨣᨲᩮᩣ, ᨿᩮᩉᩥ ᩈᨾᨶ᩠ᨶᩣᨣᨲᩔ ᨾᩉᩣᨸᩩᩁᩥᩈᩔ ᨴ᩠ᩅᩮᩅ ᨣᨲᩥᨿᩮᩣ ᨽᩅᨶ᩠ᨲᩥ ᩋᨶᨬ᩠ᨬᩣ. ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ ᨵᨾ᩠ᨾᩥᨠᩮᩣ ᨵᨾ᩠ᨾᩁᩣᨩᩣ ᨧᩣᨲᩩᩁᨶ᩠ᨲᩮᩣ ᩅᩥᨩᩥᨲᩣᩅᩦ ᨩᨶᨸᨴᨲ᩠ᨳᩣᩅᩁᩥᨿᨸ᩠ᨸᨲ᩠ᨲᩮᩣ ᩈᨲ᩠ᨲᩁᨲᨶᩈᨾᨶ᩠ᨶᩣᨣᨲᩮᩣ. ᨲᩔᩥᨾᩣᨶᩥ ᩈᨲ᩠ᨲᩁᨲᨶᩣᨶᩥ ᨽᩅᨶ᩠ᨲᩥ. ᩈᩮᨿ᩠ᨿᨳᩥᨴᩴ – ᨧᨠ᩠ᨠᩁᨲᨶᩴ ᩉᨲ᩠ᨳᩥᩁᨲᨶᩴ ᩋᩔᩁᨲᨶᩴ ᨾᨱᩥᩁᨲᨶᩴ ᩍᨲ᩠ᨳᩥᩁᨲᨶᩴ ᨣᩉᨸᨲᩥᩁᨲᨶᩴ ᨸᩁᩥᨱᩣᨿᨠᩁᨲᨶᨾᩮᩅ ᩈᨲ᩠ᨲᨾᩴ. ᨸᩁᩮᩣᩈᩉᩔᩴ ᨡᩮᩣ ᨸᨶᩔ ᨸᩩᨲ᩠ᨲᩣ ᨽᩅᨶ᩠ᨲᩥ ᩈᩪᩁᩣ ᩅᩦᩁᨦ᩠ᨣᩁᩪᨸᩣ ᨸᩁᩈᩮᨶᨸ᩠ᨸᨾᨴ᩠ᨴᨶᩣ. ᩈᩮᩣ ᩍᨾᩴ ᨸᨳᩅᩥᩴ ᩈᩣᨣᩁᨸᩁᩥᨿᨶ᩠ᨲᩴ ᩋᨴᨱ᩠ᨯᩮᨶ ᩋᩈᨲ᩠ᨳᩮᨶ ᨵᨾ᩠ᨾᩮᨶ [ᨵᨾ᩠ᨾᩮᨶ ᩈᨾᩮᨶ (ᩈ᩠ᨿᩣ.)] ᩋᨽᩥᩅᩥᨩᩥᨿ ᩋᨩ᩠ᨫᩣᩅᩈᨲᩥ. ᩈᨧᩮ ᨡᩮᩣ ᨸᨶ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨲᩥ, ᩋᩁᩉᩴ ᩉᩮᩣᨲᩥ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩅᩥᩅᨭᨧ᩠ᨨᨴᩮᩣ’ᨲᩥ.

ᩅᩥᨸᩔᩦᩈᨾᨬ᩠ᨬᩣ

᪓᪗. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᨻᨶ᩠ᨵᩩᨾᩣ ᩁᩣᨩᩣ ᨶᩮᨾᩥᨲ᩠ᨲᩮ ᨻᩕᩣᩉ᩠ᨾᨱᩮ ᩋᩉᨲᩮᩉᩥ ᩅᨲ᩠ᨳᩮᩉᩥ ᩋᨧ᩠ᨨᩣᨴᩣᨸᩮᨲ᩠ᩅᩣ [ᩋᨧ᩠ᨨᩣᨴᩮᨲ᩠ᩅᩣ (ᩈ᩠ᨿᩣ.)] ᩈᨻ᩠ᨻᨠᩣᨾᩮᩉᩥ ᩈᨶ᩠ᨲᨸ᩠ᨸᩮᩈᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᨻᨶ᩠ᨵᩩᨾᩣ ᩁᩣᨩᩣ ᩅᩥᨸᩔᩥᩔ ᨠᩩᨾᩣᩁᩔ ᨵᩣᨲᩥᨿᩮᩣ ᩏᨸᨭ᩠ᨮᩣᨸᩮᩈᩥ. ᩋᨬ᩠ᨬᩣ ᨡᩦᩁᩴ ᨸᩣᨿᩮᨶ᩠ᨲᩥ, ᩋᨬ᩠ᨬᩣ ᨶ᩠ᩉᩣᨸᩮᨶ᩠ᨲᩥ, ᩋᨬ᩠ᨬᩣ ᨵᩣᩁᩮᨶ᩠ᨲᩥ, ᩋᨬ᩠ᨬᩣ ᩋᨦ᩠ᨠᩮᨶ ᨸᩁᩥᩉᩁᨶ᩠ᨲᩥ. ᨩᩣᨲᩔ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨠᩩᨾᩣᩁᩔ ᩈᩮᨲᨧ᩠ᨨᨲ᩠ᨲᩴ ᨵᩣᩁᨿᩥᨲ᩠ᨳ ᨴᩥᩅᩣ ᨧᩮᩅ ᩁᨲ᩠ᨲᩥᨬ᩠ᨧ – ‘ᨾᩣ ᨶᩴ ᩈᩦᨲᩴ ᩅᩣ ᩏᨱ᩠ᩉᩴ ᩅᩣ ᨲᩥᨱᩴ ᩅᩣ ᩁᨩᩮᩣ ᩅᩣ ᩏᩔᩣᩅᩮᩣ ᩅᩣ ᨻᩣᨵᨿᩥᨲ᩠ᨳᩣ’ᨲᩥ. ᨩᩣᨲᩮᩣ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᨻᩉᩩᨶᩮᩣ ᨩᨶᩔ ᨸᩥᨿᩮᩣ ᩋᩉᩮᩣᩈᩥ ᨾᨶᩣᨸᩮᩣ. ᩈᩮᨿ᩠ᨿᨳᩣᨸᩥ, ᨽᩥᨠ᩠ᨡᩅᩮ, ᩏᨸ᩠ᨸᩃᩴ ᩅᩣ ᨸᨴᩩᨾᩴ ᩅᩣ ᨸᩩᨱ᩠ᨯᩁᩦᨠᩴ ᩅᩣ ᨻᩉᩩᨶᩮᩣ ᨩᨶᩔ ᨸᩥᨿᩴ ᨾᨶᩣᨸᩴ; ᩑᩅᨾᩮᩅ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᨻᩉᩩᨶᩮᩣ ᨩᨶᩔ ᨸᩥᨿᩮᩣ ᩋᩉᩮᩣᩈᩥ ᨾᨶᩣᨸᩮᩣ. ᩈ᩠ᩅᩣᩔᩩᨴᩴ ᩋᨦ᩠ᨠᩮᨶᩮᩅ ᩋᨦ᩠ᨠᩴ ᨸᩁᩥᩉᩁᩥᨿᨲᩥ.

᪓᪘. ‘‘ᨩᩣᨲᩮᩣ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᨾᨬ᩠ᨩᩩᩔᩁᩮᩣ ᨧ [ᨠᩩᨾᩣᩁᩮᩣ ᨻᩕᩉ᩠ᨾᩔᩁᩮᩣ ᨾᨬ᩠ᨩᩩᩔᩁᩮᩣ ᨧ (ᩈᩦ. ᨠ.)] ᩋᩉᩮᩣᩈᩥ ᩅᨣ᩠ᨣᩩᩔᩁᩮᩣ ᨧ ᨾᨵᩩᩁᩔᩁᩮᩣ ᨧ ᨸᩮᨾᨶᩥᨿᩔᩁᩮᩣ ᨧ. ᩈᩮᨿ᩠ᨿᨳᩣᨸᩥ, ᨽᩥᨠ᩠ᨡᩅᩮ, ᩉᩥᨾᩅᨶ᩠ᨲᩮ ᨸᨻ᩠ᨻᨲᩮ ᨠᩁᩅᩦᨠᩣ ᨶᩣᨾ ᩈᨠᩩᨱᨩᩣᨲᩥ ᨾᨬ᩠ᨩᩩᩔᩁᩣ ᨧ ᩅᨣ᩠ᨣᩩᩔᩁᩣ ᨧ ᨾᨵᩩᩁᩔᩁᩣ ᨧ ᨸᩮᨾᨶᩥᨿᩔᩁᩣ ᨧ; ᩑᩅᨾᩮᩅ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᨾᨬ᩠ᨩᩩᩔᩁᩮᩣ ᨧ ᩋᩉᩮᩣᩈᩥ ᩅᨣ᩠ᨣᩩᩔᩁᩮᩣ ᨧ ᨾᨵᩩᩁᩔᩁᩮᩣ ᨧ ᨸᩮᨾᨶᩥᨿᩔᩁᩮᩣ ᨧ.

᪓᪙. ‘‘ᨩᩣᨲᩔ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨠᩩᨾᩣᩁᩔ ᨠᨾ᩠ᨾᩅᩥᨸᩣᨠᨩᩴ ᨴᩥᨻ᩠ᨻᨧᨠ᩠ᨡᩩ ᨸᩣᨲᩩᩁᩉᩮᩣᩈᩥ ᨿᩮᨶ ᩈᩩᨴᩴ [ᨿᩮᨶ ᨴᩪᩁᩴ (ᩈ᩠ᨿᩣ.)] ᩈᨾᨶ᩠ᨲᩣ ᨿᩮᩣᨩᨶᩴ ᨸᩔᨲᩥ ᨴᩥᩅᩣ ᨧᩮᩅ ᩁᨲ᩠ᨲᩥᨬ᩠ᨧ.

᪔᪐. ‘‘ᨩᩣᨲᩮᩣ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᩋᨶᩥᨾᩥᩈᨶ᩠ᨲᩮᩣ ᨸᩮᨠ᩠ᨡᨲᩥ ᩈᩮᨿ᩠ᨿᨳᩣᨸᩥ ᨴᩮᩅᩣ ᨲᩣᩅᨲᩥᩴᩈᩣ. ‘ᩋᨶᩥᨾᩥᩈᨶ᩠ᨲᩮᩣ ᨠᩩᨾᩣᩁᩮᩣ ᨸᩮᨠ᩠ᨡᨲᩦ’ᨲᩥ ᨡᩮᩣ, ᨽᩥᨠ᩠ᨡᩅᩮ [ᩋᨶᩥᨾᩥᩈᨶ᩠ᨲᩮᩣ ᨸᩮᨠ᩠ᨡᨲᩥ, ᨩᩣᨲᩔ ᨡᩮᩣ ᨸᨶ ᨽᩥᨠ᩠ᨡᩅᩮ (ᨠ.)], ᩅᩥᨸᩔᩥᩔ ᨠᩩᨾᩣᩁᩔ ‘ᩅᩥᨸᩔᩦ ᩅᩥᨸᩔᩦ’ ᨲ᩠ᩅᩮᩅ ᩈᨾᨬ᩠ᨬᩣ ᩏᨴᨸᩣᨴᩥ.

᪔᪑. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᨻᨶ᩠ᨵᩩᨾᩣ ᩁᩣᨩᩣ ᩋᨲ᩠ᨳᨠᩁᨱᩮ [ᩋᨭ᩠ᨭ ᨠᩁᨱᩮ (ᩈ᩠ᨿᩣ.)] ᨶᩥᩈᩥᨶ᩠ᨶᩮᩣ ᩅᩥᨸᩔᩥᩴ ᨠᩩᨾᩣᩁᩴ ᩋᨦ᩠ᨠᩮ ᨶᩥᩈᩦᨴᩣᨸᩮᨲ᩠ᩅᩣ ᩋᨲ᩠ᨳᩮ ᩋᨶᩩᩈᩣᩈᨲᩥ. ᨲᨲᩕ ᩈᩩᨴᩴ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᨸᩥᨲᩩᩋᨦ᩠ᨠᩮ ᨶᩥᩈᩥᨶ᩠ᨶᩮᩣ ᩅᩥᨧᩮᨿ᩠ᨿ ᩅᩥᨧᩮᨿ᩠ᨿ ᩋᨲ᩠ᨳᩮ ᨸᨶᩣᨿᨲᩥ ᨬᩣᨿᩮᨶ [ᩋᨭ᩠ᨭᩮ ᨸᨶᩣᨿᨲᩥ ᨬᩣᨱᩮᨶ (ᩈ᩠ᨿᩣ.)]. ᩅᩥᨧᩮᨿ᩠ᨿ ᩅᩥᨧᩮᨿ᩠ᨿ ᨠᩩᨾᩣᩁᩮᩣ ᩋᨲ᩠ᨳᩮ ᨸᨶᩣᨿᨲᩥ ᨬᩣᨿᩮᨶᩣᨲᩥ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨠᩩᨾᩣᩁᩔ ᨽᩥᨿ᩠ᨿᩮᩣᩈᩮᩣᨾᨲ᩠ᨲᩣᨿ ‘ᩅᩥᨸᩔᩦ ᩅᩥᨸᩔᩦ’ ᨲ᩠ᩅᩮᩅ ᩈᨾᨬ᩠ᨬᩣ ᩏᨴᨸᩣᨴᩥ.

᪔᪒. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᨻᨶ᩠ᨵᩩᨾᩣ ᩁᩣᨩᩣ ᩅᩥᨸᩔᩥᩔ ᨠᩩᨾᩣᩁᩔ ᨲᨿᩮᩣ ᨸᩣᩈᩣᨴᩮ ᨠᩣᩁᩣᨸᩮᩈᩥ, ᩑᨠᩴ ᩅᩔᩥᨠᩴ ᩑᨠᩴ ᩉᩮᨾᨶ᩠ᨲᩥᨠᩴ ᩑᨠᩴ ᨣᩥᨾ᩠ᩉᩥᨠᩴ; ᨸᨬ᩠ᨧ ᨠᩣᨾᨣᩩᨱᩣᨶᩥ ᩏᨸᨭ᩠ᨮᩣᨸᩮᩈᩥ. ᨲᨲᩕ ᩈᩩᨴᩴ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᩅᩔᩥᨠᩮ ᨸᩣᩈᩣᨴᩮ ᨧᨲ᩠ᨲᩣᩁᩮᩣ ᨾᩣᩈᩮ [ᩅᩔᩥᨠᩮ ᨸᩣᩈᩣᨴᩮ ᩅᩔᩥᨠᩮ] ᨶᩥᨸ᩠ᨸᩩᩁᩥᩈᩮᩉᩥ ᨲᩪᩁᩥᨿᩮᩉᩥ ᨸᩁᩥᨧᩣᩁᨿᨾᩣᨶᩮᩣ ᨶ ᩉᩮᨭ᩠ᨮᩣᨸᩣᩈᩣᨴᩴ ᩒᩁᩮᩣᩉᨲᩦ’’ᨲᩥ.

ᨸᨮᨾᨽᩣᨱᩅᩣᩁᩮᩣ.

ᨩᩥᨱ᩠ᨱᨸᩩᩁᩥᩈᩮᩣ

᪔᪓. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᨻᩉᩪᨶᩴ ᩅᩔᩣᨶᩴ ᨻᩉᩪᨶᩴ ᩅᩔᩈᨲᩣᨶᩴ ᨻᩉᩪᨶᩴ ᩅᩔᩈᩉᩔᩣᨶᩴ ᩋᨧ᩠ᨧᨿᩮᨶ ᩈᩣᩁᨳᩥᩴ ᩌᨾᨶ᩠ᨲᩮᩈᩥ – ‘ᨿᩮᩣᨩᩮᩉᩥ, ᩈᨾ᩠ᨾ ᩈᩣᩁᨳᩥ, ᨽᨴ᩠ᨴᩣᨶᩥ ᨽᨴ᩠ᨴᩣᨶᩥ ᨿᩣᨶᩣᨶᩥ ᩏᨿ᩠ᨿᩣᨶᨽᩪᨾᩥᩴ ᨣᨧ᩠ᨨᩣᨾ ᩈᩩᨽᩪᨾᩥᨴᩔᨶᩣᨿᩣ’ᨲᩥ. ‘ᩑᩅᩴ, ᨴᩮᩅᩣ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᩈᩣᩁᨳᩥ ᩅᩥᨸᩔᩥᩔ ᨠᩩᨾᩣᩁᩔ ᨸᨭᩥᩔᩩᨲ᩠ᩅᩣ ᨽᨴ᩠ᨴᩣᨶᩥ ᨽᨴ᩠ᨴᩣᨶᩥ ᨿᩣᨶᩣᨶᩥ ᨿᩮᩣᨩᩮᨲ᩠ᩅᩣ ᩅᩥᨸᩔᩥᩔ ᨠᩩᨾᩣᩁᩔ ᨸᨭᩥᩅᩮᨴᩮᩈᩥ – ‘ᨿᩩᨲ᩠ᨲᩣᨶᩥ ᨡᩮᩣ ᨲᩮ, ᨴᩮᩅ, ᨽᨴ᩠ᨴᩣᨶᩥ ᨽᨴ᩠ᨴᩣᨶᩥ ᨿᩣᨶᩣᨶᩥ, ᨿᩔ ᨴᩣᨶᩥ ᨠᩣᩃᩴ ᨾᨬ᩠ᨬᩈᩦ’ᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᨽᨴ᩠ᨴᩴ ᨽᨴ᩠ᨴᩴ ᨿᩣᨶᩴ [ᨽᨴᩕᩴ ᨿᩣᨶᩴ (ᩈ᩠ᨿᩣ.), ᨽᨴ᩠ᨴᩴ ᨿᩣᨶᩴ (ᨸᩦ.) ᨧᨲ᩠ᨲᩣᩁᩮᩣ ᨾᩣᩈᩮ (ᩈᩦ. ᨸᩦ.)] ᩋᨽᩥᩁᩩᩉᩥᨲ᩠ᩅᩣ ᨽᨴ᩠ᨴᩮᩉᩥ ᨽᨴ᩠ᨴᩮᩉᩥ ᨿᩣᨶᩮᩉᩥ ᩏᨿ᩠ᨿᩣᨶᨽᩪᨾᩥᩴ ᨶᩥᨿ᩠ᨿᩣᩈᩥ.

᪔᪔. ‘‘ᩋᨴ᩠ᨴᩈᩣ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᩴ ᨶᩥᨿ᩠ᨿᨶ᩠ᨲᩮᩣ ᨸᩩᩁᩥᩈᩴ ᨩᩥᨱ᩠ᨱᩴ ᨣᩮᩣᨸᩣᨶᩈᩥᩅᨦ᩠ᨠᩴ ᨽᩮᩣᨣ᩠ᨣᩴ [ᨽᨣ᩠ᨣᩴ (ᩈ᩠ᨿᩣ.)] ᨴᨱ᩠ᨯᨸᩁᩣᨿᨶᩴ ᨸᩅᩮᨵᨾᩣᨶᩴ ᨣᨧ᩠ᨨᨶ᩠ᨲᩴ ᩌᨲᩩᩁᩴ ᨣᨲᨿᩮᩣᨻ᩠ᨻᨶᩴ. ᨴᩥᩈ᩠ᩅᩣ ᩈᩣᩁᨳᩥᩴ ᩌᨾᨶ᩠ᨲᩮᩈᩥ – ‘ᩋᨿᩴ ᨸᨶ, ᩈᨾ᩠ᨾ ᩈᩣᩁᨳᩥ, ᨸᩩᩁᩥᩈᩮᩣ ᨠᩥᩴᨠᨲᩮᩣ? ᨠᩮᩈᩣᨸᩥᩔ ᨶ ᨿᨳᩣ ᩋᨬ᩠ᨬᩮᩈᩴ, ᨠᩣᨿᩮᩣᨸᩥᩔ ᨶ ᨿᨳᩣ ᩋᨬ᩠ᨬᩮᩈ’ᨶ᩠ᨲᩥ. ‘ᩑᩈᩮᩣ ᨡᩮᩣ, ᨴᩮᩅ, ᨩᩥᨱ᩠ᨱᩮᩣ ᨶᩣᨾᩣ’ᨲᩥ. ‘ᨠᩥᩴ ᨸᨶᩮᩈᩮᩣ, ᩈᨾ᩠ᨾ ᩈᩣᩁᨳᩥ, ᨩᩥᨱ᩠ᨱᩮᩣ ᨶᩣᨾᩣ’ᨲᩥ? ‘ᩑᩈᩮᩣ ᨡᩮᩣ, ᨴᩮᩅ, ᨩᩥᨱ᩠ᨱᩮᩣ ᨶᩣᨾ. ᨶ ᨴᩣᨶᩥ ᨲᩮᨶ ᨧᩥᩁᩴ ᨩᩦᩅᩥᨲᨻ᩠ᨻᩴ ᨽᩅᩥᩔᨲᩦ’ᨲᩥ. ‘ᨠᩥᩴ ᨸᨶ, ᩈᨾ᩠ᨾ ᩈᩣᩁᨳᩥ, ᩋᩉᨾ᩠ᨸᩥ ᨩᩁᩣᨵᨾ᩠ᨾᩮᩣ, ᨩᩁᩴ ᩋᨶᨲᩦᨲᩮᩣ’ᨲᩥ? ‘ᨲ᩠ᩅᨬ᩠ᨧ, ᨴᩮᩅ, ᨾᨿᨬ᩠ᨧᨾ᩠ᩉ ᩈᨻ᩠ᨻᩮ ᨩᩁᩣᨵᨾ᩠ᨾᩣ, ᨩᩁᩴ ᩋᨶᨲᩦᨲᩣ’ᨲᩥ. ‘ᨲᩮᨶ ᩉᩥ, ᩈᨾ᩠ᨾ ᩈᩣᩁᨳᩥ, ᩋᩃᩴ ᨴᩣᨶᨩ᩠ᨩ ᩏᨿ᩠ᨿᩣᨶᨽᩪᨾᩥᨿᩣ. ᩍᨲᩮᩣᩅ ᩋᨶ᩠ᨲᩮᨸᩩᩁᩴ ᨸᨧ᩠ᨧᨶᩥᨿ᩠ᨿᩣᩉᩦ’ᨲᩥ. ‘ᩑᩅᩴ, ᨴᩮᩅᩣ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᩈᩣᩁᨳᩥ ᩅᩥᨸᩔᩥᩔ ᨠᩩᨾᩣᩁᩔ ᨸᨭᩥᩔᩩᨲ᩠ᩅᩣ ᨲᨲᩮᩣᩅ ᩋᨶ᩠ᨲᩮᨸᩩᩁᩴ ᨸᨧ᩠ᨧᨶᩥᨿ᩠ᨿᩣᩈᩥ. ᨲᨲᩕ ᩈᩩᨴᩴ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᩋᨶ᩠ᨲᩮᨸᩩᩁᩴ ᨣᨲᩮᩣ ᨴᩩᨠ᩠ᨡᩦ ᨴᩩᨾ᩠ᨾᨶᩮᩣ ᨸᨩ᩠ᨫᩣᨿᨲᩥ – ‘ᨵᩥᩁᨲ᩠ᨳᩩ ᨠᩥᩁ, ᨽᩮᩣ, ᨩᩣᨲᩥ ᨶᩣᨾ, ᨿᨲᩕ ᩉᩥ ᨶᩣᨾ ᨩᩣᨲᩔ ᨩᩁᩣ ᨸᨬ᩠ᨬᩣᨿᩥᩔᨲᩦ’ᨲᩥ!

᪔᪕. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᨻᨶ᩠ᨵᩩᨾᩣ ᩁᩣᨩᩣ ᩈᩣᩁᨳᩥᩴ ᩌᨾᨶ᩠ᨲᩣᨸᩮᨲ᩠ᩅᩣ ᩑᨲᨴᩅᩮᩣᨧ – ‘ᨠᨧ᩠ᨧᩥ, ᩈᨾ᩠ᨾ ᩈᩣᩁᨳᩥ, ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᨿᩣ ᩋᨽᩥᩁᨾᩥᨲ᩠ᨳ? ᨠᨧ᩠ᨧᩥ, ᩈᨾ᩠ᨾ ᩈᩣᩁᨳᩥ, ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᨿᩣ ᩋᨲ᩠ᨲᨾᨶᩮᩣ ᩋᩉᩮᩣᩈᩦ’ᨲᩥ? ‘ᨶ ᨡᩮᩣ, ᨴᩮᩅ, ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᨿᩣ ᩋᨽᩥᩁᨾᩥᨲ᩠ᨳ, ᨶ ᨡᩮᩣ, ᨴᩮᩅ, ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᨿᩣ ᩋᨲ᩠ᨲᨾᨶᩮᩣ ᩋᩉᩮᩣᩈᩦ’ᨲᩥ. ‘ᨠᩥᩴ ᨸᨶ, ᩈᨾ᩠ᨾ ᩈᩣᩁᨳᩥ, ᩋᨴ᩠ᨴᩈ ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᩴ ᨶᩥᨿ᩠ᨿᨶ᩠ᨲᩮᩣ’ᨲᩥ? ‘ᩋᨴ᩠ᨴᩈᩣ ᨡᩮᩣ, ᨴᩮᩅ, ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᩴ ᨶᩥᨿ᩠ᨿᨶ᩠ᨲᩮᩣ ᨸᩩᩁᩥᩈᩴ ᨩᩥᨱ᩠ᨱᩴ ᨣᩮᩣᨸᩣᨶᩈᩥᩅᨦ᩠ᨠᩴ ᨽᩮᩣᨣ᩠ᨣᩴ ᨴᨱ᩠ᨯᨸᩁᩣᨿᨶᩴ ᨸᩅᩮᨵᨾᩣᨶᩴ ᨣᨧ᩠ᨨᨶ᩠ᨲᩴ ᩌᨲᩩᩁᩴ ᨣᨲᨿᩮᩣᨻ᩠ᨻᨶᩴ. ᨴᩥᩈ᩠ᩅᩣ ᨾᩴ ᩑᨲᨴᩅᩮᩣᨧ – ‘‘ᩋᨿᩴ ᨸᨶ, ᩈᨾ᩠ᨾ ᩈᩣᩁᨳᩥ, ᨸᩩᩁᩥᩈᩮᩣ ᨠᩥᩴᨠᨲᩮᩣ, ᨠᩮᩈᩣᨸᩥᩔ ᨶ ᨿᨳᩣ ᩋᨬ᩠ᨬᩮᩈᩴ, ᨠᩣᨿᩮᩣᨸᩥᩔ ᨶ ᨿᨳᩣ ᩋᨬ᩠ᨬᩮᩈ’’ᨶ᩠ᨲᩥ? ‘‘ᩑᩈᩮᩣ ᨡᩮᩣ, ᨴᩮᩅ, ᨩᩥᨱ᩠ᨱᩮᩣ ᨶᩣᨾᩣ’’ᨲᩥ. ‘‘ᨠᩥᩴ ᨸᨶᩮᩈᩮᩣ, ᩈᨾ᩠ᨾ ᩈᩣᩁᨳᩥ, ᨩᩥᨱ᩠ᨱᩮᩣ ᨶᩣᨾᩣ’’ᨲᩥ? ‘‘ᩑᩈᩮᩣ ᨡᩮᩣ, ᨴᩮᩅ, ᨩᩥᨱ᩠ᨱᩮᩣ ᨶᩣᨾ ᨶ ᨴᩣᨶᩥ ᨲᩮᨶ ᨧᩥᩁᩴ ᨩᩦᩅᩥᨲᨻ᩠ᨻᩴ ᨽᩅᩥᩔᨲᩦ’’ᨲᩥ. ‘‘ᨠᩥᩴ ᨸᨶ, ᩈᨾ᩠ᨾ ᩈᩣᩁᨳᩥ, ᩋᩉᨾ᩠ᨸᩥ ᨩᩁᩣᨵᨾ᩠ᨾᩮᩣ, ᨩᩁᩴ ᩋᨶᨲᩦᨲᩮᩣ’’ᨲᩥ? ‘‘ᨲ᩠ᩅᨬ᩠ᨧ, ᨴᩮᩅ, ᨾᨿᨬ᩠ᨧᨾ᩠ᩉ ᩈᨻ᩠ᨻᩮ ᨩᩁᩣᨵᨾ᩠ᨾᩣ, ᨩᩁᩴ ᩋᨶᨲᩦᨲᩣ’’ᨲᩥ.

‘‘‘ᨲᩮᨶ ᩉᩥ, ᩈᨾ᩠ᨾ ᩈᩣᩁᨳᩥ, ᩋᩃᩴ ᨴᩣᨶᨩ᩠ᨩ ᩏᨿ᩠ᨿᩣᨶᨽᩪᨾᩥᨿᩣ, ᩍᨲᩮᩣᩅ ᩋᨶ᩠ᨲᩮᨸᩩᩁᩴ ᨸᨧ᩠ᨧᨶᩥᨿ᩠ᨿᩣᩉᩦ’’’ᨲᩥ. ‘‘ᩑᩅᩴ, ᨴᩮᩅᩣ’’ᨲᩥ ᨡᩮᩣ ᩋᩉᩴ, ᨴᩮᩅ, ᩅᩥᨸᩔᩥᩔ ᨠᩩᨾᩣᩁᩔ ᨸᨭᩥᩔᩩᨲ᩠ᩅᩣ ᨲᨲᩮᩣᩅ ᩋᨶ᩠ᨲᩮᨸᩩᩁᩴ ᨸᨧ᩠ᨧᨶᩥᨿ᩠ᨿᩣᩈᩥᩴ. ᩈᩮᩣ ᨡᩮᩣ, ᨴᩮᩅ, ᨠᩩᨾᩣᩁᩮᩣ ᩋᨶ᩠ᨲᩮᨸᩩᩁᩴ ᨣᨲᩮᩣ ᨴᩩᨠ᩠ᨡᩦ ᨴᩩᨾ᩠ᨾᨶᩮᩣ ᨸᨩ᩠ᨫᩣᨿᨲᩥ – ‘‘ᨵᩥᩁᨲ᩠ᨳᩩ ᨠᩥᩁ ᨽᩮᩣ ᨩᩣᨲᩥ ᨶᩣᨾ, ᨿᨲᩕ ᩉᩥ ᨶᩣᨾ ᨩᩣᨲᩔ ᨩᩁᩣ ᨸᨬ᩠ᨬᩣᨿᩥᩔᨲᩦ’’’ᨲᩥ.

ᨻ᩠ᨿᩣᨵᩥᨲᨸᩩᩁᩥᩈᩮᩣ

᪔᪖. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᨻᨶ᩠ᨵᩩᨾᩔ ᩁᨬ᩠ᨬᩮᩣ ᩑᨲᨴᩉᩮᩣᩈᩥ –

‘ᨾᩣ ᩉᩮᩅ ᨡᩮᩣ ᩅᩥᨸᩔᩦ ᨠᩩᨾᩣᩁᩮᩣ ᨶ ᩁᨩ᩠ᨩᩴ ᨠᩣᩁᩮᩈᩥ, ᨾᩣ ᩉᩮᩅ ᩅᩥᨸᩔᩦ ᨠᩩᨾᩣᩁᩮᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥ, ᨾᩣ ᩉᩮᩅ ᨶᩮᨾᩥᨲ᩠ᨲᩣᨶᩴ ᨻᩕᩣᩉ᩠ᨾᨱᩣᨶᩴ ᩈᨧ᩠ᨧᩴ ᩋᩔ ᩅᨧᨶ’ᨶ᩠ᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᨻᨶ᩠ᨵᩩᨾᩣ ᩁᩣᨩᩣ ᩅᩥᨸᩔᩥᩔ ᨠᩩᨾᩣᩁᩔ ᨽᩥᨿ᩠ᨿᩮᩣᩈᩮᩣᨾᨲ᩠ᨲᩣᨿ ᨸᨬ᩠ᨧ ᨠᩣᨾᨣᩩᨱᩣᨶᩥ ᩏᨸᨭ᩠ᨮᩣᨸᩮᩈᩥ – ‘ᨿᨳᩣ ᩅᩥᨸᩔᩦ ᨠᩩᨾᩣᩁᩮᩣ ᩁᨩ᩠ᨩᩴ ᨠᩁᩮᨿ᩠ᨿ, ᨿᨳᩣ ᩅᩥᨸᩔᩦ ᨠᩩᨾᩣᩁᩮᩣ ᨶ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩮᨿ᩠ᨿ, ᨿᨳᩣ ᨶᩮᨾᩥᨲ᩠ᨲᩣᨶᩴ ᨻᩕᩣᩉ᩠ᨾᨱᩣᨶᩴ ᨾᩥᨧ᩠ᨨᩣ ᩋᩔ ᩅᨧᨶ’ᨶ᩠ᨲᩥ.

‘‘ᨲᨲᩕ ᩈᩩᨴᩴ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᨸᨬ᩠ᨧᩉᩥ ᨠᩣᨾᨣᩩᨱᩮᩉᩥ ᩈᨾᨸ᩠ᨸᩥᨲᩮᩣ ᩈᨾᨦ᩠ᨣᩦᨽᩪᨲᩮᩣ ᨸᩁᩥᨧᩣᩁᩮᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᨻᩉᩪᨶᩴ ᩅᩔᩣᨶᩴ…ᨸᩮ…

᪔᪗. ‘‘ᩋᨴ᩠ᨴᩈᩣ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᩴ ᨶᩥᨿ᩠ᨿᨶ᩠ᨲᩮᩣ ᨸᩩᩁᩥᩈᩴ ᩌᨻᩣᨵᩥᨠᩴ ᨴᩩᨠ᩠ᨡᩥᨲᩴ ᨻᩣᩊ᩠ᩉᨣᩥᩃᩣᨶᩴ ᩈᨠᩮ ᨾᩩᨲ᩠ᨲᨠᩁᩦᩈᩮ ᨸᩃᩥᨸᨶ᩠ᨶᩴ ᩈᩮᨾᩣᨶᩴ [ᩈᨿᨾᩣᨶᩴ (ᩈ᩠ᨿᩣ. ᨠ.)] ᩋᨬ᩠ᨬᩮᩉᩥ ᩅᩩᨭ᩠ᨮᩣᨸᩥᨿᨾᩣᨶᩴ ᩋᨬ᩠ᨬᩮᩉᩥ ᩈᩴᩅᩮᩈᩥᨿᨾᩣᨶᩴ. ᨴᩥᩈ᩠ᩅᩣ ᩈᩣᩁᨳᩥᩴ ᩌᨾᨶ᩠ᨲᩮᩈᩥ – ‘ᩋᨿᩴ ᨸᨶ, ᩈᨾ᩠ᨾ ᩈᩣᩁᨳᩥ, ᨸᩩᩁᩥᩈᩮᩣ ᨠᩥᩴᨠᨲᩮᩣ? ᩋᨠ᩠ᨡᩦᨶᩥᨸᩥᩔ ᨶ ᨿᨳᩣ ᩋᨬ᩠ᨬᩮᩈᩴ, ᩈᩁᩮᩣᨸᩥᩔ [ᩈᩥᩁᩮᩣᨸᩥᩔ (ᩈ᩠ᨿᩣ.)] ᨶ ᨿᨳᩣ ᩋᨬ᩠ᨬᩮᩈ’ᨶ᩠ᨲᩥ? ‘ᩑᩈᩮᩣ ᨡᩮᩣ, ᨴᩮᩅ, ᨻ᩠ᨿᩣᨵᩥᨲᩮᩣ ᨶᩣᨾᩣ’ᨲᩥ. ‘ᨠᩥᩴ ᨸᨶᩮᩈᩮᩣ, ᩈᨾ᩠ᨾ ᩈᩣᩁᨳᩥ, ᨻ᩠ᨿᩣᨵᩥᨲᩮᩣ ᨶᩣᨾᩣ’ᨲᩥ? ‘ᩑᩈᩮᩣ ᨡᩮᩣ, ᨴᩮᩅ, ᨻ᩠ᨿᩣᨵᩥᨲᩮᩣ ᨶᩣᨾ ᩋᨸ᩠ᨸᩮᩅ ᨶᩣᨾ ᨲᨾ᩠ᩉᩣ ᩌᨻᩣᨵᩣ ᩅᩩᨭ᩠ᨮᩉᩮᨿ᩠ᨿᩣ’ᨲᩥ. ‘ᨠᩥᩴ ᨸᨶ, ᩈᨾ᩠ᨾ ᩈᩣᩁᨳᩥ, ᩋᩉᨾ᩠ᨸᩥ ᨻ᩠ᨿᩣᨵᩥᨵᨾ᩠ᨾᩮᩣ, ᨻ᩠ᨿᩣᨵᩥᩴ ᩋᨶᨲᩦᨲᩮᩣ’ᨲᩥ? ‘ᨲ᩠ᩅᨬ᩠ᨧ, ᨴᩮᩅ, ᨾᨿᨬ᩠ᨧᨾ᩠ᩉ ᩈᨻ᩠ᨻᩮ ᨻ᩠ᨿᩣᨵᩥᨵᨾ᩠ᨾᩣ, ᨻ᩠ᨿᩣᨵᩥᩴ ᩋᨶᨲᩦᨲᩣ’ᨲᩥ. ‘ᨲᩮᨶ ᩉᩥ, ᩈᨾ᩠ᨾ ᩈᩣᩁᨳᩥ, ᩋᩃᩴ ᨴᩣᨶᨩ᩠ᨩ ᩏᨿ᩠ᨿᩣᨶᨽᩪᨾᩥᨿᩣ, ᩍᨲᩮᩣᩅ ᩋᨶ᩠ᨲᩮᨸᩩᩁᩴ ᨸᨧ᩠ᨧᨶᩥᨿ᩠ᨿᩣᩉᩦ’ᨲᩥ. ‘ᩑᩅᩴ ᨴᩮᩅᩣ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᩈᩣᩁᨳᩥ ᩅᩥᨸᩔᩥᩔ ᨠᩩᨾᩣᩁᩔ ᨸᨭᩥᩔᩩᨲ᩠ᩅᩣ ᨲᨲᩮᩣᩅ ᩋᨶ᩠ᨲᩮᨸᩩᩁᩴ ᨸᨧ᩠ᨧᨶᩥᨿ᩠ᨿᩣᩈᩥ. ᨲᨲᩕ ᩈᩩᨴᩴ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᩋᨶ᩠ᨲᩮᨸᩩᩁᩴ ᨣᨲᩮᩣ ᨴᩩᨠ᩠ᨡᩦ ᨴᩩᨾ᩠ᨾᨶᩮᩣ ᨸᨩ᩠ᨫᩣᨿᨲᩥ – ‘ᨵᩥᩁᨲ᩠ᨳᩩ ᨠᩥᩁ ᨽᩮᩣ ᨩᩣᨲᩥ ᨶᩣᨾ, ᨿᨲᩕ ᩉᩥ ᨶᩣᨾ ᨩᩣᨲᩔ ᨩᩁᩣ ᨸᨬ᩠ᨬᩣᨿᩥᩔᨲᩥ, ᨻ᩠ᨿᩣᨵᩥ ᨸᨬ᩠ᨬᩣᨿᩥᩔᨲᩦ’ᨲᩥ.

᪔᪘. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᨻᨶ᩠ᨵᩩᨾᩣ ᩁᩣᨩᩣ ᩈᩣᩁᨳᩥᩴ ᩌᨾᨶ᩠ᨲᩣᨸᩮᨲ᩠ᩅᩣ ᩑᨲᨴᩅᩮᩣᨧ – ‘ᨠᨧ᩠ᨧᩥ, ᩈᨾ᩠ᨾ ᩈᩣᩁᨳᩥ, ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᨿᩣ ᩋᨽᩥᩁᨾᩥᨲ᩠ᨳ, ᨠᨧ᩠ᨧᩥ, ᩈᨾ᩠ᨾ ᩈᩣᩁᨳᩥ, ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᨿᩣ ᩋᨲ᩠ᨲᨾᨶᩮᩣ ᩋᩉᩮᩣᩈᩦ’ᨲᩥ? ‘ᨶ ᨡᩮᩣ, ᨴᩮᩅ, ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᨿᩣ ᩋᨽᩥᩁᨾᩥᨲ᩠ᨳ, ᨶ ᨡᩮᩣ, ᨴᩮᩅ, ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᨿᩣ ᩋᨲ᩠ᨲᨾᨶᩮᩣ ᩋᩉᩮᩣᩈᩦ’ᨲᩥ. ‘ᨠᩥᩴ ᨸᨶ, ᩈᨾ᩠ᨾ ᩈᩣᩁᨳᩥ, ᩋᨴ᩠ᨴᩈ ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᩴ ᨶᩥᨿ᩠ᨿᨶ᩠ᨲᩮᩣ’ᨲᩥ? ‘ᩋᨴ᩠ᨴᩈᩣ ᨡᩮᩣ, ᨴᩮᩅ, ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᩴ ᨶᩥᨿ᩠ᨿᨶ᩠ᨲᩮᩣ ᨸᩩᩁᩥᩈᩴ ᩌᨻᩣᨵᩥᨠᩴ ᨴᩩᨠ᩠ᨡᩥᨲᩴ ᨻᩣᩊ᩠ᩉᨣᩥᩃᩣᨶᩴ ᩈᨠᩮ ᨾᩩᨲ᩠ᨲᨠᩁᩦᩈᩮ ᨸᩃᩥᨸᨶ᩠ᨶᩴ ᩈᩮᨾᩣᨶᩴ ᩋᨬ᩠ᨬᩮᩉᩥ ᩅᩩᨭ᩠ᨮᩣᨸᩥᨿᨾᩣᨶᩴ ᩋᨬ᩠ᨬᩮᩉᩥ ᩈᩴᩅᩮᩈᩥᨿᨾᩣᨶᩴ. ᨴᩥᩈ᩠ᩅᩣ ᨾᩴ ᩑᨲᨴᩅᩮᩣᨧ – ‘‘ᩋᨿᩴ ᨸᨶ, ᩈᨾ᩠ᨾ ᩈᩣᩁᨳᩥ, ᨸᩩᩁᩥᩈᩮᩣ ᨠᩥᩴᨠᨲᩮᩣ, ᩋᨠ᩠ᨡᩦᨶᩥᨸᩥᩔ ᨶ ᨿᨳᩣ ᩋᨬ᩠ᨬᩮᩈᩴ, ᩈᩁᩮᩣᨸᩥᩔ ᨶ ᨿᨳᩣ ᩋᨬ᩠ᨬᩮᩈ’’ᨶ᩠ᨲᩥ? ‘‘ᩑᩈᩮᩣ ᨡᩮᩣ, ᨴᩮᩅ, ᨻ᩠ᨿᩣᨵᩥᨲᩮᩣ ᨶᩣᨾᩣ’’ᨲᩥ. ‘‘ᨠᩥᩴ ᨸᨶᩮᩈᩮᩣ, ᩈᨾ᩠ᨾ ᩈᩣᩁᨳᩥ, ᨻ᩠ᨿᩣᨵᩥᨲᩮᩣ ᨶᩣᨾᩣ’’ᨲᩥ? ‘‘ᩑᩈᩮᩣ ᨡᩮᩣ, ᨴᩮᩅ, ᨻ᩠ᨿᩣᨵᩥᨲᩮᩣ ᨶᩣᨾ ᩋᨸ᩠ᨸᩮᩅ ᨶᩣᨾ ᨲᨾ᩠ᩉᩣ ᩌᨻᩣᨵᩣ ᩅᩩᨭ᩠ᨮᩉᩮᨿ᩠ᨿᩣ’’ᨲᩥ. ‘‘ᨠᩥᩴ ᨸᨶ, ᩈᨾ᩠ᨾ ᩈᩣᩁᨳᩥ, ᩋᩉᨾ᩠ᨸᩥ ᨻ᩠ᨿᩣᨵᩥᨵᨾ᩠ᨾᩮᩣ, ᨻ᩠ᨿᩣᨵᩥᩴ ᩋᨶᨲᩦᨲᩮᩣ’’ᨲᩥ? ‘‘ᨲ᩠ᩅᨬ᩠ᨧ, ᨴᩮᩅ, ᨾᨿᨬ᩠ᨧᨾ᩠ᩉ ᩈᨻ᩠ᨻᩮ ᨻ᩠ᨿᩣᨵᩥᨵᨾ᩠ᨾᩣ, ᨻ᩠ᨿᩣᨵᩥᩴ ᩋᨶᨲᩦᨲᩣ’’ᨲᩥ. ‘‘ᨲᩮᨶ ᩉᩥ, ᩈᨾ᩠ᨾ ᩈᩣᩁᨳᩥ, ᩋᩃᩴ ᨴᩣᨶᨩ᩠ᨩ ᩏᨿ᩠ᨿᩣᨶᨽᩪᨾᩥᨿᩣ, ᩍᨲᩮᩣᩅ ᩋᨶ᩠ᨲᩮᨸᩩᩁᩴ ᨸᨧ᩠ᨧᨶᩥᨿ᩠ᨿᩣᩉᩦ’’ᨲᩥ. ‘‘ᩑᩅᩴ, ᨴᩮᩅᩣ’’ᨲᩥ ᨡᩮᩣ ᩋᩉᩴ, ᨴᩮᩅ, ᩅᩥᨸᩔᩥᩔ ᨠᩩᨾᩣᩁᩔ ᨸᨭᩥᩔᩩᨲ᩠ᩅᩣ ᨲᨲᩮᩣᩅ ᩋᨶ᩠ᨲᩮᨸᩩᩁᩴ ᨸᨧ᩠ᨧᨶᩥᨿ᩠ᨿᩣᩈᩥᩴ. ᩈᩮᩣ ᨡᩮᩣ, ᨴᩮᩅ, ᨠᩩᨾᩣᩁᩮᩣ ᩋᨶ᩠ᨲᩮᨸᩩᩁᩴ ᨣᨲᩮᩣ ᨴᩩᨠ᩠ᨡᩦ ᨴᩩᨾ᩠ᨾᨶᩮᩣ ᨸᨩ᩠ᨫᩣᨿᨲᩥ – ‘‘‘ᨵᩥᩁᨲ᩠ᨳᩩ ᨠᩥᩁ ᨽᩮᩣ ᨩᩣᨲᩥ ᨶᩣᨾ, ᨿᨲᩕ ᩉᩥ ᨶᩣᨾ ᨩᩣᨲᩔ ᨩᩁᩣ ᨸᨬ᩠ᨬᩣᨿᩥᩔᨲᩥ, ᨻ᩠ᨿᩣᨵᩥ ᨸᨬ᩠ᨬᩣᨿᩥᩔᨲᩦ’’’ᨲᩥ.

ᨠᩣᩃᨦ᩠ᨠᨲᨸᩩᩁᩥᩈᩮᩣ

᪔᪙. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᨻᨶ᩠ᨵᩩᨾᩔ ᩁᨬ᩠ᨬᩮᩣ ᩑᨲᨴᩉᩮᩣᩈᩥ – ‘ᨾᩣ ᩉᩮᩅ ᨡᩮᩣ ᩅᩥᨸᩔᩦ ᨠᩩᨾᩣᩁᩮᩣ ᨶ ᩁᨩ᩠ᨩᩴ ᨠᩣᩁᩮᩈᩥ, ᨾᩣ ᩉᩮᩅ ᩅᩥᨸᩔᩦ ᨠᩩᨾᩣᩁᩮᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥ, ᨾᩣ ᩉᩮᩅ ᨶᩮᨾᩥᨲ᩠ᨲᩣᨶᩴ ᨻᩕᩣᩉ᩠ᨾᨱᩣᨶᩴ ᩈᨧ᩠ᨧᩴ ᩋᩔ ᩅᨧᨶ’ᨶ᩠ᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᨻᨶ᩠ᨵᩩᨾᩣ ᩁᩣᨩᩣ ᩅᩥᨸᩔᩥᩔ ᨠᩩᨾᩣᩁᩔ ᨽᩥᨿ᩠ᨿᩮᩣᩈᩮᩣᨾᨲ᩠ᨲᩣᨿ ᨸᨬ᩠ᨧ ᨠᩣᨾᨣᩩᨱᩣᨶᩥ ᩏᨸᨭ᩠ᨮᩣᨸᩮᩈᩥ – ‘ᨿᨳᩣ ᩅᩥᨸᩔᩦ ᨠᩩᨾᩣᩁᩮᩣ ᩁᨩ᩠ᨩᩴ ᨠᩁᩮᨿ᩠ᨿ, ᨿᨳᩣ ᩅᩥᨸᩔᩦ ᨠᩩᨾᩣᩁᩮᩣ ᨶ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩮᨿ᩠ᨿ, ᨿᨳᩣ ᨶᩮᨾᩥᨲ᩠ᨲᩣᨶᩴ ᨻᩕᩣᩉ᩠ᨾᨱᩣᨶᩴ ᨾᩥᨧ᩠ᨨᩣ ᩋᩔ ᩅᨧᨶ’ᨶ᩠ᨲᩥ.

‘‘ᨲᨲᩕ ᩈᩩᨴᩴ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᨸᨬ᩠ᨧᩉᩥ ᨠᩣᨾᨣᩩᨱᩮᩉᩥ ᩈᨾᨸ᩠ᨸᩥᨲᩮᩣ ᩈᨾᨦ᩠ᨣᩦᨽᩪᨲᩮᩣ ᨸᩁᩥᨧᩣᩁᩮᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᨻᩉᩪᨶᩴ ᩅᩔᩣᨶᩴ…ᨸᩮ…

᪕᪐. ‘‘ᩋᨴ᩠ᨴᩈᩣ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᩴ ᨶᩥᨿ᩠ᨿᨶ᩠ᨲᩮᩣ ᨾᩉᩣᨩᨶᨠᩣᨿᩴ ᩈᨶ᩠ᨶᩥᨸᨲᩥᨲᩴ ᨶᩣᨶᩣᩁᨲ᩠ᨲᩣᨶᨬ᩠ᨧ ᨴᩩᩔᩣᨶᩴ ᩅᩥᩃᩣᨲᩴ ᨠᨿᩥᩁᨾᩣᨶᩴ. ᨴᩥᩈ᩠ᩅᩣ ᩈᩣᩁᨳᩥᩴ ᩌᨾᨶ᩠ᨲᩮᩈᩥ – ‘ᨠᩥᩴ ᨶᩩ ᨡᩮᩣ, ᩈᩮᩣ, ᩈᨾ᩠ᨾ ᩈᩣᩁᨳᩥ, ᨾᩉᩣᨩᨶᨠᩣᨿᩮᩣ ᩈᨶ᩠ᨶᩥᨸᨲᩥᨲᩮᩣ ᨶᩣᨶᩣᩁᨲ᩠ᨲᩣᨶᨬ᩠ᨧ ᨴᩩᩔᩣᨶᩴ ᩅᩥᩃᩣᨲᩴ ᨠᨿᩥᩁᨲᩦ’ᨲᩥ? ‘ᩑᩈᩮᩣ ᨡᩮᩣ, ᨴᩮᩅ, ᨠᩣᩃᨦ᩠ᨠᨲᩮᩣ ᨶᩣᨾᩣ’ᨲᩥ. ‘ᨲᩮᨶ ᩉᩥ, ᩈᨾ᩠ᨾ ᩈᩣᩁᨳᩥ, ᨿᩮᨶ ᩈᩮᩣ ᨠᩣᩃᨦ᩠ᨠᨲᩮᩣ ᨲᩮᨶ ᩁᨳᩴ ᨸᩮᩈᩮᩉᩦ’ᨲᩥ. ‘ᩑᩅᩴ, ᨴᩮᩅᩣ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᩈᩣᩁᨳᩥ ᩅᩥᨸᩔᩥᩔ ᨠᩩᨾᩣᩁᩔ ᨸᨭᩥᩔᩩᨲ᩠ᩅᩣ ᨿᩮᨶ ᩈᩮᩣ ᨠᩣᩃᨦ᩠ᨠᨲᩮᩣ ᨲᩮᨶ ᩁᨳᩴ ᨸᩮᩈᩮᩈᩥ. ᩋᨴ᩠ᨴᩈᩣ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᨸᩮᨲᩴ ᨠᩣᩃᨦ᩠ᨠᨲᩴ, ᨴᩥᩈ᩠ᩅᩣ ᩈᩣᩁᨳᩥᩴ ᩌᨾᨶ᩠ᨲᩮᩈᩥ – ‘ᨠᩥᩴ ᨸᨶᩣᨿᩴ, ᩈᨾ᩠ᨾ ᩈᩣᩁᨳᩥ, ᨠᩣᩃᨦ᩠ᨠᨲᩮᩣ ᨶᩣᨾᩣ’ᨲᩥ? ‘ᩑᩈᩮᩣ ᨡᩮᩣ, ᨴᩮᩅ, ᨠᩣᩃᨦ᩠ᨠᨲᩮᩣ ᨶᩣᨾ. ᨶ ᨴᩣᨶᩥ ᨲᩴ ᨴᨠ᩠ᨡᨶ᩠ᨲᩥ ᨾᩣᨲᩣ ᩅᩣ ᨸᩥᨲᩣ ᩅᩣ ᩋᨬ᩠ᨬᩮ ᩅᩣ ᨬᩣᨲᩥᩈᩣᩃᩮᩣᩉᩥᨲᩣ, ᩈᩮᩣᨸᩥ ᨶ ᨴᨠ᩠ᨡᩥᩔᨲᩥ ᨾᩣᨲᩁᩴ ᩅᩣ ᨸᩥᨲᩁᩴ ᩅᩣ ᩋᨬ᩠ᨬᩮ ᩅᩣ ᨬᩣᨲᩥᩈᩣᩃᩮᩣᩉᩥᨲᩮ’ᨲᩥ. ‘ᨠᩥᩴ ᨸᨶ, ᩈᨾ᩠ᨾ ᩈᩣᩁᨳᩥ, ᩋᩉᨾ᩠ᨸᩥ ᨾᩁᨱᨵᨾ᩠ᨾᩮᩣ ᨾᩁᨱᩴ ᩋᨶᨲᩦᨲᩮᩣ; ᨾᨾ᩠ᨸᩥ ᨶ ᨴᨠ᩠ᨡᨶ᩠ᨲᩥ ᨴᩮᩅᩮᩣ ᩅᩣ ᨴᩮᩅᩦ ᩅᩣ ᩋᨬ᩠ᨬᩮ ᩅᩣ ᨬᩣᨲᩥᩈᩣᩃᩮᩣᩉᩥᨲᩣ; ᩋᩉᨾ᩠ᨸᩥ ᨶ ᨴᨠ᩠ᨡᩥᩔᩣᨾᩥ ᨴᩮᩅᩴ ᩅᩣ ᨴᩮᩅᩥᩴ ᩅᩣ ᩋᨬ᩠ᨬᩮ ᩅᩣ ᨬᩣᨲᩥᩈᩣᩃᩮᩣᩉᩥᨲᩮ’ᨲᩥ? ‘ᨲ᩠ᩅᨬ᩠ᨧ, ᨴᩮᩅ, ᨾᨿᨬ᩠ᨧᨾ᩠ᩉ ᩈᨻ᩠ᨻᩮ ᨾᩁᨱᨵᨾ᩠ᨾᩣ ᨾᩁᨱᩴ ᩋᨶᨲᩦᨲᩣ; ᨲᨾ᩠ᨸᩥ ᨶ ᨴᨠ᩠ᨡᨶ᩠ᨲᩥ ᨴᩮᩅᩮᩣ ᩅᩣ ᨴᩮᩅᩦ ᩅᩣ ᩋᨬ᩠ᨬᩮ ᩅᩣ ᨬᩣᨲᩥᩈᩣᩃᩮᩣᩉᩥᨲᩣ; ᨲ᩠ᩅᨾ᩠ᨸᩥ ᨶ ᨴᨠ᩠ᨡᩥᩔᩈᩥ ᨴᩮᩅᩴ ᩅᩣ ᨴᩮᩅᩥᩴ ᩅᩣ ᩋᨬ᩠ᨬᩮ ᩅᩣ ᨬᩣᨲᩥᩈᩣᩃᩮᩣᩉᩥᨲᩮ’ᨲᩥ. ‘ᨲᩮᨶ ᩉᩥ, ᩈᨾ᩠ᨾ ᩈᩣᩁᨳᩥ, ᩋᩃᩴ ᨴᩣᨶᨩ᩠ᨩ ᩏᨿ᩠ᨿᩣᨶᨽᩪᨾᩥᨿᩣ, ᩍᨲᩮᩣᩅ ᩋᨶ᩠ᨲᩮᨸᩩᩁᩴ ᨸᨧ᩠ᨧᨶᩥᨿ᩠ᨿᩣᩉᩦ’ᨲᩥ. ‘ᩑᩅᩴ, ᨴᩮᩅᩣ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᩈᩣᩁᨳᩥ ᩅᩥᨸᩔᩥᩔ ᨠᩩᨾᩣᩁᩔ ᨸᨭᩥᩔᩩᨲ᩠ᩅᩣ ᨲᨲᩮᩣᩅ ᩋᨶ᩠ᨲᩮᨸᩩᩁᩴ ᨸᨧ᩠ᨧᨶᩥᨿ᩠ᨿᩣᩈᩥ. ᨲᨲᩕ ᩈᩩᨴᩴ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᩋᨶ᩠ᨲᩮᨸᩩᩁᩴ ᨣᨲᩮᩣ ᨴᩩᨠ᩠ᨡᩦ ᨴᩩᨾ᩠ᨾᨶᩮᩣ ᨸᨩ᩠ᨫᩣᨿᨲᩥ – ‘ᨵᩥᩁᨲ᩠ᨳᩩ ᨠᩥᩁ, ᨽᩮᩣ, ᨩᩣᨲᩥ ᨶᩣᨾ, ᨿᨲᩕ ᩉᩥ ᨶᩣᨾ ᨩᩣᨲᩔ ᨩᩁᩣ ᨸᨬ᩠ᨬᩣᨿᩥᩔᨲᩥ, ᨻ᩠ᨿᩣᨵᩥ ᨸᨬ᩠ᨬᩣᨿᩥᩔᨲᩥ, ᨾᩁᨱᩴ ᨸᨬ᩠ᨬᩣᨿᩥᩔᨲᩦ’ᨲᩥ.

᪕᪑. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᨻᨶ᩠ᨵᩩᨾᩣ ᩁᩣᨩᩣ ᩈᩣᩁᨳᩥᩴ ᩌᨾᨶ᩠ᨲᩣᨸᩮᨲ᩠ᩅᩣ ᩑᨲᨴᩅᩮᩣᨧ – ‘ᨠᨧ᩠ᨧᩥ, ᩈᨾ᩠ᨾ ᩈᩣᩁᨳᩥ, ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᨿᩣ ᩋᨽᩥᩁᨾᩥᨲ᩠ᨳ, ᨠᨧ᩠ᨧᩥ, ᩈᨾ᩠ᨾ ᩈᩣᩁᨳᩥ, ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᨿᩣ ᩋᨲ᩠ᨲᨾᨶᩮᩣ ᩋᩉᩮᩣᩈᩦ’ᨲᩥ? ‘ᨶ ᨡᩮᩣ, ᨴᩮᩅ, ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᨿᩣ ᩋᨽᩥᩁᨾᩥᨲ᩠ᨳ, ᨶ ᨡᩮᩣ, ᨴᩮᩅ, ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᨿᩣ ᩋᨲ᩠ᨲᨾᨶᩮᩣ ᩋᩉᩮᩣᩈᩦ’ᨲᩥ. ‘ᨠᩥᩴ ᨸᨶ, ᩈᨾ᩠ᨾ ᩈᩣᩁᨳᩥ, ᩋᨴ᩠ᨴᩈ ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᩴ ᨶᩥᨿ᩠ᨿᨶ᩠ᨲᩮᩣ’ᨲᩥ? ‘ᩋᨴ᩠ᨴᩈᩣ ᨡᩮᩣ, ᨴᩮᩅ, ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᩴ ᨶᩥᨿ᩠ᨿᨶ᩠ᨲᩮᩣ ᨾᩉᩣᨩᨶᨠᩣᨿᩴ ᩈᨶ᩠ᨶᩥᨸᨲᩥᨲᩴ ᨶᩣᨶᩣᩁᨲ᩠ᨲᩣᨶᨬ᩠ᨧ ᨴᩩᩔᩣᨶᩴ ᩅᩥᩃᩣᨲᩴ ᨠᨿᩥᩁᨾᩣᨶᩴ. ᨴᩥᩈ᩠ᩅᩣ ᨾᩴ ᩑᨲᨴᩅᩮᩣᨧ – ‘‘ᨠᩥᩴ ᨶᩩ ᨡᩮᩣ, ᩈᩮᩣ, ᩈᨾ᩠ᨾ ᩈᩣᩁᨳᩥ, ᨾᩉᩣᨩᨶᨠᩣᨿᩮᩣ ᩈᨶ᩠ᨶᩥᨸᨲᩥᨲᩮᩣ ᨶᩣᨶᩣᩁᨲ᩠ᨲᩣᨶᨬ᩠ᨧ ᨴᩩᩔᩣᨶᩴ ᩅᩥᩃᩣᨲᩴ ᨠᨿᩥᩁᨲᩦ’’ᨲᩥ? ‘‘ᩑᩈᩮᩣ ᨡᩮᩣ, ᨴᩮᩅ, ᨠᩣᩃᨦ᩠ᨠᨲᩮᩣ ᨶᩣᨾᩣ’’ᨲᩥ. ‘‘ᨲᩮᨶ ᩉᩥ, ᩈᨾ᩠ᨾ ᩈᩣᩁᨳᩥ, ᨿᩮᨶ ᩈᩮᩣ ᨠᩣᩃᨦ᩠ᨠᨲᩮᩣ ᨲᩮᨶ ᩁᨳᩴ ᨸᩮᩈᩮᩉᩦ’’ᨲᩥ. ‘‘ᩑᩅᩴ ᨴᩮᩅᩣ’’ᨲᩥ ᨡᩮᩣ ᩋᩉᩴ, ᨴᩮᩅ, ᩅᩥᨸᩔᩥᩔ ᨠᩩᨾᩣᩁᩔ ᨸᨭᩥᩔᩩᨲ᩠ᩅᩣ ᨿᩮᨶ ᩈᩮᩣ ᨠᩣᩃᨦ᩠ᨠᨲᩮᩣ ᨲᩮᨶ ᩁᨳᩴ ᨸᩮᩈᩮᩈᩥᩴ. ᩋᨴ᩠ᨴᩈᩣ ᨡᩮᩣ, ᨴᩮᩅ, ᨠᩩᨾᩣᩁᩮᩣ ᨸᩮᨲᩴ ᨠᩣᩃᨦ᩠ᨠᨲᩴ, ᨴᩥᩈ᩠ᩅᩣ ᨾᩴ ᩑᨲᨴᩅᩮᩣᨧ – ‘‘ᨠᩥᩴ ᨸᨶᩣᨿᩴ, ᩈᨾ᩠ᨾ ᩈᩣᩁᨳᩥ, ᨠᩣᩃᨦ᩠ᨠᨲᩮᩣ ᨶᩣᨾᩣ’’ᨲᩥ? ‘‘ᩑᩈᩮᩣ ᨡᩮᩣ, ᨴᩮᩅ, ᨠᩣᩃᨦ᩠ᨠᨲᩮᩣ ᨶᩣᨾ. ᨶ ᨴᩣᨶᩥ ᨲᩴ ᨴᨠ᩠ᨡᨶ᩠ᨲᩥ ᨾᩣᨲᩣ ᩅᩣ ᨸᩥᨲᩣ ᩅᩣ ᩋᨬ᩠ᨬᩮ ᩅᩣ ᨬᩣᨲᩥᩈᩣᩃᩮᩣᩉᩥᨲᩣ, ᩈᩮᩣᨸᩥ ᨶ ᨴᨠ᩠ᨡᩥᩔᨲᩥ ᨾᩣᨲᩁᩴ ᩅᩣ ᨸᩥᨲᩁᩴ ᩅᩣ ᩋᨬ᩠ᨬᩮ ᩅᩣ ᨬᩣᨲᩥᩈᩣᩃᩮᩣᩉᩥᨲᩮ’’ᨲᩥ. ‘‘ᨠᩥᩴ ᨸᨶ, ᩈᨾ᩠ᨾ ᩈᩣᩁᨳᩥ, ᩋᩉᨾ᩠ᨸᩥ ᨾᩁᨱᨵᨾ᩠ᨾᩮᩣ ᨾᩁᨱᩴ ᩋᨶᨲᩦᨲᩮᩣ; ᨾᨾ᩠ᨸᩥ ᨶ ᨴᨠ᩠ᨡᨶ᩠ᨲᩥ ᨴᩮᩅᩮᩣ ᩅᩣ ᨴᩮᩅᩦ ᩅᩣ ᩋᨬ᩠ᨬᩮ ᩅᩣ ᨬᩣᨲᩥᩈᩣᩃᩮᩣᩉᩥᨲᩣ; ᩋᩉᨾ᩠ᨸᩥ ᨶ ᨴᨠ᩠ᨡᩥᩔᩣᨾᩥ ᨴᩮᩅᩴ ᩅᩣ ᨴᩮᩅᩥᩴ ᩅᩣ ᩋᨬ᩠ᨬᩮ ᩅᩣ ᨬᩣᨲᩥᩈᩣᩃᩮᩣᩉᩥᨲᩮ’’ᨲᩥ? ‘‘ᨲ᩠ᩅᨬ᩠ᨧ, ᨴᩮᩅ, ᨾᨿᨬ᩠ᨧᨾ᩠ᩉ ᩈᨻ᩠ᨻᩮ ᨾᩁᨱᨵᨾ᩠ᨾᩣ ᨾᩁᨱᩴ ᩋᨶᨲᩦᨲᩣ; ᨲᨾ᩠ᨸᩥ ᨶ ᨴᨠ᩠ᨡᨶ᩠ᨲᩥ ᨴᩮᩅᩮᩣ ᩅᩣ ᨴᩮᩅᩦ ᩅᩣ ᩋᨬ᩠ᨬᩮ ᩅᩣ ᨬᩣᨲᩥᩈᩣᩃᩮᩣᩉᩥᨲᩣ, ᨲ᩠ᩅᨾ᩠ᨸᩥ ᨶ ᨴᨠ᩠ᨡᩥᩔᩈᩥ ᨴᩮᩅᩴ ᩅᩣ ᨴᩮᩅᩥᩴ ᩅᩣ ᩋᨬ᩠ᨬᩮ ᩅᩣ ᨬᩣᨲᩥᩈᩣᩃᩮᩣᩉᩥᨲᩮ’’ᨲᩥ. ‘‘ᨲᩮᨶ ᩉᩥ, ᩈᨾ᩠ᨾ ᩈᩣᩁᨳᩥ, ᩋᩃᩴ ᨴᩣᨶᨩ᩠ᨩ ᩏᨿ᩠ᨿᩣᨶᨽᩪᨾᩥᨿᩣ, ᩍᨲᩮᩣᩅ ᩋᨶ᩠ᨲᩮᨸᩩᩁᩴ ᨸᨧ᩠ᨧᨶᩥᨿ᩠ᨿᩣᩉᩦ’ᨲᩥ. ‘‘‘ᩑᩅᩴ, ᨴᩮᩅᩣ’’ᨲᩥ ᨡᩮᩣ ᩋᩉᩴ, ᨴᩮᩅ, ᩅᩥᨸᩔᩥᩔ ᨠᩩᨾᩣᩁᩔ ᨸᨭᩥᩔᩩᨲ᩠ᩅᩣ ᨲᨲᩮᩣᩅ ᩋᨶ᩠ᨲᩮᨸᩩᩁᩴ ᨸᨧ᩠ᨧᨶᩥᨿ᩠ᨿᩣᩈᩥᩴ. ᩈᩮᩣ ᨡᩮᩣ, ᨴᩮᩅ, ᨠᩩᨾᩣᩁᩮᩣ ᩋᨶ᩠ᨲᩮᨸᩩᩁᩴ ᨣᨲᩮᩣ ᨴᩩᨠ᩠ᨡᩦ ᨴᩩᨾ᩠ᨾᨶᩮᩣ ᨸᨩ᩠ᨫᩣᨿᨲᩥ – ‘‘ᨵᩥᩁᨲ᩠ᨳᩩ ᨠᩥᩁ ᨽᩮᩣ ᨩᩣᨲᩥ ᨶᩣᨾ, ᨿᨲᩕ ᩉᩥ ᨶᩣᨾ ᨩᩣᨲᩔ ᨩᩁᩣ ᨸᨬ᩠ᨬᩣᨿᩥᩔᨲᩥ, ᨻ᩠ᨿᩣᨵᩥ ᨸᨬ᩠ᨬᩣᨿᩥᩔᨲᩥ, ᨾᩁᨱᩴ ᨸᨬ᩠ᨬᩣᨿᩥᩔᨲᩦ’’’ᨲᩥ.

ᨸᨻ᩠ᨻᨩᩥᨲᩮᩣ

᪕᪒. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᨻᨶ᩠ᨵᩩᨾᩔ ᩁᨬ᩠ᨬᩮᩣ ᩑᨲᨴᩉᩮᩣᩈᩥ – ‘ᨾᩣ ᩉᩮᩅ ᨡᩮᩣ ᩅᩥᨸᩔᩦ ᨠᩩᨾᩣᩁᩮᩣ ᨶ ᩁᨩ᩠ᨩᩴ ᨠᩣᩁᩮᩈᩥ, ᨾᩣ ᩉᩮᩅ ᩅᩥᨸᩔᩦ ᨠᩩᨾᩣᩁᩮᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥ, ᨾᩣ ᩉᩮᩅ ᨶᩮᨾᩥᨲ᩠ᨲᩣᨶᩴ ᨻᩕᩣᩉ᩠ᨾᨱᩣᨶᩴ ᩈᨧ᩠ᨧᩴ ᩋᩔ ᩅᨧᨶ’ᨶ᩠ᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᨻᨶ᩠ᨵᩩᨾᩣ ᩁᩣᨩᩣ ᩅᩥᨸᩔᩥᩔ ᨠᩩᨾᩣᩁᩔ ᨽᩥᨿ᩠ᨿᩮᩣᩈᩮᩣᨾᨲ᩠ᨲᩣᨿ ᨸᨬ᩠ᨧ ᨠᩣᨾᨣᩩᨱᩣᨶᩥ ᩏᨸᨭ᩠ᨮᩣᨸᩮᩈᩥ – ‘ᨿᨳᩣ ᩅᩥᨸᩔᩦ ᨠᩩᨾᩣᩁᩮᩣ ᩁᨩ᩠ᨩᩴ ᨠᩁᩮᨿ᩠ᨿ, ᨿᨳᩣ ᩅᩥᨸᩔᩦ ᨠᩩᨾᩣᩁᩮᩣ ᨶ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩮᨿ᩠ᨿ, ᨿᨳᩣ ᨶᩮᨾᩥᨲ᩠ᨲᩣᨶᩴ ᨻᩕᩣᩉ᩠ᨾᨱᩣᨶᩴ ᨾᩥᨧ᩠ᨨᩣ ᩋᩔ ᩅᨧᨶ’ᨶ᩠ᨲᩥ.

‘‘ᨲᨲᩕ ᩈᩩᨴᩴ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᨸᨬ᩠ᨧᩉᩥ ᨠᩣᨾᨣᩩᨱᩮᩉᩥ ᩈᨾᨸ᩠ᨸᩥᨲᩮᩣ ᩈᨾᨦ᩠ᨣᩦᨽᩪᨲᩮᩣ ᨸᩁᩥᨧᩣᩁᩮᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᨻᩉᩪᨶᩴ ᩅᩔᩣᨶᩴ ᨻᩉᩪᨶᩴ ᩅᩔᩈᨲᩣᨶᩴ ᨻᩉᩪᨶᩴ ᩅᩔᩈᩉᩔᩣᨶᩴ ᩋᨧ᩠ᨧᨿᩮᨶ ᩈᩣᩁᨳᩥᩴ ᩌᨾᨶ᩠ᨲᩮᩈᩥ – ‘ᨿᩮᩣᨩᩮᩉᩥ, ᩈᨾ᩠ᨾ ᩈᩣᩁᨳᩥ, ᨽᨴ᩠ᨴᩣᨶᩥ ᨽᨴ᩠ᨴᩣᨶᩥ ᨿᩣᨶᩣᨶᩥ, ᩏᨿ᩠ᨿᩣᨶᨽᩪᨾᩥᩴ ᨣᨧ᩠ᨨᩣᨾ ᩈᩩᨽᩪᨾᩥᨴᩔᨶᩣᨿᩣ’ᨲᩥ. ‘ᩑᩅᩴ, ᨴᩮᩅᩣ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᩈᩣᩁᨳᩥ ᩅᩥᨸᩔᩥᩔ ᨠᩩᨾᩣᩁᩔ ᨸᨭᩥᩔᩩᨲ᩠ᩅᩣ ᨽᨴ᩠ᨴᩣᨶᩥ ᨽᨴ᩠ᨴᩣᨶᩥ ᨿᩣᨶᩣᨶᩥ ᨿᩮᩣᨩᩮᨲ᩠ᩅᩣ ᩅᩥᨸᩔᩥᩔ ᨠᩩᨾᩣᩁᩔ ᨸᨭᩥᩅᩮᨴᩮᩈᩥ – ‘ᨿᩩᨲ᩠ᨲᩣᨶᩥ ᨡᩮᩣ ᨲᩮ, ᨴᩮᩅ, ᨽᨴ᩠ᨴᩣᨶᩥ ᨽᨴ᩠ᨴᩣᨶᩥ ᨿᩣᨶᩣᨶᩥ, ᨿᩔ ᨴᩣᨶᩥ ᨠᩣᩃᩴ ᨾᨬ᩠ᨬᩈᩦ’ᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᨽᨴ᩠ᨴᩴ ᨽᨴ᩠ᨴᩴ ᨿᩣᨶᩴ ᩋᨽᩥᩁᩩᩉᩥᨲ᩠ᩅᩣ ᨽᨴ᩠ᨴᩮᩉᩥ ᨽᨴ᩠ᨴᩮᩉᩥ ᨿᩣᨶᩮᩉᩥ ᩏᨿ᩠ᨿᩣᨶᨽᩪᨾᩥᩴ ᨶᩥᨿ᩠ᨿᩣᩈᩥ.

᪕᪓. ‘‘ᩋᨴ᩠ᨴᩈᩣ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᩏᨿ᩠ᨿᩣᨶᨽᩪᨾᩥᩴ ᨶᩥᨿ᩠ᨿᨶ᩠ᨲᩮᩣ ᨸᩩᩁᩥᩈᩴ ᨽᨱ᩠ᨯᩩᩴ ᨸᨻ᩠ᨻᨩᩥᨲᩴ ᨠᩣᩈᩣᨿᩅᩈᨶᩴ. ᨴᩥᩈ᩠ᩅᩣ ᩈᩣᩁᨳᩥᩴ ᩌᨾᨶ᩠ᨲᩮᩈᩥ – ‘ᩋᨿᩴ ᨸᨶ, ᩈᨾ᩠ᨾ ᩈᩣᩁᨳᩥ, ᨸᩩᩁᩥᩈᩮᩣ ᨠᩥᩴᨠᨲᩮᩣ? ᩈᩦᩈᩴᨸᩥᩔ ᨶ ᨿᨳᩣ ᩋᨬ᩠ᨬᩮᩈᩴ, ᩅᨲ᩠ᨳᩣᨶᩥᨸᩥᩔ ᨶ ᨿᨳᩣ ᩋᨬ᩠ᨬᩮᩈ’ᨶ᩠ᨲᩥ? ‘ᩑᩈᩮᩣ ᨡᩮᩣ, ᨴᩮᩅ, ᨸᨻ᩠ᨻᨩᩥᨲᩮᩣ ᨶᩣᨾᩣ’ᨲᩥ. ‘ᨠᩥᩴ ᨸᨶᩮᩈᩮᩣ, ᩈᨾ᩠ᨾ ᩈᩣᩁᨳᩥ, ᨸᨻ᩠ᨻᨩᩥᨲᩮᩣ ᨶᩣᨾᩣ’ᨲᩥ? ‘ᩑᩈᩮᩣ ᨡᩮᩣ, ᨴᩮᩅ, ᨸᨻ᩠ᨻᨩᩥᨲᩮᩣ ᨶᩣᨾ ᩈᩣᨵᩩ ᨵᨾ᩠ᨾᨧᩁᩥᨿᩣ ᩈᩣᨵᩩ ᩈᨾᨧᩁᩥᨿᩣ [ᩈᨾ᩠ᨾᨧᩁᩥᨿᩣ (ᨠ.)] ᩈᩣᨵᩩ ᨠᩩᩈᩃᨠᩥᩁᩥᨿᩣ [ᨠᩩᩈᩃᨧᩁᩥᨿᩣ (ᩈ᩠ᨿᩣ.)] ᩈᩣᨵᩩ ᨸᩩᨬ᩠ᨬᨠᩥᩁᩥᨿᩣ ᩈᩣᨵᩩ ᩋᩅᩥᩉᩥᩴᩈᩣ ᩈᩣᨵᩩ ᨽᩪᨲᩣᨶᩩᨠᨾ᩠ᨸᩣ’ᨲᩥ. ‘ᩈᩣᨵᩩ ᨡᩮᩣ ᩈᩮᩣ, ᩈᨾ᩠ᨾ ᩈᩣᩁᨳᩥ, ᨸᨻ᩠ᨻᨩᩥᨲᩮᩣ ᨶᩣᨾ, ᩈᩣᨵᩩ ᨵᨾ᩠ᨾᨧᩁᩥᨿᩣ ᩈᩣᨵᩩ ᩈᨾᨧᩁᩥᨿᩣ ᩈᩣᨵᩩ ᨠᩩᩈᩃᨠᩥᩁᩥᨿᩣ ᩈᩣᨵᩩ ᨸᩩᨬ᩠ᨬᨠᩥᩁᩥᨿᩣ ᩈᩣᨵᩩ ᩋᩅᩥᩉᩥᩴᩈᩣ ᩈᩣᨵᩩ ᨽᩪᨲᩣᨶᩩᨠᨾ᩠ᨸᩣ. ᨲᩮᨶ ᩉᩥ, ᩈᨾ᩠ᨾ ᩈᩣᩁᨳᩥ, ᨿᩮᨶ ᩈᩮᩣ ᨸᨻ᩠ᨻᨩᩥᨲᩮᩣ ᨲᩮᨶ ᩁᨳᩴ ᨸᩮᩈᩮᩉᩦ’ᨲᩥ. ‘ᩑᩅᩴ, ᨴᩮᩅᩣ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᩈᩣᩁᨳᩥ ᩅᩥᨸᩔᩥᩔ ᨠᩩᨾᩣᩁᩔ ᨸᨭᩥᩔᩩᨲ᩠ᩅᩣ ᨿᩮᨶ ᩈᩮᩣ ᨸᨻ᩠ᨻᨩᩥᨲᩮᩣ ᨲᩮᨶ ᩁᨳᩴ ᨸᩮᩈᩮᩈᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᨲᩴ ᨸᨻ᩠ᨻᨩᩥᨲᩴ ᩑᨲᨴᩅᩮᩣᨧ – ‘ᨲ᩠ᩅᩴ ᨸᨶ, ᩈᨾ᩠ᨾ, ᨠᩥᩴᨠᨲᩮᩣ, ᩈᩦᩈᨾ᩠ᨸᩥ ᨲᩮ ᨶ ᨿᨳᩣ ᩋᨬ᩠ᨬᩮᩈᩴ, ᩅᨲ᩠ᨳᩣᨶᩥᨸᩥ ᨲᩮ ᨶ ᨿᨳᩣ ᩋᨬ᩠ᨬᩮᩈ’ᨶ᩠ᨲᩥ? ‘ᩋᩉᩴ ᨡᩮᩣ, ᨴᩮᩅ, ᨸᨻ᩠ᨻᨩᩥᨲᩮᩣ ᨶᩣᨾᩣ’ᨲᩥ. ‘ᨠᩥᩴ ᨸᨶ ᨲ᩠ᩅᩴ, ᩈᨾ᩠ᨾ, ᨸᨻ᩠ᨻᨩᩥᨲᩮᩣ ᨶᩣᨾᩣ’ᨲᩥ? ‘ᩋᩉᩴ ᨡᩮᩣ, ᨴᩮᩅ, ᨸᨻ᩠ᨻᨩᩥᨲᩮᩣ ᨶᩣᨾ, ᩈᩣᨵᩩ ᨵᨾ᩠ᨾᨧᩁᩥᨿᩣ ᩈᩣᨵᩩ ᩈᨾᨧᩁᩥᨿᩣ ᩈᩣᨵᩩ ᨠᩩᩈᩃᨠᩥᩁᩥᨿᩣ ᩈᩣᨵᩩ ᨸᩩᨬ᩠ᨬᨠᩥᩁᩥᨿᩣ ᩈᩣᨵᩩ ᩋᩅᩥᩉᩥᩴᩈᩣ ᩈᩣᨵᩩ ᨽᩪᨲᩣᨶᩩᨠᨾ᩠ᨸᩣ’ᨲᩥ. ‘ᩈᩣᨵᩩ ᨡᩮᩣ ᨲ᩠ᩅᩴ, ᩈᨾ᩠ᨾ, ᨸᨻ᩠ᨻᨩᩥᨲᩮᩣ ᨶᩣᨾ ᩈᩣᨵᩩ ᨵᨾ᩠ᨾᨧᩁᩥᨿᩣ ᩈᩣᨵᩩ ᩈᨾᨧᩁᩥᨿᩣ ᩈᩣᨵᩩ ᨠᩩᩈᩃᨠᩥᩁᩥᨿᩣ ᩈᩣᨵᩩ ᨸᩩᨬ᩠ᨬᨠᩥᩁᩥᨿᩣ ᩈᩣᨵᩩ ᩋᩅᩥᩉᩥᩴᩈᩣ ᩈᩣᨵᩩ ᨽᩪᨲᩣᨶᩩᨠᨾ᩠ᨸᩣ’ᨲᩥ.

ᨻᩮᩣᨵᩥᩈᨲ᩠ᨲᨸᨻ᩠ᨻᨩ᩠ᨩᩣ

᪕᪔. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨠᩩᨾᩣᩁᩮᩣ ᩈᩣᩁᨳᩥᩴ ᩌᨾᨶ᩠ᨲᩮᩈᩥ – ‘ᨲᩮᨶ ᩉᩥ, ᩈᨾ᩠ᨾ ᩈᩣᩁᨳᩥ, ᩁᨳᩴ ᩌᨴᩣᨿ ᩍᨲᩮᩣᩅ ᩋᨶ᩠ᨲᩮᨸᩩᩁᩴ ᨸᨧ᩠ᨧᨶᩥᨿ᩠ᨿᩣᩉᩥ. ᩋᩉᩴ ᨸᨶ ᩍᨵᩮᩅ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᩣᨾᩦ’ᨲᩥ. ‘ᩑᩅᩴ, ᨴᩮᩅᩣ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᩈᩣᩁᨳᩥ ᩅᩥᨸᩔᩥᩔ ᨠᩩᨾᩣᩁᩔ ᨸᨭᩥᩔᩩᨲ᩠ᩅᩣ ᩁᨳᩴ ᩌᨴᩣᨿ ᨲᨲᩮᩣᩅ ᩋᨶ᩠ᨲᩮᨸᩩᩁᩴ ᨸᨧ᩠ᨧᨶᩥᨿ᩠ᨿᩣᩈᩥ. ᩅᩥᨸᩔᩦ ᨸᨶ ᨠᩩᨾᩣᩁᩮᩣ ᨲᨲ᩠ᨳᩮᩅ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥ.

ᨾᩉᩣᨩᨶᨠᩣᨿᩋᨶᩩᨸᨻ᩠ᨻᨩ᩠ᨩᩣ

᪕᪕. ‘‘ᩋᩔᩮᩣᩈᩥ ᨡᩮᩣ, ᨽᩥᨠ᩠ᨡᩅᩮ, ᨻᨶ᩠ᨵᩩᨾᨲᩥᨿᩣ ᩁᩣᨩᨵᩣᨶᩥᨿᩣ ᨾᩉᩣᨩᨶᨠᩣᨿᩮᩣ ᨧᨲᩩᩁᩣᩈᩦᨲᩥ ᨸᩣᨱᩈᩉᩔᩣᨶᩥ – ‘ᩅᩥᨸᩔᩦ ᨠᩥᩁ ᨠᩩᨾᩣᩁᩮᩣ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᨲᩮᩣ’ᨲᩥ. ᩈᩩᨲ᩠ᩅᩣᨶ ᨲᩮᩈᩴ ᩑᨲᨴᩉᩮᩣᩈᩥ – ‘ᨶ ᩉᩥ ᨶᩪᨶ ᩈᩮᩣ ᩒᩁᨠᩮᩣ ᨵᨾ᩠ᨾᩅᩥᨶᨿᩮᩣ, ᨶ ᩈᩣ ᩒᩁᨠᩣ [ᩒᩁᩥᨠᩣ (ᩈᩦ. ᩈ᩠ᨿᩣ.)] ᨸᨻ᩠ᨻᨩ᩠ᨩᩣ, ᨿᨲ᩠ᨳ ᩅᩥᨸᩔᩦ ᨠᩩᨾᩣᩁᩮᩣ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᨲᩮᩣ. ᩅᩥᨸᩔᩦᨸᩥ ᨶᩣᨾ ᨠᩩᨾᩣᩁᩮᩣ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᨲᩥ, ᨠᩥᨾᨦ᩠ᨣᩴ [ᨠᩥᨾᨦ᩠ᨣ (ᩈᩦ.)] ᨸᨶ ᨾᨿ’ᨶ᩠ᨲᩥ.

‘‘ᩋᨳ ᨡᩮᩣ, ᩈᩮᩣ ᨽᩥᨠ᩠ᨡᩅᩮ, ᨾᩉᩣᨩᨶᨠᩣᨿᩮᩣ [ᨾᩉᩣᨩᨶᨠᩣᨿᩮᩣ (ᩈ᩠ᨿᩣ.)] ᨧᨲᩩᩁᩣᩈᩦᨲᩥ ᨸᩣᨱᩈᩉᩔᩣᨶᩥ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᩅᩥᨸᩔᩥᩴ ᨻᩮᩣᨵᩥᩈᨲ᩠ᨲᩴ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᨲᩴ ᩋᨶᩩᨸᨻ᩠ᨻᨩᩥᩴᩈᩩ. ᨲᩣᨿ ᩈᩩᨴᩴ, ᨽᩥᨠ᩠ᨡᩅᩮ, ᨸᩁᩥᩈᩣᨿ ᨸᩁᩥᩅᩩᨲᩮᩣ ᩅᩥᨸᩔᩦ ᨻᩮᩣᨵᩥᩈᨲ᩠ᨲᩮᩣ ᨣᩣᨾᨶᩥᨣᨾᨩᨶᨸᨴᩁᩣᨩᨵᩣᨶᩦᩈᩩ ᨧᩣᩁᩥᨠᩴ ᨧᩁᨲᩥ.

᪕᪖. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩁᩉᩮᩣᨣᨲᩔ ᨸᨭᩥᩈᩃ᩠ᩃᩦᨶᩔ ᩑᩅᩴ ᨧᩮᨲᩈᩮᩣ ᨸᩁᩥᩅᩥᨲᨠ᩠ᨠᩮᩣ ᩏᨴᨸᩣᨴᩥ – ‘ᨶ ᨡᩮᩣ ᨾᩮᨲᩴ [ᨶ ᨡᩮᩣ ᨸᨶᩮᨲᩴ (ᩈ᩠ᨿᩣ.)] ᨸᨲᩥᩁᩪᨸᩴ ᨿᩮᩣᩉᩴ ᩌᨠᩥᨱ᩠ᨱᩮᩣ ᩅᩥᩉᩁᩣᨾᩥ, ᨿᩴᨶᩪᨶᩣᩉᩴ ᩑᨠᩮᩣ ᨣᨱᨾ᩠ᩉᩣ ᩅᩪᨸᨠᨭ᩠ᨮᩮᩣ ᩅᩥᩉᩁᩮᨿ᩠ᨿ’ᨶ᩠ᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨻᩮᩣᨵᩥᩈᨲ᩠ᨲᩮᩣ ᩋᨸᩁᩮᨶ ᩈᨾᨿᩮᨶ ᩑᨠᩮᩣ ᨣᨱᨾ᩠ᩉᩣ ᩅᩪᨸᨠᨭ᩠ᨮᩮᩣ ᩅᩥᩉᩣᩈᩥ, ᩋᨬ᩠ᨬᩮᨶᩮᩅ ᨲᩣᨶᩥ ᨧᨲᩩᩁᩣᩈᩦᨲᩥ ᨸᨻ᩠ᨻᨩᩥᨲᩈᩉᩔᩣᨶᩥ ᩋᨣᨾᩴᩈᩩ, ᩋᨬ᩠ᨬᩮᨶ ᨾᨣ᩠ᨣᩮᨶ ᩅᩥᨸᩔᩦ ᨻᩮᩣᨵᩥᩈᨲ᩠ᨲᩮᩣ.

ᨻᩮᩣᨵᩥᩈᨲ᩠ᨲᩋᨽᩥᨶᩥᩅᩮᩈᩮᩣ

᪕᪗. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩅᩣᩈᩪᨸᨣᨲᩔ ᩁᩉᩮᩣᨣᨲᩔ ᨸᨭᩥᩈᩃ᩠ᩃᩦᨶᩔ ᩑᩅᩴ ᨧᩮᨲᩈᩮᩣ ᨸᩁᩥᩅᩥᨲᨠ᩠ᨠᩮᩣ ᩏᨴᨸᩣᨴᩥ – ‘ᨠᩥᨧ᩠ᨨᩴ ᩅᨲᩣᨿᩴ ᩃᩮᩣᨠᩮᩣ ᩌᨸᨶ᩠ᨶᩮᩣ, ᨩᩣᨿᨲᩥ ᨧ ᨩᩦᨿᨲᩥ ᨧ ᨾᩦᨿᨲᩥ ᨧ [ᨩᩥᨿ᩠ᨿᨲᩥ ᨧ ᨾᩥᨿ᩠ᨿᨲᩥ ᨧ (ᨠ.)] ᨧᩅᨲᩥ ᨧ ᩏᨸᨸᨩ᩠ᨩᨲᩥ ᨧ, ᩋᨳ ᨧ ᨸᨶᩥᨾᩔ ᨴᩩᨠ᩠ᨡᩔ ᨶᩥᩔᩁᨱᩴ ᨶᨸ᩠ᨸᨩᩣᨶᩣᨲᩥ ᨩᩁᩣᨾᩁᨱᩔ, ᨠᩩᨴᩣᩔᩩ ᨶᩣᨾ ᩍᨾᩔ ᨴᩩᨠ᩠ᨡᩔ ᨶᩥᩔᩁᨱᩴ ᨸᨬ᩠ᨬᩣᨿᩥᩔᨲᩥ ᨩᩁᩣᨾᩁᨱᩔᩣ’ᨲᩥ?

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩈᨲᩥ ᨩᩁᩣᨾᩁᨱᩴ ᩉᩮᩣᨲᩥ, ᨠᩥᩴᨸᨧ᩠ᨧᨿᩣ ᨩᩁᩣᨾᩁᨱ’ᨶ᩠ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᨩᩣᨲᩥᨿᩣ ᨡᩮᩣ ᩈᨲᩥ ᨩᩁᩣᨾᩁᨱᩴ ᩉᩮᩣᨲᩥ, ᨩᩣᨲᩥᨸᨧ᩠ᨧᨿᩣ ᨩᩁᩣᨾᩁᨱ’ᨶ᩠ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩈᨲᩥ ᨩᩣᨲᩥ ᩉᩮᩣᨲᩥ, ᨠᩥᩴᨸᨧ᩠ᨧᨿᩣ ᨩᩣᨲᩦ’ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᨽᩅᩮ ᨡᩮᩣ ᩈᨲᩥ ᨩᩣᨲᩥ ᩉᩮᩣᨲᩥ, ᨽᩅᨸᨧ᩠ᨧᨿᩣ ᨩᩣᨲᩦ’ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩈᨲᩥ ᨽᩅᩮᩣ ᩉᩮᩣᨲᩥ, ᨠᩥᩴᨸᨧ᩠ᨧᨿᩣ ᨽᩅᩮᩣ’ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᩏᨸᩣᨴᩣᨶᩮ ᨡᩮᩣ ᩈᨲᩥ ᨽᩅᩮᩣ ᩉᩮᩣᨲᩥ, ᩏᨸᩣᨴᩣᨶᨸᨧ᩠ᨧᨿᩣ ᨽᩅᩮᩣ’ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩈᨲᩥ ᩏᨸᩣᨴᩣᨶᩴ ᩉᩮᩣᨲᩥ, ᨠᩥᩴᨸᨧ᩠ᨧᨿᩣ ᩏᨸᩣᨴᩣᨶ’ᨶ᩠ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᨲᨱ᩠ᩉᩣᨿ ᨡᩮᩣ ᩈᨲᩥ ᩏᨸᩣᨴᩣᨶᩴ ᩉᩮᩣᨲᩥ, ᨲᨱ᩠ᩉᩣᨸᨧ᩠ᨧᨿᩣ ᩏᨸᩣᨴᩣᨶ’ᨶ᩠ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩈᨲᩥ ᨲᨱ᩠ᩉᩣ ᩉᩮᩣᨲᩥ, ᨠᩥᩴᨸᨧ᩠ᨧᨿᩣ ᨲᨱ᩠ᩉᩣ’ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᩅᩮᨴᨶᩣᨿ ᨡᩮᩣ ᩈᨲᩥ ᨲᨱ᩠ᩉᩣ ᩉᩮᩣᨲᩥ, ᩅᩮᨴᨶᩣᨸᨧ᩠ᨧᨿᩣ ᨲᨱ᩠ᩉᩣ’ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩈᨲᩥ ᩅᩮᨴᨶᩣ ᩉᩮᩣᨲᩥ, ᨠᩥᩴᨸᨧ᩠ᨧᨿᩣ ᩅᩮᨴᨶᩣ’ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᨹᩔᩮ ᨡᩮᩣ ᩈᨲᩥ ᩅᩮᨴᨶᩣ ᩉᩮᩣᨲᩥ, ᨹᩔᨸᨧ᩠ᨧᨿᩣ ᩅᩮᨴᨶᩣ’ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩈᨲᩥ ᨹᩔᩮᩣ ᩉᩮᩣᨲᩥ, ᨠᩥᩴᨸᨧ᩠ᨧᨿᩣ ᨹᩔᩮᩣ’ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᩈᩊᩣᨿᨲᨶᩮ ᨡᩮᩣ ᩈᨲᩥ ᨹᩔᩮᩣ ᩉᩮᩣᨲᩥ, ᩈᩊᩣᨿᨲᨶᨸᨧ᩠ᨧᨿᩣ ᨹᩔᩮᩣ’ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩈᨲᩥ ᩈᩊᩣᨿᨲᨶᩴ ᩉᩮᩣᨲᩥ, ᨠᩥᩴᨸᨧ᩠ᨧᨿᩣ ᩈᩊᩣᨿᨲᨶ’ᨶ᩠ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᨶᩣᨾᩁᩪᨸᩮ ᨡᩮᩣ ᩈᨲᩥ ᩈᩊᩣᨿᨲᨶᩴ ᩉᩮᩣᨲᩥ, ᨶᩣᨾᩁᩪᨸᨸᨧ᩠ᨧᨿᩣ ᩈᩊᩣᨿᨲᨶ’ᨶ᩠ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩈᨲᩥ ᨶᩣᨾᩁᩪᨸᩴ ᩉᩮᩣᨲᩥ, ᨠᩥᩴᨸᨧ᩠ᨧᨿᩣ ᨶᩣᨾᩁᩪᨸ’ᨶ᩠ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᩅᩥᨬ᩠ᨬᩣᨱᩮ ᨡᩮᩣ ᩈᨲᩥ ᨶᩣᨾᩁᩪᨸᩴ ᩉᩮᩣᨲᩥ, ᩅᩥᨬ᩠ᨬᩣᨱᨸᨧ᩠ᨧᨿᩣ ᨶᩣᨾᩁᩪᨸ’ᨶ᩠ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩈᨲᩥ ᩅᩥᨬ᩠ᨬᩣᨱᩴ ᩉᩮᩣᨲᩥ, ᨠᩥᩴᨸᨧ᩠ᨧᨿᩣ ᩅᩥᨬ᩠ᨬᩣᨱ’ᨶ᩠ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᨶᩣᨾᩁᩪᨸᩮ ᨡᩮᩣ ᩈᨲᩥ ᩅᩥᨬ᩠ᨬᩣᨱᩴ ᩉᩮᩣᨲᩥ, ᨶᩣᨾᩁᩪᨸᨸᨧ᩠ᨧᨿᩣ ᩅᩥᨬ᩠ᨬᩣᨱ’ᨶ᩠ᨲᩥ.

᪕᪘. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨸᨧ᩠ᨧᩩᨴᩣᩅᨲ᩠ᨲᨲᩥ ᨡᩮᩣ ᩍᨴᩴ ᩅᩥᨬ᩠ᨬᩣᨱᩴ ᨶᩣᨾᩁᩪᨸᨾ᩠ᩉᩣ, ᨶᩣᨸᩁᩴ ᨣᨧ᩠ᨨᨲᩥ. ᩑᨲ᩠ᨲᩣᩅᨲᩣ ᨩᩣᨿᩮᨳ ᩅᩣ ᨩᩥᨿ᩠ᨿᩮᨳ ᩅᩣ ᨾᩥᨿ᩠ᨿᩮᨳ ᩅᩣ ᨧᩅᩮᨳ ᩅᩣ ᩏᨸᨸᨩ᩠ᨩᩮᨳ ᩅᩣ, ᨿᨴᩥᨴᩴ ᨶᩣᨾᩁᩪᨸᨸᨧ᩠ᨧᨿᩣ ᩅᩥᨬ᩠ᨬᩣᨱᩴ, ᩅᩥᨬ᩠ᨬᩣᨱᨸᨧ᩠ᨧᨿᩣ ᨶᩣᨾᩁᩪᨸᩴ, ᨶᩣᨾᩁᩪᨸᨸᨧ᩠ᨧᨿᩣ ᩈᩊᩣᨿᨲᨶᩴ, ᩈᩊᩣᨿᨲᨶᨸᨧ᩠ᨧᨿᩣ ᨹᩔᩮᩣ, ᨹᩔᨸᨧ᩠ᨧᨿᩣ ᩅᩮᨴᨶᩣ, ᩅᩮᨴᨶᩣᨸᨧ᩠ᨧᨿᩣ ᨲᨱ᩠ᩉᩣ, ᨲᨱ᩠ᩉᩣᨸᨧ᩠ᨧᨿᩣ ᩏᨸᩣᨴᩣᨶᩴ, ᩏᨸᩣᨴᩣᨶᨸᨧ᩠ᨧᨿᩣ ᨽᩅᩮᩣ, ᨽᩅᨸᨧ᩠ᨧᨿᩣ ᨩᩣᨲᩥ, ᨩᩣᨲᩥᨸᨧ᩠ᨧᨿᩣ ᨩᩁᩣᨾᩁᨱᩴ ᩈᩮᩣᨠᨸᩁᩥᨴᩮᩅᨴᩩᨠ᩠ᨡᨴᩮᩣᨾᨶᩔᩩᨸᩣᨿᩣᩈᩣ ᩈᨾ᩠ᨽᩅᨶ᩠ᨲᩥ. ᩑᩅᨾᩮᨲᩔ ᨠᩮᩅᩃᩔ ᨴᩩᨠ᩠ᨡᨠ᩠ᨡᨶ᩠ᨵᩔ ᩈᨾᩩᨴᨿᩮᩣ ᩉᩮᩣᨲᩥ’.

᪕᪙. ‘‘‘ᩈᨾᩩᨴᨿᩮᩣ ᩈᨾᩩᨴᨿᩮᩣ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨸᩩᨻ᩠ᨻᩮ ᩋᨶᨶᩩᩔᩩᨲᩮᩈᩩ ᨵᨾ᩠ᨾᩮᩈᩩ ᨧᨠ᩠ᨡᩩᩴ ᩏᨴᨸᩣᨴᩥ, ᨬᩣᨱᩴ ᩏᨴᨸᩣᨴᩥ, ᨸᨬ᩠ᨬᩣ ᩏᨴᨸᩣᨴᩥ, ᩅᩥᨩ᩠ᨩᩣ ᩏᨴᨸᩣᨴᩥ, ᩌᩃᩮᩣᨠᩮᩣ ᩏᨴᨸᩣᨴᩥ.

᪖᪐. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩋᩈᨲᩥ ᨩᩁᩣᨾᩁᨱᩴ ᨶ ᩉᩮᩣᨲᩥ, ᨠᩥᩔ ᨶᩥᩁᩮᩣᨵᩣ ᨩᩁᩣᨾᩁᨱᨶᩥᩁᩮᩣᨵᩮᩣ’ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᨩᩣᨲᩥᨿᩣ ᨡᩮᩣ ᩋᩈᨲᩥ ᨩᩁᩣᨾᩁᨱᩴ ᨶ ᩉᩮᩣᨲᩥ, ᨩᩣᨲᩥᨶᩥᩁᩮᩣᨵᩣ ᨩᩁᩣᨾᩁᨱᨶᩥᩁᩮᩣᨵᩮᩣ’ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩋᩈᨲᩥ ᨩᩣᨲᩥ ᨶ ᩉᩮᩣᨲᩥ, ᨠᩥᩔ ᨶᩥᩁᩮᩣᨵᩣ ᨩᩣᨲᩥᨶᩥᩁᩮᩣᨵᩮᩣ’ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᨽᩅᩮ ᨡᩮᩣ ᩋᩈᨲᩥ ᨩᩣᨲᩥ ᨶ ᩉᩮᩣᨲᩥ, ᨽᩅᨶᩥᩁᩮᩣᨵᩣ ᨩᩣᨲᩥᨶᩥᩁᩮᩣᨵᩮᩣ’ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩋᩈᨲᩥ ᨽᩅᩮᩣ ᨶ ᩉᩮᩣᨲᩥ, ᨠᩥᩔ ᨶᩥᩁᩮᩣᨵᩣ ᨽᩅᨶᩥᩁᩮᩣᨵᩮᩣ’ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᩏᨸᩣᨴᩣᨶᩮ ᨡᩮᩣ ᩋᩈᨲᩥ ᨽᩅᩮᩣ ᨶ ᩉᩮᩣᨲᩥ, ᩏᨸᩣᨴᩣᨶᨶᩥᩁᩮᩣᨵᩣ ᨽᩅᨶᩥᩁᩮᩣᨵᩮᩣ’ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩋᩈᨲᩥ ᩏᨸᩣᨴᩣᨶᩴ ᨶ ᩉᩮᩣᨲᩥ, ᨠᩥᩔ ᨶᩥᩁᩮᩣᨵᩣ ᩏᨸᩣᨴᩣᨶᨶᩥᩁᩮᩣᨵᩮᩣ’ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᨲᨱ᩠ᩉᩣᨿ ᨡᩮᩣ ᩋᩈᨲᩥ ᩏᨸᩣᨴᩣᨶᩴ ᨶ ᩉᩮᩣᨲᩥ, ᨲᨱ᩠ᩉᩣᨶᩥᩁᩮᩣᨵᩣ ᩏᨸᩣᨴᩣᨶᨶᩥᩁᩮᩣᨵᩮᩣ’ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩋᩈᨲᩥ ᨲᨱ᩠ᩉᩣ ᨶ ᩉᩮᩣᨲᩥ, ᨠᩥᩔ ᨶᩥᩁᩮᩣᨵᩣ ᨲᨱ᩠ᩉᩣᨶᩥᩁᩮᩣᨵᩮᩣ’ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᩅᩮᨴᨶᩣᨿ ᨡᩮᩣ ᩋᩈᨲᩥ ᨲᨱ᩠ᩉᩣ ᨶ ᩉᩮᩣᨲᩥ, ᩅᩮᨴᨶᩣᨶᩥᩁᩮᩣᨵᩣ ᨲᨱ᩠ᩉᩣᨶᩥᩁᩮᩣᨵᩮᩣ’ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩋᩈᨲᩥ ᩅᩮᨴᨶᩣ ᨶ ᩉᩮᩣᨲᩥ, ᨠᩥᩔ ᨶᩥᩁᩮᩣᨵᩣ ᩅᩮᨴᨶᩣᨶᩥᩁᩮᩣᨵᩮᩣ’ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᨹᩔᩮ ᨡᩮᩣ ᩋᩈᨲᩥ ᩅᩮᨴᨶᩣ ᨶ ᩉᩮᩣᨲᩥ, ᨹᩔᨶᩥᩁᩮᩣᨵᩣ ᩅᩮᨴᨶᩣᨶᩥᩁᩮᩣᨵᩮᩣ’ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩋᩈᨲᩥ ᨹᩔᩮᩣ ᨶ ᩉᩮᩣᨲᩥ, ᨠᩥᩔ ᨶᩥᩁᩮᩣᨵᩣ ᨹᩔᨶᩥᩁᩮᩣᨵᩮᩣ’ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᩈᩊᩣᨿᨲᨶᩮ ᨡᩮᩣ ᩋᩈᨲᩥ ᨹᩔᩮᩣ ᨶ ᩉᩮᩣᨲᩥ, ᩈᩊᩣᨿᨲᨶᨶᩥᩁᩮᩣᨵᩣ ᨹᩔᨶᩥᩁᩮᩣᨵᩮᩣ’ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩋᩈᨲᩥ ᩈᩊᩣᨿᨲᨶᩴ ᨶ ᩉᩮᩣᨲᩥ, ᨠᩥᩔ ᨶᩥᩁᩮᩣᨵᩣ ᩈᩊᩣᨿᨲᨶᨶᩥᩁᩮᩣᨵᩮᩣ’ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᨶᩣᨾᩁᩪᨸᩮ ᨡᩮᩣ ᩋᩈᨲᩥ ᩈᩊᩣᨿᨲᨶᩴ ᨶ ᩉᩮᩣᨲᩥ, ᨶᩣᨾᩁᩪᨸᨶᩥᩁᩮᩣᨵᩣ ᩈᩊᩣᨿᨲᨶᨶᩥᩁᩮᩣᨵᩮᩣ’ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩋᩈᨲᩥ ᨶᩣᨾᩁᩪᨸᩴ ᨶ ᩉᩮᩣᨲᩥ, ᨠᩥᩔ ᨶᩥᩁᩮᩣᨵᩣ ᨶᩣᨾᩁᩪᨸᨶᩥᩁᩮᩣᨵᩮᩣ’ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᩅᩥᨬ᩠ᨬᩣᨱᩮ ᨡᩮᩣ ᩋᩈᨲᩥ ᨶᩣᨾᩁᩪᨸᩴ ᨶ ᩉᩮᩣᨲᩥ, ᩅᩥᨬ᩠ᨬᩣᨱᨶᩥᩁᩮᩣᨵᩣ ᨶᩣᨾᩁᩪᨸᨶᩥᩁᩮᩣᨵᩮᩣ’ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᨠᩥᨾ᩠ᩉᩥ ᨶᩩ ᨡᩮᩣ ᩋᩈᨲᩥ ᩅᩥᨬ᩠ᨬᩣᨱᩴ ᨶ ᩉᩮᩣᨲᩥ, ᨠᩥᩔ ᨶᩥᩁᩮᩣᨵᩣ ᩅᩥᨬ᩠ᨬᩣᨱᨶᩥᩁᩮᩣᨵᩮᩣ’ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩣ ᩋᩉᩩ ᨸᨬ᩠ᨬᩣᨿ ᩋᨽᩥᩈᨾᨿᩮᩣ – ‘ᨶᩣᨾᩁᩪᨸᩮ ᨡᩮᩣ ᩋᩈᨲᩥ ᩅᩥᨬ᩠ᨬᩣᨱᩴ ᨶ ᩉᩮᩣᨲᩥ, ᨶᩣᨾᩁᩪᨸᨶᩥᩁᩮᩣᨵᩣ ᩅᩥᨬ᩠ᨬᩣᨱᨶᩥᩁᩮᩣᨵᩮᩣ’ᨲᩥ.

᪖᪑. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᩑᨲᨴᩉᩮᩣᩈᩥ – ‘ᩋᨵᩥᨣᨲᩮᩣ ᨡᩮᩣ ᨾ᩠ᨿᩣᨿᩴ ᨾᨣ᩠ᨣᩮᩣ ᩈᨾ᩠ᨻᩮᩣᨵᩣᨿ ᨿᨴᩥᨴᩴ – ᨶᩣᨾᩁᩪᨸᨶᩥᩁᩮᩣᨵᩣ ᩅᩥᨬ᩠ᨬᩣᨱᨶᩥᩁᩮᩣᨵᩮᩣ, ᩅᩥᨬ᩠ᨬᩣᨱᨶᩥᩁᩮᩣᨵᩣ ᨶᩣᨾᩁᩪᨸᨶᩥᩁᩮᩣᨵᩮᩣ, ᨶᩣᨾᩁᩪᨸᨶᩥᩁᩮᩣᨵᩣ ᩈᩊᩣᨿᨲᨶᨶᩥᩁᩮᩣᨵᩮᩣ, ᩈᩊᩣᨿᨲᨶᨶᩥᩁᩮᩣᨵᩣ ᨹᩔᨶᩥᩁᩮᩣᨵᩮᩣ, ᨹᩔᨶᩥᩁᩮᩣᨵᩣ ᩅᩮᨴᨶᩣᨶᩥᩁᩮᩣᨵᩮᩣ, ᩅᩮᨴᨶᩣᨶᩥᩁᩮᩣᨵᩣ ᨲᨱ᩠ᩉᩣᨶᩥᩁᩮᩣᨵᩮᩣ, ᨲᨱ᩠ᩉᩣᨶᩥᩁᩮᩣᨵᩣ ᩏᨸᩣᨴᩣᨶᨶᩥᩁᩮᩣᨵᩮᩣ, ᩏᨸᩣᨴᩣᨶᨶᩥᩁᩮᩣᨵᩣ ᨽᩅᨶᩥᩁᩮᩣᨵᩮᩣ, ᨽᩅᨶᩥᩁᩮᩣᨵᩣ ᨩᩣᨲᩥᨶᩥᩁᩮᩣᨵᩮᩣ, ᨩᩣᨲᩥᨶᩥᩁᩮᩣᨵᩣ ᨩᩁᩣᨾᩁᨱᩴ ᩈᩮᩣᨠᨸᩁᩥᨴᩮᩅᨴᩩᨠ᩠ᨡᨴᩮᩣᨾᨶᩔᩩᨸᩣᨿᩣᩈᩣ ᨶᩥᩁᩩᨩ᩠ᨫᨶ᩠ᨲᩥ. ᩑᩅᨾᩮᨲᩔ ᨠᩮᩅᩃᩔ ᨴᩩᨠ᩠ᨡᨠ᩠ᨡᨶ᩠ᨵᩔ ᨶᩥᩁᩮᩣᨵᩮᩣ ᩉᩮᩣᨲᩥ’.

᪖᪒. ‘‘‘ᨶᩥᩁᩮᩣᨵᩮᩣ ᨶᩥᩁᩮᩣᨵᩮᩣ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨻᩮᩣᨵᩥᩈᨲ᩠ᨲᩔ ᨸᩩᨻ᩠ᨻᩮ ᩋᨶᨶᩩᩔᩩᨲᩮᩈᩩ ᨵᨾ᩠ᨾᩮᩈᩩ ᨧᨠ᩠ᨡᩩᩴ ᩏᨴᨸᩣᨴᩥ, ᨬᩣᨱᩴ ᩏᨴᨸᩣᨴᩥ, ᨸᨬ᩠ᨬᩣ ᩏᨴᨸᩣᨴᩥ, ᩅᩥᨩ᩠ᨩᩣ ᩏᨴᨸᩣᨴᩥ, ᩌᩃᩮᩣᨠᩮᩣ ᩏᨴᨸᩣᨴᩥ.

᪖᪓. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨻᩮᩣᨵᩥᩈᨲ᩠ᨲᩮᩣ ᩋᨸᩁᩮᨶ ᩈᨾᨿᩮᨶ ᨸᨬ᩠ᨧᩈᩩ ᩏᨸᩣᨴᩣᨶᨠ᩠ᨡᨶ᩠ᨵᩮᩈᩩ ᩏᨴᨿᨻ᩠ᨻᨿᩣᨶᩩᨸᩔᩦ ᩅᩥᩉᩣᩈᩥ – ‘ᩍᨲᩥ ᩁᩪᨸᩴ, ᩍᨲᩥ ᩁᩪᨸᩔ ᩈᨾᩩᨴᨿᩮᩣ, ᩍᨲᩥ ᩁᩪᨸᩔ ᩋᨲ᩠ᨳᨦ᩠ᨣᨾᩮᩣ; ᩍᨲᩥ ᩅᩮᨴᨶᩣ, ᩍᨲᩥ ᩅᩮᨴᨶᩣᨿ ᩈᨾᩩᨴᨿᩮᩣ, ᩍᨲᩥ ᩅᩮᨴᨶᩣᨿ ᩋᨲ᩠ᨳᨦ᩠ᨣᨾᩮᩣ; ᩍᨲᩥ ᩈᨬ᩠ᨬᩣ, ᩍᨲᩥ ᩈᨬ᩠ᨬᩣᨿ ᩈᨾᩩᨴᨿᩮᩣ, ᩍᨲᩥ ᩈᨬ᩠ᨬᩣᨿ ᩋᨲ᩠ᨳᨦ᩠ᨣᨾᩮᩣ; ᩍᨲᩥ ᩈᨦ᩠ᨡᩣᩁᩣ, ᩍᨲᩥ ᩈᨦ᩠ᨡᩣᩁᩣᨶᩴ ᩈᨾᩩᨴᨿᩮᩣ, ᩍᨲᩥ ᩈᨦ᩠ᨡᩣᩁᩣᨶᩴ ᩋᨲ᩠ᨳᨦ᩠ᨣᨾᩮᩣ; ᩍᨲᩥ ᩅᩥᨬ᩠ᨬᩣᨱᩴ, ᩍᨲᩥ ᩅᩥᨬ᩠ᨬᩣᨱᩔ ᩈᨾᩩᨴᨿᩮᩣ, ᩍᨲᩥ ᩅᩥᨬ᩠ᨬᩣᨱᩔ ᩋᨲ᩠ᨳᨦ᩠ᨣᨾᩮᩣ’ᨲᩥ, ᨲᩔ ᨸᨬ᩠ᨧᩈᩩ ᩏᨸᩣᨴᩣᨶᨠ᩠ᨡᨶ᩠ᨵᩮᩈᩩ ᩏᨴᨿᨻ᩠ᨻᨿᩣᨶᩩᨸᩔᩥᨶᩮᩣ ᩅᩥᩉᩁᨲᩮᩣ ᨶ ᨧᩥᩁᩔᩮᩅ ᩋᨶᩩᨸᩣᨴᩣᨿ ᩌᩈᩅᩮᩉᩥ ᨧᩥᨲ᩠ᨲᩴ ᩅᩥᨾᩩᨧ᩠ᨧᩦ’’ᨲᩥ.

ᨴᩩᨲᩥᨿᨽᩣᨱᩅᩣᩁᩮᩣ.

ᨻᩕᩉ᩠ᨾᨿᩣᨧᨶᨠᨳᩣ

᪖᪔. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩑᨲᨴᩉᩮᩣᩈᩥ – ‘ᨿᩴᨶᩪᨶᩣᩉᩴ ᨵᨾ᩠ᨾᩴ ᨴᩮᩈᩮᨿ᩠ᨿ’ᨶ᩠ᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩑᨲᨴᩉᩮᩣᩈᩥ – ‘ᩋᨵᩥᨣᨲᩮᩣ ᨡᩮᩣ ᨾ᩠ᨿᩣᨿᩴ ᨵᨾ᩠ᨾᩮᩣ ᨣᨾ᩠ᨽᩦᩁᩮᩣ ᨴᩩᨴ᩠ᨴᩈᩮᩣ ᨴᩩᩁᨶᩩᨻᩮᩣᨵᩮᩣ ᩈᨶ᩠ᨲᩮᩣ ᨸᨱᩦᨲᩮᩣ ᩋᨲᨠ᩠ᨠᩣᩅᨧᩁᩮᩣ ᨶᩥᨸᩩᨱᩮᩣ ᨸᨱ᩠ᨯᩥᨲᩅᩮᨴᨶᩦᨿᩮᩣ. ᩌᩃᨿᩁᩣᨾᩣ ᨡᩮᩣ ᨸᨶᩣᨿᩴ ᨸᨩᩣ ᩌᩃᨿᩁᨲᩣ ᩌᩃᨿᩈᨾ᩠ᨾᩩᨴᩥᨲᩣ. ᩌᩃᨿᩁᩣᨾᩣᨿ ᨡᩮᩣ ᨸᨶ ᨸᨩᩣᨿ ᩌᩃᨿᩁᨲᩣᨿ ᩌᩃᨿᩈᨾ᩠ᨾᩩᨴᩥᨲᩣᨿ ᨴᩩᨴ᩠ᨴᩈᩴ ᩍᨴᩴ ᨮᩣᨶᩴ ᨿᨴᩥᨴᩴ ᩍᨴᨸ᩠ᨸᨧ᩠ᨧᨿᨲᩣᨸᨭᩥᨧ᩠ᨧᩈᨾᩩᨸ᩠ᨸᩣᨴᩮᩣ. ᩍᨴᨾ᩠ᨸᩥ ᨡᩮᩣ ᨮᩣᨶᩴ ᨴᩩᨴ᩠ᨴᩈᩴ ᨿᨴᩥᨴᩴ ᩈᨻ᩠ᨻᩈᨦ᩠ᨡᩣᩁᩈᨾᨳᩮᩣ ᩈᨻ᩠ᨻᩪᨸᨵᩥᨸᨭᩥᨶᩥᩔᨣ᩠ᨣᩮᩣ ᨲᨱ᩠ᩉᩣᨠ᩠ᨡᨿᩮᩣ ᩅᩥᩁᩣᨣᩮᩣ ᨶᩥᩁᩮᩣᨵᩮᩣ ᨶᩥᨻ᩠ᨻᩣᨶᩴ. ᩋᩉᨬ᩠ᨧᩮᩅ ᨡᩮᩣ ᨸᨶ ᨵᨾ᩠ᨾᩴ ᨴᩮᩈᩮᨿ᩠ᨿᩴ, ᨸᩁᩮ ᨧ ᨾᩮ ᨶ ᩌᨩᩣᨶᩮᨿ᩠ᨿᩩᩴ; ᩈᩮᩣ ᨾᨾᩔ ᨠᩥᩃᨾᨳᩮᩣ, ᩈᩣ ᨾᨾᩔ ᩅᩥᩉᩮᩈᩣ’ᨲᩥ.

᪖᪕. ‘‘ᩋᨸᩥᩔᩩ, ᨽᩥᨠ᩠ᨡᩅᩮ, ᩅᩥᨸᩔᩥᩴ ᨽᨣᩅᨶ᩠ᨲᩴ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᩍᨾᩣ ᩋᨶᨧ᩠ᨨᩁᩥᨿᩣ ᨣᩣᨳᩣᨿᩮᩣ ᨸᨭᩥᨽᩴᩈᩩ ᨸᩩᨻ᩠ᨻᩮ ᩋᩔᩩᨲᨸᩩᨻ᩠ᨻᩣ –

‘ᨠᩥᨧ᩠ᨨᩮᨶ ᨾᩮ ᩋᨵᩥᨣᨲᩴ, ᩉᩃᩴ ᨴᩣᨶᩥ ᨸᨠᩣᩈᩥᨲᩩᩴ;

ᩁᩣᨣᨴᩮᩣᩈᨸᩁᩮᨲᩮᩉᩥ, ᨶᩣᨿᩴ ᨵᨾ᩠ᨾᩮᩣ ᩈᩩᩈᨾ᩠ᨻᩩᨵᩮᩣ.

‘ᨸᨭᩥᩈᩮᩣᨲᨣᩣᨾᩥᩴ ᨶᩥᨸᩩᨱᩴ, ᨣᨾ᩠ᨽᩦᩁᩴ ᨴᩩᨴ᩠ᨴᩈᩴ ᩋᨱᩩᩴ;

ᩁᩣᨣᩁᨲ᩠ᨲᩣ ᨶ ᨴᨠ᩠ᨡᨶ᩠ᨲᩥ, ᨲᨾᩮᩣᨡᨶ᩠ᨵᩮᨶ ᩌᩅᩩᨭᩣ’ᨲᩥ.

‘‘ᩍᨲᩥᩉ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨸᨭᩥᩈᨬ᩠ᨧᩥᨠ᩠ᨡᨲᩮᩣ ᩋᨸ᩠ᨸᩮᩣᩔᩩᨠ᩠ᨠᨲᩣᨿ ᨧᩥᨲ᩠ᨲᩴ ᨶᨾᩥ, ᨶᩮᩣ ᨵᨾ᩠ᨾᨴᩮᩈᨶᩣᨿ.

᪖᪖. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩋᨬ᩠ᨬᨲᩁᩔ ᨾᩉᩣᨻᩕᩉ᩠ᨾᩩᨶᩮᩣ ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨧᩮᨲᩈᩣ ᨧᩮᨲᩮᩣᨸᩁᩥᩅᩥᨲᨠ᩠ᨠᨾᨬ᩠ᨬᩣᨿ ᩑᨲᨴᩉᩮᩣᩈᩥ – ‘ᨶᩔᨲᩥ ᩅᨲ ᨽᩮᩣ ᩃᩮᩣᨠᩮᩣ, ᩅᩥᨶᩔᨲᩥ ᩅᨲ ᨽᩮᩣ ᩃᩮᩣᨠᩮᩣ, ᨿᨲᩕ ᩉᩥ ᨶᩣᨾ ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩋᨸ᩠ᨸᩮᩣᩔᩩᨠ᩠ᨠᨲᩣᨿ ᨧᩥᨲ᩠ᨲᩴ ᨶᨾᨲᩥ [ᨶᨾᩥ (ᩈ᩠ᨿᩣ. ᨠ.), ᨶᨾᩥᩔᨲᩥ (?)], ᨶᩮᩣ ᨵᨾ᩠ᨾᨴᩮᩈᨶᩣᨿᩣ’ᨲᩥ. ᩋᨳ ᨡᩮᩣ ᩈᩮᩣ, ᨽᩥᨠ᩠ᨡᩅᩮ, ᨾᩉᩣᨻᩕᩉ᩠ᨾᩣ ᩈᩮᨿ᩠ᨿᨳᩣᨸᩥ ᨶᩣᨾ ᨻᩃᩅᩣ ᨸᩩᩁᩥᩈᩮᩣ ᩈᨾᩥᨬ᩠ᨩᩥᨲᩴ ᩅᩣ ᨻᩣᩉᩴ ᨸᩈᩣᩁᩮᨿ᩠ᨿ, ᨸᩈᩣᩁᩥᨲᩴ ᩅᩣ ᨻᩣᩉᩴ ᩈᨾᩥᨬ᩠ᨩᩮᨿ᩠ᨿ; ᩑᩅᨾᩮᩅ ᨻᩕᩉ᩠ᨾᩃᩮᩣᨠᩮ ᩋᨶ᩠ᨲᩁᩉᩥᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨸᩩᩁᨲᩮᩣ ᨸᩣᨲᩩᩁᩉᩮᩣᩈᩥ. ᩋᨳ ᨡᩮᩣ ᩈᩮᩣ, ᨽᩥᨠ᩠ᨡᩅᩮ, ᨾᩉᩣᨻᩕᩉ᩠ᨾᩣ ᩑᨠᩴᩈᩴ ᩏᨲ᩠ᨲᩁᩣᩈᨦ᩠ᨣᩴ ᨠᩁᩥᨲ᩠ᩅᩣ ᨴᨠ᩠ᨡᩥᨱᩴ ᨩᩣᨱᩩᨾᨱ᩠ᨯᩃᩴ ᨸᨳᩅᩥᨿᩴ ᨶᩥᩉᨶ᩠ᨲ᩠ᩅᩣ [ᨶᩥᨴᩉᨶ᩠ᨲᩮᩣ (ᩈ᩠ᨿᩣ.)] ᨿᩮᨶ ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨲᩮᨶᨬ᩠ᨩᩃᩥᩴ ᨸᨱᩣᨾᩮᨲ᩠ᩅᩣ ᩅᩥᨸᩔᩥᩴ ᨽᨣᩅᨶ᩠ᨲᩴ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᩑᨲᨴᩅᩮᩣᨧ – ‘ᨴᩮᩈᩮᨲᩩ, ᨽᨶ᩠ᨲᩮ, ᨽᨣᩅᩣ ᨵᨾ᩠ᨾᩴ, ᨴᩮᩈᩮᨲᩩ ᩈᩩᨣᨲᩮᩣ ᨵᨾ᩠ᨾᩴ, ᩈᨶ᩠ᨲᩥ [ᩈᨶ᩠ᨲᩦ (ᩈ᩠ᨿᩣ.)] ᩈᨲ᩠ᨲᩣ ᩋᨸ᩠ᨸᩁᨩᨠ᩠ᨡᨩᩣᨲᩥᨠᩣ; ᩋᩔᩅᨶᨲᩣ ᨵᨾ᩠ᨾᩔ ᨸᩁᩥᩉᩣᨿᨶ᩠ᨲᩥ, ᨽᩅᩥᩔᨶ᩠ᨲᩥ ᨵᨾ᩠ᨾᩔ ᩋᨬ᩠ᨬᩣᨲᩣᩁᩮᩣ’ᨲᩥ.

᪖᪗. ‘‘ᩑᩅᩴ ᩅᩩᨲ᩠ᨲᩮ [ᩋᨳ ᨡᩮᩣ (ᨠ.)], ᨽᩥᨠ᩠ᨡᩅᩮ, ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨲᩴ ᨾᩉᩣᨻᩕᩉ᩠ᨾᩣᨶᩴ ᩑᨲᨴᩅᩮᩣᨧ – ‘ᨾᨿ᩠ᩉᨾ᩠ᨸᩥ ᨡᩮᩣ, ᨻᩕᩉ᩠ᨾᩮ, ᩑᨲᨴᩉᩮᩣᩈᩥ – ‘‘ᨿᩴᨶᩪᨶᩣᩉᩴ ᨵᨾ᩠ᨾᩴ ᨴᩮᩈᩮᨿ᩠ᨿ’’ᨶ᩠ᨲᩥ. ᨲᩔ ᨾᨿ᩠ᩉᩴ, ᨻᩕᩉ᩠ᨾᩮ, ᩑᨲᨴᩉᩮᩣᩈᩥ – ‘‘ᩋᨵᩥᨣᨲᩮᩣ ᨡᩮᩣ ᨾ᩠ᨿᩣᨿᩴ ᨵᨾ᩠ᨾᩮᩣ ᨣᨾ᩠ᨽᩦᩁᩮᩣ ᨴᩩᨴ᩠ᨴᩈᩮᩣ ᨴᩩᩁᨶᩩᨻᩮᩣᨵᩮᩣ ᩈᨶ᩠ᨲᩮᩣ ᨸᨱᩦᨲᩮᩣ ᩋᨲᨠ᩠ᨠᩣᩅᨧᩁᩮᩣ ᨶᩥᨸᩩᨱᩮᩣ ᨸᨱ᩠ᨯᩥᨲᩅᩮᨴᨶᩦᨿᩮᩣ. ᩌᩃᨿᩁᩣᨾᩣ ᨡᩮᩣ ᨸᨶᩣᨿᩴ ᨸᨩᩣ ᩌᩃᨿᩁᨲᩣ ᩌᩃᨿᩈᨾ᩠ᨾᩩᨴᩥᨲᩣ. ᩌᩃᨿᩁᩣᨾᩣᨿ ᨡᩮᩣ ᨸᨶ ᨸᨩᩣᨿ ᩌᩃᨿᩁᨲᩣᨿ ᩌᩃᨿᩈᨾ᩠ᨾᩩᨴᩥᨲᩣᨿ ᨴᩩᨴ᩠ᨴᩈᩴ ᩍᨴᩴ ᨮᩣᨶᩴ ᨿᨴᩥᨴᩴ ᩍᨴᨸ᩠ᨸᨧ᩠ᨧᨿᨲᩣᨸᨭᩥᨧ᩠ᨧᩈᨾᩩᨸ᩠ᨸᩣᨴᩮᩣ. ᩍᨴᨾ᩠ᨸᩥ ᨡᩮᩣ ᨮᩣᨶᩴ ᨴᩩᨴ᩠ᨴᩈᩴ ᨿᨴᩥᨴᩴ ᩈᨻ᩠ᨻᩈᨦ᩠ᨡᩣᩁᩈᨾᨳᩮᩣ ᩈᨻ᩠ᨻᩪᨸᨵᩥᨸᨭᩥᨶᩥᩔᨣ᩠ᨣᩮᩣ ᨲᨱ᩠ᩉᩣᨠ᩠ᨡᨿᩮᩣ ᩅᩥᩁᩣᨣᩮᩣ ᨶᩥᩁᩮᩣᨵᩮᩣ ᨶᩥᨻ᩠ᨻᩣᨶᩴ. ᩋᩉᨬ᩠ᨧᩮᩅ ᨡᩮᩣ ᨸᨶ ᨵᨾ᩠ᨾᩴ ᨴᩮᩈᩮᨿ᩠ᨿᩴ, ᨸᩁᩮ ᨧ ᨾᩮ ᨶ ᩌᨩᩣᨶᩮᨿ᩠ᨿᩩᩴ; ᩈᩮᩣ ᨾᨾᩔ ᨠᩥᩃᨾᨳᩮᩣ, ᩈᩣ ᨾᨾᩔ ᩅᩥᩉᩮᩈᩣ’’ᨲᩥ. ᩋᨸᩥᩔᩩ ᨾᩴ, ᨻᩕᩉ᩠ᨾᩮ, ᩍᨾᩣ ᩋᨶᨧ᩠ᨨᩁᩥᨿᩣ ᨣᩣᨳᩣᨿᩮᩣ ᨸᨭᩥᨽᩴᩈᩩ ᨸᩩᨻ᩠ᨻᩮ ᩋᩔᩩᨲᨸᩩᨻ᩠ᨻᩣ –

‘‘ᨠᩥᨧ᩠ᨨᩮᨶ ᨾᩮ ᩋᨵᩥᨣᨲᩴ, ᩉᩃᩴ ᨴᩣᨶᩥ ᨸᨠᩣᩈᩥᨲᩩᩴ;

ᩁᩣᨣᨴᩮᩣᩈᨸᩁᩮᨲᩮᩉᩥ, ᨶᩣᨿᩴ ᨵᨾ᩠ᨾᩮᩣ ᩈᩩᩈᨾ᩠ᨻᩩᨵᩮᩣ.

‘‘ᨸᨭᩥᩈᩮᩣᨲᨣᩣᨾᩥᩴ ᨶᩥᨸᩩᨱᩴ, ᨣᨾ᩠ᨽᩦᩁᩴ ᨴᩩᨴ᩠ᨴᩈᩴ ᩋᨱᩩᩴ;

ᩁᩣᨣᩁᨲ᩠ᨲᩣ ᨶ ᨴᨠ᩠ᨡᨶ᩠ᨲᩥ, ᨲᨾᩮᩣᨡᨶ᩠ᨵᩮᨶ ᩌᩅᩩᨭᩣ’’ᨲᩥ.

‘ᩍᨲᩥᩉ ᨾᩮ, ᨻᩕᩉ᩠ᨾᩮ, ᨸᨭᩥᩈᨬ᩠ᨧᩥᨠ᩠ᨡᨲᩮᩣ ᩋᨸ᩠ᨸᩮᩣᩔᩩᨠ᩠ᨠᨲᩣᨿ ᨧᩥᨲ᩠ᨲᩴ ᨶᨾᩥ, ᨶᩮᩣ ᨵᨾ᩠ᨾᨴᩮᩈᨶᩣᨿᩣ’ᨲᩥ.

᪖᪘. ‘‘ᨴᩩᨲᩥᨿᨾ᩠ᨸᩥ ᨡᩮᩣ, ᨽᩥᨠ᩠ᨡᩅᩮ, ᩈᩮᩣ ᨾᩉᩣᨻᩕᩉ᩠ᨾᩣ…ᨸᩮ… ᨲᨲᩥᨿᨾ᩠ᨸᩥ ᨡᩮᩣ, ᨽᩥᨠ᩠ᨡᩅᩮ, ᩈᩮᩣ ᨾᩉᩣᨻᩕᩉ᩠ᨾᩣ ᩅᩥᨸᩔᩥᩴ ᨽᨣᩅᨶ᩠ᨲᩴ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᩑᨲᨴᩅᩮᩣᨧ – ‘ᨴᩮᩈᩮᨲᩩ, ᨽᨶ᩠ᨲᩮ, ᨽᨣᩅᩣ ᨵᨾ᩠ᨾᩴ, ᨴᩮᩈᩮᨲᩩ ᩈᩩᨣᨲᩮᩣ ᨵᨾ᩠ᨾᩴ, ᩈᨶ᩠ᨲᩥ ᩈᨲ᩠ᨲᩣ ᩋᨸ᩠ᨸᩁᨩᨠ᩠ᨡᨩᩣᨲᩥᨠᩣ, ᩋᩔᩅᨶᨲᩣ ᨵᨾ᩠ᨾᩔ ᨸᩁᩥᩉᩣᨿᨶ᩠ᨲᩥ, ᨽᩅᩥᩔᨶ᩠ᨲᩥ ᨵᨾ᩠ᨾᩔ ᩋᨬ᩠ᨬᩣᨲᩣᩁᩮᩣ’ᨲᩥ.

᪖᪙. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨻᩕᩉ᩠ᨾᩩᨶᩮᩣ ᨧ ᩋᨩ᩠ᨫᩮᩈᨶᩴ ᩅᩥᨴᩥᨲ᩠ᩅᩣ ᩈᨲ᩠ᨲᩮᩈᩩ ᨧ ᨠᩣᩁᩩᨬ᩠ᨬᨲᩴ ᨸᨭᩥᨧ᩠ᨧ ᨻᩩᨴ᩠ᨵᨧᨠ᩠ᨡᩩᨶᩣ ᩃᩮᩣᨠᩴ ᩅᩮᩣᩃᩮᩣᨠᩮᩈᩥ. ᩋᨴ᩠ᨴᩈᩣ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨻᩩᨴ᩠ᨵᨧᨠ᩠ᨡᩩᨶᩣ ᩃᩮᩣᨠᩴ ᩅᩮᩣᩃᩮᩣᨠᩮᨶ᩠ᨲᩮᩣ ᩈᨲ᩠ᨲᩮ ᩋᨸ᩠ᨸᩁᨩᨠ᩠ᨡᩮ ᨾᩉᩣᩁᨩᨠ᩠ᨡᩮ ᨲᩥᨠ᩠ᨡᩥᨶ᩠ᨴᩕᩥᨿᩮ ᨾᩩᨴᩥᨶ᩠ᨴᩕᩥᨿᩮ ᩈ᩠ᩅᩣᨠᩣᩁᩮ ᨴ᩠ᩅᩣᨠᩣᩁᩮ ᩈᩩᩅᩥᨬ᩠ᨬᩣᨸᨿᩮ ᨴᩩᩅᩥᨬ᩠ᨬᩣᨸᨿᩮ [ᨴᩩᩅᩥᨬ᩠ᨬᩣᨸᨿᩮ ᨽᨻ᩠ᨻᩮ ᩋᨽᨻ᩠ᨻᩮ (ᩈ᩠ᨿᩣ.)] ᩋᨸ᩠ᨸᩮᨠᨧ᩠ᨧᩮ ᨸᩁᩃᩮᩣᨠᩅᨩ᩠ᨩᨽᨿᨴᩔᩣᩅᩥᨶᩮ [ᨴᩔᩣᩅᩥᨶᩮᩣ (ᩈᩦ. ᩈ᩠ᨿᩣ. ᨠᩴ. ᨠ.)] ᩅᩥᩉᩁᨶ᩠ᨲᩮ, ᩋᨸ᩠ᨸᩮᨠᨧ᩠ᨧᩮ ᨶ ᨸᩁᩃᩮᩣᨠᩅᨩ᩠ᨩᨽᨿᨴᩔᩣᩅᩥᨶᩮ [ᨴᩔᩣᩅᩥᨶᩮᩣ (ᩈᩦ. ᩈ᩠ᨿᩣ. ᨠᩴ. ᨠ.)] ᩅᩥᩉᩁᨶ᩠ᨲᩮ. ᩈᩮᨿ᩠ᨿᨳᩣᨸᩥ ᨶᩣᨾ ᩏᨸ᩠ᨸᩃᩥᨶᩥᨿᩴ ᩅᩣ ᨸᨴᩩᨾᩥᨶᩥᨿᩴ ᩅᩣ ᨸᩩᨱ᩠ᨯᩁᩦᨠᩥᨶᩥᨿᩴ ᩅᩣ ᩋᨸ᩠ᨸᩮᨠᨧ᩠ᨧᩣᨶᩥ ᩏᨸ᩠ᨸᩃᩣᨶᩥ ᩅᩣ ᨸᨴᩩᨾᩣᨶᩥ ᩅᩣ ᨸᩩᨱ᩠ᨯᩁᩦᨠᩣᨶᩥ ᩅᩣ ᩏᨴᨠᩮ ᨩᩣᨲᩣᨶᩥ ᩏᨴᨠᩮ ᩈᩴᩅᨯ᩠ᨰᩣᨶᩥ ᩏᨴᨠᩣᨶᩩᨣ᩠ᨣᨲᩣᨶᩥ ᩋᨶ᩠ᨲᩮᩣ ᨶᩥᨾᩩᨣ᩠ᨣᨸᩮᩣᩈᩦᨶᩥ. ᩋᨸ᩠ᨸᩮᨠᨧ᩠ᨧᩣᨶᩥ ᩏᨸ᩠ᨸᩃᩣᨶᩥ ᩅᩣ ᨸᨴᩩᨾᩣᨶᩥ ᩅᩣ ᨸᩩᨱ᩠ᨯᩁᩦᨠᩣᨶᩥ ᩅᩣ ᩏᨴᨠᩮ ᨩᩣᨲᩣᨶᩥ ᩏᨴᨠᩮ ᩈᩴᩅᨯ᩠ᨰᩣᨶᩥ ᩈᨾᩮᩣᨴᨠᩴ ᨮᩥᨲᩣᨶᩥ. ᩋᨸ᩠ᨸᩮᨠᨧ᩠ᨧᩣᨶᩥ ᩏᨸ᩠ᨸᩃᩣᨶᩥ ᩅᩣ ᨸᨴᩩᨾᩣᨶᩥ ᩅᩣ ᨸᩩᨱ᩠ᨯᩁᩦᨠᩣᨶᩥ ᩅᩣ ᩏᨴᨠᩮ ᨩᩣᨲᩣᨶᩥ ᩏᨴᨠᩮ ᩈᩴᩅᨯ᩠ᨰᩣᨶᩥ ᩏᨴᨠᩣ ᩋᨧ᩠ᨧᩩᨣ᩠ᨣᨾ᩠ᨾ ᨮᩥᨲᩣᨶᩥ ᩋᨶᩩᨸᩃᩥᨲ᩠ᨲᩣᨶᩥ ᩏᨴᨠᩮᨶ. ᩑᩅᨾᩮᩅ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨻᩩᨴ᩠ᨵᨧᨠ᩠ᨡᩩᨶᩣ ᩃᩮᩣᨠᩴ ᩅᩮᩣᩃᩮᩣᨠᩮᨶ᩠ᨲᩮᩣ ᩋᨴ᩠ᨴᩈ ᩈᨲ᩠ᨲᩮ ᩋᨸ᩠ᨸᩁᨩᨠ᩠ᨡᩮ ᨾᩉᩣᩁᨩᨠ᩠ᨡᩮ ᨲᩥᨠ᩠ᨡᩥᨶ᩠ᨴᩕᩥᨿᩮ ᨾᩩᨴᩥᨶ᩠ᨴᩕᩥᨿᩮ ᩈ᩠ᩅᩣᨠᩣᩁᩮ ᨴ᩠ᩅᩣᨠᩣᩁᩮ ᩈᩩᩅᩥᨬ᩠ᨬᩣᨸᨿᩮ ᨴᩩᩅᩥᨬ᩠ᨬᩣᨸᨿᩮ ᩋᨸ᩠ᨸᩮᨠᨧ᩠ᨧᩮ ᨸᩁᩃᩮᩣᨠᩅᨩ᩠ᨩᨽᨿᨴᩔᩣᩅᩥᨶᩮ ᩅᩥᩉᩁᨶ᩠ᨲᩮ, ᩋᨸ᩠ᨸᩮᨠᨧ᩠ᨧᩮ ᨶ ᨸᩁᩃᩮᩣᨠᩅᨩ᩠ᨩᨽᨿᨴᩔᩣᩅᩥᨶᩮ ᩅᩥᩉᩁᨶ᩠ᨲᩮ.

᪗᪐. ‘‘ᩋᨳ ᨡᩮᩣ ᩈᩮᩣ, ᨽᩥᨠ᩠ᨡᩅᩮ, ᨾᩉᩣᨻᩕᩉ᩠ᨾᩣ ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨧᩮᨲᩈᩣ ᨧᩮᨲᩮᩣᨸᩁᩥᩅᩥᨲᨠ᩠ᨠᨾᨬ᩠ᨬᩣᨿ ᩅᩥᨸᩔᩥᩴ ᨽᨣᩅᨶ᩠ᨲᩴ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᨣᩣᨳᩣᩉᩥ ᩋᨩ᩠ᨫᨽᩣᩈᩥ –

‘ᩈᩮᩃᩮ ᨿᨳᩣ ᨸᨻ᩠ᨻᨲᨾᩩᨴ᩠ᨵᨶᩥᨭ᩠ᨮᩥᨲᩮᩣ, ᨿᨳᩣᨸᩥ ᨸᩔᩮ ᨩᨶᨲᩴ ᩈᨾᨶ᩠ᨲᨲᩮᩣ;

ᨲᨳᩪᨸᨾᩴ ᨵᨾ᩠ᨾᨾᨿᩴ ᩈᩩᨾᩮᨵ, ᨸᩣᩈᩣᨴᨾᩣᩁᩩᨿ᩠ᩉ ᩈᨾᨶ᩠ᨲᨧᨠ᩠ᨡᩩ.

‘ᩈᩮᩣᨠᩣᩅᨲᩥᨱ᩠ᨱᩴ [ᩈᩮᩣᨠᩣᩅᨠᩥᨱ᩠ᨱᩴ (ᩈ᩠ᨿᩣ.)] ᨩᨶᨲᨾᨸᩮᨲᩈᩮᩣᨠᩮᩣ,

ᩋᩅᩮᨠ᩠ᨡᩔᩩ ᨩᩣᨲᩥᨩᩁᩣᨽᩥᨽᩪᨲᩴ;

ᩏᨭ᩠ᨮᩮᩉᩥ ᩅᩦᩁ ᩅᩥᨩᩥᨲᩈᨦ᩠ᨣᩣᨾ,

ᩈᨲ᩠ᨳᩅᩣᩉ ᩋᨱᨱ ᩅᩥᨧᩁ ᩃᩮᩣᨠᩮ.

ᨴᩮᩈᩔᩩ [ᨴᩮᩈᩮᨲᩩ (ᩈ᩠ᨿᩣ. ᨸᩦ.)] ᨽᨣᩅᩣ ᨵᨾ᩠ᨾᩴ,

ᩋᨬ᩠ᨬᩣᨲᩣᩁᩮᩣ ᨽᩅᩥᩔᨶ᩠ᨲᩦ’ᨲᩥ.

᪗᪑. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨲᩴ ᨾᩉᩣᨻᩕᩉ᩠ᨾᩣᨶᩴ ᨣᩣᨳᩣᨿ ᩋᨩ᩠ᨫᨽᩣᩈᩥ –

‘ᩋᨸᩣᩁᩩᨲᩣ ᨲᩮᩈᩴ ᩋᨾᨲᩔ ᨴ᩠ᩅᩣᩁᩣ,

ᨿᩮ ᩈᩮᩣᨲᩅᨶ᩠ᨲᩮᩣ ᨸᨾᩩᨬ᩠ᨧᨶ᩠ᨲᩩ ᩈᨴ᩠ᨵᩴ;

ᩅᩥᩉᩥᩴᩈᩈᨬ᩠ᨬᩦ ᨸᨣᩩᨱᩴ ᨶ ᨽᩣᩈᩥᩴ,

ᨵᨾ᩠ᨾᩴ ᨸᨱᩦᨲᩴ ᨾᨶᩩᨩᩮᩈᩩ ᨻᩕᩉ᩠ᨾᩮ’ᨲᩥ.

‘‘ᩋᨳ ᨡᩮᩣ ᩈᩮᩣ, ᨽᩥᨠ᩠ᨡᩅᩮ, ᨾᩉᩣᨻᩕᩉ᩠ᨾᩣ ‘ᨠᨲᩣᩅᨠᩣᩈᩮᩣ ᨡᩮᩣᨾ᩠ᩉᩥ ᩅᩥᨸᩔᩥᨶᩣ ᨽᨣᩅᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨵᨾ᩠ᨾᨴᩮᩈᨶᩣᨿᩣ’ᨲᩥ ᩅᩥᨸᩔᩥᩴ ᨽᨣᩅᨶ᩠ᨲᩴ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨲᨲ᩠ᨳᩮᩅ ᩋᨶ᩠ᨲᩁᨵᩣᨿᩥ.

ᩋᨣ᩠ᨣᩈᩣᩅᨠᨿᩩᨣᩴ

᪗᪒. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩑᨲᨴᩉᩮᩣᩈᩥ – ‘ᨠᩔ ᨶᩩ ᨡᩮᩣ ᩋᩉᩴ ᨸᨮᨾᩴ ᨵᨾ᩠ᨾᩴ ᨴᩮᩈᩮᨿ᩠ᨿᩴ, ᨠᩮᩣ ᩍᨾᩴ ᨵᨾ᩠ᨾᩴ ᨡᩥᨸ᩠ᨸᨾᩮᩅ ᩌᨩᩣᨶᩥᩔᨲᩦ’ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩑᨲᨴᩉᩮᩣᩈᩥ – ‘ᩋᨿᩴ ᨡᩮᩣ ᨡᨱ᩠ᨯᩮᩣ ᨧ ᩁᩣᨩᨸᩩᨲ᩠ᨲᩮᩣ ᨲᩥᩔᩮᩣ ᨧ ᨸᩩᩁᩮᩣᩉᩥᨲᨸᩩᨲ᩠ᨲᩮᩣ ᨻᨶ᩠ᨵᩩᨾᨲᩥᨿᩣ ᩁᩣᨩᨵᩣᨶᩥᨿᩣ ᨸᨭᩥᩅᩈᨶ᩠ᨲᩥ ᨸᨱ᩠ᨯᩥᨲᩣ ᩅᩥᨿᨲ᩠ᨲᩣ ᨾᩮᨵᩣᩅᩥᨶᩮᩣ ᨴᩦᨥᩁᨲ᩠ᨲᩴ ᩋᨸ᩠ᨸᩁᨩᨠ᩠ᨡᨩᩣᨲᩥᨠᩣ. ᨿᩴᨶᩪᨶᩣᩉᩴ ᨡᨱ᩠ᨯᩔ ᨧ ᩁᩣᨩᨸᩩᨲ᩠ᨲᩔ, ᨲᩥᩔᩔ ᨧ ᨸᩩᩁᩮᩣᩉᩥᨲᨸᩩᨲ᩠ᨲᩔ ᨸᨮᨾᩴ ᨵᨾ᩠ᨾᩴ ᨴᩮᩈᩮᨿ᩠ᨿᩴ, ᨲᩮ ᩍᨾᩴ ᨵᨾ᩠ᨾᩴ ᨡᩥᨸ᩠ᨸᨾᩮᩅ ᩌᨩᩣᨶᩥᩔᨶ᩠ᨲᩦ’ᨲᩥ.

᪗᪓. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩈᩮᨿ᩠ᨿᨳᩣᨸᩥ ᨶᩣᨾ ᨻᩃᩅᩣ ᨸᩩᩁᩥᩈᩮᩣ ᩈᨾᩥᨬ᩠ᨩᩥᨲᩴ ᩅᩣ ᨻᩣᩉᩴ ᨸᩈᩣᩁᩮᨿ᩠ᨿ, ᨸᩈᩣᩁᩥᨲᩴ ᩅᩣ ᨻᩣᩉᩴ ᩈᨾᩥᨬ᩠ᨩᩮᨿ᩠ᨿ; ᩑᩅᨾᩮᩅ ᨻᩮᩣᨵᩥᩁᩩᨠ᩠ᨡᨾᩪᩃᩮ ᩋᨶ᩠ᨲᩁᩉᩥᨲᩮᩣ ᨻᨶ᩠ᨵᩩᨾᨲᩥᨿᩣ ᩁᩣᨩᨵᩣᨶᩥᨿᩣ ᨡᩮᨾᩮ ᨾᩥᨣᨴᩣᨿᩮ ᨸᩣᨲᩩᩁᩉᩮᩣᩈᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨴᩣᨿᨸᩣᩃᩴ [ᨾᩥᨣᨴᩣᨿᨸᩣᩃᩴ (ᩈ᩠ᨿᩣ.)] ᩌᨾᨶ᩠ᨲᩮᩈᩥ – ‘ᩑᩉᩥ ᨲ᩠ᩅᩴ, ᩈᨾ᩠ᨾ ᨴᩣᨿᨸᩣᩃ, ᨻᨶ᩠ᨵᩩᨾᨲᩥᩴ ᩁᩣᨩᨵᩣᨶᩥᩴ ᨸᩅᩥᩈᩥᨲ᩠ᩅᩣ ᨡᨱ᩠ᨯᨬ᩠ᨧ ᩁᩣᨩᨸᩩᨲ᩠ᨲᩴ ᨲᩥᩔᨬ᩠ᨧ ᨸᩩᩁᩮᩣᩉᩥᨲᨸᩩᨲ᩠ᨲᩴ ᩑᩅᩴ ᩅᨴᩮᩉᩥ – ᩅᩥᨸᩔᩦ, ᨽᨶ᩠ᨲᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨻᨶ᩠ᨵᩩᨾᨲᩥᩴ ᩁᩣᨩᨵᩣᨶᩥᩴ ᩋᨶᩩᨸ᩠ᨸᨲ᩠ᨲᩮᩣ ᨡᩮᨾᩮ ᨾᩥᨣᨴᩣᨿᩮ ᩅᩥᩉᩁᨲᩥ, ᩈᩮᩣ ᨲᩩᨾ᩠ᩉᩣᨠᩴ ᨴᩔᨶᨠᩣᨾᩮᩣ’ᨲᩥ. ‘ᩑᩅᩴ, ᨽᨶ᩠ᨲᩮ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᨴᩣᨿᨸᩣᩃᩮᩣ ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨸᨭᩥᩔᩩᨲ᩠ᩅᩣ ᨻᨶ᩠ᨵᩩᨾᨲᩥᩴ ᩁᩣᨩᨵᩣᨶᩥᩴ ᨸᩅᩥᩈᩥᨲ᩠ᩅᩣ ᨡᨱ᩠ᨯᨬ᩠ᨧ ᩁᩣᨩᨸᩩᨲ᩠ᨲᩴ ᨲᩥᩔᨬ᩠ᨧ ᨸᩩᩁᩮᩣᩉᩥᨲᨸᩩᨲ᩠ᨲᩴ ᩑᨲᨴᩅᩮᩣᨧ – ‘ᩅᩥᨸᩔᩦ, ᨽᨶ᩠ᨲᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨻᨶ᩠ᨵᩩᨾᨲᩥᩴ ᩁᩣᨩᨵᩣᨶᩥᩴ ᩋᨶᩩᨸ᩠ᨸᨲ᩠ᨲᩮᩣ ᨡᩮᨾᩮ ᨾᩥᨣᨴᩣᨿᩮ ᩅᩥᩉᩁᨲᩥ; ᩈᩮᩣ ᨲᩩᨾ᩠ᩉᩣᨠᩴ ᨴᩔᨶᨠᩣᨾᩮᩣ’ᨲᩥ.

᪗᪔. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᨡᨱ᩠ᨯᩮᩣ ᨧ ᩁᩣᨩᨸᩩᨲ᩠ᨲᩮᩣ ᨲᩥᩔᩮᩣ ᨧ ᨸᩩᩁᩮᩣᩉᩥᨲᨸᩩᨲ᩠ᨲᩮᩣ ᨽᨴ᩠ᨴᩣᨶᩥ ᨽᨴ᩠ᨴᩣᨶᩥ ᨿᩣᨶᩣᨶᩥ ᨿᩮᩣᨩᩣᨸᩮᨲ᩠ᩅᩣ ᨽᨴ᩠ᨴᩴ ᨽᨴ᩠ᨴᩴ ᨿᩣᨶᩴ ᩋᨽᩥᩁᩩᩉᩥᨲ᩠ᩅᩣ ᨽᨴ᩠ᨴᩮᩉᩥ ᨽᨴ᩠ᨴᩮᩉᩥ ᨿᩣᨶᩮᩉᩥ ᨻᨶ᩠ᨵᩩᨾᨲᩥᨿᩣ ᩁᩣᨩᨵᩣᨶᩥᨿᩣ ᨶᩥᨿ᩠ᨿᩥᩴᩈᩩ. ᨿᩮᨶ ᨡᩮᨾᩮᩣ ᨾᩥᨣᨴᩣᨿᩮᩣ ᨲᩮᨶ ᨸᩣᨿᩥᩴᩈᩩ. ᨿᩣᩅᨲᩥᨠᩣ ᨿᩣᨶᩔ ᨽᩪᨾᩥ, ᨿᩣᨶᩮᨶ ᨣᨶ᩠ᨲ᩠ᩅᩣ ᨿᩣᨶᩣ ᨸᨧ᩠ᨧᩮᩣᩁᩮᩣᩉᩥᨲ᩠ᩅᩣ ᨸᨲ᩠ᨲᩥᨠᩣᩅ [ᨸᨴᩥᨠᩣᩅ (ᩈ᩠ᨿᩣ.)] ᨿᩮᨶ ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ. ᩏᨸᩈᨦ᩠ᨠᨾᩥᨲ᩠ᩅᩣ ᩅᩥᨸᩔᩥᩴ ᨽᨣᩅᨶ᩠ᨲᩴ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ.

᪗᪕. ‘‘ᨲᩮᩈᩴ ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩋᨶᩩᨸᩩᨻ᩠ᨻᩥᩴ ᨠᨳᩴ [ᩌᨶᩩᨸᩩᨻ᩠ᨻᩥᨠᨳᩴ (ᩈᩦ. ᨸᩦ.)] ᨠᨳᩮᩈᩥ, ᩈᩮᨿ᩠ᨿᨳᩥᨴᩴ – ᨴᩣᨶᨠᨳᩴ ᩈᩦᩃᨠᨳᩴ ᩈᨣ᩠ᨣᨠᨳᩴ ᨠᩣᨾᩣᨶᩴ ᩌᨴᩦᨶᩅᩴ ᩒᨠᩣᩁᩴ ᩈᩴᨠᩥᩃᩮᩈᩴ ᨶᩮᨠ᩠ᨡᨾ᩠ᨾᩮ ᩌᨶᩥᩈᩴᩈᩴ ᨸᨠᩣᩈᩮᩈᩥ. ᨿᨴᩣ ᨲᩮ ᨽᨣᩅᩣ ᩋᨬ᩠ᨬᩣᩈᩥ ᨠᩃ᩠ᩃᨧᩥᨲ᩠ᨲᩮ ᨾᩩᨴᩩᨧᩥᨲ᩠ᨲᩮ ᩅᩥᨶᩦᩅᩁᨱᨧᩥᨲ᩠ᨲᩮ ᩏᨴᨣ᩠ᨣᨧᩥᨲ᩠ᨲᩮ ᨸᩈᨶ᩠ᨶᨧᩥᨲ᩠ᨲᩮ, ᩋᨳ ᨿᩣ ᨻᩩᨴ᩠ᨵᩣᨶᩴ ᩈᩣᨾᩩᨠ᩠ᨠᩴᩈᩥᨠᩣ ᨵᨾ᩠ᨾᨴᩮᩈᨶᩣ, ᨲᩴ ᨸᨠᩣᩈᩮᩈᩥ – ᨴᩩᨠ᩠ᨡᩴ ᩈᨾᩩᨴᨿᩴ ᨶᩥᩁᩮᩣᨵᩴ ᨾᨣ᩠ᨣᩴ. ᩈᩮᨿ᩠ᨿᨳᩣᨸᩥ ᨶᩣᨾ ᩈᩩᨴ᩠ᨵᩴ ᩅᨲ᩠ᨳᩴ ᩋᨸᨣᨲᨠᩣᩊᨠᩴ ᩈᨾ᩠ᨾᨴᩮᩅ ᩁᨩᨶᩴ ᨸᨭᩥᨣ᩠ᨣᨱ᩠ᩉᩮᨿ᩠ᨿ, ᩑᩅᨾᩮᩅ ᨡᨱ᩠ᨯᩔ ᨧ ᩁᩣᨩᨸᩩᨲ᩠ᨲᩔ ᨲᩥᩔᩔ ᨧ ᨸᩩᩁᩮᩣᩉᩥᨲᨸᩩᨲ᩠ᨲᩔ ᨲᩈ᩠ᨾᩥᩴᨿᩮᩅ ᩌᩈᨶᩮ ᩅᩥᩁᨩᩴ ᩅᩦᨲᨾᩃᩴ ᨵᨾ᩠ᨾᨧᨠ᩠ᨡᩩᩴ ᩏᨴᨸᩣᨴᩥ – ‘ᨿᩴ ᨠᩥᨬ᩠ᨧᩥ ᩈᨾᩩᨴᨿᨵᨾ᩠ᨾᩴ, ᩈᨻ᩠ᨻᩴ ᨲᩴ ᨶᩥᩁᩮᩣᨵᨵᨾ᩠ᨾ’ᨶ᩠ᨲᩥ.

᪗᪖. ‘‘ᨲᩮ ᨴᩥᨭ᩠ᨮᨵᨾ᩠ᨾᩣ ᨸᨲ᩠ᨲᨵᨾ᩠ᨾᩣ ᩅᩥᨴᩥᨲᨵᨾ᩠ᨾᩣ ᨸᩁᩥᨿᩮᩣᨣᩣᩊ᩠ᩉᨵᨾ᩠ᨾᩣ ᨲᩥᨱ᩠ᨱᩅᩥᨧᩥᨠᩥᨧ᩠ᨨᩣ ᩅᩥᨣᨲᨠᨳᩴᨠᨳᩣ ᩅᩮᩈᩣᩁᨩ᩠ᨩᨸ᩠ᨸᨲ᩠ᨲᩣ ᩋᨸᩁᨸ᩠ᨸᨧ᩠ᨧᨿᩣ ᩈᨲ᩠ᨳᩩᩈᩣᩈᨶᩮ ᩅᩥᨸᩔᩥᩴ ᨽᨣᩅᨶ᩠ᨲᩴ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᩑᨲᨴᩅᩮᩣᨧᩩᩴ – ‘ᩋᨽᩥᨠ᩠ᨠᨶ᩠ᨲᩴ, ᨽᨶ᩠ᨲᩮ, ᩋᨽᩥᨠ᩠ᨠᨶ᩠ᨲᩴ, ᨽᨶ᩠ᨲᩮ. ᩈᩮᨿ᩠ᨿᨳᩣᨸᩥ, ᨽᨶ᩠ᨲᩮ, ᨶᩥᨠ᩠ᨠᩩᨩ᩠ᨩᩥᨲᩴ ᩅᩣ ᩏᨠ᩠ᨠᩩᨩ᩠ᨩᩮᨿ᩠ᨿ, ᨸᨭᩥᨧ᩠ᨨᨶ᩠ᨶᩴ ᩅᩣ ᩅᩥᩅᩁᩮᨿ᩠ᨿ, ᨾᩪᩊ᩠ᩉᩔ ᩅᩣ ᨾᨣ᩠ᨣᩴ ᩌᨧᩥᨠ᩠ᨡᩮᨿ᩠ᨿ, ᩋᨶ᩠ᨵᨠᩣᩁᩮ ᩅᩣ ᨲᩮᩃᨸᨩ᩠ᨩᩮᩣᨲᩴ ᨵᩣᩁᩮᨿ᩠ᨿ ‘‘ᨧᨠ᩠ᨡᩩᨾᨶ᩠ᨲᩮᩣ ᩁᩪᨸᩣᨶᩥ ᨴᨠ᩠ᨡᨶ᩠ᨲᩦ’’ᨲᩥ. ᩑᩅᨾᩮᩅᩴ ᨽᨣᩅᨲᩣ ᩋᨶᩮᨠᨸᩁᩥᨿᩣᨿᩮᨶ ᨵᨾ᩠ᨾᩮᩣ ᨸᨠᩣᩈᩥᨲᩮᩣ. ᩑᨲᩮ ᨾᨿᩴ, ᨽᨶ᩠ᨲᩮ, ᨽᨣᩅᨶ᩠ᨲᩴ ᩈᩁᨱᩴ ᨣᨧ᩠ᨨᩣᨾ ᨵᨾ᩠ᨾᨬ᩠ᨧ. ᩃᨽᩮᨿ᩠ᨿᩣᨾ ᨾᨿᩴ, ᨽᨶ᩠ᨲᩮ, ᨽᨣᩅᨲᩮᩣ ᩈᨶ᩠ᨲᩥᨠᩮ ᨸᨻ᩠ᨻᨩ᩠ᨩᩴ, ᩃᨽᩮᨿ᩠ᨿᩣᨾ ᩏᨸᩈᨾ᩠ᨸᨴ’ᨶ᩠ᨲᩥ.

᪗᪗. ‘‘ᩋᩃᨲ᩠ᨳᩩᩴ ᨡᩮᩣ, ᨽᩥᨠ᩠ᨡᩅᩮ, ᨡᨱ᩠ᨯᩮᩣ ᨧ ᩁᩣᨩᨸᩩᨲ᩠ᨲᩮᩣ, ᨲᩥᩔᩮᩣ ᨧ ᨸᩩᩁᩮᩣᩉᩥᨲᨸᩩᨲ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩈᨶ᩠ᨲᩥᨠᩮ ᨸᨻ᩠ᨻᨩ᩠ᨩᩴ ᩋᩃᨲ᩠ᨳᩩᩴ ᩏᨸᩈᨾ᩠ᨸᨴᩴ. ᨲᩮ ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᩈᩥ ᩈᨾᩣᨴᨸᩮᩈᩥ ᩈᨾᩩᨲ᩠ᨲᩮᨩᩮᩈᩥ ᩈᨾ᩠ᨸᩉᩴᩈᩮᩈᩥ; ᩈᨦ᩠ᨡᩣᩁᩣᨶᩴ ᩌᨴᩦᨶᩅᩴ ᩒᨠᩣᩁᩴ ᩈᩴᨠᩥᩃᩮᩈᩴ ᨶᩥᨻ᩠ᨻᩣᨶᩮ [ᨶᩮᨠ᩠ᨡᨾ᩠ᨾᩮ (ᩈ᩠ᨿᩣ.)] ᩌᨶᩥᩈᩴᩈᩴ ᨸᨠᩣᩈᩮᩈᩥ. ᨲᩮᩈᩴ ᩅᩥᨸᩔᩥᨶᩣ ᨽᨣᩅᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩥᨿᨾᩣᨶᩣᨶᩴ ᩈᨾᩣᨴᨸᩥᨿᨾᩣᨶᩣᨶᩴ ᩈᨾᩩᨲ᩠ᨲᩮᨩᩥᨿᨾᩣᨶᩣᨶᩴ ᩈᨾ᩠ᨸᩉᩴᩈᩥᨿᨾᩣᨶᩣᨶᩴ ᨶᨧᩥᩁᩔᩮᩅ ᩋᨶᩩᨸᩣᨴᩣᨿ ᩌᩈᩅᩮᩉᩥ ᨧᩥᨲ᩠ᨲᩣᨶᩥ ᩅᩥᨾᩩᨧ᩠ᨧᩥᩴᩈᩩ.

ᨾᩉᩣᨩᨶᨠᩣᨿᨸᨻ᩠ᨻᨩ᩠ᨩᩣ

᪗᪘. ‘‘ᩋᩔᩮᩣᩈᩥ ᨡᩮᩣ, ᨽᩥᨠ᩠ᨡᩅᩮ, ᨻᨶ᩠ᨵᩩᨾᨲᩥᨿᩣ ᩁᩣᨩᨵᩣᨶᩥᨿᩣ ᨾᩉᩣᨩᨶᨠᩣᨿᩮᩣ ᨧᨲᩩᩁᩣᩈᩦᨲᩥᨸᩣᨱᩈᩉᩔᩣᨶᩥ – ‘ᩅᩥᨸᩔᩦ ᨠᩥᩁ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨻᨶ᩠ᨵᩩᨾᨲᩥᩴ ᩁᩣᨩᨵᩣᨶᩥᩴ ᩋᨶᩩᨸ᩠ᨸᨲ᩠ᨲᩮᩣ ᨡᩮᨾᩮ ᨾᩥᨣᨴᩣᨿᩮ ᩅᩥᩉᩁᨲᩥ. ᨡᨱ᩠ᨯᩮᩣ ᨧ ᨠᩥᩁ ᩁᩣᨩᨸᩩᨲ᩠ᨲᩮᩣ ᨲᩥᩔᩮᩣ ᨧ ᨸᩩᩁᩮᩣᩉᩥᨲᨸᩩᨲ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩈᨶ᩠ᨲᩥᨠᩮ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᨲᩣ’ᨲᩥ. ᩈᩩᨲ᩠ᩅᩣᨶ ᨶᩮᩈᩴ ᩑᨲᨴᩉᩮᩣᩈᩥ – ‘ᨶ ᩉᩥ ᨶᩪᨶ ᩈᩮᩣ ᩒᩁᨠᩮᩣ ᨵᨾ᩠ᨾᩅᩥᨶᨿᩮᩣ, ᨶ ᩈᩣ ᩒᩁᨠᩣ ᨸᨻ᩠ᨻᨩ᩠ᨩᩣ, ᨿᨲ᩠ᨳ ᨡᨱ᩠ᨯᩮᩣ ᨧ ᩁᩣᨩᨸᩩᨲ᩠ᨲᩮᩣ ᨲᩥᩔᩮᩣ ᨧ ᨸᩩᩁᩮᩣᩉᩥᨲᨸᩩᨲ᩠ᨲᩮᩣ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᨲᩣ. ᨡᨱ᩠ᨯᩮᩣ ᨧ ᩁᩣᨩᨸᩩᨲ᩠ᨲᩮᩣ ᨲᩥᩔᩮᩣ ᨧ ᨸᩩᩁᩮᩣᩉᩥᨲᨸᩩᨲ᩠ᨲᩮᩣ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᨶ᩠ᨲᩥ, ᨠᩥᨾᨦ᩠ᨣᩴ ᨸᨶ ᨾᨿ’ᨶ᩠ᨲᩥ. ᩋᨳ ᨡᩮᩣ ᩈᩮᩣ, ᨽᩥᨠ᩠ᨡᩅᩮ, ᨾᩉᩣᨩᨶᨠᩣᨿᩮᩣ ᨧᨲᩩᩁᩣᩈᩦᨲᩥᨸᩣᨱᩈᩉᩔᩣᨶᩥ ᨻᨶ᩠ᨵᩩᨾᨲᩥᨿᩣ ᩁᩣᨩᨵᩣᨶᩥᨿᩣ ᨶᩥᨠ᩠ᨡᨾᩥᨲ᩠ᩅᩣ ᨿᩮᨶ ᨡᩮᨾᩮᩣ ᨾᩥᨣᨴᩣᨿᩮᩣ ᨿᩮᨶ ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᩅᩥᨸᩔᩥᩴ ᨽᨣᩅᨶ᩠ᨲᩴ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ.

᪗᪙. ‘‘ᨲᩮᩈᩴ ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩋᨶᩩᨸᩩᨻ᩠ᨻᩥᩴ ᨠᨳᩴ ᨠᨳᩮᩈᩥ. ᩈᩮᨿ᩠ᨿᨳᩥᨴᩴ – ᨴᩣᨶᨠᨳᩴ ᩈᩦᩃᨠᨳᩴ ᩈᨣ᩠ᨣᨠᨳᩴ ᨠᩣᨾᩣᨶᩴ ᩌᨴᩦᨶᩅᩴ ᩒᨠᩣᩁᩴ ᩈᩴᨠᩥᩃᩮᩈᩴ ᨶᩮᨠ᩠ᨡᨾ᩠ᨾᩮ ᩌᨶᩥᩈᩴᩈᩴ ᨸᨠᩣᩈᩮᩈᩥ. ᨿᨴᩣ ᨲᩮ ᨽᨣᩅᩣ ᩋᨬ᩠ᨬᩣᩈᩥ ᨠᩃ᩠ᩃᨧᩥᨲ᩠ᨲᩮ ᨾᩩᨴᩩᨧᩥᨲ᩠ᨲᩮ ᩅᩥᨶᩦᩅᩁᨱᨧᩥᨲ᩠ᨲᩮ ᩏᨴᨣ᩠ᨣᨧᩥᨲ᩠ᨲᩮ ᨸᩈᨶ᩠ᨶᨧᩥᨲ᩠ᨲᩮ, ᩋᨳ ᨿᩣ ᨻᩩᨴ᩠ᨵᩣᨶᩴ ᩈᩣᨾᩩᨠ᩠ᨠᩴᩈᩥᨠᩣ ᨵᨾ᩠ᨾᨴᩮᩈᨶᩣ, ᨲᩴ ᨸᨠᩣᩈᩮᩈᩥ – ᨴᩩᨠ᩠ᨡᩴ ᩈᨾᩩᨴᨿᩴ ᨶᩥᩁᩮᩣᨵᩴ ᨾᨣ᩠ᨣᩴ. ᩈᩮᨿ᩠ᨿᨳᩣᨸᩥ ᨶᩣᨾ ᩈᩩᨴ᩠ᨵᩴ ᩅᨲ᩠ᨳᩴ ᩋᨸᨣᨲᨠᩣᩊᨠᩴ ᩈᨾ᩠ᨾᨴᩮᩅ ᩁᨩᨶᩴ ᨸᨭᩥᨣ᩠ᨣᨱ᩠ᩉᩮᨿ᩠ᨿ, ᩑᩅᨾᩮᩅ ᨲᩮᩈᩴ ᨧᨲᩩᩁᩣᩈᩦᨲᩥᨸᩣᨱᩈᩉᩔᩣᨶᩴ ᨲᩈ᩠ᨾᩥᩴᨿᩮᩅ ᩌᩈᨶᩮ ᩅᩥᩁᨩᩴ ᩅᩦᨲᨾᩃᩴ ᨵᨾ᩠ᨾᨧᨠ᩠ᨡᩩᩴ ᩏᨴᨸᩣᨴᩥ – ‘ᨿᩴ ᨠᩥᨬ᩠ᨧᩥ ᩈᨾᩩᨴᨿᨵᨾ᩠ᨾᩴ ᩈᨻ᩠ᨻᩴ ᨲᩴ ᨶᩥᩁᩮᩣᨵᨵᨾ᩠ᨾ’ᨶ᩠ᨲᩥ.

᪘᪐. ‘‘ᨲᩮ ᨴᩥᨭ᩠ᨮᨵᨾ᩠ᨾᩣ ᨸᨲ᩠ᨲᨵᨾ᩠ᨾᩣ ᩅᩥᨴᩥᨲᨵᨾ᩠ᨾᩣ ᨸᩁᩥᨿᩮᩣᨣᩣᩊ᩠ᩉᨵᨾ᩠ᨾᩣ ᨲᩥᨱ᩠ᨱᩅᩥᨧᩥᨠᩥᨧ᩠ᨨᩣ ᩅᩥᨣᨲᨠᨳᩴᨠᨳᩣ ᩅᩮᩈᩣᩁᨩ᩠ᨩᨸ᩠ᨸᨲ᩠ᨲᩣ ᩋᨸᩁᨸ᩠ᨸᨧ᩠ᨧᨿᩣ ᩈᨲ᩠ᨳᩩᩈᩣᩈᨶᩮ ᩅᩥᨸᩔᩥᩴ ᨽᨣᩅᨶ᩠ᨲᩴ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᩑᨲᨴᩅᩮᩣᨧᩩᩴ – ‘ᩋᨽᩥᨠ᩠ᨠᨶ᩠ᨲᩴ, ᨽᨶ᩠ᨲᩮ, ᩋᨽᩥᨠ᩠ᨠᨶ᩠ᨲᩴ, ᨽᨶ᩠ᨲᩮ. ᩈᩮᨿ᩠ᨿᨳᩣᨸᩥ, ᨽᨶ᩠ᨲᩮ, ᨶᩥᨠ᩠ᨠᩩᨩ᩠ᨩᩥᨲᩴ ᩅᩣ ᩏᨠ᩠ᨠᩩᨩ᩠ᨩᩮᨿ᩠ᨿ, ᨸᨭᩥᨧ᩠ᨨᨶ᩠ᨶᩴ ᩅᩣ ᩅᩥᩅᩁᩮᨿ᩠ᨿ, ᨾᩪᩊ᩠ᩉᩔ ᩅᩣ ᨾᨣ᩠ᨣᩴ ᩌᨧᩥᨠ᩠ᨡᩮᨿ᩠ᨿ, ᩋᨶ᩠ᨵᨠᩣᩁᩮ ᩅᩣ ᨲᩮᩃᨸᨩ᩠ᨩᩮᩣᨲᩴ ᨵᩣᩁᩮᨿ᩠ᨿ ‘‘ᨧᨠ᩠ᨡᩩᨾᨶ᩠ᨲᩮᩣ ᩁᩪᨸᩣᨶᩥ ᨴᨠ᩠ᨡᨶ᩠ᨲᩦ’’ᨲᩥ. ᩑᩅᨾᩮᩅᩴ ᨽᨣᩅᨲᩣ ᩋᨶᩮᨠᨸᩁᩥᨿᩣᨿᩮᨶ ᨵᨾ᩠ᨾᩮᩣ ᨸᨠᩣᩈᩥᨲᩮᩣ. ᩑᨲᩮ ᨾᨿᩴ, ᨽᨶ᩠ᨲᩮ, ᨽᨣᩅᨶ᩠ᨲᩴ ᩈᩁᨱᩴ ᨣᨧ᩠ᨨᩣᨾ ᨵᨾ᩠ᨾᨬ᩠ᨧ ᨽᩥᨠ᩠ᨡᩩᩈᨦ᩠ᨥᨬ᩠ᨧ [( ) ᨶᨲ᩠ᨳᩥ ᩋᨭ᩠ᨮᨠᨳᩣᨿᩴ, ᨸᩣᩊᩥᨿᩴ ᨸᨶ ᩈᨻ᩠ᨻᨲ᩠ᨳᨸᩥ ᨴᩥᩔᨲᩥ]. ᩃᨽᩮᨿ᩠ᨿᩣᨾ ᨾᨿᩴ, ᨽᨶ᩠ᨲᩮ, ᨽᨣᩅᨲᩮᩣ ᩈᨶ᩠ᨲᩥᨠᩮ ᨸᨻ᩠ᨻᨩ᩠ᨩᩴ ᩃᨽᩮᨿ᩠ᨿᩣᨾ ᩏᨸᩈᨾ᩠ᨸᨴ’’ᨶ᩠ᨲᩥ.

᪘᪑. ‘‘ᩋᩃᨲ᩠ᨳᩩᩴ ᨡᩮᩣ, ᨽᩥᨠ᩠ᨡᩅᩮ, ᨲᩣᨶᩥ ᨧᨲᩩᩁᩣᩈᩦᨲᩥᨸᩣᨱᩈᩉᩔᩣᨶᩥ ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩈᨶ᩠ᨲᩥᨠᩮ ᨸᨻ᩠ᨻᨩ᩠ᨩᩴ, ᩋᩃᨲ᩠ᨳᩩᩴ ᩏᨸᩈᨾ᩠ᨸᨴᩴ. ᨲᩮ ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᩈᩥ ᩈᨾᩣᨴᨸᩮᩈᩥ ᩈᨾᩩᨲ᩠ᨲᩮᨩᩮᩈᩥ ᩈᨾ᩠ᨸᩉᩴᩈᩮᩈᩥ; ᩈᨦ᩠ᨡᩣᩁᩣᨶᩴ ᩌᨴᩦᨶᩅᩴ ᩒᨠᩣᩁᩴ ᩈᩴᨠᩥᩃᩮᩈᩴ ᨶᩥᨻ᩠ᨻᩣᨶᩮ ᩌᨶᩥᩈᩴᩈᩴ ᨸᨠᩣᩈᩮᩈᩥ. ᨲᩮᩈᩴ ᩅᩥᨸᩔᩥᨶᩣ ᨽᨣᩅᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩥᨿᨾᩣᨶᩣᨶᩴ ᩈᨾᩣᨴᨸᩥᨿᨾᩣᨶᩣᨶᩴ ᩈᨾᩩᨲ᩠ᨲᩮᨩᩥᨿᨾᩣᨶᩣᨶᩴ ᩈᨾ᩠ᨸᩉᩴᩈᩥᨿᨾᩣᨶᩣᨶᩴ ᨶᨧᩥᩁᩔᩮᩅ ᩋᨶᩩᨸᩣᨴᩣᨿ ᩌᩈᩅᩮᩉᩥ ᨧᩥᨲ᩠ᨲᩣᨶᩥ ᩅᩥᨾᩩᨧ᩠ᨧᩥᩴᩈᩩ.

ᨸᩩᩁᩥᨾᨸᨻ᩠ᨻᨩᩥᨲᩣᨶᩴ ᨵᨾ᩠ᨾᩣᨽᩥᩈᨾᨿᩮᩣ

᪘᪒. ‘‘ᩋᩔᩮᩣᩈᩩᩴ ᨡᩮᩣ, ᨽᩥᨠ᩠ᨡᩅᩮ, ᨲᩣᨶᩥ ᨸᩩᩁᩥᨾᩣᨶᩥ ᨧᨲᩩᩁᩣᩈᩦᨲᩥᨸᨻ᩠ᨻᨩᩥᨲᩈᩉᩔᩣᨶᩥ – ‘ᩅᩥᨸᩔᩦ ᨠᩥᩁ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨻᨶ᩠ᨵᩩᨾᨲᩥᩴ ᩁᩣᨩᨵᩣᨶᩥᩴ ᩋᨶᩩᨸ᩠ᨸᨲ᩠ᨲᩮᩣ ᨡᩮᨾᩮ ᨾᩥᨣᨴᩣᨿᩮ ᩅᩥᩉᩁᨲᩥ, ᨵᨾ᩠ᨾᨬ᩠ᨧ ᨠᩥᩁ ᨴᩮᩈᩮᨲᩦ’ᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᨲᩣᨶᩥ ᨧᨲᩩᩁᩣᩈᩦᨲᩥᨸᨻ᩠ᨻᨩᩥᨲᩈᩉᩔᩣᨶᩥ ᨿᩮᨶ ᨻᨶ᩠ᨵᩩᨾᨲᩦ ᩁᩣᨩᨵᩣᨶᩦ ᨿᩮᨶ ᨡᩮᨾᩮᩣ ᨾᩥᨣᨴᩣᨿᩮᩣ ᨿᩮᨶ ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᩅᩥᨸᩔᩥᩴ ᨽᨣᩅᨶ᩠ᨲᩴ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ.

᪘᪓. ‘‘ᨲᩮᩈᩴ ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩋᨶᩩᨸᩩᨻ᩠ᨻᩥᩴ ᨠᨳᩴ ᨠᨳᩮᩈᩥ. ᩈᩮᨿ᩠ᨿᨳᩥᨴᩴ – ᨴᩣᨶᨠᨳᩴ ᩈᩦᩃᨠᨳᩴ ᩈᨣ᩠ᨣᨠᨳᩴ ᨠᩣᨾᩣᨶᩴ ᩌᨴᩦᨶᩅᩴ ᩒᨠᩣᩁᩴ ᩈᩴᨠᩥᩃᩮᩈᩴ ᨶᩮᨠ᩠ᨡᨾ᩠ᨾᩮ ᩌᨶᩥᩈᩴᩈᩴ ᨸᨠᩣᩈᩮᩈᩥ. ᨿᨴᩣ ᨲᩮ ᨽᨣᩅᩣ ᩋᨬ᩠ᨬᩣᩈᩥ ᨠᩃ᩠ᩃᨧᩥᨲ᩠ᨲᩮ ᨾᩩᨴᩩᨧᩥᨲ᩠ᨲᩮ ᩅᩥᨶᩦᩅᩁᨱᨧᩥᨲ᩠ᨲᩮ ᩏᨴᨣ᩠ᨣᨧᩥᨲ᩠ᨲᩮ ᨸᩈᨶ᩠ᨶᨧᩥᨲ᩠ᨲᩮ, ᩋᨳ ᨿᩣ ᨻᩩᨴ᩠ᨵᩣᨶᩴ ᩈᩣᨾᩩᨠ᩠ᨠᩴᩈᩥᨠᩣ ᨵᨾ᩠ᨾᨴᩮᩈᨶᩣ, ᨲᩴ ᨸᨠᩣᩈᩮᩈᩥ – ᨴᩩᨠ᩠ᨡᩴ ᩈᨾᩩᨴᨿᩴ ᨶᩥᩁᩮᩣᨵᩴ ᨾᨣ᩠ᨣᩴ. ᩈᩮᨿ᩠ᨿᨳᩣᨸᩥ ᨶᩣᨾ ᩈᩩᨴ᩠ᨵᩴ ᩅᨲ᩠ᨳᩴ ᩋᨸᨣᨲᨠᩣᩊᨠᩴ ᩈᨾ᩠ᨾᨴᩮᩅ ᩁᨩᨶᩴ ᨸᨭᩥᨣ᩠ᨣᨱ᩠ᩉᩮᨿ᩠ᨿ, ᩑᩅᨾᩮᩅ ᨲᩮᩈᩴ ᨧᨲᩩᩁᩣᩈᩦᨲᩥᨸᨻ᩠ᨻᨩᩥᨲᩈᩉᩔᩣᨶᩴ ᨲᩈ᩠ᨾᩥᩴᨿᩮᩅ ᩌᩈᨶᩮ ᩅᩥᩁᨩᩴ ᩅᩦᨲᨾᩃᩴ ᨵᨾ᩠ᨾᨧᨠ᩠ᨡᩩᩴ ᩏᨴᨸᩣᨴᩥ – ‘ᨿᩴ ᨠᩥᨬ᩠ᨧᩥ ᩈᨾᩩᨴᨿᨵᨾ᩠ᨾᩴ ᩈᨻ᩠ᨻᩴ ᨲᩴ ᨶᩥᩁᩮᩣᨵᨵᨾ᩠ᨾ’ᨶ᩠ᨲᩥ.

᪘᪔. ‘‘ᨲᩮ ᨴᩥᨭ᩠ᨮᨵᨾ᩠ᨾᩣ ᨸᨲ᩠ᨲᨵᨾ᩠ᨾᩣ ᩅᩥᨴᩥᨲᨵᨾ᩠ᨾᩣ ᨸᩁᩥᨿᩮᩣᨣᩣᩊ᩠ᩉᨵᨾ᩠ᨾᩣ ᨲᩥᨱ᩠ᨱᩅᩥᨧᩥᨠᩥᨧ᩠ᨨᩣ ᩅᩥᨣᨲᨠᨳᩴᨠᨳᩣ ᩅᩮᩈᩣᩁᨩ᩠ᨩᨸ᩠ᨸᨲ᩠ᨲᩣ ᩋᨸᩁᨸ᩠ᨸᨧ᩠ᨧᨿᩣ ᩈᨲ᩠ᨳᩩᩈᩣᩈᨶᩮ ᩅᩥᨸᩔᩥᩴ ᨽᨣᩅᨶ᩠ᨲᩴ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᩑᨲᨴᩅᩮᩣᨧᩩᩴ – ‘ᩋᨽᩥᨠ᩠ᨠᨶ᩠ᨲᩴ, ᨽᨶ᩠ᨲᩮ, ᩋᨽᩥᨠ᩠ᨠᨶ᩠ᨲᩴ, ᨽᨶ᩠ᨲᩮ. ᩈᩮᨿ᩠ᨿᨳᩣᨸᩥ, ᨽᨶ᩠ᨲᩮ, ᨶᩥᨠ᩠ᨠᩩᨩ᩠ᨩᩥᨲᩴ ᩅᩣ ᩏᨠ᩠ᨠᩩᨩ᩠ᨩᩮᨿ᩠ᨿ, ᨸᨭᩥᨧ᩠ᨨᨶ᩠ᨶᩴ ᩅᩣ ᩅᩥᩅᩁᩮᨿ᩠ᨿ, ᨾᩪᩊ᩠ᩉᩔ ᩅᩣ ᨾᨣ᩠ᨣᩴ ᩌᨧᩥᨠ᩠ᨡᩮᨿ᩠ᨿ, ᩋᨶ᩠ᨵᨠᩣᩁᩮ ᩅᩣ ᨲᩮᩃᨸᨩ᩠ᨩᩮᩣᨲᩴ ᨵᩣᩁᩮᨿ᩠ᨿ ‘‘ᨧᨠ᩠ᨡᩩᨾᨶ᩠ᨲᩮᩣ ᩁᩪᨸᩣᨶᩥ ᨴᨠ᩠ᨡᨶ᩠ᨲᩦ’’ᨲᩥ. ᩑᩅᨾᩮᩅᩴ ᨽᨣᩅᨲᩣ ᩋᨶᩮᨠᨸᩁᩥᨿᩣᨿᩮᨶ ᨵᨾ᩠ᨾᩮᩣ ᨸᨠᩣᩈᩥᨲᩮᩣ. ᩑᨲᩮ ᨾᨿᩴ, ᨽᨶ᩠ᨲᩮ, ᨽᨣᩅᨶ᩠ᨲᩴ ᩈᩁᨱᩴ ᨣᨧ᩠ᨨᩣᨾ ᨵᨾ᩠ᨾᨬ᩠ᨧ ᨽᩥᨠ᩠ᨡᩩᩈᨦ᩠ᨥᨬ᩠ᨧ. ᩃᨽᩮᨿ᩠ᨿᩣᨾ ᨾᨿᩴ, ᨽᨶ᩠ᨲᩮ, ᨽᨣᩅᨲᩮᩣ ᩈᨶ᩠ᨲᩥᨠᩮ ᨸᨻ᩠ᨻᨩ᩠ᨩᩴ ᩃᨽᩮᨿ᩠ᨿᩣᨾ ᩏᨸᩈᨾ᩠ᨸᨴ’’ᨶ᩠ᨲᩥ.

᪘᪕. ‘‘ᩋᩃᨲ᩠ᨳᩩᩴ ᨡᩮᩣ, ᨽᩥᨠ᩠ᨡᩅᩮ, ᨲᩣᨶᩥ ᨧᨲᩩᩁᩣᩈᩦᨲᩥᨸᨻ᩠ᨻᨩᩥᨲᩈᩉᩔᩣᨶᩥ ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩈᨶ᩠ᨲᩥᨠᩮ ᨸᨻ᩠ᨻᨩ᩠ᨩᩴ ᩋᩃᨲ᩠ᨳᩩᩴ ᩏᨸᩈᨾ᩠ᨸᨴᩴ. ᨲᩮ ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᩈᩥ ᩈᨾᩣᨴᨸᩮᩈᩥ ᩈᨾᩩᨲ᩠ᨲᩮᨩᩮᩈᩥ ᩈᨾ᩠ᨸᩉᩴᩈᩮᩈᩥ; ᩈᨦ᩠ᨡᩣᩁᩣᨶᩴ ᩌᨴᩦᨶᩅᩴ ᩒᨠᩣᩁᩴ ᩈᩴᨠᩥᩃᩮᩈᩴ ᨶᩥᨻ᩠ᨻᩣᨶᩮ ᩌᨶᩥᩈᩴᩈᩴ ᨸᨠᩣᩈᩮᩈᩥ. ᨲᩮᩈᩴ ᩅᩥᨸᩔᩥᨶᩣ ᨽᨣᩅᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩥᨿᨾᩣᨶᩣᨶᩴ ᩈᨾᩣᨴᨸᩥᨿᨾᩣᨶᩣᨶᩴ ᩈᨾᩩᨲ᩠ᨲᩮᨩᩥᨿᨾᩣᨶᩣᨶᩴ ᩈᨾ᩠ᨸᩉᩴᩈᩥᨿᨾᩣᨶᩣᨶᩴ ᨶᨧᩥᩁᩔᩮᩅ ᩋᨶᩩᨸᩣᨴᩣᨿ ᩌᩈᩅᩮᩉᩥ ᨧᩥᨲ᩠ᨲᩣᨶᩥ ᩅᩥᨾᩩᨧ᩠ᨧᩥᩴᩈᩩ.

ᨧᩣᩁᩥᨠᩣᩋᨶᩩᨩᩣᨶᨶᩴ

᪘᪖. ‘‘ᨲᩮᨶ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩈᨾᨿᩮᨶ ᨻᨶ᩠ᨵᩩᨾᨲᩥᨿᩣ ᩁᩣᨩᨵᩣᨶᩥᨿᩣ ᨾᩉᩣᨽᩥᨠ᩠ᨡᩩᩈᨦ᩠ᨥᩮᩣ ᨸᨭᩥᩅᩈᨲᩥ ᩋᨭ᩠ᨮᩈᨭ᩠ᨮᩥᨽᩥᨠ᩠ᨡᩩᩈᨲᩈᩉᩔᩴ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩁᩉᩮᩣᨣᨲᩔ ᨸᨭᩥᩈᩃ᩠ᩃᩦᨶᩔ ᩑᩅᩴ ᨧᩮᨲᩈᩮᩣ ᨸᩁᩥᩅᩥᨲᨠ᩠ᨠᩮᩣ ᩏᨴᨸᩣᨴᩥ – ‘ᨾᩉᩣ ᨡᩮᩣ ᩑᨲᩁᩉᩥ ᨽᩥᨠ᩠ᨡᩩᩈᨦ᩠ᨥᩮᩣ ᨻᨶ᩠ᨵᩩᨾᨲᩥᨿᩣ ᩁᩣᨩᨵᩣᨶᩥᨿᩣ ᨸᨭᩥᩅᩈᨲᩥ ᩋᨭ᩠ᨮᩈᨭ᩠ᨮᩥᨽᩥᨠ᩠ᨡᩩᩈᨲᩈᩉᩔᩴ, ᨿᩴᨶᩪᨶᩣᩉᩴ ᨽᩥᨠ᩠ᨡᩪ ᩋᨶᩩᨩᩣᨶᩮᨿ᩠ᨿᩴ – ‘ᨧᩁᨳ, ᨽᩥᨠ᩠ᨡᩅᩮ, ᨧᩣᩁᩥᨠᩴ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ; ᨾᩣ ᩑᨠᩮᨶ ᨴ᩠ᩅᩮ ᩋᨣᨾᩥᨲ᩠ᨳ; ᨴᩮᩈᩮᨳ, ᨽᩥᨠ᩠ᨡᩅᩮ, ᨵᨾ᩠ᨾᩴ ᩌᨴᩥᨠᩃ᩠ᨿᩣᨱᩴ ᨾᨩ᩠ᨫᩮᨠᩃ᩠ᨿᩣᨱᩴ ᨸᩁᩥᨿᩮᩣᩈᩣᨶᨠᩃ᩠ᨿᩣᨱᩴ ᩈᩣᨲ᩠ᨳᩴ ᩈᨻ᩠ᨿᨬ᩠ᨩᨶᩴ ᨠᩮᩅᩃᨸᩁᩥᨸᩩᨱ᩠ᨱᩴ ᨸᩁᩥᩈᩩᨴ᩠ᨵᩴ ᨻᩕᩉ᩠ᨾᨧᩁᩥᨿᩴ ᨸᨠᩣᩈᩮᨳ. ᩈᨶ᩠ᨲᩥ ᩈᨲ᩠ᨲᩣ ᩋᨸ᩠ᨸᩁᨩᨠ᩠ᨡᨩᩣᨲᩥᨠᩣ, ᩋᩔᩅᨶᨲᩣ ᨵᨾ᩠ᨾᩔ ᨸᩁᩥᩉᩣᨿᨶ᩠ᨲᩥ, ᨽᩅᩥᩔᨶ᩠ᨲᩥ ᨵᨾ᩠ᨾᩔ ᩋᨬ᩠ᨬᩣᨲᩣᩁᩮᩣ. ᩋᨸᩥ ᨧ ᨨᨶ᩠ᨶᩴ ᨨᨶ᩠ᨶᩴ ᩅᩔᩣᨶᩴ ᩋᨧ᩠ᨧᨿᩮᨶ ᨻᨶ᩠ᨵᩩᨾᨲᩦ ᩁᩣᨩᨵᩣᨶᩦ ᩏᨸᩈᨦ᩠ᨠᨾᩥᨲᨻ᩠ᨻᩣ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩣᨿᩣ’’’ᨲᩥ.

᪘᪗. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩋᨬ᩠ᨬᨲᩁᩮᩣ ᨾᩉᩣᨻᩕᩉ᩠ᨾᩣ ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨧᩮᨲᩈᩣ ᨧᩮᨲᩮᩣᨸᩁᩥᩅᩥᨲᨠ᩠ᨠᨾᨬ᩠ᨬᩣᨿ ᩈᩮᨿ᩠ᨿᨳᩣᨸᩥ ᨶᩣᨾ ᨻᩃᩅᩣ ᨸᩩᩁᩥᩈᩮᩣ ᩈᨾᩥᨬ᩠ᨩᩥᨲᩴ ᩅᩣ ᨻᩣᩉᩴ ᨸᩈᩣᩁᩮᨿ᩠ᨿ, ᨸᩈᩣᩁᩥᨲᩴ ᩅᩣ ᨻᩣᩉᩴ ᩈᨾᩥᨬ᩠ᨩᩮᨿ᩠ᨿ. ᩑᩅᨾᩮᩅ ᨻᩕᩉ᩠ᨾᩃᩮᩣᨠᩮ ᩋᨶ᩠ᨲᩁᩉᩥᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨸᩩᩁᨲᩮᩣ ᨸᩣᨲᩩᩁᩉᩮᩣᩈᩥ. ᩋᨳ ᨡᩮᩣ ᩈᩮᩣ, ᨽᩥᨠ᩠ᨡᩅᩮ, ᨾᩉᩣᨻᩕᩉ᩠ᨾᩣ ᩑᨠᩴᩈᩴ ᩏᨲ᩠ᨲᩁᩣᩈᨦ᩠ᨣᩴ ᨠᩁᩥᨲ᩠ᩅᩣ ᨿᩮᨶ ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨲᩮᨶᨬ᩠ᨩᩃᩥᩴ ᨸᨱᩣᨾᩮᨲ᩠ᩅᩣ ᩅᩥᨸᩔᩥᩴ ᨽᨣᩅᨶ᩠ᨲᩴ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᩑᨲᨴᩅᩮᩣᨧ – ‘ᩑᩅᨾᩮᨲᩴ, ᨽᨣᩅᩣ, ᩑᩅᨾᩮᨲᩴ, ᩈᩩᨣᨲ. ᨾᩉᩣ ᨡᩮᩣ, ᨽᨶ᩠ᨲᩮ, ᩑᨲᩁᩉᩥ ᨽᩥᨠ᩠ᨡᩩᩈᨦ᩠ᨥᩮᩣ ᨻᨶ᩠ᨵᩩᨾᨲᩥᨿᩣ ᩁᩣᨩᨵᩣᨶᩥᨿᩣ ᨸᨭᩥᩅᩈᨲᩥ ᩋᨭ᩠ᨮᩈᨭ᩠ᨮᩥᨽᩥᨠ᩠ᨡᩩᩈᨲᩈᩉᩔᩴ, ᩋᨶᩩᨩᩣᨶᩣᨲᩩ, ᨽᨶ᩠ᨲᩮ, ᨽᨣᩅᩣ ᨽᩥᨠ᩠ᨡᩪ – ‘‘ᨧᩁᨳ, ᨽᩥᨠ᩠ᨡᩅᩮ, ᨧᩣᩁᩥᨠᩴ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ; ᨾᩣ ᩑᨠᩮᨶ ᨴ᩠ᩅᩮ ᩋᨣᨾᩥᨲ᩠ᨳ; ᨴᩮᩈᩮᨳ, ᨽᩥᨠ᩠ᨡᩅᩮ, ᨵᨾ᩠ᨾᩴ ᩌᨴᩥᨠᩃ᩠ᨿᩣᨱᩴ ᨾᨩ᩠ᨫᩮᨠᩃ᩠ᨿᩣᨱᩴ ᨸᩁᩥᨿᩮᩣᩈᩣᨶᨠᩃ᩠ᨿᩣᨱᩴ ᩈᩣᨲ᩠ᨳᩴ ᩈᨻ᩠ᨿᨬ᩠ᨩᨶᩴ ᨠᩮᩅᩃᨸᩁᩥᨸᩩᨱ᩠ᨱᩴ ᨸᩁᩥᩈᩩᨴ᩠ᨵᩴ ᨻᩕᩉ᩠ᨾᨧᩁᩥᨿᩴ ᨸᨠᩣᩈᩮᨳ. ᩈᨶ᩠ᨲᩥ ᩈᨲ᩠ᨲᩣ ᩋᨸ᩠ᨸᩁᨩᨠ᩠ᨡᨩᩣᨲᩥᨠᩣ, ᩋᩔᩅᨶᨲᩣ ᨵᨾ᩠ᨾᩔ ᨸᩁᩥᩉᩣᨿᨶ᩠ᨲᩥ, ᨽᩅᩥᩔᨶ᩠ᨲᩥ ᨵᨾ᩠ᨾᩔ ᩋᨬ᩠ᨬᩣᨲᩣᩁᩮᩣ’’ᨲᩥ [ᩋᨬ᩠ᨬᩣᨲᩣᩁᩮᩣ (ᩔᨻ᩠ᨻᨲ᩠ᨳ)]. ᩋᨸᩥ ᨧ, ᨽᨶ᩠ᨲᩮ, ᨾᨿᩴ ᨲᨳᩣ ᨠᩁᩥᩔᩣᨾ ᨿᨳᩣ ᨽᩥᨠ᩠ᨡᩪ ᨨᨶ᩠ᨶᩴ ᨨᨶ᩠ᨶᩴ ᩅᩔᩣᨶᩴ ᩋᨧ᩠ᨧᨿᩮᨶ ᨻᨶ᩠ᨵᩩᨾᨲᩥᩴ ᩁᩣᨩᨵᩣᨶᩥᩴ ᩏᨸᩈᨦ᩠ᨠᨾᩥᩔᨶ᩠ᨲᩥ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩣᨿᩣ’ᨲᩥ. ᩍᨴᨾᩅᩮᩣᨧ, ᨽᩥᨠ᩠ᨡᩅᩮ, ᩈᩮᩣ ᨾᩉᩣᨻᩕᩉ᩠ᨾᩣ, ᩍᨴᩴ ᩅᨲ᩠ᩅᩣ ᩅᩥᨸᩔᩥᩴ ᨽᨣᩅᨶ᩠ᨲᩴ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨲᨲ᩠ᨳᩮᩅ ᩋᨶ᩠ᨲᩁᨵᩣᨿᩥ.

᪘᪘. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩈᩣᨿᨶ᩠ᩉᩈᨾᨿᩴ ᨸᨭᩥᩈᩃ᩠ᩃᩣᨶᩣ ᩅᩩᨭ᩠ᨮᩥᨲᩮᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘ᩍᨵ ᨾᨿ᩠ᩉᩴ, ᨽᩥᨠ᩠ᨡᩅᩮ, ᩁᩉᩮᩣᨣᨲᩔ ᨸᨭᩥᩈᩃ᩠ᩃᩦᨶᩔ ᩑᩅᩴ ᨧᩮᨲᩈᩮᩣ ᨸᩁᩥᩅᩥᨲᨠ᩠ᨠᩮᩣ ᩏᨴᨸᩣᨴᩥ – ᨾᩉᩣ ᨡᩮᩣ ᩑᨲᩁᩉᩥ ᨽᩥᨠ᩠ᨡᩩᩈᨦ᩠ᨥᩮᩣ ᨻᨶ᩠ᨵᩩᨾᨲᩥᨿᩣ ᩁᩣᨩᨵᩣᨶᩥᨿᩣ ᨸᨭᩥᩅᩈᨲᩥ ᩋᨭ᩠ᨮᩈᨭ᩠ᨮᩥᨽᩥᨠ᩠ᨡᩩᩈᨲᩈᩉᩔᩴ. ᨿᩴᨶᩪᨶᩣᩉᩴ ᨽᩥᨠ᩠ᨡᩪ ᩋᨶᩩᨩᩣᨶᩮᨿ᩠ᨿᩴ – ‘ᨧᩁᨳ, ᨽᩥᨠ᩠ᨡᩅᩮ, ᨧᩣᩁᩥᨠᩴ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ; ᨾᩣ ᩑᨠᩮᨶ ᨴ᩠ᩅᩮ ᩋᨣᨾᩥᨲ᩠ᨳ; ᨴᩮᩈᩮᨳ, ᨽᩥᨠ᩠ᨡᩅᩮ, ᨵᨾ᩠ᨾᩴ ᩌᨴᩥᨠᩃ᩠ᨿᩣᨱᩴ ᨾᨩ᩠ᨫᩮᨠᩃ᩠ᨿᩣᨱᩴ ᨸᩁᩥᨿᩮᩣᩈᩣᨶᨠᩃ᩠ᨿᩣᨱᩴ ᩈᩣᨲ᩠ᨳᩴ ᩈᨻ᩠ᨿᨬ᩠ᨩᨶᩴ ᨠᩮᩅᩃᨸᩁᩥᨸᩩᨱ᩠ᨱᩴ ᨸᩁᩥᩈᩩᨴ᩠ᨵᩴ ᨻᩕᩉ᩠ᨾᨧᩁᩥᨿᩴ ᨸᨠᩣᩈᩮᨳ. ᩈᨶ᩠ᨲᩥ ᩈᨲ᩠ᨲᩣ ᩋᨸ᩠ᨸᩁᨩᨠ᩠ᨡᨩᩣᨲᩥᨠᩣ, ᩋᩔᩅᨶᨲᩣ ᨵᨾ᩠ᨾᩔ ᨸᩁᩥᩉᩣᨿᨶ᩠ᨲᩥ, ᨽᩅᩥᩔᨶ᩠ᨲᩥ ᨵᨾ᩠ᨾᩔ ᩋᨬ᩠ᨬᩣᨲᩣᩁᩮᩣ. ᩋᨸᩥ ᨧ, ᨨᨶ᩠ᨶᩴ ᨨᨶ᩠ᨶᩴ ᩅᩔᩣᨶᩴ ᩋᨧ᩠ᨧᨿᩮᨶ ᨻᨶ᩠ᨵᩩᨾᨲᩦ ᩁᩣᨩᨵᩣᨶᩦ ᩏᨸᩈᨦ᩠ᨠᨾᩥᨲᨻ᩠ᨻᩣ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩣᨿᩣᨲᩥ.

‘‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩋᨬ᩠ᨬᨲᩁᩮᩣ ᨾᩉᩣᨻᩕᩉ᩠ᨾᩣ ᨾᨾ ᨧᩮᨲᩈᩣ ᨧᩮᨲᩮᩣᨸᩁᩥᩅᩥᨲᨠ᩠ᨠᨾᨬ᩠ᨬᩣᨿ ᩈᩮᨿ᩠ᨿᨳᩣᨸᩥ ᨶᩣᨾ ᨻᩃᩅᩣ ᨸᩩᩁᩥᩈᩮᩣ ᩈᨾᩥᨬ᩠ᨩᩥᨲᩴ ᩅᩣ ᨻᩣᩉᩴ ᨸᩈᩣᩁᩮᨿ᩠ᨿ, ᨸᩈᩣᩁᩥᨲᩴ ᩅᩣ ᨻᩣᩉᩴ ᩈᨾᩥᨬ᩠ᨩᩮᨿ᩠ᨿ, ᩑᩅᨾᩮᩅ ᨻᩕᩉ᩠ᨾᩃᩮᩣᨠᩮ ᩋᨶ᩠ᨲᩁᩉᩥᨲᩮᩣ ᨾᨾ ᨸᩩᩁᨲᩮᩣ ᨸᩣᨲᩩᩁᩉᩮᩣᩈᩥ. ᩋᨳ ᨡᩮᩣ ᩈᩮᩣ, ᨽᩥᨠ᩠ᨡᩅᩮ, ᨾᩉᩣᨻᩕᩉ᩠ᨾᩣ ᩑᨠᩴᩈᩴ ᩏᨲ᩠ᨲᩁᩣᩈᨦ᩠ᨣᩴ ᨠᩁᩥᨲ᩠ᩅᩣ ᨿᩮᨶᩣᩉᩴ ᨲᩮᨶᨬ᩠ᨩᩃᩥᩴ ᨸᨱᩣᨾᩮᨲ᩠ᩅᩣ ᨾᩴ ᩑᨲᨴᩅᩮᩣᨧ – ‘‘ᩑᩅᨾᩮᨲᩴ, ᨽᨣᩅᩣ, ᩑᩅᨾᩮᨲᩴ, ᩈᩩᨣᨲ. ᨾᩉᩣ ᨡᩮᩣ, ᨽᨶ᩠ᨲᩮ, ᩑᨲᩁᩉᩥ ᨽᩥᨠ᩠ᨡᩩᩈᨦ᩠ᨥᩮᩣ ᨻᨶ᩠ᨵᩩᨾᨲᩥᨿᩣ ᩁᩣᨩᨵᩣᨶᩥᨿᩣ ᨸᨭᩥᩅᩈᨲᩥ ᩋᨭ᩠ᨮᩈᨭ᩠ᨮᩥᨽᩥᨠ᩠ᨡᩩᩈᨲᩈᩉᩔᩴ. ᩋᨶᩩᨩᩣᨶᩣᨲᩩ, ᨽᨶ᩠ᨲᩮ, ᨽᨣᩅᩣ ᨽᩥᨠ᩠ᨡᩪ – ‘ᨧᩁᨳ, ᨽᩥᨠ᩠ᨡᩅᩮ, ᨧᩣᩁᩥᨠᩴ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ; ᨾᩣ ᩑᨠᩮᨶ ᨴ᩠ᩅᩮ ᩋᨣᨾᩥᨲ᩠ᨳ; ᨴᩮᩈᩮᨳ, ᨽᩥᨠ᩠ᨡᩅᩮ, ᨵᨾ᩠ᨾᩴ…ᨸᩮ… ᩈᨶ᩠ᨲᩥ ᩈᨲ᩠ᨲᩣ ᩋᨸ᩠ᨸᩁᨩᨠ᩠ᨡᨩᩣᨲᩥᨠᩣ, ᩋᩔᩅᨶᨲᩣ ᨵᨾ᩠ᨾᩔ ᨸᩁᩥᩉᩣᨿᨶ᩠ᨲᩥ, ᨽᩅᩥᩔᨶ᩠ᨲᩥ ᨵᨾ᩠ᨾᩔ ᩋᨬ᩠ᨬᩣᨲᩣᩁᩮᩣ’ᨲᩥ. ᩋᨸᩥ ᨧ, ᨽᨶ᩠ᨲᩮ, ᨾᨿᩴ ᨲᨳᩣ ᨠᩁᩥᩔᩣᨾ, ᨿᨳᩣ ᨽᩥᨠ᩠ᨡᩪ ᨨᨶ᩠ᨶᩴ ᨨᨶ᩠ᨶᩴ ᩅᩔᩣᨶᩴ ᩋᨧ᩠ᨧᨿᩮᨶ ᨻᨶ᩠ᨵᩩᨾᨲᩥᩴ ᩁᩣᨩᨵᩣᨶᩥᩴ ᩏᨸᩈᨦ᩠ᨠᨾᩥᩔᨶ᩠ᨲᩥ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩣᨿᩣ’’ᨲᩥ. ᩍᨴᨾᩅᩮᩣᨧ, ᨽᩥᨠ᩠ᨡᩅᩮ, ᩈᩮᩣ ᨾᩉᩣᨻᩕᩉ᩠ᨾᩣ, ᩍᨴᩴ ᩅᨲ᩠ᩅᩣ ᨾᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨲᨲ᩠ᨳᩮᩅ ᩋᨶ᩠ᨲᩁᨵᩣᨿᩥ’.

‘‘‘ᩋᨶᩩᨩᩣᨶᩣᨾᩥ, ᨽᩥᨠ᩠ᨡᩅᩮ, ᨧᩁᨳ ᨧᩣᩁᩥᨠᩴ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ; ᨾᩣ ᩑᨠᩮᨶ ᨴ᩠ᩅᩮ ᩋᨣᨾᩥᨲ᩠ᨳ; ᨴᩮᩈᩮᨳ, ᨽᩥᨠ᩠ᨡᩅᩮ, ᨵᨾ᩠ᨾᩴ ᩌᨴᩥᨠᩃ᩠ᨿᩣᨱᩴ ᨾᨩ᩠ᨫᩮᨠᩃ᩠ᨿᩣᨱᩴ ᨸᩁᩥᨿᩮᩣᩈᩣᨶᨠᩃ᩠ᨿᩣᨱᩴ ᩈᩣᨲ᩠ᨳᩴ ᩈᨻ᩠ᨿᨬ᩠ᨩᨶᩴ ᨠᩮᩅᩃᨸᩁᩥᨸᩩᨱ᩠ᨱᩴ ᨸᩁᩥᩈᩩᨴ᩠ᨵᩴ ᨻᩕᩉ᩠ᨾᨧᩁᩥᨿᩴ ᨸᨠᩣᩈᩮᨳ. ᩈᨶ᩠ᨲᩥ ᩈᨲ᩠ᨲᩣ ᩋᨸ᩠ᨸᩁᨩᨠ᩠ᨡᨩᩣᨲᩥᨠᩣ, ᩋᩔᩅᨶᨲᩣ ᨵᨾ᩠ᨾᩔ ᨸᩁᩥᩉᩣᨿᨶ᩠ᨲᩥ, ᨽᩅᩥᩔᨶ᩠ᨲᩥ ᨵᨾ᩠ᨾᩔ ᩋᨬ᩠ᨬᩣᨲᩣᩁᩮᩣ. ᩋᨸᩥ ᨧ, ᨽᩥᨠ᩠ᨡᩅᩮ, ᨨᨶ᩠ᨶᩴ ᨨᨶ᩠ᨶᩴ ᩅᩔᩣᨶᩴ ᩋᨧ᩠ᨧᨿᩮᨶ ᨻᨶ᩠ᨵᩩᨾᨲᩦ ᩁᩣᨩᨵᩣᨶᩦ ᩏᨸᩈᨦ᩠ᨠᨾᩥᨲᨻ᩠ᨻᩣ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩣᨿᩣ’ᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᨿᩮᨽᩩᨿ᩠ᨿᩮᨶ ᩑᨠᩣᩉᩮᨶᩮᩅ ᨩᨶᨸᨴᨧᩣᩁᩥᨠᩴ ᨸᨠ᩠ᨠᨾᩥᩴᩈᩩ.

᪘᪙. ‘‘ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨩᨾ᩠ᨻᩩᨴᩦᨸᩮ ᨧᨲᩩᩁᩣᩈᩦᨲᩥ ᩌᩅᩣᩈᩈᩉᩔᩣᨶᩥ ᩉᩮᩣᨶ᩠ᨲᩥ. ᩑᨠᨾ᩠ᩉᩥ ᩉᩥ ᩅᩔᩮ ᨶᩥᨠ᩠ᨡᨶ᩠ᨲᩮ ᨴᩮᩅᨲᩣ ᩈᨴ᩠ᨴᨾᨶᩩᩔᩣᩅᩮᩈᩩᩴ – ‘ᨶᩥᨠ᩠ᨡᨶ᩠ᨲᩴ ᨡᩮᩣ, ᨾᩣᩁᩥᩈᩣ, ᩑᨠᩴ ᩅᩔᩴ; ᨸᨬ᩠ᨧ ᨴᩣᨶᩥ ᩅᩔᩣᨶᩥ ᩈᩮᩈᩣᨶᩥ; ᨸᨬ᩠ᨧᨶ᩠ᨶᩴ ᩅᩔᩣᨶᩴ ᩋᨧ᩠ᨧᨿᩮᨶ ᨻᨶ᩠ᨵᩩᨾᨲᩦ ᩁᩣᨩᨵᩣᨶᩦ ᩏᨸᩈᨦ᩠ᨠᨾᩥᨲᨻ᩠ᨻᩣ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩣᨿᩣ’ᨲᩥ. ᨴ᩠ᩅᩦᩈᩩ ᩅᩔᩮᩈᩩ ᨶᩥᨠ᩠ᨡᨶ᩠ᨲᩮᩈᩩ… ᨲᩦᩈᩩ ᩅᩔᩮᩈᩩ ᨶᩥᨠ᩠ᨡᨶ᩠ᨲᩮᩈᩩ… ᨧᨲᩪᩈᩩ ᩅᩔᩮᩈᩩ ᨶᩥᨠ᩠ᨡᨶ᩠ᨲᩮᩈᩩ… ᨸᨬ᩠ᨧᩈᩩ ᩅᩔᩮᩈᩩ ᨶᩥᨠ᩠ᨡᨶ᩠ᨲᩮᩈᩩ ᨴᩮᩅᨲᩣ ᩈᨴ᩠ᨴᨾᨶᩩᩔᩣᩅᩮᩈᩩᩴ – ‘ᨶᩥᨠ᩠ᨡᨶ᩠ᨲᩣᨶᩥ ᨡᩮᩣ, ᨾᩣᩁᩥᩈᩣ, ᨸᨬ᩠ᨧᩅᩔᩣᨶᩥ; ᩑᨠᩴ ᨴᩣᨶᩥ ᩅᩔᩴ ᩈᩮᩈᩴ; ᩑᨠᩔ ᩅᩔᩔ ᩋᨧ᩠ᨧᨿᩮᨶ ᨻᨶ᩠ᨵᩩᨾᨲᩦ ᩁᩣᨩᨵᩣᨶᩦ ᩏᨸᩈᨦ᩠ᨠᨾᩥᨲᨻ᩠ᨻᩣ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩣᨿᩣ’ᨲᩥ. ᨨᩈᩩ ᩅᩔᩮᩈᩩ ᨶᩥᨠ᩠ᨡᨶ᩠ᨲᩮᩈᩩ ᨴᩮᩅᨲᩣ ᩈᨴ᩠ᨴᨾᨶᩩᩔᩣᩅᩮᩈᩩᩴ – ‘ᨶᩥᨠ᩠ᨡᨶ᩠ᨲᩣᨶᩥ ᨡᩮᩣ, ᨾᩣᩁᩥᩈᩣ, ᨨᨻ᩠ᨻᩔᩣᨶᩥ, ᩈᨾᨿᩮᩣ ᨴᩣᨶᩥ ᨻᨶ᩠ᨵᩩᨾᨲᩥᩴ ᩁᩣᨩᨵᩣᨶᩥᩴ ᩏᨸᩈᨦ᩠ᨠᨾᩥᨲᩩᩴ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩣᨿᩣ’ᨲᩥ. ᩋᨳ ᨡᩮᩣ ᨲᩮ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᩋᨸ᩠ᨸᩮᨠᨧ᩠ᨧᩮ ᩈᨠᩮᨶ ᩍᨴ᩠ᨵᩣᨶᩩᨽᩣᩅᩮᨶ ᩋᨸ᩠ᨸᩮᨠᨧ᩠ᨧᩮ ᨴᩮᩅᨲᩣᨶᩴ ᩍᨴ᩠ᨵᩣᨶᩩᨽᩣᩅᩮᨶ ᩑᨠᩣᩉᩮᨶᩮᩅ ᨻᨶ᩠ᨵᩩᨾᨲᩥᩴ ᩁᩣᨩᨵᩣᨶᩥᩴ ᩏᨸᩈᨦ᩠ᨠᨾᩥᩴᩈᩩ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩣᨿᩣᨲᩥ [ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩣᨿ (?)].

᪙᪐. ‘‘ᨲᨲᩕ ᩈᩩᨴᩴ, ᨽᩥᨠ᩠ᨡᩅᩮ, ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨽᩥᨠ᩠ᨡᩩᩈᨦ᩠ᨥᩮ ᩑᩅᩴ ᨸᩣᨲᩥᨾᩮᩣᨠ᩠ᨡᩴ ᩏᨴ᩠ᨴᩥᩈᨲᩥ –

‘ᨡᨶ᩠ᨲᩦ ᨸᩁᨾᩴ ᨲᨸᩮᩣ ᨲᩥᨲᩥᨠ᩠ᨡᩣ,

ᨶᩥᨻ᩠ᨻᩣᨶᩴ ᨸᩁᨾᩴ ᩅᨴᨶ᩠ᨲᩥ ᨻᩩᨴ᩠ᨵᩣ;

ᨶ ᩉᩥ ᨸᨻ᩠ᨻᨩᩥᨲᩮᩣ ᨸᩁᩪᨸᨥᩣᨲᩦ,

ᨶ ᩈᨾᨱᩮᩣ [ᩈᨾᨱᩮᩣ (ᩈᩦ. ᩈ᩠ᨿᩣ. ᨸᩦ.)] ᩉᩮᩣᨲᩥ ᨸᩁᩴ ᩅᩥᩉᩮᨮᨿᨶ᩠ᨲᩮᩣ.

‘ᩈᨻ᩠ᨻᨸᩣᨸᩔ ᩋᨠᩁᨱᩴ, ᨠᩩᩈᩃᩔ ᩏᨸᩈᨾ᩠ᨸᨴᩣ;

ᩈᨧᩥᨲ᩠ᨲᨸᩁᩥᨿᩮᩣᨴᨸᨶᩴ, ᩑᨲᩴ ᨻᩩᨴ᩠ᨵᩣᨶᩈᩣᩈᨶᩴ.

‘ᩋᨶᩪᨸᩅᩣᨴᩮᩣ ᩋᨶᩪᨸᨥᩣᨲᩮᩣ [ᩋᨶᩩᨸᩅᩣᨴᩮᩣ ᩋᨶᩩᨸᨥᩣᨲᩮᩣ (ᨸᩦ. ᨠ.)], ᨸᩣᨲᩥᨾᩮᩣᨠ᩠ᨡᩮ ᨧ ᩈᩴᩅᩁᩮᩣ;

ᨾᨲ᩠ᨲᨬ᩠ᨬᩩᨲᩣ ᨧ ᨽᨲ᩠ᨲᩈ᩠ᨾᩥᩴ, ᨸᨶ᩠ᨲᨬ᩠ᨧ ᩈᨿᨶᩣᩈᨶᩴ;

ᩋᨵᩥᨧᩥᨲ᩠ᨲᩮ ᨧ ᩌᨿᩮᩣᨣᩮᩣ, ᩑᨲᩴ ᨻᩩᨴ᩠ᨵᩣᨶᩈᩣᩈᨶ’ᨶ᩠ᨲᩥ.

ᨴᩮᩅᨲᩣᩁᩮᩣᨧᨶᩴ

᪙᪑. ‘‘ᩑᨠᨾᩥᨴᩣᩉᩴ, ᨽᩥᨠ᩠ᨡᩅᩮ, ᩈᨾᨿᩴ ᩏᨠ᩠ᨠᨭ᩠ᨮᩣᨿᩴ ᩅᩥᩉᩁᩣᨾᩥ ᩈᩩᨽᨣᩅᨶᩮ ᩈᩣᩃᩁᩣᨩᨾᩪᩃᩮ. ᨲᩔ ᨾᨿ᩠ᩉᩴ, ᨽᩥᨠ᩠ᨡᩅᩮ, ᩁᩉᩮᩣᨣᨲᩔ ᨸᨭᩥᩈᩃ᩠ᩃᩦᨶᩔ ᩑᩅᩴ ᨧᩮᨲᩈᩮᩣ ᨸᩁᩥᩅᩥᨲᨠ᩠ᨠᩮᩣ ᩏᨴᨸᩣᨴᩥ – ‘ᨶ ᨡᩮᩣ ᩈᩮᩣ ᩈᨲ᩠ᨲᩣᩅᩣᩈᩮᩣ ᩈᩩᩃᨽᩁᩪᨸᩮᩣ, ᨿᩮᩣ ᨾᨿᩣ ᩋᨶᩣᩅᩩᨲ᩠ᨳᨸᩩᨻ᩠ᨻᩮᩣ [ᩋᨶᨩ᩠ᨫᩣᩅᩩᨭ᩠ᨮᨸᩩᨻ᩠ᨻᩮᩣ (ᨠ. ᩈᩦ. ᨠ.)] ᩍᨾᩥᨶᩣ ᨴᩦᨥᩮᨶ ᩋᨴ᩠ᨵᩩᨶᩣ ᩋᨬ᩠ᨬᨲᩕ ᩈᩩᨴ᩠ᨵᩣᩅᩣᩈᩮᩉᩥ ᨴᩮᩅᩮᩉᩥ. ᨿᩴᨶᩪᨶᩣᩉᩴ ᨿᩮᨶ ᩈᩩᨴ᩠ᨵᩣᩅᩣᩈᩣ ᨴᩮᩅᩣ ᨲᩮᨶᩩᨸᩈᨦ᩠ᨠᨾᩮᨿ᩠ᨿ’ᨶ᩠ᨲᩥ. ᩋᨳ ᨡ᩠ᩅᩣᩉᩴ, ᨽᩥᨠ᩠ᨡᩅᩮ, ᩈᩮᨿ᩠ᨿᨳᩣᨸᩥ ᨶᩣᨾ ᨻᩃᩅᩣ ᨸᩩᩁᩥᩈᩮᩣ ᩈᨾᩥᨬ᩠ᨩᩥᨲᩴ ᩅᩣ ᨻᩣᩉᩴ ᨸᩈᩣᩁᩮᨿ᩠ᨿ, ᨸᩈᩣᩁᩥᨲᩴ ᩅᩣ ᨻᩣᩉᩴ ᩈᨾᩥᨬ᩠ᨩᩮᨿ᩠ᨿ, ᩑᩅᨾᩮᩅ ᩏᨠ᩠ᨠᨭ᩠ᨮᩣᨿᩴ ᩈᩩᨽᨣᩅᨶᩮ ᩈᩣᩃᩁᩣᨩᨾᩪᩃᩮ ᩋᨶ᩠ᨲᩁᩉᩥᨲᩮᩣ ᩋᩅᩥᩉᩮᩈᩩ ᨴᩮᩅᩮᩈᩩ ᨸᩣᨲᩩᩁᩉᩮᩣᩈᩥᩴ. ᨲᩈ᩠ᨾᩥᩴ, ᨽᩥᨠ᩠ᨡᩅᩮ, ᨴᩮᩅᨶᩥᨠᩣᨿᩮ ᩋᨶᩮᨠᩣᨶᩥ ᨴᩮᩅᨲᩣᩈᩉᩔᩣᨶᩥ ᩋᨶᩮᨠᩣᨶᩥ ᨴᩮᩅᨲᩣᩈᨲᩈᩉᩔᩣᨶᩥ [ᩋᨶᩮᨠᩣᨶᩥ ᨴᩮᩅᨲᩣᩈᨲᩣᨶᩥ ᩋᨶᩮᨠᩣᨶᩥ ᨴᩮᩅᨲᩣᩈᩉᩔᩣᨶᩥ (ᩈ᩠ᨿᩣ.)] ᨿᩮᨶᩣᩉᩴ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩴᩈᩩ. ᩑᨠᨾᨶ᩠ᨲᩴ ᨮᩥᨲᩣ ᨡᩮᩣ, ᨽᩥᨠ᩠ᨡᩅᩮ, ᨲᩣ ᨴᩮᩅᨲᩣ ᨾᩴ ᩑᨲᨴᩅᩮᩣᨧᩩᩴ – ‘ᩍᨲᩮᩣ ᩈᩮᩣ, ᨾᩣᩁᩥᩈᩣ, ᩑᨠᨶᩅᩩᨲᩥᨠᨸ᩠ᨸᩮ ᨿᩴ ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩏᨴᨸᩣᨴᩥ. ᩅᩥᨸᩔᩦ, ᨾᩣᩁᩥᩈᩣ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨡᨲ᩠ᨲᩥᨿᩮᩣ ᨩᩣᨲᩥᨿᩣ ᩋᩉᩮᩣᩈᩥ, ᨡᨲ᩠ᨲᩥᨿᨠᩩᩃᩮ ᩏᨴᨸᩣᨴᩥ. ᩅᩥᨸᩔᩦ, ᨾᩣᩁᩥᩈᩣ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨠᩮᩣᨱ᩠ᨯᨬ᩠ᨬᩮᩣ ᨣᩮᩣᨲ᩠ᨲᩮᨶ ᩋᩉᩮᩣᩈᩥ. ᩅᩥᨸᩔᩥᩔ, ᨾᩣᩁᩥᩈᩣ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩋᩈᩦᨲᩥᩅᩔᩈᩉᩔᩣᨶᩥ ᩌᨿᩩᨸ᩠ᨸᨾᩣᨱᩴ ᩋᩉᩮᩣᩈᩥ. ᩅᩥᨸᩔᩦ, ᨾᩣᩁᩥᩈᩣ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨸᩣᨭᩃᩥᨿᩣ ᨾᩪᩃᩮ ᩋᨽᩥᩈᨾ᩠ᨻᩩᨴ᩠ᨵᩮᩣ. ᩅᩥᨸᩔᩥᩔ, ᨾᩣᩁᩥᩈᩣ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨡᨱ᩠ᨯᨲᩥᩔᩴ ᨶᩣᨾ ᩈᩣᩅᨠᨿᩩᨣᩴ ᩋᩉᩮᩣᩈᩥ ᩋᨣ᩠ᨣᩴ ᨽᨴ᩠ᨴᨿᩩᨣᩴ. ᩅᩥᨸᩔᩥᩔ, ᨾᩣᩁᩥᩈᩣ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨲᨿᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩣ ᩋᩉᩮᩈᩩᩴ. ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩋᨭ᩠ᨮᩈᨭ᩠ᨮᩥᨽᩥᨠ᩠ᨡᩩᩈᨲᩈᩉᩔᩴ. ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᨽᩥᨠ᩠ᨡᩩᩈᨲᩈᩉᩔᩴ. ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩋᩈᩦᨲᩥᨽᩥᨠ᩠ᨡᩩᩈᩉᩔᩣᨶᩥ. ᩅᩥᨸᩔᩥᩔ, ᨾᩣᩁᩥᩈᩣ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩍᨾᩮ ᨲᨿᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩣ ᩋᩉᩮᩈᩩᩴ ᩈᨻ᩠ᨻᩮᩈᩴᨿᩮᩅ ᨡᩦᨱᩣᩈᩅᩣᨶᩴ. ᩅᩥᨸᩔᩥᩔ, ᨾᩣᩁᩥᩈᩣ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩋᩈᩮᩣᨠᩮᩣ ᨶᩣᨾ ᨽᩥᨠ᩠ᨡᩩ ᩏᨸᨭ᩠ᨮᩣᨠᩮᩣ ᩋᩉᩮᩣᩈᩥ ᩋᨣ᩠ᨣᩩᨸᨭ᩠ᨮᩣᨠᩮᩣ. ᩅᩥᨸᩔᩥᩔ, ᨾᩣᩁᩥᩈ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨻᨶ᩠ᨵᩩᨾᩣ ᨶᩣᨾ ᩁᩣᨩᩣ ᨸᩥᨲᩣ ᩋᩉᩮᩣᩈᩥ. ᨻᨶ᩠ᨵᩩᨾᨲᩦ ᨶᩣᨾ ᨴᩮᩅᩦ ᨾᩣᨲᩣ ᩋᩉᩮᩣᩈᩥ ᨩᨶᩮᨲ᩠ᨲᩥ. ᨻᨶ᩠ᨵᩩᨾᩔ ᩁᨬ᩠ᨬᩮᩣ ᨻᨶ᩠ᨵᩩᨾᨲᩦ ᨶᩣᨾ ᨶᨣᩁᩴ ᩁᩣᨩᨵᩣᨶᩦ ᩋᩉᩮᩣᩈᩥ. ᩅᩥᨸᩔᩥᩔ, ᨾᩣᩁᩥᩈᩣ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩑᩅᩴ ᩋᨽᩥᨶᩥᨠ᩠ᨡᨾᨶᩴ ᩋᩉᩮᩣᩈᩥ ᩑᩅᩴ ᨸᨻ᩠ᨻᨩ᩠ᨩᩣ ᩑᩅᩴ ᨸᨵᩣᨶᩴ ᩑᩅᩴ ᩋᨽᩥᩈᨾ᩠ᨻᩮᩣᨵᩥ ᩑᩅᩴ ᨵᨾ᩠ᨾᨧᨠ᩠ᨠᨸ᩠ᨸᩅᨲ᩠ᨲᨶᩴ. ᨲᩮ ᨾᨿᩴ, ᨾᩣᩁᩥᩈᩣ, ᩅᩥᨸᩔᩥᨾ᩠ᩉᩥ ᨽᨣᩅᨲᩥ ᨻᩕᩉ᩠ᨾᨧᩁᩥᨿᩴ ᨧᩁᩥᨲ᩠ᩅᩣ ᨠᩣᨾᩮᩈᩩ ᨠᩣᨾᨧ᩠ᨨᨶ᩠ᨴᩴ ᩅᩥᩁᩣᨩᩮᨲ᩠ᩅᩣ ᩍᨵᩪᨸᨸᨶ᩠ᨶᩣ’ᨲᩥ …ᨸᩮ…

‘‘ᨲᩈ᩠ᨾᩥᩴᨿᩮᩅ ᨡᩮᩣ, ᨽᩥᨠ᩠ᨡᩅᩮ, ᨴᩮᩅᨶᩥᨠᩣᨿᩮ ᩋᨶᩮᨠᩣᨶᩥ ᨴᩮᩅᨲᩣᩈᩉᩔᩣᨶᩥ ᩋᨶᩮᨠᩣᨶᩥ ᨴᩮᩅᨲᩣᩈᨲᩈᩉᩔᩣᨶᩥ [ᩋᨶᩮᨠᩣᨶᩥ ᨴᩮᩅᨲᩣᩈᨲᩣᨶᩥ ᩋᨶᩮᨠᩣᨶᩥ ᨴᩮᩅᨲᩣᩈᩉᩔᩣᨶᩥ (ᩈ᩠ᨿᩣ. ᩑᩅᨾᩩᨸᩁᩥᨸᩥ)] ᨿᩮᨶᩣᩉᩴ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩴᩈᩩ. ᩑᨠᨾᨶ᩠ᨲᩴ ᨮᩥᨲᩣ ᨡᩮᩣ, ᨽᩥᨠ᩠ᨡᩅᩮ, ᨲᩣ ᨴᩮᩅᨲᩣ ᨾᩴ ᩑᨲᨴᩅᩮᩣᨧᩩᩴ – ‘ᩍᨾᩈ᩠ᨾᩥᩴᨿᩮᩅ ᨡᩮᩣ, ᨾᩣᩁᩥᩈᩣ, ᨽᨴ᩠ᨴᨠᨸ᩠ᨸᩮ ᨽᨣᩅᩣ ᩑᨲᩁᩉᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩏᨸ᩠ᨸᨶ᩠ᨶᩮᩣ. ᨽᨣᩅᩣ, ᨾᩣᩁᩥᩈᩣ, ᨡᨲ᩠ᨲᩥᨿᩮᩣ ᨩᩣᨲᩥᨿᩣ ᨡᨲ᩠ᨲᩥᨿᨠᩩᩃᩮ ᩏᨸ᩠ᨸᨶ᩠ᨶᩮᩣ. ᨽᨣᩅᩣ, ᨾᩣᩁᩥᩈᩣ, ᨣᩮᩣᨲᨾᩮᩣ ᨣᩮᩣᨲ᩠ᨲᩮᨶ. ᨽᨣᩅᨲᩮᩣ, ᨾᩣᩁᩥᩈᩣ, ᩋᨸ᩠ᨸᨠᩴ ᩌᨿᩩᨸ᩠ᨸᨾᩣᨱᩴ ᨸᩁᩥᨲ᩠ᨲᩴ ᩃᩉᩩᨠᩴ ᨿᩮᩣ ᨧᩥᩁᩴ ᨩᩦᩅᨲᩥ, ᩈᩮᩣ ᩅᩔᩈᨲᩴ ᩋᨸ᩠ᨸᩴ ᩅᩣ ᨽᩥᨿ᩠ᨿᩮᩣ. ᨽᨣᩅᩣ, ᨾᩣᩁᩥᩈᩣ, ᩋᩔᨲ᩠ᨳᩔ ᨾᩪᩃᩮ ᩋᨽᩥᩈᨾ᩠ᨻᩩᨴ᩠ᨵᩮᩣ. ᨽᨣᩅᨲᩮᩣ, ᨾᩣᩁᩥᩈᩣ, ᩈᩣᩁᩥᨸᩩᨲ᩠ᨲᨾᩮᩣᨣ᩠ᨣᩃ᩠ᩃᩣᨶᩴ ᨶᩣᨾ ᩈᩣᩅᨠᨿᩩᨣᩴ ᩋᩉᩮᩣᩈᩥ ᩋᨣ᩠ᨣᩴ ᨽᨴ᩠ᨴᨿᩩᨣᩴ. ᨽᨣᩅᨲᩮᩣ, ᨾᩣᩁᩥᩈᩣ, ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩋᨯ᩠ᨰᨲᩮᩊᩈᩣᨶᩥ ᨽᩥᨠ᩠ᨡᩩᩈᨲᩣᨶᩥ. ᨽᨣᩅᨲᩮᩣ, ᨾᩣᩁᩥᩈᩣ, ᩋᨿᩴ ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩈᨻ᩠ᨻᩮᩈᩴᨿᩮᩅ ᨡᩦᨱᩣᩈᩅᩣᨶᩴ. ᨽᨣᩅᨲᩮᩣ, ᨾᩣᩁᩥᩈᩣ, ᩌᨶᨶ᩠ᨴᩮᩣ ᨶᩣᨾ ᨽᩥᨠ᩠ᨡᩩ ᩏᨸᨭ᩠ᨮᩣᨠᩮᩣ ᩋᩉᩮᩣᩈᩥ ᩋᨣ᩠ᨣᩩᨸᨭ᩠ᨮᩣᨠᩮᩣ. ᨽᨣᩅᨲᩮᩣ, ᨾᩣᩁᩥᩈᩣ, ᩈᩩᨴ᩠ᨵᩮᩣᨴᨶᩮᩣ ᨶᩣᨾ ᩁᩣᨩᩣ ᨸᩥᨲᩣ ᩋᩉᩮᩣᩈᩥ. ᨾᩣᨿᩣ ᨶᩣᨾ ᨴᩮᩅᩦ ᨾᩣᨲᩣ ᩋᩉᩮᩣᩈᩥ ᨩᨶᩮᨲ᩠ᨲᩥ. ᨠᨸᩥᩃᩅᨲ᩠ᨳᩩ ᨶᩣᨾ ᨶᨣᩁᩴ ᩁᩣᨩᨵᩣᨶᩦ ᩋᩉᩮᩣᩈᩥ. ᨽᨣᩅᨲᩮᩣ, ᨾᩣᩁᩥᩈᩣ, ᩑᩅᩴ ᩋᨽᩥᨶᩥᨠ᩠ᨡᨾᨶᩴ ᩋᩉᩮᩣᩈᩥ ᩑᩅᩴ ᨸᨻ᩠ᨻᨩ᩠ᨩᩣ ᩑᩅᩴ ᨸᨵᩣᨶᩴ ᩑᩅᩴ ᩋᨽᩥᩈᨾ᩠ᨻᩮᩣᨵᩥ ᩑᩅᩴ ᨵᨾ᩠ᨾᨧᨠ᩠ᨠᨸ᩠ᨸᩅᨲ᩠ᨲᨶᩴ. ᨲᩮ ᨾᨿᩴ, ᨾᩣᩁᩥᩈᩣ, ᨽᨣᩅᨲᩥ ᨻᩕᩉ᩠ᨾᨧᩁᩥᨿᩴ ᨧᩁᩥᨲ᩠ᩅᩣ ᨠᩣᨾᩮᩈᩩ ᨠᩣᨾᨧ᩠ᨨᨶ᩠ᨴᩴ ᩅᩥᩁᩣᨩᩮᨲ᩠ᩅᩣ ᩍᨵᩪᨸᨸᨶ᩠ᨶᩣ’ᨲᩥ.

᪙᪒. ‘‘ᩋᨳ ᨡ᩠ᩅᩣᩉᩴ, ᨽᩥᨠ᩠ᨡᩅᩮ, ᩋᩅᩥᩉᩮᩉᩥ ᨴᩮᩅᩮᩉᩥ ᩈᨴ᩠ᨵᩥᩴ ᨿᩮᨶ ᩋᨲᨸ᩠ᨸᩣ ᨴᩮᩅᩣ ᨲᩮᨶᩩᨸᩈᨦ᩠ᨠᨾᩥᩴ…ᨸᩮ… ᩋᨳ ᨡ᩠ᩅᩣᩉᩴ, ᨽᩥᨠ᩠ᨡᩅᩮ, ᩋᩅᩥᩉᩮᩉᩥ ᨧ ᨴᩮᩅᩮᩉᩥ ᩋᨲᨸ᩠ᨸᩮᩉᩥ ᨧ ᨴᩮᩅᩮᩉᩥ ᩈᨴ᩠ᨵᩥᩴ ᨿᩮᨶ ᩈᩩᨴᩔᩣ ᨴᩮᩅᩣ ᨲᩮᨶᩩᨸᩈᨦ᩠ᨠᨾᩥᩴ. ᩋᨳ ᨡ᩠ᩅᩣᩉᩴ, ᨽᩥᨠ᩠ᨡᩅᩮ, ᩋᩅᩥᩉᩮᩉᩥ ᨧ ᨴᩮᩅᩮᩉᩥ ᩋᨲᨸ᩠ᨸᩮᩉᩥ ᨧ ᨴᩮᩅᩮᩉᩥ ᩈᩩᨴᩔᩮᩉᩥ ᨧ ᨴᩮᩅᩮᩉᩥ ᩈᨴ᩠ᨵᩥᩴ ᨿᩮᨶ ᩈᩩᨴᩔᩦ ᨴᩮᩅᩣ ᨲᩮᨶᩩᨸᩈᨦ᩠ᨠᨾᩥᩴ. ᩋᨳ ᨡ᩠ᩅᩣᩉᩴ, ᨽᩥᨠ᩠ᨡᩅᩮ, ᩋᩅᩥᩉᩮᩉᩥ ᨧ ᨴᩮᩅᩮᩉᩥ ᩋᨲᨸ᩠ᨸᩮᩉᩥ ᨧ ᨴᩮᩅᩮᩉᩥ ᩈᩩᨴᩔᩮᩉᩥ ᨧ ᨴᩮᩅᩮᩉᩥ ᩈᩩᨴᩔᩦᩉᩥ ᨧ ᨴᩮᩅᩮᩉᩥ ᩈᨴ᩠ᨵᩥᩴ ᨿᩮᨶ ᩋᨠᨶᩥᨭ᩠ᨮᩣ ᨴᩮᩅᩣ ᨲᩮᨶᩩᨸᩈᨦ᩠ᨠᨾᩥᩴ. ᨲᩈ᩠ᨾᩥᩴ, ᨽᩥᨠ᩠ᨡᩅᩮ, ᨴᩮᩅᨶᩥᨠᩣᨿᩮ ᩋᨶᩮᨠᩣᨶᩥ ᨴᩮᩅᨲᩣᩈᩉᩔᩣᨶᩥ ᩋᨶᩮᨠᩣᨶᩥ ᨴᩮᩅᨲᩣᩈᨲᩈᩉᩔᩣᨶᩥ ᨿᩮᨶᩣᩉᩴ ᨲᩮᨶᩩᨸᩈᨦ᩠ᨠᨾᩥᩴᩈᩩ, ᩏᨸᩈᨦ᩠ᨠᨾᩥᨲ᩠ᩅᩣ ᨾᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩴᩈᩩ.

‘‘ᩑᨠᨾᨶ᩠ᨲᩴ ᨮᩥᨲᩣ ᨡᩮᩣ, ᨽᩥᨠ᩠ᨡᩅᩮ, ᨲᩣ ᨴᩮᩅᨲᩣ ᨾᩴ ᩑᨲᨴᩅᩮᩣᨧᩩᩴ – ‘ᩍᨲᩮᩣ ᩈᩮᩣ, ᨾᩣᩁᩥᩈᩣ, ᩑᨠᨶᩅᩩᨲᩥᨠᨸ᩠ᨸᩮ ᨿᩴ ᩅᩥᨸᩔᩦ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩏᨴᨸᩣᨴᩥ. ᩅᩥᨸᩔᩦ, ᨾᩣᩁᩥᩈᩣ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨡᨲ᩠ᨲᩥᨿᩮᩣ ᨩᩣᨲᩥᨿᩣ ᩋᩉᩮᩣᩈᩥ. ᨡᨲ᩠ᨲᩥᨿᨠᩩᩃᩮ ᩏᨴᨸᩣᨴᩥ. ᩅᩥᨸᩔᩦ, ᨾᩣᩁᩥᩈᩣ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨠᩮᩣᨱ᩠ᨯᨬ᩠ᨬᩮᩣ ᨣᩮᩣᨲ᩠ᨲᩮᨶ ᩋᩉᩮᩣᩈᩥ. ᩅᩥᨸᩔᩥᩔ, ᨾᩣᩁᩥᩈᩣ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩋᩈᩦᨲᩥᩅᩔᩈᩉᩔᩣᨶᩥ ᩌᨿᩩᨸ᩠ᨸᨾᩣᨱᩴ ᩋᩉᩮᩣᩈᩥ. ᩅᩥᨸᩔᩦ, ᨾᩣᩁᩥᩈᩣ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨸᩣᨭᩃᩥᨿᩣ ᨾᩪᩃᩮ ᩋᨽᩥᩈᨾ᩠ᨻᩩᨴ᩠ᨵᩮᩣ. ᩅᩥᨸᩔᩥᩔ, ᨾᩣᩁᩥᩈᩣ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨡᨱ᩠ᨯᨲᩥᩔᩴ ᨶᩣᨾ ᩈᩣᩅᨠᨿᩩᨣᩴ ᩋᩉᩮᩣᩈᩥ ᩋᨣ᩠ᨣᩴ ᨽᨴ᩠ᨴᨿᩩᨣᩴ. ᩅᩥᨸᩔᩥᩔ, ᨾᩣᩁᩥᩈᩣ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨲᨿᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩣ ᩋᩉᩮᩈᩩᩴ. ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩋᨭ᩠ᨮᩈᨭ᩠ᨮᩥᨽᩥᨠ᩠ᨡᩩᩈᨲᩈᩉᩔᩴ. ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᨽᩥᨠ᩠ᨡᩩᩈᨲᩈᩉᩔᩴ. ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩋᩈᩦᨲᩥᨽᩥᨠ᩠ᨡᩩᩈᩉᩔᩣᨶᩥ. ᩅᩥᨸᩔᩥᩔ, ᨾᩣᩁᩥᩈᩣ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩍᨾᩮ ᨲᨿᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩣ ᩋᩉᩮᩈᩩᩴ ᩈᨻ᩠ᨻᩮᩈᩴᨿᩮᩅ ᨡᩦᨱᩣᩈᩅᩣᨶᩴ. ᩅᩥᨸᩔᩥᩔ, ᨾᩣᩁᩥᩈᩣ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩋᩈᩮᩣᨠᩮᩣ ᨶᩣᨾ ᨽᩥᨠ᩠ᨡᩩ ᩏᨸᨭ᩠ᨮᩣᨠᩮᩣ ᩋᩉᩮᩣᩈᩥ ᩋᨣ᩠ᨣᩩᨸᨭ᩠ᨮᩣᨠᩮᩣ. ᩅᩥᨸᩔᩥᩔ, ᨾᩣᩁᩥᩈᩣ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨻᨶ᩠ᨵᩩᨾᩣ ᨶᩣᨾ ᩁᩣᨩᩣ ᨸᩥᨲᩣ ᩋᩉᩮᩣᩈᩥ ᨻᨶ᩠ᨵᩩᨾᨲᩦ ᨶᩣᨾ ᨴᩮᩅᩦ ᨾᩣᨲᩣ ᩋᩉᩮᩣᩈᩥ ᨩᨶᩮᨲ᩠ᨲᩥ. ᨻᨶ᩠ᨵᩩᨾᩔ ᩁᨬ᩠ᨬᩮᩣ ᨻᨶ᩠ᨵᩩᨾᨲᩦ ᨶᩣᨾ ᨶᨣᩁᩴ ᩁᩣᨩᨵᩣᨶᩦ ᩋᩉᩮᩣᩈᩥ. ᩅᩥᨸᩔᩥᩔ, ᨾᩣᩁᩥᩈᩣ, ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩑᩅᩴ ᩋᨽᩥᨶᩥᨠ᩠ᨡᨾᨶᩴ ᩋᩉᩮᩣᩈᩥ ᩑᩅᩴ ᨸᨻ᩠ᨻᨩ᩠ᨩᩣ ᩑᩅᩴ ᨸᨵᩣᨶᩴ ᩑᩅᩴ ᩋᨽᩥᩈᨾ᩠ᨻᩮᩣᨵᩥ, ᩑᩅᩴ ᨵᨾ᩠ᨾᨧᨠ᩠ᨠᨸ᩠ᨸᩅᨲ᩠ᨲᨶᩴ. ᨲᩮ ᨾᨿᩴ, ᨾᩣᩁᩥᩈᩣ, ᩅᩥᨸᩔᩥᨾ᩠ᩉᩥ ᨽᨣᩅᨲᩥ ᨻᩕᩉ᩠ᨾᨧᩁᩥᨿᩴ ᨧᩁᩥᨲ᩠ᩅᩣ ᨠᩣᨾᩮᩈᩩ ᨠᩣᨾᨧ᩠ᨨᨶ᩠ᨴᩴ ᩅᩥᩁᩣᨩᩮᨲ᩠ᩅᩣ ᩍᨵᩪᨸᨸᨶ᩠ᨶᩣ’ᨲᩥ. ᨲᩈ᩠ᨾᩥᩴᨿᩮᩅ ᨡᩮᩣ, ᨽᩥᨠ᩠ᨡᩅᩮ, ᨴᩮᩅᨶᩥᨠᩣᨿᩮ ᩋᨶᩮᨠᩣᨶᩥ ᨴᩮᩅᨲᩣᩈᩉᩔᩣᨶᩥ ᩋᨶᩮᨠᩣᨶᩥ ᨴᩮᩅᨲᩣᩈᨲᩈᩉᩔᩣᨶᩥ ᨿᩮᨶᩣᩉᩴ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩴᩈᩩ. ᩑᨠᨾᨶ᩠ᨲᩴ ᨮᩥᨲᩣ ᨡᩮᩣ, ᨽᩥᨠ᩠ᨡᩅᩮ, ᨲᩣ ᨴᩮᩅᨲᩣ ᨾᩴ ᩑᨲᨴᩅᩮᩣᨧᩩᩴ – ‘ᩍᨲᩮᩣ ᩈᩮᩣ, ᨾᩣᩁᩥᩈᩣ, ᩑᨠᨲᩥᩴᩈᩮ ᨠᨸ᩠ᨸᩮ ᨿᩴ ᩈᩥᨡᩦ ᨽᨣᩅᩣ…ᨸᩮ… ᨲᩮ ᨾᨿᩴ, ᨾᩣᩁᩥᩈᩣ, ᩈᩥᨡᩥᨾ᩠ᩉᩥ ᨽᨣᩅᨲᩥ ᨲᩈ᩠ᨾᩥᨬ᩠ᨬᩮᩅ ᨡᩮᩣ ᨾᩣᩁᩥᩈᩣ, ᩑᨠᨲᩥᩴᩈᩮ ᨠᨸ᩠ᨸᩮ ᨿᩴ ᩅᩮᩔᨽᩪ ᨽᨣᩅᩣ…ᨸᩮ… ᨲᩮ ᨾᨿᩴ, ᨾᩣᩁᩥᩈᩣ, ᩅᩮᩔᨽᩩᨾ᩠ᩉᩥ ᨽᨣᩅᨲᩥ…ᨸᩮ… ᩍᨾᩈ᩠ᨾᩥᩴᨿᩮᩅ ᨡᩮᩣ, ᨾᩣᩁᩥᩈᩣ, ᨽᨴ᩠ᨴᨠᨸ᩠ᨸᩮ ᨠᨠᩩᩈᨶ᩠ᨵᩮᩣ ᨠᩮᩣᨱᩣᨣᨾᨶᩮᩣ ᨠᩔᨸᩮᩣ ᨽᨣᩅᩣ…ᨸᩮ… ᨲᩮ ᨾᨿᩴ, ᨾᩣᩁᩥᩈᩣ, ᨠᨠᩩᩈᨶ᩠ᨵᨾ᩠ᩉᩥ ᨠᩮᩣᨱᩣᨣᨾᨶᨾ᩠ᩉᩥ ᨠᩔᨸᨾ᩠ᩉᩥ ᨽᨣᩅᨲᩥ ᨻᩕᩉ᩠ᨾᨧᩁᩥᨿᩴ ᨧᩁᩥᨲ᩠ᩅᩣ ᨠᩣᨾᩮᩈᩩ ᨠᩣᨾᨧ᩠ᨨᨶ᩠ᨴᩴ ᩅᩥᩁᩣᨩᩮᨲ᩠ᩅᩣ ᩍᨵᩪᨸᨸᨶ᩠ᨶᩣ’ᨲᩥ.

᪙᪓. ‘‘ᨲᩈ᩠ᨾᩥᩴᨿᩮᩅ ᨡᩮᩣ, ᨽᩥᨠ᩠ᨡᩅᩮ, ᨴᩮᩅᨶᩥᨠᩣᨿᩮ ᩋᨶᩮᨠᩣᨶᩥ ᨴᩮᩅᨲᩣᩈᩉᩔᩣᨶᩥ ᩋᨶᩮᨠᩣᨶᩥ ᨴᩮᩅᨲᩣᩈᨲᩈᩉᩔᩣᨶᩥ ᨿᩮᨶᩣᩉᩴ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩴᩈᩩ. ᩑᨠᨾᨶ᩠ᨲᩴ ᨮᩥᨲᩣ ᨡᩮᩣ, ᨽᩥᨠ᩠ᨡᩅᩮ, ᨲᩣ ᨴᩮᩅᨲᩣ ᨾᩴ ᩑᨲᨴᩅᩮᩣᨧᩩᩴ – ‘ᩍᨾᩈ᩠ᨾᩥᩴᨿᩮᩅ ᨡᩮᩣ, ᨾᩣᩁᩥᩈᩣ, ᨽᨴ᩠ᨴᨠᨸ᩠ᨸᩮ ᨽᨣᩅᩣ ᩑᨲᩁᩉᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩏᨸ᩠ᨸᨶ᩠ᨶᩮᩣ. ᨽᨣᩅᩣ, ᨾᩣᩁᩥᩈᩣ, ᨡᨲ᩠ᨲᩥᨿᩮᩣ ᨩᩣᨲᩥᨿᩣ, ᨡᨲ᩠ᨲᩥᨿᨠᩩᩃᩮ ᩏᨸ᩠ᨸᨶ᩠ᨶᩮᩣ. ᨽᨣᩅᩣ, ᨾᩣᩁᩥᩈᩣ, ᨣᩮᩣᨲᨾᩮᩣ ᨣᩮᩣᨲ᩠ᨲᩮᨶ. ᨽᨣᩅᨲᩮᩣ, ᨾᩣᩁᩥᩈᩣ, ᩋᨸ᩠ᨸᨠᩴ ᩌᨿᩩᨸ᩠ᨸᨾᩣᨱᩴ ᨸᩁᩥᨲ᩠ᨲᩴ ᩃᩉᩩᨠᩴ ᨿᩮᩣ ᨧᩥᩁᩴ ᨩᩦᩅᨲᩥ, ᩈᩮᩣ ᩅᩔᩈᨲᩴ ᩋᨸ᩠ᨸᩴ ᩅᩣ ᨽᩥᨿ᩠ᨿᩮᩣ. ᨽᨣᩅᩣ, ᨾᩣᩁᩥᩈᩣ, ᩋᩔᨲ᩠ᨳᩔ ᨾᩪᩃᩮ ᩋᨽᩥᩈᨾ᩠ᨻᩩᨴ᩠ᨵᩮᩣ. ᨽᨣᩅᨲᩮᩣ, ᨾᩣᩁᩥᩈᩣ, ᩈᩣᩁᩥᨸᩩᨲ᩠ᨲᨾᩮᩣᨣ᩠ᨣᩃ᩠ᩃᩣᨶᩴ ᨶᩣᨾ ᩈᩣᩅᨠᨿᩩᨣᩴ ᩋᩉᩮᩣᩈᩥ ᩋᨣ᩠ᨣᩴ ᨽᨴ᩠ᨴᨿᩩᨣᩴ. ᨽᨣᩅᨲᩮᩣ, ᨾᩣᩁᩥᩈᩣ, ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩋᨯ᩠ᨰᨲᩮᩊᩈᩣᨶᩥ ᨽᩥᨠ᩠ᨡᩩᩈᨲᩣᨶᩥ. ᨽᨣᩅᨲᩮᩣ, ᨾᩣᩁᩥᩈᩣ, ᩋᨿᩴ ᩑᨠᩮᩣ ᩈᩣᩅᨠᩣᨶᩴ ᩈᨶ᩠ᨶᩥᨸᩣᨲᩮᩣ ᩋᩉᩮᩣᩈᩥ ᩈᨻ᩠ᨻᩮᩈᩴᨿᩮᩅ ᨡᩦᨱᩣᩈᩅᩣᨶᩴ. ᨽᨣᩅᨲᩮᩣ, ᨾᩣᩁᩥᩈᩣ, ᩌᨶᨶ᩠ᨴᩮᩣ ᨶᩣᨾ ᨽᩥᨠ᩠ᨡᩩ ᩏᨸᨭ᩠ᨮᩣᨠᩮᩣ ᩋᨣ᩠ᨣᩩᨸᨭ᩠ᨮᩣᨠᩮᩣ ᩋᩉᩮᩣᩈᩥ. ᨽᨣᩅᨲᩮᩣ, ᨾᩣᩁᩥᩈᩣ, ᩈᩩᨴ᩠ᨵᩮᩣᨴᨶᩮᩣ ᨶᩣᨾ ᩁᩣᨩᩣ ᨸᩥᨲᩣ ᩋᩉᩮᩣᩈᩥ. ᨾᩣᨿᩣ ᨶᩣᨾ ᨴᩮᩅᩦ ᨾᩣᨲᩣ ᩋᩉᩮᩣᩈᩥ ᨩᨶᩮᨲ᩠ᨲᩥ. ᨠᨸᩥᩃᩅᨲ᩠ᨳᩩ ᨶᩣᨾ ᨶᨣᩁᩴ ᩁᩣᨩᨵᩣᨶᩦ ᩋᩉᩮᩣᩈᩥ. ᨽᨣᩅᨲᩮᩣ, ᨾᩣᩁᩥᩈᩣ, ᩑᩅᩴ ᩋᨽᩥᨶᩥᨠ᩠ᨡᨾᨶᩴ ᩋᩉᩮᩣᩈᩥ, ᩑᩅᩴ ᨸᨻ᩠ᨻᨩ᩠ᨩᩣ, ᩑᩅᩴ ᨸᨵᩣᨶᩴ, ᩑᩅᩴ ᩋᨽᩥᩈᨾ᩠ᨻᩮᩣᨵᩥ, ᩑᩅᩴ ᨵᨾ᩠ᨾᨧᨠ᩠ᨠᨸ᩠ᨸᩅᨲ᩠ᨲᨶᩴ. ᨲᩮ ᨾᨿᩴ, ᨾᩣᩁᩥᩈᩣ, ᨽᨣᩅᨲᩥ ᨻᩕᩉ᩠ᨾᨧᩁᩥᨿᩴ ᨧᩁᩥᨲ᩠ᩅᩣ ᨠᩣᨾᩮᩈᩩ ᨠᩣᨾᨧ᩠ᨨᨶ᩠ᨴᩴ ᩅᩥᩁᩣᨩᩮᨲ᩠ᩅᩣ ᩍᨵᩪᨸᨸᨶ᩠ᨶᩣ’ᨲᩥ.

᪙᪔. ‘‘ᩍᨲᩥ ᨡᩮᩣ, ᨽᩥᨠ᩠ᨡᩅᩮ, ᨲᨳᩣᨣᨲᩔᩮᩅᩮᩈᩣ ᨵᨾ᩠ᨾᨵᩣᨲᩩ ᩈᩩᨸ᩠ᨸᨭᩥᩅᩥᨴ᩠ᨵᩣ, ᨿᩔᩣ ᨵᨾ᩠ᨾᨵᩣᨲᩩᨿᩣ ᩈᩩᨸ᩠ᨸᨭᩥᩅᩥᨴ᩠ᨵᨲ᩠ᨲᩣ ᨲᨳᩣᨣᨲᩮᩣ ᩋᨲᩦᨲᩮ ᨻᩩᨴ᩠ᨵᩮ ᨸᩁᩥᨶᩥᨻ᩠ᨻᩩᨲᩮ ᨨᩥᨶ᩠ᨶᨸᨸᨬ᩠ᨧᩮ ᨨᩥᨶ᩠ᨶᩅᨭᩩᨾᩮ ᨸᩁᩥᨿᩣᨴᩥᨶ᩠ᨶᩅᨭ᩠ᨭᩮ ᩈᨻ᩠ᨻᨴᩩᨠ᩠ᨡᩅᩦᨲᩥᩅᨲ᩠ᨲᩮ ᨩᩣᨲᩥᨲᩮᩣᨸᩥ ᩋᨶᩩᩔᩁᨲᩥ, ᨶᩣᨾᨲᩮᩣᨸᩥ ᩋᨶᩩᩔᩁᨲᩥ, ᨣᩮᩣᨲ᩠ᨲᨲᩮᩣᨸᩥ ᩋᨶᩩᩔᩁᨲᩥ, ᩌᨿᩩᨸ᩠ᨸᨾᩣᨱᨲᩮᩣᨸᩥ ᩋᨶᩩᩔᩁᨲᩥ, ᩈᩣᩅᨠᨿᩩᨣᨲᩮᩣᨸᩥ ᩋᨶᩩᩔᩁᨲᩥ, ᩈᩣᩅᨠᩈᨶ᩠ᨶᩥᨸᩣᨲᨲᩮᩣᨸᩥ ᩋᨶᩩᩔᩁᨲᩥ ‘ᩑᩅᩴᨩᨧ᩠ᨧᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ’ ᩍᨲᩥᨸᩥ. ‘ᩑᩅᩴᨶᩣᨾᩣ ᩑᩅᩴᨣᩮᩣᨲ᩠ᨲᩣ ᩑᩅᩴᩈᩦᩃᩣ ᩑᩅᩴᨵᨾ᩠ᨾᩣ ᩑᩅᩴᨸᨬ᩠ᨬᩣ ᩑᩅᩴᩅᩥᩉᩣᩁᩦ ᩑᩅᩴᩅᩥᨾᩩᨲ᩠ᨲᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ’ ᩍᨲᩥᨸᩦᨲᩥ.

‘‘ᨴᩮᩅᨲᩣᨸᩥ ᨲᨳᩣᨣᨲᩔ ᩑᨲᨾᨲ᩠ᨳᩴ ᩌᩁᩮᩣᨧᩮᩈᩩᩴ, ᨿᩮᨶ ᨲᨳᩣᨣᨲᩮᩣ ᩋᨲᩦᨲᩮ ᨻᩩᨴ᩠ᨵᩮ ᨸᩁᩥᨶᩥᨻ᩠ᨻᩩᨲᩮ ᨨᩥᨶ᩠ᨶᨸᨸᨬ᩠ᨧᩮ ᨨᩥᨶ᩠ᨶᩅᨭᩩᨾᩮ ᨸᩁᩥᨿᩣᨴᩥᨶ᩠ᨶᩅᨭ᩠ᨭᩮ ᩈᨻ᩠ᨻᨴᩩᨠ᩠ᨡᩅᩦᨲᩥᩅᨲ᩠ᨲᩮ ᨩᩣᨲᩥᨲᩮᩣᨸᩥ ᩋᨶᩩᩔᩁᨲᩥ, ᨶᩣᨾᨲᩮᩣᨸᩥ ᩋᨶᩩᩔᩁᨲᩥ, ᨣᩮᩣᨲ᩠ᨲᨲᩮᩣᨸᩥ ᩋᨶᩩᩔᩁᨲᩥ, ᩌᨿᩩᨸ᩠ᨸᨾᩣᨱᨲᩮᩣᨸᩥ ᩋᨶᩩᩔᩁᨲᩥ, ᩈᩣᩅᨠᨿᩩᨣᨲᩮᩣᨸᩥ ᩋᨶᩩᩔᩁᨲᩥ, ᩈᩣᩅᨠᩈᨶ᩠ᨶᩥᨸᩣᨲᨲᩮᩣᨸᩥ ᩋᨶᩩᩔᩁᨲᩥ ‘ᩑᩅᩴᨩᨧ᩠ᨧᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ’ ᩍᨲᩥᨸᩥ. ‘ᩑᩅᩴᨶᩣᨾᩣ ᩑᩅᩴᨣᩮᩣᨲ᩠ᨲᩣ ᩑᩅᩴᩈᩦᩃᩣ ᩑᩅᩴᨵᨾ᩠ᨾᩣ ᩑᩅᩴᨸᨬ᩠ᨬᩣ ᩑᩅᩴᩅᩥᩉᩣᩁᩦ ᩑᩅᩴᩅᩥᨾᩩᨲ᩠ᨲᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ’ ᩍᨲᩥᨸᩦ’’ᨲᩥ.

ᩍᨴᨾᩅᩮᩣᨧ ᨽᨣᩅᩣ. ᩋᨲ᩠ᨲᨾᨶᩣ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩩᨶ᩠ᨲᩥ.

ᨾᩉᩣᨸᨴᩣᨶᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᨸᨮᨾᩴ.

᪒. ᨾᩉᩣᨶᩥᨴᩣᨶᩈᩩᨲ᩠ᨲᩴ

ᨸᨭᩥᨧ᩠ᨧᩈᨾᩩᨸ᩠ᨸᩣᨴᩮᩣ

᪙᪕. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᨠᩩᩁᩪᩈᩩ ᩅᩥᩉᩁᨲᩥ ᨠᨾ᩠ᨾᩣᩈᨵᨾ᩠ᨾᩴ ᨶᩣᨾ [ᨠᨾ᩠ᨾᩣᩈᨴᨾ᩠ᨾᩴ ᨶᩣᨾ (ᩈ᩠ᨿᩣ.)] ᨠᩩᩁᩪᨶᩴ ᨶᩥᨣᨾᩮᩣ. ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ, ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩋᨧ᩠ᨨᩁᩥᨿᩴ, ᨽᨶ᩠ᨲᩮ, ᩋᨻ᩠ᨽᩩᨲᩴ, ᨽᨶ᩠ᨲᩮ! ᨿᩣᩅ ᨣᨾ᩠ᨽᩦᩁᩮᩣ ᨧᩣᨿᩴ, ᨽᨶ᩠ᨲᩮ, ᨸᨭᩥᨧ᩠ᨧᩈᨾᩩᨸ᩠ᨸᩣᨴᩮᩣ ᨣᨾ᩠ᨽᩦᩁᩣᩅᨽᩣᩈᩮᩣ ᨧ, ᩋᨳ ᨧ ᨸᨶ ᨾᩮ ᩏᨲ᩠ᨲᩣᨶᨠᩩᨲ᩠ᨲᩣᨶᨠᩮᩣ ᩅᩥᨿ ᨡᩣᨿᨲᩦ’’ᨲᩥ. ‘‘ᨾᩣ ᩉᩮᩅᩴ, ᩌᨶᨶ᩠ᨴ, ᩋᩅᨧ, ᨾᩣ ᩉᩮᩅᩴ, ᩌᨶᨶ᩠ᨴ, ᩋᩅᨧ. ᨣᨾ᩠ᨽᩦᩁᩮᩣ ᨧᩣᨿᩴ, ᩌᨶᨶ᩠ᨴ, ᨸᨭᩥᨧ᩠ᨧᩈᨾᩩᨸ᩠ᨸᩣᨴᩮᩣ ᨣᨾ᩠ᨽᩦᩁᩣᩅᨽᩣᩈᩮᩣ ᨧ. ᩑᨲᩔ, ᩌᨶᨶ᩠ᨴ, ᨵᨾ᩠ᨾᩔ ᩋᨶᨶᩩᨻᩮᩣᨵᩣ ᩋᨸ᩠ᨸᨭᩥᩅᩮᨵᩣ ᩑᩅᨾᨿᩴ ᨸᨩᩣ ᨲᨶ᩠ᨲᩣᨠᩩᩃᨠᨩᩣᨲᩣ ᨠᩩᩃᨣᨱ᩠ᨮᩥᨠᨩᩣᨲᩣ [ᨣᩩᩃᩣᨣᩩᨱ᩠ᨮᩥᨠᨩᩣᨲᩣ (ᩈᩦ. ᨸᩦ.), ᨣᩩᨱᨣᨱ᩠ᨮᩥᨠᨩᩣᨲᩣ (ᩈ᩠ᨿᩣ.)] ᨾᩩᨬ᩠ᨩᨸᨻ᩠ᨻᨩᨽᩪᨲᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᩈᩴᩈᩣᩁᩴ ᨶᩣᨲᩥᩅᨲ᩠ᨲᨲᩥ.

᪙᪖. ‘‘‘ᩋᨲ᩠ᨳᩥ ᩍᨴᨸ᩠ᨸᨧ᩠ᨧᨿᩣ ᨩᩁᩣᨾᩁᨱ’ᨶ᩠ᨲᩥ ᩍᨲᩥ ᨸᩩᨭ᩠ᨮᩮᨶ ᩈᨲᩣ, ᩌᨶᨶ᩠ᨴ, ᩋᨲ᩠ᨳᩦᨲᩥᩔ ᩅᨧᨶᩦᨿᩴ. ‘ᨠᩥᩴᨸᨧ᩠ᨧᨿᩣ ᨩᩁᩣᨾᩁᨱ’ᨶ᩠ᨲᩥ ᩍᨲᩥ ᨧᩮ ᩅᨴᩮᨿ᩠ᨿ, ‘ᨩᩣᨲᩥᨸᨧ᩠ᨧᨿᩣ ᨩᩁᩣᨾᩁᨱ’ᨶ᩠ᨲᩥ ᩍᨧ᩠ᨧᩔ ᩅᨧᨶᩦᨿᩴ.

‘‘‘ᩋᨲ᩠ᨳᩥ ᩍᨴᨸ᩠ᨸᨧ᩠ᨧᨿᩣ ᨩᩣᨲᩦ’ᨲᩥ ᩍᨲᩥ ᨸᩩᨭ᩠ᨮᩮᨶ ᩈᨲᩣ, ᩌᨶᨶ᩠ᨴ, ᩋᨲ᩠ᨳᩦᨲᩥᩔ ᩅᨧᨶᩦᨿᩴ. ‘ᨠᩥᩴᨸᨧ᩠ᨧᨿᩣ ᨩᩣᨲᩦ’ᨲᩥ ᩍᨲᩥ ᨧᩮ ᩅᨴᩮᨿ᩠ᨿ, ‘ᨽᩅᨸᨧ᩠ᨧᨿᩣ ᨩᩣᨲᩦ’ᨲᩥ ᩍᨧ᩠ᨧᩔ ᩅᨧᨶᩦᨿᩴ.

‘‘‘ᩋᨲ᩠ᨳᩥ ᩍᨴᨸ᩠ᨸᨧ᩠ᨧᨿᩣ ᨽᩅᩮᩣ’ᨲᩥ ᩍᨲᩥ ᨸᩩᨭ᩠ᨮᩮᨶ ᩈᨲᩣ, ᩌᨶᨶ᩠ᨴ, ᩋᨲ᩠ᨳᩦᨲᩥᩔ ᩅᨧᨶᩦᨿᩴ. ‘ᨠᩥᩴᨸᨧ᩠ᨧᨿᩣ ᨽᩅᩮᩣ’ᨲᩥ ᩍᨲᩥ ᨧᩮ ᩅᨴᩮᨿ᩠ᨿ, ‘ᩏᨸᩣᨴᩣᨶᨸᨧ᩠ᨧᨿᩣ ᨽᩅᩮᩣ’ᨲᩥ ᩍᨧ᩠ᨧᩔ ᩅᨧᨶᩦᨿᩴ.

‘‘‘ᩋᨲ᩠ᨳᩥ ᩍᨴᨸ᩠ᨸᨧ᩠ᨧᨿᩣ ᩏᨸᩣᨴᩣᨶ’ᨶ᩠ᨲᩥ ᩍᨲᩥ ᨸᩩᨭ᩠ᨮᩮᨶ ᩈᨲᩣ, ᩌᨶᨶ᩠ᨴ, ᩋᨲ᩠ᨳᩦᨲᩥᩔ ᩅᨧᨶᩦᨿᩴ. ‘ᨠᩥᩴᨸᨧ᩠ᨧᨿᩣ ᩏᨸᩣᨴᩣᨶ’ᨶ᩠ᨲᩥ ᩍᨲᩥ ᨧᩮ ᩅᨴᩮᨿ᩠ᨿ, ‘ᨲᨱ᩠ᩉᩣᨸᨧ᩠ᨧᨿᩣ ᩏᨸᩣᨴᩣᨶ’ᨶ᩠ᨲᩥ ᩍᨧ᩠ᨧᩔ ᩅᨧᨶᩦᨿᩴ.

‘‘‘ᩋᨲ᩠ᨳᩥ ᩍᨴᨸ᩠ᨸᨧ᩠ᨧᨿᩣ ᨲᨱ᩠ᩉᩣ’ᨲᩥ ᩍᨲᩥ ᨸᩩᨭ᩠ᨮᩮᨶ ᩈᨲᩣ, ᩌᨶᨶ᩠ᨴ, ᩋᨲ᩠ᨳᩦᨲᩥᩔ ᩅᨧᨶᩦᨿᩴ. ‘ᨠᩥᩴᨸᨧ᩠ᨧᨿᩣ ᨲᨱ᩠ᩉᩣ’ᨲᩥ ᩍᨲᩥ ᨧᩮ ᩅᨴᩮᨿ᩠ᨿ, ‘ᩅᩮᨴᨶᩣᨸᨧ᩠ᨧᨿᩣ ᨲᨱ᩠ᩉᩣ’ᨲᩥ ᩍᨧ᩠ᨧᩔ ᩅᨧᨶᩦᨿᩴ.

‘‘‘ᩋᨲ᩠ᨳᩥ ᩍᨴᨸ᩠ᨸᨧ᩠ᨧᨿᩣ ᩅᩮᨴᨶᩣ’ᨲᩥ ᩍᨲᩥ ᨸᩩᨭ᩠ᨮᩮᨶ ᩈᨲᩣ, ᩌᨶᨶ᩠ᨴ, ᩋᨲ᩠ᨳᩦᨲᩥᩔ ᩅᨧᨶᩦᨿᩴ. ‘ᨠᩥᩴᨸᨧ᩠ᨧᨿᩣ ᩅᩮᨴᨶᩣ’ᨲᩥ ᩍᨲᩥ ᨧᩮ ᩅᨴᩮᨿ᩠ᨿ, ‘ᨹᩔᨸᨧ᩠ᨧᨿᩣ ᩅᩮᨴᨶᩣ’ᨲᩥ ᩍᨧ᩠ᨧᩔ ᩅᨧᨶᩦᨿᩴ.

‘‘‘ᩋᨲ᩠ᨳᩥ ᩍᨴᨸ᩠ᨸᨧ᩠ᨧᨿᩣ ᨹᩔᩮᩣ’ᨲᩥ ᩍᨲᩥ ᨸᩩᨭ᩠ᨮᩮᨶ ᩈᨲᩣ, ᩌᨶᨶ᩠ᨴ, ᩋᨲ᩠ᨳᩦᨲᩥᩔ ᩅᨧᨶᩦᨿᩴ. ‘ᨠᩥᩴᨸᨧ᩠ᨧᨿᩣ ᨹᩔᩮᩣ’ᨲᩥ ᩍᨲᩥ ᨧᩮ ᩅᨴᩮᨿ᩠ᨿ, ‘ᨶᩣᨾᩁᩪᨸᨸᨧ᩠ᨧᨿᩣ ᨹᩔᩮᩣ’ᨲᩥ ᩍᨧ᩠ᨧᩔ ᩅᨧᨶᩦᨿᩴ.

‘‘‘ᩋᨲ᩠ᨳᩥ ᩍᨴᨸ᩠ᨸᨧ᩠ᨧᨿᩣ ᨶᩣᨾᩁᩪᨸ’ᨶ᩠ᨲᩥ ᩍᨲᩥ ᨸᩩᨭ᩠ᨮᩮᨶ ᩈᨲᩣ, ᩌᨶᨶ᩠ᨴ, ᩋᨲ᩠ᨳᩦᨲᩥᩔ ᩅᨧᨶᩦᨿᩴ. ‘ᨠᩥᩴᨸᨧ᩠ᨧᨿᩣ ᨶᩣᨾᩁᩪᨸ’ᨶ᩠ᨲᩥ ᩍᨲᩥ ᨧᩮ ᩅᨴᩮᨿ᩠ᨿ, ‘ᩅᩥᨬ᩠ᨬᩣᨱᨸᨧ᩠ᨧᨿᩣ ᨶᩣᨾᩁᩪᨸ’ᨶ᩠ᨲᩥ ᩍᨧ᩠ᨧᩔ ᩅᨧᨶᩦᨿᩴ.

‘‘‘ᩋᨲ᩠ᨳᩥ ᩍᨴᨸ᩠ᨸᨧ᩠ᨧᨿᩣ ᩅᩥᨬ᩠ᨬᩣᨱ’ᨶ᩠ᨲᩥ ᩍᨲᩥ ᨸᩩᨭ᩠ᨮᩮᨶ ᩈᨲᩣ, ᩌᨶᨶ᩠ᨴ, ᩋᨲ᩠ᨳᩦᨲᩥᩔ ᩅᨧᨶᩦᨿᩴ. ‘ᨠᩥᩴᨸᨧ᩠ᨧᨿᩣ ᩅᩥᨬ᩠ᨬᩣᨱ’ᨶ᩠ᨲᩥ ᩍᨲᩥ ᨧᩮ ᩅᨴᩮᨿ᩠ᨿ, ‘ᨶᩣᨾᩁᩪᨸᨸᨧ᩠ᨧᨿᩣ ᩅᩥᨬ᩠ᨬᩣᨱ’ᨶ᩠ᨲᩥ ᩍᨧ᩠ᨧᩔ ᩅᨧᨶᩦᨿᩴ.

᪙᪗. ‘‘ᩍᨲᩥ ᨡᩮᩣ, ᩌᨶᨶ᩠ᨴ, ᨶᩣᨾᩁᩪᨸᨸᨧ᩠ᨧᨿᩣ ᩅᩥᨬ᩠ᨬᩣᨱᩴ, ᩅᩥᨬ᩠ᨬᩣᨱᨸᨧ᩠ᨧᨿᩣ ᨶᩣᨾᩁᩪᨸᩴ, ᨶᩣᨾᩁᩪᨸᨸᨧ᩠ᨧᨿᩣ ᨹᩔᩮᩣ, ᨹᩔᨸᨧ᩠ᨧᨿᩣ ᩅᩮᨴᨶᩣ, ᩅᩮᨴᨶᩣᨸᨧ᩠ᨧᨿᩣ ᨲᨱ᩠ᩉᩣ, ᨲᨱ᩠ᩉᩣᨸᨧ᩠ᨧᨿᩣ ᩏᨸᩣᨴᩣᨶᩴ, ᩏᨸᩣᨴᩣᨶᨸᨧ᩠ᨧᨿᩣ ᨽᩅᩮᩣ, ᨽᩅᨸᨧ᩠ᨧᨿᩣ ᨩᩣᨲᩥ, ᨩᩣᨲᩥᨸᨧ᩠ᨧᨿᩣ ᨩᩁᩣᨾᩁᨱᩴ ᩈᩮᩣᨠᨸᩁᩥᨴᩮᩅᨴᩩᨠ᩠ᨡᨴᩮᩣᨾᨶᩔᩩᨸᩣᨿᩣᩈᩣ ᩈᨾ᩠ᨽᩅᨶ᩠ᨲᩥ. ᩑᩅᨾᩮᨲᩔ ᨠᩮᩅᩃᩔ ᨴᩩᨠ᩠ᨡᨠ᩠ᨡᨶ᩠ᨵᩔ ᩈᨾᩩᨴᨿᩮᩣ ᩉᩮᩣᨲᩥ.

᪙᪘. ‘‘‘ᨩᩣᨲᩥᨸᨧ᩠ᨧᨿᩣ ᨩᩁᩣᨾᩁᨱ’ᨶ᩠ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᨩᩣᨲᩥᨸᨧ᩠ᨧᨿᩣ ᨩᩁᩣᨾᩁᨱᩴ. ᨩᩣᨲᩥ ᨧ ᩉᩥ, ᩌᨶᨶ᩠ᨴ, ᨶᩣᨽᩅᩥᩔ ᩈᨻ᩠ᨻᩮᨶ ᩈᨻ᩠ᨻᩴ ᩈᨻ᩠ᨻᨳᩣ ᩈᨻ᩠ᨻᩴ ᨠᩔᨧᩥ ᨠᩥᨾ᩠ᩉᩥᨧᩥ, ᩈᩮᨿ᩠ᨿᨳᩥᨴᩴ – ᨴᩮᩅᩣᨶᩴ ᩅᩣ ᨴᩮᩅᨲ᩠ᨲᩣᨿ, ᨣᨶ᩠ᨵᨻ᩠ᨻᩣᨶᩴ ᩅᩣ ᨣᨶ᩠ᨵᨻ᩠ᨻᨲ᩠ᨲᩣᨿ, ᨿᨠ᩠ᨡᩣᨶᩴ ᩅᩣ ᨿᨠ᩠ᨡᨲ᩠ᨲᩣᨿ, ᨽᩪᨲᩣᨶᩴ ᩅᩣ ᨽᩪᨲᨲ᩠ᨲᩣᨿ, ᨾᨶᩩᩔᩣᨶᩴ ᩅᩣ ᨾᨶᩩᩔᨲ᩠ᨲᩣᨿ, ᨧᨲᩩᨸ᩠ᨸᨴᩣᨶᩴ ᩅᩣ ᨧᨲᩩᨸ᩠ᨸᨴᨲ᩠ᨲᩣᨿ, ᨸᨠ᩠ᨡᩦᨶᩴ ᩅᩣ ᨸᨠ᩠ᨡᩥᨲ᩠ᨲᩣᨿ, ᩈᩁᩦᩈᨸᩣᨶᩴ ᩅᩣ ᩈᩁᩦᩈᨸᨲ᩠ᨲᩣᨿ [ᩈᩥᩁᩥᩴᩈᨸᩣᨶᩴ ᩈᩥᩁᩥᩴᩈᨸᨲ᩠ᨲᩣᨿ (ᩈᩦ. ᩈ᩠ᨿᩣ.)], ᨲᩮᩈᩴ ᨲᩮᩈᨬ᩠ᨧ ᩉᩥ, ᩌᨶᨶ᩠ᨴ, ᩈᨲ᩠ᨲᩣᨶᩴ ᨲᨴᨲ᩠ᨲᩣᨿ ᨩᩣᨲᩥ ᨶᩣᨽᩅᩥᩔ. ᩈᨻ᩠ᨻᩈᩮᩣ ᨩᩣᨲᩥᨿᩣ ᩋᩈᨲᩥ ᨩᩣᨲᩥᨶᩥᩁᩮᩣᨵᩣ ᩋᨸᩥ ᨶᩩ ᨡᩮᩣ ᨩᩁᩣᨾᩁᨱᩴ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᨩᩁᩣᨾᩁᨱᩔ, ᨿᨴᩥᨴᩴ ᨩᩣᨲᩥ’’.

᪙᪙. ‘‘‘ᨽᩅᨸᨧ᩠ᨧᨿᩣ ᨩᩣᨲᩦ’ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᨽᩅᨸᨧ᩠ᨧᨿᩣ ᨩᩣᨲᩥ. ᨽᩅᩮᩣ ᨧ ᩉᩥ, ᩌᨶᨶ᩠ᨴ, ᨶᩣᨽᩅᩥᩔ ᩈᨻ᩠ᨻᩮᨶ ᩈᨻ᩠ᨻᩴ ᩈᨻ᩠ᨻᨳᩣ ᩈᨻ᩠ᨻᩴ ᨠᩔᨧᩥ ᨠᩥᨾ᩠ᩉᩥᨧᩥ, ᩈᩮᨿ᩠ᨿᨳᩥᨴᩴ – ᨠᩣᨾᨽᩅᩮᩣ ᩅᩣ ᩁᩪᨸᨽᩅᩮᩣ ᩅᩣ ᩋᩁᩪᨸᨽᩅᩮᩣ ᩅᩣ, ᩈᨻ᩠ᨻᩈᩮᩣ ᨽᩅᩮ ᩋᩈᨲᩥ ᨽᩅᨶᩥᩁᩮᩣᨵᩣ ᩋᨸᩥ ᨶᩩ ᨡᩮᩣ ᨩᩣᨲᩥ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᨩᩣᨲᩥᨿᩣ, ᨿᨴᩥᨴᩴ ᨽᩅᩮᩣ’’.

᪑᪐᪐. ‘‘‘ᩏᨸᩣᨴᩣᨶᨸᨧ᩠ᨧᨿᩣ ᨽᩅᩮᩣ’ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᩏᨸᩣᨴᩣᨶᨸᨧ᩠ᨧᨿᩣ ᨽᩅᩮᩣ. ᩏᨸᩣᨴᩣᨶᨬ᩠ᨧ ᩉᩥ, ᩌᨶᨶ᩠ᨴ, ᨶᩣᨽᩅᩥᩔ ᩈᨻ᩠ᨻᩮᨶ ᩈᨻ᩠ᨻᩴ ᩈᨻ᩠ᨻᨳᩣ ᩈᨻ᩠ᨻᩴ ᨠᩔᨧᩥ ᨠᩥᨾ᩠ᩉᩥᨧᩥ, ᩈᩮᨿ᩠ᨿᨳᩥᨴᩴ – ᨠᩣᨾᩩᨸᩣᨴᩣᨶᩴ ᩅᩣ ᨴᩥᨭ᩠ᨮᩩᨸᩣᨴᩣᨶᩴ ᩅᩣ ᩈᩦᩃᨻ᩠ᨻᨲᩩᨸᩣᨴᩣᨶᩴ ᩅᩣ ᩋᨲ᩠ᨲᩅᩣᨴᩩᨸᩣᨴᩣᨶᩴ ᩅᩣ, ᩈᨻ᩠ᨻᩈᩮᩣ ᩏᨸᩣᨴᩣᨶᩮ ᩋᩈᨲᩥ ᩏᨸᩣᨴᩣᨶᨶᩥᩁᩮᩣᨵᩣ ᩋᨸᩥ ᨶᩩ ᨡᩮᩣ ᨽᩅᩮᩣ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᨽᩅᩔ, ᨿᨴᩥᨴᩴ ᩏᨸᩣᨴᩣᨶᩴ’’.

᪑᪐᪑. ‘‘‘ᨲᨱ᩠ᩉᩣᨸᨧ᩠ᨧᨿᩣ ᩏᨸᩣᨴᩣᨶ’ᨶ᩠ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᨲᨱ᩠ᩉᩣᨸᨧ᩠ᨧᨿᩣ ᩏᨸᩣᨴᩣᨶᩴ. ᨲᨱ᩠ᩉᩣ ᨧ ᩉᩥ, ᩌᨶᨶ᩠ᨴ, ᨶᩣᨽᩅᩥᩔ ᩈᨻ᩠ᨻᩮᨶ ᩈᨻ᩠ᨻᩴ ᩈᨻ᩠ᨻᨳᩣ ᩈᨻ᩠ᨻᩴ ᨠᩔᨧᩥ ᨠᩥᨾ᩠ᩉᩥᨧᩥ, ᩈᩮᨿ᩠ᨿᨳᩥᨴᩴ – ᩁᩪᨸᨲᨱ᩠ᩉᩣ ᩈᨴ᩠ᨴᨲᨱ᩠ᩉᩣ ᨣᨶ᩠ᨵᨲᨱ᩠ᩉᩣ ᩁᩈᨲᨱ᩠ᩉᩣ ᨹᩮᩣᨭ᩠ᨮᨻ᩠ᨻᨲᨱ᩠ᩉᩣ ᨵᨾ᩠ᨾᨲᨱ᩠ᩉᩣ, ᩈᨻ᩠ᨻᩈᩮᩣ ᨲᨱ᩠ᩉᩣᨿ ᩋᩈᨲᩥ ᨲᨱ᩠ᩉᩣᨶᩥᩁᩮᩣᨵᩣ ᩋᨸᩥ ᨶᩩ ᨡᩮᩣ ᩏᨸᩣᨴᩣᨶᩴ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᩏᨸᩣᨴᩣᨶᩔ, ᨿᨴᩥᨴᩴ ᨲᨱ᩠ᩉᩣ’’.

᪑᪐᪒. ‘‘‘ᩅᩮᨴᨶᩣᨸᨧ᩠ᨧᨿᩣ ᨲᨱ᩠ᩉᩣ’ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᩅᩮᨴᨶᩣᨸᨧ᩠ᨧᨿᩣ ᨲᨱ᩠ᩉᩣ. ᩅᩮᨴᨶᩣ ᨧ ᩉᩥ, ᩌᨶᨶ᩠ᨴ, ᨶᩣᨽᩅᩥᩔ ᩈᨻ᩠ᨻᩮᨶ ᩈᨻ᩠ᨻᩴ ᩈᨻ᩠ᨻᨳᩣ ᩈᨻ᩠ᨻᩴ ᨠᩔᨧᩥ ᨠᩥᨾ᩠ᩉᩥᨧᩥ, ᩈᩮᨿ᩠ᨿᨳᩥᨴᩴ – ᨧᨠ᩠ᨡᩩᩈᨾ᩠ᨹᩔᨩᩣ ᩅᩮᨴᨶᩣ ᩈᩮᩣᨲᩈᨾ᩠ᨹᩔᨩᩣ ᩅᩮᨴᨶᩣ ᨥᩣᨶᩈᨾ᩠ᨹᩔᨩᩣ ᩅᩮᨴᨶᩣ ᨩᩥᩅ᩠ᩉᩣᩈᨾ᩠ᨹᩔᨩᩣ ᩅᩮᨴᨶᩣ ᨠᩣᨿᩈᨾ᩠ᨹᩔᨩᩣ ᩅᩮᨴᨶᩣ ᨾᨶᩮᩣᩈᨾ᩠ᨹᩔᨩᩣ ᩅᩮᨴᨶᩣ, ᩈᨻ᩠ᨻᩈᩮᩣ ᩅᩮᨴᨶᩣᨿ ᩋᩈᨲᩥ ᩅᩮᨴᨶᩣᨶᩥᩁᩮᩣᨵᩣ ᩋᨸᩥ ᨶᩩ ᨡᩮᩣ ᨲᨱ᩠ᩉᩣ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᨲᨱ᩠ᩉᩣᨿ, ᨿᨴᩥᨴᩴ ᩅᩮᨴᨶᩣ’’.

᪑᪐᪓. ‘‘ᩍᨲᩥ ᨡᩮᩣ ᨸᨶᩮᨲᩴ, ᩌᨶᨶ᩠ᨴ, ᩅᩮᨴᨶᩴ ᨸᨭᩥᨧ᩠ᨧ ᨲᨱ᩠ᩉᩣ, ᨲᨱ᩠ᩉᩴ ᨸᨭᩥᨧ᩠ᨧ ᨸᩁᩥᨿᩮᩈᨶᩣ, ᨸᩁᩥᨿᩮᩈᨶᩴ ᨸᨭᩥᨧ᩠ᨧ ᩃᩣᨽᩮᩣ, ᩃᩣᨽᩴ ᨸᨭᩥᨧ᩠ᨧ ᩅᩥᨶᩥᨧ᩠ᨨᨿᩮᩣ, ᩅᩥᨶᩥᨧ᩠ᨨᨿᩴ ᨸᨭᩥᨧ᩠ᨧ ᨨᨶ᩠ᨴᩁᩣᨣᩮᩣ, ᨨᨶ᩠ᨴᩁᩣᨣᩴ ᨸᨭᩥᨧ᩠ᨧ ᩋᨩ᩠ᨫᩮᩣᩈᩣᨶᩴ, ᩋᨩ᩠ᨫᩮᩣᩈᩣᨶᩴ ᨸᨭᩥᨧ᩠ᨧ ᨸᩁᩥᨣ᩠ᨣᩉᩮᩣ, ᨸᩁᩥᨣ᩠ᨣᩉᩴ ᨸᨭᩥᨧ᩠ᨧ ᨾᨧ᩠ᨨᩁᩥᨿᩴ, ᨾᨧ᩠ᨨᩁᩥᨿᩴ ᨸᨭᩥᨧ᩠ᨧ ᩌᩁᨠ᩠ᨡᩮᩣ. ᩌᩁᨠ᩠ᨡᩣᨵᩥᨠᩁᨱᩴ ᨴᨱ᩠ᨯᩣᨴᩣᨶᩈᨲ᩠ᨳᩣᨴᩣᨶᨠᩃᩉᩅᩥᨣ᩠ᨣᩉᩅᩥᩅᩣᨴᨲᩩᩅᩴᨲᩩᩅᩴᨸᩮᩈᩩᨬ᩠ᨬᨾᩩᩈᩣᩅᩣᨴᩣ ᩋᨶᩮᨠᩮ ᨸᩣᨸᨠᩣ ᩋᨠᩩᩈᩃᩣ ᨵᨾ᩠ᨾᩣ ᩈᨾ᩠ᨽᩅᨶ᩠ᨲᩥ.

᪑᪐᪔. ‘‘‘ᩌᩁᨠ᩠ᨡᩣᨵᩥᨠᩁᨱᩴ [ᩌᩁᨠ᩠ᨡᩴ ᨸᨭᩥᨧ᩠ᨧ ᩌᩁᨠ᩠ᨡᩣᨵᩥᨠᩁᨱᩴ (ᩈ᩠ᨿᩣ.)] ᨴᨱ᩠ᨯᩣᨴᩣᨶᩈᨲ᩠ᨳᩣᨴᩣᨶᨠᩃᩉᩅᩥᨣ᩠ᨣᩉᩅᩥᩅᩣᨴᨲᩩᩅᩴᨲᩩᩅᩴᨸᩮᩈᩩᨬ᩠ᨬᨾᩩᩈᩣᩅᩣᨴᩣ ᩋᨶᩮᨠᩮ ᨸᩣᨸᨠᩣ ᩋᨠᩩᩈᩃᩣ ᨵᨾ᩠ᨾᩣ ᩈᨾ᩠ᨽᩅᨶ᩠ᨲᩦ’ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᩌᩁᨠ᩠ᨡᩣᨵᩥᨠᩁᨱᩴ ᨴᨱ᩠ᨯᩣᨴᩣᨶᩈᨲ᩠ᨳᩣᨴᩣᨶᨠᩃᩉᩅᩥᨣ᩠ᨣᩉᩅᩥᩅᩣᨴᨲᩩᩅᩴᨲᩩᩅᩴᨸᩮᩈᩩᨬ᩠ᨬᨾᩩᩈᩣᩅᩣᨴᩣ ᩋᨶᩮᨠᩮ ᨸᩣᨸᨠᩣ ᩋᨠᩩᩈᩃᩣ ᨵᨾ᩠ᨾᩣ ᩈᨾ᩠ᨽᩅᨶ᩠ᨲᩥ. ᩌᩁᨠ᩠ᨡᩮᩣ ᨧ ᩉᩥ, ᩌᨶᨶ᩠ᨴ, ᨶᩣᨽᩅᩥᩔ ᩈᨻ᩠ᨻᩮᨶ ᩈᨻ᩠ᨻᩴ ᩈᨻ᩠ᨻᨳᩣ ᩈᨻ᩠ᨻᩴ ᨠᩔᨧᩥ ᨠᩥᨾ᩠ᩉᩥᨧᩥ, ᩈᨻ᩠ᨻᩈᩮᩣ ᩌᩁᨠ᩠ᨡᩮ ᩋᩈᨲᩥ ᩌᩁᨠ᩠ᨡᨶᩥᩁᩮᩣᨵᩣ ᩋᨸᩥ ᨶᩩ ᨡᩮᩣ ᨴᨱ᩠ᨯᩣᨴᩣᨶᩈᨲ᩠ᨳᩣᨴᩣᨶᨠᩃᩉᩅᩥᨣ᩠ᨣᩉᩅᩥᩅᩣᨴᨲᩩᩅᩴᨲᩩᩅᩴᨸᩮᩈᩩᨬ᩠ᨬᨾᩩᩈᩣᩅᩣᨴᩣ ᩋᨶᩮᨠᩮ ᨸᩣᨸᨠᩣ ᩋᨠᩩᩈᩃᩣ ᨵᨾ᩠ᨾᩣ ᩈᨾ᩠ᨽᩅᩮᨿ᩠ᨿᩩ’’ᨶ᩠ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᨴᨱ᩠ᨯᩣᨴᩣᨶᩈᨲ᩠ᨳᩣᨴᩣᨶᨠᩃᩉᩅᩥᨣ᩠ᨣᩉᩅᩥᩅᩣᨴᨲᩩᩅᩴᨲᩩᩅᩴᨸᩮᩈᩩᨬ᩠ᨬᨾᩩᩈᩣᩅᩣᨴᩣᨶᩴ ᩋᨶᩮᨠᩮᩈᩴ ᨸᩣᨸᨠᩣᨶᩴ ᩋᨠᩩᩈᩃᩣᨶᩴ ᨵᨾ᩠ᨾᩣᨶᩴ ᩈᨾ᩠ᨽᩅᩣᨿ ᨿᨴᩥᨴᩴ ᩌᩁᨠ᩠ᨡᩮᩣ.

᪑᪐᪕. ‘‘‘ᨾᨧ᩠ᨨᩁᩥᨿᩴ ᨸᨭᩥᨧ᩠ᨧ ᩌᩁᨠ᩠ᨡᩮᩣ’ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᨾᨧ᩠ᨨᩁᩥᨿᩴ ᨸᨭᩥᨧ᩠ᨧ ᩌᩁᨠ᩠ᨡᩮᩣ. ᨾᨧ᩠ᨨᩁᩥᨿᨬ᩠ᨧ ᩉᩥ, ᩌᨶᨶ᩠ᨴ, ᨶᩣᨽᩅᩥᩔ ᩈᨻ᩠ᨻᩮᨶ ᩈᨻ᩠ᨻᩴ ᩈᨻ᩠ᨻᨳᩣ ᩈᨻ᩠ᨻᩴ ᨠᩔᨧᩥ ᨠᩥᨾ᩠ᩉᩥᨧᩥ, ᩈᨻ᩠ᨻᩈᩮᩣ ᨾᨧ᩠ᨨᩁᩥᨿᩮ ᩋᩈᨲᩥ ᨾᨧ᩠ᨨᩁᩥᨿᨶᩥᩁᩮᩣᨵᩣ ᩋᨸᩥ ᨶᩩ ᨡᩮᩣ ᩌᩁᨠ᩠ᨡᩮᩣ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᩌᩁᨠ᩠ᨡᩔ, ᨿᨴᩥᨴᩴ ᨾᨧ᩠ᨨᩁᩥᨿᩴ’’.

᪑᪐᪖. ‘‘‘ᨸᩁᩥᨣ᩠ᨣᩉᩴ ᨸᨭᩥᨧ᩠ᨧ ᨾᨧ᩠ᨨᩁᩥᨿ’ᨶ᩠ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᨸᩁᩥᨣ᩠ᨣᩉᩴ ᨸᨭᩥᨧ᩠ᨧ ᨾᨧ᩠ᨨᩁᩥᨿᩴ. ᨸᩁᩥᨣ᩠ᨣᩉᩮᩣ ᨧ ᩉᩥ, ᩌᨶᨶ᩠ᨴ, ᨶᩣᨽᩅᩥᩔ ᩈᨻ᩠ᨻᩮᨶ ᩈᨻ᩠ᨻᩴ ᩈᨻ᩠ᨻᨳᩣ ᩈᨻ᩠ᨻᩴ ᨠᩔᨧᩥ ᨠᩥᨾ᩠ᩉᩥᨧᩥ, ᩈᨻ᩠ᨻᩈᩮᩣ ᨸᩁᩥᨣ᩠ᨣᩉᩮ ᩋᩈᨲᩥ ᨸᩁᩥᨣ᩠ᨣᩉᨶᩥᩁᩮᩣᨵᩣ ᩋᨸᩥ ᨶᩩ ᨡᩮᩣ ᨾᨧ᩠ᨨᩁᩥᨿᩴ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᨾᨧ᩠ᨨᩁᩥᨿᩔ, ᨿᨴᩥᨴᩴ ᨸᩁᩥᨣ᩠ᨣᩉᩮᩣ’’.

᪑᪐᪗. ‘‘‘ᩋᨩ᩠ᨫᩮᩣᩈᩣᨶᩴ ᨸᨭᩥᨧ᩠ᨧ ᨸᩁᩥᨣ᩠ᨣᩉᩮᩣ’ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᩋᨩ᩠ᨫᩮᩣᩈᩣᨶᩴ ᨸᨭᩥᨧ᩠ᨧ ᨸᩁᩥᨣ᩠ᨣᩉᩮᩣ. ᩋᨩ᩠ᨫᩮᩣᩈᩣᨶᨬ᩠ᨧ ᩉᩥ, ᩌᨶᨶ᩠ᨴ, ᨶᩣᨽᩅᩥᩔ ᩈᨻ᩠ᨻᩮᨶ ᩈᨻ᩠ᨻᩴ ᩈᨻ᩠ᨻᨳᩣ ᩈᨻ᩠ᨻᩴ ᨠᩔᨧᩥ ᨠᩥᨾ᩠ᩉᩥᨧᩥ, ᩈᨻ᩠ᨻᩈᩮᩣ ᩋᨩ᩠ᨫᩮᩣᩈᩣᨶᩮ ᩋᩈᨲᩥ ᩋᨩ᩠ᨫᩮᩣᩈᩣᨶᨶᩥᩁᩮᩣᨵᩣ ᩋᨸᩥ ᨶᩩ ᨡᩮᩣ ᨸᩁᩥᨣ᩠ᨣᩉᩮᩣ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᨸᩁᩥᨣ᩠ᨣᩉᩔ – ᨿᨴᩥᨴᩴ ᩋᨩ᩠ᨫᩮᩣᩈᩣᨶᩴ’’.

᪑᪐᪘. ‘‘‘ᨨᨶ᩠ᨴᩁᩣᨣᩴ ᨸᨭᩥᨧ᩠ᨧ ᩋᨩ᩠ᨫᩮᩣᩈᩣᨶ’ᨶ᩠ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᨨᨶ᩠ᨴᩁᩣᨣᩴ ᨸᨭᩥᨧ᩠ᨧ ᩋᨩ᩠ᨫᩮᩣᩈᩣᨶᩴ. ᨨᨶ᩠ᨴᩁᩣᨣᩮᩣ ᨧ ᩉᩥ, ᩌᨶᨶ᩠ᨴ, ᨶᩣᨽᩅᩥᩔ ᩈᨻ᩠ᨻᩮᨶ ᩈᨻ᩠ᨻᩴ ᩈᨻ᩠ᨻᨳᩣ ᩈᨻ᩠ᨻᩴ ᨠᩔᨧᩥ ᨠᩥᨾ᩠ᩉᩥᨧᩥ, ᩈᨻ᩠ᨻᩈᩮᩣ ᨨᨶ᩠ᨴᩁᩣᨣᩮ ᩋᩈᨲᩥ ᨨᨶ᩠ᨴᩁᩣᨣᨶᩥᩁᩮᩣᨵᩣ ᩋᨸᩥ ᨶᩩ ᨡᩮᩣ ᩋᨩ᩠ᨫᩮᩣᩈᩣᨶᩴ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᩋᨩ᩠ᨫᩮᩣᩈᩣᨶᩔ, ᨿᨴᩥᨴᩴ ᨨᨶ᩠ᨴᩁᩣᨣᩮᩣ’’.

᪑᪐᪙. ‘‘‘ᩅᩥᨶᩥᨧ᩠ᨨᨿᩴ ᨸᨭᩥᨧ᩠ᨧ ᨨᨶ᩠ᨴᩁᩣᨣᩮᩣ’ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᩅᩥᨶᩥᨧ᩠ᨨᨿᩴ ᨸᨭᩥᨧ᩠ᨧ ᨨᨶ᩠ᨴᩁᩣᨣᩮᩣ. ᩅᩥᨶᩥᨧ᩠ᨨᨿᩮᩣ ᨧ ᩉᩥ, ᩌᨶᨶ᩠ᨴ, ᨶᩣᨽᩅᩥᩔ ᩈᨻ᩠ᨻᩮᨶ ᩈᨻ᩠ᨻᩴ ᩈᨻ᩠ᨻᨳᩣ ᩈᨻ᩠ᨻᩴ ᨠᩔᨧᩥ ᨠᩥᨾ᩠ᩉᩥᨧᩥ, ᩈᨻ᩠ᨻᩈᩮᩣ ᩅᩥᨶᩥᨧ᩠ᨨᨿᩮ ᩋᩈᨲᩥ ᩅᩥᨶᩥᨧ᩠ᨨᨿᨶᩥᩁᩮᩣᨵᩣ ᩋᨸᩥ ᨶᩩ ᨡᩮᩣ ᨨᨶ᩠ᨴᩁᩣᨣᩮᩣ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᨨᨶ᩠ᨴᩁᩣᨣᩔ, ᨿᨴᩥᨴᩴ ᩅᩥᨶᩥᨧ᩠ᨨᨿᩮᩣ’’.

᪑᪑᪐. ‘‘‘ᩃᩣᨽᩴ ᨸᨭᩥᨧ᩠ᨧ ᩅᩥᨶᩥᨧ᩠ᨨᨿᩮᩣ’ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᩃᩣᨽᩴ ᨸᨭᩥᨧ᩠ᨧ ᩅᩥᨶᩥᨧ᩠ᨨᨿᩮᩣ. ᩃᩣᨽᩮᩣ ᨧ ᩉᩥ, ᩌᨶᨶ᩠ᨴ, ᨶᩣᨽᩅᩥᩔ ᩈᨻ᩠ᨻᩮᨶ ᩈᨻ᩠ᨻᩴ ᩈᨻ᩠ᨻᨳᩣ ᩈᨻ᩠ᨻᩴ ᨠᩔᨧᩥ ᨠᩥᨾ᩠ᩉᩥᨧᩥ, ᩈᨻ᩠ᨻᩈᩮᩣ ᩃᩣᨽᩮ ᩋᩈᨲᩥ ᩃᩣᨽᨶᩥᩁᩮᩣᨵᩣ ᩋᨸᩥ ᨶᩩ ᨡᩮᩣ ᩅᩥᨶᩥᨧ᩠ᨨᨿᩮᩣ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᩅᩥᨶᩥᨧ᩠ᨨᨿᩔ, ᨿᨴᩥᨴᩴ ᩃᩣᨽᩮᩣ’’.

᪑᪑᪑. ‘‘‘ᨸᩁᩥᨿᩮᩈᨶᩴ ᨸᨭᩥᨧ᩠ᨧ ᩃᩣᨽᩮᩣ’ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᨸᩁᩥᨿᩮᩈᨶᩴ ᨸᨭᩥᨧ᩠ᨧ ᩃᩣᨽᩮᩣ. ᨸᩁᩥᨿᩮᩈᨶᩣ ᨧ ᩉᩥ, ᩌᨶᨶ᩠ᨴ, ᨶᩣᨽᩅᩥᩔ ᩈᨻ᩠ᨻᩮᨶ ᩈᨻ᩠ᨻᩴ ᩈᨻ᩠ᨻᨳᩣ ᩈᨻ᩠ᨻᩴ ᨠᩔᨧᩥ ᨠᩥᨾ᩠ᩉᩥᨧᩥ, ᩈᨻ᩠ᨻᩈᩮᩣ ᨸᩁᩥᨿᩮᩈᨶᩣᨿ ᩋᩈᨲᩥ ᨸᩁᩥᨿᩮᩈᨶᩣᨶᩥᩁᩮᩣᨵᩣ ᩋᨸᩥ ᨶᩩ ᨡᩮᩣ ᩃᩣᨽᩮᩣ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᩃᩣᨽᩔ, ᨿᨴᩥᨴᩴ ᨸᩁᩥᨿᩮᩈᨶᩣ’’.

᪑᪑᪒. ‘‘‘ᨲᨱ᩠ᩉᩴ ᨸᨭᩥᨧ᩠ᨧ ᨸᩁᩥᨿᩮᩈᨶᩣ’ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᨲᨱ᩠ᩉᩴ ᨸᨭᩥᨧ᩠ᨧ ᨸᩁᩥᨿᩮᩈᨶᩣ. ᨲᨱ᩠ᩉᩣ ᨧ ᩉᩥ, ᩌᨶᨶ᩠ᨴ, ᨶᩣᨽᩅᩥᩔ ᩈᨻ᩠ᨻᩮᨶ ᩈᨻ᩠ᨻᩴ ᩈᨻ᩠ᨻᨳᩣ ᩈᨻ᩠ᨻᩴ ᨠᩔᨧᩥ ᨠᩥᨾ᩠ᩉᩥᨧᩥ, ᩈᩮᨿ᩠ᨿᨳᩥᨴᩴ – ᨠᩣᨾᨲᨱ᩠ᩉᩣ ᨽᩅᨲᨱ᩠ᩉᩣ ᩅᩥᨽᩅᨲᨱ᩠ᩉᩣ, ᩈᨻ᩠ᨻᩈᩮᩣ ᨲᨱ᩠ᩉᩣᨿ ᩋᩈᨲᩥ ᨲᨱ᩠ᩉᩣᨶᩥᩁᩮᩣᨵᩣ ᩋᨸᩥ ᨶᩩ ᨡᩮᩣ ᨸᩁᩥᨿᩮᩈᨶᩣ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᨸᩁᩥᨿᩮᩈᨶᩣᨿ, ᨿᨴᩥᨴᩴ ᨲᨱ᩠ᩉᩣ. ᩍᨲᩥ ᨡᩮᩣ, ᩌᨶᨶ᩠ᨴ, ᩍᨾᩮ ᨴ᩠ᩅᩮ ᨵᨾ᩠ᨾᩣ [ᩍᨾᩮ ᨵᨾ᩠ᨾᩣ (ᨠ.)] ᨴ᩠ᩅᨿᩮᨶ ᩅᩮᨴᨶᩣᨿ ᩑᨠᩈᨾᩮᩣᩈᩁᨱᩣ ᨽᩅᨶ᩠ᨲᩥ’’.

᪑᪑᪓. ‘‘‘ᨹᩔᨸᨧ᩠ᨧᨿᩣ ᩅᩮᨴᨶᩣ’ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ‘ᨹᩔᨸᨧ᩠ᨧᨿᩣ ᩅᩮᨴᨶᩣ. ᨹᩔᩮᩣ ᨧ ᩉᩥ, ᩌᨶᨶ᩠ᨴ, ᨶᩣᨽᩅᩥᩔ ᩈᨻ᩠ᨻᩮᨶ ᩈᨻ᩠ᨻᩴ ᩈᨻ᩠ᨻᨳᩣ ᩈᨻ᩠ᨻᩴ ᨠᩔᨧᩥ ᨠᩥᨾ᩠ᩉᩥᨧᩥ, ᩈᩮᨿ᩠ᨿᨳᩥᨴᩴ – ᨧᨠ᩠ᨡᩩᩈᨾ᩠ᨹᩔᩮᩣ ᩈᩮᩣᨲᩈᨾ᩠ᨹᩔᩮᩣ ᨥᩣᨶᩈᨾ᩠ᨹᩔᩮᩣ ᨩᩥᩅ᩠ᩉᩣᩈᨾ᩠ᨹᩔᩮᩣ ᨠᩣᨿᩈᨾ᩠ᨹᩔᩮᩣ ᨾᨶᩮᩣᩈᨾ᩠ᨹᩔᩮᩣ, ᩈᨻ᩠ᨻᩈᩮᩣ ᨹᩔᩮ ᩋᩈᨲᩥ ᨹᩔᨶᩥᩁᩮᩣᨵᩣ ᩋᨸᩥ ᨶᩩ ᨡᩮᩣ ᩅᩮᨴᨶᩣ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᩅᩮᨴᨶᩣᨿ, ᨿᨴᩥᨴᩴ ᨹᩔᩮᩣ’’.

᪑᪑᪔. ‘‘‘ᨶᩣᨾᩁᩪᨸᨸᨧ᩠ᨧᨿᩣ ᨹᩔᩮᩣ’ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᨶᩣᨾᩁᩪᨸᨸᨧ᩠ᨧᨿᩣ ᨹᩔᩮᩣ. ᨿᩮᩉᩥ, ᩌᨶᨶ᩠ᨴ, ᩌᨠᩣᩁᩮᩉᩥ ᨿᩮᩉᩥ ᩃᩥᨦ᩠ᨣᩮᩉᩥ ᨿᩮᩉᩥ ᨶᩥᨾᩥᨲ᩠ᨲᩮᩉᩥ ᨿᩮᩉᩥ ᩏᨴ᩠ᨴᩮᩈᩮᩉᩥ ᨶᩣᨾᨠᩣᨿᩔ ᨸᨬ᩠ᨬᨲ᩠ᨲᩥ ᩉᩮᩣᨲᩥ, ᨲᩮᩈᩩ ᩌᨠᩣᩁᩮᩈᩩ ᨲᩮᩈᩩ ᩃᩥᨦ᩠ᨣᩮᩈᩩ ᨲᩮᩈᩩ ᨶᩥᨾᩥᨲ᩠ᨲᩮᩈᩩ ᨲᩮᩈᩩ ᩏᨴ᩠ᨴᩮᩈᩮᩈᩩ ᩋᩈᨲᩥ ᩋᨸᩥ ᨶᩩ ᨡᩮᩣ ᩁᩪᨸᨠᩣᨿᩮ ᩋᨵᩥᩅᨧᨶᩈᨾ᩠ᨹᩔᩮᩣ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨿᩮᩉᩥ, ᩌᨶᨶ᩠ᨴ, ᩌᨠᩣᩁᩮᩉᩥ ᨿᩮᩉᩥ ᩃᩥᨦ᩠ᨣᩮᩉᩥ ᨿᩮᩉᩥ ᨶᩥᨾᩥᨲ᩠ᨲᩮᩉᩥ ᨿᩮᩉᩥ ᩏᨴ᩠ᨴᩮᩈᩮᩉᩥ ᩁᩪᨸᨠᩣᨿᩔ ᨸᨬ᩠ᨬᨲ᩠ᨲᩥ ᩉᩮᩣᨲᩥ, ᨲᩮᩈᩩ ᩌᨠᩣᩁᩮᩈᩩ…ᨸᩮ… ᨲᩮᩈᩩ ᩏᨴ᩠ᨴᩮᩈᩮᩈᩩ ᩋᩈᨲᩥ ᩋᨸᩥ ᨶᩩ ᨡᩮᩣ ᨶᩣᨾᨠᩣᨿᩮ ᨸᨭᩥᨥᩈᨾ᩠ᨹᩔᩮᩣ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨿᩮᩉᩥ, ᩌᨶᨶ᩠ᨴ, ᩌᨠᩣᩁᩮᩉᩥ…ᨸᩮ… ᨿᩮᩉᩥ ᩏᨴ᩠ᨴᩮᩈᩮᩉᩥ ᨶᩣᨾᨠᩣᨿᩔ ᨧ ᩁᩪᨸᨠᩣᨿᩔ ᨧ ᨸᨬ᩠ᨬᨲ᩠ᨲᩥ ᩉᩮᩣᨲᩥ, ᨲᩮᩈᩩ ᩌᨠᩣᩁᩮᩈᩩ…ᨸᩮ… ᨲᩮᩈᩩ ᩏᨴ᩠ᨴᩮᩈᩮᩈᩩ ᩋᩈᨲᩥ ᩋᨸᩥ ᨶᩩ ᨡᩮᩣ ᩋᨵᩥᩅᨧᨶᩈᨾ᩠ᨹᩔᩮᩣ ᩅᩣ ᨸᨭᩥᨥᩈᨾ᩠ᨹᩔᩮᩣ ᩅᩣ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨿᩮᩉᩥ, ᩌᨶᨶ᩠ᨴ, ᩌᨠᩣᩁᩮᩉᩥ…ᨸᩮ… ᨿᩮᩉᩥ ᩏᨴ᩠ᨴᩮᩈᩮᩉᩥ ᨶᩣᨾᩁᩪᨸᩔ ᨸᨬ᩠ᨬᨲ᩠ᨲᩥ ᩉᩮᩣᨲᩥ, ᨲᩮᩈᩩ ᩌᨠᩣᩁᩮᩈᩩ …ᨸᩮ… ᨲᩮᩈᩩ ᩏᨴ᩠ᨴᩮᩈᩮᩈᩩ ᩋᩈᨲᩥ ᩋᨸᩥ ᨶᩩ ᨡᩮᩣ ᨹᩔᩮᩣ ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᨹᩔᩔ, ᨿᨴᩥᨴᩴ ᨶᩣᨾᩁᩪᨸᩴ’’.

᪑᪑᪕. ‘‘‘ᩅᩥᨬ᩠ᨬᩣᨱᨸᨧ᩠ᨧᨿᩣ ᨶᩣᨾᩁᩪᨸ’ᨶ᩠ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᩅᩥᨬ᩠ᨬᩣᨱᨸᨧ᩠ᨧᨿᩣ ᨶᩣᨾᩁᩪᨸᩴ. ᩅᩥᨬ᩠ᨬᩣᨱᨬ᩠ᨧ ᩉᩥ, ᩌᨶᨶ᩠ᨴ, ᨾᩣᨲᩩᨠᩩᨧ᩠ᨨᩥᩈ᩠ᨾᩥᩴ ᨶ ᩒᨠ᩠ᨠᨾᩥᩔᨳ, ᩋᨸᩥ ᨶᩩ ᨡᩮᩣ ᨶᩣᨾᩁᩪᨸᩴ ᨾᩣᨲᩩᨠᩩᨧ᩠ᨨᩥᩈ᩠ᨾᩥᩴ ᩈᨾᩩᨧ᩠ᨧᩥᩔᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᩅᩥᨬ᩠ᨬᩣᨱᨬ᩠ᨧ ᩉᩥ, ᩌᨶᨶ᩠ᨴ, ᨾᩣᨲᩩᨠᩩᨧ᩠ᨨᩥᩈ᩠ᨾᩥᩴ ᩒᨠ᩠ᨠᨾᩥᨲ᩠ᩅᩣ ᩅᩮᩣᨠ᩠ᨠᨾᩥᩔᨳ, ᩋᨸᩥ ᨶᩩ ᨡᩮᩣ ᨶᩣᨾᩁᩪᨸᩴ ᩍᨲ᩠ᨳᨲ᩠ᨲᩣᨿ ᩋᨽᩥᨶᩥᨻ᩠ᨻᨲ᩠ᨲᩥᩔᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᩅᩥᨬ᩠ᨬᩣᨱᨬ᩠ᨧ ᩉᩥ, ᩌᨶᨶ᩠ᨴ, ᨴᩉᩁᩔᩮᩅ ᩈᨲᩮᩣ ᩅᩮᩣᨧ᩠ᨨᩥᨩ᩠ᨩᩥᩔᨳ ᨠᩩᨾᩣᩁᨠᩔ ᩅᩣ ᨠᩩᨾᩣᩁᩥᨠᩣᨿ ᩅᩣ, ᩋᨸᩥ ᨶᩩ ᨡᩮᩣ ᨶᩣᨾᩁᩪᨸᩴ ᩅᩩᨴ᩠ᨵᩥᩴ ᩅᩥᩁᩪᩊ᩠ᩉᩥᩴ ᩅᩮᨸᩩᩃ᩠ᩃᩴ ᩌᨸᨩ᩠ᨩᩥᩔᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᨶᩣᨾᩁᩪᨸᩔ – ᨿᨴᩥᨴᩴ ᩅᩥᨬ᩠ᨬᩣᨱᩴ’’.

᪑᪑᪖. ‘‘‘ᨶᩣᨾᩁᩪᨸᨸᨧ᩠ᨧᨿᩣ ᩅᩥᨬ᩠ᨬᩣᨱ’ᨶ᩠ᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨲᨴᩣᨶᨶ᩠ᨴ, ᩍᨾᩥᨶᩣᨸᩮᨲᩴ ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᨶᩣᨾᩁᩪᨸᨸᨧ᩠ᨧᨿᩣ ᩅᩥᨬ᩠ᨬᩣᨱᩴ. ᩅᩥᨬ᩠ᨬᩣᨱᨬ᩠ᨧ ᩉᩥ, ᩌᨶᨶ᩠ᨴ, ᨶᩣᨾᩁᩪᨸᩮ ᨸᨲᩥᨭ᩠ᨮᩴ ᨶ ᩃᨽᩥᩔᨳ, ᩋᨸᩥ ᨶᩩ ᨡᩮᩣ ᩌᨿᨲᩥᩴ ᨩᩣᨲᩥᨩᩁᩣᨾᩁᨱᩴ ᨴᩩᨠ᩠ᨡᩈᨾᩩᨴᨿᩈᨾ᩠ᨽᩅᩮᩣ [ᨩᩣᨲᩥᨩᩁᩣᨾᩁᨱᨴᩩᨠ᩠ᨡᩈᨾᩩᨴᨿᩈᨾ᩠ᨽᩅᩮᩣ (ᩈᩦ. ᩈ᩠ᨿᩣ. ᨸᩦ.)] ᨸᨬ᩠ᨬᩣᨿᩮᨳᩣ’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᩈᩮᩅ ᩉᩮᨲᩩ ᩑᨲᩴ ᨶᩥᨴᩣᨶᩴ ᩑᩈ ᩈᨾᩩᨴᨿᩮᩣ ᩑᩈ ᨸᨧ᩠ᨧᨿᩮᩣ ᩅᩥᨬ᩠ᨬᩣᨱᩔ ᨿᨴᩥᨴᩴ ᨶᩣᨾᩁᩪᨸᩴ. ᩑᨲ᩠ᨲᩣᩅᨲᩣ ᨡᩮᩣ, ᩌᨶᨶ᩠ᨴ, ᨩᩣᨿᩮᨳ ᩅᩣ ᨩᩦᨿᩮᨳ [ᨩᩥᨿ᩠ᨿᩮᨳ (ᨠ.)] ᩅᩣ ᨾᩦᨿᩮᨳ [ᨾᩥᨿ᩠ᨿᩮᨳ (ᨠ.)] ᩅᩣ ᨧᩅᩮᨳ ᩅᩣ ᩏᨸᨸᨩ᩠ᨩᩮᨳ ᩅᩣ. ᩑᨲ᩠ᨲᩣᩅᨲᩣ ᩋᨵᩥᩅᨧᨶᨸᨳᩮᩣ, ᩑᨲ᩠ᨲᩣᩅᨲᩣ ᨶᩥᩁᩩᨲ᩠ᨲᩥᨸᨳᩮᩣ, ᩑᨲ᩠ᨲᩣᩅᨲᩣ ᨸᨬ᩠ᨬᨲ᩠ᨲᩥᨸᨳᩮᩣ, ᩑᨲ᩠ᨲᩣᩅᨲᩣ ᨸᨬ᩠ᨬᩣᩅᨧᩁᩴ, ᩑᨲ᩠ᨲᩣᩅᨲᩣ ᩅᨭ᩠ᨭᩴ ᩅᨲ᩠ᨲᨲᩥ ᩍᨲ᩠ᨳᨲ᩠ᨲᩴ ᨸᨬ᩠ᨬᩣᨸᨶᩣᨿ ᨿᨴᩥᨴᩴ ᨶᩣᨾᩁᩪᨸᩴ ᩈᩉ ᩅᩥᨬ᩠ᨬᩣᨱᩮᨶ ᩋᨬ᩠ᨬᨾᨬ᩠ᨬᨸᨧ᩠ᨧᨿᨲᩣ ᨸᩅᨲ᩠ᨲᨲᩥ.

ᩋᨲ᩠ᨲᨸᨬ᩠ᨬᨲ᩠ᨲᩥ

᪑᪑᪗. ‘‘ᨠᩥᨲ᩠ᨲᩣᩅᨲᩣ ᨧ, ᩌᨶᨶ᩠ᨴ, ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ? ᩁᩪᨸᩥᩴ ᩅᩣ ᩉᩥ, ᩌᨶᨶ᩠ᨴ, ᨸᩁᩥᨲ᩠ᨲᩴ ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ – ‘‘ᩁᩪᨸᩦ ᨾᩮ ᨸᩁᩥᨲ᩠ᨲᩮᩣ ᩋᨲ᩠ᨲᩣ’’ᨲᩥ. ᩁᩪᨸᩥᩴ ᩅᩣ ᩉᩥ, ᩌᨶᨶ᩠ᨴ, ᩋᨶᨶ᩠ᨲᩴ ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ – ‘ᩁᩪᨸᩦ ᨾᩮ ᩋᨶᨶ᩠ᨲᩮᩣ ᩋᨲ᩠ᨲᩣ’ᨲᩥ. ᩋᩁᩪᨸᩥᩴ ᩅᩣ ᩉᩥ, ᩌᨶᨶ᩠ᨴ, ᨸᩁᩥᨲ᩠ᨲᩴ ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ – ‘ᩋᩁᩪᨸᩦ ᨾᩮ ᨸᩁᩥᨲ᩠ᨲᩮᩣ ᩋᨲ᩠ᨲᩣ’ᨲᩥ. ᩋᩁᩪᨸᩥᩴ ᩅᩣ ᩉᩥ, ᩌᨶᨶ᩠ᨴ, ᩋᨶᨶ᩠ᨲᩴ ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ – ‘ᩋᩁᩪᨸᩦ ᨾᩮ ᩋᨶᨶ᩠ᨲᩮᩣ ᩋᨲ᩠ᨲᩣ’ᨲᩥ.

᪑᪑᪘. ‘‘ᨲᨲᩕᩣᨶᨶ᩠ᨴ, ᨿᩮᩣ ᩈᩮᩣ ᩁᩪᨸᩥᩴ ᨸᩁᩥᨲ᩠ᨲᩴ ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ. ᩑᨲᩁᩉᩥ ᩅᩣ ᩈᩮᩣ ᩁᩪᨸᩥᩴ ᨸᩁᩥᨲ᩠ᨲᩴ ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ, ᨲᨲ᩠ᨳ ᨽᩣᩅᩥᩴ ᩅᩣ ᩈᩮᩣ ᩁᩪᨸᩥᩴ ᨸᩁᩥᨲ᩠ᨲᩴ ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ, ‘ᩋᨲᨳᩴ ᩅᩣ ᨸᨶ ᩈᨶ᩠ᨲᩴ ᨲᨳᨲ᩠ᨲᩣᨿ ᩏᨸᨠᨸ᩠ᨸᩮᩔᩣᨾᩦ’ᨲᩥ ᩍᨲᩥ ᩅᩣ ᨸᨶᩔ ᩉᩮᩣᨲᩥ. ᩑᩅᩴ ᩈᨶ᩠ᨲᩴ ᨡᩮᩣ, ᩌᨶᨶ᩠ᨴ, ᩁᩪᨸᩥᩴ [ᩁᩪᨸᩦ (ᨠ.)] ᨸᩁᩥᨲ᩠ᨲᨲ᩠ᨲᩣᨶᩩᨴᩥᨭ᩠ᨮᩥ ᩋᨶᩩᩈᩮᨲᩦᨲᩥ ᩍᨧ᩠ᨧᩣᩃᩴ ᩅᨧᨶᩣᨿ.

‘‘ᨲᨲᩕᩣᨶᨶ᩠ᨴ, ᨿᩮᩣ ᩈᩮᩣ ᩁᩪᨸᩥᩴ ᩋᨶᨶ᩠ᨲᩴ ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ. ᩑᨲᩁᩉᩥ ᩅᩣ ᩈᩮᩣ ᩁᩪᨸᩥᩴ ᩋᨶᨶ᩠ᨲᩴ ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ, ᨲᨲ᩠ᨳ ᨽᩣᩅᩥᩴ ᩅᩣ ᩈᩮᩣ ᩁᩪᨸᩥᩴ ᩋᨶᨶ᩠ᨲᩴ ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ, ‘ᩋᨲᨳᩴ ᩅᩣ ᨸᨶ ᩈᨶ᩠ᨲᩴ ᨲᨳᨲ᩠ᨲᩣᨿ ᩏᨸᨠᨸ᩠ᨸᩮᩔᩣᨾᩦ’ᨲᩥ ᩍᨲᩥ ᩅᩣ ᨸᨶᩔ ᩉᩮᩣᨲᩥ. ᩑᩅᩴ ᩈᨶ᩠ᨲᩴ ᨡᩮᩣ, ᩌᨶᨶ᩠ᨴ, ᩁᩪᨸᩥᩴ [ᩁᩪᨸᩦ (ᨠ.)] ᩋᨶᨶ᩠ᨲᨲ᩠ᨲᩣᨶᩩᨴᩥᨭ᩠ᨮᩥ ᩋᨶᩩᩈᩮᨲᩦᨲᩥ ᩍᨧ᩠ᨧᩣᩃᩴ ᩅᨧᨶᩣᨿ.

‘‘ᨲᨲᩕᩣᨶᨶ᩠ᨴ, ᨿᩮᩣ ᩈᩮᩣ ᩋᩁᩪᨸᩥᩴ ᨸᩁᩥᨲ᩠ᨲᩴ ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ. ᩑᨲᩁᩉᩥ ᩅᩣ ᩈᩮᩣ ᩋᩁᩪᨸᩥᩴ ᨸᩁᩥᨲ᩠ᨲᩴ ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ, ᨲᨲ᩠ᨳ ᨽᩣᩅᩥᩴ ᩅᩣ ᩈᩮᩣ ᩋᩁᩪᨸᩥᩴ ᨸᩁᩥᨲ᩠ᨲᩴ ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ, ‘ᩋᨲᨳᩴ ᩅᩣ ᨸᨶ ᩈᨶ᩠ᨲᩴ ᨲᨳᨲ᩠ᨲᩣᨿ ᩏᨸᨠᨸ᩠ᨸᩮᩔᩣᨾᩦ’ᨲᩥ ᩍᨲᩥ ᩅᩣ ᨸᨶᩔ ᩉᩮᩣᨲᩥ. ᩑᩅᩴ ᩈᨶ᩠ᨲᩴ ᨡᩮᩣ, ᩌᨶᨶ᩠ᨴ, ᩋᩁᩪᨸᩥᩴ [ᩋᩁᩪᨸᩦ (ᨠ.)] ᨸᩁᩥᨲ᩠ᨲᨲ᩠ᨲᩣᨶᩩᨴᩥᨭ᩠ᨮᩥ ᩋᨶᩩᩈᩮᨲᩦᨲᩥ ᩍᨧ᩠ᨧᩣᩃᩴ ᩅᨧᨶᩣᨿ.

‘‘ᨲᨲᩕᩣᨶᨶ᩠ᨴ, ᨿᩮᩣ ᩈᩮᩣ ᩋᩁᩪᨸᩥᩴ ᩋᨶᨶ᩠ᨲᩴ ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ. ᩑᨲᩁᩉᩥ ᩅᩣ ᩈᩮᩣ ᩋᩁᩪᨸᩥᩴ ᩋᨶᨶ᩠ᨲᩴ ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ, ᨲᨲ᩠ᨳ ᨽᩣᩅᩥᩴ ᩅᩣ ᩈᩮᩣ ᩋᩁᩪᨸᩥᩴ ᩋᨶᨶ᩠ᨲᩴ ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ, ‘ᩋᨲᨳᩴ ᩅᩣ ᨸᨶ ᩈᨶ᩠ᨲᩴ ᨲᨳᨲ᩠ᨲᩣᨿ ᩏᨸᨠᨸ᩠ᨸᩮᩔᩣᨾᩦ’ᨲᩥ ᩍᨲᩥ ᩅᩣ ᨸᨶᩔ ᩉᩮᩣᨲᩥ. ᩑᩅᩴ ᩈᨶ᩠ᨲᩴ ᨡᩮᩣ, ᩌᨶᨶ᩠ᨴ, ᩋᩁᩪᨸᩥᩴ [ᩋᩁᩪᨸᩦ (ᨠ.)] ᩋᨶᨶ᩠ᨲᨲ᩠ᨲᩣᨶᩩᨴᩥᨭ᩠ᨮᩥ ᩋᨶᩩᩈᩮᨲᩦᨲᩥ ᩍᨧ᩠ᨧᩣᩃᩴ ᩅᨧᨶᩣᨿ. ᩑᨲ᩠ᨲᩣᩅᨲᩣ ᨡᩮᩣ, ᩌᨶᨶ᩠ᨴ, ᩋᨲ᩠ᨲᩣᨶᩴ ᨸᨬ᩠ᨬᨸᩮᨶ᩠ᨲᩮᩣ ᨸᨬ᩠ᨬᨸᩮᨲᩥ.

ᨶᩋᨲ᩠ᨲᨸᨬ᩠ᨬᨲ᩠ᨲᩥ

᪑᪑᪙. ‘‘ᨠᩥᨲ᩠ᨲᩣᩅᨲᩣ ᨧ, ᩌᨶᨶ᩠ᨴ, ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ? ᩁᩪᨸᩥᩴ ᩅᩣ ᩉᩥ, ᩌᨶᨶ᩠ᨴ, ᨸᩁᩥᨲ᩠ᨲᩴ ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ – ‘ᩁᩪᨸᩦ ᨾᩮ ᨸᩁᩥᨲ᩠ᨲᩮᩣ ᩋᨲ᩠ᨲᩣ’ᨲᩥ. ᩁᩪᨸᩥᩴ ᩅᩣ ᩉᩥ, ᩌᨶᨶ᩠ᨴ, ᩋᨶᨶ᩠ᨲᩴ ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ – ‘ᩁᩪᨸᩦ ᨾᩮ ᩋᨶᨶ᩠ᨲᩮᩣ ᩋᨲ᩠ᨲᩣ’ᨲᩥ. ᩋᩁᩪᨸᩥᩴ ᩅᩣ ᩉᩥ, ᩌᨶᨶ᩠ᨴ, ᨸᩁᩥᨲ᩠ᨲᩴ ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ – ‘ᩋᩁᩪᨸᩦ ᨾᩮ ᨸᩁᩥᨲ᩠ᨲᩮᩣ ᩋᨲ᩠ᨲᩣ’ᨲᩥ. ᩋᩁᩪᨸᩥᩴ ᩅᩣ ᩉᩥ, ᩌᨶᨶ᩠ᨴ, ᩋᨶᨶ᩠ᨲᩴ ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ – ‘ᩋᩁᩪᨸᩦ ᨾᩮ ᩋᨶᨶ᩠ᨲᩮᩣ ᩋᨲ᩠ᨲᩣ’ᨲᩥ.

᪑᪒᪐. ‘‘ᨲᨲᩕᩣᨶᨶ᩠ᨴ, ᨿᩮᩣ ᩈᩮᩣ ᩁᩪᨸᩥᩴ ᨸᩁᩥᨲ᩠ᨲᩴ ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ. ᩑᨲᩁᩉᩥ ᩅᩣ ᩈᩮᩣ ᩁᩪᨸᩥᩴ ᨸᩁᩥᨲ᩠ᨲᩴ ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ, ᨲᨲ᩠ᨳ ᨽᩣᩅᩥᩴ ᩅᩣ ᩈᩮᩣ ᩁᩪᨸᩥᩴ ᨸᩁᩥᨲ᩠ᨲᩴ ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ, ‘ᩋᨲᨳᩴ ᩅᩣ ᨸᨶ ᩈᨶ᩠ᨲᩴ ᨲᨳᨲ᩠ᨲᩣᨿ ᩏᨸᨠᨸ᩠ᨸᩮᩔᩣᨾᩦ’ᨲᩥ ᩍᨲᩥ ᩅᩣ ᨸᨶᩔ ᨶ ᩉᩮᩣᨲᩥ. ᩑᩅᩴ ᩈᨶ᩠ᨲᩴ ᨡᩮᩣ, ᩌᨶᨶ᩠ᨴ, ᩁᩪᨸᩥᩴ ᨸᩁᩥᨲ᩠ᨲᨲ᩠ᨲᩣᨶᩩᨴᩥᨭ᩠ᨮᩥ ᨶᩣᨶᩩᩈᩮᨲᩦᨲᩥ ᩍᨧ᩠ᨧᩣᩃᩴ ᩅᨧᨶᩣᨿ.

‘‘ᨲᨲᩕᩣᨶᨶ᩠ᨴ, ᨿᩮᩣ ᩈᩮᩣ ᩁᩪᨸᩥᩴ ᩋᨶᨶ᩠ᨲᩴ ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ. ᩑᨲᩁᩉᩥ ᩅᩣ ᩈᩮᩣ ᩁᩪᨸᩥᩴ ᩋᨶᨶ᩠ᨲᩴ ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ, ᨲᨲ᩠ᨳ ᨽᩣᩅᩥᩴ ᩅᩣ ᩈᩮᩣ ᩁᩪᨸᩥᩴ ᩋᨶᨶ᩠ᨲᩴ ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ, ‘ᩋᨲᨳᩴ ᩅᩣ ᨸᨶ ᩈᨶ᩠ᨲᩴ ᨲᨳᨲ᩠ᨲᩣᨿ ᩏᨸᨠᨸ᩠ᨸᩮᩔᩣᨾᩦ’ᨲᩥ ᩍᨲᩥ ᩅᩣ ᨸᨶᩔ ᨶ ᩉᩮᩣᨲᩥ. ᩑᩅᩴ ᩈᨶ᩠ᨲᩴ ᨡᩮᩣ, ᩌᨶᨶ᩠ᨴ, ᩁᩪᨸᩥᩴ ᩋᨶᨶ᩠ᨲᨲ᩠ᨲᩣᨶᩩᨴᩥᨭ᩠ᨮᩥ ᨶᩣᨶᩩᩈᩮᨲᩦᨲᩥ ᩍᨧ᩠ᨧᩣᩃᩴ ᩅᨧᨶᩣᨿ.

‘‘ᨲᨲᩕᩣᨶᨶ᩠ᨴ, ᨿᩮᩣ ᩈᩮᩣ ᩋᩁᩪᨸᩥᩴ ᨸᩁᩥᨲ᩠ᨲᩴ ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ. ᩑᨲᩁᩉᩥ ᩅᩣ ᩈᩮᩣ ᩋᩁᩪᨸᩥᩴ ᨸᩁᩥᨲ᩠ᨲᩴ ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ, ᨲᨲ᩠ᨳ ᨽᩣᩅᩥᩴ ᩅᩣ ᩈᩮᩣ ᩋᩁᩪᨸᩥᩴ ᨸᩁᩥᨲ᩠ᨲᩴ ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ, ‘ᩋᨲᨳᩴ ᩅᩣ ᨸᨶ ᩈᨶ᩠ᨲᩴ ᨲᨳᨲ᩠ᨲᩣᨿ ᩏᨸᨠᨸ᩠ᨸᩮᩔᩣᨾᩦ’ᨲᩥ ᩍᨲᩥ ᩅᩣ ᨸᨶᩔ ᨶ ᩉᩮᩣᨲᩥ. ᩑᩅᩴ ᩈᨶ᩠ᨲᩴ ᨡᩮᩣ, ᩌᨶᨶ᩠ᨴ, ᩋᩁᩪᨸᩥᩴ ᨸᩁᩥᨲ᩠ᨲᨲ᩠ᨲᩣᨶᩩᨴᩥᨭ᩠ᨮᩥ ᨶᩣᨶᩩᩈᩮᨲᩦᨲᩥ ᩍᨧ᩠ᨧᩣᩃᩴ ᩅᨧᨶᩣᨿ.

‘‘ᨲᨲᩕᩣᨶᨶ᩠ᨴ, ᨿᩮᩣ ᩈᩮᩣ ᩋᩁᩪᨸᩥᩴ ᩋᨶᨶ᩠ᨲᩴ ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ. ᩑᨲᩁᩉᩥ ᩅᩣ ᩈᩮᩣ ᩋᩁᩪᨸᩥᩴ ᩋᨶᨶ᩠ᨲᩴ ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ, ᨲᨲ᩠ᨳ ᨽᩣᩅᩥᩴ ᩅᩣ ᩈᩮᩣ ᩋᩁᩪᨸᩥᩴ ᩋᨶᨶ᩠ᨲᩴ ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ, ‘ᩋᨲᨳᩴ ᩅᩣ ᨸᨶ ᩈᨶ᩠ᨲᩴ ᨲᨳᨲ᩠ᨲᩣᨿ ᩏᨸᨠᨸ᩠ᨸᩮᩔᩣᨾᩦ’ᨲᩥ ᩍᨲᩥ ᩅᩣ ᨸᨶᩔ ᨶ ᩉᩮᩣᨲᩥ. ᩑᩅᩴ ᩈᨶ᩠ᨲᩴ ᨡᩮᩣ, ᩌᨶᨶ᩠ᨴ, ᩋᩁᩪᨸᩥᩴ ᩋᨶᨶ᩠ᨲᨲ᩠ᨲᩣᨶᩩᨴᩥᨭ᩠ᨮᩥ ᨶᩣᨶᩩᩈᩮᨲᩦᨲᩥ ᩍᨧ᩠ᨧᩣᩃᩴ ᩅᨧᨶᩣᨿ. ᩑᨲ᩠ᨲᩣᩅᨲᩣ ᨡᩮᩣ, ᩌᨶᨶ᩠ᨴ, ᩋᨲ᩠ᨲᩣᨶᩴ ᨶ ᨸᨬ᩠ᨬᨸᩮᨶ᩠ᨲᩮᩣ ᨶ ᨸᨬ᩠ᨬᨸᩮᨲᩥ.

ᩋᨲ᩠ᨲᩈᨾᨶᩩᨸᩔᨶᩣ

᪑᪒᪑. ‘‘ᨠᩥᨲ᩠ᨲᩣᩅᨲᩣ ᨧ, ᩌᨶᨶ᩠ᨴ, ᩋᨲ᩠ᨲᩣᨶᩴ ᩈᨾᨶᩩᨸᩔᨾᩣᨶᩮᩣ ᩈᨾᨶᩩᨸᩔᨲᩥ? ᩅᩮᨴᨶᩴ ᩅᩣ ᩉᩥ, ᩌᨶᨶ᩠ᨴ, ᩋᨲ᩠ᨲᩣᨶᩴ ᩈᨾᨶᩩᨸᩔᨾᩣᨶᩮᩣ ᩈᨾᨶᩩᨸᩔᨲᩥ – ‘ᩅᩮᨴᨶᩣ ᨾᩮ ᩋᨲ᩠ᨲᩣ’ᨲᩥ. ‘ᨶ ᩉᩮᩅ ᨡᩮᩣ ᨾᩮ ᩅᩮᨴᨶᩣ ᩋᨲ᩠ᨲᩣ, ᩋᨸ᩠ᨸᨭᩥᩈᩴᩅᩮᨴᨶᩮᩣ ᨾᩮ ᩋᨲ᩠ᨲᩣ’ᨲᩥ ᩍᨲᩥ ᩅᩣ ᩉᩥ, ᩌᨶᨶ᩠ᨴ, ᩋᨲ᩠ᨲᩣᨶᩴ ᩈᨾᨶᩩᨸᩔᨾᩣᨶᩮᩣ ᩈᨾᨶᩩᨸᩔᨲᩥ. ‘ᨶ ᩉᩮᩅ ᨡᩮᩣ ᨾᩮ ᩅᩮᨴᨶᩣ ᩋᨲ᩠ᨲᩣ, ᨶᩮᩣᨸᩥ ᩋᨸ᩠ᨸᨭᩥᩈᩴᩅᩮᨴᨶᩮᩣ ᨾᩮ ᩋᨲ᩠ᨲᩣ, ᩋᨲ᩠ᨲᩣ ᨾᩮ ᩅᩮᨴᩥᨿᨲᩥ, ᩅᩮᨴᨶᩣᨵᨾ᩠ᨾᩮᩣ ᩉᩥ ᨾᩮ ᩋᨲ᩠ᨲᩣ’ᨲᩥ ᩍᨲᩥ ᩅᩣ ᩉᩥ, ᩌᨶᨶ᩠ᨴ, ᩋᨲ᩠ᨲᩣᨶᩴ ᩈᨾᨶᩩᨸᩔᨾᩣᨶᩮᩣ ᩈᨾᨶᩩᨸᩔᨲᩥ.

᪑᪒᪒. ‘‘ᨲᨲᩕᩣᨶᨶ᩠ᨴ, ᨿᩮᩣ ᩈᩮᩣ ᩑᩅᨾᩣᩉ – ‘ᩅᩮᨴᨶᩣ ᨾᩮ ᩋᨲ᩠ᨲᩣ’ᨲᩥ, ᩈᩮᩣ ᩑᩅᨾᩔ ᩅᨧᨶᩦᨿᩮᩣ – ‘ᨲᩥᩔᩮᩣ ᨡᩮᩣ ᩍᨾᩣ, ᩌᩅᩩᩈᩮᩣ, ᩅᩮᨴᨶᩣ – ᩈᩩᨡᩣ ᩅᩮᨴᨶᩣ ᨴᩩᨠ᩠ᨡᩣ ᩅᩮᨴᨶᩣ ᩋᨴᩩᨠ᩠ᨡᨾᩈᩩᨡᩣ ᩅᩮᨴᨶᩣ. ᩍᨾᩣᩈᩴ ᨡᩮᩣ ᨲ᩠ᩅᩴ ᨲᩥᩔᨶ᩠ᨶᩴ ᩅᩮᨴᨶᩣᨶᩴ ᨠᨲᨾᩴ ᩋᨲ᩠ᨲᨲᩮᩣ ᩈᨾᨶᩩᨸᩔᩈᩦ’ᨲᩥ? ᨿᩈ᩠ᨾᩥᩴ, ᩌᨶᨶ᩠ᨴ, ᩈᨾᨿᩮ ᩈᩩᨡᩴ ᩅᩮᨴᨶᩴ ᩅᩮᨴᩮᨲᩥ, ᨶᩮᩅ ᨲᩈ᩠ᨾᩥᩴ ᩈᨾᨿᩮ ᨴᩩᨠ᩠ᨡᩴ ᩅᩮᨴᨶᩴ ᩅᩮᨴᩮᨲᩥ, ᨶ ᩋᨴᩩᨠ᩠ᨡᨾᩈᩩᨡᩴ ᩅᩮᨴᨶᩴ ᩅᩮᨴᩮᨲᩥ; ᩈᩩᨡᩴᨿᩮᩅ ᨲᩈ᩠ᨾᩥᩴ ᩈᨾᨿᩮ ᩅᩮᨴᨶᩴ ᩅᩮᨴᩮᨲᩥ. ᨿᩈ᩠ᨾᩥᩴ, ᩌᨶᨶ᩠ᨴ, ᩈᨾᨿᩮ ᨴᩩᨠ᩠ᨡᩴ ᩅᩮᨴᨶᩴ ᩅᩮᨴᩮᨲᩥ, ᨶᩮᩅ ᨲᩈ᩠ᨾᩥᩴ ᩈᨾᨿᩮ ᩈᩩᨡᩴ ᩅᩮᨴᨶᩴ ᩅᩮᨴᩮᨲᩥ, ᨶ ᩋᨴᩩᨠ᩠ᨡᨾᩈᩩᨡᩴ ᩅᩮᨴᨶᩴ ᩅᩮᨴᩮᨲᩥ; ᨴᩩᨠ᩠ᨡᩴᨿᩮᩅ ᨲᩈ᩠ᨾᩥᩴ ᩈᨾᨿᩮ ᩅᩮᨴᨶᩴ ᩅᩮᨴᩮᨲᩥ. ᨿᩈ᩠ᨾᩥᩴ, ᩌᨶᨶ᩠ᨴ, ᩈᨾᨿᩮ ᩋᨴᩩᨠ᩠ᨡᨾᩈᩩᨡᩴ ᩅᩮᨴᨶᩴ ᩅᩮᨴᩮᨲᩥ, ᨶᩮᩅ ᨲᩈ᩠ᨾᩥᩴ ᩈᨾᨿᩮ ᩈᩩᨡᩴ ᩅᩮᨴᨶᩴ ᩅᩮᨴᩮᨲᩥ, ᨶ ᨴᩩᨠ᩠ᨡᩴ ᩅᩮᨴᨶᩴ ᩅᩮᨴᩮᨲᩥ; ᩋᨴᩩᨠ᩠ᨡᨾᩈᩩᨡᩴᨿᩮᩅ ᨲᩈ᩠ᨾᩥᩴ ᩈᨾᨿᩮ ᩅᩮᨴᨶᩴ ᩅᩮᨴᩮᨲᩥ.

᪑᪒᪓. ‘‘ᩈᩩᨡᩣᨸᩥ ᨡᩮᩣ, ᩌᨶᨶ᩠ᨴ, ᩅᩮᨴᨶᩣ ᩋᨶᩥᨧ᩠ᨧᩣ ᩈᨦ᩠ᨡᨲᩣ ᨸᨭᩥᨧ᩠ᨧᩈᨾᩩᨸ᩠ᨸᨶ᩠ᨶᩣ ᨡᨿᨵᨾ᩠ᨾᩣ ᩅᨿᨵᨾ᩠ᨾᩣ ᩅᩥᩁᩣᨣᨵᨾ᩠ᨾᩣ ᨶᩥᩁᩮᩣᨵᨵᨾ᩠ᨾᩣ. ᨴᩩᨠ᩠ᨡᩣᨸᩥ ᨡᩮᩣ, ᩌᨶᨶ᩠ᨴ, ᩅᩮᨴᨶᩣ ᩋᨶᩥᨧ᩠ᨧᩣ ᩈᨦ᩠ᨡᨲᩣ ᨸᨭᩥᨧ᩠ᨧᩈᨾᩩᨸ᩠ᨸᨶ᩠ᨶᩣ ᨡᨿᨵᨾ᩠ᨾᩣ ᩅᨿᨵᨾ᩠ᨾᩣ ᩅᩥᩁᩣᨣᨵᨾ᩠ᨾᩣ ᨶᩥᩁᩮᩣᨵᨵᨾ᩠ᨾᩣ. ᩋᨴᩩᨠ᩠ᨡᨾᩈᩩᨡᩣᨸᩥ ᨡᩮᩣ, ᩌᨶᨶ᩠ᨴ, ᩅᩮᨴᨶᩣ ᩋᨶᩥᨧ᩠ᨧᩣ ᩈᨦ᩠ᨡᨲᩣ ᨸᨭᩥᨧ᩠ᨧᩈᨾᩩᨸ᩠ᨸᨶ᩠ᨶᩣ ᨡᨿᨵᨾ᩠ᨾᩣ ᩅᨿᨵᨾ᩠ᨾᩣ ᩅᩥᩁᩣᨣᨵᨾ᩠ᨾᩣ ᨶᩥᩁᩮᩣᨵᨵᨾ᩠ᨾᩣ. ᨲᩔ ᩈᩩᨡᩴ ᩅᩮᨴᨶᩴ ᩅᩮᨴᩥᨿᨾᩣᨶᩔ ‘ᩑᩈᩮᩣ ᨾᩮ ᩋᨲ᩠ᨲᩣ’ᨲᩥ ᩉᩮᩣᨲᩥ. ᨲᩔᩣᨿᩮᩅ ᩈᩩᨡᩣᨿ ᩅᩮᨴᨶᩣᨿ ᨶᩥᩁᩮᩣᨵᩣ ‘ᨻ᩠ᨿᨣᩣ [ᨻ᩠ᨿᨣ᩠ᨣᩣ (ᩈᩦ. ᨠ.)] ᨾᩮ ᩋᨲ᩠ᨲᩣ’ᨲᩥ ᩉᩮᩣᨲᩥ. ᨴᩩᨠ᩠ᨡᩴ ᩅᩮᨴᨶᩴ ᩅᩮᨴᩥᨿᨾᩣᨶᩔ ‘ᩑᩈᩮᩣ ᨾᩮ ᩋᨲ᩠ᨲᩣ’ᨲᩥ ᩉᩮᩣᨲᩥ. ᨲᩔᩣᨿᩮᩅ ᨴᩩᨠ᩠ᨡᩣᨿ ᩅᩮᨴᨶᩣᨿ ᨶᩥᩁᩮᩣᨵᩣ ‘ᨻ᩠ᨿᨣᩣ ᨾᩮ ᩋᨲ᩠ᨲᩣ’ᨲᩥ ᩉᩮᩣᨲᩥ. ᩋᨴᩩᨠ᩠ᨡᨾᩈᩩᨡᩴ ᩅᩮᨴᨶᩴ ᩅᩮᨴᩥᨿᨾᩣᨶᩔ ‘ᩑᩈᩮᩣ ᨾᩮ ᩋᨲ᩠ᨲᩣ’ᨲᩥ ᩉᩮᩣᨲᩥ. ᨲᩔᩣᨿᩮᩅ ᩋᨴᩩᨠ᩠ᨡᨾᩈᩩᨡᩣᨿ ᩅᩮᨴᨶᩣᨿ ᨶᩥᩁᩮᩣᨵᩣ ‘ᨻ᩠ᨿᨣᩣ ᨾᩮ ᩋᨲ᩠ᨲᩣ’ᨲᩥ ᩉᩮᩣᨲᩥ. ᩍᨲᩥ ᩈᩮᩣ ᨴᩥᨭ᩠ᨮᩮᩅ ᨵᨾ᩠ᨾᩮ ᩋᨶᩥᨧ᩠ᨧᩈᩩᨡᨴᩩᨠ᩠ᨡᩅᩮᩣᨠᩥᨱ᩠ᨱᩴ ᩏᨸ᩠ᨸᩣᨴᩅᨿᨵᨾ᩠ᨾᩴ ᩋᨲ᩠ᨲᩣᨶᩴ ᩈᨾᨶᩩᨸᩔᨾᩣᨶᩮᩣ ᩈᨾᨶᩩᨸᩔᨲᩥ, ᨿᩮᩣ ᩈᩮᩣ ᩑᩅᨾᩣᩉ – ‘ᩅᩮᨴᨶᩣ ᨾᩮ ᩋᨲ᩠ᨲᩣ’ᨲᩥ. ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᨲᩮᨶ ᨸᩮᨲᩴ ᨶᨠ᩠ᨡᨾᨲᩥ – ‘ᩅᩮᨴᨶᩣ ᨾᩮ ᩋᨲ᩠ᨲᩣ’ᨲᩥ ᩈᨾᨶᩩᨸᩔᩥᨲᩩᩴ.

᪑᪒᪔. ‘‘ᨲᨲᩕᩣᨶᨶ᩠ᨴ, ᨿᩮᩣ ᩈᩮᩣ ᩑᩅᨾᩣᩉ – ‘ᨶ ᩉᩮᩅ ᨡᩮᩣ ᨾᩮ ᩅᩮᨴᨶᩣ ᩋᨲ᩠ᨲᩣ, ᩋᨸ᩠ᨸᨭᩥᩈᩴᩅᩮᨴᨶᩮᩣ ᨾᩮ ᩋᨲ᩠ᨲᩣ’ᨲᩥ, ᩈᩮᩣ ᩑᩅᨾᩔ ᩅᨧᨶᩦᨿᩮᩣ – ‘ᨿᨲ᩠ᨳ ᨸᨶᩣᩅᩩᩈᩮᩣ, ᩈᨻ᩠ᨻᩈᩮᩣ ᩅᩮᨴᨿᩥᨲᩴ ᨶᨲ᩠ᨳᩥ ᩋᨸᩥ ᨶᩩ ᨡᩮᩣ, ᨲᨲ᩠ᨳ ‘‘ᩋᨿᨾᩉᨾᩈ᩠ᨾᩦ’’ᨲᩥ ᩈᩥᨿᩣ’’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᨲᩮᨶ ᨸᩮᨲᩴ ᨶᨠ᩠ᨡᨾᨲᩥ – ‘ᨶ ᩉᩮᩅ ᨡᩮᩣ ᨾᩮ ᩅᩮᨴᨶᩣ ᩋᨲ᩠ᨲᩣ, ᩋᨸ᩠ᨸᨭᩥᩈᩴᩅᩮᨴᨶᩮᩣ ᨾᩮ ᩋᨲ᩠ᨲᩣ’ᨲᩥ ᩈᨾᨶᩩᨸᩔᩥᨲᩩᩴ.

᪑᪒᪕. ‘‘ᨲᨲᩕᩣᨶᨶ᩠ᨴ, ᨿᩮᩣ ᩈᩮᩣ ᩑᩅᨾᩣᩉ – ‘ᨶ ᩉᩮᩅ ᨡᩮᩣ ᨾᩮ ᩅᩮᨴᨶᩣ ᩋᨲ᩠ᨲᩣ, ᨶᩮᩣᨸᩥ ᩋᨸ᩠ᨸᨭᩥᩈᩴᩅᩮᨴᨶᩮᩣ ᨾᩮ ᩋᨲ᩠ᨲᩣ, ᩋᨲ᩠ᨲᩣ ᨾᩮ ᩅᩮᨴᩥᨿᨲᩥ, ᩅᩮᨴᨶᩣᨵᨾ᩠ᨾᩮᩣ ᩉᩥ ᨾᩮ ᩋᨲ᩠ᨲᩣ’ᨲᩥ. ᩈᩮᩣ ᩑᩅᨾᩔ ᩅᨧᨶᩦᨿᩮᩣ – ᩅᩮᨴᨶᩣ ᨧ ᩉᩥ, ᩌᩅᩩᩈᩮᩣ, ᩈᨻ᩠ᨻᩮᨶ ᩈᨻ᩠ᨻᩴ ᩈᨻ᩠ᨻᨳᩣ ᩈᨻ᩠ᨻᩴ ᩋᨸᩁᩥᩈᩮᩈᩣ ᨶᩥᩁᩩᨩ᩠ᨫᩮᨿ᩠ᨿᩩᩴ. ᩈᨻ᩠ᨻᩈᩮᩣ ᩅᩮᨴᨶᩣᨿ ᩋᩈᨲᩥ ᩅᩮᨴᨶᩣᨶᩥᩁᩮᩣᨵᩣ ᩋᨸᩥ ᨶᩩ ᨡᩮᩣ ᨲᨲ᩠ᨳ ‘ᩋᨿᨾᩉᨾᩈ᩠ᨾᩦ’ᨲᩥ ᩈᩥᨿᩣ’’ᨲᩥ? ‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᩑᨲᩮᨶ ᨸᩮᨲᩴ ᨶᨠ᩠ᨡᨾᨲᩥ – ‘‘ᨶ ᩉᩮᩅ ᨡᩮᩣ ᨾᩮ ᩅᩮᨴᨶᩣ ᩋᨲ᩠ᨲᩣ, ᨶᩮᩣᨸᩥ ᩋᨸ᩠ᨸᨭᩥᩈᩴᩅᩮᨴᨶᩮᩣ ᨾᩮ ᩋᨲ᩠ᨲᩣ, ᩋᨲ᩠ᨲᩣ ᨾᩮ ᩅᩮᨴᩥᨿᨲᩥ, ᩅᩮᨴᨶᩣᨵᨾ᩠ᨾᩮᩣ ᩉᩥ ᨾᩮ ᩋᨲ᩠ᨲᩣ’ᨲᩥ ᩈᨾᨶᩩᨸᩔᩥᨲᩩᩴ.

᪑᪒᪖. ‘‘ᨿᨲᩮᩣ ᨡᩮᩣ, ᩌᨶᨶ᩠ᨴ, ᨽᩥᨠ᩠ᨡᩩ ᨶᩮᩅ ᩅᩮᨴᨶᩴ ᩋᨲ᩠ᨲᩣᨶᩴ ᩈᨾᨶᩩᨸᩔᨲᩥ, ᨶᩮᩣᨸᩥ ᩋᨸ᩠ᨸᨭᩥᩈᩴᩅᩮᨴᨶᩴ ᩋᨲ᩠ᨲᩣᨶᩴ ᩈᨾᨶᩩᨸᩔᨲᩥ, ᨶᩮᩣᨸᩥ ‘ᩋᨲ᩠ᨲᩣ ᨾᩮ ᩅᩮᨴᩥᨿᨲᩥ, ᩅᩮᨴᨶᩣᨵᨾ᩠ᨾᩮᩣ ᩉᩥ ᨾᩮ ᩋᨲ᩠ᨲᩣ’ᨲᩥ ᩈᨾᨶᩩᨸᩔᨲᩥ. ᩈᩮᩣ ᩑᩅᩴ ᨶ ᩈᨾᨶᩩᨸᩔᨶ᩠ᨲᩮᩣ ᨶ ᨧ ᨠᩥᨬ᩠ᨧᩥ ᩃᩮᩣᨠᩮ ᩏᨸᩣᨴᩥᨿᨲᩥ, ᩋᨶᩩᨸᩣᨴᩥᨿᩴ ᨶ ᨸᩁᩥᨲᩔᨲᩥ, ᩋᨸᩁᩥᨲᩔᩴ [ᩋᨸᩁᩥᨲᩔᨶᩴ (ᨠ.)] ᨸᨧ᩠ᨧᨲ᩠ᨲᨬ᩠ᨬᩮᩅ ᨸᩁᩥᨶᩥᨻ᩠ᨻᩣᨿᨲᩥ, ‘ᨡᩦᨱᩣ ᨩᩣᨲᩥ, ᩅᩩᩈᩥᨲᩴ ᨻᩕᩉ᩠ᨾᨧᩁᩥᨿᩴ, ᨠᨲᩴ ᨠᩁᨱᩦᨿᩴ, ᨶᩣᨸᩁᩴ ᩍᨲ᩠ᨳᨲ᩠ᨲᩣᨿᩣ’ᨲᩥ ᨸᨩᩣᨶᩣᨲᩥ. ᩑᩅᩴ ᩅᩥᨾᩩᨲ᩠ᨲᨧᩥᨲ᩠ᨲᩴ ᨡᩮᩣ, ᩌᨶᨶ᩠ᨴ, ᨽᩥᨠ᩠ᨡᩩᩴ ᨿᩮᩣ ᩑᩅᩴ ᩅᨴᩮᨿ᩠ᨿ – ‘ᩉᩮᩣᨲᩥ ᨲᨳᩣᨣᨲᩮᩣ ᨸᩁᩴ ᨾᩁᨱᩣ ᩍᨲᩥᩔ [ᩍᨲᩥ ᩈᩣ (ᩋᨭ᩠ᨮᨠᨳᩣᨿᩴ ᨸᩣᨮᨶ᩠ᨲᩁᩴ)] ᨴᩥᨭ᩠ᨮᩦ’ᨲᩥ, ᨲᨴᨠᩃ᩠ᩃᩴ. ‘ᨶ ᩉᩮᩣᨲᩥ ᨲᨳᩣᨣᨲᩮᩣ ᨸᩁᩴ ᨾᩁᨱᩣ ᩍᨲᩥᩔ ᨴᩥᨭ᩠ᨮᩦ’ᨲᩥ, ᨲᨴᨠᩃ᩠ᩃᩴ. ‘ᩉᩮᩣᨲᩥ ᨧ ᨶ ᨧ ᩉᩮᩣᨲᩥ ᨲᨳᩣᨣᨲᩮᩣ ᨸᩁᩴ ᨾᩁᨱᩣ ᩍᨲᩥᩔ ᨴᩥᨭ᩠ᨮᩦ’ᨲᩥ, ᨲᨴᨠᩃ᩠ᩃᩴ. ‘ᨶᩮᩅ ᩉᩮᩣᨲᩥ ᨶ ᨶ ᩉᩮᩣᨲᩥ ᨲᨳᩣᨣᨲᩮᩣ ᨸᩁᩴ ᨾᩁᨱᩣ ᩍᨲᩥᩔ ᨴᩥᨭ᩠ᨮᩦ’ᨲᩥ, ᨲᨴᨠᩃ᩠ᩃᩴ. ᨲᩴ ᨠᩥᩔ ᩉᩮᨲᩩ? ᨿᩣᩅᨲᩣ, ᩌᨶᨶ᩠ᨴ, ᩋᨵᩥᩅᨧᨶᩴ ᨿᩣᩅᨲᩣ ᩋᨵᩥᩅᨧᨶᨸᨳᩮᩣ, ᨿᩣᩅᨲᩣ ᨶᩥᩁᩩᨲ᩠ᨲᩥ ᨿᩣᩅᨲᩣ ᨶᩥᩁᩩᨲ᩠ᨲᩥᨸᨳᩮᩣ, ᨿᩣᩅᨲᩣ ᨸᨬ᩠ᨬᨲ᩠ᨲᩥ ᨿᩣᩅᨲᩣ ᨸᨬ᩠ᨬᨲ᩠ᨲᩥᨸᨳᩮᩣ, ᨿᩣᩅᨲᩣ ᨸᨬ᩠ᨬᩣ ᨿᩣᩅᨲᩣ ᨸᨬ᩠ᨬᩣᩅᨧᩁᩴ, ᨿᩣᩅᨲᩣ ᩅᨭ᩠ᨭᩴ [ᨿᩣᩅᨲᩣ ᩅᨭ᩠ᨭᩴ ᩅᨭ᩠ᨭᨲᩥ (ᨠ. ᩈᩦ.)], ᨿᩣᩅᨲᩣ ᩅᨭ᩠ᨭᨲᩥ [ᨿᩣᩅᨲᩣ ᩅᨭ᩠ᨭᩴ ᩅᨭ᩠ᨭᨲᩥ (ᨠ. ᩈᩦ.)], ᨲᨴᨽᩥᨬ᩠ᨬᩣᩅᩥᨾᩩᨲ᩠ᨲᩮᩣ ᨽᩥᨠ᩠ᨡᩩ, ᨲᨴᨽᩥᨬ᩠ᨬᩣᩅᩥᨾᩩᨲ᩠ᨲᩴ ᨽᩥᨠ᩠ᨡᩩᩴ ‘ᨶ ᨩᩣᨶᩣᨲᩥ ᨶ ᨸᩔᨲᩥ ᩍᨲᩥᩔ ᨴᩥᨭ᩠ᨮᩦ’ᨲᩥ, ᨲᨴᨠᩃ᩠ᩃᩴ.

ᩈᨲ᩠ᨲ ᩅᩥᨬ᩠ᨬᩣᨱᨭ᩠ᨮᩥᨲᩥ

᪑᪒᪗. ‘‘ᩈᨲ᩠ᨲ ᨡᩮᩣ, ᩌᨶᨶ᩠ᨴ [ᩈᨲ᩠ᨲ ᨡᩮᩣ ᩍᨾᩣ ᩌᨶᨶ᩠ᨴ (ᨠ. ᩈᩦ. ᩈ᩠ᨿᩣ.)], ᩅᩥᨬ᩠ᨬᩣᨱᨭ᩠ᨮᩥᨲᩥᨿᩮᩣ, ᨴ᩠ᩅᩮ ᩌᨿᨲᨶᩣᨶᩥ. ᨠᨲᨾᩣ ᩈᨲ᩠ᨲ? ᩈᨶ᩠ᨲᩣᨶᨶ᩠ᨴ, ᩈᨲ᩠ᨲᩣ ᨶᩣᨶᨲ᩠ᨲᨠᩣᨿᩣ ᨶᩣᨶᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨾᨶᩩᩔᩣ, ᩑᨠᨧ᩠ᨧᩮ ᨧ ᨴᩮᩅᩣ, ᩑᨠᨧ᩠ᨧᩮ ᨧ ᩅᩥᨶᩥᨸᩣᨲᩥᨠᩣ. ᩋᨿᩴ ᨸᨮᨾᩣ ᩅᩥᨬ᩠ᨬᩣᨱᨭ᩠ᨮᩥᨲᩥ. ᩈᨶ᩠ᨲᩣᨶᨶ᩠ᨴ, ᩈᨲ᩠ᨲᩣ ᨶᩣᨶᨲ᩠ᨲᨠᩣᨿᩣ ᩑᨠᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨴᩮᩅᩣ ᨻᩕᩉ᩠ᨾᨠᩣᨿᩥᨠᩣ ᨸᨮᨾᩣᨽᩥᨶᩥᨻ᩠ᨻᨲ᩠ᨲᩣ. ᩋᨿᩴ ᨴᩩᨲᩥᨿᩣ ᩅᩥᨬ᩠ᨬᩣᨱᨭ᩠ᨮᩥᨲᩥ. ᩈᨶ᩠ᨲᩣᨶᨶ᩠ᨴ, ᩈᨲ᩠ᨲᩣ ᩑᨠᨲ᩠ᨲᨠᩣᨿᩣ ᨶᩣᨶᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨴᩮᩅᩣ ᩌᨽᩔᩁᩣ. ᩋᨿᩴ ᨲᨲᩥᨿᩣ ᩅᩥᨬ᩠ᨬᩣᨱᨭ᩠ᨮᩥᨲᩥ. ᩈᨶ᩠ᨲᩣᨶᨶ᩠ᨴ, ᩈᨲ᩠ᨲᩣ ᩑᨠᨲ᩠ᨲᨠᩣᨿᩣ ᩑᨠᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨴᩮᩅᩣ ᩈᩩᨽᨠᩥᨱ᩠ᩉᩣ. ᩋᨿᩴ ᨧᨲᩩᨲ᩠ᨳᩦ ᩅᩥᨬ᩠ᨬᩣᨱᨭ᩠ᨮᩥᨲᩥ. ᩈᨶ᩠ᨲᩣᨶᨶ᩠ᨴ, ᩈᨲ᩠ᨲᩣ ᩈᨻ᩠ᨻᩈᩮᩣ ᩁᩪᨸᩈᨬ᩠ᨬᩣᨶᩴ ᩈᨾᨲᩥᨠ᩠ᨠᨾᩣ ᨸᨭᩥᨥᩈᨬ᩠ᨬᩣᨶᩴ ᩋᨲ᩠ᨳᨦ᩠ᨣᨾᩣ ᨶᩣᨶᨲ᩠ᨲᩈᨬ᩠ᨬᩣᨶᩴ ᩋᨾᨶᩈᩥᨠᩣᩁᩣ ‘ᩋᨶᨶ᩠ᨲᩮᩣ ᩌᨠᩣᩈᩮᩣ’ᨲᩥ ᩌᨠᩣᩈᩣᨶᨬ᩠ᨧᩣᨿᨲᨶᩪᨸᨣᩣ. ᩋᨿᩴ ᨸᨬ᩠ᨧᨾᩦ ᩅᩥᨬ᩠ᨬᩣᨱᨭ᩠ᨮᩥᨲᩥ. ᩈᨶ᩠ᨲᩣᨶᨶ᩠ᨴ, ᩈᨲ᩠ᨲᩣ ᩈᨻ᩠ᨻᩈᩮᩣ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᩋᨶᨶ᩠ᨲᩴ ᩅᩥᨬ᩠ᨬᩣᨱ’ᨶ᩠ᨲᩥ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩪᨸᨣᩣ. ᩋᨿᩴ ᨨᨭ᩠ᨮᩦ ᩅᩥᨬ᩠ᨬᩣᨱᨭ᩠ᨮᩥᨲᩥ. ᩈᨶ᩠ᨲᩣᨶᨶ᩠ᨴ, ᩈᨲ᩠ᨲᩣ ᩈᨻ᩠ᨻᩈᩮᩣ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᨶᨲ᩠ᨳᩥ ᨠᩥᨬ᩠ᨧᩦ’ᨲᩥ ᩌᨠᩥᨬ᩠ᨧᨬ᩠ᨬᩣᨿᨲᨶᩪᨸᨣᩣ. ᩋᨿᩴ ᩈᨲ᩠ᨲᨾᩦ ᩅᩥᨬ᩠ᨬᩣᨱᨭ᩠ᨮᩥᨲᩥ. ᩋᩈᨬ᩠ᨬᩈᨲ᩠ᨲᩣᨿᨲᨶᩴ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᨾᩮᩅ ᨴᩩᨲᩥᨿᩴ.

᪑᪒᪘. ‘‘ᨲᨲᩕᩣᨶᨶ᩠ᨴ, ᨿᩣᨿᩴ ᨸᨮᨾᩣ ᩅᩥᨬ᩠ᨬᩣᨱᨭ᩠ᨮᩥᨲᩥ ᨶᩣᨶᨲ᩠ᨲᨠᩣᨿᩣ ᨶᩣᨶᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨾᨶᩩᩔᩣ, ᩑᨠᨧ᩠ᨧᩮ ᨧ ᨴᩮᩅᩣ, ᩑᨠᨧ᩠ᨧᩮ ᨧ ᩅᩥᨶᩥᨸᩣᨲᩥᨠᩣ. ᨿᩮᩣ ᨶᩩ ᨡᩮᩣ, ᩌᨶᨶ᩠ᨴ, ᨲᨬ᩠ᨧ ᨸᨩᩣᨶᩣᨲᩥ, ᨲᩔᩣ ᨧ ᩈᨾᩩᨴᨿᩴ ᨸᨩᩣᨶᩣᨲᩥ, ᨲᩔᩣ ᨧ ᩋᨲ᩠ᨳᨦ᩠ᨣᨾᩴ ᨸᨩᩣᨶᩣᨲᩥ, ᨲᩔᩣ ᨧ ᩋᩔᩣᨴᩴ ᨸᨩᩣᨶᩣᨲᩥ, ᨲᩔᩣ ᨧ ᩌᨴᩦᨶᩅᩴ ᨸᨩᩣᨶᩣᨲᩥ, ᨲᩔᩣ ᨧ ᨶᩥᩔᩁᨱᩴ ᨸᨩᩣᨶᩣᨲᩥ, ᨠᩃ᩠ᩃᩴ ᨶᩩ ᨲᩮᨶ ᨲᨴᨽᩥᨶᨶ᩠ᨴᩥᨲᩩ’’ᨶ᩠ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’…ᨸᩮ… ‘‘ᨲᨲᩕᩣᨶᨶ᩠ᨴ, ᨿᨾᩥᨴᩴ ᩋᩈᨬ᩠ᨬᩈᨲ᩠ᨲᩣᨿᨲᨶᩴ. ᨿᩮᩣ ᨶᩩ ᨡᩮᩣ, ᩌᨶᨶ᩠ᨴ, ᨲᨬ᩠ᨧ ᨸᨩᩣᨶᩣᨲᩥ, ᨲᩔ ᨧ ᩈᨾᩩᨴᨿᩴ ᨸᨩᩣᨶᩣᨲᩥ, ᨲᩔ ᨧ ᩋᨲ᩠ᨳᨦ᩠ᨣᨾᩴ ᨸᨩᩣᨶᩣᨲᩥ, ᨲᩔ ᨧ ᩋᩔᩣᨴᩴ ᨸᨩᩣᨶᩣᨲᩥ, ᨲᩔ ᨧ ᩌᨴᩦᨶᩅᩴ ᨸᨩᩣᨶᩣᨲᩥ, ᨲᩔ ᨧ ᨶᩥᩔᩁᨱᩴ ᨸᨩᩣᨶᩣᨲᩥ, ᨠᩃ᩠ᩃᩴ ᨶᩩ ᨲᩮᨶ ᨲᨴᨽᩥᨶᨶ᩠ᨴᩥᨲᩩ’’ᨶ᩠ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ‘‘ᨲᨲᩕᩣᨶᨶ᩠ᨴ, ᨿᨾᩥᨴᩴ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ. ᨿᩮᩣ ᨶᩩ ᨡᩮᩣ, ᩌᨶᨶ᩠ᨴ, ᨲᨬ᩠ᨧ ᨸᨩᩣᨶᩣᨲᩥ, ᨲᩔ ᨧ ᩈᨾᩩᨴᨿᩴ ᨸᨩᩣᨶᩣᨲᩥ, ᨲᩔ ᨧ ᩋᨲ᩠ᨳᨦ᩠ᨣᨾᩴ ᨸᨩᩣᨶᩣᨲᩥ, ᨲᩔ ᨧ ᩋᩔᩣᨴᩴ ᨸᨩᩣᨶᩣᨲᩥ, ᨲᩔ ᨧ ᩌᨴᩦᨶᩅᩴ ᨸᨩᩣᨶᩣᨲᩥ, ᨲᩔ ᨧ ᨶᩥᩔᩁᨱᩴ ᨸᨩᩣᨶᩣᨲᩥ, ᨠᩃ᩠ᩃᩴ ᨶᩩ ᨲᩮᨶ ᨲᨴᨽᩥᨶᨶ᩠ᨴᩥᨲᩩ’’ᨶ᩠ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’. ᨿᨲᩮᩣ ᨡᩮᩣ, ᩌᨶᨶ᩠ᨴ, ᨽᩥᨠ᩠ᨡᩩ ᩍᨾᩣᩈᨬ᩠ᨧ ᩈᨲ᩠ᨲᨶ᩠ᨶᩴ ᩅᩥᨬ᩠ᨬᩣᨱᨭ᩠ᨮᩥᨲᩦᨶᩴ ᩍᨾᩮᩈᨬ᩠ᨧ ᨴ᩠ᩅᩥᨶ᩠ᨶᩴ ᩌᨿᨲᨶᩣᨶᩴ ᩈᨾᩩᨴᨿᨬ᩠ᨧ ᩋᨲ᩠ᨳᨦ᩠ᨣᨾᨬ᩠ᨧ ᩋᩔᩣᨴᨬ᩠ᨧ ᩌᨴᩦᨶᩅᨬ᩠ᨧ ᨶᩥᩔᩁᨱᨬ᩠ᨧ ᨿᨳᩣᨽᩪᨲᩴ ᩅᩥᨴᩥᨲ᩠ᩅᩣ ᩋᨶᩩᨸᩣᨴᩣ ᩅᩥᨾᩩᨲ᩠ᨲᩮᩣ ᩉᩮᩣᨲᩥ, ᩋᨿᩴ ᩅᩩᨧ᩠ᨧᨲᩣᨶᨶ᩠ᨴ, ᨽᩥᨠ᩠ᨡᩩ ᨸᨬ᩠ᨬᩣᩅᩥᨾᩩᨲ᩠ᨲᩮᩣ.

ᩋᨭ᩠ᨮ ᩅᩥᨾᩮᩣᨠ᩠ᨡᩣ

᪑᪒᪙. ‘‘ᩋᨭ᩠ᨮ ᨡᩮᩣ ᩍᨾᩮ, ᩌᨶᨶ᩠ᨴ, ᩅᩥᨾᩮᩣᨠ᩠ᨡᩣ. ᨠᨲᨾᩮ ᩋᨭ᩠ᨮ? ᩁᩪᨸᩦ ᩁᩪᨸᩣᨶᩥ ᨸᩔᨲᩥ ᩋᨿᩴ ᨸᨮᨾᩮᩣ ᩅᩥᨾᩮᩣᨠ᩠ᨡᩮᩣ. ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ, ᩋᨿᩴ ᨴᩩᨲᩥᨿᩮᩣ ᩅᩥᨾᩮᩣᨠ᩠ᨡᩮᩣ. ᩈᩩᨽᨶ᩠ᨲᩮᩅ ᩋᨵᩥᨾᩩᨲ᩠ᨲᩮᩣ ᩉᩮᩣᨲᩥ, ᩋᨿᩴ ᨲᨲᩥᨿᩮᩣ ᩅᩥᨾᩮᩣᨠ᩠ᨡᩮᩣ. ᩈᨻ᩠ᨻᩈᩮᩣ ᩁᩪᨸᩈᨬ᩠ᨬᩣᨶᩴ ᩈᨾᨲᩥᨠ᩠ᨠᨾᩣ ᨸᨭᩥᨥᩈᨬ᩠ᨬᩣᨶᩴ ᩋᨲ᩠ᨳᨦ᩠ᨣᨾᩣ ᨶᩣᨶᨲ᩠ᨲᩈᨬ᩠ᨬᩣᨶᩴ ᩋᨾᨶᩈᩥᨠᩣᩁᩣ ‘ᩋᨶᨶ᩠ᨲᩮᩣ ᩌᨠᩣᩈᩮᩣ’ᨲᩥ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ, ᩋᨿᩴ ᨧᨲᩩᨲ᩠ᨳᩮᩣ ᩅᩥᨾᩮᩣᨠ᩠ᨡᩮᩣ. ᩈᨻ᩠ᨻᩈᩮᩣ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᩋᨶᨶ᩠ᨲᩴ ᩅᩥᨬ᩠ᨬᩣᨱ’ᨶ᩠ᨲᩥ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ, ᩋᨿᩴ ᨸᨬ᩠ᨧᨾᩮᩣ ᩅᩥᨾᩮᩣᨠ᩠ᨡᩮᩣ. ᩈᨻ᩠ᨻᩈᩮᩣ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᨶᨲ᩠ᨳᩥ ᨠᩥᨬ᩠ᨧᩦ’ᨲᩥ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ, ᩋᨿᩴ ᨨᨭ᩠ᨮᩮᩣ ᩅᩥᨾᩮᩣᨠ᩠ᨡᩮᩣ. ᩈᨻ᩠ᨻᩈᩮᩣ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣ’ᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ, ᩋᨿᩴ ᩈᨲ᩠ᨲᨾᩮᩣ ᩅᩥᨾᩮᩣᨠ᩠ᨡᩮᩣ. ᩈᨻ᩠ᨻᩈᩮᩣ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ᩈᨬ᩠ᨬᩣᩅᩮᨴᨿᩥᨲᨶᩥᩁᩮᩣᨵᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ, ᩋᨿᩴ ᩋᨭ᩠ᨮᨾᩮᩣ ᩅᩥᨾᩮᩣᨠ᩠ᨡᩮᩣ. ᩍᨾᩮ ᨡᩮᩣ, ᩌᨶᨶ᩠ᨴ, ᩋᨭ᩠ᨮ ᩅᩥᨾᩮᩣᨠ᩠ᨡᩣ.

᪑᪓᪐. ‘‘ᨿᨲᩮᩣ ᨡᩮᩣ, ᩌᨶᨶ᩠ᨴ, ᨽᩥᨠ᩠ᨡᩩ ᩍᨾᩮ ᩋᨭ᩠ᨮ ᩅᩥᨾᩮᩣᨠ᩠ᨡᩮ ᩋᨶᩩᩃᩮᩣᨾᨾ᩠ᨸᩥ ᩈᨾᩣᨸᨩ᩠ᨩᨲᩥ, ᨸᨭᩥᩃᩮᩣᨾᨾ᩠ᨸᩥ ᩈᨾᩣᨸᨩ᩠ᨩᨲᩥ, ᩋᨶᩩᩃᩮᩣᨾᨸᨭᩥᩃᩮᩣᨾᨾ᩠ᨸᩥ ᩈᨾᩣᨸᨩ᩠ᨩᨲᩥ, ᨿᨲ᩠ᨳᩥᨧ᩠ᨨᨠᩴ ᨿᨴᩥᨧ᩠ᨨᨠᩴ ᨿᩣᩅᨲᩥᨧ᩠ᨨᨠᩴ ᩈᨾᩣᨸᨩ᩠ᨩᨲᩥᨸᩥ ᩅᩩᨭ᩠ᨮᩣᨲᩥᨸᩥ. ᩌᩈᩅᩣᨶᨬ᩠ᨧ ᨡᨿᩣ ᩋᨶᩣᩈᩅᩴ ᨧᩮᨲᩮᩣᩅᩥᨾᩩᨲ᩠ᨲᩥᩴ ᨸᨬ᩠ᨬᩣᩅᩥᨾᩩᨲ᩠ᨲᩥᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ, ᩋᨿᩴ ᩅᩩᨧ᩠ᨧᨲᩣᨶᨶ᩠ᨴ, ᨽᩥᨠ᩠ᨡᩩ ᩏᨽᨲᩮᩣᨽᩣᨣᩅᩥᨾᩩᨲ᩠ᨲᩮᩣ. ᩍᨾᩣᨿ ᨧ ᩌᨶᨶ᩠ᨴ ᩏᨽᨲᩮᩣᨽᩣᨣᩅᩥᨾᩩᨲ᩠ᨲᩥᨿᩣ ᩋᨬ᩠ᨬᩣ ᩏᨽᨲᩮᩣᨽᩣᨣᩅᩥᨾᩩᨲ᩠ᨲᩥ ᩏᨲ᩠ᨲᩁᩥᨲᩁᩣ ᩅᩣ ᨸᨱᩦᨲᨲᩁᩣ ᩅᩣ ᨶᨲ᩠ᨳᩦ’’ᨲᩥ. ᩍᨴᨾᩅᩮᩣᨧ ᨽᨣᩅᩣ. ᩋᨲ᩠ᨲᨾᨶᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩦᨲᩥ.

ᨾᩉᩣᨶᩥᨴᩣᨶᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᨴᩩᨲᩥᨿᩴ.

᪓. ᨾᩉᩣᨸᩁᩥᨶᩥᨻ᩠ᨻᩣᨶᩈᩩᨲ᩠ᨲᩴ

᪑᪓᪑. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᩁᩣᨩᨣᩉᩮ ᩅᩥᩉᩁᨲᩥ ᨣᩥᨩ᩠ᨫᨠᩪᨭᩮ ᨸᨻ᩠ᨻᨲᩮ. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩁᩣᨩᩣ ᨾᩣᨣᨵᩮᩣ ᩋᨩᩣᨲᩈᨲ᩠ᨲᩩ ᩅᩮᨴᩮᩉᩥᨸᩩᨲ᩠ᨲᩮᩣ ᩅᨩ᩠ᨩᩦ ᩋᨽᩥᨿᩣᨲᩩᨠᩣᨾᩮᩣ ᩉᩮᩣᨲᩥ. ᩈᩮᩣ ᩑᩅᨾᩣᩉ – ‘‘ᩋᩉᩴ ᩉᩥᨾᩮ ᩅᨩ᩠ᨩᩦ ᩑᩅᩴᨾᩉᩥᨴ᩠ᨵᩥᨠᩮ ᩑᩅᩴᨾᩉᩣᨶᩩᨽᩣᩅᩮ ᩏᨧ᩠ᨨᩮᨧ᩠ᨨᩣᨾᩥ [ᩏᨧ᩠ᨨᩮᨩ᩠ᨩᩣᨾᩥ (ᩈ᩠ᨿᩣ. ᨸᩦ.), ᩏᨧ᩠ᨨᩥᨩ᩠ᨩᩣᨾᩥ (ᨠ.)] ᩅᨩ᩠ᨩᩦ, ᩅᩥᨶᩣᩈᩮᩔᩣᨾᩥ ᩅᨩ᩠ᨩᩦ, ᩋᨶᨿᨻ᩠ᨿᩈᨶᩴ ᩌᨸᩣᨴᩮᩔᩣᨾᩥ ᩅᨩ᩠ᨩᩦ’’ᨲᩥ [ᩌᨸᩣᨴᩮᩔᩣᨾᩥ ᩅᨩ᩠ᨩᩦᨲᩥ (ᩈᨻ᩠ᨻᨲ᩠ᨳ) ᩋ. ᨶᩥ. ᪗.᪒᪒ ᨸᩔᩥᨲᨻ᩠ᨻᩴ].

᪑᪓᪒. ᩋᨳ ᨡᩮᩣ ᩁᩣᨩᩣ ᨾᩣᨣᨵᩮᩣ ᩋᨩᩣᨲᩈᨲ᩠ᨲᩩ ᩅᩮᨴᩮᩉᩥᨸᩩᨲ᩠ᨲᩮᩣ ᩅᩔᨠᩣᩁᩴ ᨻᩕᩣᩉ᩠ᨾᨱᩴ ᨾᨣᨵᨾᩉᩣᨾᨲ᩠ᨲᩴ ᩌᨾᨶ᩠ᨲᩮᩈᩥ – ‘‘ᩑᩉᩥ ᨲ᩠ᩅᩴ, ᨻᩕᩣᩉ᩠ᨾᨱ, ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾ; ᩏᨸᩈᨦ᩠ᨠᨾᩥᨲ᩠ᩅᩣ ᨾᨾ ᩅᨧᨶᩮᨶ ᨽᨣᩅᨲᩮᩣ ᨸᩣᨴᩮ ᩈᩥᩁᩈᩣ ᩅᨶ᩠ᨴᩣᩉᩥ, ᩋᨸ᩠ᨸᩣᨻᩣᨵᩴ ᩋᨸ᩠ᨸᩣᨲᨦ᩠ᨠᩴ ᩃᩉᩩᨭ᩠ᨮᩣᨶᩴ ᨻᩃᩴ ᨹᩣᩈᩩᩅᩥᩉᩣᩁᩴ ᨸᩩᨧ᩠ᨨ – ‘ᩁᩣᨩᩣ, ᨽᨶ᩠ᨲᩮ, ᨾᩣᨣᨵᩮᩣ ᩋᨩᩣᨲᩈᨲ᩠ᨲᩩ ᩅᩮᨴᩮᩉᩥᨸᩩᨲ᩠ᨲᩮᩣ ᨽᨣᩅᨲᩮᩣ ᨸᩣᨴᩮ ᩈᩥᩁᩈᩣ ᩅᨶ᩠ᨴᨲᩥ, ᩋᨸ᩠ᨸᩣᨻᩣᨵᩴ ᩋᨸ᩠ᨸᩣᨲᨦ᩠ᨠᩴ ᩃᩉᩩᨭ᩠ᨮᩣᨶᩴ ᨻᩃᩴ ᨹᩣᩈᩩᩅᩥᩉᩣᩁᩴ ᨸᩩᨧ᩠ᨨᨲᩦ’ᨲᩥ. ᩑᩅᨬ᩠ᨧ ᩅᨴᩮᩉᩥ – ‘ᩁᩣᨩᩣ, ᨽᨶ᩠ᨲᩮ, ᨾᩣᨣᨵᩮᩣ ᩋᨩᩣᨲᩈᨲ᩠ᨲᩩ ᩅᩮᨴᩮᩉᩥᨸᩩᨲ᩠ᨲᩮᩣ ᩅᨩ᩠ᨩᩦ ᩋᨽᩥᨿᩣᨲᩩᨠᩣᨾᩮᩣ. ᩈᩮᩣ ᩑᩅᨾᩣᩉ – ‘‘ᩋᩉᩴ ᩉᩥᨾᩮ ᩅᨩ᩠ᨩᩦ ᩑᩅᩴᨾᩉᩥᨴ᩠ᨵᩥᨠᩮ ᩑᩅᩴᨾᩉᩣᨶᩩᨽᩣᩅᩮ ᩏᨧ᩠ᨨᩮᨧ᩠ᨨᩣᨾᩥ ᩅᨩ᩠ᨩᩦ, ᩅᩥᨶᩣᩈᩮᩔᩣᨾᩥ ᩅᨩ᩠ᨩᩦ, ᩋᨶᨿᨻ᩠ᨿᩈᨶᩴ ᩌᨸᩣᨴᩮᩔᩣᨾᩦ’’’ᨲᩥ. ᨿᨳᩣ ᨲᩮ ᨽᨣᩅᩣ ᨻ᩠ᨿᩣᨠᩁᩮᩣᨲᩥ, ᨲᩴ ᩈᩣᨵᩩᨠᩴ ᩏᨣ᩠ᨣᩉᩮᨲ᩠ᩅᩣ ᨾᨾ ᩌᩁᩮᩣᨧᩮᨿ᩠ᨿᩣᩈᩥ. ᨶ ᩉᩥ ᨲᨳᩣᨣᨲᩣ ᩅᩥᨲᨳᩴ ᨽᨱᨶ᩠ᨲᩦ’’ᨲᩥ.

ᩅᩔᨠᩣᩁᨻᩕᩣᩉ᩠ᨾᨱᩮᩣ

᪑᪓᪓. ‘‘ᩑᩅᩴ, ᨽᩮᩣ’’ᨲᩥ ᨡᩮᩣ ᩅᩔᨠᩣᩁᩮᩣ ᨻᩕᩣᩉ᩠ᨾᨱᩮᩣ ᨾᨣᨵᨾᩉᩣᨾᨲ᩠ᨲᩮᩣ ᩁᨬ᩠ᨬᩮᩣ ᨾᩣᨣᨵᩔ ᩋᨩᩣᨲᩈᨲ᩠ᨲᩩᩔ ᩅᩮᨴᩮᩉᩥᨸᩩᨲ᩠ᨲᩔ ᨸᨭᩥᩔᩩᨲ᩠ᩅᩣ ᨽᨴ᩠ᨴᩣᨶᩥ ᨽᨴ᩠ᨴᩣᨶᩥ ᨿᩣᨶᩣᨶᩥ ᨿᩮᩣᨩᩮᨲ᩠ᩅᩣ ᨽᨴ᩠ᨴᩴ ᨽᨴ᩠ᨴᩴ ᨿᩣᨶᩴ ᩋᨽᩥᩁᩩᩉᩥᨲ᩠ᩅᩣ ᨽᨴ᩠ᨴᩮᩉᩥ ᨽᨴ᩠ᨴᩮᩉᩥ ᨿᩣᨶᩮᩉᩥ ᩁᩣᨩᨣᩉᨾ᩠ᩉᩣ ᨶᩥᨿ᩠ᨿᩣᩈᩥ, ᨿᩮᨶ ᨣᩥᨩ᩠ᨫᨠᩪᨭᩮᩣ ᨸᨻ᩠ᨻᨲᩮᩣ ᨲᩮᨶ ᨸᩣᨿᩣᩈᩥ. ᨿᩣᩅᨲᩥᨠᩣ ᨿᩣᨶᩔ ᨽᩪᨾᩥ, ᨿᩣᨶᩮᨶ ᨣᨶ᩠ᨲ᩠ᩅᩣ, ᨿᩣᨶᩣ ᨸᨧ᩠ᨧᩮᩣᩁᩮᩣᩉᩥᨲ᩠ᩅᩣ ᨸᨲ᩠ᨲᩥᨠᩮᩣᩅ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨲᩣ ᩈᨴ᩠ᨵᩥᩴ ᩈᨾ᩠ᨾᩮᩣᨴᩥ. ᩈᨾ᩠ᨾᩮᩣᨴᨶᩦᨿᩴ ᨠᨳᩴ ᩈᩣᩁᨱᩦᨿᩴ ᩅᩦᨲᩥᩈᩣᩁᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᩅᩔᨠᩣᩁᩮᩣ ᨻᩕᩣᩉ᩠ᨾᨱᩮᩣ ᨾᨣᨵᨾᩉᩣᨾᨲ᩠ᨲᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩁᩣᨩᩣ, ᨽᩮᩣ ᨣᩮᩣᨲᨾ, ᨾᩣᨣᨵᩮᩣ ᩋᨩᩣᨲᩈᨲ᩠ᨲᩩ ᩅᩮᨴᩮᩉᩥᨸᩩᨲ᩠ᨲᩮᩣ ᨽᩮᩣᨲᩮᩣ ᨣᩮᩣᨲᨾᩔ ᨸᩣᨴᩮ ᩈᩥᩁᩈᩣ ᩅᨶ᩠ᨴᨲᩥ, ᩋᨸ᩠ᨸᩣᨻᩣᨵᩴ ᩋᨸ᩠ᨸᩣᨲᨦ᩠ᨠᩴ ᩃᩉᩩᨭ᩠ᨮᩣᨶᩴ ᨻᩃᩴ ᨹᩣᩈᩩᩅᩥᩉᩣᩁᩴ ᨸᩩᨧ᩠ᨨᨲᩥ. ᩁᩣᨩᩣ [ᩑᩅᨬ᩠ᨧ ᩅᨴᩮᨲᩥ ᩁᩣᨩᩣ (ᨠ.)], ᨽᩮᩣ ᨣᩮᩣᨲᨾ, ᨾᩣᨣᨵᩮᩣ ᩋᨩᩣᨲᩈᨲ᩠ᨲᩩ ᩅᩮᨴᩮᩉᩥᨸᩩᨲ᩠ᨲᩮᩣ ᩅᨩ᩠ᨩᩦ ᩋᨽᩥᨿᩣᨲᩩᨠᩣᨾᩮᩣ. ᩈᩮᩣ ᩑᩅᨾᩣᩉ – ‘ᩋᩉᩴ ᩉᩥᨾᩮ ᩅᨩ᩠ᨩᩦ ᩑᩅᩴᨾᩉᩥᨴ᩠ᨵᩥᨠᩮ ᩑᩅᩴᨾᩉᩣᨶᩩᨽᩣᩅᩮ ᩏᨧ᩠ᨨᩮᨧ᩠ᨨᩣᨾᩥ ᩅᨩ᩠ᨩᩦ, ᩅᩥᨶᩣᩈᩮᩔᩣᨾᩥ ᩅᨩ᩠ᨩᩦ, ᩋᨶᨿᨻ᩠ᨿᩈᨶᩴ ᩌᨸᩣᨴᩮᩔᩣᨾᩦ’’’ᨲᩥ.

ᩁᩣᨩᩋᨸᩁᩥᩉᩣᨶᩥᨿᨵᨾ᩠ᨾᩣ

᪑᪓᪔. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᩥᨭ᩠ᨮᩥᨲᩮᩣ ᨮᩥᨲᩮᩣ ᩉᩮᩣᨲᩥ ᨽᨣᩅᨶ᩠ᨲᩴ ᨻᩦᨩᨿᨾᩣᨶᩮᩣ [ᩅᩦᨩᨿᨾᩣᨶᩮᩣ (ᩈᩦ.), ᩅᩦᨩᩥᨿᨾᩣᨶᩮᩣ (ᩈ᩠ᨿᩣ.)]. ᩋᨳ ᨡᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᨠᩥᨶ᩠ᨲᩥ ᨲᩮ, ᩌᨶᨶ᩠ᨴ, ᩈᩩᨲᩴ, ‘ᩅᨩ᩠ᨩᩦ ᩋᨽᩥᨱ᩠ᩉᩴ ᩈᨶ᩠ᨶᩥᨸᩣᨲᩣ ᩈᨶ᩠ᨶᩥᨸᩣᨲᨻᩉᩩᩃᩣ’ᨲᩥ? ‘‘ᩈᩩᨲᩴ ᨾᩮᨲᩴ, ᨽᨶ᩠ᨲᩮ – ‘ᩅᨩ᩠ᨩᩦ ᩋᨽᩥᨱ᩠ᩉᩴ ᩈᨶ᩠ᨶᩥᨸᩣᨲᩣ ᩈᨶ᩠ᨶᩥᨸᩣᨲᨻᩉᩩᩃᩣ’’ᨲᩥ. ‘‘ᨿᩣᩅᨠᩦᩅᨬ᩠ᨧ, ᩌᨶᨶ᩠ᨴ, ᩅᨩ᩠ᨩᩦ ᩋᨽᩥᨱ᩠ᩉᩴ ᩈᨶ᩠ᨶᩥᨸᩣᨲᩣ ᩈᨶ᩠ᨶᩥᨸᩣᨲᨻᩉᩩᩃᩣ ᨽᩅᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᩌᨶᨶ᩠ᨴ, ᩅᨩ᩠ᨩᩦᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨠᩥᨶ᩠ᨲᩥ ᨲᩮ, ᩌᨶᨶ᩠ᨴ, ᩈᩩᨲᩴ, ‘ᩅᨩ᩠ᨩᩦ ᩈᨾᨣ᩠ᨣᩣ ᩈᨶ᩠ᨶᩥᨸᨲᨶ᩠ᨲᩥ, ᩈᨾᨣ᩠ᨣᩣ ᩅᩩᨭ᩠ᨮᩉᨶ᩠ᨲᩥ, ᩈᨾᨣ᩠ᨣᩣ ᩅᨩ᩠ᨩᩥᨠᩁᨱᩦᨿᩣᨶᩥ ᨠᩁᩮᩣᨶ᩠ᨲᩦ’ᨲᩥ? ‘‘ᩈᩩᨲᩴ ᨾᩮᨲᩴ, ᨽᨶ᩠ᨲᩮ – ‘ᩅᨩ᩠ᨩᩦ ᩈᨾᨣ᩠ᨣᩣ ᩈᨶ᩠ᨶᩥᨸᨲᨶ᩠ᨲᩥ, ᩈᨾᨣ᩠ᨣᩣ ᩅᩩᨭ᩠ᨮᩉᨶ᩠ᨲᩥ, ᩈᨾᨣ᩠ᨣᩣ ᩅᨩ᩠ᨩᩥᨠᩁᨱᩦᨿᩣᨶᩥ ᨠᩁᩮᩣᨶ᩠ᨲᩦ’’ᨲᩥ. ‘‘ᨿᩣᩅᨠᩦᩅᨬ᩠ᨧ, ᩌᨶᨶ᩠ᨴ, ᩅᨩ᩠ᨩᩦ ᩈᨾᨣ᩠ᨣᩣ ᩈᨶ᩠ᨶᩥᨸᨲᩥᩔᨶ᩠ᨲᩥ, ᩈᨾᨣ᩠ᨣᩣ ᩅᩩᨭ᩠ᨮᩉᩥᩔᨶ᩠ᨲᩥ, ᩈᨾᨣ᩠ᨣᩣ ᩅᨩ᩠ᨩᩥᨠᩁᨱᩦᨿᩣᨶᩥ ᨠᩁᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᩌᨶᨶ᩠ᨴ, ᩅᨩ᩠ᨩᩦᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨠᩥᨶ᩠ᨲᩥ ᨲᩮ, ᩌᨶᨶ᩠ᨴ, ᩈᩩᨲᩴ, ‘ᩅᨩ᩠ᨩᩦ ᩋᨸᨬ᩠ᨬᨲ᩠ᨲᩴ ᨶ ᨸᨬ᩠ᨬᨸᩮᨶ᩠ᨲᩥ, ᨸᨬ᩠ᨬᨲ᩠ᨲᩴ ᨶ ᩈᨾᩩᨧ᩠ᨨᩥᨶ᩠ᨴᨶ᩠ᨲᩥ, ᨿᨳᩣᨸᨬ᩠ᨬᨲ᩠ᨲᩮ ᨸᩮᩣᩁᩣᨱᩮ ᩅᨩ᩠ᨩᩥᨵᨾ᩠ᨾᩮ ᩈᨾᩣᨴᩣᨿ ᩅᨲ᩠ᨲᨶ᩠ᨲᩦ’’’ᨲᩥ? ‘‘ᩈᩩᨲᩴ ᨾᩮᨲᩴ, ᨽᨶ᩠ᨲᩮ – ‘ᩅᨩ᩠ᨩᩦ ᩋᨸᨬ᩠ᨬᨲ᩠ᨲᩴ ᨶ ᨸᨬ᩠ᨬᨸᩮᨶ᩠ᨲᩥ, ᨸᨬ᩠ᨬᨲ᩠ᨲᩴ ᨶ ᩈᨾᩩᨧ᩠ᨨᩥᨶ᩠ᨴᨶ᩠ᨲᩥ, ᨿᨳᩣᨸᨬ᩠ᨬᨲ᩠ᨲᩮ ᨸᩮᩣᩁᩣᨱᩮ ᩅᨩ᩠ᨩᩥᨵᨾ᩠ᨾᩮ ᩈᨾᩣᨴᩣᨿ ᩅᨲ᩠ᨲᨶ᩠ᨲᩦ’’’ᨲᩥ. ‘‘ᨿᩣᩅᨠᩦᩅᨬ᩠ᨧ, ᩌᨶᨶ᩠ᨴ, ‘‘ᩅᨩ᩠ᨩᩦ ᩋᨸᨬ᩠ᨬᨲ᩠ᨲᩴ ᨶ ᨸᨬ᩠ᨬᨸᩮᩔᨶ᩠ᨲᩥ, ᨸᨬ᩠ᨬᨲ᩠ᨲᩴ ᨶ ᩈᨾᩩᨧ᩠ᨨᩥᨶ᩠ᨴᩥᩔᨶ᩠ᨲᩥ, ᨿᨳᩣᨸᨬ᩠ᨬᨲ᩠ᨲᩮ ᨸᩮᩣᩁᩣᨱᩮ ᩅᨩ᩠ᨩᩥᨵᨾ᩠ᨾᩮ ᩈᨾᩣᨴᩣᨿ ᩅᨲ᩠ᨲᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᩌᨶᨶ᩠ᨴ, ᩅᨩ᩠ᨩᩦᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨠᩥᨶ᩠ᨲᩥ ᨲᩮ, ᩌᨶᨶ᩠ᨴ, ᩈᩩᨲᩴ, ‘ᩅᨩ᩠ᨩᩦ ᨿᩮ ᨲᩮ ᩅᨩ᩠ᨩᩦᨶᩴ ᩅᨩ᩠ᨩᩥᨾᩉᩃ᩠ᩃᨠᩣ, ᨲᩮ ᩈᨠ᩠ᨠᩁᩮᩣᨶ᩠ᨲᩥ ᨣᩁᩩᩴ ᨠᩁᩮᩣᨶ᩠ᨲᩥ [ᨣᩁᩩᨠᩁᩮᩣᨶ᩠ᨲᩥ (ᩈᩦ. ᩈ᩠ᨿᩣ. ᨸᩦ.)] ᨾᩣᨶᩮᨶ᩠ᨲᩥ ᨸᩪᨩᩮᨶ᩠ᨲᩥ, ᨲᩮᩈᨬ᩠ᨧ ᩈᩮᩣᨲᨻ᩠ᨻᩴ ᨾᨬ᩠ᨬᨶ᩠ᨲᩦ’’’ᨲᩥ? ‘‘ᩈᩩᨲᩴ ᨾᩮᨲᩴ, ᨽᨶ᩠ᨲᩮ – ‘ᩅᨩ᩠ᨩᩦ ᨿᩮ ᨲᩮ ᩅᨩ᩠ᨩᩦᨶᩴ ᩅᨩ᩠ᨩᩥᨾᩉᩃ᩠ᩃᨠᩣ, ᨲᩮ ᩈᨠ᩠ᨠᩁᩮᩣᨶ᩠ᨲᩥ ᨣᩁᩩᩴ ᨠᩁᩮᩣᨶ᩠ᨲᩥ ᨾᩣᨶᩮᨶ᩠ᨲᩥ ᨸᩪᨩᩮᨶ᩠ᨲᩥ, ᨲᩮᩈᨬ᩠ᨧ ᩈᩮᩣᨲᨻ᩠ᨻᩴ ᨾᨬ᩠ᨬᨶ᩠ᨲᩦ’’’ᨲᩥ. ‘‘ᨿᩣᩅᨠᩦᩅᨬ᩠ᨧ, ᩌᨶᨶ᩠ᨴ, ᩅᨩ᩠ᨩᩦ ᨿᩮ ᨲᩮ ᩅᨩ᩠ᨩᩦᨶᩴ ᩅᨩ᩠ᨩᩥᨾᩉᩃ᩠ᩃᨠᩣ, ᨲᩮ ᩈᨠ᩠ᨠᩁᩥᩔᨶ᩠ᨲᩥ ᨣᩁᩩᩴ ᨠᩁᩥᩔᨶ᩠ᨲᩥ ᨾᩣᨶᩮᩔᨶ᩠ᨲᩥ ᨸᩪᨩᩮᩔᨶ᩠ᨲᩥ, ᨲᩮᩈᨬ᩠ᨧ ᩈᩮᩣᨲᨻ᩠ᨻᩴ ᨾᨬ᩠ᨬᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᩌᨶᨶ᩠ᨴ, ᩅᨩ᩠ᨩᩦᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨠᩥᨶ᩠ᨲᩥ ᨲᩮ, ᩌᨶᨶ᩠ᨴ, ᩈᩩᨲᩴ, ‘ᩅᨩ᩠ᨩᩦ ᨿᩣ ᨲᩣ ᨠᩩᩃᩥᨲ᩠ᨳᩥᨿᩮᩣ ᨠᩩᩃᨠᩩᨾᩣᩁᩥᨿᩮᩣ, ᨲᩣ ᨶ ᩒᨠ᩠ᨠᩔ ᨸᩈᨿ᩠ᩉ ᩅᩣᩈᩮᨶ᩠ᨲᩦ’’’ᨲᩥ? ‘‘ᩈᩩᨲᩴ ᨾᩮᨲᩴ, ᨽᨶ᩠ᨲᩮ – ‘ᩅᨩ᩠ᨩᩦ ᨿᩣ ᨲᩣ ᨠᩩᩃᩥᨲ᩠ᨳᩥᨿᩮᩣ ᨠᩩᩃᨠᩩᨾᩣᩁᩥᨿᩮᩣ ᨲᩣ ᨶ ᩒᨠ᩠ᨠᩔ ᨸᩈᨿ᩠ᩉ ᩅᩣᩈᩮᨶ᩠ᨲᩦ’’’ᨲᩥ. ‘‘ᨿᩣᩅᨠᩦᩅᨬ᩠ᨧ, ᩌᨶᨶ᩠ᨴ, ᩅᨩ᩠ᨩᩦ ᨿᩣ ᨲᩣ ᨠᩩᩃᩥᨲ᩠ᨳᩥᨿᩮᩣ ᨠᩩᩃᨠᩩᨾᩣᩁᩥᨿᩮᩣ, ᨲᩣ ᨶ ᩒᨠ᩠ᨠᩔ ᨸᩈᨿ᩠ᩉ ᩅᩣᩈᩮᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᩌᨶᨶ᩠ᨴ, ᩅᨩ᩠ᨩᩦᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨠᩥᨶ᩠ᨲᩥ ᨲᩮ, ᩌᨶᨶ᩠ᨴ, ᩈᩩᨲᩴ, ‘ᩅᨩ᩠ᨩᩦ ᨿᩣᨶᩥ ᨲᩣᨶᩥ

ᩅᨩ᩠ᨩᩦᨶᩴ ᩅᨩ᩠ᨩᩥᨧᩮᨲᩥᨿᩣᨶᩥ ᩋᨻ᩠ᨽᨶ᩠ᨲᩁᩣᨶᩥ ᨧᩮᩅ ᨻᩣᩉᩥᩁᩣᨶᩥ ᨧ, ᨲᩣᨶᩥ ᩈᨠ᩠ᨠᩁᩮᩣᨶ᩠ᨲᩥ ᨣᩁᩩᩴ ᨠᩁᩮᩣᨶ᩠ᨲᩥ ᨾᩣᨶᩮᨶ᩠ᨲᩥ ᨸᩪᨩᩮᨶ᩠ᨲᩥ, ᨲᩮᩈᨬ᩠ᨧ ᨴᩥᨶ᩠ᨶᨸᩩᨻ᩠ᨻᩴ ᨠᨲᨸᩩᨻ᩠ᨻᩴ ᨵᨾ᩠ᨾᩥᨠᩴ ᨻᩃᩥᩴ ᨶᩮᩣ ᨸᩁᩥᩉᩣᨸᩮᨶ᩠ᨲᩦ’’’ᨲᩥ? ‘‘ᩈᩩᨲᩴ ᨾᩮᨲᩴ, ᨽᨶ᩠ᨲᩮ – ‘ᩅᨩ᩠ᨩᩦ ᨿᩣᨶᩥ ᨲᩣᨶᩥ ᩅᨩ᩠ᨩᩦᨶᩴ ᩅᨩ᩠ᨩᩥᨧᩮᨲᩥᨿᩣᨶᩥ ᩋᨻ᩠ᨽᨶ᩠ᨲᩁᩣᨶᩥ ᨧᩮᩅ ᨻᩣᩉᩥᩁᩣᨶᩥ ᨧ, ᨲᩣᨶᩥ ᩈᨠ᩠ᨠᩁᩮᩣᨶ᩠ᨲᩥ ᨣᩁᩩᩴ ᨠᩁᩮᩣᨶ᩠ᨲᩥ ᨾᩣᨶᩮᨶ᩠ᨲᩥ ᨸᩪᨩᩮᨶ᩠ᨲᩥ ᨲᩮᩈᨬ᩠ᨧ ᨴᩥᨶ᩠ᨶᨸᩩᨻ᩠ᨻᩴ ᨠᨲᨸᩩᨻ᩠ᨻᩴ ᨵᨾ᩠ᨾᩥᨠᩴ ᨻᩃᩥᩴ ᨶᩮᩣ ᨸᩁᩥᩉᩣᨸᩮᨶ᩠ᨲᩦ’’’ᨲᩥ. ‘‘ᨿᩣᩅᨠᩦᩅᨬ᩠ᨧ, ᩌᨶᨶ᩠ᨴ, ᩅᨩ᩠ᨩᩦ ᨿᩣᨶᩥ ᨲᩣᨶᩥ ᩅᨩ᩠ᨩᩦᨶᩴ ᩅᨩ᩠ᨩᩥᨧᩮᨲᩥᨿᩣᨶᩥ ᩋᨻ᩠ᨽᨶ᩠ᨲᩁᩣᨶᩥ ᨧᩮᩅ ᨻᩣᩉᩥᩁᩣᨶᩥ ᨧ, ᨲᩣᨶᩥ ᩈᨠ᩠ᨠᩁᩥᩔᨶ᩠ᨲᩥ ᨣᩁᩩᩴ ᨠᩁᩥᩔᨶ᩠ᨲᩥ ᨾᩣᨶᩮᩔᨶ᩠ᨲᩥ ᨸᩪᨩᩮᩔᨶ᩠ᨲᩥ, ᨲᩮᩈᨬ᩠ᨧ ᨴᩥᨶ᩠ᨶᨸᩩᨻ᩠ᨻᩴ ᨠᨲᨸᩩᨻ᩠ᨻᩴ ᨵᨾ᩠ᨾᩥᨠᩴ ᨻᩃᩥᩴ ᨶᩮᩣ ᨸᩁᩥᩉᩣᨸᩮᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᩌᨶᨶ᩠ᨴ, ᩅᨩ᩠ᨩᩦᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨠᩥᨶ᩠ᨲᩥ ᨲᩮ, ᩌᨶᨶ᩠ᨴ, ᩈᩩᨲᩴ, ‘ᩅᨩ᩠ᨩᩦᨶᩴ ᩋᩁᩉᨶ᩠ᨲᩮᩈᩩ ᨵᨾ᩠ᨾᩥᨠᩣ ᩁᨠ᩠ᨡᩣᩅᩁᨱᨣᩩᨲ᩠ᨲᩥ ᩈᩩᩈᩴᩅᩥᩉᩥᨲᩣ, ᨠᩥᨶ᩠ᨲᩥ ᩋᨶᩣᨣᨲᩣ ᨧ ᩋᩁᩉᨶ᩠ᨲᩮᩣ ᩅᩥᨩᩥᨲᩴ ᩌᨣᨧ᩠ᨨᩮᨿ᩠ᨿᩩᩴ, ᩌᨣᨲᩣ ᨧ ᩋᩁᩉᨶ᩠ᨲᩮᩣ ᩅᩥᨩᩥᨲᩮ ᨹᩣᩈᩩ ᩅᩥᩉᩁᩮᨿ᩠ᨿᩩ’’’ᨶ᩠ᨲᩥ? ‘‘ᩈᩩᨲᩴ ᨾᩮᨲᩴ, ᨽᨶ᩠ᨲᩮ ‘ᩅᨩ᩠ᨩᩦᨶᩴ ᩋᩁᩉᨶ᩠ᨲᩮᩈᩩ ᨵᨾ᩠ᨾᩥᨠᩣ ᩁᨠ᩠ᨡᩣᩅᩁᨱᨣᩩᨲ᩠ᨲᩥ ᩈᩩᩈᩴᩅᩥᩉᩥᨲᩣ ᨠᩥᨶ᩠ᨲᩥ ᩋᨶᩣᨣᨲᩣ ᨧ ᩋᩁᩉᨶ᩠ᨲᩮᩣ ᩅᩥᨩᩥᨲᩴ ᩌᨣᨧ᩠ᨨᩮᨿ᩠ᨿᩩᩴ, ᩌᨣᨲᩣ ᨧ ᩋᩁᩉᨶ᩠ᨲᩮᩣ ᩅᩥᨩᩥᨲᩮ ᨹᩣᩈᩩ ᩅᩥᩉᩁᩮᨿ᩠ᨿᩩ’’’ᨶ᩠ᨲᩥ. ‘‘ᨿᩣᩅᨠᩦᩅᨬ᩠ᨧ, ᩌᨶᨶ᩠ᨴ, ᩅᨩ᩠ᨩᩦᨶᩴ ᩋᩁᩉᨶ᩠ᨲᩮᩈᩩ ᨵᨾ᩠ᨾᩥᨠᩣ ᩁᨠ᩠ᨡᩣᩅᩁᨱᨣᩩᨲ᩠ᨲᩥ ᩈᩩᩈᩴᩅᩥᩉᩥᨲᩣ ᨽᩅᩥᩔᨲᩥ, ᨠᩥᨶ᩠ᨲᩥ ᩋᨶᩣᨣᨲᩣ ᨧ ᩋᩁᩉᨶ᩠ᨲᩮᩣ ᩅᩥᨩᩥᨲᩴ ᩌᨣᨧ᩠ᨨᩮᨿ᩠ᨿᩩᩴ, ᩌᨣᨲᩣ ᨧ ᩋᩁᩉᨶ᩠ᨲᩮᩣ ᩅᩥᨩᩥᨲᩮ ᨹᩣᩈᩩ ᩅᩥᩉᩁᩮᨿ᩠ᨿᩩᨶ᩠ᨲᩥ. ᩅᩩᨴ᩠ᨵᩥᨿᩮᩅ, ᩌᨶᨶ᩠ᨴ, ᩅᨩ᩠ᨩᩦᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩦ’’ᨲᩥ.

᪑᪓᪕. ᩋᨳ ᨡᩮᩣ ᨽᨣᩅᩣ ᩅᩔᨠᩣᩁᩴ ᨻᩕᩣᩉ᩠ᨾᨱᩴ ᨾᨣᨵᨾᩉᩣᨾᨲ᩠ᨲᩴ ᩌᨾᨶ᩠ᨲᩮᩈᩥ – ‘‘ᩑᨠᨾᩥᨴᩣᩉᩴ, ᨻᩕᩣᩉ᩠ᨾᨱ, ᩈᨾᨿᩴ ᩅᩮᩈᩣᩃᩥᨿᩴ ᩅᩥᩉᩁᩣᨾᩥ ᩈᩣᩁᨶ᩠ᨴᨴᩮ [ᩈᩣᨶᨶ᩠ᨴᩁᩮ (ᨠ.)] ᨧᩮᨲᩥᨿᩮ. ᨲᨲᩕᩣᩉᩴ ᩅᨩ᩠ᨩᩦᨶᩴ ᩍᨾᩮ ᩈᨲ᩠ᨲ ᩋᨸᩁᩥᩉᩣᨶᩥᨿᩮ ᨵᨾ᩠ᨾᩮ ᨴᩮᩈᩮᩈᩥᩴ. ᨿᩣᩅᨠᩦᩅᨬ᩠ᨧ, ᨻᩕᩣᩉ᩠ᨾᨱ, ᩍᨾᩮ ᩈᨲ᩠ᨲ ᩋᨸᩁᩥᩉᩣᨶᩥᨿᩣ ᨵᨾ᩠ᨾᩣ ᩅᨩ᩠ᨩᩦᩈᩩ ᨮᩔᨶ᩠ᨲᩥ, ᩍᨾᩮᩈᩩ ᨧ ᩈᨲ᩠ᨲᩈᩩ ᩋᨸᩁᩥᩉᩣᨶᩥᨿᩮᩈᩩ ᨵᨾ᩠ᨾᩮᩈᩩ ᩅᨩ᩠ᨩᩦ ᩈᨶ᩠ᨴᩥᩔᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨻᩕᩣᩉ᩠ᨾᨱ, ᩅᨩ᩠ᨩᩦᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩦ’’ᨲᩥ.

ᩑᩅᩴ ᩅᩩᨲ᩠ᨲᩮ, ᩅᩔᨠᩣᩁᩮᩣ ᨻᩕᩣᩉ᩠ᨾᨱᩮᩣ ᨾᨣᨵᨾᩉᩣᨾᨲ᩠ᨲᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩑᨠᨾᩮᨠᩮᨶᨸᩥ, ᨽᩮᩣ ᨣᩮᩣᨲᨾ, ᩋᨸᩁᩥᩉᩣᨶᩥᨿᩮᨶ ᨵᨾ᩠ᨾᩮᨶ ᩈᨾᨶ᩠ᨶᩣᨣᨲᩣᨶᩴ ᩅᨩ᩠ᨩᩦᨶᩴ ᩅᩩᨴ᩠ᨵᩥᨿᩮᩅ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ. ᨠᩮᩣ ᨸᨶ ᩅᩣᨴᩮᩣ ᩈᨲ᩠ᨲᩉᩥ ᩋᨸᩁᩥᩉᩣᨶᩥᨿᩮᩉᩥ ᨵᨾ᩠ᨾᩮᩉᩥ. ᩋᨠᩁᨱᩦᨿᩣᩅ [ᩋᨠᩁᨱᩦᨿᩣ ᨧ (ᩈ᩠ᨿᩣ. ᨠ.)], ᨽᩮᩣ ᨣᩮᩣᨲᨾ, ᩅᨩ᩠ᨩᩦ [ᩅᨩ᩠ᨩᩦᨶᩴ (ᨠ.)] ᩁᨬ᩠ᨬᩣ ᨾᩣᨣᨵᩮᨶ ᩋᨩᩣᨲᩈᨲ᩠ᨲᩩᨶᩣ ᩅᩮᨴᩮᩉᩥᨸᩩᨲ᩠ᨲᩮᨶ ᨿᨴᩥᨴᩴ ᨿᩩᨴ᩠ᨵᩔ, ᩋᨬ᩠ᨬᨲᩕ ᩏᨸᩃᩣᨸᨶᩣᨿ ᩋᨬ᩠ᨬᨲᩕ ᨾᩥᨳᩩᨽᩮᨴᩣ. ᩉᨶ᩠ᨴ ᨧ ᨴᩣᨶᩥ ᨾᨿᩴ, ᨽᩮᩣ ᨣᩮᩣᨲᨾ, ᨣᨧ᩠ᨨᩣᨾ, ᨻᩉᩩᨠᩥᨧ᩠ᨧᩣ ᨾᨿᩴ ᨻᩉᩩᨠᩁᨱᩦᨿᩣ’’ᨲᩥ. ‘‘ᨿᩔᨴᩣᨶᩥ ᨲ᩠ᩅᩴ, ᨻᩕᩣᩉ᩠ᨾᨱ, ᨠᩣᩃᩴ ᨾᨬ᩠ᨬᩈᩦ’’ᨲᩥ. ᩋᨳ ᨡᩮᩣ ᩅᩔᨠᩣᩁᩮᩣ ᨻᩕᩣᩉ᩠ᨾᨱᩮᩣ ᨾᨣᨵᨾᩉᩣᨾᨲ᩠ᨲᩮᩣ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩥᨲ᩠ᩅᩣ ᩋᨶᩩᨾᩮᩣᨴᩥᨲ᩠ᩅᩣ ᩏᨭ᩠ᨮᩣᨿᩣᩈᨶᩣ ᨸᨠ᩠ᨠᩣᨾᩥ.

ᨽᩥᨠ᩠ᨡᩩᩋᨸᩁᩥᩉᩣᨶᩥᨿᨵᨾ᩠ᨾᩣ

᪑᪓᪖. ᩋᨳ ᨡᩮᩣ ᨽᨣᩅᩣ ᩋᨧᩥᩁᨸᨠ᩠ᨠᨶ᩠ᨲᩮ ᩅᩔᨠᩣᩁᩮ ᨻᩕᩣᩉ᩠ᨾᨱᩮ ᨾᨣᨵᨾᩉᩣᨾᨲ᩠ᨲᩮ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᨣᨧ᩠ᨨ ᨲ᩠ᩅᩴ, ᩌᨶᨶ᩠ᨴ, ᨿᩣᩅᨲᩥᨠᩣ ᨽᩥᨠ᩠ᨡᩪ ᩁᩣᨩᨣᩉᩴ ᩏᨸᨶᩥᩔᩣᨿ ᩅᩥᩉᩁᨶ᩠ᨲᩥ, ᨲᩮ ᩈᨻ᩠ᨻᩮ ᩏᨸᨭ᩠ᨮᩣᨶᩈᩣᩃᩣᨿᩴ ᩈᨶ᩠ᨶᩥᨸᩣᨲᩮᩉᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨭᩥᩔᩩᨲ᩠ᩅᩣ ᨿᩣᩅᨲᩥᨠᩣ ᨽᩥᨠ᩠ᨡᩪ ᩁᩣᨩᨣᩉᩴ ᩏᨸᨶᩥᩔᩣᨿ ᩅᩥᩉᩁᨶ᩠ᨲᩥ, ᨲᩮ ᩈᨻ᩠ᨻᩮ ᩏᨸᨭ᩠ᨮᩣᨶᩈᩣᩃᩣᨿᩴ ᩈᨶ᩠ᨶᩥᨸᩣᨲᩮᨲ᩠ᩅᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩣᩈᩥ. ᩑᨠᨾᨶ᩠ᨲᩴ ᨮᩥᨲᩮᩣ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩈᨶ᩠ᨶᩥᨸᨲᩥᨲᩮᩣ, ᨽᨶ᩠ᨲᩮ, ᨽᩥᨠ᩠ᨡᩩᩈᨦ᩠ᨥᩮᩣ, ᨿᩔᨴᩣᨶᩥ, ᨽᨶ᩠ᨲᩮ, ᨽᨣᩅᩣ ᨠᩣᩃᩴ ᨾᨬ᩠ᨬᨲᩦ’’ᨲᩥ.

ᩋᨳ ᨡᩮᩣ ᨽᨣᩅᩣ ᩏᨭ᩠ᨮᩣᨿᩣᩈᨶᩣ ᨿᩮᨶ ᩏᨸᨭ᩠ᨮᩣᨶᩈᩣᩃᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨸᨬ᩠ᨬᨲ᩠ᨲᩮ ᩌᩈᨶᩮ ᨶᩥᩈᩦᨴᩥ. ᨶᩥᩈᨩ᩠ᨩ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᩈᨲ᩠ᨲ ᩅᩮᩣ, ᨽᩥᨠ᩠ᨡᩅᩮ, ᩋᨸᩁᩥᩉᩣᨶᩥᨿᩮ ᨵᨾ᩠ᨾᩮ ᨴᩮᩈᩮᩔᩣᨾᩥ, ᨲᩴ ᩈᩩᨱᩣᨳ, ᩈᩣᨵᩩᨠᩴ ᨾᨶᩈᩥᨠᩁᩮᩣᨳ, ᨽᩣᩈᩥᩔᩣᨾᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩩᩴ. ᨽᨣᩅᩣ ᩑᨲᨴᩅᩮᩣᨧ –

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᩋᨽᩥᨱ᩠ᩉᩴ ᩈᨶ᩠ᨶᩥᨸᩣᨲᩣ ᩈᨶ᩠ᨶᩥᨸᩣᨲᨻᩉᩩᩃᩣ ᨽᩅᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᩈᨾᨣ᩠ᨣᩣ ᩈᨶ᩠ᨶᩥᨸᨲᩥᩔᨶ᩠ᨲᩥ, ᩈᨾᨣ᩠ᨣᩣ ᩅᩩᨭ᩠ᨮᩉᩥᩔᨶ᩠ᨲᩥ, ᩈᨾᨣ᩠ᨣᩣ ᩈᨦ᩠ᨥᨠᩁᨱᩦᨿᩣᨶᩥ ᨠᩁᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᩋᨸᨬ᩠ᨬᨲ᩠ᨲᩴ ᨶ ᨸᨬ᩠ᨬᨸᩮᩔᨶ᩠ᨲᩥ, ᨸᨬ᩠ᨬᨲ᩠ᨲᩴ ᨶ ᩈᨾᩩᨧ᩠ᨨᩥᨶ᩠ᨴᩥᩔᨶ᩠ᨲᩥ, ᨿᨳᩣᨸᨬ᩠ᨬᨲ᩠ᨲᩮᩈᩩ ᩈᩥᨠ᩠ᨡᩣᨸᨴᩮᩈᩩ ᩈᨾᩣᨴᩣᨿ ᩅᨲ᩠ᨲᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᨿᩮ ᨲᩮ ᨽᩥᨠ᩠ᨡᩪ ᨳᩮᩁᩣ ᩁᨲ᩠ᨲᨬ᩠ᨬᩪ ᨧᩥᩁᨸᨻ᩠ᨻᨩᩥᨲᩣ ᩈᨦ᩠ᨥᨸᩥᨲᩁᩮᩣ ᩈᨦ᩠ᨥᨸᩁᩥᨱᩣᨿᨠᩣ, ᨲᩮ ᩈᨠ᩠ᨠᩁᩥᩔᨶ᩠ᨲᩥ ᨣᩁᩩᩴ ᨠᩁᩥᩔᨶ᩠ᨲᩥ ᨾᩣᨶᩮᩔᨶ᩠ᨲᩥ ᨸᩪᨩᩮᩔᨶ᩠ᨲᩥ, ᨲᩮᩈᨬ᩠ᨧ ᩈᩮᩣᨲᨻ᩠ᨻᩴ ᨾᨬ᩠ᨬᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᩏᨸ᩠ᨸᨶ᩠ᨶᩣᨿ ᨲᨱ᩠ᩉᩣᨿ ᨸᩮᩣᨶᩮᩣᨻ᩠ᨽᩅᩥᨠᩣᨿ ᨶ ᩅᩈᩴ ᨣᨧ᩠ᨨᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᩌᩁᨬ᩠ᨬᨠᩮᩈᩩ ᩈᩮᨶᩣᩈᨶᩮᩈᩩ ᩈᩣᨸᩮᨠ᩠ᨡᩣ ᨽᩅᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᨸᨧ᩠ᨧᨲ᩠ᨲᨬ᩠ᨬᩮᩅ ᩈᨲᩥᩴ ᩏᨸᨭ᩠ᨮᨸᩮᩔᨶ᩠ᨲᩥ – ‘ᨠᩥᨶ᩠ᨲᩥ ᩋᨶᩣᨣᨲᩣ ᨧ ᨸᩮᩈᩃᩣ ᩈᨻᩕᩉ᩠ᨾᨧᩣᩁᩦ ᩌᨣᨧ᩠ᨨᩮᨿ᩠ᨿᩩᩴ, ᩌᨣᨲᩣ ᨧ ᨸᩮᩈᩃᩣ ᩈᨻᩕᩉ᩠ᨾᨧᩣᩁᩦ ᨹᩣᩈᩩ [ᨹᩣᩈᩩᩴ (ᩈᩦ. ᩈ᩠ᨿᩣ. ᨸᩦ.)] ᩅᩥᩉᩁᩮᨿ᩠ᨿᩩ’ᨶ᩠ᨲᩥ. ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᩍᨾᩮ ᩈᨲ᩠ᨲ ᩋᨸᩁᩥᩉᩣᨶᩥᨿᩣ ᨵᨾ᩠ᨾᩣ ᨽᩥᨠ᩠ᨡᩪᩈᩩ ᨮᩔᨶ᩠ᨲᩥ, ᩍᨾᩮᩈᩩ ᨧ ᩈᨲ᩠ᨲᩈᩩ ᩋᨸᩁᩥᩉᩣᨶᩥᨿᩮᩈᩩ ᨵᨾ᩠ᨾᩮᩈᩩ ᨽᩥᨠ᩠ᨡᩪ ᩈᨶ᩠ᨴᩥᩔᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

᪑᪓᪗. ‘‘ᩋᨸᩁᩮᨸᩥ ᩅᩮᩣ, ᨽᩥᨠ᩠ᨡᩅᩮ, ᩈᨲ᩠ᨲ ᩋᨸᩁᩥᩉᩣᨶᩥᨿᩮ ᨵᨾ᩠ᨾᩮ ᨴᩮᩈᩮᩔᩣᨾᩥ, ᨲᩴ ᩈᩩᨱᩣᨳ, ᩈᩣᨵᩩᨠᩴ ᨾᨶᩈᩥᨠᩁᩮᩣᨳ, ᨽᩣᩈᩥᩔᩣᨾᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩩᩴ. ᨽᨣᩅᩣ ᩑᨲᨴᩅᩮᩣᨧ –

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᨶ ᨠᨾ᩠ᨾᩣᩁᩣᨾᩣ ᨽᩅᩥᩔᨶ᩠ᨲᩥ ᨶ ᨠᨾ᩠ᨾᩁᨲᩣ ᨶ ᨠᨾ᩠ᨾᩣᩁᩣᨾᨲᨾᨶᩩᨿᩩᨲ᩠ᨲᩣ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᨶ ᨽᩔᩣᩁᩣᨾᩣ ᨽᩅᩥᩔᨶ᩠ᨲᩥ ᨶ ᨽᩔᩁᨲᩣ ᨶ ᨽᩔᩣᩁᩣᨾᨲᨾᨶᩩᨿᩩᨲ᩠ᨲᩣ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᨶ ᨶᩥᨴ᩠ᨴᩣᩁᩣᨾᩣ ᨽᩅᩥᩔᨶ᩠ᨲᩥ ᨶ ᨶᩥᨴ᩠ᨴᩣᩁᨲᩣ ᨶ ᨶᩥᨴ᩠ᨴᩣᩁᩣᨾᨲᨾᨶᩩᨿᩩᨲ᩠ᨲᩣ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᨶ ᩈᨦ᩠ᨣᨱᩥᨠᩣᩁᩣᨾᩣ ᨽᩅᩥᩔᨶ᩠ᨲᩥ ᨶ ᩈᨦ᩠ᨣᨱᩥᨠᩁᨲᩣ ᨶ ᩈᨦ᩠ᨣᨱᩥᨠᩣᩁᩣᨾᨲᨾᨶᩩᨿᩩᨲ᩠ᨲᩣ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᨶ ᨸᩣᨸᩥᨧ᩠ᨨᩣ ᨽᩅᩥᩔᨶ᩠ᨲᩥ ᨶ ᨸᩣᨸᩥᨠᩣᨶᩴ ᩍᨧ᩠ᨨᩣᨶᩴ ᩅᩈᩴ ᨣᨲᩣ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᨶ ᨸᩣᨸᨾᩥᨲ᩠ᨲᩣ ᨽᩅᩥᩔᨶ᩠ᨲᩥ ᨶ ᨸᩣᨸᩈᩉᩣᨿᩣ ᨶ ᨸᩣᨸᩈᨾ᩠ᨸᩅᨦ᩠ᨠᩣ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᨶ ᩒᩁᨾᨲ᩠ᨲᨠᩮᨶ ᩅᩥᩈᩮᩈᩣᨵᩥᨣᨾᩮᨶ ᩋᨶ᩠ᨲᩁᩣᩅᩮᩣᩈᩣᨶᩴ ᩌᨸᨩ᩠ᨩᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᩍᨾᩮ ᩈᨲ᩠ᨲ ᩋᨸᩁᩥᩉᩣᨶᩥᨿᩣ ᨵᨾ᩠ᨾᩣ ᨽᩥᨠ᩠ᨡᩪᩈᩩ ᨮᩔᨶ᩠ᨲᩥ, ᩍᨾᩮᩈᩩ ᨧ ᩈᨲ᩠ᨲᩈᩩ ᩋᨸᩁᩥᩉᩣᨶᩥᨿᩮᩈᩩ ᨵᨾ᩠ᨾᩮᩈᩩ ᨽᩥᨠ᩠ᨡᩪ ᩈᨶ᩠ᨴᩥᩔᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

᪑᪓᪘. ‘‘ᩋᨸᩁᩮᨸᩥ ᩅᩮᩣ, ᨽᩥᨠ᩠ᨡᩅᩮ, ᩈᨲ᩠ᨲ ᩋᨸᩁᩥᩉᩣᨶᩥᨿᩮ ᨵᨾ᩠ᨾᩮ ᨴᩮᩈᩮᩔᩣᨾᩥ…ᨸᩮ… ‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᩈᨴ᩠ᨵᩣ ᨽᩅᩥᩔᨶ᩠ᨲᩥ…ᨸᩮ… ᩉᩥᩁᩥᨾᨶᩣ ᨽᩅᩥᩔᨶ᩠ᨲᩥ… ᩒᨲ᩠ᨲᨸ᩠ᨸᩦ ᨽᩅᩥᩔᨶ᩠ᨲᩥ… ᨻᩉᩩᩔᩩᨲᩣ ᨽᩅᩥᩔᨶ᩠ᨲᩥ… ᩌᩁᨴ᩠ᨵᩅᩦᩁᩥᨿᩣ ᨽᩅᩥᩔᨶ᩠ᨲᩥ… ᩏᨸᨭ᩠ᨮᩥᨲᩔᨲᩦ ᨽᩅᩥᩔᨶ᩠ᨲᩥ… ᨸᨬ᩠ᨬᩅᨶ᩠ᨲᩮᩣ ᨽᩅᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ. ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᩍᨾᩮ ᩈᨲ᩠ᨲ ᩋᨸᩁᩥᩉᩣᨶᩥᨿᩣ ᨵᨾ᩠ᨾᩣ ᨽᩥᨠ᩠ᨡᩪᩈᩩ ᨮᩔᨶ᩠ᨲᩥ, ᩍᨾᩮᩈᩩ ᨧ ᩈᨲ᩠ᨲᩈᩩ ᩋᨸᩁᩥᩉᩣᨶᩥᨿᩮᩈᩩ ᨵᨾ᩠ᨾᩮᩈᩩ ᨽᩥᨠ᩠ᨡᩪ ᩈᨶ᩠ᨴᩥᩔᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

᪑᪓᪙. ‘‘ᩋᨸᩁᩮᨸᩥ ᩅᩮᩣ, ᨽᩥᨠ᩠ᨡᩅᩮ, ᩈᨲ᩠ᨲ ᩋᨸᩁᩥᩉᩣᨶᩥᨿᩮ ᨵᨾ᩠ᨾᩮ ᨴᩮᩈᩮᩔᩣᨾᩥ, ᨲᩴ ᩈᩩᨱᩣᨳ, ᩈᩣᨵᩩᨠᩴ ᨾᨶᩈᩥᨠᩁᩮᩣᨳ, ᨽᩣᩈᩥᩔᩣᨾᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩩᩴ. ᨽᨣᩅᩣ ᩑᨲᨴᩅᩮᩣᨧ –

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩈᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᩔᨶ᩠ᨲᩥ…ᨸᩮ… ᨵᨾ᩠ᨾᩅᩥᨧᨿᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᩔᨶ᩠ᨲᩥ… ᩅᩦᩁᩥᨿᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᩔᨶ᩠ᨲᩥ… ᨸᩦᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᩔᨶ᩠ᨲᩥ… ᨸᩔᨴ᩠ᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᩔᨶ᩠ᨲᩥ… ᩈᨾᩣᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᩔᨶ᩠ᨲᩥ… ᩏᨸᩮᨠ᩠ᨡᩣᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᩍᨾᩮ ᩈᨲ᩠ᨲ ᩋᨸᩁᩥᩉᩣᨶᩥᨿᩣ ᨵᨾ᩠ᨾᩣ ᨽᩥᨠ᩠ᨡᩪᩈᩩ ᨮᩔᨶ᩠ᨲᩥ, ᩍᨾᩮᩈᩩ ᨧ ᩈᨲ᩠ᨲᩈᩩ ᩋᨸᩁᩥᩉᩣᨶᩥᨿᩮᩈᩩ ᨵᨾ᩠ᨾᩮᩈᩩ ᨽᩥᨠ᩠ᨡᩪ ᩈᨶ᩠ᨴᩥᩔᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ ᨶᩮᩣ ᨸᩁᩥᩉᩣᨶᩥ.

᪑᪔᪐. ‘‘ᩋᨸᩁᩮᨸᩥ ᩅᩮᩣ, ᨽᩥᨠ᩠ᨡᩅᩮ, ᩈᨲ᩠ᨲ ᩋᨸᩁᩥᩉᩣᨶᩥᨿᩮ ᨵᨾ᩠ᨾᩮ ᨴᩮᩈᩮᩔᩣᨾᩥ, ᨲᩴ ᩈᩩᨱᩣᨳ, ᩈᩣᨵᩩᨠᩴ ᨾᨶᩈᩥᨠᩁᩮᩣᨳ, ᨽᩣᩈᩥᩔᩣᨾᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩩᩴ. ᨽᨣᩅᩣ ᩑᨲᨴᩅᩮᩣᨧ –

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᩋᨶᩥᨧ᩠ᨧᩈᨬ᩠ᨬᩴ ᨽᩣᩅᩮᩔᨶ᩠ᨲᩥ…ᨸᩮ… ᩋᨶᨲ᩠ᨲᩈᨬ᩠ᨬᩴ ᨽᩣᩅᩮᩔᨶ᩠ᨲᩥ… ᩋᩈᩩᨽᩈᨬ᩠ᨬᩴ ᨽᩣᩅᩮᩔᨶ᩠ᨲᩥ… ᩌᨴᩦᨶᩅᩈᨬ᩠ᨬᩴ ᨽᩣᩅᩮᩔᨶ᩠ᨲᩥ… ᨸᩉᩣᨶᩈᨬ᩠ᨬᩴ ᨽᩣᩅᩮᩔᨶ᩠ᨲᩥ… ᩅᩥᩁᩣᨣᩈᨬ᩠ᨬᩴ ᨽᩣᩅᩮᩔᨶ᩠ᨲᩥ… ᨶᩥᩁᩮᩣᨵᩈᨬ᩠ᨬᩴ ᨽᩣᩅᩮᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᩍᨾᩮ ᩈᨲ᩠ᨲ ᩋᨸᩁᩥᩉᩣᨶᩥᨿᩣ ᨵᨾ᩠ᨾᩣ ᨽᩥᨠ᩠ᨡᩪᩈᩩ ᨮᩔᨶ᩠ᨲᩥ, ᩍᨾᩮᩈᩩ ᨧ ᩈᨲ᩠ᨲᩈᩩ ᩋᨸᩁᩥᩉᩣᨶᩥᨿᩮᩈᩩ ᨵᨾ᩠ᨾᩮᩈᩩ ᨽᩥᨠ᩠ᨡᩪ ᩈᨶ᩠ᨴᩥᩔᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

᪑᪔᪑. ‘‘ᨨ, ᩅᩮᩣ ᨽᩥᨠ᩠ᨡᩅᩮ, ᩋᨸᩁᩥᩉᩣᨶᩥᨿᩮ ᨵᨾ᩠ᨾᩮ ᨴᩮᩈᩮᩔᩣᨾᩥ, ᨲᩴ ᩈᩩᨱᩣᨳ, ᩈᩣᨵᩩᨠᩴ ᨾᨶᩈᩥᨠᩁᩮᩣᨳ, ᨽᩣᩈᩥᩔᩣᨾᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩩᩴ. ᨽᨣᩅᩣ ᩑᨲᨴᩅᩮᩣᨧ –

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᨾᩮᨲ᩠ᨲᩴ ᨠᩣᨿᨠᨾ᩠ᨾᩴ ᨸᨧ᩠ᨧᩩᨸᨭ᩠ᨮᩣᨸᩮᩔᨶ᩠ᨲᩥ ᩈᨻᩕᩉ᩠ᨾᨧᩣᩁᩦᩈᩩ ᩌᩅᩥ ᨧᩮᩅ ᩁᩉᩮᩣ ᨧ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᨾᩮᨲ᩠ᨲᩴ ᩅᨧᩦᨠᨾ᩠ᨾᩴ ᨸᨧ᩠ᨧᩩᨸᨭ᩠ᨮᩣᨸᩮᩔᨶ᩠ᨲᩥ …ᨸᩮ… ᨾᩮᨲ᩠ᨲᩴ ᨾᨶᩮᩣᨠᨾ᩠ᨾᩴ ᨸᨧ᩠ᨧᩩᨸᨭ᩠ᨮᩣᨸᩮᩔᨶ᩠ᨲᩥ ᩈᨻᩕᩉ᩠ᨾᨧᩣᩁᩦᩈᩩ ᩌᩅᩥ ᨧᩮᩅ ᩁᩉᩮᩣ ᨧ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ, ᨿᩮ ᨲᩮ ᩃᩣᨽᩣ ᨵᨾ᩠ᨾᩥᨠᩣ ᨵᨾ᩠ᨾᩃᨴ᩠ᨵᩣ ᩋᨶ᩠ᨲᨾᩈᩮᩣ ᨸᨲ᩠ᨲᨸᩁᩥᨿᩣᨸᨶ᩠ᨶᨾᨲ᩠ᨲᨾ᩠ᨸᩥ ᨲᨳᩣᩁᩪᨸᩮᩉᩥ ᩃᩣᨽᩮᩉᩥ ᩋᨸ᩠ᨸᨭᩥᩅᩥᨽᨲ᩠ᨲᨽᩮᩣᨣᩦ ᨽᩅᩥᩔᨶ᩠ᨲᩥ ᩈᩦᩃᩅᨶ᩠ᨲᩮᩉᩥ ᩈᨻᩕᩉ᩠ᨾᨧᩣᩁᩦᩉᩥ ᩈᩣᨵᩣᩁᨱᨽᩮᩣᨣᩦ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᨿᩣᨶᩥ ᨠᩣᨶᩥ ᩈᩦᩃᩣᨶᩥ ᩋᨡᨱ᩠ᨯᩣᨶᩥ ᩋᨧ᩠ᨨᩥᨴ᩠ᨴᩣᨶᩥ ᩋᩈᨻᩃᩣᨶᩥ ᩋᨠᨾ᩠ᨾᩣᩈᩣᨶᩥ ᨽᩩᨩᩥᩔᩣᨶᩥ ᩅᩥᨬ᩠ᨬᩪᨸᩈᨲ᩠ᨳᩣᨶᩥ [ᩅᩥᨬ᩠ᨬᩩᨸ᩠ᨸᩈᨲ᩠ᨳᩣᨶᩥ (ᩈᩦ.)] ᩋᨸᩁᩣᨾᨭ᩠ᨮᩣᨶᩥ ᩈᨾᩣᨵᩥᩈᩴᩅᨲ᩠ᨲᨶᩥᨠᩣᨶᩥ ᨲᨳᩣᩁᩪᨸᩮᩈᩩ ᩈᩦᩃᩮᩈᩩ ᩈᩦᩃᩈᩣᨾᨬ᩠ᨬᨣᨲᩣ ᩅᩥᩉᩁᩥᩔᨶ᩠ᨲᩥ ᩈᨻᩕᩉ᩠ᨾᨧᩣᩁᩦᩉᩥ ᩌᩅᩥ ᨧᩮᩅ ᩁᩉᩮᩣ ᨧ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᨿᩣᨿᩴ ᨴᩥᨭ᩠ᨮᩥ ᩋᩁᩥᨿᩣ ᨶᩥᨿ᩠ᨿᩣᨶᩥᨠᩣ, ᨶᩥᨿ᩠ᨿᩣᨲᩥ ᨲᨠ᩠ᨠᩁᩔ ᩈᨾ᩠ᨾᩣ ᨴᩩᨠ᩠ᨡᨠ᩠ᨡᨿᩣᨿ, ᨲᨳᩣᩁᩪᨸᩣᨿ ᨴᩥᨭ᩠ᨮᩥᨿᩣ ᨴᩥᨭ᩠ᨮᩥᩈᩣᨾᨬ᩠ᨬᨣᨲᩣ ᩅᩥᩉᩁᩥᩔᨶ᩠ᨲᩥ ᩈᨻᩕᩉ᩠ᨾᨧᩣᩁᩦᩉᩥ ᩌᩅᩥ ᨧᩮᩅ ᩁᩉᩮᩣ ᨧ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩥ.

‘‘ᨿᩣᩅᨠᩦᩅᨬ᩠ᨧ, ᨽᩥᨠ᩠ᨡᩅᩮ, ᩍᨾᩮ ᨨ ᩋᨸᩁᩥᩉᩣᨶᩥᨿᩣ ᨵᨾ᩠ᨾᩣ ᨽᩥᨠ᩠ᨡᩪᩈᩩ ᨮᩔᨶ᩠ᨲᩥ, ᩍᨾᩮᩈᩩ ᨧ ᨨᩈᩩ ᩋᨸᩁᩥᩉᩣᨶᩥᨿᩮᩈᩩ ᨵᨾ᩠ᨾᩮᩈᩩ ᨽᩥᨠ᩠ᨡᩪ ᩈᨶ᩠ᨴᩥᩔᩥᩔᨶ᩠ᨲᩥ, ᩅᩩᨴ᩠ᨵᩥᨿᩮᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨸᩣᨭᩥᨠᨦ᩠ᨡᩣ, ᨶᩮᩣ ᨸᩁᩥᩉᩣᨶᩦ’’ᨲᩥ.

᪑᪔᪒. ᨲᨲᩕ ᩈᩩᨴᩴ ᨽᨣᩅᩣ ᩁᩣᨩᨣᩉᩮ ᩅᩥᩉᩁᨶ᩠ᨲᩮᩣ ᨣᩥᨩ᩠ᨫᨠᩪᨭᩮ ᨸᨻ᩠ᨻᨲᩮ ᩑᨲᨴᩮᩅ ᨻᩉᩩᩃᩴ ᨽᩥᨠ᩠ᨡᩪᨶᩴ ᨵᨾ᩠ᨾᩥᩴ ᨠᨳᩴ ᨠᩁᩮᩣᨲᩥ – ‘‘ᩍᨲᩥ ᩈᩦᩃᩴ, ᩍᨲᩥ ᩈᨾᩣᨵᩥ, ᩍᨲᩥ ᨸᨬ᩠ᨬᩣ. ᩈᩦᩃᨸᩁᩥᨽᩣᩅᩥᨲᩮᩣ ᩈᨾᩣᨵᩥ ᨾᩉᨸ᩠ᨹᩃᩮᩣ ᩉᩮᩣᨲᩥ ᨾᩉᩣᨶᩥᩈᩴᩈᩮᩣ. ᩈᨾᩣᨵᩥᨸᩁᩥᨽᩣᩅᩥᨲᩣ ᨸᨬ᩠ᨬᩣ ᨾᩉᨸ᩠ᨹᩃᩣ ᩉᩮᩣᨲᩥ ᨾᩉᩣᨶᩥᩈᩴᩈᩣ. ᨸᨬ᩠ᨬᩣᨸᩁᩥᨽᩣᩅᩥᨲᩴ ᨧᩥᨲ᩠ᨲᩴ ᩈᨾ᩠ᨾᨴᩮᩅ ᩌᩈᩅᩮᩉᩥ ᩅᩥᨾᩩᨧ᩠ᨧᨲᩥ, ᩈᩮᨿ᩠ᨿᨳᩥᨴᩴ – ᨠᩣᨾᩣᩈᩅᩣ, ᨽᩅᩣᩈᩅᩣ, ᩋᩅᩥᨩ᩠ᨩᩣᩈᩅᩣ’’ᨲᩥ.

᪑᪔᪓. ᩋᨳ ᨡᩮᩣ ᨽᨣᩅᩣ ᩁᩣᨩᨣᩉᩮ ᨿᨳᩣᨽᩥᩁᨶ᩠ᨲᩴ ᩅᩥᩉᩁᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩌᨿᩣᨾᩣᨶᨶ᩠ᨴ, ᨿᩮᨶ ᩋᨾ᩠ᨻᩃᨭ᩠ᨮᩥᨠᩣ ᨲᩮᨶᩩᨸᩈᨦ᩠ᨠᨾᩥᩔᩣᨾᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ. ᩋᨳ ᨡᩮᩣ ᨽᨣᩅᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨿᩮᨶ ᩋᨾ᩠ᨻᩃᨭ᩠ᨮᩥᨠᩣ ᨲᨴᩅᩈᩁᩥ. ᨲᨲᩕ ᩈᩩᨴᩴ ᨽᨣᩅᩣ ᩋᨾ᩠ᨻᩃᨭ᩠ᨮᩥᨠᩣᨿᩴ ᩅᩥᩉᩁᨲᩥ ᩁᩣᨩᩣᨣᩣᩁᨠᩮ. ᨲᨲᩕᩣᨸᩥ ᩈᩩᨴᩴ ᨽᨣᩅᩣ ᩋᨾ᩠ᨻᩃᨭ᩠ᨮᩥᨠᩣᨿᩴ ᩅᩥᩉᩁᨶ᩠ᨲᩮᩣ ᩁᩣᨩᩣᨣᩣᩁᨠᩮ ᩑᨲᨴᩮᩅ ᨻᩉᩩᩃᩴ ᨽᩥᨠ᩠ᨡᩪᨶᩴ ᨵᨾ᩠ᨾᩥᩴ ᨠᨳᩴ ᨠᩁᩮᩣᨲᩥ – ‘‘ᩍᨲᩥ ᩈᩦᩃᩴ ᩍᨲᩥ ᩈᨾᩣᨵᩥ ᩍᨲᩥ ᨸᨬ᩠ᨬᩣ. ᩈᩦᩃᨸᩁᩥᨽᩣᩅᩥᨲᩮᩣ ᩈᨾᩣᨵᩥ ᨾᩉᨸ᩠ᨹᩃᩮᩣ ᩉᩮᩣᨲᩥ ᨾᩉᩣᨶᩥᩈᩴᩈᩮᩣ. ᩈᨾᩣᨵᩥᨸᩁᩥᨽᩣᩅᩥᨲᩣ ᨸᨬ᩠ᨬᩣ ᨾᩉᨸ᩠ᨹᩃᩣ ᩉᩮᩣᨲᩥ ᨾᩉᩣᨶᩥᩈᩴᩈᩣ. ᨸᨬ᩠ᨬᩣᨸᩁᩥᨽᩣᩅᩥᨲᩴ ᨧᩥᨲ᩠ᨲᩴ ᩈᨾ᩠ᨾᨴᩮᩅ ᩌᩈᩅᩮᩉᩥ ᩅᩥᨾᩩᨧ᩠ᨧᨲᩥ, ᩈᩮᨿ᩠ᨿᨳᩥᨴᩴ – ᨠᩣᨾᩣᩈᩅᩣ, ᨽᩅᩣᩈᩅᩣ, ᩋᩅᩥᨩ᩠ᨩᩣᩈᩅᩣ’’ᨲᩥ.

᪑᪔᪔. ᩋᨳ ᨡᩮᩣ ᨽᨣᩅᩣ ᩋᨾ᩠ᨻᩃᨭ᩠ᨮᩥᨠᩣᨿᩴ ᨿᨳᩣᨽᩥᩁᨶ᩠ᨲᩴ ᩅᩥᩉᩁᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩌᨿᩣᨾᩣᨶᨶ᩠ᨴ, ᨿᩮᨶ ᨶᩣᩊᨶ᩠ᨴᩣ ᨲᩮᨶᩩᨸᩈᨦ᩠ᨠᨾᩥᩔᩣᨾᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ. ᩋᨳ ᨡᩮᩣ ᨽᨣᩅᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨿᩮᨶ ᨶᩣᩊᨶ᩠ᨴᩣ ᨲᨴᩅᩈᩁᩥ, ᨲᨲᩕ ᩈᩩᨴᩴ ᨽᨣᩅᩣ ᨶᩣᩊᨶ᩠ᨴᩣᨿᩴ ᩅᩥᩉᩁᨲᩥ ᨸᩣᩅᩣᩁᩥᨠᨾ᩠ᨻᩅᨶᩮ.

ᩈᩣᩁᩥᨸᩩᨲ᩠ᨲᩈᩦᩉᨶᩣᨴᩮᩣ

᪑᪔᪕. ᩋᨳ ᨡᩮᩣ ᩌᨿᩈ᩠ᨾᩣ ᩈᩣᩁᩥᨸᩩᨲ᩠ᨲᩮᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᩌᨿᩈ᩠ᨾᩣ ᩈᩣᩁᩥᨸᩩᨲ᩠ᨲᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩑᩅᩴ ᨸᩈᨶ᩠ᨶᩮᩣ ᩋᩉᩴ, ᨽᨶ᩠ᨲᩮ, ᨽᨣᩅᨲᩥ; ᨶ ᨧᩣᩉᩩ ᨶ ᨧ ᨽᩅᩥᩔᨲᩥ ᨶ ᨧᩮᨲᩁᩉᩥ ᩅᩥᨩ᩠ᨩᨲᩥ ᩋᨬ᩠ᨬᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᨽᨣᩅᨲᩣ ᨽᩥᨿ᩠ᨿᩮᩣᨽᩥᨬ᩠ᨬᨲᩁᩮᩣ ᨿᨴᩥᨴᩴ ᩈᨾ᩠ᨻᩮᩣᨵᩥᨿ’’ᨶ᩠ᨲᩥ. ‘‘ᩏᩊᩣᩁᩣ ᨡᩮᩣ ᨲᩮ ᩋᨿᩴ, ᩈᩣᩁᩥᨸᩩᨲ᩠ᨲ, ᩌᩈᨽᩦ ᩅᩣᨧᩣ [ᩌᩈᨽᩥᩅᩣᨧᩣ (ᩈ᩠ᨿᩣ.)] ᨽᩣᩈᩥᨲᩣ, ᩑᨠᩴᩈᩮᩣ ᨣᩉᩥᨲᩮᩣ, ᩈᩦᩉᨶᩣᨴᩮᩣ ᨶᨴᩥᨲᩮᩣ – ‘ᩑᩅᩴᨸᩈᨶ᩠ᨶᩮᩣ ᩋᩉᩴ, ᨽᨶ᩠ᨲᩮ, ᨽᨣᩅᨲᩥ; ᨶ ᨧᩣᩉᩩ ᨶ ᨧ ᨽᩅᩥᩔᨲᩥ ᨶ ᨧᩮᨲᩁᩉᩥ ᩅᩥᨩ᩠ᨩᨲᩥ ᩋᨬ᩠ᨬᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᨽᨣᩅᨲᩣ ᨽᩥᨿ᩠ᨿᩮᩣᨽᩥᨬ᩠ᨬᨲᩁᩮᩣ ᨿᨴᩥᨴᩴ ᩈᨾ᩠ᨻᩮᩣᨵᩥᨿ’ᨶ᩠ᨲᩥ.

‘‘ᨠᩥᩴ ᨲᩮ [ᨠᩥᩴ ᨶᩩ (ᩈ᩠ᨿᩣ. ᨸᩦ. ᨠ.)], ᩈᩣᩁᩥᨸᩩᨲ᩠ᨲ, ᨿᩮ ᨲᩮ ᩋᩉᩮᩈᩩᩴ ᩋᨲᩦᨲᨾᨴ᩠ᨵᩣᨶᩴ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᩈᨻ᩠ᨻᩮ ᨲᩮ ᨽᨣᩅᨶ᩠ᨲᩮᩣ ᨧᩮᨲᩈᩣ ᨧᩮᨲᩮᩣ ᨸᩁᩥᨧ᩠ᨧ ᩅᩥᨴᩥᨲᩣ – ‘ᩑᩅᩴᩈᩦᩃᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩥ, ᩑᩅᩴᨵᨾ᩠ᨾᩣ ᩑᩅᩴᨸᨬ᩠ᨬᩣ ᩑᩅᩴᩅᩥᩉᩣᩁᩦ ᩑᩅᩴᩅᩥᨾᩩᨲ᩠ᨲᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩦ’’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’.

‘‘ᨠᩥᩴ ᨸᨶ ᨲᩮ [ᨠᩥᩴ ᨸᨶ (ᩈ᩠ᨿᩣ. ᨸᩦ. ᨠ.)], ᩈᩣᩁᩥᨸᩩᨲ᩠ᨲ, ᨿᩮ ᨲᩮ ᨽᩅᩥᩔᨶ᩠ᨲᩥ ᩋᨶᩣᨣᨲᨾᨴ᩠ᨵᩣᨶᩴ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᩈᨻ᩠ᨻᩮ ᨲᩮ ᨽᨣᩅᨶ᩠ᨲᩮᩣ ᨧᩮᨲᩈᩣ ᨧᩮᨲᩮᩣ ᨸᩁᩥᨧ᩠ᨧ ᩅᩥᨴᩥᨲᩣ – ‘ᩑᩅᩴᩈᩦᩃᩣ ᨲᩮ ᨽᨣᩅᨶ᩠ᨲᩮᩣ ᨽᩅᩥᩔᨶ᩠ᨲᩥ ᩍᨲᩥᨸᩥ, ᩑᩅᩴᨵᨾ᩠ᨾᩣ ᩑᩅᩴᨸᨬ᩠ᨬᩣ ᩑᩅᩴᩅᩥᩉᩣᩁᩦ ᩑᩅᩴᩅᩥᨾᩩᨲ᩠ᨲᩣ ᨲᩮ ᨽᨣᩅᨶ᩠ᨲᩮᩣ ᨽᩅᩥᩔᨶ᩠ᨲᩥ ᩍᨲᩥᨸᩦ’’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’.

‘‘ᨠᩥᩴ ᨸᨶ ᨲᩮ, ᩈᩣᩁᩥᨸᩩᨲ᩠ᨲ, ᩋᩉᩴ ᩑᨲᩁᩉᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨧᩮᨲᩈᩣ ᨧᩮᨲᩮᩣ ᨸᩁᩥᨧ᩠ᨧ ᩅᩥᨴᩥᨲᩮᩣ – ‘‘ᩑᩅᩴᩈᩦᩃᩮᩣ ᨽᨣᩅᩣ ᩍᨲᩥᨸᩥ, ᩑᩅᩴᨵᨾ᩠ᨾᩮᩣ ᩑᩅᩴᨸᨬ᩠ᨬᩮᩣ ᩑᩅᩴᩅᩥᩉᩣᩁᩦ ᩑᩅᩴᩅᩥᨾᩩᨲ᩠ᨲᩮᩣ ᨽᨣᩅᩣ ᩍᨲᩥᨸᩦ’’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’.

‘‘ᩑᨲ᩠ᨳ ᨧ ᩉᩥ ᨲᩮ, ᩈᩣᩁᩥᨸᩩᨲ᩠ᨲ, ᩋᨲᩦᨲᩣᨶᩣᨣᨲᨸᨧ᩠ᨧᩩᨸ᩠ᨸᨶ᩠ᨶᩮᩈᩩ ᩋᩁᩉᨶ᩠ᨲᩮᩈᩩ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩈᩩ ᨧᩮᨲᩮᩣᨸᩁᩥᨿᨬᩣᨱᩴ [ᨧᩮᨲᩮᩣᨸᩁᩥᨬ᩠ᨬᩣᨿᨬᩣᨱᩴ (ᩈ᩠ᨿᩣ.), ᨧᩮᨲᩈᩣ ᨧᩮᨲᩮᩣᨸᩁᩥᨿᩣᨿᨬᩣᨱᩴ (ᨠ.)] ᨶᨲ᩠ᨳᩥ. ᩋᨳ ᨠᩥᨬ᩠ᨧᩁᩉᩥ ᨲᩮ ᩋᨿᩴ, ᩈᩣᩁᩥᨸᩩᨲ᩠ᨲ, ᩏᩊᩣᩁᩣ ᩌᩈᨽᩦ ᩅᩣᨧᩣ ᨽᩣᩈᩥᨲᩣ, ᩑᨠᩴᩈᩮᩣ ᨣᩉᩥᨲᩮᩣ, ᩈᩦᩉᨶᩣᨴᩮᩣ ᨶᨴᩥᨲᩮᩣ – ‘ᩑᩅᩴᨸᩈᨶ᩠ᨶᩮᩣ ᩋᩉᩴ, ᨽᨶ᩠ᨲᩮ, ᨽᨣᩅᨲᩥ; ᨶ ᨧᩣᩉᩩ ᨶ ᨧ ᨽᩅᩥᩔᨲᩥ ᨶ ᨧᩮᨲᩁᩉᩥ ᩅᩥᨩ᩠ᨩᨲᩥ ᩋᨬ᩠ᨬᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᨽᨣᩅᨲᩣ ᨽᩥᨿ᩠ᨿᩮᩣᨽᩥᨬ᩠ᨬᨲᩁᩮᩣ ᨿᨴᩥᨴᩴ ᩈᨾ᩠ᨻᩮᩣᨵᩥᨿ’’’ᨶ᩠ᨲᩥ?

᪑᪔᪖. ‘‘ᨶ ᨡᩮᩣ ᨾᩮ, ᨽᨶ᩠ᨲᩮ, ᩋᨲᩦᨲᩣᨶᩣᨣᨲᨸᨧ᩠ᨧᩩᨸ᩠ᨸᨶ᩠ᨶᩮᩈᩩ ᩋᩁᩉᨶ᩠ᨲᩮᩈᩩ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩈᩩ ᨧᩮᨲᩮᩣᨸᩁᩥᨿᨬᩣᨱᩴ ᩋᨲ᩠ᨳᩥ, ᩋᨸᩥ ᨧ ᨾᩮ ᨵᨾ᩠ᨾᨶ᩠ᩅᨿᩮᩣ ᩅᩥᨴᩥᨲᩮᩣ. ᩈᩮᨿ᩠ᨿᨳᩣᨸᩥ, ᨽᨶ᩠ᨲᩮ, ᩁᨬ᩠ᨬᩮᩣ ᨸᨧ᩠ᨧᨶ᩠ᨲᩥᨾᩴ ᨶᨣᩁᩴ ᨴᩊ᩠ᩉᩩᨴ᩠ᨵᩣᨸᩴ ᨴᩊ᩠ᩉᨸᩣᨠᩣᩁᨲᩮᩣᩁᨱᩴ ᩑᨠᨴ᩠ᩅᩣᩁᩴ, ᨲᨲᩕᩔ ᨴᩮᩣᩅᩣᩁᩥᨠᩮᩣ ᨸᨱ᩠ᨯᩥᨲᩮᩣ ᩅᩥᨿᨲ᩠ᨲᩮᩣ ᨾᩮᨵᩣᩅᩦ ᩋᨬ᩠ᨬᩣᨲᩣᨶᩴ ᨶᩥᩅᩣᩁᩮᨲᩣ ᨬᩣᨲᩣᨶᩴ ᨸᩅᩮᩈᩮᨲᩣ. ᩈᩮᩣ ᨲᩔ ᨶᨣᩁᩔ ᩈᨾᨶ᩠ᨲᩣ ᩋᨶᩩᨸᩁᩥᨿᩣᨿᨸᨳᩴ [ᩋᨶᩩᨧᩁᩥᨿᩣᨿᨸᨳᩴ (ᩈ᩠ᨿᩣ.)] ᩋᨶᩩᨠ᩠ᨠᨾᨾᩣᨶᩮᩣ ᨶ ᨸᩔᩮᨿ᩠ᨿ ᨸᩣᨠᩣᩁᩈᨶ᩠ᨵᩥᩴ ᩅᩣ ᨸᩣᨠᩣᩁᩅᩥᩅᩁᩴ ᩅᩣ, ᩋᨶ᩠ᨲᨾᩈᩮᩣ ᨻᩥᩊᩣᩁᨶᩥᨠ᩠ᨡᨾᨶᨾᨲ᩠ᨲᨾ᩠ᨸᩥ. ᨲᩔ ᩑᩅᨾᩔ [ᨶ ᨸᩔᩮᨿ᩠ᨿ ᨲᩔ ᩑᩅᨾᩔ (ᩈ᩠ᨿᩣ.)] – ‘ᨿᩮ ᨡᩮᩣ ᨠᩮᨧᩥ ᩒᩊᩣᩁᩥᨠᩣ ᨸᩣᨱᩣ ᩍᨾᩴ ᨶᨣᩁᩴ ᨸᩅᩥᩈᨶ᩠ᨲᩥ ᩅᩣ ᨶᩥᨠ᩠ᨡᨾᨶ᩠ᨲᩥ ᩅᩣ, ᩈᨻ᩠ᨻᩮ ᨲᩮ ᩍᨾᩥᨶᩣᩅ ᨴ᩠ᩅᩣᩁᩮᨶ ᨸᩅᩥᩈᨶ᩠ᨲᩥ ᩅᩣ ᨶᩥᨠ᩠ᨡᨾᨶ᩠ᨲᩥ ᩅᩣ’ᨲᩥ. ᩑᩅᨾᩮᩅ ᨡᩮᩣ ᨾᩮ, ᨽᨶ᩠ᨲᩮ, ᨵᨾ᩠ᨾᨶ᩠ᩅᨿᩮᩣ ᩅᩥᨴᩥᨲᩮᩣ – ‘ᨿᩮ ᨲᩮ, ᨽᨶ᩠ᨲᩮ, ᩋᩉᩮᩈᩩᩴ ᩋᨲᩦᨲᨾᨴ᩠ᨵᩣᨶᩴ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᩈᨻ᩠ᨻᩮ ᨲᩮ ᨽᨣᩅᨶ᩠ᨲᩮᩣ ᨸᨬ᩠ᨧ ᨶᩦᩅᩁᨱᩮ ᨸᩉᩣᨿ ᨧᩮᨲᩈᩮᩣ ᩏᨸᨠ᩠ᨠᩥᩃᩮᩈᩮ ᨸᨬ᩠ᨬᩣᨿ ᨴᩩᨻ᩠ᨻᩃᩦᨠᩁᨱᩮ ᨧᨲᩪᩈᩩ ᩈᨲᩥᨸᨭ᩠ᨮᩣᨶᩮᩈᩩ ᩈᩩᨸᨲᩥᨭ᩠ᨮᩥᨲᨧᩥᨲ᩠ᨲᩣ ᩈᨲ᩠ᨲᨻᩮᩣᨩ᩠ᨫᨦ᩠ᨣᩮ ᨿᨳᩣᨽᩪᨲᩴ ᨽᩣᩅᩮᨲ᩠ᩅᩣ ᩋᨶᩩᨲ᩠ᨲᩁᩴ ᩈᨾ᩠ᨾᩣᩈᨾ᩠ᨻᩮᩣᨵᩥᩴ ᩋᨽᩥᩈᨾ᩠ᨻᩩᨩ᩠ᨫᩥᩴᩈᩩ. ᨿᩮᨸᩥ ᨲᩮ, ᨽᨶ᩠ᨲᩮ, ᨽᩅᩥᩔᨶ᩠ᨲᩥ ᩋᨶᩣᨣᨲᨾᨴ᩠ᨵᩣᨶᩴ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᩈᨻ᩠ᨻᩮ ᨲᩮ ᨽᨣᩅᨶ᩠ᨲᩮᩣ ᨸᨬ᩠ᨧ ᨶᩦᩅᩁᨱᩮ ᨸᩉᩣᨿ ᨧᩮᨲᩈᩮᩣ ᩏᨸᨠ᩠ᨠᩥᩃᩮᩈᩮ ᨸᨬ᩠ᨬᩣᨿ ᨴᩩᨻ᩠ᨻᩃᩦᨠᩁᨱᩮ ᨧᨲᩪᩈᩩ ᩈᨲᩥᨸᨭ᩠ᨮᩣᨶᩮᩈᩩ ᩈᩩᨸᨲᩥᨭ᩠ᨮᩥᨲᨧᩥᨲ᩠ᨲᩣ ᩈᨲ᩠ᨲ ᨻᩮᩣᨩ᩠ᨫᨦ᩠ᨣᩮ ᨿᨳᩣᨽᩪᨲᩴ ᨽᩣᩅᩮᨲ᩠ᩅᩣ ᩋᨶᩩᨲ᩠ᨲᩁᩴ ᩈᨾ᩠ᨾᩣᩈᨾ᩠ᨻᩮᩣᨵᩥᩴ ᩋᨽᩥᩈᨾ᩠ᨻᩩᨩ᩠ᨫᩥᩔᨶ᩠ᨲᩥ. ᨽᨣᩅᩣᨸᩥ, ᨽᨶ᩠ᨲᩮ, ᩑᨲᩁᩉᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨸᨬ᩠ᨧ ᨶᩦᩅᩁᨱᩮ ᨸᩉᩣᨿ ᨧᩮᨲᩈᩮᩣ ᩏᨸᨠ᩠ᨠᩥᩃᩮᩈᩮ ᨸᨬ᩠ᨬᩣᨿ ᨴᩩᨻ᩠ᨻᩃᩦᨠᩁᨱᩮ ᨧᨲᩪᩈᩩ ᩈᨲᩥᨸᨭ᩠ᨮᩣᨶᩮᩈᩩ ᩈᩩᨸᨲᩥᨭ᩠ᨮᩥᨲᨧᩥᨲ᩠ᨲᩮᩣ ᩈᨲ᩠ᨲ ᨻᩮᩣᨩ᩠ᨫᨦ᩠ᨣᩮ ᨿᨳᩣᨽᩪᨲᩴ ᨽᩣᩅᩮᨲ᩠ᩅᩣ ᩋᨶᩩᨲ᩠ᨲᩁᩴ ᩈᨾ᩠ᨾᩣᩈᨾ᩠ᨻᩮᩣᨵᩥᩴ ᩋᨽᩥᩈᨾ᩠ᨻᩩᨴ᩠ᨵᩮᩣ’’’ᨲᩥ.

᪑᪔᪗. ᨲᨲᩕᨸᩥ ᩈᩩᨴᩴ ᨽᨣᩅᩣ ᨶᩣᩊᨶ᩠ᨴᩣᨿᩴ ᩅᩥᩉᩁᨶ᩠ᨲᩮᩣ ᨸᩣᩅᩣᩁᩥᨠᨾ᩠ᨻᩅᨶᩮ ᩑᨲᨴᩮᩅ ᨻᩉᩩᩃᩴ ᨽᩥᨠ᩠ᨡᩪᨶᩴ ᨵᨾ᩠ᨾᩥᩴ ᨠᨳᩴ ᨠᩁᩮᩣᨲᩥ – ‘‘ᩍᨲᩥ ᩈᩦᩃᩴ, ᩍᨲᩥ ᩈᨾᩣᨵᩥ, ᩍᨲᩥ ᨸᨬ᩠ᨬᩣ. ᩈᩦᩃᨸᩁᩥᨽᩣᩅᩥᨲᩮᩣ ᩈᨾᩣᨵᩥ ᨾᩉᨸ᩠ᨹᩃᩮᩣ ᩉᩮᩣᨲᩥ ᨾᩉᩣᨶᩥᩈᩴᩈᩮᩣ. ᩈᨾᩣᨵᩥᨸᩁᩥᨽᩣᩅᩥᨲᩣ ᨸᨬ᩠ᨬᩣ ᨾᩉᨸ᩠ᨹᩃᩣ ᩉᩮᩣᨲᩥ ᨾᩉᩣᨶᩥᩈᩴᩈᩣ. ᨸᨬ᩠ᨬᩣᨸᩁᩥᨽᩣᩅᩥᨲᩴ ᨧᩥᨲ᩠ᨲᩴ ᩈᨾ᩠ᨾᨴᩮᩅ ᩌᩈᩅᩮᩉᩥ ᩅᩥᨾᩩᨧ᩠ᨧᨲᩥ, ᩈᩮᨿ᩠ᨿᨳᩥᨴᩴ – ᨠᩣᨾᩣᩈᩅᩣ, ᨽᩅᩣᩈᩅᩣ, ᩋᩅᩥᨩ᩠ᨩᩣᩈᩅᩣ’’ᨲᩥ.

ᨴᩩᩔᩦᩃᩌᨴᩦᨶᩅᩣ

᪑᪔᪘. ᩋᨳ ᨡᩮᩣ ᨽᨣᩅᩣ ᨶᩣᩊᨶ᩠ᨴᩣᨿᩴ ᨿᨳᩣᨽᩥᩁᨶ᩠ᨲᩴ ᩅᩥᩉᩁᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩌᨿᩣᨾᩣᨶᨶ᩠ᨴ, ᨿᩮᨶ ᨸᩣᨭᩃᩥᨣᩣᨾᩮᩣ ᨲᩮᨶᩩᨸᩈᨦ᩠ᨠᨾᩥᩔᩣᨾᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ. ᩋᨳ ᨡᩮᩣ ᨽᨣᩅᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨿᩮᨶ ᨸᩣᨭᩃᩥᨣᩣᨾᩮᩣ ᨲᨴᩅᩈᩁᩥ. ᩋᩔᩮᩣᩈᩩᩴ ᨡᩮᩣ ᨸᩣᨭᩃᩥᨣᩣᨾᩥᨠᩣ ᩏᨸᩣᩈᨠᩣ – ‘‘ᨽᨣᩅᩣ ᨠᩥᩁ ᨸᩣᨭᩃᩥᨣᩣᨾᩴ ᩋᨶᩩᨸ᩠ᨸᨲ᩠ᨲᩮᩣ’’ᨲᩥ. ᩋᨳ ᨡᩮᩣ ᨸᩣᨭᩃᩥᨣᩣᨾᩥᨠᩣ ᩏᨸᩣᩈᨠᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩣ ᨡᩮᩣ ᨸᩣᨭᩃᩥᨣᩣᨾᩥᨠᩣ ᩏᨸᩣᩈᨠᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧᩩᩴ – ‘‘ᩋᨵᩥᩅᩣᩈᩮᨲᩩ ᨶᩮᩣ, ᨽᨶ᩠ᨲᩮ, ᨽᨣᩅᩣ ᩌᩅᩈᨳᩣᨣᩣᩁ’’ᨶ᩠ᨲᩥ. ᩋᨵᩥᩅᩣᩈᩮᩈᩥ ᨽᨣᩅᩣ ᨲᩩᨱ᩠ᩉᩦᨽᩣᩅᩮᨶ. ᩋᨳ ᨡᩮᩣ ᨸᩣᨭᩃᩥᨣᩣᨾᩥᨠᩣ ᩏᨸᩣᩈᨠᩣ ᨽᨣᩅᨲᩮᩣ ᩋᨵᩥᩅᩣᩈᨶᩴ ᩅᩥᨴᩥᨲ᩠ᩅᩣ ᩏᨭ᩠ᨮᩣᨿᩣᩈᨶᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨿᩮᨶ ᩌᩅᩈᨳᩣᨣᩣᩁᩴ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᩈᨻ᩠ᨻᩈᨶ᩠ᨳᩁᩥᩴ [ᩈᨻ᩠ᨻᩈᨶ᩠ᨳᩁᩥᨲᩴ ᩈᨲ᩠ᨳᨲᩴ (ᩈ᩠ᨿᩣ.), ᩈᨻ᩠ᨻᩈᨶ᩠ᨳᩁᩥᩴ ᩈᨶ᩠ᨳᨲᩴ (ᨠ.)] ᩌᩅᩈᨳᩣᨣᩣᩁᩴ ᩈᨶ᩠ᨳᩁᩥᨲ᩠ᩅᩣ ᩌᩈᨶᩣᨶᩥ ᨸᨬ᩠ᨬᨸᩮᨲ᩠ᩅᩣ ᩏᨴᨠᨾᨱᩥᨠᩴ ᨸᨲᩥᨭ᩠ᨮᩣᨸᩮᨲ᩠ᩅᩣ ᨲᩮᩃᨸᨴᩦᨸᩴ ᩌᩁᩮᩣᨸᩮᨲ᩠ᩅᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ, ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩴᩈᩩ. ᩑᨠᨾᨶ᩠ᨲᩴ ᨮᩥᨲᩣ ᨡᩮᩣ ᨸᩣᨭᩃᩥᨣᩣᨾᩥᨠᩣ ᩏᨸᩣᩈᨠᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧᩩᩴ – ‘‘ᩈᨻ᩠ᨻᩈᨶ᩠ᨳᩁᩥᩈᨶ᩠ᨳᨲᩴ [ᩈᨻ᩠ᨻᩈᨶ᩠ᨳᩁᩥᩴ ᩈᨶ᩠ᨳᨲᩴ (ᩈᩦ. ᩈ᩠ᨿᩣ. ᨸᩦ. ᨠ.)], ᨽᨶ᩠ᨲᩮ, ᩌᩅᩈᨳᩣᨣᩣᩁᩴ, ᩌᩈᨶᩣᨶᩥ ᨸᨬ᩠ᨬᨲ᩠ᨲᩣᨶᩥ, ᩏᨴᨠᨾᨱᩥᨠᩮᩣ ᨸᨲᩥᨭ᩠ᨮᩣᨸᩥᨲᩮᩣ, ᨲᩮᩃᨸᨴᩦᨸᩮᩣ ᩌᩁᩮᩣᨸᩥᨲᩮᩣ; ᨿᩔᨴᩣᨶᩥ, ᨽᨶ᩠ᨲᩮ, ᨽᨣᩅᩣ ᨠᩣᩃᩴ ᨾᨬ᩠ᨬᨲᩦ’’ᨲᩥ. ᩋᨳ ᨡᩮᩣ ᨽᨣᩅᩣ ᩈᩣᨿᨶ᩠ᩉᩈᨾᨿᩴ [ᩍᨴᩴ ᨸᨴᩴ ᩅᩥᨶᨿᨾᩉᩣᩅᨣ᩠ᨣ ᨶ ᨴᩥᩔᨲᩥ]. ᨶᩥᩅᩣᩈᩮᨲ᩠ᩅᩣ ᨸᨲ᩠ᨲᨧᩦᩅᩁᨾᩣᨴᩣᨿ ᩈᨴ᩠ᨵᩥᩴ ᨽᩥᨠ᩠ᨡᩩᩈᨦ᩠ᨥᩮᨶ ᨿᩮᨶ ᩌᩅᩈᨳᩣᨣᩣᩁᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨸᩣᨴᩮ ᨸᨠ᩠ᨡᩣᩃᩮᨲ᩠ᩅᩣ ᩌᩅᩈᨳᩣᨣᩣᩁᩴ ᨸᩅᩥᩈᩥᨲ᩠ᩅᩣ ᨾᨩ᩠ᨫᩥᨾᩴ ᨳᨾ᩠ᨽᩴ ᨶᩥᩔᩣᨿ ᨸᩩᩁᨲ᩠ᨳᩣᨽᩥᨾᩩᨡᩮᩣ [ᨸᩩᩁᨲ᩠ᨳᩥᨾᩣᨽᩥᨾᩩᨡᩮᩣ (ᨠ.)] ᨶᩥᩈᩦᨴᩥ. ᨽᩥᨠ᩠ᨡᩩᩈᨦ᩠ᨥᩮᩣᨸᩥ ᨡᩮᩣ ᨸᩣᨴᩮ ᨸᨠ᩠ᨡᩣᩃᩮᨲ᩠ᩅᩣ ᩌᩅᩈᨳᩣᨣᩣᩁᩴ ᨸᩅᩥᩈᩥᨲ᩠ᩅᩣ ᨸᨧ᩠ᨨᩥᨾᩴ ᨽᩥᨲ᩠ᨲᩥᩴ ᨶᩥᩔᩣᨿ ᨸᩩᩁᨲ᩠ᨳᩣᨽᩥᨾᩩᨡᩮᩣ ᨶᩥᩈᩦᨴᩥ ᨽᨣᩅᨶ᩠ᨲᨾᩮᩅ ᨸᩩᩁᨠ᩠ᨡᨲ᩠ᩅᩣ. ᨸᩣᨭᩃᩥᨣᩣᨾᩥᨠᩣᨸᩥ ᨡᩮᩣ ᩏᨸᩣᩈᨠᩣ ᨸᩣᨴᩮ ᨸᨠ᩠ᨡᩣᩃᩮᨲ᩠ᩅᩣ ᩌᩅᩈᨳᩣᨣᩣᩁᩴ ᨸᩅᩥᩈᩥᨲ᩠ᩅᩣ ᨸᩩᩁᨲ᩠ᨳᩥᨾᩴ ᨽᩥᨲ᩠ᨲᩥᩴ ᨶᩥᩔᩣᨿ ᨸᨧ᩠ᨨᩥᨾᩣᨽᩥᨾᩩᨡᩣ ᨶᩥᩈᩦᨴᩥᩴᩈᩩ ᨽᨣᩅᨶ᩠ᨲᨾᩮᩅ ᨸᩩᩁᨠ᩠ᨡᨲ᩠ᩅᩣ.

᪑᪔᪙. ᩋᨳ ᨡᩮᩣ ᨽᨣᩅᩣ ᨸᩣᨭᩃᩥᨣᩣᨾᩥᨠᩮ ᩏᨸᩣᩈᨠᩮ ᩌᨾᨶ᩠ᨲᩮᩈᩥ – ‘‘ᨸᨬ᩠ᨧᩥᨾᩮ, ᨣᩉᨸᨲᨿᩮᩣ, ᩌᨴᩦᨶᩅᩣ ᨴᩩᩔᩦᩃᩔ ᩈᩦᩃᩅᩥᨸᨲ᩠ᨲᩥᨿᩣ. ᨠᨲᨾᩮ ᨸᨬ᩠ᨧ? ᩍᨵ, ᨣᩉᨸᨲᨿᩮᩣ, ᨴᩩᩔᩦᩃᩮᩣ ᩈᩦᩃᩅᩥᨸᨶ᩠ᨶᩮᩣ ᨸᨾᩣᨴᩣᨵᩥᨠᩁᨱᩴ ᨾᩉᨲᩥᩴ ᨽᩮᩣᨣᨩᩣᨶᩥᩴ ᨶᩥᨣᨧ᩠ᨨᨲᩥ. ᩋᨿᩴ ᨸᨮᨾᩮᩣ ᩌᨴᩦᨶᩅᩮᩣ ᨴᩩᩔᩦᩃᩔ ᩈᩦᩃᩅᩥᨸᨲ᩠ᨲᩥᨿᩣ.

‘‘ᨸᩩᨶ ᨧᨸᩁᩴ, ᨣᩉᨸᨲᨿᩮᩣ, ᨴᩩᩔᩦᩃᩔ ᩈᩦᩃᩅᩥᨸᨶ᩠ᨶᩔ ᨸᩣᨸᨠᩮᩣ ᨠᩥᨲ᩠ᨲᩥᩈᨴ᩠ᨴᩮᩣ ᩋᨻ᩠ᨽᩩᨣ᩠ᨣᨧ᩠ᨨᨲᩥ. ᩋᨿᩴ ᨴᩩᨲᩥᨿᩮᩣ ᩌᨴᩦᨶᩅᩮᩣ ᨴᩩᩔᩦᩃᩔ ᩈᩦᩃᩅᩥᨸᨲ᩠ᨲᩥᨿᩣ.

‘‘ᨸᩩᨶ ᨧᨸᩁᩴ, ᨣᩉᨸᨲᨿᩮᩣ, ᨴᩩᩔᩦᩃᩮᩣ ᩈᩦᩃᩅᩥᨸᨶ᩠ᨶᩮᩣ ᨿᨬ᩠ᨬᨴᩮᩅ ᨸᩁᩥᩈᩴ ᩏᨸᩈᨦ᩠ᨠᨾᨲᩥ – ᨿᨴᩥ ᨡᨲ᩠ᨲᩥᨿᨸᩁᩥᩈᩴ ᨿᨴᩥ ᨻᩕᩣᩉ᩠ᨾᨱᨸᩁᩥᩈᩴ ᨿᨴᩥ ᨣᩉᨸᨲᩥᨸᩁᩥᩈᩴ ᨿᨴᩥ ᩈᨾᨱᨸᩁᩥᩈᩴ – ᩋᩅᩥᩈᩣᩁᨴᩮᩣ ᩏᨸᩈᨦ᩠ᨠᨾᨲᩥ ᨾᨦ᩠ᨠᩩᨽᩪᨲᩮᩣ. ᩋᨿᩴ ᨲᨲᩥᨿᩮᩣ ᩌᨴᩦᨶᩅᩮᩣ ᨴᩩᩔᩦᩃᩔ ᩈᩦᩃᩅᩥᨸᨲ᩠ᨲᩥᨿᩣ.

‘‘ᨸᩩᨶ ᨧᨸᩁᩴ, ᨣᩉᨸᨲᨿᩮᩣ, ᨴᩩᩔᩦᩃᩮᩣ ᩈᩦᩃᩅᩥᨸᨶ᩠ᨶᩮᩣ ᩈᨾ᩠ᨾᩪᩊ᩠ᩉᩮᩣ ᨠᩣᩃᨦ᩠ᨠᩁᩮᩣᨲᩥ. ᩋᨿᩴ ᨧᨲᩩᨲ᩠ᨳᩮᩣ ᩌᨴᩦᨶᩅᩮᩣ ᨴᩩᩔᩦᩃᩔ ᩈᩦᩃᩅᩥᨸᨲ᩠ᨲᩥᨿᩣ.

‘‘ᨸᩩᨶ ᨧᨸᩁᩴ, ᨣᩉᨸᨲᨿᩮᩣ, ᨴᩩᩔᩦᩃᩮᩣ ᩈᩦᩃᩅᩥᨸᨶ᩠ᨶᩮᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨩ᩠ᨩᨲᩥ. ᩋᨿᩴ ᨸᨬ᩠ᨧᨾᩮᩣ ᩌᨴᩦᨶᩅᩮᩣ ᨴᩩᩔᩦᩃᩔ ᩈᩦᩃᩅᩥᨸᨲ᩠ᨲᩥᨿᩣ. ᩍᨾᩮ ᨡᩮᩣ, ᨣᩉᨸᨲᨿᩮᩣ, ᨸᨬ᩠ᨧ ᩌᨴᩦᨶᩅᩣ ᨴᩩᩔᩦᩃᩔ ᩈᩦᩃᩅᩥᨸᨲ᩠ᨲᩥᨿᩣ.

ᩈᩦᩃᩅᨶ᩠ᨲᩌᨶᩥᩈᩴᩈ

᪑᪕᪐. ‘‘ᨸᨬ᩠ᨧᩥᨾᩮ, ᨣᩉᨸᨲᨿᩮᩣ, ᩌᨶᩥᩈᩴᩈᩣ ᩈᩦᩃᩅᨲᩮᩣ ᩈᩦᩃᩈᨾ᩠ᨸᨴᩣᨿ. ᨠᨲᨾᩮ ᨸᨬ᩠ᨧ? ᩍᨵ, ᨣᩉᨸᨲᨿᩮᩣ, ᩈᩦᩃᩅᩣ ᩈᩦᩃᩈᨾ᩠ᨸᨶ᩠ᨶᩮᩣ ᩋᨸ᩠ᨸᨾᩣᨴᩣᨵᩥᨠᩁᨱᩴ ᨾᩉᨶ᩠ᨲᩴ ᨽᩮᩣᨣᨠ᩠ᨡᨶ᩠ᨵᩴ ᩋᨵᩥᨣᨧ᩠ᨨᨲᩥ. ᩋᨿᩴ ᨸᨮᨾᩮᩣ ᩌᨶᩥᩈᩴᩈᩮᩣ ᩈᩦᩃᩅᨲᩮᩣ ᩈᩦᩃᩈᨾ᩠ᨸᨴᩣᨿ.

‘‘ᨸᩩᨶ ᨧᨸᩁᩴ, ᨣᩉᨸᨲᨿᩮᩣ, ᩈᩦᩃᩅᨲᩮᩣ ᩈᩦᩃᩈᨾ᩠ᨸᨶ᩠ᨶᩔ ᨠᩃ᩠ᨿᩣᨱᩮᩣ ᨠᩥᨲ᩠ᨲᩥᩈᨴ᩠ᨴᩮᩣ ᩋᨻ᩠ᨽᩩᨣ᩠ᨣᨧ᩠ᨨᨲᩥ. ᩋᨿᩴ ᨴᩩᨲᩥᨿᩮᩣ ᩌᨶᩥᩈᩴᩈᩮᩣ ᩈᩦᩃᩅᨲᩮᩣ ᩈᩦᩃᩈᨾ᩠ᨸᨴᩣᨿ.

‘‘ᨸᩩᨶ ᨧᨸᩁᩴ, ᨣᩉᨸᨲᨿᩮᩣ, ᩈᩦᩃᩅᩣ ᩈᩦᩃᩈᨾ᩠ᨸᨶ᩠ᨶᩮᩣ ᨿᨬ᩠ᨬᨴᩮᩅ ᨸᩁᩥᩈᩴ ᩏᨸᩈᨦ᩠ᨠᨾᨲᩥ – ᨿᨴᩥ ᨡᨲ᩠ᨲᩥᨿᨸᩁᩥᩈᩴ ᨿᨴᩥ ᨻᩕᩣᩉ᩠ᨾᨱᨸᩁᩥᩈᩴ ᨿᨴᩥ ᨣᩉᨸᨲᩥᨸᩁᩥᩈᩴ ᨿᨴᩥ ᩈᨾᨱᨸᩁᩥᩈᩴ ᩅᩥᩈᩣᩁᨴᩮᩣ ᩏᨸᩈᨦ᩠ᨠᨾᨲᩥ ᩋᨾᨦ᩠ᨠᩩᨽᩪᨲᩮᩣ. ᩋᨿᩴ ᨲᨲᩥᨿᩮᩣ ᩌᨶᩥᩈᩴᩈᩮᩣ ᩈᩦᩃᩅᨲᩮᩣ ᩈᩦᩃᩈᨾ᩠ᨸᨴᩣᨿ.

‘‘ᨸᩩᨶ ᨧᨸᩁᩴ, ᨣᩉᨸᨲᨿᩮᩣ, ᩈᩦᩃᩅᩣ ᩈᩦᩃᩈᨾ᩠ᨸᨶ᩠ᨶᩮᩣ ᩋᩈᨾ᩠ᨾᩪᩊ᩠ᩉᩮᩣ ᨠᩣᩃᨦ᩠ᨠᩁᩮᩣᨲᩥ. ᩋᨿᩴ ᨧᨲᩩᨲ᩠ᨳᩮᩣ ᩌᨶᩥᩈᩴᩈᩮᩣ ᩈᩦᩃᩅᨲᩮᩣ ᩈᩦᩃᩈᨾ᩠ᨸᨴᩣᨿ.

‘‘ᨸᩩᨶ ᨧᨸᩁᩴ, ᨣᩉᨸᨲᨿᩮᩣ, ᩈᩦᩃᩅᩣ ᩈᩦᩃᩈᨾ᩠ᨸᨶ᩠ᨶᩮᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨲᩥ. ᩋᨿᩴ ᨸᨬ᩠ᨧᨾᩮᩣ ᩌᨶᩥᩈᩴᩈᩮᩣ ᩈᩦᩃᩅᨲᩮᩣ ᩈᩦᩃᩈᨾ᩠ᨸᨴᩣᨿ. ᩍᨾᩮ ᨡᩮᩣ, ᨣᩉᨸᨲᨿᩮᩣ, ᨸᨬ᩠ᨧ ᩌᨶᩥᩈᩴᩈᩣ ᩈᩦᩃᩅᨲᩮᩣ ᩈᩦᩃᩈᨾ᩠ᨸᨴᩣᨿᩣ’’ᨲᩥ.

᪑᪕᪑. ᩋᨳ ᨡᩮᩣ ᨽᨣᩅᩣ ᨸᩣᨭᩃᩥᨣᩣᨾᩥᨠᩮ ᩏᨸᩣᩈᨠᩮ ᨻᩉᩩᨴᩮᩅ ᩁᨲ᩠ᨲᩥᩴ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᨲ᩠ᩅᩣ ᩈᨾᩣᨴᨸᩮᨲ᩠ᩅᩣ ᩈᨾᩩᨲ᩠ᨲᩮᨩᩮᨲ᩠ᩅᩣ ᩈᨾ᩠ᨸᩉᩴᩈᩮᨲ᩠ᩅᩣ ᩏᨿ᩠ᨿᩮᩣᨩᩮᩈᩥ – ‘‘ᩋᨽᩥᨠ᩠ᨠᨶ᩠ᨲᩣ ᨡᩮᩣ, ᨣᩉᨸᨲᨿᩮᩣ, ᩁᨲ᩠ᨲᩥ, ᨿᩔᨴᩣᨶᩥ ᨲᩩᨾ᩠ᩉᩮ ᨠᩣᩃᩴ ᨾᨬ᩠ᨬᨳᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᨸᩣᨭᩃᩥᨣᩣᨾᩥᨠᩣ ᩏᨸᩣᩈᨠᩣ ᨽᨣᩅᨲᩮᩣ ᨸᨭᩥᩔᩩᨲ᩠ᩅᩣ ᩏᨭ᩠ᨮᩣᨿᩣᩈᨶᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨸᨠ᩠ᨠᨾᩥᩴᩈᩩ. ᩋᨳ ᨡᩮᩣ ᨽᨣᩅᩣ ᩋᨧᩥᩁᨸᨠ᩠ᨠᨶ᩠ᨲᩮᩈᩩ ᨸᩣᨭᩃᩥᨣᩣᨾᩥᨠᩮᩈᩩ ᩏᨸᩣᩈᨠᩮᩈᩩ ᩈᩩᨬ᩠ᨬᩣᨣᩣᩁᩴ ᨸᩣᩅᩥᩈᩥ.

ᨸᩣᨭᩃᩥᨸᩩᨲ᩠ᨲᨶᨣᩁᨾᩣᨸᨶᩴ

᪑᪕᪒. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩈᩩᨶᩥᨵᩅᩔᨠᩣᩁᩣ [ᩈᩩᨶᩦᨵᩅᩔᨠᩣᩁᩣ (ᩈ᩠ᨿᩣ. ᨠ.)] ᨾᨣᨵᨾᩉᩣᨾᨲ᩠ᨲᩣ ᨸᩣᨭᩃᩥᨣᩣᨾᩮ ᨶᨣᩁᩴ ᨾᩣᨸᩮᨶ᩠ᨲᩥ ᩅᨩ᩠ᨩᩦᨶᩴ ᨸᨭᩥᨻᩣᩉᩣᨿ. ᨲᩮᨶ ᩈᨾᨿᩮᨶ ᩈᨾ᩠ᨻᩉᩩᩃᩣ ᨴᩮᩅᨲᩣᨿᩮᩣ ᩈᩉᩔᩮᩅ [ᩈᩉᩔᩔᩮᩅ (ᩈᩦ. ᨸᩦ. ᨠ.), ᩈᩉᩔᩈᩮᩅ (ᨭᩦᨠᩣᨿᩴ ᨸᩣᨮᨶ᩠ᨲᩁᩴ), ᩈᩉᩔᩈᩉᩔᩮᩅ (ᩏᨴᩣᨶᨭ᩠ᨮᨠᨳᩣ)] ᨸᩣᨭᩃᩥᨣᩣᨾᩮ ᩅᨲ᩠ᨳᩪᨶᩥ ᨸᩁᩥᨣ᩠ᨣᨱ᩠ᩉᨶ᩠ᨲᩥ. ᨿᩈ᩠ᨾᩥᩴ ᨸᨴᩮᩈᩮ ᨾᩉᩮᩈᨠ᩠ᨡᩣ ᨴᩮᩅᨲᩣ ᩅᨲ᩠ᨳᩪᨶᩥ ᨸᩁᩥᨣ᩠ᨣᨱ᩠ᩉᨶ᩠ᨲᩥ, ᨾᩉᩮᩈᨠ᩠ᨡᩣᨶᩴ ᨲᨲ᩠ᨳ ᩁᨬ᩠ᨬᩴ ᩁᩣᨩᨾᩉᩣᨾᨲ᩠ᨲᩣᨶᩴ ᨧᩥᨲ᩠ᨲᩣᨶᩥ ᨶᨾᨶ᩠ᨲᩥ ᨶᩥᩅᩮᩈᨶᩣᨶᩥ ᨾᩣᨸᩮᨲᩩᩴ. ᨿᩈ᩠ᨾᩥᩴ ᨸᨴᩮᩈᩮ ᨾᨩ᩠ᨫᩥᨾᩣ ᨴᩮᩅᨲᩣ ᩅᨲ᩠ᨳᩪᨶᩥ ᨸᩁᩥᨣ᩠ᨣᨱ᩠ᩉᨶ᩠ᨲᩥ, ᨾᨩ᩠ᨫᩥᨾᩣᨶᩴ ᨲᨲ᩠ᨳ ᩁᨬ᩠ᨬᩴ ᩁᩣᨩᨾᩉᩣᨾᨲ᩠ᨲᩣᨶᩴ ᨧᩥᨲ᩠ᨲᩣᨶᩥ ᨶᨾᨶ᩠ᨲᩥ ᨶᩥᩅᩮᩈᨶᩣᨶᩥ ᨾᩣᨸᩮᨲᩩᩴ. ᨿᩈ᩠ᨾᩥᩴ ᨸᨴᩮᩈᩮ ᨶᩦᨧᩣ ᨴᩮᩅᨲᩣ ᩅᨲ᩠ᨳᩪᨶᩥ ᨸᩁᩥᨣ᩠ᨣᨱ᩠ᩉᨶ᩠ᨲᩥ, ᨶᩦᨧᩣᨶᩴ ᨲᨲ᩠ᨳ ᩁᨬ᩠ᨬᩴ ᩁᩣᨩᨾᩉᩣᨾᨲ᩠ᨲᩣᨶᩴ ᨧᩥᨲ᩠ᨲᩣᨶᩥ ᨶᨾᨶ᩠ᨲᩥ ᨶᩥᩅᩮᩈᨶᩣᨶᩥ ᨾᩣᨸᩮᨲᩩᩴ. ᩋᨴ᩠ᨴᩈᩣ ᨡᩮᩣ ᨽᨣᩅᩣ ᨴᩥᨻ᩠ᨻᩮᨶ ᨧᨠ᩠ᨡᩩᨶᩣ ᩅᩥᩈᩩᨴ᩠ᨵᩮᨶ ᩋᨲᩥᨠ᩠ᨠᨶ᩠ᨲᨾᩣᨶᩩᩈᨠᩮᨶ ᨲᩣ ᨴᩮᩅᨲᩣᨿᩮᩣ ᩈᩉᩔᩮᩅ ᨸᩣᨭᩃᩥᨣᩣᨾᩮ ᩅᨲ᩠ᨳᩪᨶᩥ ᨸᩁᩥᨣ᩠ᨣᨱ᩠ᩉᨶ᩠ᨲᩥᨿᩮᩣ. ᩋᨳ ᨡᩮᩣ ᨽᨣᩅᩣ ᩁᨲ᩠ᨲᩥᨿᩣ ᨸᨧ᩠ᨧᩪᩈᩈᨾᨿᩴ ᨸᨧ᩠ᨧᩩᨭ᩠ᨮᩣᨿ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᨠᩮ ᨶᩩ ᨡᩮᩣ [ᨠᩮᩣ ᨶᩩ ᨡᩮᩣ (ᩈᩦ. ᩈ᩠ᨿᩣ. ᨸᩦ. ᨠ.)], ᩌᨶᨶ᩠ᨴ, ᨸᩣᨭᩃᩥᨣᩣᨾᩮ ᨶᨣᩁᩴ ᨾᩣᨸᩮᨶ᩠ᨲᩦ’’ᨲᩥ [ᨾᩣᨸᩮᨲᩦᨲᩥ (ᩈᩦ. ᩈ᩠ᨿᩣ. ᨸᩦ. ᨠ.)]? ‘‘ᩈᩩᨶᩥᨵᩅᩔᨠᩣᩁᩣ, ᨽᨶ᩠ᨲᩮ, ᨾᨣᨵᨾᩉᩣᨾᨲ᩠ᨲᩣ ᨸᩣᨭᩃᩥᨣᩣᨾᩮ ᨶᨣᩁᩴ ᨾᩣᨸᩮᨶ᩠ᨲᩥ ᩅᨩ᩠ᨩᩦᨶᩴ ᨸᨭᩥᨻᩣᩉᩣᨿᩣ’’ᨲᩥ. ‘‘ᩈᩮᨿ᩠ᨿᨳᩣᨸᩥ, ᩌᨶᨶ᩠ᨴ, ᨴᩮᩅᩮᩉᩥ ᨲᩣᩅᨲᩥᩴᩈᩮᩉᩥ ᩈᨴ᩠ᨵᩥᩴ ᨾᨶ᩠ᨲᩮᨲ᩠ᩅᩣ, ᩑᩅᨾᩮᩅ ᨡᩮᩣ, ᩌᨶᨶ᩠ᨴ, ᩈᩩᨶᩥᨵᩅᩔᨠᩣᩁᩣ ᨾᨣᨵᨾᩉᩣᨾᨲ᩠ᨲᩣ ᨸᩣᨭᩃᩥᨣᩣᨾᩮ ᨶᨣᩁᩴ ᨾᩣᨸᩮᨶ᩠ᨲᩥ ᩅᨩ᩠ᨩᩦᨶᩴ ᨸᨭᩥᨻᩣᩉᩣᨿ. ᩍᨵᩣᩉᩴ, ᩌᨶᨶ᩠ᨴ, ᩋᨴ᩠ᨴᩈᩴ ᨴᩥᨻ᩠ᨻᩮᨶ ᨧᨠ᩠ᨡᩩᨶᩣ ᩅᩥᩈᩩᨴ᩠ᨵᩮᨶ ᩋᨲᩥᨠ᩠ᨠᨶ᩠ᨲᨾᩣᨶᩩᩈᨠᩮᨶ ᩈᨾ᩠ᨻᩉᩩᩃᩣ ᨴᩮᩅᨲᩣᨿᩮᩣ ᩈᩉᩔᩮᩅ ᨸᩣᨭᩃᩥᨣᩣᨾᩮ ᩅᨲ᩠ᨳᩪᨶᩥ ᨸᩁᩥᨣ᩠ᨣᨱ᩠ᩉᨶ᩠ᨲᩥᨿᩮᩣ. ᨿᩈ᩠ᨾᩥᩴ, ᩌᨶᨶ᩠ᨴ, ᨸᨴᩮᩈᩮ ᨾᩉᩮᩈᨠ᩠ᨡᩣ ᨴᩮᩅᨲᩣ ᩅᨲ᩠ᨳᩪᨶᩥ ᨸᩁᩥᨣ᩠ᨣᨱ᩠ᩉᨶ᩠ᨲᩥ, ᨾᩉᩮᩈᨠ᩠ᨡᩣᨶᩴ ᨲᨲ᩠ᨳ ᩁᨬ᩠ᨬᩴ ᩁᩣᨩᨾᩉᩣᨾᨲ᩠ᨲᩣᨶᩴ ᨧᩥᨲ᩠ᨲᩣᨶᩥ ᨶᨾᨶ᩠ᨲᩥ ᨶᩥᩅᩮᩈᨶᩣᨶᩥ ᨾᩣᨸᩮᨲᩩᩴ. ᨿᩈ᩠ᨾᩥᩴ ᨸᨴᩮᩈᩮ ᨾᨩ᩠ᨫᩥᨾᩣ ᨴᩮᩅᨲᩣ ᩅᨲ᩠ᨳᩪᨶᩥ ᨸᩁᩥᨣ᩠ᨣᨱ᩠ᩉᨶ᩠ᨲᩥ, ᨾᨩ᩠ᨫᩥᨾᩣᨶᩴ ᨲᨲ᩠ᨳ ᩁᨬ᩠ᨬᩴ ᩁᩣᨩᨾᩉᩣᨾᨲ᩠ᨲᩣᨶᩴ ᨧᩥᨲ᩠ᨲᩣᨶᩥ ᨶᨾᨶ᩠ᨲᩥ ᨶᩥᩅᩮᩈᨶᩣᨶᩥ ᨾᩣᨸᩮᨲᩩᩴ. ᨿᩈ᩠ᨾᩥᩴ ᨸᨴᩮᩈᩮ ᨶᩦᨧᩣ ᨴᩮᩅᨲᩣ ᩅᨲ᩠ᨳᩪᨶᩥ ᨸᩁᩥᨣ᩠ᨣᨱ᩠ᩉᨶ᩠ᨲᩥ, ᨶᩦᨧᩣᨶᩴ ᨲᨲ᩠ᨳ ᩁᨬ᩠ᨬᩴ ᩁᩣᨩᨾᩉᩣᨾᨲ᩠ᨲᩣᨶᩴ ᨧᩥᨲ᩠ᨲᩣᨶᩥ ᨶᨾᨶ᩠ᨲᩥ ᨶᩥᩅᩮᩈᨶᩣᨶᩥ ᨾᩣᨸᩮᨲᩩᩴ. ᨿᩣᩅᨲᩣ, ᩌᨶᨶ᩠ᨴ, ᩋᩁᩥᨿᩴ ᩌᨿᨲᨶᩴ ᨿᩣᩅᨲᩣ ᩅᨱᩥᨸ᩠ᨸᨳᩮᩣ ᩍᨴᩴ ᩋᨣ᩠ᨣᨶᨣᩁᩴ ᨽᩅᩥᩔᨲᩥ ᨸᩣᨭᩃᩥᨸᩩᨲ᩠ᨲᩴ ᨸᩩᨭᨽᩮᨴᨶᩴ. ᨸᩣᨭᩃᩥᨸᩩᨲ᩠ᨲᩔ ᨡᩮᩣ, ᩌᨶᨶ᩠ᨴ, ᨲᨿᩮᩣ ᩋᨶ᩠ᨲᩁᩣᨿᩣ ᨽᩅᩥᩔᨶ᩠ᨲᩥ – ᩋᨣ᩠ᨣᩥᨲᩮᩣ ᩅᩣ ᩏᨴᨠᨲᩮᩣ ᩅᩣ ᨾᩥᨳᩩᨽᩮᨴᩣ ᩅᩣ’’ᨲᩥ.

᪑᪕᪓. ᩋᨳ ᨡᩮᩣ ᩈᩩᨶᩥᨵᩅᩔᨠᩣᩁᩣ ᨾᨣᨵᨾᩉᩣᨾᨲ᩠ᨲᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨲᩣ ᩈᨴ᩠ᨵᩥᩴ ᩈᨾ᩠ᨾᩮᩣᨴᩥᩴᩈᩩ, ᩈᨾ᩠ᨾᩮᩣᨴᨶᩦᨿᩴ ᨠᨳᩴ ᩈᩣᩁᨱᩦᨿᩴ ᩅᩦᨲᩥᩈᩣᩁᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩴᩈᩩ, ᩑᨠᨾᨶ᩠ᨲᩴ ᨮᩥᨲᩣ ᨡᩮᩣ ᩈᩩᨶᩥᨵᩅᩔᨠᩣᩁᩣ ᨾᨣᨵᨾᩉᩣᨾᨲ᩠ᨲᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧᩩᩴ – ‘‘ᩋᨵᩥᩅᩣᩈᩮᨲᩩ ᨶᩮᩣ ᨽᩅᩴ ᨣᩮᩣᨲᨾᩮᩣ ᩋᨩ᩠ᨩᨲᨶᩣᨿ ᨽᨲ᩠ᨲᩴ ᩈᨴ᩠ᨵᩥᩴ ᨽᩥᨠ᩠ᨡᩩᩈᨦ᩠ᨥᩮᨶᩣ’’ᨲᩥ. ᩋᨵᩥᩅᩣᩈᩮᩈᩥ ᨽᨣᩅᩣ ᨲᩩᨱ᩠ᩉᩦᨽᩣᩅᩮᨶ. ᩋᨳ ᨡᩮᩣ ᩈᩩᨶᩥᨵᩅᩔᨠᩣᩁᩣ ᨾᨣᨵᨾᩉᩣᨾᨲ᩠ᨲᩣ ᨽᨣᩅᨲᩮᩣ ᩋᨵᩥᩅᩣᩈᨶᩴ ᩅᩥᨴᩥᨲ᩠ᩅᩣ ᨿᩮᨶ ᩈᨠᩮᩣ ᩌᩅᩈᨳᩮᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᩈᨠᩮ ᩌᩅᩈᨳᩮ ᨸᨱᩦᨲᩴ ᨡᩣᨴᨶᩦᨿᩴ ᨽᩮᩣᨩᨶᩦᨿᩴ ᨸᨭᩥᨿᩣᨴᩣᨸᩮᨲ᩠ᩅᩣ ᨽᨣᩅᨲᩮᩣ ᨠᩣᩃᩴ ᩌᩁᩮᩣᨧᩣᨸᩮᩈᩩᩴ – ‘‘ᨠᩣᩃᩮᩣ, ᨽᩮᩣ ᨣᩮᩣᨲᨾ, ᨶᩥᨭ᩠ᨮᩥᨲᩴ ᨽᨲ᩠ᨲ’’ᨶ᩠ᨲᩥ.

ᩋᨳ ᨡᩮᩣ ᨽᨣᩅᩣ ᨸᩩᨻ᩠ᨻᨱ᩠ᩉᩈᨾᨿᩴ ᨶᩥᩅᩣᩈᩮᨲ᩠ᩅᩣ ᨸᨲ᩠ᨲᨧᩦᩅᩁᨾᩣᨴᩣᨿ ᩈᨴ᩠ᨵᩥᩴ ᨽᩥᨠ᩠ᨡᩩᩈᨦ᩠ᨥᩮᨶ ᨿᩮᨶ ᩈᩩᨶᩥᨵᩅᩔᨠᩣᩁᩣᨶᩴ ᨾᨣᨵᨾᩉᩣᨾᨲ᩠ᨲᩣᨶᩴ ᩌᩅᩈᨳᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨸᨬ᩠ᨬᨲ᩠ᨲᩮ ᩌᩈᨶᩮ ᨶᩥᩈᩦᨴᩥ. ᩋᨳ ᨡᩮᩣ ᩈᩩᨶᩥᨵᩅᩔᨠᩣᩁᩣ ᨾᨣᨵᨾᩉᩣᨾᨲ᩠ᨲᩣ ᨻᩩᨴ᩠ᨵᨸ᩠ᨸᨾᩩᨡᩴ ᨽᩥᨠ᩠ᨡᩩᩈᨦ᩠ᨥᩴ ᨸᨱᩦᨲᩮᨶ ᨡᩣᨴᨶᩦᨿᩮᨶ ᨽᩮᩣᨩᨶᩦᨿᩮᨶ ᩈᩉᨲ᩠ᨳᩣ ᩈᨶ᩠ᨲᨸ᩠ᨸᩮᩈᩩᩴ ᩈᨾ᩠ᨸᩅᩣᩁᩮᩈᩩᩴ. ᩋᨳ ᨡᩮᩣ ᩈᩩᨶᩥᨵᩅᩔᨠᩣᩁᩣ ᨾᨣᨵᨾᩉᩣᨾᨲ᩠ᨲᩣ ᨽᨣᩅᨶ᩠ᨲᩴ ᨽᩩᨲ᩠ᨲᩣᩅᩥᩴ ᩒᨶᩦᨲᨸᨲ᩠ᨲᨸᩣᨱᩥᩴ ᩋᨬ᩠ᨬᨲᩁᩴ ᨶᩦᨧᩴ ᩌᩈᨶᩴ ᨣᩉᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮ ᨡᩮᩣ ᩈᩩᨶᩥᨵᩅᩔᨠᩣᩁᩮ ᨾᨣᨵᨾᩉᩣᨾᨲ᩠ᨲᩮ ᨽᨣᩅᩣ ᩍᨾᩣᩉᩥ ᨣᩣᨳᩣᩉᩥ ᩋᨶᩩᨾᩮᩣᨴᩥ –

‘‘ᨿᩈ᩠ᨾᩥᩴ ᨸᨴᩮᩈᩮ ᨠᨸ᩠ᨸᩮᨲᩥ, ᩅᩣᩈᩴ ᨸᨱ᩠ᨯᩥᨲᨩᩣᨲᩥᨿᩮᩣ;

ᩈᩦᩃᩅᨶ᩠ᨲᩮᨲ᩠ᨳ ᨽᩮᩣᨩᩮᨲ᩠ᩅᩣ, ᩈᨬ᩠ᨬᨲᩮ ᨻᩕᩉ᩠ᨾᨧᩣᩁᨿᩮᩣ [ᨻᩕᩉ᩠ᨾᨧᩣᩁᩥᨶᩮᩣ (ᩈ᩠ᨿᩣ.)].

‘‘ᨿᩣ ᨲᨲ᩠ᨳ ᨴᩮᩅᨲᩣ ᩌᩈᩩᩴ, ᨲᩣᩈᩴ ᨴᨠ᩠ᨡᩥᨱᨾᩣᨴᩥᩈᩮ;

ᨲᩣ ᨸᩪᨩᩥᨲᩣ ᨸᩪᨩᨿᨶ᩠ᨲᩥ [ᨸᩪᨩᩥᨲᩣ ᨸᩪᨩᨿᨶ᩠ᨲᩥ ᨶᩴ (ᨠ.)], ᨾᩣᨶᩥᨲᩣ ᨾᩣᨶᨿᨶ᩠ᨲᩥ ᨶᩴ.

‘‘ᨲᨲᩮᩣ ᨶᩴ ᩋᨶᩩᨠᨾ᩠ᨸᨶ᩠ᨲᩥ, ᨾᩣᨲᩣ ᨸᩩᨲ᩠ᨲᩴᩅ ᩒᩁᩈᩴ;

ᨴᩮᩅᨲᩣᨶᩩᨠᨾ᩠ᨸᩥᨲᩮᩣ ᨸᩮᩣᩈᩮᩣ, ᩈᨴᩣ ᨽᨴᩕᩣᨶᩥ ᨸᩔᨲᩦ’’ᨲᩥ.

ᩋᨳ ᨡᩮᩣ ᨽᨣᩅᩣ ᩈᩩᨶᩥᨵᩅᩔᨠᩣᩁᩮ ᨾᨣᨵᨾᩉᩣᨾᨲ᩠ᨲᩮ ᩍᨾᩣᩉᩥ ᨣᩣᨳᩣᩉᩥ ᩋᨶᩩᨾᩮᩣᨴᩥᨲ᩠ᩅᩣ ᩏᨭ᩠ᨮᩣᨿᩣᩈᨶᩣ ᨸᨠ᩠ᨠᩣᨾᩥ.

᪑᪕᪔. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩈᩩᨶᩥᨵᩅᩔᨠᩣᩁᩣ ᨾᨣᨵᨾᩉᩣᨾᨲ᩠ᨲᩣ ᨽᨣᩅᨶ᩠ᨲᩴ ᨸᩥᨭ᩠ᨮᩥᨲᩮᩣ ᨸᩥᨭ᩠ᨮᩥᨲᩮᩣ ᩋᨶᩩᨻᨶ᩠ᨵᩣ ᩉᩮᩣᨶ᩠ᨲᩥ – ‘‘ᨿᩮᨶᨩ᩠ᨩ ᩈᨾᨱᩮᩣ ᨣᩮᩣᨲᨾᩮᩣ ᨴ᩠ᩅᩣᩁᩮᨶ ᨶᩥᨠ᩠ᨡᨾᩥᩔᨲᩥ, ᨲᩴ ᨣᩮᩣᨲᨾᨴ᩠ᩅᩣᩁᩴ ᨶᩣᨾ ᨽᩅᩥᩔᨲᩥ. ᨿᩮᨶ ᨲᩥᨲ᩠ᨳᩮᨶ ᨣᨦ᩠ᨣᩴ ᨶᨴᩥᩴ ᨲᩁᩥᩔᨲᩥ, ᨲᩴ ᨣᩮᩣᨲᨾᨲᩥᨲ᩠ᨳᩴ ᨶᩣᨾ ᨽᩅᩥᩔᨲᩦ’’ᨲᩥ. ᩋᨳ ᨡᩮᩣ ᨽᨣᩅᩣ ᨿᩮᨶ ᨴ᩠ᩅᩣᩁᩮᨶ ᨶᩥᨠ᩠ᨡᨾᩥ, ᨲᩴ ᨣᩮᩣᨲᨾᨴ᩠ᩅᩣᩁᩴ ᨶᩣᨾ ᩋᩉᩮᩣᩈᩥ. ᩋᨳ ᨡᩮᩣ ᨽᨣᩅᩣ ᨿᩮᨶ ᨣᨦ᩠ᨣᩣ ᨶᨴᩦ ᨲᩮᨶᩩᨸᩈᨦ᩠ᨠᨾᩥ. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨣᨦ᩠ᨣᩣ ᨶᨴᩦ ᨸᩪᩁᩣ ᩉᩮᩣᨲᩥ ᩈᨾᨲᩥᨲ᩠ᨲᩥᨠᩣ ᨠᩣᨠᨸᩮᨿ᩠ᨿᩣ. ᩋᨸ᩠ᨸᩮᨠᨧ᩠ᨧᩮ ᨾᨶᩩᩔᩣ ᨶᩣᩅᩴ ᨸᩁᩥᨿᩮᩈᨶ᩠ᨲᩥ, ᩋᨸ᩠ᨸᩮᨠᨧ᩠ᨧᩮ ᩏᩊᩩᨾ᩠ᨸᩴ ᨸᩁᩥᨿᩮᩈᨶ᩠ᨲᩥ, ᩋᨸ᩠ᨸᩮᨠᨧ᩠ᨧᩮ ᨠᩩᩃ᩠ᩃᩴ ᨻᨶ᩠ᨵᨶ᩠ᨲᩥ ᩋᨸᩣᩁᩣ [ᨸᩣᩁᩣ (ᩈᩦ. ᩈ᩠ᨿᩣ. ᨠ.), ᩒᩁᩣ (ᩅᩥ. ᨾᩉᩣᩅᨣ᩠ᨣ)], ᨸᩣᩁᩴ ᨣᨶ᩠ᨲᩩᨠᩣᨾᩣ. ᩋᨳ ᨡᩮᩣ ᨽᨣᩅᩣ – ᩈᩮᨿ᩠ᨿᨳᩣᨸᩥ ᨶᩣᨾ ᨻᩃᩅᩣ ᨸᩩᩁᩥᩈᩮᩣ ᩈᨾᩥᨬ᩠ᨩᩥᨲᩴ ᩅᩣ ᨻᩣᩉᩴ ᨸᩈᩣᩁᩮᨿ᩠ᨿ, ᨸᩈᩣᩁᩥᨲᩴ ᩅᩣ ᨻᩣᩉᩴ ᩈᨾᩥᨬ᩠ᨩᩮᨿ᩠ᨿ, ᩑᩅᨾᩮᩅ – ᨣᨦ᩠ᨣᩣᨿ ᨶᨴᩥᨿᩣ ᩒᩁᩥᨾᨲᩦᩁᩮ ᩋᨶ᩠ᨲᩁᩉᩥᨲᩮᩣ ᨸᩣᩁᩥᨾᨲᩦᩁᩮ ᨸᨧ᩠ᨧᩩᨭ᩠ᨮᩣᩈᩥ ᩈᨴ᩠ᨵᩥᩴ ᨽᩥᨠ᩠ᨡᩩᩈᨦ᩠ᨥᩮᨶ. ᩋᨴ᩠ᨴᩈᩣ ᨡᩮᩣ ᨽᨣᩅᩣ ᨲᩮ ᨾᨶᩩᩔᩮ ᩋᨸ᩠ᨸᩮᨠᨧ᩠ᨧᩮ ᨶᩣᩅᩴ ᨸᩁᩥᨿᩮᩈᨶ᩠ᨲᩮ ᩋᨸ᩠ᨸᩮᨠᨧ᩠ᨧᩮ ᩏᩊᩩᨾ᩠ᨸᩴ ᨸᩁᩥᨿᩮᩈᨶ᩠ᨲᩮ ᩋᨸ᩠ᨸᩮᨠᨧ᩠ᨧᩮ ᨠᩩᩃ᩠ᩃᩴ ᨻᨶ᩠ᨵᨶ᩠ᨲᩮ ᩋᨸᩣᩁᩣ ᨸᩣᩁᩴ ᨣᨶ᩠ᨲᩩᨠᩣᨾᩮ. ᩋᨳ ᨡᩮᩣ ᨽᨣᩅᩣ ᩑᨲᨾᨲ᩠ᨳᩴ ᩅᩥᨴᩥᨲ᩠ᩅᩣ ᨲᩣᨿᩴ ᩅᩮᩃᩣᨿᩴ ᩍᨾᩴ ᩏᨴᩣᨶᩴ ᩏᨴᩣᨶᩮᩈᩥ –

‘‘ᨿᩮ ᨲᩁᨶ᩠ᨲᩥ ᩋᨱ᩠ᨱᩅᩴ ᩈᩁᩴ, ᩈᩮᨲᩩᩴ ᨠᨲ᩠ᩅᩣᨶ ᩅᩥᩈᨩ᩠ᨩ ᨸᩃ᩠ᩃᩃᩣᨶᩥ;

ᨠᩩᩃ᩠ᩃᨬ᩠ᩉᩥ ᨩᨶᩮᩣ ᨻᨶ᩠ᨵᨲᩥ [ᨠᩩᩃ᩠ᩃᩴ ᨩᨶᩮᩣ ᨧ ᨻᨶ᩠ᨵᨲᩥ (ᩈ᩠ᨿᩣ.), ᨠᩩᩃ᩠ᩃᩴ ᩉᩥ ᨩᨶᩮᩣ ᨸᨻᨶ᩠ᨵᨲᩥ (ᩈᩦ. ᨸᩦ. ᨠ.)], ᨲᩥᨱ᩠ᨱᩣ [ᨶᩥᨲᩥᨱ᩠ᨱᩣ, ᨶ ᨲᩥᨱ᩠ᨱᩣ (ᨠ.)] ᨾᩮᨵᩣᩅᩥᨶᩮᩣ ᨩᨶᩣ’’ᨲᩥ.

ᨸᨮᨾᨽᩣᨱᩅᩣᩁᩮᩣ.

ᩋᩁᩥᨿᩈᨧ᩠ᨧᨠᨳᩣ

᪑᪕᪕. ᩋᨳ ᨡᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩌᨿᩣᨾᩣᨶᨶ᩠ᨴ, ᨿᩮᨶ ᨠᩮᩣᨭᩥᨣᩣᨾᩮᩣ ᨲᩮᨶᩩᨸᩈᨦ᩠ᨠᨾᩥᩔᩣᨾᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ. ᩋᨳ ᨡᩮᩣ ᨽᨣᩅᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨿᩮᨶ ᨠᩮᩣᨭᩥᨣᩣᨾᩮᩣ ᨲᨴᩅᩈᩁᩥ. ᨲᨲᩕ ᩈᩩᨴᩴ ᨽᨣᩅᩣ ᨠᩮᩣᨭᩥᨣᩣᨾᩮ ᩅᩥᩉᩁᨲᩥ. ᨲᨲᩕ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ –

‘‘ᨧᨲᩩᨶ᩠ᨶᩴ, ᨽᩥᨠ᩠ᨡᩅᩮ, ᩋᩁᩥᨿᩈᨧ᩠ᨧᩣᨶᩴ ᩋᨶᨶᩩᨻᩮᩣᨵᩣ ᩋᨸ᩠ᨸᨭᩥᩅᩮᨵᩣ ᩑᩅᨾᩥᨴᩴ ᨴᩦᨥᨾᨴ᩠ᨵᩣᨶᩴ ᩈᨶ᩠ᨵᩣᩅᩥᨲᩴ ᩈᩴᩈᩁᩥᨲᩴ ᨾᨾᨬ᩠ᨧᩮᩅ ᨲᩩᨾ᩠ᩉᩣᨠᨬ᩠ᨧ. ᨠᨲᨾᩮᩈᩴ ᨧᨲᩩᨶ᩠ᨶᩴ? ᨴᩩᨠ᩠ᨡᩔ, ᨽᩥᨠ᩠ᨡᩅᩮ, ᩋᩁᩥᨿᩈᨧ᩠ᨧᩔ ᩋᨶᨶᩩᨻᩮᩣᨵᩣ ᩋᨸ᩠ᨸᨭᩥᩅᩮᨵᩣ ᩑᩅᨾᩥᨴᩴ ᨴᩦᨥᨾᨴ᩠ᨵᩣᨶᩴ ᩈᨶ᩠ᨵᩣᩅᩥᨲᩴ ᩈᩴᩈᩁᩥᨲᩴ ᨾᨾᨬ᩠ᨧᩮᩅ ᨲᩩᨾ᩠ᩉᩣᨠᨬ᩠ᨧ. ᨴᩩᨠ᩠ᨡᩈᨾᩩᨴᨿᩔ, ᨽᩥᨠ᩠ᨡᩅᩮ, ᩋᩁᩥᨿᩈᨧ᩠ᨧᩔ ᩋᨶᨶᩩᨻᩮᩣᨵᩣ ᩋᨸ᩠ᨸᨭᩥᩅᩮᨵᩣ ᩑᩅᨾᩥᨴᩴ ᨴᩦᨥᨾᨴ᩠ᨵᩣᨶᩴ ᩈᨶ᩠ᨵᩣᩅᩥᨲᩴ ᩈᩴᩈᩁᩥᨲᩴ ᨾᨾᨬ᩠ᨧᩮᩅ ᨲᩩᨾ᩠ᩉᩣᨠᨬ᩠ᨧ. ᨴᩩᨠ᩠ᨡᨶᩥᩁᩮᩣᨵᩔ, ᨽᩥᨠ᩠ᨡᩅᩮ, ᩋᩁᩥᨿᩈᨧ᩠ᨧᩔ ᩋᨶᨶᩩᨻᩮᩣᨵᩣ ᩋᨸ᩠ᨸᨭᩥᩅᩮᨵᩣ ᩑᩅᨾᩥᨴᩴ ᨴᩦᨥᨾᨴ᩠ᨵᩣᨶᩴ ᩈᨶ᩠ᨵᩣᩅᩥᨲᩴ ᩈᩴᩈᩁᩥᨲᩴ ᨾᨾᨬ᩠ᨧᩮᩅ ᨲᩩᨾ᩠ᩉᩣᨠᨬ᩠ᨧ. ᨴᩩᨠ᩠ᨡᨶᩥᩁᩮᩣᨵᨣᩣᨾᩥᨶᩥᨿᩣ ᨸᨭᩥᨸᨴᩣᨿ, ᨽᩥᨠ᩠ᨡᩅᩮ, ᩋᩁᩥᨿᩈᨧ᩠ᨧᩔ ᩋᨶᨶᩩᨻᩮᩣᨵᩣ ᩋᨸ᩠ᨸᨭᩥᩅᩮᨵᩣ ᩑᩅᨾᩥᨴᩴ ᨴᩦᨥᨾᨴ᩠ᨵᩣᨶᩴ ᩈᨶ᩠ᨵᩣᩅᩥᨲᩴ ᩈᩴᩈᩁᩥᨲᩴ ᨾᨾᨬ᩠ᨧᩮᩅ ᨲᩩᨾ᩠ᩉᩣᨠᨬ᩠ᨧ. ᨲᨿᩥᨴᩴ, ᨽᩥᨠ᩠ᨡᩅᩮ, ᨴᩩᨠ᩠ᨡᩴ ᩋᩁᩥᨿᩈᨧ᩠ᨧᩴ ᩋᨶᩩᨻᩩᨴ᩠ᨵᩴ ᨸᨭᩥᩅᩥᨴ᩠ᨵᩴ, ᨴᩩᨠ᩠ᨡᩈᨾᩩᨴᨿᩴ [ᨴᩩᨠ᩠ᨡᩈᨾᩩᨴᨿᩮᩣ (ᩈ᩠ᨿᩣ.)] ᩋᩁᩥᨿᩈᨧ᩠ᨧᩴ ᩋᨶᩩᨻᩩᨴ᩠ᨵᩴ ᨸᨭᩥᩅᩥᨴ᩠ᨵᩴ, ᨴᩩᨠ᩠ᨡᨶᩥᩁᩮᩣᨵᩴ [ᨴᩩᨠ᩠ᨡᨶᩥᩁᩮᩣᨵᩮᩣ (ᩈ᩠ᨿᩣ.)] ᩋᩁᩥᨿᩈᨧ᩠ᨧᩴ ᩋᨶᩩᨻᩩᨴ᩠ᨵᩴ ᨸᨭᩥᩅᩥᨴ᩠ᨵᩴ, ᨴᩩᨠ᩠ᨡᨶᩥᩁᩮᩣᨵᨣᩣᨾᩥᨶᩦ ᨸᨭᩥᨸᨴᩣ ᩋᩁᩥᨿᩈᨧ᩠ᨧᩴ ᩋᨶᩩᨻᩩᨴ᩠ᨵᩴ ᨸᨭᩥᩅᩥᨴ᩠ᨵᩴ, ᩏᨧ᩠ᨨᩥᨶ᩠ᨶᩣ ᨽᩅᨲᨱ᩠ᩉᩣ, ᨡᩦᨱᩣ ᨽᩅᨶᩮᨲ᩠ᨲᩥ, ᨶᨲ᩠ᨳᩥᨴᩣᨶᩥ ᨸᩩᨶᨻ᩠ᨽᩅᩮᩣ’’ᨲᩥ. ᩍᨴᨾᩅᩮᩣᨧ ᨽᨣᩅᩣ. ᩍᨴᩴ ᩅᨲ᩠ᩅᩣᨶ ᩈᩩᨣᨲᩮᩣ ᩋᨳᩣᨸᩁᩴ ᩑᨲᨴᩅᩮᩣᨧ ᩈᨲ᩠ᨳᩣ –

‘‘ᨧᨲᩩᨶ᩠ᨶᩴ ᩋᩁᩥᨿᩈᨧ᩠ᨧᩣᨶᩴ, ᨿᨳᩣᨽᩪᨲᩴ ᩋᨴᩔᨶᩣ;

ᩈᩴᩈᩥᨲᩴ ᨴᩦᨥᨾᨴ᩠ᨵᩣᨶᩴ, ᨲᩣᩈᩩ ᨲᩣᩈ᩠ᩅᩮᩅ ᨩᩣᨲᩥᩈᩩ.

ᨲᩣᨶᩥ ᩑᨲᩣᨶᩥ ᨴᩥᨭ᩠ᨮᩣᨶᩥ, ᨽᩅᨶᩮᨲ᩠ᨲᩥ ᩈᨾᩪᩉᨲᩣ;

ᩏᨧ᩠ᨨᩥᨶ᩠ᨶᩴ ᨾᩪᩃᩴ ᨴᩩᨠ᩠ᨡᩔ, ᨶᨲ᩠ᨳᩥ ᨴᩣᨶᩥ ᨸᩩᨶᨻ᩠ᨽᩅᩮᩣ’’ᨲᩥ.

ᨲᨲᩕᨸᩥ ᩈᩩᨴᩴ ᨽᨣᩅᩣ ᨠᩮᩣᨭᩥᨣᩣᨾᩮ ᩅᩥᩉᩁᨶ᩠ᨲᩮᩣ ᩑᨲᨴᩮᩅ ᨻᩉᩩᩃᩴ ᨽᩥᨠ᩠ᨡᩪᨶᩴ ᨵᨾ᩠ᨾᩥᩴ ᨠᨳᩴ ᨠᩁᩮᩣᨲᩥ – ‘‘ᩍᨲᩥ ᩈᩦᩃᩴ, ᩍᨲᩥ ᩈᨾᩣᨵᩥ, ᩍᨲᩥ ᨸᨬ᩠ᨬᩣ. ᩈᩦᩃᨸᩁᩥᨽᩣᩅᩥᨲᩮᩣ ᩈᨾᩣᨵᩥ ᨾᩉᨸ᩠ᨹᩃᩮᩣ ᩉᩮᩣᨲᩥ ᨾᩉᩣᨶᩥᩈᩴᩈᩮᩣ. ᩈᨾᩣᨵᩥᨸᩁᩥᨽᩣᩅᩥᨲᩣ ᨸᨬ᩠ᨬᩣ ᨾᩉᨸ᩠ᨹᩃᩣ ᩉᩮᩣᨲᩥ ᨾᩉᩣᨶᩥᩈᩴᩈᩣ. ᨸᨬ᩠ᨬᩣᨸᩁᩥᨽᩣᩅᩥᨲᩴ ᨧᩥᨲ᩠ᨲᩴ ᩈᨾ᩠ᨾᨴᩮᩅ ᩌᩈᩅᩮᩉᩥ ᩅᩥᨾᩩᨧ᩠ᨧᨲᩥ, ᩈᩮᨿ᩠ᨿᨳᩥᨴᩴ – ᨠᩣᨾᩣᩈᩅᩣ, ᨽᩅᩣᩈᩅᩣ, ᩋᩅᩥᨩ᩠ᨩᩣᩈᩅᩣ’’ᨲᩥ.

ᩋᨶᩣᩅᨲ᩠ᨲᩥᨵᨾ᩠ᨾᩈᨾ᩠ᨻᩮᩣᨵᩥᨸᩁᩣᨿᨱᩣ

᪑᪕᪖. ᩋᨳ ᨡᩮᩣ ᨽᨣᩅᩣ ᨠᩮᩣᨭᩥᨣᩣᨾᩮ ᨿᨳᩣᨽᩥᩁᨶ᩠ᨲᩴ ᩅᩥᩉᩁᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩌᨿᩣᨾᩣᨶᨶ᩠ᨴ, ᨿᩮᨶ ᨶᩣᨲᩥᨠᩣ [ᨶᩣᨴᩥᨠᩣ (ᩈ᩠ᨿᩣ. ᨸᩦ.)] ᨲᩮᨶᩩᨸᨦ᩠ᨠᨾᩥᩔᩣᨾᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ. ᩋᨳ ᨡᩮᩣ ᨽᨣᩅᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨿᩮᨶ ᨶᩣᨲᩥᨠᩣ ᨲᨴᩅᩈᩁᩥ. ᨲᨲᩕᨸᩥ ᩈᩩᨴᩴ ᨽᨣᩅᩣ ᨶᩣᨲᩥᨠᩮ ᩅᩥᩉᩁᨲᩥ ᨣᩥᨬ᩠ᨩᨠᩣᩅᩈᨳᩮ. ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩈᩣᩊ᩠ᩉᩮᩣ ᨶᩣᨾ, ᨽᨶ᩠ᨲᩮ, ᨽᩥᨠ᩠ᨡᩩ ᨶᩣᨲᩥᨠᩮ ᨠᩣᩃᨦ᩠ᨠᨲᩮᩣ, ᨲᩔ ᨠᩣ ᨣᨲᩥ, ᨠᩮᩣ ᩋᨽᩥᩈᨾ᩠ᨸᩁᩣᨿᩮᩣ? ᨶᨶ᩠ᨴᩣ ᨶᩣᨾ, ᨽᨶ᩠ᨲᩮ, ᨽᩥᨠ᩠ᨡᩩᨶᩦ ᨶᩣᨲᩥᨠᩮ ᨠᩣᩃᨦ᩠ᨠᨲᩣ, ᨲᩔᩣ ᨠᩣ ᨣᨲᩥ, ᨠᩮᩣ ᩋᨽᩥᩈᨾ᩠ᨸᩁᩣᨿᩮᩣ? ᩈᩩᨴᨲ᩠ᨲᩮᩣ ᨶᩣᨾ, ᨽᨶ᩠ᨲᩮ, ᩏᨸᩣᩈᨠᩮᩣ ᨶᩣᨲᩥᨠᩮ ᨠᩣᩃᨦ᩠ᨠᨲᩮᩣ, ᨲᩔ ᨠᩣ ᨣᨲᩥ, ᨠᩮᩣ ᩋᨽᩥᩈᨾ᩠ᨸᩁᩣᨿᩮᩣ? ᩈᩩᨩᩣᨲᩣ ᨶᩣᨾ, ᨽᨶ᩠ᨲᩮ, ᩏᨸᩣᩈᩥᨠᩣ ᨶᩣᨲᩥᨠᩮ ᨠᩣᩃᨦ᩠ᨠᨲᩣ, ᨲᩔᩣ ᨠᩣ ᨣᨲᩥ, ᨠᩮᩣ ᩋᨽᩥᩈᨾ᩠ᨸᩁᩣᨿᩮᩣ? ᨠᩩᨠ᩠ᨠᩩᨭᩮᩣ [ᨠᨠᩩᨵᩮᩣ (ᩈ᩠ᨿᩣ.)] ᨶᩣᨾ, ᨽᨶ᩠ᨲᩮ, ᩏᨸᩣᩈᨠᩮᩣ ᨶᩣᨲᩥᨠᩮ ᨠᩣᩃᨦ᩠ᨠᨲᩮᩣ, ᨲᩔ ᨠᩣ ᨣᨲᩥ, ᨠᩮᩣ ᩋᨽᩥᩈᨾ᩠ᨸᩁᩣᨿᩮᩣ? ᨠᩣᩊᩥᨾ᩠ᨻᩮᩣ [ᨠᩣᩃᩥᨦ᩠ᨣᩮᩣ (ᨸᩦ.), ᨠᩣᩁᩊᩥᨾ᩠ᨻᩮᩣ (ᩈ᩠ᨿᩣ.)] ᨶᩣᨾ, ᨽᨶ᩠ᨲᩮ, ᩏᨸᩣᩈᨠᩮᩣ…ᨸᩮ… ᨶᩥᨠᨭᩮᩣ ᨶᩣᨾ, ᨽᨶ᩠ᨲᩮ, ᩏᨸᩣᩈᨠᩮᩣ… ᨠᨭᩥᩔᩉᩮᩣ [ᨠᨭᩥᩔᨽᩮᩣ (ᩈᩦ. ᨸᩦ.)] ᨶᩣᨾ, ᨽᨶ᩠ᨲᩮ, ᩏᨸᩣᩈᨠᩮᩣ… ᨲᩩᨭ᩠ᨮᩮᩣ ᨶᩣᨾ, ᨽᨶ᩠ᨲᩮ, ᩏᨸᩣᩈᨠᩮᩣ… ᩈᨶ᩠ᨲᩩᨭ᩠ᨮᩮᩣ ᨶᩣᨾ, ᨽᨶ᩠ᨲᩮ, ᩏᨸᩣᩈᨠᩮᩣ… ᨽᨴ᩠ᨴᩮᩣ [ᨽᨭᩮᩣ (ᩈ᩠ᨿᩣ.)] ᨶᩣᨾ, ᨽᨶ᩠ᨲᩮ, ᩏᨸᩣᩈᨠᩮᩣ… ᩈᩩᨽᨴ᩠ᨴᩮᩣ [ᩈᩩᨽᨭᩮᩣ (ᩈ᩠ᨿᩣ.)] ᨶᩣᨾ, ᨽᨶ᩠ᨲᩮ, ᩏᨸᩣᩈᨠᩮᩣ ᨶᩣᨲᩥᨠᩮ ᨠᩣᩃᨦ᩠ᨠᨲᩮᩣ, ᨲᩔ ᨠᩣ ᨣᨲᩥ, ᨠᩮᩣ ᩋᨽᩥᩈᨾ᩠ᨸᩁᩣᨿᩮᩣ’’ᨲᩥ?

᪑᪕᪗. ‘‘ᩈᩣᩊ᩠ᩉᩮᩣ, ᩌᨶᨶ᩠ᨴ, ᨽᩥᨠ᩠ᨡᩩ ᩌᩈᩅᩣᨶᩴ ᨡᨿᩣ ᩋᨶᩣᩈᩅᩴ ᨧᩮᨲᩮᩣᩅᩥᨾᩩᨲ᩠ᨲᩥᩴ ᨸᨬ᩠ᨬᩣᩅᩥᨾᩩᨲ᩠ᨲᩥᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᩏᨸᩈᨾ᩠ᨸᨩ᩠ᨩ ᩅᩥᩉᩣᩈᩥ. ᨶᨶ᩠ᨴᩣ, ᩌᨶᨶ᩠ᨴ, ᨽᩥᨠ᩠ᨡᩩᨶᩦ ᨸᨬ᩠ᨧᨶ᩠ᨶᩴ ᩒᩁᨾ᩠ᨽᩣᨣᩥᨿᩣᨶᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩒᨸᨸᩣᨲᩥᨠᩣ ᨲᨲ᩠ᨳ ᨸᩁᩥᨶᩥᨻ᩠ᨻᩣᨿᩥᨶᩦ ᩋᨶᩣᩅᨲ᩠ᨲᩥᨵᨾ᩠ᨾᩣ ᨲᩈ᩠ᨾᩣ ᩃᩮᩣᨠᩣ. ᩈᩩᨴᨲ᩠ᨲᩮᩣ, ᩌᨶᨶ᩠ᨴ, ᩏᨸᩣᩈᨠᩮᩣ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩁᩣᨣᨴᩮᩣᩈᨾᩮᩣᩉᩣᨶᩴ ᨲᨶᩩᨲ᩠ᨲᩣ ᩈᨠᨴᩣᨣᩣᨾᩦ ᩈᨠᩥᨴᩮᩅ ᩍᨾᩴ ᩃᩮᩣᨠᩴ ᩌᨣᨶ᩠ᨲ᩠ᩅᩣ ᨴᩩᨠ᩠ᨡᩔᨶ᩠ᨲᩴ ᨠᩁᩥᩔᨲᩥ. ᩈᩩᨩᩣᨲᩣ, ᩌᨶᨶ᩠ᨴ, ᩏᨸᩣᩈᩥᨠᩣ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩈᩮᩣᨲᩣᨸᨶ᩠ᨶᩣ ᩋᩅᩥᨶᩥᨸᩣᨲᨵᨾ᩠ᨾᩣ ᨶᩥᨿᨲᩣ ᩈᨾ᩠ᨻᩮᩣᨵᩥᨸᩁᩣᨿᨱᩣ [ᨸᩁᩣᨿᨶᩣ (ᩈᩦ. ᩈ᩠ᨿᩣ. ᨸᩦ. ᨠ.)]. ᨠᩩᨠ᩠ᨠᩩᨭᩮᩣ, ᩌᨶᨶ᩠ᨴ, ᩏᨸᩣᩈᨠᩮᩣ ᨸᨬ᩠ᨧᨶ᩠ᨶᩴ ᩒᩁᨾ᩠ᨽᩣᨣᩥᨿᩣᨶᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩒᨸᨸᩣᨲᩥᨠᩮᩣ ᨲᨲ᩠ᨳ ᨸᩁᩥᨶᩥᨻ᩠ᨻᩣᨿᩦ ᩋᨶᩣᩅᨲ᩠ᨲᩥᨵᨾ᩠ᨾᩮᩣ ᨲᩈ᩠ᨾᩣ ᩃᩮᩣᨠᩣ. ᨠᩣᩊᩥᨾ᩠ᨻᩮᩣ, ᩌᨶᨶ᩠ᨴ, ᩏᨸᩣᩈᨠᩮᩣ…ᨸᩮ… ᨶᩥᨠᨭᩮᩣ, ᩌᨶᨶ᩠ᨴ, ᩏᨸᩣᩈᨠᩮᩣ… ᨠᨭᩥᩔᩉᩮᩣ, ᩌᨶᨶ᩠ᨴ, ᩏᨸᩣᩈᨠᩮᩣ… ᨲᩩᨭ᩠ᨮᩮᩣ, ᩌᨶᨶ᩠ᨴ, ᩏᨸᩣᩈᨠᩮᩣ … ᩈᨶ᩠ᨲᩩᨭ᩠ᨮᩮᩣ, ᩌᨶᨶ᩠ᨴ, ᩏᨸᩣᩈᨠᩮᩣ… ᨽᨴ᩠ᨴᩮᩣ, ᩌᨶᨶ᩠ᨴ, ᩏᨸᩣᩈᨠᩮᩣ… ᩈᩩᨽᨴ᩠ᨴᩮᩣ, ᩌᨶᨶ᩠ᨴ, ᩏᨸᩣᩈᨠᩮᩣ ᨸᨬ᩠ᨧᨶ᩠ᨶᩴ ᩒᩁᨾ᩠ᨽᩣᨣᩥᨿᩣᨶᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩒᨸᨸᩣᨲᩥᨠᩮᩣ ᨲᨲ᩠ᨳ ᨸᩁᩥᨶᩥᨻ᩠ᨻᩣᨿᩦ ᩋᨶᩣᩅᨲ᩠ᨲᩥᨵᨾ᩠ᨾᩮᩣ ᨲᩈ᩠ᨾᩣ ᩃᩮᩣᨠᩣ. ᨸᩁᩮᩣᨸᨬ᩠ᨬᩣᩈᩴ, ᩌᨶᨶ᩠ᨴ, ᨶᩣᨲᩥᨠᩮ ᩏᨸᩣᩈᨠᩣ ᨠᩣᩃᨦ᩠ᨠᨲᩣ, ᨸᨬ᩠ᨧᨶ᩠ᨶᩴ ᩒᩁᨾ᩠ᨽᩣᨣᩥᨿᩣᨶᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩒᨸᨸᩣᨲᩥᨠᩣ ᨲᨲ᩠ᨳ ᨸᩁᩥᨶᩥᨻ᩠ᨻᩣᨿᩥᨶᩮᩣ ᩋᨶᩣᩅᨲ᩠ᨲᩥᨵᨾ᩠ᨾᩣ ᨲᩈ᩠ᨾᩣ ᩃᩮᩣᨠᩣ. ᩈᩣᨵᩥᨠᩣ ᨶᩅᩩᨲᩥ [ᨨᩣᨵᩥᨠᩣ ᨶᩅᩩᨲᩥ (ᩈ᩠ᨿᩣ.)], ᩌᨶᨶ᩠ᨴ, ᨶᩣᨲᩥᨠᩮ ᩏᨸᩣᩈᨠᩣ ᨠᩣᩃᨦ᩠ᨠᨲᩣ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩁᩣᨣᨴᩮᩣᩈᨾᩮᩣᩉᩣᨶᩴ ᨲᨶᩩᨲ᩠ᨲᩣ ᩈᨠᨴᩣᨣᩣᨾᩥᨶᩮᩣ ᩈᨠᩥᨴᩮᩅ ᩍᨾᩴ ᩃᩮᩣᨠᩴ ᩌᨣᨶ᩠ᨲ᩠ᩅᩣ ᨴᩩᨠ᩠ᨡᩔᨶ᩠ᨲᩴ ᨠᩁᩥᩔᨶ᩠ᨲᩥ. ᩈᩣᨲᩥᩁᩮᨠᩣᨶᩥ [ᨴᩈᩣᨲᩥᩁᩮᨠᩣᨶᩥ (ᩈ᩠ᨿᩣ.)], ᩌᨶᨶ᩠ᨴ, ᨸᨬ᩠ᨧᩈᨲᩣᨶᩥ ᨶᩣᨲᩥᨠᩮ ᩏᨸᩣᩈᨠᩣ ᨠᩣᩃᨦ᩠ᨠᨲᩣ, ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩈᩮᩣᨲᩣᨸᨶ᩠ᨶᩣ ᩋᩅᩥᨶᩥᨸᩣᨲᨵᨾ᩠ᨾᩣ ᨶᩥᨿᨲᩣ ᩈᨾ᩠ᨻᩮᩣᨵᩥᨸᩁᩣᨿᨱᩣ.

ᨵᨾ᩠ᨾᩣᨴᩣᩈᨵᨾ᩠ᨾᨸᩁᩥᨿᩣᨿᩣ

᪑᪕᪘. ‘‘ᩋᨶᨧ᩠ᨨᩁᩥᨿᩴ ᨡᩮᩣ ᨸᨶᩮᨲᩴ, ᩌᨶᨶ᩠ᨴ, ᨿᩴ ᨾᨶᩩᩔᨽᩪᨲᩮᩣ ᨠᩣᩃᨦ᩠ᨠᩁᩮᨿ᩠ᨿ. ᨲᩈ᩠ᨾᩥᩴᨿᩮᩅ [ᨲᩈ᩠ᨾᩥᩴ ᨲᩈ᩠ᨾᩥᩴ ᨧᩮ (ᩈᩦ. ᨸᩦ.), ᨲᩈ᩠ᨾᩥᩴ ᨲᩈ᩠ᨾᩥᩴ ᨡᩮᩣ (ᩈ᩠ᨿᩣ.)] ᨠᩣᩃᨦ᩠ᨠᨲᩮ ᨲᨳᩣᨣᨲᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᨲᨾᨲ᩠ᨳᩴ ᨸᩩᨧ᩠ᨨᩥᩔᨳ, ᩅᩥᩉᩮᩈᩣ ᩉᩮᩈᩣ, ᩌᨶᨶ᩠ᨴ, ᨲᨳᩣᨣᨲᩔ. ᨲᩈ᩠ᨾᩣᨲᩥᩉᩣᨶᨶ᩠ᨴ, ᨵᨾ᩠ᨾᩣᨴᩣᩈᩴ ᨶᩣᨾ ᨵᨾ᩠ᨾᨸᩁᩥᨿᩣᨿᩴ ᨴᩮᩈᩮᩔᩣᨾᩥ, ᨿᩮᨶ ᩈᨾᨶ᩠ᨶᩣᨣᨲᩮᩣ ᩋᩁᩥᨿᩈᩣᩅᨠᩮᩣ ᩌᨠᨦ᩠ᨡᨾᩣᨶᩮᩣ ᩋᨲ᩠ᨲᨶᩣᩅ ᩋᨲ᩠ᨲᩣᨶᩴ ᨻ᩠ᨿᩣᨠᩁᩮᨿ᩠ᨿ – ‘ᨡᩦᨱᨶᩥᩁᨿᩮᩣᨾ᩠ᩉᩥ ᨡᩦᨱᨲᩥᩁᨧ᩠ᨨᩣᨶᨿᩮᩣᨶᩥ ᨡᩦᨱᨸᩮᨲ᩠ᨲᩥᩅᩥᩈᨿᩮᩣ ᨡᩦᨱᩣᨸᩣᨿᨴᩩᨣ᩠ᨣᨲᩥᩅᩥᨶᩥᨸᩣᨲᩮᩣ, ᩈᩮᩣᨲᩣᨸᨶ᩠ᨶᩮᩣᩉᨾᩈ᩠ᨾᩥ ᩋᩅᩥᨶᩥᨸᩣᨲᨵᨾ᩠ᨾᩮᩣ ᨶᩥᨿᨲᩮᩣ ᩈᨾ᩠ᨻᩮᩣᨵᩥᨸᩁᩣᨿᨱᩮᩣ’ᨲᩥ.

᪑᪕᪙. ‘‘ᨠᨲᨾᩮᩣ ᨧ ᩈᩮᩣ, ᩌᨶᨶ᩠ᨴ, ᨵᨾ᩠ᨾᩣᨴᩣᩈᩮᩣ ᨵᨾ᩠ᨾᨸᩁᩥᨿᩣᨿᩮᩣ, ᨿᩮᨶ ᩈᨾᨶ᩠ᨶᩣᨣᨲᩮᩣ ᩋᩁᩥᨿᩈᩣᩅᨠᩮᩣ ᩌᨠᨦ᩠ᨡᨾᩣᨶᩮᩣ ᩋᨲ᩠ᨲᨶᩣᩅ ᩋᨲ᩠ᨲᩣᨶᩴ ᨻ᩠ᨿᩣᨠᩁᩮᨿ᩠ᨿ – ‘ᨡᩦᨱᨶᩥᩁᨿᩮᩣᨾ᩠ᩉᩥ ᨡᩦᨱᨲᩥᩁᨧ᩠ᨨᩣᨶᨿᩮᩣᨶᩥ ᨡᩦᨱᨸᩮᨲ᩠ᨲᩥᩅᩥᩈᨿᩮᩣ ᨡᩦᨱᩣᨸᩣᨿᨴᩩᨣ᩠ᨣᨲᩥᩅᩥᨶᩥᨸᩣᨲᩮᩣ, ᩈᩮᩣᨲᩣᨸᨶ᩠ᨶᩮᩣᩉᨾᩈ᩠ᨾᩥ ᩋᩅᩥᨶᩥᨸᩣᨲᨵᨾ᩠ᨾᩮᩣ ᨶᩥᨿᨲᩮᩣ ᩈᨾ᩠ᨻᩮᩣᨵᩥᨸᩁᩣᨿᨱᩮᩣ’ᨲᩥ?

‘‘ᩍᨵᩣᨶᨶ᩠ᨴ, ᩋᩁᩥᨿᩈᩣᩅᨠᩮᩣ ᨻᩩᨴ᩠ᨵᩮ ᩋᩅᩮᨧ᩠ᨧᨸ᩠ᨸᩈᩣᨴᩮᨶ ᩈᨾᨶ᩠ᨶᩣᨣᨲᩮᩣ ᩉᩮᩣᨲᩥ – ‘ᩍᨲᩥᨸᩥ ᩈᩮᩣ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩮᩣ ᩈᩩᨣᨲᩮᩣ ᩃᩮᩣᨠᩅᩥᨴᩪ ᩋᨶᩩᨲ᩠ᨲᩁᩮᩣ ᨸᩩᩁᩥᩈᨴᨾ᩠ᨾᩈᩣᩁᨳᩥ ᩈᨲ᩠ᨳᩣ ᨴᩮᩅᨾᨶᩩᩔᩣᨶᩴ ᨻᩩᨴ᩠ᨵᩮᩣ ᨽᨣᩅᩣ’ᨲᩥ.

‘‘ᨵᨾ᩠ᨾᩮ ᩋᩅᩮᨧ᩠ᨧᨸ᩠ᨸᩈᩣᨴᩮᨶ ᩈᨾᨶ᩠ᨶᩣᨣᨲᩮᩣ ᩉᩮᩣᨲᩥ – ‘ᩈ᩠ᩅᩣᨠ᩠ᨡᩣᨲᩮᩣ ᨽᨣᩅᨲᩣ ᨵᨾ᩠ᨾᩮᩣ ᩈᨶ᩠ᨴᩥᨭ᩠ᨮᩥᨠᩮᩣ ᩋᨠᩣᩃᩥᨠᩮᩣ ᩑᩉᩥᨸᩔᩥᨠᩮᩣ ᩒᨸᨶᩮᨿ᩠ᨿᩥᨠᩮᩣ ᨸᨧ᩠ᨧᨲ᩠ᨲᩴ ᩅᩮᨴᩥᨲᨻ᩠ᨻᩮᩣ ᩅᩥᨬ᩠ᨬᩪᩉᩦ’ᨲᩥ.

‘‘ᩈᨦ᩠ᨥᩮ ᩋᩅᩮᨧ᩠ᨧᨸ᩠ᨸᩈᩣᨴᩮᨶ ᩈᨾᨶ᩠ᨶᩣᨣᨲᩮᩣ ᩉᩮᩣᨲᩥ – ‘ᩈᩩᨸ᩠ᨸᨭᩥᨸᨶ᩠ᨶᩮᩣ ᨽᨣᩅᨲᩮᩣ ᩈᩣᩅᨠᩈᨦ᩠ᨥᩮᩣ, ᩏᨩᩩᨸ᩠ᨸᨭᩥᨸᨶ᩠ᨶᩮᩣ ᨽᨣᩅᨲᩮᩣ ᩈᩣᩅᨠᩈᨦ᩠ᨥᩮᩣ, ᨬᩣᨿᨸ᩠ᨸᨭᩥᨸᨶ᩠ᨶᩮᩣ ᨽᨣᩅᨲᩮᩣ ᩈᩣᩅᨠᩈᨦ᩠ᨥᩮᩣ, ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩮᩣ ᨽᨣᩅᨲᩮᩣ ᩈᩣᩅᨠᩈᨦ᩠ᨥᩮᩣ ᨿᨴᩥᨴᩴ ᨧᨲ᩠ᨲᩣᩁᩥ ᨸᩩᩁᩥᩈᨿᩩᨣᩣᨶᩥ ᩋᨭ᩠ᨮ ᨸᩩᩁᩥᩈᨸᩩᨣ᩠ᨣᩃᩣ, ᩑᩈ ᨽᨣᩅᨲᩮᩣ ᩈᩣᩅᨠᩈᨦ᩠ᨥᩮᩣ ᩌᩉᩩᨶᩮᨿ᩠ᨿᩮᩣ ᨸᩣᩉᩩᨶᩮᨿ᩠ᨿᩮᩣ ᨴᨠ᩠ᨡᩥᨱᩮᨿ᩠ᨿᩮᩣ ᩋᨬ᩠ᨩᩃᩥᨠᩁᨱᩦᨿᩮᩣ ᩋᨶᩩᨲ᩠ᨲᩁᩴ ᨸᩩᨬ᩠ᨬᨠ᩠ᨡᩮᨲ᩠ᨲᩴ ᩃᩮᩣᨠᩔᩣ’ᨲᩥ.

‘‘ᩋᩁᩥᨿᨠᨶ᩠ᨲᩮᩉᩥ ᩈᩦᩃᩮᩉᩥ ᩈᨾᨶ᩠ᨶᩣᨣᨲᩮᩣ ᩉᩮᩣᨲᩥ ᩋᨡᨱ᩠ᨯᩮᩉᩥ ᩋᨧ᩠ᨨᩥᨴ᩠ᨴᩮᩉᩥ ᩋᩈᨻᩃᩮᩉᩥ ᩋᨠᨾ᩠ᨾᩣᩈᩮᩉᩥ ᨽᩩᨩᩥᩔᩮᩉᩥ ᩅᩥᨬ᩠ᨬᩪᨸᩈᨲ᩠ᨳᩮᩉᩥ ᩋᨸᩁᩣᨾᨭ᩠ᨮᩮᩉᩥ ᩈᨾᩣᨵᩥᩈᩴᩅᨲ᩠ᨲᨶᩥᨠᩮᩉᩥ.

‘‘ᩋᨿᩴ ᨡᩮᩣ ᩈᩮᩣ, ᩌᨶᨶ᩠ᨴ, ᨵᨾ᩠ᨾᩣᨴᩣᩈᩮᩣ ᨵᨾ᩠ᨾᨸᩁᩥᨿᩣᨿᩮᩣ, ᨿᩮᨶ ᩈᨾᨶ᩠ᨶᩣᨣᨲᩮᩣ ᩋᩁᩥᨿᩈᩣᩅᨠᩮᩣ ᩌᨠᨦ᩠ᨡᨾᩣᨶᩮᩣ ᩋᨲ᩠ᨲᨶᩣᩅ ᩋᨲ᩠ᨲᩣᨶᩴ ᨻ᩠ᨿᩣᨠᩁᩮᨿ᩠ᨿ – ‘ᨡᩦᨱᨶᩥᩁᨿᩮᩣᨾ᩠ᩉᩥ ᨡᩦᨱᨲᩥᩁᨧ᩠ᨨᩣᨶᨿᩮᩣᨶᩥ ᨡᩦᨱᨸᩮᨲ᩠ᨲᩥᩅᩥᩈᨿᩮᩣ ᨡᩦᨱᩣᨸᩣᨿᨴᩩᨣ᩠ᨣᨲᩥᩅᩥᨶᩥᨸᩣᨲᩮᩣ, ᩈᩮᩣᨲᩣᨸᨶ᩠ᨶᩮᩣᩉᨾᩈ᩠ᨾᩥ ᩋᩅᩥᨶᩥᨸᩣᨲᨵᨾ᩠ᨾᩮᩣ ᨶᩥᨿᨲᩮᩣ ᩈᨾ᩠ᨻᩮᩣᨵᩥᨸᩁᩣᨿᨱᩮᩣ’’’ᨲᩥ.

ᨲᨲᩕᨸᩥ ᩈᩩᨴᩴ ᨽᨣᩅᩣ ᨶᩣᨲᩥᨠᩮ ᩅᩥᩉᩁᨶ᩠ᨲᩮᩣ ᨣᩥᨬ᩠ᨩᨠᩣᩅᩈᨳᩮ ᩑᨲᨴᩮᩅ ᨻᩉᩩᩃᩴ ᨽᩥᨠ᩠ᨡᩪᨶᩴ ᨵᨾ᩠ᨾᩥᩴ ᨠᨳᩴ ᨠᩁᩮᩣᨲᩥ –

‘‘ᩍᨲᩥ ᩈᩦᩃᩴ ᩍᨲᩥ ᩈᨾᩣᨵᩥ ᩍᨲᩥ ᨸᨬ᩠ᨬᩣ. ᩈᩦᩃᨸᩁᩥᨽᩣᩅᩥᨲᩮᩣ ᩈᨾᩣᨵᩥ ᨾᩉᨸ᩠ᨹᩃᩮᩣ ᩉᩮᩣᨲᩥ ᨾᩉᩣᨶᩥᩈᩴᩈᩮᩣ. ᩈᨾᩣᨵᩥᨸᩁᩥᨽᩣᩅᩥᨲᩣ ᨸᨬ᩠ᨬᩣ ᨾᩉᨸ᩠ᨹᩃᩣ ᩉᩮᩣᨲᩥ ᨾᩉᩣᨶᩥᩈᩴᩈᩣ. ᨸᨬ᩠ᨬᩣᨸᩁᩥᨽᩣᩅᩥᨲᩴ ᨧᩥᨲ᩠ᨲᩴ ᩈᨾ᩠ᨾᨴᩮᩅ ᩌᩈᩅᩮᩉᩥ ᩅᩥᨾᩩᨧ᩠ᨧᨲᩥ, ᩈᩮᨿ᩠ᨿᨳᩥᨴᩴ – ᨠᩣᨾᩣᩈᩅᩣ, ᨽᩅᩣᩈᩅᩣ, ᩋᩅᩥᨩ᩠ᨩᩣᩈᩅᩣ’’ᨲᩥ.

᪑᪖᪐. ᩋᨳ ᨡᩮᩣ ᨽᨣᩅᩣ ᨶᩣᨲᩥᨠᩮ ᨿᨳᩣᨽᩥᩁᨶ᩠ᨲᩴ ᩅᩥᩉᩁᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩌᨿᩣᨾᩣᨶᨶ᩠ᨴ, ᨿᩮᨶ ᩅᩮᩈᩣᩃᩦ ᨲᩮᨶᩩᨸᩈᨦ᩠ᨠᨾᩥᩔᩣᨾᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ. ᩋᨳ ᨡᩮᩣ ᨽᨣᩅᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨿᩮᨶ ᩅᩮᩈᩣᩃᩦ ᨲᨴᩅᩈᩁᩥ. ᨲᨲᩕ ᩈᩩᨴᩴ ᨽᨣᩅᩣ ᩅᩮᩈᩣᩃᩥᨿᩴ ᩅᩥᩉᩁᨲᩥ ᩋᨾ᩠ᨻᨸᩣᩃᩥᩅᨶᩮ. ᨲᨲᩕ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ –

‘‘ᩈᨲᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩅᩥᩉᩁᩮᨿ᩠ᨿ ᩈᨾ᩠ᨸᨩᩣᨶᩮᩣ, ᩋᨿᩴ ᩅᩮᩣ ᩋᨾ᩠ᩉᩣᨠᩴ ᩋᨶᩩᩈᩣᩈᨶᩦ. ᨠᨳᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩈᨲᩮᩣ ᩉᩮᩣᨲᩥ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ. ᩅᩮᨴᨶᩣᩈᩩ ᩅᩮᨴᨶᩣᨶᩩᨸᩔᩦ…ᨸᩮ… ᨧᩥᨲ᩠ᨲᩮ ᨧᩥᨲ᩠ᨲᩣᨶᩩᨸᩔᩦ…ᨸᩮ… ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ. ᩑᩅᩴ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩈᨲᩮᩣ ᩉᩮᩣᨲᩥ.

‘‘ᨠᨳᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩈᨾ᩠ᨸᨩᩣᨶᩮᩣ ᩉᩮᩣᨲᩥ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩋᨽᩥᨠ᩠ᨠᨶ᩠ᨲᩮ ᨸᨭᩥᨠ᩠ᨠᨶ᩠ᨲᩮ ᩈᨾ᩠ᨸᨩᩣᨶᨠᩣᩁᩦ ᩉᩮᩣᨲᩥ, ᩌᩃᩮᩣᨠᩥᨲᩮ ᩅᩥᩃᩮᩣᨠᩥᨲᩮ ᩈᨾ᩠ᨸᨩᩣᨶᨠᩣᩁᩦ ᩉᩮᩣᨲᩥ, ᩈᨾᩥᨬ᩠ᨩᩥᨲᩮ ᨸᩈᩣᩁᩥᨲᩮ ᩈᨾ᩠ᨸᨩᩣᨶᨠᩣᩁᩦ ᩉᩮᩣᨲᩥ, ᩈᨦ᩠ᨥᩣᨭᩥᨸᨲ᩠ᨲᨧᩦᩅᩁᨵᩣᩁᨱᩮ ᩈᨾ᩠ᨸᨩᩣᨶᨠᩣᩁᩦ ᩉᩮᩣᨲᩥ, ᩋᩈᩥᨲᩮ ᨸᩦᨲᩮ ᨡᩣᨿᩥᨲᩮ ᩈᩣᨿᩥᨲᩮ ᩈᨾ᩠ᨸᨩᩣᨶᨠᩣᩁᩦ ᩉᩮᩣᨲᩥ, ᩏᨧ᩠ᨧᩣᩁᨸᩔᩣᩅᨠᨾ᩠ᨾᩮ ᩈᨾ᩠ᨸᨩᩣᨶᨠᩣᩁᩦ ᩉᩮᩣᨲᩥ, ᨣᨲᩮ ᨮᩥᨲᩮ ᨶᩥᩈᩥᨶ᩠ᨶᩮ ᩈᩩᨲ᩠ᨲᩮ ᨩᩣᨣᩁᩥᨲᩮ ᨽᩣᩈᩥᨲᩮ ᨲᩩᨱ᩠ᩉᩦᨽᩣᩅᩮ ᩈᨾ᩠ᨸᨩᩣᨶᨠᩣᩁᩦ ᩉᩮᩣᨲᩥ. ᩑᩅᩴ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩈᨾ᩠ᨸᨩᩣᨶᩮᩣ ᩉᩮᩣᨲᩥ. ᩈᨲᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩅᩥᩉᩁᩮᨿ᩠ᨿ ᩈᨾ᩠ᨸᨩᩣᨶᩮᩣ, ᩋᨿᩴ ᩅᩮᩣ ᩋᨾ᩠ᩉᩣᨠᩴ ᩋᨶᩩᩈᩣᩈᨶᩦ’’ᨲᩥ.

ᩋᨾ᩠ᨻᨸᩣᩃᩦᨣᨱᩥᨠᩣ

᪑᪖᪑. ᩋᩔᩮᩣᩈᩥ ᨡᩮᩣ ᩋᨾ᩠ᨻᨸᩣᩃᩦ ᨣᨱᩥᨠᩣ – ‘‘ᨽᨣᩅᩣ ᨠᩥᩁ ᩅᩮᩈᩣᩃᩥᩴ ᩋᨶᩩᨸ᩠ᨸᨲ᩠ᨲᩮᩣ ᩅᩮᩈᩣᩃᩥᨿᩴ ᩅᩥᩉᩁᨲᩥ ᨾᨿ᩠ᩉᩴ ᩋᨾ᩠ᨻᩅᨶᩮ’’ᨲᩥ. ᩋᨳ ᨡᩮᩣ ᩋᨾ᩠ᨻᨸᩣᩃᩦ ᨣᨱᩥᨠᩣ ᨽᨴ᩠ᨴᩣᨶᩥ ᨽᨴ᩠ᨴᩣᨶᩥ ᨿᩣᨶᩣᨶᩥ ᨿᩮᩣᨩᩣᨸᩮᨲ᩠ᩅᩣ ᨽᨴ᩠ᨴᩴ ᨽᨴ᩠ᨴᩴ ᨿᩣᨶᩴ ᩋᨽᩥᩁᩩᩉᩥᨲ᩠ᩅᩣ ᨽᨴ᩠ᨴᩮᩉᩥ ᨽᨴ᩠ᨴᩮᩉᩥ ᨿᩣᨶᩮᩉᩥ ᩅᩮᩈᩣᩃᩥᨿᩣ ᨶᩥᨿ᩠ᨿᩣᩈᩥ. ᨿᩮᨶ ᩈᨠᩮᩣ ᩌᩁᩣᨾᩮᩣ ᨲᩮᨶ ᨸᩣᨿᩣᩈᩥ. ᨿᩣᩅᨲᩥᨠᩣ ᨿᩣᨶᩔ ᨽᩪᨾᩥ, ᨿᩣᨶᩮᨶ ᨣᨶ᩠ᨲ᩠ᩅᩣ, ᨿᩣᨶᩣ ᨸᨧ᩠ᨧᩮᩣᩁᩮᩣᩉᩥᨲ᩠ᩅᩣ ᨸᨲ᩠ᨲᩥᨠᩣᩅ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩴ ᨡᩮᩣ ᩋᨾ᩠ᨻᨸᩣᩃᩥᩴ ᨣᨱᩥᨠᩴ ᨽᨣᩅᩣ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᩈᩥ ᩈᨾᩣᨴᨸᩮᩈᩥ ᩈᨾᩩᨲ᩠ᨲᩮᨩᩮᩈᩥ ᩈᨾ᩠ᨸᩉᩴᩈᩮᩈᩥ. ᩋᨳ ᨡᩮᩣ ᩋᨾ᩠ᨻᨸᩣᩃᩦ ᨣᨱᩥᨠᩣ ᨽᨣᩅᨲᩣ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩥᨲᩣ ᩈᨾᩣᨴᨸᩥᨲᩣ ᩈᨾᩩᨲ᩠ᨲᩮᨩᩥᨲᩣ ᩈᨾ᩠ᨸᩉᩴᩈᩥᨲᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩋᨵᩥᩅᩣᩈᩮᨲᩩ ᨾᩮ, ᨽᨶ᩠ᨲᩮ, ᨽᨣᩅᩣ ᩈ᩠ᩅᩣᨲᨶᩣᨿ ᨽᨲ᩠ᨲᩴ ᩈᨴ᩠ᨵᩥᩴ ᨽᩥᨠ᩠ᨡᩩᩈᨦ᩠ᨥᩮᨶᩣ’’ᨲᩥ. ᩋᨵᩥᩅᩣᩈᩮᩈᩥ ᨽᨣᩅᩣ ᨲᩩᨱ᩠ᩉᩦᨽᩣᩅᩮᨶ. ᩋᨳ ᨡᩮᩣ ᩋᨾ᩠ᨻᨸᩣᩃᩦ ᨣᨱᩥᨠᩣ ᨽᨣᩅᨲᩮᩣ ᩋᨵᩥᩅᩣᩈᨶᩴ ᩅᩥᨴᩥᨲ᩠ᩅᩣ ᩏᨭ᩠ᨮᩣᨿᩣᩈᨶᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨸᨠ᩠ᨠᩣᨾᩥ.

ᩋᩔᩮᩣᩈᩩᩴ ᨡᩮᩣ ᩅᩮᩈᩣᩃᩥᨠᩣ ᩃᩥᨧ᩠ᨨᩅᩦ – ‘‘ᨽᨣᩅᩣ ᨠᩥᩁ ᩅᩮᩈᩣᩃᩥᩴ ᩋᨶᩩᨸ᩠ᨸᨲ᩠ᨲᩮᩣ ᩅᩮᩈᩣᩃᩥᨿᩴ ᩅᩥᩉᩁᨲᩥ ᩋᨾ᩠ᨻᨸᩣᩃᩥᩅᨶᩮ’’ᨲᩥ. ᩋᨳ ᨡᩮᩣ ᨲᩮ ᩃᩥᨧ᩠ᨨᩅᩦ ᨽᨴ᩠ᨴᩣᨶᩥ ᨽᨴ᩠ᨴᩣᨶᩥ ᨿᩣᨶᩣᨶᩥ ᨿᩮᩣᨩᩣᨸᩮᨲ᩠ᩅᩣ ᨽᨴ᩠ᨴᩴ ᨽᨴ᩠ᨴᩴ ᨿᩣᨶᩴ ᩋᨽᩥᩁᩩᩉᩥᨲ᩠ᩅᩣ ᨽᨴ᩠ᨴᩮᩉᩥ ᨽᨴ᩠ᨴᩮᩉᩥ ᨿᩣᨶᩮᩉᩥ ᩅᩮᩈᩣᩃᩥᨿᩣ ᨶᩥᨿ᩠ᨿᩥᩴᩈᩩ. ᨲᨲᩕ ᩑᨠᨧ᩠ᨧᩮ ᩃᩥᨧ᩠ᨨᩅᩦ ᨶᩦᩃᩣ ᩉᩮᩣᨶ᩠ᨲᩥ ᨶᩦᩃᩅᨱ᩠ᨱᩣ ᨶᩦᩃᩅᨲ᩠ᨳᩣ ᨶᩦᩃᩣᩃᨦ᩠ᨠᩣᩁᩣ, ᩑᨠᨧ᩠ᨧᩮ ᩃᩥᨧ᩠ᨨᩅᩦ ᨸᩦᨲᩣ ᩉᩮᩣᨶ᩠ᨲᩥ ᨸᩦᨲᩅᨱ᩠ᨱᩣ ᨸᩦᨲᩅᨲ᩠ᨳᩣ ᨸᩦᨲᩣᩃᨦ᩠ᨠᩣᩁᩣ, ᩑᨠᨧ᩠ᨧᩮ ᩃᩥᨧ᩠ᨨᩅᩦ ᩃᩮᩣᩉᩥᨲᩣ ᩉᩮᩣᨶ᩠ᨲᩥ ᩃᩮᩣᩉᩥᨲᩅᨱ᩠ᨱᩣ ᩃᩮᩣᩉᩥᨲᩅᨲ᩠ᨳᩣ ᩃᩮᩣᩉᩥᨲᩣᩃᨦ᩠ᨠᩣᩁᩣ, ᩑᨠᨧ᩠ᨧᩮ ᩃᩥᨧ᩠ᨨᩅᩦ ᩒᨴᩣᨲᩣ ᩉᩮᩣᨶ᩠ᨲᩥ ᩒᨴᩣᨲᩅᨱ᩠ᨱᩣ ᩒᨴᩣᨲᩅᨲ᩠ᨳᩣ ᩒᨴᩣᨲᩣᩃᨦ᩠ᨠᩣᩁᩣ. ᩋᨳ ᨡᩮᩣ ᩋᨾ᩠ᨻᨸᩣᩃᩦ ᨣᨱᩥᨠᩣ ᨴᩉᩁᩣᨶᩴ ᨴᩉᩁᩣᨶᩴ ᩃᩥᨧ᩠ᨨᩅᩦᨶᩴ ᩋᨠ᩠ᨡᩮᨶ ᩋᨠ᩠ᨡᩴ ᨧᨠ᩠ᨠᩮᨶ ᨧᨠ᩠ᨠᩴ ᨿᩩᨣᩮᨶ ᨿᩩᨣᩴ ᨸᨭᩥᩅᨭ᩠ᨭᩮᩈᩥ [ᨸᩁᩥᩅᨲ᩠ᨲᩮᩈᩥ (ᩅᩥ. ᨾᩉᩣᩅᨣ᩠ᨣ)]. ᩋᨳ ᨡᩮᩣ ᨲᩮ ᩃᩥᨧ᩠ᨨᩅᩦ ᩋᨾ᩠ᨻᨸᩣᩃᩥᩴ ᨣᨱᩥᨠᩴ ᩑᨲᨴᩅᩮᩣᨧᩩᩴ – ‘‘ᨠᩥᩴ, ᨩᩮ ᩋᨾ᩠ᨻᨸᩣᩃᩥ, ᨴᩉᩁᩣᨶᩴ ᨴᩉᩁᩣᨶᩴ ᩃᩥᨧ᩠ᨨᩅᩦᨶᩴ ᩋᨠ᩠ᨡᩮᨶ ᩋᨠ᩠ᨡᩴ ᨧᨠ᩠ᨠᩮᨶ ᨧᨠ᩠ᨠᩴ ᨿᩩᨣᩮᨶ ᨿᩩᨣᩴ ᨸᨭᩥᩅᨭ᩠ᨭᩮᩈᩦ’’ᨲᩥ? ‘‘ᨲᨳᩣ ᩉᩥ ᨸᨶ ᨾᩮ, ᩋᨿ᩠ᨿᨸᩩᨲ᩠ᨲᩣ, ᨽᨣᩅᩣ ᨶᩥᨾᨶ᩠ᨲᩥᨲᩮᩣ ᩈ᩠ᩅᩣᨲᨶᩣᨿ ᨽᨲ᩠ᨲᩴ ᩈᨴ᩠ᨵᩥᩴ ᨽᩥᨠ᩠ᨡᩩᩈᨦ᩠ᨥᩮᨶᩣ’’ᨲᩥ. ‘‘ᨴᩮᩉᩥ, ᨩᩮ ᩋᨾ᩠ᨻᨸᩣᩃᩥ, ᩑᨲᩴ [ᩑᨠᩴ (ᨠ.)] ᨽᨲ᩠ᨲᩴ ᩈᨲᩈᩉᩔᩮᨶᩣ’’ᨲᩥ. ‘‘ᩈᨧᩮᨸᩥ ᨾᩮ, ᩋᨿ᩠ᨿᨸᩩᨲ᩠ᨲᩣ, ᩅᩮᩈᩣᩃᩥᩴ ᩈᩣᩉᩣᩁᩴ ᨴᩔᨳ [ᨴᨩ᩠ᨩᩮᨿ᩠ᨿᩣᨳ (ᩅᩥ. ᨾᩉᩣᩅᨣ᩠ᨣ)], ᩑᩅᨾᩉᩴ ᨲᩴ [ᩑᩅᨾ᩠ᨸᩥ ᨾᩉᨶ᩠ᨲᩴ (ᩈ᩠ᨿᩣ.), ᩑᩅᩴ ᨾᩉᨶ᩠ᨲᩴ (ᩈᩦ. ᨸᩦ.)] ᨽᨲ᩠ᨲᩴ ᨶ ᨴᩔᩣᨾᩦ’’ᨲᩥ [ᨶᩮᩅ ᨴᨩ᩠ᨩᩣᩉᩴ ᨲᩴ ᨽᨲ᩠ᨲᨶ᩠ᨲᩥ (ᩅᩥ. ᨾᩉᩣᩅᨣ᩠ᨣ)]. ᩋᨳ ᨡᩮᩣ ᨲᩮ ᩃᩥᨧ᩠ᨨᩅᩦ ᩋᨦ᩠ᨣᩩᩃᩥᩴ ᨹᩮᩣᨭᩮᩈᩩᩴ – ‘‘ᨩᩥᨲᨾ᩠ᩉ [ᨩᩥᨲᨾ᩠ᩉᩣ (ᨻᩉᩪᩈᩩ)] ᩅᨲ ᨽᩮᩣ ᩋᨾ᩠ᨻᨠᩣᨿ, ᨩᩥᨲᨾ᩠ᩉ ᩅᨲ ᨽᩮᩣ ᩋᨾ᩠ᨻᨠᩣᨿᩣ’’ᨲᩥ [‘‘ᨩᩥᨲᨾ᩠ᩉᩣ ᩅᨲ ᨽᩮᩣ ᩋᨾ᩠ᨻᨸᩣᩃᩥᨠᩣᨿ ᩅᨬ᩠ᨧᩥᨲᨾ᩠ᩉᩣ ᩅᨲ ᨽᩮᩣ ᩋᨾ᩠ᨻᨸᩣᩃᩥᨠᩣᨿᩣ’’ᨲᩥ (ᩈ᩠ᨿᩣ.)].

ᩋᨳ ᨡᩮᩣ ᨲᩮ ᩃᩥᨧ᩠ᨨᩅᩦ ᨿᩮᨶ ᩋᨾ᩠ᨻᨸᩣᩃᩥᩅᨶᩴ ᨲᩮᨶ ᨸᩣᨿᩥᩴᩈᩩ. ᩋᨴ᩠ᨴᩈᩣ ᨡᩮᩣ ᨽᨣᩅᩣ ᨲᩮ ᩃᩥᨧ᩠ᨨᩅᩦ ᨴᩪᩁᨲᩮᩣᩅ ᩌᨣᨧ᩠ᨨᨶ᩠ᨲᩮ. ᨴᩥᩈ᩠ᩅᩣᨶ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᨿᩮᩈᩴ [ᨿᩮᩉᩥ (ᩅᩥ. ᨾᩉᩣᩅᨣ᩠ᨣ)], ᨽᩥᨠ᩠ᨡᩅᩮ, ᨽᩥᨠ᩠ᨡᩪᨶᩴ ᨴᩮᩅᩣ ᨲᩣᩅᨲᩥᩴᩈᩣ ᩋᨴᩥᨭ᩠ᨮᨸᩩᨻ᩠ᨻᩣ, ᩒᩃᩮᩣᨠᩮᨳ, ᨽᩥᨠ᩠ᨡᩅᩮ, ᩃᩥᨧ᩠ᨨᩅᩥᨸᩁᩥᩈᩴ; ᩋᨸᩃᩮᩣᨠᩮᨳ, ᨽᩥᨠ᩠ᨡᩅᩮ, ᩃᩥᨧ᩠ᨨᩅᩥᨸᩁᩥᩈᩴ; ᩏᨸᩈᩴᩉᩁᨳ, ᨽᩥᨠ᩠ᨡᩅᩮ, ᩃᩥᨧ᩠ᨨᩅᩥᨸᩁᩥᩈᩴ – ᨲᩣᩅᨲᩥᩴᩈᩈᨴᩥᩈ’’ᨶ᩠ᨲᩥ. ᩋᨳ ᨡᩮᩣ ᨲᩮ ᩃᩥᨧ᩠ᨨᩅᩦ ᨿᩣᩅᨲᩥᨠᩣ ᨿᩣᨶᩔ ᨽᩪᨾᩥ, ᨿᩣᨶᩮᨶ ᨣᨶ᩠ᨲ᩠ᩅᩣ, ᨿᩣᨶᩣ ᨸᨧ᩠ᨧᩮᩣᩁᩮᩣᩉᩥᨲ᩠ᩅᩣ ᨸᨲ᩠ᨲᩥᨠᩣᩅ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮ ᨡᩮᩣ ᨲᩮ ᩃᩥᨧ᩠ᨨᩅᩦ ᨽᨣᩅᩣ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᩈᩥ ᩈᨾᩣᨴᨸᩮᩈᩥ ᩈᨾᩩᨲ᩠ᨲᩮᨩᩮᩈᩥ ᩈᨾ᩠ᨸᩉᩴᩈᩮᩈᩥ. ᩋᨳ ᨡᩮᩣ ᨲᩮ ᩃᩥᨧ᩠ᨨᩅᩦ ᨽᨣᩅᨲᩣ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩥᨲᩣ ᩈᨾᩣᨴᨸᩥᨲᩣ ᩈᨾᩩᨲ᩠ᨲᩮᨩᩥᨲᩣ ᩈᨾ᩠ᨸᩉᩴᩈᩥᨲᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧᩩᩴ – ‘‘ᩋᨵᩥᩅᩣᩈᩮᨲᩩ ᨶᩮᩣ, ᨽᨶ᩠ᨲᩮ, ᨽᨣᩅᩣ ᩈ᩠ᩅᩣᨲᨶᩣᨿ ᨽᨲ᩠ᨲᩴ ᩈᨴ᩠ᨵᩥᩴ ᨽᩥᨠ᩠ᨡᩩᩈᨦ᩠ᨥᩮᨶᩣ’’ᨲᩥ. ᩋᨳ ᨡᩮᩣ ᨽᨣᩅᩣ ᨲᩮ ᩃᩥᨧ᩠ᨨᩅᩦ ᩑᨲᨴᩅᩮᩣᨧ – ‘‘ᩋᨵᩥᩅᩩᨲ᩠ᨳᩴ [ᩋᨵᩥᩅᩣᩈᩥᨲᩴ (ᩈ᩠ᨿᩣ.)] ᨡᩮᩣ ᨾᩮ, ᩃᩥᨧ᩠ᨨᩅᩦ, ᩈ᩠ᩅᩣᨲᨶᩣᨿ ᩋᨾ᩠ᨻᨸᩣᩃᩥᨿᩣ ᨣᨱᩥᨠᩣᨿ ᨽᨲ᩠ᨲ’’ᨶ᩠ᨲᩥ. ᩋᨳ ᨡᩮᩣ ᨲᩮ ᩃᩥᨧ᩠ᨨᩅᩦ ᩋᨦ᩠ᨣᩩᩃᩥᩴ ᨹᩮᩣᨭᩮᩈᩩᩴ – ‘‘ᨩᩥᨲᨾ᩠ᩉ ᩅᨲ ᨽᩮᩣ ᩋᨾ᩠ᨻᨠᩣᨿ, ᨩᩥᨲᨾ᩠ᩉ ᩅᨲ ᨽᩮᩣ ᩋᨾ᩠ᨻᨠᩣᨿᩣ’’ᨲᩥ. ᩋᨳ ᨡᩮᩣ ᨲᩮ ᩃᩥᨧ᩠ᨨᩅᩦ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩥᨲ᩠ᩅᩣ ᩋᨶᩩᨾᩮᩣᨴᩥᨲ᩠ᩅᩣ ᩏᨭ᩠ᨮᩣᨿᩣᩈᨶᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨸᨠ᩠ᨠᨾᩥᩴᩈᩩ.

᪑᪖᪒. ᩋᨳ ᨡᩮᩣ ᩋᨾ᩠ᨻᨸᩣᩃᩦ ᨣᨱᩥᨠᩣ ᨲᩔᩣ ᩁᨲ᩠ᨲᩥᨿᩣ ᩋᨧ᩠ᨧᨿᩮᨶ ᩈᨠᩮ ᩌᩁᩣᨾᩮ ᨸᨱᩦᨲᩴ ᨡᩣᨴᨶᩦᨿᩴ ᨽᩮᩣᨩᨶᩦᨿᩴ ᨸᨭᩥᨿᩣᨴᩣᨸᩮᨲ᩠ᩅᩣ ᨽᨣᩅᨲᩮᩣ ᨠᩣᩃᩴ ᩌᩁᩮᩣᨧᩣᨸᩮᩈᩥ – ‘‘ᨠᩣᩃᩮᩣ, ᨽᨶ᩠ᨲᩮ, ᨶᩥᨭ᩠ᨮᩥᨲᩴ ᨽᨲ᩠ᨲ’’ᨶ᩠ᨲᩥ. ᩋᨳ ᨡᩮᩣ ᨽᨣᩅᩣ ᨸᩩᨻ᩠ᨻᨱ᩠ᩉᩈᨾᨿᩴ ᨶᩥᩅᩣᩈᩮᨲ᩠ᩅᩣ ᨸᨲ᩠ᨲᨧᩦᩅᩁᨾᩣᨴᩣᨿ ᩈᨴ᩠ᨵᩥᩴ ᨽᩥᨠ᩠ᨡᩩᩈᨦ᩠ᨥᩮᨶ ᨿᩮᨶ ᩋᨾ᩠ᨻᨸᩣᩃᩥᨿᩣ ᨣᨱᩥᨠᩣᨿ ᨶᩥᩅᩮᩈᨶᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨸᨬ᩠ᨬᨲ᩠ᨲᩮ ᩌᩈᨶᩮ ᨶᩥᩈᩦᨴᩥ. ᩋᨳ ᨡᩮᩣ ᩋᨾ᩠ᨻᨸᩣᩃᩦ ᨣᨱᩥᨠᩣ ᨻᩩᨴ᩠ᨵᨸ᩠ᨸᨾᩩᨡᩴ ᨽᩥᨠ᩠ᨡᩩᩈᨦ᩠ᨥᩴ ᨸᨱᩦᨲᩮᨶ ᨡᩣᨴᨶᩦᨿᩮᨶ ᨽᩮᩣᨩᨶᩦᨿᩮᨶ ᩈᩉᨲ᩠ᨳᩣ ᩈᨶ᩠ᨲᨸ᩠ᨸᩮᩈᩥ ᩈᨾ᩠ᨸᩅᩣᩁᩮᩈᩥ. ᩋᨳ ᨡᩮᩣ ᩋᨾ᩠ᨻᨸᩣᩃᩦ ᨣᨱᩥᨠᩣ ᨽᨣᩅᨶ᩠ᨲᩴ ᨽᩩᨲ᩠ᨲᩣᩅᩥᩴ ᩒᨶᩦᨲᨸᨲ᩠ᨲᨸᩣᨱᩥᩴ ᩋᨬ᩠ᨬᨲᩁᩴ ᨶᩦᨧᩴ ᩌᩈᨶᩴ ᨣᩉᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩣ ᨡᩮᩣ ᩋᨾ᩠ᨻᨸᩣᩃᩦ ᨣᨱᩥᨠᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩍᨾᩣᩉᩴ, ᨽᨶ᩠ᨲᩮ, ᩌᩁᩣᨾᩴ ᨻᩩᨴ᩠ᨵᨸ᩠ᨸᨾᩩᨡᩔ ᨽᩥᨠ᩠ᨡᩩᩈᨦ᩠ᨥᩔ ᨴᨾ᩠ᨾᩦ’’ᨲᩥ. ᨸᨭᩥᨣ᩠ᨣᩉᩮᩈᩥ ᨽᨣᩅᩣ ᩌᩁᩣᨾᩴ. ᩋᨳ ᨡᩮᩣ ᨽᨣᩅᩣ ᩋᨾ᩠ᨻᨸᩣᩃᩥᩴ ᨣᨱᩥᨠᩴ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᨲ᩠ᩅᩣ ᩈᨾᩣᨴᨸᩮᨲ᩠ᩅᩣ ᩈᨾᩩᨲ᩠ᨲᩮᨩᩮᨲ᩠ᩅᩣ ᩈᨾ᩠ᨸᩉᩴᩈᩮᨲ᩠ᩅᩣ ᩏᨭ᩠ᨮᩣᨿᩣᩈᨶᩣ ᨸᨠ᩠ᨠᩣᨾᩥ. ᨲᨲᩕᨸᩥ ᩈᩩᨴᩴ ᨽᨣᩅᩣ ᩅᩮᩈᩣᩃᩥᨿᩴ ᩅᩥᩉᩁᨶ᩠ᨲᩮᩣ ᩋᨾ᩠ᨻᨸᩣᩃᩥᩅᨶᩮ ᩑᨲᨴᩮᩅ ᨻᩉᩩᩃᩴ ᨽᩥᨠ᩠ᨡᩪᨶᩴ ᨵᨾ᩠ᨾᩥᩴ ᨠᨳᩴ ᨠᩁᩮᩣᨲᩥ – ‘‘ᩍᨲᩥ ᩈᩦᩃᩴ, ᩍᨲᩥ ᩈᨾᩣᨵᩥ, ᩍᨲᩥ ᨸᨬ᩠ᨬᩣ. ᩈᩦᩃᨸᩁᩥᨽᩣᩅᩥᨲᩮᩣ ᩈᨾᩣᨵᩥ ᨾᩉᨸ᩠ᨹᩃᩮᩣ ᩉᩮᩣᨲᩥ ᨾᩉᩣᨶᩥᩈᩴᩈᩮᩣ. ᩈᨾᩣᨵᩥᨸᩁᩥᨽᩣᩅᩥᨲᩣ ᨸᨬ᩠ᨬᩣ ᨾᩉᨸ᩠ᨹᩃᩣ ᩉᩮᩣᨲᩥ ᨾᩉᩣᨶᩥᩈᩴᩈᩣ. ᨸᨬ᩠ᨬᩣᨸᩁᩥᨽᩣᩅᩥᨲᩴ ᨧᩥᨲ᩠ᨲᩴ ᩈᨾ᩠ᨾᨴᩮᩅ ᩌᩈᩅᩮᩉᩥ ᩅᩥᨾᩩᨧ᩠ᨧᨲᩥ, ᩈᩮᨿ᩠ᨿᨳᩥᨴᩴ – ᨠᩣᨾᩣᩈᩅᩣ, ᨽᩅᩣᩈᩅᩣ, ᩋᩅᩥᨩ᩠ᨩᩣᩈᩅᩣ’’ᨲᩥ.

ᩅᩮᩊᩩᩅᨣᩣᨾᩅᩔᩪᨸᨣᨾᨶᩴ

᪑᪖᪓. ᩋᨳ ᨡᩮᩣ ᨽᨣᩅᩣ ᩋᨾ᩠ᨻᨸᩣᩃᩥᩅᨶᩮ ᨿᨳᩣᨽᩥᩁᨶ᩠ᨲᩴ ᩅᩥᩉᩁᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩌᨿᩣᨾᩣᨶᨶ᩠ᨴ, ᨿᩮᨶ ᩅᩮᩊᩩᩅᨣᩣᨾᨠᩮᩣ [ᨻᩮᩊᩩᩅᨣᩣᨾᨠᩮᩣ (ᩈᩦ. ᨸᩦ.)] ᨲᩮᨶᩩᨸᩈᨦ᩠ᨠᨾᩥᩔᩣᨾᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ. ᩋᨳ ᨡᩮᩣ ᨽᨣᩅᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨿᩮᨶ ᩅᩮᩊᩩᩅᨣᩣᨾᨠᩮᩣ ᨲᨴᩅᩈᩁᩥ. ᨲᨲᩕ ᩈᩩᨴᩴ ᨽᨣᩅᩣ ᩅᩮᩊᩩᩅᨣᩣᨾᨠᩮ ᩅᩥᩉᩁᨲᩥ. ᨲᨲᩕ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᩑᨳ ᨲᩩᨾ᩠ᩉᩮ, ᨽᩥᨠ᩠ᨡᩅᩮ, ᩈᨾᨶ᩠ᨲᩣ ᩅᩮᩈᩣᩃᩥᩴ ᨿᨳᩣᨾᩥᨲ᩠ᨲᩴ ᨿᨳᩣᩈᨶ᩠ᨴᩥᨭ᩠ᨮᩴ ᨿᨳᩣᩈᨾ᩠ᨽᨲ᩠ᨲᩴ ᩅᩔᩴ ᩏᨸᩮᨳ [ᩏᨸᨣᨧ᩠ᨨᨳ (ᩈ᩠ᨿᩣ.)]. ᩋᩉᩴ ᨸᨶ ᩍᨵᩮᩅ ᩅᩮᩊᩩᩅᨣᩣᨾᨠᩮ ᩅᩔᩴ ᩏᨸᨣᨧ᩠ᨨᩣᨾᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨸᨭᩥᩔᩩᨲ᩠ᩅᩣ ᩈᨾᨶ᩠ᨲᩣ ᩅᩮᩈᩣᩃᩥᩴ ᨿᨳᩣᨾᩥᨲ᩠ᨲᩴ ᨿᨳᩣᩈᨶ᩠ᨴᩥᨭ᩠ᨮᩴ ᨿᨳᩣᩈᨾ᩠ᨽᨲ᩠ᨲᩴ ᩅᩔᩴ ᩏᨸᨣᨧ᩠ᨨᩥᩴᩈᩩ. ᨽᨣᩅᩣ ᨸᨶ ᨲᨲ᩠ᨳᩮᩅ ᩅᩮᩊᩩᩅᨣᩣᨾᨠᩮ ᩅᩔᩴ ᩏᨸᨣᨧ᩠ᨨᩥ.

᪑᪖᪔. ᩋᨳ ᨡᩮᩣ ᨽᨣᩅᨲᩮᩣ ᩅᩔᩪᨸᨣᨲᩔ ᨡᩁᩮᩣ ᩌᨻᩣᨵᩮᩣ ᩏᨸ᩠ᨸᨩ᩠ᨩᩥ, ᨻᩣᩊ᩠ᩉᩣ ᩅᩮᨴᨶᩣ ᩅᨲ᩠ᨲᨶ᩠ᨲᩥ ᨾᩣᩁᨱᨶ᩠ᨲᩥᨠᩣ. ᨲᩣ ᩈᩩᨴᩴ ᨽᨣᩅᩣ ᩈᨲᩮᩣ ᩈᨾ᩠ᨸᨩᩣᨶᩮᩣ ᩋᨵᩥᩅᩣᩈᩮᩈᩥ ᩋᩅᩥᩉᨬ᩠ᨬᨾᩣᨶᩮᩣ. ᩋᨳ ᨡᩮᩣ ᨽᨣᩅᨲᩮᩣ ᩑᨲᨴᩉᩮᩣᩈᩥ – ‘‘ᨶ ᨡᩮᩣ ᨾᩮᨲᩴ ᨸᨲᩥᩁᩪᨸᩴ, ᨿ᩠ᩅᩣᩉᩴ ᩋᨶᩣᨾᨶ᩠ᨲᩮᨲ᩠ᩅᩣ ᩏᨸᨭ᩠ᨮᩣᨠᩮ ᩋᨶᨸᩃᩮᩣᨠᩮᨲ᩠ᩅᩣ ᨽᩥᨠ᩠ᨡᩩᩈᨦ᩠ᨥᩴ ᨸᩁᩥᨶᩥᨻ᩠ᨻᩣᨿᩮᨿ᩠ᨿᩴ. ᨿᩴᨶᩪᨶᩣᩉᩴ ᩍᨾᩴ ᩌᨻᩣᨵᩴ ᩅᩦᩁᩥᨿᩮᨶ ᨸᨭᩥᨸᨱᩣᨾᩮᨲ᩠ᩅᩣ ᨩᩦᩅᩥᨲᩈᨦ᩠ᨡᩣᩁᩴ ᩋᨵᩥᨭ᩠ᨮᩣᨿ ᩅᩥᩉᩁᩮᨿ᩠ᨿ’’ᨶ᩠ᨲᩥ. ᩋᨳ ᨡᩮᩣ ᨽᨣᩅᩣ ᨲᩴ ᩌᨻᩣᨵᩴ ᩅᩦᩁᩥᨿᩮᨶ ᨸᨭᩥᨸᨱᩣᨾᩮᨲ᩠ᩅᩣ ᨩᩦᩅᩥᨲᩈᨦ᩠ᨡᩣᩁᩴ ᩋᨵᩥᨭ᩠ᨮᩣᨿ ᩅᩥᩉᩣᩈᩥ. ᩋᨳ ᨡᩮᩣ ᨽᨣᩅᨲᩮᩣ ᩈᩮᩣ ᩌᨻᩣᨵᩮᩣ ᨸᨭᩥᨸᩔᨾ᩠ᨽᩥ. ᩋᨳ ᨡᩮᩣ ᨽᨣᩅᩣ ᨣᩥᩃᩣᨶᩣ ᩅᩩᨭ᩠ᨮᩥᨲᩮᩣ [ᨣᩥᩃᩣᨶᩅᩩᨭ᩠ᨮᩥᨲᩮᩣ (ᩈᨴ᩠ᨴᨶᩦᨲᩥ)] ᩋᨧᩥᩁᩅᩩᨭ᩠ᨮᩥᨲᩮᩣ ᨣᩮᩃᨬ᩠ᨬᩣ ᩅᩥᩉᩣᩁᩣ ᨶᩥᨠ᩠ᨡᨾ᩠ᨾ ᩅᩥᩉᩣᩁᨸᨧ᩠ᨨᩣᨿᩣᨿᩴ ᨸᨬ᩠ᨬᨲ᩠ᨲᩮ ᩌᩈᨶᩮ ᨶᩥᩈᩦᨴᩥ. ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᨴᩥᨭ᩠ᨮᩮᩣ ᨾᩮ, ᨽᨶ᩠ᨲᩮ, ᨽᨣᩅᨲᩮᩣ ᨹᩣᩈᩩ; ᨴᩥᨭ᩠ᨮᩴ ᨾᩮ, ᨽᨶ᩠ᨲᩮ, ᨽᨣᩅᨲᩮᩣ ᨡᨾᨶᩦᨿᩴ, ᩋᨸᩥ ᨧ ᨾᩮ, ᨽᨶ᩠ᨲᩮ, ᨾᨵᩩᩁᨠᨩᩣᨲᩮᩣ ᩅᩥᨿ ᨠᩣᨿᩮᩣ. ᨴᩥᩈᩣᨸᩥ ᨾᩮ ᨶ ᨸᨠ᩠ᨡᩣᨿᨶ᩠ᨲᩥ; ᨵᨾ᩠ᨾᩣᨸᩥ ᨾᩴ ᨶ ᨸᨭᩥᨽᨶ᩠ᨲᩥ ᨽᨣᩅᨲᩮᩣ ᨣᩮᩃᨬ᩠ᨬᩮᨶ, ᩋᨸᩥ ᨧ ᨾᩮ, ᨽᨶ᩠ᨲᩮ, ᩋᩉᩮᩣᩈᩥ ᨠᩣᨧᩥᨴᩮᩅ ᩋᩔᩣᩈᨾᨲ᩠ᨲᩣ – ‘ᨶ ᨲᩣᩅ ᨽᨣᩅᩣ ᨸᩁᩥᨶᩥᨻ᩠ᨻᩣᨿᩥᩔᨲᩥ, ᨶ ᨿᩣᩅ ᨽᨣᩅᩣ ᨽᩥᨠ᩠ᨡᩩᩈᨦ᩠ᨥᩴ ᩌᩁᨻ᩠ᨽ ᨠᩥᨬ᩠ᨧᩥᨴᩮᩅ ᩏᨴᩣᩉᩁᨲᩦ’’’ᨲᩥ.

᪑᪖᪕. ‘‘ᨠᩥᩴ ᨸᨶᩣᨶᨶ᩠ᨴ, ᨽᩥᨠ᩠ᨡᩩᩈᨦ᩠ᨥᩮᩣ ᨾᨿᩥ ᨸᨧ᩠ᨧᩣᩈᩦᩈᨲᩥ [ᨸᨧ᩠ᨧᩣᩈᩥᩴᩈᨲᩥ (ᩈᩦ. ᩈ᩠ᨿᩣ.)]? ᨴᩮᩈᩥᨲᩮᩣ, ᩌᨶᨶ᩠ᨴ, ᨾᨿᩣ ᨵᨾ᩠ᨾᩮᩣ ᩋᨶᨶ᩠ᨲᩁᩴ ᩋᨻᩣᩉᩥᩁᩴ ᨠᩁᩥᨲ᩠ᩅᩣ. ᨶᨲ᩠ᨳᩣᨶᨶ᩠ᨴ, ᨲᨳᩣᨣᨲᩔ ᨵᨾ᩠ᨾᩮᩈᩩ ᩌᨧᩁᩥᨿᨾᩩᨭ᩠ᨮᩥ. ᨿᩔ ᨶᩪᨶ, ᩌᨶᨶ᩠ᨴ, ᩑᩅᨾᩔ – ‘ᩋᩉᩴ ᨽᩥᨠ᩠ᨡᩩᩈᨦ᩠ᨥᩴ ᨸᩁᩥᩉᩁᩥᩔᩣᨾᩦ’ᨲᩥ ᩅᩣ ‘ᨾᨾᩩᨴ᩠ᨴᩮᩈᩥᨠᩮᩣ ᨽᩥᨠ᩠ᨡᩩᩈᨦ᩠ᨥᩮᩣ’ᨲᩥ ᩅᩣ, ᩈᩮᩣ ᨶᩪᨶ, ᩌᨶᨶ᩠ᨴ, ᨽᩥᨠ᩠ᨡᩩᩈᨦ᩠ᨥᩴ ᩌᩁᨻ᩠ᨽ ᨠᩥᨬ᩠ᨧᩥᨴᩮᩅ ᩏᨴᩣᩉᩁᩮᨿ᩠ᨿ. ᨲᨳᩣᨣᨲᩔ ᨡᩮᩣ, ᩌᨶᨶ᩠ᨴ, ᨶ ᩑᩅᩴ ᩉᩮᩣᨲᩥ – ‘ᩋᩉᩴ ᨽᩥᨠ᩠ᨡᩩᩈᨦ᩠ᨥᩴ ᨸᩁᩥᩉᩁᩥᩔᩣᨾᩦ’ᨲᩥ ᩅᩣ ‘ᨾᨾᩩᨴ᩠ᨴᩮᩈᩥᨠᩮᩣ ᨽᩥᨠ᩠ᨡᩩᩈᨦ᩠ᨥᩮᩣ’ᨲᩥ ᩅᩣ. ᩈᨠᩥᩴ [ᨠᩥᩴ (ᩈᩦ. ᨸᩦ.)], ᩌᨶᨶ᩠ᨴ, ᨲᨳᩣᨣᨲᩮᩣ ᨽᩥᨠ᩠ᨡᩩᩈᨦ᩠ᨥᩴ ᩌᩁᨻ᩠ᨽ ᨠᩥᨬ᩠ᨧᩥᨴᩮᩅ ᩏᨴᩣᩉᩁᩥᩔᨲᩥ. ᩋᩉᩴ ᨡᩮᩣ ᨸᨶᩣᨶᨶ᩠ᨴ, ᩑᨲᩁᩉᩥ ᨩᩥᨱ᩠ᨱᩮᩣ ᩅᩩᨴ᩠ᨵᩮᩣ ᨾᩉᩃ᩠ᩃᨠᩮᩣ ᩋᨴ᩠ᨵᨣᨲᩮᩣ ᩅᨿᩮᩣᩋᨶᩩᨸ᩠ᨸᨲ᩠ᨲᩮᩣ. ᩌᩈᩦᨲᩥᨠᩮᩣ ᨾᩮ ᩅᨿᩮᩣ ᩅᨲ᩠ᨲᨲᩥ. ᩈᩮᨿ᩠ᨿᨳᩣᨸᩥ, ᩌᨶᨶ᩠ᨴ, ᨩᨩ᩠ᨩᩁᩈᨠᨭᩴ ᩅᩮᨮᨾᩥᩔᨠᩮᨶ [ᩅᩮᩊᩩᨾᩥᩔᨠᩮᨶ (ᩈ᩠ᨿᩣ.), ᩅᩮᨥᨾᩥᩔᨠᩮᨶ (ᨸᩦ.), ᩅᩮᨵᨾᩥᩔᨠᩮᨶ, ᩅᩮᨡᨾᩥᩔᨠᩮᨶ (ᨠ.)] ᨿᩣᨸᩮᨲᩥ, ᩑᩅᨾᩮᩅ ᨡᩮᩣ, ᩌᨶᨶ᩠ᨴ, ᩅᩮᨮᨾᩥᩔᨠᩮᨶ ᨾᨬ᩠ᨬᩮ ᨲᨳᩣᨣᨲᩔ ᨠᩣᨿᩮᩣ ᨿᩣᨸᩮᨲᩥ. ᨿᩈ᩠ᨾᩥᩴ, ᩌᨶᨶ᩠ᨴ, ᩈᨾᨿᩮ ᨲᨳᩣᨣᨲᩮᩣ ᩈᨻ᩠ᨻᨶᩥᨾᩥᨲ᩠ᨲᩣᨶᩴ ᩋᨾᨶᩈᩥᨠᩣᩁᩣ ᩑᨠᨧ᩠ᨧᩣᨶᩴ ᩅᩮᨴᨶᩣᨶᩴ ᨶᩥᩁᩮᩣᨵᩣ ᩋᨶᩥᨾᩥᨲ᩠ᨲᩴ ᨧᩮᨲᩮᩣᩈᨾᩣᨵᩥᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ, ᨹᩣᩈᩩᨲᩁᩮᩣ, ᩌᨶᨶ᩠ᨴ, ᨲᩈ᩠ᨾᩥᩴ ᩈᨾᨿᩮ ᨲᨳᩣᨣᨲᩔ ᨠᩣᨿᩮᩣ ᩉᩮᩣᨲᩥ. ᨲᩈ᩠ᨾᩣᨲᩥᩉᩣᨶᨶ᩠ᨴ, ᩋᨲ᩠ᨲᨴᩦᨸᩣ ᩅᩥᩉᩁᨳ ᩋᨲ᩠ᨲᩈᩁᨱᩣ ᩋᨶᨬ᩠ᨬᩈᩁᨱᩣ, ᨵᨾ᩠ᨾᨴᩦᨸᩣ ᨵᨾ᩠ᨾᩈᩁᨱᩣ ᩋᨶᨬ᩠ᨬᩈᩁᨱᩣ. ᨠᨳᨬ᩠ᨧᩣᨶᨶ᩠ᨴ, ᨽᩥᨠ᩠ᨡᩩ ᩋᨲ᩠ᨲᨴᩦᨸᩮᩣ ᩅᩥᩉᩁᨲᩥ ᩋᨲ᩠ᨲᩈᩁᨱᩮᩣ ᩋᨶᨬ᩠ᨬᩈᩁᨱᩮᩣ, ᨵᨾ᩠ᨾᨴᩦᨸᩮᩣ ᨵᨾ᩠ᨾᩈᩁᨱᩮᩣ ᩋᨶᨬ᩠ᨬᩈᩁᨱᩮᩣ? ᩍᨵᩣᨶᨶ᩠ᨴ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ ᩋᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ, ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ. ᩅᩮᨴᨶᩣᩈᩩ…ᨸᩮ… ᨧᩥᨲ᩠ᨲᩮ…ᨸᩮ… ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ, ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ. ᩑᩅᩴ ᨡᩮᩣ, ᩌᨶᨶ᩠ᨴ, ᨽᩥᨠ᩠ᨡᩩ ᩋᨲ᩠ᨲᨴᩦᨸᩮᩣ ᩅᩥᩉᩁᨲᩥ ᩋᨲ᩠ᨲᩈᩁᨱᩮᩣ ᩋᨶᨬ᩠ᨬᩈᩁᨱᩮᩣ, ᨵᨾ᩠ᨾᨴᩦᨸᩮᩣ ᨵᨾ᩠ᨾᩈᩁᨱᩮᩣ ᩋᨶᨬ᩠ᨬᩈᩁᨱᩮᩣ. ᨿᩮ ᩉᩥ ᨠᩮᨧᩥ, ᩌᨶᨶ᩠ᨴ, ᩑᨲᩁᩉᩥ ᩅᩣ ᨾᨾ ᩅᩣ ᩋᨧ᩠ᨧᨿᩮᨶ ᩋᨲ᩠ᨲᨴᩦᨸᩣ ᩅᩥᩉᩁᩥᩔᨶ᩠ᨲᩥ ᩋᨲ᩠ᨲᩈᩁᨱᩣ ᩋᨶᨬ᩠ᨬᩈᩁᨱᩣ, ᨵᨾ᩠ᨾᨴᩦᨸᩣ ᨵᨾ᩠ᨾᩈᩁᨱᩣ ᩋᨶᨬ᩠ᨬᩈᩁᨱᩣ, ᨲᨾᨲᨣ᩠ᨣᩮ ᨾᩮ ᨲᩮ, ᩌᨶᨶ᩠ᨴ, ᨽᩥᨠ᩠ᨡᩪ ᨽᩅᩥᩔᨶ᩠ᨲᩥ ᨿᩮ ᨠᩮᨧᩥ ᩈᩥᨠ᩠ᨡᩣᨠᩣᨾᩣ’’ᨲᩥ.

ᨴᩩᨲᩥᨿᨽᩣᨱᩅᩣᩁᩮᩣ.

ᨶᩥᨾᩥᨲ᩠ᨲᩮᩣᨽᩣᩈᨠᨳᩣ

᪑᪖᪖. ᩋᨳ ᨡᩮᩣ ᨽᨣᩅᩣ ᨸᩩᨻ᩠ᨻᨱ᩠ᩉᩈᨾᨿᩴ ᨶᩥᩅᩣᩈᩮᨲ᩠ᩅᩣ ᨸᨲ᩠ᨲᨧᩦᩅᩁᨾᩣᨴᩣᨿ ᩅᩮᩈᩣᩃᩥᩴ ᨸᩥᨱ᩠ᨯᩣᨿ ᨸᩣᩅᩥᩈᩥ. ᩅᩮᩈᩣᩃᩥᨿᩴ ᨸᩥᨱ᩠ᨯᩣᨿ ᨧᩁᩥᨲ᩠ᩅᩣ ᨸᨧ᩠ᨨᩣᨽᨲ᩠ᨲᩴ ᨸᩥᨱ᩠ᨯᨸᩣᨲᨸᨭᩥᨠ᩠ᨠᨶ᩠ᨲᩮᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᨣᨱ᩠ᩉᩣᩉᩥ, ᩌᨶᨶ᩠ᨴ, ᨶᩥᩈᩦᨴᨶᩴ, ᨿᩮᨶ ᨧᩣᨸᩣᩃᩴ ᨧᩮᨲᩥᨿᩴ [ᨸᩣᩅᩣᩃᩴ (ᨧᩮᨲᩥᨿᩴ (ᩈ᩠ᨿᩣ.)] ᨲᩮᨶᩩᨸᩈᨦ᩠ᨠᨾᩥᩔᩣᨾ ᨴᩥᩅᩣ ᩅᩥᩉᩣᩁᩣᨿᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨭᩥᩔᩩᨲ᩠ᩅᩣ ᨶᩥᩈᩦᨴᨶᩴ ᩌᨴᩣᨿ ᨽᨣᩅᨶ᩠ᨲᩴ ᨸᩥᨭ᩠ᨮᩥᨲᩮᩣ ᨸᩥᨭ᩠ᨮᩥᨲᩮᩣ ᩋᨶᩩᨻᨶ᩠ᨵᩥ. ᩋᨳ ᨡᩮᩣ ᨽᨣᩅᩣ ᨿᩮᨶ ᨧᩣᨸᩣᩃᩴ ᨧᩮᨲᩥᨿᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨸᨬ᩠ᨬᨲ᩠ᨲᩮ ᩌᩈᨶᩮ ᨶᩥᩈᩦᨴᩥ. ᩌᨿᩈ᩠ᨾᩣᨸᩥ ᨡᩮᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ.

᪑᪖᪗. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩴ ᨡᩮᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᨽᨣᩅᩣ ᩑᨲᨴᩅᩮᩣᨧ – ‘‘ᩁᨾᨱᩦᨿᩣ, ᩌᨶᨶ᩠ᨴ, ᩅᩮᩈᩣᩃᩦ, ᩁᨾᨱᩦᨿᩴ ᩏᨴᩮᨶᩴ ᨧᩮᨲᩥᨿᩴ, ᩁᨾᨱᩦᨿᩴ ᨣᩮᩣᨲᨾᨠᩴ ᨧᩮᨲᩥᨿᩴ, ᩁᨾᨱᩦᨿᩴ ᩈᨲ᩠ᨲᨾ᩠ᨻᩴ [ᩈᨲ᩠ᨲᨾ᩠ᨻᨠᩴ (ᨸᩦ.)] ᨧᩮᨲᩥᨿᩴ, ᩁᨾᨱᩦᨿᩴ ᨻᩉᩩᨸᩩᨲ᩠ᨲᩴ ᨧᩮᨲᩥᨿᩴ, ᩁᨾᨱᩦᨿᩴ ᩈᩣᩁᨶ᩠ᨴᨴᩴ ᨧᩮᨲᩥᨿᩴ, ᩁᨾᨱᩦᨿᩴ ᨧᩣᨸᩣᩃᩴ ᨧᩮᨲᩥᨿᩴ. ᨿᩔ ᨠᩔᨧᩥ, ᩌᨶᨶ᩠ᨴ, ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ, ᩈᩮᩣ ᩌᨠᨦ᩠ᨡᨾᩣᨶᩮᩣ ᨠᨸ᩠ᨸᩴ ᩅᩣ ᨲᩥᨭ᩠ᨮᩮᨿ᩠ᨿ ᨠᨸ᩠ᨸᩣᩅᩈᩮᩈᩴ ᩅᩣ. ᨲᨳᩣᨣᨲᩔ ᨡᩮᩣ, ᩌᨶᨶ᩠ᨴ, ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ, ᩈᩮᩣ ᩌᨠᨦ᩠ᨡᨾᩣᨶᩮᩣ [ᩌᨠᨦ᩠ᨡᨾᩣᨶᩮᩣ (?)], ᩌᨶᨶ᩠ᨴ, ᨲᨳᩣᨣᨲᩮᩣ ᨠᨸ᩠ᨸᩴ ᩅᩣ ᨲᩥᨭ᩠ᨮᩮᨿ᩠ᨿ ᨠᨸ᩠ᨸᩣᩅᩈᩮᩈᩴ ᩅᩣ’’ᨲᩥ. ᩑᩅᨾ᩠ᨸᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩣ ᩒᩊᩣᩁᩥᨠᩮ ᨶᩥᨾᩥᨲ᩠ᨲᩮ ᨠᨿᩥᩁᨾᩣᨶᩮ ᩒᩊᩣᩁᩥᨠᩮ ᩒᨽᩣᩈᩮ ᨠᨿᩥᩁᨾᩣᨶᩮ ᨶᩣᩈᨠ᩠ᨡᩥ ᨸᨭᩥᩅᩥᨩ᩠ᨫᩥᨲᩩᩴ; ᨶ ᨽᨣᩅᨶ᩠ᨲᩴ ᨿᩣᨧᩥ – ‘‘ᨲᩥᨭ᩠ᨮᨲᩩ, ᨽᨶ᩠ᨲᩮ, ᨽᨣᩅᩣ ᨠᨸ᩠ᨸᩴ, ᨲᩥᨭ᩠ᨮᨲᩩ ᩈᩩᨣᨲᩮᩣ ᨠᨸ᩠ᨸᩴ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶ’’ᨶ᩠ᨲᩥ, ᨿᨳᩣ ᨲᩴ ᨾᩣᩁᩮᨶ ᨸᩁᩥᨿᩩᨭ᩠ᨮᩥᨲᨧᩥᨲ᩠ᨲᩮᩣ. ᨴᩩᨲᩥᨿᨾ᩠ᨸᩥ ᨡᩮᩣ ᨽᨣᩅᩣ…ᨸᩮ… ᨲᨲᩥᨿᨾ᩠ᨸᩥ ᨡᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩁᨾᨱᩦᨿᩣ, ᩌᨶᨶ᩠ᨴ, ᩅᩮᩈᩣᩃᩦ, ᩁᨾᨱᩦᨿᩴ ᩏᨴᩮᨶᩴ ᨧᩮᨲᩥᨿᩴ, ᩁᨾᨱᩦᨿᩴ ᨣᩮᩣᨲᨾᨠᩴ ᨧᩮᨲᩥᨿᩴ, ᩁᨾᨱᩦᨿᩴ ᩈᨲ᩠ᨲᨾ᩠ᨻᩴ ᨧᩮᨲᩥᨿᩴ, ᩁᨾᨱᩦᨿᩴ ᨻᩉᩩᨸᩩᨲ᩠ᨲᩴ ᨧᩮᨲᩥᨿᩴ, ᩁᨾᨱᩦᨿᩴ ᩈᩣᩁᨶ᩠ᨴᨴᩴ ᨧᩮᨲᩥᨿᩴ, ᩁᨾᨱᩦᨿᩴ ᨧᩣᨸᩣᩃᩴ ᨧᩮᨲᩥᨿᩴ. ᨿᩔ ᨠᩔᨧᩥ, ᩌᨶᨶ᩠ᨴ, ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ, ᩈᩮᩣ ᩌᨠᨦ᩠ᨡᨾᩣᨶᩮᩣ ᨠᨸ᩠ᨸᩴ ᩅᩣ ᨲᩥᨭ᩠ᨮᩮᨿ᩠ᨿ ᨠᨸ᩠ᨸᩣᩅᩈᩮᩈᩴ ᩅᩣ. ᨲᨳᩣᨣᨲᩔ ᨡᩮᩣ, ᩌᨶᨶ᩠ᨴ, ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ, ᩈᩮᩣ ᩌᨠᨦ᩠ᨡᨾᩣᨶᩮᩣ, ᩌᨶᨶ᩠ᨴ, ᨲᨳᩣᨣᨲᩮᩣ ᨠᨸ᩠ᨸᩴ ᩅᩣ ᨲᩥᨭ᩠ᨮᩮᨿ᩠ᨿ ᨠᨸ᩠ᨸᩣᩅᩈᩮᩈᩴ ᩅᩣ’’ᨲᩥ. ᩑᩅᨾ᩠ᨸᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩣ ᩒᩊᩣᩁᩥᨠᩮ ᨶᩥᨾᩥᨲ᩠ᨲᩮ ᨠᨿᩥᩁᨾᩣᨶᩮ ᩒᩊᩣᩁᩥᨠᩮ ᩒᨽᩣᩈᩮ ᨠᨿᩥᩁᨾᩣᨶᩮ ᨶᩣᩈᨠ᩠ᨡᩥ ᨸᨭᩥᩅᩥᨩ᩠ᨫᩥᨲᩩᩴ; ᨶ ᨽᨣᩅᨶ᩠ᨲᩴ ᨿᩣᨧᩥ – ‘‘ᨲᩥᨭ᩠ᨮᨲᩩ, ᨽᨶ᩠ᨲᩮ, ᨽᨣᩅᩣ ᨠᨸ᩠ᨸᩴ, ᨲᩥᨭ᩠ᨮᨲᩩ ᩈᩩᨣᨲᩮᩣ ᨠᨸ᩠ᨸᩴ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶ’’ᨶ᩠ᨲᩥ, ᨿᨳᩣ ᨲᩴ ᨾᩣᩁᩮᨶ ᨸᩁᩥᨿᩩᨭ᩠ᨮᩥᨲᨧᩥᨲ᩠ᨲᩮᩣ. ᩋᨳ ᨡᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᨣᨧ᩠ᨨ ᨲ᩠ᩅᩴ, ᩌᨶᨶ᩠ᨴ, ᨿᩔᨴᩣᨶᩥ ᨠᩣᩃᩴ ᨾᨬ᩠ᨬᩈᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨭᩥᩔᩩᨲ᩠ᩅᩣ ᩏᨭ᩠ᨮᩣᨿᩣᩈᨶᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᩋᩅᩥᨴᩪᩁᩮ ᩋᨬ᩠ᨬᨲᩁᩈ᩠ᨾᩥᩴ ᩁᩩᨠ᩠ᨡᨾᩪᩃᩮ ᨶᩥᩈᩦᨴᩥ.

ᨾᩣᩁᨿᩣᨧᨶᨠᨳᩣ

᪑᪖᪘. ᩋᨳ ᨡᩮᩣ ᨾᩣᩁᩮᩣ ᨸᩣᨸᩥᨾᩣ ᩋᨧᩥᩁᨸᨠ᩠ᨠᨶ᩠ᨲᩮ ᩌᨿᩈ᩠ᨾᨶ᩠ᨲᩮ ᩌᨶᨶ᩠ᨴᩮ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩣᩈᩥ. ᩑᨠᨾᨶ᩠ᨲᩴ ᨮᩥᨲᩮᩣ ᨡᩮᩣ ᨾᩣᩁᩮᩣ ᨸᩣᨸᩥᨾᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᨸᩁᩥᨶᩥᨻ᩠ᨻᩣᨲᩩᨴᩣᨶᩥ, ᨽᨶ᩠ᨲᩮ, ᨽᨣᩅᩣ, ᨸᩁᩥᨶᩥᨻ᩠ᨻᩣᨲᩩ ᩈᩩᨣᨲᩮᩣ, ᨸᩁᩥᨶᩥᨻ᩠ᨻᩣᨶᨠᩣᩃᩮᩣ ᨴᩣᨶᩥ, ᨽᨶ᩠ᨲᩮ, ᨽᨣᩅᨲᩮᩣ. ᨽᩣᩈᩥᨲᩣ ᨡᩮᩣ ᨸᨶᩮᩈᩣ, ᨽᨶ᩠ᨲᩮ, ᨽᨣᩅᨲᩣ ᩅᩣᨧᩣ – ‘ᨶ ᨲᩣᩅᩣᩉᩴ, ᨸᩣᨸᩥᨾ, ᨸᩁᩥᨶᩥᨻ᩠ᨻᩣᨿᩥᩔᩣᨾᩥ, ᨿᩣᩅ ᨾᩮ ᨽᩥᨠ᩠ᨡᩪ ᨶ ᩈᩣᩅᨠᩣ ᨽᩅᩥᩔᨶ᩠ᨲᩥ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨻᩉᩩᩔᩩᨲᩣ ᨵᨾ᩠ᨾᨵᩁᩣ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩣ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩣ ᩋᨶᩩᨵᨾ᩠ᨾᨧᩣᩁᩥᨶᩮᩣ, ᩈᨠᩴ ᩌᨧᩁᩥᨿᨠᩴ ᩏᨣ᩠ᨣᩉᩮᨲ᩠ᩅᩣ ᩌᨧᩥᨠ᩠ᨡᩥᩔᨶ᩠ᨲᩥ ᨴᩮᩈᩮᩔᨶ᩠ᨲᩥ ᨸᨬ᩠ᨬᨸᩮᩔᨶ᩠ᨲᩥ ᨸᨭ᩠ᨮᨸᩮᩔᨶ᩠ᨲᩥ ᩅᩥᩅᩁᩥᩔᨶ᩠ᨲᩥ ᩅᩥᨽᨩᩥᩔᨶ᩠ᨲᩥ ᩏᨲ᩠ᨲᩣᨶᩦ [ᩏᨲ᩠ᨲᩣᨶᩥᩴ (ᨠ.), ᩏᨲ᩠ᨲᩣᨶᩥ (ᩈᩦ. ᨸᩦ.)] ᨠᩁᩥᩔᨶ᩠ᨲᩥ, ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᨶ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᩔᨶ᩠ᨲᩦ’ᨲᩥ. ᩑᨲᩁᩉᩥ ᨡᩮᩣ ᨸᨶ, ᨽᨶ᩠ᨲᩮ, ᨽᩥᨠ᩠ᨡᩪ ᨽᨣᩅᨲᩮᩣ ᩈᩣᩅᨠᩣ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨻᩉᩩᩔᩩᨲᩣ ᨵᨾ᩠ᨾᨵᩁᩣ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩣ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩣ ᩋᨶᩩᨵᨾ᩠ᨾᨧᩣᩁᩥᨶᩮᩣ, ᩈᨠᩴ ᩌᨧᩁᩥᨿᨠᩴ ᩏᨣ᩠ᨣᩉᩮᨲ᩠ᩅᩣ ᩌᨧᩥᨠ᩠ᨡᨶ᩠ᨲᩥ ᨴᩮᩈᩮᨶ᩠ᨲᩥ ᨸᨬ᩠ᨬᨸᩮᨶ᩠ᨲᩥ ᨸᨭ᩠ᨮᨸᩮᨶ᩠ᨲᩥ ᩅᩥᩅᩁᨶ᩠ᨲᩥ ᩅᩥᨽᨩᨶ᩠ᨲᩥ ᩏᨲ᩠ᨲᩣᨶᩦᨠᩁᩮᩣᨶ᩠ᨲᩥ, ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᨶ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᨶ᩠ᨲᩥ. ᨸᩁᩥᨶᩥᨻ᩠ᨻᩣᨲᩩᨴᩣᨶᩥ, ᨽᨶ᩠ᨲᩮ, ᨽᨣᩅᩣ, ᨸᩁᩥᨶᩥᨻ᩠ᨻᩣᨲᩩ ᩈᩩᨣᨲᩮᩣ, ᨸᩁᩥᨶᩥᨻ᩠ᨻᩣᨶᨠᩣᩃᩮᩣᨴᩣᨶᩥ, ᨽᨶ᩠ᨲᩮ, ᨽᨣᩅᨲᩮᩣ.

‘‘ᨽᩣᩈᩥᨲᩣ ᨡᩮᩣ ᨸᨶᩮᩈᩣ, ᨽᨶ᩠ᨲᩮ, ᨽᨣᩅᨲᩣ ᩅᩣᨧᩣ – ‘ᨶ ᨲᩣᩅᩣᩉᩴ, ᨸᩣᨸᩥᨾ, ᨸᩁᩥᨶᩥᨻ᩠ᨻᩣᨿᩥᩔᩣᨾᩥ, ᨿᩣᩅ ᨾᩮ ᨽᩥᨠ᩠ᨡᩩᨶᩥᨿᩮᩣ ᨶ ᩈᩣᩅᩥᨠᩣ ᨽᩅᩥᩔᨶ᩠ᨲᩥ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨻᩉᩩᩔᩩᨲᩣ ᨵᨾ᩠ᨾᨵᩁᩣ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩣ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩣ ᩋᨶᩩᨵᨾ᩠ᨾᨧᩣᩁᩥᨶᩥᨿᩮᩣ, ᩈᨠᩴ ᩌᨧᩁᩥᨿᨠᩴ ᩏᨣ᩠ᨣᩉᩮᨲ᩠ᩅᩣ ᩌᨧᩥᨠ᩠ᨡᩥᩔᨶ᩠ᨲᩥ ᨴᩮᩈᩮᩔᨶ᩠ᨲᩥ ᨸᨬ᩠ᨬᨸᩮᩔᨶ᩠ᨲᩥ ᨸᨭ᩠ᨮᨸᩮᩔᨶ᩠ᨲᩥ ᩅᩥᩅᩁᩥᩔᨶ᩠ᨲᩥ ᩅᩥᨽᨩᩥᩔᨶ᩠ᨲᩥ ᩏᨲ᩠ᨲᩣᨶᩦᨠᩁᩥᩔᨶ᩠ᨲᩥ, ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᨶ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᩔᨶ᩠ᨲᩦ’ᨲᩥ. ᩑᨲᩁᩉᩥ ᨡᩮᩣ ᨸᨶ, ᨽᨶ᩠ᨲᩮ, ᨽᩥᨠ᩠ᨡᩩᨶᩥᨿᩮᩣ ᨽᨣᩅᨲᩮᩣ ᩈᩣᩅᩥᨠᩣ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨻᩉᩩᩔᩩᨲᩣ ᨵᨾ᩠ᨾᨵᩁᩣ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩣ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩣ ᩋᨶᩩᨵᨾ᩠ᨾᨧᩣᩁᩥᨶᩥᨿᩮᩣ, ᩈᨠᩴ ᩌᨧᩁᩥᨿᨠᩴ ᩏᨣ᩠ᨣᩉᩮᨲ᩠ᩅᩣ ᩌᨧᩥᨠ᩠ᨡᨶ᩠ᨲᩥ ᨴᩮᩈᩮᨶ᩠ᨲᩥ ᨸᨬ᩠ᨬᨸᩮᨶ᩠ᨲᩥ ᨸᨭ᩠ᨮᨸᩮᨶ᩠ᨲᩥ ᩅᩥᩅᩁᨶ᩠ᨲᩥ ᩅᩥᨽᨩᨶ᩠ᨲᩥ ᩏᨲ᩠ᨲᩣᨶᩦᨠᩁᩮᩣᨶ᩠ᨲᩥ, ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᨶ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᨶ᩠ᨲᩥ. ᨸᩁᩥᨶᩥᨻ᩠ᨻᩣᨲᩩᨴᩣᨶᩥ, ᨽᨶ᩠ᨲᩮ, ᨽᨣᩅᩣ, ᨸᩁᩥᨶᩥᨻ᩠ᨻᩣᨲᩩ ᩈᩩᨣᨲᩮᩣ, ᨸᩁᩥᨶᩥᨻ᩠ᨻᩣᨶᨠᩣᩃᩮᩣᨴᩣᨶᩥ, ᨽᨶ᩠ᨲᩮ, ᨽᨣᩅᨲᩮᩣ.

‘‘ᨽᩣᩈᩥᨲᩣ ᨡᩮᩣ ᨸᨶᩮᩈᩣ, ᨽᨶ᩠ᨲᩮ, ᨽᨣᩅᨲᩣ ᩅᩣᨧᩣ – ‘ᨶ ᨲᩣᩅᩣᩉᩴ, ᨸᩣᨸᩥᨾ, ᨸᩁᩥᨶᩥᨻ᩠ᨻᩣᨿᩥᩔᩣᨾᩥ, ᨿᩣᩅ ᨾᩮ ᩏᨸᩣᩈᨠᩣ ᨶ ᩈᩣᩅᨠᩣ ᨽᩅᩥᩔᨶ᩠ᨲᩥ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨻᩉᩩᩔᩩᨲᩣ ᨵᨾ᩠ᨾᨵᩁᩣ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩣ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩣ ᩋᨶᩩᨵᨾ᩠ᨾᨧᩣᩁᩥᨶᩮᩣ, ᩈᨠᩴ ᩌᨧᩁᩥᨿᨠᩴ ᩏᨣ᩠ᨣᩉᩮᨲ᩠ᩅᩣ ᩌᨧᩥᨠ᩠ᨡᩥᩔᨶ᩠ᨲᩥ ᨴᩮᩈᩮᩔᨶ᩠ᨲᩥ ᨸᨬ᩠ᨬᨸᩮᩔᨶ᩠ᨲᩥ ᨸᨭ᩠ᨮᨸᩮᩔᨶ᩠ᨲᩥ ᩅᩥᩅᩁᩥᩔᨶ᩠ᨲᩥ ᩅᩥᨽᨩᩥᩔᨶ᩠ᨲᩥ ᩏᨲ᩠ᨲᩣᨶᩦᨠᩁᩥᩔᨶ᩠ᨲᩥ, ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᨶ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᩔᨶ᩠ᨲᩦ’ᨲᩥ. ᩑᨲᩁᩉᩥ ᨡᩮᩣ ᨸᨶ, ᨽᨶ᩠ᨲᩮ, ᩏᨸᩣᩈᨠᩣ ᨽᨣᩅᨲᩮᩣ ᩈᩣᩅᨠᩣ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨻᩉᩩᩔᩩᨲᩣ ᨵᨾ᩠ᨾᨵᩁᩣ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩣ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩣ ᩋᨶᩩᨵᨾ᩠ᨾᨧᩣᩁᩥᨶᩮᩣ, ᩈᨠᩴ ᩌᨧᩁᩥᨿᨠᩴ ᩏᨣ᩠ᨣᩉᩮᨲ᩠ᩅᩣ ᩌᨧᩥᨠ᩠ᨡᨶ᩠ᨲᩥ ᨴᩮᩈᩮᨶ᩠ᨲᩥ ᨸᨬ᩠ᨬᨸᩮᨶ᩠ᨲᩥ ᨸᨭ᩠ᨮᨸᩮᨶ᩠ᨲᩥ ᩅᩥᩅᩁᨶ᩠ᨲᩥ ᩅᩥᨽᨩᨶ᩠ᨲᩥ ᩏᨲ᩠ᨲᩣᨶᩦᨠᩁᩮᩣᨶ᩠ᨲᩥ, ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᨶ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᨶ᩠ᨲᩥ. ᨸᩁᩥᨶᩥᨻ᩠ᨻᩣᨲᩩᨴᩣᨶᩥ, ᨽᨶ᩠ᨲᩮ, ᨽᨣᩅᩣ, ᨸᩁᩥᨶᩥᨻ᩠ᨻᩣᨲᩩ ᩈᩩᨣᨲᩮᩣ, ᨸᩁᩥᨶᩥᨻ᩠ᨻᩣᨶᨠᩣᩃᩮᩣᨴᩣᨶᩥ, ᨽᨶ᩠ᨲᩮ, ᨽᨣᩅᨲᩮᩣ.

‘‘ᨽᩣᩈᩥᨲᩣ ᨡᩮᩣ ᨸᨶᩮᩈᩣ, ᨽᨶ᩠ᨲᩮ, ᨽᨣᩅᨲᩣ ᩅᩣᨧᩣ – ‘ᨶ ᨲᩣᩅᩣᩉᩴ, ᨸᩣᨸᩥᨾ ᨸᩁᩥᨶᩥᨻ᩠ᨻᩣᨿᩥᩔᩣᨾᩥ, ᨿᩣᩅ ᨾᩮ ᩏᨸᩣᩈᩥᨠᩣ ᨶ ᩈᩣᩅᩥᨠᩣ ᨽᩅᩥᩔᨶ᩠ᨲᩥ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨻᩉᩩᩔᩩᨲᩣ ᨵᨾ᩠ᨾᨵᩁᩣ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩣ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩣ ᩋᨶᩩᨵᨾ᩠ᨾᨧᩣᩁᩥᨶᩥᨿᩮᩣ, ᩈᨠᩴ ᩌᨧᩁᩥᨿᨠᩴ ᩏᨣ᩠ᨣᩉᩮᨲ᩠ᩅᩣ ᩌᨧᩥᨠ᩠ᨡᩥᩔᨶ᩠ᨲᩥ ᨴᩮᩈᩮᩔᨶ᩠ᨲᩥ ᨸᨬ᩠ᨬᨸᩮᩔᨶ᩠ᨲᩥ ᨸᨭ᩠ᨮᨸᩮᩔᨶ᩠ᨲᩥ ᩅᩥᩅᩁᩥᩔᨶ᩠ᨲᩥ ᩅᩥᨽᨩᩥᩔᨶ᩠ᨲᩥ ᩏᨲ᩠ᨲᩣᨶᩦᨠᩁᩥᩔᨶ᩠ᨲᩥ, ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᨶ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᩔᨶ᩠ᨲᩦ’ᨲᩥ. ᩑᨲᩁᩉᩥ ᨡᩮᩣ ᨸᨶ, ᨽᨶ᩠ᨲᩮ, ᩏᨸᩣᩈᩥᨠᩣ ᨽᨣᩅᨲᩮᩣ ᩈᩣᩅᩥᨠᩣ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨻᩉᩩᩔᩩᨲᩣ ᨵᨾ᩠ᨾᨵᩁᩣ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩣ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩣ ᩋᨶᩩᨵᨾ᩠ᨾᨧᩣᩁᩥᨶᩥᨿᩮᩣ, ᩈᨠᩴ ᩌᨧᩁᩥᨿᨠᩴ ᩏᨣ᩠ᨣᩉᩮᨲ᩠ᩅᩣ ᩌᨧᩥᨠ᩠ᨡᨶ᩠ᨲᩥ ᨴᩮᩈᩮᨶ᩠ᨲᩥ ᨸᨬ᩠ᨬᨸᩮᨶ᩠ᨲᩥ ᨸᨭ᩠ᨮᨸᩮᨶ᩠ᨲᩥ ᩅᩥᩅᩁᨶ᩠ᨲᩥ ᩅᩥᨽᨩᨶ᩠ᨲᩥ ᩏᨲ᩠ᨲᩣᨶᩦᨠᩁᩮᩣᨶ᩠ᨲᩥ, ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᨶ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᨶ᩠ᨲᩥ. ᨸᩁᩥᨶᩥᨻ᩠ᨻᩣᨲᩩᨴᩣᨶᩥ, ᨽᨶ᩠ᨲᩮ, ᨽᨣᩅᩣ, ᨸᩁᩥᨶᩥᨻ᩠ᨻᩣᨲᩩ ᩈᩩᨣᨲᩮᩣ, ᨸᩁᩥᨶᩥᨻ᩠ᨻᩣᨶᨠᩣᩃᩮᩣᨴᩣᨶᩥ, ᨽᨶ᩠ᨲᩮ, ᨽᨣᩅᨲᩮᩣ.

‘‘ᨽᩣᩈᩥᨲᩣ ᨡᩮᩣ ᨸᨶᩮᩈᩣ, ᨽᨶ᩠ᨲᩮ, ᨽᨣᩅᨲᩣ ᩅᩣᨧᩣ – ‘ᨶ ᨲᩣᩅᩣᩉᩴ, ᨸᩣᨸᩥᨾ, ᨸᩁᩥᨶᩥᨻ᩠ᨻᩣᨿᩥᩔᩣᨾᩥ, ᨿᩣᩅ ᨾᩮ ᩍᨴᩴ ᨻᩕᩉ᩠ᨾᨧᩁᩥᨿᩴ ᨶ ᩍᨴ᩠ᨵᩴ ᨧᩮᩅ ᨽᩅᩥᩔᨲᩥ ᨹᩦᨲᨬ᩠ᨧ ᩅᩥᨲ᩠ᨳᩣᩁᩥᨠᩴ ᨻᩣᩉᩩᨩᨬ᩠ᨬᩴ ᨸᩩᨳᩩᨽᩪᨲᩴ ᨿᩣᩅ ᨴᩮᩅᨾᨶᩩᩔᩮᩉᩥ ᩈᩩᨸ᩠ᨸᨠᩣᩈᩥᨲ’ᨶ᩠ᨲᩥ. ᩑᨲᩁᩉᩥ ᨡᩮᩣ ᨸᨶ, ᨽᨶ᩠ᨲᩮ, ᨽᨣᩅᨲᩮᩣ ᨻᩕᩉ᩠ᨾᨧᩁᩥᨿᩴ ᩍᨴ᩠ᨵᩴ ᨧᩮᩅ ᨹᩦᨲᨬ᩠ᨧ ᩅᩥᨲ᩠ᨳᩣᩁᩥᨠᩴ ᨻᩣᩉᩩᨩᨬ᩠ᨬᩴ ᨸᩩᨳᩩᨽᩪᨲᩴ, ᨿᩣᩅ ᨴᩮᩅᨾᨶᩩᩔᩮᩉᩥ ᩈᩩᨸ᩠ᨸᨠᩣᩈᩥᨲᩴ. ᨸᩁᩥᨶᩥᨻ᩠ᨻᩣᨲᩩᨴᩣᨶᩥ, ᨽᨶ᩠ᨲᩮ, ᨽᨣᩅᩣ, ᨸᩁᩥᨶᩥᨻ᩠ᨻᩣᨲᩩ ᩈᩩᨣᨲᩮᩣ, ᨸᩁᩥᨶᩥᨻ᩠ᨻᩣᨶᨠᩣᩃᩮᩣᨴᩣᨶᩥ, ᨽᨶ᩠ᨲᩮ, ᨽᨣᩅᨲᩮᩣ’’ᨲᩥ.

ᩑᩅᩴ ᩅᩩᨲ᩠ᨲᩮ ᨽᨣᩅᩣ ᨾᩣᩁᩴ ᨸᩣᨸᩥᨾᨶ᩠ᨲᩴ ᩑᨲᨴᩅᩮᩣᨧ – ‘‘ᩋᨸ᩠ᨸᩮᩣᩔᩩᨠ᩠ᨠᩮᩣ ᨲ᩠ᩅᩴ, ᨸᩣᨸᩥᨾ, ᩉᩮᩣᩉᩥ, ᨶ ᨧᩥᩁᩴ ᨲᨳᩣᨣᨲᩔ ᨸᩁᩥᨶᩥᨻ᩠ᨻᩣᨶᩴ ᨽᩅᩥᩔᨲᩥ. ᩍᨲᩮᩣ ᨲᩥᨱ᩠ᨱᩴ ᨾᩣᩈᩣᨶᩴ ᩋᨧ᩠ᨧᨿᩮᨶ ᨲᨳᩣᨣᨲᩮᩣ ᨸᩁᩥᨶᩥᨻ᩠ᨻᩣᨿᩥᩔᨲᩦ’’ᨲᩥ.

ᩌᨿᩩᩈᨦ᩠ᨡᩣᩁᩒᩔᨩ᩠ᨩᨶᩴ

᪑᪖᪙. ᩋᨳ ᨡᩮᩣ ᨽᨣᩅᩣ ᨧᩣᨸᩣᩃᩮ ᨧᩮᨲᩥᨿᩮ ᩈᨲᩮᩣ ᩈᨾ᩠ᨸᨩᩣᨶᩮᩣ ᩌᨿᩩᩈᨦ᩠ᨡᩣᩁᩴ ᩒᩔᨩᩥ. ᩒᩔᨭ᩠ᨮᩮ ᨧ ᨽᨣᩅᨲᩣ ᩌᨿᩩᩈᨦ᩠ᨡᩣᩁᩮ ᨾᩉᩣᨽᩪᨾᩥᨧᩣᩃᩮᩣ ᩋᩉᩮᩣᩈᩥ ᨽᩥᩴᩈᨶᨠᩮᩣ ᩈᩃᩮᩣᨾᩉᩴᩈᩮᩣ [ᩃᩮᩣᨾᩉᩴᩈᩮᩣ (ᩈ᩠ᨿᩣ.)], ᨴᩮᩅᨴᩩᨶ᩠ᨴᩩᨽᩥᨿᩮᩣ [ᨴᩮᩅᨴᩩᨴᩕᨽᩥᨿᩮᩣ (ᨠ.)] ᨧ ᨹᩃᩥᩴᩈᩩ. ᩋᨳ ᨡᩮᩣ ᨽᨣᩅᩣ ᩑᨲᨾᨲ᩠ᨳᩴ ᩅᩥᨴᩥᨲ᩠ᩅᩣ ᨲᩣᨿᩴ ᩅᩮᩃᩣᨿᩴ ᩍᨾᩴ ᩏᨴᩣᨶᩴ ᩏᨴᩣᨶᩮᩈᩥ –

‘‘ᨲᩩᩃᨾᨲᩩᩃᨬ᩠ᨧ ᩈᨾ᩠ᨽᩅᩴ, ᨽᩅᩈᨦ᩠ᨡᩣᩁᨾᩅᩔᨩᩥ ᨾᩩᨶᩥ;

ᩋᨩ᩠ᨫᨲ᩠ᨲᩁᨲᩮᩣ ᩈᨾᩣᩉᩥᨲᩮᩣ, ᩋᨽᩥᨶ᩠ᨴᩥ ᨠᩅᨧᨾᩥᩅᨲ᩠ᨲᩈᨾ᩠ᨽᩅ’’ᨶ᩠ᨲᩥ.

ᨾᩉᩣᨽᩪᨾᩥᨧᩣᩃᩉᩮᨲᩩ

᪑᪗᪐. ᩋᨳ ᨡᩮᩣ ᩌᨿᩈ᩠ᨾᨲᩮᩣ ᩌᨶᨶ᩠ᨴᩔ ᩑᨲᨴᩉᩮᩣᩈᩥ – ‘‘ᩋᨧ᩠ᨨᩁᩥᨿᩴ ᩅᨲ ᨽᩮᩣ, ᩋᨻ᩠ᨽᩩᨲᩴ ᩅᨲ ᨽᩮᩣ, ᨾᩉᩣ ᩅᨲᩣᨿᩴ ᨽᩪᨾᩥᨧᩣᩃᩮᩣ; ᩈᩩᨾᩉᩣ ᩅᨲᩣᨿᩴ ᨽᩪᨾᩥᨧᩣᩃᩮᩣ ᨽᩥᩴᩈᨶᨠᩮᩣ ᩈᩃᩮᩣᨾᩉᩴᩈᩮᩣ; ᨴᩮᩅᨴᩩᨶ᩠ᨴᩩᨽᩥᨿᩮᩣ ᨧ ᨹᩃᩥᩴᩈᩩ. ᨠᩮᩣ ᨶᩩ ᨡᩮᩣ ᩉᩮᨲᩩ ᨠᩮᩣ ᨸᨧ᩠ᨧᨿᩮᩣ ᨾᩉᨲᩮᩣ ᨽᩪᨾᩥᨧᩣᩃᩔ ᨸᩣᨲᩩᨽᩣᩅᩣᨿᩣ’’ᨲᩥ?

ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ, ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ, ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩋᨧ᩠ᨨᩁᩥᨿᩴ, ᨽᨶ᩠ᨲᩮ, ᩋᨻ᩠ᨽᩩᨲᩴ, ᨽᨶ᩠ᨲᩮ, ᨾᩉᩣ ᩅᨲᩣᨿᩴ, ᨽᨶ᩠ᨲᩮ, ᨽᩪᨾᩥᨧᩣᩃᩮᩣ; ᩈᩩᨾᩉᩣ ᩅᨲᩣᨿᩴ, ᨽᨶ᩠ᨲᩮ, ᨽᩪᨾᩥᨧᩣᩃᩮᩣ ᨽᩥᩴᩈᨶᨠᩮᩣ ᩈᩃᩮᩣᨾᩉᩴᩈᩮᩣ; ᨴᩮᩅᨴᩩᨶ᩠ᨴᩩᨽᩥᨿᩮᩣ ᨧ ᨹᩃᩥᩴᩈᩩ. ᨠᩮᩣ ᨶᩩ ᨡᩮᩣ, ᨽᨶ᩠ᨲᩮ, ᩉᩮᨲᩩ ᨠᩮᩣ ᨸᨧ᩠ᨧᨿᩮᩣ ᨾᩉᨲᩮᩣ ᨽᩪᨾᩥᨧᩣᩃᩔ ᨸᩣᨲᩩᨽᩣᩅᩣᨿᩣ’’ᨲᩥ?

᪑᪗᪑. ‘‘ᩋᨭ᩠ᨮ ᨡᩮᩣ ᩍᨾᩮ, ᩌᨶᨶ᩠ᨴ, ᩉᩮᨲᩪ, ᩋᨭ᩠ᨮ ᨸᨧ᩠ᨧᨿᩣ ᨾᩉᨲᩮᩣ ᨽᩪᨾᩥᨧᩣᩃᩔ ᨸᩣᨲᩩᨽᩣᩅᩣᨿ. ᨠᨲᨾᩮ ᩋᨭ᩠ᨮ? ᩋᨿᩴ, ᩌᨶᨶ᩠ᨴ, ᨾᩉᩣᨸᨳᩅᩦ ᩏᨴᨠᩮ ᨸᨲᩥᨭ᩠ᨮᩥᨲᩣ, ᩏᨴᨠᩴ ᩅᩣᨲᩮ ᨸᨲᩥᨭ᩠ᨮᩥᨲᩴ, ᩅᩣᨲᩮᩣ ᩌᨠᩣᩈᨭ᩠ᨮᩮᩣ. ᩉᩮᩣᨲᩥ ᨡᩮᩣ ᩈᩮᩣ, ᩌᨶᨶ᩠ᨴ, ᩈᨾᨿᩮᩣ, ᨿᩴ ᨾᩉᩣᩅᩣᨲᩣ ᩅᩣᨿᨶ᩠ᨲᩥ. ᨾᩉᩣᩅᩣᨲᩣ ᩅᩣᨿᨶ᩠ᨲᩣ ᩏᨴᨠᩴ ᨠᨾ᩠ᨸᩮᨶ᩠ᨲᩥ. ᩏᨴᨠᩴ ᨠᨾ᩠ᨸᩥᨲᩴ ᨸᨳᩅᩥᩴ ᨠᨾ᩠ᨸᩮᨲᩥ. ᩋᨿᩴ ᨸᨮᨾᩮᩣ ᩉᩮᨲᩩ ᨸᨮᨾᩮᩣ ᨸᨧ᩠ᨧᨿᩮᩣ ᨾᩉᨲᩮᩣ ᨽᩪᨾᩥᨧᩣᩃᩔ ᨸᩣᨲᩩᨽᩣᩅᩣᨿ.

‘‘ᨸᩩᨶ ᨧᨸᩁᩴ, ᩌᨶᨶ᩠ᨴ, ᩈᨾᨱᩮᩣ ᩅᩣ ᩉᩮᩣᨲᩥ ᨻᩕᩣᩉ᩠ᨾᨱᩮᩣ ᩅᩣ ᩍᨴ᩠ᨵᩥᨾᩣ ᨧᩮᨲᩮᩣᩅᩈᩥᨸ᩠ᨸᨲ᩠ᨲᩮᩣ, ᨴᩮᩅᩮᩣ ᩅᩣ ᨾᩉᩥᨴ᩠ᨵᩥᨠᩮᩣ ᨾᩉᩣᨶᩩᨽᩣᩅᩮᩣ, ᨲᩔ ᨸᩁᩥᨲ᩠ᨲᩣ ᨸᨳᩅᩦᩈᨬ᩠ᨬᩣ ᨽᩣᩅᩥᨲᩣ ᩉᩮᩣᨲᩥ, ᩋᨸ᩠ᨸᨾᩣᨱᩣ ᩌᨸᩮᩣᩈᨬ᩠ᨬᩣ. ᩈᩮᩣ ᩍᨾᩴ ᨸᨳᩅᩥᩴ ᨠᨾ᩠ᨸᩮᨲᩥ ᩈᨦ᩠ᨠᨾ᩠ᨸᩮᨲᩥ ᩈᨾ᩠ᨸᨠᨾ᩠ᨸᩮᨲᩥ ᩈᨾ᩠ᨸᩅᩮᨵᩮᨲᩥ. ᩋᨿᩴ ᨴᩩᨲᩥᨿᩮᩣ ᩉᩮᨲᩩ ᨴᩩᨲᩥᨿᩮᩣ ᨸᨧ᩠ᨧᨿᩮᩣ ᨾᩉᨲᩮᩣ ᨽᩪᨾᩥᨧᩣᩃᩔ ᨸᩣᨲᩩᨽᩣᩅᩣᨿ.

‘‘ᨸᩩᨶ ᨧᨸᩁᩴ, ᩌᨶᨶ᩠ᨴ, ᨿᨴᩣ ᨻᩮᩣᨵᩥᩈᨲ᩠ᨲᩮᩣ ᨲᩩᩈᩥᨲᨠᩣᨿᩣ ᨧᩅᩥᨲ᩠ᩅᩣ ᩈᨲᩮᩣ ᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨾᨲᩥ, ᨲᨴᩣᨿᩴ ᨸᨳᩅᩦ ᨠᨾ᩠ᨸᨲᩥ ᩈᨦ᩠ᨠᨾ᩠ᨸᨲᩥ ᩈᨾ᩠ᨸᨠᨾ᩠ᨸᨲᩥ ᩈᨾ᩠ᨸᩅᩮᨵᨲᩥ. ᩋᨿᩴ ᨲᨲᩥᨿᩮᩣ ᩉᩮᨲᩩ ᨲᨲᩥᨿᩮᩣ ᨸᨧ᩠ᨧᨿᩮᩣ ᨾᩉᨲᩮᩣ ᨽᩪᨾᩥᨧᩣᩃᩔ ᨸᩣᨲᩩᨽᩣᩅᩣᨿ.

‘‘ᨸᩩᨶ ᨧᨸᩁᩴ, ᩌᨶᨶ᩠ᨴ, ᨿᨴᩣ ᨻᩮᩣᨵᩥᩈᨲ᩠ᨲᩮᩣ ᩈᨲᩮᩣ ᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩈ᩠ᨾᩣ ᨶᩥᨠ᩠ᨡᨾᨲᩥ, ᨲᨴᩣᨿᩴ ᨸᨳᩅᩦ ᨠᨾ᩠ᨸᨲᩥ ᩈᨦ᩠ᨠᨾ᩠ᨸᨲᩥ ᩈᨾ᩠ᨸᨠᨾ᩠ᨸᨲᩥ ᩈᨾ᩠ᨸᩅᩮᨵᨲᩥ. ᩋᨿᩴ ᨧᨲᩩᨲ᩠ᨳᩮᩣ ᩉᩮᨲᩩ ᨧᨲᩩᨲ᩠ᨳᩮᩣ ᨸᨧ᩠ᨧᨿᩮᩣ ᨾᩉᨲᩮᩣ ᨽᩪᨾᩥᨧᩣᩃᩔ ᨸᩣᨲᩩᨽᩣᩅᩣᨿ.

‘‘ᨸᩩᨶ ᨧᨸᩁᩴ, ᩌᨶᨶ᩠ᨴ, ᨿᨴᩣ ᨲᨳᩣᨣᨲᩮᩣ ᩋᨶᩩᨲ᩠ᨲᩁᩴ ᩈᨾ᩠ᨾᩣᩈᨾ᩠ᨻᩮᩣᨵᩥᩴ ᩋᨽᩥᩈᨾ᩠ᨻᩩᨩ᩠ᨫᨲᩥ, ᨲᨴᩣᨿᩴ ᨸᨳᩅᩦ ᨠᨾ᩠ᨸᨲᩥ ᩈᨦ᩠ᨠᨾ᩠ᨸᨲᩥ ᩈᨾ᩠ᨸᨠᨾ᩠ᨸᨲᩥ ᩈᨾ᩠ᨸᩅᩮᨵᨲᩥ. ᩋᨿᩴ ᨸᨬ᩠ᨧᨾᩮᩣ ᩉᩮᨲᩩ ᨸᨬ᩠ᨧᨾᩮᩣ ᨸᨧ᩠ᨧᨿᩮᩣ ᨾᩉᨲᩮᩣ ᨽᩪᨾᩥᨧᩣᩃᩔ ᨸᩣᨲᩩᨽᩣᩅᩣᨿ.

‘‘ᨸᩩᨶ ᨧᨸᩁᩴ, ᩌᨶᨶ᩠ᨴ, ᨿᨴᩣ ᨲᨳᩣᨣᨲᩮᩣ ᩋᨶᩩᨲ᩠ᨲᩁᩴ ᨵᨾ᩠ᨾᨧᨠ᩠ᨠᩴ ᨸᩅᨲ᩠ᨲᩮᨲᩥ, ᨲᨴᩣᨿᩴ ᨸᨳᩅᩦ ᨠᨾ᩠ᨸᨲᩥ ᩈᨦ᩠ᨠᨾ᩠ᨸᨲᩥ ᩈᨾ᩠ᨸᨠᨾ᩠ᨸᨲᩥ ᩈᨾ᩠ᨸᩅᩮᨵᨲᩥ. ᩋᨿᩴ ᨨᨭ᩠ᨮᩮᩣ ᩉᩮᨲᩩ ᨨᨭ᩠ᨮᩮᩣ ᨸᨧ᩠ᨧᨿᩮᩣ ᨾᩉᨲᩮᩣ ᨽᩪᨾᩥᨧᩣᩃᩔ ᨸᩣᨲᩩᨽᩣᩅᩣᨿ.

‘‘ᨸᩩᨶ ᨧᨸᩁᩴ, ᩌᨶᨶ᩠ᨴ, ᨿᨴᩣ ᨲᨳᩣᨣᨲᩮᩣ ᩈᨲᩮᩣ ᩈᨾ᩠ᨸᨩᩣᨶᩮᩣ ᩌᨿᩩᩈᨦ᩠ᨡᩣᩁᩴ ᩒᩔᨩ᩠ᨩᨲᩥ, ᨲᨴᩣᨿᩴ ᨸᨳᩅᩦ ᨠᨾ᩠ᨸᨲᩥ ᩈᨦ᩠ᨠᨾ᩠ᨸᨲᩥ ᩈᨾ᩠ᨸᨠᨾ᩠ᨸᨲᩥ ᩈᨾ᩠ᨸᩅᩮᨵᨲᩥ. ᩋᨿᩴ ᩈᨲ᩠ᨲᨾᩮᩣ ᩉᩮᨲᩩ ᩈᨲ᩠ᨲᨾᩮᩣ ᨸᨧ᩠ᨧᨿᩮᩣ ᨾᩉᨲᩮᩣ ᨽᩪᨾᩥᨧᩣᩃᩔ ᨸᩣᨲᩩᨽᩣᩅᩣᨿ.

‘‘ᨸᩩᨶ ᨧᨸᩁᩴ, ᩌᨶᨶ᩠ᨴ, ᨿᨴᩣ ᨲᨳᩣᨣᨲᩮᩣ ᩋᨶᩩᨸᩣᨴᩥᩈᩮᩈᩣᨿ ᨶᩥᨻ᩠ᨻᩣᨶᨵᩣᨲᩩᨿᩣ ᨸᩁᩥᨶᩥᨻ᩠ᨻᩣᨿᨲᩥ, ᨲᨴᩣᨿᩴ ᨸᨳᩅᩦ ᨠᨾ᩠ᨸᨲᩥ ᩈᨦ᩠ᨠᨾ᩠ᨸᨲᩥ ᩈᨾ᩠ᨸᨠᨾ᩠ᨸᨲᩥ ᩈᨾ᩠ᨸᩅᩮᨵᨲᩥ. ᩋᨿᩴ ᩋᨭ᩠ᨮᨾᩮᩣ ᩉᩮᨲᩩ ᩋᨭ᩠ᨮᨾᩮᩣ ᨸᨧ᩠ᨧᨿᩮᩣ ᨾᩉᨲᩮᩣ ᨽᩪᨾᩥᨧᩣᩃᩔ ᨸᩣᨲᩩᨽᩣᩅᩣᨿ. ᩍᨾᩮ ᨡᩮᩣ, ᩌᨶᨶ᩠ᨴ, ᩋᨭ᩠ᨮ ᩉᩮᨲᩪ, ᩋᨭ᩠ᨮ ᨸᨧ᩠ᨧᨿᩣ ᨾᩉᨲᩮᩣ ᨽᩪᨾᩥᨧᩣᩃᩔ ᨸᩣᨲᩩᨽᩣᩅᩣᨿᩣ’’ᨲᩥ.

ᩋᨭ᩠ᨮ ᨸᩁᩥᩈᩣ

᪑᪗᪒. ‘‘ᩋᨭ᩠ᨮ ᨡᩮᩣ ᩍᨾᩣ, ᩌᨶᨶ᩠ᨴ, ᨸᩁᩥᩈᩣ. ᨠᨲᨾᩣ ᩋᨭ᩠ᨮ? ᨡᨲ᩠ᨲᩥᨿᨸᩁᩥᩈᩣ, ᨻᩕᩣᩉ᩠ᨾᨱᨸᩁᩥᩈᩣ, ᨣᩉᨸᨲᩥᨸᩁᩥᩈᩣ, ᩈᨾᨱᨸᩁᩥᩈᩣ, ᨧᩣᨲᩩᨾᩉᩣᩁᩣᨩᩥᨠᨸᩁᩥᩈᩣ [ᨧᩣᨲᩩᨾ᩠ᨾᩉᩣᩁᩣᨩᩥᨠᨸᩁᩥᩈᩣ (ᩈᩦ. ᩈ᩠ᨿᩣ. ᨠᩴ. ᨸᩦ.)], ᨲᩣᩅᨲᩥᩴᩈᨸᩁᩥᩈᩣ, ᨾᩣᩁᨸᩁᩥᩈᩣ, ᨻᩕᩉ᩠ᨾᨸᩁᩥᩈᩣ. ᩋᨽᩥᨩᩣᨶᩣᨾᩥ ᨡᩮᩣ ᨸᨶᩣᩉᩴ, ᩌᨶᨶ᩠ᨴ, ᩋᨶᩮᨠᩈᨲᩴ ᨡᨲ᩠ᨲᩥᨿᨸᩁᩥᩈᩴ ᩏᨸᩈᨦ᩠ᨠᨾᩥᨲᩣ. ᨲᨲᩕᨸᩥ ᨾᨿᩣ ᩈᨶ᩠ᨶᩥᩈᩥᨶ᩠ᨶᨸᩩᨻ᩠ᨻᩴ ᨧᩮᩅ ᩈᩃ᩠ᩃᨸᩥᨲᨸᩩᨻ᩠ᨻᨬ᩠ᨧ ᩈᩣᨠᨧ᩠ᨨᩣ ᨧ ᩈᨾᩣᨸᨩ᩠ᨩᩥᨲᨸᩩᨻ᩠ᨻᩣ. ᨲᨲ᩠ᨳ ᨿᩣᨴᩥᩈᨠᩮᩣ ᨲᩮᩈᩴ ᩅᨱ᩠ᨱᩮᩣ ᩉᩮᩣᨲᩥ, ᨲᩣᨴᩥᩈᨠᩮᩣ ᨾᨿ᩠ᩉᩴ ᩅᨱ᩠ᨱᩮᩣ ᩉᩮᩣᨲᩥ. ᨿᩣᨴᩥᩈᨠᩮᩣ ᨲᩮᩈᩴ ᩈᩁᩮᩣ ᩉᩮᩣᨲᩥ, ᨲᩣᨴᩥᩈᨠᩮᩣ ᨾᨿ᩠ᩉᩴ ᩈᩁᩮᩣ ᩉᩮᩣᨲᩥ. ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᨾᩥ ᩈᨾᩣᨴᨸᩮᨾᩥ ᩈᨾᩩᨲ᩠ᨲᩮᨩᩮᨾᩥ ᩈᨾ᩠ᨸᩉᩴᩈᩮᨾᩥ. ᨽᩣᩈᨾᩣᨶᨬ᩠ᨧ ᨾᩴ ᨶ ᨩᩣᨶᨶ᩠ᨲᩥ – ‘ᨠᩮᩣ ᨶᩩ ᨡᩮᩣ ᩋᨿᩴ ᨽᩣᩈᨲᩥ ᨴᩮᩅᩮᩣ ᩅᩣ ᨾᨶᩩᩔᩮᩣ ᩅᩣ’ᨲᩥ? ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᨲ᩠ᩅᩣ ᩈᨾᩣᨴᨸᩮᨲ᩠ᩅᩣ ᩈᨾᩩᨲ᩠ᨲᩮᨩᩮᨲ᩠ᩅᩣ ᩈᨾ᩠ᨸᩉᩴᩈᩮᨲ᩠ᩅᩣ ᩋᨶ᩠ᨲᩁᨵᩣᨿᩣᨾᩥ. ᩋᨶ᩠ᨲᩁᩉᩥᨲᨬ᩠ᨧ ᨾᩴ ᨶ ᨩᩣᨶᨶ᩠ᨲᩥ – ‘ᨠᩮᩣ ᨶᩩ ᨡᩮᩣ ᩋᨿᩴ ᩋᨶ᩠ᨲᩁᩉᩥᨲᩮᩣ ᨴᩮᩅᩮᩣ ᩅᩣ ᨾᨶᩩᩔᩮᩣ ᩅᩣ’ᨲᩥ? ᩋᨽᩥᨩᩣᨶᩣᨾᩥ ᨡᩮᩣ ᨸᨶᩣᩉᩴ, ᩌᨶᨶ᩠ᨴ, ᩋᨶᩮᨠᩈᨲᩴ ᨻᩕᩣᩉ᩠ᨾᨱᨸᩁᩥᩈᩴ…ᨸᩮ… ᨣᩉᨸᨲᩥᨸᩁᩥᩈᩴ… ᩈᨾᨱᨸᩁᩥᩈᩴ… ᨧᩣᨲᩩᨾᩉᩣᩁᩣᨩᩥᨠᨸᩁᩥᩈᩴ… ᨲᩣᩅᨲᩥᩴᩈᨸᩁᩥᩈᩴ… ᨾᩣᩁᨸᩁᩥᩈᩴ… ᨻᩕᩉ᩠ᨾᨸᩁᩥᩈᩴ ᩏᨸᩈᨦ᩠ᨠᨾᩥᨲᩣ. ᨲᨲᩕᨸᩥ ᨾᨿᩣ ᩈᨶ᩠ᨶᩥᩈᩥᨶ᩠ᨶᨸᩩᨻ᩠ᨻᩴ ᨧᩮᩅ ᩈᩃ᩠ᩃᨸᩥᨲᨸᩩᨻ᩠ᨻᨬ᩠ᨧ ᩈᩣᨠᨧ᩠ᨨᩣ ᨧ ᩈᨾᩣᨸᨩ᩠ᨩᩥᨲᨸᩩᨻ᩠ᨻᩣ. ᨲᨲ᩠ᨳ ᨿᩣᨴᩥᩈᨠᩮᩣ ᨲᩮᩈᩴ ᩅᨱ᩠ᨱᩮᩣ ᩉᩮᩣᨲᩥ, ᨲᩣᨴᩥᩈᨠᩮᩣ ᨾᨿ᩠ᩉᩴ ᩅᨱ᩠ᨱᩮᩣ ᩉᩮᩣᨲᩥ. ᨿᩣᨴᩥᩈᨠᩮᩣ ᨲᩮᩈᩴ ᩈᩁᩮᩣ ᩉᩮᩣᨲᩥ, ᨲᩣᨴᩥᩈᨠᩮᩣ ᨾᨿ᩠ᩉᩴ ᩈᩁᩮᩣ ᩉᩮᩣᨲᩥ. ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᨾᩥ ᩈᨾᩣᨴᨸᩮᨾᩥ ᩈᨾᩩᨲ᩠ᨲᩮᨩᩮᨾᩥ ᩈᨾ᩠ᨸᩉᩴᩈᩮᨾᩥ. ᨽᩣᩈᨾᩣᨶᨬ᩠ᨧ ᨾᩴ ᨶ ᨩᩣᨶᨶ᩠ᨲᩥ – ‘ᨠᩮᩣ ᨶᩩ ᨡᩮᩣ ᩋᨿᩴ ᨽᩣᩈᨲᩥ ᨴᩮᩅᩮᩣ ᩅᩣ ᨾᨶᩩᩔᩮᩣ ᩅᩣ’ᨲᩥ? ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᨲ᩠ᩅᩣ ᩈᨾᩣᨴᨸᩮᨲ᩠ᩅᩣ ᩈᨾᩩᨲ᩠ᨲᩮᨩᩮᨲ᩠ᩅᩣ ᩈᨾ᩠ᨸᩉᩴᩈᩮᨲ᩠ᩅᩣ ᩋᨶ᩠ᨲᩁᨵᩣᨿᩣᨾᩥ. ᩋᨶ᩠ᨲᩁᩉᩥᨲᨬ᩠ᨧ ᨾᩴ ᨶ ᨩᩣᨶᨶ᩠ᨲᩥ – ‘ᨠᩮᩣ ᨶᩩ ᨡᩮᩣ ᩋᨿᩴ ᩋᨶ᩠ᨲᩁᩉᩥᨲᩮᩣ ᨴᩮᩅᩮᩣ ᩅᩣ ᨾᨶᩩᩔᩮᩣ ᩅᩣ’ᨲᩥ? ᩍᨾᩣ ᨡᩮᩣ, ᩌᨶᨶ᩠ᨴ, ᩋᨭ᩠ᨮ ᨸᩁᩥᩈᩣ.

ᩋᨭ᩠ᨮ ᩋᨽᩥᨽᩣᨿᨲᨶᩣᨶᩥ

᪑᪗᪓. ‘‘ᩋᨭ᩠ᨮ ᨡᩮᩣ ᩍᨾᩣᨶᩥ, ᩌᨶᨶ᩠ᨴ, ᩋᨽᩥᨽᩣᨿᨲᨶᩣᨶᩥ. ᨠᨲᨾᩣᨶᩥ ᩋᨭ᩠ᨮ? ᩋᨩ᩠ᨫᨲ᩠ᨲᩴ ᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨸᩁᩥᨲ᩠ᨲᩣᨶᩥ ᩈᩩᩅᨱ᩠ᨱᨴᩩᨻ᩠ᨻᨱ᩠ᨱᩣᨶᩥ. ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨸᨮᨾᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩋᨸ᩠ᨸᨾᩣᨱᩣᨶᩥ ᩈᩩᩅᨱ᩠ᨱᨴᩩᨻ᩠ᨻᨱ᩠ᨱᩣᨶᩥ. ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨴᩩᨲᩥᨿᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨸᩁᩥᨲ᩠ᨲᩣᨶᩥ ᩈᩩᩅᨱ᩠ᨱᨴᩩᨻ᩠ᨻᨱ᩠ᨱᩣᨶᩥ. ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨲᨲᩥᨿᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩋᨸ᩠ᨸᨾᩣᨱᩣᨶᩥ ᩈᩩᩅᨱ᩠ᨱᨴᩩᨻ᩠ᨻᨱ᩠ᨱᩣᨶᩥ. ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨧᨲᩩᨲ᩠ᨳᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨶᩦᩃᩣᨶᩥ ᨶᩦᩃᩅᨱ᩠ᨱᩣᨶᩥ ᨶᩦᩃᨶᩥᨴᩔᨶᩣᨶᩥ ᨶᩦᩃᨶᩥᨽᩣᩈᩣᨶᩥ. ᩈᩮᨿ᩠ᨿᨳᩣᨸᩥ ᨶᩣᨾ ᩏᨾᩣᨸᩩᨸ᩠ᨹᩴ ᨶᩦᩃᩴ ᨶᩦᩃᩅᨱ᩠ᨱᩴ ᨶᩦᩃᨶᩥᨴᩔᨶᩴ ᨶᩦᩃᨶᩥᨽᩣᩈᩴ. ᩈᩮᨿ᩠ᨿᨳᩣ ᩅᩣ ᨸᨶ ᨲᩴ ᩅᨲ᩠ᨳᩴ ᨻᩣᩁᩣᨱᩈᩮᨿ᩠ᨿᨠᩴ ᩏᨽᨲᩮᩣᨽᩣᨣᩅᩥᨾᨭ᩠ᨮᩴ ᨶᩦᩃᩴ ᨶᩦᩃᩅᨱ᩠ᨱᩴ ᨶᩦᩃᨶᩥᨴᩔᨶᩴ ᨶᩦᩃᨶᩥᨽᩣᩈᩴ. ᩑᩅᨾᩮᩅ ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨶᩦᩃᩣᨶᩥ ᨶᩦᩃᩅᨱ᩠ᨱᩣᨶᩥ ᨶᩦᩃᨶᩥᨴᩔᨶᩣᨶᩥ ᨶᩦᩃᨶᩥᨽᩣᩈᩣᨶᩥ. ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨸᨬ᩠ᨧᨾᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨸᩦᨲᩣᨶᩥ ᨸᩦᨲᩅᨱ᩠ᨱᩣᨶᩥ ᨸᩦᨲᨶᩥᨴᩔᨶᩣᨶᩥ ᨸᩦᨲᨶᩥᨽᩣᩈᩣᨶᩥ. ᩈᩮᨿ᩠ᨿᨳᩣᨸᩥ ᨶᩣᨾ ᨠᨱᩥᨠᩣᩁᨸᩩᨸ᩠ᨹᩴ ᨸᩦᨲᩴ ᨸᩦᨲᩅᨱ᩠ᨱᩴ ᨸᩦᨲᨶᩥᨴᩔᨶᩴ ᨸᩦᨲᨶᩥᨽᩣᩈᩴ. ᩈᩮᨿ᩠ᨿᨳᩣ ᩅᩣ ᨸᨶ ᨲᩴ ᩅᨲ᩠ᨳᩴ ᨻᩣᩁᩣᨱᩈᩮᨿ᩠ᨿᨠᩴ ᩏᨽᨲᩮᩣᨽᩣᨣᩅᩥᨾᨭ᩠ᨮᩴ ᨸᩦᨲᩴ ᨸᩦᨲᩅᨱ᩠ᨱᩴ ᨸᩦᨲᨶᩥᨴᩔᨶᩴ ᨸᩦᨲᨶᩥᨽᩣᩈᩴ. ᩑᩅᨾᩮᩅ ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨸᩦᨲᩣᨶᩥ ᨸᩦᨲᩅᨱ᩠ᨱᩣᨶᩥ ᨸᩦᨲᨶᩥᨴᩔᨶᩣᨶᩥ ᨸᩦᨲᨶᩥᨽᩣᩈᩣᨶᩥ. ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨨᨭ᩠ᨮᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩃᩮᩣᩉᩥᨲᨠᩣᨶᩥ ᩃᩮᩣᩉᩥᨲᨠᩅᨱ᩠ᨱᩣᨶᩥ ᩃᩮᩣᩉᩥᨲᨠᨶᩥᨴᩔᨶᩣᨶᩥ ᩃᩮᩣᩉᩥᨲᨠᨶᩥᨽᩣᩈᩣᨶᩥ. ᩈᩮᨿ᩠ᨿᨳᩣᨸᩥ ᨶᩣᨾ ᨻᨶ᩠ᨵᩩᨩᩦᩅᨠᨸᩩᨸ᩠ᨹᩴ ᩃᩮᩣᩉᩥᨲᨠᩴ ᩃᩮᩣᩉᩥᨲᨠᩅᨱ᩠ᨱᩴ ᩃᩮᩣᩉᩥᨲᨠᨶᩥᨴᩔᨶᩴ ᩃᩮᩣᩉᩥᨲᨠᨶᩥᨽᩣᩈᩴ. ᩈᩮᨿ᩠ᨿᨳᩣ ᩅᩣ ᨸᨶ ᨲᩴ ᩅᨲ᩠ᨳᩴ ᨻᩣᩁᩣᨱᩈᩮᨿ᩠ᨿᨠᩴ ᩏᨽᨲᩮᩣᨽᩣᨣᩅᩥᨾᨭ᩠ᨮᩴ ᩃᩮᩣᩉᩥᨲᨠᩴ ᩃᩮᩣᩉᩥᨲᨠᩅᨱ᩠ᨱᩴ ᩃᩮᩣᩉᩥᨲᨠᨶᩥᨴᩔᨶᩴ ᩃᩮᩣᩉᩥᨲᨠᨶᩥᨽᩣᩈᩴ. ᩑᩅᨾᩮᩅ ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩃᩮᩣᩉᩥᨲᨠᩣᨶᩥ ᩃᩮᩣᩉᩥᨲᨠᩅᨱ᩠ᨱᩣᨶᩥ ᩃᩮᩣᩉᩥᨲᨠᨶᩥᨴᩔᨶᩣᨶᩥ ᩃᩮᩣᩉᩥᨲᨠᨶᩥᨽᩣᩈᩣᨶᩥ. ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᩈᨲ᩠ᨲᨾᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩒᨴᩣᨲᩣᨶᩥ ᩒᨴᩣᨲᩅᨱ᩠ᨱᩣᨶᩥ ᩒᨴᩣᨲᨶᩥᨴᩔᨶᩣᨶᩥ ᩒᨴᩣᨲᨶᩥᨽᩣᩈᩣᨶᩥ. ᩈᩮᨿ᩠ᨿᨳᩣᨸᩥ ᨶᩣᨾ ᩒᩈᨵᩥᨲᩣᩁᨠᩣ ᩒᨴᩣᨲᩣ ᩒᨴᩣᨲᩅᨱ᩠ᨱᩣ ᩒᨴᩣᨲᨶᩥᨴᩔᨶᩣ ᩒᨴᩣᨲᨶᩥᨽᩣᩈᩣ. ᩈᩮᨿ᩠ᨿᨳᩣ ᩅᩣ ᨸᨶ ᨲᩴ ᩅᨲ᩠ᨳᩴ ᨻᩣᩁᩣᨱᩈᩮᨿ᩠ᨿᨠᩴ ᩏᨽᨲᩮᩣᨽᩣᨣᩅᩥᨾᨭ᩠ᨮᩴ ᩒᨴᩣᨲᩴ ᩒᨴᩣᨲᩅᨱ᩠ᨱᩴ ᩒᨴᩣᨲᨶᩥᨴᩔᨶᩴ ᩒᨴᩣᨲᨶᩥᨽᩣᩈᩴ. ᩑᩅᨾᩮᩅ ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩒᨴᩣᨲᩣᨶᩥ ᩒᨴᩣᨲᩅᨱ᩠ᨱᩣᨶᩥ ᩒᨴᩣᨲᨶᩥᨴᩔᨶᩣᨶᩥ ᩒᨴᩣᨲᨶᩥᨽᩣᩈᩣᨶᩥ. ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᩋᨭ᩠ᨮᨾᩴ ᩋᨽᩥᨽᩣᨿᨲᨶᩴ. ᩍᨾᩣᨶᩥ ᨡᩮᩣ, ᩌᨶᨶ᩠ᨴ, ᩋᨭ᩠ᨮ ᩋᨽᩥᨽᩣᨿᨲᨶᩣᨶᩥ.

ᩋᨭ᩠ᨮ ᩅᩥᨾᩮᩣᨠ᩠ᨡᩣ

᪑᪗᪔. ‘‘ᩋᨭ᩠ᨮ ᨡᩮᩣ ᩍᨾᩮ, ᩌᨶᨶ᩠ᨴ, ᩅᩥᨾᩮᩣᨠ᩠ᨡᩣ. ᨠᨲᨾᩮ ᩋᨭ᩠ᨮ? ᩁᩪᨸᩦ ᩁᩪᨸᩣᨶᩥ ᨸᩔᨲᩥ, ᩋᨿᩴ ᨸᨮᨾᩮᩣ ᩅᩥᨾᩮᩣᨠ᩠ᨡᩮᩣ. ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ, ᩋᨿᩴ ᨴᩩᨲᩥᨿᩮᩣ ᩅᩥᨾᩮᩣᨠ᩠ᨡᩮᩣ. ᩈᩩᨽᨶ᩠ᨲᩮᩅ ᩋᨵᩥᨾᩩᨲ᩠ᨲᩮᩣ ᩉᩮᩣᨲᩥ, ᩋᨿᩴ ᨲᨲᩥᨿᩮᩣ ᩅᩥᨾᩮᩣᨠ᩠ᨡᩮᩣ. ᩈᨻ᩠ᨻᩈᩮᩣ ᩁᩪᨸᩈᨬ᩠ᨬᩣᨶᩴ ᩈᨾᨲᩥᨠ᩠ᨠᨾᩣ ᨸᨭᩥᨥᩈᨬ᩠ᨬᩣᨶᩴ ᩋᨲ᩠ᨳᨦ᩠ᨣᨾᩣ ᨶᩣᨶᨲ᩠ᨲᩈᨬ᩠ᨬᩣᨶᩴ ᩋᨾᨶᩈᩥᨠᩣᩁᩣ ‘ᩋᨶᨶ᩠ᨲᩮᩣ ᩌᨠᩣᩈᩮᩣ’ᨲᩥ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ, ᩋᨿᩴ ᨧᨲᩩᨲ᩠ᨳᩮᩣ ᩅᩥᨾᩮᩣᨠ᩠ᨡᩮᩣ. ᩈᨻ᩠ᨻᩈᩮᩣ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᩋᨶᨶ᩠ᨲᩴ ᩅᩥᨬ᩠ᨬᩣᨱ’ᨶ᩠ᨲᩥ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ, ᩋᨿᩴ ᨸᨬ᩠ᨧᨾᩮᩣ ᩅᩥᨾᩮᩣᨠ᩠ᨡᩮᩣ. ᩈᨻ᩠ᨻᩈᩮᩣ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᨶᨲ᩠ᨳᩥ ᨠᩥᨬ᩠ᨧᩦ’ᨲᩥ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ, ᩋᨿᩴ ᨨᨭ᩠ᨮᩮᩣ ᩅᩥᨾᩮᩣᨠ᩠ᨡᩮᩣ. ᩈᨻ᩠ᨻᩈᩮᩣ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ ᩈᨲ᩠ᨲᨾᩮᩣ ᩅᩥᨾᩮᩣᨠ᩠ᨡᩮᩣ. ᩈᨻ᩠ᨻᩈᩮᩣ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ᩈᨬ᩠ᨬᩣᩅᩮᨴᨿᩥᨲᨶᩥᩁᩮᩣᨵᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ, ᩋᨿᩴ ᩋᨭ᩠ᨮᨾᩮᩣ ᩅᩥᨾᩮᩣᨠ᩠ᨡᩮᩣ. ᩍᨾᩮ ᨡᩮᩣ, ᩌᨶᨶ᩠ᨴ, ᩋᨭ᩠ᨮ ᩅᩥᨾᩮᩣᨠ᩠ᨡᩣ.

᪑᪗᪕. ‘‘ᩑᨠᨾᩥᨴᩣᩉᩴ, ᩌᨶᨶ᩠ᨴ, ᩈᨾᨿᩴ ᩏᩁᩩᩅᩮᩃᩣᨿᩴ ᩅᩥᩉᩁᩣᨾᩥ ᨶᨩ᩠ᨩᩣ ᨶᩮᩁᨬ᩠ᨩᩁᩣᨿ ᨲᩦᩁᩮ ᩋᨩᨸᩣᩃᨶᩥᨣᩕᩮᩣᨵᩮ ᨸᨮᨾᩣᨽᩥᩈᨾ᩠ᨻᩩᨴ᩠ᨵᩮᩣ. ᩋᨳ ᨡᩮᩣ, ᩌᨶᨶ᩠ᨴ, ᨾᩣᩁᩮᩣ ᨸᩣᨸᩥᨾᩣ ᨿᩮᨶᩣᩉᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩣᩈᩥ. ᩑᨠᨾᨶ᩠ᨲᩴ ᨮᩥᨲᩮᩣ ᨡᩮᩣ, ᩌᨶᨶ᩠ᨴ, ᨾᩣᩁᩮᩣ ᨸᩣᨸᩥᨾᩣ ᨾᩴ ᩑᨲᨴᩅᩮᩣᨧ – ‘ᨸᩁᩥᨶᩥᨻ᩠ᨻᩣᨲᩩᨴᩣᨶᩥ, ᨽᨶ᩠ᨲᩮ, ᨽᨣᩅᩣ; ᨸᩁᩥᨶᩥᨻ᩠ᨻᩣᨲᩩ ᩈᩩᨣᨲᩮᩣ, ᨸᩁᩥᨶᩥᨻ᩠ᨻᩣᨶᨠᩣᩃᩮᩣᨴᩣᨶᩥ, ᨽᨶ᩠ᨲᩮ, ᨽᨣᩅᨲᩮᩣ’ᨲᩥ. ᩑᩅᩴ ᩅᩩᨲ᩠ᨲᩮ ᩋᩉᩴ, ᩌᨶᨶ᩠ᨴ, ᨾᩣᩁᩴ ᨸᩣᨸᩥᨾᨶ᩠ᨲᩴ ᩑᨲᨴᩅᩮᩣᨧᩴ –

‘‘‘ᨶ ᨲᩣᩅᩣᩉᩴ, ᨸᩣᨸᩥᨾ, ᨸᩁᩥᨶᩥᨻ᩠ᨻᩣᨿᩥᩔᩣᨾᩥ, ᨿᩣᩅ ᨾᩮ ᨽᩥᨠ᩠ᨡᩪ ᨶ ᩈᩣᩅᨠᩣ ᨽᩅᩥᩔᨶ᩠ᨲᩥ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨻᩉᩩᩔᩩᨲᩣ ᨵᨾ᩠ᨾᨵᩁᩣ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩣ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩣ ᩋᨶᩩᨵᨾ᩠ᨾᨧᩣᩁᩥᨶᩮᩣ, ᩈᨠᩴ ᩌᨧᩁᩥᨿᨠᩴ ᩏᨣ᩠ᨣᩉᩮᨲ᩠ᩅᩣ ᩌᨧᩥᨠ᩠ᨡᩥᩔᨶ᩠ᨲᩥ ᨴᩮᩈᩮᩔᨶ᩠ᨲᩥ ᨸᨬ᩠ᨬᨸᩮᩔᨶ᩠ᨲᩥ ᨸᨭ᩠ᨮᨸᩮᩔᨶ᩠ᨲᩥ ᩅᩥᩅᩁᩥᩔᨶ᩠ᨲᩥ ᩅᩥᨽᨩᩥᩔᨶ᩠ᨲᩥ ᩏᨲ᩠ᨲᩣᨶᩦᨠᩁᩥᩔᨶ᩠ᨲᩥ, ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᨶ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᩔᨶ᩠ᨲᩥ.

‘‘‘ᨶ ᨲᩣᩅᩣᩉᩴ, ᨸᩣᨸᩥᨾ, ᨸᩁᩥᨶᩥᨻ᩠ᨻᩣᨿᩥᩔᩣᨾᩥ, ᨿᩣᩅ ᨾᩮ ᨽᩥᨠ᩠ᨡᩩᨶᩥᨿᩮᩣ ᨶ ᩈᩣᩅᩥᨠᩣ ᨽᩅᩥᩔᨶ᩠ᨲᩥ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨻᩉᩩᩔᩩᨲᩣ ᨵᨾ᩠ᨾᨵᩁᩣ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩣ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩣ ᩋᨶᩩᨵᨾ᩠ᨾᨧᩣᩁᩥᨶᩥᨿᩮᩣ, ᩈᨠᩴ ᩌᨧᩁᩥᨿᨠᩴ ᩏᨣ᩠ᨣᩉᩮᨲ᩠ᩅᩣ ᩌᨧᩥᨠ᩠ᨡᩥᩔᨶ᩠ᨲᩥ ᨴᩮᩈᩮᩔᨶ᩠ᨲᩥ ᨸᨬ᩠ᨬᨸᩮᩔᨶ᩠ᨲᩥ ᨸᨭ᩠ᨮᨸᩮᩔᨶ᩠ᨲᩥ ᩅᩥᩅᩁᩥᩔᨶ᩠ᨲᩥ ᩅᩥᨽᨩᩥᩔᨶ᩠ᨲᩥ ᩏᨲ᩠ᨲᩣᨶᩦᨠᩁᩥᩔᨶ᩠ᨲᩥ, ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᨶ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᩔᨶ᩠ᨲᩥ.

‘‘‘ᨶ ᨲᩣᩅᩣᩉᩴ, ᨸᩣᨸᩥᨾ, ᨸᩁᩥᨶᩥᨻ᩠ᨻᩣᨿᩥᩔᩣᨾᩥ, ᨿᩣᩅ ᨾᩮ ᩏᨸᩣᩈᨠᩣ ᨶ ᩈᩣᩅᨠᩣ ᨽᩅᩥᩔᨶ᩠ᨲᩥ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨻᩉᩩᩔᩩᨲᩣ ᨵᨾ᩠ᨾᨵᩁᩣ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩣ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩣ ᩋᨶᩩᨵᨾ᩠ᨾᨧᩣᩁᩥᨶᩮᩣ, ᩈᨠᩴ ᩌᨧᩁᩥᨿᨠᩴ ᩏᨣ᩠ᨣᩉᩮᨲ᩠ᩅᩣ ᩌᨧᩥᨠ᩠ᨡᩥᩔᨶ᩠ᨲᩥ ᨴᩮᩈᩮᩔᨶ᩠ᨲᩥ ᨸᨬ᩠ᨬᨸᩮᩔᨶ᩠ᨲᩥ ᨸᨭ᩠ᨮᨸᩮᩔᨶ᩠ᨲᩥ ᩅᩥᩅᩁᩥᩔᨶ᩠ᨲᩥ ᩅᩥᨽᨩᩥᩔᨶ᩠ᨲᩥ ᩏᨲ᩠ᨲᩣᨶᩦᨠᩁᩥᩔᨶ᩠ᨲᩥ, ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᨶ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᩔᨶ᩠ᨲᩥ.

‘‘‘ᨶ ᨲᩣᩅᩣᩉᩴ, ᨸᩣᨸᩥᨾ, ᨸᩁᩥᨶᩥᨻ᩠ᨻᩣᨿᩥᩔᩣᨾᩥ, ᨿᩣᩅ ᨾᩮ ᩏᨸᩣᩈᩥᨠᩣ ᨶ ᩈᩣᩅᩥᨠᩣ ᨽᩅᩥᩔᨶ᩠ᨲᩥ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨻᩉᩩᩔᩩᨲᩣ ᨵᨾ᩠ᨾᨵᩁᩣ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩣ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩣ ᩋᨶᩩᨵᨾ᩠ᨾᨧᩣᩁᩥᨶᩥᨿᩮᩣ, ᩈᨠᩴ ᩌᨧᩁᩥᨿᨠᩴ ᩏᨣ᩠ᨣᩉᩮᨲ᩠ᩅᩣ ᩌᨧᩥᨠ᩠ᨡᩥᩔᨶ᩠ᨲᩥ ᨴᩮᩈᩮᩔᨶ᩠ᨲᩥ ᨸᨬ᩠ᨬᨸᩮᩔᨶ᩠ᨲᩥ ᨸᨭ᩠ᨮᨸᩮᩔᨶ᩠ᨲᩥ ᩅᩥᩅᩁᩥᩔᨶ᩠ᨲᩥ ᩅᩥᨽᨩᩥᩔᨶ᩠ᨲᩥ ᩏᨲ᩠ᨲᩣᨶᩦᨠᩁᩥᩔᨶ᩠ᨲᩥ, ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᨶ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᩔᨶ᩠ᨲᩥ.

‘‘‘ᨶ ᨲᩣᩅᩣᩉᩴ, ᨸᩣᨸᩥᨾ, ᨸᩁᩥᨶᩥᨻ᩠ᨻᩣᨿᩥᩔᩣᨾᩥ, ᨿᩣᩅ ᨾᩮ ᩍᨴᩴ ᨻᩕᩉ᩠ᨾᨧᩁᩥᨿᩴ ᨶ ᩍᨴ᩠ᨵᨬ᩠ᨧᩮᩅ ᨽᩅᩥᩔᨲᩥ ᨹᩦᨲᨬ᩠ᨧ ᩅᩥᨲ᩠ᨳᩣᩁᩥᨠᩴ ᨻᩣᩉᩩᨩᨬ᩠ᨬᩴ ᨸᩩᨳᩩᨽᩪᨲᩴ ᨿᩣᩅ ᨴᩮᩅᨾᨶᩩᩔᩮᩉᩥ ᩈᩩᨸ᩠ᨸᨠᩣᩈᩥᨲ’ᨶ᩠ᨲᩥ.

᪑᪗᪖. ‘‘ᩍᨴᩣᨶᩮᩅ ᨡᩮᩣ, ᩌᨶᨶ᩠ᨴ, ᩋᨩ᩠ᨩ ᨧᩣᨸᩣᩃᩮ ᨧᩮᨲᩥᨿᩮ ᨾᩣᩁᩮᩣ ᨸᩣᨸᩥᨾᩣ ᨿᩮᨶᩣᩉᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩣᩈᩥ. ᩑᨠᨾᨶ᩠ᨲᩴ ᨮᩥᨲᩮᩣ ᨡᩮᩣ, ᩌᨶᨶ᩠ᨴ, ᨾᩣᩁᩮᩣ ᨸᩣᨸᩥᨾᩣ ᨾᩴ ᩑᨲᨴᩅᩮᩣᨧ – ‘ᨸᩁᩥᨶᩥᨻ᩠ᨻᩣᨲᩩᨴᩣᨶᩥ, ᨽᨶ᩠ᨲᩮ, ᨽᨣᩅᩣ, ᨸᩁᩥᨶᩥᨻ᩠ᨻᩣᨲᩩ ᩈᩩᨣᨲᩮᩣ, ᨸᩁᩥᨶᩥᨻ᩠ᨻᩣᨶᨠᩣᩃᩮᩣᨴᩣᨶᩥ, ᨽᨶ᩠ᨲᩮ, ᨽᨣᩅᨲᩮᩣ. ᨽᩣᩈᩥᨲᩣ ᨡᩮᩣ ᨸᨶᩮᩈᩣ, ᨽᨶ᩠ᨲᩮ, ᨽᨣᩅᨲᩣ ᩅᩣᨧᩣ – ‘‘ᨶ ᨲᩣᩅᩣᩉᩴ, ᨸᩣᨸᩥᨾ, ᨸᩁᩥᨶᩥᨻ᩠ᨻᩣᨿᩥᩔᩣᨾᩥ, ᨿᩣᩅ ᨾᩮ ᨽᩥᨠ᩠ᨡᩪ ᨶ ᩈᩣᩅᨠᩣ ᨽᩅᩥᩔᨶ᩠ᨲᩥ…ᨸᩮ… ᨿᩣᩅ ᨾᩮ ᨽᩥᨠ᩠ᨡᩩᨶᩥᨿᩮᩣ ᨶ ᩈᩣᩅᩥᨠᩣ ᨽᩅᩥᩔᨶ᩠ᨲᩥ…ᨸᩮ… ᨿᩣᩅ ᨾᩮ ᩏᨸᩣᩈᨠᩣ ᨶ ᩈᩣᩅᨠᩣ ᨽᩅᩥᩔᨶ᩠ᨲᩥ…ᨸᩮ… ᨿᩣᩅ ᨾᩮ ᩏᨸᩣᩈᩥᨠᩣ ᨶ ᩈᩣᩅᩥᨠᩣ ᨽᩅᩥᩔᨶ᩠ᨲᩥ…ᨸᩮ… ᨿᩣᩅ ᨾᩮ ᩍᨴᩴ ᨻᩕᩉ᩠ᨾᨧᩁᩥᨿᩴ ᨶ ᩍᨴ᩠ᨵᨬ᩠ᨧᩮᩅ ᨽᩅᩥᩔᨲᩥ ᨹᩦᨲᨬ᩠ᨧ ᩅᩥᨲ᩠ᨳᩣᩁᩥᨠᩴ ᨻᩣᩉᩩᨩᨬ᩠ᨬᩴ ᨸᩩᨳᩩᨽᩪᨲᩴ, ᨿᩣᩅ ᨴᩮᩅᨾᨶᩩᩔᩮᩉᩥ ᩈᩩᨸ᩠ᨸᨠᩣᩈᩥᨲ’’ᨶ᩠ᨲᩥ. ᩑᨲᩁᩉᩥ ᨡᩮᩣ ᨸᨶ, ᨽᨶ᩠ᨲᩮ, ᨽᨣᩅᨲᩮᩣ ᨻᩕᩉ᩠ᨾᨧᩁᩥᨿᩴ ᩍᨴ᩠ᨵᨬ᩠ᨧᩮᩅ ᨹᩦᨲᨬ᩠ᨧ ᩅᩥᨲ᩠ᨳᩣᩁᩥᨠᩴ ᨻᩣᩉᩩᨩᨬ᩠ᨬᩴ ᨸᩩᨳᩩᨽᩪᨲᩴ, ᨿᩣᩅ ᨴᩮᩅᨾᨶᩩᩔᩮᩉᩥ ᩈᩩᨸ᩠ᨸᨠᩣᩈᩥᨲᩴ. ᨸᩁᩥᨶᩥᨻ᩠ᨻᩣᨲᩩᨴᩣᨶᩥ, ᨽᨶ᩠ᨲᩮ, ᨽᨣᩅᩣ, ᨸᩁᩥᨶᩥᨻ᩠ᨻᩣᨲᩩ ᩈᩩᨣᨲᩮᩣ, ᨸᩁᩥᨶᩥᨻ᩠ᨻᩣᨶᨠᩣᩃᩮᩣᨴᩣᨶᩥ, ᨽᨶ᩠ᨲᩮ, ᨽᨣᩅᨲᩮᩣ’ᨲᩥ.

᪑᪗᪗. ‘‘ᩑᩅᩴ ᩅᩩᨲ᩠ᨲᩮ, ᩋᩉᩴ, ᩌᨶᨶ᩠ᨴ, ᨾᩣᩁᩴ ᨸᩣᨸᩥᨾᨶ᩠ᨲᩴ ᩑᨲᨴᩅᩮᩣᨧᩴ – ‘ᩋᨸ᩠ᨸᩮᩣᩔᩩᨠ᩠ᨠᩮᩣ ᨲ᩠ᩅᩴ, ᨸᩣᨸᩥᨾ, ᩉᩮᩣᩉᩥ, ᨶᨧᩥᩁᩴ ᨲᨳᩣᨣᨲᩔ ᨸᩁᩥᨶᩥᨻ᩠ᨻᩣᨶᩴ ᨽᩅᩥᩔᨲᩥ. ᩍᨲᩮᩣ ᨲᩥᨱ᩠ᨱᩴ ᨾᩣᩈᩣᨶᩴ ᩋᨧ᩠ᨧᨿᩮᨶ ᨲᨳᩣᨣᨲᩮᩣ ᨸᩁᩥᨶᩥᨻ᩠ᨻᩣᨿᩥᩔᨲᩦ’ᨲᩥ. ᩍᨴᩣᨶᩮᩅ ᨡᩮᩣ, ᩌᨶᨶ᩠ᨴ, ᩋᨩ᩠ᨩ ᨧᩣᨸᩣᩃᩮ ᨧᩮᨲᩥᨿᩮ ᨲᨳᩣᨣᨲᩮᨶ ᩈᨲᩮᨶ ᩈᨾ᩠ᨸᨩᩣᨶᩮᨶ ᩌᨿᩩᩈᨦ᩠ᨡᩣᩁᩮᩣ ᩒᩔᨭ᩠ᨮᩮᩣ’’ᨲᩥ.

ᩌᨶᨶ᩠ᨴᨿᩣᨧᨶᨠᨳᩣ

᪑᪗᪘. ᩑᩅᩴ ᩅᩩᨲ᩠ᨲᩮ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᨲᩥᨭ᩠ᨮᨲᩩ, ᨽᨶ᩠ᨲᩮ, ᨽᨣᩅᩣ ᨠᨸ᩠ᨸᩴ, ᨲᩥᨭ᩠ᨮᨲᩩ ᩈᩩᨣᨲᩮᩣ ᨠᨸ᩠ᨸᩴ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶ’’ᨶ᩠ᨲᩥ.

‘‘ᩋᩃᩴᨴᩣᨶᩥ, ᩌᨶᨶ᩠ᨴ. ᨾᩣ ᨲᨳᩣᨣᨲᩴ ᨿᩣᨧᩥ, ᩋᨠᩣᩃᩮᩣᨴᩣᨶᩥ, ᩌᨶᨶ᩠ᨴ, ᨲᨳᩣᨣᨲᩴ ᨿᩣᨧᨶᩣᨿᩣ’’ᨲᩥ. ᨴᩩᨲᩥᨿᨾ᩠ᨸᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ…ᨸᩮ… ᨲᨲᩥᨿᨾ᩠ᨸᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᨲᩥᨭ᩠ᨮᨲᩩ, ᨽᨶ᩠ᨲᩮ, ᨽᨣᩅᩣ ᨠᨸ᩠ᨸᩴ, ᨲᩥᨭ᩠ᨮᨲᩩ ᩈᩩᨣᨲᩮᩣ ᨠᨸ᩠ᨸᩴ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶ’’ᨶ᩠ᨲᩥ.

‘‘ᩈᨴ᩠ᨴᩉᩈᩥ ᨲ᩠ᩅᩴ, ᩌᨶᨶ᩠ᨴ, ᨲᨳᩣᨣᨲᩔ ᨻᩮᩣᨵᩥ’’ᨶ᩠ᨲᩥ? ‘‘ᩑᩅᩴ, ᨽᨶ᩠ᨲᩮ’’. ‘‘ᩋᨳ ᨠᩥᨬ᩠ᨧᩁᩉᩥ ᨲ᩠ᩅᩴ, ᩌᨶᨶ᩠ᨴ, ᨲᨳᩣᨣᨲᩴ ᨿᩣᩅᨲᨲᩥᨿᨠᩴ ᩋᨽᩥᨶᩥᨸ᩠ᨸᩦᩊᩮᩈᩦ’’ᨲᩥ? ‘‘ᩈᨾ᩠ᨾᩩᨡᩣ ᨾᩮᨲᩴ, ᨽᨶ᩠ᨲᩮ, ᨽᨣᩅᨲᩮᩣ ᩈᩩᨲᩴ ᩈᨾ᩠ᨾᩩᨡᩣ ᨸᨭᩥᨣ᩠ᨣᩉᩥᨲᩴ – ‘ᨿᩔ ᨠᩔᨧᩥ, ᩌᨶᨶ᩠ᨴ, ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ, ᩈᩮᩣ ᩌᨠᨦ᩠ᨡᨾᩣᨶᩮᩣ ᨠᨸ᩠ᨸᩴ ᩅᩣ ᨲᩥᨭ᩠ᨮᩮᨿ᩠ᨿ ᨠᨸ᩠ᨸᩣᩅᩈᩮᩈᩴ ᩅᩣ. ᨲᨳᩣᨣᨲᩔ ᨡᩮᩣ, ᩌᨶᨶ᩠ᨴ, ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ. ᩈᩮᩣ ᩌᨠᨦ᩠ᨡᨾᩣᨶᩮᩣ, ᩌᨶᨶ᩠ᨴ, ᨲᨳᩣᨣᨲᩮᩣ ᨠᨸ᩠ᨸᩴ ᩅᩣ ᨲᩥᨭ᩠ᨮᩮᨿ᩠ᨿ ᨠᨸ᩠ᨸᩣᩅᩈᩮᩈᩴ ᩅᩣ’’’ᨲᩥ. ‘‘ᩈᨴ᩠ᨴᩉᩈᩥ ᨲ᩠ᩅᩴ, ᩌᨶᨶ᩠ᨴᩣ’’ᨲᩥ? ‘‘ᩑᩅᩴ, ᨽᨶ᩠ᨲᩮ’’. ‘‘ᨲᩈ᩠ᨾᩣᨲᩥᩉᩣᨶᨶ᩠ᨴ, ᨲᩩᨿ᩠ᩉᩮᩅᩮᨲᩴ ᨴᩩᨠ᩠ᨠᨭᩴ, ᨲᩩᨿ᩠ᩉᩮᩅᩮᨲᩴ ᩋᨸᩁᨴ᩠ᨵᩴ, ᨿᩴ ᨲ᩠ᩅᩴ ᨲᨳᩣᨣᨲᩮᨶ ᩑᩅᩴ ᩒᩊᩣᩁᩥᨠᩮ ᨶᩥᨾᩥᨲ᩠ᨲᩮ ᨠᨿᩥᩁᨾᩣᨶᩮ ᩒᩊᩣᩁᩥᨠᩮ ᩒᨽᩣᩈᩮ ᨠᨿᩥᩁᨾᩣᨶᩮ ᨶᩣᩈᨠ᩠ᨡᩥ ᨸᨭᩥᩅᩥᨩ᩠ᨫᩥᨲᩩᩴ, ᨶ ᨲᨳᩣᨣᨲᩴ ᨿᩣᨧᩥ – ‘ᨲᩥᨭ᩠ᨮᨲᩩ, ᨽᨶ᩠ᨲᩮ, ᨽᨣᩅᩣ ᨠᨸ᩠ᨸᩴ, ᨲᩥᨭ᩠ᨮᨲᩩ ᩈᩩᨣᨲᩮᩣ ᨠᨸ᩠ᨸᩴ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶ’’ᨶ᩠ᨲᩥ. ᩈᨧᩮ ᨲ᩠ᩅᩴ, ᩌᨶᨶ᩠ᨴ, ᨲᨳᩣᨣᨲᩴ ᨿᩣᨧᩮᨿ᩠ᨿᩣᩈᩥ, ᨴ᩠ᩅᩮᩅ ᨲᩮ ᩅᩣᨧᩣ ᨲᨳᩣᨣᨲᩮᩣ ᨸᨭᩥᨠ᩠ᨡᩥᨸᩮᨿ᩠ᨿ, ᩋᨳ ᨲᨲᩥᨿᨠᩴ ᩋᨵᩥᩅᩣᩈᩮᨿ᩠ᨿ. ᨲᩈ᩠ᨾᩣᨲᩥᩉᩣᨶᨶ᩠ᨴ, ᨲᩩᨿ᩠ᩉᩮᩅᩮᨲᩴ ᨴᩩᨠ᩠ᨠᨭᩴ, ᨲᩩᨿ᩠ᩉᩮᩅᩮᨲᩴ ᩋᨸᩁᨴ᩠ᨵᩴ.

᪑᪗᪙. ‘‘ᩑᨠᨾᩥᨴᩣᩉᩴ, ᩌᨶᨶ᩠ᨴ, ᩈᨾᨿᩴ ᩁᩣᨩᨣᩉᩮ ᩅᩥᩉᩁᩣᨾᩥ ᨣᩥᨩ᩠ᨫᨠᩪᨭᩮ ᨸᨻ᩠ᨻᨲᩮ. ᨲᨲᩕᩣᨸᩥ ᨡᩮᩣ ᨲᩣᩉᩴ, ᩌᨶᨶ᩠ᨴ, ᩌᨾᨶ᩠ᨲᩮᩈᩥᩴ – ‘ᩁᨾᨱᩦᨿᩴ, ᩌᨶᨶ᩠ᨴ, ᩁᩣᨩᨣᩉᩴ, ᩁᨾᨱᩦᨿᩮᩣ, ᩌᨶᨶ᩠ᨴ, ᨣᩥᨩ᩠ᨫᨠᩪᨭᩮᩣ ᨸᨻ᩠ᨻᨲᩮᩣ. ᨿᩔ ᨠᩔᨧᩥ, ᩌᨶᨶ᩠ᨴ, ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ, ᩈᩮᩣ ᩌᨠᨦ᩠ᨡᨾᩣᨶᩮᩣ ᨠᨸ᩠ᨸᩴ ᩅᩣ ᨲᩥᨭ᩠ᨮᩮᨿ᩠ᨿ ᨠᨸ᩠ᨸᩣᩅᩈᩮᩈᩴ ᩅᩣ. ᨲᨳᩣᨣᨲᩔ ᨡᩮᩣ, ᩌᨶᨶ᩠ᨴ, ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ, ᩈᩮᩣ ᩌᨠᨦ᩠ᨡᨾᩣᨶᩮᩣ, ᩌᨶᨶ᩠ᨴ, ᨲᨳᩣᨣᨲᩮᩣ ᨠᨸ᩠ᨸᩴ ᩅᩣ ᨲᩥᨭ᩠ᨮᩮᨿ᩠ᨿ ᨠᨸ᩠ᨸᩣᩅᩈᩮᩈᩴ ᩅᩣ’ᨲᩥ. ᩑᩅᨾ᩠ᨸᩥ ᨡᩮᩣ ᨲ᩠ᩅᩴ, ᩌᨶᨶ᩠ᨴ, ᨲᨳᩣᨣᨲᩮᨶ ᩒᩊᩣᩁᩥᨠᩮ ᨶᩥᨾᩥᨲ᩠ᨲᩮ ᨠᨿᩥᩁᨾᩣᨶᩮ ᩒᩊᩣᩁᩥᨠᩮ ᩒᨽᩣᩈᩮ ᨠᨿᩥᩁᨾᩣᨶᩮ ᨶᩣᩈᨠ᩠ᨡᩥ ᨸᨭᩥᩅᩥᨩ᩠ᨫᩥᨲᩩᩴ, ᨶ ᨲᨳᩣᨣᨲᩴ ᨿᩣᨧᩥ – ‘ᨲᩥᨭ᩠ᨮᨲᩩ, ᨽᨶ᩠ᨲᩮ, ᨽᨣᩅᩣ ᨠᨸ᩠ᨸᩴ, ᨲᩥᨭ᩠ᨮᨲᩩ ᩈᩩᨣᨲᩮᩣ ᨠᨸ᩠ᨸᩴ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶ’ᨶ᩠ᨲᩥ. ᩈᨧᩮ ᨲ᩠ᩅᩴ, ᩌᨶᨶ᩠ᨴ, ᨲᨳᩣᨣᨲᩴ ᨿᩣᨧᩮᨿ᩠ᨿᩣᩈᩥ, ᨴ᩠ᩅᩮ ᨲᩮ ᩅᩣᨧᩣ ᨲᨳᩣᨣᨲᩮᩣ ᨸᨭᩥᨠ᩠ᨡᩥᨸᩮᨿ᩠ᨿ, ᩋᨳ ᨲᨲᩥᨿᨠᩴ ᩋᨵᩥᩅᩣᩈᩮᨿ᩠ᨿ. ᨲᩈ᩠ᨾᩣᨲᩥᩉᩣᨶᨶ᩠ᨴ, ᨲᩩᨿ᩠ᩉᩮᩅᩮᨲᩴ ᨴᩩᨠ᩠ᨠᨭᩴ, ᨲᩩᨿ᩠ᩉᩮᩅᩮᨲᩴ ᩋᨸᩁᨴ᩠ᨵᩴ.

᪑᪘᪐. ‘‘ᩑᨠᨾᩥᨴᩣᩉᩴ, ᩌᨶᨶ᩠ᨴ, ᩈᨾᨿᩴ ᨲᨲ᩠ᨳᩮᩅ ᩁᩣᨩᨣᩉᩮ ᩅᩥᩉᩁᩣᨾᩥ ᨣᩮᩣᨲᨾᨶᩥᨣᩕᩮᩣᨵᩮ…ᨸᩮ… ᨲᨲ᩠ᨳᩮᩅ ᩁᩣᨩᨣᩉᩮ ᩅᩥᩉᩁᩣᨾᩥ ᨧᩮᩣᩁᨸᨸᩣᨲᩮ… ᨲᨲ᩠ᨳᩮᩅ ᩁᩣᨩᨣᩉᩮ ᩅᩥᩉᩁᩣᨾᩥ ᩅᩮᨽᩣᩁᨸᩔᩮ ᩈᨲ᩠ᨲᨸᨱ᩠ᨱᩥᨣᩩᩉᩣᨿᩴ… ᨲᨲ᩠ᨳᩮᩅ ᩁᩣᨩᨣᩉᩮ ᩅᩥᩉᩁᩣᨾᩥ ᩍᩈᩥᨣᩥᩃᩥᨸᩔᩮ ᨠᩣᩊᩈᩥᩃᩣᨿᩴ… ᨲᨲ᩠ᨳᩮᩅ ᩁᩣᨩᨣᩉᩮ ᩅᩥᩉᩁᩣᨾᩥ ᩈᩦᨲᩅᨶᩮ ᩈᨸ᩠ᨸᩈᩮᩣᨱ᩠ᨯᩥᨠᨸᨻ᩠ᨽᩣᩁᩮ… ᨲᨲ᩠ᨳᩮᩅ ᩁᩣᨩᨣᩉᩮ ᩅᩥᩉᩁᩣᨾᩥ ᨲᨸᩮᩣᨴᩣᩁᩣᨾᩮ… ᨲᨲ᩠ᨳᩮᩅ ᩁᩣᨩᨣᩉᩮ ᩅᩥᩉᩁᩣᨾᩥ ᩅᩮᩊᩩᩅᨶᩮ ᨠᩃᨶ᩠ᨴᨠᨶᩥᩅᩣᨸᩮ… ᨲᨲ᩠ᨳᩮᩅ ᩁᩣᨩᨣᩉᩮ ᩅᩥᩉᩁᩣᨾᩥ ᨩᩦᩅᨠᨾ᩠ᨻᩅᨶᩮ… ᨲᨲ᩠ᨳᩮᩅ ᩁᩣᨩᨣᩉᩮ ᩅᩥᩉᩁᩣᨾᩥ ᨾᨴ᩠ᨴᨠᩩᨧ᩠ᨨᩥᩈ᩠ᨾᩥᩴ ᨾᩥᨣᨴᩣᨿᩮ ᨲᨲᩕᩣᨸᩥ ᨡᩮᩣ ᨲᩣᩉᩴ, ᩌᨶᨶ᩠ᨴ, ᩌᨾᨶ᩠ᨲᩮᩈᩥᩴ – ‘ᩁᨾᨱᩦᨿᩴ, ᩌᨶᨶ᩠ᨴ, ᩁᩣᨩᨣᩉᩴ, ᩁᨾᨱᩦᨿᩮᩣ ᨣᩥᨩ᩠ᨫᨠᩪᨭᩮᩣ ᨸᨻ᩠ᨻᨲᩮᩣ, ᩁᨾᨱᩦᨿᩮᩣ ᨣᩮᩣᨲᨾᨶᩥᨣᩕᩮᩣᨵᩮᩣ, ᩁᨾᨱᩦᨿᩮᩣ ᨧᩮᩣᩁᨸᨸᩣᨲᩮᩣ, ᩁᨾᨱᩦᨿᩣ ᩅᩮᨽᩣᩁᨸᩔᩮ ᩈᨲ᩠ᨲᨸᨱ᩠ᨱᩥᨣᩩᩉᩣ, ᩁᨾᨱᩦᨿᩣ ᩍᩈᩥᨣᩥᩃᩥᨸᩔᩮ ᨠᩣᩊᩈᩥᩃᩣ, ᩁᨾᨱᩦᨿᩮᩣ ᩈᩦᨲᩅᨶᩮ ᩈᨸ᩠ᨸᩈᩮᩣᨱ᩠ᨯᩥᨠᨸᨻ᩠ᨽᩣᩁᩮᩣ, ᩁᨾᨱᩦᨿᩮᩣ ᨲᨸᩮᩣᨴᩣᩁᩣᨾᩮᩣ, ᩁᨾᨱᩦᨿᩮᩣ ᩅᩮᩊᩩᩅᨶᩮ ᨠᩃᨶ᩠ᨴᨠᨶᩥᩅᩣᨸᩮᩣ, ᩁᨾᨱᩦᨿᩴ ᨩᩦᩅᨠᨾ᩠ᨻᩅᨶᩴ, ᩁᨾᨱᩦᨿᩮᩣ ᨾᨴ᩠ᨴᨠᩩᨧ᩠ᨨᩥᩈ᩠ᨾᩥᩴ ᨾᩥᨣᨴᩣᨿᩮᩣ. ᨿᩔ ᨠᩔᨧᩥ, ᩌᨶᨶ᩠ᨴ, ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ…ᨸᩮ… ᩌᨠᨦ᩠ᨡᨾᩣᨶᩮᩣ, ᩌᨶᨶ᩠ᨴ, ᨲᨳᩣᨣᨲᩮᩣ ᨠᨸ᩠ᨸᩴ ᩅᩣ ᨲᩥᨭ᩠ᨮᩮᨿ᩠ᨿ ᨠᨸ᩠ᨸᩣᩅᩈᩮᩈᩴ ᩅᩣ’ᨲᩥ. ᩑᩅᨾ᩠ᨸᩥ ᨡᩮᩣ ᨲ᩠ᩅᩴ, ᩌᨶᨶ᩠ᨴ, ᨲᨳᩣᨣᨲᩮᨶ ᩒᩊᩣᩁᩥᨠᩮ ᨶᩥᨾᩥᨲ᩠ᨲᩮ ᨠᨿᩥᩁᨾᩣᨶᩮ ᩒᩊᩣᩁᩥᨠᩮ ᩒᨽᩣᩈᩮ ᨠᨿᩥᩁᨾᩣᨶᩮ ᨶᩣᩈᨠ᩠ᨡᩥ ᨸᨭᩥᩅᩥᨩ᩠ᨫᩥᨲᩩᩴ, ᨶ ᨲᨳᩣᨣᨲᩴ ᨿᩣᨧᩥ – ‘ᨲᩥᨭ᩠ᨮᨲᩩ, ᨽᨶ᩠ᨲᩮ, ᨽᨣᩅᩣ ᨠᨸ᩠ᨸᩴ, ᨲᩥᨭ᩠ᨮᨲᩩ ᩈᩩᨣᨲᩮᩣ ᨠᨸ᩠ᨸᩴ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶ’ᨶ᩠ᨲᩥ. ᩈᨧᩮ ᨲ᩠ᩅᩴ, ᩌᨶᨶ᩠ᨴ, ᨲᨳᩣᨣᨲᩴ ᨿᩣᨧᩮᨿ᩠ᨿᩣᩈᩥ, ᨴ᩠ᩅᩮᩅ ᨲᩮ ᩅᩣᨧᩣ ᨲᨳᩣᨣᨲᩮᩣ ᨸᨭᩥᨠ᩠ᨡᩥᨸᩮᨿ᩠ᨿ, ᩋᨳ ᨲᨲᩥᨿᨠᩴ ᩋᨵᩥᩅᩣᩈᩮᨿ᩠ᨿ. ᨲᩈ᩠ᨾᩣᨲᩥᩉᩣᨶᨶ᩠ᨴ, ᨲᩩᨿ᩠ᩉᩮᩅᩮᨲᩴ ᨴᩩᨠ᩠ᨠᨭᩴ, ᨲᩩᨿ᩠ᩉᩮᩅᩮᨲᩴ ᩋᨸᩁᨴ᩠ᨵᩴ.

᪑᪘᪑. ‘‘ᩑᨠᨾᩥᨴᩣᩉᩴ, ᩌᨶᨶ᩠ᨴ, ᩈᨾᨿᩴ ᩍᨵᩮᩅ ᩅᩮᩈᩣᩃᩥᨿᩴ ᩅᩥᩉᩁᩣᨾᩥ ᩏᨴᩮᨶᩮ ᨧᩮᨲᩥᨿᩮ. ᨲᨲᩕᩣᨸᩥ ᨡᩮᩣ ᨲᩣᩉᩴ, ᩌᨶᨶ᩠ᨴ, ᩌᨾᨶ᩠ᨲᩮᩈᩥᩴ – ‘ᩁᨾᨱᩦᨿᩣ, ᩌᨶᨶ᩠ᨴ, ᩅᩮᩈᩣᩃᩦ, ᩁᨾᨱᩦᨿᩴ ᩏᨴᩮᨶᩴ ᨧᩮᨲᩥᨿᩴ. ᨿᩔ ᨠᩔᨧᩥ, ᩌᨶᨶ᩠ᨴ, ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ, ᩈᩮᩣ ᩌᨠᨦ᩠ᨡᨾᩣᨶᩮᩣ ᨠᨸ᩠ᨸᩴ ᩅᩣ ᨲᩥᨭ᩠ᨮᩮᨿ᩠ᨿ ᨠᨸ᩠ᨸᩣᩅᩈᩮᩈᩴ ᩅᩣ. ᨲᨳᩣᨣᨲᩔ ᨡᩮᩣ, ᩌᨶᨶ᩠ᨴ, ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ, ᩈᩮᩣ ᩌᨠᨦ᩠ᨡᨾᩣᨶᩮᩣ, ᩌᨶᨶ᩠ᨴ, ᨲᨳᩣᨣᨲᩮᩣ ᨠᨸ᩠ᨸᩴ ᩅᩣ ᨲᩥᨭ᩠ᨮᩮᨿ᩠ᨿ ᨠᨸ᩠ᨸᩣᩅᩈᩮᩈᩴ ᩅᩣ’ᨲᩥ. ᩑᩅᨾ᩠ᨸᩥ ᨡᩮᩣ ᨲ᩠ᩅᩴ, ᩌᨶᨶ᩠ᨴ, ᨲᨳᩣᨣᨲᩮᨶ ᩒᩊᩣᩁᩥᨠᩮ ᨶᩥᨾᩥᨲ᩠ᨲᩮ ᨠᨿᩥᩁᨾᩣᨶᩮ ᩒᩊᩣᩁᩥᨠᩮ ᩒᨽᩣᩈᩮ ᨠᨿᩥᩁᨾᩣᨶᩮ ᨶᩣᩈᨠ᩠ᨡᩥ ᨸᨭᩥᩅᩥᨩ᩠ᨫᩥᨲᩩᩴ, ᨶ ᨲᨳᩣᨣᨲᩴ ᨿᩣᨧᩥ – ‘ᨲᩥᨭ᩠ᨮᨲᩩ, ᨽᨶ᩠ᨲᩮ, ᨽᨣᩅᩣ ᨠᨸ᩠ᨸᩴ, ᨲᩥᨭ᩠ᨮᨲᩩ ᩈᩩᨣᨲᩮᩣ ᨠᨸ᩠ᨸᩴ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶ’ᨶ᩠ᨲᩥ. ᩈᨧᩮ ᨲ᩠ᩅᩴ, ᩌᨶᨶ᩠ᨴ, ᨲᨳᩣᨣᨲᩴ ᨿᩣᨧᩮᨿ᩠ᨿᩣᩈᩥ, ᨴ᩠ᩅᩮᩅ ᨲᩮ ᩅᩣᨧᩣ ᨲᨳᩣᨣᨲᩮᩣ ᨸᨭᩥᨠ᩠ᨡᩥᨸᩮᨿ᩠ᨿ, ᩋᨳ ᨲᨲᩥᨿᨠᩴ ᩋᨵᩥᩅᩣᩈᩮᨿ᩠ᨿ, ᨲᩈ᩠ᨾᩣᨲᩥᩉᩣᨶᨶ᩠ᨴ, ᨲᩩᨿ᩠ᩉᩮᩅᩮᨲᩴ ᨴᩩᨠ᩠ᨠᨭᩴ, ᨲᩩᨿ᩠ᩉᩮᩅᩮᨲᩴ ᩋᨸᩁᨴ᩠ᨵᩴ.

᪑᪘᪒. ‘‘ᩑᨠᨾᩥᨴᩣᩉᩴ, ᩌᨶᨶ᩠ᨴ, ᩈᨾᨿᩴ ᩍᨵᩮᩅ ᩅᩮᩈᩣᩃᩥᨿᩴ ᩅᩥᩉᩁᩣᨾᩥ ᨣᩮᩣᨲᨾᨠᩮ ᨧᩮᨲᩥᨿᩮ …ᨸᩮ… ᩍᨵᩮᩅ ᩅᩮᩈᩣᩃᩥᨿᩴ ᩅᩥᩉᩁᩣᨾᩥ ᩈᨲ᩠ᨲᨾ᩠ᨻᩮ ᨧᩮᨲᩥᨿᩮ… ᩍᨵᩮᩅ ᩅᩮᩈᩣᩃᩥᨿᩴ ᩅᩥᩉᩁᩣᨾᩥ ᨻᩉᩩᨸᩩᨲ᩠ᨲᩮ ᨧᩮᨲᩥᨿᩮ… ᩍᨵᩮᩅ ᩅᩮᩈᩣᩃᩥᨿᩴ ᩅᩥᩉᩁᩣᨾᩥ ᩈᩣᩁᨶ᩠ᨴᨴᩮ ᨧᩮᨲᩥᨿᩮ… ᩍᨴᩣᨶᩮᩅ ᨡᩮᩣ ᨲᩣᩉᩴ, ᩌᨶᨶ᩠ᨴ, ᩋᨩ᩠ᨩ ᨧᩣᨸᩣᩃᩮ ᨧᩮᨲᩥᨿᩮ ᩌᨾᨶ᩠ᨲᩮᩈᩥᩴ – ‘ᩁᨾᨱᩦᨿᩣ, ᩌᨶᨶ᩠ᨴ, ᩅᩮᩈᩣᩃᩦ, ᩁᨾᨱᩦᨿᩴ ᩏᨴᩮᨶᩴ ᨧᩮᨲᩥᨿᩴ, ᩁᨾᨱᩦᨿᩴ ᨣᩮᩣᨲᨾᨠᩴ ᨧᩮᨲᩥᨿᩴ, ᩁᨾᨱᩦᨿᩴ ᩈᨲ᩠ᨲᨾ᩠ᨻᩴ ᨧᩮᨲᩥᨿᩴ, ᩁᨾᨱᩦᨿᩴ ᨻᩉᩩᨸᩩᨲ᩠ᨲᩴ ᨧᩮᨲᩥᨿᩴ, ᩁᨾᨱᩦᨿᩴ ᩈᩣᩁᨶ᩠ᨴᨴᩴ ᨧᩮᨲᩥᨿᩴ, ᩁᨾᨱᩦᨿᩴ ᨧᩣᨸᩣᩃᩴ ᨧᩮᨲᩥᨿᩴ. ᨿᩔ ᨠᩔᨧᩥ, ᩌᨶᨶ᩠ᨴ, ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ, ᩈᩮᩣ ᩌᨠᨦ᩠ᨡᨾᩣᨶᩮᩣ ᨠᨸ᩠ᨸᩴ ᩅᩣ ᨲᩥᨭ᩠ᨮᩮᨿ᩠ᨿ ᨠᨸ᩠ᨸᩣᩅᩈᩮᩈᩴ ᩅᩣ. ᨲᨳᩣᨣᨲᩔ ᨡᩮᩣ, ᩌᨶᨶ᩠ᨴ, ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ, ᩈᩮᩣ ᩌᨠᨦ᩠ᨡᨾᩣᨶᩮᩣ, ᩌᨶᨶ᩠ᨴ, ᨲᨳᩣᨣᨲᩮᩣ ᨠᨸ᩠ᨸᩴ ᩅᩣ ᨲᩥᨭ᩠ᨮᩮᨿ᩠ᨿ ᨠᨸ᩠ᨸᩣᩅᩈᩮᩈᩴ ᩅᩣ’ᨲᩥ. ᩑᩅᨾ᩠ᨸᩥ ᨡᩮᩣ ᨲ᩠ᩅᩴ, ᩌᨶᨶ᩠ᨴ, ᨲᨳᩣᨣᨲᩮᨶ ᩒᩊᩣᩁᩥᨠᩮ ᨶᩥᨾᩥᨲ᩠ᨲᩮ ᨠᨿᩥᩁᨾᩣᨶᩮ ᩒᩊᩣᩁᩥᨠᩮ ᩒᨽᩣᩈᩮ ᨠᨿᩥᩁᨾᩣᨶᩮ ᨶᩣᩈᨠ᩠ᨡᩥ ᨸᨭᩥᩅᩥᨩ᩠ᨫᩥᨲᩩᩴ, ᨶ ᨲᨳᩣᨣᨲᩴ ᨿᩣᨧᩥ – ‘ᨲᩥᨭ᩠ᨮᨲᩩ ᨽᨣᩅᩣ ᨠᨸ᩠ᨸᩴ, ᨲᩥᨭ᩠ᨮᨲᩩ ᩈᩩᨣᨲᩮᩣ ᨠᨸ᩠ᨸᩴ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶ’ᨶ᩠ᨲᩥ. ᩈᨧᩮ ᨲ᩠ᩅᩴ, ᩌᨶᨶ᩠ᨴ, ᨲᨳᩣᨣᨲᩴ ᨿᩣᨧᩮᨿ᩠ᨿᩣᩈᩥ, ᨴ᩠ᩅᩮᩅ ᨲᩮ ᩅᩣᨧᩣ ᨲᨳᩣᨣᨲᩮᩣ ᨸᨭᩥᨠ᩠ᨡᩥᨸᩮᨿ᩠ᨿ, ᩋᨳ ᨲᨲᩥᨿᨠᩴ ᩋᨵᩥᩅᩣᩈᩮᨿ᩠ᨿ. ᨲᩈ᩠ᨾᩣᨲᩥᩉᩣᨶᨶ᩠ᨴ, ᨲᩩᨿ᩠ᩉᩮᩅᩮᨲᩴ ᨴᩩᨠ᩠ᨠᨭᩴ, ᨲᩩᨿ᩠ᩉᩮᩅᩮᨲᩴ ᩋᨸᩁᨴ᩠ᨵᩴ.

᪑᪘᪓. ‘‘ᨶᨶᩩ ᩑᨲᩴ [ᩑᩅᩴ (ᩈ᩠ᨿᩣ. ᨸᩦ.)], ᩌᨶᨶ᩠ᨴ, ᨾᨿᩣ ᨸᨭᩥᨠᨧ᩠ᨧᩮᩅ [ᨸᨭᩥᨣᨧ᩠ᨧᩮᩅ (ᩈᩦ. ᨸᩦ.)] ᩋᨠ᩠ᨡᩣᨲᩴ – ‘ᩈᨻ᩠ᨻᩮᩉᩮᩅ ᨸᩥᨿᩮᩉᩥ ᨾᨶᩣᨸᩮᩉᩥ ᨶᩣᨶᩣᨽᩣᩅᩮᩣ ᩅᩥᨶᩣᨽᩣᩅᩮᩣ ᩋᨬ᩠ᨬᨳᩣᨽᩣᩅᩮᩣ. ᨲᩴ ᨠᩩᨲᩮᨲ᩠ᨳ, ᩌᨶᨶ᩠ᨴ, ᩃᨻ᩠ᨽᩣ, ᨿᩴ ᨲᩴ ᨩᩣᨲᩴ ᨽᩪᨲᩴ ᩈᨦ᩠ᨡᨲᩴ ᨸᩃᩮᩣᨠᨵᨾ᩠ᨾᩴ, ᨲᩴ ᩅᨲ ᨾᩣ ᨸᩃᩩᨩ᩠ᨩᩦᨲᩥ ᨶᩮᨲᩴ ᨮᩣᨶᩴ ᩅᩥᨩ᩠ᨩᨲᩥ’. ᨿᩴ ᨡᩮᩣ ᨸᨶᩮᨲᩴ, ᩌᨶᨶ᩠ᨴ, ᨲᨳᩣᨣᨲᩮᨶ ᨧᨲ᩠ᨲᩴ ᩅᨶ᩠ᨲᩴ ᨾᩩᨲ᩠ᨲᩴ ᨸᩉᩦᨶᩴ ᨸᨭᩥᨶᩥᩔᨭ᩠ᨮᩴ ᩒᩔᨭ᩠ᨮᩮᩣ ᩌᨿᩩᩈᨦ᩠ᨡᩣᩁᩮᩣ, ᩑᨠᩴᩈᩮᨶ ᩅᩣᨧᩣ ᨽᩣᩈᩥᨲᩣ – ‘ᨶ ᨧᩥᩁᩴ ᨲᨳᩣᨣᨲᩔ ᨸᩁᩥᨶᩥᨻ᩠ᨻᩣᨶᩴ ᨽᩅᩥᩔᨲᩥ. ᩍᨲᩮᩣ ᨲᩥᨱ᩠ᨱᩴ ᨾᩣᩈᩣᨶᩴ ᩋᨧ᩠ᨧᨿᩮᨶ ᨲᨳᩣᨣᨲᩮᩣ ᨸᩁᩥᨶᩥᨻ᩠ᨻᩣᨿᩥᩔᨲᩦ’ᨲᩥ. ᨲᨬ᩠ᨧ [ᨲᩴ ᩅᨧᨶᩴ (ᩈᩦ.)] ᨲᨳᩣᨣᨲᩮᩣ ᨩᩦᩅᩥᨲᩉᩮᨲᩩ ᨸᩩᨶ ᨸᨧ᩠ᨧᩣᩅᨾᩥᩔᨲᩦᨲᩥ [ᨸᨧ᩠ᨧᩣᨣᨾᩥᩔᨲᩦᨲᩥ (ᩈ᩠ᨿᩣ. ᨠ.)] ᨶᩮᨲᩴ ᨮᩣᨶᩴ ᩅᩥᨩ᩠ᨩᨲᩥ. ᩌᨿᩣᨾᩣᨶᨶ᩠ᨴ, ᨿᩮᨶ ᨾᩉᩣᩅᨶᩴ ᨠᩪᨭᩣᨣᩣᩁᩈᩣᩃᩣ ᨲᩮᨶᩩᨸᩈᨦ᩠ᨠᨾᩥᩔᩣᨾᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ.

ᩋᨳ ᨡᩮᩣ ᨽᨣᩅᩣ ᩌᨿᩈ᩠ᨾᨲᩣ ᩌᨶᨶ᩠ᨴᩮᨶ ᩈᨴ᩠ᨵᩥᩴ ᨿᩮᨶ ᨾᩉᩣᩅᨶᩴ ᨠᩪᨭᩣᨣᩣᩁᩈᩣᩃᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᨣᨧ᩠ᨨ ᨲ᩠ᩅᩴ, ᩌᨶᨶ᩠ᨴ, ᨿᩣᩅᨲᩥᨠᩣ ᨽᩥᨠ᩠ᨡᩪ ᩅᩮᩈᩣᩃᩥᩴ ᩏᨸᨶᩥᩔᩣᨿ ᩅᩥᩉᩁᨶ᩠ᨲᩥ, ᨲᩮ ᩈᨻ᩠ᨻᩮ ᩏᨸᨭ᩠ᨮᩣᨶᩈᩣᩃᩣᨿᩴ ᩈᨶ᩠ᨶᩥᨸᩣᨲᩮᩉᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨭᩥᩔᩩᨲ᩠ᩅᩣ ᨿᩣᩅᨲᩥᨠᩣ ᨽᩥᨠ᩠ᨡᩪ ᩅᩮᩈᩣᩃᩥᩴ ᩏᨸᨶᩥᩔᩣᨿ ᩅᩥᩉᩁᨶ᩠ᨲᩥ, ᨲᩮ ᩈᨻ᩠ᨻᩮ ᩏᨸᨭ᩠ᨮᩣᨶᩈᩣᩃᩣᨿᩴ ᩈᨶ᩠ᨶᩥᨸᩣᨲᩮᨲ᩠ᩅᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩣᩈᩥ. ᩑᨠᨾᨶ᩠ᨲᩴ ᨮᩥᨲᩮᩣ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩈᨶ᩠ᨶᩥᨸᨲᩥᨲᩮᩣ, ᨽᨶ᩠ᨲᩮ, ᨽᩥᨠ᩠ᨡᩩᩈᨦ᩠ᨥᩮᩣ, ᨿᩔᨴᩣᨶᩥ, ᨽᨶ᩠ᨲᩮ, ᨽᨣᩅᩣ ᨠᩣᩃᩴ ᨾᨬ᩠ᨬᨲᩦ’’ᨲᩥ.

᪑᪘᪔. ᩋᨳ ᨡᩮᩣ ᨽᨣᩅᩣ ᨿᩮᨶᩩᨸᨭ᩠ᨮᩣᨶᩈᩣᩃᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨸᨬ᩠ᨬᨲ᩠ᨲᩮ ᩌᩈᨶᩮ ᨶᩥᩈᩦᨴᩥ. ᨶᩥᩈᨩ᩠ᨩ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᨲᩈ᩠ᨾᩣᨲᩥᩉ, ᨽᩥᨠ᩠ᨡᩅᩮ, ᨿᩮ ᨲᩮ ᨾᨿᩣ ᨵᨾ᩠ᨾᩣ ᩋᨽᩥᨬ᩠ᨬᩣ ᨴᩮᩈᩥᨲᩣ, ᨲᩮ ᩅᩮᩣ ᩈᩣᨵᩩᨠᩴ ᩏᨣ᩠ᨣᩉᩮᨲ᩠ᩅᩣ ᩌᩈᩮᩅᩥᨲᨻ᩠ᨻᩣ ᨽᩣᩅᩮᨲᨻ᩠ᨻᩣ ᨻᩉᩩᩃᩦᨠᩣᨲᨻ᩠ᨻᩣ, ᨿᨳᨿᩥᨴᩴ ᨻᩕᩉ᩠ᨾᨧᩁᩥᨿᩴ ᩋᨴ᩠ᨵᨶᩥᨿᩴ ᩋᩔ ᨧᩥᩁᨭ᩠ᨮᩥᨲᩥᨠᩴ, ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᨠᨲᨾᩮ ᨧ ᨲᩮ, ᨽᩥᨠ᩠ᨡᩅᩮ, ᨵᨾ᩠ᨾᩣ ᨾᨿᩣ ᩋᨽᩥᨬ᩠ᨬᩣ ᨴᩮᩈᩥᨲᩣ, ᨿᩮ ᩅᩮᩣ ᩈᩣᨵᩩᨠᩴ ᩏᨣ᩠ᨣᩉᩮᨲ᩠ᩅᩣ ᩌᩈᩮᩅᩥᨲᨻ᩠ᨻᩣ ᨽᩣᩅᩮᨲᨻ᩠ᨻᩣ ᨻᩉᩩᩃᩦᨠᩣᨲᨻ᩠ᨻᩣ, ᨿᨳᨿᩥᨴᩴ ᨻᩕᩉ᩠ᨾᨧᩁᩥᨿᩴ ᩋᨴ᩠ᨵᨶᩥᨿᩴ ᩋᩔ ᨧᩥᩁᨭ᩠ᨮᩥᨲᩥᨠᩴ, ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᩈᩮᨿ᩠ᨿᨳᩥᨴᩴ – ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩣ ᨧᨲ᩠ᨲᩣᩁᩮᩣ ᩈᨾ᩠ᨾᨸ᩠ᨸᨵᩣᨶᩣ ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ ᨸᨬ᩠ᨧᩥᨶ᩠ᨴᩕᩥᨿᩣᨶᩥ ᨸᨬ᩠ᨧ ᨻᩃᩣᨶᩥ ᩈᨲ᩠ᨲ ᨻᩮᩣᨩ᩠ᨫᨦ᩠ᨣᩣ ᩋᩁᩥᨿᩮᩣ ᩋᨭ᩠ᨮᨦ᩠ᨣᩥᨠᩮᩣ ᨾᨣ᩠ᨣᩮᩣ. ᩍᨾᩮ ᨡᩮᩣ ᨲᩮ, ᨽᩥᨠ᩠ᨡᩅᩮ, ᨵᨾ᩠ᨾᩣ ᨾᨿᩣ ᩋᨽᩥᨬ᩠ᨬᩣ ᨴᩮᩈᩥᨲᩣ, ᨿᩮ ᩅᩮᩣ ᩈᩣᨵᩩᨠᩴ ᩏᨣ᩠ᨣᩉᩮᨲ᩠ᩅᩣ ᩌᩈᩮᩅᩥᨲᨻ᩠ᨻᩣ ᨽᩣᩅᩮᨲᨻ᩠ᨻᩣ ᨻᩉᩩᩃᩦᨠᩣᨲᨻ᩠ᨻᩣ, ᨿᨳᨿᩥᨴᩴ ᨻᩕᩉ᩠ᨾᨧᩁᩥᨿᩴ ᩋᨴ᩠ᨵᨶᩥᨿᩴ ᩋᩔ ᨧᩥᩁᨭ᩠ᨮᩥᨲᩥᨠᩴ, ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶ’’ᨶ᩠ᨲᩥ.

᪑᪘᪕. ᩋᨳ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᩉᨶ᩠ᨴᨴᩣᨶᩥ, ᨽᩥᨠ᩠ᨡᩅᩮ, ᩌᨾᨶ᩠ᨲᨿᩣᨾᩥ ᩅᩮᩣ, ᩅᨿᨵᨾ᩠ᨾᩣ ᩈᨦ᩠ᨡᩣᩁᩣ, ᩋᨸ᩠ᨸᨾᩣᨴᩮᨶ ᩈᨾ᩠ᨸᩣᨴᩮᨳ. ᨶᨧᩥᩁᩴ ᨲᨳᩣᨣᨲᩔ ᨸᩁᩥᨶᩥᨻ᩠ᨻᩣᨶᩴ ᨽᩅᩥᩔᨲᩥ. ᩍᨲᩮᩣ ᨲᩥᨱ᩠ᨱᩴ ᨾᩣᩈᩣᨶᩴ ᩋᨧ᩠ᨧᨿᩮᨶ ᨲᨳᩣᨣᨲᩮᩣ ᨸᩁᩥᨶᩥᨻ᩠ᨻᩣᨿᩥᩔᨲᩦ’’ᨲᩥ. ᩍᨴᨾᩅᩮᩣᨧ ᨽᨣᩅᩣ, ᩍᨴᩴ ᩅᨲ᩠ᩅᩣᨶ ᩈᩩᨣᨲᩮᩣ ᩋᨳᩣᨸᩁᩴ ᩑᨲᨴᩅᩮᩣᨧ ᩈᨲ᩠ᨳᩣ [ᩍᨲᩮᩣ ᨸᩁᩴ ᩈ᩠ᨿᩣᨾᨸᩮᩣᨲ᩠ᨳᨠᩮ ᩑᩅᩴᨸᩥ ᨸᩣᨮᩮᩣ ᨴᩥᩔᨲᩥ –§ᨴᩉᩁᩣᨸᩥ ᨧ ᨿᩮ ᩅᩩᨴ᩠ᨵᩣ, ᨿᩮ ᨻᩣᩃᩣ ᨿᩮ ᨧ ᨸᨱ᩠ᨯᩥᨲᩣ.§ᩋᨯ᩠ᨰᩣᨧᩮᩅ ᨴᩃᩥᨴ᩠ᨴᩣ ᨧ, ᩈᨻ᩠ᨻᩮ ᨾᨧ᩠ᨧᩩᨸᩁᩣᨿᨶᩣ.§ᨿᨳᩣᨸᩥ ᨠᩩᨾ᩠ᨽᨠᩣᩁᩔ, ᨠᨲᩴ ᨾᨲ᩠ᨲᩥᨠᨽᩣᨩᨶᩴ.§ᨡᩩᨴ᩠ᨴᨠᨬ᩠ᨧ ᨾᩉᨶ᩠ᨲᨬ᩠ᨧ, ᨿᨬ᩠ᨧ ᨸᨠ᩠ᨠᩴ ᨿᨬ᩠ᨧ ᩌᨾᨠᩴ.§ᩈᨻ᩠ᨻᩴ ᨽᩮᨴᨸᩁᩥᨿᨶ᩠ᨲᩴ, ᩑᩅᩴ ᨾᨧ᩠ᨧᩣᨶ ᨩᩦᩅᩥᨲᩴ.§ᩋᨳᩣᨸᩁᩴ ᩑᨲᨴᩅᩮᩣᨧ ᩈᨲ᩠ᨳᩣ]. –

‘‘ᨸᩁᩥᨸᨠ᩠ᨠᩮᩣ ᩅᨿᩮᩣ ᨾᨿ᩠ᩉᩴ, ᨸᩁᩥᨲ᩠ᨲᩴ ᨾᨾ ᨩᩦᩅᩥᨲᩴ;

ᨸᩉᩣᨿ ᩅᩮᩣ ᨣᨾᩥᩔᩣᨾᩥ, ᨠᨲᩴ ᨾᩮ ᩈᩁᨱᨾᨲ᩠ᨲᨶᩮᩣ.

‘‘ᩋᨸ᩠ᨸᨾᨲ᩠ᨲᩣ ᩈᨲᩦᨾᨶ᩠ᨲᩮᩣ, ᩈᩩᩈᩦᩃᩣ ᩉᩮᩣᨳ ᨽᩥᨠ᩠ᨡᩅᩮᩣ;

ᩈᩩᩈᨾᩣᩉᩥᨲᩈᨦ᩠ᨠᨸ᩠ᨸᩣ, ᩈᨧᩥᨲ᩠ᨲᨾᨶᩩᩁᨠ᩠ᨡᨳ.

‘‘ᨿᩮᩣ ᩍᨾᩈ᩠ᨾᩥᩴ ᨵᨾ᩠ᨾᩅᩥᨶᨿᩮ, ᩋᨸ᩠ᨸᨾᨲ᩠ᨲᩮᩣ ᩅᩥᩉᩔᨲᩥ;

ᨸᩉᩣᨿ ᨩᩣᨲᩥᩈᩴᩈᩣᩁᩴ, ᨴᩩᨠ᩠ᨡᩔᨶ᩠ᨲᩴ ᨠᩁᩥᩔᨲᩦ’’ᨲᩥ [ᩅᩥᩉᩁᩥᩔᨲᩥ (ᩈ᩠ᨿᩣ.), ᩅᩥᩉᩮᩔᨲᩥ (ᩈᩦ.)].

ᨲᨲᩥᨿᩮᩣ ᨽᩣᨱᩅᩣᩁᩮᩣ.

ᨶᩣᨣᩣᨸᩃᩮᩣᨠᩥᨲᩴ

᪑᪘᪖. ᩋᨳ ᨡᩮᩣ ᨽᨣᩅᩣ ᨸᩩᨻ᩠ᨻᨱ᩠ᩉᩈᨾᨿᩴ ᨶᩥᩅᩣᩈᩮᨲ᩠ᩅᩣ ᨸᨲ᩠ᨲᨧᩦᩅᩁᨾᩣᨴᩣᨿ ᩅᩮᩈᩣᩃᩥᩴ ᨸᩥᨱ᩠ᨯᩣᨿ ᨸᩣᩅᩥᩈᩥ. ᩅᩮᩈᩣᩃᩥᨿᩴ ᨸᩥᨱ᩠ᨯᩣᨿ ᨧᩁᩥᨲ᩠ᩅᩣ ᨸᨧ᩠ᨨᩣᨽᨲ᩠ᨲᩴ ᨸᩥᨱ᩠ᨯᨸᩣᨲᨸ᩠ᨸᨭᩥᨠ᩠ᨠᨶ᩠ᨲᩮᩣ ᨶᩣᨣᩣᨸᩃᩮᩣᨠᩥᨲᩴ ᩅᩮᩈᩣᩃᩥᩴ ᩋᨸᩃᩮᩣᨠᩮᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩍᨴᩴ ᨸᨧ᩠ᨨᩥᨾᨠᩴ, ᩌᨶᨶ᩠ᨴ, ᨲᨳᩣᨣᨲᩔ ᩅᩮᩈᩣᩃᩥᨿᩣ ᨴᩔᨶᩴ ᨽᩅᩥᩔᨲᩥ. ᩌᨿᩣᨾᩣᨶᨶ᩠ᨴ, ᨿᩮᨶ ᨽᨱ᩠ᨯᨣᩣᨾᩮᩣ [ᨽᨱ᩠ᨯᩩᨣᩣᨾᩮᩣ (ᨠ.)] ᨲᩮᨶᩩᨸᩈᨦ᩠ᨠᨾᩥᩔᩣᨾᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ.

ᩋᨳ ᨡᩮᩣ ᨽᨣᩅᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨿᩮᨶ ᨽᨱ᩠ᨯᨣᩣᨾᩮᩣ ᨲᨴᩅᩈᩁᩥ. ᨲᨲᩕ ᩈᩩᨴᩴ ᨽᨣᩅᩣ ᨽᨱ᩠ᨯᨣᩣᨾᩮ ᩅᩥᩉᩁᨲᩥ. ᨲᨲᩕ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᨧᨲᩩᨶ᩠ᨶᩴ, ᨽᩥᨠ᩠ᨡᩅᩮ, ᨵᨾ᩠ᨾᩣᨶᩴ ᩋᨶᨶᩩᨻᩮᩣᨵᩣ ᩋᨸ᩠ᨸᨭᩥᩅᩮᨵᩣ ᩑᩅᨾᩥᨴᩴ ᨴᩦᨥᨾᨴ᩠ᨵᩣᨶᩴ ᩈᨶ᩠ᨵᩣᩅᩥᨲᩴ ᩈᩴᩈᩁᩥᨲᩴ ᨾᨾᨬ᩠ᨧᩮᩅ ᨲᩩᨾ᩠ᩉᩣᨠᨬ᩠ᨧ. ᨠᨲᨾᩮᩈᩴ ᨧᨲᩩᨶ᩠ᨶᩴ? ᩋᩁᩥᨿᩔ, ᨽᩥᨠ᩠ᨡᩅᩮ, ᩈᩦᩃᩔ ᩋᨶᨶᩩᨻᩮᩣᨵᩣ ᩋᨸ᩠ᨸᨭᩥᩅᩮᨵᩣ ᩑᩅᨾᩥᨴᩴ ᨴᩦᨥᨾᨴ᩠ᨵᩣᨶᩴ ᩈᨶ᩠ᨵᩣᩅᩥᨲᩴ ᩈᩴᩈᩁᩥᨲᩴ ᨾᨾᩴ ᨧᩮᩅ ᨲᩩᨾ᩠ᩉᩣᨠᨬ᩠ᨧ. ᩋᩁᩥᨿᩔ, ᨽᩥᨠ᩠ᨡᩅᩮ, ᩈᨾᩣᨵᩥᩔ ᩋᨶᨶᩩᨻᩮᩣᨵᩣ ᩋᨸ᩠ᨸᨭᩥᩅᩮᨵᩣ ᩑᩅᨾᩥᨴᩴ ᨴᩦᨥᨾᨴ᩠ᨵᩣᨶᩴ ᩈᨶ᩠ᨵᩣᩅᩥᨲᩴ ᩈᩴᩈᩁᩥᨲᩴ ᨾᨾᩴ ᨧᩮᩅ ᨲᩩᨾ᩠ᩉᩣᨠᨬ᩠ᨧ. ᩋᩁᩥᨿᩣᨿ, ᨽᩥᨠ᩠ᨡᩅᩮ, ᨸᨬ᩠ᨬᩣᨿ ᩋᨶᨶᩩᨻᩮᩣᨵᩣ ᩋᨸ᩠ᨸᨭᩥᩅᩮᨵᩣ ᩑᩅᨾᩥᨴᩴ ᨴᩦᨥᨾᨴ᩠ᨵᩣᨶᩴ ᩈᨶ᩠ᨵᩣᩅᩥᨲᩴ ᩈᩴᩈᩁᩥᨲᩴ ᨾᨾᩴ ᨧᩮᩅ ᨲᩩᨾ᩠ᩉᩣᨠᨬ᩠ᨧ. ᩋᩁᩥᨿᩣᨿ, ᨽᩥᨠ᩠ᨡᩅᩮ, ᩅᩥᨾᩩᨲ᩠ᨲᩥᨿᩣ ᩋᨶᨶᩩᨻᩮᩣᨵᩣ ᩋᨸ᩠ᨸᨭᩥᩅᩮᨵᩣ ᩑᩅᨾᩥᨴᩴ ᨴᩦᨥᨾᨴ᩠ᨵᩣᨶᩴ ᩈᨶ᩠ᨵᩣᩅᩥᨲᩴ ᩈᩴᩈᩁᩥᨲᩴ ᨾᨾᩴ ᨧᩮᩅ ᨲᩩᨾ᩠ᩉᩣᨠᨬ᩠ᨧ. ᨲᨿᩥᨴᩴ, ᨽᩥᨠ᩠ᨡᩅᩮ, ᩋᩁᩥᨿᩴ ᩈᩦᩃᩴ ᩋᨶᩩᨻᩩᨴ᩠ᨵᩴ ᨸᨭᩥᩅᩥᨴ᩠ᨵᩴ, ᩋᩁᩥᨿᩮᩣ ᩈᨾᩣᨵᩥ ᩋᨶᩩᨻᩩᨴ᩠ᨵᩮᩣ ᨸᨭᩥᩅᩥᨴ᩠ᨵᩮᩣ, ᩋᩁᩥᨿᩣ ᨸᨬ᩠ᨬᩣ ᩋᨶᩩᨻᩩᨴ᩠ᨵᩣ ᨸᨭᩥᩅᩥᨴ᩠ᨵᩣ, ᩋᩁᩥᨿᩣ ᩅᩥᨾᩩᨲ᩠ᨲᩥ ᩋᨶᩩᨻᩩᨴ᩠ᨵᩣ ᨸᨭᩥᩅᩥᨴ᩠ᨵᩣ, ᩏᨧ᩠ᨨᩥᨶ᩠ᨶᩣ ᨽᩅᨲᨱ᩠ᩉᩣ, ᨡᩦᨱᩣ ᨽᩅᨶᩮᨲ᩠ᨲᩥ, ᨶᨲ᩠ᨳᩥ ᨴᩣᨶᩥ ᨸᩩᨶᨻ᩠ᨽᩅᩮᩣ’’ᨲᩥ. ᩍᨴᨾᩅᩮᩣᨧ ᨽᨣᩅᩣ, ᩍᨴᩴ ᩅᨲ᩠ᩅᩣᨶ ᩈᩩᨣᨲᩮᩣ ᩋᨳᩣᨸᩁᩴ ᩑᨲᨴᩅᩮᩣᨧ ᩈᨲ᩠ᨳᩣ –

‘‘ᩈᩦᩃᩴ ᩈᨾᩣᨵᩥ ᨸᨬ᩠ᨬᩣ ᨧ, ᩅᩥᨾᩩᨲ᩠ᨲᩥ ᨧ ᩋᨶᩩᨲ᩠ᨲᩁᩣ;

ᩋᨶᩩᨻᩩᨴ᩠ᨵᩣ ᩍᨾᩮ ᨵᨾ᩠ᨾᩣ, ᨣᩮᩣᨲᨾᩮᨶ ᨿᩈᩔᩥᨶᩣ.

‘‘ᩍᨲᩥ ᨻᩩᨴ᩠ᨵᩮᩣ ᩋᨽᩥᨬ᩠ᨬᩣᨿ, ᨵᨾ᩠ᨾᨾᨠ᩠ᨡᩣᩈᩥ ᨽᩥᨠ᩠ᨡᩩᨶᩴ;

ᨴᩩᨠ᩠ᨡᩔᨶ᩠ᨲᨠᩁᩮᩣ ᩈᨲ᩠ᨳᩣ, ᨧᨠ᩠ᨡᩩᨾᩣ ᨸᩁᩥᨶᩥᨻ᩠ᨻᩩᨲᩮᩣ’’ᨲᩥ.

ᨲᨲᩕᩣᨸᩥ ᩈᩩᨴᩴ ᨽᨣᩅᩣ ᨽᨱ᩠ᨯᨣᩣᨾᩮ ᩅᩥᩉᩁᨶ᩠ᨲᩮᩣ ᩑᨲᨴᩮᩅ ᨻᩉᩩᩃᩴ ᨽᩥᨠ᩠ᨡᩪᨶᩴ ᨵᨾ᩠ᨾᩥᩴ ᨠᨳᩴ ᨠᩁᩮᩣᨲᩥ – ‘‘ᩍᨲᩥ ᩈᩦᩃᩴ, ᩍᨲᩥ ᩈᨾᩣᨵᩥ, ᩍᨲᩥ ᨸᨬ᩠ᨬᩣ. ᩈᩦᩃᨸᩁᩥᨽᩣᩅᩥᨲᩮᩣ ᩈᨾᩣᨵᩥ ᨾᩉᨸ᩠ᨹᩃᩮᩣ ᩉᩮᩣᨲᩥ ᨾᩉᩣᨶᩥᩈᩴᩈᩮᩣ. ᩈᨾᩣᨵᩥᨸᩁᩥᨽᩣᩅᩥᨲᩣ ᨸᨬ᩠ᨬᩣ ᨾᩉᨸ᩠ᨹᩃᩣ ᩉᩮᩣᨲᩥ ᨾᩉᩣᨶᩥᩈᩴᩈᩣ. ᨸᨬ᩠ᨬᩣᨸᩁᩥᨽᩣᩅᩥᨲᩴ ᨧᩥᨲ᩠ᨲᩴ ᩈᨾ᩠ᨾᨴᩮᩅ ᩌᩈᩅᩮᩉᩥ ᩅᩥᨾᩩᨧ᩠ᨧᨲᩥ, ᩈᩮᨿ᩠ᨿᨳᩥᨴᩴ – ᨠᩣᨾᩣᩈᩅᩣ, ᨽᩅᩣᩈᩅᩣ, ᩋᩅᩥᨩ᩠ᨩᩣᩈᩅᩣ’’ᨲᩥ.

ᨧᨲᩩᨾᩉᩣᨸᨴᩮᩈᨠᨳᩣ

᪑᪘᪗. ᩋᨳ ᨡᩮᩣ ᨽᨣᩅᩣ ᨽᨱ᩠ᨯᨣᩣᨾᩮ ᨿᨳᩣᨽᩥᩁᨶ᩠ᨲᩴ ᩅᩥᩉᩁᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩌᨿᩣᨾᩣᨶᨶ᩠ᨴ, ᨿᩮᨶ ᩉᨲ᩠ᨳᩥᨣᩣᨾᩮᩣ, ᨿᩮᨶ ᩋᨾ᩠ᨻᨣᩣᨾᩮᩣ, ᨿᩮᨶ ᨩᨾ᩠ᨻᩩᨣᩣᨾᩮᩣ, ᨿᩮᨶ ᨽᩮᩣᨣᨶᨣᩁᩴ ᨲᩮᨶᩩᨸᩈᨦ᩠ᨠᨾᩥᩔᩣᨾᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ. ᩋᨳ ᨡᩮᩣ ᨽᨣᩅᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨿᩮᨶ ᨽᩮᩣᨣᨶᨣᩁᩴ ᨲᨴᩅᩈᩁᩥ. ᨲᨲᩕ ᩈᩩᨴᩴ ᨽᨣᩅᩣ ᨽᩮᩣᨣᨶᨣᩁᩮ ᩅᩥᩉᩁᨲᩥ ᩌᨶᨶ᩠ᨴᩮ [ᩈᩣᨶᨶ᩠ᨴᩁᩮ (ᨠ.)] ᨧᩮᨲᩥᨿᩮ. ᨲᨲᩕ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᨧᨲ᩠ᨲᩣᩁᩮᩣᨾᩮ, ᨽᩥᨠ᩠ᨡᩅᩮ, ᨾᩉᩣᨸᨴᩮᩈᩮ ᨴᩮᩈᩮᩔᩣᨾᩥ, ᨲᩴ ᩈᩩᨱᩣᨳ, ᩈᩣᨵᩩᨠᩴ ᨾᨶᩈᩥᨠᩁᩮᩣᨳ, ᨽᩣᩈᩥᩔᩣᨾᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩩᩴ. ᨽᨣᩅᩣ ᩑᨲᨴᩅᩮᩣᨧ –

᪑᪘᪘. ‘‘ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩑᩅᩴ ᩅᨴᩮᨿ᩠ᨿ – ‘ᩈᨾ᩠ᨾᩩᨡᩣ ᨾᩮᨲᩴ, ᩌᩅᩩᩈᩮᩣ, ᨽᨣᩅᨲᩮᩣ ᩈᩩᨲᩴ ᩈᨾ᩠ᨾᩩᨡᩣ ᨸᨭᩥᨣ᩠ᨣᩉᩥᨲᩴ, ᩋᨿᩴ ᨵᨾ᩠ᨾᩮᩣ ᩋᨿᩴ ᩅᩥᨶᨿᩮᩣ ᩍᨴᩴ ᩈᨲ᩠ᨳᩩᩈᩣᩈᨶ’ᨶ᩠ᨲᩥ. ᨲᩔ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩮᩣ ᨽᩣᩈᩥᨲᩴ ᨶᩮᩅ ᩋᨽᩥᨶᨶ᩠ᨴᩥᨲᨻ᩠ᨻᩴ ᨶᨸ᩠ᨸᨭᩥᨠ᩠ᨠᩮᩣᩈᩥᨲᨻ᩠ᨻᩴ. ᩋᨶᨽᩥᨶᨶ᩠ᨴᩥᨲ᩠ᩅᩣ ᩋᨸ᩠ᨸᨭᩥᨠ᩠ᨠᩮᩣᩈᩥᨲ᩠ᩅᩣ ᨲᩣᨶᩥ ᨸᨴᨻ᩠ᨿᨬ᩠ᨩᨶᩣᨶᩥ ᩈᩣᨵᩩᨠᩴ ᩏᨣ᩠ᨣᩉᩮᨲ᩠ᩅᩣ ᩈᩩᨲ᩠ᨲᩮ ᩒᩈᩣᩁᩮᨲᨻ᩠ᨻᩣᨶᩥ [ᩒᨲᩣᩁᩮᨲᨻ᩠ᨻᩣᨶᩥ], ᩅᩥᨶᨿᩮ ᩈᨶ᩠ᨴᩔᩮᨲᨻ᩠ᨻᩣᨶᩥ. ᨲᩣᨶᩥ ᨧᩮ ᩈᩩᨲ᩠ᨲᩮ ᩒᩈᩣᩁᩥᨿᨾᩣᨶᩣᨶᩥ [ᩒᨲᩣᩁᩥᨿᨾᩣᨶᩣᨶᩥ] ᩅᩥᨶᨿᩮ ᩈᨶ᩠ᨴᩔᩥᨿᨾᩣᨶᩣᨶᩥ ᨶ ᨧᩮᩅ ᩈᩩᨲ᩠ᨲᩮ ᩒᩈᩁᨶ᩠ᨲᩥ [ᩒᨲᩁᨶ᩠ᨲᩥ (ᩈᩦ. ᨸᩦ. ᩋ. ᨶᩥ. ᪔.᪑᪘᪐], ᨶ ᨧ ᩅᩥᨶᨿᩮ ᩈᨶ᩠ᨴᩥᩔᨶ᩠ᨲᩥ, ᨶᩥᨭ᩠ᨮᨾᩮᨲ᩠ᨳ ᨣᨶ᩠ᨲᨻ᩠ᨻᩴ – ‘ᩋᨴ᩠ᨵᩣ, ᩍᨴᩴ ᨶ ᨧᩮᩅ ᨲᩔ ᨽᨣᩅᨲᩮᩣ ᩅᨧᨶᩴ; ᩍᨾᩔ ᨧ ᨽᩥᨠ᩠ᨡᩩᨶᩮᩣ ᨴᩩᨣ᩠ᨣᩉᩥᨲ’ᨶ᩠ᨲᩥ. ᩍᨲᩥᩉᩮᨲᩴ, ᨽᩥᨠ᩠ᨡᩅᩮ, ᨨᨯ᩠ᨯᩮᨿ᩠ᨿᩣᨳ. ᨲᩣᨶᩥ ᨧᩮ ᩈᩩᨲ᩠ᨲᩮ ᩒᩈᩣᩁᩥᨿᨾᩣᨶᩣᨶᩥ ᩅᩥᨶᨿᩮ ᩈᨶ᩠ᨴᩔᩥᨿᨾᩣᨶᩣᨶᩥ ᩈᩩᨲ᩠ᨲᩮ ᨧᩮᩅ ᩒᩈᩁᨶ᩠ᨲᩥ, ᩅᩥᨶᨿᩮ ᨧ ᩈᨶ᩠ᨴᩥᩔᨶ᩠ᨲᩥ, ᨶᩥᨭ᩠ᨮᨾᩮᨲ᩠ᨳ ᨣᨶ᩠ᨲᨻ᩠ᨻᩴ – ‘ᩋᨴ᩠ᨵᩣ, ᩍᨴᩴ ᨲᩔ ᨽᨣᩅᨲᩮᩣ ᩅᨧᨶᩴ; ᩍᨾᩔ ᨧ ᨽᩥᨠ᩠ᨡᩩᨶᩮᩣ ᩈᩩᨣ᩠ᨣᩉᩥᨲ’ᨶ᩠ᨲᩥ. ᩍᨴᩴ, ᨽᩥᨠ᩠ᨡᩅᩮ, ᨸᨮᨾᩴ ᨾᩉᩣᨸᨴᩮᩈᩴ ᨵᩣᩁᩮᨿ᩠ᨿᩣᨳ.

‘‘ᩍᨵ ᨸᨶ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩑᩅᩴ ᩅᨴᩮᨿ᩠ᨿ – ‘ᩋᨾᩩᨠᩈ᩠ᨾᩥᩴ ᨶᩣᨾ ᩌᩅᩣᩈᩮ ᩈᨦ᩠ᨥᩮᩣ ᩅᩥᩉᩁᨲᩥ ᩈᨳᩮᩁᩮᩣ ᩈᨸᩣᨾᩮᩣᨠ᩠ᨡᩮᩣ. ᨲᩔ ᨾᩮ ᩈᨦ᩠ᨥᩔ ᩈᨾ᩠ᨾᩩᨡᩣ ᩈᩩᨲᩴ ᩈᨾ᩠ᨾᩩᨡᩣ ᨸᨭᩥᨣ᩠ᨣᩉᩥᨲᩴ, ᩋᨿᩴ ᨵᨾ᩠ᨾᩮᩣ ᩋᨿᩴ ᩅᩥᨶᨿᩮᩣ ᩍᨴᩴ ᩈᨲ᩠ᨳᩩᩈᩣᩈᨶ’ᨶ᩠ᨲᩥ. ᨲᩔ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩮᩣ ᨽᩣᩈᩥᨲᩴ ᨶᩮᩅ ᩋᨽᩥᨶᨶ᩠ᨴᩥᨲᨻ᩠ᨻᩴ ᨶᨸ᩠ᨸᨭᩥᨠ᩠ᨠᩮᩣᩈᩥᨲᨻ᩠ᨻᩴ. ᩋᨶᨽᩥᨶᨶ᩠ᨴᩥᨲ᩠ᩅᩣ ᩋᨸ᩠ᨸᨭᩥᨠ᩠ᨠᩮᩣᩈᩥᨲ᩠ᩅᩣ ᨲᩣᨶᩥ ᨸᨴᨻ᩠ᨿᨬ᩠ᨩᨶᩣᨶᩥ ᩈᩣᨵᩩᨠᩴ ᩏᨣ᩠ᨣᩉᩮᨲ᩠ᩅᩣ ᩈᩩᨲ᩠ᨲᩮ ᩒᩈᩣᩁᩮᨲᨻ᩠ᨻᩣᨶᩥ, ᩅᩥᨶᨿᩮ ᩈᨶ᩠ᨴᩔᩮᨲᨻ᩠ᨻᩣᨶᩥ. ᨲᩣᨶᩥ ᨧᩮ ᩈᩩᨲ᩠ᨲᩮ ᩒᩈᩣᩁᩥᨿᨾᩣᨶᩣᨶᩥ ᩅᩥᨶᨿᩮ ᩈᨶ᩠ᨴᩔᩥᨿᨾᩣᨶᩣᨶᩥ ᨶ ᨧᩮᩅ ᩈᩩᨲ᩠ᨲᩮ ᩒᩈᩁᨶ᩠ᨲᩥ, ᨶ ᨧ ᩅᩥᨶᨿᩮ ᩈᨶ᩠ᨴᩥᩔᨶ᩠ᨲᩥ, ᨶᩥᨭ᩠ᨮᨾᩮᨲ᩠ᨳ ᨣᨶ᩠ᨲᨻ᩠ᨻᩴ – ‘ᩋᨴ᩠ᨵᩣ, ᩍᨴᩴ ᨶ ᨧᩮᩅ ᨲᩔ ᨽᨣᩅᨲᩮᩣ ᩅᨧᨶᩴ; ᨲᩔ ᨧ ᩈᨦ᩠ᨥᩔ ᨴᩩᨣ᩠ᨣᩉᩥᨲ’ᨶ᩠ᨲᩥ. ᩍᨲᩥᩉᩮᨲᩴ, ᨽᩥᨠ᩠ᨡᩅᩮ, ᨨᨯ᩠ᨯᩮᨿ᩠ᨿᩣᨳ. ᨲᩣᨶᩥ ᨧᩮ ᩈᩩᨲ᩠ᨲᩮ ᩒᩈᩣᩁᩥᨿᨾᩣᨶᩣᨶᩥ ᩅᩥᨶᨿᩮ ᩈᨶ᩠ᨴᩔᩥᨿᨾᩣᨶᩣᨶᩥ ᩈᩩᨲ᩠ᨲᩮ ᨧᩮᩅ ᩒᩈᩁᨶ᩠ᨲᩥ ᩅᩥᨶᨿᩮ ᨧ ᩈᨶ᩠ᨴᩥᩔᨶ᩠ᨲᩥ, ᨶᩥᨭ᩠ᨮᨾᩮᨲ᩠ᨳ ᨣᨶ᩠ᨲᨻ᩠ᨻᩴ – ‘ᩋᨴ᩠ᨵᩣ, ᩍᨴᩴ ᨲᩔ ᨽᨣᩅᨲᩮᩣ ᩅᨧᨶᩴ; ᨲᩔ ᨧ ᩈᨦ᩠ᨥᩔ ᩈᩩᨣ᩠ᨣᩉᩥᨲ’ᨶ᩠ᨲᩥ. ᩍᨴᩴ, ᨽᩥᨠ᩠ᨡᩅᩮ, ᨴᩩᨲᩥᨿᩴ ᨾᩉᩣᨸᨴᩮᩈᩴ ᨵᩣᩁᩮᨿ᩠ᨿᩣᨳ.

‘‘ᩍᨵ ᨸᨶ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩑᩅᩴ ᩅᨴᩮᨿ᩠ᨿ – ‘ᩋᨾᩩᨠᩈ᩠ᨾᩥᩴ ᨶᩣᨾ ᩌᩅᩣᩈᩮ ᩈᨾ᩠ᨻᩉᩩᩃᩣ ᨳᩮᩁᩣ ᨽᩥᨠ᩠ᨡᩪ ᩅᩥᩉᩁᨶ᩠ᨲᩥ ᨻᩉᩩᩔᩩᨲᩣ ᩌᨣᨲᩣᨣᨾᩣ ᨵᨾ᩠ᨾᨵᩁᩣ ᩅᩥᨶᨿᨵᩁᩣ ᨾᩣᨲᩥᨠᩣᨵᩁᩣ. ᨲᩮᩈᩴ ᨾᩮ ᨳᩮᩁᩣᨶᩴ ᩈᨾ᩠ᨾᩩᨡᩣ ᩈᩩᨲᩴ ᩈᨾ᩠ᨾᩩᨡᩣ ᨸᨭᩥᨣ᩠ᨣᩉᩥᨲᩴ – ᩋᨿᩴ ᨵᨾ᩠ᨾᩮᩣ ᩋᨿᩴ ᩅᩥᨶᨿᩮᩣ ᩍᨴᩴ ᩈᨲ᩠ᨳᩩᩈᩣᩈᨶ’ᨶ᩠ᨲᩥ. ᨲᩔ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩮᩣ ᨽᩣᩈᩥᨲᩴ ᨶᩮᩅ ᩋᨽᩥᨶᨶ᩠ᨴᩥᨲᨻ᩠ᨻᩴ…ᨸᩮ… ᨶ ᨧ ᩅᩥᨶᨿᩮ ᩈᨶ᩠ᨴᩥᩔᨶ᩠ᨲᩥ, ᨶᩥᨭ᩠ᨮᨾᩮᨲ᩠ᨳ ᨣᨶ᩠ᨲᨻ᩠ᨻᩴ – ‘ᩋᨴ᩠ᨵᩣ, ᩍᨴᩴ ᨶ ᨧᩮᩅ ᨲᩔ ᨽᨣᩅᨲᩮᩣ ᩅᨧᨶᩴ; ᨲᩮᩈᨬ᩠ᨧ ᨳᩮᩁᩣᨶᩴ ᨴᩩᨣ᩠ᨣᩉᩥᨲ’ᨶ᩠ᨲᩥ. ᩍᨲᩥᩉᩮᨲᩴ, ᨽᩥᨠ᩠ᨡᩅᩮ, ᨨᨯ᩠ᨯᩮᨿ᩠ᨿᩣᨳ. ᨲᩣᨶᩥ ᨧᩮ ᩈᩩᨲ᩠ᨲᩮ ᩒᩈᩣᩁᩥᨿᨾᩣᨶᩣᨶᩥ…ᨸᩮ… ᩅᩥᨶᨿᩮ ᨧ ᩈᨶ᩠ᨴᩥᩔᨶ᩠ᨲᩥ, ᨶᩥᨭ᩠ᨮᨾᩮᨲ᩠ᨳ ᨣᨶ᩠ᨲᨻ᩠ᨻᩴ – ‘ᩋᨴ᩠ᨵᩣ, ᩍᨴᩴ ᨲᩔ ᨽᨣᩅᨲᩮᩣ ᩅᨧᨶᩴ; ᨲᩮᩈᨬ᩠ᨧ ᨳᩮᩁᩣᨶᩴ ᩈᩩᨣ᩠ᨣᩉᩥᨲ’ᨶ᩠ᨲᩥ. ᩍᨴᩴ, ᨽᩥᨠ᩠ᨡᩅᩮ, ᨲᨲᩥᨿᩴ ᨾᩉᩣᨸᨴᩮᩈᩴ ᨵᩣᩁᩮᨿ᩠ᨿᩣᨳ.

‘‘ᩍᨵ ᨸᨶ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩑᩅᩴ ᩅᨴᩮᨿ᩠ᨿ – ‘ᩋᨾᩩᨠᩈ᩠ᨾᩥᩴ ᨶᩣᨾ ᩌᩅᩣᩈᩮ ᩑᨠᩮᩣ ᨳᩮᩁᩮᩣ ᨽᩥᨠ᩠ᨡᩩ ᩅᩥᩉᩁᨲᩥ ᨻᩉᩩᩔᩩᨲᩮᩣ ᩌᨣᨲᩣᨣᨾᩮᩣ ᨵᨾ᩠ᨾᨵᩁᩮᩣ ᩅᩥᨶᨿᨵᩁᩮᩣ ᨾᩣᨲᩥᨠᩣᨵᩁᩮᩣ. ᨲᩔ ᨾᩮ ᨳᩮᩁᩔ ᩈᨾ᩠ᨾᩩᨡᩣ ᩈᩩᨲᩴ ᩈᨾ᩠ᨾᩩᨡᩣ ᨸᨭᩥᨣ᩠ᨣᩉᩥᨲᩴ – ᩋᨿᩴ ᨵᨾ᩠ᨾᩮᩣ ᩋᨿᩴ ᩅᩥᨶᨿᩮᩣ ᩍᨴᩴ ᩈᨲ᩠ᨳᩩᩈᩣᩈᨶ’ᨶ᩠ᨲᩥ. ᨲᩔ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩮᩣ ᨽᩣᩈᩥᨲᩴ ᨶᩮᩅ ᩋᨽᩥᨶᨶ᩠ᨴᩥᨲᨻ᩠ᨻᩴ ᨶᨸ᩠ᨸᨭᩥᨠ᩠ᨠᩮᩣᩈᩥᨲᨻ᩠ᨻᩴ. ᩋᨶᨽᩥᨶᨶ᩠ᨴᩥᨲ᩠ᩅᩣ ᩋᨸ᩠ᨸᨭᩥᨠ᩠ᨠᩮᩣᩈᩥᨲ᩠ᩅᩣ ᨲᩣᨶᩥ ᨸᨴᨻ᩠ᨿᨬ᩠ᨩᨶᩣᨶᩥ ᩈᩣᨵᩩᨠᩴ ᩏᨣ᩠ᨣᩉᩮᨲ᩠ᩅᩣ ᩈᩩᨲ᩠ᨲᩮ ᩒᩈᩣᩁᩥᨲᨻ᩠ᨻᩣᨶᩥ, ᩅᩥᨶᨿᩮ ᩈᨶ᩠ᨴᩔᩮᨲᨻ᩠ᨻᩣᨶᩥ. ᨲᩣᨶᩥ ᨧᩮ ᩈᩩᨲ᩠ᨲᩮ ᩒᩈᩣᩁᩥᨿᨾᩣᨶᩣᨶᩥ ᩅᩥᨶᨿᩮ ᩈᨶ᩠ᨴᩔᩥᨿᨾᩣᨶᩣᨶᩥ ᨶ ᨧᩮᩅ ᩈᩩᨲ᩠ᨲᩮ ᩒᩈᩁᨶ᩠ᨲᩥ, ᨶ ᨧ ᩅᩥᨶᨿᩮ ᩈᨶ᩠ᨴᩥᩔᨶ᩠ᨲᩥ, ᨶᩥᨭ᩠ᨮᨾᩮᨲ᩠ᨳ ᨣᨶ᩠ᨲᨻ᩠ᨻᩴ – ‘ᩋᨴ᩠ᨵᩣ, ᩍᨴᩴ ᨶ ᨧᩮᩅ ᨲᩔ ᨽᨣᩅᨲᩮᩣ ᩅᨧᨶᩴ; ᨲᩔ ᨧ ᨳᩮᩁᩔ ᨴᩩᨣ᩠ᨣᩉᩥᨲ’ᨶ᩠ᨲᩥ. ᩍᨲᩥᩉᩮᨲᩴ, ᨽᩥᨠ᩠ᨡᩅᩮ, ᨨᨯ᩠ᨯᩮᨿ᩠ᨿᩣᨳ. ᨲᩣᨶᩥ ᨧ ᩈᩩᨲ᩠ᨲᩮ ᩒᩈᩣᩁᩥᨿᨾᩣᨶᩣᨶᩥ ᩅᩥᨶᨿᩮ ᩈᨶ᩠ᨴᩔᩥᨿᨾᩣᨶᩣᨶᩥ ᩈᩩᨲ᩠ᨲᩮ ᨧᩮᩅ ᩒᩈᩁᨶ᩠ᨲᩥ, ᩅᩥᨶᨿᩮ ᨧ ᩈᨶ᩠ᨴᩥᩔᨶ᩠ᨲᩥ, ᨶᩥᨭ᩠ᨮᨾᩮᨲ᩠ᨳ ᨣᨶ᩠ᨲᨻ᩠ᨻᩴ – ‘ᩋᨴ᩠ᨵᩣ, ᩍᨴᩴ ᨲᩔ ᨽᨣᩅᨲᩮᩣ ᩅᨧᨶᩴ; ᨲᩔ ᨧ ᨳᩮᩁᩔ ᩈᩩᨣ᩠ᨣᩉᩥᨲ’ᨶ᩠ᨲᩥ. ᩍᨴᩴ, ᨽᩥᨠ᩠ᨡᩅᩮ, ᨧᨲᩩᨲ᩠ᨳᩴ ᨾᩉᩣᨸᨴᩮᩈᩴ ᨵᩣᩁᩮᨿ᩠ᨿᩣᨳ. ᩍᨾᩮ ᨡᩮᩣ, ᨽᩥᨠ᩠ᨡᩅᩮ, ᨧᨲ᩠ᨲᩣᩁᩮᩣ ᨾᩉᩣᨸᨴᩮᩈᩮ ᨵᩣᩁᩮᨿ᩠ᨿᩣᨳᩣ’’ᨲᩥ.

ᨲᨲᩕᨸᩥ ᩈᩩᨴᩴ ᨽᨣᩅᩣ ᨽᩮᩣᨣᨶᨣᩁᩮ ᩅᩥᩉᩁᨶ᩠ᨲᩮᩣ ᩌᨶᨶ᩠ᨴᩮ ᨧᩮᨲᩥᨿᩮ ᩑᨲᨴᩮᩅ ᨻᩉᩩᩃᩴ ᨽᩥᨠ᩠ᨡᩪᨶᩴ ᨵᨾ᩠ᨾᩥᩴ ᨠᨳᩴ ᨠᩁᩮᩣᨲᩥ – ‘‘ᩍᨲᩥ ᩈᩦᩃᩴ, ᩍᨲᩥ ᩈᨾᩣᨵᩥ, ᩍᨲᩥ ᨸᨬ᩠ᨬᩣ. ᩈᩦᩃᨸᩁᩥᨽᩣᩅᩥᨲᩮᩣ ᩈᨾᩣᨵᩥ ᨾᩉᨸ᩠ᨹᩃᩮᩣ ᩉᩮᩣᨲᩥ ᨾᩉᩣᨶᩥᩈᩴᩈᩮᩣ. ᩈᨾᩣᨵᩥᨸᩁᩥᨽᩣᩅᩥᨲᩣ ᨸᨬ᩠ᨬᩣ ᨾᩉᨸ᩠ᨹᩃᩣ ᩉᩮᩣᨲᩥ ᨾᩉᩣᨶᩥᩈᩴᩈᩣ. ᨸᨬ᩠ᨬᩣᨸᩁᩥᨽᩣᩅᩥᨲᩴ ᨧᩥᨲ᩠ᨲᩴ ᩈᨾ᩠ᨾᨴᩮᩅ ᩌᩈᩅᩮᩉᩥ ᩅᩥᨾᩩᨧ᩠ᨧᨲᩥ, ᩈᩮᨿ᩠ᨿᨳᩥᨴᩴ – ᨠᩣᨾᩣᩈᩅᩣ, ᨽᩅᩣᩈᩅᩣ, ᩋᩅᩥᨩ᩠ᨩᩣᩈᩅᩣ’’ᨲᩥ.

ᨠᨾ᩠ᨾᩣᩁᨸᩩᨲ᩠ᨲᨧᩩᨶ᩠ᨴᩅᨲ᩠ᨳᩩ

᪑᪘᪙. ᩋᨳ ᨡᩮᩣ ᨽᨣᩅᩣ ᨽᩮᩣᨣᨶᨣᩁᩮ ᨿᨳᩣᨽᩥᩁᨶ᩠ᨲᩴ ᩅᩥᩉᩁᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩌᨿᩣᨾᩣᨶᨶ᩠ᨴ, ᨿᩮᨶ ᨸᩣᩅᩣ ᨲᩮᨶᩩᨸᩈᨦ᩠ᨠᨾᩥᩔᩣᨾᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ. ᩋᨳ ᨡᩮᩣ ᨽᨣᩅᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨿᩮᨶ ᨸᩣᩅᩣ ᨲᨴᩅᩈᩁᩥ. ᨲᨲᩕ ᩈᩩᨴᩴ ᨽᨣᩅᩣ ᨸᩣᩅᩣᨿᩴ ᩅᩥᩉᩁᨲᩥ ᨧᩩᨶ᩠ᨴᩔ ᨠᨾ᩠ᨾᩣᩁᨸᩩᨲ᩠ᨲᩔ ᩋᨾ᩠ᨻᩅᨶᩮ. ᩋᩔᩮᩣᩈᩥ ᨡᩮᩣ ᨧᩩᨶ᩠ᨴᩮᩣ ᨠᨾ᩠ᨾᩣᩁᨸᩩᨲ᩠ᨲᩮᩣ – ‘‘ᨽᨣᩅᩣ ᨠᩥᩁ ᨸᩣᩅᩴ ᩋᨶᩩᨸ᩠ᨸᨲ᩠ᨲᩮᩣ, ᨸᩣᩅᩣᨿᩴ ᩅᩥᩉᩁᨲᩥ ᨾᨿ᩠ᩉᩴ ᩋᨾ᩠ᨻᩅᨶᩮ’’ᨲᩥ. ᩋᨳ ᨡᩮᩣ ᨧᩩᨶ᩠ᨴᩮᩣ ᨠᨾ᩠ᨾᩣᩁᨸᩩᨲ᩠ᨲᩮᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩴ ᨡᩮᩣ ᨧᩩᨶ᩠ᨴᩴ ᨠᨾ᩠ᨾᩣᩁᨸᩩᨲ᩠ᨲᩴ ᨽᨣᩅᩣ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᩈᩥ ᩈᨾᩣᨴᨸᩮᩈᩥ ᩈᨾᩩᨲ᩠ᨲᩮᨩᩮᩈᩥ ᩈᨾ᩠ᨸᩉᩴᩈᩮᩈᩥ. ᩋᨳ ᨡᩮᩣ ᨧᩩᨶ᩠ᨴᩮᩣ ᨠᨾ᩠ᨾᩣᩁᨸᩩᨲ᩠ᨲᩮᩣ ᨽᨣᩅᨲᩣ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩥᨲᩮᩣ ᩈᨾᩣᨴᨸᩥᨲᩮᩣ ᩈᨾᩩᨲ᩠ᨲᩮᨩᩥᨲᩮᩣ ᩈᨾ᩠ᨸᩉᩴᩈᩥᨲᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩋᨵᩥᩅᩣᩈᩮᨲᩩ ᨾᩮ, ᨽᨶ᩠ᨲᩮ, ᨽᨣᩅᩣ ᩈ᩠ᩅᩣᨲᨶᩣᨿ ᨽᨲ᩠ᨲᩴ ᩈᨴ᩠ᨵᩥᩴ ᨽᩥᨠ᩠ᨡᩩᩈᨦ᩠ᨥᩮᨶᩣ’’ᨲᩥ. ᩋᨵᩥᩅᩣᩈᩮᩈᩥ ᨽᨣᩅᩣ ᨲᩩᨱ᩠ᩉᩦᨽᩣᩅᩮᨶ. ᩋᨳ ᨡᩮᩣ ᨧᩩᨶ᩠ᨴᩮᩣ ᨠᨾ᩠ᨾᩣᩁᨸᩩᨲ᩠ᨲᩮᩣ ᨽᨣᩅᨲᩮᩣ ᩋᨵᩥᩅᩣᩈᨶᩴ ᩅᩥᨴᩥᨲ᩠ᩅᩣ ᩏᨭ᩠ᨮᩣᨿᩣᩈᨶᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨸᨠ᩠ᨠᩣᨾᩥ.

ᩋᨳ ᨡᩮᩣ ᨧᩩᨶ᩠ᨴᩮᩣ ᨠᨾ᩠ᨾᩣᩁᨸᩩᨲ᩠ᨲᩮᩣ ᨲᩔᩣ ᩁᨲ᩠ᨲᩥᨿᩣ ᩋᨧ᩠ᨧᨿᩮᨶ ᩈᨠᩮ ᨶᩥᩅᩮᩈᨶᩮ ᨸᨱᩦᨲᩴ ᨡᩣᨴᨶᩦᨿᩴ ᨽᩮᩣᨩᨶᩦᨿᩴ ᨸᨭᩥᨿᩣᨴᩣᨸᩮᨲ᩠ᩅᩣ ᨸᩉᩪᨲᨬ᩠ᨧ ᩈᩪᨠᩁᨾᨴ᩠ᨴᩅᩴ ᨽᨣᩅᨲᩮᩣ ᨠᩣᩃᩴ ᩌᩁᩮᩣᨧᩣᨸᩮᩈᩥ – ‘‘ᨠᩣᩃᩮᩣ, ᨽᨶ᩠ᨲᩮ, ᨶᩥᨭ᩠ᨮᩥᨲᩴ ᨽᨲ᩠ᨲ’’ᨶ᩠ᨲᩥ. ᩋᨳ ᨡᩮᩣ ᨽᨣᩅᩣ ᨸᩩᨻ᩠ᨻᨱ᩠ᩉᩈᨾᨿᩴ ᨶᩥᩅᩣᩈᩮᨲ᩠ᩅᩣ ᨸᨲ᩠ᨲᨧᩦᩅᩁᨾᩣᨴᩣᨿ ᩈᨴ᩠ᨵᩥᩴ ᨽᩥᨠ᩠ᨡᩩᩈᨦ᩠ᨥᩮᨶ ᨿᩮᨶ ᨧᩩᨶ᩠ᨴᩔ ᨠᨾ᩠ᨾᩣᩁᨸᩩᨲ᩠ᨲᩔ ᨶᩥᩅᩮᩈᨶᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨸᨬ᩠ᨬᨲ᩠ᨲᩮ ᩌᩈᨶᩮ ᨶᩥᩈᩦᨴᩥ. ᨶᩥᩈᨩ᩠ᨩ ᨡᩮᩣ ᨽᨣᩅᩣ ᨧᩩᨶ᩠ᨴᩴ ᨠᨾ᩠ᨾᩣᩁᨸᩩᨲ᩠ᨲᩴ ᩌᨾᨶ᩠ᨲᩮᩈᩥ – ‘‘ᨿᩴ ᨲᩮ, ᨧᩩᨶ᩠ᨴ, ᩈᩪᨠᩁᨾᨴ᩠ᨴᩅᩴ ᨸᨭᩥᨿᨲ᩠ᨲᩴ, ᨲᩮᨶ ᨾᩴ ᨸᩁᩥᩅᩥᩈ. ᨿᩴ ᨸᨶᨬ᩠ᨬᩴ ᨡᩣᨴᨶᩦᨿᩴ ᨽᩮᩣᨩᨶᩦᨿᩴ ᨸᨭᩥᨿᨲ᩠ᨲᩴ, ᨲᩮᨶ ᨽᩥᨠ᩠ᨡᩩᩈᨦ᩠ᨥᩴ ᨸᩁᩥᩅᩥᩈᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᨧᩩᨶ᩠ᨴᩮᩣ ᨠᨾ᩠ᨾᩣᩁᨸᩩᨲ᩠ᨲᩮᩣ ᨽᨣᩅᨲᩮᩣ ᨸᨭᩥᩔᩩᨲ᩠ᩅᩣ ᨿᩴ ᩋᩉᩮᩣᩈᩥ ᩈᩪᨠᩁᨾᨴ᩠ᨴᩅᩴ ᨸᨭᩥᨿᨲ᩠ᨲᩴ, ᨲᩮᨶ ᨽᨣᩅᨶ᩠ᨲᩴ ᨸᩁᩥᩅᩥᩈᩥ. ᨿᩴ ᨸᨶᨬ᩠ᨬᩴ ᨡᩣᨴᨶᩦᨿᩴ ᨽᩮᩣᨩᨶᩦᨿᩴ ᨸᨭᩥᨿᨲ᩠ᨲᩴ, ᨲᩮᨶ ᨽᩥᨠ᩠ᨡᩩᩈᨦ᩠ᨥᩴ ᨸᩁᩥᩅᩥᩈᩥ. ᩋᨳ ᨡᩮᩣ ᨽᨣᩅᩣ ᨧᩩᨶ᩠ᨴᩴ ᨠᨾ᩠ᨾᩣᩁᨸᩩᨲ᩠ᨲᩴ ᩌᨾᨶ᩠ᨲᩮᩈᩥ – ‘‘ᨿᩴ ᨲᩮ, ᨧᩩᨶ᩠ᨴ, ᩈᩪᨠᩁᨾᨴ᩠ᨴᩅᩴ ᩋᩅᩈᩥᨭ᩠ᨮᩴ, ᨲᩴ ᩈᩮᩣᨻ᩠ᨽᩮ ᨶᩥᨡᨱᩣᩉᩥ. ᨶᩣᩉᩴ ᨲᩴ, ᨧᩩᨶ᩠ᨴ, ᨸᩔᩣᨾᩥ ᩈᨴᩮᩅᨠᩮ ᩃᩮᩣᨠᩮ ᩈᨾᩣᩁᨠᩮ ᩈᨻᩕᩉ᩠ᨾᨠᩮ ᩈᩔᨾᨱᨻᩕᩣᩉ᩠ᨾᨱᩥᨿᩣ ᨸᨩᩣᨿ ᩈᨴᩮᩅᨾᨶᩩᩔᩣᨿ, ᨿᩔ ᨲᩴ ᨸᩁᩥᨽᩩᨲ᩠ᨲᩴ ᩈᨾ᩠ᨾᩣ ᨸᩁᩥᨱᩣᨾᩴ ᨣᨧ᩠ᨨᩮᨿ᩠ᨿ ᩋᨬ᩠ᨬᨲᩕ ᨲᨳᩣᨣᨲᩔᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᨧᩩᨶ᩠ᨴᩮᩣ ᨠᨾ᩠ᨾᩣᩁᨸᩩᨲ᩠ᨲᩮᩣ ᨽᨣᩅᨲᩮᩣ ᨸᨭᩥᩔᩩᨲ᩠ᩅᩣ ᨿᩴ ᩋᩉᩮᩣᩈᩥ ᩈᩪᨠᩁᨾᨴ᩠ᨴᩅᩴ ᩋᩅᩈᩥᨭ᩠ᨮᩴ, ᨲᩴ ᩈᩮᩣᨻ᩠ᨽᩮ ᨶᩥᨡᨱᩥᨲ᩠ᩅᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩴ ᨡᩮᩣ ᨧᩩᨶ᩠ᨴᩴ ᨠᨾ᩠ᨾᩣᩁᨸᩩᨲ᩠ᨲᩴ ᨽᨣᩅᩣ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᨲ᩠ᩅᩣ ᩈᨾᩣᨴᨸᩮᨲ᩠ᩅᩣ ᩈᨾᩩᨲ᩠ᨲᩮᨩᩮᨲ᩠ᩅᩣ ᩈᨾ᩠ᨸᩉᩴᩈᩮᨲ᩠ᩅᩣ ᩏᨭ᩠ᨮᩣᨿᩣᩈᨶᩣ ᨸᨠ᩠ᨠᩣᨾᩥ.

᪑᪙᪐. ᩋᨳ ᨡᩮᩣ ᨽᨣᩅᨲᩮᩣ ᨧᩩᨶ᩠ᨴᩔ ᨠᨾ᩠ᨾᩣᩁᨸᩩᨲ᩠ᨲᩔ ᨽᨲ᩠ᨲᩴ ᨽᩩᨲ᩠ᨲᩣᩅᩥᩔ ᨡᩁᩮᩣ ᩌᨻᩣᨵᩮᩣ ᩏᨸ᩠ᨸᨩ᩠ᨩᩥ, ᩃᩮᩣᩉᩥᨲᨸᨠ᩠ᨡᨶ᩠ᨴᩥᨠᩣ ᨸᨻᩣᩊ᩠ᩉᩣ ᩅᩮᨴᨶᩣ ᩅᨲ᩠ᨲᨶ᩠ᨲᩥ ᨾᩣᩁᨱᨶ᩠ᨲᩥᨠᩣ. ᨲᩣ ᩈᩩᨴᩴ ᨽᨣᩅᩣ ᩈᨲᩮᩣ ᩈᨾ᩠ᨸᨩᩣᨶᩮᩣ ᩋᨵᩥᩅᩣᩈᩮᩈᩥ ᩋᩅᩥᩉᨬ᩠ᨬᨾᩣᨶᩮᩣ. ᩋᨳ ᨡᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩌᨿᩣᨾᩣᨶᨶ᩠ᨴ, ᨿᩮᨶ ᨠᩩᩈᩥᨶᩣᩁᩣ ᨲᩮᨶᩩᨸᩈᨦ᩠ᨠᨾᩥᩔᩣᨾᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ.

ᨧᩩᨶ᩠ᨴᩔ ᨽᨲ᩠ᨲᩴ ᨽᩩᨬ᩠ᨩᩥᨲ᩠ᩅᩣ, ᨠᨾ᩠ᨾᩣᩁᩔᩣᨲᩥ ᨾᩮ ᩈᩩᨲᩴ;

ᩌᨻᩣᨵᩴ ᩈᨾ᩠ᨹᩩᩈᩦ ᨵᩦᩁᩮᩣ, ᨸᨻᩣᩊ᩠ᩉᩴ ᨾᩣᩁᨱᨶ᩠ᨲᩥᨠᩴ.

ᨽᩩᨲ᩠ᨲᩔ ᨧ ᩈᩪᨠᩁᨾᨴ᩠ᨴᩅᩮᨶ,

ᨻ᩠ᨿᩣᨵᩥᨸ᩠ᨸᨻᩣᩊ᩠ᩉᩮᩣ ᩏᨴᨸᩣᨴᩥ ᩈᨲ᩠ᨳᩩᨶᩮᩣ;

ᩅᩥᩁᩮᨧᨾᩣᨶᩮᩣ [ᩅᩥᩁᩥᨧ᩠ᨧᨾᩣᨶᩮᩣ (ᩈᩦ. ᩈ᩠ᨿᩣ. ᨠ.), ᩅᩥᩁᩥᨬ᩠ᨧᨾᩣᨶᩮᩣ (?)] ᨽᨣᩅᩣ ᩋᩅᩮᩣᨧ,

ᨣᨧ᩠ᨨᩣᨾᩉᩴ ᨠᩩᩈᩥᨶᩣᩁᩴ ᨶᨣᩁᨶ᩠ᨲᩥ.

ᨸᩣᨶᩦᨿᩣᩉᩁᨱᩴ

᪑᪙᪑. ᩋᨳ ᨡᩮᩣ ᨽᨣᩅᩣ ᨾᨣ᩠ᨣᩣ ᩒᨠ᩠ᨠᨾ᩠ᨾ ᨿᩮᨶ ᩋᨬ᩠ᨬᨲᩁᩴ ᩁᩩᨠ᩠ᨡᨾᩪᩃᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩍᨦ᩠ᨥ ᨾᩮ ᨲ᩠ᩅᩴ, ᩌᨶᨶ᩠ᨴ, ᨧᨲᩩᨣ᩠ᨣᩩᨱᩴ ᩈᨦ᩠ᨥᩣᨭᩥᩴ ᨸᨬ᩠ᨬᨸᩮᩉᩥ, ᨠᩥᩃᨶ᩠ᨲᩮᩣᩈ᩠ᨾᩥ, ᩌᨶᨶ᩠ᨴ, ᨶᩥᩈᩦᨴᩥᩔᩣᨾᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨭᩥᩔᩩᨲ᩠ᩅᩣ ᨧᨲᩩᨣ᩠ᨣᩩᨱᩴ ᩈᨦ᩠ᨥᩣᨭᩥᩴ ᨸᨬ᩠ᨬᨸᩮᩈᩥ. ᨶᩥᩈᩦᨴᩥ ᨽᨣᩅᩣ ᨸᨬ᩠ᨬᨲ᩠ᨲᩮ ᩌᩈᨶᩮ. ᨶᩥᩈᨩ᩠ᨩ ᨡᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩍᨦ᩠ᨥ ᨾᩮ ᨲ᩠ᩅᩴ, ᩌᨶᨶ᩠ᨴ, ᨸᩣᨶᩦᨿᩴ ᩌᩉᩁ, ᨸᩥᨸᩣᩈᩥᨲᩮᩣᩈ᩠ᨾᩥ, ᩌᨶᨶ᩠ᨴ, ᨸᩥᩅᩥᩔᩣᨾᩦ’’ᨲᩥ. ᩑᩅᩴ ᩅᩩᨲ᩠ᨲᩮ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩍᨴᩣᨶᩥ, ᨽᨶ᩠ᨲᩮ, ᨸᨬ᩠ᨧᨾᨲ᩠ᨲᩣᨶᩥ ᩈᨠᨭᩈᨲᩣᨶᩥ ᩋᨲᩥᨠ᩠ᨠᨶ᩠ᨲᩣᨶᩥ, ᨲᩴ ᨧᨠ᩠ᨠᨧ᩠ᨨᩥᨶ᩠ᨶᩴ ᩏᨴᨠᩴ ᨸᩁᩥᨲ᩠ᨲᩴ ᩃᩩᩊᩥᨲᩴ ᩌᩅᩥᩃᩴ ᩈᨶ᩠ᨴᨲᩥ. ᩋᨿᩴ, ᨽᨶ᩠ᨲᩮ, ᨠᨠᩩᨵᩣ [ᨠᨠᩩᨳᩣ (ᩈᩦ. ᨸᩦ.)] ᨶᨴᩦ ᩋᩅᩥᨴᩪᩁᩮ ᩋᨧ᩠ᨨᩮᩣᨴᨠᩣ ᩈᩣᨲᩮᩣᨴᨠᩣ ᩈᩦᨲᩮᩣᨴᨠᩣ ᩈᩮᨲᩮᩣᨴᨠᩣ [ᩈᩮᨲᨠᩣ (ᩈᩦ.)] ᩈᩩᨸ᩠ᨸᨲᩥᨲ᩠ᨳᩣ ᩁᨾᨱᩦᨿᩣ. ᩑᨲ᩠ᨳ ᨽᨣᩅᩣ ᨸᩣᨶᩦᨿᨬ᩠ᨧ ᨸᩥᩅᩥᩔᨲᩥ, ᨣᨲ᩠ᨲᩣᨶᩥ ᨧ ᩈᩦᨲᩦ [ᩈᩦᨲᩴ (ᩈᩦ. ᨸᩦ. ᨠ.)] ᨠᩁᩥᩔᨲᩦ’’ᨲᩥ.

ᨴᩩᨲᩥᨿᨾ᩠ᨸᩥ ᨡᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩍᨦ᩠ᨥ ᨾᩮ ᨲ᩠ᩅᩴ, ᩌᨶᨶ᩠ᨴ, ᨸᩣᨶᩦᨿᩴ ᩌᩉᩁ, ᨸᩥᨸᩣᩈᩥᨲᩮᩣᩈ᩠ᨾᩥ, ᩌᨶᨶ᩠ᨴ, ᨸᩥᩅᩥᩔᩣᨾᩦ’’ᨲᩥ. ᨴᩩᨲᩥᨿᨾ᩠ᨸᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩍᨴᩣᨶᩥ, ᨽᨶ᩠ᨲᩮ, ᨸᨬ᩠ᨧᨾᨲ᩠ᨲᩣᨶᩥ ᩈᨠᨭᩈᨲᩣᨶᩥ ᩋᨲᩥᨠ᩠ᨠᨶ᩠ᨲᩣᨶᩥ, ᨲᩴ ᨧᨠ᩠ᨠᨧ᩠ᨨᩥᨶ᩠ᨶᩴ ᩏᨴᨠᩴ ᨸᩁᩥᨲ᩠ᨲᩴ ᩃᩩᩊᩥᨲᩴ ᩌᩅᩥᩃᩴ ᩈᨶ᩠ᨴᨲᩥ. ᩋᨿᩴ, ᨽᨶ᩠ᨲᩮ, ᨠᨠᩩᨵᩣ ᨶᨴᩦ ᩋᩅᩥᨴᩪᩁᩮ ᩋᨧ᩠ᨨᩮᩣᨴᨠᩣ ᩈᩣᨲᩮᩣᨴᨠᩣ ᩈᩦᨲᩮᩣᨴᨠᩣ ᩈᩮᨲᩮᩣᨴᨠᩣ ᩈᩩᨸ᩠ᨸᨲᩥᨲ᩠ᨳᩣ ᩁᨾᨱᩦᨿᩣ. ᩑᨲ᩠ᨳ ᨽᨣᩅᩣ ᨸᩣᨶᩦᨿᨬ᩠ᨧ ᨸᩥᩅᩥᩔᨲᩥ, ᨣᨲ᩠ᨲᩣᨶᩥ ᨧ ᩈᩦᨲᩦᨠᩁᩥᩔᨲᩦ’’ᨲᩥ.

ᨲᨲᩥᨿᨾ᩠ᨸᩥ ᨡᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩍᨦ᩠ᨥ ᨾᩮ ᨲ᩠ᩅᩴ, ᩌᨶᨶ᩠ᨴ, ᨸᩣᨶᩦᨿᩴ ᩌᩉᩁ, ᨸᩥᨸᩣᩈᩥᨲᩮᩣᩈ᩠ᨾᩥ, ᩌᨶᨶ᩠ᨴ, ᨸᩥᩅᩥᩔᩣᨾᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨭᩥᩔᩩᨲ᩠ᩅᩣ ᨸᨲ᩠ᨲᩴ ᨣᩉᩮᨲ᩠ᩅᩣ ᨿᩮᨶ ᩈᩣ ᨶᨴᩥᨠᩣ ᨲᩮᨶᩩᨸᩈᨦ᩠ᨠᨾᩥ. ᩋᨳ ᨡᩮᩣ ᩈᩣ ᨶᨴᩥᨠᩣ ᨧᨠ᩠ᨠᨧ᩠ᨨᩥᨶ᩠ᨶᩣ ᨸᩁᩥᨲ᩠ᨲᩣ ᩃᩩᩊᩥᨲᩣ ᩌᩅᩥᩃᩣ ᩈᨶ᩠ᨴᨾᩣᨶᩣ, ᩌᨿᩈ᩠ᨾᨶ᩠ᨲᩮ ᩌᨶᨶ᩠ᨴᩮ ᩏᨸᩈᨦ᩠ᨠᨾᨶ᩠ᨲᩮ ᩋᨧ᩠ᨨᩣ ᩅᩥᨸ᩠ᨸᩈᨶ᩠ᨶᩣ ᩋᨶᩣᩅᩥᩃᩣ ᩈᨶ᩠ᨴᩥᨲ᩠ᨳ [ᩈᨶ᩠ᨴᨲᩥ (ᩈ᩠ᨿᩣ.)]. ᩋᨳ ᨡᩮᩣ ᩌᨿᩈ᩠ᨾᨲᩮᩣ ᩌᨶᨶ᩠ᨴᩔ ᩑᨲᨴᩉᩮᩣᩈᩥ – ‘‘ᩋᨧ᩠ᨨᩁᩥᨿᩴ ᩅᨲ, ᨽᩮᩣ, ᩋᨻ᩠ᨽᩩᨲᩴ ᩅᨲ, ᨽᩮᩣ, ᨲᨳᩣᨣᨲᩔ ᨾᩉᩥᨴ᩠ᨵᩥᨠᨲᩣ ᨾᩉᩣᨶᩩᨽᩣᩅᨲᩣ. ᩋᨿᨬ᩠ᩉᩥ ᩈᩣ ᨶᨴᩥᨠᩣ ᨧᨠ᩠ᨠᨧ᩠ᨨᩥᨶ᩠ᨶᩣ ᨸᩁᩥᨲ᩠ᨲᩣ ᩃᩩᩊᩥᨲᩣ ᩌᩅᩥᩃᩣ ᩈᨶ᩠ᨴᨾᩣᨶᩣ ᨾᨿᩥ ᩏᨸᩈᨦ᩠ᨠᨾᨶ᩠ᨲᩮ ᩋᨧ᩠ᨨᩣ ᩅᩥᨸ᩠ᨸᩈᨶ᩠ᨶᩣ ᩋᨶᩣᩅᩥᩃᩣ ᩈᨶ᩠ᨴᨲᩦ’’ᨲᩥ. ᨸᨲ᩠ᨲᩮᨶ ᨸᩣᨶᩦᨿᩴ ᩌᨴᩣᨿ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩋᨧ᩠ᨨᩁᩥᨿᩴ, ᨽᨶ᩠ᨲᩮ, ᩋᨻ᩠ᨽᩩᨲᩴ, ᨽᨶ᩠ᨲᩮ, ᨲᨳᩣᨣᨲᩔ ᨾᩉᩥᨴ᩠ᨵᩥᨠᨲᩣ ᨾᩉᩣᨶᩩᨽᩣᩅᨲᩣ. ᩍᨴᩣᨶᩥ ᩈᩣ ᨽᨶ᩠ᨲᩮ ᨶᨴᩥᨠᩣ ᨧᨠ᩠ᨠᨧ᩠ᨨᩥᨶ᩠ᨶᩣ ᨸᩁᩥᨲ᩠ᨲᩣ ᩃᩩᩊᩥᨲᩣ ᩌᩅᩥᩃᩣ ᩈᨶ᩠ᨴᨾᩣᨶᩣ ᨾᨿᩥ ᩏᨸᩈᨦ᩠ᨠᨾᨶ᩠ᨲᩮ ᩋᨧ᩠ᨨᩣ ᩅᩥᨸ᩠ᨸᩈᨶ᩠ᨶᩣ ᩋᨶᩣᩅᩥᩃᩣ ᩈᨶ᩠ᨴᩥᨲ᩠ᨳ. ᨸᩥᩅᨲᩩ ᨽᨣᩅᩣ ᨸᩣᨶᩦᨿᩴ ᨸᩥᩅᨲᩩ ᩈᩩᨣᨲᩮᩣ ᨸᩣᨶᩦᨿ’’ᨶ᩠ᨲᩥ. ᩋᨳ ᨡᩮᩣ ᨽᨣᩅᩣ ᨸᩣᨶᩦᨿᩴ ᩋᨸᩣᨿᩥ.

ᨸᩩᨠ᩠ᨠᩩᩈᨾᩃ᩠ᩃᨸᩩᨲ᩠ᨲᩅᨲ᩠ᨳᩩ

᪑᪙᪒. ᨲᩮᨶ ᩁᩮᩣᨡᩮᩣ ᨸᨶ ᩈᨾᨿᩮᨶ ᨸᩩᨠ᩠ᨠᩩᩈᩮᩣ ᨾᩃ᩠ᩃᨸᩩᨲ᩠ᨲᩮᩣ ᩌᩊᩣᩁᩔ ᨠᩣᩃᩣᨾᩔ ᩈᩣᩅᨠᩮᩣ ᨠᩩᩈᩥᨶᩣᩁᩣᨿ ᨸᩣᩅᩴ ᩋᨴ᩠ᨵᩣᨶᨾᨣ᩠ᨣᨸ᩠ᨸᨭᩥᨸ᩠ᨸᨶ᩠ᨶᩮᩣ ᩉᩮᩣᨲᩥ. ᩋᨴ᩠ᨴᩈᩣ ᨡᩮᩣ ᨸᩩᨠ᩠ᨠᩩᩈᩮᩣ ᨾᩃ᩠ᩃᨸᩩᨲ᩠ᨲᩮᩣ ᨽᨣᩅᨶ᩠ᨲᩴ ᩋᨬ᩠ᨬᨲᩁᩈ᩠ᨾᩥᩴ ᩁᩩᨠ᩠ᨡᨾᩪᩃᩮ ᨶᩥᩈᩥᨶ᩠ᨶᩴ. ᨴᩥᩈ᩠ᩅᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᨸᩩᨠ᩠ᨠᩩᩈᩮᩣ ᨾᩃ᩠ᩃᨸᩩᨲ᩠ᨲᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩋᨧ᩠ᨨᩁᩥᨿᩴ, ᨽᨶ᩠ᨲᩮ, ᩋᨻ᩠ᨽᩩᨲᩴ, ᨽᨶ᩠ᨲᩮ, ᩈᨶ᩠ᨲᩮᨶ ᩅᨲ, ᨽᨶ᩠ᨲᩮ, ᨸᨻ᩠ᨻᨩᩥᨲᩣ ᩅᩥᩉᩣᩁᩮᨶ ᩅᩥᩉᩁᨶ᩠ᨲᩥ. ᨽᩪᨲᨸᩩᨻ᩠ᨻᩴ, ᨽᨶ᩠ᨲᩮ, ᩌᩊᩣᩁᩮᩣ ᨠᩣᩃᩣᨾᩮᩣ ᩋᨴ᩠ᨵᩣᨶᨾᨣ᩠ᨣᨸ᩠ᨸᨭᩥᨸ᩠ᨸᨶ᩠ᨶᩮᩣ ᨾᨣ᩠ᨣᩣ ᩒᨠ᩠ᨠᨾ᩠ᨾ ᩋᩅᩥᨴᩪᩁᩮ ᩋᨬ᩠ᨬᨲᩁᩈ᩠ᨾᩥᩴ ᩁᩩᨠ᩠ᨡᨾᩪᩃᩮ ᨴᩥᩅᩣᩅᩥᩉᩣᩁᩴ ᨶᩥᩈᩦᨴᩥ. ᩋᨳ ᨡᩮᩣ, ᨽᨶ᩠ᨲᩮ, ᨸᨬ᩠ᨧᨾᨲ᩠ᨲᩣᨶᩥ ᩈᨠᨭᩈᨲᩣᨶᩥ ᩌᩊᩣᩁᩴ ᨠᩣᩃᩣᨾᩴ ᨶᩥᩔᩣᨿ ᨶᩥᩔᩣᨿ ᩋᨲᩥᨠ᩠ᨠᨾᩥᩴᩈᩩ. ᩋᨳ ᨡᩮᩣ, ᨽᨶ᩠ᨲᩮ, ᩋᨬ᩠ᨬᨲᩁᩮᩣ ᨸᩩᩁᩥᩈᩮᩣ ᨲᩔ ᩈᨠᨭᩈᨲ᩠ᨳᩔ [ᩈᨠᨭᩈᨲᩔ (ᨠ.)] ᨸᩥᨭ᩠ᨮᩥᨲᩮᩣ ᨸᩥᨭ᩠ᨮᩥᨲᩮᩣ ᩌᨣᨧ᩠ᨨᨶ᩠ᨲᩮᩣ ᨿᩮᨶ ᩌᩊᩣᩁᩮᩣ ᨠᩣᩃᩣᨾᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩌᩊᩣᩁᩴ ᨠᩣᩃᩣᨾᩴ ᩑᨲᨴᩅᩮᩣᨧ – ‘ᩋᨸᩥ, ᨽᨶ᩠ᨲᩮ, ᨸᨬ᩠ᨧᨾᨲ᩠ᨲᩣᨶᩥ ᩈᨠᨭᩈᨲᩣᨶᩥ ᩋᨲᩥᨠ᩠ᨠᨶ᩠ᨲᩣᨶᩥ ᩋᨴ᩠ᨴᩈᩣ’ᨲᩥ? ‘ᨶ ᨡᩮᩣ ᩋᩉᩴ, ᩌᩅᩩᩈᩮᩣ, ᩋᨴ᩠ᨴᩈ’ᨶ᩠ᨲᩥ. ‘ᨠᩥᩴ ᨸᨶ, ᨽᨶ᩠ᨲᩮ, ᩈᨴ᩠ᨴᩴ ᩋᩔᩮᩣᩈᩦ’ᨲᩥ? ‘ᨶ ᨡᩮᩣ ᩋᩉᩴ, ᩌᩅᩩᩈᩮᩣ, ᩈᨴ᩠ᨴᩴ ᩋᩔᩮᩣᩈᩥ’ᨶ᩠ᨲᩥ. ‘ᨠᩥᩴ ᨸᨶ, ᨽᨶ᩠ᨲᩮ, ᩈᩩᨲ᩠ᨲᩮᩣ ᩋᩉᩮᩣᩈᩦ’ᨲᩥ? ‘ᨶ ᨡᩮᩣ ᩋᩉᩴ, ᩌᩅᩩᩈᩮᩣ, ᩈᩩᨲ᩠ᨲᩮᩣ ᩋᩉᩮᩣᩈᩥ’ᨶ᩠ᨲᩥ. ‘ᨠᩥᩴ ᨸᨶ, ᨽᨶ᩠ᨲᩮ, ᩈᨬ᩠ᨬᩦ ᩋᩉᩮᩣᩈᩦ’ᨲᩥ? ‘ᩑᩅᨾᩣᩅᩩᩈᩮᩣ’ᨲᩥ. ‘ᩈᩮᩣ ᨲ᩠ᩅᩴ, ᨽᨶ᩠ᨲᩮ, ᩈᨬ᩠ᨬᩦ ᩈᨾᩣᨶᩮᩣ ᨩᩣᨣᩁᩮᩣ ᨸᨬ᩠ᨧᨾᨲ᩠ᨲᩣᨶᩥ ᩈᨠᨭᩈᨲᩣᨶᩥ ᨶᩥᩔᩣᨿ ᨶᩥᩔᩣᨿ ᩋᨲᩥᨠ᩠ᨠᨶ᩠ᨲᩣᨶᩥ ᨶᩮᩅ ᩋᨴ᩠ᨴᩈ, ᨶ ᨸᨶ ᩈᨴ᩠ᨴᩴ ᩋᩔᩮᩣᩈᩥ; ᩋᨸᩥᩈᩩ [ᩋᨸᩥ ᩉᩥ (ᩈᩦ. ᩈ᩠ᨿᩣ. ᨸᩦ.)] ᨲᩮ, ᨽᨶ᩠ᨲᩮ, ᩈᨦ᩠ᨥᩣᨭᩥ ᩁᨩᩮᨶ ᩒᨠᩥᨱ᩠ᨱᩣ’ᨲᩥ? ‘ᩑᩅᨾᩣᩅᩩᩈᩮᩣ’ᨲᩥ. ᩋᨳ ᨡᩮᩣ, ᨽᨶ᩠ᨲᩮ, ᨲᩔ ᨸᩩᩁᩥᩈᩔ ᩑᨲᨴᩉᩮᩣᩈᩥ – ‘ᩋᨧ᩠ᨨᩁᩥᨿᩴ ᩅᨲ ᨽᩮᩣ, ᩋᨻ᩠ᨽᩩᨲᩴ ᩅᨲ ᨽᩮᩣ, ᩈᨶ᩠ᨲᩮᨶ ᩅᨲ ᨽᩮᩣ ᨸᨻ᩠ᨻᨩᩥᨲᩣ ᩅᩥᩉᩣᩁᩮᨶ ᩅᩥᩉᩁᨶ᩠ᨲᩥ. ᨿᨲᩕ ᩉᩥ ᨶᩣᨾ ᩈᨬ᩠ᨬᩦ ᩈᨾᩣᨶᩮᩣ ᨩᩣᨣᩁᩮᩣ ᨸᨬ᩠ᨧᨾᨲ᩠ᨲᩣᨶᩥ ᩈᨠᨭᩈᨲᩣᨶᩥ ᨶᩥᩔᩣᨿ ᨶᩥᩔᩣᨿ ᩋᨲᩥᨠ᩠ᨠᨶ᩠ᨲᩣᨶᩥ ᨶᩮᩅ ᨴᨠ᩠ᨡᨲᩥ, ᨶ ᨸᨶ ᩈᨴ᩠ᨴᩴ ᩈᩮᩣᩔᨲᩦ’ᨲᩥ! ᩌᩊᩣᩁᩮ ᨠᩣᩃᩣᨾᩮ ᩏᩊᩣᩁᩴ ᨸᩈᩣᨴᩴ ᨸᩅᩮᨴᩮᨲ᩠ᩅᩣ ᨸᨠ᩠ᨠᩣᨾᩦ’’ᨲᩥ.

᪑᪙᪓. ‘‘ᨲᩴ ᨠᩥᩴ ᨾᨬ᩠ᨬᩈᩥ, ᨸᩩᨠ᩠ᨠᩩᩈ, ᨠᨲᨾᩴ ᨶᩩ ᨡᩮᩣ ᨴᩩᨠ᩠ᨠᩁᨲᩁᩴ ᩅᩣ ᨴᩩᩁᨽᩥᩈᨾ᩠ᨽᩅᨲᩁᩴ ᩅᩣ – ᨿᩮᩣ ᩅᩣ ᩈᨬ᩠ᨬᩦ ᩈᨾᩣᨶᩮᩣ ᨩᩣᨣᩁᩮᩣ ᨸᨬ᩠ᨧᨾᨲ᩠ᨲᩣᨶᩥ ᩈᨠᨭᩈᨲᩣᨶᩥ ᨶᩥᩔᩣᨿ ᨶᩥᩔᩣᨿ ᩋᨲᩥᨠ᩠ᨠᨶ᩠ᨲᩣᨶᩥ ᨶᩮᩅ ᨸᩔᩮᨿ᩠ᨿ, ᨶ ᨸᨶ ᩈᨴ᩠ᨴᩴ ᩈᩩᨱᩮᨿ᩠ᨿ; ᨿᩮᩣ ᩅᩣ ᩈᨬ᩠ᨬᩦ ᩈᨾᩣᨶᩮᩣ ᨩᩣᨣᩁᩮᩣ ᨴᩮᩅᩮ ᩅᩔᨶ᩠ᨲᩮ ᨴᩮᩅᩮ ᨣᩊᨣᩊᩣᨿᨶ᩠ᨲᩮ ᩅᩥᨩ᩠ᨩᩩᩃ᩠ᩃᨲᩣᩈᩩ [ᩅᩥᨩ᩠ᨩᩩᨲᩣᩈᩩ (ᩈᩦ. ᩈ᩠ᨿᩣ. ᨸᩦ.)] ᨶᩥᨧ᩠ᨨᩁᨶ᩠ᨲᩦᩈᩩ ᩋᩈᨶᩥᨿᩣ ᨹᩃᨶ᩠ᨲᩥᨿᩣ ᨶᩮᩅ ᨸᩔᩮᨿ᩠ᨿ, ᨶ ᨸᨶ ᩈᨴ᩠ᨴᩴ ᩈᩩᨱᩮᨿ᩠ᨿᩣ’’ᨲᩥ? ‘‘ᨠᩥᨬ᩠ᩉᩥ, ᨽᨶ᩠ᨲᩮ, ᨠᩁᩥᩔᨶ᩠ᨲᩥ ᨸᨬ᩠ᨧ ᩅᩣ ᩈᨠᨭᩈᨲᩣᨶᩥ ᨨ ᩅᩣ ᩈᨠᨭᩈᨲᩣᨶᩥ ᩈᨲ᩠ᨲ ᩅᩣ ᩈᨠᨭᩈᨲᩣᨶᩥ ᩋᨭ᩠ᨮ ᩅᩣ ᩈᨠᨭᩈᨲᩣᨶᩥ ᨶᩅ ᩅᩣ ᩈᨠᨭᩈᨲᩣᨶᩥ [ᨶᩅ ᩅᩣ ᩈᨠᨭᩈᨲᩣᨶᩥ ᨴᩈ ᩅᩣ ᩈᨠᨭᩈᨲᩣᨶᩥ (ᩈᩦ.)], ᩈᨠᨭᩈᩉᩔᩴ ᩅᩣ ᩈᨠᨭᩈᨲᩈᩉᩔᩴ ᩅᩣ. ᩋᨳ ᨡᩮᩣ ᩑᨲᨴᩮᩅ ᨴᩩᨠ᩠ᨠᩁᨲᩁᩴ ᨧᩮᩅ ᨴᩩᩁᨽᩥᩈᨾ᩠ᨽᩅᨲᩁᨬ᩠ᨧ ᨿᩮᩣ ᩈᨬ᩠ᨬᩦ ᩈᨾᩣᨶᩮᩣ ᨩᩣᨣᩁᩮᩣ ᨴᩮᩅᩮ ᩅᩔᨶ᩠ᨲᩮ ᨴᩮᩅᩮ ᨣᩊᨣᩊᩣᨿᨶ᩠ᨲᩮ ᩅᩥᨩ᩠ᨩᩩᩃ᩠ᩃᨲᩣᩈᩩ ᨶᩥᨧ᩠ᨨᩁᨶ᩠ᨲᩦᩈᩩ ᩋᩈᨶᩥᨿᩣ ᨹᩃᨶ᩠ᨲᩥᨿᩣ ᨶᩮᩅ ᨸᩔᩮᨿ᩠ᨿ, ᨶ ᨸᨶ ᩈᨴ᩠ᨴᩴ ᩈᩩᨱᩮᨿ᩠ᨿᩣ’’ᨲᩥ.

‘‘ᩑᨠᨾᩥᨴᩣᩉᩴ, ᨸᩩᨠ᩠ᨠᩩᩈ, ᩈᨾᨿᩴ ᩌᨲᩩᨾᩣᨿᩴ ᩅᩥᩉᩁᩣᨾᩥ ᨽᩩᩈᩣᨣᩣᩁᩮ. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨴᩮᩅᩮ ᩅᩔᨶ᩠ᨲᩮ ᨴᩮᩅᩮ ᨣᩊᨣᩊᩣᨿᨶ᩠ᨲᩮ ᩅᩥᨩ᩠ᨩᩩᩃ᩠ᩃᨲᩣᩈᩩ ᨶᩥᨧ᩠ᨨᩁᨶ᩠ᨲᩦᩈᩩ ᩋᩈᨶᩥᨿᩣ ᨹᩃᨶ᩠ᨲᩥᨿᩣ ᩋᩅᩥᨴᩪᩁᩮ ᨽᩩᩈᩣᨣᩣᩁᩔ ᨴ᩠ᩅᩮ ᨠᩔᨠᩣ ᨽᩣᨲᩁᩮᩣ ᩉᨲᩣ ᨧᨲ᩠ᨲᩣᩁᩮᩣ ᨧ ᨻᩃᩥᨻᨴ᩠ᨴᩣ [ᨻᩃᩥᨻᨴ᩠ᨴᩣ (ᩈᩦ. ᨸᩦ.)]. ᩋᨳ ᨡᩮᩣ, ᨸᩩᨠ᩠ᨠᩩᩈ, ᩌᨲᩩᨾᩣᨿ ᨾᩉᩣᨩᨶᨠᩣᨿᩮᩣ ᨶᩥᨠ᩠ᨡᨾᩥᨲ᩠ᩅᩣ ᨿᩮᨶ ᨲᩮ ᨴ᩠ᩅᩮ ᨠᩔᨠᩣ ᨽᩣᨲᩁᩮᩣ ᩉᨲᩣ ᨧᨲ᩠ᨲᩣᩁᩮᩣ ᨧ ᨻᩃᩥᨻᨴ᩠ᨴᩣ ᨲᩮᨶᩩᨸᩈᨦ᩠ᨠᨾᩥ. ᨲᩮᨶ ᨡᩮᩣ ᨸᨶᩣᩉᩴ, ᨸᩩᨠ᩠ᨠᩩᩈ, ᩈᨾᨿᩮᨶ ᨽᩩᩈᩣᨣᩣᩁᩣ ᨶᩥᨠ᩠ᨡᨾᩥᨲ᩠ᩅᩣ ᨽᩩᩈᩣᨣᩣᩁᨴ᩠ᩅᩣᩁᩮ ᩋᨻ᩠ᨽᩮᩣᨠᩣᩈᩮ ᨧᨦ᩠ᨠᨾᩣᨾᩥ. ᩋᨳ ᨡᩮᩣ, ᨸᩩᨠ᩠ᨠᩩᩈ, ᩋᨬ᩠ᨬᨲᩁᩮᩣ ᨸᩩᩁᩥᩈᩮᩣ ᨲᨾ᩠ᩉᩣ ᨾᩉᩣᨩᨶᨠᩣᨿᩣ ᨿᩮᨶᩣᩉᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩣᩈᩥ. ᩑᨠᨾᨶ᩠ᨲᩴ ᨮᩥᨲᩴ ᨡᩮᩣ ᩋᩉᩴ, ᨸᩩᨠ᩠ᨠᩩᩈ, ᨲᩴ ᨸᩩᩁᩥᩈᩴ ᩑᨲᨴᩅᩮᩣᨧᩴ – ‘ᨠᩥᩴ ᨶᩩ ᨡᩮᩣ ᩑᩈᩮᩣ, ᩌᩅᩩᩈᩮᩣ, ᨾᩉᩣᨩᨶᨠᩣᨿᩮᩣ ᩈᨶ᩠ᨶᩥᨸᨲᩥᨲᩮᩣ’ᨲᩥ? ‘ᩍᨴᩣᨶᩥ, ᨽᨶ᩠ᨲᩮ, ᨴᩮᩅᩮ ᩅᩔᨶ᩠ᨲᩮ ᨴᩮᩅᩮ ᨣᩊᨣᩊᩣᨿᨶ᩠ᨲᩮ ᩅᩥᨩ᩠ᨩᩩᩃ᩠ᩃᨲᩣᩈᩩ ᨶᩥᨧ᩠ᨨᩁᨶ᩠ᨲᩦᩈᩩ ᩋᩈᨶᩥᨿᩣ ᨹᩃᨶ᩠ᨲᩥᨿᩣ ᨴ᩠ᩅᩮ ᨠᩔᨠᩣ ᨽᩣᨲᩁᩮᩣ ᩉᨲᩣ ᨧᨲ᩠ᨲᩣᩁᩮᩣ ᨧ ᨻᩃᩥᨻᨴ᩠ᨴᩣ. ᩑᨲ᩠ᨳᩮᩈᩮᩣ ᨾᩉᩣᨩᨶᨠᩣᨿᩮᩣ ᩈᨶ᩠ᨶᩥᨸᨲᩥᨲᩮᩣ. ᨲ᩠ᩅᩴ ᨸᨶ, ᨽᨶ᩠ᨲᩮ, ᨠ᩠ᩅ ᩋᩉᩮᩣᩈᩦ’ᨲᩥ? ‘ᩍᨵᩮᩅ ᨡᩮᩣ ᩋᩉᩴ, ᩌᩅᩩᩈᩮᩣ, ᩋᩉᩮᩣᩈᩥ’ᨶ᩠ᨲᩥ. ‘ᨠᩥᩴ ᨸᨶ, ᨽᨶ᩠ᨲᩮ, ᩋᨴ᩠ᨴᩈᩣ’ᨲᩥ? ‘ᨶ ᨡᩮᩣ ᩋᩉᩴ, ᩌᩅᩩᩈᩮᩣ, ᩋᨴ᩠ᨴᩈ’ᨶ᩠ᨲᩥ. ‘ᨠᩥᩴ ᨸᨶ, ᨽᨶ᩠ᨲᩮ, ᩈᨴ᩠ᨴᩴ ᩋᩔᩮᩣᩈᩦ’ᨲᩥ? ‘ᨶ ᨡᩮᩣ ᩋᩉᩴ, ᩌᩅᩩᩈᩮᩣ, ᩈᨴ᩠ᨴᩴ ᩋᩔᩮᩣᩈᩥ’ᨶ᩠ᨲᩥ. ‘ᨠᩥᩴ ᨸᨶ, ᨽᨶ᩠ᨲᩮ, ᩈᩩᨲ᩠ᨲᩮᩣ ᩋᩉᩮᩣᩈᩦ’ᨲᩥ? ‘ᨶ ᨡᩮᩣ ᩋᩉᩴ, ᩌᩅᩩᩈᩮᩣ, ᩈᩩᨲ᩠ᨲᩮᩣ ᩋᩉᩮᩣᩈᩥ’ᨶ᩠ᨲᩥ. ‘ᨠᩥᩴ ᨸᨶ, ᨽᨶ᩠ᨲᩮ, ᩈᨬ᩠ᨬᩦ ᩋᩉᩮᩣᩈᩦ’ᨲᩥ? ‘ᩑᩅᨾᩣᩅᩩᩈᩮᩣ’ᨲᩥ. ‘ᩈᩮᩣ ᨲ᩠ᩅᩴ, ᨽᨶ᩠ᨲᩮ, ᩈᨬ᩠ᨬᩦ ᩈᨾᩣᨶᩮᩣ ᨩᩣᨣᩁᩮᩣ ᨴᩮᩅᩮ ᩅᩔᨶ᩠ᨲᩮ ᨴᩮᩅᩮ ᨣᩊᨣᩊᩣᨿᨶ᩠ᨲᩮ ᩅᩥᨩ᩠ᨩᩩᩃ᩠ᩃᨲᩣᩈᩩ ᨶᩥᨧ᩠ᨨᩁᨶ᩠ᨲᩦᩈᩩ ᩋᩈᨶᩥᨿᩣ ᨹᩃᨶ᩠ᨲᩥᨿᩣ ᨶᩮᩅ ᩋᨴ᩠ᨴᩈ, ᨶ ᨸᨶ ᩈᨴ᩠ᨴᩴ ᩋᩔᩮᩣᩈᩦ’ᨲᩥ? ‘‘ᩑᩅᨾᩣᩅᩩᩈᩮᩣ’’ᨲᩥ?

‘‘ᩋᨳ ᨡᩮᩣ, ᨸᩩᨠ᩠ᨠᩩᩈ, ᨸᩩᩁᩥᩈᩔ ᩑᨲᨴᩉᩮᩣᩈᩥ – ‘ᩋᨧ᩠ᨨᩁᩥᨿᩴ ᩅᨲ ᨽᩮᩣ, ᩋᨻ᩠ᨽᩩᨲᩴ ᩅᨲ ᨽᩮᩣ, ᩈᨶ᩠ᨲᩮᨶ ᩅᨲ ᨽᩮᩣ ᨸᨻ᩠ᨻᨩᩥᨲᩣ ᩅᩥᩉᩣᩁᩮᨶ ᩅᩥᩉᩁᨶ᩠ᨲᩥ. ᨿᨲᩕ ᩉᩥ ᨶᩣᨾ ᩈᨬ᩠ᨬᩦ ᩈᨾᩣᨶᩮᩣ ᨩᩣᨣᩁᩮᩣ ᨴᩮᩅᩮ ᩅᩔᨶ᩠ᨲᩮ ᨴᩮᩅᩮ ᨣᩊᨣᩊᩣᨿᨶ᩠ᨲᩮ ᩅᩥᨩ᩠ᨩᩩᩃ᩠ᩃᨲᩣᩈᩩ ᨶᩥᨧ᩠ᨨᩁᨶ᩠ᨲᩦᩈᩩ ᩋᩈᨶᩥᨿᩣ ᨹᩃᨶ᩠ᨲᩥᨿᩣ ᨶᩮᩅ ᨴᨠ᩠ᨡᨲᩥ, ᨶ ᨸᨶ ᩈᨴ᩠ᨴᩴ ᩈᩮᩣᩔᨲᩦ’ᨲᩥ [ᩈᩩᨱᩥᩔᨲᩥ (ᩈ᩠ᨿᩣ.)]. ᨾᨿᩥ ᩏᩊᩣᩁᩴ ᨸᩈᩣᨴᩴ ᨸᩅᩮᨴᩮᨲ᩠ᩅᩣ ᨾᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨸᨠ᩠ᨠᩣᨾᩦ’’ᨲᩥ.

ᩑᩅᩴ ᩅᩩᨲ᩠ᨲᩮ ᨸᩩᨠ᩠ᨠᩩᩈᩮᩣ ᨾᩃ᩠ᩃᨸᩩᨲ᩠ᨲᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩑᩈᩣᩉᩴ, ᨽᨶ᩠ᨲᩮ, ᨿᩮᩣ ᨾᩮ ᩌᩊᩣᩁᩮ ᨠᩣᩃᩣᨾᩮ ᨸᩈᩣᨴᩮᩣ ᨲᩴ ᨾᩉᩣᩅᩣᨲᩮ ᩅᩣ ᩒᨹᩩᨱᩣᨾᩥ ᩈᩦᨥᩈᩮᩣᨲᩣᨿ [ᩈᩥᨦ᩠ᨥᩈᩮᩣᨲᩣᨿ (ᨠ.)] ᩅᩣ ᨶᨴᩥᨿᩣ ᨸᩅᩣᩉᩮᨾᩥ. ᩋᨽᩥᨠ᩠ᨠᨶ᩠ᨲᩴ, ᨽᨶ᩠ᨲᩮ, ᩋᨽᩥᨠ᩠ᨠᨶ᩠ᨲᩴ, ᨽᨶ᩠ᨲᩮ! ᩈᩮᨿ᩠ᨿᨳᩣᨸᩥ, ᨽᨶ᩠ᨲᩮ, ᨶᩥᨠ᩠ᨠᩩᨩ᩠ᨩᩥᨲᩴ ᩅᩣ ᩏᨠ᩠ᨠᩩᨩ᩠ᨩᩮᨿ᩠ᨿ, ᨸᨭᩥᨧ᩠ᨨᨶ᩠ᨶᩴ ᩅᩣ ᩅᩥᩅᩁᩮᨿ᩠ᨿ, ᨾᩪᩊ᩠ᩉᩔ ᩅᩣ ᨾᨣ᩠ᨣᩴ ᩌᨧᩥᨠ᩠ᨡᩮᨿ᩠ᨿ, ᩋᨶ᩠ᨵᨠᩣᩁᩮ ᩅᩣ ᨲᩮᩃᨸᨩ᩠ᨩᩮᩣᨲᩴ ᨵᩣᩁᩮᨿ᩠ᨿ ‘ᨧᨠ᩠ᨡᩩᨾᨶ᩠ᨲᩮᩣ ᩁᩪᨸᩣᨶᩥ ᨴᨠ᩠ᨡᨶ᩠ᨲᩦ’ᨲᩥ; ᩑᩅᨾᩮᩅᩴ ᨽᨣᩅᨲᩣ ᩋᨶᩮᨠᨸᩁᩥᨿᩣᨿᩮᨶ ᨵᨾ᩠ᨾᩮᩣ ᨸᨠᩣᩈᩥᨲᩮᩣ. ᩑᩈᩣᩉᩴ, ᨽᨶ᩠ᨲᩮ, ᨽᨣᩅᨶ᩠ᨲᩴ ᩈᩁᨱᩴ ᨣᨧ᩠ᨨᩣᨾᩥ ᨵᨾ᩠ᨾᨬ᩠ᨧ ᨽᩥᨠ᩠ᨡᩩᩈᨦ᩠ᨥᨬ᩠ᨧ. ᩏᨸᩣᩈᨠᩴ ᨾᩴ ᨽᨣᩅᩣ ᨵᩣᩁᩮᨲᩩ ᩋᨩ᩠ᨩᨲᨣ᩠ᨣᩮ ᨸᩣᨱᩩᨸᩮᨲᩴ ᩈᩁᨱᩴ ᨣᨲ’’ᨶ᩠ᨲᩥ.

᪑᪙᪔. ᩋᨳ ᨡᩮᩣ ᨸᩩᨠ᩠ᨠᩩᩈᩮᩣ ᨾᩃ᩠ᩃᨸᩩᨲ᩠ᨲᩮᩣ ᩋᨬ᩠ᨬᨲᩁᩴ ᨸᩩᩁᩥᩈᩴ ᩌᨾᨶ᩠ᨲᩮᩈᩥ – ‘‘ᩍᨦ᩠ᨥ ᨾᩮ ᨲ᩠ᩅᩴ, ᨽᨱᩮ, ᩈᩥᨦ᩠ᨣᩦᩅᨱ᩠ᨱᩴ ᨿᩩᨣᨾᨭ᩠ᨮᩴ ᨵᩣᩁᨱᩦᨿᩴ ᩌᩉᩁᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩈᩮᩣ ᨸᩩᩁᩥᩈᩮᩣ ᨸᩩᨠ᩠ᨠᩩᩈᩔ ᨾᩃ᩠ᩃᨸᩩᨲ᩠ᨲᩔ ᨸᨭᩥᩔᩩᨲ᩠ᩅᩣ ᨲᩴ ᩈᩥᨦ᩠ᨣᩦᩅᨱ᩠ᨱᩴ ᨿᩩᨣᨾᨭ᩠ᨮᩴ ᨵᩣᩁᨱᩦᨿᩴ ᩌᩉᩁᩥ [ᩌᩉᩁᩈᩥ (ᨠ.)]. ᩋᨳ ᨡᩮᩣ ᨸᩩᨠ᩠ᨠᩩᩈᩮᩣ ᨾᩃ᩠ᩃᨸᩩᨲ᩠ᨲᩮᩣ ᨲᩴ ᩈᩥᨦ᩠ᨣᩦᩅᨱ᩠ᨱᩴ ᨿᩩᨣᨾᨭ᩠ᨮᩴ ᨵᩣᩁᨱᩦᨿᩴ ᨽᨣᩅᨲᩮᩣ ᩏᨸᨶᩣᨾᩮᩈᩥ – ‘‘ᩍᨴᩴ, ᨽᨶ᩠ᨲᩮ, ᩈᩥᨦ᩠ᨣᩦᩅᨱ᩠ᨱᩴ ᨿᩩᨣᨾᨭ᩠ᨮᩴ ᨵᩣᩁᨱᩦᨿᩴ, ᨲᩴ ᨾᩮ ᨽᨣᩅᩣ ᨸᨭᩥᨣ᩠ᨣᨱ᩠ᩉᩣᨲᩩ ᩋᨶᩩᨠᨾ᩠ᨸᩴ ᩏᨸᩣᨴᩣᨿᩣ’’ᨲᩥ. ‘‘ᨲᩮᨶ ᩉᩥ, ᨸᩩᨠ᩠ᨠᩩᩈ, ᩑᨠᩮᨶ ᨾᩴ ᩋᨧ᩠ᨨᩣᨴᩮᩉᩥ, ᩑᨠᩮᨶ ᩌᨶᨶ᩠ᨴ’’ᨶ᩠ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᨸᩩᨠ᩠ᨠᩩᩈᩮᩣ ᨾᩃ᩠ᩃᨸᩩᨲ᩠ᨲᩮᩣ ᨽᨣᩅᨲᩮᩣ ᨸᨭᩥᩔᩩᨲ᩠ᩅᩣ ᩑᨠᩮᨶ ᨽᨣᩅᨶ᩠ᨲᩴ ᩋᨧ᩠ᨨᩣᨴᩮᨲᩥ, ᩑᨠᩮᨶ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ. ᩋᨳ ᨡᩮᩣ ᨽᨣᩅᩣ ᨸᩩᨠ᩠ᨠᩩᩈᩴ ᨾᩃ᩠ᩃᨸᩩᨲ᩠ᨲᩴ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᩈᩥ ᩈᨾᩣᨴᨸᩮᩈᩥ ᩈᨾᩩᨲ᩠ᨲᩮᨩᩮᩈᩥ ᩈᨾ᩠ᨸᩉᩴᩈᩮᩈᩥ. ᩋᨳ ᨡᩮᩣ ᨸᩩᨠ᩠ᨠᩩᩈᩮᩣ ᨾᩃ᩠ᩃᨸᩩᨲ᩠ᨲᩮᩣ ᨽᨣᩅᨲᩣ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩥᨲᩮᩣ ᩈᨾᩣᨴᨸᩥᨲᩮᩣ ᩈᨾᩩᨲ᩠ᨲᩮᨩᩥᨲᩮᩣ ᩈᨾ᩠ᨸᩉᩴᩈᩥᨲᩮᩣ ᩏᨭ᩠ᨮᩣᨿᩣᩈᨶᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨸᨠ᩠ᨠᩣᨾᩥ.

᪑᪙᪕. ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᩋᨧᩥᩁᨸᨠ᩠ᨠᨶ᩠ᨲᩮ ᨸᩩᨠ᩠ᨠᩩᩈᩮ ᨾᩃ᩠ᩃᨸᩩᨲ᩠ᨲᩮ ᨲᩴ ᩈᩥᨦ᩠ᨣᩦᩅᨱ᩠ᨱᩴ ᨿᩩᨣᨾᨭ᩠ᨮᩴ ᨵᩣᩁᨱᩦᨿᩴ ᨽᨣᩅᨲᩮᩣ ᨠᩣᨿᩴ ᩏᨸᨶᩣᨾᩮᩈᩥ. ᨲᩴ ᨽᨣᩅᨲᩮᩣ ᨠᩣᨿᩴ ᩏᨸᨶᩣᨾᩥᨲᩴ ᩉᨲᨧ᩠ᨧᩥᨠᩴ ᩅᩥᨿ [ᩅᩦᨲᨧ᩠ᨧᩥᨠᩴᩅᩥᨿ (ᩈᩦ. ᨸᩦ.)] ᨡᩣᨿᨲᩥ. ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩋᨧ᩠ᨨᩁᩥᨿᩴ, ᨽᨶ᩠ᨲᩮ, ᩋᨻ᩠ᨽᩩᨲᩴ, ᨽᨶ᩠ᨲᩮ, ᨿᩣᩅ ᨸᩁᩥᩈᩩᨴ᩠ᨵᩮᩣ, ᨽᨶ᩠ᨲᩮ, ᨲᨳᩣᨣᨲᩔ ᨨᩅᩥᩅᨱ᩠ᨱᩮᩣ ᨸᩁᩥᨿᩮᩣᨴᩣᨲᩮᩣ. ᩍᨴᩴ, ᨽᨶ᩠ᨲᩮ, ᩈᩥᨦ᩠ᨣᩦᩅᨱ᩠ᨱᩴ ᨿᩩᨣᨾᨭ᩠ᨮᩴ ᨵᩣᩁᨱᩦᨿᩴ ᨽᨣᩅᨲᩮᩣ ᨠᩣᨿᩴ ᩏᨸᨶᩣᨾᩥᨲᩴ ᩉᨲᨧ᩠ᨧᩥᨠᩴ ᩅᩥᨿ ᨡᩣᨿᨲᩦ’’ᨲᩥ. ‘‘ᩑᩅᨾᩮᨲᩴ, ᩌᨶᨶ᩠ᨴ, ᩑᩅᨾᩮᨲᩴ, ᩌᨶᨶ᩠ᨴ ᨴ᩠ᩅᩦᩈᩩ ᨠᩣᩃᩮᩈᩩ ᩋᨲᩥᩅᩥᨿ ᨲᨳᩣᨣᨲᩔ ᨠᩣᨿᩮᩣ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ ᨨᩅᩥᩅᨱ᩠ᨱᩮᩣ ᨸᩁᩥᨿᩮᩣᨴᩣᨲᩮᩣ. ᨠᨲᨾᩮᩈᩩ ᨴ᩠ᩅᩦᩈᩩ? ᨿᨬ᩠ᨧ, ᩌᨶᨶ᩠ᨴ, ᩁᨲ᩠ᨲᩥᩴ ᨲᨳᩣᨣᨲᩮᩣ ᩋᨶᩩᨲ᩠ᨲᩁᩴ ᩈᨾ᩠ᨾᩣᩈᨾ᩠ᨻᩮᩣᨵᩥᩴ ᩋᨽᩥᩈᨾ᩠ᨻᩩᨩ᩠ᨫᨲᩥ, ᨿᨬ᩠ᨧ ᩁᨲ᩠ᨲᩥᩴ ᩋᨶᩩᨸᩣᨴᩥᩈᩮᩈᩣᨿ ᨶᩥᨻ᩠ᨻᩣᨶᨵᩣᨲᩩᨿᩣ ᨸᩁᩥᨶᩥᨻ᩠ᨻᩣᨿᨲᩥ. ᩍᨾᩮᩈᩩ ᨡᩮᩣ, ᩌᨶᨶ᩠ᨴ, ᨴ᩠ᩅᩦᩈᩩ ᨠᩣᩃᩮᩈᩩ ᩋᨲᩥᩅᩥᨿ ᨲᨳᩣᨣᨲᩔ ᨠᩣᨿᩮᩣ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ ᨨᩅᩥᩅᨱ᩠ᨱᩮᩣ ᨸᩁᩥᨿᩮᩣᨴᩣᨲᩮᩣ. ‘‘ᩋᨩ᩠ᨩ ᨡᩮᩣ, ᨸᨶᩣᨶᨶ᩠ᨴ, ᩁᨲ᩠ᨲᩥᨿᩣ ᨸᨧ᩠ᨨᩥᨾᩮ ᨿᩣᨾᩮ ᨠᩩᩈᩥᨶᩣᩁᩣᨿᩴ ᩏᨸᩅᨲ᩠ᨲᨶᩮ ᨾᩃ᩠ᩃᩣᨶᩴ ᩈᩣᩃᩅᨶᩮ ᩋᨶ᩠ᨲᩁᩮᨶ [ᩋᨶ᩠ᨲᩁᩮ (ᩈ᩠ᨿᩣ.)] ᨿᨾᨠᩈᩣᩃᩣᨶᩴ ᨲᨳᩣᨣᨲᩔ ᨸᩁᩥᨶᩥᨻ᩠ᨻᩣᨶᩴ ᨽᩅᩥᩔᨲᩥ [ᨽᩅᩥᩔᨲᩦᨲᩥ (ᨠ.)]. ᩌᨿᩣᨾᩣᨶᨶ᩠ᨴ, ᨿᩮᨶ ᨠᨠᩩᨵᩣ ᨶᨴᩦ ᨲᩮᨶᩩᨸᩈᨦ᩠ᨠᨾᩥᩔᩣᨾᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ.

ᩈᩥᨦ᩠ᨣᩦᩅᨱ᩠ᨱᩴ ᨿᩩᨣᨾᨭ᩠ᨮᩴ, ᨸᩩᨠ᩠ᨠᩩᩈᩮᩣ ᩋᨽᩥᩉᩣᩁᨿᩥ;

ᨲᩮᨶ ᩋᨧ᩠ᨨᩣᨴᩥᨲᩮᩣ ᩈᨲ᩠ᨳᩣ, ᩉᩮᨾᩅᨱ᩠ᨱᩮᩣ ᩋᩈᩮᩣᨽᨳᩣᨲᩥ.

᪑᪙᪖. ᩋᨳ ᨡᩮᩣ ᨽᨣᩅᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨿᩮᨶ ᨠᨠᩩᨵᩣ ᨶᨴᩦ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨠᨠᩩᨵᩴ ᨶᨴᩥᩴ ᩋᨩ᩠ᨫᩮᩣᨣᩣᩉᩮᨲ᩠ᩅᩣ ᨶ᩠ᩉᨲ᩠ᩅᩣ ᨧ ᨸᩥᩅᩥᨲ᩠ᩅᩣ ᨧ ᨸᨧ᩠ᨧᩩᨲ᩠ᨲᩁᩥᨲ᩠ᩅᩣ ᨿᩮᨶ ᩋᨾ᩠ᨻᩅᨶᩴ ᨲᩮᨶᩩᨸᩈᨦ᩠ᨠᨾᩥ. ᩏᨸᩈᨦ᩠ᨠᨾᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᨧᩩᨶ᩠ᨴᨠᩴ ᩌᨾᨶ᩠ᨲᩮᩈᩥ – ‘‘ᩍᨦ᩠ᨥ ᨾᩮ ᨲ᩠ᩅᩴ, ᨧᩩᨶ᩠ᨴᨠ, ᨧᨲᩩᨣ᩠ᨣᩩᨱᩴ ᩈᨦ᩠ᨥᩣᨭᩥᩴ ᨸᨬ᩠ᨬᨸᩮᩉᩥ, ᨠᩥᩃᨶ᩠ᨲᩮᩣᩈ᩠ᨾᩥ, ᨧᩩᨶ᩠ᨴᨠ, ᨶᩥᨸᨩ᩠ᨩᩥᩔᩣᨾᩦ’’ᨲᩥ.

‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᨧᩩᨶ᩠ᨴᨠᩮᩣ ᨽᨣᩅᨲᩮᩣ ᨸᨭᩥᩔᩩᨲ᩠ᩅᩣ ᨧᨲᩩᨣ᩠ᨣᩩᨱᩴ ᩈᨦ᩠ᨥᩣᨭᩥᩴ ᨸᨬ᩠ᨬᨸᩮᩈᩥ. ᩋᨳ ᨡᩮᩣ ᨽᨣᩅᩣ ᨴᨠ᩠ᨡᩥᨱᩮᨶ ᨸᩔᩮᨶ ᩈᩦᩉᩈᩮᨿ᩠ᨿᩴ ᨠᨸ᩠ᨸᩮᩈᩥ ᨸᩣᨴᩮ ᨸᩣᨴᩴ ᩋᨧ᩠ᨧᩣᨵᩣᨿ ᩈᨲᩮᩣ ᩈᨾ᩠ᨸᨩᩣᨶᩮᩣ ᩏᨭ᩠ᨮᩣᨶᩈᨬ᩠ᨬᩴ ᨾᨶᩈᩥᨠᩁᩥᨲ᩠ᩅᩣ. ᩌᨿᩈ᩠ᨾᩣ ᨸᨶ ᨧᩩᨶ᩠ᨴᨠᩮᩣ ᨲᨲ᩠ᨳᩮᩅ ᨽᨣᩅᨲᩮᩣ ᨸᩩᩁᨲᩮᩣ ᨶᩥᩈᩦᨴᩥ.

ᨣᨶ᩠ᨲ᩠ᩅᩣᨶ ᨻᩩᨴ᩠ᨵᩮᩣ ᨶᨴᩥᨠᩴ ᨠᨠᩩᨵᩴ,

ᩋᨧ᩠ᨨᩮᩣᨴᨠᩴ ᩈᩣᨲᩩᨴᨠᩴ ᩅᩥᨸ᩠ᨸᩈᨶ᩠ᨶᩴ;

ᩒᨣᩣᩉᩥ ᩈᨲ᩠ᨳᩣ ᩋᨠᩥᩃᨶ᩠ᨲᩁᩪᨸᩮᩣ [ᩈᩩᨠᩥᩃᨶ᩠ᨲᩁᩪᨸᩮᩣ (ᩈᩦ. ᨸᩦ.)],

ᨲᨳᩣᨣᨲᩮᩣ ᩋᨸ᩠ᨸᨭᩥᨾᩮᩣ ᨧ [ᩋᨸ᩠ᨸᨭᩥᨾᩮᩣᨵ (ᨸᩦ.)] ᩃᩮᩣᨠᩮ.

ᨶ᩠ᩉᨲ᩠ᩅᩣ ᨧ ᨸᩥᩅᩥᨲ᩠ᩅᩣ ᨧᩩᨴᨲᩣᩁᩥ ᩈᨲ᩠ᨳᩣ [ᨸᩥᩅᩥᨲ᩠ᩅᩣ ᨧᩩᨶ᩠ᨴᨠᩮᨶ, ᨸᩥᩅᩥᨲ᩠ᩅᩣ ᨧ ᩏᨲ᩠ᨲᩁᩥ (ᨠ.)],

ᨸᩩᩁᨠ᩠ᨡᨲᩮᩣ ᨽᩥᨠ᩠ᨡᩩᨣᨱᩔ ᨾᨩ᩠ᨫᩮ;

ᩅᨲ᩠ᨲᩣ [ᩈᨲ᩠ᨳᩣ (ᩈᩦ. ᩈ᩠ᨿᩣ. ᨸᩦ.)] ᨸᩅᨲ᩠ᨲᩣ ᨽᨣᩅᩣ ᩍᨵ ᨵᨾ᩠ᨾᩮ,

ᩏᨸᩣᨣᨾᩥ ᩋᨾ᩠ᨻᩅᨶᩴ ᨾᩉᩮᩈᩥ.

ᩌᨾᨶ᩠ᨲᨿᩥ ᨧᩩᨶ᩠ᨴᨠᩴ ᨶᩣᨾ ᨽᩥᨠ᩠ᨡᩩᩴ,

ᨧᨲᩩᨣ᩠ᨣᩩᨱᩴ ᩈᨶ᩠ᨳᩁ ᨾᩮ ᨶᩥᨸᨩ᩠ᨩᩴ;

ᩈᩮᩣ ᨧᩮᩣᨴᩥᨲᩮᩣ ᨽᩣᩅᩥᨲᨲ᩠ᨲᩮᨶ ᨧᩩᨶ᩠ᨴᩮᩣ,

ᨧᨲᩩᨣ᩠ᨣᩩᨱᩴ ᩈᨶ᩠ᨳᩁᩥ ᨡᩥᨸ᩠ᨸᨾᩮᩅ.

ᨶᩥᨸᨩ᩠ᨩᩥ ᩈᨲ᩠ᨳᩣ ᩋᨠᩥᩃᨶ᩠ᨲᩁᩪᨸᩮᩣ,

ᨧᩩᨶ᩠ᨴᩮᩣᨸᩥ ᨲᨲ᩠ᨳ ᨸᨾᩩᨡᩮ [ᩈᨾᩩᨡᩮ (ᨠ.)] ᨶᩥᩈᩦᨴᩦᨲᩥ.

᪑᪙᪗. ᩋᨳ ᨡᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩈᩥᨿᩣ ᨡᩮᩣ [ᨿᩮᩣ ᨡᩮᩣ (ᨠ.)], ᨸᨶᩣᨶᨶ᩠ᨴ, ᨧᩩᨶ᩠ᨴᩔ ᨠᨾ᩠ᨾᩣᩁᨸᩩᨲ᩠ᨲᩔ ᨠᩮᩣᨧᩥ ᩅᩥᨸ᩠ᨸᨭᩥᩈᩣᩁᩴ ᩏᨸ᩠ᨸᩣᨴᩮᨿ᩠ᨿ – ‘ᨲᩔ ᨲᩮ, ᩌᩅᩩᩈᩮᩣ ᨧᩩᨶ᩠ᨴ, ᩋᩃᩣᨽᩣ ᨲᩔ ᨲᩮ ᨴᩩᩃ᩠ᩃᨴ᩠ᨵᩴ, ᨿᩔ ᨲᩮ ᨲᨳᩣᨣᨲᩮᩣ ᨸᨧ᩠ᨨᩥᨾᩴ ᨸᩥᨱ᩠ᨯᨸᩣᨲᩴ ᨸᩁᩥᨽᩩᨬ᩠ᨩᩥᨲ᩠ᩅᩣ ᨸᩁᩥᨶᩥᨻ᩠ᨻᩩᨲᩮᩣ’ᨲᩥ. ᨧᩩᨶ᩠ᨴᩔ, ᩌᨶᨶ᩠ᨴ, ᨠᨾ᩠ᨾᩣᩁᨸᩩᨲ᩠ᨲᩔ ᩑᩅᩴ ᩅᩥᨸ᩠ᨸᨭᩥᩈᩣᩁᩮᩣ ᨸᨭᩥᩅᩥᨶᩮᨲᨻ᩠ᨻᩮᩣ – ‘ᨲᩔ ᨲᩮ, ᩌᩅᩩᩈᩮᩣ ᨧᩩᨶ᩠ᨴ, ᩃᩣᨽᩣ ᨲᩔ ᨲᩮ ᩈᩩᩃᨴ᩠ᨵᩴ, ᨿᩔ ᨲᩮ ᨲᨳᩣᨣᨲᩮᩣ ᨸᨧ᩠ᨨᩥᨾᩴ ᨸᩥᨱ᩠ᨯᨸᩣᨲᩴ ᨸᩁᩥᨽᩩᨬ᩠ᨩᩥᨲ᩠ᩅᩣ ᨸᩁᩥᨶᩥᨻ᩠ᨻᩩᨲᩮᩣ. ᩈᨾ᩠ᨾᩩᨡᩣ ᨾᩮᨲᩴ, ᩌᩅᩩᩈᩮᩣ ᨧᩩᨶ᩠ᨴ, ᨽᨣᩅᨲᩮᩣ ᩈᩩᨲᩴ ᩈᨾ᩠ᨾᩩᨡᩣ ᨸᨭᩥᨣ᩠ᨣᩉᩥᨲᩴ – ᨴ᩠ᩅᩮ ᨾᩮ ᨸᩥᨱ᩠ᨯᨸᩣᨲᩣ ᩈᨾᩈᨾᨹᩃᩣ [ᩈᨾᩣ ᩈᨾᨹᩃᩣ (ᨠ.)] ᩈᨾᩅᩥᨸᩣᨠᩣ [ᩈᨾᩈᨾᩅᩥᨸᩣᨠᩣ (ᩈᩦ. ᩈ᩠ᨿᩣ. ᨸᩦ.)], ᩋᨲᩥᩅᩥᨿ ᩋᨬ᩠ᨬᩮᩉᩥ ᨸᩥᨱ᩠ᨯᨸᩣᨲᩮᩉᩥ ᨾᩉᨸ᩠ᨹᩃᨲᩁᩣ ᨧ ᨾᩉᩣᨶᩥᩈᩴᩈᨲᩁᩣ ᨧ. ᨠᨲᨾᩮ ᨴ᩠ᩅᩮ? ᨿᨬ᩠ᨧ ᨸᩥᨱ᩠ᨯᨸᩣᨲᩴ ᨸᩁᩥᨽᩩᨬ᩠ᨩᩥᨲ᩠ᩅᩣ ᨲᨳᩣᨣᨲᩮᩣ ᩋᨶᩩᨲ᩠ᨲᩁᩴ ᩈᨾ᩠ᨾᩣᩈᨾ᩠ᨻᩮᩣᨵᩥᩴ ᩋᨽᩥᩈᨾ᩠ᨻᩩᨩ᩠ᨫᨲᩥ, ᨿᨬ᩠ᨧ ᨸᩥᨱ᩠ᨯᨸᩣᨲᩴ ᨸᩁᩥᨽᩩᨬ᩠ᨩᩥᨲ᩠ᩅᩣ ᨲᨳᩣᨣᨲᩮᩣ ᩋᨶᩩᨸᩣᨴᩥᩈᩮᩈᩣᨿ ᨶᩥᨻ᩠ᨻᩣᨶᨵᩣᨲᩩᨿᩣ ᨸᩁᩥᨶᩥᨻ᩠ᨻᩣᨿᨲᩥ. ᩍᨾᩮ ᨴ᩠ᩅᩮ ᨸᩥᨱ᩠ᨯᨸᩣᨲᩣ ᩈᨾᩈᨾᨹᩃᩣ ᩈᨾᩅᩥᨸᩣᨠᩣ, ᩋᨲᩥᩅᩥᨿ ᩋᨬ᩠ᨬᩮᩉᩥ ᨸᩥᨱ᩠ᨯᨸᩣᨲᩮᩉᩥ ᨾᩉᨸ᩠ᨹᩃᨲᩁᩣ ᨧ ᨾᩉᩣᨶᩥᩈᩴᩈᨲᩁᩣ ᨧ. ᩌᨿᩩᩈᩴᩅᨲ᩠ᨲᨶᩥᨠᩴ ᩌᨿᩈ᩠ᨾᨲᩣ ᨧᩩᨶ᩠ᨴᩮᨶ ᨠᨾ᩠ᨾᩣᩁᨸᩩᨲ᩠ᨲᩮᨶ ᨠᨾ᩠ᨾᩴ ᩏᨸᨧᩥᨲᩴ, ᩅᨱ᩠ᨱᩈᩴᩅᨲ᩠ᨲᨶᩥᨠᩴ ᩌᨿᩈ᩠ᨾᨲᩣ ᨧᩩᨶ᩠ᨴᩮᨶ ᨠᨾ᩠ᨾᩣᩁᨸᩩᨲ᩠ᨲᩮᨶ ᨠᨾ᩠ᨾᩴ ᩏᨸᨧᩥᨲᩴ, ᩈᩩᨡᩈᩴᩅᨲ᩠ᨲᨶᩥᨠᩴ ᩌᨿᩈ᩠ᨾᨲᩣ ᨧᩩᨶ᩠ᨴᩮᨶ ᨠᨾ᩠ᨾᩣᩁᨸᩩᨲ᩠ᨲᩮᨶ ᨠᨾ᩠ᨾᩴ ᩏᨸᨧᩥᨲᩴ, ᨿᩈᩈᩴᩅᨲ᩠ᨲᨶᩥᨠᩴ ᩌᨿᩈ᩠ᨾᨲᩣ ᨧᩩᨶ᩠ᨴᩮᨶ ᨠᨾ᩠ᨾᩣᩁᨸᩩᨲ᩠ᨲᩮᨶ ᨠᨾ᩠ᨾᩴ ᩏᨸᨧᩥᨲᩴ, ᩈᨣ᩠ᨣᩈᩴᩅᨲ᩠ᨲᨶᩥᨠᩴ ᩌᨿᩈ᩠ᨾᨲᩣ ᨧᩩᨶ᩠ᨴᩮᨶ ᨠᨾ᩠ᨾᩣᩁᨸᩩᨲ᩠ᨲᩮᨶ ᨠᨾ᩠ᨾᩴ ᩏᨸᨧᩥᨲᩴ, ᩌᨵᩥᨸᨲᩮᨿ᩠ᨿᩈᩴᩅᨲ᩠ᨲᨶᩥᨠᩴ ᩌᨿᩈ᩠ᨾᨲᩣ ᨧᩩᨶ᩠ᨴᩮᨶ ᨠᨾ᩠ᨾᩣᩁᨸᩩᨲ᩠ᨲᩮᨶ ᨠᨾ᩠ᨾᩴ ᩏᨸᨧᩥᨲ’ᨶ᩠ᨲᩥ. ᨧᩩᨶ᩠ᨴᩔ, ᩌᨶᨶ᩠ᨴ, ᨠᨾ᩠ᨾᩣᩁᨸᩩᨲ᩠ᨲᩔ ᩑᩅᩴ ᩅᩥᨸ᩠ᨸᨭᩥᩈᩣᩁᩮᩣ ᨸᨭᩥᩅᩥᨶᩮᨲᨻ᩠ᨻᩮᩣ’’ᨲᩥ. ᩋᨳ ᨡᩮᩣ ᨽᨣᩅᩣ ᩑᨲᨾᨲ᩠ᨳᩴ ᩅᩥᨴᩥᨲ᩠ᩅᩣ ᨲᩣᨿᩴ ᩅᩮᩃᩣᨿᩴ ᩍᨾᩴ ᩏᨴᩣᨶᩴ ᩏᨴᩣᨶᩮᩈᩥ –

‘‘ᨴᨴᨲᩮᩣ ᨸᩩᨬ᩠ᨬᩴ ᨸᩅᨯ᩠ᨰᨲᩥ,

ᩈᩴᨿᨾᨲᩮᩣ ᩅᩮᩁᩴ ᨶ ᨧᩦᨿᨲᩥ;

ᨠᩩᩈᩃᩮᩣ ᨧ ᨩᩉᩣᨲᩥ ᨸᩣᨸᨠᩴ,

ᩁᩣᨣᨴᩮᩣᩈᨾᩮᩣᩉᨠ᩠ᨡᨿᩣ ᩈᨶᩥᨻ᩠ᨻᩩᨲᩮᩣ’’ᨲᩥ.

ᨧᨲᩩᨲ᩠ᨳᩮᩣ ᨽᩣᨱᩅᩣᩁᩮᩣ.

ᨿᨾᨠᩈᩣᩃᩣ

᪑᪙᪘. ᩋᨳ ᨡᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩌᨿᩣᨾᩣᨶᨶ᩠ᨴ, ᨿᩮᨶ ᩉᩥᩁᨬ᩠ᨬᩅᨲᩥᨿᩣ ᨶᨴᩥᨿᩣ ᨸᩣᩁᩥᨾᩴ ᨲᩦᩁᩴ, ᨿᩮᨶ ᨠᩩᩈᩥᨶᩣᩁᩣ ᩏᨸᩅᨲ᩠ᨲᨶᩴ ᨾᩃ᩠ᩃᩣᨶᩴ ᩈᩣᩃᩅᨶᩴ ᨲᩮᨶᩩᨸᩈᨦ᩠ᨠᨾᩥᩔᩣᨾᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ. ᩋᨳ ᨡᩮᩣ ᨽᨣᩅᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨿᩮᨶ ᩉᩥᩁᨬ᩠ᨬᩅᨲᩥᨿᩣ ᨶᨴᩥᨿᩣ ᨸᩣᩁᩥᨾᩴ ᨲᩦᩁᩴ, ᨿᩮᨶ ᨠᩩᩈᩥᨶᩣᩁᩣ ᩏᨸᩅᨲ᩠ᨲᨶᩴ ᨾᩃ᩠ᩃᩣᨶᩴ ᩈᩣᩃᩅᨶᩴ ᨲᩮᨶᩩᨸᩈᨦ᩠ᨠᨾᩥ. ᩏᨸᩈᨦ᩠ᨠᨾᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩍᨦ᩠ᨥ ᨾᩮ ᨲ᩠ᩅᩴ, ᩌᨶᨶ᩠ᨴ, ᩋᨶ᩠ᨲᩁᩮᨶ ᨿᨾᨠᩈᩣᩃᩣᨶᩴ ᩏᨲ᩠ᨲᩁᩈᩦᩈᨠᩴ ᨾᨬ᩠ᨧᨠᩴ ᨸᨬ᩠ᨬᨸᩮᩉᩥ, ᨠᩥᩃᨶ᩠ᨲᩮᩣᩈ᩠ᨾᩥ, ᩌᨶᨶ᩠ᨴ, ᨶᩥᨸᨩ᩠ᨩᩥᩔᩣᨾᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨭᩥᩔᩩᨲ᩠ᩅᩣ ᩋᨶ᩠ᨲᩁᩮᨶ ᨿᨾᨠᩈᩣᩃᩣᨶᩴ ᩏᨲ᩠ᨲᩁᩈᩦᩈᨠᩴ ᨾᨬ᩠ᨧᨠᩴ ᨸᨬ᩠ᨬᨸᩮᩈᩥ. ᩋᨳ ᨡᩮᩣ ᨽᨣᩅᩣ ᨴᨠ᩠ᨡᩥᨱᩮᨶ ᨸᩔᩮᨶ ᩈᩦᩉᩈᩮᨿ᩠ᨿᩴ ᨠᨸ᩠ᨸᩮᩈᩥ ᨸᩣᨴᩮ ᨸᩣᨴᩴ ᩋᨧ᩠ᨧᩣᨵᩣᨿ ᩈᨲᩮᩣ ᩈᨾ᩠ᨸᨩᩣᨶᩮᩣ.

ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨿᨾᨠᩈᩣᩃᩣ ᩈᨻ᩠ᨻᨹᩣᩃᩥᨹᩩᩃ᩠ᩃᩣ ᩉᩮᩣᨶ᩠ᨲᩥ ᩋᨠᩣᩃᨸᩩᨸ᩠ᨹᩮᩉᩥ. ᨲᩮ ᨲᨳᩣᨣᨲᩔ ᩈᩁᩦᩁᩴ ᩒᨠᩥᩁᨶ᩠ᨲᩥ ᩋᨩ᩠ᨫᩮᩣᨠᩥᩁᨶ᩠ᨲᩥ ᩋᨽᩥᨸ᩠ᨸᨠᩥᩁᨶ᩠ᨲᩥ ᨲᨳᩣᨣᨲᩔ ᨸᩪᨩᩣᨿ. ᨴᩥᨻ᩠ᨻᩣᨶᩥᨸᩥ ᨾᨶ᩠ᨴᩣᩁᩅᨸᩩᨸ᩠ᨹᩣᨶᩥ ᩋᨶ᩠ᨲᩃᩥᨠ᩠ᨡᩣ ᨸᨸᨲᨶ᩠ᨲᩥ, ᨲᩣᨶᩥ ᨲᨳᩣᨣᨲᩔ ᩈᩁᩦᩁᩴ ᩒᨠᩥᩁᨶ᩠ᨲᩥ ᩋᨩ᩠ᨫᩮᩣᨠᩥᩁᨶ᩠ᨲᩥ ᩋᨽᩥᨸ᩠ᨸᨠᩥᩁᨶ᩠ᨲᩥ ᨲᨳᩣᨣᨲᩔ ᨸᩪᨩᩣᨿ. ᨴᩥᨻ᩠ᨻᩣᨶᩥᨸᩥ ᨧᨶ᩠ᨴᨶᨧᩩᨱ᩠ᨱᩣᨶᩥ ᩋᨶ᩠ᨲᩃᩥᨠ᩠ᨡᩣ ᨸᨸᨲᨶ᩠ᨲᩥ, ᨲᩣᨶᩥ ᨲᨳᩣᨣᨲᩔ ᩈᩁᩦᩁᩴ ᩒᨠᩥᩁᨶ᩠ᨲᩥ ᩋᨩ᩠ᨫᩮᩣᨠᩥᩁᨶ᩠ᨲᩥ ᩋᨽᩥᨸ᩠ᨸᨠᩥᩁᨶ᩠ᨲᩥ ᨲᨳᩣᨣᨲᩔ ᨸᩪᨩᩣᨿ. ᨴᩥᨻ᩠ᨻᩣᨶᩥᨸᩥ ᨲᩪᩁᩥᨿᩣᨶᩥ ᩋᨶ᩠ᨲᩃᩥᨠ᩠ᨡᩮ ᩅᨩ᩠ᨩᨶ᩠ᨲᩥ ᨲᨳᩣᨣᨲᩔ ᨸᩪᨩᩣᨿ. ᨴᩥᨻ᩠ᨻᩣᨶᩥᨸᩥ ᩈᨦ᩠ᨣᩦᨲᩣᨶᩥ ᩋᨶ᩠ᨲᩃᩥᨠ᩠ᨡᩮ ᩅᨲ᩠ᨲᨶ᩠ᨲᩥ ᨲᨳᩣᨣᨲᩔ ᨸᩪᨩᩣᨿ.

᪑᪙᪙. ᩋᨳ ᨡᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩈᨻ᩠ᨻᨹᩣᩃᩥᨹᩩᩃ᩠ᩃᩣ ᨡᩮᩣ, ᩌᨶᨶ᩠ᨴ, ᨿᨾᨠᩈᩣᩃᩣ ᩋᨠᩣᩃᨸᩩᨸ᩠ᨹᩮᩉᩥ. ᨲᩮ ᨲᨳᩣᨣᨲᩔ ᩈᩁᩦᩁᩴ ᩒᨠᩥᩁᨶ᩠ᨲᩥ ᩋᨩ᩠ᨫᩮᩣᨠᩥᩁᨶ᩠ᨲᩥ ᩋᨽᩥᨸ᩠ᨸᨠᩥᩁᨶ᩠ᨲᩥ ᨲᨳᩣᨣᨲᩔ ᨸᩪᨩᩣᨿ. ᨴᩥᨻ᩠ᨻᩣᨶᩥᨸᩥ ᨾᨶ᩠ᨴᩣᩁᩅᨸᩩᨸ᩠ᨹᩣᨶᩥ ᩋᨶ᩠ᨲᩃᩥᨠ᩠ᨡᩣ ᨸᨸᨲᨶ᩠ᨲᩥ, ᨲᩣᨶᩥ ᨲᨳᩣᨣᨲᩔ ᩈᩁᩦᩁᩴ ᩒᨠᩥᩁᨶ᩠ᨲᩥ ᩋᨩ᩠ᨫᩮᩣᨠᩥᩁᨶ᩠ᨲᩥ ᩋᨽᩥᨸ᩠ᨸᨠᩥᩁᨶ᩠ᨲᩥ ᨲᨳᩣᨣᨲᩔ ᨸᩪᨩᩣᨿ. ᨴᩥᨻ᩠ᨻᩣᨶᩥᨸᩥ ᨧᨶ᩠ᨴᨶᨧᩩᨱ᩠ᨱᩣᨶᩥ ᩋᨶ᩠ᨲᩃᩥᨠ᩠ᨡᩣ ᨸᨸᨲᨶ᩠ᨲᩥ, ᨲᩣᨶᩥ ᨲᨳᩣᨣᨲᩔ ᩈᩁᩦᩁᩴ ᩒᨠᩥᩁᨶ᩠ᨲᩥ ᩋᨩ᩠ᨫᩮᩣᨠᩥᩁᨶ᩠ᨲᩥ ᩋᨽᩥᨸ᩠ᨸᨠᩥᩁᨶ᩠ᨲᩥ ᨲᨳᩣᨣᨲᩔ ᨸᩪᨩᩣᨿ. ᨴᩥᨻ᩠ᨻᩣᨶᩥᨸᩥ ᨲᩪᩁᩥᨿᩣᨶᩥ ᩋᨶ᩠ᨲᩃᩥᨠ᩠ᨡᩮ ᩅᨩ᩠ᨩᨶ᩠ᨲᩥ ᨲᨳᩣᨣᨲᩔ ᨸᩪᨩᩣᨿ. ᨴᩥᨻ᩠ᨻᩣᨶᩥᨸᩥ ᩈᨦ᩠ᨣᩦᨲᩣᨶᩥ ᩋᨶ᩠ᨲᩃᩥᨠ᩠ᨡᩮ ᩅᨲ᩠ᨲᨶ᩠ᨲᩥ ᨲᨳᩣᨣᨲᩔ ᨸᩪᨩᩣᨿ. ᨶ ᨡᩮᩣ, ᩌᨶᨶ᩠ᨴ, ᩑᨲ᩠ᨲᩣᩅᨲᩣ ᨲᨳᩣᨣᨲᩮᩣ ᩈᨠ᩠ᨠᨲᩮᩣ ᩅᩣ ᩉᩮᩣᨲᩥ ᨣᩁᩩᨠᨲᩮᩣ ᩅᩣ ᨾᩣᨶᩥᨲᩮᩣ ᩅᩣ ᨸᩪᨩᩥᨲᩮᩣ ᩅᩣ ᩋᨸᨧᩥᨲᩮᩣ ᩅᩣ. ᨿᩮᩣ ᨡᩮᩣ, ᩌᨶᨶ᩠ᨴ, ᨽᩥᨠ᩠ᨡᩩ ᩅᩣ ᨽᩥᨠ᩠ᨡᩩᨶᩦ ᩅᩣ ᩏᨸᩣᩈᨠᩮᩣ ᩅᩣ ᩏᨸᩣᩈᩥᨠᩣ ᩅᩣ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩮᩣ ᩅᩥᩉᩁᨲᩥ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩮᩣ ᩋᨶᩩᨵᨾ᩠ᨾᨧᩣᩁᩦ, ᩈᩮᩣ ᨲᨳᩣᨣᨲᩴ ᩈᨠ᩠ᨠᩁᩮᩣᨲᩥ ᨣᩁᩩᩴ ᨠᩁᩮᩣᨲᩥ ᨾᩣᨶᩮᨲᩥ ᨸᩪᨩᩮᨲᩥ ᩋᨸᨧᩥᨿᨲᩥ [ᩍᨴᩴ ᨸᨴᩴ ᩈᩦᩈ᩠ᨿᩣᩍᨸᩮᩣᨲ᩠ᨳᨠᩮᩈᩩ ᨶ ᨴᩥᩔᨲᩥ], ᨸᩁᨾᩣᨿ ᨸᩪᨩᩣᨿ. ᨲᩈ᩠ᨾᩣᨲᩥᩉᩣᨶᨶ᩠ᨴ, ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩣ ᩅᩥᩉᩁᩥᩔᩣᨾ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩣ ᩋᨶᩩᨵᨾ᩠ᨾᨧᩣᩁᩥᨶᩮᩣᨲᩥ. ᩑᩅᨬ᩠ᩉᩥ ᩅᩮᩣ, ᩌᨶᨶ᩠ᨴ, ᩈᩥᨠ᩠ᨡᩥᨲᨻ᩠ᨻ’’ᨶ᩠ᨲᩥ.

ᩏᨸᩅᩣᨱᨲ᩠ᨳᩮᩁᩮᩣ

᪒᪐᪐. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩌᨿᩈ᩠ᨾᩣ ᩏᨸᩅᩣᨱᩮᩣ ᨽᨣᩅᨲᩮᩣ ᨸᩩᩁᨲᩮᩣ ᨮᩥᨲᩮᩣ ᩉᩮᩣᨲᩥ ᨽᨣᩅᨶ᩠ᨲᩴ ᨻᩦᨩᨿᨾᩣᨶᩮᩣ. ᩋᨳ ᨡᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩏᨸᩅᩣᨱᩴ ᩋᨸᩈᩣᩁᩮᩈᩥ – ‘‘ᩋᨸᩮᩉᩥ, ᨽᩥᨠ᩠ᨡᩩ, ᨾᩣ ᨾᩮ ᨸᩩᩁᨲᩮᩣ ᩋᨭ᩠ᨮᩣᩈᩦ’’ᨲᩥ. ᩋᨳ ᨡᩮᩣ ᩌᨿᩈ᩠ᨾᨲᩮᩣ ᩌᨶᨶ᩠ᨴᩔ ᩑᨲᨴᩉᩮᩣᩈᩥ – ‘‘ᩋᨿᩴ ᨡᩮᩣ ᩌᨿᩈ᩠ᨾᩣ ᩏᨸᩅᩣᨱᩮᩣ ᨴᩦᨥᩁᨲ᩠ᨲᩴ ᨽᨣᩅᨲᩮᩣ ᩏᨸᨭ᩠ᨮᩣᨠᩮᩣ ᩈᨶ᩠ᨲᩥᨠᩣᩅᨧᩁᩮᩣ ᩈᨾᩦᨸᨧᩣᩁᩦ. ᩋᨳ ᨧ ᨸᨶ ᨽᨣᩅᩣ ᨸᨧ᩠ᨨᩥᨾᩮ ᨠᩣᩃᩮ ᩌᨿᩈ᩠ᨾᨶ᩠ᨲᩴ ᩏᨸᩅᩣᨱᩴ ᩋᨸᩈᩣᩁᩮᨲᩥ – ‘ᩋᨸᩮᩉᩥ ᨽᩥᨠ᩠ᨡᩩ, ᨾᩣ ᨾᩮ ᨸᩩᩁᨲᩮᩣ ᩋᨭ᩠ᨮᩣᩈᩦ’ᨲᩥ. ᨠᩮᩣ ᨶᩩ ᨡᩮᩣ ᩉᩮᨲᩩ, ᨠᩮᩣ ᨸᨧ᩠ᨧᨿᩮᩣ, ᨿᩴ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩏᨸᩅᩣᨱᩴ ᩋᨸᩈᩣᩁᩮᨲᩥ – ‘ᩋᨸᩮᩉᩥ, ᨽᩥᨠ᩠ᨡᩩ, ᨾᩣ ᨾᩮ ᨸᩩᩁᨲᩮᩣ ᩋᨭ᩠ᨮᩣᩈᩦ’ᨲᩥ? ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘ᩋᨿᩴ, ᨽᨶ᩠ᨲᩮ, ᩌᨿᩈ᩠ᨾᩣ ᩏᨸᩅᩣᨱᩮᩣ ᨴᩦᨥᩁᨲ᩠ᨲᩴ ᨽᨣᩅᨲᩮᩣ ᩏᨸᨭ᩠ᨮᩣᨠᩮᩣ ᩈᨶ᩠ᨲᩥᨠᩣᩅᨧᩁᩮᩣ ᩈᨾᩦᨸᨧᩣᩁᩦ. ᩋᨳ ᨧ ᨸᨶ ᨽᨣᩅᩣ ᨸᨧ᩠ᨨᩥᨾᩮ ᨠᩣᩃᩮ ᩌᨿᩈ᩠ᨾᨶ᩠ᨲᩴ ᩏᨸᩅᩣᨱᩴ ᩋᨸᩈᩣᩁᩮᨲᩥ – ‘‘ᩋᨸᩮᩉᩥ, ᨽᩥᨠ᩠ᨡᩩ, ᨾᩣ ᨾᩮ ᨸᩩᩁᨲᩮᩣ ᩋᨭ᩠ᨮᩣᩈᩦ’’ᨲᩥ. ᨠᩮᩣ ᨶᩩ ᨡᩮᩣ, ᨽᨶ᩠ᨲᩮ, ᩉᩮᨲᩩ, ᨠᩮᩣ ᨸᨧ᩠ᨧᨿᩮᩣ, ᨿᩴ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩏᨸᩅᩣᨱᩴ ᩋᨸᩈᩣᩁᩮᨲᩥ – ‘‘ᩋᨸᩮᩉᩥ, ᨽᩥᨠ᩠ᨡᩩ, ᨾᩣ ᨾᩮ ᨸᩩᩁᨲᩮᩣ ᩋᨭ᩠ᨮᩣᩈᩦ’’ᨲᩥ? ‘‘ᨿᩮᨽᩩᨿ᩠ᨿᩮᨶ, ᩌᨶᨶ᩠ᨴ, ᨴᩈᩈᩩ ᩃᩮᩣᨠᨵᩣᨲᩪᩈᩩ ᨴᩮᩅᨲᩣ ᩈᨶ᩠ᨶᩥᨸᨲᩥᨲᩣ ᨲᨳᩣᨣᨲᩴ ᨴᩔᨶᩣᨿ. ᨿᩣᩅᨲᩣ, ᩌᨶᨶ᩠ᨴ, ᨠᩩᩈᩥᨶᩣᩁᩣ ᩏᨸᩅᨲ᩠ᨲᨶᩴ ᨾᩃ᩠ᩃᩣᨶᩴ ᩈᩣᩃᩅᨶᩴ ᩈᨾᨶ᩠ᨲᨲᩮᩣ ᨴ᩠ᩅᩣᨴᩈ ᨿᩮᩣᨩᨶᩣᨶᩥ, ᨶᨲ᩠ᨳᩥ ᩈᩮᩣ ᨸᨴᩮᩈᩮᩣ ᩅᩣᩃᨣ᩠ᨣᨠᩮᩣᨭᩥᨶᩥᨲᩩᨴᨶᨾᨲ᩠ᨲᩮᩣᨸᩥ ᨾᩉᩮᩈᨠ᩠ᨡᩣᩉᩥ ᨴᩮᩅᨲᩣᩉᩥ ᩋᨸ᩠ᨹᩩᨭᩮᩣ. ᨴᩮᩅᨲᩣ, ᩌᨶᨶ᩠ᨴ, ᩏᨩ᩠ᨫᩣᨿᨶ᩠ᨲᩥ – ‘ᨴᩪᩁᩣ ᨧ ᩅᨲᨾ᩠ᩉ ᩌᨣᨲᩣ ᨲᨳᩣᨣᨲᩴ ᨴᩔᨶᩣᨿ. ᨠᨴᩣᨧᩥ ᨠᩁᩉᨧᩥ ᨲᨳᩣᨣᨲᩣ ᩃᩮᩣᨠᩮ ᩏᨸ᩠ᨸᨩ᩠ᨩᨶ᩠ᨲᩥ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ. ᩋᨩ᩠ᨩᩮᩅ ᩁᨲ᩠ᨲᩥᨿᩣ ᨸᨧ᩠ᨨᩥᨾᩮ ᨿᩣᨾᩮ ᨲᨳᩣᨣᨲᩔ ᨸᩁᩥᨶᩥᨻ᩠ᨻᩣᨶᩴ ᨽᩅᩥᩔᨲᩥ. ᩋᨿᨬ᩠ᨧ ᨾᩉᩮᩈᨠ᩠ᨡᩮᩣ ᨽᩥᨠ᩠ᨡᩩ ᨽᨣᩅᨲᩮᩣ ᨸᩩᩁᨲᩮᩣ ᨮᩥᨲᩮᩣ ᩒᩅᩣᩁᩮᨶ᩠ᨲᩮᩣ, ᨶ ᨾᨿᩴ ᩃᨽᩣᨾ ᨸᨧ᩠ᨨᩥᨾᩮ ᨠᩣᩃᩮ ᨲᨳᩣᨣᨲᩴ ᨴᩔᨶᩣᨿᩣ’’’ᨲᩥ.

᪒᪐᪑. ‘‘ᨠᨳᩴᨽᩪᨲᩣ ᨸᨶ, ᨽᨶ᩠ᨲᩮ, ᨽᨣᩅᩣ ᨴᩮᩅᨲᩣ ᨾᨶᩈᩥᨠᩁᩮᩣᨲᩦ’’ᨲᩥ [ᨾᨶᩈᩥ ᨠᩁᩮᩣᨶ᩠ᨲᩦᨲᩥ (ᩈ᩠ᨿᩣ. ᨠ.)]? ‘‘ᩈᨶ᩠ᨲᩣᨶᨶ᩠ᨴ, ᨴᩮᩅᨲᩣ ᩌᨠᩣᩈᩮ ᨸᨳᩅᩦᩈᨬ᩠ᨬᩥᨶᩥᨿᩮᩣ ᨠᩮᩈᩮ ᨸᨠᩥᩁᩥᨿ ᨠᨶ᩠ᨴᨶ᩠ᨲᩥ, ᨻᩣᩉᩣ ᨸᨣ᩠ᨣᨿ᩠ᩉ ᨠᨶ᩠ᨴᨶ᩠ᨲᩥ, ᨨᩥᨶ᩠ᨶᨸᩣᨲᩴ ᨸᨸᨲᨶ᩠ᨲᩥ [ᨨᩥᨶ᩠ᨶᩴᨸᩣᨴᩴᩅᩥᨿ ᨸᨸᨲᨶ᩠ᨲᩥ (ᩈ᩠ᨿᩣ.)], ᩌᩅᨭ᩠ᨭᨶ᩠ᨲᩥ, ᩅᩥᩅᨭ᩠ᨭᨶ᩠ᨲᩥ – ‘ᩋᨲᩥᨡᩥᨸ᩠ᨸᩴ ᨽᨣᩅᩣ ᨸᩁᩥᨶᩥᨻ᩠ᨻᩣᨿᩥᩔᨲᩥ, ᩋᨲᩥᨡᩥᨸ᩠ᨸᩴ ᩈᩩᨣᨲᩮᩣ ᨸᩁᩥᨶᩥᨻ᩠ᨻᩣᨿᩥᩔᨲᩥ, ᩋᨲᩥᨡᩥᨸ᩠ᨸᩴ ᨧᨠ᩠ᨡᩩᩴ [ᨧᨠ᩠ᨡᩩᨾᩣ (ᩈ᩠ᨿᩣ. ᨠ.)] ᩃᩮᩣᨠᩮ ᩋᨶ᩠ᨲᩁᨵᩴᩌᨿᩥᩔᨲᩦ’ᨲᩥ.

‘‘ᩈᨶ᩠ᨲᩣᨶᨶ᩠ᨴ, ᨴᩮᩅᨲᩣ ᨸᨳᩅᩥᨿᩴ ᨸᨳᩅᩦᩈᨬ᩠ᨬᩥᨶᩥᨿᩮᩣ ᨠᩮᩈᩮ ᨸᨠᩥᩁᩥᨿ ᨠᨶ᩠ᨴᨶ᩠ᨲᩥ, ᨻᩣᩉᩣ ᨸᨣ᩠ᨣᨿ᩠ᩉ ᨠᨶ᩠ᨴᨶ᩠ᨲᩥ, ᨨᩥᨶ᩠ᨶᨸᩣᨲᩴ ᨸᨸᨲᨶ᩠ᨲᩥ, ᩌᩅᨭ᩠ᨭᨶ᩠ᨲᩥ, ᩅᩥᩅᨭ᩠ᨭᨶ᩠ᨲᩥ – ‘ᩋᨲᩥᨡᩥᨸ᩠ᨸᩴ ᨽᨣᩅᩣ ᨸᩁᩥᨶᩥᨻ᩠ᨻᩣᨿᩥᩔᨲᩥ, ᩋᨲᩥᨡᩥᨸ᩠ᨸᩴ ᩈᩩᨣᨲᩮᩣ ᨸᩁᩥᨶᩥᨻ᩠ᨻᩣᨿᩥᩔᨲᩥ, ᩋᨲᩥᨡᩥᨸ᩠ᨸᩴ ᨧᨠ᩠ᨡᩩᩴ ᩃᩮᩣᨠᩮ ᩋᨶ᩠ᨲᩁᨵᩣᨿᩥᩔᨲᩦ’’’ᨲᩥ.

‘‘ᨿᩣ ᨸᨶ ᨲᩣ ᨴᩮᩅᨲᩣ ᩅᩦᨲᩁᩣᨣᩣ, ᨲᩣ ᩈᨲᩣ ᩈᨾ᩠ᨸᨩᩣᨶᩣ ᩋᨵᩥᩅᩣᩈᩮᨶ᩠ᨲᩥ – ‘ᩋᨶᩥᨧ᩠ᨧᩣ ᩈᨦ᩠ᨡᩣᩁᩣ, ᨲᩴ ᨠᩩᨲᩮᨲ᩠ᨳ ᩃᨻ᩠ᨽᩣ’ᨲᩥ.

ᨧᨲᩩᩈᩴᩅᩮᨩᨶᩦᨿᨭ᩠ᨮᩣᨶᩣᨶᩥ

᪒᪐᪒. ‘‘ᨸᩩᨻ᩠ᨻᩮ, ᨽᨶ᩠ᨲᩮ, ᨴᩥᩈᩣᩈᩩ ᩅᩔᩴ ᩅᩩᨭ᩠ᨮᩣ [ᩅᩔᩴᩅᩩᨲ᩠ᨳᩣ (ᩈᩦ. ᩈ᩠ᨿᩣ. ᨠᩴ. ᨸᩦ.)] ᨽᩥᨠ᩠ᨡᩪ ᩌᨣᨧ᩠ᨨᨶ᩠ᨲᩥ ᨲᨳᩣᨣᨲᩴ ᨴᩔᨶᩣᨿ. ᨲᩮ ᨾᨿᩴ ᩃᨽᩣᨾ ᨾᨶᩮᩣᨽᩣᩅᨶᩦᨿᩮ ᨽᩥᨠ᩠ᨡᩪ ᨴᩔᨶᩣᨿ, ᩃᨽᩣᨾ ᨸᨿᩥᩁᩩᨸᩣᩈᨶᩣᨿ. ᨽᨣᩅᨲᩮᩣ ᨸᨶ ᨾᨿᩴ, ᨽᨶ᩠ᨲᩮ, ᩋᨧ᩠ᨧᨿᩮᨶ ᨶ ᩃᨽᩥᩔᩣᨾ ᨾᨶᩮᩣᨽᩣᩅᨶᩦᨿᩮ ᨽᩥᨠ᩠ᨡᩪ ᨴᩔᨶᩣᨿ, ᨶ ᩃᨽᩥᩔᩣᨾ ᨸᨿᩥᩁᩩᨸᩣᩈᨶᩣᨿᩣ’’ᨲᩥ.

‘‘ᨧᨲ᩠ᨲᩣᩁᩥᨾᩣᨶᩥ, ᩌᨶᨶ᩠ᨴ, ᩈᨴ᩠ᨵᩔ ᨠᩩᩃᨸᩩᨲ᩠ᨲᩔ ᨴᩔᨶᩦᨿᩣᨶᩥ ᩈᩴᩅᩮᨩᨶᩦᨿᩣᨶᩥ ᨮᩣᨶᩣᨶᩥ. ᨠᨲᨾᩣᨶᩥ ᨧᨲ᩠ᨲᩣᩁᩥ? ‘ᩍᨵ ᨲᨳᩣᨣᨲᩮᩣ ᨩᩣᨲᩮᩣ’ᨲᩥ, ᩌᨶᨶ᩠ᨴ, ᩈᨴ᩠ᨵᩔ ᨠᩩᩃᨸᩩᨲ᩠ᨲᩔ ᨴᩔᨶᩦᨿᩴ ᩈᩴᩅᩮᨩᨶᩦᨿᩴ ᨮᩣᨶᩴ. ‘ᩍᨵ ᨲᨳᩣᨣᨲᩮᩣ ᩋᨶᩩᨲ᩠ᨲᩁᩴ ᩈᨾ᩠ᨾᩣᩈᨾ᩠ᨻᩮᩣᨵᩥᩴ ᩋᨽᩥᩈᨾ᩠ᨻᩩᨴ᩠ᨵᩮᩣ’ᨲᩥ, ᩌᨶᨶ᩠ᨴ, ᩈᨴ᩠ᨵᩔ ᨠᩩᩃᨸᩩᨲ᩠ᨲᩔ ᨴᩔᨶᩦᨿᩴ ᩈᩴᩅᩮᨩᨶᩦᨿᩴ ᨮᩣᨶᩴ. ‘ᩍᨵ ᨲᨳᩣᨣᨲᩮᨶ ᩋᨶᩩᨲ᩠ᨲᩁᩴ ᨵᨾ᩠ᨾᨧᨠ᩠ᨠᩴ ᨸᩅᨲ᩠ᨲᩥᨲ’ᨶ᩠ᨲᩥ, ᩌᨶᨶ᩠ᨴ, ᩈᨴ᩠ᨵᩔ ᨠᩩᩃᨸᩩᨲ᩠ᨲᩔ ᨴᩔᨶᩦᨿᩴ ᩈᩴᩅᩮᨩᨶᩦᨿᩴ ᨮᩣᨶᩴ. ‘ᩍᨵ ᨲᨳᩣᨣᨲᩮᩣ ᩋᨶᩩᨸᩣᨴᩥᩈᩮᩈᩣᨿ ᨶᩥᨻ᩠ᨻᩣᨶᨵᩣᨲᩩᨿᩣ ᨸᩁᩥᨶᩥᨻ᩠ᨻᩩᨲᩮᩣ’ᨲᩥ, ᩌᨶᨶ᩠ᨴ, ᩈᨴ᩠ᨵᩔ ᨠᩩᩃᨸᩩᨲ᩠ᨲᩔ ᨴᩔᨶᩦᨿᩴ ᩈᩴᩅᩮᨩᨶᩦᨿᩴ ᨮᩣᨶᩴ. ᩍᨾᩣᨶᩥ ᨡᩮᩣ, ᩌᨶᨶ᩠ᨴ, ᨧᨲ᩠ᨲᩣᩁᩥ ᩈᨴ᩠ᨵᩔ ᨠᩩᩃᨸᩩᨲ᩠ᨲᩔ ᨴᩔᨶᩦᨿᩣᨶᩥ ᩈᩴᩅᩮᨩᨶᩦᨿᩣᨶᩥ ᨮᩣᨶᩣᨶᩥ.

‘‘ᩌᨣᨾᩥᩔᨶ᩠ᨲᩥ ᨡᩮᩣ, ᩌᨶᨶ᩠ᨴ, ᩈᨴ᩠ᨵᩣ ᨽᩥᨠ᩠ᨡᩪ ᨽᩥᨠ᩠ᨡᩩᨶᩥᨿᩮᩣ ᩏᨸᩣᩈᨠᩣ ᩏᨸᩣᩈᩥᨠᩣᨿᩮᩣ – ‘ᩍᨵ ᨲᨳᩣᨣᨲᩮᩣ ᨩᩣᨲᩮᩣ’ᨲᩥᨸᩥ, ‘ᩍᨵ ᨲᨳᩣᨣᨲᩮᩣ ᩋᨶᩩᨲ᩠ᨲᩁᩴ ᩈᨾ᩠ᨾᩣᩈᨾ᩠ᨻᩮᩣᨵᩥᩴ ᩋᨽᩥᩈᨾ᩠ᨻᩩᨴ᩠ᨵᩮᩣ’ᨲᩥᨸᩥ, ‘ᩍᨵ ᨲᨳᩣᨣᨲᩮᨶ ᩋᨶᩩᨲ᩠ᨲᩁᩴ ᨵᨾ᩠ᨾᨧᨠ᩠ᨠᩴ ᨸᩅᨲ᩠ᨲᩥᨲ’ᨶ᩠ᨲᩥᨸᩥ, ‘ᩍᨵ ᨲᨳᩣᨣᨲᩮᩣ ᩋᨶᩩᨸᩣᨴᩥᩈᩮᩈᩣᨿ ᨶᩥᨻ᩠ᨻᩣᨶᨵᩣᨲᩩᨿᩣ ᨸᩁᩥᨶᩥᨻ᩠ᨻᩩᨲᩮᩣ’ᨲᩥᨸᩥ. ᨿᩮ ᩉᩥ ᨠᩮᨧᩥ, ᩌᨶᨶ᩠ᨴ, ᨧᩮᨲᩥᨿᨧᩣᩁᩥᨠᩴ ᩌᩉᩥᨱ᩠ᨯᨶ᩠ᨲᩣ ᨸᩈᨶ᩠ᨶᨧᩥᨲ᩠ᨲᩣ ᨠᩣᩃᨦ᩠ᨠᩁᩥᩔᨶ᩠ᨲᩥ, ᩈᨻ᩠ᨻᩮ ᨲᩮ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᩥᩔᨶ᩠ᨲᩦ’’ᨲᩥ.

ᩌᨶᨶ᩠ᨴᨸᩩᨧ᩠ᨨᩣᨠᨳᩣ

᪒᪐᪓. ‘‘ᨠᨳᩴ ᨾᨿᩴ, ᨽᨶ᩠ᨲᩮ, ᨾᩣᨲᩩᨣᩣᨾᩮ ᨸᨭᩥᨸᨩ᩠ᨩᩣᨾᩣ’’ᨲᩥ? ‘‘ᩋᨴᩔᨶᩴ, ᩌᨶᨶ᩠ᨴᩣ’’ᨲᩥ. ‘‘ᨴᩔᨶᩮ, ᨽᨣᩅᩣ, ᩈᨲᩥ ᨠᨳᩴ ᨸᨭᩥᨸᨩ᩠ᨩᩥᨲᨻ᩠ᨻ’’ᨶ᩠ᨲᩥ? ‘‘ᩋᨶᩣᩃᩣᨸᩮᩣ, ᩌᨶᨶ᩠ᨴᩣ’’ᨲᩥ. ‘‘ᩌᩃᨸᨶ᩠ᨲᩮᨶ ᨸᨶ, ᨽᨶ᩠ᨲᩮ, ᨠᨳᩴ ᨸᨭᩥᨸᨩ᩠ᨩᩥᨲᨻ᩠ᨻ’’ᨶ᩠ᨲᩥ? ‘‘ᩈᨲᩥ, ᩌᨶᨶ᩠ᨴ, ᩏᨸᨭ᩠ᨮᩣᨸᩮᨲᨻ᩠ᨻᩣ’’ᨲᩥ.

᪒᪐᪔. ‘‘ᨠᨳᩴ ᨾᨿᩴ, ᨽᨶ᩠ᨲᩮ, ᨲᨳᩣᨣᨲᩔ ᩈᩁᩦᩁᩮ ᨸᨭᩥᨸᨩ᩠ᨩᩣᨾᩣ’’ᨲᩥ? ‘‘ᩋᨻ᩠ᨿᩣᩅᨭᩣ ᨲᩩᨾ᩠ᩉᩮ, ᩌᨶᨶ᩠ᨴ, ᩉᩮᩣᨳ ᨲᨳᩣᨣᨲᩔ ᩈᩁᩦᩁᨸᩪᨩᩣᨿ. ᩍᨦ᩠ᨥ ᨲᩩᨾ᩠ᩉᩮ, ᩌᨶᨶ᩠ᨴ, ᩈᩣᩁᨲ᩠ᨳᩮ ᨥᨭᨳ ᩋᨶᩩᨿᩩᨬ᩠ᨩᨳ [ᩈᨴᨲ᩠ᨳᩮ ᩋᨶᩩᨿᩩᨬ᩠ᨩᨳ (ᩈᩦ. ᩈ᩠ᨿᩣ.), ᩈᨴᨲ᩠ᨳᩴ ᩋᨶᩩᨿᩩᨬ᩠ᨩᨳ (ᨸᩦ.), ᩈᩣᩁᨲ᩠ᨳᩮ ᩋᨶᩩᨿᩩᨬ᩠ᨩᨳ (ᨠ.)], ᩈᩣᩁᨲ᩠ᨳᩮ ᩋᨸ᩠ᨸᨾᨲ᩠ᨲᩣ ᩌᨲᩣᨸᩥᨶᩮᩣ ᨸᩉᩥᨲᨲ᩠ᨲᩣ ᩅᩥᩉᩁᨳ. ᩈᨶ᩠ᨲᩣᨶᨶ᩠ᨴ, ᨡᨲ᩠ᨲᩥᨿᨸᨱ᩠ᨯᩥᨲᩣᨸᩥ ᨻᩕᩣᩉ᩠ᨾᨱᨸᨱ᩠ᨯᩥᨲᩣᨸᩥ ᨣᩉᨸᨲᩥᨸᨱ᩠ᨯᩥᨲᩣᨸᩥ ᨲᨳᩣᨣᨲᩮ ᩋᨽᩥᨸ᩠ᨸᩈᨶ᩠ᨶᩣ, ᨲᩮ ᨲᨳᩣᨣᨲᩔ ᩈᩁᩦᩁᨸᩪᨩᩴ ᨠᩁᩥᩔᨶ᩠ᨲᩦ’’ᨲᩥ.

᪒᪐᪕. ‘‘ᨠᨳᩴ ᨸᨶ, ᨽᨶ᩠ᨲᩮ, ᨲᨳᩣᨣᨲᩔ ᩈᩁᩦᩁᩮ ᨸᨭᩥᨸᨩ᩠ᨩᩥᨲᨻ᩠ᨻ’’ᨶ᩠ᨲᩥ? ‘‘ᨿᨳᩣ ᨡᩮᩣ, ᩌᨶᨶ᩠ᨴ, ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩈᩁᩦᩁᩮ ᨸᨭᩥᨸᨩ᩠ᨩᨶ᩠ᨲᩥ, ᩑᩅᩴ ᨲᨳᩣᨣᨲᩔ ᩈᩁᩦᩁᩮ ᨸᨭᩥᨸᨩ᩠ᨩᩥᨲᨻ᩠ᨻ’’ᨶ᩠ᨲᩥ. ‘‘ᨠᨳᩴ ᨸᨶ, ᨽᨶ᩠ᨲᩮ, ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩈᩁᩦᩁᩮ ᨸᨭᩥᨸᨩ᩠ᨩᨶ᩠ᨲᩦ’’ᨲᩥ? ‘‘ᩁᨬ᩠ᨬᩮᩣ, ᩌᨶᨶ᩠ᨴ, ᨧᨠ᩠ᨠᩅᨲ᩠ᨲᩥᩔ ᩈᩁᩦᩁᩴ ᩋᩉᨲᩮᨶ ᩅᨲ᩠ᨳᩮᨶ ᩅᩮᨮᩮᨶ᩠ᨲᩥ, ᩋᩉᨲᩮᨶ ᩅᨲ᩠ᨳᩮᨶ ᩅᩮᨮᩮᨲ᩠ᩅᩣ ᩅᩥᩉᨲᩮᨶ ᨠᨸ᩠ᨸᩣᩈᩮᨶ ᩅᩮᨮᩮᨶ᩠ᨲᩥ, ᩅᩥᩉᨲᩮᨶ ᨠᨸ᩠ᨸᩣᩈᩮᨶ ᩅᩮᨮᩮᨲ᩠ᩅᩣ ᩋᩉᨲᩮᨶ ᩅᨲ᩠ᨳᩮᨶ ᩅᩮᨮᩮᨶ᩠ᨲᩥ. ᩑᨲᩮᨶᩩᨸᩣᨿᩮᨶ ᨸᨬ᩠ᨧᩉᩥ ᨿᩩᨣᩈᨲᩮᩉᩥ ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩈᩁᩦᩁᩴ [ᩈᩁᩦᩁᩮ (ᩈ᩠ᨿᩣ. ᨠ.)] ᩅᩮᨮᩮᨲ᩠ᩅᩣ ᩌᨿᩈᩣᨿ ᨲᩮᩃᨴᩮᩣᨱᩥᨿᩣ ᨸᨠ᩠ᨡᩥᨸᩥᨲ᩠ᩅᩣ ᩋᨬ᩠ᨬᩥᩔᩣ ᩌᨿᩈᩣᨿ ᨴᩮᩣᨱᩥᨿᩣ ᨸᨭᩥᨠᩩᨩ᩠ᨩᩥᨲ᩠ᩅᩣ ᩈᨻ᩠ᨻᨣᨶ᩠ᨵᩣᨶᩴ ᨧᩥᨲᨠᩴ ᨠᩁᩥᨲ᩠ᩅᩣ ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩈᩁᩦᩁᩴ ᨫᩣᨸᩮᨶ᩠ᨲᩥ. ᨧᩣᨲᩩᨾᩉᩣᨸᨳᩮ [ᨧᩣᨲᩩᨾ᩠ᨾᩉᩣᨸᨳᩮ (ᩈᩦ. ᩈ᩠ᨿᩣ. ᨠᩴ. ᨸᩦ.)] ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᨳᩪᨸᩴ ᨠᩁᩮᩣᨶ᩠ᨲᩥ. ᩑᩅᩴ ᨡᩮᩣ, ᩌᨶᨶ᩠ᨴ, ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩈᩁᩦᩁᩮ ᨸᨭᩥᨸᨩ᩠ᨩᨶ᩠ᨲᩥ. ᨿᨳᩣ ᨡᩮᩣ, ᩌᨶᨶ᩠ᨴ, ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩈᩁᩦᩁᩮ ᨸᨭᩥᨸᨩ᩠ᨩᨶ᩠ᨲᩥ, ᩑᩅᩴ ᨲᨳᩣᨣᨲᩔ ᩈᩁᩦᩁᩮ ᨸᨭᩥᨸᨩ᩠ᨩᩥᨲᨻ᩠ᨻᩴ. ᨧᩣᨲᩩᨾᩉᩣᨸᨳᩮ ᨲᨳᩣᨣᨲᩔ ᨳᩪᨸᩮᩣ ᨠᩣᨲᨻ᩠ᨻᩮᩣ. ᨲᨲ᩠ᨳ ᨿᩮ ᨾᩣᩃᩴ ᩅᩣ ᨣᨶ᩠ᨵᩴ ᩅᩣ ᨧᩩᨱ᩠ᨱᨠᩴ [ᩅᨱ᩠ᨱᨠᩴ (ᩈᩦ. ᨸᩦ.)] ᩅᩣ ᩌᩁᩮᩣᨸᩮᩔᨶ᩠ᨲᩥ ᩅᩣ ᩋᨽᩥᩅᩣᨴᩮᩔᨶ᩠ᨲᩥ ᩅᩣ ᨧᩥᨲ᩠ᨲᩴ ᩅᩣ ᨸᩈᩣᨴᩮᩔᨶ᩠ᨲᩥ ᨲᩮᩈᩴ ᨲᩴ ᨽᩅᩥᩔᨲᩥ ᨴᩦᨥᩁᨲ᩠ᨲᩴ ᩉᩥᨲᩣᨿ ᩈᩩᨡᩣᨿ.

ᨳᩪᨸᩣᩁᩉᨸᩩᨣ᩠ᨣᩃᩮᩣ

᪒᪐᪖. ‘‘ᨧᨲ᩠ᨲᩣᩁᩮᩣᨾᩮ, ᩌᨶᨶ᩠ᨴ, ᨳᩪᨸᩣᩁᩉᩣ. ᨠᨲᨾᩮ ᨧᨲ᩠ᨲᩣᩁᩮᩣ? ᨲᨳᩣᨣᨲᩮᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨳᩪᨸᩣᩁᩉᩮᩣ, ᨸᨧ᩠ᨧᩮᨠᩈᨾ᩠ᨻᩩᨴ᩠ᨵᩮᩣ ᨳᩪᨸᩣᩁᩉᩮᩣ, ᨲᨳᩣᨣᨲᩔ ᩈᩣᩅᨠᩮᩣ ᨳᩪᨸᩣᩁᩉᩮᩣ, ᩁᩣᨩᩣ ᨧᨠ᩠ᨠᩅᨲ᩠ᨲᩦ [ᨧᨠ᩠ᨠᩅᨲ᩠ᨲᩥ (ᩈ᩠ᨿᩣ. ᨠ.)] ᨳᩪᨸᩣᩁᩉᩮᩣᨲᩥ.

‘‘ᨠᩥᨬ᩠ᨧᩣᨶᨶ᩠ᨴ, ᩋᨲ᩠ᨳᩅᩈᩴ ᨸᨭᩥᨧ᩠ᨧ ᨲᨳᩣᨣᨲᩮᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨳᩪᨸᩣᩁᩉᩮᩣ? ‘ᩋᨿᩴ ᨲᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᨳᩪᨸᩮᩣ’ᨲᩥ, ᩌᨶᨶ᩠ᨴ, ᨻᩉᩩᨩᨶᩣ ᨧᩥᨲ᩠ᨲᩴ ᨸᩈᩣᨴᩮᨶ᩠ᨲᩥ. ᨲᩮ ᨲᨲ᩠ᨳ ᨧᩥᨲ᩠ᨲᩴ ᨸᩈᩣᨴᩮᨲ᩠ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨶ᩠ᨲᩥ. ᩍᨴᩴ ᨡᩮᩣ, ᩌᨶᨶ᩠ᨴ, ᩋᨲ᩠ᨳᩅᩈᩴ ᨸᨭᩥᨧ᩠ᨧ ᨲᨳᩣᨣᨲᩮᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨳᩪᨸᩣᩁᩉᩮᩣ.

‘‘ᨠᩥᨬ᩠ᨧᩣᨶᨶ᩠ᨴ, ᩋᨲ᩠ᨳᩅᩈᩴ ᨸᨭᩥᨧ᩠ᨧ ᨸᨧ᩠ᨧᩮᨠᩈᨾ᩠ᨻᩩᨴ᩠ᨵᩮᩣ ᨳᩪᨸᩣᩁᩉᩮᩣ? ‘ᩋᨿᩴ ᨲᩔ ᨽᨣᩅᨲᩮᩣ ᨸᨧ᩠ᨧᩮᨠᩈᨾ᩠ᨻᩩᨴ᩠ᨵᩔ ᨳᩪᨸᩮᩣ’ᨲᩥ, ᩌᨶᨶ᩠ᨴ, ᨻᩉᩩᨩᨶᩣ ᨧᩥᨲ᩠ᨲᩴ ᨸᩈᩣᨴᩮᨶ᩠ᨲᩥ. ᨲᩮ ᨲᨲ᩠ᨳ ᨧᩥᨲ᩠ᨲᩴ ᨸᩈᩣᨴᩮᨲ᩠ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨶ᩠ᨲᩥ. ᩍᨴᩴ ᨡᩮᩣ, ᩌᨶᨶ᩠ᨴ, ᩋᨲ᩠ᨳᩅᩈᩴ ᨸᨭᩥᨧ᩠ᨧ ᨸᨧ᩠ᨧᩮᨠᩈᨾ᩠ᨻᩩᨴ᩠ᨵᩮᩣ ᨳᩪᨸᩣᩁᩉᩮᩣ.

‘‘ᨠᩥᨬ᩠ᨧᩣᨶᨶ᩠ᨴ, ᩋᨲ᩠ᨳᩅᩈᩴ ᨸᨭᩥᨧ᩠ᨧ ᨲᨳᩣᨣᨲᩔ ᩈᩣᩅᨠᩮᩣ ᨳᩪᨸᩣᩁᩉᩮᩣ? ‘ᩋᨿᩴ ᨲᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩈᩣᩅᨠᩔ ᨳᩪᨸᩮᩣ’ᨲᩥ ᩌᨶᨶ᩠ᨴ, ᨻᩉᩩᨩᨶᩣ ᨧᩥᨲ᩠ᨲᩴ ᨸᩈᩣᨴᩮᨶ᩠ᨲᩥ. ᨲᩮ ᨲᨲ᩠ᨳ ᨧᩥᨲ᩠ᨲᩴ ᨸᩈᩣᨴᩮᨲ᩠ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨶ᩠ᨲᩥ. ᩍᨴᩴ ᨡᩮᩣ, ᩌᨶᨶ᩠ᨴ, ᩋᨲ᩠ᨳᩅᩈᩴ ᨸᨭᩥᨧ᩠ᨧ ᨲᨳᩣᨣᨲᩔ ᩈᩣᩅᨠᩮᩣ ᨳᩪᨸᩣᩁᩉᩮᩣ.

‘‘ᨠᩥᨬ᩠ᨧᩣᨶᨶ᩠ᨴ, ᩋᨲ᩠ᨳᩅᩈᩴ ᨸᨭᩥᨧ᩠ᨧ ᩁᩣᨩᩣ ᨧᨠ᩠ᨠᩅᨲ᩠ᨲᩦ ᨳᩪᨸᩣᩁᩉᩮᩣ? ‘ᩋᨿᩴ ᨲᩔ ᨵᨾ᩠ᨾᩥᨠᩔ ᨵᨾ᩠ᨾᩁᨬ᩠ᨬᩮᩣ ᨳᩪᨸᩮᩣ’ᨲᩥ, ᩌᨶᨶ᩠ᨴ, ᨻᩉᩩᨩᨶᩣ ᨧᩥᨲ᩠ᨲᩴ ᨸᩈᩣᨴᩮᨶ᩠ᨲᩥ. ᨲᩮ ᨲᨲ᩠ᨳ ᨧᩥᨲ᩠ᨲᩴ ᨸᩈᩣᨴᩮᨲ᩠ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨶ᩠ᨲᩥ. ᩍᨴᩴ ᨡᩮᩣ, ᩌᨶᨶ᩠ᨴ, ᩋᨲ᩠ᨳᩅᩈᩴ ᨸᨭᩥᨧ᩠ᨧ ᩁᩣᨩᩣ ᨧᨠ᩠ᨠᩅᨲ᩠ᨲᩦ ᨳᩪᨸᩣᩁᩉᩮᩣ. ᩍᨾᩮ ᨡᩮᩣ, ᩌᨶᨶ᩠ᨴ ᨧᨲ᩠ᨲᩣᩁᩮᩣ ᨳᩪᨸᩣᩁᩉᩣ’’ᨲᩥ.

ᩌᨶᨶ᩠ᨴᩋᨧ᩠ᨨᩁᩥᨿᨵᨾ᩠ᨾᩮᩣ

᪒᪐᪗. ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᩅᩥᩉᩣᩁᩴ ᨸᩅᩥᩈᩥᨲ᩠ᩅᩣ ᨠᨸᩥᩈᩦᩈᩴ ᩌᩃᨾ᩠ᨻᩥᨲ᩠ᩅᩣ ᩁᩮᩣᨴᨾᩣᨶᩮᩣ ᩋᨭ᩠ᨮᩣᩈᩥ – ‘‘ᩋᩉᨬ᩠ᨧ ᩅᨲᨾ᩠ᩉᩥ ᩈᩮᨡᩮᩣ ᩈᨠᩁᨱᩦᨿᩮᩣ, ᩈᨲ᩠ᨳᩩ ᨧ ᨾᩮ ᨸᩁᩥᨶᩥᨻ᩠ᨻᩣᨶᩴ ᨽᩅᩥᩔᨲᩥ, ᨿᩮᩣ ᨾᨾ ᩋᨶᩩᨠᨾ᩠ᨸᨠᩮᩣ’’ᨲᩥ. ᩋᨳ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᨠᩉᩴ ᨶᩩ ᨡᩮᩣ, ᨽᩥᨠ᩠ᨡᩅᩮ, ᩌᨶᨶ᩠ᨴᩮᩣ’’ᨲᩥ? ‘‘ᩑᩈᩮᩣ, ᨽᨶ᩠ᨲᩮ, ᩌᨿᩈ᩠ᨾᩣ ᩌᨶᨶ᩠ᨴᩮᩣ ᩅᩥᩉᩣᩁᩴ ᨸᩅᩥᩈᩥᨲ᩠ᩅᩣ ᨠᨸᩥᩈᩦᩈᩴ ᩌᩃᨾ᩠ᨻᩥᨲ᩠ᩅᩣ ᩁᩮᩣᨴᨾᩣᨶᩮᩣ ᨮᩥᨲᩮᩣ – ‘ᩋᩉᨬ᩠ᨧ ᩅᨲᨾ᩠ᩉᩥ ᩈᩮᨡᩮᩣ ᩈᨠᩁᨱᩦᨿᩮᩣ, ᩈᨲ᩠ᨳᩩ ᨧ ᨾᩮ ᨸᩁᩥᨶᩥᨻ᩠ᨻᩣᨶᩴ ᨽᩅᩥᩔᨲᩥ, ᨿᩮᩣ ᨾᨾ ᩋᨶᩩᨠᨾ᩠ᨸᨠᩮᩣ’’’ᨲᩥ. ᩋᨳ ᨡᩮᩣ ᨽᨣᩅᩣ ᩋᨬ᩠ᨬᨲᩁᩴ ᨽᩥᨠ᩠ᨡᩩᩴ ᩌᨾᨶ᩠ᨲᩮᩈᩥ – ‘‘ᩑᩉᩥ ᨲ᩠ᩅᩴ, ᨽᩥᨠ᩠ᨡᩩ, ᨾᨾ ᩅᨧᨶᩮᨶ ᩌᨶᨶ᩠ᨴᩴ ᩌᨾᨶ᩠ᨲᩮᩉᩥ – ‘ᩈᨲ᩠ᨳᩣ ᨲᩴ, ᩌᩅᩩᩈᩮᩣ ᩌᨶᨶ᩠ᨴ, ᩌᨾᨶ᩠ᨲᩮᨲᩦ’’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩈᩮᩣ ᨽᩥᨠ᩠ᨡᩩ ᨽᨣᩅᨲᩮᩣ ᨸᨭᩥᩔᩩᨲ᩠ᩅᩣ ᨿᩮᨶᩣᨿᩈ᩠ᨾᩣ ᩌᨶᨶ᩠ᨴᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩑᨲᨴᩅᩮᩣᨧ – ‘‘ᩈᨲ᩠ᨳᩣ ᨲᩴ, ᩌᩅᩩᩈᩮᩣ ᩌᨶᨶ᩠ᨴ, ᩌᨾᨶ᩠ᨲᩮᨲᩦ’’ᨲᩥ. ‘‘ᩑᩅᨾᩣᩅᩩᩈᩮᩣ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨲᩔ ᨽᩥᨠ᩠ᨡᩩᨶᩮᩣ ᨸᨭᩥᩔᩩᨲ᩠ᩅᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩴ ᨡᩮᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᨽᨣᩅᩣ ᩑᨲᨴᩅᩮᩣᨧ – ‘‘ᩋᩃᩴ, ᩌᨶᨶ᩠ᨴ, ᨾᩣ ᩈᩮᩣᨧᩥ ᨾᩣ ᨸᩁᩥᨴᩮᩅᩥ, ᨶᨶᩩ ᩑᨲᩴ, ᩌᨶᨶ᩠ᨴ, ᨾᨿᩣ ᨸᨭᩥᨠᨧ᩠ᨧᩮᩅ ᩋᨠ᩠ᨡᩣᨲᩴ – ‘ᩈᨻ᩠ᨻᩮᩉᩮᩅ ᨸᩥᨿᩮᩉᩥ ᨾᨶᩣᨸᩮᩉᩥ ᨶᩣᨶᩣᨽᩣᩅᩮᩣ ᩅᩥᨶᩣᨽᩣᩅᩮᩣ ᩋᨬ᩠ᨬᨳᩣᨽᩣᩅᩮᩣ’; ᨲᩴ ᨠᩩᨲᩮᨲ᩠ᨳ, ᩌᨶᨶ᩠ᨴ, ᩃᨻ᩠ᨽᩣ. ᨿᩴ ᨲᩴ ᨩᩣᨲᩴ ᨽᩪᨲᩴ ᩈᨦ᩠ᨡᨲᩴ ᨸᩃᩮᩣᨠᨵᨾ᩠ᨾᩴ, ᨲᩴ ᩅᨲ ᨲᨳᩣᨣᨲᩔᩣᨸᩥ ᩈᩁᩦᩁᩴ ᨾᩣ ᨸᩃᩩᨩ᩠ᨩᩦ’ᨲᩥ ᨶᩮᨲᩴ ᨮᩣᨶᩴ ᩅᩥᨩ᩠ᨩᨲᩥ. ᨴᩦᨥᩁᨲ᩠ᨲᩴ ᨡᩮᩣ ᨲᩮ, ᩌᨶᨶ᩠ᨴ, ᨲᨳᩣᨣᨲᩮᩣ ᨸᨧ᩠ᨧᩩᨸᨭ᩠ᨮᩥᨲᩮᩣ ᨾᩮᨲ᩠ᨲᩮᨶ ᨠᩣᨿᨠᨾ᩠ᨾᩮᨶ ᩉᩥᨲᩮᨶ ᩈᩩᨡᩮᨶ ᩋᨴ᩠ᩅᨿᩮᨶ ᩋᨸ᩠ᨸᨾᩣᨱᩮᨶ, ᨾᩮᨲ᩠ᨲᩮᨶ ᩅᨧᩦᨠᨾ᩠ᨾᩮᨶ ᩉᩥᨲᩮᨶ ᩈᩩᨡᩮᨶ ᩋᨴ᩠ᩅᨿᩮᨶ ᩋᨸ᩠ᨸᨾᩣᨱᩮᨶ, ᨾᩮᨲ᩠ᨲᩮᨶ ᨾᨶᩮᩣᨠᨾ᩠ᨾᩮᨶ ᩉᩥᨲᩮᨶ ᩈᩩᨡᩮᨶ ᩋᨴ᩠ᩅᨿᩮᨶ ᩋᨸ᩠ᨸᨾᩣᨱᩮᨶ. ᨠᨲᨸᩩᨬ᩠ᨬᩮᩣᩈᩥ ᨲ᩠ᩅᩴ, ᩌᨶᨶ᩠ᨴ, ᨸᨵᩣᨶᨾᨶᩩᨿᩩᨬ᩠ᨩ, ᨡᩥᨸ᩠ᨸᩴ ᩉᩮᩣᩉᩥᩈᩥ ᩋᨶᩣᩈᩅᩮᩣ’’ᨲᩥ.

᪒᪐᪘. ᩋᨳ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᨿᩮᨸᩥ ᨲᩮ, ᨽᩥᨠ᩠ᨡᩅᩮ, ᩋᩉᩮᩈᩩᩴ ᩋᨲᩦᨲᨾᨴ᩠ᨵᩣᨶᩴ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᨲᩮᩈᨾ᩠ᨸᩥ ᨽᨣᩅᨶ᩠ᨲᩣᨶᩴ ᩑᨲᨸ᩠ᨸᩁᨾᩣᨿᩮᩅ ᩏᨸᨭ᩠ᨮᩣᨠᩣ ᩋᩉᩮᩈᩩᩴ, ᩈᩮᨿ᩠ᨿᨳᩣᨸᩥ ᨾᨿ᩠ᩉᩴ ᩌᨶᨶ᩠ᨴᩮᩣ. ᨿᩮᨸᩥ ᨲᩮ, ᨽᩥᨠ᩠ᨡᩅᩮ, ᨽᩅᩥᩔᨶ᩠ᨲᩥ ᩋᨶᩣᨣᨲᨾᨴ᩠ᨵᩣᨶᩴ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᨲᩮᩈᨾ᩠ᨸᩥ ᨽᨣᩅᨶ᩠ᨲᩣᨶᩴ ᩑᨲᨸ᩠ᨸᩁᨾᩣᨿᩮᩅ ᩏᨸᨭ᩠ᨮᩣᨠᩣ ᨽᩅᩥᩔᨶ᩠ᨲᩥ, ᩈᩮᨿ᩠ᨿᨳᩣᨸᩥ ᨾᨿ᩠ᩉᩴ ᩌᨶᨶ᩠ᨴᩮᩣ. ᨸᨱ᩠ᨯᩥᨲᩮᩣ, ᨽᩥᨠ᩠ᨡᩅᩮ, ᩌᨶᨶ᩠ᨴᩮᩣ; ᨾᩮᨵᩣᩅᩦ, ᨽᩥᨠ᩠ᨡᩅᩮ, ᩌᨶᨶ᩠ᨴᩮᩣ. ᨩᩣᨶᩣᨲᩥ ‘ᩋᨿᩴ ᨠᩣᩃᩮᩣ ᨲᨳᩣᨣᨲᩴ ᨴᩔᨶᩣᨿ ᩏᨸᩈᨦ᩠ᨠᨾᩥᨲᩩᩴ ᨽᩥᨠ᩠ᨡᩪᨶᩴ, ᩋᨿᩴ ᨠᩣᩃᩮᩣ ᨽᩥᨠ᩠ᨡᩩᨶᩦᨶᩴ, ᩋᨿᩴ ᨠᩣᩃᩮᩣ ᩏᨸᩣᩈᨠᩣᨶᩴ, ᩋᨿᩴ ᨠᩣᩃᩮᩣ ᩏᨸᩣᩈᩥᨠᩣᨶᩴ, ᩋᨿᩴ ᨠᩣᩃᩮᩣ ᩁᨬ᩠ᨬᩮᩣ ᩁᩣᨩᨾᩉᩣᨾᨲ᩠ᨲᩣᨶᩴ ᨲᩥᨲ᩠ᨳᩥᨿᩣᨶᩴ ᨲᩥᨲ᩠ᨳᩥᨿᩈᩣᩅᨠᩣᨶ’ᨶ᩠ᨲᩥ.

᪒᪐᪙. ‘‘ᨧᨲ᩠ᨲᩣᩁᩮᩣᨾᩮ, ᨽᩥᨠ᩠ᨡᩅᩮ, ᩋᨧ᩠ᨨᩁᩥᨿᩣ ᩋᨻ᩠ᨽᩩᨲᩣ ᨵᨾ᩠ᨾᩣ [ᩋᨻ᩠ᨽᩩᨲᨵᨾ᩠ᨾᩣ (ᩈ᩠ᨿᩣ. ᨠ.)] ᩌᨶᨶ᩠ᨴᩮ. ᨠᨲᨾᩮ ᨧᨲ᩠ᨲᩣᩁᩮᩣ? ᩈᨧᩮ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨸᩁᩥᩈᩣ ᩌᨶᨶ᩠ᨴᩴ ᨴᩔᨶᩣᨿ ᩏᨸᩈᨦ᩠ᨠᨾᨲᩥ, ᨴᩔᨶᩮᨶ ᩈᩣ ᩋᨲ᩠ᨲᨾᨶᩣ ᩉᩮᩣᨲᩥ. ᨲᨲᩕ ᨧᩮ ᩌᨶᨶ᩠ᨴᩮᩣ ᨵᨾ᩠ᨾᩴ ᨽᩣᩈᨲᩥ, ᨽᩣᩈᩥᨲᩮᨶᨸᩥ ᩈᩣ ᩋᨲ᩠ᨲᨾᨶᩣ ᩉᩮᩣᨲᩥ. ᩋᨲᩥᨲ᩠ᨲᩣᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨸᩁᩥᩈᩣ ᩉᩮᩣᨲᩥ, ᩋᨳ ᨡᩮᩣ ᩌᨶᨶ᩠ᨴᩮᩣ ᨲᩩᨱ᩠ᩉᩦ ᩉᩮᩣᨲᩥ. ᩈᨧᩮ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩦᨸᩁᩥᩈᩣ ᩌᨶᨶ᩠ᨴᩴ ᨴᩔᨶᩣᨿ ᩏᨸᩈᨦ᩠ᨠᨾᨲᩥ, ᨴᩔᨶᩮᨶ ᩈᩣ ᩋᨲ᩠ᨲᨾᨶᩣ ᩉᩮᩣᨲᩥ. ᨲᨲᩕ ᨧᩮ ᩌᨶᨶ᩠ᨴᩮᩣ ᨵᨾ᩠ᨾᩴ ᨽᩣᩈᨲᩥ, ᨽᩣᩈᩥᨲᩮᨶᨸᩥ ᩈᩣ ᩋᨲ᩠ᨲᨾᨶᩣ ᩉᩮᩣᨲᩥ. ᩋᨲᩥᨲ᩠ᨲᩣᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩦᨸᩁᩥᩈᩣ ᩉᩮᩣᨲᩥ, ᩋᨳ ᨡᩮᩣ ᩌᨶᨶ᩠ᨴᩮᩣ ᨲᩩᨱ᩠ᩉᩦ ᩉᩮᩣᨲᩥ. ᩈᨧᩮ, ᨽᩥᨠ᩠ᨡᩅᩮ, ᩏᨸᩣᩈᨠᨸᩁᩥᩈᩣ ᩌᨶᨶ᩠ᨴᩴ ᨴᩔᨶᩣᨿ ᩏᨸᩈᨦ᩠ᨠᨾᨲᩥ, ᨴᩔᨶᩮᨶ ᩈᩣ ᩋᨲ᩠ᨲᨾᨶᩣ ᩉᩮᩣᨲᩥ. ᨲᨲᩕ ᨧᩮ ᩌᨶᨶ᩠ᨴᩮᩣ ᨵᨾ᩠ᨾᩴ ᨽᩣᩈᨲᩥ, ᨽᩣᩈᩥᨲᩮᨶᨸᩥ ᩈᩣ ᩋᨲ᩠ᨲᨾᨶᩣ ᩉᩮᩣᨲᩥ. ᩋᨲᩥᨲ᩠ᨲᩣᩅ, ᨽᩥᨠ᩠ᨡᩅᩮ, ᩏᨸᩣᩈᨠᨸᩁᩥᩈᩣ ᩉᩮᩣᨲᩥ, ᩋᨳ ᨡᩮᩣ ᩌᨶᨶ᩠ᨴᩮᩣ ᨲᩩᨱ᩠ᩉᩦ ᩉᩮᩣᨲᩥ. ᩈᨧᩮ, ᨽᩥᨠ᩠ᨡᩅᩮ, ᩏᨸᩣᩈᩥᨠᩣᨸᩁᩥᩈᩣ ᩌᨶᨶ᩠ᨴᩴ ᨴᩔᨶᩣᨿ ᩏᨸᩈᨦ᩠ᨠᨾᨲᩥ, ᨴᩔᨶᩮᨶ ᩈᩣ ᩋᨲ᩠ᨲᨾᨶᩣ ᩉᩮᩣᨲᩥ. ᨲᨲᩕ ᨧᩮ, ᩌᨶᨶ᩠ᨴᩮᩣ, ᨵᨾ᩠ᨾᩴ ᨽᩣᩈᨲᩥ, ᨽᩣᩈᩥᨲᩮᨶᨸᩥ ᩈᩣ ᩋᨲ᩠ᨲᨾᨶᩣ ᩉᩮᩣᨲᩥ. ᩋᨲᩥᨲ᩠ᨲᩣᩅ, ᨽᩥᨠ᩠ᨡᩅᩮ, ᩏᨸᩣᩈᩥᨠᩣᨸᩁᩥᩈᩣ ᩉᩮᩣᨲᩥ, ᩋᨳ ᨡᩮᩣ ᩌᨶᨶ᩠ᨴᩮᩣ ᨲᩩᨱ᩠ᩉᩦ ᩉᩮᩣᨲᩥ. ᩍᨾᩮ ᨡᩮᩣ, ᨽᩥᨠ᩠ᨡᩅᩮ, ᨧᨲ᩠ᨲᩣᩁᩮᩣ ᩋᨧ᩠ᨨᩁᩥᨿᩣ ᩋᨻ᩠ᨽᩩᨲᩣ ᨵᨾ᩠ᨾᩣ ᩌᨶᨶ᩠ᨴᩮ.

‘‘ᨧᨲ᩠ᨲᩣᩁᩮᩣᨾᩮ, ᨽᩥᨠ᩠ᨡᩅᩮ, ᩋᨧ᩠ᨨᩁᩥᨿᩣ ᩋᨻ᩠ᨽᩩᨲᩣ ᨵᨾ᩠ᨾᩣ ᩁᨬ᩠ᨬᩮ ᨧᨠ᩠ᨠᩅᨲ᩠ᨲᩥᨾ᩠ᩉᩥ. ᨠᨲᨾᩮ ᨧᨲ᩠ᨲᩣᩁᩮᩣ? ᩈᨧᩮ, ᨽᩥᨠ᩠ᨡᩅᩮ, ᨡᨲ᩠ᨲᩥᨿᨸᩁᩥᩈᩣ ᩁᩣᨩᩣᨶᩴ ᨧᨠ᩠ᨠᩅᨲ᩠ᨲᩥᩴ ᨴᩔᨶᩣᨿ ᩏᨸᩈᨦ᩠ᨠᨾᨲᩥ, ᨴᩔᨶᩮᨶ ᩈᩣ ᩋᨲ᩠ᨲᨾᨶᩣ ᩉᩮᩣᨲᩥ. ᨲᨲᩕ ᨧᩮ ᩁᩣᨩᩣ ᨧᨠ᩠ᨠᩅᨲ᩠ᨲᩦ ᨽᩣᩈᨲᩥ, ᨽᩣᩈᩥᨲᩮᨶᨸᩥ ᩈᩣ ᩋᨲ᩠ᨲᨾᨶᩣ ᩉᩮᩣᨲᩥ. ᩋᨲᩥᨲ᩠ᨲᩣᩅ, ᨽᩥᨠ᩠ᨡᩅᩮ, ᨡᨲ᩠ᨲᩥᨿᨸᩁᩥᩈᩣ ᩉᩮᩣᨲᩥ. ᩋᨳ ᨡᩮᩣ ᩁᩣᨩᩣ ᨧᨠ᩠ᨠᩅᨲ᩠ᨲᩦ ᨲᩩᨱ᩠ᩉᩦ ᩉᩮᩣᨲᩥ. ᩈᨧᩮ ᨽᩥᨠ᩠ᨡᩅᩮ, ᨻᩕᩣᩉ᩠ᨾᨱᨸᩁᩥᩈᩣ…ᨸᩮ… ᨣᩉᨸᨲᩥᨸᩁᩥᩈᩣ…ᨸᩮ… ᩈᨾᨱᨸᩁᩥᩈᩣ ᩁᩣᨩᩣᨶᩴ ᨧᨠ᩠ᨠᩅᨲ᩠ᨲᩥᩴ ᨴᩔᨶᩣᨿ ᩏᨸᩈᨦ᩠ᨠᨾᨲᩥ, ᨴᩔᨶᩮᨶ ᩈᩣ ᩋᨲ᩠ᨲᨾᨶᩣ ᩉᩮᩣᨲᩥ. ᨲᨲᩕ ᨧᩮ ᩁᩣᨩᩣ ᨧᨠ᩠ᨠᩅᨲ᩠ᨲᩦ ᨽᩣᩈᨲᩥ, ᨽᩣᩈᩥᨲᩮᨶᨸᩥ ᩈᩣ ᩋᨲ᩠ᨲᨾᨶᩣ ᩉᩮᩣᨲᩥ. ᩋᨲᩥᨲ᩠ᨲᩣᩅ, ᨽᩥᨠ᩠ᨡᩅᩮ, ᩈᨾᨱᨸᩁᩥᩈᩣ ᩉᩮᩣᨲᩥ, ᩋᨳ ᨡᩮᩣ ᩁᩣᨩᩣ ᨧᨠ᩠ᨠᩅᨲ᩠ᨲᩦ ᨲᩩᨱ᩠ᩉᩦ ᩉᩮᩣᨲᩥ. ᩑᩅᨾᩮᩅ ᨡᩮᩣ, ᨽᩥᨠ᩠ᨡᩅᩮ, ᨧᨲ᩠ᨲᩣᩁᩮᩣᨾᩮ ᩋᨧ᩠ᨨᩁᩥᨿᩣ ᩋᨻ᩠ᨽᩩᨲᩣ ᨵᨾ᩠ᨾᩣ ᩌᨶᨶ᩠ᨴᩮ. ᩈᨧᩮ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨸᩁᩥᩈᩣ ᩌᨶᨶ᩠ᨴᩴ ᨴᩔᨶᩣᨿ ᩏᨸᩈᨦ᩠ᨠᨾᨲᩥ, ᨴᩔᨶᩮᨶ ᩈᩣ ᩋᨲ᩠ᨲᨾᨶᩣ ᩉᩮᩣᨲᩥ. ᨲᨲᩕ ᨧᩮ ᩌᨶᨶ᩠ᨴᩮᩣ ᨵᨾ᩠ᨾᩴ ᨽᩣᩈᨲᩥ, ᨽᩣᩈᩥᨲᩮᨶᨸᩥ ᩈᩣ ᩋᨲ᩠ᨲᨾᨶᩣ ᩉᩮᩣᨲᩥ. ᩋᨲᩥᨲ᩠ᨲᩣᩅ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨸᩁᩥᩈᩣ ᩉᩮᩣᨲᩥ. ᩋᨳ ᨡᩮᩣ ᩌᨶᨶ᩠ᨴᩮᩣ ᨲᩩᨱ᩠ᩉᩦ ᩉᩮᩣᨲᩥ. ᩈᨧᩮ, ᨽᩥᨠ᩠ᨡᩅᩮ ᨽᩥᨠ᩠ᨡᩩᨶᩦᨸᩁᩥᩈᩣ…ᨸᩮ… ᩏᨸᩣᩈᨠᨸᩁᩥᩈᩣ…ᨸᩮ… ᩏᨸᩣᩈᩥᨠᩣᨸᩁᩥᩈᩣ ᩌᨶᨶ᩠ᨴᩴ ᨴᩔᨶᩣᨿ ᩏᨸᩈᨦ᩠ᨠᨾᨲᩥ, ᨴᩔᨶᩮᨶ ᩈᩣ ᩋᨲ᩠ᨲᨾᨶᩣ ᩉᩮᩣᨲᩥ. ᨲᨲᩕ ᨧᩮ ᩌᨶᨶ᩠ᨴᩮᩣ ᨵᨾ᩠ᨾᩴ ᨽᩣᩈᨲᩥ, ᨽᩣᩈᩥᨲᩮᨶᨸᩥ ᩈᩣ ᩋᨲ᩠ᨲᨾᨶᩣ ᩉᩮᩣᨲᩥ. ᩋᨲᩥᨲ᩠ᨲᩣᩅ, ᨽᩥᨠ᩠ᨡᩅᩮ, ᩏᨸᩣᩈᩥᨠᩣᨸᩁᩥᩈᩣ ᩉᩮᩣᨲᩥ. ᩋᨳ ᨡᩮᩣ ᩌᨶᨶ᩠ᨴᩮᩣ ᨲᩩᨱ᩠ᩉᩦ ᩉᩮᩣᨲᩥ. ᩍᨾᩮ ᨡᩮᩣ, ᨽᩥᨠ᩠ᨡᩅᩮ, ᨧᨲ᩠ᨲᩣᩁᩮᩣ ᩋᨧ᩠ᨨᩁᩥᨿᩣ ᩋᨻ᩠ᨽᩩᨲᩣ ᨵᨾ᩠ᨾᩣ ᩌᨶᨶ᩠ᨴᩮ’’ᨲᩥ.

ᨾᩉᩣᩈᩩᨴᩔᨶᩈᩩᨲ᩠ᨲᨴᩮᩈᨶᩣ

᪒᪑᪐. ᩑᩅᩴ ᩅᩩᨲ᩠ᨲᩮ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᨾᩣ, ᨽᨶ᩠ᨲᩮ, ᨽᨣᩅᩣ ᩍᨾᩈ᩠ᨾᩥᩴ ᨡᩩᨴ᩠ᨴᨠᨶᨣᩁᨠᩮ ᩏᨩ᩠ᨩᨦ᩠ᨣᩃᨶᨣᩁᨠᩮ ᩈᩣᨡᩣᨶᨣᩁᨠᩮ ᨸᩁᩥᨶᩥᨻ᩠ᨻᩣᨿᩥ. ᩈᨶ᩠ᨲᩥ, ᨽᨶ᩠ᨲᩮ, ᩋᨬ᩠ᨬᩣᨶᩥ ᨾᩉᩣᨶᨣᩁᩣᨶᩥ, ᩈᩮᨿ᩠ᨿᨳᩥᨴᩴ – ᨧᨾ᩠ᨸᩣ ᩁᩣᨩᨣᩉᩴ ᩈᩣᩅᨲ᩠ᨳᩦ ᩈᩣᨠᩮᨲᩴ ᨠᩮᩣᩈᨾ᩠ᨻᩦ ᨻᩣᩁᩣᨱᩈᩦ; ᩑᨲ᩠ᨳ ᨽᨣᩅᩣ ᨸᩁᩥᨶᩥᨻ᩠ᨻᩣᨿᨲᩩ. ᩑᨲ᩠ᨳ ᨻᩉᩪ ᨡᨲ᩠ᨲᩥᨿᨾᩉᩣᩈᩣᩃᩣ, ᨻᩕᩣᩉ᩠ᨾᨱᨾᩉᩣᩈᩣᩃᩣ ᨣᩉᨸᨲᩥᨾᩉᩣᩈᩣᩃᩣ ᨲᨳᩣᨣᨲᩮ ᩋᨽᩥᨸ᩠ᨸᩈᨶ᩠ᨶᩣ. ᨲᩮ ᨲᨳᩣᨣᨲᩔ ᩈᩁᩦᩁᨸᩪᨩᩴ ᨠᩁᩥᩔᨶ᩠ᨲᩦ’’ᨲᩥ ‘‘ᨾᩣᩉᩮᩅᩴ, ᩌᨶᨶ᩠ᨴ, ᩋᩅᨧ; ᨾᩣᩉᩮᩅᩴ, ᩌᨶᨶ᩠ᨴ, ᩋᩅᨧ – ‘ᨡᩩᨴ᩠ᨴᨠᨶᨣᩁᨠᩴ ᩏᨩ᩠ᨩᨦ᩠ᨣᩃᨶᨣᩁᨠᩴ ᩈᩣᨡᩣᨶᨣᩁᨠ’ᨶ᩠ᨲᩥ.

‘‘ᨽᩪᨲᨸᩩᨻ᩠ᨻᩴ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨶᩣᨾ ᩋᩉᩮᩣᩈᩥ ᨧᨠ᩠ᨠᩅᨲ᩠ᨲᩦ ᨵᨾ᩠ᨾᩥᨠᩮᩣ ᨵᨾ᩠ᨾᩁᩣᨩᩣ ᨧᩣᨲᩩᩁᨶ᩠ᨲᩮᩣ ᩅᩥᨩᩥᨲᩣᩅᩦ ᨩᨶᨸ᩠ᨸᨴᨲ᩠ᨳᩣᩅᩁᩥᨿᨸ᩠ᨸᨲ᩠ᨲᩮᩣ ᩈᨲ᩠ᨲᩁᨲᨶᩈᨾᨶ᩠ᨶᩣᨣᨲᩮᩣ. ᩁᨬ᩠ᨬᩮᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩔ ᩋᨿᩴ ᨠᩩᩈᩥᨶᩣᩁᩣ ᨠᩩᩈᩣᩅᨲᩦ ᨶᩣᨾ ᩁᩣᨩᨵᩣᨶᩦ ᩋᩉᩮᩣᩈᩥ, ᨸᩩᩁᨲ᩠ᨳᩥᨾᩮᨶ ᨧ ᨸᨧ᩠ᨨᩥᨾᩮᨶ ᨧ ᨴ᩠ᩅᩣᨴᩈᨿᩮᩣᨩᨶᩣᨶᩥ ᩌᨿᩣᨾᩮᨶ; ᩏᨲ᩠ᨲᩁᩮᨶ ᨧ ᨴᨠ᩠ᨡᩥᨱᩮᨶ ᨧ ᩈᨲ᩠ᨲᨿᩮᩣᨩᨶᩣᨶᩥ ᩅᩥᨲ᩠ᨳᩣᩁᩮᨶ. ᨠᩩᩈᩣᩅᨲᩦ, ᩌᨶᨶ᩠ᨴ, ᩁᩣᨩᨵᩣᨶᩦ ᩍᨴ᩠ᨵᩣ ᨧᩮᩅ ᩋᩉᩮᩣᩈᩥ ᨹᩦᨲᩣ ᨧ ᨻᩉᩩᨩᨶᩣ ᨧ ᩌᨠᩥᨱ᩠ᨱᨾᨶᩩᩔᩣ ᨧ ᩈᩩᨽᩥᨠ᩠ᨡᩣ ᨧ. ᩈᩮᨿ᩠ᨿᨳᩣᨸᩥ, ᩌᨶᨶ᩠ᨴ, ᨴᩮᩅᩣᨶᩴ ᩌᩊᨠᨾᨶ᩠ᨴᩣ ᨶᩣᨾ ᩁᩣᨩᨵᩣᨶᩦ ᩍᨴ᩠ᨵᩣ ᨧᩮᩅ ᩉᩮᩣᨲᩥ ᨹᩦᨲᩣ ᨧ ᨻᩉᩩᨩᨶᩣ ᨧ ᩌᨠᩥᨱ᩠ᨱᨿᨠ᩠ᨡᩣ ᨧ ᩈᩩᨽᩥᨠ᩠ᨡᩣ ᨧ; ᩑᩅᨾᩮᩅ ᨡᩮᩣ, ᩌᨶᨶ᩠ᨴ, ᨠᩩᩈᩣᩅᨲᩦ ᩁᩣᨩᨵᩣᨶᩦ ᩍᨴ᩠ᨵᩣ ᨧᩮᩅ ᩋᩉᩮᩣᩈᩥ ᨹᩦᨲᩣ ᨧ ᨻᩉᩩᨩᨶᩣ ᨧ ᩌᨠᩥᨱ᩠ᨱᨾᨶᩩᩔᩣ ᨧ ᩈᩩᨽᩥᨠ᩠ᨡᩣ ᨧ. ᨠᩩᩈᩣᩅᨲᩦ, ᩌᨶᨶ᩠ᨴ, ᩁᩣᨩᨵᩣᨶᩦ ᨴᩈᩉᩥ ᩈᨴ᩠ᨴᩮᩉᩥ ᩋᩅᩥᩅᩥᨲ᩠ᨲᩣ ᩋᩉᩮᩣᩈᩥ ᨴᩥᩅᩣ ᨧᩮᩅ ᩁᨲ᩠ᨲᩥᨬ᩠ᨧ, ᩈᩮᨿ᩠ᨿᨳᩥᨴᩴ – ᩉᨲ᩠ᨳᩥᩈᨴ᩠ᨴᩮᨶ ᩋᩔᩈᨴ᩠ᨴᩮᨶ ᩁᨳᩈᨴ᩠ᨴᩮᨶ ᨽᩮᩁᩥᩈᨴ᩠ᨴᩮᨶ ᨾᩩᨴᩥᨦ᩠ᨣᩈᨴ᩠ᨴᩮᨶ ᩅᩦᨱᩣᩈᨴ᩠ᨴᩮᨶ ᨣᩦᨲᩈᨴ᩠ᨴᩮᨶ ᩈᨦ᩠ᨡᩈᨴ᩠ᨴᩮᨶ ᩈᨾ᩠ᨾᩈᨴ᩠ᨴᩮᨶ ᨸᩣᨱᩥᨲᩣᩊᩈᨴ᩠ᨴᩮᨶ ‘ᩋᩈ᩠ᨶᩣᨳ ᨸᩥᩅᨳ ᨡᩣᨴᨳᩣ’ᨲᩥ ᨴᩈᨾᩮᨶ ᩈᨴ᩠ᨴᩮᨶ.

‘‘ᨣᨧ᩠ᨨ ᨲ᩠ᩅᩴ, ᩌᨶᨶ᩠ᨴ, ᨠᩩᩈᩥᨶᩣᩁᩴ ᨸᩅᩥᩈᩥᨲ᩠ᩅᩣ ᨠᩮᩣᩈᩥᨶᩣᩁᨠᩣᨶᩴ ᨾᩃ᩠ᩃᩣᨶᩴ ᩌᩁᩮᩣᨧᩮᩉᩥ – ‘ᩋᨩ᩠ᨩ ᨡᩮᩣ, ᩅᩣᩈᩮᨭ᩠ᨮᩣ, ᩁᨲ᩠ᨲᩥᨿᩣ ᨸᨧ᩠ᨨᩥᨾᩮ ᨿᩣᨾᩮ ᨲᨳᩣᨣᨲᩔ ᨸᩁᩥᨶᩥᨻ᩠ᨻᩣᨶᩴ ᨽᩅᩥᩔᨲᩥ. ᩋᨽᩥᨠ᩠ᨠᨾᨳ ᩅᩣᩈᩮᨭ᩠ᨮᩣ, ᩋᨽᩥᨠ᩠ᨠᨾᨳ ᩅᩣᩈᩮᨭ᩠ᨮᩣ. ᨾᩣ ᨸᨧ᩠ᨨᩣ ᩅᩥᨸ᩠ᨸᨭᩥᩈᩣᩁᩥᨶᩮᩣ ᩋᩉᩩᩅᨲ᩠ᨳ – ᩋᨾ᩠ᩉᩣᨠᨬ᩠ᨧ ᨶᩮᩣ ᨣᩣᨾᨠ᩠ᨡᩮᨲ᩠ᨲᩮ ᨲᨳᩣᨣᨲᩔ ᨸᩁᩥᨶᩥᨻ᩠ᨻᩣᨶᩴ ᩋᩉᩮᩣᩈᩥ, ᨶ ᨾᨿᩴ ᩃᨽᩥᨾ᩠ᩉᩣ ᨸᨧ᩠ᨨᩥᨾᩮ ᨠᩣᩃᩮ ᨲᨳᩣᨣᨲᩴ ᨴᩔᨶᩣᨿᩣ’’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨭᩥᩔᩩᨲ᩠ᩅᩣ ᨶᩥᩅᩣᩈᩮᨲ᩠ᩅᩣ ᨸᨲ᩠ᨲᨧᩦᩅᩁᨾᩣᨴᩣᨿ ᩋᨲ᩠ᨲᨴᩩᨲᩥᨿᩮᩣ ᨠᩩᩈᩥᨶᩣᩁᩴ ᨸᩣᩅᩥᩈᩥ.

ᨾᩃ᩠ᩃᩣᨶᩴ ᩅᨶ᩠ᨴᨶᩣ

᪒᪑᪑. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨠᩮᩣᩈᩥᨶᩣᩁᨠᩣ ᨾᩃ᩠ᩃᩣ ᩈᨶ᩠ᨵᩣᨣᩣᩁᩮ [ᩈᨶ᩠ᨳᩣᨣᩣᩁᩮ (ᩈᩦ. ᩈ᩠ᨿᩣ. ᨸᩦ.)] ᩈᨶ᩠ᨶᩥᨸᨲᩥᨲᩣ ᩉᩮᩣᨶ᩠ᨲᩥ ᨠᩮᨶᨧᩥᨴᩮᩅ ᨠᩁᨱᩦᨿᩮᨶ. ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨿᩮᨶ ᨠᩮᩣᩈᩥᨶᩣᩁᨠᩣᨶᩴ ᨾᩃ᩠ᩃᩣᨶᩴ ᩈᨶ᩠ᨵᩣᨣᩣᩁᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨠᩮᩣᩈᩥᨶᩣᩁᨠᩣᨶᩴ ᨾᩃ᩠ᩃᩣᨶᩴ ᩌᩁᩮᩣᨧᩮᩈᩥ – ‘‘ᩋᨩ᩠ᨩ ᨡᩮᩣ, ᩅᩣᩈᩮᨭ᩠ᨮᩣ, ᩁᨲ᩠ᨲᩥᨿᩣ ᨸᨧ᩠ᨨᩥᨾᩮ ᨿᩣᨾᩮ ᨲᨳᩣᨣᨲᩔ ᨸᩁᩥᨶᩥᨻ᩠ᨻᩣᨶᩴ ᨽᩅᩥᩔᨲᩥ. ᩋᨽᩥᨠ᩠ᨠᨾᨳ ᩅᩣᩈᩮᨭ᩠ᨮᩣ ᩋᨽᩥᨠ᩠ᨠᨾᨳ ᩅᩣᩈᩮᨭ᩠ᨮᩣ. ᨾᩣ ᨸᨧ᩠ᨨᩣ ᩅᩥᨸ᩠ᨸᨭᩥᩈᩣᩁᩥᨶᩮᩣ ᩋᩉᩩᩅᨲ᩠ᨳ – ‘ᩋᨾ᩠ᩉᩣᨠᨬ᩠ᨧ ᨶᩮᩣ ᨣᩣᨾᨠ᩠ᨡᩮᨲ᩠ᨲᩮ ᨲᨳᩣᨣᨲᩔ ᨸᩁᩥᨶᩥᨻ᩠ᨻᩣᨶᩴ ᩋᩉᩮᩣᩈᩥ, ᨶ ᨾᨿᩴ ᩃᨽᩥᨾ᩠ᩉᩣ ᨸᨧ᩠ᨨᩥᨾᩮ ᨠᩣᩃᩮ ᨲᨳᩣᨣᨲᩴ ᨴᩔᨶᩣᨿᩣ’’’ᨲᩥ. ᩍᨴᨾᩣᨿᩈ᩠ᨾᨲᩮᩣ ᩌᨶᨶ᩠ᨴᩔ ᩅᨧᨶᩴ ᩈᩩᨲ᩠ᩅᩣ ᨾᩃ᩠ᩃᩣ ᨧ ᨾᩃ᩠ᩃᨸᩩᨲ᩠ᨲᩣ ᨧ ᨾᩃ᩠ᩃᩈᩩᨱᩥᩈᩣ ᨧ ᨾᩃ᩠ᩃᨸᨩᩣᨸᨲᩥᨿᩮᩣ ᨧ ᩋᨥᩣᩅᩥᨶᩮᩣ ᨴᩩᨾ᩠ᨾᨶᩣ ᨧᩮᨲᩮᩣᨴᩩᨠ᩠ᨡᩈᨾᨸ᩠ᨸᩥᨲᩣ ᩋᨸ᩠ᨸᩮᨠᨧ᩠ᨧᩮ ᨠᩮᩈᩮ ᨸᨠᩥᩁᩥᨿ ᨠᨶ᩠ᨴᨶ᩠ᨲᩥ, ᨻᩣᩉᩣ ᨸᨣ᩠ᨣᨿ᩠ᩉ ᨠᨶ᩠ᨴᨶ᩠ᨲᩥ, ᨨᩥᨶ᩠ᨶᨸᩣᨲᩴ ᨸᨸᨲᨶ᩠ᨲᩥ, ᩌᩅᨭ᩠ᨭᨶ᩠ᨲᩥ ᩅᩥᩅᨭ᩠ᨭᨶ᩠ᨲᩥ – ‘ᩋᨲᩥᨡᩥᨸ᩠ᨸᩴ ᨽᨣᩅᩣ ᨸᩁᩥᨶᩥᨻ᩠ᨻᩣᨿᩥᩔᨲᩥ, ᩋᨲᩥᨡᩥᨸ᩠ᨸᩴ ᩈᩩᨣᨲᩮᩣ ᨸᩁᩥᨶᩥᨻ᩠ᨻᩣᨿᩥᩔᨲᩥ, ᩋᨲᩥᨡᩥᨸ᩠ᨸᩴ ᨧᨠ᩠ᨡᩩᩴ ᩃᩮᩣᨠᩮ ᩋᨶ᩠ᨲᩁᨵᩣᨿᩥᩔᨲᩦ’ᨲᩥ. ᩋᨳ ᨡᩮᩣ ᨾᩃ᩠ᩃᩣ ᨧ ᨾᩃ᩠ᩃᨸᩩᨲ᩠ᨲᩣ ᨧ ᨾᩃ᩠ᩃᩈᩩᨱᩥᩈᩣ ᨧ ᨾᩃ᩠ᩃᨸᨩᩣᨸᨲᩥᨿᩮᩣ ᨧ ᩋᨥᩣᩅᩥᨶᩮᩣ ᨴᩩᨾ᩠ᨾᨶᩣ ᨧᩮᨲᩮᩣᨴᩩᨠ᩠ᨡᩈᨾᨸ᩠ᨸᩥᨲᩣ ᨿᩮᨶ ᩏᨸᩅᨲ᩠ᨲᨶᩴ ᨾᩃ᩠ᩃᩣᨶᩴ ᩈᩣᩃᩅᨶᩴ ᨿᩮᨶᩣᨿᩈ᩠ᨾᩣ ᩌᨶᨶ᩠ᨴᩮᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ. ᩋᨳ ᨡᩮᩣ ᩌᨿᩈ᩠ᨾᨲᩮᩣ ᩌᨶᨶ᩠ᨴᩔ ᩑᨲᨴᩉᩮᩣᩈᩥ – ‘‘ᩈᨧᩮ ᨡᩮᩣ ᩋᩉᩴ ᨠᩮᩣᩈᩥᨶᩣᩁᨠᩮ ᨾᩃ᩠ᩃᩮ ᩑᨠᨾᩮᨠᩴ ᨽᨣᩅᨶ᩠ᨲᩴ ᩅᨶ᩠ᨴᩣᨸᩮᩔᩣᨾᩥ, ᩋᩅᨶ᩠ᨴᩥᨲᩮᩣ ᨽᨣᩅᩣ ᨠᩮᩣᩈᩥᨶᩣᩁᨠᩮᩉᩥ ᨾᩃ᩠ᩃᩮᩉᩥ ᨽᩅᩥᩔᨲᩥ, ᩋᨳᩣᨿᩴ ᩁᨲ᩠ᨲᩥ ᩅᩥᨽᩣᨿᩥᩔᨲᩥ. ᨿᩴᨶᩪᨶᩣᩉᩴ ᨠᩮᩣᩈᩥᨶᩣᩁᨠᩮ ᨾᩃ᩠ᩃᩮ ᨠᩩᩃᨸᩁᩥᩅᨲ᩠ᨲᩈᩮᩣ ᨠᩩᩃᨸᩁᩥᩅᨲ᩠ᨲᩈᩮᩣ ᨮᨸᩮᨲ᩠ᩅᩣ ᨽᨣᩅᨶ᩠ᨲᩴ ᩅᨶ᩠ᨴᩣᨸᩮᨿ᩠ᨿᩴ – ‘ᩍᨲ᩠ᨳᨶ᩠ᨶᩣᨾᩮᩣ, ᨽᨶ᩠ᨲᩮ, ᨾᩃ᩠ᩃᩮᩣ ᩈᨸᩩᨲ᩠ᨲᩮᩣ ᩈᨽᩁᩥᨿᩮᩣ ᩈᨸᩁᩥᩈᩮᩣ ᩈᩣᨾᨧ᩠ᨧᩮᩣ ᨽᨣᩅᨲᩮᩣ ᨸᩣᨴᩮ ᩈᩥᩁᩈᩣ ᩅᨶ᩠ᨴᨲᩦ’ᨲᩥ. ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨠᩮᩣᩈᩥᨶᩣᩁᨠᩮ ᨾᩃ᩠ᩃᩮ ᨠᩩᩃᨸᩁᩥᩅᨲ᩠ᨲᩈᩮᩣ ᨠᩩᩃᨸᩁᩥᩅᨲ᩠ᨲᩈᩮᩣ ᨮᨸᩮᨲ᩠ᩅᩣ ᨽᨣᩅᨶ᩠ᨲᩴ ᩅᨶ᩠ᨴᩣᨸᩮᩈᩥ – ‘ᩍᨲ᩠ᨳᨶ᩠ᨶᩣᨾᩮᩣ, ᨽᨶ᩠ᨲᩮ, ᨾᩃ᩠ᩃᩮᩣ ᩈᨸᩩᨲ᩠ᨲᩮᩣ ᩈᨽᩁᩥᨿᩮᩣ ᩈᨸᩁᩥᩈᩮᩣ ᩈᩣᨾᨧ᩠ᨧᩮᩣ ᨽᨣᩅᨲᩮᩣ ᨸᩣᨴᩮ ᩈᩥᩁᩈᩣ ᩅᨶ᩠ᨴᨲᩦ’’’ᨲᩥ. ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᩑᨲᩮᨶ ᩏᨸᩣᨿᩮᨶ ᨸᨮᨾᩮᨶᩮᩅ ᨿᩣᨾᩮᨶ ᨠᩮᩣᩈᩥᨶᩣᩁᨠᩮ ᨾᩃ᩠ᩃᩮ ᨽᨣᩅᨶ᩠ᨲᩴ ᩅᨶ᩠ᨴᩣᨸᩮᩈᩥ.

ᩈᩩᨽᨴ᩠ᨴᨸᩁᩥᨻ᩠ᨻᩣᨩᨠᩅᨲ᩠ᨳᩩ

᪒᪑᪒. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩈᩩᨽᨴ᩠ᨴᩮᩣ ᨶᩣᨾ ᨸᩁᩥᨻ᩠ᨻᩣᨩᨠᩮᩣ ᨠᩩᩈᩥᨶᩣᩁᩣᨿᩴ ᨸᨭᩥᩅᩈᨲᩥ. ᩋᩔᩮᩣᩈᩥ ᨡᩮᩣ ᩈᩩᨽᨴ᩠ᨴᩮᩣ ᨸᩁᩥᨻ᩠ᨻᩣᨩᨠᩮᩣ – ‘‘ᩋᨩ᩠ᨩ ᨠᩥᩁ ᩁᨲ᩠ᨲᩥᨿᩣ ᨸᨧ᩠ᨨᩥᨾᩮ ᨿᩣᨾᩮ ᩈᨾᨱᩔ ᨣᩮᩣᨲᨾᩔ ᨸᩁᩥᨶᩥᨻ᩠ᨻᩣᨶᩴ ᨽᩅᩥᩔᨲᩦ’’ᨲᩥ. ᩋᨳ ᨡᩮᩣ ᩈᩩᨽᨴ᩠ᨴᩔ ᨸᩁᩥᨻ᩠ᨻᩣᨩᨠᩔ ᩑᨲᨴᩉᩮᩣᩈᩥ – ‘‘ᩈᩩᨲᩴ ᨡᩮᩣ ᨸᨶ ᨾᩮᨲᩴ ᨸᩁᩥᨻ᩠ᨻᩣᨩᨠᩣᨶᩴ ᩅᩩᨯ᩠ᨰᩣᨶᩴ ᨾᩉᩃ᩠ᩃᨠᩣᨶᩴ ᩌᨧᩁᩥᨿᨸᩣᨧᩁᩥᨿᩣᨶᩴ ᨽᩣᩈᨾᩣᨶᩣᨶᩴ – ‘ᨠᨴᩣᨧᩥ ᨠᩁᩉᨧᩥ ᨲᨳᩣᨣᨲᩣ ᩃᩮᩣᨠᩮ ᩏᨸ᩠ᨸᨩ᩠ᨩᨶ᩠ᨲᩥ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ’ᨲᩥ. ᩋᨩ᩠ᨩᩮᩅ ᩁᨲ᩠ᨲᩥᨿᩣ ᨸᨧ᩠ᨨᩥᨾᩮ ᨿᩣᨾᩮ ᩈᨾᨱᩔ ᨣᩮᩣᨲᨾᩔ ᨸᩁᩥᨶᩥᨻ᩠ᨻᩣᨶᩴ ᨽᩅᩥᩔᨲᩥ. ᩋᨲ᩠ᨳᩥ ᨧ ᨾᩮ ᩋᨿᩴ ᨠᨦ᩠ᨡᩣᨵᨾ᩠ᨾᩮᩣ ᩏᨸ᩠ᨸᨶ᩠ᨶᩮᩣ, ᩑᩅᩴ ᨸᩈᨶ᩠ᨶᩮᩣ ᩋᩉᩴ ᩈᨾᨱᩮ ᨣᩮᩣᨲᨾᩮ, ‘ᨸᩉᩮᩣᨲᩥ ᨾᩮ ᩈᨾᨱᩮᩣ ᨣᩮᩣᨲᨾᩮᩣ ᨲᨳᩣ ᨵᨾ᩠ᨾᩴ ᨴᩮᩈᩮᨲᩩᩴ, ᨿᨳᩣᩉᩴ ᩍᨾᩴ ᨠᨦ᩠ᨡᩣᨵᨾ᩠ᨾᩴ ᨸᨩᩉᩮᨿ᩠ᨿ’’’ᨶ᩠ᨲᩥ. ᩋᨳ ᨡᩮᩣ ᩈᩩᨽᨴ᩠ᨴᩮᩣ ᨸᩁᩥᨻ᩠ᨻᩣᨩᨠᩮᩣ ᨿᩮᨶ ᩏᨸᩅᨲ᩠ᨲᨶᩴ ᨾᩃ᩠ᩃᩣᨶᩴ ᩈᩣᩃᩅᨶᩴ, ᨿᩮᨶᩣᨿᩈ᩠ᨾᩣ ᩌᨶᨶ᩠ᨴᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩑᨲᨴᩅᩮᩣᨧ – ‘‘ᩈᩩᨲᩴ ᨾᩮᨲᩴ, ᨽᩮᩣ ᩌᨶᨶ᩠ᨴ, ᨸᩁᩥᨻ᩠ᨻᩣᨩᨠᩣᨶᩴ ᩅᩩᨯ᩠ᨰᩣᨶᩴ ᨾᩉᩃ᩠ᩃᨠᩣᨶᩴ ᩌᨧᩁᩥᨿᨸᩣᨧᩁᩥᨿᩣᨶᩴ ᨽᩣᩈᨾᩣᨶᩣᨶᩴ – ‘ᨠᨴᩣᨧᩥ ᨠᩁᩉᨧᩥ ᨲᨳᩣᨣᨲᩣ ᩃᩮᩣᨠᩮ ᩏᨸ᩠ᨸᨩ᩠ᨩᨶ᩠ᨲᩥ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ’ᨲᩥ. ᩋᨩ᩠ᨩᩮᩅ ᩁᨲ᩠ᨲᩥᨿᩣ ᨸᨧ᩠ᨨᩥᨾᩮ ᨿᩣᨾᩮ ᩈᨾᨱᩔ ᨣᩮᩣᨲᨾᩔ ᨸᩁᩥᨶᩥᨻ᩠ᨻᩣᨶᩴ ᨽᩅᩥᩔᨲᩥ. ᩋᨲ᩠ᨳᩥ ᨧ ᨾᩮ ᩋᨿᩴ ᨠᨦ᩠ᨡᩣᨵᨾ᩠ᨾᩮᩣ ᩏᨸ᩠ᨸᨶ᩠ᨶᩮᩣ – ᩑᩅᩴ ᨸᩈᨶ᩠ᨶᩮᩣ ᩋᩉᩴ ᩈᨾᨱᩮ ᨣᩮᩣᨲᨾᩮ ‘ᨸᩉᩮᩣᨲᩥ ᨾᩮ ᩈᨾᨱᩮᩣ ᨣᩮᩣᨲᨾᩮᩣ ᨲᨳᩣ ᨵᨾ᩠ᨾᩴ ᨴᩮᩈᩮᨲᩩᩴ, ᨿᨳᩣᩉᩴ ᩍᨾᩴ ᨠᨦ᩠ᨡᩣᨵᨾ᩠ᨾᩴ ᨸᨩᩉᩮᨿ᩠ᨿ’ᨶ᩠ᨲᩥ. ᩈᩣᨵᩣᩉᩴ, ᨽᩮᩣ ᩌᨶᨶ᩠ᨴ, ᩃᨽᩮᨿ᩠ᨿᩴ ᩈᨾᨱᩴ ᨣᩮᩣᨲᨾᩴ ᨴᩔᨶᩣᨿᩣ’’ᨲᩥ. ᩑᩅᩴ ᩅᩩᨲ᩠ᨲᩮ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᩈᩩᨽᨴ᩠ᨴᩴ ᨸᩁᩥᨻ᩠ᨻᩣᨩᨠᩴ ᩑᨲᨴᩅᩮᩣᨧ – ‘‘ᩋᩃᩴ, ᩌᩅᩩᩈᩮᩣ ᩈᩩᨽᨴ᩠ᨴ, ᨾᩣ ᨲᨳᩣᨣᨲᩴ ᩅᩥᩉᩮᨮᩮᩈᩥ, ᨠᩥᩃᨶ᩠ᨲᩮᩣ ᨽᨣᩅᩣ’’ᨲᩥ. ᨴᩩᨲᩥᨿᨾ᩠ᨸᩥ ᨡᩮᩣ ᩈᩩᨽᨴ᩠ᨴᩮᩣ ᨸᩁᩥᨻ᩠ᨻᩣᨩᨠᩮᩣ…ᨸᩮ… ᨲᨲᩥᨿᨾ᩠ᨸᩥ ᨡᩮᩣ ᩈᩩᨽᨴ᩠ᨴᩮᩣ ᨸᩁᩥᨻ᩠ᨻᩣᨩᨠᩮᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩑᨲᨴᩅᩮᩣᨧ – ‘‘ᩈᩩᨲᩴ ᨾᩮᨲᩴ, ᨽᩮᩣ ᩌᨶᨶ᩠ᨴ, ᨸᩁᩥᨻ᩠ᨻᩣᨩᨠᩣᨶᩴ ᩅᩩᨯ᩠ᨰᩣᨶᩴ ᨾᩉᩃ᩠ᩃᨠᩣᨶᩴ ᩌᨧᩁᩥᨿᨸᩣᨧᩁᩥᨿᩣᨶᩴ ᨽᩣᩈᨾᩣᨶᩣᨶᩴ – ‘ᨠᨴᩣᨧᩥ ᨠᩁᩉᨧᩥ ᨲᨳᩣᨣᨲᩣ ᩃᩮᩣᨠᩮ ᩏᨸ᩠ᨸᨩ᩠ᨩᨶ᩠ᨲᩥ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ’ᨲᩥ. ᩋᨩ᩠ᨩᩮᩅ ᩁᨲ᩠ᨲᩥᨿᩣ ᨸᨧ᩠ᨨᩥᨾᩮ ᨿᩣᨾᩮ ᩈᨾᨱᩔ ᨣᩮᩣᨲᨾᩔ ᨸᩁᩥᨶᩥᨻ᩠ᨻᩣᨶᩴ ᨽᩅᩥᩔᨲᩥ. ᩋᨲ᩠ᨳᩥ ᨧ ᨾᩮ ᩋᨿᩴ ᨠᨦ᩠ᨡᩣᨵᨾ᩠ᨾᩮᩣ ᩏᨸ᩠ᨸᨶ᩠ᨶᩮᩣ – ᩑᩅᩴ ᨸᩈᨶ᩠ᨶᩮᩣ ᩋᩉᩴ ᩈᨾᨱᩮ ᨣᩮᩣᨲᨾᩮ, ‘ᨸᩉᩮᩣᨲᩥ ᨾᩮ ᩈᨾᨱᩮᩣ ᨣᩮᩣᨲᨾᩮᩣ ᨲᨳᩣ ᨵᨾ᩠ᨾᩴ ᨴᩮᩈᩮᨲᩩᩴ, ᨿᨳᩣᩉᩴ ᩍᨾᩴ ᨠᨦ᩠ᨡᩣᨵᨾ᩠ᨾᩴ ᨸᨩᩉᩮᨿ᩠ᨿ’ᨶ᩠ᨲᩥ. ᩈᩣᨵᩣᩉᩴ, ᨽᩮᩣ ᩌᨶᨶ᩠ᨴ, ᩃᨽᩮᨿ᩠ᨿᩴ ᩈᨾᨱᩴ ᨣᩮᩣᨲᨾᩴ ᨴᩔᨶᩣᨿᩣ’’ᨲᩥ. ᨲᨲᩥᨿᨾ᩠ᨸᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᩈᩩᨽᨴ᩠ᨴᩴ ᨸᩁᩥᨻ᩠ᨻᩣᨩᨠᩴ ᩑᨲᨴᩅᩮᩣᨧ – ‘‘ᩋᩃᩴ, ᩌᩅᩩᩈᩮᩣ ᩈᩩᨽᨴ᩠ᨴ, ᨾᩣ ᨲᨳᩣᨣᨲᩴ ᩅᩥᩉᩮᨮᩮᩈᩥ, ᨠᩥᩃᨶ᩠ᨲᩮᩣ ᨽᨣᩅᩣ’’ᨲᩥ.

᪒᪑᪓. ᩋᩔᩮᩣᩈᩥ ᨡᩮᩣ ᨽᨣᩅᩣ ᩌᨿᩈ᩠ᨾᨲᩮᩣ ᩌᨶᨶ᩠ᨴᩔ ᩈᩩᨽᨴ᩠ᨴᩮᨶ ᨸᩁᩥᨻ᩠ᨻᩣᨩᨠᩮᨶ ᩈᨴ᩠ᨵᩥᩴ ᩍᨾᩴ ᨠᨳᩣᩈᩃ᩠ᩃᩣᨸᩴ. ᩋᨳ ᨡᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩋᩃᩴ, ᩌᨶᨶ᩠ᨴ, ᨾᩣ ᩈᩩᨽᨴ᩠ᨴᩴ ᩅᩣᩁᩮᩈᩥ, ᩃᨽᨲᩴ, ᩌᨶᨶ᩠ᨴ, ᩈᩩᨽᨴ᩠ᨴᩮᩣ ᨲᨳᩣᨣᨲᩴ ᨴᩔᨶᩣᨿ. ᨿᩴ ᨠᩥᨬ᩠ᨧᩥ ᨾᩴ ᩈᩩᨽᨴ᩠ᨴᩮᩣ ᨸᩩᨧ᩠ᨨᩥᩔᨲᩥ, ᩈᨻ᩠ᨻᩴ ᨲᩴ ᩋᨬ᩠ᨬᩣᨸᩮᨠ᩠ᨡᩮᩣᩅ ᨸᩩᨧ᩠ᨨᩥᩔᨲᩥ, ᨶᩮᩣ ᩅᩥᩉᩮᩈᩣᨸᩮᨠ᩠ᨡᩮᩣ. ᨿᩴ ᨧᩔᩣᩉᩴ ᨸᩩᨭ᩠ᨮᩮᩣ ᨻ᩠ᨿᩣᨠᩁᩥᩔᩣᨾᩥ, ᨲᩴ ᨡᩥᨸ᩠ᨸᨾᩮᩅ ᩌᨩᩣᨶᩥᩔᨲᩦ’’ᨲᩥ. ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᩈᩩᨽᨴ᩠ᨴᩴ ᨸᩁᩥᨻ᩠ᨻᩣᨩᨠᩴ ᩑᨲᨴᩅᩮᩣᨧ – ‘‘ᨣᨧ᩠ᨨᩣᩅᩩᩈᩮᩣ ᩈᩩᨽᨴ᩠ᨴ, ᨠᩁᩮᩣᨲᩥ ᨲᩮ ᨽᨣᩅᩣ ᩒᨠᩣᩈ’’ᨶ᩠ᨲᩥ. ᩋᨳ ᨡᩮᩣ ᩈᩩᨽᨴ᩠ᨴᩮᩣ ᨸᩁᩥᨻ᩠ᨻᩣᨩᨠᩮᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨲᩣ ᩈᨴ᩠ᨵᩥᩴ ᩈᨾ᩠ᨾᩮᩣᨴᩥ, ᩈᨾ᩠ᨾᩮᩣᨴᨶᩦᨿᩴ ᨠᨳᩴ ᩈᩣᩁᨱᩦᨿᩴ ᩅᩦᨲᩥᩈᩣᩁᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᩈᩩᨽᨴ᩠ᨴᩮᩣ ᨸᩁᩥᨻ᩠ᨻᩣᨩᨠᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᨿᩮᨾᩮ, ᨽᩮᩣ ᨣᩮᩣᨲᨾ, ᩈᨾᨱᨻᩕᩣᩉ᩠ᨾᨱᩣ ᩈᨦ᩠ᨥᩥᨶᩮᩣ ᨣᨱᩥᨶᩮᩣ ᨣᨱᩣᨧᩁᩥᨿᩣ ᨬᩣᨲᩣ ᨿᩈᩔᩥᨶᩮᩣ ᨲᩥᨲ᩠ᨳᨠᩁᩣ ᩈᩣᨵᩩᩈᨾ᩠ᨾᨲᩣ ᨻᩉᩩᨩᨶᩔ, ᩈᩮᨿ᩠ᨿᨳᩥᨴᩴ – ᨸᩪᩁᨱᩮᩣ ᨠᩔᨸᩮᩣ, ᨾᨠ᩠ᨡᩃᩥ ᨣᩮᩣᩈᩣᩃᩮᩣ, ᩋᨩᩥᨲᩮᩣ ᨠᩮᩈᨠᨾ᩠ᨻᩃᩮᩣ, ᨸᨠᩩᨵᩮᩣ ᨠᨧ᩠ᨧᩣᨿᨶᩮᩣ, ᩈᨬ᩠ᨧᨿᩮᩣ ᨻᩮᩃᨭ᩠ᨮᨸᩩᨲ᩠ᨲᩮᩣ, ᨶᩥᨣᨱ᩠ᨮᩮᩣ ᨶᩣᨭᨸᩩᨲ᩠ᨲᩮᩣ, ᩈᨻ᩠ᨻᩮᨲᩮ ᩈᨠᩣᨿ ᨸᨭᩥᨬ᩠ᨬᩣᨿ ᩋᨻ᩠ᨽᨬ᩠ᨬᩥᩴᩈᩩ, ᩈᨻ᩠ᨻᩮᩅ ᨶ ᩋᨻ᩠ᨽᨬ᩠ᨬᩥᩴᩈᩩ, ᩏᨴᩣᩉᩩ ᩑᨠᨧ᩠ᨧᩮ ᩋᨻ᩠ᨽᨬ᩠ᨬᩥᩴᩈᩩ, ᩑᨠᨧ᩠ᨧᩮ ᨶ ᩋᨻ᩠ᨽᨬ᩠ᨬᩥᩴᩈᩪ’’ᨲᩥ? ‘‘ᩋᩃᩴ, ᩈᩩᨽᨴ᩠ᨴ, ᨲᩥᨭ᩠ᨮᨲᩮᨲᩴ – ‘ᩈᨻ᩠ᨻᩮᨲᩮ ᩈᨠᩣᨿ ᨸᨭᩥᨬ᩠ᨬᩣᨿ ᩋᨻ᩠ᨽᨬ᩠ᨬᩥᩴᩈᩩ, ᩈᨻ᩠ᨻᩮᩅ ᨶ ᩋᨻ᩠ᨽᨬ᩠ᨬᩥᩴᩈᩩ, ᩏᨴᩣᩉᩩ ᩑᨠᨧ᩠ᨧᩮ ᩋᨻ᩠ᨽᨬ᩠ᨬᩥᩴᩈᩩ, ᩑᨠᨧ᩠ᨧᩮ ᨶ ᩋᨻ᩠ᨽᨬ᩠ᨬᩥᩴᩈᩪ’ᨲᩥ. ᨵᨾ᩠ᨾᩴ ᨲᩮ, ᩈᩩᨽᨴ᩠ᨴ, ᨴᩮᩈᩮᩔᩣᨾᩥ; ᨲᩴ ᩈᩩᨱᩣᩉᩥ ᩈᩣᨵᩩᨠᩴ ᨾᨶᩈᩥᨠᩁᩮᩣᩉᩥ, ᨽᩣᩈᩥᩔᩣᨾᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩈᩩᨽᨴ᩠ᨴᩮᩣ ᨸᩁᩥᨻ᩠ᨻᩣᨩᨠᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ. ᨽᨣᩅᩣ ᩑᨲᨴᩅᩮᩣᨧ –

᪒᪑᪔. ‘‘ᨿᩈ᩠ᨾᩥᩴ ᨡᩮᩣ, ᩈᩩᨽᨴ᩠ᨴ, ᨵᨾ᩠ᨾᩅᩥᨶᨿᩮ ᩋᩁᩥᨿᩮᩣ ᩋᨭ᩠ᨮᨦ᩠ᨣᩥᨠᩮᩣ ᨾᨣ᩠ᨣᩮᩣ ᨶ ᩏᨸᩃᨻ᩠ᨽᨲᩥ, ᩈᨾᨱᩮᩣᨸᩥ ᨲᨲ᩠ᨳ ᨶ ᩏᨸᩃᨻ᩠ᨽᨲᩥ. ᨴᩩᨲᩥᨿᩮᩣᨸᩥ ᨲᨲ᩠ᨳ ᩈᨾᨱᩮᩣ ᨶ ᩏᨸᩃᨻ᩠ᨽᨲᩥ. ᨲᨲᩥᨿᩮᩣᨸᩥ ᨲᨲ᩠ᨳ ᩈᨾᨱᩮᩣ ᨶ ᩏᨸᩃᨻ᩠ᨽᨲᩥ. ᨧᨲᩩᨲ᩠ᨳᩮᩣᨸᩥ ᨲᨲ᩠ᨳ ᩈᨾᨱᩮᩣ ᨶ ᩏᨸᩃᨻ᩠ᨽᨲᩥ. ᨿᩈ᩠ᨾᩥᨬ᩠ᨧ ᨡᩮᩣ, ᩈᩩᨽᨴ᩠ᨴ, ᨵᨾ᩠ᨾᩅᩥᨶᨿᩮ ᩋᩁᩥᨿᩮᩣ ᩋᨭ᩠ᨮᨦ᩠ᨣᩥᨠᩮᩣ ᨾᨣ᩠ᨣᩮᩣ ᩏᨸᩃᨻ᩠ᨽᨲᩥ, ᩈᨾᨱᩮᩣᨸᩥ ᨲᨲ᩠ᨳ ᩏᨸᩃᨻ᩠ᨽᨲᩥ, ᨴᩩᨲᩥᨿᩮᩣᨸᩥ ᨲᨲ᩠ᨳ ᩈᨾᨱᩮᩣ ᩏᨸᩃᨻ᩠ᨽᨲᩥ, ᨲᨲᩥᨿᩮᩣᨸᩥ ᨲᨲ᩠ᨳ ᩈᨾᨱᩮᩣ ᩏᨸᩃᨻ᩠ᨽᨲᩥ, ᨧᨲᩩᨲ᩠ᨳᩮᩣᨸᩥ ᨲᨲ᩠ᨳ ᩈᨾᨱᩮᩣ ᩏᨸᩃᨻ᩠ᨽᨲᩥ. ᩍᨾᩈ᩠ᨾᩥᩴ ᨡᩮᩣ, ᩈᩩᨽᨴ᩠ᨴ, ᨵᨾ᩠ᨾᩅᩥᨶᨿᩮ ᩋᩁᩥᨿᩮᩣ ᩋᨭ᩠ᨮᨦ᩠ᨣᩥᨠᩮᩣ ᨾᨣ᩠ᨣᩮᩣ ᩏᨸᩃᨻ᩠ᨽᨲᩥ, ᩍᨵᩮᩅ, ᩈᩩᨽᨴ᩠ᨴ, ᩈᨾᨱᩮᩣ, ᩍᨵ ᨴᩩᨲᩥᨿᩮᩣ ᩈᨾᨱᩮᩣ, ᩍᨵ ᨲᨲᩥᨿᩮᩣ ᩈᨾᨱᩮᩣ, ᩍᨵ ᨧᨲᩩᨲ᩠ᨳᩮᩣ ᩈᨾᨱᩮᩣ, ᩈᩩᨬ᩠ᨬᩣ ᨸᩁᨸ᩠ᨸᩅᩣᨴᩣ ᩈᨾᨱᩮᨽᩥ ᩋᨬ᩠ᨬᩮᩉᩥ [ᩋᨬ᩠ᨬᩮ (ᨸᩦ.)]. ᩍᨾᩮ ᨧ [ᩍᨵᩮᩅ (ᨠ.)], ᩈᩩᨽᨴ᩠ᨴ, ᨽᩥᨠ᩠ᨡᩪ ᩈᨾ᩠ᨾᩣ ᩅᩥᩉᩁᩮᨿ᩠ᨿᩩᩴ, ᩋᩈᩩᨬ᩠ᨬᩮᩣ ᩃᩮᩣᨠᩮᩣ ᩋᩁᩉᨶ᩠ᨲᩮᩉᩥ ᩋᩔᩣᨲᩥ.

‘‘ᩑᨠᩪᨶᨲᩥᩴᩈᩮᩣ ᩅᨿᩈᩣ ᩈᩩᨽᨴ᩠ᨴ,

ᨿᩴ ᨸᨻ᩠ᨻᨩᩥᩴ ᨠᩥᩴᨠᩩᩈᩃᩣᨶᩩᩑᩈᩦ;

ᩅᩔᩣᨶᩥ ᨸᨬ᩠ᨬᩣᩈ ᩈᨾᩣᨵᩥᨠᩣᨶᩥ,

ᨿᨲᩮᩣ ᩋᩉᩴ ᨸᨻ᩠ᨻᨩᩥᨲᩮᩣ ᩈᩩᨽᨴ᩠ᨴ.

ᨬᩣᨿᩔ ᨵᨾ᩠ᨾᩔ ᨸᨴᩮᩈᩅᨲ᩠ᨲᩦ,

ᩍᨲᩮᩣ ᨻᩉᩥᨴ᩠ᨵᩣ ᩈᨾᨱᩮᩣᨸᩥ ᨶᨲ᩠ᨳᩥ.

‘‘ᨴᩩᨲᩥᨿᩮᩣᨸᩥ ᩈᨾᨱᩮᩣ ᨶᨲ᩠ᨳᩥ. ᨲᨲᩥᨿᩮᩣᨸᩥ ᩈᨾᨱᩮᩣ ᨶᨲ᩠ᨳᩥ. ᨧᨲᩩᨲ᩠ᨳᩮᩣᨸᩥ ᩈᨾᨱᩮᩣ ᨶᨲ᩠ᨳᩥ. ᩈᩩᨬ᩠ᨬᩣ ᨸᩁᨸ᩠ᨸᩅᩣᨴᩣ ᩈᨾᨱᩮᨽᩥ ᩋᨬ᩠ᨬᩮᩉᩥ. ᩍᨾᩮ ᨧ, ᩈᩩᨽᨴ᩠ᨴ, ᨽᩥᨠ᩠ᨡᩪ ᩈᨾ᩠ᨾᩣ ᩅᩥᩉᩁᩮᨿ᩠ᨿᩩᩴ, ᩋᩈᩩᨬ᩠ᨬᩮᩣ ᩃᩮᩣᨠᩮᩣ ᩋᩁᩉᨶ᩠ᨲᩮᩉᩥ ᩋᩔᩣ’’ᨲᩥ.

᪒᪑᪕. ᩑᩅᩴ ᩅᩩᨲ᩠ᨲᩮ ᩈᩩᨽᨴ᩠ᨴᩮᩣ ᨸᩁᩥᨻ᩠ᨻᩣᨩᨠᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩋᨽᩥᨠ᩠ᨠᨶ᩠ᨲᩴ, ᨽᨶ᩠ᨲᩮ, ᩋᨽᩥᨠ᩠ᨠᨶ᩠ᨲᩴ, ᨽᨶ᩠ᨲᩮ. ᩈᩮᨿ᩠ᨿᨳᩣᨸᩥ, ᨽᨶ᩠ᨲᩮ, ᨶᩥᨠ᩠ᨠᩩᨩ᩠ᨩᩥᨲᩴ ᩅᩣ ᩏᨠ᩠ᨠᩩᨩ᩠ᨩᩮᨿ᩠ᨿ, ᨸᨭᩥᨧ᩠ᨨᨶ᩠ᨶᩴ ᩅᩣ ᩅᩥᩅᩁᩮᨿ᩠ᨿ, ᨾᩪᩊ᩠ᩉᩔ ᩅᩣ ᨾᨣ᩠ᨣᩴ ᩌᨧᩥᨠ᩠ᨡᩮᨿ᩠ᨿ, ᩋᨶ᩠ᨵᨠᩣᩁᩮ ᩅᩣ ᨲᩮᩃᨸᨩ᩠ᨩᩮᩣᨲᩴ ᨵᩣᩁᩮᨿ᩠ᨿ, ‘ᨧᨠ᩠ᨡᩩᨾᨶ᩠ᨲᩮᩣ ᩁᩪᨸᩣᨶᩥ ᨴᨠ᩠ᨡᨶ᩠ᨲᩦ’ᨲᩥ, ᩑᩅᨾᩮᩅᩴ ᨽᨣᩅᨲᩣ ᩋᨶᩮᨠᨸᩁᩥᨿᩣᨿᩮᨶ ᨵᨾ᩠ᨾᩮᩣ ᨸᨠᩣᩈᩥᨲᩮᩣ. ᩑᩈᩣᩉᩴ, ᨽᨶ᩠ᨲᩮ, ᨽᨣᩅᨶ᩠ᨲᩴ ᩈᩁᨱᩴ ᨣᨧ᩠ᨨᩣᨾᩥ ᨵᨾ᩠ᨾᨬ᩠ᨧ ᨽᩥᨠ᩠ᨡᩩᩈᨦ᩠ᨥᨬ᩠ᨧ. ᩃᨽᩮᨿ᩠ᨿᩣᩉᩴ, ᨽᨶ᩠ᨲᩮ, ᨽᨣᩅᨲᩮᩣ ᩈᨶ᩠ᨲᩥᨠᩮ ᨸᨻ᩠ᨻᨩ᩠ᨩᩴ, ᩃᨽᩮᨿ᩠ᨿᩴ ᩏᨸᩈᨾ᩠ᨸᨴ’’ᨶ᩠ᨲᩥ. ‘‘ᨿᩮᩣ ᨡᩮᩣ, ᩈᩩᨽᨴ᩠ᨴ, ᩋᨬ᩠ᨬᨲᩥᨲ᩠ᨳᩥᨿᨸᩩᨻ᩠ᨻᩮᩣ ᩍᨾᩈ᩠ᨾᩥᩴ ᨵᨾ᩠ᨾᩅᩥᨶᨿᩮ ᩌᨠᨦ᩠ᨡᨲᩥ ᨸᨻ᩠ᨻᨩ᩠ᨩᩴ, ᩌᨠᨦ᩠ᨡᨲᩥ ᩏᨸᩈᨾ᩠ᨸᨴᩴ, ᩈᩮᩣ ᨧᨲ᩠ᨲᩣᩁᩮᩣ ᨾᩣᩈᩮ ᨸᩁᩥᩅᩈᨲᩥ. ᨧᨲᩩᨶ᩠ᨶᩴ ᨾᩣᩈᩣᨶᩴ ᩋᨧ᩠ᨧᨿᩮᨶ ᩌᩁᨴ᩠ᨵᨧᩥᨲ᩠ᨲᩣ ᨽᩥᨠ᩠ᨡᩪ ᨸᨻ᩠ᨻᩣᨩᩮᨶ᩠ᨲᩥ ᩏᨸᩈᨾ᩠ᨸᩣᨴᩮᨶ᩠ᨲᩥ ᨽᩥᨠ᩠ᨡᩩᨽᩣᩅᩣᨿ. ᩋᨸᩥ ᨧ ᨾᩮᨲ᩠ᨳ ᨸᩩᨣ᩠ᨣᩃᩅᩮᨾᨲ᩠ᨲᨲᩣ ᩅᩥᨴᩥᨲᩣ’’ᨲᩥ. ‘‘ᩈᨧᩮ, ᨽᨶ᩠ᨲᩮ, ᩋᨬ᩠ᨬᨲᩥᨲ᩠ᨳᩥᨿᨸᩩᨻ᩠ᨻᩣ ᩍᨾᩈ᩠ᨾᩥᩴ ᨵᨾ᩠ᨾᩅᩥᨶᨿᩮ ᩌᨠᨦ᩠ᨡᨶ᩠ᨲᩣ ᨸᨻ᩠ᨻᨩ᩠ᨩᩴ ᩌᨠᨦ᩠ᨡᨶ᩠ᨲᩣ ᩏᨸᩈᨾ᩠ᨸᨴᩴ ᨧᨲ᩠ᨲᩣᩁᩮᩣ ᨾᩣᩈᩮ ᨸᩁᩥᩅᩈᨶ᩠ᨲᩥ, ᨧᨲᩩᨶ᩠ᨶᩴ ᨾᩣᩈᩣᨶᩴ ᩋᨧ᩠ᨧᨿᩮᨶ ᩌᩁᨴ᩠ᨵᨧᩥᨲ᩠ᨲᩣ ᨽᩥᨠ᩠ᨡᩪ ᨸᨻ᩠ᨻᩣᨩᩮᨶ᩠ᨲᩥ ᩏᨸᩈᨾ᩠ᨸᩣᨴᩮᨶ᩠ᨲᩥ ᨽᩥᨠ᩠ᨡᩩᨽᩣᩅᩣᨿ. ᩋᩉᩴ ᨧᨲ᩠ᨲᩣᩁᩥ ᩅᩔᩣᨶᩥ ᨸᩁᩥᩅᩈᩥᩔᩣᨾᩥ, ᨧᨲᩩᨶ᩠ᨶᩴ ᩅᩔᩣᨶᩴ ᩋᨧ᩠ᨧᨿᩮᨶ ᩌᩁᨴ᩠ᨵᨧᩥᨲ᩠ᨲᩣ ᨽᩥᨠ᩠ᨡᩪ ᨸᨻ᩠ᨻᩣᨩᩮᨶ᩠ᨲᩩ ᩏᨸᩈᨾ᩠ᨸᩣᨴᩮᨶ᩠ᨲᩩ ᨽᩥᨠ᩠ᨡᩩᨽᩣᩅᩣᨿᩣ’’ᨲᩥ.

ᩋᨳ ᨡᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᨲᩮᨶᩉᩣᨶᨶ᩠ᨴ, ᩈᩩᨽᨴ᩠ᨴᩴ ᨸᨻ᩠ᨻᩣᨩᩮᩉᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ. ᩋᨳ ᨡᩮᩣ ᩈᩩᨽᨴ᩠ᨴᩮᩣ ᨸᩁᩥᨻ᩠ᨻᩣᨩᨠᩮᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩑᨲᨴᩅᩮᩣᨧ – ‘‘ᩃᩣᨽᩣ ᩅᩮᩣ, ᩌᩅᩩᩈᩮᩣ ᩌᨶᨶ᩠ᨴ; ᩈᩩᩃᨴ᩠ᨵᩴ ᩅᩮᩣ, ᩌᩅᩩᩈᩮᩣ ᩌᨶᨶ᩠ᨴ, ᨿᩮ ᩑᨲ᩠ᨳ ᩈᨲ᩠ᨳᩩ [ᩈᨲ᩠ᨳᩣᩁᩣ (ᩈ᩠ᨿᩣ.)] ᩈᨾ᩠ᨾᩩᨡᩣ ᩋᨶ᩠ᨲᩮᩅᩣᩈᩥᨠᩣᨽᩥᩈᩮᨠᩮᨶ ᩋᨽᩥᩈᩥᨲ᩠ᨲᩣ’’ᨲᩥ. ᩋᩃᨲ᩠ᨳ ᨡᩮᩣ ᩈᩩᨽᨴ᩠ᨴᩮᩣ ᨸᩁᩥᨻ᩠ᨻᩣᨩᨠᩮᩣ ᨽᨣᩅᨲᩮᩣ ᩈᨶ᩠ᨲᩥᨠᩮ ᨸᨻ᩠ᨻᨩ᩠ᨩᩴ, ᩋᩃᨲ᩠ᨳ ᩏᨸᩈᨾ᩠ᨸᨴᩴ. ᩋᨧᩥᩁᩪᨸᩈᨾ᩠ᨸᨶ᩠ᨶᩮᩣ ᨡᩮᩣ ᨸᨶᩣᨿᩈ᩠ᨾᩣ ᩈᩩᨽᨴ᩠ᨴᩮᩣ ᩑᨠᩮᩣ ᩅᩪᨸᨠᨭ᩠ᨮᩮᩣ ᩋᨸ᩠ᨸᨾᨲ᩠ᨲᩮᩣ ᩌᨲᩣᨸᩦ ᨸᩉᩥᨲᨲ᩠ᨲᩮᩣ ᩅᩥᩉᩁᨶ᩠ᨲᩮᩣ ᨶᨧᩥᩁᩔᩮᩅ – ‘ᨿᩔᨲ᩠ᨳᩣᨿ ᨠᩩᩃᨸᩩᨲ᩠ᨲᩣ ᩈᨾ᩠ᨾᨴᩮᩅ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨶ᩠ᨲᩥ’ ᨲᨴᨶᩩᨲ᩠ᨲᩁᩴ ᨻᩕᩉ᩠ᨾᨧᩁᩥᨿᨸᩁᩥᨿᩮᩣᩈᩣᨶᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᩏᨸᩈᨾ᩠ᨸᨩ᩠ᨩ ᩅᩥᩉᩣᩈᩥ. ‘ᨡᩦᨱᩣ ᨩᩣᨲᩥ, ᩅᩩᩈᩥᨲᩴ ᨻᩕᩉ᩠ᨾᨧᩁᩥᨿᩴ, ᨠᨲᩴ ᨠᩁᨱᩦᨿᩴ, ᨶᩣᨸᩁᩴ ᩍᨲ᩠ᨳᨲ᩠ᨲᩣᨿᩣ’ᨲᩥ ᩋᨻ᩠ᨽᨬ᩠ᨬᩣᩈᩥ. ᩋᨬ᩠ᨬᨲᩁᩮᩣ ᨡᩮᩣ ᨸᨶᩣᨿᩈ᩠ᨾᩣ ᩈᩩᨽᨴ᩠ᨴᩮᩣ ᩋᩁᩉᨲᩴ ᩋᩉᩮᩣᩈᩥ. ᩈᩮᩣ ᨽᨣᩅᨲᩮᩣ ᨸᨧ᩠ᨨᩥᨾᩮᩣ ᩈᨠ᩠ᨡᩥᩈᩣᩅᨠᩮᩣ ᩋᩉᩮᩣᩈᩦᨲᩥ.

ᨸᨬ᩠ᨧᨾᩮᩣ ᨽᩣᨱᩅᩣᩁᩮᩣ.

ᨲᨳᩣᨣᨲᨸᨧ᩠ᨨᩥᨾᩅᩣᨧᩣ

᪒᪑᪖. ᩋᨳ ᨡᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᩈᩥᨿᩣ ᨡᩮᩣ ᨸᨶᩣᨶᨶ᩠ᨴ, ᨲᩩᨾ᩠ᩉᩣᨠᩴ ᩑᩅᨾᩔ – ‘ᩋᨲᩦᨲᩈᨲ᩠ᨳᩩᨠᩴ ᨸᩣᩅᨧᨶᩴ, ᨶᨲ᩠ᨳᩥ ᨶᩮᩣ ᩈᨲ᩠ᨳᩣ’ᨲᩥ. ᨶ ᨡᩮᩣ ᨸᨶᩮᨲᩴ, ᩌᨶᨶ᩠ᨴ, ᩑᩅᩴ ᨴᨭ᩠ᨮᨻ᩠ᨻᩴ. ᨿᩮᩣ ᩅᩮᩣ, ᩌᨶᨶ᩠ᨴ, ᨾᨿᩣ ᨵᨾ᩠ᨾᩮᩣ ᨧ ᩅᩥᨶᨿᩮᩣ ᨧ ᨴᩮᩈᩥᨲᩮᩣ ᨸᨬ᩠ᨬᨲ᩠ᨲᩮᩣ, ᩈᩮᩣ ᩅᩮᩣ ᨾᨾᨧ᩠ᨧᨿᩮᨶ ᩈᨲ᩠ᨳᩣ. ᨿᨳᩣ ᨡᩮᩣ ᨸᨶᩣᨶᨶ᩠ᨴ, ᩑᨲᩁᩉᩥ ᨽᩥᨠ᩠ᨡᩪ ᩋᨬ᩠ᨬᨾᨬ᩠ᨬᩴ ᩌᩅᩩᩈᩮᩣᩅᩣᨴᩮᨶ ᩈᨾᩩᨴᩣᨧᩁᨶ᩠ᨲᩥ, ᨶ ᨡᩮᩣ ᨾᨾᨧ᩠ᨧᨿᩮᨶ ᩑᩅᩴ ᩈᨾᩩᨴᩣᨧᩁᩥᨲᨻ᩠ᨻᩴ. ᨳᩮᩁᨲᩁᩮᨶ, ᩌᨶᨶ᩠ᨴ, ᨽᩥᨠ᩠ᨡᩩᨶᩣ ᨶᩅᨠᨲᩁᩮᩣ ᨽᩥᨠ᩠ᨡᩩ ᨶᩣᨾᩮᨶ ᩅᩣ ᨣᩮᩣᨲ᩠ᨲᩮᨶ ᩅᩣ ᩌᩅᩩᩈᩮᩣᩅᩣᨴᩮᨶ ᩅᩣ ᩈᨾᩩᨴᩣᨧᩁᩥᨲᨻ᩠ᨻᩮᩣ. ᨶᩅᨠᨲᩁᩮᨶ ᨽᩥᨠ᩠ᨡᩩᨶᩣ ᨳᩮᩁᨲᩁᩮᩣ ᨽᩥᨠ᩠ᨡᩩ ‘ᨽᨶ᩠ᨲᩮ’ᨲᩥ ᩅᩣ ‘ᩌᨿᩈ᩠ᨾᩣ’ᨲᩥ ᩅᩣ ᩈᨾᩩᨴᩣᨧᩁᩥᨲᨻ᩠ᨻᩮᩣ. ᩌᨠᨦ᩠ᨡᨾᩣᨶᩮᩣ, ᩌᨶᨶ᩠ᨴ, ᩈᨦ᩠ᨥᩮᩣ ᨾᨾᨧ᩠ᨧᨿᩮᨶ ᨡᩩᨴ᩠ᨴᩣᨶᩩᨡᩩᨴ᩠ᨴᨠᩣᨶᩥ ᩈᩥᨠ᩠ᨡᩣᨸᨴᩣᨶᩥ ᩈᨾᩪᩉᨶᨲᩩ. ᨨᨶ᩠ᨶᩔ, ᩌᨶᨶ᩠ᨴ, ᨽᩥᨠ᩠ᨡᩩᨶᩮᩣ ᨾᨾᨧ᩠ᨧᨿᩮᨶ ᨻᩕᩉ᩠ᨾᨴᨱ᩠ᨯᩮᩣ ᨴᩣᨲᨻ᩠ᨻᩮᩣ’’ᨲᩥ. ‘‘ᨠᨲᨾᩮᩣ ᨸᨶ, ᨽᨶ᩠ᨲᩮ, ᨻᩕᩉ᩠ᨾᨴᨱ᩠ᨯᩮᩣ’’ᨲᩥ? ‘‘ᨨᨶ᩠ᨶᩮᩣ, ᩌᨶᨶ᩠ᨴ, ᨽᩥᨠ᩠ᨡᩩ ᨿᩴ ᩍᨧ᩠ᨨᩮᨿ᩠ᨿ, ᨲᩴ ᩅᨴᩮᨿ᩠ᨿ. ᩈᩮᩣ ᨽᩥᨠ᩠ᨡᩪᩉᩥ ᨶᩮᩅ ᩅᨲ᩠ᨲᨻ᩠ᨻᩮᩣ, ᨶ ᩒᩅᨴᩥᨲᨻ᩠ᨻᩮᩣ, ᨶ ᩋᨶᩩᩈᩣᩈᩥᨲᨻ᩠ᨻᩮᩣ’’ᨲᩥ.

᪒᪑᪗. ᩋᨳ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᩈᩥᨿᩣ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩑᨠᨽᩥᨠ᩠ᨡᩩᩔᩣᨸᩥ ᨠᨦ᩠ᨡᩣ ᩅᩣ ᩅᩥᨾᨲᩥ ᩅᩣ ᨻᩩᨴ᩠ᨵᩮ ᩅᩣ ᨵᨾ᩠ᨾᩮ ᩅᩣ ᩈᨦ᩠ᨥᩮ ᩅᩣ ᨾᨣ᩠ᨣᩮ ᩅᩣ ᨸᨭᩥᨸᨴᩣᨿ ᩅᩣ, ᨸᩩᨧ᩠ᨨᨳ, ᨽᩥᨠ᩠ᨡᩅᩮ, ᨾᩣ ᨸᨧ᩠ᨨᩣ ᩅᩥᨸ᩠ᨸᨭᩥᩈᩣᩁᩥᨶᩮᩣ ᩋᩉᩩᩅᨲ᩠ᨳ – ‘ᩈᨾ᩠ᨾᩩᨡᩦᨽᩪᨲᩮᩣ ᨶᩮᩣ ᩈᨲ᩠ᨳᩣ ᩋᩉᩮᩣᩈᩥ, ᨶ ᨾᨿᩴ ᩈᨠ᩠ᨡᩥᨾ᩠ᩉᩣ ᨽᨣᩅᨶ᩠ᨲᩴ ᩈᨾ᩠ᨾᩩᨡᩣ ᨸᨭᩥᨸᩩᨧ᩠ᨨᩥᨲᩩ’’’ ᨶ᩠ᨲᩥ. ᩑᩅᩴ ᩅᩩᨲ᩠ᨲᩮ ᨲᩮ ᨽᩥᨠ᩠ᨡᩪ ᨲᩩᨱ᩠ᩉᩦ ᩋᩉᩮᩈᩩᩴ. ᨴᩩᨲᩥᨿᨾ᩠ᨸᩥ ᨡᩮᩣ ᨽᨣᩅᩣ…ᨸᩮ… ᨲᨲᩥᨿᨾ᩠ᨸᩥ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᩈᩥᨿᩣ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩑᨠᨽᩥᨠ᩠ᨡᩩᩔᩣᨸᩥ ᨠᨦ᩠ᨡᩣ ᩅᩣ ᩅᩥᨾᨲᩥ ᩅᩣ ᨻᩩᨴ᩠ᨵᩮ ᩅᩣ ᨵᨾ᩠ᨾᩮ ᩅᩣ ᩈᨦ᩠ᨥᩮ ᩅᩣ ᨾᨣ᩠ᨣᩮ ᩅᩣ ᨸᨭᩥᨸᨴᩣᨿ ᩅᩣ, ᨸᩩᨧ᩠ᨨᨳ, ᨽᩥᨠ᩠ᨡᩅᩮ, ᨾᩣ ᨸᨧ᩠ᨨᩣ ᩅᩥᨸ᩠ᨸᨭᩥᩈᩣᩁᩥᨶᩮᩣ ᩋᩉᩩᩅᨲ᩠ᨳ – ‘ᩈᨾ᩠ᨾᩩᨡᩦᨽᩪᨲᩮᩣ ᨶᩮᩣ ᩈᨲ᩠ᨳᩣ ᩋᩉᩮᩣᩈᩥ, ᨶ ᨾᨿᩴ ᩈᨠ᩠ᨡᩥᨾ᩠ᩉᩣ ᨽᨣᩅᨶ᩠ᨲᩴ ᩈᨾ᩠ᨾᩩᨡᩣ ᨸᨭᩥᨸᩩᨧ᩠ᨨᩥᨲᩩ’’’ ᨶ᩠ᨲᩥ. ᨲᨲᩥᨿᨾ᩠ᨸᩥ ᨡᩮᩣ ᨲᩮ ᨽᩥᨠ᩠ᨡᩪ ᨲᩩᨱ᩠ᩉᩦ ᩋᩉᩮᩈᩩᩴ. ᩋᨳ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᩈᩥᨿᩣ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩈᨲ᩠ᨳᩩᨣᩣᩁᩅᩮᨶᨸᩥ ᨶ ᨸᩩᨧ᩠ᨨᩮᨿ᩠ᨿᩣᨳ. ᩈᩉᩣᨿᨠᩮᩣᨸᩥ, ᨽᩥᨠ᩠ᨡᩅᩮ, ᩈᩉᩣᨿᨠᩔ ᩌᩁᩮᩣᨧᩮᨲᩪ’’ᨲᩥ. ᩑᩅᩴ ᩅᩩᨲ᩠ᨲᩮ ᨲᩮ ᨽᩥᨠ᩠ᨡᩪ ᨲᩩᨱ᩠ᩉᩦ ᩋᩉᩮᩈᩩᩴ. ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩋᨧ᩠ᨨᩁᩥᨿᩴ, ᨽᨶ᩠ᨲᩮ, ᩋᨻ᩠ᨽᩩᨲᩴ, ᨽᨶ᩠ᨲᩮ, ᩑᩅᩴ ᨸᩈᨶ᩠ᨶᩮᩣ ᩋᩉᩴ, ᨽᨶ᩠ᨲᩮ, ᩍᨾᩈ᩠ᨾᩥᩴ ᨽᩥᨠ᩠ᨡᩩᩈᨦ᩠ᨥᩮ, ‘ᨶᨲ᩠ᨳᩥ ᩑᨠᨽᩥᨠ᩠ᨡᩩᩔᩣᨸᩥ ᨠᨦ᩠ᨡᩣ ᩅᩣ ᩅᩥᨾᨲᩥ ᩅᩣ ᨻᩩᨴ᩠ᨵᩮ ᩅᩣ ᨵᨾ᩠ᨾᩮ ᩅᩣ ᩈᨦ᩠ᨥᩮ ᩅᩣ ᨾᨣ᩠ᨣᩮ ᩅᩣ ᨸᨭᩥᨸᨴᩣᨿ ᩅᩣ’’’ᨲᩥ. ‘‘ᨸᩈᩣᨴᩣ ᨡᩮᩣ ᨲ᩠ᩅᩴ, ᩌᨶᨶ᩠ᨴ, ᩅᨴᩮᩈᩥ, ᨬᩣᨱᨾᩮᩅ ᩉᩮᨲ᩠ᨳ, ᩌᨶᨶ᩠ᨴ, ᨲᨳᩣᨣᨲᩔ. ᨶᨲ᩠ᨳᩥ ᩍᨾᩈ᩠ᨾᩥᩴ ᨽᩥᨠ᩠ᨡᩩᩈᨦ᩠ᨥᩮ ᩑᨠᨽᩥᨠ᩠ᨡᩩᩔᩣᨸᩥ ᨠᨦ᩠ᨡᩣ ᩅᩣ ᩅᩥᨾᨲᩥ ᩅᩣ ᨻᩩᨴ᩠ᨵᩮ ᩅᩣ ᨵᨾ᩠ᨾᩮ ᩅᩣ ᩈᨦ᩠ᨥᩮ ᩅᩣ ᨾᨣ᩠ᨣᩮ ᩅᩣ ᨸᨭᩥᨸᨴᩣᨿ ᩅᩣ. ᩍᨾᩮᩈᨬ᩠ᩉᩥ, ᩌᨶᨶ᩠ᨴ, ᨸᨬ᩠ᨧᨶ᩠ᨶᩴ ᨽᩥᨠ᩠ᨡᩩᩈᨲᩣᨶᩴ ᨿᩮᩣ ᨸᨧ᩠ᨨᩥᨾᨠᩮᩣ ᨽᩥᨠ᩠ᨡᩩ, ᩈᩮᩣ ᩈᩮᩣᨲᩣᨸᨶ᩠ᨶᩮᩣ ᩋᩅᩥᨶᩥᨸᩣᨲᨵᨾ᩠ᨾᩮᩣ ᨶᩥᨿᨲᩮᩣ ᩈᨾ᩠ᨻᩮᩣᨵᩥᨸᩁᩣᨿᨱᩮᩣ’’ᨲᩥ.

᪒᪑᪘. ᩋᨳ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᩉᨶ᩠ᨴ ᨴᩣᨶᩥ, ᨽᩥᨠ᩠ᨡᩅᩮ, ᩌᨾᨶ᩠ᨲᨿᩣᨾᩥ ᩅᩮᩣ, ᩅᨿᨵᨾ᩠ᨾᩣ ᩈᨦ᩠ᨡᩣᩁᩣ ᩋᨸ᩠ᨸᨾᩣᨴᩮᨶ ᩈᨾ᩠ᨸᩣᨴᩮᨳᩣ’’ᨲᩥ. ᩋᨿᩴ ᨲᨳᩣᨣᨲᩔ ᨸᨧ᩠ᨨᩥᨾᩣ ᩅᩣᨧᩣ.

ᨸᩁᩥᨶᩥᨻ᩠ᨻᩩᨲᨠᨳᩣ

᪒᪑᪙. ᩋᨳ ᨡᩮᩣ ᨽᨣᩅᩣ ᨸᨮᨾᩴ ᨫᩣᨶᩴ ᩈᨾᩣᨸᨩ᩠ᨩᩥ, ᨸᨮᨾᨩ᩠ᨫᩣᨶᩣ ᩅᩩᨭ᩠ᨮᩉᩥᨲ᩠ᩅᩣ ᨴᩩᨲᩥᨿᩴ ᨫᩣᨶᩴ ᩈᨾᩣᨸᨩ᩠ᨩᩥ, ᨴᩩᨲᩥᨿᨩ᩠ᨫᩣᨶᩣ ᩅᩩᨭ᩠ᨮᩉᩥᨲ᩠ᩅᩣ ᨲᨲᩥᨿᩴ ᨫᩣᨶᩴ ᩈᨾᩣᨸᨩ᩠ᨩᩥ, ᨲᨲᩥᨿᨩ᩠ᨫᩣᨶᩣ ᩅᩩᨭ᩠ᨮᩉᩥᨲ᩠ᩅᩣ ᨧᨲᩩᨲ᩠ᨳᩴ ᨫᩣᨶᩴ ᩈᨾᩣᨸᨩ᩠ᨩᩥ. ᨧᨲᩩᨲ᩠ᨳᨩ᩠ᨫᩣᨶᩣ ᩅᩩᨭ᩠ᨮᩉᩥᨲ᩠ᩅᩣ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩈᨾᩣᨸᨩ᩠ᨩᩥ, ᩌᨠᩣᩈᩣᨶᨬ᩠ᨧᩣᨿᨲᨶᩈᨾᩣᨸᨲ᩠ᨲᩥᨿᩣ ᩅᩩᨭ᩠ᨮᩉᩥᨲ᩠ᩅᩣ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩈᨾᩣᨸᨩ᩠ᨩᩥ, ᩅᩥᨬ᩠ᨬᩣᨱᨬ᩠ᨧᩣᨿᨲᨶᩈᨾᩣᨸᨲ᩠ᨲᩥᨿᩣ ᩅᩩᨭ᩠ᨮᩉᩥᨲ᩠ᩅᩣ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩈᨾᩣᨸᨩ᩠ᨩᩥ, ᩌᨠᩥᨬ᩠ᨧᨬ᩠ᨬᩣᨿᨲᨶᩈᨾᩣᨸᨲ᩠ᨲᩥᨿᩣ ᩅᩩᨭ᩠ᨮᩉᩥᨲ᩠ᩅᩣ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ ᩈᨾᩣᨸᨩ᩠ᨩᩥ, ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩈᨾᩣᨸᨲ᩠ᨲᩥᨿᩣ ᩅᩩᨭ᩠ᨮᩉᩥᨲ᩠ᩅᩣ ᩈᨬ᩠ᨬᩣᩅᩮᨴᨿᩥᨲᨶᩥᩁᩮᩣᨵᩴ ᩈᨾᩣᨸᨩ᩠ᨩᩥ.

ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᩌᨿᩈ᩠ᨾᨶ᩠ᨲᩴ ᩋᨶᩩᩁᩩᨴ᩠ᨵᩴ ᩑᨲᨴᩅᩮᩣᨧ – ‘‘ᨸᩁᩥᨶᩥᨻ᩠ᨻᩩᨲᩮᩣ, ᨽᨶ᩠ᨲᩮ ᩋᨶᩩᩁᩩᨴ᩠ᨵ, ᨽᨣᩅᩣ’’ᨲᩥ. ‘‘ᨶᩣᩅᩩᩈᩮᩣ ᩌᨶᨶ᩠ᨴ, ᨽᨣᩅᩣ ᨸᩁᩥᨶᩥᨻ᩠ᨻᩩᨲᩮᩣ, ᩈᨬ᩠ᨬᩣᩅᩮᨴᨿᩥᨲᨶᩥᩁᩮᩣᨵᩴ ᩈᨾᩣᨸᨶ᩠ᨶᩮᩣ’’ᨲᩥ.

ᩋᨳ ᨡᩮᩣ ᨽᨣᩅᩣ ᩈᨬ᩠ᨬᩣᩅᩮᨴᨿᩥᨲᨶᩥᩁᩮᩣᨵᩈᨾᩣᨸᨲ᩠ᨲᩥᨿᩣ ᩅᩩᨭ᩠ᨮᩉᩥᨲ᩠ᩅᩣ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ ᩈᨾᩣᨸᨩ᩠ᨩᩥ, ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩈᨾᩣᨸᨲ᩠ᨲᩥᨿᩣ ᩅᩩᨭ᩠ᨮᩉᩥᨲ᩠ᩅᩣ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩈᨾᩣᨸᨩ᩠ᨩᩥ, ᩌᨠᩥᨬ᩠ᨧᨬ᩠ᨬᩣᨿᨲᨶᩈᨾᩣᨸᨲ᩠ᨲᩥᨿᩣ ᩅᩩᨭ᩠ᨮᩉᩥᨲ᩠ᩅᩣ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩈᨾᩣᨸᨩ᩠ᨩᩥ, ᩅᩥᨬ᩠ᨬᩣᨱᨬ᩠ᨧᩣᨿᨲᨶᩈᨾᩣᨸᨲ᩠ᨲᩥᨿᩣ ᩅᩩᨭ᩠ᨮᩉᩥᨲ᩠ᩅᩣ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩈᨾᩣᨸᨩ᩠ᨩᩥ, ᩌᨠᩣᩈᩣᨶᨬ᩠ᨧᩣᨿᨲᨶᩈᨾᩣᨸᨲ᩠ᨲᩥᨿᩣ ᩅᩩᨭ᩠ᨮᩉᩥᨲ᩠ᩅᩣ ᨧᨲᩩᨲ᩠ᨳᩴ ᨫᩣᨶᩴ ᩈᨾᩣᨸᨩ᩠ᨩᩥ, ᨧᨲᩩᨲ᩠ᨳᨩ᩠ᨫᩣᨶᩣ ᩅᩩᨭ᩠ᨮᩉᩥᨲ᩠ᩅᩣ ᨲᨲᩥᨿᩴ ᨫᩣᨶᩴ ᩈᨾᩣᨸᨩ᩠ᨩᩥ, ᨲᨲᩥᨿᨩ᩠ᨫᩣᨶᩣ ᩅᩩᨭ᩠ᨮᩉᩥᨲ᩠ᩅᩣ ᨴᩩᨲᩥᨿᩴ ᨫᩣᨶᩴ ᩈᨾᩣᨸᨩ᩠ᨩᩥ, ᨴᩩᨲᩥᨿᨩ᩠ᨫᩣᨶᩣ ᩅᩩᨭ᩠ᨮᩉᩥᨲ᩠ᩅᩣ ᨸᨮᨾᩴ ᨫᩣᨶᩴ ᩈᨾᩣᨸᨩ᩠ᨩᩥ, ᨸᨮᨾᨩ᩠ᨫᩣᨶᩣ ᩅᩩᨭ᩠ᨮᩉᩥᨲ᩠ᩅᩣ ᨴᩩᨲᩥᨿᩴ ᨫᩣᨶᩴ ᩈᨾᩣᨸᨩ᩠ᨩᩥ, ᨴᩩᨲᩥᨿᨩ᩠ᨫᩣᨶᩣ ᩅᩩᨭ᩠ᨮᩉᩥᨲ᩠ᩅᩣ ᨲᨲᩥᨿᩴ ᨫᩣᨶᩴ ᩈᨾᩣᨸᨩ᩠ᨩᩥ, ᨲᨲᩥᨿᨩ᩠ᨫᩣᨶᩣ ᩅᩩᨭ᩠ᨮᩉᩥᨲ᩠ᩅᩣ ᨧᨲᩩᨲ᩠ᨳᩴ ᨫᩣᨶᩴ ᩈᨾᩣᨸᨩ᩠ᨩᩥ, ᨧᨲᩩᨲ᩠ᨳᨩ᩠ᨫᩣᨶᩣ ᩅᩩᨭ᩠ᨮᩉᩥᨲ᩠ᩅᩣ ᩈᨾᨶᨶ᩠ᨲᩁᩣ ᨽᨣᩅᩣ ᨸᩁᩥᨶᩥᨻ᩠ᨻᩣᨿᩥ.

᪒᪒᪐. ᨸᩁᩥᨶᩥᨻ᩠ᨻᩩᨲᩮ ᨽᨣᩅᨲᩥ ᩈᩉ ᨸᩁᩥᨶᩥᨻ᩠ᨻᩣᨶᩣ ᨾᩉᩣᨽᩪᨾᩥᨧᩣᩃᩮᩣ ᩋᩉᩮᩣᩈᩥ ᨽᩥᩴᩈᨶᨠᩮᩣ ᩈᩃᩮᩣᨾᩉᩴᩈᩮᩣ. ᨴᩮᩅᨴᩩᨶ᩠ᨴᩩᨽᩥᨿᩮᩣ ᨧ ᨹᩃᩥᩴᩈᩩ. ᨸᩁᩥᨶᩥᨻ᩠ᨻᩩᨲᩮ ᨽᨣᩅᨲᩥ ᩈᩉ ᨸᩁᩥᨶᩥᨻ᩠ᨻᩣᨶᩣ ᨻᩕᩉ᩠ᨾᩣᩈᩉᨾ᩠ᨸᨲᩥ ᩍᨾᩴ ᨣᩣᨳᩴ ᩋᨽᩣᩈᩥ –

‘‘ᩈᨻ᩠ᨻᩮᩅ ᨶᩥᨠ᩠ᨡᩥᨸᩥᩔᨶ᩠ᨲᩥ, ᨽᩪᨲᩣ ᩃᩮᩣᨠᩮ ᩈᨾᩩᩔᨿᩴ;

ᨿᨲ᩠ᨳ ᩑᨲᩣᨴᩥᩈᩮᩣ ᩈᨲ᩠ᨳᩣ, ᩃᩮᩣᨠᩮ ᩋᨸ᩠ᨸᨭᩥᨸᩩᨣ᩠ᨣᩃᩮᩣ;

ᨲᨳᩣᨣᨲᩮᩣ ᨻᩃᨸ᩠ᨸᨲ᩠ᨲᩮᩣ, ᩈᨾ᩠ᨻᩩᨴ᩠ᨵᩮᩣ ᨸᩁᩥᨶᩥᨻ᩠ᨻᩩᨲᩮᩣ’’ᨲᩥ.

᪒᪒᪑. ᨸᩁᩥᨶᩥᨻ᩠ᨻᩩᨲᩮ ᨽᨣᩅᨲᩥ ᩈᩉ ᨸᩁᩥᨶᩥᨻ᩠ᨻᩣᨶᩣ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᩍᨾᩴ ᨣᩣᨳᩴ ᩋᨽᩣᩈᩥ –

‘‘ᩋᨶᩥᨧ᩠ᨧᩣ ᩅᨲ ᩈᨦ᩠ᨡᩣᩁᩣ, ᩏᨸ᩠ᨸᩣᨴᩅᨿᨵᨾ᩠ᨾᩥᨶᩮᩣ;

ᩏᨸ᩠ᨸᨩ᩠ᨩᩥᨲ᩠ᩅᩣ ᨶᩥᩁᩩᨩ᩠ᨫᨶ᩠ᨲᩥ, ᨲᩮᩈᩴ ᩅᩪᨸᩈᨾᩮᩣ ᩈᩩᨡᩮᩣ’’ᨲᩥ.

᪒᪒᪒. ᨸᩁᩥᨶᩥᨻ᩠ᨻᩩᨲᩮ ᨽᨣᩅᨲᩥ ᩈᩉ ᨸᩁᩥᨶᩥᨻ᩠ᨻᩣᨶᩣ ᩌᨿᩈ᩠ᨾᩣ ᩋᨶᩩᩁᩩᨴ᩠ᨵᩮᩣ ᩍᨾᩣ ᨣᩣᨳᩣᨿᩮᩣ ᩋᨽᩣᩈᩥ –

‘‘ᨶᩣᩉᩩ ᩋᩔᩣᩈᨸᩔᩣᩈᩮᩣ, ᨮᩥᨲᨧᩥᨲ᩠ᨲᩔ ᨲᩣᨴᩥᨶᩮᩣ;

ᩋᨶᩮᨩᩮᩣ ᩈᨶ᩠ᨲᩥᨾᩣᩁᨻ᩠ᨽ, ᨿᩴ ᨠᩣᩃᨾᨠᩁᩦ ᨾᩩᨶᩥ.

‘‘ᩋᩈᩃ᩠ᩃᩦᨶᩮᨶ ᨧᩥᨲ᩠ᨲᩮᨶ, ᩅᩮᨴᨶᩴ ᩋᨩ᩠ᨫᩅᩣᩈᨿᩥ;

ᨸᨩ᩠ᨩᩮᩣᨲᩔᩮᩅ ᨶᩥᨻ᩠ᨻᩣᨶᩴ, ᩅᩥᨾᩮᩣᨠ᩠ᨡᩮᩣ ᨧᩮᨲᩈᩮᩣ ᩋᩉᩪ’’ᨲᩥ.

᪒᪒᪓. ᨸᩁᩥᨶᩥᨻ᩠ᨻᩩᨲᩮ ᨽᨣᩅᨲᩥ ᩈᩉ ᨸᩁᩥᨶᩥᨻ᩠ᨻᩣᨶᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᩍᨾᩴ ᨣᩣᨳᩴ ᩋᨽᩣᩈᩥ –

‘‘ᨲᨴᩣᩈᩥ ᨿᩴ ᨽᩥᩴᩈᨶᨠᩴ, ᨲᨴᩣᩈᩥ ᩃᩮᩣᨾᩉᩴᩈᨶᩴ;

ᩈᨻ᩠ᨻᩣᨠᩣᩁᩅᩁᩪᨸᩮᨲᩮ, ᩈᨾ᩠ᨻᩩᨴ᩠ᨵᩮ ᨸᩁᩥᨶᩥᨻ᩠ᨻᩩᨲᩮ’’ᨲᩥ.

᪒᪒᪔. ᨸᩁᩥᨶᩥᨻ᩠ᨻᩩᨲᩮ ᨽᨣᩅᨲᩥ ᨿᩮ ᨲᩮ ᨲᨲ᩠ᨳ ᨽᩥᨠ᩠ᨡᩪ ᩋᩅᩦᨲᩁᩣᨣᩣ ᩋᨸ᩠ᨸᩮᨠᨧ᩠ᨧᩮ ᨻᩣᩉᩣ ᨸᨣ᩠ᨣᨿ᩠ᩉ ᨠᨶ᩠ᨴᨶ᩠ᨲᩥ, ᨨᩥᨶ᩠ᨶᨸᩣᨲᩴ ᨸᨸᨲᨶ᩠ᨲᩥ, ᩌᩅᨭ᩠ᨭᨶ᩠ᨲᩥ ᩅᩥᩅᨭ᩠ᨭᨶ᩠ᨲᩥ, ‘‘ᩋᨲᩥᨡᩥᨸ᩠ᨸᩴ ᨽᨣᩅᩣ ᨸᩁᩥᨶᩥᨻ᩠ᨻᩩᨲᩮᩣ, ᩋᨲᩥᨡᩥᨸ᩠ᨸᩴ ᩈᩩᨣᨲᩮᩣ ᨸᩁᩥᨶᩥᨻ᩠ᨻᩩᨲᩮᩣ, ᩋᨲᩥᨡᩥᨸ᩠ᨸᩴ ᨧᨠ᩠ᨡᩩᩴ ᩃᩮᩣᨠᩮ ᩋᨶ᩠ᨲᩁᩉᩥᨲᩮᩣ’’ᨲᩥ. ᨿᩮ ᨸᨶ ᨲᩮ ᨽᩥᨠ᩠ᨡᩪ ᩅᩦᨲᩁᩣᨣᩣ, ᨲᩮ ᩈᨲᩣ ᩈᨾ᩠ᨸᨩᩣᨶᩣ ᩋᨵᩥᩅᩣᩈᩮᨶ᩠ᨲᩥ – ‘‘ᩋᨶᩥᨧ᩠ᨧᩣ ᩈᨦ᩠ᨡᩣᩁᩣ, ᨲᩴ ᨠᩩᨲᩮᨲ᩠ᨳ ᩃᨻ᩠ᨽᩣ’’ᨲᩥ.

᪒᪒᪕. ᩋᨳ ᨡᩮᩣ ᩌᨿᩈ᩠ᨾᩣ ᩋᨶᩩᩁᩩᨴ᩠ᨵᩮᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᩋᩃᩴ, ᩌᩅᩩᩈᩮᩣ, ᨾᩣ ᩈᩮᩣᨧᩥᨲ᩠ᨳ ᨾᩣ ᨸᩁᩥᨴᩮᩅᩥᨲ᩠ᨳ. ᨶᨶᩩ ᩑᨲᩴ, ᩌᩅᩩᩈᩮᩣ, ᨽᨣᩅᨲᩣ ᨸᨭᩥᨠᨧ᩠ᨧᩮᩅ ᩋᨠ᩠ᨡᩣᨲᩴ – ‘ᩈᨻ᩠ᨻᩮᩉᩮᩅ ᨸᩥᨿᩮᩉᩥ ᨾᨶᩣᨸᩮᩉᩥ ᨶᩣᨶᩣᨽᩣᩅᩮᩣ ᩅᩥᨶᩣᨽᩣᩅᩮᩣ ᩋᨬ᩠ᨬᨳᩣᨽᩣᩅᩮᩣ’. ᨲᩴ ᨠᩩᨲᩮᨲ᩠ᨳ, ᩌᩅᩩᩈᩮᩣ, ᩃᨻ᩠ᨽᩣ. ‘ᨿᩴ ᨲᩴ ᨩᩣᨲᩴ ᨽᩪᨲᩴ ᩈᨦ᩠ᨡᨲᩴ ᨸᩃᩮᩣᨠᨵᨾ᩠ᨾᩴ, ᨲᩴ ᩅᨲ ᨾᩣ ᨸᩃᩩᨩ᩠ᨩᩦ’ᨲᩥ, ᨶᩮᨲᩴ ᨮᩣᨶᩴ ᩅᩥᨩ᩠ᨩᨲᩥ. ᨴᩮᩅᨲᩣ, ᩌᩅᩩᩈᩮᩣ, ᩏᨩ᩠ᨫᩣᨿᨶ᩠ᨲᩦ’’ᨲᩥ. ‘‘ᨠᨳᩴᨽᩪᨲᩣ ᨸᨶ, ᨽᨶ᩠ᨲᩮ, ᩌᨿᩈ᩠ᨾᩣ ᩋᨶᩩᩁᩩᨴ᩠ᨵᩮᩣ ᨴᩮᩅᨲᩣ ᨾᨶᩈᩥ ᨠᩁᩮᩣᨲᩦ’’ᨲᩥ [ᨽᨶ᩠ᨲᩮ ᩋᨶᩩᩁᩩᨴ᩠ᨵ ᨴᩮᩅᨲᩣ ᨾᨶᩈᩥ ᨠᩁᩮᩣᨶ᩠ᨲᩦᨲᩥ (ᩈ᩠ᨿᩣ. ᨠ.)]?

‘‘ᩈᨶ᩠ᨲᩣᩅᩩᩈᩮᩣ ᩌᨶᨶ᩠ᨴ, ᨴᩮᩅᨲᩣ ᩌᨠᩣᩈᩮ ᨸᨳᩅᩦᩈᨬ᩠ᨬᩥᨶᩥᨿᩮᩣ ᨠᩮᩈᩮ ᨸᨠᩥᩁᩥᨿ ᨠᨶ᩠ᨴᨶ᩠ᨲᩥ, ᨻᩣᩉᩣ ᨸᨣ᩠ᨣᨿ᩠ᩉ ᨠᨶ᩠ᨴᨶ᩠ᨲᩥ, ᨨᩥᨶ᩠ᨶᨸᩣᨲᩴ ᨸᨸᨲᨶ᩠ᨲᩥ, ᩌᩅᨭ᩠ᨭᨶ᩠ᨲᩥ, ᩅᩥᩅᨭ᩠ᨭᨶ᩠ᨲᩥ – ‘ᩋᨲᩥᨡᩥᨸ᩠ᨸᩴ ᨽᨣᩅᩣ ᨸᩁᩥᨶᩥᨻ᩠ᨻᩩᨲᩮᩣ, ᩋᨲᩥᨡᩥᨸ᩠ᨸᩴ ᩈᩩᨣᨲᩮᩣ ᨸᩁᩥᨶᩥᨻ᩠ᨻᩩᨲᩮᩣ, ᩋᨲᩥᨡᩥᨸ᩠ᨸᩴ ᨧᨠ᩠ᨡᩩᩴ ᩃᩮᩣᨠᩮ ᩋᨶ᩠ᨲᩁᩉᩥᨲᩮᩣ’ᨲᩥ. ᩈᨶ᩠ᨲᩣᩅᩩᩈᩮᩣ ᩌᨶᨶ᩠ᨴ, ᨴᩮᩅᨲᩣ ᨸᨳᩅᩥᨿᩣ ᨸᨳᩅᩦᩈᨬ᩠ᨬᩥᨶᩥᨿᩮᩣ ᨠᩮᩈᩮ ᨸᨠᩥᩁᩥᨿ ᨠᨶ᩠ᨴᨶ᩠ᨲᩥ, ᨻᩣᩉᩣ ᨸᨣ᩠ᨣᨿ᩠ᩉ ᨠᨶ᩠ᨴᨶ᩠ᨲᩥ, ᨨᩥᨶ᩠ᨶᨸᩣᨲᩴ ᨸᨸᨲᨶ᩠ᨲᩥ, ᩌᩅᨭ᩠ᨭᨶ᩠ᨲᩥ, ᩅᩥᩅᨭ᩠ᨭᨶ᩠ᨲᩥ – ‘ᩋᨲᩥᨡᩥᨸ᩠ᨸᩴ ᨽᨣᩅᩣ ᨸᩁᩥᨶᩥᨻ᩠ᨻᩩᨲᩮᩣ, ᩋᨲᩥᨡᩥᨸ᩠ᨸᩴ ᩈᩩᨣᨲᩮᩣ ᨸᩁᩥᨶᩥᨻ᩠ᨻᩩᨲᩮᩣ, ᩋᨲᩥᨡᩥᨸ᩠ᨸᩴ ᨧᨠ᩠ᨡᩩᩴ ᩃᩮᩣᨠᩮ ᩋᨶ᩠ᨲᩁᩉᩥᨲᩮᩣ’ᨲᩥ. ᨿᩣ ᨸᨶ ᨲᩣ ᨴᩮᩅᨲᩣ ᩅᩦᨲᩁᩣᨣᩣ, ᨲᩣ ᩈᨲᩣ ᩈᨾ᩠ᨸᨩᩣᨶᩣ ᩋᨵᩥᩅᩣᩈᩮᨶ᩠ᨲᩥ – ‘ᩋᨶᩥᨧ᩠ᨧᩣ ᩈᨦ᩠ᨡᩣᩁᩣ, ᨲᩴ ᨠᩩᨲᩮᨲ᩠ᨳ ᩃᨻ᩠ᨽᩣ’ᨲᩥ. ᩋᨳ ᨡᩮᩣ ᩌᨿᩈ᩠ᨾᩣ ᨧ ᩋᨶᩩᩁᩩᨴ᩠ᨵᩮᩣ ᩌᨿᩈ᩠ᨾᩣ ᨧ ᩌᨶᨶ᩠ᨴᩮᩣ ᨲᩴ ᩁᨲ᩠ᨲᩣᩅᩈᩮᩈᩴ ᨵᨾ᩠ᨾᩥᨿᩣ ᨠᨳᩣᨿ ᩅᩦᨲᩥᨶᩣᨾᩮᩈᩩᩴ.

᪒᪒᪖. ᩋᨳ ᨡᩮᩣ ᩌᨿᩈ᩠ᨾᩣ ᩋᨶᩩᩁᩩᨴ᩠ᨵᩮᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩌᨾᨶ᩠ᨲᩮᩈᩥ – ‘‘ᨣᨧ᩠ᨨᩣᩅᩩᩈᩮᩣ ᩌᨶᨶ᩠ᨴ, ᨠᩩᩈᩥᨶᩣᩁᩴ ᨸᩅᩥᩈᩥᨲ᩠ᩅᩣ ᨠᩮᩣᩈᩥᨶᩣᩁᨠᩣᨶᩴ ᨾᩃ᩠ᩃᩣᨶᩴ ᩌᩁᩮᩣᨧᩮᩉᩥ – ‘ᨸᩁᩥᨶᩥᨻ᩠ᨻᩩᨲᩮᩣ, ᩅᩣᩈᩮᨭ᩠ᨮᩣ, ᨽᨣᩅᩣ, ᨿᩔᨴᩣᨶᩥ ᨠᩣᩃᩴ ᨾᨬ᩠ᨬᨳᩣ’’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᩌᨿᩈ᩠ᨾᨲᩮᩣ ᩋᨶᩩᩁᩩᨴ᩠ᨵᩔ ᨸᨭᩥᩔᩩᨲ᩠ᩅᩣ ᨸᩩᨻ᩠ᨻᨱ᩠ᩉᩈᨾᨿᩴ ᨶᩥᩅᩣᩈᩮᨲ᩠ᩅᩣ ᨸᨲ᩠ᨲᨧᩦᩅᩁᨾᩣᨴᩣᨿ ᩋᨲ᩠ᨲᨴᩩᨲᩥᨿᩮᩣ ᨠᩩᩈᩥᨶᩣᩁᩴ ᨸᩣᩅᩥᩈᩥ. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨠᩮᩣᩈᩥᨶᩣᩁᨠᩣ ᨾᩃ᩠ᩃᩣ ᩈᨶ᩠ᨵᩣᨣᩣᩁᩮ ᩈᨶ᩠ᨶᩥᨸᨲᩥᨲᩣ ᩉᩮᩣᨶ᩠ᨲᩥ ᨲᩮᨶᩮᩅ ᨠᩁᨱᩦᨿᩮᨶ. ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨿᩮᨶ ᨠᩮᩣᩈᩥᨶᩣᩁᨠᩣᨶᩴ ᨾᩃ᩠ᩃᩣᨶᩴ ᩈᨶ᩠ᨵᩣᨣᩣᩁᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨠᩮᩣᩈᩥᨶᩣᩁᨠᩣᨶᩴ ᨾᩃ᩠ᩃᩣᨶᩴ ᩌᩁᩮᩣᨧᩮᩈᩥ – ‘ᨸᩁᩥᨶᩥᨻ᩠ᨻᩩᨲᩮᩣ, ᩅᩣᩈᩮᨭ᩠ᨮᩣ, ᨽᨣᩅᩣ, ᨿᩔᨴᩣᨶᩥ ᨠᩣᩃᩴ ᨾᨬ᩠ᨬᨳᩣ’ᨲᩥ. ᩍᨴᨾᩣᨿᩈ᩠ᨾᨲᩮᩣ ᩌᨶᨶ᩠ᨴᩔ ᩅᨧᨶᩴ ᩈᩩᨲ᩠ᩅᩣ ᨾᩃ᩠ᩃᩣ ᨧ ᨾᩃ᩠ᩃᨸᩩᨲ᩠ᨲᩣ ᨧ ᨾᩃ᩠ᩃᩈᩩᨱᩥᩈᩣ ᨧ ᨾᩃ᩠ᩃᨸᨩᩣᨸᨲᩥᨿᩮᩣ ᨧ ᩋᨥᩣᩅᩥᨶᩮᩣ ᨴᩩᨾ᩠ᨾᨶᩣ ᨧᩮᨲᩮᩣᨴᩩᨠ᩠ᨡᩈᨾᨸ᩠ᨸᩥᨲᩣ ᩋᨸ᩠ᨸᩮᨠᨧ᩠ᨧᩮ ᨠᩮᩈᩮ ᨸᨠᩥᩁᩥᨿ ᨠᨶ᩠ᨴᨶ᩠ᨲᩥ, ᨻᩣᩉᩣ ᨸᨣ᩠ᨣᨿ᩠ᩉ ᨠᨶ᩠ᨴᨶ᩠ᨲᩥ, ᨨᩥᨶ᩠ᨶᨸᩣᨲᩴ ᨸᨸᨲᨶ᩠ᨲᩥ, ᩌᩅᨭ᩠ᨭᨶ᩠ᨲᩥ, ᩅᩥᩅᨭ᩠ᨭᨶ᩠ᨲᩥ – ‘‘ᩋᨲᩥᨡᩥᨸ᩠ᨸᩴ ᨽᨣᩅᩣ ᨸᩁᩥᨶᩥᨻ᩠ᨻᩩᨲᩮᩣ, ᩋᨲᩥᨡᩥᨸ᩠ᨸᩴ ᩈᩩᨣᨲᩮᩣ ᨸᩁᩥᨶᩥᨻ᩠ᨻᩩᨲᩮᩣ, ᩋᨲᩥᨡᩥᨸ᩠ᨸᩴ ᨧᨠ᩠ᨡᩩᩴ ᩃᩮᩣᨠᩮ ᩋᨶ᩠ᨲᩁᩉᩥᨲᩮᩣ’’ᨲᩥ.

ᨻᩩᨴ᩠ᨵᩈᩁᩦᩁᨸᩪᨩᩣ

᪒᪒᪗. ᩋᨳ ᨡᩮᩣ ᨠᩮᩣᩈᩥᨶᩣᩁᨠᩣ ᨾᩃ᩠ᩃᩣ ᨸᩩᩁᩥᩈᩮ ᩌᨱᩣᨸᩮᩈᩩᩴ – ‘‘ᨲᩮᨶ ᩉᩥ, ᨽᨱᩮ, ᨠᩩᩈᩥᨶᩣᩁᩣᨿᩴ ᨣᨶ᩠ᨵᨾᩣᩃᨬ᩠ᨧ ᩈᨻ᩠ᨻᨬ᩠ᨧ ᨲᩣᩊᩣᩅᨧᩁᩴ ᩈᨶ᩠ᨶᩥᨸᩣᨲᩮᨳᩣ’’ᨲᩥ. ᩋᨳ ᨡᩮᩣ ᨠᩮᩣᩈᩥᨶᩣᩁᨠᩣ ᨾᩃ᩠ᩃᩣ ᨣᨶ᩠ᨵᨾᩣᩃᨬ᩠ᨧ ᩈᨻ᩠ᨻᨬ᩠ᨧ ᨲᩣᩊᩣᩅᨧᩁᩴ ᨸᨬ᩠ᨧ ᨧ ᨴᩩᩔᨿᩩᨣᩈᨲᩣᨶᩥ ᩌᨴᩣᨿ ᨿᩮᨶ ᩏᨸᩅᨲ᩠ᨲᨶᩴ ᨾᩃ᩠ᩃᩣᨶᩴ ᩈᩣᩃᩅᨶᩴ, ᨿᩮᨶ ᨽᨣᩅᨲᩮᩣ ᩈᩁᩦᩁᩴ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨲᩮᩣ ᩈᩁᩦᩁᩴ ᨶᨧ᩠ᨧᩮᩉᩥ ᨣᩦᨲᩮᩉᩥ ᩅᩣᨴᩥᨲᩮᩉᩥ ᨾᩣᩃᩮᩉᩥ ᨣᨶ᩠ᨵᩮᩉᩥ ᩈᨠ᩠ᨠᩁᩮᩣᨶ᩠ᨲᩣ ᨣᩁᩩᩴ ᨠᩁᩮᩣᨶ᩠ᨲᩣ ᨾᩣᨶᩮᨶ᩠ᨲᩣ ᨸᩪᨩᩮᨶ᩠ᨲᩣ ᨧᩮᩃᩅᩥᨲᩣᨶᩣᨶᩥ ᨠᩁᩮᩣᨶ᩠ᨲᩣ ᨾᨱ᩠ᨯᩃᨾᩣᩊᩮ ᨸᨭᩥᨿᩣᨴᩮᨶ᩠ᨲᩣ ᩑᨠᨴᩥᩅᩈᩴ ᩅᩦᨲᩥᨶᩣᨾᩮᩈᩩᩴ.

ᩋᨳ ᨡᩮᩣ ᨠᩮᩣᩈᩥᨶᩣᩁᨠᩣᨶᩴ ᨾᩃ᩠ᩃᩣᨶᩴ ᩑᨲᨴᩉᩮᩣᩈᩥ – ‘‘ᩋᨲᩥᩅᩥᨠᩣᩃᩮᩣ ᨡᩮᩣ ᩋᨩ᩠ᨩ ᨽᨣᩅᨲᩮᩣ ᩈᩁᩦᩁᩴ ᨫᩣᨸᩮᨲᩩᩴ, ᩈ᩠ᩅᩮ ᨴᩣᨶᩥ ᨾᨿᩴ ᨽᨣᩅᨲᩮᩣ ᩈᩁᩦᩁᩴ ᨫᩣᨸᩮᩔᩣᨾᩣ’’ᨲᩥ. ᩋᨳ ᨡᩮᩣ ᨠᩮᩣᩈᩥᨶᩣᩁᨠᩣ ᨾᩃ᩠ᩃᩣ ᨽᨣᩅᨲᩮᩣ ᩈᩁᩦᩁᩴ ᨶᨧ᩠ᨧᩮᩉᩥ ᨣᩦᨲᩮᩉᩥ ᩅᩣᨴᩥᨲᩮᩉᩥ ᨾᩣᩃᩮᩉᩥ ᨣᨶ᩠ᨵᩮᩉᩥ ᩈᨠ᩠ᨠᩁᩮᩣᨶ᩠ᨲᩣ ᨣᩁᩩᩴ ᨠᩁᩮᩣᨶ᩠ᨲᩣ ᨾᩣᨶᩮᨶ᩠ᨲᩣ ᨸᩪᨩᩮᨶ᩠ᨲᩣ ᨧᩮᩃᩅᩥᨲᩣᨶᩣᨶᩥ ᨠᩁᩮᩣᨶ᩠ᨲᩣ ᨾᨱ᩠ᨯᩃᨾᩣᩊᩮ ᨸᨭᩥᨿᩣᨴᩮᨶ᩠ᨲᩣ ᨴᩩᨲᩥᨿᨾ᩠ᨸᩥ ᨴᩥᩅᩈᩴ ᩅᩦᨲᩥᨶᩣᨾᩮᩈᩩᩴ, ᨲᨲᩥᨿᨾ᩠ᨸᩥ ᨴᩥᩅᩈᩴ ᩅᩦᨲᩥᨶᩣᨾᩮᩈᩩᩴ, ᨧᨲᩩᨲ᩠ᨳᨾ᩠ᨸᩥ ᨴᩥᩅᩈᩴ ᩅᩦᨲᩥᨶᩣᨾᩮᩈᩩᩴ, ᨸᨬ᩠ᨧᨾᨾ᩠ᨸᩥ ᨴᩥᩅᩈᩴ ᩅᩦᨲᩥᨶᩣᨾᩮᩈᩩᩴ, ᨨᨭ᩠ᨮᨾ᩠ᨸᩥ ᨴᩥᩅᩈᩴ ᩅᩦᨲᩥᨶᩣᨾᩮᩈᩩᩴ.

ᩋᨳ ᨡᩮᩣ ᩈᨲ᩠ᨲᨾᩴ ᨴᩥᩅᩈᩴ ᨠᩮᩣᩈᩥᨶᩣᩁᨠᩣᨶᩴ ᨾᩃ᩠ᩃᩣᨶᩴ ᩑᨲᨴᩉᩮᩣᩈᩥ – ‘‘ᨾᨿᩴ ᨽᨣᩅᨲᩮᩣ ᩈᩁᩦᩁᩴ ᨶᨧ᩠ᨧᩮᩉᩥ ᨣᩦᨲᩮᩉᩥ ᩅᩣᨴᩥᨲᩮᩉᩥ ᨾᩣᩃᩮᩉᩥ ᨣᨶ᩠ᨵᩮᩉᩥ ᩈᨠ᩠ᨠᩁᩮᩣᨶ᩠ᨲᩣ ᨣᩁᩩᩴ ᨠᩁᩮᩣᨶ᩠ᨲᩣ ᨾᩣᨶᩮᨶ᩠ᨲᩣ ᨸᩪᨩᩮᨶ᩠ᨲᩣ ᨴᨠ᩠ᨡᩥᨱᩮᨶ ᨴᨠ᩠ᨡᩥᨱᩴ ᨶᨣᩁᩔ ᩉᩁᩥᨲ᩠ᩅᩣ ᨻᩣᩉᩥᩁᩮᨶ ᨻᩣᩉᩥᩁᩴ ᨴᨠ᩠ᨡᩥᨱᨲᩮᩣ ᨶᨣᩁᩔ ᨽᨣᩅᨲᩮᩣ ᩈᩁᩦᩁᩴ ᨫᩣᨸᩮᩔᩣᨾᩣ’’ᨲᩥ.

᪒᪒᪘. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩋᨭ᩠ᨮ ᨾᩃ᩠ᩃᨸᩣᨾᩮᩣᨠ᩠ᨡᩣ ᩈᩦᩈᩴᨶ᩠ᩉᩣᨲᩣ ᩋᩉᨲᩣᨶᩥ ᩅᨲ᩠ᨳᩣᨶᩥ ᨶᩥᩅᨲ᩠ᨳᩣ ‘‘ᨾᨿᩴ ᨽᨣᩅᨲᩮᩣ ᩈᩁᩦᩁᩴ ᩏᨧ᩠ᨧᩣᩁᩮᩔᩣᨾᩣ’’ᨲᩥ ᨶ ᩈᨠ᩠ᨠᩮᩣᨶ᩠ᨲᩥ ᩏᨧ᩠ᨧᩣᩁᩮᨲᩩᩴ. ᩋᨳ ᨡᩮᩣ ᨠᩮᩣᩈᩥᨶᩣᩁᨠᩣ ᨾᩃ᩠ᩃᩣ ᩌᨿᩈ᩠ᨾᨶ᩠ᨲᩴ ᩋᨶᩩᩁᩩᨴ᩠ᨵᩴ ᩑᨲᨴᩅᩮᩣᨧᩩᩴ – ‘‘ᨠᩮᩣ ᨶᩩ ᨡᩮᩣ, ᨽᨶ᩠ᨲᩮ ᩋᨶᩩᩁᩩᨴ᩠ᨵ, ᩉᩮᨲᩩ ᨠᩮᩣ ᨸᨧ᩠ᨧᨿᩮᩣ, ᨿᩮᨶᩥᨾᩮ ᩋᨭ᩠ᨮ ᨾᩃ᩠ᩃᨸᩣᨾᩮᩣᨠ᩠ᨡᩣ ᩈᩦᩈᩴᨶ᩠ᩉᩣᨲᩣ ᩋᩉᨲᩣᨶᩥ ᩅᨲ᩠ᨳᩣᨶᩥ ᨶᩥᩅᨲ᩠ᨳᩣ ‘ᨾᨿᩴ ᨽᨣᩅᨲᩮᩣ ᩈᩁᩦᩁᩴ ᩏᨧ᩠ᨧᩣᩁᩮᩔᩣᨾᩣ’ᨲᩥ ᨶ ᩈᨠ᩠ᨠᩮᩣᨶ᩠ᨲᩥ ᩏᨧ᩠ᨧᩣᩁᩮᨲᩩ’’ᨶ᩠ᨲᩥ? ‘‘ᩋᨬ᩠ᨬᨳᩣ ᨡᩮᩣ, ᩅᩣᩈᩮᨭ᩠ᨮᩣ, ᨲᩩᨾ᩠ᩉᩣᨠᩴ ᩋᨵᩥᨸ᩠ᨸᩣᨿᩮᩣ, ᩋᨬ᩠ᨬᨳᩣ ᨴᩮᩅᨲᩣᨶᩴ ᩋᨵᩥᨸ᩠ᨸᩣᨿᩮᩣ’’ᨲᩥ. ‘‘ᨠᨳᩴ ᨸᨶ, ᨽᨶ᩠ᨲᩮ, ᨴᩮᩅᨲᩣᨶᩴ ᩋᨵᩥᨸ᩠ᨸᩣᨿᩮᩣ’’ᨲᩥ? ‘‘ᨲᩩᨾ᩠ᩉᩣᨠᩴ ᨡᩮᩣ, ᩅᩣᩈᩮᨭ᩠ᨮᩣ, ᩋᨵᩥᨸ᩠ᨸᩣᨿᩮᩣ – ‘ᨾᨿᩴ ᨽᨣᩅᨲᩮᩣ ᩈᩁᩦᩁᩴ ᨶᨧ᩠ᨧᩮᩉᩥ ᨣᩦᨲᩮᩉᩥ ᩅᩣᨴᩥᨲᩮᩉᩥ ᨾᩣᩃᩮᩉᩥ ᨣᨶ᩠ᨵᩮᩉᩥ ᩈᨠ᩠ᨠᩁᩮᩣᨶ᩠ᨲᩣ ᨣᩁᩩᩴ ᨠᩁᩮᩣᨶ᩠ᨲᩣ ᨾᩣᨶᩮᨶ᩠ᨲᩣ ᨸᩪᨩᩮᨶ᩠ᨲᩣ ᨴᨠ᩠ᨡᩥᨱᩮᨶ ᨴᨠ᩠ᨡᩥᨱᩴ ᨶᨣᩁᩔ ᩉᩁᩥᨲ᩠ᩅᩣ ᨻᩣᩉᩥᩁᩮᨶ ᨻᩣᩉᩥᩁᩴ ᨴᨠ᩠ᨡᩥᨱᨲᩮᩣ ᨶᨣᩁᩔ ᨽᨣᩅᨲᩮᩣ ᩈᩁᩦᩁᩴ ᨫᩣᨸᩮᩔᩣᨾᩣ’ᨲᩥ; ᨴᩮᩅᨲᩣᨶᩴ ᨡᩮᩣ, ᩅᩣᩈᩮᨭ᩠ᨮᩣ, ᩋᨵᩥᨸ᩠ᨸᩣᨿᩮᩣ – ‘ᨾᨿᩴ ᨽᨣᩅᨲᩮᩣ ᩈᩁᩦᩁᩴ ᨴᩥᨻ᩠ᨻᩮᩉᩥ ᨶᨧ᩠ᨧᩮᩉᩥ ᨣᩦᨲᩮᩉᩥ ᩅᩣᨴᩥᨲᩮᩉᩥ ᨣᨶ᩠ᨵᩮᩉᩥ ᩈᨠ᩠ᨠᩁᩮᩣᨶ᩠ᨲᩣ ᨣᩁᩩᩴ ᨠᩁᩮᩣᨶ᩠ᨲᩣ ᨾᩣᨶᩮᨶ᩠ᨲᩣ ᨸᩪᨩᩮᨶ᩠ᨲᩣ ᩏᨲ᩠ᨲᩁᩮᨶ ᩏᨲ᩠ᨲᩁᩴ ᨶᨣᩁᩔ ᩉᩁᩥᨲ᩠ᩅᩣ ᩏᨲ᩠ᨲᩁᩮᨶ ᨴ᩠ᩅᩣᩁᩮᨶ ᨶᨣᩁᩴ ᨸᩅᩮᩈᩮᨲ᩠ᩅᩣ ᨾᨩ᩠ᨫᩮᨶ ᨾᨩ᩠ᨫᩴ ᨶᨣᩁᩔ ᩉᩁᩥᨲ᩠ᩅᩣ ᨸᩩᩁᨲ᩠ᨳᩥᨾᩮᨶ ᨴ᩠ᩅᩣᩁᩮᨶ ᨶᩥᨠ᩠ᨡᨾᩥᨲ᩠ᩅᩣ ᨸᩩᩁᨲ᩠ᨳᩥᨾᨲᩮᩣ ᨶᨣᩁᩔ ᨾᨠᩩᨭᨻᨶ᩠ᨵᨶᩴ ᨶᩣᨾ ᨾᩃ᩠ᩃᩣᨶᩴ ᨧᩮᨲᩥᨿᩴ ᩑᨲ᩠ᨳ ᨽᨣᩅᨲᩮᩣ ᩈᩁᩦᩁᩴ ᨫᩣᨸᩮᩔᩣᨾᩣ’ᨲᩥ. ‘‘ᨿᨳᩣ, ᨽᨶ᩠ᨲᩮ, ᨴᩮᩅᨲᩣᨶᩴ ᩋᨵᩥᨸ᩠ᨸᩣᨿᩮᩣ, ᨲᨳᩣ ᩉᩮᩣᨲᩪ’’ᨲᩥ.

᪒᪒᪙. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨠᩩᩈᩥᨶᩣᩁᩣ ᨿᩣᩅ ᩈᨶ᩠ᨵᩥᩈᨾᩃᩈᩴᨠᨭᩦᩁᩣ ᨩᨱ᩠ᨱᩩᨾᨲ᩠ᨲᩮᨶ ᩒᨵᩥᨶᩣ ᨾᨶ᩠ᨴᩣᩁᩅᨸᩩᨸ᩠ᨹᩮᩉᩥ ᩈᨶ᩠ᨳᨲᩣ [ᩈᨱ᩠ᨮᩥᨲᩣ (ᩈ᩠ᨿᩣ.)] ᩉᩮᩣᨲᩥ. ᩋᨳ ᨡᩮᩣ ᨴᩮᩅᨲᩣ ᨧ ᨠᩮᩣᩈᩥᨶᩣᩁᨠᩣ ᨧ ᨾᩃ᩠ᩃᩣ ᨽᨣᩅᨲᩮᩣ ᩈᩁᩦᩁᩴ ᨴᩥᨻ᩠ᨻᩮᩉᩥ ᨧ ᨾᩣᨶᩩᩈᨠᩮᩉᩥ ᨧ ᨶᨧ᩠ᨧᩮᩉᩥ ᨣᩦᨲᩮᩉᩥ ᩅᩣᨴᩥᨲᩮᩉᩥ ᨾᩣᩃᩮᩉᩥ ᨣᨶ᩠ᨵᩮᩉᩥ ᩈᨠ᩠ᨠᩁᩮᩣᨶ᩠ᨲᩣ ᨣᩁᩩᩴ ᨠᩁᩮᩣᨶ᩠ᨲᩣ ᨾᩣᨶᩮᨶ᩠ᨲᩣ ᨸᩪᨩᩮᨶ᩠ᨲᩣ ᩏᨲ᩠ᨲᩁᩮᨶ ᩏᨲ᩠ᨲᩁᩴ ᨶᨣᩁᩔ ᩉᩁᩥᨲ᩠ᩅᩣ ᩏᨲ᩠ᨲᩁᩮᨶ ᨴ᩠ᩅᩣᩁᩮᨶ ᨶᨣᩁᩴ ᨸᩅᩮᩈᩮᨲ᩠ᩅᩣ ᨾᨩ᩠ᨫᩮᨶ ᨾᨩ᩠ᨫᩴ ᨶᨣᩁᩔ ᩉᩁᩥᨲ᩠ᩅᩣ ᨸᩩᩁᨲ᩠ᨳᩥᨾᩮᨶ ᨴ᩠ᩅᩣᩁᩮᨶ ᨶᩥᨠ᩠ᨡᨾᩥᨲ᩠ᩅᩣ ᨸᩩᩁᨲ᩠ᨳᩥᨾᨲᩮᩣ ᨶᨣᩁᩔ ᨾᨠᩩᨭᨻᨶ᩠ᨵᨶᩴ ᨶᩣᨾ ᨾᩃ᩠ᩃᩣᨶᩴ ᨧᩮᨲᩥᨿᩴ ᩑᨲ᩠ᨳ ᨧ ᨽᨣᩅᨲᩮᩣ ᩈᩁᩦᩁᩴ ᨶᩥᨠ᩠ᨡᩥᨸᩥᩴᩈᩩ.

᪒᪓᪐. ᩋᨳ ᨡᩮᩣ ᨠᩮᩣᩈᩥᨶᩣᩁᨠᩣ ᨾᩃ᩠ᩃᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩑᨲᨴᩅᩮᩣᨧᩩᩴ – ‘‘ᨠᨳᩴ ᨾᨿᩴ, ᨽᨶ᩠ᨲᩮ ᩌᨶᨶ᩠ᨴ, ᨲᨳᩣᨣᨲᩔ ᩈᩁᩦᩁᩮ ᨸᨭᩥᨸᨩ᩠ᨩᩣᨾᩣ’’ᨲᩥ? ‘‘ᨿᨳᩣ ᨡᩮᩣ, ᩅᩣᩈᩮᨭ᩠ᨮᩣ, ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩈᩁᩦᩁᩮ ᨸᨭᩥᨸᨩ᩠ᨩᨶ᩠ᨲᩥ, ᩑᩅᩴ ᨲᨳᩣᨣᨲᩔ ᩈᩁᩦᩁᩮ ᨸᨭᩥᨸᨩ᩠ᨩᩥᨲᨻ᩠ᨻ’’ᨶ᩠ᨲᩥ. ‘‘ᨠᨳᩴ ᨸᨶ, ᨽᨶ᩠ᨲᩮ ᩌᨶᨶ᩠ᨴ, ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩈᩁᩦᩁᩮ ᨸᨭᩥᨸᨩ᩠ᨩᨶ᩠ᨲᩦ’’ᨲᩥ? ‘‘ᩁᨬ᩠ᨬᩮᩣ, ᩅᩣᩈᩮᨭ᩠ᨮᩣ, ᨧᨠ᩠ᨠᩅᨲ᩠ᨲᩥᩔ ᩈᩁᩦᩁᩴ ᩋᩉᨲᩮᨶ ᩅᨲ᩠ᨳᩮᨶ ᩅᩮᨮᩮᨶ᩠ᨲᩥ, ᩋᩉᨲᩮᨶ ᩅᨲ᩠ᨳᩮᨶ ᩅᩮᨮᩮᨲ᩠ᩅᩣ ᩅᩥᩉᨲᩮᨶ ᨠᨸ᩠ᨸᩣᩈᩮᨶ ᩅᩮᨮᩮᨶ᩠ᨲᩥ, ᩅᩥᩉᨲᩮᨶ ᨠᨸ᩠ᨸᩣᩈᩮᨶ ᩅᩮᨮᩮᨲ᩠ᩅᩣ ᩋᩉᨲᩮᨶ ᩅᨲ᩠ᨳᩮᨶ ᩅᩮᨮᩮᨶ᩠ᨲᩥ. ᩑᨲᩮᨶ ᩏᨸᩣᨿᩮᨶ ᨸᨬ᩠ᨧᩉᩥ ᨿᩩᨣᩈᨲᩮᩉᩥ ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩈᩁᩦᩁᩴ ᩅᩮᨮᩮᨲ᩠ᩅᩣ ᩌᨿᩈᩣᨿ ᨲᩮᩃᨴᩮᩣᨱᩥᨿᩣ ᨸᨠ᩠ᨡᩥᨸᩥᨲ᩠ᩅᩣ ᩋᨬ᩠ᨬᩥᩔᩣ ᩌᨿᩈᩣᨿ ᨴᩮᩣᨱᩥᨿᩣ ᨸᨭᩥᨠᩩᨩ᩠ᨩᩥᨲ᩠ᩅᩣ ᩈᨻ᩠ᨻᨣᨶ᩠ᨵᩣᨶᩴ ᨧᩥᨲᨠᩴ ᨠᩁᩥᨲ᩠ᩅᩣ ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩈᩁᩦᩁᩴ ᨫᩣᨸᩮᨶ᩠ᨲᩥ. ᨧᩣᨲᩩᨾᩉᩣᨸᨳᩮ ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᨳᩪᨸᩴ ᨠᩁᩮᩣᨶ᩠ᨲᩥ. ᩑᩅᩴ ᨡᩮᩣ, ᩅᩣᩈᩮᨭ᩠ᨮᩣ, ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩈᩁᩦᩁᩮ ᨸᨭᩥᨸᨩ᩠ᨩᨶ᩠ᨲᩥ. ᨿᨳᩣ ᨡᩮᩣ, ᩅᩣᩈᩮᨭ᩠ᨮᩣ, ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩈᩁᩦᩁᩮ ᨸᨭᩥᨸᨩ᩠ᨩᨶ᩠ᨲᩥ, ᩑᩅᩴ ᨲᨳᩣᨣᨲᩔ ᩈᩁᩦᩁᩮ ᨸᨭᩥᨸᨩ᩠ᨩᩥᨲᨻ᩠ᨻᩴ. ᨧᩣᨲᩩᨾᩉᩣᨸᨳᩮ ᨲᨳᩣᨣᨲᩔ ᨳᩪᨸᩮᩣ ᨠᩣᨲᨻ᩠ᨻᩮᩣ. ᨲᨲ᩠ᨳ ᨿᩮ ᨾᩣᩃᩴ ᩅᩣ ᨣᨶ᩠ᨵᩴ ᩅᩣ ᨧᩩᨱ᩠ᨱᨠᩴ ᩅᩣ ᩌᩁᩮᩣᨸᩮᩔᨶ᩠ᨲᩥ ᩅᩣ ᩋᨽᩥᩅᩣᨴᩮᩔᨶ᩠ᨲᩥ ᩅᩣ ᨧᩥᨲ᩠ᨲᩴ ᩅᩣ ᨸᩈᩣᨴᩮᩔᨶ᩠ᨲᩥ, ᨲᩮᩈᩴ ᨲᩴ ᨽᩅᩥᩔᨲᩥ ᨴᩦᨥᩁᨲ᩠ᨲᩴ ᩉᩥᨲᩣᨿ ᩈᩩᨡᩣᨿᩣ’’ᨲᩥ. ᩋᨳ ᨡᩮᩣ ᨠᩮᩣᩈᩥᨶᩣᩁᨠᩣ ᨾᩃ᩠ᩃᩣ ᨸᩩᩁᩥᩈᩮ ᩌᨱᩣᨸᩮᩈᩩᩴ – ‘‘ᨲᩮᨶ ᩉᩥ, ᨽᨱᩮ, ᨾᩃ᩠ᩃᩣᨶᩴ ᩅᩥᩉᨲᩴ ᨠᨸ᩠ᨸᩣᩈᩴ ᩈᨶ᩠ᨶᩥᨸᩣᨲᩮᨳᩣ’’ᨲᩥ.

ᩋᨳ ᨡᩮᩣ ᨠᩮᩣᩈᩥᨶᩣᩁᨠᩣ ᨾᩃ᩠ᩃᩣ ᨽᨣᩅᨲᩮᩣ ᩈᩁᩦᩁᩴ ᩋᩉᨲᩮᨶ ᩅᨲ᩠ᨳᩮᨶ ᩅᩮᨮᩮᨲ᩠ᩅᩣ ᩅᩥᩉᨲᩮᨶ ᨠᨸ᩠ᨸᩣᩈᩮᨶ ᩅᩮᨮᩮᩈᩩᩴ, ᩅᩥᩉᨲᩮᨶ ᨠᨸ᩠ᨸᩣᩈᩮᨶ ᩅᩮᨮᩮᨲ᩠ᩅᩣ ᩋᩉᨲᩮᨶ ᩅᨲ᩠ᨳᩮᨶ ᩅᩮᨮᩮᩈᩩᩴ. ᩑᨲᩮᨶ ᩏᨸᩣᨿᩮᨶ ᨸᨬ᩠ᨧᩉᩥ ᨿᩩᨣᩈᨲᩮᩉᩥ ᨽᨣᩅᨲᩮᩣ ᩈᩁᩦᩁᩴ ᩅᩮᨮᩮᨲ᩠ᩅᩣ ᩌᨿᩈᩣᨿ ᨲᩮᩃᨴᩮᩣᨱᩥᨿᩣ ᨸᨠ᩠ᨡᩥᨸᩥᨲ᩠ᩅᩣ ᩋᨬ᩠ᨬᩥᩔᩣ ᩌᨿᩈᩣᨿ ᨴᩮᩣᨱᩥᨿᩣ ᨸᨭᩥᨠᩩᨩ᩠ᨩᩥᨲ᩠ᩅᩣ ᩈᨻ᩠ᨻᨣᨶ᩠ᨵᩣᨶᩴ ᨧᩥᨲᨠᩴ ᨠᩁᩥᨲ᩠ᩅᩣ ᨽᨣᩅᨲᩮᩣ ᩈᩁᩦᩁᩴ ᨧᩥᨲᨠᩴ ᩌᩁᩮᩣᨸᩮᩈᩩᩴ.

ᨾᩉᩣᨠᩔᨸᨲ᩠ᨳᩮᩁᩅᨲ᩠ᨳᩩ

᪒᪓᪑. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩌᨿᩈ᩠ᨾᩣ ᨾᩉᩣᨠᩔᨸᩮᩣ ᨸᩣᩅᩣᨿ ᨠᩩᩈᩥᨶᩣᩁᩴ ᩋᨴ᩠ᨵᩣᨶᨾᨣ᩠ᨣᨸ᩠ᨸᨭᩥᨸ᩠ᨸᨶ᩠ᨶᩮᩣ ᩉᩮᩣᨲᩥ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨸᨬ᩠ᨧᨾᨲ᩠ᨲᩮᩉᩥ ᨽᩥᨠ᩠ᨡᩩᩈᨲᩮᩉᩥ. ᩋᨳ ᨡᩮᩣ ᩌᨿᩈ᩠ᨾᩣ ᨾᩉᩣᨠᩔᨸᩮᩣ ᨾᨣ᩠ᨣᩣ ᩒᨠ᩠ᨠᨾ᩠ᨾ ᩋᨬ᩠ᨬᨲᩁᩈ᩠ᨾᩥᩴ ᩁᩩᨠ᩠ᨡᨾᩪᩃᩮ ᨶᩥᩈᩦᨴᩥ. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩋᨬ᩠ᨬᨲᩁᩮᩣ ᩌᨩᩦᩅᨠᩮᩣ ᨠᩩᩈᩥᨶᩣᩁᩣᨿ ᨾᨶ᩠ᨴᩣᩁᩅᨸᩩᨸ᩠ᨹᩴ ᨣᩉᩮᨲ᩠ᩅᩣ ᨸᩣᩅᩴ ᩋᨴ᩠ᨵᩣᨶᨾᨣ᩠ᨣᨸ᩠ᨸᨭᩥᨸ᩠ᨸᨶ᩠ᨶᩮᩣ ᩉᩮᩣᨲᩥ. ᩋᨴ᩠ᨴᩈᩣ ᨡᩮᩣ ᩌᨿᩈ᩠ᨾᩣ ᨾᩉᩣᨠᩔᨸᩮᩣ ᨲᩴ ᩌᨩᩦᩅᨠᩴ ᨴᩪᩁᨲᩮᩣᩅ ᩌᨣᨧ᩠ᨨᨶ᩠ᨲᩴ, ᨴᩥᩈ᩠ᩅᩣ ᨲᩴ ᩌᨩᩦᩅᨠᩴ ᩑᨲᨴᩅᩮᩣᨧ – ‘‘ᩋᨸᩣᩅᩩᩈᩮᩣ, ᩋᨾ᩠ᩉᩣᨠᩴ ᩈᨲ᩠ᨳᩣᩁᩴ ᨩᩣᨶᩣᩈᩦ’’ᨲᩥ? ‘‘ᩌᨾᩣᩅᩩᩈᩮᩣ, ᨩᩣᨶᩣᨾᩥ, ᩋᨩ᩠ᨩ ᩈᨲ᩠ᨲᩣᩉᨸᩁᩥᨶᩥᨻ᩠ᨻᩩᨲᩮᩣ ᩈᨾᨱᩮᩣ ᨣᩮᩣᨲᨾᩮᩣ. ᨲᨲᩮᩣ ᨾᩮ ᩍᨴᩴ ᨾᨶ᩠ᨴᩣᩁᩅᨸᩩᨸ᩠ᨹᩴ ᨣᩉᩥᨲ’’ᨶ᩠ᨲᩥ. ᨲᨲ᩠ᨳ ᨿᩮ ᨲᩮ ᨽᩥᨠ᩠ᨡᩪ ᩋᩅᩦᨲᩁᩣᨣᩣ ᩋᨸ᩠ᨸᩮᨠᨧ᩠ᨧᩮ ᨻᩣᩉᩣ ᨸᨣ᩠ᨣᨿ᩠ᩉ ᨠᨶ᩠ᨴᨶ᩠ᨲᩥ, ᨨᩥᨶ᩠ᨶᨸᩣᨲᩴ ᨸᨸᨲᨶ᩠ᨲᩥ, ᩌᩅᨭ᩠ᨭᨶ᩠ᨲᩥ, ᩅᩥᩅᨭ᩠ᨭᨶ᩠ᨲᩥ – ‘‘ᩋᨲᩥᨡᩥᨸ᩠ᨸᩴ ᨽᨣᩅᩣ ᨸᩁᩥᨶᩥᨻ᩠ᨻᩩᨲᩮᩣ, ᩋᨲᩥᨡᩥᨸ᩠ᨸᩴ ᩈᩩᨣᨲᩮᩣ ᨸᩁᩥᨶᩥᨻ᩠ᨻᩩᨲᩮᩣ, ᩋᨲᩥᨡᩥᨸ᩠ᨸᩴ ᨧᨠ᩠ᨡᩩᩴ ᩃᩮᩣᨠᩮ ᩋᨶ᩠ᨲᩁᩉᩥᨲᩮᩣ’’ᨲᩥ. ᨿᩮ ᨸᨶ ᨲᩮ ᨽᩥᨠ᩠ᨡᩪ ᩅᩦᨲᩁᩣᨣᩣ, ᨲᩮ ᩈᨲᩣ ᩈᨾ᩠ᨸᨩᩣᨶᩣ ᩋᨵᩥᩅᩣᩈᩮᨶ᩠ᨲᩥ – ‘‘ᩋᨶᩥᨧ᩠ᨧᩣ ᩈᨦ᩠ᨡᩣᩁᩣ, ᨲᩴ ᨠᩩᨲᩮᨲ᩠ᨳ ᩃᨻ᩠ᨽᩣ’’ᨲᩥ.

᪒᪓᪒. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩈᩩᨽᨴ᩠ᨴᩮᩣ ᨶᩣᨾ ᩅᩩᨴ᩠ᨵᨸᨻ᩠ᨻᨩᩥᨲᩮᩣ ᨲᩔᩴ ᨸᩁᩥᩈᩣᨿᩴ ᨶᩥᩈᩥᨶ᩠ᨶᩮᩣ ᩉᩮᩣᨲᩥ. ᩋᨳ ᨡᩮᩣ ᩈᩩᨽᨴ᩠ᨴᩮᩣ ᩅᩩᨴ᩠ᨵᨸᨻ᩠ᨻᨩᩥᨲᩮᩣ ᨲᩮ ᨽᩥᨠ᩠ᨡᩪ ᩑᨲᨴᩅᩮᩣᨧ – ‘‘ᩋᩃᩴ, ᩌᩅᩩᩈᩮᩣ, ᨾᩣ ᩈᩮᩣᨧᩥᨲ᩠ᨳ, ᨾᩣ ᨸᩁᩥᨴᩮᩅᩥᨲ᩠ᨳ, ᩈᩩᨾᩩᨲ᩠ᨲᩣ ᨾᨿᩴ ᨲᩮᨶ ᨾᩉᩣᩈᨾᨱᩮᨶ. ᩏᨸᨴ᩠ᨴᩩᨲᩣ ᨧ ᩉᩮᩣᨾ – ‘ᩍᨴᩴ ᩅᩮᩣ ᨠᨸ᩠ᨸᨲᩥ, ᩍᨴᩴ ᩅᩮᩣ ᨶ ᨠᨸ᩠ᨸᨲᩦ’ᨲᩥ. ᩍᨴᩣᨶᩥ ᨸᨶ ᨾᨿᩴ ᨿᩴ ᩍᨧ᩠ᨨᩥᩔᩣᨾ, ᨲᩴ ᨠᩁᩥᩔᩣᨾ, ᨿᩴ ᨶ ᩍᨧ᩠ᨨᩥᩔᩣᨾ, ᨶ ᨲᩴ ᨠᩁᩥᩔᩣᨾᩣ’’ᨲᩥ. ᩋᨳ ᨡᩮᩣ ᩌᨿᩈ᩠ᨾᩣ ᨾᩉᩣᨠᩔᨸᩮᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᩋᩃᩴ, ᩌᩅᩩᩈᩮᩣ, ᨾᩣ ᩈᩮᩣᨧᩥᨲ᩠ᨳ, ᨾᩣ ᨸᩁᩥᨴᩮᩅᩥᨲ᩠ᨳ. ᨶᨶᩩ ᩑᨲᩴ, ᩌᩅᩩᩈᩮᩣ, ᨽᨣᩅᨲᩣ ᨸᨭᩥᨠᨧ᩠ᨧᩮᩅ ᩋᨠ᩠ᨡᩣᨲᩴ – ‘ᩈᨻ᩠ᨻᩮᩉᩮᩅ ᨸᩥᨿᩮᩉᩥ ᨾᨶᩣᨸᩮᩉᩥ ᨶᩣᨶᩣᨽᩣᩅᩮᩣ ᩅᩥᨶᩣᨽᩣᩅᩮᩣ ᩋᨬ᩠ᨬᨳᩣᨽᩣᩅᩮᩣ’. ᨲᩴ ᨠᩩᨲᩮᨲ᩠ᨳ, ᩌᩅᩩᩈᩮᩣ, ᩃᨻ᩠ᨽᩣ. ‘ᨿᩴ ᨲᩴ ᨩᩣᨲᩴ ᨽᩪᨲᩴ ᩈᨦ᩠ᨡᨲᩴ ᨸᩃᩮᩣᨠᨵᨾ᩠ᨾᩴ, ᨲᩴ ᨲᨳᩣᨣᨲᩔᩣᨸᩥ ᩈᩁᩦᩁᩴ ᨾᩣ ᨸᩃᩩᨩ᩠ᨩᩦ’ᨲᩥ, ᨶᩮᨲᩴ ᨮᩣᨶᩴ ᩅᩥᨩ᩠ᨩᨲᩦ’’ᨲᩥ.

᪒᪓᪓. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨧᨲ᩠ᨲᩣᩁᩮᩣ ᨾᩃ᩠ᩃᨸᩣᨾᩮᩣᨠ᩠ᨡᩣ ᩈᩦᩈᩴᨶ᩠ᩉᩣᨲᩣ ᩋᩉᨲᩣᨶᩥ ᩅᨲ᩠ᨳᩣᨶᩥ ᨶᩥᩅᨲ᩠ᨳᩣ – ‘‘ᨾᨿᩴ ᨽᨣᩅᨲᩮᩣ ᨧᩥᨲᨠᩴ ᩌᩊᩥᨾ᩠ᨸᩮᩔᩣᨾᩣ’’ᨲᩥ ᨶ ᩈᨠ᩠ᨠᩮᩣᨶ᩠ᨲᩥ ᩌᩊᩥᨾ᩠ᨸᩮᨲᩩᩴ. ᩋᨳ ᨡᩮᩣ ᨠᩮᩣᩈᩥᨶᩣᩁᨠᩣ ᨾᩃ᩠ᩃᩣ ᩌᨿᩈ᩠ᨾᨶ᩠ᨲᩴ ᩋᨶᩩᩁᩩᨴ᩠ᨵᩴ ᩑᨲᨴᩅᩮᩣᨧᩩᩴ – ‘‘ᨠᩮᩣ ᨶᩩ ᨡᩮᩣ, ᨽᨶ᩠ᨲᩮ ᩋᨶᩩᩁᩩᨴ᩠ᨵ, ᩉᩮᨲᩩ ᨠᩮᩣ ᨸᨧ᩠ᨧᨿᩮᩣ, ᨿᩮᨶᩥᨾᩮ ᨧᨲ᩠ᨲᩣᩁᩮᩣ ᨾᩃ᩠ᩃᨸᩣᨾᩮᩣᨠ᩠ᨡᩣ ᩈᩦᩈᩴᨶ᩠ᩉᩣᨲᩣ ᩋᩉᨲᩣᨶᩥ ᩅᨲ᩠ᨳᩣᨶᩥ ᨶᩥᩅᨲ᩠ᨳᩣ – ‘ᨾᨿᩴ ᨽᨣᩅᨲᩮᩣ ᨧᩥᨲᨠᩴ ᩌᩊᩥᨾ᩠ᨸᩮᩔᩣᨾᩣ’ᨲᩥ ᨶ ᩈᨠ᩠ᨠᩮᩣᨶ᩠ᨲᩥ ᩌᩊᩥᨾ᩠ᨸᩮᨲᩩ’’ᨶ᩠ᨲᩥ? ‘‘ᩋᨬ᩠ᨬᨳᩣ ᨡᩮᩣ, ᩅᩣᩈᩮᨭ᩠ᨮᩣ, ᨴᩮᩅᨲᩣᨶᩴ ᩋᨵᩥᨸ᩠ᨸᩣᨿᩮᩣ’’ᨲᩥ. ‘‘ᨠᨳᩴ ᨸᨶ, ᨽᨶ᩠ᨲᩮ, ᨴᩮᩅᨲᩣᨶᩴ ᩋᨵᩥᨸ᩠ᨸᩣᨿᩮᩣ’’ᨲᩥ? ‘‘ᨴᩮᩅᨲᩣᨶᩴ ᨡᩮᩣ, ᩅᩣᩈᩮᨭ᩠ᨮᩣ, ᩋᨵᩥᨸ᩠ᨸᩣᨿᩮᩣ – ‘ᩋᨿᩴ ᩌᨿᩈ᩠ᨾᩣ ᨾᩉᩣᨠᩔᨸᩮᩣ ᨸᩣᩅᩣᨿ ᨠᩩᩈᩥᨶᩣᩁᩴ ᩋᨴ᩠ᨵᩣᨶᨾᨣ᩠ᨣᨸ᩠ᨸᨭᩥᨸ᩠ᨸᨶ᩠ᨶᩮᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨸᨬ᩠ᨧᨾᨲ᩠ᨲᩮᩉᩥ ᨽᩥᨠ᩠ᨡᩩᩈᨲᩮᩉᩥ. ᨶ ᨲᩣᩅ ᨽᨣᩅᨲᩮᩣ ᨧᩥᨲᨠᩮᩣ ᨸᨩ᩠ᨩᩃᩥᩔᨲᩥ, ᨿᩣᩅᩣᨿᩈ᩠ᨾᩣ ᨾᩉᩣᨠᩔᨸᩮᩣ ᨽᨣᩅᨲᩮᩣ ᨸᩣᨴᩮ ᩈᩥᩁᩈᩣ ᨶ ᩅᨶ᩠ᨴᩥᩔᨲᩦ’’’ᨲᩥ. ‘‘ᨿᨳᩣ, ᨽᨶ᩠ᨲᩮ, ᨴᩮᩅᨲᩣᨶᩴ ᩋᨵᩥᨸ᩠ᨸᩣᨿᩮᩣ, ᨲᨳᩣ ᩉᩮᩣᨲᩪ’’ᨲᩥ.

᪒᪓᪔. ᩋᨳ ᨡᩮᩣ ᩌᨿᩈ᩠ᨾᩣ ᨾᩉᩣᨠᩔᨸᩮᩣ ᨿᩮᨶ ᨠᩩᩈᩥᨶᩣᩁᩣ ᨾᨠᩩᨭᨻᨶ᩠ᨵᨶᩴ ᨶᩣᨾ ᨾᩃ᩠ᩃᩣᨶᩴ ᨧᩮᨲᩥᨿᩴ, ᨿᩮᨶ ᨽᨣᩅᨲᩮᩣ ᨧᩥᨲᨠᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩑᨠᩴᩈᩴ ᨧᩦᩅᩁᩴ ᨠᨲ᩠ᩅᩣ ᩋᨬ᩠ᨩᩃᩥᩴ ᨸᨱᩣᨾᩮᨲ᩠ᩅᩣ ᨲᩥᨠ᩠ᨡᨲ᩠ᨲᩩᩴ ᨧᩥᨲᨠᩴ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨽᨣᩅᨲᩮᩣ ᨸᩣᨴᩮ ᩈᩥᩁᩈᩣ ᩅᨶ᩠ᨴᩥ. ᨲᩣᨶᩥᨸᩥ ᨡᩮᩣ ᨸᨬ᩠ᨧᨽᩥᨠ᩠ᨡᩩᩈᨲᩣᨶᩥ ᩑᨠᩴᩈᩴ ᨧᩦᩅᩁᩴ ᨠᨲ᩠ᩅᩣ ᩋᨬ᩠ᨩᩃᩥᩴ ᨸᨱᩣᨾᩮᨲ᩠ᩅᩣ ᨲᩥᨠ᩠ᨡᨲ᩠ᨲᩩᩴ ᨧᩥᨲᨠᩴ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨽᨣᩅᨲᩮᩣ ᨸᩣᨴᩮ ᩈᩥᩁᩈᩣ ᩅᨶ᩠ᨴᩥᩴᩈᩩ. ᩅᨶ᩠ᨴᩥᨲᩮ ᨧ ᨸᨶᩣᨿᩈ᩠ᨾᨲᩣ ᨾᩉᩣᨠᩔᨸᩮᨶ ᨲᩮᩉᩥ ᨧ ᨸᨬ᩠ᨧᩉᩥ ᨽᩥᨠ᩠ᨡᩩᩈᨲᩮᩉᩥ ᩈᨿᨾᩮᩅ ᨽᨣᩅᨲᩮᩣ ᨧᩥᨲᨠᩮᩣ ᨸᨩ᩠ᨩᩃᩥ.

᪒᪓᪕. ᨫᩣᨿᨾᩣᨶᩔ ᨡᩮᩣ ᨸᨶ ᨽᨣᩅᨲᩮᩣ ᩈᩁᩦᩁᩔ ᨿᩴ ᩋᩉᩮᩣᩈᩥ ᨨᩅᩦᨲᩥ ᩅᩣ ᨧᨾ᩠ᨾᨶ᩠ᨲᩥ ᩅᩣ ᨾᩴᩈᨶ᩠ᨲᩥ ᩅᩣ ᨶ᩠ᩉᩣᩁᩪᨲᩥ ᩅᩣ ᩃᩈᩥᨠᩣᨲᩥ ᩅᩣ, ᨲᩔ ᨶᩮᩅ ᨨᩣᩁᩥᨠᩣ ᨸᨬ᩠ᨬᩣᨿᩥᨲ᩠ᨳ, ᨶ ᨾᩈᩥ; ᩈᩁᩦᩁᩣᨶᩮᩅ ᩋᩅᩈᩥᩔᩥᩴᩈᩩ. ᩈᩮᨿ᩠ᨿᨳᩣᨸᩥ ᨶᩣᨾ ᩈᨸ᩠ᨸᩥᩔ ᩅᩣ ᨲᩮᩃᩔ ᩅᩣ ᨫᩣᨿᨾᩣᨶᩔ ᨶᩮᩅ ᨨᩣᩁᩥᨠᩣ ᨸᨬ᩠ᨬᩣᨿᨲᩥ, ᨶ ᨾᩈᩥ; ᩑᩅᨾᩮᩅ ᨽᨣᩅᨲᩮᩣ ᩈᩁᩦᩁᩔ ᨫᩣᨿᨾᩣᨶᩔ ᨿᩴ ᩋᩉᩮᩣᩈᩥ ᨨᩅᩦᨲᩥ ᩅᩣ ᨧᨾ᩠ᨾᨶ᩠ᨲᩥ ᩅᩣ ᨾᩴᩈᨶ᩠ᨲᩥ ᩅᩣ ᨶ᩠ᩉᩣᩁᩪᨲᩥ ᩅᩣ ᩃᩈᩥᨠᩣᨲᩥ ᩅᩣ, ᨲᩔ ᨶᩮᩅ ᨨᩣᩁᩥᨠᩣ ᨸᨬ᩠ᨬᩣᨿᩥᨲ᩠ᨳ, ᨶ ᨾᩈᩥ; ᩈᩁᩦᩁᩣᨶᩮᩅ ᩋᩅᩈᩥᩔᩥᩴᩈᩩ. ᨲᩮᩈᨬ᩠ᨧ ᨸᨬ᩠ᨧᨶ᩠ᨶᩴ ᨴᩩᩔᨿᩩᨣᩈᨲᩣᨶᩴ ᨴ᩠ᩅᩮᩅ ᨴᩩᩔᩣᨶᩥ ᨶ ᨯᨿ᩠ᩉᩥᩴᩈᩩ ᨿᨬ᩠ᨧ ᩈᨻ᩠ᨻᩋᨻ᩠ᨽᨶ᩠ᨲᩁᩥᨾᩴ ᨿᨬ᩠ᨧ ᨻᩣᩉᩥᩁᩴ. ᨴᨯ᩠ᨰᩮ ᨧ ᨡᩮᩣ ᨸᨶ ᨽᨣᩅᨲᩮᩣ ᩈᩁᩦᩁᩮ ᩋᨶ᩠ᨲᩃᩥᨠ᩠ᨡᩣ ᩏᨴᨠᨵᩣᩁᩣ ᨸᩣᨲᩩᨽᩅᩥᨲ᩠ᩅᩣ ᨽᨣᩅᨲᩮᩣ ᨧᩥᨲᨠᩴ ᨶᩥᨻ᩠ᨻᩣᨸᩮᩈᩥ. ᩏᨴᨠᩈᩣᩃᨲᩮᩣᨸᩥ [ᩏᨴᨠᩴ ᩈᩣᩃᨲᩮᩣᨸᩥ (ᩈᩦ. ᩈ᩠ᨿᩣ. ᨠᩴ.)] ᩋᨻ᩠ᨽᩩᨶ᩠ᨶᨾᩥᨲ᩠ᩅᩣ ᨽᨣᩅᨲᩮᩣ ᨧᩥᨲᨠᩴ ᨶᩥᨻ᩠ᨻᩣᨸᩮᩈᩥ. ᨠᩮᩣᩈᩥᨶᩣᩁᨠᩣᨸᩥ ᨾᩃ᩠ᩃᩣ ᩈᨻ᩠ᨻᨣᨶ᩠ᨵᩮᩣᨴᨠᩮᨶ ᨽᨣᩅᨲᩮᩣ ᨧᩥᨲᨠᩴ ᨶᩥᨻ᩠ᨻᩣᨸᩮᩈᩩᩴ. ᩋᨳ ᨡᩮᩣ ᨠᩮᩣᩈᩥᨶᩣᩁᨠᩣ ᨾᩃ᩠ᩃᩣ ᨽᨣᩅᨲᩮᩣ ᩈᩁᩦᩁᩣᨶᩥ ᩈᨲ᩠ᨲᩣᩉᩴ ᩈᨶ᩠ᨵᩣᨣᩣᩁᩮ ᩈᨲ᩠ᨲᩥᨸᨬ᩠ᨩᩁᩴ ᨠᩁᩥᨲ᩠ᩅᩣ ᨵᨶᩩᨸᩣᨠᩣᩁᩴ ᨸᩁᩥᨠ᩠ᨡᩥᨸᩣᨸᩮᨲ᩠ᩅᩣ [ᨸᩁᩥᨠ᩠ᨡᩥᨸᩥᨲ᩠ᩅᩣ (ᩈ᩠ᨿᩣ.)] ᨶᨧ᩠ᨧᩮᩉᩥ ᨣᩦᨲᩮᩉᩥ ᩅᩣᨴᩥᨲᩮᩉᩥ ᨾᩣᩃᩮᩉᩥ ᨣᨶ᩠ᨵᩮᩉᩥ ᩈᨠ᩠ᨠᩁᩥᩴᩈᩩ ᨣᩁᩩᩴ ᨠᩁᩥᩴᩈᩩ ᨾᩣᨶᩮᩈᩩᩴ ᨸᩪᨩᩮᩈᩩᩴ.

ᩈᩁᩦᩁᨵᩣᨲᩩᩅᩥᨽᩣᨩᨶᩴ

᪒᪓᪖. ᩋᩔᩮᩣᩈᩥ ᨡᩮᩣ ᩁᩣᨩᩣ ᨾᩣᨣᨵᩮᩣ ᩋᨩᩣᨲᩈᨲ᩠ᨲᩩ ᩅᩮᨴᩮᩉᩥᨸᩩᨲ᩠ᨲᩮᩣ – ‘‘ᨽᨣᩅᩣ ᨠᩥᩁ ᨠᩩᩈᩥᨶᩣᩁᩣᨿᩴ ᨸᩁᩥᨶᩥᨻ᩠ᨻᩩᨲᩮᩣ’’ᨲᩥ. ᩋᨳ ᨡᩮᩣ ᩁᩣᨩᩣ ᨾᩣᨣᨵᩮᩣ ᩋᨩᩣᨲᩈᨲ᩠ᨲᩩ ᩅᩮᨴᩮᩉᩥᨸᩩᨲ᩠ᨲᩮᩣ ᨠᩮᩣᩈᩥᨶᩣᩁᨠᩣᨶᩴ ᨾᩃ᩠ᩃᩣᨶᩴ ᨴᩪᨲᩴ ᨸᩣᩉᩮᩈᩥ – ‘‘ᨽᨣᩅᩣᨸᩥ ᨡᨲ᩠ᨲᩥᨿᩮᩣ ᩋᩉᨾ᩠ᨸᩥ ᨡᨲ᩠ᨲᩥᨿᩮᩣ, ᩋᩉᨾ᩠ᨸᩥ ᩋᩁᩉᩣᨾᩥ ᨽᨣᩅᨲᩮᩣ ᩈᩁᩦᩁᩣᨶᩴ ᨽᩣᨣᩴ, ᩋᩉᨾ᩠ᨸᩥ ᨽᨣᩅᨲᩮᩣ ᩈᩁᩦᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᨠᩁᩥᩔᩣᨾᩦ’’ᨲᩥ.

ᩋᩔᩮᩣᩈᩩᩴ ᨡᩮᩣ ᩅᩮᩈᩣᩃᩥᨠᩣ ᩃᩥᨧ᩠ᨨᩅᩦ – ‘‘ᨽᨣᩅᩣ ᨠᩥᩁ ᨠᩩᩈᩥᨶᩣᩁᩣᨿᩴ ᨸᩁᩥᨶᩥᨻ᩠ᨻᩩᨲᩮᩣ’’ᨲᩥ. ᩋᨳ ᨡᩮᩣ ᩅᩮᩈᩣᩃᩥᨠᩣ ᩃᩥᨧ᩠ᨨᩅᩦ ᨠᩮᩣᩈᩥᨶᩣᩁᨠᩣᨶᩴ ᨾᩃ᩠ᩃᩣᨶᩴ ᨴᩪᨲᩴ ᨸᩣᩉᩮᩈᩩᩴ – ‘‘ᨽᨣᩅᩣᨸᩥ ᨡᨲ᩠ᨲᩥᨿᩮᩣ ᨾᨿᨾ᩠ᨸᩥ ᨡᨲ᩠ᨲᩥᨿᩣ, ᨾᨿᨾ᩠ᨸᩥ ᩋᩁᩉᩣᨾ ᨽᨣᩅᨲᩮᩣ ᩈᩁᩦᩁᩣᨶᩴ ᨽᩣᨣᩴ, ᨾᨿᨾ᩠ᨸᩥ ᨽᨣᩅᨲᩮᩣ ᩈᩁᩦᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᨠᩁᩥᩔᩣᨾᩣ’’ᨲᩥ.

ᩋᩔᩮᩣᩈᩩᩴ ᨡᩮᩣ ᨠᨸᩥᩃᩅᨲ᩠ᨳᩩᩅᩣᩈᩦ ᩈᨠ᩠ᨿᩣ – ‘‘ᨽᨣᩅᩣ ᨠᩥᩁ ᨠᩩᩈᩥᨶᩣᩁᩣᨿᩴ ᨸᩁᩥᨶᩥᨻ᩠ᨻᩩᨲᩮᩣ’’ᨲᩥ. ᩋᨳ ᨡᩮᩣ ᨠᨸᩥᩃᩅᨲ᩠ᨳᩩᩅᩣᩈᩦ ᩈᨠ᩠ᨿᩣ ᨠᩮᩣᩈᩥᨶᩣᩁᨠᩣᨶᩴ ᨾᩃ᩠ᩃᩣᨶᩴ ᨴᩪᨲᩴ ᨸᩣᩉᩮᩈᩩᩴ – ‘‘ᨽᨣᩅᩣ ᩋᨾ᩠ᩉᩣᨠᩴ ᨬᩣᨲᩥᩈᩮᨭ᩠ᨮᩮᩣ, ᨾᨿᨾ᩠ᨸᩥ ᩋᩁᩉᩣᨾ ᨽᨣᩅᨲᩮᩣ ᩈᩁᩦᩁᩣᨶᩴ ᨽᩣᨣᩴ, ᨾᨿᨾ᩠ᨸᩥ ᨽᨣᩅᨲᩮᩣ ᩈᩁᩦᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᨠᩁᩥᩔᩣᨾᩣ’’ᨲᩥ.

ᩋᩔᩮᩣᩈᩩᩴ ᨡᩮᩣ ᩋᩃ᩠ᩃᨠᨸ᩠ᨸᨠᩣ ᨻᩩᩃᨿᩮᩣ [ᨳᩪᩃᨿᩮᩣ (ᩈ᩠ᨿᩣ.)] – ‘‘ᨽᨣᩅᩣ ᨠᩥᩁ ᨠᩩᩈᩥᨶᩣᩁᩣᨿᩴ ᨸᩁᩥᨶᩥᨻ᩠ᨻᩩᨲᩮᩣ’’ᨲᩥ. ᩋᨳ ᨡᩮᩣ ᩋᩃ᩠ᩃᨠᨸ᩠ᨸᨠᩣ ᨻᩩᩃᨿᩮᩣ ᨠᩮᩣᩈᩥᨶᩣᩁᨠᩣᨶᩴ ᨾᩃ᩠ᩃᩣᨶᩴ ᨴᩪᨲᩴ ᨸᩣᩉᩮᩈᩩᩴ – ‘‘ᨽᨣᩅᩣᨸᩥ ᨡᨲ᩠ᨲᩥᨿᩮᩣ ᨾᨿᨾ᩠ᨸᩥ ᨡᨲ᩠ᨲᩥᨿᩣ, ᨾᨿᨾ᩠ᨸᩥ ᩋᩁᩉᩣᨾ ᨽᨣᩅᨲᩮᩣ ᩈᩁᩦᩁᩣᨶᩴ ᨽᩣᨣᩴ, ᨾᨿᨾ᩠ᨸᩥ ᨽᨣᩅᨲᩮᩣ ᩈᩁᩦᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᨠᩁᩥᩔᩣᨾᩣ’’ᨲᩥ.

ᩋᩔᩮᩣᩈᩩᩴ ᨡᩮᩣ ᩁᩣᨾᨣᩣᨾᨠᩣ ᨠᩮᩣᩊᩥᨿᩣ – ‘‘ᨽᨣᩅᩣ ᨠᩥᩁ ᨠᩩᩈᩥᨶᩣᩁᩣᨿᩴ ᨸᩁᩥᨶᩥᨻ᩠ᨻᩩᨲᩮᩣ’’ᨲᩥ. ᩋᨳ ᨡᩮᩣ ᩁᩣᨾᨣᩣᨾᨠᩣ ᨠᩮᩣᩊᩥᨿᩣ ᨠᩮᩣᩈᩥᨶᩣᩁᨠᩣᨶᩴ ᨾᩃ᩠ᩃᩣᨶᩴ ᨴᩪᨲᩴ ᨸᩣᩉᩮᩈᩩᩴ – ‘‘ᨽᨣᩅᩣᨸᩥ ᨡᨲ᩠ᨲᩥᨿᩮᩣ ᨾᨿᨾ᩠ᨸᩥ ᨡᨲ᩠ᨲᩥᨿᩣ, ᨾᨿᨾ᩠ᨸᩥ ᩋᩁᩉᩣᨾ ᨽᨣᩅᨲᩮᩣ ᩈᩁᩦᩁᩣᨶᩴ ᨽᩣᨣᩴ, ᨾᨿᨾ᩠ᨸᩥ ᨽᨣᩅᨲᩮᩣ ᩈᩁᩦᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᨠᩁᩥᩔᩣᨾᩣ’’ᨲᩥ.

ᩋᩔᩮᩣᩈᩥ ᨡᩮᩣ ᩅᩮᨭ᩠ᨮᨴᩦᨸᨠᩮᩣ ᨻᩕᩣᩉ᩠ᨾᨱᩮᩣ – ‘‘ᨽᨣᩅᩣ ᨠᩥᩁ ᨠᩩᩈᩥᨶᩣᩁᩣᨿᩴ ᨸᩁᩥᨶᩥᨻ᩠ᨻᩩᨲᩮᩣ’’ᨲᩥ. ᩋᨳ ᨡᩮᩣ ᩅᩮᨭ᩠ᨮᨴᩦᨸᨠᩮᩣ ᨻᩕᩣᩉ᩠ᨾᨱᩮᩣ ᨠᩮᩣᩈᩥᨶᩣᩁᨠᩣᨶᩴ ᨾᩃ᩠ᩃᩣᨶᩴ ᨴᩪᨲᩴ ᨸᩣᩉᩮᩈᩥ – ‘‘ᨽᨣᩅᩣᨸᩥ ᨡᨲ᩠ᨲᩥᨿᩮᩣ ᩋᩉᩴ ᨸᩥᩈ᩠ᨾᩥ ᨻᩕᩣᩉ᩠ᨾᨱᩮᩣ, ᩋᩉᨾ᩠ᨸᩥ ᩋᩁᩉᩣᨾᩥ ᨽᨣᩅᨲᩮᩣ ᩈᩁᩦᩁᩣᨶᩴ ᨽᩣᨣᩴ, ᩋᩉᨾ᩠ᨸᩥ ᨽᨣᩅᨲᩮᩣ ᩈᩁᩦᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᨠᩁᩥᩔᩣᨾᩦ’’ᨲᩥ.

ᩋᩔᩮᩣᩈᩩᩴ ᨡᩮᩣ ᨸᩣᩅᩮᨿ᩠ᨿᨠᩣ ᨾᩃ᩠ᩃᩣ – ‘‘ᨽᨣᩅᩣ ᨠᩥᩁ ᨠᩩᩈᩥᨶᩣᩁᩣᨿᩴ ᨸᩁᩥᨶᩥᨻ᩠ᨻᩩᨲᩮᩣ’’ᨲᩥ. ᩋᨳ ᨡᩮᩣ ᨸᩣᩅᩮᨿ᩠ᨿᨠᩣ ᨾᩃ᩠ᩃᩣ ᨠᩮᩣᩈᩥᨶᩣᩁᨠᩣᨶᩴ ᨾᩃ᩠ᩃᩣᨶᩴ ᨴᩪᨲᩴ ᨸᩣᩉᩮᩈᩩᩴ – ‘‘ᨽᨣᩅᩣᨸᩥ ᨡᨲ᩠ᨲᩥᨿᩮᩣ ᨾᨿᨾ᩠ᨸᩥ ᨡᨲ᩠ᨲᩥᨿᩣ, ᨾᨿᨾ᩠ᨸᩥ ᩋᩁᩉᩣᨾ ᨽᨣᩅᨲᩮᩣ ᩈᩁᩦᩁᩣᨶᩴ ᨽᩣᨣᩴ, ᨾᨿᨾ᩠ᨸᩥ ᨽᨣᩅᨲᩮᩣ ᩈᩁᩦᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᨠᩁᩥᩔᩣᨾᩣ’’ᨲᩥ.

ᩑᩅᩴ ᩅᩩᨲ᩠ᨲᩮ ᨠᩮᩣᩈᩥᨶᩣᩁᨠᩣ ᨾᩃ᩠ᩃᩣ ᨲᩮ ᩈᨦ᩠ᨥᩮ ᨣᨱᩮ ᩑᨲᨴᩅᩮᩣᨧᩩᩴ – ‘‘ᨽᨣᩅᩣ ᩋᨾ᩠ᩉᩣᨠᩴ ᨣᩣᨾᨠ᩠ᨡᩮᨲ᩠ᨲᩮ ᨸᩁᩥᨶᩥᨻ᩠ᨻᩩᨲᩮᩣ, ᨶ ᨾᨿᩴ ᨴᩔᩣᨾ ᨽᨣᩅᨲᩮᩣ ᩈᩁᩦᩁᩣᨶᩴ ᨽᩣᨣ’’ᨶ᩠ᨲᩥ.

᪒᪓᪗. ᩑᩅᩴ ᩅᩩᨲ᩠ᨲᩮ ᨴᩮᩣᨱᩮᩣ ᨻᩕᩣᩉ᩠ᨾᨱᩮᩣ ᨲᩮ ᩈᨦ᩠ᨥᩮ ᨣᨱᩮ ᩑᨲᨴᩅᩮᩣᨧ –

‘‘ᩈᩩᨱᨶ᩠ᨲᩩ ᨽᩮᩣᨶ᩠ᨲᩮᩣ ᨾᨾ ᩑᨠᩅᩣᨧᩴ,

ᩋᨾ᩠ᩉᩣᨠ [ᨨᨶ᩠ᨴᩣᨶᩩᩁᨠ᩠ᨡᨱᨲ᩠ᨳᩴ ᨶᩥᨣ᩠ᨣᩉᩦᨲᩃᩮᩣᨸᩮᩣ]; ᨻᩩᨴ᩠ᨵᩮᩣ ᩋᩉᩩ ᨡᨶ᩠ᨲᩥᩅᩣᨴᩮᩣ;

ᨶ ᩉᩥ ᩈᩣᨵᩩ ᨿᩴ ᩏᨲ᩠ᨲᨾᨸᩩᨣ᩠ᨣᩃᩔ,

ᩈᩁᩦᩁᨽᩣᨣᩮ ᩈᩥᨿᩣ ᩈᨾ᩠ᨸᩉᩣᩁᩮᩣ.

ᩈᨻ᩠ᨻᩮᩅ ᨽᩮᩣᨶ᩠ᨲᩮᩣ ᩈᩉᩥᨲᩣ ᩈᨾᨣ᩠ᨣᩣ,

ᩈᨾ᩠ᨾᩮᩣᨴᨾᩣᨶᩣ ᨠᩁᩮᩣᨾᨭ᩠ᨮᨽᩣᨣᩮ;

ᩅᩥᨲ᩠ᨳᩣᩁᩥᨠᩣ ᩉᩮᩣᨶ᩠ᨲᩩ ᨴᩥᩈᩣᩈᩩ ᨳᩪᨸᩣ,

ᨻᩉᩪ ᨩᨶᩣ ᨧᨠ᩠ᨡᩩᨾᨲᩮᩣ ᨸᩈᨶ᩠ᨶᩣ’’ᨲᩥ.

᪒᪓᪘. ‘‘ᨲᩮᨶ ᩉᩥ, ᨻᩕᩣᩉ᩠ᨾᨱ, ᨲ᩠ᩅᨬ᩠ᨬᩮᩅ ᨽᨣᩅᨲᩮᩣ ᩈᩁᩦᩁᩣᨶᩥ ᩋᨭ᩠ᨮᨵᩣ ᩈᨾᩴ ᩈᩅᩥᨽᨲ᩠ᨲᩴ ᩅᩥᨽᨩᩣᩉᩦ’’ᨲᩥ. ‘‘ᩑᩅᩴ, ᨽᩮᩣ’’ᨲᩥ ᨡᩮᩣ ᨴᩮᩣᨱᩮᩣ ᨻᩕᩣᩉ᩠ᨾᨱᩮᩣ ᨲᩮᩈᩴ ᩈᨦ᩠ᨥᩣᨶᩴ ᨣᨱᩣᨶᩴ ᨸᨭᩥᩔᩩᨲ᩠ᩅᩣ ᨽᨣᩅᨲᩮᩣ ᩈᩁᩦᩁᩣᨶᩥ ᩋᨭ᩠ᨮᨵᩣ ᩈᨾᩴ ᩈᩩᩅᩥᨽᨲ᩠ᨲᩴ ᩅᩥᨽᨩᩥᨲ᩠ᩅᩣ ᨲᩮ ᩈᨦ᩠ᨥᩮ ᨣᨱᩮ ᩑᨲᨴᩅᩮᩣᨧ – ‘‘ᩍᨾᩴ ᨾᩮ ᨽᩮᩣᨶ᩠ᨲᩮᩣ ᨲᩩᨾ᩠ᨻᩴ ᨴᨴᨶ᩠ᨲᩩ ᩋᩉᨾ᩠ᨸᩥ ᨲᩩᨾ᩠ᨻᩔ ᨳᩪᨸᨬ᩠ᨧ ᨾᩉᨬ᩠ᨧ ᨠᩁᩥᩔᩣᨾᩦ’’ᨲᩥ. ᩋᨴᩴᩈᩩ ᨡᩮᩣ ᨲᩮ ᨴᩮᩣᨱᩔ ᨻᩕᩣᩉ᩠ᨾᨱᩔ ᨲᩩᨾ᩠ᨻᩴ.

ᩋᩔᩮᩣᩈᩩᩴ ᨡᩮᩣ ᨸᩥᨸ᩠ᨸᩃᩥᩅᨶᩥᨿᩣ [ᨸᩥᨸ᩠ᨹᩃᩥᩅᨶᩥᨿᩣ (ᩈ᩠ᨿᩣ.)] ᨾᩮᩣᩁᩥᨿᩣ – ‘‘ᨽᨣᩅᩣ ᨠᩥᩁ ᨠᩩᩈᩥᨶᩣᩁᩣᨿᩴ ᨸᩁᩥᨶᩥᨻ᩠ᨻᩩᨲᩮᩣ’’ᨲᩥ. ᩋᨳ ᨡᩮᩣ ᨸᩥᨸ᩠ᨸᩃᩥᩅᨶᩥᨿᩣ ᨾᩮᩣᩁᩥᨿᩣ ᨠᩮᩣᩈᩥᨶᩣᩁᨠᩣᨶᩴ ᨾᩃ᩠ᩃᩣᨶᩴ ᨴᩪᨲᩴ ᨸᩣᩉᩮᩈᩩᩴ – ‘‘ᨽᨣᩅᩣᨸᩥ ᨡᨲ᩠ᨲᩥᨿᩮᩣ ᨾᨿᨾ᩠ᨸᩥ ᨡᨲ᩠ᨲᩥᨿᩣ, ᨾᨿᨾ᩠ᨸᩥ ᩋᩁᩉᩣᨾ ᨽᨣᩅᨲᩮᩣ ᩈᩁᩦᩁᩣᨶᩴ ᨽᩣᨣᩴ, ᨾᨿᨾ᩠ᨸᩥ ᨽᨣᩅᨲᩮᩣ ᩈᩁᩦᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᨠᩁᩥᩔᩣᨾᩣ’’ᨲᩥ. ‘‘ᨶᨲ᩠ᨳᩥ ᨽᨣᩅᨲᩮᩣ ᩈᩁᩦᩁᩣᨶᩴ ᨽᩣᨣᩮᩣ, ᩅᩥᨽᨲ᩠ᨲᩣᨶᩥ ᨽᨣᩅᨲᩮᩣ ᩈᩁᩦᩁᩣᨶᩥ. ᩍᨲᩮᩣ ᩋᨦ᩠ᨣᩣᩁᩴ ᩉᩁᨳᩣ’’ᨲᩥ. ᨲᩮ ᨲᨲᩮᩣ ᩋᨦ᩠ᨣᩣᩁᩴ ᩉᩁᩥᩴᩈᩩ [ᩌᩉᩁᩥᩴᩈᩩ (ᩈ᩠ᨿᩣ. ᨠ.)].

ᨵᩣᨲᩩᨳᩪᨸᨸᩪᨩᩣ

᪒᪓᪙. ᩋᨳ ᨡᩮᩣ ᩁᩣᨩᩣ ᨾᩣᨣᨵᩮᩣ ᩋᨩᩣᨲᩈᨲ᩠ᨲᩩ ᩅᩮᨴᩮᩉᩥᨸᩩᨲ᩠ᨲᩮᩣ ᩁᩣᨩᨣᩉᩮ ᨽᨣᩅᨲᩮᩣ ᩈᩁᩦᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᩋᨠᩣᩈᩥ. ᩅᩮᩈᩣᩃᩥᨠᩣᨸᩥ ᩃᩥᨧ᩠ᨨᩅᩦ ᩅᩮᩈᩣᩃᩥᨿᩴ ᨽᨣᩅᨲᩮᩣ ᩈᩁᩦᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᩋᨠᩴᩈᩩ. ᨠᨸᩥᩃᩅᨲ᩠ᨳᩩᩅᩣᩈᩦᨸᩥ ᩈᨠ᩠ᨿᩣ ᨠᨸᩥᩃᩅᨲ᩠ᨳᩩᩈ᩠ᨾᩥᩴ ᨽᨣᩅᨲᩮᩣ ᩈᩁᩦᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᩋᨠᩴᩈᩩ. ᩋᩃ᩠ᩃᨠᨸ᩠ᨸᨠᩣᨸᩥ ᨻᩩᩃᨿᩮᩣ ᩋᩃ᩠ᩃᨠᨸ᩠ᨸᩮ ᨽᨣᩅᨲᩮᩣ ᩈᩁᩦᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᩋᨠᩴᩈᩩ. ᩁᩣᨾᨣᩣᨾᨠᩣᨸᩥ ᨠᩮᩣᩊᩥᨿᩣ ᩁᩣᨾᨣᩣᨾᩮ ᨽᨣᩅᨲᩮᩣ ᩈᩁᩦᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᩋᨠᩴᩈᩩ. ᩅᩮᨭ᩠ᨮᨴᩦᨸᨠᩮᩣᨸᩥ ᨻᩕᩣᩉ᩠ᨾᨱᩮᩣ ᩅᩮᨭ᩠ᨮᨴᩦᨸᩮ ᨽᨣᩅᨲᩮᩣ ᩈᩁᩦᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᩋᨠᩣᩈᩥ. ᨸᩣᩅᩮᨿ᩠ᨿᨠᩣᨸᩥ ᨾᩃ᩠ᩃᩣ ᨸᩣᩅᩣᨿᩴ ᨽᨣᩅᨲᩮᩣ ᩈᩁᩦᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᩋᨠᩴᩈᩩ. ᨠᩮᩣᩈᩥᨶᩣᩁᨠᩣᨸᩥ ᨾᩃ᩠ᩃᩣ ᨠᩩᩈᩥᨶᩣᩁᩣᨿᩴ ᨽᨣᩅᨲᩮᩣ ᩈᩁᩦᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᩋᨠᩴᩈᩩ. ᨴᩮᩣᨱᩮᩣᨸᩥ ᨻᩕᩣᩉ᩠ᨾᨱᩮᩣ ᨲᩩᨾ᩠ᨻᩔ ᨳᩪᨸᨬ᩠ᨧ ᨾᩉᨬ᩠ᨧ ᩋᨠᩣᩈᩥ. ᨸᩥᨸ᩠ᨸᩃᩥᩅᨶᩥᨿᩣᨸᩥ ᨾᩮᩣᩁᩥᨿᩣ ᨸᩥᨸ᩠ᨸᩃᩥᩅᨶᩮ ᩋᨦ᩠ᨣᩣᩁᩣᨶᩴ ᨳᩪᨸᨬ᩠ᨧ ᨾᩉᨬ᩠ᨧ ᩋᨠᩴᩈᩩ. ᩍᨲᩥ ᩋᨭ᩠ᨮ ᩈᩁᩦᩁᨳᩪᨸᩣ ᨶᩅᨾᩮᩣ ᨲᩩᨾ᩠ᨻᨳᩪᨸᩮᩣ ᨴᩈᨾᩮᩣ ᩋᨦ᩠ᨣᩣᩁᨳᩪᨸᩮᩣ. ᩑᩅᨾᩮᨲᩴ ᨽᩪᨲᨸᩩᨻ᩠ᨻᨶ᩠ᨲᩥ.

᪒᪔᪐. ᩋᨭ᩠ᨮᨴᩮᩣᨱᩴ ᨧᨠ᩠ᨡᩩᨾᨲᩮᩣ ᩈᩁᩦᩁᩴ, ᩈᨲ᩠ᨲᨴᩮᩣᨱᩴ ᨩᨾ᩠ᨻᩩᨴᩦᨸᩮ ᨾᩉᩮᨶ᩠ᨲᩥ.

ᩑᨠᨬ᩠ᨧ ᨴᩮᩣᨱᩴ ᨸᩩᩁᩥᩈᩅᩁᩩᨲ᩠ᨲᨾᩔ, ᩁᩣᨾᨣᩣᨾᩮ ᨶᩣᨣᩁᩣᨩᩣ ᨾᩉᩮᨲᩥ.

ᩑᨠᩣᩉᩥ ᨴᩣᨮᩣ ᨲᩥᨴᩥᩅᩮᩉᩥ ᨸᩪᨩᩥᨲᩣ, ᩑᨠᩣ ᨸᨶ ᨣᨶ᩠ᨵᩣᩁᨸᩩᩁᩮ ᨾᩉᩦᨿᨲᩥ;

ᨠᩣᩃᩥᨦ᩠ᨣᩁᨬ᩠ᨬᩮᩣ ᩅᩥᨩᩥᨲᩮ ᨸᩩᨶᩮᨠᩴ, ᩑᨠᩴ ᨸᨶ ᨶᩣᨣᩁᩣᨩᩣ ᨾᩉᩮᨲᩥ.

ᨲᩔᩮᩅ ᨲᩮᨩᩮᨶ ᩋᨿᩴ ᩅᩈᩩᨶ᩠ᨵᩁᩣ,

ᩌᨿᩣᨣᩈᩮᨭ᩠ᨮᩮᩉᩥ ᨾᩉᩦ ᩋᩃᨦ᩠ᨠᨲᩣ;

ᩑᩅᩴ ᩍᨾᩴ ᨧᨠ᩠ᨡᩩᨾᨲᩮᩣ ᩈᩁᩦᩁᩴ,

ᩈᩩᩈᨠ᩠ᨠᨲᩴ ᩈᨠ᩠ᨠᨲᩈᨠ᩠ᨠᨲᩮᩉᩥ.

ᨴᩮᩅᩥᨶ᩠ᨴᨶᩣᨣᩥᨶ᩠ᨴᨶᩁᩥᨶ᩠ᨴᨸᩪᨩᩥᨲᩮᩣ,

ᨾᨶᩩᩔᩥᨶ᩠ᨴᩈᩮᨭ᩠ᨮᩮᩉᩥ ᨲᨳᩮᩅ ᨸᩪᨩᩥᨲᩮᩣ;

ᨲᩴ ᩅᨶ᩠ᨴᨳ [ᨲᩴ ᨲᩴ ᩅᨶ᩠ᨴᨳ (ᩈ᩠ᨿᩣ.)] ᨸᨬ᩠ᨩᩃᩥᨠᩣ ᩃᨽᩥᨲ᩠ᩅᩣ,

ᨻᩩᨴ᩠ᨵᩮᩣ ᩉᩅᩮ ᨠᨸ᩠ᨸᩈᨲᩮᩉᩥ ᨴᩩᩃ᩠ᩃᨽᩮᩣᨲᩥ.

ᨧᨲ᩠ᨲᩣᩃᩦᩈ ᩈᨾᩣ ᨴᨶ᩠ᨲᩣ, ᨠᩮᩈᩣ ᩃᩮᩣᨾᩣ ᨧ ᩈᨻ᩠ᨻᩈᩮᩣ;

ᨴᩮᩅᩣ ᩉᩁᩥᩴᩈᩩ ᩑᨠᩮᨠᩴ, ᨧᨠ᩠ᨠᩅᩣᩊᨸᩁᨾ᩠ᨸᩁᩣᨲᩥ.

ᨾᩉᩣᨸᩁᩥᨶᩥᨻ᩠ᨻᩣᨶᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᨲᨲᩥᨿᩴ.

᪔. ᨾᩉᩣᩈᩩᨴᩔᨶᩈᩩᨲ᩠ᨲᩴ

᪒᪔᪑. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᨠᩩᩈᩥᨶᩣᩁᩣᨿᩴ ᩅᩥᩉᩁᨲᩥ ᩏᨸᩅᨲ᩠ᨲᨶᩮ ᨾᩃ᩠ᩃᩣᨶᩴ ᩈᩣᩃᩅᨶᩮ ᩋᨶ᩠ᨲᩁᩮᨶ ᨿᨾᨠᩈᩣᩃᩣᨶᩴ ᨸᩁᩥᨶᩥᨻ᩠ᨻᩣᨶᩈᨾᨿᩮ. ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᨾᩣ, ᨽᨶ᩠ᨲᩮ, ᨽᨣᩅᩣ ᩍᨾᩈ᩠ᨾᩥᩴ ᨡᩩᨴ᩠ᨴᨠᨶᨣᩁᨠᩮ ᩏᨩ᩠ᨩᨦ᩠ᨣᩃᨶᨣᩁᨠᩮ ᩈᩣᨡᩣᨶᨣᩁᨠᩮ ᨸᩁᩥᨶᩥᨻ᩠ᨻᩣᨿᩥ. ᩈᨶ᩠ᨲᩥ, ᨽᨶ᩠ᨲᩮ, ᩋᨬ᩠ᨬᩣᨶᩥ ᨾᩉᩣᨶᨣᩁᩣᨶᩥ. ᩈᩮᨿ᩠ᨿᨳᩥᨴᩴ – ᨧᨾ᩠ᨸᩣ, ᩁᩣᨩᨣᩉᩴ, ᩈᩣᩅᨲ᩠ᨳᩥ, ᩈᩣᨠᩮᨲᩴ, ᨠᩮᩣᩈᨾ᩠ᨻᩦ, ᨻᩣᩁᩣᨱᩈᩦ; ᩑᨲ᩠ᨳ ᨽᨣᩅᩣ ᨸᩁᩥᨶᩥᨻ᩠ᨻᩣᨿᨲᩩ. ᩑᨲ᩠ᨳ ᨻᩉᩪ ᨡᨲ᩠ᨲᩥᨿᨾᩉᩣᩈᩣᩃᩣ ᨻᩕᩣᩉ᩠ᨾᨱᨾᩉᩣᩈᩣᩃᩣ ᨣᩉᨸᨲᩥᨾᩉᩣᩈᩣᩃᩣ ᨲᨳᩣᨣᨲᩮ ᩋᨽᩥᨸ᩠ᨸᩈᨶ᩠ᨶᩣ, ᨲᩮ ᨲᨳᩣᨣᨲᩔ ᩈᩁᩦᩁᨸᩪᨩᩴ ᨠᩁᩥᩔᨶ᩠ᨲᩦ’’ᨲᩥ.

᪒᪔᪒. ‘‘ᨾᩣ ᩉᩮᩅᩴ, ᩌᨶᨶ᩠ᨴ, ᩋᩅᨧ; ᨾᩣ ᩉᩮᩅᩴ, ᩌᨶᨶ᩠ᨴ, ᩋᩅᨧ – ᨡᩩᨴ᩠ᨴᨠᨶᨣᩁᨠᩴ ᩏᨩ᩠ᨩᨦ᩠ᨣᩃᨶᨣᩁᨠᩴ ᩈᩣᨡᩣᨶᨣᩁᨠ’’ᨶ᩠ᨲᩥ.

ᨠᩩᩈᩣᩅᨲᩦᩁᩣᨩᨵᩣᨶᩦ

‘‘ᨽᩪᨲᨸᩩᨻ᩠ᨻᩴ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨶᩣᨾ ᩋᩉᩮᩣᩈᩥ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᩅᩈᩥᨲ᩠ᨲᩮᩣ [ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩣ (ᨠ.), ᨧᨠ᩠ᨠᩅᨲ᩠ᨲᩦᨵᨾ᩠ᨾᩥᨠᩮᩣ ᨵᨾ᩠ᨾᩁᩣᨩᩣ (ᨾᩉᩣᨸᩁᩥᨶᩥᨻ᩠ᨻᩣᨶᩈᩩᨲ᩠ᨲ)] ᨧᩣᨲᩩᩁᨶ᩠ᨲᩮᩣ ᩅᩥᨩᩥᨲᩣᩅᩦ ᨩᨶᨸᨴᨲ᩠ᨳᩣᩅᩁᩥᨿᨸ᩠ᨸᨲ᩠ᨲᩮᩣ. ᩁᨬ᩠ᨬᩮᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩔ ᩋᨿᩴ ᨠᩩᩈᩥᨶᩣᩁᩣ ᨠᩩᩈᩣᩅᨲᩦ ᨶᩣᨾ ᩁᩣᨩᨵᩣᨶᩦ ᩋᩉᩮᩣᩈᩥ. ᨸᩩᩁᨲ᩠ᨳᩥᨾᩮᨶ ᨧ ᨸᨧ᩠ᨨᩥᨾᩮᨶ ᨧ ᨴ᩠ᩅᩣᨴᩈᨿᩮᩣᨩᨶᩣᨶᩥ ᩌᨿᩣᨾᩮᨶ, ᩏᨲ᩠ᨲᩁᩮᨶ ᨧ ᨴᨠ᩠ᨡᩥᨱᩮᨶ ᨧ ᩈᨲ᩠ᨲᨿᩮᩣᨩᨶᩣᨶᩥ ᩅᩥᨲ᩠ᨳᩣᩁᩮᨶ. ᨠᩩᩈᩣᩅᨲᩦ, ᩌᨶᨶ᩠ᨴ, ᩁᩣᨩᨵᩣᨶᩦ ᩍᨴ᩠ᨵᩣ ᨧᩮᩅ ᩋᩉᩮᩣᩈᩥ ᨹᩦᨲᩣ ᨧ ᨻᩉᩩᨩᨶᩣ ᨧ ᩌᨠᩥᨱ᩠ᨱᨾᨶᩩᩔᩣ ᨧ ᩈᩩᨽᩥᨠ᩠ᨡᩣ ᨧ. ᩈᩮᨿ᩠ᨿᨳᩣᨸᩥ, ᩌᨶᨶ᩠ᨴ, ᨴᩮᩅᩣᨶᩴ ᩌᩊᨠᨾᨶ᩠ᨴᩣ ᨶᩣᨾ ᩁᩣᨩᨵᩣᨶᩦ ᩍᨴ᩠ᨵᩣ ᨧᩮᩅ ᩉᩮᩣᨲᩥ ᨹᩦᨲᩣ ᨧ [ᩍᨴ᩠ᨵᩣ ᨧᩮᩅ ᩋᩉᩮᩣᩈᩥ ᨹᩦᨲᩣ ᨧ (ᩈ᩠ᨿᩣ.)] ᨻᩉᩩᨩᨶᩣ ᨧ ᩌᨠᩥᨱ᩠ᨱᨿᨠ᩠ᨡᩣ ᨧ ᩈᩩᨽᩥᨠ᩠ᨡᩣ ᨧ; ᩑᩅᨾᩮᩅ ᨡᩮᩣ, ᩌᨶᨶ᩠ᨴ, ᨠᩩᩈᩣᩅᨲᩦ ᩁᩣᨩᨵᩣᨶᩦ ᩍᨴ᩠ᨵᩣ ᨧᩮᩅ ᩋᩉᩮᩣᩈᩥ ᨹᩦᨲᩣ ᨧ ᨻᩉᩩᨩᨶᩣ ᨧ ᩌᨠᩥᨱ᩠ᨱᨾᨶᩩᩔᩣ ᨧ ᩈᩩᨽᩥᨠ᩠ᨡᩣ ᨧ. ᨠᩩᩈᩣᩅᨲᩦ, ᩌᨶᨶ᩠ᨴ, ᩁᩣᨩᨵᩣᨶᩦ ᨴᩈᩉᩥ ᩈᨴ᩠ᨴᩮᩉᩥ ᩋᩅᩥᩅᩥᨲ᩠ᨲᩣ ᩋᩉᩮᩣᩈᩥ ᨴᩥᩅᩣ ᨧᩮᩅ ᩁᨲ᩠ᨲᩥᨬ᩠ᨧ, ᩈᩮᨿ᩠ᨿᨳᩥᨴᩴ – ᩉᨲ᩠ᨳᩥᩈᨴ᩠ᨴᩮᨶ ᩋᩔᩈᨴ᩠ᨴᩮᨶ ᩁᨳᩈᨴ᩠ᨴᩮᨶ ᨽᩮᩁᩥᩈᨴ᩠ᨴᩮᨶ ᨾᩩᨴᩥᨦ᩠ᨣᩈᨴ᩠ᨴᩮᨶ ᩅᩦᨱᩣᩈᨴ᩠ᨴᩮᨶ ᨣᩦᨲᩈᨴ᩠ᨴᩮᨶ ᩈᨦ᩠ᨡᩈᨴ᩠ᨴᩮᨶ ᩈᨾ᩠ᨾᩈᨴ᩠ᨴᩮᨶ ᨸᩣᨱᩥᨲᩣᩊᩈᨴ᩠ᨴᩮᨶ ‘ᩋᩈ᩠ᨶᩣᨳ ᨸᩥᩅᨳ ᨡᩣᨴᨳᩣ’ᨲᩥ ᨴᩈᨾᩮᨶ ᩈᨴ᩠ᨴᩮᨶ.

‘‘ᨠᩩᩈᩣᩅᨲᩦ, ᩌᨶᨶ᩠ᨴ, ᩁᩣᨩᨵᩣᨶᩦ ᩈᨲ᩠ᨲᩉᩥ ᨸᩣᨠᩣᩁᩮᩉᩥ ᨸᩁᩥᨠ᩠ᨡᩥᨲ᩠ᨲᩣ ᩋᩉᩮᩣᩈᩥ. ᩑᨠᩮᩣ ᨸᩣᨠᩣᩁᩮᩣ ᩈᩮᩣᩅᨱ᩠ᨱᨾᨿᩮᩣ, ᩑᨠᩮᩣ ᩁᩪᨸᩥᨿᨾᨿᩮᩣ, ᩑᨠᩮᩣ ᩅᩮᩊᩩᩁᩥᨿᨾᨿᩮᩣ, ᩑᨠᩮᩣ ᨹᩃᩥᨠᨾᨿᩮᩣ, ᩑᨠᩮᩣ ᩃᩮᩣᩉᩥᨲᨦ᩠ᨠᨾᨿᩮᩣ [ᩃᩮᩣᩉᩥᨲᨦ᩠ᨣᨾᨿᩮᩣ (ᨠ.), ᩃᩮᩣᩉᩥᨲᨠᨾᨿᩮᩣ (ᨻ᩠ᨿᩣᨠᩁᨱᩮᩈᩩ)], ᩑᨠᩮᩣ ᨾᩈᩣᩁᨣᩃ᩠ᩃᨾᨿᩮᩣ, ᩑᨠᩮᩣ ᩈᨻ᩠ᨻᩁᨲᨶᨾᨿᩮᩣ. ᨠᩩᩈᩣᩅᨲᩥᨿᩣ, ᩌᨶᨶ᩠ᨴ, ᩁᩣᨩᨵᩣᨶᩥᨿᩣ ᨧᨲᩩᨶ᩠ᨶᩴ ᩅᨱ᩠ᨱᩣᨶᩴ ᨴ᩠ᩅᩣᩁᩣᨶᩥ ᩋᩉᩮᩈᩩᩴ. ᩑᨠᩴ ᨴ᩠ᩅᩣᩁᩴ ᩈᩮᩣᩅᨱ᩠ᨱᨾᨿᩴ, ᩑᨠᩴ ᩁᩪᨸᩥᨿᨾᨿᩴ, ᩑᨠᩴ ᩅᩮᩊᩩᩁᩥᨿᨾᨿᩴ, ᩑᨠᩴ ᨹᩃᩥᨠᨾᨿᩴ. ᩑᨠᩮᨠᩈ᩠ᨾᩥᩴ ᨴ᩠ᩅᩣᩁᩮ ᩈᨲ᩠ᨲ ᩈᨲ᩠ᨲ ᩑᩈᩥᨠᩣ ᨶᩥᨡᩣᨲᩣ ᩋᩉᩮᩈᩩᩴ ᨲᩥᨸᩮᩣᩁᩥᩈᨦ᩠ᨣᩣ ᨲᩥᨸᩮᩣᩁᩥᩈᨶᩥᨡᩣᨲᩣ ᨴ᩠ᩅᩣᨴᩈᨸᩮᩣᩁᩥᩈᩣ ᩏᨻ᩠ᨻᩮᨵᩮᨶ. ᩑᨠᩣ ᩑᩈᩥᨠᩣ ᩈᩮᩣᩅᨱ᩠ᨱᨾᨿᩣ, ᩑᨠᩣ ᩁᩪᨸᩥᨿᨾᨿᩣ, ᩑᨠᩣ ᩅᩮᩊᩩᩁᩥᨿᨾᨿᩣ, ᩑᨠᩣ ᨹᩃᩥᨠᨾᨿᩣ, ᩑᨠᩣ ᩃᩮᩣᩉᩥᨲᨦ᩠ᨠᨾᨿᩣ, ᩑᨠᩣ ᨾᩈᩣᩁᨣᩃ᩠ᩃᨾᨿᩣ, ᩑᨠᩣ ᩈᨻ᩠ᨻᩁᨲᨶᨾᨿᩣ. ᨠᩩᩈᩣᩅᨲᩦ, ᩌᨶᨶ᩠ᨴ, ᩁᩣᨩᨵᩣᨶᩦ ᩈᨲ᩠ᨲᩉᩥ ᨲᩣᩃᨸᨶ᩠ᨲᩦᩉᩥ ᨸᩁᩥᨠ᩠ᨡᩥᨲ᩠ᨲᩣ ᩋᩉᩮᩣᩈᩥ. ᩑᨠᩣ ᨲᩣᩃᨸᨶ᩠ᨲᩥ ᩈᩮᩣᩅᨱ᩠ᨱᨾᨿᩣ, ᩑᨠᩣ ᩁᩪᨸᩥᨿᨾᨿᩣ, ᩑᨠᩣ ᩅᩮᩊᩩᩁᩥᨿᨾᨿᩣ, ᩑᨠᩣ ᨹᩃᩥᨠᨾᨿᩣ, ᩑᨠᩣ ᩃᩮᩣᩉᩥᨲᨦ᩠ᨠᨾᨿᩣ, ᩑᨠᩣ ᨾᩈᩣᩁᨣᩃ᩠ᩃᨾᨿᩣ, ᩑᨠᩣ ᩈᨻ᩠ᨻᩁᨲᨶᨾᨿᩣ. ᩈᩮᩣᩅᨱ᩠ᨱᨾᨿᩔ ᨲᩣᩃᩔ ᩈᩮᩣᩅᨱ᩠ᨱᨾᨿᩮᩣ ᨡᨶ᩠ᨵᩮᩣ ᩋᩉᩮᩣᩈᩥ, ᩁᩪᨸᩥᨿᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᩁᩪᨸᩥᨿᨾᨿᩔ ᨲᩣᩃᩔ ᩁᩪᨸᩥᨿᨾᨿᩮᩣ ᨡᨶ᩠ᨵᩮᩣ ᩋᩉᩮᩣᩈᩥ, ᩈᩮᩣᩅᨱ᩠ᨱᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᩅᩮᩊᩩᩁᩥᨿᨾᨿᩔ ᨲᩣᩃᩔ ᩅᩮᩊᩩᩁᩥᨿᨾᨿᩮᩣ ᨡᨶ᩠ᨵᩮᩣ ᩋᩉᩮᩣᩈᩥ, ᨹᩃᩥᨠᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᨹᩃᩥᨠᨾᨿᩔ ᨲᩣᩃᩔ ᨹᩃᩥᨠᨾᨿᩮᩣ ᨡᨶ᩠ᨵᩮᩣ ᩋᩉᩮᩣᩈᩥ, ᩅᩮᩊᩩᩁᩥᨿᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᩃᩮᩣᩉᩥᨲᨦ᩠ᨠᨾᨿᩔ ᨲᩣᩃᩔ ᩃᩮᩣᩉᩥᨲᨦ᩠ᨠᨾᨿᩮᩣ ᨡᨶ᩠ᨵᩮᩣ ᩋᩉᩮᩣᩈᩥ, ᨾᩈᩣᩁᨣᩃ᩠ᩃᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᨾᩈᩣᩁᨣᩃ᩠ᩃᨾᨿᩔ ᨲᩣᩃᩔ ᨾᩈᩣᩁᨣᩃ᩠ᩃᨾᨿᩮᩣ ᨡᨶ᩠ᨵᩮᩣ ᩋᩉᩮᩣᩈᩥ, ᩃᩮᩣᩉᩥᨲᨦ᩠ᨠᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᩈᨻ᩠ᨻᩁᨲᨶᨾᨿᩔ ᨲᩣᩃᩔ ᩈᨻ᩠ᨻᩁᨲᨶᨾᨿᩮᩣ ᨡᨶ᩠ᨵᩮᩣ ᩋᩉᩮᩣᩈᩥ, ᩈᨻ᩠ᨻᩁᨲᨶᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᨲᩣᩈᩴ ᨡᩮᩣ ᨸᨶᩣᨶᨶ᩠ᨴ, ᨲᩣᩃᨸᨶ᩠ᨲᩦᨶᩴ ᩅᩣᨲᩮᩁᩥᨲᩣᨶᩴ ᩈᨴ᩠ᨴᩮᩣ ᩋᩉᩮᩣᩈᩥ ᩅᨣ᩠ᨣᩩ ᨧ ᩁᨩᨶᩦᨿᩮᩣ ᨧ ᨡᨾᨶᩦᨿᩮᩣ [ᨠᨾᨶᩦᨿᩮᩣ (ᩈᩦ. ᩈ᩠ᨿᩣ. ᨸᩦ.)] ᨧ ᨾᨴᨶᩦᨿᩮᩣ ᨧ. ᩈᩮᨿ᩠ᨿᨳᩣᨸᩥ, ᩌᨶᨶ᩠ᨴ, ᨸᨬ᩠ᨧᨦ᩠ᨣᩥᨠᩔ ᨲᩪᩁᩥᨿᩔ ᩈᩩᩅᩥᨶᩦᨲᩔ ᩈᩩᨸ᩠ᨸᨭᩥᨲᩣᩊᩥᨲᩔ ᩈᩩᨠᩩᩈᩃᩮᩉᩥ ᩈᨾᨶ᩠ᨶᩣᩉᨲᩔ ᩈᨴ᩠ᨴᩮᩣ ᩉᩮᩣᨲᩥ ᩅᨣ᩠ᨣᩩ ᨧ ᩁᨩᨶᩦᨿᩮᩣ ᨧ ᨡᨾᨶᩦᨿᩮᩣ ᨧ ᨾᨴᨶᩦᨿᩮᩣ ᨧ, ᩑᩅᨾᩮᩅ ᨡᩮᩣ, ᩌᨶᨶ᩠ᨴ, ᨲᩣᩈᩴ ᨲᩣᩃᨸᨶ᩠ᨲᩦᨶᩴ ᩅᩣᨲᩮᩁᩥᨲᩣᨶᩴ ᩈᨴ᩠ᨴᩮᩣ ᩋᩉᩮᩣᩈᩥ ᩅᨣ᩠ᨣᩩ ᨧ ᩁᨩᨶᩦᨿᩮᩣ ᨧ ᨡᨾᨶᩦᨿᩮᩣ ᨧ ᨾᨴᨶᩦᨿᩮᩣ ᨧ. ᨿᩮ ᨡᩮᩣ ᨸᨶᩣᨶᨶ᩠ᨴ, ᨲᩮᨶ ᩈᨾᨿᩮᨶ ᨠᩩᩈᩣᩅᨲᩥᨿᩣ ᩁᩣᨩᨵᩣᨶᩥᨿᩣ ᨵᩩᨲ᩠ᨲᩣ ᩋᩉᩮᩈᩩᩴ ᩈᩮᩣᨱ᩠ᨯᩣ ᨸᩥᨸᩣᩈᩣ, ᨲᩮ ᨲᩣᩈᩴ ᨲᩣᩃᨸᨶ᩠ᨲᩦᨶᩴ ᩅᩣᨲᩮᩁᩥᨲᩣᨶᩴ ᩈᨴ᩠ᨴᩮᨶ ᨸᩁᩥᨧᩣᩁᩮᩈᩩᩴ.

ᨧᨠ᩠ᨠᩁᨲᨶᩴ

᪒᪔᪓. ‘‘ᩁᩣᨩᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩮᩣ ᩈᨲ᩠ᨲᩉᩥ ᩁᨲᨶᩮᩉᩥ ᩈᨾᨶ᩠ᨶᩣᨣᨲᩮᩣ ᩋᩉᩮᩣᩈᩥ ᨧᨲᩪᩉᩥ ᨧ ᩍᨴ᩠ᨵᩦᩉᩥ. ᨠᨲᨾᩮᩉᩥ ᩈᨲ᩠ᨲᩉᩥ? ᩍᨵᩣᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᨲᨴᩉᩩᨸᩮᩣᩈᨳᩮ ᨸᨶ᩠ᨶᩁᩈᩮ ᩈᩦᩈᩴᨶ᩠ᩉᩣᨲᩔ ᩏᨸᩮᩣᩈᨳᩥᨠᩔ ᩏᨸᩁᩥᨸᩣᩈᩣᨴᩅᩁᨣᨲᩔ ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᨸᩣᨲᩩᩁᩉᩮᩣᩈᩥ ᩈᩉᩔᩣᩁᩴ ᩈᨶᩮᨾᩥᨠᩴ ᩈᨶᩣᨽᩥᨠᩴ ᩈᨻ᩠ᨻᩣᨠᩣᩁᨸᩁᩥᨸᩪᩁᩴ. ᨴᩥᩈ᩠ᩅᩣ ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩑᨲᨴᩉᩮᩣᩈᩥ – ‘ᩈᩩᨲᩴ ᨡᩮᩣ ᨸᨶᩮᨲᩴ – ‘‘ᨿᩔ ᩁᨬ᩠ᨬᩮᩣ ᨡᨲ᩠ᨲᩥᨿᩔ ᨾᩩᨴ᩠ᨵᩣᩅᩈᩥᨲ᩠ᨲᩔ ᨲᨴᩉᩩᨸᩮᩣᩈᨳᩮ ᨸᨶ᩠ᨶᩁᩈᩮ ᩈᩦᩈᩴᨶ᩠ᩉᩣᨲᩔ ᩏᨸᩮᩣᩈᨳᩥᨠᩔ ᩏᨸᩁᩥᨸᩣᩈᩣᨴᩅᩁᨣᨲᩔ ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᨸᩣᨲᩩᨽᩅᨲᩥ ᩈᩉᩔᩣᩁᩴ ᩈᨶᩮᨾᩥᨠᩴ ᩈᨶᩣᨽᩥᨠᩴ ᩈᨻ᩠ᨻᩣᨠᩣᩁᨸᩁᩥᨸᩪᩁᩴ, ᩈᩮᩣ ᩉᩮᩣᨲᩥ ᩁᩣᨩᩣ ᨧᨠ᩠ᨠᩅᨲ᩠ᨲᩦ’’ᨲᩥ. ᩋᩔᩴ ᨶᩩ ᨡᩮᩣ ᩋᩉᩴ ᩁᩣᨩᩣ ᨧᨠ᩠ᨠᩅᨲ᩠ᨲᩦ’ᨲᩥ.

᪒᪔᪔. ‘‘ᩋᨳ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᩏᨭ᩠ᨮᩣᨿᩣᩈᨶᩣ ᩑᨠᩴᩈᩴ ᩏᨲ᩠ᨲᩁᩣᩈᨦ᩠ᨣᩴ ᨠᩁᩥᨲ᩠ᩅᩣ ᩅᩣᨾᩮᨶ ᩉᨲ᩠ᨳᩮᨶ ᩈᩩᩅᨱ᩠ᨱᨽᩥᨦ᩠ᨠᩣᩁᩴ ᨣᩉᩮᨲ᩠ᩅᩣ ᨴᨠ᩠ᨡᩥᨱᩮᨶ ᩉᨲ᩠ᨳᩮᨶ ᨧᨠ᩠ᨠᩁᨲᨶᩴ ᩋᨻ᩠ᨽᩩᨠ᩠ᨠᩥᩁᩥ – ‘ᨸᩅᨲ᩠ᨲᨲᩩ ᨽᩅᩴ ᨧᨠ᩠ᨠᩁᨲᨶᩴ, ᩋᨽᩥᩅᩥᨩᩥᨶᩣᨲᩩ ᨽᩅᩴ ᨧᨠ᩠ᨠᩁᨲᨶ’ᨶ᩠ᨲᩥ. ᩋᨳ ᨡᩮᩣ ᨲᩴ, ᩌᨶᨶ᩠ᨴ, ᨧᨠ᩠ᨠᩁᨲᨶᩴ ᨸᩩᩁᨲ᩠ᨳᩥᨾᩴ ᨴᩥᩈᩴ ᨸᩅᨲ᩠ᨲᩥ [ᨸᩅᨲ᩠ᨲᨲᩥ (ᩈ᩠ᨿᩣ. ᨠ.)], ᩋᨶ᩠ᩅᨴᩮᩅ [ᩋᨶᩩᨴᩮᩅ (ᩈ᩠ᨿᩣ.)] ᩁᩣᨩᩣ ᨾᩉᩣᩈᩩᨴᩔᨶᩮᩣ ᩈᨴ᩠ᨵᩥᩴ ᨧᨲᩩᩁᨦ᩠ᨣᩥᨶᩥᨿᩣ ᩈᩮᨶᩣᨿ, ᨿᩈ᩠ᨾᩥᩴ ᨡᩮᩣ ᨸᨶᩣᨶᨶ᩠ᨴ, ᨸᨴᩮᩈᩮ ᨧᨠ᩠ᨠᩁᨲᨶᩴ ᨸᨲᩥᨭ᩠ᨮᩣᩈᩥ, ᨲᨲ᩠ᨳ ᩁᩣᨩᩣ ᨾᩉᩣᩈᩩᨴᩔᨶᩮᩣ ᩅᩣᩈᩴ ᩏᨸᨣᨧ᩠ᨨᩥ ᩈᨴ᩠ᨵᩥᩴ ᨧᨲᩩᩁᨦ᩠ᨣᩥᨶᩥᨿᩣ ᩈᩮᨶᩣᨿ. ᨿᩮ ᨡᩮᩣ ᨸᨶᩣᨶᨶ᩠ᨴ, ᨸᩩᩁᨲ᩠ᨳᩥᨾᩣᨿ ᨴᩥᩈᩣᨿ ᨸᨭᩥᩁᩣᨩᩣᨶᩮᩣ, ᨲᩮ ᩁᩣᨩᩣᨶᩴ ᨾᩉᩣᩈᩩᨴᩔᨶᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᨾᩣᩉᩴᩈᩩ – ‘ᩑᩉᩥ ᨡᩮᩣ ᨾᩉᩣᩁᩣᨩ, ᩈ᩠ᩅᩣᨣᨲᩴ ᨲᩮ ᨾᩉᩣᩁᩣᨩ, ᩈᨠᩴ ᨲᩮ ᨾᩉᩣᩁᩣᨩ, ᩋᨶᩩᩈᩣᩈ ᨾᩉᩣᩁᩣᨩᩣ’ᨲᩥ. ᩁᩣᨩᩣ ᨾᩉᩣᩈᩩᨴᩔᨶᩮᩣ ᩑᩅᨾᩣᩉ – ‘ᨸᩣᨱᩮᩣ ᨶ ᩉᨶ᩠ᨲᨻ᩠ᨻᩮᩣ, ᩋᨴᩥᨶ᩠ᨶᩴ ᨶ ᩌᨴᩣᨲᨻ᩠ᨻᩴ, ᨠᩣᨾᩮᩈᩩ ᨾᩥᨧ᩠ᨨᩣ ᨶ ᨧᩁᩥᨲᨻ᩠ᨻᩣ, ᨾᩩᩈᩣ ᨶ ᨽᨱᩥᨲᨻ᩠ᨻᩣ, ᨾᨩ᩠ᨩᩴ ᨶ ᨸᩣᨲᨻ᩠ᨻᩴ, ᨿᨳᩣᨽᩩᨲ᩠ᨲᨬ᩠ᨧ ᨽᩩᨬ᩠ᨩᨳᩣ’ᨲᩥ. ᨿᩮ ᨡᩮᩣ ᨸᨶᩣᨶᨶ᩠ᨴ, ᨸᩩᩁᨲ᩠ᨳᩥᨾᩣᨿ ᨴᩥᩈᩣᨿ ᨸᨭᩥᩁᩣᨩᩣᨶᩮᩣ, ᨲᩮ ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩋᨶᩩᨿᨶ᩠ᨲᩣ ᩋᩉᩮᩈᩩᩴ. ᩋᨳ ᨡᩮᩣ ᨲᩴ, ᩌᨶᨶ᩠ᨴ, ᨧᨠ᩠ᨠᩁᨲᨶᩴ ᨸᩩᩁᨲ᩠ᨳᩥᨾᩴ ᩈᨾᩩᨴ᩠ᨴᩴ ᩋᨩ᩠ᨫᩮᩣᨣᩣᩉᩮᨲ᩠ᩅᩣ ᨸᨧ᩠ᨧᩩᨲ᩠ᨲᩁᩥᨲ᩠ᩅᩣ ᨴᨠ᩠ᨡᩥᨱᩴ ᨴᩥᩈᩴ ᨸᩅᨲ᩠ᨲᩥ…ᨸᩮ… ᨴᨠ᩠ᨡᩥᨱᩴ ᩈᨾᩩᨴ᩠ᨴᩴ ᩋᨩ᩠ᨫᩮᩣᨣᩣᩉᩮᨲ᩠ᩅᩣ ᨸᨧ᩠ᨧᩩᨲ᩠ᨲᩁᩥᨲ᩠ᩅᩣ ᨸᨧ᩠ᨨᩥᨾᩴ ᨴᩥᩈᩴ ᨸᩅᨲ᩠ᨲᩥ…ᨸᩮ… ᨸᨧ᩠ᨨᩥᨾᩴ ᩈᨾᩩᨴ᩠ᨴᩴ ᩋᨩ᩠ᨫᩮᩣᨣᩣᩉᩮᨲ᩠ᩅᩣ ᨸᨧ᩠ᨧᩩᨲ᩠ᨲᩁᩥᨲ᩠ᩅᩣ ᩏᨲ᩠ᨲᩁᩴ ᨴᩥᩈᩴ ᨸᩅᨲ᩠ᨲᩥ, ᩋᨶ᩠ᩅᨴᩮᩅ ᩁᩣᨩᩣ ᨾᩉᩣᩈᩩᨴᩔᨶᩮᩣ ᩈᨴ᩠ᨵᩥᩴ ᨧᨲᩩᩁᨦ᩠ᨣᩥᨶᩥᨿᩣ ᩈᩮᨶᩣᨿ. ᨿᩈ᩠ᨾᩥᩴ ᨡᩮᩣ ᨸᨶᩣᨶᨶ᩠ᨴ, ᨸᨴᩮᩈᩮ ᨧᨠ᩠ᨠᩁᨲᨶᩴ ᨸᨲᩥᨭ᩠ᨮᩣᩈᩥ, ᨲᨲ᩠ᨳ ᩁᩣᨩᩣ ᨾᩉᩣᩈᩩᨴᩔᨶᩮᩣ ᩅᩣᩈᩴ ᩏᨸᨣᨧ᩠ᨨᩥ ᩈᨴ᩠ᨵᩥᩴ ᨧᨲᩩᩁᨦ᩠ᨣᩥᨶᩥᨿᩣ ᩈᩮᨶᩣᨿ. ᨿᩮ ᨡᩮᩣ ᨸᨶᩣᨶᨶ᩠ᨴ, ᩏᨲ᩠ᨲᩁᩣᨿ ᨴᩥᩈᩣᨿ ᨸᨭᩥᩁᩣᨩᩣᨶᩮᩣ, ᨲᩮ ᩁᩣᨩᩣᨶᩴ ᨾᩉᩣᩈᩩᨴᩔᨶᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᨾᩣᩉᩴᩈᩩ – ‘ᩑᩉᩥ ᨡᩮᩣ ᨾᩉᩣᩁᩣᨩ, ᩈ᩠ᩅᩣᨣᨲᩴ ᨲᩮ ᨾᩉᩣᩁᩣᨩ, ᩈᨠᩴ ᨲᩮ ᨾᩉᩣᩁᩣᨩ, ᩋᨶᩩᩈᩣᩈ ᨾᩉᩣᩁᩣᨩᩣ’ᨲᩥ. ᩁᩣᨩᩣ ᨾᩉᩣᩈᩩᨴᩔᨶᩮᩣ ᩑᩅᨾᩣᩉ – ‘ᨸᩣᨱᩮᩣ ᨶ ᩉᨶ᩠ᨲᨻ᩠ᨻᩮᩣ, ᩋᨴᩥᨶ᩠ᨶᩴ ᨶ ᩌᨴᩣᨲᨻ᩠ᨻᩴ, ᨠᩣᨾᩮᩈᩩ ᨾᩥᨧ᩠ᨨᩣ ᨶ ᨧᩁᩥᨲᨻ᩠ᨻᩣ, ᨾᩩᩈᩣ ᨶ ᨽᨱᩥᨲᨻ᩠ᨻᩣ, ᨾᨩ᩠ᨩᩴ ᨶ ᨸᩣᨲᨻ᩠ᨻᩴ, ᨿᨳᩣᨽᩩᨲ᩠ᨲᨬ᩠ᨧ ᨽᩩᨬ᩠ᨩᨳᩣ’ᨲᩥ. ᨿᩮ ᨡᩮᩣ ᨸᨶᩣᨶᨶ᩠ᨴ, ᩏᨲ᩠ᨲᩁᩣᨿ ᨴᩥᩈᩣᨿ ᨸᨭᩥᩁᩣᨩᩣᨶᩮᩣ, ᨲᩮ ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩋᨶᩩᨿᨶ᩠ᨲᩣ ᩋᩉᩮᩈᩩᩴ.

᪒᪔᪕. ‘‘ᩋᨳ ᨡᩮᩣ ᨲᩴ, ᩌᨶᨶ᩠ᨴ, ᨧᨠ᩠ᨠᩁᨲᨶᩴ ᩈᨾᩩᨴ᩠ᨴᨸᩁᩥᨿᨶ᩠ᨲᩴ ᨸᨳᩅᩥᩴ ᩋᨽᩥᩅᩥᨩᩥᨶᩥᨲ᩠ᩅᩣ ᨠᩩᩈᩣᩅᨲᩥᩴ ᩁᩣᨩᨵᩣᨶᩥᩴ ᨸᨧ᩠ᨧᩣᨣᨶ᩠ᨲ᩠ᩅᩣ ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩋᨶ᩠ᨲᩮᨸᩩᩁᨴ᩠ᩅᩣᩁᩮ ᩋᨲ᩠ᨳᨠᩁᨱᨸᨾᩩᨡᩮ ᩋᨠ᩠ᨡᩣᩉᨲᩴ ᨾᨬ᩠ᨬᩮ ᩋᨭ᩠ᨮᩣᩈᩥ ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩋᨶ᩠ᨲᩮᨸᩩᩁᩴ ᩏᨸᩈᩮᩣᨽᨿᨾᩣᨶᩴ. ᩁᨬ᩠ᨬᩮᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩔ ᩑᩅᩁᩪᨸᩴ ᨧᨠ᩠ᨠᩁᨲᨶᩴ ᨸᩣᨲᩩᩁᩉᩮᩣᩈᩥ.

ᩉᨲ᩠ᨳᩥᩁᨲᨶᩴ

᪒᪔᪖. ‘‘ᨸᩩᨶ ᨧᨸᩁᩴ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩉᨲ᩠ᨳᩥᩁᨲᨶᩴ ᨸᩣᨲᩩᩁᩉᩮᩣᩈᩥ ᩈᨻ᩠ᨻᩈᩮᨲᩮᩣ ᩈᨲ᩠ᨲᨸ᩠ᨸᨲᩥᨭ᩠ᨮᩮᩣ ᩍᨴ᩠ᨵᩥᨾᩣ ᩅᩮᩉᩣᩈᨦ᩠ᨣᨾᩮᩣ ᩏᨸᩮᩣᩈᨳᩮᩣ ᨶᩣᨾ ᨶᩣᨣᩁᩣᨩᩣ. ᨲᩴ ᨴᩥᩈ᩠ᩅᩣ ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᨧᩥᨲ᩠ᨲᩴ ᨸᩈᩦᨴᩥ – ‘ᨽᨴ᩠ᨴᨠᩴ ᩅᨲ ᨽᩮᩣ ᩉᨲ᩠ᨳᩥᨿᩣᨶᩴ, ᩈᨧᩮ ᨴᨾᨳᩴ ᩏᨸᩮᨿ᩠ᨿᩣ’ᨲᩥ. ᩋᨳ ᨡᩮᩣ ᨲᩴ, ᩌᨶᨶ᩠ᨴ, ᩉᨲ᩠ᨳᩥᩁᨲᨶᩴ – ᩈᩮᨿ᩠ᨿᨳᩣᨸᩥ ᨶᩣᨾ ᨣᨶ᩠ᨵᩉᨲ᩠ᨳᩣᨩᩣᨶᩥᨿᩮᩣ ᨴᩦᨥᩁᨲ᩠ᨲᩴ ᩈᩩᨸᩁᩥᨴᨶ᩠ᨲᩮᩣ, ᩑᩅᨾᩮᩅ ᨴᨾᨳᩴ ᩏᨸᨣᨧ᩠ᨨᩥ. ᨽᩪᨲᨸᩩᨻ᩠ᨻᩴ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨲᨾᩮᩅ ᩉᨲ᩠ᨳᩥᩁᨲᨶᩴ ᩅᩦᨾᩴᩈᨾᩣᨶᩮᩣ ᨸᩩᨻ᩠ᨻᨱ᩠ᩉᩈᨾᨿᩴ ᩋᨽᩥᩁᩩᩉᩥᨲ᩠ᩅᩣ ᩈᨾᩩᨴ᩠ᨴᨸᩁᩥᨿᨶ᩠ᨲᩴ ᨸᨳᩅᩥᩴ ᩋᨶᩩᨿᩣᨿᩥᨲ᩠ᩅᩣ ᨠᩩᩈᩣᩅᨲᩥᩴ ᩁᩣᨩᨵᩣᨶᩥᩴ ᨸᨧ᩠ᨧᩣᨣᨶ᩠ᨲ᩠ᩅᩣ ᨸᩣᨲᩁᩣᩈᨾᨠᩣᩈᩥ. ᩁᨬ᩠ᨬᩮᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩔ ᩑᩅᩁᩪᨸᩴ ᩉᨲ᩠ᨳᩥᩁᨲᨶᩴ ᨸᩣᨲᩩᩁᩉᩮᩣᩈᩥ.

ᩋᩔᩁᨲᨶᩴ

᪒᪔᪗. ‘‘ᨸᩩᨶ ᨧᨸᩁᩴ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩋᩔᩁᨲᨶᩴ ᨸᩣᨲᩩᩁᩉᩮᩣᩈᩥ ᩈᨻ᩠ᨻᩈᩮᨲᩮᩣ ᨠᩣᩊᩈᩦᩈᩮᩣ ᨾᩩᨬ᩠ᨩᨠᩮᩈᩮᩣ ᩍᨴ᩠ᨵᩥᨾᩣ ᩅᩮᩉᩣᩈᨦ᩠ᨣᨾᩮᩣ ᩅᩃᩣᩉᨠᩮᩣ ᨶᩣᨾ ᩋᩔᩁᩣᨩᩣ. ᨲᩴ ᨴᩥᩈ᩠ᩅᩣ ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᨧᩥᨲ᩠ᨲᩴ ᨸᩈᩦᨴᩥ – ‘ᨽᨴ᩠ᨴᨠᩴ ᩅᨲ ᨽᩮᩣ ᩋᩔᨿᩣᨶᩴ ᩈᨧᩮ ᨴᨾᨳᩴ ᩏᨸᩮᨿ᩠ᨿᩣ’ᨲᩥ. ᩋᨳ ᨡᩮᩣ ᨲᩴ, ᩌᨶᨶ᩠ᨴ, ᩋᩔᩁᨲᨶᩴ ᩈᩮᨿ᩠ᨿᨳᩣᨸᩥ ᨶᩣᨾ ᨽᨴ᩠ᨴᩮᩣ ᩋᩔᩣᨩᩣᨶᩥᨿᩮᩣ ᨴᩦᨥᩁᨲ᩠ᨲᩴ ᩈᩩᨸᩁᩥᨴᨶ᩠ᨲᩮᩣ, ᩑᩅᨾᩮᩅ ᨴᨾᨳᩴ ᩏᨸᨣᨧ᩠ᨨᩥ. ᨽᩪᨲᨸᩩᨻ᩠ᨻᩴ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨲᨾᩮᩅ ᩋᩔᩁᨲᨶᩴ ᩅᩦᨾᩴᩈᨾᩣᨶᩮᩣ ᨸᩩᨻ᩠ᨻᨱ᩠ᩉᩈᨾᨿᩴ ᩋᨽᩥᩁᩩᩉᩥᨲ᩠ᩅᩣ ᩈᨾᩩᨴ᩠ᨴᨸᩁᩥᨿᨶ᩠ᨲᩴ ᨸᨳᩅᩥᩴ ᩋᨶᩩᨿᩣᨿᩥᨲ᩠ᩅᩣ ᨠᩩᩈᩣᩅᨲᩥᩴ ᩁᩣᨩᨵᩣᨶᩥᩴ ᨸᨧ᩠ᨧᩣᨣᨶ᩠ᨲ᩠ᩅᩣ ᨸᩣᨲᩁᩣᩈᨾᨠᩣᩈᩥ. ᩁᨬ᩠ᨬᩮᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩔ ᩑᩅᩁᩪᨸᩴ ᩋᩔᩁᨲᨶᩴ ᨸᩣᨲᩩᩁᩉᩮᩣᩈᩥ.

ᨾᨱᩥᩁᨲᨶᩴ

᪒᪔᪘. ‘‘ᨸᩩᨶ ᨧᨸᩁᩴ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᨾᨱᩥᩁᨲᨶᩴ ᨸᩣᨲᩩᩁᩉᩮᩣᩈᩥ. ᩈᩮᩣ ᩋᩉᩮᩣᩈᩥ ᨾᨱᩥ ᩅᩮᩊᩩᩁᩥᨿᩮᩣ ᩈᩩᨽᩮᩣ ᨩᩣᨲᩥᨾᩣ ᩋᨭ᩠ᨮᩴᩈᩮᩣ ᩈᩩᨸᩁᩥᨠᨾ᩠ᨾᨠᨲᩮᩣ ᩋᨧ᩠ᨨᩮᩣ ᩅᩥᨸ᩠ᨸᩈᨶ᩠ᨶᩮᩣ ᩋᨶᩣᩅᩥᩃᩮᩣ ᩈᨻ᩠ᨻᩣᨠᩣᩁᩈᨾ᩠ᨸᨶ᩠ᨶᩮᩣ. ᨲᩔ ᨡᩮᩣ ᨸᨶᩣᨶᨶ᩠ᨴ, ᨾᨱᩥᩁᨲᨶᩔ ᩌᨽᩣ ᩈᨾᨶ᩠ᨲᩣ ᨿᩮᩣᨩᨶᩴ ᨹᩩᨭᩣ ᩋᩉᩮᩣᩈᩥ. ᨽᩪᨲᨸᩩᨻ᩠ᨻᩴ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨲᨾᩮᩅ ᨾᨱᩥᩁᨲᨶᩴ ᩅᩦᨾᩴᩈᨾᩣᨶᩮᩣ ᨧᨲᩩᩁᨦ᩠ᨣᩥᨶᩥᩴ ᩈᩮᨶᩴ ᩈᨶ᩠ᨶᨿ᩠ᩉᩥᨲ᩠ᩅᩣ ᨾᨱᩥᩴ ᨵᨩᨣ᩠ᨣᩴ ᩌᩁᩮᩣᨸᩮᨲ᩠ᩅᩣ ᩁᨲ᩠ᨲᨶ᩠ᨵᨠᩣᩁᨲᩥᨾᩥᩈᩣᨿ ᨸᩣᨿᩣᩈᩥ. ᨿᩮ ᨡᩮᩣ ᨸᨶᩣᨶᨶ᩠ᨴ, ᩈᨾᨶ᩠ᨲᩣ ᨣᩣᨾᩣ ᩋᩉᩮᩈᩩᩴ, ᨲᩮ ᨲᩮᨶᩮᩣᨽᩣᩈᩮᨶ ᨠᨾ᩠ᨾᨶ᩠ᨲᩮ ᨸᨿᩮᩣᨩᩮᩈᩩᩴ ᨴᩥᩅᩣᨲᩥ ᨾᨬ᩠ᨬᨾᩣᨶᩣ. ᩁᨬ᩠ᨬᩮᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩔ ᩑᩅᩁᩪᨸᩴ ᨾᨱᩥᩁᨲᨶᩴ ᨸᩣᨲᩩᩁᩉᩮᩣᩈᩥ.

ᩍᨲ᩠ᨳᩥᩁᨲᨶᩴ

᪒᪔᪙. ‘‘ᨸᩩᨶ ᨧᨸᩁᩴ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩍᨲ᩠ᨳᩥᩁᨲᨶᩴ ᨸᩣᨲᩩᩁᩉᩮᩣᩈᩥ ᩋᨽᩥᩁᩪᨸᩣ ᨴᩔᨶᩦᨿᩣ ᨸᩣᩈᩣᨴᩥᨠᩣ ᨸᩁᨾᩣᨿ ᩅᨱ᩠ᨱᨸᩮᩣᨠ᩠ᨡᩁᨲᩣᨿ ᩈᨾᨶ᩠ᨶᩣᨣᨲᩣ ᨶᩣᨲᩥᨴᩦᨥᩣ ᨶᩣᨲᩥᩁᩔᩣ ᨶᩣᨲᩥᨠᩥᩈᩣ ᨶᩣᨲᩥᨳᩪᩃᩣ ᨶᩣᨲᩥᨠᩣᩊᩥᨠᩣ ᨶᩣᨧ᩠ᨧᩮᩣᨴᩣᨲᩣ ᩋᨲᩥᨠ᩠ᨠᨶ᩠ᨲᩣ ᨾᩣᨶᩩᩈᩥᩅᨱ᩠ᨱᩴ [ᨾᩣᨶᩩᩔᩥᩅᨱ᩠ᨱᩴ (ᩈ᩠ᨿᩣ.)] ᩋᨸ᩠ᨸᨲ᩠ᨲᩣ ᨴᩥᨻ᩠ᨻᩅᨱ᩠ᨱᩴ. ᨲᩔ ᨡᩮᩣ ᨸᨶᩣᨶᨶ᩠ᨴ, ᩍᨲ᩠ᨳᩥᩁᨲᨶᩔ ᩑᩅᩁᩪᨸᩮᩣ ᨠᩣᨿᩈᨾ᩠ᨹᩔᩮᩣ ᩉᩮᩣᨲᩥ, ᩈᩮᨿ᩠ᨿᨳᩣᨸᩥ ᨶᩣᨾ ᨲᩪᩃᨸᩥᨧᩩᨶᩮᩣ ᩅᩣ ᨠᨸ᩠ᨸᩣᩈᨸᩥᨧᩩᨶᩮᩣ ᩅᩣ. ᨲᩔ ᨡᩮᩣ ᨸᨶᩣᨶᨶ᩠ᨴ, ᩍᨲ᩠ᨳᩥᩁᨲᨶᩔ ᩈᩦᨲᩮ ᩏᨱ᩠ᩉᩣᨶᩥ ᨣᨲ᩠ᨲᩣᨶᩥ ᩉᩮᩣᨶ᩠ᨲᩥ, ᩏᨱ᩠ᩉᩮ ᩈᩦᨲᩣᨶᩥ. ᨲᩔ ᨡᩮᩣ ᨸᨶᩣᨶᨶ᩠ᨴ, ᩍᨲ᩠ᨳᩥᩁᨲᨶᩔ ᨠᩣᨿᨲᩮᩣ ᨧᨶ᩠ᨴᨶᨣᨶ᩠ᨵᩮᩣ ᩅᩣᨿᨲᩥ, ᨾᩩᨡᨲᩮᩣ ᩏᨸ᩠ᨸᩃᨣᨶ᩠ᨵᩮᩣ. ᨲᩴ ᨡᩮᩣ ᨸᨶᩣᨶᨶ᩠ᨴ, ᩍᨲ᩠ᨳᩥᩁᨲᨶᩴ ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᨸᩩᨻ᩠ᨻᩩᨭ᩠ᨮᩣᨿᩥᨶᩦ ᩋᩉᩮᩣᩈᩥ ᨸᨧ᩠ᨨᩣᨶᩥᨸᩣᨲᩥᨶᩦ ᨠᩥᨦ᩠ᨠᩣᩁᨸᨭᩥᩔᩣᩅᩥᨶᩦ ᨾᨶᩣᨸᨧᩣᩁᩥᨶᩦ ᨸᩥᨿᩅᩣᨴᩥᨶᩦ. ᨲᩴ ᨡᩮᩣ ᨸᨶᩣᨶᨶ᩠ᨴ, ᩍᨲ᩠ᨳᩥᩁᨲᨶᩴ ᩁᩣᨩᩣᨶᩴ ᨾᩉᩣᩈᩩᨴᩔᨶᩴ ᨾᨶᩈᩣᨸᩥ ᨶᩮᩣ ᩋᨲᩥᨧᩁᩥ [ᩋᨲᩥᨧᩁᩦ (ᨠ.), ᩋᨲᩥᨧᩣᩁᩦ (ᩈᩦ. ᩈ᩠ᨿᩣ. ᨸᩦ.)], ᨠᩩᨲᩮᩣ ᨸᨶ ᨠᩣᨿᩮᨶ. ᩁᨬ᩠ᨬᩮᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩔ ᩑᩅᩁᩪᨸᩴ ᩍᨲ᩠ᨳᩥᩁᨲᨶᩴ ᨸᩣᨲᩩᩁᩉᩮᩣᩈᩥ.

ᨣᩉᨸᨲᩥᩁᨲᨶᩴ

᪒᪕᪐. ‘‘ᨸᩩᨶ ᨧᨸᩁᩴ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᨣᩉᨸᨲᩥᩁᨲᨶᩴ ᨸᩣᨲᩩᩁᩉᩮᩣᩈᩥ. ᨲᩔ ᨠᨾ᩠ᨾᩅᩥᨸᩣᨠᨩᩴ ᨴᩥᨻ᩠ᨻᨧᨠ᩠ᨡᩩ ᨸᩣᨲᩩᩁᩉᩮᩣᩈᩥ ᨿᩮᨶ ᨶᩥᨵᩥᩴ ᨸᩔᨲᩥ ᩈᩔᩣᨾᩥᨠᨾ᩠ᨸᩥ ᩋᩔᩣᨾᩥᨠᨾ᩠ᨸᩥ. ᩈᩮᩣ ᩁᩣᨩᩣᨶᩴ ᨾᩉᩣᩈᩩᨴᩔᨶᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᨾᩣᩉ – ‘ᩋᨸ᩠ᨸᩮᩣᩔᩩᨠ᩠ᨠᩮᩣ ᨲ᩠ᩅᩴ, ᨴᩮᩅ, ᩉᩮᩣᩉᩥ, ᩋᩉᩴ ᨲᩮ ᨵᨶᩮᨶ ᨵᨶᨠᩁᨱᩦᨿᩴ ᨠᩁᩥᩔᩣᨾᩦ’ᨲᩥ. ᨽᩪᨲᨸᩩᨻ᩠ᨻᩴ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨲᨾᩮᩅ ᨣᩉᨸᨲᩥᩁᨲᨶᩴ ᩅᩦᨾᩴᩈᨾᩣᨶᩮᩣ ᨶᩣᩅᩴ ᩋᨽᩥᩁᩩᩉᩥᨲ᩠ᩅᩣ ᨾᨩ᩠ᨫᩮ ᨣᨦ᩠ᨣᩣᨿ ᨶᨴᩥᨿᩣ ᩈᩮᩣᨲᩴ ᩒᨣᩣᩉᩥᨲ᩠ᩅᩣ ᨣᩉᨸᨲᩥᩁᨲᨶᩴ ᩑᨲᨴᩅᩮᩣᨧ – ‘ᩋᨲ᩠ᨳᩮᩣ ᨾᩮ, ᨣᩉᨸᨲᩥ, ᩉᩥᩁᨬ᩠ᨬᩈᩩᩅᨱ᩠ᨱᩮᨶᩣ’ᨲᩥ. ‘ᨲᩮᨶ ᩉᩥ, ᨾᩉᩣᩁᩣᨩ, ᩑᨠᩴ ᨲᩦᩁᩴ ᨶᩣᩅᩣ ᩏᨸᩮᨲᩪ’ᨲᩥ. ‘ᩍᨵᩮᩅ ᨾᩮ, ᨣᩉᨸᨲᩥ, ᩋᨲ᩠ᨳᩮᩣ ᩉᩥᩁᨬ᩠ᨬᩈᩩᩅᨱ᩠ᨱᩮᨶᩣ’ᨲᩥ. ᩋᨳ ᨡᩮᩣ ᨲᩴ, ᩌᨶᨶ᩠ᨴ, ᨣᩉᨸᨲᩥᩁᨲᨶᩴ ᩏᨽᩮᩣᩉᩥ ᩉᨲ᩠ᨳᩮᩉᩥ ᩏᨴᨠᩴ ᩒᨾᩈᩥᨲ᩠ᩅᩣ ᨸᩪᩁᩴ ᩉᩥᩁᨬ᩠ᨬᩈᩩᩅᨱ᩠ᨱᩔ ᨠᩩᨾ᩠ᨽᩥᩴ ᩏᨴ᩠ᨵᩁᩥᨲ᩠ᩅᩣ ᩁᩣᨩᩣᨶᩴ ᨾᩉᩣᩈᩩᨴᩔᨶᩴ ᩑᨲᨴᩅᩮᩣᨧ – ‘ᩋᩃᨾᩮᨲ᩠ᨲᩣᩅᨲᩣ ᨾᩉᩣᩁᩣᨩ, ᨠᨲᨾᩮᨲ᩠ᨲᩣᩅᨲᩣ ᨾᩉᩣᩁᩣᨩ, ᨸᩪᨩᩥᨲᨾᩮᨲ᩠ᨲᩣᩅᨲᩣ ᨾᩉᩣᩁᩣᨩᩣ’ᨲᩥ? ᩁᩣᨩᩣ ᨾᩉᩣᩈᩩᨴᩔᨶᩮᩣ ᩑᩅᨾᩣᩉ – ‘ᩋᩃᨾᩮᨲ᩠ᨲᩣᩅᨲᩣ ᨣᩉᨸᨲᩥ, ᨠᨲᨾᩮᨲ᩠ᨲᩣᩅᨲᩣ ᨣᩉᨸᨲᩥ, ᨸᩪᨩᩥᨲᨾᩮᨲ᩠ᨲᩣᩅᨲᩣ ᨣᩉᨸᨲᩦ’ᨲᩥ. ᩁᨬ᩠ᨬᩮᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩔ ᩑᩅᩁᩪᨸᩴ ᨣᩉᨸᨲᩥᩁᨲᨶᩴ ᨸᩣᨲᩩᩁᩉᩮᩣᩈᩥ.

ᨸᩁᩥᨱᩣᨿᨠᩁᨲᨶᩴ

᪒᪕᪑. ‘‘ᨸᩩᨶ ᨧᨸᩁᩴ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᨸᩁᩥᨱᩣᨿᨠᩁᨲᨶᩴ ᨸᩣᨲᩩᩁᩉᩮᩣᩈᩥ ᨸᨱ᩠ᨯᩥᨲᩮᩣ ᩅᩥᨿᨲ᩠ᨲᩮᩣ ᨾᩮᨵᩣᩅᩦ ᨸᨭᩥᨻᩃᩮᩣ ᩁᩣᨩᩣᨶᩴ ᨾᩉᩣᩈᩩᨴᩔᨶᩴ ᩏᨸᨿᩣᨸᩮᨲᨻ᩠ᨻᩴ ᩏᨸᨿᩣᨸᩮᨲᩩᩴ, ᩋᨸᨿᩣᨸᩮᨲᨻ᩠ᨻᩴ ᩋᨸᨿᩣᨸᩮᨲᩩᩴ, ᨮᨸᩮᨲᨻ᩠ᨻᩴ ᨮᨸᩮᨲᩩᩴ. ᩈᩮᩣ ᩁᩣᨩᩣᨶᩴ ᨾᩉᩣᩈᩩᨴᩔᨶᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᨾᩣᩉ – ‘ᩋᨸ᩠ᨸᩮᩣᩔᩩᨠ᩠ᨠᩮᩣ ᨲ᩠ᩅᩴ, ᨴᩮᩅ, ᩉᩮᩣᩉᩥ, ᩋᩉᨾᨶᩩᩈᩣᩈᩥᩔᩣᨾᩦ’ᨲᩥ. ᩁᨬ᩠ᨬᩮᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩔ ᩑᩅᩁᩪᨸᩴ ᨸᩁᩥᨱᩣᨿᨠᩁᨲᨶᩴ ᨸᩣᨲᩩᩁᩉᩮᩣᩈᩥ.

‘‘ᩁᩣᨩᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩮᩣ ᩍᨾᩮᩉᩥ ᩈᨲ᩠ᨲᩉᩥ ᩁᨲᨶᩮᩉᩥ ᩈᨾᨶ᩠ᨶᩣᨣᨲᩮᩣ ᩋᩉᩮᩣᩈᩥ.

ᨧᨲᩩᩍᨴ᩠ᨵᩥᩈᨾᨶ᩠ᨶᩣᨣᨲᩮᩣ

᪒᪕᪒. ‘‘ᩁᩣᨩᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩮᩣ ᨧᨲᩪᩉᩥ ᩍᨴ᩠ᨵᩦᩉᩥ ᩈᨾᨶ᩠ᨶᩣᨣᨲᩮᩣ ᩋᩉᩮᩣᩈᩥ. ᨠᨲᨾᩣᩉᩥ ᨧᨲᩪᩉᩥ ᩍᨴ᩠ᨵᩦᩉᩥ? ᩍᨵᩣᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᩋᨽᩥᩁᩪᨸᩮᩣ ᩋᩉᩮᩣᩈᩥ ᨴᩔᨶᩦᨿᩮᩣ ᨸᩣᩈᩣᨴᩥᨠᩮᩣ ᨸᩁᨾᩣᨿ ᩅᨱ᩠ᨱᨸᩮᩣᨠ᩠ᨡᩁᨲᩣᨿ ᩈᨾᨶ᩠ᨶᩣᨣᨲᩮᩣ ᩋᨲᩥᩅᩥᨿ ᩋᨬ᩠ᨬᩮᩉᩥ ᨾᨶᩩᩔᩮᩉᩥ. ᩁᩣᨩᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩮᩣ ᩍᨾᩣᨿ ᨸᨮᨾᩣᨿ ᩍᨴ᩠ᨵᩥᨿᩣ ᩈᨾᨶ᩠ᨶᩣᨣᨲᩮᩣ ᩋᩉᩮᩣᩈᩥ.

‘‘ᨸᩩᨶ ᨧᨸᩁᩴ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨴᩦᨥᩣᨿᩩᨠᩮᩣ ᩋᩉᩮᩣᩈᩥ ᨧᩥᩁᨭ᩠ᨮᩥᨲᩥᨠᩮᩣ ᩋᨲᩥᩅᩥᨿ ᩋᨬ᩠ᨬᩮᩉᩥ ᨾᨶᩩᩔᩮᩉᩥ. ᩁᩣᨩᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩮᩣ ᩍᨾᩣᨿ ᨴᩩᨲᩥᨿᩣᨿ ᩍᨴ᩠ᨵᩥᨿᩣ ᩈᨾᨶ᩠ᨶᩣᨣᨲᩮᩣ ᩋᩉᩮᩣᩈᩥ.

‘‘ᨸᩩᨶ ᨧᨸᩁᩴ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᩋᨸ᩠ᨸᩣᨻᩣᨵᩮᩣ ᩋᩉᩮᩣᩈᩥ ᩋᨸ᩠ᨸᩣᨲᨦ᩠ᨠᩮᩣ ᩈᨾᩅᩮᨸᩣᨠᩥᨶᩥᨿᩣ ᨣᩉᨱᩥᨿᩣ ᩈᨾᨶ᩠ᨶᩣᨣᨲᩮᩣ ᨶᩣᨲᩥᩈᩦᨲᩣᨿ ᨶᩣᨧ᩠ᨧᩩᨱ᩠ᩉᩣᨿ ᩋᨲᩥᩅᩥᨿ ᩋᨬ᩠ᨬᩮᩉᩥ ᨾᨶᩩᩔᩮᩉᩥ. ᩁᩣᨩᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩮᩣ ᩍᨾᩣᨿ ᨲᨲᩥᨿᩣᨿ ᩍᨴ᩠ᨵᩥᨿᩣ ᩈᨾᨶ᩠ᨶᩣᨣᨲᩮᩣ ᩋᩉᩮᩣᩈᩥ.

‘‘ᨸᩩᨶ ᨧᨸᩁᩴ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨻᩕᩣᩉ᩠ᨾᨱᨣᩉᨸᨲᩥᨠᩣᨶᩴ ᨸᩥᨿᩮᩣ ᩋᩉᩮᩣᩈᩥ ᨾᨶᩣᨸᩮᩣ. ᩈᩮᨿ᩠ᨿᨳᩣᨸᩥ, ᩌᨶᨶ᩠ᨴ, ᨸᩥᨲᩣ ᨸᩩᨲ᩠ᨲᩣᨶᩴ ᨸᩥᨿᩮᩣ ᩉᩮᩣᨲᩥ ᨾᨶᩣᨸᩮᩣ, ᩑᩅᨾᩮᩅ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨻᩕᩣᩉ᩠ᨾᨱᨣᩉᨸᨲᩥᨠᩣᨶᩴ ᨸᩥᨿᩮᩣ ᩋᩉᩮᩣᩈᩥ ᨾᨶᩣᨸᩮᩣ. ᩁᨬ᩠ᨬᩮᩣᨸᩥ, ᩌᨶᨶ᩠ᨴ, ᨾᩉᩣᩈᩩᨴᩔᨶᩔ ᨻᩕᩣᩉ᩠ᨾᨱᨣᩉᨸᨲᩥᨠᩣ ᨸᩥᨿᩣ ᩋᩉᩮᩈᩩᩴ ᨾᨶᩣᨸᩣ. ᩈᩮᨿ᩠ᨿᨳᩣᨸᩥ, ᩌᨶᨶ᩠ᨴ, ᨸᩥᨲᩩ ᨸᩩᨲ᩠ᨲᩣ ᨸᩥᨿᩣ ᩉᩮᩣᨶ᩠ᨲᩥ ᨾᨶᩣᨸᩣ, ᩑᩅᨾᩮᩅ ᨡᩮᩣ, ᩌᨶᨶ᩠ᨴ, ᩁᨬ᩠ᨬᩮᩣᨸᩥ ᨾᩉᩣᩈᩩᨴᩔᨶᩔ ᨻᩕᩣᩉ᩠ᨾᨱᨣᩉᨸᨲᩥᨠᩣ ᨸᩥᨿᩣ ᩋᩉᩮᩈᩩᩴ ᨾᨶᩣᨸᩣ.

‘‘ᨽᩪᨲᨸᩩᨻ᩠ᨻᩴ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨧᨲᩩᩁᨦ᩠ᨣᩥᨶᩥᨿᩣ ᩈᩮᨶᩣᨿ ᩏᨿ᩠ᨿᩣᨶᨽᩪᨾᩥᩴ ᨶᩥᨿ᩠ᨿᩣᩈᩥ. ᩋᨳ ᨡᩮᩣ, ᩌᨶᨶ᩠ᨴ, ᨻᩕᩣᩉ᩠ᨾᨱᨣᩉᨸᨲᩥᨠᩣ ᩁᩣᨩᩣᨶᩴ ᨾᩉᩣᩈᩩᨴᩔᨶᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᨾᩣᩉᩴᩈᩩ – ‘ᩋᨲᩁᨾᩣᨶᩮᩣ, ᨴᩮᩅ, ᨿᩣᩉᩥ, ᨿᨳᩣ ᨲᩴ ᨾᨿᩴ ᨧᩥᩁᨲᩁᩴ ᨸᩔᩮᨿ᩠ᨿᩣᨾᩣ’ᨲᩥ. ᩁᩣᨩᩣᨸᩥ, ᩌᨶᨶ᩠ᨴ, ᨾᩉᩣᩈᩩᨴᩔᨶᩮᩣ ᩈᩣᩁᨳᩥᩴ ᩌᨾᨶ᩠ᨲᩮᩈᩥ – ‘ᩋᨲᩁᨾᩣᨶᩮᩣ, ᩈᩣᩁᨳᩥ, ᩁᨳᩴ ᨸᩮᩈᩮᩉᩥ, ᨿᨳᩣ ᩋᩉᩴ ᨻᩕᩣᩉ᩠ᨾᨱᨣᩉᨸᨲᩥᨠᩮ ᨧᩥᩁᨲᩁᩴ ᨸᩔᩮᨿ᩠ᨿ’ᨶ᩠ᨲᩥ. ᩁᩣᨩᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩮᩣ ᩍᨾᩣᨿ ᨧᨲᩩᨲ᩠ᨳᩥᨿᩣ [ᨧᨲᩩᨲ᩠ᨳᩣᨿ (ᩈ᩠ᨿᩣ.)] ᩍᨴ᩠ᨵᩥᨿᩣ ᩈᨾᨶ᩠ᨶᩣᨣᨲᩮᩣ ᩋᩉᩮᩣᩈᩥ. ᩁᩣᨩᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩮᩣ ᩍᨾᩣᩉᩥ ᨧᨲᩪᩉᩥ ᩍᨴ᩠ᨵᩦᩉᩥ ᩈᨾᨶ᩠ᨶᩣᨣᨲᩮᩣ ᩋᩉᩮᩣᩈᩥ.

ᨵᨾ᩠ᨾᨸᩣᩈᩣᨴᨸᩮᩣᨠ᩠ᨡᩁᨱᩦ

᪒᪕᪓. ‘‘ᩋᨳ ᨡᩮᩣ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩑᨲᨴᩉᩮᩣᩈᩥ – ‘ᨿᩴᨶᩪᨶᩣᩉᩴ ᩍᨾᩣᩈᩩ ᨲᩣᩃᨶ᩠ᨲᩁᩥᨠᩣᩈᩩ ᨵᨶᩩᩈᨲᩮ ᨵᨶᩩᩈᨲᩮ ᨸᩮᩣᨠ᩠ᨡᩁᨱᩥᨿᩮᩣ ᨾᩣᨸᩮᨿ᩠ᨿ’ᨶ᩠ᨲᩥ.

‘‘ᨾᩣᨸᩮᩈᩥ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨲᩣᩈᩩ ᨲᩣᩃᨶ᩠ᨲᩁᩥᨠᩣᩈᩩ ᨵᨶᩩᩈᨲᩮ ᨵᨶᩩᩈᨲᩮ ᨸᩮᩣᨠ᩠ᨡᩁᨱᩥᨿᩮᩣ. ᨲᩣ ᨡᩮᩣ ᨸᨶᩣᨶᨶ᩠ᨴ, ᨸᩮᩣᨠ᩠ᨡᩁᨱᩥᨿᩮᩣ ᨧᨲᩩᨶ᩠ᨶᩴ ᩅᨱ᩠ᨱᩣᨶᩴ ᩍᨭ᩠ᨮᨠᩣᩉᩥ ᨧᩥᨲᩣ ᩋᩉᩮᩈᩩᩴ – ᩑᨠᩣ ᩍᨭ᩠ᨮᨠᩣ ᩈᩮᩣᩅᨱ᩠ᨱᨾᨿᩣ, ᩑᨠᩣ ᩁᩪᨸᩥᨿᨾᨿᩣ, ᩑᨠᩣ ᩅᩮᩊᩩᩁᩥᨿᨾᨿᩣ, ᩑᨠᩣ ᨹᩃᩥᨠᨾᨿᩣ.

‘‘ᨲᩣᩈᩩ ᨡᩮᩣ ᨸᨶᩣᨶᨶ᩠ᨴ, ᨸᩮᩣᨠ᩠ᨡᩁᨱᩦᩈᩩ ᨧᨲ᩠ᨲᩣᩁᩥ ᨧᨲ᩠ᨲᩣᩁᩥ ᩈᩮᩣᨸᩣᨶᩣᨶᩥ ᩋᩉᩮᩈᩩᩴ ᨧᨲᩩᨶ᩠ᨶᩴ ᩅᨱ᩠ᨱᩣᨶᩴ, ᩑᨠᩴ ᩈᩮᩣᨸᩣᨶᩴ ᩈᩮᩣᩅᨱ᩠ᨱᨾᨿᩴ ᩑᨠᩴ ᩁᩪᨸᩥᨿᨾᨿᩴ ᩑᨠᩴ ᩅᩮᩊᩩᩁᩥᨿᨾᨿᩴ ᩑᨠᩴ ᨹᩃᩥᨠᨾᨿᩴ. ᩈᩮᩣᩅᨱ᩠ᨱᨾᨿᩔ ᩈᩮᩣᨸᩣᨶᩔ ᩈᩮᩣᩅᨱ᩠ᨱᨾᨿᩣ ᨳᨾ᩠ᨽᩣ ᩋᩉᩮᩈᩩᩴ, ᩁᩪᨸᩥᨿᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ. ᩁᩪᨸᩥᨿᨾᨿᩔ ᩈᩮᩣᨸᩣᨶᩔ ᩁᩪᨸᩥᨿᨾᨿᩣ ᨳᨾ᩠ᨽᩣ ᩋᩉᩮᩈᩩᩴ, ᩈᩮᩣᩅᨱ᩠ᨱᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ. ᩅᩮᩊᩩᩁᩥᨿᨾᨿᩔ ᩈᩮᩣᨸᩣᨶᩔ ᩅᩮᩊᩩᩁᩥᨿᨾᨿᩣ ᨳᨾ᩠ᨽᩣ ᩋᩉᩮᩈᩩᩴ, ᨹᩃᩥᨠᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ. ᨹᩃᩥᨠᨾᨿᩔ ᩈᩮᩣᨸᩣᨶᩔ ᨹᩃᩥᨠᨾᨿᩣ ᨳᨾ᩠ᨽᩣ ᩋᩉᩮᩈᩩᩴ, ᩅᩮᩊᩩᩁᩥᨿᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ. ᨲᩣ ᨡᩮᩣ ᨸᨶᩣᨶᨶ᩠ᨴ, ᨸᩮᩣᨠ᩠ᨡᩁᨱᩥᨿᩮᩣ ᨴ᩠ᩅᩦᩉᩥ ᩅᩮᨴᩥᨠᩣᩉᩥ ᨸᩁᩥᨠ᩠ᨡᩥᨲ᩠ᨲᩣ ᩋᩉᩮᩈᩩᩴ ᩑᨠᩣ ᩅᩮᨴᩥᨠᩣ ᩈᩮᩣᩅᨱ᩠ᨱᨾᨿᩣ, ᩑᨠᩣ ᩁᩪᨸᩥᨿᨾᨿᩣ. ᩈᩮᩣᩅᨱ᩠ᨱᨾᨿᩣᨿ ᩅᩮᨴᩥᨠᩣᨿ ᩈᩮᩣᩅᨱ᩠ᨱᨾᨿᩣ ᨳᨾ᩠ᨽᩣ ᩋᩉᩮᩈᩩᩴ, ᩁᩪᨸᩥᨿᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ. ᩁᩪᨸᩥᨿᨾᨿᩣᨿ ᩅᩮᨴᩥᨠᩣᨿ ᩁᩪᨸᩥᨿᨾᨿᩣ ᨳᨾ᩠ᨽᩣ ᩋᩉᩮᩈᩩᩴ, ᩈᩮᩣᩅᨱ᩠ᨱᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ. ᩋᨳ ᨡᩮᩣ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩑᨲᨴᩉᩮᩣᩈᩥ – ‘ᨿᩴᨶᩪᨶᩣᩉᩴ ᩍᨾᩣᩈᩩ ᨸᩮᩣᨠ᩠ᨡᩁᨱᩦᩈᩩ ᩑᩅᩁᩪᨸᩴ ᨾᩣᩃᩴ ᩁᩮᩣᨸᩣᨸᩮᨿ᩠ᨿᩴ ᩏᨸ᩠ᨸᩃᩴ ᨸᨴᩩᨾᩴ ᨠᩩᨾᩩᨴᩴ ᨸᩩᨱ᩠ᨯᩁᩦᨠᩴ ᩈᨻ᩠ᨻᩮᩣᨲᩩᨠᩴ ᩈᨻ᩠ᨻᨩᨶᩔ ᩋᨶᩣᩅᨭ’ᨶ᩠ᨲᩥ. ᩁᩮᩣᨸᩣᨸᩮᩈᩥ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨲᩣᩈᩩ ᨸᩮᩣᨠ᩠ᨡᩁᨱᩦᩈᩩ ᩑᩅᩁᩪᨸᩴ ᨾᩣᩃᩴ ᩏᨸ᩠ᨸᩃᩴ ᨸᨴᩩᨾᩴ ᨠᩩᨾᩩᨴᩴ ᨸᩩᨱ᩠ᨯᩁᩦᨠᩴ ᩈᨻ᩠ᨻᩮᩣᨲᩩᨠᩴ ᩈᨻ᩠ᨻᨩᨶᩔ ᩋᨶᩣᩅᨭᩴ.

᪒᪕᪔. ‘‘ᩋᨳ ᨡᩮᩣ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩑᨲᨴᩉᩮᩣᩈᩥ – ‘ᨿᩴᨶᩪᨶᩣᩉᩴ ᩍᨾᩣᩈᩴ ᨸᩮᩣᨠ᩠ᨡᩁᨱᩦᨶᩴ ᨲᩦᩁᩮ ᨶ᩠ᩉᩣᨸᨠᩮ ᨸᩩᩁᩥᩈᩮ ᨮᨸᩮᨿ᩠ᨿᩴ, ᨿᩮ ᩌᨣᨲᩣᨣᨲᩴ ᨩᨶᩴ ᨶ᩠ᩉᩣᨸᩮᩔᨶ᩠ᨲᩦ’ᨲᩥ. ᨮᨸᩮᩈᩥ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨲᩣᩈᩴ ᨸᩮᩣᨠ᩠ᨡᩁᨱᩦᨶᩴ ᨲᩦᩁᩮ ᨶ᩠ᩉᩣᨸᨠᩮ ᨸᩩᩁᩥᩈᩮ, ᨿᩮ ᩌᨣᨲᩣᨣᨲᩴ ᨩᨶᩴ ᨶ᩠ᩉᩣᨸᩮᩈᩩᩴ.

‘‘ᩋᨳ ᨡᩮᩣ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩑᨲᨴᩉᩮᩣᩈᩥ – ‘ᨿᩴᨶᩪᨶᩣᩉᩴ ᩍᨾᩣᩈᩴ ᨸᩮᩣᨠ᩠ᨡᩁᨱᩦᨶᩴ ᨲᩦᩁᩮ ᩑᩅᩁᩪᨸᩴ ᨴᩣᨶᩴ ᨸᨭ᩠ᨮᨸᩮᨿ᩠ᨿᩴ – ᩋᨶ᩠ᨶᩴ ᩋᨶ᩠ᨶᨭ᩠ᨮᩥᨠᩔ [ᩋᨶ᩠ᨶᨲ᩠ᨳᩥᨲᩔ (ᩈᩦ. ᩈ᩠ᨿᩣ. ᨠᩴ. ᨸᩦ.), ᩑᩅᩴ ᩈᨻ᩠ᨻᨲ᩠ᨳ ᨸᨠᨽᩥᩁᩪᨸᩮᨶᩮᩅ ᨴᩥᩔᨲᩥ], ᨸᩣᨶᩴ ᨸᩣᨶᨭ᩠ᨮᩥᨠᩔ, ᩅᨲ᩠ᨳᩴ ᩅᨲ᩠ᨳᨭ᩠ᨮᩥᨠᩔ, ᨿᩣᨶᩴ ᨿᩣᨶᨭ᩠ᨮᩥᨠᩔ, ᩈᨿᨶᩴ ᩈᨿᨶᨭ᩠ᨮᩥᨠᩔ, ᩍᨲ᩠ᨳᩥᩴ ᩍᨲ᩠ᨳᩥᨭ᩠ᨮᩥᨠᩔ, ᩉᩥᩁᨬ᩠ᨬᩴ ᩉᩥᩁᨬ᩠ᨬᨭ᩠ᨮᩥᨠᩔ, ᩈᩩᩅᨱ᩠ᨱᩴ ᩈᩩᩅᨱ᩠ᨱᨭ᩠ᨮᩥᨠᩔᩣ’ᨲᩥ. ᨸᨭ᩠ᨮᨸᩮᩈᩥ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨲᩣᩈᩴ ᨸᩮᩣᨠ᩠ᨡᩁᨱᩦᨶᩴ ᨲᩦᩁᩮ ᩑᩅᩁᩪᨸᩴ ᨴᩣᨶᩴ – ᩋᨶ᩠ᨶᩴ ᩋᨶ᩠ᨶᨭ᩠ᨮᩥᨠᩔ, ᨸᩣᨶᩴ ᨸᩣᨶᨭ᩠ᨮᩥᨠᩔ, ᩅᨲ᩠ᨳᩴ ᩅᨲ᩠ᨳᨭ᩠ᨮᩥᨠᩔ, ᨿᩣᨶᩴ ᨿᩣᨶᨭ᩠ᨮᩥᨠᩔ, ᩈᨿᨶᩴ ᩈᨿᨶᨭ᩠ᨮᩥᨠᩔ, ᩍᨲ᩠ᨳᩥᩴ ᩍᨲ᩠ᨳᩥᨭ᩠ᨮᩥᨠᩔ, ᩉᩥᩁᨬ᩠ᨬᩴ ᩉᩥᩁᨬ᩠ᨬᨭ᩠ᨮᩥᨠᩔ, ᩈᩩᩅᨱ᩠ᨱᩴ ᩈᩩᩅᨱ᩠ᨱᨭ᩠ᨮᩥᨠᩔ.

᪒᪕᪕. ‘‘ᩋᨳ ᨡᩮᩣ, ᩌᨶᨶ᩠ᨴ, ᨻᩕᩣᩉ᩠ᨾᨱᨣᩉᨸᨲᩥᨠᩣ ᨸᩉᩪᨲᩴ ᩈᩣᨸᨲᩮᨿ᩠ᨿᩴ ᩌᨴᩣᨿ ᩁᩣᨩᩣᨶᩴ ᨾᩉᩣᩈᩩᨴᩔᨶᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᨾᩣᩉᩴᩈᩩ – ‘ᩍᨴᩴ, ᨴᩮᩅ, ᨸᩉᩪᨲᩴ ᩈᩣᨸᨲᩮᨿ᩠ᨿᩴ ᨴᩮᩅᨬ᩠ᨬᩮᩅ ᩏᨴ᩠ᨴᩥᩔ ᩌᨽᨲᩴ, ᨲᩴ ᨴᩮᩅᩮᩣ ᨸᨭᩥᨣ᩠ᨣᨱ᩠ᩉᨲᩪ’ᨲᩥ. ‘ᩋᩃᩴ ᨽᩮᩣ, ᨾᨾᨸᩥᨴᩴ ᨸᩉᩪᨲᩴ ᩈᩣᨸᨲᩮᨿ᩠ᨿᩴ ᨵᨾ᩠ᨾᩥᨠᩮᨶ ᨻᩃᩥᨶᩣ ᩋᨽᩥᩈᨦ᩠ᨡᨲᩴ, ᨲᨬ᩠ᨧ ᩅᩮᩣ ᩉᩮᩣᨲᩩ, ᩍᨲᩮᩣ ᨧ ᨽᩥᨿ᩠ᨿᩮᩣ ᩉᩁᨳᩣ’ᨲᩥ. ᨲᩮ ᩁᨬ᩠ᨬᩣ ᨸᨭᩥᨠ᩠ᨡᩥᨲ᩠ᨲᩣ ᩑᨠᨾᨶ᩠ᨲᩴ ᩋᨸᨠ᩠ᨠᨾ᩠ᨾ ᩑᩅᩴ ᩈᨾᨧᩥᨶ᩠ᨲᩮᩈᩩᩴ – ‘ᨶ ᨡᩮᩣ ᩑᨲᩴ ᩋᨾ᩠ᩉᩣᨠᩴ ᨸᨲᩥᩁᩪᨸᩴ, ᨿᩴ ᨾᨿᩴ ᩍᨾᩣᨶᩥ ᩈᩣᨸᨲᩮᨿ᩠ᨿᩣᨶᩥ ᨸᩩᨶᨴᩮᩅ ᩈᨠᩣᨶᩥ ᨥᩁᩣᨶᩥ ᨸᨭᩥᩉᩁᩮᨿ᩠ᨿᩣᨾ. ᨿᩴᨶᩪᨶ ᨾᨿᩴ ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᨶᩥᩅᩮᩈᨶᩴ ᨾᩣᨸᩮᨿ᩠ᨿᩣᨾᩣ’ᨲᩥ. ᨲᩮ ᩁᩣᨩᩣᨶᩴ ᨾᩉᩣᩈᩩᨴᩔᨶᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᨾᩣᩉᩴᩈᩩ – ‘ᨶᩥᩅᩮᩈᨶᩴ ᨲᩮ ᨴᩮᩅ, ᨾᩣᨸᩮᩔᩣᨾᩣ’ᨲᩥ. ᩋᨵᩥᩅᩣᩈᩮᩈᩥ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨲᩩᨱ᩠ᩉᩦᨽᩣᩅᩮᨶ.

᪒᪕᪖. ‘‘ᩋᨳ ᨡᩮᩣ, ᩌᨶᨶ᩠ᨴ, ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᨧᩮᨲᩈᩣ ᨧᩮᨲᩮᩣᨸᩁᩥᩅᩥᨲᨠ᩠ᨠᨾᨬ᩠ᨬᩣᨿ ᩅᩥᩔᨠᨾ᩠ᨾᩴ [ᩅᩥᩈᩩᨠᨾ᩠ᨾᩴ (ᨠ.)] ᨴᩮᩅᨸᩩᨲ᩠ᨲᩴ ᩌᨾᨶ᩠ᨲᩮᩈᩥ – ‘ᩑᩉᩥ ᨲ᩠ᩅᩴ, ᩈᨾ᩠ᨾ ᩅᩥᩔᨠᨾ᩠ᨾ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᨶᩥᩅᩮᩈᨶᩴ ᨾᩣᨸᩮᩉᩥ ᨵᨾ᩠ᨾᩴ ᨶᩣᨾ ᨸᩣᩈᩣᨴ’ᨶ᩠ᨲᩥ. ‘ᩑᩅᩴ ᨽᨴ᩠ᨴᨶ᩠ᨲᩅᩣ’ᨲᩥ ᨡᩮᩣ, ᩌᨶᨶ᩠ᨴ, ᩅᩥᩔᨠᨾ᩠ᨾᩮᩣ ᨴᩮᩅᨸᩩᨲ᩠ᨲᩮᩣ ᩈᨠ᩠ᨠᩔ ᨴᩮᩅᩣᨶᨾᩥᨶ᩠ᨴᩔ ᨸᨭᩥᩔᩩᨲ᩠ᩅᩣ ᩈᩮᨿ᩠ᨿᨳᩣᨸᩥ ᨶᩣᨾ ᨻᩃᩅᩣ ᨸᩩᩁᩥᩈᩮᩣ ᩈᨾᩥᨬ᩠ᨩᩥᨲᩴ ᩅᩣ ᨻᩣᩉᩴ ᨸᩈᩣᩁᩮᨿ᩠ᨿ ᨸᩈᩣᩁᩥᨲᩴ ᩅᩣ ᨻᩣᩉᩴ ᩈᨾᩥᨬ᩠ᨩᩮᨿ᩠ᨿ, ᩑᩅᨾᩮᩅ ᨴᩮᩅᩮᩈᩩ ᨲᩣᩅᨲᩥᩴᩈᩮᩈᩩ ᩋᨶ᩠ᨲᩁᩉᩥᨲᩮᩣ ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᨸᩩᩁᨲᩮᩣ ᨸᩣᨲᩩᩁᩉᩮᩣᩈᩥ. ᩋᨳ ᨡᩮᩣ, ᩌᨶᨶ᩠ᨴ, ᩅᩥᩔᨠᨾ᩠ᨾᩮᩣ ᨴᩮᩅᨸᩩᨲ᩠ᨲᩮᩣ ᩁᩣᨩᩣᨶᩴ ᨾᩉᩣᩈᩩᨴᩔᨶᩴ ᩑᨲᨴᩅᩮᩣᨧ – ‘ᨶᩥᩅᩮᩈᨶᩴ ᨲᩮ ᨴᩮᩅ, ᨾᩣᨸᩮᩔᩣᨾᩥ ᨵᨾ᩠ᨾᩴ ᨶᩣᨾ ᨸᩣᩈᩣᨴ’ᨶ᩠ᨲᩥ. ᩋᨵᩥᩅᩣᩈᩮᩈᩥ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨲᩩᨱ᩠ᩉᩦᨽᩣᩅᩮᨶ.

‘‘ᨾᩣᨸᩮᩈᩥ ᨡᩮᩣ, ᩌᨶᨶ᩠ᨴ, ᩅᩥᩔᨠᨾ᩠ᨾᩮᩣ ᨴᩮᩅᨸᩩᨲ᩠ᨲᩮᩣ ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᨶᩥᩅᩮᩈᨶᩴ ᨵᨾ᩠ᨾᩴ ᨶᩣᨾ ᨸᩣᩈᩣᨴᩴ. ᨵᨾ᩠ᨾᩮᩣ, ᩌᨶᨶ᩠ᨴ, ᨸᩣᩈᩣᨴᩮᩣ ᨸᩩᩁᨲ᩠ᨳᩥᨾᩮᨶ ᨸᨧ᩠ᨨᩥᨾᩮᨶ ᨧ ᨿᩮᩣᨩᨶᩴ ᩌᨿᩣᨾᩮᨶ ᩋᩉᩮᩣᩈᩥ. ᩏᨲ᩠ᨲᩁᩮᨶ ᨴᨠ᩠ᨡᩥᨱᩮᨶ ᨧ ᩋᨯ᩠ᨰᨿᩮᩣᨩᨶᩴ ᩅᩥᨲ᩠ᨳᩣᩁᩮᨶ. ᨵᨾ᩠ᨾᩔ, ᩌᨶᨶ᩠ᨴ, ᨸᩣᩈᩣᨴᩔ ᨲᩥᨸᩮᩣᩁᩥᩈᩴ ᩏᨧ᩠ᨧᨲᩁᩮᨶ ᩅᨲ᩠ᨳᩩ ᨧᩥᨲᩴ ᩋᩉᩮᩣᩈᩥ ᨧᨲᩩᨶ᩠ᨶᩴ ᩅᨱ᩠ᨱᩣᨶᩴ ᩍᨭ᩠ᨮᨠᩣᩉᩥ – ᩑᨠᩣ ᩍᨭ᩠ᨮᨠᩣ ᩈᩮᩣᩅᨱ᩠ᨱᨾᨿᩣ, ᩑᨠᩣ ᩁᩪᨸᩥᨿᨾᨿᩣ, ᩑᨠᩣ ᩅᩮᩊᩩᩁᩥᨿᨾᨿᩣ, ᩑᨠᩣ ᨹᩃᩥᨠᨾᨿᩣ.

‘‘ᨵᨾ᩠ᨾᩔ, ᩌᨶᨶ᩠ᨴ, ᨸᩣᩈᩣᨴᩔ ᨧᨲᩩᩁᩣᩈᩦᨲᩥ ᨳᨾ᩠ᨽᩈᩉᩔᩣᨶᩥ ᩋᩉᩮᩈᩩᩴ ᨧᨲᩩᨶ᩠ᨶᩴ ᩅᨱ᩠ᨱᩣᨶᩴ – ᩑᨠᩮᩣ ᨳᨾ᩠ᨽᩮᩣ ᩈᩮᩣᩅᨱ᩠ᨱᨾᨿᩮᩣ, ᩑᨠᩮᩣ ᩁᩪᨸᩥᨿᨾᨿᩮᩣ, ᩑᨠᩮᩣ ᩅᩮᩊᩩᩁᩥᨿᨾᨿᩮᩣ, ᩑᨠᩮᩣ ᨹᩃᩥᨠᨾᨿᩮᩣ. ᨵᨾ᩠ᨾᩮᩣ, ᩌᨶᨶ᩠ᨴ, ᨸᩣᩈᩣᨴᩮᩣ ᨧᨲᩩᨶ᩠ᨶᩴ ᩅᨱ᩠ᨱᩣᨶᩴ ᨹᩃᨠᩮᩉᩥ ᩈᨶ᩠ᨳᨲᩮᩣ ᩋᩉᩮᩣᩈᩥ – ᩑᨠᩴ ᨹᩃᨠᩴ ᩈᩮᩣᩅᨱ᩠ᨱᨾᨿᩴ, ᩑᨠᩴ ᩁᩪᨸᩥᨿᨾᨿᩴ, ᩑᨠᩴ ᩅᩮᩊᩩᩁᩥᨿᨾᨿᩴ, ᩑᨠᩴ ᨹᩃᩥᨠᨾᨿᩴ.

‘‘ᨵᨾ᩠ᨾᩔ, ᩌᨶᨶ᩠ᨴ, ᨸᩣᩈᩣᨴᩔ ᨧᨲᩩᩅᩦᩈᨲᩥ ᩈᩮᩣᨸᩣᨶᩣᨶᩥ ᩋᩉᩮᩈᩩᩴ ᨧᨲᩩᨶ᩠ᨶᩴ ᩅᨱ᩠ᨱᩣᨶᩴ – ᩑᨠᩴ ᩈᩮᩣᨸᩣᨶᩴ ᩈᩮᩣᩅᨱ᩠ᨱᨾᨿᩴ, ᩑᨠᩴ ᩁᩪᨸᩥᨿᨾᨿᩴ, ᩑᨠᩴ ᩅᩮᩊᩩᩁᩥᨿᨾᨿᩴ, ᩑᨠᩴ ᨹᩃᩥᨠᨾᨿᩴ. ᩈᩮᩣᩅᨱ᩠ᨱᨾᨿᩔ ᩈᩮᩣᨸᩣᨶᩔ ᩈᩮᩣᩅᨱ᩠ᨱᨾᨿᩣ ᨳᨾ᩠ᨽᩣ ᩋᩉᩮᩈᩩᩴ ᩁᩪᨸᩥᨿᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ. ᩁᩪᨸᩥᨿᨾᨿᩔ ᩈᩮᩣᨸᩣᨶᩔ ᩁᩪᨸᩥᨿᨾᨿᩣ ᨳᨾ᩠ᨽᩣ ᩋᩉᩮᩈᩩᩴ ᩈᩮᩣᩅᨱ᩠ᨱᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ. ᩅᩮᩊᩩᩁᩥᨿᨾᨿᩔ ᩈᩮᩣᨸᩣᨶᩔ ᩅᩮᩊᩩᩁᩥᨿᨾᨿᩣ ᨳᨾ᩠ᨽᩣ ᩋᩉᩮᩈᩩᩴ ᨹᩃᩥᨠᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ. ᨹᩃᩥᨠᨾᨿᩔ ᩈᩮᩣᨸᩣᨶᩔ ᨹᩃᩥᨠᨾᨿᩣ ᨳᨾ᩠ᨽᩣ ᩋᩉᩮᩈᩩᩴ ᩅᩮᩊᩩᩁᩥᨿᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ.

‘‘ᨵᨾ᩠ᨾᩮ, ᩌᨶᨶ᩠ᨴ, ᨸᩣᩈᩣᨴᩮ ᨧᨲᩩᩁᩣᩈᩦᨲᩥ ᨠᩪᨭᩣᨣᩣᩁᩈᩉᩔᩣᨶᩥ ᩋᩉᩮᩈᩩᩴ ᨧᨲᩩᨶ᩠ᨶᩴ ᩅᨱ᩠ᨱᩣᨶᩴ – ᩑᨠᩴ ᨠᩪᨭᩣᨣᩣᩁᩴ ᩈᩮᩣᩅᨱ᩠ᨱᨾᨿᩴ, ᩑᨠᩴ ᩁᩪᨸᩥᨿᨾᨿᩴ, ᩑᨠᩴ ᩅᩮᩊᩩᩁᩥᨿᨾᨿᩴ, ᩑᨠᩴ ᨹᩃᩥᨠᨾᨿᩴ. ᩈᩮᩣᩅᨱ᩠ᨱᨾᨿᩮ ᨠᩪᨭᩣᨣᩣᩁᩮ ᩁᩪᨸᩥᨿᨾᨿᩮᩣ ᨸᩃ᩠ᩃᨦ᩠ᨠᩮᩣ ᨸᨬ᩠ᨬᨲ᩠ᨲᩮᩣ ᩋᩉᩮᩣᩈᩥ, ᩁᩪᨸᩥᨿᨾᨿᩮ ᨠᩪᨭᩣᨣᩣᩁᩮ ᩈᩮᩣᩅᨱ᩠ᨱᨾᨿᩮᩣ ᨸᩃ᩠ᩃᨦ᩠ᨠᩮᩣ ᨸᨬ᩠ᨬᨲ᩠ᨲᩮᩣ ᩋᩉᩮᩣᩈᩥ, ᩅᩮᩊᩩᩁᩥᨿᨾᨿᩮ ᨠᩪᨭᩣᨣᩣᩁᩮ ᨴᨶ᩠ᨲᨾᨿᩮᩣ ᨸᩃ᩠ᩃᨦ᩠ᨠᩮᩣ ᨸᨬ᩠ᨬᨲ᩠ᨲᩮᩣ ᩋᩉᩮᩣᩈᩥ, ᨹᩃᩥᨠᨾᨿᩮ ᨠᩪᨭᩣᨣᩣᩁᩮ ᩈᩣᩁᨾᨿᩮᩣ ᨸᩃ᩠ᩃᨦ᩠ᨠᩮᩣ ᨸᨬ᩠ᨬᨲ᩠ᨲᩮᩣ ᩋᩉᩮᩣᩈᩥ. ᩈᩮᩣᩅᨱ᩠ᨱᨾᨿᩔ ᨠᩪᨭᩣᨣᩣᩁᩔ ᨴ᩠ᩅᩣᩁᩮ ᩁᩪᨸᩥᨿᨾᨿᩮᩣ ᨲᩣᩃᩮᩣ ᨮᩥᨲᩮᩣ ᩋᩉᩮᩣᩈᩥ, ᨲᩔ ᩁᩪᨸᩥᨿᨾᨿᩮᩣ ᨡᨶ᩠ᨵᩮᩣ ᩈᩮᩣᩅᨱ᩠ᨱᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᩁᩪᨸᩥᨿᨾᨿᩔ ᨠᩪᨭᩣᨣᩣᩁᩔ ᨴ᩠ᩅᩣᩁᩮ ᩈᩮᩣᩅᨱ᩠ᨱᨾᨿᩮᩣ ᨲᩣᩃᩮᩣ ᨮᩥᨲᩮᩣ ᩋᩉᩮᩣᩈᩥ, ᨲᩔ ᩈᩮᩣᩅᨱ᩠ᨱᨾᨿᩮᩣ ᨡᨶ᩠ᨵᩮᩣ, ᩁᩪᨸᩥᨿᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᩅᩮᩊᩩᩁᩥᨿᨾᨿᩔ ᨠᩪᨭᩣᨣᩣᩁᩔ ᨴ᩠ᩅᩣᩁᩮ ᨹᩃᩥᨠᨾᨿᩮᩣ ᨲᩣᩃᩮᩣ ᨮᩥᨲᩮᩣ ᩋᩉᩮᩣᩈᩥ, ᨲᩔ ᨹᩃᩥᨠᨾᨿᩮᩣ ᨡᨶ᩠ᨵᩮᩣ, ᩅᩮᩊᩩᩁᩥᨿᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᨹᩃᩥᨠᨾᨿᩔ ᨠᩪᨭᩣᨣᩣᩁᩔ ᨴ᩠ᩅᩣᩁᩮ ᩅᩮᩊᩩᩁᩥᨿᨾᨿᩮᩣ ᨲᩣᩃᩮᩣ ᨮᩥᨲᩮᩣ ᩋᩉᩮᩣᩈᩥ, ᨲᩔ ᩅᩮᩊᩩᩁᩥᨿᨾᨿᩮᩣ ᨡᨶ᩠ᨵᩮᩣ, ᨹᩃᩥᨠᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ.

᪒᪕᪗. ‘‘ᩋᨳ ᨡᩮᩣ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩑᨲᨴᩉᩮᩣᩈᩥ – ‘ᨿᩴᨶᩪᨶᩣᩉᩴ ᨾᩉᩣᩅᩥᨿᩪᩉᩔ ᨠᩪᨭᩣᨣᩣᩁᩔ ᨴ᩠ᩅᩣᩁᩮ ᩈᨻ᩠ᨻᩈᩮᩣᩅᨱ᩠ᨱᨾᨿᩴ ᨲᩣᩃᩅᨶᩴ ᨾᩣᨸᩮᨿ᩠ᨿᩴ, ᨿᨲ᩠ᨳ ᨴᩥᩅᩣᩅᩥᩉᩣᩁᩴ ᨶᩥᩈᩦᨴᩥᩔᩣᨾᩦ’ᨲᩥ. ᨾᩣᨸᩮᩈᩥ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨾᩉᩣᩅᩥᨿᩪᩉᩔ ᨠᩪᨭᩣᨣᩣᩁᩔ ᨴ᩠ᩅᩣᩁᩮ ᩈᨻ᩠ᨻᩈᩮᩣᩅᨱ᩠ᨱᨾᨿᩴ ᨲᩣᩃᩅᨶᩴ, ᨿᨲ᩠ᨳ ᨴᩥᩅᩣᩅᩥᩉᩣᩁᩴ ᨶᩥᩈᩦᨴᩥ. ᨵᨾ᩠ᨾᩮᩣ, ᩌᨶᨶ᩠ᨴ, ᨸᩣᩈᩣᨴᩮᩣ ᨴ᩠ᩅᩦᩉᩥ ᩅᩮᨴᩥᨠᩣᩉᩥ ᨸᩁᩥᨠ᩠ᨡᩥᨲ᩠ᨲᩮᩣ ᩋᩉᩮᩣᩈᩥ, ᩑᨠᩣ ᩅᩮᨴᩥᨠᩣ ᩈᩮᩣᩅᨱ᩠ᨱᨾᨿᩣ, ᩑᨠᩣ ᩁᩪᨸᩥᨿᨾᨿᩣ. ᩈᩮᩣᩅᨱ᩠ᨱᨾᨿᩣᨿ ᩅᩮᨴᩥᨠᩣᨿ ᩈᩮᩣᩅᨱ᩠ᨱᨾᨿᩣ ᨳᨾ᩠ᨽᩣ ᩋᩉᩮᩈᩩᩴ, ᩁᩪᨸᩥᨿᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ. ᩁᩪᨸᩥᨿᨾᨿᩣᨿ ᩅᩮᨴᩥᨠᩣᨿ ᩁᩪᨸᩥᨿᨾᨿᩣ ᨳᨾ᩠ᨽᩣ ᩋᩉᩮᩈᩩᩴ, ᩈᩮᩣᩅᨱ᩠ᨱᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ.

᪒᪕᪘. ‘‘ᨵᨾ᩠ᨾᩮᩣ, ᩌᨶᨶ᩠ᨴ, ᨸᩣᩈᩣᨴᩮᩣ ᨴ᩠ᩅᩦᩉᩥ ᨠᩥᨦ᩠ᨠᩥᨱᩥᨠᨩᩣᩃᩮᩉᩥ [ᨠᩥᨦ᩠ᨠᨱᩥᨠᨩᩣᩃᩮᩉᩥ (ᩈ᩠ᨿᩣ. ᨠ.)] ᨸᩁᩥᨠ᩠ᨡᩥᨲ᩠ᨲᩮᩣ ᩋᩉᩮᩣᩈᩥ – ᩑᨠᩴ ᨩᩣᩃᩴ ᩈᩮᩣᩅᨱ᩠ᨱᨾᨿᩴ ᩑᨠᩴ ᩁᩪᨸᩥᨿᨾᨿᩴ. ᩈᩮᩣᩅᨱ᩠ᨱᨾᨿᩔ ᨩᩣᩃᩔ ᩁᩪᨸᩥᨿᨾᨿᩣ ᨠᩥᨦ᩠ᨠᩥᨱᩥᨠᩣ ᩋᩉᩮᩈᩩᩴ, ᩁᩪᨸᩥᨿᨾᨿᩔ ᨩᩣᩃᩔ ᩈᩮᩣᩅᨱ᩠ᨱᨾᨿᩣ ᨠᩥᨦ᩠ᨠᩥᨱᩥᨠᩣ ᩋᩉᩮᩈᩩᩴ. ᨲᩮᩈᩴ ᨡᩮᩣ ᨸᨶᩣᨶᨶ᩠ᨴ, ᨠᩥᨦ᩠ᨠᩥᨱᩥᨠᨩᩣᩃᩣᨶᩴ ᩅᩣᨲᩮᩁᩥᨲᩣᨶᩴ ᩈᨴ᩠ᨴᩮᩣ ᩋᩉᩮᩣᩈᩥ ᩅᨣ᩠ᨣᩩ ᨧ ᩁᨩᨶᩦᨿᩮᩣ ᨧ ᨡᨾᨶᩦᨿᩮᩣ ᨧ ᨾᨴᨶᩦᨿᩮᩣ ᨧ. ᩈᩮᨿ᩠ᨿᨳᩣᨸᩥ, ᩌᨶᨶ᩠ᨴ, ᨸᨬ᩠ᨧᨦ᩠ᨣᩥᨠᩔ ᨲᩪᩁᩥᨿᩔ ᩈᩩᩅᩥᨶᩦᨲᩔ ᩈᩩᨸ᩠ᨸᨭᩥᨲᩣᩊᩥᨲᩔ ᩈᩩᨠᩩᩈᩃᩮᩉᩥ [ᨠᩩᩈᩃᩮᩉᩥ (ᩈᩦ. ᩈ᩠ᨿᩣ. ᨠᩴ. ᨸᩦ.)] ᩈᨾᨶ᩠ᨶᩣᩉᨲᩔ ᩈᨴ᩠ᨴᩮᩣ ᩉᩮᩣᨲᩥ, ᩅᨣ᩠ᨣᩩ ᨧ ᩁᨩᨶᩦᨿᩮᩣ ᨧ ᨡᨾᨶᩦᨿᩮᩣ ᨧ ᨾᨴᨶᩦᨿᩮᩣ ᨧ, ᩑᩅᨾᩮᩅ ᨡᩮᩣ, ᩌᨶᨶ᩠ᨴ, ᨲᩮᩈᩴ ᨠᩥᨦ᩠ᨠᩥᨱᩥᨠᨩᩣᩃᩣᨶᩴ ᩅᩣᨲᩮᩁᩥᨲᩣᨶᩴ ᩈᨴ᩠ᨴᩮᩣ ᩋᩉᩮᩣᩈᩥ ᩅᨣ᩠ᨣᩩ ᨧ ᩁᨩᨶᩦᨿᩮᩣ ᨧ ᨡᨾᨶᩦᨿᩮᩣ ᨧ ᨾᨴᨶᩦᨿᩮᩣ ᨧ. ᨿᩮ ᨡᩮᩣ ᨸᨶᩣᨶᨶ᩠ᨴ, ᨲᩮᨶ ᩈᨾᨿᩮᨶ ᨠᩩᩈᩣᩅᨲᩥᨿᩣ ᩁᩣᨩᨵᩣᨶᩥᨿᩣ ᨵᩩᨲ᩠ᨲᩣ ᩋᩉᩮᩈᩩᩴ ᩈᩮᩣᨱ᩠ᨯᩣ ᨸᩥᨸᩣᩈᩣ, ᨲᩮ ᨲᩮᩈᩴ ᨠᩥᨦ᩠ᨠᩥᨱᩥᨠᨩᩣᩃᩣᨶᩴ ᩅᩣᨲᩮᩁᩥᨲᩣᨶᩴ ᩈᨴ᩠ᨴᩮᨶ ᨸᩁᩥᨧᩣᩁᩮᩈᩩᩴ. ᨶᩥᨭ᩠ᨮᩥᨲᩮᩣ ᨡᩮᩣ ᨸᨶᩣᨶᨶ᩠ᨴ, ᨵᨾ᩠ᨾᩮᩣ ᨸᩣᩈᩣᨴᩮᩣ ᨴᩩᨴ᩠ᨴᩥᨠ᩠ᨡᩮᩣ ᩋᩉᩮᩣᩈᩥ ᨾᩩᩈᨲᩥ ᨧᨠ᩠ᨡᩪᨶᩥ. ᩈᩮᨿ᩠ᨿᨳᩣᨸᩥ, ᩌᨶᨶ᩠ᨴ, ᩅᩔᩣᨶᩴ ᨸᨧ᩠ᨨᩥᨾᩮ ᨾᩣᩈᩮ ᩈᩁᨴᩈᨾᨿᩮ ᩅᩥᨴ᩠ᨵᩮ ᩅᩥᨣᨲᩅᩃᩣᩉᨠᩮ ᨴᩮᩅᩮ ᩌᨴᩥᨧ᩠ᨧᩮᩣ ᨶᨽᩴ ᩋᨻ᩠ᨽᩩᩔᨠ᩠ᨠᨾᩣᨶᩮᩣ [ᩋᨻ᩠ᨽᩩᨣ᩠ᨣᨾᨾᩣᨶᩮᩣ (ᩈᩦ. ᨸᩦ. ᨠ.)] ᨴᩩᨴ᩠ᨴᩥᨠ᩠ᨡᩮᩣ [ᨴᩩᨴᩥᨠ᩠ᨡᩮᩣ (ᨸᩦ.)] ᩉᩮᩣᨲᩥ ᨾᩩᩈᨲᩥ ᨧᨠ᩠ᨡᩪᨶᩥ; ᩑᩅᨾᩮᩅ ᨡᩮᩣ, ᩌᨶᨶ᩠ᨴ, ᨵᨾ᩠ᨾᩮᩣ ᨸᩣᩈᩣᨴᩮᩣ ᨴᩩᨴ᩠ᨴᩥᨠ᩠ᨡᩮᩣ ᩋᩉᩮᩣᩈᩥ ᨾᩩᩈᨲᩥ ᨧᨠ᩠ᨡᩪᨶᩥ.

᪒᪕᪙. ‘‘ᩋᨳ ᨡᩮᩣ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩑᨲᨴᩉᩮᩣᩈᩥ – ‘ᨿᩴᨶᩪᨶᩣᩉᩴ ᨵᨾ᩠ᨾᩔ ᨸᩣᩈᩣᨴᩔ ᨸᩩᩁᨲᩮᩣ ᨵᨾ᩠ᨾᩴ ᨶᩣᨾ ᨸᩮᩣᨠ᩠ᨡᩁᨱᩥᩴ ᨾᩣᨸᩮᨿ᩠ᨿ’ᨶ᩠ᨲᩥ. ᨾᩣᨸᩮᩈᩥ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨵᨾ᩠ᨾᩔ ᨸᩣᩈᩣᨴᩔ ᨸᩩᩁᨲᩮᩣ ᨵᨾ᩠ᨾᩴ ᨶᩣᨾ ᨸᩮᩣᨠ᩠ᨡᩁᨱᩥᩴ. ᨵᨾ᩠ᨾᩣ, ᩌᨶᨶ᩠ᨴ, ᨸᩮᩣᨠ᩠ᨡᩁᨱᩦ ᨸᩩᩁᨲ᩠ᨳᩥᨾᩮᨶ ᨸᨧ᩠ᨨᩥᨾᩮᨶ ᨧ ᨿᩮᩣᨩᨶᩴ ᩌᨿᩣᨾᩮᨶ ᩋᩉᩮᩣᩈᩥ, ᩏᨲ᩠ᨲᩁᩮᨶ ᨴᨠ᩠ᨡᩥᨱᩮᨶ ᨧ ᩋᨯ᩠ᨰᨿᩮᩣᨩᨶᩴ ᩅᩥᨲ᩠ᨳᩣᩁᩮᨶ. ᨵᨾ᩠ᨾᩣ, ᩌᨶᨶ᩠ᨴ, ᨸᩮᩣᨠ᩠ᨡᩁᨱᩦ ᨧᨲᩩᨶ᩠ᨶᩴ ᩅᨱ᩠ᨱᩣᨶᩴ ᩍᨭ᩠ᨮᨠᩣᩉᩥ ᨧᩥᨲᩣ ᩋᩉᩮᩣᩈᩥ – ᩑᨠᩣ ᩍᨭ᩠ᨮᨠᩣ ᩈᩮᩣᩅᨱ᩠ᨱᨾᨿᩣ, ᩑᨠᩣ ᩁᩪᨸᩥᨿᨾᨿᩣ, ᩑᨠᩣ ᩅᩮᩊᩩᩁᩥᨿᨾᨿᩣ, ᩑᨠᩣ ᨹᩃᩥᨠᨾᨿᩣ.

‘‘ᨵᨾ᩠ᨾᩣᨿ, ᩌᨶᨶ᩠ᨴ, ᨸᩮᩣᨠ᩠ᨡᩁᨱᩥᨿᩣ ᨧᨲᩩᩅᩦᩈᨲᩥ ᩈᩮᩣᨸᩣᨶᩣᨶᩥ ᩋᩉᩮᩈᩩᩴ ᨧᨲᩩᨶ᩠ᨶᩴ ᩅᨱ᩠ᨱᩣᨶᩴ – ᩑᨠᩴ ᩈᩮᩣᨸᩣᨶᩴ ᩈᩮᩣᩅᨱ᩠ᨱᨾᨿᩴ, ᩑᨠᩴ ᩁᩪᨸᩥᨿᨾᨿᩴ, ᩑᨠᩴ ᩅᩮᩊᩩᩁᩥᨿᨾᨿᩴ, ᩑᨠᩴ ᨹᩃᩥᨠᨾᨿᩴ. ᩈᩮᩣᩅᨱ᩠ᨱᨾᨿᩔ ᩈᩮᩣᨸᩣᨶᩔ ᩈᩮᩣᩅᨱ᩠ᨱᨾᨿᩣ ᨳᨾ᩠ᨽᩣ ᩋᩉᩮᩈᩩᩴ ᩁᩪᨸᩥᨿᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ. ᩁᩪᨸᩥᨿᨾᨿᩔ ᩈᩮᩣᨸᩣᨶᩔ ᩁᩪᨸᩥᨿᨾᨿᩣ ᨳᨾ᩠ᨽᩣ ᩋᩉᩮᩈᩩᩴ ᩈᩮᩣᩅᨱ᩠ᨱᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ. ᩅᩮᩊᩩᩁᩥᨿᨾᨿᩔ ᩈᩮᩣᨸᩣᨶᩔ ᩅᩮᩊᩩᩁᩥᨿᨾᨿᩣ ᨳᨾ᩠ᨽᩣ ᩋᩉᩮᩈᩩᩴ ᨹᩃᩥᨠᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ. ᨹᩃᩥᨠᨾᨿᩔ ᩈᩮᩣᨸᩣᨶᩔ ᨹᩃᩥᨠᨾᨿᩣ ᨳᨾ᩠ᨽᩣ ᩋᩉᩮᩈᩩᩴ ᩅᩮᩊᩩᩁᩥᨿᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ.

‘‘ᨵᨾ᩠ᨾᩣ, ᩌᨶᨶ᩠ᨴ, ᨸᩮᩣᨠ᩠ᨡᩁᨱᩦ ᨴ᩠ᩅᩦᩉᩥ ᩅᩮᨴᩥᨠᩣᩉᩥ ᨸᩁᩥᨠ᩠ᨡᩥᨲ᩠ᨲᩣ ᩋᩉᩮᩣᩈᩥ – ᩑᨠᩣ ᩅᩮᨴᩥᨠᩣ ᩈᩮᩣᩅᨱ᩠ᨱᨾᨿᩣ, ᩑᨠᩣ ᩁᩪᨸᩥᨿᨾᨿᩣ. ᩈᩮᩣᩅᨱ᩠ᨱᨾᨿᩣᨿ ᩅᩮᨴᩥᨠᩣᨿ ᩈᩮᩣᩅᨱ᩠ᨱᨾᨿᩣ ᨳᨾ᩠ᨽᩣ ᩋᩉᩮᩈᩩᩴ ᩁᩪᨸᩥᨿᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ. ᩁᩪᨸᩥᨿᨾᨿᩣᨿ ᩅᩮᨴᩥᨠᩣᨿ ᩁᩪᨸᩥᨿᨾᨿᩣ ᨳᨾ᩠ᨽᩣ ᩋᩉᩮᩈᩩᩴ ᩈᩮᩣᩅᨱ᩠ᨱᨾᨿᩣ ᩈᩪᨧᩥᨿᩮᩣ ᨧ ᩏᨱ᩠ᩉᩦᩈᨬ᩠ᨧ.

‘‘ᨵᨾ᩠ᨾᩣ, ᩌᨶᨶ᩠ᨴ, ᨸᩮᩣᨠ᩠ᨡᩁᨱᩦ ᩈᨲ᩠ᨲᩉᩥ ᨲᩣᩃᨸᨶ᩠ᨲᩦᩉᩥ ᨸᩁᩥᨠ᩠ᨡᩥᨲ᩠ᨲᩣ ᩋᩉᩮᩣᩈᩥ – ᩑᨠᩣ ᨲᩣᩃᨸᨶ᩠ᨲᩥ ᩈᩮᩣᩅᨱ᩠ᨱᨾᨿᩣ, ᩑᨠᩣ ᩁᩪᨸᩥᨿᨾᨿᩣ, ᩑᨠᩣ ᩅᩮᩊᩩᩁᩥᨿᨾᨿᩣ, ᩑᨠᩣ ᨹᩃᩥᨠᨾᨿᩣ, ᩑᨠᩣ ᩃᩮᩣᩉᩥᨲᨦ᩠ᨠᨾᨿᩣ, ᩑᨠᩣ ᨾᩈᩣᩁᨣᩃ᩠ᩃᨾᨿᩣ, ᩑᨠᩣ ᩈᨻ᩠ᨻᩁᨲᨶᨾᨿᩣ. ᩈᩮᩣᩅᨱ᩠ᨱᨾᨿᩔ ᨲᩣᩃᩔ ᩈᩮᩣᩅᨱ᩠ᨱᨾᨿᩮᩣ ᨡᨶ᩠ᨵᩮᩣ ᩋᩉᩮᩣᩈᩥ ᩁᩪᨸᩥᨿᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᩁᩪᨸᩥᨿᨾᨿᩔ ᨲᩣᩃᩔ ᩁᩪᨸᩥᨿᨾᨿᩮᩣ ᨡᨶ᩠ᨵᩮᩣ ᩋᩉᩮᩣᩈᩥ ᩈᩮᩣᩅᨱ᩠ᨱᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᩅᩮᩊᩩᩁᩥᨿᨾᨿᩔ ᨲᩣᩃᩔ ᩅᩮᩊᩩᩁᩥᨿᨾᨿᩮᩣ ᨡᨶ᩠ᨵᩮᩣ ᩋᩉᩮᩣᩈᩥ ᨹᩃᩥᨠᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᨹᩃᩥᨠᨾᨿᩔ ᨲᩣᩃᩔ ᨹᩃᩥᨠᨾᨿᩮᩣ ᨡᨶ᩠ᨵᩮᩣ ᩋᩉᩮᩣᩈᩥ ᩅᩮᩊᩩᩁᩥᨿᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᩃᩮᩣᩉᩥᨲᨦ᩠ᨠᨾᨿᩔ ᨲᩣᩃᩔ ᩃᩮᩣᩉᩥᨲᨦ᩠ᨠᨾᨿᩮᩣ ᨡᨶ᩠ᨵᩮᩣ ᩋᩉᩮᩣᩈᩥ ᨾᩈᩣᩁᨣᩃ᩠ᩃᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᨾᩈᩣᩁᨣᩃ᩠ᩃᨾᨿᩔ ᨲᩣᩃᩔ ᨾᩈᩣᩁᨣᩃ᩠ᩃᨾᨿᩮᩣ ᨡᨶ᩠ᨵᩮᩣ ᩋᩉᩮᩣᩈᩥ ᩃᩮᩣᩉᩥᨲᨦ᩠ᨠᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᩈᨻ᩠ᨻᩁᨲᨶᨾᨿᩔ ᨲᩣᩃᩔ ᩈᨻ᩠ᨻᩁᨲᨶᨾᨿᩮᩣ ᨡᨶ᩠ᨵᩮᩣ ᩋᩉᩮᩣᩈᩥ, ᩈᨻ᩠ᨻᩁᨲᨶᨾᨿᩣᨶᩥ ᨸᨲ᩠ᨲᩣᨶᩥ ᨧ ᨹᩃᩣᨶᩥ ᨧ. ᨲᩣᩈᩴ ᨡᩮᩣ ᨸᨶᩣᨶᨶ᩠ᨴ, ᨲᩣᩃᨸᨶ᩠ᨲᩦᨶᩴ ᩅᩣᨲᩮᩁᩥᨲᩣᨶᩴ ᩈᨴ᩠ᨴᩮᩣ ᩋᩉᩮᩣᩈᩥ, ᩅᨣ᩠ᨣᩩ ᨧ ᩁᨩᨶᩦᨿᩮᩣ ᨧ ᨡᨾᨶᩦᨿᩮᩣ ᨧ ᨾᨴᨶᩦᨿᩮᩣ ᨧ. ᩈᩮᨿ᩠ᨿᨳᩣᨸᩥ, ᩌᨶᨶ᩠ᨴ, ᨸᨬ᩠ᨧᨦ᩠ᨣᩥᨠᩔ ᨲᩪᩁᩥᨿᩔ ᩈᩩᩅᩥᨶᩦᨲᩔ ᩈᩩᨸ᩠ᨸᨭᩥᨲᩣᩊᩥᨲᩔ ᩈᩩᨠᩩᩈᩃᩮᩉᩥ ᩈᨾᨶ᩠ᨶᩣᩉᨲᩔ ᩈᨴ᩠ᨴᩮᩣ ᩉᩮᩣᨲᩥ ᩅᨣ᩠ᨣᩩ ᨧ ᩁᨩᨶᩦᨿᩮᩣ ᨧ ᨡᨾᨶᩦᨿᩮᩣ ᨧ ᨾᨴᨶᩦᨿᩮᩣ ᨧ, ᩑᩅᨾᩮᩅ ᨡᩮᩣ, ᩌᨶᨶ᩠ᨴ, ᨲᩣᩈᩴ ᨲᩣᩃᨸᨶ᩠ᨲᩦᨶᩴ ᩅᩣᨲᩮᩁᩥᨲᩣᨶᩴ ᩈᨴ᩠ᨴᩮᩣ ᩋᩉᩮᩣᩈᩥ ᩅᨣ᩠ᨣᩩ ᨧ ᩁᨩᨶᩦᨿᩮᩣ ᨧ ᨡᨾᨶᩦᨿᩮᩣ ᨧ ᨾᨴᨶᩦᨿᩮᩣ ᨧ. ᨿᩮ ᨡᩮᩣ ᨸᨶᩣᨶᨶ᩠ᨴ, ᨲᩮᨶ ᩈᨾᨿᩮᨶ ᨠᩩᩈᩣᩅᨲᩥᨿᩣ ᩁᩣᨩᨵᩣᨶᩥᨿᩣ ᨵᩩᨲ᩠ᨲᩣ ᩋᩉᩮᩈᩩᩴ ᩈᩮᩣᨱ᩠ᨯᩣ ᨸᩥᨸᩣᩈᩣ, ᨲᩮ ᨲᩣᩈᩴ ᨲᩣᩃᨸᨶ᩠ᨲᩦᨶᩴ ᩅᩣᨲᩮᩁᩥᨲᩣᨶᩴ ᩈᨴ᩠ᨴᩮᨶ ᨸᩁᩥᨧᩣᩁᩮᩈᩩᩴ.

‘‘ᨶᩥᨭ᩠ᨮᩥᨲᩮ ᨡᩮᩣ ᨸᨶᩣᨶᨶ᩠ᨴ, ᨵᨾ᩠ᨾᩮ ᨸᩣᩈᩣᨴᩮ ᨶᩥᨭ᩠ᨮᩥᨲᩣᨿ ᨵᨾ᩠ᨾᩣᨿ ᨧ ᨸᩮᩣᨠ᩠ᨡᩁᨱᩥᨿᩣ ᩁᩣᨩᩣ ᨾᩉᩣᩈᩩᨴᩔᨶᩮᩣ ‘ᨿᩮ [ᨿᩮ ᨠᩮᩣ ᨸᨶᩣᨶᨶ᩠ᨴ (ᩈ᩠ᨿᩣ. ᨠ.)] ᨲᩮᨶ ᩈᨾᨿᩮᨶ ᩈᨾᨱᩮᩈᩩ ᩅᩣ ᩈᨾᨱᩈᨾ᩠ᨾᨲᩣ ᨻᩕᩣᩉ᩠ᨾᨱᩮᩈᩩ ᩅᩣ ᨻᩕᩣᩉ᩠ᨾᨱᩈᨾ᩠ᨾᨲᩣ’, ᨲᩮ ᩈᨻ᩠ᨻᨠᩣᨾᩮᩉᩥ ᩈᨶ᩠ᨲᨸ᩠ᨸᩮᨲ᩠ᩅᩣ ᨵᨾ᩠ᨾᩴ ᨸᩣᩈᩣᨴᩴ ᩋᨽᩥᩁᩩᩉᩥ.

ᨸᨮᨾᨽᩣᨱᩅᩣᩁᩮᩣ.

ᨫᩣᨶᩈᨾ᩠ᨸᨲ᩠ᨲᩥ

᪒᪖᪐. ‘‘ᩋᨳ ᨡᩮᩣ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩑᨲᨴᩉᩮᩣᩈᩥ – ‘ᨠᩥᩔ ᨶᩩ ᨡᩮᩣ ᨾᩮ ᩍᨴᩴ ᨠᨾ᩠ᨾᩔ ᨹᩃᩴ ᨠᩥᩔ ᨠᨾ᩠ᨾᩔ ᩅᩥᨸᩣᨠᩮᩣ, ᨿᩮᨶᩣᩉᩴ ᩑᨲᩁᩉᩥ ᩑᩅᩴᨾᩉᩥᨴ᩠ᨵᩥᨠᩮᩣ ᩑᩅᩴᨾᩉᩣᨶᩩᨽᩣᩅᩮᩣ’ᨲᩥ? ᩋᨳ ᨡᩮᩣ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩑᨲᨴᩉᩮᩣᩈᩥ – ‘ᨲᩥᨱ᩠ᨱᩴ ᨡᩮᩣ ᨾᩮ ᩍᨴᩴ ᨠᨾ᩠ᨾᩣᨶᩴ ᨹᩃᩴ ᨲᩥᨱ᩠ᨱᩴ ᨠᨾ᩠ᨾᩣᨶᩴ ᩅᩥᨸᩣᨠᩮᩣ, ᨿᩮᨶᩣᩉᩴ ᩑᨲᩁᩉᩥ ᩑᩅᩴᨾᩉᩥᨴ᩠ᨵᩥᨠᩮᩣ ᩑᩅᩴᨾᩉᩣᨶᩩᨽᩣᩅᩮᩣ, ᩈᩮᨿ᩠ᨿᨳᩥᨴᩴ ᨴᩣᨶᩔ ᨴᨾᩔ ᩈᩴᨿᨾᩔᩣ’ᨲᩥ.

‘‘ᩋᨳ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨿᩮᨶ ᨾᩉᩣᩅᩥᨿᩪᩉᩴ ᨠᩪᨭᩣᨣᩣᩁᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩉᩣᩅᩥᨿᩪᩉᩔ ᨠᩪᨭᩣᨣᩣᩁᩔ ᨴ᩠ᩅᩣᩁᩮ ᨮᩥᨲᩮᩣ ᩏᨴᩣᨶᩴ ᩏᨴᩣᨶᩮᩈᩥ – ‘ᨲᩥᨭ᩠ᨮ, ᨠᩣᨾᩅᩥᨲᨠ᩠ᨠ, ᨲᩥᨭ᩠ᨮ, ᨻ᩠ᨿᩣᨸᩣᨴᩅᩥᨲᨠ᩠ᨠ, ᨲᩥᨭ᩠ᨮ, ᩅᩥᩉᩥᩴᩈᩣᩅᩥᨲᨠ᩠ᨠ. ᩑᨲ᩠ᨲᩣᩅᨲᩣ ᨠᩣᨾᩅᩥᨲᨠ᩠ᨠ, ᩑᨲ᩠ᨲᩣᩅᨲᩣ ᨻ᩠ᨿᩣᨸᩣᨴᩅᩥᨲᨠ᩠ᨠ, ᩑᨲ᩠ᨲᩣᩅᨲᩣ ᩅᩥᩉᩥᩴᩈᩣᩅᩥᨲᨠ᩠ᨠᩣ’ᨲᩥ.

᪒᪖᪑. ‘‘ᩋᨳ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨾᩉᩣᩅᩥᨿᩪᩉᩴ ᨠᩪᨭᩣᨣᩣᩁᩴ ᨸᩅᩥᩈᩥᨲ᩠ᩅᩣ ᩈᩮᩣᩅᨱ᩠ᨱᨾᨿᩮ ᨸᩃ᩠ᩃᨦ᩠ᨠᩮ ᨶᩥᩈᩥᨶ᩠ᨶᩮᩣ ᩅᩥᩅᩥᨧ᩠ᨧᩮᩅ ᨠᩣᨾᩮᩉᩥ ᩅᩥᩅᩥᨧ᩠ᨧ ᩋᨠᩩᩈᩃᩮᩉᩥ ᨵᨾ᩠ᨾᩮᩉᩥ ᩈᩅᩥᨲᨠ᩠ᨠᩴ ᩈᩅᩥᨧᩣᩁᩴ ᩅᩥᩅᩮᨠᨩᩴ ᨸᩦᨲᩥᩈᩩᨡᩴ ᨸᨮᨾᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩣᩈᩥ. ᩅᩥᨲᨠ᩠ᨠᩅᩥᨧᩣᩁᩣᨶᩴ ᩅᩪᨸᩈᨾᩣ ᩋᨩ᩠ᨫᨲ᩠ᨲᩴ ᩈᨾ᩠ᨸᩈᩣᨴᨶᩴ ᨧᩮᨲᩈᩮᩣ ᩑᨠᩮᩣᨴᩥᨽᩣᩅᩴ ᩋᩅᩥᨲᨠ᩠ᨠᩴ ᩋᩅᩥᨧᩣᩁᩴ ᩈᨾᩣᨵᩥᨩᩴ ᨸᩦᨲᩥᩈᩩᨡᩴ ᨴᩩᨲᩥᨿᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩣᩈᩥ. ᨸᩦᨲᩥᨿᩣ ᨧ ᩅᩥᩁᩣᨣᩣ ᩏᨸᩮᨠ᩠ᨡᨠᩮᩣ ᨧ ᩅᩥᩉᩣᩈᩥ, ᩈᨲᩮᩣ ᨧ ᩈᨾ᩠ᨸᨩᩣᨶᩮᩣ ᩈᩩᨡᨬ᩠ᨧ ᨠᩣᨿᩮᨶ ᨸᨭᩥᩈᩴᩅᩮᨴᩮᩈᩥ, ᨿᩴ ᨲᩴ ᩋᩁᩥᨿᩣ ᩌᨧᩥᨠ᩠ᨡᨶ᩠ᨲᩥ – ‘ᩏᨸᩮᨠ᩠ᨡᨠᩮᩣ ᩈᨲᩥᨾᩣ ᩈᩩᨡᩅᩥᩉᩣᩁᩦ’ᨲᩥ ᨲᨲᩥᨿᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩣᩈᩥ. ᩈᩩᨡᩔ ᨧ ᨸᩉᩣᨶᩣ ᨴᩩᨠ᩠ᨡᩔ ᨧ ᨸᩉᩣᨶᩣ ᨸᩩᨻ᩠ᨻᩮᩅ ᩈᩮᩣᨾᨶᩔᨴᩮᩣᨾᨶᩔᩣᨶᩴ ᩋᨲ᩠ᨳᨦ᩠ᨣᨾᩣ ᩋᨴᩩᨠ᩠ᨡᨾᩈᩩᨡᩴ ᩏᨸᩮᨠ᩠ᨡᩣᩈᨲᩥᨸᩣᩁᩥᩈᩩᨴ᩠ᨵᩥᩴ ᨧᨲᩩᨲ᩠ᨳᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩣᩈᩥ.

᪒᪖᪒. ‘‘ᩋᨳ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨾᩉᩣᩅᩥᨿᩪᩉᩣ ᨠᩪᨭᩣᨣᩣᩁᩣ ᨶᩥᨠ᩠ᨡᨾᩥᨲ᩠ᩅᩣ ᩈᩮᩣᩅᨱ᩠ᨱᨾᨿᩴ ᨠᩪᨭᩣᨣᩣᩁᩴ ᨸᩅᩥᩈᩥᨲ᩠ᩅᩣ ᩁᩪᨸᩥᨿᨾᨿᩮ ᨸᩃ᩠ᩃᨦ᩠ᨠᩮ ᨶᩥᩈᩥᨶ᩠ᨶᩮᩣ ᨾᩮᨲ᩠ᨲᩣᩈᩉᨣᨲᩮᨶ ᨧᩮᨲᩈᩣ ᩑᨠᩴ ᨴᩥᩈᩴ ᨹᩁᩥᨲ᩠ᩅᩣ ᩅᩥᩉᩣᩈᩥ. ᨲᨳᩣ ᨴᩩᨲᩥᨿᩴ ᨲᨳᩣ ᨲᨲᩥᨿᩴ ᨲᨳᩣ ᨧᨲᩩᨲ᩠ᨳᩴ. ᩍᨲᩥ ᩏᨴ᩠ᨵᨾᨵᩮᩣ ᨲᩥᩁᩥᨿᩴ ᩈᨻ᩠ᨻᨵᩥ ᩈᨻ᩠ᨻᨲ᩠ᨲᨲᩣᨿ ᩈᨻ᩠ᨻᩣᩅᨶ᩠ᨲᩴ ᩃᩮᩣᨠᩴ ᨾᩮᨲ᩠ᨲᩣᩈᩉᨣᨲᩮᨶ ᨧᩮᨲᩈᩣ ᩅᩥᨸᩩᩃᩮᨶ ᨾᩉᨣ᩠ᨣᨲᩮᨶ ᩋᨸ᩠ᨸᨾᩣᨱᩮᨶ ᩋᩅᩮᩁᩮᨶ ᩋᨻ᩠ᨿᩣᨸᨩ᩠ᨩᩮᨶ ᨹᩁᩥᨲ᩠ᩅᩣ ᩅᩥᩉᩣᩈᩥ. ᨠᩁᩩᨱᩣᩈᩉᨣᨲᩮᨶ ᨧᩮᨲᩈᩣ…ᨸᩮ… ᨾᩩᨴᩥᨲᩣᩈᩉᨣᨲᩮᨶ ᨧᩮᨲᩈᩣ…ᨸᩮ… ᩏᨸᩮᨠ᩠ᨡᩣᩈᩉᨣᨲᩮᨶ ᨧᩮᨲᩈᩣ ᩑᨠᩴ ᨴᩥᩈᩴ ᨹᩁᩥᨲ᩠ᩅᩣ ᩅᩥᩉᩣᩈᩥ ᨲᨳᩣ ᨴᩩᨲᩥᨿᩴ ᨲᨳᩣ ᨲᨲᩥᨿᩴ ᨲᨳᩣ ᨧᨲᩩᨲ᩠ᨳᩴ. ᩍᨲᩥ ᩏᨴ᩠ᨵᨾᨵᩮᩣ ᨲᩥᩁᩥᨿᩴ ᩈᨻ᩠ᨻᨵᩥ ᩈᨻ᩠ᨻᨲ᩠ᨲᨲᩣᨿ ᩈᨻ᩠ᨻᩣᩅᨶ᩠ᨲᩴ ᩃᩮᩣᨠᩴ ᩏᨸᩮᨠ᩠ᨡᩣᩈᩉᨣᨲᩮᨶ ᨧᩮᨲᩈᩣ ᩅᩥᨸᩩᩃᩮᨶ ᨾᩉᨣ᩠ᨣᨲᩮᨶ ᩋᨸ᩠ᨸᨾᩣᨱᩮᨶ ᩋᩅᩮᩁᩮᨶ ᩋᨻ᩠ᨿᩣᨸᨩ᩠ᨩᩮᨶ ᨹᩁᩥᨲ᩠ᩅᩣ ᩅᩥᩉᩣᩈᩥ.

ᨧᨲᩩᩁᩣᩈᩦᨲᩥ ᨶᨣᩁᩈᩉᩔᩣᨴᩥ

᪒᪖᪓. ‘‘ᩁᨬ᩠ᨬᩮᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩔ ᨧᨲᩩᩁᩣᩈᩦᨲᩥ ᨶᨣᩁᩈᩉᩔᩣᨶᩥ ᩋᩉᩮᩈᩩᩴ ᨠᩩᩈᩣᩅᨲᩦᩁᩣᨩᨵᩣᨶᩥᨸ᩠ᨸᨾᩩᨡᩣᨶᩥ; ᨧᨲᩩᩁᩣᩈᩦᨲᩥ ᨸᩣᩈᩣᨴᩈᩉᩔᩣᨶᩥ ᩋᩉᩮᩈᩩᩴ ᨵᨾ᩠ᨾᨸᩣᩈᩣᨴᨸ᩠ᨸᨾᩩᨡᩣᨶᩥ; ᨧᨲᩩᩁᩣᩈᩦᨲᩥ ᨠᩪᨭᩣᨣᩣᩁᩈᩉᩔᩣᨶᩥ ᩋᩉᩮᩈᩩᩴ ᨾᩉᩣᩅᩥᨿᩪᩉᨠᩪᨭᩣᨣᩣᩁᨸ᩠ᨸᨾᩩᨡᩣᨶᩥ; ᨧᨲᩩᩁᩣᩈᩦᨲᩥ ᨸᩃ᩠ᩃᨦ᩠ᨠᩈᩉᩔᩣᨶᩥ ᩋᩉᩮᩈᩩᩴ ᩈᩮᩣᩅᨱ᩠ᨱᨾᨿᩣᨶᩥ ᩁᩪᨸᩥᨿᨾᨿᩣᨶᩥ ᨴᨶ᩠ᨲᨾᨿᩣᨶᩥ ᩈᩣᩁᨾᨿᩣᨶᩥ ᨣᩮᩣᨶᨠᨲ᩠ᨳᨲᩣᨶᩥ ᨸᨭᩥᨠᨲ᩠ᨳᨲᩣᨶᩥ ᨸᨭᩃᩥᨠᨲ᩠ᨳᨲᩣᨶᩥ ᨠᨴᩃᩥᨾᩥᨣᨸᩅᩁᨸᨧ᩠ᨧᨲ᩠ᨳᩁᨱᩣᨶᩥ ᩈᩏᨲ᩠ᨲᩁᨧ᩠ᨨᨴᩣᨶᩥ ᩏᨽᨲᩮᩣᩃᩮᩣᩉᩥᨲᨠᩪᨸᨵᩣᨶᩣᨶᩥ; ᨧᨲᩩᩁᩣᩈᩦᨲᩥ ᨶᩣᨣᩈᩉᩔᩣᨶᩥ ᩋᩉᩮᩈᩩᩴ ᩈᩮᩣᩅᨱ᩠ᨱᩣᩃᨦ᩠ᨠᩣᩁᩣᨶᩥ ᩈᩮᩣᩅᨱ᩠ᨱᨵᨩᩣᨶᩥ ᩉᩮᨾᨩᩣᩃᨸᨭᩥᨧ᩠ᨨᨶ᩠ᨶᩣᨶᩥ ᩏᨸᩮᩣᩈᨳᨶᩣᨣᩁᩣᨩᨸ᩠ᨸᨾᩩᨡᩣᨶᩥ; ᨧᨲᩩᩁᩣᩈᩦᨲᩥ ᩋᩔᩈᩉᩔᩣᨶᩥ ᩋᩉᩮᩈᩩᩴ ᩈᩮᩣᩅᨱ᩠ᨱᩣᩃᨦ᩠ᨠᩣᩁᩣᨶᩥ ᩈᩮᩣᩅᨱ᩠ᨱᨵᨩᩣᨶᩥ ᩉᩮᨾᨩᩣᩃᨸᨭᩥᨧ᩠ᨨᨶ᩠ᨶᩣᨶᩥ ᩅᩃᩣᩉᨠᩋᩔᩁᩣᨩᨸ᩠ᨸᨾᩩᨡᩣᨶᩥ; ᨧᨲᩩᩁᩣᩈᩦᨲᩥ ᩁᨳᩈᩉᩔᩣᨶᩥ ᩋᩉᩮᩈᩩᩴ ᩈᩦᩉᨧᨾ᩠ᨾᨸᩁᩥᩅᩣᩁᩣᨶᩥ ᨻ᩠ᨿᨣ᩠ᨥᨧᨾ᩠ᨾᨸᩁᩥᩅᩣᩁᩣᨶᩥ ᨴᩦᨸᩥᨧᨾ᩠ᨾᨸᩁᩥᩅᩣᩁᩣᨶᩥ ᨸᨱ᩠ᨯᩩᨠᨾ᩠ᨻᩃᨸᩁᩥᩅᩣᩁᩣᨶᩥ ᩈᩮᩣᩅᨱ᩠ᨱᩣᩃᨦ᩠ᨠᩣᩁᩣᨶᩥ ᩈᩮᩣᩅᨱ᩠ᨱᨵᨩᩣᨶᩥ ᩉᩮᨾᨩᩣᩃᨸᨭᩥᨧ᩠ᨨᨶ᩠ᨶᩣᨶᩥ ᩅᩮᨩᨿᨶ᩠ᨲᩁᨳᨸ᩠ᨸᨾᩩᨡᩣᨶᩥ; ᨧᨲᩩᩁᩣᩈᩦᨲᩥ ᨾᨱᩥᩈᩉᩔᩣᨶᩥ ᩋᩉᩮᩈᩩᩴ ᨾᨱᩥᩁᨲᨶᨸ᩠ᨸᨾᩩᨡᩣᨶᩥ; ᨧᨲᩩᩁᩣᩈᩦᨲᩥ ᩍᨲ᩠ᨳᩥᩈᩉᩔᩣᨶᩥ ᩋᩉᩮᩈᩩᩴ ᩈᩩᨽᨴ᩠ᨴᩣᨴᩮᩅᩥᨸ᩠ᨸᨾᩩᨡᩣᨶᩥ; ᨧᨲᩩᩁᩣᩈᩦᨲᩥ ᨣᩉᨸᨲᩥᩈᩉᩔᩣᨶᩥ ᩋᩉᩮᩈᩩᩴ ᨣᩉᨸᨲᩥᩁᨲᨶᨸ᩠ᨸᨾᩩᨡᩣᨶᩥ; ᨧᨲᩩᩁᩣᩈᩦᨲᩥ ᨡᨲ᩠ᨲᩥᨿᩈᩉᩔᩣᨶᩥ ᩋᩉᩮᩈᩩᩴ ᩋᨶᩩᨿᨶ᩠ᨲᩣᨶᩥ ᨸᩁᩥᨱᩣᨿᨠᩁᨲᨶᨸ᩠ᨸᨾᩩᨡᩣᨶᩥ; ᨧᨲᩩᩁᩣᩈᩦᨲᩥ ᨵᩮᨶᩩᩈᩉᩔᩣᨶᩥ ᩋᩉᩮᩈᩩᩴ ᨴᩩᩉᩈᨶ᩠ᨴᨶᩣᨶᩥ [ᨴᩩᨠᩪᩃᩈᨶ᩠ᨴᨶᩣᨶᩥ(ᨸᩦ.)] ᨴᩩᨠᩪᩃᩈᨶ᩠ᨴᩣᨶᩣᨶᩥ [ᨴᩩᨠᩪᩃᩈᨶ᩠ᨴᨶᩣᨶᩥ (ᨸᩦ.) ᨴᩩᨠᩪᩃᩈᨶ᩠ᨴᩣᨶᩣᨶᩥ (ᩈᩴ. ᨶᩥ. ᪓.᪙᪖)] ᨠᩴᩈᩪᨸᨵᩣᩁᨱᩣᨶᩥ; ᨧᨲᩩᩁᩣᩈᩦᨲᩥ ᩅᨲ᩠ᨳᨠᩮᩣᨭᩥᩈᩉᩔᩣᨶᩥ ᩋᩉᩮᩈᩩᩴ ᨡᩮᩣᨾᩈᩩᨡᩩᨾᩣᨶᩴ ᨠᨸ᩠ᨸᩣᩈᩥᨠᩈᩩᨡᩩᨾᩣᨶᩴ ᨠᩮᩣᩈᩮᨿ᩠ᨿᩈᩩᨡᩩᨾᩣᨶᩴ ᨠᨾ᩠ᨻᩃᩈᩩᨡᩩᨾᩣᨶᩴ; (ᩁᨬ᩠ᨬᩮᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩔ) [( ) ᩈᩦ. ᩍᨸᩮᩣᨲ᩠ᨳᨠᩮᩈᩩ ᨶᨲ᩠ᨳᩥ] ᨧᨲᩩᩁᩣᩈᩦᨲᩥ ᨳᩣᩃᩥᨸᩣᨠᩈᩉᩔᩣᨶᩥ ᩋᩉᩮᩈᩩᩴ ᩈᩣᨿᩴ ᨸᩣᨲᩴ ᨽᨲ᩠ᨲᩣᨽᩥᩉᩣᩁᩮᩣ ᩋᨽᩥᩉᩁᩥᨿᩥᨲ᩠ᨳ.

᪒᪖᪔. ‘‘ᨲᩮᨶ ᨡᩮᩣ ᨸᨶᩣᨶᨶ᩠ᨴ, ᩈᨾᨿᩮᨶ ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᨧᨲᩩᩁᩣᩈᩦᨲᩥ ᨶᩣᨣᩈᩉᩔᩣᨶᩥ ᩈᩣᨿᩴ ᨸᩣᨲᩴ ᩏᨸᨭ᩠ᨮᩣᨶᩴ ᩌᨣᨧ᩠ᨨᨶ᩠ᨲᩥ. ᩋᨳ ᨡᩮᩣ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩑᨲᨴᩉᩮᩣᩈᩥ – ‘ᩍᨾᩣᨶᩥ ᨡᩮᩣ ᨾᩮ ᨧᨲᩩᩁᩣᩈᩦᨲᩥ ᨶᩣᨣᩈᩉᩔᩣᨶᩥ ᩈᩣᨿᩴ ᨸᩣᨲᩴ ᩏᨸᨭ᩠ᨮᩣᨶᩴ ᩌᨣᨧ᩠ᨨᨶ᩠ᨲᩥ, ᨿᩴᨶᩪᨶ ᩅᩔᩈᨲᩔ ᩅᩔᩈᨲᩔ ᩋᨧ᩠ᨧᨿᩮᨶ ᨴ᩠ᩅᩮᨧᨲ᩠ᨲᩣᩃᩦᩈᩴ ᨴ᩠ᩅᩮᨧᨲ᩠ᨲᩣᩃᩦᩈᩴ ᨶᩣᨣᩈᩉᩔᩣᨶᩥ ᩈᨠᩥᩴ ᩈᨠᩥᩴ ᩏᨸᨭ᩠ᨮᩣᨶᩴ ᩌᨣᨧ᩠ᨨᩮᨿ᩠ᨿᩩ’ᨶ᩠ᨲᩥ. ᩋᨳ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨸᩁᩥᨱᩣᨿᨠᩁᨲᨶᩴ ᩌᨾᨶ᩠ᨲᩮᩈᩥ – ‘ᩍᨾᩣᨶᩥ ᨡᩮᩣ ᨾᩮ, ᩈᨾ᩠ᨾ ᨸᩁᩥᨱᩣᨿᨠᩁᨲᨶ, ᨧᨲᩩᩁᩣᩈᩦᨲᩥ ᨶᩣᨣᩈᩉᩔᩣᨶᩥ ᩈᩣᨿᩴ ᨸᩣᨲᩴ ᩏᨸᨭ᩠ᨮᩣᨶᩴ ᩌᨣᨧ᩠ᨨᨶ᩠ᨲᩥ, ᨲᩮᨶ ᩉᩥ, ᩈᨾ᩠ᨾ ᨸᩁᩥᨱᩣᨿᨠᩁᨲᨶ, ᩅᩔᩈᨲᩔ ᩅᩔᩈᨲᩔ ᩋᨧ᩠ᨧᨿᩮᨶ ᨴ᩠ᩅᩮᨧᨲ᩠ᨲᩣᩃᩦᩈᩴ ᨴ᩠ᩅᩮᨧᨲ᩠ᨲᩣᩃᩦᩈᩴ ᨶᩣᨣᩈᩉᩔᩣᨶᩥ ᩈᨠᩥᩴ ᩈᨠᩥᩴ ᩏᨸᨭ᩠ᨮᩣᨶᩴ ᩌᨣᨧ᩠ᨨᨶ᩠ᨲᩪ’ᨲᩥ. ‘ᩑᩅᩴ, ᨴᩮᩅᩣ’ᨲᩥ ᨡᩮᩣ, ᩌᨶᨶ᩠ᨴ, ᨸᩁᩥᨱᩣᨿᨠᩁᨲᨶᩴ ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᨸᨧ᩠ᨧᩔᩮᩣᩈᩥ. ᩋᨳ ᨡᩮᩣ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩋᨸᩁᩮᨶ ᩈᨾᨿᩮᨶ ᩅᩔᩈᨲᩔ ᩅᩔᩈᨲᩔ ᩋᨧ᩠ᨧᨿᩮᨶ ᨴ᩠ᩅᩮᨧᨲ᩠ᨲᩣᩃᩦᩈᩴ ᨴ᩠ᩅᩮᨧᨲ᩠ᨲᩣᩃᩦᩈᩴ ᨶᩣᨣᩈᩉᩔᩣᨶᩥ ᩈᨠᩥᩴ ᩈᨠᩥᩴ ᩏᨸᨭ᩠ᨮᩣᨶᩴ ᩌᨣᨾᩴᩈᩩ.

ᩈᩩᨽᨴ᩠ᨴᩣᨴᩮᩅᩥᩏᨸᩈᨦ᩠ᨠᨾᨶᩴ

᪒᪖᪕. ‘‘ᩋᨳ ᨡᩮᩣ, ᩌᨶᨶ᩠ᨴ, ᩈᩩᨽᨴ᩠ᨴᩣᨿ ᨴᩮᩅᩥᨿᩣ ᨻᩉᩩᨶ᩠ᨶᩴ ᩅᩔᩣᨶᩴ ᨻᩉᩩᨶ᩠ᨶᩴ ᩅᩔᩈᨲᩣᨶᩴ ᨻᩉᩩᨶ᩠ᨶᩴ ᩅᩔᩈᩉᩔᩣᨶᩴ ᩋᨧ᩠ᨧᨿᩮᨶ ᩑᨲᨴᩉᩮᩣᩈᩥ – ‘ᨧᩥᩁᩴ ᨴᩥᨭ᩠ᨮᩮᩣ ᨡᩮᩣ ᨾᩮ ᩁᩣᨩᩣ ᨾᩉᩣᩈᩩᨴᩔᨶᩮᩣ. ᨿᩴᨶᩪᨶᩣᩉᩴ ᩁᩣᨩᩣᨶᩴ ᨾᩉᩣᩈᩩᨴᩔᨶᩴ ᨴᩔᨶᩣᨿ ᩏᨸᩈᨦ᩠ᨠᨾᩮᨿ᩠ᨿ’ᨶ᩠ᨲᩥ. ᩋᨳ ᨡᩮᩣ, ᩌᨶᨶ᩠ᨴ, ᩈᩩᨽᨴ᩠ᨴᩣ ᨴᩮᩅᩦ ᩍᨲ᩠ᨳᩣᨣᩣᩁᩴ ᩌᨾᨶ᩠ᨲᩮᩈᩥ – ‘ᩑᨳ ᨲᩩᨾ᩠ᩉᩮ ᩈᩦᩈᩣᨶᩥ ᨶ᩠ᩉᩣᨿᨳ ᨸᩦᨲᩣᨶᩥ ᩅᨲ᩠ᨳᩣᨶᩥ ᨸᩣᩁᩩᨸᨳ. ᨧᩥᩁᩴ ᨴᩥᨭ᩠ᨮᩮᩣ ᨶᩮᩣ ᩁᩣᨩᩣ ᨾᩉᩣᩈᩩᨴᩔᨶᩮᩣ, ᩁᩣᨩᩣᨶᩴ ᨾᩉᩣᩈᩩᨴᩔᨶᩴ ᨴᩔᨶᩣᨿ ᩏᨸᩈᨦ᩠ᨠᨾᩥᩔᩣᨾᩣ’ᨲᩥ. ‘ᩑᩅᩴ, ᩋᨿ᩠ᨿᩮ’ᨲᩥ ᨡᩮᩣ, ᩌᨶᨶ᩠ᨴ, ᩍᨲ᩠ᨳᩣᨣᩣᩁᩴ ᩈᩩᨽᨴ᩠ᨴᩣᨿ ᨴᩮᩅᩥᨿᩣ ᨸᨭᩥᩔᩩᨲ᩠ᩅᩣ ᩈᩦᩈᩣᨶᩥ ᨶ᩠ᩉᩣᨿᩥᨲ᩠ᩅᩣ ᨸᩦᨲᩣᨶᩥ ᩅᨲ᩠ᨳᩣᨶᩥ ᨸᩣᩁᩩᨸᩥᨲ᩠ᩅᩣ ᨿᩮᨶ ᩈᩩᨽᨴ᩠ᨴᩣ ᨴᩮᩅᩦ ᨲᩮᨶᩩᨸᩈᨦ᩠ᨠᨾᩥ. ᩋᨳ ᨡᩮᩣ, ᩌᨶᨶ᩠ᨴ, ᩈᩩᨽᨴ᩠ᨴᩣ ᨴᩮᩅᩦ ᨸᩁᩥᨱᩣᨿᨠᩁᨲᨶᩴ ᩌᨾᨶ᩠ᨲᩮᩈᩥ – ‘ᨠᨸ᩠ᨸᩮᩉᩥ, ᩈᨾ᩠ᨾ ᨸᩁᩥᨱᩣᨿᨠᩁᨲᨶ, ᨧᨲᩩᩁᨦ᩠ᨣᩥᨶᩥᩴ ᩈᩮᨶᩴ, ᨧᩥᩁᩴ ᨴᩥᨭ᩠ᨮᩮᩣ ᨶᩮᩣ ᩁᩣᨩᩣ ᨾᩉᩣᩈᩩᨴᩔᨶᩮᩣ, ᩁᩣᨩᩣᨶᩴ ᨾᩉᩣᩈᩩᨴᩔᨶᩴ ᨴᩔᨶᩣᨿ ᩏᨸᩈᨦ᩠ᨠᨾᩥᩔᩣᨾᩣ’ᨲᩥ. ‘ᩑᩅᩴ, ᨴᩮᩅᩦ’ᨲᩥ ᨡᩮᩣ, ᩌᨶᨶ᩠ᨴ, ᨸᩁᩥᨱᩣᨿᨠᩁᨲᨶᩴ ᩈᩩᨽᨴ᩠ᨴᩣᨿ ᨴᩮᩅᩥᨿᩣ ᨸᨭᩥᩔᩩᨲ᩠ᩅᩣ ᨧᨲᩩᩁᨦ᩠ᨣᩥᨶᩥᩴ ᩈᩮᨶᩴ ᨠᨸ᩠ᨸᩣᨸᩮᨲ᩠ᩅᩣ ᩈᩩᨽᨴ᩠ᨴᩣᨿ ᨴᩮᩅᩥᨿᩣ ᨸᨭᩥᩅᩮᨴᩮᩈᩥ – ‘ᨠᨸ᩠ᨸᩥᨲᩣ ᨡᩮᩣ, ᨴᩮᩅᩥ, ᨧᨲᩩᩁᨦ᩠ᨣᩥᨶᩦ ᩈᩮᨶᩣ, ᨿᩔᨴᩣᨶᩥ ᨠᩣᩃᩴ ᨾᨬ᩠ᨬᩈᩦ’ᨲᩥ. ᩋᨳ ᨡᩮᩣ, ᩌᨶᨶ᩠ᨴ, ᩈᩩᨽᨴ᩠ᨴᩣ ᨴᩮᩅᩦ ᨧᨲᩩᩁᨦ᩠ᨣᩥᨶᩥᨿᩣ ᩈᩮᨶᩣᨿ ᩈᨴ᩠ᨵᩥᩴ ᩍᨲ᩠ᨳᩣᨣᩣᩁᩮᨶ ᨿᩮᨶ ᨵᨾ᩠ᨾᩮᩣ ᨸᩣᩈᩣᨴᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨵᨾ᩠ᨾᩴ ᨸᩣᩈᩣᨴᩴ ᩋᨽᩥᩁᩩᩉᩥᨲ᩠ᩅᩣ ᨿᩮᨶ ᨾᩉᩣᩅᩥᨿᩪᩉᩴ ᨠᩪᨭᩣᨣᩣᩁᩴ ᨲᩮᨶᩩᨸᩈᨦ᩠ᨠᨾᩥ. ᩏᨸᩈᨦ᩠ᨠᨾᩥᨲ᩠ᩅᩣ ᨾᩉᩣᩅᩥᨿᩪᩉᩔ ᨠᩪᨭᩣᨣᩣᩁᩔ ᨴ᩠ᩅᩣᩁᨻᩣᩉᩴ ᩌᩃᨾ᩠ᨻᩥᨲ᩠ᩅᩣ ᩋᨭ᩠ᨮᩣᩈᩥ. ᩋᨳ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᩈᨴ᩠ᨴᩴ ᩈᩩᨲ᩠ᩅᩣ – ‘ᨠᩥᩴ ᨶᩩ ᨡᩮᩣ ᨾᩉᨲᩮᩣ ᩅᩥᨿ ᨩᨶᨠᩣᨿᩔ ᩈᨴ᩠ᨴᩮᩣ’ᨲᩥ ᨾᩉᩣᩅᩥᨿᩪᩉᩣ ᨠᩪᨭᩣᨣᩣᩁᩣ ᨶᩥᨠ᩠ᨡᨾᨶ᩠ᨲᩮᩣ ᩋᨴ᩠ᨴᩈ ᩈᩩᨽᨴ᩠ᨴᩴ ᨴᩮᩅᩥᩴ ᨴ᩠ᩅᩣᩁᨻᩣᩉᩴ ᩌᩃᨾ᩠ᨻᩥᨲ᩠ᩅᩣ ᨮᩥᨲᩴ, ᨴᩥᩈ᩠ᩅᩣᨶ ᩈᩩᨽᨴ᩠ᨴᩴ ᨴᩮᩅᩥᩴ ᩑᨲᨴᩅᩮᩣᨧ – ‘ᩑᨲ᩠ᨳᩮᩅ, ᨴᩮᩅᩥ, ᨲᩥᨭ᩠ᨮ ᨾᩣ ᨸᩣᩅᩥᩈᩦ’ᨲᩥ. ᩋᨳ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᩋᨬ᩠ᨬᨲᩁᩴ ᨸᩩᩁᩥᩈᩴ ᩌᨾᨶ᩠ᨲᩮᩈᩥ – ‘ᩑᩉᩥ ᨲ᩠ᩅᩴ, ᩋᨾ᩠ᨽᩮᩣ ᨸᩩᩁᩥᩈ, ᨾᩉᩣᩅᩥᨿᩪᩉᩣ ᨠᩪᨭᩣᨣᩣᩁᩣ ᩈᩮᩣᩅᨱ᩠ᨱᨾᨿᩴ ᨸᩃ᩠ᩃᨦ᩠ᨠᩴ ᨶᩦᩉᩁᩥᨲ᩠ᩅᩣ ᩈᨻ᩠ᨻᩈᩮᩣᩅᨱ᩠ᨱᨾᨿᩮ ᨲᩣᩃᩅᨶᩮ ᨸᨬ᩠ᨬᨸᩮᩉᩦ’ᨲᩥ. ‘ᩑᩅᩴ, ᨴᩮᩅᩣ’ᨲᩥ ᨡᩮᩣ, ᩌᨶᨶ᩠ᨴ, ᩈᩮᩣ ᨸᩩᩁᩥᩈᩮᩣ ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᨸᨭᩥᩔᩩᨲ᩠ᩅᩣ ᨾᩉᩣᩅᩥᨿᩪᩉᩣ ᨠᩪᨭᩣᨣᩣᩁᩣ ᩈᩮᩣᩅᨱ᩠ᨱᨾᨿᩴ ᨸᩃ᩠ᩃᨦ᩠ᨠᩴ ᨶᩦᩉᩁᩥᨲ᩠ᩅᩣ ᩈᨻ᩠ᨻᩈᩮᩣᩅᨱ᩠ᨱᨾᨿᩮ ᨲᩣᩃᩅᨶᩮ ᨸᨬ᩠ᨬᨸᩮᩈᩥ. ᩋᨳ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨴᨠ᩠ᨡᩥᨱᩮᨶ ᨸᩔᩮᨶ ᩈᩦᩉᩈᩮᨿ᩠ᨿᩴ ᨠᨸ᩠ᨸᩮᩈᩥ ᨸᩣᨴᩮ ᨸᩣᨴᩴ ᩋᨧ᩠ᨧᩣᨵᩣᨿ ᩈᨲᩮᩣ ᩈᨾ᩠ᨸᨩᩣᨶᩮᩣ.

᪒᪖᪖. ‘‘ᩋᨳ ᨡᩮᩣ, ᩌᨶᨶ᩠ᨴ, ᩈᩩᨽᨴ᩠ᨴᩣᨿ ᨴᩮᩅᩥᨿᩣ ᩑᨲᨴᩉᩮᩣᩈᩥ – ‘ᩅᩥᨸ᩠ᨸᩈᨶ᩠ᨶᩣᨶᩥ ᨡᩮᩣ ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᩍᨶ᩠ᨴᩕᩥᨿᩣᨶᩥ, ᨸᩁᩥᩈᩩᨴ᩠ᨵᩮᩣ ᨨᩅᩥᩅᨱ᩠ᨱᩮᩣ ᨸᩁᩥᨿᩮᩣᨴᩣᨲᩮᩣ, ᨾᩣ ᩉᩮᩅ ᨡᩮᩣ ᩁᩣᨩᩣ ᨾᩉᩣᩈᩩᨴᩔᨶᩮᩣ ᨠᩣᩃᨾᨠᩣᩈᩦ’ᨲᩥ ᩁᩣᨩᩣᨶᩴ ᨾᩉᩣᩈᩩᨴᩔᨶᩴ ᩑᨲᨴᩅᩮᩣᨧ –

‘ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨶᨣᩁᩈᩉᩔᩣᨶᩥ ᨠᩩᩈᩣᩅᨲᩦᩁᩣᨩᨵᩣᨶᩥᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨩᨶᩮᩉᩥ ᨩᩦᩅᩥᨲᩮ ᩋᨸᩮᨠ᩠ᨡᩴ ᨠᩁᩮᩣᩉᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨸᩣᩈᩣᨴᩈᩉᩔᩣᨶᩥ ᨵᨾ᩠ᨾᨸᩣᩈᩣᨴᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨩᨶᩮᩉᩥ ᨩᩦᩅᩥᨲᩮ ᩋᨸᩮᨠ᩠ᨡᩴ ᨠᩁᩮᩣᩉᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨠᩪᨭᩣᨣᩣᩁᩈᩉᩔᩣᨶᩥ ᨾᩉᩣᩅᩥᨿᩪᩉᨠᩪᨭᩣᨣᩣᩁᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨩᨶᩮᩉᩥ ᨩᩦᩅᩥᨲᩮ ᩋᨸᩮᨠ᩠ᨡᩴ ᨠᩁᩮᩣᩉᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨸᩃ᩠ᩃᨦ᩠ᨠᩈᩉᩔᩣᨶᩥ ᩈᩮᩣᩅᨱ᩠ᨱᨾᨿᩣᨶᩥ ᩁᩪᨸᩥᨿᨾᨿᩣᨶᩥ ᨴᨶ᩠ᨲᨾᨿᩣᨶᩥ ᩈᩣᩁᨾᨿᩣᨶᩥ ᨣᩮᩣᨶᨠᨲ᩠ᨳᨲᩣᨶᩥ ᨸᨭᩥᨠᨲ᩠ᨳᨲᩣᨶᩥ ᨸᨭᩃᩥᨠᨲ᩠ᨳᨲᩣᨶᩥ ᨠᨴᩃᩥᨾᩥᨣᨸᩅᩁᨸᨧ᩠ᨧᨲ᩠ᨳᩁᨱᩣᨶᩥ ᩈᩏᨲ᩠ᨲᩁᨧ᩠ᨨᨴᩣᨶᩥ ᩏᨽᨲᩮᩣᩃᩮᩣᩉᩥᨲᨠᩪᨸᨵᩣᨶᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨩᨶᩮᩉᩥ, ᨩᩦᩅᩥᨲᩮ ᩋᨸᩮᨠ᩠ᨡᩴ ᨠᩁᩮᩣᩉᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨶᩣᨣᩈᩉᩔᩣᨶᩥ ᩈᩮᩣᩅᨱ᩠ᨱᩣᩃᨦ᩠ᨠᩣᩁᩣᨶᩥ ᩈᩮᩣᩅᨱ᩠ᨱᨵᨩᩣᨶᩥ ᩉᩮᨾᨩᩣᩃᨸᨭᩥᨧ᩠ᨨᨶ᩠ᨶᩣᨶᩥ ᩏᨸᩮᩣᩈᨳᨶᩣᨣᩁᩣᨩᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨩᨶᩮᩉᩥ ᨩᩦᩅᩥᨲᩮ ᩋᨸᩮᨠ᩠ᨡᩴ ᨠᩁᩮᩣᩉᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᩋᩔᩈᩉᩔᩣᨶᩥ ᩈᩮᩣᩅᨱ᩠ᨱᩣᩃᨦ᩠ᨠᩣᩁᩣᨶᩥ ᩈᩮᩣᩅᨱ᩠ᨱᨵᨩᩣᨶᩥ ᩉᩮᨾᨩᩣᩃᨸᨭᩥᨧ᩠ᨨᨶ᩠ᨶᩣᨶᩥ ᩅᩃᩣᩉᨠᩋᩔᩁᩣᨩᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨩᨶᩮᩉᩥ ᨩᩦᩅᩥᨲᩮ ᩋᨸᩮᨠ᩠ᨡᩴ ᨠᩁᩮᩣᩉᩥ. ᩍᨾᩣᨶᩥ ᨲᩮ, ᨴᩮᩅ ᨧᨲᩩᩁᩣᩈᩦᨲᩥ ᩁᨳᩈᩉᩔᩣᨶᩥ ᩈᩦᩉᨧᨾ᩠ᨾᨸᩁᩥᩅᩣᩁᩣᨶᩥ ᨻ᩠ᨿᨣ᩠ᨥᨧᨾ᩠ᨾᨸᩁᩥᩅᩣᩁᩣᨶᩥ ᨴᩦᨸᩥᨧᨾ᩠ᨾᨸᩁᩥᩅᩣᩁᩣᨶᩥ ᨸᨱ᩠ᨯᩩᨠᨾ᩠ᨻᩃᨸᩁᩥᩅᩣᩁᩣᨶᩥ ᩈᩮᩣᩅᨱ᩠ᨱᩣᩃᨦ᩠ᨠᩣᩁᩣᨶᩥ ᩈᩮᩣᩅᨱ᩠ᨱᨵᨩᩣᨶᩥ ᩉᩮᨾᨩᩣᩃᨸᨭᩥᨧ᩠ᨨᨶ᩠ᨶᩣᨶᩥ ᩅᩮᨩᨿᨶ᩠ᨲᩁᨳᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨩᨶᩮᩉᩥ ᨩᩦᩅᩥᨲᩮ ᩋᨸᩮᨠ᩠ᨡᩴ ᨠᩁᩮᩣᩉᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨾᨱᩥᩈᩉᩔᩣᨶᩥ ᨾᨱᩥᩁᨲᨶᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨩᨶᩮᩉᩥ ᨩᩦᩅᩥᨲᩮ ᩋᨸᩮᨠ᩠ᨡᩴ ᨠᩁᩮᩣᩉᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᩍᨲ᩠ᨳᩥᩈᩉᩔᩣᨶᩥ ᩍᨲ᩠ᨳᩥᩁᨲᨶᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨩᨶᩮᩉᩥ ᨩᩦᩅᩥᨲᩮ ᩋᨸᩮᨠ᩠ᨡᩴ ᨠᩁᩮᩣᩉᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨣᩉᨸᨲᩥᩈᩉᩔᩣᨶᩥ ᨣᩉᨸᨲᩥᩁᨲᨶᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨩᨶᩮᩉᩥ ᨩᩦᩅᩥᨲᩮ ᩋᨸᩮᨠ᩠ᨡᩴ ᨠᩁᩮᩣᩉᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨡᨲ᩠ᨲᩥᨿᩈᩉᩔᩣᨶᩥ ᩋᨶᩩᨿᨶ᩠ᨲᩣᨶᩥ ᨸᩁᩥᨱᩣᨿᨠᩁᨲᨶᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨩᨶᩮᩉᩥ ᨩᩦᩅᩥᨲᩮ ᩋᨸᩮᨠ᩠ᨡᩴ ᨠᩁᩮᩣᩉᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨵᩮᨶᩩᩈᩉᩔᩣᨶᩥ ᨴᩩᩉᩈᨶ᩠ᨴᨶᩣᨶᩥ ᨠᩴᩈᩪᨸᨵᩣᩁᨱᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨩᨶᩮᩉᩥ ᨩᩦᩅᩥᨲᩮ ᩋᨸᩮᨠ᩠ᨡᩴ ᨠᩁᩮᩣᩉᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᩅᨲ᩠ᨳᨠᩮᩣᨭᩥᩈᩉᩔᩣᨶᩥ ᨡᩮᩣᨾᩈᩩᨡᩩᨾᩣᨶᩴ ᨠᨸ᩠ᨸᩣᩈᩥᨠᩈᩩᨡᩩᨾᩣᨶᩴ ᨠᩮᩣᩈᩮᨿ᩠ᨿᩈᩩᨡᩩᨾᩣᨶᩴ ᨠᨾ᩠ᨻᩃᩈᩩᨡᩩᨾᩣᨶᩴ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨩᨶᩮᩉᩥ, ᨩᩦᩅᩥᨲᩮ ᩋᨸᩮᨠ᩠ᨡᩴ ᨠᩁᩮᩣᩉᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨳᩣᩃᩥᨸᩣᨠᩈᩉᩔᩣᨶᩥ ᩈᩣᨿᩴ ᨸᩣᨲᩴ ᨽᨲ᩠ᨲᩣᨽᩥᩉᩣᩁᩮᩣ ᩋᨽᩥᩉᩁᩥᨿᨲᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨩᨶᩮᩉᩥ ᨩᩦᩅᩥᨲᩮ ᩋᨸᩮᨠ᩠ᨡᩴ ᨠᩁᩮᩣᩉᩦ’ᨲᩥ.

᪒᪖᪗. ‘‘ᩑᩅᩴ ᩅᩩᨲ᩠ᨲᩮ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᩈᩩᨽᨴ᩠ᨴᩴ ᨴᩮᩅᩥᩴ ᩑᨲᨴᩅᩮᩣᨧ –

‘ᨴᩦᨥᩁᨲ᩠ᨲᩴ ᨡᩮᩣ ᨾᩴ ᨲ᩠ᩅᩴ, ᨴᩮᩅᩥ, ᩍᨭ᩠ᨮᩮᩉᩥ ᨠᨶ᩠ᨲᩮᩉᩥ ᨸᩥᨿᩮᩉᩥ ᨾᨶᩣᨸᩮᩉᩥ ᩈᨾᩩᨴᩣᨧᩁᩥᨲ᩠ᨳ; ᩋᨳ ᨧ ᨸᨶ ᨾᩴ ᨲ᩠ᩅᩴ ᨸᨧ᩠ᨨᩥᨾᩮ ᨠᩣᩃᩮ ᩋᨶᩥᨭ᩠ᨮᩮᩉᩥ ᩋᨠᨶ᩠ᨲᩮᩉᩥ ᩋᨸ᩠ᨸᩥᨿᩮᩉᩥ ᩋᨾᨶᩣᨸᩮᩉᩥ ᩈᨾᩩᨴᩣᨧᩁᩈᩦ’ᨲᩥ. ‘ᨠᨳᩴ ᨧᩁᩉᩥ ᨲᩴ, ᨴᩮᩅ, ᩈᨾᩩᨴᩣᨧᩁᩣᨾᩦ’ᨲᩥ? ‘ᩑᩅᩴ ᨡᩮᩣ ᨾᩴ ᨲ᩠ᩅᩴ, ᨴᩮᩅᩥ, ᩈᨾᩩᨴᩣᨧᩁ – ‘‘ᩈᨻ᩠ᨻᩮᩉᩮᩅ, ᨴᩮᩅ, ᨸᩥᨿᩮᩉᩥ ᨾᨶᩣᨸᩮᩉᩥ ᨶᩣᨶᩣᨽᩣᩅᩮᩣ ᩅᩥᨶᩣᨽᩣᩅᩮᩣ ᩋᨬ᩠ᨬᨳᩣᨽᩣᩅᩮᩣ, ᨾᩣ ᨡᩮᩣ ᨲ᩠ᩅᩴ, ᨴᩮᩅ, ᩈᩣᨸᩮᨠ᩠ᨡᩮᩣ ᨠᩣᩃᨾᨠᩣᩈᩥ, ᨴᩩᨠ᩠ᨡᩣ ᩈᩣᨸᩮᨠ᩠ᨡᩔ ᨠᩣᩃᨦ᩠ᨠᩥᩁᩥᨿᩣ, ᨣᩁᩉᩥᨲᩣ ᨧ ᩈᩣᨸᩮᨠ᩠ᨡᩔ ᨠᩣᩃᨦ᩠ᨠᩥᩁᩥᨿᩣ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨶᨣᩁᩈᩉᩔᩣᨶᩥ ᨠᩩᩈᩣᩅᨲᩦᩁᩣᨩᨵᩣᨶᩥᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨸᩣᩈᩣᨴᩈᩉᩔᩣᨶᩥ ᨵᨾ᩠ᨾᨸᩣᩈᩣᨴᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨠᩪᨭᩣᨣᩣᩁᩈᩉᩔᩣᨶᩥ ᨾᩉᩣᩅᩥᨿᩪᩉᨠᩪᨭᩣᨣᩣᩁᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨸᩃ᩠ᩃᨦ᩠ᨠᩈᩉᩔᩣᨶᩥ ᩈᩮᩣᩅᨱ᩠ᨱᨾᨿᩣᨶᩥ ᩁᩪᨸᩥᨿᨾᨿᩣᨶᩥ ᨴᨶ᩠ᨲᨾᨿᩣᨶᩥ ᩈᩣᩁᨾᨿᩣᨶᩥ ᨣᩮᩣᨶᨠᨲ᩠ᨳᨲᩣᨶᩥ ᨸᨭᩥᨠᨲ᩠ᨳᨲᩣᨶᩥ ᨸᨭᩃᩥᨠᨲ᩠ᨳᨲᩣᨶᩥ ᨠᨴᩃᩥᨾᩥᨣᨸᩅᩁᨸᨧ᩠ᨧᨲ᩠ᨳᩁᨱᩣᨶᩥ ᩈᩏᨲ᩠ᨲᩁᨧ᩠ᨨᨴᩣᨶᩥ ᩏᨽᨲᩮᩣᩃᩮᩣᩉᩥᨲᨠᩪᨸᨵᩣᨶᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨶᩣᨣᩈᩉᩔᩣᨶᩥ ᩈᩮᩣᩅᨱ᩠ᨱᩣᩃᨦ᩠ᨠᩣᩁᩣᨶᩥ ᩈᩮᩣᩅᨱ᩠ᨱᨵᨩᩣᨶᩥ ᩉᩮᨾᨩᩣᩃᨸᨭᩥᨧ᩠ᨨᨶ᩠ᨶᩣᨶᩥ ᩏᨸᩮᩣᩈᨳᨶᩣᨣᩁᩣᨩᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᩋᩔᩈᩉᩔᩣᨶᩥ ᩈᩮᩣᩅᨱ᩠ᨱᩣᩃᨦ᩠ᨠᩣᩁᩣᨶᩥ ᩈᩮᩣᩅᨱ᩠ᨱᨵᨩᩣᨶᩥ ᩉᩮᨾᨩᩣᩃᨸᨭᩥᨧ᩠ᨨᨶ᩠ᨶᩣᨶᩥ ᩅᩃᩣᩉᨠᩋᩔᩁᩣᨩᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᩁᨳᩈᩉᩔᩣᨶᩥ ᩈᩦᩉᨧᨾ᩠ᨾᨸᩁᩥᩅᩣᩁᩣᨶᩥ ᨻ᩠ᨿᨣ᩠ᨥᨧᨾ᩠ᨾᨸᩁᩥᩅᩣᩁᩣᨶᩥ ᨴᩦᨸᩥᨧᨾ᩠ᨾᨸᩁᩥᩅᩣᩁᩣᨶᩥ ᨸᨱ᩠ᨯᩩᨠᨾ᩠ᨻᩃᨸᩁᩥᩅᩣᩁᩣᨶᩥ ᩈᩮᩣᩅᨱ᩠ᨱᩣᩃᨦ᩠ᨠᩣᩁᩣᨶᩥ ᩈᩮᩣᩅᨱ᩠ᨱᨵᨩᩣᨶᩥ ᩉᩮᨾᨩᩣᩃᨸᨭᩥᨧ᩠ᨨᨶ᩠ᨶᩣᨶᩥ ᩅᩮᨩᨿᨶ᩠ᨲᩁᨳᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨾᨱᩥᩈᩉᩔᩣᨶᩥ ᨾᨱᩥᩁᨲᨶᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᩍᨲ᩠ᨳᩥᩈᩉᩔᩣᨶᩥ ᩈᩩᨽᨴ᩠ᨴᩣᨴᩮᩅᩥᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨣᩉᨸᨲᩥᩈᩉᩔᩣᨶᩥ ᨣᩉᨸᨲᩥᩁᨲᨶᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨡᨲ᩠ᨲᩥᨿᩈᩉᩔᩣᨶᩥ ᩋᨶᩩᨿᨶ᩠ᨲᩣᨶᩥ ᨸᩁᩥᨱᩣᨿᨠᩁᨲᨶᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨵᩮᨶᩩᩈᩉᩔᩣᨶᩥ ᨴᩩᩉᩈᨶ᩠ᨴᨶᩣᨶᩥ ᨠᩴᩈᩪᨸᨵᩣᩁᨱᩣᨶᩥ. ᩑᨲ᩠ᨳ ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᩅᨲ᩠ᨳᨠᩮᩣᨭᩥᩈᩉᩔᩣᨶᩥ ᨡᩮᩣᨾᩈᩩᨡᩩᨾᩣᨶᩴ ᨠᨸ᩠ᨸᩣᩈᩥᨠᩈᩩᨡᩩᨾᩣᨶᩴ ᨠᩮᩣᩈᩮᨿ᩠ᨿᩈᩩᨡᩩᨾᩣᨶᩴ ᨠᨾ᩠ᨻᩃᩈᩩᨡᩩᨾᩣᨶᩴ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ ᨴᩮᩅ ᨧᨲᩩᩁᩣᩈᩦᨲᩥ ᨳᩣᩃᩥᨸᩣᨠᩈᩉᩔᩣᨶᩥ ᩈᩣᨿᩴ ᨸᩣᨲᩴ ᨽᨲ᩠ᨲᩣᨽᩥᩉᩣᩁᩮᩣ ᩋᨽᩥᩉᩁᩥᨿᨲᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩦ’’’ᨲᩥ.

᪒᪖᪘. ‘‘ᩑᩅᩴ ᩅᩩᨲ᩠ᨲᩮ, ᩌᨶᨶ᩠ᨴ, ᩈᩩᨽᨴ᩠ᨴᩣ ᨴᩮᩅᩦ ᨸᩁᩮᩣᨴᩥ ᩋᩔᩪᨶᩥ ᨸᩅᨲ᩠ᨲᩮᩈᩥ. ᩋᨳ ᨡᩮᩣ, ᩌᨶᨶ᩠ᨴ, ᩈᩩᨽᨴ᩠ᨴᩣ ᨴᩮᩅᩦ ᩋᩔᩪᨶᩥ ᨸᩩᨬ᩠ᨨᩥᨲ᩠ᩅᩣ [ᨸᨾᨩ᩠ᨩᩥᨲ᩠ᩅᩣ (ᩈᩦ. ᩈ᩠ᨿᩣ. ᨸᩦ.), ᨸᩩᨬ᩠ᨩᩥᨲ᩠ᩅᩣ (ᨠ.)] ᩁᩣᨩᩣᨶᩴ ᨾᩉᩣᩈᩩᨴᩔᨶᩴ ᩑᨲᨴᩅᩮᩣᨧ –

‘ᩈᨻ᩠ᨻᩮᩉᩮᩅ, ᨴᩮᩅ, ᨸᩥᨿᩮᩉᩥ ᨾᨶᩣᨸᩮᩉᩥ ᨶᩣᨶᩣᨽᩣᩅᩮᩣ ᩅᩥᨶᩣᨽᩣᩅᩮᩣ ᩋᨬ᩠ᨬᨳᩣᨽᩣᩅᩮᩣ, ᨾᩣ ᨡᩮᩣ ᨲ᩠ᩅᩴ, ᨴᩮᩅ, ᩈᩣᨸᩮᨠ᩠ᨡᩮᩣ ᨠᩣᩃᨾᨠᩣᩈᩥ, ᨴᩩᨠ᩠ᨡᩣ ᩈᩣᨸᩮᨠ᩠ᨡᩔ ᨠᩣᩃᨦ᩠ᨠᩥᩁᩥᨿᩣ, ᨣᩁᩉᩥᨲᩣ ᨧ ᩈᩣᨸᩮᨠ᩠ᨡᩔ ᨠᩣᩃᨦ᩠ᨠᩥᩁᩥᨿᩣ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨶᨣᩁᩈᩉᩔᩣᨶᩥ ᨠᩩᩈᩣᩅᨲᩦᩁᩣᨩᨵᩣᨶᩥᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨸᩣᩈᩣᨴᩈᩉᩔᩣᨶᩥ ᨵᨾ᩠ᨾᨸᩣᩈᩣᨴᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨠᩪᨭᩣᨣᩣᩁᩈᩉᩔᩣᨶᩥ ᨾᩉᩣᩅᩥᨿᩪᩉᨠᩪᨭᩣᨣᩣᩁᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨸᩃ᩠ᩃᨦ᩠ᨠᩈᩉᩔᩣᨶᩥ ᩈᩮᩣᩅᨱ᩠ᨱᨾᨿᩣᨶᩥ ᩁᩪᨸᩥᨿᨾᨿᩣᨶᩥ ᨴᨶ᩠ᨲᨾᨿᩣᨶᩥ ᩈᩣᩁᨾᨿᩣᨶᩥ ᨣᩮᩣᨶᨠᨲ᩠ᨳᨲᩣᨶᩥ ᨸᨭᩥᨠᨲ᩠ᨳᨲᩣᨶᩥ ᨸᨭᩃᩥᨠᨲ᩠ᨳᨲᩣᨶᩥ ᨠᨴᩃᩥᨾᩥᨣᨸᩅᩁᨸᨧ᩠ᨧᨲ᩠ᨳᩁᨱᩣᨶᩥ ᩈᩏᨲ᩠ᨲᩁᨧ᩠ᨨᨴᩣᨶᩥ ᩏᨽᨲᩮᩣᩃᩮᩣᩉᩥᨲᨠᩪᨸᨵᩣᨶᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨶᩣᨣᩈᩉᩔᩣᨶᩥ ᩈᩮᩣᩅᨱ᩠ᨱᩣᩃᨦ᩠ᨠᩣᩁᩣᨶᩥ ᩈᩮᩣᩅᨱ᩠ᨱᨵᨩᩣᨶᩥ ᩉᩮᨾᨩᩣᩃᨸᨭᩥᨧ᩠ᨨᨶ᩠ᨶᩣᨶᩥ ᩏᨸᩮᩣᩈᨳᨶᩣᨣᩁᩣᨩᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᩋᩔᩈᩉᩔᩣᨶᩥ ᩈᩮᩣᩅᨱ᩠ᨱᩣᩃᨦ᩠ᨠᩣᩁᩣᨶᩥ ᩈᩮᩣᩅᨱ᩠ᨱᨵᨩᩣᨶᩥ ᩉᩮᨾᨩᩣᩃᨸᨭᩥᨧ᩠ᨨᨶ᩠ᨶᩣᨶᩥ ᩅᩃᩣᩉᨠᩋᩔᩁᩣᨩᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ, ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᩁᨳᩈᩉᩔᩣᨶᩥ ᩈᩦᩉᨧᨾ᩠ᨾᨸᩁᩥᩅᩣᩁᩣᨶᩥ ᨻ᩠ᨿᨣ᩠ᨥᨧᨾ᩠ᨾᨸᩁᩥᩅᩣᩁᩣᨶᩥ ᨴᩦᨸᩥᨧᨾ᩠ᨾᨸᩁᩥᩅᩣᩁᩣᨶᩥ ᨸᨱ᩠ᨯᩩᨠᨾ᩠ᨻᩃᨸᩁᩥᩅᩣᩁᩣᨶᩥ ᩈᩮᩣᩅᨱ᩠ᨱᩣᩃᨦ᩠ᨠᩣᩁᩣᨶᩥ ᩈᩮᩣᩅᨱ᩠ᨱᨵᨩᩣᨶᩥ ᩉᩮᨾᨩᩣᩃᨸᨭᩥᨧ᩠ᨨᨶ᩠ᨶᩣᨶᩥ ᩅᩮᨩᨿᨶ᩠ᨲᩁᨳᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨾᨱᩥᩈᩉᩔᩣᨶᩥ ᨾᨱᩥᩁᨲᨶᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᩍᨲ᩠ᨳᩥᩈᩉᩔᩣᨶᩥ ᩍᨲ᩠ᨳᩥᩁᨲᨶᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ, ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨣᩉᨸᨲᩥᩈᩉᩔᩣᨶᩥ ᨣᩉᨸᨲᩥᩁᨲᨶᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨡᨲ᩠ᨲᩥᨿᩈᩉᩔᩣᨶᩥ ᩋᨶᩩᨿᨶ᩠ᨲᩣᨶᩥ ᨸᩁᩥᨱᩣᨿᨠᩁᨲᨶᨸ᩠ᨸᨾᩩᨡᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨵᩮᨶᩩᩈᩉᩔᩣᨶᩥ ᨴᩩᩉᩈᨶ᩠ᨴᨶᩣᨶᩥ ᨠᩴᩈᩪᨸᨵᩣᩁᨱᩣᨶᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᩅᨲ᩠ᨳᨠᩮᩣᨭᩥᩈᩉᩔᩣᨶᩥ ᨡᩮᩣᨾᩈᩩᨡᩩᨾᩣᨶᩴ ᨠᨸ᩠ᨸᩣᩈᩥᨠᩈᩩᨡᩩᨾᩣᨶᩴ ᨠᩮᩣᩈᩮᨿ᩠ᨿᩈᩩᨡᩩᨾᩣᨶᩴ ᨠᨾ᩠ᨻᩃᩈᩩᨡᩩᨾᩣᨶᩴ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩥ. ᩍᨾᩣᨶᩥ ᨲᩮ, ᨴᩮᩅ, ᨧᨲᩩᩁᩣᩈᩦᨲᩥ ᨳᩣᩃᩥᨸᩣᨠᩈᩉᩔᩣᨶᩥ ᩈᩣᨿᩴ ᨸᩣᨲᩴ ᨽᨲ᩠ᨲᩣᨽᩥᩉᩣᩁᩮᩣ ᩋᨽᩥᩉᩁᩥᨿᨲᩥ. ᩑᨲ᩠ᨳ, ᨴᩮᩅ, ᨨᨶ᩠ᨴᩴ ᨸᨩᩉ ᨩᩦᩅᩥᨲᩮ ᩋᨸᩮᨠ᩠ᨡᩴ ᨾᩣᨠᩣᩈᩦ’ᨲᩥ.

ᨻᩕᩉ᩠ᨾᩃᩮᩣᨠᩪᨸᨣᨾᩴ

᪒᪖᪙. ‘‘ᩋᨳ ᨡᩮᩣ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᨶᨧᩥᩁᩔᩮᩅ ᨠᩣᩃᨾᨠᩣᩈᩥ. ᩈᩮᨿ᩠ᨿᨳᩣᨸᩥ, ᩌᨶᨶ᩠ᨴ, ᨣᩉᨸᨲᩥᩔ ᩅᩣ ᨣᩉᨸᨲᩥᨸᩩᨲ᩠ᨲᩔ ᩅᩣ ᨾᨶᩩᨬ᩠ᨬᩴ ᨽᩮᩣᨩᨶᩴ ᨽᩩᨲ᩠ᨲᩣᩅᩥᩔ ᨽᨲ᩠ᨲᩈᨾ᩠ᨾᨴᩮᩣ ᩉᩮᩣᨲᩥ, ᩑᩅᨾᩮᩅ ᨡᩮᩣ, ᩌᨶᨶ᩠ᨴ, ᩁᨬ᩠ᨬᩮᩣ ᨾᩉᩣᩈᩩᨴᩔᨶᩔ ᨾᩣᩁᨱᨶ᩠ᨲᩥᨠᩣ ᩅᩮᨴᨶᩣ ᩋᩉᩮᩣᩈᩥ. ᨠᩣᩃᨦ᩠ᨠᨲᩮᩣ ᨧ, ᩌᨶᨶ᩠ᨴ, ᩁᩣᨩᩣ ᨾᩉᩣᩈᩩᨴᩔᨶᩮᩣ ᩈᩩᨣᨲᩥᩴ ᨻᩕᩉ᩠ᨾᩃᩮᩣᨠᩴ ᩏᨸᨸᨩ᩠ᨩᩥ. ᩁᩣᨩᩣ, ᩌᨶᨶ᩠ᨴ, ᨾᩉᩣᩈᩩᨴᩔᨶᩮᩣ ᨧᨲᩩᩁᩣᩈᩦᨲᩥ ᩅᩔᩈᩉᩔᩣᨶᩥ ᨠᩩᨾᩣᩁᨠᩦᩊᩴ [ᨠᩦᩊᩥᨲᩴ (ᨠ.), ᨠᩦᩊᩥᨠᩴ (ᩈᩦ. ᨸᩦ.)] ᨠᩦᩊᩥ. ᨧᨲᩩᩁᩣᩈᩦᨲᩥ ᩅᩔᩈᩉᩔᩣᨶᩥ ᩒᨸᩁᨩ᩠ᨩᩴ ᨠᩣᩁᩮᩈᩥ. ᨧᨲᩩᩁᩣᩈᩦᨲᩥ ᩅᩔᩈᩉᩔᩣᨶᩥ ᩁᨩ᩠ᨩᩴ ᨠᩣᩁᩮᩈᩥ. ᨧᨲᩩᩁᩣᩈᩦᨲᩥ ᩅᩔᩈᩉᩔᩣᨶᩥ ᨣᩥᩉᩥᨽᩪᨲᩮᩣ [ᨣᩥᩉᩦᨽᩪᨲᩮᩣ (ᩈᩦ. ᨸᩦ.)] ᨵᨾ᩠ᨾᩮ ᨸᩣᩈᩣᨴᩮ ᨻᩕᩉ᩠ᨾᨧᩁᩥᨿᩴ ᨧᩁᩥ [ᨻᩕᩉ᩠ᨾᨧᩁᩥᨿᨾᨧᩁᩥ (ᨠ.)]. ᩈᩮᩣ ᨧᨲ᩠ᨲᩣᩁᩮᩣ ᨻᩕᩉ᩠ᨾᩅᩥᩉᩣᩁᩮ ᨽᩣᩅᩮᨲ᩠ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᨻᩕᩉ᩠ᨾᩃᩮᩣᨠᩪᨸᨣᩮᩣ ᩋᩉᩮᩣᩈᩥ.

᪒᪗᪐. ‘‘ᩈᩥᨿᩣ ᨡᩮᩣ ᨸᨶᩣᨶᨶ᩠ᨴ, ᩑᩅᨾᩔ – ‘ᩋᨬ᩠ᨬᩮᩣ ᨶᩪᨶ ᨲᩮᨶ ᩈᨾᨿᩮᨶ ᩁᩣᨩᩣ ᨾᩉᩣᩈᩩᨴᩔᨶᩮᩣ ᩋᩉᩮᩣᩈᩦ’ᨲᩥ, ᨶ ᨡᩮᩣ ᨸᨶᩮᨲᩴ, ᩌᨶᨶ᩠ᨴ, ᩑᩅᩴ ᨴᨭ᩠ᨮᨻ᩠ᨻᩴ. ᩋᩉᩴ ᨲᩮᨶ ᩈᨾᨿᩮᨶ ᩁᩣᨩᩣ ᨾᩉᩣᩈᩩᨴᩔᨶᩮᩣ ᩋᩉᩮᩣᩈᩥᩴ. ᨾᨾ ᨲᩣᨶᩥ ᨧᨲᩩᩁᩣᩈᩦᨲᩥ ᨶᨣᩁᩈᩉᩔᩣᨶᩥ ᨠᩩᩈᩣᩅᨲᩦᩁᩣᨩᨵᩣᨶᩥᨸ᩠ᨸᨾᩩᨡᩣᨶᩥ, ᨾᨾ ᨲᩣᨶᩥ ᨧᨲᩩᩁᩣᩈᩦᨲᩥ ᨸᩣᩈᩣᨴᩈᩉᩔᩣᨶᩥ ᨵᨾ᩠ᨾᨸᩣᩈᩣᨴᨸ᩠ᨸᨾᩩᨡᩣᨶᩥ, ᨾᨾ ᨲᩣᨶᩥ ᨧᨲᩩᩁᩣᩈᩦᨲᩥ ᨠᩪᨭᩣᨣᩣᩁᩈᩉᩔᩣᨶᩥ ᨾᩉᩣᩅᩥᨿᩪᩉᨠᩪᨭᩣᨣᩣᩁᨸ᩠ᨸᨾᩩᨡᩣᨶᩥ, ᨾᨾ ᨲᩣᨶᩥ ᨧᨲᩩᩁᩣᩈᩦᨲᩥ ᨸᩃ᩠ᩃᨦ᩠ᨠᩈᩉᩔᩣᨶᩥ ᩈᩮᩣᩅᨱ᩠ᨱᨾᨿᩣᨶᩥ ᩁᩪᨸᩥᨿᨾᨿᩣᨶᩥ ᨴᨶ᩠ᨲᨾᨿᩣᨶᩥ ᩈᩣᩁᨾᨿᩣᨶᩥ ᨣᩮᩣᨶᨠᨲ᩠ᨳᨲᩣᨶᩥ ᨸᨭᩥᨠᨲ᩠ᨳᨲᩣᨶᩥ ᨸᨭᩃᩥᨠᨲ᩠ᨳᨲᩣᨶᩥ ᨠᨴᩃᩥᨾᩥᨣᨸᩅᩁᨸᨧ᩠ᨧᨲ᩠ᨳᩁᨱᩣᨶᩥ ᩈᩏᨲ᩠ᨲᩁᨧ᩠ᨨᨴᩣᨶᩥ ᩏᨽᨲᩮᩣᩃᩮᩣᩉᩥᨲᨠᩪᨸᨵᩣᨶᩣᨶᩥ, ᨾᨾ ᨲᩣᨶᩥ ᨧᨲᩩᩁᩣᩈᩦᨲᩥ ᨶᩣᨣᩈᩉᩔᩣᨶᩥ ᩈᩮᩣᩅᨱ᩠ᨱᩣᩃᨦ᩠ᨠᩣᩁᩣᨶᩥ ᩈᩮᩣᩅᨱ᩠ᨱᨵᨩᩣᨶᩥ ᩉᩮᨾᨩᩣᩃᨸᨭᩥᨧ᩠ᨨᨶ᩠ᨶᩣᨶᩥ ᩏᨸᩮᩣᩈᨳᨶᩣᨣᩁᩣᨩᨸ᩠ᨸᨾᩩᨡᩣᨶᩥ, ᨾᨾ ᨲᩣᨶᩥ ᨧᨲᩩᩁᩣᩈᩦᨲᩥ ᩋᩔᩈᩉᩔᩣᨶᩥ ᩈᩮᩣᩅᨱ᩠ᨱᩣᩃᨦ᩠ᨠᩣᩁᩣᨶᩥ ᩈᩮᩣᩅᨱ᩠ᨱᨵᨩᩣᨶᩥ ᩉᩮᨾᨩᩣᩃᨸᨭᩥᨧ᩠ᨨᨶ᩠ᨶᩣᨶᩥ ᩅᩃᩣᩉᨠᩋᩔᩁᩣᨩᨸ᩠ᨸᨾᩩᨡᩣᨶᩥ, ᨾᨾ ᨲᩣᨶᩥ ᨧᨲᩩᩁᩣᩈᩦᨲᩥ ᩁᨳᩈᩉᩔᩣᨶᩥ ᩈᩦᩉᨧᨾ᩠ᨾᨸᩁᩥᩅᩣᩁᩣᨶᩥ ᨻ᩠ᨿᨣ᩠ᨥᨧᨾ᩠ᨾᨸᩁᩥᩅᩣᩁᩣᨶᩥ ᨴᩦᨸᩥᨧᨾ᩠ᨾᨸᩁᩥᩅᩣᩁᩣᨶᩥ ᨸᨱ᩠ᨯᩩᨠᨾ᩠ᨻᩃᨸᩁᩥᩅᩣᩁᩣᨶᩥ ᩈᩮᩣᩅᨱ᩠ᨱᩣᩃᨦ᩠ᨠᩣᩁᩣᨶᩥ ᩈᩮᩣᩅᨱ᩠ᨱᨵᨩᩣᨶᩥ ᩉᩮᨾᨩᩣᩃᨸᨭᩥᨧ᩠ᨨᨶ᩠ᨶᩣᨶᩥ ᩅᩮᨩᨿᨶ᩠ᨲᩁᨳᨸ᩠ᨸᨾᩩᨡᩣᨶᩥ, ᨾᨾ ᨲᩣᨶᩥ ᨧᨲᩩᩁᩣᩈᩦᨲᩥ ᨾᨱᩥᩈᩉᩔᩣᨶᩥ ᨾᨱᩥᩁᨲᨶᨸ᩠ᨸᨾᩩᨡᩣᨶᩥ, ᨾᨾ ᨲᩣᨶᩥ ᨧᨲᩩᩁᩣᩈᩦᨲᩥ ᩍᨲ᩠ᨳᩥᩈᩉᩔᩣᨶᩥ ᩈᩩᨽᨴ᩠ᨴᩣᨴᩮᩅᩥᨸ᩠ᨸᨾᩩᨡᩣᨶᩥ, ᨾᨾ ᨲᩣᨶᩥ ᨧᨲᩩᩁᩣᩈᩦᨲᩥ ᨣᩉᨸᨲᩥᩈᩉᩔᩣᨶᩥ ᨣᩉᨸᨲᩥᩁᨲᨶᨸ᩠ᨸᨾᩩᨡᩣᨶᩥ, ᨾᨾ ᨲᩣᨶᩥ ᨧᨲᩩᩁᩣᩈᩦᨲᩥ ᨡᨲ᩠ᨲᩥᨿᩈᩉᩔᩣᨶᩥ ᩋᨶᩩᨿᨶ᩠ᨲᩣᨶᩥ ᨸᩁᩥᨱᩣᨿᨠᩁᨲᨶᨸ᩠ᨸᨾᩩᨡᩣᨶᩥ, ᨾᨾ ᨲᩣᨶᩥ ᨧᨲᩩᩁᩣᩈᩦᨲᩥ ᨵᩮᨶᩩᩈᩉᩔᩣᨶᩥ ᨴᩩᩉᩈᨶ᩠ᨴᨶᩣᨶᩥ ᨠᩴᩈᩪᨸᨵᩣᩁᨱᩣᨶᩥ, ᨾᨾ ᨲᩣᨶᩥ ᨧᨲᩩᩁᩣᩈᩦᨲᩥ ᩅᨲ᩠ᨳᨠᩮᩣᨭᩥᩈᩉᩔᩣᨶᩥ ᨡᩮᩣᨾᩈᩩᨡᩩᨾᩣᨶᩴ ᨠᨸ᩠ᨸᩣᩈᩥᨠᩈᩩᨡᩩᨾᩣᨶᩴ ᨠᩮᩣᩈᩮᨿ᩠ᨿᩈᩩᨡᩩᨾᩣᨶᩴ ᨠᨾ᩠ᨻᩃᩈᩩᨡᩩᨾᩣᨶᩴ, ᨾᨾ ᨲᩣᨶᩥ ᨧᨲᩩᩁᩣᩈᩦᨲᩥ ᨳᩣᩃᩥᨸᩣᨠᩈᩉᩔᩣᨶᩥ ᩈᩣᨿᩴ ᨸᩣᨲᩴ ᨽᨲ᩠ᨲᩣᨽᩥᩉᩣᩁᩮᩣ ᩋᨽᩥᩉᩁᩥᨿᩥᨲ᩠ᨳ.

᪒᪗᪑. ‘‘ᨲᩮᩈᩴ ᨡᩮᩣ ᨸᨶᩣᨶᨶ᩠ᨴ, ᨧᨲᩩᩁᩣᩈᩦᨲᩥᨶᨣᩁᩈᩉᩔᩣᨶᩴ ᩑᨠᨬ᩠ᨬᩮᩅ ᨲᩴ ᨶᨣᩁᩴ ᩉᩮᩣᨲᩥ, ᨿᩴ ᨲᩮᨶ ᩈᨾᨿᩮᨶ ᩋᨩ᩠ᨫᩣᩅᩈᩣᨾᩥ ᨿᨴᩥᨴᩴ ᨠᩩᩈᩣᩅᨲᩦ ᩁᩣᨩᨵᩣᨶᩦ. ᨲᩮᩈᩴ ᨡᩮᩣ ᨸᨶᩣᨶᨶ᩠ᨴ, ᨧᨲᩩᩁᩣᩈᩦᨲᩥᨸᩣᩈᩣᨴᩈᩉᩔᩣᨶᩴ ᩑᨠᩮᩣᨿᩮᩅ ᩈᩮᩣ ᨸᩣᩈᩣᨴᩮᩣ ᩉᩮᩣᨲᩥ, ᨿᩴ ᨲᩮᨶ ᩈᨾᨿᩮᨶ ᩋᨩ᩠ᨫᩣᩅᩈᩣᨾᩥ ᨿᨴᩥᨴᩴ ᨵᨾ᩠ᨾᩮᩣ ᨸᩣᩈᩣᨴᩮᩣ. ᨲᩮᩈᩴ ᨡᩮᩣ ᨸᨶᩣᨶᨶ᩠ᨴ, ᨧᨲᩩᩁᩣᩈᩦᨲᩥᨠᩪᨭᩣᨣᩣᩁᩈᩉᩔᩣᨶᩴ ᩑᨠᨬ᩠ᨬᩮᩅ ᨲᩴ ᨠᩪᨭᩣᨣᩣᩁᩴ ᩉᩮᩣᨲᩥ, ᨿᩴ ᨲᩮᨶ ᩈᨾᨿᩮᨶ ᩋᨩ᩠ᨫᩣᩅᩈᩣᨾᩥ ᨿᨴᩥᨴᩴ ᨾᩉᩣᩅᩥᨿᩪᩉᩴ ᨠᩪᨭᩣᨣᩣᩁᩴ. ᨲᩮᩈᩴ ᨡᩮᩣ ᨸᨶᩣᨶᨶ᩠ᨴ, ᨧᨲᩩᩁᩣᩈᩦᨲᩥᨸᩃ᩠ᩃᨦ᩠ᨠᩈᩉᩔᩣᨶᩴ ᩑᨠᩮᩣᨿᩮᩅ ᩈᩮᩣ ᨸᩃ᩠ᩃᨦ᩠ᨠᩮᩣ ᩉᩮᩣᨲᩥ, ᨿᩴ ᨲᩮᨶ ᩈᨾᨿᩮᨶ ᨸᩁᩥᨽᩩᨬ᩠ᨩᩣᨾᩥ ᨿᨴᩥᨴᩴ ᩈᩮᩣᩅᨱ᩠ᨱᨾᨿᩮᩣ ᩅᩣ ᩁᩪᨸᩥᨿᨾᨿᩮᩣ ᩅᩣ ᨴᨶ᩠ᨲᨾᨿᩮᩣ ᩅᩣ ᩈᩣᩁᨾᨿᩮᩣ ᩅᩣ. ᨲᩮᩈᩴ ᨡᩮᩣ ᨸᨶᩣᨶᨶ᩠ᨴ, ᨧᨲᩩᩁᩣᩈᩦᨲᩥᨶᩣᨣᩈᩉᩔᩣᨶᩴ ᩑᨠᩮᩣᨿᩮᩅ ᩈᩮᩣ ᨶᩣᨣᩮᩣ ᩉᩮᩣᨲᩥ, ᨿᩴ ᨲᩮᨶ ᩈᨾᨿᩮᨶ ᩋᨽᩥᩁᩩᩉᩣᨾᩥ ᨿᨴᩥᨴᩴ ᩏᨸᩮᩣᩈᨳᩮᩣ ᨶᩣᨣᩁᩣᨩᩣ. ᨲᩮᩈᩴ ᨡᩮᩣ ᨸᨶᩣᨶᨶ᩠ᨴ, ᨧᨲᩩᩁᩣᩈᩦᨲᩥᩋᩔᩈᩉᩔᩣᨶᩴ ᩑᨠᩮᩣᨿᩮᩅ ᩈᩮᩣ ᩋᩔᩮᩣ ᩉᩮᩣᨲᩥ, ᨿᩴ ᨲᩮᨶ ᩈᨾᨿᩮᨶ ᩋᨽᩥᩁᩩᩉᩣᨾᩥ ᨿᨴᩥᨴᩴ ᩅᩃᩣᩉᨠᩮᩣ ᩋᩔᩁᩣᨩᩣ. ᨲᩮᩈᩴ ᨡᩮᩣ ᨸᨶᩣᨶᨶ᩠ᨴ, ᨧᨲᩩᩁᩣᩈᩦᨲᩥᩁᨳᩈᩉᩔᩣᨶᩴ ᩑᨠᩮᩣᨿᩮᩅ ᩈᩮᩣ ᩁᨳᩮᩣ ᩉᩮᩣᨲᩥ, ᨿᩴ ᨲᩮᨶ ᩈᨾᨿᩮᨶ ᩋᨽᩥᩁᩩᩉᩣᨾᩥ ᨿᨴᩥᨴᩴ ᩅᩮᨩᨿᨶ᩠ᨲᩁᨳᩮᩣ. ᨲᩮᩈᩴ ᨡᩮᩣ ᨸᨶᩣᨶᨶ᩠ᨴ, ᨧᨲᩩᩁᩣᩈᩦᨲᩥᩍᨲ᩠ᨳᩥᩈᩉᩔᩣᨶᩴ ᩑᨠᩣᨿᩮᩅ ᩈᩣ ᩍᨲ᩠ᨳᩦ ᩉᩮᩣᨲᩥ, ᨿᩣ ᨲᩮᨶ ᩈᨾᨿᩮᨶ ᨸᨧ᩠ᨧᩩᨸᨭ᩠ᨮᩣᨲᩥ ᨡᨲ᩠ᨲᩥᨿᩣᨶᩦ ᩅᩣ ᩅᩮᩔᩥᨶᩦ [ᩅᩮᩔᩣᨿᩥᨶᩦ (ᩈ᩠ᨿᩣ.), ᩅᩮᩃᩣᨾᩥᨠᩣᨶᩦ (ᨠ. ᩈᩦ. ᨸᩦ.) ᩅᩮᩃᩣᨾᩥᨠᩣ (ᩈᩴ. ᨶᩥ. ᪓.᪙᪖)] ᩅᩣ. ᨲᩮᩈᩴ ᨡᩮᩣ ᨸᨶᩣᨶᨶ᩠ᨴ, ᩅᩣ. ᨲᩮᩈᩴ ᨡᩮᩣ ᨸᨶᩣᨶᨶ᩠ᨴ, ᨧᨲᩩᩁᩣᩈᩦᨲᩥᩅᨲ᩠ᨳᨠᩮᩣᨭᩥᩈᩉᩔᩣᨶᩴ ᩑᨠᩴᨿᩮᩅ ᨲᩴ ᨴᩩᩔᨿᩩᨣᩴ ᩉᩮᩣᨲᩥ, ᨿᩴ ᨲᩮᨶ ᩈᨾᨿᩮᨶ ᨸᩁᩥᨴᩉᩣᨾᩥ ᨡᩮᩣᨾᩈᩩᨡᩩᨾᩴ ᩅᩣ ᨠᨸ᩠ᨸᩣᩈᩥᨠᩈᩩᨡᩩᨾᩴ ᩅᩣ ᨠᩮᩣᩈᩮᨿ᩠ᨿᩈᩩᨡᩩᨾᩴ ᩅᩣ ᨠᨾ᩠ᨻᩃᩈᩩᨡᩩᨾᩴ ᩅᩣ. ᨲᩮᩈᩴ ᨡᩮᩣ ᨸᨶᩣᨶᨶ᩠ᨴ, ᨧᨲᩩᩁᩣᩈᩦᨲᩥᨳᩣᩃᩥᨸᩣᨠᩈᩉᩔᩣᨶᩴ ᩑᨠᩮᩣᨿᩮᩅ ᩈᩮᩣ ᨳᩣᩃᩥᨸᩣᨠᩮᩣ ᩉᩮᩣᨲᩥ, ᨿᨲᩮᩣ ᨶᩣᩊᩥᨠᩮᩣᨴᨶᨸᩁᨾᩴ ᨽᩩᨬ᩠ᨩᩣᨾᩥ ᨲᨴᩩᨸᩥᨿᨬ᩠ᨧ ᩈᩪᨸᩮᨿ᩠ᨿᩴ.

᪒᪗᪒. ‘‘ᨸᩔᩣᨶᨶ᩠ᨴ, ᩈᨻ᩠ᨻᩮᨲᩮ ᩈᨦ᩠ᨡᩣᩁᩣ ᩋᨲᩦᨲᩣ ᨶᩥᩁᩩᨴ᩠ᨵᩣ ᩅᩥᨸᩁᩥᨱᨲᩣ. ᩑᩅᩴ ᩋᨶᩥᨧ᩠ᨧᩣ ᨡᩮᩣ, ᩌᨶᨶ᩠ᨴ, ᩈᨦ᩠ᨡᩣᩁᩣ; ᩑᩅᩴ ᩋᨴ᩠ᨵᩩᩅᩣ ᨡᩮᩣ, ᩌᨶᨶ᩠ᨴ, ᩈᨦ᩠ᨡᩣᩁᩣ; ᩑᩅᩴ ᩋᨶᩔᩣᩈᩥᨠᩣ ᨡᩮᩣ, ᩌᨶᨶ᩠ᨴ, ᩈᨦ᩠ᨡᩣᩁᩣ! ᨿᩣᩅᨬ᩠ᨧᩥᨴᩴ, ᩌᨶᨶ᩠ᨴ, ᩋᩃᨾᩮᩅ ᩈᨻ᩠ᨻᩈᨦ᩠ᨡᩣᩁᩮᩈᩩ ᨶᩥᨻ᩠ᨻᩥᨶ᩠ᨴᩥᨲᩩᩴ, ᩋᩃᩴ ᩅᩥᩁᨩ᩠ᨩᩥᨲᩩᩴ, ᩋᩃᩴ ᩅᩥᨾᩩᨧ᩠ᨧᩥᨲᩩᩴ.

‘‘ᨨᨠ᩠ᨡᨲ᩠ᨲᩩᩴ ᨡᩮᩣ ᨸᨶᩣᩉᩴ, ᩌᨶᨶ᩠ᨴ, ᩋᨽᩥᨩᩣᨶᩣᨾᩥ ᩍᨾᩈ᩠ᨾᩥᩴ ᨸᨴᩮᩈᩮ ᩈᩁᩦᩁᩴ ᨶᩥᨠ᩠ᨡᩥᨸᩥᨲᩴ, ᨲᨬ᩠ᨧ ᨡᩮᩣ ᩁᩣᨩᩣᩅ ᩈᨾᩣᨶᩮᩣ ᨧᨠ᩠ᨠᩅᨲ᩠ᨲᩦ ᨵᨾ᩠ᨾᩥᨠᩮᩣ ᨵᨾ᩠ᨾᩁᩣᨩᩣ ᨧᩣᨲᩩᩁᨶ᩠ᨲᩮᩣ ᩅᩥᨩᩥᨲᩣᩅᩦ ᨩᨶᨸᨴᨲ᩠ᨳᩣᩅᩁᩥᨿᨸᨲ᩠ᨲᩮᩣ ᩈᨲ᩠ᨲᩁᨲᨶᩈᨾᨶ᩠ᨶᩣᨣᨲᩮᩣ, ᩋᨿᩴ ᩈᨲ᩠ᨲᨾᩮᩣ ᩈᩁᩦᩁᨶᩥᨠ᩠ᨡᩮᨸᩮᩣ. ᨶ ᨡᩮᩣ ᨸᨶᩣᩉᩴ, ᩌᨶᨶ᩠ᨴ, ᨲᩴ ᨸᨴᩮᩈᩴ ᩈᨾᨶᩩᨸᩔᩣᨾᩥ ᩈᨴᩮᩅᨠᩮ ᩃᩮᩣᨠᩮ ᩈᨾᩣᩁᨠᩮ ᩈᨻᩕᩉ᩠ᨾᨠᩮ ᩈᩔᨾᨱᨻᩕᩣᩉ᩠ᨾᨱᩥᨿᩣ ᨸᨩᩣᨿ ᩈᨴᩮᩅᨾᨶᩩᩔᩣᨿ ᨿᨲ᩠ᨳ ᨲᨳᩣᨣᨲᩮᩣ ᩋᨭ᩠ᨮᨾᩴ ᩈᩁᩦᩁᩴ ᨶᩥᨠ᩠ᨡᩥᨸᩮᨿ᩠ᨿᩣ’’ᨲᩥ. ᩍᨴᨾᩅᩮᩣᨧ ᨽᨣᩅᩣ, ᩍᨴᩴ ᩅᨲ᩠ᩅᩣᨶ ᩈᩩᨣᨲᩮᩣ ᩋᨳᩣᨸᩁᩴ ᩑᨲᨴᩅᩮᩣᨧ ᩈᨲ᩠ᨳᩣ –

‘‘ᩋᨶᩥᨧ᩠ᨧᩣ ᩅᨲ ᩈᨦ᩠ᨡᩣᩁᩣ, ᩏᨸ᩠ᨸᩣᨴᩅᨿᨵᨾ᩠ᨾᩥᨶᩮᩣ;

ᩏᨸ᩠ᨸᨩ᩠ᨩᩥᨲ᩠ᩅᩣ ᨶᩥᩁᩩᨩ᩠ᨫᨶ᩠ᨲᩥ, ᨲᩮᩈᩴ ᩅᩪᨸᩈᨾᩮᩣ ᩈᩩᨡᩮᩣ’’ᨲᩥ.

ᨾᩉᩣᩈᩩᨴᩔᨶᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᨧᨲᩩᨲ᩠ᨳᩴ.

᪕. ᨩᨶᩅᩈᨽᩈᩩᨲ᩠ᨲᩴ

ᨶᩣᨲᩥᨠᩥᨿᩣᨴᩥᨻ᩠ᨿᩣᨠᩁᨱᩴ

᪒᪗᪓. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᨶᩣᨲᩥᨠᩮ [ᨶᩣᨴᩥᨠᩮ (ᩈᩦ. ᩈ᩠ᨿᩣ. ᨸᩦ.)] ᩅᩥᩉᩁᨲᩥ ᨣᩥᨬ᩠ᨩᨠᩣᩅᩈᨳᩮ. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨽᨣᩅᩣ ᨸᩁᩥᨲᩮᩣ ᨸᩁᩥᨲᩮᩣ ᨩᨶᨸᨴᩮᩈᩩ ᨸᩁᩥᨧᩣᩁᨠᩮ ᩋᨻ᩠ᨽᨲᩦᨲᩮ ᨠᩣᩃᨦ᩠ᨠᨲᩮ ᩏᨸᨸᨲ᩠ᨲᩦᩈᩩ ᨻ᩠ᨿᩣᨠᩁᩮᩣᨲᩥ ᨠᩣᩈᩥᨠᩮᩣᩈᩃᩮᩈᩩ ᩅᨩ᩠ᨩᩥᨾᩃ᩠ᩃᩮᩈᩩ ᨧᩮᨲᩥᩅᩴᩈᩮᩈᩩ [ᨧᩮᨲᩥᨿᩅᩴᩈᩮᩈᩩ (ᨠ.)] ᨠᩩᩁᩩᨸᨬ᩠ᨧᩣᩃᩮᩈᩩ ᨾᨩ᩠ᨫᩈᩪᩁᩈᩮᨶᩮᩈᩩ [ᨾᨧ᩠ᨨᩈᩩᩁᩈᩮᨶᩮᩈᩩ (ᩈ᩠ᨿᩣ.), ᨾᨧ᩠ᨨᩈᩪᩁᩈᩮᨶᩮᩈᩩ (ᩈᩦ. ᨸᩦ.)] – ‘‘ᩋᩈᩩ ᩋᨾᩩᨲᩕ ᩏᨸᨸᨶ᩠ᨶᩮᩣ, ᩋᩈᩩ ᩋᨾᩩᨲᩕ ᩏᨸᨸᨶ᩠ᨶᩮᩣ [ᩏᨸᨸᨶ᩠ᨶᩮᩣᨲᩥ (ᨠ.)]. ᨸᩁᩮᩣᨸᨬ᩠ᨬᩣᩈ ᨶᩣᨲᩥᨠᩥᨿᩣ ᨸᩁᩥᨧᩣᩁᨠᩣ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ ᨸᨬ᩠ᨧᨶ᩠ᨶᩴ ᩒᩁᨾ᩠ᨽᩣᨣᩥᨿᩣᨶᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩒᨸᨸᩣᨲᩥᨠᩣ ᨲᨲ᩠ᨳ ᨸᩁᩥᨶᩥᨻ᩠ᨻᩣᨿᩥᨶᩮᩣ ᩋᨶᩣᩅᨲ᩠ᨲᩥᨵᨾ᩠ᨾᩣ ᨲᩈ᩠ᨾᩣ ᩃᩮᩣᨠᩣ. ᩈᩣᨵᩥᨠᩣ ᨶᩅᩩᨲᩥ ᨶᩣᨲᩥᨠᩥᨿᩣ ᨸᩁᩥᨧᩣᩁᨠᩣ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩁᩣᨣᨴᩮᩣᩈᨾᩮᩣᩉᩣᨶᩴ ᨲᨶᩩᨲ᩠ᨲᩣ ᩈᨠᨴᩣᨣᩣᨾᩥᨶᩮᩣ, ᩈᨠᩥᨴᩮᩅ [ᩈᨠᩥᩴᨴᩮᩅ (ᨠ.)] ᩍᨾᩴ ᩃᩮᩣᨠᩴ ᩌᨣᨶ᩠ᨲ᩠ᩅᩣ ᨴᩩᨠ᩠ᨡᩔᨶ᩠ᨲᩴ ᨠᩁᩥᩔᨶ᩠ᨲᩥ. ᩈᩣᨲᩥᩁᩮᨠᩣᨶᩥ ᨸᨬ᩠ᨧᩈᨲᩣᨶᩥ ᨶᩣᨲᩥᨠᩥᨿᩣ ᨸᩁᩥᨧᩣᩁᨠᩣ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩈᩮᩣᨲᩣᨸᨶ᩠ᨶᩣ ᩋᩅᩥᨶᩥᨸᩣᨲᨵᨾ᩠ᨾᩣ ᨶᩥᨿᨲᩣ ᩈᨾ᩠ᨻᩮᩣᨵᩥᨸᩁᩣᨿᨱᩣ’’ᨲᩥ.

᪒᪗᪔. ᩋᩔᩮᩣᩈᩩᩴ ᨡᩮᩣ ᨶᩣᨲᩥᨠᩥᨿᩣ ᨸᩁᩥᨧᩣᩁᨠᩣ – ‘‘ᨽᨣᩅᩣ ᨠᩥᩁ ᨸᩁᩥᨲᩮᩣ ᨸᩁᩥᨲᩮᩣ ᨩᨶᨸᨴᩮᩈᩩ ᨸᩁᩥᨧᩣᩁᨠᩮ ᩋᨻ᩠ᨽᨲᩦᨲᩮ ᨠᩣᩃᨦ᩠ᨠᨲᩮ ᩏᨸᨸᨲ᩠ᨲᩦᩈᩩ ᨻ᩠ᨿᩣᨠᩁᩮᩣᨲᩥ ᨠᩣᩈᩥᨠᩮᩣᩈᩃᩮᩈᩩ ᩅᨩ᩠ᨩᩥᨾᩃ᩠ᩃᩮᩈᩩ ᨧᩮᨲᩥᩅᩴᩈᩮᩈᩩ ᨠᩩᩁᩩᨸᨬ᩠ᨧᩣᩃᩮᩈᩩ ᨾᨩ᩠ᨫᩈᩪᩁᩈᩮᨶᩮᩈᩩ – ‘ᩋᩈᩩ ᩋᨾᩩᨲᩕ ᩏᨸᨸᨶ᩠ᨶᩮᩣ, ᩋᩈᩩ ᩋᨾᩩᨲᩕ ᩏᨸᨸᨶ᩠ᨶᩮᩣ. ᨸᩁᩮᩣᨸᨬ᩠ᨬᩣᩈ ᨶᩣᨲᩥᨠᩥᨿᩣ ᨸᩁᩥᨧᩣᩁᨠᩣ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ ᨸᨬ᩠ᨧᨶ᩠ᨶᩴ ᩒᩁᨾ᩠ᨽᩣᨣᩥᨿᩣᨶᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩒᨸᨸᩣᨲᩥᨠᩣ ᨲᨲ᩠ᨳ ᨸᩁᩥᨶᩥᨻ᩠ᨻᩣᨿᩥᨶᩮᩣ ᩋᨶᩣᩅᨲ᩠ᨲᩥᨵᨾ᩠ᨾᩣ ᨲᩈ᩠ᨾᩣ ᩃᩮᩣᨠᩣ. ᩈᩣᨵᩥᨠᩣ ᨶᩅᩩᨲᩥ ᨶᩣᨲᩥᨠᩥᨿᩣ ᨸᩁᩥᨧᩣᩁᨠᩣ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩁᩣᨣᨴᩮᩣᩈᨾᩮᩣᩉᩣᨶᩴ ᨲᨶᩩᨲ᩠ᨲᩣ ᩈᨠᨴᩣᨣᩣᨾᩥᨶᩮᩣ ᩈᨠᩥᨴᩮᩅ ᩍᨾᩴ ᩃᩮᩣᨠᩴ ᩌᨣᨶ᩠ᨲ᩠ᩅᩣ ᨴᩩᨠ᩠ᨡᩔᨶ᩠ᨲᩴ ᨠᩁᩥᩔᨶ᩠ᨲᩥ. ᩈᩣᨲᩥᩁᩮᨠᩣᨶᩥ ᨸᨬ᩠ᨧᩈᨲᩣᨶᩥ ᨶᩣᨲᩥᨠᩥᨿᩣ ᨸᩁᩥᨧᩣᩁᨠᩣ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩈᩮᩣᨲᩣᨸᨶ᩠ᨶᩣ ᩋᩅᩥᨶᩥᨸᩣᨲᨵᨾ᩠ᨾᩣ ᨶᩥᨿᨲᩣ ᩈᨾ᩠ᨻᩮᩣᨵᩥᨸᩁᩣᨿᨱᩣ’ᨲᩥ. ᨲᩮᨶ ᨧ ᨶᩣᨲᩥᨠᩥᨿᩣ ᨸᩁᩥᨧᩣᩁᨠᩣ ᩋᨲ᩠ᨲᨾᨶᩣ ᩋᩉᩮᩈᩩᩴ ᨸᨾᩩᨴᩥᨲᩣ ᨸᩦᨲᩥᩈᩮᩣᨾᨶᩔᨩᩣᨲᩣ ᨽᨣᩅᨲᩮᩣ ᨸᨬ᩠ᩉᩅᩮᨿ᩠ᨿᩣᨠᩁᨱᩴ [ᨸᨬ᩠ᩉᩣᩅᩮᨿ᩠ᨿᩣᨠᩁᨱᩴ (ᩈ᩠ᨿᩣ. ᨠ.)] ᩈᩩᨲ᩠ᩅᩣ.

᪒᪗᪕. ᩋᩔᩮᩣᩈᩥ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ – ‘‘ᨽᨣᩅᩣ ᨠᩥᩁ ᨸᩁᩥᨲᩮᩣ ᨸᩁᩥᨲᩮᩣ ᨩᨶᨸᨴᩮᩈᩩ ᨸᩁᩥᨧᩣᩁᨠᩮ ᩋᨻ᩠ᨽᨲᩦᨲᩮ ᨠᩣᩃᨦ᩠ᨠᨲᩮ ᩏᨸᨸᨲ᩠ᨲᩦᩈᩩ ᨻ᩠ᨿᩣᨠᩁᩮᩣᨲᩥ ᨠᩣᩈᩥᨠᩮᩣᩈᩃᩮᩈᩩ ᩅᨩ᩠ᨩᩥᨾᩃ᩠ᩃᩮᩈᩩ ᨧᩮᨲᩥᩅᩴᩈᩮᩈᩩ ᨠᩩᩁᩩᨸᨬ᩠ᨧᩣᩃᩮᩈᩩ ᨾᨩ᩠ᨫᩈᩪᩁᩈᩮᨶᩮᩈᩩ – ‘ᩋᩈᩩ ᩋᨾᩩᨲᩕ ᩏᨸᨸᨶ᩠ᨶᩮᩣ, ᩋᩈᩩ ᩋᨾᩩᨲᩕ ᩏᨸᨸᨶ᩠ᨶᩮᩣ. ᨸᩁᩮᩣᨸᨬ᩠ᨬᩣᩈ ᨶᩣᨲᩥᨠᩥᨿᩣ ᨸᩁᩥᨧᩣᩁᨠᩣ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ ᨸᨬ᩠ᨧᨶ᩠ᨶᩴ ᩒᩁᨾ᩠ᨽᩣᨣᩥᨿᩣᨶᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩒᨸᨸᩣᨲᩥᨠᩣ ᨲᨲ᩠ᨳ ᨸᩁᩥᨶᩥᨻ᩠ᨻᩣᨿᩥᨶᩮᩣ ᩋᨶᩣᩅᨲ᩠ᨲᩥᨵᨾ᩠ᨾᩣ ᨲᩈ᩠ᨾᩣ ᩃᩮᩣᨠᩣ. ᩈᩣᨵᩥᨠᩣ ᨶᩅᩩᨲᩥ ᨶᩣᨲᩥᨠᩥᨿᩣ ᨸᩁᩥᨧᩣᩁᨠᩣ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩁᩣᨣᨴᩮᩣᩈᨾᩮᩣᩉᩣᨶᩴ ᨲᨶᩩᨲ᩠ᨲᩣ ᩈᨠᨴᩣᨣᩣᨾᩥᨶᩮᩣ ᩈᨠᩥᨴᩮᩅ ᩍᨾᩴ ᩃᩮᩣᨠᩴ ᩌᨣᨶ᩠ᨲ᩠ᩅᩣ ᨴᩩᨠ᩠ᨡᩔᨶ᩠ᨲᩴ ᨠᩁᩥᩔᨶ᩠ᨲᩥ. ᩈᩣᨲᩥᩁᩮᨠᩣᨶᩥ ᨸᨬ᩠ᨧᩈᨲᩣᨶᩥ ᨶᩣᨲᩥᨠᩥᨿᩣ ᨸᩁᩥᨧᩣᩁᨠᩣ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩈᩮᩣᨲᩣᨸᨶ᩠ᨶᩣ ᩋᩅᩥᨶᩥᨸᩣᨲᨵᨾ᩠ᨾᩣ ᨶᩥᨿᨲᩣ ᩈᨾ᩠ᨻᩮᩣᨵᩥᨸᩁᩣᨿᨱᩣ’ᨲᩥ. ᨲᩮᨶ ᨧ ᨶᩣᨲᩥᨠᩥᨿᩣ ᨸᩁᩥᨧᩣᩁᨠᩣ ᩋᨲ᩠ᨲᨾᨶᩣ ᩋᩉᩮᩈᩩᩴ ᨸᨾᩩᨴᩥᨲᩣ ᨸᩦᨲᩥᩈᩮᩣᨾᨶᩔᨩᩣᨲᩣ ᨽᨣᩅᨲᩮᩣ ᨸᨬ᩠ᩉᩅᩮᨿ᩠ᨿᩣᨠᩁᨱᩴ ᩈᩩᨲ᩠ᩅᩣ’’ᨲᩥ.

ᩌᨶᨶ᩠ᨴᨸᩁᩥᨠᨳᩣ

᪒᪗᪖. ᩋᨳ ᨡᩮᩣ ᩌᨿᩈ᩠ᨾᨲᩮᩣ ᩌᨶᨶ᩠ᨴᩔ ᩑᨲᨴᩉᩮᩣᩈᩥ – ‘‘ᩍᨾᩮ ᨡᩮᩣ ᨸᨶᩣᨸᩥ ᩋᩉᩮᩈᩩᩴ ᨾᩣᨣᨵᨠᩣ ᨸᩁᩥᨧᩣᩁᨠᩣ ᨻᩉᩪ ᨧᩮᩅ ᩁᨲ᩠ᨲᨬ᩠ᨬᩪ ᨧ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ. ᩈᩩᨬ᩠ᨬᩣ ᨾᨬ᩠ᨬᩮ ᩋᨦ᩠ᨣᨾᨣᨵᩣ ᩋᨦ᩠ᨣᨾᩣᨣᨵᨠᩮᩉᩥ [ᩋᨦ᩠ᨣᨾᩣᨣᨵᩥᨠᩮᩉᩥ (ᩈ᩠ᨿᩣ.)] ᨸᩁᩥᨧᩣᩁᨠᩮᩉᩥ ᩋᨻ᩠ᨽᨲᩦᨲᩮᩉᩥ ᨠᩣᩃᨦ᩠ᨠᨲᩮᩉᩥ. ᨲᩮ ᨡᩮᩣ ᨸᨶᩣᨸᩥ [ᨲᩮᨶ ᨡᩮᩣ ᨸᨶᩣᨸᩥ (ᩈ᩠ᨿᩣ.)] ᩋᩉᩮᩈᩩᩴ ᨻᩩᨴ᩠ᨵᩮ ᨸᩈᨶ᩠ᨶᩣ ᨵᨾ᩠ᨾᩮ ᨸᩈᨶ᩠ᨶᩣ ᩈᨦ᩠ᨥᩮ ᨸᩈᨶ᩠ᨶᩣ ᩈᩦᩃᩮᩈᩩ ᨸᩁᩥᨸᩪᩁᨠᩣᩁᩥᨶᩮᩣ. ᨲᩮ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ ᨽᨣᩅᨲᩣ ᩋᨻ᩠ᨿᩣᨠᨲᩣ; ᨲᩮᩈᨾ᩠ᨸᩥᩔ ᩈᩣᨵᩩ ᩅᩮᨿ᩠ᨿᩣᨠᩁᨱᩴ, ᨻᩉᩩᨩᨶᩮᩣ ᨸᩈᩦᨴᩮᨿ᩠ᨿ, ᨲᨲᩮᩣ ᨣᨧ᩠ᨨᩮᨿ᩠ᨿ ᩈᩩᨣᨲᩥᩴ. ᩋᨿᩴ ᨡᩮᩣ ᨸᨶᩣᨸᩥ ᩋᩉᩮᩣᩈᩥ ᩁᩣᨩᩣ ᨾᩣᨣᨵᩮᩣ ᩈᩮᨶᩥᨿᩮᩣ ᨻᩥᨾ᩠ᨻᩥᩈᩣᩁᩮᩣ ᨵᨾ᩠ᨾᩥᨠᩮᩣ ᨵᨾ᩠ᨾᩁᩣᨩᩣ ᩉᩥᨲᩮᩣ ᨻᩕᩣᩉ᩠ᨾᨱᨣᩉᨸᨲᩥᨠᩣᨶᩴ ᨶᩮᨣᨾᩣᨶᨬ᩠ᨧᩮᩅ ᨩᩣᨶᨸᨴᩣᨶᨬ᩠ᨧ. ᩋᨸᩥᩔᩩᨴᩴ ᨾᨶᩩᩔᩣ ᨠᩥᨲ᩠ᨲᨿᨾᩣᨶᩁᩪᨸᩣ ᩅᩥᩉᩁᨶ᩠ᨲᩥ – ‘ᩑᩅᩴ ᨶᩮᩣ ᩈᩮᩣ ᨵᨾ᩠ᨾᩥᨠᩮᩣ ᨵᨾ᩠ᨾᩁᩣᨩᩣ ᩈᩩᨡᩣᨸᩮᨲ᩠ᩅᩣ ᨠᩣᩃᨦ᩠ᨠᨲᩮᩣ, ᩑᩅᩴ ᨾᨿᩴ ᨲᩔ ᨵᨾ᩠ᨾᩥᨠᩔ ᨵᨾ᩠ᨾᩁᨬ᩠ᨬᩮᩣ ᩅᩥᨩᩥᨲᩮ ᨹᩣᩈᩩ [ᨹᩣᩈᩩᨠᩴ (ᩈ᩠ᨿᩣ.)] ᩅᩥᩉᩁᩥᨾ᩠ᩉᩣ’ᨲᩥ. ᩈᩮᩣ ᨡᩮᩣ ᨸᨶᩣᨸᩥ ᩋᩉᩮᩣᩈᩥ ᨻᩩᨴ᩠ᨵᩮ ᨸᩈᨶ᩠ᨶᩮᩣ ᨵᨾ᩠ᨾᩮ ᨸᩈᨶ᩠ᨶᩮᩣ ᩈᨦ᩠ᨥᩮ ᨸᩈᨶ᩠ᨶᩮᩣ ᩈᩦᩃᩮᩈᩩ ᨸᩁᩥᨸᩪᩁᨠᩣᩁᩦ. ᩋᨸᩥᩔᩩᨴᩴ ᨾᨶᩩᩔᩣ ᩑᩅᨾᩣᩉᩴᩈᩩ – ‘ᨿᩣᩅ ᨾᩁᨱᨠᩣᩃᩣᨸᩥ ᩁᩣᨩᩣ ᨾᩣᨣᨵᩮᩣ ᩈᩮᨶᩥᨿᩮᩣ ᨻᩥᨾ᩠ᨻᩥᩈᩣᩁᩮᩣ ᨽᨣᩅᨶ᩠ᨲᩴ ᨠᩥᨲ᩠ᨲᨿᨾᩣᨶᩁᩪᨸᩮᩣ ᨠᩣᩃᨦ᩠ᨠᨲᩮᩣ’ᨲᩥ. ᩈᩮᩣ ᩋᨻ᩠ᨽᨲᩦᨲᩮᩣ ᨠᩣᩃᨦ᩠ᨠᨲᩮᩣ ᨽᨣᩅᨲᩣ ᩋᨻ᩠ᨿᩣᨠᨲᩮᩣ. ᨲᩔᨸᩥᩔ ᩈᩣᨵᩩ ᩅᩮᨿ᩠ᨿᩣᨠᩁᨱᩴ ᨻᩉᩩᨩᨶᩮᩣ ᨸᩈᩦᨴᩮᨿ᩠ᨿ, ᨲᨲᩮᩣ ᨣᨧ᩠ᨨᩮᨿ᩠ᨿ ᩈᩩᨣᨲᩥᩴ. ᨽᨣᩅᨲᩮᩣ ᨡᩮᩣ ᨸᨶ ᩈᨾ᩠ᨻᩮᩣᨵᩥ ᨾᨣᨵᩮᩈᩩ. ᨿᨲ᩠ᨳ ᨡᩮᩣ ᨸᨶ ᨽᨣᩅᨲᩮᩣ ᩈᨾ᩠ᨻᩮᩣᨵᩥ ᨾᨣᨵᩮᩈᩩ, ᨠᨳᩴ ᨲᨲᩕ ᨽᨣᩅᩣ ᨾᩣᨣᨵᨠᩮ ᨸᩁᩥᨧᩣᩁᨠᩮ ᩋᨻ᩠ᨽᨲᩦᨲᩮ ᨠᩣᩃᨦ᩠ᨠᨲᩮ ᩏᨸᨸᨲ᩠ᨲᩦᩈᩩ ᨶ ᨻ᩠ᨿᩣᨠᩁᩮᨿ᩠ᨿ. ᨽᨣᩅᩣ ᨧᩮ ᨡᩮᩣ ᨸᨶ ᨾᩣᨣᨵᨠᩮ ᨸᩁᩥᨧᩣᩁᨠᩮ ᩋᨻ᩠ᨽᨲᩦᨲᩮ ᨠᩣᩃᨦ᩠ᨠᨲᩮ ᩏᨸᨸᨲ᩠ᨲᩦᩈᩩ ᨶ ᨻ᩠ᨿᩣᨠᩁᩮᨿ᩠ᨿ, ᨴᩦᨶᨾᨶᩣ [ᨶᩥᨶ᩠ᨶᨾᨶᩣ (ᩈ᩠ᨿᩣ.), ᨴᩦᨶᨾᩣᨶᩣ (ᩈᩦ. ᨸᩦ.)] ᨲᩮᨶᩔᩩ ᨾᩣᨣᨵᨠᩣ ᨸᩁᩥᨧᩣᩁᨠᩣ; ᨿᩮᨶ ᨡᩮᩣ ᨸᨶᩔᩩ ᨴᩦᨶᨾᨶᩣ ᨾᩣᨣᨵᨠᩣ ᨸᩁᩥᨧᩣᩁᨠᩣ ᨠᨳᩴ ᨲᩮ ᨽᨣᩅᩣ ᨶ ᨻ᩠ᨿᩣᨠᩁᩮᨿ᩠ᨿᩣ’’ᨲᩥ?

᪒᪗᪗. ᩍᨴᨾᩣᨿᩈ᩠ᨾᩣ ᩌᨶᨶ᩠ᨴᩮᩣ ᨾᩣᨣᨵᨠᩮ ᨸᩁᩥᨧᩣᩁᨠᩮ ᩌᩁᨻ᩠ᨽ ᩑᨠᩮᩣ ᩁᩉᩮᩣ ᩋᨶᩩᩅᩥᨧᩥᨶ᩠ᨲᩮᨲ᩠ᩅᩣ ᩁᨲ᩠ᨲᩥᨿᩣ ᨸᨧ᩠ᨧᩪᩈᩈᨾᨿᩴ ᨸᨧ᩠ᨧᩩᨭ᩠ᨮᩣᨿ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩈᩩᨲᩴ ᨾᩮᨲᩴ, ᨽᨶ᩠ᨲᩮ – ‘ᨽᨣᩅᩣ ᨠᩥᩁ ᨸᩁᩥᨲᩮᩣ ᨸᩁᩥᨲᩮᩣ ᨩᨶᨸᨴᩮᩈᩩ ᨸᩁᩥᨧᩣᩁᨠᩮ ᩋᨻ᩠ᨽᨲᩦᨲᩮ ᨠᩣᩃᨦ᩠ᨠᨲᩮ ᩏᨸᨸᨲ᩠ᨲᩦᩈᩩ ᨻ᩠ᨿᩣᨠᩁᩮᩣᨲᩥ ᨠᩣᩈᩥᨠᩮᩣᩈᩃᩮᩈᩩ ᩅᨩ᩠ᨩᩥᨾᩃ᩠ᩃᩮᩈᩩ ᨧᩮᨲᩥᩅᩴᩈᩮᩈᩩ ᨠᩩᩁᩩᨸᨬ᩠ᨧᩣᩃᩮᩈᩩ ᨾᨩ᩠ᨫᩈᩪᩁᩈᩮᨶᩮᩈᩩ – ‘‘ᩋᩈᩩ ᩋᨾᩩᨲᩕ ᩏᨸᨸᨶ᩠ᨶᩮᩣ, ᩋᩈᩩ ᩋᨾᩩᨲᩕ ᩏᨸᨸᨶ᩠ᨶᩮᩣ. ᨸᩁᩮᩣᨸᨬ᩠ᨬᩣᩈ ᨶᩣᨲᩥᨠᩥᨿᩣ ᨸᩁᩥᨧᩣᩁᨠᩣ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ ᨸᨬ᩠ᨧᨶ᩠ᨶᩴ ᩒᩁᨾ᩠ᨽᩣᨣᩥᨿᩣᨶᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩒᨸᨸᩣᨲᩥᨠᩣ ᨲᨲ᩠ᨳ ᨸᩁᩥᨶᩥᨻ᩠ᨻᩣᨿᩥᨶᩮᩣ ᩋᨶᩣᩅᨲ᩠ᨲᩥᨵᨾ᩠ᨾᩣ ᨲᩈ᩠ᨾᩣ ᩃᩮᩣᨠᩣ. ᩈᩣᨵᩥᨠᩣ ᨶᩅᩩᨲᩥ ᨶᩣᨲᩥᨠᩥᨿᩣ ᨸᩁᩥᨧᩣᩁᨠᩣ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩁᩣᨣᨴᩮᩣᩈᨾᩮᩣᩉᩣᨶᩴ ᨲᨶᩩᨲ᩠ᨲᩣ ᩈᨠᨴᩣᨣᩣᨾᩥᨶᩮᩣ, ᩈᨠᩥᨴᩮᩅ ᩍᨾᩴ ᩃᩮᩣᨠᩴ ᩌᨣᨶ᩠ᨲ᩠ᩅᩣ ᨴᩩᨠ᩠ᨡᩔᨶ᩠ᨲᩴ ᨠᩁᩥᩔᨶ᩠ᨲᩥ. ᩈᩣᨲᩥᩁᩮᨠᩣᨶᩥ ᨸᨬ᩠ᨧᩈᨲᩣᨶᩥ ᨶᩣᨲᩥᨠᩥᨿᩣ ᨸᩁᩥᨧᩣᩁᨠᩣ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩈᩮᩣᨲᩣᨸᨶ᩠ᨶᩣ ᩋᩅᩥᨶᩥᨸᩣᨲᨵᨾ᩠ᨾᩣ ᨶᩥᨿᨲᩣ ᩈᨾ᩠ᨻᩮᩣᨵᩥᨸᩁᩣᨿᨱᩣᨲᩥ. ᨲᩮᨶ ᨧ ᨶᩣᨲᩥᨠᩥᨿᩣ ᨸᩁᩥᨧᩣᩁᨠᩣ ᩋᨲ᩠ᨲᨾᨶᩣ ᩋᩉᩮᩈᩩᩴ ᨸᨾᩩᨴᩥᨲᩣ ᨸᩦᨲᩥᩈᩮᩣᨾᨶᩔᨩᩣᨲᩣ ᨽᨣᩅᨲᩮᩣ ᨸᨬ᩠ᩉᩅᩮᨿ᩠ᨿᩣᨠᩁᨱᩴ ᩈᩩᨲ᩠ᩅᩣ’’ᨲᩥ. ᩍᨾᩮ ᨡᩮᩣ ᨸᨶᩣᨸᩥ, ᨽᨶ᩠ᨲᩮ, ᩋᩉᩮᩈᩩᩴ ᨾᩣᨣᨵᨠᩣ ᨸᩁᩥᨧᩣᩁᨠᩣ ᨻᩉᩪ ᨧᩮᩅ ᩁᨲ᩠ᨲᨬ᩠ᨬᩪ ᨧ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ. ᩈᩩᨬ᩠ᨬᩣ ᨾᨬ᩠ᨬᩮ ᩋᨦ᩠ᨣᨾᨣᨵᩣ ᩋᨦ᩠ᨣᨾᩣᨣᨵᨠᩮᩉᩥ ᨸᩁᩥᨧᩣᩁᨠᩮᩉᩥ ᩋᨻ᩠ᨽᨲᩦᨲᩮᩉᩥ ᨠᩣᩃᨦ᩠ᨠᨲᩮᩉᩥ. ᨲᩮ ᨡᩮᩣ ᨸᨶᩣᨸᩥ, ᨽᨶ᩠ᨲᩮ, ᩋᩉᩮᩈᩩᩴ ᨻᩩᨴ᩠ᨵᩮ ᨸᩈᨶ᩠ᨶᩣ ᨵᨾ᩠ᨾᩮ ᨸᩈᨶ᩠ᨶᩣ ᩈᨦ᩠ᨥᩮ ᨸᩈᨶ᩠ᨶᩣ ᩈᩦᩃᩮᩈᩩ ᨸᩁᩥᨸᩪᩁᨠᩣᩁᩥᨶᩮᩣ, ᨲᩮ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ ᨽᨣᩅᨲᩣ ᩋᨻ᩠ᨿᩣᨠᨲᩣ. ᨲᩮᩈᨾ᩠ᨸᩥᩔ ᩈᩣᨵᩩ ᩅᩮᨿ᩠ᨿᩣᨠᩁᨱᩴ, ᨻᩉᩩᨩᨶᩮᩣ ᨸᩈᩦᨴᩮᨿ᩠ᨿ, ᨲᨲᩮᩣ ᨣᨧ᩠ᨨᩮᨿ᩠ᨿ ᩈᩩᨣᨲᩥᩴ. ᩋᨿᩴ ᨡᩮᩣ ᨸᨶᩣᨸᩥ, ᨽᨶ᩠ᨲᩮ, ᩋᩉᩮᩣᩈᩥ ᩁᩣᨩᩣ ᨾᩣᨣᨵᩮᩣ ᩈᩮᨶᩥᨿᩮᩣ ᨻᩥᨾ᩠ᨻᩥᩈᩣᩁᩮᩣ ᨵᨾ᩠ᨾᩥᨠᩮᩣ ᨵᨾ᩠ᨾᩁᩣᨩᩣ ᩉᩥᨲᩮᩣ ᨻᩕᩣᩉ᩠ᨾᨱᨣᩉᨸᨲᩥᨠᩣᨶᩴ ᨶᩮᨣᨾᩣᨶᨬ᩠ᨧᩮᩅ ᨩᩣᨶᨸᨴᩣᨶᨬ᩠ᨧ. ᩋᨸᩥᩔᩩᨴᩴ ᨾᨶᩩᩔᩣ ᨠᩥᨲ᩠ᨲᨿᨾᩣᨶᩁᩪᨸᩣ ᩅᩥᩉᩁᨶ᩠ᨲᩥ – ‘ᩑᩅᩴ ᨶᩮᩣ ᩈᩮᩣ ᨵᨾ᩠ᨾᩥᨠᩮᩣ ᨵᨾ᩠ᨾᩁᩣᨩᩣ ᩈᩩᨡᩣᨸᩮᨲ᩠ᩅᩣ ᨠᩣᩃᨦ᩠ᨠᨲᩮᩣ. ᩑᩅᩴ ᨾᨿᩴ ᨲᩔ ᨵᨾ᩠ᨾᩥᨠᩔ ᨵᨾ᩠ᨾᩁᨬ᩠ᨬᩮᩣ ᩅᩥᨩᩥᨲᩮ ᨹᩣᩈᩩ ᩅᩥᩉᩁᩥᨾ᩠ᩉᩣ’ᨲᩥ. ᩈᩮᩣ ᨡᩮᩣ ᨸᨶᩣᨸᩥ, ᨽᨶ᩠ᨲᩮ, ᩋᩉᩮᩣᩈᩥ ᨻᩩᨴ᩠ᨵᩮ ᨸᩈᨶ᩠ᨶᩮᩣ ᨵᨾ᩠ᨾᩮ ᨸᩈᨶ᩠ᨶᩮᩣ ᩈᨦ᩠ᨥᩮ ᨸᩈᨶ᩠ᨶᩮᩣ ᩈᩦᩃᩮᩈᩩ ᨸᩁᩥᨸᩪᩁᨠᩣᩁᩦ. ᩋᨸᩥᩔᩩᨴᩴ ᨾᨶᩩᩔᩣ ᩑᩅᨾᩣᩉᩴᩈᩩ – ‘ᨿᩣᩅ ᨾᩁᨱᨠᩣᩃᩣᨸᩥ ᩁᩣᨩᩣ ᨾᩣᨣᨵᩮᩣ ᩈᩮᨶᩥᨿᩮᩣ ᨻᩥᨾ᩠ᨻᩥᩈᩣᩁᩮᩣ ᨽᨣᩅᨶ᩠ᨲᩴ ᨠᩥᨲ᩠ᨲᨿᨾᩣᨶᩁᩪᨸᩮᩣ ᨠᩣᩃᨦ᩠ᨠᨲᩮᩣ’ᨲᩥ. ᩈᩮᩣ ᩋᨻ᩠ᨽᨲᩦᨲᩮᩣ ᨠᩣᩃᨦ᩠ᨠᨲᩮᩣ ᨽᨣᩅᨲᩣ ᩋᨻ᩠ᨿᩣᨠᨲᩮᩣ; ᨲᩔᨸᩥᩔ ᩈᩣᨵᩩ ᩅᩮᨿ᩠ᨿᩣᨠᩁᨱᩴ, ᨻᩉᩩᨩᨶᩮᩣ ᨸᩈᩦᨴᩮᨿ᩠ᨿ, ᨲᨲᩮᩣ ᨣᨧ᩠ᨨᩮᨿ᩠ᨿ ᩈᩩᨣᨲᩥᩴ. ᨽᨣᩅᨲᩮᩣ ᨡᩮᩣ ᨸᨶ, ᨽᨶ᩠ᨲᩮ, ᩈᨾ᩠ᨻᩮᩣᨵᩥ ᨾᨣᨵᩮᩈᩩ. ᨿᨲ᩠ᨳ ᨡᩮᩣ ᨸᨶ, ᨽᨶ᩠ᨲᩮ, ᨽᨣᩅᨲᩮᩣ ᩈᨾ᩠ᨻᩮᩣᨵᩥ ᨾᨣᨵᩮᩈᩩ, ᨠᨳᩴ ᨲᨲᩕ ᨽᨣᩅᩣ ᨾᩣᨣᨵᨠᩮ ᨸᩁᩥᨧᩣᩁᨠᩮ ᩋᨻ᩠ᨽᨲᩦᨲᩮ ᨠᩣᩃᨦ᩠ᨠᨲᩮ ᩏᨸᨸᨲ᩠ᨲᩦᩈᩩ ᨶ ᨻ᩠ᨿᩣᨠᩁᩮᨿ᩠ᨿ? ᨽᨣᩅᩣ ᨧᩮ ᨡᩮᩣ ᨸᨶ, ᨽᨶ᩠ᨲᩮ, ᨾᩣᨣᨵᨠᩮ ᨸᩁᩥᨧᩣᩁᨠᩮ ᩋᨻ᩠ᨽᨲᩦᨲᩮ ᨠᩣᩃᨦ᩠ᨠᨲᩮ ᩏᨸᨸᨲ᩠ᨲᩦᩈᩩ ᨶ ᨻ᩠ᨿᩣᨠᩁᩮᨿ᩠ᨿ ᨴᩦᨶᨾᨶᩣ ᨲᩮᨶᩔᩩ ᨾᩣᨣᨵᨠᩣ ᨸᩁᩥᨧᩣᩁᨠᩣ; ᨿᩮᨶ ᨡᩮᩣ ᨸᨶᩔᩩ ᨴᩦᨶᨾᨶᩣ ᨾᩣᨣᨵᨠᩣ ᨸᩁᩥᨧᩣᩁᨠᩣ ᨠᨳᩴ ᨲᩮ ᨽᨣᩅᩣ ᨶ ᨻ᩠ᨿᩣᨠᩁᩮᨿ᩠ᨿᩣ’’ᨲᩥ. ᩍᨴᨾᩣᨿᩈ᩠ᨾᩣ ᩌᨶᨶ᩠ᨴᩮᩣ ᨾᩣᨣᨵᨠᩮ ᨸᩁᩥᨧᩣᩁᨠᩮ ᩌᩁᨻ᩠ᨽ ᨽᨣᩅᨲᩮᩣ ᩈᨾ᩠ᨾᩩᨡᩣ ᨸᩁᩥᨠᨳᩴ ᨠᨲ᩠ᩅᩣ ᩏᨭ᩠ᨮᩣᨿᩣᩈᨶᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨸᨠ᩠ᨠᩣᨾᩥ.

᪒᪗᪘. ᩋᨳ ᨡᩮᩣ ᨽᨣᩅᩣ ᩋᨧᩥᩁᨸᨠ᩠ᨠᨶ᩠ᨲᩮ ᩌᨿᩈ᩠ᨾᨶ᩠ᨲᩮ ᩌᨶᨶ᩠ᨴᩮ ᨸᩩᨻ᩠ᨻᨱ᩠ᩉᩈᨾᨿᩴ ᨶᩥᩅᩣᩈᩮᨲ᩠ᩅᩣ ᨸᨲ᩠ᨲᨧᩦᩅᩁᨾᩣᨴᩣᨿ ᨶᩣᨲᩥᨠᩴ ᨸᩥᨱ᩠ᨯᩣᨿ ᨸᩣᩅᩥᩈᩥ. ᨶᩣᨲᩥᨠᩮ ᨸᩥᨱ᩠ᨯᩣᨿ ᨧᩁᩥᨲ᩠ᩅᩣ ᨸᨧ᩠ᨨᩣᨽᨲ᩠ᨲᩴ ᨸᩥᨱ᩠ᨯᨸᩣᨲᨸᨭᩥᨠ᩠ᨠᨶ᩠ᨲᩮᩣ ᨸᩣᨴᩮ ᨸᨠ᩠ᨡᩣᩃᩮᨲ᩠ᩅᩣ ᨣᩥᨬ᩠ᨩᨠᩣᩅᩈᨳᩴ ᨸᩅᩥᩈᩥᨲ᩠ᩅᩣ ᨾᩣᨣᨵᨠᩮ ᨸᩁᩥᨧᩣᩁᨠᩮ ᩌᩁᨻ᩠ᨽ ᩋᨭ᩠ᨮᩥᩴ ᨠᨲ᩠ᩅᩣ [ᩋᨭ᩠ᨮᩥᨠᨲ᩠ᩅᩣ (ᩈᩦ. ᩈ᩠ᨿᩣ. ᨸᩦ.)] ᨾᨶᩈᩥᨠᨲ᩠ᩅᩣ ᩈᨻ᩠ᨻᩴ ᨧᩮᨲᩈᩣ [ᩈᨻ᩠ᨻᨧᩮᨲᩈᩣ (ᨸᩦ.)] ᩈᨾᨶ᩠ᨶᩣᩉᩁᩥᨲ᩠ᩅᩣ ᨸᨬ᩠ᨬᨲ᩠ᨲᩮ ᩌᩈᨶᩮ ᨶᩥᩈᩦᨴᩥ – ‘‘ᨣᨲᩥᩴ ᨶᩮᩈᩴ ᨩᩣᨶᩥᩔᩣᨾᩥ ᩋᨽᩥᩈᨾ᩠ᨸᩁᩣᨿᩴ, ᨿᩴᨣᨲᩥᨠᩣ ᨲᩮ ᨽᩅᨶ᩠ᨲᩮᩣ ᨿᩴᩋᨽᩥᩈᨾ᩠ᨸᩁᩣᨿᩣ’’ᨲᩥ. ᩋᨴ᩠ᨴᩈᩣ ᨡᩮᩣ ᨽᨣᩅᩣ ᨾᩣᨣᨵᨠᩮ ᨸᩁᩥᨧᩣᩁᨠᩮ ‘‘ᨿᩴᨣᨲᩥᨠᩣ ᨲᩮ ᨽᩅᨶ᩠ᨲᩮᩣ ᨿᩴᩋᨽᩥᩈᨾ᩠ᨸᩁᩣᨿᩣ’’ᨲᩥ. ᩋᨳ ᨡᩮᩣ ᨽᨣᩅᩣ ᩈᩣᨿᨶ᩠ᩉᩈᨾᨿᩴ ᨸᨭᩥᩈᩃ᩠ᩃᩣᨶᩣ ᩅᩩᨭ᩠ᨮᩥᨲᩮᩣ ᨣᩥᨬ᩠ᨩᨠᩣᩅᩈᨳᩣ ᨶᩥᨠ᩠ᨡᨾᩥᨲ᩠ᩅᩣ ᩅᩥᩉᩣᩁᨸᨧ᩠ᨨᩣᨿᩣᨿᩴ ᨸᨬ᩠ᨬᨲ᩠ᨲᩮ ᩌᩈᨶᩮ ᨶᩥᩈᩦᨴᩥ.

᪒᪗᪙. ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩏᨸᩈᨶ᩠ᨲᨸᨴᩥᩔᩮᩣ [ᩏᨸᩈᨶ᩠ᨲᨸᨲᩥᩈᩮᩣ (ᨠ.)] ᨽᨶ᩠ᨲᩮ ᨽᨣᩅᩣ ᨽᩣᨲᩥᩁᩥᩅ ᨽᨣᩅᨲᩮᩣ ᨾᩩᨡᩅᨱ᩠ᨱᩮᩣ ᩅᩥᨸ᩠ᨸᩈᨶ᩠ᨶᨲ᩠ᨲᩣ ᩍᨶ᩠ᨴᩕᩥᨿᩣᨶᩴ. ᩈᨶ᩠ᨲᩮᨶ ᨶᩪᨶᨩ᩠ᨩ ᨽᨶ᩠ᨲᩮ ᨽᨣᩅᩣ ᩅᩥᩉᩣᩁᩮᨶ ᩅᩥᩉᩣᩈᩦ’’ᨲᩥ? ‘‘ᨿᨴᩮᩅ ᨡᩮᩣ ᨾᩮ ᨲ᩠ᩅᩴ, ᩌᨶᨶ᩠ᨴ, ᨾᩣᨣᨵᨠᩮ ᨸᩁᩥᨧᩣᩁᨠᩮ ᩌᩁᨻ᩠ᨽ ᩈᨾ᩠ᨾᩩᨡᩣ ᨸᩁᩥᨠᨳᩴ ᨠᨲ᩠ᩅᩣ ᩏᨭ᩠ᨮᩣᨿᩣᩈᨶᩣ ᨸᨠ᩠ᨠᨶ᩠ᨲᩮᩣ, ᨲᨴᩮᩅᩣᩉᩴ ᨶᩣᨲᩥᨠᩮ ᨸᩥᨱ᩠ᨯᩣᨿ ᨧᩁᩥᨲ᩠ᩅᩣ ᨸᨧ᩠ᨨᩣᨽᨲ᩠ᨲᩴ ᨸᩥᨱ᩠ᨯᨸᩣᨲᨸᨭᩥᨠ᩠ᨠᨶ᩠ᨲᩮᩣ ᨸᩣᨴᩮ ᨸᨠ᩠ᨡᩣᩃᩮᨲ᩠ᩅᩣ ᨣᩥᨬ᩠ᨩᨠᩣᩅᩈᨳᩴ ᨸᩅᩥᩈᩥᨲ᩠ᩅᩣ ᨾᩣᨣᨵᨠᩮ ᨸᩁᩥᨧᩣᩁᨠᩮ ᩌᩁᨻ᩠ᨽ ᩋᨭ᩠ᨮᩥᩴ ᨠᨲ᩠ᩅᩣ ᨾᨶᩈᩥᨠᨲ᩠ᩅᩣ ᩈᨻ᩠ᨻᩴ ᨧᩮᨲᩈᩣ ᩈᨾᨶ᩠ᨶᩣᩉᩁᩥᨲ᩠ᩅᩣ ᨸᨬ᩠ᨬᨲ᩠ᨲᩮ ᩌᩈᨶᩮ ᨶᩥᩈᩦᨴᩥᩴ – ‘ᨣᨲᩥᩴ ᨶᩮᩈᩴ ᨩᩣᨶᩥᩔᩣᨾᩥ ᩋᨽᩥᩈᨾ᩠ᨸᩁᩣᨿᩴ, ᨿᩴᨣᨲᩥᨠᩣ ᨲᩮ ᨽᩅᨶ᩠ᨲᩮᩣ ᨿᩴᩋᨽᩥᩈᨾ᩠ᨸᩁᩣᨿᩣ’ᨲᩥ. ᩋᨴ᩠ᨴᩈᩴ ᨡᩮᩣ ᩋᩉᩴ, ᩌᨶᨶ᩠ᨴ, ᨾᩣᨣᨵᨠᩮ ᨸᩁᩥᨧᩣᩁᨠᩮ ‘ᨿᩴᨣᨲᩥᨠᩣ ᨲᩮ ᨽᩅᨶ᩠ᨲᩮᩣ ᨿᩴᩋᨽᩥᩈᨾ᩠ᨸᩁᩣᨿᩣ’’’ᨲᩥ.

ᨩᨶᩅᩈᨽᨿᨠ᩠ᨡᩮᩣ

᪒᪘᪐. ‘‘ᩋᨳ ᨡᩮᩣ, ᩌᨶᨶ᩠ᨴ, ᩋᨶ᩠ᨲᩁᩉᩥᨲᩮᩣ ᨿᨠ᩠ᨡᩮᩣ ᩈᨴ᩠ᨴᨾᨶᩩᩔᩣᩅᩮᩈᩥ – ‘ᨩᨶᩅᩈᨽᩮᩣ ᩋᩉᩴ ᨽᨣᩅᩣ; ᨩᨶᩅᩈᨽᩮᩣ ᩋᩉᩴ ᩈᩩᨣᨲᩣ’ᨲᩥ. ᩋᨽᩥᨩᩣᨶᩣᩈᩥ ᨶᩮᩣ ᨲ᩠ᩅᩴ, ᩌᨶᨶ᩠ᨴ, ᩍᨲᩮᩣ ᨸᩩᨻ᩠ᨻᩮ ᩑᩅᩁᩪᨸᩴ ᨶᩣᨾᨵᩮᨿ᩠ᨿᩴ ᩈᩩᨲᩴ [ᩈᩩᨲ᩠ᩅᩣ (ᨸᩦ.)] ᨿᨴᩥᨴᩴ ᨩᨶᩅᩈᨽᩮᩣ’’ᨲᩥ?

‘‘ᨶ ᨡᩮᩣ ᩋᩉᩴ, ᨽᨶ᩠ᨲᩮ, ᩋᨽᩥᨩᩣᨶᩣᨾᩥ ᩍᨲᩮᩣ ᨸᩩᨻ᩠ᨻᩮ ᩑᩅᩁᩪᨸᩴ ᨶᩣᨾᨵᩮᨿ᩠ᨿᩴ ᩈᩩᨲᩴ ᨿᨴᩥᨴᩴ ᨩᨶᩅᩈᨽᩮᩣᨲᩥ, ᩋᨸᩥ ᨧ ᨾᩮ, ᨽᨶ᩠ᨲᩮ, ᩃᩮᩣᨾᩣᨶᩥ ᩉᨭ᩠ᨮᩣᨶᩥ ‘ᨩᨶᩅᩈᨽᩮᩣ’ᨲᩥ ᨶᩣᨾᨵᩮᨿ᩠ᨿᩴ ᩈᩩᨲ᩠ᩅᩣ. ᨲᩔ ᨾᨿ᩠ᩉᩴ, ᨽᨶ᩠ᨲᩮ, ᩑᨲᨴᩉᩮᩣᩈᩥ – ‘ᨶ ᩉᩥ ᨶᩪᨶ ᩈᩮᩣ ᩒᩁᨠᩮᩣ ᨿᨠ᩠ᨡᩮᩣ ᨽᩅᩥᩔᨲᩥ ᨿᨴᩥᨴᩴ ᩑᩅᩁᩪᨸᩴ ᨶᩣᨾᨵᩮᨿ᩠ᨿᩴ ᩈᩩᨸᨬ᩠ᨬᨲ᩠ᨲᩴ ᨿᨴᩥᨴᩴ ᨩᨶᩅᩈᨽᩮᩣ’’ᨲᩥ. ‘‘ᩋᨶᨶ᩠ᨲᩁᩣ ᨡᩮᩣ, ᩌᨶᨶ᩠ᨴ, ᩈᨴ᩠ᨴᨸᩣᨲᩩᨽᩣᩅᩣ ᩏᩊᩣᩁᩅᨱ᩠ᨱᩮᩣ ᨾᩮ ᨿᨠ᩠ᨡᩮᩣ ᩈᨾ᩠ᨾᩩᨡᩮ ᨸᩣᨲᩩᩁᩉᩮᩣᩈᩥ. ᨴᩩᨲᩥᨿᨾ᩠ᨸᩥ ᩈᨴ᩠ᨴᨾᨶᩩᩔᩣᩅᩮᩈᩥ – ‘ᨻᩥᨾ᩠ᨻᩥᩈᩣᩁᩮᩣ ᩋᩉᩴ ᨽᨣᩅᩣ; ᨻᩥᨾ᩠ᨻᩥᩈᩣᩁᩮᩣ ᩋᩉᩴ ᩈᩩᨣᨲᩣᨲᩥ. ᩍᨴᩴ ᩈᨲ᩠ᨲᨾᩴ ᨡᩮᩣ ᩋᩉᩴ, ᨽᨶ᩠ᨲᩮ, ᩅᩮᩔᩅᨱᩔ ᨾᩉᩣᩁᩣᨩᩔ ᩈᩉᨻ᩠ᨿᨲᩴ ᩏᨸᨸᨩ᩠ᨩᩣᨾᩥ, ᩈᩮᩣ ᨲᨲᩮᩣ ᨧᩩᨲᩮᩣ ᨾᨶᩩᩔᩁᩣᨩᩣ ᨽᩅᩥᨲᩩᩴ ᨸᩉᩮᩣᨾᩥ [ᩈᩮᩣ ᨲᨲᩮᩣ ᨧᩩᨲᩮᩣ ᨾᨶᩩᩔᩁᩣᨩᩣ, ᩋᨾᨶᩩᩔᩁᩣᨩᩣ ᨴᩥᩅᩥ ᩉᩮᩣᨾᩥ (ᩈᩦ. ᨸᩦ.)].

ᩍᨲᩮᩣ ᩈᨲ᩠ᨲ ᨲᨲᩮᩣ ᩈᨲ᩠ᨲ, ᩈᩴᩈᩣᩁᩣᨶᩥ ᨧᨲᩩᨴ᩠ᨴᩈ;

ᨶᩥᩅᩣᩈᨾᨽᩥᨩᩣᨶᩣᨾᩥ, ᨿᨲ᩠ᨳ ᨾᩮ ᩅᩩᩈᩥᨲᩴ ᨸᩩᩁᩮ.

᪒᪘᪑. ‘ᨴᩦᨥᩁᨲ᩠ᨲᩴ ᨡᩮᩣ ᩋᩉᩴ, ᨽᨶ᩠ᨲᩮ, ᩋᩅᩥᨶᩥᨸᩣᨲᩮᩣ ᩋᩅᩥᨶᩥᨸᩣᨲᩴ ᩈᨬ᩠ᨩᩣᨶᩣᨾᩥ, ᩌᩈᩣ ᨧ ᨸᨶ ᨾᩮ ᩈᨶ᩠ᨲᩥᨭ᩠ᨮᨲᩥ ᩈᨠᨴᩣᨣᩣᨾᩥᨲᩣᨿᩣ’ᨲᩥ. ‘ᩋᨧ᩠ᨨᩁᩥᨿᨾᩥᨴᩴ ᩌᨿᩈ᩠ᨾᨲᩮᩣ ᨩᨶᩅᩈᨽᩔ ᨿᨠ᩠ᨡᩔ, ᩋᨻ᩠ᨽᩩᨲᨾᩥᨴᩴ ᩌᨿᩈ᩠ᨾᨲᩮᩣ ᨩᨶᩅᩈᨽᩔ ᨿᨠ᩠ᨡᩔ. ‘‘ᨴᩦᨥᩁᨲ᩠ᨲᩴ ᨡᩮᩣ ᩋᩉᩴ, ᨽᨶ᩠ᨲᩮ, ᩋᩅᩥᨶᩥᨸᩣᨲᩮᩣ ᩋᩅᩥᨶᩥᨸᩣᨲᩴ ᩈᨬ᩠ᨩᩣᨶᩣᨾᩦ’’ᨲᩥ ᨧ ᩅᨴᩮᩈᩥ, ‘‘ᩌᩈᩣ ᨧ ᨸᨶ ᨾᩮ ᩈᨶ᩠ᨲᩥᨭ᩠ᨮᨲᩥ ᩈᨠᨴᩣᨣᩣᨾᩥᨲᩣᨿᩣ’’ᨲᩥ ᨧ ᩅᨴᩮᩈᩥ, ᨠᩩᨲᩮᩣᨶᩥᨴᩣᨶᩴ ᨸᨶᩣᨿᩈ᩠ᨾᩣ ᨩᨶᩅᩈᨽᩮᩣ ᨿᨠ᩠ᨡᩮᩣ ᩑᩅᩁᩪᨸᩴ ᩏᩊᩣᩁᩴ ᩅᩥᩈᩮᩈᩣᨵᩥᨣᨾᩴ ᩈᨬ᩠ᨩᩣᨶᩣᨲᩦᨲᩥ? ᨶ ᩋᨬ᩠ᨬᨲᩕ, ᨽᨣᩅᩣ, ᨲᩅ ᩈᩣᩈᨶᩣ, ᨶ ᩋᨬ᩠ᨬᨲᩕ [ᩋᨬ᩠ᨬᨲ᩠ᨳ (ᩈᩦ. ᨸᩦ.)], ᩈᩩᨣᨲ, ᨲᩅ ᩈᩣᩈᨶᩣ; ᨿᨴᨣ᩠ᨣᩮ ᩋᩉᩴ, ᨽᨶ᩠ᨲᩮ, ᨽᨣᩅᨲᩥ ᩑᨠᨶ᩠ᨲᩥᨠᨲᩮᩣ [ᩑᨠᨶ᩠ᨲᨲᩮᩣ (ᩈ᩠ᨿᩣ.), ᩑᨠᨶ᩠ᨲᨣᨲᩮᩣ (ᨸᩦ.)] ᩋᨽᩥᨸ᩠ᨸᩈᨶ᩠ᨶᩮᩣ, ᨲᨴᨣ᩠ᨣᩮ ᩋᩉᩴ, ᨽᨶ᩠ᨲᩮ, ᨴᩦᨥᩁᨲ᩠ᨲᩴ ᩋᩅᩥᨶᩥᨸᩣᨲᩮᩣ ᩋᩅᩥᨶᩥᨸᩣᨲᩴ ᩈᨬ᩠ᨩᩣᨶᩣᨾᩥ, ᩌᩈᩣ ᨧ ᨸᨶ ᨾᩮ ᩈᨶ᩠ᨲᩥᨭ᩠ᨮᨲᩥ ᩈᨠᨴᩣᨣᩣᨾᩥᨲᩣᨿ. ᩍᨵᩣᩉᩴ, ᨽᨶ᩠ᨲᩮ, ᩅᩮᩔᩅᨱᩮᨶ ᨾᩉᩣᩁᩣᨩᩮᨶ ᨸᩮᩈᩥᨲᩮᩣ ᩅᩥᩁᩪᩊ᩠ᩉᨠᩔ ᨾᩉᩣᩁᩣᨩᩔ ᩈᨶ᩠ᨲᩥᨠᩮ ᨠᩮᨶᨧᩥᨴᩮᩅ ᨠᩁᨱᩦᨿᩮᨶ ᩋᨴ᩠ᨴᩈᩴ ᨽᨣᩅᨶ᩠ᨲᩴ ᩋᨶ᩠ᨲᩁᩣᨾᨣ᩠ᨣᩮ ᨣᩥᨬ᩠ᨩᨠᩣᩅᩈᨳᩴ ᨸᩅᩥᩈᩥᨲ᩠ᩅᩣ ᨾᩣᨣᨵᨠᩮ ᨸᩁᩥᨧᩣᩁᨠᩮ ᩌᩁᨻ᩠ᨽ ᩋᨭ᩠ᨮᩥᩴ ᨠᨲ᩠ᩅᩣ ᨾᨶᩈᩥᨠᨲ᩠ᩅᩣ ᩈᨻ᩠ᨻᩴ ᨧᩮᨲᩈᩣ ᩈᨾᨶ᩠ᨶᩣᩉᩁᩥᨲ᩠ᩅᩣ ᨶᩥᩈᩥᨶ᩠ᨶᩴ – ‘‘ᨣᨲᩥᩴ ᨶᩮᩈᩴ ᨩᩣᨶᩥᩔᩣᨾᩥ ᩋᨽᩥᩈᨾ᩠ᨸᩁᩣᨿᩴ, ᨿᩴᨣᨲᩥᨠᩣ ᨲᩮ ᨽᩅᨶ᩠ᨲᩮᩣ ᨿᩴᩋᨽᩥᩈᨾ᩠ᨸᩁᩣᨿᩣ’’ᨲᩥ. ᩋᨶᨧ᩠ᨨᩁᩥᨿᩴ ᨡᩮᩣ ᨸᨶᩮᨲᩴ, ᨽᨶ᩠ᨲᩮ, ᨿᩴ ᩅᩮᩔᩅᨱᩔ ᨾᩉᩣᩁᩣᨩᩔ ᨲᩔᩴ ᨸᩁᩥᩈᩣᨿᩴ ᨽᩣᩈᨲᩮᩣ ᩈᨾ᩠ᨾᩩᨡᩣ ᩈᩩᨲᩴ ᩈᨾ᩠ᨾᩩᨡᩣ ᨸᨭᩥᨣ᩠ᨣᩉᩥᨲᩴ – ‘‘ᨿᩴᨣᨲᩥᨠᩣ ᨲᩮ ᨽᩅᨶ᩠ᨲᩮᩣ ᨿᩴᩋᨽᩥᩈᨾ᩠ᨸᩁᩣᨿᩣ’’ᨲᩥ. ᨲᩔ ᨾᨿ᩠ᩉᩴ, ᨽᨶ᩠ᨲᩮ, ᩑᨲᨴᩉᩮᩣᩈᩥ – ᨽᨣᩅᨶ᩠ᨲᨬ᩠ᨧ ᨴᨠ᩠ᨡᩣᨾᩥ, ᩍᨴᨬ᩠ᨧ ᨽᨣᩅᨲᩮᩣ ᩌᩁᩮᩣᨧᩮᩔᩣᨾᩦᨲᩥ. ᩍᨾᩮ ᨡᩮᩣ ᨾᩮ, ᨽᨶ᩠ᨲᩮ, ᨴ᩠ᩅᩮᨸᨧ᩠ᨧᨿᩣ ᨽᨣᩅᨶ᩠ᨲᩴ ᨴᩔᨶᩣᨿ ᩏᨸᩈᨦ᩠ᨠᨾᩥᨲᩩᩴ’.

ᨴᩮᩅᩈᨽᩣ

᪒᪘᪒. ‘ᨸᩩᩁᩥᨾᩣᨶᩥ, ᨽᨶ᩠ᨲᩮ, ᨴᩥᩅᩈᩣᨶᩥ ᨸᩩᩁᩥᨾᨲᩁᩣᨶᩥ ᨲᨴᩉᩩᨸᩮᩣᩈᨳᩮ ᨸᨶ᩠ᨶᩁᩈᩮ ᩅᩔᩪᨸᨶᩣᨿᩥᨠᩣᨿ ᨸᩩᨱ᩠ᨱᩣᨿ ᨸᩩᨱ᩠ᨱᨾᩣᨿ ᩁᨲ᩠ᨲᩥᨿᩣ ᨠᩮᩅᩃᨠᨸ᩠ᨸᩣ ᨧ ᨴᩮᩅᩣ ᨲᩣᩅᨲᩥᩴᩈᩣ ᩈᩩᨵᨾ᩠ᨾᩣᨿᩴ ᩈᨽᩣᨿᩴ ᩈᨶ᩠ᨶᩥᩈᩥᨶ᩠ᨶᩣ ᩉᩮᩣᨶ᩠ᨲᩥ ᩈᨶ᩠ᨶᩥᨸᨲᩥᨲᩣ. ᨾᩉᨲᩦ ᨧ ᨴᩥᨻ᩠ᨻᨸᩁᩥᩈᩣ [ᨴᩥᨻ᩠ᨻᩣ ᨸᩁᩥᩈᩣ (ᩈᩦ. ᨸᩦ.)] ᩈᨾᨶ᩠ᨲᨲᩮᩣ ᨶᩥᩈᩥᨶ᩠ᨶᩣ ᩉᩮᩣᨶ᩠ᨲᩥ [ᨶᩥᩈᩥᨶ᩠ᨶᩣ ᩉᩮᩣᨲᩥ (ᩈᩦ.), ᩈᨶ᩠ᨶᩥᩈᩥᨶ᩠ᨶᩣ ᩉᩮᩣᨶ᩠ᨲᩥ ᩈᨶ᩠ᨶᩥᨸᨲᩥᨲᩣ (ᨠ.)], ᨧᨲ᩠ᨲᩣᩁᩮᩣ ᨧ ᨾᩉᩣᩁᩣᨩᩣᨶᩮᩣ ᨧᨲᩩᨴ᩠ᨴᩥᩈᩣ ᨶᩥᩈᩥᨶ᩠ᨶᩣ ᩉᩮᩣᨶ᩠ᨲᩥ. ᨸᩩᩁᨲ᩠ᨳᩥᨾᩣᨿ ᨴᩥᩈᩣᨿ ᨵᨲᩁᨭ᩠ᨮᩮᩣ ᨾᩉᩣᩁᩣᨩᩣ ᨸᨧ᩠ᨨᩥᨾᩣᨽᩥᨾᩩᨡᩮᩣ [ᨸᨧ᩠ᨨᩣᨽᩥᨾᩩᨡᩮᩣ (ᨠ.)] ᨶᩥᩈᩥᨶ᩠ᨶᩮᩣ ᩉᩮᩣᨲᩥ ᨴᩮᩅᩮ ᨸᩩᩁᨠ᩠ᨡᨲ᩠ᩅᩣ; ᨴᨠ᩠ᨡᩥᨱᩣᨿ ᨴᩥᩈᩣᨿ ᩅᩥᩁᩪᩊ᩠ᩉᨠᩮᩣ ᨾᩉᩣᩁᩣᨩᩣ ᩏᨲ᩠ᨲᩁᩣᨽᩥᨾᩩᨡᩮᩣ ᨶᩥᩈᩥᨶ᩠ᨶᩮᩣ ᩉᩮᩣᨲᩥ ᨴᩮᩅᩮ ᨸᩩᩁᨠ᩠ᨡᨲ᩠ᩅᩣ; ᨸᨧ᩠ᨨᩥᨾᩣᨿ ᨴᩥᩈᩣᨿ ᩅᩥᩁᩪᨸᨠ᩠ᨡᩮᩣ ᨾᩉᩣᩁᩣᨩᩣ ᨸᩩᩁᨲ᩠ᨳᩣᨽᩥᨾᩩᨡᩮᩣ ᨶᩥᩈᩥᨶ᩠ᨶᩮᩣ ᩉᩮᩣᨲᩥ ᨴᩮᩅᩮ ᨸᩩᩁᨠ᩠ᨡᨲ᩠ᩅᩣ; ᩏᨲ᩠ᨲᩁᩣᨿ ᨴᩥᩈᩣᨿ ᩅᩮᩔᩅᨱᩮᩣ ᨾᩉᩣᩁᩣᨩᩣ ᨴᨠ᩠ᨡᩥᨱᩣᨽᩥᨾᩩᨡᩮᩣ ᨶᩥᩈᩥᨶ᩠ᨶᩮᩣ ᩉᩮᩣᨲᩥ ᨴᩮᩅᩮ ᨸᩩᩁᨠ᩠ᨡᨲ᩠ᩅᩣ. ᨿᨴᩣ, ᨽᨶ᩠ᨲᩮ, ᨠᩮᩅᩃᨠᨸ᩠ᨸᩣ ᨧ ᨴᩮᩅᩣ ᨲᩣᩅᨲᩥᩴᩈᩣ ᩈᩩᨵᨾ᩠ᨾᩣᨿᩴ ᩈᨽᩣᨿᩴ ᩈᨶ᩠ᨶᩥᩈᩥᨶ᩠ᨶᩣ ᩉᩮᩣᨶ᩠ᨲᩥ ᩈᨶ᩠ᨶᩥᨸᨲᩥᨲᩣ, ᨾᩉᨲᩦ ᨧ ᨴᩥᨻ᩠ᨻᨸᩁᩥᩈᩣ ᩈᨾᨶ᩠ᨲᨲᩮᩣ ᨶᩥᩈᩥᨶ᩠ᨶᩣ ᩉᩮᩣᨶ᩠ᨲᩥ, ᨧᨲ᩠ᨲᩣᩁᩮᩣ ᨧ ᨾᩉᩣᩁᩣᨩᩣᨶᩮᩣ ᨧᨲᩩᨴ᩠ᨴᩥᩈᩣ ᨶᩥᩈᩥᨶ᩠ᨶᩣ ᩉᩮᩣᨶ᩠ᨲᩥ. ᩍᨴᩴ ᨶᩮᩈᩴ ᩉᩮᩣᨲᩥ ᩌᩈᨶᩈ᩠ᨾᩥᩴ; ᩋᨳ ᨸᨧ᩠ᨨᩣ ᩋᨾ᩠ᩉᩣᨠᩴ ᩌᩈᨶᩴ ᩉᩮᩣᨲᩥ. ᨿᩮ ᨲᩮ, ᨽᨶ᩠ᨲᩮ, ᨴᩮᩅᩣ ᨽᨣᩅᨲᩥ ᨻᩕᩉ᩠ᨾᨧᩁᩥᨿᩴ ᨧᩁᩥᨲ᩠ᩅᩣ ᩋᨵᩩᨶᩪᨸᨸᨶ᩠ᨶᩣ ᨲᩣᩅᨲᩥᩴᩈᨠᩣᨿᩴ, ᨲᩮ ᩋᨬ᩠ᨬᩮ ᨴᩮᩅᩮ ᩋᨲᩥᩁᩮᩣᨧᨶ᩠ᨲᩥ ᩅᨱ᩠ᨱᩮᨶ ᨧᩮᩅ ᨿᩈᩈᩣ ᨧ. ᨲᩮᨶ ᩈᩩᨴᩴ, ᨽᨶ᩠ᨲᩮ, ᨴᩮᩅᩣ ᨲᩣᩅᨲᩥᩴᩈᩣ ᩋᨲ᩠ᨲᨾᨶᩣ ᩉᩮᩣᨶ᩠ᨲᩥ ᨸᨾᩩᨴᩥᨲᩣ ᨸᩦᨲᩥᩈᩮᩣᨾᨶᩔᨩᩣᨲᩣ ‘‘ᨴᩥᨻ᩠ᨻᩣ ᩅᨲ ᨽᩮᩣ ᨠᩣᨿᩣ ᨸᩁᩥᨸᩪᩁᩮᨶ᩠ᨲᩥ, ᩉᩣᨿᨶ᩠ᨲᩥ ᩋᩈᩩᩁᨠᩣᨿᩣ’’ᨲᩥ. ᩋᨳ ᨡᩮᩣ, ᨽᨶ᩠ᨲᩮ, ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᨾ᩠ᨸᩈᩣᨴᩴ ᩅᩥᨴᩥᨲ᩠ᩅᩣ ᩍᨾᩣᩉᩥ ᨣᩣᨳᩣᩉᩥ ᩋᨶᩩᨾᩮᩣᨴᩥ –

‘‘ᨾᩮᩣᨴᨶ᩠ᨲᩥ ᩅᨲ ᨽᩮᩣ ᨴᩮᩅᩣ, ᨲᩣᩅᨲᩥᩴᩈᩣ ᩈᩉᩥᨶ᩠ᨴᨠᩣ [ᩈᩍᨶ᩠ᨴᨠᩣ (ᩈᩦ.)];

ᨲᨳᩣᨣᨲᩴ ᨶᨾᩔᨶ᩠ᨲᩣ, ᨵᨾ᩠ᨾᩔ ᨧ ᩈᩩᨵᨾ᩠ᨾᨲᩴ.

ᨶᩅᩮ ᨴᩮᩅᩮ ᨧ ᨸᩔᨶ᩠ᨲᩣ, ᩅᨱ᩠ᨱᩅᨶ᩠ᨲᩮ ᨿᩈᩔᩥᨶᩮ [ᨿᩈᩔᩥᨶᩮᩣ (ᩈ᩠ᨿᩣ.)];

ᩈᩩᨣᨲᩈ᩠ᨾᩥᩴ ᨻᩕᩉ᩠ᨾᨧᩁᩥᨿᩴ, ᨧᩁᩥᨲ᩠ᩅᩣᨶ ᩍᨵᩣᨣᨲᩮ.

ᨲᩮ ᩋᨬ᩠ᨬᩮ ᩋᨲᩥᩁᩮᩣᨧᨶ᩠ᨲᩥ, ᩅᨱ᩠ᨱᩮᨶ ᨿᩈᩈᩣᨿᩩᨶᩣ;

ᩈᩣᩅᨠᩣ ᨽᩪᩁᩥᨸᨬ᩠ᨬᩔ, ᩅᩥᩈᩮᩈᩪᨸᨣᨲᩣ ᩍᨵ.

ᩍᨴᩴ ᨴᩥᩈ᩠ᩅᩣᨶ ᨶᨶ᩠ᨴᨶ᩠ᨲᩥ, ᨲᩣᩅᨲᩥᩴᩈᩣ ᩈᩉᩥᨶ᩠ᨴᨠᩣ;

ᨲᨳᩣᨣᨲᩴ ᨶᨾᩔᨶ᩠ᨲᩣ, ᨵᨾ᩠ᨾᩔ ᨧ ᩈᩩᨵᨾ᩠ᨾᨲ’’ᨶ᩠ᨲᩥ.

‘ᨲᩮᨶ ᩈᩩᨴᩴ, ᨽᨶ᩠ᨲᩮ, ᨴᩮᩅᩣ ᨲᩣᩅᨲᩥᩴᩈᩣ ᨽᩥᨿ᩠ᨿᩮᩣᩈᩮᩣᨾᨲ᩠ᨲᩣᨿ ᩋᨲ᩠ᨲᨾᨶᩣ ᩉᩮᩣᨶ᩠ᨲᩥ ᨸᨾᩩᨴᩥᨲᩣ ᨸᩦᨲᩥᩈᩮᩣᨾᨶᩔᨩᩣᨲᩣ ‘‘ᨴᩥᨻ᩠ᨻᩣ ᩅᨲ, ᨽᩮᩣ, ᨠᩣᨿᩣ ᨸᩁᩥᨸᩪᩁᩮᨶ᩠ᨲᩥ, ᩉᩣᨿᨶ᩠ᨲᩥ ᩋᩈᩩᩁᨠᩣᨿᩣ’’ᨲᩥ. ᩋᨳ ᨡᩮᩣ, ᨽᨶ᩠ᨲᩮ, ᨿᩮᨶᨲ᩠ᨳᩮᨶ ᨴᩮᩅᩣ ᨲᩣᩅᨲᩥᩴᩈᩣ ᩈᩩᨵᨾ᩠ᨾᩣᨿᩴ ᩈᨽᩣᨿᩴ ᩈᨶ᩠ᨶᩥᩈᩥᨶ᩠ᨶᩣ ᩉᩮᩣᨶ᩠ᨲᩥ ᩈᨶ᩠ᨶᩥᨸᨲᩥᨲᩣ, ᨲᩴ ᩋᨲ᩠ᨳᩴ ᨧᩥᨶ᩠ᨲᨿᩥᨲ᩠ᩅᩣ ᨲᩴ ᩋᨲ᩠ᨳᩴ ᨾᨶ᩠ᨲᨿᩥᨲ᩠ᩅᩣ ᩅᩩᨲ᩠ᨲᩅᨧᨶᩣᨸᩥ ᨲᩴ [ᩅᩩᨲ᩠ᨲᩅᨧᨶᩣ ᨶᩣᨾᩥᨴᩴ (ᨠ.)] ᨧᨲ᩠ᨲᩣᩁᩮᩣ ᨾᩉᩣᩁᩣᨩᩣᨶᩮᩣ ᨲᩈ᩠ᨾᩥᩴ ᩋᨲ᩠ᨳᩮ ᩉᩮᩣᨶ᩠ᨲᩥ. ᨸᨧ᩠ᨧᩣᨶᩩᩈᩥᨭ᩠ᨮᩅᨧᨶᩣᨸᩥ ᨲᩴ [ᨸᨧ᩠ᨧᩣᨶᩩᩈᩥᨭ᩠ᨮᩅᨧᨶᩣ ᨶᩣᨾᩥᨴᩴ (ᨠ.)] ᨧᨲ᩠ᨲᩣᩁᩮᩣ ᨾᩉᩣᩁᩣᨩᩣᨶᩮᩣ ᨲᩈ᩠ᨾᩥᩴ ᩋᨲ᩠ᨳᩮ ᩉᩮᩣᨶ᩠ᨲᩥ, ᩈᨠᩮᩈᩩ ᩈᨠᩮᩈᩩ ᩌᩈᨶᩮᩈᩩ ᨮᩥᨲᩣ ᩋᩅᩥᨸᨠ᩠ᨠᨶ᩠ᨲᩣ [ᩋᨵᩥᨸᨠ᩠ᨠᨶ᩠ᨲᩣ (ᨠ.)].

ᨲᩮ ᩅᩩᨲ᩠ᨲᩅᩣᨠ᩠ᨿᩣ ᩁᩣᨩᩣᨶᩮᩣ, ᨸᨭᩥᨣ᩠ᨣᨿ᩠ᩉᩣᨶᩩᩈᩣᩈᨶᩥᩴ;

ᩅᩥᨸ᩠ᨸᩈᨶ᩠ᨶᨾᨶᩣ ᩈᨶ᩠ᨲᩣ, ᩋᨭ᩠ᨮᩴᩈᩩ ᩈᨾ᩠ᩉᩥ ᩌᩈᨶᩮᨲᩥ.

᪒᪘᪓. ‘ᩋᨳ ᨡᩮᩣ, ᨽᨶ᩠ᨲᩮ, ᩏᨲ᩠ᨲᩁᩣᨿ ᨴᩥᩈᩣᨿ ᩏᩊᩣᩁᩮᩣ ᩌᩃᩮᩣᨠᩮᩣ ᩈᨬ᩠ᨩᩣᨿᩥ, ᩒᨽᩣᩈᩮᩣ ᨸᩣᨲᩩᩁᩉᩮᩣᩈᩥ ᩋᨲᩥᨠ᩠ᨠᨾ᩠ᨾᩮᩅ ᨴᩮᩅᩣᨶᩴ ᨴᩮᩅᩣᨶᩩᨽᩣᩅᩴ. ᩋᨳ ᨡᩮᩣ, ᨽᨶ᩠ᨲᩮ, ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨴᩮᩅᩮ ᨲᩣᩅᨲᩥᩴᩈᩮ ᩌᨾᨶ᩠ᨲᩮᩈᩥ – ‘‘ᨿᨳᩣ ᨡᩮᩣ, ᨾᩣᩁᩥᩈᩣ, ᨶᩥᨾᩥᨲ᩠ᨲᩣᨶᩥ ᨴᩥᩔᨶ᩠ᨲᩥ, ᩏᩊᩣᩁᩮᩣ ᩌᩃᩮᩣᨠᩮᩣ ᩈᨬ᩠ᨩᩣᨿᨲᩥ, ᩒᨽᩣᩈᩮᩣ ᨸᩣᨲᩩᨽᩅᨲᩥ, ᨻᩕᩉ᩠ᨾᩣ ᨸᩣᨲᩩᨽᩅᩥᩔᨲᩥ. ᨻᩕᩉ᩠ᨾᩩᨶᩮᩣ ᩉᩮᨲᩴ ᨸᩩᨻ᩠ᨻᨶᩥᨾᩥᨲ᩠ᨲᩴ ᨸᩣᨲᩩᨽᩣᩅᩣᨿ ᨿᨴᩥᨴᩴ ᩌᩃᩮᩣᨠᩮᩣ ᩈᨬ᩠ᨩᩣᨿᨲᩥ ᩒᨽᩣᩈᩮᩣ ᨸᩣᨲᩩᨽᩅᨲᩦᨲᩥ.

‘‘ᨿᨳᩣ ᨶᩥᨾᩥᨲ᩠ᨲᩣ ᨴᩥᩔᨶ᩠ᨲᩥ, ᨻᩕᩉ᩠ᨾᩣ ᨸᩣᨲᩩᨽᩅᩥᩔᨲᩥ;

ᨻᩕᩉ᩠ᨾᩩᨶᩮᩣ ᩉᩮᨲᩴ ᨶᩥᨾᩥᨲ᩠ᨲᩴ, ᩒᨽᩣᩈᩮᩣ ᩅᩥᨸᩩᩃᩮᩣ ᨾᩉᩣ’’ᨲᩥ.

ᩈᨶᨦ᩠ᨠᩩᨾᩣᩁᨠᨳᩣ

᪒᪘᪔. ‘ᩋᨳ ᨡᩮᩣ, ᨽᨶ᩠ᨲᩮ, ᨴᩮᩅᩣ ᨲᩣᩅᨲᩥᩴᩈᩣ ᨿᨳᩣᩈᨠᩮᩈᩩ ᩌᩈᨶᩮᩈᩩ ᨶᩥᩈᩦᨴᩥᩴᩈᩩ – ‘‘ᩒᨽᩣᩈᨾᩮᨲᩴ ᨬᩔᩣᨾ, ᨿᩴᩅᩥᨸᩣᨠᩮᩣ ᨽᩅᩥᩔᨲᩥ, ᩈᨧ᩠ᨨᩥᨠᨲ᩠ᩅᩣᩅ ᨶᩴ ᨣᨾᩥᩔᩣᨾᩣ’’ᨲᩥ. ᨧᨲ᩠ᨲᩣᩁᩮᩣᨸᩥ ᨾᩉᩣᩁᩣᨩᩣᨶᩮᩣ ᨿᨳᩣᩈᨠᩮᩈᩩ ᩌᩈᨶᩮᩈᩩ ᨶᩥᩈᩦᨴᩥᩴᩈᩩ – ‘‘ᩒᨽᩣᩈᨾᩮᨲᩴ ᨬᩔᩣᨾ ᨿᩴᩅᩥᨸᩣᨠᩮᩣ ᨽᩅᩥᩔᨲᩥ, ᩈᨧ᩠ᨨᩥᨠᨲ᩠ᩅᩣᩅ ᨶᩴ ᨣᨾᩥᩔᩣᨾᩣ’’ᨲᩥ. ᩍᨴᩴ ᩈᩩᨲ᩠ᩅᩣ ᨴᩮᩅᩣ ᨲᩣᩅᨲᩥᩴᩈᩣ ᩑᨠᨣ᩠ᨣᩣ ᩈᨾᩣᨸᨩ᩠ᨩᩥᩴᩈᩩ – ‘‘ᩒᨽᩣᩈᨾᩮᨲᩴ ᨬᩔᩣᨾ, ᨿᩴᩅᩥᨸᩣᨠᩮᩣ ᨽᩅᩥᩔᨲᩥ, ᩈᨧ᩠ᨨᩥᨠᨲ᩠ᩅᩣᩅ ᨶᩴ ᨣᨾᩥᩔᩣᨾᩣ’’ᨲᩥ.

‘ᨿᨴᩣ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨸᩣᨲᩩᨽᩅᨲᩥ, ᩒᩊᩣᩁᩥᨠᩴ ᩋᨲ᩠ᨲᨽᩣᩅᩴ ᩋᨽᩥᨶᩥᨾ᩠ᨾᩥᨶᩥᨲ᩠ᩅᩣ ᨸᩣᨲᩩᨽᩅᨲᩥ. ᨿᩮᩣ ᨡᩮᩣ ᨸᨶ, ᨽᨶ᩠ᨲᩮ, ᨻᩕᩉ᩠ᨾᩩᨶᩮᩣ ᨸᨠᨲᩥᩅᨱ᩠ᨱᩮᩣ ᩋᨶᨽᩥᩈᨾ᩠ᨽᩅᨶᩦᨿᩮᩣ ᩈᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨧᨠ᩠ᨡᩩᨸᨳᩈ᩠ᨾᩥᩴ. ᨿᨴᩣ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨸᩣᨲᩩᨽᩅᨲᩥ, ᩈᩮᩣ ᩋᨬ᩠ᨬᩮ ᨴᩮᩅᩮ ᩋᨲᩥᩁᩮᩣᨧᨲᩥ ᩅᨱ᩠ᨱᩮᨶ ᨧᩮᩅ ᨿᩈᩈᩣ ᨧ. ᩈᩮᨿ᩠ᨿᨳᩣᨸᩥ, ᨽᨶ᩠ᨲᩮ, ᩈᩮᩣᩅᨱ᩠ᨱᩮᩣ ᩅᩥᨣ᩠ᨣᩉᩮᩣ ᨾᩣᨶᩩᩈᩴ ᩅᩥᨣ᩠ᨣᩉᩴ ᩋᨲᩥᩁᩮᩣᨧᨲᩥ; ᩑᩅᨾᩮᩅ ᨡᩮᩣ, ᨽᨶ᩠ᨲᩮ, ᨿᨴᩣ ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨸᩣᨲᩩᨽᩅᨲᩥ, ᩈᩮᩣ ᩋᨬ᩠ᨬᩮ ᨴᩮᩅᩮ ᩋᨲᩥᩁᩮᩣᨧᨲᩥ ᩅᨱ᩠ᨱᩮᨶ ᨧᩮᩅ ᨿᩈᩈᩣ ᨧ. ᨿᨴᩣ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨸᩣᨲᩩᨽᩅᨲᩥ, ᨶ ᨲᩔᩴ ᨸᩁᩥᩈᩣᨿᩴ ᨠᩮᩣᨧᩥ ᨴᩮᩅᩮᩣ ᩋᨽᩥᩅᩣᨴᩮᨲᩥ ᩅᩣ ᨸᨧ᩠ᨧᩩᨭ᩠ᨮᩮᨲᩥ ᩅᩣ ᩌᩈᨶᩮᨶ ᩅᩣ ᨶᩥᨾᨶ᩠ᨲᩮᨲᩥ. ᩈᨻ᩠ᨻᩮᩅ ᨲᩩᨱ᩠ᩉᩦᨽᩪᨲᩣ ᨸᨬ᩠ᨩᩃᩥᨠᩣ ᨸᩃ᩠ᩃᨦ᩠ᨠᩮᨶ ᨶᩥᩈᩦᨴᨶ᩠ᨲᩥ – ‘‘ᨿᩔᨴᩣᨶᩥ ᨴᩮᩅᩔ ᨸᩃ᩠ᩃᨦ᩠ᨠᩴ ᩍᨧ᩠ᨨᩥᩔᨲᩥ ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ, ᨲᩔ ᨴᩮᩅᩔ ᨸᩃ᩠ᩃᨦ᩠ᨠᩮ ᨶᩥᩈᩦᨴᩥᩔᨲᩦ’’ᨲᩥ.

‘ᨿᩔ ᨡᩮᩣ ᨸᨶ, ᨽᨶ᩠ᨲᩮ, ᨴᩮᩅᩔ ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨸᩃ᩠ᩃᨦ᩠ᨠᩮ ᨶᩥᩈᩦᨴᨲᩥ, ᩏᩊᩣᩁᩴ ᩈᩮᩣ ᩃᨽᨲᩥ ᨴᩮᩅᩮᩣ ᩅᩮᨴᨸᨭᩥᩃᩣᨽᩴ; ᩏᩊᩣᩁᩴ ᩈᩮᩣ ᩃᨽᨲᩥ ᨴᩮᩅᩮᩣ ᩈᩮᩣᨾᨶᩔᨸᨭᩥᩃᩣᨽᩴ. ᩈᩮᨿ᩠ᨿᨳᩣᨸᩥ, ᨽᨶ᩠ᨲᩮ, ᩁᩣᨩᩣ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᩅᩈᩥᨲ᩠ᨲᩮᩣ ᩋᨵᩩᨶᩣᨽᩥᩈᩥᨲ᩠ᨲᩮᩣ ᩁᨩ᩠ᨩᩮᨶ, ᩏᩊᩣᩁᩴ ᩈᩮᩣ ᩃᨽᨲᩥ ᩅᩮᨴᨸᨭᩥᩃᩣᨽᩴ, ᩏᩊᩣᩁᩴ ᩈᩮᩣ ᩃᨽᨲᩥ ᩈᩮᩣᨾᨶᩔᨸᨭᩥᩃᩣᨽᩴ. ᩑᩅᨾᩮᩅ ᨡᩮᩣ, ᨽᨶ᩠ᨲᩮ, ᨿᩔ ᨴᩮᩅᩔ ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨸᩃ᩠ᩃᨦ᩠ᨠᩮ ᨶᩥᩈᩦᨴᨲᩥ, ᩏᩊᩣᩁᩴ ᩈᩮᩣ ᩃᨽᨲᩥ ᨴᩮᩅᩮᩣ ᩅᩮᨴᨸᨭᩥᩃᩣᨽᩴ, ᩏᩊᩣᩁᩴ ᩈᩮᩣ ᩃᨽᨲᩥ ᨴᩮᩅᩮᩣ ᩈᩮᩣᨾᨶᩔᨸᨭᩥᩃᩣᨽᩴ. ᩋᨳ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᩒᩊᩣᩁᩥᨠᩴ ᩋᨲ᩠ᨲᨽᩣᩅᩴ ᩋᨽᩥᨶᩥᨾ᩠ᨾᩥᨶᩥᨲ᩠ᩅᩣ ᨠᩩᨾᩣᩁᩅᨱ᩠ᨱᩦ [ᨠᩩᨾᩣᩁᩅᨱ᩠ᨱᩮᩣ (ᩈ᩠ᨿᩣ. ᨠ.)] ᩉᩩᨲ᩠ᩅᩣ ᨸᨬ᩠ᨧᩈᩥᨡᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨸᩣᨲᩩᩁᩉᩮᩣᩈᩥ. ᩈᩮᩣ ᩅᩮᩉᩣᩈᩴ ᩋᨻ᩠ᨽᩩᨣ᩠ᨣᨶ᩠ᨲ᩠ᩅᩣ ᩌᨠᩣᩈᩮ ᩋᨶ᩠ᨲᩃᩥᨠ᩠ᨡᩮ ᨸᩃ᩠ᩃᨦ᩠ᨠᩮᨶ ᨶᩥᩈᩦᨴᩥ. ᩈᩮᨿ᩠ᨿᨳᩣᨸᩥ, ᨽᨶ᩠ᨲᩮ, ᨻᩃᩅᩣ ᨸᩩᩁᩥᩈᩮᩣ ᩈᩩᨸᨧ᩠ᨧᨲ᩠ᨳᨲᩮ ᩅᩣ ᨸᩃ᩠ᩃᨦ᩠ᨠᩮ ᩈᨾᩮ ᩅᩣ ᨽᩪᨾᩥᨽᩣᨣᩮ ᨸᩃ᩠ᩃᨦ᩠ᨠᩮᨶ ᨶᩥᩈᩦᨴᩮᨿ᩠ᨿ; ᩑᩅᨾᩮᩅ ᨡᩮᩣ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᩅᩮᩉᩣᩈᩴ ᩋᨻ᩠ᨽᩩᨣ᩠ᨣᨶ᩠ᨲ᩠ᩅᩣ ᩌᨠᩣᩈᩮ ᩋᨶ᩠ᨲᩃᩥᨠ᩠ᨡᩮ ᨸᩃ᩠ᩃᨦ᩠ᨠᩮᨶ ᨶᩥᩈᩦᨴᩥᨲ᩠ᩅᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᨾ᩠ᨸᩈᩣᨴᩴ ᩅᩥᨴᩥᨲ᩠ᩅᩣ ᩍᨾᩣᩉᩥ ᨣᩣᨳᩣᩉᩥ ᩋᨶᩩᨾᩮᩣᨴᩥ –

‘‘ᨾᩮᩣᨴᨶ᩠ᨲᩥ ᩅᨲ ᨽᩮᩣ ᨴᩮᩅᩣ, ᨲᩣᩅᨲᩥᩴᩈᩣ ᩈᩉᩥᨶ᩠ᨴᨠᩣ;

ᨲᨳᩣᨣᨲᩴ ᨶᨾᩔᨶ᩠ᨲᩣ, ᨵᨾ᩠ᨾᩔ ᨧ ᩈᩩᨵᨾ᩠ᨾᨲᩴ.

‘‘ᨶᩅᩮ ᨴᩮᩅᩮ ᨧ ᨸᩔᨶ᩠ᨲᩣ, ᩅᨱ᩠ᨱᩅᨶ᩠ᨲᩮ ᨿᩈᩔᩥᨶᩮ;

ᩈᩩᨣᨲᩈ᩠ᨾᩥᩴ ᨻᩕᩉ᩠ᨾᨧᩁᩥᨿᩴ, ᨧᩁᩥᨲ᩠ᩅᩣᨶ ᩍᨵᩣᨣᨲᩮ.

‘‘ᨲᩮ ᩋᨬ᩠ᨬᩮ ᩋᨲᩥᩁᩮᩣᨧᨶ᩠ᨲᩥ, ᩅᨱ᩠ᨱᩮᨶ ᨿᩈᩈᩣᨿᩩᨶᩣ;

ᩈᩣᩅᨠᩣ ᨽᩪᩁᩥᨸᨬ᩠ᨬᩔ, ᩅᩥᩈᩮᩈᩪᨸᨣᨲᩣ ᩍᨵ.

‘‘ᩍᨴᩴ ᨴᩥᩈ᩠ᩅᩣᨶ ᨶᨶ᩠ᨴᨶ᩠ᨲᩥ, ᨲᩣᩅᨲᩥᩴᩈᩣ ᩈᩉᩥᨶ᩠ᨴᨠᩣ;

ᨲᨳᩣᨣᨲᩴ ᨶᨾᩔᨶ᩠ᨲᩣ, ᨵᨾ᩠ᨾᩔ ᨧ ᩈᩩᨵᨾ᩠ᨾᨲ’’ᨶ᩠ᨲᩥ.

᪒᪘᪕. ‘ᩍᨾᨾᨲ᩠ᨳᩴ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨽᩣᩈᩥᨲ᩠ᨳ; ᩍᨾᨾᨲ᩠ᨳᩴ, ᨽᨶ᩠ᨲᩮ, ᨻᩕᩉ᩠ᨾᩩᨶᩮᩣ ᩈᨶᨦ᩠ᨠᩩᨾᩣᩁᩔ ᨽᩣᩈᨲᩮᩣ ᩋᨭ᩠ᨮᨦ᩠ᨣᩈᨾᨶ᩠ᨶᩣᨣᨲᩮᩣ ᩈᩁᩮᩣ ᩉᩮᩣᨲᩥ ᩅᩥᩔᨭ᩠ᨮᩮᩣ ᨧ ᩅᩥᨬ᩠ᨬᩮᨿ᩠ᨿᩮᩣ ᨧ ᨾᨬ᩠ᨩᩩ ᨧ ᩈᩅᨶᩦᨿᩮᩣ ᨧ ᨻᩥᨶ᩠ᨴᩩ ᨧ ᩋᩅᩥᩈᩣᩁᩦ ᨧ ᨣᨾ᩠ᨽᩦᩁᩮᩣ ᨧ ᨶᩥᨶ᩠ᨶᩣᨴᩦ ᨧ. ᨿᨳᩣᨸᩁᩥᩈᩴ ᨡᩮᩣ ᨸᨶ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᩈᩁᩮᨶ ᩅᩥᨬ᩠ᨬᩣᨸᩮᨲᩥ; ᨶ ᨧᩔ ᨻᩉᩥᨴ᩠ᨵᩣ ᨸᩁᩥᩈᩣᨿ ᨥᩮᩣᩈᩮᩣ ᨶᩥᨧ᩠ᨨᩁᨲᩥ. ᨿᩔ ᨡᩮᩣ ᨸᨶ, ᨽᨶ᩠ᨲᩮ, ᩑᩅᩴ ᩋᨭ᩠ᨮᨦ᩠ᨣᩈᨾᨶ᩠ᨶᩣᨣᨲᩮᩣ ᩈᩁᩮᩣ ᩉᩮᩣᨲᩥ, ᩈᩮᩣ ᩅᩩᨧ᩠ᨧᨲᩥ ‘‘ᨻᩕᩉ᩠ᨾᩔᩁᩮᩣ’’ᨲᩥ.

‘ᩋᨳ ᨡᩮᩣ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨲᩮᨲ᩠ᨲᩥᩴᩈᩮ ᩋᨲ᩠ᨲᨽᩣᩅᩮ ᩋᨽᩥᨶᩥᨾ᩠ᨾᩥᨶᩥᨲ᩠ᩅᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨸᨧ᩠ᨧᩮᨠᨸᩃ᩠ᩃᨦ᩠ᨠᩮᩈᩩ ᨸᩃ᩠ᩃᨦ᩠ᨠᩮᨶ [ᨸᨧ᩠ᨧᩮᨠᨸᩃ᩠ᩃᨦ᩠ᨠᩮᨶ (ᨠ.)] ᨶᩥᩈᩦᨴᩥᨲ᩠ᩅᩣ ᨴᩮᩅᩮ ᨲᩣᩅᨲᩥᩴᩈᩮ ᩌᨾᨶ᩠ᨲᩮᩈᩥ – ‘‘ᨲᩴ ᨠᩥᩴ ᨾᨬ᩠ᨬᨶ᩠ᨲᩥ, ᨽᩮᩣᨶ᩠ᨲᩮᩣ ᨴᩮᩅᩣ ᨲᩣᩅᨲᩥᩴᩈᩣ, ᨿᩣᩅᨬ᩠ᨧ ᩈᩮᩣ ᨽᨣᩅᩣ ᨻᩉᩩᨩᨶᩉᩥᨲᩣᨿ ᨸᨭᩥᨸᨶ᩠ᨶᩮᩣ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᨿᩮ ᩉᩥ ᨠᩮᨧᩥ, ᨽᩮᩣ, ᨻᩩᨴ᩠ᨵᩴ ᩈᩁᨱᩴ ᨣᨲᩣ ᨵᨾ᩠ᨾᩴ ᩈᩁᨱᩴ ᨣᨲᩣ ᩈᨦ᩠ᨥᩴ ᩈᩁᨱᩴ ᨣᨲᩣ ᩈᩦᩃᩮᩈᩩ ᨸᩁᩥᨸᩪᩁᨠᩣᩁᩥᨶᩮᩣ ᨲᩮ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸ᩠ᨸᩮᨠᨧ᩠ᨧᩮ ᨸᩁᨶᩥᨾ᩠ᨾᩥᨲᩅᩈᩅᨲ᩠ᨲᩦᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨩ᩠ᨩᨶ᩠ᨲᩥ, ᩋᨸ᩠ᨸᩮᨠᨧ᩠ᨧᩮ ᨶᩥᨾ᩠ᨾᩣᨶᩁᨲᩦᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨩ᩠ᨩᨶ᩠ᨲᩥ, ᩋᨸ᩠ᨸᩮᨠᨧ᩠ᨧᩮ ᨲᩩᩈᩥᨲᩣᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨩ᩠ᨩᨶ᩠ᨲᩥ, ᩋᨸ᩠ᨸᩮᨠᨧ᩠ᨧᩮ ᨿᩣᨾᩣᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨩ᩠ᨩᨶ᩠ᨲᩥ, ᩋᨸ᩠ᨸᩮᨠᨧ᩠ᨧᩮ ᨲᩣᩅᨲᩥᩴᩈᩣᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨩ᩠ᨩᨶ᩠ᨲᩥ, ᩋᨸ᩠ᨸᩮᨠᨧ᩠ᨧᩮ ᨧᩣᨲᩩᨾᩉᩣᩁᩣᨩᩥᨠᩣᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨩ᩠ᨩᨶ᩠ᨲᩥ. ᨿᩮ ᩈᨻ᩠ᨻᨶᩥᩉᩦᨶᩴ ᨠᩣᨿᩴ ᨸᩁᩥᨸᩪᩁᩮᨶ᩠ᨲᩥ, ᨲᩮ ᨣᨶ᩠ᨵᨻ᩠ᨻᨠᩣᨿᩴ ᨸᩁᩥᨸᩪᩁᩮᨶ᩠ᨲᩦ’’’ᨲᩥ.

᪒᪘᪖. ‘ᩍᨾᨾᨲ᩠ᨳᩴ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨽᩣᩈᩥᨲ᩠ᨳ; ᩍᨾᨾᨲ᩠ᨳᩴ, ᨽᨶ᩠ᨲᩮ, ᨻᩕᩉ᩠ᨾᩩᨶᩮᩣ ᩈᨶᨦ᩠ᨠᩩᨾᩣᩁᩔ ᨽᩣᩈᨲᩮᩣ ᨥᩮᩣᩈᩮᩣᨿᩮᩅ ᨴᩮᩅᩣ ᨾᨬ᩠ᨬᨶ᩠ᨲᩥ – ‘‘ᨿ᩠ᩅᩣᨿᩴ ᨾᨾ ᨸᩃ᩠ᩃᨦ᩠ᨠᩮ ᩈ᩠ᩅᩣᨿᩴ ᩑᨠᩮᩣᩅ ᨽᩣᩈᨲᩦ’’ᨲᩥ.

ᩑᨠᩈ᩠ᨾᩥᩴ ᨽᩣᩈᨾᩣᨶᩈ᩠ᨾᩥᩴ, ᩈᨻ᩠ᨻᩮ ᨽᩣᩈᨶ᩠ᨲᩥ ᨶᩥᨾ᩠ᨾᩥᨲᩣ;

ᩑᨠᩈ᩠ᨾᩥᩴ ᨲᩩᨱ᩠ᩉᩥᨾᩣᩈᩦᨶᩮ, ᩈᨻ᩠ᨻᩮ ᨲᩩᨱ᩠ᩉᩦ ᨽᩅᨶ᩠ᨲᩥ ᨲᩮ.

ᨲᨴᩣᩈᩩ ᨴᩮᩅᩣ ᨾᨬ᩠ᨬᨶ᩠ᨲᩥ, ᨲᩣᩅᨲᩥᩴᩈᩣ ᩈᩉᩥᨶ᩠ᨴᨠᩣ;

ᨿ᩠ᩅᩣᨿᩴ ᨾᨾ ᨸᩃ᩠ᩃᨦ᩠ᨠᩈ᩠ᨾᩥᩴ, ᩈ᩠ᩅᩣᨿᩴ ᩑᨠᩮᩣᩅ ᨽᩣᩈᨲᩦᨲᩥ.

‘ᩋᨳ ᨡᩮᩣ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᩑᨠᨲ᩠ᨲᩮᨶ ᩋᨲ᩠ᨲᩣᨶᩴ ᩏᨸᩈᩴᩉᩁᨲᩥ, ᩑᨠᨲ᩠ᨲᩮᨶ ᩋᨲ᩠ᨲᩣᨶᩴ ᩏᨸᩈᩴᩉᩁᩥᨲ᩠ᩅᩣ ᩈᨠ᩠ᨠᩔ ᨴᩮᩅᩣᨶᨾᩥᨶ᩠ᨴᩔ ᨸᩃ᩠ᩃᨦ᩠ᨠᩮ ᨸᩃ᩠ᩃᨦ᩠ᨠᩮᨶ ᨶᩥᩈᩦᨴᩥᨲ᩠ᩅᩣ ᨴᩮᩅᩮ ᨲᩣᩅᨲᩥᩴᩈᩮ ᩌᨾᨶ᩠ᨲᩮᩈᩥ –

ᨽᩣᩅᩥᨲᩍᨴ᩠ᨵᩥᨸᩣᨴᩮᩣ

᪒᪘᪗. ‘‘‘ᨲᩴ ᨠᩥᩴ ᨾᨬ᩠ᨬᨶ᩠ᨲᩥ, ᨽᩮᩣᨶ᩠ᨲᩮᩣ ᨴᩮᩅᩣ ᨲᩣᩅᨲᩥᩴᩈᩣ, ᨿᩣᩅ ᩈᩩᨸᨬ᩠ᨬᨲ᩠ᨲᩣ ᨧᩥᨾᩮ ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ ᨸᨬ᩠ᨬᨲ᩠ᨲᩣ ᩍᨴ᩠ᨵᩥᨸᩉᩩᨲᩣᨿ [ᩍᨴ᩠ᨵᩥᨻᩉᩩᩃᩦᨠᨲᩣᨿ (ᩈ᩠ᨿᩣ.)] ᩍᨴ᩠ᨵᩥᩅᩥᩈᩅᩥᨲᩣᨿ [ᩍᨴ᩠ᨵᩥᩅᩥᩈᩮᩅᩥᨲᩣᨿ (ᩈ᩠ᨿᩣ.)] ᩍᨴ᩠ᨵᩥᩅᩥᨠᩩᨻ᩠ᨻᨶᨲᩣᨿ. ᨠᨲᨾᩮ ᨧᨲ᩠ᨲᩣᩁᩮᩣ? ᩍᨵ ᨽᩮᩣ ᨽᩥᨠ᩠ᨡᩩ ᨨᨶ᩠ᨴᩈᨾᩣᨵᩥᨸ᩠ᨸᨵᩣᨶᩈᨦ᩠ᨡᩣᩁᩈᨾᨶ᩠ᨶᩣᨣᨲᩴ ᩍᨴ᩠ᨵᩥᨸᩣᨴᩴ ᨽᩣᩅᩮᨲᩥ. ᩅᩦᩁᩥᨿᩈᨾᩣᨵᩥᨸ᩠ᨸᨵᩣᨶᩈᨦ᩠ᨡᩣᩁᩈᨾᨶ᩠ᨶᩣᨣᨲᩴ ᩍᨴ᩠ᨵᩥᨸᩣᨴᩴ ᨽᩣᩅᩮᨲᩥ. ᨧᩥᨲ᩠ᨲᩈᨾᩣᨵᩥᨸ᩠ᨸᨵᩣᨶᩈᨦ᩠ᨡᩣᩁᩈᨾᨶ᩠ᨶᩣᨣᨲᩴ ᩍᨴ᩠ᨵᩥᨸᩣᨴᩴ ᨽᩣᩅᩮᨲᩥ. ᩅᩦᨾᩴᩈᩣᩈᨾᩣᨵᩥᨸ᩠ᨸᨵᩣᨶᩈᨦ᩠ᨡᩣᩁᩈᨾᨶ᩠ᨶᩣᨣᨲᩴ ᩍᨴ᩠ᨵᩥᨸᩣᨴᩴ ᨽᩣᩅᩮᨲᩥ. ᩍᨾᩮ ᨡᩮᩣ, ᨽᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ ᨸᨬ᩠ᨬᨲ᩠ᨲᩣ ᩍᨴ᩠ᨵᩥᨸᩉᩩᨲᩣᨿ ᩍᨴ᩠ᨵᩥᩅᩥᩈᩅᩥᨲᩣᨿ ᩍᨴ᩠ᨵᩥᩅᩥᨠᩩᨻ᩠ᨻᨶᨲᩣᨿ.

‘‘‘ᨿᩮ ᩉᩥ ᨠᩮᨧᩥ ᨽᩮᩣ ᩋᨲᩦᨲᨾᨴ᩠ᨵᩣᨶᩴ ᩈᨾᨱᩣ ᩅᩣ ᨻᩕᩣᩉ᩠ᨾᨱᩣ ᩅᩣ ᩋᨶᩮᨠᩅᩥᩉᩥᨲᩴ ᩍᨴ᩠ᨵᩥᩅᩥᨵᩴ ᨸᨧ᩠ᨧᨶᩩᨽᩮᩣᩈᩩᩴ, ᩈᨻ᩠ᨻᩮ ᨲᩮ ᩍᨾᩮᩈᩴᨿᩮᩅ ᨧᨲᩩᨶ᩠ᨶᩴ ᩍᨴ᩠ᨵᩥᨸᩣᨴᩣᨶᩴ ᨽᩣᩅᩥᨲᨲ᩠ᨲᩣ ᨻᩉᩩᩃᩦᨠᨲᨲ᩠ᨲᩣ. ᨿᩮᨸᩥ ᩉᩥ ᨠᩮᨧᩥ ᨽᩮᩣ ᩋᨶᩣᨣᨲᨾᨴ᩠ᨵᩣᨶᩴ ᩈᨾᨱᩣ ᩅᩣ ᨻᩕᩣᩉ᩠ᨾᨱᩣ ᩅᩣ ᩋᨶᩮᨠᩅᩥᩉᩥᨲᩴ ᩍᨴ᩠ᨵᩥᩅᩥᨵᩴ ᨸᨧ᩠ᨧᨶᩩᨽᩮᩣᩔᨶ᩠ᨲᩥ, ᩈᨻ᩠ᨻᩮ ᨲᩮ ᩍᨾᩮᩈᩴᨿᩮᩅ ᨧᨲᩩᨶ᩠ᨶᩴ ᩍᨴ᩠ᨵᩥᨸᩣᨴᩣᨶᩴ ᨽᩣᩅᩥᨲᨲ᩠ᨲᩣ ᨻᩉᩩᩃᩦᨠᨲᨲ᩠ᨲᩣ. ᨿᩮᨸᩥ ᩉᩥ ᨠᩮᨧᩥ ᨽᩮᩣ ᩑᨲᩁᩉᩥ ᩈᨾᨱᩣ ᩅᩣ ᨻᩕᩣᩉ᩠ᨾᨱᩣ ᩅᩣ ᩋᨶᩮᨠᩅᩥᩉᩥᨲᩴ ᩍᨴ᩠ᨵᩥᩅᩥᨵᩴ ᨸᨧ᩠ᨧᨶᩩᨽᩮᩣᨶ᩠ᨲᩥ, ᩈᨻ᩠ᨻᩮ ᨲᩮ ᩍᨾᩮᩈᩴᨿᩮᩅ ᨧᨲᩩᨶ᩠ᨶᩴ ᩍᨴ᩠ᨵᩥᨸᩣᨴᩣᨶᩴ ᨽᩣᩅᩥᨲᨲ᩠ᨲᩣ ᨻᩉᩩᩃᩦᨠᨲᨲ᩠ᨲᩣ. ᨸᩔᨶ᩠ᨲᩥ ᨶᩮᩣ ᨽᩮᩣᨶ᩠ᨲᩮᩣ ᨴᩮᩅᩣ ᨲᩣᩅᨲᩥᩴᩈᩣ ᨾᨾᨸᩥᨾᩴ ᩑᩅᩁᩪᨸᩴ ᩍᨴ᩠ᨵᩣᨶᩩᨽᩣᩅ’’ᨶ᩠ᨲᩥ? ‘‘ᩑᩅᩴ ᨾᩉᩣᨻᩕᩉ᩠ᨾᩮ’’ᨲᩥ. ‘‘ᩋᩉᨾ᩠ᨸᩥ ᨡᩮᩣ ᨽᩮᩣ ᩍᨾᩮᩈᩴᨿᩮᩅ ᨧᨲᩩᨶ᩠ᨶᨬ᩠ᨧ ᩍᨴ᩠ᨵᩥᨸᩣᨴᩣᨶᩴ ᨽᩣᩅᩥᨲᨲ᩠ᨲᩣ ᨻᩉᩩᩃᩦᨠᨲᨲ᩠ᨲᩣ ᩑᩅᩴ ᨾᩉᩥᨴ᩠ᨵᩥᨠᩮᩣ ᩑᩅᩴᨾᩉᩣᨶᩩᨽᩣᩅᩮᩣ’’ᨲᩥ. ᩍᨾᨾᨲ᩠ᨳᩴ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨽᩣᩈᩥᨲ᩠ᨳ. ᩍᨾᨾᨲ᩠ᨳᩴ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨽᩣᩈᩥᨲ᩠ᩅᩣ ᨴᩮᩅᩮ ᨲᩣᩅᨲᩥᩴᩈᩮ ᩌᨾᨶ᩠ᨲᩮᩈᩥ –

ᨲᩥᩅᩥᨵᩮᩣ ᩒᨠᩣᩈᩣᨵᩥᨣᨾᩮᩣ

᪒᪘᪘. ‘‘‘ᨲᩴ ᨠᩥᩴ ᨾᨬ᩠ᨬᨶ᩠ᨲᩥ, ᨽᩮᩣᨶ᩠ᨲᩮᩣ ᨴᩮᩅᩣ ᨲᩣᩅᨲᩥᩴᩈᩣ, ᨿᩣᩅᨬ᩠ᨧᩥᨴᩴ ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨲᨿᩮᩣ ᩒᨠᩣᩈᩣᨵᩥᨣᨾᩣ ᩋᨶᩩᨻᩩᨴ᩠ᨵᩣ ᩈᩩᨡᩔᩣᨵᩥᨣᨾᩣᨿ. ᨠᨲᨾᩮ ᨲᨿᩮᩣ? ᩍᨵ ᨽᩮᩣ ᩑᨠᨧ᩠ᨧᩮᩣ ᩈᩴᩈᨭ᩠ᨮᩮᩣ ᩅᩥᩉᩁᨲᩥ ᨠᩣᨾᩮᩉᩥ ᩈᩴᩈᨭ᩠ᨮᩮᩣ ᩋᨠᩩᩈᩃᩮᩉᩥ ᨵᨾ᩠ᨾᩮᩉᩥ. ᩈᩮᩣ ᩋᨸᩁᩮᨶ ᩈᨾᨿᩮᨶ ᩋᩁᩥᨿᨵᨾ᩠ᨾᩴ ᩈᩩᨱᩣᨲᩥ, ᨿᩮᩣᨶᩥᩈᩮᩣ ᨾᨶᩈᩥ ᨠᩁᩮᩣᨲᩥ, ᨵᨾ᩠ᨾᩣᨶᩩᨵᨾ᩠ᨾᩴ ᨸᨭᩥᨸᨩ᩠ᨩᨲᩥ. ᩈᩮᩣ ᩋᩁᩥᨿᨵᨾ᩠ᨾᩔᩅᨶᩴ ᩌᨣᨾ᩠ᨾ ᨿᩮᩣᨶᩥᩈᩮᩣᨾᨶᩈᩥᨠᩣᩁᩴ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨲ᩠ᨲᩥᩴ ᩋᩈᩴᩈᨭ᩠ᨮᩮᩣ ᩅᩥᩉᩁᨲᩥ ᨠᩣᨾᩮᩉᩥ ᩋᩈᩴᩈᨭ᩠ᨮᩮᩣ ᩋᨠᩩᩈᩃᩮᩉᩥ ᨵᨾ᩠ᨾᩮᩉᩥ. ᨲᩔ ᩋᩈᩴᩈᨭ᩠ᨮᩔ ᨠᩣᨾᩮᩉᩥ ᩋᩈᩴᩈᨭ᩠ᨮᩔ ᩋᨠᩩᩈᩃᩮᩉᩥ ᨵᨾ᩠ᨾᩮᩉᩥ ᩏᨸ᩠ᨸᨩ᩠ᨩᨲᩥ ᩈᩩᨡᩴ, ᩈᩩᨡᩣ ᨽᩥᨿ᩠ᨿᩮᩣ ᩈᩮᩣᨾᨶᩔᩴ. ᩈᩮᨿ᩠ᨿᨳᩣᨸᩥ, ᨽᩮᩣ, ᨸᨾᩩᨴᩣ ᨸᩣᨾᩮᩣᨩ᩠ᨩᩴ [ᨸᩣᨾᩩᨩ᩠ᨩᩴ (ᨸᩦ. ᨠ.)] ᨩᩣᨿᩮᨳ, ᩑᩅᨾᩮᩅ ᨡᩮᩣ, ᨽᩮᩣ, ᩋᩈᩴᩈᨭ᩠ᨮᩔ ᨠᩣᨾᩮᩉᩥ ᩋᩈᩴᩈᨭ᩠ᨮᩔ ᩋᨠᩩᩈᩃᩮᩉᩥ ᨵᨾ᩠ᨾᩮᩉᩥ ᩏᨸ᩠ᨸᨩ᩠ᨩᨲᩥ ᩈᩩᨡᩴ, ᩈᩩᨡᩣ ᨽᩥᨿ᩠ᨿᩮᩣ ᩈᩮᩣᨾᨶᩔᩴ. ᩋᨿᩴ ᨡᩮᩣ, ᨽᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨸᨮᨾᩮᩣ ᩒᨠᩣᩈᩣᨵᩥᨣᨾᩮᩣ ᩋᨶᩩᨻᩩᨴ᩠ᨵᩮᩣ ᩈᩩᨡᩔᩣᨵᩥᨣᨾᩣᨿ.

‘‘‘ᨸᩩᨶ ᨧᨸᩁᩴ, ᨽᩮᩣ, ᩍᨵᩮᨠᨧ᩠ᨧᩔ ᩒᩊᩣᩁᩥᨠᩣ ᨠᩣᨿᩈᨦ᩠ᨡᩣᩁᩣ ᩋᨸ᩠ᨸᨭᩥᨸ᩠ᨸᩔᨴ᩠ᨵᩣ ᩉᩮᩣᨶ᩠ᨲᩥ, ᩒᩊᩣᩁᩥᨠᩣ ᩅᨧᩦᩈᨦ᩠ᨡᩣᩁᩣ ᩋᨸ᩠ᨸᨭᩥᨸ᩠ᨸᩔᨴ᩠ᨵᩣ ᩉᩮᩣᨶ᩠ᨲᩥ, ᩒᩊᩣᩁᩥᨠᩣ ᨧᩥᨲ᩠ᨲᩈᨦ᩠ᨡᩣᩁᩣ ᩋᨸ᩠ᨸᨭᩥᨸ᩠ᨸᩔᨴ᩠ᨵᩣ ᩉᩮᩣᨶ᩠ᨲᩥ. ᩈᩮᩣ ᩋᨸᩁᩮᨶ ᩈᨾᨿᩮᨶ ᩋᩁᩥᨿᨵᨾ᩠ᨾᩴ ᩈᩩᨱᩣᨲᩥ, ᨿᩮᩣᨶᩥᩈᩮᩣ ᨾᨶᩈᩥ ᨠᩁᩮᩣᨲᩥ, ᨵᨾ᩠ᨾᩣᨶᩩᨵᨾ᩠ᨾᩴ ᨸᨭᩥᨸᨩ᩠ᨩᨲᩥ. ᨲᩔ ᩋᩁᩥᨿᨵᨾ᩠ᨾᩔᩅᨶᩴ ᩌᨣᨾ᩠ᨾ ᨿᩮᩣᨶᩥᩈᩮᩣᨾᨶᩈᩥᨠᩣᩁᩴ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨲ᩠ᨲᩥᩴ ᩒᩊᩣᩁᩥᨠᩣ ᨠᩣᨿᩈᨦ᩠ᨡᩣᩁᩣ ᨸᨭᩥᨸ᩠ᨸᩔᨾ᩠ᨽᨶ᩠ᨲᩥ, ᩒᩊᩣᩁᩥᨠᩣ ᩅᨧᩦᩈᨦ᩠ᨡᩣᩁᩣ ᨸᨭᩥᨸ᩠ᨸᩔᨾ᩠ᨽᨶ᩠ᨲᩥ, ᩒᩊᩣᩁᩥᨠᩣ ᨧᩥᨲ᩠ᨲᩈᨦ᩠ᨡᩣᩁᩣ ᨸᨭᩥᨸ᩠ᨸᩔᨾ᩠ᨽᨶ᩠ᨲᩥ. ᨲᩔ ᩒᩊᩣᩁᩥᨠᩣᨶᩴ ᨠᩣᨿᩈᨦ᩠ᨡᩣᩁᩣᨶᩴ ᨸᨭᩥᨸ᩠ᨸᩔᨴ᩠ᨵᩥᨿᩣ ᩒᩊᩣᩁᩥᨠᩣᨶᩴ ᩅᨧᩦᩈᨦ᩠ᨡᩣᩁᩣᨶᩴ ᨸᨭᩥᨸ᩠ᨸᩔᨴ᩠ᨵᩥᨿᩣ ᩒᩊᩣᩁᩥᨠᩣᨶᩴ ᨧᩥᨲ᩠ᨲᩈᨦ᩠ᨡᩣᩁᩣᨶᩴ ᨸᨭᩥᨸ᩠ᨸᩔᨴ᩠ᨵᩥᨿᩣ ᩏᨸ᩠ᨸᨩ᩠ᨩᨲᩥ ᩈᩩᨡᩴ, ᩈᩩᨡᩣ ᨽᩥᨿ᩠ᨿᩮᩣ ᩈᩮᩣᨾᨶᩔᩴ. ᩈᩮᨿ᩠ᨿᨳᩣᨸᩥ, ᨽᩮᩣ, ᨸᨾᩩᨴᩣ ᨸᩣᨾᩮᩣᨩ᩠ᨩᩴ ᨩᩣᨿᩮᨳ, ᩑᩅᨾᩮᩅ ᨡᩮᩣ ᨽᩮᩣ ᩒᩊᩣᩁᩥᨠᩣᨶᩴ ᨠᩣᨿᩈᨦ᩠ᨡᩣᩁᩣᨶᩴ ᨸᨭᩥᨸ᩠ᨸᩔᨴ᩠ᨵᩥᨿᩣ ᩒᩊᩣᩁᩥᨠᩣᨶᩴ ᩅᨧᩦᩈᨦ᩠ᨡᩣᩁᩣᨶᩴ ᨸᨭᩥᨸ᩠ᨸᩔᨴ᩠ᨵᩥᨿᩣ ᩒᩊᩣᩁᩥᨠᩣᨶᩴ ᨧᩥᨲ᩠ᨲᩈᨦ᩠ᨡᩣᩁᩣᨶᩴ ᨸᨭᩥᨸ᩠ᨸᩔᨴ᩠ᨵᩥᨿᩣ ᩏᨸ᩠ᨸᨩ᩠ᨩᨲᩥ ᩈᩩᨡᩴ, ᩈᩩᨡᩣ ᨽᩥᨿ᩠ᨿᩮᩣ ᩈᩮᩣᨾᨶᩔᩴ. ᩋᨿᩴ ᨡᩮᩣ, ᨽᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨴᩩᨲᩥᨿᩮᩣ ᩒᨠᩣᩈᩣᨵᩥᨣᨾᩮᩣ ᩋᨶᩩᨻᩩᨴ᩠ᨵᩮᩣ ᩈᩩᨡᩔᩣᨵᩥᨣᨾᩣᨿ.

‘‘‘ᨸᩩᨶ ᨧᨸᩁᩴ, ᨽᩮᩣ, ᩍᨵᩮᨠᨧ᩠ᨧᩮᩣ ‘ᩍᨴᩴ ᨠᩩᩈᩃ’ᨶ᩠ᨲᩥ ᨿᨳᩣᨽᩪᨲᩴ ᨶᨸ᩠ᨸᨩᩣᨶᩣᨲᩥ, ‘ᩍᨴᩴ ᩋᨠᩩᩈᩃ’ᨶ᩠ᨲᩥ ᨿᨳᩣᨽᩪᨲᩴ ᨶᨸ᩠ᨸᨩᩣᨶᩣᨲᩥ. ‘ᩍᨴᩴ ᩈᩣᩅᨩ᩠ᨩᩴ ᩍᨴᩴ ᩋᨶᩅᨩ᩠ᨩᩴ, ᩍᨴᩴ ᩈᩮᩅᩥᨲᨻ᩠ᨻᩴ ᩍᨴᩴ ᨶ ᩈᩮᩅᩥᨲᨻ᩠ᨻᩴ, ᩍᨴᩴ ᩉᩦᨶᩴ ᩍᨴᩴ ᨸᨱᩦᨲᩴ, ᩍᨴᩴ ᨠᨱ᩠ᩉᩈᩩᨠ᩠ᨠᩈᨸ᩠ᨸᨭᩥᨽᩣᨣ’ᨶ᩠ᨲᩥ ᨿᨳᩣᨽᩪᨲᩴ ᨶᨸ᩠ᨸᨩᩣᨶᩣᨲᩥ. ᩈᩮᩣ ᩋᨸᩁᩮᨶ ᩈᨾᨿᩮᨶ ᩋᩁᩥᨿᨵᨾ᩠ᨾᩴ ᩈᩩᨱᩣᨲᩥ, ᨿᩮᩣᨶᩥᩈᩮᩣ ᨾᨶᩈᩥ ᨠᩁᩮᩣᨲᩥ, ᨵᨾ᩠ᨾᩣᨶᩩᨵᨾ᩠ᨾᩴ ᨸᨭᩥᨸᨩ᩠ᨩᨲᩥ. ᩈᩮᩣ ᩋᩁᩥᨿᨵᨾ᩠ᨾᩔᩅᨶᩴ ᩌᨣᨾ᩠ᨾ ᨿᩮᩣᨶᩥᩈᩮᩣᨾᨶᩈᩥᨠᩣᩁᩴ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨲ᩠ᨲᩥᩴ, ‘ᩍᨴᩴ ᨠᩩᩈᩃ’ᨶ᩠ᨲᩥ ᨿᨳᩣᨽᩪᨲᩴ ᨸᨩᩣᨶᩣᨲᩥ, ‘ᩍᨴᩴ ᩋᨠᩩᩈᩃ’ᨶ᩠ᨲᩥ ᨿᨳᩣᨽᩪᨲᩴ ᨸᨩᩣᨶᩣᨲᩥ. ᩍᨴᩴ ᩈᩣᩅᨩ᩠ᨩᩴ ᩍᨴᩴ ᩋᨶᩅᨩ᩠ᨩᩴ, ᩍᨴᩴ ᩈᩮᩅᩥᨲᨻ᩠ᨻᩴ ᩍᨴᩴ ᨶ ᩈᩮᩅᩥᨲᨻ᩠ᨻᩴ, ᩍᨴᩴ ᩉᩦᨶᩴ ᩍᨴᩴ ᨸᨱᩦᨲᩴ, ᩍᨴᩴ ᨠᨱ᩠ᩉᩈᩩᨠ᩠ᨠᩈᨸ᩠ᨸᨭᩥᨽᩣᨣ’ᨶ᩠ᨲᩥ ᨿᨳᩣᨽᩪᨲᩴ ᨸᨩᩣᨶᩣᨲᩥ. ᨲᩔ ᩑᩅᩴ ᨩᩣᨶᨲᩮᩣ ᩑᩅᩴ ᨸᩔᨲᩮᩣ ᩋᩅᩥᨩ᩠ᨩᩣ ᨸᩉᩦᨿᨲᩥ, ᩅᩥᨩ᩠ᨩᩣ ᩏᨸ᩠ᨸᨩ᩠ᨩᨲᩥ. ᨲᩔ ᩋᩅᩥᨩ᩠ᨩᩣᩅᩥᩁᩣᨣᩣ ᩅᩥᨩ᩠ᨩᩩᨸ᩠ᨸᩣᨴᩣ ᩏᨸ᩠ᨸᨩ᩠ᨩᨲᩥ ᩈᩩᨡᩴ, ᩈᩩᨡᩣ ᨽᩥᨿ᩠ᨿᩮᩣ ᩈᩮᩣᨾᨶᩔᩴ. ᩈᩮᨿ᩠ᨿᨳᩣᨸᩥ, ᨽᩮᩣ, ᨸᨾᩩᨴᩣ ᨸᩣᨾᩮᩣᨩ᩠ᨩᩴ ᨩᩣᨿᩮᨳ, ᩑᩅᨾᩮᩅ ᨡᩮᩣ, ᨽᩮᩣ, ᩋᩅᩥᨩ᩠ᨩᩣᩅᩥᩁᩣᨣᩣ ᩅᩥᨩ᩠ᨩᩩᨸ᩠ᨸᩣᨴᩣ ᩏᨸ᩠ᨸᨩ᩠ᨩᨲᩥ ᩈᩩᨡᩴ, ᩈᩩᨡᩣ ᨽᩥᨿ᩠ᨿᩮᩣ ᩈᩮᩣᨾᨶᩔᩴ. ᩋᨿᩴ ᨡᩮᩣ, ᨽᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨲᨲᩥᨿᩮᩣ ᩒᨠᩣᩈᩣᨵᩥᨣᨾᩮᩣ ᩋᨶᩩᨻᩩᨴ᩠ᨵᩮᩣ ᩈᩩᨡᩔᩣᨵᩥᨣᨾᩣᨿ. ᩍᨾᩮ ᨡᩮᩣ, ᨽᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨲᨿᩮᩣ ᩒᨠᩣᩈᩣᨵᩥᨣᨾᩣ ᩋᨶᩩᨻᩩᨴ᩠ᨵᩣ ᩈᩩᨡᩔᩣᨵᩥᨣᨾᩣᨿᩣ’’ᨲᩥ. ᩍᨾᨾᨲ᩠ᨳᩴ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨽᩣᩈᩥᨲ᩠ᨳ, ᩍᨾᨾᨲ᩠ᨳᩴ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨽᩣᩈᩥᨲ᩠ᩅᩣ ᨴᩮᩅᩮ ᨲᩣᩅᨲᩥᩴᩈᩮ ᩌᨾᨶ᩠ᨲᩮᩈᩥ –

ᨧᨲᩩᩈᨲᩥᨸᨭ᩠ᨮᩣᨶᩴ

᪒᪘᪙. ‘‘‘ᨲᩴ ᨠᩥᩴ ᨾᨬ᩠ᨬᨶ᩠ᨲᩥ, ᨽᩮᩣᨶ᩠ᨲᩮᩣ ᨴᩮᩅᩣ ᨲᩣᩅᨲᩥᩴᩈᩣ, ᨿᩣᩅ ᩈᩩᨸᨬ᩠ᨬᨲ᩠ᨲᩣ ᨧᩥᨾᩮ ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩣ ᨸᨬ᩠ᨬᨲ᩠ᨲᩣ ᨠᩩᩈᩃᩔᩣᨵᩥᨣᨾᩣᨿ. ᨠᨲᨾᩮ ᨧᨲ᩠ᨲᩣᩁᩮᩣ? ᩍᨵ, ᨽᩮᩣ, ᨽᩥᨠ᩠ᨡᩩ ᩋᨩ᩠ᨫᨲ᩠ᨲᩴ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ. ᩋᨩ᩠ᨫᨲ᩠ᨲᩴ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨶ᩠ᨲᩮᩣ ᨲᨲ᩠ᨳ ᩈᨾ᩠ᨾᩣ ᩈᨾᩣᨵᩥᨿᨲᩥ, ᩈᨾ᩠ᨾᩣ ᩅᩥᨸ᩠ᨸᩈᩦᨴᨲᩥ. ᩈᩮᩣ ᨲᨲ᩠ᨳ ᩈᨾ᩠ᨾᩣ ᩈᨾᩣᩉᩥᨲᩮᩣ ᩈᨾ᩠ᨾᩣ ᩅᩥᨸ᩠ᨸᩈᨶ᩠ᨶᩮᩣ ᨻᩉᩥᨴ᩠ᨵᩣ ᨸᩁᨠᩣᨿᩮ ᨬᩣᨱᨴᩔᨶᩴ ᩋᨽᩥᨶᩥᨻ᩠ᨻᨲ᩠ᨲᩮᨲᩥ. ᩋᨩ᩠ᨫᨲ᩠ᨲᩴ ᩅᩮᨴᨶᩣᩈᩩ ᩅᩮᨴᨶᩣᨶᩩᨸᩔᩦ ᩅᩥᩉᩁᨲᩥ…ᨸᩮ… ᨻᩉᩥᨴ᩠ᨵᩣ ᨸᩁᩅᩮᨴᨶᩣᩈᩩ ᨬᩣᨱᨴᩔᨶᩴ ᩋᨽᩥᨶᩥᨻ᩠ᨻᨲ᩠ᨲᩮᨲᩥ. ᩋᨩ᩠ᨫᨲ᩠ᨲᩴ ᨧᩥᨲ᩠ᨲᩮ ᨧᩥᨲ᩠ᨲᩣᨶᩩᨸᩔᩦ ᩅᩥᩉᩁᨲᩥ…ᨸᩮ… ᨻᩉᩥᨴ᩠ᨵᩣ ᨸᩁᨧᩥᨲ᩠ᨲᩮ ᨬᩣᨱᨴᩔᨶᩴ ᩋᨽᩥᨶᩥᨻ᩠ᨻᨲ᩠ᨲᩮᨲᩥ. ᩋᨩ᩠ᨫᨲ᩠ᨲᩴ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ. ᩋᨩ᩠ᨫᨲ᩠ᨲᩴ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨶ᩠ᨲᩮᩣ ᨲᨲ᩠ᨳ ᩈᨾ᩠ᨾᩣ ᩈᨾᩣᨵᩥᨿᨲᩥ, ᩈᨾ᩠ᨾᩣ ᩅᩥᨸ᩠ᨸᩈᩦᨴᨲᩥ. ᩈᩮᩣ ᨲᨲ᩠ᨳ ᩈᨾ᩠ᨾᩣ ᩈᨾᩣᩉᩥᨲᩮᩣ ᩈᨾ᩠ᨾᩣ ᩅᩥᨸ᩠ᨸᩈᨶ᩠ᨶᩮᩣ ᨻᩉᩥᨴ᩠ᨵᩣ ᨸᩁᨵᨾ᩠ᨾᩮᩈᩩ ᨬᩣᨱᨴᩔᨶᩴ ᩋᨽᩥᨶᩥᨻ᩠ᨻᨲ᩠ᨲᩮᨲᩥ. ᩍᨾᩮ ᨡᩮᩣ, ᨽᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩣ ᨸᨬ᩠ᨬᨲ᩠ᨲᩣ ᨠᩩᩈᩃᩔᩣᨵᩥᨣᨾᩣᨿᩣ’’ᨲᩥ. ᩍᨾᨾᨲ᩠ᨳᩴ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨽᩣᩈᩥᨲ᩠ᨳ. ᩍᨾᨾᨲ᩠ᨳᩴ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨽᩣᩈᩥᨲ᩠ᩅᩣ ᨴᩮᩅᩮ ᨲᩣᩅᨲᩥᩴᩈᩮ ᩌᨾᨶ᩠ᨲᩮᩈᩥ –

ᩈᨲ᩠ᨲ ᩈᨾᩣᨵᩥᨸᩁᩥᨠ᩠ᨡᩣᩁᩣ

᪒᪙᪐. ‘‘‘ᨲᩴ ᨠᩥᩴ ᨾᨬ᩠ᨬᨶ᩠ᨲᩥ, ᨽᩮᩣᨶ᩠ᨲᩮᩣ ᨴᩮᩅᩣ ᨲᩣᩅᨲᩥᩴᩈᩣ, ᨿᩣᩅ ᩈᩩᨸᨬ᩠ᨬᨲ᩠ᨲᩣ ᨧᩥᨾᩮ ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᩈᨲ᩠ᨲ ᩈᨾᩣᨵᩥᨸᩁᩥᨠ᩠ᨡᩣᩁᩣ ᩈᨾ᩠ᨾᩣᩈᨾᩣᨵᩥᩔ ᨸᩁᩥᨽᩣᩅᨶᩣᨿ ᩈᨾ᩠ᨾᩣᩈᨾᩣᨵᩥᩔ ᨸᩣᩁᩥᨸᩪᩁᩥᨿᩣ. ᨠᨲᨾᩮ ᩈᨲ᩠ᨲ? ᩈᨾ᩠ᨾᩣᨴᩥᨭ᩠ᨮᩥ ᩈᨾ᩠ᨾᩣᩈᨦ᩠ᨠᨸ᩠ᨸᩮᩣ ᩈᨾ᩠ᨾᩣᩅᩣᨧᩣ ᩈᨾ᩠ᨾᩣᨠᨾ᩠ᨾᨶ᩠ᨲᩮᩣ ᩈᨾ᩠ᨾᩣᩌᨩᩦᩅᩮᩣ ᩈᨾ᩠ᨾᩣᩅᩣᨿᩣᨾᩮᩣ ᩈᨾ᩠ᨾᩣᩈᨲᩥ. ᨿᩣ ᨡᩮᩣ, ᨽᩮᩣ, ᩍᨾᩮᩉᩥ ᩈᨲ᩠ᨲᩉᨦ᩠ᨣᩮᩉᩥ ᨧᩥᨲ᩠ᨲᩔ ᩑᨠᨣ᩠ᨣᨲᩣ ᨸᩁᩥᨠ᩠ᨡᨲᩣ, ᩋᨿᩴ ᩅᩩᨧ᩠ᨧᨲᩥ, ᨽᩮᩣ, ᩋᩁᩥᨿᩮᩣ ᩈᨾ᩠ᨾᩣᩈᨾᩣᨵᩥ ᩈᩏᨸᨶᩥᩈᩮᩣ ᩍᨲᩥᨸᩥ ᩈᨸᩁᩥᨠ᩠ᨡᩣᩁᩮᩣ ᩍᨲᩥᨸᩥ. ᩈᨾ᩠ᨾᩣᨴᩥᨭ᩠ᨮᩥᩔ ᨽᩮᩣ, ᩈᨾ᩠ᨾᩣᩈᨦ᩠ᨠᨸ᩠ᨸᩮᩣ ᨸᩉᩮᩣᨲᩥ, ᩈᨾ᩠ᨾᩣᩈᨦ᩠ᨠᨸ᩠ᨸᩔ ᩈᨾ᩠ᨾᩣᩅᩣᨧᩣ ᨸᩉᩮᩣᨲᩥ, ᩈᨾ᩠ᨾᩣᩅᩣᨧᩔ ᩈᨾ᩠ᨾᩣᨠᨾ᩠ᨾᨶ᩠ᨲᩮᩣ ᨸᩉᩮᩣᨲᩥ. ᩈᨾ᩠ᨾᩣᨠᨾ᩠ᨾᨶ᩠ᨲᩔ ᩈᨾ᩠ᨾᩣᩌᨩᩦᩅᩮᩣ ᨸᩉᩮᩣᨲᩥ, ᩈᨾ᩠ᨾᩣᩌᨩᩦᩅᩔ ᩈᨾ᩠ᨾᩣᩅᩣᨿᩣᨾᩮᩣ ᨸᩉᩮᩣᨲᩥ, ᩈᨾ᩠ᨾᩣᩅᩣᨿᩣᨾᩔ ᩈᨾ᩠ᨾᩣᩈᨲᩥ ᨸᩉᩮᩣᨲᩥ, ᩈᨾ᩠ᨾᩣᩈᨲᩥᩔ ᩈᨾ᩠ᨾᩣᩈᨾᩣᨵᩥ ᨸᩉᩮᩣᨲᩥ, ᩈᨾ᩠ᨾᩣᩈᨾᩣᨵᩥᩔ ᩈᨾ᩠ᨾᩣᨬᩣᨱᩴ ᨸᩉᩮᩣᨲᩥ, ᩈᨾ᩠ᨾᩣᨬᩣᨱᩔ ᩈᨾ᩠ᨾᩣᩅᩥᨾᩩᨲ᩠ᨲᩥ ᨸᩉᩮᩣᨲᩥ. ᨿᨬ᩠ᩉᩥ ᨲᩴ, ᨽᩮᩣ, ᩈᨾ᩠ᨾᩣ ᩅᨴᨾᩣᨶᩮᩣ ᩅᨴᩮᨿ᩠ᨿ – ‘ᩈ᩠ᩅᩣᨠ᩠ᨡᩣᨲᩮᩣ ᨽᨣᩅᨲᩣ ᨵᨾ᩠ᨾᩮᩣ ᩈᨶ᩠ᨴᩥᨭ᩠ᨮᩥᨠᩮᩣ ᩋᨠᩣᩃᩥᨠᩮᩣ ᩑᩉᩥᨸᩔᩥᨠᩮᩣ ᩒᨸᨶᩮᨿ᩠ᨿᩥᨠᩮᩣ ᨸᨧ᩠ᨧᨲ᩠ᨲᩴ ᩅᩮᨴᩥᨲᨻ᩠ᨻᩮᩣ ᩅᩥᨬ᩠ᨬᩪᩉᩥ ᩋᨸᩣᩁᩩᨲᩣ ᩋᨾᨲᩔ ᨴ᩠ᩅᩣᩁᩣ’ᨲᩥ ᩍᨴᨾᩮᩅ ᨲᩴ ᩈᨾ᩠ᨾᩣ ᩅᨴᨾᩣᨶᩮᩣ ᩅᨴᩮᨿ᩠ᨿ. ᩈ᩠ᩅᩣᨠ᩠ᨡᩣᨲᩮᩣ ᩉᩥ, ᨽᩮᩣ, ᨽᨣᩅᨲᩣ ᨵᨾ᩠ᨾᩮᩣ ᩈᨶ᩠ᨴᩥᨭ᩠ᨮᩥᨠᩮᩣ, ᩋᨠᩣᩃᩥᨠᩮᩣ ᩑᩉᩥᨸᩔᩥᨠᩮᩣ ᩒᨸᨶᩮᨿ᩠ᨿᩥᨠᩮᩣ ᨸᨧ᩠ᨧᨲ᩠ᨲᩴ ᩅᩮᨴᩥᨲᨻ᩠ᨻᩮᩣ ᩅᩥᨬ᩠ᨬᩪᩉᩥ ᩋᨸᩣᩁᩩᨲᩣ ᩋᨾᨲᩔ ᨴ᩠ᩅᩣᩁᩣ [ᨴ᩠ᩅᩣᩁᩣᨲᩥ (ᩈ᩠ᨿᩣ. ᨠ.)].

‘‘‘ᨿᩮ ᩉᩥ ᨠᩮᨧᩥ, ᨽᩮᩣ, ᨻᩩᨴ᩠ᨵᩮ ᩋᩅᩮᨧ᩠ᨧᨸ᩠ᨸᩈᩣᨴᩮᨶ ᩈᨾᨶ᩠ᨶᩣᨣᨲᩣ, ᨵᨾ᩠ᨾᩮ ᩋᩅᩮᨧ᩠ᨧᨸ᩠ᨸᩈᩣᨴᩮᨶ ᩈᨾᨶ᩠ᨶᩣᨣᨲᩣ, ᩈᨦ᩠ᨥᩮ ᩋᩅᩮᨧ᩠ᨧᨸ᩠ᨸᩈᩣᨴᩮᨶ ᩈᨾᨶ᩠ᨶᩣᨣᨲᩣ, ᩋᩁᩥᨿᨠᨶ᩠ᨲᩮᩉᩥ ᩈᩦᩃᩮᩉᩥ ᩈᨾᨶ᩠ᨶᩣᨣᨲᩣ, ᨿᩮ ᨧᩥᨾᩮ ᩒᨸᨸᩣᨲᩥᨠᩣ ᨵᨾ᩠ᨾᩅᩥᨶᩦᨲᩣ ᩈᩣᨲᩥᩁᩮᨠᩣᨶᩥ ᨧᨲᩩᩅᩦᩈᨲᩥᩈᨲᩈᩉᩔᩣᨶᩥ ᨾᩣᨣᨵᨠᩣ ᨸᩁᩥᨧᩣᩁᨠᩣ ᩋᨻ᩠ᨽᨲᩦᨲᩣ ᨠᩣᩃᨦ᩠ᨠᨲᩣ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩈᩮᩣᨲᩣᨸᨶ᩠ᨶᩣ ᩋᩅᩥᨶᩥᨸᩣᨲᨵᨾ᩠ᨾᩣ ᨶᩥᨿᨲᩣ ᩈᨾ᩠ᨻᩮᩣᨵᩥᨸᩁᩣᨿᨱᩣ. ᩋᨲ᩠ᨳᩥ ᨧᩮᩅᩮᨲ᩠ᨳ ᩈᨠᨴᩣᨣᩣᨾᩥᨶᩮᩣ.

‘‘ᩋᨲ᩠ᨳᩣᨿᩴ [ᩋᨳᩣᨿᩴ (ᩈᩦ. ᩈ᩠ᨿᩣ.)] ᩍᨲᩁᩣ ᨸᨩᩣ, ᨸᩩᨬ᩠ᨬᩣᨽᩣᨣᩣᨲᩥ ᨾᩮ ᨾᨶᩮᩣ;

ᩈᨦ᩠ᨡᩣᨲᩩᩴ ᨶᩮᩣᨸᩥ ᩈᨠ᩠ᨠᩮᩣᨾᩥ, ᨾᩩᩈᩣᩅᩣᨴᩔ ᩒᨲ᩠ᨲᨸ᩠ᨸ’’ᨶ᩠ᨲᩥ.

᪒᪙᪑. ‘ᩍᨾᨾᨲ᩠ᨳᩴ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨽᩣᩈᩥᨲ᩠ᨳ, ᩍᨾᨾᨲ᩠ᨳᩴ, ᨽᨶ᩠ᨲᩮ, ᨻᩕᩉ᩠ᨾᩩᨶᩮᩣ ᩈᨶᨦ᩠ᨠᩩᨾᩣᩁᩔ ᨽᩣᩈᨲᩮᩣ ᩅᩮᩔᩅᨱᩔ ᨾᩉᩣᩁᩣᨩᩔ ᩑᩅᩴ ᨧᩮᨲᩈᩮᩣ ᨸᩁᩥᩅᩥᨲᨠ᩠ᨠᩮᩣ ᩏᨴᨸᩣᨴᩥ – ‘‘ᩋᨧ᩠ᨨᩁᩥᨿᩴ ᩅᨲ ᨽᩮᩣ, ᩋᨻ᩠ᨽᩩᨲᩴ ᩅᨲ ᨽᩮᩣ, ᩑᩅᩁᩪᨸᩮᩣᨸᩥ ᨶᩣᨾ ᩏᩊᩣᩁᩮᩣ ᩈᨲ᩠ᨳᩣ ᨽᩅᩥᩔᨲᩥ, ᩑᩅᩁᩪᨸᩴ ᩏᩊᩣᩁᩴ ᨵᨾ᩠ᨾᨠ᩠ᨡᩣᨶᩴ, ᩑᩅᩁᩪᨸᩣ ᩏᩊᩣᩁᩣ ᩅᩥᩈᩮᩈᩣᨵᩥᨣᨾᩣ ᨸᨬ᩠ᨬᩣᨿᩥᩔᨶ᩠ᨲᩦ’’ᨲᩥ. ᩋᨳ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᩅᩮᩔᩅᨱᩔ ᨾᩉᩣᩁᩣᨩᩔ ᨧᩮᨲᩈᩣ ᨧᩮᨲᩮᩣᨸᩁᩥᩅᩥᨲᨠ᩠ᨠᨾᨬ᩠ᨬᩣᨿ ᩅᩮᩔᩅᨱᩴ ᨾᩉᩣᩁᩣᨩᩣᨶᩴ ᩑᨲᨴᩅᩮᩣᨧ – ‘‘ᨲᩴ ᨠᩥᩴ ᨾᨬ᩠ᨬᨲᩥ ᨽᩅᩴ ᩅᩮᩔᩅᨱᩮᩣ ᨾᩉᩣᩁᩣᨩᩣ ᩋᨲᩦᨲᨾ᩠ᨸᩥ ᩋᨴ᩠ᨵᩣᨶᩴ ᩑᩅᩁᩪᨸᩮᩣ ᩏᩊᩣᩁᩮᩣ ᩈᨲ᩠ᨳᩣ ᩋᩉᩮᩣᩈᩥ, ᩑᩅᩁᩪᨸᩴ ᩏᩊᩣᩁᩴ ᨵᨾ᩠ᨾᨠ᩠ᨡᩣᨶᩴ, ᩑᩅᩁᩪᨸᩣ ᩏᩊᩣᩁᩣ ᩅᩥᩈᩮᩈᩣᨵᩥᨣᨾᩣ ᨸᨬ᩠ᨬᩣᨿᩥᩴᩈᩩ. ᩋᨶᩣᨣᨲᨾ᩠ᨸᩥ ᩋᨴ᩠ᨵᩣᨶᩴ ᩑᩅᩁᩪᨸᩮᩣ ᩏᩊᩣᩁᩮᩣ ᩈᨲ᩠ᨳᩣ ᨽᩅᩥᩔᨲᩥ, ᩑᩅᩁᩪᨸᩴ ᩏᩊᩣᩁᩴ ᨵᨾ᩠ᨾᨠ᩠ᨡᩣᨶᩴ, ᩑᩅᩁᩪᨸᩣ ᩏᩊᩣᩁᩣ ᩅᩥᩈᩮᩈᩣᨵᩥᨣᨾᩣ ᨸᨬ᩠ᨬᩣᨿᩥᩔᨶ᩠ᨲᩦ’’’ᨲᩥ.

᪒᪙᪒. ‘‘‘ᩍᨾᨾᨲ᩠ᨳᩴ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩋᨽᩣᩈᩥ, ᩍᨾᨾᨲ᩠ᨳᩴ ᩅᩮᩔᩅᨱᩮᩣ ᨾᩉᩣᩁᩣᨩᩣ ᨻᩕᩉ᩠ᨾᩩᨶᩮᩣ ᩈᨶᨦ᩠ᨠᩩᨾᩣᩁᩔ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨽᩣᩈᨲᩮᩣ ᩈᨾ᩠ᨾᩩᨡᩣ ᩈᩩᨲᩴ [ᩈᩩᨲ᩠ᩅᩣ (ᩈᩦ. ᨸᩦ.)] ᩈᨾ᩠ᨾᩩᨡᩣ ᨸᨭᩥᨣ᩠ᨣᩉᩥᨲᩴ ᩈᨿᩴ ᨸᩁᩥᩈᩣᨿᩴ ᩌᩁᩮᩣᨧᩮᩈᩥ’’.

ᩍᨾᨾᨲ᩠ᨳᩴ ᨩᨶᩅᩈᨽᩮᩣ ᨿᨠ᩠ᨡᩮᩣ ᩅᩮᩔᩅᨱᩔ ᨾᩉᩣᩁᩣᨩᩔ ᩈᨿᩴ ᨸᩁᩥᩈᩣᨿᩴ ᨽᩣᩈᨲᩮᩣ ᩈᨾ᩠ᨾᩩᨡᩣ ᩈᩩᨲᩴ ᩈᨾ᩠ᨾᩩᨡᩣ ᨸᨭᩥᨣ᩠ᨣᩉᩥᨲᩴ [ᨸᨭᩥᨣ᩠ᨣᩉᩮᨲ᩠ᩅᩣ (ᩈᩦ. ᨸᩦ.)] ᨽᨣᩅᨲᩮᩣ ᩌᩁᩮᩣᨧᩮᩈᩥ. ᩍᨾᨾᨲ᩠ᨳᩴ ᨽᨣᩅᩣ ᨩᨶᩅᩈᨽᩔ ᨿᨠ᩠ᨡᩔ ᩈᨾ᩠ᨾᩩᨡᩣ ᩈᩩᨲ᩠ᩅᩣ ᩈᨾ᩠ᨾᩩᨡᩣ ᨸᨭᩥᨣ᩠ᨣᩉᩮᨲ᩠ᩅᩣ ᩈᩣᨾᨬ᩠ᨧ ᩋᨽᩥᨬ᩠ᨬᩣᨿ ᩌᨿᩈ᩠ᨾᨲᩮᩣ ᩌᨶᨶ᩠ᨴᩔ ᩌᩁᩮᩣᨧᩮᩈᩥ, ᩍᨾᨾᨲ᩠ᨳᨾᩣᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨲᩮᩣ ᩈᨾ᩠ᨾᩩᨡᩣ ᩈᩩᨲ᩠ᩅᩣ ᩈᨾ᩠ᨾᩩᨡᩣ ᨸᨭᩥᨣ᩠ᨣᩉᩮᨲ᩠ᩅᩣ ᩌᩁᩮᩣᨧᩮᩈᩥ ᨽᩥᨠ᩠ᨡᩪᨶᩴ ᨽᩥᨠ᩠ᨡᩩᨶᩦᨶᩴ ᩏᨸᩣᩈᨠᩣᨶᩴ ᩏᨸᩣᩈᩥᨠᩣᨶᩴ. ᨲᨿᩥᨴᩴ ᨻᩕᩉ᩠ᨾᨧᩁᩥᨿᩴ ᩍᨴ᩠ᨵᨬ᩠ᨧᩮᩅ ᨹᩦᨲᨬ᩠ᨧ ᩅᩥᨲ᩠ᨳᩣᩁᩥᨠᩴ ᨻᩣᩉᩩᨩᨬ᩠ᨬᩴ ᨸᩩᨳᩩᨽᩪᨲᩴ ᨿᩣᩅ ᨴᩮᩅᨾᨶᩩᩔᩮᩉᩥ ᩈᩩᨸ᩠ᨸᨠᩣᩈᩥᨲᨶ᩠ᨲᩥ.

ᨩᨶᩅᩈᨽᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᨸᨬ᩠ᨧᨾᩴ.

᪖. ᨾᩉᩣᨣᩮᩣᩅᩥᨶ᩠ᨴᩈᩩᨲ᩠ᨲᩴ

᪒᪙᪓. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᩁᩣᨩᨣᩉᩮ ᩅᩥᩉᩁᨲᩥ ᨣᩥᨩ᩠ᨫᨠᩪᨭᩮ ᨸᨻ᩠ᨻᨲᩮ. ᩋᨳ ᨡᩮᩣ ᨸᨬ᩠ᨧᩈᩥᨡᩮᩣ ᨣᨶ᩠ᨵᨻ᩠ᨻᨸᩩᨲ᩠ᨲᩮᩣ ᩋᨽᩥᨠ᩠ᨠᨶ᩠ᨲᩣᨿ ᩁᨲ᩠ᨲᩥᨿᩣ ᩋᨽᩥᨠ᩠ᨠᨶ᩠ᨲᩅᨱ᩠ᨱᩮᩣ ᨠᩮᩅᩃᨠᨸ᩠ᨸᩴ ᨣᩥᨩ᩠ᨫᨠᩪᨭᩴ ᨸᨻ᩠ᨻᨲᩴ ᩒᨽᩣᩈᩮᨲ᩠ᩅᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩣᩈᩥ. ᩑᨠᨾᨶ᩠ᨲᩴ ᨮᩥᨲᩮᩣ ᨡᩮᩣ ᨸᨬ᩠ᨧᩈᩥᨡᩮᩣ ᨣᨶ᩠ᨵᨻ᩠ᨻᨸᩩᨲ᩠ᨲᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᨿᩴ ᨡᩮᩣ ᨾᩮ, ᨽᨶ᩠ᨲᩮ, ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᨾ᩠ᨾᩩᨡᩣ ᩈᩩᨲᩴ ᩈᨾ᩠ᨾᩩᨡᩣ ᨸᨭᩥᨣ᩠ᨣᩉᩥᨲᩴ, ᩌᩁᩮᩣᨧᩮᨾᩥ ᨲᩴ ᨽᨣᩅᨲᩮᩣ’’ᨲᩥ. ‘‘ᩌᩁᩮᩣᨧᩮᩉᩥ ᨾᩮ ᨲ᩠ᩅᩴ, ᨸᨬ᩠ᨧᩈᩥᨡᩣ’’ᨲᩥ ᨽᨣᩅᩣ ᩋᩅᩮᩣᨧ.

ᨴᩮᩅᩈᨽᩣ

᪒᪙᪔. ‘‘ᨸᩩᩁᩥᨾᩣᨶᩥ, ᨽᨶ᩠ᨲᩮ, ᨴᩥᩅᩈᩣᨶᩥ ᨸᩩᩁᩥᨾᨲᩁᩣᨶᩥ ᨲᨴᩉᩩᨸᩮᩣᩈᨳᩮ ᨸᨶ᩠ᨶᩁᩈᩮ ᨸᩅᩣᩁᨱᩣᨿ ᨸᩩᨱ᩠ᨱᩣᨿ ᨸᩩᨱ᩠ᨱᨾᩣᨿ ᩁᨲ᩠ᨲᩥᨿᩣ ᨠᩮᩅᩃᨠᨸ᩠ᨸᩣ ᨧ ᨴᩮᩅᩣ ᨲᩣᩅᨲᩥᩴᩈᩣ ᩈᩩᨵᨾ᩠ᨾᩣᨿᩴ ᩈᨽᩣᨿᩴ ᩈᨶ᩠ᨶᩥᩈᩥᨶ᩠ᨶᩣ ᩉᩮᩣᨶ᩠ᨲᩥ ᩈᨶ᩠ᨶᩥᨸᨲᩥᨲᩣ; ᨾᩉᨲᩦ ᨧ ᨴᩥᨻ᩠ᨻᨸᩁᩥᩈᩣ ᩈᨾᨶ᩠ᨲᨲᩮᩣ ᨶᩥᩈᩥᨶ᩠ᨶᩣ ᩉᩮᩣᨶ᩠ᨲᩥ, ᨧᨲ᩠ᨲᩣᩁᩮᩣ ᨧ ᨾᩉᩣᩁᩣᨩᩣᨶᩮᩣ ᨧᨲᩩᨴ᩠ᨴᩥᩈᩣ ᨶᩥᩈᩥᨶ᩠ᨶᩣ ᩉᩮᩣᨶ᩠ᨲᩥ; ᨸᩩᩁᨲ᩠ᨳᩥᨾᩣᨿ ᨴᩥᩈᩣᨿ ᨵᨲᩁᨭ᩠ᨮᩮᩣ ᨾᩉᩣᩁᩣᨩᩣ ᨸᨧ᩠ᨨᩥᨾᩣᨽᩥᨾᩩᨡᩮᩣ ᨶᩥᩈᩥᨶ᩠ᨶᩮᩣ ᩉᩮᩣᨲᩥ ᨴᩮᩅᩮ ᨸᩩᩁᨠ᩠ᨡᨲ᩠ᩅᩣ; ᨴᨠ᩠ᨡᩥᨱᩣᨿ ᨴᩥᩈᩣᨿ ᩅᩥᩁᩪᩊ᩠ᩉᨠᩮᩣ ᨾᩉᩣᩁᩣᨩᩣ ᩏᨲ᩠ᨲᩁᩣᨽᩥᨾᩩᨡᩮᩣ ᨶᩥᩈᩥᨶ᩠ᨶᩮᩣ ᩉᩮᩣᨲᩥ ᨴᩮᩅᩮ ᨸᩩᩁᨠ᩠ᨡᨲ᩠ᩅᩣ; ᨸᨧ᩠ᨨᩥᨾᩣᨿ ᨴᩥᩈᩣᨿ ᩅᩥᩁᩪᨸᨠ᩠ᨡᩮᩣ ᨾᩉᩣᩁᩣᨩᩣ ᨸᩩᩁᨲ᩠ᨳᩣᨽᩥᨾᩩᨡᩮᩣ ᨶᩥᩈᩥᨶ᩠ᨶᩮᩣ ᩉᩮᩣᨲᩥ ᨴᩮᩅᩮ ᨸᩩᩁᨠ᩠ᨡᨲ᩠ᩅᩣ; ᩏᨲ᩠ᨲᩁᩣᨿ ᨴᩥᩈᩣᨿ ᩅᩮᩔᩅᨱᩮᩣ ᨾᩉᩣᩁᩣᨩᩣ ᨴᨠ᩠ᨡᩥᨱᩣᨽᩥᨾᩩᨡᩮᩣ ᨶᩥᩈᩥᨶ᩠ᨶᩮᩣ ᩉᩮᩣᨲᩥ ᨴᩮᩅᩮ ᨸᩩᩁᨠ᩠ᨡᨲ᩠ᩅᩣ. ᨿᨴᩣ ᨽᨶ᩠ᨲᩮ, ᨠᩮᩅᩃᨠᨸ᩠ᨸᩣ ᨧ ᨴᩮᩅᩣ ᨲᩣᩅᨲᩥᩴᩈᩣ ᩈᩩᨵᨾ᩠ᨾᩣᨿᩴ ᩈᨽᩣᨿᩴ ᩈᨶ᩠ᨶᩥᩈᩥᨶ᩠ᨶᩣ ᩉᩮᩣᨶ᩠ᨲᩥ ᩈᨶ᩠ᨶᩥᨸᨲᩥᨲᩣ, ᨾᩉᨲᩦ ᨧ ᨴᩥᨻ᩠ᨻᨸᩁᩥᩈᩣ ᩈᨾᨶ᩠ᨲᨲᩮᩣ ᨶᩥᩈᩥᨶ᩠ᨶᩣ ᩉᩮᩣᨶ᩠ᨲᩥ, ᨧᨲ᩠ᨲᩣᩁᩮᩣ ᨧ ᨾᩉᩣᩁᩣᨩᩣᨶᩮᩣ ᨧᨲᩩᨴ᩠ᨴᩥᩈᩣ ᨶᩥᩈᩥᨶ᩠ᨶᩣ ᩉᩮᩣᨶ᩠ᨲᩥ, ᩍᨴᩴ ᨶᩮᩈᩴ ᩉᩮᩣᨲᩥ ᩌᩈᨶᩈ᩠ᨾᩥᩴ; ᩋᨳ ᨸᨧ᩠ᨨᩣ ᩋᨾ᩠ᩉᩣᨠᩴ ᩌᩈᨶᩴ ᩉᩮᩣᨲᩥ.

‘‘ᨿᩮ ᨲᩮ, ᨽᨶ᩠ᨲᩮ, ᨴᩮᩅᩣ ᨽᨣᩅᨲᩥ ᨻᩕᩉ᩠ᨾᨧᩁᩥᨿᩴ ᨧᩁᩥᨲ᩠ᩅᩣ ᩋᨵᩩᨶᩪᨸᨸᨶ᩠ᨶᩣ ᨲᩣᩅᨲᩥᩴᩈᨠᩣᨿᩴ, ᨲᩮ ᩋᨬ᩠ᨬᩮ ᨴᩮᩅᩮ ᩋᨲᩥᩁᩮᩣᨧᨶ᩠ᨲᩥ ᩅᨱ᩠ᨱᩮᨶ ᨧᩮᩅ ᨿᩈᩈᩣ ᨧ. ᨲᩮᨶ ᩈᩩᨴᩴ, ᨽᨶ᩠ᨲᩮ, ᨴᩮᩅᩣ ᨲᩣᩅᨲᩥᩴᩈᩣ ᩋᨲ᩠ᨲᨾᨶᩣ ᩉᩮᩣᨶ᩠ᨲᩥ ᨸᨾᩩᨴᩥᨲᩣ ᨸᩦᨲᩥᩈᩮᩣᨾᨶᩔᨩᩣᨲᩣ; ‘ᨴᩥᨻ᩠ᨻᩣ ᩅᨲ, ᨽᩮᩣ, ᨠᩣᨿᩣ ᨸᩁᩥᨸᩪᩁᩮᨶ᩠ᨲᩥ, ᩉᩣᨿᨶ᩠ᨲᩥ ᩋᩈᩩᩁᨠᩣᨿᩣ’ᨲᩥ.

᪒᪙᪕. ‘‘ᩋᨳ ᨡᩮᩣ, ᨽᨶ᩠ᨲᩮ, ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᨾ᩠ᨸᩈᩣᨴᩴ ᩅᩥᨴᩥᨲ᩠ᩅᩣ ᩍᨾᩣᩉᩥ ᨣᩣᨳᩣᩉᩥ ᩋᨶᩩᨾᩮᩣᨴᩥ –

‘ᨾᩮᩣᨴᨶ᩠ᨲᩥ ᩅᨲ ᨽᩮᩣ ᨴᩮᩅᩣ, ᨲᩣᩅᨲᩥᩴᩈᩣ ᩈᩉᩥᨶ᩠ᨴᨠᩣ;

ᨲᨳᩣᨣᨲᩴ ᨶᨾᩔᨶ᩠ᨲᩣ, ᨵᨾ᩠ᨾᩔ ᨧ ᩈᩩᨵᨾ᩠ᨾᨲᩴ.

ᨶᩅᩮ ᨴᩮᩅᩮ ᨧ ᨸᩔᨶ᩠ᨲᩣ, ᩅᨱ᩠ᨱᩅᨶ᩠ᨲᩮ ᨿᩈᩔᩥᨶᩮ;

ᩈᩩᨣᨲᩈ᩠ᨾᩥᩴ ᨻᩕᩉ᩠ᨾᨧᩁᩥᨿᩴ, ᨧᩁᩥᨲ᩠ᩅᩣᨶ ᩍᨵᩣᨣᨲᩮ.

ᨲᩮ ᩋᨬ᩠ᨬᩮ ᩋᨲᩥᩁᩮᩣᨧᨶ᩠ᨲᩥ, ᩅᨱ᩠ᨱᩮᨶ ᨿᩈᩈᩣᨿᩩᨶᩣ;

ᩈᩣᩅᨠᩣ ᨽᩪᩁᩥᨸᨬ᩠ᨬᩔ, ᩅᩥᩈᩮᩈᩪᨸᨣᨲᩣ ᩍᨵ.

ᩍᨴᩴ ᨴᩥᩈ᩠ᩅᩣᨶ ᨶᨶ᩠ᨴᨶ᩠ᨲᩥ, ᨲᩣᩅᨲᩥᩴᩈᩣ ᩈᩉᩥᨶ᩠ᨴᨠᩣ;

ᨲᨳᩣᨣᨲᩴ ᨶᨾᩔᨶ᩠ᨲᩣ, ᨵᨾ᩠ᨾᩔ ᨧ ᩈᩩᨵᨾ᩠ᨾᨲ’ᨶ᩠ᨲᩥ.

‘‘ᨲᩮᨶ ᩈᩩᨴᩴ, ᨽᨶ᩠ᨲᩮ, ᨴᩮᩅᩣ ᨲᩣᩅᨲᩥᩴᩈᩣ ᨽᩥᨿ᩠ᨿᩮᩣᩈᩮᩣ ᨾᨲ᩠ᨲᩣᨿ ᩋᨲ᩠ᨲᨾᨶᩣ ᩉᩮᩣᨶ᩠ᨲᩥ ᨸᨾᩩᨴᩥᨲᩣ ᨸᩦᨲᩥᩈᩮᩣᨾᨶᩔᨩᩣᨲᩣ; ‘ᨴᩥᨻ᩠ᨻᩣ ᩅᨲ, ᨽᩮᩣ, ᨠᩣᨿᩣ ᨸᩁᩥᨸᩪᩁᩮᨶ᩠ᨲᩥ, ᩉᩣᨿᨶ᩠ᨲᩥ ᩋᩈᩩᩁᨠᩣᨿᩣ’’’ᨲᩥ.

ᩋᨭ᩠ᨮ ᨿᨳᩣᨽᩩᨧ᩠ᨧᩅᨱ᩠ᨱᩣ

᪒᪙᪖. ‘‘ᩋᨳ ᨡᩮᩣ, ᨽᨶ᩠ᨲᩮ, ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᨾ᩠ᨸᩈᩣᨴᩴ ᩅᩥᨴᩥᨲ᩠ᩅᩣ ᨴᩮᩅᩮ ᨲᩣᩅᨲᩥᩴᩈᩮ ᩌᨾᨶ᩠ᨲᩮᩈᩥ – ‘ᩍᨧ᩠ᨨᩮᨿ᩠ᨿᩣᨳ ᨶᩮᩣ ᨲᩩᨾ᩠ᩉᩮ, ᨾᩣᩁᩥᩈᩣ, ᨲᩔ ᨽᨣᩅᨲᩮᩣ ᩋᨭ᩠ᨮ ᨿᨳᩣᨽᩩᨧ᩠ᨧᩮ ᩅᨱ᩠ᨱᩮ ᩈᩮᩣᨲᩩ’ᨶ᩠ᨲᩥ? ‘ᩍᨧ᩠ᨨᩣᨾ ᨾᨿᩴ, ᨾᩣᩁᩥᩈ, ᨲᩔ ᨽᨣᩅᨲᩮᩣ ᩋᨭ᩠ᨮ ᨿᨳᩣᨽᩩᨧ᩠ᨧᩮ ᩅᨱ᩠ᨱᩮ ᩈᩮᩣᨲᩩ’ᨶ᩠ᨲᩥ. ᩋᨳ ᨡᩮᩣ, ᨽᨶ᩠ᨲᩮ, ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨽᨣᩅᨲᩮᩣ ᩋᨭ᩠ᨮ ᨿᨳᩣᨽᩩᨧ᩠ᨧᩮ ᩅᨱ᩠ᨱᩮ ᨸᨿᩥᩁᩩᨴᩣᩉᩣᩈᩥ – ‘ᨲᩴ ᨠᩥᩴ ᨾᨬ᩠ᨬᨶ᩠ᨲᩥ, ᨽᩮᩣᨶ᩠ᨲᩮᩣ ᨴᩮᩅᩣ ᨲᩣᩅᨲᩥᩴᩈᩣ? ᨿᩣᩅᨬ᩠ᨧ ᩈᩮᩣ ᨽᨣᩅᩣ ᨻᩉᩩᨩᨶᩉᩥᨲᩣᨿ ᨸᨭᩥᨸᨶ᩠ᨶᩮᩣ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᩑᩅᩴ ᨻᩉᩩᨩᨶᩉᩥᨲᩣᨿ ᨸᨭᩥᨸᨶ᩠ᨶᩴ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ ᩍᨾᩥᨶᩣᨸᨦ᩠ᨣᩮᨶ ᩈᨾᨶ᩠ᨶᩣᨣᨲᩴ ᩈᨲ᩠ᨳᩣᩁᩴ ᨶᩮᩅ ᩋᨲᩦᨲᩴᩈᩮ ᩈᨾᨶᩩᨸᩔᩣᨾ, ᨶ ᨸᨶᩮᨲᩁᩉᩥ, ᩋᨬ᩠ᨬᨲᩕ ᨲᩮᨶ ᨽᨣᩅᨲᩣ.

‘‘ᩈ᩠ᩅᩣᨠ᩠ᨡᩣᨲᩮᩣ ᨡᩮᩣ ᨸᨶ ᨲᩮᨶ ᨽᨣᩅᨲᩣ ᨵᨾ᩠ᨾᩮᩣ ᩈᨶ᩠ᨴᩥᨭ᩠ᨮᩥᨠᩮᩣ ᩋᨠᩣᩃᩥᨠᩮᩣ ᩑᩉᩥᨸᩔᩥᨠᩮᩣ ᩒᨸᨶᩮᨿ᩠ᨿᩥᨠᩮᩣ ᨸᨧ᩠ᨧᨲ᩠ᨲᩴ ᩅᩮᨴᩥᨲᨻ᩠ᨻᩮᩣ ᩅᩥᨬ᩠ᨬᩪᩉᩥ. ᩑᩅᩴ ᩒᨸᨶᩮᨿ᩠ᨿᩥᨠᩔ ᨵᨾ᩠ᨾᩔ ᨴᩮᩈᩮᨲᩣᩁᩴ ᩍᨾᩥᨶᩣᨸᨦ᩠ᨣᩮᨶ ᩈᨾᨶ᩠ᨶᩣᨣᨲᩴ ᩈᨲ᩠ᨳᩣᩁᩴ ᨶᩮᩅ ᩋᨲᩦᨲᩴᩈᩮ ᩈᨾᨶᩩᨸᩔᩣᨾ, ᨶ ᨸᨶᩮᨲᩁᩉᩥ, ᩋᨬ᩠ᨬᨲᩕ ᨲᩮᨶ ᨽᨣᩅᨲᩣ.

‘‘ᩍᨴᩴ ᨠᩩᩈᩃᨶ᩠ᨲᩥ ᨡᩮᩣ ᨸᨶ ᨲᩮᨶ ᨽᨣᩅᨲᩣ ᩈᩩᨸᨬ᩠ᨬᨲ᩠ᨲᩴ, ᩍᨴᩴ ᩋᨠᩩᩈᩃᨶ᩠ᨲᩥ ᩈᩩᨸᨬ᩠ᨬᨲ᩠ᨲᩴ. ᩍᨴᩴ ᩈᩣᩅᨩ᩠ᨩᩴ ᩍᨴᩴ ᩋᨶᩅᨩ᩠ᨩᩴ, ᩍᨴᩴ ᩈᩮᩅᩥᨲᨻ᩠ᨻᩴ ᩍᨴᩴ ᨶ ᩈᩮᩅᩥᨲᨻ᩠ᨻᩴ, ᩍᨴᩴ ᩉᩦᨶᩴ ᩍᨴᩴ ᨸᨱᩦᨲᩴ, ᩍᨴᩴ ᨠᨱ᩠ᩉᩈᩩᨠ᩠ᨠᩈᨸ᩠ᨸᨭᩥᨽᩣᨣᨶ᩠ᨲᩥ ᩈᩩᨸᨬ᩠ᨬᨲ᩠ᨲᩴ. ᩑᩅᩴ ᨠᩩᩈᩃᩣᨠᩩᩈᩃᩈᩣᩅᨩ᩠ᨩᩣᨶᩅᨩ᩠ᨩᩈᩮᩅᩥᨲᨻ᩠ᨻᩣᩈᩮᩅᩥᨲᨻ᩠ᨻᩉᩦᨶ-ᨸᨱᩦᨲᨠᨱ᩠ᩉᩈᩩᨠ᩠ᨠᩈᨸ᩠ᨸᨭᩥᨽᩣᨣᩣᨶᩴ ᨵᨾ᩠ᨾᩣᨶᩴ ᨸᨬ᩠ᨬᨸᩮᨲᩣᩁᩴ ᩍᨾᩥᨶᩣᨸᨦ᩠ᨣᩮᨶ ᩈᨾᨶ᩠ᨶᩣᨣᨲᩴ ᩈᨲ᩠ᨳᩣᩁᩴ ᨶᩮᩅ ᩋᨲᩦᨲᩴᩈᩮ ᩈᨾᨶᩩᨸᩔᩣᨾ, ᨶ ᨸᨶᩮᨲᩁᩉᩥ, ᩋᨬ᩠ᨬᨲᩕ ᨲᩮᨶ ᨽᨣᩅᨲᩣ.

‘‘ᩈᩩᨸᨬ᩠ᨬᨲ᩠ᨲᩣ ᨡᩮᩣ ᨸᨶ ᨲᩮᨶ ᨽᨣᩅᨲᩣ ᩈᩣᩅᨠᩣᨶᩴ ᨶᩥᨻ᩠ᨻᩣᨶᨣᩣᨾᩥᨶᩦ ᨸᨭᩥᨸᨴᩣ, ᩈᩴᩈᨶ᩠ᨴᨲᩥ ᨶᩥᨻ᩠ᨻᩣᨶᨬ᩠ᨧ ᨸᨭᩥᨸᨴᩣ ᨧ. ᩈᩮᨿ᩠ᨿᨳᩣᨸᩥ ᨶᩣᨾ ᨣᨦ᩠ᨣᩮᩣᨴᨠᩴ ᨿᨾᩩᨶᩮᩣᨴᨠᩮᨶ ᩈᩴᩈᨶ᩠ᨴᨲᩥ ᩈᨾᩮᨲᩥ, ᩑᩅᨾᩮᩅ ᩈᩩᨸᨬ᩠ᨬᨲ᩠ᨲᩣ ᨲᩮᨶ ᨽᨣᩅᨲᩣ ᩈᩣᩅᨠᩣᨶᩴ ᨶᩥᨻ᩠ᨻᩣᨶᨣᩣᨾᩥᨶᩦ ᨸᨭᩥᨸᨴᩣ, ᩈᩴᩈᨶ᩠ᨴᨲᩥ ᨶᩥᨻ᩠ᨻᩣᨶᨬ᩠ᨧ ᨸᨭᩥᨸᨴᩣ ᨧ. ᩑᩅᩴ ᨶᩥᨻ᩠ᨻᩣᨶᨣᩣᨾᩥᨶᩥᨿᩣ ᨸᨭᩥᨸᨴᩣᨿ ᨸᨬ᩠ᨬᨸᩮᨲᩣᩁᩴ ᩍᨾᩥᨶᩣᨸᨦ᩠ᨣᩮᨶ ᩈᨾᨶ᩠ᨶᩣᨣᨲᩴ ᩈᨲ᩠ᨳᩣᩁᩴ ᨶᩮᩅ ᩋᨲᩦᨲᩴᩈᩮ ᩈᨾᨶᩩᨸᩔᩣᨾ, ᨶ ᨸᨶᩮᨲᩁᩉᩥ, ᩋᨬ᩠ᨬᨲᩕ ᨲᩮᨶ ᨽᨣᩅᨲᩣ.

‘‘ᩋᨽᩥᨶᩥᨸ᩠ᨹᨶ᩠ᨶᩮᩣ [ᩋᨽᩥᨶᩥᨸ᩠ᨸᨶ᩠ᨶᩮᩣ (ᨸᩦ. ᨠ.)] ᨡᩮᩣ ᨸᨶ ᨲᩔ ᨽᨣᩅᨲᩮᩣ ᩃᩣᨽᩮᩣ ᩋᨽᩥᨶᩥᨸ᩠ᨹᨶ᩠ᨶᩮᩣ ᩈᩥᩃᩮᩣᨠᩮᩣ, ᨿᩣᩅ ᨾᨬ᩠ᨬᩮ ᨡᨲ᩠ᨲᩥᨿᩣ ᩈᨾ᩠ᨸᩥᨿᩣᨿᨾᩣᨶᩁᩪᨸᩣ ᩅᩥᩉᩁᨶ᩠ᨲᩥ, ᩅᩥᨣᨲᨾᨴᩮᩣ ᨡᩮᩣ ᨸᨶ ᩈᩮᩣ ᨽᨣᩅᩣ ᩌᩉᩣᩁᩴ ᩌᩉᩣᩁᩮᨲᩥ. ᩑᩅᩴ ᩅᩥᨣᨲᨾᨴᩴ ᩌᩉᩣᩁᩴ ᩌᩉᩁᨿᨾᩣᨶᩴ ᩍᨾᩥᨶᩣᨸᨦ᩠ᨣᩮᨶ ᩈᨾᨶ᩠ᨶᩣᨣᨲᩴ ᩈᨲ᩠ᨳᩣᩁᩴ ᨶᩮᩅ ᩋᨲᩦᨲᩴᩈᩮ ᩈᨾᨶᩩᨸᩔᩣᨾ, ᨶ ᨸᨶᩮᨲᩁᩉᩥ, ᩋᨬ᩠ᨬᨲᩕ ᨲᩮᨶ ᨽᨣᩅᨲᩣ.

‘‘ᩃᨴ᩠ᨵᩈᩉᩣᨿᩮᩣ ᨡᩮᩣ ᨸᨶ ᩈᩮᩣ ᨽᨣᩅᩣ ᩈᩮᨡᩣᨶᨬ᩠ᨧᩮᩅ ᨸᨭᩥᨸᨶ᩠ᨶᩣᨶᩴ ᨡᩦᨱᩣᩈᩅᩣᨶᨬ᩠ᨧ ᩅᩩᩈᩥᨲᩅᨲᩴ. ᨲᩮ ᨽᨣᩅᩣ ᩋᨸᨶᩩᨩ᩠ᨩ ᩑᨠᩣᩁᩣᨾᨲᩴ ᩋᨶᩩᨿᩩᨲ᩠ᨲᩮᩣ ᩅᩥᩉᩁᨲᩥ. ᩑᩅᩴ ᩑᨠᩣᩁᩣᨾᨲᩴ ᩋᨶᩩᨿᩩᨲ᩠ᨲᩴ ᩍᨾᩥᨶᩣᨸᨦ᩠ᨣᩮᨶ ᩈᨾᨶ᩠ᨶᩣᨣᨲᩴ ᩈᨲ᩠ᨳᩣᩁᩴ ᨶᩮᩅ ᩋᨲᩦᨲᩴᩈᩮ ᩈᨾᨶᩩᨸᩔᩣᨾ, ᨶ ᨸᨶᩮᨲᩁᩉᩥ, ᩋᨬ᩠ᨬᨲᩕ ᨲᩮᨶ ᨽᨣᩅᨲᩣ.

‘‘ᨿᨳᩣᩅᩣᨴᩦ ᨡᩮᩣ ᨸᨶ ᩈᩮᩣ ᨽᨣᩅᩣ ᨲᨳᩣᨠᩣᩁᩦ, ᨿᨳᩣᨠᩣᩁᩦ ᨲᨳᩣᩅᩣᨴᩦ, ᩍᨲᩥ ᨿᨳᩣᩅᩣᨴᩦ ᨲᨳᩣᨠᩣᩁᩦ, ᨿᨳᩣᨠᩣᩁᩦ ᨲᨳᩣᩅᩣᨴᩦ. ᩑᩅᩴ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩴ ᩍᨾᩥᨶᩣᨸᨦ᩠ᨣᩮᨶ ᩈᨾᨶ᩠ᨶᩣᨣᨲᩴ ᩈᨲ᩠ᨳᩣᩁᩴ ᨶᩮᩅ ᩋᨲᩦᨲᩴᩈᩮ ᩈᨾᨶᩩᨸᩔᩣᨾ, ᨶ ᨸᨶᩮᨲᩁᩉᩥ, ᩋᨬ᩠ᨬᨲᩕ ᨲᩮᨶ ᨽᨣᩅᨲᩣ.

‘‘ᨲᩥᨱ᩠ᨱᩅᩥᨧᩥᨠᩥᨧ᩠ᨨᩮᩣ ᨡᩮᩣ ᨸᨶ ᩈᩮᩣ ᨽᨣᩅᩣ ᩅᩥᨣᨲᨠᨳᩴᨠᨳᩮᩣ ᨸᩁᩥᨿᩮᩣᩈᩥᨲᩈᨦ᩠ᨠᨸ᩠ᨸᩮᩣ ᩋᨩ᩠ᨫᩣᩈᨿᩴ ᩌᨴᩥᨻᩕᩉ᩠ᨾᨧᩁᩥᨿᩴ. ᩑᩅᩴ ᨲᩥᨱ᩠ᨱᩅᩥᨧᩥᨠᩥᨧ᩠ᨨᩴ ᩅᩥᨣᨲᨠᨳᩴᨠᨳᩴ ᨸᩁᩥᨿᩮᩣᩈᩥᨲᩈᨦ᩠ᨠᨸ᩠ᨸᩴ ᩋᨩ᩠ᨫᩣᩈᨿᩴ ᩌᨴᩥᨻᩕᩉ᩠ᨾᨧᩁᩥᨿᩴ ᩍᨾᩥᨶᩣᨸᨦ᩠ᨣᩮᨶ ᩈᨾᨶ᩠ᨶᩣᨣᨲᩴ ᩈᨲ᩠ᨳᩣᩁᩴ ᨶᩮᩅ ᩋᨲᩦᨲᩴᩈᩮ ᩈᨾᨶᩩᨸᩔᩣᨾ, ᨶ ᨸᨶᩮᨲᩁᩉᩥ, ᩋᨬ᩠ᨬᨲᩕ ᨲᩮᨶ ᨽᨣᩅᨲᩣ’ᨲᩥ.

᪒᪙᪗. ‘‘ᩍᨾᩮ ᨡᩮᩣ, ᨽᨶ᩠ᨲᩮ, ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨽᨣᩅᨲᩮᩣ ᩋᨭ᩠ᨮ ᨿᨳᩣᨽᩩᨧ᩠ᨧᩮ ᩅᨱ᩠ᨱᩮ ᨸᨿᩥᩁᩩᨴᩣᩉᩣᩈᩥ. ᨲᩮᨶ ᩈᩩᨴᩴ, ᨽᨶ᩠ᨲᩮ, ᨴᩮᩅᩣ ᨲᩣᩅᨲᩥᩴᩈᩣ ᨽᩥᨿ᩠ᨿᩮᩣᩈᩮᩣ ᨾᨲ᩠ᨲᩣᨿ ᩋᨲ᩠ᨲᨾᨶᩣ ᩉᩮᩣᨶ᩠ᨲᩥ ᨸᨾᩩᨴᩥᨲᩣ ᨸᩦᨲᩥᩈᩮᩣᨾᨶᩔᨩᩣᨲᩣ ᨽᨣᩅᨲᩮᩣ ᩋᨭ᩠ᨮ ᨿᨳᩣᨽᩩᨧ᩠ᨧᩮ ᩅᨱ᩠ᨱᩮ ᩈᩩᨲ᩠ᩅᩣ. ᨲᨲᩕ, ᨽᨶ᩠ᨲᩮ, ᩑᨠᨧ᩠ᨧᩮ ᨴᩮᩅᩣ ᩑᩅᨾᩣᩉᩴᩈᩩ – ‘ᩋᩉᩮᩣ ᩅᨲ, ᨾᩣᩁᩥᩈᩣ, ᨧᨲ᩠ᨲᩣᩁᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ ᩃᩮᩣᨠᩮ ᩏᨸ᩠ᨸᨩ᩠ᨩᩮᨿ᩠ᨿᩩᩴ ᨵᨾ᩠ᨾᨬ᩠ᨧ ᨴᩮᩈᩮᨿ᩠ᨿᩩᩴ ᨿᨳᩁᩥᩅ ᨽᨣᩅᩣ. ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶ’ᨶ᩠ᨲᩥ. ᩑᨠᨧ᩠ᨧᩮ ᨴᩮᩅᩣ ᩑᩅᨾᩣᩉᩴᩈᩩ – ‘ᨲᩥᨭ᩠ᨮᨶ᩠ᨲᩩ, ᨾᩣᩁᩥᩈᩣ, ᨧᨲ᩠ᨲᩣᩁᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᩋᩉᩮᩣ ᩅᨲ, ᨾᩣᩁᩥᩈᩣ, ᨲᨿᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ ᩃᩮᩣᨠᩮ ᩏᨸ᩠ᨸᨩ᩠ᨩᩮᨿ᩠ᨿᩩᩴ ᨵᨾ᩠ᨾᨬ᩠ᨧ ᨴᩮᩈᩮᨿ᩠ᨿᩩᩴ ᨿᨳᩁᩥᩅ ᨽᨣᩅᩣ. ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶ’ᨶ᩠ᨲᩥ. ᩑᨠᨧ᩠ᨧᩮ ᨴᩮᩅᩣ ᩑᩅᨾᩣᩉᩴᩈᩩ – ‘ᨲᩥᨭ᩠ᨮᨶ᩠ᨲᩩ, ᨾᩣᩁᩥᩈᩣ, ᨲᨿᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᩋᩉᩮᩣ ᩅᨲ, ᨾᩣᩁᩥᩈᩣ, ᨴ᩠ᩅᩮ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ ᩃᩮᩣᨠᩮ ᩏᨸ᩠ᨸᨩ᩠ᨩᩮᨿ᩠ᨿᩩᩴ ᨵᨾ᩠ᨾᨬ᩠ᨧ ᨴᩮᩈᩮᨿ᩠ᨿᩩᩴ ᨿᨳᩁᩥᩅ ᨽᨣᩅᩣ. ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶ’ᨶ᩠ᨲᩥ.

᪒᪙᪘. ‘‘ᩑᩅᩴ ᩅᩩᨲ᩠ᨲᩮ, ᨽᨶ᩠ᨲᩮ, ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨴᩮᩅᩮ ᨲᩣᩅᨲᩥᩴᩈᩮ ᩑᨲᨴᩅᩮᩣᨧ – ‘ᩋᨭ᩠ᨮᩣᨶᩴ ᨡᩮᩣ ᩑᨲᩴ, ᨾᩣᩁᩥᩈᩣ, ᩋᨶᩅᨠᩣᩈᩮᩣ, ᨿᩴ ᩑᨠᩥᩔᩣ ᩃᩮᩣᨠᨵᩣᨲᩩᨿᩣ ᨴ᩠ᩅᩮ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ ᩋᨸᩩᨻ᩠ᨻᩴ ᩋᨧᩁᩥᨾᩴ ᩏᨸ᩠ᨸᨩ᩠ᨩᩮᨿ᩠ᨿᩩᩴ, ᨶᩮᨲᩴ ᨮᩣᨶᩴ ᩅᩥᨩ᩠ᨩᨲᩥ. ᩋᩉᩮᩣ ᩅᨲ, ᨾᩣᩁᩥᩈᩣ, ᩈᩮᩣ ᨽᨣᩅᩣ ᩋᨸ᩠ᨸᩣᨻᩣᨵᩮᩣ ᩋᨸ᩠ᨸᩣᨲᨦ᩠ᨠᩮᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᨲᩥᨭ᩠ᨮᩮᨿ᩠ᨿ. ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶ’ᨶ᩠ᨲᩥ. ᩋᨳ ᨡᩮᩣ, ᨽᨶ᩠ᨲᩮ, ᨿᩮᨶᨲ᩠ᨳᩮᨶ ᨴᩮᩅᩣ ᨲᩣᩅᨲᩥᩴᩈᩣ ᩈᩩᨵᨾ᩠ᨾᩣᨿᩴ ᩈᨽᩣᨿᩴ ᩈᨶ᩠ᨶᩥᩈᩥᨶ᩠ᨶᩣ ᩉᩮᩣᨶ᩠ᨲᩥ ᩈᨶ᩠ᨶᩥᨸᨲᩥᨲᩣ, ᨲᩴ ᩋᨲ᩠ᨳᩴ ᨧᩥᨶ᩠ᨲᨿᩥᨲ᩠ᩅᩣ ᨲᩴ ᩋᨲ᩠ᨳᩴ ᨾᨶ᩠ᨲᨿᩥᨲ᩠ᩅᩣ ᩅᩩᨲ᩠ᨲᩅᨧᨶᩣᨸᩥ ᨲᩴ ᨧᨲ᩠ᨲᩣᩁᩮᩣ ᨾᩉᩣᩁᩣᨩᩣᨶᩮᩣ ᨲᩈ᩠ᨾᩥᩴ ᩋᨲ᩠ᨳᩮ ᩉᩮᩣᨶ᩠ᨲᩥ. ᨸᨧ᩠ᨧᩣᨶᩩᩈᩥᨭ᩠ᨮᩅᨧᨶᩣᨸᩥ ᨲᩴ ᨧᨲ᩠ᨲᩣᩁᩮᩣ ᨾᩉᩣᩁᩣᨩᩣᨶᩮᩣ ᨲᩈ᩠ᨾᩥᩴ ᩋᨲ᩠ᨳᩮ ᩉᩮᩣᨶ᩠ᨲᩥ, ᩈᨠᩮᩈᩩ ᩈᨠᩮᩈᩩ ᩌᩈᨶᩮᩈᩩ ᨮᩥᨲᩣ ᩋᩅᩥᨸᨠ᩠ᨠᨶ᩠ᨲᩣ.

ᨲᩮ ᩅᩩᨲ᩠ᨲᩅᩣᨠ᩠ᨿᩣ ᩁᩣᨩᩣᨶᩮᩣ, ᨸᨭᩥᨣ᩠ᨣᨿ᩠ᩉᩣᨶᩩᩈᩣᩈᨶᩥᩴ;

ᩅᩥᨸ᩠ᨸᩈᨶ᩠ᨶᨾᨶᩣ ᩈᨶ᩠ᨲᩣ, ᩋᨭ᩠ᨮᩴᩈᩩ ᩈᨾ᩠ᩉᩥ ᩌᩈᨶᩮᨲᩥ.

᪒᪙᪙. ‘‘ᩋᨳ ᨡᩮᩣ, ᨽᨶ᩠ᨲᩮ, ᩏᨲ᩠ᨲᩁᩣᨿ ᨴᩥᩈᩣᨿ ᩏᩊᩣᩁᩮᩣ ᩌᩃᩮᩣᨠᩮᩣ ᩈᨬ᩠ᨩᩣᨿᩥ, ᩒᨽᩣᩈᩮᩣ ᨸᩣᨲᩩᩁᩉᩮᩣᩈᩥ ᩋᨲᩥᨠ᩠ᨠᨾ᩠ᨾᩮᩅ ᨴᩮᩅᩣᨶᩴ ᨴᩮᩅᩣᨶᩩᨽᩣᩅᩴ. ᩋᨳ ᨡᩮᩣ, ᨽᨶ᩠ᨲᩮ, ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨴᩮᩅᩮ ᨲᩣᩅᨲᩥᩴᩈᩮ ᩌᨾᨶ᩠ᨲᩮᩈᩥ – ‘ᨿᨳᩣ ᨡᩮᩣ, ᨾᩣᩁᩥᩈᩣ, ᨶᩥᨾᩥᨲ᩠ᨲᩣᨶᩥ ᨴᩥᩔᨶ᩠ᨲᩥ, ᩏᩊᩣᩁᩮᩣ ᩌᩃᩮᩣᨠᩮᩣ ᩈᨬ᩠ᨩᩣᨿᨲᩥ, ᩒᨽᩣᩈᩮᩣ ᨸᩣᨲᩩᨽᩅᨲᩥ, ᨻᩕᩉ᩠ᨾᩣ ᨸᩣᨲᩩᨽᩅᩥᩔᨲᩥ; ᨻᩕᩉ᩠ᨾᩩᨶᩮᩣ ᩉᩮᨲᩴ ᨸᩩᨻ᩠ᨻᨶᩥᨾᩥᨲ᩠ᨲᩴ ᨸᩣᨲᩩᨽᩣᩅᩣᨿ, ᨿᨴᩥᨴᩴ ᩌᩃᩮᩣᨠᩮᩣ ᩈᨬ᩠ᨩᩣᨿᨲᩥ ᩒᨽᩣᩈᩮᩣ ᨸᩣᨲᩩᨽᩅᨲᩦᨲᩥ.

‘ᨿᨳᩣ ᨶᩥᨾᩥᨲ᩠ᨲᩣ ᨴᩥᩔᨶ᩠ᨲᩥ, ᨻᩕᩉ᩠ᨾᩣ ᨸᩣᨲᩩᨽᩅᩥᩔᨲᩥ;

ᨻᩕᩉ᩠ᨾᩩᨶᩮᩣ ᩉᩮᨲᩴ ᨶᩥᨾᩥᨲ᩠ᨲᩴ, ᩒᨽᩣᩈᩮᩣ ᩅᩥᨸᩩᩃᩮᩣ ᨾᩉᩣ’ᨲᩥ.

ᩈᨶᨦ᩠ᨠᩩᨾᩣᩁᨠᨳᩣ

᪓᪐᪐. ‘‘ᩋᨳ ᨡᩮᩣ, ᨽᨶ᩠ᨲᩮ, ᨴᩮᩅᩣ ᨲᩣᩅᨲᩥᩴᩈᩣ ᨿᨳᩣᩈᨠᩮᩈᩩ ᩌᩈᨶᩮᩈᩩ ᨶᩥᩈᩦᨴᩥᩴᩈᩩ – ‘ᩒᨽᩣᩈᨾᩮᨲᩴ ᨬᩔᩣᨾ, ᨿᩴᩅᩥᨸᩣᨠᩮᩣ ᨽᩅᩥᩔᨲᩥ, ᩈᨧ᩠ᨨᩥᨠᨲ᩠ᩅᩣᩅ ᨶᩴ ᨣᨾᩥᩔᩣᨾᩣ’ᨲᩥ. ᨧᨲ᩠ᨲᩣᩁᩮᩣᨸᩥ ᨾᩉᩣᩁᩣᨩᩣᨶᩮᩣ ᨿᨳᩣᩈᨠᩮᩈᩩ ᩌᩈᨶᩮᩈᩩ ᨶᩥᩈᩦᨴᩥᩴᩈᩩ – ‘ᩒᨽᩣᩈᨾᩮᨲᩴ ᨬᩔᩣᨾ, ᨿᩴᩅᩥᨸᩣᨠᩮᩣ ᨽᩅᩥᩔᨲᩥ, ᩈᨧ᩠ᨨᩥᨠᨲ᩠ᩅᩣᩅ ᨶᩴ ᨣᨾᩥᩔᩣᨾᩣ’ᨲᩥ. ᩍᨴᩴ ᩈᩩᨲ᩠ᩅᩣ ᨴᩮᩅᩣ ᨲᩣᩅᨲᩥᩴᩈᩣ ᩑᨠᨣ᩠ᨣᩣ ᩈᨾᩣᨸᨩ᩠ᨩᩥᩴᩈᩩ – ‘ᩒᨽᩣᩈᨾᩮᨲᩴ ᨬᩔᩣᨾ, ᨿᩴᩅᩥᨸᩣᨠᩮᩣ ᨽᩅᩥᩔᨲᩥ, ᩈᨧ᩠ᨨᩥᨠᨲ᩠ᩅᩣᩅ ᨶᩴ ᨣᨾᩥᩔᩣᨾᩣ’ᨲᩥ.

‘‘ᨿᨴᩣ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨸᩣᨲᩩᨽᩅᨲᩥ, ᩒᩊᩣᩁᩥᨠᩴ ᩋᨲ᩠ᨲᨽᩣᩅᩴ ᩋᨽᩥᨶᩥᨾ᩠ᨾᩥᨶᩥᨲ᩠ᩅᩣ ᨸᩣᨲᩩᨽᩅᨲᩥ. ᨿᩮᩣ ᨡᩮᩣ ᨸᨶ, ᨽᨶ᩠ᨲᩮ, ᨻᩕᩉ᩠ᨾᩩᨶᩮᩣ ᨸᨠᨲᩥᩅᨱ᩠ᨱᩮᩣ, ᩋᨶᨽᩥᩈᨾ᩠ᨽᩅᨶᩦᨿᩮᩣ ᩈᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨧᨠ᩠ᨡᩩᨸᨳᩈ᩠ᨾᩥᩴ. ᨿᨴᩣ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨸᩣᨲᩩᨽᩅᨲᩥ, ᩈᩮᩣ ᩋᨬ᩠ᨬᩮ ᨴᩮᩅᩮ ᩋᨲᩥᩁᩮᩣᨧᨲᩥ ᩅᨱ᩠ᨱᩮᨶ ᨧᩮᩅ ᨿᩈᩈᩣ ᨧ. ᩈᩮᨿ᩠ᨿᨳᩣᨸᩥ, ᨽᨶ᩠ᨲᩮ, ᩈᩮᩣᩅᨱ᩠ᨱᩮᩣ ᩅᩥᨣ᩠ᨣᩉᩮᩣ ᨾᩣᨶᩩᩈᩴ ᩅᩥᨣ᩠ᨣᩉᩴ ᩋᨲᩥᩁᩮᩣᨧᨲᩥ, ᩑᩅᨾᩮᩅ ᨡᩮᩣ, ᨽᨶ᩠ᨲᩮ, ᨿᨴᩣ ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨸᩣᨲᩩᨽᩅᨲᩥ, ᩈᩮᩣ ᩋᨬ᩠ᨬᩮ ᨴᩮᩅᩮ ᩋᨲᩥᩁᩮᩣᨧᨲᩥ ᩅᨱ᩠ᨱᩮᨶ ᨧᩮᩅ ᨿᩈᩈᩣ ᨧ. ᨿᨴᩣ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨸᩣᨲᩩᨽᩅᨲᩥ, ᨶ ᨲᩔᩴ ᨸᩁᩥᩈᩣᨿᩴ ᨠᩮᩣᨧᩥ ᨴᩮᩅᩮᩣ ᩋᨽᩥᩅᩣᨴᩮᨲᩥ ᩅᩣ ᨸᨧ᩠ᨧᩩᨭ᩠ᨮᩮᨲᩥ ᩅᩣ ᩌᩈᨶᩮᨶ ᩅᩣ ᨶᩥᨾᨶ᩠ᨲᩮᨲᩥ. ᩈᨻ᩠ᨻᩮᩅ ᨲᩩᨱ᩠ᩉᩦᨽᩪᨲᩣ ᨸᨬ᩠ᨩᩃᩥᨠᩣ ᨸᩃ᩠ᩃᨦ᩠ᨠᩮᨶ ᨶᩥᩈᩦᨴᨶ᩠ᨲᩥ – ‘ᨿᩔᨴᩣᨶᩥ ᨴᩮᩅᩔ ᨸᩃ᩠ᩃᨦ᩠ᨠᩴ ᩍᨧ᩠ᨨᩥᩔᨲᩥ ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ, ᨲᩔ ᨴᩮᩅᩔ ᨸᩃ᩠ᩃᨦ᩠ᨠᩮ ᨶᩥᩈᩦᨴᩥᩔᨲᩦ’ᨲᩥ. ᨿᩔ ᨡᩮᩣ ᨸᨶ, ᨽᨶ᩠ᨲᩮ, ᨴᩮᩅᩔ ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨸᩃ᩠ᩃᨦ᩠ᨠᩮ ᨶᩥᩈᩦᨴᨲᩥ, ᩏᩊᩣᩁᩴ ᩈᩮᩣ ᩃᨽᨲᩥ ᨴᩮᩅᩮᩣ ᩅᩮᨴᨸᨭᩥᩃᩣᨽᩴ, ᩏᩊᩣᩁᩴ ᩈᩮᩣ ᩃᨽᨲᩥ ᨴᩮᩅᩮᩣ ᩈᩮᩣᨾᨶᩔᨸᨭᩥᩃᩣᨽᩴ. ᩈᩮᨿ᩠ᨿᨳᩣᨸᩥ, ᨽᨶ᩠ᨲᩮ, ᩁᩣᨩᩣ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᩅᩈᩥᨲ᩠ᨲᩮᩣ ᩋᨵᩩᨶᩣᨽᩥᩈᩥᨲ᩠ᨲᩮᩣ ᩁᨩ᩠ᨩᩮᨶ, ᩏᩊᩣᩁᩴ ᩈᩮᩣ ᩃᨽᨲᩥ ᩅᩮᨴᨸᨭᩥᩃᩣᨽᩴ, ᩏᩊᩣᩁᩴ ᩈᩮᩣ ᩃᨽᨲᩥ ᩈᩮᩣᨾᨶᩔᨸᨭᩥᩃᩣᨽᩴ, ᩑᩅᨾᩮᩅ ᨡᩮᩣ, ᨽᨶ᩠ᨲᩮ, ᨿᩔ ᨴᩮᩅᩔ ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨸᩃ᩠ᩃᨦ᩠ᨠᩮ ᨶᩥᩈᩦᨴᨲᩥ, ᩏᩊᩣᩁᩴ ᩈᩮᩣ ᩃᨽᨲᩥ ᨴᩮᩅᩮᩣ ᩅᩮᨴᨸᨭᩥᩃᩣᨽᩴ, ᩏᩊᩣᩁᩴ ᩈᩮᩣ ᩃᨽᨲᩥ ᨴᩮᩅᩮᩣ ᩈᩮᩣᨾᨶᩔᨸᨭᩥᩃᩣᨽᩴ. ᩋᨳ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᨾ᩠ᨸᩈᩣᨴᩴ ᩅᩥᨴᩥᨲ᩠ᩅᩣ ᩋᨶ᩠ᨲᩁᩉᩥᨲᩮᩣ ᩍᨾᩣᩉᩥ ᨣᩣᨳᩣᩉᩥ ᩋᨶᩩᨾᩮᩣᨴᩥ –

‘ᨾᩮᩣᨴᨶ᩠ᨲᩥ ᩅᨲ ᨽᩮᩣ ᨴᩮᩅᩣ, ᨲᩣᩅᨲᩥᩴᩈᩣ ᩈᩉᩥᨶ᩠ᨴᨠᩣ;

ᨲᨳᩣᨣᨲᩴ ᨶᨾᩔᨶ᩠ᨲᩣ, ᨵᨾ᩠ᨾᩔ ᨧ ᩈᩩᨵᨾ᩠ᨾᨲᩴ.

‘ᨶᩅᩮ ᨴᩮᩅᩮ ᨧ ᨸᩔᨶ᩠ᨲᩣ, ᩅᨱ᩠ᨱᩅᨶ᩠ᨲᩮ ᨿᩈᩔᩥᨶᩮ;

ᩈᩩᨣᨲᩈ᩠ᨾᩥᩴ ᨻᩕᩉ᩠ᨾᨧᩁᩥᨿᩴ, ᨧᩁᩥᨲ᩠ᩅᩣᨶ ᩍᨵᩣᨣᨲᩮ.

‘ᨲᩮ ᩋᨬ᩠ᨬᩮ ᩋᨲᩥᩁᩮᩣᨧᨶ᩠ᨲᩥ, ᩅᨱ᩠ᨱᩮᨶ ᨿᩈᩈᩣᨿᩩᨶᩣ;

ᩈᩣᩅᨠᩣ ᨽᩪᩁᩥᨸᨬ᩠ᨬᩔ, ᩅᩥᩈᩮᩈᩪᨸᨣᨲᩣ ᩍᨵ.

‘ᩍᨴᩴ ᨴᩥᩈ᩠ᩅᩣᨶ ᨶᨶ᩠ᨴᨶ᩠ᨲᩥ, ᨲᩣᩅᨲᩥᩴᩈᩣ ᩈᩉᩥᨶ᩠ᨴᨠᩣ;

ᨲᨳᩣᨣᨲᩴ ᨶᨾᩔᨶ᩠ᨲᩣ, ᨵᨾ᩠ᨾᩔ ᨧ ᩈᩩᨵᨾ᩠ᨾᨲ’ᨶ᩠ᨲᩥ.

᪓᪐᪑. ‘‘ᩍᨾᨾᨲ᩠ᨳᩴ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᩋᨽᩣᩈᩥᨲ᩠ᨳ. ᩍᨾᨾᨲ᩠ᨳᩴ, ᨽᨶ᩠ᨲᩮ, ᨻᩕᩉ᩠ᨾᩩᨶᩮᩣ ᩈᨶᨦ᩠ᨠᩩᨾᩣᩁᩔ ᨽᩣᩈᨲᩮᩣ ᩋᨭ᩠ᨮᨦ᩠ᨣᩈᨾᨶ᩠ᨶᩣᨣᨲᩮᩣ ᩈᩁᩮᩣ ᩉᩮᩣᨲᩥ ᩅᩥᩔᨭ᩠ᨮᩮᩣ ᨧ ᩅᩥᨬ᩠ᨬᩮᨿ᩠ᨿᩮᩣ ᨧ ᨾᨬ᩠ᨩᩩ ᨧ ᩈᩅᨶᩦᨿᩮᩣ ᨧ ᨻᩥᨶ᩠ᨴᩩ ᨧ ᩋᩅᩥᩈᩣᩁᩦ ᨧ ᨣᨾ᩠ᨽᩦᩁᩮᩣ ᨧ ᨶᩥᨶ᩠ᨶᩣᨴᩦ ᨧ. ᨿᨳᩣᨸᩁᩥᩈᩴ ᨡᩮᩣ ᨸᨶ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᩈᩁᩮᨶ ᩅᩥᨬ᩠ᨬᩣᨸᩮᨲᩥ, ᨶ ᨧᩔ ᨻᩉᩥᨴ᩠ᨵᩣ ᨸᩁᩥᩈᩣᨿ ᨥᩮᩣᩈᩮᩣ ᨶᩥᨧ᩠ᨨᩁᨲᩥ. ᨿᩔ ᨡᩮᩣ ᨸᨶ, ᨽᨶ᩠ᨲᩮ, ᩑᩅᩴ ᩋᨭ᩠ᨮᨦ᩠ᨣᩈᨾᨶ᩠ᨶᩣᨣᨲᩮᩣ ᩈᩁᩮᩣ ᩉᩮᩣᨲᩥ, ᩈᩮᩣ ᩅᩩᨧ᩠ᨧᨲᩥ ‘ᨻᩕᩉ᩠ᨾᩔᩁᩮᩣ’ᨲᩥ. ᩋᨳ ᨡᩮᩣ, ᨽᨶ᩠ᨲᩮ, ᨴᩮᩅᩣ ᨲᩣᩅᨲᩥᩴᩈᩣ ᨻᩕᩉ᩠ᨾᩣᨶᩴ ᩈᨶᨦ᩠ᨠᩩᨾᩣᩁᩴ ᩑᨲᨴᩅᩮᩣᨧᩩᩴ – ‘ᩈᩣᨵᩩ, ᨾᩉᩣᨻᩕᩉ᩠ᨾᩮ, ᩑᨲᨴᩮᩅ ᨾᨿᩴ ᩈᨦ᩠ᨡᩣᨿ ᨾᩮᩣᨴᩣᨾ; ᩋᨲ᩠ᨳᩥ ᨧ ᩈᨠ᩠ᨠᩮᨶ ᨴᩮᩅᩣᨶᨾᩥᨶ᩠ᨴᩮᨶ ᨲᩔ ᨽᨣᩅᨲᩮᩣ ᩋᨭ᩠ᨮ ᨿᨳᩣᨽᩩᨧ᩠ᨧᩣ ᩅᨱ᩠ᨱᩣ ᨽᩣᩈᩥᨲᩣ; ᨲᩮ ᨧ ᨾᨿᩴ ᩈᨦ᩠ᨡᩣᨿ ᨾᩮᩣᨴᩣᨾᩣ’ᨲᩥ.

ᩋᨭ᩠ᨮ ᨿᨳᩣᨽᩩᨧ᩠ᨧᩅᨱ᩠ᨱᩣ

᪓᪐᪒. ‘‘ᩋᨳ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᩈᨠ᩠ᨠᩴ ᨴᩮᩅᩣᨶᨾᩥᨶ᩠ᨴᩴ ᩑᨲᨴᩅᩮᩣᨧ – ‘ᩈᩣᨵᩩ, ᨴᩮᩅᩣᨶᨾᩥᨶ᩠ᨴ, ᨾᨿᨾ᩠ᨸᩥ ᨲᩔ ᨽᨣᩅᨲᩮᩣ ᩋᨭ᩠ᨮ ᨿᨳᩣᨽᩩᨧ᩠ᨧᩮ ᩅᨱ᩠ᨱᩮ ᩈᩩᨱᩮᨿ᩠ᨿᩣᨾᩣ’ᨲᩥ. ‘ᩑᩅᩴ ᨾᩉᩣᨻᩕᩉ᩠ᨾᩮ’ᨲᩥ ᨡᩮᩣ, ᨽᨶ᩠ᨲᩮ, ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨻᩕᩉ᩠ᨾᩩᨶᩮᩣ ᩈᨶᨦ᩠ᨠᩩᨾᩣᩁᩔ ᨽᨣᩅᨲᩮᩣ ᩋᨭ᩠ᨮ ᨿᨳᩣᨽᩩᨧ᩠ᨧᩮ ᩅᨱ᩠ᨱᩮ ᨸᨿᩥᩁᩩᨴᩣᩉᩣᩈᩥ.

‘‘ᨲᩴ ᨠᩥᩴ ᨾᨬ᩠ᨬᨲᩥ, ᨽᩅᩴ ᨾᩉᩣᨻᩕᩉ᩠ᨾᩣ? ᨿᩣᩅᨬ᩠ᨧ ᩈᩮᩣ ᨽᨣᩅᩣ ᨻᩉᩩᨩᨶᩉᩥᨲᩣᨿ ᨸᨭᩥᨸᨶ᩠ᨶᩮᩣ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᩑᩅᩴ ᨻᩉᩩᨩᨶᩉᩥᨲᩣᨿ ᨸᨭᩥᨸᨶ᩠ᨶᩴ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ ᩍᨾᩥᨶᩣᨸᨦ᩠ᨣᩮᨶ ᩈᨾᨶ᩠ᨶᩣᨣᨲᩴ ᩈᨲ᩠ᨳᩣᩁᩴ ᨶᩮᩅ ᩋᨲᩦᨲᩴᩈᩮ ᩈᨾᨶᩩᨸᩔᩣᨾ, ᨶ ᨸᨶᩮᨲᩁᩉᩥ, ᩋᨬ᩠ᨬᨲᩕ ᨲᩮᨶ ᨽᨣᩅᨲᩣ.

‘‘ᩈ᩠ᩅᩣᨠ᩠ᨡᩣᨲᩮᩣ ᨡᩮᩣ ᨸᨶ ᨲᩮᨶ ᨽᨣᩅᨲᩣ ᨵᨾ᩠ᨾᩮᩣ ᩈᨶ᩠ᨴᩥᨭ᩠ᨮᩥᨠᩮᩣ ᩋᨠᩣᩃᩥᨠᩮᩣ ᩑᩉᩥᨸᩔᩥᨠᩮᩣ ᩒᨸᨶᩮᨿ᩠ᨿᩥᨠᩮᩣ ᨸᨧ᩠ᨧᨲ᩠ᨲᩴ ᩅᩮᨴᩥᨲᨻ᩠ᨻᩮᩣ ᩅᩥᨬ᩠ᨬᩪᩉᩥ. ᩑᩅᩴ ᩒᨸᨶᩮᨿ᩠ᨿᩥᨠᩔ ᨵᨾ᩠ᨾᩔ ᨴᩮᩈᩮᨲᩣᩁᩴ ᩍᨾᩥᨶᩣᨸᨦ᩠ᨣᩮᨶ ᩈᨾᨶ᩠ᨶᩣᨣᨲᩴ ᩈᨲ᩠ᨳᩣᩁᩴ ᨶᩮᩅ ᩋᨲᩦᨲᩴᩈᩮ ᩈᨾᨶᩩᨸᩔᩣᨾ, ᨶ ᨸᨶᩮᨲᩁᩉᩥ, ᩋᨬ᩠ᨬᨲᩕ ᨲᩮᨶ ᨽᨣᩅᨲᩣ.

‘‘ᩍᨴᩴ ᨠᩩᩈᩃ’ᨶ᩠ᨲᩥ ᨡᩮᩣ ᨸᨶ ᨲᩮᨶ ᨽᨣᩅᨲᩣ ᩈᩩᨸᨬ᩠ᨬᨲ᩠ᨲᩴ, ‘ᩍᨴᩴ ᩋᨠᩩᩈᩃ’ᨶ᩠ᨲᩥ ᩈᩩᨸᨬ᩠ᨬᨲ᩠ᨲᩴ, ‘ᩍᨴᩴ ᩈᩣᩅᨩ᩠ᨩᩴ ᩍᨴᩴ ᩋᨶᩅᨩ᩠ᨩᩴ, ᩍᨴᩴ ᩈᩮᩅᩥᨲᨻ᩠ᨻᩴ ᩍᨴᩴ ᨶ ᩈᩮᩅᩥᨲᨻ᩠ᨻᩴ, ᩍᨴᩴ ᩉᩦᨶᩴ ᩍᨴᩴ ᨸᨱᩦᨲᩴ, ᩍᨴᩴ ᨠᨱ᩠ᩉᩈᩩᨠ᩠ᨠᩈᨸ᩠ᨸᨭᩥᨽᩣᨣ’ᨶ᩠ᨲᩥ ᩈᩩᨸᨬ᩠ᨬᨲ᩠ᨲᩴ. ᩑᩅᩴ ᨠᩩᩈᩃᩣᨠᩩᩈᩃᩈᩣᩅᨩ᩠ᨩᩣᨶᩅᨩ᩠ᨩᩈᩮᩅᩥᨲᨻ᩠ᨻᩣᩈᩮᩅᩥᨲᨻ᩠ᨻᩉᩦᨶᨸᨱᩦᨲᨠᨱ᩠ᩉᩈᩩᨠ᩠ᨠᩈᨸ᩠ᨸᨭᩥᨽᩣᨣᩣᨶᩴ ᨵᨾ᩠ᨾᩣᨶᩴ ᨸᨬ᩠ᨬᩣᨸᩮᨲᩣᩁᩴ. ᩍᨾᩥᨶᩣᨸᨦ᩠ᨣᩮᨶ ᩈᨾᨶ᩠ᨶᩣᨣᨲᩴ ᩈᨲ᩠ᨳᩣᩁᩴ ᨶᩮᩅ ᩋᨲᩦᨲᩴᩈᩮ ᩈᨾᨶᩩᨸᩔᩣᨾ, ᨶ ᨸᨶᩮᨲᩁᩉᩥ, ᩋᨬ᩠ᨬᨲᩕ ᨲᩮᨶ ᨽᨣᩅᨲᩣ.

‘‘ᩈᩩᨸᨬ᩠ᨬᨲ᩠ᨲᩣ ᨡᩮᩣ ᨸᨶ ᨲᩮᨶ ᨽᨣᩅᨲᩣ ᩈᩣᩅᨠᩣᨶᩴ ᨶᩥᨻ᩠ᨻᩣᨶᨣᩣᨾᩥᨶᩦ ᨸᨭᩥᨸᨴᩣ ᩈᩴᩈᨶ᩠ᨴᨲᩥ ᨶᩥᨻ᩠ᨻᩣᨶᨬ᩠ᨧ ᨸᨭᩥᨸᨴᩣ ᨧ. ᩈᩮᨿ᩠ᨿᨳᩣᨸᩥ ᨶᩣᨾ ᨣᨦ᩠ᨣᩮᩣᨴᨠᩴ ᨿᨾᩩᨶᩮᩣᨴᨠᩮᨶ ᩈᩴᩈᨶ᩠ᨴᨲᩥ ᩈᨾᩮᨲᩥ, ᩑᩅᨾᩮᩅ ᩈᩩᨸᨬ᩠ᨬᨲ᩠ᨲᩣ ᨲᩮᨶ ᨽᨣᩅᨲᩣ ᩈᩣᩅᨠᩣᨶᩴ ᨶᩥᨻ᩠ᨻᩣᨶᨣᩣᨾᩥᨶᩦ ᨸᨭᩥᨸᨴᩣ ᩈᩴᩈᨶ᩠ᨴᨲᩥ ᨶᩥᨻ᩠ᨻᩣᨶᨬ᩠ᨧ ᨸᨭᩥᨸᨴᩣ ᨧ. ᩑᩅᩴ ᨶᩥᨻ᩠ᨻᩣᨶᨣᩣᨾᩥᨶᩥᨿᩣ ᨸᨭᩥᨸᨴᩣᨿ ᨸᨬ᩠ᨬᩣᨸᩮᨲᩣᩁᩴ ᩍᨾᩥᨶᩣᨸᨦ᩠ᨣᩮᨶ ᩈᨾᨶ᩠ᨶᩣᨣᨲᩴ ᩈᨲ᩠ᨳᩣᩁᩴ ᨶᩮᩅ ᩋᨲᩦᨲᩴᩈᩮ ᩈᨾᨶᩩᨸᩔᩣᨾ, ᨶ ᨸᨶᩮᨲᩁᩉᩥ, ᩋᨬ᩠ᨬᨲᩕ ᨲᩮᨶ ᨽᨣᩅᨲᩣ.

‘‘ᩋᨽᩥᨶᩥᨸ᩠ᨹᨶ᩠ᨶᩮᩣ ᨡᩮᩣ ᨸᨶ ᨲᩔ ᨽᨣᩅᨲᩮᩣ ᩃᩣᨽᩮᩣ ᩋᨽᩥᨶᩥᨸ᩠ᨹᨶ᩠ᨶᩮᩣ ᩈᩥᩃᩮᩣᨠᩮᩣ, ᨿᩣᩅ ᨾᨬ᩠ᨬᩮ ᨡᨲ᩠ᨲᩥᨿᩣ ᩈᨾ᩠ᨸᩥᨿᩣᨿᨾᩣᨶᩁᩪᨸᩣ ᩅᩥᩉᩁᨶ᩠ᨲᩥ. ᩅᩥᨣᨲᨾᨴᩮᩣ ᨡᩮᩣ ᨸᨶ ᩈᩮᩣ ᨽᨣᩅᩣ ᩌᩉᩣᩁᩴ ᩌᩉᩣᩁᩮᨲᩥ. ᩑᩅᩴ ᩅᩥᨣᨲᨾᨴᩴ ᩌᩉᩣᩁᩴ ᩌᩉᩁᨿᨾᩣᨶᩴ ᩍᨾᩥᨶᩣᨸᨦ᩠ᨣᩮᨶ ᩈᨾᨶ᩠ᨶᩣᨣᨲᩴ ᩈᨲ᩠ᨳᩣᩁᩴ ᨶᩮᩅ ᩋᨲᩦᨲᩴᩈᩮ ᩈᨾᨶᩩᨸᩔᩣᨾ, ᨶ ᨸᨶᩮᨲᩁᩉᩥ, ᩋᨬ᩠ᨬᨲᩕ ᨲᩮᨶ ᨽᨣᩅᨲᩣ.

‘‘ᩃᨴ᩠ᨵᩈᩉᩣᨿᩮᩣ ᨡᩮᩣ ᨸᨶ ᩈᩮᩣ ᨽᨣᩅᩣ ᩈᩮᨡᩣᨶᨬ᩠ᨧᩮᩅ ᨸᨭᩥᨸᨶ᩠ᨶᩣᨶᩴ ᨡᩦᨱᩣᩈᩅᩣᨶᨬ᩠ᨧ ᩅᩩᩈᩥᨲᩅᨲᩴ, ᨲᩮ ᨽᨣᩅᩣ ᩋᨸᨶᩩᨩ᩠ᨩ ᩑᨠᩣᩁᩣᨾᨲᩴ ᩋᨶᩩᨿᩩᨲ᩠ᨲᩮᩣ ᩅᩥᩉᩁᨲᩥ. ᩑᩅᩴ ᩑᨠᩣᩁᩣᨾᨲᩴ ᩋᨶᩩᨿᩩᨲ᩠ᨲᩴ ᩍᨾᩥᨶᩣᨸᨦ᩠ᨣᩮᨶ ᩈᨾᨶ᩠ᨶᩣᨣᨲᩴ ᩈᨲ᩠ᨳᩣᩁᩴ ᨶᩮᩅ ᩋᨲᩦᨲᩴᩈᩮ ᩈᨾᨶᩩᨸᩔᩣᨾ, ᨶ ᨸᨶᩮᨲᩁᩉᩥ, ᩋᨬ᩠ᨬᨲᩕ ᨲᩮᨶ ᨽᨣᩅᨲᩣ.

‘‘ᨿᨳᩣᩅᩣᨴᩦ ᨡᩮᩣ ᨸᨶ ᩈᩮᩣ ᨽᨣᩅᩣ ᨲᨳᩣᨠᩣᩁᩦ, ᨿᨳᩣᨠᩣᩁᩦ ᨲᨳᩣᩅᩣᨴᩦ; ᩍᨲᩥ ᨿᨳᩣᩅᩣᨴᩦ ᨲᨳᩣᨠᩣᩁᩦ, ᨿᨳᩣᨠᩣᩁᩦ ᨲᨳᩣᩅᩣᨴᩦ. ᩑᩅᩴ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸ᩠ᨸᨶ᩠ᨶᩴ ᩍᨾᩥᨶᩣᨸᨦ᩠ᨣᩮᨶ ᩈᨾᨶ᩠ᨶᩣᨣᨲᩴ ᩈᨲ᩠ᨳᩣᩁᩴ ᨶᩮᩅ ᩋᨲᩦᨲᩴᩈᩮ ᩈᨾᨶᩩᨸᩔᩣᨾ, ᨶ ᨸᨶᩮᨲᩁᩉᩥ, ᩋᨬ᩠ᨬᨲᩕ ᨲᩮᨶ ᨽᨣᩅᨲᩣ.

‘‘ᨲᩥᨱ᩠ᨱᩅᩥᨧᩥᨠᩥᨧ᩠ᨨᩮᩣ ᨡᩮᩣ ᨸᨶ ᩈᩮᩣ ᨽᨣᩅᩣ ᩅᩥᨣᨲᨠᨳᩴᨠᨳᩮᩣ ᨸᩁᩥᨿᩮᩣᩈᩥᨲᩈᨦ᩠ᨠᨸ᩠ᨸᩮᩣ ᩋᨩ᩠ᨫᩣᩈᨿᩴ ᩌᨴᩥᨻᩕᩉ᩠ᨾᨧᩁᩥᨿᩴ. ᩑᩅᩴ ᨲᩥᨱ᩠ᨱᩅᩥᨧᩥᨠᩥᨧ᩠ᨨᩴ ᩅᩥᨣᨲᨠᨳᩴᨠᨳᩴ ᨸᩁᩥᨿᩮᩣᩈᩥᨲᩈᨦ᩠ᨠᨸ᩠ᨸᩴ ᩋᨩ᩠ᨫᩣᩈᨿᩴ ᩌᨴᩥᨻᩕᩉ᩠ᨾᨧᩁᩥᨿᩴ. ᩍᨾᩥᨶᩣᨸᨦ᩠ᨣᩮᨶ ᩈᨾᨶ᩠ᨶᩣᨣᨲᩴ ᩈᨲ᩠ᨳᩣᩁᩴ ᨶᩮᩅ ᩋᨲᩦᨲᩴᩈᩮ ᩈᨾᨶᩩᨸᩔᩣᨾ, ᨶ ᨸᨶᩮᨲᩁᩉᩥ, ᩋᨬ᩠ᨬᨲᩕ ᨲᩮᨶ ᨽᨣᩅᨲᩣ’ᨲᩥ.

᪓᪐᪓. ‘‘ᩍᨾᩮ ᨡᩮᩣ, ᨽᨶ᩠ᨲᩮ, ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨻᩕᩉ᩠ᨾᩩᨶᩮᩣ ᩈᨶᨦ᩠ᨠᩩᨾᩣᩁᩔ ᨽᨣᩅᨲᩮᩣ ᩋᨭ᩠ᨮ ᨿᨳᩣᨽᩩᨧ᩠ᨧᩮ ᩅᨱ᩠ᨱᩮ ᨸᨿᩥᩁᩩᨴᩣᩉᩣᩈᩥ. ᨲᩮᨶ ᩈᩩᨴᩴ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᩋᨲ᩠ᨲᨾᨶᩮᩣ ᩉᩮᩣᨲᩥ ᨸᨾᩩᨴᩥᨲᩮᩣ ᨸᩦᨲᩥᩈᩮᩣᨾᨶᩔᨩᩣᨲᩮᩣ ᨽᨣᩅᨲᩮᩣ ᩋᨭ᩠ᨮ ᨿᨳᩣᨽᩩᨧ᩠ᨧᩮ ᩅᨱ᩠ᨱᩮ ᩈᩩᨲ᩠ᩅᩣ. ᩋᨳ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᩒᩊᩣᩁᩥᨠᩴ ᩋᨲ᩠ᨲᨽᩣᩅᩴ ᩋᨽᩥᨶᩥᨾ᩠ᨾᩥᨶᩥᨲ᩠ᩅᩣ ᨠᩩᨾᩣᩁᩅᨱ᩠ᨱᩦ ᩉᩩᨲ᩠ᩅᩣ ᨸᨬ᩠ᨧᩈᩥᨡᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨸᩣᨲᩩᩁᩉᩮᩣᩈᩥ. ᩈᩮᩣ ᩅᩮᩉᩣᩈᩴ ᩋᨻ᩠ᨽᩩᨣ᩠ᨣᨶ᩠ᨲ᩠ᩅᩣ ᩌᨠᩣᩈᩮ ᩋᨶ᩠ᨲᩃᩥᨠ᩠ᨡᩮ ᨸᩃ᩠ᩃᨦ᩠ᨠᩮᨶ ᨶᩥᩈᩦᨴᩥ. ᩈᩮᨿ᩠ᨿᨳᩣᨸᩥ, ᨽᨶ᩠ᨲᩮ, ᨻᩃᩅᩣ ᨸᩩᩁᩥᩈᩮᩣ ᩈᩩᨸᨧ᩠ᨧᨲ᩠ᨳᨲᩮ ᩅᩣ ᨸᩃ᩠ᩃᨦ᩠ᨠᩮ ᩈᨾᩮ ᩅᩣ ᨽᩪᨾᩥᨽᩣᨣᩮ ᨸᩃ᩠ᩃᨦ᩠ᨠᩮᨶ ᨶᩥᩈᩦᨴᩮᨿ᩠ᨿ, ᩑᩅᨾᩮᩅ ᨡᩮᩣ, ᨽᨶ᩠ᨲᩮ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᩅᩮᩉᩣᩈᩴ ᩋᨻ᩠ᨽᩩᨣ᩠ᨣᨶ᩠ᨲ᩠ᩅᩣ ᩌᨠᩣᩈᩮ ᩋᨶ᩠ᨲᩃᩥᨠ᩠ᨡᩮ ᨸᩃ᩠ᩃᨦ᩠ᨠᩮᨶ ᨶᩥᩈᩦᨴᩥᨲ᩠ᩅᩣ ᨴᩮᩅᩮ ᨲᩣᩅᨲᩥᩴᩈᩮ ᩌᨾᨶ᩠ᨲᩮᩈᩥ –

ᨣᩮᩣᩅᩥᨶ᩠ᨴᨻᩕᩣᩉ᩠ᨾᨱᩅᨲ᩠ᨳᩩ

᪓᪐᪔. ‘‘ᨲᩴ ᨠᩥᩴ ᨾᨬ᩠ᨬᨶ᩠ᨲᩥ, ᨽᩮᩣᨶ᩠ᨲᩮᩣ ᨴᩮᩅᩣ ᨲᩣᩅᨲᩥᩴᩈᩣ, ᨿᩣᩅ ᨴᩦᨥᩁᨲ᩠ᨲᩴ ᨾᩉᩣᨸᨬ᩠ᨬᩮᩣᩅ ᩈᩮᩣ ᨽᨣᩅᩣ ᩋᩉᩮᩣᩈᩥ. ᨽᩪᨲᨸᩩᨻ᩠ᨻᩴ, ᨽᩮᩣ, ᩁᩣᨩᩣ ᨴᩥᩈᨾ᩠ᨸᨲᩥ ᨶᩣᨾ ᩋᩉᩮᩣᩈᩥ. ᨴᩥᩈᨾ᩠ᨸᨲᩥᩔ ᩁᨬ᩠ᨬᩮᩣ ᨣᩮᩣᩅᩥᨶ᩠ᨴᩮᩣ ᨶᩣᨾ ᨻᩕᩣᩉ᩠ᨾᨱᩮᩣ ᨸᩩᩁᩮᩣᩉᩥᨲᩮᩣ ᩋᩉᩮᩣᩈᩥ. ᨴᩥᩈᨾ᩠ᨸᨲᩥᩔ ᩁᨬ᩠ᨬᩮᩣ ᩁᩮᨱᩩ ᨶᩣᨾ ᨠᩩᨾᩣᩁᩮᩣ ᨸᩩᨲ᩠ᨲᩮᩣ ᩋᩉᩮᩣᩈᩥ. ᨣᩮᩣᩅᩥᨶ᩠ᨴᩔ ᨻᩕᩣᩉ᩠ᨾᨱᩔ ᨩᩮᩣᨲᩥᨸᩣᩃᩮᩣ ᨶᩣᨾ ᨾᩣᨱᩅᩮᩣ ᨸᩩᨲ᩠ᨲᩮᩣ ᩋᩉᩮᩣᩈᩥ. ᩍᨲᩥ ᩁᩮᨱᩩ ᨧ ᩁᩣᨩᨸᩩᨲ᩠ᨲᩮᩣ ᨩᩮᩣᨲᩥᨸᩣᩃᩮᩣ ᨧ ᨾᩣᨱᩅᩮᩣ ᩋᨬ᩠ᨬᩮ ᨧ ᨨ ᨡᨲ᩠ᨲᩥᨿᩣ ᩍᨧ᩠ᨧᩮᨲᩮ ᩋᨭ᩠ᨮ ᩈᩉᩣᨿᩣ ᩋᩉᩮᩈᩩᩴ. ᩋᨳ ᨡᩮᩣ, ᨽᩮᩣ, ᩋᩉᩮᩣᩁᨲ᩠ᨲᩣᨶᩴ ᩋᨧ᩠ᨧᨿᩮᨶ ᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨠᩣᩃᨾᨠᩣᩈᩥ. ᨣᩮᩣᩅᩥᨶ᩠ᨴᩮ ᨻᩕᩣᩉ᩠ᨾᨱᩮ ᨠᩣᩃᨦ᩠ᨠᨲᩮ ᩁᩣᨩᩣ ᨴᩥᩈᨾ᩠ᨸᨲᩥ ᨸᩁᩥᨴᩮᩅᩮᩈᩥ – ‘‘ᨿᩈ᩠ᨾᩥᩴ ᩅᨲ, ᨽᩮᩣ, ᨾᨿᩴ ᩈᨾᨿᩮ ᨣᩮᩣᩅᩥᨶ᩠ᨴᩮ ᨻᩕᩣᩉ᩠ᨾᨱᩮ ᩈᨻ᩠ᨻᨠᩥᨧ᩠ᨧᩣᨶᩥ ᩈᨾ᩠ᨾᩣ ᩅᩮᩣᩔᨩ᩠ᨩᩥᨲ᩠ᩅᩣ ᨸᨬ᩠ᨧᩉᩥ ᨠᩣᨾᨣᩩᨱᩮᩉᩥ ᩈᨾᨸ᩠ᨸᩥᨲᩣ ᩈᨾᨦ᩠ᨣᩦᨽᩪᨲᩣ ᨸᩁᩥᨧᩣᩁᩮᨾ, ᨲᩈ᩠ᨾᩥᩴ ᨶᩮᩣ ᩈᨾᨿᩮ ᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨠᩣᩃᨦ᩠ᨠᨲᩮᩣ’’ᨲᩥ. ᩑᩅᩴ ᩅᩩᨲ᩠ᨲᩮ ᨽᩮᩣ ᩁᩮᨱᩩ ᩁᩣᨩᨸᩩᨲ᩠ᨲᩮᩣ ᩁᩣᨩᩣᨶᩴ ᨴᩥᩈᨾ᩠ᨸᨲᩥᩴ ᩑᨲᨴᩅᩮᩣᨧ – ‘‘ᨾᩣ ᨡᩮᩣ ᨲ᩠ᩅᩴ, ᨴᩮᩅ, ᨣᩮᩣᩅᩥᨶ᩠ᨴᩮ ᨻᩕᩣᩉ᩠ᨾᨱᩮ ᨠᩣᩃᨦ᩠ᨠᨲᩮ ᩋᨲᩥᨻᩣᩊ᩠ᩉᩴ ᨸᩁᩥᨴᩮᩅᩮᩈᩥ. ᩋᨲ᩠ᨳᩥ, ᨴᩮᩅ, ᨣᩮᩣᩅᩥᨶ᩠ᨴᩔ ᨻᩕᩣᩉ᩠ᨾᨱᩔ ᨩᩮᩣᨲᩥᨸᩣᩃᩮᩣ ᨶᩣᨾ ᨾᩣᨱᩅᩮᩣ ᨸᩩᨲ᩠ᨲᩮᩣ ᨸᨱ᩠ᨯᩥᨲᨲᩁᩮᩣ ᨧᩮᩅ ᨸᩥᨲᩁᩣ, ᩋᩃᨾᨲ᩠ᨳᨴᩈᨲᩁᩮᩣ ᨧᩮᩅ ᨸᩥᨲᩁᩣ; ᨿᩮᨸᩥᩔ ᨸᩥᨲᩣ ᩋᨲ᩠ᨳᩮ ᩋᨶᩩᩈᩣᩈᩥ, ᨲᩮᨸᩥ ᨩᩮᩣᨲᩥᨸᩣᩃᩔᩮᩅ ᨾᩣᨱᩅᩔ ᩋᨶᩩᩈᩣᩈᨶᩥᨿᩣ’’ᨲᩥ. ‘‘ᩑᩅᩴ ᨠᩩᨾᩣᩁᩣ’’ᨲᩥ? ‘‘ᩑᩅᩴ ᨴᩮᩅᩣ’’ᨲᩥ.

ᨾᩉᩣᨣᩮᩣᩅᩥᨶ᩠ᨴᩅᨲ᩠ᨳᩩ

᪓᪐᪕. ‘‘ᩋᨳ ᨡᩮᩣ, ᨽᩮᩣ, ᩁᩣᨩᩣ ᨴᩥᩈᨾ᩠ᨸᨲᩥ ᩋᨬ᩠ᨬᨲᩁᩴ ᨸᩩᩁᩥᩈᩴ ᩌᨾᨶ᩠ᨲᩮᩈᩥ – ‘‘ᩑᩉᩥ ᨲ᩠ᩅᩴ, ᩋᨾ᩠ᨽᩮᩣ ᨸᩩᩁᩥᩈ, ᨿᩮᨶ ᨩᩮᩣᨲᩥᨸᩣᩃᩮᩣ ᨶᩣᨾ ᨾᩣᨱᩅᩮᩣ ᨲᩮᨶᩩᨸᩈᨦ᩠ᨠᨾ; ᩏᨸᩈᨦ᩠ᨠᨾᩥᨲ᩠ᩅᩣ ᨩᩮᩣᨲᩥᨸᩣᩃᩴ ᨾᩣᨱᩅᩴ ᩑᩅᩴ ᩅᨴᩮᩉᩥ – ‘ᨽᩅᨾᨲ᩠ᨳᩩ ᨽᩅᨶ᩠ᨲᩴ ᨩᩮᩣᨲᩥᨸᩣᩃᩴ, ᩁᩣᨩᩣ ᨴᩥᩈᨾ᩠ᨸᨲᩥ ᨽᩅᨶ᩠ᨲᩴ ᨩᩮᩣᨲᩥᨸᩣᩃᩴ ᨾᩣᨱᩅᩴ ᩌᨾᨶ᩠ᨲᨿᨲᩥ, ᩁᩣᨩᩣ ᨴᩥᩈᨾ᩠ᨸᨲᩥ ᨽᩮᩣᨲᩮᩣ ᨩᩮᩣᨲᩥᨸᩣᩃᩔ ᨾᩣᨱᩅᩔ ᨴᩔᨶᨠᩣᨾᩮᩣ’’’ᨲᩥ. ‘‘ᩑᩅᩴ, ᨴᩮᩅᩣ’’ᨲᩥ ᨡᩮᩣ, ᨽᩮᩣ, ᩈᩮᩣ ᨸᩩᩁᩥᩈᩮᩣ ᨴᩥᩈᨾ᩠ᨸᨲᩥᩔ ᩁᨬ᩠ᨬᩮᩣ ᨸᨭᩥᩔᩩᨲ᩠ᩅᩣ ᨿᩮᨶ ᨩᩮᩣᨲᩥᨸᩣᩃᩮᩣ ᨾᩣᨱᩅᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨩᩮᩣᨲᩥᨸᩣᩃᩴ ᨾᩣᨱᩅᩴ ᩑᨲᨴᩅᩮᩣᨧ – ‘‘ᨽᩅᨾᨲ᩠ᨳᩩ ᨽᩅᨶ᩠ᨲᩴ ᨩᩮᩣᨲᩥᨸᩣᩃᩴ, ᩁᩣᨩᩣ ᨴᩥᩈᨾ᩠ᨸᨲᩥ ᨽᩅᨶ᩠ᨲᩴ ᨩᩮᩣᨲᩥᨸᩣᩃᩴ ᨾᩣᨱᩅᩴ ᩌᨾᨶ᩠ᨲᨿᨲᩥ, ᩁᩣᨩᩣ ᨴᩥᩈᨾ᩠ᨸᨲᩥ ᨽᩮᩣᨲᩮᩣ ᨩᩮᩣᨲᩥᨸᩣᩃᩔ ᨾᩣᨱᩅᩔ ᨴᩔᨶᨠᩣᨾᩮᩣ’’ᨲᩥ. ‘‘ᩑᩅᩴ, ᨽᩮᩣ’’ᨲᩥ ᨡᩮᩣ ᨽᩮᩣ ᨩᩮᩣᨲᩥᨸᩣᩃᩮᩣ ᨾᩣᨱᩅᩮᩣ ᨲᩔ ᨸᩩᩁᩥᩈᩔ ᨸᨭᩥᩔᩩᨲ᩠ᩅᩣ ᨿᩮᨶ ᩁᩣᨩᩣ ᨴᩥᩈᨾ᩠ᨸᨲᩥ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨴᩥᩈᨾ᩠ᨸᨲᩥᨶᩣ ᩁᨬ᩠ᨬᩣ ᩈᨴ᩠ᨵᩥᩴ ᩈᨾ᩠ᨾᩮᩣᨴᩥ; ᩈᨾ᩠ᨾᩮᩣᨴᨶᩦᨿᩴ ᨠᨳᩴ ᩈᩣᩁᨱᩦᨿᩴ ᩅᩦᨲᩥᩈᩣᩁᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩴ ᨡᩮᩣ, ᨽᩮᩣ, ᨩᩮᩣᨲᩥᨸᩣᩃᩴ ᨾᩣᨱᩅᩴ ᩁᩣᨩᩣ ᨴᩥᩈᨾ᩠ᨸᨲᩥ ᩑᨲᨴᩅᩮᩣᨧ – ‘‘ᩋᨶᩩᩈᩣᩈᨲᩩ ᨶᩮᩣ ᨽᩅᩴ ᨩᩮᩣᨲᩥᨸᩣᩃᩮᩣ, ᨾᩣ ᨶᩮᩣ ᨽᩅᩴ ᨩᩮᩣᨲᩥᨸᩣᩃᩮᩣ ᩋᨶᩩᩈᩣᩈᨶᩥᨿᩣ ᨸᨧ᩠ᨧᨻ᩠ᨿᩣᩉᩣᩈᩥ. ᨸᩮᨲ᩠ᨲᩥᨠᩮ ᨲᩴ ᨮᩣᨶᩮ ᨮᨸᩮᩔᩣᨾᩥ, ᨣᩮᩣᩅᩥᨶ᩠ᨴᩥᨿᩮ ᩋᨽᩥᩈᩥᨬ᩠ᨧᩥᩔᩣᨾᩦ’’ᨲᩥ. ‘‘ᩑᩅᩴ, ᨽᩮᩣ’’ᨲᩥ ᨡᩮᩣ, ᨽᩮᩣ, ᩈᩮᩣ ᨩᩮᩣᨲᩥᨸᩣᩃᩮᩣ ᨾᩣᨱᩅᩮᩣ ᨴᩥᩈᨾ᩠ᨸᨲᩥᩔ ᩁᨬ᩠ᨬᩮᩣ ᨸᨧ᩠ᨧᩔᩮᩣᩈᩥ. ᩋᨳ ᨡᩮᩣ, ᨽᩮᩣ, ᩁᩣᨩᩣ ᨴᩥᩈᨾ᩠ᨸᨲᩥ ᨩᩮᩣᨲᩥᨸᩣᩃᩴ ᨾᩣᨱᩅᩴ ᨣᩮᩣᩅᩥᨶ᩠ᨴᩥᨿᩮ ᩋᨽᩥᩈᩥᨬ᩠ᨧᩥ, ᨲᩴ ᨸᩮᨲ᩠ᨲᩥᨠᩮ ᨮᩣᨶᩮ ᨮᨸᩮᩈᩥ. ᩋᨽᩥᩈᩥᨲ᩠ᨲᩮᩣ ᨩᩮᩣᨲᩥᨸᩣᩃᩮᩣ ᨾᩣᨱᩅᩮᩣ ᨣᩮᩣᩅᩥᨶ᩠ᨴᩥᨿᩮ ᨸᩮᨲ᩠ᨲᩥᨠᩮ ᨮᩣᨶᩮ ᨮᨸᩥᨲᩮᩣ ᨿᩮᨸᩥᩔ ᨸᩥᨲᩣ ᩋᨲ᩠ᨳᩮ ᩋᨶᩩᩈᩣᩈᩥ ᨲᩮᨸᩥ ᩋᨲ᩠ᨳᩮ ᩋᨶᩩᩈᩣᩈᨲᩥ, ᨿᩮᨸᩥᩔ ᨸᩥᨲᩣ ᩋᨲ᩠ᨳᩮ ᨶᩣᨶᩩᩈᩣᩈᩥ, ᨲᩮᨸᩥ ᩋᨲ᩠ᨳᩮ ᩋᨶᩩᩈᩣᩈᨲᩥ; ᨿᩮᨸᩥᩔ ᨸᩥᨲᩣ ᨠᨾ᩠ᨾᨶ᩠ᨲᩮ ᩋᨽᩥᩈᨾ᩠ᨽᩮᩣᩈᩥ, ᨲᩮᨸᩥ ᨠᨾ᩠ᨾᨶ᩠ᨲᩮ ᩋᨽᩥᩈᨾ᩠ᨽᩮᩣᨲᩥ, ᨿᩮᨸᩥᩔ ᨸᩥᨲᩣ ᨠᨾ᩠ᨾᨶ᩠ᨲᩮ ᨶᩣᨽᩥᩈᨾ᩠ᨽᩮᩣᩈᩥ, ᨲᩮᨸᩥ ᨠᨾ᩠ᨾᨶ᩠ᨲᩮ ᩋᨽᩥᩈᨾ᩠ᨽᩮᩣᨲᩥ. ᨲᨾᩮᨶᩴ ᨾᨶᩩᩔᩣ ᩑᩅᨾᩣᩉᩴᩈᩩ – ‘‘ᨣᩮᩣᩅᩥᨶ᩠ᨴᩮᩣ ᩅᨲ, ᨽᩮᩣ, ᨻᩕᩣᩉ᩠ᨾᨱᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᩅᨲ, ᨽᩮᩣ, ᨻᩕᩣᩉ᩠ᨾᨱᩮᩣ’’ᨲᩥ. ᩍᨾᩥᨶᩣ ᨡᩮᩣ ᩑᩅᩴ, ᨽᩮᩣ, ᨸᩁᩥᨿᩣᨿᩮᨶ ᨩᩮᩣᨲᩥᨸᩣᩃᩔ ᨾᩣᨱᩅᩔ ᨣᩮᩣᩅᩥᨶ᩠ᨴᩮᩣ ᨾᩉᩣᨣᩮᩣᩅᩥᨶ᩠ᨴᩮᩣᨲ᩠ᩅᩮᩅ ᩈᨾᨬ᩠ᨬᩣ ᩏᨴᨸᩣᨴᩥ.

ᩁᨩ᩠ᨩᩈᩴᩅᩥᨽᨩᨶᩴ

᪓᪐᪖. ‘‘ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨿᩮᨶ ᨲᩮ ᨨ ᨡᨲ᩠ᨲᩥᨿᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨲᩮ ᨨ ᨡᨲ᩠ᨲᩥᨿᩮ ᩑᨲᨴᩅᩮᩣᨧ – ‘‘ᨴᩥᩈᨾ᩠ᨸᨲᩥ ᨡᩮᩣ, ᨽᩮᩣ, ᩁᩣᨩᩣ ᨩᩥᨱ᩠ᨱᩮᩣ ᩅᩩᨴ᩠ᨵᩮᩣ ᨾᩉᩃ᩠ᩃᨠᩮᩣ ᩋᨴ᩠ᨵᨣᨲᩮᩣ ᩅᨿᩮᩣᩋᨶᩩᨸ᩠ᨸᨲ᩠ᨲᩮᩣ, ᨠᩮᩣ ᨶᩩ ᨡᩮᩣ ᨸᨶ, ᨽᩮᩣ, ᨩᩣᨶᩣᨲᩥ ᨩᩦᩅᩥᨲᩴ? ᨮᩣᨶᩴ ᨡᩮᩣ ᨸᨶᩮᨲᩴ ᩅᩥᨩ᩠ᨩᨲᩥ, ᨿᩴ ᨴᩥᩈᨾ᩠ᨸᨲᩥᨾ᩠ᩉᩥ ᩁᨬ᩠ᨬᩮ ᨠᩣᩃᨦ᩠ᨠᨲᩮ ᩁᩣᨩᨠᨲ᩠ᨲᩣᩁᩮᩣ ᩁᩮᨱᩩᩴ ᩁᩣᨩᨸᩩᨲ᩠ᨲᩴ ᩁᨩ᩠ᨩᩮ ᩋᨽᩥᩈᩥᨬ᩠ᨧᩮᨿ᩠ᨿᩩᩴ. ᩌᨿᨶ᩠ᨲᩩ, ᨽᩮᩣᨶ᩠ᨲᩮᩣ, ᨿᩮᨶ ᩁᩮᨱᩩ ᩁᩣᨩᨸᩩᨲ᩠ᨲᩮᩣ ᨲᩮᨶᩩᨸᩈᨦ᩠ᨠᨾᨳ; ᩏᨸᩈᨦ᩠ᨠᨾᩥᨲ᩠ᩅᩣ ᩁᩮᨱᩩᩴ ᩁᩣᨩᨸᩩᨲ᩠ᨲᩴ ᩑᩅᩴ ᩅᨴᩮᨳ – ‘‘ᨾᨿᩴ ᨡᩮᩣ ᨽᩮᩣᨲᩮᩣ ᩁᩮᨱᩩᩔ ᩈᩉᩣᨿᩣ ᨸᩥᨿᩣ ᨾᨶᩣᨸᩣ ᩋᨸ᩠ᨸᨭᩥᨠᩪᩃᩣ, ᨿᩴᩈᩩᨡᩮᩣ ᨽᩅᩴ ᨲᩴᩈᩩᨡᩣ ᨾᨿᩴ, ᨿᩴᨴᩩᨠ᩠ᨡᩮᩣ ᨽᩅᩴ ᨲᩴᨴᩩᨠ᩠ᨡᩣ ᨾᨿᩴ. ᨴᩥᩈᨾ᩠ᨸᨲᩥ ᨡᩮᩣ, ᨽᩮᩣ, ᩁᩣᨩᩣ ᨩᩥᨱ᩠ᨱᩮᩣ ᩅᩩᨴ᩠ᨵᩮᩣ ᨾᩉᩃ᩠ᩃᨠᩮᩣ ᩋᨴ᩠ᨵᨣᨲᩮᩣ ᩅᨿᩮᩣᩋᨶᩩᨸ᩠ᨸᨲ᩠ᨲᩮᩣ, ᨠᩮᩣ ᨶᩩ ᨡᩮᩣ ᨸᨶ, ᨽᩮᩣ, ᨩᩣᨶᩣᨲᩥ ᨩᩦᩅᩥᨲᩴ? ᨮᩣᨶᩴ ᨡᩮᩣ ᨸᨶᩮᨲᩴ ᩅᩥᨩ᩠ᨩᨲᩥ, ᨿᩴ ᨴᩥᩈᨾ᩠ᨸᨲᩥᨾ᩠ᩉᩥ ᩁᨬ᩠ᨬᩮ ᨠᩣᩃᨦ᩠ᨠᨲᩮ ᩁᩣᨩᨠᨲ᩠ᨲᩣᩁᩮᩣ ᨽᩅᨶ᩠ᨲᩴ ᩁᩮᨱᩩᩴ ᩁᨩ᩠ᨩᩮ ᩋᨽᩥᩈᩥᨬ᩠ᨧᩮᨿ᩠ᨿᩩᩴ. ᩈᨧᩮ ᨽᩅᩴ ᩁᩮᨱᩩ ᩁᨩ᩠ᨩᩴ ᩃᨽᩮᨳ, ᩈᩴᩅᩥᨽᨩᩮᨳ ᨶᩮᩣ ᩁᨩ᩠ᨩᩮᨶᩣ’’ᨲᩥ. ‘‘ᩑᩅᩴ ᨽᩮᩣ’’ᨲᩥ ᨡᩮᩣ, ᨽᩮᩣ, ᨲᩮ ᨨ ᨡᨲ᩠ᨲᩥᨿᩣ ᨾᩉᩣᨣᩮᩣᩅᩥᨶ᩠ᨴᩔ ᨻᩕᩣᩉ᩠ᨾᨱᩔ ᨸᨭᩥᩔᩩᨲ᩠ᩅᩣ ᨿᩮᨶ ᩁᩮᨱᩩ ᩁᩣᨩᨸᩩᨲ᩠ᨲᩮᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᩁᩮᨱᩩᩴ ᩁᩣᨩᨸᩩᨲ᩠ᨲᩴ ᩑᨲᨴᩅᩮᩣᨧᩩᩴ – ‘‘ᨾᨿᩴ ᨡᩮᩣ ᨽᩮᩣᨲᩮᩣ ᩁᩮᨱᩩᩔ ᩈᩉᩣᨿᩣ ᨸᩥᨿᩣ ᨾᨶᩣᨸᩣ ᩋᨸ᩠ᨸᨭᩥᨠᩪᩃᩣ; ᨿᩴᩈᩩᨡᩮᩣ ᨽᩅᩴ ᨲᩴᩈᩩᨡᩣ ᨾᨿᩴ, ᨿᩴᨴᩩᨠ᩠ᨡᩮᩣ ᨽᩅᩴ ᨲᩴᨴᩩᨠ᩠ᨡᩣ ᨾᨿᩴ. ᨴᩥᩈᨾ᩠ᨸᨲᩥ ᨡᩮᩣ, ᨽᩮᩣ, ᩁᩣᨩᩣ ᨩᩥᨱ᩠ᨱᩮᩣ ᩅᩩᨴ᩠ᨵᩮᩣ ᨾᩉᩃ᩠ᩃᨠᩮᩣ ᩋᨴ᩠ᨵᨣᨲᩮᩣ ᩅᨿᩮᩣᩋᨶᩩᨸ᩠ᨸᨲ᩠ᨲᩮᩣ, ᨠᩮᩣ ᨶᩩ ᨡᩮᩣ ᨸᨶ ᨽᩮᩣ ᨩᩣᨶᩣᨲᩥ ᨩᩦᩅᩥᨲᩴ? ᨮᩣᨶᩴ ᨡᩮᩣ ᨸᨶᩮᨲᩴ ᩅᩥᨩ᩠ᨩᨲᩥ, ᨿᩴ ᨴᩥᩈᨾ᩠ᨸᨲᩥᨾ᩠ᩉᩥ ᩁᨬ᩠ᨬᩮ ᨠᩣᩃᨦ᩠ᨠᨲᩮ ᩁᩣᨩᨠᨲ᩠ᨲᩣᩁᩮᩣ ᨽᩅᨶ᩠ᨲᩴ ᩁᩮᨱᩩᩴ ᩁᨩ᩠ᨩᩮ ᩋᨽᩥᩈᩥᨬ᩠ᨧᩮᨿ᩠ᨿᩩᩴ. ᩈᨧᩮ ᨽᩅᩴ ᩁᩮᨱᩩ ᩁᨩ᩠ᨩᩴ ᩃᨽᩮᨳ, ᩈᩴᩅᩥᨽᨩᩮᨳ ᨶᩮᩣ ᩁᨩ᩠ᨩᩮᨶᩣ’’ᨲᩥ. ‘‘ᨠᩮᩣ ᨶᩩ ᨡᩮᩣ, ᨽᩮᩣ, ᩋᨬ᩠ᨬᩮᩣ ᨾᨾ ᩅᩥᨩᩥᨲᩮ ᩈᩩᨡᩮᩣ ᨽᩅᩮᨳ [ᩈᩩᨡᩣ ᨽᩅᩮᨿ᩠ᨿᩣᨳ (ᨠ.), ᩈᩩᨡᩴ ᨽᩅᩮᨿ᩠ᨿᩣᨳ, ᩈᩩᨡᨾᩮᨵᩮᨿ᩠ᨿᩣᨳ (ᩈᩦ. ᨸᩦ.),ᩈᩩᨡ ᨾᩮᨵᩮᨳ (?)], ᩋᨬ᩠ᨬᨲᩕ ᨽᩅᨶ᩠ᨲᩮᨽᩥ? ᩈᨧᩣᩉᩴ, ᨽᩮᩣ, ᩁᨩ᩠ᨩᩴ ᩃᨽᩥᩔᩣᨾᩥ, ᩈᩴᩅᩥᨽᨩᩥᩔᩣᨾᩥ ᩅᩮᩣ ᩁᨩ᩠ᨩᩮᨶᩣ’’’ᨲᩥ.

᪓᪐᪗. ‘‘ᩋᨳ ᨡᩮᩣ, ᨽᩮᩣ, ᩋᩉᩮᩣᩁᨲ᩠ᨲᩣᨶᩴ ᩋᨧ᩠ᨧᨿᩮᨶ ᩁᩣᨩᩣ ᨴᩥᩈᨾ᩠ᨸᨲᩥ ᨠᩣᩃᨾᨠᩣᩈᩥ. ᨴᩥᩈᨾ᩠ᨸᨲᩥᨾ᩠ᩉᩥ ᩁᨬ᩠ᨬᩮ ᨠᩣᩃᨦ᩠ᨠᨲᩮ ᩁᩣᨩᨠᨲ᩠ᨲᩣᩁᩮᩣ ᩁᩮᨱᩩᩴ ᩁᩣᨩᨸᩩᨲ᩠ᨲᩴ ᩁᨩ᩠ᨩᩮ ᩋᨽᩥᩈᩥᨬ᩠ᨧᩥᩴᩈᩩ. ᩋᨽᩥᩈᩥᨲ᩠ᨲᩮᩣ ᩁᩮᨱᩩ ᩁᨩ᩠ᨩᩮᨶ ᨸᨬ᩠ᨧᩉᩥ ᨠᩣᨾᨣᩩᨱᩮᩉᩥ ᩈᨾᨸ᩠ᨸᩥᨲᩮᩣ ᩈᨾᨦ᩠ᨣᩦᨽᩪᨲᩮᩣ ᨸᩁᩥᨧᩣᩁᩮᨲᩥ. ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨿᩮᨶ ᨲᩮ ᨨ ᨡᨲ᩠ᨲᩥᨿᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨲᩮ ᨨ ᨡᨲ᩠ᨲᩥᨿᩮ ᩑᨲᨴᩅᩮᩣᨧ – ‘‘ᨴᩥᩈᨾ᩠ᨸᨲᩥ ᨡᩮᩣ, ᨽᩮᩣ, ᩁᩣᨩᩣ ᨠᩣᩃᨦ᩠ᨠᨲᩮᩣ. ᩋᨽᩥᩈᩥᨲ᩠ᨲᩮᩣ ᩁᩮᨱᩩ ᩁᨩ᩠ᨩᩮᨶ ᨸᨬ᩠ᨧᩉᩥ ᨠᩣᨾᨣᩩᨱᩮᩉᩥ ᩈᨾᨸ᩠ᨸᩥᨲᩮᩣ ᩈᨾᨦ᩠ᨣᩦᨽᩪᨲᩮᩣ ᨸᩁᩥᨧᩣᩁᩮᨲᩥ. ᨠᩮᩣ ᨶᩩ ᨡᩮᩣ ᨸᨶ, ᨽᩮᩣ, ᨩᩣᨶᩣᨲᩥ, ᨾᨴᨶᩦᨿᩣ ᨠᩣᨾᩣ? ᩌᨿᨶ᩠ᨲᩩ, ᨽᩮᩣᨶ᩠ᨲᩮᩣ, ᨿᩮᨶ ᩁᩮᨱᩩ ᩁᩣᨩᩣ ᨲᩮᨶᩩᨸᩈᨦ᩠ᨠᨾᨳ; ᩏᨸᩈᨦ᩠ᨠᨾᩥᨲ᩠ᩅᩣ ᩁᩮᨱᩩᩴ ᩁᩣᨩᩣᨶᩴ ᩑᩅᩴ ᩅᨴᩮᨳ – ᨴᩥᩈᨾ᩠ᨸᨲᩥ ᨡᩮᩣ, ᨽᩮᩣ, ᩁᩣᨩᩣ ᨠᩣᩃᨦ᩠ᨠᨲᩮᩣ, ᩋᨽᩥᩈᩥᨲ᩠ᨲᩮᩣ ᨽᩅᩴ ᩁᩮᨱᩩ ᩁᨩ᩠ᨩᩮᨶ, ᩈᩁᨲᩥ ᨽᩅᩴ ᨲᩴ ᩅᨧᨶ’’’ᨶ᩠ᨲᩥ?

᪓᪐᪘. ‘‘‘ᩑᩅᩴ, ᨽᩮᩣ’’ᨲᩥ ᨡᩮᩣ, ᨽᩮᩣ, ᨲᩮ ᨨ ᨡᨲ᩠ᨲᩥᨿᩣ ᨾᩉᩣᨣᩮᩣᩅᩥᨶ᩠ᨴᩔ ᨻᩕᩣᩉ᩠ᨾᨱᩔ ᨸᨭᩥᩔᩩᨲ᩠ᩅᩣ ᨿᩮᨶ ᩁᩮᨱᩩ ᩁᩣᨩᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᩁᩮᨱᩩᩴ ᩁᩣᨩᩣᨶᩴ ᩑᨲᨴᩅᩮᩣᨧᩩᩴ – ‘‘ᨴᩥᩈᨾ᩠ᨸᨲᩥ ᨡᩮᩣ, ᨽᩮᩣ, ᩁᩣᨩᩣ ᨠᩣᩃᨦ᩠ᨠᨲᩮᩣ, ᩋᨽᩥᩈᩥᨲ᩠ᨲᩮᩣ ᨽᩅᩴ ᩁᩮᨱᩩ ᩁᨩ᩠ᨩᩮᨶ, ᩈᩁᨲᩥ ᨽᩅᩴ ᨲᩴ ᩅᨧᨶ’’ᨶ᩠ᨲᩥ? ‘‘ᩈᩁᩣᨾᩉᩴ, ᨽᩮᩣ, ᨲᩴ ᩅᨧᨶᩴ [ᩅᨧᨶᨶ᩠ᨲᩥ (ᩈ᩠ᨿᩣ. ᨠ.)]. ᨠᩮᩣ ᨶᩩ ᨡᩮᩣ, ᨽᩮᩣ, ᨸᩉᩮᩣᨲᩥ ᩍᨾᩴ ᨾᩉᩣᨸᨳᩅᩥᩴ ᩏᨲ᩠ᨲᩁᩮᨶ ᩌᨿᨲᩴ ᨴᨠ᩠ᨡᩥᨱᩮᨶ ᩈᨠᨭᨾᩩᨡᩴ ᩈᨲ᩠ᨲᨵᩣ ᩈᨾᩴ ᩈᩩᩅᩥᨽᨲ᩠ᨲᩴ ᩅᩥᨽᨩᩥᨲᩩ’’ᨶ᩠ᨲᩥ? ‘‘ᨠᩮᩣ ᨶᩩ ᨡᩮᩣ, ᨽᩮᩣ, ᩋᨬ᩠ᨬᩮᩣ ᨸᩉᩮᩣᨲᩥ, ᩋᨬ᩠ᨬᨲᩕ ᨾᩉᩣᨣᩮᩣᩅᩥᨶ᩠ᨴᩮᨶ ᨻᩕᩣᩉ᩠ᨾᨱᩮᨶᩣ’’ᨲᩥ? ᩋᨳ ᨡᩮᩣ, ᨽᩮᩣ, ᩁᩮᨱᩩ ᩁᩣᨩᩣ ᩋᨬ᩠ᨬᨲᩁᩴ ᨸᩩᩁᩥᩈᩴ ᩌᨾᨶ᩠ᨲᩮᩈᩥ – ‘‘ᩑᩉᩥ ᨲ᩠ᩅᩴ, ᩋᨾ᩠ᨽᩮᩣ ᨸᩩᩁᩥᩈ, ᨿᩮᨶ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨲᩮᨶᩩᨸᩈᨦ᩠ᨠᨾ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩉᩣᨣᩮᩣᩅᩥᨶ᩠ᨴᩴ ᨻᩕᩣᩉ᩠ᨾᨱᩴ ᩑᩅᩴ ᩅᨴᩮᩉᩥ – ‘ᩁᩣᨩᩣ ᨲᩴ, ᨽᨶ᩠ᨲᩮ, ᩁᩮᨱᩩ ᩌᨾᨶ᩠ᨲᩮᨲᩦ’’’ᨲᩥ. ‘‘ᩑᩅᩴ ᨴᩮᩅᩣ’’ᨲᩥ ᨡᩮᩣ, ᨽᩮᩣ, ᩈᩮᩣ ᨸᩩᩁᩥᩈᩮᩣ ᩁᩮᨱᩩᩔ ᩁᨬ᩠ᨬᩮᩣ ᨸᨭᩥᩔᩩᨲ᩠ᩅᩣ ᨿᩮᨶ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩉᩣᨣᩮᩣᩅᩥᨶ᩠ᨴᩴ ᨻᩕᩣᩉ᩠ᨾᨱᩴ ᩑᨲᨴᩅᩮᩣᨧ – ‘‘ᩁᩣᨩᩣ ᨲᩴ, ᨽᨶ᩠ᨲᩮ, ᩁᩮᨱᩩ ᩌᨾᨶ᩠ᨲᩮᨲᩦ’’ᨲᩥ. ‘‘ᩑᩅᩴ, ᨽᩮᩣ’’ᨲᩥ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨲᩔ ᨸᩩᩁᩥᩈᩔ ᨸᨭᩥᩔᩩᨲ᩠ᩅᩣ ᨿᩮᨶ ᩁᩮᨱᩩ ᩁᩣᨩᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩁᩮᨱᩩᨶᩣ ᩁᨬ᩠ᨬᩣ ᩈᨴ᩠ᨵᩥᩴ ᩈᨾ᩠ᨾᩮᩣᨴᩥ. ᩈᨾ᩠ᨾᩮᩣᨴᨶᩦᨿᩴ ᨠᨳᩴ ᩈᩣᩁᨱᩦᨿᩴ ᩅᩦᨲᩥᩈᩣᩁᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩴ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩴ ᨻᩕᩣᩉ᩠ᨾᨱᩴ ᩁᩮᨱᩩ ᩁᩣᨩᩣ ᩑᨲᨴᩅᩮᩣᨧ – ‘‘ᩑᨲᩩ, ᨽᩅᩴ ᨣᩮᩣᩅᩥᨶ᩠ᨴᩮᩣ, ᩍᨾᩴ ᨾᩉᩣᨸᨳᩅᩥᩴ ᩏᨲ᩠ᨲᩁᩮᨶ ᩌᨿᨲᩴ ᨴᨠ᩠ᨡᩥᨱᩮᨶ ᩈᨠᨭᨾᩩᨡᩴ ᩈᨲ᩠ᨲᨵᩣ ᩈᨾᩴ ᩈᩩᩅᩥᨽᨲ᩠ᨲᩴ ᩅᩥᨽᨩᨲᩪ’’ᨲᩥ. ‘‘ᩑᩅᩴ, ᨽᩮᩣ’’ᨲᩥ ᨡᩮᩣ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᩁᩮᨱᩩᩔ ᩁᨬ᩠ᨬᩮᩣ ᨸᨭᩥᩔᩩᨲ᩠ᩅᩣ ᩍᨾᩴ ᨾᩉᩣᨸᨳᩅᩥᩴ ᩏᨲ᩠ᨲᩁᩮᨶ ᩌᨿᨲᩴ ᨴᨠ᩠ᨡᩥᨱᩮᨶ ᩈᨠᨭᨾᩩᨡᩴ ᩈᨲ᩠ᨲᨵᩣ ᩈᨾᩴ ᩈᩩᩅᩥᨽᨲ᩠ᨲᩴ ᩅᩥᨽᨩᩥ. ᩈᨻ᩠ᨻᩣᨶᩥ ᩈᨠᨭᨾᩩᨡᩣᨶᩥ ᨸᨭ᩠ᨮᨸᩮᩈᩥ [ᩋᨭ᩠ᨮᨸᩮᩈᩥ (ᩈᩦ. ᨸᩦ.)]. ᨲᨲᩕ ᩈᩩᨴᩴ ᨾᨩ᩠ᨫᩮ ᩁᩮᨱᩩᩔ ᩁᨬ᩠ᨬᩮᩣ ᨩᨶᨸᨴᩮᩣ ᩉᩮᩣᨲᩥ.

᪓᪐᪙. ᨴᨶ᩠ᨲᨸᩩᩁᩴ ᨠᩃᩥᨦ᩠ᨣᩣᨶᩴ [ᨠᩣᩃᩥᨦ᩠ᨣᩣᨶᩴ (ᩈ᩠ᨿᩣ. ᨸᩦ. ᨠ.)], ᩋᩔᨠᩣᨶᨬ᩠ᨧ ᨸᩮᩣᨲᨶᩴ.

ᨾᩉᩮᩈᨿᩴ [ᨾᩣᩉᩥᩔᨲᩥ (ᩈᩦ. ᩈ᩠ᨿᩣ. ᨸᩦ.)] ᩋᩅᨶ᩠ᨲᩦᨶᩴ, ᩈᩮᩣᩅᩦᩁᩣᨶᨬ᩠ᨧ ᩁᩮᩣᩁᩩᨠᩴ.

ᨾᩥᨳᩥᩃᩣ ᨧ ᩅᩥᨴᩮᩉᩣᨶᩴ, ᨧᨾ᩠ᨸᩣ ᩋᨦ᩠ᨣᩮᩈᩩ ᨾᩣᨸᩥᨲᩣ;

ᨻᩣᩁᩣᨱᩈᩦ ᨧ ᨠᩣᩈᩦᨶᩴ, ᩑᨲᩮ ᨣᩮᩣᩅᩥᨶ᩠ᨴᨾᩣᨸᩥᨲᩣᨲᩥ.

᪓᪑᪐. ‘‘ᩋᨳ ᨡᩮᩣ, ᨽᩮᩣ, ᨲᩮ ᨨ ᨡᨲ᩠ᨲᩥᨿᩣ ᨿᨳᩣᩈᨠᩮᨶ ᩃᩣᨽᩮᨶ ᩋᨲ᩠ᨲᨾᨶᩣ ᩋᩉᩮᩈᩩᩴ ᨸᩁᩥᨸᩩᨱ᩠ᨱᩈᨦ᩠ᨠᨸ᩠ᨸᩣ – ‘‘ᨿᩴ ᩅᨲ ᨶᩮᩣ ᩋᩉᩮᩣᩈᩥ ᩍᨧ᩠ᨨᩥᨲᩴ, ᨿᩴ ᩌᨠᨦ᩠ᨡᩥᨲᩴ, ᨿᩴ ᩋᨵᩥᨸ᩠ᨸᩮᨲᩴ, ᨿᩴ ᩋᨽᩥᨸᨲ᩠ᨳᩥᨲᩴ, ᨲᩴ ᨶᩮᩣ ᩃᨴ᩠ᨵ’’ᨶ᩠ᨲᩥ.

‘‘ᩈᨲ᩠ᨲᨽᩪ ᨻᩕᩉ᩠ᨾᨴᨲ᩠ᨲᩮᩣ ᨧ, ᩅᩮᩔᨽᩪ ᨽᩁᨲᩮᩣ ᩈᩉ;

ᩁᩮᨱᩩ ᨴ᩠ᩅᩮ ᨵᨲᩁᨭ᩠ᨮᩣ ᨧ, ᨲᨴᩣᩈᩩᩴ ᩈᨲ᩠ᨲ ᨽᩣᩁᨵᩣ’ᨲᩥ.

ᨸᨮᨾᨽᩣᨱᩅᩣᩁᩮᩣ ᨶᩥᨭ᩠ᨮᩥᨲᩮᩣ.

ᨠᩥᨲ᩠ᨲᩥᩈᨴ᩠ᨴᩋᨻ᩠ᨽᩩᨣ᩠ᨣᨾᨶᩴ

᪓᪑᪑. ‘‘ᩋᨳ ᨡᩮᩣ, ᨽᩮᩣ, ᨲᩮ ᨨ ᨡᨲ᩠ᨲᩥᨿᩣ ᨿᩮᨶ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩉᩣᨣᩮᩣᩅᩥᨶ᩠ᨴᩴ ᨻᩕᩣᩉ᩠ᨾᨱᩴ ᩑᨲᨴᩅᩮᩣᨧᩩᩴ – ‘‘ᨿᨳᩣ ᨡᩮᩣ ᨽᩅᩴ ᨣᩮᩣᩅᩥᨶ᩠ᨴᩮᩣ ᩁᩮᨱᩩᩔ ᩁᨬ᩠ᨬᩮᩣ ᩈᩉᩣᨿᩮᩣ ᨸᩥᨿᩮᩣ ᨾᨶᩣᨸᩮᩣ ᩋᨸ᩠ᨸᨭᩥᨠᩪᩃᩮᩣ. ᩑᩅᨾᩮᩅ ᨡᩮᩣ ᨽᩅᩴ ᨣᩮᩣᩅᩥᨶ᩠ᨴᩮᩣ ᩋᨾ᩠ᩉᩣᨠᨾ᩠ᨸᩥ ᩈᩉᩣᨿᩮᩣ ᨸᩥᨿᩮᩣ ᨾᨶᩣᨸᩮᩣ ᩋᨸ᩠ᨸᨭᩥᨠᩪᩃᩮᩣ, ᩋᨶᩩᩈᩣᩈᨲᩩ ᨶᩮᩣ ᨽᩅᩴ ᨣᩮᩣᩅᩥᨶ᩠ᨴᩮᩣ; ᨾᩣ ᨶᩮᩣ ᨽᩅᩴ ᨣᩮᩣᩅᩥᨶ᩠ᨴᩮᩣ ᩋᨶᩩᩈᩣᩈᨶᩥᨿᩣ ᨸᨧ᩠ᨧᨻ᩠ᨿᩣᩉᩣᩈᩦ’’ᨲᩥ. ‘‘ᩑᩅᩴ, ᨽᩮᩣ’’ᨲᩥ ᨡᩮᩣ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨲᩮᩈᩴ ᨨᨶ᩠ᨶᩴ ᨡᨲ᩠ᨲᩥᨿᩣᨶᩴ ᨸᨧ᩠ᨧᩔᩮᩣᩈᩥ. ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᩈᨲ᩠ᨲ ᨧ ᩁᩣᨩᩣᨶᩮᩣ ᨡᨲ᩠ᨲᩥᨿᩮ ᨾᩩᨴ᩠ᨵᩣᩅᩈᩥᨲ᩠ᨲᩮ ᩁᨩ᩠ᨩᩮ [ᨾᩩᨴ᩠ᨵᩣᨽᩥᩈᩥᨲ᩠ᨲᩮ ᩁᨩ᩠ᨩᩮᨶ (ᩈ᩠ᨿᩣ.)] ᩋᨶᩩᩈᩣᩈᩥ, ᩈᨲ᩠ᨲ ᨧ ᨻᩕᩣᩉ᩠ᨾᨱᨾᩉᩣᩈᩣᩃᩮ ᩈᨲ᩠ᨲ ᨧ ᨶ᩠ᩉᩣᨲᨠᩈᨲᩣᨶᩥ ᨾᨶ᩠ᨲᩮ ᩅᩣᨧᩮᩈᩥ.

᪓᪑᪒. ‘‘ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩔ ᨻᩕᩣᩉ᩠ᨾᨱᩔ ᩋᨸᩁᩮᨶ ᩈᨾᨿᩮᨶ ᩑᩅᩴ ᨠᩃ᩠ᨿᩣᨱᩮᩣ ᨠᩥᨲ᩠ᨲᩥᩈᨴ᩠ᨴᩮᩣ ᩋᨻ᩠ᨽᩩᨣ᩠ᨣᨧ᩠ᨨᩥ [ᩋᨻ᩠ᨽᩩᨣ᩠ᨣᨬ᩠ᨨᩥ (ᩈᩦ. ᨸᩦ.)] – ‘‘ᩈᨠ᩠ᨡᩥ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨻᩕᩉ᩠ᨾᩣᨶᩴ ᨸᩔᨲᩥ, ᩈᨠ᩠ᨡᩥ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨲᩥ ᩈᩃ᩠ᩃᨸᨲᩥ ᨾᨶ᩠ᨲᩮᨲᩦ’’ᨲᩥ. ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩔ ᨻᩕᩣᩉ᩠ᨾᨱᩔ ᩑᨲᨴᩉᩮᩣᩈᩥ – ‘‘ᨾᨿ᩠ᩉᩴ ᨡᩮᩣ ᩑᩅᩴ ᨠᩃ᩠ᨿᩣᨱᩮᩣ ᨠᩥᨲ᩠ᨲᩥᩈᨴ᩠ᨴᩮᩣ ᩋᨻ᩠ᨽᩩᨣ᩠ᨣᨲᩮᩣ – ‘ᩈᨠ᩠ᨡᩥ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨻᩕᩉ᩠ᨾᩣᨶᩴ ᨸᩔᨲᩥ, ᩈᨠ᩠ᨡᩥ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨲᩥ ᩈᩃ᩠ᩃᨸᨲᩥ ᨾᨶ᩠ᨲᩮᨲᩦ’ᨲᩥ. ᨶ ᨡᩮᩣ ᨸᨶᩣᩉᩴ ᨻᩕᩉ᩠ᨾᩣᨶᩴ ᨸᩔᩣᨾᩥ, ᨶ ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨾᩥ, ᨶ ᨻᩕᩉ᩠ᨾᩩᨶᩣ ᩈᩃ᩠ᩃᨸᩣᨾᩥ, ᨶ ᨻᩕᩉ᩠ᨾᩩᨶᩣ ᨾᨶ᩠ᨲᩮᨾᩥ. ᩈᩩᨲᩴ ᨡᩮᩣ ᨸᨶ ᨾᩮᨲᩴ ᨻᩕᩣᩉ᩠ᨾᨱᩣᨶᩴ ᩅᩩᨴ᩠ᨵᩣᨶᩴ ᨾᩉᩃ᩠ᩃᨠᩣᨶᩴ ᩌᨧᩁᩥᨿᨸᩣᨧᩁᩥᨿᩣᨶᩴ ᨽᩣᩈᨾᩣᨶᩣᨶᩴ – ‘ᨿᩮᩣ ᩅᩔᩥᨠᩮ ᨧᨲ᩠ᨲᩣᩁᩮᩣ ᨾᩣᩈᩮ ᨸᨭᩥᩈᩃ᩠ᩃᩦᨿᨲᩥ, ᨠᩁᩩᨱᩴ ᨫᩣᨶᩴ ᨫᩣᨿᨲᩥ, ᩈᩮᩣ ᨻᩕᩉ᩠ᨾᩣᨶᩴ ᨸᩔᨲᩥ ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨲᩥ ᨻᩕᩉ᩠ᨾᩩᨶᩣ ᩈᩃ᩠ᩃᨸᨲᩥ ᨻᩕᩉ᩠ᨾᩩᨶᩣ ᨾᨶ᩠ᨲᩮᨲᩦ’ᨲᩥ. ᨿᩴᨶᩪᨶᩣᩉᩴ ᩅᩔᩥᨠᩮ ᨧᨲ᩠ᨲᩣᩁᩮᩣ ᨾᩣᩈᩮ ᨸᨭᩥᩈᩃ᩠ᩃᩦᨿᩮᨿ᩠ᨿᩴ, ᨠᩁᩩᨱᩴ ᨫᩣᨶᩴ ᨫᩣᨿᩮᨿ᩠ᨿ’’ᨶ᩠ᨲᩥ.

᪓᪑᪓. ‘‘ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨿᩮᨶ ᩁᩮᨱᩩ ᩁᩣᨩᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩁᩮᨱᩩᩴ ᩁᩣᨩᩣᨶᩴ ᩑᨲᨴᩅᩮᩣᨧ – ‘‘ᨾᨿ᩠ᩉᩴ ᨡᩮᩣ, ᨽᩮᩣ, ᩑᩅᩴ ᨠᩃ᩠ᨿᩣᨱᩮᩣ ᨠᩥᨲ᩠ᨲᩥᩈᨴ᩠ᨴᩮᩣ ᩋᨻ᩠ᨽᩩᨣ᩠ᨣᨲᩮᩣ – ‘ᩈᨠ᩠ᨡᩥ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨻᩕᩉ᩠ᨾᩣᨶᩴ ᨸᩔᨲᩥ, ᩈᨠ᩠ᨡᩥ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨲᩥ ᩈᩃ᩠ᩃᨸᨲᩥ ᨾᨶ᩠ᨲᩮᨲᩦ’ᨲᩥ. ᨶ ᨡᩮᩣ ᨸᨶᩣᩉᩴ, ᨽᩮᩣ, ᨻᩕᩉ᩠ᨾᩣᨶᩴ ᨸᩔᩣᨾᩥ, ᨶ ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨾᩥ, ᨶ ᨻᩕᩉ᩠ᨾᩩᨶᩣ ᩈᩃ᩠ᩃᨸᩣᨾᩥ, ᨶ ᨻᩕᩉ᩠ᨾᩩᨶᩣ ᨾᨶ᩠ᨲᩮᨾᩥ. ᩈᩩᨲᩴ ᨡᩮᩣ ᨸᨶ ᨾᩮᨲᩴ ᨻᩕᩣᩉ᩠ᨾᨱᩣᨶᩴ ᩅᩩᨴ᩠ᨵᩣᨶᩴ ᨾᩉᩃ᩠ᩃᨠᩣᨶᩴ ᩌᨧᩁᩥᨿᨸᩣᨧᩁᩥᨿᩣᨶᩴ ᨽᩣᩈᨾᩣᨶᩣᨶᩴ – ‘ᨿᩮᩣ ᩅᩔᩥᨠᩮ ᨧᨲ᩠ᨲᩣᩁᩮᩣ ᨾᩣᩈᩮ ᨸᨭᩥᩈᩃ᩠ᩃᩦᨿᨲᩥ, ᨠᩁᩩᨱᩴ ᨫᩣᨶᩴ ᨫᩣᨿᨲᩥ, ᩈᩮᩣ ᨻᩕᩉ᩠ᨾᩣᨶᩴ ᨸᩔᨲᩥ, ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨲᩥ ᨻᩕᩉ᩠ᨾᩩᨶᩣ ᩈᩃ᩠ᩃᨸᨲᩥ ᨻᩕᩉ᩠ᨾᩩᨶᩣ ᨾᨶ᩠ᨲᩮᨲᩦ’ᨲᩥ. ᩍᨧ᩠ᨨᩣᨾᩉᩴ, ᨽᩮᩣ, ᩅᩔᩥᨠᩮ ᨧᨲ᩠ᨲᩣᩁᩮᩣ ᨾᩣᩈᩮ ᨸᨭᩥᩈᩃ᩠ᩃᩦᨿᩥᨲᩩᩴ, ᨠᩁᩩᨱᩴ ᨫᩣᨶᩴ ᨫᩣᨿᩥᨲᩩᩴ; ᨶᨾ᩠ᩉᩥ ᨠᩮᨶᨧᩥ ᩏᨸᩈᨦ᩠ᨠᨾᩥᨲᨻ᩠ᨻᩮᩣ ᩋᨬ᩠ᨬᨲᩕ ᩑᨠᩮᨶ ᨽᨲ᩠ᨲᩣᨽᩥᩉᩣᩁᩮᨶᩣ’’ᨲᩥ. ‘‘ᨿᩔᨴᩣᨶᩥ ᨽᩅᩴ ᨣᩮᩣᩅᩥᨶ᩠ᨴᩮᩣ ᨠᩣᩃᩴ ᨾᨬ᩠ᨬᨲᩦ’’ᨲᩥ.

᪓᪑᪔. ‘‘ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨿᩮᨶ ᨲᩮ ᨨ ᨡᨲ᩠ᨲᩥᨿᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨲᩮ ᨨ ᨡᨲ᩠ᨲᩥᨿᩮ ᩑᨲᨴᩅᩮᩣᨧ – ‘‘ᨾᨿ᩠ᩉᩴ ᨡᩮᩣ, ᨽᩮᩣ, ᩑᩅᩴ ᨠᩃ᩠ᨿᩣᨱᩮᩣ ᨠᩥᨲ᩠ᨲᩥᩈᨴ᩠ᨴᩮᩣ ᩋᨻ᩠ᨽᩩᨣ᩠ᨣᨲᩮᩣ – ‘ᩈᨠ᩠ᨡᩥ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨻᩕᩉ᩠ᨾᩣᨶᩴ ᨸᩔᨲᩥ, ᩈᨠ᩠ᨡᩥ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨲᩥ ᩈᩃ᩠ᩃᨸᨲᩥ ᨾᨶ᩠ᨲᩮᨲᩦ’ᨲᩥ. ᨶ ᨡᩮᩣ ᨸᨶᩣᩉᩴ, ᨽᩮᩣ, ᨻᩕᩉ᩠ᨾᩣᨶᩴ ᨸᩔᩣᨾᩥ, ᨶ ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨾᩥ, ᨶ ᨻᩕᩉ᩠ᨾᩩᨶᩣ ᩈᩃ᩠ᩃᨸᩣᨾᩥ, ᨶ ᨻᩕᩉ᩠ᨾᩩᨶᩣ ᨾᨶ᩠ᨲᩮᨾᩥ. ᩈᩩᨲᩴ ᨡᩮᩣ ᨸᨶ ᨾᩮᨲᩴ ᨻᩕᩣᩉ᩠ᨾᨱᩣᨶᩴ ᩅᩩᨴ᩠ᨵᩣᨶᩴ ᨾᩉᩃ᩠ᩃᨠᩣᨶᩴ ᩌᨧᩁᩥᨿᨸᩣᨧᩁᩥᨿᩣᨶᩴ ᨽᩣᩈᨾᩣᨶᩣᨶᩴ, ‘ᨿᩮᩣ ᩅᩔᩥᨠᩮ ᨧᨲ᩠ᨲᩣᩁᩮᩣ ᨾᩣᩈᩮ ᨸᨭᩥᩈᩃ᩠ᩃᩦᨿᨲᩥ, ᨠᩁᩩᨱᩴ ᨫᩣᨶᩴ ᨫᩣᨿᨲᩥ, ᩈᩮᩣ ᨻᩕᩉ᩠ᨾᩣᨶᩴ ᨸᩔᨲᩥ ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨲᩥ ᨻᩕᩉ᩠ᨾᩩᨶᩣ ᩈᩃ᩠ᩃᨸᨲᩥ ᨻᩕᩉ᩠ᨾᩩᨶᩣ ᨾᨶ᩠ᨲᩮᨲᩦ’ᨲᩥ. ᩍᨧ᩠ᨨᩣᨾᩉᩴ, ᨽᩮᩣ, ᩅᩔᩥᨠᩮ ᨧᨲ᩠ᨲᩣᩁᩮᩣ ᨾᩣᩈᩮ ᨸᨭᩥᩈᩃ᩠ᩃᩦᨿᩥᨲᩩᩴ, ᨠᩁᩩᨱᩴ ᨫᩣᨶᩴ ᨫᩣᨿᩥᨲᩩᩴ; ᨶᨾ᩠ᩉᩥ ᨠᩮᨶᨧᩥ ᩏᨸᩈᨦ᩠ᨠᨾᩥᨲᨻ᩠ᨻᩮᩣ ᩋᨬ᩠ᨬᨲᩕ ᩑᨠᩮᨶ ᨽᨲ᩠ᨲᩣᨽᩥᩉᩣᩁᩮᨶᩣ’’ᨲᩥ. ‘‘ᨿᩔᨴᩣᨶᩥ ᨽᩅᩴ ᨣᩮᩣᩅᩥᨶ᩠ᨴᩮᩣ ᨠᩣᩃᩴ ᨾᨬ᩠ᨬᨲᩦ’’’ᨲᩥ.

᪓᪑᪕. ‘‘ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨿᩮᨶ ᨲᩮ ᩈᨲ᩠ᨲ ᨧ ᨻᩕᩣᩉ᩠ᨾᨱᨾᩉᩣᩈᩣᩃᩣ ᩈᨲ᩠ᨲ ᨧ ᨶ᩠ᩉᩣᨲᨠᩈᨲᩣᨶᩥ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨲᩮ ᩈᨲ᩠ᨲ ᨧ ᨻᩕᩣᩉ᩠ᨾᨱᨾᩉᩣᩈᩣᩃᩮ ᩈᨲ᩠ᨲ ᨧ ᨶ᩠ᩉᩣᨲᨠᩈᨲᩣᨶᩥ ᩑᨲᨴᩅᩮᩣᨧ – ‘‘ᨾᨿ᩠ᩉᩴ ᨡᩮᩣ, ᨽᩮᩣ, ᩑᩅᩴ ᨠᩃ᩠ᨿᩣᨱᩮᩣ ᨠᩥᨲ᩠ᨲᩥᩈᨴ᩠ᨴᩮᩣ ᩋᨻ᩠ᨽᩩᨣ᩠ᨣᨲᩮᩣ – ‘ᩈᨠ᩠ᨡᩥ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨻᩕᩉ᩠ᨾᩣᨶᩴ ᨸᩔᨲᩥ, ᩈᨠ᩠ᨡᩥ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨲᩥ ᩈᩃ᩠ᩃᨸᨲᩥ ᨾᨶ᩠ᨲᩮᨲᩦ’ᨲᩥ. ᨶ ᨡᩮᩣ ᨸᨶᩣᩉᩴ, ᨽᩮᩣ, ᨻᩕᩉ᩠ᨾᩣᨶᩴ ᨸᩔᩣᨾᩥ, ᨶ ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨾᩥ, ᨶ ᨻᩕᩉ᩠ᨾᩩᨶᩣ ᩈᩃ᩠ᩃᨸᩣᨾᩥ, ᨶ ᨻᩕᩉ᩠ᨾᩩᨶᩣ ᨾᨶ᩠ᨲᩮᨾᩥ. ᩈᩩᨲᩴ ᨡᩮᩣ ᨸᨶ ᨾᩮᨲᩴ ᨻᩕᩣᩉ᩠ᨾᨱᩣᨶᩴ ᩅᩩᨴ᩠ᨵᩣᨶᩴ ᨾᩉᩃ᩠ᩃᨠᩣᨶᩴ ᩌᨧᩁᩥᨿᨸᩣᨧᩁᩥᨿᩣᨶᩴ ᨽᩣᩈᨾᩣᨶᩣᨶᩴ – ‘ᨿᩮᩣ ᩅᩔᩥᨠᩮ ᨧᨲ᩠ᨲᩣᩁᩮᩣ ᨾᩣᩈᩮ ᨸᨭᩥᩈᩃ᩠ᩃᩦᨿᨲᩥ, ᨠᩁᩩᨱᩴ ᨫᩣᨶᩴ ᨫᩣᨿᨲᩥ, ᩈᩮᩣ ᨻᩕᩉ᩠ᨾᩣᨶᩴ ᨸᩔᨲᩥ, ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨲᩥ, ᨻᩕᩉ᩠ᨾᩩᨶᩣ ᩈᩃ᩠ᩃᨸᨲᩥ, ᨻᩕᩉ᩠ᨾᩩᨶᩣ ᨾᨶ᩠ᨲᩮᨲᩦ’ᨲᩥ. ᨲᩮᨶ ᩉᩥ, ᨽᩮᩣ, ᨿᨳᩣᩈᩩᨲᩮ ᨿᨳᩣᨸᩁᩥᨿᨲ᩠ᨲᩮ ᨾᨶ᩠ᨲᩮ ᩅᩥᨲ᩠ᨳᩣᩁᩮᨶ ᩈᨩ᩠ᨫᩣᨿᩴ ᨠᩁᩮᩣᨳ, ᩋᨬ᩠ᨬᨾᨬ᩠ᨬᨬ᩠ᨧ ᨾᨶ᩠ᨲᩮ ᩅᩣᨧᩮᨳ; ᩍᨧ᩠ᨨᩣᨾᩉᩴ, ᨽᩮᩣ, ᩅᩔᩥᨠᩮ ᨧᨲ᩠ᨲᩣᩁᩮᩣ ᨾᩣᩈᩮ ᨸᨭᩥᩈᩃ᩠ᩃᩦᨿᩥᨲᩩᩴ, ᨠᩁᩩᨱᩴ ᨫᩣᨶᩴ ᨫᩣᨿᩥᨲᩩᩴ; ᨶᨾ᩠ᩉᩥ ᨠᩮᨶᨧᩥ ᩏᨸᩈᨦ᩠ᨠᨾᩥᨲᨻ᩠ᨻᩮᩣ ᩋᨬ᩠ᨬᨲᩕ ᩑᨠᩮᨶ ᨽᨲ᩠ᨲᩣᨽᩥᩉᩣᩁᩮᨶᩣ’’ᨲᩥ. ‘‘ᨿᩔ ᨴᩣᨶᩥ ᨽᩅᩴ ᨣᩮᩣᩅᩥᨶ᩠ᨴᩮᩣ ᨠᩣᩃᩴ ᨾᨬ᩠ᨬᨲᩦ’’ᨲᩥ.

᪓᪑᪖. ‘‘ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨿᩮᨶ ᨧᨲ᩠ᨲᩣᩁᩦᩈᩣ ᨽᩁᩥᨿᩣ ᩈᩣᨴᩥᩈᩥᨿᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨧᨲ᩠ᨲᩣᩁᩦᩈᩣ ᨽᩁᩥᨿᩣ ᩈᩣᨴᩥᩈᩥᨿᩮᩣ ᩑᨲᨴᩅᩮᩣᨧ – ‘‘ᨾᨿ᩠ᩉᩴ ᨡᩮᩣ, ᨽᩮᩣᨲᩦ, ᩑᩅᩴ ᨠᩃ᩠ᨿᩣᨱᩮᩣ ᨠᩥᨲ᩠ᨲᩥᩈᨴ᩠ᨴᩮᩣ ᩋᨻ᩠ᨽᩩᨣ᩠ᨣᨲᩮᩣ – ‘ᩈᨠ᩠ᨡᩥ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨻᩕᩉ᩠ᨾᩣᨶᩴ ᨸᩔᨲᩥ, ᩈᨠ᩠ᨡᩥ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨲᩥ ᩈᩃ᩠ᩃᨸᨲᩥ ᨾᨶ᩠ᨲᩮᨲᩦ’ᨲᩥ. ᨶ ᨡᩮᩣ ᨸᨶᩣᩉᩴ, ᨽᩮᩣᨲᩦ, ᨻᩕᩉ᩠ᨾᩣᨶᩴ ᨸᩔᩣᨾᩥ, ᨶ ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨾᩥ, ᨶ ᨻᩕᩉ᩠ᨾᩩᨶᩣ ᩈᩃ᩠ᩃᨸᩣᨾᩥ, ᨶ ᨻᩕᩉ᩠ᨾᩩᨶᩣ ᨾᨶ᩠ᨲᩮᨾᩥ. ᩈᩩᨲᩴ ᨡᩮᩣ ᨸᨶ ᨾᩮᨲᩴ ᨻᩕᩣᩉ᩠ᨾᨱᩣᨶᩴ ᩅᩩᨴ᩠ᨵᩣᨶᩴ ᨾᩉᩃ᩠ᩃᨠᩣᨶᩴ ᩌᨧᩁᩥᨿᨸᩣᨧᩁᩥᨿᩣᨶᩴ ᨽᩣᩈᨾᩣᨶᩣᨶᩴ ‘ᨿᩮᩣ ᩅᩔᩥᨠᩮ ᨧᨲ᩠ᨲᩣᩁᩮᩣ ᨾᩣᩈᩮ ᨸᨭᩥᩈᩃ᩠ᩃᩦᨿᨲᩥ, ᨠᩁᩩᨱᩴ ᨫᩣᨶᩴ ᨫᩣᨿᨲᩥ, ᩈᩮᩣ ᨻᩕᩉ᩠ᨾᩣᨶᩴ ᨸᩔᨲᩥ, ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨲᩥ, ᨻᩕᩉ᩠ᨾᩩᨶᩣ ᩈᩃ᩠ᩃᨸᨲᩥ, ᨻᩕᩉ᩠ᨾᩩᨶᩣ ᨾᨶ᩠ᨲᩮᨲᩦᨲᩥ, ᩍᨧ᩠ᨨᩣᨾᩉᩴ, ᨽᩮᩣᨲᩦ, ᩅᩔᩥᨠᩮ ᨧᨲ᩠ᨲᩣᩁᩮᩣ ᨾᩣᩈᩮ ᨸᨭᩥᩈᩃ᩠ᩃᩦᨿᩥᨲᩩᩴ, ᨠᩁᩩᨱᩴ ᨫᩣᨶᩴ ᨫᩣᨿᩥᨲᩩᩴ; ᨶᨾ᩠ᩉᩥ ᨠᩮᨶᨧᩥ ᩏᨸᩈᨦ᩠ᨠᨾᩥᨲᨻ᩠ᨻᩮᩣ ᩋᨬ᩠ᨬᨲᩕ ᩑᨠᩮᨶ ᨽᨲ᩠ᨲᩣᨽᩥᩉᩣᩁᩮᨶᩣ’’ᨲᩥ. ‘‘ᨿᩔ ᨴᩣᨶᩥ ᨽᩅᩴ ᨣᩮᩣᩅᩥᨶ᩠ᨴᩮᩣ ᨠᩣᩃᩴ ᨾᨬ᩠ᨬᨲᩦ’’’ᨲᩥ.

᪓᪑᪗. ‘‘ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨸᩩᩁᨲ᩠ᨳᩥᨾᩮᨶ ᨶᨣᩁᩔ ᨶᩅᩴ ᩈᨶ᩠ᨵᩣᨣᩣᩁᩴ ᨠᩣᩁᩣᨸᩮᨲ᩠ᩅᩣ ᩅᩔᩥᨠᩮ ᨧᨲ᩠ᨲᩣᩁᩮᩣ ᨾᩣᩈᩮ ᨸᨭᩥᩈᩃ᩠ᩃᩦᨿᩥ, ᨠᩁᩩᨱᩴ ᨫᩣᨶᩴ ᨫᩣᨿᩥ; ᨶᩣᩔᩩᨵ ᨠᩮᩣᨧᩥ ᩏᨸᩈᨦ᩠ᨠᨾᨲᩥ [ᩏᨸᩈᨦ᩠ᨠᨾᩥ (ᨸᩦ.)] ᩋᨬ᩠ᨬᨲᩕ ᩑᨠᩮᨶ ᨽᨲ᩠ᨲᩣᨽᩥᩉᩣᩁᩮᨶ. ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩔ ᨻᩕᩣᩉ᩠ᨾᨱᩔ ᨧᨲᩩᨶ᩠ᨶᩴ ᨾᩣᩈᩣᨶᩴ ᩋᨧ᩠ᨧᨿᩮᨶ ᩋᩉᩩᨴᩮᩅ ᩏᨠ᩠ᨠᨱ᩠ᨮᨶᩣ ᩋᩉᩩ ᨸᩁᩥᨲᩔᨶᩣ – ‘‘ᩈᩩᨲᩴ ᨡᩮᩣ ᨸᨶ ᨾᩮᨲᩴ ᨻᩕᩣᩉ᩠ᨾᨱᩣᨶᩴ ᩅᩩᨴ᩠ᨵᩣᨶᩴ ᨾᩉᩃ᩠ᩃᨠᩣᨶᩴ ᩌᨧᩁᩥᨿᨸᩣᨧᩁᩥᨿᩣᨶᩴ ᨽᩣᩈᨾᩣᨶᩣᨶᩴ – ‘ᨿᩮᩣ ᩅᩔᩥᨠᩮ ᨧᨲ᩠ᨲᩣᩁᩮᩣ ᨾᩣᩈᩮ ᨸᨭᩥᩈᩃ᩠ᩃᩦᨿᨲᩥ, ᨠᩁᩩᨱᩴ ᨫᩣᨶᩴ ᨫᩣᨿᨲᩥ, ᩈᩮᩣ ᨻᩕᩉ᩠ᨾᩣᨶᩴ ᨸᩔᨲᩥ, ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨲᩥ ᨻᩕᩉ᩠ᨾᩩᨶᩣ ᩈᩃ᩠ᩃᨸᨲᩥ ᨻᩕᩉ᩠ᨾᩩᨶᩣ ᨾᨶ᩠ᨲᩮᨲᩦ’ᨲᩥ. ᨶ ᨡᩮᩣ ᨸᨶᩣᩉᩴ ᨻᩕᩉ᩠ᨾᩣᨶᩴ ᨸᩔᩣᨾᩥ, ᨶ ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩮᨾᩥ ᨶ ᨻᩕᩉ᩠ᨾᩩᨶᩣ ᩈᩃ᩠ᩃᨸᩣᨾᩥ ᨶ ᨻᩕᩉ᩠ᨾᩩᨶᩣ ᨾᨶ᩠ᨲᩮᨾᩦ’’’ᨲᩥ.

ᨻᩕᩉ᩠ᨾᩩᨶᩣ ᩈᩣᨠᨧ᩠ᨨᩣ

᪓᪑᪘. ‘‘ᩋᨳ ᨡᩮᩣ, ᨽᩮᩣ, ᨻᩕᩉ᩠ᨾᩣ ᩈᨶᨦ᩠ᨠᩩᨾᩣᩁᩮᩣ ᨾᩉᩣᨣᩮᩣᩅᩥᨶ᩠ᨴᩔ ᨻᩕᩣᩉ᩠ᨾᨱᩔ ᨧᩮᨲᩈᩣ ᨧᩮᨲᩮᩣᨸᩁᩥᩅᩥᨲᨠ᩠ᨠᨾᨬ᩠ᨬᩣᨿ ᩈᩮᨿ᩠ᨿᨳᩣᨸᩥ ᨶᩣᨾ ᨻᩃᩅᩣ ᨸᩩᩁᩥᩈᩮᩣ ᩈᨾᩥᨬ᩠ᨩᩥᨲᩴ ᩅᩣ ᨻᩣᩉᩴ ᨸᩈᩣᩁᩮᨿ᩠ᨿ, ᨸᩈᩣᩁᩥᨲᩴ ᩅᩣ ᨻᩣᩉᩴ ᩈᨾᩥᨬ᩠ᨩᩮᨿ᩠ᨿ, ᩑᩅᨾᩮᩅ, ᨻᩕᩉ᩠ᨾᩃᩮᩣᨠᩮ ᩋᨶ᩠ᨲᩁᩉᩥᨲᩮᩣ ᨾᩉᩣᨣᩮᩣᩅᩥᨶ᩠ᨴᩔ ᨻᩕᩣᩉ᩠ᨾᨱᩔ ᩈᨾ᩠ᨾᩩᨡᩮ ᨸᩣᨲᩩᩁᩉᩮᩣᩈᩥ. ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩔ ᨻᩕᩣᩉ᩠ᨾᨱᩔ ᩋᩉᩩᨴᩮᩅ ᨽᨿᩴ ᩋᩉᩩ ᨨᨾ᩠ᨽᩥᨲᨲ᩠ᨲᩴ ᩋᩉᩩ ᩃᩮᩣᨾᩉᩴᩈᩮᩣ ᨿᨳᩣ ᨲᩴ ᩋᨴᩥᨭ᩠ᨮᨸᩩᨻ᩠ᨻᩴ ᩁᩪᨸᩴ ᨴᩥᩈ᩠ᩅᩣ. ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨽᩦᨲᩮᩣ ᩈᩴᩅᩥᨣ᩠ᨣᩮᩣ ᩃᩮᩣᨾᩉᨭ᩠ᨮᨩᩣᨲᩮᩣ ᨻᩕᩉ᩠ᨾᩣᨶᩴ ᩈᨶᨦ᩠ᨠᩩᨾᩣᩁᩴ ᨣᩣᨳᩣᨿ ᩋᨩ᩠ᨫᨽᩣᩈᩥ –

‘‘‘ᩅᨱ᩠ᨱᩅᩣ ᨿᩈᩅᩣ ᩈᩥᩁᩥᨾᩣ, ᨠᩮᩣ ᨶᩩ ᨲ᩠ᩅᨾᩈᩥ ᨾᩣᩁᩥᩈ;

ᩋᨩᩣᨶᨶ᩠ᨲᩣ ᨲᩴ ᨸᩩᨧ᩠ᨨᩣᨾ, ᨠᨳᩴ ᨩᩣᨶᩮᨾᩩ ᨲᩴ ᨾᨿ’’ᨶ᩠ᨲᩥ.

‘‘ᨾᩴ ᩅᩮ ᨠᩩᨾᩣᩁᩴ ᨩᩣᨶᨶ᩠ᨲᩥ, ᨻᩕᩉ᩠ᨾᩃᩮᩣᨠᩮ ᩈᨶᨶ᩠ᨲᨶᩴ [ᩈᨶᨶ᩠ᨲᩥᨧ (ᨠ.)];

ᩈᨻ᩠ᨻᩮ ᨩᩣᨶᨶ᩠ᨲᩥ ᨾᩴ ᨴᩮᩅᩣ, ᩑᩅᩴ ᨣᩮᩣᩅᩥᨶ᩠ᨴ ᨩᩣᨶᩉᩥ’’.

‘‘‘ᩌᩈᨶᩴ ᩏᨴᨠᩴ ᨸᨩ᩠ᨩᩴ, ᨾᨵᩩᩈᩣᨠᨬ᩠ᨧ [ᨾᨵᩩᨸᩣᨠᨬ᩠ᨧ (ᩈᩦ. ᩈ᩠ᨿᩣ. ᨸᩦ.)] ᨻᩕᩉ᩠ᨾᩩᨶᩮᩣ;

ᩋᨣ᩠ᨥᩮ ᨽᩅᨶ᩠ᨲᩴ ᨸᩩᨧ᩠ᨨᩣᨾ, ᩋᨣ᩠ᨥᩴ ᨠᩩᩁᩩᨲᩩ ᨶᩮᩣ ᨽᩅᩴ’’.

‘‘ᨸᨭᩥᨣ᩠ᨣᨱ᩠ᩉᩣᨾ ᨲᩮ ᩋᨣ᩠ᨥᩴ, ᨿᩴ ᨲ᩠ᩅᩴ ᨣᩮᩣᩅᩥᨶ᩠ᨴ ᨽᩣᩈᩈᩥ;

ᨴᩥᨭ᩠ᨮᨵᨾ᩠ᨾᩉᩥᨲᨲ᩠ᨳᩣᨿ, ᩈᨾ᩠ᨸᩁᩣᨿ ᩈᩩᨡᩣᨿ ᨧ;

ᨠᨲᩣᩅᨠᩣᩈᩮᩣ ᨸᩩᨧ᩠ᨨᩔᩩ, ᨿᩴ ᨠᩥᨬ᩠ᨧᩥ ᩋᨽᩥᨸᨲ᩠ᨳᩥᨲ’’ᨶ᩠ᨲᩥ.

᪓᪑᪙. ‘‘ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩔ ᨻᩕᩣᩉ᩠ᨾᨱᩔ ᩑᨲᨴᩉᩮᩣᩈᩥ – ‘‘ᨠᨲᩣᩅᨠᩣᩈᩮᩣ ᨡᩮᩣᨾ᩠ᩉᩥ ᨻᩕᩉ᩠ᨾᩩᨶᩣ ᩈᨶᨦ᩠ᨠᩩᨾᩣᩁᩮᨶ. ᨠᩥᩴ ᨶᩩ ᨡᩮᩣ ᩋᩉᩴ ᨻᩕᩉ᩠ᨾᩣᨶᩴ ᩈᨶᨦ᩠ᨠᩩᨾᩣᩁᩴ ᨸᩩᨧ᩠ᨨᩮᨿ᩠ᨿᩴ ᨴᩥᨭ᩠ᨮᨵᨾ᩠ᨾᩥᨠᩴ ᩅᩣ ᩋᨲ᩠ᨳᩴ ᩈᨾ᩠ᨸᩁᩣᨿᩥᨠᩴ ᩅᩣ’ᨲᩥ? ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩔ ᨻᩕᩣᩉ᩠ᨾᨱᩔ ᩑᨲᨴᩉᩮᩣᩈᩥ – ‘ᨠᩩᩈᩃᩮᩣ ᨡᩮᩣ ᩋᩉᩴ ᨴᩥᨭ᩠ᨮᨵᨾ᩠ᨾᩥᨠᩣᨶᩴ ᩋᨲ᩠ᨳᩣᨶᩴ, ᩋᨬ᩠ᨬᩮᨸᩥ ᨾᩴ ᨴᩥᨭ᩠ᨮᨵᨾ᩠ᨾᩥᨠᩴ ᩋᨲ᩠ᨳᩴ ᨸᩩᨧ᩠ᨨᨶ᩠ᨲᩥ. ᨿᩴᨶᩪᨶᩣᩉᩴ ᨻᩕᩉ᩠ᨾᩣᨶᩴ ᩈᨶᨦ᩠ᨠᩩᨾᩣᩁᩴ ᩈᨾ᩠ᨸᩁᩣᨿᩥᨠᨬ᩠ᨬᩮᩅ ᩋᨲ᩠ᨳᩴ ᨸᩩᨧ᩠ᨨᩮᨿ᩠ᨿ’ᨶ᩠ᨲᩥ. ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨻᩕᩉ᩠ᨾᩣᨶᩴ ᩈᨶᨦ᩠ᨠᩩᨾᩣᩁᩴ ᨣᩣᨳᩣᨿ ᩋᨩ᩠ᨫᨽᩣᩈᩥ –

‘‘ᨸᩩᨧ᩠ᨨᩣᨾᩥ ᨻᩕᩉ᩠ᨾᩣᨶᩴ ᩈᨶᨦ᩠ᨠᩩᨾᩣᩁᩴ,

ᨠᨦ᩠ᨡᩦ ᩋᨠᨦ᩠ᨡᩥᩴ ᨸᩁᩅᩮᨴᩥᨿᩮᩈᩩ;

ᨠᨲ᩠ᨳᨭ᩠ᨮᩥᨲᩮᩣ ᨠᩥᨾ᩠ᩉᩥ ᨧ ᩈᩥᨠ᩠ᨡᨾᩣᨶᩮᩣ,

ᨸᨸ᩠ᨸᩮᩣᨲᩥ ᨾᨧ᩠ᨧᩮᩣ ᩋᨾᨲᩴ ᨻᩕᩉ᩠ᨾᩃᩮᩣᨠ’’ᨶ᩠ᨲᩥ.

‘‘ᩉᩥᨲ᩠ᩅᩣ ᨾᨾᨲ᩠ᨲᩴ ᨾᨶᩩᨩᩮᩈᩩ ᨻᩕᩉ᩠ᨾᩮ,

ᩑᨠᩮᩣᨴᩥᨽᩪᨲᩮᩣ ᨠᩁᩩᨱᩮᨵᩥᨾᩩᨲ᩠ᨲᩮᩣ [ᨠᩁᩩᨱᩣᨵᩥᨾᩩᨲ᩠ᨲᩮᩣ (ᩈᩦ. ᩈ᩠ᨿᩣ. ᨸᩦ.)];

ᨶᩥᩁᩣᨾᨣᨶ᩠ᨵᩮᩣ ᩅᩥᩁᨲᩮᩣ ᨾᩮᨳᩩᨶᩈ᩠ᨾᩣ,

ᩑᨲ᩠ᨳᨭ᩠ᨮᩥᨲᩮᩣ ᩑᨲ᩠ᨳ ᨧ ᩈᩥᨠ᩠ᨡᨾᩣᨶᩮᩣ;

ᨸᨸ᩠ᨸᩮᩣᨲᩥ ᨾᨧ᩠ᨧᩮᩣ ᩋᨾᨲᩴ ᨻᩕᩉ᩠ᨾᩃᩮᩣᨠ’’ᨶ᩠ᨲᩥ.

᪓᪒᪐. ‘‘ᩉᩥᨲ᩠ᩅᩣ ᨾᨾᨲ᩠ᨲ’ᨶ᩠ᨲᩥ ᩋᩉᩴ ᨽᩮᩣᨲᩮᩣ ᩌᨩᩣᨶᩣᨾᩥ. ᩍᨵᩮᨠᨧ᩠ᨧᩮᩣ ᩋᨸ᩠ᨸᩴ ᩅᩣ ᨽᩮᩣᨣᨠ᩠ᨡᨶ᩠ᨵᩴ ᨸᩉᩣᨿ ᨾᩉᨶ᩠ᨲᩴ ᩅᩣ ᨽᩮᩣᨣᨠ᩠ᨡᨶ᩠ᨵᩴ ᨸᩉᩣᨿ ᩋᨸ᩠ᨸᩴ ᩅᩣ ᨬᩣᨲᩥᨸᩁᩥᩅᨭ᩠ᨭᩴ ᨸᩉᩣᨿ ᨾᩉᨶ᩠ᨲᩴ ᩅᩣ ᨬᩣᨲᩥᨸᩁᩥᩅᨭ᩠ᨭᩴ ᨸᩉᩣᨿ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨲᩥ, ‘ᩍᨲᩥ ᩉᩥᨲ᩠ᩅᩣ ᨾᨾᨲ᩠ᨲ’ᨶ᩠ᨲᩥ ᩋᩉᩴ ᨽᩮᩣᨲᩮᩣ ᩌᨩᩣᨶᩣᨾᩥ. ‘ᩑᨠᩮᩣᨴᩥᨽᩪᨲᩮᩣ’ᨲᩥ ᩋᩉᩴ ᨽᩮᩣᨲᩮᩣ ᩌᨩᩣᨶᩣᨾᩥ. ᩍᨵᩮᨠᨧ᩠ᨧᩮᩣ ᩅᩥᩅᩥᨲ᩠ᨲᩴ ᩈᩮᨶᩣᩈᨶᩴ ᨽᨩᨲᩥ ᩋᩁᨬ᩠ᨬᩴ ᩁᩩᨠ᩠ᨡᨾᩪᩃᩴ ᨸᨻ᩠ᨻᨲᩴ ᨠᨶ᩠ᨴᩁᩴ ᨣᩥᩁᩥᨣᩩᩉᩴ ᩈᩩᩈᩣᨶᩴ ᩅᨶᨸᨲ᩠ᨳᩴ ᩋᨻ᩠ᨽᩮᩣᨠᩣᩈᩴ ᨸᩃᩣᩃᨸᩩᨬ᩠ᨩᩴ, ᩍᨲᩥ ᩑᨠᩮᩣᨴᩥᨽᩪᨲᩮᩣ’ᨲᩥ ᩋᩉᩴ ᨽᩮᩣᨲᩮᩣ ᩌᨩᩣᨶᩣᨾᩥ. ‘ᨠᩁᩩᨱᩮᨵᩥᨾᩩᨲ᩠ᨲᩮᩣ’ᨲᩥ ᩋᩉᩴ ᨽᩮᩣᨲᩮᩣ ᩌᨩᩣᨶᩣᨾᩥ. ᩍᨵᩮᨠᨧ᩠ᨧᩮᩣ ᨠᩁᩩᨱᩣᩈᩉᨣᨲᩮᨶ ᨧᩮᨲᩈᩣ ᩑᨠᩴ ᨴᩥᩈᩴ ᨹᩁᩥᨲ᩠ᩅᩣ ᩅᩥᩉᩁᨲᩥ, ᨲᨳᩣ ᨴᩩᨲᩥᨿᩴ, ᨲᨳᩣ ᨲᨲᩥᨿᩴ, ᨲᨳᩣ ᨧᨲᩩᨲ᩠ᨳᩴ. ᩍᨲᩥ ᩏᨴ᩠ᨵᨾᨵᩮᩣᨲᩥᩁᩥᨿᩴ ᩈᨻ᩠ᨻᨵᩥ ᩈᨻ᩠ᨻᨲ᩠ᨲᨲᩣᨿ ᩈᨻ᩠ᨻᩣᩅᨶ᩠ᨲᩴ ᩃᩮᩣᨠᩴ ᨠᩁᩩᨱᩣᩈᩉᨣᨲᩮᨶ ᨧᩮᨲᩈᩣ ᩅᩥᨸᩩᩃᩮᨶ ᨾᩉᨣ᩠ᨣᨲᩮᨶ ᩋᨸ᩠ᨸᨾᩣᨱᩮᨶ ᩋᩅᩮᩁᩮᨶ ᩋᨻ᩠ᨿᩣᨸᨩ᩠ᨩᩮᨶ ᨹᩁᩥᨲ᩠ᩅᩣ ᩅᩥᩉᩁᨲᩥ. ᩍᨲᩥ ‘ᨠᩁᩩᨱᩮᨵᩥᨾᩩᨲ᩠ᨲᩮᩣ’ᨲᩥ ᩋᩉᩴ ᨽᩮᩣᨲᩮᩣ ᩌᨩᩣᨶᩣᨾᩥ. ᩌᨾᨣᨶ᩠ᨵᩮ ᨧ ᨡᩮᩣ ᩋᩉᩴ ᨽᩮᩣᨲᩮᩣ ᨽᩣᩈᨾᩣᨶᩔ ᨶ ᩌᨩᩣᨶᩣᨾᩥ.

‘‘ᨠᩮ ᩌᨾᨣᨶ᩠ᨵᩣ ᨾᨶᩩᨩᩮᩈᩩ ᨻᩕᩉ᩠ᨾᩮ,

ᩑᨲᩮ ᩋᩅᩥᨴ᩠ᩅᩣ ᩍᨵ ᨻᩕᩪᩉᩥ ᨵᩦᩁ;

ᨠᩮᨶᩣᩅᨭᩣ [ᨠᩮᨶᩣᩅᩩᨭᩣ (ᩈ᩠ᨿᩣ.)] ᩅᩣᨲᩥ ᨸᨩᩣ ᨠᩩᩁᩩᨲᩩ [ᨠᩩᩁᩩᩁᩪ (ᩈ᩠ᨿᩣ.), ᨠᩩᩁᩩᨭ᩠ᨮᩁᩪ (ᨸᩦ.), ᨠᩩᩁᩪᩁᩩ (?)],

ᩌᨸᩣᨿᩥᨠᩣ ᨶᩥᩅᩩᨲᨻᩕᩉ᩠ᨾᩃᩮᩣᨠᩣ’’ᨲᩥ.

‘‘ᨠᩮᩣᨵᩮᩣ ᨾᩮᩣᩈᩅᨩ᩠ᨩᩴ ᨶᩥᨠᨲᩥ ᨧ ᨴᩩᨻ᩠ᨽᩮᩣ,

ᨠᨴᩁᩥᨿᨲᩣ ᩋᨲᩥᨾᩣᨶᩮᩣ ᩏᩈᩪᨿᩣ;

ᩍᨧ᩠ᨨᩣ ᩅᩥᩅᩥᨧ᩠ᨨᩣ ᨸᩁᩉᩮᨮᨶᩣ ᨧ,

ᩃᩮᩣᨽᩮᩣ ᨧ ᨴᩮᩣᩈᩮᩣ ᨧ ᨾᨴᩮᩣ ᨧ ᨾᩮᩣᩉᩮᩣ;

ᩑᨲᩮᩈᩩ ᨿᩩᨲ᩠ᨲᩣ ᩋᨶᩥᩁᩣᨾᨣᨶ᩠ᨵᩣ,

ᩌᨸᩣᨿᩥᨠᩣ ᨶᩥᩅᩩᨲᨻᩕᩉ᩠ᨾᩃᩮᩣᨠᩣ’’ᨲᩥ.

‘‘ᨿᨳᩣ ᨡᩮᩣ ᩋᩉᩴ ᨽᩮᩣᨲᩮᩣ ᩌᨾᨣᨶ᩠ᨵᩮ ᨽᩣᩈᨾᩣᨶᩔ ᩌᨩᩣᨶᩣᨾᩥ. ᨲᩮ ᨶ ᩈᩩᨶᩥᨾ᩠ᨾᨴᨿᩣ ᩋᨣᩣᩁᩴ ᩋᨩ᩠ᨫᩣᩅᩈᨲᩣ. ᨸᨻ᩠ᨻᨩᩥᩔᩣᨾᩉᩴ, ᨽᩮᩣ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿ’’ᨶ᩠ᨲᩥ. ‘‘ᨿᩔᨴᩣᨶᩥ ᨽᩅᩴ ᨣᩮᩣᩅᩥᨶ᩠ᨴᩮᩣ ᨠᩣᩃᩴ ᨾᨬ᩠ᨬᨲᩦ’’ᨲᩥ.

ᩁᩮᨱᩩᩁᩣᨩᩌᨾᨶ᩠ᨲᨶᩣ

᪓᪒᪑. ‘‘ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨿᩮᨶ ᩁᩮᨱᩩ ᩁᩣᨩᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩁᩮᨱᩩᩴ ᩁᩣᨩᩣᨶᩴ ᩑᨲᨴᩅᩮᩣᨧ – ‘‘ᩋᨬ᩠ᨬᩴ ᨴᩣᨶᩥ ᨽᩅᩴ ᨸᩩᩁᩮᩣᩉᩥᨲᩴ ᨸᩁᩥᨿᩮᩈᨲᩩ, ᨿᩮᩣ ᨽᩮᩣᨲᩮᩣ ᩁᨩ᩠ᨩᩴ ᩋᨶᩩᩈᩣᩈᩥᩔᨲᩥ. ᩍᨧ᩠ᨨᩣᨾᩉᩴ, ᨽᩮᩣ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᨲᩩᩴ. ᨿᨳᩣ ᨡᩮᩣ ᨸᨶ ᨾᩮ ᩈᩩᨲᩴ ᨻᩕᩉ᩠ᨾᩩᨶᩮᩣ ᩌᨾᨣᨶ᩠ᨵᩮ ᨽᩣᩈᨾᩣᨶᩔ, ᨲᩮ ᨶ ᩈᩩᨶᩥᨾ᩠ᨾᨴᨿᩣ ᩋᨣᩣᩁᩴ ᩋᨩ᩠ᨫᩣᩅᩈᨲᩣ. ᨸᨻ᩠ᨻᨩᩥᩔᩣᨾᩉᩴ, ᨽᩮᩣ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿ’’ᨶ᩠ᨲᩥ.

‘‘ᩌᨾᨶ᩠ᨲᨿᩣᨾᩥ ᩁᩣᨩᩣᨶᩴ, ᩁᩮᨱᩩᩴ ᨽᩪᨾᩥᨸᨲᩥᩴ ᩋᩉᩴ;

ᨲ᩠ᩅᩴ ᨸᨩᩣᨶᩔᩩ ᩁᨩ᩠ᨩᩮᨶ, ᨶᩣᩉᩴ ᨸᩮᩣᩁᩮᩣᩉᩥᨧ᩠ᨧᩮ ᩁᨾᩮ’’.

‘‘ᩈᨧᩮ ᨲᩮ ᩐᨶᩴ ᨠᩣᨾᩮᩉᩥ, ᩋᩉᩴ ᨸᩁᩥᨸᩪᩁᨿᩣᨾᩥ ᨲᩮ;

ᨿᩮᩣ ᨲᩴ ᩉᩥᩴᩈᨲᩥ ᩅᩣᩁᩮᨾᩥ, ᨽᩪᨾᩥᩈᩮᨶᩣᨸᨲᩥ ᩋᩉᩴ;

ᨲᩩᩅᩴ ᨸᩥᨲᩣ ᩋᩉᩴ ᨸᩩᨲ᩠ᨲᩮᩣ, ᨾᩣ ᨶᩮᩣ ᨣᩮᩣᩅᩥᨶ᩠ᨴ ᨸᩣᨩᩉᩥ’’ [ᨸᩣᨩᩮᩉᩥ (ᩋᨭ᩠ᨮᨠᨳᩣᨿᩴ ᩈᩴᩅᨱ᩠ᨱᩥᨲᨸᩣᨮᨶ᩠ᨲᩁᩴ)].

‘‘ᨶᨾᨲ᩠ᨳᩥ ᩐᨶᩴ ᨠᩣᨾᩮᩉᩥ, ᩉᩥᩴᩈᩥᨲᩣ ᨾᩮ ᨶ ᩅᩥᨩ᩠ᨩᨲᩥ;

ᩋᨾᨶᩩᩔᩅᨧᩮᩣ ᩈᩩᨲ᩠ᩅᩣ, ᨲᩈ᩠ᨾᩣᩉᩴ ᨶ ᨣᩉᩮ ᩁᨾᩮ’’.

‘‘ᩋᨾᨶᩩᩔᩮᩣ ᨠᨳᩴᩅᨱ᩠ᨱᩮᩣ, ᨠᩥᩴ ᨲᩮ ᩋᨲ᩠ᨳᩴ ᩋᨽᩣᩈᨳ;

ᨿᨬ᩠ᨧ ᩈᩩᨲ᩠ᩅᩣ ᨩᩉᩣᩈᩥ ᨶᩮᩣ, ᨣᩮᩉᩮ ᩋᨾ᩠ᩉᩮ ᨧ ᨠᩮᩅᩃᩦ’’.

‘‘ᩏᨸᩅᩩᨲ᩠ᨳᩔ ᨾᩮ ᨸᩩᨻ᩠ᨻᩮ, ᨿᩥᨭ᩠ᨮᩩᨠᩣᨾᩔ ᨾᩮ ᩈᨲᩮᩣ;

ᩋᨣ᩠ᨣᩥ ᨸᨩ᩠ᨩᩃᩥᨲᩮᩣ ᩌᩈᩥ, ᨠᩩᩈᨸᨲ᩠ᨲᨸᩁᩥᨲ᩠ᨳᨲᩮᩣ’’.

‘‘ᨲᨲᩮᩣ ᨾᩮ ᨻᩕᩉ᩠ᨾᩣ ᨸᩣᨲᩩᩁᩉᩩ, ᨻᩕᩉ᩠ᨾᩃᩮᩣᨠᩣ ᩈᨶᨶ᩠ᨲᨶᩮᩣ;

ᩈᩮᩣ ᨾᩮ ᨸᨬ᩠ᩉᩴ ᩅᩥᨿᩣᨠᩣᩈᩥ, ᨲᩴ ᩈᩩᨲ᩠ᩅᩣ ᨶ ᨣᩉᩮ ᩁᨾᩮ’’.

‘‘ᩈᨴ᩠ᨴᩉᩣᨾᩥ ᩋᩉᩴ ᨽᩮᩣᨲᩮᩣ, ᨿᩴ ᨲ᩠ᩅᩴ ᨣᩮᩣᩅᩥᨶ᩠ᨴ ᨽᩣᩈᩈᩥ;

ᩋᨾᨶᩩᩔᩅᨧᩮᩣ ᩈᩩᨲ᩠ᩅᩣ, ᨠᨳᩴ ᩅᨲ᩠ᨲᩮᨳ ᩋᨬ᩠ᨬᨳᩣ.

‘‘ᨲᩮ ᨲᩴ ᩋᨶᩩᩅᨲ᩠ᨲᩥᩔᩣᨾ, ᩈᨲ᩠ᨳᩣ ᨣᩮᩣᩅᩥᨶ᩠ᨴ ᨶᩮᩣ ᨽᩅᩴ;

ᨾᨱᩥ ᨿᨳᩣ ᩅᩮᩊᩩᩁᩥᨿᩮᩣ, ᩋᨠᩣᨧᩮᩣ ᩅᩥᨾᩃᩮᩣ ᩈᩩᨽᩮᩣ;

ᩑᩅᩴ ᩈᩩᨴ᩠ᨵᩣ ᨧᩁᩥᩔᩣᨾ, ᨣᩮᩣᩅᩥᨶ᩠ᨴᩔᩣᨶᩩᩈᩣᩈᨶᩮ’’ᨲᩥ.

‘‘‘ᩈᨧᩮ ᨽᩅᩴ ᨣᩮᩣᩅᩥᨶ᩠ᨴᩮᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᨲᩥ, ᨾᨿᨾ᩠ᨸᩥ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᩣᨾ. ᩋᨳ ᨿᩣ ᨲᩮ ᨣᨲᩥ, ᩈᩣ ᨶᩮᩣ ᨣᨲᩥ ᨽᩅᩥᩔᨲᩦ’’ᨲᩥ.

ᨨ ᨡᨲ᩠ᨲᩥᨿᩌᨾᨶ᩠ᨲᨶᩣ

᪓᪒᪒. ‘‘ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨿᩮᨶ ᨲᩮ ᨨ ᨡᨲ᩠ᨲᩥᨿᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨲᩮ ᨨ ᨡᨲ᩠ᨲᩥᨿᩮ ᩑᨲᨴᩅᩮᩣᨧ – ‘‘ᩋᨬ᩠ᨬᩴ ᨴᩣᨶᩥ ᨽᩅᨶ᩠ᨲᩮᩣ ᨸᩩᩁᩮᩣᩉᩥᨲᩴ ᨸᩁᩥᨿᩮᩈᨶ᩠ᨲᩩ, ᨿᩮᩣ ᨽᩅᨶ᩠ᨲᩣᨶᩴ ᩁᨩ᩠ᨩᩮ ᩋᨶᩩᩈᩣᩈᩥᩔᨲᩥ. ᩍᨧ᩠ᨨᩣᨾᩉᩴ, ᨽᩮᩣ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᨲᩩᩴ. ᨿᨳᩣ ᨡᩮᩣ ᨸᨶ ᨾᩮ ᩈᩩᨲᩴ ᨻᩕᩉ᩠ᨾᩩᨶᩮᩣ ᩌᨾᨣᨶ᩠ᨵᩮ ᨽᩣᩈᨾᩣᨶᩔ, ᨲᩮ ᨶ ᩈᩩᨶᩥᨾ᩠ᨾᨴᨿᩣ ᩋᨣᩣᩁᩴ ᩋᨩ᩠ᨫᩣᩅᩈᨲᩣ. ᨸᨻ᩠ᨻᨩᩥᩔᩣᨾᩉᩴ, ᨽᩮᩣ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿ’’ᨶ᩠ᨲᩥ. ᩋᨳ ᨡᩮᩣ, ᨽᩮᩣ, ᨲᩮ ᨨ ᨡᨲ᩠ᨲᩥᨿᩣ ᩑᨠᨾᨶ᩠ᨲᩴ ᩋᨸᨠ᩠ᨠᨾ᩠ᨾ ᩑᩅᩴ ᩈᨾᨧᩥᨶ᩠ᨲᩮᩈᩩᩴ – ‘‘ᩍᨾᩮ ᨡᩮᩣ ᨻᩕᩣᩉ᩠ᨾᨱᩣ ᨶᩣᨾ ᨵᨶᩃᩩᨴ᩠ᨵᩣ; ᨿᩴᨶᩪᨶ ᨾᨿᩴ ᨾᩉᩣᨣᩮᩣᩅᩥᨶ᩠ᨴᩴ ᨻᩕᩣᩉ᩠ᨾᨱᩴ ᨵᨶᩮᨶ ᩈᩥᨠ᩠ᨡᩮᨿ᩠ᨿᩣᨾᩣ’’ᨲᩥ. ᨲᩮ ᨾᩉᩣᨣᩮᩣᩅᩥᨶ᩠ᨴᩴ ᨻᩕᩣᩉ᩠ᨾᨱᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᨾᩣᩉᩴᩈᩩ – ‘‘ᩈᩴᩅᩥᨩ᩠ᨩᨲᩥ ᨡᩮᩣ, ᨽᩮᩣ, ᩍᨾᩮᩈᩩ ᩈᨲ᩠ᨲᩈᩩ ᩁᨩ᩠ᨩᩮᩈᩩ ᨸᩉᩪᨲᩴ ᩈᩣᨸᨲᩮᨿ᩠ᨿᩴ, ᨲᨲᩮᩣ ᨽᩮᩣᨲᩮᩣ ᨿᩣᩅᨲᨠᩮᨶ ᩋᨲ᩠ᨳᩮᩣ, ᨲᩣᩅᨲᨠᩴ ᩌᩉᩁᩦᨿᨲ’’ᨶ᩠ᨲᩥ. ‘‘ᩋᩃᩴ, ᨽᩮᩣ, ᨾᨾᨸᩥᨴᩴ ᨸᩉᩪᨲᩴ ᩈᩣᨸᨲᩮᨿ᩠ᨿᩴ ᨽᩅᨶ᩠ᨲᩣᨶᩴᨿᩮᩅ ᩅᩣᩉᩈᩣ. ᨲᨾᩉᩴ ᩈᨻ᩠ᨻᩴ ᨸᩉᩣᨿ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᩣᨾᩥ. ᨿᨳᩣ ᨡᩮᩣ ᨸᨶ ᨾᩮ ᩈᩩᨲᩴ ᨻᩕᩉ᩠ᨾᩩᨶᩮᩣ ᩌᨾᨣᨶ᩠ᨵᩮ ᨽᩣᩈᨾᩣᨶᩔ, ᨲᩮ ᨶ ᩈᩩᨶᩥᨾ᩠ᨾᨴᨿᩣ ᩋᨣᩣᩁᩴ ᩋᨩ᩠ᨫᩣᩅᩈᨲᩣ, ᨸᨻ᩠ᨻᨩᩥᩔᩣᨾᩉᩴ, ᨽᩮᩣ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿ’’ᨶ᩠ᨲᩥ. ᩋᨳ ᨡᩮᩣ, ᨽᩮᩣ, ᨲᩮ ᨨ ᨡᨲ᩠ᨲᩥᨿᩣ ᩑᨠᨾᨶ᩠ᨲᩴ ᩋᨸᨠ᩠ᨠᨾ᩠ᨾ ᩑᩅᩴ ᩈᨾᨧᩥᨶ᩠ᨲᩮᩈᩩᩴ – ‘‘ᩍᨾᩮ ᨡᩮᩣ ᨻᩕᩣᩉ᩠ᨾᨱᩣ ᨶᩣᨾ ᩍᨲ᩠ᨳᩥᩃᩩᨴ᩠ᨵᩣ; ᨿᩴᨶᩪᨶ ᨾᨿᩴ ᨾᩉᩣᨣᩮᩣᩅᩥᨶ᩠ᨴᩴ ᨻᩕᩣᩉ᩠ᨾᨱᩴ ᩍᨲ᩠ᨳᩦᩉᩥ ᩈᩥᨠ᩠ᨡᩮᨿ᩠ᨿᩣᨾᩣ’’ᨲᩥ. ᨲᩮ ᨾᩉᩣᨣᩮᩣᩅᩥᨶ᩠ᨴᩴ ᨻᩕᩣᩉ᩠ᨾᨱᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᨾᩣᩉᩴᩈᩩ – ‘‘ᩈᩴᩅᩥᨩ᩠ᨩᨶ᩠ᨲᩥ ᨡᩮᩣ, ᨽᩮᩣ, ᩍᨾᩮᩈᩩ ᩈᨲ᩠ᨲᩈᩩ ᩁᨩ᩠ᨩᩮᩈᩩ ᨸᩉᩪᨲᩣ ᩍᨲ᩠ᨳᩥᨿᩮᩣ, ᨲᨲᩮᩣ ᨽᩮᩣᨲᩮᩣ ᨿᩣᩅᨲᩥᨠᩣᩉᩥ ᩋᨲ᩠ᨳᩮᩣ, ᨲᩣᩅᨲᩥᨠᩣ ᩌᨶᩦᨿᨲ’’ᨶ᩠ᨲᩥ. ‘‘ᩋᩃᩴ, ᨽᩮᩣ, ᨾᨾᨸᩥᨾᩣ [ᨾᨾᨸᩥᨲᩣ (ᨠ.), ᨾᨾᨸᩥ (ᩈᩦ.)] ᨧᨲ᩠ᨲᩣᩁᩦᩈᩣ ᨽᩁᩥᨿᩣ ᩈᩣᨴᩥᩈᩥᨿᩮᩣ. ᨲᩣᨸᩣᩉᩴ ᩈᨻ᩠ᨻᩣ ᨸᩉᩣᨿ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᩣᨾᩥ. ᨿᨳᩣ ᨡᩮᩣ ᨸᨶ ᨾᩮ ᩈᩩᨲᩴ ᨻᩕᩉ᩠ᨾᩩᨶᩮᩣ ᩌᨾᨣᨶ᩠ᨵᩮ ᨽᩣᩈᨾᩣᨶᩔ, ᨲᩮ ᨶ ᩈᩩᨶᩥᨾ᩠ᨾᨴᨿᩣ ᩋᨣᩣᩁᩴ ᩋᨩ᩠ᨫᩣᩅᩈᨲᩣ, ᨸᨻ᩠ᨻᨩᩥᩔᩣᨾᩉᩴ, ᨽᩮᩣ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᨶ᩠ᨲᩥ’’.

᪓᪒᪓. ‘‘ᩈᨧᩮ ᨽᩅᩴ ᨣᩮᩣᩅᩥᨶ᩠ᨴᩮᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᨲᩥ, ᨾᨿᨾ᩠ᨸᩥ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᩣᨾ, ᩋᨳ ᨿᩣ ᨲᩮ ᨣᨲᩥ, ᩈᩣ ᨶᩮᩣ ᨣᨲᩥ ᨽᩅᩥᩔᨲᩦᨲᩥ.

‘‘ᩈᨧᩮ ᨩᩉᨳ ᨠᩣᨾᩣᨶᩥ, ᨿᨲ᩠ᨳ ᩈᨲ᩠ᨲᩮᩣ ᨸᩩᨳᩩᨩ᩠ᨩᨶᩮᩣ;

ᩌᩁᨾ᩠ᨽᩅ᩠ᩉᩮᩣ ᨴᩊ᩠ᩉᩣ ᩉᩮᩣᨳ, ᨡᨶ᩠ᨲᩥᨻᩃᩈᨾᩣᩉᩥᨲᩣ.

‘‘ᩑᩈ ᨾᨣ᩠ᨣᩮᩣ ᩏᨩᩩᨾᨣ᩠ᨣᩮᩣ, ᩑᩈ ᨾᨣ᩠ᨣᩮᩣ ᩋᨶᩩᨲ᩠ᨲᩁᩮᩣ;

ᩈᨴ᩠ᨵᨾ᩠ᨾᩮᩣ ᩈᨻ᩠ᨽᩥ ᩁᨠ᩠ᨡᩥᨲᩮᩣ, ᨻᩕᩉ᩠ᨾᩃᩮᩣᨠᩪᨸᨸᨲ᩠ᨲᩥᨿᩣᨲᩥ.

‘‘ᨲᩮᨶ ᩉᩥ ᨽᩅᩴ ᨣᩮᩣᩅᩥᨶ᩠ᨴᩮᩣ ᩈᨲ᩠ᨲ ᩅᩔᩣᨶᩥ ᩌᨣᨾᩮᨲᩩ. ᩈᨲ᩠ᨲᨶ᩠ᨶᩴ ᩅᩔᩣᨶᩴ ᩋᨧ᩠ᨧᨿᩮᨶ ᨾᨿᨾ᩠ᨸᩥ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᩣᨾ, ᩋᨳ ᨿᩣ ᨲᩮ ᨣᨲᩥ, ᩈᩣ ᨶᩮᩣ ᨣᨲᩥ ᨽᩅᩥᩔᨲᩦ’’ᨲᩥ.

‘‘‘ᩋᨲᩥᨧᩥᩁᩴ ᨡᩮᩣ, ᨽᩮᩣ, ᩈᨲ᩠ᨲ ᩅᩔᩣᨶᩥ, ᨶᩣᩉᩴ ᩈᨠ᩠ᨠᩮᩣᨾᩥ, ᨽᩅᨶ᩠ᨲᩮ, ᩈᨲ᩠ᨲ ᩅᩔᩣᨶᩥ ᩌᨣᨾᩮᨲᩩᩴ. ᨠᩮᩣ ᨶᩩ ᨡᩮᩣ ᨸᨶ, ᨽᩮᩣ, ᨩᩣᨶᩣᨲᩥ ᨩᩦᩅᩥᨲᩣᨶᩴ! ᨣᨾᨶᩦᨿᩮᩣ ᩈᨾ᩠ᨸᩁᩣᨿᩮᩣ, ᨾᨶ᩠ᨲᩣᨿᩴ [ᨾᨶ᩠ᨲᩣᨿ (ᨻᩉᩪᩈᩩ)] ᨻᩮᩣᨴ᩠ᨵᨻ᩠ᨻᩴ, ᨠᨲ᩠ᨲᨻ᩠ᨻᩴ ᨠᩩᩈᩃᩴ, ᨧᩁᩥᨲᨻ᩠ᨻᩴ ᨻᩕᩉ᩠ᨾᨧᩁᩥᨿᩴ, ᨶᨲ᩠ᨳᩥ ᨩᩣᨲᩔ ᩋᨾᩁᨱᩴ. ᨿᨳᩣ ᨡᩮᩣ ᨸᨶ ᨾᩮ ᩈᩩᨲᩴ ᨻᩕᩉ᩠ᨾᩩᨶᩮᩣ ᩌᨾᨣᨶ᩠ᨵᩮ ᨽᩣᩈᨾᩣᨶᩔ, ᨲᩮ ᨶ ᩈᩩᨶᩥᨾ᩠ᨾᨴᨿᩣ ᩋᨣᩣᩁᩴ ᩋᨩ᩠ᨫᩣᩅᩈᨲᩣ, ᨸᨻ᩠ᨻᨩᩥᩔᩣᨾᩉᩴ, ᨽᩮᩣ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿ’’’ᨶ᩠ᨲᩥ. ‘‘ᨲᩮᨶ ᩉᩥ ᨽᩅᩴ ᨣᩮᩣᩅᩥᨶ᩠ᨴᩮᩣ ᨨᨻ᩠ᨻᩔᩣᨶᩥ ᩌᨣᨾᩮᨲᩩ…ᨸᩮ… ᨸᨬ᩠ᨧ ᩅᩔᩣᨶᩥ ᩌᨣᨾᩮᨲᩩ… ᨧᨲ᩠ᨲᩣᩁᩥ ᩅᩔᩣᨶᩥ ᩌᨣᨾᩮᨲᩩ… ᨲᩦᨱᩥ ᩅᩔᩣᨶᩥ ᩌᨣᨾᩮᨲᩩ… ᨴ᩠ᩅᩮ ᩅᩔᩣᨶᩥ ᩌᨣᨾᩮᨲᩩ… ᩑᨠᩴ ᩅᩔᩴ ᩌᨣᨾᩮᨲᩩ, ᩑᨠᩔ ᩅᩔᩔ ᩋᨧ᩠ᨧᨿᩮᨶ ᨾᨿᨾ᩠ᨸᩥ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᩣᨾ, ᩋᨳ ᨿᩣ ᨲᩮ ᨣᨲᩥ, ᩈᩣ ᨶᩮᩣ ᨣᨲᩥ ᨽᩅᩥᩔᨲᩦ’’ᨲᩥ.

‘‘‘ᩋᨲᩥᨧᩥᩁᩴ ᨡᩮᩣ, ᨽᩮᩣ, ᩑᨠᩴ ᩅᩔᩴ, ᨶᩣᩉᩴ ᩈᨠ᩠ᨠᩮᩣᨾᩥ ᨽᩅᨶ᩠ᨲᩮ ᩑᨠᩴ ᩅᩔᩴ ᩌᨣᨾᩮᨲᩩᩴ. ᨠᩮᩣ ᨶᩩ ᨡᩮᩣ ᨸᨶ, ᨽᩮᩣ, ᨩᩣᨶᩣᨲᩥ ᨩᩦᩅᩥᨲᩣᨶᩴ! ᨣᨾᨶᩦᨿᩮᩣ ᩈᨾ᩠ᨸᩁᩣᨿᩮᩣ, ᨾᨶ᩠ᨲᩣᨿᩴ ᨻᩮᩣᨴ᩠ᨵᨻ᩠ᨻᩴ, ᨠᨲ᩠ᨲᨻ᩠ᨻᩴ ᨠᩩᩈᩃᩴ, ᨧᩁᩥᨲᨻ᩠ᨻᩴ ᨻᩕᩉ᩠ᨾᨧᩁᩥᨿᩴ, ᨶᨲ᩠ᨳᩥ ᨩᩣᨲᩔ ᩋᨾᩁᨱᩴ. ᨿᨳᩣ ᨡᩮᩣ ᨸᨶ ᨾᩮ ᩈᩩᨲᩴ ᨻᩕᩉ᩠ᨾᩩᨶᩮᩣ ᩌᨾᨣᨶ᩠ᨵᩮ ᨽᩣᩈᨾᩣᨶᩔ, ᨲᩮ ᨶ ᩈᩩᨶᩥᨾ᩠ᨾᨴᨿᩣ ᩋᨣᩣᩁᩴ ᩋᨩ᩠ᨫᩣᩅᩈᨲᩣ, ᨸᨻ᩠ᨻᨩᩥᩔᩣᨾᩉᩴ, ᨽᩮᩣ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿ’’ᨶ᩠ᨲᩥ. ‘‘ᨲᩮᨶ ᩉᩥ ᨽᩅᩴ ᨣᩮᩣᩅᩥᨶ᩠ᨴᩮᩣ ᩈᨲ᩠ᨲ ᨾᩣᩈᩣᨶᩥ ᩌᨣᨾᩮᨲᩩ, ᩈᨲ᩠ᨲᨶ᩠ᨶᩴ ᨾᩣᩈᩣᨶᩴ ᩋᨧ᩠ᨧᨿᩮᨶ ᨾᨿᨾ᩠ᨸᩥ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᩣᨾ, ᩋᨳ ᨿᩣ ᨲᩮ ᨣᨲᩥ, ᩈᩣ ᨶᩮᩣ ᨣᨲᩥ ᨽᩅᩥᩔᨲᩦ’’ᨲᩥ.

‘‘‘ᩋᨲᩥᨧᩥᩁᩴ ᨡᩮᩣ, ᨽᩮᩣ, ᩈᨲ᩠ᨲ ᨾᩣᩈᩣᨶᩥ, ᨶᩣᩉᩴ ᩈᨠ᩠ᨠᩮᩣᨾᩥ ᨽᩅᨶ᩠ᨲᩮ ᩈᨲ᩠ᨲ ᨾᩣᩈᩣᨶᩥ ᩌᨣᨾᩮᨲᩩᩴ. ᨠᩮᩣ ᨶᩩ ᨡᩮᩣ ᨸᨶ, ᨽᩮᩣ, ᨩᩣᨶᩣᨲᩥ ᨩᩦᩅᩥᨲᩣᨶᩴ. ᨣᨾᨶᩦᨿᩮᩣ ᩈᨾ᩠ᨸᩁᩣᨿᩮᩣ, ᨾᨶ᩠ᨲᩣᨿᩴ ᨻᩮᩣᨴ᩠ᨵᨻ᩠ᨻᩴ, ᨠᨲ᩠ᨲᨻ᩠ᨻᩴ ᨠᩩᩈᩃᩴ, ᨧᩁᩥᨲᨻ᩠ᨻᩴ ᨻᩕᩉ᩠ᨾᨧᩁᩥᨿᩴ, ᨶᨲ᩠ᨳᩥ ᨩᩣᨲᩔ ᩋᨾᩁᨱᩴ. ᨿᨳᩣ ᨡᩮᩣ ᨸᨶ ᨾᩮ ᩈᩩᨲᩴ ᨻᩕᩉ᩠ᨾᩩᨶᩮᩣ ᩌᨾᨣᨶ᩠ᨵᩮ ᨽᩣᩈᨾᩣᨶᩔ, ᨲᩮ ᨶ ᩈᩩᨶᩥᨾ᩠ᨾᨴᨿᩣ ᩋᨣᩣᩁᩴ ᩋᨩ᩠ᨫᩣᩅᩈᨲᩣ, ᨸᨻ᩠ᨻᨩᩥᩔᩣᨾᩉᩴ, ᨽᩮᩣ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿ’’ᨶ᩠ᨲᩥ.

‘‘‘ᨲᩮᨶ ᩉᩥ ᨽᩅᩴ ᨣᩮᩣᩅᩥᨶ᩠ᨴᩮᩣ ᨨ ᨾᩣᩈᩣᨶᩥ ᩌᨣᨾᩮᨲᩩ…ᨸᩮ… ᨸᨬ᩠ᨧ ᨾᩣᩈᩣᨶᩥ ᩌᨣᨾᩮᨲᩩ… ᨧᨲ᩠ᨲᩣᩁᩥ ᨾᩣᩈᩣᨶᩥ ᩌᨣᨾᩮᨲᩩ… ᨲᩦᨱᩥ ᨾᩣᩈᩣᨶᩥ ᩌᨣᨾᩮᨲᩩ… ᨴ᩠ᩅᩮ ᨾᩣᩈᩣᨶᩥ ᩌᨣᨾᩮᨲᩩ… ᩑᨠᩴ ᨾᩣᩈᩴ ᩌᨣᨾᩮᨲᩩ… ᩋᨴ᩠ᨵᨾᩣᩈᩴ ᩌᨣᨾᩮᨲᩩ, ᩋᨴ᩠ᨵᨾᩣᩈᩔ ᩋᨧ᩠ᨧᨿᩮᨶ ᨾᨿᨾ᩠ᨸᩥ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᩣᨾ, ᩋᨳ ᨿᩣ ᨲᩮ ᨣᨲᩥ, ᩈᩣ ᨶᩮᩣ ᨣᨲᩥ ᨽᩅᩥᩔᨲᩦ’’ᨲᩥ.

‘‘‘ᩋᨲᩥᨧᩥᩁᩴ ᨡᩮᩣ, ᨽᩮᩣ, ᩋᨴ᩠ᨵᨾᩣᩈᩮᩣ, ᨶᩣᩉᩴ ᩈᨠ᩠ᨠᩮᩣᨾᩥ ᨽᩅᨶ᩠ᨲᩮ ᩋᨴ᩠ᨵᨾᩣᩈᩴ ᩌᨣᨾᩮᨲᩩᩴ. ᨠᩮᩣ ᨶᩩ ᨡᩮᩣ ᨸᨶ, ᨽᩮᩣ, ᨩᩣᨶᩣᨲᩥ ᨩᩦᩅᩥᨲᩣᨶᩴ! ᨣᨾᨶᩦᨿᩮᩣ ᩈᨾ᩠ᨸᩁᩣᨿᩮᩣ, ᨾᨶ᩠ᨲᩣᨿᩴ ᨻᩮᩣᨴ᩠ᨵᨻ᩠ᨻᩴ, ᨠᨲ᩠ᨲᨻ᩠ᨻᩴ ᨠᩩᩈᩃᩴ, ᨧᩁᩥᨲᨻ᩠ᨻᩴ ᨻᩕᩉ᩠ᨾᨧᩁᩥᨿᩴ, ᨶᨲ᩠ᨳᩥ ᨩᩣᨲᩔ ᩋᨾᩁᨱᩴ. ᨿᨳᩣ ᨡᩮᩣ ᨸᨶ ᨾᩮ ᩈᩩᨲᩴ ᨻᩕᩉ᩠ᨾᩩᨶᩮᩣ ᩌᨾᨣᨶ᩠ᨵᩮ ᨽᩣᩈᨾᩣᨶᩔ, ᨲᩮ ᨶ ᩈᩩᨶᩥᨾ᩠ᨾᨴᨿᩣ ᩋᨣᩣᩁᩴ ᩋᨩ᩠ᨫᩣᩅᩈᨲᩣ, ᨸᨻ᩠ᨻᨩᩥᩔᩣᨾᩉᩴ, ᨽᩮᩣ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿ’’ᨶ᩠ᨲᩥ. ‘‘ᨲᩮᨶ ᩉᩥ ᨽᩅᩴ ᨣᩮᩣᩅᩥᨶ᩠ᨴᩮᩣ ᩈᨲ᩠ᨲᩣᩉᩴ ᩌᨣᨾᩮᨲᩩ, ᨿᩣᩅ ᨾᨿᩴ ᩈᨠᩮ ᨸᩩᨲ᩠ᨲᨽᩣᨲᩁᩮᩣ ᩁᨩ᩠ᨩᩮᨶ [ᩁᨩ᩠ᨩᩮ (ᩈ᩠ᨿᩣ.)] ᩋᨶᩩᩈᩣᩈᩥᩔᩣᨾ, ᩈᨲ᩠ᨲᩣᩉᩔ ᩋᨧ᩠ᨧᨿᩮᨶ ᨾᨿᨾ᩠ᨸᩥ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᩣᨾ, ᩋᨳ ᨿᩣ ᨲᩮ ᨣᨲᩥ, ᩈᩣ ᨶᩮᩣ ᨣᨲᩥ ᨽᩅᩥᩔᨲᩦ’’ᨲᩥ. ‘‘ᨶ ᨧᩥᩁᩴ ᨡᩮᩣ, ᨽᩮᩣ, ᩈᨲ᩠ᨲᩣᩉᩴ, ᩌᨣᨾᩮᩔᩣᨾᩉᩴ ᨽᩅᨶ᩠ᨲᩮ ᩈᨲ᩠ᨲᩣᩉ’’ᨶ᩠ᨲᩥ.

ᨻᩕᩣᩉ᩠ᨾᨱᨾᩉᩣᩈᩣᩃᩣᨴᩦᨶᩴ ᩌᨾᨶ᩠ᨲᨶᩣ

᪓᪒᪔. ‘‘ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨿᩮᨶ ᨲᩮ ᩈᨲ᩠ᨲ ᨧ ᨻᩕᩣᩉ᩠ᨾᨱᨾᩉᩣᩈᩣᩃᩣ ᩈᨲ᩠ᨲ ᨧ ᨶ᩠ᩉᩣᨲᨠᩈᨲᩣᨶᩥ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨲᩮ ᩈᨲ᩠ᨲ ᨧ ᨻᩕᩣᩉ᩠ᨾᨱᨾᩉᩣᩈᩣᩃᩮ ᩈᨲ᩠ᨲ ᨧ ᨶ᩠ᩉᩣᨲᨠᩈᨲᩣᨶᩥ ᩑᨲᨴᩅᩮᩣᨧ – ‘‘ᩋᨬ᩠ᨬᩴ ᨴᩣᨶᩥ ᨽᩅᨶ᩠ᨲᩮᩣ ᩌᨧᩁᩥᨿᩴ ᨸᩁᩥᨿᩮᩈᨶ᩠ᨲᩩ, ᨿᩮᩣ ᨽᩅᨶ᩠ᨲᩣᨶᩴ ᨾᨶ᩠ᨲᩮ ᩅᩣᨧᩮᩔᨲᩥ. ᩍᨧ᩠ᨨᩣᨾᩉᩴ, ᨽᩮᩣ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᨲᩩᩴ. ᨿᨳᩣ ᨡᩮᩣ ᨸᨶ ᨾᩮ ᩈᩩᨲᩴ ᨻᩕᩉ᩠ᨾᩩᨶᩮᩣ ᩌᨾᨣᨶ᩠ᨵᩮ ᨽᩣᩈᨾᩣᨶᩔ. ᨲᩮ ᨶ ᩈᩩᨶᩥᨾ᩠ᨾᨴᨿᩣ ᩋᨣᩣᩁᩴ ᩋᨩ᩠ᨫᩣᩅᩈᨲᩣ, ᨸᨻ᩠ᨻᨩᩥᩔᩣᨾᩉᩴ, ᨽᩮᩣ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿ’’ᨶ᩠ᨲᩥ. ‘‘ᨾᩣ ᨽᩅᩴ ᨣᩮᩣᩅᩥᨶ᩠ᨴᩮᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥ. ᨸᨻ᩠ᨻᨩ᩠ᨩᩣ, ᨽᩮᩣ, ᩋᨸ᩠ᨸᩮᩈᨠ᩠ᨡᩣ ᨧ ᩋᨸ᩠ᨸᩃᩣᨽᩣ ᨧ; ᨻᩕᩉ᩠ᨾᨬ᩠ᨬᩴ ᨾᩉᩮᩈᨠ᩠ᨡᨬ᩠ᨧ ᨾᩉᩣᩃᩣᨽᨬ᩠ᨧᩣ’’ᨲᩥ. ‘‘ᨾᩣ ᨽᩅᨶ᩠ᨲᩮᩣ ᩑᩅᩴ ᩋᩅᨧᩩᨲ᩠ᨳ – ‘‘ᨸᨻ᩠ᨻᨩ᩠ᨩᩣ ᩋᨸ᩠ᨸᩮᩈᨠ᩠ᨡᩣ ᨧ ᩋᨸ᩠ᨸᩃᩣᨽᩣ ᨧ, ᨻᩕᩉ᩠ᨾᨬ᩠ᨬᩴ ᨾᩉᩮᩈᨠ᩠ᨡᨬ᩠ᨧ ᨾᩉᩣᩃᩣᨽᨬ᩠ᨧᩣ’’ᨲᩥ. ᨠᩮᩣ ᨶᩩ ᨡᩮᩣ, ᨽᩮᩣ, ᩋᨬ᩠ᨬᨲᩕ ᨾᨿᩣ ᨾᩉᩮᩈᨠ᩠ᨡᨲᩁᩮᩣ ᩅᩣ ᨾᩉᩣᩃᩣᨽᨲᩁᩮᩣ ᩅᩣ! ᩋᩉᨬ᩠ᩉᩥ, ᨽᩮᩣ, ᩑᨲᩁᩉᩥ ᩁᩣᨩᩣᩅ ᩁᨬ᩠ᨬᩴ ᨻᩕᩉ᩠ᨾᩣᩅ ᨻᩕᩣᩉ᩠ᨾᨱᩣᨶᩴ [ᨻᩕᩉ᩠ᨾᩣᨶᩴ (ᩈᩦ. ᨸᩦ. ᨠ.)] ᨴᩮᩅᨲᩣᩅ ᨣᩉᨸᨲᩥᨠᩣᨶᩴ. ᨲᨾᩉᩴ ᩈᨻ᩠ᨻᩴ ᨸᩉᩣᨿ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᩣᨾᩥ. ᨿᨳᩣ ᨡᩮᩣ ᨸᨶ ᨾᩮ ᩈᩩᨲᩴ ᨻᩕᩉ᩠ᨾᩩᨶᩮᩣ ᩌᨾᨣᨶ᩠ᨵᩮ ᨽᩣᩈᨾᩣᨶᩔ, ᨲᩮ ᨶ ᩈᩩᨶᩥᨾ᩠ᨾᨴᨿᩣ ᩋᨣᩣᩁᩴ ᩋᨩ᩠ᨫᩣᩅᩈᨲᩣ. ᨸᨻ᩠ᨻᨩᩥᩔᩣᨾᩉᩴ, ᨽᩮᩣ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿ’’ᨶ᩠ᨲᩥ. ‘‘ᩈᨧᩮ ᨽᩅᩴ ᨣᩮᩣᩅᩥᨶ᩠ᨴᩮᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᨲᩥ, ᨾᨿᨾ᩠ᨸᩥ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᩣᨾ, ᩋᨳ ᨿᩣ ᨲᩮ ᨣᨲᩥ, ᩈᩣ ᨶᩮᩣ ᨣᨲᩥ ᨽᩅᩥᩔᨲᩦ’’ᨲᩥ.

ᨽᩁᩥᨿᩣᨶᩴ ᩌᨾᨶ᩠ᨲᨶᩣ

᪓᪒᪕. ‘‘ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨿᩮᨶ ᨧᨲ᩠ᨲᩣᩁᩦᩈᩣ ᨽᩁᩥᨿᩣ ᩈᩣᨴᩥᩈᩥᨿᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨧᨲ᩠ᨲᩣᩁᩦᩈᩣ ᨽᩁᩥᨿᩣ ᩈᩣᨴᩥᩈᩥᨿᩮᩣ ᩑᨲᨴᩅᩮᩣᨧ – ‘‘ᨿᩣ ᨽᩮᩣᨲᩦᨶᩴ ᩍᨧ᩠ᨨᨲᩥ, ᩈᨠᩣᨶᩥ ᩅᩣ ᨬᩣᨲᩥᨠᩩᩃᩣᨶᩥ ᨣᨧ᩠ᨨᨲᩩ ᩋᨬ᩠ᨬᩴ ᩅᩣ ᨽᨲ᩠ᨲᩣᩁᩴ ᨸᩁᩥᨿᩮᩈᨲᩩ. ᩍᨧ᩠ᨨᩣᨾᩉᩴ, ᨽᩮᩣᨲᩦ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᨲᩩᩴ. ᨿᨳᩣ ᨡᩮᩣ ᨸᨶ ᨾᩮ ᩈᩩᨲᩴ ᨻᩕᩉ᩠ᨾᩩᨶᩮᩣ ᩌᨾᨣᨶ᩠ᨵᩮ ᨽᩣᩈᨾᩣᨶᩔ, ᨲᩮ ᨶ ᩈᩩᨶᩥᨾ᩠ᨾᨴᨿᩣ ᩋᨣᩣᩁᩴ ᩋᨩ᩠ᨫᩣᩅᩈᨲᩣ. ᨸᨻ᩠ᨻᨩᩥᩔᩣᨾᩉᩴ, ᨽᩮᩣᨲᩦ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿ’’ᨶ᩠ᨲᩥ. ‘‘ᨲ᩠ᩅᨬ᩠ᨬᩮᩅ ᨶᩮᩣ ᨬᩣᨲᩥ ᨬᩣᨲᩥᨠᩣᨾᩣᨶᩴ, ᨲ᩠ᩅᩴ ᨸᨶ ᨽᨲ᩠ᨲᩣ ᨽᨲ᩠ᨲᩩᨠᩣᨾᩣᨶᩴ. ᩈᨧᩮ ᨽᩅᩴ ᨣᩮᩣᩅᩥᨶ᩠ᨴᩮᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᨲᩥ, ᨾᨿᨾ᩠ᨸᩥ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᩣᨾ, ᩋᨳ ᨿᩣ ᨲᩮ ᨣᨲᩥ, ᩈᩣ ᨶᩮᩣ ᨣᨲᩥ ᨽᩅᩥᩔᨲᩦ’’ᨲᩥ.

ᨾᩉᩣᨣᩮᩣᩅᩥᨶ᩠ᨴᨸᨻ᩠ᨻᨩ᩠ᨩᩣ

᪓᪒᪖. ‘‘ᩋᨳ ᨡᩮᩣ, ᨽᩮᩣ, ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨲᩔ ᩈᨲ᩠ᨲᩣᩉᩔ ᩋᨧ᩠ᨧᨿᩮᨶ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥ. ᨸᨻ᩠ᨻᨩᩥᨲᩴ ᨸᨶ ᨾᩉᩣᨣᩮᩣᩅᩥᨶ᩠ᨴᩴ ᨻᩕᩣᩉ᩠ᨾᨱᩴ ᩈᨲ᩠ᨲ ᨧ ᩁᩣᨩᩣᨶᩮᩣ ᨡᨲ᩠ᨲᩥᨿᩣ ᨾᩩᨴ᩠ᨵᩣᩅᩈᩥᨲ᩠ᨲᩣ ᩈᨲ᩠ᨲ ᨧ ᨻᩕᩣᩉ᩠ᨾᨱᨾᩉᩣᩈᩣᩃᩣ ᩈᨲ᩠ᨲ ᨧ ᨶ᩠ᩉᩣᨲᨠᩈᨲᩣᨶᩥ ᨧᨲ᩠ᨲᩣᩁᩦᩈᩣ ᨧ ᨽᩁᩥᨿᩣ ᩈᩣᨴᩥᩈᩥᨿᩮᩣ ᩋᨶᩮᨠᩣᨶᩥ ᨧ ᨡᨲ᩠ᨲᩥᨿᩈᩉᩔᩣᨶᩥ ᩋᨶᩮᨠᩣᨶᩥ ᨧ ᨻᩕᩣᩉ᩠ᨾᨱᩈᩉᩔᩣᨶᩥ ᩋᨶᩮᨠᩣᨶᩥ ᨧ ᨣᩉᨸᨲᩥᩈᩉᩔᩣᨶᩥ ᩋᨶᩮᨠᩮᩉᩥ ᨧ ᩍᨲ᩠ᨳᩣᨣᩣᩁᩮᩉᩥ ᩍᨲ᩠ᨳᩥᨿᩮᩣ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᨾᩉᩣᨣᩮᩣᩅᩥᨶ᩠ᨴᩴ ᨻᩕᩣᩉ᩠ᨾᨱᩴ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᨲᩴ ᩋᨶᩩᨸᨻ᩠ᨻᨩᩥᩴᩈᩩ. ᨲᩣᨿ ᩈᩩᨴᩴ, ᨽᩮᩣ, ᨸᩁᩥᩈᩣᨿ ᨸᩁᩥᩅᩩᨲᩮᩣ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨣᩣᨾᨶᩥᨣᨾᩁᩣᨩᨵᩣᨶᩦᩈᩩ ᨧᩣᩁᩥᨠᩴ ᨧᩁᨲᩥ. ᨿᩴ ᨡᩮᩣ ᨸᨶ, ᨽᩮᩣ, ᨲᩮᨶ ᩈᨾᨿᩮᨶ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᩏᨸᩈᨦ᩠ᨠᨾᨲᩥ, ᨲᨲ᩠ᨳ ᩁᩣᨩᩣᩅ ᩉᩮᩣᨲᩥ ᩁᨬ᩠ᨬᩴ, ᨻᩕᩉ᩠ᨾᩣᩅ ᨻᩕᩣᩉ᩠ᨾᨱᩣᨶᩴ, ᨴᩮᩅᨲᩣᩅ ᨣᩉᨸᨲᩥᨠᩣᨶᩴ. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨾᨶᩩᩔᩣ ᨡᩥᨸᨶ᩠ᨲᩥ ᩅᩣ ᩏᨸᨠ᩠ᨡᩃᨶ᩠ᨲᩥ ᩅᩣ ᨲᩮ ᩑᩅᨾᩣᩉᩴᩈᩩ – ‘‘ᨶᨾᨲ᩠ᨳᩩ ᨾᩉᩣᨣᩮᩣᩅᩥᨶ᩠ᨴᩔ ᨻᩕᩣᩉ᩠ᨾᨱᩔ, ᨶᨾᨲ᩠ᨳᩩ ᩈᨲ᩠ᨲ ᨸᩩᩁᩮᩣᩉᩥᨲᩔᩣ’’’ᨲᩥ.

᪓᪒᪗. ‘‘ᨾᩉᩣᨣᩮᩣᩅᩥᨶ᩠ᨴᩮᩣ, ᨽᩮᩣ, ᨻᩕᩣᩉ᩠ᨾᨱᩮᩣ ᨾᩮᨲ᩠ᨲᩣᩈᩉᨣᨲᩮᨶ ᨧᩮᨲᩈᩣ ᩑᨠᩴ ᨴᩥᩈᩴ ᨹᩁᩥᨲ᩠ᩅᩣ ᩅᩥᩉᩣᩈᩥ, ᨲᨳᩣ ᨴᩩᨲᩥᨿᩴ, ᨲᨳᩣ ᨲᨲᩥᨿᩴ, ᨲᨳᩣ ᨧᨲᩩᨲ᩠ᨳᩴ. ᩍᨲᩥ ᩏᨴ᩠ᨵᨾᨵᩮᩣ ᨲᩥᩁᩥᨿᩴ ᩈᨻ᩠ᨻᨵᩥ ᩈᨻ᩠ᨻᨲ᩠ᨲᨲᩣᨿ ᩈᨻ᩠ᨻᩣᩅᨶ᩠ᨲᩴ ᩃᩮᩣᨠᩴ ᨾᩮᨲ᩠ᨲᩣᩈᩉᨣᨲᩮᨶ ᨧᩮᨲᩈᩣ ᩅᩥᨸᩩᩃᩮᨶ ᨾᩉᨣ᩠ᨣᨲᩮᨶ ᩋᨸ᩠ᨸᨾᩣᨱᩮᨶ ᩋᩅᩮᩁᩮᨶ ᩋᨻ᩠ᨿᩣᨸᨩ᩠ᨩᩮᨶ ᨹᩁᩥᨲ᩠ᩅᩣ ᩅᩥᩉᩣᩈᩥ. ᨠᩁᩩᨱᩣᩈᩉᨣᨲᩮᨶ ᨧᩮᨲᩈᩣ…ᨸᩮ… ᨾᩩᨴᩥᨲᩣᩈᩉᨣᨲᩮᨶ ᨧᩮᨲᩈᩣ…ᨸᩮ… ᩏᨸᩮᨠ᩠ᨡᩣᩈᩉᨣᨲᩮᨶ ᨧᩮᨲᩈᩣ…ᨸᩮ… ᩋᨻ᩠ᨿᩣᨸᨩ᩠ᨩᩮᨶ ᨹᩁᩥᨲ᩠ᩅᩣ ᩅᩥᩉᩣᩈᩥ ᩈᩣᩅᨠᩣᨶᨬ᩠ᨧ ᨻᩕᩉ᩠ᨾᩃᩮᩣᨠᩈᩉᨻ᩠ᨿᨲᩣᨿ ᨾᨣ᩠ᨣᩴ ᨴᩮᩈᩮᩈᩥ.

᪓᪒᪘. ‘‘ᨿᩮ ᨡᩮᩣ ᨸᨶ, ᨽᩮᩣ, ᨲᩮᨶ ᩈᨾᨿᩮᨶ ᨾᩉᩣᨣᩮᩣᩅᩥᨶ᩠ᨴᩔ ᨻᩕᩣᩉ᩠ᨾᨱᩔ ᩈᩣᩅᨠᩣ ᩈᨻ᩠ᨻᩮᨶ ᩈᨻ᩠ᨻᩴ ᩈᩣᩈᨶᩴ ᩌᨩᩣᨶᩥᩴᩈᩩ. ᨲᩮ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᨻᩕᩉ᩠ᨾᩃᩮᩣᨠᩴ ᩏᨸᨸᨩ᩠ᨩᩥᩴᩈᩩ. ᨿᩮ ᨶ ᩈᨻ᩠ᨻᩮᨶ ᩈᨻ᩠ᨻᩴ ᩈᩣᩈᨶᩴ ᩌᨩᩣᨶᩥᩴᩈᩩ, ᨲᩮ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸ᩠ᨸᩮᨠᨧ᩠ᨧᩮ ᨸᩁᨶᩥᨾ᩠ᨾᩥᨲᩅᩈᩅᨲ᩠ᨲᩦᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨩ᩠ᨩᩥᩴᩈᩩ; ᩋᨸ᩠ᨸᩮᨠᨧ᩠ᨧᩮ ᨶᩥᨾ᩠ᨾᩣᨶᩁᨲᩦᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨩ᩠ᨩᩥᩴᩈᩩ; ᩋᨸ᩠ᨸᩮᨠᨧ᩠ᨧᩮ ᨲᩩᩈᩥᨲᩣᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨩ᩠ᨩᩥᩴᩈᩩ; ᩋᨸ᩠ᨸᩮᨠᨧ᩠ᨧᩮ ᨿᩣᨾᩣᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨩ᩠ᨩᩥᩴᩈᩩ; ᩋᨸ᩠ᨸᩮᨠᨧ᩠ᨧᩮ ᨲᩣᩅᨲᩥᩴᩈᩣᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨩ᩠ᨩᩥᩴᩈᩩ; ᩋᨸ᩠ᨸᩮᨠᨧ᩠ᨧᩮ ᨧᩣᨲᩩᨾᩉᩣᩁᩣᨩᩥᨠᩣᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨩ᩠ᨩᩥᩴᩈᩩ; ᨿᩮ ᩈᨻ᩠ᨻᨶᩥᩉᩦᨶᩴ ᨠᩣᨿᩴ ᨸᩁᩥᨸᩪᩁᩮᩈᩩᩴ ᨲᩮ ᨣᨶ᩠ᨵᨻ᩠ᨻᨠᩣᨿᩴ ᨸᩁᩥᨸᩪᩁᩮᩈᩩᩴ. ᩍᨲᩥ ᨡᩮᩣ, ᨽᩮᩣ [ᨸᨶ (ᩈ᩠ᨿᩣ. ᨠ.)], ᩈᨻ᩠ᨻᩮᩈᩴᨿᩮᩅ ᨲᩮᩈᩴ ᨠᩩᩃᨸᩩᨲ᩠ᨲᩣᨶᩴ ᩋᨾᩮᩣᨥᩣ ᨸᨻ᩠ᨻᨩ᩠ᨩᩣ ᩋᩉᩮᩣᩈᩥ ᩋᩅᨬ᩠ᨫᩣ ᩈᨹᩃᩣ ᩈᩏᨴᩕᨿᩣ’’’ᨲᩥ.

᪓᪒᪙. ‘‘ᩈᩁᨲᩥ ᨲᩴ ᨽᨣᩅᩣ’’ᨲᩥ? ‘‘ᩈᩁᩣᨾᩉᩴ, ᨸᨬ᩠ᨧᩈᩥᨡ. ᩋᩉᩴ ᨲᩮᨶ ᩈᨾᨿᩮᨶ ᨾᩉᩣᨣᩮᩣᩅᩥᨶ᩠ᨴᩮᩣ ᨻᩕᩣᩉ᩠ᨾᨱᩮᩣ ᩋᩉᩮᩣᩈᩥᩴ. ᩋᩉᩴ ᨲᩮᩈᩴ ᩈᩣᩅᨠᩣᨶᩴ ᨻᩕᩉ᩠ᨾᩃᩮᩣᨠᩈᩉᨻ᩠ᨿᨲᩣᨿ ᨾᨣ᩠ᨣᩴ ᨴᩮᩈᩮᩈᩥᩴ. ᨲᩴ ᨡᩮᩣ ᨸᨶ ᨾᩮ, ᨸᨬ᩠ᨧᩈᩥᨡ, ᨻᩕᩉ᩠ᨾᨧᩁᩥᨿᩴ ᨶ ᨶᩥᨻ᩠ᨻᩥᨴᩣᨿ ᨶ ᩅᩥᩁᩣᨣᩣᨿ ᨶ ᨶᩥᩁᩮᩣᨵᩣᨿ ᨶ ᩏᨸᩈᨾᩣᨿ ᨶ ᩋᨽᩥᨬ᩠ᨬᩣᨿ ᨶ ᩈᨾ᩠ᨻᩮᩣᨵᩣᨿ ᨶ ᨶᩥᨻ᩠ᨻᩣᨶᩣᨿ ᩈᩴᩅᨲ᩠ᨲᨲᩥ, ᨿᩣᩅᨴᩮᩅ ᨻᩕᩉ᩠ᨾᩃᩮᩣᨠᩪᨸᨸᨲ᩠ᨲᩥᨿᩣ.

ᩍᨴᩴ ᨡᩮᩣ ᨸᨶ ᨾᩮ, ᨸᨬ᩠ᨧᩈᩥᨡ, ᨻᩕᩉ᩠ᨾᨧᩁᩥᨿᩴ ᩑᨠᨶ᩠ᨲᨶᩥᨻ᩠ᨻᩥᨴᩣᨿ ᩅᩥᩁᩣᨣᩣᨿ ᨶᩥᩁᩮᩣᨵᩣᨿ ᩏᨸᩈᨾᩣᨿ ᩋᨽᩥᨬ᩠ᨬᩣᨿ ᩈᨾ᩠ᨻᩮᩣᨵᩣᨿ ᨶᩥᨻ᩠ᨻᩣᨶᩣᨿ ᩈᩴᩅᨲ᩠ᨲᨲᩥ. ᨠᨲᨾᨬ᩠ᨧ ᨲᩴ, ᨸᨬ᩠ᨧᩈᩥᨡ, ᨻᩕᩉ᩠ᨾᨧᩁᩥᨿᩴ ᩑᨠᨶ᩠ᨲᨶᩥᨻ᩠ᨻᩥᨴᩣᨿ ᩅᩥᩁᩣᨣᩣᨿ ᨶᩥᩁᩮᩣᨵᩣᨿ ᩏᨸᩈᨾᩣᨿ ᩋᨽᩥᨬ᩠ᨬᩣᨿ ᩈᨾ᩠ᨻᩮᩣᨵᩣᨿ ᨶᩥᨻ᩠ᨻᩣᨶᩣᨿ ᩈᩴᩅᨲ᩠ᨲᨲᩥ? ᩋᨿᨾᩮᩅ ᩋᩁᩥᨿᩮᩣ ᩋᨭ᩠ᨮᨦ᩠ᨣᩥᨠᩮᩣ ᨾᨣ᩠ᨣᩮᩣ. ᩈᩮᨿ᩠ᨿᨳᩥᨴᩴ – ᩈᨾ᩠ᨾᩣᨴᩥᨭ᩠ᨮᩥ ᩈᨾ᩠ᨾᩣᩈᨦ᩠ᨠᨸ᩠ᨸᩮᩣ ᩈᨾ᩠ᨾᩣᩅᩣᨧᩣ ᩈᨾ᩠ᨾᩣᨠᨾ᩠ᨾᨶ᩠ᨲᩮᩣ ᩈᨾ᩠ᨾᩣᩌᨩᩦᩅᩮᩣ ᩈᨾ᩠ᨾᩣᩅᩣᨿᩣᨾᩮᩣ ᩈᨾ᩠ᨾᩣᩈᨲᩥ ᩈᨾ᩠ᨾᩣᩈᨾᩣᨵᩥ. ᩍᨴᩴ ᨡᩮᩣ ᨲᩴ, ᨸᨬ᩠ᨧᩈᩥᨡ, ᨻᩕᩉ᩠ᨾᨧᩁᩥᨿᩴ ᩑᨠᨶ᩠ᨲᨶᩥᨻ᩠ᨻᩥᨴᩣᨿ ᩅᩥᩁᩣᨣᩣᨿ ᨶᩥᩁᩮᩣᨵᩣᨿ ᩏᨸᩈᨾᩣᨿ ᩋᨽᩥᨬ᩠ᨬᩣᨿ ᩈᨾ᩠ᨻᩮᩣᨵᩣᨿ ᨶᩥᨻ᩠ᨻᩣᨶᩣᨿ ᩈᩴᩅᨲ᩠ᨲᨲᩥ.

᪓᪓᪐. ‘‘ᨿᩮ ᨡᩮᩣ ᨸᨶ ᨾᩮ, ᨸᨬ᩠ᨧᩈᩥᨡ, ᩈᩣᩅᨠᩣ ᩈᨻ᩠ᨻᩮᨶ ᩈᨻ᩠ᨻᩴ ᩈᩣᩈᨶᩴ ᩌᨩᩣᨶᨶ᩠ᨲᩥ, ᨲᩮ ᩌᩈᩅᩣᨶᩴ ᨡᨿᩣ ᩋᨶᩣᩈᩅᩴ ᨧᩮᨲᩮᩣᩅᩥᨾᩩᨲ᩠ᨲᩥᩴ ᨸᨬ᩠ᨬᩣᩅᩥᨾᩩᨲ᩠ᨲᩥᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᩏᨸᩈᨾ᩠ᨸᨩ᩠ᨩ ᩅᩥᩉᩁᨶ᩠ᨲᩥ; ᨿᩮ ᨶ ᩈᨻ᩠ᨻᩮᨶ ᩈᨻ᩠ᨻᩴ ᩈᩣᩈᨶᩴ ᩌᨩᩣᨶᨶ᩠ᨲᩥ, ᨲᩮ ᨸᨬ᩠ᨧᨶ᩠ᨶᩴ ᩒᩁᨾ᩠ᨽᩣᨣᩥᨿᩣᨶᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩒᨸᨸᩣᨲᩥᨠᩣ ᩉᩮᩣᨶ᩠ᨲᩥ ᨲᨲ᩠ᨳ ᨸᩁᩥᨶᩥᨻ᩠ᨻᩣᨿᩥᨶᩮᩣ ᩋᨶᩣᩅᨲ᩠ᨲᩥᨵᨾ᩠ᨾᩣ ᨲᩈ᩠ᨾᩣ ᩃᩮᩣᨠᩣ. ᨿᩮ ᨶ ᩈᨻ᩠ᨻᩮᨶ ᩈᨻ᩠ᨻᩴ ᩈᩣᩈᨶᩴ ᩌᨩᩣᨶᨶ᩠ᨲᩥ, ᩋᨸ᩠ᨸᩮᨠᨧ᩠ᨧᩮ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩁᩣᨣᨴᩮᩣᩈᨾᩮᩣᩉᩣᨶᩴ ᨲᨶᩩᨲ᩠ᨲᩣ ᩈᨠᨴᩣᨣᩣᨾᩥᨶᩮᩣ ᩉᩮᩣᨶ᩠ᨲᩥ ᩈᨠᩥᨴᩮᩅ ᩍᨾᩴ ᩃᩮᩣᨠᩴ ᩌᨣᨶ᩠ᨲ᩠ᩅᩣ ᨴᩩᨠ᩠ᨡᩔᨶ᩠ᨲᩴ ᨠᩁᩥᩔᨶ᩠ᨲᩥ [ᨠᩁᩮᩣᨶ᩠ᨲᩥ (ᩈᩦ. ᨸᩦ.)]. ᨿᩮ ᨶ ᩈᨻ᩠ᨻᩮᨶ ᩈᨻ᩠ᨻᩴ ᩈᩣᩈᨶᩴ ᩌᨩᩣᨶᨶ᩠ᨲᩥ, ᩋᨸ᩠ᨸᩮᨠᨧ᩠ᨧᩮ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩈᩮᩣᨲᩣᨸᨶ᩠ᨶᩣ ᩉᩮᩣᨶ᩠ᨲᩥ ᩋᩅᩥᨶᩥᨸᩣᨲᨵᨾ᩠ᨾᩣ ᨶᩥᨿᨲᩣ ᩈᨾ᩠ᨻᩮᩣᨵᩥᨸᩁᩣᨿᨱᩣ. ᩍᨲᩥ ᨡᩮᩣ, ᨸᨬ᩠ᨧᩈᩥᨡ, ᩈᨻ᩠ᨻᩮᩈᩴᨿᩮᩅ ᩍᨾᩮᩈᩴ ᨠᩩᩃᨸᩩᨲ᩠ᨲᩣᨶᩴ ᩋᨾᩮᩣᨥᩣ ᨸᨻ᩠ᨻᨩ᩠ᨩᩣ [ᨸᨻ᩠ᨻᨩᩣ ᩋᩉᩮᩣᩈᩥ (ᨠ.)] ᩋᩅᨬ᩠ᨫᩣ ᩈᨹᩃᩣ ᩈᩏᨴᩕᨿᩣ’’ᨲᩥ.

ᩍᨴᨾᩅᩮᩣᨧ ᨽᨣᩅᩣ. ᩋᨲ᩠ᨲᨾᨶᩮᩣ ᨸᨬ᩠ᨧᩈᩥᨡᩮᩣ ᨣᨶ᩠ᨵᨻ᩠ᨻᨸᩩᨲ᩠ᨲᩮᩣ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩥᨲ᩠ᩅᩣ ᩋᨶᩩᨾᩮᩣᨴᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨲᨲ᩠ᨳᩮᩅᨶ᩠ᨲᩁᨵᩣᨿᩦᨲᩥ.

ᨾᩉᩣᨣᩮᩣᩅᩥᨶ᩠ᨴᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᨨᨭ᩠ᨮᩴ.

᪗. ᨾᩉᩣᩈᨾᨿᩈᩩᨲ᩠ᨲᩴ

᪓᪓᪑. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᩈᨠ᩠ᨠᩮᩈᩩ ᩅᩥᩉᩁᨲᩥ ᨠᨸᩥᩃᩅᨲ᩠ᨳᩩᩈ᩠ᨾᩥᩴ ᨾᩉᩣᩅᨶᩮ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨸᨬ᩠ᨧᨾᨲ᩠ᨲᩮᩉᩥ ᨽᩥᨠ᩠ᨡᩩᩈᨲᩮᩉᩥ ᩈᨻ᩠ᨻᩮᩉᩮᩅ ᩋᩁᩉᨶ᩠ᨲᩮᩉᩥ; ᨴᩈᩉᩥ ᨧ ᩃᩮᩣᨠᨵᩣᨲᩪᩉᩥ ᨴᩮᩅᨲᩣ ᨿᩮᨽᩩᨿ᩠ᨿᩮᨶ ᩈᨶ᩠ᨶᩥᨸᨲᩥᨲᩣ ᩉᩮᩣᨶ᩠ᨲᩥ ᨽᨣᩅᨶ᩠ᨲᩴ ᨴᩔᨶᩣᨿ ᨽᩥᨠ᩠ᨡᩩᩈᨦ᩠ᨥᨬ᩠ᨧ. ᩋᨳ ᨡᩮᩣ ᨧᨲᩩᨶ᩠ᨶᩴ ᩈᩩᨴ᩠ᨵᩣᩅᩣᩈᨠᩣᨿᩥᨠᩣᨶᩴ ᨴᩮᩅᨲᩣᨶᩴ [ᨴᩮᩅᩣᨶᩴ (ᩈᩦ. ᩈ᩠ᨿᩣ. ᨸᩦ.)] ᩑᨲᨴᩉᩮᩣᩈᩥ – ‘‘ᩋᨿᩴ ᨡᩮᩣ ᨽᨣᩅᩣ ᩈᨠ᩠ᨠᩮᩈᩩ ᩅᩥᩉᩁᨲᩥ ᨠᨸᩥᩃᩅᨲ᩠ᨳᩩᩈ᩠ᨾᩥᩴ ᨾᩉᩣᩅᨶᩮ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨸᨬ᩠ᨧᨾᨲ᩠ᨲᩮᩉᩥ ᨽᩥᨠ᩠ᨡᩩᩈᨲᩮᩉᩥ ᩈᨻ᩠ᨻᩮᩉᩮᩅ ᩋᩁᩉᨶ᩠ᨲᩮᩉᩥ; ᨴᩈᩉᩥ ᨧ ᩃᩮᩣᨠᨵᩣᨲᩪᩉᩥ ᨴᩮᩅᨲᩣ ᨿᩮᨽᩩᨿ᩠ᨿᩮᨶ ᩈᨶ᩠ᨶᩥᨸᨲᩥᨲᩣ ᩉᩮᩣᨶ᩠ᨲᩥ ᨽᨣᩅᨶ᩠ᨲᩴ ᨴᩔᨶᩣᨿ ᨽᩥᨠ᩠ᨡᩩᩈᨦ᩠ᨥᨬ᩠ᨧ. ᨿᩴᨶᩪᨶ ᨾᨿᨾ᩠ᨸᩥ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩮᨿ᩠ᨿᩣᨾ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨲᩮᩣ ᩈᨶ᩠ᨲᩥᨠᩮ ᨸᨧ᩠ᨧᩮᨠᩴ ᨣᩣᨳᩴ [ᨸᨧ᩠ᨧᩮᨠᨣᩣᨳᩴ (ᩈᩦ. ᩈ᩠ᨿᩣ. ᨸᩦ.), ᨸᨧ᩠ᨧᩮᨠᨣᩣᨳᩣ (ᨠ. ᩈᩦ.)] ᨽᩣᩈᩮᨿ᩠ᨿᩣᨾᩣ’’ᨲᩥ.

᪓᪓᪒. ᩋᨳ ᨡᩮᩣ ᨲᩣ ᨴᩮᩅᨲᩣ ᩈᩮᨿ᩠ᨿᨳᩣᨸᩥ ᨶᩣᨾ ᨻᩃᩅᩣ ᨸᩩᩁᩥᩈᩮᩣ ᩈᨾᩥᨬ᩠ᨩᩥᨲᩴ ᩅᩣ ᨻᩣᩉᩴ ᨸᩈᩣᩁᩮᨿ᩠ᨿ ᨸᩈᩣᩁᩥᨲᩴ ᩅᩣ ᨻᩣᩉᩴ ᩈᨾᩥᨬ᩠ᨩᩮᨿ᩠ᨿ, ᩑᩅᨾᩮᩅ ᩈᩩᨴ᩠ᨵᩣᩅᩣᩈᩮᩈᩩ ᨴᩮᩅᩮᩈᩩ ᩋᨶ᩠ᨲᩁᩉᩥᨲᩣ ᨽᨣᩅᨲᩮᩣ ᨸᩩᩁᨲᩮᩣ ᨸᩣᨲᩩᩁᩉᩮᩈᩩᩴ. ᩋᨳ ᨡᩮᩣ ᨲᩣ ᨴᩮᩅᨲᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩴᩈᩩ. ᩑᨠᨾᨶ᩠ᨲᩴ ᨮᩥᨲᩣ ᨡᩮᩣ ᩑᨠᩣ ᨴᩮᩅᨲᩣ ᨽᨣᩅᨲᩮᩣ ᩈᨶ᩠ᨲᩥᨠᩮ ᩍᨾᩴ ᨣᩣᨳᩴ ᩋᨽᩣᩈᩥ –

‘‘ᨾᩉᩣᩈᨾᨿᩮᩣ ᨸᩅᨶᩈ᩠ᨾᩥᩴ, ᨴᩮᩅᨠᩣᨿᩣ ᩈᨾᩣᨣᨲᩣ;

ᩌᨣᨲᨾ᩠ᩉ ᩍᨾᩴ ᨵᨾ᩠ᨾᩈᨾᨿᩴ, ᨴᨠ᩠ᨡᩥᨲᩣᨿᩮ ᩋᨸᩁᩣᨩᩥᨲᩈᨦ᩠ᨥ’’ᨶ᩠ᨲᩥ.

ᩋᨳ ᨡᩮᩣ ᩋᨸᩁᩣ ᨴᩮᩅᨲᩣ ᨽᨣᩅᨲᩮᩣ ᩈᨶ᩠ᨲᩥᨠᩮ ᩍᨾᩴ ᨣᩣᨳᩴ ᩋᨽᩣᩈᩥ –

‘‘ᨲᨲᩕ ᨽᩥᨠ᩠ᨡᩅᩮᩣ ᩈᨾᩣᨴᩉᩴᩈᩩ, ᨧᩥᨲ᩠ᨲᨾᨲ᩠ᨲᨶᩮᩣ ᩏᨩᩩᨠᩴ ᩋᨠᩴᩈᩩ [ᩏᨩᩩᨠᨾᨠᩴᩈᩩ (ᩈᩦ. ᩈ᩠ᨿᩣ. ᨸᩦ.)];

ᩈᩣᩁᨳᩦᩅ ᨶᩮᨲ᩠ᨲᩣᨶᩥ ᨣᩉᩮᨲ᩠ᩅᩣ, ᩍᨶ᩠ᨴᩕᩥᨿᩣᨶᩥ ᩁᨠ᩠ᨡᨶ᩠ᨲᩥ ᨸᨱ᩠ᨯᩥᨲᩣ’’ᨲᩥ.

ᩋᨳ ᨡᩮᩣ ᩋᨸᩁᩣ ᨴᩮᩅᨲᩣ ᨽᨣᩅᨲᩮᩣ ᩈᨶ᩠ᨲᩥᨠᩮ ᩍᨾᩴ ᨣᩣᨳᩴ ᩋᨽᩣᩈᩥ –

‘‘ᨨᩮᨲ᩠ᩅᩣ ᨡᩦᩃᩴ ᨨᩮᨲ᩠ᩅᩣ ᨸᩃᩥᨥᩴ, ᩍᨶ᩠ᨴᨡᩦᩃᩴ ᩐᩉᨧ᩠ᨧ [ᩏᩉᨧ᩠ᨧ (ᨠ.)] ᨾᨶᩮᨩᩣ;

ᨲᩮ ᨧᩁᨶ᩠ᨲᩥ ᩈᩩᨴ᩠ᨵᩣ ᩅᩥᨾᩃᩣ, ᨧᨠ᩠ᨡᩩᨾᨲᩣ ᩈᩩᨴᨶ᩠ᨲᩣ ᩈᩩᩈᩩᨶᩣᨣᩣ’’ᨲᩥ.

ᩋᨳ ᨡᩮᩣ ᩋᨸᩁᩣ ᨴᩮᩅᨲᩣ ᨽᨣᩅᨲᩮᩣ ᩈᨶ᩠ᨲᩥᨠᩮ ᩍᨾᩴ ᨣᩣᨳᩴ ᩋᨽᩣᩈᩥ –

‘‘ᨿᩮᨠᩮᨧᩥ ᨻᩩᨴ᩠ᨵᩴ ᩈᩁᨱᩴ ᨣᨲᩣᩈᩮ, ᨶ ᨲᩮ ᨣᨾᩥᩔᨶ᩠ᨲᩥ ᩋᨸᩣᨿᨽᩪᨾᩥᩴ;

ᨸᩉᩣᨿ ᨾᩣᨶᩩᩈᩴ ᨴᩮᩉᩴ, ᨴᩮᩅᨠᩣᨿᩴ ᨸᩁᩥᨸᩪᩁᩮᩔᨶ᩠ᨲᩦ’’ᨲᩥ.

ᨴᩮᩅᨲᩣᩈᨶ᩠ᨶᩥᨸᩣᨲᩣ

᪓᪓᪓. ᩋᨳ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᨿᩮᨽᩩᨿ᩠ᨿᩮᨶ, ᨽᩥᨠ᩠ᨡᩅᩮ, ᨴᩈᩈᩩ ᩃᩮᩣᨠᨵᩣᨲᩪᩈᩩ ᨴᩮᩅᨲᩣ ᩈᨶ᩠ᨶᩥᨸᨲᩥᨲᩣ ᩉᩮᩣᨶ᩠ᨲᩥ [( ) ᩈᩦ. ᩍᨸᩮᩣᨲ᩠ᨳᨠᩮᩈᩩ ᨶᨲ᩠ᨳᩥ], ᨲᨳᩣᨣᨲᩴ ᨴᩔᨶᩣᨿ ᨽᩥᨠ᩠ᨡᩩᩈᨦ᩠ᨥᨬ᩠ᨧ. ᨿᩮᨸᩥ ᨲᩮ, ᨽᩥᨠ᩠ᨡᩅᩮ, ᩋᩉᩮᩈᩩᩴ ᩋᨲᩦᨲᨾᨴ᩠ᨵᩣᨶᩴ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᨲᩮᩈᨾ᩠ᨸᩥ ᨽᨣᩅᨶ᩠ᨲᩣᨶᩴ ᩑᨲᩴᨸᩁᨾᩣᨿᩮᩅ [ᩑᨲᨸᩁᨾᩣᨿᩮᩅ (ᩈᩦ. ᩈ᩠ᨿᩣ. ᨸᩦ.)] ᨴᩮᩅᨲᩣ ᩈᨶ᩠ᨶᩥᨸᨲᩥᨲᩣ ᩋᩉᩮᩈᩩᩴ ᩈᩮᨿ᩠ᨿᨳᩣᨸᩥ ᨾᨿ᩠ᩉᩴ ᩑᨲᩁᩉᩥ. ᨿᩮᨸᩥ ᨲᩮ, ᨽᩥᨠ᩠ᨡᩅᩮ, ᨽᩅᩥᩔᨶ᩠ᨲᩥ ᩋᨶᩣᨣᨲᨾᨴ᩠ᨵᩣᨶᩴ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᨲᩮᩈᨾ᩠ᨸᩥ ᨽᨣᩅᨶ᩠ᨲᩣᨶᩴ ᩑᨲᩴᨸᩁᨾᩣᨿᩮᩅ ᨴᩮᩅᨲᩣ ᩈᨶ᩠ᨶᩥᨸᨲᩥᨲᩣ ᨽᩅᩥᩔᨶ᩠ᨲᩥ ᩈᩮᨿ᩠ᨿᨳᩣᨸᩥ ᨾᨿ᩠ᩉᩴ ᩑᨲᩁᩉᩥ. ᩌᨧᩥᨠ᩠ᨡᩥᩔᩣᨾᩥ, ᨽᩥᨠ᩠ᨡᩅᩮ, ᨴᩮᩅᨠᩣᨿᩣᨶᩴ ᨶᩣᨾᩣᨶᩥ; ᨠᩥᨲ᩠ᨲᨿᩥᩔᩣᨾᩥ, ᨽᩥᨠ᩠ᨡᩅᩮ, ᨴᩮᩅᨠᩣᨿᩣᨶᩴ ᨶᩣᨾᩣᨶᩥ; ᨴᩮᩈᩮᩔᩣᨾᩥ, ᨽᩥᨠ᩠ᨡᩅᩮ, ᨴᩮᩅᨠᩣᨿᩣᨶᩴ ᨶᩣᨾᩣᨶᩥ. ᨲᩴ ᩈᩩᨱᩣᨳ, ᩈᩣᨵᩩᨠᩴ ᨾᨶᩈᩥᨠᩁᩮᩣᨳ, ᨽᩣᩈᩥᩔᩣᨾᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩩᩴ.

᪓᪓᪔. ᨽᨣᩅᩣ ᩑᨲᨴᩅᩮᩣᨧ –

‘‘ᩈᩥᩃᩮᩣᨠᨾᨶᩩᨠᩔᩣᨾᩥ, ᨿᨲ᩠ᨳ ᨽᩩᨾ᩠ᨾᩣ ᨲᨴᩔᩥᨲᩣ;

ᨿᩮ ᩈᩥᨲᩣ ᨣᩥᩁᩥᨣᨻ᩠ᨽᩁᩴ, ᨸᩉᩥᨲᨲ᩠ᨲᩣ ᩈᨾᩣᩉᩥᨲᩣ.

‘‘ᨸᩩᨳᩪᩈᩦᩉᩣᩅ ᩈᩃ᩠ᩃᩦᨶᩣ, ᩃᩮᩣᨾᩉᩴᩈᩣᨽᩥᩈᨾ᩠ᨽᩩᨶᩮᩣ;

ᩒᨴᩣᨲᨾᨶᩈᩣ ᩈᩩᨴ᩠ᨵᩣ, ᩅᩥᨸ᩠ᨸᩈᨶ᩠ᨶᨾᨶᩣᩅᩥᩃᩣ’’ [ᩅᩥᨸ᩠ᨸᩈᨶ᩠ᨶᩣᨾᨶᩣᩅᩥᩃᩣ (ᨸᩦ. ᨠ.)].

ᨽᩥᨿ᩠ᨿᩮᩣ ᨸᨬ᩠ᨧᩈᨲᩮ ᨬᨲ᩠ᩅᩣ, ᩅᨶᩮ ᨠᩣᨸᩥᩃᩅᨲ᩠ᨳᩅᩮ;

ᨲᨲᩮᩣ ᩌᨾᨶ᩠ᨲᨿᩦ ᩈᨲ᩠ᨳᩣ, ᩈᩣᩅᨠᩮ ᩈᩣᩈᨶᩮ ᩁᨲᩮ.

‘‘ᨴᩮᩅᨠᩣᨿᩣ ᩋᨽᩥᨠ᩠ᨠᨶ᩠ᨲᩣ, ᨲᩮ ᩅᩥᨩᩣᨶᩣᨳ ᨽᩥᨠ᩠ᨡᩅᩮᩣ’’;

ᨲᩮ ᨧ ᩌᨲᨸ᩠ᨸᨾᨠᩁᩩᩴ, ᩈᩩᨲ᩠ᩅᩣ ᨻᩩᨴ᩠ᨵᩔ ᩈᩣᩈᨶᩴ.

ᨲᩮᩈᩴ ᨸᩣᨲᩩᩁᩉᩩ ᨬᩣᨱᩴ, ᩋᨾᨶᩩᩔᩣᨶᨴᩔᨶᩴ;

ᩋᨸ᩠ᨸᩮᨠᩮ ᩈᨲᨾᨴ᩠ᨴᨠ᩠ᨡᩩᩴ, ᩈᩉᩔᩴ ᩋᨳ ᩈᨲ᩠ᨲᩁᩥᩴ.

ᩈᨲᩴ ᩑᨠᩮ ᩈᩉᩔᩣᨶᩴ, ᩋᨾᨶᩩᩔᩣᨶᨾᨴ᩠ᨴᩈᩩᩴ;

ᩋᨸ᩠ᨸᩮᨠᩮᨶᨶ᩠ᨲᨾᨴ᩠ᨴᨠ᩠ᨡᩩᩴ, ᨴᩥᩈᩣ ᩈᨻ᩠ᨻᩣ ᨹᩩᨭᩣ ᩋᩉᩩᩴ.

ᨲᨬ᩠ᨧ ᩈᨻ᩠ᨻᩴ ᩋᨽᩥᨬ᩠ᨬᩣᨿ, ᩅᩅᨲ᩠ᨳᩥᨲ᩠ᩅᩣᨶ [ᩅᩅᨠ᩠ᨡᩥᨲ᩠ᩅᩣᨶ (ᩈᩦ. ᩈ᩠ᨿᩣ. ᨸᩦ.), ᩋᩅᩮᨠ᩠ᨡᩥᨲ᩠ᩅᩣᨶ (ᨭᩦᨠᩣ)] ᨧᨠ᩠ᨡᩩᨾᩣ;

ᨲᨲᩮᩣ ᩌᨾᨶ᩠ᨲᨿᩦ ᩈᨲ᩠ᨳᩣ, ᩈᩣᩅᨠᩮ ᩈᩣᩈᨶᩮ ᩁᨲᩮ.

‘‘ᨴᩮᩅᨠᩣᨿᩣ ᩋᨽᩥᨠ᩠ᨠᨶ᩠ᨲᩣ, ᨲᩮ ᩅᩥᨩᩣᨶᩣᨳ ᨽᩥᨠ᩠ᨡᩅᩮᩣ;

ᨿᩮ ᩅᩮᩣᩉᩴ ᨠᩥᨲ᩠ᨲᨿᩥᩔᩣᨾᩥ, ᨣᩥᩁᩣᩉᩥ ᩋᨶᩩᨸᩩᨻ᩠ᨻᩈᩮᩣ.

᪓᪓᪕. ‘‘ᩈᨲ᩠ᨲᩈᩉᩔᩣ ᨲᩮ ᨿᨠ᩠ᨡᩣ, ᨽᩩᨾ᩠ᨾᩣ ᨠᩣᨸᩥᩃᩅᨲ᩠ᨳᩅᩣ.

ᩍᨴ᩠ᨵᩥᨾᨶ᩠ᨲᩮᩣ ᨩᩩᨲᩥᨾᨶ᩠ᨲᩮᩣ, ᩅᨱ᩠ᨱᩅᨶ᩠ᨲᩮᩣ ᨿᩈᩔᩥᨶᩮᩣ;

ᨾᩮᩣᨴᨾᩣᨶᩣ ᩋᨽᩥᨠ᩠ᨠᩣᨾᩩᩴ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

‘‘ᨨᩈᩉᩔᩣ ᩉᩮᨾᩅᨲᩣ, ᨿᨠ᩠ᨡᩣ ᨶᩣᨶᨲ᩠ᨲᩅᨱ᩠ᨱᩥᨶᩮᩣ;

ᩍᨴ᩠ᨵᩥᨾᨶ᩠ᨲᩮᩣ ᨩᩩᨲᩦᨾᨶ᩠ᨲᩮᩣ [ᨩᩩᨲᩦᨾᨶ᩠ᨲᩮᩣ (ᩈᩦ. ᨸᩦ.)], ᩅᨱ᩠ᨱᩅᨶ᩠ᨲᩮᩣ ᨿᩈᩔᩥᨶᩮᩣ;

ᨾᩮᩣᨴᨾᩣᨶᩣ ᩋᨽᩥᨠ᩠ᨠᩣᨾᩩᩴ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

‘‘ᩈᩣᨲᩣᨣᩥᩁᩣ ᨲᩥᩈᩉᩔᩣ, ᨿᨠ᩠ᨡᩣ ᨶᩣᨶᨲ᩠ᨲᩅᨱ᩠ᨱᩥᨶᩮᩣ;

ᩍᨴ᩠ᨵᩥᨾᨶ᩠ᨲᩮᩣ ᨩᩩᨲᩥᨾᨶ᩠ᨲᩮᩣ, ᩅᨱ᩠ᨱᩅᨶ᩠ᨲᩮᩣ ᨿᩈᩔᩥᨶᩮᩣ;

ᨾᩮᩣᨴᨾᩣᨶᩣ ᩋᨽᩥᨠ᩠ᨠᩣᨾᩩᩴ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

‘‘ᩍᨧ᩠ᨧᩮᨲᩮ ᩈᩮᩣᩊᩈᩈᩉᩔᩣ, ᨿᨠ᩠ᨡᩣ ᨶᩣᨶᨲ᩠ᨲᩅᨱ᩠ᨱᩥᨶᩮᩣ;

ᩍᨴ᩠ᨵᩥᨾᨶ᩠ᨲᩮᩣ ᨩᩩᨲᩥᨾᨶ᩠ᨲᩮᩣ, ᩅᨱ᩠ᨱᩅᨶ᩠ᨲᩮᩣ ᨿᩈᩔᩥᨶᩮᩣ;

ᨾᩮᩣᨴᨾᩣᨶᩣ ᩋᨽᩥᨠ᩠ᨠᩣᨾᩩᩴ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

‘‘ᩅᩮᩔᩣᨾᩥᨲ᩠ᨲᩣ ᨸᨬ᩠ᨧᩈᨲᩣ, ᨿᨠ᩠ᨡᩣ ᨶᩣᨶᨲ᩠ᨲᩅᨱ᩠ᨱᩥᨶᩮᩣ;

ᩍᨴ᩠ᨵᩥᨾᨶ᩠ᨲᩮᩣ ᨩᩩᨲᩥᨾᨶ᩠ᨲᩮᩣ, ᩅᨱ᩠ᨱᩅᨶ᩠ᨲᩮᩣ ᨿᩈᩔᩥᨶᩮᩣ;

ᨾᩮᩣᨴᨾᩣᨶᩣ ᩋᨽᩥᨠ᩠ᨠᩣᨾᩩᩴ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

‘‘ᨠᩩᨾ᩠ᨽᩦᩁᩮᩣ ᩁᩣᨩᨣᩉᩥᨠᩮᩣ, ᩅᩮᨸᩩᩃ᩠ᩃᩔ ᨶᩥᩅᩮᩈᨶᩴ;

ᨽᩥᨿ᩠ᨿᩮᩣ ᨶᩴ ᩈᨲᩈᩉᩔᩴ, ᨿᨠ᩠ᨡᩣᨶᩴ ᨸᨿᩥᩁᩩᨸᩣᩈᨲᩥ;

ᨠᩩᨾ᩠ᨽᩦᩁᩮᩣ ᩁᩣᨩᨣᩉᩥᨠᩮᩣ, ᩈᩮᩣᨸᩣᨣᩣ ᩈᨾᩥᨲᩥᩴ ᩅᨶᩴ.

᪓᪓᪖. ‘‘ᨸᩩᩁᩥᨾᨬ᩠ᨧ ᨴᩥᩈᩴ ᩁᩣᨩᩣ, ᨵᨲᩁᨭ᩠ᨮᩮᩣ ᨸᩈᩣᩈᨲᩥ.

ᨣᨶ᩠ᨵᨻ᩠ᨻᩣᨶᩴ ᩋᨵᩥᨸᨲᩥ, ᨾᩉᩣᩁᩣᨩᩣ ᨿᩈᩔᩥᩈᩮᩣ.

‘‘ᨸᩩᨲ᩠ᨲᩣᨸᩥ ᨲᩔ ᨻᩉᩅᩮᩣ, ᩍᨶ᩠ᨴᨶᩣᨾᩣ ᨾᩉᨻ᩠ᨻᩃᩣ;

ᩍᨴ᩠ᨵᩥᨾᨶ᩠ᨲᩮᩣ ᨩᩩᨲᩥᨾᨶ᩠ᨲᩮᩣ, ᩅᨱ᩠ᨱᩅᨶ᩠ᨲᩮᩣ ᨿᩈᩔᩥᨶᩮᩣ;

ᨾᩮᩣᨴᨾᩣᨶᩣ ᩋᨽᩥᨠ᩠ᨠᩣᨾᩩᩴ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

‘‘ᨴᨠ᩠ᨡᩥᨱᨬ᩠ᨧ ᨴᩥᩈᩴ ᩁᩣᨩᩣ, ᩅᩥᩁᩪᩊ᩠ᩉᩮᩣ ᨲᩴ ᨸᩈᩣᩈᨲᩥ [ᨲᨸ᩠ᨸᩈᩣᩈᨲᩥ (ᩈ᩠ᨿᩣ.)];

ᨠᩩᨾ᩠ᨽᨱ᩠ᨯᩣᨶᩴ ᩋᨵᩥᨸᨲᩥ, ᨾᩉᩣᩁᩣᨩᩣ ᨿᩈᩔᩥᩈᩮᩣ.

‘‘ᨸᩩᨲ᩠ᨲᩣᨸᩥ ᨲᩔ ᨻᩉᩅᩮᩣ, ᩍᨶ᩠ᨴᨶᩣᨾᩣ ᨾᩉᨻ᩠ᨻᩃᩣ;

ᩍᨴ᩠ᨵᩥᨾᨶ᩠ᨲᩮᩣ ᨩᩩᨲᩥᨾᨶ᩠ᨲᩮᩣ, ᩅᨱ᩠ᨱᩅᨶ᩠ᨲᩮᩣ ᨿᩈᩔᩥᨶᩮᩣ;

ᨾᩮᩣᨴᨾᩣᨶᩣ ᩋᨽᩥᨠ᩠ᨠᩣᨾᩩᩴ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

‘‘ᨸᨧ᩠ᨨᩥᨾᨬ᩠ᨧ ᨴᩥᩈᩴ ᩁᩣᨩᩣ, ᩅᩥᩁᩪᨸᨠ᩠ᨡᩮᩣ ᨸᩈᩣᩈᨲᩥ;

ᨶᩣᨣᩣᨶᨬ᩠ᨧ ᩋᨵᩥᨸᨲᩥ, ᨾᩉᩣᩁᩣᨩᩣ ᨿᩈᩔᩥᩈᩮᩣ.

‘‘ᨸᩩᨲ᩠ᨲᩣᨸᩥ ᨲᩔ ᨻᩉᩅᩮᩣ, ᩍᨶ᩠ᨴᨶᩣᨾᩣ ᨾᩉᨻ᩠ᨻᩃᩣ;

ᩍᨴ᩠ᨵᩥᨾᨶ᩠ᨲᩮᩣ ᨩᩩᨲᩥᨾᨶ᩠ᨲᩮᩣ, ᩅᨱ᩠ᨱᩅᨶ᩠ᨲᩮᩣ ᨿᩈᩔᩥᨶᩮᩣ;

ᨾᩮᩣᨴᨾᩣᨶᩣ ᩋᨽᩥᨠ᩠ᨠᩣᨾᩩᩴ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

‘‘ᩏᨲ᩠ᨲᩁᨬ᩠ᨧ ᨴᩥᩈᩴ ᩁᩣᨩᩣ, ᨠᩩᩅᩮᩁᩮᩣ ᨲᩴ ᨸᩈᩣᩈᨲᩥ;

ᨿᨠ᩠ᨡᩣᨶᨬ᩠ᨧ ᩋᨵᩥᨸᨲᩥ, ᨾᩉᩣᩁᩣᨩᩣ ᨿᩈᩔᩥᩈᩮᩣ.

‘‘ᨸᩩᨲ᩠ᨲᩣᨸᩥ ᨲᩔ ᨻᩉᩅᩮᩣ, ᩍᨶ᩠ᨴᨶᩣᨾᩣ ᨾᩉᨻ᩠ᨻᩃᩣ;

ᩍᨴ᩠ᨵᩥᨾᨶ᩠ᨲᩮᩣ ᨩᩩᨲᩥᨾᨶ᩠ᨲᩮᩣ, ᩅᨱ᩠ᨱᩅᨶ᩠ᨲᩮᩣ ᨿᩈᩔᩥᨶᩮᩣ;

ᨾᩮᩣᨴᨾᩣᨶᩣ ᩋᨽᩥᨠ᩠ᨠᩣᨾᩩᩴ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

‘‘ᨸᩩᩁᩥᨾᩴ ᨴᩥᩈᩴ ᨵᨲᩁᨭ᩠ᨮᩮᩣ, ᨴᨠ᩠ᨡᩥᨱᩮᨶ ᩅᩥᩁᩪᩊ᩠ᩉᨠᩮᩣ;

ᨸᨧ᩠ᨨᩥᨾᩮᨶ ᩅᩥᩁᩪᨸᨠ᩠ᨡᩮᩣ, ᨠᩩᩅᩮᩁᩮᩣ ᩏᨲ᩠ᨲᩁᩴ ᨴᩥᩈᩴ.

‘‘ᨧᨲ᩠ᨲᩣᩁᩮᩣ ᨲᩮ ᨾᩉᩣᩁᩣᨩᩣ, ᩈᨾᨶ᩠ᨲᩣ ᨧᨲᩩᩁᩮᩣ ᨴᩥᩈᩣ;

ᨴᨴ᩠ᨴᩃ᩠ᩃᨾᩣᨶᩣ [ᨴᨴ᩠ᨴᩊ᩠ᩉᨾᩣᨶᩣ (ᨠ.)] ᩋᨭ᩠ᨮᩴᩈᩩ, ᩅᨶᩮ ᨠᩣᨸᩥᩃᩅᨲ᩠ᨳᩅᩮ.

᪓᪓᪗. ‘‘ᨲᩮᩈᩴ ᨾᩣᨿᩣᩅᩥᨶᩮᩣ ᨴᩣᩈᩣ, ᩌᨣᩩᩴ [ᩌᨣᩪ (ᩈ᩠ᨿᩣ.), ᩌᨣᩩ (ᩈᩦ. ᨸᩦ.) ᩑᩅᨾᩩᨸᩁᩥᨸᩥ] ᩅᨬ᩠ᨧᨶᩥᨠᩣ ᩈᨮᩣ.

ᨾᩣᨿᩣ ᨠᩩᨭᩮᨱ᩠ᨯᩩ ᩅᩥᨭᩮᨱ᩠ᨯᩩ [ᩅᩮᨭᩮᨱ᩠ᨯᩩ (ᩈᩦ. ᩈ᩠ᨿᩣ. ᨸᩦ.)], ᩅᩥᨭᩩᨧ᩠ᨧ [ᩅᩥᨭᩪ ᨧ (ᩈ᩠ᨿᩣ.)] ᩅᩥᨭᩩᨭᩮᩣ ᩈᩉ.

‘‘ᨧᨶ᩠ᨴᨶᩮᩣ ᨠᩣᨾᩈᩮᨭ᩠ᨮᩮᩣ ᨧ, ᨠᩥᨶ᩠ᨶᩥᨥᨱ᩠ᨯᩩ [ᨠᩥᨶ᩠ᨶᩩᨥᨱ᩠ᨯᩩ (ᩈᩦ. ᩈ᩠ᨿᩣ. ᨸᩦ.)] ᨶᩥᨥᨱ᩠ᨯᩩ ᨧ;

ᨸᨶᩣᨴᩮᩣ ᩒᨸᨾᨬ᩠ᨬᩮᩣ ᨧ, ᨴᩮᩅᩈᩪᨲᩮᩣ ᨧ ᨾᩣᨲᩃᩥ.

‘‘ᨧᩥᨲ᩠ᨲᩈᩮᨶᩮᩣ ᨧ ᨣᨶ᩠ᨵᨻ᩠ᨻᩮᩣ, ᨶᩊᩮᩣᩁᩣᨩᩣ ᨩᨶᩮᩈᨽᩮᩣ [ᨩᨶᩮᩣᩈᨽᩮᩣ (ᩈ᩠ᨿᩣ.)];

ᩌᨣᩣ ᨸᨬ᩠ᨧᩈᩥᨡᩮᩣ ᨧᩮᩅ, ᨲᩥᨾ᩠ᨻᩁᩪ ᩈᩪᩁᩥᨿᩅᨧ᩠ᨧᩈᩣ [ᩈᩩᩁᩥᨿᩅᨧ᩠ᨧᩈᩣ (ᩈᩦ. ᨸᩦ.)].

‘‘ᩑᨲᩮ ᨧᨬ᩠ᨬᩮ ᨧ ᩁᩣᨩᩣᨶᩮᩣ, ᨣᨶ᩠ᨵᨻ᩠ᨻᩣ ᩈᩉ ᩁᩣᨩᩩᨽᩥ;

ᨾᩮᩣᨴᨾᩣᨶᩣ ᩋᨽᩥᨠ᩠ᨠᩣᨾᩩᩴ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

᪓᪓᪘. ‘‘ᩋᨳᩣᨣᩩᩴ ᨶᩣᨣᩈᩣ ᨶᩣᨣᩣ, ᩅᩮᩈᩣᩃᩣ ᩈᩉᨲᨧ᩠ᨨᨠᩣ.

ᨠᨾ᩠ᨻᩃᩔᨲᩁᩣ ᩌᨣᩩᩴ, ᨸᩣᨿᩣᨣᩣ ᩈᩉ ᨬᩣᨲᩥᨽᩥ.

‘‘ᨿᩣᨾᩩᨶᩣ ᨵᨲᩁᨭ᩠ᨮᩣ ᨧ, ᩌᨣᩪ ᨶᩣᨣᩣ ᨿᩈᩔᩥᨶᩮᩣ;

ᩑᩁᩣᩅᨱᩮᩣ ᨾᩉᩣᨶᩣᨣᩮᩣ, ᩈᩮᩣᨸᩣᨣᩣ ᩈᨾᩥᨲᩥᩴ ᩅᨶᩴ.

‘‘ᨿᩮ ᨶᩣᨣᩁᩣᨩᩮ ᩈᩉᩈᩣ ᩉᩁᨶ᩠ᨲᩥ, ᨴᩥᨻ᩠ᨻᩣ ᨴᩥᨩᩣ ᨸᨠ᩠ᨡᩥ ᩅᩥᩈᩩᨴ᩠ᨵᨧᨠ᩠ᨡᩪ;

ᩅᩮᩉᩣᨿᩈᩣ [ᩅᩮᩉᩣᩈᨿᩣ (ᩈᩦ. ᨸᩦ.)] ᨲᩮ ᩅᨶᨾᨩ᩠ᨫᨸᨲ᩠ᨲᩣ, ᨧᩥᨲᩕᩣ ᩈᩩᨸᨱ᩠ᨱᩣ ᩍᨲᩥ ᨲᩮᩈ ᨶᩣᨾᩴ.

‘‘ᩋᨽᨿᩴ ᨲᨴᩣ ᨶᩣᨣᩁᩣᨩᩣᨶᨾᩣᩈᩥ, ᩈᩩᨸᨱ᩠ᨱᨲᩮᩣ ᨡᩮᨾᨾᨠᩣᩈᩥ ᨻᩩᨴ᩠ᨵᩮᩣ;

ᩈᨱ᩠ᩉᩣᩉᩥ ᩅᩣᨧᩣᩉᩥ ᩏᨸᩅ᩠ᩉᨿᨶ᩠ᨲᩣ, ᨶᩣᨣᩣ ᩈᩩᨸᨱ᩠ᨱᩣ ᩈᩁᨱᨾᨠᩴᩈᩩ ᨻᩩᨴ᩠ᨵᩴ.

᪓᪓᪙. ‘‘ᨩᩥᨲᩣ ᩅᨩᩥᩁᩉᨲ᩠ᨳᩮᨶ, ᩈᨾᩩᨴ᩠ᨴᩴ ᩋᩈᩩᩁᩣᩈᩥᨲᩣ.

ᨽᩣᨲᩁᩮᩣ ᩅᩣᩈᩅᩔᩮᨲᩮ, ᩍᨴ᩠ᨵᩥᨾᨶ᩠ᨲᩮᩣ ᨿᩈᩔᩥᨶᩮᩣ.

‘‘ᨠᩣᩃᨠᨬ᩠ᨧᩣ ᨾᩉᩣᨽᩥᩈ᩠ᨾᩣ [ᨠᩣᩃᨠᨬ᩠ᨩᩣ ᨾᩉᩣᨽᩥᩴᩈᩣ (ᩈᩦ. ᨸᩦ.)], ᩋᩈᩩᩁᩣ ᨴᩣᨶᩅᩮᨥᩈᩣ;

ᩅᩮᨸᨧᩥᨲ᩠ᨲᩥ ᩈᩩᨧᩥᨲ᩠ᨲᩥ ᨧ, ᨸᩉᩣᩁᩣᨴᩮᩣ ᨶᨾᩩᨧᩦ ᩈᩉ.

‘‘ᩈᨲᨬ᩠ᨧ ᨻᩃᩥᨸᩩᨲ᩠ᨲᩣᨶᩴ, ᩈᨻ᩠ᨻᩮ ᩅᩮᩁᩮᩣᨧᨶᩣᨾᨠᩣ;

ᩈᨶ᩠ᨶᨿ᩠ᩉᩥᨲ᩠ᩅᩣ ᨻᩃᩥᩈᩮᨶᩴ [ᨻᩃᩦᩈᩮᨶᩴ (ᩈ᩠ᨿᩣ.)], ᩁᩣᩉᩩᨽᨴ᩠ᨴᨾᩩᨸᩣᨣᨾᩩᩴ;

ᩈᨾᨿᩮᩣᨴᩣᨶᩥ ᨽᨴ᩠ᨴᨶ᩠ᨲᩮ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

᪓᪔᪐. ‘‘ᩌᨸᩮᩣ ᨧ ᨴᩮᩅᩣ ᨸᨳᩅᩦ, ᨲᩮᨩᩮᩣ ᩅᩣᨿᩮᩣ ᨲᨴᩣᨣᨾᩩᩴ.

ᩅᩁᩩᨱᩣ ᩅᩣᩁᨱᩣ [ᩅᩣᩁᩩᨱᩣ (ᩈ᩠ᨿᩣ.)] ᨴᩮᩅᩣ, ᩈᩮᩣᨾᩮᩣ ᨧ ᨿᩈᩈᩣ ᩈᩉ.

‘‘ᨾᩮᨲ᩠ᨲᩣ ᨠᩁᩩᨱᩣ ᨠᩣᨿᩥᨠᩣ, ᩌᨣᩩᩴ ᨴᩮᩅᩣ ᨿᩈᩔᩥᨶᩮᩣ;

ᨴᩈᩮᨲᩮ ᨴᩈᨵᩣ ᨠᩣᨿᩣ, ᩈᨻ᩠ᨻᩮ ᨶᩣᨶᨲ᩠ᨲᩅᨱ᩠ᨱᩥᨶᩮᩣ.

‘‘ᩍᨴ᩠ᨵᩥᨾᨶ᩠ᨲᩮᩣ ᨩᩩᨲᩥᨾᨶ᩠ᨲᩮᩣ, ᩅᨱ᩠ᨱᩅᨶ᩠ᨲᩮᩣ ᨿᩈᩔᩥᨶᩮᩣ;

ᨾᩮᩣᨴᨾᩣᨶᩣ ᩋᨽᩥᨠ᩠ᨠᩣᨾᩩᩴ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

‘‘ᩅᩮᨱ᩠ᨯᩩᨴᩮᩅᩣ ᩈᩉᩃᩥ ᨧ [ᩅᩮᨱ᩠ᩉᩪᨧ ᨴᩮᩅᩣ ᩈᩉᩃᩦᨧ (ᩈᩦ. ᨸᩦ.)], ᩋᩈᨾᩣ ᨧ ᨴᩩᩅᩮ ᨿᨾᩣ;

ᨧᨶ᩠ᨴᩔᩪᨸᨶᩥᩈᩣ ᨴᩮᩅᩣ, ᨧᨶ᩠ᨴᨾᩣᨣᩩᩴ ᨸᩩᩁᨠ᩠ᨡᨲ᩠ᩅᩣ.

‘‘ᩈᩪᩁᩥᨿᩔᩪᨸᨶᩥᩈᩣ [ᩈᩩᩁᩥᨿᩔᩪᨸᨶᩥᩈᩣ (ᩈᩦ. ᩈ᩠ᨿᩣ. ᨸᩦ.)] ᨴᩮᩅᩣ, ᩈᩪᩁᩥᨿᨾᩣᨣᩩᩴ ᨸᩩᩁᨠ᩠ᨡᨲ᩠ᩅᩣ;

ᨶᨠ᩠ᨡᨲ᩠ᨲᩣᨶᩥ ᨸᩩᩁᨠ᩠ᨡᨲ᩠ᩅᩣ, ᩌᨣᩩᩴ ᨾᨶ᩠ᨴᩅᩃᩣᩉᨠᩣ.

‘‘ᩅᩈᩪᨶᩴ ᩅᩣᩈᩅᩮᩣ ᩈᩮᨭ᩠ᨮᩮᩣ, ᩈᨠ᩠ᨠᩮᩣᨸᩣᨣᩣ ᨸᩩᩁᩥᨶ᩠ᨴᨴᩮᩣ;

ᨴᩈᩮᨲᩮ ᨴᩈᨵᩣ ᨠᩣᨿᩣ, ᩈᨻ᩠ᨻᩮ ᨶᩣᨶᨲ᩠ᨲᩅᨱ᩠ᨱᩥᨶᩮᩣ.

‘‘ᩍᨴ᩠ᨵᩥᨾᨶ᩠ᨲᩮᩣ ᨩᩩᨲᩥᨾᨶ᩠ᨲᩮᩣ, ᩅᨱ᩠ᨱᩅᨶ᩠ᨲᩮᩣ ᨿᩈᩔᩥᨶᩮᩣ;

ᨾᩮᩣᨴᨾᩣᨶᩣ ᩋᨽᩥᨠ᩠ᨠᩣᨾᩩᩴ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

‘‘ᩋᨳᩣᨣᩩᩴ ᩈᩉᨽᩪ ᨴᩮᩅᩣ, ᨩᩃᨾᨣ᩠ᨣᩥᩈᩥᨡᩣᩁᩥᩅ;

ᩋᩁᩥᨭ᩠ᨮᨠᩣ ᨧ ᩁᩮᩣᨩᩣ ᨧ, ᩏᨾᩣᨸᩩᨸ᩠ᨹᨶᩥᨽᩣᩈᩥᨶᩮᩣ.

‘‘ᩅᩁᩩᨱᩣ ᩈᩉᨵᨾ᩠ᨾᩣ ᨧ, ᩋᨧ᩠ᨧᩩᨲᩣ ᨧ ᩋᨶᩮᨩᨠᩣ;

ᩈᩪᩃᩮᨿ᩠ᨿᩁᩩᨧᩥᩁᩣ ᩌᨣᩩᩴ, ᩌᨣᩩᩴ ᩅᩣᩈᩅᨶᩮᩈᩥᨶᩮᩣ;

ᨴᩈᩮᨲᩮ ᨴᩈᨵᩣ ᨠᩣᨿᩣ, ᩈᨻ᩠ᨻᩮ ᨶᩣᨶᨲ᩠ᨲᩅᨱ᩠ᨱᩥᨶᩮᩣ.

‘‘ᩍᨴ᩠ᨵᩥᨾᨶ᩠ᨲᩮᩣ ᨩᩩᨲᩥᨾᨶ᩠ᨲᩮᩣ, ᩅᨱ᩠ᨱᩅᨶ᩠ᨲᩮᩣ ᨿᩈᩔᩥᨶᩮᩣ;

ᨾᩮᩣᨴᨾᩣᨶᩣ ᩋᨽᩥᨠ᩠ᨠᩣᨾᩩᩴ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

‘‘ᩈᨾᩣᨶᩣ ᨾᩉᩣᩈᨾᨶᩣ, ᨾᩣᨶᩩᩈᩣ ᨾᩣᨶᩩᩈᩩᨲ᩠ᨲᨾᩣ;

ᨡᩥᨯ᩠ᨯᩣᨸᨴᩮᩣᩈᩥᨠᩣ ᩌᨣᩩᩴ, ᩌᨣᩩᩴ ᨾᨶᩮᩣᨸᨴᩮᩣᩈᩥᨠᩣ.

‘‘ᩋᨳᩣᨣᩩᩴ ᩉᩁᨿᩮᩣ ᨴᩮᩅᩣ, ᨿᩮ ᨧ ᩃᩮᩣᩉᩥᨲᩅᩣᩈᩥᨶᩮᩣ;

ᨸᩣᩁᨣᩣ ᨾᩉᩣᨸᩣᩁᨣᩣ, ᩌᨣᩩᩴ ᨴᩮᩅᩣ ᨿᩈᩔᩥᨶᩮᩣ;

ᨴᩈᩮᨲᩮ ᨴᩈᨵᩣ ᨠᩣᨿᩣ, ᩈᨻ᩠ᨻᩮ ᨶᩣᨶᨲ᩠ᨲᩅᨱ᩠ᨱᩥᨶᩮᩣ.

‘‘ᩍᨴ᩠ᨵᩥᨾᨶ᩠ᨲᩮᩣ ᨩᩩᨲᩥᨾᨶ᩠ᨲᩮᩣ, ᩅᨱ᩠ᨱᩅᨶ᩠ᨲᩮᩣ ᨿᩈᩔᩥᨶᩮᩣ;

ᨾᩮᩣᨴᨾᩣᨶᩣ ᩋᨽᩥᨠ᩠ᨠᩣᨾᩩᩴ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

‘‘ᩈᩩᨠ᩠ᨠᩣ ᨠᩁᨾ᩠ᨽᩣ [ᨠᩁᩩᨾ᩠ᩉᩣ (ᩈᩦ. ᩈ᩠ᨿᩣ. ᨸᩦ.)] ᩋᩁᩩᨱᩣ, ᩌᨣᩩᩴ ᩅᩮᨥᨶᩈᩣ ᩈᩉ;

ᩒᨴᩣᨲᨣᨿ᩠ᩉᩣ ᨸᩣᨾᩮᩣᨠ᩠ᨡᩣ, ᩌᨣᩩᩴ ᨴᩮᩅᩣ ᩅᩥᨧᨠ᩠ᨡᨱᩣ.

‘‘ᩈᨴᩣᨾᨲ᩠ᨲᩣ ᩉᩣᩁᨣᨩᩣ, ᨾᩥᩔᨠᩣ ᨧ ᨿᩈᩔᩥᨶᩮᩣ;

ᨳᨶᨿᩴ ᩌᨣ ᨸᨩ᩠ᨩᩩᨶ᩠ᨶᩮᩣ, ᨿᩮᩣ ᨴᩥᩈᩣ ᩋᨽᩥᩅᩔᨲᩥ.

‘‘ᨴᩈᩮᨲᩮ ᨴᩈᨵᩣ ᨠᩣᨿᩣ, ᩈᨻ᩠ᨻᩮ ᨶᩣᨶᨲ᩠ᨲᩅᨱ᩠ᨱᩥᨶᩮᩣ;

ᩍᨴ᩠ᨵᩥᨾᨶ᩠ᨲᩮᩣ ᨩᩩᨲᩥᨾᨶ᩠ᨲᩮᩣ, ᩅᨱ᩠ᨱᩅᨶ᩠ᨲᩮᩣ ᨿᩈᩔᩥᨶᩮᩣ;

ᨾᩮᩣᨴᨾᩣᨶᩣ ᩋᨽᩥᨠ᩠ᨠᩣᨾᩩᩴ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

‘‘ᨡᩮᨾᩥᨿᩣ ᨲᩩᩈᩥᨲᩣ ᨿᩣᨾᩣ, ᨠᨭ᩠ᨮᨠᩣ ᨧ ᨿᩈᩔᩥᨶᩮᩣ;

ᩃᨾ᩠ᨻᩦᨲᨠᩣ ᩃᩣᨾᩈᩮᨭ᩠ᨮᩣ, ᨩᩮᩣᨲᩥᨶᩣᨾᩣ ᨧ ᩌᩈᩅᩣ;

ᨶᩥᨾ᩠ᨾᩣᨶᩁᨲᩥᨶᩮᩣ ᩌᨣᩩᩴ, ᩋᨳᩣᨣᩩᩴ ᨸᩁᨶᩥᨾ᩠ᨾᩥᨲᩣ.

‘‘ᨴᩈᩮᨲᩮ ᨴᩈᨵᩣ ᨠᩣᨿᩣ, ᩈᨻ᩠ᨻᩮ ᨶᩣᨶᨲ᩠ᨲᩅᨱ᩠ᨱᩥᨶᩮᩣ;

ᩍᨴ᩠ᨵᩥᨾᨶ᩠ᨲᩮᩣ ᨩᩩᨲᩥᨾᨶ᩠ᨲᩮᩣ, ᩅᨱ᩠ᨱᩅᨶ᩠ᨲᩮᩣ ᨿᩈᩔᩥᨶᩮᩣ;

ᨾᩮᩣᨴᨾᩣᨶᩣ ᩋᨽᩥᨠ᩠ᨠᩣᨾᩩᩴ, ᨽᩥᨠ᩠ᨡᩪᨶᩴ ᩈᨾᩥᨲᩥᩴ ᩅᨶᩴ.

‘‘ᩈᨭ᩠ᨮᩮᨲᩮ ᨴᩮᩅᨶᩥᨠᩣᨿᩣ, ᩈᨻ᩠ᨻᩮ ᨶᩣᨶᨲ᩠ᨲᩅᨱ᩠ᨱᩥᨶᩮᩣ;

ᨶᩣᨾᨶ᩠ᩅᨿᩮᨶ ᩌᨣᨧ᩠ᨨᩩᩴ [ᩌᨣᨬ᩠ᨨᩩᩴ (ᩈᩦ. ᩈ᩠ᨿᩣ. ᨸᩦ.)], ᨿᩮ ᨧᨬ᩠ᨬᩮ ᩈᨴᩥᩈᩣ ᩈᩉ.

‘‘‘ᨸᩅᩩᨭ᩠ᨮᨩᩣᨲᩥᨾᨡᩥᩃᩴ [ᨸᩅᩩᨲ᩠ᨳᨩᩣᨲᩥᩴ ᩋᨡᩥᩃᩴ (ᩈᩦ. ᨸᩦ.)], ᩒᨥᨲᩥᨱ᩠ᨱᨾᨶᩣᩈᩅᩴ;

ᨴᨠ᩠ᨡᩮᨾᩮᩣᨥᨲᩁᩴ ᨶᩣᨣᩴ, ᨧᨶ᩠ᨴᩴᩅ ᩋᩈᩥᨲᩣᨲᩥᨣᩴ’.

᪓᪔᪑. ‘‘ᩈᩩᨻᩕᩉ᩠ᨾᩣ ᨸᩁᨾᨲ᩠ᨲᩮᩣ ᨧ [ᨸᩁᨾᨲ᩠ᨳᩮᩣ ᨧ (ᨠ.)], ᨸᩩᨲ᩠ᨲᩣ ᩍᨴ᩠ᨵᩥᨾᨲᩮᩣ ᩈᩉ.

ᩈᨶᨦ᩠ᨠᩩᨾᩣᩁᩮᩣ ᨲᩥᩔᩮᩣ ᨧ, ᩈᩮᩣᨸᩣᨣ ᩈᨾᩥᨲᩥᩴ ᩅᨶᩴ.

‘‘ᩈᩉᩔᩴ ᨻᩕᩉ᩠ᨾᩃᩮᩣᨠᩣᨶᩴ, ᨾᩉᩣᨻᩕᩉ᩠ᨾᩣᨽᩥᨲᩥᨭ᩠ᨮᨲᩥ;

ᩏᨸᨸᨶ᩠ᨶᩮᩣ ᨩᩩᨲᩥᨾᨶ᩠ᨲᩮᩣ, ᨽᩥᩈ᩠ᨾᩣᨠᩣᨿᩮᩣ ᨿᩈᩔᩥᩈᩮᩣ.

‘‘ᨴᩈᩮᨲ᩠ᨳ ᩍᩔᩁᩣ ᩌᨣᩩᩴ, ᨸᨧ᩠ᨧᩮᨠᩅᩈᩅᨲ᩠ᨲᩥᨶᩮᩣ;

ᨲᩮᩈᨬ᩠ᨧ ᨾᨩ᩠ᨫᨲᩮᩣ ᩌᨣ, ᩉᩣᩁᩥᨲᩮᩣ ᨸᩁᩥᩅᩣᩁᩥᨲᩮᩣ.

᪓᪔᪒. ‘‘ᨲᩮ ᨧ ᩈᨻ᩠ᨻᩮ ᩋᨽᩥᨠ᩠ᨠᨶ᩠ᨲᩮ, ᩈᩍᨶ᩠ᨴᩮ [ᩈᩥᨶ᩠ᨴᩮ (ᩈ᩠ᨿᩣ.)] ᨴᩮᩅᩮ ᩈᨻᩕᩉ᩠ᨾᨠᩮ.

ᨾᩣᩁᩈᩮᨶᩣ ᩋᨽᩥᨠ᩠ᨠᩣᨾᩥ, ᨸᩔ ᨠᨱ᩠ᩉᩔ ᨾᨶ᩠ᨴᩥᨿᩴ.

‘‘‘ᩑᨳ ᨣᨱ᩠ᩉᨳ ᨻᨶ᩠ᨵᨳ, ᩁᩣᨣᩮᨶ ᨻᨴ᩠ᨵᨾᨲ᩠ᨳᩩ ᩅᩮᩣ;

ᩈᨾᨶ᩠ᨲᩣ ᨸᩁᩥᩅᩣᩁᩮᨳ, ᨾᩣ ᩅᩮᩣ ᨾᩩᨬ᩠ᨧᩥᨲ᩠ᨳ ᨠᩮᩣᨧᩥ ᨶᩴ’.

‘‘ᩍᨲᩥ ᨲᨲ᩠ᨳ ᨾᩉᩣᩈᩮᨶᩮᩣ, ᨠᨱ᩠ᩉᩮᩣ ᩈᩮᨶᩴ ᩋᨸᩮᩈᨿᩥ;

ᨸᩣᨱᩥᨶᩣ ᨲᩃᨾᩣᩉᨧ᩠ᨧ, ᩈᩁᩴ ᨠᨲ᩠ᩅᩣᨶ ᨽᩮᩁᩅᩴ.

‘‘ᨿᨳᩣ ᨸᩣᩅᩩᩔᨠᩮᩣ ᨾᩮᨥᩮᩣ, ᨳᨶᨿᨶ᩠ᨲᩮᩣ ᩈᩅᩥᨩ᩠ᨩᩩᨠᩮᩣ; +

ᨲᨴᩣ ᩈᩮᩣ ᨸᨧ᩠ᨧᩩᨴᩣᩅᨲ᩠ᨲᩥ, ᩈᨦ᩠ᨠᩩᨴ᩠ᨵᩮᩣ ᩋᩈᨿᩴᩅᩈᩮ [ᩋᩈᨿᩴᩅᩈᩦ (ᩈᩦ. ᨸᩦ.)].

᪓᪔᪓. ᨲᨬ᩠ᨧ ᩈᨻ᩠ᨻᩴ ᩋᨽᩥᨬ᩠ᨬᩣᨿ, ᩅᩅᨲ᩠ᨳᩥᨲ᩠ᩅᩣᨶ ᨧᨠ᩠ᨡᩩᨾᩣ.

ᨲᨲᩮᩣ ᩌᨾᨶ᩠ᨲᨿᩦ ᩈᨲ᩠ᨳᩣ, ᩈᩣᩅᨠᩮ ᩈᩣᩈᨶᩮ ᩁᨲᩮ.

‘‘ᨾᩣᩁᩈᩮᨶᩣ ᩋᨽᩥᨠ᩠ᨠᨶ᩠ᨲᩣ, ᨲᩮ ᩅᩥᨩᩣᨶᩣᨳ ᨽᩥᨠ᩠ᨡᩅᩮᩣ;

ᨲᩮ ᨧ ᩌᨲᨸ᩠ᨸᨾᨠᩁᩩᩴ, ᩈᩩᨲ᩠ᩅᩣ ᨻᩩᨴ᩠ᨵᩔ ᩈᩣᩈᨶᩴ;

ᩅᩦᨲᩁᩣᨣᩮᩉᩥ ᨸᨠ᩠ᨠᩣᨾᩩᩴ, ᨶᩮᩈᩴ ᩃᩮᩣᨾᩣᨸᩥ ᩍᨬ᩠ᨩᨿᩩᩴ.

‘‘‘ᩈᨻ᩠ᨻᩮ ᩅᩥᨩᩥᨲᩈᨦ᩠ᨣᩣᨾᩣ, ᨽᨿᩣᨲᩦᨲᩣ ᨿᩈᩔᩥᨶᩮᩣ;

ᨾᩮᩣᨴᨶ᩠ᨲᩥ ᩈᩉ ᨽᩪᨲᩮᩉᩥ, ᩈᩣᩅᨠᩣ ᨲᩮ ᨩᨶᩮᩈᩩᨲᩣ’’ᨲᩥ.

ᨾᩉᩣᩈᨾᨿᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᩈᨲ᩠ᨲᨾᩴ.

᪘. ᩈᨠ᩠ᨠᨸᨬ᩠ᩉᩈᩩᨲ᩠ᨲᩴ

᪓᪔᪔. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᨾᨣᨵᩮᩈᩩ ᩅᩥᩉᩁᨲᩥ, ᨸᩣᨧᩦᨶᨲᩮᩣ ᩁᩣᨩᨣᩉᩔ ᩋᨾ᩠ᨻᩈᨱ᩠ᨯᩣ ᨶᩣᨾ ᨻᩕᩣᩉ᩠ᨾᨱᨣᩣᨾᩮᩣ, ᨲᩔᩩᨲ᩠ᨲᩁᨲᩮᩣ ᩅᩮᨴᩥᨿᨠᩮ ᨸᨻ᩠ᨻᨲᩮ ᩍᨶ᩠ᨴᩈᩣᩃᨣᩩᩉᩣᨿᩴ. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩈᨠ᩠ᨠᩔ ᨴᩮᩅᩣᨶᨾᩥᨶ᩠ᨴᩔ ᩏᩔᩩᨠ᩠ᨠᩴ ᩏᨴᨸᩣᨴᩥ ᨽᨣᩅᨶ᩠ᨲᩴ ᨴᩔᨶᩣᨿ. ᩋᨳ ᨡᩮᩣ ᩈᨠ᩠ᨠᩔ ᨴᩮᩅᩣᨶᨾᩥᨶ᩠ᨴᩔ ᩑᨲᨴᩉᩮᩣᩈᩥ – ‘‘ᨠᩉᩴ ᨶᩩ ᨡᩮᩣ ᨽᨣᩅᩣ ᩑᨲᩁᩉᩥ ᩅᩥᩉᩁᨲᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ’’ᨲᩥ? ᩋᨴ᩠ᨴᩈᩣ ᨡᩮᩣ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨽᨣᩅᨶ᩠ᨲᩴ ᨾᨣᨵᩮᩈᩩ ᩅᩥᩉᩁᨶ᩠ᨲᩴ ᨸᩣᨧᩦᨶᨲᩮᩣ ᩁᩣᨩᨣᩉᩔ ᩋᨾ᩠ᨻᩈᨱ᩠ᨯᩣ ᨶᩣᨾ ᨻᩕᩣᩉ᩠ᨾᨱᨣᩣᨾᩮᩣ, ᨲᩔᩩᨲ᩠ᨲᩁᨲᩮᩣ ᩅᩮᨴᩥᨿᨠᩮ ᨸᨻ᩠ᨻᨲᩮ ᩍᨶ᩠ᨴᩈᩣᩃᨣᩩᩉᩣᨿᩴ. ᨴᩥᩈ᩠ᩅᩣᨶ ᨴᩮᩅᩮ ᨲᩣᩅᨲᩥᩴᩈᩮ ᩌᨾᨶ᩠ᨲᩮᩈᩥ – ‘‘ᩋᨿᩴ, ᨾᩣᩁᩥᩈᩣ, ᨽᨣᩅᩣ ᨾᨣᨵᩮᩈᩩ ᩅᩥᩉᩁᨲᩥ, ᨸᩣᨧᩦᨶᨲᩮᩣ ᩁᩣᨩᨣᩉᩔ ᩋᨾ᩠ᨻᩈᨱ᩠ᨯᩣ ᨶᩣᨾ ᨻᩕᩣᩉ᩠ᨾᨱᨣᩣᨾᩮᩣ, ᨲᩔᩩᨲ᩠ᨲᩁᨲᩮᩣ ᩅᩮᨴᩥᨿᨠᩮ ᨸᨻ᩠ᨻᨲᩮ ᩍᨶ᩠ᨴᩈᩣᩃᨣᩩᩉᩣᨿᩴ. ᨿᨴᩥ ᨸᨶ, ᨾᩣᩁᩥᩈᩣ, ᨾᨿᩴ ᨲᩴ ᨽᨣᩅᨶ᩠ᨲᩴ ᨴᩔᨶᩣᨿ ᩏᨸᩈᨦ᩠ᨠᨾᩮᨿ᩠ᨿᩣᨾ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵ’’ᨶ᩠ᨲᩥ? ‘‘ᩑᩅᩴ ᨽᨴ᩠ᨴᨶ᩠ᨲᩅᩣ’’ᨲᩥ ᨡᩮᩣ ᨴᩮᩅᩣ ᨲᩣᩅᨲᩥᩴᩈᩣ ᩈᨠ᩠ᨠᩔ ᨴᩮᩅᩣᨶᨾᩥᨶ᩠ᨴᩔ ᨸᨧ᩠ᨧᩔᩮᩣᩈᩩᩴ.

᪓᪔᪕. ᩋᨳ ᨡᩮᩣ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨸᨬ᩠ᨧᩈᩥᨡᩴ ᨣᨶ᩠ᨵᨻ᩠ᨻᨴᩮᩅᨸᩩᨲ᩠ᨲᩴ [ᨣᨶ᩠ᨵᨻ᩠ᨻᨸᩩᨲ᩠ᨲᩴ (ᩈ᩠ᨿᩣ.)] ᩌᨾᨶ᩠ᨲᩮᩈᩥ – ‘‘ᩋᨿᩴ, ᨲᩣᨲ ᨸᨬ᩠ᨧᩈᩥᨡ, ᨽᨣᩅᩣ ᨾᨣᨵᩮᩈᩩ ᩅᩥᩉᩁᨲᩥ ᨸᩣᨧᩦᨶᨲᩮᩣ ᩁᩣᨩᨣᩉᩔ ᩋᨾ᩠ᨻᩈᨱ᩠ᨯᩣ ᨶᩣᨾ ᨻᩕᩣᩉ᩠ᨾᨱᨣᩣᨾᩮᩣ, ᨲᩔᩩᨲ᩠ᨲᩁᨲᩮᩣ ᩅᩮᨴᩥᨿᨠᩮ ᨸᨻ᩠ᨻᨲᩮ ᩍᨶ᩠ᨴᩈᩣᩃᨣᩩᩉᩣᨿᩴ. ᨿᨴᩥ ᨸᨶ, ᨲᩣᨲ ᨸᨬ᩠ᨧᩈᩥᨡ, ᨾᨿᩴ ᨲᩴ ᨽᨣᩅᨶ᩠ᨲᩴ ᨴᩔᨶᩣᨿ ᩏᨸᩈᨦ᩠ᨠᨾᩮᨿ᩠ᨿᩣᨾ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵ’’ᨶ᩠ᨲᩥ? ‘‘ᩑᩅᩴ ᨽᨴ᩠ᨴᨶ᩠ᨲᩅᩣ’’ᨲᩥ ᨡᩮᩣ ᨸᨬ᩠ᨧᩈᩥᨡᩮᩣ ᨣᨶ᩠ᨵᨻ᩠ᨻᨴᩮᩅᨸᩩᨲ᩠ᨲᩮᩣ ᩈᨠ᩠ᨠᩔ ᨴᩮᩅᩣᨶᨾᩥᨶ᩠ᨴᩔ ᨸᨭᩥᩔᩩᨲ᩠ᩅᩣ ᨻᩮᩃᩩᩅᨸᨱ᩠ᨯᩩᩅᩦᨱᩴ ᩌᨴᩣᨿ ᩈᨠ᩠ᨠᩔ ᨴᩮᩅᩣᨶᨾᩥᨶ᩠ᨴᩔ ᩋᨶᩩᨧᩁᩥᨿᩴ ᩏᨸᩣᨣᨾᩥ.

᪓᪔᪖. ᩋᨳ ᨡᩮᩣ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨴᩮᩅᩮᩉᩥ ᨲᩣᩅᨲᩥᩴᩈᩮᩉᩥ ᨸᩁᩥᩅᩩᨲᩮᩣ ᨸᨬ᩠ᨧᩈᩥᨡᩮᨶ ᨣᨶ᩠ᨵᨻ᩠ᨻᨴᩮᩅᨸᩩᨲ᩠ᨲᩮᨶ ᨸᩩᩁᨠ᩠ᨡᨲᩮᩣ ᩈᩮᨿ᩠ᨿᨳᩣᨸᩥ ᨶᩣᨾ ᨻᩃᩅᩣ ᨸᩩᩁᩥᩈᩮᩣ ᩈᨾᩥᨬ᩠ᨩᩥᨲᩴ ᩅᩣ ᨻᩣᩉᩴ ᨸᩈᩣᩁᩮᨿ᩠ᨿ ᨸᩈᩣᩁᩥᨲᩴ ᩅᩣ ᨻᩣᩉᩴ ᩈᨾᩥᨬ᩠ᨩᩮᨿ᩠ᨿ; ᩑᩅᨾᩮᩅ ᨴᩮᩅᩮᩈᩩ ᨲᩣᩅᨲᩥᩴᩈᩮᩈᩩ ᩋᨶ᩠ᨲᩁᩉᩥᨲᩮᩣ ᨾᨣᨵᩮᩈᩩ ᨸᩣᨧᩦᨶᨲᩮᩣ ᩁᩣᨩᨣᩉᩔ ᩋᨾ᩠ᨻᩈᨱ᩠ᨯᩣ ᨶᩣᨾ ᨻᩕᩣᩉ᩠ᨾᨱᨣᩣᨾᩮᩣ, ᨲᩔᩩᨲ᩠ᨲᩁᨲᩮᩣ ᩅᩮᨴᩥᨿᨠᩮ ᨸᨻ᩠ᨻᨲᩮ ᨸᨧ᩠ᨧᩩᨭ᩠ᨮᩣᩈᩥ. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩅᩮᨴᩥᨿᨠᩮᩣ ᨸᨻ᩠ᨻᨲᩮᩣ ᩋᨲᩥᩁᩥᩅ ᩒᨽᩣᩈᨩᩣᨲᩮᩣ ᩉᩮᩣᨲᩥ ᩋᨾ᩠ᨻᩈᨱ᩠ᨯᩣ ᨧ ᨻᩕᩣᩉ᩠ᨾᨱᨣᩣᨾᩮᩣ ᨿᨳᩣ ᨲᩴ ᨴᩮᩅᩣᨶᩴ ᨴᩮᩅᩣᨶᩩᨽᩣᩅᩮᨶ. ᩋᨸᩥᩔᩩᨴᩴ ᨸᩁᩥᨲᩮᩣ ᨣᩣᨾᩮᩈᩩ ᨾᨶᩩᩔᩣ ᩑᩅᨾᩣᩉᩴᩈᩩ – ‘‘ᩌᨴᩥᨲ᩠ᨲᩔᩩ ᨶᩣᨾᨩ᩠ᨩ ᩅᩮᨴᩥᨿᨠᩮᩣ ᨸᨻ᩠ᨻᨲᩮᩣ ᨫᩣᨿᨲᩥᩈᩩ [ᨫᩣᨿᨲᩔᩩ (ᩈ᩠ᨿᩣ.), ᨸᨩ᩠ᨫᩣᨿᩥᨲᩔᩩ (ᩈᩦ. ᨸᩦ.)] ᨶᩣᨾᨩ᩠ᨩ ᩅᩮᨴᩥᨿᨠᩮᩣ ᨸᨻ᩠ᨻᨲᩮᩣ ᨩᩃᨲᩥᩈᩩ [ᨩᩃᨲᩔᩩ (ᩈ᩠ᨿᩣ.), ᨩᩃᩥᨲᩔᩩ (ᩈᩦ. ᨸᩦ.)] ᨶᩣᨾᨩ᩠ᨩ ᩅᩮᨴᩥᨿᨠᩮᩣ ᨸᨻ᩠ᨻᨲᩮᩣ ᨠᩥᩴᩈᩩ ᨶᩣᨾᨩ᩠ᨩ ᩅᩮᨴᩥᨿᨠᩮᩣ ᨸᨻ᩠ᨻᨲᩮᩣ ᩋᨲᩥᩁᩥᩅ ᩒᨽᩣᩈᨩᩣᨲᩮᩣ ᩋᨾ᩠ᨻᩈᨱ᩠ᨯᩣ ᨧ ᨻᩕᩣᩉ᩠ᨾᨱᨣᩣᨾᩮᩣ’’ᨲᩥ ᩈᩴᩅᩥᨣ᩠ᨣᩣ ᩃᩮᩣᨾᩉᨭ᩠ᨮᨩᩣᨲᩣ ᩋᩉᩮᩈᩩᩴ.

᪓᪔᪗. ᩋᨳ ᨡᩮᩣ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨸᨬ᩠ᨧᩈᩥᨡᩴ ᨣᨶ᩠ᨵᨻ᩠ᨻᨴᩮᩅᨸᩩᨲ᩠ᨲᩴ ᩌᨾᨶ᩠ᨲᩮᩈᩥ – ‘‘ᨴᩩᩁᩩᨸᩈᨦ᩠ᨠᨾᩣ ᨡᩮᩣ, ᨲᩣᨲ ᨸᨬ᩠ᨧᩈᩥᨡ, ᨲᨳᩣᨣᨲᩣ ᨾᩣᨴᩥᩈᩮᨶ, ᨫᩣᨿᩦ ᨫᩣᨶᩁᨲᩣ, ᨲᨴᨶ᩠ᨲᩁᩴ [ᨲᨴᨶᨶ᩠ᨲᩁᩴ (ᩈᩦ. ᩈ᩠ᨿᩣ. ᨸᩦ. ᨠ.)] ᨸᨭᩥᩈᩃ᩠ᩃᩦᨶᩣ. ᨿᨴᩥ ᨸᨶ ᨲ᩠ᩅᩴ, ᨲᩣᨲ ᨸᨬ᩠ᨧᩈᩥᨡ, ᨽᨣᩅᨶ᩠ᨲᩴ ᨸᨮᨾᩴ ᨸᩈᩣᨴᩮᨿ᩠ᨿᩣᩈᩥ, ᨲᨿᩣ, ᨲᩣᨲ, ᨸᨮᨾᩴ ᨸᩈᩣᨴᩥᨲᩴ ᨸᨧ᩠ᨨᩣ ᨾᨿᩴ ᨲᩴ ᨽᨣᩅᨶ᩠ᨲᩴ ᨴᩔᨶᩣᨿ ᩏᨸᩈᨦ᩠ᨠᨾᩮᨿ᩠ᨿᩣᨾ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵ’’ᨶ᩠ᨲᩥ. ‘‘ᩑᩅᩴ ᨽᨴ᩠ᨴᨶ᩠ᨲᩅᩣ’’ᨲᩥ ᨡᩮᩣ ᨸᨬ᩠ᨧᩈᩥᨡᩮᩣ ᨣᨶ᩠ᨵᨻ᩠ᨻᨴᩮᩅᨸᩩᨲ᩠ᨲᩮᩣ ᩈᨠ᩠ᨠᩔ ᨴᩮᩅᩣᨶᨾᩥᨶ᩠ᨴᩔ ᨸᨭᩥᩔᩩᨲ᩠ᩅᩣ ᨻᩮᩃᩩᩅᨸᨱ᩠ᨯᩩᩅᩦᨱᩴ ᩌᨴᩣᨿ ᨿᩮᨶ ᩍᨶ᩠ᨴᩈᩣᩃᨣᩩᩉᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ‘‘ᩑᨲ᩠ᨲᩣᩅᨲᩣ ᨾᩮ ᨽᨣᩅᩣ ᨶᩮᩅ ᩋᨲᩥᨴᩪᩁᩮ ᨽᩅᩥᩔᨲᩥ ᨶᩣᨧ᩠ᨧᩣᩈᨶ᩠ᨶᩮ, ᩈᨴ᩠ᨴᨬ᩠ᨧ ᨾᩮ ᩈᩮᩣᩔᨲᩦ’’ᨲᩥ ᩑᨠᨾᨶ᩠ᨲᩴ ᩋᨭ᩠ᨮᩣᩈᩥ.

ᨸᨬ᩠ᨧᩈᩥᨡᨣᩦᨲᨣᩣᨳᩣ

᪓᪔᪘. ᩑᨠᨾᨶ᩠ᨲᩴ ᨮᩥᨲᩮᩣ ᨡᩮᩣ ᨸᨬ᩠ᨧᩈᩥᨡᩮᩣ ᨣᨶ᩠ᨵᨻ᩠ᨻᨴᩮᩅᨸᩩᨲ᩠ᨲᩮᩣ ᨻᩮᩃᩩᩅᨸᨱ᩠ᨯᩩᩅᩦᨱᩴ [ᩅᩮᩊᩩᩅᨸᨱ᩠ᨯᩩᩅᩦᨱᩴ ᩌᨴᩣᨿ (ᩈ᩠ᨿᩣ.)] ᩋᩔᩣᩅᩮᩈᩥ, ᩍᨾᩣ ᨧ ᨣᩣᨳᩣ ᩋᨽᩣᩈᩥ ᨻᩩᨴ᩠ᨵᩪᨸᩈᨬ᩠ᩉᩥᨲᩣ ᨵᨾ᩠ᨾᩪᨸᩈᨬ᩠ᩉᩥᨲᩣ ᩈᨦ᩠ᨥᩪᨸᩈᨬ᩠ᩉᩥᨲᩣ ᩋᩁᩉᨶ᩠ᨲᩪᨸᩈᨬ᩠ᩉᩥᨲᩣ ᨠᩣᨾᩪᨸᩈᨬ᩠ᩉᩥᨲᩣ –

‘‘ᩅᨶ᩠ᨴᩮ ᨲᩮ ᨸᩥᨲᩁᩴ ᨽᨴ᩠ᨴᩮ, ᨲᩥᨾ᩠ᨻᩁᩩᩴ ᩈᩪᩁᩥᨿᩅᨧ᩠ᨨᩈᩮ;

ᨿᩮᨶ ᨩᩣᨲᩣᩈᩥ ᨠᩃ᩠ᨿᩣᨱᩦ, ᩌᨶᨶ᩠ᨴᨩᨶᨶᩦ ᨾᨾ.

‘‘ᩅᩣᨲᩮᩣᩅ ᩈᩮᨴᨲᩴ ᨠᨶ᩠ᨲᩮᩣ, ᨸᩣᨶᩦᨿᩴᩅ ᨸᩥᨸᩣᩈᨲᩮᩣ;

ᩋᨦ᩠ᨣᩦᩁᩈᩥ ᨸᩥᨿᩣᨾᩮᩈᩥ, ᨵᨾ᩠ᨾᩮᩣ ᩋᩁᩉᨲᩣᨾᩥᩅ.

‘‘ᩌᨲᩩᩁᩔᩮᩅ ᨽᩮᩈᨩ᩠ᨩᩴ, ᨽᩮᩣᨩᨶᩴᩅ ᨩᩥᨥᨧ᩠ᨨᨲᩮᩣ;

ᨸᩁᩥᨶᩥᨻ᩠ᨻᩣᨸᨿ ᨾᩴ ᨽᨴ᩠ᨴᩮ, ᨩᩃᨶ᩠ᨲᨾᩥᩅ ᩅᩣᩁᩥᨶᩣ.

‘‘ᩈᩦᨲᩮᩣᨴᨠᩴ ᨸᩮᩣᨠ᩠ᨡᩁᨱᩥᩴ, ᨿᩩᨲ᩠ᨲᩴ ᨠᩥᨬ᩠ᨩᨠ᩠ᨡᩁᩮᨱᩩᨶᩣ;

ᨶᩣᨣᩮᩣ ᨥᨾ᩠ᨾᩣᨽᩥᨲᨲ᩠ᨲᩮᩣᩅ, ᩒᨣᩣᩉᩮ ᨲᩮ ᨳᨶᩪᨴᩁᩴ.

‘‘ᩋᨧ᩠ᨧᨦ᩠ᨠᩩᩈᩮᩣᩅ ᨶᩣᨣᩮᩣᩅ, ᨩᩥᨲᩴ ᨾᩮ ᨲᩩᨲ᩠ᨲᨲᩮᩣᨾᩁᩴ;

ᨠᩣᩁᨱᩴ ᨶᨸ᩠ᨸᨩᩣᨶᩣᨾᩥ, ᩈᨾ᩠ᨾᨲ᩠ᨲᩮᩣ ᩃᨠ᩠ᨡᨱᩪᩁᩩᨿᩣ.

‘‘ᨲᨿᩥ ᨣᩮᨵᩥᨲᨧᩥᨲ᩠ᨲᩮᩣᩈ᩠ᨾᩥ, ᨧᩥᨲ᩠ᨲᩴ ᩅᩥᨸᩁᩥᨱᩣᨾᩥᨲᩴ;

ᨸᨭᩥᨣᨶ᩠ᨲᩩᩴ ᨶ ᩈᨠ᩠ᨠᩮᩣᨾᩥ, ᩅᨦ᩠ᨠᨥᩈ᩠ᨲᩮᩣᩅ ᩋᨾ᩠ᨻᩩᨩᩮᩣ.

‘‘ᩅᩣᨾᩪᩁᩩ ᩈᨩ ᨾᩴ ᨽᨴ᩠ᨴᩮ, ᩈᨩ ᨾᩴ ᨾᨶ᩠ᨴᩃᩮᩣᨧᨶᩮ;

ᨸᩃᩥᩔᨩ ᨾᩴ ᨠᩃ᩠ᨿᩣᨱᩥ, ᩑᨲᩴ ᨾᩮ ᩋᨽᩥᨸᨲ᩠ᨳᩥᨲᩴ.

‘‘ᩋᨸ᩠ᨸᨠᩮᩣ ᩅᨲ ᨾᩮ ᩈᨶ᩠ᨲᩮᩣ, ᨠᩣᨾᩮᩣ ᩅᩮᩃ᩠ᩃᩥᨲᨠᩮᩈᩥᨿᩣ;

ᩋᨶᩮᨠᨽᩣᩅᩮᩣ ᩈᨾᩩᨸ᩠ᨸᩣᨴᩥ, ᩋᩁᩉᨶ᩠ᨲᩮᩅ ᨴᨠ᩠ᨡᩥᨱᩣ.

‘‘ᨿᩴ ᨾᩮ ᩋᨲ᩠ᨳᩥ ᨠᨲᩴ ᨸᩩᨬ᩠ᨬᩴ, ᩋᩁᩉᨶ᩠ᨲᩮᩈᩩ ᨲᩣᨴᩥᩈᩩ;

ᨲᩴ ᨾᩮ ᩈᨻ᩠ᨻᨦ᩠ᨣᨠᩃ᩠ᨿᩣᨱᩥ, ᨲᨿᩣ ᩈᨴ᩠ᨵᩥᩴ ᩅᩥᨸᨧ᩠ᨧᨲᩴ.

‘‘ᨿᩴ ᨾᩮ ᩋᨲ᩠ᨳᩥ ᨠᨲᩴ ᨸᩩᨬ᩠ᨬᩴ, ᩋᩈ᩠ᨾᩥᩴ ᨸᨳᩅᩥᨾᨱ᩠ᨯᩃᩮ;

ᨲᩴ ᨾᩮ ᩈᨻ᩠ᨻᨦ᩠ᨣᨠᩃ᩠ᨿᩣᨱᩥ, ᨲᨿᩣ ᩈᨴ᩠ᨵᩥᩴ ᩅᩥᨸᨧ᩠ᨧᨲᩴ.

‘‘ᩈᨠ᩠ᨿᨸᩩᨲ᩠ᨲᩮᩣᩅ ᨫᩣᨶᩮᨶ, ᩑᨠᩮᩣᨴᩥ ᨶᩥᨸᨠᩮᩣ ᩈᨲᩮᩣ;

ᩋᨾᨲᩴ ᨾᩩᨶᩥ ᨩᩥᨣᩦᩈᩣᨶᩮᩣ [ᨩᩥᨣᩥᩴᩈᩣᨶᩮᩣ (ᩈᩦ. ᩈ᩠ᨿᩣ. ᨸᩦ.)], ᨲᨾᩉᩴ ᩈᩪᩁᩥᨿᩅᨧ᩠ᨨᩈᩮ.

‘‘ᨿᨳᩣᨸᩥ ᨾᩩᨶᩥ ᨶᨶ᩠ᨴᩮᨿ᩠ᨿ, ᨸᨲ᩠ᩅᩣ ᩈᨾ᩠ᨻᩮᩣᨵᩥᨾᩩᨲ᩠ᨲᨾᩴ;

ᩑᩅᩴ ᨶᨶ᩠ᨴᩮᨿ᩠ᨿᩴ ᨠᩃ᩠ᨿᩣᨱᩥ, ᨾᩥᩔᩦᨽᩣᩅᩴ ᨣᨲᩮᩣ ᨲᨿᩣ.

‘‘ᩈᨠ᩠ᨠᩮᩣ ᨧᩮ ᨾᩮ ᩅᩁᩴ ᨴᨩ᩠ᨩᩣ, ᨲᩣᩅᨲᩥᩴᩈᩣᨶᨾᩥᩔᩁᩮᩣ;

ᨲᩣᩉᩴ ᨽᨴ᩠ᨴᩮ ᩅᩁᩮᨿ᩠ᨿᩣᩉᩮ, ᩑᩅᩴ ᨠᩣᨾᩮᩣ ᨴᩊ᩠ᩉᩮᩣ ᨾᨾ.

‘‘ᩈᩣᩃᩴᩅ ᨶ ᨧᩥᩁᩴ ᨹᩩᩃ᩠ᩃᩴ, ᨸᩥᨲᩁᩴ ᨲᩮ ᩈᩩᨾᩮᨵᩈᩮ;

ᩅᨶ᩠ᨴᨾᩣᨶᩮᩣ ᨶᨾᩔᩣᨾᩥ, ᨿᩔᩣ ᩈᩮᨲᩣᨴᩥᩈᩦ ᨸᨩᩣ’’ᨲᩥ.

᪓᪔᪙. ᩑᩅᩴ ᩅᩩᨲ᩠ᨲᩮ ᨽᨣᩅᩣ ᨸᨬ᩠ᨧᩈᩥᨡᩴ ᨣᨶ᩠ᨵᨻ᩠ᨻᨴᩮᩅᨸᩩᨲ᩠ᨲᩴ ᩑᨲᨴᩅᩮᩣᨧ – ‘‘ᩈᩴᩈᨶ᩠ᨴᨲᩥ ᨡᩮᩣ ᨲᩮ, ᨸᨬ᩠ᨧᩈᩥᨡ, ᨲᨶ᩠ᨲᩥᩔᩁᩮᩣ ᨣᩦᨲᩔᩁᩮᨶ, ᨣᩦᨲᩔᩁᩮᩣ ᨧ ᨲᨶ᩠ᨲᩥᩔᩁᩮᨶ; ᨶ ᨧ ᨸᨶ [ᨶᩮᩅ ᨸᨶ (ᩈ᩠ᨿᩣ.)] ᨲᩮ ᨸᨬ᩠ᨧᩈᩥᨡ, ᨲᨶ᩠ᨲᩥᩔᩁᩮᩣ ᨣᩦᨲᩔᩁᩴ ᩋᨲᩥᩅᨲ᩠ᨲᨲᩥ, ᨣᩦᨲᩔᩁᩮᩣ ᨧ ᨲᨶ᩠ᨲᩥᩔᩁᩴ. ᨠᨴᩣ ᩈᩴᨿᩪᩊ᩠ᩉᩣ ᨸᨶ ᨲᩮ, ᨸᨬ᩠ᨧᩈᩥᨡ, ᩍᨾᩣ ᨣᩣᨳᩣ ᨻᩩᨴ᩠ᨵᩪᨸᩈᨬ᩠ᩉᩥᨲᩣ ᨵᨾ᩠ᨾᩪᨸᩈᨬ᩠ᩉᩥᨲᩣ ᩈᨦ᩠ᨥᩪᨸᩈᨬ᩠ᩉᩥᨲᩣ ᩋᩁᩉᨶ᩠ᨲᩪᨸᩈᨬ᩠ᩉᩥᨲᩣ ᨠᩣᨾᩪᨸᩈᨬ᩠ᩉᩥᨲᩣ’’ᨲᩥ? ‘‘ᩑᨠᨾᩥᨴᩴ, ᨽᨶ᩠ᨲᩮ, ᩈᨾᨿᩴ ᨽᨣᩅᩣ ᩏᩁᩩᩅᩮᩃᩣᨿᩴ ᩅᩥᩉᩁᨲᩥ ᨶᨩ᩠ᨩᩣ ᨶᩮᩁᨬ᩠ᨩᩁᩣᨿ ᨲᩦᩁᩮ ᩋᨩᨸᩣᩃᨶᩥᨣᩕᩮᩣᨵᩮ ᨸᨮᨾᩣᨽᩥᩈᨾ᩠ᨻᩩᨴ᩠ᨵᩮᩣ. ᨲᩮᨶ ᨡᩮᩣ ᨸᨶᩣᩉᩴ, ᨽᨶ᩠ᨲᩮ, ᩈᨾᨿᩮᨶ ᨽᨴ᩠ᨴᩣ ᨶᩣᨾ ᩈᩪᩁᩥᨿᩅᨧ᩠ᨨᩈᩣ ᨲᩥᨾ᩠ᨻᩁᩩᨶᩮᩣ ᨣᨶ᩠ᨵᨻ᩠ᨻᩁᨬ᩠ᨬᩮᩣ ᨵᩦᨲᩣ, ᨲᨾᨽᩥᨠᨦ᩠ᨡᩣᨾᩥ. ᩈᩣ ᨡᩮᩣ ᨸᨶ, ᨽᨶ᩠ᨲᩮ, ᨽᨣᩥᨶᩦ ᨸᩁᨠᩣᨾᩥᨶᩦ ᩉᩮᩣᨲᩥ; ᩈᩥᨡᨱ᩠ᨯᩦ ᨶᩣᨾ ᨾᩣᨲᩃᩥᩔ ᩈᨦ᩠ᨣᩣᩉᨠᩔ ᨸᩩᨲ᩠ᨲᩮᩣ, ᨲᨾᨽᩥᨠᨦ᩠ᨡᨲᩥ. ᨿᨲᩮᩣ ᨡᩮᩣ ᩋᩉᩴ, ᨽᨶ᩠ᨲᩮ, ᨲᩴ ᨽᨣᩥᨶᩥᩴ ᨶᩣᩃᨲ᩠ᨳᩴ ᨠᩮᨶᨧᩥ ᨸᩁᩥᨿᩣᨿᩮᨶ. ᩋᨳᩣᩉᩴ ᨻᩮᩃᩩᩅᨸᨱ᩠ᨯᩩᩅᩦᨱᩴ ᩌᨴᩣᨿ ᨿᩮᨶ ᨲᩥᨾ᩠ᨻᩁᩩᨶᩮᩣ ᨣᨶ᩠ᨵᨻ᩠ᨻᩁᨬ᩠ᨬᩮᩣ ᨶᩥᩅᩮᩈᨶᩴ ᨲᩮᨶᩩᨸᩈᨦ᩠ᨠᨾᩥᩴ; ᩏᨸᩈᨦ᩠ᨠᨾᩥᨲ᩠ᩅᩣ ᨻᩮᩃᩩᩅᨸᨱ᩠ᨯᩩᩅᩦᨱᩴ ᩋᩔᩣᩅᩮᩈᩥᩴ, ᩍᨾᩣ ᨧ ᨣᩣᨳᩣ ᩋᨽᩣᩈᩥᩴ ᨻᩩᨴ᩠ᨵᩪᨸᩈᨬ᩠ᩉᩥᨲᩣ ᨵᨾ᩠ᨾᩪᨸᩈᨬ᩠ᩉᩥᨲᩣ ᩈᨦ᩠ᨥᩪᨸᩈᨬ᩠ᩉᩥᨲᩣ ᩋᩁᩉᨶ᩠ᨲᩪᨸᩈᨬ᩠ᩉᩥᨲᩣ ᨠᩣᨾᩪᨸᩈᨬ᩠ᩉᩥᨲᩣ –

‘‘ᩅᨶ᩠ᨴᩮ ᨲᩮ ᨸᩥᨲᩁᩴ ᨽᨴ᩠ᨴᩮ, ᨲᩥᨾ᩠ᨻᩁᩩᩴ ᩈᩪᩁᩥᨿᩅᨧ᩠ᨨᩈᩮ;

ᨿᩮᨶ ᨩᩣᨲᩣᩈᩥ ᨠᩃ᩠ᨿᩣᨱᩦ, ᩌᨶᨶ᩠ᨴᨩᨶᨶᩦ ᨾᨾ. …ᨸᩮ…

ᩈᩣᩃᩴᩅ ᨶ ᨧᩥᩁᩴ ᨹᩩᩃ᩠ᩃᩴ, ᨸᩥᨲᩁᩴ ᨲᩮ ᩈᩩᨾᩮᨵᩈᩮ;

ᩅᨶ᩠ᨴᨾᩣᨶᩮᩣ ᨶᨾᩔᩣᨾᩥ, ᨿᩔᩣ ᩈᩮᨲᩣᨴᩥᩈᩦ ᨸᨩᩣ’’ᨲᩥ.

‘‘ᩑᩅᩴ ᩅᩩᨲ᩠ᨲᩮ, ᨽᨶ᩠ᨲᩮ, ᨽᨴ᩠ᨴᩣ ᩈᩪᩁᩥᨿᩅᨧ᩠ᨨᩈᩣ ᨾᩴ ᩑᨲᨴᩅᩮᩣᨧ – ‘ᨶ ᨡᩮᩣ ᨾᩮ, ᨾᩣᩁᩥᩈ, ᩈᩮᩣ ᨽᨣᩅᩣ ᩈᨾ᩠ᨾᩩᨡᩣ ᨴᩥᨭ᩠ᨮᩮᩣ ᩋᨸᩥ ᨧ ᩈᩩᨲᩮᩣᨿᩮᩅ ᨾᩮ ᩈᩮᩣ ᨽᨣᩅᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᩩᨵᨾ᩠ᨾᩣᨿᩴ ᩈᨽᩣᨿᩴ ᩏᨸᨶᨧ᩠ᨧᨶ᩠ᨲᩥᨿᩣ. ᨿᨲᩮᩣ ᨡᩮᩣ ᨲ᩠ᩅᩴ, ᨾᩣᩁᩥᩈ, ᨲᩴ ᨽᨣᩅᨶ᩠ᨲᩴ ᨠᩥᨲ᩠ᨲᩮᩈᩥ, ᩉᩮᩣᨲᩩ ᨶᩮᩣ ᩋᨩ᩠ᨩ ᩈᨾᩣᨣᨾᩮᩣ’ᨲᩥ. ᩈᩮᩣᨿᩮᩅ ᨶᩮᩣ, ᨽᨶ᩠ᨲᩮ, ᨲᩔᩣ ᨽᨣᩥᨶᩥᨿᩣ ᩈᨴ᩠ᨵᩥᩴ ᩈᨾᩣᨣᨾᩮᩣ ᩋᩉᩮᩣᩈᩥ. ᨶ ᨧ ᨴᩣᨶᩥ ᨲᨲᩮᩣ ᨸᨧ᩠ᨨᩣ’’ᨲᩥ.

ᩈᨠ᩠ᨠᩪᨸᩈᨦ᩠ᨠᨾ

᪓᪕᪐. ᩋᨳ ᨡᩮᩣ ᩈᨠ᩠ᨠᩔ ᨴᩮᩅᩣᨶᨾᩥᨶ᩠ᨴᩔ ᩑᨲᨴᩉᩮᩣᩈᩥ – ‘‘ᨸᨭᩥᩈᨾ᩠ᨾᩮᩣᨴᨲᩥ ᨸᨬ᩠ᨧᩈᩥᨡᩮᩣ ᨣᨶ᩠ᨵᨻ᩠ᨻᨴᩮᩅᨸᩩᨲ᩠ᨲᩮᩣ ᨽᨣᩅᨲᩣ, ᨽᨣᩅᩣ ᨧ ᨸᨬ᩠ᨧᩈᩥᨡᩮᨶᩣ’’ᨲᩥ. ᩋᨳ ᨡᩮᩣ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨸᨬ᩠ᨧᩈᩥᨡᩴ ᨣᨶ᩠ᨵᨻ᩠ᨻᨴᩮᩅᨸᩩᨲ᩠ᨲᩴ ᩌᨾᨶ᩠ᨲᩮᩈᩥ – ‘‘ᩋᨽᩥᩅᩣᨴᩮᩉᩥ ᨾᩮ ᨲ᩠ᩅᩴ, ᨲᩣᨲ ᨸᨬ᩠ᨧᩈᩥᨡ, ᨽᨣᩅᨶ᩠ᨲᩴ – ‘ᩈᨠ᩠ᨠᩮᩣ, ᨽᨶ᩠ᨲᩮ, ᨴᩮᩅᩣᨶᨾᩥᨶ᩠ᨴᩮᩣ ᩈᩣᨾᨧ᩠ᨧᩮᩣ ᩈᨸᩁᩥᨩᨶᩮᩣ ᨽᨣᩅᨲᩮᩣ ᨸᩣᨴᩮ ᩈᩥᩁᩈᩣ ᩅᨶ᩠ᨴᨲᩦ’ᨲᩥ’’. ‘‘ᩑᩅᩴ ᨽᨴ᩠ᨴᨶ᩠ᨲᩅᩣ’’ᨲᩥ ᨡᩮᩣ ᨸᨬ᩠ᨧᩈᩥᨡᩮᩣ ᨣᨶ᩠ᨵᨻ᩠ᨻᨴᩮᩅᨸᩩᨲ᩠ᨲᩮᩣ ᩈᨠ᩠ᨠᩔ ᨴᩮᩅᩣᨶᨾᩥᨶ᩠ᨴᩔ ᨸᨭᩥᩔᩩᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲᩥ – ‘‘ᩈᨠ᩠ᨠᩮᩣ, ᨽᨶ᩠ᨲᩮ, ᨴᩮᩅᩣᨶᨾᩥᨶ᩠ᨴᩮᩣ ᩈᩣᨾᨧ᩠ᨧᩮᩣ ᩈᨸᩁᩥᨩᨶᩮᩣ ᨽᨣᩅᨲᩮᩣ ᨸᩣᨴᩮ ᩈᩥᩁᩈᩣ ᩅᨶ᩠ᨴᨲᩦ’’ᨲᩥ. ‘‘ᩑᩅᩴ ᩈᩩᨡᩦ ᩉᩮᩣᨲᩩ, ᨸᨬ᩠ᨧᩈᩥᨡ, ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᩈᩣᨾᨧ᩠ᨧᩮᩣ ᩈᨸᩁᩥᨩᨶᩮᩣ; ᩈᩩᨡᨠᩣᨾᩣ ᩉᩥ ᨴᩮᩅᩣ ᨾᨶᩩᩔᩣ ᩋᩈᩩᩁᩣ ᨶᩣᨣᩣ ᨣᨶ᩠ᨵᨻ᩠ᨻᩣ ᨿᩮ ᨧᨬ᩠ᨬᩮ ᩈᨶ᩠ᨲᩥ ᨸᩩᨳᩩᨠᩣᨿᩣ’’ᨲᩥ.

᪓᪕᪑. ᩑᩅᨬ᩠ᨧ ᨸᨶ ᨲᨳᩣᨣᨲᩣ ᩑᩅᩁᩪᨸᩮ ᨾᩉᩮᩈᨠ᩠ᨡᩮ ᨿᨠ᩠ᨡᩮ ᩋᨽᩥᩅᨴᨶ᩠ᨲᩥ. ᩋᨽᩥᩅᨴᩥᨲᩮᩣ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨽᨣᩅᨲᩮᩣ ᩍᨶ᩠ᨴᩈᩣᩃᨣᩩᩉᩴ ᨸᩅᩥᩈᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩣᩈᩥ. ᨴᩮᩅᩣᨸᩥ ᨲᩣᩅᨲᩥᩴᩈᩣ ᩍᨶ᩠ᨴᩈᩣᩃᨣᩩᩉᩴ ᨸᩅᩥᩈᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩴᩈᩩ. ᨸᨬ᩠ᨧᩈᩥᨡᩮᩣᨸᩥ ᨣᨶ᩠ᨵᨻ᩠ᨻᨴᩮᩅᨸᩩᨲ᩠ᨲᩮᩣ ᩍᨶ᩠ᨴᩈᩣᩃᨣᩩᩉᩴ ᨸᩅᩥᩈᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩣᩈᩥ.

ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩍᨶ᩠ᨴᩈᩣᩃᨣᩩᩉᩣ ᩅᩥᩈᨾᩣ ᩈᨶ᩠ᨲᩦ ᩈᨾᩣ ᩈᨾᨸᩣᨴᩥ, ᩈᨾ᩠ᨻᩣᨵᩣ ᩈᨶ᩠ᨲᩦ ᩏᩁᩩᨶ᩠ᨴᩣ [ᩏᩁᩩᨴ᩠ᨴᩣ (ᨠ.)] ᩈᨾᨸᩣᨴᩥ, ᩋᨶ᩠ᨵᨠᩣᩁᩮᩣ ᨣᩩᩉᩣᨿᩴ ᩋᨶ᩠ᨲᩁᨵᩣᨿᩥ, ᩌᩃᩮᩣᨠᩮᩣ ᩏᨴᨸᩣᨴᩥ ᨿᨳᩣ ᨲᩴ ᨴᩮᩅᩣᨶᩴ ᨴᩮᩅᩣᨶᩩᨽᩣᩅᩮᨶ.

᪓᪕᪒. ᩋᨳ ᨡᩮᩣ ᨽᨣᩅᩣ ᩈᨠ᩠ᨠᩴ ᨴᩮᩅᩣᨶᨾᩥᨶ᩠ᨴᩴ ᩑᨲᨴᩅᩮᩣᨧ – ‘‘ᩋᨧ᩠ᨨᩁᩥᨿᨾᩥᨴᩴ ᩌᨿᩈ᩠ᨾᨲᩮᩣ ᨠᩮᩣᩈᩥᨿᩔ, ᩋᨻ᩠ᨽᩩᨲᨾᩥᨴᩴ ᩌᨿᩈ᩠ᨾᨲᩮᩣ ᨠᩮᩣᩈᩥᨿᩔ ᨲᩣᩅ ᨻᩉᩩᨠᩥᨧ᩠ᨧᩔ ᨻᩉᩩᨠᩁᨱᩦᨿᩔ ᨿᨴᩥᨴᩴ ᩍᨵᩣᨣᨾᨶ’’ᨶ᩠ᨲᩥ. ‘‘ᨧᩥᩁᨸᨭᩥᨠᩣᩉᩴ, ᨽᨶ᩠ᨲᩮ, ᨽᨣᩅᨶ᩠ᨲᩴ ᨴᩔᨶᩣᨿ ᩏᨸᩈᨦ᩠ᨠᨾᩥᨲᩩᨠᩣᨾᩮᩣ; ᩋᨸᩥ ᨧ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᨠᩮᩉᩥᨧᩥ ᨠᩮᩉᩥᨧᩥ [ᨠᩮᩉᩥᨧᩥ (ᩈ᩠ᨿᩣ.)] ᨠᩥᨧ᩠ᨧᨠᩁᨱᩦᨿᩮᩉᩥ ᨻ᩠ᨿᩣᩅᨭᩮᩣ; ᩑᩅᩣᩉᩴ ᨶᩣᩈᨠ᩠ᨡᩥᩴ ᨽᨣᩅᨶ᩠ᨲᩴ ᨴᩔᨶᩣᨿ ᩏᨸᩈᨦ᩠ᨠᨾᩥᨲᩩᩴ. ᩑᨠᨾᩥᨴᩴ, ᨽᨶ᩠ᨲᩮ, ᩈᨾᨿᩴ ᨽᨣᩅᩣ ᩈᩣᩅᨲ᩠ᨳᩥᨿᩴ ᩅᩥᩉᩁᨲᩥ ᩈᩃᩊᩣᨣᩣᩁᨠᩮ. ᩋᨳ ᨡ᩠ᩅᩣᩉᩴ, ᨽᨶ᩠ᨲᩮ, ᩈᩣᩅᨲ᩠ᨳᩥᩴ ᩋᨣᨾᩣᩈᩥᩴ ᨽᨣᩅᨶ᩠ᨲᩴ ᨴᩔᨶᩣᨿ. ᨲᩮᨶ ᨡᩮᩣ ᨸᨶ, ᨽᨶ᩠ᨲᩮ, ᩈᨾᨿᩮᨶ ᨽᨣᩅᩣ ᩋᨬ᩠ᨬᨲᩁᩮᨶ ᩈᨾᩣᨵᩥᨶᩣ ᨶᩥᩈᩥᨶ᩠ᨶᩮᩣ ᩉᩮᩣᨲᩥ, ᨽᩪᨩᨲᩥ [ᨽᩩᨬ᩠ᨩᨲᩦ ᨧ (ᩈᩦ. ᨸᩦ.), ᨽᩩᨩᨣᩦ (ᩈ᩠ᨿᩣ.)] ᨧ ᨶᩣᨾ ᩅᩮᩔᩅᨱᩔ ᨾᩉᩣᩁᩣᨩᩔ ᨸᩁᩥᨧᩣᩁᩥᨠᩣ ᨽᨣᩅᨶ᩠ᨲᩴ ᨸᨧ᩠ᨧᩩᨸᨭ᩠ᨮᩥᨲᩣ ᩉᩮᩣᨲᩥ, ᨸᨬ᩠ᨩᩃᩥᨠᩣ ᨶᨾᩔᨾᩣᨶᩣ ᨲᩥᨭ᩠ᨮᨲᩥ. ᩋᨳ ᨡ᩠ᩅᩣᩉᩴ, ᨽᨶ᩠ᨲᩮ, ᨽᩪᨩᨲᩥᩴ ᩑᨲᨴᩅᩮᩣᨧᩴ – ‘ᩋᨽᩥᩅᩣᨴᩮᩉᩥ ᨾᩮ ᨲ᩠ᩅᩴ, ᨽᨣᩥᨶᩥ, ᨽᨣᩅᨶ᩠ᨲᩴ – ‘‘ᩈᨠ᩠ᨠᩮᩣ, ᨽᨶ᩠ᨲᩮ, ᨴᩮᩅᩣᨶᨾᩥᨶ᩠ᨴᩮᩣ ᩈᩣᨾᨧ᩠ᨧᩮᩣ ᩈᨸᩁᩥᨩᨶᩮᩣ ᨽᨣᩅᨲᩮᩣ ᨸᩣᨴᩮ ᩈᩥᩁᩈᩣ ᩅᨶ᩠ᨴᨲᩦ’’ᨲᩥ. ᩑᩅᩴ ᩅᩩᨲ᩠ᨲᩮ, ᨽᨶ᩠ᨲᩮ, ᩈᩣ ᨽᩪᨩᨲᩥ ᨾᩴ ᩑᨲᨴᩅᩮᩣᨧ – ‘ᩋᨠᩣᩃᩮᩣ ᨡᩮᩣ, ᨾᩣᩁᩥᩈ, ᨽᨣᩅᨶ᩠ᨲᩴ ᨴᩔᨶᩣᨿ; ᨸᨭᩥᩈᩃ᩠ᩃᩦᨶᩮᩣ ᨽᨣᩅᩣ’ᨲᩥ. ‘ᨲᩮᨶ ᩉᩦ, ᨽᨣᩥᨶᩥ, ᨿᨴᩣ ᨽᨣᩅᩣ ᨲᨾ᩠ᩉᩣ ᩈᨾᩣᨵᩥᨾ᩠ᩉᩣ ᩅᩩᨭ᩠ᨮᩥᨲᩮᩣ ᩉᩮᩣᨲᩥ, ᩋᨳ ᨾᨾ ᩅᨧᨶᩮᨶ ᨽᨣᩅᨶ᩠ᨲᩴ ᩋᨽᩥᩅᩣᨴᩮᩉᩥ – ‘‘ᩈᨠ᩠ᨠᩮᩣ, ᨽᨶ᩠ᨲᩮ, ᨴᩮᩅᩣᨶᨾᩥᨶ᩠ᨴᩮᩣ ᩈᩣᨾᨧ᩠ᨧᩮᩣ ᩈᨸᩁᩥᨩᨶᩮᩣ ᨽᨣᩅᨲᩮᩣ ᨸᩣᨴᩮ ᩈᩥᩁᩈᩣ ᩅᨶ᩠ᨴᨲᩦ’’ᨲᩥ. ᨠᨧ᩠ᨧᩥ ᨾᩮ ᩈᩣ, ᨽᨶ᩠ᨲᩮ, ᨽᨣᩥᨶᩦ ᨽᨣᩅᨶ᩠ᨲᩴ ᩋᨽᩥᩅᩣᨴᩮᩈᩥ? ᩈᩁᨲᩥ ᨽᨣᩅᩣ ᨲᩔᩣ ᨽᨣᩥᨶᩥᨿᩣ ᩅᨧᨶ’’ᨶ᩠ᨲᩥ? ‘‘ᩋᨽᩥᩅᩣᨴᩮᩈᩥ ᨾᩴ ᩈᩣ, ᨴᩮᩅᩣᨶᨾᩥᨶ᩠ᨴ, ᨽᨣᩥᨶᩦ, ᩈᩁᩣᨾᩉᩴ ᨲᩔᩣ ᨽᨣᩥᨶᩥᨿᩣ ᩅᨧᨶᩴ. ᩋᨸᩥ ᨧᩣᩉᩴ ᩌᨿᩈ᩠ᨾᨲᩮᩣ ᨶᩮᨾᩥᩈᨴ᩠ᨴᩮᨶ [ᨧᨠ᩠ᨠᨶᩮᨾᩥᩈᨴ᩠ᨴᩮᨶ (ᩈ᩠ᨿᩣ.)] ᨲᨾ᩠ᩉᩣ ᩈᨾᩣᨵᩥᨾ᩠ᩉᩣ ᩅᩩᨭ᩠ᨮᩥᨲᩮᩣ’’ᨲᩥ. ‘‘ᨿᩮ ᨲᩮ, ᨽᨶ᩠ᨲᩮ, ᨴᩮᩅᩣ ᩋᨾ᩠ᩉᩮᩉᩥ ᨸᨮᨾᨲᩁᩴ ᨲᩣᩅᨲᩥᩴᩈᨠᩣᨿᩴ ᩏᨸᨸᨶ᩠ᨶᩣ, ᨲᩮᩈᩴ ᨾᩮ ᩈᨾ᩠ᨾᩩᨡᩣ ᩈᩩᨲᩴ ᩈᨾ᩠ᨾᩩᨡᩣ ᨸᨭᩥᨣ᩠ᨣᩉᩥᨲᩴ – ‘ᨿᨴᩣ ᨲᨳᩣᨣᨲᩣ ᩃᩮᩣᨠᩮ ᩏᨸ᩠ᨸᨩ᩠ᨩᨶ᩠ᨲᩥ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᨴᩥᨻ᩠ᨻᩣ ᨠᩣᨿᩣ ᨸᩁᩥᨸᩪᩁᩮᨶ᩠ᨲᩥ, ᩉᩣᨿᨶ᩠ᨲᩥ ᩋᩈᩩᩁᨠᩣᨿᩣ’ᨲᩥ. ᨲᩴ ᨾᩮ ᩍᨴᩴ, ᨽᨶ᩠ᨲᩮ, ᩈᨠ᩠ᨡᩥᨴᩥᨭ᩠ᨮᩴ ᨿᨲᩮᩣ ᨲᨳᩣᨣᨲᩮᩣ ᩃᩮᩣᨠᩮ ᩏᨸ᩠ᨸᨶ᩠ᨶᩮᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨴᩥᨻ᩠ᨻᩣ ᨠᩣᨿᩣ ᨸᩁᩥᨸᩪᩁᩮᨶ᩠ᨲᩥ, ᩉᩣᨿᨶ᩠ᨲᩥ ᩋᩈᩩᩁᨠᩣᨿᩣᨲᩥ.

ᨣᩮᩣᨸᨠᩅᨲ᩠ᨳᩩ

᪓᪕᪓. ‘‘ᩍᨵᩮᩅ, ᨽᨶ᩠ᨲᩮ, ᨠᨸᩥᩃᩅᨲ᩠ᨳᩩᩈ᩠ᨾᩥᩴ ᨣᩮᩣᨸᩥᨠᩣ ᨶᩣᨾ ᩈᨠ᩠ᨿᨵᩦᨲᩣ ᩋᩉᩮᩣᩈᩥ ᨻᩩᨴ᩠ᨵᩮ ᨸᩈᨶ᩠ᨶᩣ ᨵᨾ᩠ᨾᩮ ᨸᩈᨶ᩠ᨶᩣ ᩈᨦ᩠ᨥᩮ ᨸᩈᨶ᩠ᨶᩣ ᩈᩦᩃᩮᩈᩩ ᨸᩁᩥᨸᩪᩁᨠᩣᩁᩥᨶᩦ. ᩈᩣ ᩍᨲ᩠ᨳᩥᨲ᩠ᨲᩴ [ᩍᨲ᩠ᨳᩥᨧᩥᨲ᩠ᨲᩴ (ᩈ᩠ᨿᩣ.)] ᩅᩥᩁᩣᨩᩮᨲ᩠ᩅᩣ ᨸᩩᩁᩥᩈᨲ᩠ᨲᩴ [ᨸᩩᩁᩥᩈᨧᩥᨲ᩠ᨲᩴ (ᩈ᩠ᨿᩣ.)] ᨽᩣᩅᩮᨲ᩠ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨶ᩠ᨶᩣ. ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᩉᨻ᩠ᨿᨲᩴ ᩋᨾ᩠ᩉᩣᨠᩴ ᨸᩩᨲ᩠ᨲᨲ᩠ᨲᩴ ᩋᨩ᩠ᨫᩩᨸᨣᨲᩣ. ᨲᨲᩕᨸᩥ ᨶᩴ ᩑᩅᩴ ᨩᩣᨶᨶ᩠ᨲᩥ – ‘ᨣᩮᩣᨸᨠᩮᩣ ᨴᩮᩅᨸᩩᨲ᩠ᨲᩮᩣ, ᨣᩮᩣᨸᨠᩮᩣ ᨴᩮᩅᨸᩩᨲ᩠ᨲᩮᩣ’ᨲᩥ. ᩋᨬ᩠ᨬᩮᨸᩥ, ᨽᨶ᩠ᨲᩮ, ᨲᨿᩮᩣ ᨽᩥᨠ᩠ᨡᩪ ᨽᨣᩅᨲᩥ ᨻᩕᩉ᩠ᨾᨧᩁᩥᨿᩴ ᨧᩁᩥᨲ᩠ᩅᩣ ᩉᩦᨶᩴ ᨣᨶ᩠ᨵᨻ᩠ᨻᨠᩣᨿᩴ ᩏᨸᨸᨶ᩠ᨶᩣ. ᨲᩮ ᨸᨬ᩠ᨧᩉᩥ ᨠᩣᨾᨣᩩᨱᩮᩉᩥ ᩈᨾᨸ᩠ᨸᩥᨲᩣ ᩈᨾᨦ᩠ᨣᩦᨽᩪᨲᩣ ᨸᩁᩥᨧᩣᩁᨿᨾᩣᨶᩣ ᩋᨾ᩠ᩉᩣᨠᩴ ᩏᨸᨭ᩠ᨮᩣᨶᩴ ᩌᨣᨧ᩠ᨨᨶ᩠ᨲᩥ ᩋᨾ᩠ᩉᩣᨠᩴ ᨸᩣᩁᩥᨧᩁᩥᨿᩴ. ᨲᩮ ᩋᨾ᩠ᩉᩣᨠᩴ ᩏᨸᨭ᩠ᨮᩣᨶᩴ ᩌᨣᨲᩮ ᩋᨾ᩠ᩉᩣᨠᩴ ᨸᩣᩁᩥᨧᩁᩥᨿᩴ ᨣᩮᩣᨸᨠᩮᩣ ᨴᩮᩅᨸᩩᨲ᩠ᨲᩮᩣ ᨸᨭᩥᨧᩮᩣᨴᩮᩈᩥ – ‘ᨠᩩᨲᩮᩣᨾᩩᨡᩣ ᨶᩣᨾ ᨲᩩᨾ᩠ᩉᩮ, ᨾᩣᩁᩥᩈᩣ, ᨲᩔ ᨽᨣᩅᨲᩮᩣ ᨵᨾ᩠ᨾᩴ ᩋᩔᩩᨲ᩠ᨳ [ᩌᨿᩩᩉᩥᨲ᩠ᨳ (ᩈ᩠ᨿᩣ.)] – ᩋᩉᨬ᩠ᩉᩥ ᨶᩣᨾ ᩍᨲ᩠ᨳᩥᨠᩣ ᩈᨾᩣᨶᩣ ᨻᩩᨴ᩠ᨵᩮ ᨸᩈᨶ᩠ᨶᩣ ᨵᨾ᩠ᨾᩮ ᨸᩈᨶ᩠ᨶᩣ ᩈᨦ᩠ᨥᩮ ᨸᩈᨶ᩠ᨶᩣ ᩈᩦᩃᩮᩈᩩ ᨸᩁᩥᨸᩪᩁᨠᩣᩁᩥᨶᩦ ᩍᨲ᩠ᨳᩥᨲ᩠ᨲᩴ ᩅᩥᩁᩣᨩᩮᨲ᩠ᩅᩣ ᨸᩩᩁᩥᩈᨲ᩠ᨲᩴ ᨽᩣᩅᩮᨲ᩠ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨶ᩠ᨶᩣ, ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᩉᨻ᩠ᨿᨲᩴ ᩈᨠ᩠ᨠᩔ ᨴᩮᩅᩣᨶᨾᩥᨶ᩠ᨴᩔ ᨸᩩᨲ᩠ᨲᨲ᩠ᨲᩴ ᩋᨩ᩠ᨫᩩᨸᨣᨲᩣ. ᩍᨵᩣᨸᩥ ᨾᩴ ᩑᩅᩴ ᨩᩣᨶᨶ᩠ᨲᩥ ‘‘ᨣᩮᩣᨸᨠᩮᩣ ᨴᩮᩅᨸᩩᨲ᩠ᨲᩮᩣ ᨣᩮᩣᨸᨠᩮᩣ ᨴᩮᩅᨸᩩᨲ᩠ᨲᩮᩣ’ᨲᩥ. ᨲᩩᨾ᩠ᩉᩮ ᨸᨶ, ᨾᩣᩁᩥᩈᩣ, ᨽᨣᩅᨲᩥ ᨻᩕᩉ᩠ᨾᨧᩁᩥᨿᩴ ᨧᩁᩥᨲ᩠ᩅᩣ ᩉᩦᨶᩴ ᨣᨶ᩠ᨵᨻ᩠ᨻᨠᩣᨿᩴ ᩏᨸᨸᨶ᩠ᨶᩣ. ᨴᩩᨴ᩠ᨴᩥᨭ᩠ᨮᩁᩪᨸᩴ ᩅᨲ, ᨽᩮᩣ, ᩋᨴ᩠ᨴᩈᩣᨾ, ᨿᩮ ᨾᨿᩴ ᩋᨴ᩠ᨴᩈᩣᨾ ᩈᩉᨵᨾ᩠ᨾᩥᨠᩮ ᩉᩦᨶᩴ ᨣᨶ᩠ᨵᨻ᩠ᨻᨠᩣᨿᩴ ᩏᨸᨸᨶ᩠ᨶᩮ’ᨲᩥ. ᨲᩮᩈᩴ, ᨽᨶ᩠ᨲᩮ, ᨣᩮᩣᨸᨠᩮᨶ ᨴᩮᩅᨸᩩᨲ᩠ᨲᩮᨶ ᨸᨭᩥᨧᩮᩣᨴᩥᨲᩣᨶᩴ ᨴ᩠ᩅᩮ ᨴᩮᩅᩣ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨲᩥᩴ ᨸᨭᩥᩃᨽᩥᩴᩈᩩ ᨠᩣᨿᩴ ᨻᩕᩉ᩠ᨾᨸᩩᩁᩮᩣᩉᩥᨲᩴ, ᩑᨠᩮᩣ ᨸᨶ ᨴᩮᩅᩮᩣ ᨠᩣᨾᩮ ᩋᨩ᩠ᨫᩣᩅᩈᩥ.

᪓᪕᪔. ‘‘‘ᩏᨸᩣᩈᩥᨠᩣ ᨧᨠ᩠ᨡᩩᨾᨲᩮᩣ ᩋᩉᩮᩣᩈᩥᩴ,

ᨶᩣᨾᨾ᩠ᨸᩥ ᨾᨿ᩠ᩉᩴ ᩋᩉᩩ ‘ᨣᩮᩣᨸᩥᨠᩣ’ᨲᩥ;

ᨻᩩᨴ᩠ᨵᩮ ᨧ ᨵᨾ᩠ᨾᩮ ᨧ ᩋᨽᩥᨸ᩠ᨸᩈᨶ᩠ᨶᩣ,

ᩈᨦ᩠ᨥᨬ᩠ᨧᩩᨸᨭ᩠ᨮᩣᩈᩥᩴ ᨸᩈᨶ᩠ᨶᨧᩥᨲ᩠ᨲᩣ.

‘‘‘ᨲᩔᩮᩅ ᨻᩩᨴ᩠ᨵᩔ ᩈᩩᨵᨾ᩠ᨾᨲᩣᨿ,

ᩈᨠ᩠ᨠᩔ ᨸᩩᨲ᩠ᨲᩮᩣᨾ᩠ᩉᩥ ᨾᩉᩣᨶᩩᨽᩣᩅᩮᩣ;

ᨾᩉᩣᨩᩩᨲᩦᨠᩮᩣ ᨲᩥᨴᩥᩅᩪᨸᨸᨶ᩠ᨶᩮᩣ,

ᨩᩣᨶᨶ᩠ᨲᩥ ᨾᩴ ᩍᨵᩣᨸᩥ ‘ᨣᩮᩣᨸᨠᩮᩣ’ᨲᩥ.

‘‘‘ᩋᨳᨴ᩠ᨴᩈᩴ ᨽᩥᨠ᩠ᨡᩅᩮᩣ ᨴᩥᨭ᩠ᨮᨸᩩᨻ᩠ᨻᩮ,

ᨣᨶ᩠ᨵᨻ᩠ᨻᨠᩣᨿᩪᨸᨣᨲᩮ ᩅᩈᩦᨶᩮ;

ᩍᨾᩮᩉᩥ ᨲᩮ ᨣᩮᩣᨲᨾᩈᩣᩅᨠᩣᩈᩮ,

ᨿᩮ ᨧ ᨾᨿᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩣ.

‘‘‘ᩋᨶ᩠ᨶᩮᨶ ᨸᩣᨶᩮᨶ ᩏᨸᨭ᩠ᨮᩉᩥᨾ᩠ᩉᩣ,

ᨸᩣᨴᩪᨸᩈᨦ᩠ᨣᨿ᩠ᩉ ᩈᨠᩮ ᨶᩥᩅᩮᩈᨶᩮ;

ᨠᩩᨲᩮᩣᨾᩩᨡᩣ ᨶᩣᨾ ᩍᨾᩮ ᨽᩅᨶ᩠ᨲᩮᩣ,

ᨻᩩᨴ᩠ᨵᩔ ᨵᨾ᩠ᨾᩣᨶᩥ ᨸᨭᩥᨣ᩠ᨣᩉᩮᩈᩩᩴ [ᨻᩩᨴ᩠ᨵᩔ ᨵᨾ᩠ᨾᩴ ᨶ ᨸᨭᩥᨣ᩠ᨣᩉᩮᩈᩩᩴ (ᩈ᩠ᨿᩣ.)].

‘‘‘ᨸᨧ᩠ᨧᨲ᩠ᨲᩴ ᩅᩮᨴᩥᨲᨻ᩠ᨻᩮᩣ ᩉᩥ ᨵᨾ᩠ᨾᩮᩣ,

ᩈᩩᨴᩮᩈᩥᨲᩮᩣ ᨧᨠ᩠ᨡᩩᨾᨲᩣᨶᩩᨻᩩᨴ᩠ᨵᩮᩣ;

ᩋᩉᨬ᩠ᩉᩥ ᨲᩩᨾ᩠ᩉᩮᩅ ᩏᨸᩣᩈᨾᩣᨶᩮᩣ,

ᩈᩩᨲ᩠ᩅᩣᨶ ᩋᩁᩥᨿᩣᨶ ᩈᩩᨽᩣᩈᩥᨲᩣᨶᩥ.

‘‘‘ᩈᨠ᩠ᨠᩔ ᨸᩩᨲ᩠ᨲᩮᩣᨾ᩠ᩉᩥ ᨾᩉᩣᨶᩩᨽᩣᩅᩮᩣ,

ᨾᩉᩣᨩᩩᨲᩦᨠᩮᩣ ᨲᩥᨴᩥᩅᩪᨸᨸᨶ᩠ᨶᩮᩣ;

ᨲᩩᨾ᩠ᩉᩮ ᨸᨶ ᩈᩮᨭ᩠ᨮᨾᩩᨸᩣᩈᨾᩣᨶᩣ,

ᩋᨶᩩᨲ᩠ᨲᩁᩴ ᨻᩕᩉ᩠ᨾᨧᩁᩥᨿᩴ ᨧᩁᩥᨲ᩠ᩅᩣ.

‘‘‘ᩉᩦᨶᩴ ᨠᩣᨿᩴ ᩏᨸᨸᨶ᩠ᨶᩣ ᨽᩅᨶ᩠ᨲᩮᩣ,

ᩋᨶᩣᨶᩩᩃᩮᩣᨾᩣ ᨽᩅᨲᩪᨸᨸᨲ᩠ᨲᩥ;

ᨴᩩᨴ᩠ᨴᩥᨭ᩠ᨮᩁᩪᨸᩴ ᩅᨲ ᩋᨴ᩠ᨴᩈᩣᨾ,

ᩈᩉᨵᨾ᩠ᨾᩥᨠᩮ ᩉᩦᨶᨠᩣᨿᩪᨸᨸᨶ᩠ᨶᩮ.

‘‘‘ᨣᨶ᩠ᨵᨻ᩠ᨻᨠᩣᨿᩪᨸᨣᨲᩣ ᨽᩅᨶ᩠ᨲᩮᩣ,

ᨴᩮᩅᩣᨶᨾᩣᨣᨧ᩠ᨨᨳ ᨸᩣᩁᩥᨧᩁᩥᨿᩴ;

ᩋᨣᩣᩁᩮ ᩅᩈᨲᩮᩣ ᨾᨿ᩠ᩉᩴ,

ᩍᨾᩴ ᨸᩔ ᩅᩥᩈᩮᩈᨲᩴ.

‘‘‘ᩍᨲ᩠ᨳᩦ ᩉᩩᨲ᩠ᩅᩣ ᩈ᩠ᩅᨩ᩠ᨩ ᨸᩩᨾᩮᩣᨾ᩠ᩉᩥ ᨴᩮᩅᩮᩣ,

ᨴᩥᨻ᩠ᨻᩮᩉᩥ ᨠᩣᨾᩮᩉᩥ ᩈᨾᨦ᩠ᨣᩥᨽᩪᨲᩮᩣ’;

ᨲᩮ ᨧᩮᩣᨴᩥᨲᩣ ᨣᩮᩣᨲᨾᩈᩣᩅᨠᩮᨶ,

ᩈᩴᩅᩮᨣᨾᩣᨸᩣᨴᩩ ᩈᨾᩮᨧ᩠ᨧ ᨣᩮᩣᨸᨠᩴ.

‘‘‘ᩉᨶ᩠ᨴ ᩅᩥᨿᩣᨿᩣᨾ [ᩅᩥᨣᩣᨿᩣᨾ (ᩈ᩠ᨿᩣ.), ᩅᩥᨲᩣᨿᩣᨾ (ᨸᩦ.)] ᨻ᩠ᨿᩣᨿᩣᨾ [ᩅᩥᨿᩣᨿᨾᩣᨾ (ᩈᩦ. ᨸᩦ.)],

ᨾᩣ ᨶᩮᩣ ᨾᨿᩴ ᨸᩁᨸᩮᩔᩣ ᩋᩉᩩᨾ᩠ᩉᩣ’;

ᨲᩮᩈᩴ ᨴᩩᩅᩮ ᩅᩦᩁᩥᨿᨾᩣᩁᨽᩥᩴᩈᩩ,

ᩋᨶᩩᩔᩁᩴ ᨣᩮᩣᨲᨾᩈᩣᩈᨶᩣᨶᩥ.

‘‘ᩍᨵᩮᩅ ᨧᩥᨲ᩠ᨲᩣᨶᩥ ᩅᩥᩁᩣᨩᨿᩥᨲ᩠ᩅᩣ,

ᨠᩣᨾᩮᩈᩩ ᩌᨴᩦᨶᩅᨾᨴ᩠ᨴᩈᩴᩈᩩ;

ᨲᩮ ᨠᩣᨾᩈᩴᨿᩮᩣᨩᨶᨻᨶ᩠ᨵᨶᩣᨶᩥ,

ᨸᩣᨸᩥᨾᨿᩮᩣᨣᩣᨶᩥ ᨴᩩᩁᨧ᩠ᨧᨿᩣᨶᩥ.

‘‘ᨶᩣᨣᩮᩣᩅ ᩈᨶ᩠ᨶᩣᨶᩥ ᨣᩩᨱᩣᨶᩥ [ᩈᨶ᩠ᨴᩣᨶᨣᩩᨱᩣᨶᩥ (ᩈᩦ. ᨸᩦ.), ᩈᨶ᩠ᨲᩣᨶᩥ ᨣᩩᨱᩣᨶᩥ (ᩈ᩠ᨿᩣ.)] ᨨᩮᨲ᩠ᩅᩣ,

ᨴᩮᩅᩮ ᨲᩣᩅᨲᩥᩴᩈᩮ ᩋᨲᩥᨠ᩠ᨠᨾᩥᩴᩈᩩ;

ᩈᩍᨶ᩠ᨴᩣ ᨴᩮᩅᩣ ᩈᨸᨩᩣᨸᨲᩥᨠᩣ,

ᩈᨻ᩠ᨻᩮ ᩈᩩᨵᨾ᩠ᨾᩣᨿ ᩈᨽᩣᨿᩩᨸᩅᩥᨭ᩠ᨮᩣ.

‘‘ᨲᩮᩈᩴ ᨶᩥᩈᩥᨶ᩠ᨶᩣᨶᩴ ᩋᨽᩥᨠ᩠ᨠᨾᩥᩴᩈᩩ,

ᩅᩦᩁᩣ ᩅᩥᩁᩣᨣᩣ ᩅᩥᩁᨩᩴ ᨠᩁᩮᩣᨶ᩠ᨲᩣ;

ᨲᩮ ᨴᩥᩈ᩠ᩅᩣ ᩈᩴᩅᩮᨣᨾᨠᩣᩈᩥ ᩅᩣᩈᩅᩮᩣ,

ᨴᩮᩅᩣᨽᩥᨽᩪ ᨴᩮᩅᨣᨱᩔ ᨾᨩ᩠ᨫᩮ.

‘‘‘ᩍᨾᩮᩉᩥ ᨲᩮ ᩉᩦᨶᨠᩣᨿᩪᨸᨸᨶ᩠ᨶᩣ,

ᨴᩮᩅᩮ ᨲᩣᩅᨲᩥᩴᩈᩮ ᩋᨽᩥᨠ᩠ᨠᨾᨶ᩠ᨲᩥ’;

ᩈᩴᩅᩮᨣᨩᩣᨲᩔ ᩅᨧᩮᩣ ᨶᩥᩈᨾ᩠ᨾ,

ᩈᩮᩣ ᨣᩮᩣᨸᨠᩮᩣ ᩅᩣᩈᩅᨾᨩ᩠ᨫᨽᩣᩈᩥ.

‘‘‘ᨻᩩᨴ᩠ᨵᩮᩣ ᨩᨶᩥᨶ᩠ᨴᨲ᩠ᨳᩥ ᨾᨶᩩᩔᩃᩮᩣᨠᩮ,

ᨠᩣᨾᩣᨽᩥᨽᩪ ᩈᨠ᩠ᨿᨾᩩᨶᩦᨲᩥ ᨬᩣᨿᨲᩥ;

ᨲᩔᩮᩅ ᨲᩮ ᨸᩩᨲ᩠ᨲᩣ ᩈᨲᩥᨿᩣ ᩅᩥᩉᩦᨶᩣ,

ᨧᩮᩣᨴᩥᨲᩣ ᨾᨿᩣ ᨲᩮ ᩈᨲᩥᨾᨩ᩠ᨫᩃᨲ᩠ᨳᩩᩴ.

‘‘‘ᨲᩥᨱ᩠ᨱᩴ ᨲᩮᩈᩴ ᩌᩅᩈᩥᨶᩮᨲ᩠ᨳ [ᩋᩅᩈᩦᨶᩮᨲ᩠ᨳ (ᨸᩦ.)] ᩑᨠᩮᩣ,

ᨣᨶ᩠ᨵᨻ᩠ᨻᨠᩣᨿᩪᨸᨣᨲᩮᩣ ᩅᩈᩦᨶᩮᩣ;

ᨴ᩠ᩅᩮ ᨧ ᩈᨾ᩠ᨻᩮᩣᨵᩥᨸᨳᩣᨶᩩᩈᩣᩁᩥᨶᩮᩣ,

ᨴᩮᩅᩮᨸᩥ ᩉᩦᩊᩮᨶ᩠ᨲᩥ ᩈᨾᩣᩉᩥᨲᨲ᩠ᨲᩣ.

‘‘‘ᩑᨲᩣᨴᩥᩈᩦ ᨵᨾ᩠ᨾᨸ᩠ᨸᨠᩣᩈᨶᩮᨲ᩠ᨳ,

ᨶ ᨲᨲ᩠ᨳ ᨠᩥᩴᨠᨦ᩠ᨡᨲᩥ ᨠᩮᩣᨧᩥ ᩈᩣᩅᨠᩮᩣ;

ᨶᩥᨲᩥᨱ᩠ᨱᩒᨥᩴ ᩅᩥᨧᩥᨠᩥᨧ᩠ᨨᨨᩥᨶ᩠ᨶᩴ,

ᨻᩩᨴ᩠ᨵᩴ ᨶᨾᩔᩣᨾ ᨩᩥᨶᩴ ᨩᨶᩥᨶ᩠ᨴᩴ’.

‘‘ᨿᩴ ᨲᩮ ᨵᨾ᩠ᨾᩴ ᩍᨵᨬ᩠ᨬᩣᨿ,

ᩅᩥᩈᩮᩈᩴ ᩋᨩ᩠ᨫᨣᩴᩈᩩ [ᩋᨩ᩠ᨫᨣᨾᩴᩈᩩ (ᩈ᩠ᨿᩣ.)] ᨲᩮ;

ᨠᩣᨿᩴ ᨻᩕᩉ᩠ᨾᨸᩩᩁᩮᩣᩉᩥᨲᩴ,

ᨴᩩᩅᩮ ᨲᩮᩈᩴ ᩅᩥᩈᩮᩈᨣᩪ.

‘‘ᨲᩔ ᨵᨾ᩠ᨾᩔ ᨸᨲ᩠ᨲᩥᨿᩣ,

ᩌᨣᨲᨾ᩠ᩉᩣᩈᩥ ᨾᩣᩁᩥᩈ;

ᨠᨲᩣᩅᨠᩣᩈᩣ ᨽᨣᩅᨲᩣ,

ᨸᨬ᩠ᩉᩴ ᨸᩩᨧ᩠ᨨᩮᨾᩩ ᨾᩣᩁᩥᩈᩣ’’ᨲᩥ.

᪓᪕᪕. ᩋᨳ ᨡᩮᩣ ᨽᨣᩅᨲᩮᩣ ᩑᨲᨴᩉᩮᩣᩈᩥ – ‘‘ᨴᩦᨥᩁᨲ᩠ᨲᩴ ᩅᩥᩈᩩᨴ᩠ᨵᩮᩣ ᨡᩮᩣ ᩋᨿᩴ ᨿᨠ᩠ᨡᩮᩣ [ᩈᨠ᩠ᨠᩮᩣ (ᩈᩦ. ᩈ᩠ᨿᩣ. ᨸᩦ.)], ᨿᩴ ᨠᩥᨬ᩠ᨧᩥ ᨾᩴ ᨸᨬ᩠ᩉᩴ ᨸᩩᨧ᩠ᨨᩥᩔᨲᩥ, ᩈᨻ᩠ᨻᩴ ᨲᩴ ᩋᨲ᩠ᨳᩈᨬ᩠ᩉᩥᨲᩴᨿᩮᩅ ᨸᩩᨧ᩠ᨨᩥᩔᨲᩥ, ᨶᩮᩣ ᩋᨶᨲ᩠ᨳᩈᨬ᩠ᩉᩥᨲᩴ. ᨿᨬ᩠ᨧᩔᩣᩉᩴ ᨸᩩᨭ᩠ᨮᩮᩣ ᨻ᩠ᨿᩣᨠᩁᩥᩔᩣᨾᩥ, ᨲᩴ ᨡᩥᨸ᩠ᨸᨾᩮᩅ ᩌᨩᩣᨶᩥᩔᨲᩦ’’ᨲᩥ.

᪓᪕᪖. ᩋᨳ ᨡᩮᩣ ᨽᨣᩅᩣ ᩈᨠ᩠ᨠᩴ ᨴᩮᩅᩣᨶᨾᩥᨶ᩠ᨴᩴ ᨣᩣᨳᩣᨿ ᩋᨩ᩠ᨫᨽᩣᩈᩥ –

‘‘ᨸᩩᨧ᩠ᨨ ᩅᩣᩈᩅ ᨾᩴ ᨸᨬ᩠ᩉᩴ, ᨿᩴ ᨠᩥᨬ᩠ᨧᩥ ᨾᨶᩈᩥᨧ᩠ᨨᩈᩥ;

ᨲᩔ ᨲᩔᩮᩅ ᨸᨬ᩠ᩉᩔ, ᩋᩉᩴ ᩋᨶ᩠ᨲᩴ ᨠᩁᩮᩣᨾᩥ ᨲᩮ’’ᨲᩥ.

ᨸᨮᨾᨽᩣᨱᩅᩣᩁᩮᩣ ᨶᩥᨭ᩠ᨮᩥᨲᩮᩣ.

᪓᪕᪗. ᨠᨲᩣᩅᨠᩣᩈᩮᩣ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨽᨣᩅᨲᩣ ᩍᨾᩴ ᨽᨣᩅᨶ᩠ᨲᩴ [ᨴᩮᩅᩣᨶᨾᩥᨶ᩠ᨴᩮᩣ ᨽᨣᩅᨶ᩠ᨲᩴ ᩍᨾᩴ (ᩈᩦ. ᨸᩦ.)] ᨸᨮᨾᩴ ᨸᨬ᩠ᩉᩴ ᩋᨸᩩᨧ᩠ᨨᩥ –

‘‘ᨠᩥᩴ ᩈᩴᨿᩮᩣᨩᨶᩣ ᨶᩩ ᨡᩮᩣ, ᨾᩣᩁᩥᩈ, ᨴᩮᩅᩣ ᨾᨶᩩᩔᩣ ᩋᩈᩩᩁᩣ ᨶᩣᨣᩣ ᨣᨶ᩠ᨵᨻ᩠ᨻᩣ ᨿᩮ ᨧᨬ᩠ᨬᩮ ᩈᨶ᩠ᨲᩥ ᨸᩩᨳᩩᨠᩣᨿᩣ, ᨲᩮ – ‘ᩋᩅᩮᩁᩣ ᩋᨴᨱ᩠ᨯᩣ ᩋᩈᨸᨲ᩠ᨲᩣ ᩋᨻ᩠ᨿᩣᨸᨩ᩠ᨩᩣ ᩅᩥᩉᩁᩮᨾᩩ ᩋᩅᩮᩁᩥᨶᩮᩣ’ᨲᩥ ᩍᨲᩥ ᨧ ᨶᩮᩈᩴ ᩉᩮᩣᨲᩥ, ᩋᨳ ᨧ ᨸᨶ ᩈᩅᩮᩁᩣ ᩈᨴᨱ᩠ᨯᩣ ᩈᩈᨸᨲ᩠ᨲᩣ ᩈᨻ᩠ᨿᩣᨸᨩ᩠ᨩᩣ ᩅᩥᩉᩁᨶ᩠ᨲᩥ ᩈᩅᩮᩁᩥᨶᩮᩣ’’ᨲᩥ? ᩍᨲ᩠ᨳᩴ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨽᨣᩅᨶ᩠ᨲᩴ ᨸᨬ᩠ᩉᩴ [ᩍᨾᩴ ᨸᨮᨾᩴ ᨸᨬ᩠ᩉᩴ (ᩈᩦ. ᨸᩦ.)] ᩋᨸᩩᨧ᩠ᨨᩥ. ᨲᩔ ᨽᨣᩅᩣ ᨸᨬ᩠ᩉᩴ ᨸᩩᨭ᩠ᨮᩮᩣ ᨻ᩠ᨿᩣᨠᩣᩈᩥ –

‘‘ᩍᩔᩣᨾᨧ᩠ᨨᩁᩥᨿᩈᩴᨿᩮᩣᨩᨶᩣ ᨡᩮᩣ, ᨴᩮᩅᩣᨶᨾᩥᨶ᩠ᨴ, ᨴᩮᩅᩣ ᨾᨶᩩᩔᩣ ᩋᩈᩩᩁᩣ ᨶᩣᨣᩣ ᨣᨶ᩠ᨵᨻ᩠ᨻᩣ ᨿᩮ ᨧᨬ᩠ᨬᩮ ᩈᨶ᩠ᨲᩥ ᨸᩩᨳᩩᨠᩣᨿᩣ, ᨲᩮ – ‘ᩋᩅᩮᩁᩣ ᩋᨴᨱ᩠ᨯᩣ ᩋᩈᨸᨲ᩠ᨲᩣ ᩋᨻ᩠ᨿᩣᨸᨩ᩠ᨩᩣ ᩅᩥᩉᩁᩮᨾᩩ ᩋᩅᩮᩁᩥᨶᩮᩣ’ᨲᩥ ᩍᨲᩥ ᨧ ᨶᩮᩈᩴ ᩉᩮᩣᨲᩥ, ᩋᨳ ᨧ ᨸᨶ ᩈᩅᩮᩁᩣ ᩈᨴᨱ᩠ᨯᩣ ᩈᩈᨸᨲ᩠ᨲᩣ ᩈᨻ᩠ᨿᩣᨸᨩ᩠ᨩᩣ ᩅᩥᩉᩁᨶ᩠ᨲᩥ ᩈᩅᩮᩁᩥᨶᩮᩣ’’ᨲᩥ. ᩍᨲ᩠ᨳᩴ ᨽᨣᩅᩣ ᩈᨠ᩠ᨠᩔ ᨴᩮᩅᩣᨶᨾᩥᨶ᩠ᨴᩔ ᨸᨬ᩠ᩉᩴ ᨸᩩᨭ᩠ᨮᩮᩣ ᨻ᩠ᨿᩣᨠᩣᩈᩥ. ᩋᨲ᩠ᨲᨾᨶᩮᩣ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩥ ᩋᨶᩩᨾᩮᩣᨴᩥ – ‘‘ᩑᩅᨾᩮᨲᩴ, ᨽᨣᩅᩣ, ᩑᩅᨾᩮᨲᩴ, ᩈᩩᨣᨲ. ᨲᩥᨱ᩠ᨱᩣ ᨾᩮᨲ᩠ᨳ ᨠᨦ᩠ᨡᩣ ᩅᩥᨣᨲᩣ ᨠᨳᩴᨠᨳᩣ ᨽᨣᩅᨲᩮᩣ ᨸᨬ᩠ᩉᩅᩮᨿ᩠ᨿᩣᨠᩁᨱᩴ ᩈᩩᨲ᩠ᩅᩣ’’ᨲᩥ.

᪓᪕᪘. ᩍᨲᩥᩉ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩥᨲ᩠ᩅᩣ ᩋᨶᩩᨾᩮᩣᨴᩥᨲ᩠ᩅᩣ ᨽᨣᩅᨶ᩠ᨲᩴ ᩏᨲ᩠ᨲᩁᩥᩴ [ᩏᨲ᩠ᨲᩁᩥᩴ (ᩈᩦ. ᩈ᩠ᨿᩣ. ᨸᩦ.)] ᨸᨬ᩠ᩉᩴ ᩋᨸᩩᨧ᩠ᨨᩥ –

‘‘ᩍᩔᩣᨾᨧ᩠ᨨᩁᩥᨿᩴ ᨸᨶ, ᨾᩣᩁᩥᩈ, ᨠᩥᩴᨶᩥᨴᩣᨶᩴ ᨠᩥᩴᩈᨾᩩᨴᨿᩴ ᨠᩥᩴᨩᩣᨲᩥᨠᩴ ᨠᩥᩴᨸᨽᩅᩴ; ᨠᩥᩈ᩠ᨾᩥᩴ ᩈᨲᩥ ᩍᩔᩣᨾᨧ᩠ᨨᩁᩥᨿᩴ ᩉᩮᩣᨲᩥ; ᨠᩥᩈ᩠ᨾᩥᩴ ᩋᩈᨲᩥ ᩍᩔᩣᨾᨧ᩠ᨨᩁᩥᨿᩴ ᨶ ᩉᩮᩣᨲᩦ’’ᨲᩥ? ‘‘ᩍᩔᩣᨾᨧ᩠ᨨᩁᩥᨿᩴ ᨡᩮᩣ, ᨴᩮᩅᩣᨶᨾᩥᨶ᩠ᨴ, ᨸᩥᨿᩣᨸ᩠ᨸᩥᨿᨶᩥᨴᩣᨶᩴ ᨸᩥᨿᩣᨸ᩠ᨸᩥᨿᩈᨾᩩᨴᨿᩴ ᨸᩥᨿᩣᨸ᩠ᨸᩥᨿᨩᩣᨲᩥᨠᩴ ᨸᩥᨿᩣᨸ᩠ᨸᩥᨿᨸᨽᩅᩴ; ᨸᩥᨿᩣᨸ᩠ᨸᩥᨿᩮ ᩈᨲᩥ ᩍᩔᩣᨾᨧ᩠ᨨᩁᩥᨿᩴ ᩉᩮᩣᨲᩥ, ᨸᩥᨿᩣᨸ᩠ᨸᩥᨿᩮ ᩋᩈᨲᩥ ᩍᩔᩣᨾᨧ᩠ᨨᩁᩥᨿᩴ ᨶ ᩉᩮᩣᨲᩦ’’ᨲᩥ.

‘‘ᨸᩥᨿᩣᨸ᩠ᨸᩥᨿᩴ ᨡᩮᩣ ᨸᨶ, ᨾᩣᩁᩥᩈ, ᨠᩥᩴᨶᩥᨴᩣᨶᩴ ᨠᩥᩴᩈᨾᩩᨴᨿᩴ ᨠᩥᩴᨩᩣᨲᩥᨠᩴ ᨠᩥᩴᨸᨽᩅᩴ; ᨠᩥᩈ᩠ᨾᩥᩴ ᩈᨲᩥ ᨸᩥᨿᩣᨸ᩠ᨸᩥᨿᩴ ᩉᩮᩣᨲᩥ; ᨠᩥᩈ᩠ᨾᩥᩴ ᩋᩈᨲᩥ ᨸᩥᨿᩣᨸ᩠ᨸᩥᨿᩴ ᨶ ᩉᩮᩣᨲᩦ’’ᨲᩥ? ‘‘ᨸᩥᨿᩣᨸ᩠ᨸᩥᨿᩴ ᨡᩮᩣ, ᨴᩮᩅᩣᨶᨾᩥᨶ᩠ᨴ, ᨨᨶ᩠ᨴᨶᩥᨴᩣᨶᩴ ᨨᨶ᩠ᨴᩈᨾᩩᨴᨿᩴ ᨨᨶ᩠ᨴᨩᩣᨲᩥᨠᩴ ᨨᨶ᩠ᨴᨸᨽᩅᩴ; ᨨᨶ᩠ᨴᩮ ᩈᨲᩥ ᨸᩥᨿᩣᨸ᩠ᨸᩥᨿᩴ ᩉᩮᩣᨲᩥ; ᨨᨶ᩠ᨴᩮ ᩋᩈᨲᩥ ᨸᩥᨿᩣᨸ᩠ᨸᩥᨿᩴ ᨶ ᩉᩮᩣᨲᩦ’’ᨲᩥ.

‘‘ᨨᨶ᩠ᨴᩮᩣ ᨡᩮᩣ ᨸᨶ, ᨾᩣᩁᩥᩈ, ᨠᩥᩴᨶᩥᨴᩣᨶᩮᩣ ᨠᩥᩴᩈᨾᩩᨴᨿᩮᩣ ᨠᩥᩴᨩᩣᨲᩥᨠᩮᩣ ᨠᩥᩴᨸᨽᩅᩮᩣ; ᨠᩥᩈ᩠ᨾᩥᩴ ᩈᨲᩥ ᨨᨶ᩠ᨴᩮᩣ ᩉᩮᩣᨲᩥ; ᨠᩥᩈ᩠ᨾᩥᩴ ᩋᩈᨲᩥ ᨨᨶ᩠ᨴᩮᩣ ᨶ ᩉᩮᩣᨲᩦ’’ᨲᩥ? ‘‘ᨨᨶ᩠ᨴᩮᩣ ᨡᩮᩣ, ᨴᩮᩅᩣᨶᨾᩥᨶ᩠ᨴ, ᩅᩥᨲᨠ᩠ᨠᨶᩥᨴᩣᨶᩮᩣ ᩅᩥᨲᨠ᩠ᨠᩈᨾᩩᨴᨿᩮᩣ ᩅᩥᨲᨠ᩠ᨠᨩᩣᨲᩥᨠᩮᩣ ᩅᩥᨲᨠ᩠ᨠᨸᨽᩅᩮᩣ; ᩅᩥᨲᨠ᩠ᨠᩮ ᩈᨲᩥ ᨨᨶ᩠ᨴᩮᩣ ᩉᩮᩣᨲᩥ; ᩅᩥᨲᨠ᩠ᨠᩮ ᩋᩈᨲᩥ ᨨᨶ᩠ᨴᩮᩣ ᨶ ᩉᩮᩣᨲᩦ’’ᨲᩥ.

‘‘ᩅᩥᨲᨠ᩠ᨠᩮᩣ ᨡᩮᩣ ᨸᨶ, ᨾᩣᩁᩥᩈ, ᨠᩥᩴᨶᩥᨴᩣᨶᩮᩣ ᨠᩥᩴᩈᨾᩩᨴᨿᩮᩣ ᨠᩥᩴᨩᩣᨲᩥᨠᩮᩣ ᨠᩥᩴᨸᨽᩅᩮᩣ; ᨠᩥᩈ᩠ᨾᩥᩴ ᩈᨲᩥ ᩅᩥᨲᨠ᩠ᨠᩮᩣ ᩉᩮᩣᨲᩥ; ᨠᩥᩈ᩠ᨾᩥᩴ ᩋᩈᨲᩥ ᩅᩥᨲᨠ᩠ᨠᩮᩣ ᨶ ᩉᩮᩣᨲᩦ’’ᨲᩥ? ‘‘ᩅᩥᨲᨠ᩠ᨠᩮᩣ ᨡᩮᩣ, ᨴᩮᩅᩣᨶᨾᩥᨶ᩠ᨴ, ᨸᨸᨬ᩠ᨧᩈᨬ᩠ᨬᩣᩈᨦ᩠ᨡᩣᨶᩥᨴᩣᨶᩮᩣ ᨸᨸᨬ᩠ᨧᩈᨬ᩠ᨬᩣᩈᨦ᩠ᨡᩣᩈᨾᩩᨴᨿᩮᩣ ᨸᨸᨬ᩠ᨧᩈᨬ᩠ᨬᩣᩈᨦ᩠ᨡᩣᨩᩣᨲᩥᨠᩮᩣ ᨸᨸᨬ᩠ᨧᩈᨬ᩠ᨬᩣᩈᨦ᩠ᨡᩣᨸᨽᩅᩮᩣ; ᨸᨸᨬ᩠ᨧᩈᨬ᩠ᨬᩣᩈᨦ᩠ᨡᩣᨿ ᩈᨲᩥ ᩅᩥᨲᨠ᩠ᨠᩮᩣ ᩉᩮᩣᨲᩥ; ᨸᨸᨬ᩠ᨧᩈᨬ᩠ᨬᩣᩈᨦ᩠ᨡᩣᨿ ᩋᩈᨲᩥ ᩅᩥᨲᨠ᩠ᨠᩮᩣ ᨶ ᩉᩮᩣᨲᩦ’’ᨲᩥ.

‘‘ᨠᨳᩴ ᨸᨭᩥᨸᨶ᩠ᨶᩮᩣ ᨸᨶ, ᨾᩣᩁᩥᩈ, ᨽᩥᨠ᩠ᨡᩩ ᨸᨸᨬ᩠ᨧᩈᨬ᩠ᨬᩣᩈᨦ᩠ᨡᩣᨶᩥᩁᩮᩣᨵᩈᩣᩁᩩᨸ᩠ᨸᨣᩣᨾᩥᨶᩥᩴ ᨸᨭᩥᨸᨴᩴ ᨸᨭᩥᨸᨶ᩠ᨶᩮᩣ ᩉᩮᩣᨲᩦ’’ᨲᩥ?

ᩅᩮᨴᨶᩣᨠᨾ᩠ᨾᨭ᩠ᨮᩣᨶᩴ

᪓᪕᪙. ‘‘ᩈᩮᩣᨾᨶᩔᩴᨸᩣᩉᩴ [ᨸᩉᩴ (ᩈᩦ. ᨸᩦ.), ᨧᩣᩉᩴ (ᩈ᩠ᨿᩣ. ᨠᩴ.)], ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩥ. ᨴᩮᩣᨾᨶᩔᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩥ. ᩏᨸᩮᨠ᩠ᨡᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩥ.

᪓᪖᪐. ‘‘ᩈᩮᩣᨾᨶᩔᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩦᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨠᩥᨬ᩠ᨧᩮᨲᩴ ᨸᨭᩥᨧ᩠ᨧ ᩅᩩᨲ᩠ᨲᩴ? ᨲᨲ᩠ᨳ ᨿᩴ ᨩᨬ᩠ᨬᩣ ᩈᩮᩣᨾᨶᩔᩴ ‘ᩍᨾᩴ ᨡᩮᩣ ᨾᩮ ᩈᩮᩣᨾᨶᩔᩴ ᩈᩮᩅᨲᩮᩣ ᩋᨠᩩᩈᩃᩣ ᨵᨾ᩠ᨾᩣ ᩋᨽᩥᩅᨯ᩠ᨰᨶ᩠ᨲᩥ, ᨠᩩᩈᩃᩣ ᨵᨾ᩠ᨾᩣ ᨸᩁᩥᩉᩣᨿᨶ᩠ᨲᩦ’ᨲᩥ, ᩑᩅᩁᩪᨸᩴ ᩈᩮᩣᨾᨶᩔᩴ ᨶ ᩈᩮᩅᩥᨲᨻ᩠ᨻᩴ. ᨲᨲ᩠ᨳ ᨿᩴ ᨩᨬ᩠ᨬᩣ ᩈᩮᩣᨾᨶᩔᩴ ‘ᩍᨾᩴ ᨡᩮᩣ ᨾᩮ ᩈᩮᩣᨾᨶᩔᩴ ᩈᩮᩅᨲᩮᩣ ᩋᨠᩩᩈᩃᩣ ᨵᨾ᩠ᨾᩣ ᨸᩁᩥᩉᩣᨿᨶ᩠ᨲᩥ, ᨠᩩᩈᩃᩣ ᨵᨾ᩠ᨾᩣ ᩋᨽᩥᩅᨯ᩠ᨰᨶ᩠ᨲᩦ’ᨲᩥ, ᩑᩅᩁᩪᨸᩴ ᩈᩮᩣᨾᨶᩔᩴ ᩈᩮᩅᩥᨲᨻ᩠ᨻᩴ. ᨲᨲ᩠ᨳ ᨿᩴ ᨧᩮ ᩈᩅᩥᨲᨠ᩠ᨠᩴ ᩈᩅᩥᨧᩣᩁᩴ, ᨿᩴ ᨧᩮ ᩋᩅᩥᨲᨠ᩠ᨠᩴ ᩋᩅᩥᨧᩣᩁᩴ, ᨿᩮ ᩋᩅᩥᨲᨠ᩠ᨠᩮ ᩋᩅᩥᨧᩣᩁᩮ, ᨲᩮ [ᩈᩮ (ᩈᩦ. ᨸᩦ.)] ᨸᨱᩦᨲᨲᩁᩮ. ᩈᩮᩣᨾᨶᩔᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩦᨲᩥ. ᩍᨲᩥ ᨿᩴ ᨲᩴ ᩅᩩᨲ᩠ᨲᩴ, ᩍᨴᨾᩮᨲᩴ ᨸᨭᩥᨧ᩠ᨧ ᩅᩩᨲ᩠ᨲᩴ.

᪓᪖᪑. ‘‘ᨴᩮᩣᨾᨶᩔᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩦᨲᩥ. ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨠᩥᨬ᩠ᨧᩮᨲᩴ ᨸᨭᩥᨧ᩠ᨧ ᩅᩩᨲ᩠ᨲᩴ? ᨲᨲ᩠ᨳ ᨿᩴ ᨩᨬ᩠ᨬᩣ ᨴᩮᩣᨾᨶᩔᩴ ‘ᩍᨾᩴ ᨡᩮᩣ ᨾᩮ ᨴᩮᩣᨾᨶᩔᩴ ᩈᩮᩅᨲᩮᩣ ᩋᨠᩩᩈᩃᩣ ᨵᨾ᩠ᨾᩣ ᩋᨽᩥᩅᨯ᩠ᨰᨶ᩠ᨲᩥ, ᨠᩩᩈᩃᩣ ᨵᨾ᩠ᨾᩣ ᨸᩁᩥᩉᩣᨿᨶ᩠ᨲᩦ’ᨲᩥ, ᩑᩅᩁᩪᨸᩴ ᨴᩮᩣᨾᨶᩔᩴ ᨶ ᩈᩮᩅᩥᨲᨻ᩠ᨻᩴ. ᨲᨲ᩠ᨳ ᨿᩴ ᨩᨬ᩠ᨬᩣ ᨴᩮᩣᨾᨶᩔᩴ ‘ᩍᨾᩴ ᨡᩮᩣ ᨾᩮ ᨴᩮᩣᨾᨶᩔᩴ ᩈᩮᩅᨲᩮᩣ ᩋᨠᩩᩈᩃᩣ ᨵᨾ᩠ᨾᩣ ᨸᩁᩥᩉᩣᨿᨶ᩠ᨲᩥ, ᨠᩩᩈᩃᩣ ᨵᨾ᩠ᨾᩣ ᩋᨽᩥᩅᨯ᩠ᨰᨶ᩠ᨲᩦ’ᨲᩥ, ᩑᩅᩁᩪᨸᩴ ᨴᩮᩣᨾᨶᩔᩴ ᩈᩮᩅᩥᨲᨻ᩠ᨻᩴ. ᨲᨲ᩠ᨳ ᨿᩴ ᨧᩮ ᩈᩅᩥᨲᨠ᩠ᨠᩴ ᩈᩅᩥᨧᩣᩁᩴ, ᨿᩴ ᨧᩮ ᩋᩅᩥᨲᨠ᩠ᨠᩴ ᩋᩅᩥᨧᩣᩁᩴ, ᨿᩮ ᩋᩅᩥᨲᨠ᩠ᨠᩮ ᩋᩅᩥᨧᩣᩁᩮ, ᨲᩮ ᨸᨱᩦᨲᨲᩁᩮ. ᨴᩮᩣᨾᨶᩔᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩦ’ᨲᩥ ᩍᨲᩥ ᨿᩴ ᨲᩴ ᩅᩩᨲ᩠ᨲᩴ, ᩍᨴᨾᩮᨲᩴ ᨸᨭᩥᨧ᩠ᨧ ᩅᩩᨲ᩠ᨲᩴ.

᪓᪖᪒. ‘‘ᩏᨸᩮᨠ᩠ᨡᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩦᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨠᩥᨬ᩠ᨧᩮᨲᩴ ᨸᨭᩥᨧ᩠ᨧ ᩅᩩᨲ᩠ᨲᩴ? ᨲᨲ᩠ᨳ ᨿᩴ ᨩᨬ᩠ᨬᩣ ᩏᨸᩮᨠ᩠ᨡᩴ ‘ᩍᨾᩴ ᨡᩮᩣ ᨾᩮ ᩏᨸᩮᨠ᩠ᨡᩴ ᩈᩮᩅᨲᩮᩣ ᩋᨠᩩᩈᩃᩣ ᨵᨾ᩠ᨾᩣ ᩋᨽᩥᩅᨯ᩠ᨰᨶ᩠ᨲᩥ, ᨠᩩᩈᩃᩣ ᨵᨾ᩠ᨾᩣ ᨸᩁᩥᩉᩣᨿᨶ᩠ᨲᩦ’ᨲᩥ, ᩑᩅᩁᩪᨸᩣ ᩏᨸᩮᨠ᩠ᨡᩣ ᨶ ᩈᩮᩅᩥᨲᨻ᩠ᨻᩣ. ᨲᨲ᩠ᨳ ᨿᩴ ᨩᨬ᩠ᨬᩣ ᩏᨸᩮᨠ᩠ᨡᩴ ‘ᩍᨾᩴ ᨡᩮᩣ ᨾᩮ ᩏᨸᩮᨠ᩠ᨡᩴ ᩈᩮᩅᨲᩮᩣ ᩋᨠᩩᩈᩃᩣ ᨵᨾ᩠ᨾᩣ ᨸᩁᩥᩉᩣᨿᨶ᩠ᨲᩥ, ᨠᩩᩈᩃᩣ ᨵᨾ᩠ᨾᩣ ᩋᨽᩥᩅᨯ᩠ᨰᨶ᩠ᨲᩦ’ᨲᩥ, ᩑᩅᩁᩪᨸᩣ ᩏᨸᩮᨠ᩠ᨡᩣ ᩈᩮᩅᩥᨲᨻ᩠ᨻᩣ. ᨲᨲ᩠ᨳ ᨿᩴ ᨧᩮ ᩈᩅᩥᨲᨠ᩠ᨠᩴ ᩈᩅᩥᨧᩣᩁᩴ, ᨿᩴ ᨧᩮ ᩋᩅᩥᨲᨠ᩠ᨠᩴ ᩋᩅᩥᨧᩣᩁᩴ, ᨿᩮ ᩋᩅᩥᨲᨠ᩠ᨠᩮ ᩋᩅᩥᨧᩣᩁᩮ, ᨲᩮ ᨸᨱᩦᨲᨲᩁᩮ. ᩏᨸᩮᨠ᩠ᨡᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩦᨲᩥ ᩍᨲᩥ ᨿᩴ ᨲᩴ ᩅᩩᨲ᩠ᨲᩴ, ᩍᨴᨾᩮᨲᩴ ᨸᨭᩥᨧ᩠ᨧ ᩅᩩᨲ᩠ᨲᩴ.

᪓᪖᪓. ‘‘ᩑᩅᩴ ᨸᨭᩥᨸᨶ᩠ᨶᩮᩣ ᨡᩮᩣ, ᨴᩮᩅᩣᨶᨾᩥᨶ᩠ᨴ, ᨽᩥᨠ᩠ᨡᩩ ᨸᨸᨬ᩠ᨧᩈᨬ᩠ᨬᩣᩈᨦ᩠ᨡᩣᨶᩥᩁᩮᩣᨵᩈᩣᩁᩩᨸ᩠ᨸᨣᩣᨾᩥᨶᩥᩴ ᨸᨭᩥᨸᨴᩴ ᨸᨭᩥᨸᨶ᩠ᨶᩮᩣ ᩉᩮᩣᨲᩦ’’ᨲᩥ. ᩍᨲ᩠ᨳᩴ ᨽᨣᩅᩣ ᩈᨠ᩠ᨠᩔ ᨴᩮᩅᩣᨶᨾᩥᨶ᩠ᨴᩔ ᨸᨬ᩠ᩉᩴ ᨸᩩᨭ᩠ᨮᩮᩣ ᨻ᩠ᨿᩣᨠᩣᩈᩥ. ᩋᨲ᩠ᨲᨾᨶᩮᩣ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩥ ᩋᨶᩩᨾᩮᩣᨴᩥ – ‘‘ᩑᩅᨾᩮᨲᩴ, ᨽᨣᩅᩣ, ᩑᩅᨾᩮᨲᩴ, ᩈᩩᨣᨲ, ᨲᩥᨱ᩠ᨱᩣ ᨾᩮᨲ᩠ᨳ ᨠᨦ᩠ᨡᩣ ᩅᩥᨣᨲᩣ ᨠᨳᩴᨠᨳᩣ ᨽᨣᩅᨲᩮᩣ ᨸᨬ᩠ᩉᩅᩮᨿ᩠ᨿᩣᨠᩁᨱᩴ ᩈᩩᨲ᩠ᩅᩣ’’ᨲᩥ.

ᨸᩣᨲᩥᨾᩮᩣᨠ᩠ᨡᩈᩴᩅᩁᩮᩣ

᪓᪖᪔. ᩍᨲᩥᩉ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩥᨲ᩠ᩅᩣ ᩋᨶᩩᨾᩮᩣᨴᩥᨲ᩠ᩅᩣ ᨽᨣᩅᨶ᩠ᨲᩴ ᩏᨲ᩠ᨲᩁᩥᩴ ᨸᨬ᩠ᩉᩴ ᩋᨸᩩᨧ᩠ᨨᩥ –

‘‘ᨠᨳᩴ ᨸᨭᩥᨸᨶ᩠ᨶᩮᩣ ᨸᨶ, ᨾᩣᩁᩥᩈ, ᨽᩥᨠ᩠ᨡᩩ ᨸᩣᨲᩥᨾᩮᩣᨠ᩠ᨡᩈᩴᩅᩁᩣᨿ ᨸᨭᩥᨸᨶ᩠ᨶᩮᩣ ᩉᩮᩣᨲᩦ’’ᨲᩥ? ‘‘ᨠᩣᨿᩈᨾᩣᨧᩣᩁᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩥ. ᩅᨧᩦᩈᨾᩣᨧᩣᩁᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩥ. ᨸᩁᩥᨿᩮᩈᨶᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻ’’ᨾ᩠ᨸᩥ.

‘‘ᨠᩣᨿᩈᨾᩣᨧᩣᩁᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ ᩈᩮᩅᩥᨲᨻ᩠ᨻᨾ᩠ᨸᩥ ᩋᩈᩮᩅᩥᨲᨻ᩠ᨻᨾ᩠ᨸᩦᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨠᩥᨬ᩠ᨧᩮᨲᩴ ᨸᨭᩥᨧ᩠ᨧ ᩅᩩᨲ᩠ᨲᩴ? ᨲᨲ᩠ᨳ ᨿᩴ ᨩᨬ᩠ᨬᩣ ᨠᩣᨿᩈᨾᩣᨧᩣᩁᩴ ‘ᩍᨾᩴ ᨡᩮᩣ ᨾᩮ ᨠᩣᨿᩈᨾᩣᨧᩣᩁᩴ ᩈᩮᩅᨲᩮᩣ ᩋᨠᩩᩈᩃᩣ ᨵᨾ᩠ᨾᩣ ᩋᨽᩥᩅᨯ᩠ᨰᨶ᩠ᨲᩥ, ᨠᩩᩈᩃᩣ ᨵᨾ᩠ᨾᩣ ᨸᩁᩥᩉᩣᨿᨶ᩠ᨲᩦ’ᨲᩥ, ᩑᩅᩁᩪᨸᩮᩣ ᨠᩣᨿᩈᨾᩣᨧᩣᩁᩮᩣ ᨶ ᩈᩮᩅᩥᨲᨻ᩠ᨻᩮᩣ. ᨲᨲ᩠ᨳ ᨿᩴ ᨩᨬ᩠ᨬᩣ ᨠᩣᨿᩈᨾᩣᨧᩣᩁᩴ ‘ᩍᨾᩴ ᨡᩮᩣ ᨾᩮ ᨠᩣᨿᩈᨾᩣᨧᩣᩁᩴ ᩈᩮᩅᨲᩮᩣ ᩋᨠᩩᩈᩃᩣ ᨵᨾ᩠ᨾᩣ ᨸᩁᩥᩉᩣᨿᨶ᩠ᨲᩥ, ᨠᩩᩈᩃᩣ ᨵᨾ᩠ᨾᩣ ᩋᨽᩥᩅᨯ᩠ᨰᨶ᩠ᨲᩦ’ᨲᩥ, ᩑᩅᩁᩪᨸᩮᩣ ᨠᩣᨿᩈᨾᩣᨧᩣᩁᩮᩣ ᩈᩮᩅᩥᨲᨻ᩠ᨻᩮᩣ. ᨠᩣᨿᩈᨾᩣᨧᩣᩁᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩦᨲᩥ ᩍᨲᩥ ᨿᩴ ᨲᩴ ᩅᩩᨲ᩠ᨲᩴ, ᩍᨴᨾᩮᨲᩴ ᨸᨭᩥᨧ᩠ᨧ ᩅᩩᨲ᩠ᨲᩴ.

‘‘ᩅᨧᩦᩈᨾᩣᨧᩣᩁᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩦ’ᨲᩥ. ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨠᩥᨬ᩠ᨧᩮᨲᩴ ᨸᨭᩥᨧ᩠ᨧ ᩅᩩᨲ᩠ᨲᩴ? ᨲᨲ᩠ᨳ ᨿᩴ ᨩᨬ᩠ᨬᩣ ᩅᨧᩦᩈᨾᩣᨧᩣᩁᩴ ‘ᩍᨾᩴ ᨡᩮᩣ ᨾᩮ ᩅᨧᩦᩈᨾᩣᨧᩣᩁᩴ ᩈᩮᩅᨲᩮᩣ ᩋᨠᩩᩈᩃᩣ ᨵᨾ᩠ᨾᩣ ᩋᨽᩥᩅᨯ᩠ᨰᨶ᩠ᨲᩥ, ᨠᩩᩈᩃᩣ ᨵᨾ᩠ᨾᩣ ᨸᩁᩥᩉᩣᨿᨶ᩠ᨲᩦ’ᨲᩥ, ᩑᩅᩁᩪᨸᩮᩣ ᩅᨧᩦᩈᨾᩣᨧᩣᩁᩮᩣ ᨶ ᩈᩮᩅᩥᨲᨻ᩠ᨻᩮᩣ. ᨲᨲ᩠ᨳ ᨿᩴ ᨩᨬ᩠ᨬᩣ ᩅᨧᩦᩈᨾᩣᨧᩣᩁᩴ ‘ᩍᨾᩴ ᨡᩮᩣ ᨾᩮ ᩅᨧᩦᩈᨾᩣᨧᩣᩁᩴ ᩈᩮᩅᨲᩮᩣ ᩋᨠᩩᩈᩃᩣ ᨵᨾ᩠ᨾᩣ ᨸᩁᩥᩉᩣᨿᨶ᩠ᨲᩥ, ᨠᩩᩈᩃᩣ ᨵᨾ᩠ᨾᩣ ᩋᨽᩥᩅᨯ᩠ᨰᨶ᩠ᨲᩦ’ᨲᩥ, ᩑᩅᩁᩪᨸᩮᩣ ᩅᨧᩦᩈᨾᩣᨧᩣᩁᩮᩣ ᩈᩮᩅᩥᨲᨻ᩠ᨻᩮᩣ. ᩅᨧᩦᩈᨾᩣᨧᩣᩁᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩦᨲᩥ ᩍᨲᩥ ᨿᩴ ᨲᩴ ᩅᩩᨲ᩠ᨲᩴ, ᩍᨴᨾᩮᨲᩴ ᨸᨭᩥᨧ᩠ᨧ ᩅᩩᨲ᩠ᨲᩴ.

‘‘ᨸᩁᩥᨿᩮᩈᨶᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩦᨲᩥ ᩍᨲᩥ ᨡᩮᩣ ᨸᨶᩮᨲᩴ ᩅᩩᨲ᩠ᨲᩴ, ᨠᩥᨬ᩠ᨧᩮᨲᩴ ᨸᨭᩥᨧ᩠ᨧ ᩅᩩᨲ᩠ᨲᩴ? ᨲᨲ᩠ᨳ ᨿᩴ ᨩᨬ᩠ᨬᩣ ᨸᩁᩥᨿᩮᩈᨶᩴ ‘ᩍᨾᩴ ᨡᩮᩣ ᨾᩮ ᨸᩁᩥᨿᩮᩈᨶᩴ ᩈᩮᩅᨲᩮᩣ ᩋᨠᩩᩈᩃᩣ ᨵᨾ᩠ᨾᩣ ᩋᨽᩥᩅᨯ᩠ᨰᨶ᩠ᨲᩥ, ᨠᩩᩈᩃᩣ ᨵᨾ᩠ᨾᩣ ᨸᩁᩥᩉᩣᨿᨶ᩠ᨲᩦ’ᨲᩥ, ᩑᩅᩁᩪᨸᩣ ᨸᩁᩥᨿᩮᩈᨶᩣ ᨶ ᩈᩮᩅᩥᨲᨻ᩠ᨻᩣ. ᨲᨲ᩠ᨳ ᨿᩴ ᨩᨬ᩠ᨬᩣ ᨸᩁᩥᨿᩮᩈᨶᩴ ‘ᩍᨾᩴ ᨡᩮᩣ ᨾᩮ ᨸᩁᩥᨿᩮᩈᨶᩴ ᩈᩮᩅᨲᩮᩣ ᩋᨠᩩᩈᩃᩣ ᨵᨾ᩠ᨾᩣ ᨸᩁᩥᩉᩣᨿᨶ᩠ᨲᩥ, ᨠᩩᩈᩃᩣ ᨵᨾ᩠ᨾᩣ ᩋᨽᩥᩅᨯ᩠ᨰᨶ᩠ᨲᩦ’ᨲᩥ, ᩑᩅᩁᩪᨸᩣ ᨸᩁᩥᨿᩮᩈᨶᩣ ᩈᩮᩅᩥᨲᨻ᩠ᨻᩣ. ᨸᩁᩥᨿᩮᩈᨶᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩦᨲᩥ ᩍᨲᩥ ᨿᩴ ᨲᩴ ᩅᩩᨲ᩠ᨲᩴ, ᩍᨴᨾᩮᨲᩴ ᨸᨭᩥᨧ᩠ᨧ ᩅᩩᨲ᩠ᨲᩴ.

‘‘ᩑᩅᩴ ᨸᨭᩥᨸᨶ᩠ᨶᩮᩣ ᨡᩮᩣ, ᨴᩮᩅᩣᨶᨾᩥᨶ᩠ᨴ, ᨽᩥᨠ᩠ᨡᩩ ᨸᩣᨲᩥᨾᩮᩣᨠ᩠ᨡᩈᩴᩅᩁᩣᨿ ᨸᨭᩥᨸᨶ᩠ᨶᩮᩣ ᩉᩮᩣᨲᩦ’’ᨲᩥ. ᩍᨲ᩠ᨳᩴ ᨽᨣᩅᩣ ᩈᨠ᩠ᨠᩔ ᨴᩮᩅᩣᨶᨾᩥᨶ᩠ᨴᩔ ᨸᨬ᩠ᩉᩴ ᨸᩩᨭ᩠ᨮᩮᩣ ᨻ᩠ᨿᩣᨠᩣᩈᩥ. ᩋᨲ᩠ᨲᨾᨶᩮᩣ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩥ ᩋᨶᩩᨾᩮᩣᨴᩥ – ‘‘ᩑᩅᨾᩮᨲᩴ, ᨽᨣᩅᩣ, ᩑᩅᨾᩮᨲᩴ, ᩈᩩᨣᨲ. ᨲᩥᨱ᩠ᨱᩣ ᨾᩮᨲ᩠ᨳ ᨠᨦ᩠ᨡᩣ ᩅᩥᨣᨲᩣ ᨠᨳᩴᨠᨳᩣ ᨽᨣᩅᨲᩮᩣ ᨸᨬ᩠ᩉᩅᩮᨿ᩠ᨿᩣᨠᩁᨱᩴ ᩈᩩᨲ᩠ᩅᩣ’’ᨲᩥ.

ᩍᨶ᩠ᨴᩕᩥᨿᩈᩴᩅᩁᩮᩣ

᪓᪖᪕. ᩍᨲᩥᩉ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩥᨲ᩠ᩅᩣ ᩋᨶᩩᨾᩮᩣᨴᩥᨲ᩠ᩅᩣ ᨽᨣᩅᨶ᩠ᨲᩴ ᩏᨲ᩠ᨲᩁᩥᩴ ᨸᨬ᩠ᩉᩴ ᩋᨸᩩᨧ᩠ᨨᩥ –

‘‘ᨠᨳᩴ ᨸᨭᩥᨸᨶ᩠ᨶᩮᩣ ᨸᨶ, ᨾᩣᩁᩥᩈ, ᨽᩥᨠ᩠ᨡᩩ ᩍᨶ᩠ᨴᩕᩥᨿᩈᩴᩅᩁᩣᨿ ᨸᨭᩥᨸᨶ᩠ᨶᩮᩣ ᩉᩮᩣᨲᩦ’’ᨲᩥ? ‘‘ᨧᨠ᩠ᨡᩩᩅᩥᨬ᩠ᨬᩮᨿ᩠ᨿᩴ ᩁᩪᨸᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩥ. ᩈᩮᩣᨲᩅᩥᨬ᩠ᨬᩮᨿ᩠ᨿᩴ ᩈᨴ᩠ᨴᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩥ. ᨥᩣᨶᩅᩥᨬ᩠ᨬᩮᨿ᩠ᨿᩴ ᨣᨶ᩠ᨵᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩥ. ᨩᩥᩅ᩠ᩉᩣᩅᩥᨬ᩠ᨬᩮᨿ᩠ᨿᩴ ᩁᩈᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩥ. ᨠᩣᨿᩅᩥᨬ᩠ᨬᩮᨿ᩠ᨿᩴ ᨹᩮᩣᨭ᩠ᨮᨻ᩠ᨻᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩥ. ᨾᨶᩮᩣᩅᩥᨬ᩠ᨬᩮᨿ᩠ᨿᩴ ᨵᨾ᩠ᨾᩴᨸᩣᩉᩴ, ᨴᩮᩅᩣᨶᨾᩥᨶ᩠ᨴ, ᨴᩩᩅᩥᨵᩮᨶ ᩅᨴᩣᨾᩥ – ᩈᩮᩅᩥᨲᨻ᩠ᨻᨾ᩠ᨸᩥ, ᩋᩈᩮᩅᩥᨲᨻ᩠ᨻᨾ᩠ᨸᩦ’’ᨲᩥ.

ᩑᩅᩴ ᩅᩩᨲ᩠ᨲᩮ, ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ –

‘‘ᩍᨾᩔ ᨡᩮᩣ ᩋᩉᩴ, ᨽᨶ᩠ᨲᩮ, ᨽᨣᩅᨲᩣ ᩈᨦ᩠ᨡᩥᨲ᩠ᨲᩮᨶ ᨽᩣᩈᩥᨲᩔ ᩑᩅᩴ ᩅᩥᨲ᩠ᨳᩣᩁᩮᨶ ᩋᨲ᩠ᨳᩴ ᩌᨩᩣᨶᩣᨾᩥ. ᨿᨳᩣᩁᩪᨸᩴ, ᨽᨶ᩠ᨲᩮ, ᨧᨠ᩠ᨡᩩᩅᩥᨬ᩠ᨬᩮᨿ᩠ᨿᩴ ᩁᩪᨸᩴ ᩈᩮᩅᨲᩮᩣ ᩋᨠᩩᩈᩃᩣ ᨵᨾ᩠ᨾᩣ ᩋᨽᩥᩅᨯ᩠ᨰᨶ᩠ᨲᩥ, ᨠᩩᩈᩃᩣ ᨵᨾ᩠ᨾᩣ ᨸᩁᩥᩉᩣᨿᨶ᩠ᨲᩥ, ᩑᩅᩁᩪᨸᩴ ᨧᨠ᩠ᨡᩩᩅᩥᨬ᩠ᨬᩮᨿ᩠ᨿᩴ ᩁᩪᨸᩴ ᨶ ᩈᩮᩅᩥᨲᨻ᩠ᨻᩴ. ᨿᨳᩣᩁᩪᨸᨬ᩠ᨧ ᨡᩮᩣ, ᨽᨶ᩠ᨲᩮ, ᨧᨠ᩠ᨡᩩᩅᩥᨬ᩠ᨬᩮᨿ᩠ᨿᩴ ᩁᩪᨸᩴ ᩈᩮᩅᨲᩮᩣ ᩋᨠᩩᩈᩃᩣ ᨵᨾ᩠ᨾᩣ ᨸᩁᩥᩉᩣᨿᨶ᩠ᨲᩥ, ᨠᩩᩈᩃᩣ ᨵᨾ᩠ᨾᩣ ᩋᨽᩥᩅᨯ᩠ᨰᨶ᩠ᨲᩥ, ᩑᩅᩁᩪᨸᩴ ᨧᨠ᩠ᨡᩩᩅᩥᨬ᩠ᨬᩮᨿ᩠ᨿᩴ ᩁᩪᨸᩴ ᩈᩮᩅᩥᨲᨻ᩠ᨻᩴ. ᨿᨳᩣᩁᩪᨸᨬ᩠ᨧ ᨡᩮᩣ, ᨽᨶ᩠ᨲᩮ, ᩈᩮᩣᨲᩅᩥᨬ᩠ᨬᩮᨿ᩠ᨿᩴ ᩈᨴ᩠ᨴᩴ ᩈᩮᩅᨲᩮᩣ…ᨸᩮ… ᨥᩣᨶᩅᩥᨬ᩠ᨬᩮᨿ᩠ᨿᩴ ᨣᨶ᩠ᨵᩴ ᩈᩮᩅᨲᩮᩣ… ᨩᩥᩅ᩠ᩉᩣᩅᩥᨬ᩠ᨬᩮᨿ᩠ᨿᩴ ᩁᩈᩴ ᩈᩮᩅᨲᩮᩣ… ᨠᩣᨿᩅᩥᨬ᩠ᨬᩮᨿ᩠ᨿᩴ ᨹᩮᩣᨭ᩠ᨮᨻ᩠ᨻᩴ ᩈᩮᩅᨲᩮᩣ… ᨾᨶᩮᩣᩅᩥᨬ᩠ᨬᩮᨿ᩠ᨿᩴ ᨵᨾ᩠ᨾᩴ ᩈᩮᩅᨲᩮᩣ ᩋᨠᩩᩈᩃᩣ ᨵᨾ᩠ᨾᩣ ᩋᨽᩥᩅᨯ᩠ᨰᨶ᩠ᨲᩥ, ᨠᩩᩈᩃᩣ ᨵᨾ᩠ᨾᩣ ᨸᩁᩥᩉᩣᨿᨶ᩠ᨲᩥ, ᩑᩅᩁᩪᨸᩮᩣ ᨾᨶᩮᩣᩅᩥᨬ᩠ᨬᩮᨿ᩠ᨿᩮᩣ ᨵᨾ᩠ᨾᩮᩣ ᨶ ᩈᩮᩅᩥᨲᨻ᩠ᨻᩮᩣ. ᨿᨳᩣᩁᩪᨸᨬ᩠ᨧ ᨡᩮᩣ, ᨽᨶ᩠ᨲᩮ, ᨾᨶᩮᩣᩅᩥᨬ᩠ᨬᩮᨿ᩠ᨿᩴ ᨵᨾ᩠ᨾᩴ ᩈᩮᩅᨲᩮᩣ ᩋᨠᩩᩈᩃᩣ ᨵᨾ᩠ᨾᩣ ᨸᩁᩥᩉᩣᨿᨶ᩠ᨲᩥ, ᨠᩩᩈᩃᩣ ᨵᨾ᩠ᨾᩣ ᩋᨽᩥᩅᨯ᩠ᨰᨶ᩠ᨲᩥ, ᩑᩅᩁᩪᨸᩮᩣ ᨾᨶᩮᩣᩅᩥᨬ᩠ᨬᩮᨿ᩠ᨿᩮᩣ ᨵᨾ᩠ᨾᩮᩣ ᩈᩮᩅᩥᨲᨻ᩠ᨻᩮᩣ.

‘‘ᩍᨾᩔ ᨡᩮᩣ ᨾᩮ, ᨽᨶ᩠ᨲᩮ, ᨽᨣᩅᨲᩣ ᩈᨦ᩠ᨡᩥᨲ᩠ᨲᩮᨶ ᨽᩣᩈᩥᨲᩔ ᩑᩅᩴ ᩅᩥᨲ᩠ᨳᩣᩁᩮᨶ ᩋᨲ᩠ᨳᩴ ᩌᨩᩣᨶᨲᩮᩣ ᨲᩥᨱ᩠ᨱᩣ ᨾᩮᨲ᩠ᨳ ᨠᨦ᩠ᨡᩣ ᩅᩥᨣᨲᩣ ᨠᨳᩴᨠᨳᩣ ᨽᨣᩅᨲᩮᩣ ᨸᨬ᩠ᩉᩅᩮᨿ᩠ᨿᩣᨠᩁᨱᩴ ᩈᩩᨲ᩠ᩅᩣ’’ᨲᩥ.

᪓᪖᪖. ᩍᨲᩥᩉ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩥᨲ᩠ᩅᩣ ᩋᨶᩩᨾᩮᩣᨴᩥᨲ᩠ᩅᩣ ᨽᨣᩅᨶ᩠ᨲᩴ ᩏᨲ᩠ᨲᩁᩥᩴ ᨸᨬ᩠ᩉᩴ ᩋᨸᩩᨧ᩠ᨨᩥ –

‘‘ᩈᨻ᩠ᨻᩮᩅ ᨶᩩ ᨡᩮᩣ, ᨾᩣᩁᩥᩈ, ᩈᨾᨱᨻᩕᩣᩉ᩠ᨾᨱᩣ ᩑᨠᨶ᩠ᨲᩅᩣᨴᩣ ᩑᨠᨶ᩠ᨲᩈᩦᩃᩣ ᩑᨠᨶ᩠ᨲᨨᨶ᩠ᨴᩣ ᩑᨠᨶ᩠ᨲᩋᨩ᩠ᨫᩮᩣᩈᩣᨶᩣ’’ᨲᩥ? ‘‘ᨶ ᨡᩮᩣ, ᨴᩮᩅᩣᨶᨾᩥᨶ᩠ᨴ, ᩈᨻ᩠ᨻᩮ ᩈᨾᨱᨻᩕᩣᩉ᩠ᨾᨱᩣ ᩑᨠᨶ᩠ᨲᩅᩣᨴᩣ ᩑᨠᨶ᩠ᨲᩈᩦᩃᩣ ᩑᨠᨶ᩠ᨲᨨᨶ᩠ᨴᩣ ᩑᨠᨶ᩠ᨲᩋᨩ᩠ᨫᩮᩣᩈᩣᨶᩣ’’ᨲᩥ.

‘‘ᨠᩈ᩠ᨾᩣ ᨸᨶ, ᨾᩣᩁᩥᩈ, ᨶ ᩈᨻ᩠ᨻᩮ ᩈᨾᨱᨻᩕᩣᩉ᩠ᨾᨱᩣ ᩑᨠᨶ᩠ᨲᩅᩣᨴᩣ ᩑᨠᨶ᩠ᨲᩈᩦᩃᩣ ᩑᨠᨶ᩠ᨲᨨᨶ᩠ᨴᩣ ᩑᨠᨶ᩠ᨲᩋᨩ᩠ᨫᩮᩣᩈᩣᨶᩣ’’ᨲᩥ? ‘‘ᩋᨶᩮᨠᨵᩣᨲᩩ ᨶᩣᨶᩣᨵᩣᨲᩩ ᨡᩮᩣ, ᨴᩮᩅᩣᨶᨾᩥᨶ᩠ᨴ, ᩃᩮᩣᨠᩮᩣ. ᨲᩈ᩠ᨾᩥᩴ ᩋᨶᩮᨠᨵᩣᨲᩩᨶᩣᨶᩣᨵᩣᨲᩩᩈ᩠ᨾᩥᩴ ᩃᩮᩣᨠᩮ ᨿᩴ ᨿᨴᩮᩅ ᩈᨲ᩠ᨲᩣ ᨵᩣᨲᩩᩴ ᩋᨽᩥᨶᩥᩅᩥᩈᨶ᩠ᨲᩥ, ᨲᩴ ᨲᨴᩮᩅ ᨳᩣᨾᩈᩣ ᨸᩁᩣᨾᩣᩈᩣ ᩋᨽᩥᨶᩥᩅᩥᩔ ᩅᩮᩣᩉᩁᨶ᩠ᨲᩥ – ‘ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ. ᨲᩈ᩠ᨾᩣ ᨶ ᩈᨻ᩠ᨻᩮ ᩈᨾᨱᨻᩕᩣᩉ᩠ᨾᨱᩣ ᩑᨠᨶ᩠ᨲᩅᩣᨴᩣ ᩑᨠᨶ᩠ᨲᩈᩦᩃᩣ ᩑᨠᨶ᩠ᨲᨨᨶ᩠ᨴᩣ ᩑᨠᨶ᩠ᨲᩋᨩ᩠ᨫᩮᩣᩈᩣᨶᩣ’’ᨲᩥ.

‘‘ᩈᨻ᩠ᨻᩮᩅ ᨶᩩ ᨡᩮᩣ, ᨾᩣᩁᩥᩈ, ᩈᨾᨱᨻᩕᩣᩉ᩠ᨾᨱᩣ ᩋᨧ᩠ᨧᨶ᩠ᨲᨶᩥᨭ᩠ᨮᩣ ᩋᨧ᩠ᨧᨶ᩠ᨲᨿᩮᩣᨣᨠ᩠ᨡᩮᨾᩦ ᩋᨧ᩠ᨧᨶ᩠ᨲᨻᩕᩉ᩠ᨾᨧᩣᩁᩦ ᩋᨧ᩠ᨧᨶ᩠ᨲᨸᩁᩥᨿᩮᩣᩈᩣᨶᩣ’’ᨲᩥ? ‘‘ᨶ ᨡᩮᩣ, ᨴᩮᩅᩣᨶᨾᩥᨶ᩠ᨴ, ᩈᨻ᩠ᨻᩮ ᩈᨾᨱᨻᩕᩣᩉ᩠ᨾᨱᩣ ᩋᨧ᩠ᨧᨶ᩠ᨲᨶᩥᨭ᩠ᨮᩣ ᩋᨧ᩠ᨧᨶ᩠ᨲᨿᩮᩣᨣᨠ᩠ᨡᩮᨾᩦ ᩋᨧ᩠ᨧᨶ᩠ᨲᨻᩕᩉ᩠ᨾᨧᩣᩁᩦ ᩋᨧ᩠ᨧᨶ᩠ᨲᨸᩁᩥᨿᩮᩣᩈᩣᨶᩣ’’ᨲᩥ.

‘‘ᨠᩈ᩠ᨾᩣ ᨸᨶ, ᨾᩣᩁᩥᩈ, ᨶ ᩈᨻ᩠ᨻᩮ ᩈᨾᨱᨻᩕᩣᩉ᩠ᨾᨱᩣ ᩋᨧ᩠ᨧᨶ᩠ᨲᨶᩥᨭ᩠ᨮᩣ ᩋᨧ᩠ᨧᨶ᩠ᨲᨿᩮᩣᨣᨠ᩠ᨡᩮᨾᩦ ᩋᨧ᩠ᨧᨶ᩠ᨲᨻᩕᩉ᩠ᨾᨧᩣᩁᩦ ᩋᨧ᩠ᨧᨶ᩠ᨲᨸᩁᩥᨿᩮᩣᩈᩣᨶᩣ’’ᨲᩥ? ‘‘ᨿᩮ ᨡᩮᩣ, ᨴᩮᩅᩣᨶᨾᩥᨶ᩠ᨴ, ᨽᩥᨠ᩠ᨡᩪ ᨲᨱ᩠ᩉᩣᩈᨦ᩠ᨡᨿᩅᩥᨾᩩᨲ᩠ᨲᩣ ᨲᩮ ᩋᨧ᩠ᨧᨶ᩠ᨲᨶᩥᨭ᩠ᨮᩣ ᩋᨧ᩠ᨧᨶ᩠ᨲᨿᩮᩣᨣᨠ᩠ᨡᩮᨾᩦ ᩋᨧ᩠ᨧᨶ᩠ᨲᨻᩕᩉ᩠ᨾᨧᩣᩁᩦ ᩋᨧ᩠ᨧᨶ᩠ᨲᨸᩁᩥᨿᩮᩣᩈᩣᨶᩣ. ᨲᩈ᩠ᨾᩣ ᨶ ᩈᨻ᩠ᨻᩮ ᩈᨾᨱᨻᩕᩣᩉ᩠ᨾᨱᩣ ᩋᨧ᩠ᨧᨶ᩠ᨲᨶᩥᨭ᩠ᨮᩣ ᩋᨧ᩠ᨧᨶ᩠ᨲᨿᩮᩣᨣᨠ᩠ᨡᩮᨾᩦ ᩋᨧ᩠ᨧᨶ᩠ᨲᨻᩕᩉ᩠ᨾᨧᩣᩁᩦ ᩋᨧ᩠ᨧᨶ᩠ᨲᨸᩁᩥᨿᩮᩣᩈᩣᨶᩣ’’ᨲᩥ.

ᩍᨲ᩠ᨳᩴ ᨽᨣᩅᩣ ᩈᨠ᩠ᨠᩔ ᨴᩮᩅᩣᨶᨾᩥᨶ᩠ᨴᩔ ᨸᨬ᩠ᩉᩴ ᨸᩩᨭ᩠ᨮᩮᩣ ᨻ᩠ᨿᩣᨠᩣᩈᩥ. ᩋᨲ᩠ᨲᨾᨶᩮᩣ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩥ ᩋᨶᩩᨾᩮᩣᨴᩥ – ‘‘ᩑᩅᨾᩮᨲᩴ, ᨽᨣᩅᩣ, ᩑᩅᨾᩮᨲᩴ, ᩈᩩᨣᨲ. ᨲᩥᨱ᩠ᨱᩣ ᨾᩮᨲ᩠ᨳ ᨠᨦ᩠ᨡᩣ ᩅᩥᨣᨲᩣ ᨠᨳᩴᨠᨳᩣ ᨽᨣᩅᨲᩮᩣ ᨸᨬ᩠ᩉᩅᩮᨿ᩠ᨿᩣᨠᩁᨱᩴ ᩈᩩᨲ᩠ᩅᩣ’’ᨲᩥ.

᪓᪖᪗. ᩍᨲᩥᩉ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩥᨲ᩠ᩅᩣ ᩋᨶᩩᨾᩮᩣᨴᩥᨲ᩠ᩅᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ –

‘‘ᩑᨩᩣ, ᨽᨶ᩠ᨲᩮ, ᩁᩮᩣᨣᩮᩣ, ᩑᨩᩣ ᨣᨱ᩠ᨯᩮᩣ, ᩑᨩᩣ ᩈᩃ᩠ᩃᩴ, ᩑᨩᩣ ᩍᨾᩴ ᨸᩩᩁᩥᩈᩴ ᨸᩁᩥᨠᨯ᩠ᨰᨲᩥ ᨲᩔ ᨲᩔᩮᩅ ᨽᩅᩔ ᩋᨽᩥᨶᩥᨻ᩠ᨻᨲ᩠ᨲᩥᨿᩣ. ᨲᩈ᩠ᨾᩣ ᩋᨿᩴ ᨸᩩᩁᩥᩈᩮᩣ ᩏᨧ᩠ᨧᩣᩅᨧᨾᩣᨸᨩ᩠ᨩᨲᩥ. ᨿᩮᩈᩣᩉᩴ, ᨽᨶ᩠ᨲᩮ, ᨸᨬ᩠ᩉᩣᨶᩴ ᩍᨲᩮᩣ ᨻᩉᩥᨴ᩠ᨵᩣ ᩋᨬ᩠ᨬᩮᩈᩩ ᩈᨾᨱᨻᩕᩣᩉ᩠ᨾᨱᩮᩈᩩ ᩒᨠᩣᩈᨠᨾ᩠ᨾᨾ᩠ᨸᩥ ᨶᩣᩃᨲ᩠ᨳᩴ, ᨲᩮ ᨾᩮ ᨽᨣᩅᨲᩣ ᨻ᩠ᨿᩣᨠᨲᩣ. ᨴᩦᨥᩁᨲ᩠ᨲᩣᨶᩩᩈᨿᩥᨲᨬ᩠ᨧ ᨸᨶ [ᨴᩦᨥᩁᨲ᩠ᨲᩣᨶᩩᨸᩔᨲᩣ, ᨿᨬ᩠ᨧ ᨸᨶ (ᩈ᩠ᨿᩣ.), ᨴᩦᨥᩁᨲ᩠ᨲᩣᨶᩩᩈᨿᩥᨶᩮᩣ, ᨿᨬ᩠ᨧ ᨸᨶ (ᩈᩦ. ᨸᩦ.)] ᨾᩮ ᩅᩥᨧᩥᨠᩥᨧ᩠ᨨᩣᨠᨳᩴᨠᨳᩣᩈᩃ᩠ᩃᩴ, ᨲᨬ᩠ᨧ ᨽᨣᩅᨲᩣ ᩋᨻ᩠ᨻᩩᩊ᩠ᩉ’’ᨶ᩠ᨲᩥ.

‘‘ᩋᨽᩥᨩᩣᨶᩣᩈᩥ ᨶᩮᩣ ᨲ᩠ᩅᩴ, ᨴᩮᩅᩣᨶᨾᩥᨶ᩠ᨴ, ᩍᨾᩮ ᨸᨬ᩠ᩉᩮ ᩋᨬ᩠ᨬᩮ ᩈᨾᨱᨻᩕᩣᩉ᩠ᨾᨱᩮ ᨸᩩᨧ᩠ᨨᩥᨲᩣ’’ᨲᩥ? ‘‘ᩋᨽᩥᨩᩣᨶᩣᨾᩉᩴ, ᨽᨶ᩠ᨲᩮ, ᩍᨾᩮ ᨸᨬ᩠ᩉᩮ ᩋᨬ᩠ᨬᩮ ᩈᨾᨱᨻᩕᩣᩉ᩠ᨾᨱᩮ ᨸᩩᨧ᩠ᨨᩥᨲᩣ’’ᨲᩥ. ‘‘ᨿᨳᩣ ᨠᨳᩴ ᨸᨶ ᨲᩮ, ᨴᩮᩅᩣᨶᨾᩥᨶ᩠ᨴ, ᨻ᩠ᨿᩣᨠᩴᩈᩩ? ᩈᨧᩮ ᨲᩮ ᩋᨣᩁᩩ ᨽᩣᩈᩔᩪ’’ᨲᩥ. ‘‘ᨶ ᨡᩮᩣ ᨾᩮ, ᨽᨶ᩠ᨲᩮ, ᨣᩁᩩ ᨿᨲ᩠ᨳᩔ ᨽᨣᩅᩣ ᨶᩥᩈᩥᨶ᩠ᨶᩮᩣ ᨽᨣᩅᨶ᩠ᨲᩁᩪᨸᩮᩣ ᩅᩣ’’ᨲᩥ. ‘‘ᨲᩮᨶ ᩉᩥ, ᨴᩮᩅᩣᨶᨾᩥᨶ᩠ᨴ, ᨽᩣᩈᩔᩪ’’ᨲᩥ. ‘‘ᨿᩮᩈ᩠ᩅᩣᩉᩴ [ᨿᩮᩈᩣᩉᩴ (ᩈᩦ. ᩈ᩠ᨿᩣ. ᨸᩦ.)], ᨽᨶ᩠ᨲᩮ, ᨾᨬ᩠ᨬᩣᨾᩥ ᩈᨾᨱᨻᩕᩣᩉ᩠ᨾᨱᩣ ᩌᩁᨬ᩠ᨬᩥᨠᩣ ᨸᨶ᩠ᨲᩈᩮᨶᩣᩈᨶᩣᨲᩥ, ᨲ᩠ᨿᩣᩉᩴ ᩏᨸᩈᨦ᩠ᨠᨾᩥᨲ᩠ᩅᩣ ᩍᨾᩮ ᨸᨬ᩠ᩉᩮ ᨸᩩᨧ᩠ᨨᩣᨾᩥ, ᨲᩮ ᨾᨿᩣ ᨸᩩᨭ᩠ᨮᩣ ᨶ ᩈᨾ᩠ᨸᩣᨿᨶ᩠ᨲᩥ, ᩋᩈᨾ᩠ᨸᩣᨿᨶ᩠ᨲᩣ ᨾᨾᩴᨿᩮᩅ ᨸᨭᩥᨸᩩᨧ᩠ᨨᨶ᩠ᨲᩥ – ‘ᨠᩮᩣ ᨶᩣᨾᩮᩣ ᩌᨿᩈ᩠ᨾᩣ’ᨲᩥ? ᨲᩮᩈᩣᩉᩴ ᨸᩩᨭ᩠ᨮᩮᩣ ᨻ᩠ᨿᩣᨠᩁᩮᩣᨾᩥ – ‘ᩋᩉᩴ ᨡᩮᩣ, ᨾᩣᩁᩥᩈ, ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ’ᨲᩥ. ᨲᩮ ᨾᨾᩴᨿᩮᩅ ᩏᨲ᩠ᨲᩁᩥ ᨸᨭᩥᨸᩩᨧ᩠ᨨᨶ᩠ᨲᩥ – ‘ᨠᩥᩴ ᨸᨶᩣᨿᩈ᩠ᨾᩣ, ᨴᩮᩅᩣᨶᨾᩥᨶ᩠ᨴ [ᨴᩮᩅᩣᨶᨾᩥᨶ᩠ᨴᩮᩣ (ᩈᩦ. ᨸᩦ.)], ᨠᨾ᩠ᨾᩴ ᨠᨲ᩠ᩅᩣ ᩍᨾᩴ ᨮᩣᨶᩴ ᨸᨲ᩠ᨲᩮᩣ’ᨲᩥ? ᨲᩮᩈᩣᩉᩴ ᨿᨳᩣᩈᩩᨲᩴ ᨿᨳᩣᨸᩁᩥᨿᨲ᩠ᨲᩴ ᨵᨾ᩠ᨾᩴ ᨴᩮᩈᩮᨾᩥ. ᨲᩮ ᨲᩣᩅᨲᨠᩮᨶᩮᩅ ᩋᨲ᩠ᨲᨾᨶᩣ ᩉᩮᩣᨶ᩠ᨲᩥ – ‘ᩈᨠ᩠ᨠᩮᩣ ᨧ ᨶᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨴᩥᨭ᩠ᨮᩮᩣ, ᨿᨬ᩠ᨧ ᨶᩮᩣ ᩋᨸᩩᨧ᩠ᨨᩥᨾ᩠ᩉᩣ, ᨲᨬ᩠ᨧ ᨶᩮᩣ ᨻ᩠ᨿᩣᨠᩣᩈᩦ’ᨲᩥ. ᨲᩮ ᩋᨬ᩠ᨬᨴᨲ᩠ᨳᩩ ᨾᨾᩴᨿᩮᩅ ᩈᩣᩅᨠᩣ ᩈᨾ᩠ᨸᨩ᩠ᨩᨶ᩠ᨲᩥ, ᨶ ᨧᩣᩉᩴ ᨲᩮᩈᩴ. ᩋᩉᩴ ᨡᩮᩣ ᨸᨶ, ᨽᨶ᩠ᨲᩮ, ᨽᨣᩅᨲᩮᩣ ᩈᩣᩅᨠᩮᩣ ᩈᩮᩣᨲᩣᨸᨶ᩠ᨶᩮᩣ ᩋᩅᩥᨶᩥᨸᩣᨲᨵᨾ᩠ᨾᩮᩣ ᨶᩥᨿᨲᩮᩣ ᩈᨾ᩠ᨻᩮᩣᨵᩥᨸᩁᩣᨿᨱᩮᩣ’’ᨲᩥ.

ᩈᩮᩣᨾᨶᩔᨸᨭᩥᩃᩣᨽᨠᨳᩣ

᪓᪖᪘. ‘‘ᩋᨽᩥᨩᩣᨶᩣᩈᩥ ᨶᩮᩣ ᨲ᩠ᩅᩴ, ᨴᩮᩅᩣᨶᨾᩥᨶ᩠ᨴ, ᩍᨲᩮᩣ ᨸᩩᨻ᩠ᨻᩮ ᩑᩅᩁᩪᨸᩴ ᩅᩮᨴᨸᨭᩥᩃᩣᨽᩴ ᩈᩮᩣᨾᨶᩔᨸᨭᩥᩃᩣᨽ’’ᨶ᩠ᨲᩥ? ‘‘ᩋᨽᩥᨩᩣᨶᩣᨾᩉᩴ, ᨽᨶ᩠ᨲᩮ, ᩍᨲᩮᩣ ᨸᩩᨻ᩠ᨻᩮ ᩑᩅᩁᩪᨸᩴ ᩅᩮᨴᨸᨭᩥᩃᩣᨽᩴ ᩈᩮᩣᨾᨶᩔᨸᨭᩥᩃᩣᨽ’’ᨶ᩠ᨲᩥ. ‘‘ᨿᨳᩣ ᨠᨳᩴ ᨸᨶ ᨲ᩠ᩅᩴ, ᨴᩮᩅᩣᨶᨾᩥᨶ᩠ᨴ, ᩋᨽᩥᨩᩣᨶᩣᩈᩥ ᩍᨲᩮᩣ ᨸᩩᨻ᩠ᨻᩮ ᩑᩅᩁᩪᨸᩴ ᩅᩮᨴᨸᨭᩥᩃᩣᨽᩴ ᩈᩮᩣᨾᨶᩔᨸᨭᩥᩃᩣᨽ’’ᨶ᩠ᨲᩥ?

‘‘ᨽᩪᨲᨸᩩᨻ᩠ᨻᩴ, ᨽᨶ᩠ᨲᩮ, ᨴᩮᩅᩣᩈᩩᩁᩈᨦ᩠ᨣᩣᨾᩮᩣ ᩈᨾᩩᨸᨻ᩠ᨿᩪᩊ᩠ᩉᩮᩣ [ᩈᨾᩪᨸᨻ᩠ᨻᩩᩊ᩠ᩉᩮᩣ (ᩈᩦ. ᨸᩦ.)] ᩋᩉᩮᩣᩈᩥ. ᨲᩈ᩠ᨾᩥᩴ ᨡᩮᩣ ᨸᨶ, ᨽᨶ᩠ᨲᩮ, ᩈᨦ᩠ᨣᩣᨾᩮ ᨴᩮᩅᩣ ᨩᩥᨶᩥᩴᩈᩩ, ᩋᩈᩩᩁᩣ ᨸᩁᩣᨩᨿᩥᩴᩈᩩ [ᨸᩁᩣᨩᩥᩴᩈᩩ (ᩈᩦ. ᨸᩦ.)]. ᨲᩔ ᨾᨿ᩠ᩉᩴ, ᨽᨶ᩠ᨲᩮ, ᨲᩴ ᩈᨦ᩠ᨣᩣᨾᩴ ᩋᨽᩥᩅᩥᨩᩥᨶᩥᨲ᩠ᩅᩣ ᩅᩥᨩᩥᨲᩈᨦ᩠ᨣᩣᨾᩔ ᩑᨲᨴᩉᩮᩣᩈᩥ – ‘ᨿᩣ ᨧᩮᩅ ᨴᩣᨶᩥ ᨴᩥᨻ᩠ᨻᩣ ᩒᨩᩣ ᨿᩣ ᨧ ᩋᩈᩩᩁᩣ ᩒᨩᩣ, ᩏᨽᨿᨾᩮᨲᩴ [ᩏᨽᨿᨾᩮᨲ᩠ᨳ (ᩈ᩠ᨿᩣ.)] ᨴᩮᩅᩣ ᨸᩁᩥᨽᩩᨬ᩠ᨩᩥᩔᨶ᩠ᨲᩦ’ᨲᩥ. ᩈᩮᩣ ᨡᩮᩣ ᨸᨶ ᨾᩮ, ᨽᨶ᩠ᨲᩮ, ᩅᩮᨴᨸᨭᩥᩃᩣᨽᩮᩣ ᩈᩮᩣᨾᨶᩔᨸᨭᩥᩃᩣᨽᩮᩣ ᩈᨴᨱ᩠ᨯᩣᩅᨧᩁᩮᩣ ᩈᩈᨲ᩠ᨳᩣᩅᨧᩁᩮᩣ ᨶ ᨶᩥᨻ᩠ᨻᩥᨴᩣᨿ ᨶ ᩅᩥᩁᩣᨣᩣᨿ ᨶ ᨶᩥᩁᩮᩣᨵᩣᨿ ᨶ ᩏᨸᩈᨾᩣᨿ ᨶ ᩋᨽᩥᨬ᩠ᨬᩣᨿ ᨶ ᩈᨾ᩠ᨻᩮᩣᨵᩣᨿ ᨶ ᨶᩥᨻ᩠ᨻᩣᨶᩣᨿ ᩈᩴᩅᨲ᩠ᨲᨲᩥ. ᨿᩮᩣ ᨡᩮᩣ ᨸᨶ ᨾᩮ ᩋᨿᩴ, ᨽᨶ᩠ᨲᩮ, ᨽᨣᩅᨲᩮᩣ ᨵᨾ᩠ᨾᩴ ᩈᩩᨲ᩠ᩅᩣ ᩅᩮᨴᨸᨭᩥᩃᩣᨽᩮᩣ ᩈᩮᩣᨾᨶᩔᨸᨭᩥᩃᩣᨽᩮᩣ, ᩈᩮᩣ ᩋᨴᨱ᩠ᨯᩣᩅᨧᩁᩮᩣ ᩋᩈᨲ᩠ᨳᩣᩅᨧᩁᩮᩣ ᩑᨠᨶ᩠ᨲᨶᩥᨻ᩠ᨻᩥᨴᩣᨿ ᩅᩥᩁᩣᨣᩣᨿ ᨶᩥᩁᩮᩣᨵᩣᨿ ᩏᨸᩈᨾᩣᨿ ᩋᨽᩥᨬ᩠ᨬᩣᨿ ᩈᨾ᩠ᨻᩮᩣᨵᩣᨿ ᨶᩥᨻ᩠ᨻᩣᨶᩣᨿ ᩈᩴᩅᨲ᩠ᨲᨲᩦ’’ᨲᩥ.

᪓᪖᪙. ‘‘ᨠᩥᩴ ᨸᨶ ᨲ᩠ᩅᩴ, ᨴᩮᩅᩣᨶᨾᩥᨶ᩠ᨴ, ᩋᨲ᩠ᨳᩅᩈᩴ ᩈᨾ᩠ᨸᩔᨾᩣᨶᩮᩣ ᩑᩅᩁᩪᨸᩴ ᩅᩮᨴᨸᨭᩥᩃᩣᨽᩴ ᩈᩮᩣᨾᨶᩔᨸᨭᩥᩃᩣᨽᩴ ᨸᩅᩮᨴᩮᩈᩦ’’ᨲᩥ? ‘‘ᨨ ᨡᩮᩣ ᩋᩉᩴ, ᨽᨶ᩠ᨲᩮ, ᩋᨲ᩠ᨳᩅᩈᩮ ᩈᨾ᩠ᨸᩔᨾᩣᨶᩮᩣ ᩑᩅᩁᩪᨸᩴ ᩅᩮᨴᨸᨭᩥᩃᩣᨽᩴ ᩈᩮᩣᨾᨶᩔᨸᨭᩥᩃᩣᨽᩴ ᨸᩅᩮᨴᩮᨾᩥ.

‘‘ᩍᨵᩮᩅ ᨲᩥᨭ᩠ᨮᨾᩣᨶᩔ, ᨴᩮᩅᨽᩪᨲᩔ ᨾᩮ ᩈᨲᩮᩣ;

ᨸᩩᨶᩁᩣᨿᩩ ᨧ ᨾᩮ ᩃᨴ᩠ᨵᩮᩣ, ᩑᩅᩴ ᨩᩣᨶᩣᩉᩥ ᨾᩣᩁᩥᩈ.

‘‘ᩍᨾᩴ ᨡᩮᩣ ᩋᩉᩴ, ᨽᨶ᩠ᨲᩮ, ᨸᨮᨾᩴ ᩋᨲ᩠ᨳᩅᩈᩴ ᩈᨾ᩠ᨸᩔᨾᩣᨶᩮᩣ ᩑᩅᩁᩪᨸᩴ ᩅᩮᨴᨸᨭᩥᩃᩣᨽᩴ ᩈᩮᩣᨾᨶᩔᨸᨭᩥᩃᩣᨽᩴ ᨸᩅᩮᨴᩮᨾᩥ.

‘‘ᨧᩩᨲᩣᩉᩴ ᨴᩥᩅᩥᨿᩣ ᨠᩣᨿᩣ, ᩌᨿᩩᩴ ᩉᩥᨲ᩠ᩅᩣ ᩋᨾᩣᨶᩩᩈᩴ;

ᩋᨾᩪᩊ᩠ᩉᩮᩣ ᨣᨻ᩠ᨽᨾᩮᩔᩣᨾᩥ, ᨿᨲ᩠ᨳ ᨾᩮ ᩁᨾᨲᩦ ᨾᨶᩮᩣ.

‘‘ᩍᨾᩴ ᨡᩮᩣ ᩋᩉᩴ, ᨽᨶ᩠ᨲᩮ, ᨴᩩᨲᩥᨿᩴ ᩋᨲ᩠ᨳᩅᩈᩴ ᩈᨾ᩠ᨸᩔᨾᩣᨶᩮᩣ ᩑᩅᩁᩪᨸᩴ ᩅᩮᨴᨸᨭᩥᩃᩣᨽᩴ ᩈᩮᩣᨾᨶᩔᨸᨭᩥᩃᩣᨽᩴ ᨸᩅᩮᨴᩮᨾᩥ.

‘‘ᩈ᩠ᩅᩣᩉᩴ ᩋᨾᩪᩊ᩠ᩉᨸᨬ᩠ᨬᩔ [ᩋᨾᩪᩊ᩠ᩉᨸᨬ᩠ᩉᩔ (?)], ᩅᩥᩉᩁᩴ ᩈᩣᩈᨶᩮ ᩁᨲᩮᩣ;

ᨬᩣᨿᩮᨶ ᩅᩥᩉᩁᩥᩔᩣᨾᩥ, ᩈᨾ᩠ᨸᨩᩣᨶᩮᩣ ᨸᨭᩥᩔᨲᩮᩣ.

‘‘ᩍᨾᩴ ᨡᩮᩣ ᩋᩉᩴ, ᨽᨶ᩠ᨲᩮ, ᨲᨲᩥᨿᩴ ᩋᨲ᩠ᨳᩅᩈᩴ ᩈᨾ᩠ᨸᩔᨾᩣᨶᩮᩣ ᩑᩅᩁᩪᨸᩴ ᩅᩮᨴᨸᨭᩥᩃᩣᨽᩴ ᩈᩮᩣᨾᨶᩔᨸᨭᩥᩃᩣᨽᩴ ᨸᩅᩮᨴᩮᨾᩥ.

‘‘ᨬᩣᨿᩮᨶ ᨾᩮ ᨧᩁᨲᩮᩣ ᨧ, ᩈᨾ᩠ᨻᩮᩣᨵᩥ ᨧᩮ ᨽᩅᩥᩔᨲᩥ;

ᩋᨬ᩠ᨬᩣᨲᩣ ᩅᩥᩉᩁᩥᩔᩣᨾᩥ, ᩈ᩠ᩅᩮᩅ ᩋᨶ᩠ᨲᩮᩣ ᨽᩅᩥᩔᨲᩥ.

‘‘ᩍᨾᩴ ᨡᩮᩣ ᩋᩉᩴ, ᨽᨶ᩠ᨲᩮ, ᨧᨲᩩᨲ᩠ᨳᩴ ᩋᨲ᩠ᨳᩅᩈᩴ ᩈᨾ᩠ᨸᩔᨾᩣᨶᩮᩣ ᩑᩅᩁᩪᨸᩴ ᩅᩮᨴᨸᨭᩥᩃᩣᨽᩴ ᩈᩮᩣᨾᨶᩔᨸᨭᩥᩃᩣᨽᩴ ᨸᩅᩮᨴᩮᨾᩥ.

‘‘ᨧᩩᨲᩣᩉᩴ ᨾᩣᨶᩩᩈᩣ ᨠᩣᨿᩣ, ᩌᨿᩩᩴ ᩉᩥᨲ᩠ᩅᩣᨶ ᨾᩣᨶᩩᩈᩴ;

ᨸᩩᨶ ᨴᩮᩅᩮᩣ ᨽᩅᩥᩔᩣᨾᩥ, ᨴᩮᩅᩃᩮᩣᨠᨾ᩠ᩉᩥ ᩏᨲ᩠ᨲᨾᩮᩣ.

‘‘ᩍᨾᩴ ᨡᩮᩣ ᩋᩉᩴ, ᨽᨶ᩠ᨲᩮ, ᨸᨬ᩠ᨧᨾᩴ ᩋᨲ᩠ᨳᩅᩈᩴ ᩈᨾ᩠ᨸᩔᨾᩣᨶᩮᩣ ᩑᩅᩁᩪᨸᩴ ᩅᩮᨴᨸᨭᩥᩃᩣᨽᩴ ᩈᩮᩣᨾᨶᩔᨸᨭᩥᩃᩣᨽᩴ ᨸᩅᩮᨴᩮᨾᩥ.

‘‘ᨲᩮ [ᨿᩮ (?)] ᨸᨱᩦᨲᨲᩁᩣ ᨴᩮᩅᩣ, ᩋᨠᨶᩥᨭ᩠ᨮᩣ ᨿᩈᩔᩥᨶᩮᩣ;

ᩋᨶ᩠ᨲᩥᨾᩮ ᩅᨲ᩠ᨲᨾᩣᨶᨾ᩠ᩉᩥ, ᩈᩮᩣ ᨶᩥᩅᩣᩈᩮᩣ ᨽᩅᩥᩔᨲᩥ.

‘‘ᩍᨾᩴ ᨡᩮᩣ ᩋᩉᩴ, ᨽᨶ᩠ᨲᩮ, ᨨᨭ᩠ᨮᩴ ᩋᨲ᩠ᨳᩅᩈᩴ ᩈᨾ᩠ᨸᩔᨾᩣᨶᩮᩣ ᩑᩅᩁᩪᨸᩴ ᩅᩮᨴᨸᨭᩥᩃᩣᨽᩴ ᩈᩮᩣᨾᨶᩔᨸᨭᩥᩃᩣᨽᩴ ᨸᩅᩮᨴᩮᨾᩥ.

‘‘ᩍᨾᩮ ᨡᩮᩣ ᩋᩉᩴ, ᨽᨶ᩠ᨲᩮ, ᨨ ᩋᨲ᩠ᨳᩅᩈᩮ ᩈᨾ᩠ᨸᩔᨾᩣᨶᩮᩣ ᩑᩅᩁᩪᨸᩴ ᩅᩮᨴᨸᨭᩥᩃᩣᨽᩴ ᩈᩮᩣᨾᨶᩔᨸᨭᩥᩃᩣᨽᩴ ᨸᩅᩮᨴᩮᨾᩥ.

᪓᪗᪐. ‘‘ᩋᨸᩁᩥᨿᩮᩣᩈᩥᨲᩈᨦ᩠ᨠᨸ᩠ᨸᩮᩣ, ᩅᩥᨧᩥᨠᩥᨧ᩠ᨨᩮᩣ ᨠᨳᩴᨠᨳᩦ.

ᩅᩥᨧᩁᩥᩴ ᨴᩦᨥᨾᨴ᩠ᨵᩣᨶᩴ, ᩋᨶ᩠ᩅᩮᩈᨶ᩠ᨲᩮᩣ ᨲᨳᩣᨣᨲᩴ.

‘‘ᨿᩔᩩ ᨾᨬ᩠ᨬᩣᨾᩥ ᩈᨾᨱᩮ, ᨸᩅᩥᩅᩥᨲ᩠ᨲᩅᩥᩉᩣᩁᩥᨶᩮᩣ;

ᩈᨾ᩠ᨻᩩᨴ᩠ᨵᩣ ᩍᨲᩥ ᨾᨬ᩠ᨬᩣᨶᩮᩣ, ᨣᨧ᩠ᨨᩣᨾᩥ ᨲᩮ ᩏᨸᩣᩈᩥᨲᩩᩴ.

‘‘‘ᨠᨳᩴ ᩌᩁᩣᨵᨶᩣ ᩉᩮᩣᨲᩥ, ᨠᨳᩴ ᩉᩮᩣᨲᩥ ᩅᩥᩁᩣᨵᨶᩣ’;

ᩍᨲᩥ ᨸᩩᨭ᩠ᨮᩣ ᨶ ᩈᨾ᩠ᨸᩣᨿᨶ᩠ᨲᩥ [ᩈᨾ᩠ᨽᩮᩣᨶ᩠ᨲᩥ (ᩈ᩠ᨿᩣ.)], ᨾᨣ᩠ᨣᩮ ᨸᨭᩥᨸᨴᩣᩈᩩ ᨧ.

‘‘ᨲ᩠ᨿᩔᩩ ᨿᨴᩣ ᨾᩴ ᨩᩣᨶᨶ᩠ᨲᩥ, ᩈᨠ᩠ᨠᩮᩣ ᨴᩮᩅᩣᨶᨾᩣᨣᨲᩮᩣ;

ᨲ᩠ᨿᩔᩩ ᨾᨾᩮᩅ ᨸᩩᨧ᩠ᨨᨶ᩠ᨲᩥ, ‘ᨠᩥᩴ ᨠᨲ᩠ᩅᩣ ᨸᩣᨸᩩᨱᩦ ᩍᨴᩴ’.

‘‘ᨲᩮᩈᩴ ᨿᨳᩣᩈᩩᨲᩴ ᨵᨾ᩠ᨾᩴ, ᨴᩮᩈᨿᩣᨾᩥ ᨩᨶᩮ ᩈᩩᨲᩴ [ᨩᨶᩮᩈᩩᨲ (ᨠ. ᩈᩦ.)];

ᨲᩮᨶ ᩋᨲ᩠ᨲᨾᨶᩣ ᩉᩮᩣᨶ᩠ᨲᩥ, ‘ᨴᩥᨭ᩠ᨮᩮᩣ ᨶᩮᩣ ᩅᩣᩈᩅᩮᩣᨲᩥ ᨧ’.

‘‘ᨿᨴᩣ ᨧ ᨻᩩᨴ᩠ᨵᨾᨴ᩠ᨴᨠ᩠ᨡᩥᩴ, ᩅᩥᨧᩥᨠᩥᨧ᩠ᨨᩣᩅᩥᨲᩣᩁᨱᩴ;

ᩈᩮᩣᨾ᩠ᩉᩥ ᩅᩦᨲᨽᨿᩮᩣ ᩋᨩ᩠ᨩ, ᩈᨾ᩠ᨻᩩᨴ᩠ᨵᩴ ᨸᨿᩥᩁᩩᨸᩣᩈᩥᨿ [ᨸᨿᩥᩁᩩᨸᩣᩈᨿᩥᩴ (ᩈ᩠ᨿᩣ. ᨠ.)].

‘‘ᨲᨱ᩠ᩉᩣᩈᩃ᩠ᩃᩔ ᩉᨶ᩠ᨲᩣᩁᩴ, ᨻᩩᨴ᩠ᨵᩴ ᩋᨸ᩠ᨸᨭᩥᨸᩩᨣ᩠ᨣᩃᩴ;

ᩋᩉᩴ ᩅᨶ᩠ᨴᩮ ᨾᩉᩣᩅᩦᩁᩴ, ᨻᩩᨴ᩠ᨵᨾᩣᨴᩥᨧ᩠ᨧᨻᨶ᩠ᨵᩩᨶᩴ.

‘‘ᨿᩴ ᨠᩁᩮᩣᨾᩈᩥ ᨻᩕᩉ᩠ᨾᩩᨶᩮᩣ, ᩈᨾᩴ ᨴᩮᩅᩮᩉᩥ ᨾᩣᩁᩥᩈ;

ᨲᨴᨩ᩠ᨩ ᨲᩩᨿ᩠ᩉᩴ ᨠᩔᩣᨾ [ᨴᩔᩣᨾ (ᩈ᩠ᨿᩣ. ᨠ.)], ᩉᨶ᩠ᨴ ᩈᩣᨾᩴ ᨠᩁᩮᩣᨾ ᨲᩮ.

‘‘ᨲ᩠ᩅᨾᩮᩅ ᩋᩈᩥ [ᨲᩩᩅᨾᩮᩅᩈᩥ (ᨸᩦ.)] ᩈᨾ᩠ᨻᩩᨴ᩠ᨵᩮᩣ, ᨲᩩᩅᩴ ᩈᨲ᩠ᨳᩣ ᩋᨶᩩᨲ᩠ᨲᩁᩮᩣ;

ᩈᨴᩮᩅᨠᩈ᩠ᨾᩥᩴ ᩃᩮᩣᨠᩈ᩠ᨾᩥᩴ, ᨶᨲ᩠ᨳᩥ ᨲᩮ ᨸᨭᩥᨸᩩᨣ᩠ᨣᩃᩮᩣ’’ᨲᩥ.

᪓᪗᪑. ᩋᨳ ᨡᩮᩣ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨸᨬ᩠ᨧᩈᩥᨡᩴ ᨣᨶ᩠ᨵᨻ᩠ᨻᨸᩩᨲ᩠ᨲᩴ ᩌᨾᨶ᩠ᨲᩮᩈᩥ – ‘‘ᨻᩉᩪᨸᨠᩣᩁᩮᩣ ᨡᩮᩣ ᨾᩮᩈᩥ ᨲ᩠ᩅᩴ, ᨲᩣᨲ ᨸᨬ᩠ᨧᩈᩥᨡ, ᨿᩴ ᨲ᩠ᩅᩴ ᨽᨣᩅᨶ᩠ᨲᩴ ᨸᨮᨾᩴ ᨸᩈᩣᨴᩮᩈᩥ. ᨲᨿᩣ, ᨲᩣᨲ, ᨸᨮᨾᩴ ᨸᩈᩣᨴᩥᨲᩴ ᨸᨧ᩠ᨨᩣ ᨾᨿᩴ ᨲᩴ ᨽᨣᩅᨶ᩠ᨲᩴ ᨴᩔᨶᩣᨿ ᩏᨸᩈᨦ᩠ᨠᨾᩥᨾ᩠ᩉᩣ ᩋᩁᩉᨶ᩠ᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ. ᨸᩮᨲ᩠ᨲᩥᨠᩮ ᩅᩣ ᨮᩣᨶᩮ ᨮᨸᨿᩥᩔᩣᨾᩥ, ᨣᨶ᩠ᨵᨻ᩠ᨻᩁᩣᨩᩣ ᨽᩅᩥᩔᩈᩥ, ᨽᨴ᩠ᨴᨬ᩠ᨧ ᨲᩮ ᩈᩪᩁᩥᨿᩅᨧ᩠ᨨᩈᩴ ᨴᨾ᩠ᨾᩥ, ᩈᩣ ᩉᩥ ᨲᩮ ᩋᨽᩥᨸᨲ᩠ᨳᩥᨲᩣ’’ᨲᩥ.

ᩋᨳ ᨡᩮᩣ ᩈᨠ᩠ᨠᩮᩣ ᨴᩮᩅᩣᨶᨾᩥᨶ᩠ᨴᩮᩣ ᨸᩣᨱᩥᨶᩣ ᨸᨳᩅᩥᩴ ᨸᩁᩣᨾᩈᩥᨲ᩠ᩅᩣ ᨲᩥᨠ᩠ᨡᨲ᩠ᨲᩩᩴ ᩏᨴᩣᨶᩴ ᩏᨴᩣᨶᩮᩈᩥ – ‘‘ᨶᨾᩮᩣ ᨲᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔᩣ’’ᨲᩥ.

ᩍᨾᩈ᩠ᨾᩥᨬ᩠ᨧ ᨸᨶ ᩅᩮᨿ᩠ᨿᩣᨠᩁᨱᩈ᩠ᨾᩥᩴ ᨽᨬ᩠ᨬᨾᩣᨶᩮ ᩈᨠ᩠ᨠᩔ ᨴᩮᩅᩣᨶᨾᩥᨶ᩠ᨴᩔ ᩅᩥᩁᨩᩴ ᩅᩦᨲᨾᩃᩴ ᨵᨾ᩠ᨾᨧᨠ᩠ᨡᩩᩴ ᩏᨴᨸᩣᨴᩥ – ‘‘ᨿᩴ ᨠᩥᨬ᩠ᨧᩥ ᩈᨾᩩᨴᨿᨵᨾ᩠ᨾᩴ, ᩈᨻ᩠ᨻᩴ ᨲᩴ ᨶᩥᩁᩮᩣᨵᨵᨾ᩠ᨾ’’ᨶ᩠ᨲᩥ. ᩋᨬ᩠ᨬᩮᩈᨬ᩠ᨧ ᩋᩈᩦᨲᩥᨿᩣ ᨴᩮᩅᨲᩣᩈᩉᩔᩣᨶᩴ, ᩍᨲᩥ ᨿᩮ ᩈᨠ᩠ᨠᩮᨶ ᨴᩮᩅᩣᨶᨾᩥᨶ᩠ᨴᩮᨶ ᩋᨩ᩠ᨫᩥᨭ᩠ᨮᨸᨬ᩠ᩉᩣ ᨸᩩᨭ᩠ᨮᩣ, ᨲᩮ ᨽᨣᩅᨲᩣ ᨻ᩠ᨿᩣᨠᨲᩣ. ᨲᩈ᩠ᨾᩣ ᩍᨾᩔ ᩅᩮᨿ᩠ᨿᩣᨠᩁᨱᩔ ᩈᨠ᩠ᨠᨸᨬ᩠ᩉᩣᨲ᩠ᩅᩮᩅ ᩋᨵᩥᩅᨧᨶᨶ᩠ᨲᩥ.

ᩈᨠ᩠ᨠᨸᨬ᩠ᩉᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᩋᨭ᩠ᨮᨾᩴ.

᪙. ᨾᩉᩣᩈᨲᩥᨸᨭ᩠ᨮᩣᨶᩈᩩᨲ᩠ᨲᩴ

᪓᪗᪒. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᨠᩩᩁᩪᩈᩩ ᩅᩥᩉᩁᨲᩥ ᨠᨾ᩠ᨾᩣᩈᨵᨾ᩠ᨾᩴ ᨶᩣᨾ ᨠᩩᩁᩪᨶᩴ ᨶᩥᨣᨾᩮᩣ. ᨲᨲᩕ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᨽᩥᨠ᩠ᨡᩅᩮᩣ’’ᨲᩥ. ‘‘ᨽᨴ᩠ᨴᨶ᩠ᨲᩮ’’ᨲᩥ [ᨽᨴᨶ᩠ᨲᩮᨲᩥ (ᩈᩦ. ᩈ᩠ᨿᩣ. ᨸᩦ.)] ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩩᩴ. ᨽᨣᩅᩣ ᩑᨲᨴᩅᩮᩣᨧ –

ᩏᨴ᩠ᨴᩮᩈᩮᩣ

᪓᪗᪓. ‘‘ᩑᨠᩣᨿᨶᩮᩣ ᩋᨿᩴ, ᨽᩥᨠ᩠ᨡᩅᩮ, ᨾᨣ᩠ᨣᩮᩣ ᩈᨲ᩠ᨲᩣᨶᩴ ᩅᩥᩈᩩᨴ᩠ᨵᩥᨿᩣ, ᩈᩮᩣᨠᨸᩁᩥᨴᩮᩅᩣᨶᩴ ᩈᨾᨲᩥᨠ᩠ᨠᨾᩣᨿ ᨴᩩᨠ᩠ᨡᨴᩮᩣᨾᨶᩔᩣᨶᩴ ᩋᨲ᩠ᨳᨦ᩠ᨣᨾᩣᨿ ᨬᩣᨿᩔ ᩋᨵᩥᨣᨾᩣᨿ ᨶᩥᨻ᩠ᨻᩣᨶᩔ ᩈᨧ᩠ᨨᩥᨠᩥᩁᩥᨿᩣᨿ, ᨿᨴᩥᨴᩴ ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩣ.

‘‘ᨠᨲᨾᩮ ᨧᨲ᩠ᨲᩣᩁᩮᩣ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ, ᩅᩮᨴᨶᩣᩈᩩ ᩅᩮᨴᨶᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ, ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ, ᨧᩥᨲ᩠ᨲᩮ ᨧᩥᨲ᩠ᨲᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ, ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ.

ᩏᨴ᩠ᨴᩮᩈᩮᩣ ᨶᩥᨭ᩠ᨮᩥᨲᩮᩣ.

ᨠᩣᨿᩣᨶᩩᨸᩔᨶᩣ ᩌᨶᩣᨸᩣᨶᨸᨻ᩠ᨻᩴ

᪓᪗᪔. ‘‘ᨠᨳᨬ᩠ᨧ ᨸᨶ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩋᩁᨬ᩠ᨬᨣᨲᩮᩣ ᩅᩣ ᩁᩩᨠ᩠ᨡᨾᩪᩃᨣᨲᩮᩣ ᩅᩣ ᩈᩩᨬ᩠ᨬᩣᨣᩣᩁᨣᨲᩮᩣ ᩅᩣ ᨶᩥᩈᩦᨴᨲᩥ ᨸᩃ᩠ᩃᨦ᩠ᨠᩴ ᩌᨽᩩᨩᩥᨲ᩠ᩅᩣ ᩏᨩᩩᩴ ᨠᩣᨿᩴ ᨸᨱᩥᨵᩣᨿ ᨸᩁᩥᨾᩩᨡᩴ ᩈᨲᩥᩴ ᩏᨸᨭ᩠ᨮᨸᩮᨲ᩠ᩅᩣ. ᩈᩮᩣ ᩈᨲᩮᩣᩅ ᩋᩔᩈᨲᩥ, ᩈᨲᩮᩣᩅ ᨸᩔᩈᨲᩥ. ᨴᩦᨥᩴ ᩅᩣ ᩋᩔᩈᨶ᩠ᨲᩮᩣ ‘ᨴᩦᨥᩴ ᩋᩔᩈᩣᨾᩦ’ᨲᩥ ᨸᨩᩣᨶᩣᨲᩥ, ᨴᩦᨥᩴ ᩅᩣ ᨸᩔᩈᨶ᩠ᨲᩮᩣ ‘ᨴᩦᨥᩴ ᨸᩔᩈᩣᨾᩦ’ᨲᩥ ᨸᨩᩣᨶᩣᨲᩥ. ᩁᩔᩴ ᩅᩣ ᩋᩔᩈᨶ᩠ᨲᩮᩣ ‘ᩁᩔᩴ ᩋᩔᩈᩣᨾᩦ’ᨲᩥ ᨸᨩᩣᨶᩣᨲᩥ, ᩁᩔᩴ ᩅᩣ ᨸᩔᩈᨶ᩠ᨲᩮᩣ ‘ᩁᩔᩴ ᨸᩔᩈᩣᨾᩦ’ᨲᩥ ᨸᨩᩣᨶᩣᨲᩥ. ‘ᩈᨻ᩠ᨻᨠᩣᨿᨸᨭᩥᩈᩴᩅᩮᨴᩦ ᩋᩔᩈᩥᩔᩣᨾᩦ’ᨲᩥ ᩈᩥᨠ᩠ᨡᨲᩥ, ‘ᩈᨻ᩠ᨻᨠᩣᨿᨸᨭᩥᩈᩴᩅᩮᨴᩦ ᨸᩔᩈᩥᩔᩣᨾᩦ’ᨲᩥ ᩈᩥᨠ᩠ᨡᨲᩥ. ‘ᨸᩔᨾ᩠ᨽᨿᩴ ᨠᩣᨿᩈᨦ᩠ᨡᩣᩁᩴ ᩋᩔᩈᩥᩔᩣᨾᩦ’ᨲᩥ ᩈᩥᨠ᩠ᨡᨲᩥ, ‘ᨸᩔᨾ᩠ᨽᨿᩴ ᨠᩣᨿᩈᨦ᩠ᨡᩣᩁᩴ ᨸᩔᩈᩥᩔᩣᨾᩦ’ᨲᩥ ᩈᩥᨠ᩠ᨡᨲᩥ.

‘‘ᩈᩮᨿ᩠ᨿᨳᩣᨸᩥ, ᨽᩥᨠ᩠ᨡᩅᩮ, ᨴᨠ᩠ᨡᩮᩣ ᨽᨾᨠᩣᩁᩮᩣ ᩅᩣ ᨽᨾᨠᩣᩁᨶ᩠ᨲᩮᩅᩣᩈᩦ ᩅᩣ ᨴᩦᨥᩴ ᩅᩣ ᩋᨬ᩠ᨨᨶ᩠ᨲᩮᩣ ‘ᨴᩦᨥᩴ ᩋᨬ᩠ᨨᩣᨾᩦ’ᨲᩥ ᨸᨩᩣᨶᩣᨲᩥ, ᩁᩔᩴ ᩅᩣ ᩋᨬ᩠ᨨᨶ᩠ᨲᩮᩣ ‘ᩁᩔᩴ ᩋᨬ᩠ᨨᩣᨾᩦ’ᨲᩥ ᨸᨩᩣᨶᩣᨲᩥ ᩑᩅᨾᩮᩅ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨴᩦᨥᩴ ᩅᩣ ᩋᩔᩈᨶ᩠ᨲᩮᩣ ‘ᨴᩦᨥᩴ ᩋᩔᩈᩣᨾᩦ’ᨲᩥ ᨸᨩᩣᨶᩣᨲᩥ, ᨴᩦᨥᩴ ᩅᩣ ᨸᩔᩈᨶ᩠ᨲᩮᩣ ‘ᨴᩦᨥᩴ ᨸᩔᩈᩣᨾᩦ’ᨲᩥ ᨸᨩᩣᨶᩣᨲᩥ, ᩁᩔᩴ ᩅᩣ ᩋᩔᩈᨶ᩠ᨲᩮᩣ ‘ᩁᩔᩴ ᩋᩔᩈᩣᨾᩦ’ᨲᩥ ᨸᨩᩣᨶᩣᨲᩥ, ᩁᩔᩴ ᩅᩣ ᨸᩔᩈᨶ᩠ᨲᩮᩣ ‘ᩁᩔᩴ ᨸᩔᩈᩣᨾᩦ’ᨲᩥ ᨸᨩᩣᨶᩣᨲᩥ. ‘ᩈᨻ᩠ᨻᨠᩣᨿᨸᨭᩥᩈᩴᩅᩮᨴᩦ ᩋᩔᩈᩥᩔᩣᨾᩦ’ᨲᩥ ᩈᩥᨠ᩠ᨡᨲᩥ, ‘ᩈᨻ᩠ᨻᨠᩣᨿᨸᨭᩥᩈᩴᩅᩮᨴᩦ ᨸᩔᩈᩥᩔᩣᨾᩦ’ᨲᩥ ᩈᩥᨠ᩠ᨡᨲᩥ, ‘ᨸᩔᨾ᩠ᨽᨿᩴ ᨠᩣᨿᩈᨦ᩠ᨡᩣᩁᩴ ᩋᩔᩈᩥᩔᩣᨾᩦ’ᨲᩥ ᩈᩥᨠ᩠ᨡᨲᩥ, ‘ᨸᩔᨾ᩠ᨽᨿᩴ ᨠᩣᨿᩈᨦ᩠ᨡᩣᩁᩴ ᨸᩔᩈᩥᩔᩣᨾᩦ’ᨲᩥ ᩈᩥᨠ᩠ᨡᨲᩥ. ᩍᨲᩥ ᩋᨩ᩠ᨫᨲ᩠ᨲᩴ ᩅᩣ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ, ᨻᩉᩥᨴ᩠ᨵᩣ ᩅᩣ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ, ᩋᨩ᩠ᨫᨲ᩠ᨲᨻᩉᩥᨴ᩠ᨵᩣ ᩅᩣ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ. ᩈᨾᩩᨴᨿᨵᨾ᩠ᨾᩣᨶᩩᨸᩔᩦ ᩅᩣ ᨠᩣᨿᩈ᩠ᨾᩥᩴ ᩅᩥᩉᩁᨲᩥ, ᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨠᩣᨿᩈ᩠ᨾᩥᩴ ᩅᩥᩉᩁᨲᩥ, ᩈᨾᩩᨴᨿᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨠᩣᨿᩈ᩠ᨾᩥᩴ ᩅᩥᩉᩁᨲᩥ. ‘ᩋᨲ᩠ᨳᩥ ᨠᩣᨿᩮᩣ’ᨲᩥ ᩅᩣ ᨸᨶᩔ ᩈᨲᩥ ᨸᨧ᩠ᨧᩩᨸᨭ᩠ᨮᩥᨲᩣ ᩉᩮᩣᨲᩥ ᨿᩣᩅᨴᩮᩅ ᨬᩣᨱᨾᨲ᩠ᨲᩣᨿ ᨸᨭᩥᩔᨲᩥᨾᨲ᩠ᨲᩣᨿ ᩋᨶᩥᩔᩥᨲᩮᩣ ᨧ ᩅᩥᩉᩁᨲᩥ, ᨶ ᨧ ᨠᩥᨬ᩠ᨧᩥ ᩃᩮᩣᨠᩮ ᩏᨸᩣᨴᩥᨿᨲᩥ. ᩑᩅᨾ᩠ᨸᩥ ᨡᩮᩣ [ᩑᩅᨾ᩠ᨸᩥ (ᩈᩦ. ᩈ᩠ᨿᩣ. ᨸᩦ.)], ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ.

ᩌᨶᩣᨸᩣᨶᨸᨻ᩠ᨻᩴ ᨶᩥᨭ᩠ᨮᩥᨲᩴ.

ᨠᩣᨿᩣᨶᩩᨸᩔᨶᩣ ᩍᩁᩥᨿᩣᨸᨳᨸᨻ᩠ᨻᩴ

᪓᪗᪕. ‘‘ᨸᩩᨶ ᨧᨸᩁᩴ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨣᨧ᩠ᨨᨶ᩠ᨲᩮᩣ ᩅᩣ ‘ᨣᨧ᩠ᨨᩣᨾᩦ’ᨲᩥ ᨸᨩᩣᨶᩣᨲᩥ, ᨮᩥᨲᩮᩣ ᩅᩣ ‘ᨮᩥᨲᩮᩣᨾ᩠ᩉᩦ’ᨲᩥ ᨸᨩᩣᨶᩣᨲᩥ, ᨶᩥᩈᩥᨶ᩠ᨶᩮᩣ ᩅᩣ ‘ᨶᩥᩈᩥᨶ᩠ᨶᩮᩣᨾ᩠ᩉᩦ’ᨲᩥ ᨸᨩᩣᨶᩣᨲᩥ, ᩈᨿᩣᨶᩮᩣ ᩅᩣ ‘ᩈᨿᩣᨶᩮᩣᨾ᩠ᩉᩦ’ᨲᩥ ᨸᨩᩣᨶᩣᨲᩥ, ᨿᨳᩣ ᨿᨳᩣ ᩅᩣ ᨸᨶᩔ ᨠᩣᨿᩮᩣ ᨸᨱᩥᩉᩥᨲᩮᩣ ᩉᩮᩣᨲᩥ, ᨲᨳᩣ ᨲᨳᩣ ᨶᩴ ᨸᨩᩣᨶᩣᨲᩥ. ᩍᨲᩥ ᩋᨩ᩠ᨫᨲ᩠ᨲᩴ ᩅᩣ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ, ᨻᩉᩥᨴ᩠ᨵᩣ ᩅᩣ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ, ᩋᨩ᩠ᨫᨲ᩠ᨲᨻᩉᩥᨴ᩠ᨵᩣ ᩅᩣ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ. ᩈᨾᩩᨴᨿᨵᨾ᩠ᨾᩣᨶᩩᨸᩔᩦ ᩅᩣ ᨠᩣᨿᩈ᩠ᨾᩥᩴ ᩅᩥᩉᩁᨲᩥ, ᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨠᩣᨿᩈ᩠ᨾᩥᩴ ᩅᩥᩉᩁᨲᩥ, ᩈᨾᩩᨴᨿᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨠᩣᨿᩈ᩠ᨾᩥᩴ ᩅᩥᩉᩁᨲᩥ. ‘ᩋᨲ᩠ᨳᩥ ᨠᩣᨿᩮᩣ’ᨲᩥ ᩅᩣ ᨸᨶᩔ ᩈᨲᩥ ᨸᨧ᩠ᨧᩩᨸᨭ᩠ᨮᩥᨲᩣ ᩉᩮᩣᨲᩥ ᨿᩣᩅᨴᩮᩅ ᨬᩣᨱᨾᨲ᩠ᨲᩣᨿ ᨸᨭᩥᩔᨲᩥᨾᨲ᩠ᨲᩣᨿ ᩋᨶᩥᩔᩥᨲᩮᩣ ᨧ ᩅᩥᩉᩁᨲᩥ, ᨶ ᨧ ᨠᩥᨬ᩠ᨧᩥ ᩃᩮᩣᨠᩮ ᩏᨸᩣᨴᩥᨿᨲᩥ. ᩑᩅᨾ᩠ᨸᩥ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ.

ᩍᩁᩥᨿᩣᨸᨳᨸᨻ᩠ᨻᩴ ᨶᩥᨭ᩠ᨮᩥᨲᩴ.

ᨠᩣᨿᩣᨶᩩᨸᩔᨶᩣ ᩈᨾ᩠ᨸᨩᩣᨶᨸᨻ᩠ᨻᩴ

᪓᪗᪖. ‘‘ᨸᩩᨶ ᨧᨸᩁᩴ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩋᨽᩥᨠ᩠ᨠᨶ᩠ᨲᩮ ᨸᨭᩥᨠ᩠ᨠᨶ᩠ᨲᩮ ᩈᨾ᩠ᨸᨩᩣᨶᨠᩣᩁᩦ ᩉᩮᩣᨲᩥ, ᩌᩃᩮᩣᨠᩥᨲᩮ ᩅᩥᩃᩮᩣᨠᩥᨲᩮ ᩈᨾ᩠ᨸᨩᩣᨶᨠᩣᩁᩦ ᩉᩮᩣᨲᩥ, ᩈᨾᩥᨬ᩠ᨩᩥᨲᩮ ᨸᩈᩣᩁᩥᨲᩮ ᩈᨾ᩠ᨸᨩᩣᨶᨠᩣᩁᩦ ᩉᩮᩣᨲᩥ, ᩈᨦ᩠ᨥᩣᨭᩥᨸᨲ᩠ᨲᨧᩦᩅᩁᨵᩣᩁᨱᩮ ᩈᨾ᩠ᨸᨩᩣᨶᨠᩣᩁᩦ ᩉᩮᩣᨲᩥ, ᩋᩈᩥᨲᩮ ᨸᩦᨲᩮ ᨡᩣᨿᩥᨲᩮ ᩈᩣᨿᩥᨲᩮ ᩈᨾ᩠ᨸᨩᩣᨶᨠᩣᩁᩦ ᩉᩮᩣᨲᩥ, ᩏᨧ᩠ᨧᩣᩁᨸᩔᩣᩅᨠᨾ᩠ᨾᩮ ᩈᨾ᩠ᨸᨩᩣᨶᨠᩣᩁᩦ ᩉᩮᩣᨲᩥ, ᨣᨲᩮ ᨮᩥᨲᩮ ᨶᩥᩈᩥᨶ᩠ᨶᩮ ᩈᩩᨲ᩠ᨲᩮ ᨩᩣᨣᩁᩥᨲᩮ ᨽᩣᩈᩥᨲᩮ ᨲᩩᨱ᩠ᩉᩦᨽᩣᩅᩮ ᩈᨾ᩠ᨸᨩᩣᨶᨠᩣᩁᩦ ᩉᩮᩣᨲᩥ. ᩍᨲᩥ ᩋᨩ᩠ᨫᨲ᩠ᨲᩴ ᩅᩣ…ᨸᩮ… ᩑᩅᨾ᩠ᨸᩥ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ.

ᩈᨾ᩠ᨸᨩᩣᨶᨸᨻ᩠ᨻᩴ ᨶᩥᨭ᩠ᨮᩥᨲᩴ.

ᨠᩣᨿᩣᨶᩩᨸᩔᨶᩣ ᨸᨭᩥᨠᩪᩃᨾᨶᩈᩥᨠᩣᩁᨸᨻ᩠ᨻᩴ

᪓᪗᪗. ‘‘ᨸᩩᨶ ᨧᨸᩁᩴ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩍᨾᨾᩮᩅ ᨠᩣᨿᩴ ᩏᨴ᩠ᨵᩴ ᨸᩣᨴᨲᩃᩣ ᩋᨵᩮᩣ ᨠᩮᩈᨾᨲ᩠ᨳᨠᩣ ᨲᨧᨸᩁᩥᨿᨶ᩠ᨲᩴ ᨸᩪᩁᩴ ᨶᩣᨶᨸ᩠ᨸᨠᩣᩁᩔ ᩋᩈᩩᨧᩥᨶᩮᩣ ᨸᨧ᩠ᨧᩅᩮᨠ᩠ᨡᨲᩥ – ‘ᩋᨲ᩠ᨳᩥ ᩍᨾᩈ᩠ᨾᩥᩴ ᨠᩣᨿᩮ ᨠᩮᩈᩣ ᩃᩮᩣᨾᩣ ᨶᨡᩣ ᨴᨶ᩠ᨲᩣ ᨲᨧᩮᩣ, ᨾᩴᩈᩴ ᨶ᩠ᩉᩣᩁᩩ ᩋᨭ᩠ᨮᩥ ᩋᨭ᩠ᨮᩥᨾᩥᨬ᩠ᨩᩴ ᩅᨠ᩠ᨠᩴ, ᩉᨴᨿᩴ ᨿᨠᨶᩴ ᨠᩥᩃᩮᩣᨾᨠᩴ ᨸᩥᩉᨠᩴ ᨸᨸ᩠ᨹᩣᩈᩴ, ᩋᨶ᩠ᨲᩴ ᩋᨶ᩠ᨲᨣᩩᨱᩴ ᩏᨴᩁᩥᨿᩴ ᨠᩁᩦᩈᩴ [ᨠᩁᩦᩈᩴ ᨾᨲ᩠ᨳᩃᩩᨦ᩠ᨣᩴ (ᨠ.)], ᨸᩥᨲ᩠ᨲᩴ ᩈᩮᨾ᩠ᩉᩴ ᨸᩩᨻ᩠ᨻᩮᩣ ᩃᩮᩣᩉᩥᨲᩴ ᩈᩮᨴᩮᩣ ᨾᩮᨴᩮᩣ, ᩋᩔᩩ ᩅᩈᩣ ᨡᩮᩊᩮᩣ ᩈᩥᨦ᩠ᨥᩣᨱᩥᨠᩣ ᩃᩈᩥᨠᩣ ᨾᩩᨲ᩠ᨲ’ᨶ᩠ᨲᩥ.

‘‘ᩈᩮᨿ᩠ᨿᨳᩣᨸᩥ, ᨽᩥᨠ᩠ᨡᩅᩮ, ᩏᨽᨲᩮᩣᨾᩩᨡᩣ ᨸᩩᨲᩮᩣᩊᩥ [ᨾᩪᨲᩮᩣᩊᩦ (ᩈ᩠ᨿᩣ.), ᨾᩩᨲᩮᩣᩃᩥ (ᨸᩦ.)] ᨸᩪᩁᩣ ᨶᩣᨶᩣᩅᩥᩉᩥᨲᩔ ᨵᨬ᩠ᨬᩔ, ᩈᩮᨿ᩠ᨿᨳᩥᨴᩴ ᩈᩣᩃᩦᨶᩴ ᩅᩦᩉᩦᨶᩴ ᨾᩩᨣ᩠ᨣᩣᨶᩴ ᨾᩣᩈᩣᨶᩴ ᨲᩥᩃᩣᨶᩴ ᨲᨱ᩠ᨯᩩᩃᩣᨶᩴ. ᨲᨾᩮᨶᩴ ᨧᨠ᩠ᨡᩩᨾᩣ ᨸᩩᩁᩥᩈᩮᩣ ᨾᩩᨬ᩠ᨧᩥᨲ᩠ᩅᩣ ᨸᨧ᩠ᨧᩅᩮᨠ᩠ᨡᩮᨿ᩠ᨿ – ‘ᩍᨾᩮ ᩈᩣᩃᩦ, ᩍᨾᩮ ᩅᩦᩉᩦ ᩍᨾᩮ ᨾᩩᨣ᩠ᨣᩣ ᩍᨾᩮ ᨾᩣᩈᩣ ᩍᨾᩮ ᨲᩥᩃᩣ ᩍᨾᩮ ᨲᨱ᩠ᨯᩩᩃᩣ’ᨲᩥ. ᩑᩅᨾᩮᩅ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩍᨾᨾᩮᩅ ᨠᩣᨿᩴ ᩏᨴ᩠ᨵᩴ ᨸᩣᨴᨲᩃᩣ ᩋᨵᩮᩣ ᨠᩮᩈᨾᨲ᩠ᨳᨠᩣ ᨲᨧᨸᩁᩥᨿᨶ᩠ᨲᩴ ᨸᩪᩁᩴ ᨶᩣᨶᨸ᩠ᨸᨠᩣᩁᩔ ᩋᩈᩩᨧᩥᨶᩮᩣ ᨸᨧ᩠ᨧᩅᩮᨠ᩠ᨡᨲᩥ – ‘ᩋᨲ᩠ᨳᩥ ᩍᨾᩈ᩠ᨾᩥᩴ ᨠᩣᨿᩮ ᨠᩮᩈᩣ ᩃᩮᩣᨾᩣ…ᨸᩮ… ᨾᩩᨲ᩠ᨲ’ᨶ᩠ᨲᩥ.

ᩍᨲᩥ ᩋᨩ᩠ᨫᨲ᩠ᨲᩴ ᩅᩣ…ᨸᩮ… ᩑᩅᨾ᩠ᨸᩥ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ.

ᨸᨭᩥᨠᩪᩃᨾᨶᩈᩥᨠᩣᩁᨸᨻ᩠ᨻᩴ ᨶᩥᨭ᩠ᨮᩥᨲᩴ.

ᨠᩣᨿᩣᨶᩩᨸᩔᨶᩣ ᨵᩣᨲᩩᨾᨶᩈᩥᨠᩣᩁᨸᨻ᩠ᨻᩴ

᪓᪗᪘. ‘‘ᨸᩩᨶ ᨧᨸᩁᩴ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩍᨾᨾᩮᩅ ᨠᩣᨿᩴ ᨿᨳᩣᨮᩥᨲᩴ ᨿᨳᩣᨸᨱᩥᩉᩥᨲᩴ ᨵᩣᨲᩩᩈᩮᩣ ᨸᨧ᩠ᨧᩅᩮᨠ᩠ᨡᨲᩥ – ‘ᩋᨲ᩠ᨳᩥ ᩍᨾᩈ᩠ᨾᩥᩴ ᨠᩣᨿᩮ ᨸᨳᩅᩦᨵᩣᨲᩩ ᩌᨸᩮᩣᨵᩣᨲᩩ ᨲᩮᨩᩮᩣᨵᩣᨲᩩ ᩅᩣᨿᩮᩣᨵᩣᨲᩪ’ᨲᩥ.

‘‘ᩈᩮᨿ᩠ᨿᨳᩣᨸᩥ, ᨽᩥᨠ᩠ᨡᩅᩮ, ᨴᨠ᩠ᨡᩮᩣ ᨣᩮᩣᨥᩣᨲᨠᩮᩣ ᩅᩣ ᨣᩮᩣᨥᩣᨲᨠᨶ᩠ᨲᩮᩅᩣᩈᩦ ᩅᩣ ᨣᩣᩅᩥᩴ ᩅᨵᩥᨲ᩠ᩅᩣ ᨧᨲᩩᨾᩉᩣᨸᨳᩮ ᨻᩥᩃᩈᩮᩣ ᩅᩥᨽᨩᩥᨲ᩠ᩅᩣ ᨶᩥᩈᩥᨶ᩠ᨶᩮᩣ ᩋᩔ, ᩑᩅᨾᩮᩅ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩍᨾᨾᩮᩅ ᨠᩣᨿᩴ ᨿᨳᩣᨮᩥᨲᩴ ᨿᨳᩣᨸᨱᩥᩉᩥᨲᩴ ᨵᩣᨲᩩᩈᩮᩣ ᨸᨧ᩠ᨧᩅᩮᨠ᩠ᨡᨲᩥ – ‘ᩋᨲ᩠ᨳᩥ ᩍᨾᩈ᩠ᨾᩥᩴ ᨠᩣᨿᩮ ᨸᨳᩅᩦᨵᩣᨲᩩ ᩌᨸᩮᩣᨵᩣᨲᩩ ᨲᩮᨩᩮᩣᨵᩣᨲᩩ ᩅᩣᨿᩮᩣᨵᩣᨲᩪ’ᨲᩥ.

‘‘ᩍᨲᩥ ᩋᨩ᩠ᨫᨲ᩠ᨲᩴ ᩅᩣ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ…ᨸᩮ… ᩑᩅᨾ᩠ᨸᩥ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ.

ᨵᩣᨲᩩᨾᨶᩈᩥᨠᩣᩁᨸᨻ᩠ᨻᩴ ᨶᩥᨭ᩠ᨮᩥᨲᩴ.

ᨠᩣᨿᩣᨶᩩᨸᩔᨶᩣ ᨶᩅᩈᩥᩅᨳᩥᨠᨸᨻ᩠ᨻᩴ

᪓᪗᪙. ‘‘ᨸᩩᨶ ᨧᨸᩁᩴ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩈᩮᨿ᩠ᨿᨳᩣᨸᩥ ᨸᩔᩮᨿ᩠ᨿ ᩈᩁᩦᩁᩴ ᩈᩥᩅᨳᩥᨠᩣᨿ ᨨᨯ᩠ᨯᩥᨲᩴ ᩑᨠᩣᩉᨾᨲᩴ ᩅᩣ ᨴ᩠ᩅᩦᩉᨾᨲᩴ ᩅᩣ ᨲᩦᩉᨾᨲᩴ ᩅᩣ ᩏᨴ᩠ᨵᩩᨾᩣᨲᨠᩴ ᩅᩥᨶᩦᩃᨠᩴ ᩅᩥᨸᩩᨻ᩠ᨻᨠᨩᩣᨲᩴ. ᩈᩮᩣ ᩍᨾᨾᩮᩅ ᨠᩣᨿᩴ ᩏᨸᩈᩴᩉᩁᨲᩥ – ‘ᩋᨿᨾ᩠ᨸᩥ ᨡᩮᩣ ᨠᩣᨿᩮᩣ ᩑᩅᩴᨵᨾ᩠ᨾᩮᩣ ᩑᩅᩴᨽᩣᩅᩦ ᩑᩅᩴᩋᨶᨲᩦᨲᩮᩣ’ᨲᩥ.

‘‘ᩍᨲᩥ ᩋᨩ᩠ᨫᨲ᩠ᨲᩴ ᩅᩣ …ᨸᩮ… ᩑᩅᨾ᩠ᨸᩥ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ.

‘‘ᨸᩩᨶ ᨧᨸᩁᩴ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩈᩮᨿ᩠ᨿᨳᩣᨸᩥ ᨸᩔᩮᨿ᩠ᨿ ᩈᩁᩦᩁᩴ ᩈᩥᩅᨳᩥᨠᩣᨿ ᨨᨯ᩠ᨯᩥᨲᩴ ᨠᩣᨠᩮᩉᩥ ᩅᩣ ᨡᨩ᩠ᨩᨾᩣᨶᩴ ᨠᩩᩃᩃᩮᩉᩥ ᩅᩣ ᨡᨩ᩠ᨩᨾᩣᨶᩴ ᨣᩥᨩ᩠ᨫᩮᩉᩥ ᩅᩣ ᨡᨩ᩠ᨩᨾᩣᨶᩴ ᨠᨦ᩠ᨠᩮᩉᩥ ᩅᩣ ᨡᨩ᩠ᨩᨾᩣᨶᩴ ᩈᩩᨶᨡᩮᩉᩥ ᩅᩣ ᨡᨩ᩠ᨩᨾᩣᨶᩴ ᨻ᩠ᨿᨣ᩠ᨥᩮᩉᩥ ᩅᩣ ᨡᨩ᩠ᨩᨾᩣᨶᩴ ᨴᩦᨸᩦᩉᩥ ᩅᩣ ᨡᨩ᩠ᨩᨾᩣᨶᩴ ᩈᩥᨦ᩠ᨣᩣᩃᩮᩉᩥ ᩅᩣ [ᨣᩥᨩ᩠ᨫᩮᩉᩥ ᩅᩣ ᨡᨩ᩠ᨩᨾᩣᨶᩴ, ᩈᩩᩅᩣᨶᩮᩉᩥ ᩅᩣ ᨡᨩ᩠ᨩᨾᩣᨶᩴ, ᩈᩥᨣᩣᩃᩮᩉᩥ ᩅᩣ ᨡᨩ᩠ᨩᨾᩣᨶᩴ, (ᩈ᩠ᨿᩣ. ᨸᩦ.)] ᨡᨩ᩠ᨩᨾᩣᨶᩴ ᩅᩥᩅᩥᨵᩮᩉᩥ ᩅᩣ ᨸᩣᨱᨠᨩᩣᨲᩮᩉᩥ ᨡᨩ᩠ᨩᨾᩣᨶᩴ. ᩈᩮᩣ ᩍᨾᨾᩮᩅ ᨠᩣᨿᩴ ᩏᨸᩈᩴᩉᩁᨲᩥ – ‘ᩋᨿᨾ᩠ᨸᩥ ᨡᩮᩣ ᨠᩣᨿᩮᩣ ᩑᩅᩴᨵᨾ᩠ᨾᩮᩣ ᩑᩅᩴᨽᩣᩅᩦ ᩑᩅᩴᩋᨶᨲᩦᨲᩮᩣ’ᨲᩥ.

‘‘ᩍᨲᩥ ᩋᨩ᩠ᨫᨲ᩠ᨲᩴ ᩅᩣ…ᨸᩮ… ᩑᩅᨾ᩠ᨸᩥ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ.

‘‘ᨸᩩᨶ ᨧᨸᩁᩴ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩈᩮᨿ᩠ᨿᨳᩣᨸᩥ ᨸᩔᩮᨿ᩠ᨿ ᩈᩁᩦᩁᩴ ᩈᩥᩅᨳᩥᨠᩣᨿ ᨨᨯ᩠ᨯᩥᨲᩴ ᩋᨭ᩠ᨮᩥᨠᩈᨦ᩠ᨡᩃᩥᨠᩴ ᩈᨾᩴᩈᩃᩮᩣᩉᩥᨲᩴ ᨶ᩠ᩉᩣᩁᩩᩈᨾ᩠ᨻᨶ᩠ᨵᩴ…ᨸᩮ… ᩋᨭ᩠ᨮᩥᨠᩈᨦ᩠ᨡᩃᩥᨠᩴ ᨶᩥᨾᩴᩈᩃᩮᩣᩉᩥᨲᨾᨠ᩠ᨡᩥᨲᩴ ᨶ᩠ᩉᩣᩁᩩᩈᨾ᩠ᨻᨶ᩠ᨵᩴ…ᨸᩮ… ᩋᨭ᩠ᨮᩥᨠᩈᨦ᩠ᨡᩃᩥᨠᩴ ᩋᨸᨣᨲᨾᩴᩈᩃᩮᩣᩉᩥᨲᩴ ᨶ᩠ᩉᩣᩁᩩᩈᨾ᩠ᨻᨶ᩠ᨵᩴ…ᨸᩮ… ᩋᨭ᩠ᨮᩥᨠᩣᨶᩥ ᩋᨸᨣᨲᩈᨾ᩠ᨻᨶ᩠ᨵᩣᨶᩥ [ᩋᨸᨣᨲᨶ᩠ᩉᩣᩁᩩᩈᨾ᩠ᨻᨶ᩠ᨵᩣᨶᩥ (ᩈ᩠ᨿᩣ.)] ᨴᩥᩈᩣ ᩅᩥᨴᩥᩈᩣ ᩅᩥᨠ᩠ᨡᩥᨲ᩠ᨲᩣᨶᩥ, ᩋᨬ᩠ᨬᩮᨶ ᩉᨲ᩠ᨳᨭ᩠ᨮᩥᨠᩴ ᩋᨬ᩠ᨬᩮᨶ ᨸᩣᨴᨭ᩠ᨮᩥᨠᩴ ᩋᨬ᩠ᨬᩮᨶ ᨣᩮᩣᨸ᩠ᨹᨠᨭ᩠ᨮᩥᨠᩴ [‘‘ᩋᨬ᩠ᨬᩮᨶ ᨣᩮᩣᨸ᩠ᨹᨠᨭ᩠ᨮᩥᨠ’’ᨶ᩠ᨲᩥ ᩍᨴᩴ ᩈᩦ. ᩈ᩠ᨿᩣ. ᨸᩦ. ᨸᩮᩣᨲ᩠ᨳᨠᩮᩈᩩ ᨶᨲ᩠ᨳᩥ] ᩋᨬ᩠ᨬᩮᨶ ᨩᨦ᩠ᨥᨭ᩠ᨮᩥᨠᩴ ᩋᨬ᩠ᨬᩮᨶ ᩐᩁᩩᨭ᩠ᨮᩥᨠᩴ ᩋᨬ᩠ᨬᩮᨶ ᨠᨭᩥᨭ᩠ᨮᩥᨠᩴ [ᩋᨬ᩠ᨬᩮᨶ ᨠᨭᨭ᩠ᨮᩥᨠᩴ ᩋᨬ᩠ᨬᩮᨶ ᨸᩥᨭ᩠ᨮᨭ᩠ᨮᩥᨠᩴ ᩋᨬ᩠ᨬᩮᨶ ᨠᨱ᩠ᨯᨠᨭ᩠ᨮᩥᨠᩴ ᩋᨬ᩠ᨬᩮᨶ ᨹᩣᩈᩩᨠᨭ᩠ᨮᩥᨠᩴ ᩋᨬ᩠ᨬᩮᨶ ᩏᩁᨭ᩠ᨮᩥᨠᩴ ᩋᨬ᩠ᨬᩮᨶ ᩋᩴᩈᨭ᩠ᨮᩥᨠᩴ ᩋᨬ᩠ᨬᩮᨶ ᨻᩣᩉᩩᨭ᩠ᨮᩥᨠᩴ (ᩈ᩠ᨿᩣ.)] ᩋᨬ᩠ᨬᩮᨶ ᨹᩣᩈᩩᨠᨭ᩠ᨮᩥᨠᩴ ᩋᨬ᩠ᨬᩮᨶ ᨸᩥᨭ᩠ᨮᩥᨭ᩠ᨮᩥᨠᩴ ᩋᨬ᩠ᨬᩮᨶ ᨡᨶ᩠ᨵᨭ᩠ᨮᩥᨠᩴ [ᩋᨬ᩠ᨬᩮᨶ ᨠᨭᨭ᩠ᨮᩥᨠᩴ ᩋᨬ᩠ᨬᩮᨶ ᨸᩥᨭ᩠ᨮᨭ᩠ᨮᩥᨠᩴ ᩋᨬ᩠ᨬᩮᨶ ᨠᨱ᩠ᨯᨠᨭ᩠ᨮᩥᨠᩴ ᩋᨬ᩠ᨬᩮᨶ ᨹᩣᩈᩩᨠᨭ᩠ᨮᩥᨠᩴ ᩋᨬ᩠ᨬᩮᨶ ᩏᩁᨭ᩠ᨮᩥᨠᩴ ᩋᨬ᩠ᨬᩮᨶ ᩋᩴᩈᨭ᩠ᨮᩥᨠᩴ ᩋᨬ᩠ᨬᩮᨶ ᨻᩣᩉᩩᨭ᩠ᨮᩥᨠᩴ (ᩈ᩠ᨿᩣ.)] ᩋᨬ᩠ᨬᩮᨶ ᨣᩦᩅᨭ᩠ᨮᩥᨠᩴ ᩋᨬ᩠ᨬᩮᨶ ᩉᨶᩩᨠᨭ᩠ᨮᩥᨠᩴ ᩋᨬ᩠ᨬᩮᨶ ᨴᨶ᩠ᨲᨭ᩠ᨮᩥᨠᩴ ᩋᨬ᩠ᨬᩮᨶ ᩈᩦᩈᨠᨭᩣᩉᩴ. ᩈᩮᩣ ᩍᨾᨾᩮᩅ ᨠᩣᨿᩴ ᩏᨸᩈᩴᩉᩁᨲᩥ – ‘ᩋᨿᨾ᩠ᨸᩥ ᨡᩮᩣ ᨠᩣᨿᩮᩣ ᩑᩅᩴᨵᨾ᩠ᨾᩮᩣ ᩑᩅᩴᨽᩣᩅᩦ ᩑᩅᩴᩋᨶᨲᩦᨲᩮᩣ’ᨲᩥ.

‘‘ᩍᨲᩥ ᩋᨩ᩠ᨫᨲ᩠ᨲᩴ ᩅᩣ …ᨸᩮ… ᩅᩥᩉᩁᨲᩥ.

‘‘ᨸᩩᨶ ᨧᨸᩁᩴ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩈᩮᨿ᩠ᨿᨳᩣᨸᩥ ᨸᩔᩮᨿ᩠ᨿ ᩈᩁᩦᩁᩴ ᩈᩥᩅᨳᩥᨠᩣᨿ ᨨᨯ᩠ᨯᩥᨲᩴ ᩋᨭ᩠ᨮᩥᨠᩣᨶᩥ ᩈᩮᨲᩣᨶᩥ ᩈᨦ᩠ᨡᩅᨱ᩠ᨱᨸᨭᩥᨽᩣᨣᩣᨶᩥ…ᨸᩮ… ᩋᨭ᩠ᨮᩥᨠᩣᨶᩥ ᨸᩩᨬ᩠ᨩᨠᩥᨲᩣᨶᩥ ᨲᩮᩁᩮᩣᩅᩔᩥᨠᩣᨶᩥ …ᨸᩮ… ᩋᨭ᩠ᨮᩥᨠᩣᨶᩥ ᨸᩪᨲᩦᨶᩥ ᨧᩩᨱ᩠ᨱᨠᨩᩣᨲᩣᨶᩥ. ᩈᩮᩣ ᩍᨾᨾᩮᩅ ᨠᩣᨿᩴ ᩏᨸᩈᩴᩉᩁᨲᩥ – ‘ᩋᨿᨾ᩠ᨸᩥ ᨡᩮᩣ ᨠᩣᨿᩮᩣ ᩑᩅᩴᨵᨾ᩠ᨾᩮᩣ ᩑᩅᩴᨽᩣᩅᩦ ᩑᩅᩴᩋᨶᨲᩦᨲᩮᩣ’ᨲᩥ. ᩍᨲᩥ ᩋᨩ᩠ᨫᨲ᩠ᨲᩴ ᩅᩣ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ, ᨻᩉᩥᨴ᩠ᨵᩣ ᩅᩣ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ, ᩋᨩ᩠ᨫᨲ᩠ᨲᨻᩉᩥᨴ᩠ᨵᩣ ᩅᩣ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ. ᩈᨾᩩᨴᨿᨵᨾ᩠ᨾᩣᨶᩩᨸᩔᩦ ᩅᩣ ᨠᩣᨿᩈ᩠ᨾᩥᩴ ᩅᩥᩉᩁᨲᩥ, ᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨠᩣᨿᩈ᩠ᨾᩥᩴ ᩅᩥᩉᩁᨲᩥ, ᩈᨾᩩᨴᨿᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨠᩣᨿᩈ᩠ᨾᩥᩴ ᩅᩥᩉᩁᨲᩥ. ‘ᩋᨲ᩠ᨳᩥ ᨠᩣᨿᩮᩣ’ᨲᩥ ᩅᩣ ᨸᨶᩔ ᩈᨲᩥ ᨸᨧ᩠ᨧᩩᨸᨭ᩠ᨮᩥᨲᩣ ᩉᩮᩣᨲᩥ ᨿᩣᩅᨴᩮᩅ ᨬᩣᨱᨾᨲ᩠ᨲᩣᨿ ᨸᨭᩥᩔᨲᩥᨾᨲ᩠ᨲᩣᨿ ᩋᨶᩥᩔᩥᨲᩮᩣ ᨧ ᩅᩥᩉᩁᨲᩥ, ᨶ ᨧ ᨠᩥᨬ᩠ᨧᩥ ᩃᩮᩣᨠᩮ ᩏᨸᩣᨴᩥᨿᨲᩥ. ᩑᩅᨾ᩠ᨸᩥ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ.

ᨶᩅᩈᩥᩅᨳᩥᨠᨸᨻ᩠ᨻᩴ ᨶᩥᨭ᩠ᨮᩥᨲᩴ.

ᨧᩩᨴ᩠ᨴᩈ ᨠᩣᨿᩣᨶᩩᨸᩔᨶᩣ ᨶᩥᨭ᩠ᨮᩥᨲᩣ.

ᩅᩮᨴᨶᩣᨶᩩᨸᩔᨶᩣ

᪓᪘᪐. ‘‘ᨠᨳᨬ᩠ᨧ ᨸᨶ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩅᩮᨴᨶᩣᩈᩩ ᩅᩮᨴᨶᩣᨶᩩᨸᩔᩦ ᩅᩥᩉᩁᨲᩥ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩈᩩᨡᩴ ᩅᩣ ᩅᩮᨴᨶᩴ ᩅᩮᨴᨿᨾᩣᨶᩮᩣ ‘ᩈᩩᨡᩴ ᩅᩮᨴᨶᩴ ᩅᩮᨴᨿᩣᨾᩦ’ᨲᩥ ᨸᨩᩣᨶᩣᨲᩥ. ᨴᩩᨠ᩠ᨡᩴ ᩅᩣ ᩅᩮᨴᨶᩴ ᩅᩮᨴᨿᨾᩣᨶᩮᩣ ‘ᨴᩩᨠ᩠ᨡᩴ ᩅᩮᨴᨶᩴ ᩅᩮᨴᨿᩣᨾᩦ’ᨲᩥ ᨸᨩᩣᨶᩣᨲᩥ. ᩋᨴᩩᨠ᩠ᨡᨾᩈᩩᨡᩴ ᩅᩣ ᩅᩮᨴᨶᩴ ᩅᩮᨴᨿᨾᩣᨶᩮᩣ ‘ᩋᨴᩩᨠ᩠ᨡᨾᩈᩩᨡᩴ ᩅᩮᨴᨶᩴ ᩅᩮᨴᨿᩣᨾᩦ’ᨲᩥ ᨸᨩᩣᨶᩣᨲᩥ. ᩈᩣᨾᩥᩈᩴ ᩅᩣ ᩈᩩᨡᩴ ᩅᩮᨴᨶᩴ ᩅᩮᨴᨿᨾᩣᨶᩮᩣ ‘ᩈᩣᨾᩥᩈᩴ ᩈᩩᨡᩴ ᩅᩮᨴᨶᩴ ᩅᩮᨴᨿᩣᨾᩦ’ᨲᩥ ᨸᨩᩣᨶᩣᨲᩥ, ᨶᩥᩁᩣᨾᩥᩈᩴ ᩅᩣ ᩈᩩᨡᩴ ᩅᩮᨴᨶᩴ ᩅᩮᨴᨿᨾᩣᨶᩮᩣ ‘ᨶᩥᩁᩣᨾᩥᩈᩴ ᩈᩩᨡᩴ ᩅᩮᨴᨶᩴ ᩅᩮᨴᨿᩣᨾᩦ’ᨲᩥ ᨸᨩᩣᨶᩣᨲᩥ. ᩈᩣᨾᩥᩈᩴ ᩅᩣ ᨴᩩᨠ᩠ᨡᩴ ᩅᩮᨴᨶᩴ ᩅᩮᨴᨿᨾᩣᨶᩮᩣ ‘ᩈᩣᨾᩥᩈᩴ ᨴᩩᨠ᩠ᨡᩴ ᩅᩮᨴᨶᩴ ᩅᩮᨴᨿᩣᨾᩦ’ᨲᩥ ᨸᨩᩣᨶᩣᨲᩥ, ᨶᩥᩁᩣᨾᩥᩈᩴ ᩅᩣ ᨴᩩᨠ᩠ᨡᩴ ᩅᩮᨴᨶᩴ ᩅᩮᨴᨿᨾᩣᨶᩮᩣ ‘ᨶᩥᩁᩣᨾᩥᩈᩴ ᨴᩩᨠ᩠ᨡᩴ ᩅᩮᨴᨶᩴ ᩅᩮᨴᨿᩣᨾᩦ’ᨲᩥ ᨸᨩᩣᨶᩣᨲᩥ. ᩈᩣᨾᩥᩈᩴ ᩅᩣ ᩋᨴᩩᨠ᩠ᨡᨾᩈᩩᨡᩴ ᩅᩮᨴᨶᩴ ᩅᩮᨴᨿᨾᩣᨶᩮᩣ ‘ᩈᩣᨾᩥᩈᩴ ᩋᨴᩩᨠ᩠ᨡᨾᩈᩩᨡᩴ ᩅᩮᨴᨶᩴ ᩅᩮᨴᨿᩣᨾᩦ’ᨲᩥ ᨸᨩᩣᨶᩣᨲᩥ, ᨶᩥᩁᩣᨾᩥᩈᩴ ᩅᩣ ᩋᨴᩩᨠ᩠ᨡᨾᩈᩩᨡᩴ ᩅᩮᨴᨶᩴ ᩅᩮᨴᨿᨾᩣᨶᩮᩣ ‘ᨶᩥᩁᩣᨾᩥᩈᩴ ᩋᨴᩩᨠ᩠ᨡᨾᩈᩩᨡᩴ ᩅᩮᨴᨶᩴ ᩅᩮᨴᨿᩣᨾᩦ’ᨲᩥ ᨸᨩᩣᨶᩣᨲᩥ. ᩍᨲᩥ ᩋᨩ᩠ᨫᨲ᩠ᨲᩴ ᩅᩣ ᩅᩮᨴᨶᩣᩈᩩ ᩅᩮᨴᨶᩣᨶᩩᨸᩔᩦ ᩅᩥᩉᩁᨲᩥ, ᨻᩉᩥᨴ᩠ᨵᩣ ᩅᩣ ᩅᩮᨴᨶᩣᩈᩩ ᩅᩮᨴᨶᩣᨶᩩᨸᩔᩦ ᩅᩥᩉᩁᨲᩥ, ᩋᨩ᩠ᨫᨲ᩠ᨲᨻᩉᩥᨴ᩠ᨵᩣ ᩅᩣ ᩅᩮᨴᨶᩣᩈᩩ ᩅᩮᨴᨶᩣᨶᩩᨸᩔᩦ ᩅᩥᩉᩁᨲᩥ. ᩈᨾᩩᨴᨿᨵᨾ᩠ᨾᩣᨶᩩᨸᩔᩦ ᩅᩣ ᩅᩮᨴᨶᩣᩈᩩ ᩅᩥᩉᩁᨲᩥ, ᩅᨿᨵᨾ᩠ᨾᩣᨶᩩᨸᩔᩦ ᩅᩣ ᩅᩮᨴᨶᩣᩈᩩ ᩅᩥᩉᩁᨲᩥ, ᩈᨾᩩᨴᨿᩅᨿᨵᨾ᩠ᨾᩣᨶᩩᨸᩔᩦ ᩅᩣ ᩅᩮᨴᨶᩣᩈᩩ ᩅᩥᩉᩁᨲᩥ. ‘ᩋᨲ᩠ᨳᩥ ᩅᩮᨴᨶᩣ’ᨲᩥ ᩅᩣ ᨸᨶᩔ ᩈᨲᩥ ᨸᨧ᩠ᨧᩩᨸᨭ᩠ᨮᩥᨲᩣ ᩉᩮᩣᨲᩥ ᨿᩣᩅᨴᩮᩅ ᨬᩣᨱᨾᨲ᩠ᨲᩣᨿ ᨸᨭᩥᩔᨲᩥᨾᨲ᩠ᨲᩣᨿ ᩋᨶᩥᩔᩥᨲᩮᩣ ᨧ ᩅᩥᩉᩁᨲᩥ, ᨶ ᨧ ᨠᩥᨬ᩠ᨧᩥ ᩃᩮᩣᨠᩮ ᩏᨸᩣᨴᩥᨿᨲᩥ. ᩑᩅᨾ᩠ᨸᩥ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩅᩮᨴᨶᩣᩈᩩ ᩅᩮᨴᨶᩣᨶᩩᨸᩔᩦ ᩅᩥᩉᩁᨲᩥ.

ᩅᩮᨴᨶᩣᨶᩩᨸᩔᨶᩣ ᨶᩥᨭ᩠ᨮᩥᨲᩣ.

ᨧᩥᨲ᩠ᨲᩣᨶᩩᨸᩔᨶᩣ

᪓᪘᪑. ‘‘ᨠᨳᨬ᩠ᨧ ᨸᨶ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨧᩥᨲ᩠ᨲᩮ ᨧᩥᨲ᩠ᨲᩣᨶᩩᨸᩔᩦ ᩅᩥᩉᩁᨲᩥ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩈᩁᩣᨣᩴ ᩅᩣ ᨧᩥᨲ᩠ᨲᩴ ‘ᩈᩁᩣᨣᩴ ᨧᩥᨲ᩠ᨲ’ᨶ᩠ᨲᩥ ᨸᨩᩣᨶᩣᨲᩥ, ᩅᩦᨲᩁᩣᨣᩴ ᩅᩣ ᨧᩥᨲ᩠ᨲᩴ ‘ᩅᩦᨲᩁᩣᨣᩴ ᨧᩥᨲ᩠ᨲ’ᨶ᩠ᨲᩥ ᨸᨩᩣᨶᩣᨲᩥ. ᩈᨴᩮᩣᩈᩴ ᩅᩣ ᨧᩥᨲ᩠ᨲᩴ ‘ᩈᨴᩮᩣᩈᩴ ᨧᩥᨲ᩠ᨲ’ᨶ᩠ᨲᩥ ᨸᨩᩣᨶᩣᨲᩥ, ᩅᩦᨲᨴᩮᩣᩈᩴ ᩅᩣ ᨧᩥᨲ᩠ᨲᩴ ‘ᩅᩦᨲᨴᩮᩣᩈᩴ ᨧᩥᨲ᩠ᨲ’ᨶ᩠ᨲᩥ ᨸᨩᩣᨶᩣᨲᩥ. ᩈᨾᩮᩣᩉᩴ ᩅᩣ ᨧᩥᨲ᩠ᨲᩴ ‘ᩈᨾᩮᩣᩉᩴ ᨧᩥᨲ᩠ᨲ’ᨶ᩠ᨲᩥ ᨸᨩᩣᨶᩣᨲᩥ, ᩅᩦᨲᨾᩮᩣᩉᩴ ᩅᩣ ᨧᩥᨲ᩠ᨲᩴ ‘ᩅᩦᨲᨾᩮᩣᩉᩴ ᨧᩥᨲ᩠ᨲ’ᨶ᩠ᨲᩥ ᨸᨩᩣᨶᩣᨲᩥ. ᩈᨦ᩠ᨡᩥᨲ᩠ᨲᩴ ᩅᩣ ᨧᩥᨲ᩠ᨲᩴ ‘ᩈᨦ᩠ᨡᩥᨲ᩠ᨲᩴ ᨧᩥᨲ᩠ᨲ’ᨶ᩠ᨲᩥ ᨸᨩᩣᨶᩣᨲᩥ, ᩅᩥᨠ᩠ᨡᩥᨲ᩠ᨲᩴ ᩅᩣ ᨧᩥᨲ᩠ᨲᩴ ‘ᩅᩥᨠ᩠ᨡᩥᨲ᩠ᨲᩴ ᨧᩥᨲ᩠ᨲ’ᨶ᩠ᨲᩥ ᨸᨩᩣᨶᩣᨲᩥ. ᨾᩉᨣ᩠ᨣᨲᩴ ᩅᩣ ᨧᩥᨲ᩠ᨲᩴ ‘ᨾᩉᨣ᩠ᨣᨲᩴ ᨧᩥᨲ᩠ᨲ’ᨶ᩠ᨲᩥ ᨸᨩᩣᨶᩣᨲᩥ, ᩋᨾᩉᨣ᩠ᨣᨲᩴ ᩅᩣ ᨧᩥᨲ᩠ᨲᩴ ‘ᩋᨾᩉᨣ᩠ᨣᨲᩴ ᨧᩥᨲ᩠ᨲ’ᨶ᩠ᨲᩥ ᨸᨩᩣᨶᩣᨲᩥ. ᩈᩏᨲ᩠ᨲᩁᩴ ᩅᩣ ᨧᩥᨲ᩠ᨲᩴ ‘ᩈᩏᨲ᩠ᨲᩁᩴ ᨧᩥᨲ᩠ᨲ’ᨶ᩠ᨲᩥ ᨸᨩᩣᨶᩣᨲᩥ, ᩋᨶᩩᨲ᩠ᨲᩁᩴ ᩅᩣ ᨧᩥᨲ᩠ᨲᩴ ‘ᩋᨶᩩᨲ᩠ᨲᩁᩴ ᨧᩥᨲ᩠ᨲ’ᨶ᩠ᨲᩥ ᨸᨩᩣᨶᩣᨲᩥ. ᩈᨾᩣᩉᩥᨲᩴ ᩅᩣ ᨧᩥᨲ᩠ᨲᩴ ‘ᩈᨾᩣᩉᩥᨲᩴ ᨧᩥᨲ᩠ᨲ’ᨶ᩠ᨲᩥ ᨸᨩᩣᨶᩣᨲᩥ, ᩋᩈᨾᩣᩉᩥᨲᩴ ᩅᩣ ᨧᩥᨲ᩠ᨲᩴ ‘ᩋᩈᨾᩣᩉᩥᨲᩴ ᨧᩥᨲ᩠ᨲ’ᨶ᩠ᨲᩥ ᨸᨩᩣᨶᩣᨲᩥ. ᩅᩥᨾᩩᨲ᩠ᨲᩴ ᩅᩣ ᨧᩥᨲ᩠ᨲᩴ ‘ᩅᩥᨾᩩᨲ᩠ᨲᩴ ᨧᩥᨲ᩠ᨲ’ᨶ᩠ᨲᩥ ᨸᨩᩣᨶᩣᨲᩥ. ᩋᩅᩥᨾᩩᨲ᩠ᨲᩴ ᩅᩣ ᨧᩥᨲ᩠ᨲᩴ ‘ᩋᩅᩥᨾᩩᨲ᩠ᨲᩴ ᨧᩥᨲ᩠ᨲ’ᨶ᩠ᨲᩥ ᨸᨩᩣᨶᩣᨲᩥ. ᩍᨲᩥ ᩋᨩ᩠ᨫᨲ᩠ᨲᩴ ᩅᩣ ᨧᩥᨲ᩠ᨲᩮ ᨧᩥᨲ᩠ᨲᩣᨶᩩᨸᩔᩦ ᩅᩥᩉᩁᨲᩥ, ᨻᩉᩥᨴ᩠ᨵᩣ ᩅᩣ ᨧᩥᨲ᩠ᨲᩮ ᨧᩥᨲ᩠ᨲᩣᨶᩩᨸᩔᩦ ᩅᩥᩉᩁᨲᩥ, ᩋᨩ᩠ᨫᨲ᩠ᨲᨻᩉᩥᨴ᩠ᨵᩣ ᩅᩣ ᨧᩥᨲ᩠ᨲᩮ ᨧᩥᨲ᩠ᨲᩣᨶᩩᨸᩔᩦ ᩅᩥᩉᩁᨲᩥ. ᩈᨾᩩᨴᨿᨵᨾ᩠ᨾᩣᨶᩩᨸᩔᩦ ᩅᩣ ᨧᩥᨲ᩠ᨲᩈ᩠ᨾᩥᩴ ᩅᩥᩉᩁᨲᩥ, ᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨧᩥᨲ᩠ᨲᩈ᩠ᨾᩥᩴ ᩅᩥᩉᩁᨲᩥ, ᩈᨾᩩᨴᨿᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨧᩥᨲ᩠ᨲᩈ᩠ᨾᩥᩴ ᩅᩥᩉᩁᨲᩥ, ‘ᩋᨲ᩠ᨳᩥ ᨧᩥᨲ᩠ᨲ’ᨶ᩠ᨲᩥ ᩅᩣ ᨸᨶᩔ ᩈᨲᩥ ᨸᨧ᩠ᨧᩩᨸᨭ᩠ᨮᩥᨲᩣ ᩉᩮᩣᨲᩥ ᨿᩣᩅᨴᩮᩅ ᨬᩣᨱᨾᨲ᩠ᨲᩣᨿ ᨸᨭᩥᩔᨲᩥᨾᨲ᩠ᨲᩣᨿ ᩋᨶᩥᩔᩥᨲᩮᩣ ᨧ ᩅᩥᩉᩁᨲᩥ, ᨶ ᨧ ᨠᩥᨬ᩠ᨧᩥ ᩃᩮᩣᨠᩮ ᩏᨸᩣᨴᩥᨿᨲᩥ. ᩑᩅᨾ᩠ᨸᩥ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨧᩥᨲ᩠ᨲᩮ ᨧᩥᨲ᩠ᨲᩣᨶᩩᨸᩔᩦ ᩅᩥᩉᩁᨲᩥ.

ᨧᩥᨲ᩠ᨲᩣᨶᩩᨸᩔᨶᩣ ᨶᩥᨭ᩠ᨮᩥᨲᩣ.

ᨵᨾ᩠ᨾᩣᨶᩩᨸᩔᨶᩣ ᨶᩦᩅᩁᨱᨸᨻ᩠ᨻᩴ

᪓᪘᪒. ‘‘ᨠᨳᨬ᩠ᨧ ᨸᨶ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᨸᨬ᩠ᨧᩈᩩ ᨶᩦᩅᩁᨱᩮᩈᩩ. ᨠᨳᨬ᩠ᨧ ᨸᨶ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᨸᨬ᩠ᨧᩈᩩ ᨶᩦᩅᩁᨱᩮᩈᩩ?

‘‘ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᨠᩣᨾᨧ᩠ᨨᨶ᩠ᨴᩴ ‘ᩋᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᨠᩣᨾᨧ᩠ᨨᨶ᩠ᨴᩮᩣ’ᨲᩥ ᨸᨩᩣᨶᩣᨲᩥ, ᩋᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᨠᩣᨾᨧ᩠ᨨᨶ᩠ᨴᩴ ‘ᨶᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᨠᩣᨾᨧ᩠ᨨᨶ᩠ᨴᩮᩣ’ᨲᩥ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᨠᩣᨾᨧ᩠ᨨᨶ᩠ᨴᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᨠᩣᨾᨧ᩠ᨨᨶ᩠ᨴᩔ ᨸᩉᩣᨶᩴ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᨸᩉᩦᨶᩔ ᨠᩣᨾᨧ᩠ᨨᨶ᩠ᨴᩔ ᩌᨿᨲᩥᩴ ᩋᨶᩩᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᨻ᩠ᨿᩣᨸᩣᨴᩴ ‘ᩋᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᨻ᩠ᨿᩣᨸᩣᨴᩮᩣ’ᨲᩥ ᨸᨩᩣᨶᩣᨲᩥ, ᩋᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᨻ᩠ᨿᩣᨸᩣᨴᩴ ‘ᨶᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᨻ᩠ᨿᩣᨸᩣᨴᩮᩣ’ᨲᩥ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᨻ᩠ᨿᩣᨸᩣᨴᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᨻ᩠ᨿᩣᨸᩣᨴᩔ ᨸᩉᩣᨶᩴ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᨸᩉᩦᨶᩔ ᨻ᩠ᨿᩣᨸᩣᨴᩔ ᩌᨿᨲᩥᩴ ᩋᨶᩩᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᨳᩥᨶᨾᩥᨴ᩠ᨵᩴ ‘ᩋᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᨳᩥᨶᨾᩥᨴ᩠ᨵ’ᨶ᩠ᨲᩥ ᨸᨩᩣᨶᩣᨲᩥ, ᩋᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᨳᩥᨶᨾᩥᨴ᩠ᨵᩴ ‘ᨶᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᨳᩥᨶᨾᩥᨴ᩠ᨵ’ᨶ᩠ᨲᩥ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᨳᩥᨶᨾᩥᨴ᩠ᨵᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᨳᩥᨶᨾᩥᨴ᩠ᨵᩔ ᨸᩉᩣᨶᩴ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᨸᩉᩦᨶᩔ ᨳᩥᨶᨾᩥᨴ᩠ᨵᩔ ᩌᨿᨲᩥᩴ ᩋᨶᩩᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᩏᨴ᩠ᨵᨧ᩠ᨧᨠᩩᨠ᩠ᨠᩩᨧ᩠ᨧᩴ ‘ᩋᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᩏᨴ᩠ᨵᨧ᩠ᨧᨠᩩᨠ᩠ᨠᩩᨧ᩠ᨧ’ᨶ᩠ᨲᩥ ᨸᨩᩣᨶᩣᨲᩥ, ᩋᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᩏᨴ᩠ᨵᨧ᩠ᨧᨠᩩᨠ᩠ᨠᩩᨧ᩠ᨧᩴ ‘ᨶᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᩏᨴ᩠ᨵᨧ᩠ᨧᨠᩩᨠ᩠ᨠᩩᨧ᩠ᨧ’ᨶ᩠ᨲᩥ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᩏᨴ᩠ᨵᨧ᩠ᨧᨠᩩᨠ᩠ᨠᩩᨧ᩠ᨧᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᩏᨴ᩠ᨵᨧ᩠ᨧᨠᩩᨠ᩠ᨠᩩᨧ᩠ᨧᩔ ᨸᩉᩣᨶᩴ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᨸᩉᩦᨶᩔ ᩏᨴ᩠ᨵᨧ᩠ᨧᨠᩩᨠ᩠ᨠᩩᨧ᩠ᨧᩔ ᩌᨿᨲᩥᩴ ᩋᨶᩩᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᩅᩥᨧᩥᨠᩥᨧ᩠ᨨᩴ ‘ᩋᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᩅᩥᨧᩥᨠᩥᨧ᩠ᨨᩣ’ᨲᩥ ᨸᨩᩣᨶᩣᨲᩥ, ᩋᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᩅᩥᨧᩥᨠᩥᨧ᩠ᨨᩴ ‘ᨶᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᩅᩥᨧᩥᨠᩥᨧ᩠ᨨᩣ’ᨲᩥ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩣᨿ ᩅᩥᨧᩥᨠᩥᨧ᩠ᨨᩣᨿ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩣᨿ ᩅᩥᨧᩥᨠᩥᨧ᩠ᨨᩣᨿ ᨸᩉᩣᨶᩴ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᨸᩉᩦᨶᩣᨿ ᩅᩥᨧᩥᨠᩥᨧ᩠ᨨᩣᨿ ᩌᨿᨲᩥᩴ ᩋᨶᩩᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᩍᨲᩥ ᩋᨩ᩠ᨫᨲ᩠ᨲᩴ ᩅᩣ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ, ᨻᩉᩥᨴ᩠ᨵᩣ ᩅᩣ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ, ᩋᨩ᩠ᨫᨲ᩠ᨲᨻᩉᩥᨴ᩠ᨵᩣ ᩅᩣ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᩈᨾᩩᨴᨿᨵᨾ᩠ᨾᩣᨶᩩᨸᩔᩦ ᩅᩣ ᨵᨾ᩠ᨾᩮᩈᩩ ᩅᩥᩉᩁᨲᩥ, ᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨵᨾ᩠ᨾᩮᩈᩩ ᩅᩥᩉᩁᨲᩥ, ᩈᨾᩩᨴᨿᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨵᨾ᩠ᨾᩮᩈᩩ ᩅᩥᩉᩁᨲᩥ ‘ᩋᨲ᩠ᨳᩥ ᨵᨾ᩠ᨾᩣ’ᨲᩥ ᩅᩣ ᨸᨶᩔ ᩈᨲᩥ ᨸᨧ᩠ᨧᩩᨸᨭ᩠ᨮᩥᨲᩣ ᩉᩮᩣᨲᩥ ᨿᩣᩅᨴᩮᩅ ᨬᩣᨱᨾᨲ᩠ᨲᩣᨿ ᨸᨭᩥᩔᨲᩥᨾᨲ᩠ᨲᩣᨿ ᩋᨶᩥᩔᩥᨲᩮᩣ ᨧ ᩅᩥᩉᩁᨲᩥ, ᨶ ᨧ ᨠᩥᨬ᩠ᨧᩥ ᩃᩮᩣᨠᩮ ᩏᨸᩣᨴᩥᨿᨲᩥ. ᩑᩅᨾ᩠ᨸᩥ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᨸᨬ᩠ᨧᩈᩩ ᨶᩦᩅᩁᨱᩮᩈᩩ.

ᨶᩦᩅᩁᨱᨸᨻ᩠ᨻᩴ ᨶᩥᨭ᩠ᨮᩥᨲᩴ.

ᨵᨾ᩠ᨾᩣᨶᩩᨸᩔᨶᩣ ᨡᨶ᩠ᨵᨸᨻ᩠ᨻᩴ

᪓᪘᪓. ‘‘ᨸᩩᨶ ᨧᨸᩁᩴ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᨸᨬ᩠ᨧᩈᩩ ᩏᨸᩣᨴᩣᨶᨠ᩠ᨡᨶ᩠ᨵᩮᩈᩩ. ᨠᨳᨬ᩠ᨧ ᨸᨶ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᨸᨬ᩠ᨧᩈᩩ ᩏᨸᩣᨴᩣᨶᨠ᩠ᨡᨶ᩠ᨵᩮᩈᩩ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ – ‘ᩍᨲᩥ ᩁᩪᨸᩴ, ᩍᨲᩥ ᩁᩪᨸᩔ ᩈᨾᩩᨴᨿᩮᩣ, ᩍᨲᩥ ᩁᩪᨸᩔ ᩋᨲ᩠ᨳᨦ᩠ᨣᨾᩮᩣ; ᩍᨲᩥ ᩅᩮᨴᨶᩣ, ᩍᨲᩥ ᩅᩮᨴᨶᩣᨿ ᩈᨾᩩᨴᨿᩮᩣ, ᩍᨲᩥ ᩅᩮᨴᨶᩣᨿ ᩋᨲ᩠ᨳᨦ᩠ᨣᨾᩮᩣ; ᩍᨲᩥ ᩈᨬ᩠ᨬᩣ, ᩍᨲᩥ ᩈᨬ᩠ᨬᩣᨿ ᩈᨾᩩᨴᨿᩮᩣ, ᩍᨲᩥ ᩈᨬ᩠ᨬᩣᨿ ᩋᨲ᩠ᨳᨦ᩠ᨣᨾᩮᩣ; ᩍᨲᩥ ᩈᨦ᩠ᨡᩣᩁᩣ, ᩍᨲᩥ ᩈᨦ᩠ᨡᩣᩁᩣᨶᩴ ᩈᨾᩩᨴᨿᩮᩣ, ᩍᨲᩥ ᩈᨦ᩠ᨡᩣᩁᩣᨶᩴ ᩋᨲ᩠ᨳᨦ᩠ᨣᨾᩮᩣ, ᩍᨲᩥ ᩅᩥᨬ᩠ᨬᩣᨱᩴ, ᩍᨲᩥ ᩅᩥᨬ᩠ᨬᩣᨱᩔ ᩈᨾᩩᨴᨿᩮᩣ, ᩍᨲᩥ ᩅᩥᨬ᩠ᨬᩣᨱᩔ ᩋᨲ᩠ᨳᨦ᩠ᨣᨾᩮᩣ’ᨲᩥ, ᩍᨲᩥ ᩋᨩ᩠ᨫᨲ᩠ᨲᩴ ᩅᩣ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ, ᨻᩉᩥᨴ᩠ᨵᩣ ᩅᩣ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ, ᩋᨩ᩠ᨫᨲ᩠ᨲᨻᩉᩥᨴ᩠ᨵᩣ ᩅᩣ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ. ᩈᨾᩩᨴᨿᨵᨾ᩠ᨾᩣᨶᩩᨸᩔᩦ ᩅᩣ ᨵᨾ᩠ᨾᩮᩈᩩ ᩅᩥᩉᩁᨲᩥ, ᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨵᨾ᩠ᨾᩮᩈᩩ ᩅᩥᩉᩁᨲᩥ, ᩈᨾᩩᨴᨿᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨵᨾ᩠ᨾᩮᩈᩩ ᩅᩥᩉᩁᨲᩥ. ‘ᩋᨲ᩠ᨳᩥ ᨵᨾ᩠ᨾᩣ’ᨲᩥ ᩅᩣ ᨸᨶᩔ ᩈᨲᩥ ᨸᨧ᩠ᨧᩩᨸᨭ᩠ᨮᩥᨲᩣ ᩉᩮᩣᨲᩥ ᨿᩣᩅᨴᩮᩅ ᨬᩣᨱᨾᨲ᩠ᨲᩣᨿ ᨸᨭᩥᩔᨲᩥᨾᨲ᩠ᨲᩣᨿ, ᩋᨶᩥᩔᩥᨲᩮᩣ ᨧ ᩅᩥᩉᩁᨲᩥ, ᨶ ᨧ ᨠᩥᨬ᩠ᨧᩥ ᩃᩮᩣᨠᩮ ᩏᨸᩣᨴᩥᨿᨲᩥ. ᩑᩅᨾ᩠ᨸᩥ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᨸᨬ᩠ᨧᩈᩩ ᩏᨸᩣᨴᩣᨶᨠ᩠ᨡᨶ᩠ᨵᩮᩈᩩ.

ᨡᨶ᩠ᨵᨸᨻ᩠ᨻᩴ ᨶᩥᨭ᩠ᨮᩥᨲᩴ.

ᨵᨾ᩠ᨾᩣᨶᩩᨸᩔᨶᩣ ᩌᨿᨲᨶᨸᨻ᩠ᨻᩴ

᪓᪘᪔. ‘‘ᨸᩩᨶ ᨧᨸᩁᩴ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᨨᩈᩩ ᩋᨩ᩠ᨫᨲ᩠ᨲᩥᨠᨻᩣᩉᩥᩁᩮᩈᩩ ᩌᨿᨲᨶᩮᩈᩩ. ᨠᨳᨬ᩠ᨧ ᨸᨶ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᨨᩈᩩ ᩋᨩ᩠ᨫᨲ᩠ᨲᩥᨠᨻᩣᩉᩥᩁᩮᩈᩩ ᩌᨿᨲᨶᩮᩈᩩ?

‘‘ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨧᨠ᩠ᨡᩩᨬ᩠ᨧ ᨸᨩᩣᨶᩣᨲᩥ, ᩁᩪᨸᩮ ᨧ ᨸᨩᩣᨶᩣᨲᩥ, ᨿᨬ᩠ᨧ ᨲᨴᩩᨽᨿᩴ ᨸᨭᩥᨧ᩠ᨧ ᩏᨸ᩠ᨸᨩ᩠ᨩᨲᩥ ᩈᩴᨿᩮᩣᨩᨶᩴ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᩈᩴᨿᩮᩣᨩᨶᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᩈᩴᨿᩮᩣᨩᨶᩔ ᨸᩉᩣᨶᩴ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᨸᩉᩦᨶᩔ ᩈᩴᨿᩮᩣᨩᨶᩔ ᩌᨿᨲᩥᩴ ᩋᨶᩩᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᩈᩮᩣᨲᨬ᩠ᨧ ᨸᨩᩣᨶᩣᨲᩥ, ᩈᨴ᩠ᨴᩮ ᨧ ᨸᨩᩣᨶᩣᨲᩥ, ᨿᨬ᩠ᨧ ᨲᨴᩩᨽᨿᩴ ᨸᨭᩥᨧ᩠ᨧ ᩏᨸ᩠ᨸᨩ᩠ᨩᨲᩥ ᩈᩴᨿᩮᩣᨩᨶᩴ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᩈᩴᨿᩮᩣᨩᨶᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᩈᩴᨿᩮᩣᨩᨶᩔ ᨸᩉᩣᨶᩴ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᨸᩉᩦᨶᩔ ᩈᩴᨿᩮᩣᨩᨶᩔ ᩌᨿᨲᩥᩴ ᩋᨶᩩᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᨥᩣᨶᨬ᩠ᨧ ᨸᨩᩣᨶᩣᨲᩥ, ᨣᨶ᩠ᨵᩮ ᨧ ᨸᨩᩣᨶᩣᨲᩥ, ᨿᨬ᩠ᨧ ᨲᨴᩩᨽᨿᩴ ᨸᨭᩥᨧ᩠ᨧ ᩏᨸ᩠ᨸᨩ᩠ᨩᨲᩥ ᩈᩴᨿᩮᩣᨩᨶᩴ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᩈᩴᨿᩮᩣᨩᨶᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᩈᩴᨿᩮᩣᨩᨶᩔ ᨸᩉᩣᨶᩴ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᨸᩉᩦᨶᩔ ᩈᩴᨿᩮᩣᨩᨶᩔ ᩌᨿᨲᩥᩴ ᩋᨶᩩᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᨩᩥᩅ᩠ᩉᨬ᩠ᨧ ᨸᨩᩣᨶᩣᨲᩥ, ᩁᩈᩮ ᨧ ᨸᨩᩣᨶᩣᨲᩥ, ᨿᨬ᩠ᨧ ᨲᨴᩩᨽᨿᩴ ᨸᨭᩥᨧ᩠ᨧ ᩏᨸ᩠ᨸᨩ᩠ᨩᨲᩥ ᩈᩴᨿᩮᩣᨩᨶᩴ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᩈᩴᨿᩮᩣᨩᨶᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᩈᩴᨿᩮᩣᨩᨶᩔ ᨸᩉᩣᨶᩴ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᨸᩉᩦᨶᩔ ᩈᩴᨿᩮᩣᨩᨶᩔ ᩌᨿᨲᩥᩴ ᩋᨶᩩᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᨠᩣᨿᨬ᩠ᨧ ᨸᨩᩣᨶᩣᨲᩥ, ᨹᩮᩣᨭ᩠ᨮᨻ᩠ᨻᩮ ᨧ ᨸᨩᩣᨶᩣᨲᩥ, ᨿᨬ᩠ᨧ ᨲᨴᩩᨽᨿᩴ ᨸᨭᩥᨧ᩠ᨧ ᩏᨸ᩠ᨸᨩ᩠ᨩᨲᩥ ᩈᩴᨿᩮᩣᨩᨶᩴ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᩈᩴᨿᩮᩣᨩᨶᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᩈᩴᨿᩮᩣᨩᨶᩔ ᨸᩉᩣᨶᩴ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᨸᩉᩦᨶᩔ ᩈᩴᨿᩮᩣᨩᨶᩔ ᩌᨿᨲᩥᩴ ᩋᨶᩩᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᨾᨶᨬ᩠ᨧ ᨸᨩᩣᨶᩣᨲᩥ, ᨵᨾ᩠ᨾᩮ ᨧ ᨸᨩᩣᨶᩣᨲᩥ, ᨿᨬ᩠ᨧ ᨲᨴᩩᨽᨿᩴ ᨸᨭᩥᨧ᩠ᨧ ᩏᨸ᩠ᨸᨩ᩠ᨩᨲᩥ ᩈᩴᨿᩮᩣᨩᨶᩴ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᩈᩴᨿᩮᩣᨩᨶᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᩈᩴᨿᩮᩣᨩᨶᩔ ᨸᩉᩣᨶᩴ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᨸᩉᩦᨶᩔ ᩈᩴᨿᩮᩣᨩᨶᩔ ᩌᨿᨲᩥᩴ ᩋᨶᩩᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᩍᨲᩥ ᩋᨩ᩠ᨫᨲ᩠ᨲᩴ ᩅᩣ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ, ᨻᩉᩥᨴ᩠ᨵᩣ ᩅᩣ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ, ᩋᨩ᩠ᨫᨲ᩠ᨲᨻᩉᩥᨴ᩠ᨵᩣ ᩅᩣ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ. ᩈᨾᩩᨴᨿᨵᨾ᩠ᨾᩣᨶᩩᨸᩔᩦ ᩅᩣ ᨵᨾ᩠ᨾᩮᩈᩩ ᩅᩥᩉᩁᨲᩥ, ᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨵᨾ᩠ᨾᩮᩈᩩ ᩅᩥᩉᩁᨲᩥ, ᩈᨾᩩᨴᨿᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨵᨾ᩠ᨾᩮᩈᩩ ᩅᩥᩉᩁᨲᩥ. ‘ᩋᨲ᩠ᨳᩥ ᨵᨾ᩠ᨾᩣ’ᨲᩥ ᩅᩣ ᨸᨶᩔ ᩈᨲᩥ ᨸᨧ᩠ᨧᩩᨸᨭ᩠ᨮᩥᨲᩣ ᩉᩮᩣᨲᩥ ᨿᩣᩅᨴᩮᩅ ᨬᩣᨱᨾᨲ᩠ᨲᩣᨿ ᨸᨭᩥᩔᨲᩥᨾᨲ᩠ᨲᩣᨿ, ᩋᨶᩥᩔᩥᨲᩮᩣ ᨧ ᩅᩥᩉᩁᨲᩥ, ᨶ ᨧ ᨠᩥᨬ᩠ᨧᩥ ᩃᩮᩣᨠᩮ ᩏᨸᩣᨴᩥᨿᨲᩥ. ᩑᩅᨾ᩠ᨸᩥ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᨨᩈᩩ ᩋᨩ᩠ᨫᨲ᩠ᨲᩥᨠᨻᩣᩉᩥᩁᩮᩈᩩ ᩌᨿᨲᨶᩮᩈᩩ.

ᩌᨿᨲᨶᨸᨻ᩠ᨻᩴ ᨶᩥᨭ᩠ᨮᩥᨲᩴ.

ᨵᨾ᩠ᨾᩣᨶᩩᨸᩔᨶᩣ ᨻᩮᩣᨩ᩠ᨫᨦ᩠ᨣᨸᨻ᩠ᨻᩴ

᪓᪘᪕. ‘‘ᨸᩩᨶ ᨧᨸᩁᩴ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᩈᨲ᩠ᨲᩈᩩ ᨻᩮᩣᨩ᩠ᨫᨦ᩠ᨣᩮᩈᩩ. ᨠᨳᨬ᩠ᨧ ᨸᨶ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᩈᨲ᩠ᨲᩈᩩ ᨻᩮᩣᨩ᩠ᨫᨦ᩠ᨣᩮᩈᩩ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᩈᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ‘ᩋᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᩈᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ’ᨲᩥ ᨸᨩᩣᨶᩣᨲᩥ, ᩋᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᩈᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ‘ᨶᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᩈᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ’ᨲᩥ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᩈᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᩈᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩔ ᨽᩣᩅᨶᩣᨿ ᨸᩣᩁᩥᨸᩪᩁᩦ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᨵᨾ᩠ᨾᩅᩥᨧᨿᩈᨾ᩠ᨻᩮᩣᨩ᩠ᨫᨦ᩠ᨣᩴ ‘ᩋᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᨵᨾ᩠ᨾᩅᩥᨧᨿᩈᨾ᩠ᨻᩮᩣᨩ᩠ᨫᨦ᩠ᨣᩮᩣ’ᨲᩥ ᨸᨩᩣᨶᩣᨲᩥ, ᩋᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᨵᨾ᩠ᨾᩅᩥᨧᨿᩈᨾ᩠ᨻᩮᩣᨩ᩠ᨫᨦ᩠ᨣᩴ ‘ᨶᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᨵᨾ᩠ᨾᩅᩥᨧᨿᩈᨾ᩠ᨻᩮᩣᨩ᩠ᨫᨦ᩠ᨣᩮᩣ’ᨲᩥ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᨵᨾ᩠ᨾᩅᩥᨧᨿᩈᨾ᩠ᨻᩮᩣᨩ᩠ᨫᨦ᩠ᨣᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᨵᨾ᩠ᨾᩅᩥᨧᨿᩈᨾ᩠ᨻᩮᩣᨩ᩠ᨫᨦ᩠ᨣᩔ ᨽᩣᩅᨶᩣᨿ ᨸᩣᩁᩥᨸᩪᩁᩦ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᩅᩦᩁᩥᨿᩈᨾ᩠ᨻᩮᩣᨩ᩠ᨫᨦ᩠ᨣᩴ ‘ᩋᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᩅᩦᩁᩥᨿᩈᨾ᩠ᨻᩮᩣᨩ᩠ᨫᨦ᩠ᨣᩮᩣ’ᨲᩥ ᨸᨩᩣᨶᩣᨲᩥ, ᩋᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᩅᩦᩁᩥᨿᩈᨾ᩠ᨻᩮᩣᨩ᩠ᨫᨦ᩠ᨣᩴ ‘ᨶᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᩅᩦᩁᩥᨿᩈᨾ᩠ᨻᩮᩣᨩ᩠ᨫᨦ᩠ᨣᩮᩣ’ᨲᩥ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᩅᩦᩁᩥᨿᩈᨾ᩠ᨻᩮᩣᨩ᩠ᨫᨦ᩠ᨣᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᩅᩦᩁᩥᨿᩈᨾ᩠ᨻᩮᩣᨩ᩠ᨫᨦ᩠ᨣᩔ ᨽᩣᩅᨶᩣᨿ ᨸᩣᩁᩥᨸᩪᩁᩦ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᨸᩦᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ‘ᩋᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᨸᩦᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ’ᨲᩥ ᨸᨩᩣᨶᩣᨲᩥ, ᩋᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᨸᩦᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ‘ᨶᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᨸᩦᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ’ᨲᩥ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᨸᩦᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᨸᩦᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩔ ᨽᩣᩅᨶᩣᨿ ᨸᩣᩁᩥᨸᩪᩁᩦ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᨸᩔᨴ᩠ᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ‘ᩋᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᨸᩔᨴ᩠ᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ’ᨲᩥ ᨸᨩᩣᨶᩣᨲᩥ, ᩋᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᨸᩔᨴ᩠ᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ‘ᨶᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᨸᩔᨴ᩠ᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ’ᨲᩥ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᨸᩔᨴ᩠ᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᨸᩔᨴ᩠ᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩔ ᨽᩣᩅᨶᩣᨿ ᨸᩣᩁᩥᨸᩪᩁᩦ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᩈᨾᩣᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ‘ᩋᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᩈᨾᩣᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ’ᨲᩥ ᨸᨩᩣᨶᩣᨲᩥ, ᩋᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᩈᨾᩣᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ‘ᨶᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᩈᨾᩣᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ’ᨲᩥ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᩈᨾᩣᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᩈᨾᩣᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩔ ᨽᩣᩅᨶᩣᨿ ᨸᩣᩁᩥᨸᩪᩁᩦ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᩏᨸᩮᨠ᩠ᨡᩣᩈᨾ᩠ᨻᩮᩣᨩ᩠ᨫᨦ᩠ᨣᩴ ‘ᩋᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᩏᨸᩮᨠ᩠ᨡᩣᩈᨾ᩠ᨻᩮᩣᨩ᩠ᨫᨦ᩠ᨣᩮᩣ’ᨲᩥ ᨸᨩᩣᨶᩣᨲᩥ, ᩋᩈᨶ᩠ᨲᩴ ᩅᩣ ᩋᨩ᩠ᨫᨲ᩠ᨲᩴ ᩏᨸᩮᨠ᩠ᨡᩣᩈᨾ᩠ᨻᩮᩣᨩ᩠ᨫᨦ᩠ᨣᩴ ‘ᨶᨲ᩠ᨳᩥ ᨾᩮ ᩋᨩ᩠ᨫᨲ᩠ᨲᩴ ᩏᨸᩮᨠ᩠ᨡᩣᩈᨾ᩠ᨻᩮᩣᨩ᩠ᨫᨦ᩠ᨣᩮᩣ’ᨲᩥ ᨸᨩᩣᨶᩣᨲᩥ, ᨿᨳᩣ ᨧ ᩋᨶᩩᨸ᩠ᨸᨶ᩠ᨶᩔ ᩏᨸᩮᨠ᩠ᨡᩣᩈᨾ᩠ᨻᩮᩣᨩ᩠ᨫᨦ᩠ᨣᩔ ᩏᨸ᩠ᨸᩣᨴᩮᩣ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ, ᨿᨳᩣ ᨧ ᩏᨸ᩠ᨸᨶ᩠ᨶᩔ ᩏᨸᩮᨠ᩠ᨡᩣᩈᨾ᩠ᨻᩮᩣᨩ᩠ᨫᨦ᩠ᨣᩔ ᨽᩣᩅᨶᩣᨿ ᨸᩣᩁᩥᨸᩪᩁᩦ ᩉᩮᩣᨲᩥ ᨲᨬ᩠ᨧ ᨸᨩᩣᨶᩣᨲᩥ.

‘‘ᩍᨲᩥ ᩋᨩ᩠ᨫᨲ᩠ᨲᩴ ᩅᩣ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ, ᨻᩉᩥᨴ᩠ᨵᩣ ᩅᩣ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ, ᩋᨩ᩠ᨫᨲ᩠ᨲᨻᩉᩥᨴ᩠ᨵᩣ ᩅᩣ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ. ᩈᨾᩩᨴᨿᨵᨾ᩠ᨾᩣᨶᩩᨸᩔᩦ ᩅᩣ ᨵᨾ᩠ᨾᩮᩈᩩ ᩅᩥᩉᩁᨲᩥ, ᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨵᨾ᩠ᨾᩮᩈᩩ ᩅᩥᩉᩁᨲᩥ, ᩈᨾᩩᨴᨿᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨵᨾ᩠ᨾᩮᩈᩩ ᩅᩥᩉᩁᨲᩥ ‘ᩋᨲ᩠ᨳᩥ ᨵᨾ᩠ᨾᩣ’ᨲᩥ ᩅᩣ ᨸᨶᩔ ᩈᨲᩥ ᨸᨧ᩠ᨧᩩᨸᨭ᩠ᨮᩥᨲᩣ ᩉᩮᩣᨲᩥ ᨿᩣᩅᨴᩮᩅ ᨬᩣᨱᨾᨲ᩠ᨲᩣᨿ ᨸᨭᩥᩔᨲᩥᨾᨲ᩠ᨲᩣᨿ ᩋᨶᩥᩔᩥᨲᩮᩣ ᨧ ᩅᩥᩉᩁᨲᩥ, ᨶ ᨧ ᨠᩥᨬ᩠ᨧᩥ ᩃᩮᩣᨠᩮ ᩏᨸᩣᨴᩥᨿᨲᩥ. ᩑᩅᨾ᩠ᨸᩥ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᩈᨲ᩠ᨲᩈᩩ ᨻᩮᩣᨩ᩠ᨫᨦ᩠ᨣᩮᩈᩩ.

ᨻᩮᩣᨩ᩠ᨫᨦ᩠ᨣᨸᨻ᩠ᨻᩴ ᨶᩥᨭ᩠ᨮᩥᨲᩴ. [ᨻᩮᩣᨩ᩠ᨫᨦ᩠ᨣᨸᨻ᩠ᨻᩴ ᨶᩥᨭ᩠ᨮᩥᨲᩴ, ᨸᨮᨾᨽᩣᨱᩅᩣᩁᩴ (ᩈ᩠ᨿᩣ.)]

ᨵᨾ᩠ᨾᩣᨶᩩᨸᩔᨶᩣ ᩈᨧ᩠ᨧᨸᨻ᩠ᨻᩴ

᪓᪘᪖. ‘‘ᨸᩩᨶ ᨧᨸᩁᩴ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᨧᨲᩪᩈᩩ ᩋᩁᩥᨿᩈᨧ᩠ᨧᩮᩈᩩ. ᨠᨳᨬ᩠ᨧ ᨸᨶ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᨧᨲᩪᩈᩩ ᩋᩁᩥᨿᩈᨧ᩠ᨧᩮᩈᩩ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ‘ᩍᨴᩴ ᨴᩩᨠ᩠ᨡ’ᨶ᩠ᨲᩥ ᨿᨳᩣᨽᩪᨲᩴ ᨸᨩᩣᨶᩣᨲᩥ, ‘ᩋᨿᩴ ᨴᩩᨠ᩠ᨡᩈᨾᩩᨴᨿᩮᩣ’ᨲᩥ ᨿᨳᩣᨽᩪᨲᩴ ᨸᨩᩣᨶᩣᨲᩥ, ‘ᩋᨿᩴ ᨴᩩᨠ᩠ᨡᨶᩥᩁᩮᩣᨵᩮᩣ’ᨲᩥ ᨿᨳᩣᨽᩪᨲᩴ ᨸᨩᩣᨶᩣᨲᩥ, ‘ᩋᨿᩴ ᨴᩩᨠ᩠ᨡᨶᩥᩁᩮᩣᨵᨣᩣᨾᩥᨶᩦ ᨸᨭᩥᨸᨴᩣ’ᨲᩥ ᨿᨳᩣᨽᩪᨲᩴ ᨸᨩᩣᨶᩣᨲᩥ.

ᨸᨮᨾᨽᩣᨱᩅᩣᩁᩮᩣ ᨶᩥᨭ᩠ᨮᩥᨲᩮᩣ.

ᨴᩩᨠ᩠ᨡᩈᨧ᩠ᨧᨶᩥᨴ᩠ᨴᩮᩈᩮᩣ

᪓᪘᪗. ‘‘ᨠᨲᨾᨬ᩠ᨧ, ᨽᩥᨠ᩠ᨡᩅᩮ, ᨴᩩᨠ᩠ᨡᩴ ᩋᩁᩥᨿᩈᨧ᩠ᨧᩴ? ᨩᩣᨲᩥᨸᩥ ᨴᩩᨠ᩠ᨡᩣ, ᨩᩁᩣᨸᩥ ᨴᩩᨠ᩠ᨡᩣ, ᨾᩁᨱᨾ᩠ᨸᩥ ᨴᩩᨠ᩠ᨡᩴ, ᩈᩮᩣᨠᨸᩁᩥᨴᩮᩅᨴᩩᨠ᩠ᨡᨴᩮᩣᨾᨶᩔᩩᨸᩣᨿᩣᩈᩣᨸᩥ ᨴᩩᨠ᩠ᨡᩣ, ᩋᨸ᩠ᨸᩥᨿᩮᩉᩥ ᩈᨾ᩠ᨸᨿᩮᩣᨣᩮᩣᨸᩥ ᨴᩩᨠ᩠ᨡᩮᩣ, ᨸᩥᨿᩮᩉᩥ ᩅᩥᨸ᩠ᨸᨿᩮᩣᨣᩮᩣᨸᩥ ᨴᩩᨠ᩠ᨡᩮᩣ [ᩋᨸ᩠ᨸᩥᨿᩮᩉᩥ…ᨸᩮ… ᩅᩥᨸ᩠ᨸᨿᩮᩣᨣᩮᩣ ᨴᩩᨠ᩠ᨡᩮᩣᨲᩥᨸᩣᨮᩮᩣ ᨧᩮᩅ ᨲᩴᨶᩥᨴ᩠ᨴᩮᩈᩮᩣ ᨧ ᨠᨲ᩠ᨳᨧᩥ ᨶ ᨴᩥᩔᨲᩥ, ᩋᨭ᩠ᨮᨠᨳᩣᨿᩴᨸᩥ ᨲᩴᩈᩴᩅᨱ᩠ᨱᨶᩣ ᨶᨲ᩠ᨳᩥ], ᨿᨾ᩠ᨸᩥᨧ᩠ᨨᩴ ᨶ ᩃᨽᨲᩥ ᨲᨾ᩠ᨸᩥ ᨴᩩᨠ᩠ᨡᩴ, ᩈᨦ᩠ᨡᩥᨲ᩠ᨲᩮᨶ ᨸᨬ᩠ᨧᩩᨸᩣᨴᩣᨶᨠ᩠ᨡᨶ᩠ᨵᩣ [ᨸᨬ᩠ᨧᩩᨸᩣᨴᩣᨶᨠ᩠ᨡᨶ᩠ᨵᩣᨸᩥ (ᨠ.)] ᨴᩩᨠ᩠ᨡᩣ.

᪓᪘᪘. ‘‘ᨠᨲᨾᩣ ᨧ, ᨽᩥᨠ᩠ᨡᩅᩮ, ᨩᩣᨲᩥ? ᨿᩣ ᨲᩮᩈᩴ ᨲᩮᩈᩴ ᩈᨲ᩠ᨲᩣᨶᩴ ᨲᨾ᩠ᩉᩥ ᨲᨾ᩠ᩉᩥ ᩈᨲ᩠ᨲᨶᩥᨠᩣᨿᩮ ᨩᩣᨲᩥ ᩈᨬ᩠ᨩᩣᨲᩥ ᩒᨠ᩠ᨠᨶ᩠ᨲᩥ ᩋᨽᩥᨶᩥᨻ᩠ᨻᨲ᩠ᨲᩥ ᨡᨶ᩠ᨵᩣᨶᩴ ᨸᩣᨲᩩᨽᩣᩅᩮᩣ ᩌᨿᨲᨶᩣᨶᩴ ᨸᨭᩥᩃᩣᨽᩮᩣ, ᩋᨿᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᨩᩣᨲᩥ.

᪓᪘᪙. ‘‘ᨠᨲᨾᩣ ᨧ, ᨽᩥᨠ᩠ᨡᩅᩮ, ᨩᩁᩣ? ᨿᩣ ᨲᩮᩈᩴ ᨲᩮᩈᩴ ᩈᨲ᩠ᨲᩣᨶᩴ ᨲᨾ᩠ᩉᩥ ᨲᨾ᩠ᩉᩥ ᩈᨲ᩠ᨲᨶᩥᨠᩣᨿᩮ ᨩᩁᩣ ᨩᩦᩁᨱᨲᩣ ᨡᨱ᩠ᨯᩥᨧ᩠ᨧᩴ ᨸᩣᩃᩥᨧ᩠ᨧᩴ ᩅᩃᩥᨲ᩠ᨲᨧᨲᩣ ᩌᨿᩩᨶᩮᩣ ᩈᩴᩉᩣᨶᩥ ᩍᨶ᩠ᨴᩕᩥᨿᩣᨶᩴ ᨸᩁᩥᨸᩣᨠᩮᩣ, ᩋᨿᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᨩᩁᩣ.

᪓᪙᪐. ‘‘ᨠᨲᨾᨬ᩠ᨧ, ᨽᩥᨠ᩠ᨡᩅᩮ, ᨾᩁᨱᩴ? ᨿᩴ [ᩋᨭ᩠ᨮᨠᨳᩣ ᩒᩃᩮᩣᨠᩮᨲᨻ᩠ᨻᩣ] ᨲᩮᩈᩴ ᨲᩮᩈᩴ ᩈᨲ᩠ᨲᩣᨶᩴ ᨲᨾ᩠ᩉᩣ ᨲᨾ᩠ᩉᩣ ᩈᨲ᩠ᨲᨶᩥᨠᩣᨿᩣ ᨧᩩᨲᩥ ᨧᩅᨶᨲᩣ ᨽᩮᨴᩮᩣ ᩋᨶ᩠ᨲᩁᨵᩣᨶᩴ ᨾᨧ᩠ᨧᩩ ᨾᩁᨱᩴ ᨠᩣᩃᨠᩥᩁᩥᨿᩣ ᨡᨶ᩠ᨵᩣᨶᩴ ᨽᩮᨴᩮᩣ ᨠᩊᩮᩅᩁᩔ ᨶᩥᨠ᩠ᨡᩮᨸᩮᩣ ᨩᩦᩅᩥᨲᩥᨶ᩠ᨴᩕᩥᨿᩔᩩᨸᨧ᩠ᨨᩮᨴᩮᩣ, ᩍᨴᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᨾᩁᨱᩴ.

᪓᪙᪑. ‘‘ᨠᨲᨾᩮᩣ ᨧ, ᨽᩥᨠ᩠ᨡᩅᩮ, ᩈᩮᩣᨠᩮᩣ? ᨿᩮᩣ ᨡᩮᩣ, ᨽᩥᨠ᩠ᨡᩅᩮ, ᩋᨬ᩠ᨬᨲᩁᨬ᩠ᨬᨲᩁᩮᨶ ᨻ᩠ᨿᩈᨶᩮᨶ ᩈᨾᨶ᩠ᨶᩣᨣᨲᩔ ᩋᨬ᩠ᨬᨲᩁᨬ᩠ᨬᨲᩁᩮᨶ ᨴᩩᨠ᩠ᨡᨵᨾ᩠ᨾᩮᨶ ᨹᩩᨭ᩠ᨮᩔ ᩈᩮᩣᨠᩮᩣ ᩈᩮᩣᨧᨶᩣ ᩈᩮᩣᨧᩥᨲᨲ᩠ᨲᩴ ᩋᨶ᩠ᨲᩮᩣᩈᩮᩣᨠᩮᩣ ᩋᨶ᩠ᨲᩮᩣᨸᩁᩥᩈᩮᩣᨠᩮᩣ, ᩋᨿᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᩈᩮᩣᨠᩮᩣ.

᪓᪙᪒. ‘‘ᨠᨲᨾᩮᩣ ᨧ, ᨽᩥᨠ᩠ᨡᩅᩮ, ᨸᩁᩥᨴᩮᩅᩮᩣ? ᨿᩮᩣ ᨡᩮᩣ, ᨽᩥᨠ᩠ᨡᩅᩮ, ᩋᨬ᩠ᨬᨲᩁᨬ᩠ᨬᨲᩁᩮᨶ ᨻ᩠ᨿᩈᨶᩮᨶ ᩈᨾᨶ᩠ᨶᩣᨣᨲᩔ ᩋᨬ᩠ᨬᨲᩁᨬ᩠ᨬᨲᩁᩮᨶ ᨴᩩᨠ᩠ᨡᨵᨾ᩠ᨾᩮᨶ ᨹᩩᨭ᩠ᨮᩔ ᩌᨴᩮᩅᩮᩣ ᨸᩁᩥᨴᩮᩅᩮᩣ ᩌᨴᩮᩅᨶᩣ ᨸᩁᩥᨴᩮᩅᨶᩣ ᩌᨴᩮᩅᩥᨲᨲ᩠ᨲᩴ ᨸᩁᩥᨴᩮᩅᩥᨲᨲ᩠ᨲᩴ, ᩋᨿᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ ᨸᩁᩥᨴᩮᩅᩮᩣ.

᪓᪙᪓. ‘‘ᨠᨲᨾᨬ᩠ᨧ, ᨽᩥᨠ᩠ᨡᩅᩮ, ᨴᩩᨠ᩠ᨡᩴ? ᨿᩴ ᨡᩮᩣ, ᨽᩥᨠ᩠ᨡᩅᩮ, ᨠᩣᨿᩥᨠᩴ ᨴᩩᨠ᩠ᨡᩴ ᨠᩣᨿᩥᨠᩴ ᩋᩈᩣᨲᩴ ᨠᩣᨿᩈᨾ᩠ᨹᩔᨩᩴ ᨴᩩᨠ᩠ᨡᩴ ᩋᩈᩣᨲᩴ ᩅᩮᨴᨿᩥᨲᩴ, ᩍᨴᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᨴᩩᨠ᩠ᨡᩴ.

᪓᪙᪔. ‘‘ᨠᨲᨾᨬ᩠ᨧ, ᨽᩥᨠ᩠ᨡᩅᩮ, ᨴᩮᩣᨾᨶᩔᩴ? ᨿᩴ ᨡᩮᩣ, ᨽᩥᨠ᩠ᨡᩅᩮ, ᨧᩮᨲᩈᩥᨠᩴ ᨴᩩᨠ᩠ᨡᩴ ᨧᩮᨲᩈᩥᨠᩴ ᩋᩈᩣᨲᩴ ᨾᨶᩮᩣᩈᨾ᩠ᨹᩔᨩᩴ ᨴᩩᨠ᩠ᨡᩴ ᩋᩈᩣᨲᩴ ᩅᩮᨴᨿᩥᨲᩴ, ᩍᨴᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᨴᩮᩣᨾᨶᩔᩴ.

᪓᪙᪕. ‘‘ᨠᨲᨾᩮᩣ ᨧ, ᨽᩥᨠ᩠ᨡᩅᩮ, ᩏᨸᩣᨿᩣᩈᩮᩣ? ᨿᩮᩣ ᨡᩮᩣ, ᨽᩥᨠ᩠ᨡᩅᩮ, ᩋᨬ᩠ᨬᨲᩁᨬ᩠ᨬᨲᩁᩮᨶ ᨻ᩠ᨿᩈᨶᩮᨶ ᩈᨾᨶ᩠ᨶᩣᨣᨲᩔ ᩋᨬ᩠ᨬᨲᩁᨬ᩠ᨬᨲᩁᩮᨶ ᨴᩩᨠ᩠ᨡᨵᨾ᩠ᨾᩮᨶ ᨹᩩᨭ᩠ᨮᩔ ᩌᨿᩣᩈᩮᩣ ᩏᨸᩣᨿᩣᩈᩮᩣ ᩌᨿᩣᩈᩥᨲᨲ᩠ᨲᩴ ᩏᨸᩣᨿᩣᩈᩥᨲᨲ᩠ᨲᩴ, ᩋᨿᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᩏᨸᩣᨿᩣᩈᩮᩣ.

᪓᪙᪖. ‘‘ᨠᨲᨾᩮᩣ ᨧ, ᨽᩥᨠ᩠ᨡᩅᩮ, ᩋᨸ᩠ᨸᩥᨿᩮᩉᩥ ᩈᨾ᩠ᨸᨿᩮᩣᨣᩮᩣ ᨴᩩᨠ᩠ᨡᩮᩣ? ᩍᨵ ᨿᩔ ᨲᩮ ᩉᩮᩣᨶ᩠ᨲᩥ ᩋᨶᩥᨭ᩠ᨮᩣ ᩋᨠᨶ᩠ᨲᩣ ᩋᨾᨶᩣᨸᩣ ᩁᩪᨸᩣ ᩈᨴ᩠ᨴᩣ ᨣᨶ᩠ᨵᩣ ᩁᩈᩣ ᨹᩮᩣᨭ᩠ᨮᨻ᩠ᨻᩣ ᨵᨾ᩠ᨾᩣ, ᨿᩮ ᩅᩣ ᨸᨶᩔ ᨲᩮ ᩉᩮᩣᨶ᩠ᨲᩥ ᩋᨶᨲ᩠ᨳᨠᩣᨾᩣ ᩋᩉᩥᨲᨠᩣᨾᩣ ᩋᨹᩣᩈᩩᨠᨠᩣᨾᩣ ᩋᨿᩮᩣᨣᨠ᩠ᨡᩮᨾᨠᩣᨾᩣ, ᨿᩣ ᨲᩮᩉᩥ ᩈᨴ᩠ᨵᩥᩴ ᩈᨦ᩠ᨣᨲᩥ ᩈᨾᩣᨣᨾᩮᩣ ᩈᨾᩮᩣᨵᩣᨶᩴ ᨾᩥᩔᩦᨽᩣᩅᩮᩣ, ᩋᨿᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᩋᨸ᩠ᨸᩥᨿᩮᩉᩥ ᩈᨾ᩠ᨸᨿᩮᩣᨣᩮᩣ ᨴᩩᨠ᩠ᨡᩮᩣ.

᪓᪙᪗. ‘‘ᨠᨲᨾᩮᩣ ᨧ, ᨽᩥᨠ᩠ᨡᩅᩮ, ᨸᩥᨿᩮᩉᩥ ᩅᩥᨸ᩠ᨸᨿᩮᩣᨣᩮᩣ ᨴᩩᨠ᩠ᨡᩮᩣ? ᩍᨵ ᨿᩔ ᨲᩮ ᩉᩮᩣᨶ᩠ᨲᩥ ᩍᨭ᩠ᨮᩣ ᨠᨶ᩠ᨲᩣ ᨾᨶᩣᨸᩣ ᩁᩪᨸᩣ ᩈᨴ᩠ᨴᩣ ᨣᨶ᩠ᨵᩣ ᩁᩈᩣ ᨹᩮᩣᨭ᩠ᨮᨻ᩠ᨻᩣ ᨵᨾ᩠ᨾᩣ, ᨿᩮ ᩅᩣ ᨸᨶᩔ ᨲᩮ ᩉᩮᩣᨶ᩠ᨲᩥ ᩋᨲ᩠ᨳᨠᩣᨾᩣ ᩉᩥᨲᨠᩣᨾᩣ ᨹᩣᩈᩩᨠᨠᩣᨾᩣ ᨿᩮᩣᨣᨠ᩠ᨡᩮᨾᨠᩣᨾᩣ ᨾᩣᨲᩣ ᩅᩣ ᨸᩥᨲᩣ ᩅᩣ ᨽᩣᨲᩣ ᩅᩣ ᨽᨣᩥᨶᩦ ᩅᩣ ᨾᩥᨲ᩠ᨲᩣ ᩅᩣ ᩋᨾᨧ᩠ᨧᩣ ᩅᩣ ᨬᩣᨲᩥᩈᩣᩃᩮᩣᩉᩥᨲᩣ ᩅᩣ, ᨿᩣ ᨲᩮᩉᩥ ᩈᨴ᩠ᨵᩥᩴ ᩋᩈᨦ᩠ᨣᨲᩥ ᩋᩈᨾᩣᨣᨾᩮᩣ ᩋᩈᨾᩮᩣᨵᩣᨶᩴ ᩋᨾᩥᩔᩦᨽᩣᩅᩮᩣ, ᩋᨿᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᨸᩥᨿᩮᩉᩥ ᩅᩥᨸ᩠ᨸᨿᩮᩣᨣᩮᩣ ᨴᩩᨠ᩠ᨡᩮᩣ.

᪓᪙᪘. ‘‘ᨠᨲᨾᨬ᩠ᨧ, ᨽᩥᨠ᩠ᨡᩅᩮ, ᨿᨾ᩠ᨸᩥᨧ᩠ᨨᩴ ᨶ ᩃᨽᨲᩥ ᨲᨾ᩠ᨸᩥ ᨴᩩᨠ᩠ᨡᩴ? ᨩᩣᨲᩥᨵᨾ᩠ᨾᩣᨶᩴ, ᨽᩥᨠ᩠ᨡᩅᩮ, ᩈᨲ᩠ᨲᩣᨶᩴ ᩑᩅᩴ ᩍᨧ᩠ᨨᩣ ᩏᨸ᩠ᨸᨩ᩠ᨩᨲᩥ – ‘ᩋᩉᩮᩣ ᩅᨲ ᨾᨿᩴ ᨶ ᨩᩣᨲᩥᨵᨾ᩠ᨾᩣ ᩋᩔᩣᨾ, ᨶ ᨧ ᩅᨲ ᨶᩮᩣ ᨩᩣᨲᩥ ᩌᨣᨧ᩠ᨨᩮᨿ᩠ᨿᩣ’ᨲᩥ. ᨶ ᨡᩮᩣ ᨸᨶᩮᨲᩴ ᩍᨧ᩠ᨨᩣᨿ ᨸᨲ᩠ᨲᨻ᩠ᨻᩴ, ᩍᨴᨾ᩠ᨸᩥ ᨿᨾ᩠ᨸᩥᨧ᩠ᨨᩴ ᨶ ᩃᨽᨲᩥ ᨲᨾ᩠ᨸᩥ ᨴᩩᨠ᩠ᨡᩴ. ᨩᩁᩣᨵᨾ᩠ᨾᩣᨶᩴ, ᨽᩥᨠ᩠ᨡᩅᩮ, ᩈᨲ᩠ᨲᩣᨶᩴ ᩑᩅᩴ ᩍᨧ᩠ᨨᩣ ᩏᨸ᩠ᨸᨩ᩠ᨩᨲᩥ – ‘ᩋᩉᩮᩣ ᩅᨲ ᨾᨿᩴ ᨶ ᨩᩁᩣᨵᨾ᩠ᨾᩣ ᩋᩔᩣᨾ, ᨶ ᨧ ᩅᨲ ᨶᩮᩣ ᨩᩁᩣ ᩌᨣᨧ᩠ᨨᩮᨿ᩠ᨿᩣ’ᨲᩥ. ᨶ ᨡᩮᩣ ᨸᨶᩮᨲᩴ ᩍᨧ᩠ᨨᩣᨿ ᨸᨲ᩠ᨲᨻ᩠ᨻᩴ, ᩍᨴᨾ᩠ᨸᩥ ᨿᨾ᩠ᨸᩥᨧ᩠ᨨᩴ ᨶ ᩃᨽᨲᩥ ᨲᨾ᩠ᨸᩥ ᨴᩩᨠ᩠ᨡᩴ. ᨻ᩠ᨿᩣᨵᩥᨵᨾ᩠ᨾᩣᨶᩴ, ᨽᩥᨠ᩠ᨡᩅᩮ, ᩈᨲ᩠ᨲᩣᨶᩴ ᩑᩅᩴ ᩍᨧ᩠ᨨᩣ ᩏᨸ᩠ᨸᨩ᩠ᨩᨲᩥ ‘ᩋᩉᩮᩣ ᩅᨲ ᨾᨿᩴ ᨶ ᨻ᩠ᨿᩣᨵᩥᨵᨾ᩠ᨾᩣ ᩋᩔᩣᨾ, ᨶ ᨧ ᩅᨲ ᨶᩮᩣ ᨻ᩠ᨿᩣᨵᩥ ᩌᨣᨧ᩠ᨨᩮᨿ᩠ᨿᩣ’ᨲᩥ. ᨶ ᨡᩮᩣ ᨸᨶᩮᨲᩴ ᩍᨧ᩠ᨨᩣᨿ ᨸᨲ᩠ᨲᨻ᩠ᨻᩴ, ᩍᨴᨾ᩠ᨸᩥ ᨿᨾ᩠ᨸᩥᨧ᩠ᨨᩴ ᨶ ᩃᨽᨲᩥ ᨲᨾ᩠ᨸᩥ ᨴᩩᨠ᩠ᨡᩴ. ᨾᩁᨱᨵᨾ᩠ᨾᩣᨶᩴ, ᨽᩥᨠ᩠ᨡᩅᩮ, ᩈᨲ᩠ᨲᩣᨶᩴ ᩑᩅᩴ ᩍᨧ᩠ᨨᩣ ᩏᨸ᩠ᨸᨩ᩠ᨩᨲᩥ ‘ᩋᩉᩮᩣ ᩅᨲ ᨾᨿᩴ ᨶ ᨾᩁᨱᨵᨾ᩠ᨾᩣ ᩋᩔᩣᨾ, ᨶ ᨧ ᩅᨲ ᨶᩮᩣ ᨾᩁᨱᩴ ᩌᨣᨧ᩠ᨨᩮᨿ᩠ᨿᩣ’ᨲᩥ. ᨶ ᨡᩮᩣ ᨸᨶᩮᨲᩴ ᩍᨧ᩠ᨨᩣᨿ ᨸᨲ᩠ᨲᨻ᩠ᨻᩴ, ᩍᨴᨾ᩠ᨸᩥ ᨿᨾ᩠ᨸᩥᨧ᩠ᨨᩴ ᨶ ᩃᨽᨲᩥ ᨲᨾ᩠ᨸᩥ ᨴᩩᨠ᩠ᨡᩴ. ᩈᩮᩣᨠᨸᩁᩥᨴᩮᩅᨴᩩᨠ᩠ᨡᨴᩮᩣᨾᨶᩔᩩᨸᩣᨿᩣᩈᨵᨾ᩠ᨾᩣᨶᩴ, ᨽᩥᨠ᩠ᨡᩅᩮ, ᩈᨲ᩠ᨲᩣᨶᩴ ᩑᩅᩴ ᩍᨧ᩠ᨨᩣ ᩏᨸ᩠ᨸᨩ᩠ᨩᨲᩥ ‘ᩋᩉᩮᩣ ᩅᨲ ᨾᨿᩴ ᨶ ᩈᩮᩣᨠᨸᩁᩥᨴᩮᩅᨴᩩᨠ᩠ᨡᨴᩮᩣᨾᨶᩔᩩᨸᩣᨿᩣᩈᨵᨾ᩠ᨾᩣ ᩋᩔᩣᨾ, ᨶ ᨧ ᩅᨲ ᨶᩮᩣ ᩈᩮᩣᨠᨸᩁᩥᨴᩮᩅᨴᩩᨠ᩠ᨡᨴᩮᩣᨾᨶᩔᩩᨸᩣᨿᩣᩈᨵᨾ᩠ᨾᩣ ᩌᨣᨧ᩠ᨨᩮᨿ᩠ᨿᩩ’ᨶ᩠ᨲᩥ. ᨶ ᨡᩮᩣ ᨸᨶᩮᨲᩴ ᩍᨧ᩠ᨨᩣᨿ ᨸᨲ᩠ᨲᨻ᩠ᨻᩴ, ᩍᨴᨾ᩠ᨸᩥ ᨿᨾ᩠ᨸᩥᨧ᩠ᨨᩴ ᨶ ᩃᨽᨲᩥ ᨲᨾ᩠ᨸᩥ ᨴᩩᨠ᩠ᨡᩴ.

᪓᪙᪙. ‘‘ᨠᨲᨾᩮ ᨧ, ᨽᩥᨠ᩠ᨡᩅᩮ, ᩈᨦ᩠ᨡᩥᨲ᩠ᨲᩮᨶ ᨸᨬ᩠ᨧᩩᨸᩣᨴᩣᨶᨠ᩠ᨡᨶ᩠ᨵᩣ ᨴᩩᨠ᩠ᨡᩣ? ᩈᩮᨿ᩠ᨿᨳᩥᨴᩴ – ᩁᩪᨸᩩᨸᩣᨴᩣᨶᨠ᩠ᨡᨶ᩠ᨵᩮᩣ, ᩅᩮᨴᨶᩩᨸᩣᨴᩣᨶᨠ᩠ᨡᨶ᩠ᨵᩮᩣ, ᩈᨬ᩠ᨬᩩᨸᩣᨴᩣᨶᨠ᩠ᨡᨶ᩠ᨵᩮᩣ, ᩈᨦ᩠ᨡᩣᩁᩩᨸᩣᨴᩣᨶᨠ᩠ᨡᨶ᩠ᨵᩮᩣ, ᩅᩥᨬ᩠ᨬᩣᨱᩩᨸᩣᨴᩣᨶᨠ᩠ᨡᨶ᩠ᨵᩮᩣ. ᩍᨾᩮ ᩅᩩᨧ᩠ᨧᨶ᩠ᨲᩥ, ᨽᩥᨠ᩠ᨡᩅᩮ, ᩈᨦ᩠ᨡᩥᨲ᩠ᨲᩮᨶ ᨸᨬ᩠ᨧᩩᨸᩣᨴᩣᨶᨠ᩠ᨡᨶ᩠ᨵᩣ ᨴᩩᨠ᩠ᨡᩣ. ᩍᨴᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᨴᩩᨠ᩠ᨡᩴ ᩋᩁᩥᨿᩈᨧ᩠ᨧᩴ.

ᩈᨾᩩᨴᨿᩈᨧ᩠ᨧᨶᩥᨴ᩠ᨴᩮᩈᩮᩣ

᪔᪐᪐. ‘‘ᨠᨲᨾᨬ᩠ᨧ, ᨽᩥᨠ᩠ᨡᩅᩮ, ᨴᩩᨠ᩠ᨡᩈᨾᩩᨴᨿᩴ [ᨴᩩᨠ᩠ᨡᩈᨾᩩᨴᨿᩮᩣ (ᩈ᩠ᨿᩣ.)] ᩋᩁᩥᨿᩈᨧ᩠ᨧᩴ? ᨿᩣᨿᩴ ᨲᨱ᩠ᩉᩣ ᨸᩮᩣᨶᩮᩣᨻ᩠ᨽᩅᩥᨠᩣ [ᨸᩮᩣᨶᩮᩣᨽᩅᩥᨠᩣ (ᩈᩦ. ᨸᩦ.)] ᨶᨶ᩠ᨴᩦᩁᩣᨣᩈᩉᨣᨲᩣ [ᨶᨶ᩠ᨴᩥᩁᩣᨣᩈᩉᨣᨲᩣ (ᩈᩦ. ᩈ᩠ᨿᩣ. ᨸᩦ.)] ᨲᨲᩕᨲᨲᩕᩣᨽᩥᨶᨶ᩠ᨴᩥᨶᩦ, ᩈᩮᨿ᩠ᨿᨳᩥᨴᩴ – ᨠᩣᨾᨲᨱ᩠ᩉᩣ ᨽᩅᨲᨱ᩠ᩉᩣ ᩅᩥᨽᩅᨲᨱ᩠ᩉᩣ.

‘‘ᩈᩣ ᨡᩮᩣ ᨸᨶᩮᩈᩣ, ᨽᩥᨠ᩠ᨡᩅᩮ, ᨲᨱ᩠ᩉᩣ ᨠᨲ᩠ᨳ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ, ᨠᨲ᩠ᨳ ᨶᩥᩅᩥᩈᨾᩣᨶᩣ ᨶᩥᩅᩥᩈᨲᩥ? ᨿᩴ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ, ᩑᨲ᩠ᨳ ᨶᩥᩅᩥᩈᨾᩣᨶᩣ ᨶᩥᩅᩥᩈᨲᩥ.

‘‘ᨠᩥᨬ᩠ᨧ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ? ᨧᨠ᩠ᨡᩩ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ, ᩑᨲ᩠ᨳ ᨶᩥᩅᩥᩈᨾᩣᨶᩣ ᨶᩥᩅᩥᩈᨲᩥ. ᩈᩮᩣᨲᩴ ᩃᩮᩣᨠᩮ…ᨸᩮ… ᨥᩣᨶᩴ ᩃᩮᩣᨠᩮ… ᨩᩥᩅ᩠ᩉᩣ ᩃᩮᩣᨠᩮ… ᨠᩣᨿᩮᩣ ᩃᩮᩣᨠᩮ… ᨾᨶᩮᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ, ᩑᨲ᩠ᨳ ᨶᩥᩅᩥᩈᨾᩣᨶᩣ ᨶᩥᩅᩥᩈᨲᩥ.

‘‘ᩁᩪᨸᩣ ᩃᩮᩣᨠᩮ… ᩈᨴ᩠ᨴᩣ ᩃᩮᩣᨠᩮ… ᨣᨶ᩠ᨵᩣ ᩃᩮᩣᨠᩮ… ᩁᩈᩣ ᩃᩮᩣᨠᩮ… ᨹᩮᩣᨭ᩠ᨮᨻ᩠ᨻᩣ ᩃᩮᩣᨠᩮ… ᨵᨾ᩠ᨾᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ, ᩑᨲ᩠ᨳ ᨶᩥᩅᩥᩈᨾᩣᨶᩣ ᨶᩥᩅᩥᩈᨲᩥ.

‘‘ᨧᨠ᩠ᨡᩩᩅᩥᨬ᩠ᨬᩣᨱᩴ ᩃᩮᩣᨠᩮ… ᩈᩮᩣᨲᩅᩥᨬ᩠ᨬᩣᨱᩴ ᩃᩮᩣᨠᩮ… ᨥᩣᨶᩅᩥᨬ᩠ᨬᩣᨱᩴ ᩃᩮᩣᨠᩮ… ᨩᩥᩅ᩠ᩉᩣᩅᩥᨬ᩠ᨬᩣᨱᩴ ᩃᩮᩣᨠᩮ… ᨠᩣᨿᩅᩥᨬ᩠ᨬᩣᨱᩴ ᩃᩮᩣᨠᩮ… ᨾᨶᩮᩣᩅᩥᨬ᩠ᨬᩣᨱᩴ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ, ᩑᨲ᩠ᨳ ᨶᩥᩅᩥᩈᨾᩣᨶᩣ ᨶᩥᩅᩥᩈᨲᩥ.

‘‘ᨧᨠ᩠ᨡᩩᩈᨾ᩠ᨹᩔᩮᩣ ᩃᩮᩣᨠᩮ… ᩈᩮᩣᨲᩈᨾ᩠ᨹᩔᩮᩣ ᩃᩮᩣᨠᩮ… ᨥᩣᨶᩈᨾ᩠ᨹᩔᩮᩣ ᩃᩮᩣᨠᩮ… ᨩᩥᩅ᩠ᩉᩣᩈᨾ᩠ᨹᩔᩮᩣ ᩃᩮᩣᨠᩮ… ᨠᩣᨿᩈᨾ᩠ᨹᩔᩮᩣ ᩃᩮᩣᨠᩮ… ᨾᨶᩮᩣᩈᨾ᩠ᨹᩔᩮᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ, ᩑᨲ᩠ᨳ ᨶᩥᩅᩥᩈᨾᩣᨶᩣ ᨶᩥᩅᩥᩈᨲᩥ.

‘‘ᨧᨠ᩠ᨡᩩᩈᨾ᩠ᨹᩔᨩᩣ ᩅᩮᨴᨶᩣ ᩃᩮᩣᨠᩮ… ᩈᩮᩣᨲᩈᨾ᩠ᨹᩔᨩᩣ ᩅᩮᨴᨶᩣ ᩃᩮᩣᨠᩮ… ᨥᩣᨶᩈᨾ᩠ᨹᩔᨩᩣ ᩅᩮᨴᨶᩣ ᩃᩮᩣᨠᩮ… ᨩᩥᩅ᩠ᩉᩣᩈᨾ᩠ᨹᩔᨩᩣ ᩅᩮᨴᨶᩣ ᩃᩮᩣᨠᩮ… ᨠᩣᨿᩈᨾ᩠ᨹᩔᨩᩣ ᩅᩮᨴᨶᩣ ᩃᩮᩣᨠᩮ… ᨾᨶᩮᩣᩈᨾ᩠ᨹᩔᨩᩣ ᩅᩮᨴᨶᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ, ᩑᨲ᩠ᨳ ᨶᩥᩅᩥᩈᨾᩣᨶᩣ ᨶᩥᩅᩥᩈᨲᩥ.

‘‘ᩁᩪᨸᩈᨬ᩠ᨬᩣ ᩃᩮᩣᨠᩮ… ᩈᨴ᩠ᨴᩈᨬ᩠ᨬᩣ ᩃᩮᩣᨠᩮ… ᨣᨶ᩠ᨵᩈᨬ᩠ᨬᩣ ᩃᩮᩣᨠᩮ… ᩁᩈᩈᨬ᩠ᨬᩣ ᩃᩮᩣᨠᩮ… ᨹᩮᩣᨭ᩠ᨮᨻ᩠ᨻᩈᨬ᩠ᨬᩣ ᩃᩮᩣᨠᩮ… ᨵᨾ᩠ᨾᩈᨬ᩠ᨬᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ, ᩑᨲ᩠ᨳ ᨶᩥᩅᩥᩈᨾᩣᨶᩣ ᨶᩥᩅᩥᩈᨲᩥ.

‘‘ᩁᩪᨸᩈᨬ᩠ᨧᩮᨲᨶᩣ ᩃᩮᩣᨠᩮ… ᩈᨴ᩠ᨴᩈᨬ᩠ᨧᩮᨲᨶᩣ ᩃᩮᩣᨠᩮ… ᨣᨶ᩠ᨵᩈᨬ᩠ᨧᩮᨲᨶᩣ ᩃᩮᩣᨠᩮ… ᩁᩈᩈᨬ᩠ᨧᩮᨲᨶᩣ ᩃᩮᩣᨠᩮ… ᨹᩮᩣᨭ᩠ᨮᨻ᩠ᨻᩈᨬ᩠ᨧᩮᨲᨶᩣ ᩃᩮᩣᨠᩮ… ᨵᨾ᩠ᨾᩈᨬ᩠ᨧᩮᨲᨶᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ, ᩑᨲ᩠ᨳ ᨶᩥᩅᩥᩈᨾᩣᨶᩣ ᨶᩥᩅᩥᩈᨲᩥ.

‘‘ᩁᩪᨸᨲᨱ᩠ᩉᩣ ᩃᩮᩣᨠᩮ… ᩈᨴ᩠ᨴᨲᨱ᩠ᩉᩣ ᩃᩮᩣᨠᩮ… ᨣᨶ᩠ᨵᨲᨱ᩠ᩉᩣ ᩃᩮᩣᨠᩮ… ᩁᩈᨲᨱ᩠ᩉᩣ ᩃᩮᩣᨠᩮ… ᨹᩮᩣᨭ᩠ᨮᨻ᩠ᨻᨲᨱ᩠ᩉᩣ ᩃᩮᩣᨠᩮ… ᨵᨾ᩠ᨾᨲᨱ᩠ᩉᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ, ᩑᨲ᩠ᨳ ᨶᩥᩅᩥᩈᨾᩣᨶᩣ ᨶᩥᩅᩥᩈᨲᩥ.

‘‘ᩁᩪᨸᩅᩥᨲᨠ᩠ᨠᩮᩣ ᩃᩮᩣᨠᩮ… ᩈᨴ᩠ᨴᩅᩥᨲᨠ᩠ᨠᩮᩣ ᩃᩮᩣᨠᩮ… ᨣᨶ᩠ᨵᩅᩥᨲᨠ᩠ᨠᩮᩣ ᩃᩮᩣᨠᩮ… ᩁᩈᩅᩥᨲᨠ᩠ᨠᩮᩣ ᩃᩮᩣᨠᩮ… ᨹᩮᩣᨭ᩠ᨮᨻ᩠ᨻᩅᩥᨲᨠ᩠ᨠᩮᩣ ᩃᩮᩣᨠᩮ… ᨵᨾ᩠ᨾᩅᩥᨲᨠ᩠ᨠᩮᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ, ᩑᨲ᩠ᨳ ᨶᩥᩅᩥᩈᨾᩣᨶᩣ ᨶᩥᩅᩥᩈᨲᩥ.

‘‘ᩁᩪᨸᩅᩥᨧᩣᩁᩮᩣ ᩃᩮᩣᨠᩮ… ᩈᨴ᩠ᨴᩅᩥᨧᩣᩁᩮᩣ ᩃᩮᩣᨠᩮ… ᨣᨶ᩠ᨵᩅᩥᨧᩣᩁᩮᩣ ᩃᩮᩣᨠᩮ… ᩁᩈᩅᩥᨧᩣᩁᩮᩣ ᩃᩮᩣᨠᩮ… ᨹᩮᩣᨭ᩠ᨮᨻ᩠ᨻᩅᩥᨧᩣᩁᩮᩣ ᩃᩮᩣᨠᩮ… ᨵᨾ᩠ᨾᩅᩥᨧᩣᩁᩮᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ, ᩑᨲ᩠ᨳ ᨶᩥᩅᩥᩈᨾᩣᨶᩣ ᨶᩥᩅᩥᩈᨲᩥ. ᩍᨴᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᨴᩩᨠ᩠ᨡᩈᨾᩩᨴᨿᩴ ᩋᩁᩥᨿᩈᨧ᩠ᨧᩴ.

ᨶᩥᩁᩮᩣᨵᩈᨧ᩠ᨧᨶᩥᨴ᩠ᨴᩮᩈᩮᩣ

᪔᪐᪑. ‘‘ᨠᨲᨾᨬ᩠ᨧ, ᨽᩥᨠ᩠ᨡᩅᩮ, ᨴᩩᨠ᩠ᨡᨶᩥᩁᩮᩣᨵᩴ [ᨴᩩᨠ᩠ᨡᨶᩥᩁᩮᩣᨵᩮᩣ (ᩈ᩠ᨿᩣ.)] ᩋᩁᩥᨿᩈᨧ᩠ᨧᩴ? ᨿᩮᩣ ᨲᩔᩣᨿᩮᩅ ᨲᨱ᩠ᩉᩣᨿ ᩋᩈᩮᩈᩅᩥᩁᩣᨣᨶᩥᩁᩮᩣᨵᩮᩣ ᨧᩣᨣᩮᩣ ᨸᨭᩥᨶᩥᩔᨣ᩠ᨣᩮᩣ ᨾᩩᨲ᩠ᨲᩥ ᩋᨶᩣᩃᨿᩮᩣ.

‘‘ᩈᩣ ᨡᩮᩣ ᨸᨶᩮᩈᩣ, ᨽᩥᨠ᩠ᨡᩅᩮ, ᨲᨱ᩠ᩉᩣ ᨠᨲ᩠ᨳ ᨸᩉᩦᨿᨾᩣᨶᩣ ᨸᩉᩦᨿᨲᩥ, ᨠᨲ᩠ᨳ ᨶᩥᩁᩩᨩ᩠ᨫᨾᩣᨶᩣ ᨶᩥᩁᩩᨩ᩠ᨫᨲᩥ? ᨿᩴ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᨸᩉᩦᨿᨾᩣᨶᩣ ᨸᩉᩦᨿᨲᩥ, ᩑᨲ᩠ᨳ ᨶᩥᩁᩩᨩ᩠ᨫᨾᩣᨶᩣ ᨶᩥᩁᩩᨩ᩠ᨫᨲᩥ.

‘‘ᨠᩥᨬ᩠ᨧ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ? ᨧᨠ᩠ᨡᩩ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᨸᩉᩦᨿᨾᩣᨶᩣ ᨸᩉᩦᨿᨲᩥ, ᩑᨲ᩠ᨳ ᨶᩥᩁᩩᨩ᩠ᨫᨾᩣᨶᩣ ᨶᩥᩁᩩᨩ᩠ᨫᨲᩥ. ᩈᩮᩣᨲᩴ ᩃᩮᩣᨠᩮ…ᨸᩮ… ᨥᩣᨶᩴ ᩃᩮᩣᨠᩮ… ᨩᩥᩅ᩠ᩉᩣ ᩃᩮᩣᨠᩮ… ᨠᩣᨿᩮᩣ ᩃᩮᩣᨠᩮ… ᨾᨶᩮᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᨸᩉᩦᨿᨾᩣᨶᩣ ᨸᩉᩦᨿᨲᩥ, ᩑᨲ᩠ᨳ ᨶᩥᩁᩩᨩ᩠ᨫᨾᩣᨶᩣ ᨶᩥᩁᩩᨩ᩠ᨫᨲᩥ.

‘‘ᩁᩪᨸᩣ ᩃᩮᩣᨠᩮ… ᩈᨴ᩠ᨴᩣ ᩃᩮᩣᨠᩮ… ᨣᨶ᩠ᨵᩣ ᩃᩮᩣᨠᩮ… ᩁᩈᩣ ᩃᩮᩣᨠᩮ… ᨹᩮᩣᨭ᩠ᨮᨻ᩠ᨻᩣ ᩃᩮᩣᨠᩮ… ᨵᨾ᩠ᨾᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᨸᩉᩦᨿᨾᩣᨶᩣ ᨸᩉᩦᨿᨲᩥ, ᩑᨲ᩠ᨳ ᨶᩥᩁᩩᨩ᩠ᨫᨾᩣᨶᩣ ᨶᩥᩁᩩᨩ᩠ᨫᨲᩥ.

‘‘ᨧᨠ᩠ᨡᩩᩅᩥᨬ᩠ᨬᩣᨱᩴ ᩃᩮᩣᨠᩮ… ᩈᩮᩣᨲᩅᩥᨬ᩠ᨬᩣᨱᩴ ᩃᩮᩣᨠᩮ… ᨥᩣᨶᩅᩥᨬ᩠ᨬᩣᨱᩴ ᩃᩮᩣᨠᩮ… ᨩᩥᩅ᩠ᩉᩣᩅᩥᨬ᩠ᨬᩣᨱᩴ ᩃᩮᩣᨠᩮ… ᨠᩣᨿᩅᩥᨬ᩠ᨬᩣᨱᩴ ᩃᩮᩣᨠᩮ… ᨾᨶᩮᩣᩅᩥᨬ᩠ᨬᩣᨱᩴ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᨸᩉᩦᨿᨾᩣᨶᩣ ᨸᩉᩦᨿᨲᩥ, ᩑᨲ᩠ᨳ ᨶᩥᩁᩩᨩ᩠ᨫᨾᩣᨶᩣ ᨶᩥᩁᩩᨩ᩠ᨫᨲᩥ.

‘‘ᨧᨠ᩠ᨡᩩᩈᨾ᩠ᨹᩔᩮᩣ ᩃᩮᩣᨠᩮ… ᩈᩮᩣᨲᩈᨾ᩠ᨹᩔᩮᩣ ᩃᩮᩣᨠᩮ… ᨥᩣᨶᩈᨾ᩠ᨹᩔᩮᩣ ᩃᩮᩣᨠᩮ… ᨩᩥᩅ᩠ᩉᩣᩈᨾ᩠ᨹᩔᩮᩣ ᩃᩮᩣᨠᩮ… ᨠᩣᨿᩈᨾ᩠ᨹᩔᩮᩣ ᩃᩮᩣᨠᩮ… ᨾᨶᩮᩣᩈᨾ᩠ᨹᩔᩮᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᨸᩉᩦᨿᨾᩣᨶᩣ ᨸᩉᩦᨿᨲᩥ, ᩑᨲ᩠ᨳ ᨶᩥᩁᩩᨩ᩠ᨫᨾᩣᨶᩣ ᨶᩥᩁᩩᨩ᩠ᨫᨲᩥ.

‘‘ᨧᨠ᩠ᨡᩩᩈᨾ᩠ᨹᩔᨩᩣ ᩅᩮᨴᨶᩣ ᩃᩮᩣᨠᩮ… ᩈᩮᩣᨲᩈᨾ᩠ᨹᩔᨩᩣ ᩅᩮᨴᨶᩣ ᩃᩮᩣᨠᩮ … ᨥᩣᨶᩈᨾ᩠ᨹᩔᨩᩣ ᩅᩮᨴᨶᩣ ᩃᩮᩣᨠᩮ… ᨩᩥᩅ᩠ᩉᩣᩈᨾ᩠ᨹᩔᨩᩣ ᩅᩮᨴᨶᩣ ᩃᩮᩣᨠᩮ… ᨠᩣᨿᩈᨾ᩠ᨹᩔᨩᩣ ᩅᩮᨴᨶᩣ ᩃᩮᩣᨠᩮ… ᨾᨶᩮᩣᩈᨾ᩠ᨹᩔᨩᩣ ᩅᩮᨴᨶᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᨸᩉᩦᨿᨾᩣᨶᩣ ᨸᩉᩦᨿᨲᩥ, ᩑᨲ᩠ᨳ ᨶᩥᩁᩩᨩ᩠ᨫᨾᩣᨶᩣ ᨶᩥᩁᩩᨩ᩠ᨫᨲᩥ.

‘‘ᩁᩪᨸᩈᨬ᩠ᨬᩣ ᩃᩮᩣᨠᩮ… ᩈᨴ᩠ᨴᩈᨬ᩠ᨬᩣ ᩃᩮᩣᨠᩮ… ᨣᨶ᩠ᨵᩈᨬ᩠ᨬᩣ ᩃᩮᩣᨠᩮ… ᩁᩈᩈᨬ᩠ᨬᩣ ᩃᩮᩣᨠᩮ… ᨹᩮᩣᨭ᩠ᨮᨻ᩠ᨻᩈᨬ᩠ᨬᩣ ᩃᩮᩣᨠᩮ… ᨵᨾ᩠ᨾᩈᨬ᩠ᨬᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᨸᩉᩦᨿᨾᩣᨶᩣ ᨸᩉᩦᨿᨲᩥ, ᩑᨲ᩠ᨳ ᨶᩥᩁᩩᨩ᩠ᨫᨾᩣᨶᩣ ᨶᩥᩁᩩᨩ᩠ᨫᨲᩥ.

‘‘ᩁᩪᨸᩈᨬ᩠ᨧᩮᨲᨶᩣ ᩃᩮᩣᨠᩮ… ᩈᨴ᩠ᨴᩈᨬ᩠ᨧᩮᨲᨶᩣ ᩃᩮᩣᨠᩮ… ᨣᨶ᩠ᨵᩈᨬ᩠ᨧᩮᨲᨶᩣ ᩃᩮᩣᨠᩮ… ᩁᩈᩈᨬ᩠ᨧᩮᨲᨶᩣ ᩃᩮᩣᨠᩮ… ᨹᩮᩣᨭ᩠ᨮᨻ᩠ᨻᩈᨬ᩠ᨧᩮᨲᨶᩣ ᩃᩮᩣᨠᩮ… ᨵᨾ᩠ᨾᩈᨬ᩠ᨧᩮᨲᨶᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᨸᩉᩦᨿᨾᩣᨶᩣ ᨸᩉᩦᨿᨲᩥ, ᩑᨲ᩠ᨳ ᨶᩥᩁᩩᨩ᩠ᨫᨾᩣᨶᩣ ᨶᩥᩁᩩᨩ᩠ᨫᨲᩥ.

‘‘ᩁᩪᨸᨲᨱ᩠ᩉᩣ ᩃᩮᩣᨠᩮ… ᩈᨴ᩠ᨴᨲᨱ᩠ᩉᩣ ᩃᩮᩣᨠᩮ… ᨣᨶ᩠ᨵᨲᨱ᩠ᩉᩣ ᩃᩮᩣᨠᩮ… ᩁᩈᨲᨱ᩠ᩉᩣ ᩃᩮᩣᨠᩮ… ᨹᩮᩣᨭ᩠ᨮᨻ᩠ᨻᨲᨱ᩠ᩉᩣ ᩃᩮᩣᨠᩮ… ᨵᨾ᩠ᨾᨲᨱ᩠ᩉᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᨸᩉᩦᨿᨾᩣᨶᩣ ᨸᩉᩦᨿᨲᩥ, ᩑᨲ᩠ᨳ ᨶᩥᩁᩩᨩ᩠ᨫᨾᩣᨶᩣ ᨶᩥᩁᩩᨩ᩠ᨫᨲᩥ.

‘‘ᩁᩪᨸᩅᩥᨲᨠ᩠ᨠᩮᩣ ᩃᩮᩣᨠᩮ… ᩈᨴ᩠ᨴᩅᩥᨲᨠ᩠ᨠᩮᩣ ᩃᩮᩣᨠᩮ… ᨣᨶ᩠ᨵᩅᩥᨲᨠ᩠ᨠᩮᩣ ᩃᩮᩣᨠᩮ… ᩁᩈᩅᩥᨲᨠ᩠ᨠᩮᩣ ᩃᩮᩣᨠᩮ… ᨹᩮᩣᨭ᩠ᨮᨻ᩠ᨻᩅᩥᨲᨠ᩠ᨠᩮᩣ ᩃᩮᩣᨠᩮ… ᨵᨾ᩠ᨾᩅᩥᨲᨠ᩠ᨠᩮᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᨸᩉᩦᨿᨾᩣᨶᩣ ᨸᩉᩦᨿᨲᩥ, ᩑᨲ᩠ᨳ ᨶᩥᩁᩩᨩ᩠ᨫᨾᩣᨶᩣ ᨶᩥᩁᩩᨩ᩠ᨫᨲᩥ.

‘‘ᩁᩪᨸᩅᩥᨧᩣᩁᩮᩣ ᩃᩮᩣᨠᩮ… ᩈᨴ᩠ᨴᩅᩥᨧᩣᩁᩮᩣ ᩃᩮᩣᨠᩮ… ᨣᨶ᩠ᨵᩅᩥᨧᩣᩁᩮᩣ ᩃᩮᩣᨠᩮ… ᩁᩈᩅᩥᨧᩣᩁᩮᩣ ᩃᩮᩣᨠᩮ… ᨹᩮᩣᨭ᩠ᨮᨻ᩠ᨻᩅᩥᨧᩣᩁᩮᩣ ᩃᩮᩣᨠᩮ… ᨵᨾ᩠ᨾᩅᩥᨧᩣᩁᩮᩣ ᩃᩮᩣᨠᩮ ᨸᩥᨿᩁᩪᨸᩴ ᩈᩣᨲᩁᩪᨸᩴ, ᩑᨲ᩠ᨳᩮᩈᩣ ᨲᨱ᩠ᩉᩣ ᨸᩉᩦᨿᨾᩣᨶᩣ ᨸᩉᩦᨿᨲᩥ, ᩑᨲ᩠ᨳ ᨶᩥᩁᩩᨩ᩠ᨫᨾᩣᨶᩣ ᨶᩥᩁᩩᨩ᩠ᨫᨲᩥ. ᩍᨴᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᨴᩩᨠ᩠ᨡᨶᩥᩁᩮᩣᨵᩴ ᩋᩁᩥᨿᩈᨧ᩠ᨧᩴ.

ᨾᨣ᩠ᨣᩈᨧ᩠ᨧᨶᩥᨴ᩠ᨴᩮᩈᩮᩣ

᪔᪐᪒. ‘‘ᨠᨲᨾᨬ᩠ᨧ, ᨽᩥᨠ᩠ᨡᩅᩮ, ᨴᩩᨠ᩠ᨡᨶᩥᩁᩮᩣᨵᨣᩣᨾᩥᨶᩦ ᨸᨭᩥᨸᨴᩣ ᩋᩁᩥᨿᩈᨧ᩠ᨧᩴ? ᩋᨿᨾᩮᩅ ᩋᩁᩥᨿᩮᩣ ᩋᨭ᩠ᨮᨦ᩠ᨣᩥᨠᩮᩣ ᨾᨣ᩠ᨣᩮᩣ ᩈᩮᨿ᩠ᨿᨳᩥᨴᩴ – ᩈᨾ᩠ᨾᩣᨴᩥᨭ᩠ᨮᩥ ᩈᨾ᩠ᨾᩣᩈᨦ᩠ᨠᨸ᩠ᨸᩮᩣ ᩈᨾ᩠ᨾᩣᩅᩣᨧᩣ ᩈᨾ᩠ᨾᩣᨠᨾ᩠ᨾᨶ᩠ᨲᩮᩣ ᩈᨾ᩠ᨾᩣᩌᨩᩦᩅᩮᩣ ᩈᨾ᩠ᨾᩣᩅᩣᨿᩣᨾᩮᩣ ᩈᨾ᩠ᨾᩣᩈᨲᩥ ᩈᨾ᩠ᨾᩣᩈᨾᩣᨵᩥ.

‘‘ᨠᨲᨾᩣ ᨧ, ᨽᩥᨠ᩠ᨡᩅᩮ, ᩈᨾ᩠ᨾᩣᨴᩥᨭ᩠ᨮᩥ? ᨿᩴ ᨡᩮᩣ, ᨽᩥᨠ᩠ᨡᩅᩮ, ᨴᩩᨠ᩠ᨡᩮ ᨬᩣᨱᩴ, ᨴᩩᨠ᩠ᨡᩈᨾᩩᨴᨿᩮ ᨬᩣᨱᩴ, ᨴᩩᨠ᩠ᨡᨶᩥᩁᩮᩣᨵᩮ ᨬᩣᨱᩴ, ᨴᩩᨠ᩠ᨡᨶᩥᩁᩮᩣᨵᨣᩣᨾᩥᨶᩥᨿᩣ ᨸᨭᩥᨸᨴᩣᨿ ᨬᩣᨱᩴ, ᩋᨿᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᩈᨾ᩠ᨾᩣᨴᩥᨭ᩠ᨮᩥ.

‘‘ᨠᨲᨾᩮᩣ ᨧ, ᨽᩥᨠ᩠ᨡᩅᩮ, ᩈᨾ᩠ᨾᩣᩈᨦ᩠ᨠᨸ᩠ᨸᩮᩣ? ᨶᩮᨠ᩠ᨡᨾ᩠ᨾᩈᨦ᩠ᨠᨸ᩠ᨸᩮᩣ ᩋᨻ᩠ᨿᩣᨸᩣᨴᩈᨦ᩠ᨠᨸ᩠ᨸᩮᩣ ᩋᩅᩥᩉᩥᩴᩈᩣᩈᨦ᩠ᨠᨸ᩠ᨸᩮᩣ, ᩋᨿᩴ ᩅᩩᨧ᩠ᨧᨲᩥ ᨽᩥᨠ᩠ᨡᩅᩮ, ᩈᨾ᩠ᨾᩣᩈᨦ᩠ᨠᨸ᩠ᨸᩮᩣ.

‘‘ᨠᨲᨾᩣ ᨧ, ᨽᩥᨠ᩠ᨡᩅᩮ, ᩈᨾ᩠ᨾᩣᩅᩣᨧᩣ? ᨾᩩᩈᩣᩅᩣᨴᩣ ᩅᩮᩁᨾᨱᩦ [ᩅᩮᩁᨾᨱᩥ (ᨠ.)] ᨸᩥᩈᩩᨱᩣᨿ ᩅᩣᨧᩣᨿ ᩅᩮᩁᨾᨱᩦ ᨹᩁᩩᩈᩣᨿ ᩅᩣᨧᩣᨿ ᩅᩮᩁᨾᨱᩦ ᩈᨾ᩠ᨹᨸ᩠ᨸᩃᩣᨸᩣ ᩅᩮᩁᨾᨱᩦ, ᩋᨿᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᩈᨾ᩠ᨾᩣᩅᩣᨧᩣ.

‘‘ᨠᨲᨾᩮᩣ ᨧ, ᨽᩥᨠ᩠ᨡᩅᩮ, ᩈᨾ᩠ᨾᩣᨠᨾ᩠ᨾᨶ᩠ᨲᩮᩣ? ᨸᩣᨱᩣᨲᩥᨸᩣᨲᩣ ᩅᩮᩁᨾᨱᩦ ᩋᨴᩥᨶ᩠ᨶᩣᨴᩣᨶᩣ ᩅᩮᩁᨾᨱᩦ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ ᩅᩮᩁᨾᨱᩦ, ᩋᨿᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᩈᨾ᩠ᨾᩣᨠᨾ᩠ᨾᨶ᩠ᨲᩮᩣ.

‘‘ᨠᨲᨾᩮᩣ ᨧ, ᨽᩥᨠ᩠ᨡᩅᩮ, ᩈᨾ᩠ᨾᩣᩌᨩᩦᩅᩮᩣ? ᩍᨵ, ᨽᩥᨠ᩠ᨡᩅᩮ, ᩋᩁᩥᨿᩈᩣᩅᨠᩮᩣ ᨾᩥᨧ᩠ᨨᩣᩌᨩᩦᩅᩴ ᨸᩉᩣᨿ ᩈᨾ᩠ᨾᩣᩌᨩᩦᩅᩮᨶ ᨩᩦᩅᩥᨲᩴ ᨠᨸ᩠ᨸᩮᨲᩥ, ᩋᨿᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᩈᨾ᩠ᨾᩣᩌᨩᩦᩅᩮᩣ.

‘‘ᨠᨲᨾᩮᩣ ᨧ, ᨽᩥᨠ᩠ᨡᩅᩮ, ᩈᨾ᩠ᨾᩣᩅᩣᨿᩣᨾᩮᩣ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩋᨶᩩᨸ᩠ᨸᨶ᩠ᨶᩣᨶᩴ ᨸᩣᨸᨠᩣᨶᩴ ᩋᨠᩩᩈᩃᩣᨶᩴ ᨵᨾ᩠ᨾᩣᨶᩴ ᩋᨶᩩᨸ᩠ᨸᩣᨴᩣᨿ ᨨᨶ᩠ᨴᩴ ᨩᨶᩮᨲᩥ ᩅᩣᨿᨾᨲᩥ ᩅᩦᩁᩥᨿᩴ ᩌᩁᨽᨲᩥ ᨧᩥᨲ᩠ᨲᩴ ᨸᨣ᩠ᨣᨱ᩠ᩉᩣᨲᩥ ᨸᨴᩉᨲᩥ; ᩏᨸ᩠ᨸᨶ᩠ᨶᩣᨶᩴ ᨸᩣᨸᨠᩣᨶᩴ ᩋᨠᩩᩈᩃᩣᨶᩴ ᨵᨾ᩠ᨾᩣᨶᩴ ᨸᩉᩣᨶᩣᨿ ᨨᨶ᩠ᨴᩴ ᨩᨶᩮᨲᩥ ᩅᩣᨿᨾᨲᩥ ᩅᩦᩁᩥᨿᩴ ᩌᩁᨽᨲᩥ ᨧᩥᨲ᩠ᨲᩴ ᨸᨣ᩠ᨣᨱ᩠ᩉᩣᨲᩥ ᨸᨴᩉᨲᩥ; ᩋᨶᩩᨸ᩠ᨸᨶ᩠ᨶᩣᨶᩴ ᨠᩩᩈᩃᩣᨶᩴ ᨵᨾ᩠ᨾᩣᨶᩴ ᩏᨸ᩠ᨸᩣᨴᩣᨿ ᨨᨶ᩠ᨴᩴ ᨩᨶᩮᨲᩥ ᩅᩣᨿᨾᨲᩥ ᩅᩦᩁᩥᨿᩴ ᩌᩁᨽᨲᩥ ᨧᩥᨲ᩠ᨲᩴ ᨸᨣ᩠ᨣᨱ᩠ᩉᩣᨲᩥ ᨸᨴᩉᨲᩥ; ᩏᨸ᩠ᨸᨶ᩠ᨶᩣᨶᩴ ᨠᩩᩈᩃᩣᨶᩴ ᨵᨾ᩠ᨾᩣᨶᩴ ᨮᩥᨲᩥᨿᩣ ᩋᩈᨾ᩠ᨾᩮᩣᩈᩣᨿ ᨽᩥᨿ᩠ᨿᩮᩣᨽᩣᩅᩣᨿ ᩅᩮᨸᩩᩃ᩠ᩃᩣᨿ ᨽᩣᩅᨶᩣᨿ ᨸᩣᩁᩥᨸᩪᩁᩥᨿᩣ ᨨᨶ᩠ᨴᩴ ᨩᨶᩮᨲᩥ ᩅᩣᨿᨾᨲᩥ ᩅᩦᩁᩥᨿᩴ ᩌᩁᨽᨲᩥ ᨧᩥᨲ᩠ᨲᩴ ᨸᨣ᩠ᨣᨱ᩠ᩉᩣᨲᩥ ᨸᨴᩉᨲᩥ. ᩋᨿᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᩈᨾ᩠ᨾᩣᩅᩣᨿᩣᨾᩮᩣ.

‘‘ᨠᨲᨾᩣ ᨧ, ᨽᩥᨠ᩠ᨡᩅᩮ, ᩈᨾ᩠ᨾᩣᩈᨲᩥ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ; ᩅᩮᨴᨶᩣᩈᩩ ᩅᩮᨴᨶᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ; ᨧᩥᨲ᩠ᨲᩮ ᨧᩥᨲ᩠ᨲᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ; ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ. ᩋᨿᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᩈᨾ᩠ᨾᩣᩈᨲᩥ.

‘‘ᨠᨲᨾᩮᩣ ᨧ, ᨽᩥᨠ᩠ᨡᩅᩮ, ᩈᨾ᩠ᨾᩣᩈᨾᩣᨵᩥ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩅᩥᩅᩥᨧ᩠ᨧᩮᩅ ᨠᩣᨾᩮᩉᩥ ᩅᩥᩅᩥᨧ᩠ᨧ ᩋᨠᩩᩈᩃᩮᩉᩥ ᨵᨾ᩠ᨾᩮᩉᩥ ᩈᩅᩥᨲᨠ᩠ᨠᩴ ᩈᩅᩥᨧᩣᩁᩴ ᩅᩥᩅᩮᨠᨩᩴ ᨸᩦᨲᩥᩈᩩᨡᩴ ᨸᨮᨾᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩅᩥᨲᨠ᩠ᨠᩅᩥᨧᩣᩁᩣᨶᩴ ᩅᩪᨸᩈᨾᩣ ᩋᨩ᩠ᨫᨲ᩠ᨲᩴ ᩈᨾ᩠ᨸᩈᩣᨴᨶᩴ ᨧᩮᨲᩈᩮᩣ ᩑᨠᩮᩣᨴᩥᨽᩣᩅᩴ ᩋᩅᩥᨲᨠ᩠ᨠᩴ ᩋᩅᩥᨧᩣᩁᩴ ᩈᨾᩣᨵᩥᨩᩴ ᨸᩦᨲᩥᩈᩩᨡᩴ ᨴᩩᨲᩥᨿᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᨸᩦᨲᩥᨿᩣ ᨧ ᩅᩥᩁᩣᨣᩣ ᩏᨸᩮᨠ᩠ᨡᨠᩮᩣ ᨧ ᩅᩥᩉᩁᨲᩥ, ᩈᨲᩮᩣ ᨧ ᩈᨾ᩠ᨸᨩᩣᨶᩮᩣ, ᩈᩩᨡᨬ᩠ᨧ ᨠᩣᨿᩮᨶ ᨸᨭᩥᩈᩴᩅᩮᨴᩮᨲᩥ, ᨿᩴ ᨲᩴ ᩋᩁᩥᨿᩣ ᩌᨧᩥᨠ᩠ᨡᨶ᩠ᨲᩥ ‘ᩏᨸᩮᨠ᩠ᨡᨠᩮᩣ ᩈᨲᩥᨾᩣ ᩈᩩᨡᩅᩥᩉᩣᩁᩦ’ᨲᩥ ᨲᨲᩥᨿᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᩩᨡᩔ ᨧ ᨸᩉᩣᨶᩣ ᨴᩩᨠ᩠ᨡᩔ ᨧ ᨸᩉᩣᨶᩣ ᨸᩩᨻ᩠ᨻᩮᩅ ᩈᩮᩣᨾᨶᩔᨴᩮᩣᨾᨶᩔᩣᨶᩴ ᩋᨲ᩠ᨳᨦ᩠ᨣᨾᩣ ᩋᨴᩩᨠ᩠ᨡᨾᩈᩩᨡᩴ ᩏᨸᩮᨠ᩠ᨡᩣᩈᨲᩥᨸᩣᩁᩥᩈᩩᨴ᩠ᨵᩥᩴ ᨧᨲᩩᨲ᩠ᨳᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᩈᨾ᩠ᨾᩣᩈᨾᩣᨵᩥ. ᩍᨴᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᨴᩩᨠ᩠ᨡᨶᩥᩁᩮᩣᨵᨣᩣᨾᩥᨶᩦ ᨸᨭᩥᨸᨴᩣ ᩋᩁᩥᨿᩈᨧ᩠ᨧᩴ.

᪔᪐᪓. ‘‘ᩍᨲᩥ ᩋᨩ᩠ᨫᨲ᩠ᨲᩴ ᩅᩣ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ, ᨻᩉᩥᨴ᩠ᨵᩣ ᩅᩣ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ, ᩋᨩ᩠ᨫᨲ᩠ᨲᨻᩉᩥᨴ᩠ᨵᩣ ᩅᩣ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ. ᩈᨾᩩᨴᨿᨵᨾ᩠ᨾᩣᨶᩩᨸᩔᩦ ᩅᩣ ᨵᨾ᩠ᨾᩮᩈᩩ ᩅᩥᩉᩁᨲᩥ, ᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨵᨾ᩠ᨾᩮᩈᩩ ᩅᩥᩉᩁᨲᩥ, ᩈᨾᩩᨴᨿᩅᨿᨵᨾ᩠ᨾᩣᨶᩩᨸᩔᩦ ᩅᩣ ᨵᨾ᩠ᨾᩮᩈᩩ ᩅᩥᩉᩁᨲᩥ. ‘ᩋᨲ᩠ᨳᩥ ᨵᨾ᩠ᨾᩣ’ᨲᩥ ᩅᩣ ᨸᨶᩔ ᩈᨲᩥ ᨸᨧ᩠ᨧᩩᨸᨭ᩠ᨮᩥᨲᩣ ᩉᩮᩣᨲᩥ ᨿᩣᩅᨴᩮᩅ ᨬᩣᨱᨾᨲ᩠ᨲᩣᨿ ᨸᨭᩥᩔᨲᩥᨾᨲ᩠ᨲᩣᨿ ᩋᨶᩥᩔᩥᨲᩮᩣ ᨧ ᩅᩥᩉᩁᨲᩥ, ᨶ ᨧ ᨠᩥᨬ᩠ᨧᩥ ᩃᩮᩣᨠᩮ ᩏᨸᩣᨴᩥᨿᨲᩥ. ᩑᩅᨾ᩠ᨸᩥ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᨧᨲᩪᩈᩩ ᩋᩁᩥᨿᩈᨧ᩠ᨧᩮᩈᩩ.

ᩈᨧ᩠ᨧᨸᨻ᩠ᨻᩴ ᨶᩥᨭ᩠ᨮᩥᨲᩴ.

ᨵᨾ᩠ᨾᩣᨶᩩᨸᩔᨶᩣ ᨶᩥᨭ᩠ᨮᩥᨲᩣ.

᪔᪐᪔. ‘‘ᨿᩮᩣ ᩉᩥ ᨠᩮᩣᨧᩥ, ᨽᩥᨠ᩠ᨡᩅᩮ, ᩍᨾᩮ ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩮ ᩑᩅᩴ ᨽᩣᩅᩮᨿ᩠ᨿ ᩈᨲ᩠ᨲᩅᩔᩣᨶᩥ, ᨲᩔ ᨴ᩠ᩅᩥᨶ᩠ᨶᩴ ᨹᩃᩣᨶᩴ ᩋᨬ᩠ᨬᨲᩁᩴ ᨹᩃᩴ ᨸᩣᨭᩥᨠᨦ᩠ᨡᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩋᨬ᩠ᨬᩣ; ᩈᨲᩥ ᩅᩣ ᩏᨸᩣᨴᩥᩈᩮᩈᩮ ᩋᨶᩣᨣᩣᨾᩥᨲᩣ.

‘‘ᨲᩥᨭ᩠ᨮᨶ᩠ᨲᩩ, ᨽᩥᨠ᩠ᨡᩅᩮ, ᩈᨲ᩠ᨲᩅᩔᩣᨶᩥ. ᨿᩮᩣ ᩉᩥ ᨠᩮᩣᨧᩥ, ᨽᩥᨠ᩠ᨡᩅᩮ, ᩍᨾᩮ ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩮ ᩑᩅᩴ ᨽᩣᩅᩮᨿ᩠ᨿ ᨨ ᩅᩔᩣᨶᩥ…ᨸᩮ… ᨸᨬ᩠ᨧ ᩅᩔᩣᨶᩥ… ᨧᨲ᩠ᨲᩣᩁᩥ ᩅᩔᩣᨶᩥ… ᨲᩦᨱᩥ ᩅᩔᩣᨶᩥ… ᨴ᩠ᩅᩮ ᩅᩔᩣᨶᩥ… ᩑᨠᩴ ᩅᩔᩴ… ᨲᩥᨭ᩠ᨮᨲᩩ, ᨽᩥᨠ᩠ᨡᩅᩮ, ᩑᨠᩴ ᩅᩔᩴ. ᨿᩮᩣ ᩉᩥ ᨠᩮᩣᨧᩥ, ᨽᩥᨠ᩠ᨡᩅᩮ, ᩍᨾᩮ ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩮ ᩑᩅᩴ ᨽᩣᩅᩮᨿ᩠ᨿ ᩈᨲ᩠ᨲᨾᩣᩈᩣᨶᩥ, ᨲᩔ ᨴ᩠ᩅᩥᨶ᩠ᨶᩴ ᨹᩃᩣᨶᩴ ᩋᨬ᩠ᨬᨲᩁᩴ ᨹᩃᩴ ᨸᩣᨭᩥᨠᨦ᩠ᨡᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩋᨬ᩠ᨬᩣ; ᩈᨲᩥ ᩅᩣ ᩏᨸᩣᨴᩥᩈᩮᩈᩮ ᩋᨶᩣᨣᩣᨾᩥᨲᩣ.

‘‘ᨲᩥᨭ᩠ᨮᨶ᩠ᨲᩩ, ᨽᩥᨠ᩠ᨡᩅᩮ, ᩈᨲ᩠ᨲ ᨾᩣᩈᩣᨶᩥ. ᨿᩮᩣ ᩉᩥ ᨠᩮᩣᨧᩥ, ᨽᩥᨠ᩠ᨡᩅᩮ, ᩍᨾᩮ ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩮ ᩑᩅᩴ ᨽᩣᩅᩮᨿ᩠ᨿ ᨨ ᨾᩣᩈᩣᨶᩥ…ᨸᩮ… ᨸᨬ᩠ᨧ ᨾᩣᩈᩣᨶᩥ… ᨧᨲ᩠ᨲᩣᩁᩥ ᨾᩣᩈᩣᨶᩥ… ᨲᩦᨱᩥ ᨾᩣᩈᩣᨶᩥ … ᨴ᩠ᩅᩮ ᨾᩣᩈᩣᨶᩥ… ᩑᨠᩴ ᨾᩣᩈᩴ… ᩋᨯ᩠ᨰᨾᩣᩈᩴ… ᨲᩥᨭ᩠ᨮᨲᩩ, ᨽᩥᨠ᩠ᨡᩅᩮ, ᩋᨯ᩠ᨰᨾᩣᩈᩮᩣ. ᨿᩮᩣ ᩉᩥ ᨠᩮᩣᨧᩥ, ᨽᩥᨠ᩠ᨡᩅᩮ, ᩍᨾᩮ ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩮ ᩑᩅᩴ ᨽᩣᩅᩮᨿ᩠ᨿ ᩈᨲ᩠ᨲᩣᩉᩴ, ᨲᩔ ᨴ᩠ᩅᩥᨶ᩠ᨶᩴ ᨹᩃᩣᨶᩴ ᩋᨬ᩠ᨬᨲᩁᩴ ᨹᩃᩴ ᨸᩣᨭᩥᨠᨦ᩠ᨡᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩋᨬ᩠ᨬᩣ; ᩈᨲᩥ ᩅᩣ ᩏᨸᩣᨴᩥᩈᩮᩈᩮ ᩋᨶᩣᨣᩣᨾᩥᨲᩣᨲᩥ.

᪔᪐᪕. ‘‘ᩑᨠᩣᨿᨶᩮᩣ ᩋᨿᩴ, ᨽᩥᨠ᩠ᨡᩅᩮ, ᨾᨣ᩠ᨣᩮᩣ ᩈᨲ᩠ᨲᩣᨶᩴ ᩅᩥᩈᩩᨴ᩠ᨵᩥᨿᩣ ᩈᩮᩣᨠᨸᩁᩥᨴᩮᩅᩣᨶᩴ ᩈᨾᨲᩥᨠ᩠ᨠᨾᩣᨿ ᨴᩩᨠ᩠ᨡᨴᩮᩣᨾᨶᩔᩣᨶᩴ ᩋᨲ᩠ᨳᨦ᩠ᨣᨾᩣᨿ ᨬᩣᨿᩔ ᩋᨵᩥᨣᨾᩣᨿ ᨶᩥᨻ᩠ᨻᩣᨶᩔ ᩈᨧ᩠ᨨᩥᨠᩥᩁᩥᨿᩣᨿ ᨿᨴᩥᨴᩴ ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩣᨲᩥ. ᩍᨲᩥ ᨿᩴ ᨲᩴ ᩅᩩᨲ᩠ᨲᩴ, ᩍᨴᨾᩮᨲᩴ ᨸᨭᩥᨧ᩠ᨧ ᩅᩩᨲ᩠ᨲ’’ᨶ᩠ᨲᩥ. ᩍᨴᨾᩅᩮᩣᨧ ᨽᨣᩅᩣ. ᩋᨲ᩠ᨲᨾᨶᩣ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩩᨶ᩠ᨲᩥ.

ᨾᩉᩣᩈᨲᩥᨸᨭ᩠ᨮᩣᨶᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᨶᩅᨾᩴ.

᪑᪐. ᨸᩣᨿᩣᩈᩥᩈᩩᨲ᩠ᨲᩴ

᪔᪐᪖. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᩌᨿᩈ᩠ᨾᩣ ᨠᩩᨾᩣᩁᨠᩔᨸᩮᩣ ᨠᩮᩣᩈᩃᩮᩈᩩ ᨧᩣᩁᩥᨠᩴ ᨧᩁᨾᩣᨶᩮᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨸᨬ᩠ᨧᨾᨲ᩠ᨲᩮᩉᩥ ᨽᩥᨠ᩠ᨡᩩᩈᨲᩮᩉᩥ ᨿᩮᨶ ᩈᩮᨲᨻ᩠ᨿᩣ ᨶᩣᨾ ᨠᩮᩣᩈᩃᩣᨶᩴ ᨶᨣᩁᩴ ᨲᨴᩅᩈᩁᩥ. ᨲᨲᩕ ᩈᩩᨴᩴ ᩌᨿᩈ᩠ᨾᩣ ᨠᩩᨾᩣᩁᨠᩔᨸᩮᩣ ᩈᩮᨲᨻ᩠ᨿᩣᨿᩴ ᩅᩥᩉᩁᨲᩥ ᩏᨲ᩠ᨲᩁᩮᨶ ᩈᩮᨲᨻ᩠ᨿᩴ ᩈᩥᩴᩈᨸᩣᩅᨶᩮ [ᩈᩦᩈᨸᩣᩅᨶᩮ (ᩈ᩠ᨿᩣ.)]. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᩈᩮᨲᨻ᩠ᨿᩴ ᩋᨩ᩠ᨫᩣᩅᩈᨲᩥ ᩈᨲ᩠ᨲᩩᩔᨴᩴ ᩈᨲᩥᨱᨠᨭ᩠ᨮᩮᩣᨴᨠᩴ ᩈᨵᨬ᩠ᨬᩴ ᩁᩣᨩᨽᩮᩣᨣ᩠ᨣᩴ ᩁᨬ᩠ᨬᩣ ᨸᩈᩮᨶᨴᩥᨶᩣ ᨠᩮᩣᩈᩃᩮᨶ ᨴᩥᨶ᩠ᨶᩴ ᩁᩣᨩᨴᩣᨿᩴ ᨻᩕᩉ᩠ᨾᨴᩮᨿ᩠ᨿᩴ.

ᨸᩣᨿᩣᩈᩥᩁᩣᨩᨬ᩠ᨬᩅᨲ᩠ᨳᩩ

᪔᪐᪗. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨸᩣᨿᩣᩈᩥᩔ ᩁᩣᨩᨬ᩠ᨬᩔ ᩑᩅᩁᩪᨸᩴ ᨸᩣᨸᨠᩴ ᨴᩥᨭ᩠ᨮᩥᨣᨲᩴ ᩏᨸ᩠ᨸᨶ᩠ᨶᩴ ᩉᩮᩣᨲᩥ – ‘‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ [ᩈᩩᨠᨭᨠ᩠ᨠᨭᩣᨶᩴ (ᩈᩦ. ᨸᩦ.)] ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’ᨲᩥ. ᩋᩔᩮᩣᩈᩩᩴ ᨡᩮᩣ ᩈᩮᨲᨻ᩠ᨿᨠᩣ ᨻᩕᩣᩉ᩠ᨾᨱᨣᩉᨸᨲᩥᨠᩣ – ‘‘ᩈᨾᨱᩮᩣ ᨡᩃᩩ ᨽᩮᩣ ᨠᩩᨾᩣᩁᨠᩔᨸᩮᩣ ᩈᨾᨱᩔ ᨣᩮᩣᨲᨾᩔ ᩈᩣᩅᨠᩮᩣ ᨠᩮᩣᩈᩃᩮᩈᩩ ᨧᩣᩁᩥᨠᩴ ᨧᩁᨾᩣᨶᩮᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨸᨬ᩠ᨧᨾᨲ᩠ᨲᩮᩉᩥ ᨽᩥᨠ᩠ᨡᩩᩈᨲᩮᩉᩥ ᩈᩮᨲᨻ᩠ᨿᩴ ᩋᨶᩩᨸ᩠ᨸᨲ᩠ᨲᩮᩣ ᩈᩮᨲᨻ᩠ᨿᩣᨿᩴ ᩅᩥᩉᩁᨲᩥ ᩏᨲ᩠ᨲᩁᩮᨶ ᩈᩮᨲᨻ᩠ᨿᩴ ᩈᩥᩴᩈᨸᩣᩅᨶᩮ. ᨲᩴ ᨡᩮᩣ ᨸᨶ ᨽᩅᨶ᩠ᨲᩴ ᨠᩩᨾᩣᩁᨠᩔᨸᩴ ᩑᩅᩴ ᨠᩃ᩠ᨿᩣᨱᩮᩣ ᨠᩥᨲ᩠ᨲᩥᩈᨴ᩠ᨴᩮᩣ ᩋᨻ᩠ᨽᩩᨣ᩠ᨣᨲᩮᩣ – ‘ᨸᨱ᩠ᨯᩥᨲᩮᩣ ᨻ᩠ᨿᨲ᩠ᨲᩮᩣ ᨾᩮᨵᩣᩅᩦ ᨻᩉᩩᩔᩩᨲᩮᩣ ᨧᩥᨲ᩠ᨲᨠᨳᩦ ᨠᩃ᩠ᨿᩣᨱᨸᨭᩥᨽᩣᨶᩮᩣ ᩅᩩᨴ᩠ᨵᩮᩣ [ᨻᩩᨴ᩠ᨵᩮᩣ (ᩈ᩠ᨿᩣ. ᨠ.)] ᨧᩮᩅ ᩋᩁᩉᩣ ᨧ. ᩈᩣᨵᩩ ᨡᩮᩣ ᨸᨶ ᨲᨳᩣᩁᩪᨸᩣᨶᩴ ᩋᩁᩉᨲᩴ ᨴᩔᨶᩴ ᩉᩮᩣᨲᩦ’’’ᨲᩥ. ᩋᨳ ᨡᩮᩣ ᩈᩮᨲᨻ᩠ᨿᨠᩣ ᨻᩕᩣᩉ᩠ᨾᨱᨣᩉᨸᨲᩥᨠᩣ ᩈᩮᨲᨻ᩠ᨿᩣᨿ ᨶᩥᨠ᩠ᨡᨾᩥᨲ᩠ᩅᩣ ᩈᨦ᩠ᨥᩈᨦ᩠ᨥᩦ ᨣᨱᩦᨽᩪᨲᩣ ᩏᨲ᩠ᨲᩁᩮᨶᨾᩩᨡᩣ ᨣᨧ᩠ᨨᨶ᩠ᨲᩥ ᨿᩮᨶ ᩈᩥᩴᩈᨸᩣᩅᨶᩴ [ᨿᩮᨶ ᩈᩥᩴᩈᨸᩣᩅᨶᩴ, ᨲᩮᨶᩩᨸᩈᨦ᩠ᨠᨾᨶ᩠ᨲᩥ (ᩈᩦ. ᨸᩦ.)].

᪔᪐᪘. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᩏᨸᩁᩥᨸᩣᩈᩣᨴᩮ ᨴᩥᩅᩣᩈᩮᨿ᩠ᨿᩴ ᩏᨸᨣᨲᩮᩣ ᩉᩮᩣᨲᩥ. ᩋᨴ᩠ᨴᩈᩣ ᨡᩮᩣ ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᩈᩮᨲᨻ᩠ᨿᨠᩮ ᨻᩕᩣᩉ᩠ᨾᨱᨣᩉᨸᨲᩥᨠᩮ ᩈᩮᨲᨻ᩠ᨿᩣᨿ ᨶᩥᨠ᩠ᨡᨾᩥᨲ᩠ᩅᩣ ᩈᨦ᩠ᨥᩈᨦ᩠ᨥᩦ ᨣᨱᩦᨽᩪᨲᩮ ᩏᨲ᩠ᨲᩁᩮᨶᨾᩩᨡᩮ ᨣᨧ᩠ᨨᨶ᩠ᨲᩮ ᨿᩮᨶ ᩈᩥᩴᩈᨸᩣᩅᨶᩴ [ᨿᩮᨶ ᩈᩥᩴᩈᨸᩣᩅᨶᩴ, ᨲᩮᨶᩩᨸᩈᨦ᩠ᨠᨾᨶ᩠ᨲᩮ (ᩈᩦ. ᨸᩦ.)], ᨴᩥᩈ᩠ᩅᩣ ᨡᨲ᩠ᨲᩴ ᩌᨾᨶ᩠ᨲᩮᩈᩥ – ‘‘ᨠᩥᩴ ᨶᩩ ᨡᩮᩣ, ᨽᩮᩣ ᨡᨲ᩠ᨲᩮ, ᩈᩮᨲᨻ᩠ᨿᨠᩣ ᨻᩕᩣᩉ᩠ᨾᨱᨣᩉᨸᨲᩥᨠᩣ ᩈᩮᨲᨻ᩠ᨿᩣᨿ ᨶᩥᨠ᩠ᨡᨾᩥᨲ᩠ᩅᩣ ᩈᨦ᩠ᨥᩈᨦ᩠ᨥᩦ ᨣᨱᩦᨽᩪᨲᩣ ᩏᨲ᩠ᨲᩁᩮᨶᨾᩩᨡᩣ ᨣᨧ᩠ᨨᨶ᩠ᨲᩥ ᨿᩮᨶ ᩈᩥᩴᩈᨸᩣᩅᨶ’’ᨶ᩠ᨲᩥ [ᩑᨲ᩠ᨳ ᨸᨶ ᩈᨻ᩠ᨻᨲ᩠ᨳᨸᩥ ᩑᩅᨾᩮᩅ ᨴᩥᩔᨲᩥ, ᨶᨲ᩠ᨳᩥ ᨸᩣᨮᨶ᩠ᨲᩁᩴ]?

‘‘ᩋᨲ᩠ᨳᩥ ᨡᩮᩣ, ᨽᩮᩣ, ᩈᨾᨱᩮᩣ ᨠᩩᨾᩣᩁᨠᩔᨸᩮᩣ, ᩈᨾᨱᩔ ᨣᩮᩣᨲᨾᩔ ᩈᩣᩅᨠᩮᩣ ᨠᩮᩣᩈᩃᩮᩈᩩ ᨧᩣᩁᩥᨠᩴ ᨧᩁᨾᩣᨶᩮᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨸᨬ᩠ᨧᨾᨲ᩠ᨲᩮᩉᩥ ᨽᩥᨠ᩠ᨡᩩᩈᨲᩮᩉᩥ ᩈᩮᨲᨻ᩠ᨿᩴ ᩋᨶᩩᨸ᩠ᨸᨲ᩠ᨲᩮᩣ ᩈᩮᨲᨻ᩠ᨿᩣᨿᩴ ᩅᩥᩉᩁᨲᩥ ᩏᨲ᩠ᨲᩁᩮᨶ ᩈᩮᨲᨻ᩠ᨿᩴ ᩈᩥᩴᩈᨸᩣᩅᨶᩮ. ᨲᩴ ᨡᩮᩣ ᨸᨶ ᨽᩅᨶ᩠ᨲᩴ ᨠᩩᨾᩣᩁᨠᩔᨸᩴ ᩑᩅᩴ ᨠᩃ᩠ᨿᩣᨱᩮᩣ ᨠᩥᨲ᩠ᨲᩥᩈᨴ᩠ᨴᩮᩣ ᩋᨻ᩠ᨽᩩᨣ᩠ᨣᨲᩮᩣ – ‘ᨸᨱ᩠ᨯᩥᨲᩮᩣ ᨻ᩠ᨿᨲ᩠ᨲᩮᩣ ᨾᩮᨵᩣᩅᩦ ᨻᩉᩩᩔᩩᨲᩮᩣ ᨧᩥᨲ᩠ᨲᨠᨳᩦ ᨠᩃ᩠ᨿᩣᨱᨸᨭᩥᨽᩣᨶᩮᩣ ᩅᩩᨴ᩠ᨵᩮᩣ ᨧᩮᩅ ᩋᩁᩉᩣ ᨧᩣ’ᨲᩥ [ᩋᩁᩉᩣ ᨧ (ᩈ᩠ᨿᩣ. ᨠ.)]. ᨲᨾᩮᨲᩮ [ᨲᨾᩮᨶᩴ ᨲᩮ (ᩈᩦ. ᨠ.), ᨲᨾᩮᨶᩴ (ᨸᩦ.)] ᨽᩅᨶ᩠ᨲᩴ ᨠᩩᨾᩣᩁᨠᩔᨸᩴ ᨴᩔᨶᩣᨿ ᩏᨸᩈᨦ᩠ᨠᨾᨶ᩠ᨲᩦ’’ᨲᩥ. ‘‘ᨲᩮᨶ ᩉᩥ, ᨽᩮᩣ ᨡᨲ᩠ᨲᩮ, ᨿᩮᨶ ᩈᩮᨲᨻ᩠ᨿᨠᩣ ᨻᩕᩣᩉ᩠ᨾᨱᨣᩉᨸᨲᩥᨠᩣ ᨲᩮᨶᩩᨸᩈᨦ᩠ᨠᨾ; ᩏᨸᩈᨦ᩠ᨠᨾᩥᨲ᩠ᩅᩣ ᩈᩮᨲᨻ᩠ᨿᨠᩮ ᨻᩕᩣᩉ᩠ᨾᨱᨣᩉᨸᨲᩥᨠᩮ ᩑᩅᩴ ᩅᨴᩮᩉᩥ – ‘ᨸᩣᨿᩣᩈᩥ, ᨽᩮᩣ, ᩁᩣᨩᨬ᩠ᨬᩮᩣ ᩑᩅᨾᩣᩉ – ᩌᨣᨾᩮᨶ᩠ᨲᩩ ᨠᩥᩁ ᨽᩅᨶ᩠ᨲᩮᩣ, ᨸᩣᨿᩣᩈᩥᨸᩥ ᩁᩣᨩᨬ᩠ᨬᩮᩣ ᩈᨾᨱᩴ ᨠᩩᨾᩣᩁᨠᩔᨸᩴ ᨴᩔᨶᩣᨿ ᩏᨸᩈᨦ᩠ᨠᨾᩥᩔᨲᩦ’ᨲᩥ. ᨸᩩᩁᩣ ᩈᨾᨱᩮᩣ ᨠᩩᨾᩣᩁᨠᩔᨸᩮᩣ ᩈᩮᨲᨻ᩠ᨿᨠᩮ ᨻᩕᩣᩉ᩠ᨾᨱᨣᩉᨸᨲᩥᨠᩮ ᨻᩣᩃᩮ ᩋᨻ᩠ᨿᨲ᩠ᨲᩮ ᩈᨬ᩠ᨬᩣᨸᩮᨲᩥ – ‘ᩍᨲᩥᨸᩥ ᩋᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᩋᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᩋᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’ᨲᩥ. ᨶᨲ᩠ᨳᩥ ᩉᩥ, ᨽᩮᩣ ᨡᨲ᩠ᨲᩮ, ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’ᨲᩥ. ‘‘ᩑᩅᩴ ᨽᩮᩣ’’ᨲᩥ ᨡᩮᩣ ᩈᩮᩣ ᨡᨲ᩠ᨲᩣ ᨸᩣᨿᩣᩈᩥᩔ ᩁᩣᨩᨬ᩠ᨬᩔ ᨸᨭᩥᩔᩩᨲ᩠ᩅᩣ ᨿᩮᨶ ᩈᩮᨲᨻ᩠ᨿᨠᩣ ᨻᩕᩣᩉ᩠ᨾᨱᨣᩉᨸᨲᩥᨠᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩈᩮᨲᨻ᩠ᨿᨠᩮ ᨻᩕᩣᩉ᩠ᨾᨱᨣᩉᨸᨲᩥᨠᩮ ᩑᨲᨴᩅᩮᩣᨧ – ‘‘ᨸᩣᨿᩣᩈᩥ, ᨽᩮᩣ, ᩁᩣᨩᨬ᩠ᨬᩮᩣ ᩑᩅᨾᩣᩉ, ᩌᨣᨾᩮᨶ᩠ᨲᩩ ᨠᩥᩁ ᨽᩅᨶ᩠ᨲᩮᩣ, ᨸᩣᨿᩣᩈᩥᨸᩥ ᩁᩣᨩᨬ᩠ᨬᩮᩣ ᩈᨾᨱᩴ ᨠᩩᨾᩣᩁᨠᩔᨸᩴ ᨴᩔᨶᩣᨿ ᩏᨸᩈᨦ᩠ᨠᨾᩥᩔᨲᩦ’’ᨲᩥ.

᪔᪐᪙. ᩋᨳ ᨡᩮᩣ ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᩈᩮᨲᨻ᩠ᨿᨠᩮᩉᩥ ᨻᩕᩣᩉ᩠ᨾᨱᨣᩉᨸᨲᩥᨠᩮᩉᩥ ᨸᩁᩥᩅᩩᨲᩮᩣ ᨿᩮᨶ ᩈᩥᩴᩈᨸᩣᩅᨶᩴ ᨿᩮᨶᩣᨿᩈ᩠ᨾᩣ ᨠᩩᨾᩣᩁᨠᩔᨸᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩌᨿᩈ᩠ᨾᨲᩣ ᨠᩩᨾᩣᩁᨠᩔᨸᩮᨶ ᩈᨴ᩠ᨵᩥᩴ ᩈᨾ᩠ᨾᩮᩣᨴᩥ, ᩈᨾ᩠ᨾᩮᩣᨴᨶᩦᨿᩴ ᨠᨳᩴ ᩈᩣᩁᨱᩦᨿᩴ ᩅᩦᨲᩥᩈᩣᩁᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩈᩮᨲᨻ᩠ᨿᨠᩣᨸᩥ ᨡᩮᩣ ᨻᩕᩣᩉ᩠ᨾᨱᨣᩉᨸᨲᩥᨠᩣ ᩋᨸ᩠ᨸᩮᨠᨧ᩠ᨧᩮ ᩌᨿᩈ᩠ᨾᨶ᩠ᨲᩴ ᨠᩩᨾᩣᩁᨠᩔᨸᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ; ᩋᨸ᩠ᨸᩮᨠᨧ᩠ᨧᩮ ᩌᨿᩈ᩠ᨾᨲᩣ ᨠᩩᨾᩣᩁᨠᩔᨸᩮᨶ ᩈᨴ᩠ᨵᩥᩴ ᩈᨾ᩠ᨾᩮᩣᨴᩥᩴᩈᩩ; ᩈᨾ᩠ᨾᩮᩣᨴᨶᩦᨿᩴ ᨠᨳᩴ ᩈᩣᩁᨱᩦᨿᩴ ᩅᩦᨲᩥᩈᩣᩁᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ. ᩋᨸ᩠ᨸᩮᨠᨧ᩠ᨧᩮ ᨿᩮᨶᩣᨿᩈ᩠ᨾᩣ ᨠᩩᨾᩣᩁᨠᩔᨸᩮᩣ ᨲᩮᨶᨬ᩠ᨩᩃᩥᩴ ᨸᨱᩣᨾᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ. ᩋᨸ᩠ᨸᩮᨠᨧ᩠ᨧᩮ ᨶᩣᨾᨣᩮᩣᨲ᩠ᨲᩴ ᩈᩣᩅᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ. ᩋᨸ᩠ᨸᩮᨠᨧ᩠ᨧᩮ ᨲᩩᨱ᩠ᩉᩦᨽᩪᨲᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ.

ᨶᨲ᩠ᨳᩥᨠᩅᩣᨴᩮᩣ

᪔᪑᪐. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᩌᨿᩈ᩠ᨾᨶ᩠ᨲᩴ ᨠᩩᨾᩣᩁᨠᩔᨸᩴ ᩑᨲᨴᩅᩮᩣᨧ – ‘‘ᩋᩉᨬ᩠ᩉᩥ, ᨽᩮᩣ ᨠᩔᨸ, ᩑᩅᩴᩅᩣᨴᩦ ᩑᩅᩴᨴᩥᨭ᩠ᨮᩦ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ. ‘‘ᨶᩣᩉᩴ, ᩁᩣᨩᨬ᩠ᨬ, ᩑᩅᩴᩅᩣᨴᩥᩴ ᩑᩅᩴᨴᩥᨭ᩠ᨮᩥᩴ ᩋᨴ᩠ᨴᩈᩴ ᩅᩣ ᩋᩔᩮᩣᩈᩥᩴ ᩅᩣ. ᨠᨳᨬ᩠ᩉᩥ ᨶᩣᨾ ᩑᩅᩴ ᩅᨴᩮᨿ᩠ᨿ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’ᨲᩥ?

ᨧᨶ᩠ᨴᩥᨾᩈᩪᩁᩥᨿᩏᨸᨾᩣ

᪔᪑᪑. ‘‘ᨲᩮᨶ ᩉᩥ, ᩁᩣᨩᨬ᩠ᨬ, ᨲᨬ᩠ᨬᩮᩅᩮᨲ᩠ᨳ ᨸᨭᩥᨸᩩᨧ᩠ᨨᩥᩔᩣᨾᩥ, ᨿᨳᩣ ᨲᩮ ᨡᨾᩮᨿ᩠ᨿ, ᨲᨳᩣ ᨶᩴ ᨻ᩠ᨿᩣᨠᩁᩮᨿ᩠ᨿᩣᩈᩥ. ᨲᩴ ᨠᩥᩴ ᨾᨬ᩠ᨬᩈᩥ, ᩁᩣᨩᨬ᩠ᨬ, ᩍᨾᩮ ᨧᨶ᩠ᨴᩥᨾᩈᩪᩁᩥᨿᩣ ᩍᨾᩈ᩠ᨾᩥᩴ ᩅᩣ ᩃᩮᩣᨠᩮ ᨸᩁᩈ᩠ᨾᩥᩴ ᩅᩣ, ᨴᩮᩅᩣ ᩅᩣ ᨲᩮ ᨾᨶᩩᩔᩣ ᩅᩣ’’ᨲᩥ? ‘‘ᩍᨾᩮ, ᨽᩮᩣ ᨠᩔᨸ, ᨧᨶ᩠ᨴᩥᨾᩈᩪᩁᩥᨿᩣ ᨸᩁᩈ᩠ᨾᩥᩴ ᩃᩮᩣᨠᩮ, ᨶ ᩍᨾᩈ᩠ᨾᩥᩴ; ᨴᩮᩅᩣ ᨲᩮ ᨶ ᨾᨶᩩᩔᩣ’’ᨲᩥ. ‘‘ᩍᨾᩥᨶᩣᨸᩥ ᨡᩮᩣ ᨲᩮ, ᩁᩣᨩᨬ᩠ᨬ, ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩩ – ᩍᨲᩥᨸᩥ ᩋᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᩋᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᩋᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’ᨲᩥ.

᪔᪑᪒. ‘‘ᨠᩥᨬ᩠ᨧᩣᨸᩥ ᨽᩅᩴ ᨠᩔᨸᩮᩣ ᩑᩅᨾᩣᩉ, ᩋᨳ ᨡᩮᩣ ᩑᩅᩴ ᨾᩮ ᩑᨲ᩠ᨳ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ. ‘‘ᩋᨲ᩠ᨳᩥ ᨸᨶ, ᩁᩣᨩᨬ᩠ᨬ, ᨸᩁᩥᨿᩣᨿᩮᩣ, ᨿᩮᨶ ᨲᩮ ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ? ‘‘ᩋᨲ᩠ᨳᩥ, ᨽᩮᩣ ᨠᩔᨸ, ᨸᩁᩥᨿᩣᨿᩮᩣ, ᨿᩮᨶ ᨾᩮ ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ. ‘‘ᨿᨳᩣ ᨠᨳᩴ ᩅᩥᨿ, ᩁᩣᨩᨬ᩠ᨬᩣ’’ᨲᩥ? ‘‘ᩍᨵ ᨾᩮ, ᨽᩮᩣ ᨠᩔᨸ, ᨾᩥᨲ᩠ᨲᩣᨾᨧ᩠ᨧᩣ ᨬᩣᨲᩥᩈᩣᩃᩮᩣᩉᩥᨲᩣ ᨸᩣᨱᩣᨲᩥᨸᩣᨲᩦ ᩋᨴᩥᨶ᩠ᨶᩣᨴᩣᨿᩦ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩦ ᨾᩩᩈᩣᩅᩣᨴᩦ ᨸᩥᩈᩩᨱᩅᩣᨧᩣ ᨹᩁᩩᩈᩅᩣᨧᩣ ᩈᨾ᩠ᨹᨸ᩠ᨸᩃᩣᨸᩦ ᩋᨽᩥᨩ᩠ᨫᩣᩃᩪ ᨻ᩠ᨿᩣᨸᨶ᩠ᨶᨧᩥᨲ᩠ᨲᩣ ᨾᩥᨧ᩠ᨨᩣᨴᩥᨭ᩠ᨮᩦ. ᨲᩮ ᩋᨸᩁᩮᨶ ᩈᨾᨿᩮᨶ ᩌᨻᩣᨵᩥᨠᩣ ᩉᩮᩣᨶ᩠ᨲᩥ ᨴᩩᨠ᩠ᨡᩥᨲᩣ ᨻᩣᩊ᩠ᩉᨣᩥᩃᩣᨶᩣ. ᨿᨴᩣᩉᩴ ᨩᩣᨶᩣᨾᩥ – ‘ᨶ ᨴᩣᨶᩥᨾᩮ ᩍᨾᨾ᩠ᩉᩣ ᩌᨻᩣᨵᩣ ᩅᩩᨭ᩠ᨮᩉᩥᩔᨶ᩠ᨲᩦ’ᨲᩥ ᨲ᩠ᨿᩣᩉᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᩴ ᩅᨴᩣᨾᩥ – ‘ᩈᨶ᩠ᨲᩥ ᨡᩮᩣ, ᨽᩮᩣ, ᩑᨠᩮ ᩈᨾᨱᨻᩕᩣᩉ᩠ᨾᨱᩣ ᩑᩅᩴᩅᩣᨴᩥᨶᩮᩣ ᩑᩅᩴᨴᩥᨭ᩠ᨮᩥᨶᩮᩣ – ᨿᩮ ᨲᩮ ᨸᩣᨱᩣᨲᩥᨸᩣᨲᩦ ᩋᨴᩥᨶ᩠ᨶᩣᨴᩣᨿᩦ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩦ ᨾᩩᩈᩣᩅᩣᨴᩦ ᨸᩥᩈᩩᨱᩅᩣᨧᩣ ᨹᩁᩩᩈᩅᩣᨧᩣ ᩈᨾ᩠ᨹᨸ᩠ᨸᩃᩣᨸᩦ ᩋᨽᩥᨩ᩠ᨫᩣᩃᩪ ᨻ᩠ᨿᩣᨸᨶ᩠ᨶᨧᩥᨲ᩠ᨲᩣ ᨾᩥᨧ᩠ᨨᩣᨴᩥᨭ᩠ᨮᩦ, ᨲᩮ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨩ᩠ᨩᨶ᩠ᨲᩦ’ᨲᩥ. ᨽᩅᨶ᩠ᨲᩮᩣ ᨡᩮᩣ ᨸᩣᨱᩣᨲᩥᨸᩣᨲᩦ ᩋᨴᩥᨶ᩠ᨶᩣᨴᩣᨿᩦ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩦ ᨾᩩᩈᩣᩅᩣᨴᩦ ᨸᩥᩈᩩᨱᩅᩣᨧᩣ ᨹᩁᩩᩈᩅᩣᨧᩣ ᩈᨾ᩠ᨹᨸ᩠ᨸᩃᩣᨸᩦ ᩋᨽᩥᨩ᩠ᨫᩣᩃᩪ ᨻ᩠ᨿᩣᨸᨶ᩠ᨶᨧᩥᨲ᩠ᨲᩣ ᨾᩥᨧ᩠ᨨᩣᨴᩥᨭ᩠ᨮᩦ. ᩈᨧᩮ ᨲᩮᩈᩴ ᨽᩅᨲᩴ ᩈᨾᨱᨻᩕᩣᩉ᩠ᨾᨱᩣᨶᩴ ᩈᨧ᩠ᨧᩴ ᩅᨧᨶᩴ, ᨽᩅᨶ᩠ᨲᩮᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨩ᩠ᨩᩥᩔᨶ᩠ᨲᩥ. ᩈᨧᩮ, ᨽᩮᩣ, ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨩ᩠ᨩᩮᨿ᩠ᨿᩣᨳ, ᨿᩮᨶ ᨾᩮ ᩌᨣᨶ᩠ᨲ᩠ᩅᩣ ᩌᩁᩮᩣᨧᩮᨿ᩠ᨿᩣᨳ – ‘ᩍᨲᩥᨸᩥ ᩋᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᩋᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᩋᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’ᨲᩥ. ᨽᩅᨶ᩠ᨲᩮᩣ ᨡᩮᩣ ᨸᨶ ᨾᩮ ᩈᨴ᩠ᨵᩣᨿᩥᨠᩣ ᨸᨧ᩠ᨧᨿᩥᨠᩣ, ᨿᩴ ᨽᩅᨶ᩠ᨲᩮᩉᩥ ᨴᩥᨭ᩠ᨮᩴ, ᨿᨳᩣ ᩈᩣᨾᩴ ᨴᩥᨭ᩠ᨮᩴ ᩑᩅᨾᩮᨲᩴ ᨽᩅᩥᩔᨲᩦ’ᨲᩥ. ᨲᩮ ᨾᩮ ‘ᩈᩣᨵᩪ’ᨲᩥ ᨸᨭᩥᩔᩩᨲ᩠ᩅᩣ ᨶᩮᩅ ᩌᨣᨶ᩠ᨲ᩠ᩅᩣ ᩌᩁᩮᩣᨧᩮᨶ᩠ᨲᩥ, ᨶ ᨸᨶ ᨴᩪᨲᩴ ᨸᩉᩥᨱᨶ᩠ᨲᩥ. ᩋᨿᨾ᩠ᨸᩥ ᨡᩮᩣ, ᨽᩮᩣ ᨠᩔᨸ, ᨸᩁᩥᨿᩣᨿᩮᩣ, ᨿᩮᨶ ᨾᩮ ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ.

ᨧᩮᩣᩁᩏᨸᨾᩣ

᪔᪑᪓. ‘‘ᨲᩮᨶ ᩉᩥ, ᩁᩣᨩᨬ᩠ᨬ, ᨲᨬ᩠ᨬᩮᩅᩮᨲ᩠ᨳ ᨸᨭᩥᨸᩩᨧ᩠ᨨᩥᩔᩣᨾᩥ. ᨿᨳᩣ ᨲᩮ ᨡᨾᩮᨿ᩠ᨿ ᨲᨳᩣ ᨶᩴ ᨻ᩠ᨿᩣᨠᩁᩮᨿ᩠ᨿᩣᩈᩥ. ᨲᩴ ᨠᩥᩴ ᨾᨬ᩠ᨬᩈᩥ, ᩁᩣᨩᨬ᩠ᨬ, ᩍᨵ ᨲᩮ ᨸᩩᩁᩥᩈᩣ ᨧᩮᩣᩁᩴ ᩌᨣᩩᨧᩣᩁᩥᩴ ᨣᩉᩮᨲ᩠ᩅᩣ ᨴᩔᩮᨿ᩠ᨿᩩᩴ – ‘ᩋᨿᩴ ᨲᩮ, ᨽᨶ᩠ᨲᩮ, ᨧᩮᩣᩁᩮᩣ ᩌᨣᩩᨧᩣᩁᩦ; ᩍᨾᩔ ᨿᩴ ᩍᨧ᩠ᨨᩈᩥ, ᨲᩴ ᨴᨱ᩠ᨯᩴ ᨸᨱᩮᩉᩦ’ᨲᩥ. ᨲᩮ ᨲ᩠ᩅᩴ ᩑᩅᩴ ᩅᨴᩮᨿ᩠ᨿᩣᩈᩥ – ‘ᨲᩮᨶ ᩉᩥ, ᨽᩮᩣ, ᩍᨾᩴ ᨸᩩᩁᩥᩈᩴ ᨴᩊ᩠ᩉᩣᨿ ᩁᨩ᩠ᨩᩩᨿᩣ ᨸᨧ᩠ᨨᩣᨻᩣᩉᩴ ᨣᩣᩊ᩠ᩉᨻᨶ᩠ᨵᨶᩴ ᨻᨶ᩠ᨵᩥᨲ᩠ᩅᩣ ᨡᩩᩁᨾᩩᨱ᩠ᨯᩴ ᨠᩁᩥᨲ᩠ᩅᩣ [ᨠᩣᩁᩮᨲ᩠ᩅᩣ (ᩈ᩠ᨿᩣ. ᨠ.)] ᨡᩁᩔᩁᩮᨶ ᨸᨱᩅᩮᨶ ᩁᨳᩥᨠᩣᨿ ᩁᨳᩥᨠᩴ [ᩁᨳᩥᨿᩣᨿ ᩁᨳᩥᨿᩴ (ᨻᩉᩪᩈᩪ)] ᩈᩥᨦ᩠ᨥᩣᨭᨠᩮᨶ ᩈᩥᨦ᩠ᨥᩣᨭᨠᩴ ᨸᩁᩥᨶᩮᨲ᩠ᩅᩣ ᨴᨠ᩠ᨡᩥᨱᩮᨶ ᨴ᩠ᩅᩣᩁᩮᨶ ᨶᩥᨠ᩠ᨡᨾᩥᨲ᩠ᩅᩣ ᨴᨠ᩠ᨡᩥᨱᨲᩮᩣ ᨶᨣᩁᩔ ᩌᨥᩣᨲᨶᩮ ᩈᩦᩈᩴ ᨨᩥᨶ᩠ᨴᨳᩣ’ᨲᩥ. ᨲᩮ ‘ᩈᩣᨵᩪ’ᨲᩥ ᨸᨭᩥᩔᩩᨲ᩠ᩅᩣ ᨲᩴ ᨸᩩᩁᩥᩈᩴ ᨴᩊ᩠ᩉᩣᨿ ᩁᨩ᩠ᨩᩩᨿᩣ ᨸᨧ᩠ᨨᩣᨻᩣᩉᩴ ᨣᩣᩊ᩠ᩉᨻᨶ᩠ᨵᨶᩴ ᨻᨶ᩠ᨵᩥᨲ᩠ᩅᩣ ᨡᩩᩁᨾᩩᨱ᩠ᨯᩴ ᨠᩁᩥᨲ᩠ᩅᩣ ᨡᩁᩔᩁᩮᨶ ᨸᨱᩅᩮᨶ ᩁᨳᩥᨠᩣᨿ ᩁᨳᩥᨠᩴ ᩈᩥᨦ᩠ᨥᩣᨭᨠᩮᨶ ᩈᩥᨦ᩠ᨥᩣᨭᨠᩴ ᨸᩁᩥᨶᩮᨲ᩠ᩅᩣ ᨴᨠ᩠ᨡᩥᨱᩮᨶ ᨴ᩠ᩅᩣᩁᩮᨶ ᨶᩥᨠ᩠ᨡᨾᩥᨲ᩠ᩅᩣ ᨴᨠ᩠ᨡᩥᨱᨲᩮᩣ ᨶᨣᩁᩔ ᩌᨥᩣᨲᨶᩮ ᨶᩥᩈᩦᨴᩣᨸᩮᨿ᩠ᨿᩩᩴ. ᩃᨽᩮᨿ᩠ᨿ ᨶᩩ ᨡᩮᩣ ᩈᩮᩣ ᨧᩮᩣᩁᩮᩣ ᨧᩮᩣᩁᨥᩣᨲᩮᩈᩩ – ‘ᩌᨣᨾᩮᨶ᩠ᨲᩩ ᨲᩣᩅ ᨽᩅᨶ᩠ᨲᩮᩣ ᨧᩮᩣᩁᨥᩣᨲᩣ, ᩋᨾᩩᨠᩈ᩠ᨾᩥᩴ ᨾᩮ ᨣᩣᨾᩮ ᩅᩣ ᨶᩥᨣᨾᩮ ᩅᩣ ᨾᩥᨲ᩠ᨲᩣᨾᨧ᩠ᨧᩣ ᨬᩣᨲᩥᩈᩣᩃᩮᩣᩉᩥᨲᩣ, ᨿᩣᩅᩣᩉᩴ ᨲᩮᩈᩴ ᩏᨴ᩠ᨴᩥᩈᩥᨲ᩠ᩅᩣ ᩌᨣᨧ᩠ᨨᩣᨾᩦ’ᨲᩥ, ᩏᨴᩣᩉᩩ ᩅᩥᨸ᩠ᨸᩃᨸᨶ᩠ᨲᩔᩮᩅ ᨧᩮᩣᩁᨥᩣᨲᩣ ᩈᩦᩈᩴ ᨨᩥᨶ᩠ᨴᩮᨿ᩠ᨿᩩ’’ᨶ᩠ᨲᩥ? ‘‘ᨶ ᩉᩥ ᩈᩮᩣ, ᨽᩮᩣ ᨠᩔᨸ, ᨧᩮᩣᩁᩮᩣ ᩃᨽᩮᨿ᩠ᨿ ᨧᩮᩣᩁᨥᩣᨲᩮᩈᩩ – ‘ᩌᨣᨾᩮᨶ᩠ᨲᩩ ᨲᩣᩅ ᨽᩅᨶ᩠ᨲᩮᩣ ᨧᩮᩣᩁᨥᩣᨲᩣ ᩋᨾᩩᨠᩈ᩠ᨾᩥᩴ ᨾᩮ ᨣᩣᨾᩮ ᩅᩣ ᨶᩥᨣᨾᩮ ᩅᩣ ᨾᩥᨲ᩠ᨲᩣᨾᨧ᩠ᨧᩣ ᨬᩣᨲᩥᩈᩣᩃᩮᩣᩉᩥᨲᩣ, ᨿᩣᩅᩣᩉᩴ ᨲᩮᩈᩴ ᩏᨴ᩠ᨴᩥᩈᩥᨲ᩠ᩅᩣ ᩌᨣᨧ᩠ᨨᩣᨾᩦ’ᨲᩥ. ᩋᨳ ᨡᩮᩣ ᨶᩴ ᩅᩥᨸ᩠ᨸᩃᨸᨶ᩠ᨲᩔᩮᩅ ᨧᩮᩣᩁᨥᩣᨲᩣ ᩈᩦᩈᩴ ᨨᩥᨶ᩠ᨴᩮᨿ᩠ᨿᩩ’’ᨶ᩠ᨲᩥ. ‘‘ᩈᩮᩣ ᩉᩥ ᨶᩣᨾ, ᩁᩣᨩᨬ᩠ᨬ, ᨧᩮᩣᩁᩮᩣ ᨾᨶᩩᩔᩮᩣ ᨾᨶᩩᩔᨽᩪᨲᩮᩈᩩ ᨧᩮᩣᩁᨥᩣᨲᩮᩈᩩ ᨶ ᩃᨽᩥᩔᨲᩥ – ‘ᩌᨣᨾᩮᨶ᩠ᨲᩩ ᨲᩣᩅ ᨽᩅᨶ᩠ᨲᩮᩣ ᨧᩮᩣᩁᨥᩣᨲᩣ, ᩋᨾᩩᨠᩈ᩠ᨾᩥᩴ ᨾᩮ ᨣᩣᨾᩮ ᩅᩣ ᨶᩥᨣᨾᩮ ᩅᩣ ᨾᩥᨲ᩠ᨲᩣᨾᨧ᩠ᨧᩣ ᨬᩣᨲᩥᩈᩣᩃᩮᩣᩉᩥᨲᩣ, ᨿᩣᩅᩣᩉᩴ ᨲᩮᩈᩴ ᩏᨴ᩠ᨴᩥᩈᩥᨲ᩠ᩅᩣ ᩌᨣᨧ᩠ᨨᩣᨾᩦ’ᨲᩥ. ᨠᩥᩴ ᨸᨶ ᨲᩮ ᨾᩥᨲ᩠ᨲᩣᨾᨧ᩠ᨧᩣ ᨬᩣᨲᩥᩈᩣᩃᩮᩣᩉᩥᨲᩣ ᨸᩣᨱᩣᨲᩥᨸᩣᨲᩦ ᩋᨴᩥᨶ᩠ᨶᩣᨴᩣᨿᩦ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩦ ᨾᩩᩈᩣᩅᩣᨴᩦ ᨸᩥᩈᩩᨱᩅᩣᨧᩣ ᨹᩁᩩᩈᩅᩣᨧᩣ ᩈᨾ᩠ᨹᨸ᩠ᨸᩃᩣᨸᩦ ᩋᨽᩥᨩ᩠ᨫᩣᩃᩪ ᨻ᩠ᨿᩣᨸᨶ᩠ᨶᨧᩥᨲ᩠ᨲᩣ ᨾᩥᨧ᩠ᨨᩣᨴᩥᨭ᩠ᨮᩦ, ᨲᩮ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨶ᩠ᨶᩣ ᩃᨽᩥᩔᨶ᩠ᨲᩥ ᨶᩥᩁᨿᨸᩣᩃᩮᩈᩩ – ‘ᩌᨣᨾᩮᨶ᩠ᨲᩩ ᨲᩣᩅ ᨽᩅᨶ᩠ᨲᩮᩣ ᨶᩥᩁᨿᨸᩣᩃᩣ, ᨿᩣᩅ ᨾᨿᩴ ᨸᩣᨿᩣᩈᩥᩔ ᩁᩣᨩᨬ᩠ᨬᩔ ᨣᨶ᩠ᨲ᩠ᩅᩣ ᩌᩁᩮᩣᨧᩮᨾ – ‘‘ᩍᨲᩥᨸᩥ ᩋᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᩋᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᩋᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ? ᩍᨾᩥᨶᩣᨸᩥ ᨡᩮᩣ ᨲᩮ, ᩁᩣᨩᨬ᩠ᨬ, ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩩ – ‘ᩍᨲᩥᨸᩥ ᩋᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᩋᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᩋᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ.

᪔᪑᪔. ‘‘ᨠᩥᨬ᩠ᨧᩣᨸᩥ ᨽᩅᩴ ᨠᩔᨸᩮᩣ ᩑᩅᨾᩣᩉ, ᩋᨳ ᨡᩮᩣ ᩑᩅᩴ ᨾᩮ ᩑᨲ᩠ᨳ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’ᨲᩥ. ‘‘ᩋᨲ᩠ᨳᩥ ᨸᨶ, ᩁᩣᨩᨬ᩠ᨬ, ᨸᩁᩥᨿᩣᨿᩮᩣ ᨿᩮᨶ ᨲᩮ ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ? ‘‘ᩋᨲ᩠ᨳᩥ, ᨽᩮᩣ ᨠᩔᨸ, ᨸᩁᩥᨿᩣᨿᩮᩣ, ᨿᩮᨶ ᨾᩮ ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ. ‘‘ᨿᨳᩣ ᨠᨳᩴ ᩅᩥᨿ, ᩁᩣᨩᨬ᩠ᨬᩣ’’ᨲᩥ? ‘‘ᩍᨵ ᨾᩮ, ᨽᩮᩣ ᨠᩔᨸ, ᨾᩥᨲ᩠ᨲᩣᨾᨧ᩠ᨧᩣ ᨬᩣᨲᩥᩈᩣᩃᩮᩣᩉᩥᨲᩣ ᨸᩣᨱᩣᨲᩥᨸᩣᨲᩣ ᨸᨭᩥᩅᩥᩁᨲᩣ ᩋᨴᩥᨶ᩠ᨶᩣᨴᩣᨶᩣ ᨸᨭᩥᩅᩥᩁᨲᩣ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ ᨸᨭᩥᩅᩥᩁᨲᩣ ᨾᩩᩈᩣᩅᩣᨴᩣ ᨸᨭᩥᩅᩥᩁᨲᩣ ᨸᩥᩈᩩᨱᩣᨿ ᩅᩣᨧᩣᨿ ᨸᨭᩥᩅᩥᩁᨲᩣ ᨹᩁᩩᩈᩣᨿ ᩅᩣᨧᩣᨿ ᨸᨭᩥᩅᩥᩁᨲᩣ ᩈᨾ᩠ᨹᨸ᩠ᨸᩃᩣᨸᩣ ᨸᨭᩥᩅᩥᩁᨲᩣ ᩋᨶᨽᩥᨩ᩠ᨫᩣᩃᩪ ᩋᨻ᩠ᨿᩣᨸᨶ᩠ᨶᨧᩥᨲ᩠ᨲᩣ ᩈᨾ᩠ᨾᩣᨴᩥᨭ᩠ᨮᩦ. ᨲᩮ ᩋᨸᩁᩮᨶ ᩈᨾᨿᩮᨶ ᩌᨻᩣᨵᩥᨠᩣ ᩉᩮᩣᨶ᩠ᨲᩥ ᨴᩩᨠ᩠ᨡᩥᨲᩣ ᨻᩣᩊ᩠ᩉᨣᩥᩃᩣᨶᩣ. ᨿᨴᩣᩉᩴ ᨩᩣᨶᩣᨾᩥ – ‘ᨶ ᨴᩣᨶᩥᨾᩮ ᩍᨾᨾ᩠ᩉᩣ ᩌᨻᩣᨵᩣ ᩅᩩᨭ᩠ᨮᩉᩥᩔᨶ᩠ᨲᩦ’ᨲᩥ ᨲ᩠ᨿᩣᩉᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᩴ ᩅᨴᩣᨾᩥ – ‘ᩈᨶ᩠ᨲᩥ ᨡᩮᩣ, ᨽᩮᩣ, ᩑᨠᩮ ᩈᨾᨱᨻᩕᩣᩉ᩠ᨾᨱᩣ ᩑᩅᩴᩅᩣᨴᩥᨶᩮᩣ ᩑᩅᩴᨴᩥᨭ᩠ᨮᩥᨶᩮᩣ – ᨿᩮ ᨲᩮ ᨸᩣᨱᩣᨲᩥᨸᩣᨲᩣ ᨸᨭᩥᩅᩥᩁᨲᩣ ᩋᨴᩥᨶ᩠ᨶᩣᨴᩣᨶᩣ ᨸᨭᩥᩅᩥᩁᨲᩣ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ ᨸᨭᩥᩅᩥᩁᨲᩣ ᨾᩩᩈᩣᩅᩣᨴᩣ ᨸᨭᩥᩅᩥᩁᨲᩣ ᨸᩥᩈᩩᨱᩣᨿ ᩅᩣᨧᩣᨿ ᨸᨭᩥᩅᩥᩁᨲᩣ ᨹᩁᩩᩈᩣᨿ ᩅᩣᨧᩣᨿ ᨸᨭᩥᩅᩥᩁᨲᩣ ᩈᨾ᩠ᨹᨸ᩠ᨸᩃᩣᨸᩣ ᨸᨭᩥᩅᩥᩁᨲᩣ ᩋᨶᨽᩥᨩ᩠ᨫᩣᩃᩪ ᩋᨻ᩠ᨿᩣᨸᨶ᩠ᨶᨧᩥᨲ᩠ᨲᩣ ᩈᨾ᩠ᨾᩣᨴᩥᨭ᩠ᨮᩦ ᨲᩮ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨶ᩠ᨲᩦᨲᩥ. ᨽᩅᨶ᩠ᨲᩮᩣ ᨡᩮᩣ ᨸᩣᨱᩣᨲᩥᨸᩣᨲᩣ ᨸᨭᩥᩅᩥᩁᨲᩣ ᩋᨴᩥᨶ᩠ᨶᩣᨴᩣᨶᩣ ᨸᨭᩥᩅᩥᩁᨲᩣ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ ᨸᨭᩥᩅᩥᩁᨲᩣ ᨾᩩᩈᩣᩅᩣᨴᩣ ᨸᨭᩥᩅᩥᩁᨲᩣ ᨸᩥᩈᩩᨱᩣᨿ ᩅᩣᨧᩣᨿ ᨸᨭᩥᩅᩥᩁᨲᩣ ᨹᩁᩩᩈᩣᨿ ᩅᩣᨧᩣᨿ ᨸᨭᩥᩅᩥᩁᨲᩣ ᩈᨾ᩠ᨹᨸ᩠ᨸᩃᩣᨸᩣ ᨸᨭᩥᩅᩥᩁᨲᩣ ᩋᨶᨽᩥᨩ᩠ᨫᩣᩃᩪ ᩋᨻ᩠ᨿᩣᨸᨶ᩠ᨶᨧᩥᨲ᩠ᨲᩣ ᩈᨾ᩠ᨾᩣᨴᩥᨭ᩠ᨮᩦ. ᩈᨧᩮ ᨲᩮᩈᩴ ᨽᩅᨲᩴ ᩈᨾᨱᨻᩕᩣᩉ᩠ᨾᨱᩣᨶᩴ ᩈᨧ᩠ᨧᩴ ᩅᨧᨶᩴ, ᨽᩅᨶ᩠ᨲᩮᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᩥᩔᨶ᩠ᨲᩥ. ᩈᨧᩮ, ᨽᩮᩣ, ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᩮᨿ᩠ᨿᩣᨳ, ᨿᩮᨶ ᨾᩮ ᩌᨣᨶ᩠ᨲ᩠ᩅᩣ ᩌᩁᩮᩣᨧᩮᨿ᩠ᨿᩣᨳ – ‘ᩍᨲᩥᨸᩥ ᩋᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᩋᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᩋᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’ᨲᩥ. ᨽᩅᨶ᩠ᨲᩮᩣ ᨡᩮᩣ ᨸᨶ ᨾᩮ ᩈᨴ᩠ᨵᩣᨿᩥᨠᩣ ᨸᨧ᩠ᨧᨿᩥᨠᩣ, ᨿᩴ ᨽᩅᨶ᩠ᨲᩮᩉᩥ ᨴᩥᨭ᩠ᨮᩴ, ᨿᨳᩣ ᩈᩣᨾᩴ ᨴᩥᨭ᩠ᨮᩴ ᩑᩅᨾᩮᨲᩴ ᨽᩅᩥᩔᨲᩦ’ᨲᩥ. ᨲᩮ ᨾᩮ ‘ᩈᩣᨵᩪ’ᨲᩥ ᨸᨭᩥᩔᩩᨲ᩠ᩅᩣ ᨶᩮᩅ ᩌᨣᨶ᩠ᨲ᩠ᩅᩣ ᩌᩁᩮᩣᨧᩮᨶ᩠ᨲᩥ, ᨶ ᨸᨶ ᨴᩪᨲᩴ ᨸᩉᩥᨱᨶ᩠ᨲᩥ. ᩋᨿᨾ᩠ᨸᩥ ᨡᩮᩣ, ᨽᩮᩣ ᨠᩔᨸ, ᨸᩁᩥᨿᩣᨿᩮᩣ, ᨿᩮᨶ ᨾᩮ ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ.

ᨣᩪᨳᨠᩪᨸᨸᩩᩁᩥᩈᩏᨸᨾᩣ

᪔᪑᪕. ‘‘ᨲᩮᨶ ᩉᩥ, ᩁᩣᨩᨬ᩠ᨬ, ᩏᨸᨾᩴ ᨲᩮ ᨠᩁᩥᩔᩣᨾᩥ. ᩏᨸᨾᩣᨿ ᨾᩥᨵᩮᨠᨧ᩠ᨧᩮ [ᩏᨸᨾᩣᨿᨸᩥᨵᩮᨠᨧ᩠ᨧᩮ (ᩈᩦ. ᩈ᩠ᨿᩣ.), ᩏᨸᨾᩣᨿᨸᩥᩍᨵᩮᨠᨧ᩠ᨧᩮ (ᨸᩦ.)] ᩅᩥᨬ᩠ᨬᩪ ᨸᩩᩁᩥᩈᩣ ᨽᩣᩈᩥᨲᩔ ᩋᨲ᩠ᨳᩴ ᩌᨩᩣᨶᨶ᩠ᨲᩥ. ᩈᩮᨿ᩠ᨿᨳᩣᨸᩥ, ᩁᩣᨩᨬ᩠ᨬ, ᨸᩩᩁᩥᩈᩮᩣ ᨣᩪᨳᨠᩪᨸᩮ ᩈᩈᩦᩈᨠᩴ [ᩈᩈᩦᩈᨠᩮᩣ (ᩈ᩠ᨿᩣ.)] ᨶᩥᨾᩩᨣ᩠ᨣᩮᩣ ᩋᩔ. ᩋᨳ ᨲ᩠ᩅᩴ ᨸᩩᩁᩥᩈᩮ ᩌᨱᩣᨸᩮᨿ᩠ᨿᩣᩈᩥ – ‘ᨲᩮᨶ ᩉᩥ, ᨽᩮᩣ, ᨲᩴ ᨸᩩᩁᩥᩈᩴ ᨲᨾ᩠ᩉᩣ ᨣᩪᨳᨠᩪᨸᩣ ᩏᨴ᩠ᨵᩁᨳᩣ’ᨲᩥ. ᨲᩮ ‘ᩈᩣᨵᩪ’ᨲᩥ ᨸᨭᩥᩔᩩᨲ᩠ᩅᩣ ᨲᩴ ᨸᩩᩁᩥᩈᩴ ᨲᨾ᩠ᩉᩣ ᨣᩪᨳᨠᩪᨸᩣ ᩏᨴ᩠ᨵᩁᩮᨿ᩠ᨿᩩᩴ. ᨲᩮ ᨲ᩠ᩅᩴ ᩑᩅᩴ ᩅᨴᩮᨿ᩠ᨿᩣᩈᩥ – ‘ᨲᩮᨶ ᩉᩥ, ᨽᩮᩣ, ᨲᩔ ᨸᩩᩁᩥᩈᩔ ᨠᩣᨿᩣ ᩅᩮᩊᩩᨸᩮᩈᩥᨠᩣᩉᩥ ᨣᩪᨳᩴ ᩈᩩᨶᩥᨾ᩠ᨾᨩ᩠ᨩᩥᨲᩴ ᨶᩥᨾ᩠ᨾᨩ᩠ᨩᨳᩣ’ᨲᩥ. ᨲᩮ ‘ᩈᩣᨵᩪ’ᨲᩥ ᨸᨭᩥᩔᩩᨲ᩠ᩅᩣ ᨲᩔ ᨸᩩᩁᩥᩈᩔ ᨠᩣᨿᩣ ᩅᩮᩊᩩᨸᩮᩈᩥᨠᩣᩉᩥ ᨣᩪᨳᩴ ᩈᩩᨶᩥᨾ᩠ᨾᨩ᩠ᨩᩥᨲᩴ ᨶᩥᨾ᩠ᨾᨩ᩠ᨩᩮᨿ᩠ᨿᩩᩴ. ᨲᩮ ᨲ᩠ᩅᩴ ᩑᩅᩴ ᩅᨴᩮᨿ᩠ᨿᩣᩈᩥ – ‘ᨲᩮᨶ ᩉᩥ, ᨽᩮᩣ, ᨲᩔ ᨸᩩᩁᩥᩈᩔ ᨠᩣᨿᩴ ᨸᨱ᩠ᨯᩩᨾᨲ᩠ᨲᩥᨠᩣᨿ ᨲᩥᨠ᩠ᨡᨲ᩠ᨲᩩᩴ ᩈᩩᨻ᩠ᨻᨭ᩠ᨭᩥᨲᩴ ᩏᨻ᩠ᨻᨭ᩠ᨭᩮᨳᩣ’ᨲᩥ [ᩈᩩᨸ᩠ᨸᨭ᩠ᨭᩥᨲᩴ ᩏᨸ᩠ᨸᨭ᩠ᨭᩮᨳᩣᨲᩥ (ᨠ.)]. ᨲᩮ ᨲᩔ ᨸᩩᩁᩥᩈᩔ ᨠᩣᨿᩴ ᨸᨱ᩠ᨯᩩᨾᨲ᩠ᨲᩥᨠᩣᨿ ᨲᩥᨠ᩠ᨡᨲ᩠ᨲᩩᩴ ᩈᩩᨻ᩠ᨻᨭ᩠ᨭᩥᨲᩴ ᩏᨻ᩠ᨻᨭ᩠ᨭᩮᨿ᩠ᨿᩩᩴ. ᨲᩮ ᨲ᩠ᩅᩴ ᩑᩅᩴ ᩅᨴᩮᨿ᩠ᨿᩣᩈᩥ – ‘ᨲᩮᨶ ᩉᩥ, ᨽᩮᩣ, ᨲᩴ ᨸᩩᩁᩥᩈᩴ ᨲᩮᩃᩮᨶ ᩋᨻ᩠ᨽᨬ᩠ᨩᩥᨲ᩠ᩅᩣ ᩈᩩᨡᩩᨾᩮᨶ ᨧᩩᨱ᩠ᨱᩮᨶ ᨲᩥᨠ᩠ᨡᨲ᩠ᨲᩩᩴ ᩈᩩᨸ᩠ᨸᨵᩮᩣᨲᩴ ᨠᩁᩮᩣᨳᩣ’ᨲᩥ. ᨲᩮ ᨲᩴ ᨸᩩᩁᩥᩈᩴ ᨲᩮᩃᩮᨶ ᩋᨻ᩠ᨽᨬ᩠ᨩᩥᨲ᩠ᩅᩣ ᩈᩩᨡᩩᨾᩮᨶ ᨧᩩᨱ᩠ᨱᩮᨶ ᨲᩥᨠ᩠ᨡᨲ᩠ᨲᩩᩴ ᩈᩩᨸ᩠ᨸᨵᩮᩣᨲᩴ ᨠᩁᩮᨿ᩠ᨿᩩᩴ. ᨲᩮ ᨲ᩠ᩅᩴ ᩑᩅᩴ ᩅᨴᩮᨿ᩠ᨿᩣᩈᩥ – ‘ᨲᩮᨶ ᩉᩥ, ᨽᩮᩣ, ᨲᩔ ᨸᩩᩁᩥᩈᩔ ᨠᩮᩈᨾᩔᩩᩴ ᨠᨸ᩠ᨸᩮᨳᩣ’ᨲᩥ. ᨲᩮ ᨲᩔ ᨸᩩᩁᩥᩈᩔ ᨠᩮᩈᨾᩔᩩᩴ ᨠᨸ᩠ᨸᩮᨿ᩠ᨿᩩᩴ. ᨲᩮ ᨲ᩠ᩅᩴ ᩑᩅᩴ ᩅᨴᩮᨿ᩠ᨿᩣᩈᩥ – ‘ᨲᩮᨶ ᩉᩥ, ᨽᩮᩣ, ᨲᩔ ᨸᩩᩁᩥᩈᩔ ᨾᩉᨣ᩠ᨥᨬ᩠ᨧ ᨾᩣᩃᩴ ᨾᩉᨣ᩠ᨥᨬ᩠ᨧ ᩅᩥᩃᩮᨸᨶᩴ ᨾᩉᨣ᩠ᨥᩣᨶᩥ ᨧ ᩅᨲ᩠ᨳᩣᨶᩥ ᩏᨸᩉᩁᨳᩣ’ᨲᩥ. ᨲᩮ ᨲᩔ ᨸᩩᩁᩥᩈᩔ ᨾᩉᨣ᩠ᨥᨬ᩠ᨧ ᨾᩣᩃᩴ ᨾᩉᨣ᩠ᨥᨬ᩠ᨧ ᩅᩥᩃᩮᨸᨶᩴ ᨾᩉᨣ᩠ᨥᩣᨶᩥ ᨧ ᩅᨲ᩠ᨳᩣᨶᩥ ᩏᨸᩉᩁᩮᨿ᩠ᨿᩩᩴ. ᨲᩮ ᨲ᩠ᩅᩴ ᩑᩅᩴ ᩅᨴᩮᨿ᩠ᨿᩣᩈᩥ – ‘ᨲᩮᨶ ᩉᩥ, ᨽᩮᩣ, ᨲᩴ ᨸᩩᩁᩥᩈᩴ ᨸᩣᩈᩣᨴᩴ ᩌᩁᩮᩣᨸᩮᨲ᩠ᩅᩣ ᨸᨬ᩠ᨧᨠᩣᨾᨣᩩᨱᩣᨶᩥ ᩏᨸᨭ᩠ᨮᩣᨸᩮᨳᩣ’ᨲᩥ. ᨲᩮ ᨲᩴ ᨸᩩᩁᩥᩈᩴ ᨸᩣᩈᩣᨴᩴ ᩌᩁᩮᩣᨸᩮᨲ᩠ᩅᩣ ᨸᨬ᩠ᨧᨠᩣᨾᨣᩩᨱᩣᨶᩥ ᩏᨸᨭ᩠ᨮᩣᨸᩮᨿ᩠ᨿᩩᩴ.

‘‘ᨲᩴ ᨠᩥᩴ ᨾᨬ᩠ᨬᩈᩥ, ᩁᩣᨩᨬ᩠ᨬ, ᩋᨸᩥ ᨶᩩ ᨲᩔ ᨸᩩᩁᩥᩈᩔ ᩈᩩᨶ᩠ᩉᩣᨲᩔ ᩈᩩᩅᩥᩃᩥᨲ᩠ᨲᩔ ᩈᩩᨠᨸ᩠ᨸᩥᨲᨠᩮᩈᨾᩔᩩᩔ ᩌᨾᩩᨠ᩠ᨠᨾᩣᩃᩣᨽᩁᨱᩔ ᩒᨴᩣᨲᩅᨲ᩠ᨳᩅᩈᨶᩔ ᩏᨸᩁᩥᨸᩣᩈᩣᨴᩅᩁᨣᨲᩔ ᨸᨬ᩠ᨧᩉᩥ ᨠᩣᨾᨣᩩᨱᩮᩉᩥ ᩈᨾᨸ᩠ᨸᩥᨲᩔ ᩈᨾᨦ᩠ᨣᩦᨽᩪᨲᩔ ᨸᩁᩥᨧᩣᩁᨿᨾᩣᨶᩔ ᨸᩩᨶᨴᩮᩅ ᨲᩈ᩠ᨾᩥᩴ ᨣᩪᨳᨠᩪᨸᩮ ᨶᩥᨾᩩᨩ᩠ᨩᩥᨲᩩᨠᩣᨾᨲᩣ [ᨶᩥᨾᩩᨩ᩠ᨩᩥᨲᩩᨠᩣᨾ᩠ᨿᨲᩣ (ᩈ᩠ᨿᩣ. ᨠ.)] ᩋᩔᩣ’’ᨲᩥ? ‘‘ᨶᩮᩣ ᩉᩥᨴᩴ, ᨽᩮᩣ ᨠᩔᨸ’’. ‘‘ᨲᩴ ᨠᩥᩔ ᩉᩮᨲᩩ’’? ‘‘ᩋᩈᩩᨧᩥ, ᨽᩮᩣ ᨠᩔᨸ, ᨣᩪᨳᨠᩪᨸᩮᩣ ᩋᩈᩩᨧᩥ ᨧᩮᩅ ᩋᩈᩩᨧᩥᩈᨦ᩠ᨡᩣᨲᩮᩣ ᨧ ᨴᩩᨣ᩠ᨣᨶ᩠ᨵᩮᩣ ᨧ ᨴᩩᨣ᩠ᨣᨶ᩠ᨵᩈᨦ᩠ᨡᩣᨲᩮᩣ ᨧ ᨩᩮᨣᩩᨧ᩠ᨨᩮᩣ ᨧ ᨩᩮᨣᩩᨧ᩠ᨨᩈᨦ᩠ᨡᩣᨲᩮᩣ ᨧ ᨸᨭᩥᨠᩪᩃᩮᩣ ᨧ ᨸᨭᩥᨠᩪᩃᩈᨦ᩠ᨡᩣᨲᩮᩣ ᨧᩣ’’ᨲᩥ. ‘‘ᩑᩅᨾᩮᩅ ᨡᩮᩣ, ᩁᩣᨩᨬ᩠ᨬ, ᨾᨶᩩᩔᩣ ᨴᩮᩅᩣᨶᩴ ᩋᩈᩩᨧᩦ ᨧᩮᩅ ᩋᩈᩩᨧᩥᩈᨦ᩠ᨡᩣᨲᩣ ᨧ, ᨴᩩᨣ᩠ᨣᨶ᩠ᨵᩣ ᨧ ᨴᩩᨣ᩠ᨣᨶ᩠ᨵᩈᨦ᩠ᨡᩣᨲᩣ ᨧ, ᨩᩮᨣᩩᨧ᩠ᨨᩣ ᨧ ᨩᩮᨣᩩᨧ᩠ᨨᩈᨦ᩠ᨡᩣᨲᩣ ᨧ, ᨸᨭᩥᨠᩪᩃᩣ ᨧ ᨸᨭᩥᨠᩪᩃᩈᨦ᩠ᨡᩣᨲᩣ ᨧ. ᨿᩮᩣᨩᨶᩈᨲᩴ ᨡᩮᩣ, ᩁᩣᨩᨬ᩠ᨬ, ᨾᨶᩩᩔᨣᨶ᩠ᨵᩮᩣ ᨴᩮᩅᩮ ᩏᨻ᩠ᨻᩣᨵᨲᩥ. ᨠᩥᩴ ᨸᨶ ᨲᩮ ᨾᩥᨲ᩠ᨲᩣᨾᨧ᩠ᨧᩣ ᨬᩣᨲᩥᩈᩣᩃᩮᩣᩉᩥᨲᩣ ᨸᩣᨱᩣᨲᩥᨸᩣᨲᩣ ᨸᨭᩥᩅᩥᩁᨲᩣ ᩋᨴᩥᨶ᩠ᨶᩣᨴᩣᨶᩣ ᨸᨭᩥᩅᩥᩁᨲᩣ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ ᨸᨭᩥᩅᩥᩁᨲᩣ ᨾᩩᩈᩣᩅᩣᨴᩣ ᨸᨭᩥᩅᩥᩁᨲᩣ ᨸᩥᩈᩩᨱᩣᨿ ᩅᩣᨧᩣᨿ ᨸᨭᩥᩅᩥᩁᨲᩣ ᨹᩁᩩᩈᩣᨿ ᩅᩣᨧᩣᨿ ᨸᨭᩥᩅᩥᩁᨲᩣ ᩈᨾ᩠ᨹᨸ᩠ᨸᩃᩣᨸᩣ ᨸᨭᩥᩅᩥᩁᨲᩣ ᩋᨶᨽᩥᨩ᩠ᨫᩣᩃᩪ ᩋᨻ᩠ᨿᩣᨸᨶ᩠ᨶᨧᩥᨲ᩠ᨲᩣ ᩈᨾ᩠ᨾᩣᨴᩥᨭ᩠ᨮᩦ, ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨶ᩠ᨶᩣ ᨲᩮ ᩌᨣᨶ᩠ᨲ᩠ᩅᩣ ᩌᩁᩮᩣᨧᩮᩔᨶ᩠ᨲᩥ – ‘ᩍᨲᩥᨸᩥ ᩋᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᩋᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᩋᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’ᨲᩥ? ᩍᨾᩥᨶᩣᨸᩥ ᨡᩮᩣ ᨲᩮ, ᩁᩣᨩᨬ᩠ᨬ, ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩩ – ‘ᩍᨲᩥᨸᩥ ᩋᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᩋᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᩋᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ.

᪔᪑᪖. ‘‘ᨠᩥᨬ᩠ᨧᩣᨸᩥ ᨽᩅᩴ ᨠᩔᨸᩮᩣ ᩑᩅᨾᩣᩉ, ᩋᨳ ᨡᩮᩣ ᩑᩅᩴ ᨾᩮ ᩑᨲ᩠ᨳ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ. ‘‘ᩋᨲ᩠ᨳᩥ ᨸᨶ, ᩁᩣᨩᨬ᩠ᨬ, ᨸᩁᩥᨿᩣᨿᩮᩣ …ᨸᩮ… ‘‘ᩋᨲ᩠ᨳᩥ, ᨽᩮᩣ ᨠᩔᨸ, ᨸᩁᩥᨿᩣᨿᩮᩣ…ᨸᩮ… ``ᨿᨳᩣ ᨠᨳᩴ ᩅᩥᨿ, ᩁᩣᨩᨬ᩠ᨬᩣᨲᩥ? ‘‘ᩍᨵ ᨾᩮ, ᨽᩮᩣ ᨠᩔᨸ, ᨾᩥᨲ᩠ᨲᩣᨾᨧ᩠ᨧᩣ ᨬᩣᨲᩥᩈᩣᩃᩮᩣᩉᩥᨲᩣ ᨸᩣᨱᩣᨲᩥᨸᩣᨲᩣ ᨸᨭᩥᩅᩥᩁᨲᩣ ᩋᨴᩥᨶ᩠ᨶᩣᨴᩣᨶᩣ ᨸᨭᩥᩅᩥᩁᨲᩣ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ ᨸᨭᩥᩅᩥᩁᨲᩣ ᨾᩩᩈᩣᩅᩣᨴᩣ ᨸᨭᩥᩅᩥᩁᨲᩣ ᩈᩩᩁᩣᨾᩮᩁᨿᨾᨩ᩠ᨩᨸᨾᩣᨴᨭ᩠ᨮᩣᨶᩣ ᨸᨭᩥᩅᩥᩁᨲᩣ, ᨲᩮ ᩋᨸᩁᩮᨶ ᩈᨾᨿᩮᨶ ᩌᨻᩣᨵᩥᨠᩣ ᩉᩮᩣᨶ᩠ᨲᩥ ᨴᩩᨠ᩠ᨡᩥᨲᩣ ᨻᩣᩊ᩠ᩉᨣᩥᩃᩣᨶᩣ. ᨿᨴᩣᩉᩴ ᨩᩣᨶᩣᨾᩥ – ‘ᨶ ᨴᩣᨶᩥᨾᩮ ᩍᨾᨾ᩠ᩉᩣ ᩌᨻᩣᨵᩣ ᩅᩩᨭ᩠ᨮᩉᩥᩔᨶ᩠ᨲᩦ’ᨲᩥ ᨲ᩠ᨿᩣᩉᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᩴ ᩅᨴᩣᨾᩥ – ‘ᩈᨶ᩠ᨲᩥ ᨡᩮᩣ, ᨽᩮᩣ, ᩑᨠᩮ ᩈᨾᨱᨻᩕᩣᩉ᩠ᨾᨱᩣ ᩑᩅᩴᩅᩣᨴᩥᨶᩮᩣ ᩑᩅᩴᨴᩥᨭ᩠ᨮᩥᨶᩮᩣ – ᨿᩮ ᨲᩮ ᨸᩣᨱᩣᨲᩥᨸᩣᨲᩣ ᨸᨭᩥᩅᩥᩁᨲᩣ ᩋᨴᩥᨶ᩠ᨶᩣᨴᩣᨶᩣ ᨸᨭᩥᩅᩥᩁᨲᩣ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ ᨸᨭᩥᩅᩥᩁᨲᩣ ᨾᩩᩈᩣᩅᩣᨴᩣ ᨸᨭᩥᩅᩥᩁᨲᩣ ᩈᩩᩁᩣᨾᩮᩁᨿᨾᨩ᩠ᨩᨸᨾᩣᨴᨭ᩠ᨮᩣᨶᩣ ᨸᨭᩥᩅᩥᩁᨲᩣ, ᨲᩮ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨶ᩠ᨲᩥ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᩉᨻ᩠ᨿᨲᨶ᩠ᨲᩥ. ᨽᩅᨶ᩠ᨲᩮᩣ ᨡᩮᩣ ᨸᩣᨱᩣᨲᩥᨸᩣᨲᩣ ᨸᨭᩥᩅᩥᩁᨲᩣ ᩋᨴᩥᨶ᩠ᨶᩣᨴᩣᨶᩣ ᨸᨭᩥᩅᩥᩁᨲᩣ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ ᨸᨭᩥᩅᩥᩁᨲᩣ ᨾᩩᩈᩣᩅᩣᨴᩣ ᨸᨭᩥᩅᩥᩁᨲᩣ ᩈᩩᩁᩣᨾᩮᩁᨿᨾᨩ᩠ᨩᨸᨾᩣᨴᨭ᩠ᨮᩣᨶᩣ ᨸᨭᩥᩅᩥᩁᨲᩣ. ᩈᨧᩮ ᨲᩮᩈᩴ ᨽᩅᨲᩴ ᩈᨾᨱᨻᩕᩣᩉ᩠ᨾᨱᩣᨶᩴ ᩈᨧ᩠ᨧᩴ ᩅᨧᨶᩴ, ᨽᩅᨶ᩠ᨲᩮᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᩥᩔᨶ᩠ᨲᩥ, ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᩉᨻ᩠ᨿᨲᩴ. ᩈᨧᩮ, ᨽᩮᩣ, ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᩮᨿ᩠ᨿᩣᨳ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᩉᨻ᩠ᨿᨲᩴ, ᨿᩮᨶ ᨾᩮ ᩌᨣᨶ᩠ᨲ᩠ᩅᩣ ᩌᩁᩮᩣᨧᩮᨿ᩠ᨿᩣᨳ – `ᩍᨲᩥᨸᩥ ᩋᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᩋᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᩋᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣᨲᩥ. ᨽᩅᨶ᩠ᨲᩮᩣ ᨡᩮᩣ ᨸᨶ ᨾᩮ ᩈᨴ᩠ᨵᩣᨿᩥᨠᩣ ᨸᨧ᩠ᨧᨿᩥᨠᩣ, ᨿᩴ ᨽᩅᨶ᩠ᨲᩮᩉᩥ ᨴᩥᨭ᩠ᨮᩴ, ᨿᨳᩣ ᩈᩣᨾᩴ ᨴᩥᨭ᩠ᨮᩴ ᩑᩅᨾᩮᨲᩴ ᨽᩅᩥᩔᨲᩦᨲᩥ. ᨲᩮ ᨾᩮ ‘ᩈᩣᨵᩪ’ᨲᩥ ᨸᨭᩥᩔᩩᨲ᩠ᩅᩣ ᨶᩮᩅ ᩌᨣᨶ᩠ᨲ᩠ᩅᩣ ᩌᩁᩮᩣᨧᩮᨶ᩠ᨲᩥ, ᨶ ᨸᨶ ᨴᩪᨲᩴ ᨸᩉᩥᨱᨶ᩠ᨲᩥ. ᩋᨿᨾ᩠ᨸᩥ ᨡᩮᩣ, ᨽᩮᩣ ᨠᩔᨸ, ᨸᩁᩥᨿᩣᨿᩮᩣ, ᨿᩮᨶ ᨾᩮ ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ.

ᨲᩣᩅᨲᩥᩴᩈᨴᩮᩅᩏᨸᨾᩣ

᪔᪑᪗. ‘‘ᨲᩮᨶ ᩉᩥ, ᩁᩣᨩᨬ᩠ᨬ, ᨲᨬ᩠ᨬᩮᩅᩮᨲ᩠ᨳ ᨸᨭᩥᨸᩩᨧ᩠ᨨᩥᩔᩣᨾᩥ; ᨿᨳᩣ ᨲᩮ ᨡᨾᩮᨿ᩠ᨿ, ᨲᨳᩣ ᨶᩴ ᨻ᩠ᨿᩣᨠᩁᩮᨿ᩠ᨿᩣᩈᩥ. ᨿᩴ ᨡᩮᩣ ᨸᨶ, ᩁᩣᨩᨬ᩠ᨬ, ᨾᩣᨶᩩᩔᨠᩴ ᩅᩔᩈᨲᩴ, ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩑᩈᩮᩣ ᩑᨠᩮᩣ ᩁᨲ᩠ᨲᩥᨶ᩠ᨴᩥᩅᩮᩣ [ᩁᨲ᩠ᨲᩥᨴᩥᩅᩮᩣ (ᨠ.)], ᨲᩣᨿ ᩁᨲ᩠ᨲᩥᨿᩣ ᨲᩥᩴᩈᩁᨲ᩠ᨲᩥᨿᩮᩣ ᨾᩣᩈᩮᩣ, ᨲᩮᨶ ᨾᩣᩈᩮᨶ ᨴ᩠ᩅᩣᨴᩈᨾᩣᩈᩥᨿᩮᩣ ᩈᩴᩅᨧ᩠ᨨᩁᩮᩣ, ᨲᩮᨶ ᩈᩴᩅᨧ᩠ᨨᩁᩮᨶ ᨴᩥᨻ᩠ᨻᩴ ᩅᩔᩈᩉᩔᩴ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩌᨿᩩᨸ᩠ᨸᨾᩣᨱᩴ. ᨿᩮ ᨲᩮ ᨾᩥᨲ᩠ᨲᩣᨾᨧ᩠ᨧᩣ ᨬᩣᨲᩥᩈᩣᩃᩮᩣᩉᩥᨲᩣ ᨸᩣᨱᩣᨲᩥᨸᩣᨲᩣ ᨸᨭᩥᩅᩥᩁᨲᩣ ᩋᨴᩥᨶ᩠ᨶᩣᨴᩣᨶᩣ ᨸᨭᩥᩅᩥᩁᨲᩣ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ ᨸᨭᩥᩅᩥᩁᨲᩣ ᨾᩩᩈᩣᩅᩣᨴᩣ ᨸᨭᩥᩅᩥᩁᨲᩣ ᩈᩩᩁᩣᨾᩮᩁᨿᨾᨩ᩠ᨩᨸᨾᩣᨴᨭ᩠ᨮᩣᨶᩣ ᨸᨭᩥᩅᩥᩁᨲᩣ, ᨲᩮ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨶ᩠ᨶᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᩉᨻ᩠ᨿᨲᩴ. ᩈᨧᩮ ᨸᨶ ᨲᩮᩈᩴ ᩑᩅᩴ ᨽᩅᩥᩔᨲᩥ – ‘ᨿᩣᩅ ᨾᨿᩴ ᨴ᩠ᩅᩮ ᩅᩣ ᨲᩦᨱᩥ ᩅᩣ ᩁᨲ᩠ᨲᩥᨶ᩠ᨴᩥᩅᩣ ᨴᩥᨻ᩠ᨻᩮᩉᩥ ᨸᨬ᩠ᨧᩉᩥ ᨠᩣᨾᨣᩩᨱᩮᩉᩥ ᩈᨾᨸ᩠ᨸᩥᨲᩣ ᩈᨾᨦ᩠ᨣᩦᨽᩪᨲᩣ ᨸᩁᩥᨧᩣᩁᩮᨾ, ᩋᨳ ᨾᨿᩴ ᨸᩣᨿᩣᩈᩥᩔ ᩁᩣᨩᨬ᩠ᨬᩔ ᨣᨶ᩠ᨲ᩠ᩅᩣ ᩌᩁᩮᩣᨧᩮᨿ᩠ᨿᩣᨾ – ‘‘ᩍᨲᩥᨸᩥ ᩋᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᩋᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᩋᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’ᨲᩥ. ᩋᨸᩥ ᨶᩩ ᨲᩮ ᩌᨣᨶ᩠ᨲ᩠ᩅᩣ ᩌᩁᩮᩣᨧᩮᨿ᩠ᨿᩩᩴ – ‘ᩍᨲᩥᨸᩥ ᩋᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᩋᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᩋᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ? ‘‘ᨶᩮᩣ ᩉᩥᨴᩴ, ᨽᩮᩣ ᨠᩔᨸ. ᩋᨸᩥ ᩉᩥ ᨾᨿᩴ, ᨽᩮᩣ ᨠᩔᨸ, ᨧᩥᩁᩴ ᨠᩣᩃᨦ᩠ᨠᨲᩣᨸᩥ ᨽᩅᩮᨿ᩠ᨿᩣᨾ. ᨠᩮᩣ ᨸᨶᩮᨲᩴ ᨽᩮᩣᨲᩮᩣ ᨠᩔᨸᩔ ᩌᩁᩮᩣᨧᩮᨲᩥ – ‘ᩋᨲ᩠ᨳᩥ ᨴᩮᩅᩣ ᨲᩣᩅᨲᩥᩴᩈᩣ’ᨲᩥ ᩅᩣ ‘ᩑᩅᩴᨴᩦᨥᩣᨿᩩᨠᩣ ᨴᩮᩅᩣ ᨲᩣᩅᨲᩥᩴᩈᩣ’ᨲᩥ ᩅᩣ. ᨶ ᨾᨿᩴ ᨽᩮᩣᨲᩮᩣ ᨠᩔᨸᩔ ᩈᨴ᩠ᨴᩉᩣᨾ – ‘ᩋᨲ᩠ᨳᩥ ᨴᩮᩅᩣ ᨲᩣᩅᨲᩥᩴᩈᩣ’ᨲᩥ ᩅᩣ ‘ᩑᩅᩴᨴᩦᨥᩣᨿᩩᨠᩣ ᨴᩮᩅᩣ ᨲᩣᩅᨲᩥᩴᩈᩣ’ᨲᩥ ᩅᩣ’’ᨲᩥ.

ᨩᨧ᩠ᨧᨶ᩠ᨵᩏᨸᨾᩣ

᪔᪑᪘. ‘‘ᩈᩮᨿ᩠ᨿᨳᩣᨸᩥ, ᩁᩣᨩᨬ᩠ᨬ, ᨩᨧ᩠ᨧᨶ᩠ᨵᩮᩣ ᨸᩩᩁᩥᩈᩮᩣ ᨶ ᨸᩔᩮᨿ᩠ᨿ ᨠᨱ᩠ᩉ – ᩈᩩᨠ᩠ᨠᩣᨶᩥ ᩁᩪᨸᩣᨶᩥ, ᨶ ᨸᩔᩮᨿ᩠ᨿ ᨶᩦᩃᨠᩣᨶᩥ ᩁᩪᨸᩣᨶᩥ, ᨶ ᨸᩔᩮᨿ᩠ᨿ ᨸᩦᨲᨠᩣᨶᩥ [ᨾᨬ᩠ᨩᩮᨭ᩠ᨮᨠᩣᨶᩥ (ᩈ᩠ᨿᩣ.)] ᩁᩪᨸᩣᨶᩥ, ᨶ ᨸᩔᩮᨿ᩠ᨿ ᩃᩮᩣᩉᩥᨲᨠᩣᨶᩥ ᩁᩪᨸᩣᨶᩥ, ᨶ ᨸᩔᩮᨿ᩠ᨿ ᨾᨬ᩠ᨩᩥᨭ᩠ᨮᨠᩣᨶᩥ ᩁᩪᨸᩣᨶᩥ, ᨶ ᨸᩔᩮᨿ᩠ᨿ ᩈᨾᩅᩥᩈᨾᩴ, ᨶ ᨸᩔᩮᨿ᩠ᨿ ᨲᩣᩁᨠᩣᨶᩥ ᩁᩪᨸᩣᨶᩥ, ᨶ ᨸᩔᩮᨿ᩠ᨿ ᨧᨶ᩠ᨴᩥᨾᩈᩪᩁᩥᨿᩮ. ᩈᩮᩣ ᩑᩅᩴ ᩅᨴᩮᨿ᩠ᨿ – ‘ᨶᨲ᩠ᨳᩥ ᨠᨱ᩠ᩉᩈᩩᨠ᩠ᨠᩣᨶᩥ ᩁᩪᨸᩣᨶᩥ, ᨶᨲ᩠ᨳᩥ ᨠᨱ᩠ᩉᩈᩩᨠ᩠ᨠᩣᨶᩴ ᩁᩪᨸᩣᨶᩴ ᨴᩔᩣᩅᩦ. ᨶᨲ᩠ᨳᩥ ᨶᩦᩃᨠᩣᨶᩥ ᩁᩪᨸᩣᨶᩥ, ᨶᨲ᩠ᨳᩥ ᨶᩦᩃᨠᩣᨶᩴ ᩁᩪᨸᩣᨶᩴ ᨴᩔᩣᩅᩦ. ᨶᨲ᩠ᨳᩥ ᨸᩦᨲᨠᩣᨶᩥ ᩁᩪᨸᩣᨶᩥ, ᨶᨲ᩠ᨳᩥ ᨸᩦᨲᨠᩣᨶᩴ ᩁᩪᨸᩣᨶᩴ ᨴᩔᩣᩅᩦ. ᨶᨲ᩠ᨳᩥ ᩃᩮᩣᩉᩥᨲᨠᩣᨶᩥ ᩁᩪᨸᩣᨶᩥ, ᨶᨲ᩠ᨳᩥ ᩃᩮᩣᩉᩥᨲᨠᩣᨶᩴ ᩁᩪᨸᩣᨶᩴ ᨴᩔᩣᩅᩦ. ᨶᨲ᩠ᨳᩥ ᨾᨬ᩠ᨩᩥᨭ᩠ᨮᨠᩣᨶᩥ ᩁᩪᨸᩣᨶᩥ, ᨶᨲ᩠ᨳᩥ ᨾᨬ᩠ᨩᩥᨭ᩠ᨮᨠᩣᨶᩴ ᩁᩪᨸᩣᨶᩴ ᨴᩔᩣᩅᩦ. ᨶᨲ᩠ᨳᩥ ᩈᨾᩅᩥᩈᨾᩴ, ᨶᨲ᩠ᨳᩥ ᩈᨾᩅᩥᩈᨾᩔ ᨴᩔᩣᩅᩦ. ᨶᨲ᩠ᨳᩥ ᨲᩣᩁᨠᩣᨶᩥ ᩁᩪᨸᩣᨶᩥ, ᨶᨲ᩠ᨳᩥ ᨲᩣᩁᨠᩣᨶᩴ ᩁᩪᨸᩣᨶᩴ ᨴᩔᩣᩅᩦ. ᨶᨲ᩠ᨳᩥ ᨧᨶ᩠ᨴᩥᨾᩈᩪᩁᩥᨿᩣ, ᨶᨲ᩠ᨳᩥ ᨧᨶ᩠ᨴᩥᨾᩈᩪᩁᩥᨿᩣᨶᩴ ᨴᩔᩣᩅᩦ. ᩋᩉᨾᩮᨲᩴ ᨶ ᨩᩣᨶᩣᨾᩥ, ᩋᩉᨾᩮᨲᩴ ᨶ ᨸᩔᩣᨾᩥ, ᨲᩈ᩠ᨾᩣ ᨲᩴ ᨶᨲ᩠ᨳᩦ’ᨲᩥ. ᩈᨾ᩠ᨾᩣ ᨶᩩ ᨡᩮᩣ ᩈᩮᩣ, ᩁᩣᨩᨬ᩠ᨬ, ᩅᨴᨾᩣᨶᩮᩣ ᩅᨴᩮᨿ᩠ᨿᩣ’’ᨲᩥ? ‘‘ᨶᩮᩣ ᩉᩥᨴᩴ, ᨽᩮᩣ ᨠᩔᨸ. ᩋᨲ᩠ᨳᩥ ᨠᨱ᩠ᩉᩈᩩᨠ᩠ᨠᩣᨶᩥ ᩁᩪᨸᩣᨶᩥ, ᩋᨲ᩠ᨳᩥ ᨠᨱ᩠ᩉᩈᩩᨠ᩠ᨠᩣᨶᩴ ᩁᩪᨸᩣᨶᩴ ᨴᩔᩣᩅᩦ. ᩋᨲ᩠ᨳᩥ ᨶᩦᩃᨠᩣᨶᩥ ᩁᩪᨸᩣᨶᩥ, ᩋᨲ᩠ᨳᩥ ᨶᩦᩃᨠᩣᨶᩴ ᩁᩪᨸᩣᨶᩴ ᨴᩔᩣᩅᩦ…ᨸᩮ… ᩋᨲ᩠ᨳᩥ ᩈᨾᩅᩥᩈᨾᩴ, ᩋᨲ᩠ᨳᩥ ᩈᨾᩅᩥᩈᨾᩔ ᨴᩔᩣᩅᩦ. ᩋᨲ᩠ᨳᩥ ᨲᩣᩁᨠᩣᨶᩥ ᩁᩪᨸᩣᨶᩥ, ᩋᨲ᩠ᨳᩥ ᨲᩣᩁᨠᩣᨶᩴ ᩁᩪᨸᩣᨶᩴ ᨴᩔᩣᩅᩦ. ᩋᨲ᩠ᨳᩥ ᨧᨶ᩠ᨴᩥᨾᩈᩪᩁᩥᨿᩣ, ᩋᨲ᩠ᨳᩥ ᨧᨶ᩠ᨴᩥᨾᩈᩪᩁᩥᨿᩣᨶᩴ ᨴᩔᩣᩅᩦ. ‘ᩋᩉᨾᩮᨲᩴ ᨶ ᨩᩣᨶᩣᨾᩥ, ᩋᩉᨾᩮᨲᩴ ᨶ ᨸᩔᩣᨾᩥ, ᨲᩈ᩠ᨾᩣ ᨲᩴ ᨶᨲ᩠ᨳᩦ’ᨲᩥ. ᨶ ᩉᩥ ᩈᩮᩣ, ᨽᩮᩣ ᨠᩔᨸ, ᩈᨾ᩠ᨾᩣ ᩅᨴᨾᩣᨶᩮᩣ ᩅᨴᩮᨿ᩠ᨿᩣ’’ᨲᩥ. ‘‘ᩑᩅᨾᩮᩅ ᨡᩮᩣ ᨲ᩠ᩅᩴ, ᩁᩣᨩᨬ᩠ᨬ, ᨩᨧ᩠ᨧᨶ᩠ᨵᩪᨸᨾᩮᩣ ᨾᨬ᩠ᨬᩮ ᨸᨭᩥᨽᩣᩈᩥ ᨿᩴ ᨾᩴ ᨲ᩠ᩅᩴ ᩑᩅᩴ ᩅᨴᩮᩈᩥ’’.

‘‘ᨠᩮᩣ ᨸᨶᩮᨲᩴ ᨽᩮᩣᨲᩮᩣ ᨠᩔᨸᩔ ᩌᩁᩮᩣᨧᩮᨲᩥ – ‘ᩋᨲ᩠ᨳᩥ ᨴᩮᩅᩣ ᨲᩣᩅᨲᩥᩴᩈᩣ’’ᨲᩥ ᩅᩣ, ‘ᩑᩅᩴᨴᩦᨥᩣᨿᩩᨠᩣ ᨴᩮᩅᩣ ᨲᩣᩅᨲᩥᩴᩈᩣ’ᨲᩥ ᩅᩣ? ᨶ ᨾᨿᩴ ᨽᩮᩣᨲᩮᩣ ᨠᩔᨸᩔ ᩈᨴ᩠ᨴᩉᩣᨾ – ‘ᩋᨲ᩠ᨳᩥ ᨴᩮᩅᩣ ᨲᩣᩅᨲᩥᩴᩈᩣ’ᨲᩥ ᩅᩣ ‘ᩑᩅᩴᨴᩦᨥᩣᨿᩩᨠᩣ ᨴᩮᩅᩣ ᨲᩣᩅᨲᩥᩴᩈᩣ’ᨲᩥ ᩅᩣ’’ᨲᩥ. ‘‘ᨶ ᨡᩮᩣ, ᩁᩣᨩᨬ᩠ᨬ, ᩑᩅᩴ ᨸᩁᩮᩣ ᩃᩮᩣᨠᩮᩣ ᨴᨭ᩠ᨮᨻ᩠ᨻᩮᩣ, ᨿᨳᩣ ᨲ᩠ᩅᩴ ᨾᨬ᩠ᨬᩈᩥ ᩍᨾᩥᨶᩣ ᨾᩴᩈᨧᨠ᩠ᨡᩩᨶᩣ. ᨿᩮ ᨡᩮᩣ ᨲᩮ ᩁᩣᨩᨬ᩠ᨬ ᩈᨾᨱᨻᩕᩣᩉ᩠ᨾᨱᩣ ᩋᩁᨬ᩠ᨬᩅᨶᨸᨲ᩠ᨳᩣᨶᩥ ᨸᨶ᩠ᨲᩣᨶᩥ ᩈᩮᨶᩣᩈᨶᩣᨶᩥ ᨸᨭᩥᩈᩮᩅᨶ᩠ᨲᩥ, ᨲᩮ ᨲᨲ᩠ᨳ ᩋᨸ᩠ᨸᨾᨲ᩠ᨲᩣ ᩌᨲᩣᨸᩥᨶᩮᩣ ᨸᩉᩥᨲᨲ᩠ᨲᩣ ᩅᩥᩉᩁᨶ᩠ᨲᩣ ᨴᩥᨻ᩠ᨻᨧᨠ᩠ᨡᩩᩴ ᩅᩥᩈᩮᩣᨵᩮᨶ᩠ᨲᩥ. ᨲᩮ ᨴᩥᨻ᩠ᨻᩮᨶ ᨧᨠ᩠ᨡᩩᨶᩣ ᩅᩥᩈᩩᨴ᩠ᨵᩮᨶ ᩋᨲᩥᨠ᩠ᨠᨶ᩠ᨲᨾᩣᨶᩩᩈᨠᩮᨶ ᩍᨾᩴ ᨧᩮᩅ ᩃᩮᩣᨠᩴ ᨸᩔᨶ᩠ᨲᩥ ᨸᩁᨬ᩠ᨧ ᩈᨲ᩠ᨲᩮ ᨧ ᩒᨸᨸᩣᨲᩥᨠᩮ. ᩑᩅᨬ᩠ᨧ ᨡᩮᩣ, ᩁᩣᨩᨬ᩠ᨬ, ᨸᩁᩮᩣ ᩃᩮᩣᨠᩮᩣ ᨴᨭ᩠ᨮᨻ᩠ᨻᩮᩣ; ᨶᨲ᩠ᩅᩮᩅ ᨿᨳᩣ ᨲ᩠ᩅᩴ ᨾᨬ᩠ᨬᩈᩥ ᩍᨾᩥᨶᩣ ᨾᩴᩈᨧᨠ᩠ᨡᩩᨶᩣ. ᩍᨾᩥᨶᩣᨸᩥ ᨡᩮᩣ ᨲᩮ, ᩁᩣᨩᨬ᩠ᨬ, ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩩ – ‘ᩍᨲᩥᨸᩥ ᩋᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᩋᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᩋᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ.

᪔᪑᪙. ‘‘ᨠᩥᨬ᩠ᨧᩣᨸᩥ ᨽᩅᩴ ᨠᩔᨸᩮᩣ ᩑᩅᨾᩣᩉ, ᩋᨳ ᨡᩮᩣ ᩑᩅᩴ ᨾᩮ ᩑᨲ᩠ᨳ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’ᨲᩥ. ‘‘ᩋᨲ᩠ᨳᩥ ᨸᨶ, ᩁᩣᨩᨬ᩠ᨬ, ᨸᩁᩥᨿᩣᨿᩮᩣ…ᨸᩮ… ᩋᨲ᩠ᨳᩥ, ᨽᩮᩣ ᨠᩔᨸ, ᨸᩁᩥᨿᩣᨿᩮᩣ…ᨸᩮ… ᨿᨳᩣ ᨠᨳᩴ ᩅᩥᨿ, ᩁᩣᨩᨬ᩠ᨬᩣ’’ᨲᩥ? ‘‘ᩍᨵᩣᩉᩴ, ᨽᩮᩣ ᨠᩔᨸ, ᨸᩔᩣᨾᩥ ᩈᨾᨱᨻᩕᩣᩉ᩠ᨾᨱᩮ ᩈᩦᩃᩅᨶ᩠ᨲᩮ ᨠᩃ᩠ᨿᩣᨱᨵᨾ᩠ᨾᩮ ᨩᩦᩅᩥᨲᩩᨠᩣᨾᩮ ᩋᨾᩁᩥᨲᩩᨠᩣᨾᩮ ᩈᩩᨡᨠᩣᨾᩮ ᨴᩩᨠ᩠ᨡᨸᨭᩥᨠᩪᩃᩮ. ᨲᩔ ᨾᨿ᩠ᩉᩴ, ᨽᩮᩣ ᨠᩔᨸ, ᩑᩅᩴ ᩉᩮᩣᨲᩥ – ᩈᨧᩮ ᨡᩮᩣ ᩍᨾᩮ ᨽᩮᩣᨶ᩠ᨲᩮᩣ ᩈᨾᨱᨻᩕᩣᩉ᩠ᨾᨱᩣ ᩈᩦᩃᩅᨶ᩠ᨲᩮᩣ ᨠᩃ᩠ᨿᩣᨱᨵᨾ᩠ᨾᩣ ᩑᩅᩴ ᨩᩣᨶᩮᨿ᩠ᨿᩩᩴ – ‘ᩍᨲᩮᩣ ᨶᩮᩣ ᨾᨲᩣᨶᩴ ᩈᩮᨿ᩠ᨿᩮᩣ ᨽᩅᩥᩔᨲᩦ’ᨲᩥ. ᩍᨴᩣᨶᩥᨾᩮ ᨽᩮᩣᨶ᩠ᨲᩮᩣ ᩈᨾᨱᨻᩕᩣᩉ᩠ᨾᨱᩣ ᩈᩦᩃᩅᨶ᩠ᨲᩮᩣ ᨠᩃ᩠ᨿᩣᨱᨵᨾ᩠ᨾᩣ ᩅᩥᩈᩴ ᩅᩣ ᨡᩣᨴᩮᨿ᩠ᨿᩩᩴ, ᩈᨲ᩠ᨳᩴ ᩅᩣ ᩌᩉᩁᩮᨿ᩠ᨿᩩᩴ, ᩏᨻ᩠ᨻᨶ᩠ᨵᩥᨲ᩠ᩅᩣ ᩅᩣ ᨠᩣᩃᨦ᩠ᨠᩁᩮᨿ᩠ᨿᩩᩴ, ᨸᨸᩣᨲᩮ ᩅᩣ ᨸᨸᨲᩮᨿ᩠ᨿᩩᩴ. ᨿᩈ᩠ᨾᩣ ᨧ ᨡᩮᩣ ᩍᨾᩮ ᨽᩮᩣᨶ᩠ᨲᩮᩣ ᩈᨾᨱᨻᩕᩣᩉ᩠ᨾᨱᩣ ᩈᩦᩃᩅᨶ᩠ᨲᩮᩣ ᨠᩃ᩠ᨿᩣᨱᨵᨾ᩠ᨾᩣ ᨶ ᩑᩅᩴ ᨩᩣᨶᨶ᩠ᨲᩥ – ‘ᩍᨲᩮᩣ ᨶᩮᩣ ᨾᨲᩣᨶᩴ ᩈᩮᨿ᩠ᨿᩮᩣ ᨽᩅᩥᩔᨲᩦ’ᨲᩥ, ᨲᩈ᩠ᨾᩣ ᩍᨾᩮ ᨽᩮᩣᨶ᩠ᨲᩮᩣ ᩈᨾᨱᨻᩕᩣᩉ᩠ᨾᨱᩣ ᩈᩦᩃᩅᨶ᩠ᨲᩮᩣ ᨠᩃ᩠ᨿᩣᨱᨵᨾ᩠ᨾᩣ ᨩᩦᩅᩥᨲᩩᨠᩣᨾᩣ ᩋᨾᩁᩥᨲᩩᨠᩣᨾᩣ ᩈᩩᨡᨠᩣᨾᩣ ᨴᩩᨠ᩠ᨡᨸᨭᩥᨠᩪᩃᩣ ᩋᨲ᩠ᨲᩣᨶᩴ ᨶ ᨾᩣᩁᩮᨶ᩠ᨲᩥ [( ) ᨶᨲ᩠ᨳᩥ (ᩈ᩠ᨿᩣ. ᨸᩦ.)]. ᩋᨿᨾ᩠ᨸᩥ ᨡᩮᩣ, ᨽᩮᩣ ᨠᩔᨸ, ᨸᩁᩥᨿᩣᨿᩮᩣ, ᨿᩮᨶ ᨾᩮ ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ.

ᨣᨻ᩠ᨽᩥᨶᩦᩏᨸᨾᩣ

᪔᪒᪐. ‘‘ᨲᩮᨶ ᩉᩥ, ᩁᩣᨩᨬ᩠ᨬ, ᩏᨸᨾᩴ ᨲᩮ ᨠᩁᩥᩔᩣᨾᩥ. ᩏᨸᨾᩣᨿ ᨾᩥᨵᩮᨠᨧ᩠ᨧᩮ ᩅᩥᨬ᩠ᨬᩪ ᨸᩩᩁᩥᩈᩣ ᨽᩣᩈᩥᨲᩔ ᩋᨲ᩠ᨳᩴ ᩌᨩᩣᨶᨶ᩠ᨲᩥ. ᨽᩪᨲᨸᩩᨻ᩠ᨻᩴ, ᩁᩣᨩᨬ᩠ᨬ, ᩋᨬ᩠ᨬᨲᩁᩔ ᨻᩕᩣᩉ᩠ᨾᨱᩔ ᨴ᩠ᩅᩮ ᨸᨩᩣᨸᨲᩥᨿᩮᩣ ᩋᩉᩮᩈᩩᩴ. ᩑᨠᩥᩔᩣ ᨸᩩᨲ᩠ᨲᩮᩣ ᩋᩉᩮᩣᩈᩥ ᨴᩈᩅᩔᩩᨴ᩠ᨴᩮᩈᩥᨠᩮᩣ ᩅᩣ ᨴ᩠ᩅᩣᨴᩈᩅᩔᩩᨴ᩠ᨴᩮᩈᩥᨠᩮᩣ ᩅᩣ, ᩑᨠᩣ ᨣᨻ᩠ᨽᩥᨶᩦ ᩏᨸᩅᩥᨩᨬ᩠ᨬᩣ. ᩋᨳ ᨡᩮᩣ ᩈᩮᩣ ᨻᩕᩣᩉ᩠ᨾᨱᩮᩣ ᨠᩣᩃᨾᨠᩣᩈᩥ. ᩋᨳ ᨡᩮᩣ ᩈᩮᩣ ᨾᩣᨱᩅᨠᩮᩣ ᨾᩣᨲᩩᩈᨸᨲ᩠ᨲᩥᩴ [ᨾᩣᨲᩩᩈᨸᨲᩥᩴ (ᩈ᩠ᨿᩣ.)] ᩑᨲᨴᩅᩮᩣᨧ – ‘ᨿᨾᩥᨴᩴ, ᨽᩮᩣᨲᩥ, ᨵᨶᩴ ᩅᩣ ᨵᨬ᩠ᨬᩴ ᩅᩣ ᩁᨩᨲᩴ ᩅᩣ ᨩᩣᨲᩁᩪᨸᩴ ᩅᩣ, ᩈᨻ᩠ᨻᩴ ᨲᩴ ᨾᨿ᩠ᩉᩴ; ᨶᨲ᩠ᨳᩥ ᨲᩩᨿ᩠ᩉᩮᨲ᩠ᨳ ᨠᩥᨬ᩠ᨧᩥ. ᨸᩥᨲᩩ ᨾᩮ [ᨸᩥᨲᩩ ᨾᩮ ᩈᨶ᩠ᨲᨠᩮᩣ (ᩈ᩠ᨿᩣ.)] ᨽᩮᩣᨲᩥ, ᨴᩣᨿᨩ᩠ᨩᩴ ᨶᩥᨿ᩠ᨿᩣᨴᩮᩉᩦ’ᨲᩥ [ᨶᩦᨿ᩠ᨿᩣᨲᩮᩉᩦᨲᩥ (ᩈᩦ. ᨸᩦ.)]. ᩑᩅᩴ ᩅᩩᨲ᩠ᨲᩮ ᩈᩣ ᨻᩕᩣᩉ᩠ᨾᨱᩦ ᨲᩴ ᨾᩣᨱᩅᨠᩴ ᩑᨲᨴᩅᩮᩣᨧ – ‘ᩌᨣᨾᩮᩉᩥ ᨲᩣᩅ, ᨲᩣᨲ, ᨿᩣᩅ ᩅᩥᨩᩣᨿᩣᨾᩥ. ᩈᨧᩮ ᨠᩩᨾᩣᩁᨠᩮᩣ ᨽᩅᩥᩔᨲᩥ, ᨲᩔᨸᩥ ᩑᨠᨴᩮᩈᩮᩣ ᨽᩅᩥᩔᨲᩥ; ᩈᨧᩮ ᨠᩩᨾᩣᩁᩥᨠᩣ ᨽᩅᩥᩔᨲᩥ, ᩈᩣᨸᩥ ᨲᩮ ᩒᨸᨽᩮᩣᨣ᩠ᨣᩣ [ᩏᨸᨽᩮᩣᨣ᩠ᨣᩣ (ᩈ᩠ᨿᩣ.)] ᨽᩅᩥᩔᨲᩦ’ᨲᩥ. ᨴᩩᨲᩥᨿᨾ᩠ᨸᩥ ᨡᩮᩣ ᩈᩮᩣ ᨾᩣᨱᩅᨠᩮᩣ ᨾᩣᨲᩩᩈᨸᨲ᩠ᨲᩥᩴ ᩑᨲᨴᩅᩮᩣᨧ – ‘ᨿᨾᩥᨴᩴ, ᨽᩮᩣᨲᩥ, ᨵᨶᩴ ᩅᩣ ᨵᨬ᩠ᨬᩴ ᩅᩣ ᩁᨩᨲᩴ ᩅᩣ ᨩᩣᨲᩁᩪᨸᩴ ᩅᩣ, ᩈᨻ᩠ᨻᩴ ᨲᩴ ᨾᨿ᩠ᩉᩴ; ᨶᨲ᩠ᨳᩥ ᨲᩩᨿ᩠ᩉᩮᨲ᩠ᨳ ᨠᩥᨬ᩠ᨧᩥ. ᨸᩥᨲᩩ ᨾᩮ, ᨽᩮᩣᨲᩥ, ᨴᩣᨿᨩ᩠ᨩᩴ ᨶᩥᨿ᩠ᨿᩣᨴᩮᩉᩦ’ᨲᩥ. ᨴᩩᨲᩥᨿᨾ᩠ᨸᩥ ᨡᩮᩣ ᩈᩣ ᨻᩕᩣᩉ᩠ᨾᨱᩦ ᨲᩴ ᨾᩣᨱᩅᨠᩴ ᩑᨲᨴᩅᩮᩣᨧ – ‘ᩌᨣᨾᩮᩉᩥ ᨲᩣᩅ, ᨲᩣᨲ, ᨿᩣᩅ ᩅᩥᨩᩣᨿᩣᨾᩥ. ᩈᨧᩮ ᨠᩩᨾᩣᩁᨠᩮᩣ ᨽᩅᩥᩔᨲᩥ, ᨲᩔᨸᩥ ᩑᨠᨴᩮᩈᩮᩣ ᨽᩅᩥᩔᨲᩥ; ᩈᨧᩮ ᨠᩩᨾᩣᩁᩥᨠᩣ ᨽᩅᩥᩔᨲᩥ ᩈᩣᨸᩥ ᨲᩮ ᩒᨸᨽᩮᩣᨣ᩠ᨣᩣ [ᩏᨸᨽᩮᩣᨣ᩠ᨣᩣ (ᩈ᩠ᨿᩣ.)] ᨽᩅᩥᩔᨲᩦ’ᨲᩥ. ᨲᨲᩥᨿᨾ᩠ᨸᩥ ᨡᩮᩣ ᩈᩮᩣ ᨾᩣᨱᩅᨠᩮᩣ ᨾᩣᨲᩩᩈᨸᨲ᩠ᨲᩥᩴ ᩑᨲᨴᩅᩮᩣᨧ – ‘ᨿᨾᩥᨴᩴ, ᨽᩮᩣᨲᩥ, ᨵᨶᩴ ᩅᩣ ᨵᨬ᩠ᨬᩴ ᩅᩣ ᩁᨩᨲᩴ ᩅᩣ ᨩᩣᨲᩁᩪᨸᩴ ᩅᩣ, ᩈᨻ᩠ᨻᩴ ᨲᩴ ᨾᨿ᩠ᩉᩴ; ᨶᨲ᩠ᨳᩥ ᨲᩩᨿ᩠ᩉᩮᨲ᩠ᨳ ᨠᩥᨬ᩠ᨧᩥ. ᨸᩥᨲᩩ ᨾᩮ, ᨽᩮᩣᨲᩥ, ᨴᩣᨿᨩ᩠ᨩᩴ ᨶᩥᨿ᩠ᨿᩣᨴᩮᩉᩦ’ᨲᩥ.

‘‘ᩋᨳ ᨡᩮᩣ ᩈᩣ ᨻᩕᩣᩉ᩠ᨾᨱᩦ ᩈᨲ᩠ᨳᩴ ᨣᩉᩮᨲ᩠ᩅᩣ ᩒᩅᩁᨠᩴ ᨸᩅᩥᩈᩥᨲ᩠ᩅᩣ ᩏᨴᩁᩴ ᩒᨸᩣᨴᩮᩈᩥ [ᩏᨸ᩠ᨸᩣᨲᩮᩈᩥ (ᩈ᩠ᨿᩣ.)] – ‘ᨿᩣᩅ ᩅᩥᨩᩣᨿᩣᨾᩥ ᨿᨴᩥ ᩅᩣ ᨠᩩᨾᩣᩁᨠᩮᩣ ᨿᨴᩥ ᩅᩣ ᨠᩩᨾᩣᩁᩥᨠᩣ’ᨲᩥ. ᩈᩣ ᩋᨲ᩠ᨲᩣᨶᩴ ᨧᩮᩅ ᨩᩦᩅᩥᨲᨬ᩠ᨧ ᨣᨻ᩠ᨽᨬ᩠ᨧ ᩈᩣᨸᨲᩮᨿ᩠ᨿᨬ᩠ᨧ ᩅᩥᨶᩣᩈᩮᩈᩥ. ᨿᨳᩣ ᨲᩴ ᨻᩣᩃᩣ ᩋᨻ᩠ᨿᨲ᩠ᨲᩣ ᩋᨶᨿᨻ᩠ᨿᩈᨶᩴ ᩌᨸᨶ᩠ᨶᩣ ᩋᨿᩮᩣᨶᩥᩈᩮᩣ ᨴᩣᨿᨩ᩠ᨩᩴ ᨣᩅᩮᩈᨶ᩠ᨲᩦ, ᩑᩅᨾᩮᩅ ᨡᩮᩣ ᨲ᩠ᩅᩴ, ᩁᩣᨩᨬ᩠ᨬ, ᨻᩣᩃᩮᩣ ᩋᨻ᩠ᨿᨲ᩠ᨲᩮᩣ ᩋᨶᨿᨻ᩠ᨿᩈᨶᩴ ᩌᨸᨩ᩠ᨩᩥᩔᩈᩥ ᩋᨿᩮᩣᨶᩥᩈᩮᩣ ᨸᩁᩃᩮᩣᨠᩴ ᨣᩅᩮᩈᨶ᩠ᨲᩮᩣ; ᩈᩮᨿ᩠ᨿᨳᩣᨸᩥ ᩈᩣ ᨻᩕᩣᩉ᩠ᨾᨱᩦ ᨻᩣᩃᩣ ᩋᨻ᩠ᨿᨲ᩠ᨲᩣ ᩋᨶᨿᨻ᩠ᨿᩈᨶᩴ ᩌᨸᨶ᩠ᨶᩣ ᩋᨿᩮᩣᨶᩥᩈᩮᩣ ᨴᩣᨿᨩ᩠ᨩᩴ ᨣᩅᩮᩈᨶ᩠ᨲᩦ. ᨶ ᨡᩮᩣ, ᩁᩣᨩᨬ᩠ᨬ, ᩈᨾᨱᨻᩕᩣᩉ᩠ᨾᨱᩣ ᩈᩦᩃᩅᨶ᩠ᨲᩮᩣ ᨠᩃ᩠ᨿᩣᨱᨵᨾ᩠ᨾᩣ ᩋᨸᨠ᩠ᨠᩴ ᨸᩁᩥᨸᩣᨧᩮᨶ᩠ᨲᩥ; ᩋᨸᩥ ᨧ ᨸᩁᩥᨸᩣᨠᩴ ᩌᨣᨾᩮᨶ᩠ᨲᩥ. ᨸᨱ᩠ᨯᩥᨲᩣᨶᩴ ᩋᨲ᩠ᨳᩮᩣ ᩉᩥ, ᩁᩣᨩᨬ᩠ᨬ, ᩈᨾᨱᨻᩕᩣᩉ᩠ᨾᨱᩣᨶᩴ ᩈᩦᩃᩅᨶ᩠ᨲᩣᨶᩴ ᨠᩃ᩠ᨿᩣᨱᨵᨾ᩠ᨾᩣᨶᩴ ᨩᩦᩅᩥᨲᩮᨶ. ᨿᨳᩣ ᨿᨳᩣ ᨡᩮᩣ, ᩁᩣᨩᨬ᩠ᨬ, ᩈᨾᨱᨻᩕᩣᩉ᩠ᨾᨱᩣ ᩈᩦᩃᩅᨶ᩠ᨲᩮᩣ ᨠᩃ᩠ᨿᩣᨱᨵᨾ᩠ᨾᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᨲᩥᨭ᩠ᨮᨶ᩠ᨲᩥ, ᨲᨳᩣ ᨲᨳᩣ ᨻᩉᩩᩴ ᨸᩩᨬ᩠ᨬᩴ ᨸᩈᩅᨶ᩠ᨲᩥ, ᨻᩉᩩᨩᨶᩉᩥᨲᩣᨿ ᨧ ᨸᨭᩥᨸᨩ᩠ᨩᨶ᩠ᨲᩥ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᩍᨾᩥᨶᩣᨸᩥ ᨡᩮᩣ ᨲᩮ, ᩁᩣᨩᨬ᩠ᨬ, ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩩ – ‘ᩍᨲᩥᨸᩥ ᩋᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᩋᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᩋᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ.

᪔᪒᪑. ‘‘ᨠᩥᨬ᩠ᨧᩣᨸᩥ ᨽᩅᩴ ᨠᩔᨸᩮᩣ ᩑᩅᨾᩣᩉ, ᩋᨳ ᨡᩮᩣ ᩑᩅᩴ ᨾᩮ ᩑᨲ᩠ᨳ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ. ‘‘ᩋᨲ᩠ᨳᩥ ᨸᨶ, ᩁᩣᨩᨬ᩠ᨬ, ᨸᩁᩥᨿᩣᨿᩮᩣ…ᨸᩮ… ᩋᨲ᩠ᨳᩥ, ᨽᩮᩣ ᨠᩔᨸ, ᨸᩁᩥᨿᩣᨿᩮᩣ…ᨸᩮ… ᨿᨳᩣ ᨠᨳᩴ ᩅᩥᨿ, ᩁᩣᨩᨬ᩠ᨬᩣ’’ᨲᩥ? ‘‘ᩍᨵ ᨾᩮ, ᨽᩮᩣ ᨠᩔᨸ, ᨸᩩᩁᩥᩈᩣ ᨧᩮᩣᩁᩴ ᩌᨣᩩᨧᩣᩁᩥᩴ ᨣᩉᩮᨲ᩠ᩅᩣ ᨴᩔᩮᨶ᩠ᨲᩥ – ‘ᩋᨿᩴ ᨲᩮ, ᨽᨶ᩠ᨲᩮ, ᨧᩮᩣᩁᩮᩣ ᩌᨣᩩᨧᩣᩁᩦ; ᩍᨾᩔ ᨿᩴ ᩍᨧ᩠ᨨᩈᩥ, ᨲᩴ ᨴᨱ᩠ᨯᩴ ᨸᨱᩮᩉᩦ’ᨲᩥ. ᨲ᩠ᨿᩣᩉᩴ ᩑᩅᩴ ᩅᨴᩣᨾᩥ – ‘ᨲᩮᨶ ᩉᩥ, ᨽᩮᩣ, ᩍᨾᩴ ᨸᩩᩁᩥᩈᩴ ᨩᩦᩅᨶ᩠ᨲᩴᨿᩮᩅ ᨠᩩᨾ᩠ᨽᩥᨿᩣ ᨸᨠ᩠ᨡᩥᨸᩥᨲ᩠ᩅᩣ ᨾᩩᨡᩴ ᨸᩥᨴᩉᩥᨲ᩠ᩅᩣ ᩋᩃ᩠ᩃᩮᨶ ᨧᨾ᩠ᨾᩮᨶ ᩒᨶᨶ᩠ᨵᩥᨲ᩠ᩅᩣ ᩋᩃ᩠ᩃᩣᨿ ᨾᨲ᩠ᨲᩥᨠᩣᨿ ᨻᩉᩃᩣᩅᩃᩮᨸᨶᩴ [ᨻᩉᩃᩅᩥᩃᩮᨸᨶᩴ (ᩈ᩠ᨿᩣ. ᨠ.)] ᨠᩁᩥᨲ᩠ᩅᩣ ᩏᨴ᩠ᨵᨶᩴ ᩌᩁᩮᩣᨸᩮᨲ᩠ᩅᩣ ᩋᨣ᩠ᨣᩥᩴ ᨴᩮᨳᩣ’ᨲᩥ. ᨲᩮ ᨾᩮ ‘ᩈᩣᨵᩪ’ᨲᩥ ᨸᨭᩥᩔᩩᨲ᩠ᩅᩣ ᨲᩴ ᨸᩩᩁᩥᩈᩴ ᨩᩦᩅᨶ᩠ᨲᩴᨿᩮᩅ ᨠᩩᨾ᩠ᨽᩥᨿᩣ ᨸᨠ᩠ᨡᩥᨸᩥᨲ᩠ᩅᩣ ᨾᩩᨡᩴ ᨸᩥᨴᩉᩥᨲ᩠ᩅᩣ ᩋᩃ᩠ᩃᩮᨶ ᨧᨾ᩠ᨾᩮᨶ ᩒᨶᨶ᩠ᨵᩥᨲ᩠ᩅᩣ ᩋᩃ᩠ᩃᩣᨿ ᨾᨲ᩠ᨲᩥᨠᩣᨿ ᨻᩉᩃᩣᩅᩃᩮᨸᨶᩴ ᨠᩁᩥᨲ᩠ᩅᩣ ᩏᨴ᩠ᨵᨶᩴ ᩌᩁᩮᩣᨸᩮᨲ᩠ᩅᩣ ᩋᨣ᩠ᨣᩥᩴ ᨴᩮᨶ᩠ᨲᩥ. ᨿᨴᩣ ᨾᨿᩴ ᨩᩣᨶᩣᨾ ‘ᨠᩣᩃᨦ᩠ᨠᨲᩮᩣ ᩈᩮᩣ ᨸᩩᩁᩥᩈᩮᩣ’ᨲᩥ, ᩋᨳ ᨶᩴ ᨠᩩᨾ᩠ᨽᩥᩴ ᩒᩁᩮᩣᨸᩮᨲ᩠ᩅᩣ ᩏᨻ᩠ᨽᩥᨶ᩠ᨴᩥᨲ᩠ᩅᩣ ᨾᩩᨡᩴ ᩅᩥᩅᩁᩥᨲ᩠ᩅᩣ ᩈᨱᩥᨠᩴ ᨶᩥᩃ᩠ᩃᩮᩣᨠᩮᨾ [ᩅᩥᩃᩮᩣᨠᩮᨾ (ᩈ᩠ᨿᩣ.)] – ‘ᩋᨸ᩠ᨸᩮᩅ ᨶᩣᨾᩔ ᨩᩦᩅᩴ ᨶᩥᨠ᩠ᨡᨾᨶ᩠ᨲᩴ ᨸᩔᩮᨿ᩠ᨿᩣᨾᩣ’ᨲᩥ. ᨶᩮᩅᩔ ᨾᨿᩴ ᨩᩦᩅᩴ ᨶᩥᨠ᩠ᨡᨾᨶ᩠ᨲᩴ ᨸᩔᩣᨾ. ᩋᨿᨾ᩠ᨸᩥ ᨡᩮᩣ, ᨽᩮᩣ ᨠᩔᨸ, ᨸᩁᩥᨿᩣᨿᩮᩣ, ᨿᩮᨶ ᨾᩮ ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ.

ᩈᩩᨸᩥᨶᨠᩏᨸᨾᩣ

᪔᪒᪒. ‘‘ᨲᩮᨶ ᩉᩥ, ᩁᩣᨩᨬ᩠ᨬ, ᨲᨬ᩠ᨬᩮᩅᩮᨲ᩠ᨳ ᨸᨭᩥᨸᩩᨧ᩠ᨨᩥᩔᩣᨾᩥ, ᨿᨳᩣ ᨲᩮ ᨡᨾᩮᨿ᩠ᨿ, ᨲᨳᩣ ᨶᩴ ᨻ᩠ᨿᩣᨠᩁᩮᨿ᩠ᨿᩣᩈᩥ. ᩋᨽᩥᨩᩣᨶᩣᩈᩥ ᨶᩮᩣ ᨲ᩠ᩅᩴ, ᩁᩣᨩᨬ᩠ᨬ, ᨴᩥᩅᩣ ᩈᩮᨿ᩠ᨿᩴ ᩏᨸᨣᨲᩮᩣ ᩈᩩᨸᩥᨶᨠᩴ ᨸᩔᩥᨲᩣ ᩌᩁᩣᨾᩁᩣᨾᨱᩮᨿ᩠ᨿᨠᩴ ᩅᨶᩁᩣᨾᨱᩮᨿ᩠ᨿᨠᩴ ᨽᩪᨾᩥᩁᩣᨾᨱᩮᨿ᩠ᨿᨠᩴ ᨸᩮᩣᨠ᩠ᨡᩁᨱᩦᩁᩣᨾᨱᩮᨿ᩠ᨿᨠ’’ᨶ᩠ᨲᩥ? ‘‘ᩋᨽᩥᨩᩣᨶᩣᨾᩉᩴ, ᨽᩮᩣ ᨠᩔᨸ, ᨴᩥᩅᩣᩈᩮᨿ᩠ᨿᩴ ᩏᨸᨣᨲᩮᩣ ᩈᩩᨸᩥᨶᨠᩴ ᨸᩔᩥᨲᩣ ᩌᩁᩣᨾᩁᩣᨾᨱᩮᨿ᩠ᨿᨠᩴ ᩅᨶᩁᩣᨾᨱᩮᨿ᩠ᨿᨠᩴ ᨽᩪᨾᩥᩁᩣᨾᨱᩮᨿ᩠ᨿᨠᩴ ᨸᩮᩣᨠ᩠ᨡᩁᨱᩦᩁᩣᨾᨱᩮᨿ᩠ᨿᨠ’’ᨶ᩠ᨲᩥ. ‘‘ᩁᨠ᩠ᨡᨶ᩠ᨲᩥ ᨲᩴ ᨲᨾ᩠ᩉᩥ ᩈᨾᨿᩮ ᨡᩩᨩ᩠ᨩᩣᨸᩥ ᩅᩣᨾᨶᨠᩣᨸᩥ ᩅᩮᩃᩣᩈᩥᨠᩣᨸᩥ [ᨧᩮᩃᩣᩅᩥᨠᩣᨸᩥ (ᩈ᩠ᨿᩣ.), ᨠᩮᩊᩣᨿᩥᨠᩣᨸᩥ (ᩈᩦ.)] ᨠᩮᩣᨾᩣᩁᩥᨠᩣᨸᩦ’’ᨲᩥ? ‘‘ᩑᩅᩴ, ᨽᩮᩣ ᨠᩔᨸ, ᩁᨠ᩠ᨡᨶ᩠ᨲᩥ ᨾᩴ ᨲᨾ᩠ᩉᩥ ᩈᨾᨿᩮ ᨡᩩᨩ᩠ᨩᩣᨸᩥ ᩅᩣᨾᨶᨠᩣᨸᩥ ᩅᩮᩃᩣᩈᩥᨠᩣᨸᩥ [ᨧᩮᩃᩣᩅᩥᨠᩣᨸᩥ (ᩈ᩠ᨿᩣ.), ᨠᩮᩊᩣᨿᩥᨠᩣᨸᩥ (ᩈᩦ.)] ᨠᩮᩣᨾᩣᩁᩥᨠᩣᨸᩦ’’ᨲᩥ. ‘‘ᩋᨸᩥ ᨶᩩ ᨲᩣ ᨲᩩᨿ᩠ᩉᩴ ᨩᩦᩅᩴ ᨸᩔᨶ᩠ᨲᩥ ᨸᩅᩥᩈᨶ᩠ᨲᩴ ᩅᩣ ᨶᩥᨠ᩠ᨡᨾᨶ᩠ᨲᩴ ᩅᩣ’’ᨲᩥ? ‘‘ᨶᩮᩣ ᩉᩥᨴᩴ, ᨽᩮᩣ ᨠᩔᨸ’’. ‘‘ᨲᩣ ᩉᩥ ᨶᩣᨾ, ᩁᩣᨩᨬ᩠ᨬ, ᨲᩩᨿ᩠ᩉᩴ ᨩᩦᩅᨶ᩠ᨲᩔ ᨩᩦᩅᨶ᩠ᨲᩥᨿᩮᩣ ᨩᩦᩅᩴ ᨶ ᨸᩔᩥᩔᨶ᩠ᨲᩥ ᨸᩅᩥᩈᨶ᩠ᨲᩴ ᩅᩣ ᨶᩥᨠ᩠ᨡᨾᨶ᩠ᨲᩴ ᩅᩣ. ᨠᩥᩴ ᨸᨶ ᨲ᩠ᩅᩴ ᨠᩣᩃᨦ᩠ᨠᨲᩔ ᨩᩦᩅᩴ ᨸᩔᩥᩔᩈᩥ ᨸᩅᩥᩈᨶ᩠ᨲᩴ ᩅᩣ ᨶᩥᨠ᩠ᨡᨾᨶ᩠ᨲᩴ ᩅᩣ. ᩍᨾᩥᨶᩣᨸᩥ ᨡᩮᩣ ᨲᩮ, ᩁᩣᨩᨬ᩠ᨬ, ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩩ – ‘‘ᩍᨲᩥᨸᩥ ᩋᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᩋᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᩋᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ.

᪔᪒᪓. ‘‘ᨠᩥᨬ᩠ᨧᩣᨸᩥ ᨽᩅᩴ ᨠᩔᨸᩮᩣ ᩑᩅᨾᩣᩉ, ᩋᨳ ᨡᩮᩣ ᩑᩅᩴ ᨾᩮ ᩑᨲ᩠ᨳ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ. ‘‘ᩋᨲ᩠ᨳᩥ ᨸᨶ, ᩁᩣᨩᨬ᩠ᨬ, ᨸᩁᩥᨿᩣᨿᩮᩣ…ᨸᩮ… ‘‘ᩋᨲ᩠ᨳᩥ, ᨽᩮᩣ ᨠᩔᨸ, ᨸᩁᩥᨿᩣᨿᩮᩣ…ᨸᩮ… ᨿᨳᩣ ᨠᨳᩴ ᩅᩥᨿ ᩁᩣᨩᨬ᩠ᨬᩣ’’ᨲᩥ? ‘‘ᩍᨵ ᨾᩮ, ᨽᩮᩣ ᨠᩔᨸ, ᨸᩩᩁᩥᩈᩣ ᨧᩮᩣᩁᩴ ᩌᨣᩩᨧᩣᩁᩥᩴ ᨣᩉᩮᨲ᩠ᩅᩣ ᨴᩔᩮᨶ᩠ᨲᩥ – ‘ᩋᨿᩴ ᨲᩮ, ᨽᨶ᩠ᨲᩮ, ᨧᩮᩣᩁᩮᩣ ᩌᨣᩩᨧᩣᩁᩦ; ᩍᨾᩔ ᨿᩴ ᩍᨧ᩠ᨨᩈᩥ, ᨲᩴ ᨴᨱ᩠ᨯᩴ ᨸᨱᩮᩉᩦ’ᨲᩥ. ᨲ᩠ᨿᩣᩉᩴ ᩑᩅᩴ ᩅᨴᩣᨾᩥ – ‘ᨲᩮᨶ ᩉᩥ, ᨽᩮᩣ, ᩍᨾᩴ ᨸᩩᩁᩥᩈᩴ ᨩᩦᩅᨶ᩠ᨲᩴᨿᩮᩅ ᨲᩩᩃᩣᨿ ᨲᩩᩃᩮᨲ᩠ᩅᩣ ᨩᩥᨿᩣᨿ ᩋᨶᩔᩣᩈᨠᩴ ᨾᩣᩁᩮᨲ᩠ᩅᩣ ᨸᩩᨶᨴᩮᩅ ᨲᩩᩃᩣᨿ ᨲᩩᩃᩮᨳᩣ’ᨲᩥ. ᨲᩮ ᨾᩮ ‘ᩈᩣᨵᩪ’ᨲᩥ ᨸᨭᩥᩔᩩᨲ᩠ᩅᩣ ᨲᩴ ᨸᩩᩁᩥᩈᩴ ᨩᩦᩅᨶ᩠ᨲᩴᨿᩮᩅ ᨲᩩᩃᩣᨿ ᨲᩩᩃᩮᨲ᩠ᩅᩣ ᨩᩥᨿᩣᨿ ᩋᨶᩔᩣᩈᨠᩴ ᨾᩣᩁᩮᨲ᩠ᩅᩣ ᨸᩩᨶᨴᩮᩅ ᨲᩩᩃᩣᨿ ᨲᩩᩃᩮᨶ᩠ᨲᩥ. ᨿᨴᩣ ᩈᩮᩣ ᨩᩦᩅᨲᩥ, ᨲᨴᩣ ᩃᩉᩩᨲᩁᩮᩣ ᨧ ᩉᩮᩣᨲᩥ ᨾᩩᨴᩩᨲᩁᩮᩣ ᨧ ᨠᨾ᩠ᨾᨬ᩠ᨬᨲᩁᩮᩣ ᨧ. ᨿᨴᩣ ᨸᨶ ᩈᩮᩣ ᨠᩣᩃᨦ᩠ᨠᨲᩮᩣ ᩉᩮᩣᨲᩥ ᨲᨴᩣ ᨣᩁᩩᨲᩁᩮᩣ ᨧ ᩉᩮᩣᨲᩥ ᨸᨲ᩠ᨳᩥᨶ᩠ᨶᨲᩁᩮᩣ ᨧ ᩋᨠᨾ᩠ᨾᨬ᩠ᨬᨲᩁᩮᩣ ᨧ. ᩋᨿᨾ᩠ᨸᩥ ᨡᩮᩣ, ᨽᩮᩣ ᨠᩔᨸ, ᨸᩁᩥᨿᩣᨿᩮᩣ, ᨿᩮᨶ ᨾᩮ ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ.

ᩈᨶ᩠ᨲᨲ᩠ᨲᩋᨿᩮᩣᨣᩩᩊᩏᨸᨾᩣ

᪔᪒᪔. ‘‘ᨲᩮᨶ ᩉᩥ, ᩁᩣᨩᨬ᩠ᨬ, ᩏᨸᨾᩴ ᨲᩮ ᨠᩁᩥᩔᩣᨾᩥ. ᩏᨸᨾᩣᨿ ᨾᩥᨵᩮᨠᨧ᩠ᨧᩮ ᩅᩥᨬ᩠ᨬᩪ ᨸᩩᩁᩥᩈᩣ ᨽᩣᩈᩥᨲᩔ ᩋᨲ᩠ᨳᩴ ᩌᨩᩣᨶᨶ᩠ᨲᩥ. ᩈᩮᨿ᩠ᨿᨳᩣᨸᩥ, ᩁᩣᨩᨬ᩠ᨬ, ᨸᩩᩁᩥᩈᩮᩣ ᨴᩥᩅᩈᩴ ᩈᨶ᩠ᨲᨲ᩠ᨲᩴ ᩋᨿᩮᩣᨣᩩᩊᩴ ᩌᨴᩥᨲ᩠ᨲᩴ ᩈᨾ᩠ᨸᨩ᩠ᨩᩃᩥᨲᩴ ᩈᨩᩮᩣᨲᩥᨽᩪᨲᩴ ᨲᩩᩃᩣᨿ ᨲᩩᩃᩮᨿ᩠ᨿ. ᨲᨾᩮᨶᩴ ᩋᨸᩁᩮᨶ ᩈᨾᨿᩮᨶ ᩈᩦᨲᩴ ᨶᩥᨻ᩠ᨻᩩᨲᩴ ᨲᩩᩃᩣᨿ ᨲᩩᩃᩮᨿ᩠ᨿ. ᨠᨴᩣ ᨶᩩ ᨡᩮᩣ ᩈᩮᩣ ᩋᨿᩮᩣᨣᩩᩊᩮᩣ ᩃᩉᩩᨲᩁᩮᩣ ᩅᩣ ᩉᩮᩣᨲᩥ ᨾᩩᨴᩩᨲᩁᩮᩣ ᩅᩣ ᨠᨾ᩠ᨾᨬ᩠ᨬᨲᩁᩮᩣ ᩅᩣ, ᨿᨴᩣ ᩅᩣ ᩌᨴᩥᨲ᩠ᨲᩮᩣ ᩈᨾ᩠ᨸᨩ᩠ᨩᩃᩥᨲᩮᩣ ᩈᨩᩮᩣᨲᩥᨽᩪᨲᩮᩣ, ᨿᨴᩣ ᩅᩣ ᩈᩦᨲᩮᩣ ᨶᩥᨻ᩠ᨻᩩᨲᩮᩣ’’ᨲᩥ? ‘‘ᨿᨴᩣ ᩈᩮᩣ, ᨽᩮᩣ ᨠᩔᨸ, ᩋᨿᩮᩣᨣᩩᩊᩮᩣ ᨲᩮᨩᩮᩣᩈᩉᨣᨲᩮᩣ ᨧ ᩉᩮᩣᨲᩥ ᩅᩣᨿᩮᩣᩈᩉᨣᨲᩮᩣ ᨧ ᩌᨴᩥᨲ᩠ᨲᩮᩣ ᩈᨾ᩠ᨸᨩ᩠ᨩᩃᩥᨲᩮᩣ ᩈᨩᩮᩣᨲᩥᨽᩪᨲᩮᩣ, ᨲᨴᩣ ᩃᩉᩩᨲᩁᩮᩣ ᨧ ᩉᩮᩣᨲᩥ ᨾᩩᨴᩩᨲᩁᩮᩣ ᨧ ᨠᨾ᩠ᨾᨬ᩠ᨬᨲᩁᩮᩣ ᨧ. ᨿᨴᩣ ᨸᨶ ᩈᩮᩣ ᩋᨿᩮᩣᨣᩩᩊᩮᩣ ᨶᩮᩅ ᨲᩮᨩᩮᩣᩈᩉᨣᨲᩮᩣ ᩉᩮᩣᨲᩥ ᨶ ᩅᩣᨿᩮᩣᩈᩉᨣᨲᩮᩣ ᩈᩦᨲᩮᩣ ᨶᩥᨻ᩠ᨻᩩᨲᩮᩣ, ᨲᨴᩣ ᨣᩁᩩᨲᩁᩮᩣ ᨧ ᩉᩮᩣᨲᩥ ᨸᨲ᩠ᨳᩥᨶ᩠ᨶᨲᩁᩮᩣ ᨧ ᩋᨠᨾ᩠ᨾᨬ᩠ᨬᨲᩁᩮᩣ ᨧᩣ’’ᨲᩥ. ‘‘ᩑᩅᨾᩮᩅ ᨡᩮᩣ, ᩁᩣᨩᨬ᩠ᨬ, ᨿᨴᩣᨿᩴ ᨠᩣᨿᩮᩣ ᩌᨿᩩᩈᩉᨣᨲᩮᩣ ᨧ ᩉᩮᩣᨲᩥ ᩏᩈ᩠ᨾᩣᩈᩉᨣᨲᩮᩣ ᨧ ᩅᩥᨬ᩠ᨬᩣᨱᩈᩉᨣᨲᩮᩣ ᨧ, ᨲᨴᩣ ᩃᩉᩩᨲᩁᩮᩣ ᨧ ᩉᩮᩣᨲᩥ ᨾᩩᨴᩩᨲᩁᩮᩣ ᨧ ᨠᨾ᩠ᨾᨬ᩠ᨬᨲᩁᩮᩣ ᨧ. ᨿᨴᩣ ᨸᨶᩣᨿᩴ ᨠᩣᨿᩮᩣ ᨶᩮᩅ ᩌᨿᩩᩈᩉᨣᨲᩮᩣ ᩉᩮᩣᨲᩥ ᨶ ᩏᩈ᩠ᨾᩣᩈᩉᨣᨲᩮᩣ ᨶ ᩅᩥᨬ᩠ᨬᩣᨱᩈᩉᨣᨲᩮᩣ ᨲᨴᩣ ᨣᩁᩩᨲᩁᩮᩣ ᨧ ᩉᩮᩣᨲᩥ ᨸᨲ᩠ᨳᩥᨶ᩠ᨶᨲᩁᩮᩣ ᨧ ᩋᨠᨾ᩠ᨾᨬ᩠ᨬᨲᩁᩮᩣ ᨧ. ᩍᨾᩥᨶᩣᨸᩥ ᨡᩮᩣ ᨲᩮ, ᩁᩣᨩᨬ᩠ᨬ, ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩩ – ‘ᩍᨲᩥᨸᩥ ᩋᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᩋᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᩋᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ.

᪔᪒᪕. ‘‘ᨠᩥᨬ᩠ᨧᩣᨸᩥ ᨽᩅᩴ ᨠᩔᨸᩮᩣ ᩑᩅᨾᩣᩉ, ᩋᨳ ᨡᩮᩣ ᩑᩅᩴ ᨾᩮ ᩑᨲ᩠ᨳ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ. ‘‘ᩋᨲ᩠ᨳᩥ ᨸᨶ, ᩁᩣᨩᨬ᩠ᨬ, ᨸᩁᩥᨿᩣᨿᩮᩣ…ᨸᩮ… ᩋᨲ᩠ᨳᩥ, ᨽᩮᩣ ᨠᩔᨸ, ᨸᩁᩥᨿᩣᨿᩮᩣ…ᨸᩮ… ᨿᨳᩣ ᨠᨳᩴ ᩅᩥᨿ ᩁᩣᨩᨬ᩠ᨬᩣ’’ᨲᩥ? ‘‘ᩍᨵ ᨾᩮ, ᨽᩮᩣ ᨠᩔᨸ, ᨸᩩᩁᩥᩈᩣ ᨧᩮᩣᩁᩴ ᩌᨣᩩᨧᩣᩁᩥᩴ ᨣᩉᩮᨲ᩠ᩅᩣ ᨴᩔᩮᨶ᩠ᨲᩥ – ‘ᩋᨿᩴ ᨲᩮ, ᨽᨶ᩠ᨲᩮ, ᨧᩮᩣᩁᩮᩣ ᩌᨣᩩᨧᩣᩁᩦ; ᩍᨾᩔ ᨿᩴ ᩍᨧ᩠ᨨᩈᩥ, ᨲᩴ ᨴᨱ᩠ᨯᩴ ᨸᨱᩮᩉᩦ’ᨲᩥ. ᨲ᩠ᨿᩣᩉᩴ ᩑᩅᩴ ᩅᨴᩣᨾᩥ – ‘ᨲᩮᨶ ᩉᩥ, ᨽᩮᩣ, ᩍᨾᩴ ᨸᩩᩁᩥᩈᩴ ᩋᨶᩩᨸᩉᨧ᩠ᨧ ᨨᩅᩥᨬ᩠ᨧ ᨧᨾ᩠ᨾᨬ᩠ᨧ ᨾᩴᩈᨬ᩠ᨧ ᨶ᩠ᩉᩣᩁᩩᨬ᩠ᨧ ᩋᨭ᩠ᨮᩥᨬ᩠ᨧ ᩋᨭ᩠ᨮᩥᨾᩥᨬ᩠ᨩᨬ᩠ᨧ ᨩᩦᩅᩥᨲᩣ ᩅᩮᩣᩁᩮᩣᨸᩮᨳ, ᩋᨸ᩠ᨸᩮᩅ ᨶᩣᨾᩔ ᨩᩦᩅᩴ ᨶᩥᨠ᩠ᨡᨾᨶ᩠ᨲᩴ ᨸᩔᩮᨿ᩠ᨿᩣᨾᩣ’ᨲᩥ. ᨲᩮ ᨾᩮ ‘ᩈᩣᨵᩪ’ᨲᩥ ᨸᨭᩥᩔᩩᨲ᩠ᩅᩣ ᨲᩴ ᨸᩩᩁᩥᩈᩴ ᩋᨶᩩᨸᩉᨧ᩠ᨧ ᨨᩅᩥᨬ᩠ᨧ…ᨸᩮ… ᨩᩦᩅᩥᨲᩣ ᩅᩮᩣᩁᩮᩣᨸᩮᨶ᩠ᨲᩥ. ᨿᨴᩣ ᩈᩮᩣ ᩌᨾᨲᩮᩣ ᩉᩮᩣᨲᩥ, ᨲ᩠ᨿᩣᩉᩴ ᩑᩅᩴ ᩅᨴᩣᨾᩥ – ‘ᨲᩮᨶ ᩉᩥ, ᨽᩮᩣ, ᩍᨾᩴ ᨸᩩᩁᩥᩈᩴ ᩏᨲ᩠ᨲᩣᨶᩴ ᨶᩥᨸᩣᨲᩮᨳ, ᩋᨸ᩠ᨸᩮᩅ ᨶᩣᨾᩔ ᨩᩦᩅᩴ ᨶᩥᨠ᩠ᨡᨾᨶ᩠ᨲᩴ ᨸᩔᩮᨿ᩠ᨿᩣᨾᩣ’ᨲᩥ. ᨲᩮ ᨲᩴ ᨸᩩᩁᩥᩈᩴ ᩏᨲ᩠ᨲᩣᨶᩴ ᨶᩥᨸᩣᨲᩮᨶ᩠ᨲᩥ. ᨶᩮᩅᩔ ᨾᨿᩴ ᨩᩦᩅᩴ ᨶᩥᨠ᩠ᨡᨾᨶ᩠ᨲᩴ ᨸᩔᩣᨾ. ᨲ᩠ᨿᩣᩉᩴ ᩑᩅᩴ ᩅᨴᩣᨾᩥ – ‘ᨲᩮᨶ ᩉᩥ, ᨽᩮᩣ, ᩍᨾᩴ ᨸᩩᩁᩥᩈᩴ ᩋᩅᨠᩩᨩ᩠ᨩᩴ ᨶᩥᨸᩣᨲᩮᨳ… ᨸᩔᩮᨶ ᨶᩥᨸᩣᨲᩮᨳ… ᨴᩩᨲᩥᨿᩮᨶ ᨸᩔᩮᨶ ᨶᩥᨸᩣᨲᩮᨳ… ᩏᨴ᩠ᨵᩴ ᨮᨸᩮᨳ… ᩒᨾᩩᨴ᩠ᨵᨠᩴ ᨮᨸᩮᨳ… ᨸᩣᨱᩥᨶᩣ ᩌᨠᩮᩣᨭᩮᨳ… ᩃᩮᨯ᩠ᨯᩩᨶᩣ ᩌᨠᩮᩣᨭᩮᨳ… ᨴᨱ᩠ᨯᩮᨶ ᩌᨠᩮᩣᨭᩮᨳ… ᩈᨲ᩠ᨳᩮᨶ ᩌᨠᩮᩣᨭᩮᨳ… ᩒᨵᩩᨶᩣᨳ ᩈᨶ᩠ᨵᩩᨶᩣᨳ ᨶᩥᨴ᩠ᨵᩩᨶᩣᨳ, ᩋᨸ᩠ᨸᩮᩅ ᨶᩣᨾᩔ ᨩᩦᩅᩴ ᨶᩥᨠ᩠ᨡᨾᨶ᩠ᨲᩴ ᨸᩔᩮᨿ᩠ᨿᩣᨾᩣ’ᨲᩥ. ᨲᩮ ᨲᩴ ᨸᩩᩁᩥᩈᩴ ᩒᨵᩩᨶᨶ᩠ᨲᩥ ᩈᨶ᩠ᨵᩩᨶᨶ᩠ᨲᩥ ᨶᩥᨴ᩠ᨵᩩᨶᨶ᩠ᨲᩥ. ᨶᩮᩅᩔ ᨾᨿᩴ ᨩᩦᩅᩴ ᨶᩥᨠ᩠ᨡᨾᨶ᩠ᨲᩴ ᨸᩔᩣᨾ. ᨲᩔ ᨲᨴᩮᩅ ᨧᨠ᩠ᨡᩩ ᩉᩮᩣᨲᩥ ᨲᩮ ᩁᩪᨸᩣ, ᨲᨬ᩠ᨧᩣᨿᨲᨶᩴ ᨶᨸ᩠ᨸᨭᩥᩈᩴᩅᩮᨴᩮᨲᩥ. ᨲᨴᩮᩅ ᩈᩮᩣᨲᩴ ᩉᩮᩣᨲᩥ ᨲᩮ ᩈᨴ᩠ᨴᩣ, ᨲᨬ᩠ᨧᩣᨿᨲᨶᩴ ᨶᨸ᩠ᨸᨭᩥᩈᩴᩅᩮᨴᩮᨲᩥ. ᨲᨴᩮᩅ ᨥᩣᨶᩴ ᩉᩮᩣᨲᩥ ᨲᩮ ᨣᨶ᩠ᨵᩣ, ᨲᨬ᩠ᨧᩣᨿᨲᨶᩴ ᨶᨸ᩠ᨸᨭᩥᩈᩴᩅᩮᨴᩮᨲᩥ. ᩈᩣᩅ ᨩᩥᩅ᩠ᩉᩣ ᩉᩮᩣᨲᩥ ᨲᩮ ᩁᩈᩣ, ᨲᨬ᩠ᨧᩣᨿᨲᨶᩴ ᨶᨸ᩠ᨸᨭᩥᩈᩴᩅᩮᨴᩮᨲᩥ. ᩈ᩠ᩅᩮᩅ ᨠᩣᨿᩮᩣ ᩉᩮᩣᨲᩥ ᨲᩮ ᨹᩮᩣᨭ᩠ᨮᨻ᩠ᨻᩣ, ᨲᨬ᩠ᨧᩣᨿᨲᨶᩴ ᨶᨸ᩠ᨸᨭᩥᩈᩴᩅᩮᨴᩮᨲᩥ. ᩋᨿᨾ᩠ᨸᩥ ᨡᩮᩣ, ᨽᩮᩣ ᨠᩔᨸ, ᨸᩁᩥᨿᩣᨿᩮᩣ, ᨿᩮᨶ ᨾᩮ ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ.

ᩈᨦ᩠ᨡᨵᨾᩏᨸᨾᩣ

᪔᪒᪖. ‘‘ᨲᩮᨶ ᩉᩥ, ᩁᩣᨩᨬ᩠ᨬ, ᩏᨸᨾᩴ ᨲᩮ ᨠᩁᩥᩔᩣᨾᩥ. ᩏᨸᨾᩣᨿ ᨾᩥᨵᩮᨠᨧ᩠ᨧᩮ ᩅᩥᨬ᩠ᨬᩪ ᨸᩩᩁᩥᩈᩣ ᨽᩣᩈᩥᨲᩔ ᩋᨲ᩠ᨳᩴ ᩌᨩᩣᨶᨶ᩠ᨲᩥ. ᨽᩪᨲᨸᩩᨻ᩠ᨻᩴ, ᩁᩣᨩᨬ᩠ᨬ, ᩋᨬ᩠ᨬᨲᩁᩮᩣ ᩈᨦ᩠ᨡᨵᨾᩮᩣ ᩈᨦ᩠ᨡᩴ ᩌᨴᩣᨿ ᨸᨧ᩠ᨧᨶ᩠ᨲᩥᨾᩴ ᨩᨶᨸᨴᩴ ᩋᨣᨾᩣᩈᩥ. ᩈᩮᩣ ᨿᩮᨶ ᩋᨬ᩠ᨬᨲᩁᩮᩣ ᨣᩣᨾᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨾᨩ᩠ᨫᩮ ᨣᩣᨾᩔ ᨮᩥᨲᩮᩣ ᨲᩥᨠ᩠ᨡᨲ᩠ᨲᩩᩴ ᩈᨦ᩠ᨡᩴ ᩏᨸᩃᩣᨸᩮᨲ᩠ᩅᩣ ᩈᨦ᩠ᨡᩴ ᨽᩪᨾᩥᨿᩴ ᨶᩥᨠ᩠ᨡᩥᨸᩥᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩋᨳ ᨡᩮᩣ, ᩁᩣᨩᨬ᩠ᨬ, ᨲᩮᩈᩴ ᨸᨧ᩠ᨧᨶ᩠ᨲᨩᨶᨸᨴᩣᨶᩴ [ᨸᨧ᩠ᨧᨶ᩠ᨲᨩᩣᨶᩴ (ᩈᩦ.)] ᨾᨶᩩᩔᩣᨶᩴ ᩑᨲᨴᩉᩮᩣᩈᩥ – ‘ᩋᨾ᩠ᨽᩮᩣ ᨠᩔ ᨶᩩ ᨡᩮᩣ [ᩑᨲᨴᩉᩮᩣᩈᩥ ‘‘ᨠᩥᩔ ᨴᩩᨡᩮᩣ (ᨸᩦ.)] ᩑᩈᩮᩣ ᩈᨴ᩠ᨴᩮᩣ ᩑᩅᩴᩁᨩᨶᩦᨿᩮᩣ ᩑᩅᩴᨠᨾᨶᩦᨿᩮᩣ ᩑᩅᩴᨾᨴᨶᩦᨿᩮᩣ ᩑᩅᩴᨻᨶ᩠ᨵᨶᩦᨿᩮᩣ ᩑᩅᩴᨾᩩᨧ᩠ᨨᨶᩦᨿᩮᩣ’ᨲᩥ. ᩈᨶ᩠ᨶᩥᨸᨲᩥᨲ᩠ᩅᩣ ᨲᩴ ᩈᨦ᩠ᨡᨵᨾᩴ ᩑᨲᨴᩅᩮᩣᨧᩩᩴ – ‘ᩋᨾ᩠ᨽᩮᩣ, ᨠᩔ ᨶᩩ ᨡᩮᩣ ᩑᩈᩮᩣ ᩈᨴ᩠ᨴᩮᩣ ᩑᩅᩴᩁᨩᨶᩦᨿᩮᩣ ᩑᩅᩴᨠᨾᨶᩦᨿᩮᩣ ᩑᩅᩴᨾᨴᨶᩦᨿᩮᩣ ᩑᩅᩴᨻᨶ᩠ᨵᨶᩦᨿᩮᩣ ᩑᩅᩴᨾᩩᨧ᩠ᨨᨶᩦᨿᩮᩣ’ᨲᩥ. ‘ᩑᩈᩮᩣ ᨡᩮᩣ, ᨽᩮᩣ, ᩈᨦ᩠ᨡᩮᩣ ᨶᩣᨾ ᨿᩔᩮᩈᩮᩣ ᩈᨴ᩠ᨴᩮᩣ ᩑᩅᩴᩁᨩᨶᩦᨿᩮᩣ ᩑᩅᩴᨠᨾᨶᩦᨿᩮᩣ ᩑᩅᩴᨾᨴᨶᩦᨿᩮᩣ ᩑᩅᩴᨻᨶ᩠ᨵᨶᩦᨿᩮᩣ ᩑᩅᩴᨾᩩᨧ᩠ᨨᨶᩦᨿᩮᩣ’ᨲᩥ. ᨲᩮ ᨲᩴ ᩈᨦ᩠ᨡᩴ ᩏᨲ᩠ᨲᩣᨶᩴ ᨶᩥᨸᩣᨲᩮᩈᩩᩴ – ‘ᩅᨴᩮᩉᩥ, ᨽᩮᩣ ᩈᨦ᩠ᨡ, ᩅᨴᩮᩉᩥ, ᨽᩮᩣ ᩈᨦ᩠ᨡᩣ’ᨲᩥ. ᨶᩮᩅ ᩈᩮᩣ ᩈᨦ᩠ᨡᩮᩣ ᩈᨴ᩠ᨴᨾᨠᩣᩈᩥ. ᨲᩮ ᨲᩴ ᩈᨦ᩠ᨡᩴ ᩋᩅᨠᩩᨩ᩠ᨩᩴ ᨶᩥᨸᩣᨲᩮᩈᩩᩴ, ᨸᩔᩮᨶ ᨶᩥᨸᩣᨲᩮᩈᩩᩴ, ᨴᩩᨲᩥᨿᩮᨶ ᨸᩔᩮᨶ ᨶᩥᨸᩣᨲᩮᩈᩩᩴ, ᩏᨴ᩠ᨵᩴ ᨮᨸᩮᩈᩩᩴ, ᩒᨾᩩᨴ᩠ᨵᨠᩴ ᨮᨸᩮᩈᩩᩴ, ᨸᩣᨱᩥᨶᩣ ᩌᨠᩮᩣᨭᩮᩈᩩᩴ, ᩃᩮᨯ᩠ᨯᩩᨶᩣ ᩌᨠᩮᩣᨭᩮᩈᩩᩴ, ᨴᨱ᩠ᨯᩮᨶ ᩌᨠᩮᩣᨭᩮᩈᩩᩴ, ᩈᨲ᩠ᨳᩮᨶ ᩌᨠᩮᩣᨭᩮᩈᩩᩴ, ᩒᨵᩩᨶᩥᩴᩈᩩ ᩈᨶ᩠ᨵᩩᨶᩥᩴᩈᩩ ᨶᩥᨴ᩠ᨵᩩᨶᩥᩴᩈᩩ – ‘ᩅᨴᩮᩉᩥ, ᨽᩮᩣ ᩈᨦ᩠ᨡ, ᩅᨴᩮᩉᩥ, ᨽᩮᩣ ᩈᨦ᩠ᨡᩣ’ᨲᩥ. ᨶᩮᩅ ᩈᩮᩣ ᩈᨦ᩠ᨡᩮᩣ ᩈᨴ᩠ᨴᨾᨠᩣᩈᩥ.

‘‘ᩋᨳ ᨡᩮᩣ, ᩁᩣᨩᨬ᩠ᨬ, ᨲᩔ ᩈᨦ᩠ᨡᨵᨾᩔ ᩑᨲᨴᩉᩮᩣᩈᩥ – ‘ᨿᩣᩅ ᨻᩣᩃᩣ ᩍᨾᩮ ᨸᨧ᩠ᨧᨶ᩠ᨲᨩᨶᨸᨴᩣᨾᨶᩩᩔᩣ, ᨠᨳᨬ᩠ᩉᩥ ᨶᩣᨾ ᩋᨿᩮᩣᨶᩥᩈᩮᩣ ᩈᨦ᩠ᨡᩈᨴ᩠ᨴᩴ ᨣᩅᩮᩈᩥᩔᨶ᩠ᨲᩦ’ᨲᩥ. ᨲᩮᩈᩴ ᨸᩮᨠ᩠ᨡᨾᩣᨶᩣᨶᩴ ᩈᨦ᩠ᨡᩴ ᨣᩉᩮᨲ᩠ᩅᩣ ᨲᩥᨠ᩠ᨡᨲ᩠ᨲᩩᩴ ᩈᨦ᩠ᨡᩴ ᩏᨸᩃᩣᨸᩮᨲ᩠ᩅᩣ ᩈᨦ᩠ᨡᩴ ᩌᨴᩣᨿ ᨸᨠ᩠ᨠᩣᨾᩥ. ᩋᨳ ᨡᩮᩣ, ᩁᩣᨩᨬ᩠ᨬ, ᨲᩮᩈᩴ ᨸᨧ᩠ᨧᨶ᩠ᨲᨩᨶᨸᨴᩣᨶᩴ ᨾᨶᩩᩔᩣᨶᩴ ᩑᨲᨴᩉᩮᩣᩈᩥ – ‘ᨿᨴᩣ ᨠᩥᩁ, ᨽᩮᩣ, ᩋᨿᩴ ᩈᨦ᩠ᨡᩮᩣ ᨶᩣᨾ ᨸᩩᩁᩥᩈᩈᩉᨣᨲᩮᩣ ᨧ ᩉᩮᩣᨲᩥ ᩅᩣᨿᩣᨾᩈᩉᨣᨲᩮᩣ [ᩅᩣᨿᩮᩣᩈᩉᨣᨲᩮᩣ (ᩈ᩠ᨿᩣ.)] ᨧ ᩅᩣᨿᩩᩈᩉᨣᨲᩮᩣ ᨧ, ᨲᨴᩣᨿᩴ ᩈᨦ᩠ᨡᩮᩣ ᩈᨴ᩠ᨴᩴ ᨠᩁᩮᩣᨲᩥ, ᨿᨴᩣ ᨸᨶᩣᨿᩴ ᩈᨦ᩠ᨡᩮᩣ ᨶᩮᩅ ᨸᩩᩁᩥᩈᩈᩉᨣᨲᩮᩣ ᩉᩮᩣᨲᩥ ᨶ ᩅᩣᨿᩣᨾᩈᩉᨣᨲᩮᩣ ᨶ ᩅᩣᨿᩩᩈᩉᨣᨲᩮᩣ, ᨶᩣᨿᩴ ᩈᨦ᩠ᨡᩮᩣ ᩈᨴ᩠ᨴᩴ ᨠᩁᩮᩣᨲᩦ’ᨲᩥ. ᩑᩅᨾᩮᩅ ᨡᩮᩣ, ᩁᩣᨩᨬ᩠ᨬ, ᨿᨴᩣᨿᩴ ᨠᩣᨿᩮᩣ ᩌᨿᩩᩈᩉᨣᨲᩮᩣ ᨧ ᩉᩮᩣᨲᩥ ᩏᩈ᩠ᨾᩣᩈᩉᨣᨲᩮᩣ ᨧ ᩅᩥᨬ᩠ᨬᩣᨱᩈᩉᨣᨲᩮᩣ ᨧ, ᨲᨴᩣ ᩋᨽᩥᨠ᩠ᨠᨾᨲᩥᨸᩥ ᨸᨭᩥᨠ᩠ᨠᨾᨲᩥᨸᩥ ᨲᩥᨭ᩠ᨮᨲᩥᨸᩥ ᨶᩥᩈᩦᨴᨲᩥᨸᩥ ᩈᩮᨿ᩠ᨿᨾ᩠ᨸᩥ ᨠᨸ᩠ᨸᩮᨲᩥ, ᨧᨠ᩠ᨡᩩᨶᩣᨸᩥ ᩁᩪᨸᩴ ᨸᩔᨲᩥ, ᩈᩮᩣᨲᩮᨶᨸᩥ ᩈᨴ᩠ᨴᩴ ᩈᩩᨱᩣᨲᩥ, ᨥᩣᨶᩮᨶᨸᩥ ᨣᨶ᩠ᨵᩴ ᨥᩣᨿᨲᩥ, ᨩᩥᩅ᩠ᩉᩣᨿᨸᩥ ᩁᩈᩴ ᩈᩣᨿᨲᩥ, ᨠᩣᨿᩮᨶᨸᩥ ᨹᩮᩣᨭ᩠ᨮᨻ᩠ᨻᩴ ᨹᩩᩈᨲᩥ, ᨾᨶᩈᩣᨸᩥ ᨵᨾ᩠ᨾᩴ ᩅᩥᨩᩣᨶᩣᨲᩥ. ᨿᨴᩣ ᨸᨶᩣᨿᩴ ᨠᩣᨿᩮᩣ ᨶᩮᩅ ᩌᨿᩩᩈᩉᨣᨲᩮᩣ ᩉᩮᩣᨲᩥ, ᨶ ᩏᩈ᩠ᨾᩣᩈᩉᨣᨲᩮᩣ, ᨶ ᩅᩥᨬ᩠ᨬᩣᨱᩈᩉᨣᨲᩮᩣ, ᨲᨴᩣ ᨶᩮᩅ ᩋᨽᩥᨠ᩠ᨠᨾᨲᩥ ᨶ ᨸᨭᩥᨠ᩠ᨠᨾᨲᩥ ᨶ ᨲᩥᨭ᩠ᨮᨲᩥ ᨶ ᨶᩥᩈᩦᨴᨲᩥ ᨶ ᩈᩮᨿ᩠ᨿᩴ ᨠᨸ᩠ᨸᩮᨲᩥ, ᨧᨠ᩠ᨡᩩᨶᩣᨸᩥ ᩁᩪᨸᩴ ᨶ ᨸᩔᨲᩥ, ᩈᩮᩣᨲᩮᨶᨸᩥ ᩈᨴ᩠ᨴᩴ ᨶ ᩈᩩᨱᩣᨲᩥ, ᨥᩣᨶᩮᨶᨸᩥ ᨣᨶ᩠ᨵᩴ ᨶ ᨥᩣᨿᨲᩥ, ᨩᩥᩅ᩠ᩉᩣᨿᨸᩥ ᩁᩈᩴ ᨶ ᩈᩣᨿᨲᩥ, ᨠᩣᨿᩮᨶᨸᩥ ᨹᩮᩣᨭ᩠ᨮᨻ᩠ᨻᩴ ᨶ ᨹᩩᩈᨲᩥ, ᨾᨶᩈᩣᨸᩥ ᨵᨾ᩠ᨾᩴ ᨶ ᩅᩥᨩᩣᨶᩣᨲᩥ. ᩍᨾᩥᨶᩣᨸᩥ ᨡᩮᩣ ᨲᩮ, ᩁᩣᨩᨬ᩠ᨬ, ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩩ – ‘ᩍᨲᩥᨸᩥ ᩋᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᩋᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᩋᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’ᨲᩥ [ᩅᩥᨸᩣᨠᩮᩣᨲᩥ, ᨸᨮᨾᨽᩣᨱᩅᩣᩁᩴ (ᩈ᩠ᨿᩣ.)].

᪔᪒᪗. ‘‘ᨠᩥᨬ᩠ᨧᩣᨸᩥ ᨽᩅᩴ ᨠᩔᨸᩮᩣ ᩑᩅᨾᩣᩉ, ᩋᨳ ᨡᩮᩣ ᩑᩅᩴ ᨾᩮ ᩑᨲ᩠ᨳ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ. ‘‘ᩋᨲ᩠ᨳᩥ ᨸᨶ, ᩁᩣᨩᨬ᩠ᨬ, ᨸᩁᩥᨿᩣᨿᩮᩣ…ᨸᩮ… ᩋᨲ᩠ᨳᩥ, ᨽᩮᩣ ᨠᩔᨸ, ᨸᩁᩥᨿᩣᨿᩮᩣ…ᨸᩮ… ᨿᨳᩣ ᨠᨳᩴ ᩅᩥᨿ ᩁᩣᨩᨬ᩠ᨬᩣ’’ᨲᩥ? ‘‘ᩍᨵ ᨾᩮ, ᨽᩮᩣ ᨠᩔᨸ, ᨸᩩᩁᩥᩈᩣ ᨧᩮᩣᩁᩴ ᩌᨣᩩᨧᩣᩁᩥᩴ ᨣᩉᩮᨲ᩠ᩅᩣ ᨴᩔᩮᨶ᩠ᨲᩥ – ‘ᩋᨿᩴ ᨲᩮ, ᨽᨶ᩠ᨲᩮ, ᨧᩮᩣᩁᩮᩣ ᩌᨣᩩᨧᩣᩁᩦ, ᩍᨾᩔ ᨿᩴ ᩍᨧ᩠ᨨᩈᩥ, ᨲᩴ ᨴᨱ᩠ᨯᩴ ᨸᨱᩮᩉᩦ’ᨲᩥ. ᨲ᩠ᨿᩣᩉᩴ ᩑᩅᩴ ᩅᨴᩣᨾᩥ – ‘ᨲᩮᨶ ᩉᩥ, ᨽᩮᩣ, ᩍᨾᩔ ᨸᩩᩁᩥᩈᩔ ᨨᩅᩥᩴ ᨨᩥᨶ᩠ᨴᨳ, ᩋᨸ᩠ᨸᩮᩅ ᨶᩣᨾᩔ ᨩᩦᩅᩴ ᨸᩔᩮᨿ᩠ᨿᩣᨾᩣ’ᨲᩥ. ᨲᩮ ᨲᩔ ᨸᩩᩁᩥᩈᩔ ᨨᩅᩥᩴ ᨨᩥᨶ᩠ᨴᨶ᩠ᨲᩥ. ᨶᩮᩅᩔ ᨾᨿᩴ ᨩᩦᩅᩴ ᨸᩔᩣᨾ. ᨲ᩠ᨿᩣᩉᩴ ᩑᩅᩴ ᩅᨴᩣᨾᩥ – ‘ᨲᩮᨶ ᩉᩥ, ᨽᩮᩣ, ᩍᨾᩔ ᨸᩩᩁᩥᩈᩔ ᨧᨾ᩠ᨾᩴ ᨨᩥᨶ᩠ᨴᨳ, ᨾᩴᩈᩴ ᨨᩥᨶ᩠ᨴᨳ, ᨶ᩠ᩉᩣᩁᩩᩴ ᨨᩥᨶ᩠ᨴᨳ, ᩋᨭ᩠ᨮᩥᩴ ᨨᩥᨶ᩠ᨴᨳ, ᩋᨭ᩠ᨮᩥᨾᩥᨬ᩠ᨩᩴ ᨨᩥᨶ᩠ᨴᨳ, ᩋᨸ᩠ᨸᩮᩅ ᨶᩣᨾᩔ ᨩᩦᩅᩴ ᨸᩔᩮᨿ᩠ᨿᩣᨾᩣ’ᨲᩥ. ᨲᩮ ᨲᩔ ᨸᩩᩁᩥᩈᩔ ᩋᨭ᩠ᨮᩥᨾᩥᨬ᩠ᨩᩴ ᨨᩥᨶ᩠ᨴᨶ᩠ᨲᩥ, ᨶᩮᩅᩔ ᨾᨿᩴ ᨩᩦᩅᩴ ᨸᩔᩮᨿ᩠ᨿᩣᨾ. ᩋᨿᨾ᩠ᨸᩥ ᨡᩮᩣ, ᨽᩮᩣ ᨠᩔᨸ, ᨸᩁᩥᨿᩣᨿᩮᩣ, ᨿᩮᨶ ᨾᩮ ᨸᩁᩥᨿᩣᨿᩮᨶ ᩑᩅᩴ ᩉᩮᩣᨲᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ.

ᩋᨣ᩠ᨣᩥᨠᨩᨭᩥᩃᩏᨸᨾᩣ

᪔᪒᪘. ‘‘ᨲᩮᨶ ᩉᩥ, ᩁᩣᨩᨬ᩠ᨬ, ᩏᨸᨾᩴ ᨲᩮ ᨠᩁᩥᩔᩣᨾᩥ. ᩏᨸᨾᩣᨿ ᨾᩥᨵᩮᨠᨧ᩠ᨧᩮ ᩅᩥᨬ᩠ᨬᩪ ᨸᩩᩁᩥᩈᩣ ᨽᩣᩈᩥᨲᩔ ᩋᨲ᩠ᨳᩴ ᩌᨩᩣᨶᨶ᩠ᨲᩥ. ᨽᩪᨲᨸᩩᨻ᩠ᨻᩴ, ᩁᩣᨩᨬ᩠ᨬ, ᩋᨬ᩠ᨬᨲᩁᩮᩣ ᩋᨣ᩠ᨣᩥᨠᩮᩣ ᨩᨭᩥᩃᩮᩣ ᩋᩁᨬ᩠ᨬᩣᨿᨲᨶᩮ ᨸᨱ᩠ᨱᨠᩩᨭᩥᨿᩣ ᩈᨾ᩠ᨾᨲᩥ [ᩅᩈᨲᩥ (ᩈᩦ. ᨸᩦ.)]. ᩋᨳ ᨡᩮᩣ, ᩁᩣᨩᨬ᩠ᨬ, ᩋᨬ᩠ᨬᨲᩁᩮᩣ ᨩᨶᨸᨴᩮ ᩈᨲ᩠ᨳᩮᩣ [ᩈᨲ᩠ᨳᩮᩣ ᨩᨶᨸᨴᨸᨴᩮᩈᩣ (ᩈᩦ.), ᨩᨶᨸᨴᩮᩣ ᩈᨲ᩠ᨳᩅᩣᩈᩮᩣ (ᩈ᩠ᨿᩣ.), ᨩᨶᨸᨴᨸᨴᩮᩈᩮᩣ (ᨸᩦ.)] ᩅᩩᨭ᩠ᨮᩣᩈᩥ. ᩋᨳ ᨡᩮᩣ ᩈᩮᩣ ᩈᨲ᩠ᨳᩮᩣ [ᩈᨲ᩠ᨳᩅᩣᩈᩮᩣ (ᩈ᩠ᨿᩣ.)] ᨲᩔ ᩋᨣ᩠ᨣᩥᨠᩔ ᨩᨭᩥᩃᩔ ᩋᩔᨾᩔ ᩈᩣᨾᨶ᩠ᨲᩣ ᩑᨠᩁᨲ᩠ᨲᩥᩴ ᩅᩈᩥᨲ᩠ᩅᩣ ᨸᨠ᩠ᨠᩣᨾᩥ. ᩋᨳ ᨡᩮᩣ, ᩁᩣᨩᨬ᩠ᨬ, ᨲᩔ ᩋᨣ᩠ᨣᩥᨠᩔ ᨩᨭᩥᩃᩔ ᩑᨲᨴᩉᩮᩣᩈᩥ – ‘ᨿᩴᨶᩪᨶᩣᩉᩴ ᨿᩮᨶ ᩈᩮᩣ ᩈᨲ᩠ᨳᩅᩣᩈᩮᩣ ᨲᩮᨶᩩᨸᩈᨦ᩠ᨠᨾᩮᨿ᩠ᨿᩴ, ᩋᨸ᩠ᨸᩮᩅ ᨶᩣᨾᩮᨲ᩠ᨳ ᨠᩥᨬ᩠ᨧᩥ ᩏᨸᨠᩁᨱᩴ ᩋᨵᩥᨣᨧ᩠ᨨᩮᨿ᩠ᨿ’ᨶ᩠ᨲᩥ. ᩋᨳ ᨡᩮᩣ ᩈᩮᩣ ᩋᨣ᩠ᨣᩥᨠᩮᩣ ᨩᨭᩥᩃᩮᩣ ᨠᩣᩃᩔᩮᩅ ᩅᩩᨭ᩠ᨮᩣᨿ ᨿᩮᨶ ᩈᩮᩣ ᩈᨲ᩠ᨳᩅᩣᩈᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩋᨴ᩠ᨴᩈ ᨲᩈ᩠ᨾᩥᩴ ᩈᨲ᩠ᨳᩅᩣᩈᩮ ᨴᩉᩁᩴ ᨠᩩᨾᩣᩁᩴ ᨾᨶ᩠ᨴᩴ ᩏᨲ᩠ᨲᩣᨶᩈᩮᨿ᩠ᨿᨠᩴ ᨨᨯ᩠ᨯᩥᨲᩴ. ᨴᩥᩈ᩠ᩅᩣᨶᩔ ᩑᨲᨴᩉᩮᩣᩈᩥ – ‘ᨶ ᨡᩮᩣ ᨾᩮ ᨲᩴ ᨸᨲᩥᩁᩪᨸᩴ ᨿᩴ ᨾᩮ ᨸᩮᨠ᩠ᨡᨾᩣᨶᩔ ᨾᨶᩩᩔᨽᩪᨲᩮᩣ ᨠᩣᩃᨦ᩠ᨠᩁᩮᨿ᩠ᨿ; ᨿᩴᨶᩪᨶᩣᩉᩴ ᩍᨾᩴ ᨴᩣᩁᨠᩴ ᩋᩔᨾᩴ ᨶᩮᨲ᩠ᩅᩣ ᩌᨸᩣᨴᩮᨿ᩠ᨿᩴ ᨸᩮᩣᩈᩮᨿ᩠ᨿᩴ ᩅᨯ᩠ᨰᩮᨿ᩠ᨿ’ᨶ᩠ᨲᩥ. ᩋᨳ ᨡᩮᩣ ᩈᩮᩣ ᩋᨣ᩠ᨣᩥᨠᩮᩣ ᨩᨭᩥᩃᩮᩣ ᨲᩴ ᨴᩣᩁᨠᩴ ᩋᩔᨾᩴ ᨶᩮᨲ᩠ᩅᩣ ᩌᨸᩣᨴᩮᩈᩥ ᨸᩮᩣᩈᩮᩈᩥ ᩅᨯ᩠ᨰᩮᩈᩥ. ᨿᨴᩣ ᩈᩮᩣ ᨴᩣᩁᨠᩮᩣ ᨴᩈᩅᩔᩩᨴ᩠ᨴᩮᩈᩥᨠᩮᩣ ᩅᩣ ᩉᩮᩣᨲᩥ [ᩋᩉᩮᩣᩈᩥ (?)] ᨴ᩠ᩅᩣᨴᩈᩅᩔᩩᨴ᩠ᨴᩮᩈᩥᨠᩮᩣ ᩅᩣ, ᩋᨳ ᨡᩮᩣ ᨲᩔ ᩋᨣ᩠ᨣᩥᨠᩔ ᨩᨭᩥᩃᩔ ᨩᨶᨸᨴᩮ ᨠᨬ᩠ᨧᩥᨴᩮᩅ ᨠᩁᨱᩦᨿᩴ ᩏᨸ᩠ᨸᨩ᩠ᨩᩥ. ᩋᨳ ᨡᩮᩣ ᩈᩮᩣ ᩋᨣ᩠ᨣᩥᨠᩮᩣ ᨩᨭᩥᩃᩮᩣ ᨲᩴ ᨴᩣᩁᨠᩴ ᩑᨲᨴᩅᩮᩣᨧ – ‘ᩍᨧ᩠ᨨᩣᨾᩉᩴ, ᨲᩣᨲ, ᨩᨶᨸᨴᩴ [ᨶᨣᩁᩴ (ᨠ.)] ᨣᨶ᩠ᨲᩩᩴ; ᩋᨣ᩠ᨣᩥᩴ, ᨲᩣᨲ, ᨸᩁᩥᨧᩁᩮᨿ᩠ᨿᩣᩈᩥ. ᨾᩣ ᨧ ᨲᩮ ᩋᨣ᩠ᨣᩥ ᨶᩥᨻ᩠ᨻᩣᨿᩥ. ᩈᨧᩮ ᨧ ᨲᩮ ᩋᨣ᩠ᨣᩥ ᨶᩥᨻ᩠ᨻᩣᨿᩮᨿ᩠ᨿ, ᩋᨿᩴ ᩅᩣᩈᩦ ᩍᨾᩣᨶᩥ ᨠᨭ᩠ᨮᩣᨶᩥ ᩍᨴᩴ ᩋᩁᨱᩥᩈᩉᩥᨲᩴ, ᩋᨣ᩠ᨣᩥᩴ ᨶᩥᨻ᩠ᨻᨲ᩠ᨲᩮᨲ᩠ᩅᩣ ᩋᨣ᩠ᨣᩥᩴ ᨸᩁᩥᨧᩁᩮᨿ᩠ᨿᩣᩈᩦ’ᨲᩥ. ᩋᨳ ᨡᩮᩣ ᩈᩮᩣ ᩋᨣ᩠ᨣᩥᨠᩮᩣ ᨩᨭᩥᩃᩮᩣ ᨲᩴ ᨴᩣᩁᨠᩴ ᩑᩅᩴ ᩋᨶᩩᩈᩣᩈᩥᨲ᩠ᩅᩣ ᨩᨶᨸᨴᩴ ᩋᨣᨾᩣᩈᩥ. ᨲᩔ ᨡᩥᨯ᩠ᨯᩣᨸᩈᩩᨲᩔ ᩋᨣ᩠ᨣᩥ ᨶᩥᨻ᩠ᨻᩣᨿᩥ.

‘‘ᩋᨳ ᨡᩮᩣ ᨲᩔ ᨴᩣᩁᨠᩔ ᩑᨲᨴᩉᩮᩣᩈᩥ – ‘ᨸᩥᨲᩣ ᨡᩮᩣ ᨾᩴ ᩑᩅᩴ ᩋᩅᨧ – ‘‘ᩋᨣ᩠ᨣᩥᩴ, ᨲᩣᨲ, ᨸᩁᩥᨧᩁᩮᨿ᩠ᨿᩣᩈᩥ. ᨾᩣ ᨧ ᨲᩮ ᩋᨣ᩠ᨣᩥ ᨶᩥᨻ᩠ᨻᩣᨿᩥ. ᩈᨧᩮ ᨧ ᨲᩮ ᩋᨣ᩠ᨣᩥ ᨶᩥᨻ᩠ᨻᩣᨿᩮᨿ᩠ᨿ, ᩋᨿᩴ ᩅᩣᩈᩦ ᩍᨾᩣᨶᩥ ᨠᨭ᩠ᨮᩣᨶᩥ ᩍᨴᩴ ᩋᩁᨱᩥᩈᩉᩥᨲᩴ, ᩋᨣ᩠ᨣᩥᩴ ᨶᩥᨻ᩠ᨻᨲ᩠ᨲᩮᨲ᩠ᩅᩣ ᩋᨣ᩠ᨣᩥᩴ ᨸᩁᩥᨧᩁᩮᨿ᩠ᨿᩣᩈᩦ’’ᨲᩥ. ᨿᩴᨶᩪᨶᩣᩉᩴ ᩋᨣ᩠ᨣᩥᩴ ᨶᩥᨻ᩠ᨻᨲ᩠ᨲᩮᨲ᩠ᩅᩣ ᩋᨣ᩠ᨣᩥᩴ ᨸᩁᩥᨧᩁᩮᨿ᩠ᨿ’ᨶ᩠ᨲᩥ. ᩋᨳ ᨡᩮᩣ ᩈᩮᩣ ᨴᩣᩁᨠᩮᩣ ᩋᩁᨱᩥᩈᩉᩥᨲᩴ ᩅᩣᩈᩥᨿᩣ ᨲᨧ᩠ᨨᩥ – ‘ᩋᨸ᩠ᨸᩮᩅ ᨶᩣᨾ ᩋᨣ᩠ᨣᩥᩴ ᩋᨵᩥᨣᨧ᩠ᨨᩮᨿ᩠ᨿ’ᨶ᩠ᨲᩥ. ᨶᩮᩅ ᩈᩮᩣ ᩋᨣ᩠ᨣᩥᩴ ᩋᨵᩥᨣᨧ᩠ᨨᩥ. ᩋᩁᨱᩥᩈᩉᩥᨲᩴ ᨴ᩠ᩅᩥᨵᩣ ᨹᩣᩃᩮᩈᩥ, ᨲᩥᨵᩣ ᨹᩣᩃᩮᩈᩥ, ᨧᨲᩩᨵᩣ ᨹᩣᩃᩮᩈᩥ, ᨸᨬ᩠ᨧᨵᩣ ᨹᩣᩃᩮᩈᩥ, ᨴᩈᨵᩣ ᨹᩣᩃᩮᩈᩥ, ᩈᨲᨵᩣ [ᩅᩦᩈᨲᩥᨵᩣ (ᩈ᩠ᨿᩣ.)] ᨹᩣᩃᩮᩈᩥ, ᩈᨠᩃᩥᨠᩴ ᩈᨠᩃᩥᨠᩴ ᩋᨠᩣᩈᩥ, ᩈᨠᩃᩥᨠᩴ ᩈᨠᩃᩥᨠᩴ ᨠᩁᩥᨲ᩠ᩅᩣ ᩏᨴᩩᨠ᩠ᨡᩃᩮ ᨠᩮᩣᨭ᩠ᨭᩮᩈᩥ, ᩏᨴᩩᨠ᩠ᨡᩃᩮ ᨠᩮᩣᨭ᩠ᨭᩮᨲ᩠ᩅᩣ ᨾᩉᩣᩅᩣᨲᩮ ᩒᨸᩩᨶᩥ [ᩒᨹᩩᨶᩥ (ᩈ᩠ᨿᩣ. ᨠ.)] – ‘ᩋᨸ᩠ᨸᩮᩅ ᨶᩣᨾ ᩋᨣ᩠ᨣᩥᩴ ᩋᨵᩥᨣᨧ᩠ᨨᩮᨿ᩠ᨿ’ᨶ᩠ᨲᩥ. ᨶᩮᩅ ᩈᩮᩣ ᩋᨣ᩠ᨣᩥᩴ ᩋᨵᩥᨣᨧ᩠ᨨᩥ.

‘‘ᩋᨳ ᨡᩮᩣ ᩈᩮᩣ ᩋᨣ᩠ᨣᩥᨠᩮᩣ ᨩᨭᩥᩃᩮᩣ ᨩᨶᨸᨴᩮ ᨲᩴ ᨠᩁᨱᩦᨿᩴ ᨲᩦᩁᩮᨲ᩠ᩅᩣ ᨿᩮᨶ ᩈᨠᩮᩣ ᩋᩔᨾᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨲᩴ ᨴᩣᩁᨠᩴ ᩑᨲᨴᩅᩮᩣᨧ – ‘ᨠᨧ᩠ᨧᩥ ᨲᩮ, ᨲᩣᨲ, ᩋᨣ᩠ᨣᩥ ᨶ ᨶᩥᨻ᩠ᨻᩩᨲᩮᩣ’ᨲᩥ? ‘ᩍᨵ ᨾᩮ, ᨲᩣᨲ, ᨡᩥᨯ᩠ᨯᩣᨸᩈᩩᨲᩔ ᩋᨣ᩠ᨣᩥ ᨶᩥᨻ᩠ᨻᩣᨿᩥ. ᨲᩔ ᨾᩮ ᩑᨲᨴᩉᩮᩣᩈᩥ – ‘‘ᨸᩥᨲᩣ ᨡᩮᩣ ᨾᩴ ᩑᩅᩴ ᩋᩅᨧ ᩋᨣ᩠ᨣᩥᩴ, ᨲᩣᨲ, ᨸᩁᩥᨧᩁᩮᨿ᩠ᨿᩣᩈᩥ. ᨾᩣ ᨧ ᨲᩮ, ᨲᩣᨲ, ᩋᨣ᩠ᨣᩥ ᨶᩥᨻ᩠ᨻᩣᨿᩥ. ᩈᨧᩮ ᨧ ᨲᩮ ᩋᨣ᩠ᨣᩥ ᨶᩥᨻ᩠ᨻᩣᨿᩮᨿ᩠ᨿ, ᩋᨿᩴ ᩅᩣᩈᩦ ᩍᨾᩣᨶᩥ ᨠᨭ᩠ᨮᩣᨶᩥ ᩍᨴᩴ ᩋᩁᨱᩥᩈᩉᩥᨲᩴ, ᩋᨣ᩠ᨣᩥᩴ ᨶᩥᨻ᩠ᨻᨲ᩠ᨲᩮᨲ᩠ᩅᩣ ᩋᨣ᩠ᨣᩥᩴ ᨸᩁᩥᨧᩁᩮᨿ᩠ᨿᩣᩈᩦᨲᩥ. ᨿᩴᨶᩪᨶᩣᩉᩴ ᩋᨣ᩠ᨣᩥᩴ ᨶᩥᨻ᩠ᨻᨲ᩠ᨲᩮᨲ᩠ᩅᩣ ᩋᨣ᩠ᨣᩥᩴ ᨸᩁᩥᨧᩁᩮᨿ᩠ᨿ’’ᨶ᩠ᨲᩥ. ᩋᨳ ᨡ᩠ᩅᩣᩉᩴ, ᨲᩣᨲ, ᩋᩁᨱᩥᩈᩉᩥᨲᩴ ᩅᩣᩈᩥᨿᩣ ᨲᨧ᩠ᨨᩥᩴ – ‘‘ᩋᨸ᩠ᨸᩮᩅ ᨶᩣᨾ ᩋᨣ᩠ᨣᩥᩴ ᩋᨵᩥᨣᨧ᩠ᨨᩮᨿ᩠ᨿ’’ᨶ᩠ᨲᩥ. ᨶᩮᩅᩣᩉᩴ ᩋᨣ᩠ᨣᩥᩴ ᩋᨵᩥᨣᨧ᩠ᨨᩥᩴ. ᩋᩁᨱᩥᩈᩉᩥᨲᩴ ᨴ᩠ᩅᩥᨵᩣ ᨹᩣᩃᩮᩈᩥᩴ, ᨲᩥᨵᩣ ᨹᩣᩃᩮᩈᩥᩴ, ᨧᨲᩩᨵᩣ ᨹᩣᩃᩮᩈᩥᩴ, ᨸᨬ᩠ᨧᨵᩣ ᨹᩣᩃᩮᩈᩥᩴ, ᨴᩈᨵᩣ ᨹᩣᩃᩮᩈᩥᩴ, ᩈᨲᨵᩣ ᨹᩣᩃᩮᩈᩥᩴ, ᩈᨠᩃᩥᨠᩴ ᩈᨠᩃᩥᨠᩴ ᩋᨠᩣᩈᩥᩴ, ᩈᨠᩃᩥᨠᩴ ᩈᨠᩃᩥᨠᩴ ᨠᩁᩥᨲ᩠ᩅᩣ ᩏᨴᩩᨠ᩠ᨡᩃᩮ ᨠᩮᩣᨭ᩠ᨭᩮᩈᩥᩴ, ᩏᨴᩩᨠ᩠ᨡᩃᩮ ᨠᩮᩣᨭ᩠ᨭᩮᨲ᩠ᩅᩣ ᨾᩉᩣᩅᩣᨲᩮ ᩒᨸᩩᨶᩥᩴ – ‘‘ᩋᨸ᩠ᨸᩮᩅ ᨶᩣᨾ ᩋᨣ᩠ᨣᩥᩴ ᩋᨵᩥᨣᨧ᩠ᨨᩮᨿ᩠ᨿ’’ᨶ᩠ᨲᩥ. ᨶᩮᩅᩣᩉᩴ ᩋᨣ᩠ᨣᩥᩴ ᩋᨵᩥᨣᨧ᩠ᨨᩥ’’’ᨶ᩠ᨲᩥ. ᩋᨳ ᨡᩮᩣ ᨲᩔ ᩋᨣ᩠ᨣᩥᨠᩔ ᨩᨭᩥᩃᩔ ᩑᨲᨴᩉᩮᩣᩈᩥ – ‘ᨿᩣᩅ ᨻᩣᩃᩮᩣ ᩋᨿᩴ ᨴᩣᩁᨠᩮᩣ ᩋᨻ᩠ᨿᨲ᩠ᨲᩮᩣ, ᨠᨳᨬ᩠ᩉᩥ ᨶᩣᨾ ᩋᨿᩮᩣᨶᩥᩈᩮᩣ ᩋᨣ᩠ᨣᩥᩴ ᨣᩅᩮᩈᩥᩔᨲᩦ’ᨲᩥ. ᨲᩔ ᨸᩮᨠ᩠ᨡᨾᩣᨶᩔ ᩋᩁᨱᩥᩈᩉᩥᨲᩴ ᨣᩉᩮᨲ᩠ᩅᩣ ᩋᨣ᩠ᨣᩥᩴ ᨶᩥᨻ᩠ᨻᨲ᩠ᨲᩮᨲ᩠ᩅᩣ ᨲᩴ ᨴᩣᩁᨠᩴ ᩑᨲᨴᩅᩮᩣᨧ – ‘ᩑᩅᩴ ᨡᩮᩣ, ᨲᩣᨲ, ᩋᨣ᩠ᨣᩥ ᨶᩥᨻ᩠ᨻᨲ᩠ᨲᩮᨲᨻ᩠ᨻᩮᩣ. ᨶ ᨲ᩠ᩅᩮᩅ ᨿᨳᩣ ᨲ᩠ᩅᩴ ᨻᩣᩃᩮᩣ ᩋᨻ᩠ᨿᨲ᩠ᨲᩮᩣ ᩋᨿᩮᩣᨶᩥᩈᩮᩣ ᩋᨣ᩠ᨣᩥᩴ ᨣᩅᩮᩈᩦ’ᨲᩥ. ᩑᩅᨾᩮᩅ ᨡᩮᩣ ᨲ᩠ᩅᩴ, ᩁᩣᨩᨬ᩠ᨬ, ᨻᩣᩃᩮᩣ ᩋᨻ᩠ᨿᨲ᩠ᨲᩮᩣ ᩋᨿᩮᩣᨶᩥᩈᩮᩣ ᨸᩁᩃᩮᩣᨠᩴ ᨣᩅᩮᩈᩥᩔᩈᩥ. ᨸᨭᩥᨶᩥᩔᨩ᩠ᨩᩮᨲᩴ, ᩁᩣᨩᨬ᩠ᨬ, ᨸᩣᨸᨠᩴ ᨴᩥᨭ᩠ᨮᩥᨣᨲᩴ, ᨸᨭᩥᨶᩥᩔᨩ᩠ᨩᩮᨲᩴ, ᩁᩣᨩᨬ᩠ᨬ, ᨸᩣᨸᨠᩴ ᨴᩥᨭ᩠ᨮᩥᨣᨲᩴ, ᨾᩣ ᨲᩮ ᩋᩉᩮᩣᩈᩥ ᨴᩦᨥᩁᨲ᩠ᨲᩴ ᩋᩉᩥᨲᩣᨿ ᨴᩩᨠ᩠ᨡᩣᨿᩣ’’ᨲᩥ.

᪔᪒᪙. ‘‘ᨠᩥᨬ᩠ᨧᩣᨸᩥ ᨽᩅᩴ ᨠᩔᨸᩮᩣ ᩑᩅᨾᩣᩉ, ᩋᨳ ᨡᩮᩣ ᨶᩮᩅᩣᩉᩴ ᩈᨠ᩠ᨠᩮᩣᨾᩥ ᩍᨴᩴ ᨸᩣᨸᨠᩴ ᨴᩥᨭ᩠ᨮᩥᨣᨲᩴ ᨸᨭᩥᨶᩥᩔᨩ᩠ᨩᩥᨲᩩᩴ. ᩁᩣᨩᩣᨸᩥ ᨾᩴ ᨸᩈᩮᨶᨴᩥ ᨠᩮᩣᩈᩃᩮᩣ ᨩᩣᨶᩣᨲᩥ ᨲᩥᩁᩮᩣᩁᩣᨩᩣᨶᩮᩣᨸᩥ – ‘ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᩑᩅᩴᩅᩣᨴᩦ ᩑᩅᩴᨴᩥᨭ᩠ᨮᩦ – ‘‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’ᨲᩥ. ᩈᨧᩣᩉᩴ, ᨽᩮᩣ ᨠᩔᨸ, ᩍᨴᩴ ᨸᩣᨸᨠᩴ ᨴᩥᨭ᩠ᨮᩥᨣᨲᩴ ᨸᨭᩥᨶᩥᩔᨩ᩠ᨩᩥᩔᩣᨾᩥ, ᨽᩅᩥᩔᨶ᩠ᨲᩥ ᨾᩮ ᩅᨲ᩠ᨲᩣᩁᩮᩣ – ‘ᨿᩣᩅ ᨻᩣᩃᩮᩣ ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᩋᨻ᩠ᨿᨲ᩠ᨲᩮᩣ ᨴᩩᨣ᩠ᨣᩉᩥᨲᨣᩣᩉᩦ’ᨲᩥ. ᨠᩮᩣᨸᩮᨶᨸᩥ ᨶᩴ ᩉᩁᩥᩔᩣᨾᩥ, ᨾᨠ᩠ᨡᩮᨶᨸᩥ ᨶᩴ ᩉᩁᩥᩔᩣᨾᩥ, ᨸᩃᩣᩈᩮᨶᨸᩥ ᨶᩴ ᩉᩁᩥᩔᩣᨾᩦ’’ᨲᩥ.

ᨴ᩠ᩅᩮ ᩈᨲ᩠ᨳᩅᩣᩉᩏᨸᨾᩣ

᪔᪓᪐. ‘‘ᨲᩮᨶ ᩉᩥ, ᩁᩣᨩᨬ᩠ᨬ, ᩏᨸᨾᩴ ᨲᩮ ᨠᩁᩥᩔᩣᨾᩥ. ᩏᨸᨾᩣᨿ ᨾᩥᨵᩮᨠᨧ᩠ᨧᩮ ᩅᩥᨬ᩠ᨬᩪ ᨸᩩᩁᩥᩈᩣ ᨽᩣᩈᩥᨲᩔ ᩋᨲ᩠ᨳᩴ ᩌᨩᩣᨶᨶ᩠ᨲᩥ. ᨽᩪᨲᨸᩩᨻ᩠ᨻᩴ, ᩁᩣᨩᨬ᩠ᨬ, ᨾᩉᩣᩈᨠᨭᩈᨲ᩠ᨳᩮᩣ ᩈᨠᨭᩈᩉᩔᩴ ᨸᩩᩁᨲ᩠ᨳᩥᨾᩣ ᨩᨶᨸᨴᩣ ᨸᨧ᩠ᨨᩥᨾᩴ ᨩᨶᨸᨴᩴ ᩋᨣᨾᩣᩈᩥ. ᩈᩮᩣ ᨿᩮᨶ ᨿᩮᨶ ᨣᨧ᩠ᨨᩥ, ᨡᩥᨸ᩠ᨸᩴᨿᩮᩅ ᨸᩁᩥᨿᩣᨴᩥᨿᨲᩥ ᨲᩥᨱᨠᨭ᩠ᨮᩮᩣᨴᨠᩴ ᩉᩁᩥᨲᨠᨸᨱ᩠ᨱᩴ. ᨲᩈ᩠ᨾᩥᩴ ᨡᩮᩣ ᨸᨶ ᩈᨲ᩠ᨳᩮ ᨴ᩠ᩅᩮ ᩈᨲ᩠ᨳᩅᩣᩉᩣ ᩋᩉᩮᩈᩩᩴ ᩑᨠᩮᩣ ᨸᨬ᩠ᨧᨶ᩠ᨶᩴ ᩈᨠᨭᩈᨲᩣᨶᩴ, ᩑᨠᩮᩣ ᨸᨬ᩠ᨧᨶ᩠ᨶᩴ ᩈᨠᨭᩈᨲᩣᨶᩴ. ᩋᨳ ᨡᩮᩣ ᨲᩮᩈᩴ ᩈᨲ᩠ᨳᩅᩣᩉᩣᨶᩴ ᩑᨲᨴᩉᩮᩣᩈᩥ – ‘ᩋᨿᩴ ᨡᩮᩣ ᨾᩉᩣᩈᨠᨭᩈᨲ᩠ᨳᩮᩣ ᩈᨠᨭᩈᩉᩔᩴ; ᨲᩮ ᨾᨿᩴ ᨿᩮᨶ ᨿᩮᨶ ᨣᨧ᩠ᨨᩣᨾ, ᨡᩥᨸ᩠ᨸᨾᩮᩅ ᨸᩁᩥᨿᩣᨴᩥᨿᨲᩥ ᨲᩥᨱᨠᨭ᩠ᨮᩮᩣᨴᨠᩴ ᩉᩁᩥᨲᨠᨸᨱ᩠ᨱᩴ. ᨿᩴᨶᩪᨶ ᨾᨿᩴ ᩍᨾᩴ ᩈᨲ᩠ᨳᩴ ᨴ᩠ᩅᩥᨵᩣ ᩅᩥᨽᨩᩮᨿ᩠ᨿᩣᨾ – ᩑᨠᨲᩮᩣ ᨸᨬ᩠ᨧ ᩈᨠᨭᩈᨲᩣᨶᩥ ᩑᨠᨲᩮᩣ ᨸᨬ᩠ᨧ ᩈᨠᨭᩈᨲᩣᨶᩦ’ᨲᩥ. ᨲᩮ ᨲᩴ ᩈᨲ᩠ᨳᩴ ᨴ᩠ᩅᩥᨵᩣ ᩅᩥᨽᨩᩥᩴᩈᩩ [ᩅᩥᨽᨩᩮᩈᩩᩴ (ᨠ.)] ᩑᨠᨲᩮᩣ ᨸᨬ᩠ᨧ ᩈᨠᨭᩈᨲᩣᨶᩥ, ᩑᨠᨲᩮᩣ ᨸᨬ᩠ᨧ ᩈᨠᨭᩈᨲᩣᨶᩥ. ᩑᨠᩮᩣ ᩈᨲ᩠ᨳᩅᩣᩉᩮᩣ ᨻᩉᩩᩴ ᨲᩥᨱᨬ᩠ᨧ ᨠᨭ᩠ᨮᨬ᩠ᨧ ᩏᨴᨠᨬ᩠ᨧ ᩌᩁᩮᩣᨸᩮᨲ᩠ᩅᩣ ᩈᨲ᩠ᨳᩴ ᨸᨿᩣᨸᩮᩈᩥ [ᨸᩣᨿᩣᨸᩮᩈᩥ (ᩈᩦ. ᨸᩦ.)]. ᨴ᩠ᩅᩦᩉᨲᩦᩉᨸᨿᩣᨲᩮᩣ ᨡᩮᩣ ᨸᨶ ᩈᩮᩣ ᩈᨲ᩠ᨳᩮᩣ ᩋᨴ᩠ᨴᩈ ᨸᩩᩁᩥᩈᩴ ᨠᩣᩊᩴ ᩃᩮᩣᩉᩥᨲᨠ᩠ᨡᩴ [ᩃᩮᩣᩉᩥᨲᨠ᩠ᨡᩥᩴ (ᩈ᩠ᨿᩣ.)] ᩈᨶ᩠ᨶᨴ᩠ᨵᨠᩃᩣᨸᩴ [ᩌᩈᨶ᩠ᨶᨴ᩠ᨵᨠᩃᩣᨸᩴ (ᩈ᩠ᨿᩣ.)] ᨠᩩᨾᩩᨴᨾᩣᩃᩥᩴ ᩋᩃ᩠ᩃᩅᨲ᩠ᨳᩴ ᩋᩃ᩠ᩃᨠᩮᩈᩴ ᨠᨴ᩠ᨴᨾᨾᨠ᩠ᨡᩥᨲᩮᩉᩥ ᨧᨠ᩠ᨠᩮᩉᩥ ᨽᨴᩕᩮᨶ ᩁᨳᩮᨶ ᨸᨭᩥᨸᨳᩴ ᩌᨣᨧ᩠ᨨᨶ᩠ᨲᩴ’, ᨴᩥᩈ᩠ᩅᩣ ᩑᨲᨴᩅᩮᩣᨧ – ‘ᨠᩩᨲᩮᩣ, ᨽᩮᩣ, ᩌᨣᨧ᩠ᨨᩈᩦ’ᨲᩥ? ‘ᩋᨾᩩᨠᨾ᩠ᩉᩣ ᨩᨶᨸᨴᩣ’ᨲᩥ. ‘ᨠᩩᩉᩥᩴ ᨣᨾᩥᩔᩈᩦ’ᨲᩥ? ‘ᩋᨾᩩᨠᩴ ᨶᩣᨾ ᨩᨶᨸᨴ’ᨶ᩠ᨲᩥ. ‘ᨠᨧ᩠ᨧᩥ, ᨽᩮᩣ, ᨸᩩᩁᨲᩮᩣ ᨠᨶ᩠ᨲᩣᩁᩮ ᨾᩉᩣᨾᩮᨥᩮᩣ ᩋᨽᩥᨸ᩠ᨸᩅᩩᨭ᩠ᨮᩮᩣ’ᨲᩥ? ‘ᩑᩅᩴ, ᨽᩮᩣ, ᨸᩩᩁᨲᩮᩣ ᨠᨶ᩠ᨲᩣᩁᩮ ᨾᩉᩣᨾᩮᨥᩮᩣ ᩋᨽᩥᨸ᩠ᨸᩅᩩᨭ᩠ᨮᩮᩣ, ᩌᩈᩥᨲ᩠ᨲᩮᩣᨴᨠᩣᨶᩥ ᩅᨭᩩᨾᩣᨶᩥ, ᨻᩉᩩ ᨲᩥᨱᨬ᩠ᨧ ᨠᨭ᩠ᨮᨬ᩠ᨧ ᩏᨴᨠᨬ᩠ᨧ. ᨨᨯ᩠ᨯᩮᨳ, ᨽᩮᩣ, ᨸᩩᩁᩣᨱᩣᨶᩥ ᨲᩥᨱᩣᨶᩥ ᨠᨭ᩠ᨮᩣᨶᩥ ᩏᨴᨠᩣᨶᩥ, ᩃᩉᩩᨽᩣᩁᩮᩉᩥ ᩈᨠᨭᩮᩉᩥ ᩈᩦᨥᩴ ᩈᩦᨥᩴ ᨣᨧ᩠ᨨᨳ, ᨾᩣ ᨿᩮᩣᨣ᩠ᨣᩣᨶᩥ ᨠᩥᩃᨾᩥᨲ᩠ᨳᩣ’ᨲᩥ.

‘‘ᩋᨳ ᨡᩮᩣ ᩈᩮᩣ ᩈᨲ᩠ᨳᩅᩣᩉᩮᩣ ᩈᨲ᩠ᨳᩥᨠᩮ ᩌᨾᨶ᩠ᨲᩮᩈᩥ – ‘ᩋᨿᩴ, ᨽᩮᩣ, ᨸᩩᩁᩥᩈᩮᩣ ᩑᩅᨾᩣᩉ – ‘‘ᨸᩩᩁᨲᩮᩣ ᨠᨶ᩠ᨲᩣᩁᩮ ᨾᩉᩣᨾᩮᨥᩮᩣ ᩋᨽᩥᨸ᩠ᨸᩅᩩᨭ᩠ᨮᩮᩣ, ᩌᩈᩥᨲ᩠ᨲᩮᩣᨴᨠᩣᨶᩥ ᩅᨭᩩᨾᩣᨶᩥ, ᨻᩉᩩ ᨲᩥᨱᨬ᩠ᨧ ᨠᨭ᩠ᨮᨬ᩠ᨧ ᩏᨴᨠᨬ᩠ᨧ. ᨨᨯ᩠ᨯᩮᨳ, ᨽᩮᩣ, ᨸᩩᩁᩣᨱᩣᨶᩥ ᨲᩥᨱᩣᨶᩥ ᨠᨭ᩠ᨮᩣᨶᩥ ᩏᨴᨠᩣᨶᩥ, ᩃᩉᩩᨽᩣᩁᩮᩉᩥ ᩈᨠᨭᩮᩉᩥ ᩈᩦᨥᩴ ᩈᩦᨥᩴ ᨣᨧ᩠ᨨᨳ, ᨾᩣ ᨿᩮᩣᨣ᩠ᨣᩣᨶᩥ ᨠᩥᩃᨾᩥᨲ᩠ᨳᩣ’’ᨲᩥ. ᨨᨯ᩠ᨯᩮᨳ, ᨽᩮᩣ, ᨸᩩᩁᩣᨱᩣᨶᩥ ᨲᩥᨱᩣᨶᩥ ᨠᨭ᩠ᨮᩣᨶᩥ ᩏᨴᨠᩣᨶᩥ, ᩃᩉᩩᨽᩣᩁᩮᩉᩥ ᩈᨠᨭᩮᩉᩥ ᩈᨲ᩠ᨳᩴ ᨸᨿᩣᨸᩮᨳᩣ’ᨲᩥ. ‘ᩑᩅᩴ, ᨽᩮᩣ’ᨲᩥ ᨡᩮᩣ ᨲᩮ ᩈᨲ᩠ᨳᩥᨠᩣ ᨲᩔ ᩈᨲ᩠ᨳᩅᩣᩉᩔ ᨸᨭᩥᩔᩩᨲ᩠ᩅᩣ ᨨᨯ᩠ᨯᩮᨲ᩠ᩅᩣ ᨸᩩᩁᩣᨱᩣᨶᩥ ᨲᩥᨱᩣᨶᩥ ᨠᨭ᩠ᨮᩣᨶᩥ ᩏᨴᨠᩣᨶᩥ ᩃᩉᩩᨽᩣᩁᩮᩉᩥ ᩈᨠᨭᩮᩉᩥ ᩈᨲ᩠ᨳᩴ ᨸᨿᩣᨸᩮᩈᩩᩴ. ᨲᩮ ᨸᨮᨾᩮᨸᩥ ᩈᨲ᩠ᨳᩅᩣᩈᩮ ᨶ ᩋᨴ᩠ᨴᩈᩴᩈᩩ ᨲᩥᨱᩴ ᩅᩣ ᨠᨭ᩠ᨮᩴ ᩅᩣ ᩏᨴᨠᩴ ᩅᩣ. ᨴᩩᨲᩥᨿᩮᨸᩥ ᩈᨲ᩠ᨳᩅᩣᩈᩮ… ᨲᨲᩥᨿᩮᨸᩥ ᩈᨲ᩠ᨳᩅᩣᩈᩮ… ᨧᨲᩩᨲ᩠ᨳᩮᨸᩥ ᩈᨲ᩠ᨳᩅᩣᩈᩮ… ᨸᨬ᩠ᨧᨾᩮᨸᩥ ᩈᨲ᩠ᨳᩅᩣᩈᩮ… ᨨᨭ᩠ᨮᩮᨸᩥ ᩈᨲ᩠ᨳᩅᩣᩈᩮ… ᩈᨲ᩠ᨲᨾᩮᨸᩥ ᩈᨲ᩠ᨳᩅᩣᩈᩮ ᨶ ᩋᨴ᩠ᨴᩈᩴᩈᩩ ᨲᩥᨱᩴ ᩅᩣ ᨠᨭ᩠ᨮᩴ ᩅᩣ ᩏᨴᨠᩴ ᩅᩣ. ᩈᨻ᩠ᨻᩮᩅ ᩋᨶᨿᨻ᩠ᨿᩈᨶᩴ ᩌᨸᨩ᩠ᨩᩥᩴᩈᩩ. ᨿᩮ ᨧ ᨲᩈ᩠ᨾᩥᩴ ᩈᨲ᩠ᨳᩮ ᩋᩉᩮᩈᩩᩴ ᨾᨶᩩᩔᩣ ᩅᩣ ᨸᩈᩪ ᩅᩣ, ᩈᨻ᩠ᨻᩮ ᩈᩮᩣ ᨿᨠ᩠ᨡᩮᩣ ᩋᨾᨶᩩᩔᩮᩣ ᨽᨠ᩠ᨡᩮᩈᩥ. ᩋᨭ᩠ᨮᩥᨠᩣᨶᩮᩅ ᩈᩮᩈᩣᨶᩥ.

‘‘ᨿᨴᩣ ᩋᨬ᩠ᨬᩣᩈᩥ ᨴᩩᨲᩥᨿᩮᩣ ᩈᨲ᩠ᨳᩅᩣᩉᩮᩣ – ‘ᨻᩉᩩᨶᩥᨠ᩠ᨡᨶ᩠ᨲᩮᩣ ᨡᩮᩣ, ᨽᩮᩣ, ᨴᩣᨶᩥ ᩈᩮᩣ ᩈᨲ᩠ᨳᩮᩣ’ᨲᩥ ᨻᩉᩩᩴ ᨲᩥᨱᨬ᩠ᨧ ᨠᨭ᩠ᨮᨬ᩠ᨧ ᩏᨴᨠᨬ᩠ᨧ ᩌᩁᩮᩣᨸᩮᨲ᩠ᩅᩣ ᩈᨲ᩠ᨳᩴ ᨸᨿᩣᨸᩮᩈᩥ. ᨴ᩠ᩅᩦᩉᨲᩦᩉᨸᨿᩣᨲᩮᩣ ᨡᩮᩣ ᨸᨶ ᩈᩮᩣ ᩈᨲ᩠ᨳᩮᩣ ᩋᨴ᩠ᨴᩈ ᨸᩩᩁᩥᩈᩴ ᨠᩣᩊᩴ ᩃᩮᩣᩉᩥᨲᨠ᩠ᨡᩴ ᩈᨶ᩠ᨶᨴ᩠ᨵᨠᩃᩣᨸᩴ ᨠᩩᨾᩩᨴᨾᩣᩃᩥᩴ ᩋᩃ᩠ᩃᩅᨲ᩠ᨳᩴ ᩋᩃ᩠ᩃᨠᩮᩈᩴ ᨠᨴ᩠ᨴᨾᨾᨠ᩠ᨡᩥᨲᩮᩉᩥ ᨧᨠ᩠ᨠᩮᩉᩥ ᨽᨴᩕᩮᨶ ᩁᨳᩮᨶ ᨸᨭᩥᨸᨳᩴ ᩌᨣᨧ᩠ᨨᨶ᩠ᨲᩴ, ᨴᩥᩈ᩠ᩅᩣ ᩑᨲᨴᩅᩮᩣᨧ – ‘ᨠᩩᨲᩮᩣ, ᨽᩮᩣ, ᩌᨣᨧ᩠ᨨᩈᩦ’ᨲᩥ? ‘ᩋᨾᩩᨠᨾ᩠ᩉᩣ ᨩᨶᨸᨴᩣ’ᨲᩥ. ‘ᨠᩩᩉᩥᩴ ᨣᨾᩥᩔᩈᩦ’ᨲᩥ? ‘ᩋᨾᩩᨠᩴ ᨶᩣᨾ ᨩᨶᨸᨴ’ᨶ᩠ᨲᩥ. ‘ᨠᨧ᩠ᨧᩥ, ᨽᩮᩣ, ᨸᩩᩁᨲᩮᩣ ᨠᨶ᩠ᨲᩣᩁᩮ ᨾᩉᩣᨾᩮᨥᩮᩣ ᩋᨽᩥᨸ᩠ᨸᩅᩩᨭ᩠ᨮᩮᩣ’ᨲᩥ? ‘ᩑᩅᩴ, ᨽᩮᩣ, ᨸᩩᩁᨲᩮᩣ ᨠᨶ᩠ᨲᩣᩁᩮ ᨾᩉᩣᨾᩮᨥᩮᩣ ᩋᨽᩥᨸ᩠ᨸᩅᩩᨭ᩠ᨮᩮᩣ. ᩌᩈᩥᨲ᩠ᨲᩮᩣᨴᨠᩣᨶᩥ ᩅᨭᩩᨾᩣᨶᩥ, ᨻᩉᩩ ᨲᩥᨱᨬ᩠ᨧ ᨠᨭ᩠ᨮᨬ᩠ᨧ ᩏᨴᨠᨬ᩠ᨧ. ᨨᨯ᩠ᨯᩮᨳ, ᨽᩮᩣ, ᨸᩩᩁᩣᨱᩣᨶᩥ ᨲᩥᨱᩣᨶᩥ ᨠᨭ᩠ᨮᩣᨶᩥ ᩏᨴᨠᩣᨶᩥ, ᩃᩉᩩᨽᩣᩁᩮᩉᩥ ᩈᨠᨭᩮᩉᩥ ᩈᩦᨥᩴ ᩈᩦᨥᩴ ᨣᨧ᩠ᨨᨳ, ᨾᩣ ᨿᩮᩣᨣ᩠ᨣᩣᨶᩥ ᨠᩥᩃᨾᩥᨲ᩠ᨳᩣ’ᨲᩥ.

‘‘ᩋᨳ ᨡᩮᩣ ᩈᩮᩣ ᩈᨲ᩠ᨳᩅᩣᩉᩮᩣ ᩈᨲ᩠ᨳᩥᨠᩮ ᩌᨾᨶ᩠ᨲᩮᩈᩥ – ‘ᩋᨿᩴ, ᨽᩮᩣ, ‘‘ᨸᩩᩁᩥᩈᩮᩣ ᩑᩅᨾᩣᩉ – ᨸᩩᩁᨲᩮᩣ ᨠᨶ᩠ᨲᩣᩁᩮ ᨾᩉᩣᨾᩮᨥᩮᩣ ᩋᨽᩥᨸ᩠ᨸᩅᩩᨭ᩠ᨮᩮᩣ, ᩌᩈᩥᨲ᩠ᨲᩮᩣᨴᨠᩣᨶᩥ ᩅᨭᩩᨾᩣᨶᩥ, ᨻᩉᩩ ᨲᩥᨱᨬ᩠ᨧ ᨠᨭ᩠ᨮᨬ᩠ᨧ ᩏᨴᨠᨬ᩠ᨧ. ᨨᨯ᩠ᨯᩮᨳ, ᨽᩮᩣ, ᨸᩩᩁᩣᨱᩣᨶᩥ ᨲᩥᨱᩣᨶᩥ ᨠᨭ᩠ᨮᩣᨶᩥ ᩏᨴᨠᩣᨶᩥ, ᩃᩉᩩᨽᩣᩁᩮᩉᩥ ᩈᨠᨭᩮᩉᩥ ᩈᩦᨥᩴ ᩈᩦᨥᩴ ᨣᨧ᩠ᨨᨳ; ᨾᩣ ᨿᩮᩣᨣ᩠ᨣᩣᨶᩥ ᨠᩥᩃᨾᩥᨲ᩠ᨳᩣ’’ᨲᩥ. ᩋᨿᩴ ᨽᩮᩣ ᨸᩩᩁᩥᩈᩮᩣ ᨶᩮᩅ ᩋᨾ᩠ᩉᩣᨠᩴ ᨾᩥᨲ᩠ᨲᩮᩣ, ᨶ ᨬᩣᨲᩥᩈᩣᩃᩮᩣᩉᩥᨲᩮᩣ, ᨠᨳᩴ ᨾᨿᩴ ᩍᨾᩔ ᩈᨴ᩠ᨵᩣᨿ ᨣᨾᩥᩔᩣᨾ. ᨶ ᩅᩮᩣ ᨨᨯ᩠ᨯᩮᨲᨻ᩠ᨻᩣᨶᩥ ᨸᩩᩁᩣᨱᩣᨶᩥ ᨲᩥᨱᩣᨶᩥ ᨠᨭ᩠ᨮᩣᨶᩥ ᩏᨴᨠᩣᨶᩥ, ᨿᨳᩣᨽᨲᩮᨶ ᨽᨱ᩠ᨯᩮᨶ ᩈᨲ᩠ᨳᩴ ᨸᨿᩣᨸᩮᨳ. ᨶ ᨶᩮᩣ ᨸᩩᩁᩣᨱᩴ ᨨᨯ᩠ᨯᩮᩔᩣᨾᩣ’ᨲᩥ. ‘ᩑᩅᩴ, ᨽᩮᩣ’ᨲᩥ ᨡᩮᩣ ᨲᩮ ᩈᨲ᩠ᨳᩥᨠᩣ ᨲᩔ ᩈᨲ᩠ᨳᩅᩣᩉᩔ ᨸᨭᩥᩔᩩᨲ᩠ᩅᩣ ᨿᨳᩣᨽᨲᩮᨶ ᨽᨱ᩠ᨯᩮᨶ ᩈᨲ᩠ᨳᩴ ᨸᨿᩣᨸᩮᩈᩩᩴ. ᨲᩮ ᨸᨮᨾᩮᨸᩥ ᩈᨲ᩠ᨳᩅᩣᩈᩮ ᨶ ᩋᨴ᩠ᨴᩈᩴᩈᩩ ᨲᩥᨱᩴ ᩅᩣ ᨠᨭ᩠ᨮᩴ ᩅᩣ ᩏᨴᨠᩴ ᩅᩣ. ᨴᩩᨲᩥᨿᩮᨸᩥ ᩈᨲ᩠ᨳᩅᩣᩈᩮ… ᨲᨲᩥᨿᩮᨸᩥ ᩈᨲ᩠ᨳᩅᩣᩈᩮ… ᨧᨲᩩᨲ᩠ᨳᩮᨸᩥ ᩈᨲ᩠ᨳᩅᩣᩈᩮ… ᨸᨬ᩠ᨧᨾᩮᨸᩥ ᩈᨲ᩠ᨳᩅᩣᩈᩮ… ᨨᨭ᩠ᨮᩮᨸᩥ ᩈᨲ᩠ᨳᩅᩣᩈᩮ… ᩈᨲ᩠ᨲᨾᩮᨸᩥ ᩈᨲ᩠ᨳᩅᩣᩈᩮ ᨶ ᩋᨴ᩠ᨴᩈᩴᩈᩩ ᨲᩥᨱᩴ ᩅᩣ ᨠᨭ᩠ᨮᩴ ᩅᩣ ᩏᨴᨠᩴ ᩅᩣ. ᨲᨬ᩠ᨧ ᩈᨲ᩠ᨳᩴ ᩋᨴ᩠ᨴᩈᩴᩈᩩ ᩋᨶᨿᨻ᩠ᨿᩈᨶᩴ ᩌᨸᨶ᩠ᨶᩴ. ᨿᩮ ᨧ ᨲᩈ᩠ᨾᩥᩴ ᩈᨲ᩠ᨳᩮᨸᩥ ᩋᩉᩮᩈᩩᩴ ᨾᨶᩩᩔᩣ ᩅᩣ ᨸᩈᩪ ᩅᩣ, ᨲᩮᩈᨬ᩠ᨧ ᩋᨭ᩠ᨮᩥᨠᩣᨶᩮᩅ ᩋᨴ᩠ᨴᩈᩴᩈᩩ ᨲᩮᨶ ᨿᨠ᩠ᨡᩮᨶ ᩋᨾᨶᩩᩔᩮᨶ ᨽᨠ᩠ᨡᩥᨲᩣᨶᩴ.

‘‘ᩋᨳ ᨡᩮᩣ ᩈᩮᩣ ᩈᨲ᩠ᨳᩅᩣᩉᩮᩣ ᩈᨲ᩠ᨳᩥᨠᩮ ᩌᨾᨶ᩠ᨲᩮᩈᩥ – ‘ᩋᨿᩴ ᨡᩮᩣ, ᨽᩮᩣ, ᩈᨲ᩠ᨳᩮᩣ ᩋᨶᨿᨻ᩠ᨿᩈᨶᩴ ᩌᨸᨶ᩠ᨶᩮᩣ, ᨿᨳᩣ ᨲᩴ ᨲᩮᨶ ᨻᩣᩃᩮᨶ ᩈᨲ᩠ᨳᩅᩣᩉᩮᨶ ᨸᩁᩥᨱᩣᨿᨠᩮᨶ. ᨲᩮᨶ ᩉᩥ, ᨽᩮᩣ, ᨿᩣᨶᨾ᩠ᩉᩣᨠᩴ ᩈᨲ᩠ᨳᩮ ᩋᨸ᩠ᨸᩈᩣᩁᩣᨶᩥ ᨸᨱᩥᨿᩣᨶᩥ, ᨲᩣᨶᩥ ᨨᨯ᩠ᨯᩮᨲ᩠ᩅᩣ, ᨿᩣᨶᩥ ᩍᨾᩈ᩠ᨾᩥᩴ ᩈᨲ᩠ᨳᩮ ᨾᩉᩣᩈᩣᩁᩣᨶᩥ ᨸᨱᩥᨿᩣᨶᩥ, ᨲᩣᨶᩥ ᩌᨴᩥᨿᨳᩣ’ᨲᩥ. ‘ᩑᩅᩴ, ᨽᩮᩣ’ᨲᩥ ᨡᩮᩣ ᨲᩮ ᩈᨲ᩠ᨳᩥᨠᩣ ᨲᩔ ᩈᨲ᩠ᨳᩅᩣᩉᩔ ᨸᨭᩥᩔᩩᨲ᩠ᩅᩣ ᨿᩣᨶᩥ ᩈᨠᩈ᩠ᨾᩥᩴ ᩈᨲ᩠ᨳᩮ ᩋᨸ᩠ᨸᩈᩣᩁᩣᨶᩥ ᨸᨱᩥᨿᩣᨶᩥ, ᨲᩣᨶᩥ ᨨᨯ᩠ᨯᩮᨲ᩠ᩅᩣ ᨿᩣᨶᩥ ᨲᩈ᩠ᨾᩥᩴ ᩈᨲ᩠ᨳᩮ ᨾᩉᩣᩈᩣᩁᩣᨶᩥ ᨸᨱᩥᨿᩣᨶᩥ, ᨲᩣᨶᩥ ᩌᨴᩥᨿᩥᨲ᩠ᩅᩣ ᩈᩮᩣᨲ᩠ᨳᩥᨶᩣ ᨲᩴ ᨠᨶ᩠ᨲᩣᩁᩴ ᨶᩥᨲ᩠ᨳᩁᩥᩴᩈᩩ, ᨿᨳᩣ ᨲᩴ ᨸᨱ᩠ᨯᩥᨲᩮᨶ ᩈᨲ᩠ᨳᩅᩣᩉᩮᨶ ᨸᩁᩥᨱᩣᨿᨠᩮᨶ. ᩑᩅᨾᩮᩅ ᨡᩮᩣ ᨲ᩠ᩅᩴ, ᩁᩣᨩᨬ᩠ᨬ, ᨻᩣᩃᩮᩣ ᩋᨻ᩠ᨿᨲ᩠ᨲᩮᩣ ᩋᨶᨿᨻ᩠ᨿᩈᨶᩴ ᩌᨸᨩ᩠ᨩᩥᩔᩈᩥ ᩋᨿᩮᩣᨶᩥᩈᩮᩣ ᨸᩁᩃᩮᩣᨠᩴ ᨣᩅᩮᩈᨶ᩠ᨲᩮᩣ ᩈᩮᨿ᩠ᨿᨳᩣᨸᩥ ᩈᩮᩣ ᨸᩩᩁᩥᨾᩮᩣ ᩈᨲ᩠ᨳᩅᩣᩉᩮᩣ. ᨿᩮᨸᩥ ᨲᩅ [ᨲᩮ (ᨠ.)] ᩈᩮᩣᨲᨻ᩠ᨻᩴ ᩈᨴ᩠ᨵᩣᨲᨻ᩠ᨻᩴ [ᩈᨴ᩠ᨴᩉᩣᨲᨻ᩠ᨻᩴ (ᨸᩦ. ᨠ.)] ᨾᨬ᩠ᨬᩥᩔᨶ᩠ᨲᩥ, ᨲᩮᨸᩥ ᩋᨶᨿᨻ᩠ᨿᩈᨶᩴ ᩌᨸᨩ᩠ᨩᩥᩔᨶ᩠ᨲᩥ, ᩈᩮᨿ᩠ᨿᨳᩣᨸᩥ ᨲᩮ ᩈᨲ᩠ᨳᩥᨠᩣ. ᨸᨭᩥᨶᩥᩔᨩ᩠ᨩᩮᨲᩴ, ᩁᩣᨩᨬ᩠ᨬ, ᨸᩣᨸᨠᩴ ᨴᩥᨭ᩠ᨮᩥᨣᨲᩴ; ᨸᨭᩥᨶᩥᩔᨩ᩠ᨩᩮᨲᩴ, ᩁᩣᨩᨬ᩠ᨬ, ᨸᩣᨸᨠᩴ ᨴᩥᨭ᩠ᨮᩥᨣᨲᩴ. ᨾᩣ ᨲᩮ ᩋᩉᩮᩣᩈᩥ ᨴᩦᨥᩁᨲ᩠ᨲᩴ ᩋᩉᩥᨲᩣᨿ ᨴᩩᨠ᩠ᨡᩣᨿᩣ’’ᨲᩥ.

᪔᪓᪑. ‘‘ᨠᩥᨬ᩠ᨧᩣᨸᩥ ᨽᩅᩴ ᨠᩔᨸᩮᩣ ᩑᩅᨾᩣᩉ, ᩋᨳ ᨡᩮᩣ ᨶᩮᩅᩣᩉᩴ ᩈᨠ᩠ᨠᩮᩣᨾᩥ ᩍᨴᩴ ᨸᩣᨸᨠᩴ ᨴᩥᨭ᩠ᨮᩥᨣᨲᩴ ᨸᨭᩥᨶᩥᩔᨩ᩠ᨩᩥᨲᩩᩴ. ᩁᩣᨩᩣᨸᩥ ᨾᩴ ᨸᩈᩮᨶᨴᩥ ᨠᩮᩣᩈᩃᩮᩣ ᨩᩣᨶᩣᨲᩥ ᨲᩥᩁᩮᩣᩁᩣᨩᩣᨶᩮᩣᨸᩥ – ‘ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᩑᩅᩴᩅᩣᨴᩦ ᩑᩅᩴᨴᩥᨭ᩠ᨮᩦ – ‘‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ…ᨸᩮ… ᩅᩥᨸᩣᨠᩮᩣ’’’ᨲᩥ. ᩈᨧᩣᩉᩴ, ᨽᩮᩣ ᨠᩔᨸ, ᩍᨴᩴ ᨸᩣᨸᨠᩴ ᨴᩥᨭ᩠ᨮᩥᨣᨲᩴ ᨸᨭᩥᨶᩥᩔᨩ᩠ᨩᩥᩔᩣᨾᩥ, ᨽᩅᩥᩔᨶ᩠ᨲᩥ ᨾᩮ ᩅᨲ᩠ᨲᩣᩁᩮᩣ – ‘ᨿᩣᩅ ᨻᩣᩃᩮᩣ ᨸᩣᨿᩣᩈᩥ ᩁᩣᨩᨬ᩠ᨬᩮᩣ, ᩋᨻ᩠ᨿᨲ᩠ᨲᩮᩣ ᨴᩩᨣ᩠ᨣᩉᩥᨲᨣᩣᩉᩦ’ᨲᩥ. ᨠᩮᩣᨸᩮᨶᨸᩥ ᨶᩴ ᩉᩁᩥᩔᩣᨾᩥ, ᨾᨠ᩠ᨡᩮᨶᨸᩥ ᨶᩴ ᩉᩁᩥᩔᩣᨾᩥ, ᨸᩃᩣᩈᩮᨶᨸᩥ ᨶᩴ ᩉᩁᩥᩔᩣᨾᩦ’’ᨲᩥ.

ᨣᩪᨳᨽᩣᩁᩥᨠᩏᨸᨾᩣ

᪔᪓᪒. ‘‘ᨲᩮᨶ ᩉᩥ, ᩁᩣᨩᨬ᩠ᨬ, ᩏᨸᨾᩴ ᨲᩮ ᨠᩁᩥᩔᩣᨾᩥ. ᩏᨸᨾᩣᨿ ᨾᩥᨵᩮᨠᨧ᩠ᨧᩮ ᩅᩥᨬ᩠ᨬᩪ ᨸᩩᩁᩥᩈᩣ ᨽᩣᩈᩥᨲᩔ ᩋᨲ᩠ᨳᩴ ᩌᨩᩣᨶᨶ᩠ᨲᩥ. ᨽᩪᨲᨸᩩᨻ᩠ᨻᩴ, ᩁᩣᨩᨬ᩠ᨬ, ᩋᨬ᩠ᨬᨲᩁᩮᩣ ᩈᩪᨠᩁᨸᩮᩣᩈᨠᩮᩣ ᨸᩩᩁᩥᩈᩮᩣ ᩈᨠᨾ᩠ᩉᩣ ᨣᩣᨾᩣ ᩋᨬ᩠ᨬᩴ ᨣᩣᨾᩴ ᩋᨣᨾᩣᩈᩥ. ᨲᨲ᩠ᨳ ᩋᨴ᩠ᨴᩈ ᨸᩉᩪᨲᩴ ᩈᩩᨠ᩠ᨡᨣᩪᨳᩴ ᨨᨯ᩠ᨯᩥᨲᩴ. ᨴᩥᩈ᩠ᩅᩣᨶᩔ ᩑᨲᨴᩉᩮᩣᩈᩥ – ‘ᩋᨿᩴ ᨡᩮᩣ ᨸᩉᩩᨲᩮᩣ ᩈᩩᨠ᩠ᨡᨣᩪᨳᩮᩣ ᨨᨯ᩠ᨯᩥᨲᩮᩣ, ᨾᨾ ᨧ ᩈᩪᨠᩁᨽᨲ᩠ᨲᩴ [ᩈᩪᨠᩁᩣᨶᩴ ᨽᨠ᩠ᨡᩮᩣ (ᩈ᩠ᨿᩣ.)]; ᨿᩴᨶᩪᨶᩣᩉᩴ ᩍᨲᩮᩣ ᩈᩩᨠ᩠ᨡᨣᩪᨳᩴ ᩉᩁᩮᨿ᩠ᨿ’ᨶ᩠ᨲᩥ. ᩈᩮᩣ ᩏᨲ᩠ᨲᩁᩣᩈᨦ᩠ᨣᩴ ᨸᨲ᩠ᨳᩁᩥᨲ᩠ᩅᩣ ᨸᩉᩪᨲᩴ ᩈᩩᨠ᩠ᨡᨣᩪᨳᩴ ᩌᨠᩥᩁᩥᨲ᩠ᩅᩣ ᨽᨱ᩠ᨯᩥᨠᩴ ᨻᨶ᩠ᨵᩥᨲ᩠ᩅᩣ ᩈᩦᩈᩮ ᩏᨻ᩠ᨻᩣᩉᩮᨲ᩠ᩅᩣ [ᩏᨧ᩠ᨧᩣᩁᩮᩣᨸᩮᨲ᩠ᩅᩣ (ᨠ. ᩈᩦ. ᨠ.)] ᩋᨣᨾᩣᩈᩥ. ᨲᩔ ᩋᨶ᩠ᨲᩁᩣᨾᨣ᩠ᨣᩮ ᨾᩉᩣᩋᨠᩣᩃᨾᩮᨥᩮᩣ ᨸᩣᩅᩔᩥ. ᩈᩮᩣ ᩏᨣ᩠ᨥᩁᨶ᩠ᨲᩴ ᨸᨣ᩠ᨥᩁᨶ᩠ᨲᩴ ᨿᩣᩅ ᩋᨣ᩠ᨣᨶᨡᩣ ᨣᩪᨳᩮᨶ ᨾᨠ᩠ᨡᩥᨲᩮᩣ ᨣᩪᨳᨽᩣᩁᩴ ᩌᨴᩣᨿ ᩋᨣᨾᩣᩈᩥ. ᨲᨾᩮᨶᩴ ᨾᨶᩩᩔᩣ ᨴᩥᩈ᩠ᩅᩣ ᩑᩅᨾᩣᩉᩴᩈᩩ – ‘ᨠᨧ᩠ᨧᩥ ᨶᩮᩣ ᨲ᩠ᩅᩴ, ᨽᨱᩮ, ᩏᨾ᩠ᨾᨲ᩠ᨲᩮᩣ, ᨠᨧ᩠ᨧᩥ ᩅᩥᨧᩮᨲᩮᩣ, ᨠᨳᨬ᩠ᩉᩥ ᨶᩣᨾ ᩏᨣ᩠ᨥᩁᨶ᩠ᨲᩴ ᨸᨣ᩠ᨥᩁᨶ᩠ᨲᩴ ᨿᩣᩅ ᩋᨣ᩠ᨣᨶᨡᩣ ᨣᩪᨳᩮᨶ ᨾᨠ᩠ᨡᩥᨲᩮᩣ ᨣᩪᨳᨽᩣᩁᩴ ᩉᩁᩥᩔᩈᩦ’ᨲᩥ. ‘ᨲᩩᨾ᩠ᩉᩮ ᨡ᩠ᩅᩮᨲ᩠ᨳ, ᨽᨱᩮ, ᩏᨾ᩠ᨾᨲ᩠ᨲᩣ, ᨲᩩᨾ᩠ᩉᩮ ᩅᩥᨧᩮᨲᩣ, ᨲᨳᩣ ᩉᩥ ᨸᨶ ᨾᩮ ᩈᩪᨠᩁᨽᨲ᩠ᨲ’ᨶ᩠ᨲᩥ. ᩑᩅᨾᩮᩅ ᨡᩮᩣ ᨲ᩠ᩅᩴ, ᩁᩣᨩᨬ᩠ᨬ, ᨣᩪᨳᨽᩣᩁᩥᨠᩪᨸᨾᩮᩣ [ᨣᩪᨳᩉᩣᩁᩥᨠᩪᨸᨾᩮᩣ (ᩈᩦ. ᨸᩦ.)] ᨾᨬ᩠ᨬᩮ ᨸᨭᩥᨽᩣᩈᩥ. ᨸᨭᩥᨶᩥᩔᨩ᩠ᨩᩮᨲᩴ, ᩁᩣᨩᨬ᩠ᨬ, ᨸᩣᨸᨠᩴ ᨴᩥᨭ᩠ᨮᩥᨣᨲᩴ. ᨸᨭᩥᨶᩥᩔᨩ᩠ᨩᩮᨲᩴ, ᩁᩣᨩᨬ᩠ᨬ, ᨸᩣᨸᨠᩴ ᨴᩥᨭ᩠ᨮᩥᨣᨲᩴ. ᨾᩣ ᨲᩮ ᩋᩉᩮᩣᩈᩥ ᨴᩦᨥᩁᨲ᩠ᨲᩴ ᩋᩉᩥᨲᩣᨿ ᨴᩩᨠ᩠ᨡᩣᨿᩣ’’ᨲᩥ.

᪔᪓᪓. ‘‘ᨠᩥᨬ᩠ᨧᩣᨸᩥ ᨽᩅᩴ ᨠᩔᨸᩮᩣ ᩑᩅᨾᩣᩉ, ᩋᨳ ᨡᩮᩣ ᨶᩮᩅᩣᩉᩴ ᩈᨠ᩠ᨠᩮᩣᨾᩥ ᩍᨴᩴ ᨸᩣᨸᨠᩴ ᨴᩥᨭ᩠ᨮᩥᨣᨲᩴ ᨸᨭᩥᨶᩥᩔᨩ᩠ᨩᩥᨲᩩᩴ. ᩁᩣᨩᩣᨸᩥ ᨾᩴ ᨸᩈᩮᨶᨴᩥ ᨠᩮᩣᩈᩃᩮᩣ ᨩᩣᨶᩣᨲᩥ ᨲᩥᩁᩮᩣᩁᩣᨩᩣᨶᩮᩣᨸᩥ – ‘ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᩑᩅᩴᩅᩣᨴᩦ ᩑᩅᩴᨴᩥᨭ᩠ᨮᩦ – ‘‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ…ᨸᩮ… ᩅᩥᨸᩣᨠᩮᩣ’’ᨲᩥ. ᩈᨧᩣᩉᩴ, ᨽᩮᩣ ᨠᩔᨸ, ᩍᨴᩴ ᨸᩣᨸᨠᩴ ᨴᩥᨭ᩠ᨮᩥᨣᨲᩴ ᨸᨭᩥᨶᩥᩔᨩ᩠ᨩᩥᩔᩣᨾᩥ, ᨽᩅᩥᩔᨶ᩠ᨲᩥ ᨾᩮ ᩅᨲ᩠ᨲᩣᩁᩮᩣ – ‘ᨿᩣᩅ ᨻᩣᩃᩮᩣ ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᩋᨻ᩠ᨿᨲ᩠ᨲᩮᩣ ᨴᩩᨣ᩠ᨣᩉᩥᨲᨣᩣᩉᩦ’ᨲᩥ. ᨠᩮᩣᨸᩮᨶᨸᩥ ᨶᩴ ᩉᩁᩥᩔᩣᨾᩥ, ᨾᨠ᩠ᨡᩮᨶᨸᩥ ᨶᩴ ᩉᩁᩥᩔᩣᨾᩥ, ᨸᩃᩣᩈᩮᨶᨸᩥ ᨶᩴ ᩉᩁᩥᩔᩣᨾᩦ’’ᨲᩥ.

ᩋᨠ᩠ᨡᨵᩩᨲ᩠ᨲᨠᩏᨸᨾᩣ

᪔᪓᪔. ‘‘ᨲᩮᨶ ᩉᩥ, ᩁᩣᨩᨬ᩠ᨬ, ᩏᨸᨾᩴ ᨲᩮ ᨠᩁᩥᩔᩣᨾᩥ, ᩏᨸᨾᩣᨿ ᨾᩥᨵᩮᨠᨧ᩠ᨧᩮ ᩅᩥᨬ᩠ᨬᩪ ᨸᩩᩁᩥᩈᩣ ᨽᩣᩈᩥᨲᩔ ᩋᨲ᩠ᨳᩴ ᩌᨩᩣᨶᨶ᩠ᨲᩥ. ᨽᩪᨲᨸᩩᨻ᩠ᨻᩴ, ᩁᩣᨩᨬ᩠ᨬ, ᨴ᩠ᩅᩮ ᩋᨠ᩠ᨡᨵᩩᨲ᩠ᨲᩣ ᩋᨠ᩠ᨡᩮᩉᩥ ᨴᩥᨻ᩠ᨻᩥᩴᩈᩩ. ᩑᨠᩮᩣ ᩋᨠ᩠ᨡᨵᩩᨲ᩠ᨲᩮᩣ ᩌᨣᨲᩣᨣᨲᩴ ᨠᩃᩥᩴ ᨣᩥᩃᨲᩥ. ᩋᨴ᩠ᨴᩈᩣ ᨡᩮᩣ ᨴᩩᨲᩥᨿᩮᩣ ᩋᨠ᩠ᨡᨵᩩᨲ᩠ᨲᩮᩣ ᨲᩴ ᩋᨠ᩠ᨡᨵᩩᨲ᩠ᨲᩴ ᩌᨣᨲᩣᨣᨲᩴ ᨠᩃᩥᩴ ᨣᩥᩃᨶ᩠ᨲᩴ, ᨴᩥᩈ᩠ᩅᩣ ᨲᩴ ᩋᨠ᩠ᨡᨵᩩᨲ᩠ᨲᩴ ᩑᨲᨴᩅᩮᩣᨧ – ‘ᨲ᩠ᩅᩴ ᨡᩮᩣ, ᩈᨾ᩠ᨾ, ᩑᨠᨶ᩠ᨲᩥᨠᩮᨶ ᨩᩥᨶᩣᩈᩥ, ᨴᩮᩉᩥ ᨾᩮ, ᩈᨾ᩠ᨾ, ᩋᨠ᩠ᨡᩮ ᨸᨩᩮᩣᩉᩥᩔᩣᨾᩦ’ᨲᩥ. ‘ᩑᩅᩴ ᩈᨾ᩠ᨾᩣ’ᨲᩥ ᨡᩮᩣ ᩈᩮᩣ ᩋᨠ᩠ᨡᨵᩩᨲ᩠ᨲᩮᩣ ᨲᩔ ᩋᨠ᩠ᨡᨵᩩᨲ᩠ᨲᩔ ᩋᨠ᩠ᨡᩮ ᨸᩣᨴᩣᩈᩥ. ᩋᨳ ᨡᩮᩣ ᩈᩮᩣ ᩋᨠ᩠ᨡᨵᩩᨲ᩠ᨲᩮᩣ ᩋᨠ᩠ᨡᩮ ᩅᩥᩈᩮᨶ ᨸᩁᩥᨽᩣᩅᩮᨲ᩠ᩅᩣ ᨲᩴ ᩋᨠ᩠ᨡᨵᩩᨲ᩠ᨲᩴ ᩑᨲᨴᩅᩮᩣᨧ – ‘ᩑᩉᩥ ᨡᩮᩣ, ᩈᨾ᩠ᨾ, ᩋᨠ᩠ᨡᩮᩉᩥ ᨴᩥᨻ᩠ᨻᩥᩔᩣᨾᩣ’ᨲᩥ. ‘ᩑᩅᩴ ᩈᨾ᩠ᨾᩣ’ᨲᩥ ᨡᩮᩣ ᩈᩮᩣ ᩋᨠ᩠ᨡᨵᩩᨲ᩠ᨲᩮᩣ ᨲᩔ ᩋᨠ᩠ᨡᨵᩩᨲ᩠ᨲᩔ ᨸᨧ᩠ᨧᩔᩮᩣᩈᩥ. ᨴᩩᨲᩥᨿᨾ᩠ᨸᩥ ᨡᩮᩣ ᨲᩮ ᩋᨠ᩠ᨡᨵᩩᨲ᩠ᨲᩣ ᩋᨠ᩠ᨡᩮᩉᩥ ᨴᩥᨻ᩠ᨻᩥᩴᩈᩩ. ᨴᩩᨲᩥᨿᨾ᩠ᨸᩥ ᨡᩮᩣ ᩈᩮᩣ ᩋᨠ᩠ᨡᨵᩩᨲ᩠ᨲᩮᩣ ᩌᨣᨲᩣᨣᨲᩴ ᨠᩃᩥᩴ ᨣᩥᩃᨲᩥ. ᩋᨴ᩠ᨴᩈᩣ ᨡᩮᩣ ᨴᩩᨲᩥᨿᩮᩣ ᩋᨠ᩠ᨡᨵᩩᨲ᩠ᨲᩮᩣ ᨲᩴ ᩋᨠ᩠ᨡᨵᩩᨲ᩠ᨲᩴ ᨴᩩᨲᩥᨿᨾ᩠ᨸᩥ ᩌᨣᨲᩣᨣᨲᩴ ᨠᩃᩥᩴ ᨣᩥᩃᨶ᩠ᨲᩴ, ᨴᩥᩈ᩠ᩅᩣ ᨲᩴ ᩋᨠ᩠ᨡᨵᩩᨲ᩠ᨲᩴ ᩑᨲᨴᩅᩮᩣᨧ –

‘‘ᩃᩥᨲ᩠ᨲᩴ ᨸᩁᨾᩮᨶ ᨲᩮᨩᩈᩣ, ᨣᩥᩃᨾᨠ᩠ᨡᩴ ᨸᩩᩁᩥᩈᩮᩣ ᨶ ᨻᩩᨩ᩠ᨫᨲᩥ;

ᨣᩥᩃ ᩁᩮ ᨣᩥᩃ ᨸᩣᨸᨵᩩᨲ᩠ᨲᨠ [ᨣᩥᩃᩥ ᩁᩮ ᨸᩣᨸᨵᩩᨲ᩠ᨲᨠ (ᨠ.)], ᨸᨧ᩠ᨨᩣ ᨲᩮ ᨠᨭᩩᨠᩴ ᨽᩅᩥᩔᨲᩦᨲᩥ.

‘‘ᩑᩅᨾᩮᩅ ᨡᩮᩣ ᨲ᩠ᩅᩴ, ᩁᩣᨩᨬ᩠ᨬ, ᩋᨠ᩠ᨡᨵᩩᨲ᩠ᨲᨠᩪᨸᨾᩮᩣ ᨾᨬ᩠ᨬᩮ ᨸᨭᩥᨽᩣᩈᩥ. ᨸᨭᩥᨶᩥᩔᨩ᩠ᨩᩮᨲᩴ, ᩁᩣᨩᨬ᩠ᨬ, ᨸᩣᨸᨠᩴ ᨴᩥᨭ᩠ᨮᩥᨣᨲᩴ; ᨸᨭᩥᨶᩥᩔᨩ᩠ᨩᩮᨲᩴ, ᩁᩣᨩᨬ᩠ᨬ, ᨸᩣᨸᨠᩴ ᨴᩥᨭ᩠ᨮᩥᨣᨲᩴ. ᨾᩣ ᨲᩮ ᩋᩉᩮᩣᩈᩥ ᨴᩦᨥᩁᨲ᩠ᨲᩴ ᩋᩉᩥᨲᩣᨿ ᨴᩩᨠ᩠ᨡᩣᨿᩣ’’ᨲᩥ.

᪔᪓᪕. ‘‘ᨠᩥᨬ᩠ᨧᩣᨸᩥ ᨽᩅᩴ ᨠᩔᨸᩮᩣ ᩑᩅᨾᩣᩉ, ᩋᨳ ᨡᩮᩣ ᨶᩮᩅᩣᩉᩴ ᩈᨠ᩠ᨠᩮᩣᨾᩥ ᩍᨴᩴ ᨸᩣᨸᨠᩴ ᨴᩥᨭ᩠ᨮᩥᨣᨲᩴ ᨸᨭᩥᨶᩥᩔᨩ᩠ᨩᩥᨲᩩᩴ. ᩁᩣᨩᩣᨸᩥ ᨾᩴ ᨸᩈᩮᨶᨴᩥ ᨠᩮᩣᩈᩃᩮᩣ ᨩᩣᨶᩣᨲᩥ ᨲᩥᩁᩮᩣᩁᩣᨩᩣᨶᩮᩣᨸᩥ – ‘ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᩑᩅᩴᩅᩣᨴᩦ ᩑᩅᩴᨴᩥᨭ᩠ᨮᩦ – ‘‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ…ᨸᩮ… ᩅᩥᨸᩣᨠᩮᩣ’’ᨲᩥ. ᩈᨧᩣᩉᩴ, ᨽᩮᩣ ᨠᩔᨸ, ᩍᨴᩴ ᨸᩣᨸᨠᩴ ᨴᩥᨭ᩠ᨮᩥᨣᨲᩴ ᨸᨭᩥᨶᩥᩔᨩ᩠ᨩᩥᩔᩣᨾᩥ, ᨽᩅᩥᩔᨶ᩠ᨲᩥ ᨾᩮ ᩅᨲ᩠ᨲᩣᩁᩮᩣ – ‘ᨿᩣᩅ ᨻᩣᩃᩮᩣ ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᩋᨻ᩠ᨿᨲ᩠ᨲᩮᩣ ᨴᩩᨣ᩠ᨣᩉᩥᨲᨣᩣᩉᩦ’ᨲᩥ. ᨠᩮᩣᨸᩮᨶᨸᩥ ᨶᩴ ᩉᩁᩥᩔᩣᨾᩥ, ᨾᨠ᩠ᨡᩮᨶᨸᩥ ᨶᩴ ᩉᩁᩥᩔᩣᨾᩥ, ᨸᩃᩣᩈᩮᨶᨸᩥ ᨶᩴ ᩉᩁᩥᩔᩣᨾᩦ’’ᨲᩥ.

ᩈᩣᨱᨽᩣᩁᩥᨠᩏᨸᨾᩣ

᪔᪓᪖. ‘‘ᨲᩮᨶ ᩉᩥ, ᩁᩣᨩᨬ᩠ᨬ, ᩏᨸᨾᩴ ᨲᩮ ᨠᩁᩥᩔᩣᨾᩥ, ᩏᨸᨾᩣᨿ ᨾᩥᨵᩮᨠᨧ᩠ᨧᩮ ᩅᩥᨬ᩠ᨬᩪ ᨸᩩᩁᩥᩈᩣ ᨽᩣᩈᩥᨲᩔ ᩋᨲ᩠ᨳᩴ ᩌᨩᩣᨶᨶ᩠ᨲᩥ. ᨽᩪᨲᨸᩩᨻ᩠ᨻᩴ, ᩁᩣᨩᨬ᩠ᨬ, ᩋᨬ᩠ᨬᨲᩁᩮᩣ ᨩᨶᨸᨴᩮᩣ ᩅᩩᨭ᩠ᨮᩣᩈᩥ. ᩋᨳ ᨡᩮᩣ ᩈᩉᩣᨿᨠᩮᩣ ᩈᩉᩣᨿᨠᩴ ᩌᨾᨶ᩠ᨲᩮᩈᩥ – ‘ᩌᨿᩣᨾ, ᩈᨾ᩠ᨾ, ᨿᩮᨶ ᩈᩮᩣ ᨩᨶᨸᨴᩮᩣ ᨲᩮᨶᩩᨸᩈᨦ᩠ᨠᨾᩥᩔᩣᨾ, ᩋᨸ᩠ᨸᩮᩅ ᨶᩣᨾᩮᨲ᩠ᨳ ᨠᩥᨬ᩠ᨧᩥ ᨵᨶᩴ ᩋᨵᩥᨣᨧ᩠ᨨᩮᨿ᩠ᨿᩣᨾᩣ’ᨲᩥ. ‘ᩑᩅᩴ ᩈᨾ᩠ᨾᩣ’ᨲᩥ ᨡᩮᩣ ᩈᩉᩣᨿᨠᩮᩣ ᩈᩉᩣᨿᨠᩔ ᨸᨧ᩠ᨧᩔᩮᩣᩈᩥ. ᨲᩮ ᨿᩮᨶ ᩈᩮᩣ ᨩᨶᨸᨴᩮᩣ, ᨿᩮᨶ ᩋᨬ᩠ᨬᨲᩁᩴ ᨣᩣᨾᨸᨭ᩠ᨭᩴ [ᨣᩣᨾᨸᨩ᩠ᨩᩴ (ᩈ᩠ᨿᩣ.), ᨣᩣᨾᨸᨲ᩠ᨲᩴ (ᩈᩦ.)] ᨲᩮᨶᩩᨸᩈᨦ᩠ᨠᨾᩥᩴᩈᩩ, ᨲᨲ᩠ᨳ ᩋᨴ᩠ᨴᩈᩴᩈᩩ ᨸᩉᩪᨲᩴ ᩈᩣᨱᩴ ᨨᨯ᩠ᨯᩥᨲᩴ, ᨴᩥᩈ᩠ᩅᩣ ᩈᩉᩣᨿᨠᩮᩣ ᩈᩉᩣᨿᨠᩴ ᩌᨾᨶ᩠ᨲᩮᩈᩥ – ‘ᩍᨴᩴ ᨡᩮᩣ, ᩈᨾ᩠ᨾ, ᨸᩉᩪᨲᩴ ᩈᩣᨱᩴ ᨨᨯ᩠ᨯᩥᨲᩴ, ᨲᩮᨶ ᩉᩥ, ᩈᨾ᩠ᨾ, ᨲ᩠ᩅᨬ᩠ᨧ ᩈᩣᨱᨽᩣᩁᩴ ᨻᨶ᩠ᨵ, ᩋᩉᨬ᩠ᨧ ᩈᩣᨱᨽᩣᩁᩴ ᨻᨶ᩠ᨵᩥᩔᩣᨾᩥ, ᩏᨽᩮᩣ ᩈᩣᨱᨽᩣᩁᩴ ᩌᨴᩣᨿ ᨣᨾᩥᩔᩣᨾᩣ’ᨲᩥ. ‘ᩑᩅᩴ ᩈᨾ᩠ᨾᩣ’ᨲᩥ ᨡᩮᩣ ᩈᩉᩣᨿᨠᩮᩣ ᩈᩉᩣᨿᨠᩔ ᨸᨭᩥᩔᩩᨲ᩠ᩅᩣ ᩈᩣᨱᨽᩣᩁᩴ ᨻᨶ᩠ᨵᩥᨲ᩠ᩅᩣ ᨲᩮ ᩏᨽᩮᩣ ᩈᩣᨱᨽᩣᩁᩴ ᩌᨴᩣᨿ ᨿᩮᨶ ᩋᨬ᩠ᨬᨲᩁᩴ ᨣᩣᨾᨸᨭ᩠ᨭᩴ ᨲᩮᨶᩩᨸᩈᨦ᩠ᨠᨾᩥᩴᩈᩩ. ᨲᨲ᩠ᨳ ᩋᨴ᩠ᨴᩈᩴᩈᩩ ᨸᩉᩪᨲᩴ ᩈᩣᨱᩈᩩᨲ᩠ᨲᩴ ᨨᨯ᩠ᨯᩥᨲᩴ, ᨴᩥᩈ᩠ᩅᩣ ᩈᩉᩣᨿᨠᩮᩣ ᩈᩉᩣᨿᨠᩴ ᩌᨾᨶ᩠ᨲᩮᩈᩥ – ‘ᨿᩔ ᨡᩮᩣ, ᩈᨾ᩠ᨾ, ᩋᨲ᩠ᨳᩣᨿ ᩍᨧ᩠ᨨᩮᨿ᩠ᨿᩣᨾ ᩈᩣᨱᩴ, ᩍᨴᩴ ᨸᩉᩪᨲᩴ ᩈᩣᨱᩈᩩᨲ᩠ᨲᩴ ᨨᨯ᩠ᨯᩥᨲᩴ. ᨲᩮᨶ ᩉᩥ, ᩈᨾ᩠ᨾ, ᨲ᩠ᩅᨬ᩠ᨧ ᩈᩣᨱᨽᩣᩁᩴ ᨨᨯ᩠ᨯᩮᩉᩥ, ᩋᩉᨬ᩠ᨧ ᩈᩣᨱᨽᩣᩁᩴ ᨨᨯ᩠ᨯᩮᩔᩣᨾᩥ, ᩏᨽᩮᩣ ᩈᩣᨱᩈᩩᨲ᩠ᨲᨽᩣᩁᩴ ᩌᨴᩣᨿ ᨣᨾᩥᩔᩣᨾᩣ’ᨲᩥ. ‘ᩋᨿᩴ ᨡᩮᩣ ᨾᩮ, ᩈᨾ᩠ᨾ, ᩈᩣᨱᨽᩣᩁᩮᩣ ᨴᩪᩁᩣᨽᨲᩮᩣ ᨧ ᩈᩩᩈᨶ᩠ᨶᨴ᩠ᨵᩮᩣ ᨧ, ᩋᩃᩴ ᨾᩮ ᨲ᩠ᩅᩴ ᨸᨩᩣᨶᩣᩉᩦ’ᨲᩥ. ᩋᨳ ᨡᩮᩣ ᩈᩮᩣ ᩈᩉᩣᨿᨠᩮᩣ ᩈᩣᨱᨽᩣᩁᩴ ᨨᨯ᩠ᨯᩮᨲ᩠ᩅᩣ ᩈᩣᨱᩈᩩᨲ᩠ᨲᨽᩣᩁᩴ ᩌᨴᩥᨿᩥ.

‘‘ᨲᩮ ᨿᩮᨶ ᩋᨬ᩠ᨬᨲᩁᩴ ᨣᩣᨾᨸᨭ᩠ᨭᩴ ᨲᩮᨶᩩᨸᩈᨦ᩠ᨠᨾᩥᩴᩈᩩ. ᨲᨲ᩠ᨳ ᩋᨴ᩠ᨴᩈᩴᩈᩩ ᨸᩉᩪᨲᩣ ᩈᩣᨱᩥᨿᩮᩣ ᨨᨯ᩠ᨯᩥᨲᩣ, ᨴᩥᩈ᩠ᩅᩣ ᩈᩉᩣᨿᨠᩮᩣ ᩈᩉᩣᨿᨠᩴ ᩌᨾᨶ᩠ᨲᩮᩈᩥ – ‘ᨿᩔ ᨡᩮᩣ, ᩈᨾ᩠ᨾ, ᩋᨲ᩠ᨳᩣᨿ ᩍᨧ᩠ᨨᩮᨿ᩠ᨿᩣᨾ ᩈᩣᨱᩴ ᩅᩣ ᩈᩣᨱᩈᩩᨲ᩠ᨲᩴ ᩅᩣ, ᩍᨾᩣ ᨸᩉᩪᨲᩣ ᩈᩣᨱᩥᨿᩮᩣ ᨨᨯ᩠ᨯᩥᨲᩣ. ᨲᩮᨶ ᩉᩥ, ᩈᨾ᩠ᨾ, ᨲ᩠ᩅᨬ᩠ᨧ ᩈᩣᨱᨽᩣᩁᩴ ᨨᨯ᩠ᨯᩮᩉᩥ, ᩋᩉᨬ᩠ᨧ ᩈᩣᨱᩈᩩᨲ᩠ᨲᨽᩣᩁᩴ ᨨᨯ᩠ᨯᩮᩔᩣᨾᩥ, ᩏᨽᩮᩣ ᩈᩣᨱᩥᨽᩣᩁᩴ ᩌᨴᩣᨿ ᨣᨾᩥᩔᩣᨾᩣ’ᨲᩥ. ‘ᩋᨿᩴ ᨡᩮᩣ ᨾᩮ, ᩈᨾ᩠ᨾ, ᩈᩣᨱᨽᩣᩁᩮᩣ ᨴᩪᩁᩣᨽᨲᩮᩣ ᨧ ᩈᩩᩈᨶ᩠ᨶᨴ᩠ᨵᩮᩣ ᨧ, ᩋᩃᩴ ᨾᩮ, ᨲ᩠ᩅᩴ ᨸᨩᩣᨶᩣᩉᩦ’ᨲᩥ. ᩋᨳ ᨡᩮᩣ ᩈᩮᩣ ᩈᩉᩣᨿᨠᩮᩣ ᩈᩣᨱᩈᩩᨲ᩠ᨲᨽᩣᩁᩴ ᨨᨯ᩠ᨯᩮᨲ᩠ᩅᩣ ᩈᩣᨱᩥᨽᩣᩁᩴ ᩌᨴᩥᨿᩥ.

‘‘ᨲᩮ ᨿᩮᨶ ᩋᨬ᩠ᨬᨲᩁᩴ ᨣᩣᨾᨸᨭ᩠ᨭᩴ ᨲᩮᨶᩩᨸᩈᨦ᩠ᨠᨾᩥᩴᩈᩩ. ᨲᨲ᩠ᨳ ᩋᨴ᩠ᨴᩈᩴᩈᩩ ᨸᩉᩪᨲᩴ ᨡᩮᩣᨾᩴ ᨨᨯ᩠ᨯᩥᨲᩴ, ᨴᩥᩈ᩠ᩅᩣ…ᨸᩮ… ᨸᩉᩪᨲᩴ ᨡᩮᩣᨾᩈᩩᨲ᩠ᨲᩴ ᨨᨯ᩠ᨯᩥᨲᩴ, ᨴᩥᩈ᩠ᩅᩣ… ᨸᩉᩪᨲᩴ ᨡᩮᩣᨾᨴᩩᩔᩴ ᨨᨯ᩠ᨯᩥᨲᩴ, ᨴᩥᩈ᩠ᩅᩣ… ᨸᩉᩪᨲᩴ ᨠᨸ᩠ᨸᩣᩈᩴ ᨨᨯ᩠ᨯᩥᨲᩴ, ᨴᩥᩈ᩠ᩅᩣ… ᨸᩉᩪᨲᩴ ᨠᨸ᩠ᨸᩣᩈᩥᨠᩈᩩᨲ᩠ᨲᩴ ᨨᨯ᩠ᨯᩥᨲᩴ, ᨴᩥᩈ᩠ᩅᩣ… ᨸᩉᩪᨲᩴ ᨠᨸ᩠ᨸᩣᩈᩥᨠᨴᩩᩔᩴ ᨨᨯ᩠ᨯᩥᨲᩴ, ᨴᩥᩈ᩠ᩅᩣ… ᨸᩉᩪᨲᩴ ᩋᨿᩴ [ᩋᨿᩈᩴ (ᩈ᩠ᨿᩣ.)] ᨨᨯ᩠ᨯᩥᨲᩴ, ᨴᩥᩈ᩠ᩅᩣ… ᨸᩉᩪᨲᩴ ᩃᩮᩣᩉᩴ ᨨᨯ᩠ᨯᩥᨲᩴ, ᨴᩥᩈ᩠ᩅᩣ… ᨸᩉᩪᨲᩴ ᨲᩥᨸᩩᩴ ᨨᨯ᩠ᨯᩥᨲᩴ, ᨴᩥᩈ᩠ᩅᩣ… ᨸᩉᩪᨲᩴ ᩈᩦᩈᩴ ᨨᨯ᩠ᨯᩥᨲᩴ, ᨴᩥᩈ᩠ᩅᩣ… ᨸᩉᩪᨲᩴ ᩈᨩ᩠ᨫᩴ [ᩈᨩ᩠ᨫᩩᩴ (ᩈᩦ. ᩈ᩠ᨿᩣ. ᨸᩦ.)] ᨨᨯ᩠ᨯᩥᨲᩴ, ᨴᩥᩈ᩠ᩅᩣ… ᨸᩉᩪᨲᩴ ᩈᩩᩅᨱ᩠ᨱᩴ ᨨᨯ᩠ᨯᩥᨲᩴ, ᨴᩥᩈ᩠ᩅᩣ ᩈᩉᩣᨿᨠᩮᩣ ᩈᩉᩣᨿᨠᩴ ᩌᨾᨶ᩠ᨲᩮᩈᩥ – ‘ᨿᩔ ᨡᩮᩣ, ᩈᨾ᩠ᨾ, ᩋᨲ᩠ᨳᩣᨿ ᩍᨧ᩠ᨨᩮᨿ᩠ᨿᩣᨾ ᩈᩣᨱᩴ ᩅᩣ ᩈᩣᨱᩈᩩᨲ᩠ᨲᩴ ᩅᩣ ᩈᩣᨱᩥᨿᩮᩣ ᩅᩣ ᨡᩮᩣᨾᩴ ᩅᩣ ᨡᩮᩣᨾᩈᩩᨲ᩠ᨲᩴ ᩅᩣ ᨡᩮᩣᨾᨴᩩᩔᩴ ᩅᩣ ᨠᨸ᩠ᨸᩣᩈᩴ ᩅᩣ ᨠᨸ᩠ᨸᩣᩈᩥᨠᩈᩩᨲ᩠ᨲᩴ ᩅᩣ ᨠᨸ᩠ᨸᩣᩈᩥᨠᨴᩩᩔᩴ ᩅᩣ ᩋᨿᩴ ᩅᩣ ᩃᩮᩣᩉᩴ ᩅᩣ ᨲᩥᨸᩩᩴ ᩅᩣ ᩈᩦᩈᩴ ᩅᩣ ᩈᨩ᩠ᨫᩴ ᩅᩣ, ᩍᨴᩴ ᨸᩉᩪᨲᩴ ᩈᩩᩅᨱ᩠ᨱᩴ ᨨᨯ᩠ᨯᩥᨲᩴ. ᨲᩮᨶ ᩉᩥ, ᩈᨾ᩠ᨾ, ᨲ᩠ᩅᨬ᩠ᨧ ᩈᩣᨱᨽᩣᩁᩴ ᨨᨯ᩠ᨯᩮᩉᩥ, ᩋᩉᨬ᩠ᨧ ᩈᨩ᩠ᨫᨽᩣᩁᩴ [ᩈᨩ᩠ᨫᩩᨽᩣᩁᩴ (ᩈᩦ. ᩈ᩠ᨿᩣ. ᨸᩦ.)] ᨨᨯ᩠ᨯᩮᩔᩣᨾᩥ, ᩏᨽᩮᩣ ᩈᩩᩅᨱ᩠ᨱᨽᩣᩁᩴ ᩌᨴᩣᨿ ᨣᨾᩥᩔᩣᨾᩣ’ᨲᩥ. ‘ᩋᨿᩴ ᨡᩮᩣ ᨾᩮ, ᩈᨾ᩠ᨾ, ᩈᩣᨱᨽᩣᩁᩮᩣ ᨴᩪᩁᩣᨽᨲᩮᩣ ᨧ ᩈᩩᩈᨶ᩠ᨶᨴ᩠ᨵᩮᩣ ᨧ, ᩋᩃᩴ ᨾᩮ ᨲ᩠ᩅᩴ ᨸᨩᩣᨶᩣᩉᩦ’ᨲᩥ. ᩋᨳ ᨡᩮᩣ ᩈᩮᩣ ᩈᩉᩣᨿᨠᩮᩣ ᩈᨩ᩠ᨫᨽᩣᩁᩴ ᨨᨯ᩠ᨯᩮᨲ᩠ᩅᩣ ᩈᩩᩅᨱ᩠ᨱᨽᩣᩁᩴ ᩌᨴᩥᨿᩥ.

‘‘ᨲᩮ ᨿᩮᨶ ᩈᨠᩮᩣ ᨣᩣᨾᩮᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ. ᨲᨲ᩠ᨳ ᨿᩮᩣ ᩈᩮᩣ ᩈᩉᩣᨿᨠᩮᩣ ᩈᩣᨱᨽᩣᩁᩴ ᩌᨴᩣᨿ ᩋᨣᨾᩣᩈᩥ, ᨲᩔ ᨶᩮᩅ ᨾᩣᨲᩣᨸᩥᨲᩁᩮᩣ ᩋᨽᩥᨶᨶ᩠ᨴᩥᩴᩈᩩ, ᨶ ᨸᩩᨲ᩠ᨲᨴᩣᩁᩣ ᩋᨽᩥᨶᨶ᩠ᨴᩥᩴᩈᩩ, ᨶ ᨾᩥᨲ᩠ᨲᩣᨾᨧ᩠ᨧᩣ ᩋᨽᩥᨶᨶ᩠ᨴᩥᩴᩈᩩ, ᨶ ᨧ ᨲᨲᩮᩣᨶᩥᨴᩣᨶᩴ ᩈᩩᨡᩴ ᩈᩮᩣᨾᨶᩔᩴ ᩋᨵᩥᨣᨧ᩠ᨨᩥ. ᨿᩮᩣ ᨸᨶ ᩈᩮᩣ ᩈᩉᩣᨿᨠᩮᩣ ᩈᩩᩅᨱ᩠ᨱᨽᩣᩁᩴ ᩌᨴᩣᨿ ᩋᨣᨾᩣᩈᩥ, ᨲᩔ ᨾᩣᨲᩣᨸᩥᨲᩁᩮᩣᨸᩥ ᩋᨽᩥᨶᨶ᩠ᨴᩥᩴᩈᩩ, ᨸᩩᨲ᩠ᨲᨴᩣᩁᩣᨸᩥ ᩋᨽᩥᨶᨶ᩠ᨴᩥᩴᩈᩩ, ᨾᩥᨲ᩠ᨲᩣᨾᨧ᩠ᨧᩣᨸᩥ ᩋᨽᩥᨶᨶ᩠ᨴᩥᩴᩈᩩ, ᨲᨲᩮᩣᨶᩥᨴᩣᨶᨬ᩠ᨧ ᩈᩩᨡᩴ ᩈᩮᩣᨾᨶᩔᩴ ᩋᨵᩥᨣᨧ᩠ᨨᩥ. ‘‘ᩑᩅᨾᩮᩅ ᨡᩮᩣ ᨲ᩠ᩅᩴ, ᩁᩣᨩᨬ᩠ᨬ, ᩈᩣᨱᨽᩣᩁᩥᨠᩪᨸᨾᩮᩣ ᨾᨬ᩠ᨬᩮ ᨸᨭᩥᨽᩣᩈᩥ. ᨸᨭᩥᨶᩥᩔᨩ᩠ᨩᩮᨲᩴ, ᩁᩣᨩᨬ᩠ᨬ, ᨸᩣᨸᨠᩴ ᨴᩥᨭ᩠ᨮᩥᨣᨲᩴ; ᨸᨭᩥᨶᩥᩔᨩ᩠ᨩᩮᨲᩴ, ᩁᩣᨩᨬ᩠ᨬ, ᨸᩣᨸᨠᩴ ᨴᩥᨭ᩠ᨮᩥᨣᨲᩴ. ᨾᩣ ᨲᩮ ᩋᩉᩮᩣᩈᩥ ᨴᩦᨥᩁᨲ᩠ᨲᩴ ᩋᩉᩥᨲᩣᨿ ᨴᩩᨠ᩠ᨡᩣᨿᩣ’’ᨲᩥ.

ᩈᩁᨱᨣᨾᨶᩴ

᪔᪓᪗. ‘‘ᨸᩩᩁᩥᨾᩮᨶᩮᩅ ᩋᩉᩴ ᩒᨸᨾ᩠ᨾᩮᨶ ᨽᩮᩣᨲᩮᩣ ᨠᩔᨸᩔ ᩋᨲ᩠ᨲᨾᨶᩮᩣ ᩋᨽᩥᩁᨴ᩠ᨵᩮᩣ. ᩋᨸᩥ ᨧᩣᩉᩴ ᩍᨾᩣᨶᩥ ᩅᩥᨧᩥᨲᩕᩣᨶᩥ ᨸᨬ᩠ᩉᩣᨸᨭᩥᨽᩣᨶᩣᨶᩥ ᩈᩮᩣᨲᩩᨠᩣᨾᩮᩣ ᩑᩅᩣᩉᩴ ᨽᩅᨶ᩠ᨲᩴ ᨠᩔᨸᩴ ᨸᨧ᩠ᨧᨶᩦᨠᩴ ᨠᩣᨲᨻ᩠ᨻᩴ ᩋᨾᨬ᩠ᨬᩥᩔᩴ. ᩋᨽᩥᨠ᩠ᨠᨶ᩠ᨲᩴ, ᨽᩮᩣ ᨠᩔᨸ, ᩋᨽᩥᨠ᩠ᨠᨶ᩠ᨲᩴ, ᨽᩮᩣ ᨠᩔᨸ. ᩈᩮᨿ᩠ᨿᨳᩣᨸᩥ, ᨽᩮᩣ ᨠᩔᨸ, ᨶᩥᨠ᩠ᨠᩩᨩ᩠ᨩᩥᨲᩴ ᩅᩣ ᩏᨠ᩠ᨠᩩᨩ᩠ᨩᩮᨿ᩠ᨿ, ᨸᨭᩥᨧ᩠ᨨᨶ᩠ᨶᩴ ᩅᩣ ᩅᩥᩅᩁᩮᨿ᩠ᨿ, ᨾᩪᩊ᩠ᩉᩔ ᩅᩣ ᨾᨣ᩠ᨣᩴ ᩌᨧᩥᨠ᩠ᨡᩮᨿ᩠ᨿ, ᩋᨶ᩠ᨵᨠᩣᩁᩮ ᩅᩣ ᨲᩮᩃᨸᨩ᩠ᨩᩮᩣᨲᩴ ᨵᩣᩁᩮᨿ᩠ᨿ ‘ᨧᨠ᩠ᨡᩩᨾᨶ᩠ᨲᩮᩣ ᩁᩪᨸᩣᨶᩥ ᨴᨠ᩠ᨡᨶ᩠ᨲᩦ’ᨲᩥ ᩑᩅᨾᩮᩅᩴ ᨽᩮᩣᨲᩣ ᨠᩔᨸᩮᨶ ᩋᨶᩮᨠᨸᩁᩥᨿᩣᨿᩮᨶ ᨵᨾ᩠ᨾᩮᩣ ᨸᨠᩣᩈᩥᨲᩮᩣ. ᩑᩈᩣᩉᩴ, ᨽᩮᩣ ᨠᩔᨸ, ᨲᩴ ᨽᩅᨶ᩠ᨲᩴ ᨣᩮᩣᨲᨾᩴ ᩈᩁᨱᩴ ᨣᨧ᩠ᨨᩣᨾᩥ, ᨵᨾ᩠ᨾᨬ᩠ᨧ, ᨽᩥᨠ᩠ᨡᩩᩈᨦ᩠ᨥᨬ᩠ᨧ. ᩏᨸᩣᩈᨠᩴ ᨾᩴ ᨽᩅᩴ ᨠᩔᨸᩮᩣ ᨵᩣᩁᩮᨲᩩ ᩋᨩ᩠ᨩᨲᨣ᩠ᨣᩮ ᨸᩣᨱᩩᨸᩮᨲᩴ ᩈᩁᨱᩴ ᨣᨲᩴ.

‘‘ᩍᨧ᩠ᨨᩣᨾᩥ ᨧᩣᩉᩴ, ᨽᩮᩣ ᨠᩔᨸ, ᨾᩉᩣᨿᨬ᩠ᨬᩴ ᨿᨩᩥᨲᩩᩴ, ᩋᨶᩩᩈᩣᩈᨲᩩ ᨾᩴ ᨽᩅᩴ ᨠᩔᨸᩮᩣ, ᨿᩴ ᨾᨾᩔ ᨴᩦᨥᩁᨲ᩠ᨲᩴ ᩉᩥᨲᩣᨿ ᩈᩩᨡᩣᨿᩣ’’ᨲᩥ.

ᨿᨬ᩠ᨬᨠᨳᩣ

᪔᪓᪘. ‘‘ᨿᨳᩣᩁᩪᨸᩮ ᨡᩮᩣ, ᩁᩣᨩᨬ᩠ᨬ, ᨿᨬ᩠ᨬᩮ ᨣᩣᩅᩮᩣ ᩅᩣ ᩉᨬ᩠ᨬᨶ᩠ᨲᩥ ᩋᨩᩮᩊᨠᩣ ᩅᩣ ᩉᨬ᩠ᨬᨶ᩠ᨲᩥ, ᨠᩩᨠ᩠ᨠᩩᨭᩈᩪᨠᩁᩣ ᩅᩣ ᩉᨬ᩠ᨬᨶ᩠ᨲᩥ, ᩅᩥᩅᩥᨵᩣ ᩅᩣ ᨸᩣᨱᩣ ᩈᩴᨥᩣᨲᩴ ᩌᨸᨩ᩠ᨩᨶ᩠ᨲᩥ, ᨸᨭᩥᨣ᩠ᨣᩣᩉᨠᩣ ᨧ ᩉᩮᩣᨶ᩠ᨲᩥ ᨾᩥᨧ᩠ᨨᩣᨴᩥᨭ᩠ᨮᩦ ᨾᩥᨧ᩠ᨨᩣᩈᨦ᩠ᨠᨸ᩠ᨸᩣ ᨾᩥᨧ᩠ᨨᩣᩅᩣᨧᩣ ᨾᩥᨧ᩠ᨨᩣᨠᨾ᩠ᨾᨶ᩠ᨲᩣ ᨾᩥᨧ᩠ᨨᩣᩌᨩᩦᩅᩣ ᨾᩥᨧ᩠ᨨᩣᩅᩣᨿᩣᨾᩣ ᨾᩥᨧ᩠ᨨᩣᩈᨲᩦ ᨾᩥᨧ᩠ᨨᩣᩈᨾᩣᨵᩦ, ᩑᩅᩁᩪᨸᩮᩣ ᨡᩮᩣ, ᩁᩣᨩᨬ᩠ᨬ, ᨿᨬ᩠ᨬᩮᩣ ᨶ ᨾᩉᨸ᩠ᨹᩃᩮᩣ ᩉᩮᩣᨲᩥ ᨶ ᨾᩉᩣᨶᩥᩈᩴᩈᩮᩣ ᨶ ᨾᩉᩣᨩᩩᨲᩥᨠᩮᩣ ᨶ ᨾᩉᩣᩅᩥᨸ᩠ᨹᩣᩁᩮᩣ. ᩈᩮᨿ᩠ᨿᨳᩣᨸᩥ, ᩁᩣᨩᨬ᩠ᨬ, ᨠᩔᨠᩮᩣ ᨻᩦᨩᨶᨦ᩠ᨣᩃᩴ ᩌᨴᩣᨿ ᩅᨶᩴ ᨸᩅᩥᩈᩮᨿ᩠ᨿ. ᩈᩮᩣ ᨲᨲ᩠ᨳ ᨴᩩᨠ᩠ᨡᩮᨲ᩠ᨲᩮ ᨴᩩᨻ᩠ᨽᩪᨾᩮ ᩋᩅᩥᩉᨲᨡᩣᨱᩩᨠᨱ᩠ᨭᨠᩮ ᨻᩦᨩᩣᨶᩥ ᨸᨲᩥᨭ᩠ᨮᩣᨸᩮᨿ᩠ᨿ ᨡᨱ᩠ᨯᩣᨶᩥ ᨸᩪᨲᩦᨶᩥ ᩅᩣᨲᩣᨲᨸᩉᨲᩣᨶᩥ ᩋᩈᩣᩁᨴᩣᨶᩥ ᩋᩈᩩᨡᩈᨿᩥᨲᩣᨶᩥ. ᨴᩮᩅᩮᩣ ᨧ ᨶ ᨠᩣᩃᩮᨶ ᨠᩣᩃᩴ ᩈᨾ᩠ᨾᩣᨵᩣᩁᩴ ᩋᨶᩩᨸ᩠ᨸᩅᩮᨧ᩠ᨨᩮᨿ᩠ᨿ. ᩋᨸᩥ ᨶᩩ ᨲᩣᨶᩥ ᨻᩦᨩᩣᨶᩥ ᩅᩩᨴ᩠ᨵᩥᩴ ᩅᩥᩁᩪᩊ᩠ᩉᩥᩴ [ᩅᩥᩁᩩᩊ᩠ᩉᩥᩴ (ᨾᩮᩣᨣ᩠ᨣᩃᩣᨶᩮ)] ᩅᩮᨸᩩᩃ᩠ᩃᩴ ᩌᨸᨩ᩠ᨩᩮᨿ᩠ᨿᩩᩴ, ᨠᩔᨠᩮᩣ ᩅᩣ ᩅᩥᨸᩩᩃᩴ ᨹᩃᩴ ᩋᨵᩥᨣᨧ᩠ᨨᩮᨿ᩠ᨿᩣ’’ᨲᩥ? ‘‘ᨶᩮᩣ ᩉᩥᨴᩴ [ᨶ ᩑᩅᩴ (ᩈ᩠ᨿᩣ. ᨠ.)] ᨽᩮᩣ ᨠᩔᨸ’’. ‘‘ᩑᩅᨾᩮᩅ ᨡᩮᩣ, ᩁᩣᨩᨬ᩠ᨬ, ᨿᨳᩣᩁᩪᨸᩮ ᨿᨬ᩠ᨬᩮ ᨣᩣᩅᩮᩣ ᩅᩣ ᩉᨬ᩠ᨬᨶ᩠ᨲᩥ, ᩋᨩᩮᩊᨠᩣ ᩅᩣ ᩉᨬ᩠ᨬᨶ᩠ᨲᩥ, ᨠᩩᨠ᩠ᨠᩩᨭᩈᩪᨠᩁᩣ ᩅᩣ ᩉᨬ᩠ᨬᨶ᩠ᨲᩥ, ᩅᩥᩅᩥᨵᩣ ᩅᩣ ᨸᩣᨱᩣ ᩈᩴᨥᩣᨲᩴ ᩌᨸᨩ᩠ᨩᨶ᩠ᨲᩥ, ᨸᨭᩥᨣ᩠ᨣᩣᩉᨠᩣ ᨧ ᩉᩮᩣᨶ᩠ᨲᩥ ᨾᩥᨧ᩠ᨨᩣᨴᩥᨭ᩠ᨮᩦ ᨾᩥᨧ᩠ᨨᩣᩈᨦ᩠ᨠᨸ᩠ᨸᩣ ᨾᩥᨧ᩠ᨨᩣᩅᩣᨧᩣ ᨾᩥᨧ᩠ᨨᩣᨠᨾ᩠ᨾᨶ᩠ᨲᩣ ᨾᩥᨧ᩠ᨨᩣᩌᨩᩦᩅᩣ ᨾᩥᨧ᩠ᨨᩣᩅᩣᨿᩣᨾᩣ ᨾᩥᨧ᩠ᨨᩣᩈᨲᩦ ᨾᩥᨧ᩠ᨨᩣᩈᨾᩣᨵᩦ, ᩑᩅᩁᩪᨸᩮᩣ ᨡᩮᩣ, ᩁᩣᨩᨬ᩠ᨬ, ᨿᨬ᩠ᨬᩮᩣ ᨶ ᨾᩉᨸ᩠ᨹᩃᩮᩣ ᩉᩮᩣᨲᩥ ᨶ ᨾᩉᩣᨶᩥᩈᩴᩈᩮᩣ ᨶ ᨾᩉᩣᨩᩩᨲᩥᨠᩮᩣ ᨶ ᨾᩉᩣᩅᩥᨸ᩠ᨹᩣᩁᩮᩣ.

‘‘ᨿᨳᩣᩁᩪᨸᩮ ᨧ ᨡᩮᩣ, ᩁᩣᨩᨬ᩠ᨬ, ᨿᨬ᩠ᨬᩮ ᨶᩮᩅ ᨣᩣᩅᩮᩣ ᩉᨬ᩠ᨬᨶ᩠ᨲᩥ, ᨶ ᩋᨩᩮᩊᨠᩣ ᩉᨬ᩠ᨬᨶ᩠ᨲᩥ, ᨶ ᨠᩩᨠ᩠ᨠᩩᨭᩈᩪᨠᩁᩣ ᩉᨬ᩠ᨬᨶ᩠ᨲᩥ, ᨶ ᩅᩥᩅᩥᨵᩣ ᩅᩣ ᨸᩣᨱᩣ ᩈᩴᨥᩣᨲᩴ ᩌᨸᨩ᩠ᨩᨶ᩠ᨲᩥ, ᨸᨭᩥᨣ᩠ᨣᩣᩉᨠᩣ ᨧ ᩉᩮᩣᨶ᩠ᨲᩥ ᩈᨾ᩠ᨾᩣᨴᩥᨭ᩠ᨮᩦ ᩈᨾ᩠ᨾᩣᩈᨦ᩠ᨠᨸ᩠ᨸᩣ ᩈᨾ᩠ᨾᩣᩅᩣᨧᩣ ᩈᨾ᩠ᨾᩣᨠᨾ᩠ᨾᨶ᩠ᨲᩣ ᩈᨾ᩠ᨾᩣᩌᨩᩦᩅᩣ ᩈᨾ᩠ᨾᩣᩅᩣᨿᩣᨾᩣ ᩈᨾ᩠ᨾᩣᩈᨲᩦ ᩈᨾ᩠ᨾᩣᩈᨾᩣᨵᩦ, ᩑᩅᩁᩪᨸᩮᩣ ᨡᩮᩣ, ᩁᩣᨩᨬ᩠ᨬ, ᨿᨬ᩠ᨬᩮᩣ ᨾᩉᨸ᩠ᨹᩃᩮᩣ ᩉᩮᩣᨲᩥ ᨾᩉᩣᨶᩥᩈᩴᩈᩮᩣ ᨾᩉᩣᨩᩩᨲᩥᨠᩮᩣ ᨾᩉᩣᩅᩥᨸ᩠ᨹᩣᩁᩮᩣ. ᩈᩮᨿ᩠ᨿᨳᩣᨸᩥ, ᩁᩣᨩᨬ᩠ᨬ, ᨠᩔᨠᩮᩣ ᨻᩦᨩᨶᨦ᩠ᨣᩃᩴ ᩌᨴᩣᨿ ᩅᨶᩴ ᨸᩅᩥᩈᩮᨿ᩠ᨿ. ᩈᩮᩣ ᨲᨲ᩠ᨳ ᩈᩩᨡᩮᨲ᩠ᨲᩮ ᩈᩩᨽᩪᨾᩮ ᩈᩩᩅᩥᩉᨲᨡᩣᨱᩩᨠᨱ᩠ᨭᨠᩮ ᨻᩦᨩᩣᨶᩥ ᨸᨲᩥᨭ᩠ᨮᨸᩮᨿ᩠ᨿ ᩋᨡᨱ᩠ᨯᩣᨶᩥ ᩋᨸᩪᨲᩦᨶᩥ ᩋᩅᩣᨲᩣᨲᨸᩉᨲᩣᨶᩥ ᩈᩣᩁᨴᩣᨶᩥ ᩈᩩᨡᩈᨿᩥᨲᩣᨶᩥ. ᨴᩮᩅᩮᩣ ᨧ ᨠᩣᩃᩮᨶ ᨠᩣᩃᩴ ᩈᨾ᩠ᨾᩣᨵᩣᩁᩴ ᩋᨶᩩᨸ᩠ᨸᩅᩮᨧ᩠ᨨᩮᨿ᩠ᨿ. ᩋᨸᩥ ᨶᩩ ᨲᩣᨶᩥ ᨻᩦᨩᩣᨶᩥ ᩅᩩᨴ᩠ᨵᩥᩴ ᩅᩥᩁᩪᩊ᩠ᩉᩥᩴ ᩅᩮᨸᩩᩃ᩠ᩃᩴ ᩌᨸᨩ᩠ᨩᩮᨿ᩠ᨿᩩᩴ, ᨠᩔᨠᩮᩣ ᩅᩣ ᩅᩥᨸᩩᩃᩴ ᨹᩃᩴ ᩋᨵᩥᨣᨧ᩠ᨨᩮᨿ᩠ᨿᩣ’’ᨲᩥ? ‘‘ᩑᩅᩴ, ᨽᩮᩣ ᨠᩔᨸ’’. ‘‘ᩑᩅᨾᩮᩅ ᨡᩮᩣ, ᩁᩣᨩᨬ᩠ᨬ, ᨿᨳᩣᩁᩪᨸᩮ ᨿᨬ᩠ᨬᩮ ᨶᩮᩅ ᨣᩣᩅᩮᩣ ᩉᨬ᩠ᨬᨶ᩠ᨲᩥ, ᨶ ᩋᨩᩮᩊᨠᩣ ᩉᨬ᩠ᨬᨶ᩠ᨲᩥ, ᨶ ᨠᩩᨠ᩠ᨠᩩᨭᩈᩪᨠᩁᩣ ᩉᨬ᩠ᨬᨶ᩠ᨲᩥ, ᨶ ᩅᩥᩅᩥᨵᩣ ᩅᩣ ᨸᩣᨱᩣ ᩈᩴᨥᩣᨲᩴ ᩌᨸᨩ᩠ᨩᨶ᩠ᨲᩥ, ᨸᨭᩥᨣ᩠ᨣᩣᩉᨠᩣ ᨧ ᩉᩮᩣᨶ᩠ᨲᩥ ᩈᨾ᩠ᨾᩣᨴᩥᨭ᩠ᨮᩦ ᩈᨾ᩠ᨾᩣᩈᨦ᩠ᨠᨸ᩠ᨸᩣ ᩈᨾ᩠ᨾᩣᩅᩣᨧᩣ ᩈᨾ᩠ᨾᩣᨠᨾ᩠ᨾᨶ᩠ᨲᩣ ᩈᨾ᩠ᨾᩣᩌᨩᩦᩅᩣ ᩈᨾ᩠ᨾᩣᩅᩣᨿᩣᨾᩣ ᩈᨾ᩠ᨾᩣᩈᨲᩦ ᩈᨾ᩠ᨾᩣᩈᨾᩣᨵᩦ, ᩑᩅᩁᩪᨸᩮᩣ ᨡᩮᩣ, ᩁᩣᨩᨬ᩠ᨬ, ᨿᨬ᩠ᨬᩮᩣ ᨾᩉᨸ᩠ᨹᩃᩮᩣ ᩉᩮᩣᨲᩥ ᨾᩉᩣᨶᩥᩈᩴᩈᩮᩣ ᨾᩉᩣᨩᩩᨲᩥᨠᩮᩣ ᨾᩉᩣᩅᩥᨸ᩠ᨹᩣᩁᩮᩣ’’ᨲᩥ.

ᩏᨲ᩠ᨲᩁᨾᩣᨱᩅᩅᨲ᩠ᨳᩩ

᪔᪓᪙. ᩋᨳ ᨡᩮᩣ ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᨴᩣᨶᩴ ᨸᨭ᩠ᨮᨸᩮᩈᩥ ᩈᨾᨱᨻᩕᩣᩉ᩠ᨾᨱᨠᨸᨱᨴ᩠ᨵᩥᨠᩅᨱᩥᨻ᩠ᨻᨠᨿᩣᨧᨠᩣᨶᩴ. ᨲᩈ᩠ᨾᩥᩴ ᨡᩮᩣ ᨸᨶ ᨴᩣᨶᩮ ᩑᩅᩁᩪᨸᩴ ᨽᩮᩣᨩᨶᩴ ᨴᩦᨿᨲᩥ ᨠᨱᩣᨩᨠᩴ ᨻᩥᩃᨦ᩠ᨣᨴᩩᨲᩥᨿᩴ, ᨵᩮᩣᩁᨠᩣᨶᩥ [ᨳᩮᩣᩁᨠᩣᨶᩥ (ᩈᩦ. ᨸᩦ.), ᨧᩮᩣᩁᨠᩣᨶᩥ (ᩈ᩠ᨿᩣ.)] ᨧ ᩅᨲ᩠ᨳᩣᨶᩥ ᨣᩩᩊᩅᩣᩃᨠᩣᨶᩥ [ᨣᩩᩊᨣᩣᩊᨠᩣᨶᩥ (ᨠ.)]. ᨲᩈ᩠ᨾᩥᩴ ᨡᩮᩣ ᨸᨶ ᨴᩣᨶᩮ ᩏᨲ᩠ᨲᩁᩮᩣ ᨶᩣᨾ ᨾᩣᨱᩅᩮᩣ ᩅᩣᩅᨭᩮᩣ [ᨻ᩠ᨿᩣᩅᨭᩮᩣ (ᩈᩦ. ᨸᩦ.)] ᩋᩉᩮᩣᩈᩥ. ᩈᩮᩣ ᨴᩣᨶᩴ ᨴᨲ᩠ᩅᩣ ᩑᩅᩴ ᩋᨶᩩᨴ᩠ᨴᩥᩈᨲᩥ – ‘‘ᩍᨾᩥᨶᩣᩉᩴ ᨴᩣᨶᩮᨶ ᨸᩣᨿᩣᩈᩥᩴ ᩁᩣᨩᨬ᩠ᨬᨾᩮᩅ ᩍᨾᩈ᩠ᨾᩥᩴ ᩃᩮᩣᨠᩮ ᩈᨾᩣᨣᨧ᩠ᨨᩥᩴ, ᨾᩣ ᨸᩁᩈ᩠ᨾᩥ’’ᨶ᩠ᨲᩥ. ᩋᩔᩮᩣᩈᩥ ᨡᩮᩣ ᨸᩣᨿᩣᩈᩥ ᩁᩣᨩᨬ᩠ᨬᩮᩣ – ‘‘ᩏᨲ᩠ᨲᩁᩮᩣ ᨠᩥᩁ ᨾᩣᨱᩅᩮᩣ ᨴᩣᨶᩴ ᨴᨲ᩠ᩅᩣ ᩑᩅᩴ ᩋᨶᩩᨴ᩠ᨴᩥᩈᨲᩥ – ‘ᩍᨾᩥᨶᩣᩉᩴ ᨴᩣᨶᩮᨶ ᨸᩣᨿᩣᩈᩥᩴ ᩁᩣᨩᨬ᩠ᨬᨾᩮᩅ ᩍᨾᩈ᩠ᨾᩥᩴ ᩃᩮᩣᨠᩮ ᩈᨾᩣᨣᨧ᩠ᨨᩥᩴ, ᨾᩣ ᨸᩁᩈ᩠ᨾᩥ’’’ᨶ᩠ᨲᩥ. ᩋᨳ ᨡᩮᩣ ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᩏᨲ᩠ᨲᩁᩴ ᨾᩣᨱᩅᩴ ᩌᨾᨶ᩠ᨲᩣᨸᩮᨲ᩠ᩅᩣ ᩑᨲᨴᩅᩮᩣᨧ – ‘‘ᩈᨧ᩠ᨧᩴ ᨠᩥᩁ ᨲ᩠ᩅᩴ, ᨲᩣᨲ ᩏᨲ᩠ᨲᩁ, ᨴᩣᨶᩴ ᨴᨲ᩠ᩅᩣ ᩑᩅᩴ ᩋᨶᩩᨴ᩠ᨴᩥᩈᩈᩥ – ‘ᩍᨾᩥᨶᩣᩉᩴ ᨴᩣᨶᩮᨶ ᨸᩣᨿᩣᩈᩥᩴ ᩁᩣᨩᨬ᩠ᨬᨾᩮᩅ ᩍᨾᩈ᩠ᨾᩥᩴ ᩃᩮᩣᨠᩮ ᩈᨾᩣᨣᨧ᩠ᨨᩥᩴ, ᨾᩣ ᨸᩁᩈ᩠ᨾᩥ’’’ᨶ᩠ᨲᩥ? ‘‘ᩑᩅᩴ, ᨽᩮᩣ’’. ‘‘ᨠᩥᩔ ᨸᨶ ᨲ᩠ᩅᩴ, ᨲᩣᨲ ᩏᨲ᩠ᨲᩁ, ᨴᩣᨶᩴ ᨴᨲ᩠ᩅᩣ ᩑᩅᩴ ᩋᨶᩩᨴ᩠ᨴᩥᩈᩈᩥ – ‘ᩍᨾᩥᨶᩣᩉᩴ ᨴᩣᨶᩮᨶ ᨸᩣᨿᩣᩈᩥᩴ ᩁᩣᨩᨬ᩠ᨬᨾᩮᩅ ᩍᨾᩈ᩠ᨾᩥᩴ ᩃᩮᩣᨠᩮ ᩈᨾᩣᨣᨧ᩠ᨨᩥᩴ, ᨾᩣ ᨸᩁᩈ᩠ᨾᩥ’ᨶ᩠ᨲᩥ? ᨶᨶᩩ ᨾᨿᩴ, ᨲᩣᨲ ᩏᨲ᩠ᨲᩁ, ᨸᩩᨬ᩠ᨬᨲ᩠ᨳᩥᨠᩣ ᨴᩣᨶᩔᩮᩅ ᨹᩃᩴ ᨸᩣᨭᩥᨠᨦ᩠ᨡᩥᨶᩮᩣ’’ᨲᩥ? ‘‘ᨽᩮᩣᨲᩮᩣ ᨡᩮᩣ ᨴᩣᨶᩮ ᩑᩅᩁᩪᨸᩴ ᨽᩮᩣᨩᨶᩴ ᨴᩦᨿᨲᩥ ᨠᨱᩣᨩᨠᩴ ᨻᩥᩃᨦ᩠ᨣᨴᩩᨲᩥᨿᩴ, ᨿᩴ ᨽᩅᩴ ᨸᩣᨴᩣᨸᩥ [ᨸᩣᨴᩣᩈᩥ (ᨠ.)] ᨶ ᩍᨧ᩠ᨨᩮᨿ᩠ᨿ ᩈᨾ᩠ᨹᩩᩈᩥᨲᩩᩴ [ᨨᩩᨸᩥᨲᩩᩴ (ᨸᩦ. ᨠ.)], ᨠᩩᨲᩮᩣ ᨽᩩᨬ᩠ᨩᩥᨲᩩᩴ, ᨵᩮᩣᩁᨠᩣᨶᩥ ᨧ ᩅᨲ᩠ᨳᩣᨶᩥ ᨣᩩᩊᩅᩣᩃᨠᩣᨶᩥ, ᨿᩣᨶᩥ ᨽᩅᩴ ᨸᩣᨴᩣᨸᩥ [ᩋᨧᩥᨲ᩠ᨲᩥᨠᨲᩴ (ᨠ.)] ᨶ ᩍᨧ᩠ᨨᩮᨿ᩠ᨿ ᩈᨾ᩠ᨹᩩᩈᩥᨲᩩᩴ, ᨠᩩᨲᩮᩣ ᨸᩁᩥᨴᩉᩥᨲᩩᩴ. ᨽᩅᩴ ᨡᩮᩣ ᨸᨶᨾ᩠ᩉᩣᨠᩴ ᨸᩥᨿᩮᩣ ᨾᨶᩣᨸᩮᩣ, ᨠᨳᩴ ᨾᨿᩴ ᨾᨶᩣᨸᩴ ᩋᨾᨶᩣᨸᩮᨶ ᩈᩴᨿᩮᩣᨩᩮᨾᩣ’’ᨲᩥ? ‘‘ᨲᩮᨶ ᩉᩥ ᨲ᩠ᩅᩴ, ᨲᩣᨲ ᩏᨲ᩠ᨲᩁ, ᨿᩣᨴᩥᩈᩣᩉᩴ ᨽᩮᩣᨩᨶᩴ ᨽᩩᨬ᩠ᨩᩣᨾᩥ, ᨲᩣᨴᩥᩈᩴ ᨽᩮᩣᨩᨶᩴ ᨸᨭ᩠ᨮᨸᩮᩉᩥ. ᨿᩣᨴᩥᩈᩣᨶᩥ ᨧᩣᩉᩴ ᩅᨲ᩠ᨳᩣᨶᩥ ᨸᩁᩥᨴᩉᩣᨾᩥ, ᨲᩣᨴᩥᩈᩣᨶᩥ ᨧ ᩅᨲ᩠ᨳᩣᨶᩥ ᨸᨭ᩠ᨮᨸᩮᩉᩦ’’ᨲᩥ. ‘‘ᩑᩅᩴ, ᨽᩮᩣ’’ᨲᩥ ᨡᩮᩣ ᩏᨲ᩠ᨲᩁᩮᩣ ᨾᩣᨱᩅᩮᩣ ᨸᩣᨿᩣᩈᩥᩔ ᩁᩣᨩᨬ᩠ᨬᩔ ᨸᨭᩥᩔᩩᨲ᩠ᩅᩣ ᨿᩣᨴᩥᩈᩴ ᨽᩮᩣᨩᨶᩴ ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᨽᩩᨬ᩠ᨩᨲᩥ, ᨲᩣᨴᩥᩈᩴ ᨽᩮᩣᨩᨶᩴ ᨸᨭ᩠ᨮᨸᩮᩈᩥ. ᨿᩣᨴᩥᩈᩣᨶᩥ ᨧ ᩅᨲ᩠ᨳᩣᨶᩥ ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᨸᩁᩥᨴᩉᨲᩥ, ᨲᩣᨴᩥᩈᩣᨶᩥ ᨧ ᩅᨲ᩠ᨳᩣᨶᩥ ᨸᨭ᩠ᨮᨸᩮᩈᩥ.

᪔᪔᪐. ᩋᨳ ᨡᩮᩣ ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᩋᩈᨠ᩠ᨠᨧ᩠ᨧᩴ ᨴᩣᨶᩴ ᨴᨲ᩠ᩅᩣ ᩋᩈᩉᨲ᩠ᨳᩣ ᨴᩣᨶᩴ ᨴᨲ᩠ᩅᩣ ᩋᨧᩥᨲ᩠ᨲᩦᨠᨲᩴ ᨴᩣᨶᩴ ᨴᨲ᩠ᩅᩣ ᩋᨸᩅᩥᨴ᩠ᨵᩴ ᨴᩣᨶᩴ ᨴᨲ᩠ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᨧᩣᨲᩩᨾᩉᩣᩁᩣᨩᩥᨠᩣᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨩ᩠ᨩᩥ ᩈᩩᨬ᩠ᨬᩴ ᩈᩮᩁᩦᩈᨠᩴ ᩅᩥᨾᩣᨶᩴ. ᨿᩮᩣ ᨸᨶ ᨲᩔ ᨴᩣᨶᩮ ᩅᩣᩅᨭᩮᩣ ᩋᩉᩮᩣᩈᩥ ᩏᨲ᩠ᨲᩁᩮᩣ ᨶᩣᨾ ᨾᩣᨱᩅᩮᩣ. ᩈᩮᩣ ᩈᨠ᩠ᨠᨧ᩠ᨧᩴ ᨴᩣᨶᩴ ᨴᨲ᩠ᩅᩣ ᩈᩉᨲ᩠ᨳᩣ ᨴᩣᨶᩴ ᨴᨲ᩠ᩅᩣ ᨧᩥᨲ᩠ᨲᩦᨠᨲᩴ ᨴᩣᨶᩴ ᨴᨲ᩠ᩅᩣ ᩋᨶᨸᩅᩥᨴ᩠ᨵᩴ ᨴᩣᨶᩴ ᨴᨲ᩠ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᩥ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᩉᨻ᩠ᨿᨲᩴ.

ᨸᩣᨿᩣᩈᩥᨴᩮᩅᨸᩩᨲ᩠ᨲᩮᩣ

᪔᪔᪑. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩌᨿᩈ᩠ᨾᩣ ᨣᩅᨾ᩠ᨸᨲᩥ ᩋᨽᩥᨠ᩠ᨡᨱᩴ ᩈᩩᨬ᩠ᨬᩴ ᩈᩮᩁᩦᩈᨠᩴ ᩅᩥᨾᩣᨶᩴ ᨴᩥᩅᩣᩅᩥᩉᩣᩁᩴ ᨣᨧ᩠ᨨᨲᩥ. ᩋᨳ ᨡᩮᩣ ᨸᩣᨿᩣᩈᩥ ᨴᩮᩅᨸᩩᨲ᩠ᨲᩮᩣ ᨿᩮᨶᩣᨿᩈ᩠ᨾᩣ ᨣᩅᨾ᩠ᨸᨲᩥ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᨣᩅᨾ᩠ᨸᨲᩥᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩣᩈᩥ. ᩑᨠᨾᨶ᩠ᨲᩴ ᨮᩥᨲᩴ ᨡᩮᩣ ᨸᩣᨿᩣᩈᩥᩴ ᨴᩮᩅᨸᩩᨲ᩠ᨲᩴ ᩌᨿᩈ᩠ᨾᩣ ᨣᩅᨾ᩠ᨸᨲᩥ ᩑᨲᨴᩅᩮᩣᨧ – ‘‘ᨠᩮᩣᩈᩥ ᨲ᩠ᩅᩴ, ᩌᩅᩩᩈᩮᩣ’’ᨲᩥ? ‘‘ᩋᩉᩴ, ᨽᨶ᩠ᨲᩮ, ᨸᩣᨿᩣᩈᩥ ᩁᩣᨩᨬ᩠ᨬᩮᩣ’’ᨲᩥ. ‘‘ᨶᨶᩩ ᨲ᩠ᩅᩴ, ᩌᩅᩩᩈᩮᩣ, ᩑᩅᩴᨴᩥᨭ᩠ᨮᩥᨠᩮᩣ ᩋᩉᩮᩣᩈᩥ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’’’ᨲᩥ? ‘‘ᩈᨧ᩠ᨧᩣᩉᩴ, ᨽᨶ᩠ᨲᩮ, ᩑᩅᩴᨴᩥᨭ᩠ᨮᩥᨠᩮᩣ ᩋᩉᩮᩣᩈᩥᩴ – ‘ᩍᨲᩥᨸᩥ ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ’ᨲᩥ. ᩋᨸᩥ ᨧᩣᩉᩴ ᩋᨿ᩠ᨿᩮᨶ ᨠᩩᨾᩣᩁᨠᩔᨸᩮᨶ ᩑᨲᩈ᩠ᨾᩣ ᨸᩣᨸᨠᩣ ᨴᩥᨭ᩠ᨮᩥᨣᨲᩣ ᩅᩥᩅᩮᨧᩥᨲᩮᩣ’’ᨲᩥ. ‘‘ᨿᩮᩣ ᨸᨶ ᨲᩮ, ᩌᩅᩩᩈᩮᩣ, ᨴᩣᨶᩮ ᩅᩣᩅᨭᩮᩣ ᩋᩉᩮᩣᩈᩥ ᩏᨲ᩠ᨲᩁᩮᩣ ᨶᩣᨾ ᨾᩣᨱᩅᩮᩣ, ᩈᩮᩣ ᨠᩩᩉᩥᩴ ᩏᨸᨸᨶ᩠ᨶᩮᩣ’’ᨲᩥ? ‘‘ᨿᩮᩣ ᨾᩮ, ᨽᨶ᩠ᨲᩮ, ᨴᩣᨶᩮ ᩅᩣᩅᨭᩮᩣ ᩋᩉᩮᩣᩈᩥ ᩏᨲ᩠ᨲᩁᩮᩣ ᨶᩣᨾ ᨾᩣᨱᩅᩮᩣ, ᩈᩮᩣ ᩈᨠ᩠ᨠᨧ᩠ᨧᩴ ᨴᩣᨶᩴ ᨴᨲ᩠ᩅᩣ ᩈᩉᨲ᩠ᨳᩣ ᨴᩣᨶᩴ ᨴᨲ᩠ᩅᩣ ᨧᩥᨲ᩠ᨲᩦᨠᨲᩴ ᨴᩣᨶᩴ ᨴᨲ᩠ᩅᩣ ᩋᨶᨸᩅᩥᨴ᩠ᨵᩴ ᨴᩣᨶᩴ ᨴᨲ᩠ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨶ᩠ᨶᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᩉᨻ᩠ᨿᨲᩴ. ᩋᩉᩴ ᨸᨶ, ᨽᨶ᩠ᨲᩮ, ᩋᩈᨠ᩠ᨠᨧ᩠ᨧᩴ ᨴᩣᨶᩴ ᨴᨲ᩠ᩅᩣ ᩋᩈᩉᨲ᩠ᨳᩣ ᨴᩣᨶᩴ ᨴᨲ᩠ᩅᩣ ᩋᨧᩥᨲ᩠ᨲᩦᨠᨲᩴ ᨴᩣᨶᩴ ᨴᨲ᩠ᩅᩣ ᩋᨸᩅᩥᨴ᩠ᨵᩴ ᨴᩣᨶᩴ ᨴᨲ᩠ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᨧᩣᨲᩩᨾᩉᩣᩁᩣᨩᩥᨠᩣᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨶ᩠ᨶᩮᩣ ᩈᩩᨬ᩠ᨬᩴ ᩈᩮᩁᩦᩈᨠᩴ ᩅᩥᨾᩣᨶᩴ. ᨲᩮᨶ ᩉᩥ, ᨽᨶ᩠ᨲᩮ ᨣᩅᨾ᩠ᨸᨲᩥ, ᨾᨶᩩᩔᩃᩮᩣᨠᩴ ᨣᨶ᩠ᨲ᩠ᩅᩣ ᩑᩅᨾᩣᩁᩮᩣᨧᩮᩉᩥ – ‘ᩈᨠ᩠ᨠᨧ᩠ᨧᩴ ᨴᩣᨶᩴ ᨴᩮᨳ, ᩈᩉᨲ᩠ᨳᩣ ᨴᩣᨶᩴ ᨴᩮᨳ, ᨧᩥᨲ᩠ᨲᩦᨠᨲᩴ ᨴᩣᨶᩴ ᨴᩮᨳ, ᩋᨶᨸᩅᩥᨴ᩠ᨵᩴ ᨴᩣᨶᩴ ᨴᩮᨳ. ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᩋᩈᨠ᩠ᨠᨧ᩠ᨧᩴ ᨴᩣᨶᩴ ᨴᨲ᩠ᩅᩣ ᩋᩈᩉᨲ᩠ᨳᩣ ᨴᩣᨶᩴ ᨴᨲ᩠ᩅᩣ ᩋᨧᩥᨲ᩠ᨲᩦᨠᨲᩴ ᨴᩣᨶᩴ ᨴᨲ᩠ᩅᩣ ᩋᨸᩅᩥᨴ᩠ᨵᩴ ᨴᩣᨶᩴ ᨴᨲ᩠ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᨧᩣᨲᩩᨾᩉᩣᩁᩣᨩᩥᨠᩣᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨶ᩠ᨶᩮᩣ ᩈᩩᨬ᩠ᨬᩴ ᩈᩮᩁᩦᩈᨠᩴ ᩅᩥᨾᩣᨶᩴ. ᨿᩮᩣ ᨸᨶ ᨲᩔ ᨴᩣᨶᩮ ᩅᩣᩅᨭᩮᩣ ᩋᩉᩮᩣᩈᩥ ᩏᨲ᩠ᨲᩁᩮᩣ ᨶᩣᨾ ᨾᩣᨱᩅᩮᩣ, ᩈᩮᩣ ᩈᨠ᩠ᨠᨧ᩠ᨧᩴ ᨴᩣᨶᩴ ᨴᨲ᩠ᩅᩣ ᩈᩉᨲ᩠ᨳᩣ ᨴᩣᨶᩴ ᨴᨲ᩠ᩅᩣ ᨧᩥᨲ᩠ᨲᩦᨠᨲᩴ ᨴᩣᨶᩴ ᨴᨲ᩠ᩅᩣ ᩋᨶᨸᩅᩥᨴ᩠ᨵᩴ ᨴᩣᨶᩴ ᨴᨲ᩠ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨶ᩠ᨶᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᩉᨻ᩠ᨿᨲ’’’ᨶ᩠ᨲᩥ.

ᩋᨳ ᨡᩮᩣ ᩌᨿᩈ᩠ᨾᩣ ᨣᩅᨾ᩠ᨸᨲᩥ ᨾᨶᩩᩔᩃᩮᩣᨠᩴ ᩌᨣᨶ᩠ᨲ᩠ᩅᩣ ᩑᩅᨾᩣᩁᩮᩣᨧᩮᩈᩥ – ‘‘ᩈᨠ᩠ᨠᨧ᩠ᨧᩴ ᨴᩣᨶᩴ ᨴᩮᨳ, ᩈᩉᨲ᩠ᨳᩣ ᨴᩣᨶᩴ ᨴᩮᨳ, ᨧᩥᨲ᩠ᨲᩦᨠᨲᩴ ᨴᩣᨶᩴ ᨴᩮᨳ, ᩋᨶᨸᩅᩥᨴ᩠ᨵᩴ ᨴᩣᨶᩴ ᨴᩮᨳ. ᨸᩣᨿᩣᩈᩥ ᩁᩣᨩᨬ᩠ᨬᩮᩣ ᩋᩈᨠ᩠ᨠᨧ᩠ᨧᩴ ᨴᩣᨶᩴ ᨴᨲ᩠ᩅᩣ ᩋᩈᩉᨲ᩠ᨳᩣ ᨴᩣᨶᩴ ᨴᨲ᩠ᩅᩣ ᩋᨧᩥᨲ᩠ᨲᩦᨠᨲᩴ ᨴᩣᨶᩴ ᨴᨲ᩠ᩅᩣ ᩋᨸᩅᩥᨴ᩠ᨵᩴ ᨴᩣᨶᩴ ᨴᨲ᩠ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᨧᩣᨲᩩᨾᩉᩣᩁᩣᨩᩥᨠᩣᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨶ᩠ᨶᩮᩣ ᩈᩩᨬ᩠ᨬᩴ ᩈᩮᩁᩦᩈᨠᩴ ᩅᩥᨾᩣᨶᩴ. ᨿᩮᩣ ᨸᨶ ᨲᩔ ᨴᩣᨶᩮ ᩅᩣᩅᨭᩮᩣ ᩋᩉᩮᩣᩈᩥ ᩏᨲ᩠ᨲᩁᩮᩣ ᨶᩣᨾ ᨾᩣᨱᩅᩮᩣ, ᩈᩮᩣ ᩈᨠ᩠ᨠᨧ᩠ᨧᩴ ᨴᩣᨶᩴ ᨴᨲ᩠ᩅᩣ ᩈᩉᨲ᩠ᨳᩣ ᨴᩣᨶᩴ ᨴᨲ᩠ᩅᩣ ᨧᩥᨲ᩠ᨲᩦᨠᨲᩴ ᨴᩣᨶᩴ ᨴᨲ᩠ᩅᩣ ᩋᨶᨸᩅᩥᨴ᩠ᨵᩴ ᨴᩣᨶᩴ ᨴᨲ᩠ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨶ᩠ᨶᩮᩣ ᨴᩮᩅᩣᨶᩴ ᨲᩣᩅᨲᩥᩴᩈᩣᨶᩴ ᩈᩉᨻ᩠ᨿᨲ’’ᨶ᩠ᨲᩥ.

ᨸᩣᨿᩣᩈᩥᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᨴᩈᨾᩴ.

ᨾᩉᩣᩅᨣ᩠ᨣᩮᩣ ᨶᩥᨭ᩠ᨮᩥᨲᩮᩣ.

ᨲᩔᩩᨴ᩠ᨴᩣᨶᩴ –

ᨾᩉᩣᨸᨴᩣᨶ ᨶᩥᨴᩣᨶᩴ, ᨶᩥᨻ᩠ᨻᩣᨶᨬ᩠ᨧ ᩈᩩᨴᩔᨶᩴ;

ᨩᨶᩅᩈᨽ ᨣᩮᩣᩅᩥᨶ᩠ᨴᩴ, ᩈᨾᨿᩴ ᩈᨠ᩠ᨠᨸᨬ᩠ᩉᨠᩴ;

ᨾᩉᩣᩈᨲᩥᨸᨭ᩠ᨮᩣᨶᨬ᩠ᨧ, ᨸᩣᨿᩣᩈᩥ ᨴᩈᨾᩴ ᨽᩅᩮ [ᩈᨲᩥᨸᨭ᩠ᨮᩣᨶᨸᩣᨿᩣᩈᩥ, ᨾᩉᩣᩅᨣ᩠ᨣᩔ ᩈᨦ᩠ᨣᩉᩮᩣ (ᩈᩦ. ᨸᩦ.) ᩈᨲᩥᨸᨭ᩠ᨮᩣᨶᨸᩣᨿᩣᩈᩥ, ᨾᩉᩣᩅᨣ᩠ᨣᩮᩣᨲᩥ ᩅᩩᨧ᩠ᨧᨲᩦᨲᩥ (ᩈ᩠ᨿᩣ.)].

ᨾᩉᩣᩅᨣ᩠ᨣᨸᩣᩊᩥ ᨶᩥᨭ᩠ᨮᩥᨲᩣ.