📜

ᨶᨾᩮᩣ ᨲᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ

ᨴᩦᨥᨶᩥᨠᩣᨿᩮᩣ

ᨸᩣᨳᩥᨠᩅᨣ᩠ᨣᨸᩣᩊᩥ

᪑. ᨸᩣᨳᩥᨠᩈᩩᨲ᩠ᨲᩴ

ᩈᩩᨶᨠ᩠ᨡᨲ᩠ᨲᩅᨲ᩠ᨳᩩ

᪑. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᨾᩃ᩠ᩃᩮᩈᩩ ᩅᩥᩉᩁᨲᩥ ᩋᨶᩩᨸᩥᨿᩴ ᨶᩣᨾ [ᩋᨶᩩᨸ᩠ᨸᩥᨿᩴ ᨶᩣᨾ (ᩈ᩠ᨿᩣ.)] ᨾᩃ᩠ᩃᩣᨶᩴ ᨶᩥᨣᨾᩮᩣ. ᩋᨳ ᨡᩮᩣ ᨽᨣᩅᩣ ᨸᩩᨻ᩠ᨻᨱ᩠ᩉᩈᨾᨿᩴ ᨶᩥᩅᩣᩈᩮᨲ᩠ᩅᩣ ᨸᨲ᩠ᨲᨧᩦᩅᩁᨾᩣᨴᩣᨿ ᩋᨶᩩᨸᩥᨿᩴ ᨸᩥᨱ᩠ᨯᩣᨿ ᨸᩣᩅᩥᩈᩥ. ᩋᨳ ᨡᩮᩣ ᨽᨣᩅᨲᩮᩣ ᩑᨲᨴᩉᩮᩣᩈᩥ – ‘‘ᩋᨲᩥᨸ᩠ᨸᨣᩮᩣ ᨡᩮᩣ ᨲᩣᩅ ᩋᨶᩩᨸᩥᨿᩣᨿᩴ [ᩋᨶᩩᨸᩥᨿᩴ (ᨠ.)] ᨸᩥᨱ᩠ᨯᩣᨿ ᨧᩁᩥᨲᩩᩴ. ᨿᩴᨶᩪᨶᩣᩉᩴ ᨿᩮᨶ ᨽᨣ᩠ᨣᩅᨣᩮᩣᨲ᩠ᨲᩔ ᨸᩁᩥᨻ᩠ᨻᩣᨩᨠᩔ ᩌᩁᩣᨾᩮᩣ, ᨿᩮᨶ ᨽᨣ᩠ᨣᩅᨣᩮᩣᨲ᩠ᨲᩮᩣ ᨸᩁᩥᨻ᩠ᨻᩣᨩᨠᩮᩣ ᨲᩮᨶᩩᨸᩈᨦ᩠ᨠᨾᩮᨿ᩠ᨿ’’ᨶ᩠ᨲᩥ.

᪒. ᩋᨳ ᨡᩮᩣ ᨽᨣᩅᩣ ᨿᩮᨶ ᨽᨣ᩠ᨣᩅᨣᩮᩣᨲ᩠ᨲᩔ ᨸᩁᩥᨻ᩠ᨻᩣᨩᨠᩔ ᩌᩁᩣᨾᩮᩣ, ᨿᩮᨶ ᨽᨣ᩠ᨣᩅᨣᩮᩣᨲ᩠ᨲᩮᩣ ᨸᩁᩥᨻ᩠ᨻᩣᨩᨠᩮᩣ ᨲᩮᨶᩩᨸᩈᨦ᩠ᨠᨾᩥ. ᩋᨳ ᨡᩮᩣ ᨽᨣ᩠ᨣᩅᨣᩮᩣᨲ᩠ᨲᩮᩣ ᨸᩁᩥᨻ᩠ᨻᩣᨩᨠᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩑᨲᩩ ᨡᩮᩣ, ᨽᨶ᩠ᨲᩮ, ᨽᨣᩅᩣ. ᩈ᩠ᩅᩣᨣᨲᩴ, ᨽᨶ᩠ᨲᩮ, ᨽᨣᩅᨲᩮᩣ. ᨧᩥᩁᩔᩴ ᨡᩮᩣ, ᨽᨶ᩠ᨲᩮ, ᨽᨣᩅᩣ ᩍᨾᩴ ᨸᩁᩥᨿᩣᨿᨾᨠᩣᩈᩥ ᨿᨴᩥᨴᩴ ᩍᨵᩣᨣᨾᨶᩣᨿ. ᨶᩥᩈᩦᨴᨲᩩ, ᨽᨶ᩠ᨲᩮ, ᨽᨣᩅᩣ, ᩍᨴᨾᩣᩈᨶᩴ ᨸᨬ᩠ᨬᨲ᩠ᨲ’’ᨶ᩠ᨲᩥ. ᨶᩥᩈᩦᨴᩥ ᨽᨣᩅᩣ ᨸᨬ᩠ᨬᨲ᩠ᨲᩮ ᩌᩈᨶᩮ. ᨽᨣ᩠ᨣᩅᨣᩮᩣᨲ᩠ᨲᩮᩣᨸᩥ ᨡᩮᩣ ᨸᩁᩥᨻ᩠ᨻᩣᨩᨠᩮᩣ ᩋᨬ᩠ᨬᨲᩁᩴ ᨶᩦᨧᩴ ᩌᩈᨶᩴ ᨣᩉᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᨽᨣ᩠ᨣᩅᨣᩮᩣᨲ᩠ᨲᩮᩣ ᨸᩁᩥᨻ᩠ᨻᩣᨩᨠᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᨸᩩᩁᩥᨾᩣᨶᩥ, ᨽᨶ᩠ᨲᩮ, ᨴᩥᩅᩈᩣᨶᩥ ᨸᩩᩁᩥᨾᨲᩁᩣᨶᩥ ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨿᩮᨶᩣᩉᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩴ ᩑᨲᨴᩅᩮᩣᨧ – ‘ᨸᨧ᩠ᨧᨠ᩠ᨡᩣᨲᩮᩣ ᨴᩣᨶᩥ ᨾᨿᩣ, ᨽᨣ᩠ᨣᩅ, ᨽᨣᩅᩣ. ᨶ ᨴᩣᨶᩣᩉᩴ ᨽᨣᩅᨶ᩠ᨲᩴ ᩏᨴ᩠ᨴᩥᩔ ᩅᩥᩉᩁᩣᨾᩦ’ᨲᩥ. ᨠᨧ᩠ᨧᩮᨲᩴ, ᨽᨶ᩠ᨲᩮ, ᨲᨳᩮᩅ, ᨿᨳᩣ ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᩋᩅᨧᩣ’’ᨲᩥ? ‘‘ᨲᨳᩮᩅ ᨡᩮᩣ ᩑᨲᩴ, ᨽᨣ᩠ᨣᩅ, ᨿᨳᩣ ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᩋᩅᨧ’’.

᪓. ᨸᩩᩁᩥᨾᩣᨶᩥ, ᨽᨣ᩠ᨣᩅ, ᨴᩥᩅᩈᩣᨶᩥ ᨸᩩᩁᩥᨾᨲᩁᩣᨶᩥ ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨿᩮᨶᩣᩉᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨾᩴ ᩑᨲᨴᩅᩮᩣᨧ – ‘ᨸᨧ᩠ᨧᨠ᩠ᨡᩣᨾᩥ ᨴᩣᨶᩣᩉᩴ, ᨽᨶ᩠ᨲᩮ, ᨽᨣᩅᨶ᩠ᨲᩴ. ᨶ ᨴᩣᨶᩣᩉᩴ, ᨽᨶ᩠ᨲᩮ, ᨽᨣᩅᨶ᩠ᨲᩴ ᩏᨴ᩠ᨴᩥᩔ ᩅᩥᩉᩁᩥᩔᩣᨾᩦ’ᨲᩥ. ‘ᩑᩅᩴ ᩅᩩᨲ᩠ᨲᩮ, ᩋᩉᩴ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩴ ᩃᩥᨧ᩠ᨨᩅᩥᨸᩩᨲ᩠ᨲᩴ ᩑᨲᨴᩅᩮᩣᨧᩴ – ‘ᩋᨸᩥ ᨶᩩ ᨲᩣᩉᩴ, ᩈᩩᨶᨠ᩠ᨡᨲ᩠ᨲ, ᩑᩅᩴ ᩋᩅᨧᩴ, ᩑᩉᩥ ᨲ᩠ᩅᩴ, ᩈᩩᨶᨠ᩠ᨡᨲ᩠ᨲ, ᨾᨾᩴ ᩏᨴ᩠ᨴᩥᩔ ᩅᩥᩉᩁᩣᩉᩦ’ᨲᩥ? ‘ᨶᩮᩣ ᩉᩮᨲᩴ, ᨽᨶ᩠ᨲᩮ’. ‘ᨲ᩠ᩅᩴ ᩅᩣ ᨸᨶ ᨾᩴ ᩑᩅᩴ ᩋᩅᨧ – ᩋᩉᩴ, ᨽᨶ᩠ᨲᩮ, ᨽᨣᩅᨶ᩠ᨲᩴ ᩏᨴ᩠ᨴᩥᩔ ᩅᩥᩉᩁᩥᩔᩣᨾᩦ’ᨲᩥ? ‘ᨶᩮᩣ ᩉᩮᨲᩴ, ᨽᨶ᩠ᨲᩮ’. ‘ᩍᨲᩥ ᨠᩥᩁ, ᩈᩩᨶᨠ᩠ᨡᨲ᩠ᨲ, ᨶᩮᩅᩣᩉᩴ ᨲᩴ ᩅᨴᩣᨾᩥ – ᩑᩉᩥ ᨲ᩠ᩅᩴ, ᩈᩩᨶᨠ᩠ᨡᨲ᩠ᨲ, ᨾᨾᩴ ᩏᨴ᩠ᨴᩥᩔ ᩅᩥᩉᩁᩣᩉᩦᨲᩥ. ᨶᨸᩥ ᨠᩥᩁ ᨾᩴ ᨲ᩠ᩅᩴ ᩅᨴᩮᩈᩥ – ᩋᩉᩴ, ᨽᨶ᩠ᨲᩮ, ᨽᨣᩅᨶ᩠ᨲᩴ ᩏᨴ᩠ᨴᩥᩔ ᩅᩥᩉᩁᩥᩔᩣᨾᩦᨲᩥ. ᩑᩅᩴ ᩈᨶ᩠ᨲᩮ, ᨾᩮᩣᨥᨸᩩᩁᩥᩈ, ᨠᩮᩣ ᩈᨶ᩠ᨲᩮᩣ ᨠᩴ ᨸᨧ᩠ᨧᩣᨧᩥᨠ᩠ᨡᩈᩥ? ᨸᩔ, ᨾᩮᩣᨥᨸᩩᩁᩥᩈ, ᨿᩣᩅᨬ᩠ᨧ [ᨿᩣᩅ ᨧ (ᨠ.)] ᨲᩮ ᩍᨴᩴ ᩋᨸᩁᨴ᩠ᨵ’ᨶ᩠ᨲᩥ.

᪔. ‘ᨶ ᩉᩥ ᨸᨶ ᨾᩮ, ᨽᨶ᩠ᨲᩮ, ᨽᨣᩅᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩮᩣᨲᩦ’ᨲᩥ. ‘ᩋᨸᩥ ᨶᩩ ᨲᩣᩉᩴ, ᩈᩩᨶᨠ᩠ᨡᨲ᩠ᨲ, ᩑᩅᩴ ᩋᩅᨧᩴ – ᩑᩉᩥ ᨲ᩠ᩅᩴ, ᩈᩩᨶᨠ᩠ᨡᨲ᩠ᨲ, ᨾᨾᩴ ᩏᨴ᩠ᨴᩥᩔ ᩅᩥᩉᩁᩣᩉᩥ, ᩋᩉᩴ ᨲᩮ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩥᩔᩣᨾᩦ’ᨲᩥ? ‘ᨶᩮᩣ ᩉᩮᨲᩴ, ᨽᨶ᩠ᨲᩮ’. ‘ᨲ᩠ᩅᩴ ᩅᩣ ᨸᨶ ᨾᩴ ᩑᩅᩴ ᩋᩅᨧ – ᩋᩉᩴ, ᨽᨶ᩠ᨲᩮ, ᨽᨣᩅᨶ᩠ᨲᩴ ᩏᨴ᩠ᨴᩥᩔ ᩅᩥᩉᩁᩥᩔᩣᨾᩥ, ᨽᨣᩅᩣ ᨾᩮ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩥᩔᨲᩦ’ᨲᩥ? ‘ᨶᩮᩣ ᩉᩮᨲᩴ, ᨽᨶ᩠ᨲᩮ’. ‘ᩍᨲᩥ ᨠᩥᩁ, ᩈᩩᨶᨠ᩠ᨡᨲ᩠ᨲ, ᨶᩮᩅᩣᩉᩴ ᨲᩴ ᩅᨴᩣᨾᩥ – ᩑᩉᩥ ᨲ᩠ᩅᩴ, ᩈᩩᨶᨠ᩠ᨡᨲ᩠ᨲ, ᨾᨾᩴ ᩏᨴ᩠ᨴᩥᩔ ᩅᩥᩉᩁᩣᩉᩥ, ᩋᩉᩴ ᨲᩮ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩥᩔᩣᨾᩦ’ᨲᩥ; ᨶᨸᩥ ᨠᩥᩁ ᨾᩴ ᨲ᩠ᩅᩴ ᩅᨴᩮᩈᩥ – ᩋᩉᩴ, ᨽᨶ᩠ᨲᩮ, ᨽᨣᩅᨶ᩠ᨲᩴ ᩏᨴ᩠ᨴᩥᩔ ᩅᩥᩉᩁᩥᩔᩣᨾᩥ, ᨽᨣᩅᩣ ᨾᩮ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩥᩔᨲᩦ’ᨲᩥ. ᩑᩅᩴ ᩈᨶ᩠ᨲᩮ, ᨾᩮᩣᨥᨸᩩᩁᩥᩈ, ᨠᩮᩣ ᩈᨶ᩠ᨲᩮᩣ ᨠᩴ ᨸᨧ᩠ᨧᩣᨧᩥᨠ᩠ᨡᩈᩥ? ᨲᩴ ᨠᩥᩴ ᨾᨬ᩠ᨬᩈᩥ, ᩈᩩᨶᨠ᩠ᨡᨲ᩠ᨲ, ᨠᨲᩮ ᩅᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩮ ᩋᨠᨲᩮ ᩅᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩮ ᨿᩔᨲ᩠ᨳᩣᨿ ᨾᨿᩣ ᨵᨾ᩠ᨾᩮᩣ ᨴᩮᩈᩥᨲᩮᩣ ᩈᩮᩣ ᨶᩥᨿ᩠ᨿᩣᨲᩥ ᨲᨠ᩠ᨠᩁᩔ ᩈᨾ᩠ᨾᩣ ᨴᩩᨠ᩠ᨡᨠ᩠ᨡᨿᩣᨿᩣ’ᨲᩥ? ‘ᨠᨲᩮ ᩅᩣ, ᨽᨶ᩠ᨲᩮ, ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩮ ᩋᨠᨲᩮ ᩅᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩮ ᨿᩔᨲ᩠ᨳᩣᨿ ᨽᨣᩅᨲᩣ ᨵᨾ᩠ᨾᩮᩣ ᨴᩮᩈᩥᨲᩮᩣ ᩈᩮᩣ ᨶᩥᨿ᩠ᨿᩣᨲᩥ ᨲᨠ᩠ᨠᩁᩔ ᩈᨾ᩠ᨾᩣ ᨴᩩᨠ᩠ᨡᨠ᩠ᨡᨿᩣᨿᩣ’ᨲᩥ. ‘ᩍᨲᩥ ᨠᩥᩁ, ᩈᩩᨶᨠ᩠ᨡᨲ᩠ᨲ, ᨠᨲᩮ ᩅᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩮ, ᩋᨠᨲᩮ ᩅᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩮ, ᨿᩔᨲ᩠ᨳᩣᨿ ᨾᨿᩣ ᨵᨾ᩠ᨾᩮᩣ ᨴᩮᩈᩥᨲᩮᩣ, ᩈᩮᩣ ᨶᩥᨿ᩠ᨿᩣᨲᩥ ᨲᨠ᩠ᨠᩁᩔ ᩈᨾ᩠ᨾᩣ ᨴᩩᨠ᩠ᨡᨠ᩠ᨡᨿᩣᨿ. ᨲᨲᩕ, ᩈᩩᨶᨠ᩠ᨡᨲ᩠ᨲ, ᨠᩥᩴ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᨲᩴ ᨠᩁᩥᩔᨲᩥ? ᨸᩔ, ᨾᩮᩣᨥᨸᩩᩁᩥᩈ, ᨿᩣᩅᨬ᩠ᨧ ᨲᩮ ᩍᨴᩴ ᩋᨸᩁᨴ᩠ᨵ’ᨶ᩠ᨲᩥ.

᪕. ‘ᨶ ᩉᩥ ᨸᨶ ᨾᩮ, ᨽᨶ᩠ᨲᩮ, ᨽᨣᩅᩣ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨲᩦ’ᨲᩥ [ᨸᨬ᩠ᨬᩣᨸᩮᨲᩦᨲᩥ (ᨸᩦ.)]? ‘ᩋᨸᩥ ᨶᩩ ᨲᩣᩉᩴ, ᩈᩩᨶᨠ᩠ᨡᨲ᩠ᨲ, ᩑᩅᩴ ᩋᩅᨧᩴ – ᩑᩉᩥ ᨲ᩠ᩅᩴ, ᩈᩩᨶᨠ᩠ᨡᨲ᩠ᨲ, ᨾᨾᩴ ᩏᨴ᩠ᨴᩥᩔ ᩅᩥᩉᩁᩣᩉᩥ, ᩋᩉᩴ ᨲᩮ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᩔᩣᨾᩦ’ᨲᩥ? ‘ᨶᩮᩣ ᩉᩮᨲᩴ, ᨽᨶ᩠ᨲᩮ’. ‘ᨲ᩠ᩅᩴ ᩅᩣ ᨸᨶ ᨾᩴ ᩑᩅᩴ ᩋᩅᨧ – ᩋᩉᩴ, ᨽᨶ᩠ᨲᩮ, ᨽᨣᩅᨶ᩠ᨲᩴ ᩏᨴ᩠ᨴᩥᩔ ᩅᩥᩉᩁᩥᩔᩣᨾᩥ, ᨽᨣᩅᩣ ᨾᩮ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᩔᨲᩦ’ᨲᩥ? ‘ᨶᩮᩣ ᩉᩮᨲᩴ, ᨽᨶ᩠ᨲᩮ’. ‘ᩍᨲᩥ ᨠᩥᩁ, ᩈᩩᨶᨠ᩠ᨡᨲ᩠ᨲ, ᨶᩮᩅᩣᩉᩴ ᨲᩴ ᩅᨴᩣᨾᩥ – ᩑᩉᩥ ᨲ᩠ᩅᩴ, ᩈᩩᨶᨠ᩠ᨡᨲ᩠ᨲ, ᨾᨾᩴ ᩏᨴ᩠ᨴᩥᩔ ᩅᩥᩉᩁᩣᩉᩥ, ᩋᩉᩴ ᨲᩮ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᩔᩣᨾᩦᨲᩥ. ᨶᨸᩥ ᨠᩥᩁ ᨾᩴ ᨲ᩠ᩅᩴ ᩅᨴᩮᩈᩥ – ᩋᩉᩴ, ᨽᨶ᩠ᨲᩮ, ᨽᨣᩅᨶ᩠ᨲᩴ ᩏᨴ᩠ᨴᩥᩔ ᩅᩥᩉᩁᩥᩔᩣᨾᩥ, ᨽᨣᩅᩣ ᨾᩮ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᩔᨲᩦ’ᨲᩥ. ᩑᩅᩴ ᩈᨶ᩠ᨲᩮ, ᨾᩮᩣᨥᨸᩩᩁᩥᩈ, ᨠᩮᩣ ᩈᨶ᩠ᨲᩮᩣ ᨠᩴ ᨸᨧ᩠ᨧᩣᨧᩥᨠ᩠ᨡᩈᩥ? ᨲᩴ ᨠᩥᩴ ᨾᨬ᩠ᨬᩈᩥ, ᩈᩩᨶᨠ᩠ᨡᨲ᩠ᨲ, ᨸᨬ᩠ᨬᨲ᩠ᨲᩮ ᩅᩣ ᩋᨣ᩠ᨣᨬ᩠ᨬᩮ, ᩋᨸᨬ᩠ᨬᨲ᩠ᨲᩮ ᩅᩣ ᩋᨣ᩠ᨣᨬ᩠ᨬᩮ, ᨿᩔᨲ᩠ᨳᩣᨿ ᨾᨿᩣ ᨵᨾ᩠ᨾᩮᩣ ᨴᩮᩈᩥᨲᩮᩣ, ᩈᩮᩣ ᨶᩥᨿ᩠ᨿᩣᨲᩥ ᨲᨠ᩠ᨠᩁᩔ ᩈᨾ᩠ᨾᩣ ᨴᩩᨠ᩠ᨡᨠ᩠ᨡᨿᩣᨿᩣ’ᨲᩥ? ‘ᨸᨬ᩠ᨬᨲ᩠ᨲᩮ ᩅᩣ, ᨽᨶ᩠ᨲᩮ, ᩋᨣ᩠ᨣᨬ᩠ᨬᩮ, ᩋᨸᨬ᩠ᨬᨲ᩠ᨲᩮ ᩅᩣ ᩋᨣ᩠ᨣᨬ᩠ᨬᩮ, ᨿᩔᨲ᩠ᨳᩣᨿ ᨽᨣᩅᨲᩣ ᨵᨾ᩠ᨾᩮᩣ ᨴᩮᩈᩥᨲᩮᩣ, ᩈᩮᩣ ᨶᩥᨿ᩠ᨿᩣᨲᩥ ᨲᨠ᩠ᨠᩁᩔ ᩈᨾ᩠ᨾᩣ ᨴᩩᨠ᩠ᨡᨠ᩠ᨡᨿᩣᨿᩣ’ᨲᩥ. ‘ᩍᨲᩥ ᨠᩥᩁ, ᩈᩩᨶᨠ᩠ᨡᨲ᩠ᨲ, ᨸᨬ᩠ᨬᨲ᩠ᨲᩮ ᩅᩣ ᩋᨣ᩠ᨣᨬ᩠ᨬᩮ, ᩋᨸᨬ᩠ᨬᨲ᩠ᨲᩮ ᩅᩣ ᩋᨣ᩠ᨣᨬ᩠ᨬᩮ, ᨿᩔᨲ᩠ᨳᩣᨿ ᨾᨿᩣ ᨵᨾ᩠ᨾᩮᩣ ᨴᩮᩈᩥᨲᩮᩣ, ᩈᩮᩣ ᨶᩥᨿ᩠ᨿᩣᨲᩥ ᨲᨠ᩠ᨠᩁᩔ ᩈᨾ᩠ᨾᩣ ᨴᩩᨠ᩠ᨡᨠ᩠ᨡᨿᩣᨿ. ᨲᨲᩕ, ᩈᩩᨶᨠ᩠ᨡᨲ᩠ᨲ, ᨠᩥᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨲ᩠ᨲᩴ ᨠᩁᩥᩔᨲᩥ? ᨸᩔ, ᨾᩮᩣᨥᨸᩩᩁᩥᩈ, ᨿᩣᩅᨬ᩠ᨧ ᨲᩮ ᩍᨴᩴ ᩋᨸᩁᨴ᩠ᨵᩴ’.

᪖. ‘ᩋᨶᩮᨠᨸᩁᩥᨿᩣᨿᩮᨶ ᨡᩮᩣ ᨲᩮ, ᩈᩩᨶᨠ᩠ᨡᨲ᩠ᨲ, ᨾᨾ ᩅᨱ᩠ᨱᩮᩣ ᨽᩣᩈᩥᨲᩮᩣ ᩅᨩ᩠ᨩᩥᨣᩣᨾᩮ – ᩍᨲᩥᨸᩥ ᩈᩮᩣ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩮᩣ ᩈᩩᨣᨲᩮᩣ ᩃᩮᩣᨠᩅᩥᨴᩪ ᩋᨶᩩᨲ᩠ᨲᩁᩮᩣ ᨸᩩᩁᩥᩈᨴᨾ᩠ᨾᩈᩣᩁᨳᩥ ᩈᨲ᩠ᨳᩣ ᨴᩮᩅᨾᨶᩩᩔᩣᨶᩴ ᨻᩩᨴ᩠ᨵᩮᩣ ᨽᨣᩅᩣᨲᩥ. ᩍᨲᩥ ᨡᩮᩣ ᨲᩮ, ᩈᩩᨶᨠ᩠ᨡᨲ᩠ᨲ, ᩋᨶᩮᨠᨸᩁᩥᨿᩣᨿᩮᨶ ᨾᨾ ᩅᨱ᩠ᨱᩮᩣ ᨽᩣᩈᩥᨲᩮᩣ ᩅᨩ᩠ᨩᩥᨣᩣᨾᩮ.

‘ᩋᨶᩮᨠᨸᩁᩥᨿᩣᨿᩮᨶ ᨡᩮᩣ ᨲᩮ, ᩈᩩᨶᨠ᩠ᨡᨲ᩠ᨲ, ᨵᨾ᩠ᨾᩔ ᩅᨱ᩠ᨱᩮᩣ ᨽᩣᩈᩥᨲᩮᩣ ᩅᨩ᩠ᨩᩥᨣᩣᨾᩮ – ᩈ᩠ᩅᩣᨠ᩠ᨡᩣᨲᩮᩣ ᨽᨣᩅᨲᩣ ᨵᨾ᩠ᨾᩮᩣ ᩈᨶ᩠ᨴᩥᨭ᩠ᨮᩥᨠᩮᩣ ᩋᨠᩣᩃᩥᨠᩮᩣ ᩑᩉᩥᨸᩔᩥᨠᩮᩣ ᩒᨸᨶᩮᨿ᩠ᨿᩥᨠᩮᩣ ᨸᨧ᩠ᨧᨲ᩠ᨲᩴ ᩅᩮᨴᩥᨲᨻ᩠ᨻᩮᩣ ᩅᩥᨬ᩠ᨬᩪᩉᩦᨲᩥ. ᩍᨲᩥ ᨡᩮᩣ ᨲᩮ, ᩈᩩᨶᨠ᩠ᨡᨲ᩠ᨲ, ᩋᨶᩮᨠᨸᩁᩥᨿᩣᨿᩮᨶ ᨵᨾ᩠ᨾᩔ ᩅᨱ᩠ᨱᩮᩣ ᨽᩣᩈᩥᨲᩮᩣ ᩅᨩ᩠ᨩᩥᨣᩣᨾᩮ.

‘ᩋᨶᩮᨠᨸᩁᩥᨿᩣᨿᩮᨶ ᨡᩮᩣ ᨲᩮ, ᩈᩩᨶᨠ᩠ᨡᨲ᩠ᨲ, ᩈᨦ᩠ᨥᩔ ᩅᨱ᩠ᨱᩮᩣ ᨽᩣᩈᩥᨲᩮᩣ ᩅᨩ᩠ᨩᩥᨣᩣᨾᩮ – ᩈᩩᨸ᩠ᨸᨭᩥᨸᨶ᩠ᨶᩮᩣ ᨽᨣᩅᨲᩮᩣ ᩈᩣᩅᨠᩈᨦ᩠ᨥᩮᩣ, ᩏᨩᩩᨸ᩠ᨸᨭᩥᨸᨶ᩠ᨶᩮᩣ ᨽᨣᩅᨲᩮᩣ ᩈᩣᩅᨠᩈᨦ᩠ᨥᩮᩣ, ᨬᩣᨿᨸ᩠ᨸᨭᩥᨸᨶ᩠ᨶᩮᩣ ᨽᨣᩅᨲᩮᩣ ᩈᩣᩅᨠᩈᨦ᩠ᨥᩮᩣ, ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩮᩣ ᨽᨣᩅᨲᩮᩣ ᩈᩣᩅᨠᩈᨦ᩠ᨥᩮᩣ, ᨿᨴᩥᨴᩴ ᨧᨲ᩠ᨲᩣᩁᩥ ᨸᩩᩁᩥᩈᨿᩩᨣᩣᨶᩥ ᩋᨭ᩠ᨮ ᨸᩩᩁᩥᩈᨸᩩᨣ᩠ᨣᩃᩣ, ᩑᩈ ᨽᨣᩅᨲᩮᩣ ᩈᩣᩅᨠᩈᨦ᩠ᨥᩮᩣ, ᩌᩉᩩᨶᩮᨿ᩠ᨿᩮᩣ ᨸᩣᩉᩩᨶᩮᨿ᩠ᨿᩮᩣ ᨴᨠ᩠ᨡᩥᨱᩮᨿ᩠ᨿᩮᩣ ᩋᨬ᩠ᨩᩃᩥᨠᩁᨱᩦᨿᩮᩣ ᩋᨶᩩᨲ᩠ᨲᩁᩴ ᨸᩩᨬ᩠ᨬᨠ᩠ᨡᩮᨲ᩠ᨲᩴ ᩃᩮᩣᨠᩔᩣᨲᩥ. ᩍᨲᩥ ᨡᩮᩣ ᨲᩮ, ᩈᩩᨶᨠ᩠ᨡᨲ᩠ᨲ, ᩋᨶᩮᨠᨸᩁᩥᨿᩣᨿᩮᨶ ᩈᨦ᩠ᨥᩔ ᩅᨱ᩠ᨱᩮᩣ ᨽᩣᩈᩥᨲᩮᩣ ᩅᨩ᩠ᨩᩥᨣᩣᨾᩮ.

‘ᩌᩁᩮᩣᨧᨿᩣᨾᩥ ᨡᩮᩣ ᨲᩮ, ᩈᩩᨶᨠ᩠ᨡᨲ᩠ᨲ, ᨸᨭᩥᩅᩮᨴᨿᩣᨾᩥ ᨡᩮᩣ ᨲᩮ, ᩈᩩᨶᨠ᩠ᨡᨲ᩠ᨲ. ᨽᩅᩥᩔᨶ᩠ᨲᩥ ᨡᩮᩣ ᨲᩮ, ᩈᩩᨶᨠ᩠ᨡᨲ᩠ᨲ, ᩅᨲ᩠ᨲᩣᩁᩮᩣ, ᨶᩮᩣ ᩅᩥᩈᩉᩥ ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᩈᨾᨱᩮ ᨣᩮᩣᨲᨾᩮ ᨻᩕᩉ᩠ᨾᨧᩁᩥᨿᩴ ᨧᩁᩥᨲᩩᩴ, ᩈᩮᩣ ᩋᩅᩥᩈᩉᨶ᩠ᨲᩮᩣ ᩈᩥᨠ᩠ᨡᩴ ᨸᨧ᩠ᨧᨠ᩠ᨡᩣᨿ ᩉᩦᨶᩣᨿᩣᩅᨲ᩠ᨲᩮᩣᨲᩥ. ᩍᨲᩥ ᨡᩮᩣ ᨲᩮ, ᩈᩩᨶᨠ᩠ᨡᨲ᩠ᨲ, ᨽᩅᩥᩔᨶ᩠ᨲᩥ ᩅᨲ᩠ᨲᩣᩁᩮᩣ’ᨲᩥ.

ᩑᩅᩴ ᨸᩥ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨾᨿᩣ ᩅᩩᨧ᩠ᨧᨾᩣᨶᩮᩣ ᩋᨸᨠ᩠ᨠᨾᩮᩅ ᩍᨾᩈ᩠ᨾᩣ ᨵᨾ᩠ᨾᩅᩥᨶᨿᩣ, ᨿᨳᩣ ᨲᩴ ᩌᨸᩣᨿᩥᨠᩮᩣ ᨶᩮᩁᨿᩥᨠᩮᩣ.

ᨠᩮᩣᩁᨠ᩠ᨡᨲ᩠ᨲᩥᨿᩅᨲ᩠ᨳᩩ

᪗. ‘‘ᩑᨠᨾᩥᨴᩣᩉᩴ, ᨽᨣ᩠ᨣᩅ, ᩈᨾᨿᩴ ᨳᩪᩃᩪᩈᩩ [ᨻᩩᨾᩪᩈᩩ (ᩈᩦ. ᨸᩦ.)] ᩅᩥᩉᩁᩣᨾᩥ ᩏᨲ᩠ᨲᩁᨠᩣ ᨶᩣᨾ ᨳᩪᩃᩪᨶᩴ ᨶᩥᨣᨾᩮᩣ. ᩋᨳ ᨡ᩠ᩅᩣᩉᩴ, ᨽᨣ᩠ᨣᩅ, ᨸᩩᨻ᩠ᨻᨱ᩠ᩉᩈᨾᨿᩴ ᨶᩥᩅᩣᩈᩮᨲ᩠ᩅᩣ ᨸᨲ᩠ᨲᨧᩦᩅᩁᨾᩣᨴᩣᨿ ᩈᩩᨶᨠ᩠ᨡᨲ᩠ᨲᩮᨶ ᩃᩥᨧ᩠ᨨᩅᩥᨸᩩᨲ᩠ᨲᩮᨶ ᨸᨧ᩠ᨨᩣᩈᨾᨱᩮᨶ ᩏᨲ᩠ᨲᩁᨠᩴ ᨸᩥᨱ᩠ᨯᩣᨿ ᨸᩣᩅᩥᩈᩥᩴ. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩋᨧᩮᩃᩮᩣ ᨠᩮᩣᩁᨠ᩠ᨡᨲ᩠ᨲᩥᨿᩮᩣ ᨠᩩᨠ᩠ᨠᩩᩁᩅᨲᩥᨠᩮᩣ ᨧᨲᩩᨠ᩠ᨠᩩᨱ᩠ᨯᩥᨠᩮᩣ [ᨧᨲᩩᨠᩩᨱ᩠ᨯᩥᨠᩮᩣ (ᩈᩦ. ᨸᩦ.) ᨧᨲᩩᨠᩮᩣᨱ᩠ᨯᩥᨠᩮᩣ (ᩈ᩠ᨿᩣ. ᨠ.)] ᨨᨾᩣᨶᩥᨠᩥᨱ᩠ᨱᩴ ᨽᨠ᩠ᨡᩈᩴ ᨾᩩᨡᩮᨶᩮᩅ ᨡᩣᨴᨲᩥ, ᨾᩩᨡᩮᨶᩮᩅ ᨽᩩᨬ᩠ᨩᨲᩥ. ᩋᨴ᩠ᨴᩈᩣ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᩋᨧᩮᩃᩴ ᨠᩮᩣᩁᨠ᩠ᨡᨲ᩠ᨲᩥᨿᩴ ᨠᩩᨠ᩠ᨠᩩᩁᩅᨲᩥᨠᩴ ᨧᨲᩩᨠ᩠ᨠᩩᨱ᩠ᨯᩥᨠᩴ ᨨᨾᩣᨶᩥᨠᩥᨱ᩠ᨱᩴ ᨽᨠ᩠ᨡᩈᩴ ᨾᩩᨡᩮᨶᩮᩅ ᨡᩣᨴᨶ᩠ᨲᩴ ᨾᩩᨡᩮᨶᩮᩅ ᨽᩩᨬ᩠ᨩᨶ᩠ᨲᩴ. ᨴᩥᩈ᩠ᩅᩣᨶᩔ ᩑᨲᨴᩉᩮᩣᩈᩥ – ‘ᩈᩣᨵᩩᩁᩪᨸᩮᩣ ᩅᨲ, ᨽᩮᩣ, ᩋᨿᩴ [ᩋᩁᩉᩴ (ᩈᩦ. ᩈ᩠ᨿᩣ. ᨸᩦ.)] ᩈᨾᨱᩮᩣ ᨧᨲᩩᨠ᩠ᨠᩩᨱ᩠ᨯᩥᨠᩮᩣ ᨨᨾᩣᨶᩥᨠᩥᨱ᩠ᨱᩴ ᨽᨠ᩠ᨡᩈᩴ ᨾᩩᨡᩮᨶᩮᩅ ᨡᩣᨴᨲᩥ, ᨾᩩᨡᩮᨶᩮᩅ ᨽᩩᨬ᩠ᨩᨲᩦ’ᨲᩥ.

‘‘ᩋᨳ ᨡ᩠ᩅᩣᩉᩴ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩔ ᩃᩥᨧ᩠ᨨᩅᩥᨸᩩᨲ᩠ᨲᩔ ᨧᩮᨲᩈᩣ ᨧᩮᨲᩮᩣᨸᩁᩥᩅᩥᨲᨠ᩠ᨠᨾᨬ᩠ᨬᩣᨿ ᩈᩩᨶᨠ᩠ᨡᨲ᩠ᨲᩴ ᩃᩥᨧ᩠ᨨᩅᩥᨸᩩᨲ᩠ᨲᩴ ᩑᨲᨴᩅᩮᩣᨧᩴ – ‘ᨲ᩠ᩅᨾ᩠ᨸᩥ ᨶᩣᨾ, ᨾᩮᩣᨥᨸᩩᩁᩥᩈ, ᩈᨾᨱᩮᩣ ᩈᨠ᩠ᨿᨸᩩᨲ᩠ᨲᩥᨿᩮᩣ [ᨾᩮᩣᨥᨸᩩᩁᩥᩈ ᩈᨠ᩠ᨿᨸᩩᨲ᩠ᨲᩥᨿᩮᩣ (ᩈᩦ. ᩈ᩠ᨿᩣ. ᨸᩦ.)] ᨸᨭᩥᨩᩣᨶᩥᩔᩈᩦ’ᨲᩥ! ‘ᨠᩥᩴ ᨸᨶ ᨾᩴ, ᨽᨶ᩠ᨲᩮ, ᨽᨣᩅᩣ ᩑᩅᨾᩣᩉ – ‘ᨲ᩠ᩅᨾ᩠ᨸᩥ ᨶᩣᨾ, ᨾᩮᩣᨥᨸᩩᩁᩥᩈ, ᩈᨾᨱᩮᩣ ᩈᨠ᩠ᨿᨸᩩᨲ᩠ᨲᩥᨿᩮᩣ [ᨾᩮᩣᨥᨸᩩᩁᩥᩈ ᩈᨠ᩠ᨿᨸᩩᨲ᩠ᨲᩥᨿᩮᩣ (ᩈᩦ. ᩈ᩠ᨿᩣ. ᨸᩦ.)] ᨸᨭᩥᨩᩣᨶᩥᩔᩈᩦ’ᨲᩥ? ‘ᨶᨶᩩ ᨲᩮ, ᩈᩩᨶᨠ᩠ᨡᨲ᩠ᨲ, ᩍᨾᩴ ᩋᨧᩮᩃᩴ ᨠᩮᩣᩁᨠ᩠ᨡᨲ᩠ᨲᩥᨿᩴ ᨠᩩᨠ᩠ᨠᩩᩁᩅᨲᩥᨠᩴ ᨧᨲᩩᨠ᩠ᨠᩩᨱ᩠ᨯᩥᨠᩴ ᨨᨾᩣᨶᩥᨠᩥᨱ᩠ᨱᩴ ᨽᨠ᩠ᨡᩈᩴ ᨾᩩᨡᩮᨶᩮᩅ ᨡᩣᨴᨶ᩠ᨲᩴ ᨾᩩᨡᩮᨶᩮᩅ ᨽᩩᨬ᩠ᨩᨶ᩠ᨲᩴ ᨴᩥᩈ᩠ᩅᩣᨶ ᩑᨲᨴᩉᩮᩣᩈᩥ – ᩈᩣᨵᩩᩁᩪᨸᩮᩣ ᩅᨲ, ᨽᩮᩣ, ᩋᨿᩴ ᩈᨾᨱᩮᩣ ᨧᨲᩩᨠ᩠ᨠᩩᨱ᩠ᨯᩥᨠᩮᩣ ᨨᨾᩣᨶᩥᨠᩥᨱ᩠ᨱᩴ ᨽᨠ᩠ᨡᩈᩴ ᨾᩩᨡᩮᨶᩮᩅ ᨡᩣᨴᨲᩥ, ᨾᩩᨡᩮᨶᩮᩅ ᨽᩩᨬ᩠ᨩᨲᩦ’ᨲᩥ? ‘ᩑᩅᩴ, ᨽᨶ᩠ᨲᩮ. ᨠᩥᩴ ᨸᨶ, ᨽᨶ᩠ᨲᩮ, ᨽᨣᩅᩣ ᩋᩁᩉᨲ᩠ᨲᩔ ᨾᨧ᩠ᨨᩁᩣᨿᨲᩦ’ᨲᩥ? ‘ᨶ ᨡᩮᩣ ᩋᩉᩴ, ᨾᩮᩣᨥᨸᩩᩁᩥᩈ, ᩋᩁᩉᨲ᩠ᨲᩔ ᨾᨧ᩠ᨨᩁᩣᨿᩣᨾᩥ. ᩋᨸᩥ ᨧ, ᨲᩩᨿ᩠ᩉᩮᩅᩮᨲᩴ ᨸᩣᨸᨠᩴ ᨴᩥᨭ᩠ᨮᩥᨣᨲᩴ ᩏᨸ᩠ᨸᨶ᩠ᨶᩴ, ᨲᩴ ᨸᨩᩉ. ᨾᩣ ᨲᩮ ᩋᩉᩮᩣᩈᩥ ᨴᩦᨥᩁᨲ᩠ᨲᩴ ᩋᩉᩥᨲᩣᨿ ᨴᩩᨠ᩠ᨡᩣᨿ. ᨿᩴ ᨡᩮᩣ ᨸᨶᩮᨲᩴ, ᩈᩩᨶᨠ᩠ᨡᨲ᩠ᨲ, ᨾᨬ᩠ᨬᩈᩥ ᩋᨧᩮᩃᩴ ᨠᩮᩣᩁᨠ᩠ᨡᨲ᩠ᨲᩥᨿᩴ – ᩈᩣᨵᩩᩁᩪᨸᩮᩣ ᩋᨿᩴ ᩈᨾᨱᩮᩣᨲᩥ [ᨾᨬ᩠ᨬᩈᩥ ‘‘ᩋᨧᩮᩃᩮᩣ ᨠᩮᩣᩁᨡᨲ᩠ᨲᩥᨿᩮᩣ ᩈᩣᨵᩩᩁᩪᨸᩮᩣ ᩋᩁᩉᩴ ᩈᨾᨱᩮᩣᨲᩥ’’ (ᩈ᩠ᨿᩣ.)]. ᩈᩮᩣ ᩈᨲ᩠ᨲᨾᩴ ᨴᩥᩅᩈᩴ ᩋᩃᩈᨠᩮᨶ ᨠᩣᩃᨦ᩠ᨠᩁᩥᩔᨲᩥ. ᨠᩣᩃᨦ᩠ᨠᨲᩮᩣ [ᨠᩣᩃᨠᨲᩮᩣ (ᩈᩦ. ᩈ᩠ᨿᩣ. ᨸᩦ.)] ᨧ ᨠᩣᩃᨠᨬ᩠ᨧᩥᨠᩣ [ᨠᩣᩃᨠᨬ᩠ᨩᩣ (ᩈᩦ. ᨸᩦ.), ᨠᩣᩃᨠᨬ᩠ᨩᩥᨠᩣ (ᩈ᩠ᨿᩣ.)] ᨶᩣᨾ ᩋᩈᩩᩁᩣ ᩈᨻ᩠ᨻᨶᩥᩉᩦᨶᩮᩣ ᩋᩈᩩᩁᨠᩣᨿᩮᩣ, ᨲᨲᩕ ᩏᨸᨸᨩ᩠ᨩᩥᩔᨲᩥ. ᨠᩣᩃᨦ᩠ᨠᨲᨬ᩠ᨧ ᨶᩴ ᨻᩦᩁᨱᨲ᩠ᨳᨾ᩠ᨻᨠᩮ ᩈᩩᩈᩣᨶᩮ ᨨᨯ᩠ᨯᩮᩔᨶ᩠ᨲᩥ. ᩌᨠᨦ᩠ᨡᨾᩣᨶᩮᩣ ᨧ ᨲ᩠ᩅᩴ, ᩈᩩᨶᨠ᩠ᨡᨲ᩠ᨲ, ᩋᨧᩮᩃᩴ ᨠᩮᩣᩁᨠ᩠ᨡᨲ᩠ᨲᩥᨿᩴ ᩏᨸᩈᨦ᩠ᨠᨾᩥᨲ᩠ᩅᩣ ᨸᩩᨧ᩠ᨨᩮᨿ᩠ᨿᩣᩈᩥ – ᨩᩣᨶᩣᩈᩥ, ᩌᩅᩩᩈᩮᩣ ᨠᩮᩣᩁᨠ᩠ᨡᨲ᩠ᨲᩥᨿ [ᩋᨧᩮᩃ ᨠᩮᩣᩁᨡᨲ᩠ᨲᩥᨿ (ᨠ.)], ᩋᨲ᩠ᨲᨶᩮᩣ ᨣᨲᩥᨶ᩠ᨲᩥ? ᨮᩣᨶᩴ ᨡᩮᩣ ᨸᨶᩮᨲᩴ, ᩈᩩᨶᨠ᩠ᨡᨲ᩠ᨲ, ᩅᩥᨩ᩠ᨩᨲᩥ ᨿᩴ ᨲᩮ ᩋᨧᩮᩃᩮᩣ ᨠᩮᩣᩁᨠ᩠ᨡᨲ᩠ᨲᩥᨿᩮᩣ ᨻ᩠ᨿᩣᨠᩁᩥᩔᨲᩥ – ᨩᩣᨶᩣᨾᩥ, ᩌᩅᩩᩈᩮᩣ ᩈᩩᨶᨠ᩠ᨡᨲ᩠ᨲ, ᩋᨲ᩠ᨲᨶᩮᩣ ᨣᨲᩥᩴ; ᨠᩣᩃᨠᨬ᩠ᨧᩥᨠᩣ ᨶᩣᨾ ᩋᩈᩩᩁᩣ ᩈᨻ᩠ᨻᨶᩥᩉᩦᨶᩮᩣ ᩋᩈᩩᩁᨠᩣᨿᩮᩣ, ᨲᨲᩕᩣᨾ᩠ᩉᩥ ᩏᨸᨸᨶ᩠ᨶᩮᩣᨲᩥ.

‘‘ᩋᨳ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨿᩮᨶ ᩋᨧᩮᩃᩮᩣ ᨠᩮᩣᩁᨠ᩠ᨡᨲ᩠ᨲᩥᨿᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩋᨧᩮᩃᩴ ᨠᩮᩣᩁᨠ᩠ᨡᨲ᩠ᨲᩥᨿᩴ ᩑᨲᨴᩅᩮᩣᨧ – ‘ᨻ᩠ᨿᩣᨠᨲᩮᩣ ᨡᩮᩣᩈᩥ, ᩌᩅᩩᩈᩮᩣ ᨠᩮᩣᩁᨠ᩠ᨡᨲ᩠ᨲᩥᨿ, ᩈᨾᨱᩮᨶ ᨣᩮᩣᨲᨾᩮᨶ – ᩋᨧᩮᩃᩮᩣ ᨠᩮᩣᩁᨠ᩠ᨡᨲ᩠ᨲᩥᨿᩮᩣ ᩈᨲ᩠ᨲᨾᩴ ᨴᩥᩅᩈᩴ ᩋᩃᩈᨠᩮᨶ ᨠᩣᩃᨦ᩠ᨠᩁᩥᩔᨲᩥ. ᨠᩣᩃᨦ᩠ᨠᨲᩮᩣ ᨧ ᨠᩣᩃᨠᨬ᩠ᨧᩥᨠᩣ ᨶᩣᨾ ᩋᩈᩩᩁᩣ ᩈᨻ᩠ᨻᨶᩥᩉᩦᨶᩮᩣ ᩋᩈᩩᩁᨠᩣᨿᩮᩣ, ᨲᨲᩕ ᩏᨸᨸᨩ᩠ᨩᩥᩔᨲᩥ. ᨠᩣᩃᨦ᩠ᨠᨲᨬ᩠ᨧ ᨶᩴ ᨻᩦᩁᨱᨲ᩠ᨳᨾ᩠ᨻᨠᩮ ᩈᩩᩈᩣᨶᩮ ᨨᨯ᩠ᨯᩮᩔᨶ᩠ᨲᩦ’ᨲᩥ. ᨿᩮᨶ ᨲ᩠ᩅᩴ, ᩌᩅᩩᩈᩮᩣ ᨠᩮᩣᩁᨠ᩠ᨡᨲ᩠ᨲᩥᨿ, ᨾᨲ᩠ᨲᩴ ᨾᨲ᩠ᨲᨬ᩠ᨧ ᨽᨲ᩠ᨲᩴ ᨽᩩᨬ᩠ᨩᩮᨿ᩠ᨿᩣᩈᩥ, ᨾᨲ᩠ᨲᩴ ᨾᨲ᩠ᨲᨬ᩠ᨧ ᨸᩣᨶᩦᨿᩴ ᨸᩥᩅᩮᨿ᩠ᨿᩣᩈᩥ. ᨿᨳᩣ ᩈᨾᨱᩔ ᨣᩮᩣᨲᨾᩔ ᨾᩥᨧ᩠ᨨᩣ ᩋᩔ ᩅᨧᨶ’ᨶ᩠ᨲᩥ.

᪘. ‘‘ᩋᨳ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᩑᨠᨴ᩠ᩅᩦᩉᩥᨠᩣᨿ ᩈᨲ᩠ᨲᩁᨲ᩠ᨲᩥᨶ᩠ᨴᩥᩅᩣᨶᩥ ᨣᨱᩮᩈᩥ, ᨿᨳᩣ ᨲᩴ ᨲᨳᩣᨣᨲᩔ ᩋᩈᨴ᩠ᨴᩉᨾᩣᨶᩮᩣ. ᩋᨳ ᨡᩮᩣ, ᨽᨣ᩠ᨣᩅ, ᩋᨧᩮᩃᩮᩣ ᨠᩮᩣᩁᨠ᩠ᨡᨲ᩠ᨲᩥᨿᩮᩣ ᩈᨲ᩠ᨲᨾᩴ ᨴᩥᩅᩈᩴ ᩋᩃᩈᨠᩮᨶ ᨠᩣᩃᨾᨠᩣᩈᩥ. ᨠᩣᩃᨦ᩠ᨠᨲᩮᩣ ᨧ ᨠᩣᩃᨠᨬ᩠ᨧᩥᨠᩣ ᨶᩣᨾ ᩋᩈᩩᩁᩣ ᩈᨻ᩠ᨻᨶᩥᩉᩦᨶᩮᩣ ᩋᩈᩩᩁᨠᩣᨿᩮᩣ, ᨲᨲᩕ ᩏᨸᨸᨩ᩠ᨩᩥ. ᨠᩣᩃᨦ᩠ᨠᨲᨬ᩠ᨧ ᨶᩴ ᨻᩦᩁᨱᨲ᩠ᨳᨾ᩠ᨻᨠᩮ ᩈᩩᩈᩣᨶᩮ ᨨᨯ᩠ᨯᩮᩈᩩᩴ.

᪙. ‘‘ᩋᩔᩮᩣᩈᩥ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ – ‘ᩋᨧᩮᩃᩮᩣ ᨠᩥᩁ ᨠᩮᩣᩁᨠ᩠ᨡᨲ᩠ᨲᩥᨿᩮᩣ ᩋᩃᩈᨠᩮᨶ ᨠᩣᩃᨦ᩠ᨠᨲᩮᩣ ᨻᩦᩁᨱᨲ᩠ᨳᨾ᩠ᨻᨠᩮ ᩈᩩᩈᩣᨶᩮ ᨨᨯ᩠ᨯᩥᨲᩮᩣ’ᨲᩥ. ᩋᨳ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨿᩮᨶ ᨻᩦᩁᨱᨲ᩠ᨳᨾ᩠ᨻᨠᩴ ᩈᩩᩈᩣᨶᩴ, ᨿᩮᨶ ᩋᨧᩮᩃᩮᩣ ᨠᩮᩣᩁᨠ᩠ᨡᨲ᩠ᨲᩥᨿᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩋᨧᩮᩃᩴ ᨠᩮᩣᩁᨠ᩠ᨡᨲ᩠ᨲᩥᨿᩴ ᨲᩥᨠ᩠ᨡᨲ᩠ᨲᩩᩴ ᨸᩣᨱᩥᨶᩣ ᩌᨠᩮᩣᨭᩮᩈᩥ – ‘ᨩᩣᨶᩣᩈᩥ, ᩌᩅᩩᩈᩮᩣ ᨠᩮᩣᩁᨠ᩠ᨡᨲ᩠ᨲᩥᨿ, ᩋᨲ᩠ᨲᨶᩮᩣ ᨣᨲᩥ’ᨶ᩠ᨲᩥ? ᩋᨳ ᨡᩮᩣ, ᨽᨣ᩠ᨣᩅ, ᩋᨧᩮᩃᩮᩣ ᨠᩮᩣᩁᨠ᩠ᨡᨲ᩠ᨲᩥᨿᩮᩣ ᨸᩣᨱᩥᨶᩣ ᨸᩥᨭ᩠ᨮᩥᩴ ᨸᩁᩥᨸᩩᨬ᩠ᨨᨶ᩠ᨲᩮᩣ ᩅᩩᨭ᩠ᨮᩣᩈᩥ. ‘ᨩᩣᨶᩣᨾᩥ, ᩌᩅᩩᩈᩮᩣ ᩈᩩᨶᨠ᩠ᨡᨲ᩠ᨲ, ᩋᨲ᩠ᨲᨶᩮᩣ ᨣᨲᩥᩴ. ᨠᩣᩃᨠᨬ᩠ᨧᩥᨠᩣ ᨶᩣᨾ ᩋᩈᩩᩁᩣ ᩈᨻ᩠ᨻᨶᩥᩉᩦᨶᩮᩣ ᩋᩈᩩᩁᨠᩣᨿᩮᩣ, ᨲᨲᩕᩣᨾ᩠ᩉᩥ ᩏᨸᨸᨶ᩠ᨶᩮᩣ’ᨲᩥ ᩅᨲ᩠ᩅᩣ ᨲᨲ᩠ᨳᩮᩅ ᩏᨲ᩠ᨲᩣᨶᩮᩣ ᨸᨸᨲᩥ [ᨸᩁᩥᨸᨲᩥ (ᩈ᩠ᨿᩣ. ᨠ.)].

᪑᪐. ‘‘ᩋᨳ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨿᩮᨶᩣᩉᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩴ ᨡᩮᩣ ᩋᩉᩴ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩴ ᩃᩥᨧ᩠ᨨᩅᩥᨸᩩᨲ᩠ᨲᩴ ᩑᨲᨴᩅᩮᩣᨧᩴ – ‘ᨲᩴ ᨠᩥᩴ ᨾᨬ᩠ᨬᩈᩥ, ᩈᩩᨶᨠ᩠ᨡᨲ᩠ᨲ, ᨿᨳᩮᩅ ᨲᩮ ᩋᩉᩴ ᩋᨧᩮᩃᩴ ᨠᩮᩣᩁᨠ᩠ᨡᨲ᩠ᨲᩥᨿᩴ ᩌᩁᨻ᩠ᨽ ᨻ᩠ᨿᩣᨠᩣᩈᩥᩴ, ᨲᨳᩮᩅ ᨲᩴ ᩅᩥᨸᩣᨠᩴ, ᩋᨬ᩠ᨬᨳᩣ ᩅᩣ’ᨲᩥ? ‘ᨿᨳᩮᩅ ᨾᩮ, ᨽᨶ᩠ᨲᩮ, ᨽᨣᩅᩣ ᩋᨧᩮᩃᩴ ᨠᩮᩣᩁᨠ᩠ᨡᨲ᩠ᨲᩥᨿᩴ ᩌᩁᨻ᩠ᨽ ᨻ᩠ᨿᩣᨠᩣᩈᩥ, ᨲᨳᩮᩅ ᨲᩴ ᩅᩥᨸᩣᨠᩴ, ᨶᩮᩣ ᩋᨬ᩠ᨬᨳᩣ’ᨲᩥ. ‘ᨲᩴ ᨠᩥᩴ ᨾᨬ᩠ᨬᩈᩥ, ᩈᩩᨶᨠ᩠ᨡᨲ᩠ᨲ, ᨿᨴᩥ ᩑᩅᩴ ᩈᨶ᩠ᨲᩮ ᨠᨲᩴ ᩅᩣ ᩉᩮᩣᨲᩥ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ, ᩋᨠᨲᩴ ᩅᩣᨲᩥ? ‘ᩋᨴ᩠ᨵᩣ ᨡᩮᩣ, ᨽᨶ᩠ᨲᩮ, ᩑᩅᩴ ᩈᨶ᩠ᨲᩮ ᨠᨲᩴ ᩉᩮᩣᨲᩥ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ, ᨶᩮᩣ ᩋᨠᨲ’ᨶ᩠ᨲᩥ. ‘ᩑᩅᨾ᩠ᨸᩥ ᨡᩮᩣ ᨾᩴ ᨲ᩠ᩅᩴ, ᨾᩮᩣᨥᨸᩩᩁᩥᩈ, ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩮᩣᨶ᩠ᨲᩴ ᩑᩅᩴ ᩅᨴᩮᩈᩥ – ᨶ ᩉᩥ ᨸᨶ ᨾᩮ, ᨽᨶ᩠ᨲᩮ, ᨽᨣᩅᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩮᩣᨲᩦᨲᩥ. ᨸᩔ, ᨾᩮᩣᨥᨸᩩᩁᩥᩈ, ᨿᩣᩅᨬ᩠ᨧ ᨲᩮ ᩍᨴᩴ ᩋᨸᩁᨴ᩠ᨵ’ᨶ᩠ᨲᩥ. ‘‘ᩑᩅᨾ᩠ᨸᩥ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨾᨿᩣ ᩅᩩᨧ᩠ᨧᨾᩣᨶᩮᩣ ᩋᨸᨠ᩠ᨠᨾᩮᩅ ᩍᨾᩈ᩠ᨾᩣ ᨵᨾ᩠ᨾᩅᩥᨶᨿᩣ, ᨿᨳᩣ ᨲᩴ ᩌᨸᩣᨿᩥᨠᩮᩣ ᨶᩮᩁᨿᩥᨠᩮᩣ.

ᩋᨧᩮᩃᨠᩊᩣᩁᨾᨭ᩠ᨭᨠᩅᨲ᩠ᨳᩩ

᪑᪑. ‘‘ᩑᨠᨾᩥᨴᩣᩉᩴ, ᨽᨣ᩠ᨣᩅ, ᩈᨾᨿᩴ ᩅᩮᩈᩣᩃᩥᨿᩴ ᩅᩥᩉᩁᩣᨾᩥ ᨾᩉᩣᩅᨶᩮ ᨠᩪᨭᩣᨣᩣᩁᩈᩣᩃᩣᨿᩴ. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩋᨧᩮᩃᩮᩣ ᨠᩊᩣᩁᨾᨭ᩠ᨭᨠᩮᩣ ᩅᩮᩈᩣᩃᩥᨿᩴ ᨸᨭᩥᩅᩈᨲᩥ ᩃᩣᨽᨣ᩠ᨣᨸ᩠ᨸᨲ᩠ᨲᩮᩣ ᨧᩮᩅ ᨿᩈᨣ᩠ᨣᨸ᩠ᨸᨲ᩠ᨲᩮᩣ ᨧ ᩅᨩ᩠ᨩᩥᨣᩣᨾᩮ. ᨲᩔ ᩈᨲ᩠ᨲᩅᨲᨸᨴᩣᨶᩥ [ᩈᨲ᩠ᨲᩅᨲ᩠ᨲᨸᨴᩣᨶᩥ (ᩈ᩠ᨿᩣ. ᨸᩦ.)] ᩈᨾᨲ᩠ᨲᩣᨶᩥ ᩈᨾᩣᨴᩥᨶ᩠ᨶᩣᨶᩥ ᩉᩮᩣᨶ᩠ᨲᩥ – ‘ᨿᩣᩅᨩᩦᩅᩴ ᩋᨧᩮᩃᨠᩮᩣ ᩋᩔᩴ, ᨶ ᩅᨲ᩠ᨳᩴ ᨸᩁᩥᨴᩉᩮᨿ᩠ᨿᩴ, ᨿᩣᩅᨩᩦᩅᩴ ᨻᩕᩉ᩠ᨾᨧᩣᩁᩦ ᩋᩔᩴ, ᨶ ᨾᩮᨳᩩᨶᩴ ᨵᨾ᩠ᨾᩴ ᨸᨭᩥᩈᩮᩅᩮᨿ᩠ᨿᩴ, ᨿᩣᩅᨩᩦᩅᩴ ᩈᩩᩁᩣᨾᩴᩈᩮᨶᩮᩅ ᨿᩣᨸᩮᨿ᩠ᨿᩴ, ᨶ ᩒᨴᨶᨠᩩᨾ᩠ᨾᩣᩈᩴ ᨽᩩᨬ᩠ᨩᩮᨿ᩠ᨿᩴ. ᨸᩩᩁᨲ᩠ᨳᩥᨾᩮᨶ ᩅᩮᩈᩣᩃᩥᩴ ᩏᨴᩮᨶᩴ ᨶᩣᨾ ᨧᩮᨲᩥᨿᩴ, ᨲᩴ ᨶᩣᨲᩥᨠ᩠ᨠᨾᩮᨿ᩠ᨿᩴ, ᨴᨠ᩠ᨡᩥᨱᩮᨶ ᩅᩮᩈᩣᩃᩥᩴ ᨣᩮᩣᨲᨾᨠᩴ ᨶᩣᨾ ᨧᩮᨲᩥᨿᩴ, ᨲᩴ ᨶᩣᨲᩥᨠ᩠ᨠᨾᩮᨿ᩠ᨿᩴ, ᨸᨧ᩠ᨨᩥᨾᩮᨶ ᩅᩮᩈᩣᩃᩥᩴ ᩈᨲ᩠ᨲᨾ᩠ᨻᩴ ᨶᩣᨾ ᨧᩮᨲᩥᨿᩴ, ᨲᩴ ᨶᩣᨲᩥᨠ᩠ᨠᨾᩮᨿ᩠ᨿᩴ, ᩏᨲ᩠ᨲᩁᩮᨶ ᩅᩮᩈᩣᩃᩥᩴ ᨻᩉᩩᨸᩩᨲ᩠ᨲᩴ ᨶᩣᨾ [ᨻᩉᩩᨸᩩᨲ᩠ᨲᨠᩴ ᨶᩣᨾ (ᩈ᩠ᨿᩣ.)] ᨧᩮᨲᩥᨿᩴ ᨲᩴ ᨶᩣᨲᩥᨠ᩠ᨠᨾᩮᨿ᩠ᨿ’ᨶ᩠ᨲᩥ. ᩈᩮᩣ ᩍᨾᩮᩈᩴ ᩈᨲ᩠ᨲᨶ᩠ᨶᩴ ᩅᨲᨸᨴᩣᨶᩴ ᩈᨾᩣᨴᩣᨶᩉᩮᨲᩩ ᩃᩣᨽᨣ᩠ᨣᨸ᩠ᨸᨲ᩠ᨲᩮᩣ ᨧᩮᩅ ᨿᩈᨣ᩠ᨣᨸ᩠ᨸᨲ᩠ᨲᩮᩣ ᨧ ᩅᨩ᩠ᨩᩥᨣᩣᨾᩮ.

᪑᪒. ‘‘ᩋᨳ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨿᩮᨶ ᩋᨧᩮᩃᩮᩣ ᨠᩊᩣᩁᨾᨭ᩠ᨭᨠᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩋᨧᩮᩃᩴ ᨠᩊᩣᩁᨾᨭ᩠ᨭᨠᩴ ᨸᨬ᩠ᩉᩴ ᩋᨸᩩᨧ᩠ᨨᩥ. ᨲᩔ ᩋᨧᩮᩃᩮᩣ ᨠᩊᩣᩁᨾᨭ᩠ᨭᨠᩮᩣ ᨸᨬ᩠ᩉᩴ ᨸᩩᨭ᩠ᨮᩮᩣ ᨶ ᩈᨾ᩠ᨸᩣᨿᩣᩈᩥ. ᩋᩈᨾ᩠ᨸᩣᨿᨶ᩠ᨲᩮᩣ ᨠᩮᩣᨸᨬ᩠ᨧ ᨴᩮᩣᩈᨬ᩠ᨧ ᩋᨸ᩠ᨸᨧ᩠ᨧᨿᨬ᩠ᨧ ᨸᩣᨲ᩠ᩅᩣᨠᩣᩈᩥ. ᩋᨳ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩔ ᩃᩥᨧ᩠ᨨᩅᩥᨸᩩᨲ᩠ᨲᩔ ᩑᨲᨴᩉᩮᩣᩈᩥ – ‘ᩈᩣᨵᩩᩁᩪᨸᩴ ᩅᨲ ᨽᩮᩣ ᩋᩁᩉᨶ᩠ᨲᩴ ᩈᨾᨱᩴ ᩌᩈᩣᨴᩥᨾ᩠ᩉᩈᩮ [ᩋᩈᩣᨴᩥᨿᩥᨾ᩠ᩉᩈᩮ (ᩈ᩠ᨿᩣ.)]. ᨾᩣ ᩅᨲ ᨶᩮᩣ ᩋᩉᩮᩣᩈᩥ ᨴᩦᨥᩁᨲ᩠ᨲᩴ ᩋᩉᩥᨲᩣᨿ ᨴᩩᨠ᩠ᨡᩣᨿᩣ’ᨲᩥ.

᪑᪓. ‘‘ᩋᨳ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨿᩮᨶᩣᩉᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩴ ᨡᩮᩣ ᩋᩉᩴ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩴ ᩃᩥᨧ᩠ᨨᩅᩥᨸᩩᨲ᩠ᨲᩴ ᩑᨲᨴᩅᩮᩣᨧᩴ – ‘ᨲ᩠ᩅᨾ᩠ᨸᩥ ᨶᩣᨾ, ᨾᩮᩣᨥᨸᩩᩁᩥᩈ, ᩈᨾᨱᩮᩣ ᩈᨠ᩠ᨿᨸᩩᨲ᩠ᨲᩥᨿᩮᩣ ᨸᨭᩥᨩᩣᨶᩥᩔᩈᩦ’ᨲᩥ! ‘ᨠᩥᩴ ᨸᨶ ᨾᩴ, ᨽᨶ᩠ᨲᩮ, ᨽᨣᩅᩣ ᩑᩅᨾᩣᩉ – ᨲ᩠ᩅᨾ᩠ᨸᩥ ᨶᩣᨾ, ᨾᩮᩣᨥᨸᩩᩁᩥᩈ, ᩈᨾᨱᩮᩣ ᩈᨠ᩠ᨿᨸᩩᨲ᩠ᨲᩥᨿᩮᩣ ᨸᨭᩥᨩᩣᨶᩥᩔᩈᩦ’ᨲᩥ? ‘ᨶᨶᩩ ᨲ᩠ᩅᩴ, ᩈᩩᨶᨠ᩠ᨡᨲ᩠ᨲ, ᩋᨧᩮᩃᩴ ᨠᩊᩣᩁᨾᨭ᩠ᨭᨠᩴ ᩏᨸᩈᨦ᩠ᨠᨾᩥᨲ᩠ᩅᩣ ᨸᨬ᩠ᩉᩴ ᩋᨸᩩᨧ᩠ᨨᩥ. ᨲᩔ ᨲᩮ ᩋᨧᩮᩃᩮᩣ ᨠᩊᩣᩁᨾᨭ᩠ᨭᨠᩮᩣ ᨸᨬ᩠ᩉᩴ ᨸᩩᨭ᩠ᨮᩮᩣ ᨶ ᩈᨾ᩠ᨸᩣᨿᩣᩈᩥ. ᩋᩈᨾ᩠ᨸᩣᨿᨶ᩠ᨲᩮᩣ ᨠᩮᩣᨸᨬ᩠ᨧ ᨴᩮᩣᩈᨬ᩠ᨧ ᩋᨸ᩠ᨸᨧ᩠ᨧᨿᨬ᩠ᨧ ᨸᩣᨲ᩠ᩅᩣᨠᩣᩈᩥ. ᨲᩔ ᨲᩮ ᩑᨲᨴᩉᩮᩣᩈᩥ – ‘‘ᩈᩣᨵᩩᩁᩪᨸᩴ ᩅᨲ, ᨽᩮᩣ, ᩋᩁᩉᨶ᩠ᨲᩴ ᩈᨾᨱᩴ ᩌᩈᩣᨴᩥᨾ᩠ᩉᩈᩮ. ᨾᩣ ᩅᨲ ᨶᩮᩣ ᩋᩉᩮᩣᩈᩥ ᨴᩦᨥᩁᨲ᩠ᨲᩴ ᩋᩉᩥᨲᩣᨿ ᨴᩩᨠ᩠ᨡᩣᨿᩣ’ᨲᩥ. ‘ᩑᩅᩴ, ᨽᨶ᩠ᨲᩮ. ᨠᩥᩴ ᨸᨶ, ᨽᨶ᩠ᨲᩮ, ᨽᨣᩅᩣ ᩋᩁᩉᨲ᩠ᨲᩔ ᨾᨧ᩠ᨨᩁᩣᨿᨲᩦ’ᨲᩥ? ‘ᨶ ᨡᩮᩣ ᩋᩉᩴ, ᨾᩮᩣᨥᨸᩩᩁᩥᩈ, ᩋᩁᩉᨲ᩠ᨲᩔ ᨾᨧ᩠ᨨᩁᩣᨿᩣᨾᩥ, ᩋᨸᩥ ᨧ ᨲᩩᨿ᩠ᩉᩮᩅᩮᨲᩴ ᨸᩣᨸᨠᩴ ᨴᩥᨭ᩠ᨮᩥᨣᨲᩴ ᩏᨸ᩠ᨸᨶ᩠ᨶᩴ, ᨲᩴ ᨸᨩᩉ. ᨾᩣ ᨲᩮ ᩋᩉᩮᩣᩈᩥ ᨴᩦᨥᩁᨲ᩠ᨲᩴ ᩋᩉᩥᨲᩣᨿ ᨴᩩᨠ᩠ᨡᩣᨿ. ᨿᩴ ᨡᩮᩣ ᨸᨶᩮᨲᩴ, ᩈᩩᨶᨠ᩠ᨡᨲ᩠ᨲ, ᨾᨬ᩠ᨬᩈᩥ ᩋᨧᩮᩃᩴ ᨠᩊᩣᩁᨾᨭ᩠ᨭᨠᩴ – ᩈᩣᨵᩩᩁᩪᨸᩮᩣ ᩋᨿᩴ [ᩋᩁᩉᩴ (ᩈ᩠ᨿᩣ.)] ᩈᨾᨱᩮᩣᨲᩥ, ᩈᩮᩣ ᨶᨧᩥᩁᩔᩮᩅ ᨸᩁᩥᩉᩥᨲᩮᩣ ᩈᩣᨶᩩᨧᩣᩁᩥᨠᩮᩣ ᩅᩥᨧᩁᨶ᩠ᨲᩮᩣ ᩒᨴᨶᨠᩩᨾ᩠ᨾᩣᩈᩴ ᨽᩩᨬ᩠ᨩᨾᩣᨶᩮᩣ ᩈᨻ᩠ᨻᩣᨶᩮᩅ ᩅᩮᩈᩣᩃᩥᨿᩣᨶᩥ ᨧᩮᨲᩥᨿᩣᨶᩥ ᩈᨾᨲᩥᨠ᩠ᨠᨾᩥᨲ᩠ᩅᩣ ᨿᩈᩣ ᨶᩥᩉᩦᨶᩮᩣ [ᨿᩈᩣᨶᩥᨠᩥᨱ᩠ᨱᩮᩣ (ᨠ.)] ᨠᩣᩃᩴ ᨠᩁᩥᩔᨲᩦ’ᨲᩥ.

‘‘‘ᩋᨳ ᨡᩮᩣ, ᨽᨣ᩠ᨣᩅ, ᩋᨧᩮᩃᩮᩣ ᨠᩊᩣᩁᨾᨭ᩠ᨭᨠᩮᩣ ᨶᨧᩥᩁᩔᩮᩅ ᨸᩁᩥᩉᩥᨲᩮᩣ ᩈᩣᨶᩩᨧᩣᩁᩥᨠᩮᩣ ᩅᩥᨧᩁᨶ᩠ᨲᩮᩣ ᩒᨴᨶᨠᩩᨾ᩠ᨾᩣᩈᩴ ᨽᩩᨬ᩠ᨩᨾᩣᨶᩮᩣ ᩈᨻ᩠ᨻᩣᨶᩮᩅ ᩅᩮᩈᩣᩃᩥᨿᩣᨶᩥ ᨧᩮᨲᩥᨿᩣᨶᩥ ᩈᨾᨲᩥᨠ᩠ᨠᨾᩥᨲ᩠ᩅᩣ ᨿᩈᩣ ᨶᩥᩉᩦᨶᩮᩣ ᨠᩣᩃᨾᨠᩣᩈᩥ.

᪑᪔. ‘‘ᩋᩔᩮᩣᩈᩥ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ – ‘ᩋᨧᩮᩃᩮᩣ ᨠᩥᩁ ᨠᩊᩣᩁᨾᨭ᩠ᨭᨠᩮᩣ ᨸᩁᩥᩉᩥᨲᩮᩣ ᩈᩣᨶᩩᨧᩣᩁᩥᨠᩮᩣ ᩅᩥᨧᩁᨶ᩠ᨲᩮᩣ ᩒᨴᨶᨠᩩᨾ᩠ᨾᩣᩈᩴ ᨽᩩᨬ᩠ᨩᨾᩣᨶᩮᩣ ᩈᨻ᩠ᨻᩣᨶᩮᩅ ᩅᩮᩈᩣᩃᩥᨿᩣᨶᩥ ᨧᩮᨲᩥᨿᩣᨶᩥ ᩈᨾᨲᩥᨠ᩠ᨠᨾᩥᨲ᩠ᩅᩣ ᨿᩈᩣ ᨶᩥᩉᩦᨶᩮᩣ ᨠᩣᩃᨦ᩠ᨠᨲᩮᩣ’ᨲᩥ. ᩋᨳ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨿᩮᨶᩣᩉᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩴ ᨡᩮᩣ ᩋᩉᩴ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩴ ᩃᩥᨧ᩠ᨨᩅᩥᨸᩩᨲ᩠ᨲᩴ ᩑᨲᨴᩅᩮᩣᨧᩴ – ‘ᨲᩴ ᨠᩥᩴ ᨾᨬ᩠ᨬᩈᩥ, ᩈᩩᨶᨠ᩠ᨡᨲ᩠ᨲ, ᨿᨳᩮᩅ ᨲᩮ ᩋᩉᩴ ᩋᨧᩮᩃᩴ ᨠᩊᩣᩁᨾᨭ᩠ᨭᨠᩴ ᩌᩁᨻ᩠ᨽ ᨻ᩠ᨿᩣᨠᩣᩈᩥᩴ, ᨲᨳᩮᩅ ᨲᩴ ᩅᩥᨸᩣᨠᩴ, ᩋᨬ᩠ᨬᨳᩣ ᩅᩣ’ᨲᩥ? ‘ᨿᨳᩮᩅ ᨾᩮ, ᨽᨶ᩠ᨲᩮ, ᨽᨣᩅᩣ ᩋᨧᩮᩃᩴ ᨠᩊᩣᩁᨾᨭ᩠ᨭᨠᩴ ᩌᩁᨻ᩠ᨽ ᨻ᩠ᨿᩣᨠᩣᩈᩥ, ᨲᨳᩮᩅ ᨲᩴ ᩅᩥᨸᩣᨠᩴ, ᨶᩮᩣ ᩋᨬ᩠ᨬᨳᩣ’ᨲᩥ. ‘ᨲᩴ ᨠᩥᩴ ᨾᨬ᩠ᨬᩈᩥ, ᩈᩩᨶᨠ᩠ᨡᨲ᩠ᨲ, ᨿᨴᩥ ᩑᩅᩴ ᩈᨶ᩠ᨲᩮ ᨠᨲᩴ ᩅᩣ ᩉᩮᩣᨲᩥ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᩋᨠᨲᩴ ᩅᩣ’ᨲᩥ? ‘ᩋᨴ᩠ᨵᩣ ᨡᩮᩣ, ᨽᨶ᩠ᨲᩮ, ᩑᩅᩴ ᩈᨶ᩠ᨲᩮ ᨠᨲᩴ ᩉᩮᩣᨲᩥ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ, ᨶᩮᩣ ᩋᨠᨲ’ᨶ᩠ᨲᩥ. ‘ᩑᩅᨾ᩠ᨸᩥ ᨡᩮᩣ ᨾᩴ ᨲ᩠ᩅᩴ, ᨾᩮᩣᨥᨸᩩᩁᩥᩈ, ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩮᩣᨶ᩠ᨲᩴ ᩑᩅᩴ ᩅᨴᩮᩈᩥ – ᨶ ᩉᩥ ᨸᨶ ᨾᩮ, ᨽᨶ᩠ᨲᩮ, ᨽᨣᩅᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩮᩣᨲᩦ’’ᨲᩥ. ᨸᩔ, ᨾᩮᩣᨥᨸᩩᩁᩥᩈ, ᨿᩣᩅᨬ᩠ᨧ ᨲᩮ ᩍᨴᩴ ᩋᨸᩁᨴ᩠ᨵ’ᨶ᩠ᨲᩥ. ‘‘ᩑᩅ’ᨾ᩠ᨸᩥ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨾᨿᩣ ᩅᩩᨧ᩠ᨧᨾᩣᨶᩮᩣ ᩋᨸᨠ᩠ᨠᨾᩮᩅ ᩍᨾᩈ᩠ᨾᩣ ᨵᨾ᩠ᨾᩅᩥᨶᨿᩣ, ᨿᨳᩣ ᨲᩴ ᩌᨸᩣᨿᩥᨠᩮᩣ ᨶᩮᩁᨿᩥᨠᩮᩣ.

ᩋᨧᩮᩃᨸᩣᨳᩥᨠᨸᩩᨲ᩠ᨲᩅᨲ᩠ᨳᩩ

᪑᪕. ‘‘ᩑᨠᨾᩥᨴᩣᩉᩴ, ᨽᨣ᩠ᨣᩅ, ᩈᨾᨿᩴ ᨲᨲ᩠ᨳᩮᩅ ᩅᩮᩈᩣᩃᩥᨿᩴ ᩅᩥᩉᩁᩣᨾᩥ ᨾᩉᩣᩅᨶᩮ ᨠᩪᨭᩣᨣᩣᩁᩈᩣᩃᩣᨿᩴ. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ [ᨸᩣᨭᩥᨠᨸᩩᨲ᩠ᨲᩮᩣ (ᩈᩦ. ᩈ᩠ᨿᩣ. ᨸᩦ.)] ᩅᩮᩈᩣᩃᩥᨿᩴ ᨸᨭᩥᩅᩈᨲᩥ ᩃᩣᨽᨣ᩠ᨣᨸ᩠ᨸᨲ᩠ᨲᩮᩣ ᨧᩮᩅ ᨿᩈᨣ᩠ᨣᨸ᩠ᨸᨲ᩠ᨲᩮᩣ ᨧ ᩅᨩ᩠ᨩᩥᨣᩣᨾᩮ. ᩈᩮᩣ ᩅᩮᩈᩣᩃᩥᨿᩴ ᨸᩁᩥᩈᨲᩥ ᩑᩅᩴ ᩅᩣᨧᩴ ᨽᩣᩈᨲᩥ – ‘ᩈᨾᨱᩮᩣᨸᩥ ᨣᩮᩣᨲᨾᩮᩣ ᨬᩣᨱᩅᩣᨴᩮᩣ, ᩋᩉᨾ᩠ᨸᩥ ᨬᩣᨱᩅᩣᨴᩮᩣ. ᨬᩣᨱᩅᩣᨴᩮᩣ ᨡᩮᩣ ᨸᨶ ᨬᩣᨱᩅᩣᨴᩮᨶ ᩋᩁᩉᨲᩥ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨴᩔᩮᨲᩩᩴ. ᩈᨾᨱᩮᩣ ᨣᩮᩣᨲᨾᩮᩣ ᩏᨸᨯ᩠ᨰᨸᨳᩴ ᩌᨣᨧ᩠ᨨᩮᨿ᩠ᨿ, ᩋᩉᨾ᩠ᨸᩥ ᩏᨸᨯ᩠ᨰᨸᨳᩴ ᨣᨧ᩠ᨨᩮᨿ᩠ᨿᩴ. ᨲᩮ ᨲᨲ᩠ᨳ ᩏᨽᩮᩣᨸᩥ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩮᨿ᩠ᨿᩣᨾ. ᩑᨠᩴ ᨧᩮ ᩈᨾᨱᩮᩣ ᨣᩮᩣᨲᨾᩮᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩥᩔᨲᩥ, ᨴ᩠ᩅᩣᩉᩴ ᨠᩁᩥᩔᩣᨾᩥ. ᨴ᩠ᩅᩮ ᨧᩮ ᩈᨾᨱᩮᩣ ᨣᩮᩣᨲᨾᩮᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩣᨶᩥ ᨠᩁᩥᩔᨲᩥ, ᨧᨲ᩠ᨲᩣᩁᩣᩉᩴ ᨠᩁᩥᩔᩣᨾᩥ. ᨧᨲ᩠ᨲᩣᩁᩥ ᨧᩮ ᩈᨾᨱᩮᩣ ᨣᩮᩣᨲᨾᩮᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩣᨶᩥ ᨠᩁᩥᩔᨲᩥ, ᩋᨭ᩠ᨮᩣᩉᩴ ᨠᩁᩥᩔᩣᨾᩥ. ᩍᨲᩥ ᨿᩣᩅᨲᨠᩴ ᨿᩣᩅᨲᨠᩴ ᩈᨾᨱᩮᩣ ᨣᩮᩣᨲᨾᩮᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩥᩔᨲᩥ, ᨲᨴ᩠ᨴᩥᨣᩩᨱᩴ ᨲᨴ᩠ᨴᩥᨣᩩᨱᩣᩉᩴ ᨠᩁᩥᩔᩣᨾᩦ’ᨲᩥ.

᪑᪖. ‘‘ᩋᨳ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨿᩮᨶᩣᩉᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨾᩴ ᩑᨲᨴᩅᩮᩣᨧ – ‘ᩋᨧᩮᩃᩮᩣ, ᨽᨶ᩠ᨲᩮ, ᨸᩣᨳᩥᨠᨸᩩᨲ᩠ᨲᩮᩣ ᩅᩮᩈᩣᩃᩥᨿᩴ ᨸᨭᩥᩅᩈᨲᩥ ᩃᩣᨽᨣ᩠ᨣᨸ᩠ᨸᨲ᩠ᨲᩮᩣ ᨧᩮᩅ ᨿᩈᨣ᩠ᨣᨸ᩠ᨸᨲ᩠ᨲᩮᩣ ᨧ ᩅᨩ᩠ᨩᩥᨣᩣᨾᩮ. ᩈᩮᩣ ᩅᩮᩈᩣᩃᩥᨿᩴ ᨸᩁᩥᩈᨲᩥ ᩑᩅᩴ ᩅᩣᨧᩴ ᨽᩣᩈᨲᩥ – ᩈᨾᨱᩮᩣᨸᩥ ᨣᩮᩣᨲᨾᩮᩣ ᨬᩣᨱᩅᩣᨴᩮᩣ, ᩋᩉᨾ᩠ᨸᩥ ᨬᩣᨱᩅᩣᨴᩮᩣ. ᨬᩣᨱᩅᩣᨴᩮᩣ ᨡᩮᩣ ᨸᨶ ᨬᩣᨱᩅᩣᨴᩮᨶ ᩋᩁᩉᨲᩥ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨴᩔᩮᨲᩩᩴ. ᩈᨾᨱᩮᩣ ᨣᩮᩣᨲᨾᩮᩣ ᩏᨸᨯ᩠ᨰᨸᨳᩴ ᩌᨣᨧ᩠ᨨᩮᨿ᩠ᨿ, ᩋᩉᨾ᩠ᨸᩥ ᩏᨸᨯ᩠ᨰᨸᨳᩴ ᨣᨧ᩠ᨨᩮᨿ᩠ᨿᩴ. ᨲᩮ ᨲᨲ᩠ᨳ ᩏᨽᩮᩣᨸᩥ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩮᨿ᩠ᨿᩣᨾ. ᩑᨠᩴ ᨧᩮ ᩈᨾᨱᩮᩣ ᨣᩮᩣᨲᨾᩮᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩥᩔᨲᩥ, ᨴ᩠ᩅᩣᩉᩴ ᨠᩁᩥᩔᩣᨾᩥ. ᨴ᩠ᩅᩮ ᨧᩮ ᩈᨾᨱᩮᩣ ᨣᩮᩣᨲᨾᩮᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩣᨶᩥ ᨠᩁᩥᩔᨲᩥ, ᨧᨲ᩠ᨲᩣᩁᩣᩉᩴ ᨠᩁᩥᩔᩣᨾᩥ. ᨧᨲ᩠ᨲᩣᩁᩥ ᨧᩮ ᩈᨾᨱᩮᩣ ᨣᩮᩣᨲᨾᩮᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩣᨶᩥ ᨠᩁᩥᩔᨲᩥ, ᩋᨭ᩠ᨮᩣᩉᩴ ᨠᩁᩥᩔᩣᨾᩥ. ᩍᨲᩥ ᨿᩣᩅᨲᨠᩴ ᨿᩣᩅᨲᨠᩴ ᩈᨾᨱᩮᩣ ᨣᩮᩣᨲᨾᩮᩣ ᩏᨲ᩠ᨲᩁᩥ ᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩥᩔᨲᩥ, ᨲᨴ᩠ᨴᩥᨣᩩᨱᩴ ᨲᨴ᩠ᨴᩥᨣᩩᨱᩣᩉᩴ ᨠᩁᩥᩔᩣᨾᩦ’’ᨲᩥ.

‘‘ᩑᩅᩴ ᩅᩩᨲ᩠ᨲᩮ, ᩋᩉᩴ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩴ ᩃᩥᨧ᩠ᨨᩅᩥᨸᩩᨲ᩠ᨲᩴ ᩑᨲᨴᩅᩮᩣᨧᩴ – ‘ᩋᨽᨻ᩠ᨻᩮᩣ ᨡᩮᩣ, ᩈᩩᨶᨠ᩠ᨡᨲ᩠ᨲ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨾᨾ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᨣᨧ᩠ᨨᩮᨿ᩠ᨿᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿᩣ’ᨲᩥ.

᪑᪗. ‘ᩁᨠ᩠ᨡᨲᩮᨲᩴ, ᨽᨶ᩠ᨲᩮ, ᨽᨣᩅᩣ ᩅᩣᨧᩴ, ᩁᨠ᩠ᨡᨲᩮᨲᩴ ᩈᩩᨣᨲᩮᩣ ᩅᩣᨧ’ᨶ᩠ᨲᩥ. ‘ᨠᩥᩴ ᨸᨶ ᨾᩴ ᨲ᩠ᩅᩴ, ᩈᩩᨶᨠ᩠ᨡᨲ᩠ᨲ, ᩑᩅᩴ ᩅᨴᩮᩈᩥ – ᩁᨠ᩠ᨡᨲᩮᨲᩴ, ᨽᨶ᩠ᨲᩮ, ᨽᨣᩅᩣ ᩅᩣᨧᩴ, ᩁᨠ᩠ᨡᨲᩮᨲᩴ ᩈᩩᨣᨲᩮᩣ ᩅᩣᨧ’ᨶ᩠ᨲᩥ? ‘ᨽᨣᩅᨲᩣ ᨧᩔ, ᨽᨶ᩠ᨲᩮ, ᩑᩈᩣ ᩅᩣᨧᩣ ᩑᨠᩴᩈᩮᨶ ᩒᨵᩣᩁᩥᨲᩣ [ᩒᩅᩣᨴᩥᨲᩣ (ᨠ.)] – ᩋᨽᨻ᩠ᨻᩮᩣ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨾᨾ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᨣᨧ᩠ᨨᩮᨿ᩠ᨿᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿᩣᨲᩥ. ᩋᨧᩮᩃᩮᩣ ᨧ, ᨽᨶ᩠ᨲᩮ, ᨸᩣᨳᩥᨠᨸᩩᨲ᩠ᨲᩮᩣ ᩅᩥᩁᩪᨸᩁᩪᨸᩮᨶ ᨽᨣᩅᨲᩮᩣ ᩈᨾ᩠ᨾᩩᨡᩦᨽᩣᩅᩴ ᩌᨣᨧ᩠ᨨᩮᨿ᩠ᨿ, ᨲᨴᩔ ᨽᨣᩅᨲᩮᩣ ᨾᩩᩈᩣ’ᨲᩥ.

᪑᪘. ‘ᩋᨸᩥ ᨶᩩ, ᩈᩩᨶᨠ᩠ᨡᨲ᩠ᨲ, ᨲᨳᩣᨣᨲᩮᩣ ᨲᩴ ᩅᩣᨧᩴ ᨽᩣᩈᩮᨿ᩠ᨿ ᨿᩣ ᩈᩣ ᩅᩣᨧᩣ ᨴ᩠ᩅᨿᨣᩣᨾᩥᨶᩦ’ᨲᩥ? ‘ᨠᩥᩴ ᨸᨶ, ᨽᨶ᩠ᨲᩮ, ᨽᨣᩅᨲᩣ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨧᩮᨲᩈᩣ ᨧᩮᨲᩮᩣ ᨸᩁᩥᨧ᩠ᨧ ᩅᩥᨴᩥᨲᩮᩣ – ᩋᨽᨻ᩠ᨻᩮᩣ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨾᨾ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᨣᨧ᩠ᨨᩮᨿ᩠ᨿᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿᩣ’ᨲᩥ?

‘ᩏᨴᩣᩉᩩ, ᨴᩮᩅᨲᩣ ᨽᨣᩅᨲᩮᩣ ᩑᨲᨾᨲ᩠ᨳᩴ ᩌᩁᩮᩣᨧᩮᩈᩩᩴ – ᩋᨽᨻ᩠ᨻᩮᩣ, ᨽᨶ᩠ᨲᩮ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨽᨣᩅᨲᩮᩣ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᨣᨧ᩠ᨨᩮᨿ᩠ᨿᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿᩣ’ᨲᩥ?

᪑᪙. ‘ᨧᩮᨲᩈᩣ ᨧᩮᨲᩮᩣ ᨸᩁᩥᨧ᩠ᨧ ᩅᩥᨴᩥᨲᩮᩣ ᨧᩮᩅ ᨾᩮ, ᩈᩩᨶᨠ᩠ᨡᨲ᩠ᨲ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᩋᨽᨻ᩠ᨻᩮᩣ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨾᨾ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᨣᨧ᩠ᨨᩮᨿ᩠ᨿᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿᩣ’ᨲᩥ.

‘ᨴᩮᩅᨲᩣᨸᩥ ᨾᩮ ᩑᨲᨾᨲ᩠ᨳᩴ ᩌᩁᩮᩣᨧᩮᩈᩩᩴ – ᩋᨽᨻ᩠ᨻᩮᩣ, ᨽᨶ᩠ᨲᩮ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨽᨣᩅᨲᩮᩣ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᨣᨧ᩠ᨨᩮᨿ᩠ᨿᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿᩣ’ᨲᩥ.

‘ᩋᨩᩥᨲᩮᩣᨸᩥ ᨶᩣᨾ ᩃᩥᨧ᩠ᨨᩅᩦᨶᩴ ᩈᩮᨶᩣᨸᨲᩥ ᩋᨵᩩᨶᩣ ᨠᩣᩃᨦ᩠ᨠᨲᩮᩣ ᨲᩣᩅᨲᩥᩴᩈᨠᩣᨿᩴ ᩏᨸᨸᨶ᩠ᨶᩮᩣ. ᩈᩮᩣᨸᩥ ᨾᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᨾᩣᩁᩮᩣᨧᩮᩈᩥ – ᩋᩃᨩ᩠ᨩᩦ, ᨽᨶ᩠ᨲᩮ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ; ᨾᩩᩈᩣᩅᩣᨴᩦ, ᨽᨶ᩠ᨲᩮ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ. ᨾᨾ᩠ᨸᩥ, ᨽᨶ᩠ᨲᩮ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨻ᩠ᨿᩣᨠᩣᩈᩥ ᩅᨩ᩠ᨩᩥᨣᩣᨾᩮ – ᩋᨩᩥᨲᩮᩣ ᩃᩥᨧ᩠ᨨᩅᩦᨶᩴ ᩈᩮᨶᩣᨸᨲᩥ ᨾᩉᩣᨶᩥᩁᨿᩴ ᩏᨸᨸᨶ᩠ᨶᩮᩣᨲᩥ. ᨶ ᨡᩮᩣ ᨸᨶᩣᩉᩴ, ᨽᨶ᩠ᨲᩮ, ᨾᩉᩣᨶᩥᩁᨿᩴ ᩏᨸᨸᨶ᩠ᨶᩮᩣ; ᨲᩣᩅᨲᩥᩴᩈᨠᩣᨿᨾ᩠ᩉᩥ ᩏᨸᨸᨶ᩠ᨶᩮᩣ. ᩋᩃᨩ᩠ᨩᩦ, ᨽᨶ᩠ᨲᩮ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ; ᨾᩩᩈᩣᩅᩣᨴᩦ, ᨽᨶ᩠ᨲᩮ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ; ᩋᨽᨻ᩠ᨻᩮᩣ ᨧ, ᨽᨶ᩠ᨲᩮ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨽᨣᩅᨲᩮᩣ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᨣᨧ᩠ᨨᩮᨿ᩠ᨿᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿᩣ’ᨲᩥ.

‘ᩍᨲᩥ ᨡᩮᩣ, ᩈᩩᨶᨠ᩠ᨡᨲ᩠ᨲ, ᨧᩮᨲᩈᩣ ᨧᩮᨲᩮᩣ ᨸᩁᩥᨧ᩠ᨧ ᩅᩥᨴᩥᨲᩮᩣ ᨧᩮᩅ ᨾᩮ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᩋᨽᨻ᩠ᨻᩮᩣ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨾᨾ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᨣᨧ᩠ᨨᩮᨿ᩠ᨿᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿᩣᨲᩥ. ᨴᩮᩅᨲᩣᨸᩥ ᨾᩮ ᩑᨲᨾᨲ᩠ᨳᩴ ᩌᩁᩮᩣᨧᩮᩈᩩᩴ – ᩋᨽᨻ᩠ᨻᩮᩣ, ᨽᨶ᩠ᨲᩮ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨽᨣᩅᨲᩮᩣ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᨣᨧ᩠ᨨᩮᨿ᩠ᨿᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿᩣ’ᨲᩥ.

‘ᩈᩮᩣ ᨡᩮᩣ ᨸᨶᩣᩉᩴ, ᩈᩩᨶᨠ᩠ᨡᨲ᩠ᨲ, ᩅᩮᩈᩣᩃᩥᨿᩴ ᨸᩥᨱ᩠ᨯᩣᨿ ᨧᩁᩥᨲ᩠ᩅᩣ ᨸᨧ᩠ᨨᩣᨽᨲ᩠ᨲᩴ ᨸᩥᨱ᩠ᨯᨸᩣᨲᨸ᩠ᨸᨭᩥᨠ᩠ᨠᨶ᩠ᨲᩮᩣ ᨿᩮᨶ ᩋᨧᩮᩃᩔ ᨸᩣᨳᩥᨠᨸᩩᨲ᩠ᨲᩔ ᩌᩁᩣᨾᩮᩣ ᨲᩮᨶᩩᨸᩈᨦ᩠ᨠᨾᩥᩔᩣᨾᩥ ᨴᩥᩅᩣᩅᩥᩉᩣᩁᩣᨿ. ᨿᩔᨴᩣᨶᩥ ᨲ᩠ᩅᩴ, ᩈᩩᨶᨠ᩠ᨡᨲ᩠ᨲ, ᩍᨧ᩠ᨨᩈᩥ, ᨲᩔ ᩌᩁᩮᩣᨧᩮᩉᩦ’ᨲᩥ.

ᩍᨴ᩠ᨵᩥᨸᩣᨭᩥᩉᩣᩁᩥᨿᨠᨳᩣ

᪒᪐. ‘‘ᩋᨳ ᨡ᩠ᩅᩣᩉᩴ [ᩋᨳ ᨡᩮᩣ ᩈ᩠ᩅᩣᩉᩴ (ᩈ᩠ᨿᩣ.)], ᨽᨣ᩠ᨣᩅ, ᨸᩩᨻ᩠ᨻᨱ᩠ᩉᩈᨾᨿᩴ ᨶᩥᩅᩣᩈᩮᨲ᩠ᩅᩣ ᨸᨲ᩠ᨲᨧᩦᩅᩁᨾᩣᨴᩣᨿ ᩅᩮᩈᩣᩃᩥᩴ ᨸᩥᨱ᩠ᨯᩣᨿ ᨸᩣᩅᩥᩈᩥᩴ. ᩅᩮᩈᩣᩃᩥᨿᩴ ᨸᩥᨱ᩠ᨯᩣᨿ ᨧᩁᩥᨲ᩠ᩅᩣ ᨸᨧ᩠ᨨᩣᨽᨲ᩠ᨲᩴ ᨸᩥᨱ᩠ᨯᨸᩣᨲᨸ᩠ᨸᨭᩥᨠ᩠ᨠᨶ᩠ᨲᩮᩣ ᨿᩮᨶ ᩋᨧᩮᩃᩔ ᨸᩣᨳᩥᨠᨸᩩᨲ᩠ᨲᩔ ᩌᩁᩣᨾᩮᩣ ᨲᩮᨶᩩᨸᩈᨦ᩠ᨠᨾᩥᩴ ᨴᩥᩅᩣᩅᩥᩉᩣᩁᩣᨿ. ᩋᨳ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨲᩁᨾᩣᨶᩁᩪᨸᩮᩣ ᩅᩮᩈᩣᩃᩥᩴ ᨸᩅᩥᩈᩥᨲ᩠ᩅᩣ ᨿᩮᨶ ᩋᨽᩥᨬ᩠ᨬᩣᨲᩣ ᩋᨽᩥᨬ᩠ᨬᩣᨲᩣ ᩃᩥᨧ᩠ᨨᩅᩦ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩋᨽᩥᨬ᩠ᨬᩣᨲᩮ ᩋᨽᩥᨬ᩠ᨬᩣᨲᩮ ᩃᩥᨧ᩠ᨨᩅᩦ ᩑᨲᨴᩅᩮᩣᨧ – ‘ᩑᩈᩣᩅᩩᩈᩮᩣ, ᨽᨣᩅᩣ ᩅᩮᩈᩣᩃᩥᨿᩴ ᨸᩥᨱ᩠ᨯᩣᨿ ᨧᩁᩥᨲ᩠ᩅᩣ ᨸᨧ᩠ᨨᩣᨽᨲ᩠ᨲᩴ ᨸᩥᨱ᩠ᨯᨸᩣᨲᨸ᩠ᨸᨭᩥᨠ᩠ᨠᨶ᩠ᨲᩮᩣ ᨿᩮᨶ ᩋᨧᩮᩃᩔ ᨸᩣᨳᩥᨠᨸᩩᨲ᩠ᨲᩔ ᩌᩁᩣᨾᩮᩣ ᨲᩮᨶᩩᨸᩈᨦ᩠ᨠᨾᩥ ᨴᩥᩅᩣᩅᩥᩉᩣᩁᩣᨿ. ᩋᨽᩥᨠ᩠ᨠᨾᨳᩣᨿᩈ᩠ᨾᨶ᩠ᨲᩮᩣ ᩋᨽᩥᨠ᩠ᨠᨾᨳᩣᨿᩈ᩠ᨾᨶ᩠ᨲᩮᩣ, ᩈᩣᨵᩩᩁᩪᨸᩣᨶᩴ ᩈᨾᨱᩣᨶᩴ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨽᩅᩥᩔᨲᩦ’ᨲᩥ. ᩋᨳ ᨡᩮᩣ, ᨽᨣ᩠ᨣᩅ, ᩋᨽᩥᨬ᩠ᨬᩣᨲᩣᨶᩴ ᩋᨽᩥᨬ᩠ᨬᩣᨲᩣᨶᩴ ᩃᩥᨧ᩠ᨨᩅᩦᨶᩴ ᩑᨲᨴᩉᩮᩣᩈᩥ – ‘ᩈᩣᨵᩩᩁᩪᨸᩣᨶᩴ ᨠᩥᩁ, ᨽᩮᩣ, ᩈᨾᨱᩣᨶᩴ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨽᩅᩥᩔᨲᩥ; ᩉᨶ᩠ᨴ ᩅᨲ, ᨽᩮᩣ, ᨣᨧ᩠ᨨᩣᨾᩣ’ᨲᩥ. ᨿᩮᨶ ᨧ ᩋᨽᩥᨬ᩠ᨬᩣᨲᩣ ᩋᨽᩥᨬ᩠ᨬᩣᨲᩣ ᨻᩕᩣᩉ᩠ᨾᨱᨾᩉᩣᩈᩣᩃᩣ ᨣᩉᨸᨲᩥᨶᩮᨧᨿᩥᨠᩣ ᨶᩣᨶᩣᨲᩥᨲ᩠ᨳᩥᨿᩣ [ᨶᩣᨶᩣᨲᩥᨲ᩠ᨳᩥᨿ (ᩈ᩠ᨿᩣ.)] ᩈᨾᨱᨻᩕᩣᩉ᩠ᨾᨱᩣ ᨲᩮᨶᩩᨸᩈᨦ᩠ᨠᨾᩥ. ᩏᨸᩈᨦ᩠ᨠᨾᩥᨲ᩠ᩅᩣ ᩋᨽᩥᨬ᩠ᨬᩣᨲᩮ ᩋᨽᩥᨬ᩠ᨬᩣᨲᩮ ᨶᩣᨶᩣᨲᩥᨲ᩠ᨳᩥᨿᩮ [ᨶᩣᨶᩣᨲᩥᨲ᩠ᨳᩥᨿ (ᩈ᩠ᨿᩣ.)] ᩈᨾᨱᨻᩕᩣᩉ᩠ᨾᨱᩮ ᩑᨲᨴᩅᩮᩣᨧ – ‘ᩑᩈᩣᩅᩩᩈᩮᩣ, ᨽᨣᩅᩣ ᩅᩮᩈᩣᩃᩥᨿᩴ ᨸᩥᨱ᩠ᨯᩣᨿ ᨧᩁᩥᨲ᩠ᩅᩣ ᨸᨧ᩠ᨨᩣᨽᨲ᩠ᨲᩴ ᨸᩥᨱ᩠ᨯᨸᩣᨲᨸ᩠ᨸᨭᩥᨠ᩠ᨠᨶ᩠ᨲᩮᩣ ᨿᩮᨶ ᩋᨧᩮᩃᩔ ᨸᩣᨳᩥᨠᨸᩩᨲ᩠ᨲᩔ ᩌᩁᩣᨾᩮᩣ ᨲᩮᨶᩩᨸᩈᨦ᩠ᨠᨾᩥ ᨴᩥᩅᩣᩅᩥᩉᩣᩁᩣᨿ. ᩋᨽᩥᨠ᩠ᨠᨾᨳᩣᨿᩈ᩠ᨾᨶ᩠ᨲᩮᩣ ᩋᨽᩥᨠ᩠ᨠᨾᨳᩣᨿᩈ᩠ᨾᨶ᩠ᨲᩮᩣ, ᩈᩣᨵᩩᩁᩪᨸᩣᨶᩴ ᩈᨾᨱᩣᨶᩴ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨽᩅᩥᩔᨲᩦ’ᨲᩥ. ᩋᨳ ᨡᩮᩣ, ᨽᨣ᩠ᨣᩅ, ᩋᨽᩥᨬ᩠ᨬᩣᨲᩣᨶᩴ ᩋᨽᩥᨬ᩠ᨬᩣᨲᩣᨶᩴ ᨶᩣᨶᩣᨲᩥᨲ᩠ᨳᩥᨿᩣᨶᩴ ᩈᨾᨱᨻᩕᩣᩉ᩠ᨾᨱᩣᨶᩴ ᩑᨲᨴᩉᩮᩣᩈᩥ – ‘ᩈᩣᨵᩩᩁᩪᨸᩣᨶᩴ ᨠᩥᩁ, ᨽᩮᩣ, ᩈᨾᨱᩣᨶᩴ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨽᩅᩥᩔᨲᩥ; ᩉᨶ᩠ᨴ ᩅᨲ, ᨽᩮᩣ, ᨣᨧ᩠ᨨᩣᨾᩣ’ᨲᩥ.

‘‘ᩋᨳ ᨡᩮᩣ, ᨽᨣ᩠ᨣᩅ, ᩋᨽᩥᨬ᩠ᨬᩣᨲᩣ ᩋᨽᩥᨬ᩠ᨬᩣᨲᩣ ᩃᩥᨧ᩠ᨨᩅᩦ, ᩋᨽᩥᨬ᩠ᨬᩣᨲᩣ ᩋᨽᩥᨬ᩠ᨬᩣᨲᩣ ᨧ ᨻᩕᩣᩉ᩠ᨾᨱᨾᩉᩣᩈᩣᩃᩣ ᨣᩉᨸᨲᩥᨶᩮᨧᨿᩥᨠᩣ ᨶᩣᨶᩣᨲᩥᨲ᩠ᨳᩥᨿᩣ ᩈᨾᨱᨻᩕᩣᩉ᩠ᨾᨱᩣ ᨿᩮᨶ ᩋᨧᩮᩃᩔ ᨸᩣᨳᩥᨠᨸᩩᨲ᩠ᨲᩔ ᩌᩁᩣᨾᩮᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ. ᩈᩣ ᩑᩈᩣ, ᨽᨣ᩠ᨣᩅ, ᨸᩁᩥᩈᩣ ᨾᩉᩣ ᩉᩮᩣᨲᩥ [ᨸᩁᩥᩈᩣ ᩉᩮᩣᨲᩥ (ᩈᩦ. ᩈ᩠ᨿᩣ. ᨸᩦ.)] ᩋᨶᩮᨠᩈᨲᩣ ᩋᨶᩮᨠᩈᩉᩔᩣ.

᪒᪑. ‘‘ᩋᩔᩮᩣᩈᩥ ᨡᩮᩣ, ᨽᨣ᩠ᨣᩅ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ – ‘ᩋᨽᩥᨠ᩠ᨠᨶ᩠ᨲᩣ ᨠᩥᩁ ᩋᨽᩥᨬ᩠ᨬᩣᨲᩣ ᩋᨽᩥᨬ᩠ᨬᩣᨲᩣ ᩃᩥᨧ᩠ᨨᩅᩦ, ᩋᨽᩥᨠ᩠ᨠᨶ᩠ᨲᩣ ᩋᨽᩥᨬ᩠ᨬᩣᨲᩣ ᩋᨽᩥᨬ᩠ᨬᩣᨲᩣ ᨧ ᨻᩕᩣᩉ᩠ᨾᨱᨾᩉᩣᩈᩣᩃᩣ ᨣᩉᨸᨲᩥᨶᩮᨧᨿᩥᨠᩣ ᨶᩣᨶᩣᨲᩥᨲ᩠ᨳᩥᨿᩣ ᩈᨾᨱᨻᩕᩣᩉ᩠ᨾᨱᩣ. ᩈᨾᨱᩮᩣᨸᩥ ᨣᩮᩣᨲᨾᩮᩣ ᨾᨿ᩠ᩉᩴ ᩌᩁᩣᨾᩮ ᨴᩥᩅᩣᩅᩥᩉᩣᩁᩴ ᨶᩥᩈᩥᨶ᩠ᨶᩮᩣ’ᨲᩥ. ᩈᩩᨲ᩠ᩅᩣᨶᩔ ᨽᨿᩴ ᨨᨾ᩠ᨽᩥᨲᨲ᩠ᨲᩴ ᩃᩮᩣᨾᩉᩴᩈᩮᩣ ᩏᨴᨸᩣᨴᩥ. ᩋᨳ ᨡᩮᩣ, ᨽᨣ᩠ᨣᩅ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨽᩦᨲᩮᩣ ᩈᩴᩅᩥᨣ᩠ᨣᩮᩣ ᩃᩮᩣᨾᩉᨭ᩠ᨮᨩᩣᨲᩮᩣ ᨿᩮᨶ ᨲᩥᨶ᩠ᨴᩩᨠᨡᩣᨱᩩᨸᩁᩥᨻ᩠ᨻᩣᨩᨠᩣᩁᩣᨾᩮᩣ ᨲᩮᨶᩩᨸᩈᨦ᩠ᨠᨾᩥ.

‘‘ᩋᩔᩮᩣᩈᩥ ᨡᩮᩣ, ᨽᨣ᩠ᨣᩅ, ᩈᩣ ᨸᩁᩥᩈᩣ – ‘ᩋᨧᩮᩃᩮᩣ ᨠᩥᩁ ᨸᩣᨳᩥᨠᨸᩩᨲ᩠ᨲᩮᩣ ᨽᩦᨲᩮᩣ ᩈᩴᩅᩥᨣ᩠ᨣᩮᩣ ᩃᩮᩣᨾᩉᨭ᩠ᨮᨩᩣᨲᩮᩣ ᨿᩮᨶ ᨲᩥᨶ᩠ᨴᩩᨠᨡᩣᨱᩩᨸᩁᩥᨻ᩠ᨻᩣᨩᨠᩣᩁᩣᨾᩮᩣ ᨲᩮᨶᩩᨸᩈᨦ᩠ᨠᨶ᩠ᨲᩮᩣ’ᨲᩥ [ᨲᩮᨶᩩᨸᩈᨦ᩠ᨠᨾᨶ᩠ᨲᩮᩣ (ᩈᩦ. ᨸᩦ. ᨠ.)]. ᩋᨳ ᨡᩮᩣ, ᨽᨣ᩠ᨣᩅ, ᩈᩣ ᨸᩁᩥᩈᩣ ᩋᨬ᩠ᨬᨲᩁᩴ ᨸᩩᩁᩥᩈᩴ ᩌᨾᨶ᩠ᨲᩮᩈᩥ –

‘ᩑᩉᩥ ᨲ᩠ᩅᩴ, ᨽᩮᩣ ᨸᩩᩁᩥᩈ, ᨿᩮᨶ ᨲᩥᨶ᩠ᨴᩩᨠᨡᩣᨱᩩᨸᩁᩥᨻ᩠ᨻᩣᨩᨠᩣᩁᩣᨾᩮᩣ, ᨿᩮᨶ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩮᨶᩩᨸᩈᨦ᩠ᨠᨾ. ᩏᨸᩈᨦ᩠ᨠᨾᩥᨲ᩠ᩅᩣ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᩑᩅᩴ ᩅᨴᩮᩉᩥ – ᩋᨽᩥᨠ᩠ᨠᨾᩣᩅᩩᩈᩮᩣ, ᨸᩣᨳᩥᨠᨸᩩᨲ᩠ᨲ, ᩋᨽᩥᨠ᩠ᨠᨶ᩠ᨲᩣ ᩋᨽᩥᨬ᩠ᨬᩣᨲᩣ ᩋᨽᩥᨬ᩠ᨬᩣᨲᩣ ᩃᩥᨧ᩠ᨨᩅᩦ, ᩋᨽᩥᨠ᩠ᨠᨶ᩠ᨲᩣ ᩋᨽᩥᨬ᩠ᨬᩣᨲᩣ ᩋᨽᩥᨬ᩠ᨬᩣᨲᩣ ᨧ ᨻᩕᩣᩉ᩠ᨾᨱᨾᩉᩣᩈᩣᩃᩣ ᨣᩉᨸᨲᩥᨶᩮᨧᨿᩥᨠᩣ ᨶᩣᨶᩣᨲᩥᨲ᩠ᨳᩥᨿᩣ ᩈᨾᨱᨻᩕᩣᩉ᩠ᨾᨱᩣ, ᩈᨾᨱᩮᩣᨸᩥ ᨣᩮᩣᨲᨾᩮᩣ ᩌᨿᩈ᩠ᨾᨲᩮᩣ ᩌᩁᩣᨾᩮ ᨴᩥᩅᩣᩅᩥᩉᩣᩁᩴ ᨶᩥᩈᩥᨶ᩠ᨶᩮᩣ; ᨽᩣᩈᩥᨲᩣ ᨡᩮᩣ ᨸᨶ ᨲᩮ ᩑᩈᩣ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩅᩮᩈᩣᩃᩥᨿᩴ ᨸᩁᩥᩈᨲᩥ ᩅᩣᨧᩣ ᩈᨾᨱᩮᩣᨸᩥ ᨣᩮᩣᨲᨾᩮᩣ ᨬᩣᨱᩅᩣᨴᩮᩣ, ᩋᩉᨾ᩠ᨸᩥ ᨬᩣᨱᩅᩣᨴᩮᩣ. ᨬᩣᨱᩅᩣᨴᩮᩣ ᨡᩮᩣ ᨸᨶ ᨬᩣᨱᩅᩣᨴᩮᨶ ᩋᩁᩉᨲᩥ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨴᩔᩮᨲᩩᩴ. ᩈᨾᨱᩮᩣ ᨣᩮᩣᨲᨾᩮᩣ ᩏᨸᨯ᩠ᨰᨸᨳᩴ ᩌᨣᨧ᩠ᨨᩮᨿ᩠ᨿ ᩋᩉᨾ᩠ᨸᩥ ᩏᨸᨯ᩠ᨰᨸᨳᩴ ᨣᨧ᩠ᨨᩮᨿ᩠ᨿᩴ. ᨲᩮ ᨲᨲ᩠ᨳ ᩏᨽᩮᩣᨸᩥ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩮᨿ᩠ᨿᩣᨾ. ᩑᨠᩴ ᨧᩮ ᩈᨾᨱᩮᩣ ᨣᩮᩣᨲᨾᩮᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩥᩔᨲᩥ, ᨴ᩠ᩅᩣᩉᩴ ᨠᩁᩥᩔᩣᨾᩥ. ᨴ᩠ᩅᩮ ᨧᩮ ᩈᨾᨱᩮᩣ ᨣᩮᩣᨲᨾᩮᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩣᨶᩥ ᨠᩁᩥᩔᨲᩥ, ᨧᨲ᩠ᨲᩣᩁᩣᩉᩴ ᨠᩁᩥᩔᩣᨾᩥ. ᨧᨲ᩠ᨲᩣᩁᩥ ᨧᩮ ᩈᨾᨱᩮᩣ ᨣᩮᩣᨲᨾᩮᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩣᨶᩥ ᨠᩁᩥᩔᨲᩥ, ᩋᨭ᩠ᨮᩣᩉᩴ ᨠᩁᩥᩔᩣᨾᩥ. ᩍᨲᩥ ᨿᩣᩅᨲᨠᩴ ᨿᩣᩅᨲᨠᩴ ᩈᨾᨱᩮᩣ ᨣᩮᩣᨲᨾᩮᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩥᩔᨲᩥ, ᨲᨴ᩠ᨴᩥᨣᩩᨱᩴ ᨲᨴ᩠ᨴᩥᨣᩩᨱᩣᩉᩴ ᨠᩁᩥᩔᩣᨾᩦ’ᨲᩥ ᩋᨽᩥᨠ᩠ᨠᨾᩔᩮᩅ [ᩋᨽᩥᨠ᩠ᨠᨾᨿᩮᩅ (ᩈᩦ. ᩈ᩠ᨿᩣ. ᨸᩦ.)] ᨡᩮᩣ; ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩏᨸᨯ᩠ᨰᨸᨳᩴ. ᩈᨻ᩠ᨻᨸᨮᨾᩴᨿᩮᩅ ᩌᨣᨶ᩠ᨲ᩠ᩅᩣ ᩈᨾᨱᩮᩣ ᨣᩮᩣᨲᨾᩮᩣ ᩌᨿᩈ᩠ᨾᨲᩮᩣ ᩌᩁᩣᨾᩮ ᨴᩥᩅᩣᩅᩥᩉᩣᩁᩴ ᨶᩥᩈᩥᨶ᩠ᨶᩮᩣ’ᨲᩥ.

᪒᪒. ‘‘ᩑᩅᩴ, ᨽᩮᩣᨲᩥ ᨡᩮᩣ, ᨽᨣ᩠ᨣᩅ, ᩈᩮᩣ ᨸᩩᩁᩥᩈᩮᩣ ᨲᩔᩣ ᨸᩁᩥᩈᩣᨿ ᨸᨭᩥᩔᩩᨲ᩠ᩅᩣ ᨿᩮᨶ ᨲᩥᨶ᩠ᨴᩩᨠᨡᩣᨱᩩᨸᩁᩥᨻ᩠ᨻᩣᨩᨠᩣᩁᩣᨾᩮᩣ, ᨿᩮᨶ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩮᨶᩩᨸᩈᨦ᩠ᨠᨾᩥ. ᩏᨸᩈᨦ᩠ᨠᨾᩥᨲ᩠ᩅᩣ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᩑᨲᨴᩅᩮᩣᨧ – ‘ᩋᨽᩥᨠ᩠ᨠᨾᩣᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩋᨽᩥᨠ᩠ᨠᨶ᩠ᨲᩣ ᩋᨽᩥᨬ᩠ᨬᩣᨲᩣ ᩋᨽᩥᨬ᩠ᨬᩣᨲᩣ ᩃᩥᨧ᩠ᨨᩅᩦ, ᩋᨽᩥᨠ᩠ᨠᨶ᩠ᨲᩣ ᩋᨽᩥᨬ᩠ᨬᩣᨲᩣ ᩋᨽᩥᨬ᩠ᨬᩣᨲᩣ ᨧ ᨻᩕᩣᩉ᩠ᨾᨱᨾᩉᩣᩈᩣᩃᩣ ᨣᩉᨸᨲᩥᨶᩮᨧᨿᩥᨠᩣ ᨶᩣᨶᩣᨲᩥᨲ᩠ᨳᩥᨿᩣ ᩈᨾᨱᨻᩕᩣᩉ᩠ᨾᨱᩣ. ᩈᨾᨱᩮᩣᨸᩥ ᨣᩮᩣᨲᨾᩮᩣ ᩌᨿᩈ᩠ᨾᨲᩮᩣ ᩌᩁᩣᨾᩮ ᨴᩥᩅᩣᩅᩥᩉᩣᩁᩴ ᨶᩥᩈᩥᨶ᩠ᨶᩮᩣ. ᨽᩣᩈᩥᨲᩣ ᨡᩮᩣ ᨸᨶ ᨲᩮ ᩑᩈᩣ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩅᩮᩈᩣᩃᩥᨿᩴ ᨸᩁᩥᩈᨲᩥ ᩅᩣᨧᩣ – ᩈᨾᨱᩮᩣᨸᩥ ᨣᩮᩣᨲᨾᩮᩣ ᨬᩣᨱᩅᩣᨴᩮᩣ; ᩋᩉᨾ᩠ᨸᩥ ᨬᩣᨱᩅᩣᨴᩮᩣ. ᨬᩣᨱᩅᩣᨴᩮᩣ ᨡᩮᩣ ᨸᨶ ᨬᩣᨱᩅᩣᨴᩮᨶ ᩋᩁᩉᨲᩥ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨴᩔᩮᨲᩩᩴ…ᨸᩮ… ᨲᨴ᩠ᨴᩥᨣᩩᨱᩴ ᨲᨴ᩠ᨴᩥᨣᩩᨱᩣᩉᩴ ᨠᩁᩥᩔᩣᨾᩦᨲᩥ. ᩋᨽᩥᨠ᩠ᨠᨾᩔᩮᩅ ᨡᩮᩣ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩏᨸᨯ᩠ᨰᨸᨳᩴ. ᩈᨻ᩠ᨻᨸᨮᨾᩴᨿᩮᩅ ᩌᨣᨶ᩠ᨲ᩠ᩅᩣ ᩈᨾᨱᩮᩣ ᨣᩮᩣᨲᨾᩮᩣ ᩌᨿᩈ᩠ᨾᨲᩮᩣ ᩌᩁᩣᨾᩮ ᨴᩥᩅᩣᩅᩥᩉᩣᩁᩴ ᨶᩥᩈᩥᨶ᩠ᨶᩮᩣ’ᨲᩥ.

‘‘ᩑᩅᩴ ᩅᩩᨲ᩠ᨲᩮ, ᨽᨣ᩠ᨣᩅ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ‘ᩌᨿᩣᨾᩥ ᩌᩅᩩᩈᩮᩣ, ᩌᨿᩣᨾᩥ ᩌᩅᩩᩈᩮᩣ’ᨲᩥ ᩅᨲ᩠ᩅᩣ ᨲᨲ᩠ᨳᩮᩅ ᩈᩴᩈᨸ᩠ᨸᨲᩥ [ᩈᩴᩈᨻ᩠ᨻᨲᩥ (ᨠ.)], ᨶ ᩈᨠ᩠ᨠᩮᩣᨲᩥ ᩌᩈᨶᩣᨸᩥ ᩅᩩᨭ᩠ᨮᩣᨲᩩᩴ. ᩋᨳ ᨡᩮᩣ ᩈᩮᩣ, ᨽᨣ᩠ᨣᩅ, ᨸᩩᩁᩥᩈᩮᩣ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᩑᨲᨴᩅᩮᩣᨧ – ‘ᨠᩥᩴ ᩈᩩ ᨶᩣᨾ ᨲᩮ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᨸᩣᩅᩊᩣ ᩈᩩ ᨶᩣᨾ ᨲᩮ ᨸᩦᨮᨠᩈ᩠ᨾᩥᩴ ᩋᩃ᩠ᩃᩦᨶᩣ, ᨸᩦᨮᨠᩴ ᩈᩩ ᨶᩣᨾ ᨲᩮ ᨸᩣᩅᩊᩣᩈᩩ ᩋᩃ᩠ᩃᩦᨶᩴ? ᩌᨿᩣᨾᩥ ᩌᩅᩩᩈᩮᩣ, ᩌᨿᩣᨾᩥ ᩌᩅᩩᩈᩮᩣᨲᩥ ᩅᨲ᩠ᩅᩣ ᨲᨲ᩠ᨳᩮᩅ ᩈᩴᩈᨸ᩠ᨸᩈᩥ, ᨶ ᩈᨠ᩠ᨠᩮᩣᩈᩥ ᩌᩈᨶᩣᨸᩥ ᩅᩩᨭ᩠ᨮᩣᨲᩩ’ᨶ᩠ᨲᩥ. ᩑᩅᨾ᩠ᨸᩥ ᨡᩮᩣ, ᨽᨣ᩠ᨣᩅ, ᩅᩩᨧ᩠ᨧᨾᩣᨶᩮᩣ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ‘ᩌᨿᩣᨾᩥ ᩌᩅᩩᩈᩮᩣ, ᩌᨿᩣᨾᩥ ᩌᩅᩩᩈᩮᩣ’ᨲᩥ ᩅᨲ᩠ᩅᩣ ᨲᨲ᩠ᨳᩮᩅ ᩈᩴᩈᨸ᩠ᨸᨲᩥ, ᨶ ᩈᨠ᩠ᨠᩮᩣᨲᩥ ᩌᩈᨶᩣᨸᩥ ᩅᩩᨭ᩠ᨮᩣᨲᩩᩴ.

᪒᪓. ‘‘ᨿᨴᩣ ᨡᩮᩣ ᩈᩮᩣ, ᨽᨣ᩠ᨣᩅ, ᨸᩩᩁᩥᩈᩮᩣ ᩋᨬ᩠ᨬᩣᩈᩥ – ‘ᨸᩁᩣᨽᩪᨲᩁᩪᨸᩮᩣ ᩋᨿᩴ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ. ᩌᨿᩣᨾᩥ ᩌᩅᩩᩈᩮᩣ, ᩌᨿᩣᨾᩥ ᩌᩅᩩᩈᩮᩣᨲᩥ ᩅᨲ᩠ᩅᩣ ᨲᨲ᩠ᨳᩮᩅ ᩈᩴᩈᨸ᩠ᨸᨲᩥ, ᨶ ᩈᨠ᩠ᨠᩮᩣᨲᩥ ᩌᩈᨶᩣᨸᩥ ᩅᩩᨭ᩠ᨮᩣᨲᩩ’ᨶ᩠ᨲᩥ. ᩋᨳ ᨲᩴ ᨸᩁᩥᩈᩴ ᩌᨣᨶ᩠ᨲ᩠ᩅᩣ ᩑᩅᨾᩣᩁᩮᩣᨧᩮᩈᩥ – ‘ᨸᩁᩣᨽᩪᨲᩁᩪᨸᩮᩣ, ᨽᩮᩣ [ᨸᩁᩣᨽᩪᨲᩁᩪᨸᩮᩣ ᨽᩮᩣ ᩋᨿᩴ (ᩈ᩠ᨿᩣ. ᨠ.), ᨸᩁᩣᨽᩪᨲᩁᩪᨸᩮᩣ (ᩈᩦ. ᨸᩦ.)], ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ. ᩌᨿᩣᨾᩥ ᩌᩅᩩᩈᩮᩣ, ᩌᨿᩣᨾᩥ ᩌᩅᩩᩈᩮᩣᨲᩥ ᩅᨲ᩠ᩅᩣ ᨲᨲ᩠ᨳᩮᩅ ᩈᩴᩈᨸ᩠ᨸᨲᩥ, ᨶ ᩈᨠ᩠ᨠᩮᩣᨲᩥ ᩌᩈᨶᩣᨸᩥ ᩅᩩᨭ᩠ᨮᩣᨲᩩ’ᨶ᩠ᨲᩥ. ᩑᩅᩴ ᩅᩩᨲ᩠ᨲᩮ, ᩋᩉᩴ, ᨽᨣ᩠ᨣᩅ, ᨲᩴ ᨸᩁᩥᩈᩴ ᩑᨲᨴᩅᩮᩣᨧᩴ – ‘ᩋᨽᨻ᩠ᨻᩮᩣ ᨡᩮᩣ, ᩌᩅᩩᩈᩮᩣ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨾᨾ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ‘ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᨣᨧ᩠ᨨᩮᨿ᩠ᨿ’ᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿᩣᨲᩥ.

ᨸᨮᨾᨽᩣᨱᩅᩣᩁᩮᩣ ᨶᩥᨭ᩠ᨮᩥᨲᩮᩣ.

᪒᪔. ‘‘ᩋᨳ ᨡᩮᩣ, ᨽᨣ᩠ᨣᩅ, ᩋᨬ᩠ᨬᨲᩁᩮᩣ ᩃᩥᨧ᩠ᨨᩅᩥᨾᩉᩣᨾᨲ᩠ᨲᩮᩣ ᩏᨭ᩠ᨮᩣᨿᩣᩈᨶᩣ ᨲᩴ ᨸᩁᩥᩈᩴ ᩑᨲᨴᩅᩮᩣᨧ – ‘ᨲᩮᨶ ᩉᩥ, ᨽᩮᩣ, ᨾᩩᩉᩩᨲ᩠ᨲᩴ ᨲᩣᩅ ᩌᨣᨾᩮᨳ, ᨿᩣᩅᩣᩉᩴ ᨣᨧ᩠ᨨᩣᨾᩥ [ᨸᨧ᩠ᨧᩣᨣᨧ᩠ᨨᩣᨾᩥ (?)]. ᩋᨸ᩠ᨸᩮᩅ ᨶᩣᨾ ᩋᩉᨾ᩠ᨸᩥ ᩈᨠ᩠ᨠᩩᨱᩮᨿ᩠ᨿᩴ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᩍᨾᩴ ᨸᩁᩥᩈᩴ ᩌᨶᩮᨲᩩ’ᨶ᩠ᨲᩥ.

‘‘ᩋᨳ ᨡᩮᩣ ᩈᩮᩣ, ᨽᨣ᩠ᨣᩅ, ᩃᩥᨧ᩠ᨨᩅᩥᨾᩉᩣᨾᨲ᩠ᨲᩮᩣ ᨿᩮᨶ ᨲᩥᨶ᩠ᨴᩩᨠᨡᩣᨱᩩᨸᩁᩥᨻ᩠ᨻᩣᨩᨠᩣᩁᩣᨾᩮᩣ, ᨿᩮᨶ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩮᨶᩩᨸᩈᨦ᩠ᨠᨾᩥ. ᩏᨸᩈᨦ᩠ᨠᨾᩥᨲ᩠ᩅᩣ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᩑᨲᨴᩅᩮᩣᨧ – ‘ᩋᨽᩥᨠ᩠ᨠᨾᩣᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩋᨽᩥᨠ᩠ᨠᨶ᩠ᨲᩴ ᨲᩮ ᩈᩮᨿ᩠ᨿᩮᩣ, ᩋᨽᩥᨠ᩠ᨠᨶ᩠ᨲᩣ ᩋᨽᩥᨬ᩠ᨬᩣᨲᩣ ᩋᨽᩥᨬ᩠ᨬᩣᨲᩣ ᩃᩥᨧ᩠ᨨᩅᩦ, ᩋᨽᩥᨠ᩠ᨠᨶ᩠ᨲᩣ ᩋᨽᩥᨬ᩠ᨬᩣᨲᩣ ᩋᨽᩥᨬ᩠ᨬᩣᨲᩣ ᨧ ᨻᩕᩣᩉ᩠ᨾᨱᨾᩉᩣᩈᩣᩃᩣ ᨣᩉᨸᨲᩥᨶᩮᨧᨿᩥᨠᩣ ᨶᩣᨶᩣᨲᩥᨲ᩠ᨳᩥᨿᩣ ᩈᨾᨱᨻᩕᩣᩉ᩠ᨾᨱᩣ. ᩈᨾᨱᩮᩣᨸᩥ ᨣᩮᩣᨲᨾᩮᩣ ᩌᨿᩈ᩠ᨾᨲᩮᩣ ᩌᩁᩣᨾᩮ ᨴᩥᩅᩣᩅᩥᩉᩣᩁᩴ ᨶᩥᩈᩥᨶ᩠ᨶᩮᩣ. ᨽᩣᩈᩥᨲᩣ ᨡᩮᩣ ᨸᨶ ᨲᩮ ᩑᩈᩣ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩅᩮᩈᩣᩃᩥᨿᩴ ᨸᩁᩥᩈᨲᩥ ᩅᩣᨧᩣ – ᩈᨾᨱᩮᩣᨸᩥ ᨣᩮᩣᨲᨾᩮᩣ ᨬᩣᨱᩅᩣᨴᩮᩣ…ᨸᩮ… ᨲᨴ᩠ᨴᩥᨣᩩᨱᩴ ᨲᨴ᩠ᨴᩥᨣᩩᨱᩣᩉᩴ ᨠᩁᩥᩔᩣᨾᩦᨲᩥ. ᩋᨽᩥᨠ᩠ᨠᨾᩔᩮᩅ ᨡᩮᩣ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩏᨸᨯ᩠ᨰᨸᨳᩴ. ᩈᨻ᩠ᨻᨸᨮᨾᩴᨿᩮᩅ ᩌᨣᨶ᩠ᨲ᩠ᩅᩣ ᩈᨾᨱᩮᩣ ᨣᩮᩣᨲᨾᩮᩣ ᩌᨿᩈ᩠ᨾᨲᩮᩣ ᩌᩁᩣᨾᩮ ᨴᩥᩅᩣᩅᩥᩉᩣᩁᩴ ᨶᩥᩈᩥᨶ᩠ᨶᩮᩣ. ᨽᩣᩈᩥᨲᩣ ᨡᩮᩣ ᨸᨶᩮᩈᩣ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩈᨾᨱᩮᨶ ᨣᩮᩣᨲᨾᩮᨶ ᨸᩁᩥᩈᨲᩥ ᩅᩣᨧᩣ – ᩋᨽᨻ᩠ᨻᩮᩣ ᨡᩮᩣ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨾᨾ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᨣᨧ᩠ᨨᩮᨿ᩠ᨿᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿᩣᨲᩥ. ᩋᨽᩥᨠ᩠ᨠᨾᩣᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩋᨽᩥᨠ᩠ᨠᨾᨶᩮᨶᩮᩅ ᨲᩮ ᨩᨿᩴ ᨠᩁᩥᩔᩣᨾ, ᩈᨾᨱᩔ ᨣᩮᩣᨲᨾᩔ ᨸᩁᩣᨩᨿ’ᨶ᩠ᨲᩥ.

‘‘ᩑᩅᩴ ᩅᩩᨲ᩠ᨲᩮ, ᨽᨣ᩠ᨣᩅ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ‘ᩌᨿᩣᨾᩥ ᩌᩅᩩᩈᩮᩣ, ᩌᨿᩣᨾᩥ ᩌᩅᩩᩈᩮᩣ’ᨲᩥ ᩅᨲ᩠ᩅᩣ ᨲᨲ᩠ᨳᩮᩅ ᩈᩴᩈᨸ᩠ᨸᨲᩥ, ᨶ ᩈᨠ᩠ᨠᩮᩣᨲᩥ ᩌᩈᨶᩣᨸᩥ ᩅᩩᨭ᩠ᨮᩣᨲᩩᩴ. ᩋᨳ ᨡᩮᩣ ᩈᩮᩣ, ᨽᨣ᩠ᨣᩅ, ᩃᩥᨧ᩠ᨨᩅᩥᨾᩉᩣᨾᨲ᩠ᨲᩮᩣ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᩑᨲᨴᩅᩮᩣᨧ – ‘ᨠᩥᩴ ᩈᩩ ᨶᩣᨾ ᨲᩮ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᨸᩣᩅᩊᩣ ᩈᩩ ᨶᩣᨾ ᨲᩮ ᨸᩦᨮᨠᩈ᩠ᨾᩥᩴ ᩋᩃ᩠ᩃᩦᨶᩣ, ᨸᩦᨮᨠᩴ ᩈᩩ ᨶᩣᨾ ᨲᩮ ᨸᩣᩅᩊᩣᩈᩩ ᩋᩃ᩠ᩃᩦᨶᩴ? ᩌᨿᩣᨾᩥ ᩌᩅᩩᩈᩮᩣ, ᩌᨿᩣᨾᩥ ᩌᩅᩩᩈᩮᩣᨲᩥ ᩅᨲ᩠ᩅᩣ ᨲᨲ᩠ᨳᩮᩅ ᩈᩴᩈᨸ᩠ᨸᩈᩥ, ᨶ ᩈᨠ᩠ᨠᩮᩣᩈᩥ ᩌᩈᨶᩣᨸᩥ ᩅᩩᨭ᩠ᨮᩣᨲᩩ’ᨶ᩠ᨲᩥ. ᩑᩅᨾ᩠ᨸᩥ ᨡᩮᩣ, ᨽᨣ᩠ᨣᩅ, ᩅᩩᨧ᩠ᨧᨾᩣᨶᩮᩣ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ‘ᩌᨿᩣᨾᩥ ᩌᩅᩩᩈᩮᩣ, ᩌᨿᩣᨾᩥ ᩌᩅᩩᩈᩮᩣ’ᨲᩥ ᩅᨲ᩠ᩅᩣ ᨲᨲ᩠ᨳᩮᩅ ᩈᩴᩈᨸ᩠ᨸᨲᩥ, ᨶ ᩈᨠ᩠ᨠᩮᩣᨲᩥ ᩌᩈᨶᩣᨸᩥ ᩅᩩᨭ᩠ᨮᩣᨲᩩᩴ.

᪒᪕. ‘‘ᨿᨴᩣ ᨡᩮᩣ ᩈᩮᩣ, ᨽᨣ᩠ᨣᩅ, ᩃᩥᨧ᩠ᨨᩅᩥᨾᩉᩣᨾᨲ᩠ᨲᩮᩣ ᩋᨬ᩠ᨬᩣᩈᩥ – ‘ᨸᩁᩣᨽᩪᨲᩁᩪᨸᩮᩣ ᩋᨿᩴ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᩌᨿᩣᨾᩥ ᩌᩅᩩᩈᩮᩣ, ᩌᨿᩣᨾᩥ ᩌᩅᩩᩈᩮᩣᨲᩥ ᩅᨲ᩠ᩅᩣ ᨲᨲ᩠ᨳᩮᩅ ᩈᩴᩈᨸ᩠ᨸᨲᩥ, ᨶ ᩈᨠ᩠ᨠᩮᩣᨲᩥ ᩌᩈᨶᩣᨸᩥ ᩅᩩᨭ᩠ᨮᩣᨲᩩ’ᨶ᩠ᨲᩥ. ᩋᨳ ᨲᩴ ᨸᩁᩥᩈᩴ ᩌᨣᨶ᩠ᨲ᩠ᩅᩣ ᩑᩅᨾᩣᩁᩮᩣᨧᩮᩈᩥ – ‘ᨸᩁᩣᨽᩪᨲᩁᩪᨸᩮᩣ, ᨽᩮᩣ [ᨸᩁᩣᨽᩪᨲᩁᩪᨸᩮᩣ (ᩈᩦ. ᨸᩦ.), ᨸᩁᩣᨽᩪᨲᩁᩪᨸᩮᩣ ᩋᨿᩴ (ᩈ᩠ᨿᩣ.)], ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᩌᨿᩣᨾᩥ ᩌᩅᩩᩈᩮᩣ, ᩌᨿᩣᨾᩥ ᩌᩅᩩᩈᩮᩣᨲᩥ ᩅᨲ᩠ᩅᩣ ᨲᨲ᩠ᨳᩮᩅ ᩈᩴᩈᨸ᩠ᨸᨲᩥ, ᨶ ᩈᨠ᩠ᨠᩮᩣᨲᩥ ᩌᩈᨶᩣᨸᩥ ᩅᩩᨭ᩠ᨮᩣᨲᩩ’ᨶ᩠ᨲᩥ. ᩑᩅᩴ ᩅᩩᨲ᩠ᨲᩮ, ᩋᩉᩴ, ᨽᨣ᩠ᨣᩅ, ᨲᩴ ᨸᩁᩥᩈᩴ ᩑᨲᨴᩅᩮᩣᨧᩴ – ‘ᩋᨽᨻ᩠ᨻᩮᩣ ᨡᩮᩣ, ᩌᩅᩩᩈᩮᩣ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨾᨾ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᨣᨧ᩠ᨨᩮᨿ᩠ᨿᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿ. ᩈᨧᩮ ᨸᩣᨿᩈ᩠ᨾᨶ᩠ᨲᩣᨶᩴ ᩃᩥᨧ᩠ᨨᩅᩦᨶᩴ ᩑᩅᨾᩔ – ᨾᨿᩴ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᩅᩁᨲ᩠ᨲᩣᩉᩥ [ᨿᩣᩉᩥ ᩅᩁᨲ᩠ᨲᩣᩉᩥ (ᩈ᩠ᨿᩣ. ᨠ.)] ᨻᨶ᩠ᨵᩥᨲ᩠ᩅᩣ ᨣᩮᩣᨿᩩᨣᩮᩉᩥ ᩌᩅᩥᨬ᩠ᨨᩮᨿ᩠ᨿᩣᨾᩣᨲᩥ [ᩌᩅᩥᨬ᩠ᨩᩮᨿ᩠ᨿᩣᨾᩣᨲᩥ (ᩈ᩠ᨿᩣ.), ᩌᩅᩥᨩ᩠ᨫᩮᨿ᩠ᨿᩣᨾᩣᨲᩥ (ᩈᩦ. ᨸᩦ.)], ᨲᩣ ᩅᩁᨲ᩠ᨲᩣ ᨨᩥᨩ᩠ᨩᩮᨿ᩠ᨿᩩᩴ ᨸᩣᨳᩥᨠᨸᩩᨲ᩠ᨲᩮᩣ ᩅᩣ. ᩋᨽᨻ᩠ᨻᩮᩣ ᨸᨶ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨾᨾ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᨣᨧ᩠ᨨᩮᨿ᩠ᨿᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿᩣ’ᨲᩥ.

᪒᪖. ‘‘ᩋᨳ ᨡᩮᩣ, ᨽᨣ᩠ᨣᩅ, ᨩᩣᩃᩥᨿᩮᩣ ᨴᩣᩁᩩᨸᨲ᩠ᨲᩥᨠᨶ᩠ᨲᩮᩅᩣᩈᩦ ᩏᨭ᩠ᨮᩣᨿᩣᩈᨶᩣ ᨲᩴ ᨸᩁᩥᩈᩴ ᩑᨲᨴᩅᩮᩣᨧ – ‘ᨲᩮᨶ ᩉᩥ, ᨽᩮᩣ, ᨾᩩᩉᩩᨲ᩠ᨲᩴ ᨲᩣᩅ ᩌᨣᨾᩮᨳ, ᨿᩣᩅᩣᩉᩴ ᨣᨧ᩠ᨨᩣᨾᩥ; ᩋᨸ᩠ᨸᩮᩅ ᨶᩣᨾ ᩋᩉᨾ᩠ᨸᩥ ᩈᨠ᩠ᨠᩩᨱᩮᨿ᩠ᨿᩴ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᩍᨾᩴ ᨸᩁᩥᩈᩴ ᩌᨶᩮᨲᩩ’’ᨶ᩠ᨲᩥ.

‘‘ᩋᨳ ᨡᩮᩣ, ᨽᨣ᩠ᨣᩅ, ᨩᩣᩃᩥᨿᩮᩣ ᨴᩣᩁᩩᨸᨲ᩠ᨲᩥᨠᨶ᩠ᨲᩮᩅᩣᩈᩦ ᨿᩮᨶ ᨲᩥᨶ᩠ᨴᩩᨠᨡᩣᨱᩩᨸᩁᩥᨻ᩠ᨻᩣᨩᨠᩣᩁᩣᨾᩮᩣ, ᨿᩮᨶ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩮᨶᩩᨸᩈᨦ᩠ᨠᨾᩥ. ᩏᨸᩈᨦ᩠ᨠᨾᩥᨲ᩠ᩅᩣ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᩑᨲᨴᩅᩮᩣᨧ – ‘ᩋᨽᩥᨠ᩠ᨠᨾᩣᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩋᨽᩥᨠ᩠ᨠᨶ᩠ᨲᩴ ᨲᩮ ᩈᩮᨿ᩠ᨿᩮᩣ. ᩋᨽᩥᨠ᩠ᨠᨶ᩠ᨲᩣ ᩋᨽᩥᨬ᩠ᨬᩣᨲᩣ ᩋᨽᩥᨬ᩠ᨬᩣᨲᩣ ᩃᩥᨧ᩠ᨨᩅᩦ, ᩋᨽᩥᨠ᩠ᨠᨶ᩠ᨲᩣ ᩋᨽᩥᨬ᩠ᨬᩣᨲᩣ ᩋᨽᩥᨬ᩠ᨬᩣᨲᩣ ᨧ ᨻᩕᩣᩉ᩠ᨾᨱᨾᩉᩣᩈᩣᩃᩣ ᨣᩉᨸᨲᩥᨶᩮᨧᨿᩥᨠᩣ ᨶᩣᨶᩣᨲᩥᨲ᩠ᨳᩥᨿᩣ ᩈᨾᨱᨻᩕᩣᩉ᩠ᨾᨱᩣ. ᩈᨾᨱᩮᩣᨸᩥ ᨣᩮᩣᨲᨾᩮᩣ ᩌᨿᩈ᩠ᨾᨲᩮᩣ ᩌᩁᩣᨾᩮ ᨴᩥᩅᩣᩅᩥᩉᩣᩁᩴ ᨶᩥᩈᩥᨶ᩠ᨶᩮᩣ. ᨽᩣᩈᩥᨲᩣ ᨡᩮᩣ ᨸᨶ ᨲᩮ ᩑᩈᩣ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩅᩮᩈᩣᩃᩥᨿᩴ ᨸᩁᩥᩈᨲᩥ ᩅᩣᨧᩣ – ᩈᨾᨱᩮᩣᨸᩥ ᨣᩮᩣᨲᨾᩮᩣ ᨬᩣᨱᩅᩣᨴᩮᩣ…ᨸᩮ… ᨲᨴ᩠ᨴᩥᨣᩩᨱᩴ ᨲᨴ᩠ᨴᩥᨣᩩᨱᩣᩉᩴ ᨠᩁᩥᩔᩣᨾᩦᨲᩥ. ᩋᨽᩥᨠ᩠ᨠᨾᩔᩮᩅ, ᨡᩮᩣ ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩏᨸᨯ᩠ᨰᨸᨳᩴ. ᩈᨻ᩠ᨻᨸᨮᨾᩴᨿᩮᩅ ᩌᨣᨶ᩠ᨲ᩠ᩅᩣ ᩈᨾᨱᩮᩣ ᨣᩮᩣᨲᨾᩮᩣ ᩌᨿᩈ᩠ᨾᨲᩮᩣ ᩌᩁᩣᨾᩮ ᨴᩥᩅᩣᩅᩥᩉᩣᩁᩴ ᨶᩥᩈᩥᨶ᩠ᨶᩮᩣ. ᨽᩣᩈᩥᨲᩣ ᨡᩮᩣ ᨸᨶᩮᩈᩣ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩈᨾᨱᩮᨶ ᨣᩮᩣᨲᨾᩮᨶ ᨸᩁᩥᩈᨲᩥ ᩅᩣᨧᩣ – ᩋᨽᨻ᩠ᨻᩮᩣ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨾᨾ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᨣᨧ᩠ᨨᩮᨿ᩠ᨿᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿ. ᩈᨧᩮ ᨸᩣᨿᩈ᩠ᨾᨶ᩠ᨲᩣᨶᩴ ᩃᩥᨧ᩠ᨨᩅᩦᨶᩴ ᩑᩅᨾᩔ – ᨾᨿᩴ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᩅᩁᨲ᩠ᨲᩣᩉᩥ ᨻᨶ᩠ᨵᩥᨲ᩠ᩅᩣ ᨣᩮᩣᨿᩩᨣᩮᩉᩥ ᩌᩅᩥᨬ᩠ᨨᩮᨿ᩠ᨿᩣᨾᩣᨲᩥ. ᨲᩣ ᩅᩁᨲ᩠ᨲᩣ ᨨᩥᨩ᩠ᨩᩮᨿ᩠ᨿᩩᩴ ᨸᩣᨳᩥᨠᨸᩩᨲ᩠ᨲᩮᩣ ᩅᩣ. ᩋᨽᨻ᩠ᨻᩮᩣ ᨸᨶ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨾᨾ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᩌᨣᨧ᩠ᨨᩮᨿ᩠ᨿᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿᩣᨲᩥ. ᩋᨽᩥᨠ᩠ᨠᨾᩣᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩋᨽᩥᨠ᩠ᨠᨾᨶᩮᨶᩮᩅ ᨲᩮ ᨩᨿᩴ ᨠᩁᩥᩔᩣᨾ, ᩈᨾᨱᩔ ᨣᩮᩣᨲᨾᩔ ᨸᩁᩣᨩᨿ’ᨶ᩠ᨲᩥ.

‘‘ᩑᩅᩴ ᩅᩩᨲ᩠ᨲᩮ, ᨽᨣ᩠ᨣᩅ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ‘ᩌᨿᩣᨾᩥ ᩌᩅᩩᩈᩮᩣ, ᩌᨿᩣᨾᩥ ᩌᩅᩩᩈᩮᩣ’ᨲᩥ ᩅᨲ᩠ᩅᩣ ᨲᨲ᩠ᨳᩮᩅ ᩈᩴᩈᨸ᩠ᨸᨲᩥ, ᨶ ᩈᨠ᩠ᨠᩮᩣᨲᩥ ᩌᩈᨶᩣᨸᩥ ᩅᩩᨭ᩠ᨮᩣᨲᩩᩴ. ᩋᨳ ᨡᩮᩣ, ᨽᨣ᩠ᨣᩅ, ᨩᩣᩃᩥᨿᩮᩣ ᨴᩣᩁᩩᨸᨲ᩠ᨲᩥᨠᨶ᩠ᨲᩮᩅᩣᩈᩦ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᩑᨲᨴᩅᩮᩣᨧ – ‘ᨠᩥᩴ ᩈᩩ ᨶᩣᨾ ᨲᩮ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᨸᩣᩅᩊᩣ ᩈᩩ ᨶᩣᨾ ᨲᩮ ᨸᩦᨮᨠᩈ᩠ᨾᩥᩴ ᩋᩃ᩠ᩃᩦᨶᩣ, ᨸᩦᨮᨠᩴ ᩈᩩ ᨶᩣᨾ ᨲᩮ ᨸᩣᩅᩊᩣᩈᩩ ᩋᩃ᩠ᩃᩦᨶᩴ? ᩌᨿᩣᨾᩥ ᩌᩅᩩᩈᩮᩣ, ᩌᨿᩣᨾᩥ ᩌᩅᩩᩈᩮᩣᨲᩥ ᩅᨲ᩠ᩅᩣ ᨲᨲ᩠ᨳᩮᩅ ᩈᩴᩈᨸ᩠ᨸᩈᩥ, ᨶ ᩈᨠ᩠ᨠᩮᩣᩈᩥ ᩌᩈᨶᩣᨸᩥ ᩅᩩᨭ᩠ᨮᩣᨲᩩ’ᨶ᩠ᨲᩥ. ᩑᩅᨾ᩠ᨸᩥ ᨡᩮᩣ, ᨽᨣ᩠ᨣᩅ, ᩅᩩᨧ᩠ᨧᨾᩣᨶᩮᩣ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ‘‘ᩌᨿᩣᨾᩥ ᩌᩅᩩᩈᩮᩣ, ᩌᨿᩣᨾᩥ ᩌᩅᩩᩈᩮᩣ’’ᨲᩥ ᩅᨲ᩠ᩅᩣ ᨲᨲ᩠ᨳᩮᩅ ᩈᩴᩈᨸ᩠ᨸᨲᩥ, ᨶ ᩈᨠ᩠ᨠᩮᩣᨲᩥ ᩌᩈᨶᩣᨸᩥ ᩅᩩᨭ᩠ᨮᩣᨲᩩᨶ᩠ᨲᩥ.

᪒᪗. ‘‘ᨿᨴᩣ ᨡᩮᩣ, ᨽᨣ᩠ᨣᩅ, ᨩᩣᩃᩥᨿᩮᩣ ᨴᩣᩁᩩᨸᨲ᩠ᨲᩥᨠᨶ᩠ᨲᩮᩅᩣᩈᩦ ᩋᨬ᩠ᨬᩣᩈᩥ – ‘ᨸᩁᩣᨽᩪᨲᩁᩪᨸᩮᩣ ᩋᨿᩴ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ‘ᩌᨿᩣᨾᩥ ᩌᩅᩩᩈᩮᩣ, ᩌᨿᩣᨾᩥ ᩌᩅᩩᩈᩮᩣᨲᩥ ᩅᨲ᩠ᩅᩣ ᨲᨲ᩠ᨳᩮᩅ ᩈᩴᩈᨸ᩠ᨸᨲᩥ, ᨶ ᩈᨠ᩠ᨠᩮᩣᨲᩥ ᩌᩈᨶᩣᨸᩥ ᩅᩩᨭ᩠ᨮᩣᨲᩩ’ᨶ᩠ᨲᩥ, ᩋᨳ ᨶᩴ ᩑᨲᨴᩅᩮᩣᨧ –

‘ᨽᩪᨲᨸᩩᨻ᩠ᨻᩴ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩈᩦᩉᩔ ᨾᩥᨣᩁᨬ᩠ᨬᩮᩣ ᩑᨲᨴᩉᩮᩣᩈᩥ – ᨿᩴᨶᩪᨶᩣᩉᩴ ᩋᨬ᩠ᨬᨲᩁᩴ ᩅᨶᩈᨱ᩠ᨯᩴ ᨶᩥᩔᩣᨿ ᩌᩈᨿᩴ ᨠᨸ᩠ᨸᩮᨿ᩠ᨿᩴ. ᨲᨲᩕᩣᩈᨿᩴ ᨠᨸ᩠ᨸᩮᨲ᩠ᩅᩣ ᩈᩣᨿᨶ᩠ᩉᩈᨾᨿᩴ ᩌᩈᨿᩣ ᨶᩥᨠ᩠ᨡᨾᩮᨿ᩠ᨿᩴ, ᩌᩈᨿᩣ ᨶᩥᨠ᩠ᨡᨾᩥᨲ᩠ᩅᩣ ᩅᩥᨩᨾ᩠ᨽᩮᨿ᩠ᨿᩴ, ᩅᩥᨩᨾ᩠ᨽᩥᨲ᩠ᩅᩣ ᩈᨾᨶ᩠ᨲᩣ ᨧᨲᩩᨴ᩠ᨴᩥᩈᩣ ᩋᨶᩩᩅᩥᩃᩮᩣᨠᩮᨿ᩠ᨿᩴ, ᩈᨾᨶ᩠ᨲᩣ ᨧᨲᩩᨴ᩠ᨴᩥᩈᩣ ᩋᨶᩩᩅᩥᩃᩮᩣᨠᩮᨲ᩠ᩅᩣ ᨲᩥᨠ᩠ᨡᨲ᩠ᨲᩩᩴ ᩈᩦᩉᨶᩣᨴᩴ ᨶᨴᩮᨿ᩠ᨿᩴ, ᨲᩥᨠ᩠ᨡᨲ᩠ᨲᩩᩴ ᩈᩦᩉᨶᩣᨴᩴ ᨶᨴᩥᨲ᩠ᩅᩣ ᨣᩮᩣᨧᩁᩣᨿ ᨸᨠ᩠ᨠᨾᩮᨿ᩠ᨿᩴ. ᩈᩮᩣ ᩅᩁᩴ ᩅᩁᩴ ᨾᩥᨣᩈᩴᨥᩮ [ᨾᩥᨣᩈᩴᨥᩴ (ᩈ᩠ᨿᩣ. ᨠ.)] ᩅᨵᩥᨲ᩠ᩅᩣ ᨾᩩᨴᩩᨾᩴᩈᩣᨶᩥ ᨾᩩᨴᩩᨾᩴᩈᩣᨶᩥ ᨽᨠ᩠ᨡᨿᩥᨲ᩠ᩅᩣ ᨲᨾᩮᩅ ᩌᩈᨿᩴ ᩋᨩ᩠ᨫᩩᨸᩮᨿ᩠ᨿ’ᨶ᩠ᨲᩥ.

‘ᩋᨳ ᨡᩮᩣ, ᩌᩅᩩᩈᩮᩣ, ᩈᩮᩣ ᩈᩦᩉᩮᩣ ᨾᩥᨣᩁᩣᨩᩣ ᩋᨬ᩠ᨬᨲᩁᩴ ᩅᨶᩈᨱ᩠ᨯᩴ ᨶᩥᩔᩣᨿ ᩌᩈᨿᩴ ᨠᨸ᩠ᨸᩮᩈᩥ. ᨲᨲᩕᩣᩈᨿᩴ ᨠᨸ᩠ᨸᩮᨲ᩠ᩅᩣ ᩈᩣᨿᨶ᩠ᩉᩈᨾᨿᩴ ᩌᩈᨿᩣ ᨶᩥᨠ᩠ᨡᨾᩥ, ᩌᩈᨿᩣ ᨶᩥᨠ᩠ᨡᨾᩥᨲ᩠ᩅᩣ ᩅᩥᨩᨾ᩠ᨽᩥ, ᩅᩥᨩᨾ᩠ᨽᩥᨲ᩠ᩅᩣ ᩈᨾᨶ᩠ᨲᩣ ᨧᨲᩩᨴ᩠ᨴᩥᩈᩣ ᩋᨶᩩᩅᩥᩃᩮᩣᨠᩮᩈᩥ, ᩈᨾᨶ᩠ᨲᩣ ᨧᨲᩩᨴ᩠ᨴᩥᩈᩣ ᩋᨶᩩᩅᩥᩃᩮᩣᨠᩮᨲ᩠ᩅᩣ ᨲᩥᨠ᩠ᨡᨲ᩠ᨲᩩᩴ ᩈᩦᩉᨶᩣᨴᩴ ᨶᨴᩥ, ᨲᩥᨠ᩠ᨡᨲ᩠ᨲᩩᩴ ᩈᩦᩉᨶᩣᨴᩴ ᨶᨴᩥᨲ᩠ᩅᩣ ᨣᩮᩣᨧᩁᩣᨿ ᨸᨠ᩠ᨠᩣᨾᩥ. ᩈᩮᩣ ᩅᩁᩴ ᩅᩁᩴ ᨾᩥᨣᩈᨦ᩠ᨥᩮ ᩅᨵᩥᨲ᩠ᩅᩣ ᨾᩩᨴᩩᨾᩴᩈᩣᨶᩥ ᨾᩩᨴᩩᨾᩴᩈᩣᨶᩥ ᨽᨠ᩠ᨡᨿᩥᨲ᩠ᩅᩣ ᨲᨾᩮᩅ ᩌᩈᨿᩴ ᩋᨩ᩠ᨫᩩᨸᩮᩈᩥ.

᪒᪘. ‘ᨲᩔᩮᩅ ᨡᩮᩣ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩈᩦᩉᩔ ᨾᩥᨣᩁᨬ᩠ᨬᩮᩣ ᩅᩥᨥᩣᩈᩈᩴᩅᨯ᩠ᨰᩮᩣ ᨩᩁᩈᩥᨦ᩠ᨣᩣᩃᩮᩣ [ᨩᩁᩈᩥᨣᩣᩃᩮᩣ (ᩈᩦ. ᩈ᩠ᨿᩣ. ᨸᩦ.)] ᨴᩥᨲ᩠ᨲᩮᩣ ᨧᩮᩅ ᨻᩃᩅᩣ ᨧ. ᩋᨳ ᨡᩮᩣ, ᩌᩅᩩᩈᩮᩣ, ᨲᩔ ᨩᩁᩈᩥᨦ᩠ᨣᩣᩃᩔ ᩑᨲᨴᩉᩮᩣᩈᩥ – ᨠᩮᩣ ᨧᩣᩉᩴ, ᨠᩮᩣ ᩈᩦᩉᩮᩣ ᨾᩥᨣᩁᩣᨩᩣ. ᨿᩴᨶᩪᨶᩣᩉᨾ᩠ᨸᩥ ᩋᨬ᩠ᨬᨲᩁᩴ ᩅᨶᩈᨱ᩠ᨯᩴ ᨶᩥᩔᩣᨿ ᩌᩈᨿᩴ ᨠᨸ᩠ᨸᩮᨿ᩠ᨿᩴ. ᨲᨲᩕᩣᩈᨿᩴ ᨠᨸ᩠ᨸᩮᨲ᩠ᩅᩣ ᩈᩣᨿᨶ᩠ᩉᩈᨾᨿᩴ ᩌᩈᨿᩣ ᨶᩥᨠ᩠ᨡᨾᩮᨿ᩠ᨿᩴ, ᩌᩈᨿᩣ ᨶᩥᨠ᩠ᨡᨾᩥᨲ᩠ᩅᩣ ᩅᩥᨩᨾ᩠ᨽᩮᨿ᩠ᨿᩴ, ᩅᩥᨩᨾ᩠ᨽᩥᨲ᩠ᩅᩣ ᩈᨾᨶ᩠ᨲᩣ ᨧᨲᩩᨴ᩠ᨴᩥᩈᩣ ᩋᨶᩩᩅᩥᩃᩮᩣᨠᩮᨿ᩠ᨿᩴ, ᩈᨾᨶ᩠ᨲᩣ ᨧᨲᩩᨴ᩠ᨴᩥᩈᩣ ᩋᨶᩩᩅᩥᩃᩮᩣᨠᩮᨲ᩠ᩅᩣ ᨲᩥᨠ᩠ᨡᨲ᩠ᨲᩩᩴ ᩈᩦᩉᨶᩣᨴᩴ ᨶᨴᩮᨿ᩠ᨿᩴ, ᨲᩥᨠ᩠ᨡᨲ᩠ᨲᩩᩴ ᩈᩦᩉᨶᩣᨴᩴ ᨶᨴᩥᨲ᩠ᩅᩣ ᨣᩮᩣᨧᩁᩣᨿ ᨸᨠ᩠ᨠᨾᩮᨿ᩠ᨿᩴ. ᩈᩮᩣ ᩅᩁᩴ ᩅᩁᩴ ᨾᩥᨣᩈᨦ᩠ᨥᩮ ᩅᨵᩥᨲ᩠ᩅᩣ ᨾᩩᨴᩩᨾᩴᩈᩣᨶᩥ ᨾᩩᨴᩩᨾᩴᩈᩣᨶᩥ ᨽᨠ᩠ᨡᨿᩥᨲ᩠ᩅᩣ ᨲᨾᩮᩅ ᩌᩈᨿᩴ ᩋᨩ᩠ᨫᩩᨸᩮᨿ᩠ᨿ’ᨶ᩠ᨲᩥ.

‘ᩋᨳ ᨡᩮᩣ ᩈᩮᩣ, ᩌᩅᩩᩈᩮᩣ, ᨩᩁᩈᩥᨦ᩠ᨣᩣᩃᩮᩣ ᩋᨬ᩠ᨬᨲᩁᩴ ᩅᨶᩈᨱ᩠ᨯᩴ ᨶᩥᩔᩣᨿ ᩌᩈᨿᩴ ᨠᨸ᩠ᨸᩮᩈᩥ. ᨲᨲᩕᩣᩈᨿᩴ ᨠᨸ᩠ᨸᩮᨲ᩠ᩅᩣ ᩈᩣᨿᨶ᩠ᩉᩈᨾᨿᩴ ᩌᩈᨿᩣ ᨶᩥᨠ᩠ᨡᨾᩥ, ᩌᩈᨿᩣ ᨶᩥᨠ᩠ᨡᨾᩥᨲ᩠ᩅᩣ ᩅᩥᨩᨾ᩠ᨽᩥ, ᩅᩥᨩᨾ᩠ᨽᩥᨲ᩠ᩅᩣ ᩈᨾᨶ᩠ᨲᩣ ᨧᨲᩩᨴ᩠ᨴᩥᩈᩣ ᩋᨶᩩᩅᩥᩃᩮᩣᨠᩮᩈᩥ, ᩈᨾᨶ᩠ᨲᩣ ᨧᨲᩩᨴ᩠ᨴᩥᩈᩣ ᩋᨶᩩᩅᩥᩃᩮᩣᨠᩮᨲ᩠ᩅᩣ ᨲᩥᨠ᩠ᨡᨲ᩠ᨲᩩᩴ ᩈᩦᩉᨶᩣᨴᩴ ᨶᨴᩥᩔᩣᨾᩦᨲᩥ ᩈᩥᨦ᩠ᨣᩣᩃᨠᩴᨿᩮᩅ ᩋᨶᨴᩥ ᨽᩮᩁᨱ᩠ᨯᨠᩴᨿᩮᩅ [ᨽᩮᨴᨱ᩠ᨯᨠᩴᨿᩮᩅ (ᨠ.)] ᩋᨶᨴᩥ, ᨠᩮ ᨧ ᨨᩅᩮ ᩈᩥᨦ᩠ᨣᩣᩃᩮ, ᨠᩮ ᨸᨶ ᩈᩦᩉᨶᩣᨴᩮᨲᩥ [ᩈᩦᩉᨶᩣᨴᩮ (?)].

‘ᩑᩅᨾᩮᩅ ᨡᩮᩣ ᨲ᩠ᩅᩴ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩈᩩᨣᨲᩣᨸᨴᩣᨶᩮᩈᩩ ᨩᩦᩅᨾᩣᨶᩮᩣ ᩈᩩᨣᨲᩣᨲᩥᩁᩥᨲ᩠ᨲᩣᨶᩥ ᨽᩩᨬ᩠ᨩᨾᩣᨶᩮᩣ ᨲᨳᩣᨣᨲᩮ ᩋᩁᩉᨶ᩠ᨲᩮ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮ ᩌᩈᩣᨴᩮᨲᨻ᩠ᨻᩴ ᨾᨬ᩠ᨬᩈᩥ. ᨠᩮ ᨧ ᨨᩅᩮ ᨸᩣᨳᩥᨠᨸᩩᨲ᩠ᨲᩮ, ᨠᩣ ᨧ ᨲᨳᩣᨣᨲᩣᨶᩴ ᩋᩁᩉᨶ᩠ᨲᩣᨶᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣᨶᩴ ᩌᩈᩣᨴᨶᩣ’ᨲᩥ.

᪒᪙. ‘‘ᨿᨲᩮᩣ ᨡᩮᩣ, ᨽᨣ᩠ᨣᩅ, ᨩᩣᩃᩥᨿᩮᩣ ᨴᩣᩁᩩᨸᨲ᩠ᨲᩥᨠᨶ᩠ᨲᩮᩅᩣᩈᩦ ᩍᨾᩥᨶᩣ ᩒᨸᨾ᩠ᨾᩮᨶ ᨶᩮᩅ ᩋᩈᨠ᩠ᨡᩥ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᨲᨾ᩠ᩉᩣ ᩌᩈᨶᩣ ᨧᩣᩅᩮᨲᩩᩴ. ᩋᨳ ᨶᩴ ᩑᨲᨴᩅᩮᩣᨧ –

‘ᩈᩦᩉᩮᩣᨲᩥ ᩋᨲ᩠ᨲᩣᨶᩴ ᩈᨾᩮᨠ᩠ᨡᩥᨿᩣᨶ,

ᩋᨾᨬ᩠ᨬᩥ ᨠᩮᩣᨲ᩠ᨳᩩ ᨾᩥᨣᩁᩣᨩᩣᩉᨾᩈ᩠ᨾᩥ;

ᨲᨳᩮᩅ [ᨲᨾᩮᩅ (ᩈ᩠ᨿᩣ.)] ᩈᩮᩣ ᩈᩥᨦ᩠ᨣᩣᩃᨠᩴ ᩋᨶᨴᩥ,

ᨠᩮ ᨧ ᨨᩅᩮ ᩈᩥᨦ᩠ᨣᩣᩃᩮ ᨠᩮ ᨸᨶ ᩈᩦᩉᨶᩣᨴᩮ’ᨲᩥ.

‘ᩑᩅᨾᩮᩅ ᨡᩮᩣ ᨲ᩠ᩅᩴ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩈᩩᨣᨲᩣᨸᨴᩣᨶᩮᩈᩩ ᨩᩦᩅᨾᩣᨶᩮᩣ ᩈᩩᨣᨲᩣᨲᩥᩁᩥᨲ᩠ᨲᩣᨶᩥ ᨽᩩᨬ᩠ᨩᨾᩣᨶᩮᩣ ᨲᨳᩣᨣᨲᩮ ᩋᩁᩉᨶ᩠ᨲᩮ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮ ᩌᩈᩣᨴᩮᨲᨻ᩠ᨻᩴ ᨾᨬ᩠ᨬᩈᩥ. ᨠᩮ ᨧ ᨨᩅᩮ ᨸᩣᨳᩥᨠᨸᩩᨲ᩠ᨲᩮ, ᨠᩣ ᨧ ᨲᨳᩣᨣᨲᩣᨶᩴ ᩋᩁᩉᨶ᩠ᨲᩣᨶᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣᨶᩴ ᩌᩈᩣᨴᨶᩣ’ᨲᩥ.

᪓᪐. ‘‘ᨿᨲᩮᩣ ᨡᩮᩣ, ᨽᨣ᩠ᨣᩅ, ᨩᩣᩃᩥᨿᩮᩣ ᨴᩣᩁᩩᨸᨲ᩠ᨲᩥᨠᨶ᩠ᨲᩮᩅᩣᩈᩦ ᩍᨾᩥᨶᩣᨸᩥ ᩒᨸᨾ᩠ᨾᩮᨶ ᨶᩮᩅ ᩋᩈᨠ᩠ᨡᩥ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᨲᨾ᩠ᩉᩣ ᩌᩈᨶᩣ ᨧᩣᩅᩮᨲᩩᩴ. ᩋᨳ ᨶᩴ ᩑᨲᨴᩅᩮᩣᨧ –

‘ᩋᨬ᩠ᨬᩴ ᩋᨶᩩᨧᨦ᩠ᨠᨾᨶᩴ, ᩋᨲ᩠ᨲᩣᨶᩴ ᩅᩥᨥᩣᩈᩮ ᩈᨾᩮᨠ᩠ᨡᩥᨿ;

ᨿᩣᩅ ᩋᨲ᩠ᨲᩣᨶᩴ ᨶ ᨸᩔᨲᩥ, ᨠᩮᩣᨲ᩠ᨳᩩ ᨲᩣᩅ ᨻ᩠ᨿᨣ᩠ᨥᩮᩣᨲᩥ ᨾᨬ᩠ᨬᨲᩥ.

ᨲᨳᩮᩅ ᩈᩮᩣ ᩈᩥᨦ᩠ᨣᩣᩃᨠᩴ ᩋᨶᨴᩥ;

ᨠᩮ ᨧ ᨨᩅᩮ ᩈᩥᨦ᩠ᨣᩣᩃᩮ ᨠᩮ ᨸᨶ ᩈᩦᩉᨶᩣᨴᩮ’ᨲᩥ.

‘ᩑᩅᨾᩮᩅ ᨡᩮᩣ ᨲ᩠ᩅᩴ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩈᩩᨣᨲᩣᨸᨴᩣᨶᩮᩈᩩ ᨩᩦᩅᨾᩣᨶᩮᩣ ᩈᩩᨣᨲᩣᨲᩥᩁᩥᨲ᩠ᨲᩣᨶᩥ ᨽᩩᨬ᩠ᨩᨾᩣᨶᩮᩣ ᨲᨳᩣᨣᨲᩮ ᩋᩁᩉᨶ᩠ᨲᩮ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮ ᩌᩈᩣᨴᩮᨲᨻ᩠ᨻᩴ ᨾᨬ᩠ᨬᩈᩥ. ᨠᩮ ᨧ ᨨᩅᩮ ᨸᩣᨳᩥᨠᨸᩩᨲ᩠ᨲᩮ, ᨠᩣ ᨧ ᨲᨳᩣᨣᨲᩣᨶᩴ ᩋᩁᩉᨶ᩠ᨲᩣᨶᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣᨶᩴ ᩌᩈᩣᨴᨶᩣ’ᨲᩥ.

᪓᪑. ‘‘ᨿᨲᩮᩣ ᨡᩮᩣ, ᨽᨣ᩠ᨣᩅ, ᨩᩣᩃᩥᨿᩮᩣ ᨴᩣᩁᩩᨸᨲ᩠ᨲᩥᨠᨶ᩠ᨲᩮᩅᩣᩈᩦ ᩍᨾᩥᨶᩣᨸᩥ ᩒᨸᨾ᩠ᨾᩮᨶ ᨶᩮᩅ ᩋᩈᨠ᩠ᨡᩥ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᨲᨾ᩠ᩉᩣ ᩌᩈᨶᩣ ᨧᩣᩅᩮᨲᩩᩴ. ᩋᨳ ᨶᩴ ᩑᨲᨴᩅᩮᩣᨧ –

‘ᨽᩩᨲ᩠ᩅᩣᨶ ᨽᩮᨠᩮ [ᨽᩥᨦ᩠ᨣᩮ (ᨠ.)] ᨡᩃᨾᩪᩈᩥᨠᩣᨿᩮᩣ,

ᨠᨭᩈᩦᩈᩩ ᨡᩥᨲ᩠ᨲᩣᨶᩥ ᨧ ᨠᩮᩣᨱᨸᩣᨶᩥ [ᨠᩪᨱᨸᩣᨶᩥ (ᩈ᩠ᨿᩣ.)];

ᨾᩉᩣᩅᨶᩮ ᩈᩩᨬ᩠ᨬᩅᨶᩮ ᩅᩥᩅᨯ᩠ᨰᩮᩣ,

ᩋᨾᨬ᩠ᨬᩥ ᨠᩮᩣᨲ᩠ᨳᩩ ᨾᩥᨣᩁᩣᨩᩣᩉᨾᩈ᩠ᨾᩥ.

ᨲᨳᩮᩅ ᩈᩮᩣ ᩈᩥᨦ᩠ᨣᩣᩃᨠᩴ ᩋᨶᨴᩥ;

ᨠᩮ ᨧ ᨨᩅᩮ ᩈᩥᨦ᩠ᨣᩣᩃᩮ ᨠᩮ ᨸᨶ ᩈᩦᩉᨶᩣᨴᩮ’ᨲᩥ.

‘ᩑᩅᨾᩮᩅ ᨡᩮᩣ ᨲ᩠ᩅᩴ, ᩌᩅᩩᩈᩮᩣ ᨸᩣᨳᩥᨠᨸᩩᨲ᩠ᨲ, ᩈᩩᨣᨲᩣᨸᨴᩣᨶᩮᩈᩩ ᨩᩦᩅᨾᩣᨶᩮᩣ ᩈᩩᨣᨲᩣᨲᩥᩁᩥᨲ᩠ᨲᩣᨶᩥ ᨽᩩᨬ᩠ᨩᨾᩣᨶᩮᩣ ᨲᨳᩣᨣᨲᩮ ᩋᩁᩉᨶ᩠ᨲᩮ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮ ᩌᩈᩣᨴᩮᨲᨻ᩠ᨻᩴ ᨾᨬ᩠ᨬᩈᩥ. ᨠᩮ ᨧ ᨨᩅᩮ ᨸᩣᨳᩥᨠᨸᩩᨲ᩠ᨲᩮ, ᨠᩣ ᨧ ᨲᨳᩣᨣᨲᩣᨶᩴ ᩋᩁᩉᨶ᩠ᨲᩣᨶᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣᨶᩴ ᩌᩈᩣᨴᨶᩣ’ᨲᩥ.

᪓᪒. ‘‘ᨿᨲᩮᩣ ᨡᩮᩣ, ᨽᨣ᩠ᨣᩅ, ᨩᩣᩃᩥᨿᩮᩣ ᨴᩣᩁᩩᨸᨲ᩠ᨲᩥᨠᨶ᩠ᨲᩮᩅᩣᩈᩦ ᩍᨾᩥᨶᩣᨸᩥ ᩒᨸᨾ᩠ᨾᩮᨶ ᨶᩮᩅ ᩋᩈᨠ᩠ᨡᩥ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᨲᨾ᩠ᩉᩣ ᩌᩈᨶᩣ ᨧᩣᩅᩮᨲᩩᩴ. ᩋᨳ ᨲᩴ ᨸᩁᩥᩈᩴ ᩌᨣᨶ᩠ᨲ᩠ᩅᩣ ᩑᩅᨾᩣᩁᩮᩣᨧᩮᩈᩥ – ‘ᨸᩁᩣᨽᩪᨲᩁᩪᨸᩮᩣ, ᨽᩮᩣ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᩌᨿᩣᨾᩥ ᩌᩅᩩᩈᩮᩣ, ᩌᨿᩣᨾᩥ ᩌᩅᩩᩈᩮᩣᨲᩥ ᩅᨲ᩠ᩅᩣ ᨲᨲ᩠ᨳᩮᩅ ᩈᩴᩈᨸ᩠ᨸᨲᩥ, ᨶ ᩈᨠ᩠ᨠᩮᩣᨲᩥ ᩌᩈᨶᩣᨸᩥ ᩅᩩᨭ᩠ᨮᩣᨲᩩ’ᨶ᩠ᨲᩥ.

᪓᪓. ‘‘ᩑᩅᩴ ᩅᩩᨲ᩠ᨲᩮ, ᩋᩉᩴ, ᨽᨣ᩠ᨣᩅ, ᨲᩴ ᨸᩁᩥᩈᩴ ᩑᨲᨴᩅᩮᩣᨧᩴ – ‘ᩋᨽᨻ᩠ᨻᩮᩣ ᨡᩮᩣ, ᩌᩅᩩᩈᩮᩣ, ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨾᨾ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᨣᨧ᩠ᨨᩮᨿ᩠ᨿᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿ. ᩈᨧᩮᨸᩣᨿᩈ᩠ᨾᨶ᩠ᨲᩣᨶᩴ ᩃᩥᨧ᩠ᨨᩅᩦᨶᩴ ᩑᩅᨾᩔ – ᨾᨿᩴ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᩅᩁᨲ᩠ᨲᩣᩉᩥ ᨻᨶ᩠ᨵᩥᨲ᩠ᩅᩣ ᨶᩣᨣᩮᩉᩥ [ᨣᩮᩣᨿᩩᨣᩮᩉᩥ (ᩈᨻ᩠ᨻᨲ᩠ᨳ) ᩋᨭ᩠ᨮᨠᨳᩣ ᨸᩔᩥᨲᨻ᩠ᨻᩣ] ᩌᩅᩥᨬ᩠ᨨᩮᨿ᩠ᨿᩣᨾᩣᨲᩥ. ᨲᩣ ᩅᩁᨲ᩠ᨲᩣ ᨨᩥᨩ᩠ᨩᩮᨿ᩠ᨿᩩᩴ ᨸᩣᨳᩥᨠᨸᩩᨲ᩠ᨲᩮᩣ ᩅᩣ. ᩋᨽᨻ᩠ᨻᩮᩣ ᨸᨶ ᩋᨧᩮᩃᩮᩣ ᨸᩣᨳᩥᨠᨸᩩᨲ᩠ᨲᩮᩣ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᨾᨾ ᩈᨾ᩠ᨾᩩᨡᩦᨽᩣᩅᩴ ᩌᨣᨶ᩠ᨲᩩᩴ. ᩈᨧᩮᨸᩥᩔ ᩑᩅᨾᩔ – ᩋᩉᩴ ᨲᩴ ᩅᩣᨧᩴ ᩋᨸ᩠ᨸᩉᩣᨿ ᨲᩴ ᨧᩥᨲ᩠ᨲᩴ ᩋᨸ᩠ᨸᩉᩣᨿ ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨩ᩠ᨩᩥᨲ᩠ᩅᩣ ᩈᨾᨱᩔ ᨣᩮᩣᨲᨾᩔ ᩈᨾ᩠ᨾᩩᨡᩦᨽᩣᩅᩴ ᨣᨧ᩠ᨨᩮᨿ᩠ᨿᨶ᩠ᨲᩥ, ᨾᩩᨴ᩠ᨵᩣᨸᩥ ᨲᩔ ᩅᩥᨸᨲᩮᨿ᩠ᨿᩣ’ᨲᩥ.

᪓᪔. ‘‘ᩋᨳ ᨡ᩠ᩅᩣᩉᩴ, ᨽᨣ᩠ᨣᩅ, ᨲᩴ ᨸᩁᩥᩈᩴ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᩈᩥᩴ ᩈᨾᩣᨴᨸᩮᩈᩥᩴ ᩈᨾᩩᨲ᩠ᨲᩮᨩᩮᩈᩥᩴ ᩈᨾ᩠ᨸᩉᩴᩈᩮᩈᩥᩴ, ᨲᩴ ᨸᩁᩥᩈᩴ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᨲ᩠ᩅᩣ ᩈᨾᩣᨴᨸᩮᨲ᩠ᩅᩣ ᩈᨾᩩᨲ᩠ᨲᩮᨩᩮᨲ᩠ᩅᩣ ᩈᨾ᩠ᨸᩉᩴᩈᩮᨲ᩠ᩅᩣ ᨾᩉᩣᨻᨶ᩠ᨵᨶᩣ ᨾᩮᩣᨠ᩠ᨡᩴ ᨠᩁᩥᨲ᩠ᩅᩣ ᨧᨲᩩᩁᩣᩈᩦᨲᩥᨸᩣᨱᩈᩉᩔᩣᨶᩥ ᨾᩉᩣᩅᩥᨴᩩᨣ᩠ᨣᩣ ᩏᨴ᩠ᨵᩁᩥᨲ᩠ᩅᩣ ᨲᩮᨩᩮᩣᨵᩣᨲᩩᩴ ᩈᨾᩣᨸᨩ᩠ᨩᩥᨲ᩠ᩅᩣ ᩈᨲ᩠ᨲᨲᩣᩃᩴ ᩅᩮᩉᩣᩈᩴ ᩋᨻ᩠ᨽᩩᨣ᩠ᨣᨶ᩠ᨲ᩠ᩅᩣ ᩋᨬ᩠ᨬᩴ ᩈᨲ᩠ᨲᨲᩣᩃᨾ᩠ᨸᩥ ᩋᨧ᩠ᨧᩥᩴ [ᩋᨣ᩠ᨣᩥᩴ (ᩈ᩠ᨿᩣ.)] ᩋᨽᩥᨶᩥᨾ᩠ᨾᩥᨶᩥᨲ᩠ᩅᩣ ᨸᨩ᩠ᨩᩃᩥᨲ᩠ᩅᩣ ᨵᩪᨾᩣᨿᩥᨲ᩠ᩅᩣ [ᨵᩪᨸᩣᨿᩥᨲ᩠ᩅᩣ (ᩈᩦ. ᨸᩦ.)] ᨾᩉᩣᩅᨶᩮ ᨠᩪᨭᩣᨣᩣᩁᩈᩣᩃᩣᨿᩴ ᨸᨧ᩠ᨧᩩᨭ᩠ᨮᩣᩈᩥᩴ.

᪓᪕. ‘‘ᩋᨳ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨿᩮᨶᩣᩉᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩴ ᨡᩮᩣ ᩋᩉᩴ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩴ ᩃᩥᨧ᩠ᨨᩅᩥᨸᩩᨲ᩠ᨲᩴ ᩑᨲᨴᩅᩮᩣᨧᩴ – ‘ᨲᩴ ᨠᩥᩴ ᨾᨬ᩠ᨬᩈᩥ, ᩈᩩᨶᨠ᩠ᨡᨲ᩠ᨲ, ᨿᨳᩮᩅ ᨲᩮ ᩋᩉᩴ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᩌᩁᨻ᩠ᨽ ᨻ᩠ᨿᩣᨠᩣᩈᩥᩴ, ᨲᨳᩮᩅ ᨲᩴ ᩅᩥᨸᩣᨠᩴ ᩋᨬ᩠ᨬᨳᩣ ᩅᩣ’ᨲᩥ? ‘ᨿᨳᩮᩅ ᨾᩮ, ᨽᨶ᩠ᨲᩮ, ᨽᨣᩅᩣ ᩋᨧᩮᩃᩴ ᨸᩣᨳᩥᨠᨸᩩᨲ᩠ᨲᩴ ᩌᩁᨻ᩠ᨽ ᨻ᩠ᨿᩣᨠᩣᩈᩥ, ᨲᨳᩮᩅ ᨲᩴ ᩅᩥᨸᩣᨠᩴ, ᨶᩮᩣ ᩋᨬ᩠ᨬᨳᩣ’ᨲᩥ.

‘ᨲᩴ ᨠᩥᩴ ᨾᨬ᩠ᨬᩈᩥ, ᩈᩩᨶᨠ᩠ᨡᨲ᩠ᨲ, ᨿᨴᩥ ᩑᩅᩴ ᩈᨶ᩠ᨲᩮ ᨠᨲᩴ ᩅᩣ ᩉᩮᩣᨲᩥ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ, ᩋᨠᨲᩴ ᩅᩣ’ᨲᩥ? ‘ᩋᨴ᩠ᨵᩣ ᨡᩮᩣ, ᨽᨶ᩠ᨲᩮ, ᩑᩅᩴ ᩈᨶ᩠ᨲᩮ ᨠᨲᩴ ᩉᩮᩣᨲᩥ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ, ᨶᩮᩣ ᩋᨠᨲ’ᨶ᩠ᨲᩥ. ‘ᩑᩅᨾ᩠ᨸᩥ ᨡᩮᩣ ᨾᩴ ᨲ᩠ᩅᩴ, ᨾᩮᩣᨥᨸᩩᩁᩥᩈ, ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩮᩣᨶ᩠ᨲᩴ ᩑᩅᩴ ᩅᨴᩮᩈᩥ – ᨶ ᩉᩥ ᨸᨶ ᨾᩮ, ᨽᨶ᩠ᨲᩮ, ᨽᨣᩅᩣ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨠᩁᩮᩣᨲᩦᨲᩥ. ᨸᩔ, ᨾᩮᩣᨥᨸᩩᩁᩥᩈ, ᨿᩣᩅᨬ᩠ᨧ ᨲᩮ ᩍᨴᩴ ᩋᨸᩁᨴ᩠ᨵᩴ’ᨲᩥ.

‘‘ᩑᩅᨾ᩠ᨸᩥ ᨡᩮᩣ, ᨽᨣ᩠ᨣᩅ, ᩈᩩᨶᨠ᩠ᨡᨲ᩠ᨲᩮᩣ ᩃᩥᨧ᩠ᨨᩅᩥᨸᩩᨲ᩠ᨲᩮᩣ ᨾᨿᩣ ᩅᩩᨧ᩠ᨧᨾᩣᨶᩮᩣ ᩋᨸᨠ᩠ᨠᨾᩮᩅ ᩍᨾᩈ᩠ᨾᩣ ᨵᨾ᩠ᨾᩅᩥᨶᨿᩣ, ᨿᨳᩣ ᨲᩴ ᩌᨸᩣᨿᩥᨠᩮᩣ ᨶᩮᩁᨿᩥᨠᩮᩣ.

ᩋᨣ᩠ᨣᨬ᩠ᨬᨸᨬ᩠ᨬᨲ᩠ᨲᩥᨠᨳᩣ

᪓᪖. ‘‘ᩋᨣ᩠ᨣᨬ᩠ᨬᨬ᩠ᨧᩣᩉᩴ, ᨽᨣ᩠ᨣᩅ, ᨸᨩᩣᨶᩣᨾᩥ. ᨲᨬ᩠ᨧ ᨸᨩᩣᨶᩣᨾᩥ [‘‘ᨲᨬ᩠ᨧᨸᨩᩣᨶᩣᨾᩦ’’ᨲᩥ ᩍᨴᩴ ᩈ᩠ᨿᩣᨸᩮᩣᨲ᩠ᨳᨠᩮᨶᨲ᩠ᨳᩥ], ᨲᨲᩮᩣ ᨧ ᩏᨲ᩠ᨲᩁᩥᨲᩁᩴ ᨸᨩᩣᨶᩣᨾᩥ, ᨲᨬ᩠ᨧ ᨸᨩᩣᨶᩴ [ᨸᨩᩣᨶᨶᩴ (ᩈ᩠ᨿᩣ. ᨠ.) ᩋᨭ᩠ᨮᨠᨳᩣᩈᩴᩅᨱ᩠ᨱᨶᩣ ᨸᩔᩥᨲᨻ᩠ᨻᩣ] ᨶ ᨸᩁᩣᨾᩈᩣᨾᩥ, ᩋᨸᩁᩣᨾᩈᨲᩮᩣ ᨧ ᨾᩮ ᨸᨧ᩠ᨧᨲ᩠ᨲᨬ᩠ᨬᩮᩅ ᨶᩥᨻ᩠ᨻᩩᨲᩥ ᩅᩥᨴᩥᨲᩣ, ᨿᨴᨽᩥᨩᩣᨶᩴ ᨲᨳᩣᨣᨲᩮᩣ ᨶᩮᩣ ᩋᨶᨿᩴ ᩌᨸᨩ᩠ᨩᨲᩥ.

᪓᪗. ‘‘ᩈᨶ᩠ᨲᩥ, ᨽᨣ᩠ᨣᩅ, ᩑᨠᩮ ᩈᨾᨱᨻᩕᩣᩉ᩠ᨾᨱᩣ ᩍᩔᩁᨠᩩᨲ᩠ᨲᩴ ᨻᩕᩉ᩠ᨾᨠᩩᨲ᩠ᨲᩴ ᩌᨧᩁᩥᨿᨠᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨶ᩠ᨲᩥ. ᨲ᩠ᨿᩣᩉᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᩴ ᩅᨴᩣᨾᩥ – ‘ᩈᨧ᩠ᨧᩴ ᨠᩥᩁ ᨲᩩᨾ᩠ᩉᩮ ᩌᨿᩈ᩠ᨾᨶ᩠ᨲᩮᩣ ᩍᩔᩁᨠᩩᨲ᩠ᨲᩴ ᨻᩕᩉ᩠ᨾᨠᩩᨲ᩠ᨲᩴ ᩌᨧᩁᩥᨿᨠᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨳᩣ’ᨲᩥ? ᨲᩮ ᨧ ᨾᩮ ᩑᩅᩴ ᨸᩩᨭ᩠ᨮᩣ, ‘ᩌᨾᩮᩣ’ᨲᩥ [ᩌᨾᩣᨲᩥ (ᩈ᩠ᨿᩣ.)] ᨸᨭᩥᨩᩣᨶᨶ᩠ᨲᩥ. ᨲ᩠ᨿᩣᩉᩴ ᩑᩅᩴ ᩅᨴᩣᨾᩥ – ‘ᨠᨳᩴᩅᩥᩉᩥᨲᨠᩴ ᨸᨶ [ᨠᨳᩴ ᩅᩥᩉᩥᨲᨠᩴᨶᩮᩣ ᨸᨶ (ᨠ.)] ᨲᩩᨾ᩠ᩉᩮ ᩌᨿᩈ᩠ᨾᨶ᩠ᨲᩮᩣ ᩍᩔᩁᨠᩩᨲ᩠ᨲᩴ ᨻᩕᩉ᩠ᨾᨠᩩᨲ᩠ᨲᩴ ᩌᨧᩁᩥᨿᨠᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨳᩣ’ᨲᩥ? ᨲᩮ ᨾᨿᩣ ᨸᩩᨭ᩠ᨮᩣ ᨶ ᩈᨾ᩠ᨸᩣᨿᨶ᩠ᨲᩥ, ᩋᩈᨾ᩠ᨸᩣᨿᨶ᩠ᨲᩣ ᨾᨾᨬ᩠ᨬᩮᩅ ᨸᨭᩥᨸᩩᨧ᩠ᨨᨶ᩠ᨲᩥ. ᨲᩮᩈᩣᩉᩴ ᨸᩩᨭ᩠ᨮᩮᩣ ᨻ᩠ᨿᩣᨠᩁᩮᩣᨾᩥ –

᪓᪘. ‘ᩉᩮᩣᨲᩥ ᨡᩮᩣ ᩈᩮᩣ, ᩌᩅᩩᩈᩮᩣ, ᩈᨾᨿᩮᩣ ᨿᩴ ᨠᨴᩣᨧᩥ ᨠᩁᩉᨧᩥ ᨴᩦᨥᩔ ᩋᨴ᩠ᨵᩩᨶᩮᩣ ᩋᨧ᩠ᨧᨿᩮᨶ ᩋᨿᩴ ᩃᩮᩣᨠᩮᩣ ᩈᩴᩅᨭ᩠ᨭᨲᩥ. ᩈᩴᩅᨭ᩠ᨭᨾᩣᨶᩮ ᩃᩮᩣᨠᩮ ᨿᩮᨽᩩᨿ᩠ᨿᩮᨶ ᩈᨲ᩠ᨲᩣ ᩌᨽᩔᩁᩈᩴᩅᨲ᩠ᨲᨶᩥᨠᩣ ᩉᩮᩣᨶ᩠ᨲᩥ. ᨲᩮ ᨲᨲ᩠ᨳ ᩉᩮᩣᨶ᩠ᨲᩥ ᨾᨶᩮᩣᨾᨿᩣ ᨸᩦᨲᩥᨽᨠ᩠ᨡᩣ ᩈᨿᩴᨸᨽᩣ ᩋᨶ᩠ᨲᩃᩥᨠ᩠ᨡᨧᩁᩣ ᩈᩩᨽᨭ᩠ᨮᩣᨿᩥᨶᩮᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᨲᩥᨭ᩠ᨮᨶ᩠ᨲᩥ.

‘ᩉᩮᩣᨲᩥ ᨡᩮᩣ ᩈᩮᩣ, ᩌᩅᩩᩈᩮᩣ, ᩈᨾᨿᩮᩣ ᨿᩴ ᨠᨴᩣᨧᩥ ᨠᩁᩉᨧᩥ ᨴᩦᨥᩔ ᩋᨴ᩠ᨵᩩᨶᩮᩣ ᩋᨧ᩠ᨧᨿᩮᨶ ᩋᨿᩴ ᩃᩮᩣᨠᩮᩣ ᩅᩥᩅᨭ᩠ᨭᨲᩥ. ᩅᩥᩅᨭ᩠ᨭᨾᩣᨶᩮ ᩃᩮᩣᨠᩮ ᩈᩩᨬ᩠ᨬᩴ ᨻᩕᩉ᩠ᨾᩅᩥᨾᩣᨶᩴ ᨸᩣᨲᩩᨽᩅᨲᩥ. ᩋᨳ ᨡᩮᩣ [ᩋᨳ (ᩈᩦ. ᩈ᩠ᨿᩣ. ᨸᩦ.)] ᩋᨬ᩠ᨬᨲᩁᩮᩣ ᩈᨲ᩠ᨲᩮᩣ ᩌᨿᩩᨠ᩠ᨡᨿᩣ ᩅᩣ ᨸᩩᨬ᩠ᨬᨠ᩠ᨡᨿᩣ ᩅᩣ ᩌᨽᩔᩁᨠᩣᨿᩣ ᨧᩅᩥᨲ᩠ᩅᩣ ᩈᩩᨬ᩠ᨬᩴ ᨻᩕᩉ᩠ᨾᩅᩥᨾᩣᨶᩴ ᩏᨸᨸᨩ᩠ᨩᨲᩥ. ᩈᩮᩣ ᨲᨲ᩠ᨳ ᩉᩮᩣᨲᩥ ᨾᨶᩮᩣᨾᨿᩮᩣ ᨸᩦᨲᩥᨽᨠ᩠ᨡᩮᩣ ᩈᨿᩴᨸᨽᩮᩣ ᩋᨶ᩠ᨲᩃᩥᨠ᩠ᨡᨧᩁᩮᩣ ᩈᩩᨽᨭ᩠ᨮᩣᨿᩦ, ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᨲᩥᨭ᩠ᨮᨲᩥ.

‘ᨲᩔ ᨲᨲ᩠ᨳ ᩑᨠᨠᩔ ᨴᩦᨥᩁᨲ᩠ᨲᩴ ᨶᩥᩅᩩᩈᩥᨲᨲ᩠ᨲᩣ ᩋᨶᨽᩥᩁᨲᩥ ᨸᩁᩥᨲᩔᨶᩣ ᩏᨸ᩠ᨸᨩ᩠ᨩᨲᩥ – ᩋᩉᩮᩣ ᩅᨲ ᩋᨬ᩠ᨬᩮᨸᩥ ᩈᨲ᩠ᨲᩣ ᩍᨲ᩠ᨳᨲ᩠ᨲᩴ ᩌᨣᨧ᩠ᨨᩮᨿ᩠ᨿᩩᨶ᩠ᨲᩥ. ᩋᨳ ᩋᨬ᩠ᨬᩮᨸᩥ ᩈᨲ᩠ᨲᩣ ᩌᨿᩩᨠ᩠ᨡᨿᩣ ᩅᩣ ᨸᩩᨬ᩠ᨬᨠ᩠ᨡᨿᩣ ᩅᩣ ᩌᨽᩔᩁᨠᩣᨿᩣ ᨧᩅᩥᨲ᩠ᩅᩣ ᨻᩕᩉ᩠ᨾᩅᩥᨾᩣᨶᩴ ᩏᨸᨸᨩ᩠ᨩᨶ᩠ᨲᩥ ᨲᩔ ᩈᨲ᩠ᨲᩔ ᩈᩉᨻ᩠ᨿᨲᩴ. ᨲᩮᨸᩥ ᨲᨲ᩠ᨳ ᩉᩮᩣᨶ᩠ᨲᩥ ᨾᨶᩮᩣᨾᨿᩣ ᨸᩦᨲᩥᨽᨠ᩠ᨡᩣ ᩈᨿᩴᨸᨽᩣ ᩋᨶ᩠ᨲᩃᩥᨠ᩠ᨡᨧᩁᩣ ᩈᩩᨽᨭ᩠ᨮᩣᨿᩥᨶᩮᩣ, ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᨲᩥᨭ᩠ᨮᨶ᩠ᨲᩥ.

᪓᪙. ‘ᨲᨲᩕᩣᩅᩩᩈᩮᩣ, ᨿᩮᩣ ᩈᩮᩣ ᩈᨲ᩠ᨲᩮᩣ ᨸᨮᨾᩴ ᩏᨸᨸᨶ᩠ᨶᩮᩣ, ᨲᩔ ᩑᩅᩴ ᩉᩮᩣᨲᩥ – ᩋᩉᨾᩈ᩠ᨾᩥ ᨻᩕᩉ᩠ᨾᩣ ᨾᩉᩣᨻᩕᩉ᩠ᨾᩣ ᩋᨽᩥᨽᩪ ᩋᨶᨽᩥᨽᩪᨲᩮᩣ ᩋᨬ᩠ᨬᨴᨲ᩠ᨳᩩᨴᩈᩮᩣ ᩅᩈᩅᨲ᩠ᨲᩦ ᩍᩔᩁᩮᩣ ᨠᨲ᩠ᨲᩣ ᨶᩥᨾ᩠ᨾᩣᨲᩣ ᩈᩮᨭ᩠ᨮᩮᩣ ᩈᨩᩥᨲᩣ [ᩈᨬ᩠ᨩᩥᨲᩣ (ᩈᩦ. ᨸᩦ.), ᩈᨩ᩠ᨩᩥᨲᩣ (ᩈ᩠ᨿᩣ. ᨠᩴ.)] ᩅᩈᩦ ᨸᩥᨲᩣ ᨽᩪᨲᨽᨻ᩠ᨿᩣᨶᩴ, ᨾᨿᩣ ᩍᨾᩮ ᩈᨲ᩠ᨲᩣ ᨶᩥᨾ᩠ᨾᩥᨲᩣ. ᨲᩴ ᨠᩥᩔ ᩉᩮᨲᩩ? ᨾᨾᨬ᩠ᩉᩥ ᨸᩩᨻ᩠ᨻᩮ ᩑᨲᨴᩉᩮᩣᩈᩥ – ᩋᩉᩮᩣ ᩅᨲ ᩋᨬ᩠ᨬᩮᨸᩥ ᩈᨲ᩠ᨲᩣ ᩍᨲ᩠ᨳᨲ᩠ᨲᩴ ᩌᨣᨧ᩠ᨨᩮᨿ᩠ᨿᩩᨶ᩠ᨲᩥ; ᩍᨲᩥ ᨾᨾ ᨧ ᨾᨶᩮᩣᨸᨱᩥᨵᩥ. ᩍᨾᩮ ᨧ ᩈᨲ᩠ᨲᩣ ᩍᨲ᩠ᨳᨲ᩠ᨲᩴ ᩌᨣᨲᩣᨲᩥ.

‘ᨿᩮᨸᩥ ᨲᩮ ᩈᨲ᩠ᨲᩣ ᨸᨧ᩠ᨨᩣ ᩏᨸᨸᨶ᩠ᨶᩣ, ᨲᩮᩈᨾ᩠ᨸᩥ ᩑᩅᩴ ᩉᩮᩣᨲᩥ – ᩋᨿᩴ ᨡᩮᩣ ᨽᩅᩴ ᨻᩕᩉ᩠ᨾᩣ ᨾᩉᩣᨻᩕᩉ᩠ᨾᩣ ᩋᨽᩥᨽᩪ ᩋᨶᨽᩥᨽᩪᨲᩮᩣ ᩋᨬ᩠ᨬᨴᨲ᩠ᨳᩩᨴᩈᩮᩣ ᩅᩈᩅᨲ᩠ᨲᩦ ᩍᩔᩁᩮᩣ ᨠᨲ᩠ᨲᩣ ᨶᩥᨾ᩠ᨾᩣᨲᩣ ᩈᩮᨭ᩠ᨮᩮᩣ ᩈᨩᩥᨲᩣ ᩅᩈᩦ ᨸᩥᨲᩣ ᨽᩪᨲᨽᨻ᩠ᨿᩣᨶᩴ; ᩍᨾᩥᨶᩣ ᨾᨿᩴ ᨽᩮᩣᨲᩣ ᨻᩕᩉ᩠ᨾᩩᨶᩣ ᨶᩥᨾ᩠ᨾᩥᨲᩣ. ᨲᩴ ᨠᩥᩔ ᩉᩮᨲᩩ? ᩍᨾᨬ᩠ᩉᩥ ᨾᨿᩴ ᩋᨴ᩠ᨴᩈᩣᨾ ᩍᨵ ᨸᨮᨾᩴ ᩏᨸᨸᨶ᩠ᨶᩴ; ᨾᨿᩴ ᨸᨶᩣᨾ᩠ᩉ ᨸᨧ᩠ᨨᩣ ᩏᨸᨸᨶ᩠ᨶᩣᨲᩥ.

᪔᪐. ‘ᨲᨲᩕᩣᩅᩩᩈᩮᩣ, ᨿᩮᩣ ᩈᩮᩣ ᩈᨲ᩠ᨲᩮᩣ ᨸᨮᨾᩴ ᩏᨸᨸᨶ᩠ᨶᩮᩣ, ᩈᩮᩣ ᨴᩦᨥᩣᨿᩩᨠᨲᩁᩮᩣ ᨧ ᩉᩮᩣᨲᩥ ᩅᨱ᩠ᨱᩅᨶ᩠ᨲᨲᩁᩮᩣ ᨧ ᨾᩉᩮᩈᨠ᩠ᨡᨲᩁᩮᩣ ᨧ. ᨿᩮ ᨸᨶ ᨲᩮ ᩈᨲ᩠ᨲᩣ ᨸᨧ᩠ᨨᩣ ᩏᨸᨸᨶ᩠ᨶᩣ, ᨲᩮ ᩋᨸ᩠ᨸᩣᨿᩩᨠᨲᩁᩣ ᨧ ᩉᩮᩣᨶ᩠ᨲᩥ ᨴᩩᨻ᩠ᨻᨱ᩠ᨱᨲᩁᩣ ᨧ ᩋᨸ᩠ᨸᩮᩈᨠ᩠ᨡᨲᩁᩣ ᨧ.

‘ᨮᩣᨶᩴ ᨡᩮᩣ ᨸᨶᩮᨲᩴ, ᩌᩅᩩᩈᩮᩣ, ᩅᩥᨩ᩠ᨩᨲᩥ, ᨿᩴ ᩋᨬ᩠ᨬᨲᩁᩮᩣ ᩈᨲ᩠ᨲᩮᩣ ᨲᨾ᩠ᩉᩣ ᨠᩣᨿᩣ ᨧᩅᩥᨲ᩠ᩅᩣ ᩍᨲ᩠ᨳᨲ᩠ᨲᩴ ᩌᨣᨧ᩠ᨨᨲᩥ. ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨲᩥ. ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᨲᩮᩣ ᩈᨾᩣᨶᩮᩣ ᩌᨲᨸ᩠ᨸᨾᨶ᩠ᩅᩣᨿ ᨸᨵᩣᨶᨾᨶ᩠ᩅᩣᨿ ᩋᨶᩩᨿᩮᩣᨣᨾᨶ᩠ᩅᩣᨿ ᩋᨸ᩠ᨸᨾᩣᨴᨾᨶ᩠ᩅᩣᨿ ᩈᨾ᩠ᨾᩣᨾᨶᩈᩥᨠᩣᩁᨾᨶ᩠ᩅᩣᨿ ᨲᨳᩣᩁᩪᨸᩴ ᨧᩮᨲᩮᩣᩈᨾᩣᨵᩥᩴ ᨹᩩᩈᨲᩥ, ᨿᨳᩣᩈᨾᩣᩉᩥᨲᩮ ᨧᩥᨲ᩠ᨲᩮ ᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ; ᨲᨲᩮᩣ ᨸᩁᩴ ᨶᩣᨶᩩᩔᩁᨲᩥ.

‘ᩈᩮᩣ ᩑᩅᨾᩣᩉ – ᨿᩮᩣ ᨡᩮᩣ ᩈᩮᩣ ᨽᩅᩴ ᨻᩕᩉ᩠ᨾᩣ ᨾᩉᩣᨻᩕᩉ᩠ᨾᩣ ᩋᨽᩥᨽᩪ ᩋᨶᨽᩥᨽᩪᨲᩮᩣ ᩋᨬ᩠ᨬᨴᨲ᩠ᨳᩩᨴᩈᩮᩣ ᩅᩈᩅᨲ᩠ᨲᩦ ᩍᩔᩁᩮᩣ ᨠᨲ᩠ᨲᩣ ᨶᩥᨾ᩠ᨾᩣᨲᩣ ᩈᩮᨭ᩠ᨮᩮᩣ ᩈᨩᩥᨲᩣ ᩅᩈᩦ ᨸᩥᨲᩣ ᨽᩪᨲᨽᨻ᩠ᨿᩣᨶᩴ, ᨿᩮᨶ ᨾᨿᩴ ᨽᩮᩣᨲᩣ ᨻᩕᩉ᩠ᨾᩩᨶᩣ ᨶᩥᨾ᩠ᨾᩥᨲᩣ. ᩈᩮᩣ ᨶᩥᨧ᩠ᨧᩮᩣ ᨵᩩᩅᩮᩣ [ᩈᩔᨲᩮᩣ ᨴᩦᨥᩣᨿᩩᨠᩮᩣ (ᩈ᩠ᨿᩣ. ᨠ.)] ᩈᩔᨲᩮᩣ ᩋᩅᩥᨸᩁᩥᨱᩣᨾᨵᨾ᩠ᨾᩮᩣ ᩈᩔᨲᩥᩈᨾᩴ ᨲᨳᩮᩅ ᨮᩔᨲᩥ. ᨿᩮ ᨸᨶ ᨾᨿᩴ ᩋᩉᩩᨾ᩠ᩉᩣ ᨲᩮᨶ ᨽᩮᩣᨲᩣ ᨻᩕᩉ᩠ᨾᩩᨶᩣ ᨶᩥᨾ᩠ᨾᩥᨲᩣ, ᨲᩮ ᨾᨿᩴ ᩋᨶᩥᨧ᩠ᨧᩣ ᩋᨴ᩠ᨵᩩᩅᩣ [ᩋᨴ᩠ᨵᩩᩅᩣ ᩋᩈᩔᨲᩣ (ᩈ᩠ᨿᩣ. ᨠ.)] ᩋᨸ᩠ᨸᩣᨿᩩᨠᩣ ᨧᩅᨶᨵᨾ᩠ᨾᩣ ᩍᨲ᩠ᨳᨲ᩠ᨲᩴ ᩌᨣᨲᩣ’ᨲᩥ. ᩑᩅᩴᩅᩥᩉᩥᨲᨠᩴ ᨶᩮᩣ ᨲᩩᨾ᩠ᩉᩮ ᩌᨿᩈ᩠ᨾᨶ᩠ᨲᩮᩣ ᩍᩔᩁᨠᩩᨲ᩠ᨲᩴ ᨻᩕᩉ᩠ᨾᨠᩩᨲ᩠ᨲᩴ ᩌᨧᩁᩥᨿᨠᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨳᩣᨲᩥ. ‘ᨲᩮ ᩑᩅᨾᩣᩉᩴᩈᩩ – ᩑᩅᩴ ᨡᩮᩣ ᨶᩮᩣ, ᩌᩅᩩᩈᩮᩣ ᨣᩮᩣᨲᨾ, ᩈᩩᨲᩴ, ᨿᨳᩮᩅᩣᨿᩈ᩠ᨾᩣ ᨣᩮᩣᨲᨾᩮᩣ ᩌᩉᩣ’ᨲᩥ. ‘‘ᩋᨣ᩠ᨣᨬ᩠ᨬᨬ᩠ᨧᩣᩉᩴ, ᨽᨣ᩠ᨣᩅ, ᨸᨩᩣᨶᩣᨾᩥ. ᨲᨬ᩠ᨧ ᨸᨩᩣᨶᩣᨾᩥ, ᨲᨲᩮᩣ ᨧ ᩏᨲ᩠ᨲᩁᩥᨲᩁᩴ ᨸᨩᩣᨶᩣᨾᩥ, ᨲᨬ᩠ᨧ ᨸᨩᩣᨶᩴ ᨶ ᨸᩁᩣᨾᩈᩣᨾᩥ, ᩋᨸᩁᩣᨾᩈᨲᩮᩣ ᨧ ᨾᩮ ᨸᨧ᩠ᨧᨲ᩠ᨲᨬ᩠ᨬᩮᩅ ᨶᩥᨻ᩠ᨻᩩᨲᩥ ᩅᩥᨴᩥᨲᩣ. ᨿᨴᨽᩥᨩᩣᨶᩴ ᨲᨳᩣᨣᨲᩮᩣ ᨶᩮᩣ ᩋᨶᨿᩴ ᩌᨸᨩ᩠ᨩᨲᩥ.

᪔᪑. ‘‘ᩈᨶ᩠ᨲᩥ, ᨽᨣ᩠ᨣᩅ, ᩑᨠᩮ ᩈᨾᨱᨻᩕᩣᩉ᩠ᨾᨱᩣ ᨡᩥᨯ᩠ᨯᩣᨸᨴᩮᩣᩈᩥᨠᩴ ᩌᨧᩁᩥᨿᨠᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨶ᩠ᨲᩥ. ᨲ᩠ᨿᩣᩉᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᩴ ᩅᨴᩣᨾᩥ – ‘ᩈᨧ᩠ᨧᩴ ᨠᩥᩁ ᨲᩩᨾ᩠ᩉᩮ ᩌᨿᩈ᩠ᨾᨶ᩠ᨲᩮᩣ ᨡᩥᨯ᩠ᨯᩣᨸᨴᩮᩣᩈᩥᨠᩴ ᩌᨧᩁᩥᨿᨠᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨳᩣ’ᨲᩥ? ᨲᩮ ᨧ ᨾᩮ ᩑᩅᩴ ᨸᩩᨭ᩠ᨮᩣ ‘ᩌᨾᩮᩣ’ᨲᩥ ᨸᨭᩥᨩᩣᨶᨶ᩠ᨲᩥ. ᨲ᩠ᨿᩣᩉᩴ ᩑᩅᩴ ᩅᨴᩣᨾᩥ – ‘ᨠᨳᩴᩅᩥᩉᩥᨲᨠᩴ ᨸᨶ ᨲᩩᨾ᩠ᩉᩮ ᩌᨿᩈ᩠ᨾᨶ᩠ᨲᩮᩣ ᨡᩥᨯ᩠ᨯᩣᨸᨴᩮᩣᩈᩥᨠᩴ ᩌᨧᩁᩥᨿᨠᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨳᩣ’ᨲᩥ? ᨲᩮ ᨾᨿᩣ ᨸᩩᨭ᩠ᨮᩣ ᨶ ᩈᨾ᩠ᨸᩣᨿᨶ᩠ᨲᩥ, ᩋᩈᨾ᩠ᨸᩣᨿᨶ᩠ᨲᩣ ᨾᨾᨬ᩠ᨬᩮᩅ ᨸᨭᩥᨸᩩᨧ᩠ᨨᨶ᩠ᨲᩥ, ᨲᩮᩈᩣᩉᩴ ᨸᩩᨭ᩠ᨮᩮᩣ ᨻ᩠ᨿᩣᨠᩁᩮᩣᨾᩥ –

᪔᪒. ‘ᩈᨶ᩠ᨲᩣᩅᩩᩈᩮᩣ, ᨡᩥᨯ᩠ᨯᩣᨸᨴᩮᩣᩈᩥᨠᩣ ᨶᩣᨾ ᨴᩮᩅᩣ. ᨲᩮ ᩋᨲᩥᩅᩮᩃᩴ ᩉᩔᨡᩥᨯ᩠ᨯᩣᩁᨲᩥᨵᨾ᩠ᨾᩈᨾᩣᨸᨶ᩠ᨶᩣ [ᩉᩈᨡᩥᨯ᩠ᨯᩣᩁᨲᩥᨵᨾ᩠ᨾᩈᨾᩣᨸᨶ᩠ᨶᩣ (ᨠ.)] ᩅᩥᩉᩁᨶ᩠ᨲᩥ. ᨲᩮᩈᩴ ᩋᨲᩥᩅᩮᩃᩴ ᩉᩔᨡᩥᨯ᩠ᨯᩣᩁᨲᩥᨵᨾ᩠ᨾᩈᨾᩣᨸᨶ᩠ᨶᩣᨶᩴ ᩅᩥᩉᩁᨲᩴ ᩈᨲᩥ ᩈᨾ᩠ᨾᩩᩔᨲᩥ, ᩈᨲᩥᨿᩣ ᩈᨾ᩠ᨾᩮᩣᩈᩣ [ᩈᨲᩥᨿᩣ ᩈᨾ᩠ᨾᩮᩣᩈᩣᨿ (ᩈ᩠ᨿᩣ.)] ᨲᩮ ᨴᩮᩅᩣ ᨲᨾ᩠ᩉᩣ ᨠᩣᨿᩣ ᨧᩅᨶ᩠ᨲᩥ.

‘ᨮᩣᨶᩴ ᨡᩮᩣ ᨸᨶᩮᨲᩴ, ᩌᩅᩩᩈᩮᩣ, ᩅᩥᨩ᩠ᨩᨲᩥ, ᨿᩴ ᩋᨬ᩠ᨬᨲᩁᩮᩣ ᩈᨲ᩠ᨲᩮᩣ ᨲᨾ᩠ᩉᩣ ᨠᩣᨿᩣ ᨧᩅᩥᨲ᩠ᩅᩣ ᩍᨲ᩠ᨳᨲ᩠ᨲᩴ ᩌᨣᨧ᩠ᨨᨲᩥ, ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨲᩥ, ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᨲᩮᩣ ᩈᨾᩣᨶᩮᩣ ᩌᨲᨸ᩠ᨸᨾᨶ᩠ᩅᩣᨿ ᨸᨵᩣᨶᨾᨶ᩠ᩅᩣᨿ ᩋᨶᩩᨿᩮᩣᨣᨾᨶ᩠ᩅᩣᨿ ᩋᨸ᩠ᨸᨾᩣᨴᨾᨶ᩠ᩅᩣᨿ ᩈᨾ᩠ᨾᩣᨾᨶᩈᩥᨠᩣᩁᨾᨶ᩠ᩅᩣᨿ ᨲᨳᩣᩁᩪᨸᩴ ᨧᩮᨲᩮᩣᩈᨾᩣᨵᩥᩴ ᨹᩩᩈᨲᩥ, ᨿᨳᩣᩈᨾᩣᩉᩥᨲᩮ ᨧᩥᨲ᩠ᨲᩮ ᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ; ᨲᨲᩮᩣ ᨸᩁᩴ ᨶᩣᨶᩩᩔᩁᨲᩥ.

‘ᩈᩮᩣ ᩑᩅᨾᩣᩉ – ᨿᩮ ᨡᩮᩣ ᨲᩮ ᨽᩮᩣᨶ᩠ᨲᩮᩣ ᨴᩮᩅᩣ ᨶ ᨡᩥᨯ᩠ᨯᩣᨸᨴᩮᩣᩈᩥᨠᩣ ᨲᩮ ᨶ ᩋᨲᩥᩅᩮᩃᩴ ᩉᩔᨡᩥᨯ᩠ᨯᩣᩁᨲᩥᨵᨾ᩠ᨾᩈᨾᩣᨸᨶ᩠ᨶᩣ ᩅᩥᩉᩁᨶ᩠ᨲᩥ. ᨲᩮᩈᩴ ᨶᩣᨲᩥᩅᩮᩃᩴ ᩉᩔᨡᩥᨯ᩠ᨯᩣᩁᨲᩥᨵᨾ᩠ᨾᩈᨾᩣᨸᨶ᩠ᨶᩣᨶᩴ ᩅᩥᩉᩁᨲᩴ ᩈᨲᩥ ᨶ ᩈᨾ᩠ᨾᩩᩔᨲᩥ, ᩈᨲᩥᨿᩣ ᩋᩈᨾ᩠ᨾᩮᩣᩈᩣ ᨲᩮ ᨴᩮᩅᩣ ᨲᨾ᩠ᩉᩣ ᨠᩣᨿᩣ ᨶ ᨧᩅᨶ᩠ᨲᩥ, ᨶᩥᨧ᩠ᨧᩣ ᨵᩩᩅᩣ ᩈᩔᨲᩣ ᩋᩅᩥᨸᩁᩥᨱᩣᨾᨵᨾ᩠ᨾᩣ ᩈᩔᨲᩥᩈᨾᩴ ᨲᨳᩮᩅ ᨮᩔᨶ᩠ᨲᩥ. ᨿᩮ ᨸᨶ ᨾᨿᩴ ᩋᩉᩩᨾ᩠ᩉᩣ ᨡᩥᨯ᩠ᨯᩣᨸᨴᩮᩣᩈᩥᨠᩣ ᨲᩮ ᨾᨿᩴ ᩋᨲᩥᩅᩮᩃᩴ ᩉᩔᨡᩥᨯ᩠ᨯᩣᩁᨲᩥᨵᨾ᩠ᨾᩈᨾᩣᨸᨶ᩠ᨶᩣ ᩅᩥᩉᩁᩥᨾ᩠ᩉᩣ, ᨲᩮᩈᩴ ᨶᩮᩣ ᩋᨲᩥᩅᩮᩃᩴ ᩉᩔᨡᩥᨯ᩠ᨯᩣᩁᨲᩥᨵᨾ᩠ᨾᩈᨾᩣᨸᨶ᩠ᨶᩣᨶᩴ ᩅᩥᩉᩁᨲᩴ ᩈᨲᩥ ᩈᨾ᩠ᨾᩩᩔᨲᩥ, ᩈᨲᩥᨿᩣ ᩈᨾ᩠ᨾᩮᩣᩈᩣ ᩑᩅᩴ [ᩈᨾ᩠ᨾᩮᩣᩈᩣ ᩑᩅ (ᩈᩦ. ᨸᩦ.) ᩈᨾ᩠ᨾᩮᩣᩈᩣ ᨲᩮ (ᩈ᩠ᨿᩣ. ᨠ.)] ᨾᨿᩴ ᨲᨾ᩠ᩉᩣ ᨠᩣᨿᩣ ᨧᩩᨲᩣ, ᩋᨶᩥᨧ᩠ᨧᩣ ᩋᨴ᩠ᨵᩩᩅᩣ ᩋᨸ᩠ᨸᩣᨿᩩᨠᩣ ᨧᩅᨶᨵᨾ᩠ᨾᩣ ᩍᨲ᩠ᨳᨲ᩠ᨲᩴ ᩌᨣᨲᩣᨲᩥ. ᩑᩅᩴᩅᩥᩉᩥᨲᨠᩴ ᨶᩮᩣ ᨲᩩᨾ᩠ᩉᩮ ᩌᨿᩈ᩠ᨾᨶ᩠ᨲᩮᩣ ᨡᩥᨯ᩠ᨯᩣᨸᨴᩮᩣᩈᩥᨠᩴ ᩌᨧᩁᩥᨿᨠᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨳᩣ’ᨲᩥ. ‘ᨲᩮ ᩑᩅᨾᩣᩉᩴᩈᩩ – ᩑᩅᩴ ᨡᩮᩣ ᨶᩮᩣ, ᩌᩅᩩᩈᩮᩣ ᨣᩮᩣᨲᨾ, ᩈᩩᨲᩴ, ᨿᨳᩮᩅᩣᨿᩈ᩠ᨾᩣ ᨣᩮᩣᨲᨾᩮᩣ ᩌᩉᩣ’ᨲᩥ. ‘‘ᩋᨣ᩠ᨣᨬ᩠ᨬᨬ᩠ᨧᩣᩉᩴ, ᨽᨣ᩠ᨣᩅ, ᨸᨩᩣᨶᩣᨾᩥ…ᨸᩮ… ᨿᨴᨽᩥᨩᩣᨶᩴ ᨲᨳᩣᨣᨲᩮᩣ ᨶᩮᩣ ᩋᨶᨿᩴ ᩌᨸᨩ᩠ᨩᨲᩥ.

᪔᪓. ‘‘ᩈᨶ᩠ᨲᩥ, ᨽᨣ᩠ᨣᩅ, ᩑᨠᩮ ᩈᨾᨱᨻᩕᩣᩉ᩠ᨾᨱᩣ ᨾᨶᩮᩣᨸᨴᩮᩣᩈᩥᨠᩴ ᩌᨧᩁᩥᨿᨠᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨶ᩠ᨲᩥ. ᨲ᩠ᨿᩣᩉᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᩴ ᩅᨴᩣᨾᩥ – ‘ᩈᨧ᩠ᨧᩴ ᨠᩥᩁ ᨲᩩᨾ᩠ᩉᩮ ᩌᨿᩈ᩠ᨾᨶ᩠ᨲᩮᩣ ᨾᨶᩮᩣᨸᨴᩮᩣᩈᩥᨠᩴ ᩌᨧᩁᩥᨿᨠᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨳᩣ’ᨲᩥ? ᨲᩮ ᨧ ᨾᩮ ᩑᩅᩴ ᨸᩩᨭ᩠ᨮᩣ ‘ᩌᨾᩮᩣ’ᨲᩥ ᨸᨭᩥᨩᩣᨶᨶ᩠ᨲᩥ. ᨲ᩠ᨿᩣᩉᩴ ᩑᩅᩴ ᩅᨴᩣᨾᩥ – ‘ᨠᨳᩴᩅᩥᩉᩥᨲᨠᩴ ᨸᨶ ᨲᩩᨾ᩠ᩉᩮ ᩌᨿᩈ᩠ᨾᨶ᩠ᨲᩮᩣ ᨾᨶᩮᩣᨸᨴᩮᩣᩈᩥᨠᩴ ᩌᨧᩁᩥᨿᨠᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨳᩣ’ᨲᩥ? ᨲᩮ ᨾᨿᩣ ᨸᩩᨭ᩠ᨮᩣ ᨶ ᩈᨾ᩠ᨸᩣᨿᨶ᩠ᨲᩥ, ᩋᩈᨾ᩠ᨸᩣᨿᨶ᩠ᨲᩣ ᨾᨾᨬ᩠ᨬᩮᩅ ᨸᨭᩥᨸᩩᨧ᩠ᨨᨶ᩠ᨲᩥ. ᨲᩮᩈᩣᩉᩴ ᨸᩩᨭ᩠ᨮᩮᩣ ᨻ᩠ᨿᩣᨠᩁᩮᩣᨾᩥ –

᪔᪔. ‘ᩈᨶ᩠ᨲᩣᩅᩩᩈᩮᩣ, ᨾᨶᩮᩣᨸᨴᩮᩣᩈᩥᨠᩣ ᨶᩣᨾ ᨴᩮᩅᩣ. ᨲᩮ ᩋᨲᩥᩅᩮᩃᩴ ᩋᨬ᩠ᨬᨾᨬ᩠ᨬᩴ ᩏᨸᨶᩥᨩ᩠ᨫᩣᨿᨶ᩠ᨲᩥ. ᨲᩮ ᩋᨲᩥᩅᩮᩃᩴ ᩋᨬ᩠ᨬᨾᨬ᩠ᨬᩴ ᩏᨸᨶᩥᨩ᩠ᨫᩣᨿᨶ᩠ᨲᩣ ᩋᨬ᩠ᨬᨾᨬ᩠ᨬᨾ᩠ᩉᩥ ᨧᩥᨲ᩠ᨲᩣᨶᩥ ᨸᨴᩪᩈᩮᨶ᩠ᨲᩥ. ᨲᩮ ᩋᨬ᩠ᨬᨾᨬ᩠ᨬᩴ ᨸᨴᩩᨭ᩠ᨮᨧᩥᨲ᩠ᨲᩣ ᨠᩥᩃᨶ᩠ᨲᨠᩣᨿᩣ ᨠᩥᩃᨶ᩠ᨲᨧᩥᨲ᩠ᨲᩣ. ᨲᩮ ᨴᩮᩅᩣ ᨲᨾ᩠ᩉᩣ ᨠᩣᨿᩣ ᨧᩅᨶ᩠ᨲᩥ.

‘ᨮᩣᨶᩴ ᨡᩮᩣ ᨸᨶᩮᨲᩴ, ᩌᩅᩩᩈᩮᩣ, ᩅᩥᨩ᩠ᨩᨲᩥ, ᨿᩴ ᩋᨬ᩠ᨬᨲᩁᩮᩣ ᩈᨲ᩠ᨲᩮᩣ ᨲᨾ᩠ᩉᩣ ᨠᩣᨿᩣ ᨧᩅᩥᨲ᩠ᩅᩣ ᩍᨲ᩠ᨳᨲ᩠ᨲᩴ ᩌᨣᨧ᩠ᨨᨲᩥ. ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨲᩥ. ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᨲᩮᩣ ᩈᨾᩣᨶᩮᩣ ᩌᨲᨸ᩠ᨸᨾᨶ᩠ᩅᩣᨿ ᨸᨵᩣᨶᨾᨶ᩠ᩅᩣᨿ ᩋᨶᩩᨿᩮᩣᨣᨾᨶ᩠ᩅᩣᨿ ᩋᨸ᩠ᨸᨾᩣᨴᨾᨶ᩠ᩅᩣᨿ ᩈᨾ᩠ᨾᩣᨾᨶᩈᩥᨠᩣᩁᨾᨶ᩠ᩅᩣᨿ ᨲᨳᩣᩁᩪᨸᩴ ᨧᩮᨲᩮᩣᩈᨾᩣᨵᩥᩴ ᨹᩩᩈᨲᩥ, ᨿᨳᩣᩈᨾᩣᩉᩥᨲᩮ ᨧᩥᨲ᩠ᨲᩮ ᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ, ᨲᨲᩮᩣ ᨸᩁᩴ ᨶᩣᨶᩩᩔᩁᨲᩥ.

‘ᩈᩮᩣ ᩑᩅᨾᩣᩉ – ᨿᩮ ᨡᩮᩣ ᨲᩮ ᨽᩮᩣᨶ᩠ᨲᩮᩣ ᨴᩮᩅᩣ ᨶ ᨾᨶᩮᩣᨸᨴᩮᩣᩈᩥᨠᩣ ᨲᩮ ᨶᩣᨲᩥᩅᩮᩃᩴ ᩋᨬ᩠ᨬᨾᨬ᩠ᨬᩴ ᩏᨸᨶᩥᨩ᩠ᨫᩣᨿᨶ᩠ᨲᩥ. ᨲᩮ ᨶᩣᨲᩥᩅᩮᩃᩴ ᩋᨬ᩠ᨬᨾᨬ᩠ᨬᩴ ᩏᨸᨶᩥᨩ᩠ᨫᩣᨿᨶ᩠ᨲᩣ ᩋᨬ᩠ᨬᨾᨬ᩠ᨬᨾ᩠ᩉᩥ ᨧᩥᨲ᩠ᨲᩣᨶᩥ ᨶᨸ᩠ᨸᨴᩪᩈᩮᨶ᩠ᨲᩥ. ᨲᩮ ᩋᨬ᩠ᨬᨾᨬ᩠ᨬᩴ ᩋᨸ᩠ᨸᨴᩩᨭ᩠ᨮᨧᩥᨲ᩠ᨲᩣ ᩋᨠᩥᩃᨶ᩠ᨲᨠᩣᨿᩣ ᩋᨠᩥᩃᨶ᩠ᨲᨧᩥᨲ᩠ᨲᩣ. ᨲᩮ ᨴᩮᩅᩣ ᨲᨾ᩠ᩉᩣ [ᩋᨠᩥᩃᨶ᩠ᨲᨧᩥᨲ᩠ᨲᩣ ᨲᨾ᩠ᩉᩣ (ᨠ.)] ᨠᩣᨿᩣ ᨶ ᨧᩅᨶ᩠ᨲᩥ, ᨶᩥᨧ᩠ᨧᩣ ᨵᩩᩅᩣ ᩈᩔᨲᩣ ᩋᩅᩥᨸᩁᩥᨱᩣᨾᨵᨾ᩠ᨾᩣ ᩈᩔᨲᩥᩈᨾᩴ ᨲᨳᩮᩅ ᨮᩔᨶ᩠ᨲᩥ. ᨿᩮ ᨸᨶ ᨾᨿᩴ ᩋᩉᩩᨾ᩠ᩉᩣ ᨾᨶᩮᩣᨸᨴᩮᩣᩈᩥᨠᩣ, ᨲᩮ ᨾᨿᩴ ᩋᨲᩥᩅᩮᩃᩴ ᩋᨬ᩠ᨬᨾᨬ᩠ᨬᩴ ᩏᨸᨶᩥᨩ᩠ᨫᩣᨿᩥᨾ᩠ᩉᩣ. ᨲᩮ ᨾᨿᩴ ᩋᨲᩥᩅᩮᩃᩴ ᩋᨬ᩠ᨬᨾᨬ᩠ᨬᩴ ᩏᨸᨶᩥᨩ᩠ᨫᩣᨿᨶ᩠ᨲᩣ ᩋᨬ᩠ᨬᨾᨬ᩠ᨬᨾ᩠ᩉᩥ ᨧᩥᨲ᩠ᨲᩣᨶᩥ ᨸᨴᩪᩈᩥᨾ᩠ᩉᩣ [ᨸᨴᩮᩣᩈᩥᨿᩥᨾ᩠ᩉᩣ (ᩈ᩠ᨿᩣ.), ᨸᨴᩪᩈᨿᩥᨾ᩠ᩉᩣ (?)]. ᨲᩮ ᨾᨿᩴ ᩋᨬ᩠ᨬᨾᨬ᩠ᨬᩴ ᨸᨴᩩᨭ᩠ᨮᨧᩥᨲ᩠ᨲᩣ ᨠᩥᩃᨶ᩠ᨲᨠᩣᨿᩣ ᨠᩥᩃᨶ᩠ᨲᨧᩥᨲ᩠ᨲᩣ. ᩑᩅᩴ ᨾᨿᩴ [ᨠᩥᩃᨶ᩠ᨲᨧᩥᨲ᩠ᨲᩣᩑᩅ ᨾᨿᩴ (ᩈᩦ. ᨸᩦ.), ᨠᩥᩃᨶ᩠ᨲᨧᩥᨲ᩠ᨲᩣ (ᨠ.)] ᨲᨾ᩠ᩉᩣ ᨠᩣᨿᩣ ᨧᩩᨲᩣ, ᩋᨶᩥᨧ᩠ᨧᩣ ᩋᨴ᩠ᨵᩩᩅᩣ ᩋᨸ᩠ᨸᩣᨿᩩᨠᩣ ᨧᩅᨶᨵᨾ᩠ᨾᩣ ᩍᨲ᩠ᨳᨲ᩠ᨲᩴ ᩌᨣᨲᩣᨲᩥ. ᩑᩅᩴᩅᩥᩉᩥᨲᨠᩴ ᨶᩮᩣ ᨲᩩᨾ᩠ᩉᩮ ᩌᨿᩈ᩠ᨾᨶ᩠ᨲᩮᩣ ᨾᨶᩮᩣᨸᨴᩮᩣᩈᩥᨠᩴ ᩌᨧᩁᩥᨿᨠᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨳᩣ’ᨲᩥ. ‘ᨲᩮ ᩑᩅᨾᩣᩉᩴᩈᩩ – ᩑᩅᩴ ᨡᩮᩣ ᨶᩮᩣ, ᩌᩅᩩᩈᩮᩣ ᨣᩮᩣᨲᨾ, ᩈᩩᨲᩴ, ᨿᨳᩮᩅᩣᨿᩈ᩠ᨾᩣ ᨣᩮᩣᨲᨾᩮᩣ ᩌᩉᩣ’ᨲᩥ. ‘‘ᩋᨣ᩠ᨣᨬ᩠ᨬᨬ᩠ᨧᩣᩉᩴ, ᨽᨣ᩠ᨣᩅ, ᨸᨩᩣᨶᩣᨾᩥ…ᨸᩮ… ᨿᨴᨽᩥᨩᩣᨶᩴ ᨲᨳᩣᨣᨲᩮᩣ ᨶᩮᩣ ᩋᨶᨿᩴ ᩌᨸᨩ᩠ᨩᨲᩥ.

᪔᪕. ‘‘ᩈᨶ᩠ᨲᩥ, ᨽᨣ᩠ᨣᩅ, ᩑᨠᩮ ᩈᨾᨱᨻᩕᩣᩉ᩠ᨾᨱᩣ ᩋᨵᩥᨧ᩠ᨧᩈᨾᩩᨸ᩠ᨸᨶ᩠ᨶᩴ ᩌᨧᩁᩥᨿᨠᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨶ᩠ᨲᩥ. ᨲ᩠ᨿᩣᩉᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᩴ ᩅᨴᩣᨾᩥ – ‘ᩈᨧ᩠ᨧᩴ ᨠᩥᩁ ᨲᩩᨾ᩠ᩉᩮ ᩌᨿᩈ᩠ᨾᨶ᩠ᨲᩮᩣ ᩋᨵᩥᨧ᩠ᨧᩈᨾᩩᨸ᩠ᨸᨶ᩠ᨶᩴ ᩌᨧᩁᩥᨿᨠᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨳᩣ’ᨲᩥ? ᨲᩮ ᨧ ᨾᩮ ᩑᩅᩴ ᨸᩩᨭ᩠ᨮᩣ ‘ᩌᨾᩮᩣ’ᨲᩥ ᨸᨭᩥᨩᩣᨶᨶ᩠ᨲᩥ. ᨲ᩠ᨿᩣᩉᩴ ᩑᩅᩴ ᩅᨴᩣᨾᩥ – ‘ᨠᨳᩴᩅᩥᩉᩥᨲᨠᩴ ᨸᨶ ᨲᩩᨾ᩠ᩉᩮ ᩌᨿᩈ᩠ᨾᨶ᩠ᨲᩮᩣ ᩋᨵᩥᨧ᩠ᨧᩈᨾᩩᨸ᩠ᨸᨶ᩠ᨶᩴ ᩌᨧᩁᩥᨿᨠᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨳᩣ’ᨲᩥ? ᨲᩮ ᨾᨿᩣ ᨸᩩᨭ᩠ᨮᩣ ᨶ ᩈᨾ᩠ᨸᩣᨿᨶ᩠ᨲᩥ, ᩋᩈᨾ᩠ᨸᩣᨿᨶ᩠ᨲᩣ ᨾᨾᨬ᩠ᨬᩮᩅ ᨸᨭᩥᨸᩩᨧ᩠ᨨᨶ᩠ᨲᩥ. ᨲᩮᩈᩣᩉᩴ ᨸᩩᨭ᩠ᨮᩮᩣ ᨻ᩠ᨿᩣᨠᩁᩮᩣᨾᩥ –

᪔᪖. ‘ᩈᨶ᩠ᨲᩣᩅᩩᩈᩮᩣ, ᩋᩈᨬ᩠ᨬᩈᨲ᩠ᨲᩣ ᨶᩣᨾ ᨴᩮᩅᩣ. ᩈᨬ᩠ᨬᩩᨸ᩠ᨸᩣᨴᩣ ᨧ ᨸᨶ ᨲᩮ ᨴᩮᩅᩣ ᨲᨾ᩠ᩉᩣ ᨠᩣᨿᩣ ᨧᩅᨶ᩠ᨲᩥ.

‘ᨮᩣᨶᩴ ᨡᩮᩣ ᨸᨶᩮᨲᩴ, ᩌᩅᩩᩈᩮᩣ, ᩅᩥᨩ᩠ᨩᨲᩥ. ᨿᩴ ᩋᨬ᩠ᨬᨲᩁᩮᩣ ᩈᨲ᩠ᨲᩮᩣ ᨲᨾ᩠ᩉᩣ ᨠᩣᨿᩣ ᨧᩅᩥᨲ᩠ᩅᩣ ᩍᨲ᩠ᨳᨲ᩠ᨲᩴ ᩌᨣᨧ᩠ᨨᨲᩥ. ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨲᩥ. ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᨲᩮᩣ ᩈᨾᩣᨶᩮᩣ ᩌᨲᨸ᩠ᨸᨾᨶ᩠ᩅᩣᨿ ᨸᨵᩣᨶᨾᨶ᩠ᩅᩣᨿ ᩋᨶᩩᨿᩮᩣᨣᨾᨶ᩠ᩅᩣᨿ ᩋᨸ᩠ᨸᨾᩣᨴᨾᨶ᩠ᩅᩣᨿ ᩈᨾ᩠ᨾᩣᨾᨶᩈᩥᨠᩣᩁᨾᨶ᩠ᩅᩣᨿ ᨲᨳᩣᩁᩪᨸᩴ ᨧᩮᨲᩮᩣᩈᨾᩣᨵᩥᩴ ᨹᩩᩈᨲᩥ, ᨿᨳᩣᩈᨾᩣᩉᩥᨲᩮ ᨧᩥᨲ᩠ᨲᩮ ᨲᩴ [ᩍᨴᩴ ᨸᨴᩴ ᨻᩕᩉ᩠ᨾᨩᩣᩃᩈᩩᨲ᩠ᨲᩮ ᨶ ᨴᩥᩔᨲᩥ. ᩑᩅᩴ (ᨸᩦ. ᨠ.)] ᩈᨬ᩠ᨬᩩᨸ᩠ᨸᩣᨴᩴ ᩋᨶᩩᩔᩁᨲᩥ, ᨲᨲᩮᩣ ᨸᩁᩴ ᨶᩣᨶᩩᩔᩁᨲᩥ.

‘ᩈᩮᩣ ᩑᩅᨾᩣᩉ – ᩋᨵᩥᨧ᩠ᨧᩈᨾᩩᨸ᩠ᨸᨶ᩠ᨶᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ. ᨲᩴ ᨠᩥᩔ ᩉᩮᨲᩩ? ᩋᩉᨬ᩠ᩉᩥ ᨸᩩᨻ᩠ᨻᩮ ᨶᩣᩉᩮᩣᩈᩥᩴ, ᩈᩮᩣᨾ᩠ᩉᩥ ᩑᨲᩁᩉᩥ ᩋᩉᩩᨲ᩠ᩅᩣ ᩈᨶ᩠ᨲᨲᩣᨿ [ᩈᨲ᩠ᨲᨠᩣᨿ (ᩈᩦ. ᨸᩦ.), ᩈᨲ᩠ᨲᩣᨿ (ᨠ. ᩈᩦ.)] ᨸᩁᩥᨱᨲᩮᩣᨲᩥ. ᩑᩅᩴᩅᩥᩉᩥᨲᨠᩴ ᨶᩮᩣ ᨲᩩᨾ᩠ᩉᩮ ᩌᨿᩈ᩠ᨾᨶ᩠ᨲᩮᩣ ᩋᨵᩥᨧ᩠ᨧᩈᨾᩩᨸ᩠ᨸᨶ᩠ᨶᩴ ᩌᨧᩁᩥᨿᨠᩴ ᩋᨣ᩠ᨣᨬ᩠ᨬᩴ ᨸᨬ᩠ᨬᨸᩮᨳᩣ’ᨲᩥ? ‘ᨲᩮ ᩑᩅᨾᩣᩉᩴᩈᩩ – ᩑᩅᩴ ᨡᩮᩣ ᨶᩮᩣ, ᩌᩅᩩᩈᩮᩣ ᨣᩮᩣᨲᨾ, ᩈᩩᨲᩴ ᨿᨳᩮᩅᩣᨿᩈ᩠ᨾᩣ ᨣᩮᩣᨲᨾᩮᩣ ᩌᩉᩣ’ᨲᩥ. ‘‘ᩋᨣ᩠ᨣᨬ᩠ᨬᨬ᩠ᨧᩣᩉᩴ, ᨽᨣ᩠ᨣᩅ, ᨸᨩᩣᨶᩣᨾᩥ ᨲᨬ᩠ᨧ ᨸᨩᩣᨶᩣᨾᩥ, ᨲᨲᩮᩣ ᨧ ᩏᨲ᩠ᨲᩁᩥᨲᩁᩴ ᨸᨩᩣᨶᩣᨾᩥ, ᨲᨬ᩠ᨧ ᨸᨩᩣᨶᩴ ᨶ ᨸᩁᩣᨾᩈᩣᨾᩥ, ᩋᨸᩁᩣᨾᩈᨲᩮᩣ ᨧ ᨾᩮ ᨸᨧ᩠ᨧᨲ᩠ᨲᨬ᩠ᨬᩮᩅ ᨶᩥᨻ᩠ᨻᩩᨲᩥ ᩅᩥᨴᩥᨲᩣ. ᨿᨴᨽᩥᨩᩣᨶᩴ ᨲᨳᩣᨣᨲᩮᩣ ᨶᩮᩣ ᩋᨶᨿᩴ ᩌᨸᨩ᩠ᨩᨲᩥ.

᪔᪗. ‘‘ᩑᩅᩴᩅᩣᨴᩥᩴ ᨡᩮᩣ ᨾᩴ, ᨽᨣ᩠ᨣᩅ, ᩑᩅᨾᨠ᩠ᨡᩣᨿᩥᩴ ᩑᨠᩮ ᩈᨾᨱᨻᩕᩣᩉ᩠ᨾᨱᩣ ᩋᩈᨲᩣ ᨲᩩᨧ᩠ᨨᩣ ᨾᩩᩈᩣ ᩋᨽᩪᨲᩮᨶ ᩋᨻ᩠ᨽᩣᨧᩥᨠ᩠ᨡᨶ᩠ᨲᩥ – ‘ᩅᩥᨸᩁᩦᨲᩮᩣ ᩈᨾᨱᩮᩣ ᨣᩮᩣᨲᨾᩮᩣ ᨽᩥᨠ᩠ᨡᩅᩮᩣ ᨧ. ᩈᨾᨱᩮᩣ ᨣᩮᩣᨲᨾᩮᩣ ᩑᩅᨾᩣᩉ – ᨿᩈ᩠ᨾᩥᩴ ᩈᨾᨿᩮ ᩈᩩᨽᩴ ᩅᩥᨾᩮᩣᨠ᩠ᨡᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ, ᩈᨻ᩠ᨻᩴ ᨲᩈ᩠ᨾᩥᩴ ᩈᨾᨿᩮ ᩋᩈᩩᨽᨶ᩠ᨲ᩠ᩅᩮᩅ [ᩋᩈᩩᨽᨶ᩠ᨲᩮᩅ (ᩈᩦ. ᩈ᩠ᨿᩣ. ᨸᩦ.)] ᨸᨩᩣᨶᩣᨲᩦ’ᨲᩥ [ᩈᨬ᩠ᨩᩣᨶᩣᨲᩦᨲᩥ (ᩈᩦ. ᨸᩦ.)]. ᨶ ᨡᩮᩣ ᨸᨶᩣᩉᩴ, ᨽᨣ᩠ᨣᩅ, ᩑᩅᩴ ᩅᨴᩣᨾᩥ – ‘ᨿᩈ᩠ᨾᩥᩴ ᩈᨾᨿᩮ ᩈᩩᨽᩴ ᩅᩥᨾᩮᩣᨠ᩠ᨡᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ, ᩈᨻ᩠ᨻᩴ ᨲᩈ᩠ᨾᩥᩴ ᩈᨾᨿᩮ ᩋᩈᩩᨽᨶ᩠ᨲ᩠ᩅᩮᩅ ᨸᨩᩣᨶᩣᨲᩦ’ᨲᩥ. ᩑᩅᨬ᩠ᨧ ᨡ᩠ᩅᩣᩉᩴ, ᨽᨣ᩠ᨣᩅ, ᩅᨴᩣᨾᩥ – ‘ᨿᩈ᩠ᨾᩥᩴ ᩈᨾᨿᩮ ᩈᩩᨽᩴ ᩅᩥᨾᩮᩣᨠ᩠ᨡᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ, ᩈᩩᨽᨶ᩠ᨲ᩠ᩅᩮᩅ ᨲᩈ᩠ᨾᩥᩴ ᩈᨾᨿᩮ ᨸᨩᩣᨶᩣᨲᩦ’ᨲᩥ.

‘‘ᨲᩮ ᨧ, ᨽᨶ᩠ᨲᩮ, ᩅᩥᨸᩁᩦᨲᩣ, ᨿᩮ ᨽᨣᩅᨶ᩠ᨲᩴ ᩅᩥᨸᩁᩦᨲᨲᩮᩣ ᨴᩉᨶ᩠ᨲᩥ ᨽᩥᨠ᩠ᨡᩅᩮᩣ ᨧ. ᩑᩅᩴᨸᩈᨶ᩠ᨶᩮᩣ ᩋᩉᩴ, ᨽᨶ᩠ᨲᩮ, ᨽᨣᩅᨲᩥ. ᨸᩉᩮᩣᨲᩥ ᨾᩮ ᨽᨣᩅᩣ ᨲᨳᩣ ᨵᨾ᩠ᨾᩴ ᨴᩮᩈᩮᨲᩩᩴ, ᨿᨳᩣ ᩋᩉᩴ ᩈᩩᨽᩴ ᩅᩥᨾᩮᩣᨠ᩠ᨡᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᩮᨿ᩠ᨿ’’ᨶ᩠ᨲᩥ.

᪔᪘. ‘‘ᨴᩩᨠ᩠ᨠᩁᩴ ᨡᩮᩣ ᩑᨲᩴ, ᨽᨣ᩠ᨣᩅ, ᨲᨿᩣ ᩋᨬ᩠ᨬᨴᩥᨭ᩠ᨮᩥᨠᩮᨶ ᩋᨬ᩠ᨬᨡᨶ᩠ᨲᩥᨠᩮᨶ ᩋᨬ᩠ᨬᩁᩩᨧᩥᨠᩮᨶ ᩋᨬ᩠ᨬᨲᩕᩣᨿᩮᩣᨣᩮᨶ ᩋᨬ᩠ᨬᨲᩕᩣᨧᩁᩥᨿᨠᩮᨶ ᩈᩩᨽᩴ ᩅᩥᨾᩮᩣᨠ᩠ᨡᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᩥᨲᩩᩴ. ᩍᨦ᩠ᨥ ᨲ᩠ᩅᩴ, ᨽᨣ᩠ᨣᩅ, ᨿᩮᩣ ᨧ ᨲᩮ ᩋᨿᩴ ᨾᨿᩥ ᨸᩈᩣᨴᩮᩣ, ᨲᨾᩮᩅ ᨲ᩠ᩅᩴ ᩈᩣᨵᩩᨠᨾᨶᩩᩁᨠ᩠ᨡᩣ’’ᨲᩥ. ‘‘ᩈᨧᩮ ᨲᩴ, ᨽᨶ᩠ᨲᩮ, ᨾᨿᩣ ᨴᩩᨠ᩠ᨠᩁᩴ ᩋᨬ᩠ᨬᨴᩥᨭ᩠ᨮᩥᨠᩮᨶ ᩋᨬ᩠ᨬᨡᨶ᩠ᨲᩥᨠᩮᨶ ᩋᨬ᩠ᨬᩁᩩᨧᩥᨠᩮᨶ ᩋᨬ᩠ᨬᨲᩕᩣᨿᩮᩣᨣᩮᨶ ᩋᨬ᩠ᨬᨲᩕᩣᨧᩁᩥᨿᨠᩮᨶ ᩈᩩᨽᩴ ᩅᩥᨾᩮᩣᨠ᩠ᨡᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᩥᨲᩩᩴ. ᨿᩮᩣ ᨧ ᨾᩮ ᩋᨿᩴ, ᨽᨶ᩠ᨲᩮ, ᨽᨣᩅᨲᩥ ᨸᩈᩣᨴᩮᩣ, ᨲᨾᩮᩅᩣᩉᩴ ᩈᩣᨵᩩᨠᨾᨶᩩᩁᨠ᩠ᨡᩥᩔᩣᨾᩦ’’ᨲᩥ. ᩍᨴᨾᩅᩮᩣᨧ ᨽᨣᩅᩣ. ᩋᨲ᩠ᨲᨾᨶᩮᩣ ᨽᨣ᩠ᨣᩅᨣᩮᩣᨲ᩠ᨲᩮᩣ ᨸᩁᩥᨻ᩠ᨻᩣᨩᨠᩮᩣ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩦᨲᩥ.

ᨸᩣᨳᩥᨠᩈᩩᨲ᩠ᨲᩴ [ᨸᩣᨭᩥᨠᩈᩩᨲ᩠ᨲᨶ᩠ᨲᩴ (ᩈᩦ. ᩈ᩠ᨿᩣ. ᨠᩴ. ᨸᩦ.)] ᨶᩥᨭ᩠ᨮᩥᨲᩴ ᨸᨮᨾᩴ.

᪒. ᩏᨴᩩᨾ᩠ᨻᩁᩥᨠᩈᩩᨲ᩠ᨲᩴ

ᨶᩥᨣᩕᩮᩣᨵᨸᩁᩥᨻ᩠ᨻᩣᨩᨠᩅᨲ᩠ᨳᩩ

᪔᪙. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᩁᩣᨩᨣᩉᩮ ᩅᩥᩉᩁᨲᩥ ᨣᩥᨩ᩠ᨫᨠᩪᨭᩮ ᨸᨻ᩠ᨻᨲᩮ. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨶᩥᨣᩕᩮᩣᨵᩮᩣ ᨸᩁᩥᨻ᩠ᨻᩣᨩᨠᩮᩣ ᩏᨴᩩᨾ᩠ᨻᩁᩥᨠᩣᨿ ᨸᩁᩥᨻ᩠ᨻᩣᨩᨠᩣᩁᩣᨾᩮ ᨸᨭᩥᩅᩈᨲᩥ ᨾᩉᨲᩥᨿᩣ ᨸᩁᩥᨻ᩠ᨻᩣᨩᨠᨸᩁᩥᩈᩣᨿ ᩈᨴ᩠ᨵᩥᩴ ᨲᩥᩴᩈᨾᨲ᩠ᨲᩮᩉᩥ ᨸᩁᩥᨻ᩠ᨻᩣᨩᨠᩈᨲᩮᩉᩥ. ᩋᨳ ᨡᩮᩣ ᩈᨶ᩠ᨵᩣᨶᩮᩣ ᨣᩉᨸᨲᩥ ᨴᩥᩅᩣ ᨴᩥᩅᩔ [ᨴᩥᩅᩣᨴᩥᩅᩔᩮᩅ (ᩈᩦ. ᩈ᩠ᨿᩣ. ᨸᩦ.)] ᩁᩣᨩᨣᩉᩣ ᨶᩥᨠ᩠ᨡᨾᩥ ᨽᨣᩅᨶ᩠ᨲᩴ ᨴᩔᨶᩣᨿ. ᩋᨳ ᨡᩮᩣ ᩈᨶ᩠ᨵᩣᨶᩔ ᨣᩉᨸᨲᩥᩔ ᩑᨲᨴᩉᩮᩣᩈᩥ – ‘‘ᩋᨠᩣᩃᩮᩣ ᨡᩮᩣ ᨽᨣᩅᨶ᩠ᨲᩴ ᨴᩔᨶᩣᨿ. ᨸᨭᩥᩈᩃ᩠ᩃᩦᨶᩮᩣ ᨽᨣᩅᩣ. ᨾᨶᩮᩣᨽᩣᩅᨶᩦᨿᩣᨶᨾ᩠ᨸᩥ ᨽᩥᨠ᩠ᨡᩪᨶᩴ ᩋᩈᨾᨿᩮᩣ ᨴᩔᨶᩣᨿ. ᨸᨭᩥᩈᩃ᩠ᩃᩦᨶᩣ ᨾᨶᩮᩣᨽᩣᩅᨶᩦᨿᩣ ᨽᩥᨠ᩠ᨡᩪ. ᨿᩴᨶᩪᨶᩣᩉᩴ ᨿᩮᨶ ᩏᨴᩩᨾ᩠ᨻᩁᩥᨠᩣᨿ ᨸᩁᩥᨻ᩠ᨻᩣᨩᨠᩣᩁᩣᨾᩮᩣ, ᨿᩮᨶ ᨶᩥᨣᩕᩮᩣᨵᩮᩣ ᨸᩁᩥᨻ᩠ᨻᩣᨩᨠᩮᩣ ᨲᩮᨶᩩᨸᩈᨦ᩠ᨠᨾᩮᨿ᩠ᨿ’’ᨶ᩠ᨲᩥ. ᩋᨳ ᨡᩮᩣ ᩈᨶ᩠ᨵᩣᨶᩮᩣ ᨣᩉᨸᨲᩥ ᨿᩮᨶ ᩏᨴᩩᨾ᩠ᨻᩁᩥᨠᩣᨿ ᨸᩁᩥᨻ᩠ᨻᩣᨩᨠᩣᩁᩣᨾᩮᩣ, ᨲᩮᨶᩩᨸᩈᨦ᩠ᨠᨾᩥ.

᪕᪐. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨶᩥᨣᩕᩮᩣᨵᩮᩣ ᨸᩁᩥᨻ᩠ᨻᩣᨩᨠᩮᩣ ᨾᩉᨲᩥᨿᩣ ᨸᩁᩥᨻ᩠ᨻᩣᨩᨠᨸᩁᩥᩈᩣᨿ ᩈᨴ᩠ᨵᩥᩴ ᨶᩥᩈᩥᨶ᩠ᨶᩮᩣ ᩉᩮᩣᨲᩥ ᩏᨶ᩠ᨶᩣᨴᩥᨶᩥᨿᩣ ᩏᨧ᩠ᨧᩣᩈᨴ᩠ᨴᨾᩉᩣᩈᨴ᩠ᨴᩣᨿ ᩋᨶᩮᨠᩅᩥᩉᩥᨲᩴ ᨲᩥᩁᨧ᩠ᨨᩣᨶᨠᨳᩴ ᨠᨳᩮᨶ᩠ᨲᩥᨿᩣ. ᩈᩮᨿ᩠ᨿᨳᩥᨴᩴ – ᩁᩣᨩᨠᨳᩴ ᨧᩮᩣᩁᨠᨳᩴ ᨾᩉᩣᨾᨲ᩠ᨲᨠᨳᩴ ᩈᩮᨶᩣᨠᨳᩴ ᨽᨿᨠᨳᩴ ᨿᩩᨴ᩠ᨵᨠᨳᩴ ᩋᨶ᩠ᨶᨠᨳᩴ ᨸᩣᨶᨠᨳᩴ ᩅᨲ᩠ᨳᨠᨳᩴ ᩈᨿᨶᨠᨳᩴ ᨾᩣᩃᩣᨠᨳᩴ ᨣᨶ᩠ᨵᨠᨳᩴ ᨬᩣᨲᩥᨠᨳᩴ ᨿᩣᨶᨠᨳᩴ ᨣᩣᨾᨠᨳᩴ ᨶᩥᨣᨾᨠᨳᩴ ᨶᨣᩁᨠᨳᩴ ᨩᨶᨸᨴᨠᨳᩴ ᩍᨲ᩠ᨳᩥᨠᨳᩴ ᩈᩪᩁᨠᨳᩴ ᩅᩥᩈᩥᨡᩣᨠᨳᩴ ᨠᩩᨾ᩠ᨽᨭ᩠ᨮᩣᨶᨠᨳᩴ ᨸᩩᨻ᩠ᨻᨸᩮᨲᨠᨳᩴ ᨶᩣᨶᨲ᩠ᨲᨠᨳᩴ ᩃᩮᩣᨠᨠ᩠ᨡᩣᨿᩥᨠᩴ ᩈᨾᩩᨴ᩠ᨴᨠ᩠ᨡᩣᨿᩥᨠᩴ ᩍᨲᩥᨽᩅᩣᨽᩅᨠᨳᩴ ᩍᨲᩥ ᩅᩣ.

᪕᪑. ᩋᨴ᩠ᨴᩈᩣ ᨡᩮᩣ ᨶᩥᨣᩕᩮᩣᨵᩮᩣ ᨸᩁᩥᨻ᩠ᨻᩣᨩᨠᩮᩣ ᩈᨶ᩠ᨵᩣᨶᩴ ᨣᩉᨸᨲᩥᩴ ᨴᩪᩁᨲᩮᩣᩅ ᩌᨣᨧ᩠ᨨᨶ᩠ᨲᩴ. ᨴᩥᩈ᩠ᩅᩣ ᩈᨠᩴ ᨸᩁᩥᩈᩴ ᩈᨱ᩠ᨮᩣᨸᩮᩈᩥ – ‘‘ᩋᨸ᩠ᨸᩈᨴ᩠ᨴᩣ ᨽᩮᩣᨶ᩠ᨲᩮᩣ ᩉᩮᩣᨶ᩠ᨲᩩ, ᨾᩣ ᨽᩮᩣᨶ᩠ᨲᩮᩣ ᩈᨴ᩠ᨴᨾᨠᨲ᩠ᨳ. ᩋᨿᩴ ᩈᨾᨱᩔ ᨣᩮᩣᨲᨾᩔ ᩈᩣᩅᨠᩮᩣ ᩌᨣᨧ᩠ᨨᨲᩥ ᩈᨶ᩠ᨵᩣᨶᩮᩣ ᨣᩉᨸᨲᩥ. ᨿᩣᩅᨲᩣ ᨡᩮᩣ ᨸᨶ ᩈᨾᨱᩔ ᨣᩮᩣᨲᨾᩔ ᩈᩣᩅᨠᩣ ᨣᩥᩉᩦ ᩒᨴᩣᨲᩅᩈᨶᩣ ᩁᩣᨩᨣᩉᩮ ᨸᨭᩥᩅᩈᨶ᩠ᨲᩥ, ᩋᨿᩴ ᨲᩮᩈᩴ ᩋᨬ᩠ᨬᨲᩁᩮᩣ ᩈᨶ᩠ᨵᩣᨶᩮᩣ ᨣᩉᨸᨲᩥ. ᩋᨸ᩠ᨸᩈᨴ᩠ᨴᨠᩣᨾᩣ ᨡᩮᩣ ᨸᨶᩮᨲᩮ ᩌᨿᩈ᩠ᨾᨶ᩠ᨲᩮᩣ ᩋᨸ᩠ᨸᩈᨴ᩠ᨴᩅᩥᨶᩦᨲᩣ, ᩋᨸ᩠ᨸᩈᨴ᩠ᨴᩔ ᩅᨱ᩠ᨱᩅᩣᨴᩥᨶᩮᩣ. ᩋᨸ᩠ᨸᩮᩅ ᨶᩣᨾ ᩋᨸ᩠ᨸᩈᨴ᩠ᨴᩴ ᨸᩁᩥᩈᩴ ᩅᩥᨴᩥᨲ᩠ᩅᩣ ᩏᨸᩈᨦ᩠ᨠᨾᩥᨲᨻ᩠ᨻᩴ ᨾᨬ᩠ᨬᩮᨿ᩠ᨿᩣ’’ᨲᩥ. ᩑᩅᩴ ᩅᩩᨲ᩠ᨲᩮ ᨲᩮ ᨸᩁᩥᨻ᩠ᨻᩣᨩᨠᩣ ᨲᩩᨱ᩠ᩉᩦ ᩋᩉᩮᩈᩩᩴ.

᪕᪒. ᩋᨳ ᨡᩮᩣ ᩈᨶ᩠ᨵᩣᨶᩮᩣ ᨣᩉᨸᨲᩥ ᨿᩮᨶ ᨶᩥᨣᩕᩮᩣᨵᩮᩣ ᨸᩁᩥᨻ᩠ᨻᩣᨩᨠᩮᩣ ᨲᩮᨶᩩᨸᩈᨦ᩠ᨠᨾᩥ, ᩏᨸᩈᨦ᩠ᨠᨾᩥᨲ᩠ᩅᩣ ᨶᩥᨣᩕᩮᩣᨵᩮᨶ ᨸᩁᩥᨻ᩠ᨻᩣᨩᨠᩮᨶ ᩈᨴ᩠ᨵᩥᩴ ᩈᨾ᩠ᨾᩮᩣᨴᩥ. ᩈᨾ᩠ᨾᩮᩣᨴᨶᩦᨿᩴ ᨠᨳᩴ ᩈᩣᩁᨱᩦᨿᩴ ᩅᩦᨲᩥᩈᩣᩁᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᩈᨶ᩠ᨵᩣᨶᩮᩣ ᨣᩉᨸᨲᩥ ᨶᩥᨣᩕᩮᩣᨵᩴ ᨸᩁᩥᨻ᩠ᨻᩣᨩᨠᩴ ᩑᨲᨴᩅᩮᩣᨧ – ‘‘ᩋᨬ᩠ᨬᨳᩣ ᨡᩮᩣ ᩍᨾᩮ ᨽᩮᩣᨶ᩠ᨲᩮᩣ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩈᨦ᩠ᨣᨾ᩠ᨾ ᩈᨾᩣᨣᨾ᩠ᨾ ᩏᨶ᩠ᨶᩣᨴᩥᨶᩮᩣ ᩏᨧ᩠ᨧᩣᩈᨴ᩠ᨴᨾᩉᩣᩈᨴ᩠ᨴᩣ ᩋᨶᩮᨠᩅᩥᩉᩥᨲᩴ ᨲᩥᩁᨧ᩠ᨨᩣᨶᨠᨳᩴ ᩋᨶᩩᨿᩩᨲ᩠ᨲᩣ ᩅᩥᩉᩁᨶ᩠ᨲᩥ. ᩈᩮᨿ᩠ᨿᨳᩥᨴᩴ – ᩁᩣᨩᨠᨳᩴ…ᨸᩮ… ᩍᨲᩥᨽᩅᩣᨽᩅᨠᨳᩴ ᩍᨲᩥ ᩅᩣ. ᩋᨬ᩠ᨬᨳᩣ ᨡᩮᩣ [ᨧ (ᩈᩦ. ᨸᩦ.)] ᨸᨶ ᩈᩮᩣ ᨽᨣᩅᩣ ᩋᩁᨬ᩠ᨬᩅᨶᨸᨲ᩠ᨳᩣᨶᩥ ᨸᨶ᩠ᨲᩣᨶᩥ ᩈᩮᨶᩣᩈᨶᩣᨶᩥ ᨸᨭᩥᩈᩮᩅᨲᩥ ᩋᨸ᩠ᨸᩈᨴ᩠ᨴᩣᨶᩥ ᩋᨸ᩠ᨸᨶᩥᨣ᩠ᨥᩮᩣᩈᩣᨶᩥ ᩅᩥᨩᨶᩅᩣᨲᩣᨶᩥ ᨾᨶᩩᩔᩁᩣᩉᩔᩮᨿ᩠ᨿᨠᩣᨶᩥ ᨸᨭᩥᩈᩃ᩠ᩃᩣᨶᩈᩣᩁᩩᨸ᩠ᨸᩣᨶᩦ’’ᨲᩥ.

᪕᪓. ᩑᩅᩴ ᩅᩩᨲ᩠ᨲᩮ ᨶᩥᨣᩕᩮᩣᨵᩮᩣ ᨸᩁᩥᨻ᩠ᨻᩣᨩᨠᩮᩣ ᩈᨶ᩠ᨵᩣᨶᩴ ᨣᩉᨸᨲᩥᩴ ᩑᨲᨴᩅᩮᩣᨧ – ‘‘ᨿᨣ᩠ᨥᩮ ᨣᩉᨸᨲᩥ, ᨩᩣᨶᩮᨿ᩠ᨿᩣᩈᩥ, ᨠᩮᨶ ᩈᨾᨱᩮᩣ ᨣᩮᩣᨲᨾᩮᩣ ᩈᨴ᩠ᨵᩥᩴ ᩈᩃ᩠ᩃᨸᨲᩥ, ᨠᩮᨶ ᩈᩣᨠᨧ᩠ᨨᩴ ᩈᨾᩣᨸᨩ᩠ᨩᨲᩥ, ᨠᩮᨶ ᨸᨬ᩠ᨬᩣᩅᩮᨿ᩠ᨿᨲ᩠ᨲᩥᨿᩴ ᩈᨾᩣᨸᨩ᩠ᨩᨲᩥ? ᩈᩩᨬ᩠ᨬᩣᨣᩣᩁᩉᨲᩣ ᩈᨾᨱᩔ ᨣᩮᩣᨲᨾᩔ ᨸᨬ᩠ᨬᩣ ᩋᨸᩁᩥᩈᩣᩅᨧᩁᩮᩣ ᩈᨾᨱᩮᩣ ᨣᩮᩣᨲᨾᩮᩣ ᨶᩣᩃᩴ ᩈᩃ᩠ᩃᩣᨸᩣᨿ. ᩈᩮᩣ ᩋᨶ᩠ᨲᨾᨶ᩠ᨲᩣᨶᩮᩅ ᩈᩮᩅᨲᩥ [ᩋᨶ᩠ᨲᨸᨶ᩠ᨲᩣᨶᩮᩅ (ᩈ᩠ᨿᩣ.)]. ᩈᩮᨿ᩠ᨿᨳᩣᨸᩥ ᨶᩣᨾ ᨣᩮᩣᨠᩣᨱᩣ ᨸᩁᩥᨿᨶ᩠ᨲᨧᩣᩁᩥᨶᩦ ᩋᨶ᩠ᨲᨾᨶ᩠ᨲᩣᨶᩮᩅ ᩈᩮᩅᨲᩥ. ᩑᩅᨾᩮᩅ ᩈᩩᨬ᩠ᨬᩣᨣᩣᩁᩉᨲᩣ ᩈᨾᨱᩔ ᨣᩮᩣᨲᨾᩔ ᨸᨬ᩠ᨬᩣ; ᩋᨸᩁᩥᩈᩣᩅᨧᩁᩮᩣ ᩈᨾᨱᩮᩣ ᨣᩮᩣᨲᨾᩮᩣ; ᨶᩣᩃᩴ ᩈᩃ᩠ᩃᩣᨸᩣᨿ. ᩈᩮᩣ ᩋᨶ᩠ᨲᨾᨶ᩠ᨲᩣᨶᩮᩅ ᩈᩮᩅᨲᩥ. ᩍᨦ᩠ᨥ, ᨣᩉᨸᨲᩥ, ᩈᨾᨱᩮᩣ ᨣᩮᩣᨲᨾᩮᩣ ᩍᨾᩴ ᨸᩁᩥᩈᩴ ᩌᨣᨧ᩠ᨨᩮᨿ᩠ᨿ, ᩑᨠᨸᨬ᩠ᩉᩮᨶᩮᩅ ᨶᩴ ᩈᩴᩈᩣᨴᩮᨿ᩠ᨿᩣᨾ [ᩈᩴᩉᩁᩮᨿ᩠ᨿᩣᨾ (ᨠ.)], ᨲᩩᨧ᩠ᨨᨠᩩᨾ᩠ᨽᩦᩅ ᨶᩴ ᨾᨬ᩠ᨬᩮ ᩒᩁᩮᩣᨵᩮᨿ᩠ᨿᩣᨾᩣ’’ᨲᩥ.

᪕᪔. ᩋᩔᩮᩣᩈᩥ ᨡᩮᩣ ᨽᨣᩅᩣ ᨴᩥᨻ᩠ᨻᩣᨿ ᩈᩮᩣᨲᨵᩣᨲᩩᨿᩣ ᩅᩥᩈᩩᨴ᩠ᨵᩣᨿ ᩋᨲᩥᨠ᩠ᨠᨶ᩠ᨲᨾᩣᨶᩩᩈᩥᨠᩣᨿ ᩈᨶ᩠ᨵᩣᨶᩔ ᨣᩉᨸᨲᩥᩔ ᨶᩥᨣᩕᩮᩣᨵᩮᨶ ᨸᩁᩥᨻ᩠ᨻᩣᨩᨠᩮᨶ ᩈᨴ᩠ᨵᩥᩴ ᩍᨾᩴ ᨠᨳᩣᩈᩃ᩠ᩃᩣᨸᩴ. ᩋᨳ ᨡᩮᩣ ᨽᨣᩅᩣ ᨣᩥᨩ᩠ᨫᨠᩪᨭᩣ ᨸᨻ᩠ᨻᨲᩣ ᩒᩁᩮᩣᩉᩥᨲ᩠ᩅᩣ ᨿᩮᨶ ᩈᩩᨾᩣᨣᨵᩣᨿ ᨲᩦᩁᩮ ᨾᩮᩣᩁᨶᩥᩅᩣᨸᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩈᩩᨾᩣᨣᨵᩣᨿ ᨲᩦᩁᩮ ᨾᩮᩣᩁᨶᩥᩅᩣᨸᩮ ᩋᨻ᩠ᨽᩮᩣᨠᩣᩈᩮ ᨧᨦ᩠ᨠᨾᩥ. ᩋᨴ᩠ᨴᩈᩣ ᨡᩮᩣ ᨶᩥᨣᩕᩮᩣᨵᩮᩣ ᨸᩁᩥᨻ᩠ᨻᩣᨩᨠᩮᩣ ᨽᨣᩅᨶ᩠ᨲᩴ ᩈᩩᨾᩣᨣᨵᩣᨿ ᨲᩦᩁᩮ ᨾᩮᩣᩁᨶᩥᩅᩣᨸᩮ ᩋᨻ᩠ᨽᩮᩣᨠᩣᩈᩮ ᨧᨦ᩠ᨠᨾᨶ᩠ᨲᩴ. ᨴᩥᩈ᩠ᩅᩣᨶ ᩈᨠᩴ ᨸᩁᩥᩈᩴ ᩈᨱ᩠ᨮᩣᨸᩮᩈᩥ – ‘‘ᩋᨸ᩠ᨸᩈᨴ᩠ᨴᩣ ᨽᩮᩣᨶ᩠ᨲᩮᩣ ᩉᩮᩣᨶ᩠ᨲᩩ, ᨾᩣ ᨽᩮᩣᨶ᩠ᨲᩮᩣ ᩈᨴ᩠ᨴᨾᨠᨲ᩠ᨳ, ᩋᨿᩴ ᩈᨾᨱᩮᩣ ᨣᩮᩣᨲᨾᩮᩣ ᩈᩩᨾᩣᨣᨵᩣᨿ ᨲᩦᩁᩮ ᨾᩮᩣᩁᨶᩥᩅᩣᨸᩮ ᩋᨻ᩠ᨽᩮᩣᨠᩣᩈᩮ ᨧᨦ᩠ᨠᨾᨲᩥ. ᩋᨸ᩠ᨸᩈᨴ᩠ᨴᨠᩣᨾᩮᩣ ᨡᩮᩣ ᨸᨶ ᩈᩮᩣ ᩌᨿᩈ᩠ᨾᩣ, ᩋᨸ᩠ᨸᩈᨴ᩠ᨴᩔ ᩅᨱ᩠ᨱᩅᩣᨴᩦ. ᩋᨸ᩠ᨸᩮᩅ ᨶᩣᨾ ᩋᨸ᩠ᨸᩈᨴ᩠ᨴᩴ ᨸᩁᩥᩈᩴ ᩅᩥᨴᩥᨲ᩠ᩅᩣ ᩏᨸᩈᨦ᩠ᨠᨾᩥᨲᨻ᩠ᨻᩴ ᨾᨬ᩠ᨬᩮᨿ᩠ᨿ. ᩈᨧᩮ ᩈᨾᨱᩮᩣ ᨣᩮᩣᨲᨾᩮᩣ ᩍᨾᩴ ᨸᩁᩥᩈᩴ ᩌᨣᨧ᩠ᨨᩮᨿ᩠ᨿ, ᩍᨾᩴ ᨲᩴ ᨸᨬ᩠ᩉᩴ ᨸᩩᨧ᩠ᨨᩮᨿ᩠ᨿᩣᨾ – ‘ᨠᩮᩣ ᨶᩣᨾ ᩈᩮᩣ, ᨽᨶ᩠ᨲᩮ, ᨽᨣᩅᨲᩮᩣ ᨵᨾ᩠ᨾᩮᩣ, ᨿᩮᨶ ᨽᨣᩅᩣ ᩈᩣᩅᨠᩮ ᩅᩥᨶᩮᨲᩥ, ᨿᩮᨶ ᨽᨣᩅᨲᩣ ᩈᩣᩅᨠᩣ ᩅᩥᨶᩦᨲᩣ ᩋᩔᩣᩈᨸ᩠ᨸᨲ᩠ᨲᩣ ᨸᨭᩥᨩᩣᨶᨶ᩠ᨲᩥ ᩋᨩ᩠ᨫᩣᩈᨿᩴ ᩌᨴᩥᨻᩕᩉ᩠ᨾᨧᩁᩥᨿ’ᨶ᩠ᨲᩥ? ᩑᩅᩴ ᩅᩩᨲ᩠ᨲᩮ ᨲᩮ ᨸᩁᩥᨻ᩠ᨻᩣᨩᨠᩣ ᨲᩩᨱ᩠ᩉᩦ ᩋᩉᩮᩈᩩᩴ.

ᨲᨸᩮᩣᨩᩥᨣᩩᨧ᩠ᨨᩣᩅᩣᨴᩮᩣ

᪕᪕. ᩋᨳ ᨡᩮᩣ ᨽᨣᩅᩣ ᨿᩮᨶ ᨶᩥᨣᩕᩮᩣᨵᩮᩣ ᨸᩁᩥᨻ᩠ᨻᩣᨩᨠᩮᩣ ᨲᩮᨶᩩᨸᩈᨦ᩠ᨠᨾᩥ. ᩋᨳ ᨡᩮᩣ ᨶᩥᨣᩕᩮᩣᨵᩮᩣ ᨸᩁᩥᨻ᩠ᨻᩣᨩᨠᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩑᨲᩩ ᨡᩮᩣ, ᨽᨶ᩠ᨲᩮ, ᨽᨣᩅᩣ, ᩈ᩠ᩅᩣᨣᨲᩴ, ᨽᨶ᩠ᨲᩮ, ᨽᨣᩅᨲᩮᩣ. ᨧᩥᩁᩔᩴ ᨡᩮᩣ, ᨽᨶ᩠ᨲᩮ, ᨽᨣᩅᩣ ᩍᨾᩴ ᨸᩁᩥᨿᩣᨿᨾᨠᩣᩈᩥ ᨿᨴᩥᨴᩴ ᩍᨵᩣᨣᨾᨶᩣᨿ. ᨶᩥᩈᩦᨴᨲᩩ, ᨽᨶ᩠ᨲᩮ, ᨽᨣᩅᩣ, ᩍᨴᨾᩣᩈᨶᩴ ᨸᨬ᩠ᨬᨲ᩠ᨲ’’ᨶ᩠ᨲᩥ. ᨶᩥᩈᩦᨴᩥ ᨽᨣᩅᩣ ᨸᨬ᩠ᨬᨲ᩠ᨲᩮ ᩌᩈᨶᩮ. ᨶᩥᨣᩕᩮᩣᨵᩮᩣᨸᩥ ᨡᩮᩣ ᨸᩁᩥᨻ᩠ᨻᩣᨩᨠᩮᩣ ᩋᨬ᩠ᨬᨲᩁᩴ ᨶᩦᨧᩣᩈᨶᩴ ᨣᩉᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩴ ᨡᩮᩣ ᨶᩥᨣᩕᩮᩣᨵᩴ ᨸᩁᩥᨻ᩠ᨻᩣᨩᨠᩴ ᨽᨣᩅᩣ ᩑᨲᨴᩅᩮᩣᨧ – ‘‘ᨠᩣᨿ ᨶᩩᨲ᩠ᨳ, ᨶᩥᨣᩕᩮᩣᨵ, ᩑᨲᩁᩉᩥ ᨠᨳᩣᨿ ᩈᨶ᩠ᨶᩥᩈᩥᨶ᩠ᨶᩣ, ᨠᩣ ᨧ ᨸᨶ ᩅᩮᩣ ᩋᨶ᩠ᨲᩁᩣᨠᨳᩣ ᩅᩥᨸ᩠ᨸᨠᨲᩣ’’ᨲᩥ? ᩑᩅᩴ ᩅᩩᨲ᩠ᨲᩮ, ᨶᩥᨣᩕᩮᩣᨵᩮᩣ ᨸᩁᩥᨻ᩠ᨻᩣᨩᨠᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ, ‘‘ᩍᨵ ᨾᨿᩴ, ᨽᨶ᩠ᨲᩮ, ᩋᨴ᩠ᨴᩈᩣᨾ ᨽᨣᩅᨶ᩠ᨲᩴ ᩈᩩᨾᩣᨣᨵᩣᨿ ᨲᩦᩁᩮ ᨾᩮᩣᩁᨶᩥᩅᩣᨸᩮ ᩋᨻ᩠ᨽᩮᩣᨠᩣᩈᩮ ᨧᨦ᩠ᨠᨾᨶ᩠ᨲᩴ, ᨴᩥᩈ᩠ᩅᩣᨶ ᩑᩅᩴ ᩋᩅᩮᩣᨧᩩᨾ᩠ᩉᩣ – ‘ᩈᨧᩮ ᩈᨾᨱᩮᩣ ᨣᩮᩣᨲᨾᩮᩣ ᩍᨾᩴ ᨸᩁᩥᩈᩴ ᩌᨣᨧ᩠ᨨᩮᨿ᩠ᨿ, ᩍᨾᩴ ᨲᩴ ᨸᨬ᩠ᩉᩴ ᨸᩩᨧ᩠ᨨᩮᨿ᩠ᨿᩣᨾ – ᨠᩮᩣ ᨶᩣᨾ ᩈᩮᩣ, ᨽᨶ᩠ᨲᩮ, ᨽᨣᩅᨲᩮᩣ ᨵᨾ᩠ᨾᩮᩣ, ᨿᩮᨶ ᨽᨣᩅᩣ ᩈᩣᩅᨠᩮ ᩅᩥᨶᩮᨲᩥ, ᨿᩮᨶ ᨽᨣᩅᨲᩣ ᩈᩣᩅᨠᩣ ᩅᩥᨶᩦᨲᩣ ᩋᩔᩣᩈᨸ᩠ᨸᨲ᩠ᨲᩣ ᨸᨭᩥᨩᩣᨶᨶ᩠ᨲᩥ ᩋᨩ᩠ᨫᩣᩈᨿᩴ ᩌᨴᩥᨻᩕᩉ᩠ᨾᨧᩁᩥᨿ’ᨶ᩠ᨲᩥ? ᩋᨿᩴ ᨡᩮᩣ ᨶᩮᩣ, ᨽᨶ᩠ᨲᩮ, ᩋᨶ᩠ᨲᩁᩣᨠᨳᩣ ᩅᩥᨸ᩠ᨸᨠᨲᩣ; ᩋᨳ ᨽᨣᩅᩣ ᩋᨶᩩᨸ᩠ᨸᨲ᩠ᨲᩮᩣ’’ᨲᩥ.

᪕᪖. ‘‘ᨴᩩᨩ᩠ᨩᩣᨶᩴ ᨡᩮᩣ ᩑᨲᩴ, ᨶᩥᨣᩕᩮᩣᨵ, ᨲᨿᩣ ᩋᨬ᩠ᨬᨴᩥᨭ᩠ᨮᩥᨠᩮᨶ ᩋᨬ᩠ᨬᨡᨶ᩠ᨲᩥᨠᩮᨶ ᩋᨬ᩠ᨬᩁᩩᨧᩥᨠᩮᨶ ᩋᨬ᩠ᨬᨲᩕᩣᨿᩮᩣᨣᩮᨶ ᩋᨬ᩠ᨬᨲᩕᩣᨧᩁᩥᨿᨠᩮᨶ, ᨿᩮᨶᩣᩉᩴ ᩈᩣᩅᨠᩮ ᩅᩥᨶᩮᨾᩥ, ᨿᩮᨶ ᨾᨿᩣ ᩈᩣᩅᨠᩣ ᩅᩥᨶᩦᨲᩣ ᩋᩔᩣᩈᨸ᩠ᨸᨲ᩠ᨲᩣ ᨸᨭᩥᨩᩣᨶᨶ᩠ᨲᩥ ᩋᨩ᩠ᨫᩣᩈᨿᩴ ᩌᨴᩥᨻᩕᩉ᩠ᨾᨧᩁᩥᨿᩴ. ᩍᨦ᩠ᨥ ᨲ᩠ᩅᩴ ᨾᩴ, ᨶᩥᨣᩕᩮᩣᨵ, ᩈᨠᩮ ᩌᨧᩁᩥᨿᨠᩮ ᩋᨵᩥᨩᩮᨣᩩᨧ᩠ᨨᩮ ᨸᨬ᩠ᩉᩴ ᨸᩩᨧ᩠ᨨ – ‘ᨠᨳᩴ ᩈᨶ᩠ᨲᩣ ᨶᩩ ᨡᩮᩣ, ᨽᨶ᩠ᨲᩮ, ᨲᨸᩮᩣᨩᩥᨣᩩᨧ᩠ᨨᩣ ᨸᩁᩥᨸᩩᨱ᩠ᨱᩣ ᩉᩮᩣᨲᩥ, ᨠᨳᩴ ᩋᨸᩁᩥᨸᩩᨱ᩠ᨱᩣ’ᨲᩥ? ᩑᩅᩴ ᩅᩩᨲ᩠ᨲᩮ ᨲᩮ ᨸᩁᩥᨻ᩠ᨻᩣᨩᨠᩣ ᩏᨶ᩠ᨶᩣᨴᩥᨶᩮᩣ ᩏᨧ᩠ᨧᩣᩈᨴ᩠ᨴᨾᩉᩣᩈᨴ᩠ᨴᩣ ᩋᩉᩮᩈᩩᩴ – ‘‘ᩋᨧ᩠ᨨᩁᩥᨿᩴ ᩅᨲ ᨽᩮᩣ, ᩋᨻ᩠ᨽᩩᨲᩴ ᩅᨲ ᨽᩮᩣ, ᩈᨾᨱᩔ ᨣᩮᩣᨲᨾᩔ ᨾᩉᩥᨴ᩠ᨵᩥᨠᨲᩣ ᨾᩉᩣᨶᩩᨽᩣᩅᨲᩣ, ᨿᨲᩕ ᩉᩥ ᨶᩣᨾ ᩈᨠᩅᩣᨴᩴ ᨮᨸᩮᩔᨲᩥ, ᨸᩁᩅᩣᨴᩮᨶ ᨸᩅᩣᩁᩮᩔᨲᩦ’’ᨲᩥ.

᪕᪗. ᩋᨳ ᨡᩮᩣ ᨶᩥᨣᩕᩮᩣᨵᩮᩣ ᨸᩁᩥᨻ᩠ᨻᩣᨩᨠᩮᩣ ᨲᩮ ᨸᩁᩥᨻ᩠ᨻᩣᨩᨠᩮ ᩋᨸ᩠ᨸᩈᨴ᩠ᨴᩮ ᨠᨲ᩠ᩅᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᨾᨿᩴ ᨡᩮᩣ, ᨽᨶ᩠ᨲᩮ, ᨲᨸᩮᩣᨩᩥᨣᩩᨧ᩠ᨨᩣᩅᩣᨴᩣ [ᨲᩁᩮᩣᨩᩥᨣᩩᨧ᩠ᨨᩴᩈᩣᩁᩮᩣᨴᩣ (ᨠ.)] ᨲᨸᩮᩣᨩᩥᨣᩩᨧ᩠ᨨᩣᩈᩣᩁᩣ ᨲᨸᩮᩣᨩᩥᨣᩩᨧ᩠ᨨᩣᩋᩃ᩠ᩃᩦᨶᩣ ᩅᩥᩉᩁᩣᨾ. ᨠᨳᩴ ᩈᨶ᩠ᨲᩣ ᨶᩩ ᨡᩮᩣ, ᨽᨶ᩠ᨲᩮ, ᨲᨸᩮᩣᨩᩥᨣᩩᨧ᩠ᨨᩣ ᨸᩁᩥᨸᩩᨱ᩠ᨱᩣ ᩉᩮᩣᨲᩥ, ᨠᨳᩴ ᩋᨸᩁᩥᨸᩩᨱ᩠ᨱᩣ’’ᨲᩥ?

‘‘ᩍᨵ, ᨶᩥᨣᩕᩮᩣᨵ, ᨲᨸᩔᩦ ᩋᨧᩮᩃᨠᩮᩣ ᩉᩮᩣᨲᩥ ᨾᩩᨲ᩠ᨲᩣᨧᩣᩁᩮᩣ, ᩉᨲ᩠ᨳᩣᨸᩃᩮᨡᨶᩮᩣ [ᩉᨲ᩠ᨳᩣᩅᩃᩮᨡᨶᩮᩣ (ᩈ᩠ᨿᩣ.)], ᨶ ᩑᩉᩥᨽᨴ᩠ᨴᨶ᩠ᨲᩥᨠᩮᩣ, ᨶ ᨲᩥᨭ᩠ᨮᨽᨴ᩠ᨴᨶ᩠ᨲᩥᨠᩮᩣ, ᨶᩣᨽᩥᩉᨭᩴ, ᨶ ᩏᨴ᩠ᨴᩥᩔᨠᨲᩴ, ᨶ ᨶᩥᨾᨶ᩠ᨲᨶᩴ ᩈᩣᨴᩥᨿᨲᩥ, ᩈᩮᩣ ᨶ ᨠᩩᨾ᩠ᨽᩥᨾᩩᨡᩣ ᨸᨭᩥᨣ᩠ᨣᨱ᩠ᩉᩣᨲᩥ, ᨶ ᨠᩊᩮᩣᨸᩥᨾᩩᨡᩣ ᨸᨭᩥᨣ᩠ᨣᨱ᩠ᩉᩣᨲᩥ, ᨶ ᩑᩊᨠᨾᨶ᩠ᨲᩁᩴ, ᨶ ᨴᨱ᩠ᨯᨾᨶ᩠ᨲᩁᩴ, ᨶ ᨾᩩᩈᩃᨾᨶ᩠ᨲᩁᩴ, ᨶ ᨴ᩠ᩅᩥᨶ᩠ᨶᩴ ᨽᩩᨬ᩠ᨩᨾᩣᨶᩣᨶᩴ, ᨶ ᨣᨻ᩠ᨽᩥᨶᩥᨿᩣ, ᨶ ᨸᩣᨿᨾᩣᨶᩣᨿ, ᨶ ᨸᩩᩁᩥᩈᨶ᩠ᨲᩁᨣᨲᩣᨿ, ᨶ ᩈᨦ᩠ᨠᩥᨲ᩠ᨲᩦᩈᩩ, ᨶ ᨿᨲ᩠ᨳ ᩈᩣ ᩏᨸᨭ᩠ᨮᩥᨲᩮᩣ ᩉᩮᩣᨲᩥ, ᨶ ᨿᨲ᩠ᨳ ᨾᨠ᩠ᨡᩥᨠᩣ ᩈᨱ᩠ᨯᩈᨱ᩠ᨯᨧᩣᩁᩥᨶᩦ, ᨶ ᨾᨧ᩠ᨨᩴ, ᨶ ᨾᩴᩈᩴ, ᨶ ᩈᩩᩁᩴ, ᨶ ᨾᩮᩁᨿᩴ, ᨶ ᨳᩩᩈᩮᩣᨴᨠᩴ ᨸᩥᩅᨲᩥ, ᩈᩮᩣ ᩑᨠᩣᨣᩣᩁᩥᨠᩮᩣ ᩅᩣ ᩉᩮᩣᨲᩥ ᩑᨠᩣᩃᩮᩣᨸᩥᨠᩮᩣ, ᨴ᩠ᩅᩣᨣᩣᩁᩥᨠᩮᩣ ᩅᩣ ᩉᩮᩣᨲᩥ ᨴ᩠ᩅᩣᩃᩮᩣᨸᩥᨠᩮᩣ, ᩈᨲ᩠ᨲᩣᨣᩣᩁᩥᨠᩮᩣ ᩅᩣ ᩉᩮᩣᨲᩥ ᩈᨲ᩠ᨲᩣᩃᩮᩣᨸᩥᨠᩮᩣ, ᩑᨠᩥᩔᩣᨸᩥ ᨴᨲ᩠ᨲᩥᨿᩣ ᨿᩣᨸᩮᨲᩥ, ᨴ᩠ᩅᩦᩉᩥᨸᩥ ᨴᨲ᩠ᨲᩦᩉᩥ ᨿᩣᨸᩮᨲᩥ, ᩈᨲ᩠ᨲᩉᩥᨸᩥ ᨴᨲ᩠ᨲᩦᩉᩥ ᨿᩣᨸᩮᨲᩥ; ᩑᨠᩣᩉᩥᨠᨾ᩠ᨸᩥ ᩌᩉᩣᩁᩴ ᩌᩉᩣᩁᩮᨲᩥ, ᨴ᩠ᩅᩦᩉᩥᨠᨾ᩠ᨸᩥ [ᨴ᩠ᩅᩣᩉᩥᨠᩴᨸᩥ (ᩈᩦ. ᩈ᩠ᨿᩣ.)] ᩌᩉᩣᩁᩴ ᩌᩉᩣᩁᩮᨲᩥ, ᩈᨲ᩠ᨲᩣᩉᩥᨠᨾ᩠ᨸᩥ ᩌᩉᩣᩁᩴ ᩌᩉᩣᩁᩮᨲᩥ, ᩍᨲᩥ ᩑᩅᩁᩪᨸᩴ ᩋᨴ᩠ᨵᨾᩣᩈᩥᨠᨾ᩠ᨸᩥ ᨸᩁᩥᨿᩣᨿᨽᨲ᩠ᨲᨽᩮᩣᨩᨶᩣᨶᩩᨿᩮᩣᨣᨾᨶᩩᨿᩩᨲ᩠ᨲᩮᩣ ᩅᩥᩉᩁᨲᩥ. ᩈᩮᩣ ᩈᩣᨠᨽᨠ᩠ᨡᩮᩣ ᩅᩣ ᩉᩮᩣᨲᩥ, ᩈᩣᨾᩣᨠᨽᨠ᩠ᨡᩮᩣ ᩅᩣ ᩉᩮᩣᨲᩥ, ᨶᩦᩅᩣᩁᨽᨠ᩠ᨡᩮᩣ ᩅᩣ ᩉᩮᩣᨲᩥ, ᨴᨴ᩠ᨴᩩᩃᨽᨠ᩠ᨡᩮᩣ ᩅᩣ ᩉᩮᩣᨲᩥ, ᩉᨭᨽᨠ᩠ᨡᩮᩣ ᩅᩣ ᩉᩮᩣᨲᩥ, ᨠᨱᨽᨠ᩠ᨡᩮᩣ ᩅᩣ ᩉᩮᩣᨲᩥ, ᩌᨧᩣᨾᨽᨠ᩠ᨡᩮᩣ ᩅᩣ ᩉᩮᩣᨲᩥ, ᨸᩥᨬ᩠ᨬᩣᨠᨽᨠ᩠ᨡᩮᩣ ᩅᩣ ᩉᩮᩣᨲᩥ, ᨲᩥᨱᨽᨠ᩠ᨡᩮᩣ ᩅᩣ ᩉᩮᩣᨲᩥ, ᨣᩮᩣᨾᨿᨽᨠ᩠ᨡᩮᩣ ᩅᩣ ᩉᩮᩣᨲᩥ; ᩅᨶᨾᩪᩃᨹᩃᩣᩉᩣᩁᩮᩣ ᨿᩣᨸᩮᨲᩥ ᨸᩅᨲ᩠ᨲᨹᩃᨽᩮᩣᨩᩦ. ᩈᩮᩣ ᩈᩣᨱᩣᨶᩥᨸᩥ ᨵᩣᩁᩮᨲᩥ, ᨾᩈᩣᨱᩣᨶᩥᨸᩥ ᨵᩣᩁᩮᨲᩥ, ᨨᩅᨴᩩᩔᩣᨶᩥᨸᩥ ᨵᩣᩁᩮᨲᩥ, ᨸᩴᩈᩩᨠᩪᩃᩣᨶᩥᨸᩥ ᨵᩣᩁᩮᨲᩥ, ᨲᩥᩁᩦᨭᩣᨶᩥᨸᩥ ᨵᩣᩁᩮᨲᩥ, ᩋᨩᩥᨶᨾ᩠ᨸᩥ ᨵᩣᩁᩮᨲᩥ, ᩋᨩᩥᨶᨠ᩠ᨡᩥᨸᨾ᩠ᨸᩥ ᨵᩣᩁᩮᨲᩥ, ᨠᩩᩈᨧᩦᩁᨾ᩠ᨸᩥ ᨵᩣᩁᩮᨲᩥ, ᩅᩣᨠᨧᩦᩁᨾ᩠ᨸᩥ ᨵᩣᩁᩮᨲᩥ, ᨹᩃᨠᨧᩦᩁᨾ᩠ᨸᩥ ᨵᩣᩁᩮᨲᩥ, ᨠᩮᩈᨠᨾ᩠ᨻᩃᨾ᩠ᨸᩥ ᨵᩣᩁᩮᨲᩥ, ᩅᩣᩊᨠᨾ᩠ᨻᩃᨾ᩠ᨸᩥ ᨵᩣᩁᩮᨲᩥ, ᩏᩃᩪᨠᨸᨠ᩠ᨡᨾ᩠ᨸᩥ ᨵᩣᩁᩮᨲᩥ, ᨠᩮᩈᨾᩔᩩᩃᩮᩣᨧᨠᩮᩣᨸᩥ ᩉᩮᩣᨲᩥ ᨠᩮᩈᨾᩔᩩᩃᩮᩣᨧᨶᩣᨶᩩᨿᩮᩣᨣᨾᨶᩩᨿᩩᨲ᩠ᨲᩮᩣ, ᩏᨻ᩠ᨽᨭ᩠ᨮᨠᩮᩣᨸᩥ [ᩏᨽᨭ᩠ᨮᨠᩮᩣᨸᩥ (ᩈ᩠ᨿᩣ.), ᩏᨻ᩠ᨽᨭ᩠ᨮᩥᨠᩮᩣᨸᩥ (ᨠ.)] ᩉᩮᩣᨲᩥ ᩌᩈᨶᨸᨭᩥᨠ᩠ᨡᩥᨲ᩠ᨲᩮᩣ, ᩏᨠ᩠ᨠᩩᨭᩥᨠᩮᩣᨸᩥ ᩉᩮᩣᨲᩥ ᩏᨠ᩠ᨠᩩᨭᩥᨠᨸ᩠ᨸᨵᩣᨶᨾᨶᩩᨿᩩᨲ᩠ᨲᩮᩣ, ᨠᨱ᩠ᨭᨠᩣᨸᩔᨿᩥᨠᩮᩣᨸᩥ ᩉᩮᩣᨲᩥ ᨠᨱ᩠ᨭᨠᩣᨸᩔᨿᩮ ᩈᩮᨿ᩠ᨿᩴ ᨠᨸ᩠ᨸᩮᨲᩥ, ᨹᩃᨠᩈᩮᨿ᩠ᨿᨾ᩠ᨸᩥ ᨠᨸ᩠ᨸᩮᨲᩥ, ᨳᨱ᩠ᨯᩥᩃᩈᩮᨿ᩠ᨿᨾ᩠ᨸᩥ ᨠᨸ᩠ᨸᩮᨲᩥ, ᩑᨠᨸᩔᨿᩥᨠᩮᩣᨸᩥ ᩉᩮᩣᨲᩥ ᩁᨩᩮᩣᨩᩃ᩠ᩃᨵᩁᩮᩣ, ᩋᨻ᩠ᨽᩮᩣᨠᩣᩈᩥᨠᩮᩣᨸᩥ ᩉᩮᩣᨲᩥ ᨿᨳᩣᩈᨶ᩠ᨳᨲᩥᨠᩮᩣ, ᩅᩮᨠᨭᩥᨠᩮᩣᨸᩥ ᩉᩮᩣᨲᩥ ᩅᩥᨠᨭᨽᩮᩣᨩᨶᩣᨶᩩᨿᩮᩣᨣᨾᨶᩩᨿᩩᨲ᩠ᨲᩮᩣ, ᩋᨸᩣᨶᨠᩮᩣᨸᩥ ᩉᩮᩣᨲᩥ ᩋᨸᩣᨶᨠᨲ᩠ᨲᨾᨶᩩᨿᩩᨲ᩠ᨲᩮᩣ, ᩈᩣᨿᨲᨲᩥᨿᨠᨾ᩠ᨸᩥ ᩏᨴᨠᩮᩣᩁᩮᩣᩉᨶᩣᨶᩩᨿᩮᩣᨣᨾᨶᩩᨿᩩᨲ᩠ᨲᩮᩣ ᩅᩥᩉᩁᨲᩥ. ᨲᩴ ᨠᩥᩴ ᨾᨬ᩠ᨬᩈᩥ, ᨶᩥᨣᩕᩮᩣᨵ, ᨿᨴᩥ ᩑᩅᩴ ᩈᨶ᩠ᨲᩮ ᨲᨸᩮᩣᨩᩥᨣᩩᨧ᩠ᨨᩣ ᨸᩁᩥᨸᩩᨱ᩠ᨱᩣ ᩅᩣ ᩉᩮᩣᨲᩥ ᩋᨸᩁᩥᨸᩩᨱ᩠ᨱᩣ ᩅᩣ’’ᨲᩥ? ‘‘ᩋᨴ᩠ᨵᩣ ᨡᩮᩣ, ᨽᨶ᩠ᨲᩮ, ᩑᩅᩴ ᩈᨶ᩠ᨲᩮ ᨲᨸᩮᩣᨩᩥᨣᩩᨧ᩠ᨨᩣ ᨸᩁᩥᨸᩩᨱ᩠ᨱᩣ ᩉᩮᩣᨲᩥ, ᨶᩮᩣ ᩋᨸᩁᩥᨸᩩᨱ᩠ᨱᩣ’’ᨲᩥ. ‘‘ᩑᩅᩴ ᨸᩁᩥᨸᩩᨱ᩠ᨱᩣᨿᨸᩥ ᨡᩮᩣ ᩋᩉᩴ, ᨶᩥᨣᩕᩮᩣᨵ, ᨲᨸᩮᩣᨩᩥᨣᩩᨧ᩠ᨨᩣᨿ ᩋᨶᩮᨠᩅᩥᩉᩥᨲᩮ ᩏᨸᨠ᩠ᨠᩥᩃᩮᩈᩮ ᩅᨴᩣᨾᩦ’’ᨲᩥ.

ᩏᨸᨠ᩠ᨠᩥᩃᩮᩈᩮᩣ

᪕᪘. ‘‘ᨿᨳᩣ ᨠᨳᩴ ᨸᨶ, ᨽᨶ᩠ᨲᩮ, ᨽᨣᩅᩣ ᩑᩅᩴ ᨸᩁᩥᨸᩩᨱ᩠ᨱᩣᨿ ᨲᨸᩮᩣᨩᩥᨣᩩᨧ᩠ᨨᩣᨿ ᩋᨶᩮᨠᩅᩥᩉᩥᨲᩮ ᩏᨸᨠ᩠ᨠᩥᩃᩮᩈᩮ ᩅᨴᨲᩦ’’ᨲᩥ? ‘‘ᩍᨵ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᩋᨲ᩠ᨲᨾᨶᩮᩣ ᩉᩮᩣᨲᩥ ᨸᩁᩥᨸᩩᨱ᩠ᨱᩈᨦ᩠ᨠᨸ᩠ᨸᩮᩣ. ᨿᨾ᩠ᨸᩥ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᩋᨲ᩠ᨲᨾᨶᩮᩣ ᩉᩮᩣᨲᩥ ᨸᩁᩥᨸᩩᨱ᩠ᨱᩈᨦ᩠ᨠᨸ᩠ᨸᩮᩣ. ᩋᨿᨾ᩠ᨸᩥ ᨡᩮᩣ, ᨶᩥᨣᩕᩮᩣᨵ, ᨲᨸᩔᩥᨶᩮᩣ ᩏᨸᨠ᩠ᨠᩥᩃᩮᩈᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᩋᨲ᩠ᨲᩣᨶᩩᨠ᩠ᨠᩴᩈᩮᨲᩥ ᨸᩁᩴ ᩅᨾ᩠ᨽᩮᨲᩥ. ᨿᨾ᩠ᨸᩥ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᩋᨲ᩠ᨲᩣᨶᩩᨠ᩠ᨠᩴᩈᩮᨲᩥ ᨸᩁᩴ ᩅᨾ᩠ᨽᩮᨲᩥ. ᩋᨿᨾ᩠ᨸᩥ ᨡᩮᩣ, ᨶᩥᨣᩕᩮᩣᨵ, ᨲᨸᩔᩥᨶᩮᩣ ᩏᨸᨠ᩠ᨠᩥᩃᩮᩈᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᨾᨩ᩠ᨩᨲᩥ ᨾᩩᨧ᩠ᨨᨲᩥ ᨸᨾᩣᨴᨾᩣᨸᨩ᩠ᨩᨲᩥ [ᨾᨴᨾᩣᨸᨩ᩠ᨩᨲᩥ (ᩈ᩠ᨿᩣ.)]. ᨿᨾ᩠ᨸᩥ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᨾᨩ᩠ᨩᨲᩥ ᨾᩩᨧ᩠ᨨᨲᩥ ᨸᨾᩣᨴᨾᩣᨸᨩ᩠ᨩᨲᩥ. ᩋᨿᨾ᩠ᨸᩥ ᨡᩮᩣ, ᨶᩥᨣᩕᩮᩣᨵ, ᨲᨸᩔᩥᨶᩮᩣ ᩏᨸᨠ᩠ᨠᩥᩃᩮᩈᩮᩣ ᩉᩮᩣᨲᩥ.

᪕᪙. ‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩴ ᩋᨽᩥᨶᩥᨻ᩠ᨻᨲ᩠ᨲᩮᨲᩥ, ᩈᩮᩣ ᨲᩮᨶ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩮᨶ ᩋᨲ᩠ᨲᨾᨶᩮᩣ ᩉᩮᩣᨲᩥ ᨸᩁᩥᨸᩩᨱ᩠ᨱᩈᨦ᩠ᨠᨸ᩠ᨸᩮᩣ. ᨿᨾ᩠ᨸᩥ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩴ ᩋᨽᩥᨶᩥᨻ᩠ᨻᨲ᩠ᨲᩮᨲᩥ, ᩈᩮᩣ ᨲᩮᨶ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩮᨶ ᩋᨲ᩠ᨲᨾᨶᩮᩣ ᩉᩮᩣᨲᩥ ᨸᩁᩥᨸᩩᨱ᩠ᨱᩈᨦ᩠ᨠᨸ᩠ᨸᩮᩣ. ᩋᨿᨾ᩠ᨸᩥ ᨡᩮᩣ, ᨶᩥᨣᩕᩮᩣᨵ, ᨲᨸᩔᩥᨶᩮᩣ ᩏᨸᨠ᩠ᨠᩥᩃᩮᩈᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩴ ᩋᨽᩥᨶᩥᨻ᩠ᨻᨲ᩠ᨲᩮᨲᩥ, ᩈᩮᩣ ᨲᩮᨶ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩮᨶ ᩋᨲ᩠ᨲᩣᨶᩩᨠ᩠ᨠᩴᩈᩮᨲᩥ ᨸᩁᩴ ᩅᨾ᩠ᨽᩮᨲᩥ. ᨿᨾ᩠ᨸᩥ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩴ ᩋᨽᩥᨶᩥᨻ᩠ᨻᨲ᩠ᨲᩮᨲᩥ, ᩈᩮᩣ ᨲᩮᨶ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩮᨶ ᩋᨲ᩠ᨲᩣᨶᩩᨠ᩠ᨠᩴᩈᩮᨲᩥ ᨸᩁᩴ ᩅᨾ᩠ᨽᩮᨲᩥ. ᩋᨿᨾ᩠ᨸᩥ ᨡᩮᩣ, ᨶᩥᨣᩕᩮᩣᨵ, ᨲᨸᩔᩥᨶᩮᩣ ᩏᨸᨠ᩠ᨠᩥᩃᩮᩈᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩴ ᩋᨽᩥᨶᩥᨻ᩠ᨻᨲ᩠ᨲᩮᨲᩥ, ᩈᩮᩣ ᨲᩮᨶ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩮᨶ ᨾᨩ᩠ᨩᨲᩥ ᨾᩩᨧ᩠ᨨᨲᩥ ᨸᨾᩣᨴᨾᩣᨸᨩ᩠ᨩᨲᩥ. ᨿᨾ᩠ᨸᩥ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩴ ᩋᨽᩥᨶᩥᨻ᩠ᨻᨲ᩠ᨲᩮᨲᩥ, ᩈᩮᩣ ᨲᩮᨶ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩮᨶ ᨾᨩ᩠ᨩᨲᩥ ᨾᩩᨧ᩠ᨨᨲᩥ ᨸᨾᩣᨴᨾᩣᨸᨩ᩠ᨩᨲᩥ. ᩋᨿᨾ᩠ᨸᩥ ᨡᩮᩣ, ᨶᩥᨣᩕᩮᩣᨵ, ᨲᨸᩔᩥᨶᩮᩣ ᩏᨸᨠ᩠ᨠᩥᩃᩮᩈᩮᩣ ᩉᩮᩣᨲᩥ.

᪖᪐. ‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨽᩮᩣᨩᨶᩮᩈᩩ ᩅᩮᩣᨴᩣᩈᩴ ᩌᨸᨩ᩠ᨩᨲᩥ – ‘ᩍᨴᩴ ᨾᩮ ᨡᨾᨲᩥ, ᩍᨴᩴ ᨾᩮ ᨶᨠ᩠ᨡᨾᨲᩦ’ᨲᩥ. ᩈᩮᩣ ᨿᨬ᩠ᨧ [ᨿᩴ ᩉᩥ (ᩈᩦ. ᨸᩦ.)] ᨡ᩠ᩅᩔ ᨶᨠ᩠ᨡᨾᨲᩥ, ᨲᩴ ᩈᩣᨸᩮᨠ᩠ᨡᩮᩣ ᨸᨩᩉᨲᩥ. ᨿᩴ ᨸᨶᩔ ᨡᨾᨲᩥ, ᨲᩴ ᨣᨵᩥᨲᩮᩣ [ᨣᨳᩥᨲᩮᩣ (ᩈᩦ. ᨸᩦ.)] ᨾᩩᨧ᩠ᨨᩥᨲᩮᩣ ᩋᨩ᩠ᨫᩣᨸᨶ᩠ᨶᩮᩣ ᩋᨶᩣᨴᩦᨶᩅᨴᩔᩣᩅᩦ ᩋᨶᩥᩔᩁᨱᨸᨬ᩠ᨬᩮᩣ ᨸᩁᩥᨽᩩᨬ᩠ᨩᨲᩥ…ᨸᩮ… ᩋᨿᨾ᩠ᨸᩥ ᨡᩮᩣ, ᨶᩥᨣᩕᩮᩣᨵ, ᨲᨸᩔᩥᨶᩮᩣ ᩏᨸᨠ᩠ᨠᩥᩃᩮᩈᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᨶᩥᨠᨶ᩠ᨲᩥᩉᩮᨲᩩ – ‘ᩈᨠ᩠ᨠᩁᩥᩔᨶ᩠ᨲᩥ ᨾᩴ ᩁᩣᨩᩣᨶᩮᩣ ᩁᩣᨩᨾᩉᩣᨾᨲ᩠ᨲᩣ ᨡᨲ᩠ᨲᩥᨿᩣ ᨻᩕᩣᩉ᩠ᨾᨱᩣ ᨣᩉᨸᨲᩥᨠᩣ ᨲᩥᨲ᩠ᨳᩥᨿᩣ’ᨲᩥ…ᨸᩮ… ᩋᨿᨾ᩠ᨸᩥ ᨡᩮᩣ, ᨶᩥᨣᩕᩮᩣᨵ, ᨲᨸᩔᩥᨶᩮᩣ ᩏᨸᨠ᩠ᨠᩥᩃᩮᩈᩮᩣ ᩉᩮᩣᨲᩥ.

᪖᪑. ‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᩋᨬ᩠ᨬᨲᩁᩴ ᩈᨾᨱᩴ ᩅᩣ ᨻᩕᩣᩉ᩠ᨾᨱᩴ ᩅᩣ ᩋᨸᩈᩣᨴᩮᨲᩣ [ᩋᨸᩈᩣᩁᩮᨲᩣ (ᨠ.)] ᩉᩮᩣᨲᩥ – ‘ᨠᩥᩴ ᨸᨶᩣᨿᩴ ᩈᨾ᩠ᨻᩉᩩᩃᩣᨩᩦᩅᩮᩣ [ᨻᩉᩩᩃᩣᨩᩦᩅᩮᩣ (ᩈᩦ. ᨸᩦ.)] ᩈᨻ᩠ᨻᩴ ᩈᩴᨽᨠ᩠ᨡᩮᨲᩥ. ᩈᩮᨿ᩠ᨿᨳᩥᨴᩴ – ᨾᩪᩃᨻᩦᨩᩴ ᨡᨶ᩠ᨵᨻᩦᨩᩴ ᨹᩊᩩᨻᩦᨩᩴ ᩋᨣ᩠ᨣᨻᩦᨩᩴ ᨻᩦᨩᨻᩦᨩᨾᩮᩅ ᨸᨬ᩠ᨧᨾᩴ, ᩋᩈᨶᩥᩅᩥᨧᨠ᩠ᨠᩴ ᨴᨶ᩠ᨲᨠᩪᨭᩴ, ᩈᨾᨱᨸ᩠ᨸᩅᩣᨴᩮᨶᩣ’ᨲᩥ…ᨸᩮ… ᩋᨿᨾ᩠ᨸᩥ ᨡᩮᩣ, ᨶᩥᨣᩕᩮᩣᨵ, ᨲᨸᩔᩥᨶᩮᩣ ᩏᨸᨠ᩠ᨠᩥᩃᩮᩈᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨸᩔᨲᩥ ᩋᨬ᩠ᨬᨲᩁᩴ ᩈᨾᨱᩴ ᩅᩣ ᨻᩕᩣᩉ᩠ᨾᨱᩴ ᩅᩣ ᨠᩩᩃᩮᩈᩩ ᩈᨠ᩠ᨠᩁᩥᨿᨾᩣᨶᩴ ᨣᩁᩩᨠᩁᩥᨿᨾᩣᨶᩴ ᨾᩣᨶᩥᨿᨾᩣᨶᩴ ᨸᩪᨩᩥᨿᨾᩣᨶᩴ. ᨴᩥᩈ᩠ᩅᩣ ᨲᩔ ᩑᩅᩴ ᩉᩮᩣᨲᩥ – ‘ᩍᨾᨬ᩠ᩉᩥ ᨶᩣᨾ ᩈᨾ᩠ᨻᩉᩩᩃᩣᨩᩦᩅᩴ ᨠᩩᩃᩮᩈᩩ ᩈᨠ᩠ᨠᩁᩮᩣᨶ᩠ᨲᩥ ᨣᩁᩩᩴ ᨠᩁᩮᩣᨶ᩠ᨲᩥ ᨾᩣᨶᩮᨶ᩠ᨲᩥ ᨸᩪᨩᩮᨶ᩠ᨲᩥ. ᨾᩴ ᨸᨶ ᨲᨸᩔᩥᩴ ᩃᩪᨡᩣᨩᩦᩅᩥᩴ ᨠᩩᩃᩮᩈᩩ ᨶ ᩈᨠ᩠ᨠᩁᩮᩣᨶ᩠ᨲᩥ ᨶ ᨣᩁᩩᩴ ᨠᩁᩮᩣᨶ᩠ᨲᩥ ᨶ ᨾᩣᨶᩮᨶ᩠ᨲᩥ ᨶ ᨸᩪᨩᩮᨶ᩠ᨲᩦ’ᨲᩥ, ᩍᨲᩥ ᩈᩮᩣ ᩍᩔᩣᨾᨧ᩠ᨨᩁᩥᨿᩴ ᨠᩩᩃᩮᩈᩩ ᩏᨸ᩠ᨸᩣᨴᩮᨲᩣ ᩉᩮᩣᨲᩥ…ᨸᩮ… ᩋᨿᨾ᩠ᨸᩥ ᨡᩮᩣ, ᨶᩥᨣᩕᩮᩣᨵ, ᨲᨸᩔᩥᨶᩮᩣ ᩏᨸᨠ᩠ᨠᩥᩃᩮᩈᩮᩣ ᩉᩮᩣᨲᩥ.

᪖᪒. ‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᩌᨸᩣᨳᨠᨶᩥᩈᩣᨴᩦ ᩉᩮᩣᨲᩥ…ᨸᩮ… ᩋᨿᨾ᩠ᨸᩥ ᨡᩮᩣ, ᨶᩥᨣᩕᩮᩣᨵ, ᨲᨸᩔᩥᨶᩮᩣ ᩏᨸᨠ᩠ᨠᩥᩃᩮᩈᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᩋᨲ᩠ᨲᩣᨶᩴ ᩋᨴᩔᨿᨾᩣᨶᩮᩣ ᨠᩩᩃᩮᩈᩩ ᨧᩁᨲᩥ – ‘ᩍᨴᨾ᩠ᨸᩥ ᨾᩮ ᨲᨸᩈ᩠ᨾᩥᩴ ᩍᨴᨾ᩠ᨸᩥ ᨾᩮ ᨲᨸᩈ᩠ᨾᩥ’ᨶ᩠ᨲᩥ…ᨸᩮ… ᩋᨿᨾ᩠ᨸᩥ ᨡᩮᩣ, ᨶᩥᨣᩕᩮᩣᨵ, ᨲᨸᩔᩥᨶᩮᩣ ᩏᨸᨠ᩠ᨠᩥᩃᩮᩈᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨠᩥᨬ᩠ᨧᩥᨴᩮᩅ ᨸᨭᩥᨧ᩠ᨨᨶ᩠ᨶᩴ ᩈᩮᩅᨲᩥ. ᩈᩮᩣ ‘ᨡᨾᨲᩥ ᨲᩮ ᩍᨴ’ᨶ᩠ᨲᩥ ᨸᩩᨭ᩠ᨮᩮᩣ ᩈᨾᩣᨶᩮᩣ ᩋᨠ᩠ᨡᨾᨾᩣᨶᩴ ᩌᩉ – ‘ᨡᨾᨲᩦ’ᨲᩥ. ᨡᨾᨾᩣᨶᩴ ᩌᩉ – ‘ᨶᨠ᩠ᨡᨾᨲᩦ’ᨲᩥ. ᩍᨲᩥ ᩈᩮᩣ ᩈᨾ᩠ᨸᨩᩣᨶᨾᩩᩈᩣ ᨽᩣᩈᩥᨲᩣ ᩉᩮᩣᨲᩥ…ᨸᩮ… ᩋᨿᨾ᩠ᨸᩥ ᨡᩮᩣ, ᨶᩥᨣᩕᩮᩣᨵ, ᨲᨸᩔᩥᨶᩮᩣ ᩏᨸᨠ᩠ᨠᩥᩃᩮᩈᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨲᨳᩣᨣᨲᩔ ᩅᩣ ᨲᨳᩣᨣᨲᩈᩣᩅᨠᩔ ᩅᩣ ᨵᨾ᩠ᨾᩴ ᨴᩮᩈᩮᨶ᩠ᨲᩔ ᩈᨶ᩠ᨲᩴᨿᩮᩅ ᨸᩁᩥᨿᩣᨿᩴ ᩋᨶᩩᨬ᩠ᨬᩮᨿ᩠ᨿᩴ ᨶᩣᨶᩩᨩᩣᨶᩣᨲᩥ…ᨸᩮ… ᩋᨿᨾ᩠ᨸᩥ ᨡᩮᩣ, ᨶᩥᨣᩕᩮᩣᨵ, ᨲᨸᩔᩥᨶᩮᩣ ᩏᨸᨠ᩠ᨠᩥᩃᩮᩈᩮᩣ ᩉᩮᩣᨲᩥ.

᪖᪓. ‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨠᩮᩣᨵᨶᩮᩣ ᩉᩮᩣᨲᩥ ᩏᨸᨶᩣᩉᩦ. ᨿᨾ᩠ᨸᩥ, ᨶᩥᨣᩕᩮᩣᨵ, ᨲᨸᩔᩦ ᨠᩮᩣᨵᨶᩮᩣ ᩉᩮᩣᨲᩥ ᩏᨸᨶᩣᩉᩦ. ᩋᨿᨾ᩠ᨸᩥ ᨡᩮᩣ, ᨶᩥᨣᩕᩮᩣᨵ, ᨲᨸᩔᩥᨶᩮᩣ ᩏᨸᨠ᩠ᨠᩥᩃᩮᩈᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨾᨠ᩠ᨡᩦ ᩉᩮᩣᨲᩥ ᨸᩊᩣᩈᩦ [ᨸᩃᩣᩈᩦ (ᩈᩦ. ᩈ᩠ᨿᩣ. ᨸᩦ.)] …ᨸᩮ… ᩍᩔᩩᨠᩦ ᩉᩮᩣᨲᩥ ᨾᨧ᩠ᨨᩁᩦ… ᩈᨮᩮᩣ ᩉᩮᩣᨲᩥ ᨾᩣᨿᩣᩅᩦ… ᨳᨴ᩠ᨵᩮᩣ ᩉᩮᩣᨲᩥ ᩋᨲᩥᨾᩣᨶᩦ… ᨸᩣᨸᩥᨧ᩠ᨨᩮᩣ ᩉᩮᩣᨲᩥ ᨸᩣᨸᩥᨠᩣᨶᩴ ᩍᨧ᩠ᨨᩣᨶᩴ ᩅᩈᩴ ᨣᨲᩮᩣ… ᨾᩥᨧ᩠ᨨᩣᨴᩥᨭ᩠ᨮᩥᨠᩮᩣ ᩉᩮᩣᨲᩥ ᩋᨶ᩠ᨲᨣ᩠ᨣᩣᩉᩥᨠᩣᨿ ᨴᩥᨭ᩠ᨮᩥᨿᩣ ᩈᨾᨶ᩠ᨶᩣᨣᨲᩮᩣ… ᩈᨶ᩠ᨴᩥᨭ᩠ᨮᩥᨸᩁᩣᨾᩣᩈᩦ ᩉᩮᩣᨲᩥ ᩌᨵᩣᨶᨣ᩠ᨣᩣᩉᩦ ᨴᩩᨸ᩠ᨸᨭᩥᨶᩥᩔᨣ᩠ᨣᩦ. ᨿᨾ᩠ᨸᩥ, ᨶᩥᨣᩕᩮᩣᨵ, ᨲᨸᩔᩦ ᩈᨶ᩠ᨴᩥᨭ᩠ᨮᩥᨸᩁᩣᨾᩣᩈᩦ ᩉᩮᩣᨲᩥ ᩌᨵᩣᨶᨣ᩠ᨣᩣᩉᩦ ᨴᩩᨸ᩠ᨸᨭᩥᨶᩥᩔᨣ᩠ᨣᩦ. ᩋᨿᨾ᩠ᨸᩥ ᨡᩮᩣ, ᨶᩥᨣᩕᩮᩣᨵ, ᨲᨸᩔᩥᨶᩮᩣ ᩏᨸᨠ᩠ᨠᩥᩃᩮᩈᩮᩣ ᩉᩮᩣᨲᩥ.

‘‘ᨲᩴ ᨠᩥᩴ ᨾᨬ᩠ᨬᩈᩥ, ᨶᩥᨣᩕᩮᩣᨵ, ᨿᨴᩥᨾᩮ ᨲᨸᩮᩣᨩᩥᨣᩩᨧ᩠ᨨᩣ [ᨲᨸᩮᩣᨩᩥᨣᩩᨧ᩠ᨨᩣᨿ (?)] ᩏᨸᨠ᩠ᨠᩥᩃᩮᩈᩣ ᩅᩣ ᩋᨶᩩᨸᨠ᩠ᨠᩥᩃᩮᩈᩣ ᩅᩣ’’ᨲᩥ? ‘‘ᩋᨴ᩠ᨵᩣ ᨡᩮᩣ ᩍᨾᩮ, ᨽᨶ᩠ᨲᩮ, ᨲᨸᩮᩣᨩᩥᨣᩩᨧ᩠ᨨᩣ [ᨲᨸᩮᩣᨩᩥᨣᩩᨧ᩠ᨨᩣᨿ (?)] ᩏᨸᨠ᩠ᨠᩥᩃᩮᩈᩣ [ᩏᨸᨠ᩠ᨠᩥᩃᩮᩈᩣ ᩉᩮᩣᨲᩥ (ᨠ.)], ᨶᩮᩣ ᩋᨶᩩᨸᨠ᩠ᨠᩥᩃᩮᩈᩣ. ᨮᩣᨶᩴ ᨡᩮᩣ ᨸᨶᩮᨲᩴ, ᨽᨶ᩠ᨲᩮ, ᩅᩥᨩ᩠ᨩᨲᩥ ᨿᩴ ᩍᨵᩮᨠᨧ᩠ᨧᩮᩣ ᨲᨸᩔᩦ ᩈᨻ᩠ᨻᩮᩉᩮᩅ ᩍᨾᩮᩉᩥ ᩏᨸᨠ᩠ᨠᩥᩃᩮᩈᩮᩉᩥ ᩈᨾᨶ᩠ᨶᩣᨣᨲᩮᩣ ᩋᩔ; ᨠᩮᩣ ᨸᨶ ᩅᩣᨴᩮᩣ ᩋᨬ᩠ᨬᨲᩁᨬ᩠ᨬᨲᩁᩮᨶᩣ’’ᨲᩥ.

ᨸᩁᩥᩈᩩᨴ᩠ᨵᨸᨸᨭᩥᨠᨸ᩠ᨸᨲ᩠ᨲᨠᨳᩣ

᪖᪔. ‘‘ᩍᨵ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᨶ ᩋᨲ᩠ᨲᨾᨶᩮᩣ ᩉᩮᩣᨲᩥ ᨶ ᨸᩁᩥᨸᩩᨱ᩠ᨱᩈᨦ᩠ᨠᨸ᩠ᨸᩮᩣ. ᨿᨾ᩠ᨸᩥ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᨶ ᩋᨲ᩠ᨲᨾᨶᩮᩣ ᩉᩮᩣᨲᩥ ᨶ ᨸᩁᩥᨸᩩᨱ᩠ᨱᩈᨦ᩠ᨠᨸ᩠ᨸᩮᩣ. ᩑᩅᩴ ᩈᩮᩣ ᨲᩈ᩠ᨾᩥᩴ ᨮᩣᨶᩮ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᨶ ᩋᨲ᩠ᨲᩣᨶᩩᨠ᩠ᨠᩴᩈᩮᨲᩥ ᨶ ᨸᩁᩴ ᩅᨾ᩠ᨽᩮᨲᩥ…ᨸᩮ… ᩑᩅᩴ ᩈᩮᩣ ᨲᩈ᩠ᨾᩥᩴ ᨮᩣᨶᩮ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᨶ ᨾᨩ᩠ᨩᨲᩥ ᨶ ᨾᩩᨧ᩠ᨨᨲᩥ ᨶ ᨸᨾᩣᨴᨾᩣᨸᨩ᩠ᨩᨲᩥ…ᨸᩮ… ᩑᩅᩴ ᩈᩮᩣ ᨲᩈ᩠ᨾᩥᩴ ᨮᩣᨶᩮ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ.

᪖᪕. ‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩴ ᩋᨽᩥᨶᩥᨻ᩠ᨻᨲ᩠ᨲᩮᨲᩥ, ᩈᩮᩣ ᨲᩮᨶ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩮᨶ ᨶ ᩋᨲ᩠ᨲᨾᨶᩮᩣ ᩉᩮᩣᨲᩥ ᨶ ᨸᩁᩥᨸᩩᨱ᩠ᨱᩈᨦ᩠ᨠᨸ᩠ᨸᩮᩣ…ᨸᩮ… ᩑᩅᩴ ᩈᩮᩣ ᨲᩈ᩠ᨾᩥᩴ ᨮᩣᨶᩮ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩴ ᩋᨽᩥᨶᩥᨻ᩠ᨻᨲ᩠ᨲᩮᨲᩥ, ᩈᩮᩣ ᨲᩮᨶ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩮᨶ ᨶ ᩋᨲ᩠ᨲᩣᨶᩩᨠ᩠ᨠᩴᩈᩮᨲᩥ ᨶ ᨸᩁᩴ ᩅᨾ᩠ᨽᩮᨲᩥ…ᨸᩮ… ᩑᩅᩴ ᩈᩮᩣ ᨲᩈ᩠ᨾᩥᩴ ᨮᩣᨶᩮ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨲᨸᩴ ᩈᨾᩣᨴᩥᨿᨲᩥ, ᩈᩮᩣ ᨲᩮᨶ ᨲᨸᩈᩣ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩴ ᩋᨽᩥᨶᩥᨻ᩠ᨻᨲ᩠ᨲᩮᨲᩥ, ᩈᩮᩣ ᨲᩮᨶ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᩮᨶ ᨶ ᨾᨩ᩠ᨩᨲᩥ ᨶ ᨾᩩᨧ᩠ᨨᨲᩥ ᨶ ᨸᨾᩣᨴᨾᩣᨸᨩ᩠ᨩᨲᩥ…ᨸᩮ… ᩑᩅᩴ ᩈᩮᩣ ᨲᩈ᩠ᨾᩥᩴ ᨮᩣᨶᩮ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ.

᪖᪖. ‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨽᩮᩣᨩᨶᩮᩈᩩ ᨶ ᩅᩮᩣᨴᩣᩈᩴ ᩌᨸᨩ᩠ᨩᨲᩥ – ‘ᩍᨴᩴ ᨾᩮ ᨡᨾᨲᩥ, ᩍᨴᩴ ᨾᩮ ᨶᨠ᩠ᨡᨾᨲᩦ’ᨲᩥ. ᩈᩮᩣ ᨿᨬ᩠ᨧ ᨡ᩠ᩅᩔ ᨶᨠ᩠ᨡᨾᨲᩥ, ᨲᩴ ᩋᨶᨸᩮᨠ᩠ᨡᩮᩣ ᨸᨩᩉᨲᩥ. ᨿᩴ ᨸᨶᩔ ᨡᨾᨲᩥ, ᨲᩴ ᩋᨣᨵᩥᨲᩮᩣ ᩋᨾᩩᨧ᩠ᨨᩥᨲᩮᩣ ᩋᨶᨩ᩠ᨫᩣᨸᨶ᩠ᨶᩮᩣ ᩌᨴᩦᨶᩅᨴᩔᩣᩅᩦ ᨶᩥᩔᩁᨱᨸᨬ᩠ᨬᩮᩣ ᨸᩁᩥᨽᩩᨬ᩠ᨩᨲᩥ…ᨸᩮ… ᩑᩅᩴ ᩈᩮᩣ ᨲᩈ᩠ᨾᩥᩴ ᨮᩣᨶᩮ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨶ ᨲᨸᩴ ᩈᨾᩣᨴᩥᨿᨲᩥ ᩃᩣᨽᩈᨠ᩠ᨠᩣᩁᩈᩥᩃᩮᩣᨠᨶᩥᨠᨶ᩠ᨲᩥᩉᩮᨲᩩ – ‘ᩈᨠ᩠ᨠᩁᩥᩔᨶ᩠ᨲᩥ ᨾᩴ ᩁᩣᨩᩣᨶᩮᩣ ᩁᩣᨩᨾᩉᩣᨾᨲ᩠ᨲᩣ ᨡᨲ᩠ᨲᩥᨿᩣ ᨻᩕᩣᩉ᩠ᨾᨱᩣ ᨣᩉᨸᨲᩥᨠᩣ ᨲᩥᨲ᩠ᨳᩥᨿᩣ’ᨲᩥ…ᨸᩮ… ᩑᩅᩴ ᩈᩮᩣ ᨲᩈ᩠ᨾᩥᩴ ᨮᩣᨶᩮ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ.

᪖᪗. ‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᩋᨬ᩠ᨬᨲᩁᩴ ᩈᨾᨱᩴ ᩅᩣ ᨻᩕᩣᩉ᩠ᨾᨱᩴ ᩅᩣ ᨶᩣᨸᩈᩣᨴᩮᨲᩣ ᩉᩮᩣᨲᩥ – ‘ᨠᩥᩴ ᨸᨶᩣᨿᩴ ᩈᨾ᩠ᨻᩉᩩᩃᩣᨩᩦᩅᩮᩣ ᩈᨻ᩠ᨻᩴ ᩈᩴᨽᨠ᩠ᨡᩮᨲᩥ. ᩈᩮᨿ᩠ᨿᨳᩥᨴᩴ – ᨾᩪᩃᨻᩦᨩᩴ ᨡᨶ᩠ᨵᨻᩦᨩᩴ ᨹᩊᩩᨻᩦᨩᩴ ᩋᨣ᩠ᨣᨻᩦᨩᩴ ᨻᩦᨩᨻᩦᨩᨾᩮᩅ ᨸᨬ᩠ᨧᨾᩴ, ᩋᩈᨶᩥᩅᩥᨧᨠ᩠ᨠᩴ ᨴᨶ᩠ᨲᨠᩪᨭᩴ, ᩈᨾᨱᨸ᩠ᨸᩅᩣᨴᩮᨶᩣ’ᨲᩥ…ᨸᩮ… ᩑᩅᩴ ᩈᩮᩣ ᨲᩈ᩠ᨾᩥᩴ ᨮᩣᨶᩮ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨸᩔᨲᩥ ᩋᨬ᩠ᨬᨲᩁᩴ ᩈᨾᨱᩴ ᩅᩣ ᨻᩕᩣᩉ᩠ᨾᨱᩴ ᩅᩣ ᨠᩩᩃᩮᩈᩩ ᩈᨠ᩠ᨠᩁᩥᨿᨾᩣᨶᩴ ᨣᩁᩩ ᨠᩁᩥᨿᨾᩣᨶᩴ ᨾᩣᨶᩥᨿᨾᩣᨶᩴ ᨸᩪᨩᩥᨿᨾᩣᨶᩴ. ᨴᩥᩈ᩠ᩅᩣ ᨲᩔ ᨶ ᩑᩅᩴ ᩉᩮᩣᨲᩥ – ‘ᩍᨾᨬ᩠ᩉᩥ ᨶᩣᨾ ᩈᨾ᩠ᨻᩉᩩᩃᩣᨩᩦᩅᩴ ᨠᩩᩃᩮᩈᩩ ᩈᨠ᩠ᨠᩁᩮᩣᨶ᩠ᨲᩥ ᨣᩁᩩᩴ ᨠᩁᩮᩣᨶ᩠ᨲᩥ ᨾᩣᨶᩮᨶ᩠ᨲᩥ ᨸᩪᨩᩮᨶ᩠ᨲᩥ. ᨾᩴ ᨸᨶ ᨲᨸᩔᩥᩴ ᩃᩪᨡᩣᨩᩦᩅᩥᩴ ᨠᩩᩃᩮᩈᩩ ᨶ ᩈᨠ᩠ᨠᩁᩮᩣᨶ᩠ᨲᩥ ᨶ ᨣᩁᩩᩴ ᨠᩁᩮᩣᨶ᩠ᨲᩥ ᨶ ᨾᩣᨶᩮᨶ᩠ᨲᩥ ᨶ ᨸᩪᨩᩮᨶ᩠ᨲᩦ’ᨲᩥ, ᩍᨲᩥ ᩈᩮᩣ ᩍᩔᩣᨾᨧ᩠ᨨᩁᩥᨿᩴ ᨠᩩᩃᩮᩈᩩ ᨶᩩᨸ᩠ᨸᩣᨴᩮᨲᩣ ᩉᩮᩣᨲᩥ…ᨸᩮ… ᩑᩅᩴ ᩈᩮᩣ ᨲᩈ᩠ᨾᩥᩴ ᨮᩣᨶᩮ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ.

᪖᪘. ‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨶ ᩌᨸᩣᨳᨠᨶᩥᩈᩣᨴᩦ ᩉᩮᩣᨲᩥ…ᨸᩮ… ᩑᩅᩴ ᩈᩮᩣ ᨲᩈ᩠ᨾᩥᩴ ᨮᩣᨶᩮ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨶ ᩋᨲ᩠ᨲᩣᨶᩴ ᩋᨴᩔᨿᨾᩣᨶᩮᩣ ᨠᩩᩃᩮᩈᩩ ᨧᩁᨲᩥ – ‘ᩍᨴᨾ᩠ᨸᩥ ᨾᩮ ᨲᨸᩈ᩠ᨾᩥᩴ, ᩍᨴᨾ᩠ᨸᩥ ᨾᩮ ᨲᨸᩈ᩠ᨾᩥ’ᨶ᩠ᨲᩥ…ᨸᩮ… ᩑᩅᩴ ᩈᩮᩣ ᨲᩈ᩠ᨾᩥᩴ ᨮᩣᨶᩮ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨶ ᨠᨬ᩠ᨧᩥᨴᩮᩅ ᨸᨭᩥᨧ᩠ᨨᨶ᩠ᨶᩴ ᩈᩮᩅᨲᩥ, ᩈᩮᩣ – ‘ᨡᨾᨲᩥ ᨲᩮ ᩍᨴ’ᨶ᩠ᨲᩥ ᨸᩩᨭ᩠ᨮᩮᩣ ᩈᨾᩣᨶᩮᩣ ᩋᨠ᩠ᨡᨾᨾᩣᨶᩴ ᩌᩉ – ‘ᨶᨠ᩠ᨡᨾᨲᩦ’ᨲᩥ. ᨡᨾᨾᩣᨶᩴ ᩌᩉ – ‘ᨡᨾᨲᩦ’ᨲᩥ. ᩍᨲᩥ ᩈᩮᩣ ᩈᨾ᩠ᨸᨩᩣᨶᨾᩩᩈᩣ ᨶ ᨽᩣᩈᩥᨲᩣ ᩉᩮᩣᨲᩥ…ᨸᩮ… ᩑᩅᩴ ᩈᩮᩣ ᨲᩈ᩠ᨾᩥᩴ ᨮᩣᨶᩮ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᨲᨳᩣᨣᨲᩔ ᩅᩣ ᨲᨳᩣᨣᨲᩈᩣᩅᨠᩔ ᩅᩣ ᨵᨾ᩠ᨾᩴ ᨴᩮᩈᩮᨶ᩠ᨲᩔ ᩈᨶ᩠ᨲᩴᨿᩮᩅ ᨸᩁᩥᨿᩣᨿᩴ ᩋᨶᩩᨬ᩠ᨬᩮᨿ᩠ᨿᩴ ᩋᨶᩩᨩᩣᨶᩣᨲᩥ…ᨸᩮ… ᩑᩅᩴ ᩈᩮᩣ ᨲᩈ᩠ᨾᩥᩴ ᨮᩣᨶᩮ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ.

᪖᪙. ‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᩋᨠ᩠ᨠᩮᩣᨵᨶᩮᩣ ᩉᩮᩣᨲᩥ ᩋᨶᩩᨸᨶᩣᩉᩦ. ᨿᨾ᩠ᨸᩥ, ᨶᩥᨣᩕᩮᩣᨵ, ᨲᨸᩔᩦ ᩋᨠ᩠ᨠᩮᩣᨵᨶᩮᩣ ᩉᩮᩣᨲᩥ ᩋᨶᩩᨸᨶᩣᩉᩦ ᩑᩅᩴ ᩈᩮᩣ ᨲᩈ᩠ᨾᩥᩴ ᨮᩣᨶᩮ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᨶᩥᨣᩕᩮᩣᨵ, ᨲᨸᩔᩦ ᩋᨾᨠ᩠ᨡᩦ ᩉᩮᩣᨲᩥ ᩋᨸᩊᩣᩈᩦ…ᨸᩮ… ᩋᨶᩥᩔᩩᨠᩦ ᩉᩮᩣᨲᩥ ᩋᨾᨧ᩠ᨨᩁᩦ… ᩋᩈᨮᩮᩣ ᩉᩮᩣᨲᩥ ᩋᨾᩣᨿᩣᩅᩦ… ᩋᨲ᩠ᨳᨴ᩠ᨵᩮᩣ ᩉᩮᩣᨲᩥ ᩋᨶᨲᩥᨾᩣᨶᩦ… ᨶ ᨸᩣᨸᩥᨧ᩠ᨨᩮᩣ ᩉᩮᩣᨲᩥ ᨶ ᨸᩣᨸᩥᨠᩣᨶᩴ ᩍᨧ᩠ᨨᩣᨶᩴ ᩅᩈᩴ ᨣᨲᩮᩣ… ᨶ ᨾᩥᨧ᩠ᨨᩣᨴᩥᨭ᩠ᨮᩥᨠᩮᩣ ᩉᩮᩣᨲᩥ ᨶ ᩋᨶ᩠ᨲᨣ᩠ᨣᩣᩉᩥᨠᩣᨿ ᨴᩥᨭ᩠ᨮᩥᨿᩣ ᩈᨾᨶ᩠ᨶᩣᨣᨲᩮᩣ… ᨶ ᩈᨶ᩠ᨴᩥᨭ᩠ᨮᩥᨸᩁᩣᨾᩣᩈᩦ ᩉᩮᩣᨲᩥ ᨶ ᩌᨵᩣᨶᨣ᩠ᨣᩣᩉᩦ ᩈᩩᨸ᩠ᨸᨭᩥᨶᩥᩔᨣ᩠ᨣᩦ. ᨿᨾ᩠ᨸᩥ, ᨶᩥᨣᩕᩮᩣᨵ, ᨲᨸᩔᩦ ᨶ ᩈᨶ᩠ᨴᩥᨭ᩠ᨮᩥᨸᩁᩣᨾᩣᩈᩦ ᩉᩮᩣᨲᩥ ᨶ ᩌᨵᩣᨶᨣ᩠ᨣᩣᩉᩦ ᩈᩩᨸ᩠ᨸᨭᩥᨶᩥᩔᨣ᩠ᨣᩦ. ᩑᩅᩴ ᩈᩮᩣ ᨲᩈ᩠ᨾᩥᩴ ᨮᩣᨶᩮ ᨸᩁᩥᩈᩩᨴ᩠ᨵᩮᩣ ᩉᩮᩣᨲᩥ.

‘‘ᨲᩴ ᨠᩥᩴ ᨾᨬ᩠ᨬᩈᩥ, ᨶᩥᨣᩕᩮᩣᨵ, ᨿᨴᩥ ᩑᩅᩴ ᩈᨶ᩠ᨲᩮ ᨲᨸᩮᩣᨩᩥᨣᩩᨧ᩠ᨨᩣ ᨸᩁᩥᩈᩩᨴ᩠ᨵᩣ ᩅᩣ ᩉᩮᩣᨲᩥ ᩋᨸᩁᩥᩈᩩᨴ᩠ᨵᩣ ᩅᩣ’’ᨲᩥ? ‘‘ᩋᨴ᩠ᨵᩣ ᨡᩮᩣ, ᨽᨶ᩠ᨲᩮ, ᩑᩅᩴ ᩈᨶ᩠ᨲᩮ ᨲᨸᩮᩣᨩᩥᨣᩩᨧ᩠ᨨᩣ ᨸᩁᩥᩈᩩᨴ᩠ᨵᩣ ᩉᩮᩣᨲᩥ ᨶᩮᩣ ᩋᨸᩁᩥᩈᩩᨴ᩠ᨵᩣ, ᩋᨣ᩠ᨣᨸ᩠ᨸᨲ᩠ᨲᩣ ᨧ ᩈᩣᩁᨸ᩠ᨸᨲ᩠ᨲᩣ ᨧᩣ’’ᨲᩥ. ‘‘ᨶ ᨡᩮᩣ, ᨶᩥᨣᩕᩮᩣᨵ, ᩑᨲ᩠ᨲᩣᩅᨲᩣ ᨲᨸᩮᩣᨩᩥᨣᩩᨧ᩠ᨨᩣ ᩋᨣ᩠ᨣᨸ᩠ᨸᨲ᩠ᨲᩣ ᨧ ᩉᩮᩣᨲᩥ ᩈᩣᩁᨸ᩠ᨸᨲ᩠ᨲᩣ ᨧ; ᩋᨸᩥ ᨧ ᨡᩮᩣ ᨸᨸᨭᩥᨠᨸ᩠ᨸᨲ᩠ᨲᩣ [ᨸᨸ᩠ᨸᨭᩥᨠᨸᨲ᩠ᨲᩣ (ᨠ.)] ᩉᩮᩣᨲᩦ’’ᨲᩥ.

ᨸᩁᩥᩈᩩᨴ᩠ᨵᨲᨧᨸ᩠ᨸᨲ᩠ᨲᨠᨳᩣ

᪗᪐. ‘‘ᨠᩥᨲ᩠ᨲᩣᩅᨲᩣ ᨸᨶ, ᨽᨶ᩠ᨲᩮ, ᨲᨸᩮᩣᨩᩥᨣᩩᨧ᩠ᨨᩣ ᩋᨣ᩠ᨣᨸ᩠ᨸᨲ᩠ᨲᩣ ᨧ ᩉᩮᩣᨲᩥ ᩈᩣᩁᨸ᩠ᨸᨲ᩠ᨲᩣ ᨧ? ᩈᩣᨵᩩ ᨾᩮ, ᨽᨶ᩠ᨲᩮ, ᨽᨣᩅᩣ ᨲᨸᩮᩣᨩᩥᨣᩩᨧ᩠ᨨᩣᨿ ᩋᨣ᩠ᨣᨬ᩠ᨬᩮᩅ ᨸᩣᨸᩮᨲᩩ, ᩈᩣᩁᨬ᩠ᨬᩮᩅ ᨸᩣᨸᩮᨲᩪ’’ᨲᩥ. ‘‘ᩍᨵ, ᨶᩥᨣᩕᩮᩣᨵ, ᨲᨸᩔᩦ ᨧᩣᨲᩩᨿᩣᨾᩈᩴᩅᩁᩈᩴᩅᩩᨲᩮᩣ ᩉᩮᩣᨲᩥ. ᨠᨳᨬ᩠ᨧ, ᨶᩥᨣᩕᩮᩣᨵ, ᨲᨸᩔᩦ ᨧᩣᨲᩩᨿᩣᨾᩈᩴᩅᩁᩈᩴᩅᩩᨲᩮᩣ ᩉᩮᩣᨲᩥ? ᩍᨵ, ᨶᩥᨣᩕᩮᩣᨵ, ᨲᨸᩔᩦ ᨶ ᨸᩣᨱᩴ ᩋᨲᩥᨸᩣᨲᩮᨲᩥ [ᩋᨲᩥᨸᩣᨸᩮᨲᩥ (ᨠ. ᩈᩦ. ᨸᩦ. ᨠ.)], ᨶ ᨸᩣᨱᩴ ᩋᨲᩥᨸᩣᨲᨿᨲᩥ, ᨶ ᨸᩣᨱᨾᨲᩥᨸᩣᨲᨿᨲᩮᩣ ᩈᨾᨶᩩᨬ᩠ᨬᩮᩣ ᩉᩮᩣᨲᩥ. ᨶ ᩋᨴᩥᨶ᩠ᨶᩴ ᩌᨴᩥᨿᨲᩥ, ᨶ ᩋᨴᩥᨶ᩠ᨶᩴ ᩌᨴᩥᨿᩣᨸᩮᨲᩥ, ᨶ ᩋᨴᩥᨶ᩠ᨶᩴ ᩌᨴᩥᨿᨲᩮᩣ ᩈᨾᨶᩩᨬ᩠ᨬᩮᩣ ᩉᩮᩣᨲᩥ. ᨶ ᨾᩩᩈᩣ ᨽᨱᨲᩥ, ᨶ ᨾᩩᩈᩣ ᨽᨱᩣᨸᩮᨲᩥ, ᨶ ᨾᩩᩈᩣ ᨽᨱᨲᩮᩣ ᩈᨾᨶᩩᨬ᩠ᨬᩮᩣ ᩉᩮᩣᨲᩥ. ᨶ ᨽᩣᩅᩥᨲᨾᩣᩈᩦᩈᨲᩥ [ᨶ ᨽᩣᩅᩥᨲᨾᩣᩈᩥᩴ ᩈᨲᩥ (ᩈᩦ. ᩈ᩠ᨿᩣ. ᨸᩦ.)], ᨶ ᨽᩣᩅᩥᨲᨾᩣᩈᩦᩈᩣᨸᩮᨲᩥ, ᨶ ᨽᩣᩅᩥᨲᨾᩣᩈᩦᩈᨲᩮᩣ ᩈᨾᨶᩩᨬ᩠ᨬᩮᩣ ᩉᩮᩣᨲᩥ. ᩑᩅᩴ ᨡᩮᩣ, ᨶᩥᨣᩕᩮᩣᨵ, ᨲᨸᩔᩦ ᨧᩣᨲᩩᨿᩣᨾᩈᩴᩅᩁᩈᩴᩅᩩᨲᩮᩣ ᩉᩮᩣᨲᩥ.

‘‘ᨿᨲᩮᩣ ᨡᩮᩣ, ᨶᩥᨣᩕᩮᩣᨵ, ᨲᨸᩔᩦ ᨧᩣᨲᩩᨿᩣᨾᩈᩴᩅᩁᩈᩴᩅᩩᨲᩮᩣ ᩉᩮᩣᨲᩥ, ᩋᨴᩩᩴ ᨧᩔ ᩉᩮᩣᨲᩥ ᨲᨸᩔᩥᨲᩣᨿ. ᩈᩮᩣ ᩋᨽᩥᩉᩁᨲᩥ ᨶᩮᩣ ᩉᩦᨶᩣᨿᩣᩅᨲ᩠ᨲᨲᩥ. ᩈᩮᩣ ᩅᩥᩅᩥᨲ᩠ᨲᩴ ᩈᩮᨶᩣᩈᨶᩴ ᨽᨩᨲᩥ ᩋᩁᨬ᩠ᨬᩴ ᩁᩩᨠ᩠ᨡᨾᩪᩃᩴ ᨸᨻ᩠ᨻᨲᩴ ᨠᨶ᩠ᨴᩁᩴ ᨣᩥᩁᩥᨣᩩᩉᩴ ᩈᩩᩈᩣᨶᩴ ᩅᨶᨸᨲ᩠ᨳᩴ ᩋᨻ᩠ᨽᩮᩣᨠᩣᩈᩴ ᨸᩃᩣᩃᨸᩩᨬ᩠ᨩᩴ. ᩈᩮᩣ ᨸᨧ᩠ᨨᩣᨽᨲ᩠ᨲᩴ ᨸᩥᨱ᩠ᨯᨸᩣᨲᨸ᩠ᨸᨭᩥᨠ᩠ᨠᨶ᩠ᨲᩮᩣ ᨶᩥᩈᩦᨴᨲᩥ ᨸᩃ᩠ᩃᨦ᩠ᨠᩴ ᩌᨽᩩᨩᩥᨲ᩠ᩅᩣ ᩏᨩᩩᩴ ᨠᩣᨿᩴ ᨸᨱᩥᨵᩣᨿ ᨸᩁᩥᨾᩩᨡᩴ ᩈᨲᩥᩴ ᩏᨸᨭ᩠ᨮᨸᩮᨲ᩠ᩅᩣ. ᩈᩮᩣ ᩋᨽᩥᨩ᩠ᨫᩴ ᩃᩮᩣᨠᩮ ᨸᩉᩣᨿ ᩅᩥᨣᨲᩣᨽᩥᨩ᩠ᨫᩮᨶ ᨧᩮᨲᩈᩣ ᩅᩥᩉᩁᨲᩥ, ᩋᨽᩥᨩ᩠ᨫᩣᨿ ᨧᩥᨲ᩠ᨲᩴ ᨸᩁᩥᩈᩮᩣᨵᩮᨲᩥ. ᨻ᩠ᨿᩣᨸᩣᨴᨸ᩠ᨸᨴᩮᩣᩈᩴ ᨸᩉᩣᨿ ᩋᨻ᩠ᨿᩣᨸᨶ᩠ᨶᨧᩥᨲ᩠ᨲᩮᩣ ᩅᩥᩉᩁᨲᩥ ᩈᨻ᩠ᨻᨸᩣᨱᨽᩪᨲᩉᩥᨲᩣᨶᩩᨠᨾ᩠ᨸᩦ, ᨻ᩠ᨿᩣᨸᩣᨴᨸ᩠ᨸᨴᩮᩣᩈᩣ ᨧᩥᨲ᩠ᨲᩴ ᨸᩁᩥᩈᩮᩣᨵᩮᨲᩥ. ᨳᩥᨶᨾᩥᨴ᩠ᨵᩴ [ᨳᩦᨶᨾᩥᨴ᩠ᨵᩴ (ᩈᩦ. ᩈ᩠ᨿᩣ. ᨸᩦ.)] ᨸᩉᩣᨿ ᩅᩥᨣᨲᨳᩥᨶᨾᩥᨴ᩠ᨵᩮᩣ ᩅᩥᩉᩁᨲᩥ ᩌᩃᩮᩣᨠᩈᨬ᩠ᨬᩦ ᩈᨲᩮᩣ ᩈᨾ᩠ᨸᨩᩣᨶᩮᩣ, ᨳᩥᨶᨾᩥᨴ᩠ᨵᩣ ᨧᩥᨲ᩠ᨲᩴ ᨸᩁᩥᩈᩮᩣᨵᩮᨲᩥ. ᩏᨴ᩠ᨵᨧ᩠ᨧᨠᩩᨠ᩠ᨠᩩᨧ᩠ᨧᩴ ᨸᩉᩣᨿ ᩋᨶᩩᨴ᩠ᨵᨲᩮᩣ ᩅᩥᩉᩁᨲᩥ ᩋᨩ᩠ᨫᨲ᩠ᨲᩴ ᩅᩪᨸᩈᨶ᩠ᨲᨧᩥᨲ᩠ᨲᩮᩣ, ᩏᨴ᩠ᨵᨧ᩠ᨧᨠᩩᨠ᩠ᨠᩩᨧ᩠ᨧᩣ ᨧᩥᨲ᩠ᨲᩴ ᨸᩁᩥᩈᩮᩣᨵᩮᨲᩥ. ᩅᩥᨧᩥᨠᩥᨧ᩠ᨨᩴ ᨸᩉᩣᨿ ᨲᩥᨱ᩠ᨱᩅᩥᨧᩥᨠᩥᨧ᩠ᨨᩮᩣ ᩅᩥᩉᩁᨲᩥ ᩋᨠᨳᩴᨠᨳᩦ ᨠᩩᩈᩃᩮᩈᩩ ᨵᨾ᩠ᨾᩮᩈᩩ, ᩅᩥᨧᩥᨠᩥᨧ᩠ᨨᩣᨿ ᨧᩥᨲ᩠ᨲᩴ ᨸᩁᩥᩈᩮᩣᨵᩮᨲᩥ.

᪗᪑. ‘‘ᩈᩮᩣ ᩍᨾᩮ ᨸᨬ᩠ᨧ ᨶᩦᩅᩁᨱᩮ ᨸᩉᩣᨿ ᨧᩮᨲᩈᩮᩣ ᩏᨸᨠ᩠ᨠᩥᩃᩮᩈᩮ ᨸᨬ᩠ᨬᩣᨿ ᨴᩩᨻ᩠ᨻᩃᩦᨠᩁᨱᩮ ᨾᩮᨲ᩠ᨲᩣᩈᩉᨣᨲᩮᨶ ᨧᩮᨲᩈᩣ ᩑᨠᩴ ᨴᩥᩈᩴ ᨹᩁᩥᨲ᩠ᩅᩣ ᩅᩥᩉᩁᨲᩥ. ᨲᨳᩣ ᨴᩩᨲᩥᨿᩴ. ᨲᨳᩣ ᨲᨲᩥᨿᩴ. ᨲᨳᩣ ᨧᨲᩩᨲ᩠ᨳᩴ. ᩍᨲᩥ ᩏᨴ᩠ᨵᨾᨵᩮᩣ ᨲᩥᩁᩥᨿᩴ ᩈᨻ᩠ᨻᨵᩥ ᩈᨻ᩠ᨻᨲ᩠ᨲᨲᩣᨿ ᩈᨻ᩠ᨻᩣᩅᨶ᩠ᨲᩴ ᩃᩮᩣᨠᩴ ᨾᩮᨲ᩠ᨲᩣᩈᩉᨣᨲᩮᨶ ᨧᩮᨲᩈᩣ ᩅᩥᨸᩩᩃᩮᨶ ᨾᩉᨣ᩠ᨣᨲᩮᨶ ᩋᨸ᩠ᨸᨾᩣᨱᩮᨶ ᩋᩅᩮᩁᩮᨶ ᩋᨻ᩠ᨿᩣᨸᨩ᩠ᨩᩮᨶ ᨹᩁᩥᨲ᩠ᩅᩣ ᩅᩥᩉᩁᨲᩥ. ᨠᩁᩩᨱᩣᩈᩉᨣᨲᩮᨶ ᨧᩮᨲᩈᩣ…ᨸᩮ… ᨾᩩᨴᩥᨲᩣᩈᩉᨣᨲᩮᨶ ᨧᩮᨲᩈᩣ…ᨸᩮ… ᩏᨸᩮᨠ᩠ᨡᩣᩈᩉᨣᨲᩮᨶ ᨧᩮᨲᩈᩣ ᩑᨠᩴ ᨴᩥᩈᩴ ᨹᩁᩥᨲ᩠ᩅᩣ ᩅᩥᩉᩁᨲᩥ. ᨲᨳᩣ ᨴᩩᨲᩥᨿᩴ. ᨲᨳᩣ ᨲᨲᩥᨿᩴ. ᨲᨳᩣ ᨧᨲᩩᨲ᩠ᨳᩴ. ᩍᨲᩥ ᩏᨴ᩠ᨵᨾᨵᩮᩣ ᨲᩥᩁᩥᨿᩴ ᩈᨻ᩠ᨻᨵᩥ ᩈᨻ᩠ᨻᨲ᩠ᨲᨲᩣᨿ ᩈᨻ᩠ᨻᩣᩅᨶ᩠ᨲᩴ ᩃᩮᩣᨠᩴ ᩏᨸᩮᨠ᩠ᨡᩣᩈᩉᨣᨲᩮᨶ ᨧᩮᨲᩈᩣ ᩅᩥᨸᩩᩃᩮᨶ ᨾᩉᨣ᩠ᨣᨲᩮᨶ ᩋᨸ᩠ᨸᨾᩣᨱᩮᨶ ᩋᩅᩮᩁᩮᨶ ᩋᨻ᩠ᨿᩣᨸᨩ᩠ᨩᩮᨶ ᨹᩁᩥᨲ᩠ᩅᩣ ᩅᩥᩉᩁᨲᩥ.

‘‘ᨲᩴ ᨠᩥᩴ ᨾᨬ᩠ᨬᩈᩥ, ᨶᩥᨣᩕᩮᩣᨵ. ᨿᨴᩥ ᩑᩅᩴ ᩈᨶ᩠ᨲᩮ ᨲᨸᩮᩣᨩᩥᨣᩩᨧ᩠ᨨᩣ ᨸᩁᩥᩈᩩᨴ᩠ᨵᩣ ᩅᩣ ᩉᩮᩣᨲᩥ ᩋᨸᩁᩥᩈᩩᨴ᩠ᨵᩣ ᩅᩣ’’ᨲᩥ? ‘‘ᩋᨴ᩠ᨵᩣ ᨡᩮᩣ, ᨽᨶ᩠ᨲᩮ, ᩑᩅᩴ ᩈᨶ᩠ᨲᩮ ᨲᨸᩮᩣᨩᩥᨣᩩᨧ᩠ᨨᩣ ᨸᩁᩥᩈᩩᨴ᩠ᨵᩣ ᩉᩮᩣᨲᩥ ᨶᩮᩣ ᩋᨸᩁᩥᩈᩩᨴ᩠ᨵᩣ, ᩋᨣ᩠ᨣᨸ᩠ᨸᨲ᩠ᨲᩣ ᨧ ᩈᩣᩁᨸ᩠ᨸᨲ᩠ᨲᩣ ᨧᩣ’’ᨲᩥ. ‘‘ᨶ ᨡᩮᩣ, ᨶᩥᨣᩕᩮᩣᨵ, ᩑᨲ᩠ᨲᩣᩅᨲᩣ ᨲᨸᩮᩣᨩᩥᨣᩩᨧ᩠ᨨᩣ ᩋᨣ᩠ᨣᨸ᩠ᨸᨲ᩠ᨲᩣ ᨧ ᩉᩮᩣᨲᩥ ᩈᩣᩁᨸ᩠ᨸᨲ᩠ᨲᩣ ᨧ; ᩋᨸᩥ ᨧ ᨡᩮᩣ ᨲᨧᨸ᩠ᨸᨲ᩠ᨲᩣ ᩉᩮᩣᨲᩦ’’ᨲᩥ.

ᨸᩁᩥᩈᩩᨴ᩠ᨵᨹᩮᨣ᩠ᨣᩩᨸ᩠ᨸᨲ᩠ᨲᨠᨳᩣ

᪗᪒. ‘‘ᨠᩥᨲ᩠ᨲᩣᩅᨲᩣ ᨸᨶ, ᨽᨶ᩠ᨲᩮ, ᨲᨸᩮᩣᨩᩥᨣᩩᨧ᩠ᨨᩣ ᩋᨣ᩠ᨣᨸ᩠ᨸᨲ᩠ᨲᩣ ᨧ ᩉᩮᩣᨲᩥ ᩈᩣᩁᨸ᩠ᨸᨲ᩠ᨲᩣ ᨧ? ᩈᩣᨵᩩ ᨾᩮ, ᨽᨶ᩠ᨲᩮ, ᨽᨣᩅᩣ ᨲᨸᩮᩣᨩᩥᨣᩩᨧ᩠ᨨᩣᨿ ᩋᨣ᩠ᨣᨬ᩠ᨬᩮᩅ ᨸᩣᨸᩮᨲᩩ, ᩈᩣᩁᨬ᩠ᨬᩮᩅ ᨸᩣᨸᩮᨲᩪ’’ᨲᩥ. ‘‘ᩍᨵ, ᨶᩥᨣᩕᩮᩣᨵ, ᨲᨸᩔᩦ ᨧᩣᨲᩩᨿᩣᨾᩈᩴᩅᩁᩈᩴᩅᩩᨲᩮᩣ ᩉᩮᩣᨲᩥ. ᨠᨳᨬ᩠ᨧ, ᨶᩥᨣᩕᩮᩣᨵ, ᨲᨸᩔᩦ ᨧᩣᨲᩩᨿᩣᨾᩈᩴᩅᩁᩈᩴᩅᩩᨲᩮᩣ ᩉᩮᩣᨲᩥ…ᨸᩮ… ᨿᨲᩮᩣ ᨡᩮᩣ, ᨶᩥᨣᩕᩮᩣᨵ, ᨲᨸᩔᩦ ᨧᩣᨲᩩᨿᩣᨾᩈᩴᩅᩁᩈᩴᩅᩩᨲᩮᩣ ᩉᩮᩣᨲᩥ, ᩋᨴᩩᩴ ᨧᩔ ᩉᩮᩣᨲᩥ ᨲᨸᩔᩥᨲᩣᨿ. ᩈᩮᩣ ᩋᨽᩥᩉᩁᨲᩥ ᨶᩮᩣ ᩉᩦᨶᩣᨿᩣᩅᨲ᩠ᨲᨲᩥ. ᩈᩮᩣ ᩅᩥᩅᩥᨲ᩠ᨲᩴ ᩈᩮᨶᩣᩈᨶᩴ ᨽᨩᨲᩥ…ᨸᩮ… ᩈᩮᩣ ᩍᨾᩮ ᨸᨬ᩠ᨧ ᨶᩦᩅᩁᨱᩮ ᨸᩉᩣᨿ ᨧᩮᨲᩈᩮᩣ ᩏᨸᨠ᩠ᨠᩥᩃᩮᩈᩮ ᨸᨬ᩠ᨬᩣᨿ ᨴᩩᨻ᩠ᨻᩃᩦᨠᩁᨱᩮ ᨾᩮᨲ᩠ᨲᩣᩈᩉᨣᨲᩮᨶ ᨧᩮᨲᩈᩣ…ᨸᩮ… ᨠᩁᩩᨱᩣᩈᩉᨣᨲᩮᨶ ᨧᩮᨲᩈᩣ…ᨸᩮ… ᨾᩩᨴᩥᨲᩣᩈᩉᨣᨲᩮᨶ ᨧᩮᨲᩈᩣ…ᨸᩮ… ᩏᨸᩮᨠ᩠ᨡᩣᩈᩉᨣᨲᩮᨶ ᨧᩮᨲᩈᩣ ᩅᩥᨸᩩᩃᩮᨶ ᨾᩉᨣ᩠ᨣᨲᩮᨶ ᩋᨸ᩠ᨸᨾᩣᨱᩮᨶ ᩋᩅᩮᩁᩮᨶ ᩋᨻ᩠ᨿᩣᨸᨩ᩠ᨩᩮᨶ ᨹᩁᩥᨲ᩠ᩅᩣ ᩅᩥᩉᩁᨲᩥ. ᩈᩮᩣ ᩋᨶᩮᨠᩅᩥᩉᩥᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ ᩈᩮᨿ᩠ᨿᨳᩥᨴᩴ – ᩑᨠᨾ᩠ᨸᩥ ᨩᩣᨲᩥᩴ ᨴ᩠ᩅᩮᨸᩥ ᨩᩣᨲᩥᨿᩮᩣ ᨲᩥᩔᩮᩣᨸᩥ ᨩᩣᨲᩥᨿᩮᩣ ᨧᨲᩔᩮᩣᨸᩥ ᨩᩣᨲᩥᨿᩮᩣ ᨸᨬ᩠ᨧᨸᩥ ᨩᩣᨲᩥᨿᩮᩣ ᨴᩈᨸᩥ ᨩᩣᨲᩥᨿᩮᩣ ᩅᩦᩈᨾ᩠ᨸᩥ ᨩᩣᨲᩥᨿᩮᩣ ᨲᩥᩴᩈᨾ᩠ᨸᩥ ᨩᩣᨲᩥᨿᩮᩣ ᨧᨲ᩠ᨲᩣᩃᩦᩈᨾ᩠ᨸᩥ ᨩᩣᨲᩥᨿᩮᩣ ᨸᨬ᩠ᨬᩣᩈᨾ᩠ᨸᩥ ᨩᩣᨲᩥᨿᩮᩣ ᨩᩣᨲᩥᩈᨲᨾ᩠ᨸᩥ ᨩᩣᨲᩥᩈᩉᩔᨾ᩠ᨸᩥ ᨩᩣᨲᩥᩈᨲᩈᩉᩔᨾ᩠ᨸᩥ ᩋᨶᩮᨠᩮᨸᩥ ᩈᩴᩅᨭ᩠ᨭᨠᨸ᩠ᨸᩮ ᩋᨶᩮᨠᩮᨸᩥ ᩅᩥᩅᨭ᩠ᨭᨠᨸ᩠ᨸᩮ ᩋᨶᩮᨠᩮᨸᩥ ᩈᩴᩅᨭ᩠ᨭᩅᩥᩅᨭ᩠ᨭᨠᨸ᩠ᨸᩮ – ‘ᩋᨾᩩᨲᩕᩣᩈᩥᩴ ᩑᩅᩴᨶᩣᨾᩮᩣ ᩑᩅᩴᨣᩮᩣᨲ᩠ᨲᩮᩣ ᩑᩅᩴᩅᨱ᩠ᨱᩮᩣ ᩑᩅᨾᩣᩉᩣᩁᩮᩣ ᩑᩅᩴᩈᩩᨡᨴᩩᨠ᩠ᨡᨸ᩠ᨸᨭᩥᩈᩴᩅᩮᨴᩦ ᩑᩅᨾᩣᨿᩩᨸᩁᩥᨿᨶ᩠ᨲᩮᩣ, ᩈᩮᩣ ᨲᨲᩮᩣ ᨧᩩᨲᩮᩣ ᩋᨾᩩᨲᩕ ᩏᨴᨸᩣᨴᩥᩴ, ᨲᨲᩕᩣᨸᩣᩈᩥᩴ ᩑᩅᩴᨶᩣᨾᩮᩣ ᩑᩅᩴᨣᩮᩣᨲ᩠ᨲᩮᩣ ᩑᩅᩴᩅᨱ᩠ᨱᩮᩣ ᩑᩅᨾᩣᩉᩣᩁᩮᩣ ᩑᩅᩴᩈᩩᨡᨴᩩᨠ᩠ᨡᨸ᩠ᨸᨭᩥᩈᩴᩅᩮᨴᩦ ᩑᩅᨾᩣᨿᩩᨸᩁᩥᨿᨶ᩠ᨲᩮᩣ, ᩈᩮᩣ ᨲᨲᩮᩣ ᨧᩩᨲᩮᩣ ᩍᨵᩪᨸᨸᨶ᩠ᨶᩮᩣ’ᨲᩥ. ᩍᨲᩥ ᩈᩣᨠᩣᩁᩴ ᩈᩏᨴ᩠ᨴᩮᩈᩴ ᩋᨶᩮᨠᩅᩥᩉᩥᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ.

‘‘ᨲᩴ ᨠᩥᩴ ᨾᨬ᩠ᨬᩈᩥ, ᨶᩥᨣᩕᩮᩣᨵ, ᨿᨴᩥ ᩑᩅᩴ ᩈᨶ᩠ᨲᩮ ᨲᨸᩮᩣᨩᩥᨣᩩᨧ᩠ᨨᩣ ᨸᩁᩥᩈᩩᨴ᩠ᨵᩣ ᩅᩣ ᩉᩮᩣᨲᩥ ᩋᨸᩁᩥᩈᩩᨴ᩠ᨵᩣ ᩅᩣ’’ᨲᩥ? ‘‘ᩋᨴ᩠ᨵᩣ ᨡᩮᩣ, ᨽᨶ᩠ᨲᩮ, ᩑᩅᩴ ᩈᨶ᩠ᨲᩮ ᨲᨸᩮᩣᨩᩥᨣᩩᨧ᩠ᨨᩣ ᨸᩁᩥᩈᩩᨴ᩠ᨵᩣ ᩉᩮᩣᨲᩥ, ᨶᩮᩣ ᩋᨸᩁᩥᩈᩩᨴ᩠ᨵᩣ, ᩋᨣ᩠ᨣᨸ᩠ᨸᨲ᩠ᨲᩣ ᨧ ᩈᩣᩁᨸ᩠ᨸᨲ᩠ᨲᩣ ᨧᩣ’’ᨲᩥ. ‘‘ᨶ ᨡᩮᩣ, ᨶᩥᨣᩕᩮᩣᨵ, ᩑᨲ᩠ᨲᩣᩅᨲᩣ ᨲᨸᩮᩣᨩᩥᨣᩩᨧ᩠ᨨᩣ ᩋᨣ᩠ᨣᨸ᩠ᨸᨲ᩠ᨲᩣ ᨧ ᩉᩮᩣᨲᩥ ᩈᩣᩁᨸ᩠ᨸᨲ᩠ᨲᩣ ᨧ; ᩋᨸᩥ ᨧ ᨡᩮᩣ ᨹᩮᨣ᩠ᨣᩩᨸ᩠ᨸᨲ᩠ᨲᩣ ᩉᩮᩣᨲᩦ’’ᨲᩥ.

ᨸᩁᩥᩈᩩᨴ᩠ᨵᩋᨣ᩠ᨣᨸ᩠ᨸᨲ᩠ᨲᩈᩣᩁᨸ᩠ᨸᨲ᩠ᨲᨠᨳᩣ

᪗᪓. ‘‘ᨠᩥᨲ᩠ᨲᩣᩅᨲᩣ ᨸᨶ, ᨽᨶ᩠ᨲᩮ, ᨲᨸᩮᩣᨩᩥᨣᩩᨧ᩠ᨨᩣ ᩋᨣ᩠ᨣᨸ᩠ᨸᨲ᩠ᨲᩣ ᨧ ᩉᩮᩣᨲᩥ ᩈᩣᩁᨸ᩠ᨸᨲ᩠ᨲᩣ ᨧ? ᩈᩣᨵᩩ ᨾᩮ, ᨽᨶ᩠ᨲᩮ, ᨽᨣᩅᩣ ᨲᨸᩮᩣᨩᩥᨣᩩᨧ᩠ᨨᩣᨿ ᩋᨣ᩠ᨣᨬ᩠ᨬᩮᩅ ᨸᩣᨸᩮᨲᩩ, ᩈᩣᩁᨬ᩠ᨬᩮᩅ ᨸᩣᨸᩮᨲᩪ’’ᨲᩥ. ‘‘ᩍᨵ, ᨶᩥᨣᩕᩮᩣᨵ, ᨲᨸᩔᩦ ᨧᩣᨲᩩᨿᩣᨾᩈᩴᩅᩁᩈᩴᩅᩩᨲᩮᩣ ᩉᩮᩣᨲᩥ. ᨠᨳᨬ᩠ᨧ, ᨶᩥᨣᩕᩮᩣᨵ, ᨲᨸᩔᩦ ᨧᩣᨲᩩᨿᩣᨾᩈᩴᩅᩁᩈᩴᩅᩩᨲᩮᩣ ᩉᩮᩣᨲᩥ…ᨸᩮ… ᨿᨲᩮᩣ ᨡᩮᩣ, ᨶᩥᨣᩕᩮᩣᨵ, ᨲᨸᩔᩦ ᨧᩣᨲᩩᨿᩣᨾᩈᩴᩅᩁᩈᩴᩅᩩᨲᩮᩣ ᩉᩮᩣᨲᩥ, ᩋᨴᩩᩴ ᨧᩔ ᩉᩮᩣᨲᩥ ᨲᨸᩔᩥᨲᩣᨿ. ᩈᩮᩣ ᩋᨽᩥᩉᩁᨲᩥ ᨶᩮᩣ ᩉᩦᨶᩣᨿᩣᩅᨲ᩠ᨲᨲᩥ. ᩈᩮᩣ ᩅᩥᩅᩥᨲ᩠ᨲᩴ ᩈᩮᨶᩣᩈᨶᩴ ᨽᨩᨲᩥ…ᨸᩮ… ᩈᩮᩣ ᩍᨾᩮ ᨸᨬ᩠ᨧ ᨶᩦᩅᩁᨱᩮ ᨸᩉᩣᨿ ᨧᩮᨲᩈᩮᩣ ᩏᨸᨠ᩠ᨠᩥᩃᩮᩈᩮ ᨸᨬ᩠ᨬᩣᨿ ᨴᩩᨻ᩠ᨻᩃᩦᨠᩁᨱᩮ ᨾᩮᨲ᩠ᨲᩣᩈᩉᨣᨲᩮᨶ ᨧᩮᨲᩈᩣ…ᨸᩮ… ᩏᨸᩮᨠ᩠ᨡᩣᩈᩉᨣᨲᩮᨶ ᨧᩮᨲᩈᩣ ᩅᩥᨸᩩᩃᩮᨶ ᨾᩉᨣ᩠ᨣᨲᩮᨶ ᩋᨸ᩠ᨸᨾᩣᨱᩮᨶ ᩋᩅᩮᩁᩮᨶ ᩋᨻ᩠ᨿᩣᨸᨩ᩠ᨩᩮᨶ ᨹᩁᩥᨲ᩠ᩅᩣ ᩅᩥᩉᩁᨲᩥ. ᩈᩮᩣ ᩋᨶᩮᨠᩅᩥᩉᩥᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ. ᩈᩮᨿ᩠ᨿᨳᩥᨴᩴ – ᩑᨠᨾ᩠ᨸᩥ ᨩᩣᨲᩥᩴ ᨴ᩠ᩅᩮᨸᩥ ᨩᩣᨲᩥᨿᩮᩣ ᨲᩥᩔᩮᩣᨸᩥ ᨩᩣᨲᩥᨿᩮᩣ ᨧᨲᩔᩮᩣᨸᩥ ᨩᩣᨲᩥᨿᩮᩣ ᨸᨬ᩠ᨧᨸᩥ ᨩᩣᨲᩥᨿᩮᩣ…ᨸᩮ… ᩍᨲᩥ ᩈᩣᨠᩣᩁᩴ ᩈᩏᨴ᩠ᨴᩮᩈᩴ ᩋᨶᩮᨠᩅᩥᩉᩥᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ. ᩈᩮᩣ ᨴᩥᨻ᩠ᨻᩮᨶ ᨧᨠ᩠ᨡᩩᨶᩣ ᩅᩥᩈᩩᨴ᩠ᨵᩮᨶ ᩋᨲᩥᨠ᩠ᨠᨶ᩠ᨲᨾᩣᨶᩩᩈᨠᩮᨶ ᩈᨲ᩠ᨲᩮ ᨸᩔᨲᩥ ᨧᩅᨾᩣᨶᩮ ᩏᨸᨸᨩ᩠ᨩᨾᩣᨶᩮ ᩉᩦᨶᩮ ᨸᨱᩦᨲᩮ ᩈᩩᩅᨱ᩠ᨱᩮ ᨴᩩᨻ᩠ᨻᨱ᩠ᨱᩮ ᩈᩩᨣᨲᩮ ᨴᩩᨣ᩠ᨣᨲᩮ, ᨿᨳᩣᨠᨾ᩠ᨾᩪᨸᨣᩮ ᩈᨲ᩠ᨲᩮ ᨸᨩᩣᨶᩣᨲᩥ – ‘ᩍᨾᩮ ᩅᨲ ᨽᩮᩣᨶ᩠ᨲᩮᩣ ᩈᨲ᩠ᨲᩣ ᨠᩣᨿᨴᩩᨧ᩠ᨧᩁᩥᨲᩮᨶ ᩈᨾᨶ᩠ᨶᩣᨣᨲᩣ ᩅᨧᩦᨴᩩᨧ᩠ᨧᩁᩥᨲᩮᨶ ᩈᨾᨶ᩠ᨶᩣᨣᨲᩣ ᨾᨶᩮᩣᨴᩩᨧ᩠ᨧᩁᩥᨲᩮᨶ ᩈᨾᨶ᩠ᨶᩣᨣᨲᩣ ᩋᩁᩥᨿᩣᨶᩴ ᩏᨸᩅᩣᨴᨠᩣ ᨾᩥᨧ᩠ᨨᩣᨴᩥᨭ᩠ᨮᩥᨠᩣ ᨾᩥᨧ᩠ᨨᩣᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩣ. ᨲᩮ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨶ᩠ᨶᩣ. ᩍᨾᩮ ᩅᩣ ᨸᨶ ᨽᩮᩣᨶ᩠ᨲᩮᩣ ᩈᨲ᩠ᨲᩣ ᨠᩣᨿᩈᩩᨧᩁᩥᨲᩮᨶ ᩈᨾᨶ᩠ᨶᩣᨣᨲᩣ ᩅᨧᩦᩈᩩᨧᩁᩥᨲᩮᨶ ᩈᨾᨶ᩠ᨶᩣᨣᨲᩣ ᨾᨶᩮᩣᩈᩩᨧᩁᩥᨲᩮᨶ ᩈᨾᨶ᩠ᨶᩣᨣᨲᩣ ᩋᩁᩥᨿᩣᨶᩴ ᩋᨶᩩᨸᩅᩣᨴᨠᩣ ᩈᨾ᩠ᨾᩣᨴᩥᨭ᩠ᨮᩥᨠᩣ ᩈᨾ᩠ᨾᩣᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩣ. ᨲᩮ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨶ᩠ᨶᩣ’ᨲᩥ. ᩍᨲᩥ ᨴᩥᨻ᩠ᨻᩮᨶ ᨧᨠ᩠ᨡᩩᨶᩣ ᩅᩥᩈᩩᨴ᩠ᨵᩮᨶ ᩋᨲᩥᨠ᩠ᨠᨶ᩠ᨲᨾᩣᨶᩩᩈᨠᩮᨶ ᩈᨲ᩠ᨲᩮ ᨸᩔᨲᩥ ᨧᩅᨾᩣᨶᩮ ᩏᨸᨸᨩ᩠ᨩᨾᩣᨶᩮ ᩉᩦᨶᩮ ᨸᨱᩦᨲᩮ ᩈᩩᩅᨱ᩠ᨱᩮ ᨴᩩᨻ᩠ᨻᨱ᩠ᨱᩮ ᩈᩩᨣᨲᩮ ᨴᩩᨣ᩠ᨣᨲᩮ, ᨿᨳᩣᨠᨾ᩠ᨾᩪᨸᨣᩮ ᩈᨲ᩠ᨲᩮ ᨸᨩᩣᨶᩣᨲᩥ.

‘‘ᨲᩴ ᨠᩥᩴ ᨾᨬ᩠ᨬᩈᩥ, ᨶᩥᨣᩕᩮᩣᨵ, ᨿᨴᩥ ᩑᩅᩴ ᩈᨶ᩠ᨲᩮ ᨲᨸᩮᩣᨩᩥᨣᩩᨧ᩠ᨨᩣ ᨸᩁᩥᩈᩩᨴ᩠ᨵᩣ ᩅᩣ ᩉᩮᩣᨲᩥ ᩋᨸᩁᩥᩈᩩᨴ᩠ᨵᩣ ᩅᩣ’’ᨲᩥ? ‘‘ᩋᨴ᩠ᨵᩣ ᨡᩮᩣ, ᨽᨶ᩠ᨲᩮ, ᩑᩅᩴ ᩈᨶ᩠ᨲᩮ ᨲᨸᩮᩣᨩᩥᨣᩩᨧ᩠ᨨᩣ ᨸᩁᩥᩈᩩᨴ᩠ᨵᩣ ᩉᩮᩣᨲᩥ ᨶᩮᩣ ᩋᨸᩁᩥᩈᩩᨴ᩠ᨵᩣ, ᩋᨣ᩠ᨣᨸ᩠ᨸᨲ᩠ᨲᩣ ᨧ ᩈᩣᩁᨸ᩠ᨸᨲ᩠ᨲᩣ ᨧᩣ’’ᨲᩥ.

᪗᪔. ‘‘ᩑᨲ᩠ᨲᩣᩅᨲᩣ ᨡᩮᩣ, ᨶᩥᨣᩕᩮᩣᨵ, ᨲᨸᩮᩣᨩᩥᨣᩩᨧ᩠ᨨᩣ ᩋᨣ᩠ᨣᨸ᩠ᨸᨲ᩠ᨲᩣ ᨧ ᩉᩮᩣᨲᩥ ᩈᩣᩁᨸ᩠ᨸᨲ᩠ᨲᩣ ᨧ. ᩍᨲᩥ ᨡᩮᩣ, ᨶᩥᨣᩕᩮᩣᨵ [ᩍᨲᩥ ᨶᩥᨣᩕᩮᩣᨵ (ᩈ᩠ᨿᩣ.)], ᨿᩴ ᨾᩴ ᨲ᩠ᩅᩴ ᩋᩅᨧᩣᩈᩥ – ‘ᨠᩮᩣ ᨶᩣᨾ ᩈᩮᩣ, ᨽᨶ᩠ᨲᩮ, ᨽᨣᩅᨲᩮᩣ ᨵᨾ᩠ᨾᩮᩣ, ᨿᩮᨶ ᨽᨣᩅᩣ ᩈᩣᩅᨠᩮ ᩅᩥᨶᩮᨲᩥ, ᨿᩮᨶ ᨽᨣᩅᨲᩣ ᩈᩣᩅᨠᩣ ᩅᩥᨶᩦᨲᩣ ᩋᩔᩣᩈᨸ᩠ᨸᨲ᩠ᨲᩣ ᨸᨭᩥᨩᩣᨶᨶ᩠ᨲᩥ ᩋᨩ᩠ᨫᩣᩈᨿᩴ ᩌᨴᩥᨻᩕᩉ᩠ᨾᨧᩁᩥᨿ’ᨶ᩠ᨲᩥ. ᩍᨲᩥ ᨡᩮᩣ ᨲᩴ, ᨶᩥᨣᩕᩮᩣᨵ, ᨮᩣᨶᩴ ᩏᨲ᩠ᨲᩁᩥᨲᩁᨬ᩠ᨧ ᨸᨱᩦᨲᨲᩁᨬ᩠ᨧ, ᨿᩮᨶᩣᩉᩴ ᩈᩣᩅᨠᩮ ᩅᩥᨶᩮᨾᩥ, ᨿᩮᨶ ᨾᨿᩣ ᩈᩣᩅᨠᩣ ᩅᩥᨶᩦᨲᩣ ᩋᩔᩣᩈᨸ᩠ᨸᨲ᩠ᨲᩣ ᨸᨭᩥᨩᩣᨶᨶ᩠ᨲᩥ ᩋᨩ᩠ᨫᩣᩈᨿᩴ ᩌᨴᩥᨻᩕᩉ᩠ᨾᨧᩁᩥᨿ’’ᨶ᩠ᨲᩥ.

ᩑᩅᩴ ᩅᩩᨲ᩠ᨲᩮ, ᨲᩮ ᨸᩁᩥᨻ᩠ᨻᩣᨩᨠᩣ ᩏᨶ᩠ᨶᩣᨴᩥᨶᩮᩣ ᩏᨧ᩠ᨧᩣᩈᨴ᩠ᨴᨾᩉᩣᩈᨴ᩠ᨴᩣ ᩋᩉᩮᩈᩩᩴ – ‘‘ᩑᨲ᩠ᨳ ᨾᨿᩴ ᩋᨶᩔᩣᨾ ᩈᩣᨧᩁᩥᨿᨠᩣ, ᨶ ᨾᨿᩴ ᩍᨲᩮᩣ ᨽᩥᨿ᩠ᨿᩮᩣ ᩏᨲ᩠ᨲᩁᩥᨲᩁᩴ ᨸᨩᩣᨶᩣᨾᩣ’’ᨲᩥ.

ᨶᩥᨣᩕᩮᩣᨵᩔ ᨸᨩ᩠ᨫᩣᨿᨶᩴ

᪗᪕. ᨿᨴᩣ ᩋᨬ᩠ᨬᩣᩈᩥ ᩈᨶ᩠ᨵᩣᨶᩮᩣ ᨣᩉᨸᨲᩥ – ‘‘ᩋᨬ᩠ᨬᨴᨲ᩠ᨳᩩ ᨡᩮᩣ ᨴᩣᨶᩥᨾᩮ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᨽᨣᩅᨲᩮᩣ ᨽᩣᩈᩥᨲᩴ ᩈᩩᩔᩪᩈᨶ᩠ᨲᩥ, ᩈᩮᩣᨲᩴ ᩒᨴᩉᨶ᩠ᨲᩥ, ᩋᨬ᩠ᨬᩣᨧᩥᨲ᩠ᨲᩴ ᩏᨸᨭ᩠ᨮᩣᨸᩮᨶ᩠ᨲᩦ’’ᨲᩥ. ᩋᨳ [ᩋᨳ ᨶᩴ (ᨠ.)] ᨶᩥᨣᩕᩮᩣᨵᩴ ᨸᩁᩥᨻ᩠ᨻᩣᨩᨠᩴ ᩑᨲᨴᩅᩮᩣᨧ – ‘‘ᩍᨲᩥ ᨡᩮᩣ, ᨽᨶ᩠ᨲᩮ ᨶᩥᨣᩕᩮᩣᨵ, ᨿᩴ ᨾᩴ ᨲ᩠ᩅᩴ ᩋᩅᨧᩣᩈᩥ – ‘ᨿᨣ᩠ᨥᩮ, ᨣᩉᨸᨲᩥ, ᨩᩣᨶᩮᨿ᩠ᨿᩣᩈᩥ, ᨠᩮᨶ ᩈᨾᨱᩮᩣ ᨣᩮᩣᨲᨾᩮᩣ ᩈᨴ᩠ᨵᩥᩴ ᩈᩃ᩠ᩃᨸᨲᩥ, ᨠᩮᨶ ᩈᩣᨠᨧ᩠ᨨᩴ ᩈᨾᩣᨸᨩ᩠ᨩᨲᩥ, ᨠᩮᨶ ᨸᨬ᩠ᨬᩣᩅᩮᨿ᩠ᨿᨲ᩠ᨲᩥᨿᩴ ᩈᨾᩣᨸᨩ᩠ᨩᨲᩥ, ᩈᩩᨬ᩠ᨬᩣᨣᩣᩁᩉᨲᩣ ᩈᨾᨱᩔ ᨣᩮᩣᨲᨾᩔ ᨸᨬ᩠ᨬᩣ, ᩋᨸᩁᩥᩈᩣᩅᨧᩁᩮᩣ ᩈᨾᨱᩮᩣ ᨣᩮᩣᨲᨾᩮᩣ ᨶᩣᩃᩴ ᩈᩃ᩠ᩃᩣᨸᩣᨿ, ᩈᩮᩣ ᩋᨶ᩠ᨲᨾᨶ᩠ᨲᩣᨶᩮᩅ ᩈᩮᩅᨲᩥ; ᩈᩮᨿ᩠ᨿᨳᩣᨸᩥ ᨶᩣᨾ ᨣᩮᩣᨠᩣᨱᩣ ᨸᩁᩥᨿᨶ᩠ᨲᨧᩣᩁᩥᨶᩦ ᩋᨶ᩠ᨲᨾᨶ᩠ᨲᩣᨶᩮᩅ ᩈᩮᩅᨲᩥ. ᩑᩅᨾᩮᩅ ᩈᩩᨬ᩠ᨬᩣᨣᩣᩁᩉᨲᩣ ᩈᨾᨱᩔ ᨣᩮᩣᨲᨾᩔ ᨸᨬ᩠ᨬᩣ, ᩋᨸᩁᩥᩈᩣᩅᨧᩁᩮᩣ ᩈᨾᨱᩮᩣ ᨣᩮᩣᨲᨾᩮᩣ ᨶᩣᩃᩴ ᩈᩃ᩠ᩃᩣᨸᩣᨿ; ᩈᩮᩣ ᩋᨶ᩠ᨲᨾᨶ᩠ᨲᩣᨶᩮᩅ ᩈᩮᩅᨲᩥ; ᩍᨦ᩠ᨥ, ᨣᩉᨸᨲᩥ, ᩈᨾᨱᩮᩣ ᨣᩮᩣᨲᨾᩮᩣ ᩍᨾᩴ ᨸᩁᩥᩈᩴ ᩌᨣᨧ᩠ᨨᩮᨿ᩠ᨿ, ᩑᨠᨸᨬ᩠ᩉᩮᨶᩮᩅ ᨶᩴ ᩈᩴᩈᩣᨴᩮᨿ᩠ᨿᩣᨾ, ᨲᩩᨧ᩠ᨨᨠᩩᨾ᩠ᨽᩦᩅ ᨶᩴ ᨾᨬ᩠ᨬᩮ ᩒᩁᩮᩣᨵᩮᨿ᩠ᨿᩣᨾᩣ’ᨲᩥ. ᩋᨿᩴ ᨡᩮᩣ ᩈᩮᩣ, ᨽᨶ᩠ᨲᩮ, ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩍᨵᩣᨶᩩᨸ᩠ᨸᨲ᩠ᨲᩮᩣ, ᩋᨸᩁᩥᩈᩣᩅᨧᩁᩴ ᨸᨶ ᨶᩴ ᨠᩁᩮᩣᨳ, ᨣᩮᩣᨠᩣᨱᩴ ᨸᩁᩥᨿᨶ᩠ᨲᨧᩣᩁᩥᨶᩥᩴ ᨠᩁᩮᩣᨳ, ᩑᨠᨸᨬ᩠ᩉᩮᨶᩮᩅ ᨶᩴ ᩈᩴᩈᩣᨴᩮᨳ, ᨲᩩᨧ᩠ᨨᨠᩩᨾ᩠ᨽᩦᩅ ᨶᩴ ᩒᩁᩮᩣᨵᩮᨳᩣ’’ᨲᩥ. ᩑᩅᩴ ᩅᩩᨲ᩠ᨲᩮ, ᨶᩥᨣᩕᩮᩣᨵᩮᩣ ᨸᩁᩥᨻ᩠ᨻᩣᨩᨠᩮᩣ ᨲᩩᨱ᩠ᩉᩦᨽᩪᨲᩮᩣ ᨾᨦ᩠ᨠᩩᨽᩪᨲᩮᩣ ᨸᨲ᩠ᨲᨠ᩠ᨡᨶ᩠ᨵᩮᩣ ᩋᨵᩮᩣᨾᩩᨡᩮᩣ ᨸᨩ᩠ᨫᩣᨿᨶ᩠ᨲᩮᩣ ᩋᨸ᩠ᨸᨭᩥᨽᩣᨶᩮᩣ ᨶᩥᩈᩦᨴᩥ.

᪗᪖. ᩋᨳ ᨡᩮᩣ ᨽᨣᩅᩣ ᨶᩥᨣᩕᩮᩣᨵᩴ ᨸᩁᩥᨻ᩠ᨻᩣᨩᨠᩴ ᨲᩩᨱ᩠ᩉᩦᨽᩪᨲᩴ ᨾᨦ᩠ᨠᩩᨽᩪᨲᩴ ᨸᨲ᩠ᨲᨠ᩠ᨡᨶ᩠ᨵᩴ ᩋᨵᩮᩣᨾᩩᨡᩴ ᨸᨩ᩠ᨫᩣᨿᨶ᩠ᨲᩴ ᩋᨸ᩠ᨸᨭᩥᨽᩣᨶᩴ ᩅᩥᨴᩥᨲ᩠ᩅᩣ ᨶᩥᨣᩕᩮᩣᨵᩴ ᨸᩁᩥᨻ᩠ᨻᩣᨩᨠᩴ ᩑᨲᨴᩅᩮᩣᨧ – ‘‘ᩈᨧ᩠ᨧᩴ ᨠᩥᩁ, ᨶᩥᨣᩕᩮᩣᨵ, ᨽᩣᩈᩥᨲᩣ ᨲᩮ ᩑᩈᩣ ᩅᩣᨧᩣ’’ᨲᩥ? ‘‘ᩈᨧ᩠ᨧᩴ, ᨽᨶ᩠ᨲᩮ, ᨽᩣᩈᩥᨲᩣ ᨾᩮ ᩑᩈᩣ ᩅᩣᨧᩣ, ᨿᨳᩣᨻᩣᩃᩮᨶ ᨿᨳᩣᨾᩪᩊ᩠ᩉᩮᨶ ᨿᨳᩣᩋᨠᩩᩈᩃᩮᨶᩣ’’ᨲᩥ. ‘‘ᨲᩴ ᨠᩥᩴ ᨾᨬ᩠ᨬᩈᩥ, ᨶᩥᨣᩕᩮᩣᨵ. ᨠᩥᨶ᩠ᨲᩥ ᨲᩮ ᩈᩩᨲᩴ ᨸᩁᩥᨻ᩠ᨻᩣᨩᨠᩣᨶᩴ ᩅᩩᨯ᩠ᨰᩣᨶᩴ ᨾᩉᩃ᩠ᩃᨠᩣᨶᩴ ᩌᨧᩁᩥᨿᨸᩣᨧᩁᩥᨿᩣᨶᩴ ᨽᩣᩈᨾᩣᨶᩣᨶᩴ – ‘ᨿᩮ ᨲᩮ ᩋᩉᩮᩈᩩᩴ ᩋᨲᩦᨲᨾᨴ᩠ᨵᩣᨶᩴ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᩑᩅᩴ ᩈᩩ ᨲᩮ ᨽᨣᩅᨶ᩠ᨲᩮᩣ ᩈᩴᨣᨾ᩠ᨾ ᩈᨾᩣᨣᨾ᩠ᨾ ᩏᨶ᩠ᨶᩣᨴᩥᨶᩮᩣ ᩏᨧ᩠ᨧᩣᩈᨴ᩠ᨴᨾᩉᩣᩈᨴ᩠ᨴᩣ ᩋᨶᩮᨠᩅᩥᩉᩥᨲᩴ ᨲᩥᩁᨧ᩠ᨨᩣᨶᨠᨳᩴ ᩋᨶᩩᨿᩩᨲ᩠ᨲᩣ ᩅᩥᩉᩁᨶ᩠ᨲᩥ. ᩈᩮᨿ᩠ᨿᨳᩥᨴᩴ – ᩁᩣᨩᨠᨳᩴ ᨧᩮᩣᩁᨠᨳᩴ…ᨸᩮ… ᩍᨲᩥᨽᩅᩣᨽᩅᨠᨳᩴ ᩍᨲᩥ ᩅᩣ. ᩈᩮᨿ᩠ᨿᨳᩣᨸᩥ ᨲ᩠ᩅᩴ ᩑᨲᩁᩉᩥ ᩈᩣᨧᩁᩥᨿᨠᩮᩣ. ᩏᨴᩣᩉᩩ, ᩑᩅᩴ ᩈᩩ ᨲᩮ ᨽᨣᩅᨶ᩠ᨲᩮᩣ ᩋᩁᨬ᩠ᨬᩅᨶᨸᨲ᩠ᨳᩣᨶᩥ ᨸᨶ᩠ᨲᩣᨶᩥ ᩈᩮᨶᩣᩈᨶᩣᨶᩥ ᨸᨭᩥᩈᩮᩅᨶ᩠ᨲᩥ ᩋᨸ᩠ᨸᩈᨴ᩠ᨴᩣᨶᩥ ᩋᨸ᩠ᨸᨶᩥᨣ᩠ᨥᩮᩣᩈᩣᨶᩥ ᩅᩥᨩᨶᩅᩣᨲᩣᨶᩥ ᨾᨶᩩᩔᩁᩣᩉᩔᩮᨿ᩠ᨿᨠᩣᨶᩥ ᨸᨭᩥᩈᩃ᩠ᩃᩣᨶᩈᩣᩁᩩᨸ᩠ᨸᩣᨶᩥ, ᩈᩮᨿ᩠ᨿᨳᩣᨸᩣᩉᩴ ᩑᨲᩁᩉᩦ’ᨲᩥ.

‘‘ᩈᩩᨲᩴ ᨾᩮᨲᩴ, ᨽᨶ᩠ᨲᩮ. ᨸᩁᩥᨻ᩠ᨻᩣᨩᨠᩣᨶᩴ ᩅᩩᨯ᩠ᨰᩣᨶᩴ ᨾᩉᩃ᩠ᩃᨠᩣᨶᩴ ᩌᨧᩁᩥᨿᨸᩣᨧᩁᩥᨿᩣᨶᩴ ᨽᩣᩈᨾᩣᨶᩣᨶᩴ – ‘ᨿᩮ ᨲᩮ ᩋᩉᩮᩈᩩᩴ ᩋᨲᩦᨲᨾᨴ᩠ᨵᩣᨶᩴ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᨶ ᩑᩅᩴ ᩈᩩ [ᨶᩣᩔᩩ (ᩈᩦ. ᨸᩦ.)] ᨲᩮ ᨽᨣᩅᨶ᩠ᨲᩮᩣ ᩈᩴᨣᨾ᩠ᨾ ᩈᨾᩣᨣᨾ᩠ᨾ ᩏᨶ᩠ᨶᩣᨴᩥᨶᩮᩣ ᩏᨧ᩠ᨧᩣᩈᨴ᩠ᨴᨾᩉᩣᩈᨴ᩠ᨴᩣ ᩋᨶᩮᨠᩅᩥᩉᩥᨲᩴ ᨲᩥᩁᨧ᩠ᨨᩣᨶᨠᨳᩴ ᩋᨶᩩᨿᩩᨲ᩠ᨲᩣ ᩅᩥᩉᩁᨶ᩠ᨲᩥ. ᩈᩮᨿ᩠ᨿᨳᩥᨴᩴ – ᩁᩣᨩᨠᨳᩴ ᨧᩮᩣᩁᨠᨳᩴ…ᨸᩮ… ᩍᨲᩥᨽᩅᩣᨽᩅᨠᨳᩴ ᩍᨲᩥ ᩅᩣ, ᩈᩮᨿ᩠ᨿᨳᩣᨸᩣᩉᩴ ᩑᨲᩁᩉᩥ ᩈᩣᨧᩁᩥᨿᨠᩮᩣ. ᩑᩅᩴ ᩈᩩ ᨲᩮ ᨽᨣᩅᨶ᩠ᨲᩮᩣ ᩋᩁᨬ᩠ᨬᩅᨶᨸᨲ᩠ᨳᩣᨶᩥ ᨸᨶ᩠ᨲᩣᨶᩥ ᩈᩮᨶᩣᩈᨶᩣᨶᩥ ᨸᨭᩥᩈᩮᩅᨶ᩠ᨲᩥ ᩋᨸ᩠ᨸᩈᨴ᩠ᨴᩣᨶᩥ ᩋᨸ᩠ᨸᨶᩥᨣ᩠ᨥᩮᩣᩈᩣᨶᩥ ᩅᩥᨩᨶᩅᩣᨲᩣᨶᩥ ᨾᨶᩩᩔᩁᩣᩉᩔᩮᨿ᩠ᨿᨠᩣᨶᩥ ᨸᨭᩥᩈᩃ᩠ᩃᩣᨶᩈᩣᩁᩩᨸ᩠ᨸᩣᨶᩥ, ᩈᩮᨿ᩠ᨿᨳᩣᨸᩥ ᨽᨣᩅᩣ ᩑᨲᩁᩉᩦ’’’ᨲᩥ.

‘‘ᨲᩔ ᨲᩮ, ᨶᩥᨣᩕᩮᩣᨵ, ᩅᩥᨬ᩠ᨬᩩᩔ ᩈᨲᩮᩣ ᨾᩉᩃ᩠ᩃᨠᩔ ᨶ ᩑᨲᨴᩉᩮᩣᩈᩥ – ‘ᨻᩩᨴ᩠ᨵᩮᩣ ᩈᩮᩣ ᨽᨣᩅᩣ ᨻᩮᩣᨵᩣᨿ ᨵᨾ᩠ᨾᩴ ᨴᩮᩈᩮᨲᩥ, ᨴᨶ᩠ᨲᩮᩣ ᩈᩮᩣ ᨽᨣᩅᩣ ᨴᨾᨳᩣᨿ ᨵᨾ᩠ᨾᩴ ᨴᩮᩈᩮᨲᩥ, ᩈᨶ᩠ᨲᩮᩣ ᩈᩮᩣ ᨽᨣᩅᩣ ᩈᨾᨳᩣᨿ ᨵᨾ᩠ᨾᩴ ᨴᩮᩈᩮᨲᩥ, ᨲᩥᨱ᩠ᨱᩮᩣ ᩈᩮᩣ ᨽᨣᩅᩣ ᨲᩁᨱᩣᨿ ᨵᨾ᩠ᨾᩴ ᨴᩮᩈᩮᨲᩥ, ᨸᩁᩥᨶᩥᨻ᩠ᨻᩩᨲᩮᩣ ᩈᩮᩣ ᨽᨣᩅᩣ ᨸᩁᩥᨶᩥᨻ᩠ᨻᩣᨶᩣᨿ ᨵᨾ᩠ᨾᩴ ᨴᩮᩈᩮᨲᩦ’’’ᨲᩥ?

ᨻᩕᩉ᩠ᨾᨧᩁᩥᨿᨸᩁᩥᨿᩮᩣᩈᩣᨶᩈᨧ᩠ᨨᩥᨠᩥᩁᩥᨿᩣ

᪗᪗. ᩑᩅᩴ ᩅᩩᨲ᩠ᨲᩮ, ᨶᩥᨣᩕᩮᩣᨵᩮᩣ ᨸᩁᩥᨻ᩠ᨻᩣᨩᨠᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩋᨧ᩠ᨧᨿᩮᩣ ᨾᩴ, ᨽᨶ᩠ᨲᩮ, ᩋᨧ᩠ᨧᨣᨾᩣ ᨿᨳᩣᨻᩣᩃᩴ ᨿᨳᩣᨾᩪᩊ᩠ᩉᩴ ᨿᨳᩣᩋᨠᩩᩈᩃᩴ, ᨿ᩠ᩅᩣᩉᩴ ᩑᩅᩴ ᨽᨣᩅᨶ᩠ᨲᩴ ᩋᩅᨧᩣᩈᩥᩴ. ᨲᩔ ᨾᩮ, ᨽᨶ᩠ᨲᩮ, ᨽᨣᩅᩣ ᩋᨧ᩠ᨧᨿᩴ ᩋᨧ᩠ᨧᨿᨲᩮᩣ ᨸᨭᩥᨣ᩠ᨣᨱ᩠ᩉᩣᨲᩩ ᩌᨿᨲᩥᩴ ᩈᩴᩅᩁᩣᨿᩣ’’ᨲᩥ. ‘‘ᨲᨣ᩠ᨥ ᨲ᩠ᩅᩴ [ᨲᩴ (ᩈᩦ. ᩈ᩠ᨿᩣ. ᨸᩦ.)], ᨶᩥᨣᩕᩮᩣᨵ, ᩋᨧ᩠ᨧᨿᩮᩣ ᩋᨧ᩠ᨧᨣᨾᩣ ᨿᨳᩣᨻᩣᩃᩴ ᨿᨳᩣᨾᩪᩊ᩠ᩉᩴ ᨿᨳᩣᩋᨠᩩᩈᩃᩴ, ᨿᩮᩣ ᨾᩴ ᨲ᩠ᩅᩴ ᩑᩅᩴ ᩋᩅᨧᩣᩈᩥ. ᨿᨲᩮᩣ ᨧ ᨡᩮᩣ ᨲ᩠ᩅᩴ, ᨶᩥᨣᩕᩮᩣᨵ, ᩋᨧ᩠ᨧᨿᩴ ᩋᨧ᩠ᨧᨿᨲᩮᩣ ᨴᩥᩈ᩠ᩅᩣ ᨿᨳᩣᨵᨾ᩠ᨾᩴ ᨸᨭᩥᨠᩁᩮᩣᩈᩥ, ᨲᩴ ᨲᩮ ᨾᨿᩴ ᨸᨭᩥᨣ᩠ᨣᨱ᩠ᩉᩣᨾ. ᩅᩩᨴ᩠ᨵᩥ ᩉᩮᩈᩣ, ᨶᩥᨣᩕᩮᩣᨵ, ᩋᩁᩥᨿᩔ ᩅᩥᨶᨿᩮ, ᨿᩮᩣ ᩋᨧ᩠ᨧᨿᩴ ᩋᨧ᩠ᨧᨿᨲᩮᩣ ᨴᩥᩈ᩠ᩅᩣ ᨿᨳᩣᨵᨾ᩠ᨾᩴ ᨸᨭᩥᨠᩁᩮᩣᨲᩥ ᩌᨿᨲᩥᩴ ᩈᩴᩅᩁᩴ ᩌᨸᨩ᩠ᨩᨲᩥ. ᩋᩉᩴ ᨡᩮᩣ ᨸᨶ, ᨶᩥᨣᩕᩮᩣᨵ, ᩑᩅᩴ ᩅᨴᩣᨾᩥ –

‘ᩑᨲᩩ ᩅᩥᨬ᩠ᨬᩪ ᨸᩩᩁᩥᩈᩮᩣ ᩋᩈᨮᩮᩣ ᩋᨾᩣᨿᩣᩅᩦ ᩏᨩᩩᨩᩣᨲᩥᨠᩮᩣ, ᩋᩉᨾᨶᩩᩈᩣᩈᩣᨾᩥ ᩋᩉᩴ ᨵᨾ᩠ᨾᩴ ᨴᩮᩈᩮᨾᩥ. ᨿᨳᩣᨶᩩᩈᩥᨭ᩠ᨮᩴ ᨲᨳᩣ [ᨿᨳᩣᨶᩩᩈᩥᨭ᩠ᨮᩴ (?)] ᨸᨭᩥᨸᨩ᩠ᨩᨾᩣᨶᩮᩣ, ᨿᩔᨲ᩠ᨳᩣᨿ ᨠᩩᩃᨸᩩᨲ᩠ᨲᩣ ᩈᨾ᩠ᨾᨴᩮᩅ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨶ᩠ᨲᩥ, ᨲᨴᨶᩩᨲ᩠ᨲᩁᩴ ᨻᩕᩉ᩠ᨾᨧᩁᩥᨿᨸᩁᩥᨿᩮᩣᩈᩣᨶᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᩏᨸᩈᨾ᩠ᨸᨩ᩠ᨩ ᩅᩥᩉᩁᩥᩔᨲᩥ ᩈᨲ᩠ᨲᩅᩔᩣᨶᩥ. ᨲᩥᨭ᩠ᨮᨶ᩠ᨲᩩ, ᨶᩥᨣᩕᩮᩣᨵ, ᩈᨲ᩠ᨲ ᩅᩔᩣᨶᩥ. ᩑᨲᩩ ᩅᩥᨬ᩠ᨬᩪ ᨸᩩᩁᩥᩈᩮᩣ ᩋᩈᨮᩮᩣ ᩋᨾᩣᨿᩣᩅᩦ ᩏᨩᩩᨩᩣᨲᩥᨠᩮᩣ, ᩋᩉᨾᨶᩩᩈᩣᩈᩣᨾᩥ ᩋᩉᩴ ᨵᨾ᩠ᨾᩴ ᨴᩮᩈᩮᨾᩥ. ᨿᨳᩣᨶᩩᩈᩥᨭ᩠ᨮᩴ ᨲᨳᩣ ᨸᨭᩥᨸᨩ᩠ᨩᨾᩣᨶᩮᩣ, ᨿᩔᨲ᩠ᨳᩣᨿ ᨠᩩᩃᨸᩩᨲ᩠ᨲᩣ ᩈᨾ᩠ᨾᨴᩮᩅ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨶ᩠ᨲᩥ, ᨲᨴᨶᩩᨲ᩠ᨲᩁᩴ ᨻᩕᩉ᩠ᨾᨧᩁᩥᨿᨸᩁᩥᨿᩮᩣᩈᩣᨶᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᩏᨸᩈᨾ᩠ᨸᨩ᩠ᨩ ᩅᩥᩉᩁᩥᩔᨲᩥ ᨨ ᩅᩔᩣᨶᩥ. ᨸᨬ᩠ᨧ ᩅᩔᩣᨶᩥ… ᨧᨲ᩠ᨲᩣᩁᩥ ᩅᩔᩣᨶᩥ… ᨲᩦᨱᩥ ᩅᩔᩣᨶᩥ… ᨴ᩠ᩅᩮ ᩅᩔᩣᨶᩥ… ᩑᨠᩴ ᩅᩔᩴ. ᨲᩥᨭ᩠ᨮᨲᩩ, ᨶᩥᨣᩕᩮᩣᨵ, ᩑᨠᩴ ᩅᩔᩴ. ᩑᨲᩩ ᩅᩥᨬ᩠ᨬᩪ ᨸᩩᩁᩥᩈᩮᩣ ᩋᩈᨮᩮᩣ ᩋᨾᩣᨿᩣᩅᩦ ᩏᨩᩩᨩᩣᨲᩥᨠᩮᩣ ᩋᩉᨾᨶᩩᩈᩣᩈᩣᨾᩥ ᩋᩉᩴ ᨵᨾ᩠ᨾᩴ ᨴᩮᩈᩮᨾᩥ. ᨿᨳᩣᨶᩩᩈᩥᨭ᩠ᨮᩴ ᨲᨳᩣ ᨸᨭᩥᨸᨩ᩠ᨩᨾᩣᨶᩮᩣ, ᨿᩔᨲ᩠ᨳᩣᨿ ᨠᩩᩃᨸᩩᨲ᩠ᨲᩣ ᩈᨾ᩠ᨾᨴᩮᩅ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨶ᩠ᨲᩥ, ᨲᨴᨶᩩᨲ᩠ᨲᩁᩴ ᨻᩕᩉ᩠ᨾᨧᩁᩥᨿᨸᩁᩥᨿᩮᩣᩈᩣᨶᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᩏᨸᩈᨾ᩠ᨸᨩ᩠ᨩ ᩅᩥᩉᩁᩥᩔᨲᩥ ᩈᨲ᩠ᨲ ᨾᩣᩈᩣᨶᩥ. ᨲᩥᨭ᩠ᨮᨶ᩠ᨲᩩ, ᨶᩥᨣᩕᩮᩣᨵ, ᩈᨲ᩠ᨲ ᨾᩣᩈᩣᨶᩥ… ᨨ ᨾᩣᩈᩣᨶᩥ… ᨸᨬ᩠ᨧ ᨾᩣᩈᩣᨶᩥ … ᨧᨲ᩠ᨲᩣᩁᩥ ᨾᩣᩈᩣᨶᩥ… ᨲᩦᨱᩥ ᨾᩣᩈᩣᨶᩥ… ᨴ᩠ᩅᩮ ᨾᩣᩈᩣᨶᩥ… ᩑᨠᩴ ᨾᩣᩈᩴ… ᩋᨯ᩠ᨰᨾᩣᩈᩴ. ᨲᩥᨭ᩠ᨮᨲᩩ, ᨶᩥᨣᩕᩮᩣᨵ, ᩋᨯ᩠ᨰᨾᩣᩈᩮᩣ. ᩑᨲᩩ ᩅᩥᨬ᩠ᨬᩪ ᨸᩩᩁᩥᩈᩮᩣ ᩋᩈᨮᩮᩣ ᩋᨾᩣᨿᩣᩅᩦ ᩏᨩᩩᨩᩣᨲᩥᨠᩮᩣ, ᩋᩉᨾᨶᩩᩈᩣᩈᩣᨾᩥ ᩋᩉᩴ ᨵᨾ᩠ᨾᩴ ᨴᩮᩈᩮᨾᩥ. ᨿᨳᩣᨶᩩᩈᩥᨭ᩠ᨮᩴ ᨲᨳᩣ ᨸᨭᩥᨸᨩ᩠ᨩᨾᩣᨶᩮᩣ, ᨿᩔᨲ᩠ᨳᩣᨿ ᨠᩩᩃᨸᩩᨲ᩠ᨲᩣ ᩈᨾ᩠ᨾᨴᩮᩅ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨶ᩠ᨲᩥ, ᨲᨴᨶᩩᨲ᩠ᨲᩁᩴ ᨻᩕᩉ᩠ᨾᨧᩁᩥᨿᨸᩁᩥᨿᩮᩣᩈᩣᨶᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᩏᨸᩈᨾ᩠ᨸᨩ᩠ᨩ ᩅᩥᩉᩁᩥᩔᨲᩥ ᩈᨲ᩠ᨲᩣᩉᩴ’.

ᨸᩁᩥᨻ᩠ᨻᩣᨩᨠᩣᨶᩴ ᨸᨩ᩠ᨫᩣᨿᨶᩴ

᪗᪘. ‘‘ᩈᩥᨿᩣ ᨡᩮᩣ ᨸᨶ ᨲᩮ, ᨶᩥᨣᩕᩮᩣᨵ, ᩑᩅᨾᩔ – ‘ᩋᨶ᩠ᨲᩮᩅᩣᩈᩥᨠᨾ᩠ᨿᨲᩣ ᨶᩮᩣ ᩈᨾᨱᩮᩣ ᨣᩮᩣᨲᨾᩮᩣ ᩑᩅᨾᩣᩉᩣ’ᨲᩥ. ᨶ ᨡᩮᩣ ᨸᨶᩮᨲᩴ, ᨶᩥᨣᩕᩮᩣᨵ, ᩑᩅᩴ ᨴᨭ᩠ᨮᨻ᩠ᨻᩴ. ᨿᩮᩣ ᩑᩅ ᩅᩮᩣ [ᨲᩮ (ᩈᩦ. ᩈ᩠ᨿᩣ.)] ᩌᨧᩁᩥᨿᩮᩣ, ᩈᩮᩣ ᩑᩅ ᩅᩮᩣ ᩌᨧᩁᩥᨿᩮᩣ ᩉᩮᩣᨲᩩ. ᩈᩥᨿᩣ ᨡᩮᩣ ᨸᨶ ᨲᩮ, ᨶᩥᨣᩕᩮᩣᨵ, ᩑᩅᨾᩔ – ‘ᩏᨴ᩠ᨴᩮᩈᩣ ᨶᩮᩣ ᨧᩣᩅᩮᨲᩩᨠᩣᨾᩮᩣ ᩈᨾᨱᩮᩣ ᨣᩮᩣᨲᨾᩮᩣ ᩑᩅᨾᩣᩉᩣ’ᨲᩥ. ᨶ ᨡᩮᩣ ᨸᨶᩮᨲᩴ, ᨶᩥᨣᩕᩮᩣᨵ, ᩑᩅᩴ ᨴᨭ᩠ᨮᨻ᩠ᨻᩴ. ᨿᩮᩣ ᩑᩅ ᩅᩮᩣ ᩏᨴ᩠ᨴᩮᩈᩮᩣ ᩈᩮᩣ ᩑᩅ ᩅᩮᩣ ᩏᨴ᩠ᨴᩮᩈᩮᩣ ᩉᩮᩣᨲᩩ. ᩈᩥᨿᩣ ᨡᩮᩣ ᨸᨶ ᨲᩮ, ᨶᩥᨣᩕᩮᩣᨵ, ᩑᩅᨾᩔ – ‘ᩌᨩᩦᩅᩣ ᨶᩮᩣ ᨧᩣᩅᩮᨲᩩᨠᩣᨾᩮᩣ ᩈᨾᨱᩮᩣ ᨣᩮᩣᨲᨾᩮᩣ ᩑᩅᨾᩣᩉᩣ’ᨲᩥ. ᨶ ᨡᩮᩣ ᨸᨶᩮᨲᩴ, ᨶᩥᨣᩕᩮᩣᨵ, ᩑᩅᩴ ᨴᨭ᩠ᨮᨻ᩠ᨻᩴ. ᨿᩮᩣ ᩑᩅ ᩅᩮᩣ ᩌᨩᩦᩅᩮᩣ, ᩈᩮᩣ ᩑᩅ ᩅᩮᩣ ᩌᨩᩦᩅᩮᩣ ᩉᩮᩣᨲᩩ. ᩈᩥᨿᩣ ᨡᩮᩣ ᨸᨶ ᨲᩮ, ᨶᩥᨣᩕᩮᩣᨵ, ᩑᩅᨾᩔ – ‘ᨿᩮ ᨶᩮᩣ ᨵᨾ᩠ᨾᩣ ᩋᨠᩩᩈᩃᩣ ᩋᨠᩩᩈᩃᩈᨦ᩠ᨡᩣᨲᩣ ᩈᩣᨧᩁᩥᨿᨠᩣᨶᩴ, ᨲᩮᩈᩩ ᨸᨲᩥᨭ᩠ᨮᩣᨸᩮᨲᩩᨠᩣᨾᩮᩣ ᩈᨾᨱᩮᩣ ᨣᩮᩣᨲᨾᩮᩣ ᩑᩅᨾᩣᩉᩣ’ᨲᩥ. ᨶ ᨡᩮᩣ ᨸᨶᩮᨲᩴ, ᨶᩥᨣᩕᩮᩣᨵ, ᩑᩅᩴ ᨴᨭ᩠ᨮᨻ᩠ᨻᩴ. ᩋᨠᩩᩈᩃᩣ ᨧᩮᩅ ᩅᩮᩣ ᨲᩮ ᨵᨾ᩠ᨾᩣ [ᩅᩮᩣᨵᨾ᩠ᨾᩣ (ᨠ.), ᨲᩮ ᨵᨾ᩠ᨾᩣ (ᩈ᩠ᨿᩣ.)] ᩉᩮᩣᨶ᩠ᨲᩩ ᩋᨠᩩᩈᩃᩈᨦ᩠ᨡᩣᨲᩣ ᨧ ᩈᩣᨧᩁᩥᨿᨠᩣᨶᩴ. ᩈᩥᨿᩣ ᨡᩮᩣ ᨸᨶ ᨲᩮ, ᨶᩥᨣᩕᩮᩣᨵ, ᩑᩅᨾᩔ – ‘ᨿᩮ ᨶᩮᩣ ᨵᨾ᩠ᨾᩣ ᨠᩩᩈᩃᩣ ᨠᩩᩈᩃᩈᨦ᩠ᨡᩣᨲᩣ ᩈᩣᨧᩁᩥᨿᨠᩣᨶᩴ, ᨲᩮᩉᩥ ᩅᩥᩅᩮᨧᩮᨲᩩᨠᩣᨾᩮᩣ ᩈᨾᨱᩮᩣ ᨣᩮᩣᨲᨾᩮᩣ ᩑᩅᨾᩣᩉᩣ’ᨲᩥ. ᨶ ᨡᩮᩣ ᨸᨶᩮᨲᩴ, ᨶᩥᨣᩕᩮᩣᨵ, ᩑᩅᩴ ᨴᨭ᩠ᨮᨻ᩠ᨻᩴ. ᨠᩩᩈᩃᩣ ᨧᩮᩅ ᩅᩮᩣ ᨲᩮ ᨵᨾ᩠ᨾᩣ ᩉᩮᩣᨶ᩠ᨲᩩ ᨠᩩᩈᩃᩈᨦ᩠ᨡᩣᨲᩣ ᨧ ᩈᩣᨧᩁᩥᨿᨠᩣᨶᩴ. ᩍᨲᩥ ᨡ᩠ᩅᩣᩉᩴ, ᨶᩥᨣᩕᩮᩣᨵ, ᨶᩮᩅ ᩋᨶ᩠ᨲᩮᩅᩣᩈᩥᨠᨾ᩠ᨿᨲᩣ ᩑᩅᩴ ᩅᨴᩣᨾᩥ, ᨶᨸᩥ ᩏᨴ᩠ᨴᩮᩈᩣ ᨧᩣᩅᩮᨲᩩᨠᩣᨾᩮᩣ ᩑᩅᩴ ᩅᨴᩣᨾᩥ, ᨶᨸᩥ ᩌᨩᩦᩅᩣ ᨧᩣᩅᩮᨲᩩᨠᩣᨾᩮᩣ ᩑᩅᩴ ᩅᨴᩣᨾᩥ, ᨶᨸᩥ ᨿᩮ ᩅᩮᩣ ᨵᨾ᩠ᨾᩣ [ᨶᨸᩥ ᨿᩮ ᨡᩮᩣ ᨵᨾ᩠ᨾᩣ (ᩈᩦ.), ᨶᨸᩥ ᨿᩮ ᨲᩮ ᨵᨾ᩠ᨾᩣ (ᩈ᩠ᨿᩣ.), ᨶᨸᩥ ᨿᩮ ᨧ ᩅᩮᩣ ᨵᨾ᩠ᨾᩣ (ᨠ.)] ᩋᨠᩩᩈᩃᩣ ᩋᨠᩩᩈᩃᩈᨦ᩠ᨡᩣᨲᩣ ᩈᩣᨧᩁᩥᨿᨠᩣᨶᩴ, ᨲᩮᩈᩩ ᨸᨲᩥᨭ᩠ᨮᩣᨸᩮᨲᩩᨠᩣᨾᩮᩣ ᩑᩅᩴ ᩅᨴᩣᨾᩥ, ᨶᨸᩥ ᨿᩮ ᩅᩮᩣ ᨵᨾ᩠ᨾᩣ [ᨶᨸᩥ ᨿᩮ ᨡᩮᩣ ᨵᨾ᩠ᨾᩣ (ᩈᩦ.), ᨶᨸᩥ ᨿᩮ ᨲᩮ ᨵᨾ᩠ᨾᩣ (ᩈ᩠ᨿᩣ.), ᨶᨸᩥ ᨿᩮ ᨧ ᩅᩮᩣ ᨵᨾ᩠ᨾᩣ (ᨠ.)] ᨠᩩᩈᩃᩣ ᨠᩩᩈᩃᩈᨦ᩠ᨡᩣᨲᩣ ᩈᩣᨧᩁᩥᨿᨠᩣᨶᩴ, ᨲᩮᩉᩥ ᩅᩥᩅᩮᨧᩮᨲᩩᨠᩣᨾᩮᩣ ᩑᩅᩴ ᩅᨴᩣᨾᩥ. ᩈᨶ᩠ᨲᩥ ᨧ ᨡᩮᩣ, ᨶᩥᨣᩕᩮᩣᨵ, ᩋᨠᩩᩈᩃᩣ ᨵᨾ᩠ᨾᩣ ᩋᨸ᩠ᨸᩉᩦᨶᩣ ᩈᩴᨠᩥᩃᩮᩈᩥᨠᩣ ᨸᩮᩣᨶᩮᩣᨻ᩠ᨽᩅᩥᨠᩣ [ᨸᩮᩣᨶᩮᩣᨽᩅᩥᨠᩣ (ᨠ.)] ᩈᨴᩁᩣ [ᩈᨴ᩠ᨴᩁᩣ (ᨸᩦ. ᨠ.), ᩈᨴᩁᨳᩣ (ᩈ᩠ᨿᩣ. ᨠ.)] ᨴᩩᨠ᩠ᨡᩅᩥᨸᩣᨠᩣ ᩌᨿᨲᩥᩴ ᨩᩣᨲᩥᨩᩁᩣᨾᩁᨱᩥᨿᩣ, ᨿᩮᩈᩣᩉᩴ ᨸᩉᩣᨶᩣᨿ ᨵᨾ᩠ᨾᩴ ᨴᩮᩈᩮᨾᩥ. ᨿᨳᩣᨸᨭᩥᨸᨶ᩠ᨶᩣᨶᩴ ᩅᩮᩣ ᩈᩴᨠᩥᩃᩮᩈᩥᨠᩣ ᨵᨾ᩠ᨾᩣ ᨸᩉᩦᨿᩥᩔᨶ᩠ᨲᩥ, ᩅᩮᩣᨴᩣᨶᩦᨿᩣ ᨵᨾ᩠ᨾᩣ ᩋᨽᩥᩅᨯ᩠ᨰᩥᩔᨶ᩠ᨲᩥ, ᨸᨬ᩠ᨬᩣᨸᩣᩁᩥᨸᩪᩁᩥᩴ ᩅᩮᨸᩩᩃ᩠ᩃᨲ᩠ᨲᨬ᩠ᨧ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᩏᨸᩈᨾ᩠ᨸᨩ᩠ᨩ ᩅᩥᩉᩁᩥᩔᨳᩣ’’ᨲᩥ.

᪗᪙. ᩑᩅᩴ ᩅᩩᨲ᩠ᨲᩮ, ᨲᩮ ᨸᩁᩥᨻ᩠ᨻᩣᨩᨠᩣ ᨲᩩᨱ᩠ᩉᩦᨽᩪᨲᩣ ᨾᨦ᩠ᨠᩩᨽᩪᨲᩣ ᨸᨲ᩠ᨲᨠ᩠ᨡᨶ᩠ᨵᩣ ᩋᨵᩮᩣᨾᩩᨡᩣ ᨸᨩ᩠ᨫᩣᨿᨶ᩠ᨲᩣ ᩋᨸ᩠ᨸᨭᩥᨽᩣᨶᩣ ᨶᩥᩈᩦᨴᩥᩴᩈᩩ ᨿᨳᩣ ᨲᩴ ᨾᩣᩁᩮᨶ ᨸᩁᩥᨿᩩᨭ᩠ᨮᩥᨲᨧᩥᨲ᩠ᨲᩣ. ᩋᨳ ᨡᩮᩣ ᨽᨣᩅᨲᩮᩣ ᩑᨲᨴᩉᩮᩣᩈᩥ – ‘‘ᩈᨻ᩠ᨻᩮ ᨸᩥᨾᩮ ᨾᩮᩣᨥᨸᩩᩁᩥᩈᩣ ᨹᩩᨭ᩠ᨮᩣ ᨸᩣᨸᩥᨾᨲᩣ. ᨿᨲᩕ ᩉᩥ ᨶᩣᨾ ᩑᨠᩔᨸᩥ ᨶ ᩑᩅᩴ ᨽᩅᩥᩔᨲᩥ – ‘ᩉᨶ᩠ᨴ ᨾᨿᩴ ᩋᨬ᩠ᨬᩣᨱᨲ᩠ᨳᨾ᩠ᨸᩥ ᩈᨾᨱᩮ ᨣᩮᩣᨲᨾᩮ ᨻᩕᩉ᩠ᨾᨧᩁᩥᨿᩴ ᨧᩁᩣᨾ, ᨠᩥᩴ ᨠᩁᩥᩔᨲᩥ ᩈᨲ᩠ᨲᩣᩉᩮᩣ’’’ᨲᩥ? ᩋᨳ ᨡᩮᩣ ᨽᨣᩅᩣ ᩏᨴᩩᨾ᩠ᨻᩁᩥᨠᩣᨿ ᨸᩁᩥᨻ᩠ᨻᩣᨩᨠᩣᩁᩣᨾᩮ ᩈᩦᩉᨶᩣᨴᩴ ᨶᨴᩥᨲ᩠ᩅᩣ ᩅᩮᩉᩣᩈᩴ ᩋᨻ᩠ᨽᩩᨣ᩠ᨣᨶ᩠ᨲ᩠ᩅᩣ ᨣᩥᨩ᩠ᨫᨠᩪᨭᩮ ᨸᨻ᩠ᨻᨲᩮ ᨸᨧ᩠ᨧᩩᨸᨭ᩠ᨮᩣᩈᩥ [ᨸᨧ᩠ᨧᩩᨭ᩠ᨮᩣᩈᩥ (ᩈᩦ. ᩈ᩠ᨿᩣ. ᨸᩦ.)]. ᩈᨶ᩠ᨵᩣᨶᩮᩣ ᨸᨶ ᨣᩉᨸᨲᩥ ᨲᩣᩅᨴᩮᩅ ᩁᩣᨩᨣᩉᩴ ᨸᩣᩅᩥᩈᩦᨲᩥ.

ᩏᨴᩩᨾ᩠ᨻᩁᩥᨠᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᨴᩩᨲᩥᨿᩴ.

᪓. ᨧᨠ᩠ᨠᩅᨲ᩠ᨲᩥᩈᩩᨲ᩠ᨲᩴ

ᩋᨲ᩠ᨲᨴᩦᨸᩈᩁᨱᨲᩣ

᪘᪐. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᨾᨣᨵᩮᩈᩩ ᩅᩥᩉᩁᨲᩥ ᨾᩣᨲᩩᩃᩣᨿᩴ. ᨲᨲᩕ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᨽᩥᨠ᩠ᨡᩅᩮᩣ’’ᨲᩥ. ‘‘ᨽᨴ᩠ᨴᨶ᩠ᨲᩮ’’ᨲᩥ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩩᩴ. ᨽᨣᩅᩣ ᩑᨲᨴᩅᩮᩣᨧ – ‘‘ᩋᨲ᩠ᨲᨴᩦᨸᩣ, ᨽᩥᨠ᩠ᨡᩅᩮ, ᩅᩥᩉᩁᨳ ᩋᨲ᩠ᨲᩈᩁᨱᩣ ᩋᨶᨬ᩠ᨬᩈᩁᨱᩣ, ᨵᨾ᩠ᨾᨴᩦᨸᩣ ᨵᨾ᩠ᨾᩈᩁᨱᩣ ᩋᨶᨬ᩠ᨬᩈᩁᨱᩣ. ᨠᨳᨬ᩠ᨧ ᨸᨶ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩋᨲ᩠ᨲᨴᩦᨸᩮᩣ ᩅᩥᩉᩁᨲᩥ ᩋᨲ᩠ᨲᩈᩁᨱᩮᩣ ᩋᨶᨬ᩠ᨬᩈᩁᨱᩮᩣ, ᨵᨾ᩠ᨾᨴᩦᨸᩮᩣ ᨵᨾ᩠ᨾᩈᩁᨱᩮᩣ ᩋᨶᨬ᩠ᨬᩈᩁᨱᩮᩣ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ. ᩅᩮᨴᨶᩣᩈᩩ ᩅᩮᨴᨶᩣᨶᩩᨸᩔᩦ…ᨸᩮ… ᨧᩥᨲ᩠ᨲᩮ ᨧᩥᨲ᩠ᨲᩣᨶᩩᨸᩔᩦ…ᨸᩮ… ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ. ᩑᩅᩴ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩋᨲ᩠ᨲᨴᩦᨸᩮᩣ ᩅᩥᩉᩁᨲᩥ ᩋᨲ᩠ᨲᩈᩁᨱᩮᩣ ᩋᨶᨬ᩠ᨬᩈᩁᨱᩮᩣ, ᨵᨾ᩠ᨾᨴᩦᨸᩮᩣ ᨵᨾ᩠ᨾᩈᩁᨱᩮᩣ ᩋᨶᨬ᩠ᨬᩈᩁᨱᩮᩣ.

‘‘ᨣᩮᩣᨧᩁᩮ, ᨽᩥᨠ᩠ᨡᩅᩮ, ᨧᩁᨳ ᩈᨠᩮ ᨸᩮᨲ᩠ᨲᩥᨠᩮ ᩅᩥᩈᨿᩮ. ᨣᩮᩣᨧᩁᩮ, ᨽᩥᨠ᩠ᨡᩅᩮ, ᨧᩁᨲᩴ ᩈᨠᩮ ᨸᩮᨲ᩠ᨲᩥᨠᩮ ᩅᩥᩈᨿᩮ ᨶ ᩃᨧ᩠ᨨᨲᩥ ᨾᩣᩁᩮᩣ ᩒᨲᩣᩁᩴ, ᨶ ᩃᨧ᩠ᨨᨲᩥ ᨾᩣᩁᩮᩣ ᩌᩁᨾ᩠ᨾᨱᩴ [ᩌᩁᨾᨱᩴ (?)]. ᨠᩩᩈᩃᩣᨶᩴ, ᨽᩥᨠ᩠ᨡᩅᩮ, ᨵᨾ᩠ᨾᩣᨶᩴ ᩈᨾᩣᨴᩣᨶᩉᩮᨲᩩ ᩑᩅᨾᩥᨴᩴ ᨸᩩᨬ᩠ᨬᩴ ᨸᩅᨯ᩠ᨰᨲᩥ.

ᨴᩊ᩠ᩉᨶᩮᨾᩥᨧᨠ᩠ᨠᩅᨲ᩠ᨲᩥᩁᩣᨩᩣ

᪘᪑. ‘‘ᨽᩪᨲᨸᩩᨻ᩠ᨻᩴ, ᨽᩥᨠ᩠ᨡᩅᩮ, ᩁᩣᨩᩣ ᨴᩊ᩠ᩉᨶᩮᨾᩥ ᨶᩣᨾ ᩋᩉᩮᩣᩈᩥ ᨧᨠ᩠ᨠᩅᨲ᩠ᨲᩦ [ᨧᨠ᩠ᨠᩅᨲ᩠ᨲᩥ (ᩈ᩠ᨿᩣ. ᨸᩦ.)] ᨵᨾ᩠ᨾᩥᨠᩮᩣ ᨵᨾ᩠ᨾᩁᩣᨩᩣ ᨧᩣᨲᩩᩁᨶ᩠ᨲᩮᩣ ᩅᩥᨩᩥᨲᩣᩅᩦ ᨩᨶᨸᨴᨲ᩠ᨳᩣᩅᩁᩥᨿᨸ᩠ᨸᨲ᩠ᨲᩮᩣ ᩈᨲ᩠ᨲᩁᨲᨶᩈᨾᨶ᩠ᨶᩣᨣᨲᩮᩣ. ᨲᩔᩥᨾᩣᨶᩥ ᩈᨲ᩠ᨲ ᩁᨲᨶᩣᨶᩥ ᩋᩉᩮᩈᩩᩴ ᩈᩮᨿ᩠ᨿᨳᩥᨴᩴ – ᨧᨠ᩠ᨠᩁᨲᨶᩴᩏ ᩉᨲ᩠ᨳᩥᩁᨲᨶᩴ ᩋᩔᩁᨲᨶᩴ ᨾᨱᩥᩁᨲᨶᩴ ᩍᨲ᩠ᨳᩥᩁᨲᨶᩴ ᨣᩉᨸᨲᩥᩁᨲᨶᩴ ᨸᩁᩥᨱᩣᨿᨠᩁᨲᨶᨾᩮᩅ ᩈᨲ᩠ᨲᨾᩴ. ᨸᩁᩮᩣᩈᩉᩔᩴ ᨡᩮᩣ ᨸᨶᩔ ᨸᩩᨲ᩠ᨲᩣ ᩋᩉᩮᩈᩩᩴ ᩈᩪᩁᩣ ᩅᩦᩁᨦ᩠ᨣᩁᩪᨸᩣ ᨸᩁᩈᩮᨶᨸ᩠ᨸᨾᨴ᩠ᨴᨶᩣ. ᩈᩮᩣ ᩍᨾᩴ ᨸᨳᩅᩥᩴ ᩈᩣᨣᩁᨸᩁᩥᨿᨶ᩠ᨲᩴ ᩋᨴᨱ᩠ᨯᩮᨶ ᩋᩈᨲ᩠ᨳᩮᨶ ᨵᨾ᩠ᨾᩮᨶ [ᨵᨾ᩠ᨾᩮᨶ ᩈᨾᩮᨶ (ᩈ᩠ᨿᩣ. ᨠ.)] ᩋᨽᩥᩅᩥᨩᩥᨿ ᩋᨩ᩠ᨫᩣᩅᩈᩥ.

᪘᪒. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨴᩊ᩠ᩉᨶᩮᨾᩥ ᨻᩉᩩᨶ᩠ᨶᩴ ᩅᩔᩣᨶᩴ ᨻᩉᩩᨶ᩠ᨶᩴ ᩅᩔᩈᨲᩣᨶᩴ ᨻᩉᩩᨶ᩠ᨶᩴ ᩅᩔᩈᩉᩔᩣᨶᩴ ᩋᨧ᩠ᨧᨿᩮᨶ ᩋᨬ᩠ᨬᨲᩁᩴ ᨸᩩᩁᩥᩈᩴ ᩌᨾᨶ᩠ᨲᩮᩈᩥ – ‘ᨿᨴᩣ ᨲ᩠ᩅᩴ, ᩋᨾ᩠ᨽᩮᩣ ᨸᩩᩁᩥᩈ, ᨸᩔᩮᨿ᩠ᨿᩣᩈᩥ ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᩒᩈᨠ᩠ᨠᩥᨲᩴ ᨮᩣᨶᩣ ᨧᩩᨲᩴ, ᩋᨳ ᨾᩮ ᩌᩁᩮᩣᨧᩮᨿ᩠ᨿᩣᩈᩦ’ᨲᩥ. ‘ᩑᩅᩴ, ᨴᩮᩅᩣ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᩈᩮᩣ ᨸᩩᩁᩥᩈᩮᩣ ᩁᨬ᩠ᨬᩮᩣ ᨴᩊ᩠ᩉᨶᩮᨾᩥᩔ ᨸᨧ᩠ᨧᩔᩮᩣᩈᩥ. ᩋᨴ᩠ᨴᩈᩣ ᨡᩮᩣ, ᨽᩥᨠ᩠ᨡᩅᩮ, ᩈᩮᩣ ᨸᩩᩁᩥᩈᩮᩣ ᨻᩉᩩᨶ᩠ᨶᩴ ᩅᩔᩣᨶᩴ ᨻᩉᩩᨶ᩠ᨶᩴ ᩅᩔᩈᨲᩣᨶᩴ ᨻᩉᩩᨶ᩠ᨶᩴ ᩅᩔᩈᩉᩔᩣᨶᩴ ᩋᨧ᩠ᨧᨿᩮᨶ ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᩒᩈᨠ᩠ᨠᩥᨲᩴ ᨮᩣᨶᩣ ᨧᩩᨲᩴ, ᨴᩥᩈ᩠ᩅᩣᨶ ᨿᩮᨶ ᩁᩣᨩᩣ ᨴᩊ᩠ᩉᨶᩮᨾᩥ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩁᩣᨩᩣᨶᩴ ᨴᩊ᩠ᩉᨶᩮᨾᩥᩴ ᩑᨲᨴᩅᩮᩣᨧ – ‘ᨿᨣ᩠ᨥᩮ, ᨴᩮᩅ, ᨩᩣᨶᩮᨿ᩠ᨿᩣᩈᩥ, ᨴᩥᨻ᩠ᨻᩴ ᨲᩮ ᨧᨠ᩠ᨠᩁᨲᨶᩴ ᩒᩈᨠ᩠ᨠᩥᨲᩴ ᨮᩣᨶᩣ ᨧᩩᨲ’ᨶ᩠ᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨴᩊ᩠ᩉᨶᩮᨾᩥ ᨩᩮᨭ᩠ᨮᨸᩩᨲ᩠ᨲᩴ ᨠᩩᨾᩣᩁᩴ ᩌᨾᨶ᩠ᨲᩣᨸᩮᨲ᩠ᩅᩣ [ᩌᨾᨶ᩠ᨲᩮᨲ᩠ᩅᩣ (ᩈ᩠ᨿᩣ. ᨠ.)] ᩑᨲᨴᩅᩮᩣᨧ – ‘ᨴᩥᨻ᩠ᨻᩴ ᨠᩥᩁ ᨾᩮ, ᨲᩣᨲ ᨠᩩᨾᩣᩁ, ᨧᨠ᩠ᨠᩁᨲᨶᩴ ᩒᩈᨠ᩠ᨠᩥᨲᩴ ᨮᩣᨶᩣ ᨧᩩᨲᩴ. ᩈᩩᨲᩴ ᨡᩮᩣ ᨸᨶ ᨾᩮᨲᩴ – ᨿᩔ ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᩒᩈᨠ᩠ᨠᨲᩥ ᨮᩣᨶᩣ ᨧᩅᨲᩥ, ᨶ ᨴᩣᨶᩥ ᨲᩮᨶ ᩁᨬ᩠ᨬᩣ ᨧᩥᩁᩴ ᨩᩦᩅᩥᨲᨻ᩠ᨻᩴ ᩉᩮᩣᨲᩦᨲᩥ. ᨽᩩᨲ᩠ᨲᩣ ᨡᩮᩣ ᨸᨶ ᨾᩮ ᨾᩣᨶᩩᩈᨠᩣ ᨠᩣᨾᩣ, ᩈᨾᨿᩮᩣ ᨴᩣᨶᩥ ᨾᩮ ᨴᩥᨻ᩠ᨻᩮ ᨠᩣᨾᩮ ᨸᩁᩥᨿᩮᩈᩥᨲᩩᩴ. ᩑᩉᩥ ᨲ᩠ᩅᩴ, ᨲᩣᨲ ᨠᩩᨾᩣᩁ, ᩍᨾᩴ ᩈᨾᩩᨴ᩠ᨴᨸᩁᩥᨿᨶ᩠ᨲᩴ ᨸᨳᩅᩥᩴ ᨸᨭᩥᨸᨩ᩠ᨩ. ᩋᩉᩴ ᨸᨶ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᩣᨾᩦ’ᨲᩥ.

᪘᪓. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨴᩊ᩠ᩉᨶᩮᨾᩥ ᨩᩮᨭ᩠ᨮᨸᩩᨲ᩠ᨲᩴ ᨠᩩᨾᩣᩁᩴ ᩈᩣᨵᩩᨠᩴ ᩁᨩ᩠ᨩᩮ ᩈᨾᨶᩩᩈᩣᩈᩥᨲ᩠ᩅᩣ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥ. ᩈᨲ᩠ᨲᩣᩉᨸᨻ᩠ᨻᨩᩥᨲᩮ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩁᩣᨩᩥᩈᩥᨾ᩠ᩉᩥ ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᩋᨶ᩠ᨲᩁᨵᩣᨿᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩋᨬ᩠ᨬᨲᩁᩮᩣ ᨸᩩᩁᩥᩈᩮᩣ ᨿᩮᨶ ᩁᩣᨩᩣ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩣ [ᨾᩩᨴ᩠ᨵᩣᩅᩈᩥᨲ᩠ᨲᩮᩣ (ᩈᩦ. ᩈ᩠ᨿᩣ. ᨸᩦ.) ᩑᩅᨾᩩᨸᩁᩥᨸᩥ] ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩁᩣᨩᩣᨶᩴ ᨡᨲ᩠ᨲᩥᨿᩴ ᨾᩩᨴ᩠ᨵᩣᨽᩥᩈᩥᨲ᩠ᨲᩴ ᩑᨲᨴᩅᩮᩣᨧ – ‘ᨿᨣ᩠ᨥᩮ, ᨴᩮᩅ, ᨩᩣᨶᩮᨿ᩠ᨿᩣᩈᩥ, ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᩋᨶ᩠ᨲᩁᩉᩥᨲ’ᨶ᩠ᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩣ ᨴᩥᨻ᩠ᨻᩮ ᨧᨠ᩠ᨠᩁᨲᨶᩮ ᩋᨶ᩠ᨲᩁᩉᩥᨲᩮ ᩋᨶᨲ᩠ᨲᨾᨶᩮᩣ ᩋᩉᩮᩣᩈᩥ, ᩋᨶᨲ᩠ᨲᨾᨶᨲᨬ᩠ᨧ ᨸᨭᩥᩈᩴᩅᩮᨴᩮᩈᩥ. ᩈᩮᩣ ᨿᩮᨶ ᩁᩣᨩᩥᩈᩥ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩁᩣᨩᩥᩈᩥᩴ ᩑᨲᨴᩅᩮᩣᨧ – ‘ᨿᨣ᩠ᨥᩮ, ᨴᩮᩅ, ᨩᩣᨶᩮᨿ᩠ᨿᩣᩈᩥ, ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᩋᨶ᩠ᨲᩁᩉᩥᨲ’ᨶ᩠ᨲᩥ. ᩑᩅᩴ ᩅᩩᨲ᩠ᨲᩮ, ᨽᩥᨠ᩠ᨡᩅᩮ, ᩁᩣᨩᩥᩈᩥ ᩁᩣᨩᩣᨶᩴ ᨡᨲ᩠ᨲᩥᨿᩴ ᨾᩩᨴ᩠ᨵᩣᨽᩥᩈᩥᨲ᩠ᨲᩴ ᩑᨲᨴᩅᩮᩣᨧ – ‘ᨾᩣ ᨡᩮᩣ ᨲ᩠ᩅᩴ, ᨲᩣᨲ, ᨴᩥᨻ᩠ᨻᩮ ᨧᨠ᩠ᨠᩁᨲᨶᩮ ᩋᨶ᩠ᨲᩁᩉᩥᨲᩮ ᩋᨶᨲ᩠ᨲᨾᨶᩮᩣ ᩋᩉᩮᩣᩈᩥ, ᨾᩣ ᩋᨶᨲ᩠ᨲᨾᨶᨲᨬ᩠ᨧ ᨸᨭᩥᩈᩴᩅᩮᨴᩮᩈᩥ, ᨶ ᩉᩥ ᨲᩮ, ᨲᩣᨲ, ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᨸᩮᨲ᩠ᨲᩥᨠᩴ ᨴᩣᨿᨩ᩠ᨩᩴ. ᩍᨦ᩠ᨥ ᨲ᩠ᩅᩴ, ᨲᩣᨲ, ᩋᩁᩥᨿᩮ ᨧᨠ᩠ᨠᩅᨲ᩠ᨲᩥᩅᨲ᩠ᨲᩮ ᩅᨲ᩠ᨲᩣᩉᩥ. ᨮᩣᨶᩴ ᨡᩮᩣ ᨸᨶᩮᨲᩴ ᩅᩥᨩ᩠ᨩᨲᩥ, ᨿᩴ ᨲᩮ ᩋᩁᩥᨿᩮ ᨧᨠ᩠ᨠᩅᨲ᩠ᨲᩥᩅᨲ᩠ᨲᩮ ᩅᨲ᩠ᨲᨾᩣᨶᩔ ᨲᨴᩉᩩᨸᩮᩣᩈᨳᩮ ᨸᨶ᩠ᨶᩁᩈᩮ ᩈᩦᩈᩴᨶ᩠ᩉᩣᨲᩔ [ᩈᩦᩈᩴ ᨶᩉᩣᨲᩔ (ᩈᩦ. ᨸᩦ.), ᩈᩦᩈᨶ᩠ᩉᩣᨲᩔ (ᩈ᩠ᨿᩣ.)] ᩏᨸᩮᩣᩈᨳᩥᨠᩔ ᩏᨸᩁᩥᨸᩣᩈᩣᨴᩅᩁᨣᨲᩔ ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᨸᩣᨲᩩᨽᩅᩥᩔᨲᩥ ᩈᩉᩔᩣᩁᩴ ᩈᨶᩮᨾᩥᨠᩴ ᩈᨶᩣᨽᩥᨠᩴ ᩈᨻ᩠ᨻᩣᨠᩣᩁᨸᩁᩥᨸᩪᩁ’ᨶ᩠ᨲᩥ.

ᨧᨠ᩠ᨠᩅᨲ᩠ᨲᩥᩋᩁᩥᨿᩅᨲ᩠ᨲᩴ

᪘᪔. ‘‘‘ᨠᨲᨾᩴ ᨸᨶ ᨲᩴ, ᨴᩮᩅ, ᩋᩁᩥᨿᩴ ᨧᨠ᩠ᨠᩅᨲ᩠ᨲᩥᩅᨲ᩠ᨲ’ᨶ᩠ᨲᩥ? ‘ᨲᩮᨶ ᩉᩥ ᨲ᩠ᩅᩴ, ᨲᩣᨲ, ᨵᨾ᩠ᨾᩴᨿᩮᩅ ᨶᩥᩔᩣᨿ ᨵᨾ᩠ᨾᩴ ᩈᨠ᩠ᨠᩁᩮᩣᨶ᩠ᨲᩮᩣ ᨵᨾ᩠ᨾᩴ ᨣᩁᩩᩴ ᨠᩁᩮᩣᨶ᩠ᨲᩮᩣ [ᨣᩁᩩᨠᩁᩮᩣᨶ᩠ᨲᩮᩣ (ᩈᩦ. ᩈ᩠ᨿᩣ. ᨸᩦ.)] ᨵᨾ᩠ᨾᩴ ᨾᩣᨶᩮᨶ᩠ᨲᩮᩣ ᨵᨾ᩠ᨾᩴ ᨸᩪᨩᩮᨶ᩠ᨲᩮᩣ ᨵᨾ᩠ᨾᩴ ᩋᨸᨧᩣᨿᨾᩣᨶᩮᩣ ᨵᨾ᩠ᨾᨴ᩠ᨵᨩᩮᩣ ᨵᨾ᩠ᨾᨠᩮᨲᩩ ᨵᨾ᩠ᨾᩣᨵᩥᨸᨲᩮᨿ᩠ᨿᩮᩣ ᨵᨾ᩠ᨾᩥᨠᩴ ᩁᨠ᩠ᨡᩣᩅᩁᨱᨣᩩᨲ᩠ᨲᩥᩴ ᩈᩴᩅᩥᨴᩉᩔᩩ ᩋᨶ᩠ᨲᩮᩣᨩᨶᩈ᩠ᨾᩥᩴ ᨻᩃᨠᩣᨿᩈ᩠ᨾᩥᩴ ᨡᨲ᩠ᨲᩥᨿᩮᩈᩩ ᩋᨶᩩᨿᨶ᩠ᨲᩮᩈᩩ [ᩋᨶᩩᨿᩩᨲ᩠ᨲᩮᩈᩩ (ᩈᩦ. ᨸᩦ.)] ᨻᩕᩣᩉ᩠ᨾᨱᨣᩉᨸᨲᩥᨠᩮᩈᩩ ᨶᩮᨣᨾᨩᩣᨶᨸᨴᩮᩈᩩ ᩈᨾᨱᨻᩕᩣᩉ᩠ᨾᨱᩮᩈᩩ ᨾᩥᨣᨸᨠ᩠ᨡᩦᩈᩩ. ᨾᩣ ᨧ ᨲᩮ, ᨲᩣᨲ, ᩅᩥᨩᩥᨲᩮ ᩋᨵᨾ᩠ᨾᨠᩣᩁᩮᩣ ᨸᩅᨲ᩠ᨲᩥᨲ᩠ᨳ. ᨿᩮ ᨧ ᨲᩮ, ᨲᩣᨲ, ᩅᩥᨩᩥᨲᩮ ᩋᨵᨶᩣ ᩋᩔᩩ, ᨲᩮᩈᨬ᩠ᨧ ᨵᨶᨾᨶᩩᨸ᩠ᨸᨴᩮᨿ᩠ᨿᩣᩈᩥ [ᨵᨶᨾᨶᩩᨸ᩠ᨸᨴᨩ᩠ᨩᩮᨿ᩠ᨿᩣᩈᩥ (ᩈᩦ. ᩈ᩠ᨿᩣ. ᨸᩦ.)]. ᨿᩮ ᨧ ᨲᩮ, ᨲᩣᨲ, ᩅᩥᨩᩥᨲᩮ ᩈᨾᨱᨻᩕᩣᩉ᩠ᨾᨱᩣ ᨾᨴᨸ᩠ᨸᨾᩣᨴᩣ ᨸᨭᩥᩅᩥᩁᨲᩣ ᨡᨶ᩠ᨲᩥᩈᩮᩣᩁᨧ᩠ᨧᩮ ᨶᩥᩅᩥᨭ᩠ᨮᩣ ᩑᨠᨾᨲ᩠ᨲᩣᨶᩴ ᨴᨾᩮᨶ᩠ᨲᩥ, ᩑᨠᨾᨲ᩠ᨲᩣᨶᩴ ᩈᨾᩮᨶ᩠ᨲᩥ, ᩑᨠᨾᨲ᩠ᨲᩣᨶᩴ ᨸᩁᩥᨶᩥᨻ᩠ᨻᩣᨸᩮᨶ᩠ᨲᩥ, ᨲᩮ ᨠᩣᩃᩮᨶ ᨠᩣᩃᩴ ᩏᨸᩈᨦ᩠ᨠᨾᩥᨲ᩠ᩅᩣ ᨸᩁᩥᨸᩩᨧ᩠ᨨᩮᨿ᩠ᨿᩣᩈᩥ ᨸᩁᩥᨣ᩠ᨣᨱ᩠ᩉᩮᨿ᩠ᨿᩣᩈᩥ – ‘‘ᨠᩥᩴ, ᨽᨶ᩠ᨲᩮ, ᨠᩩᩈᩃᩴ, ᨠᩥᩴ ᩋᨠᩩᩈᩃᩴ, ᨠᩥᩴ ᩈᩣᩅᨩ᩠ᨩᩴ, ᨠᩥᩴ ᩋᨶᩅᨩ᩠ᨩᩴ, ᨠᩥᩴ ᩈᩮᩅᩥᨲᨻ᩠ᨻᩴ, ᨠᩥᩴ ᨶ ᩈᩮᩅᩥᨲᨻ᩠ᨻᩴ, ᨠᩥᩴ ᨾᩮ ᨠᩁᩦᨿᨾᩣᨶᩴ ᨴᩦᨥᩁᨲ᩠ᨲᩴ ᩋᩉᩥᨲᩣᨿ ᨴᩩᨠ᩠ᨡᩣᨿ ᩋᩔ, ᨠᩥᩴ ᩅᩣ ᨸᨶ ᨾᩮ ᨠᩁᩦᨿᨾᩣᨶᩴ ᨴᩦᨥᩁᨲ᩠ᨲᩴ ᩉᩥᨲᩣᨿ ᩈᩩᨡᩣᨿ ᩋᩔᩣ’’ᨲᩥ? ᨲᩮᩈᩴ ᩈᩩᨲ᩠ᩅᩣ ᨿᩴ ᩋᨠᩩᩈᩃᩴ ᨲᩴ ᩋᨽᩥᨶᩥᩅᨩ᩠ᨩᩮᨿ᩠ᨿᩣᩈᩥ, ᨿᩴ ᨠᩩᩈᩃᩴ ᨲᩴ ᩈᨾᩣᨴᩣᨿ ᩅᨲ᩠ᨲᩮᨿ᩠ᨿᩣᩈᩥ. ᩍᨴᩴ ᨡᩮᩣ, ᨲᩣᨲ, ᨲᩴ ᩋᩁᩥᨿᩴ ᨧᨠ᩠ᨠᩅᨲ᩠ᨲᩥᩅᨲ᩠ᨲ’ᨶ᩠ᨲᩥ.

ᨧᨠ᩠ᨠᩁᨲᨶᨸᩣᨲᩩᨽᩣᩅᩮᩣ

᪘᪕. ‘‘‘ᩑᩅᩴ, ᨴᩮᩅᩣ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩣ ᩁᩣᨩᩥᩈᩥᩔ ᨸᨭᩥᩔᩩᨲ᩠ᩅᩣ ᩋᩁᩥᨿᩮ ᨧᨠ᩠ᨠᩅᨲ᩠ᨲᩥᩅᨲ᩠ᨲᩮ [ᩋᩁᩥᨿᩴ ᨧᨠ᩠ᨠᩅᨲ᩠ᨲᩥᩅᨲ᩠ᨲᩴ (ᨠ.)] ᩅᨲ᩠ᨲᩥ. ᨲᩔ ᩋᩁᩥᨿᩮ ᨧᨠ᩠ᨠᩅᨲ᩠ᨲᩥᩅᨲ᩠ᨲᩮ ᩅᨲ᩠ᨲᨾᩣᨶᩔ ᨲᨴᩉᩩᨸᩮᩣᩈᨳᩮ ᨸᨶ᩠ᨶᩁᩈᩮ ᩈᩦᩈᩴᨶ᩠ᩉᩣᨲᩔ ᩏᨸᩮᩣᩈᨳᩥᨠᩔ ᩏᨸᩁᩥᨸᩣᩈᩣᨴᩅᩁᨣᨲᩔ ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᨸᩣᨲᩩᩁᩉᩮᩣᩈᩥ ᩈᩉᩔᩣᩁᩴ ᩈᨶᩮᨾᩥᨠᩴ ᩈᨶᩣᨽᩥᨠᩴ ᩈᨻ᩠ᨻᩣᨠᩣᩁᨸᩁᩥᨸᩪᩁᩴ. ᨴᩥᩈ᩠ᩅᩣᨶ ᩁᨬ᩠ᨬᩮᩣ ᨡᨲ᩠ᨲᩥᨿᩔ ᨾᩩᨴ᩠ᨵᩣᨽᩥᩈᩥᨲ᩠ᨲᩔ ᩑᨲᨴᩉᩮᩣᩈᩥ – ‘ᩈᩩᨲᩴ ᨡᩮᩣ ᨸᨶ ᨾᩮᨲᩴ – ᨿᩔ ᩁᨬ᩠ᨬᩮᩣ ᨡᨲ᩠ᨲᩥᨿᩔ ᨾᩩᨴ᩠ᨵᩣᨽᩥᩈᩥᨲ᩠ᨲᩔ ᨲᨴᩉᩩᨸᩮᩣᩈᨳᩮ ᨸᨶ᩠ᨶᩁᩈᩮ ᩈᩦᩈᩴᨶ᩠ᩉᩣᨲᩔ ᩏᨸᩮᩣᩈᨳᩥᨠᩔ ᩏᨸᩁᩥᨸᩣᩈᩣᨴᩅᩁᨣᨲᩔ ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᨸᩣᨲᩩᨽᩅᨲᩥ ᩈᩉᩔᩣᩁᩴ ᩈᨶᩮᨾᩥᨠᩴ ᩈᨶᩣᨽᩥᨠᩴ ᩈᨻ᩠ᨻᩣᨠᩣᩁᨸᩁᩥᨸᩪᩁᩴ, ᩈᩮᩣ ᩉᩮᩣᨲᩥ ᩁᩣᨩᩣ ᨧᨠ᩠ᨠᩅᨲ᩠ᨲᩦ’ᨲᩥ. ᩋᩔᩴ ᨶᩩ ᨡᩮᩣ ᩋᩉᩴ ᩁᩣᨩᩣ ᨧᨠ᩠ᨠᩅᨲ᩠ᨲᩦᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩣ ᩏᨭ᩠ᨮᩣᨿᩣᩈᨶᩣ ᩑᨠᩴᩈᩴ ᩏᨲᩁᩣᩈᨦ᩠ᨣᩴ ᨠᩁᩥᨲ᩠ᩅᩣ ᩅᩣᨾᩮᨶ ᩉᨲ᩠ᨳᩮᨶ ᨽᩥᨦ᩠ᨠᩣᩁᩴ ᨣᩉᩮᨲ᩠ᩅᩣ ᨴᨠ᩠ᨡᩥᨱᩮᨶ ᩉᨲ᩠ᨳᩮᨶ ᨧᨠ᩠ᨠᩁᨲᨶᩴ ᩋᨻ᩠ᨽᩩᨠ᩠ᨠᩥᩁᩥ – ‘ᨸᩅᨲ᩠ᨲᨲᩩ ᨽᩅᩴ ᨧᨠ᩠ᨠᩁᨲᨶᩴ, ᩋᨽᩥᩅᩥᨩᩥᨶᩣᨲᩩ ᨽᩅᩴ ᨧᨠ᩠ᨠᩁᨲᨶ’ᨶ᩠ᨲᩥ.

‘‘ᩋᨳ ᨡᩮᩣ ᨲᩴ, ᨽᩥᨠ᩠ᨡᩅᩮ, ᨧᨠ᩠ᨠᩁᨲᨶᩴ ᨸᩩᩁᨲ᩠ᨳᩥᨾᩴ ᨴᩥᩈᩴ ᨸᩅᨲ᩠ᨲᩥ, ᩋᨶ᩠ᩅᨴᩮᩅ ᩁᩣᨩᩣ ᨧᨠ᩠ᨠᩅᨲ᩠ᨲᩦ ᩈᨴ᩠ᨵᩥᩴ ᨧᨲᩩᩁᨦ᩠ᨣᩥᨶᩥᨿᩣ ᩈᩮᨶᩣᨿ. ᨿᩈ᩠ᨾᩥᩴ ᨡᩮᩣ ᨸᨶ, ᨽᩥᨠ᩠ᨡᩅᩮ, ᨸᨴᩮᩈᩮ ᨧᨠ᩠ᨠᩁᨲᨶᩴ ᨸᨲᩥᨭ᩠ᨮᩣᩈᩥ, ᨲᨲ᩠ᨳ ᩁᩣᨩᩣ ᨧᨠ᩠ᨠᩅᨲ᩠ᨲᩦ ᩅᩣᩈᩴ ᩏᨸᨣᨧ᩠ᨨᩥ ᩈᨴ᩠ᨵᩥᩴ ᨧᨲᩩᩁᨦ᩠ᨣᩥᨶᩥᨿᩣ ᩈᩮᨶᩣᨿ. ᨿᩮ ᨡᩮᩣ ᨸᨶ, ᨽᩥᨠ᩠ᨡᩅᩮ, ᨸᩩᩁᨲ᩠ᨳᩥᨾᩣᨿ ᨴᩥᩈᩣᨿ ᨸᨭᩥᩁᩣᨩᩣᨶᩮᩣ, ᨲᩮ ᩁᩣᨩᩣᨶᩴ ᨧᨠ᩠ᨠᩅᨲ᩠ᨲᩥᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᨾᩣᩉᩴᩈᩩ – ‘ᩑᩉᩥ ᨡᩮᩣ, ᨾᩉᩣᩁᩣᨩ, ᩈ᩠ᩅᩣᨣᨲᩴ ᨲᩮ [ᩈᩣᨣᨲᩴ (ᩈᩦ. ᨸᩦ.)] ᨾᩉᩣᩁᩣᨩ, ᩈᨠᩴ ᨲᩮ, ᨾᩉᩣᩁᩣᨩ, ᩋᨶᩩᩈᩣᩈ, ᨾᩉᩣᩁᩣᨩᩣ’ᨲᩥ. ᩁᩣᨩᩣ ᨧᨠ᩠ᨠᩅᨲ᩠ᨲᩦ ᩑᩅᨾᩣᩉ – ‘ᨸᩣᨱᩮᩣ ᨶ ᩉᨶ᩠ᨲᨻ᩠ᨻᩮᩣ, ᩋᨴᩥᨶ᩠ᨶᩴ ᨶᩣᨴᩣᨲᨻ᩠ᨻᩴ, ᨠᩣᨾᩮᩈᩩᨾᩥᨧ᩠ᨨᩣ ᨶ ᨧᩁᩥᨲᨻ᩠ᨻᩣ, ᨾᩩᩈᩣ ᨶ ᨽᩣᩈᩥᨲᨻ᩠ᨻᩣ, ᨾᨩ᩠ᨩᩴ ᨶ ᨸᩣᨲᨻ᩠ᨻᩴ, ᨿᨳᩣᨽᩩᨲ᩠ᨲᨬ᩠ᨧ ᨽᩩᨬ᩠ᨩᨳᩣ’ᨲᩥ. ᨿᩮ ᨡᩮᩣ ᨸᨶ, ᨽᩥᨠ᩠ᨡᩅᩮ, ᨸᩩᩁᨲ᩠ᨳᩥᨾᩣᨿ ᨴᩥᩈᩣᨿ ᨸᨭᩥᩁᩣᨩᩣᨶᩮᩣ, ᨲᩮ ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩋᨶᩩᨿᨶ᩠ᨲᩣ [ᩋᨶᩩᨿᩩᨲ᩠ᨲᩣ (ᩈᩦ. ᨸᩦ.)] ᩋᩉᩮᩈᩩᩴ.

᪘᪖. ‘‘ᩋᨳ ᨡᩮᩣ ᨲᩴ, ᨽᩥᨠ᩠ᨡᩅᩮ, ᨧᨠ᩠ᨠᩁᨲᨶᩴ ᨸᩩᩁᨲ᩠ᨳᩥᨾᩴ ᩈᨾᩩᨴ᩠ᨴᩴ ᩋᨩ᩠ᨫᩮᩣᨣᩣᩉᩮᨲ᩠ᩅᩣ [ᩋᨩ᩠ᨫᩮᩣᨣᩉᩮᨲ᩠ᩅᩣ (ᩈᩦ. ᩈ᩠ᨿᩣ. ᨸᩦ.)] ᨸᨧ᩠ᨧᩩᨲ᩠ᨲᩁᩥᨲ᩠ᩅᩣ ᨴᨠ᩠ᨡᩥᨱᩴ ᨴᩥᩈᩴ ᨸᩅᨲ᩠ᨲᩥ…ᨸᩮ… ᨴᨠ᩠ᨡᩥᨱᩴ ᩈᨾᩩᨴ᩠ᨴᩴ ᩋᨩ᩠ᨫᩮᩣᨣᩣᩉᩮᨲ᩠ᩅᩣ ᨸᨧ᩠ᨧᩩᨲ᩠ᨲᩁᩥᨲ᩠ᩅᩣ ᨸᨧ᩠ᨨᩥᨾᩴ ᨴᩥᩈᩴ ᨸᩅᨲ᩠ᨲᩥ, ᩋᨶ᩠ᩅᨴᩮᩅ ᩁᩣᨩᩣ ᨧᨠ᩠ᨠᩅᨲ᩠ᨲᩦ ᩈᨴ᩠ᨵᩥᩴ ᨧᨲᩩᩁᨦ᩠ᨣᩥᨶᩥᨿᩣ ᩈᩮᨶᩣᨿ. ᨿᩈ᩠ᨾᩥᩴ ᨡᩮᩣ ᨸᨶ, ᨽᩥᨠ᩠ᨡᩅᩮ, ᨸᨴᩮᩈᩮ ᨧᨠ᩠ᨠᩁᨲᨶᩴ ᨸᨲᩥᨭ᩠ᨮᩣᩈᩥ, ᨲᨲ᩠ᨳ ᩁᩣᨩᩣ ᨧᨠ᩠ᨠᩅᨲ᩠ᨲᩦ ᩅᩣᩈᩴ ᩏᨸᨣᨧ᩠ᨨᩥ ᩈᨴ᩠ᨵᩥᩴ ᨧᨲᩩᩁᨦ᩠ᨣᩥᨶᩥᨿᩣ ᩈᩮᨶᩣᨿ. ᨿᩮ ᨡᩮᩣ ᨸᨶ, ᨽᩥᨠ᩠ᨡᩅᩮ, ᨸᨧ᩠ᨨᩥᨾᩣᨿ ᨴᩥᩈᩣᨿ ᨸᨭᩥᩁᩣᨩᩣᨶᩮᩣ, ᨲᩮ ᩁᩣᨩᩣᨶᩴ ᨧᨠ᩠ᨠᩅᨲ᩠ᨲᩥᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᨾᩣᩉᩴᩈᩩ – ‘ᩑᩉᩥ ᨡᩮᩣ, ᨾᩉᩣᩁᩣᨩ, ᩈ᩠ᩅᩣᨣᨲᩴ ᨲᩮ, ᨾᩉᩣᩁᩣᨩ, ᩈᨠᩴ ᨲᩮ, ᨾᩉᩣᩁᩣᨩ, ᩋᨶᩩᩈᩣᩈ, ᨾᩉᩣᩁᩣᨩᩣ’ᨲᩥ. ᩁᩣᨩᩣ ᨧᨠ᩠ᨠᩅᨲ᩠ᨲᩦ ᩑᩅᨾᩣᩉ – ‘ᨸᩣᨱᩮᩣ ᨶ ᩉᨶ᩠ᨲᨻ᩠ᨻᩮᩣ, ᩋᨴᩥᨶ᩠ᨶᩴ ᨶᩣᨴᩣᨲᨻ᩠ᨻᩴ, ᨠᩣᨾᩮᩈᩩᨾᩥᨧ᩠ᨨᩣ ᨶ ᨧᩁᩥᨲᨻ᩠ᨻᩣ, ᨾᩩᩈᩣ ᨶ ᨽᩣᩈᩥᨲᨻ᩠ᨻᩣ, ᨾᨩ᩠ᨩᩴ ᨶ ᨸᩣᨲᨻ᩠ᨻᩴ, ᨿᨳᩣᨽᩩᨲ᩠ᨲᨬ᩠ᨧ ᨽᩩᨬ᩠ᨩᨳᩣ’ᨲᩥ. ᨿᩮ ᨡᩮᩣ ᨸᨶ, ᨽᩥᨠ᩠ᨡᩅᩮ, ᨸᨧ᩠ᨨᩥᨾᩣᨿ ᨴᩥᩈᩣᨿ ᨸᨭᩥᩁᩣᨩᩣᨶᩮᩣ, ᨲᩮ ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩋᨶᩩᨿᨶ᩠ᨲᩣ ᩋᩉᩮᩈᩩᩴ.

᪘᪗. ‘‘ᩋᨳ ᨡᩮᩣ ᨲᩴ, ᨽᩥᨠ᩠ᨡᩅᩮ, ᨧᨠ᩠ᨠᩁᨲᨶᩴ ᨸᨧ᩠ᨨᩥᨾᩴ ᩈᨾᩩᨴ᩠ᨴᩴ ᩋᨩ᩠ᨫᩮᩣᨣᩣᩉᩮᨲ᩠ᩅᩣ ᨸᨧ᩠ᨧᩩᨲ᩠ᨲᩁᩥᨲ᩠ᩅᩣ ᩏᨲ᩠ᨲᩁᩴ ᨴᩥᩈᩴ ᨸᩅᨲ᩠ᨲᩥ, ᩋᨶ᩠ᩅᨴᩮᩅ ᩁᩣᨩᩣ ᨧᨠ᩠ᨠᩅᨲ᩠ᨲᩦ ᩈᨴ᩠ᨵᩥᩴ ᨧᨲᩩᩁᨦ᩠ᨣᩥᨶᩥᨿᩣ ᩈᩮᨶᩣᨿ. ᨿᩈ᩠ᨾᩥᩴ ᨡᩮᩣ ᨸᨶ, ᨽᩥᨠ᩠ᨡᩅᩮ, ᨸᨴᩮᩈᩮ ᨧᨠ᩠ᨠᩁᨲᨶᩴ ᨸᨲᩥᨭ᩠ᨮᩣᩈᩥ, ᨲᨲ᩠ᨳ ᩁᩣᨩᩣ ᨧᨠ᩠ᨠᩅᨲ᩠ᨲᩦ ᩅᩣᩈᩴ ᩏᨸᨣᨧ᩠ᨨᩥ ᩈᨴ᩠ᨵᩥᩴ ᨧᨲᩩᩁᨦ᩠ᨣᩥᨶᩥᨿᩣ ᩈᩮᨶᩣᨿ. ᨿᩮ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩏᨲ᩠ᨲᩁᩣᨿ ᨴᩥᩈᩣᨿ ᨸᨭᩥᩁᩣᨩᩣᨶᩮᩣ, ᨲᩮ ᩁᩣᨩᩣᨶᩴ ᨧᨠ᩠ᨠᩅᨲ᩠ᨲᩥᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᨾᩣᩉᩴᩈᩩ – ‘ᩑᩉᩥ ᨡᩮᩣ, ᨾᩉᩣᩁᩣᨩ, ᩈ᩠ᩅᩣᨣᨲᩴ ᨲᩮ, ᨾᩉᩣᩁᩣᨩ, ᩈᨠᩴ ᨲᩮ, ᨾᩉᩣᩁᩣᨩ, ᩋᨶᩩᩈᩣᩈ, ᨾᩉᩣᩁᩣᨩᩣ’ᨲᩥ. ᩁᩣᨩᩣ ᨧᨠ᩠ᨠᩅᨲ᩠ᨲᩦ ᩑᩅᨾᩣᩉ – ‘ᨸᩣᨱᩮᩣ ᨶ ᩉᨶ᩠ᨲᨻ᩠ᨻᩮᩣ, ᩋᨴᩥᨶ᩠ᨶᩴ ᨶᩣᨴᩣᨲᨻ᩠ᨻᩴ, ᨠᩣᨾᩮᩈᩩᨾᩥᨧ᩠ᨨᩣ ᨶ ᨧᩁᩥᨲᨻ᩠ᨻᩣ, ᨾᩩᩈᩣ ᨶ ᨽᩣᩈᩥᨲᨻ᩠ᨻᩣ, ᨾᨩ᩠ᨩᩴ ᨶ ᨸᩣᨲᨻ᩠ᨻᩴ, ᨿᨳᩣᨽᩩᨲ᩠ᨲᨬ᩠ᨧ ᨽᩩᨬ᩠ᨩᨳᩣ’ᨲᩥ. ᨿᩮ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩏᨲ᩠ᨲᩁᩣᨿ ᨴᩥᩈᩣᨿ ᨸᨭᩥᩁᩣᨩᩣᨶᩮᩣ, ᨲᩮ ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩋᨶᩩᨿᨶ᩠ᨲᩣ ᩋᩉᩮᩈᩩᩴ.

‘‘ᩋᨳ ᨡᩮᩣ ᨲᩴ, ᨽᩥᨠ᩠ᨡᩅᩮ, ᨧᨠ᩠ᨠᩁᨲᨶᩴ ᩈᨾᩩᨴ᩠ᨴᨸᩁᩥᨿᨶ᩠ᨲᩴ ᨸᨳᩅᩥᩴ ᩋᨽᩥᩅᩥᨩᩥᨶᩥᨲ᩠ᩅᩣ ᨲᨾᩮᩅ ᩁᩣᨩᨵᩣᨶᩥᩴ ᨸᨧ᩠ᨧᩣᨣᨶ᩠ᨲ᩠ᩅᩣ ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩋᨶ᩠ᨲᩮᨸᩩᩁᨴ᩠ᩅᩣᩁᩮ ᩋᨲ᩠ᨳᨠᩁᨱᨸᨾᩩᨡᩮ [ᩋᨯ᩠ᨯᨠᩁᨱᨸᨾᩩᨡᩮ (ᨠ.)] ᩋᨠ᩠ᨡᩣᩉᨲᩴ ᨾᨬ᩠ᨬᩮ ᩋᨭ᩠ᨮᩣᩈᩥ ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᩋᨶ᩠ᨲᩮᨸᩩᩁᩴ ᩏᨸᩈᩮᩣᨽᨿᨾᩣᨶᩴ.

ᨴᩩᨲᩥᨿᩣᨴᩥᨧᨠ᩠ᨠᩅᨲ᩠ᨲᩥᨠᨳᩣ

᪘᪘. ‘‘ᨴᩩᨲᩥᨿᩮᩣᨸᩥ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨧᨠ᩠ᨠᩅᨲ᩠ᨲᩦ…ᨸᩮ… ᨲᨲᩥᨿᩮᩣᨸᩥ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨧᨠ᩠ᨠᩅᨲ᩠ᨲᩦ… ᨧᨲᩩᨲ᩠ᨳᩮᩣᨸᩥ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨧᨠ᩠ᨠᩅᨲ᩠ᨲᩦ… ᨸᨬ᩠ᨧᨾᩮᩣᨸᩥ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨧᨠ᩠ᨠᩅᨲ᩠ᨲᩦ… ᨨᨭ᩠ᨮᩮᩣᨸᩥ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨧᨠ᩠ᨠᩅᨲ᩠ᨲᩦ… ᩈᨲ᩠ᨲᨾᩮᩣᨸᩥ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨧᨠ᩠ᨠᩅᨲ᩠ᨲᩦ ᨻᩉᩩᨶ᩠ᨶᩴ ᩅᩔᩣᨶᩴ ᨻᩉᩩᨶ᩠ᨶᩴ ᩅᩔᩈᨲᩣᨶᩴ ᨻᩉᩩᨶ᩠ᨶᩴ ᩅᩔᩈᩉᩔᩣᨶᩴ ᩋᨧ᩠ᨧᨿᩮᨶ ᩋᨬ᩠ᨬᨲᩁᩴ ᨸᩩᩁᩥᩈᩴ ᩌᨾᨶ᩠ᨲᩮᩈᩥ – ‘ᨿᨴᩣ ᨲ᩠ᩅᩴ, ᩋᨾ᩠ᨽᩮᩣ ᨸᩩᩁᩥᩈ, ᨸᩔᩮᨿ᩠ᨿᩣᩈᩥ ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᩒᩈᨠ᩠ᨠᩥᨲᩴ ᨮᩣᨶᩣ ᨧᩩᨲᩴ, ᩋᨳ ᨾᩮ ᩌᩁᩮᩣᨧᩮᨿ᩠ᨿᩣᩈᩦ’ᨲᩥ. ‘ᩑᩅᩴ, ᨴᩮᩅᩣ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᩈᩮᩣ ᨸᩩᩁᩥᩈᩮᩣ ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᨸᨧ᩠ᨧᩔᩮᩣᩈᩥ. ᩋᨴ᩠ᨴᩈᩣ ᨡᩮᩣ, ᨽᩥᨠ᩠ᨡᩅᩮ, ᩈᩮᩣ ᨸᩩᩁᩥᩈᩮᩣ ᨻᩉᩩᨶ᩠ᨶᩴ ᩅᩔᩣᨶᩴ ᨻᩉᩩᨶ᩠ᨶᩴ ᩅᩔᩈᨲᩣᨶᩴ ᨻᩉᩩᨶ᩠ᨶᩴ ᩅᩔᩈᩉᩔᩣᨶᩴ ᩋᨧ᩠ᨧᨿᩮᨶ ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᩒᩈᨠ᩠ᨠᩥᨲᩴ ᨮᩣᨶᩣ ᨧᩩᨲᩴ. ᨴᩥᩈ᩠ᩅᩣᨶ ᨿᩮᨶ ᩁᩣᨩᩣ ᨧᨠ᩠ᨠᩅᨲ᩠ᨲᩦ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩁᩣᨩᩣᨶᩴ ᨧᨠ᩠ᨠᩅᨲ᩠ᨲᩥᩴ ᩑᨲᨴᩅᩮᩣᨧ – ‘ᨿᨣ᩠ᨥᩮ, ᨴᩮᩅ, ᨩᩣᨶᩮᨿ᩠ᨿᩣᩈᩥ, ᨴᩥᨻ᩠ᨻᩴ ᨲᩮ ᨧᨠ᩠ᨠᩁᨲᨶᩴ ᩒᩈᨠ᩠ᨠᩥᨲᩴ ᨮᩣᨶᩣ ᨧᩩᨲ’ᨶ᩠ᨲᩥ?

᪘᪙. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨧᨠ᩠ᨠᩅᨲ᩠ᨲᩦ ᨩᩮᨭ᩠ᨮᨸᩩᨲ᩠ᨲᩴ ᨠᩩᨾᩣᩁᩴ ᩌᨾᨶ᩠ᨲᩣᨸᩮᨲ᩠ᩅᩣ ᩑᨲᨴᩅᩮᩣᨧ – ‘ᨴᩥᨻ᩠ᨻᩴ ᨠᩥᩁ ᨾᩮ, ᨲᩣᨲ ᨠᩩᨾᩣᩁ, ᨧᨠ᩠ᨠᩁᨲᨶᩴ ᩒᩈᨠ᩠ᨠᩥᨲᩴ, ᨮᩣᨶᩣ ᨧᩩᨲᩴ, ᩈᩩᨲᩴ ᨡᩮᩣ ᨸᨶ ᨾᩮᨲᩴ – ᨿᩔ ᩁᨬ᩠ᨬᩮᩣ ᨧᨠ᩠ᨠᩅᨲ᩠ᨲᩥᩔ ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᩒᩈᨠ᩠ᨠᨲᩥ, ᨮᩣᨶᩣ ᨧᩅᨲᩥ, ᨶ ᨴᩣᨶᩥ ᨲᩮᨶ ᩁᨬ᩠ᨬᩣ ᨧᩥᩁᩴ ᨩᩦᩅᩥᨲᨻ᩠ᨻᩴ ᩉᩮᩣᨲᩦᨲᩥ. ᨽᩩᨲ᩠ᨲᩣ ᨡᩮᩣ ᨸᨶ ᨾᩮ ᨾᩣᨶᩩᩈᨠᩣ ᨠᩣᨾᩣ, ᩈᨾᨿᩮᩣ ᨴᩣᨶᩥ ᨾᩮ ᨴᩥᨻ᩠ᨻᩮ ᨠᩣᨾᩮ ᨸᩁᩥᨿᩮᩈᩥᨲᩩᩴ, ᩑᩉᩥ ᨲ᩠ᩅᩴ, ᨲᩣᨲ ᨠᩩᨾᩣᩁ, ᩍᨾᩴ ᩈᨾᩩᨴ᩠ᨴᨸᩁᩥᨿᨶ᩠ᨲᩴ ᨸᨳᩅᩥᩴ ᨸᨭᩥᨸᨩ᩠ᨩ. ᩋᩉᩴ ᨸᨶ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᩣᨾᩦ’ᨲᩥ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨧᨠ᩠ᨠᩅᨲ᩠ᨲᩦ ᨩᩮᨭ᩠ᨮᨸᩩᨲ᩠ᨲᩴ ᨠᩩᨾᩣᩁᩴ ᩈᩣᨵᩩᨠᩴ ᩁᨩ᩠ᨩᩮ ᩈᨾᨶᩩᩈᩣᩈᩥᨲ᩠ᩅᩣ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥ. ᩈᨲ᩠ᨲᩣᩉᨸᨻ᩠ᨻᨩᩥᨲᩮ ᨡᩮᩣ ᨸᨶ, ᨽᩥᨠ᩠ᨡᩅᩮ, ᩁᩣᨩᩥᩈᩥᨾ᩠ᩉᩥ ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᩋᨶ᩠ᨲᩁᨵᩣᨿᩥ.

᪙᪐. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩋᨬ᩠ᨬᨲᩁᩮᩣ ᨸᩩᩁᩥᩈᩮᩣ ᨿᩮᨶ ᩁᩣᨩᩣ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩁᩣᨩᩣᨶᩴ ᨡᨲ᩠ᨲᩥᨿᩴ ᨾᩩᨴ᩠ᨵᩣᨽᩥᩈᩥᨲ᩠ᨲᩴ ᩑᨲᨴᩅᩮᩣᨧ – ‘ᨿᨣ᩠ᨥᩮ, ᨴᩮᩅ, ᨩᩣᨶᩮᨿ᩠ᨿᩣᩈᩥ, ᨴᩥᨻ᩠ᨻᩴ ᨧᨠ᩠ᨠᩁᨲᨶᩴ ᩋᨶ᩠ᨲᩁᩉᩥᨲ’ᨶ᩠ᨲᩥ? ᩋᨳ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩣ ᨴᩥᨻ᩠ᨻᩮ ᨧᨠ᩠ᨠᩁᨲᨶᩮ ᩋᨶ᩠ᨲᩁᩉᩥᨲᩮ ᩋᨶᨲ᩠ᨲᨾᨶᩮᩣ ᩋᩉᩮᩣᩈᩥ. ᩋᨶᨲ᩠ᨲᨾᨶᨲᨬ᩠ᨧ ᨸᨭᩥᩈᩴᩅᩮᨴᩮᩈᩥ; ᨶᩮᩣ ᨧ ᨡᩮᩣ ᩁᩣᨩᩥᩈᩥᩴ ᩏᨸᩈᨦ᩠ᨠᨾᩥᨲ᩠ᩅᩣ ᩋᩁᩥᨿᩴ ᨧᨠ᩠ᨠᩅᨲ᩠ᨲᩥᩅᨲ᩠ᨲᩴ ᨸᩩᨧ᩠ᨨᩥ. ᩈᩮᩣ ᩈᨾᨲᩮᨶᩮᩅ ᩈᩩᨴᩴ ᨩᨶᨸᨴᩴ ᨸᩈᩣᩈᨲᩥ. ᨲᩔ ᩈᨾᨲᩮᨶ ᨩᨶᨸᨴᩴ ᨸᩈᩣᩈᨲᩮᩣ ᨸᩩᨻ᩠ᨻᩮᨶᩣᨸᩁᩴ ᨩᨶᨸᨴᩣ ᨶ ᨸᨻ᩠ᨻᨶ᩠ᨲᩥ, ᨿᨳᩣ ᨲᩴ ᨸᩩᨻ᩠ᨻᨠᩣᨶᩴ ᩁᩣᨩᩪᨶᩴ ᩋᩁᩥᨿᩮ ᨧᨠ᩠ᨠᩅᨲ᩠ᨲᩥᩅᨲ᩠ᨲᩮ ᩅᨲ᩠ᨲᨾᩣᨶᩣᨶᩴ.

‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩋᨾᨧ᩠ᨧᩣ ᨸᩣᩁᩥᩈᨩ᩠ᨩᩣ ᨣᨱᨠᨾᩉᩣᨾᨲ᩠ᨲᩣ ᩋᨶᩦᨠᨭ᩠ᨮᩣ ᨴᩮᩣᩅᩣᩁᩥᨠᩣ ᨾᨶ᩠ᨲᩔᩣᨩᩦᩅᩥᨶᩮᩣ ᩈᨶ᩠ᨶᩥᨸᨲᩥᨲ᩠ᩅᩣ ᩁᩣᨩᩣᨶᩴ ᨡᨲ᩠ᨲᩥᨿᩴ ᨾᩩᨴ᩠ᨵᩣᨽᩥᩈᩥᨲ᩠ᨲᩴ ᩑᨲᨴᩅᩮᩣᨧᩩᩴ – ‘ᨶ ᨡᩮᩣ ᨲᩮ, ᨴᩮᩅ, ᩈᨾᨲᩮᨶ (ᩈᩩᨴᩴ) ᨩᨶᨸᨴᩴ ᨸᩈᩣᩈᨲᩮᩣ ᨸᩩᨻ᩠ᨻᩮᨶᩣᨸᩁᩴ ᨩᨶᨸᨴᩣ ᨸᨻ᩠ᨻᨶ᩠ᨲᩥ, ᨿᨳᩣ ᨲᩴ ᨸᩩᨻ᩠ᨻᨠᩣᨶᩴ ᩁᩣᨩᩪᨶᩴ ᩋᩁᩥᨿᩮ ᨧᨠ᩠ᨠᩅᨲ᩠ᨲᩥᩅᨲ᩠ᨲᩮ ᩅᨲ᩠ᨲᨾᩣᨶᩣᨶᩴ. ᩈᩴᩅᩥᨩ᩠ᨩᨶ᩠ᨲᩥ ᨡᩮᩣ ᨲᩮ, ᨴᩮᩅ, ᩅᩥᨩᩥᨲᩮ ᩋᨾᨧ᩠ᨧᩣ ᨸᩣᩁᩥᩈᨩ᩠ᨩᩣ ᨣᨱᨠᨾᩉᩣᨾᨲ᩠ᨲᩣ ᩋᨶᩦᨠᨭ᩠ᨮᩣ ᨴᩮᩣᩅᩣᩁᩥᨠᩣ ᨾᨶ᩠ᨲᩔᩣᨩᩦᩅᩥᨶᩮᩣ ᨾᨿᨬ᩠ᨧᩮᩅ ᩋᨬ᩠ᨬᩮ ᨧ [ᩋᨬ᩠ᨬᩮ ᨧ ᨸᨱ᩠ᨯᩥᨲᩮ ᩈᨾᨱᨻᩕᩣᩉ᩠ᨾᨱᩮ ᨸᩩᨧ᩠ᨨᩮᨿ᩠ᨿᩣᩈᩥ (ᨠ.)] ᨿᩮ ᨾᨿᩴ ᩋᩁᩥᨿᩴ ᨧᨠ᩠ᨠᩅᨲ᩠ᨲᩥᩅᨲ᩠ᨲᩴ ᨵᩣᩁᩮᨾ. ᩍᨦ᩠ᨥ ᨲ᩠ᩅᩴ, ᨴᩮᩅ, ᩋᨾ᩠ᩉᩮ ᩋᩁᩥᨿᩴ ᨧᨠ᩠ᨠᩅᨲ᩠ᨲᩥᩅᨲ᩠ᨲᩴ ᨸᩩᨧ᩠ᨨ. ᨲᩔ ᨲᩮ ᨾᨿᩴ ᩋᩁᩥᨿᩴ ᨧᨠ᩠ᨠᩅᨲ᩠ᨲᩥᩅᨲ᩠ᨲᩴ ᨸᩩᨭ᩠ᨮᩣ ᨻ᩠ᨿᩣᨠᩁᩥᩔᩣᨾᩣ’ᨲᩥ.

ᩌᨿᩩᩅᨱ᩠ᨱᩣᨴᩥᨸᩁᩥᨿᩣᨶᩥᨠᨳᩣ

᪙᪑. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩣ ᩋᨾᨧ᩠ᨧᩮ ᨸᩣᩁᩥᩈᨩ᩠ᨩᩮ ᨣᨱᨠᨾᩉᩣᨾᨲ᩠ᨲᩮ ᩋᨶᩦᨠᨭ᩠ᨮᩮ ᨴᩮᩣᩅᩣᩁᩥᨠᩮ ᨾᨶ᩠ᨲᩔᩣᨩᩦᩅᩥᨶᩮᩣ ᩈᨶ᩠ᨶᩥᨸᩣᨲᩮᨲ᩠ᩅᩣ ᩋᩁᩥᨿᩴ ᨧᨠ᩠ᨠᩅᨲ᩠ᨲᩥᩅᨲ᩠ᨲᩴ ᨸᩩᨧ᩠ᨨᩥ. ᨲᩔ ᨲᩮ ᩋᩁᩥᨿᩴ ᨧᨠ᩠ᨠᩅᨲ᩠ᨲᩥᩅᨲ᩠ᨲᩴ ᨸᩩᨭ᩠ᨮᩣ ᨻ᩠ᨿᩣᨠᩁᩥᩴᩈᩩ. ᨲᩮᩈᩴ ᩈᩩᨲ᩠ᩅᩣ ᨵᨾ᩠ᨾᩥᨠᨬ᩠ᩉᩥ ᨡᩮᩣ ᩁᨠ᩠ᨡᩣᩅᩁᨱᨣᩩᨲ᩠ᨲᩥᩴ ᩈᩴᩅᩥᨴᩉᩥ, ᨶᩮᩣ ᨧ ᨡᩮᩣ ᩋᨵᨶᩣᨶᩴ ᨵᨶᨾᨶᩩᨸ᩠ᨸᨴᩣᩈᩥ. ᩋᨵᨶᩣᨶᩴ ᨵᨶᩮ ᩋᨶᨶᩩᨸ᩠ᨸᨴᩥᨿᨾᩣᨶᩮ ᨴᩣᩃᩥᨴ᩠ᨴᩥᨿᩴ ᩅᩮᨸᩩᩃ᩠ᩃᨾᨣᨾᩣᩈᩥ. ᨴᩣᩃᩥᨴ᩠ᨴᩥᨿᩮ ᩅᩮᨸᩩᩃ᩠ᩃᩴ ᨣᨲᩮ ᩋᨬ᩠ᨬᨲᩁᩮᩣ ᨸᩩᩁᩥᩈᩮᩣ ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩥ. ᨲᨾᩮᨶᩴ ᩋᨣ᩠ᨣᩉᩮᩈᩩᩴ. ᨣᩉᩮᨲ᩠ᩅᩣ ᩁᨬ᩠ᨬᩮᩣ ᨡᨲ᩠ᨲᩥᨿᩔ ᨾᩩᨴ᩠ᨵᩣᨽᩥᩈᩥᨲ᩠ᨲᩔ ᨴᩔᩮᩈᩩᩴ – ‘ᩋᨿᩴ, ᨴᩮᩅ, ᨸᩩᩁᩥᩈᩮᩣ ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩦ’ᨲᩥ. ᩑᩅᩴ ᩅᩩᨲ᩠ᨲᩮ, ᨽᩥᨠ᩠ᨡᩅᩮ, ᩁᩣᨩᩣ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩣ ᨲᩴ ᨸᩩᩁᩥᩈᩴ ᩑᨲᨴᩅᩮᩣᨧ – ‘ᩈᨧ᩠ᨧᩴ ᨠᩥᩁ ᨲ᩠ᩅᩴ, ᩋᨾ᩠ᨽᩮᩣ ᨸᩩᩁᩥᩈ, ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩦ’ᨲᩥ [ᩌᨴᩥᨿᩈᩦᨲᩥ (ᩈ᩠ᨿᩣ.)]? ‘ᩈᨧ᩠ᨧᩴ, ᨴᩮᩅᩣ’ᨲᩥ. ‘ᨠᩥᩴ ᨠᩣᩁᨱᩣ’ᨲᩥ? ‘ᨶ ᩉᩥ, ᨴᩮᩅ, ᨩᩦᩅᩣᨾᩦ’ᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩣ ᨲᩔ ᨸᩩᩁᩥᩈᩔ ᨵᨶᨾᨶᩩᨸ᩠ᨸᨴᩣᩈᩥ – ‘ᩍᨾᩥᨶᩣ ᨲ᩠ᩅᩴ, ᩋᨾ᩠ᨽᩮᩣ ᨸᩩᩁᩥᩈ, ᨵᨶᩮᨶ ᩋᨲ᩠ᨲᨶᩣ ᨧ ᨩᩦᩅᩣᩉᩥ, ᨾᩣᨲᩣᨸᩥᨲᩁᩮᩣ ᨧ ᨸᩮᩣᩈᩮᩉᩥ, ᨸᩩᨲ᩠ᨲᨴᩣᩁᨬ᩠ᨧ ᨸᩮᩣᩈᩮᩉᩥ, ᨠᨾ᩠ᨾᨶ᩠ᨲᩮ ᨧ ᨸᨿᩮᩣᨩᩮᩉᩥ, ᩈᨾᨱᨻᩕᩣᩉ᩠ᨾᨱᩮᩈᩩ [ᩈᨾᨱᩮᩈᩩ ᨻᩕᩣᩉ᩠ᨾᨱᩮᩈᩩ (ᨻᩉᩪᩈᩩ)] ᩏᨴ᩠ᨵᨣ᩠ᨣᩥᨠᩴ ᨴᨠ᩠ᨡᩥᨱᩴ ᨸᨲᩥᨭ᩠ᨮᩣᨸᩮᩉᩥ ᩈᩮᩣᩅᨣ᩠ᨣᩥᨠᩴ ᩈᩩᨡᩅᩥᨸᩣᨠᩴ ᩈᨣ᩠ᨣᩈᩴᩅᨲ᩠ᨲᨶᩥᨠ’ᨶ᩠ᨲᩥ. ‘ᩑᩅᩴ, ᨴᩮᩅᩣ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᩈᩮᩣ ᨸᩩᩁᩥᩈᩮᩣ ᩁᨬ᩠ᨬᩮᩣ ᨡᨲ᩠ᨲᩥᨿᩔ ᨾᩩᨴ᩠ᨵᩣᨽᩥᩈᩥᨲ᩠ᨲᩔ ᨸᨧ᩠ᨧᩔᩮᩣᩈᩥ.

‘‘ᩋᨬ᩠ᨬᨲᩁᩮᩣᨸᩥ ᨡᩮᩣ, ᨽᩥᨠ᩠ᨡᩅᩮ, ᨸᩩᩁᩥᩈᩮᩣ ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩥ. ᨲᨾᩮᨶᩴ ᩋᨣ᩠ᨣᩉᩮᩈᩩᩴ. ᨣᩉᩮᨲ᩠ᩅᩣ ᩁᨬ᩠ᨬᩮᩣ ᨡᨲ᩠ᨲᩥᨿᩔ ᨾᩩᨴ᩠ᨵᩣᨽᩥᩈᩥᨲ᩠ᨲᩔ ᨴᩔᩮᩈᩩᩴ – ‘ᩋᨿᩴ, ᨴᩮᩅ, ᨸᩩᩁᩥᩈᩮᩣ ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩦ’ᨲᩥ. ᩑᩅᩴ ᩅᩩᨲ᩠ᨲᩮ, ᨽᩥᨠ᩠ᨡᩅᩮ, ᩁᩣᨩᩣ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩣ ᨲᩴ ᨸᩩᩁᩥᩈᩴ ᩑᨲᨴᩅᩮᩣᨧ – ‘ᩈᨧ᩠ᨧᩴ ᨠᩥᩁ ᨲ᩠ᩅᩴ, ᩋᨾ᩠ᨽᩮᩣ ᨸᩩᩁᩥᩈ, ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩦ’ᨲᩥ? ‘ᩈᨧ᩠ᨧᩴ, ᨴᩮᩅᩣ’ᨲᩥ. ‘ᨠᩥᩴ ᨠᩣᩁᨱᩣ’ᨲᩥ? ‘ᨶ ᩉᩥ, ᨴᩮᩅ, ᨩᩦᩅᩣᨾᩦ’ᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩣ ᨲᩔ ᨸᩩᩁᩥᩈᩔ ᨵᨶᨾᨶᩩᨸ᩠ᨸᨴᩣᩈᩥ – ‘ᩍᨾᩥᨶᩣ ᨲ᩠ᩅᩴ, ᩋᨾ᩠ᨽᩮᩣ ᨸᩩᩁᩥᩈ, ᨵᨶᩮᨶ ᩋᨲ᩠ᨲᨶᩣ ᨧ ᨩᩦᩅᩣᩉᩥ, ᨾᩣᨲᩣᨸᩥᨲᩁᩮᩣ ᨧ ᨸᩮᩣᩈᩮᩉᩥ, ᨸᩩᨲ᩠ᨲᨴᩣᩁᨬ᩠ᨧ ᨸᩮᩣᩈᩮᩉᩥ, ᨠᨾ᩠ᨾᨶ᩠ᨲᩮ ᨧ ᨸᨿᩮᩣᨩᩮᩉᩥ, ᩈᨾᨱᨻᩕᩣᩉ᩠ᨾᨱᩮᩈᩩ ᩏᨴ᩠ᨵᨣ᩠ᨣᩥᨠᩴ ᨴᨠ᩠ᨡᩥᨱᩴ ᨸᨲᩥᨭ᩠ᨮᩣᨸᩮᩉᩥ ᩈᩮᩣᩅᨣ᩠ᨣᩥᨠᩴ ᩈᩩᨡᩅᩥᨸᩣᨠᩴ ᩈᨣ᩠ᨣᩈᩴᩅᨲ᩠ᨲᨶᩥᨠ’ᨶ᩠ᨲᩥ. ‘ᩑᩅᩴ, ᨴᩮᩅᩣ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᩈᩮᩣ ᨸᩩᩁᩥᩈᩮᩣ ᩁᨬ᩠ᨬᩮᩣ ᨡᨲ᩠ᨲᩥᨿᩔ ᨾᩩᨴ᩠ᨵᩣᨽᩥᩈᩥᨲ᩠ᨲᩔ ᨸᨧ᩠ᨧᩔᩮᩣᩈᩥ.

᪙᪒. ‘‘ᩋᩔᩮᩣᩈᩩᩴ ᨡᩮᩣ, ᨽᩥᨠ᩠ᨡᩅᩮ, ᨾᨶᩩᩔᩣ – ‘ᨿᩮ ᨠᩥᩁ, ᨽᩮᩣ, ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᨶ᩠ᨲᩥ, ᨲᩮᩈᩴ ᩁᩣᨩᩣ ᨵᨶᨾᨶᩩᨸ᩠ᨸᨴᩮᨲᩦ’ᨲᩥ. ᩈᩩᨲ᩠ᩅᩣᨶ ᨲᩮᩈᩴ ᩑᨲᨴᩉᩮᩣᩈᩥ – ‘ᨿᩴᨶᩪᨶ ᨾᨿᨾ᩠ᨸᩥ ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩮᨿ᩠ᨿᩣᨾᩣ’ᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩋᨬ᩠ᨬᨲᩁᩮᩣ ᨸᩩᩁᩥᩈᩮᩣ ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩥ. ᨲᨾᩮᨶᩴ ᩋᨣ᩠ᨣᩉᩮᩈᩩᩴ. ᨣᩉᩮᨲ᩠ᩅᩣ ᩁᨬ᩠ᨬᩮᩣ ᨡᨲ᩠ᨲᩥᨿᩔ ᨾᩩᨴ᩠ᨵᩣᨽᩥᩈᩥᨲ᩠ᨲᩔ ᨴᩔᩮᩈᩩᩴ – ‘ᩋᨿᩴ, ᨴᩮᩅ, ᨸᩩᩁᩥᩈᩮᩣ ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩦ’ᨲᩥ. ᩑᩅᩴ ᩅᩩᨲ᩠ᨲᩮ, ᨽᩥᨠ᩠ᨡᩅᩮ, ᩁᩣᨩᩣ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩣ ᨲᩴ ᨸᩩᩁᩥᩈᩴ ᩑᨲᨴᩅᩮᩣᨧ – ‘ᩈᨧ᩠ᨧᩴ ᨠᩥᩁ ᨲ᩠ᩅᩴ, ᩋᨾ᩠ᨽᩮᩣ ᨸᩩᩁᩥᩈ, ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩦ’ᨲᩥ? ‘ᩈᨧ᩠ᨧᩴ, ᨴᩮᩅᩣ’ᨲᩥ. ‘ᨠᩥᩴ ᨠᩣᩁᨱᩣ’ᨲᩥ? ‘ᨶ ᩉᩥ, ᨴᩮᩅ, ᨩᩦᩅᩣᨾᩦ’ᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩁᨬ᩠ᨬᩮᩣ ᨡᨲ᩠ᨲᩥᨿᩔ ᨾᩩᨴ᩠ᨵᩣᨽᩥᩈᩥᨲ᩠ᨲᩔ ᩑᨲᨴᩉᩮᩣᩈᩥ – ‘ᩈᨧᩮ ᨡᩮᩣ ᩋᩉᩴ ᨿᩮᩣ ᨿᩮᩣ ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩥᩔᨲᩥ, ᨲᩔ ᨲᩔ ᨵᨶᨾᨶᩩᨸ᩠ᨸᨴᩔᩣᨾᩥ, ᩑᩅᨾᩥᨴᩴ ᩋᨴᩥᨶ᩠ᨶᩣᨴᩣᨶᩴ ᨸᩅᨯ᩠ᨰᩥᩔᨲᩥ. ᨿᩴᨶᩪᨶᩣᩉᩴ ᩍᨾᩴ ᨸᩩᩁᩥᩈᩴ ᩈᩩᨶᩥᩈᩮᨵᩴ ᨶᩥᩈᩮᨵᩮᨿ᩠ᨿᩴ, ᨾᩪᩃᨥᨧ᩠ᨧᩴ [ᨾᩪᩃᨥᨧ᩠ᨨᩴ (ᩈ᩠ᨿᩣ.), ᨾᩪᩃᨨᩮᨩ᩠ᨩ (ᨠ.)] ᨠᩁᩮᨿ᩠ᨿᩴ, ᩈᩦᩈᨾᩔ ᨨᩥᨶ᩠ᨴᩮᨿ᩠ᨿ’ᨶ᩠ᨲᩥ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩁᩣᨩᩣ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩣ ᨸᩩᩁᩥᩈᩮ ᩌᨱᩣᨸᩮᩈᩥ – ‘ᨲᩮᨶ ᩉᩥ, ᨽᨱᩮ, ᩍᨾᩴ ᨸᩩᩁᩥᩈᩴ ᨴᩊ᩠ᩉᩣᨿ ᩁᨩ᩠ᨩᩩᨿᩣ ᨸᨧ᩠ᨨᩣᨻᩣᩉᩴ [ᨸᨧ᩠ᨨᩣᨻᩣᩉᩩᩴ (ᩈ᩠ᨿᩣ.)] ᨣᩣᩊ᩠ᩉᨻᨶ᩠ᨵᨶᩴ ᨻᨶ᩠ᨵᩥᨲ᩠ᩅᩣ ᨡᩩᩁᨾᩩᨱ᩠ᨯᩴ ᨠᩁᩥᨲ᩠ᩅᩣ ᨡᩁᩔᩁᩮᨶ ᨸᨱᩅᩮᨶ ᩁᨳᩥᨠᩣᨿ ᩁᨳᩥᨠᩴ ᩈᩥᨦ᩠ᨥᩣᨭᨠᩮᨶ ᩈᩥᨦ᩠ᨥᩣᨭᨠᩴ ᨸᩁᩥᨶᩮᨲ᩠ᩅᩣ ᨴᨠ᩠ᨡᩥᨱᩮᨶ ᨴ᩠ᩅᩣᩁᩮᨶ ᨶᩥᨠ᩠ᨡᨾᩥᨲ᩠ᩅᩣ ᨴᨠ᩠ᨡᩥᨱᨲᩮᩣ ᨶᨣᩁᩔ ᩈᩩᨶᩥᩈᩮᨵᩴ ᨶᩥᩈᩮᨵᩮᨳ, ᨾᩪᩃᨥᨧ᩠ᨧᩴ ᨠᩁᩮᩣᨳ, ᩈᩦᩈᨾᩔ ᨨᩥᨶ᩠ᨴᨳᩣ’ᨲᩥ. ‘ᩑᩅᩴ, ᨴᩮᩅᩣ’ᨲᩥ ᨡᩮᩣ, ᨽᩥᨠ᩠ᨡᩅᩮ, ᨲᩮ ᨸᩩᩁᩥᩈᩣ ᩁᨬ᩠ᨬᩮᩣ ᨡᨲ᩠ᨲᩥᨿᩔ ᨾᩩᨴ᩠ᨵᩣᨽᩥᩈᩥᨲ᩠ᨲᩔ ᨸᨭᩥᩔᩩᨲ᩠ᩅᩣ ᨲᩴ ᨸᩩᩁᩥᩈᩴ ᨴᩊ᩠ᩉᩣᨿ ᩁᨩ᩠ᨩᩩᨿᩣ ᨸᨧ᩠ᨨᩣᨻᩣᩉᩴ ᨣᩣᩊ᩠ᩉᨻᨶ᩠ᨵᨶᩴ ᨻᨶ᩠ᨵᩥᨲ᩠ᩅᩣ ᨡᩩᩁᨾᩩᨱ᩠ᨯᩴ ᨠᩁᩥᨲ᩠ᩅᩣ ᨡᩁᩔᩁᩮᨶ ᨸᨱᩅᩮᨶ ᩁᨳᩥᨠᩣᨿ ᩁᨳᩥᨠᩴ ᩈᩥᨦ᩠ᨥᩣᨭᨠᩮᨶ ᩈᩥᨦ᩠ᨥᩣᨭᨠᩴ ᨸᩁᩥᨶᩮᨲ᩠ᩅᩣ ᨴᨠ᩠ᨡᩥᨱᩮᨶ ᨴ᩠ᩅᩣᩁᩮᨶ ᨶᩥᨠ᩠ᨡᨾᩥᨲ᩠ᩅᩣ ᨴᨠ᩠ᨡᩥᨱᨲᩮᩣ ᨶᨣᩁᩔ ᩈᩩᨶᩥᩈᩮᨵᩴ ᨶᩥᩈᩮᨵᩮᩈᩩᩴ, ᨾᩪᩃᨥᨧ᩠ᨧᩴ ᩋᨠᩴᩈᩩ, ᩈᩦᩈᨾᩔ ᨨᩥᨶ᩠ᨴᩥᩴᩈᩩ.

᪙᪓. ‘‘ᩋᩔᩮᩣᩈᩩᩴ ᨡᩮᩣ, ᨽᩥᨠ᩠ᨡᩅᩮ, ᨾᨶᩩᩔᩣ – ‘ᨿᩮ ᨠᩥᩁ, ᨽᩮᩣ, ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᨶ᩠ᨲᩥ, ᨲᩮ ᩁᩣᨩᩣ ᩈᩩᨶᩥᩈᩮᨵᩴ ᨶᩥᩈᩮᨵᩮᨲᩥ, ᨾᩪᩃᨥᨧ᩠ᨧᩴ ᨠᩁᩮᩣᨲᩥ, ᩈᩦᩈᩣᨶᩥ ᨲᩮᩈᩴ ᨨᩥᨶ᩠ᨴᨲᩦ’ᨲᩥ. ᩈᩩᨲ᩠ᩅᩣᨶ ᨲᩮᩈᩴ ᩑᨲᨴᩉᩮᩣᩈᩥ – ‘ᨿᩴᨶᩪᨶ ᨾᨿᨾ᩠ᨸᩥ ᨲᩥᨱ᩠ᩉᩣᨶᩥ ᩈᨲ᩠ᨳᩣᨶᩥ ᨠᩣᩁᩣᨸᩮᩔᩣᨾ [ᨠᩣᩁᩣᨸᩮᨿ᩠ᨿᩣᨾ (ᩈ᩠ᨿᩣ. ᨸᩦ.) ᨠᩣᩁᩣᨸᩮᨿ᩠ᨿᩣᨾᩣᨲᩥ (ᨠ. ᩈᩦ.)], ᨲᩥᨱ᩠ᩉᩣᨶᩥ ᩈᨲ᩠ᨳᩣᨶᩥ ᨠᩣᩁᩣᨸᩮᨲ᩠ᩅᩣ ᨿᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩥᩔᩣᨾ, ᨲᩮ ᩈᩩᨶᩥᩈᩮᨵᩴ ᨶᩥᩈᩮᨵᩮᩔᩣᨾ, ᨾᩪᩃᨥᨧ᩠ᨧᩴ ᨠᩁᩥᩔᩣᨾ, ᩈᩦᩈᩣᨶᩥ ᨲᩮᩈᩴ ᨨᩥᨶ᩠ᨴᩥᩔᩣᨾᩣ’ᨲᩥ. ᨲᩮ ᨲᩥᨱ᩠ᩉᩣᨶᩥ ᩈᨲ᩠ᨳᩣᨶᩥ ᨠᩣᩁᩣᨸᩮᩈᩩᩴ, ᨲᩥᨱ᩠ᩉᩣᨶᩥ ᩈᨲ᩠ᨳᩣᨶᩥ ᨠᩣᩁᩣᨸᩮᨲ᩠ᩅᩣ ᨣᩣᨾᨥᩣᨲᨾ᩠ᨸᩥ ᩏᨸᨠ᩠ᨠᨾᩥᩴᩈᩩ ᨠᩣᨲᩩᩴ, ᨶᩥᨣᨾᨥᩣᨲᨾ᩠ᨸᩥ ᩏᨸᨠ᩠ᨠᨾᩥᩴᩈᩩ ᨠᩣᨲᩩᩴ, ᨶᨣᩁᨥᩣᨲᨾ᩠ᨸᩥ ᩏᨸᨠ᩠ᨠᨾᩥᩴᩈᩩ ᨠᩣᨲᩩᩴ, ᨸᨶ᩠ᨳᨴᩩᩉᨶᨾ᩠ᨸᩥ [ᨸᨶ᩠ᨳᨴᩪᩉᨶᩴᨸᩥ (ᩈᩦ. ᩈ᩠ᨿᩣ. ᨸᩦ.)] ᩏᨸᨠ᩠ᨠᨾᩥᩴᩈᩩ ᨠᩣᨲᩩᩴ. ᨿᩮᩈᩴ ᨲᩮ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᨶ᩠ᨲᩥ, ᨲᩮ ᩈᩩᨶᩥᩈᩮᨵᩴ ᨶᩥᩈᩮᨵᩮᨶ᩠ᨲᩥ, ᨾᩪᩃᨥᨧ᩠ᨧᩴ ᨠᩁᩮᩣᨶ᩠ᨲᩥ, ᩈᩦᩈᩣᨶᩥ ᨲᩮᩈᩴ ᨨᩥᨶ᩠ᨴᨶ᩠ᨲᩥ.

᪙᪔. ‘‘ᩍᨲᩥ ᨡᩮᩣ, ᨽᩥᨠ᩠ᨡᩅᩮ, ᩋᨵᨶᩣᨶᩴ ᨵᨶᩮ ᩋᨶᨶᩩᨸ᩠ᨸᨴᩥᨿᨾᩣᨶᩮ ᨴᩣᩃᩥᨴ᩠ᨴᩥᨿᩴ ᩅᩮᨸᩩᩃ᩠ᩃᨾᨣᨾᩣᩈᩥ, ᨴᩣᩃᩥᨴ᩠ᨴᩥᨿᩮ ᩅᩮᨸᩩᩃ᩠ᩃᩴ ᨣᨲᩮ ᩋᨴᩥᨶ᩠ᨶᩣᨴᩣᨶᩴ ᩅᩮᨸᩩᩃ᩠ᩃᨾᨣᨾᩣᩈᩥ, ᩋᨴᩥᨶ᩠ᨶᩣᨴᩣᨶᩮ ᩅᩮᨸᩩᩃ᩠ᩃᩴ ᨣᨲᩮ ᩈᨲ᩠ᨳᩴ ᩅᩮᨸᩩᩃ᩠ᩃᨾᨣᨾᩣᩈᩥ, ᩈᨲ᩠ᨳᩮ ᩅᩮᨸᩩᩃ᩠ᩃᩴ ᨣᨲᩮ ᨸᩣᨱᩣᨲᩥᨸᩣᨲᩮᩣ ᩅᩮᨸᩩᩃ᩠ᩃᨾᨣᨾᩣᩈᩥ, ᨸᩣᨱᩣᨲᩥᨸᩣᨲᩮ ᩅᩮᨸᩩᩃ᩠ᩃᩴ ᨣᨲᩮ ᨲᩮᩈᩴ ᩈᨲ᩠ᨲᩣᨶᩴ ᩌᨿᩩᨸᩥ ᨸᩁᩥᩉᩣᨿᩥ, ᩅᨱ᩠ᨱᩮᩣᨸᩥ ᨸᩁᩥᩉᩣᨿᩥ. ᨲᩮᩈᩴ ᩌᨿᩩᨶᩣᨸᩥ ᨸᩁᩥᩉᩣᨿᨾᩣᨶᩣᨶᩴ ᩅᨱ᩠ᨱᩮᨶᨸᩥ ᨸᩁᩥᩉᩣᨿᨾᩣᨶᩣᨶᩴ ᩋᩈᩦᨲᩥᩅᩔᩈᩉᩔᩣᨿᩩᨠᩣᨶᩴ ᨾᨶᩩᩔᩣᨶᩴ ᨧᨲ᩠ᨲᩣᩁᩦᩈᩅᩔᩈᩉᩔᩣᨿᩩᨠᩣ ᨸᩩᨲ᩠ᨲᩣ ᩋᩉᩮᩈᩩᩴ.

‘‘ᨧᨲ᩠ᨲᩣᩁᩦᩈᩅᩔᩈᩉᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᩋᨬ᩠ᨬᨲᩁᩮᩣ ᨸᩩᩁᩥᩈᩮᩣ ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩥ. ᨲᨾᩮᨶᩴ ᩋᨣ᩠ᨣᩉᩮᩈᩩᩴ. ᨣᩉᩮᨲ᩠ᩅᩣ ᩁᨬ᩠ᨬᩮᩣ ᨡᨲ᩠ᨲᩥᨿᩔ ᨾᩩᨴ᩠ᨵᩣᨽᩥᩈᩥᨲ᩠ᨲᩔ ᨴᩔᩮᩈᩩᩴ – ‘ᩋᨿᩴ, ᨴᩮᩅ, ᨸᩩᩁᩥᩈᩮᩣ ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩦ’ᨲᩥ. ᩑᩅᩴ ᩅᩩᨲ᩠ᨲᩮ, ᨽᩥᨠ᩠ᨡᩅᩮ, ᩁᩣᨩᩣ ᨡᨲ᩠ᨲᩥᨿᩮᩣ ᨾᩩᨴ᩠ᨵᩣᨽᩥᩈᩥᨲ᩠ᨲᩮᩣ ᨲᩴ ᨸᩩᩁᩥᩈᩴ ᩑᨲᨴᩅᩮᩣᨧ – ‘ᩈᨧ᩠ᨧᩴ ᨠᩥᩁ ᨲ᩠ᩅᩴ, ᩋᨾ᩠ᨽᩮᩣ ᨸᩩᩁᩥᩈ, ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩦ’ᨲᩥ? ‘ᨶ ᩉᩥ, ᨴᩮᩅᩣ’ᨲᩥ ᩈᨾ᩠ᨸᨩᩣᨶᨾᩩᩈᩣ ᩋᨽᩣᩈᩥ.

᪙᪕. ‘‘ᩍᨲᩥ ᨡᩮᩣ, ᨽᩥᨠ᩠ᨡᩅᩮ, ᩋᨵᨶᩣᨶᩴ ᨵᨶᩮ ᩋᨶᨶᩩᨸ᩠ᨸᨴᩥᨿᨾᩣᨶᩮ ᨴᩣᩃᩥᨴ᩠ᨴᩥᨿᩴ ᩅᩮᨸᩩᩃ᩠ᩃᨾᨣᨾᩣᩈᩥ. ᨴᩣᩃᩥᨴ᩠ᨴᩥᨿᩮ ᩅᩮᨸᩩᩃ᩠ᩃᩴ ᨣᨲᩮ ᩋᨴᩥᨶ᩠ᨶᩣᨴᩣᨶᩴ ᩅᩮᨸᩩᩃ᩠ᩃᨾᨣᨾᩣᩈᩥ, ᩋᨴᩥᨶ᩠ᨶᩣᨴᩣᨶᩮ ᩅᩮᨸᩩᩃ᩠ᩃᩴ ᨣᨲᩮ ᩈᨲ᩠ᨳᩴ ᩅᩮᨸᩩᩃ᩠ᩃᨾᨣᨾᩣᩈᩥ. ᩈᨲ᩠ᨳᩮ ᩅᩮᨸᩩᩃ᩠ᩃᩴ ᨣᨲᩮ ᨸᩣᨱᩣᨲᩥᨸᩣᨲᩮᩣ ᩅᩮᨸᩩᩃ᩠ᩃᨾᨣᨾᩣᩈᩥ, ᨸᩣᨱᩣᨲᩥᨸᩣᨲᩮ ᩅᩮᨸᩩᩃ᩠ᩃᩴ ᨣᨲᩮ ᨾᩩᩈᩣᩅᩣᨴᩮᩣ ᩅᩮᨸᩩᩃ᩠ᩃᨾᨣᨾᩣᩈᩥ, ᨾᩩᩈᩣᩅᩣᨴᩮ ᩅᩮᨸᩩᩃ᩠ᩃᩴ ᨣᨲᩮ ᨲᩮᩈᩴ ᩈᨲ᩠ᨲᩣᨶᩴ ᩌᨿᩩᨸᩥ ᨸᩁᩥᩉᩣᨿᩥ, ᩅᨱ᩠ᨱᩮᩣᨸᩥ ᨸᩁᩥᩉᩣᨿᩥ. ᨲᩮᩈᩴ ᩌᨿᩩᨶᩣᨸᩥ ᨸᩁᩥᩉᩣᨿᨾᩣᨶᩣᨶᩴ ᩅᨱ᩠ᨱᩮᨶᨸᩥ ᨸᩁᩥᩉᩣᨿᨾᩣᨶᩣᨶᩴ ᨧᨲ᩠ᨲᩣᩁᩦᩈᩅᩔᩈᩉᩔᩣᨿᩩᨠᩣᨶᩴ ᨾᨶᩩᩔᩣᨶᩴ ᩅᩦᩈᨲᩥᩅᩔᩈᩉᩔᩣᨿᩩᨠᩣ ᨸᩩᨲ᩠ᨲᩣ ᩋᩉᩮᩈᩩᩴ.

‘‘ᩅᩦᩈᨲᩥᩅᩔᩈᩉᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᩋᨬ᩠ᨬᨲᩁᩮᩣ ᨸᩩᩁᩥᩈᩮᩣ ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩥ. ᨲᨾᩮᨶᩴ ᩋᨬ᩠ᨬᨲᩁᩮᩣ ᨸᩩᩁᩥᩈᩮᩣ ᩁᨬ᩠ᨬᩮᩣ ᨡᨲ᩠ᨲᩥᨿᩔ ᨾᩩᨴ᩠ᨵᩣᨽᩥᩈᩥᨲ᩠ᨲᩔ ᩌᩁᩮᩣᨧᩮᩈᩥ – ‘ᩍᨲ᩠ᨳᨶ᩠ᨶᩣᨾᩮᩣ, ᨴᩮᩅ, ᨸᩩᩁᩥᩈᩮᩣ ᨸᩁᩮᩈᩴ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩦ’ᨲᩥ ᨸᩮᩈᩩᨬ᩠ᨬᨾᨠᩣᩈᩥ.

᪙᪖. ‘‘ᩍᨲᩥ ᨡᩮᩣ, ᨽᩥᨠ᩠ᨡᩅᩮ, ᩋᨵᨶᩣᨶᩴ ᨵᨶᩮ ᩋᨶᨶᩩᨸ᩠ᨸᨴᩥᨿᨾᩣᨶᩮ ᨴᩣᩃᩥᨴ᩠ᨴᩥᨿᩴ ᩅᩮᨸᩩᩃ᩠ᩃᨾᨣᨾᩣᩈᩥ. ᨴᩣᩃᩥᨴ᩠ᨴᩥᨿᩮ ᩅᩮᨸᩩᩃ᩠ᩃᩴ ᨣᨲᩮ ᩋᨴᩥᨶ᩠ᨶᩣᨴᩣᨶᩴ ᩅᩮᨸᩩᩃ᩠ᩃᨾᨣᨾᩣᩈᩥ, ᩋᨴᩥᨶ᩠ᨶᩣᨴᩣᨶᩮ ᩅᩮᨸᩩᩃ᩠ᩃᩴ ᨣᨲᩮ ᩈᨲ᩠ᨳᩴ ᩅᩮᨸᩩᩃ᩠ᩃᨾᨣᨾᩣᩈᩥ, ᩈᨲ᩠ᨳᩮ ᩅᩮᨸᩩᩃ᩠ᩃᩴ ᨣᨲᩮ ᨸᩣᨱᩣᨲᩥᨸᩣᨲᩮᩣ ᩅᩮᨸᩩᩃ᩠ᩃᨾᨣᨾᩣᩈᩥ, ᨸᩣᨱᩣᨲᩥᨸᩣᨲᩮ ᩅᩮᨸᩩᩃ᩠ᩃᩴ ᨣᨲᩮ ᨾᩩᩈᩣᩅᩣᨴᩮᩣ ᩅᩮᨸᩩᩃ᩠ᩃᨾᨣᨾᩣᩈᩥ, ᨾᩩᩈᩣᩅᩣᨴᩮ ᩅᩮᨸᩩᩃ᩠ᩃᩴ ᨣᨲᩮ ᨸᩥᩈᩩᨱᩣ ᩅᩣᨧᩣ ᩅᩮᨸᩩᩃ᩠ᩃᨾᨣᨾᩣᩈᩥ, ᨸᩥᩈᩩᨱᩣᨿ ᩅᩣᨧᩣᨿ ᩅᩮᨸᩩᩃ᩠ᩃᩴ ᨣᨲᩣᨿ ᨲᩮᩈᩴ ᩈᨲ᩠ᨲᩣᨶᩴ ᩌᨿᩩᨸᩥ ᨸᩁᩥᩉᩣᨿᩥ, ᩅᨱ᩠ᨱᩮᩣᨸᩥ ᨸᩁᩥᩉᩣᨿᩥ. ᨲᩮᩈᩴ ᩌᨿᩩᨶᩣᨸᩥ ᨸᩁᩥᩉᩣᨿᨾᩣᨶᩣᨶᩴ ᩅᨱ᩠ᨱᩮᨶᨸᩥ ᨸᩁᩥᩉᩣᨿᨾᩣᨶᩣᨶᩴ ᩅᩦᩈᨲᩥᩅᩔᩈᩉᩔᩣᨿᩩᨠᩣᨶᩴ ᨾᨶᩩᩔᩣᨶᩴ ᨴᩈᩅᩔᩈᩉᩔᩣᨿᩩᨠᩣ ᨸᩩᨲ᩠ᨲᩣ ᩋᩉᩮᩈᩩᩴ.

‘‘ᨴᩈᩅᩔᩈᩉᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᩑᨠᩥᨴᩴ ᩈᨲ᩠ᨲᩣ ᩅᨱ᩠ᨱᩅᨶ᩠ᨲᩮᩣ ᩉᩮᩣᨶ᩠ᨲᩥ, ᩑᨠᩥᨴᩴ ᩈᨲ᩠ᨲᩣ ᨴᩩᨻ᩠ᨻᨱ᩠ᨱᩣ. ᨲᨲ᩠ᨳ ᨿᩮ ᨲᩮ ᩈᨲ᩠ᨲᩣ ᨴᩩᨻ᩠ᨻᨱ᩠ᨱᩣ, ᨲᩮ ᩅᨱ᩠ᨱᩅᨶ᩠ᨲᩮ ᩈᨲ᩠ᨲᩮ ᩋᨽᩥᨩ᩠ᨫᩣᨿᨶ᩠ᨲᩣ ᨸᩁᩮᩈᩴ ᨴᩣᩁᩮᩈᩩ ᨧᩣᩁᩥᨲ᩠ᨲᩴ ᩌᨸᨩ᩠ᨩᩥᩴᩈᩩ.

᪙᪗. ‘‘ᩍᨲᩥ ᨡᩮᩣ, ᨽᩥᨠ᩠ᨡᩅᩮ, ᩋᨵᨶᩣᨶᩴ ᨵᨶᩮ ᩋᨶᨶᩩᨸ᩠ᨸᨴᩥᨿᨾᩣᨶᩮ ᨴᩣᩃᩥᨴ᩠ᨴᩥᨿᩴ ᩅᩮᨸᩩᩃ᩠ᩃᨾᨣᨾᩣᩈᩥ. ᨴᩣᩃᩥᨴ᩠ᨴᩥᨿᩮ ᩅᩮᨸᩩᩃ᩠ᩃᩴ ᨣᨲᩮ…ᨸᩮ… ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩮᩣ ᩅᩮᨸᩩᩃ᩠ᩃᨾᨣᨾᩣᩈᩥ, ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩮ ᩅᩮᨸᩩᩃ᩠ᩃᩴ ᨣᨲᩮ ᨲᩮᩈᩴ ᩈᨲ᩠ᨲᩣᨶᩴ ᩌᨿᩩᨸᩥ ᨸᩁᩥᩉᩣᨿᩥ, ᩅᨱ᩠ᨱᩮᩣᨸᩥ ᨸᩁᩥᩉᩣᨿᩥ. ᨲᩮᩈᩴ ᩌᨿᩩᨶᩣᨸᩥ ᨸᩁᩥᩉᩣᨿᨾᩣᨶᩣᨶᩴ ᩅᨱ᩠ᨱᩮᨶᨸᩥ ᨸᩁᩥᩉᩣᨿᨾᩣᨶᩣᨶᩴ ᨴᩈᩅᩔᩈᩉᩔᩣᨿᩩᨠᩣᨶᩴ ᨾᨶᩩᩔᩣᨶᩴ ᨸᨬ᩠ᨧᩅᩔᩈᩉᩔᩣᨿᩩᨠᩣ ᨸᩩᨲ᩠ᨲᩣ ᩋᩉᩮᩈᩩᩴ.

᪙᪘. ‘‘ᨸᨬ᩠ᨧᩅᩔᩈᩉᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᨴ᩠ᩅᩮ ᨵᨾ᩠ᨾᩣ ᩅᩮᨸᩩᩃ᩠ᩃᨾᨣᨾᩴᩈᩩ – ᨹᩁᩩᩈᩣᩅᩣᨧᩣ ᩈᨾ᩠ᨹᨸ᩠ᨸᩃᩣᨸᩮᩣ ᨧ. ᨴ᩠ᩅᩦᩈᩩ ᨵᨾ᩠ᨾᩮᩈᩩ ᩅᩮᨸᩩᩃ᩠ᩃᩴ ᨣᨲᩮᩈᩩ ᨲᩮᩈᩴ ᩈᨲ᩠ᨲᩣᨶᩴ ᩌᨿᩩᨸᩥ ᨸᩁᩥᩉᩣᨿᩥ, ᩅᨱ᩠ᨱᩮᩣᨸᩥ ᨸᩁᩥᩉᩣᨿᩥ. ᨲᩮᩈᩴ ᩌᨿᩩᨶᩣᨸᩥ ᨸᩁᩥᩉᩣᨿᨾᩣᨶᩣᨶᩴ ᩅᨱ᩠ᨱᩮᨶᨸᩥ ᨸᩁᩥᩉᩣᨿᨾᩣᨶᩣᨶᩴ ᨸᨬ᩠ᨧᩅᩔᩈᩉᩔᩣᨿᩩᨠᩣᨶᩴ ᨾᨶᩩᩔᩣᨶᩴ ᩋᨸ᩠ᨸᩮᨠᨧ᩠ᨧᩮ ᩋᨯ᩠ᨰᨲᩮᨿ᩠ᨿᩅᩔᩈᩉᩔᩣᨿᩩᨠᩣ, ᩋᨸ᩠ᨸᩮᨠᨧ᩠ᨧᩮ ᨴ᩠ᩅᩮᩅᩔᩈᩉᩔᩣᨿᩩᨠᩣ ᨸᩩᨲ᩠ᨲᩣ ᩋᩉᩮᩈᩩᩴ.

᪙᪙. ‘‘ᩋᨯ᩠ᨰᨲᩮᨿ᩠ᨿᩅᩔᩈᩉᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᩋᨽᩥᨩ᩠ᨫᩣᨻ᩠ᨿᩣᨸᩣᨴᩣ ᩅᩮᨸᩩᩃ᩠ᩃᨾᨣᨾᩴᩈᩩ. ᩋᨽᩥᨩ᩠ᨫᩣᨻ᩠ᨿᩣᨸᩣᨴᩮᩈᩩ ᩅᩮᨸᩩᩃ᩠ᩃᩴ ᨣᨲᩮᩈᩩ ᨲᩮᩈᩴ ᩈᨲ᩠ᨲᩣᨶᩴ ᩌᨿᩩᨸᩥ ᨸᩁᩥᩉᩣᨿᩥ, ᩅᨱ᩠ᨱᩮᩣᨸᩥ ᨸᩁᩥᩉᩣᨿᩥ. ᨲᩮᩈᩴ ᩌᨿᩩᨶᩣᨸᩥ ᨸᩁᩥᩉᩣᨿᨾᩣᨶᩣᨶᩴ ᩅᨱ᩠ᨱᩮᨶᨸᩥ ᨸᩁᩥᩉᩣᨿᨾᩣᨶᩣᨶᩴ ᩋᨯ᩠ᨰᨲᩮᨿ᩠ᨿᩅᩔᩈᩉᩔᩣᨿᩩᨠᩣᨶᩴ ᨾᨶᩩᩔᩣᨶᩴ ᩅᩔᩈᩉᩔᩣᨿᩩᨠᩣ ᨸᩩᨲ᩠ᨲᩣ ᩋᩉᩮᩈᩩᩴ.

᪑᪐᪐. ‘‘ᩅᩔᩈᩉᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᨾᩥᨧ᩠ᨨᩣᨴᩥᨭ᩠ᨮᩥ ᩅᩮᨸᩩᩃ᩠ᩃᨾᨣᨾᩣᩈᩥ. ᨾᩥᨧ᩠ᨨᩣᨴᩥᨭ᩠ᨮᩥᨿᩣ ᩅᩮᨸᩩᩃ᩠ᩃᩴ ᨣᨲᩣᨿ ᨲᩮᩈᩴ ᩈᨲ᩠ᨲᩣᨶᩴ ᩌᨿᩩᨸᩥ ᨸᩁᩥᩉᩣᨿᩥ, ᩅᨱ᩠ᨱᩮᩣᨸᩥ ᨸᩁᩥᩉᩣᨿᩥ. ᨲᩮᩈᩴ ᩌᨿᩩᨶᩣᨸᩥ ᨸᩁᩥᩉᩣᨿᨾᩣᨶᩣᨶᩴ ᩅᨱ᩠ᨱᩮᨶᨸᩥ ᨸᩁᩥᩉᩣᨿᨾᩣᨶᩣᨶᩴ ᩅᩔᩈᩉᩔᩣᨿᩩᨠᩣᨶᩴ ᨾᨶᩩᩔᩣᨶᩴ ᨸᨬ᩠ᨧᩅᩔᩈᨲᩣᨿᩩᨠᩣ ᨸᩩᨲ᩠ᨲᩣ ᩋᩉᩮᩈᩩᩴ.

᪑᪐᪑. ‘‘ᨸᨬ᩠ᨧᩅᩔᩈᨲᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᨲᨿᩮᩣ ᨵᨾ᩠ᨾᩣ ᩅᩮᨸᩩᩃ᩠ᩃᨾᨣᨾᩴᩈᩩ. ᩋᨵᨾ᩠ᨾᩁᩣᨣᩮᩣ ᩅᩥᩈᨾᩃᩮᩣᨽᩮᩣ ᨾᩥᨧ᩠ᨨᩣᨵᨾ᩠ᨾᩮᩣ. ᨲᩦᩈᩩ ᨵᨾ᩠ᨾᩮᩈᩩ ᩅᩮᨸᩩᩃ᩠ᩃᩴ ᨣᨲᩮᩈᩩ ᨲᩮᩈᩴ ᩈᨲ᩠ᨲᩣᨶᩴ ᩌᨿᩩᨸᩥ ᨸᩁᩥᩉᩣᨿᩥ, ᩅᨱ᩠ᨱᩮᩣᨸᩥ ᨸᩁᩥᩉᩣᨿᩥ. ᨲᩮᩈᩴ ᩌᨿᩩᨶᩣᨸᩥ ᨸᩁᩥᩉᩣᨿᨾᩣᨶᩣᨶᩴ ᩅᨱ᩠ᨱᩮᨶᨸᩥ ᨸᩁᩥᩉᩣᨿᨾᩣᨶᩣᨶᩴ ᨸᨬ᩠ᨧᩅᩔᩈᨲᩣᨿᩩᨠᩣᨶᩴ ᨾᨶᩩᩔᩣᨶᩴ ᩋᨸ᩠ᨸᩮᨠᨧ᩠ᨧᩮ ᩋᨯ᩠ᨰᨲᩮᨿ᩠ᨿᩅᩔᩈᨲᩣᨿᩩᨠᩣ, ᩋᨸ᩠ᨸᩮᨠᨧ᩠ᨧᩮ ᨴ᩠ᩅᩮᩅᩔᩈᨲᩣᨿᩩᨠᩣ ᨸᩩᨲ᩠ᨲᩣ ᩋᩉᩮᩈᩩᩴ.

‘‘ᩋᨯ᩠ᨰᨲᩮᨿ᩠ᨿᩅᩔᩈᨲᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᩍᨾᩮ ᨵᨾ᩠ᨾᩣ ᩅᩮᨸᩩᩃ᩠ᩃᨾᨣᨾᩴᩈᩩ. ᩋᨾᨲ᩠ᨲᩮᨿ᩠ᨿᨲᩣ ᩋᨸᩮᨲ᩠ᨲᩮᨿ᩠ᨿᨲᩣ ᩋᩈᩣᨾᨬ᩠ᨬᨲᩣ ᩋᨻᩕᩉ᩠ᨾᨬ᩠ᨬᨲᩣ ᨶ ᨠᩩᩃᩮ ᨩᩮᨭ᩠ᨮᩣᨸᨧᩣᨿᩥᨲᩣ.

᪑᪐᪒. ‘‘ᩍᨲᩥ ᨡᩮᩣ, ᨽᩥᨠ᩠ᨡᩅᩮ, ᩋᨵᨶᩣᨶᩴ ᨵᨶᩮ ᩋᨶᨶᩩᨸ᩠ᨸᨴᩥᨿᨾᩣᨶᩮ ᨴᩣᩃᩥᨴ᩠ᨴᩥᨿᩴ ᩅᩮᨸᩩᩃ᩠ᩃᨾᨣᨾᩣᩈᩥ. ᨴᩣᩃᩥᨴ᩠ᨴᩥᨿᩮ ᩅᩮᨸᩩᩃ᩠ᩃᩴ ᨣᨲᩮ ᩋᨴᩥᨶ᩠ᨶᩣᨴᩣᨶᩴ ᩅᩮᨸᩩᩃ᩠ᩃᨾᨣᨾᩣᩈᩥ. ᩋᨴᩥᨶ᩠ᨶᩣᨴᩣᨶᩮ ᩅᩮᨸᩩᩃ᩠ᩃᩴ ᨣᨲᩮ ᩈᨲ᩠ᨳᩴ ᩅᩮᨸᩩᩃ᩠ᩃᨾᨣᨾᩣᩈᩥ. ᩈᨲ᩠ᨳᩮ ᩅᩮᨸᩩᩃ᩠ᩃᩴ ᨣᨲᩮ ᨸᩣᨱᩣᨲᩥᨸᩣᨲᩮᩣ ᩅᩮᨸᩩᩃ᩠ᩃᨾᨣᨾᩣᩈᩥ. ᨸᩣᨱᩣᨲᩥᨸᩣᨲᩮ ᩅᩮᨸᩩᩃ᩠ᩃᩴ ᨣᨲᩮ ᨾᩩᩈᩣᩅᩣᨴᩮᩣ ᩅᩮᨸᩩᩃ᩠ᩃᨾᨣᨾᩣᩈᩥ. ᨾᩩᩈᩣᩅᩣᨴᩮ ᩅᩮᨸᩩᩃ᩠ᩃᩴ ᨣᨲᩮ ᨸᩥᩈᩩᨱᩣ ᩅᩣᨧᩣ ᩅᩮᨸᩩᩃ᩠ᩃᨾᨣᨾᩣᩈᩥ. ᨸᩥᩈᩩᨱᩣᨿ ᩅᩣᨧᩣᨿ ᩅᩮᨸᩩᩃ᩠ᩃᩴ ᨣᨲᩣᨿ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩮᩣ ᩅᩮᨸᩩᩃ᩠ᩃᨾᨣᨾᩣᩈᩥ. ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩮ ᩅᩮᨸᩩᩃ᩠ᩃᩴ ᨣᨲᩮ ᨴ᩠ᩅᩮ ᨵᨾ᩠ᨾᩣ ᩅᩮᨸᩩᩃ᩠ᩃᨾᨣᨾᩴᩈᩩ, ᨹᩁᩩᩈᩣ ᩅᩣᨧᩣ ᩈᨾ᩠ᨹᨸ᩠ᨸᩃᩣᨸᩮᩣ ᨧ. ᨴ᩠ᩅᩦᩈᩩ ᨵᨾ᩠ᨾᩮᩈᩩ ᩅᩮᨸᩩᩃ᩠ᩃᩴ ᨣᨲᩮᩈᩩ ᩋᨽᩥᨩ᩠ᨫᩣᨻ᩠ᨿᩣᨸᩣᨴᩣ ᩅᩮᨸᩩᩃ᩠ᩃᨾᨣᨾᩴᩈᩩ. ᩋᨽᩥᨩ᩠ᨫᩣᨻ᩠ᨿᩣᨸᩣᨴᩮᩈᩩ ᩅᩮᨸᩩᩃ᩠ᩃᩴ ᨣᨲᩮᩈᩩ ᨾᩥᨧ᩠ᨨᩣᨴᩥᨭ᩠ᨮᩥ ᩅᩮᨸᩩᩃ᩠ᩃᨾᨣᨾᩣᩈᩥ. ᨾᩥᨧ᩠ᨨᩣᨴᩥᨭ᩠ᨮᩥᨿᩣ ᩅᩮᨸᩩᩃ᩠ᩃᩴ ᨣᨲᩣᨿ ᨲᨿᩮᩣ ᨵᨾ᩠ᨾᩣ ᩅᩮᨸᩩᩃ᩠ᩃᨾᨣᨾᩴᩈᩩ, ᩋᨵᨾ᩠ᨾᩁᩣᨣᩮᩣ ᩅᩥᩈᨾᩃᩮᩣᨽᩮᩣ ᨾᩥᨧ᩠ᨨᩣᨵᨾ᩠ᨾᩮᩣ. ᨲᩦᩈᩩ ᨵᨾ᩠ᨾᩮᩈᩩ ᩅᩮᨸᩩᩃ᩠ᩃᩴ ᨣᨲᩮᩈᩩ ᩍᨾᩮ ᨵᨾ᩠ᨾᩣ ᩅᩮᨸᩩᩃ᩠ᩃᨾᨣᨾᩴᩈᩩ, ᩋᨾᨲ᩠ᨲᩮᨿ᩠ᨿᨲᩣ ᩋᨸᩮᨲ᩠ᨲᩮᨿ᩠ᨿᨲᩣ ᩋᩈᩣᨾᨬ᩠ᨬᨲᩣ ᩋᨻᩕᩉ᩠ᨾᨬ᩠ᨬᨲᩣ ᨶ ᨠᩩᩃᩮ ᨩᩮᨭ᩠ᨮᩣᨸᨧᩣᨿᩥᨲᩣ. ᩍᨾᩮᩈᩩ ᨵᨾ᩠ᨾᩮᩈᩩ ᩅᩮᨸᩩᩃ᩠ᩃᩴ ᨣᨲᩮᩈᩩ ᨲᩮᩈᩴ ᩈᨲ᩠ᨲᩣᨶᩴ ᩌᨿᩩᨸᩥ ᨸᩁᩥᩉᩣᨿᩥ, ᩅᨱ᩠ᨱᩮᩣᨸᩥ ᨸᩁᩥᩉᩣᨿᩥ. ᨲᩮᩈᩴ ᩌᨿᩩᨶᩣᨸᩥ ᨸᩁᩥᩉᩣᨿᨾᩣᨶᩣᨶᩴ ᩅᨱ᩠ᨱᩮᨶᨸᩥ ᨸᩁᩥᩉᩣᨿᨾᩣᨶᩣᨶᩴ ᩋᨯ᩠ᨰᨲᩮᨿ᩠ᨿᩅᩔᩈᨲᩣᨿᩩᨠᩣᨶᩴ ᨾᨶᩩᩔᩣᨶᩴ ᩅᩔᩈᨲᩣᨿᩩᨠᩣ ᨸᩩᨲ᩠ᨲᩣ ᩋᩉᩮᩈᩩᩴ.

ᨴᩈᩅᩔᩣᨿᩩᨠᩈᨾᨿᩮᩣ

᪑᪐᪓. ‘‘ᨽᩅᩥᩔᨲᩥ, ᨽᩥᨠ᩠ᨡᩅᩮ, ᩈᩮᩣ ᩈᨾᨿᩮᩣ, ᨿᩴ ᩍᨾᩮᩈᩴ ᨾᨶᩩᩔᩣᨶᩴ ᨴᩈᩅᩔᩣᨿᩩᨠᩣ ᨸᩩᨲ᩠ᨲᩣ ᨽᩅᩥᩔᨶ᩠ᨲᩥ. ᨴᩈᩅᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᨸᨬ᩠ᨧᩅᩔᩥᨠᩣ [ᨸᨬ᩠ᨧᨾᩣᩈᩥᨠᩣ (ᨠ. ᩈᩦ.)] ᨠᩩᨾᩣᩁᩥᨠᩣ ᩋᩃᩴᨸᨲᩮᨿ᩠ᨿᩣ ᨽᩅᩥᩔᨶ᩠ᨲᩥ. ᨴᩈᩅᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᩍᨾᩣᨶᩥ ᩁᩈᩣᨶᩥ ᩋᨶ᩠ᨲᩁᨵᩣᨿᩥᩔᨶ᩠ᨲᩥ, ᩈᩮᨿ᩠ᨿᨳᩥᨴᩴ, ᩈᨸ᩠ᨸᩥ ᨶᩅᨶᩦᨲᩴ ᨲᩮᩃᩴ ᨾᨵᩩ ᨹᩣᨱᩥᨲᩴ ᩃᩮᩣᨱᩴ. ᨴᩈᩅᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᨠᩩᨴᩕᩪᩈᨠᩮᩣ ᩋᨣ᩠ᨣᩴ ᨽᩮᩣᨩᨶᩣᨶᩴ [ᩋᨣ᩠ᨣᨽᩮᩣᨩᨶᩴ (ᩈ᩠ᨿᩣ.)] ᨽᩅᩥᩔᨲᩥ. ᩈᩮᨿ᩠ᨿᨳᩣᨸᩥ, ᨽᩥᨠ᩠ᨡᩅᩮ, ᩑᨲᩁᩉᩥ ᩈᩣᩃᩥᨾᩴᩈᩮᩣᨴᨶᩮᩣ ᩋᨣ᩠ᨣᩴ ᨽᩮᩣᨩᨶᩣᨶᩴ; ᩑᩅᨾᩮᩅ ᨡᩮᩣ, ᨽᩥᨠ᩠ᨡᩅᩮ, ᨴᩈᩅᩔᩣᨿᩩᨠᩮᩈᩩ ᨾᨶᩩᩔᩮᩈᩩ ᨠᩩᨴᩕᩪᩈᨠᩮᩣ ᩋᨣ᩠ᨣᩴ ᨽᩮᩣᨩᨶᩣᨶᩴ ᨽᩅᩥᩔᨲᩥ.

‘‘ᨴᩈᩅᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᨴᩈ ᨠᩩᩈᩃᨠᨾ᩠ᨾᨸᨳᩣ ᩈᨻ᩠ᨻᩮᨶ ᩈᨻ᩠ᨻᩴ ᩋᨶ᩠ᨲᩁᨵᩣᨿᩥᩔᨶ᩠ᨲᩥ, ᨴᩈ ᩋᨠᩩᩈᩃᨠᨾ᩠ᨾᨸᨳᩣ ᩋᨲᩥᨻ᩠ᨿᩣᨴᩥᨸ᩠ᨸᩥᩔᨶ᩠ᨲᩥ [ᩋᨲᩥᩅᩥᨿ ᨴᩥᨸ᩠ᨸᩥᩔᨶ᩠ᨲᩥ (ᩈ᩠ᨿᩣ. ᨸᩦ.), ᩋᨲᩥᩅ᩠ᨿᩣᨴᩥᨸ᩠ᨸᩥᩔᨶ᩠ᨲᩥ (ᩈᩦ.)]. ᨴᩈᩅᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᨠᩩᩈᩃᨶ᩠ᨲᩥᨸᩥ ᨶ ᨽᩅᩥᩔᨲᩥ, ᨠᩩᨲᩮᩣ ᨸᨶ ᨠᩩᩈᩃᩔ ᨠᩣᩁᨠᩮᩣ. ᨴᩈᩅᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᨿᩮ ᨲᩮ ᨽᩅᩥᩔᨶ᩠ᨲᩥ ᩋᨾᨲ᩠ᨲᩮᨿ᩠ᨿᩣ ᩋᨸᩮᨲ᩠ᨲᩮᨿ᩠ᨿᩣ ᩋᩈᩣᨾᨬ᩠ᨬᩣ ᩋᨻᩕᩉ᩠ᨾᨬ᩠ᨬᩣ ᨶ ᨠᩩᩃᩮ ᨩᩮᨭ᩠ᨮᩣᨸᨧᩣᨿᩥᨶᩮᩣ, ᨲᩮ ᨸᩩᨩ᩠ᨩᩣ ᨧ ᨽᩅᩥᩔᨶ᩠ᨲᩥ ᨸᩣᩈᩴᩈᩣ ᨧ. ᩈᩮᨿ᩠ᨿᨳᩣᨸᩥ, ᨽᩥᨠ᩠ᨡᩅᩮ, ᩑᨲᩁᩉᩥ ᨾᨲ᩠ᨲᩮᨿ᩠ᨿᩣ ᨸᩮᨲ᩠ᨲᩮᨿ᩠ᨿᩣ ᩈᩣᨾᨬ᩠ᨬᩣ ᨻᩕᩉ᩠ᨾᨬ᩠ᨬᩣ ᨠᩩᩃᩮ ᨩᩮᨭ᩠ᨮᩣᨸᨧᩣᨿᩥᨶᩮᩣ ᨸᩩᨩ᩠ᨩᩣ ᨧ ᨸᩣᩈᩴᩈᩣ ᨧ; ᩑᩅᨾᩮᩅ ᨡᩮᩣ, ᨽᩥᨠ᩠ᨡᩅᩮ, ᨴᩈᩅᩔᩣᨿᩩᨠᩮᩈᩩ ᨾᨶᩩᩔᩮᩈᩩ ᨿᩮ ᨲᩮ ᨽᩅᩥᩔᨶ᩠ᨲᩥ ᩋᨾᨲ᩠ᨲᩮᨿ᩠ᨿᩣ ᩋᨸᩮᨲ᩠ᨲᩮᨿ᩠ᨿᩣ ᩋᩈᩣᨾᨬ᩠ᨬᩣ ᩋᨻᩕᩉ᩠ᨾᨬ᩠ᨬᩣ ᨶ ᨠᩩᩃᩮ ᨩᩮᨭ᩠ᨮᩣᨸᨧᩣᨿᩥᨶᩮᩣ, ᨲᩮ ᨸᩩᨩ᩠ᨩᩣ ᨧ ᨽᩅᩥᩔᨶ᩠ᨲᩥ ᨸᩣᩈᩴᩈᩣ ᨧ.

‘‘ᨴᩈᩅᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᨶ ᨽᩅᩥᩔᨲᩥ ᨾᩣᨲᩣᨲᩥ ᩅᩣ ᨾᩣᨲᩩᨧ᩠ᨨᩣᨲᩥ ᩅᩣ ᨾᩣᨲᩩᩃᩣᨶᩦᨲᩥ ᩅᩣ ᩌᨧᩁᩥᨿᨽᩁᩥᨿᩣᨲᩥ ᩅᩣ ᨣᩁᩪᨶᩴ ᨴᩣᩁᩣᨲᩥ ᩅᩣ. ᩈᨾ᩠ᨽᩮᨴᩴ ᩃᩮᩣᨠᩮᩣ ᨣᨾᩥᩔᨲᩥ ᨿᨳᩣ ᩋᨩᩮᩊᨠᩣ ᨠᩩᨠ᩠ᨠᩩᨭᩈᩪᨠᩁᩣ ᩈᩮᩣᨱᩈᩥᨦ᩠ᨣᩣᩃᩣ [ᩈᩮᩣᨱᩈᩥᨣᩣᩃᩣ (ᩈᩦ. ᨸᩦ.)].

‘‘ᨴᩈᩅᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᨲᩮᩈᩴ ᩈᨲ᩠ᨲᩣᨶᩴ ᩋᨬ᩠ᨬᨾᨬ᩠ᨬᨾ᩠ᩉᩥ ᨲᩥᨻ᩠ᨻᩮᩣ ᩌᨥᩣᨲᩮᩣ ᨸᨧ᩠ᨧᩩᨸᨭ᩠ᨮᩥᨲᩮᩣ ᨽᩅᩥᩔᨲᩥ ᨲᩥᨻ᩠ᨻᩮᩣ ᨻ᩠ᨿᩣᨸᩣᨴᩮᩣ ᨲᩥᨻ᩠ᨻᩮᩣ ᨾᨶᩮᩣᨸᨴᩮᩣᩈᩮᩣ ᨲᩥᨻ᩠ᨻᩴ ᩅᨵᨠᨧᩥᨲ᩠ᨲᩴ. ᨾᩣᨲᩩᨸᩥ ᨸᩩᨲ᩠ᨲᨾ᩠ᩉᩥ ᨸᩩᨲ᩠ᨲᩔᨸᩥ ᨾᩣᨲᩁᩥ; ᨸᩥᨲᩩᨸᩥ ᨸᩩᨲ᩠ᨲᨾ᩠ᩉᩥ ᨸᩩᨲ᩠ᨲᩔᨸᩥ ᨸᩥᨲᩁᩥ; ᨽᩣᨲᩩᨸᩥ ᨽᨣᩥᨶᩥᨿᩣ ᨽᨣᩥᨶᩥᨿᩣᨸᩥ ᨽᩣᨲᩁᩥ ᨲᩥᨻ᩠ᨻᩮᩣ ᩌᨥᩣᨲᩮᩣ ᨸᨧ᩠ᨧᩩᨸᨭ᩠ᨮᩥᨲᩮᩣ ᨽᩅᩥᩔᨲᩥ ᨲᩥᨻ᩠ᨻᩮᩣ ᨻ᩠ᨿᩣᨸᩣᨴᩮᩣ ᨲᩥᨻ᩠ᨻᩮᩣ ᨾᨶᩮᩣᨸᨴᩮᩣᩈᩮᩣ ᨲᩥᨻ᩠ᨻᩴ ᩅᨵᨠᨧᩥᨲ᩠ᨲᩴ. ᩈᩮᨿ᩠ᨿᨳᩣᨸᩥ, ᨽᩥᨠ᩠ᨡᩅᩮ, ᨾᩣᨣᩅᩥᨠᩔ ᨾᩥᨣᩴ ᨴᩥᩈ᩠ᩅᩣ ᨲᩥᨻ᩠ᨻᩮᩣ ᩌᨥᩣᨲᩮᩣ ᨸᨧ᩠ᨧᩩᨸᨭ᩠ᨮᩥᨲᩮᩣ ᩉᩮᩣᨲᩥ ᨲᩥᨻ᩠ᨻᩮᩣ ᨻ᩠ᨿᩣᨸᩣᨴᩮᩣ ᨲᩥᨻ᩠ᨻᩮᩣ ᨾᨶᩮᩣᨸᨴᩮᩣᩈᩮᩣ ᨲᩥᨻ᩠ᨻᩴ ᩅᨵᨠᨧᩥᨲ᩠ᨲᩴ; ᩑᩅᨾᩮᩅ ᨡᩮᩣ, ᨽᩥᨠ᩠ᨡᩅᩮ, ᨴᩈᩅᩔᩣᨿᩩᨠᩮᩈᩩ ᨾᨶᩩᩔᩮᩈᩩ ᨲᩮᩈᩴ ᩈᨲ᩠ᨲᩣᨶᩴ ᩋᨬ᩠ᨬᨾᨬ᩠ᨬᨾ᩠ᩉᩥ ᨲᩥᨻ᩠ᨻᩮᩣ ᩌᨥᩣᨲᩮᩣ ᨸᨧ᩠ᨧᩩᨸᨭ᩠ᨮᩥᨲᩮᩣ ᨽᩅᩥᩔᨲᩥ ᨲᩥᨻ᩠ᨻᩮᩣ ᨻ᩠ᨿᩣᨸᩣᨴᩮᩣ ᨲᩥᨻ᩠ᨻᩮᩣ ᨾᨶᩮᩣᨸᨴᩮᩣᩈᩮᩣ ᨲᩥᨻ᩠ᨻᩴ ᩅᨵᨠᨧᩥᨲ᩠ᨲᩴ. ᨾᩣᨲᩩᨸᩥ ᨸᩩᨲ᩠ᨲᨾ᩠ᩉᩥ ᨸᩩᨲ᩠ᨲᩔᨸᩥ ᨾᩣᨲᩁᩥ; ᨸᩥᨲᩩᨸᩥ ᨸᩩᨲ᩠ᨲᨾ᩠ᩉᩥ ᨸᩩᨲ᩠ᨲᩔᨸᩥ ᨸᩥᨲᩁᩥ; ᨽᩣᨲᩩᨸᩥ ᨽᨣᩥᨶᩥᨿᩣ ᨽᨣᩥᨶᩥᨿᩣᨸᩥ ᨽᩣᨲᩁᩥ ᨲᩥᨻ᩠ᨻᩮᩣ ᩌᨥᩣᨲᩮᩣ ᨸᨧ᩠ᨧᩩᨸᨭ᩠ᨮᩥᨲᩮᩣ ᨽᩅᩥᩔᨲᩥ ᨲᩥᨻ᩠ᨻᩮᩣ ᨻ᩠ᨿᩣᨸᩣᨴᩮᩣ ᨲᩥᨻ᩠ᨻᩮᩣ ᨾᨶᩮᩣᨸᨴᩮᩣᩈᩮᩣ ᨲᩥᨻ᩠ᨻᩴ ᩅᨵᨠᨧᩥᨲ᩠ᨲᩴ.

᪑᪐᪔. ‘‘ᨴᩈᩅᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᩈᨲ᩠ᨲᩣᩉᩴ ᩈᨲ᩠ᨳᨶ᩠ᨲᩁᨠᨸ᩠ᨸᩮᩣ ᨽᩅᩥᩔᨲᩥ. ᨲᩮ ᩋᨬ᩠ᨬᨾᨬ᩠ᨬᨾ᩠ᩉᩥ ᨾᩥᨣᩈᨬ᩠ᨬᩴ ᨸᨭᩥᩃᨽᩥᩔᨶ᩠ᨲᩥ. ᨲᩮᩈᩴ ᨲᩥᨱ᩠ᩉᩣᨶᩥ ᩈᨲ᩠ᨳᩣᨶᩥ ᩉᨲ᩠ᨳᩮᩈᩩ ᨸᩣᨲᩩᨽᩅᩥᩔᨶ᩠ᨲᩥ. ᨲᩮ ᨲᩥᨱ᩠ᩉᩮᨶ ᩈᨲ᩠ᨳᩮᨶ ‘ᩑᩈ ᨾᩥᨣᩮᩣ ᩑᩈ ᨾᩥᨣᩮᩣ’ᨲᩥ ᩋᨬ᩠ᨬᨾᨬ᩠ᨬᩴ ᨩᩦᩅᩥᨲᩣ ᩅᩮᩣᩁᩮᩣᨸᩮᩔᨶ᩠ᨲᩥ.

‘‘ᩋᨳ ᨡᩮᩣ ᨲᩮᩈᩴ, ᨽᩥᨠ᩠ᨡᩅᩮ, ᩈᨲ᩠ᨲᩣᨶᩴ ᩑᨠᨧ᩠ᨧᩣᨶᩴ ᩑᩅᩴ ᨽᩅᩥᩔᨲᩥ – ‘ᨾᩣ ᨧ ᨾᨿᩴ ᨠᨬ᩠ᨧᩥ [ᨠᩥᨬ᩠ᨧᩥ (ᨠ.)], ᨾᩣ ᨧ ᩋᨾ᩠ᩉᩮ ᨠᩮᩣᨧᩥ, ᨿᩴᨶᩪᨶ ᨾᨿᩴ ᨲᩥᨱᨣᩉᨶᩴ ᩅᩣ ᩅᨶᨣᩉᨶᩴ ᩅᩣ ᩁᩩᨠ᩠ᨡᨣᩉᨶᩴ ᩅᩣ ᨶᨴᩦᩅᩥᨴᩩᨣ᩠ᨣᩴ ᩅᩣ ᨸᨻ᩠ᨻᨲᩅᩥᩈᨾᩴ ᩅᩣ ᨸᩅᩥᩈᩥᨲ᩠ᩅᩣ ᩅᨶᨾᩪᩃᨹᩃᩣᩉᩣᩁᩣ ᨿᩣᨸᩮᨿ᩠ᨿᩣᨾᩣ’ᨲᩥ. ᨲᩮ ᨲᩥᨱᨣᩉᨶᩴ ᩅᩣ ᩅᨶᨣᩉᨶᩴ ᩅᩣ ᩁᩩᨠ᩠ᨡᨣᩉᨶᩴ ᩅᩣ ᨶᨴᩦᩅᩥᨴᩩᨣ᩠ᨣᩴ ᩅᩣ ᨸᨻ᩠ᨻᨲᩅᩥᩈᨾᩴ ᩅᩣ [ᨲᩮ ᨲᩥᨱᨣᩉᨶᩴ ᩅᨶᨣᩉᨶᩴ ᩁᩩᨠ᩠ᨡᨣᩉᨶᩴ ᨶᨴᩦᩅᩥᨴᩩᨣ᩠ᨣᩴ ᨸᨻ᩠ᨻᨲᩅᩥᩈᨾᩴ (ᩈᩦ. ᨸᩦ.)] ᨸᩅᩥᩈᩥᨲ᩠ᩅᩣ ᩈᨲ᩠ᨲᩣᩉᩴ ᩅᨶᨾᩪᩃᨹᩃᩣᩉᩣᩁᩣ ᨿᩣᨸᩮᩔᨶ᩠ᨲᩥ. ᨲᩮ ᨲᩔ ᩈᨲ᩠ᨲᩣᩉᩔ ᩋᨧ᩠ᨧᨿᩮᨶ ᨲᩥᨱᨣᩉᨶᩣ ᩅᨶᨣᩉᨶᩣ ᩁᩩᨠ᩠ᨡᨣᩉᨶᩣ ᨶᨴᩦᩅᩥᨴᩩᨣ᩠ᨣᩣ ᨸᨻ᩠ᨻᨲᩅᩥᩈᨾᩣ ᨶᩥᨠ᩠ᨡᨾᩥᨲ᩠ᩅᩣ ᩋᨬ᩠ᨬᨾᨬ᩠ᨬᩴ ᩌᩃᩥᨦ᩠ᨣᩥᨲ᩠ᩅᩣ ᩈᨽᩣᨣᩣᨿᩥᩔᨶ᩠ᨲᩥ ᩈᨾᩔᩣᩈᩥᩔᨶ᩠ᨲᩥ – ‘ᨴᩥᨭ᩠ᨮᩣ, ᨽᩮᩣ, ᩈᨲ᩠ᨲᩣ ᨩᩦᩅᩈᩥ, ᨴᩥᨭ᩠ᨮᩣ, ᨽᩮᩣ, ᩈᨲ᩠ᨲᩣ ᨩᩦᩅᩈᩦ’ᨲᩥ.

ᩌᨿᩩᩅᨱ᩠ᨱᩣᨴᩥᩅᨯ᩠ᨰᨶᨠᨳᩣ

᪑᪐᪕. ‘‘ᩋᨳ ᨡᩮᩣ ᨲᩮᩈᩴ, ᨽᩥᨠ᩠ᨡᩅᩮ, ᩈᨲ᩠ᨲᩣᨶᩴ ᩑᩅᩴ ᨽᩅᩥᩔᨲᩥ – ‘ᨾᨿᩴ ᨡᩮᩣ ᩋᨠᩩᩈᩃᩣᨶᩴ ᨵᨾ᩠ᨾᩣᨶᩴ ᩈᨾᩣᨴᩣᨶᩉᩮᨲᩩ ᩑᩅᩁᩪᨸᩴ ᩌᨿᨲᩴ ᨬᩣᨲᩥᨠ᩠ᨡᨿᩴ ᨸᨲ᩠ᨲᩣ. ᨿᩴᨶᩪᨶ ᨾᨿᩴ ᨠᩩᩈᩃᩴ ᨠᩁᩮᨿ᩠ᨿᩣᨾ. ᨠᩥᩴ ᨠᩩᩈᩃᩴ ᨠᩁᩮᨿ᩠ᨿᩣᨾ? ᨿᩴᨶᩪᨶ ᨾᨿᩴ ᨸᩣᨱᩣᨲᩥᨸᩣᨲᩣ ᩅᩥᩁᨾᩮᨿ᩠ᨿᩣᨾ, ᩍᨴᩴ ᨠᩩᩈᩃᩴ ᨵᨾ᩠ᨾᩴ ᩈᨾᩣᨴᩣᨿ ᩅᨲ᩠ᨲᩮᨿ᩠ᨿᩣᨾᩣ’ᨲᩥ. ᨲᩮ ᨸᩣᨱᩣᨲᩥᨸᩣᨲᩣ ᩅᩥᩁᨾᩥᩔᨶ᩠ᨲᩥ, ᩍᨴᩴ ᨠᩩᩈᩃᩴ ᨵᨾ᩠ᨾᩴ ᩈᨾᩣᨴᩣᨿ ᩅᨲ᩠ᨲᩥᩔᨶ᩠ᨲᩥ. ᨲᩮ ᨠᩩᩈᩃᩣᨶᩴ ᨵᨾ᩠ᨾᩣᨶᩴ ᩈᨾᩣᨴᩣᨶᩉᩮᨲᩩ ᩌᨿᩩᨶᩣᨸᩥ ᩅᨯ᩠ᨰᩥᩔᨶ᩠ᨲᩥ, ᩅᨱ᩠ᨱᩮᨶᨸᩥ ᩅᨯ᩠ᨰᩥᩔᨶ᩠ᨲᩥ. ᨲᩮᩈᩴ ᩌᨿᩩᨶᩣᨸᩥ ᩅᨯ᩠ᨰᨾᩣᨶᩣᨶᩴ ᩅᨱ᩠ᨱᩮᨶᨸᩥ ᩅᨯ᩠ᨰᨾᩣᨶᩣᨶᩴ ᨴᩈᩅᩔᩣᨿᩩᨠᩣᨶᩴ ᨾᨶᩩᩔᩣᨶᩴ ᩅᩦᩈᨲᩥᩅᩔᩣᨿᩩᨠᩣ ᨸᩩᨲ᩠ᨲᩣ ᨽᩅᩥᩔᨶ᩠ᨲᩥ.

‘‘ᩋᨳ ᨡᩮᩣ ᨲᩮᩈᩴ, ᨽᩥᨠ᩠ᨡᩅᩮ, ᩈᨲ᩠ᨲᩣᨶᩴ ᩑᩅᩴ ᨽᩅᩥᩔᨲᩥ – ‘ᨾᨿᩴ ᨡᩮᩣ ᨠᩩᩈᩃᩣᨶᩴ ᨵᨾ᩠ᨾᩣᨶᩴ ᩈᨾᩣᨴᩣᨶᩉᩮᨲᩩ ᩌᨿᩩᨶᩣᨸᩥ ᩅᨯ᩠ᨰᩣᨾ, ᩅᨱ᩠ᨱᩮᨶᨸᩥ ᩅᨯ᩠ᨰᩣᨾ. ᨿᩴᨶᩪᨶ ᨾᨿᩴ ᨽᩥᨿ᩠ᨿᩮᩣᩈᩮᩣᨾᨲ᩠ᨲᩣᨿ ᨠᩩᩈᩃᩴ ᨠᩁᩮᨿ᩠ᨿᩣᨾ. ᨠᩥᩴ ᨠᩩᩈᩃᩴ ᨠᩁᩮᨿ᩠ᨿᩣᨾ? ᨿᩴᨶᩪᨶ ᨾᨿᩴ ᩋᨴᩥᨶ᩠ᨶᩣᨴᩣᨶᩣ ᩅᩥᩁᨾᩮᨿ᩠ᨿᩣᨾ… ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ ᩅᩥᩁᨾᩮᨿ᩠ᨿᩣᨾ… ᨾᩩᩈᩣᩅᩣᨴᩣ ᩅᩥᩁᨾᩮᨿ᩠ᨿᩣᨾ… ᨸᩥᩈᩩᨱᩣᨿ ᩅᩣᨧᩣᨿ ᩅᩥᩁᨾᩮᨿ᩠ᨿᩣᨾ… ᨹᩁᩩᩈᩣᨿ ᩅᩣᨧᩣᨿ ᩅᩥᩁᨾᩮᨿ᩠ᨿᩣᨾ… ᩈᨾ᩠ᨹᨸ᩠ᨸᩃᩣᨸᩣ ᩅᩥᩁᨾᩮᨿ᩠ᨿᩣᨾ… ᩋᨽᩥᨩ᩠ᨫᩴ ᨸᨩᩉᩮᨿ᩠ᨿᩣᨾ… ᨻ᩠ᨿᩣᨸᩣᨴᩴ ᨸᨩᩉᩮᨿ᩠ᨿᩣᨾ… ᨾᩥᨧ᩠ᨨᩣᨴᩥᨭ᩠ᨮᩥᩴ ᨸᨩᩉᩮᨿ᩠ᨿᩣᨾ… ᨲᨿᩮᩣ ᨵᨾ᩠ᨾᩮ ᨸᨩᩉᩮᨿ᩠ᨿᩣᨾ – ᩋᨵᨾ᩠ᨾᩁᩣᨣᩴ ᩅᩥᩈᨾᩃᩮᩣᨽᩴ ᨾᩥᨧ᩠ᨨᩣᨵᨾ᩠ᨾᩴ… ᨿᩴᨶᩪᨶ ᨾᨿᩴ ᨾᨲ᩠ᨲᩮᨿ᩠ᨿᩣ ᩋᩔᩣᨾ ᨸᩮᨲ᩠ᨲᩮᨿ᩠ᨿᩣ ᩈᩣᨾᨬ᩠ᨬᩣ ᨻᩕᩉ᩠ᨾᨬ᩠ᨬᩣ ᨠᩩᩃᩮ ᨩᩮᨭ᩠ᨮᩣᨸᨧᩣᨿᩥᨶᩮᩣ, ᩍᨴᩴ ᨠᩩᩈᩃᩴ ᨵᨾ᩠ᨾᩴ ᩈᨾᩣᨴᩣᨿ ᩅᨲ᩠ᨲᩮᨿ᩠ᨿᩣᨾᩣ’ᨲᩥ. ᨲᩮ ᨾᨲ᩠ᨲᩮᨿ᩠ᨿᩣ ᨽᩅᩥᩔᨶ᩠ᨲᩥ ᨸᩮᨲ᩠ᨲᩮᨿ᩠ᨿᩣ ᩈᩣᨾᨬ᩠ᨬᩣ ᨻᩕᩉ᩠ᨾᨬ᩠ᨬᩣ ᨠᩩᩃᩮ ᨩᩮᨭ᩠ᨮᩣᨸᨧᩣᨿᩥᨶᩮᩣ, ᩍᨴᩴ ᨠᩩᩈᩃᩴ ᨵᨾ᩠ᨾᩴ ᩈᨾᩣᨴᩣᨿ ᩅᨲ᩠ᨲᩥᩔᨶ᩠ᨲᩥ.

‘‘ᨲᩮ ᨠᩩᩈᩃᩣᨶᩴ ᨵᨾ᩠ᨾᩣᨶᩴ ᩈᨾᩣᨴᩣᨶᩉᩮᨲᩩ ᩌᨿᩩᨶᩣᨸᩥ ᩅᨯ᩠ᨰᩥᩔᨶ᩠ᨲᩥ, ᩅᨱ᩠ᨱᩮᨶᨸᩥ ᩅᨯ᩠ᨰᩥᩔᨶ᩠ᨲᩥ. ᨲᩮᩈᩴ ᩌᨿᩩᨶᩣᨸᩥ ᩅᨯ᩠ᨰᨾᩣᨶᩣᨶᩴ ᩅᨱ᩠ᨱᩮᨶᨸᩥ ᩅᨯ᩠ᨰᨾᩣᨶᩣᨶᩴ ᩅᩦᩈᨲᩥᩅᩔᩣᨿᩩᨠᩣᨶᩴ ᨾᨶᩩᩔᩣᨶᩴ ᨧᨲ᩠ᨲᩣᩁᩦᩈᩅᩔᩣᨿᩩᨠᩣ ᨸᩩᨲ᩠ᨲᩣ ᨽᩅᩥᩔᨶ᩠ᨲᩥ… ᨧᨲ᩠ᨲᩣᩁᩦᩈᩅᩔᩣᨿᩩᨠᩣᨶᩴ ᨾᨶᩩᩔᩣᨶᩴ ᩋᩈᩦᨲᩥᩅᩔᩣᨿᩩᨠᩣ ᨸᩩᨲ᩠ᨲᩣ ᨽᩅᩥᩔᨶ᩠ᨲᩥ… ᩋᩈᩦᨲᩥᩅᩔᩣᨿᩩᨠᩣᨶᩴ ᨾᨶᩩᩔᩣᨶᩴ ᩈᨭ᩠ᨮᩥᩅᩔᩈᨲᩣᨿᩩᨠᩣ ᨸᩩᨲ᩠ᨲᩣ ᨽᩅᩥᩔᨶ᩠ᨲᩥ… ᩈᨭ᩠ᨮᩥᩅᩔᩈᨲᩣᨿᩩᨠᩣᨶᩴ ᨾᨶᩩᩔᩣᨶᩴ ᩅᩦᩈᨲᩥᨲᩥᩅᩔᩈᨲᩣᨿᩩᨠᩣ ᨸᩩᨲ᩠ᨲᩣ ᨽᩅᩥᩔᨶ᩠ᨲᩥ… ᩅᩦᩈᨲᩥᨲᩥᩅᩔᩈᨲᩣᨿᩩᨠᩣᨶᩴ ᨾᨶᩩᩔᩣᨶᩴ ᨧᨲ᩠ᨲᩣᩁᩦᩈᨨᨻ᩠ᨻᩔᩈᨲᩣᨿᩩᨠᩣ ᨸᩩᨲ᩠ᨲᩣ ᨽᩅᩥᩔᨶ᩠ᨲᩥ. ᨧᨲ᩠ᨲᩣᩁᩦᩈᨨᨻ᩠ᨻᩔᩈᨲᩣᨿᩩᨠᩣᨶᩴ ᨾᨶᩩᩔᩣᨶᩴ ᨴ᩠ᩅᩮᩅᩔᩈᩉᩔᩣᨿᩩᨠᩣ ᨸᩩᨲ᩠ᨲᩣ ᨽᩅᩥᩔᨶ᩠ᨲᩥ… ᨴ᩠ᩅᩮᩅᩔᩈᩉᩔᩣᨿᩩᨠᩣᨶᩴ ᨾᨶᩩᩔᩣᨶᩴ ᨧᨲ᩠ᨲᩣᩁᩥᩅᩔᩈᩉᩔᩣᨿᩩᨠᩣ ᨸᩩᨲ᩠ᨲᩣ ᨽᩅᩥᩔᨶ᩠ᨲᩥ… ᨧᨲ᩠ᨲᩣᩁᩥᩅᩔᩈᩉᩔᩣᨿᩩᨠᩣᨶᩴ ᨾᨶᩩᩔᩣᨶᩴ ᩋᨭ᩠ᨮᩅᩔᩈᩉᩔᩣᨿᩩᨠᩣ ᨸᩩᨲ᩠ᨲᩣ ᨽᩅᩥᩔᨶ᩠ᨲᩥ… ᩋᨭ᩠ᨮᩅᩔᩈᩉᩔᩣᨿᩩᨠᩣᨶᩴ ᨾᨶᩩᩔᩣᨶᩴ ᩅᩦᩈᨲᩥᩅᩔᩈᩉᩔᩣᨿᩩᨠᩣ ᨸᩩᨲ᩠ᨲᩣ ᨽᩅᩥᩔᨶ᩠ᨲᩥ… ᩅᩦᩈᨲᩥᩅᩔᩈᩉᩔᩣᨿᩩᨠᩣᨶᩴ ᨾᨶᩩᩔᩣᨶᩴ ᨧᨲ᩠ᨲᩣᩁᩦᩈᩅᩔᩈᩉᩔᩣᨿᩩᨠᩣ ᨸᩩᨲ᩠ᨲᩣ ᨽᩅᩥᩔᨶ᩠ᨲᩥ… ᨧᨲ᩠ᨲᩣᩁᩦᩈᩅᩔᩈᩉᩔᩣᨿᩩᨠᩣᨶᩴ ᨾᨶᩩᩔᩣᨶᩴ ᩋᩈᩦᨲᩥᩅᩔᩈᩉᩔᩣᨿᩩᨠᩣ ᨸᩩᨲ᩠ᨲᩣ ᨽᩅᩥᩔᨶ᩠ᨲᩥ… ᩋᩈᩦᨲᩥᩅᩔᩈᩉᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᨸᨬ᩠ᨧᩅᩔᩈᨲᩥᨠᩣ ᨠᩩᨾᩣᩁᩥᨠᩣ ᩋᩃᩴᨸᨲᩮᨿ᩠ᨿᩣ ᨽᩅᩥᩔᨶ᩠ᨲᩥ.

ᩈᨦ᩠ᨡᩁᩣᨩᩏᨸ᩠ᨸᨲ᩠ᨲᩥ

᪑᪐᪖. ‘‘ᩋᩈᩦᨲᩥᩅᩔᩈᩉᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᨲᨿᩮᩣ ᩌᨻᩣᨵᩣ ᨽᩅᩥᩔᨶ᩠ᨲᩥ, ᩍᨧ᩠ᨨᩣ, ᩋᨶᩈᨶᩴ, ᨩᩁᩣ. ᩋᩈᩦᨲᩥᩅᩔᩈᩉᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᩋᨿᩴ ᨩᨾ᩠ᨻᩩᨴᩦᨸᩮᩣ ᩍᨴ᩠ᨵᩮᩣ ᨧᩮᩅ ᨽᩅᩥᩔᨲᩥ ᨹᩦᨲᩮᩣ ᨧ, ᨠᩩᨠ᩠ᨠᩩᨭᩈᨾ᩠ᨸᩣᨲᩥᨠᩣ ᨣᩣᨾᨶᩥᨣᨾᩁᩣᨩᨵᩣᨶᩥᨿᩮᩣ [ᨣᩣᨾᨶᩥᨣᨾᨩᨶᨸᨴᩣ ᩁᩣᨩᨵᩣᨶᩥᨿᩮᩣ (ᨠ.)]. ᩋᩈᩦᨲᩥᩅᩔᩈᩉᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᩋᨿᩴ ᨩᨾ᩠ᨻᩩᨴᩦᨸᩮᩣ ᩋᩅᩦᨧᩥ ᨾᨬ᩠ᨬᩮ ᨹᩩᨭᩮᩣ ᨽᩅᩥᩔᨲᩥ ᨾᨶᩩᩔᩮᩉᩥ, ᩈᩮᨿ᩠ᨿᨳᩣᨸᩥ ᨶᩊᩅᨶᩴ ᩅᩣ ᩈᩁᩅᨶᩴ [ᩈᩣᩁᩅᨶᩴ (ᩈ᩠ᨿᩣ.)] ᩅᩣ. ᩋᩈᩦᨲᩥᩅᩔᩈᩉᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᩋᨿᩴ ᨻᩣᩁᩣᨱᩈᩦ ᨠᩮᨲᩩᨾᨲᩦ ᨶᩣᨾ ᩁᩣᨩᨵᩣᨶᩦ ᨽᩅᩥᩔᨲᩥ ᩍᨴ᩠ᨵᩣ ᨧᩮᩅ ᨹᩦᨲᩣ ᨧ ᨻᩉᩩᨩᨶᩣ ᨧ ᩌᨠᩥᨱ᩠ᨱᨾᨶᩩᩔᩣ ᨧ ᩈᩩᨽᩥᨠ᩠ᨡᩣ ᨧ. ᩋᩈᩦᨲᩥᩅᩔᩈᩉᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᩍᨾᩈ᩠ᨾᩥᩴ ᨩᨾ᩠ᨻᩩᨴᩦᨸᩮ ᨧᨲᩩᩁᩣᩈᩦᨲᩥᨶᨣᩁᩈᩉᩔᩣᨶᩥ ᨽᩅᩥᩔᨶ᩠ᨲᩥ ᨠᩮᨲᩩᨾᨲᩦᩁᩣᨩᨵᩣᨶᩦᨸᨾᩩᨡᩣᨶᩥ. ᩋᩈᩦᨲᩥᩅᩔᩈᩉᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᨠᩮᨲᩩᨾᨲᩥᨿᩣ ᩁᩣᨩᨵᩣᨶᩥᨿᩣ ᩈᨦ᩠ᨡᩮᩣ ᨶᩣᨾ ᩁᩣᨩᩣ ᩏᨸ᩠ᨸᨩ᩠ᨩᩥᩔᨲᩥ ᨧᨠ᩠ᨠᩅᨲ᩠ᨲᩦ ᨵᨾ᩠ᨾᩥᨠᩮᩣ ᨵᨾ᩠ᨾᩁᩣᨩᩣ ᨧᩣᨲᩩᩁᨶ᩠ᨲᩮᩣ ᩅᩥᨩᩥᨲᩣᩅᩦ ᨩᨶᨸᨴᨲ᩠ᨳᩣᩅᩁᩥᨿᨸ᩠ᨸᨲ᩠ᨲᩮᩣ ᩈᨲ᩠ᨲᩁᨲᨶᩈᨾᨶ᩠ᨶᩣᨣᨲᩮᩣ. ᨲᩔᩥᨾᩣᨶᩥ ᩈᨲ᩠ᨲ ᩁᨲᨶᩣᨶᩥ ᨽᩅᩥᩔᨶ᩠ᨲᩥ, ᩈᩮᨿ᩠ᨿᨳᩥᨴᩴ, ᨧᨠ᩠ᨠᩁᨲᨶᩴ ᩉᨲ᩠ᨳᩥᩁᨲᨶᩴ ᩋᩔᩁᨲᨶᩴ ᨾᨱᩥᩁᨲᨶᩴ ᩍᨲ᩠ᨳᩥᩁᨲᨶᩴ ᨣᩉᨸᨲᩥᩁᨲᨶᩴ ᨸᩁᩥᨱᩣᨿᨠᩁᨲᨶᨾᩮᩅ ᩈᨲ᩠ᨲᨾᩴ. ᨸᩁᩮᩣᩈᩉᩔᩴ ᨡᩮᩣ ᨸᨶᩔ ᨸᩩᨲ᩠ᨲᩣ ᨽᩅᩥᩔᨶ᩠ᨲᩥ ᩈᩪᩁᩣ ᩅᩦᩁᨦ᩠ᨣᩁᩪᨸᩣ ᨸᩁᩈᩮᨶᨸ᩠ᨸᨾᨴ᩠ᨴᨶᩣ. ᩈᩮᩣ ᩍᨾᩴ ᨸᨳᩅᩥᩴ ᩈᩣᨣᩁᨸᩁᩥᨿᨶ᩠ᨲᩴ ᩋᨴᨱ᩠ᨯᩮᨶ ᩋᩈᨲ᩠ᨳᩮᨶ ᨵᨾ᩠ᨾᩮᨶ ᩋᨽᩥᩅᩥᨩᩥᨿ ᩋᨩ᩠ᨫᩣᩅᩈᩥᩔᨲᩥ.

ᨾᩮᨲ᩠ᨲᩮᨿ᩠ᨿᨻᩩᨴ᩠ᨵᩩᨸ᩠ᨸᩣᨴᩮᩣ

᪑᪐᪗. ‘‘ᩋᩈᩦᨲᩥᩅᩔᩈᩉᩔᩣᨿᩩᨠᩮᩈᩩ, ᨽᩥᨠ᩠ᨡᩅᩮ, ᨾᨶᩩᩔᩮᩈᩩ ᨾᩮᨲ᩠ᨲᩮᨿ᩠ᨿᩮᩣ ᨶᩣᨾ ᨽᨣᩅᩣ ᩃᩮᩣᨠᩮ ᩏᨸ᩠ᨸᨩ᩠ᨩᩥᩔᨲᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩮᩣ ᩈᩩᨣᨲᩮᩣ ᩃᩮᩣᨠᩅᩥᨴᩪ ᩋᨶᩩᨲ᩠ᨲᩁᩮᩣ ᨸᩩᩁᩥᩈᨴᨾ᩠ᨾᩈᩣᩁᨳᩥ ᩈᨲ᩠ᨳᩣ ᨴᩮᩅᨾᨶᩩᩔᩣᨶᩴ ᨻᩩᨴ᩠ᨵᩮᩣ ᨽᨣᩅᩣ. ᩈᩮᨿ᩠ᨿᨳᩣᨸᩣᩉᨾᩮᨲᩁᩉᩥ ᩃᩮᩣᨠᩮ ᩏᨸ᩠ᨸᨶ᩠ᨶᩮᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩮᩣ ᩈᩩᨣᨲᩮᩣ ᩃᩮᩣᨠᩅᩥᨴᩪ ᩋᨶᩩᨲ᩠ᨲᩁᩮᩣ ᨸᩩᩁᩥᩈᨴᨾ᩠ᨾᩈᩣᩁᨳᩥ ᩈᨲ᩠ᨳᩣ ᨴᩮᩅᨾᨶᩩᩔᩣᨶᩴ ᨻᩩᨴ᩠ᨵᩮᩣ ᨽᨣᩅᩣ. ᩈᩮᩣ ᩍᨾᩴ ᩃᩮᩣᨠᩴ ᩈᨴᩮᩅᨠᩴ ᩈᨾᩣᩁᨠᩴ ᩈᨻᩕᩉ᩠ᨾᨠᩴ ᩈᩔᨾᨱᨻᩕᩣᩉ᩠ᨾᨱᩥᩴ ᨸᨩᩴ ᩈᨴᩮᩅᨾᨶᩩᩔᩴ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᨸᩅᩮᨴᩮᩔᨲᩥ, ᩈᩮᨿ᩠ᨿᨳᩣᨸᩣᩉᨾᩮᨲᩁᩉᩥ ᩍᨾᩴ ᩃᩮᩣᨠᩴ ᩈᨴᩮᩅᨠᩴ ᩈᨾᩣᩁᨠᩴ ᩈᨻᩕᩉ᩠ᨾᨠᩴ ᩈᩔᨾᨱᨻᩕᩣᩉ᩠ᨾᨱᩥᩴ ᨸᨩᩴ ᩈᨴᩮᩅᨾᨶᩩᩔᩴ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᨸᩅᩮᨴᩮᨾᩥ. ᩈᩮᩣ ᨵᨾ᩠ᨾᩴ ᨴᩮᩈᩮᩔᨲᩥ ᩌᨴᩥᨠᩃ᩠ᨿᩣᨱᩴ ᨾᨩ᩠ᨫᩮᨠᩃ᩠ᨿᩣᨱᩴ ᨸᩁᩥᨿᩮᩣᩈᩣᨶᨠᩃ᩠ᨿᩣᨱᩴ ᩈᩣᨲ᩠ᨳᩴ ᩈᨻ᩠ᨿᨬ᩠ᨩᨶᩴ ᨠᩮᩅᩃᨸᩁᩥᨸᩩᨱ᩠ᨱᩴ ᨸᩁᩥᩈᩩᨴ᩠ᨵᩴ ᨻᩕᩉ᩠ᨾᨧᩁᩥᨿᩴ ᨸᨠᩣᩈᩮᩔᨲᩥ; ᩈᩮᨿ᩠ᨿᨳᩣᨸᩣᩉᨾᩮᨲᩁᩉᩥ ᨵᨾ᩠ᨾᩴ ᨴᩮᩈᩮᨾᩥ ᩌᨴᩥᨠᩃ᩠ᨿᩣᨱᩴ ᨾᨩ᩠ᨫᩮᨠᩃ᩠ᨿᩣᨱᩴ ᨸᩁᩥᨿᩮᩣᩈᩣᨶᨠᩃ᩠ᨿᩣᨱᩴ ᩈᩣᨲ᩠ᨳᩴ ᩈᨻ᩠ᨿᨬ᩠ᨩᨶᩴ ᨠᩮᩅᩃᨸᩁᩥᨸᩩᨱ᩠ᨱᩴ ᨸᩁᩥᩈᩩᨴ᩠ᨵᩴ ᨻᩕᩉ᩠ᨾᨧᩁᩥᨿᩴ ᨸᨠᩣᩈᩮᨾᩥ. ᩈᩮᩣ ᩋᨶᩮᨠᩈᩉᩔᩴ [ᩋᨶᩮᨠᩈᨲᩈᩉᩔᩴ (ᨠ.)] ᨽᩥᨠ᩠ᨡᩩᩈᩴᨥᩴ ᨸᩁᩥᩉᩁᩥᩔᨲᩥ, ᩈᩮᨿ᩠ᨿᨳᩣᨸᩣᩉᨾᩮᨲᩁᩉᩥ ᩋᨶᩮᨠᩈᨲᩴ ᨽᩥᨠ᩠ᨡᩩᩈᩴᨥᩴ ᨸᩁᩥᩉᩁᩣᨾᩥ.

᪑᪐᪘. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᩈᨦ᩠ᨡᩮᩣ ᨶᩣᨾ ᩁᩣᨩᩣ ᨿᩮᩣ ᩈᩮᩣ ᨿᩪᨸᩮᩣ ᩁᨬ᩠ᨬᩣ ᨾᩉᩣᨸᨶᩣᨴᩮᨶ ᨠᩣᩁᩣᨸᩥᨲᩮᩣ. ᨲᩴ ᨿᩪᨸᩴ ᩏᩔᩣᨸᩮᨲ᩠ᩅᩣ ᩋᨩ᩠ᨫᩣᩅᩈᩥᨲ᩠ᩅᩣ ᨲᩴ ᨴᨲ᩠ᩅᩣ ᩅᩥᩔᨩ᩠ᨩᩥᨲ᩠ᩅᩣ ᩈᨾᨱᨻᩕᩣᩉ᩠ᨾᨱᨠᨸᨱᨴ᩠ᨵᩥᨠᩅᨱᩥᨻ᩠ᨻᨠᨿᩣᨧᨠᩣᨶᩴ ᨴᩣᨶᩴ ᨴᨲ᩠ᩅᩣ ᨾᩮᨲ᩠ᨲᩮᨿ᩠ᨿᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩈᨶ᩠ᨲᩥᨠᩮ ᨠᩮᩈᨾᩔᩩᩴ ᩒᩉᩣᩁᩮᨲ᩠ᩅᩣ ᨠᩣᩈᩣᨿᩣᨶᩥ ᩅᨲ᩠ᨳᩣᨶᩥ ᩋᨧ᩠ᨨᩣᨴᩮᨲ᩠ᩅᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᩔᨲᩥ. ᩈᩮᩣ ᩑᩅᩴ ᨸᨻ᩠ᨻᨩᩥᨲᩮᩣ ᩈᨾᩣᨶᩮᩣ ᩑᨠᩮᩣ ᩅᩪᨸᨠᨭ᩠ᨮᩮᩣ ᩋᨸ᩠ᨸᨾᨲ᩠ᨲᩮᩣ ᩌᨲᩣᨸᩦ ᨸᩉᩥᨲᨲ᩠ᨲᩮᩣ ᩅᩥᩉᩁᨶ᩠ᨲᩮᩣ ᨶᨧᩥᩁᩔᩮᩅ ᨿᩔᨲ᩠ᨳᩣᨿ ᨠᩩᩃᨸᩩᨲ᩠ᨲᩣ ᩈᨾ᩠ᨾᨴᩮᩅ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨶ᩠ᨲᩥ, ᨲᨴᨶᩩᨲ᩠ᨲᩁᩴ ᨻᩕᩉ᩠ᨾᨧᩁᩥᨿᨸᩁᩥᨿᩮᩣᩈᩣᨶᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᩏᨸᩈᨾ᩠ᨸᨩ᩠ᨩ ᩅᩥᩉᩁᩥᩔᨲᩥ.

᪑᪐᪙. ‘‘ᩋᨲ᩠ᨲᨴᩦᨸᩣ, ᨽᩥᨠ᩠ᨡᩅᩮ, ᩅᩥᩉᩁᨳ ᩋᨲ᩠ᨲᩈᩁᨱᩣ ᩋᨶᨬ᩠ᨬᩈᩁᨱᩣ, ᨵᨾ᩠ᨾᨴᩦᨸᩣ ᨵᨾ᩠ᨾᩈᩁᨱᩣ ᩋᨶᨬ᩠ᨬᩈᩁᨱᩣ. ᨠᨳᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩋᨲ᩠ᨲᨴᩦᨸᩮᩣ ᩅᩥᩉᩁᨲᩥ ᩋᨲ᩠ᨲᩈᩁᨱᩮᩣ ᩋᨶᨬ᩠ᨬᩈᩁᨱᩮᩣ ᨵᨾ᩠ᨾᨴᩦᨸᩮᩣ ᨵᨾ᩠ᨾᩈᩁᨱᩮᩣ ᩋᨶᨬ᩠ᨬᩈᩁᨱᩮᩣ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ. ᩅᩮᨴᨶᩣᩈᩩ ᩅᩮᨴᨶᩣᨶᩩᨸᩔᩦ…ᨸᩮ… ᨧᩥᨲ᩠ᨲᩮ ᨧᩥᨲ᩠ᨲᩣᨶᩩᨸᩔᩦ…ᨸᩮ… ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ. ᩑᩅᩴ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩋᨲ᩠ᨲᨴᩦᨸᩮᩣ ᩅᩥᩉᩁᨲᩥ ᩋᨲ᩠ᨲᩈᩁᨱᩮᩣ ᩋᨶᨬ᩠ᨬᩈᩁᨱᩮᩣ ᨵᨾ᩠ᨾᨴᩦᨸᩮᩣ ᨵᨾ᩠ᨾᩈᩁᨱᩮᩣ ᩋᨶᨬ᩠ᨬᩈᩁᨱᩮᩣ.

ᨽᩥᨠ᩠ᨡᩩᨶᩮᩣᩌᨿᩩᩅᨱ᩠ᨱᩣᨴᩥᩅᨯ᩠ᨰᨶᨠᨳᩣ

᪑᪑᪐. ‘‘ᨣᩮᩣᨧᩁᩮ, ᨽᩥᨠ᩠ᨡᩅᩮ, ᨧᩁᨳ ᩈᨠᩮ ᨸᩮᨲ᩠ᨲᩥᨠᩮ ᩅᩥᩈᨿᩮ. ᨣᩮᩣᨧᩁᩮ, ᨽᩥᨠ᩠ᨡᩅᩮ, ᨧᩁᨶ᩠ᨲᩣ ᩈᨠᩮ ᨸᩮᨲ᩠ᨲᩥᨠᩮ ᩅᩥᩈᨿᩮ ᩌᨿᩩᨶᩣᨸᩥ ᩅᨯ᩠ᨰᩥᩔᨳ, ᩅᨱ᩠ᨱᩮᨶᨸᩥ ᩅᨯ᩠ᨰᩥᩔᨳ, ᩈᩩᨡᩮᨶᨸᩥ ᩅᨯ᩠ᨰᩥᩔᨳ, ᨽᩮᩣᨣᩮᨶᨸᩥ ᩅᨯ᩠ᨰᩥᩔᨳ, ᨻᩃᩮᨶᨸᩥ ᩅᨯ᩠ᨰᩥᩔᨳ.

‘‘ᨠᩥᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩮᩣ ᩌᨿᩩᩈ᩠ᨾᩥᩴ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨨᨶ᩠ᨴᩈᨾᩣᨵᩥᨸᨵᩣᨶᩈᨦ᩠ᨡᩣᩁᩈᨾᨶ᩠ᨶᩣᨣᨲᩴ ᩍᨴ᩠ᨵᩥᨸᩣᨴᩴ ᨽᩣᩅᩮᨲᩥ, ᩅᩦᩁᩥᨿᩈᨾᩣᨵᩥᨸᨵᩣᨶᩈᨦ᩠ᨡᩣᩁᩈᨾᨶ᩠ᨶᩣᨣᨲᩴ ᩍᨴ᩠ᨵᩥᨸᩣᨴᩴ ᨽᩣᩅᩮᨲᩥ, ᨧᩥᨲ᩠ᨲᩈᨾᩣᨵᩥᨸᨵᩣᨶᩈᨦ᩠ᨡᩣᩁᩈᨾᨶ᩠ᨶᩣᨣᨲᩴ ᩍᨴ᩠ᨵᩥᨸᩣᨴᩴ ᨽᩣᩅᩮᨲᩥ, ᩅᩦᨾᩴᩈᩣᩈᨾᩣᨵᩥᨸᨵᩣᨶᩈᨦ᩠ᨡᩣᩁᩈᨾᨶ᩠ᨶᩣᨣᨲᩴ ᩍᨴ᩠ᨵᩥᨸᩣᨴᩴ ᨽᩣᩅᩮᨲᩥ. ᩈᩮᩣ ᩍᨾᩮᩈᩴ ᨧᨲᩩᨶ᩠ᨶᩴ ᩍᨴ᩠ᨵᩥᨸᩣᨴᩣᨶᩴ ᨽᩣᩅᩥᨲᨲ᩠ᨲᩣ ᨻᩉᩩᩃᩦᨠᨲᨲ᩠ᨲᩣ ᩌᨠᨦ᩠ᨡᨾᩣᨶᩮᩣ ᨠᨸ᩠ᨸᩴ ᩅᩣ ᨲᩥᨭ᩠ᨮᩮᨿ᩠ᨿ ᨠᨸ᩠ᨸᩣᩅᩈᩮᩈᩴ ᩅᩣ. ᩍᨴᩴ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩮᩣ ᩌᨿᩩᩈ᩠ᨾᩥᩴ.

‘‘ᨠᩥᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩮᩣ ᩅᨱ᩠ᨱᩈ᩠ᨾᩥᩴ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩈᩦᩃᩅᩣ ᩉᩮᩣᨲᩥ, ᨸᩣᨲᩥᨾᩮᩣᨠ᩠ᨡᩈᩴᩅᩁᩈᩴᩅᩩᨲᩮᩣ ᩅᩥᩉᩁᨲᩥ ᩌᨧᩣᩁᨣᩮᩣᨧᩁᩈᨾ᩠ᨸᨶ᩠ᨶᩮᩣ, ᩋᨱᩩᨾᨲ᩠ᨲᩮᩈᩩ ᩅᨩ᩠ᨩᩮᩈᩩ ᨽᨿᨴᩔᩣᩅᩦ, ᩈᨾᩣᨴᩣᨿ ᩈᩥᨠ᩠ᨡᨲᩥ ᩈᩥᨠ᩠ᨡᩣᨸᨴᩮᩈᩩ. ᩍᨴᩴ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩮᩣ ᩅᨱ᩠ᨱᩈ᩠ᨾᩥᩴ.

‘‘ᨠᩥᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩮᩣ ᩈᩩᨡᩈ᩠ᨾᩥᩴ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩅᩥᩅᩥᨧ᩠ᨧᩮᩅ ᨠᩣᨾᩮᩉᩥ ᩅᩥᩅᩥᨧ᩠ᨧ ᩋᨠᩩᩈᩃᩮᩉᩥ ᨵᨾ᩠ᨾᩮᩉᩥ ᩈᩅᩥᨲᨠ᩠ᨠᩴ ᩈᩅᩥᨧᩣᩁᩴ ᩅᩥᩅᩮᨠᨩᩴ ᨸᩦᨲᩥᩈᩩᨡᩴ ᨸᨮᨾᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩅᩥᨲᨠ᩠ᨠᩅᩥᨧᩣᩁᩣᨶᩴ ᩅᩪᨸᩈᨾᩣ…ᨸᩮ… ᨴᩩᨲᩥᨿᩴ ᨫᩣᨶᩴ…ᨸᩮ… ᨲᨲᩥᨿᩴ ᨫᩣᨶᩴ…ᨸᩮ… ᨧᨲᩩᨲ᩠ᨳᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩍᨴᩴ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩮᩣ, ᩈᩩᨡᩈ᩠ᨾᩥᩴ.

‘‘ᨠᩥᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩮᩣ ᨽᩮᩣᨣᩈ᩠ᨾᩥᩴ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᨾᩮᨲ᩠ᨲᩣᩈᩉᨣᨲᩮᨶ ᨧᩮᨲᩈᩣ ᩑᨠᩴ ᨴᩥᩈᩴ ᨹᩁᩥᨲ᩠ᩅᩣ ᩅᩥᩉᩁᨲᩥ ᨲᨳᩣ ᨴᩩᨲᩥᨿᩴ. ᨲᨳᩣ ᨲᨲᩥᨿᩴ. ᨲᨳᩣ ᨧᨲᩩᨲ᩠ᨳᩴ. ᩍᨲᩥ ᩏᨴ᩠ᨵᨾᨵᩮᩣ ᨲᩥᩁᩥᨿᩴ ᩈᨻ᩠ᨻᨵᩥ ᩈᨻ᩠ᨻᨲ᩠ᨲᨲᩣᨿ ᩈᨻ᩠ᨻᩣᩅᨶ᩠ᨲᩴ ᩃᩮᩣᨠᩴ ᨾᩮᨲ᩠ᨲᩣᩈᩉᨣᨲᩮᨶ ᨧᩮᨲᩈᩣ ᩅᩥᨸᩩᩃᩮᨶ ᨾᩉᨣ᩠ᨣᨲᩮᨶ ᩋᨸ᩠ᨸᨾᩣᨱᩮᨶ ᩋᩅᩮᩁᩮᨶ ᩋᨻ᩠ᨿᩣᨸᨩ᩠ᨩᩮᨶ ᨹᩁᩥᨲ᩠ᩅᩣ ᩅᩥᩉᩁᨲᩥ. ᨠᩁᩩᨱᩣᩈᩉᨣᨲᩮᨶ ᨧᩮᨲᩈᩣ…ᨸᩮ… ᨾᩩᨴᩥᨲᩣᩈᩉᨣᨲᩮᨶ ᨧᩮᨲᩈᩣ…ᨸᩮ… ᩏᨸᩮᨠ᩠ᨡᩣᩈᩉᨣᨲᩮᨶ ᨧᩮᨲᩈᩣ ᩑᨠᩴ ᨴᩥᩈᩴ ᨹᩁᩥᨲ᩠ᩅᩣ ᩅᩥᩉᩁᨲᩥ. ᨲᨳᩣ ᨴᩩᨲᩥᨿᩴ. ᨲᨳᩣ ᨲᨲᩥᨿᩴ. ᨲᨳᩣ ᨧᨲᩩᨲ᩠ᨳᩴ. ᩍᨲᩥ ᩏᨴ᩠ᨵᨾᨵᩮᩣ ᨲᩥᩁᩥᨿᩴ ᩈᨻ᩠ᨻᨵᩥ ᩈᨻ᩠ᨻᨲ᩠ᨲᨲᩣᨿ ᩈᨻ᩠ᨻᩣᩅᨶ᩠ᨲᩴ ᩃᩮᩣᨠᩴ ᩏᨸᩮᨠ᩠ᨡᩣᩈᩉᨣᨲᩮᨶ ᨧᩮᨲᩈᩣ ᩅᩥᨸᩩᩃᩮᨶ ᨾᩉᨣ᩠ᨣᨲᩮᨶ ᩋᨸ᩠ᨸᨾᩣᨱᩮᨶ ᩋᩅᩮᩁᩮᨶ ᩋᨻ᩠ᨿᩣᨸᨩ᩠ᨩᩮᨶ ᨹᩁᩥᨲ᩠ᩅᩣ ᩅᩥᩉᩁᨲᩥ. ᩍᨴᩴ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩮᩣ ᨽᩮᩣᨣᩈ᩠ᨾᩥᩴ.

‘‘ᨠᩥᨬ᩠ᨧ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩮᩣ ᨻᩃᩈ᩠ᨾᩥᩴ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩌᩈᩅᩣᨶᩴ ᨡᨿᩣ ᩋᨶᩣᩈᩅᩴ ᨧᩮᨲᩮᩣᩅᩥᨾᩩᨲ᩠ᨲᩥᩴ ᨸᨬ᩠ᨬᩣᩅᩥᨾᩩᨲ᩠ᨲᩥᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩍᨴᩴ ᨡᩮᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩮᩣ ᨻᩃᩈ᩠ᨾᩥᩴ.

‘‘ᨶᩣᩉᩴ, ᨽᩥᨠ᩠ᨡᩅᩮ, ᩋᨬ᩠ᨬᩴ ᩑᨠᨻᩃᨾ᩠ᨸᩥ ᩈᨾᨶᩩᨸᩔᩣᨾᩥ ᨿᩴ ᩑᩅᩴ ᨴᩩᨸ᩠ᨸᩈᩉᩴ, ᨿᨳᨿᩥᨴᩴ, ᨽᩥᨠ᩠ᨡᩅᩮ, ᨾᩣᩁᨻᩃᩴ. ᨠᩩᩈᩃᩣᨶᩴ, ᨽᩥᨠ᩠ᨡᩅᩮ, ᨵᨾ᩠ᨾᩣᨶᩴ ᩈᨾᩣᨴᩣᨶᩉᩮᨲᩩ ᩑᩅᨾᩥᨴᩴ ᨸᩩᨬ᩠ᨬᩴ ᨸᩅᨯ᩠ᨰᨲᩦ’’ᨲᩥ. ᩍᨴᨾᩅᩮᩣᨧ ᨽᨣᩅᩣ. ᩋᨲ᩠ᨲᨾᨶᩣ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩩᨶ᩠ᨲᩥ.

ᨧᨠ᩠ᨠᩅᨲ᩠ᨲᩥᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᨲᨲᩥᨿᩴ.

᪔. ᩋᨣ᩠ᨣᨬ᩠ᨬᩈᩩᨲ᩠ᨲᩴ

ᩅᩣᩈᩮᨭ᩠ᨮᨽᩣᩁᨴ᩠ᩅᩣᨩᩣ

᪑᪑᪑. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᩈᩣᩅᨲ᩠ᨳᩥᨿᩴ ᩅᩥᩉᩁᨲᩥ ᨸᩩᨻ᩠ᨻᩣᩁᩣᨾᩮ ᨾᩥᨣᩣᩁᨾᩣᨲᩩᨸᩣᩈᩣᨴᩮ. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩅᩣᩈᩮᨭ᩠ᨮᨽᩣᩁᨴ᩠ᩅᩣᨩᩣ ᨽᩥᨠ᩠ᨡᩪᩈᩩ ᨸᩁᩥᩅᩈᨶ᩠ᨲᩥ ᨽᩥᨠ᩠ᨡᩩᨽᩣᩅᩴ ᩌᨠᨦ᩠ᨡᨾᩣᨶᩣ. ᩋᨳ ᨡᩮᩣ ᨽᨣᩅᩣ ᩈᩣᨿᨶ᩠ᩉᩈᨾᨿᩴ ᨸᨭᩥᩈᩃ᩠ᩃᩣᨶᩣ ᩅᩩᨭ᩠ᨮᩥᨲᩮᩣ ᨸᩣᩈᩣᨴᩣ ᩒᩁᩮᩣᩉᩥᨲ᩠ᩅᩣ ᨸᩣᩈᩣᨴᨸᨧ᩠ᨨᩣᨿᩣᨿᩴ [ᨸᩣᩈᩣᨴᨧ᩠ᨨᩣᨿᩣᨿᩴ (ᨠ.)] ᩋᨻ᩠ᨽᩮᩣᨠᩣᩈᩮ ᨧᨦ᩠ᨠᨾᨲᩥ.

᪑᪑᪒. ᩋᨴ᩠ᨴᩈᩣ ᨡᩮᩣ ᩅᩣᩈᩮᨭ᩠ᨮᩮᩣ ᨽᨣᩅᨶ᩠ᨲᩴ ᩈᩣᨿᨶ᩠ᩉᩈᨾᨿᩴ ᨸᨭᩥᩈᩃ᩠ᩃᩣᨶᩣ ᩅᩩᨭ᩠ᨮᩥᨲᩴ ᨸᩣᩈᩣᨴᩣ ᩒᩁᩮᩣᩉᩥᨲ᩠ᩅᩣ ᨸᩣᩈᩣᨴᨸᨧ᩠ᨨᩣᨿᩣᨿᩴ ᩋᨻ᩠ᨽᩮᩣᨠᩣᩈᩮ ᨧᨦ᩠ᨠᨾᨶ᩠ᨲᩴ. ᨴᩥᩈ᩠ᩅᩣᨶ ᨽᩣᩁᨴ᩠ᩅᩣᨩᩴ ᩌᨾᨶ᩠ᨲᩮᩈᩥ – ‘‘ᩋᨿᩴ, ᩌᩅᩩᩈᩮᩣ ᨽᩣᩁᨴ᩠ᩅᩣᨩ, ᨽᨣᩅᩣ ᩈᩣᨿᨶ᩠ᩉᩈᨾᨿᩴ ᨸᨭᩥᩈᩃ᩠ᩃᩣᨶᩣ ᩅᩩᨭ᩠ᨮᩥᨲᩮᩣ ᨸᩣᩈᩣᨴᩣ ᩒᩁᩮᩣᩉᩥᨲ᩠ᩅᩣ ᨸᩣᩈᩣᨴᨸᨧ᩠ᨨᩣᨿᩣᨿᩴ ᩋᨻ᩠ᨽᩮᩣᨠᩣᩈᩮ ᨧᨦ᩠ᨠᨾᨲᩥ. ᩌᨿᩣᨾᩣᩅᩩᩈᩮᩣ ᨽᩣᩁᨴ᩠ᩅᩣᨩ, ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥᩔᩣᨾ; ᩋᨸ᩠ᨸᩮᩅ ᨶᩣᨾ ᩃᨽᩮᨿ᩠ᨿᩣᨾ ᨽᨣᩅᨲᩮᩣ ᩈᨶ᩠ᨲᩥᨠᩣ [ᩈᨾ᩠ᨾᩩᨡᩣ (ᩈ᩠ᨿᩣ. ᨠ.)] ᨵᨾ᩠ᨾᩥᩴ ᨠᨳᩴ ᩈᩅᨶᩣᨿᩣ’’ᨲᩥ. ‘‘ᩑᩅᨾᩣᩅᩩᩈᩮᩣ’’ᨲᩥ ᨡᩮᩣ ᨽᩣᩁᨴ᩠ᩅᩣᨩᩮᩣ ᩅᩣᩈᩮᨭ᩠ᨮᩔ ᨸᨧ᩠ᨧᩔᩮᩣᩈᩥ.

᪑᪑᪓. ᩋᨳ ᨡᩮᩣ ᩅᩣᩈᩮᨭ᩠ᨮᨽᩣᩁᨴ᩠ᩅᩣᨩᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᨽᨣᩅᨶ᩠ᨲᩴ ᨧᨦ᩠ᨠᨾᨶ᩠ᨲᩴ ᩋᨶᩩᨧᨦ᩠ᨠᨾᩥᩴᩈᩩ. ᩋᨳ ᨡᩮᩣ ᨽᨣᩅᩣ ᩅᩣᩈᩮᨭ᩠ᨮᩴ ᩌᨾᨶ᩠ᨲᩮᩈᩥ – ‘‘ᨲᩩᨾ᩠ᩉᩮ ᨡ᩠ᩅᨲ᩠ᨳ, ᩅᩣᩈᩮᨭ᩠ᨮ, ᨻᩕᩣᩉ᩠ᨾᨱᨩᨧ᩠ᨧᩣ ᨻᩕᩣᩉ᩠ᨾᨱᨠᩩᩃᩦᨶᩣ ᨻᩕᩣᩉ᩠ᨾᨱᨠᩩᩃᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᨲᩣ, ᨠᨧ᩠ᨧᩥ ᩅᩮᩣ, ᩅᩣᩈᩮᨭ᩠ᨮ, ᨻᩕᩣᩉ᩠ᨾᨱᩣ ᨶ ᩋᨠ᩠ᨠᩮᩣᩈᨶ᩠ᨲᩥ ᨶ ᨸᩁᩥᨽᩣᩈᨶ᩠ᨲᩦ’’ᨲᩥ? ‘‘ᨲᨣ᩠ᨥ ᨶᩮᩣ, ᨽᨶ᩠ᨲᩮ, ᨻᩕᩣᩉ᩠ᨾᨱᩣ ᩋᨠ᩠ᨠᩮᩣᩈᨶ᩠ᨲᩥ ᨸᩁᩥᨽᩣᩈᨶ᩠ᨲᩥ ᩋᨲ᩠ᨲᩁᩪᨸᩣᨿ ᨸᩁᩥᨽᩣᩈᩣᨿ ᨸᩁᩥᨸᩩᨱ᩠ᨱᩣᨿ, ᨶᩮᩣ ᩋᨸᩁᩥᨸᩩᨱ᩠ᨱᩣᨿᩣ’’ᨲᩥ. ‘‘ᨿᨳᩣ ᨠᨳᩴ ᨸᨶ ᩅᩮᩣ, ᩅᩣᩈᩮᨭ᩠ᨮ, ᨻᩕᩣᩉ᩠ᨾᨱᩣ ᩋᨠ᩠ᨠᩮᩣᩈᨶ᩠ᨲᩥ ᨸᩁᩥᨽᩣᩈᨶ᩠ᨲᩥ ᩋᨲ᩠ᨲᩁᩪᨸᩣᨿ ᨸᩁᩥᨽᩣᩈᩣᨿ ᨸᩁᩥᨸᩩᨱ᩠ᨱᩣᨿ, ᨶᩮᩣ ᩋᨸᩁᩥᨸᩩᨱ᩠ᨱᩣᨿᩣ’’ᨲᩥ? ‘‘ᨻᩕᩣᩉ᩠ᨾᨱᩣ, ᨽᨶ᩠ᨲᩮ, ᩑᩅᨾᩣᩉᩴᩈᩩ – ‘ᨻᩕᩣᩉ᩠ᨾᨱᩮᩣᩅ ᩈᩮᨭ᩠ᨮᩮᩣ ᩅᨱ᩠ᨱᩮᩣ, ᩉᩦᨶᩣ ᩋᨬ᩠ᨬᩮ ᩅᨱ᩠ᨱᩣ [ᩉᩦᨶᩮᩣ ᩋᨬ᩠ᨬᩮᩣ ᩅᨱ᩠ᨱᩮᩣ (ᩈᩦ. ᨸᩦ. ᨾ. ᨶᩥ. ᪒ ᨾᨵᩩᩁᩈᩩᨲ᩠ᨲ)]. ᨻᩕᩣᩉ᩠ᨾᨱᩮᩣᩅ ᩈᩩᨠ᩠ᨠᩮᩣ ᩅᨱ᩠ᨱᩮᩣ, ᨠᨱ᩠ᩉᩣ ᩋᨬ᩠ᨬᩮ ᩅᨱ᩠ᨱᩣ [ᨠᨱ᩠ᩉᩮᩣ ᩋᨬ᩠ᨬᩮᩣ ᩅᨱ᩠ᨱᩮᩣ (ᩈᩦ. ᨸᩦ. ᨾ. ᨶᩥ. ᪒ ᨾᨵᩩᩁᩈᩩᨲ᩠ᨲ)]. ᨻᩕᩣᩉ᩠ᨾᨱᩣᩅ ᩈᩩᨩ᩠ᨫᨶ᩠ᨲᩥ, ᨶᩮᩣ ᩋᨻᩕᩣᩉ᩠ᨾᨱᩣ. ᨻᩕᩣᩉ᩠ᨾᨱᩣᩅ [ᨻᩕᩣᩉ᩠ᨾᨱᩣ (ᩈ᩠ᨿᩣ.)] ᨻᩕᩉ᩠ᨾᩩᨶᩮᩣ ᨸᩩᨲ᩠ᨲᩣ ᩒᩁᩈᩣ ᨾᩩᨡᨲᩮᩣ ᨩᩣᨲᩣ ᨻᩕᩉ᩠ᨾᨩᩣ ᨻᩕᩉ᩠ᨾᨶᩥᨾ᩠ᨾᩥᨲᩣ ᨻᩕᩉ᩠ᨾᨴᩣᨿᩣᨴᩣ. ᨲᩮ ᨲᩩᨾ᩠ᩉᩮ ᩈᩮᨭ᩠ᨮᩴ ᩅᨱ᩠ᨱᩴ ᩉᩥᨲ᩠ᩅᩣ ᩉᩦᨶᨾᨲ᩠ᨳ ᩅᨱ᩠ᨱᩴ ᩋᨩ᩠ᨫᩩᨸᨣᨲᩣ, ᨿᨴᩥᨴᩴ ᨾᩩᨱ᩠ᨯᨠᩮ ᩈᨾᨱᨠᩮ ᩍᨻ᩠ᨽᩮ ᨠᨱ᩠ᩉᩮ ᨻᨶ᩠ᨵᩩᨸᩣᨴᩣᨸᨧ᩠ᨧᩮ. ᨲᨿᩥᨴᩴ ᨶ ᩈᩣᨵᩩ, ᨲᨿᩥᨴᩴ ᨶᨸ᩠ᨸᨲᩥᩁᩪᨸᩴ, ᨿᩴ ᨲᩩᨾ᩠ᩉᩮ ᩈᩮᨭ᩠ᨮᩴ ᩅᨱ᩠ᨱᩴ ᩉᩥᨲ᩠ᩅᩣ ᩉᩦᨶᨾᨲ᩠ᨳ ᩅᨱ᩠ᨱᩴ ᩋᨩ᩠ᨫᩩᨸᨣᨲᩣ ᨿᨴᩥᨴᩴ ᨾᩩᨱ᩠ᨯᨠᩮ ᩈᨾᨱᨠᩮ ᩍᨻ᩠ᨽᩮ ᨠᨱ᩠ᩉᩮ ᨻᨶ᩠ᨵᩩᨸᩣᨴᩣᨸᨧ᩠ᨧᩮ’ᨲᩥ. ᩑᩅᩴ ᨡᩮᩣ ᨶᩮᩣ, ᨽᨶ᩠ᨲᩮ, ᨻᩕᩣᩉ᩠ᨾᨱᩣ ᩋᨠ᩠ᨠᩮᩣᩈᨶ᩠ᨲᩥ ᨸᩁᩥᨽᩣᩈᨶ᩠ᨲᩥ ᩋᨲ᩠ᨲᩁᩪᨸᩣᨿ ᨸᩁᩥᨽᩣᩈᩣᨿ ᨸᩁᩥᨸᩩᨱ᩠ᨱᩣᨿ, ᨶᩮᩣ ᩋᨸᩁᩥᨸᩩᨱ᩠ᨱᩣᨿᩣ’’ᨲᩥ.

᪑᪑᪔. ‘‘ᨲᨣ᩠ᨥ ᩅᩮᩣ, ᩅᩣᩈᩮᨭ᩠ᨮ, ᨻᩕᩣᩉ᩠ᨾᨱᩣ ᨸᩮᩣᩁᩣᨱᩴ ᩋᩔᩁᨶ᩠ᨲᩣ ᩑᩅᨾᩣᩉᩴᩈᩩ – ‘ᨻᩕᩣᩉ᩠ᨾᨱᩮᩣᩅ ᩈᩮᨭ᩠ᨮᩮᩣ ᩅᨱ᩠ᨱᩮᩣ, ᩉᩦᨶᩣ ᩋᨬ᩠ᨬᩮ ᩅᨱ᩠ᨱᩣ; ᨻᩕᩣᩉ᩠ᨾᨱᩮᩣᩅ ᩈᩩᨠ᩠ᨠᩮᩣ ᩅᨱ᩠ᨱᩮᩣ, ᨠᨱ᩠ᩉᩣ ᩋᨬ᩠ᨬᩮ ᩅᨱ᩠ᨱᩣ; ᨻᩕᩣᩉ᩠ᨾᨱᩣᩅ ᩈᩩᨩ᩠ᨫᨶ᩠ᨲᩥ, ᨶᩮᩣ ᩋᨻᩕᩣᩉ᩠ᨾᨱᩣ; ᨻᩕᩣᩉ᩠ᨾᨱᩣᩅ ᨻᩕᩉ᩠ᨾᩩᨶᩮᩣ ᨸᩩᨲ᩠ᨲᩣ ᩒᩁᩈᩣ ᨾᩩᨡᨲᩮᩣ ᨩᩣᨲᩣ ᨻᩕᩉ᩠ᨾᨩᩣ ᨻᩕᩉ᩠ᨾᨶᩥᨾ᩠ᨾᩥᨲᩣ ᨻᩕᩉ᩠ᨾᨴᩣᨿᩣᨴᩣ’ᨲᩥ. ᨴᩥᩔᨶ᩠ᨲᩥ ᨡᩮᩣ ᨸᨶ, ᩅᩣᩈᩮᨭ᩠ᨮ, ᨻᩕᩣᩉ᩠ᨾᨱᩣᨶᩴ ᨻᩕᩣᩉ᩠ᨾᨱᩥᨿᩮᩣ ᩏᨲᩩᨶᩥᨿᩮᩣᨸᩥ ᨣᨻ᩠ᨽᩥᨶᩥᨿᩮᩣᨸᩥ ᩅᩥᨩᩣᨿᨾᩣᨶᩣᨸᩥ ᨸᩣᨿᨾᩣᨶᩣᨸᩥ. ᨲᩮ ᨧ ᨻᩕᩣᩉ᩠ᨾᨱᩣ ᨿᩮᩣᨶᩥᨩᩣᩅ ᩈᨾᩣᨶᩣ ᩑᩅᨾᩣᩉᩴᩈᩩ – ‘ᨻᩕᩣᩉ᩠ᨾᨱᩮᩣᩅ ᩈᩮᨭ᩠ᨮᩮᩣ ᩅᨱ᩠ᨱᩮᩣ, ᩉᩦᨶᩣ ᩋᨬ᩠ᨬᩮ ᩅᨱ᩠ᨱᩣ; ᨻᩕᩣᩉ᩠ᨾᨱᩮᩣᩅ ᩈᩩᨠ᩠ᨠᩮᩣ ᩅᨱ᩠ᨱᩮᩣ, ᨠᨱ᩠ᩉᩣ ᩋᨬ᩠ᨬᩮ ᩅᨱ᩠ᨱᩣ; ᨻᩕᩣᩉ᩠ᨾᨱᩣᩅ ᩈᩩᨩ᩠ᨫᨶ᩠ᨲᩥ, ᨶᩮᩣ ᩋᨻᩕᩣᩉ᩠ᨾᨱᩣ; ᨻᩕᩣᩉ᩠ᨾᨱᩣᩅ ᨻᩕᩉ᩠ᨾᩩᨶᩮᩣ ᨸᩩᨲ᩠ᨲᩣ ᩒᩁᩈᩣ ᨾᩩᨡᨲᩮᩣ ᨩᩣᨲᩣ ᨻᩕᩉ᩠ᨾᨩᩣ ᨻᩕᩉ᩠ᨾᨶᩥᨾ᩠ᨾᩥᨲᩣ ᨻᩕᩉ᩠ᨾᨴᩣᨿᩣᨴᩣ’ᨲᩥ. ᨲᩮ [ᨲᩮ ᨧ (ᩈ᩠ᨿᩣ. ᨠ.)] ᨻᩕᩉ᩠ᨾᩣᨶᨬ᩠ᨧᩮᩅ ᩋᨻ᩠ᨽᩣᨧᩥᨠ᩠ᨡᨶ᩠ᨲᩥ, ᨾᩩᩈᩣ ᨧ ᨽᩣᩈᨶ᩠ᨲᩥ, ᨻᩉᩩᨬ᩠ᨧ ᩋᨸᩩᨬ᩠ᨬᩴ ᨸᩈᩅᨶ᩠ᨲᩥ.

ᨧᨲᩩᩅᨱ᩠ᨱᩈᩩᨴ᩠ᨵᩥ

᪑᪑᪕. ‘‘ᨧᨲ᩠ᨲᩣᩁᩮᩣᨾᩮ, ᩅᩣᩈᩮᨭ᩠ᨮ, ᩅᨱ᩠ᨱᩣ – ᨡᨲ᩠ᨲᩥᨿᩣ, ᨻᩕᩣᩉ᩠ᨾᨱᩣ, ᩅᩮᩔᩣ, ᩈᩩᨴ᩠ᨴᩣ. ᨡᨲ᩠ᨲᩥᨿᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ, ᩍᨵᩮᨠᨧ᩠ᨧᩮᩣ ᨸᩣᨱᩣᨲᩥᨸᩣᨲᩦ ᩉᩮᩣᨲᩥ ᩋᨴᩥᨶ᩠ᨶᩣᨴᩣᨿᩦ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩦ ᨾᩩᩈᩣᩅᩣᨴᩦ ᨸᩥᩈᩩᨱᩅᩣᨧᩮᩣ ᨹᩁᩩᩈᩅᩣᨧᩮᩣ ᩈᨾ᩠ᨹᨸ᩠ᨸᩃᩣᨸᩦ ᩋᨽᩥᨩ᩠ᨫᩣᩃᩩ ᨻ᩠ᨿᩣᨸᨶ᩠ᨶᨧᩥᨲ᩠ᨲᩮᩣ ᨾᩥᨧ᩠ᨨᩣᨴᩥᨭ᩠ᨮᩦ. ᩍᨲᩥ ᨡᩮᩣ, ᩅᩣᩈᩮᨭ᩠ᨮ, ᨿᩮᨾᩮ ᨵᨾ᩠ᨾᩣ ᩋᨠᩩᩈᩃᩣ ᩋᨠᩩᩈᩃᩈᨦ᩠ᨡᩣᨲᩣ ᩈᩣᩅᨩ᩠ᨩᩣ ᩈᩣᩅᨩ᩠ᨩᩈᨦ᩠ᨡᩣᨲᩣ ᩋᩈᩮᩅᩥᨲᨻ᩠ᨻᩣ ᩋᩈᩮᩅᩥᨲᨻ᩠ᨻᩈᨦ᩠ᨡᩣᨲᩣ ᨶᩋᩃᨾᩁᩥᨿᩣ ᨶᩋᩃᨾᩁᩥᨿᩈᨦ᩠ᨡᩣᨲᩣ ᨠᨱ᩠ᩉᩣ ᨠᨱ᩠ᩉᩅᩥᨸᩣᨠᩣ ᩅᩥᨬ᩠ᨬᩩᨣᩁᩉᩥᨲᩣ, ᨡᨲ᩠ᨲᩥᨿᩮᨸᩥ ᨲᩮ [ᨡᩮᩣ ᩅᩣᩈᩮᨭ᩠ᨮ (ᨠ.)] ᩍᨵᩮᨠᨧ᩠ᨧᩮ ᩈᨶ᩠ᨴᩥᩔᨶ᩠ᨲᩥ. ᨻᩕᩣᩉ᩠ᨾᨱᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ…ᨸᩮ… ᩅᩮᩔᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ…ᨸᩮ… ᩈᩩᨴ᩠ᨴᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ, ᩍᨵᩮᨠᨧ᩠ᨧᩮᩣ ᨸᩣᨱᩣᨲᩥᨸᩣᨲᩦ ᩉᩮᩣᨲᩥ ᩋᨴᩥᨶ᩠ᨶᩣᨴᩣᨿᩦ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩦ ᨾᩩᩈᩣᩅᩣᨴᩦ ᨸᩥᩈᩩᨱᩅᩣᨧᩮᩣ ᨹᩁᩩᩈᩅᩣᨧᩮᩣ ᩈᨾ᩠ᨹᨸ᩠ᨸᩃᩣᨸᩦ ᩋᨽᩥᨩ᩠ᨫᩣᩃᩩ ᨻ᩠ᨿᩣᨸᨶ᩠ᨶᨧᩥᨲ᩠ᨲᩮᩣ ᨾᩥᨧ᩠ᨨᩣᨴᩥᨭ᩠ᨮᩦ. ᩍᨲᩥ ᨡᩮᩣ, ᩅᩣᩈᩮᨭ᩠ᨮ, ᨿᩮᨾᩮ ᨵᨾ᩠ᨾᩣ ᩋᨠᩩᩈᩃᩣ ᩋᨠᩩᩈᩃᩈᨦ᩠ᨡᩣᨲᩣ…ᨸᩮ… ᨠᨱ᩠ᩉᩣ ᨠᨱ᩠ᩉᩅᩥᨸᩣᨠᩣ ᩅᩥᨬ᩠ᨬᩩᨣᩁᩉᩥᨲᩣ; ᩈᩩᨴ᩠ᨴᩮᨸᩥ ᨲᩮ ᩍᨵᩮᨠᨧ᩠ᨧᩮ ᩈᨶ᩠ᨴᩥᩔᨶ᩠ᨲᩥ.

‘‘ᨡᨲ᩠ᨲᩥᨿᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ, ᩍᨵᩮᨠᨧ᩠ᨧᩮᩣ ᨸᩣᨱᩣᨲᩥᨸᩣᨲᩣ ᨸᨭᩥᩅᩥᩁᨲᩮᩣ ᩉᩮᩣᨲᩥ, ᩋᨴᩥᨶ᩠ᨶᩣᨴᩣᨶᩣ ᨸᨭᩥᩅᩥᩁᨲᩮᩣ, ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ ᨸᨭᩥᩅᩥᩁᨲᩮᩣ, ᨾᩩᩈᩣᩅᩣᨴᩣ ᨸᨭᩥᩅᩥᩁᨲᩮᩣ, ᨸᩥᩈᩩᨱᩣᨿ ᩅᩣᨧᩣᨿ ᨸᨭᩥᩅᩥᩁᨲᩮᩣ, ᨹᩁᩩᩈᩣᨿ ᩅᩣᨧᩣᨿ ᨸᨭᩥᩅᩥᩁᨲᩮᩣ, ᩈᨾ᩠ᨹᨸ᩠ᨸᩃᩣᨸᩣ ᨸᨭᩥᩅᩥᩁᨲᩮᩣ, ᩋᨶᨽᩥᨩ᩠ᨫᩣᩃᩩ ᩋᨻ᩠ᨿᩣᨸᨶ᩠ᨶᨧᩥᨲ᩠ᨲᩮᩣ, ᩈᨾ᩠ᨾᩣᨴᩥᨭ᩠ᨮᩦ. ᩍᨲᩥ ᨡᩮᩣ, ᩅᩣᩈᩮᨭ᩠ᨮ, ᨿᩮᨾᩮ ᨵᨾ᩠ᨾᩣ ᨠᩩᩈᩃᩣ ᨠᩩᩈᩃᩈᨦ᩠ᨡᩣᨲᩣ ᩋᨶᩅᨩ᩠ᨩᩣ ᩋᨶᩅᨩ᩠ᨩᩈᨦ᩠ᨡᩣᨲᩣ ᩈᩮᩅᩥᨲᨻ᩠ᨻᩣ ᩈᩮᩅᩥᨲᨻ᩠ᨻᩈᨦ᩠ᨡᩣᨲᩣ ᩋᩃᨾᩁᩥᨿᩣ ᩋᩃᨾᩁᩥᨿᩈᨦ᩠ᨡᩣᨲᩣ ᩈᩩᨠ᩠ᨠᩣ ᩈᩩᨠ᩠ᨠᩅᩥᨸᩣᨠᩣ ᩅᩥᨬ᩠ᨬᩩᨸ᩠ᨸᩈᨲ᩠ᨳᩣ, ᨡᨲ᩠ᨲᩥᨿᩮᨸᩥ ᨲᩮ ᩍᨵᩮᨠᨧ᩠ᨧᩮ ᩈᨶ᩠ᨴᩥᩔᨶ᩠ᨲᩥ. ᨻᩕᩣᩉ᩠ᨾᨱᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ…ᨸᩮ… ᩅᩮᩔᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ…ᨸᩮ… ᩈᩩᨴ᩠ᨴᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ, ᩍᨵᩮᨠᨧ᩠ᨧᩮᩣ ᨸᩣᨱᩣᨲᩥᨸᩣᨲᩣ ᨸᨭᩥᩅᩥᩁᨲᩮᩣ ᩉᩮᩣᨲᩥ…ᨸᩮ… ᩋᨶᨽᩥᨩ᩠ᨫᩣᩃᩩ, ᩋᨻ᩠ᨿᩣᨸᨶ᩠ᨶᨧᩥᨲ᩠ᨲᩮᩣ, ᩈᨾ᩠ᨾᩣᨴᩥᨭ᩠ᨮᩦ. ᩍᨲᩥ ᨡᩮᩣ, ᩅᩣᩈᩮᨭ᩠ᨮ, ᨿᩮᨾᩮ ᨵᨾ᩠ᨾᩣ ᨠᩩᩈᩃᩣ ᨠᩩᩈᩃᩈᨦ᩠ᨡᩣᨲᩣ ᩋᨶᩅᨩ᩠ᨩᩣ ᩋᨶᩅᨩ᩠ᨩᩈᨦ᩠ᨡᩣᨲᩣ ᩈᩮᩅᩥᨲᨻ᩠ᨻᩣ ᩈᩮᩅᩥᨲᨻ᩠ᨻᩈᨦ᩠ᨡᩣᨲᩣ ᩋᩃᨾᩁᩥᨿᩣ ᩋᩃᨾᩁᩥᨿᩈᨦ᩠ᨡᩣᨲᩣ ᩈᩩᨠ᩠ᨠᩣ ᩈᩩᨠ᩠ᨠᩅᩥᨸᩣᨠᩣ ᩅᩥᨬ᩠ᨬᩩᨸ᩠ᨸᩈᨲ᩠ᨳᩣ; ᩈᩩᨴ᩠ᨴᩮᨸᩥ ᨲᩮ ᩍᨵᩮᨠᨧ᩠ᨧᩮ ᩈᨶ᩠ᨴᩥᩔᨶ᩠ᨲᩥ.

᪑᪑᪖. ‘‘ᩍᨾᩮᩈᩩ ᨡᩮᩣ, ᩅᩣᩈᩮᨭ᩠ᨮ, ᨧᨲᩪᩈᩩ ᩅᨱ᩠ᨱᩮᩈᩩ ᩑᩅᩴ ᩏᨽᨿᩅᩮᩣᨠᩥᨱ᩠ᨱᩮᩈᩩ ᩅᨲ᩠ᨲᨾᩣᨶᩮᩈᩩ ᨠᨱ᩠ᩉᩈᩩᨠ᩠ᨠᩮᩈᩩ ᨵᨾ᩠ᨾᩮᩈᩩ ᩅᩥᨬ᩠ᨬᩩᨣᩁᩉᩥᨲᩮᩈᩩ ᨧᩮᩅ ᩅᩥᨬ᩠ᨬᩩᨸ᩠ᨸᩈᨲ᩠ᨳᩮᩈᩩ ᨧ ᨿᨴᩮᨲ᩠ᨳ ᨻᩕᩣᩉ᩠ᨾᨱᩣ ᩑᩅᨾᩣᩉᩴᩈᩩ – ‘ᨻᩕᩣᩉ᩠ᨾᨱᩮᩣᩅ ᩈᩮᨭ᩠ᨮᩮᩣ ᩅᨱ᩠ᨱᩮᩣ, ᩉᩦᨶᩣ ᩋᨬ᩠ᨬᩮ ᩅᨱ᩠ᨱᩣ; ᨻᩕᩣᩉ᩠ᨾᨱᩮᩣᩅ ᩈᩩᨠ᩠ᨠᩮᩣ ᩅᨱ᩠ᨱᩮᩣ, ᨠᨱ᩠ᩉᩣ ᩋᨬ᩠ᨬᩮ ᩅᨱ᩠ᨱᩣ; ᨻᩕᩣᩉ᩠ᨾᨱᩣᩅ ᩈᩩᨩ᩠ᨫᨶ᩠ᨲᩥ, ᨶᩮᩣ ᩋᨻᩕᩣᩉ᩠ᨾᨱᩣ; ᨻᩕᩣᩉ᩠ᨾᨱᩣᩅ ᨻᩕᩉ᩠ᨾᩩᨶᩮᩣ ᨸᩩᨲ᩠ᨲᩣ ᩒᩁᩈᩣ ᨾᩩᨡᨲᩮᩣ ᨩᩣᨲᩣ ᨻᩕᩉ᩠ᨾᨩᩣ ᨻᩕᩉ᩠ᨾᨶᩥᨾ᩠ᨾᩥᨲᩣ ᨻᩕᩉ᩠ᨾᨴᩣᨿᩣᨴᩣ’ᨲᩥ. ᨲᩴ ᨲᩮᩈᩴ ᩅᩥᨬ᩠ᨬᩪ ᨶᩣᨶᩩᨩᩣᨶᨶ᩠ᨲᩥ. ᨲᩴ ᨠᩥᩔ ᩉᩮᨲᩩ? ᩍᨾᩮᩈᨬ᩠ᩉᩥ, ᩅᩣᩈᩮᨭ᩠ᨮ, ᨧᨲᩩᨶ᩠ᨶᩴ ᩅᨱ᩠ᨱᩣᨶᩴ ᨿᩮᩣ ᩉᩮᩣᨲᩥ ᨽᩥᨠ᩠ᨡᩩ ᩋᩁᩉᩴ ᨡᩦᨱᩣᩈᩅᩮᩣ ᩅᩩᩈᩥᨲᩅᩣ ᨠᨲᨠᩁᨱᩦᨿᩮᩣ ᩒᩉᩥᨲᨽᩣᩁᩮᩣ ᩋᨶᩩᨸ᩠ᨸᨲ᩠ᨲᩈᨴᨲ᩠ᨳᩮᩣ ᨸᩁᩥᨠ᩠ᨡᩦᨱᨽᩅᩈᩴᨿᩮᩣᨩᨶᩮᩣ ᩈᨾ᩠ᨾᨴᨬ᩠ᨬᩣᩅᩥᨾᩩᨲ᩠ᨲᩮᩣ, ᩈᩮᩣ ᨶᩮᩈᩴ ᩋᨣ᩠ᨣᨾᨠ᩠ᨡᩣᨿᨲᩥ ᨵᨾ᩠ᨾᩮᨶᩮᩅ, ᨶᩮᩣ ᩋᨵᨾ᩠ᨾᩮᨶ. ᨵᨾ᩠ᨾᩮᩣ ᩉᩥ, ᩅᩣᩈᩮᨭ᩠ᨮ, ᩈᩮᨭ᩠ᨮᩮᩣ ᨩᨶᩮᨲᩈ᩠ᨾᩥᩴ, ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧ.

᪑᪑᪗. ‘‘ᨲᨴᨾᩥᨶᩣᨸᩮᨲᩴ, ᩅᩣᩈᩮᨭ᩠ᨮ, ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᨵᨾ᩠ᨾᩮᩣᩅ ᩈᩮᨭ᩠ᨮᩮᩣ ᨩᨶᩮᨲᩈ᩠ᨾᩥᩴ, ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧ.

‘‘ᨩᩣᨶᩣᨲᩥ ᨡᩮᩣ [ᨡᩮᩣ ᨸᨶ (ᨠ.)], ᩅᩣᩈᩮᨭ᩠ᨮ, ᩁᩣᨩᩣ ᨸᩈᩮᨶᨴᩥ ᨠᩮᩣᩈᩃᩮᩣ – ‘ᩈᨾᨱᩮᩣ ᨣᩮᩣᨲᨾᩮᩣ ᩋᨶᨶ᩠ᨲᩁᩣ [ᩋᨶᩩᨲ᩠ᨲᩁᩮᩣ (ᨻᩉᩪᩈᩩ)] ᩈᨠ᩠ᨿᨠᩩᩃᩣ ᨸᨻ᩠ᨻᨩᩥᨲᩮᩣ’ᨲᩥ. ᩈᨠ᩠ᨿᩣ ᨡᩮᩣ ᨸᨶ, ᩅᩣᩈᩮᨭ᩠ᨮ, ᩁᨬ᩠ᨬᩮᩣ ᨸᩈᩮᨶᨴᩥᩔ ᨠᩮᩣᩈᩃᩔ ᩋᨶᩩᨿᩩᨲ᩠ᨲᩣ [ᩋᨶᨶ᩠ᨲᩁᩣ ᩋᨶᩩᨿᨶ᩠ᨲᩣ (ᩈ᩠ᨿᩣ.), ᩋᨶᨶ᩠ᨲᩁᩣ ᩋᨶᩩᨿᩩᨲ᩠ᨲᩣ (ᨠ.)] ᨽᩅᨶ᩠ᨲᩥ. ᨠᩁᩮᩣᨶ᩠ᨲᩥ ᨡᩮᩣ, ᩅᩣᩈᩮᨭ᩠ᨮ, ᩈᨠ᩠ᨿᩣ ᩁᨬ᩠ᨬᩮ ᨸᩈᩮᨶᨴᩥᨾ᩠ᩉᩥ ᨠᩮᩣᩈᩃᩮ ᨶᩥᨸᨧ᩠ᨧᨠᩣᩁᩴ ᩋᨽᩥᩅᩣᨴᨶᩴ ᨸᨧ᩠ᨧᩩᨭ᩠ᨮᩣᨶᩴ ᩋᨬ᩠ᨩᩃᩥᨠᨾ᩠ᨾᩴ ᩈᩣᨾᩦᨧᩥᨠᨾ᩠ᨾᩴ. ᩍᨲᩥ ᨡᩮᩣ, ᩅᩣᩈᩮᨭ᩠ᨮ, ᨿᩴ ᨠᩁᩮᩣᨶ᩠ᨲᩥ ᩈᨠ᩠ᨿᩣ ᩁᨬ᩠ᨬᩮ ᨸᩈᩮᨶᨴᩥᨾ᩠ᩉᩥ ᨠᩮᩣᩈᩃᩮ ᨶᩥᨸᨧ᩠ᨧᨠᩣᩁᩴ ᩋᨽᩥᩅᩣᨴᨶᩴ ᨸᨧ᩠ᨧᩩᨭ᩠ᨮᩣᨶᩴ ᩋᨬ᩠ᨩᩃᩥᨠᨾ᩠ᨾᩴ ᩈᩣᨾᩦᨧᩥᨠᨾ᩠ᨾᩴ, ᨠᩁᩮᩣᨲᩥ ᨲᩴ ᩁᩣᨩᩣ ᨸᩈᩮᨶᨴᩥ ᨠᩮᩣᩈᩃᩮᩣ ᨲᨳᩣᨣᨲᩮ ᨶᩥᨸᨧ᩠ᨧᨠᩣᩁᩴ ᩋᨽᩥᩅᩣᨴᨶᩴ ᨸᨧ᩠ᨧᩩᨭ᩠ᨮᩣᨶᩴ ᩋᨬ᩠ᨩᩃᩥᨠᨾ᩠ᨾᩴ ᩈᩣᨾᩦᨧᩥᨠᨾ᩠ᨾᩴ, ᨶ ᨶᩴ [ᨶᨶᩩ (ᨻᩉᩪᩈᩩ)] ‘ᩈᩩᨩᩣᨲᩮᩣ ᩈᨾᨱᩮᩣ ᨣᩮᩣᨲᨾᩮᩣ, ᨴᩩᨩ᩠ᨩᩣᨲᩮᩣᩉᨾᩈ᩠ᨾᩥ. ᨻᩃᩅᩣ ᩈᨾᨱᩮᩣ ᨣᩮᩣᨲᨾᩮᩣ, ᨴᩩᨻ᩠ᨻᩃᩮᩣᩉᨾᩈ᩠ᨾᩥ. ᨸᩣᩈᩣᨴᩥᨠᩮᩣ ᩈᨾᨱᩮᩣ ᨣᩮᩣᨲᨾᩮᩣ, ᨴᩩᨻ᩠ᨻᨱ᩠ᨱᩮᩣᩉᨾᩈ᩠ᨾᩥ. ᨾᩉᩮᩈᨠ᩠ᨡᩮᩣ ᩈᨾᨱᩮᩣ ᨣᩮᩣᨲᨾᩮᩣ, ᩋᨸ᩠ᨸᩮᩈᨠ᩠ᨡᩮᩣᩉᨾᩈ᩠ᨾᩦ’ᨲᩥ. ᩋᨳ ᨡᩮᩣ ᨶᩴ ᨵᨾ᩠ᨾᩴᨿᩮᩅ ᩈᨠ᩠ᨠᩁᩮᩣᨶ᩠ᨲᩮᩣ ᨵᨾ᩠ᨾᩴ ᨣᩁᩩᩴ ᨠᩁᩮᩣᨶ᩠ᨲᩮᩣ ᨵᨾ᩠ᨾᩴ ᨾᩣᨶᩮᨶ᩠ᨲᩮᩣ ᨵᨾ᩠ᨾᩴ ᨸᩪᨩᩮᨶ᩠ᨲᩮᩣ ᨵᨾ᩠ᨾᩴ ᩋᨸᨧᩣᨿᨾᩣᨶᩮᩣ ᩑᩅᩴ ᩁᩣᨩᩣ ᨸᩈᩮᨶᨴᩥ ᨠᩮᩣᩈᩃᩮᩣ ᨲᨳᩣᨣᨲᩮ ᨶᩥᨸᨧ᩠ᨧᨠᩣᩁᩴ ᨠᩁᩮᩣᨲᩥ, ᩋᨽᩥᩅᩣᨴᨶᩴ ᨸᨧ᩠ᨧᩩᨭ᩠ᨮᩣᨶᩴ ᩋᨬ᩠ᨩᩃᩥᨠᨾ᩠ᨾᩴ ᩈᩣᨾᩦᨧᩥᨠᨾ᩠ᨾᩴ. ᩍᨾᩥᨶᩣᨸᩥ ᨡᩮᩣ ᩑᨲᩴ, ᩅᩣᩈᩮᨭ᩠ᨮ, ᨸᩁᩥᨿᩣᨿᩮᨶ ᩅᩮᨴᩥᨲᨻ᩠ᨻᩴ, ᨿᨳᩣ ᨵᨾ᩠ᨾᩮᩣᩅ ᩈᩮᨭ᩠ᨮᩮᩣ ᨩᨶᩮᨲᩈ᩠ᨾᩥᩴ, ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧ.

᪑᪑᪘. ‘‘ᨲᩩᨾ᩠ᩉᩮ ᨡ᩠ᩅᨲ᩠ᨳ, ᩅᩣᩈᩮᨭ᩠ᨮ, ᨶᩣᨶᩣᨩᨧ᩠ᨧᩣ ᨶᩣᨶᩣᨶᩣᨾᩣ ᨶᩣᨶᩣᨣᩮᩣᨲ᩠ᨲᩣ ᨶᩣᨶᩣᨠᩩᩃᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᩥᨲᩣ. ‘ᨠᩮ ᨲᩩᨾ᩠ᩉᩮ’ᨲᩥ – ᨸᩩᨭ᩠ᨮᩣ ᩈᨾᩣᨶᩣ ‘ᩈᨾᨱᩣ ᩈᨠ᩠ᨿᨸᩩᨲ᩠ᨲᩥᨿᩣᨾ᩠ᩉᩣ’ᨲᩥ – ᨸᨭᩥᨩᩣᨶᩣᨳ. ᨿᩔ ᨡᩮᩣ ᨸᨶᩔ, ᩅᩣᩈᩮᨭ᩠ᨮ, ᨲᨳᩣᨣᨲᩮ ᩈᨴ᩠ᨵᩣ ᨶᩥᩅᩥᨭ᩠ᨮᩣ ᨾᩪᩃᨩᩣᨲᩣ ᨸᨲᩥᨭ᩠ᨮᩥᨲᩣ ᨴᩊ᩠ᩉᩣ ᩋᩈᩴᩉᩣᩁᩥᨿᩣ ᩈᨾᨱᩮᨶ ᩅᩣ ᨻᩕᩣᩉ᩠ᨾᨱᩮᨶ ᩅᩣ ᨴᩮᩅᩮᨶ ᩅᩣ ᨾᩣᩁᩮᨶ ᩅᩣ ᨻᩕᩉ᩠ᨾᩩᨶᩣ ᩅᩣ ᨠᩮᨶᨧᩥ ᩅᩣ ᩃᩮᩣᨠᩈ᩠ᨾᩥᩴ, ᨲᩔᩮᨲᩴ ᨠᩃ᩠ᩃᩴ ᩅᨧᨶᩣᨿ – ‘ᨽᨣᩅᨲᩮᩣᨾ᩠ᩉᩥ ᨸᩩᨲ᩠ᨲᩮᩣ ᩒᩁᩈᩮᩣ ᨾᩩᨡᨲᩮᩣ ᨩᩣᨲᩮᩣ ᨵᨾ᩠ᨾᨩᩮᩣ ᨵᨾ᩠ᨾᨶᩥᨾ᩠ᨾᩥᨲᩮᩣ ᨵᨾ᩠ᨾᨴᩣᨿᩣᨴᩮᩣ’ᨲᩥ. ᨲᩴ ᨠᩥᩔ ᩉᩮᨲᩩ? ᨲᨳᩣᨣᨲᩔ ᩉᩮᨲᩴ, ᩅᩣᩈᩮᨭ᩠ᨮ, ᩋᨵᩥᩅᨧᨶᩴ ‘ᨵᨾ᩠ᨾᨠᩣᨿᩮᩣ’ ᩍᨲᩥᨸᩥ, ‘ᨻᩕᩉ᩠ᨾᨠᩣᨿᩮᩣ’ ᩍᨲᩥᨸᩥ, ‘ᨵᨾ᩠ᨾᨽᩪᨲᩮᩣ’ ᩍᨲᩥᨸᩥ, ‘ᨻᩕᩉ᩠ᨾᨽᩪᨲᩮᩣ’ ᩍᨲᩥᨸᩥ.

᪑᪑᪙. ‘‘ᩉᩮᩣᨲᩥ ᨡᩮᩣ ᩈᩮᩣ, ᩅᩣᩈᩮᨭ᩠ᨮ, ᩈᨾᨿᩮᩣ ᨿᩴ ᨠᨴᩣᨧᩥ ᨠᩁᩉᨧᩥ ᨴᩦᨥᩔ ᩋᨴ᩠ᨵᩩᨶᩮᩣ ᩋᨧ᩠ᨧᨿᩮᨶ ᩋᨿᩴ ᩃᩮᩣᨠᩮᩣ ᩈᩴᩅᨭ᩠ᨭᨲᩥ. ᩈᩴᩅᨭ᩠ᨭᨾᩣᨶᩮ ᩃᩮᩣᨠᩮ ᨿᩮᨽᩩᨿ᩠ᨿᩮᨶ ᩈᨲ᩠ᨲᩣ ᩌᨽᩔᩁᩈᩴᩅᨲ᩠ᨲᨶᩥᨠᩣ ᩉᩮᩣᨶ᩠ᨲᩥ. ᨲᩮ ᨲᨲ᩠ᨳ ᩉᩮᩣᨶ᩠ᨲᩥ ᨾᨶᩮᩣᨾᨿᩣ ᨸᩦᨲᩥᨽᨠ᩠ᨡᩣ ᩈᨿᩴᨸᨽᩣ ᩋᨶ᩠ᨲᩃᩥᨠ᩠ᨡᨧᩁᩣ ᩈᩩᨽᨭ᩠ᨮᩣᨿᩥᨶᩮᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᨲᩥᨭ᩠ᨮᨶ᩠ᨲᩥ.

‘‘ᩉᩮᩣᨲᩥ ᨡᩮᩣ ᩈᩮᩣ, ᩅᩣᩈᩮᨭ᩠ᨮ, ᩈᨾᨿᩮᩣ ᨿᩴ ᨠᨴᩣᨧᩥ ᨠᩁᩉᨧᩥ ᨴᩦᨥᩔ ᩋᨴ᩠ᨵᩩᨶᩮᩣ ᩋᨧ᩠ᨧᨿᩮᨶ ᩋᨿᩴ ᩃᩮᩣᨠᩮᩣ ᩅᩥᩅᨭ᩠ᨭᨲᩥ. ᩅᩥᩅᨭ᩠ᨭᨾᩣᨶᩮ ᩃᩮᩣᨠᩮ ᨿᩮᨽᩩᨿ᩠ᨿᩮᨶ ᩈᨲ᩠ᨲᩣ ᩌᨽᩔᩁᨠᩣᨿᩣ ᨧᩅᩥᨲ᩠ᩅᩣ ᩍᨲ᩠ᨳᨲ᩠ᨲᩴ ᩌᨣᨧ᩠ᨨᨶ᩠ᨲᩥ. ᨲᩮᨵ ᩉᩮᩣᨶ᩠ᨲᩥ ᨾᨶᩮᩣᨾᨿᩣ ᨸᩦᨲᩥᨽᨠ᩠ᨡᩣ ᩈᨿᩴᨸᨽᩣ ᩋᨶ᩠ᨲᩃᩥᨠ᩠ᨡᨧᩁᩣ ᩈᩩᨽᨭ᩠ᨮᩣᨿᩥᨶᩮᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᨲᩥᨭ᩠ᨮᨶ᩠ᨲᩥ.

ᩁᩈᨸᨳᩅᩥᨸᩣᨲᩩᨽᩣᩅᩮᩣ

᪑᪒᪐. ‘‘ᩑᨠᩮᩣᨴᨠᩦᨽᩪᨲᩴ ᨡᩮᩣ ᨸᨶ, ᩅᩣᩈᩮᨭ᩠ᨮ, ᨲᩮᨶ ᩈᨾᨿᩮᨶ ᩉᩮᩣᨲᩥ ᩋᨶ᩠ᨵᨠᩣᩁᩮᩣ ᩋᨶ᩠ᨵᨠᩣᩁᨲᩥᨾᩥᩈᩣ. ᨶ ᨧᨶ᩠ᨴᩥᨾᩈᩪᩁᩥᨿᩣ ᨸᨬ᩠ᨬᩣᨿᨶ᩠ᨲᩥ, ᨶ ᨶᨠ᩠ᨡᨲ᩠ᨲᩣᨶᩥ ᨲᩣᩁᨠᩁᩪᨸᩣᨶᩥ ᨸᨬ᩠ᨬᩣᨿᨶ᩠ᨲᩥ, ᨶ ᩁᨲ᩠ᨲᩥᨶ᩠ᨴᩥᩅᩣ ᨸᨬ᩠ᨬᩣᨿᨶ᩠ᨲᩥ, ᨶ ᨾᩣᩈᨯ᩠ᨰᨾᩣᩈᩣ ᨸᨬ᩠ᨬᩣᨿᨶ᩠ᨲᩥ, ᨶ ᩏᨲᩩᩈᩴᩅᨧ᩠ᨨᩁᩣ ᨸᨬ᩠ᨬᩣᨿᨶ᩠ᨲᩥ, ᨶ ᩍᨲ᩠ᨳᩥᨸᩩᨾᩣ ᨸᨬ᩠ᨬᩣᨿᨶ᩠ᨲᩥ, ᩈᨲ᩠ᨲᩣ ᩈᨲ᩠ᨲᩣᨲ᩠ᩅᩮᩅ ᩈᨦ᩠ᨡ᩠ᨿᩴ ᨣᨧ᩠ᨨᨶ᩠ᨲᩥ. ᩋᨳ ᨡᩮᩣ ᨲᩮᩈᩴ, ᩅᩣᩈᩮᨭ᩠ᨮ, ᩈᨲ᩠ᨲᩣᨶᩴ ᨠᨴᩣᨧᩥ ᨠᩁᩉᨧᩥ ᨴᩦᨥᩔ ᩋᨴ᩠ᨵᩩᨶᩮᩣ ᩋᨧ᩠ᨧᨿᩮᨶ ᩁᩈᨸᨳᩅᩦ ᩏᨴᨠᩈ᩠ᨾᩥᩴ ᩈᨾᨲᨶᩥ [ᩈᨾᨲᩣᨶᩥ (ᨻᩉᩪᩈᩩ)]; ᩈᩮᨿ᩠ᨿᨳᩣᨸᩥ ᨶᩣᨾ ᨸᨿᩈᩮᩣ ᨲᨲ᩠ᨲᩔ [ᨸᨿᨲᨲ᩠ᨲᩔ (ᩈ᩠ᨿᩣ.)] ᨶᩥᨻ᩠ᨻᩣᨿᨾᩣᨶᩔ ᩏᨸᩁᩥ ᩈᨶ᩠ᨲᩣᨶᨠᩴ ᩉᩮᩣᨲᩥ, ᩑᩅᨾᩮᩅ ᨸᩣᨲᩩᩁᩉᩮᩣᩈᩥ. ᩈᩣ ᩋᩉᩮᩣᩈᩥ ᩅᨱ᩠ᨱᩈᨾ᩠ᨸᨶ᩠ᨶᩣ ᨣᨶ᩠ᨵᩈᨾ᩠ᨸᨶ᩠ᨶᩣ ᩁᩈᩈᨾ᩠ᨸᨶ᩠ᨶᩣ, ᩈᩮᨿ᩠ᨿᨳᩣᨸᩥ ᨶᩣᨾ ᩈᨾ᩠ᨸᨶ᩠ᨶᩴ ᩅᩣ ᩈᨸ᩠ᨸᩥ ᩈᨾ᩠ᨸᨶ᩠ᨶᩴ ᩅᩣ ᨶᩅᨶᩦᨲᩴ ᩑᩅᩴᩅᨱ᩠ᨱᩣ ᩋᩉᩮᩣᩈᩥ. ᩈᩮᨿ᩠ᨿᨳᩣᨸᩥ ᨶᩣᨾ ᨡᩩᨴ᩠ᨴᨾᨵᩩᩴ [ᨡᩩᨴ᩠ᨴᩴ ᨾᨵᩩᩴ (ᨠ. ᩈᩦ.)] ᩋᨶᩮᩊᨠᩴ [ᩋᨶᩮᩃᨠᩴ (ᩈᩦ. ᨸᩦ.)], ᩑᩅᨾᩔᩣᨴᩣ ᩋᩉᩮᩣᩈᩥ. ᩋᨳ ᨡᩮᩣ, ᩅᩣᩈᩮᨭ᩠ᨮ, ᩋᨬ᩠ᨬᨲᩁᩮᩣ ᩈᨲ᩠ᨲᩮᩣ ᩃᩮᩣᩃᨩᩣᨲᩥᨠᩮᩣ – ‘ᩋᨾ᩠ᨽᩮᩣ, ᨠᩥᨾᩮᩅᩥᨴᩴ ᨽᩅᩥᩔᨲᩦ’ᨲᩥ ᩁᩈᨸᨳᩅᩥᩴ ᩋᨦ᩠ᨣᩩᩃᩥᨿᩣ ᩈᩣᨿᩥ. ᨲᩔ ᩁᩈᨸᨳᩅᩥᩴ ᩋᨦ᩠ᨣᩩᩃᩥᨿᩣ ᩈᩣᨿᨲᩮᩣ ᩋᨧ᩠ᨨᩣᨴᩮᩈᩥ, ᨲᨱ᩠ᩉᩣ ᨧᩔ ᩒᨠ᩠ᨠᨾᩥ. ᩋᨬ᩠ᨬᩮᨸᩥ ᨡᩮᩣ, ᩅᩣᩈᩮᨭ᩠ᨮ, ᩈᨲ᩠ᨲᩣ ᨲᩔ ᩈᨲ᩠ᨲᩔ ᨴᩥᨭ᩠ᨮᩣᨶᩩᨣᨲᩥᩴ ᩌᨸᨩ᩠ᨩᨾᩣᨶᩣ ᩁᩈᨸᨳᩅᩥᩴ ᩋᨦ᩠ᨣᩩᩃᩥᨿᩣ ᩈᩣᨿᩥᩴᩈᩩ. ᨲᩮᩈᩴ ᩁᩈᨸᨳᩅᩥᩴ ᩋᨦ᩠ᨣᩩᩃᩥᨿᩣ ᩈᩣᨿᨲᩴ ᩋᨧ᩠ᨨᩣᨴᩮᩈᩥ, ᨲᨱ᩠ᩉᩣ ᨧ ᨲᩮᩈᩴ ᩒᨠ᩠ᨠᨾᩥ.

ᨧᨶ᩠ᨴᩥᨾᩈᩪᩁᩥᨿᩣᨴᩥᨸᩣᨲᩩᨽᩣᩅᩮᩣ

᪑᪒᪑. ‘‘ᩋᨳ ᨡᩮᩣ ᨲᩮ, ᩅᩣᩈᩮᨭ᩠ᨮ, ᩈᨲ᩠ᨲᩣ ᩁᩈᨸᨳᩅᩥᩴ ᩉᨲ᩠ᨳᩮᩉᩥ ᩌᩃᩩᨸ᩠ᨸᨠᩣᩁᨠᩴ ᩏᨸᨠ᩠ᨠᨾᩥᩴᩈᩩ ᨸᩁᩥᨽᩩᨬ᩠ᨩᩥᨲᩩᩴ. ᨿᨲᩮᩣ ᨡᩮᩣ ᨲᩮ [ᨿᨲᩮᩣ ᨡᩮᩣ (ᩈᩦ. ᩈ᩠ᨿᩣ. ᨸᩦ.)], ᩅᩣᩈᩮᨭ᩠ᨮ, ᩈᨲ᩠ᨲᩣ ᩁᩈᨸᨳᩅᩥᩴ ᩉᨲ᩠ᨳᩮᩉᩥ ᩌᩃᩩᨸ᩠ᨸᨠᩣᩁᨠᩴ ᩏᨸᨠ᩠ᨠᨾᩥᩴᩈᩩ ᨸᩁᩥᨽᩩᨬ᩠ᨩᩥᨲᩩᩴ. ᩋᨳ ᨲᩮᩈᩴ ᩈᨲ᩠ᨲᩣᨶᩴ ᩈᨿᩴᨸᨽᩣ ᩋᨶ᩠ᨲᩁᨵᩣᨿᩥ. ᩈᨿᩴᨸᨽᩣᨿ ᩋᨶ᩠ᨲᩁᩉᩥᨲᩣᨿ ᨧᨶ᩠ᨴᩥᨾᩈᩪᩁᩥᨿᩣ ᨸᩣᨲᩩᩁᩉᩮᩈᩩᩴ. ᨧᨶ᩠ᨴᩥᨾᩈᩪᩁᩥᨿᩮᩈᩩ ᨸᩣᨲᩩᨽᩪᨲᩮᩈᩩ ᨶᨠ᩠ᨡᨲ᩠ᨲᩣᨶᩥ ᨲᩣᩁᨠᩁᩪᨸᩣᨶᩥ ᨸᩣᨲᩩᩁᩉᩮᩈᩩᩴ. ᨶᨠ᩠ᨡᨲ᩠ᨲᩮᩈᩩ ᨲᩣᩁᨠᩁᩪᨸᩮᩈᩩ ᨸᩣᨲᩩᨽᩪᨲᩮᩈᩩ ᩁᨲ᩠ᨲᩥᨶ᩠ᨴᩥᩅᩣ ᨸᨬ᩠ᨬᩣᨿᩥᩴᩈᩩ. ᩁᨲ᩠ᨲᩥᨶ᩠ᨴᩥᩅᩮᩈᩩ ᨸᨬ᩠ᨬᩣᨿᨾᩣᨶᩮᩈᩩ ᨾᩣᩈᨯ᩠ᨰᨾᩣᩈᩣ ᨸᨬ᩠ᨬᩣᨿᩥᩴᩈᩩ. ᨾᩣᩈᨯ᩠ᨰᨾᩣᩈᩮᩈᩩ ᨸᨬ᩠ᨬᩣᨿᨾᩣᨶᩮᩈᩩ ᩏᨲᩩᩈᩴᩅᨧ᩠ᨨᩁᩣ ᨸᨬ᩠ᨬᩣᨿᩥᩴᩈᩩ. ᩑᨲ᩠ᨲᩣᩅᨲᩣ ᨡᩮᩣ, ᩅᩣᩈᩮᨭ᩠ᨮ, ᩋᨿᩴ ᩃᩮᩣᨠᩮᩣ ᨸᩩᨶ ᩅᩥᩅᨭ᩠ᨭᩮᩣ ᩉᩮᩣᨲᩥ.

᪑᪒᪒. ‘‘ᩋᨳ ᨡᩮᩣ ᨲᩮ, ᩅᩣᩈᩮᨭ᩠ᨮ, ᩈᨲ᩠ᨲᩣ ᩁᩈᨸᨳᩅᩥᩴ ᨸᩁᩥᨽᩩᨬ᩠ᨩᨶ᩠ᨲᩣ ᨲᩴᨽᨠ᩠ᨡᩣ [ᨲᨻ᩠ᨽᨠ᩠ᨡᩣ (ᩈ᩠ᨿᩣ.)] ᨲᨴᩣᩉᩣᩁᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᩋᨭ᩠ᨮᩴᩈᩩ. ᨿᨳᩣ ᨿᨳᩣ ᨡᩮᩣ ᨲᩮ, ᩅᩣᩈᩮᨭ᩠ᨮ, ᩈᨲ᩠ᨲᩣ ᩁᩈᨸᨳᩅᩥᩴ ᨸᩁᩥᨽᩩᨬ᩠ᨩᨶ᩠ᨲᩣ ᨲᩴᨽᨠ᩠ᨡᩣ ᨲᨴᩣᩉᩣᩁᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᩋᨭ᩠ᨮᩴᩈᩩ, ᨲᨳᩣ ᨲᨳᩣ ᨲᩮᩈᩴ ᩈᨲ᩠ᨲᩣᨶᩴ (ᩁᩈᨸᨳᩅᩥᩴ ᨸᩁᩥᨽᩩᨬ᩠ᨩᨶ᩠ᨲᩣᨶᩴ) [( ) ᩈᩦ. ᩈ᩠ᨿᩣ. ᨸᩦ. ᨸᩮᩣᨲ᩠ᨳᨠᩮᩈᩩ ᨶᨲ᩠ᨳᩥ] ᨡᩁᨲ᩠ᨲᨬ᩠ᨧᩮᩅ ᨠᩣᨿᩈ᩠ᨾᩥᩴ ᩒᨠ᩠ᨠᨾᩥ, ᩅᨱ᩠ᨱᩅᩮᩅᨱ᩠ᨱᨲᩣ [ᩅᨱ᩠ᨱᩅᩮᩅᨩ᩠ᨩᨲᩣ (ᨭᩦᨠᩣ)] ᨧ ᨸᨬ᩠ᨬᩣᨿᩥᨲ᩠ᨳ. ᩑᨠᩥᨴᩴ ᩈᨲ᩠ᨲᩣ ᩅᨱ᩠ᨱᩅᨶ᩠ᨲᩮᩣ ᩉᩮᩣᨶ᩠ᨲᩥ, ᩑᨠᩥᨴᩴ ᩈᨲ᩠ᨲᩣ ᨴᩩᨻ᩠ᨻᨱ᩠ᨱᩣ. ᨲᨲ᩠ᨳ ᨿᩮ ᨲᩮ ᩈᨲ᩠ᨲᩣ ᩅᨱ᩠ᨱᩅᨶ᩠ᨲᩮᩣ, ᨲᩮ ᨴᩩᨻ᩠ᨻᨱ᩠ᨱᩮ ᩈᨲ᩠ᨲᩮ ᩋᨲᩥᨾᨬ᩠ᨬᨶ᩠ᨲᩥ – ‘ᨾᨿᨾᩮᨲᩮᩉᩥ ᩅᨱ᩠ᨱᩅᨶ᩠ᨲᨲᩁᩣ, ᩋᨾ᩠ᩉᩮᩉᩮᨲᩮ ᨴᩩᨻ᩠ᨻᨱ᩠ᨱᨲᩁᩣ’ᨲᩥ. ᨲᩮᩈᩴ ᩅᨱ᩠ᨱᩣᨲᩥᨾᩣᨶᨸᨧ᩠ᨧᨿᩣ ᨾᩣᨶᩣᨲᩥᨾᩣᨶᨩᩣᨲᩥᨠᩣᨶᩴ ᩁᩈᨸᨳᩅᩦ ᩋᨶ᩠ᨲᩁᨵᩣᨿᩥ. ᩁᩈᩣᨿ ᨸᨳᩅᩥᨿᩣ ᩋᨶ᩠ᨲᩁᩉᩥᨲᩣᨿ ᩈᨶ᩠ᨶᩥᨸᨲᩥᩴᩈᩩ. ᩈᨶ᩠ᨶᩥᨸᨲᩥᨲ᩠ᩅᩣ ᩋᨶᩩᨲ᩠ᨳᩩᨶᩥᩴᩈᩩ – ‘ᩋᩉᩮᩣ ᩁᩈᩴ, ᩋᩉᩮᩣ ᩁᩈ’ᨶ᩠ᨲᩥ! ᨲᨴᩮᨲᩁᩉᩥᨸᩥ ᨾᨶᩩᩔᩣ ᨠᨬ᩠ᨧᩥᨴᩮᩅ ᩈᩩᩁᩈᩴ [ᩈᩣᨵᩩᩁᩈᩴ (ᩈᩦ. ᩈ᩠ᨿᩣ. ᨸᩦ.)] ᩃᨽᩥᨲ᩠ᩅᩣ ᩑᩅᨾᩣᩉᩴᩈᩩ – ‘ᩋᩉᩮᩣ ᩁᩈᩴ, ᩋᩉᩮᩣ ᩁᩈ’ᨶ᩠ᨲᩥ! ᨲᨴᩮᩅ ᨸᩮᩣᩁᩣᨱᩴ ᩋᨣ᩠ᨣᨬ᩠ᨬᩴ ᩋᨠ᩠ᨡᩁᩴ ᩋᨶᩩᩈᩁᨶ᩠ᨲᩥ, ᨶ ᨲ᩠ᩅᩮᩅᩔ ᩋᨲ᩠ᨳᩴ ᩌᨩᩣᨶᨶ᩠ᨲᩥ.

ᨽᩪᨾᩥᨸᨸ᩠ᨸᨭᨠᨸᩣᨲᩩᨽᩣᩅᩮᩣ

᪑᪒᪓. ‘‘ᩋᨳ ᨡᩮᩣ ᨲᩮᩈᩴ, ᩅᩣᩈᩮᨭ᩠ᨮ, ᩈᨲ᩠ᨲᩣᨶᩴ ᩁᩈᩣᨿ ᨸᨳᩅᩥᨿᩣ ᩋᨶ᩠ᨲᩁᩉᩥᨲᩣᨿ ᨽᩪᨾᩥᨸᨸ᩠ᨸᨭᨠᩮᩣ ᨸᩣᨲᩩᩁᩉᩮᩣᩈᩥ. ᩈᩮᨿ᩠ᨿᨳᩣᨸᩥ ᨶᩣᨾ ᩋᩉᩥᨧ᩠ᨨᨲ᩠ᨲᨠᩮᩣ, ᩑᩅᨾᩮᩅ ᨸᩣᨲᩩᩁᩉᩮᩣᩈᩥ. ᩈᩮᩣ ᩋᩉᩮᩣᩈᩥ ᩅᨱ᩠ᨱᩈᨾ᩠ᨸᨶ᩠ᨶᩮᩣ ᨣᨶ᩠ᨵᩈᨾ᩠ᨸᨶ᩠ᨶᩮᩣ ᩁᩈᩈᨾ᩠ᨸᨶ᩠ᨶᩮᩣ, ᩈᩮᨿ᩠ᨿᨳᩣᨸᩥ ᨶᩣᨾ ᩈᨾ᩠ᨸᨶ᩠ᨶᩴ ᩅᩣ ᩈᨸ᩠ᨸᩥ ᩈᨾ᩠ᨸᨶ᩠ᨶᩴ ᩅᩣ ᨶᩅᨶᩦᨲᩴ ᩑᩅᩴᩅᨱ᩠ᨱᩮᩣ ᩋᩉᩮᩣᩈᩥ. ᩈᩮᨿ᩠ᨿᨳᩣᨸᩥ ᨶᩣᨾ ᨡᩩᨴ᩠ᨴᨾᨵᩩᩴ ᩋᨶᩮᩊᨠᩴ, ᩑᩅᨾᩔᩣᨴᩮᩣ ᩋᩉᩮᩣᩈᩥ.

‘‘ᩋᨳ ᨡᩮᩣ ᨲᩮ, ᩅᩣᩈᩮᨭ᩠ᨮ, ᩈᨲ᩠ᨲᩣ ᨽᩪᨾᩥᨸᨸ᩠ᨸᨭᨠᩴ ᩏᨸᨠ᩠ᨠᨾᩥᩴᩈᩩ ᨸᩁᩥᨽᩩᨬ᩠ᨩᩥᨲᩩᩴ. ᨲᩮ ᨲᩴ ᨸᩁᩥᨽᩩᨬ᩠ᨩᨶ᩠ᨲᩣ ᨲᩴᨽᨠ᩠ᨡᩣ ᨲᨴᩣᩉᩣᩁᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᩋᨭ᩠ᨮᩴᩈᩩ. ᨿᨳᩣ ᨿᨳᩣ ᨡᩮᩣ ᨲᩮ, ᩅᩣᩈᩮᨭ᩠ᨮ, ᩈᨲ᩠ᨲᩣ ᨽᩪᨾᩥᨸᨸ᩠ᨸᨭᨠᩴ ᨸᩁᩥᨽᩩᨬ᩠ᨩᨶ᩠ᨲᩣ ᨲᩴᨽᨠ᩠ᨡᩣ ᨲᨴᩣᩉᩣᩁᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᩋᨭ᩠ᨮᩴᩈᩩ, ᨲᨳᩣ ᨲᨳᩣ ᨲᩮᩈᩴ ᩈᨲ᩠ᨲᩣᨶᩴ ᨽᩥᨿ᩠ᨿᩮᩣᩈᩮᩣ ᨾᨲ᩠ᨲᩣᨿ ᨡᩁᨲ᩠ᨲᨬ᩠ᨧᩮᩅ ᨠᩣᨿᩈ᩠ᨾᩥᩴ ᩒᨠ᩠ᨠᨾᩥ, ᩅᨱ᩠ᨱᩅᩮᩅᨱ᩠ᨱᨲᩣ ᨧ ᨸᨬ᩠ᨬᩣᨿᩥᨲ᩠ᨳ. ᩑᨠᩥᨴᩴ ᩈᨲ᩠ᨲᩣ ᩅᨱ᩠ᨱᩅᨶ᩠ᨲᩮᩣ ᩉᩮᩣᨶ᩠ᨲᩥ, ᩑᨠᩥᨴᩴ ᩈᨲ᩠ᨲᩣ ᨴᩩᨻ᩠ᨻᨱ᩠ᨱᩣ. ᨲᨲ᩠ᨳ ᨿᩮ ᨲᩮ ᩈᨲ᩠ᨲᩣ ᩅᨱ᩠ᨱᩅᨶ᩠ᨲᩮᩣ, ᨲᩮ ᨴᩩᨻ᩠ᨻᨱ᩠ᨱᩮ ᩈᨲ᩠ᨲᩮ ᩋᨲᩥᨾᨬ᩠ᨬᨶ᩠ᨲᩥ – ‘ᨾᨿᨾᩮᨲᩮᩉᩥ ᩅᨱ᩠ᨱᩅᨶ᩠ᨲᨲᩁᩣ, ᩋᨾ᩠ᩉᩮᩉᩮᨲᩮ ᨴᩩᨻ᩠ᨻᨱ᩠ᨱᨲᩁᩣ’ᨲᩥ. ᨲᩮᩈᩴ ᩅᨱ᩠ᨱᩣᨲᩥᨾᩣᨶᨸᨧ᩠ᨧᨿᩣ ᨾᩣᨶᩣᨲᩥᨾᩣᨶᨩᩣᨲᩥᨠᩣᨶᩴ ᨽᩪᨾᩥᨸᨸ᩠ᨸᨭᨠᩮᩣ ᩋᨶ᩠ᨲᩁᨵᩣᨿᩥ.

ᨸᨴᩣᩃᨲᩣᨸᩣᨲᩩᨽᩣᩅᩮᩣ

᪑᪒᪔. ‘‘ᨽᩪᨾᩥᨸᨸ᩠ᨸᨭᨠᩮ ᩋᨶ᩠ᨲᩁᩉᩥᨲᩮ ᨸᨴᩣᩃᨲᩣ [ᩈᨴ᩠ᨴᩣᩃᨲᩣ (ᩈᩦ.)] ᨸᩣᨲᩩᩁᩉᩮᩣᩈᩥ, ᩈᩮᨿ᩠ᨿᨳᩣᨸᩥ ᨶᩣᨾ ᨠᩃᨾ᩠ᨻᩩᨠᩣ [ᨠᩃᨾ᩠ᨻᨠᩣ (ᩈ᩠ᨿᩣ.)], ᩑᩅᨾᩮᩅ ᨸᩣᨲᩩᩁᩉᩮᩣᩈᩥ. ᩈᩣ ᩋᩉᩮᩣᩈᩥ ᩅᨱ᩠ᨱᩈᨾ᩠ᨸᨶ᩠ᨶᩣ ᨣᨶ᩠ᨵᩈᨾ᩠ᨸᨶ᩠ᨶᩣ ᩁᩈᩈᨾ᩠ᨸᨶ᩠ᨶᩣ, ᩈᩮᨿ᩠ᨿᨳᩣᨸᩥ ᨶᩣᨾ ᩈᨾ᩠ᨸᨶ᩠ᨶᩴ ᩅᩣ ᩈᨸ᩠ᨸᩥ ᩈᨾ᩠ᨸᨶ᩠ᨶᩴ ᩅᩣ ᨶᩅᨶᩦᨲᩴ ᩑᩅᩴᩅᨱ᩠ᨱᩣ ᩋᩉᩮᩣᩈᩥ. ᩈᩮᨿ᩠ᨿᨳᩣᨸᩥ ᨶᩣᨾ ᨡᩩᨴ᩠ᨴᨾᨵᩩᩴ ᩋᨶᩮᩊᨠᩴ, ᩑᩅᨾᩔᩣᨴᩣ ᩋᩉᩮᩣᩈᩥ.

‘‘ᩋᨳ ᨡᩮᩣ ᨲᩮ, ᩅᩣᩈᩮᨭ᩠ᨮ, ᩈᨲ᩠ᨲᩣ ᨸᨴᩣᩃᨲᩴ ᩏᨸᨠ᩠ᨠᨾᩥᩴᩈᩩ ᨸᩁᩥᨽᩩᨬ᩠ᨩᩥᨲᩩᩴ. ᨲᩮ ᨲᩴ ᨸᩁᩥᨽᩩᨬ᩠ᨩᨶ᩠ᨲᩣ ᨲᩴᨽᨠ᩠ᨡᩣ ᨲᨴᩣᩉᩣᩁᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᩋᨭ᩠ᨮᩴᩈᩩ. ᨿᨳᩣ ᨿᨳᩣ ᨡᩮᩣ ᨲᩮ, ᩅᩣᩈᩮᨭ᩠ᨮ, ᩈᨲ᩠ᨲᩣ ᨸᨴᩣᩃᨲᩴ ᨸᩁᩥᨽᩩᨬ᩠ᨩᨶ᩠ᨲᩣ ᨲᩴᨽᨠ᩠ᨡᩣ ᨲᨴᩣᩉᩣᩁᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᩋᨭ᩠ᨮᩴᩈᩩ, ᨲᨳᩣ ᨲᨳᩣ ᨲᩮᩈᩴ ᩈᨲ᩠ᨲᩣᨶᩴ ᨽᩥᨿ᩠ᨿᩮᩣᩈᩮᩣᨾᨲ᩠ᨲᩣᨿ ᨡᩁᨲ᩠ᨲᨬ᩠ᨧᩮᩅ ᨠᩣᨿᩈ᩠ᨾᩥᩴ ᩒᨠ᩠ᨠᨾᩥ, ᩅᨱ᩠ᨱᩅᩮᩅᨱ᩠ᨱᨲᩣ ᨧ ᨸᨬ᩠ᨬᩣᨿᩥᨲ᩠ᨳ. ᩑᨠᩥᨴᩴ ᩈᨲ᩠ᨲᩣ ᩅᨱ᩠ᨱᩅᨶ᩠ᨲᩮᩣ ᩉᩮᩣᨶ᩠ᨲᩥ, ᩑᨠᩥᨴᩴ ᩈᨲ᩠ᨲᩣ ᨴᩩᨻ᩠ᨻᨱ᩠ᨱᩣ. ᨲᨲ᩠ᨳ ᨿᩮ ᨲᩮ ᩈᨲ᩠ᨲᩣ ᩅᨱ᩠ᨱᩅᨶ᩠ᨲᩮᩣ, ᨲᩮ ᨴᩩᨻ᩠ᨻᨱ᩠ᨱᩮ ᩈᨲ᩠ᨲᩮ ᩋᨲᩥᨾᨬ᩠ᨬᨶ᩠ᨲᩥ – ‘ᨾᨿᨾᩮᨲᩮᩉᩥ ᩅᨱ᩠ᨱᩅᨶ᩠ᨲᨲᩁᩣ, ᩋᨾ᩠ᩉᩮᩉᩮᨲᩮ ᨴᩩᨻ᩠ᨻᨱ᩠ᨱᨲᩁᩣ’ᨲᩥ. ᨲᩮᩈᩴ ᩅᨱ᩠ᨱᩣᨲᩥᨾᩣᨶᨸᨧ᩠ᨧᨿᩣ ᨾᩣᨶᩣᨲᩥᨾᩣᨶᨩᩣᨲᩥᨠᩣᨶᩴ ᨸᨴᩣᩃᨲᩣ ᩋᨶ᩠ᨲᩁᨵᩣᨿᩥ.

‘‘ᨸᨴᩣᩃᨲᩣᨿ ᩋᨶ᩠ᨲᩁᩉᩥᨲᩣᨿ ᩈᨶ᩠ᨶᩥᨸᨲᩥᩴᩈᩩ. ᩈᨶ᩠ᨶᩥᨸᨲᩥᨲ᩠ᩅᩣ ᩋᨶᩩᨲ᩠ᨳᩩᨶᩥᩴᩈᩩ – ‘ᩋᩉᩩ ᩅᨲ ᨶᩮᩣ, ᩋᩉᩣᨿᩥ ᩅᨲ ᨶᩮᩣ ᨸᨴᩣᩃᨲᩣ’ᨲᩥ! ᨲᨴᩮᨲᩁᩉᩥᨸᩥ ᨾᨶᩩᩔᩣ ᨠᩮᨶᨧᩥ [ᨠᩮᨶᨧᩥᨴᩮᩅ (ᩈᩦ. ᩈ᩠ᨿᩣ. ᨸᩦ.)] ᨴᩩᨠ᩠ᨡᨵᨾ᩠ᨾᩮᨶ ᨹᩩᨭ᩠ᨮᩣ ᩑᩅᨾᩣᩉᩴᩈᩩ – ‘ᩋᩉᩩ ᩅᨲ ᨶᩮᩣ, ᩋᩉᩣᨿᩥ ᩅᨲ ᨶᩮᩣ’ᨲᩥ! ᨲᨴᩮᩅ ᨸᩮᩣᩁᩣᨱᩴ ᩋᨣ᩠ᨣᨬ᩠ᨬᩴ ᩋᨠ᩠ᨡᩁᩴ ᩋᨶᩩᩈᩁᨶ᩠ᨲᩥ, ᨶ ᨲ᩠ᩅᩮᩅᩔ ᩋᨲ᩠ᨳᩴ ᩌᨩᩣᨶᨶ᩠ᨲᩥ.

ᩋᨠᨭ᩠ᨮᨸᩣᨠᩈᩣᩃᩥᨸᩣᨲᩩᨽᩣᩅᩮᩣ

᪑᪒᪕. ‘‘ᩋᨳ ᨡᩮᩣ ᨲᩮᩈᩴ, ᩅᩣᩈᩮᨭ᩠ᨮ, ᩈᨲ᩠ᨲᩣᨶᩴ ᨸᨴᩣᩃᨲᩣᨿ ᩋᨶ᩠ᨲᩁᩉᩥᨲᩣᨿ ᩋᨠᨭ᩠ᨮᨸᩣᨠᩮᩣ ᩈᩣᩃᩥ ᨸᩣᨲᩩᩁᩉᩮᩣᩈᩥ ᩋᨠᨱᩮᩣ ᩋᨳᩩᩈᩮᩣ ᩈᩩᨴ᩠ᨵᩮᩣ ᩈᩩᨣᨶ᩠ᨵᩮᩣ ᨲᨱ᩠ᨯᩩᩃᨸ᩠ᨹᩃᩮᩣ. ᨿᩴ ᨲᩴ ᩈᩣᨿᩴ ᩈᩣᨿᨾᩣᩈᩣᨿ ᩌᩉᩁᨶ᩠ᨲᩥ, ᨸᩣᨲᩮᩣ ᨲᩴ ᩉᩮᩣᨲᩥ ᨸᨠ᩠ᨠᩴ ᨸᨭᩥᩅᩥᩁᩪᩊ᩠ᩉᩴ. ᨿᩴ ᨲᩴ ᨸᩣᨲᩮᩣ ᨸᩣᨲᩁᩣᩈᩣᨿ ᩌᩉᩁᨶ᩠ᨲᩥ, ᩈᩣᨿᩴ ᨲᩴ ᩉᩮᩣᨲᩥ ᨸᨠ᩠ᨠᩴ ᨸᨭᩥᩅᩥᩁᩪᩊ᩠ᩉᩴ; ᨶᩣᨸᨴᩣᨶᩴ ᨸᨬ᩠ᨬᩣᨿᨲᩥ. ᩋᨳ ᨡᩮᩣ ᨲᩮ, ᩅᩣᩈᩮᨭ᩠ᨮ, ᩈᨲ᩠ᨲᩣ ᩋᨠᨭ᩠ᨮᨸᩣᨠᩴ ᩈᩣᩃᩥᩴ ᨸᩁᩥᨽᩩᨬ᩠ᨩᨶ᩠ᨲᩣ ᨲᩴᨽᨠ᩠ᨡᩣ ᨲᨴᩣᩉᩣᩁᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᩋᨭ᩠ᨮᩴᩈᩩ.

ᩍᨲ᩠ᨳᩥᨸᩩᩁᩥᩈᩃᩥᨦ᩠ᨣᨸᩣᨲᩩᨽᩣᩅᩮᩣ

᪑᪒᪖. ‘‘ᨿᨳᩣ ᨿᨳᩣ ᨡᩮᩣ ᨲᩮ, ᩅᩣᩈᩮᨭ᩠ᨮ, ᩈᨲ᩠ᨲᩣ ᩋᨠᨭ᩠ᨮᨸᩣᨠᩴ ᩈᩣᩃᩥᩴ ᨸᩁᩥᨽᩩᨬ᩠ᨩᨶ᩠ᨲᩣ ᨲᩴᨽᨠ᩠ᨡᩣ ᨲᨴᩣᩉᩣᩁᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᩋᨭ᩠ᨮᩴᩈᩩ, ᨲᨳᩣ ᨲᨳᩣ ᨲᩮᩈᩴ ᩈᨲ᩠ᨲᩣᨶᩴ ᨽᩥᨿ᩠ᨿᩮᩣᩈᩮᩣᨾᨲ᩠ᨲᩣᨿ ᨡᩁᨲ᩠ᨲᨬ᩠ᨧᩮᩅ ᨠᩣᨿᩈ᩠ᨾᩥᩴ ᩒᨠ᩠ᨠᨾᩥ, ᩅᨱ᩠ᨱᩅᩮᩅᨱ᩠ᨱᨲᩣ ᨧ ᨸᨬ᩠ᨬᩣᨿᩥᨲ᩠ᨳ, ᩍᨲ᩠ᨳᩥᨿᩣ ᨧ ᩍᨲ᩠ᨳᩥᩃᩥᨦ᩠ᨣᩴ ᨸᩣᨲᩩᩁᩉᩮᩣᩈᩥ ᨸᩩᩁᩥᩈᩔ ᨧ ᨸᩩᩁᩥᩈᩃᩥᨦ᩠ᨣᩴ. ᩍᨲ᩠ᨳᩦ ᨧ ᨸᩩᩁᩥᩈᩴ ᩋᨲᩥᩅᩮᩃᩴ ᩏᨸᨶᩥᨩ᩠ᨫᩣᨿᨲᩥ ᨸᩩᩁᩥᩈᩮᩣ ᨧ ᩍᨲ᩠ᨳᩥᩴ. ᨲᩮᩈᩴ ᩋᨲᩥᩅᩮᩃᩴ ᩋᨬ᩠ᨬᨾᨬ᩠ᨬᩴ ᩏᨸᨶᩥᨩ᩠ᨫᩣᨿᨲᩴ ᩈᩣᩁᩣᨣᩮᩣ ᩏᨴᨸᩣᨴᩥ, ᨸᩁᩥᩊᩣᩉᩮᩣ ᨠᩣᨿᩈ᩠ᨾᩥᩴ ᩒᨠ᩠ᨠᨾᩥ. ᨲᩮ ᨸᩁᩥᩊᩣᩉᨸᨧ᩠ᨧᨿᩣ ᨾᩮᨳᩩᨶᩴ ᨵᨾ᩠ᨾᩴ ᨸᨭᩥᩈᩮᩅᩥᩴᩈᩩ.

‘‘ᨿᩮ ᨡᩮᩣ ᨸᨶ ᨲᩮ, ᩅᩣᩈᩮᨭ᩠ᨮ, ᨲᩮᨶ ᩈᨾᨿᩮᨶ ᩈᨲ᩠ᨲᩣ ᨸᩔᨶ᩠ᨲᩥ ᨾᩮᨳᩩᨶᩴ ᨵᨾ᩠ᨾᩴ ᨸᨭᩥᩈᩮᩅᨶ᩠ᨲᩮ, ᩋᨬ᩠ᨬᩮ ᨸᩴᩈᩩᩴ ᨡᩥᨸᨶ᩠ᨲᩥ, ᩋᨬ᩠ᨬᩮ ᩈᩮᨭ᩠ᨮᩥᩴ ᨡᩥᨸᨶ᩠ᨲᩥ, ᩋᨬ᩠ᨬᩮ ᨣᩮᩣᨾᨿᩴ ᨡᩥᨸᨶ᩠ᨲᩥ – ‘ᨶᩔ ᩋᩈᩩᨧᩥ [ᩅᩈᩃᩥ (ᩈ᩠ᨿᩣ.), ᩅᩈᩃᩦ (ᨠ.)], ᨶᩔ ᩋᩈᩩᨧᩦ’ᨲᩥ. ‘ᨠᨳᨬ᩠ᩉᩥ ᨶᩣᨾ ᩈᨲ᩠ᨲᩮᩣ ᩈᨲ᩠ᨲᩔ ᩑᩅᩁᩪᨸᩴ ᨠᩁᩥᩔᨲᩦ’ᨲᩥ! ᨲᨴᩮᨲᩁᩉᩥᨸᩥ ᨾᨶᩩᩔᩣ ᩑᨠᨧ᩠ᨧᩮᩈᩩ ᨩᨶᨸᨴᩮᩈᩩ ᩅᨵᩩᨿᩣ ᨶᩥᨻ᩠ᨻᩩᨿ᩠ᩉᨾᩣᨶᩣᨿ [ᨶᩥᩅᨿ᩠ᩉᨾᩣᨶᩣᨿ, ᨶᩥᨣ᩠ᨣᨿ᩠ᩉᨾᩣᨶᩣᨿ (ᨠ.)] ᩋᨬ᩠ᨬᩮ ᨸᩴᩈᩩᩴ ᨡᩥᨸᨶ᩠ᨲᩥ, ᩋᨬ᩠ᨬᩮ ᩈᩮᨭ᩠ᨮᩥᩴ ᨡᩥᨸᨶ᩠ᨲᩥ, ᩋᨬ᩠ᨬᩮ ᨣᩮᩣᨾᨿᩴ ᨡᩥᨸᨶ᩠ᨲᩥ. ᨲᨴᩮᩅ ᨸᩮᩣᩁᩣᨱᩴ ᩋᨣ᩠ᨣᨬ᩠ᨬᩴ ᩋᨠ᩠ᨡᩁᩴ ᩋᨶᩩᩈᩁᨶ᩠ᨲᩥ, ᨶ ᨲ᩠ᩅᩮᩅᩔ ᩋᨲ᩠ᨳᩴ ᩌᨩᩣᨶᨶ᩠ᨲᩥ.

ᨾᩮᨳᩩᨶᨵᨾ᩠ᨾᩈᨾᩣᨧᩣᩁᩮᩣ

᪑᪒᪗. ‘‘ᩋᨵᨾ᩠ᨾᩈᨾ᩠ᨾᨲᩴ ᨡᩮᩣ ᨸᨶ [ᩋᨵᨾ᩠ᨾᩈᨾ᩠ᨾᨲᩴ ᨲᩴ ᨡᩮᩣ ᨸᨶ (ᩈ᩠ᨿᩣ.), ᩋᨵᨾ᩠ᨾᩈᨾ᩠ᨾᨲᩴ ᨡᩮᩣ ᨸᨶ ᨲᩴ (?)], ᩅᩣᩈᩮᨭ᩠ᨮ, ᨲᩮᨶ ᩈᨾᨿᩮᨶ ᩉᩮᩣᨲᩥ, ᨲᨴᩮᨲᩁᩉᩥ ᨵᨾ᩠ᨾᩈᨾ᩠ᨾᨲᩴ. ᨿᩮ ᨡᩮᩣ ᨸᨶ, ᩅᩣᩈᩮᨭ᩠ᨮ, ᨲᩮᨶ ᩈᨾᨿᩮᨶ ᩈᨲ᩠ᨲᩣ ᨾᩮᨳᩩᨶᩴ ᨵᨾ᩠ᨾᩴ ᨸᨭᩥᩈᩮᩅᨶ᩠ᨲᩥ, ᨲᩮ ᨾᩣᩈᨾ᩠ᨸᩥ ᨴ᩠ᩅᩮᨾᩣᩈᨾ᩠ᨸᩥ ᨶ ᩃᨽᨶ᩠ᨲᩥ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩅᩥᩈᩥᨲᩩᩴ. ᨿᨲᩮᩣ ᨡᩮᩣ ᨲᩮ, ᩅᩣᩈᩮᨭ᩠ᨮ, ᩈᨲ᩠ᨲᩣ ᨲᩈ᩠ᨾᩥᩴ ᩋᩈᨴ᩠ᨵᨾ᩠ᨾᩮ ᩋᨲᩥᩅᩮᩃᩴ ᨸᩣᨲᨻ᩠ᨿᨲᩴ ᩌᨸᨩ᩠ᨩᩥᩴᩈᩩ. ᩋᨳ ᩋᨣᩣᩁᩣᨶᩥ ᩏᨸᨠ᩠ᨠᨾᩥᩴᩈᩩ ᨠᩣᨲᩩᩴ ᨲᩔᩮᩅ ᩋᩈᨴ᩠ᨵᨾ᩠ᨾᩔ ᨸᨭᩥᨧ᩠ᨨᩣᨴᨶᨲ᩠ᨳᩴ. ᩋᨳ ᨡᩮᩣ, ᩅᩣᩈᩮᨭ᩠ᨮ, ᩋᨬ᩠ᨬᨲᩁᩔ ᩈᨲ᩠ᨲᩔ ᩋᩃᩈᨩᩣᨲᩥᨠᩔ ᩑᨲᨴᩉᩮᩣᩈᩥ – ‘ᩋᨾ᩠ᨽᩮᩣ, ᨠᩥᨾᩮᩅᩣᩉᩴ ᩅᩥᩉᨬ᩠ᨬᩣᨾᩥ ᩈᩣᩃᩥᩴ ᩌᩉᩁᨶ᩠ᨲᩮᩣ ᩈᩣᨿᩴ ᩈᩣᨿᨾᩣᩈᩣᨿ ᨸᩣᨲᩮᩣ ᨸᩣᨲᩁᩣᩈᩣᨿ! ᨿᩴᨶᩪᨶᩣᩉᩴ ᩈᩣᩃᩥᩴ ᩌᩉᩁᩮᨿ᩠ᨿᩴ ᩈᨠᩥᩴᨴᩮᩅ [ᩈᨠᩥᩴᨴᩮᩅ (ᨠ.)] ᩈᩣᨿᨸᩣᨲᩁᩣᩈᩣᨿᩣ’ᨲᩥ!

‘‘ᩋᨳ ᨡᩮᩣ ᩈᩮᩣ, ᩅᩣᩈᩮᨭ᩠ᨮ, ᩈᨲ᩠ᨲᩮᩣ ᩈᩣᩃᩥᩴ ᩌᩉᩣᩈᩥ ᩈᨠᩥᩴᨴᩮᩅ ᩈᩣᨿᨸᩣᨲᩁᩣᩈᩣᨿ. ᩋᨳ ᨡᩮᩣ, ᩅᩣᩈᩮᨭ᩠ᨮ, ᩋᨬ᩠ᨬᨲᩁᩮᩣ ᩈᨲ᩠ᨲᩮᩣ ᨿᩮᨶ ᩈᩮᩣ ᩈᨲ᩠ᨲᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨲᩴ ᩈᨲ᩠ᨲᩴ ᩑᨲᨴᩅᩮᩣᨧ – ‘ᩑᩉᩥ, ᨽᩮᩣ ᩈᨲ᩠ᨲ, ᩈᩣᩃᩣᩉᩣᩁᩴ ᨣᨾᩥᩔᩣᨾᩣ’ᨲᩥ. ‘ᩋᩃᩴ, ᨽᩮᩣ ᩈᨲ᩠ᨲ, ᩌᩉᨲᩮᩣ [ᩌᩉᨭᩮᩣ (ᩈ᩠ᨿᩣ.)] ᨾᩮ ᩈᩣᩃᩥ ᩈᨠᩥᩴᨴᩮᩅ ᩈᩣᨿᨸᩣᨲᩁᩣᩈᩣᨿᩣ’ᨲᩥ. ᩋᨳ ᨡᩮᩣ ᩈᩮᩣ, ᩅᩣᩈᩮᨭ᩠ᨮ, ᩈᨲ᩠ᨲᩮᩣ ᨲᩔ ᩈᨲ᩠ᨲᩔ ᨴᩥᨭ᩠ᨮᩣᨶᩩᨣᨲᩥᩴ ᩌᨸᨩ᩠ᨩᨾᩣᨶᩮᩣ ᩈᩣᩃᩥᩴ ᩌᩉᩣᩈᩥ ᩈᨠᩥᩴᨴᩮᩅ ᨴ᩠ᩅᩦᩉᩣᨿ. ‘ᩑᩅᨾ᩠ᨸᩥ ᨠᩥᩁ, ᨽᩮᩣ, ᩈᩣᨵᩪ’ᨲᩥ.

‘‘ᩋᨳ ᨡᩮᩣ, ᩅᩣᩈᩮᨭ᩠ᨮ, ᩋᨬ᩠ᨬᨲᩁᩮᩣ ᩈᨲ᩠ᨲᩮᩣ ᨿᩮᨶ ᩈᩮᩣ ᩈᨲ᩠ᨲᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨲᩴ ᩈᨲ᩠ᨲᩴ ᩑᨲᨴᩅᩮᩣᨧ – ‘ᩑᩉᩥ, ᨽᩮᩣ ᩈᨲ᩠ᨲ, ᩈᩣᩃᩣᩉᩣᩁᩴ ᨣᨾᩥᩔᩣᨾᩣ’ᨲᩥ. ‘ᩋᩃᩴ, ᨽᩮᩣ ᩈᨲ᩠ᨲ, ᩌᩉᨲᩮᩣ ᨾᩮ ᩈᩣᩃᩥ ᩈᨠᩥᩴᨴᩮᩅ ᨴ᩠ᩅᩦᩉᩣᨿᩣ’ᨲᩥ. ᩋᨳ ᨡᩮᩣ ᩈᩮᩣ, ᩅᩣᩈᩮᨭ᩠ᨮ, ᩈᨲ᩠ᨲᩮᩣ ᨲᩔ ᩈᨲ᩠ᨲᩔ ᨴᩥᨭ᩠ᨮᩣᨶᩩᨣᨲᩥᩴ ᩌᨸᨩ᩠ᨩᨾᩣᨶᩮᩣ ᩈᩣᩃᩥᩴ ᩌᩉᩣᩈᩥ ᩈᨠᩥᩴᨴᩮᩅ ᨧᨲᩪᩉᩣᨿ, ‘ᩑᩅᨾ᩠ᨸᩥ ᨠᩥᩁ, ᨽᩮᩣ, ᩈᩣᨵᩪ’ᨲᩥ.

‘‘ᩋᨳ ᨡᩮᩣ, ᩅᩣᩈᩮᨭ᩠ᨮ, ᩋᨬ᩠ᨬᨲᩁᩮᩣ ᩈᨲ᩠ᨲᩮᩣ ᨿᩮᨶ ᩈᩮᩣ ᩈᨲ᩠ᨲᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨲᩴ ᩈᨲ᩠ᨲᩴ ᩑᨲᨴᩅᩮᩣᨧ – ‘ᩑᩉᩥ, ᨽᩮᩣ ᩈᨲ᩠ᨲ, ᩈᩣᩃᩣᩉᩣᩁᩴ ᨣᨾᩥᩔᩣᨾᩣ’ᨲᩥ. ‘ᩋᩃᩴ, ᨽᩮᩣ ᩈᨲ᩠ᨲ, ᩌᩉᨲᩮᩣ ᨾᩮ ᩈᩣᩃᩥ ᩈᨠᩥᨴᩮᩅ ᨧᨲᩪᩉᩣᨿᩣ’ᨲᩥ. ᩋᨳ ᨡᩮᩣ ᩈᩮᩣ, ᩅᩣᩈᩮᨭ᩠ᨮ, ᩈᨲ᩠ᨲᩮᩣ ᨲᩔ ᩈᨲ᩠ᨲᩔ ᨴᩥᨭ᩠ᨮᩣᨶᩩᨣᨲᩥᩴ ᩌᨸᨩ᩠ᨩᨾᩣᨶᩮᩣ ᩈᩣᩃᩥᩴ ᩌᩉᩣᩈᩥ ᩈᨠᩥᨴᩮᩅ ᩋᨭ᩠ᨮᩣᩉᩣᨿ, ‘ᩑᩅᨾ᩠ᨸᩥ ᨠᩥᩁ, ᨽᩮᩣ, ᩈᩣᨵᩪ’ᨲᩥ.

‘‘ᨿᨲᩮᩣ ᨡᩮᩣ ᨲᩮ, ᩅᩣᩈᩮᨭ᩠ᨮ, ᩈᨲ᩠ᨲᩣ ᩈᨶ᩠ᨶᩥᨵᩥᨠᩣᩁᨠᩴ ᩈᩣᩃᩥᩴ ᩏᨸᨠ᩠ᨠᨾᩥᩴᩈᩩ ᨸᩁᩥᨽᩩᨬ᩠ᨩᩥᨲᩩᩴ. ᩋᨳ ᨠᨱᩮᩣᨸᩥ ᨲᨱ᩠ᨯᩩᩃᩴ ᨸᩁᩥᨿᩮᩣᨶᨶ᩠ᨵᩥ, ᨳᩩᩈᩮᩣᨸᩥ ᨲᨱ᩠ᨯᩩᩃᩴ ᨸᩁᩥᨿᩮᩣᨶᨶ᩠ᨵᩥ; ᩃᩪᨶᨾ᩠ᨸᩥ ᨶᨸ᩠ᨸᨭᩥᩅᩥᩁᩪᩊ᩠ᩉᩴ, ᩋᨸᨴᩣᨶᩴ ᨸᨬ᩠ᨬᩣᨿᩥᨲ᩠ᨳ, ᩈᨱ᩠ᨯᩈᨱ᩠ᨯᩣ ᩈᩣᩃᨿᩮᩣ ᩋᨭ᩠ᨮᩴᩈᩩ.

ᩈᩣᩃᩥᩅᩥᨽᩣᨣᩮᩣ

᪑᪒᪘. ‘‘ᩋᨳ ᨡᩮᩣ ᨲᩮ, ᩅᩣᩈᩮᨭ᩠ᨮ, ᩈᨲ᩠ᨲᩣ ᩈᨶ᩠ᨶᩥᨸᨲᩥᩴᩈᩩ, ᩈᨶ᩠ᨶᩥᨸᨲᩥᨲ᩠ᩅᩣ ᩋᨶᩩᨲ᩠ᨳᩩᨶᩥᩴᩈᩩ – ‘ᨸᩣᨸᨠᩣ ᩅᨲ, ᨽᩮᩣ, ᨵᨾ᩠ᨾᩣ ᩈᨲ᩠ᨲᩮᩈᩩ ᨸᩣᨲᩩᨽᩪᨲᩣ. ᨾᨿᨬ᩠ᩉᩥ ᨸᩩᨻ᩠ᨻᩮ ᨾᨶᩮᩣᨾᨿᩣ ᩋᩉᩩᨾ᩠ᩉᩣ ᨸᩦᨲᩥᨽᨠ᩠ᨡᩣ ᩈᨿᩴᨸᨽᩣ ᩋᨶ᩠ᨲᩃᩥᨠ᩠ᨡᨧᩁᩣ ᩈᩩᨽᨭ᩠ᨮᩣᨿᩥᨶᩮᩣ, ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᩋᨭ᩠ᨮᨾ᩠ᩉᩣ. ᨲᩮᩈᩴ ᨶᩮᩣ ᩋᨾ᩠ᩉᩣᨠᩴ ᨠᨴᩣᨧᩥ ᨠᩁᩉᨧᩥ ᨴᩦᨥᩔ ᩋᨴ᩠ᨵᩩᨶᩮᩣ ᩋᨧ᩠ᨧᨿᩮᨶ ᩁᩈᨸᨳᩅᩦ ᩏᨴᨠᩈ᩠ᨾᩥᩴ ᩈᨾᨲᨶᩥ. ᩈᩣ ᩋᩉᩮᩣᩈᩥ ᩅᨱ᩠ᨱᩈᨾ᩠ᨸᨶ᩠ᨶᩣ ᨣᨶ᩠ᨵᩈᨾ᩠ᨸᨶ᩠ᨶᩣ ᩁᩈᩈᨾ᩠ᨸᨶ᩠ᨶᩣ. ᨲᩮ ᨾᨿᩴ ᩁᩈᨸᨳᩅᩥᩴ ᩉᨲ᩠ᨳᩮᩉᩥ ᩌᩃᩩᨸ᩠ᨸᨠᩣᩁᨠᩴ ᩏᨸᨠ᩠ᨠᨾᩥᨾ᩠ᩉ ᨸᩁᩥᨽᩩᨬ᩠ᨩᩥᨲᩩᩴ, ᨲᩮᩈᩴ ᨶᩮᩣ ᩁᩈᨸᨳᩅᩥᩴ ᩉᨲ᩠ᨳᩮᩉᩥ ᩌᩃᩩᨸ᩠ᨸᨠᩣᩁᨠᩴ ᩏᨸᨠ᩠ᨠᨾᨲᩴ ᨸᩁᩥᨽᩩᨬ᩠ᨩᩥᨲᩩᩴ ᩈᨿᩴᨸᨽᩣ ᩋᨶ᩠ᨲᩁᨵᩣᨿᩥ. ᩈᨿᩴᨸᨽᩣᨿ ᩋᨶ᩠ᨲᩁᩉᩥᨲᩣᨿ ᨧᨶ᩠ᨴᩥᨾᩈᩪᩁᩥᨿᩣ ᨸᩣᨲᩩᩁᩉᩮᩈᩩᩴ, ᨧᨶ᩠ᨴᩥᨾᩈᩪᩁᩥᨿᩮᩈᩩ ᨸᩣᨲᩩᨽᩪᨲᩮᩈᩩ ᨶᨠ᩠ᨡᨲ᩠ᨲᩣᨶᩥ ᨲᩣᩁᨠᩁᩪᨸᩣᨶᩥ ᨸᩣᨲᩩᩁᩉᩮᩈᩩᩴ, ᨶᨠ᩠ᨡᨲ᩠ᨲᩮᩈᩩ ᨲᩣᩁᨠᩁᩪᨸᩮᩈᩩ ᨸᩣᨲᩩᨽᩪᨲᩮᩈᩩ ᩁᨲ᩠ᨲᩥᨶ᩠ᨴᩥᩅᩣ ᨸᨬ᩠ᨬᩣᨿᩥᩴᩈᩩ, ᩁᨲ᩠ᨲᩥᨶ᩠ᨴᩥᩅᩮᩈᩩ ᨸᨬ᩠ᨬᩣᨿᨾᩣᨶᩮᩈᩩ ᨾᩣᩈᨯ᩠ᨰᨾᩣᩈᩣ ᨸᨬ᩠ᨬᩣᨿᩥᩴᩈᩩ. ᨾᩣᩈᨯ᩠ᨰᨾᩣᩈᩮᩈᩩ ᨸᨬ᩠ᨬᩣᨿᨾᩣᨶᩮᩈᩩ ᩏᨲᩩᩈᩴᩅᨧ᩠ᨨᩁᩣ ᨸᨬ᩠ᨬᩣᨿᩥᩴᩈᩩ. ᨲᩮ ᨾᨿᩴ ᩁᩈᨸᨳᩅᩥᩴ ᨸᩁᩥᨽᩩᨬ᩠ᨩᨶ᩠ᨲᩣ ᨲᩴᨽᨠ᩠ᨡᩣ ᨲᨴᩣᩉᩣᩁᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᩋᨭ᩠ᨮᨾ᩠ᩉᩣ. ᨲᩮᩈᩴ ᨶᩮᩣ ᨸᩣᨸᨠᩣᨶᩴᨿᩮᩅ ᩋᨠᩩᩈᩃᩣᨶᩴ ᨵᨾ᩠ᨾᩣᨶᩴ ᨸᩣᨲᩩᨽᩣᩅᩣ ᩁᩈᨸᨳᩅᩦ ᩋᨶ᩠ᨲᩁᨵᩣᨿᩥ. ᩁᩈᨸᨳᩅᩥᨿᩣ ᩋᨶ᩠ᨲᩁᩉᩥᨲᩣᨿ ᨽᩪᨾᩥᨸᨸ᩠ᨸᨭᨠᩮᩣ ᨸᩣᨲᩩᩁᩉᩮᩣᩈᩥ. ᩈᩮᩣ ᩋᩉᩮᩣᩈᩥ ᩅᨱ᩠ᨱᩈᨾ᩠ᨸᨶ᩠ᨶᩮᩣ ᨣᨶ᩠ᨵᩈᨾ᩠ᨸᨶ᩠ᨶᩮᩣ ᩁᩈᩈᨾ᩠ᨸᨶ᩠ᨶᩮᩣ. ᨲᩮ ᨾᨿᩴ ᨽᩪᨾᩥᨸᨸ᩠ᨸᨭᨠᩴ ᩏᨸᨠ᩠ᨠᨾᩥᨾ᩠ᩉ ᨸᩁᩥᨽᩩᨬ᩠ᨩᩥᨲᩩᩴ. ᨲᩮ ᨾᨿᩴ ᨲᩴ ᨸᩁᩥᨽᩩᨬ᩠ᨩᨶ᩠ᨲᩣ ᨲᩴᨽᨠ᩠ᨡᩣ ᨲᨴᩣᩉᩣᩁᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᩋᨭ᩠ᨮᨾ᩠ᩉᩣ. ᨲᩮᩈᩴ ᨶᩮᩣ ᨸᩣᨸᨠᩣᨶᩴᨿᩮᩅ ᩋᨠᩩᩈᩃᩣᨶᩴ ᨵᨾ᩠ᨾᩣᨶᩴ ᨸᩣᨲᩩᨽᩣᩅᩣ ᨽᩪᨾᩥᨸᨸ᩠ᨸᨭᨠᩮᩣ ᩋᨶ᩠ᨲᩁᨵᩣᨿᩥ. ᨽᩪᨾᩥᨸᨸ᩠ᨸᨭᨠᩮ ᩋᨶ᩠ᨲᩁᩉᩥᨲᩮ ᨸᨴᩣᩃᨲᩣ ᨸᩣᨲᩩᩁᩉᩮᩣᩈᩥ. ᩈᩣ ᩋᩉᩮᩣᩈᩥ ᩅᨱ᩠ᨱᩈᨾ᩠ᨸᨶ᩠ᨶᩣ ᨣᨶ᩠ᨵᩈᨾ᩠ᨸᨶ᩠ᨶᩣ ᩁᩈᩈᨾ᩠ᨸᨶ᩠ᨶᩣ. ᨲᩮ ᨾᨿᩴ ᨸᨴᩣᩃᨲᩴ ᩏᨸᨠ᩠ᨠᨾᩥᨾ᩠ᩉ ᨸᩁᩥᨽᩩᨬ᩠ᨩᩥᨲᩩᩴ. ᨲᩮ ᨾᨿᩴ ᨲᩴ ᨸᩁᩥᨽᩩᨬ᩠ᨩᨶ᩠ᨲᩣ ᨲᩴᨽᨠ᩠ᨡᩣ ᨲᨴᩣᩉᩣᩁᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᩋᨭ᩠ᨮᨾ᩠ᩉᩣ. ᨲᩮᩈᩴ ᨶᩮᩣ ᨸᩣᨸᨠᩣᨶᩴᨿᩮᩅ ᩋᨠᩩᩈᩃᩣᨶᩴ ᨵᨾ᩠ᨾᩣᨶᩴ ᨸᩣᨲᩩᨽᩣᩅᩣ ᨸᨴᩣᩃᨲᩣ ᩋᨶ᩠ᨲᩁᨵᩣᨿᩥ. ᨸᨴᩣᩃᨲᩣᨿ ᩋᨶ᩠ᨲᩁᩉᩥᨲᩣᨿ ᩋᨠᨭ᩠ᨮᨸᩣᨠᩮᩣ ᩈᩣᩃᩥ ᨸᩣᨲᩩᩁᩉᩮᩣᩈᩥ ᩋᨠᨱᩮᩣ ᩋᨳᩩᩈᩮᩣ ᩈᩩᨴ᩠ᨵᩮᩣ ᩈᩩᨣᨶ᩠ᨵᩮᩣ ᨲᨱ᩠ᨯᩩᩃᨸ᩠ᨹᩃᩮᩣ. ᨿᩴ ᨲᩴ ᩈᩣᨿᩴ ᩈᩣᨿᨾᩣᩈᩣᨿ ᩌᩉᩁᩣᨾ, ᨸᩣᨲᩮᩣ ᨲᩴ ᩉᩮᩣᨲᩥ ᨸᨠ᩠ᨠᩴ ᨸᨭᩥᩅᩥᩁᩪᩊ᩠ᩉᩴ. ᨿᩴ ᨲᩴ ᨸᩣᨲᩮᩣ ᨸᩣᨲᩁᩣᩈᩣᨿ ᩌᩉᩁᩣᨾ, ᩈᩣᨿᩴ ᨲᩴ ᩉᩮᩣᨲᩥ ᨸᨠ᩠ᨠᩴ ᨸᨭᩥᩅᩥᩁᩪᩊ᩠ᩉᩴ. ᨶᩣᨸᨴᩣᨶᩴ ᨸᨬ᩠ᨬᩣᨿᩥᨲ᩠ᨳ. ᨲᩮ ᨾᨿᩴ ᩋᨠᨭ᩠ᨮᨸᩣᨠᩴ ᩈᩣᩃᩥᩴ ᨸᩁᩥᨽᩩᨬ᩠ᨩᨶ᩠ᨲᩣ ᨲᩴᨽᨠ᩠ᨡᩣ ᨲᨴᩣᩉᩣᩁᩣ ᨧᩥᩁᩴ ᨴᩦᨥᨾᨴ᩠ᨵᩣᨶᩴ ᩋᨭ᩠ᨮᨾ᩠ᩉᩣ. ᨲᩮᩈᩴ ᨶᩮᩣ ᨸᩣᨸᨠᩣᨶᩴᨿᩮᩅ ᩋᨠᩩᩈᩃᩣᨶᩴ ᨵᨾ᩠ᨾᩣᨶᩴ ᨸᩣᨲᩩᨽᩣᩅᩣ ᨠᨱᩮᩣᨸᩥ ᨲᨱ᩠ᨯᩩᩃᩴ ᨸᩁᩥᨿᩮᩣᨶᨶ᩠ᨵᩥ, ᨳᩩᩈᩮᩣᨸᩥ ᨲᨱ᩠ᨯᩩᩃᩴ ᨸᩁᩥᨿᩮᩣᨶᨶ᩠ᨵᩥ, ᩃᩪᨶᨾ᩠ᨸᩥ ᨶᨸ᩠ᨸᨭᩥᩅᩥᩁᩪᩊ᩠ᩉᩴ, ᩋᨸᨴᩣᨶᩴ ᨸᨬ᩠ᨬᩣᨿᩥᨲ᩠ᨳ, ᩈᨱ᩠ᨯᩈᨱ᩠ᨯᩣ ᩈᩣᩃᨿᩮᩣ ᨮᩥᨲᩣ. ᨿᩴᨶᩪᨶ ᨾᨿᩴ ᩈᩣᩃᩥᩴ ᩅᩥᨽᨩᩮᨿ᩠ᨿᩣᨾ, ᨾᩁᩥᨿᩣᨴᩴ ᨮᨸᩮᨿ᩠ᨿᩣᨾᩣ’ᨲᩥ! ᩋᨳ ᨡᩮᩣ ᨲᩮ, ᩅᩣᩈᩮᨭ᩠ᨮ, ᩈᨲ᩠ᨲᩣ ᩈᩣᩃᩥᩴ ᩅᩥᨽᨩᩥᩴᩈᩩ, ᨾᩁᩥᨿᩣᨴᩴ ᨮᨸᩮᩈᩩᩴ.

᪑᪒᪙. ‘‘ᩋᨳ ᨡᩮᩣ, ᩅᩣᩈᩮᨭ᩠ᨮ, ᩋᨬ᩠ᨬᨲᩁᩮᩣ ᩈᨲ᩠ᨲᩮᩣ ᩃᩮᩣᩃᨩᩣᨲᩥᨠᩮᩣ ᩈᨠᩴ ᨽᩣᨣᩴ ᨸᩁᩥᩁᨠ᩠ᨡᨶ᩠ᨲᩮᩣ ᩋᨬ᩠ᨬᨲᩁᩴ [ᩋᨬ᩠ᨬᩔ (?)] ᨽᩣᨣᩴ ᩋᨴᩥᨶ᩠ᨶᩴ ᩌᨴᩥᨿᩥᨲ᩠ᩅᩣ ᨸᩁᩥᨽᩩᨬ᩠ᨩᩥ. ᨲᨾᩮᨶᩴ ᩋᨣ᩠ᨣᩉᩮᩈᩩᩴ, ᨣᩉᩮᨲ᩠ᩅᩣ ᩑᨲᨴᩅᩮᩣᨧᩩᩴ – ‘ᨸᩣᨸᨠᩴ ᩅᨲ, ᨽᩮᩣ ᩈᨲ᩠ᨲ, ᨠᩁᩮᩣᩈᩥ, ᨿᨲᩕ ᩉᩥ ᨶᩣᨾ ᩈᨠᩴ ᨽᩣᨣᩴ ᨸᩁᩥᩁᨠ᩠ᨡᨶ᩠ᨲᩮᩣ ᩋᨬ᩠ᨬᨲᩁᩴ ᨽᩣᨣᩴ ᩋᨴᩥᨶ᩠ᨶᩴ ᩌᨴᩥᨿᩥᨲ᩠ᩅᩣ ᨸᩁᩥᨽᩩᨬ᩠ᨩᩈᩥ. ᨾᩣᩔᩩ, ᨽᩮᩣ ᩈᨲ᩠ᨲ, ᨸᩩᨶᨸᩥ ᩑᩅᩁᩪᨸᨾᨠᩣᩈᩦ’ᨲᩥ. ‘ᩑᩅᩴ, ᨽᩮᩣ’ᨲᩥ ᨡᩮᩣ, ᩅᩣᩈᩮᨭ᩠ᨮ, ᩈᩮᩣ ᩈᨲ᩠ᨲᩮᩣ ᨲᩮᩈᩴ ᩈᨲ᩠ᨲᩣᨶᩴ ᨸᨧ᩠ᨧᩔᩮᩣᩈᩥ. ᨴᩩᨲᩥᨿᨾ᩠ᨸᩥ ᨡᩮᩣ, ᩅᩣᩈᩮᨭ᩠ᨮ, ᩈᩮᩣ ᩈᨲ᩠ᨲᩮᩣ…ᨸᩮ… ᨲᨲᩥᨿᨾ᩠ᨸᩥ ᨡᩮᩣ, ᩅᩣᩈᩮᨭ᩠ᨮ, ᩈᩮᩣ ᩈᨲ᩠ᨲᩮᩣ ᩈᨠᩴ ᨽᩣᨣᩴ ᨸᩁᩥᩁᨠ᩠ᨡᨶ᩠ᨲᩮᩣ ᩋᨬ᩠ᨬᨲᩁᩴ ᨽᩣᨣᩴ ᩋᨴᩥᨶ᩠ᨶᩴ ᩌᨴᩥᨿᩥᨲ᩠ᩅᩣ ᨸᩁᩥᨽᩩᨬ᩠ᨩᩥ. ᨲᨾᩮᨶᩴ ᩋᨣ᩠ᨣᩉᩮᩈᩩᩴ, ᨣᩉᩮᨲ᩠ᩅᩣ ᩑᨲᨴᩅᩮᩣᨧᩩᩴ – ‘ᨸᩣᨸᨠᩴ ᩅᨲ, ᨽᩮᩣ ᩈᨲ᩠ᨲ, ᨠᩁᩮᩣᩈᩥ, ᨿᨲᩕ ᩉᩥ ᨶᩣᨾ ᩈᨠᩴ ᨽᩣᨣᩴ ᨸᩁᩥᩁᨠ᩠ᨡᨶ᩠ᨲᩮᩣ ᩋᨬ᩠ᨬᨲᩁᩴ ᨽᩣᨣᩴ ᩋᨴᩥᨶ᩠ᨶᩴ ᩌᨴᩥᨿᩥᨲ᩠ᩅᩣ ᨸᩁᩥᨽᩩᨬ᩠ᨩᩈᩥ. ᨾᩣᩔᩩ, ᨽᩮᩣ ᩈᨲ᩠ᨲ, ᨸᩩᨶᨸᩥ ᩑᩅᩁᩪᨸᨾᨠᩣᩈᩦ’ᨲᩥ. ᩋᨬ᩠ᨬᩮ ᨸᩣᨱᩥᨶᩣ ᨸᩉᩁᩥᩴᩈᩩ, ᩋᨬ᩠ᨬᩮ ᩃᩮᨯ᩠ᨯᩩᨶᩣ ᨸᩉᩁᩥᩴᩈᩩ, ᩋᨬ᩠ᨬᩮ ᨴᨱ᩠ᨯᩮᨶ ᨸᩉᩁᩥᩴᩈᩩ. ᨲᨴᨣ᩠ᨣᩮ ᨡᩮᩣ, ᩅᩣᩈᩮᨭ᩠ᨮ, ᩋᨴᩥᨶ᩠ᨶᩣᨴᩣᨶᩴ ᨸᨬ᩠ᨬᩣᨿᨲᩥ, ᨣᩁᩉᩣ ᨸᨬ᩠ᨬᩣᨿᨲᩥ, ᨾᩩᩈᩣᩅᩣᨴᩮᩣ ᨸᨬ᩠ᨬᩣᨿᨲᩥ, ᨴᨱ᩠ᨯᩣᨴᩣᨶᩴ ᨸᨬ᩠ᨬᩣᨿᨲᩥ.

ᨾᩉᩣᩈᨾ᩠ᨾᨲᩁᩣᨩᩣ

᪑᪓᪐. ‘‘ᩋᨳ ᨡᩮᩣ ᨲᩮ, ᩅᩣᩈᩮᨭ᩠ᨮ, ᩈᨲ᩠ᨲᩣ ᩈᨶ᩠ᨶᩥᨸᨲᩥᩴᩈᩩ, ᩈᨶ᩠ᨶᩥᨸᨲᩥᨲ᩠ᩅᩣ ᩋᨶᩩᨲ᩠ᨳᩩᨶᩥᩴᩈᩩ – ‘ᨸᩣᨸᨠᩣ ᩅᨲ ᨽᩮᩣ ᨵᨾ᩠ᨾᩣ ᩈᨲ᩠ᨲᩮᩈᩩ ᨸᩣᨲᩩᨽᩪᨲᩣ, ᨿᨲᩕ ᩉᩥ ᨶᩣᨾ ᩋᨴᩥᨶ᩠ᨶᩣᨴᩣᨶᩴ ᨸᨬ᩠ᨬᩣᨿᩥᩔᨲᩥ, ᨣᩁᩉᩣ ᨸᨬ᩠ᨬᩣᨿᩥᩔᨲᩥ, ᨾᩩᩈᩣᩅᩣᨴᩮᩣ ᨸᨬ᩠ᨬᩣᨿᩥᩔᨲᩥ, ᨴᨱ᩠ᨯᩣᨴᩣᨶᩴ ᨸᨬ᩠ᨬᩣᨿᩥᩔᨲᩥ. ᨿᩴᨶᩪᨶ ᨾᨿᩴ ᩑᨠᩴ ᩈᨲ᩠ᨲᩴ ᩈᨾ᩠ᨾᨶ᩠ᨶᩮᨿ᩠ᨿᩣᨾ, ᨿᩮᩣ ᨶᩮᩣ ᩈᨾ᩠ᨾᩣ ᨡᩦᨿᩥᨲᨻ᩠ᨻᩴ ᨡᩦᨿᩮᨿ᩠ᨿ, ᩈᨾ᩠ᨾᩣ ᨣᩁᩉᩥᨲᨻ᩠ᨻᩴ ᨣᩁᩉᩮᨿ᩠ᨿ, ᩈᨾ᩠ᨾᩣ ᨸᨻ᩠ᨻᩣᨩᩮᨲᨻ᩠ᨻᩴ ᨸᨻ᩠ᨻᩣᨩᩮᨿ᩠ᨿ. ᨾᨿᩴ ᨸᨶᩔ ᩈᩣᩃᩦᨶᩴ ᨽᩣᨣᩴ ᩋᨶᩩᨸ᩠ᨸᨴᩔᩣᨾᩣ’ᨲᩥ.

‘‘ᩋᨳ ᨡᩮᩣ ᨲᩮ, ᩅᩣᩈᩮᨭ᩠ᨮ, ᩈᨲ᩠ᨲᩣ ᨿᩮᩣ ᨶᩮᩈᩴ ᩈᨲ᩠ᨲᩮᩣ ᩋᨽᩥᩁᩪᨸᨲᩁᩮᩣ ᨧ ᨴᩔᨶᩦᨿᨲᩁᩮᩣ ᨧ ᨸᩣᩈᩣᨴᩥᨠᨲᩁᩮᩣ ᨧ ᨾᩉᩮᩈᨠ᩠ᨡᨲᩁᩮᩣ ᨧ ᨲᩴ ᩈᨲ᩠ᨲᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᨲᨴᩅᩮᩣᨧᩩᩴ – ‘ᩑᩉᩥ, ᨽᩮᩣ ᩈᨲ᩠ᨲ, ᩈᨾ᩠ᨾᩣ ᨡᩦᨿᩥᨲᨻ᩠ᨻᩴ ᨡᩦᨿ, ᩈᨾ᩠ᨾᩣ ᨣᩁᩉᩥᨲᨻ᩠ᨻᩴ ᨣᩁᩉ, ᩈᨾ᩠ᨾᩣ ᨸᨻ᩠ᨻᩣᨩᩮᨲᨻ᩠ᨻᩴ ᨸᨻ᩠ᨻᩣᨩᩮᩉᩥ. ᨾᨿᩴ ᨸᨶ ᨲᩮ ᩈᩣᩃᩦᨶᩴ ᨽᩣᨣᩴ ᩋᨶᩩᨸ᩠ᨸᨴᩔᩣᨾᩣ’ᨲᩥ. ‘ᩑᩅᩴ, ᨽᩮᩣ’ᨲᩥ ᨡᩮᩣ, ᩅᩣᩈᩮᨭ᩠ᨮ, ᩈᩮᩣ ᩈᨲ᩠ᨲᩮᩣ ᨲᩮᩈᩴ ᩈᨲ᩠ᨲᩣᨶᩴ ᨸᨭᩥᩔᩩᨱᩥᨲ᩠ᩅᩣ ᩈᨾ᩠ᨾᩣ ᨡᩦᨿᩥᨲᨻ᩠ᨻᩴ ᨡᩦᨿᩥ, ᩈᨾ᩠ᨾᩣ ᨣᩁᩉᩥᨲᨻ᩠ᨻᩴ ᨣᩁᩉᩥ, ᩈᨾ᩠ᨾᩣ ᨸᨻ᩠ᨻᩣᨩᩮᨲᨻ᩠ᨻᩴ ᨸᨻ᩠ᨻᩣᨩᩮᩈᩥ. ᨲᩮ ᨸᨶᩔ ᩈᩣᩃᩦᨶᩴ ᨽᩣᨣᩴ ᩋᨶᩩᨸ᩠ᨸᨴᩴᩈᩩ.

᪑᪓᪑. ‘‘ᨾᩉᩣᨩᨶᩈᨾ᩠ᨾᨲᩮᩣᨲᩥ ᨡᩮᩣ, ᩅᩣᩈᩮᨭ᩠ᨮ, ‘ᨾᩉᩣᩈᨾ᩠ᨾᨲᩮᩣ, ᨾᩉᩣᩈᨾ᩠ᨾᨲᩮᩣ’ ᨲ᩠ᩅᩮᩅ ᨸᨮᨾᩴ ᩋᨠ᩠ᨡᩁᩴ ᩏᨸᨶᩥᨻ᩠ᨻᨲ᩠ᨲᩴ. ᨡᩮᨲ᩠ᨲᩣᨶᩴ ᩋᨵᩥᨸᨲᩦᨲᩥ ᨡᩮᩣ, ᩅᩣᩈᩮᨭ᩠ᨮ, ‘ᨡᨲ᩠ᨲᩥᨿᩮᩣ, ᨡᨲ᩠ᨲᩥᨿᩮᩣ’ ᨲ᩠ᩅᩮᩅ ᨴᩩᨲᩥᨿᩴ ᩋᨠ᩠ᨡᩁᩴ ᩏᨸᨶᩥᨻ᩠ᨻᨲ᩠ᨲᩴ. ᨵᨾ᩠ᨾᩮᨶ ᨸᩁᩮ ᩁᨬ᩠ᨩᩮᨲᩦᨲᩥ ᨡᩮᩣ, ᩅᩣᩈᩮᨭ᩠ᨮ, ‘ᩁᩣᨩᩣ, ᩁᩣᨩᩣ’ ᨲ᩠ᩅᩮᩅ ᨲᨲᩥᨿᩴ ᩋᨠ᩠ᨡᩁᩴ ᩏᨸᨶᩥᨻ᩠ᨻᨲ᩠ᨲᩴ. ᩍᨲᩥ ᨡᩮᩣ, ᩅᩣᩈᩮᨭ᩠ᨮ, ᩑᩅᨾᩮᨲᩔ ᨡᨲ᩠ᨲᩥᨿᨾᨱ᩠ᨯᩃᩔ ᨸᩮᩣᩁᩣᨱᩮᨶ ᩋᨣ᩠ᨣᨬ᩠ᨬᩮᨶ ᩋᨠ᩠ᨡᩁᩮᨶ ᩋᨽᩥᨶᩥᨻ᩠ᨻᨲ᩠ᨲᩥ ᩋᩉᩮᩣᩈᩥ ᨲᩮᩈᩴᨿᩮᩅ ᩈᨲ᩠ᨲᩣᨶᩴ, ᩋᨶᨬ᩠ᨬᩮᩈᩴ. ᩈᨴᩥᩈᩣᨶᩴᨿᩮᩅ, ᨶᩮᩣ ᩋᩈᨴᩥᩈᩣᨶᩴ. ᨵᨾ᩠ᨾᩮᨶᩮᩅ, ᨶᩮᩣ ᩋᨵᨾ᩠ᨾᩮᨶ. ᨵᨾ᩠ᨾᩮᩣ ᩉᩥ, ᩅᩣᩈᩮᨭ᩠ᨮ, ᩈᩮᨭ᩠ᨮᩮᩣ ᨩᨶᩮᨲᩈ᩠ᨾᩥᩴ ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧ.

ᨻᩕᩣᩉ᩠ᨾᨱᨾᨱ᩠ᨯᩃᩴ

᪑᪓᪒. ‘‘ᩋᨳ ᨡᩮᩣ ᨲᩮᩈᩴ, ᩅᩣᩈᩮᨭ᩠ᨮ, ᩈᨲ᩠ᨲᩣᨶᩴᨿᩮᩅ [ᨲᩮᩈᩴ ᨿᩮᩅ ᨡᩮᩣ ᩅᩣᩈᩮᨭ᩠ᨮ ᩈᨲ᩠ᨲᩣᨶᩴ (ᩈᩦ. ᨸᩦ.)] ᩑᨠᨧ᩠ᨧᩣᨶᩴ ᩑᨲᨴᩉᩮᩣᩈᩥ – ‘ᨸᩣᨸᨠᩣ ᩅᨲ, ᨽᩮᩣ, ᨵᨾ᩠ᨾᩣ ᩈᨲ᩠ᨲᩮᩈᩩ ᨸᩣᨲᩩᨽᩪᨲᩣ, ᨿᨲᩕ ᩉᩥ ᨶᩣᨾ ᩋᨴᩥᨶ᩠ᨶᩣᨴᩣᨶᩴ ᨸᨬ᩠ᨬᩣᨿᩥᩔᨲᩥ, ᨣᩁᩉᩣ ᨸᨬ᩠ᨬᩣᨿᩥᩔᨲᩥ, ᨾᩩᩈᩣᩅᩣᨴᩮᩣ ᨸᨬ᩠ᨬᩣᨿᩥᩔᨲᩥ, ᨴᨱ᩠ᨯᩣᨴᩣᨶᩴ ᨸᨬ᩠ᨬᩣᨿᩥᩔᨲᩥ, ᨸᨻ᩠ᨻᩣᨩᨶᩴ ᨸᨬ᩠ᨬᩣᨿᩥᩔᨲᩥ. ᨿᩴᨶᩪᨶ ᨾᨿᩴ ᨸᩣᨸᨠᩮ ᩋᨠᩩᩈᩃᩮ ᨵᨾ᩠ᨾᩮ ᩅᩣᩉᩮᨿ᩠ᨿᩣᨾᩣ’ᨲᩥ. ᨲᩮ ᨸᩣᨸᨠᩮ ᩋᨠᩩᩈᩃᩮ ᨵᨾ᩠ᨾᩮ ᩅᩣᩉᩮᩈᩩᩴ. ᨸᩣᨸᨠᩮ ᩋᨠᩩᩈᩃᩮ ᨵᨾ᩠ᨾᩮ ᩅᩣᩉᩮᨶ᩠ᨲᩦᨲᩥ ᨡᩮᩣ, ᩅᩣᩈᩮᨭ᩠ᨮ, ‘ᨻᩕᩣᩉ᩠ᨾᨱᩣ, ᨻᩕᩣᩉ᩠ᨾᨱᩣ’ ᨲ᩠ᩅᩮᩅ ᨸᨮᨾᩴ ᩋᨠ᩠ᨡᩁᩴ ᩏᨸᨶᩥᨻ᩠ᨻᨲ᩠ᨲᩴ. ᨲᩮ ᩋᩁᨬ᩠ᨬᩣᨿᨲᨶᩮ ᨸᨱ᩠ᨱᨠᩩᨭᩥᨿᩮᩣ ᨠᩁᩥᨲ᩠ᩅᩣ ᨸᨱ᩠ᨱᨠᩩᨭᩦᩈᩩ ᨫᩣᨿᨶ᩠ᨲᩥ ᩅᩦᨲᨦ᩠ᨣᩣᩁᩣ ᩅᩦᨲᨵᩪᨾᩣ ᨸᨶ᩠ᨶᨾᩩᩈᩃᩣ ᩈᩣᨿᩴ ᩈᩣᨿᨾᩣᩈᩣᨿ ᨸᩣᨲᩮᩣ ᨸᩣᨲᩁᩣᩈᩣᨿ ᨣᩣᨾᨶᩥᨣᨾᩁᩣᨩᨵᩣᨶᩥᨿᩮᩣ ᩒᩈᩁᨶ᩠ᨲᩥ ᨥᩣᩈᨾᩮᩈᨾᩣᨶᩣ [ᨥᩣᩈᨾᩮᩈᨶᩣ (ᩈᩦ. ᩈ᩠ᨿᩣ. ᨸᩦ.)]. ᨲᩮ ᨥᩣᩈᩴ ᨸᨭᩥᩃᨽᩥᨲ᩠ᩅᩣ ᨸᩩᨶᨴᩮᩅ ᩋᩁᨬ᩠ᨬᩣᨿᨲᨶᩮ ᨸᨱ᩠ᨱᨠᩩᨭᩦᩈᩩ ᨫᩣᨿᨶ᩠ᨲᩥ. ᨲᨾᩮᨶᩴ ᨾᨶᩩᩔᩣ ᨴᩥᩈ᩠ᩅᩣ ᩑᩅᨾᩣᩉᩴᩈᩩ – ‘ᩍᨾᩮ ᨡᩮᩣ, ᨽᩮᩣ, ᩈᨲ᩠ᨲᩣ ᩋᩁᨬ᩠ᨬᩣᨿᨲᨶᩮ ᨸᨱ᩠ᨱᨠᩩᨭᩥᨿᩮᩣ ᨠᩁᩥᨲ᩠ᩅᩣ ᨸᨱ᩠ᨱᨠᩩᨭᩦᩈᩩ ᨫᩣᨿᨶ᩠ᨲᩥ, ᩅᩦᨲᨦ᩠ᨣᩣᩁᩣ ᩅᩦᨲᨵᩪᨾᩣ ᨸᨶ᩠ᨶᨾᩩᩈᩃᩣ ᩈᩣᨿᩴ ᩈᩣᨿᨾᩣᩈᩣᨿ ᨸᩣᨲᩮᩣ ᨸᩣᨲᩁᩣᩈᩣᨿ ᨣᩣᨾᨶᩥᨣᨾᩁᩣᨩᨵᩣᨶᩥᨿᩮᩣ ᩒᩈᩁᨶ᩠ᨲᩥ ᨥᩣᩈᨾᩮᩈᨾᩣᨶᩣ. ᨲᩮ ᨥᩣᩈᩴ ᨸᨭᩥᩃᨽᩥᨲ᩠ᩅᩣ ᨸᩩᨶᨴᩮᩅ ᩋᩁᨬ᩠ᨬᩣᨿᨲᨶᩮ ᨸᨱ᩠ᨱᨠᩩᨭᩦᩈᩩ ᨫᩣᨿᨶ᩠ᨲᩦ’ᨲᩥ, ᨫᩣᨿᨶ᩠ᨲᩦᨲᩥ ᨡᩮᩣ [ᨸᨱ᩠ᨱᨠᩩᨭᩦᩈᩩ ᨫᩣᨿᨶ᩠ᨲᩥ ᨫᩣᨿᨶ᩠ᨲᩦᨲᩥ ᨡᩮᩣ (ᩈᩦ. ᨸᩦ.), ᨸᨱ᩠ᨱᨠᩩᨭᩦᩈᩩ ᨫᩣᨿᨶ᩠ᨲᩦᨲᩥ ᨡᩮᩣ (ᨠ.)], ᩅᩣᩈᩮᨭ᩠ᨮ, ‘ᨫᩣᨿᨠᩣ, ᨫᩣᨿᨠᩣ’ ᨲ᩠ᩅᩮᩅ ᨴᩩᨲᩥᨿᩴ ᩋᨠ᩠ᨡᩁᩴ ᩏᨸᨶᩥᨻ᩠ᨻᨲ᩠ᨲᩴ. ᨲᩮᩈᩴᨿᩮᩅ ᨡᩮᩣ, ᩅᩣᩈᩮᨭ᩠ᨮ, ᩈᨲ᩠ᨲᩣᨶᩴ ᩑᨠᨧ᩠ᨧᩮ ᩈᨲ᩠ᨲᩣ ᩋᩁᨬ᩠ᨬᩣᨿᨲᨶᩮ ᨸᨱ᩠ᨱᨠᩩᨭᩦᩈᩩ ᨲᩴ ᨫᩣᨶᩴ ᩋᨶᨽᩥᩈᨾ᩠ᨽᩩᨱᨾᩣᨶᩣ [ᩋᨶᨽᩥᩈᩴᨽᩪᨶᨾᩣᨶᩣ (ᨠᨲ᩠ᨳᨧᩥ)] ᨣᩣᨾᩈᩣᨾᨶ᩠ᨲᩴ ᨶᩥᨣᨾᩈᩣᨾᨶ᩠ᨲᩴ ᩒᩈᩁᩥᨲ᩠ᩅᩣ ᨣᨶ᩠ᨳᩮ ᨠᩁᩮᩣᨶ᩠ᨲᩣ ᩋᨧ᩠ᨨᨶ᩠ᨲᩥ. ᨲᨾᩮᨶᩴ ᨾᨶᩩᩔᩣ ᨴᩥᩈ᩠ᩅᩣ ᩑᩅᨾᩣᩉᩴᩈᩩ – ‘ᩍᨾᩮ ᨡᩮᩣ, ᨽᩮᩣ, ᩈᨲ᩠ᨲᩣ ᩋᩁᨬ᩠ᨬᩣᨿᨲᨶᩮ ᨸᨱ᩠ᨱᨠᩩᨭᩦᩈᩩ ᨲᩴ ᨫᩣᨶᩴ ᩋᨶᨽᩥᩈᨾ᩠ᨽᩩᨱᨾᩣᨶᩣ ᨣᩣᨾᩈᩣᨾᨶ᩠ᨲᩴ ᨶᩥᨣᨾᩈᩣᨾᨶ᩠ᨲᩴ ᩒᩈᩁᩥᨲ᩠ᩅᩣ ᨣᨶ᩠ᨳᩮ ᨠᩁᩮᩣᨶ᩠ᨲᩣ ᩋᨧ᩠ᨨᨶ᩠ᨲᩥ, ᨶ ᨴᩣᨶᩥᨾᩮ ᨫᩣᨿᨶ᩠ᨲᩦ’ᨲᩥ. ᨶ ᨴᩣᨶᩥᨾᩮ [ᨶ ᨴᩣᨶᩥᨾᩮ ᨫᩣᨿᨶ᩠ᨲᩦ ᨶ ᨴᩣᨶᩥᨾᩮ (ᩈᩦ. ᨸᩦ. ᨠ.)] ᨫᩣᨿᨶ᩠ᨲᩦᨲᩥ ᨡᩮᩣ, ᩅᩣᩈᩮᨭ᩠ᨮ, ‘ᩋᨩ᩠ᨫᩣᨿᨠᩣ ᩋᨩ᩠ᨫᩣᨿᨠᩣ’ ᨲ᩠ᩅᩮᩅ ᨲᨲᩥᨿᩴ ᩋᨠ᩠ᨡᩁᩴ ᩏᨸᨶᩥᨻ᩠ᨻᨲ᩠ᨲᩴ. ᩉᩦᨶᩈᨾ᩠ᨾᨲᩴ ᨡᩮᩣ ᨸᨶ, ᩅᩣᩈᩮᨭ᩠ᨮ, ᨲᩮᨶ ᩈᨾᨿᩮᨶ ᩉᩮᩣᨲᩥ, ᨲᨴᩮᨲᩁᩉᩥ ᩈᩮᨭ᩠ᨮᩈᨾ᩠ᨾᨲᩴ. ᩍᨲᩥ ᨡᩮᩣ, ᩅᩣᩈᩮᨭ᩠ᨮ, ᩑᩅᨾᩮᨲᩔ ᨻᩕᩣᩉ᩠ᨾᨱᨾᨱ᩠ᨯᩃᩔ ᨸᩮᩣᩁᩣᨱᩮᨶ ᩋᨣ᩠ᨣᨬ᩠ᨬᩮᨶ ᩋᨠ᩠ᨡᩁᩮᨶ ᩋᨽᩥᨶᩥᨻ᩠ᨻᨲ᩠ᨲᩥ ᩋᩉᩮᩣᩈᩥ ᨲᩮᩈᩴᨿᩮᩅ ᩈᨲ᩠ᨲᩣᨶᩴ, ᩋᨶᨬ᩠ᨬᩮᩈᩴ ᩈᨴᩥᩈᩣᨶᩴᨿᩮᩅ ᨶᩮᩣ ᩋᩈᨴᩥᩈᩣᨶᩴ ᨵᨾ᩠ᨾᩮᨶᩮᩅ, ᨶᩮᩣ ᩋᨵᨾ᩠ᨾᩮᨶ. ᨵᨾ᩠ᨾᩮᩣ ᩉᩥ, ᩅᩣᩈᩮᨭ᩠ᨮ, ᩈᩮᨭ᩠ᨮᩮᩣ ᨩᨶᩮᨲᩈ᩠ᨾᩥᩴ ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧ.

ᩅᩮᩔᨾᨱ᩠ᨯᩃᩴ

᪑᪓᪓. ‘‘ᨲᩮᩈᩴᨿᩮᩅ ᨡᩮᩣ, ᩅᩣᩈᩮᨭ᩠ᨮ, ᩈᨲ᩠ᨲᩣᨶᩴ ᩑᨠᨧ᩠ᨧᩮ ᩈᨲ᩠ᨲᩣ ᨾᩮᨳᩩᨶᩴ ᨵᨾ᩠ᨾᩴ ᩈᨾᩣᨴᩣᨿ ᩅᩥᩈᩩᨠᨾ᩠ᨾᨶ᩠ᨲᩮ [ᩅᩥᩔᩩᨲᨠᨾ᩠ᨾᨶ᩠ᨲᩮ (ᩈᩦ. ᨸᩦ.), ᩅᩥᩔᩩᨠᨾ᩠ᨾᨶ᩠ᨲᩮ (ᨠ. ᩈᩦ.), ᩅᩥᩈᩩᩴ ᨠᨾ᩠ᨾᨶ᩠ᨲᩮ (ᩈ᩠ᨿᩣ. ᨠ.)] ᨸᨿᩮᩣᨩᩮᩈᩩᩴ. ᨾᩮᨳᩩᨶᩴ ᨵᨾ᩠ᨾᩴ ᩈᨾᩣᨴᩣᨿ ᩅᩥᩈᩩᨠᨾ᩠ᨾᨶ᩠ᨲᩮ ᨸᨿᩮᩣᨩᩮᨶ᩠ᨲᩦᨲᩥ ᨡᩮᩣ, ᩅᩣᩈᩮᨭ᩠ᨮ, ‘ᩅᩮᩔᩣ, ᩅᩮᩔᩣ’ ᨲ᩠ᩅᩮᩅ ᩋᨠ᩠ᨡᩁᩴ ᩏᨸᨶᩥᨻ᩠ᨻᨲ᩠ᨲᩴ. ᩍᨲᩥ ᨡᩮᩣ, ᩅᩣᩈᩮᨭ᩠ᨮ, ᩑᩅᨾᩮᨲᩔ ᩅᩮᩔᨾᨱ᩠ᨯᩃᩔ ᨸᩮᩣᩁᩣᨱᩮᨶ ᩋᨣ᩠ᨣᨬ᩠ᨬᩮᨶ ᩋᨠ᩠ᨡᩁᩮᨶ ᩋᨽᩥᨶᩥᨻ᩠ᨻᨲ᩠ᨲᩥ ᩋᩉᩮᩣᩈᩥ ᨲᩮᩈᨬ᩠ᨬᩮᩅ ᩈᨲ᩠ᨲᩣᨶᩴ ᩋᨶᨬ᩠ᨬᩮᩈᩴ ᩈᨴᩥᩈᩣᨶᩴᨿᩮᩅ, ᨶᩮᩣ ᩋᩈᨴᩥᩈᩣᨶᩴ, ᨵᨾ᩠ᨾᩮᨶᩮᩅ ᨶᩮᩣ ᩋᨵᨾ᩠ᨾᩮᨶ. ᨵᨾ᩠ᨾᩮᩣ ᩉᩥ, ᩅᩣᩈᩮᨭ᩠ᨮ, ᩈᩮᨭ᩠ᨮᩮᩣ ᨩᨶᩮᨲᩈ᩠ᨾᩥᩴ ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧ.

ᩈᩩᨴ᩠ᨴᨾᨱ᩠ᨯᩃᩴ

᪑᪓᪔. ‘‘ᨲᩮᩈᨬ᩠ᨬᩮᩅ ᨡᩮᩣ, ᩅᩣᩈᩮᨭ᩠ᨮ, ᩈᨲ᩠ᨲᩣᨶᩴ ᨿᩮ ᨲᩮ ᩈᨲ᩠ᨲᩣ ᩋᩅᩈᩮᩈᩣ ᨲᩮ ᩃᩩᨴ᩠ᨴᩣᨧᩣᩁᩣ ᨡᩩᨴ᩠ᨴᩣᨧᩣᩁᩣ ᩋᩉᩮᩈᩩᩴ. ᩃᩩᨴ᩠ᨴᩣᨧᩣᩁᩣ ᨡᩩᨴ᩠ᨴᩣᨧᩣᩁᩣᨲᩥ ᨡᩮᩣ, ᩅᩣᩈᩮᨭ᩠ᨮ, ‘ᩈᩩᨴ᩠ᨴᩣ, ᩈᩩᨴ᩠ᨴᩣ’ ᨲ᩠ᩅᩮᩅ ᩋᨠ᩠ᨡᩁᩴ ᩏᨸᨶᩥᨻ᩠ᨻᨲ᩠ᨲᩴ. ᩍᨲᩥ ᨡᩮᩣ, ᩅᩣᩈᩮᨭ᩠ᨮ, ᩑᩅᨾᩮᨲᩔ ᩈᩩᨴ᩠ᨴᨾᨱ᩠ᨯᩃᩔ ᨸᩮᩣᩁᩣᨱᩮᨶ ᩋᨣ᩠ᨣᨬ᩠ᨬᩮᨶ ᩋᨠ᩠ᨡᩁᩮᨶ ᩋᨽᩥᨶᩥᨻ᩠ᨻᨲ᩠ᨲᩥ ᩋᩉᩮᩣᩈᩥ ᨲᩮᩈᩴᨿᩮᩅ ᩈᨲ᩠ᨲᩣᨶᩴ ᩋᨶᨬ᩠ᨬᩮᩈᩴ, ᩈᨴᩥᩈᩣᨶᩴᨿᩮᩅ ᨶᩮᩣ ᩋᩈᨴᩥᩈᩣᨶᩴ, ᨵᨾ᩠ᨾᩮᨶᩮᩅ, ᨶᩮᩣ ᩋᨵᨾ᩠ᨾᩮᨶ. ᨵᨾ᩠ᨾᩮᩣ ᩉᩥ, ᩅᩣᩈᩮᨭ᩠ᨮ, ᩈᩮᨭ᩠ᨮᩮᩣ ᨩᨶᩮᨲᩈ᩠ᨾᩥᩴ ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧ.

᪑᪓᪕. ‘‘ᩋᩉᩩ ᨡᩮᩣ ᩈᩮᩣ, ᩅᩣᩈᩮᨭ᩠ᨮ, ᩈᨾᨿᩮᩣ, ᨿᩴ ᨡᨲ᩠ᨲᩥᨿᩮᩣᨸᩥ ᩈᨠᩴ ᨵᨾ᩠ᨾᩴ ᨣᩁᩉᨾᩣᨶᩮᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨲᩥ – ‘ᩈᨾᨱᩮᩣ ᨽᩅᩥᩔᩣᨾᩦ’ᨲᩥ. ᨻᩕᩣᩉ᩠ᨾᨱᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ…ᨸᩮ… ᩅᩮᩔᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ…ᨸᩮ… ᩈᩩᨴ᩠ᨴᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ, ᩈᨠᩴ ᨵᨾ᩠ᨾᩴ ᨣᩁᩉᨾᩣᨶᩮᩣ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨲᩥ – ‘ᩈᨾᨱᩮᩣ ᨽᩅᩥᩔᩣᨾᩦ’ᨲᩥ. ᩍᨾᩮᩉᩥ ᨡᩮᩣ, ᩅᩣᩈᩮᨭ᩠ᨮ, ᨧᨲᩪᩉᩥ ᨾᨱ᩠ᨯᩃᩮᩉᩥ ᩈᨾᨱᨾᨱ᩠ᨯᩃᩔ ᩋᨽᩥᨶᩥᨻ᩠ᨻᨲ᩠ᨲᩥ ᩋᩉᩮᩣᩈᩥ, ᨲᩮᩈᩴᨿᩮᩅ ᩈᨲ᩠ᨲᩣᨶᩴ ᩋᨶᨬ᩠ᨬᩮᩈᩴ, ᩈᨴᩥᩈᩣᨶᩴᨿᩮᩅ ᨶᩮᩣ ᩋᩈᨴᩥᩈᩣᨶᩴ, ᨵᨾ᩠ᨾᩮᨶᩮᩅ ᨶᩮᩣ ᩋᨵᨾ᩠ᨾᩮᨶ. ᨵᨾ᩠ᨾᩮᩣ ᩉᩥ, ᩅᩣᩈᩮᨭ᩠ᨮ, ᩈᩮᨭ᩠ᨮᩮᩣ ᨩᨶᩮᨲᩈ᩠ᨾᩥᩴ ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧ.

ᨴᩩᨧ᩠ᨧᩁᩥᨲᩣᨴᩥᨠᨳᩣ

᪑᪓᪖. ‘‘ᨡᨲ᩠ᨲᩥᨿᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ, ᨠᩣᨿᩮᨶ ᨴᩩᨧ᩠ᨧᩁᩥᨲᩴ ᨧᩁᩥᨲ᩠ᩅᩣ ᩅᩣᨧᩣᨿ ᨴᩩᨧ᩠ᨧᩁᩥᨲᩴ ᨧᩁᩥᨲ᩠ᩅᩣ ᨾᨶᩈᩣ ᨴᩩᨧ᩠ᨧᩁᩥᨲᩴ ᨧᩁᩥᨲ᩠ᩅᩣ ᨾᩥᨧ᩠ᨨᩣᨴᩥᨭ᩠ᨮᩥᨠᩮᩣ ᨾᩥᨧ᩠ᨨᩣᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩮᩣ [ᩍᨴᩴ ᨸᨴᩴ ᩈᩦ. ᩍᨸᩮᩣᨲ᩠ᨳᨠᩮᩈᩩ ᨶᨲ᩠ᨳᩥ] ᨾᩥᨧ᩠ᨨᩣᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩉᩮᨲᩩ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨩ᩠ᨩᨲᩥ. ᨻᩕᩣᩉ᩠ᨾᨱᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ…ᨸᩮ… ᩅᩮᩔᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ… ᩈᩩᨴ᩠ᨴᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ… ᩈᨾᨱᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ, ᨠᩣᨿᩮᨶ ᨴᩩᨧ᩠ᨧᩁᩥᨲᩴ ᨧᩁᩥᨲ᩠ᩅᩣ ᩅᩣᨧᩣᨿ ᨴᩩᨧ᩠ᨧᩁᩥᨲᩴ ᨧᩁᩥᨲ᩠ᩅᩣ ᨾᨶᩈᩣ ᨴᩩᨧ᩠ᨧᩁᩥᨲᩴ ᨧᩁᩥᨲ᩠ᩅᩣ ᨾᩥᨧ᩠ᨨᩣᨴᩥᨭ᩠ᨮᩥᨠᩮᩣ ᨾᩥᨧ᩠ᨨᩣᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩮᩣ ᨾᩥᨧ᩠ᨨᩣᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩉᩮᨲᩩ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨩ᩠ᨩᨲᩥ.

‘‘ᨡᨲ᩠ᨲᩥᨿᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ, ᨠᩣᨿᩮᨶ ᩈᩩᨧᩁᩥᨲᩴ ᨧᩁᩥᨲ᩠ᩅᩣ ᩅᩣᨧᩣᨿ ᩈᩩᨧᩁᩥᨲᩴ ᨧᩁᩥᨲ᩠ᩅᩣ ᨾᨶᩈᩣ ᩈᩩᨧᩁᩥᨲᩴ ᨧᩁᩥᨲ᩠ᩅᩣ ᩈᨾ᩠ᨾᩣᨴᩥᨭ᩠ᨮᩥᨠᩮᩣ ᩈᨾ᩠ᨾᩣᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩮᩣ [ᩍᨴᩴ ᨸᨴᩴ ᩈᩦ. ᨸᩦ. ᨸᩮᩣᨲ᩠ᨳᨠᩮᩈᩩ ᨶᨲ᩠ᨳᩥ] ᩈᨾ᩠ᨾᩣᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩉᩮᨲᩩ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨲᩥ. ᨻᩕᩣᩉ᩠ᨾᨱᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ…ᨸᩮ… ᩅᩮᩔᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ… ᩈᩩᨴ᩠ᨴᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ… ᩈᨾᨱᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ, ᨠᩣᨿᩮᨶ ᩈᩩᨧᩁᩥᨲᩴ ᨧᩁᩥᨲ᩠ᩅᩣ ᩅᩣᨧᩣᨿ ᩈᩩᨧᩁᩥᨲᩴ ᨧᩁᩥᨲ᩠ᩅᩣ ᨾᨶᩈᩣ ᩈᩩᨧᩁᩥᨲᩴ ᨧᩁᩥᨲ᩠ᩅᩣ ᩈᨾ᩠ᨾᩣᨴᩥᨭ᩠ᨮᩥᨠᩮᩣ ᩈᨾ᩠ᨾᩣᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩮᩣ ᩈᨾ᩠ᨾᩣᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩉᩮᨲᩩ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨲᩥ.

᪑᪓᪗. ‘‘ᨡᨲ᩠ᨲᩥᨿᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ, ᨠᩣᨿᩮᨶ ᨴ᩠ᩅᨿᨠᩣᩁᩦ, ᩅᩣᨧᩣᨿ ᨴ᩠ᩅᨿᨠᩣᩁᩦ, ᨾᨶᩈᩣ ᨴ᩠ᩅᨿᨠᩣᩁᩦ, ᩅᩥᨾᩥᩔᨴᩥᨭ᩠ᨮᩥᨠᩮᩣ ᩅᩥᨾᩥᩔᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩮᩣ ᩅᩥᨾᩥᩔᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩉᩮᨲᩩ [ᩅᩥᨾᩥᩔᨴᩥᨭ᩠ᨮᩥᨠᩮᩣ ᩅᩥᨾᩥᩔᨠᨾ᩠ᨾᩈᨾᩣᨴᩣᨶᩮᩣ ᩅᩥᨾᩥᩔᨠᨾ᩠ᨾᩈᨾᩣᨴᩣᨶᩉᩮᨲᩩ (ᩈ᩠ᨿᩣ.), ᩅᩦᨲᩥᨾᩥᩔᨴᩥᨭ᩠ᨮᩥᨠᩮᩣ ᩅᩦᨲᩥᨾᩥᩔᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩉᩮᨲᩩ (ᩈᩦ. ᨸᩦ.)] ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨡᨴᩩᨠ᩠ᨡᨸ᩠ᨸᨭᩥᩈᩴᩅᩮᨴᩦ ᩉᩮᩣᨲᩥ. ᨻᩕᩣᩉ᩠ᨾᨱᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ …ᨸᩮ… ᩅᩮᩔᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ… ᩈᩩᨴ᩠ᨴᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ… ᩈᨾᨱᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ, ᨠᩣᨿᩮᨶ ᨴ᩠ᩅᨿᨠᩣᩁᩦ, ᩅᩣᨧᩣᨿ ᨴ᩠ᩅᨿᨠᩣᩁᩦ, ᨾᨶᩈᩣ ᨴ᩠ᩅᨿᨠᩣᩁᩦ, ᩅᩥᨾᩥᩔᨴᩥᨭ᩠ᨮᩥᨠᩮᩣ ᩅᩥᨾᩥᩔᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩮᩣ ᩅᩥᨾᩥᩔᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩉᩮᨲᩩ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨡᨴᩩᨠ᩠ᨡᨸ᩠ᨸᨭᩥᩈᩴᩅᩮᨴᩦ ᩉᩮᩣᨲᩥ.

ᨻᩮᩣᨵᩥᨸᨠ᩠ᨡᩥᨿᨽᩣᩅᨶᩣ

᪑᪓᪘. ‘‘ᨡᨲ᩠ᨲᩥᨿᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ, ᨠᩣᨿᩮᨶ ᩈᩴᩅᩩᨲᩮᩣ ᩅᩣᨧᩣᨿ ᩈᩴᩅᩩᨲᩮᩣ ᨾᨶᩈᩣ ᩈᩴᩅᩩᨲᩮᩣ ᩈᨲ᩠ᨲᨶ᩠ᨶᩴ ᨻᩮᩣᨵᩥᨸᨠ᩠ᨡᩥᨿᩣᨶᩴ ᨵᨾ᩠ᨾᩣᨶᩴ ᨽᩣᩅᨶᨾᨶ᩠ᩅᩣᨿ ᨴᩥᨭ᩠ᨮᩮᩅ ᨵᨾ᩠ᨾᩮ ᨸᩁᩥᨶᩥᨻ᩠ᨻᩣᨿᨲᩥ [ᨸᩁᩥᨶᩥᨻ᩠ᨻᩣᨲᩥ (ᨠ.)]. ᨻᩕᩣᩉ᩠ᨾᨱᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ…ᨸᩮ… ᩅᩮᩔᩮᩣᨸᩥ ᨡᩮᩣ ᩅᩣᩈᩮᨭ᩠ᨮ… ᩈᩩᨴ᩠ᨴᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ … ᩈᨾᨱᩮᩣᨸᩥ ᨡᩮᩣ, ᩅᩣᩈᩮᨭ᩠ᨮ, ᨠᩣᨿᩮᨶ ᩈᩴᩅᩩᨲᩮᩣ ᩅᩣᨧᩣᨿ ᩈᩴᩅᩩᨲᩮᩣ ᨾᨶᩈᩣ ᩈᩴᩅᩩᨲᩮᩣ ᩈᨲ᩠ᨲᨶ᩠ᨶᩴ ᨻᩮᩣᨵᩥᨸᨠ᩠ᨡᩥᨿᩣᨶᩴ ᨵᨾ᩠ᨾᩣᨶᩴ ᨽᩣᩅᨶᨾᨶ᩠ᩅᩣᨿ ᨴᩥᨭ᩠ᨮᩮᩅ ᨵᨾ᩠ᨾᩮ ᨸᩁᩥᨶᩥᨻ᩠ᨻᩣᨿᨲᩥ.

᪑᪓᪙. ‘‘ᩍᨾᩮᩈᨬ᩠ᩉᩥ, ᩅᩣᩈᩮᨭ᩠ᨮ, ᨧᨲᩩᨶ᩠ᨶᩴ ᩅᨱ᩠ᨱᩣᨶᩴ ᨿᩮᩣ ᩉᩮᩣᨲᩥ ᨽᩥᨠ᩠ᨡᩩ ᩋᩁᩉᩴ ᨡᩦᨱᩣᩈᩅᩮᩣ ᩅᩩᩈᩥᨲᩅᩣ ᨠᨲᨠᩁᨱᩦᨿᩮᩣ ᩒᩉᩥᨲᨽᩣᩁᩮᩣ ᩋᨶᩩᨸ᩠ᨸᨲ᩠ᨲᩈᨴᨲ᩠ᨳᩮᩣ ᨸᩁᩥᨠ᩠ᨡᩦᨱᨽᩅᩈᩴᨿᩮᩣᨩᨶᩮᩣ ᩈᨾ᩠ᨾᨴᨬ᩠ᨬᩣ ᩅᩥᨾᩩᨲ᩠ᨲᩮᩣ ᩈᩮᩣ ᨶᩮᩈᩴ ᩋᨣ᩠ᨣᨾᨠ᩠ᨡᩣᨿᨲᩥ ᨵᨾ᩠ᨾᩮᨶᩮᩅ. ᨶᩮᩣ ᩋᨵᨾ᩠ᨾᩮᨶ. ᨵᨾ᩠ᨾᩮᩣ ᩉᩥ, ᩅᩣᩈᩮᨭ᩠ᨮ, ᩈᩮᨭ᩠ᨮᩮᩣ ᨩᨶᩮᨲᩈ᩠ᨾᩥᩴ ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧ.

᪑᪔᪐. ‘‘ᨻᩕᩉ᩠ᨾᩩᨶᩣ ᨸᩮᩈᩣ, ᩅᩣᩈᩮᨭ᩠ᨮ, ᩈᨶᨦ᩠ᨠᩩᨾᩣᩁᩮᨶ ᨣᩣᨳᩣ ᨽᩣᩈᩥᨲᩣ –

‘ᨡᨲ᩠ᨲᩥᨿᩮᩣ ᩈᩮᨭ᩠ᨮᩮᩣ ᨩᨶᩮᨲᩈ᩠ᨾᩥᩴ, ᨿᩮ ᨣᩮᩣᨲ᩠ᨲᨸᨭᩥᩈᩣᩁᩥᨶᩮᩣ;

ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩮᩣ, ᩈᩮᩣ ᩈᩮᨭ᩠ᨮᩮᩣ ᨴᩮᩅᨾᩣᨶᩩᩈᩮ’ᨲᩥ.

‘‘ᩈᩣ ᨡᩮᩣ ᨸᨶᩮᩈᩣ, ᩅᩣᩈᩮᨭ᩠ᨮ, ᨻᩕᩉ᩠ᨾᩩᨶᩣ ᩈᨶᨦ᩠ᨠᩩᨾᩣᩁᩮᨶ ᨣᩣᨳᩣ ᩈᩩᨣᩦᨲᩣ, ᨶᩮᩣ ᨴᩩᨣ᩠ᨣᩦᨲᩣ. ᩈᩩᨽᩣᩈᩥᨲᩣ, ᨶᩮᩣ ᨴᩩᨻ᩠ᨽᩣᩈᩥᨲᩣ. ᩋᨲ᩠ᨳᩈᩴᩉᩥᨲᩣ, ᨶᩮᩣ ᩋᨶᨲ᩠ᨳᩈᩴᩉᩥᨲᩣ. ᩋᨶᩩᨾᨲᩣ ᨾᨿᩣ. ᩋᩉᨾ᩠ᨸᩥ, ᩅᩣᩈᩮᨭ᩠ᨮ, ᩑᩅᩴ ᩅᨴᩣᨾᩥ –

‘ᨡᨲ᩠ᨲᩥᨿᩮᩣ ᩈᩮᨭ᩠ᨮᩮᩣ ᨩᨶᩮᨲᩈ᩠ᨾᩥᩴ, ᨿᩮ ᨣᩮᩣᨲ᩠ᨲᨸᨭᩥᩈᩣᩁᩥᨶᩮᩣ;

ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩮᩣ, ᩈᩮᩣ ᩈᩮᨭ᩠ᨮᩮᩣ ᨴᩮᩅᨾᩣᨶᩩᩈᩮ’ᨲᩥ.

ᩍᨴᨾᩅᩮᩣᨧ ᨽᨣᩅᩣ. ᩋᨲ᩠ᨲᨾᨶᩣ ᩅᩣᩈᩮᨭ᩠ᨮᨽᩣᩁᨴ᩠ᩅᩣᨩᩣ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩩᨶ᩠ᨲᩥ.

ᩋᨣ᩠ᨣᨬ᩠ᨬᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᨧᨲᩩᨲ᩠ᨳᩴ.

᪕. ᩈᨾ᩠ᨸᩈᩣᨴᨶᩦᨿᩈᩩᨲ᩠ᨲᩴ

ᩈᩣᩁᩥᨸᩩᨲ᩠ᨲᩈᩦᩉᨶᩣᨴᩮᩣ

᪑᪔᪑. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᨶᩣᩊᨶ᩠ᨴᩣᨿᩴ ᩅᩥᩉᩁᨲᩥ ᨸᩣᩅᩣᩁᩥᨠᨾ᩠ᨻᩅᨶᩮ. ᩋᨳ ᨡᩮᩣ ᩌᨿᩈ᩠ᨾᩣ ᩈᩣᩁᩥᨸᩩᨲ᩠ᨲᩮᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᩌᨿᩈ᩠ᨾᩣ ᩈᩣᩁᩥᨸᩩᨲ᩠ᨲᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩑᩅᩴᨸᩈᨶ᩠ᨶᩮᩣ ᩋᩉᩴ, ᨽᨶ᩠ᨲᩮ, ᨽᨣᩅᨲᩥ, ᨶ ᨧᩣᩉᩩ ᨶ ᨧ ᨽᩅᩥᩔᨲᩥ ᨶ ᨧᩮᨲᩁᩉᩥ ᩅᩥᨩ᩠ᨩᨲᩥ ᩋᨬ᩠ᨬᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᨽᨣᩅᨲᩣ ᨽᩥᨿ᩠ᨿᩮᩣᨽᩥᨬ᩠ᨬᨲᩁᩮᩣ ᨿᨴᩥᨴᩴ ᩈᨾ᩠ᨻᩮᩣᨵᩥᨿ’’ᨶ᩠ᨲᩥ.

᪑᪔᪒. ‘‘ᩏᩊᩣᩁᩣ ᨡᩮᩣ ᨲᩮ ᩋᨿᩴ, ᩈᩣᩁᩥᨸᩩᨲ᩠ᨲ, ᩌᩈᨽᩦ ᩅᩣᨧᩣ ᨽᩣᩈᩥᨲᩣ, ᩑᨠᩴᩈᩮᩣ ᨣᩉᩥᨲᩮᩣ, ᩈᩦᩉᨶᩣᨴᩮᩣ ᨶᨴᩥᨲᩮᩣ – ‘ᩑᩅᩴᨸᩈᨶ᩠ᨶᩮᩣ ᩋᩉᩴ, ᨽᨶ᩠ᨲᩮ, ᨽᨣᩅᨲᩥ; ᨶ ᨧᩣᩉᩩ ᨶ ᨧ ᨽᩅᩥᩔᨲᩥ ᨶ ᨧᩮᨲᩁᩉᩥ ᩅᩥᨩ᩠ᨩᨲᩥ ᩋᨬ᩠ᨬᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᨽᨣᩅᨲᩣ ᨽᩥᨿ᩠ᨿᩮᩣᨽᩥᨬ᩠ᨬᨲᩁᩮᩣ ᨿᨴᩥᨴᩴ ᩈᨾ᩠ᨻᩮᩣᨵᩥᨿ’ᨶ᩠ᨲᩥ. ᨠᩥᩴ ᨲᩮ [ᨠᩥᩴ ᨶᩩ (ᩈᩦ. ᨸᩦ.), ᨠᩥᩴ ᨶᩩ ᨡᩮᩣ ᨲᩮ (ᩈ᩠ᨿᩣ.)], ᩈᩣᩁᩥᨸᩩᨲ᩠ᨲ, ᨿᩮ ᨲᩮ ᩋᩉᩮᩈᩩᩴ ᩋᨲᩦᨲᨾᨴ᩠ᨵᩣᨶᩴ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᩈᨻ᩠ᨻᩮ ᨲᩮ ᨽᨣᩅᨶ᩠ᨲᩮᩣ ᨧᩮᨲᩈᩣ ᨧᩮᨲᩮᩣ ᨸᩁᩥᨧ᩠ᨧ ᩅᩥᨴᩥᨲᩣ – ‘ᩑᩅᩴᩈᩦᩃᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩥ, ᩑᩅᩴᨵᨾ᩠ᨾᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩥ, ᩑᩅᩴᨸᨬ᩠ᨬᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩥ, ᩑᩅᩴᩅᩥᩉᩣᩁᩦ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩥ, ᩑᩅᩴᩅᩥᨾᩩᨲ᩠ᨲᩣ ᨲᩮ ᨽᨣᩅᨶ᩠ᨲᩮᩣ ᩋᩉᩮᩈᩩᩴ ᩍᨲᩥᨸᩦ’’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’.

‘‘ᨠᩥᩴ ᨸᨶ ᨲᩮ [ᨠᩥᩴ ᨸᨶ (ᩈᩦ. ᨸᩦ.)], ᩈᩣᩁᩥᨸᩩᨲ᩠ᨲ, ᨿᩮ ᨲᩮ ᨽᩅᩥᩔᨶ᩠ᨲᩥ ᩋᨶᩣᨣᨲᨾᨴ᩠ᨵᩣᨶᩴ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᩈᨻ᩠ᨻᩮ ᨲᩮ ᨽᨣᩅᨶ᩠ᨲᩮᩣ ᨧᩮᨲᩈᩣ ᨧᩮᨲᩮᩣ ᨸᩁᩥᨧ᩠ᨧ ᩅᩥᨴᩥᨲᩣ, `ᩑᩅᩴᩈᩦᩃᩣ ᨲᩮ ᨽᨣᩅᨶ᩠ᨲᩮᩣ ᨽᩅᩥᩔᨶ᩠ᨲᩥ ᩍᨲᩥᨸᩥ, ᩑᩅᩴᨵᨾ᩠ᨾᩣ…ᨸᩮ… ᩑᩅᩴᨸᨬ᩠ᨬᩣ… ᩑᩅᩴᩅᩥᩉᩣᩁᩦ… ᩑᩅᩴᩅᩥᨾᩩᨲ᩠ᨲᩣ ᨲᩮ ᨽᨣᩅᨶ᩠ᨲᩮᩣ ᨽᩅᩥᩔᨶ᩠ᨲᩥ ᩍᨲᩥᨸᩦ’’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’.

‘‘ᨠᩥᩴ ᨸᨶ ᨲᩮ [ᨠᩥᩴ ᨸᨶ (ᩈᩦ. ᨸᩦ.)], ᩈᩣᩁᩥᨸᩩᨲ᩠ᨲ, ᩋᩉᩴ ᩑᨲᩁᩉᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨧᩮᨲᩈᩣ ᨧᩮᨲᩮᩣ ᨸᩁᩥᨧ᩠ᨧ ᩅᩥᨴᩥᨲᩮᩣ – ‘ᩑᩅᩴᩈᩦᩃᩮᩣ ᨽᨣᩅᩣ ᩍᨲᩥᨸᩥ, ᩑᩅᩴᨵᨾ᩠ᨾᩮᩣ…ᨸᩮ… ᩑᩅᩴᨸᨬ᩠ᨬᩮᩣ … ᩑᩅᩴᩅᩥᩉᩣᩁᩦ… ᩑᩅᩴᩅᩥᨾᩩᨲ᩠ᨲᩮᩣ ᨽᨣᩅᩣ ᩍᨲᩥᨸᩦ’’’ᨲᩥ? ‘‘ᨶᩮᩣ ᩉᩮᨲᩴ, ᨽᨶ᩠ᨲᩮ’’.

‘‘ᩑᨲ᩠ᨳ ᨧ ᩉᩥ ᨲᩮ, ᩈᩣᩁᩥᨸᩩᨲ᩠ᨲ, ᩋᨲᩦᨲᩣᨶᩣᨣᨲᨸᨧ᩠ᨧᩩᨸ᩠ᨸᨶ᩠ᨶᩮᩈᩩ ᩋᩁᩉᨶ᩠ᨲᩮᩈᩩ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩈᩩ ᨧᩮᨲᩮᩣᨸᩁᩥᨿᨬᩣᨱᩴ ᨶᨲ᩠ᨳᩥ. ᩋᨳ ᨠᩥᩴ ᨧᩁᩉᩥ ᨲᩮ ᩋᨿᩴ, ᩈᩣᩁᩥᨸᩩᨲ᩠ᨲ, ᩏᩊᩣᩁᩣ ᩌᩈᨽᩦ ᩅᩣᨧᩣ ᨽᩣᩈᩥᨲᩣ, ᩑᨠᩴᩈᩮᩣ ᨣᩉᩥᨲᩮᩣ, ᩈᩦᩉᨶᩣᨴᩮᩣ ᨶᨴᩥᨲᩮᩣ – ‘ᩑᩅᩴᨸᩈᨶ᩠ᨶᩮᩣ ᩋᩉᩴ, ᨽᨶ᩠ᨲᩮ, ᨽᨣᩅᨲᩥ, ᨶ ᨧᩣᩉᩩ ᨶ ᨧ ᨽᩅᩥᩔᨲᩥ ᨶ ᨧᩮᨲᩁᩉᩥ ᩅᩥᨩ᩠ᨩᨲᩥ ᩋᨬ᩠ᨬᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᨽᨣᩅᨲᩣ ᨽᩥᨿ᩠ᨿᩮᩣᨽᩥᨬ᩠ᨬᨲᩁᩮᩣ ᨿᨴᩥᨴᩴ ᩈᨾ᩠ᨻᩮᩣᨵᩥᨿ’’’ᨶ᩠ᨲᩥ?

᪑᪔᪓. ‘‘ᨶ ᨡᩮᩣ ᨾᩮ [ᨶ ᨡᩮᩣ ᨸᨶᩮᨲᩴ (ᩈ᩠ᨿᩣ. ᨠ.)], ᨽᨶ᩠ᨲᩮ, ᩋᨲᩦᨲᩣᨶᩣᨣᨲᨸᨧ᩠ᨧᩩᨸ᩠ᨸᨶ᩠ᨶᩮᩈᩩ ᩋᩁᩉᨶ᩠ᨲᩮᩈᩩ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩈᩩ ᨧᩮᨲᩮᩣᨸᩁᩥᨿᨬᩣᨱᩴ ᩋᨲ᩠ᨳᩥ. ᩋᨸᩥ ᨧ, ᨾᩮ [ᨾᩮ ᨽᨶ᩠ᨲᩮ (ᩈᩦ. ᨸᩦ. ᨠ.)] ᨵᨾ᩠ᨾᨶ᩠ᩅᨿᩮᩣ ᩅᩥᨴᩥᨲᩮᩣ. ᩈᩮᨿ᩠ᨿᨳᩣᨸᩥ, ᨽᨶ᩠ᨲᩮ, ᩁᨬ᩠ᨬᩮᩣ ᨸᨧ᩠ᨧᨶ᩠ᨲᩥᨾᩴ ᨶᨣᩁᩴ ᨴᩊ᩠ᩉᩩᨴ᩠ᨵᩣᨸᩴ [ᨴᩊ᩠ᩉᩩᨴ᩠ᨴᩣᨸᩴ (ᩈᩦ. ᨸᩦ. ᨠ.)] ᨴᩊ᩠ᩉᨸᩣᨠᩣᩁᨲᩮᩣᩁᨱᩴ ᩑᨠᨴ᩠ᩅᩣᩁᩴ. ᨲᨲᩕᩔ ᨴᩮᩣᩅᩣᩁᩥᨠᩮᩣ ᨸᨱ᩠ᨯᩥᨲᩮᩣ ᨻ᩠ᨿᨲ᩠ᨲᩮᩣ ᨾᩮᨵᩣᩅᩦ ᩋᨬ᩠ᨬᩣᨲᩣᨶᩴ ᨶᩥᩅᩣᩁᩮᨲᩣ, ᨬᩣᨲᩣᨶᩴ ᨸᩅᩮᩈᩮᨲᩣ. ᩈᩮᩣ ᨲᩔ ᨶᨣᩁᩔ ᩈᨾᨶ᩠ᨲᩣ ᩋᨶᩩᨸᩁᩥᨿᩣᨿᨸᨳᩴ ᩋᨶᩩᨠ᩠ᨠᨾᨾᩣᨶᩮᩣ ᨶ ᨸᩔᩮᨿ᩠ᨿ ᨸᩣᨠᩣᩁᩈᨶ᩠ᨵᩥᩴ ᩅᩣ ᨸᩣᨠᩣᩁᩅᩥᩅᩁᩴ ᩅᩣ ᩋᨶ᩠ᨲᨾᩈᩮᩣ ᨻᩥᩊᩣᩁᨶᩥᨠ᩠ᨡᨾᨶᨾᨲ᩠ᨲᨾ᩠ᨸᩥ. ᨲᩔ ᩑᩅᨾᩔ – ‘ᨿᩮ ᨡᩮᩣ ᨠᩮᨧᩥ ᩒᩊᩣᩁᩥᨠᩣ ᨸᩣᨱᩣ ᩍᨾᩴ ᨶᨣᩁᩴ ᨸᩅᩥᩈᨶ᩠ᨲᩥ ᩅᩣ ᨶᩥᨠ᩠ᨡᨾᨶ᩠ᨲᩥ ᩅᩣ, ᩈᨻ᩠ᨻᩮ ᨲᩮ ᩍᨾᩥᨶᩣᩅ ᨴ᩠ᩅᩣᩁᩮᨶ ᨸᩅᩥᩈᨶ᩠ᨲᩥ ᩅᩣ ᨶᩥᨠ᩠ᨡᨾᨶ᩠ᨲᩥ ᩅᩣ’ᨲᩥ. ᩑᩅᨾᩮᩅ ᨡᩮᩣ ᨾᩮ, ᨽᨶ᩠ᨲᩮ, ᨵᨾ᩠ᨾᨶ᩠ᩅᨿᩮᩣ ᩅᩥᨴᩥᨲᩮᩣ. ᨿᩮ ᨲᩮ, ᨽᨶ᩠ᨲᩮ, ᩋᩉᩮᩈᩩᩴ ᩋᨲᩦᨲᨾᨴ᩠ᨵᩣᨶᩴ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᩈᨻ᩠ᨻᩮ ᨲᩮ ᨽᨣᩅᨶ᩠ᨲᩮᩣ ᨸᨬ᩠ᨧ ᨶᩦᩅᩁᨱᩮ ᨸᩉᩣᨿ ᨧᩮᨲᩈᩮᩣ ᩏᨸᨠ᩠ᨠᩥᩃᩮᩈᩮ ᨸᨬ᩠ᨬᩣᨿ ᨴᩩᨻ᩠ᨻᩃᩦᨠᩁᨱᩮ ᨧᨲᩪᩈᩩ ᩈᨲᩥᨸᨭ᩠ᨮᩣᨶᩮᩈᩩ ᩈᩩᨸ᩠ᨸᨲᩥᨭ᩠ᨮᩥᨲᨧᩥᨲ᩠ᨲᩣ, ᩈᨲ᩠ᨲ ᩈᨾ᩠ᨻᩮᩣᨩ᩠ᨫᨦ᩠ᨣᩮ ᨿᨳᩣᨽᩪᨲᩴ ᨽᩣᩅᩮᨲ᩠ᩅᩣ ᩋᨶᩩᨲ᩠ᨲᩁᩴ ᩈᨾ᩠ᨾᩣᩈᨾ᩠ᨻᩮᩣᨵᩥᩴ ᩋᨽᩥᩈᨾ᩠ᨻᩩᨩ᩠ᨫᩥᩴᩈᩩ. ᨿᩮᨸᩥ ᨲᩮ, ᨽᨶ᩠ᨲᩮ, ᨽᩅᩥᩔᨶ᩠ᨲᩥ ᩋᨶᩣᨣᨲᨾᨴ᩠ᨵᩣᨶᩴ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ, ᩈᨻ᩠ᨻᩮ ᨲᩮ ᨽᨣᩅᨶ᩠ᨲᩮᩣ ᨸᨬ᩠ᨧ ᨶᩦᩅᩁᨱᩮ ᨸᩉᩣᨿ ᨧᩮᨲᩈᩮᩣ ᩏᨸᨠ᩠ᨠᩥᩃᩮᩈᩮ ᨸᨬ᩠ᨬᩣᨿ ᨴᩩᨻ᩠ᨻᩃᩦᨠᩁᨱᩮ ᨧᨲᩪᩈᩩ ᩈᨲᩥᨸᨭ᩠ᨮᩣᨶᩮᩈᩩ ᩈᩩᨸ᩠ᨸᨲᩥᨭ᩠ᨮᩥᨲᨧᩥᨲ᩠ᨲᩣ, ᩈᨲ᩠ᨲ ᩈᨾ᩠ᨻᩮᩣᨩ᩠ᨫᨦ᩠ᨣᩮ ᨿᨳᩣᨽᩪᨲᩴ ᨽᩣᩅᩮᨲ᩠ᩅᩣ ᩋᨶᩩᨲ᩠ᨲᩁᩴ ᩈᨾ᩠ᨾᩣᩈᨾ᩠ᨻᩮᩣᨵᩥᩴ ᩋᨽᩥᩈᨾ᩠ᨻᩩᨩ᩠ᨫᩥᩔᨶ᩠ᨲᩥ. ᨽᨣᩅᩣᨸᩥ, ᨽᨶ᩠ᨲᩮ, ᩑᨲᩁᩉᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨸᨬ᩠ᨧ ᨶᩦᩅᩁᨱᩮ ᨸᩉᩣᨿ ᨧᩮᨲᩈᩮᩣ ᩏᨸᨠ᩠ᨠᩥᩃᩮᩈᩮ ᨸᨬ᩠ᨬᩣᨿ ᨴᩩᨻ᩠ᨻᩃᩦᨠᩁᨱᩮ ᨧᨲᩪᩈᩩ ᩈᨲᩥᨸᨭ᩠ᨮᩣᨶᩮᩈᩩ ᩈᩩᨸ᩠ᨸᨲᩥᨭ᩠ᨮᩥᨲᨧᩥᨲ᩠ᨲᩮᩣ ᩈᨲ᩠ᨲ ᩈᨾ᩠ᨻᩮᩣᨩ᩠ᨫᨦ᩠ᨣᩮ ᨿᨳᩣᨽᩪᨲᩴ ᨽᩣᩅᩮᨲ᩠ᩅᩣ ᩋᨶᩩᨲ᩠ᨲᩁᩴ ᩈᨾ᩠ᨾᩣᩈᨾ᩠ᨻᩮᩣᨵᩥᩴ ᩋᨽᩥᩈᨾ᩠ᨻᩩᨴ᩠ᨵᩮᩣ.

᪑᪔᪔. ‘‘ᩍᨵᩣᩉᩴ, ᨽᨶ᩠ᨲᩮ, ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥᩴ ᨵᨾ᩠ᨾᩔᩅᨶᩣᨿ. ᨲᩔ ᨾᩮ, ᨽᨶ᩠ᨲᩮ, ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᩏᨲ᩠ᨲᩁᩩᨲ᩠ᨲᩁᩴ ᨸᨱᩦᨲᨸᨱᩦᨲᩴ ᨠᨱ᩠ᩉᩈᩩᨠ᩠ᨠᩈᨸ᩠ᨸᨭᩥᨽᩣᨣᩴ. ᨿᨳᩣ ᨿᨳᩣ ᨾᩮ, ᨽᨶ᩠ᨲᩮ, ᨽᨣᩅᩣ ᨵᨾ᩠ᨾᩴ ᨴᩮᩈᩮᩈᩥ ᩏᨲ᩠ᨲᩁᩩᨲ᩠ᨲᩁᩴ ᨸᨱᩦᨲᨸᨱᩦᨲᩴ ᨠᨱ᩠ᩉᩈᩩᨠ᩠ᨠᩈᨸ᩠ᨸᨭᩥᨽᩣᨣᩴ, ᨲᨳᩣ ᨲᨳᩣᩉᩴ ᨲᩈ᩠ᨾᩥᩴ ᨵᨾ᩠ᨾᩮ ᩋᨽᩥᨬ᩠ᨬᩣ ᩍᨵᩮᨠᨧ᩠ᨧᩴ ᨵᨾ᩠ᨾᩴ ᨵᨾ᩠ᨾᩮᩈᩩ ᨶᩥᨭ᩠ᨮᨾᨣᨾᩴ; ᩈᨲ᩠ᨳᩁᩥ ᨸᩈᩦᨴᩥᩴ – ‘ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨽᨣᩅᩣ, ᩈ᩠ᩅᩣᨠ᩠ᨡᩣᨲᩮᩣ ᨽᨣᩅᨲᩣ ᨵᨾ᩠ᨾᩮᩣ, ᩈᩩᨸ᩠ᨸᨭᩥᨸᨶ᩠ᨶᩮᩣ ᩈᩣᩅᨠᩈᨦ᩠ᨥᩮᩣ’ᨲᩥ.

ᨠᩩᩈᩃᨵᨾ᩠ᨾᨴᩮᩈᨶᩣ

᪑᪔᪕. ‘‘ᩋᨸᩁᩴ ᨸᨶ, ᨽᨶ᩠ᨲᩮ, ᩑᨲᨴᩣᨶᩩᨲ᩠ᨲᩁᩥᨿᩴ, ᨿᨳᩣ ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᨠᩩᩈᩃᩮᩈᩩ ᨵᨾ᩠ᨾᩮᩈᩩ. ᨲᨲᩕᩥᨾᩮ ᨠᩩᩈᩃᩣ ᨵᨾ᩠ᨾᩣ ᩈᩮᨿ᩠ᨿᨳᩥᨴᩴ, ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩣ, ᨧᨲ᩠ᨲᩣᩁᩮᩣ ᩈᨾ᩠ᨾᨸ᩠ᨸᨵᩣᨶᩣ, ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ, ᨸᨬ᩠ᨧᩥᨶ᩠ᨴᩕᩥᨿᩣᨶᩥ, ᨸᨬ᩠ᨧ ᨻᩃᩣᨶᩥ, ᩈᨲ᩠ᨲ ᨻᩮᩣᨩ᩠ᨫᨦ᩠ᨣᩣ, ᩋᩁᩥᨿᩮᩣ ᩋᨭ᩠ᨮᨦ᩠ᨣᩥᨠᩮᩣ ᨾᨣ᩠ᨣᩮᩣ. ᩍᨵ, ᨽᨶ᩠ᨲᩮ, ᨽᩥᨠ᩠ᨡᩩ ᩌᩈᩅᩣᨶᩴ ᨡᨿᩣ ᩋᨶᩣᩈᩅᩴ ᨧᩮᨲᩮᩣᩅᩥᨾᩩᨲ᩠ᨲᩥᩴ ᨸᨬ᩠ᨬᩣᩅᩥᨾᩩᨲ᩠ᨲᩥᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩑᨲᨴᩣᨶᩩᨲ᩠ᨲᩁᩥᨿᩴ, ᨽᨶ᩠ᨲᩮ, ᨠᩩᩈᩃᩮᩈᩩ ᨵᨾ᩠ᨾᩮᩈᩩ. ᨲᩴ ᨽᨣᩅᩣ ᩋᩈᩮᩈᨾᨽᩥᨩᩣᨶᩣᨲᩥ, ᨲᩴ ᨽᨣᩅᨲᩮᩣ ᩋᩈᩮᩈᨾᨽᩥᨩᩣᨶᨲᩮᩣ ᩏᨲ᩠ᨲᩁᩥ ᩋᨽᩥᨬ᩠ᨬᩮᨿ᩠ᨿᩴ ᨶᨲ᩠ᨳᩥ, ᨿᨴᨽᩥᨩᩣᨶᩴ ᩋᨬ᩠ᨬᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᨽᨣᩅᨲᩣ ᨽᩥᨿ᩠ᨿᩮᩣᨽᩥᨬ᩠ᨬᨲᩁᩮᩣ ᩋᩔ, ᨿᨴᩥᨴᩴ ᨠᩩᩈᩃᩮᩈᩩ ᨵᨾ᩠ᨾᩮᩈᩩ.

ᩌᨿᨲᨶᨸᨱ᩠ᨱᨲ᩠ᨲᩥᨴᩮᩈᨶᩣ

᪑᪔᪖. ‘‘ᩋᨸᩁᩴ ᨸᨶ, ᨽᨶ᩠ᨲᩮ, ᩑᨲᨴᩣᨶᩩᨲ᩠ᨲᩁᩥᨿᩴ, ᨿᨳᩣ ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᩌᨿᨲᨶᨸᨱ᩠ᨱᨲ᩠ᨲᩦᩈᩩ. ᨨᨿᩥᨾᩣᨶᩥ, ᨽᨶ᩠ᨲᩮ, ᩋᨩ᩠ᨫᨲ᩠ᨲᩥᨠᨻᩣᩉᩥᩁᩣᨶᩥ ᩌᨿᨲᨶᩣᨶᩥ. ᨧᨠ᩠ᨡᩩᨬ᩠ᨧᩮᩅ ᩁᩪᨸᩣ [ᩁᩪᨸᩣᨶᩥ (ᨠ.)] ᨧ, ᩈᩮᩣᨲᨬ᩠ᨧᩮᩅ ᩈᨴ᩠ᨴᩣ ᨧ, ᨥᩣᨶᨬ᩠ᨧᩮᩅ ᨣᨶ᩠ᨵᩣ ᨧ, ᨩᩥᩅ᩠ᩉᩣ ᨧᩮᩅ ᩁᩈᩣ ᨧ, ᨠᩣᨿᩮᩣ ᨧᩮᩅ ᨹᩮᩣᨭ᩠ᨮᨻ᩠ᨻᩣ ᨧ, ᨾᨶᩮᩣ ᨧᩮᩅ ᨵᨾ᩠ᨾᩣ ᨧ. ᩑᨲᨴᩣᨶᩩᨲ᩠ᨲᩁᩥᨿᩴ, ᨽᨶ᩠ᨲᩮ, ᩌᨿᨲᨶᨸᨱ᩠ᨱᨲ᩠ᨲᩦᩈᩩ. ᨲᩴ ᨽᨣᩅᩣ ᩋᩈᩮᩈᨾᨽᩥᨩᩣᨶᩣᨲᩥ, ᨲᩴ ᨽᨣᩅᨲᩮᩣ ᩋᩈᩮᩈᨾᨽᩥᨩᩣᨶᨲᩮᩣ ᩏᨲ᩠ᨲᩁᩥ ᩋᨽᩥᨬ᩠ᨬᩮᨿ᩠ᨿᩴ ᨶᨲ᩠ᨳᩥ, ᨿᨴᨽᩥᨩᩣᨶᩴ ᩋᨬ᩠ᨬᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᨽᨣᩅᨲᩣ ᨽᩥᨿ᩠ᨿᩮᩣᨽᩥᨬ᩠ᨬᨲᩁᩮᩣ ᩋᩔ ᨿᨴᩥᨴᩴ ᩌᨿᨲᨶᨸᨱ᩠ᨱᨲ᩠ᨲᩦᩈᩩ.

ᨣᨻ᩠ᨽᩣᩅᨠ᩠ᨠᨶ᩠ᨲᩥᨴᩮᩈᨶᩣ

᪑᪔᪗. ‘‘ᩋᨸᩁᩴ ᨸᨶ, ᨽᨶ᩠ᨲᩮ, ᩑᨲᨴᩣᨶᩩᨲ᩠ᨲᩁᩥᨿᩴ, ᨿᨳᩣ ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᨣᨻ᩠ᨽᩣᩅᨠ᩠ᨠᨶ᩠ᨲᩦᩈᩩ. ᨧᨲᩔᩮᩣ ᩍᨾᩣ, ᨽᨶ᩠ᨲᩮ, ᨣᨻ᩠ᨽᩣᩅᨠ᩠ᨠᨶ᩠ᨲᩥᨿᩮᩣ. ᩍᨵ, ᨽᨶ᩠ᨲᩮ, ᩑᨠᨧ᩠ᨧᩮᩣ ᩋᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨾᨲᩥ; ᩋᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩈ᩠ᨾᩥᩴ ᨮᩣᨲᩥ; ᩋᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᨾ᩠ᩉᩣ ᨶᩥᨠ᩠ᨡᨾᨲᩥ. ᩋᨿᩴ ᨸᨮᨾᩣ ᨣᨻ᩠ᨽᩣᩅᨠ᩠ᨠᨶ᩠ᨲᩥ.

‘‘ᨸᩩᨶ ᨧᨸᩁᩴ, ᨽᨶ᩠ᨲᩮ, ᩍᨵᩮᨠᨧ᩠ᨧᩮᩣ ᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨾᨲᩥ; ᩋᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩈ᩠ᨾᩥᩴ ᨮᩣᨲᩥ; ᩋᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᨾ᩠ᩉᩣ ᨶᩥᨠ᩠ᨡᨾᨲᩥ. ᩋᨿᩴ ᨴᩩᨲᩥᨿᩣ ᨣᨻ᩠ᨽᩣᩅᨠ᩠ᨠᨶ᩠ᨲᩥ.

‘‘ᨸᩩᨶ ᨧᨸᩁᩴ, ᨽᨶ᩠ᨲᩮ, ᩍᨵᩮᨠᨧ᩠ᨧᩮᩣ ᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨾᨲᩥ; ᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩈ᩠ᨾᩥᩴ ᨮᩣᨲᩥ; ᩋᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᨾ᩠ᩉᩣ ᨶᩥᨠ᩠ᨡᨾᨲᩥ. ᩋᨿᩴ ᨲᨲᩥᨿᩣ ᨣᨻ᩠ᨽᩣᩅᨠ᩠ᨠᨶ᩠ᨲᩥ.

‘‘ᨸᩩᨶ ᨧᨸᩁᩴ, ᨽᨶ᩠ᨲᩮ, ᩍᨵᩮᨠᨧ᩠ᨧᩮᩣ ᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨾᨲᩥ; ᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩈ᩠ᨾᩥᩴ ᨮᩣᨲᩥ; ᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᨾ᩠ᩉᩣ ᨶᩥᨠ᩠ᨡᨾᨲᩥ. ᩋᨿᩴ ᨧᨲᩩᨲ᩠ᨳᩣ ᨣᨻ᩠ᨽᩣᩅᨠ᩠ᨠᨶ᩠ᨲᩥ. ᩑᨲᨴᩣᨶᩩᨲ᩠ᨲᩁᩥᨿᩴ, ᨽᨶ᩠ᨲᩮ, ᨣᨻ᩠ᨽᩣᩅᨠ᩠ᨠᨶ᩠ᨲᩦᩈᩩ.

ᩌᨴᩮᩈᨶᩅᩥᨵᩣᨴᩮᩈᨶᩣ

᪑᪔᪘. ‘‘ᩋᨸᩁᩴ ᨸᨶ, ᨽᨶ᩠ᨲᩮ, ᩑᨲᨴᩣᨶᩩᨲ᩠ᨲᩁᩥᨿᩴ, ᨿᨳᩣ ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᩌᨴᩮᩈᨶᩅᩥᨵᩣᩈᩩ. ᨧᨲᩔᩮᩣ ᩍᨾᩣ, ᨽᨶ᩠ᨲᩮ, ᩌᨴᩮᩈᨶᩅᩥᨵᩣ. ᩍᨵ, ᨽᨶ᩠ᨲᩮ, ᩑᨠᨧ᩠ᨧᩮᩣ ᨶᩥᨾᩥᨲ᩠ᨲᩮᨶ ᩌᨴᩥᩈᨲᩥ – ‘ᩑᩅᨾ᩠ᨸᩥ ᨲᩮ ᨾᨶᩮᩣ, ᩍᨲ᩠ᨳᨾ᩠ᨸᩥ ᨲᩮ ᨾᨶᩮᩣ, ᩍᨲᩥᨸᩥ ᨲᩮ ᨧᩥᨲ᩠ᨲ’ᨶ᩠ᨲᩥ. ᩈᩮᩣ ᨻᩉᩩᩴ ᨧᩮᨸᩥ ᩌᨴᩥᩈᨲᩥ, ᨲᨳᩮᩅ ᨲᩴ ᩉᩮᩣᨲᩥ, ᨶᩮᩣ ᩋᨬ᩠ᨬᨳᩣ. ᩋᨿᩴ ᨸᨮᨾᩣ ᩌᨴᩮᩈᨶᩅᩥᨵᩣ.

‘‘ᨸᩩᨶ ᨧᨸᩁᩴ, ᨽᨶ᩠ᨲᩮ, ᩍᨵᩮᨠᨧ᩠ᨧᩮᩣ ᨶ ᩉᩮᩅ ᨡᩮᩣ ᨶᩥᨾᩥᨲ᩠ᨲᩮᨶ ᩌᨴᩥᩈᨲᩥ. ᩋᨸᩥ ᨧ ᨡᩮᩣ ᨾᨶᩩᩔᩣᨶᩴ ᩅᩣ ᩋᨾᨶᩩᩔᩣᨶᩴ ᩅᩣ ᨴᩮᩅᨲᩣᨶᩴ ᩅᩣ ᩈᨴ᩠ᨴᩴ ᩈᩩᨲ᩠ᩅᩣ ᩌᨴᩥᩈᨲᩥ – ‘ᩑᩅᨾ᩠ᨸᩥ ᨲᩮ ᨾᨶᩮᩣ, ᩍᨲ᩠ᨳᨾ᩠ᨸᩥ ᨲᩮ ᨾᨶᩮᩣ, ᩍᨲᩥᨸᩥ ᨲᩮ ᨧᩥᨲ᩠ᨲ’ᨶ᩠ᨲᩥ. ᩈᩮᩣ ᨻᩉᩩᩴ ᨧᩮᨸᩥ ᩌᨴᩥᩈᨲᩥ, ᨲᨳᩮᩅ ᨲᩴ ᩉᩮᩣᨲᩥ, ᨶᩮᩣ ᩋᨬ᩠ᨬᨳᩣ. ᩋᨿᩴ ᨴᩩᨲᩥᨿᩣ ᩌᨴᩮᩈᨶᩅᩥᨵᩣ.

‘‘ᨸᩩᨶ ᨧᨸᩁᩴ, ᨽᨶ᩠ᨲᩮ, ᩍᨵᩮᨠᨧ᩠ᨧᩮᩣ ᨶ ᩉᩮᩅ ᨡᩮᩣ ᨶᩥᨾᩥᨲ᩠ᨲᩮᨶ ᩌᨴᩥᩈᨲᩥ, ᨶᩣᨸᩥ ᨾᨶᩩᩔᩣᨶᩴ ᩅᩣ ᩋᨾᨶᩩᩔᩣᨶᩴ ᩅᩣ ᨴᩮᩅᨲᩣᨶᩴ ᩅᩣ ᩈᨴ᩠ᨴᩴ ᩈᩩᨲ᩠ᩅᩣ ᩌᨴᩥᩈᨲᩥ. ᩋᨸᩥ ᨧ ᨡᩮᩣ ᩅᩥᨲᨠ᩠ᨠᨿᨲᩮᩣ ᩅᩥᨧᩣᩁᨿᨲᩮᩣ ᩅᩥᨲᨠ᩠ᨠᩅᩥᨸ᩠ᨹᩣᩁᩈᨴ᩠ᨴᩴ ᩈᩩᨲ᩠ᩅᩣ ᩌᨴᩥᩈᨲᩥ – ‘ᩑᩅᨾ᩠ᨸᩥ ᨲᩮ ᨾᨶᩮᩣ, ᩍᨲ᩠ᨳᨾ᩠ᨸᩥ ᨲᩮ ᨾᨶᩮᩣ, ᩍᨲᩥᨸᩥ ᨲᩮ ᨧᩥᨲ᩠ᨲ’ᨶ᩠ᨲᩥ. ᩈᩮᩣ ᨻᩉᩩᩴ ᨧᩮᨸᩥ ᩌᨴᩥᩈᨲᩥ, ᨲᨳᩮᩅ ᨲᩴ ᩉᩮᩣᨲᩥ, ᨶᩮᩣ ᩋᨬ᩠ᨬᨳᩣ. ᩋᨿᩴ ᨲᨲᩥᨿᩣ ᩌᨴᩮᩈᨶᩅᩥᨵᩣ.

‘‘ᨸᩩᨶ ᨧᨸᩁᩴ, ᨽᨶ᩠ᨲᩮ, ᩍᨵᩮᨠᨧ᩠ᨧᩮᩣ ᨶ ᩉᩮᩅ ᨡᩮᩣ ᨶᩥᨾᩥᨲ᩠ᨲᩮᨶ ᩌᨴᩥᩈᨲᩥ, ᨶᩣᨸᩥ ᨾᨶᩩᩔᩣᨶᩴ ᩅᩣ ᩋᨾᨶᩩᩔᩣᨶᩴ ᩅᩣ ᨴᩮᩅᨲᩣᨶᩴ ᩅᩣ ᩈᨴ᩠ᨴᩴ ᩈᩩᨲ᩠ᩅᩣ ᩌᨴᩥᩈᨲᩥ, ᨶᩣᨸᩥ ᩅᩥᨲᨠ᩠ᨠᨿᨲᩮᩣ ᩅᩥᨧᩣᩁᨿᨲᩮᩣ ᩅᩥᨲᨠ᩠ᨠᩅᩥᨸ᩠ᨹᩣᩁᩈᨴ᩠ᨴᩴ ᩈᩩᨲ᩠ᩅᩣ ᩌᨴᩥᩈᨲᩥ. ᩋᨸᩥ ᨧ ᨡᩮᩣ ᩋᩅᩥᨲᨠ᩠ᨠᩴ ᩋᩅᩥᨧᩣᩁᩴ ᩈᨾᩣᨵᩥᩴ ᩈᨾᩣᨸᨶ᩠ᨶᩔ [ᩅᩥᨲᨠ᩠ᨠᩅᩥᨧᩣᩁᩈᨾᩣᨵᩥᩈᨾᩣᨸᨶ᩠ᨶᩔ (ᩈ᩠ᨿᩣ. ᨠ.) ᩋ. ᨶᩥ. ᪓.᪖᪑ ᨸᩔᩥᨲᨻ᩠ᨻᩴ] ᨧᩮᨲᩈᩣ ᨧᩮᨲᩮᩣ ᨸᩁᩥᨧ᩠ᨧ ᨸᨩᩣᨶᩣᨲᩥ – ‘ᨿᨳᩣ ᩍᨾᩔ ᨽᩮᩣᨲᩮᩣ ᨾᨶᩮᩣᩈᨦ᩠ᨡᩣᩁᩣ ᨸᨱᩥᩉᩥᨲᩣ. ᨲᨳᩣ ᩍᨾᩔ ᨧᩥᨲ᩠ᨲᩔ ᩋᨶᨶ᩠ᨲᩁᩣ ᩍᨾᩴ ᨶᩣᨾ ᩅᩥᨲᨠ᩠ᨠᩴ ᩅᩥᨲᨠ᩠ᨠᩮᩔᨲᩦ’ᨲᩥ. ᩈᩮᩣ ᨻᩉᩩᩴ ᨧᩮᨸᩥ ᩌᨴᩥᩈᨲᩥ, ᨲᨳᩮᩅ ᨲᩴ ᩉᩮᩣᨲᩥ, ᨶᩮᩣ ᩋᨬ᩠ᨬᨳᩣ. ᩋᨿᩴ ᨧᨲᩩᨲ᩠ᨳᩣ ᩌᨴᩮᩈᨶᩅᩥᨵᩣ. ᩑᨲᨴᩣᨶᩩᨲ᩠ᨲᩁᩥᨿᩴ, ᨽᨶ᩠ᨲᩮ, ᩌᨴᩮᩈᨶᩅᩥᨵᩣᩈᩩ.

ᨴᩔᨶᩈᨾᩣᨸᨲ᩠ᨲᩥᨴᩮᩈᨶᩣ

᪑᪔᪙. ‘‘ᩋᨸᩁᩴ ᨸᨶ, ᨽᨶ᩠ᨲᩮ, ᩑᨲᨴᩣᨶᩩᨲ᩠ᨲᩁᩥᨿᩴ, ᨿᨳᩣ ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᨴᩔᨶᩈᨾᩣᨸᨲ᩠ᨲᩦᩈᩩ. ᨧᨲᩔᩮᩣ ᩍᨾᩣ, ᨽᨶ᩠ᨲᩮ, ᨴᩔᨶᩈᨾᩣᨸᨲ᩠ᨲᩥᨿᩮᩣ. ᩍᨵ, ᨽᨶ᩠ᨲᩮ, ᩑᨠᨧ᩠ᨧᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᩌᨲᨸ᩠ᨸᨾᨶ᩠ᩅᩣᨿ ᨸᨵᩣᨶᨾᨶ᩠ᩅᩣᨿ ᩋᨶᩩᨿᩮᩣᨣᨾᨶ᩠ᩅᩣᨿ ᩋᨸ᩠ᨸᨾᩣᨴᨾᨶ᩠ᩅᩣᨿ ᩈᨾ᩠ᨾᩣᨾᨶᩈᩥᨠᩣᩁᨾᨶ᩠ᩅᩣᨿ ᨲᨳᩣᩁᩪᨸᩴ ᨧᩮᨲᩮᩣᩈᨾᩣᨵᩥᩴ ᨹᩩᩈᨲᩥ, ᨿᨳᩣᩈᨾᩣᩉᩥᨲᩮ ᨧᩥᨲ᩠ᨲᩮ ᩍᨾᨾᩮᩅ ᨠᩣᨿᩴ ᩏᨴ᩠ᨵᩴ ᨸᩣᨴᨲᩃᩣ ᩋᨵᩮᩣ ᨠᩮᩈᨾᨲ᩠ᨳᨠᩣ ᨲᨧᨸᩁᩥᨿᨶ᩠ᨲᩴ ᨸᩪᩁᩴ ᨶᩣᨶᨸ᩠ᨸᨠᩣᩁᩔ ᩋᩈᩩᨧᩥᨶᩮᩣ ᨸᨧ᩠ᨧᩅᩮᨠ᩠ᨡᨲᩥ – ‘ᩋᨲ᩠ᨳᩥ ᩍᨾᩈ᩠ᨾᩥᩴ ᨠᩣᨿᩮ ᨠᩮᩈᩣ ᩃᩮᩣᨾᩣ ᨶᨡᩣ ᨴᨶ᩠ᨲᩣ ᨲᨧᩮᩣ ᨾᩴᩈᩴ ᨶ᩠ᩉᩣᩁᩩ ᩋᨭ᩠ᨮᩥ ᩋᨭ᩠ᨮᩥᨾᩥᨬ᩠ᨩᩴ ᩅᨠ᩠ᨠᩴ ᩉᨴᨿᩴ ᨿᨠᨶᩴ ᨠᩥᩃᩮᩣᨾᨠᩴ ᨸᩥᩉᨠᩴ ᨸᨸ᩠ᨹᩣᩈᩴ ᩋᨶ᩠ᨲᩴ ᩋᨶ᩠ᨲᨣᩩᨱᩴ ᩏᨴᩁᩥᨿᩴ ᨠᩁᩦᩈᩴ ᨸᩥᨲ᩠ᨲᩴ ᩈᩮᨾ᩠ᩉᩴ ᨸᩩᨻ᩠ᨻᩮᩣ ᩃᩮᩣᩉᩥᨲᩴ ᩈᩮᨴᩮᩣ ᨾᩮᨴᩮᩣ ᩋᩔᩩ ᩅᩈᩣ ᨡᩮᩊᩮᩣ ᩈᩥᨦ᩠ᨥᩣᨶᩥᨠᩣ ᩃᩈᩥᨠᩣ ᨾᩩᨲ᩠ᨲ’ᨶ᩠ᨲᩥ. ᩋᨿᩴ ᨸᨮᨾᩣ ᨴᩔᨶᩈᨾᩣᨸᨲ᩠ᨲᩥ.

‘‘ᨸᩩᨶ ᨧᨸᩁᩴ, ᨽᨶ᩠ᨲᩮ, ᩍᨵᩮᨠᨧ᩠ᨧᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᩌᨲᨸ᩠ᨸᨾᨶ᩠ᩅᩣᨿ…ᨸᩮ… ᨲᨳᩣᩁᩪᨸᩴ ᨧᩮᨲᩮᩣᩈᨾᩣᨵᩥᩴ ᨹᩩᩈᨲᩥ, ᨿᨳᩣᩈᨾᩣᩉᩥᨲᩮ ᨧᩥᨲ᩠ᨲᩮ ᩍᨾᨾᩮᩅ ᨠᩣᨿᩴ ᩏᨴ᩠ᨵᩴ ᨸᩣᨴᨲᩃᩣ ᩋᨵᩮᩣ ᨠᩮᩈᨾᨲ᩠ᨳᨠᩣ ᨲᨧᨸᩁᩥᨿᨶ᩠ᨲᩴ ᨸᩪᩁᩴ ᨶᩣᨶᨸ᩠ᨸᨠᩣᩁᩔ ᩋᩈᩩᨧᩥᨶᩮᩣ ᨸᨧ᩠ᨧᩅᩮᨠ᩠ᨡᨲᩥ – ‘ᩋᨲ᩠ᨳᩥ ᩍᨾᩈ᩠ᨾᩥᩴ ᨠᩣᨿᩮ ᨠᩮᩈᩣ ᩃᩮᩣᨾᩣ…ᨸᩮ… ᩃᩈᩥᨠᩣ ᨾᩩᨲ᩠ᨲ’ᨶ᩠ᨲᩥ. ᩋᨲᩥᨠ᩠ᨠᨾ᩠ᨾ ᨧ ᨸᩩᩁᩥᩈᩔ ᨨᩅᩥᨾᩴᩈᩃᩮᩣᩉᩥᨲᩴ ᩋᨭ᩠ᨮᩥᩴ ᨸᨧ᩠ᨧᩅᩮᨠ᩠ᨡᨲᩥ. ᩋᨿᩴ ᨴᩩᨲᩥᨿᩣ ᨴᩔᨶᩈᨾᩣᨸᨲ᩠ᨲᩥ.

‘‘ᨸᩩᨶ ᨧᨸᩁᩴ, ᨽᨶ᩠ᨲᩮ, ᩍᨵᩮᨠᨧ᩠ᨧᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᩌᨲᨸ᩠ᨸᨾᨶ᩠ᩅᩣᨿ…ᨸᩮ… ᨲᨳᩣᩁᩪᨸᩴ ᨧᩮᨲᩮᩣᩈᨾᩣᨵᩥᩴ ᨹᩩᩈᨲᩥ, ᨿᨳᩣᩈᨾᩣᩉᩥᨲᩮ ᨧᩥᨲ᩠ᨲᩮ ᩍᨾᨾᩮᩅ ᨠᩣᨿᩴ ᩏᨴ᩠ᨵᩴ ᨸᩣᨴᨲᩃᩣ ᩋᨵᩮᩣ ᨠᩮᩈᨾᨲ᩠ᨳᨠᩣ ᨲᨧᨸᩁᩥᨿᨶ᩠ᨲᩴ ᨸᩪᩁᩴ ᨶᩣᨶᨸ᩠ᨸᨠᩣᩁᩔ ᩋᩈᩩᨧᩥᨶᩮᩣ ᨸᨧ᩠ᨧᩅᩮᨠ᩠ᨡᨲᩥ – ‘ᩋᨲ᩠ᨳᩥ ᩍᨾᩈ᩠ᨾᩥᩴ ᨠᩣᨿᩮ ᨠᩮᩈᩣ ᩃᩮᩣᨾᩣ…ᨸᩮ… ᩃᩈᩥᨠᩣ ᨾᩩᨲ᩠ᨲ’ᨶ᩠ᨲᩥ. ᩋᨲᩥᨠ᩠ᨠᨾ᩠ᨾ ᨧ ᨸᩩᩁᩥᩈᩔ ᨨᩅᩥᨾᩴᩈᩃᩮᩣᩉᩥᨲᩴ ᩋᨭ᩠ᨮᩥᩴ ᨸᨧ᩠ᨧᩅᩮᨠ᩠ᨡᨲᩥ. ᨸᩩᩁᩥᩈᩔ ᨧ ᩅᩥᨬ᩠ᨬᩣᨱᩈᩮᩣᨲᩴ ᨸᨩᩣᨶᩣᨲᩥ, ᩏᨽᨿᨲᩮᩣ ᩋᨻ᩠ᨻᩮᩣᨧ᩠ᨨᩥᨶ᩠ᨶᩴ ᩍᨵ ᩃᩮᩣᨠᩮ ᨸᨲᩥᨭ᩠ᨮᩥᨲᨬ᩠ᨧ ᨸᩁᩃᩮᩣᨠᩮ ᨸᨲᩥᨭ᩠ᨮᩥᨲᨬ᩠ᨧ. ᩋᨿᩴ ᨲᨲᩥᨿᩣ ᨴᩔᨶᩈᨾᩣᨸᨲ᩠ᨲᩥ.

‘‘ᨸᩩᨶ ᨧᨸᩁᩴ, ᨽᨶ᩠ᨲᩮ, ᩍᨵᩮᨠᨧ᩠ᨧᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᩌᨲᨸ᩠ᨸᨾᨶ᩠ᩅᩣᨿ…ᨸᩮ… ᨲᨳᩣᩁᩪᨸᩴ ᨧᩮᨲᩮᩣᩈᨾᩣᨵᩥᩴ ᨹᩩᩈᨲᩥ, ᨿᨳᩣᩈᨾᩣᩉᩥᨲᩮ ᨧᩥᨲ᩠ᨲᩮ ᩍᨾᨾᩮᩅ ᨠᩣᨿᩴ ᩏᨴ᩠ᨵᩴ ᨸᩣᨴᨲᩃᩣ ᩋᨵᩮᩣ ᨠᩮᩈᨾᨲ᩠ᨳᨠᩣ ᨲᨧᨸᩁᩥᨿᨶ᩠ᨲᩴ ᨸᩪᩁᩴ ᨶᩣᨶᨸ᩠ᨸᨠᩣᩁᩔ ᩋᩈᩩᨧᩥᨶᩮᩣ ᨸᨧ᩠ᨧᩅᩮᨠ᩠ᨡᨲᩥ – ‘ᩋᨲ᩠ᨳᩥ ᩍᨾᩈ᩠ᨾᩥᩴ ᨠᩣᨿᩮ ᨠᩮᩈᩣ ᩃᩮᩣᨾᩣ…ᨸᩮ… ᩃᩈᩥᨠᩣ ᨾᩩᨲ᩠ᨲ’ᨶ᩠ᨲᩥ. ᩋᨲᩥᨠ᩠ᨠᨾ᩠ᨾ ᨧ ᨸᩩᩁᩥᩈᩔ ᨨᩅᩥᨾᩴᩈᩃᩮᩣᩉᩥᨲᩴ ᩋᨭ᩠ᨮᩥᩴ ᨸᨧ᩠ᨧᩅᩮᨠ᩠ᨡᨲᩥ. ᨸᩩᩁᩥᩈᩔ ᨧ ᩅᩥᨬ᩠ᨬᩣᨱᩈᩮᩣᨲᩴ ᨸᨩᩣᨶᩣᨲᩥ, ᩏᨽᨿᨲᩮᩣ ᩋᨻ᩠ᨻᩮᩣᨧ᩠ᨨᩥᨶ᩠ᨶᩴ ᩍᨵ ᩃᩮᩣᨠᩮ ᩋᨸ᩠ᨸᨲᩥᨭ᩠ᨮᩥᨲᨬ᩠ᨧ ᨸᩁᩃᩮᩣᨠᩮ ᩋᨸ᩠ᨸᨲᩥᨭ᩠ᨮᩥᨲᨬ᩠ᨧ. ᩋᨿᩴ ᨧᨲᩩᨲ᩠ᨳᩣ ᨴᩔᨶᩈᨾᩣᨸᨲ᩠ᨲᩥ. ᩑᨲᨴᩣᨶᩩᨲ᩠ᨲᩁᩥᨿᩴ, ᨽᨶ᩠ᨲᩮ, ᨴᩔᨶᩈᨾᩣᨸᨲ᩠ᨲᩦᩈᩩ.

ᨸᩩᨣ᩠ᨣᩃᨸᨱ᩠ᨱᨲ᩠ᨲᩥᨴᩮᩈᨶᩣ

᪑᪕᪐. ‘‘ᩋᨸᩁᩴ ᨸᨶ, ᨽᨶ᩠ᨲᩮ, ᩑᨲᨴᩣᨶᩩᨲ᩠ᨲᩁᩥᨿᩴ, ᨿᨳᩣ ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᨸᩩᨣ᩠ᨣᩃᨸᨱ᩠ᨱᨲ᩠ᨲᩦᩈᩩ. ᩈᨲ᩠ᨲᩥᨾᩮ, ᨽᨶ᩠ᨲᩮ, ᨸᩩᨣ᩠ᨣᩃᩣ. ᩏᨽᨲᩮᩣᨽᩣᨣᩅᩥᨾᩩᨲ᩠ᨲᩮᩣ ᨸᨬ᩠ᨬᩣᩅᩥᨾᩩᨲ᩠ᨲᩮᩣ ᨠᩣᨿᩈᨠ᩠ᨡᩦ ᨴᩥᨭ᩠ᨮᩥᨸ᩠ᨸᨲ᩠ᨲᩮᩣ ᩈᨴ᩠ᨵᩣᩅᩥᨾᩩᨲ᩠ᨲᩮᩣ ᨵᨾ᩠ᨾᩣᨶᩩᩈᩣᩁᩦ ᩈᨴ᩠ᨵᩣᨶᩩᩈᩣᩁᩦ. ᩑᨲᨴᩣᨶᩩᨲ᩠ᨲᩁᩥᨿᩴ, ᨽᨶ᩠ᨲᩮ, ᨸᩩᨣ᩠ᨣᩃᨸᨱ᩠ᨱᨲ᩠ᨲᩦᩈᩩ.

ᨸᨵᩣᨶᨴᩮᩈᨶᩣ

᪑᪕᪑. ‘‘ᩋᨸᩁᩴ ᨸᨶ, ᨽᨶ᩠ᨲᩮ, ᩑᨲᨴᩣᨶᩩᨲ᩠ᨲᩁᩥᨿᩴ, ᨿᨳᩣ ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᨸᨵᩣᨶᩮᩈᩩ. ᩈᨲ᩠ᨲᩥᨾᩮ, ᨽᨶ᩠ᨲᩮ ᩈᨾ᩠ᨻᩮᩣᨩ᩠ᨫᨦ᩠ᨣᩣ ᩈᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ ᨵᨾ᩠ᨾᩅᩥᨧᨿᩈᨾ᩠ᨻᩮᩣᨩ᩠ᨫᨦ᩠ᨣᩮᩣ ᩅᩦᩁᩥᨿᩈᨾ᩠ᨻᩮᩣᨩ᩠ᨫᨦ᩠ᨣᩮᩣ ᨸᩦᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ ᨸᩔᨴ᩠ᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ ᩈᨾᩣᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ ᩏᨸᩮᨠ᩠ᨡᩣᩈᨾ᩠ᨻᩮᩣᨩ᩠ᨫᨦ᩠ᨣᩮᩣ. ᩑᨲᨴᩣᨶᩩᨲ᩠ᨲᩁᩥᨿᩴ, ᨽᨶ᩠ᨲᩮ, ᨸᨵᩣᨶᩮᩈᩩ.

ᨸᨭᩥᨸᨴᩣᨴᩮᩈᨶᩣ

᪑᪕᪒. ‘‘ᩋᨸᩁᩴ ᨸᨶ, ᨽᨶ᩠ᨲᩮ, ᩑᨲᨴᩣᨶᩩᨲ᩠ᨲᩁᩥᨿᩴ, ᨿᨳᩣ ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᨸᨭᩥᨸᨴᩣᩈᩩ. ᨧᨲᩔᩮᩣ ᩍᨾᩣ, ᨽᨶ᩠ᨲᩮ, ᨸᨭᩥᨸᨴᩣ ᨴᩩᨠ᩠ᨡᩣ ᨸᨭᩥᨸᨴᩣ ᨴᨶ᩠ᨵᩣᨽᩥᨬ᩠ᨬᩣ, ᨴᩩᨠ᩠ᨡᩣ ᨸᨭᩥᨸᨴᩣ ᨡᩥᨸ᩠ᨸᩣᨽᩥᨬ᩠ᨬᩣ, ᩈᩩᨡᩣ ᨸᨭᩥᨸᨴᩣ ᨴᨶ᩠ᨵᩣᨽᩥᨬ᩠ᨬᩣ, ᩈᩩᨡᩣ ᨸᨭᩥᨸᨴᩣ ᨡᩥᨸ᩠ᨸᩣᨽᩥᨬ᩠ᨬᩣᨲᩥ. ᨲᨲᩕ, ᨽᨶ᩠ᨲᩮ, ᨿᩣᨿᩴ ᨸᨭᩥᨸᨴᩣ ᨴᩩᨠ᩠ᨡᩣ ᨴᨶ᩠ᨵᩣᨽᩥᨬ᩠ᨬᩣ, ᩋᨿᩴ, ᨽᨶ᩠ᨲᩮ, ᨸᨭᩥᨸᨴᩣ ᩏᨽᨿᩮᨶᩮᩅ ᩉᩦᨶᩣ ᩋᨠ᩠ᨡᩣᨿᨲᩥ ᨴᩩᨠ᩠ᨡᨲ᩠ᨲᩣ ᨧ ᨴᨶ᩠ᨵᨲ᩠ᨲᩣ ᨧ. ᨲᨲᩕ, ᨽᨶ᩠ᨲᩮ, ᨿᩣᨿᩴ ᨸᨭᩥᨸᨴᩣ ᨴᩩᨠ᩠ᨡᩣ ᨡᩥᨸ᩠ᨸᩣᨽᩥᨬ᩠ᨬᩣ, ᩋᨿᩴ ᨸᨶ, ᨽᨶ᩠ᨲᩮ, ᨸᨭᩥᨸᨴᩣ ᨴᩩᨠ᩠ᨡᨲ᩠ᨲᩣ ᩉᩦᨶᩣ ᩋᨠ᩠ᨡᩣᨿᨲᩥ. ᨲᨲᩕ, ᨽᨶ᩠ᨲᩮ, ᨿᩣᨿᩴ ᨸᨭᩥᨸᨴᩣ ᩈᩩᨡᩣ ᨴᨶ᩠ᨵᩣᨽᩥᨬ᩠ᨬᩣ, ᩋᨿᩴ ᨸᨶ, ᨽᨶ᩠ᨲᩮ, ᨸᨭᩥᨸᨴᩣ ᨴᨶ᩠ᨵᨲ᩠ᨲᩣ ᩉᩦᨶᩣ ᩋᨠ᩠ᨡᩣᨿᨲᩥ. ᨲᨲᩕ, ᨽᨶ᩠ᨲᩮ, ᨿᩣᨿᩴ ᨸᨭᩥᨸᨴᩣ ᩈᩩᨡᩣ ᨡᩥᨸ᩠ᨸᩣᨽᩥᨬ᩠ᨬᩣ, ᩋᨿᩴ ᨸᨶ, ᨽᨶ᩠ᨲᩮ, ᨸᨭᩥᨸᨴᩣ ᩏᨽᨿᩮᨶᩮᩅ ᨸᨱᩦᨲᩣ ᩋᨠ᩠ᨡᩣᨿᨲᩥ ᩈᩩᨡᨲ᩠ᨲᩣ ᨧ ᨡᩥᨸ᩠ᨸᨲ᩠ᨲᩣ ᨧ. ᩑᨲᨴᩣᨶᩩᨲ᩠ᨲᩁᩥᨿᩴ, ᨽᨶ᩠ᨲᩮ, ᨸᨭᩥᨸᨴᩣᩈᩩ.

ᨽᩔᩈᨾᩣᨧᩣᩁᩣᨴᩥᨴᩮᩈᨶᩣ

᪑᪕᪓. ‘‘ᩋᨸᩁᩴ ᨸᨶ, ᨽᨶ᩠ᨲᩮ, ᩑᨲᨴᩣᨶᩩᨲ᩠ᨲᩁᩥᨿᩴ, ᨿᨳᩣ ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᨽᩔᩈᨾᩣᨧᩣᩁᩮ. ᩍᨵ, ᨽᨶ᩠ᨲᩮ, ᩑᨠᨧ᩠ᨧᩮᩣ ᨶ ᨧᩮᩅ ᨾᩩᩈᩣᩅᩣᨴᩩᨸᩈᨬ᩠ᩉᩥᨲᩴ ᩅᩣᨧᩴ ᨽᩣᩈᨲᩥ ᨶ ᨧ ᩅᩮᨽᩪᨲᩥᨿᩴ ᨶ ᨧ ᨸᩮᩈᩩᨱᩥᨿᩴ ᨶ ᨧ ᩈᩣᩁᨾ᩠ᨽᨩᩴ ᨩᨿᩣᨸᩮᨠ᩠ᨡᩮᩣ; ᨾᨶ᩠ᨲᩣ ᨾᨶ᩠ᨲᩣ ᨧ ᩅᩣᨧᩴ ᨽᩣᩈᨲᩥ ᨶᩥᨵᩣᨶᩅᨲᩥᩴ ᨠᩣᩃᩮᨶ. ᩑᨲᨴᩣᨶᩩᨲ᩠ᨲᩁᩥᨿᩴ, ᨽᨶ᩠ᨲᩮ, ᨽᩔᩈᨾᩣᨧᩣᩁᩮ.

‘‘ᩋᨸᩁᩴ ᨸᨶ, ᨽᨶ᩠ᨲᩮ, ᩑᨲᨴᩣᨶᩩᨲ᩠ᨲᩁᩥᨿᩴ, ᨿᨳᩣ ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᨸᩩᩁᩥᩈᩈᩦᩃᩈᨾᩣᨧᩣᩁᩮ. ᩍᨵ, ᨽᨶ᩠ᨲᩮ, ᩑᨠᨧ᩠ᨧᩮᩣ ᩈᨧ᩠ᨧᩮᩣ ᨧᩔ ᩈᨴ᩠ᨵᩮᩣ ᨧ, ᨶ ᨧ ᨠᩩᩉᨠᩮᩣ, ᨶ ᨧ ᩃᨸᨠᩮᩣ, ᨶ ᨧ ᨶᩮᨾᩥᨲ᩠ᨲᩥᨠᩮᩣ, ᨶ ᨧ ᨶᩥᨸ᩠ᨸᩮᩈᩥᨠᩮᩣ, ᨶ ᨧ ᩃᩣᨽᩮᨶ ᩃᩣᨽᩴ ᨶᩥᨩᩥᨣᩦᩈᨶᨠᩮᩣ [ᨩᩥᨩᩥᨣᩥᩴᩈᨶᨠᩮᩣ (ᩈ᩠ᨿᩣ.), ᨶᩥᨩᩥᨣᩥᩴᩈᩥᨲᩣ (ᩈᩦ. ᨸᩦ.)], ᩍᨶ᩠ᨴᩕᩥᨿᩮᩈᩩ ᨣᩩᨲ᩠ᨲᨴ᩠ᩅᩣᩁᩮᩣ, ᨽᩮᩣᨩᨶᩮ ᨾᨲ᩠ᨲᨬ᩠ᨬᩪ, ᩈᨾᨠᩣᩁᩦ, ᨩᩣᨣᩁᩥᨿᩣᨶᩩᨿᩮᩣᨣᨾᨶᩩᨿᩩᨲ᩠ᨲᩮᩣ, ᩋᨲᨶ᩠ᨴᩥᨲᩮᩣ, ᩌᩁᨴ᩠ᨵᩅᩦᩁᩥᨿᩮᩣ, ᨫᩣᨿᩦ, ᩈᨲᩥᨾᩣ, ᨠᩃ᩠ᨿᩣᨱᨸᨭᩥᨽᩣᨶᩮᩣ, ᨣᨲᩥᨾᩣ, ᨵᩥᨲᩥᨾᩣ, ᨾᨲᩥᨾᩣ, ᨶ ᨧ ᨠᩣᨾᩮᩈᩩ ᨣᩥᨴ᩠ᨵᩮᩣ, ᩈᨲᩮᩣ ᨧ ᨶᩥᨸᨠᩮᩣ ᨧ. ᩑᨲᨴᩣᨶᩩᨲ᩠ᨲᩁᩥᨿᩴ, ᨽᨶ᩠ᨲᩮ, ᨸᩩᩁᩥᩈᩈᩦᩃᩈᨾᩣᨧᩣᩁᩮ.

ᩋᨶᩩᩈᩣᩈᨶᩅᩥᨵᩣᨴᩮᩈᨶᩣ

᪑᪕᪔. ‘‘ᩋᨸᩁᩴ ᨸᨶ, ᨽᨶ᩠ᨲᩮ, ᩑᨲᨴᩣᨶᩩᨲ᩠ᨲᩁᩥᨿᩴ, ᨿᨳᩣ ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᩋᨶᩩᩈᩣᩈᨶᩅᩥᨵᩣᩈᩩ. ᨧᨲᩔᩮᩣ ᩍᨾᩣ ᨽᨶ᩠ᨲᩮ ᩋᨶᩩᩈᩣᩈᨶᩅᩥᨵᩣ – ᨩᩣᨶᩣᨲᩥ, ᨽᨶ᩠ᨲᩮ, ᨽᨣᩅᩣ ᩋᨸᩁᩴ ᨸᩩᨣ᩠ᨣᩃᩴ ᨸᨧ᩠ᨧᨲ᩠ᨲᩴ ᨿᩮᩣᨶᩥᩈᩮᩣᨾᨶᩈᩥᨠᩣᩁᩣ ‘ᩋᨿᩴ ᨸᩩᨣ᩠ᨣᩃᩮᩣ ᨿᨳᩣᨶᩩᩈᩥᨭ᩠ᨮᩴ ᨲᨳᩣ ᨸᨭᩥᨸᨩ᩠ᨩᨾᩣᨶᩮᩣ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩈᩮᩣᨲᩣᨸᨶ᩠ᨶᩮᩣ ᨽᩅᩥᩔᨲᩥ ᩋᩅᩥᨶᩥᨸᩣᨲᨵᨾ᩠ᨾᩮᩣ ᨶᩥᨿᨲᩮᩣ ᩈᨾ᩠ᨻᩮᩣᨵᩥᨸᩁᩣᨿᨱᩮᩣ’ᨲᩥ. ᨩᩣᨶᩣᨲᩥ, ᨽᨶ᩠ᨲᩮ, ᨽᨣᩅᩣ ᨸᩁᩴ ᨸᩩᨣ᩠ᨣᩃᩴ ᨸᨧ᩠ᨧᨲ᩠ᨲᩴ ᨿᩮᩣᨶᩥᩈᩮᩣᨾᨶᩈᩥᨠᩣᩁᩣ – ‘ᩋᨿᩴ ᨸᩩᨣ᩠ᨣᩃᩮᩣ ᨿᨳᩣᨶᩩᩈᩥᨭ᩠ᨮᩴ ᨲᨳᩣ ᨸᨭᩥᨸᨩ᩠ᨩᨾᩣᨶᩮᩣ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩁᩣᨣᨴᩮᩣᩈᨾᩮᩣᩉᩣᨶᩴ ᨲᨶᩩᨲ᩠ᨲᩣ ᩈᨠᨴᩣᨣᩣᨾᩦ ᨽᩅᩥᩔᨲᩥ, ᩈᨠᩥᨴᩮᩅ ᩍᨾᩴ ᩃᩮᩣᨠᩴ ᩌᨣᨶ᩠ᨲ᩠ᩅᩣ ᨴᩩᨠ᩠ᨡᩔᨶ᩠ᨲᩴ ᨠᩁᩥᩔᨲᩦ’ᨲᩥ. ᨩᩣᨶᩣᨲᩥ, ᨽᨶ᩠ᨲᩮ, ᨽᨣᩅᩣ ᨸᩁᩴ ᨸᩩᨣ᩠ᨣᩃᩴ ᨸᨧ᩠ᨧᨲ᩠ᨲᩴ ᨿᩮᩣᨶᩥᩈᩮᩣᨾᨶᩈᩥᨠᩣᩁᩣ – ‘ᩋᨿᩴ ᨸᩩᨣ᩠ᨣᩃᩮᩣ ᨿᨳᩣᨶᩩᩈᩥᨭ᩠ᨮᩴ ᨲᨳᩣ ᨸᨭᩥᨸᨩ᩠ᨩᨾᩣᨶᩮᩣ ᨸᨬ᩠ᨧᨶ᩠ᨶᩴ ᩒᩁᨾ᩠ᨽᩣᨣᩥᨿᩣᨶᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩒᨸᨸᩣᨲᩥᨠᩮᩣ ᨽᩅᩥᩔᨲᩥ ᨲᨲ᩠ᨳ ᨸᩁᩥᨶᩥᨻ᩠ᨻᩣᨿᩦ ᩋᨶᩣᩅᨲ᩠ᨲᩥᨵᨾ᩠ᨾᩮᩣ ᨲᩈ᩠ᨾᩣ ᩃᩮᩣᨠᩣ’ᨲᩥ. ᨩᩣᨶᩣᨲᩥ, ᨽᨶ᩠ᨲᩮ, ᨽᨣᩅᩣ ᨸᩁᩴ ᨸᩩᨣ᩠ᨣᩃᩴ ᨸᨧ᩠ᨧᨲ᩠ᨲᩴ ᨿᩮᩣᨶᩥᩈᩮᩣᨾᨶᩈᩥᨠᩣᩁᩣ – ‘ᩋᨿᩴ ᨸᩩᨣ᩠ᨣᩃᩮᩣ ᨿᨳᩣᨶᩩᩈᩥᨭ᩠ᨮᩴ ᨲᨳᩣ ᨸᨭᩥᨸᨩ᩠ᨩᨾᩣᨶᩮᩣ ᩌᩈᩅᩣᨶᩴ ᨡᨿᩣ ᩋᨶᩣᩈᩅᩴ ᨧᩮᨲᩮᩣᩅᩥᨾᩩᨲ᩠ᨲᩥᩴ ᨸᨬ᩠ᨬᩣᩅᩥᨾᩩᨲ᩠ᨲᩥᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᩏᨸᩈᨾ᩠ᨸᨩ᩠ᨩ ᩅᩥᩉᩁᩥᩔᨲᩦ’ᨲᩥ. ᩑᨲᨴᩣᨶᩩᨲ᩠ᨲᩁᩥᨿᩴ, ᨽᨶ᩠ᨲᩮ, ᩋᨶᩩᩈᩣᩈᨶᩅᩥᨵᩣᩈᩩ.

ᨸᩁᨸᩩᨣ᩠ᨣᩃᩅᩥᨾᩩᨲ᩠ᨲᩥᨬᩣᨱᨴᩮᩈᨶᩣ

᪑᪕᪕. ‘‘ᩋᨸᩁᩴ ᨸᨶ, ᨽᨶ᩠ᨲᩮ, ᩑᨲᨴᩣᨶᩩᨲ᩠ᨲᩁᩥᨿᩴ, ᨿᨳᩣ ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᨸᩁᨸᩩᨣ᩠ᨣᩃᩅᩥᨾᩩᨲ᩠ᨲᩥᨬᩣᨱᩮ. ᨩᩣᨶᩣᨲᩥ, ᨽᨶ᩠ᨲᩮ, ᨽᨣᩅᩣ ᨸᩁᩴ ᨸᩩᨣ᩠ᨣᩃᩴ ᨸᨧ᩠ᨧᨲ᩠ᨲᩴ ᨿᩮᩣᨶᩥᩈᩮᩣᨾᨶᩈᩥᨠᩣᩁᩣ – ‘ᩋᨿᩴ ᨸᩩᨣ᩠ᨣᩃᩮᩣ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩈᩮᩣᨲᩣᨸᨶ᩠ᨶᩮᩣ ᨽᩅᩥᩔᨲᩥ ᩋᩅᩥᨶᩥᨸᩣᨲᨵᨾ᩠ᨾᩮᩣ ᨶᩥᨿᨲᩮᩣ ᩈᨾ᩠ᨻᩮᩣᨵᩥᨸᩁᩣᨿᨱᩮᩣ’ᨲᩥ. ᨩᩣᨶᩣᨲᩥ, ᨽᨶ᩠ᨲᩮ, ᨽᨣᩅᩣ ᨸᩁᩴ ᨸᩩᨣ᩠ᨣᩃᩴ ᨸᨧ᩠ᨧᨲ᩠ᨲᩴ ᨿᩮᩣᨶᩥᩈᩮᩣᨾᨶᩈᩥᨠᩣᩁᩣ – ‘ᩋᨿᩴ ᨸᩩᨣ᩠ᨣᩃᩮᩣ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩁᩣᨣᨴᩮᩣᩈᨾᩮᩣᩉᩣᨶᩴ ᨲᨶᩩᨲ᩠ᨲᩣ ᩈᨠᨴᩣᨣᩣᨾᩦ ᨽᩅᩥᩔᨲᩥ, ᩈᨠᩥᨴᩮᩅ ᩍᨾᩴ ᩃᩮᩣᨠᩴ ᩌᨣᨶ᩠ᨲ᩠ᩅᩣ ᨴᩩᨠ᩠ᨡᩔᨶ᩠ᨲᩴ ᨠᩁᩥᩔᨲᩦ’ᨲᩥ. ᨩᩣᨶᩣᨲᩥ, ᨽᨶ᩠ᨲᩮ, ᨽᨣᩅᩣ ᨸᩁᩴ ᨸᩩᨣ᩠ᨣᩃᩴ ᨸᨧ᩠ᨧᨲ᩠ᨲᩴ ᨿᩮᩣᨶᩥᩈᩮᩣᨾᨶᩈᩥᨠᩣᩁᩣ – ‘ᩋᨿᩴ ᨸᩩᨣ᩠ᨣᩃᩮᩣ ᨸᨬ᩠ᨧᨶ᩠ᨶᩴ ᩒᩁᨾ᩠ᨽᩣᨣᩥᨿᩣᨶᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩒᨸᨸᩣᨲᩥᨠᩮᩣ ᨽᩅᩥᩔᨲᩥ ᨲᨲ᩠ᨳ ᨸᩁᩥᨶᩥᨻ᩠ᨻᩣᨿᩦ ᩋᨶᩣᩅᨲ᩠ᨲᩥᨵᨾ᩠ᨾᩮᩣ ᨲᩈ᩠ᨾᩣ ᩃᩮᩣᨠᩣ’ᨲᩥ. ᨩᩣᨶᩣᨲᩥ, ᨽᨶ᩠ᨲᩮ, ᨽᨣᩅᩣ ᨸᩁᩴ ᨸᩩᨣ᩠ᨣᩃᩴ ᨸᨧ᩠ᨧᨲ᩠ᨲᩴ ᨿᩮᩣᨶᩥᩈᩮᩣᨾᨶᩈᩥᨠᩣᩁᩣ – ‘ᩋᨿᩴ ᨸᩩᨣ᩠ᨣᩃᩮᩣ ᩌᩈᩅᩣᨶᩴ ᨡᨿᩣ ᩋᨶᩣᩈᩅᩴ ᨧᩮᨲᩮᩣᩅᩥᨾᩩᨲ᩠ᨲᩥᩴ ᨸᨬ᩠ᨬᩣᩅᩥᨾᩩᨲ᩠ᨲᩥᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᩏᨸᩈᨾ᩠ᨸᨩ᩠ᨩ ᩅᩥᩉᩁᩥᩔᨲᩦ’ᨲᩥ. ᩑᨲᨴᩣᨶᩩᨲ᩠ᨲᩁᩥᨿᩴ, ᨽᨶ᩠ᨲᩮ, ᨸᩁᨸᩩᨣ᩠ᨣᩃᩅᩥᨾᩩᨲ᩠ᨲᩥᨬᩣᨱᩮ.

ᩈᩔᨲᩅᩣᨴᨴᩮᩈᨶᩣ

᪑᪕᪖. ‘‘ᩋᨸᩁᩴ ᨸᨶ, ᨽᨶ᩠ᨲᩮ, ᩑᨲᨴᩣᨶᩩᨲ᩠ᨲᩁᩥᨿᩴ, ᨿᨳᩣ ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᩈᩔᨲᩅᩣᨴᩮᩈᩩ. ᨲᨿᩮᩣᨾᩮ, ᨽᨶ᩠ᨲᩮ, ᩈᩔᨲᩅᩣᨴᩣ. ᩍᨵ, ᨽᨶ᩠ᨲᩮ, ᩑᨠᨧ᩠ᨧᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᩌᨲᨸ᩠ᨸᨾᨶ᩠ᩅᩣᨿ…ᨸᩮ… ᨲᨳᩣᩁᩪᨸᩴ ᨧᩮᨲᩮᩣᩈᨾᩣᨵᩥᩴ ᨹᩩᩈᨲᩥ, ᨿᨳᩣᩈᨾᩣᩉᩥᨲᩮ ᨧᩥᨲ᩠ᨲᩮ ᩋᨶᩮᨠᩅᩥᩉᩥᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ. ᩈᩮᨿ᩠ᨿᨳᩥᨴᩴ, ᩑᨠᨾ᩠ᨸᩥ ᨩᩣᨲᩥᩴ ᨴ᩠ᩅᩮᨸᩥ ᨩᩣᨲᩥᨿᩮᩣ ᨲᩥᩔᩮᩣᨸᩥ ᨩᩣᨲᩥᨿᩮᩣ ᨧᨲᩔᩮᩣᨸᩥ ᨩᩣᨲᩥᨿᩮᩣ ᨸᨬ᩠ᨧᨸᩥ ᨩᩣᨲᩥᨿᩮᩣ ᨴᩈᨸᩥ ᨩᩣᨲᩥᨿᩮᩣ ᩅᩦᩈᨾ᩠ᨸᩥ ᨩᩣᨲᩥᨿᩮᩣ ᨲᩥᩴᩈᨾ᩠ᨸᩥ ᨩᩣᨲᩥᨿᩮᩣ ᨧᨲ᩠ᨲᩣᩃᩦᩈᨾ᩠ᨸᩥ ᨩᩣᨲᩥᨿᩮᩣ ᨸᨬ᩠ᨬᩣᩈᨾ᩠ᨸᩥ ᨩᩣᨲᩥᨿᩮᩣ ᨩᩣᨲᩥᩈᨲᨾ᩠ᨸᩥ ᨩᩣᨲᩥᩈᩉᩔᨾ᩠ᨸᩥ ᨩᩣᨲᩥᩈᨲᩈᩉᩔᨾ᩠ᨸᩥ ᩋᨶᩮᨠᩣᨶᩥᨸᩥ ᨩᩣᨲᩥᩈᨲᩣᨶᩥ ᩋᨶᩮᨠᩣᨶᩥᨸᩥ ᨩᩣᨲᩥᩈᩉᩔᩣᨶᩥ ᩋᨶᩮᨠᩣᨶᩥᨸᩥ ᨩᩣᨲᩥᩈᨲᩈᩉᩔᩣᨶᩥ, ‘ᩋᨾᩩᨲᩕᩣᩈᩥᩴ ᩑᩅᩴᨶᩣᨾᩮᩣ ᩑᩅᩴᨣᩮᩣᨲ᩠ᨲᩮᩣ ᩑᩅᩴᩅᨱ᩠ᨱᩮᩣ ᩑᩅᨾᩣᩉᩣᩁᩮᩣ ᩑᩅᩴᩈᩩᨡᨴᩩᨠ᩠ᨡᨸ᩠ᨸᨭᩥᩈᩴᩅᩮᨴᩦ ᩑᩅᨾᩣᨿᩩᨸᩁᩥᨿᨶ᩠ᨲᩮᩣ, ᩈᩮᩣ ᨲᨲᩮᩣ ᨧᩩᨲᩮᩣ ᩋᨾᩩᨲᩕ ᩏᨴᨸᩣᨴᩥᩴ; ᨲᨲᩕᩣᨸᩣᩈᩥᩴ ᩑᩅᩴᨶᩣᨾᩮᩣ ᩑᩅᩴᨣᩮᩣᨲ᩠ᨲᩮᩣ ᩑᩅᩴᩅᨱ᩠ᨱᩮᩣ ᩑᩅᨾᩣᩉᩣᩁᩮᩣ ᩑᩅᩴᩈᩩᨡᨴᩩᨠ᩠ᨡᨸ᩠ᨸᨭᩥᩈᩴᩅᩮᨴᩦ ᩑᩅᨾᩣᨿᩩᨸᩁᩥᨿᨶ᩠ᨲᩮᩣ, ᩈᩮᩣ ᨲᨲᩮᩣ ᨧᩩᨲᩮᩣ ᩍᨵᩪᨸᨸᨶ᩠ᨶᩮᩣ’ᨲᩥ. ᩍᨲᩥ ᩈᩣᨠᩣᩁᩴ ᩈᩏᨴ᩠ᨴᩮᩈᩴ ᩋᨶᩮᨠᩅᩥᩉᩥᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ. ᩈᩮᩣ ᩑᩅᨾᩣᩉ – ‘ᩋᨲᩦᨲᩴᨸᩣᩉᩴ ᩋᨴ᩠ᨵᩣᨶᩴ ᨩᩣᨶᩣᨾᩥ – ᩈᩴᩅᨭ᩠ᨭᩥ ᩅᩣ ᩃᩮᩣᨠᩮᩣ ᩅᩥᩅᨭ᩠ᨭᩥ ᩅᩣᨲᩥ. ᩋᨶᩣᨣᨲᩴᨸᩣᩉᩴ ᩋᨴ᩠ᨵᩣᨶᩴ ᨩᩣᨶᩣᨾᩥ – ᩈᩴᩅᨭ᩠ᨭᩥᩔᨲᩥ ᩅᩣ ᩃᩮᩣᨠᩮᩣ ᩅᩥᩅᨭ᩠ᨭᩥᩔᨲᩥ ᩅᩣᨲᩥ. ᩈᩔᨲᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ ᩅᨬ᩠ᨫᩮᩣ ᨠᩪᨭᨭ᩠ᨮᩮᩣ ᩑᩈᩥᨠᨭ᩠ᨮᩣᨿᩥᨭ᩠ᨮᩥᨲᩮᩣ. ᨲᩮ ᨧ ᩈᨲ᩠ᨲᩣ ᩈᨶ᩠ᨵᩣᩅᨶ᩠ᨲᩥ ᩈᩴᩈᩁᨶ᩠ᨲᩥ ᨧᩅᨶ᩠ᨲᩥ ᩏᨸᨸᨩ᩠ᨩᨶ᩠ᨲᩥ, ᩋᨲ᩠ᨳᩥᨲ᩠ᩅᩮᩅ ᩈᩔᨲᩥᩈᨾ’ᨶ᩠ᨲᩥ. ᩋᨿᩴ ᨸᨮᨾᩮᩣ ᩈᩔᨲᩅᩣᨴᩮᩣ.

‘‘ᨸᩩᨶ ᨧᨸᩁᩴ, ᨽᨶ᩠ᨲᩮ, ᩍᨵᩮᨠᨧ᩠ᨧᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᩌᨲᨸ᩠ᨸᨾᨶ᩠ᩅᩣᨿ…ᨸᩮ… ᨲᨳᩣᩁᩪᨸᩴ ᨧᩮᨲᩮᩣᩈᨾᩣᨵᩥᩴ ᨹᩩᩈᨲᩥ, ᨿᨳᩣᩈᨾᩣᩉᩥᨲᩮ ᨧᩥᨲ᩠ᨲᩮ ᩋᨶᩮᨠᩅᩥᩉᩥᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ. ᩈᩮᨿ᩠ᨿᨳᩥᨴᩴ, ᩑᨠᨾ᩠ᨸᩥ ᩈᩴᩅᨭ᩠ᨭᩅᩥᩅᨭ᩠ᨭᩴ ᨴ᩠ᩅᩮᨸᩥ ᩈᩴᩅᨭ᩠ᨭᩅᩥᩅᨭ᩠ᨭᩣᨶᩥ ᨲᩦᨱᩥᨸᩥ ᩈᩴᩅᨭ᩠ᨭᩅᩥᩅᨭ᩠ᨭᩣᨶᩥ ᨧᨲ᩠ᨲᩣᩁᩥᨸᩥ ᩈᩴᩅᨭ᩠ᨭᩅᩥᩅᨭ᩠ᨭᩣᨶᩥ ᨸᨬ᩠ᨧᨸᩥ ᩈᩴᩅᨭ᩠ᨭᩅᩥᩅᨭ᩠ᨭᩣᨶᩥ ᨴᩈᨸᩥ ᩈᩴᩅᨭ᩠ᨭᩅᩥᩅᨭ᩠ᨭᩣᨶᩥ, ‘ᩋᨾᩩᨲᩕᩣᩈᩥᩴ ᩑᩅᩴᨶᩣᨾᩮᩣ ᩑᩅᩴᨣᩮᩣᨲ᩠ᨲᩮᩣ ᩑᩅᩴᩅᨱ᩠ᨱᩮᩣ ᩑᩅᨾᩣᩉᩣᩁᩮᩣ ᩑᩅᩴᩈᩩᨡᨴᩩᨠ᩠ᨡᨸ᩠ᨸᨭᩥᩈᩴᩅᩮᨴᩦ ᩑᩅᨾᩣᨿᩩᨸᩁᩥᨿᨶ᩠ᨲᩮᩣ, ᩈᩮᩣ ᨲᨲᩮᩣ ᨧᩩᨲᩮᩣ ᩋᨾᩩᨲᩕ ᩏᨴᨸᩣᨴᩥᩴ; ᨲᨲᩕᩣᨸᩣᩈᩥᩴ ᩑᩅᩴᨶᩣᨾᩮᩣ ᩑᩅᩴᨣᩮᩣᨲ᩠ᨲᩮᩣ ᩑᩅᩴᩅᨱ᩠ᨱᩮᩣ ᩑᩅᨾᩣᩉᩣᩁᩮᩣ ᩑᩅᩴᩈᩩᨡᨴᩩᨠ᩠ᨡᨸ᩠ᨸᨭᩥᩈᩴᩅᩮᨴᩦ ᩑᩅᨾᩣᨿᩩᨸᩁᩥᨿᨶ᩠ᨲᩮᩣ, ᩈᩮᩣ ᨲᨲᩮᩣ ᨧᩩᨲᩮᩣ ᩍᨵᩪᨸᨸᨶ᩠ᨶᩮᩣ’ᨲᩥ. ᩍᨲᩥ ᩈᩣᨠᩣᩁᩴ ᩈᩏᨴ᩠ᨴᩮᩈᩴ ᩋᨶᩮᨠᩅᩥᩉᩥᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ. ᩈᩮᩣ ᩑᩅᨾᩣᩉ – ‘ᩋᨲᩦᨲᩴᨸᩣᩉᩴ ᩋᨴ᩠ᨵᩣᨶᩴ ᨩᩣᨶᩣᨾᩥ ᩈᩴᩅᨭ᩠ᨭᩥ ᩅᩣ ᩃᩮᩣᨠᩮᩣ ᩅᩥᩅᨭ᩠ᨭᩥ ᩅᩣᨲᩥ. ᩋᨶᩣᨣᨲᩴᨸᩣᩉᩴ ᩋᨴ᩠ᨵᩣᨶᩴ ᨩᩣᨶᩣᨾᩥ ᩈᩴᩅᨭ᩠ᨭᩥᩔᨲᩥ ᩅᩣ ᩃᩮᩣᨠᩮᩣ ᩅᩥᩅᨭ᩠ᨭᩥᩔᨲᩥ ᩅᩣᨲᩥ. ᩈᩔᨲᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ ᩅᨬ᩠ᨫᩮᩣ ᨠᩪᨭᨭ᩠ᨮᩮᩣ ᩑᩈᩥᨠᨭ᩠ᨮᩣᨿᩥᨭ᩠ᨮᩥᨲᩮᩣ. ᨲᩮ ᨧ ᩈᨲ᩠ᨲᩣ ᩈᨶ᩠ᨵᩣᩅᨶ᩠ᨲᩥ ᩈᩴᩈᩁᨶ᩠ᨲᩥ ᨧᩅᨶ᩠ᨲᩥ ᩏᨸᨸᨩ᩠ᨩᨶ᩠ᨲᩥ, ᩋᨲ᩠ᨳᩥᨲ᩠ᩅᩮᩅ ᩈᩔᨲᩥᩈᨾ’ᨶ᩠ᨲᩥ. ᩋᨿᩴ ᨴᩩᨲᩥᨿᩮᩣ ᩈᩔᨲᩅᩣᨴᩮᩣ.

‘‘ᨸᩩᨶ ᨧᨸᩁᩴ, ᨽᨶ᩠ᨲᩮ, ᩍᨵᩮᨠᨧ᩠ᨧᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᩌᨲᨸ᩠ᨸᨾᨶ᩠ᩅᩣᨿ…ᨸᩮ… ᨲᨳᩣᩁᩪᨸᩴ ᨧᩮᨲᩮᩣᩈᨾᩣᨵᩥᩴ ᨹᩩᩈᨲᩥ, ᨿᨳᩣᩈᨾᩣᩉᩥᨲᩮ ᨧᩥᨲ᩠ᨲᩮ ᩋᨶᩮᨠᩅᩥᩉᩥᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ. ᩈᩮᨿ᩠ᨿᨳᩥᨴᩴ, ᨴᩈᨸᩥ ᩈᩴᩅᨭ᩠ᨭᩅᩥᩅᨭ᩠ᨭᩣᨶᩥ ᩅᩦᩈᨾ᩠ᨸᩥ ᩈᩴᩅᨭ᩠ᨭᩅᩥᩅᨭ᩠ᨭᩣᨶᩥ ᨲᩥᩴᩈᨾ᩠ᨸᩥ ᩈᩴᩅᨭ᩠ᨭᩅᩥᩅᨭ᩠ᨭᩣᨶᩥ ᨧᨲ᩠ᨲᩣᩃᩦᩈᨾ᩠ᨸᩥ ᩈᩴᩅᨭ᩠ᨭᩅᩥᩅᨭ᩠ᨭᩣᨶᩥ, ‘ᩋᨾᩩᨲᩕᩣᩈᩥᩴ ᩑᩅᩴᨶᩣᨾᩮᩣ ᩑᩅᩴᨣᩮᩣᨲ᩠ᨲᩮᩣ ᩑᩅᩴᩅᨱ᩠ᨱᩮᩣ ᩑᩅᨾᩣᩉᩣᩁᩮᩣ ᩑᩅᩴᩈᩩᨡᨴᩩᨠ᩠ᨡᨸ᩠ᨸᨭᩥᩈᩴᩅᩮᨴᩦ ᩑᩅᨾᩣᨿᩩᨸᩁᩥᨿᨶ᩠ᨲᩮᩣ, ᩈᩮᩣ ᨲᨲᩮᩣ ᨧᩩᨲᩮᩣ ᩋᨾᩩᨲᩕ ᩏᨴᨸᩣᨴᩥᩴ; ᨲᨲᩕᩣᨸᩣᩈᩥᩴ ᩑᩅᩴᨶᩣᨾᩮᩣ ᩑᩅᩴᨣᩮᩣᨲ᩠ᨲᩮᩣ ᩑᩅᩴᩅᨱ᩠ᨱᩮᩣ ᩑᩅᨾᩣᩉᩣᩁᩮᩣ ᩑᩅᩴᩈᩩᨡᨴᩩᨠ᩠ᨡᨸ᩠ᨸᨭᩥᩈᩴᩅᩮᨴᩦ ᩑᩅᨾᩣᨿᩩᨸᩁᩥᨿᨶ᩠ᨲᩮᩣ, ᩈᩮᩣ ᨲᨲᩮᩣ ᨧᩩᨲᩮᩣ ᩍᨵᩪᨸᨸᨶ᩠ᨶᩮᩣ’ᨲᩥ. ᩍᨲᩥ ᩈᩣᨠᩣᩁᩴ ᩈᩏᨴ᩠ᨴᩮᩈᩴ ᩋᨶᩮᨠᩅᩥᩉᩥᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ. ᩈᩮᩣ ᩑᩅᨾᩣᩉ – ‘ᩋᨲᩦᨲᩴᨸᩣᩉᩴ ᩋᨴ᩠ᨵᩣᨶᩴ ᨩᩣᨶᩣᨾᩥ ᩈᩴᩅᨭ᩠ᨭᩥᨸᩥ ᩃᩮᩣᨠᩮᩣ ᩅᩥᩅᨭ᩠ᨭᩥᨸᩦᨲᩥ; ᩋᨶᩣᨣᨲᩴᨸᩣᩉᩴ ᩋᨴ᩠ᨵᩣᨶᩴ ᨩᩣᨶᩣᨾᩥ ᩈᩴᩅᨭ᩠ᨭᩥᩔᨲᩥᨸᩥ ᩃᩮᩣᨠᩮᩣ ᩅᩥᩅᨭ᩠ᨭᩥᩔᨲᩥᨸᩦᨲᩥ. ᩈᩔᨲᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ ᩅᨬ᩠ᨫᩮᩣ ᨠᩪᨭᨭ᩠ᨮᩮᩣ ᩑᩈᩥᨠᨭ᩠ᨮᩣᨿᩥᨭ᩠ᨮᩥᨲᩮᩣ. ᨲᩮ ᨧ ᩈᨲ᩠ᨲᩣ ᩈᨶ᩠ᨵᩣᩅᨶ᩠ᨲᩥ ᩈᩴᩈᩁᨶ᩠ᨲᩥ ᨧᩅᨶ᩠ᨲᩥ ᩏᨸᨸᨩ᩠ᨩᨶ᩠ᨲᩥ, ᩋᨲ᩠ᨳᩥᨲ᩠ᩅᩮᩅ ᩈᩔᨲᩥᩈᨾ’ᨶ᩠ᨲᩥ. ᩋᨿᩴ ᨲᨲᩥᨿᩮᩣ ᩈᩔᨲᩅᩣᨴᩮᩣ, ᩑᨲᨴᩣᨶᩩᨲ᩠ᨲᩁᩥᨿᩴ, ᨽᨶ᩠ᨲᩮ, ᩈᩔᨲᩅᩣᨴᩮᩈᩩ.

ᨸᩩᨻ᩠ᨻᩮᨶᩥᩅᩣᩈᩣᨶᩩᩔᨲᩥᨬᩣᨱᨴᩮᩈᨶᩣ

᪑᪕᪗. ‘‘ᩋᨸᩁᩴ ᨸᨶ, ᨽᨶ᩠ᨲᩮ, ᩑᨲᨴᩣᨶᩩᨲ᩠ᨲᩁᩥᨿᩴ, ᨿᨳᩣ ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᨸᩩᨻ᩠ᨻᩮᨶᩥᩅᩣᩈᩣᨶᩩᩔᨲᩥᨬᩣᨱᩮ. ᩍᨵ, ᨽᨶ᩠ᨲᩮ, ᩑᨠᨧ᩠ᨧᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᩌᨲᨸ᩠ᨸᨾᨶ᩠ᩅᩣᨿ…ᨸᩮ… ᨲᨳᩣᩁᩪᨸᩴ ᨧᩮᨲᩮᩣᩈᨾᩣᨵᩥᩴ ᨹᩩᩈᨲᩥ, ᨿᨳᩣᩈᨾᩣᩉᩥᨲᩮ ᨧᩥᨲ᩠ᨲᩮ ᩋᨶᩮᨠᩅᩥᩉᩥᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ. ᩈᩮᨿ᩠ᨿᨳᩥᨴᩴ, ᩑᨠᨾ᩠ᨸᩥ ᨩᩣᨲᩥᩴ ᨴ᩠ᩅᩮᨸᩥ ᨩᩣᨲᩥᨿᩮᩣ ᨲᩥᩔᩮᩣᨸᩥ ᨩᩣᨲᩥᨿᩮᩣ ᨧᨲᩔᩮᩣᨸᩥ ᨩᩣᨲᩥᨿᩮᩣ ᨸᨬ᩠ᨧᨸᩥ ᨩᩣᨲᩥᨿᩮᩣ ᨴᩈᨸᩥ ᨩᩣᨲᩥᨿᩮᩣ ᩅᩦᩈᨾ᩠ᨸᩥ ᨩᩣᨲᩥᨿᩮᩣ ᨲᩥᩴᩈᨾ᩠ᨸᩥ ᨩᩣᨲᩥᨿᩮᩣ ᨧᨲ᩠ᨲᩣᩃᩦᩈᨾ᩠ᨸᩥ ᨩᩣᨲᩥᨿᩮᩣ ᨸᨬ᩠ᨬᩣᩈᨾ᩠ᨸᩥ ᨩᩣᨲᩥᨿᩮᩣ ᨩᩣᨲᩥᩈᨲᨾ᩠ᨸᩥ ᨩᩣᨲᩥᩈᩉᩔᨾ᩠ᨸᩥ ᨩᩣᨲᩥᩈᨲᩈᩉᩔᨾ᩠ᨸᩥ ᩋᨶᩮᨠᩮᨸᩥ ᩈᩴᩅᨭ᩠ᨭᨠᨸ᩠ᨸᩮ ᩋᨶᩮᨠᩮᨸᩥ ᩅᩥᩅᨭ᩠ᨭᨠᨸ᩠ᨸᩮ ᩋᨶᩮᨠᩮᨸᩥ ᩈᩴᩅᨭ᩠ᨭᩅᩥᩅᨭ᩠ᨭᨠᨸ᩠ᨸᩮ, ‘ᩋᨾᩩᨲᩕᩣᩈᩥᩴ ᩑᩅᩴᨶᩣᨾᩮᩣ ᩑᩅᩴᨣᩮᩣᨲ᩠ᨲᩮᩣ ᩑᩅᩴᩅᨱ᩠ᨱᩮᩣ ᩑᩅᨾᩣᩉᩣᩁᩮᩣ ᩑᩅᩴᩈᩩᨡᨴᩩᨠ᩠ᨡᨸ᩠ᨸᨭᩥᩈᩴᩅᩮᨴᩦ ᩑᩅᨾᩣᨿᩩᨸᩁᩥᨿᨶ᩠ᨲᩮᩣ, ᩈᩮᩣ ᨲᨲᩮᩣ ᨧᩩᨲᩮᩣ ᩋᨾᩩᨲᩕ ᩏᨴᨸᩣᨴᩥᩴ; ᨲᨲᩕᩣᨸᩣᩈᩥᩴ ᩑᩅᩴᨶᩣᨾᩮᩣ ᩑᩅᩴᨣᩮᩣᨲ᩠ᨲᩮᩣ ᩑᩅᩴᩅᨱ᩠ᨱᩮᩣ ᩑᩅᨾᩣᩉᩣᩁᩮᩣ ᩑᩅᩴᩈᩩᨡᨴᩩᨠ᩠ᨡᨸ᩠ᨸᨭᩥᩈᩴᩅᩮᨴᩦ ᩑᩅᨾᩣᨿᩩᨸᩁᩥᨿᨶ᩠ᨲᩮᩣ, ᩈᩮᩣ ᨲᨲᩮᩣ ᨧᩩᨲᩮᩣ ᩍᨵᩪᨸᨸᨶ᩠ᨶᩮᩣ’ᨲᩥ. ᩍᨲᩥ ᩈᩣᨠᩣᩁᩴ ᩈᩏᨴ᩠ᨴᩮᩈᩴ ᩋᨶᩮᨠᩅᩥᩉᩥᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ. ᩈᨶ᩠ᨲᩥ, ᨽᨶ᩠ᨲᩮ, ᨴᩮᩅᩣ [ᩈᨲ᩠ᨲᩣ (ᩈ᩠ᨿᩣ.)], ᨿᩮᩈᩴ ᨶ ᩈᨠ᩠ᨠᩣ ᨣᨱᨶᩣᨿ ᩅᩣ ᩈᨦ᩠ᨡᩣᨶᩮᨶ ᩅᩣ ᩌᨿᩩ ᩈᨦ᩠ᨡᩣᨲᩩᩴ. ᩋᨸᩥ ᨧ, ᨿᩈ᩠ᨾᩥᩴ ᨿᩈ᩠ᨾᩥᩴ ᩋᨲ᩠ᨲᨽᩣᩅᩮ ᩋᨽᩥᨶᩥᩅᩩᨭ᩠ᨮᨸᩩᨻ᩠ᨻᩮᩣ [ᩋᨽᩥᨶᩥᩅᩩᨲ᩠ᨳᨸᩩᨻ᩠ᨻᩮᩣ (ᩈᩦ. ᩈ᩠ᨿᩣ. ᨸᩦ.)] ᩉᩮᩣᨲᩥ ᨿᨴᩥ ᩅᩣ ᩁᩪᨸᩦᩈᩩ ᨿᨴᩥ ᩅᩣ ᩋᩁᩪᨸᩦᩈᩩ ᨿᨴᩥ ᩅᩣ ᩈᨬ᩠ᨬᩦᩈᩩ ᨿᨴᩥ ᩅᩣ ᩋᩈᨬ᩠ᨬᩦᩈᩩ ᨿᨴᩥ ᩅᩣ ᨶᩮᩅᩈᨬ᩠ᨬᩦᨶᩣᩈᨬ᩠ᨬᩦᩈᩩ. ᩍᨲᩥ ᩈᩣᨠᩣᩁᩴ ᩈᩏᨴ᩠ᨴᩮᩈᩴ ᩋᨶᩮᨠᩅᩥᩉᩥᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ. ᩑᨲᨴᩣᨶᩩᨲ᩠ᨲᩁᩥᨿᩴ, ᨽᨶ᩠ᨲᩮ, ᨸᩩᨻ᩠ᨻᩮᨶᩥᩅᩣᩈᩣᨶᩩᩔᨲᩥᨬᩣᨱᩮ.

ᨧᩩᨲᩪᨸᨸᩣᨲᨬᩣᨱᨴᩮᩈᨶᩣ

᪑᪕᪘. ‘‘ᩋᨸᩁᩴ ᨸᨶ, ᨽᨶ᩠ᨲᩮ, ᩑᨲᨴᩣᨶᩩᨲ᩠ᨲᩁᩥᨿᩴ, ᨿᨳᩣ ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᩈᨲ᩠ᨲᩣᨶᩴ ᨧᩩᨲᩪᨸᨸᩣᨲᨬᩣᨱᩮ. ᩍᨵ, ᨽᨶ᩠ᨲᩮ, ᩑᨠᨧ᩠ᨧᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᩌᨲᨸ᩠ᨸᨾᨶ᩠ᩅᩣᨿ…ᨸᩮ… ᨲᨳᩣᩁᩪᨸᩴ ᨧᩮᨲᩮᩣᩈᨾᩣᨵᩥᩴ ᨹᩩᩈᨲᩥ, ᨿᨳᩣᩈᨾᩣᩉᩥᨲᩮ ᨧᩥᨲ᩠ᨲᩮ ᨴᩥᨻ᩠ᨻᩮᨶ ᨧᨠ᩠ᨡᩩᨶᩣ ᩅᩥᩈᩩᨴ᩠ᨵᩮᨶ ᩋᨲᩥᨠ᩠ᨠᨶ᩠ᨲᨾᩣᨶᩩᩈᨠᩮᨶ ᩈᨲ᩠ᨲᩮ ᨸᩔᨲᩥ ᨧᩅᨾᩣᨶᩮ ᩏᨸᨸᨩ᩠ᨩᨾᩣᨶᩮ ᩉᩦᨶᩮ ᨸᨱᩦᨲᩮ ᩈᩩᩅᨱ᩠ᨱᩮ ᨴᩩᨻ᩠ᨻᨱ᩠ᨱᩮ ᩈᩩᨣᨲᩮ ᨴᩩᨣ᩠ᨣᨲᩮ ᨿᨳᩣᨠᨾ᩠ᨾᩪᨸᨣᩮ ᩈᨲ᩠ᨲᩮ ᨸᨩᩣᨶᩣᨲᩥ – ‘ᩍᨾᩮ ᩅᨲ ᨽᩮᩣᨶ᩠ᨲᩮᩣ ᩈᨲ᩠ᨲᩣ ᨠᩣᨿᨴᩩᨧ᩠ᨧᩁᩥᨲᩮᨶ ᩈᨾᨶ᩠ᨶᩣᨣᨲᩣ ᩅᨧᩦᨴᩩᨧ᩠ᨧᩁᩥᨲᩮᨶ ᩈᨾᨶ᩠ᨶᩣᨣᨲᩣ ᨾᨶᩮᩣᨴᩩᨧ᩠ᨧᩁᩥᨲᩮᨶ ᩈᨾᨶ᩠ᨶᩣᨣᨲᩣ ᩋᩁᩥᨿᩣᨶᩴ ᩏᨸᩅᩣᨴᨠᩣ ᨾᩥᨧ᩠ᨨᩣᨴᩥᨭ᩠ᨮᩥᨠᩣ ᨾᩥᨧ᩠ᨨᩣᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩣ. ᨲᩮ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨶ᩠ᨶᩣ. ᩍᨾᩮ ᩅᩣ ᨸᨶ ᨽᩮᩣᨶ᩠ᨲᩮᩣ ᩈᨲ᩠ᨲᩣ ᨠᩣᨿᩈᩩᨧᩁᩥᨲᩮᨶ ᩈᨾᨶ᩠ᨶᩣᨣᨲᩣ ᩅᨧᩦᩈᩩᨧᩁᩥᨲᩮᨶ ᩈᨾᨶ᩠ᨶᩣᨣᨲᩣ ᨾᨶᩮᩣᩈᩩᨧᩁᩥᨲᩮᨶ ᩈᨾᨶ᩠ᨶᩣᨣᨲᩣ ᩋᩁᩥᨿᩣᨶᩴ ᩋᨶᩩᨸᩅᩣᨴᨠᩣ ᩈᨾ᩠ᨾᩣᨴᩥᨭ᩠ᨮᩥᨠᩣ ᩈᨾ᩠ᨾᩣᨴᩥᨭ᩠ᨮᩥᨠᨾ᩠ᨾᩈᨾᩣᨴᩣᨶᩣ. ᨲᩮ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨶ᩠ᨶᩣ’ᨲᩥ. ᩍᨲᩥ ᨴᩥᨻ᩠ᨻᩮᨶ ᨧᨠ᩠ᨡᩩᨶᩣ ᩅᩥᩈᩩᨴ᩠ᨵᩮᨶ ᩋᨲᩥᨠ᩠ᨠᨶ᩠ᨲᨾᩣᨶᩩᩈᨠᩮᨶ ᩈᨲ᩠ᨲᩮ ᨸᩔᨲᩥ ᨧᩅᨾᩣᨶᩮ ᩏᨸᨸᨩ᩠ᨩᨾᩣᨶᩮ ᩉᩦᨶᩮ ᨸᨱᩦᨲᩮ ᩈᩩᩅᨱ᩠ᨱᩮ ᨴᩩᨻ᩠ᨻᨱ᩠ᨱᩮ ᩈᩩᨣᨲᩮ ᨴᩩᨣ᩠ᨣᨲᩮ ᨿᨳᩣᨠᨾ᩠ᨾᩪᨸᨣᩮ ᩈᨲ᩠ᨲᩮ ᨸᨩᩣᨶᩣᨲᩥ. ᩑᨲᨴᩣᨶᩩᨲ᩠ᨲᩁᩥᨿᩴ, ᨽᨶ᩠ᨲᩮ, ᩈᨲ᩠ᨲᩣᨶᩴ ᨧᩩᨲᩪᨸᨸᩣᨲᨬᩣᨱᩮ.

ᩍᨴ᩠ᨵᩥᩅᩥᨵᨴᩮᩈᨶᩣ

᪑᪕᪙. ‘‘ᩋᨸᩁᩴ ᨸᨶ, ᨽᨶ᩠ᨲᩮ, ᩑᨲᨴᩣᨶᩩᨲ᩠ᨲᩁᩥᨿᩴ, ᨿᨳᩣ ᨽᨣᩅᩣ ᨵᨾ᩠ᨾᩴ ᨴᩮᩈᩮᨲᩥ ᩍᨴ᩠ᨵᩥᩅᩥᨵᩣᩈᩩ. ᨴ᩠ᩅᩮᨾᩣ, ᨽᨶ᩠ᨲᩮ, ᩍᨴ᩠ᨵᩥᩅᩥᨵᩣᨿᩮᩣ – ᩋᨲ᩠ᨳᩥ, ᨽᨶ᩠ᨲᩮ, ᩍᨴ᩠ᨵᩥ ᩈᩣᩈᩅᩣ ᩈᩏᨸᨵᩥᨠᩣ, ‘ᨶᩮᩣ ᩋᩁᩥᨿᩣ’ᨲᩥ ᩅᩩᨧ᩠ᨧᨲᩥ. ᩋᨲ᩠ᨳᩥ, ᨽᨶ᩠ᨲᩮ, ᩍᨴ᩠ᨵᩥ ᩋᨶᩣᩈᩅᩣ ᩋᨶᩩᨸᨵᩥᨠᩣ ‘ᩋᩁᩥᨿᩣ’ᨲᩥ ᩅᩩᨧ᩠ᨧᨲᩥ. ‘‘ᨠᨲᨾᩣ ᨧ, ᨽᨶ᩠ᨲᩮ, ᩍᨴ᩠ᨵᩥ ᩈᩣᩈᩅᩣ ᩈᩏᨸᨵᩥᨠᩣ, ‘ᨶᩮᩣ ᩋᩁᩥᨿᩣ’ᨲᩥ ᩅᩩᨧ᩠ᨧᨲᩥ? ᩍᨵ, ᨽᨶ᩠ᨲᩮ, ᩑᨠᨧ᩠ᨧᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᩌᨲᨸ᩠ᨸᨾᨶ᩠ᩅᩣᨿ…ᨸᩮ… ᨲᨳᩣᩁᩪᨸᩴ ᨧᩮᨲᩮᩣᩈᨾᩣᨵᩥᩴ ᨹᩩᩈᨲᩥ, ᨿᨳᩣᩈᨾᩣᩉᩥᨲᩮ ᨧᩥᨲ᩠ᨲᩮ ᩋᨶᩮᨠᩅᩥᩉᩥᨲᩴ ᩍᨴ᩠ᨵᩥᩅᩥᨵᩴ ᨸᨧ᩠ᨧᨶᩩᨽᩮᩣᨲᩥ. ᩑᨠᩮᩣᨸᩥ ᩉᩩᨲ᩠ᩅᩣ ᨻᩉᩩᨵᩣ ᩉᩮᩣᨲᩥ, ᨻᩉᩩᨵᩣᨸᩥ ᩉᩩᨲ᩠ᩅᩣ ᩑᨠᩮᩣ ᩉᩮᩣᨲᩥ; ᩌᩅᩥᨽᩣᩅᩴ ᨲᩥᩁᩮᩣᨽᩣᩅᩴ ᨲᩥᩁᩮᩣᨠᩩᨭ᩠ᨭᩴ ᨲᩥᩁᩮᩣᨸᩣᨠᩣᩁᩴ ᨲᩥᩁᩮᩣᨸᨻ᩠ᨻᨲᩴ ᩋᩈᨩ᩠ᨩᨾᩣᨶᩮᩣ ᨣᨧ᩠ᨨᨲᩥ ᩈᩮᨿ᩠ᨿᨳᩣᨸᩥ ᩌᨠᩣᩈᩮ. ᨸᨳᩅᩥᨿᩣᨸᩥ ᩏᨾ᩠ᨾᩩᨩ᩠ᨩᨶᩥᨾᩩᨩ᩠ᨩᩴ ᨠᩁᩮᩣᨲᩥ, ᩈᩮᨿ᩠ᨿᨳᩣᨸᩥ ᩏᨴᨠᩮ. ᩏᨴᨠᩮᨸᩥ ᩋᨽᩥᨩ᩠ᨩᨾᩣᨶᩮ ᨣᨧ᩠ᨨᨲᩥ, ᩈᩮᨿ᩠ᨿᨳᩣᨸᩥ ᨸᨳᩅᩥᨿᩴ. ᩌᨠᩣᩈᩮᨸᩥ ᨸᩃ᩠ᩃᨦ᩠ᨠᩮᨶ ᨠᨾᨲᩥ, ᩈᩮᨿ᩠ᨿᨳᩣᨸᩥ ᨸᨠ᩠ᨡᩦ ᩈᨠᩩᨱᩮᩣ. ᩍᨾᩮᨸᩥ ᨧᨶ᩠ᨴᩥᨾᩈᩪᩁᩥᨿᩮ ᩑᩅᩴᨾᩉᩥᨴ᩠ᨵᩥᨠᩮ ᩑᩅᩴᨾᩉᩣᨶᩩᨽᩣᩅᩮ ᨸᩣᨱᩥᨶᩣ ᨸᩁᩣᨾᩈᨲᩥ ᨸᩁᩥᨾᨩ᩠ᨩᨲᩥ. ᨿᩣᩅ ᨻᩕᩉ᩠ᨾᩃᩮᩣᨠᩣᨸᩥ ᨠᩣᨿᩮᨶ ᩅᩈᩴ ᩅᨲ᩠ᨲᩮᨲᩥ. ᩋᨿᩴ, ᨽᨶ᩠ᨲᩮ, ᩍᨴ᩠ᨵᩥ ᩈᩣᩈᩅᩣ ᩈᩏᨸᨵᩥᨠᩣ, ‘ᨶᩮᩣ ᩋᩁᩥᨿᩣ’ᨲᩥ ᩅᩩᨧ᩠ᨧᨲᩥ.

‘‘ᨠᨲᨾᩣ ᨸᨶ, ᨽᨶ᩠ᨲᩮ, ᩍᨴ᩠ᨵᩥ ᩋᨶᩣᩈᩅᩣ ᩋᨶᩩᨸᨵᩥᨠᩣ, ‘ᩋᩁᩥᨿᩣ’ᨲᩥ ᩅᩩᨧ᩠ᨧᨲᩥ? ᩍᨵ, ᨽᨶ᩠ᨲᩮ, ᨽᩥᨠ᩠ᨡᩩ ᩈᨧᩮ ᩌᨠᨦ᩠ᨡᨲᩥ – ‘ᨸᨭᩥᨠᩪᩃᩮ ᩋᨸ᩠ᨸᨭᩥᨠᩪᩃᩈᨬ᩠ᨬᩦ ᩅᩥᩉᩁᩮᨿ᩠ᨿ’ᨶ᩠ᨲᩥ, ᩋᨸ᩠ᨸᨭᩥᨠᩪᩃᩈᨬ᩠ᨬᩦ ᨲᨲ᩠ᨳ ᩅᩥᩉᩁᨲᩥ. ᩈᨧᩮ ᩌᨠᨦ᩠ᨡᨲᩥ – ‘ᩋᨸ᩠ᨸᨭᩥᨠᩪᩃᩮ ᨸᨭᩥᨠᩪᩃᩈᨬ᩠ᨬᩦ ᩅᩥᩉᩁᩮᨿ᩠ᨿ’ᨶ᩠ᨲᩥ, ᨸᨭᩥᨠᩪᩃᩈᨬ᩠ᨬᩦ ᨲᨲ᩠ᨳ ᩅᩥᩉᩁᨲᩥ. ᩈᨧᩮ ᩌᨠᨦ᩠ᨡᨲᩥ – ‘ᨸᨭᩥᨠᩪᩃᩮ ᨧ ᩋᨸ᩠ᨸᨭᩥᨠᩪᩃᩮ ᨧ ᩋᨸ᩠ᨸᨭᩥᨠᩪᩃᩈᨬ᩠ᨬᩦ ᩅᩥᩉᩁᩮᨿ᩠ᨿ’ᨶ᩠ᨲᩥ, ᩋᨸ᩠ᨸᨭᩥᨠᩪᩃᩈᨬ᩠ᨬᩦ ᨲᨲ᩠ᨳ ᩅᩥᩉᩁᨲᩥ. ᩈᨧᩮ ᩌᨠᨦ᩠ᨡᨲᩥ – ‘ᨸᨭᩥᨠᩪᩃᩮ ᨧ ᩋᨸ᩠ᨸᨭᩥᨠᩪᩃᩮ ᨧ ᨸᨭᩥᨠᩪᩃᩈᨬ᩠ᨬᩦ ᩅᩥᩉᩁᩮᨿ᩠ᨿ’ᨶ᩠ᨲᩥ, ᨸᨭᩥᨠᩪᩃᩈᨬ᩠ᨬᩦ ᨲᨲ᩠ᨳ ᩅᩥᩉᩁᨲᩥ. ᩈᨧᩮ ᩌᨠᨦ᩠ᨡᨲᩥ – ‘ᨸᨭᩥᨠᩪᩃᨬ᩠ᨧ ᩋᨸ᩠ᨸᨭᩥᨠᩪᩃᨬ᩠ᨧ ᨲᨴᩩᨽᨿᩴ ᩋᨽᩥᨶᩥᩅᨩ᩠ᨩᩮᨲ᩠ᩅᩣ ᩏᨸᩮᨠ᩠ᨡᨠᩮᩣ ᩅᩥᩉᩁᩮᨿ᩠ᨿᩴ ᩈᨲᩮᩣ ᩈᨾ᩠ᨸᨩᩣᨶᩮᩣ’ᨲᩥ, ᩏᨸᩮᨠ᩠ᨡᨠᩮᩣ ᨲᨲ᩠ᨳ ᩅᩥᩉᩁᨲᩥ ᩈᨲᩮᩣ ᩈᨾ᩠ᨸᨩᩣᨶᩮᩣ. ᩋᨿᩴ, ᨽᨶ᩠ᨲᩮ, ᩍᨴ᩠ᨵᩥ ᩋᨶᩣᩈᩅᩣ ᩋᨶᩩᨸᨵᩥᨠᩣ ‘ᩋᩁᩥᨿᩣ’ᨲᩥ ᩅᩩᨧ᩠ᨧᨲᩥ. ᩑᨲᨴᩣᨶᩩᨲ᩠ᨲᩁᩥᨿᩴ, ᨽᨶ᩠ᨲᩮ, ᩍᨴ᩠ᨵᩥᩅᩥᨵᩣᩈᩩ. ᨲᩴ ᨽᨣᩅᩣ ᩋᩈᩮᩈᨾᨽᩥᨩᩣᨶᩣᨲᩥ, ᨲᩴ ᨽᨣᩅᨲᩮᩣ ᩋᩈᩮᩈᨾᨽᩥᨩᩣᨶᨲᩮᩣ ᩏᨲ᩠ᨲᩁᩥ ᩋᨽᩥᨬ᩠ᨬᩮᨿ᩠ᨿᩴ ᨶᨲ᩠ᨳᩥ, ᨿᨴᨽᩥᨩᩣᨶᩴ ᩋᨬ᩠ᨬᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᨽᨣᩅᨲᩣ ᨽᩥᨿ᩠ᨿᩮᩣᨽᩥᨬ᩠ᨬᨲᩁᩮᩣ ᩋᩔ ᨿᨴᩥᨴᩴ ᩍᨴ᩠ᨵᩥᩅᩥᨵᩣᩈᩩ.

ᩋᨬ᩠ᨬᨳᩣᩈᨲ᩠ᨳᩩᨣᩩᨱᨴᩔᨶᩴ

᪑᪖᪐. ‘‘ᨿᩴ ᨲᩴ, ᨽᨶ᩠ᨲᩮ, ᩈᨴ᩠ᨵᩮᨶ ᨠᩩᩃᨸᩩᨲ᩠ᨲᩮᨶ ᨸᨲ᩠ᨲᨻ᩠ᨻᩴ ᩌᩁᨴ᩠ᨵᩅᩦᩁᩥᨿᩮᨶ ᨳᩣᨾᩅᨲᩣ ᨸᩩᩁᩥᩈᨳᩣᨾᩮᨶ ᨸᩩᩁᩥᩈᩅᩦᩁᩥᨿᩮᨶ ᨸᩩᩁᩥᩈᨸᩁᨠ᩠ᨠᨾᩮᨶ ᨸᩩᩁᩥᩈᨵᩮᩣᩁᨿ᩠ᩉᩮᨶ, ᩋᨶᩩᨸ᩠ᨸᨲ᩠ᨲᩴ ᨲᩴ ᨽᨣᩅᨲᩣ. ᨶ ᨧ, ᨽᨶ᩠ᨲᩮ, ᨽᨣᩅᩣ ᨠᩣᨾᩮᩈᩩ ᨠᩣᨾᩈᩩᨡᩃ᩠ᩃᩥᨠᩣᨶᩩᨿᩮᩣᨣᨾᨶᩩᨿᩩᨲ᩠ᨲᩮᩣ ᩉᩦᨶᩴ ᨣᨾ᩠ᨾᩴ ᨸᩮᩣᨳᩩᨩ᩠ᨩᨶᩥᨠᩴ ᩋᨶᩁᩥᨿᩴ ᩋᨶᨲ᩠ᨳᩈᩴᩉᩥᨲᩴ, ᨶ ᨧ ᩋᨲ᩠ᨲᨠᩥᩃᨾᨳᩣᨶᩩᨿᩮᩣᨣᨾᨶᩩᨿᩩᨲ᩠ᨲᩮᩣ ᨴᩩᨠ᩠ᨡᩴ ᩋᨶᩁᩥᨿᩴ ᩋᨶᨲ᩠ᨳᩈᩴᩉᩥᨲᩴ. ᨧᨲᩩᨶ᩠ᨶᨬ᩠ᨧ ᨽᨣᩅᩣ ᨫᩣᨶᩣᨶᩴ ᩌᨽᩥᨧᩮᨲᩈᩥᨠᩣᨶᩴ ᨴᩥᨭ᩠ᨮᨵᨾ᩠ᨾᩈᩩᨡᩅᩥᩉᩣᩁᩣᨶᩴ ᨶᩥᨠᩣᨾᩃᩣᨽᩦ ᩋᨠᩥᨧ᩠ᨨᩃᩣᨽᩦ ᩋᨠᩈᩥᩁᩃᩣᨽᩦ.

ᩋᨶᩩᨿᩮᩣᨣᨴᩣᨶᨸ᩠ᨸᨠᩣᩁᩮᩣ

᪑᪖᪑. ‘‘ᩈᨧᩮ ᨾᩴ, ᨽᨶ᩠ᨲᩮ, ᩑᩅᩴ ᨸᩩᨧ᩠ᨨᩮᨿ᩠ᨿ – ‘ᨠᩥᩴ ᨶᩩ ᨡᩮᩣ, ᩌᩅᩩᩈᩮᩣ ᩈᩣᩁᩥᨸᩩᨲ᩠ᨲ, ᩋᩉᩮᩈᩩᩴ ᩋᨲᩦᨲᨾᨴ᩠ᨵᩣᨶᩴ ᩋᨬ᩠ᨬᩮ ᩈᨾᨱᩣ ᩅᩣ ᨻᩕᩣᩉ᩠ᨾᨱᩣ ᩅᩣ ᨽᨣᩅᨲᩣ ᨽᩥᨿ᩠ᨿᩮᩣᨽᩥᨬ᩠ᨬᨲᩁᩣ ᩈᨾ᩠ᨻᩮᩣᨵᩥᨿ’ᨶ᩠ᨲᩥ, ᩑᩅᩴ ᨸᩩᨭ᩠ᨮᩮᩣ ᩋᩉᩴ, ᨽᨶ᩠ᨲᩮ, ‘ᨶᩮᩣ’ᨲᩥ ᩅᨴᩮᨿ᩠ᨿᩴ. ‘ᨠᩥᩴ ᨸᨶᩣᩅᩩᩈᩮᩣ ᩈᩣᩁᩥᨸᩩᨲ᩠ᨲ, ᨽᩅᩥᩔᨶ᩠ᨲᩥ ᩋᨶᩣᨣᨲᨾᨴ᩠ᨵᩣᨶᩴ ᩋᨬ᩠ᨬᩮ ᩈᨾᨱᩣ ᩅᩣ ᨻᩕᩣᩉ᩠ᨾᨱᩣ ᩅᩣ ᨽᨣᩅᨲᩣ ᨽᩥᨿ᩠ᨿᩮᩣᨽᩥᨬ᩠ᨬᨲᩁᩣ ᩈᨾ᩠ᨻᩮᩣᨵᩥᨿ’ᨶ᩠ᨲᩥ, ᩑᩅᩴ ᨸᩩᨭ᩠ᨮᩮᩣ ᩋᩉᩴ, ᨽᨶ᩠ᨲᩮ, ‘ᨶᩮᩣ’ᨲᩥ ᩅᨴᩮᨿ᩠ᨿᩴ. ‘ᨠᩥᩴ ᨸᨶᩣᩅᩩᩈᩮᩣ ᩈᩣᩁᩥᨸᩩᨲ᩠ᨲ, ᩋᨲ᩠ᨳᩮᨲᩁᩉᩥ ᩋᨬ᩠ᨬᩮᩣ ᩈᨾᨱᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᨽᨣᩅᨲᩣ ᨽᩥᨿ᩠ᨿᩮᩣᨽᩥᨬ᩠ᨬᨲᩁᩮᩣ ᩈᨾ᩠ᨻᩮᩣᨵᩥᨿ’ᨶ᩠ᨲᩥ, ᩑᩅᩴ ᨸᩩᨭ᩠ᨮᩮᩣ ᩋᩉᩴ, ᨽᨶ᩠ᨲᩮ, ‘ᨶᩮᩣ’ᨲᩥ ᩅᨴᩮᨿ᩠ᨿᩴ.

‘‘ᩈᨧᩮ ᨸᨶ ᨾᩴ, ᨽᨶ᩠ᨲᩮ, ᩑᩅᩴ ᨸᩩᨧ᩠ᨨᩮᨿ᩠ᨿ – ‘ᨠᩥᩴ ᨶᩩ ᨡᩮᩣ, ᩌᩅᩩᩈᩮᩣ ᩈᩣᩁᩥᨸᩩᨲ᩠ᨲ, ᩋᩉᩮᩈᩩᩴ ᩋᨲᩦᨲᨾᨴ᩠ᨵᩣᨶᩴ ᩋᨬ᩠ᨬᩮ ᩈᨾᨱᩣ ᩅᩣ ᨻᩕᩣᩉ᩠ᨾᨱᩣ ᩅᩣ ᨽᨣᩅᨲᩣ ᩈᨾᩈᨾᩣ ᩈᨾ᩠ᨻᩮᩣᨵᩥᨿ’ᨶ᩠ᨲᩥ, ᩑᩅᩴ ᨸᩩᨭ᩠ᨮᩮᩣ ᩋᩉᩴ, ᨽᨶ᩠ᨲᩮ, ‘ᩑᩅ’ᨶ᩠ᨲᩥ ᩅᨴᩮᨿ᩠ᨿᩴ. ‘ᨠᩥᩴ ᨸᨶᩣᩅᩩᩈᩮᩣ ᩈᩣᩁᩥᨸᩩᨲ᩠ᨲ, ᨽᩅᩥᩔᨶ᩠ᨲᩥ ᩋᨶᩣᨣᨲᨾᨴ᩠ᨵᩣᨶᩴ ᩋᨬ᩠ᨬᩮ ᩈᨾᨱᩣ ᩅᩣ ᨻᩕᩣᩉ᩠ᨾᨱᩣ ᩅᩣ ᨽᨣᩅᨲᩣ ᩈᨾᩈᨾᩣ ᩈᨾ᩠ᨻᩮᩣᨵᩥᨿ’ᨶ᩠ᨲᩥ, ᩑᩅᩴ ᨸᩩᨭ᩠ᨮᩮᩣ ᩋᩉᩴ, ᨽᨶ᩠ᨲᩮ, ‘‘ᩑᩅ’’ᨶ᩠ᨲᩥ ᩅᨴᩮᨿ᩠ᨿᩴ. ‘ᨠᩥᩴ ᨸᨶᩣᩅᩩᩈᩮᩣ ᩈᩣᩁᩥᨸᩩᨲ᩠ᨲ, ᩋᨲ᩠ᨳᩮᨲᩁᩉᩥ ᩋᨬ᩠ᨬᩮ ᩈᨾᨱᩣ ᩅᩣ ᨻᩕᩣᩉ᩠ᨾᨱᩣ ᩅᩣ ᨽᨣᩅᨲᩣ ᩈᨾᩈᨾᩣ ᩈᨾ᩠ᨻᩮᩣᨵᩥᨿ’ᨶ᩠ᨲᩥ, ᩑᩅᩴ ᨸᩩᨭ᩠ᨮᩮᩣ ᩋᩉᩴ ᨽᨶ᩠ᨲᩮ ‘ᨶᩮᩣ’ᨲᩥ ᩅᨴᩮᨿ᩠ᨿᩴ.

‘‘ᩈᨧᩮ ᨸᨶ ᨾᩴ, ᨽᨶ᩠ᨲᩮ, ᩑᩅᩴ ᨸᩩᨧ᩠ᨨᩮᨿ᩠ᨿ – ‘ᨠᩥᩴ ᨸᨶᩣᨿᩈ᩠ᨾᩣ ᩈᩣᩁᩥᨸᩩᨲ᩠ᨲᩮᩣ ᩑᨠᨧ᩠ᨧᩴ ᩋᨻ᩠ᨽᨶᩩᨩᩣᨶᩣᨲᩥ, ᩑᨠᨧ᩠ᨧᩴ ᨶ ᩋᨻ᩠ᨽᨶᩩᨩᩣᨶᩣᨲᩦ’ᨲᩥ, ᩑᩅᩴ ᨸᩩᨭ᩠ᨮᩮᩣ ᩋᩉᩴ, ᨽᨶ᩠ᨲᩮ, ᩑᩅᩴ ᨻ᩠ᨿᩣᨠᩁᩮᨿ᩠ᨿᩴ – ‘ᩈᨾ᩠ᨾᩩᨡᩣ ᨾᩮᨲᩴ, ᩌᩅᩩᩈᩮᩣ, ᨽᨣᩅᨲᩮᩣ ᩈᩩᨲᩴ, ᩈᨾ᩠ᨾᩩᨡᩣ ᨸᨭᩥᨣ᩠ᨣᩉᩥᨲᩴ – ‘‘ᩋᩉᩮᩈᩩᩴ ᩋᨲᩦᨲᨾᨴ᩠ᨵᩣᨶᩴ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ ᨾᨿᩣ ᩈᨾᩈᨾᩣ ᩈᨾ᩠ᨻᩮᩣᨵᩥᨿ’’ᨶ᩠ᨲᩥ. ᩈᨾ᩠ᨾᩩᨡᩣ ᨾᩮᨲᩴ, ᩌᩅᩩᩈᩮᩣ, ᨽᨣᩅᨲᩮᩣ ᩈᩩᨲᩴ, ᩈᨾ᩠ᨾᩩᨡᩣ ᨸᨭᩥᨣ᩠ᨣᩉᩥᨲᩴ – ‘‘ᨽᩅᩥᩔᨶ᩠ᨲᩥ ᩋᨶᩣᨣᨲᨾᨴ᩠ᨵᩣᨶᩴ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ ᨾᨿᩣ ᩈᨾᩈᨾᩣ ᩈᨾ᩠ᨻᩮᩣᨵᩥᨿ’’ᨶ᩠ᨲᩥ. ᩈᨾ᩠ᨾᩩᨡᩣ ᨾᩮᨲᩴ, ᩌᩅᩩᩈᩮᩣ, ᨽᨣᩅᨲᩮᩣ ᩈᩩᨲᩴ ᩈᨾ᩠ᨾᩩᨡᩣ ᨸᨭᩥᨣ᩠ᨣᩉᩥᨲᩴ – ‘‘ᩋᨭ᩠ᨮᩣᨶᨾᩮᨲᩴ ᩋᨶᩅᨠᩣᩈᩮᩣ ᨿᩴ ᩑᨠᩥᩔᩣ ᩃᩮᩣᨠᨵᩣᨲᩩᨿᩣ ᨴ᩠ᩅᩮ ᩋᩁᩉᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩣ ᩋᨸᩩᨻ᩠ᨻᩴ ᩋᨧᩁᩥᨾᩴ ᩏᨸ᩠ᨸᨩ᩠ᨩᩮᨿ᩠ᨿᩩᩴ, ᨶᩮᨲᩴ ᨮᩣᨶᩴ ᩅᩥᨩ᩠ᨩᨲᩦ’’’ᨲᩥ.

‘‘ᨠᨧ᩠ᨧᩣᩉᩴ, ᨽᨶ᩠ᨲᩮ, ᩑᩅᩴ ᨸᩩᨭ᩠ᨮᩮᩣ ᩑᩅᩴ ᨻ᩠ᨿᩣᨠᩁᨾᩣᨶᩮᩣ ᩅᩩᨲ᩠ᨲᩅᩣᨴᩦ ᨧᩮᩅ ᨽᨣᩅᨲᩮᩣ ᩉᩮᩣᨾᩥ, ᨶ ᨧ ᨽᨣᩅᨶ᩠ᨲᩴ ᩋᨽᩪᨲᩮᨶ ᩋᨻ᩠ᨽᩣᨧᩥᨠ᩠ᨡᩣᨾᩥ, ᨵᨾ᩠ᨾᩔ ᨧᩣᨶᩩᨵᨾ᩠ᨾᩴ ᨻ᩠ᨿᩣᨠᩁᩮᩣᨾᩥ, ᨶ ᨧ ᨠᩮᩣᨧᩥ ᩈᩉᨵᨾ᩠ᨾᩥᨠᩮᩣ ᩅᩣᨴᩣᨶᩩᩅᩣᨴᩮᩣ [ᩅᩣᨴᩣᨶᩩᨸᩣᨲᩮᩣ (ᩈᩦ.)] ᨣᩣᩁᨿ᩠ᩉᩴ ᨮᩣᨶᩴ ᩌᨣᨧ᩠ᨨᨲᩦ’’ᨲᩥ? ‘‘ᨲᨣ᩠ᨥ ᨲ᩠ᩅᩴ, ᩈᩣᩁᩥᨸᩩᨲ᩠ᨲ, ᩑᩅᩴ ᨸᩩᨭ᩠ᨮᩮᩣ ᩑᩅᩴ ᨻ᩠ᨿᩣᨠᩁᨾᩣᨶᩮᩣ ᩅᩩᨲ᩠ᨲᩅᩣᨴᩦ ᨧᩮᩅ ᨾᩮ ᩉᩮᩣᩈᩥ, ᨶ ᨧ ᨾᩴ ᩋᨽᩪᨲᩮᨶ ᩋᨻ᩠ᨽᩣᨧᩥᨠ᩠ᨡᩈᩥ, ᨵᨾ᩠ᨾᩔ ᨧᩣᨶᩩᨵᨾ᩠ᨾᩴ ᨻ᩠ᨿᩣᨠᩁᩮᩣᩈᩥ, ᨶ ᨧ ᨠᩮᩣᨧᩥ ᩈᩉᨵᨾ᩠ᨾᩥᨠᩮᩣ ᩅᩣᨴᩣᨶᩩᩅᩣᨴᩮᩣ ᨣᩣᩁᨿ᩠ᩉᩴ ᨮᩣᨶᩴ ᩌᨣᨧ᩠ᨨᨲᩦ’’ᨲᩥ.

ᩋᨧ᩠ᨨᩁᩥᨿᩋᨻ᩠ᨽᩩᨲᩴ

᪑᪖᪒. ᩑᩅᩴ ᩅᩩᨲ᩠ᨲᩮ, ᩌᨿᩈ᩠ᨾᩣ ᩏᨴᩣᨿᩦ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩋᨧ᩠ᨨᩁᩥᨿᩴ, ᨽᨶ᩠ᨲᩮ, ᩋᨻ᩠ᨽᩩᨲᩴ, ᨽᨶ᩠ᨲᩮ, ᨲᨳᩣᨣᨲᩔ ᩋᨸ᩠ᨸᩥᨧ᩠ᨨᨲᩣ ᩈᨶ᩠ᨲᩩᨭ᩠ᨮᩥᨲᩣ ᩈᩃ᩠ᩃᩮᨡᨲᩣ. ᨿᨲᩕ ᩉᩥ ᨶᩣᨾ ᨲᨳᩣᨣᨲᩮᩣ ᩑᩅᩴᨾᩉᩥᨴ᩠ᨵᩥᨠᩮᩣ ᩑᩅᩴᨾᩉᩣᨶᩩᨽᩣᩅᩮᩣ, ᩋᨳ ᨧ ᨸᨶ ᨶᩮᩅᨲ᩠ᨲᩣᨶᩴ ᨸᩣᨲᩩᨠᩁᩥᩔᨲᩥ! ᩑᨠᨾᩮᨠᨬ᩠ᨧᩮᨸᩥ ᩍᨲᩮᩣ, ᨽᨶ᩠ᨲᩮ, ᨵᨾ᩠ᨾᩴ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩋᨲ᩠ᨲᨶᩥ ᩈᨾᨶᩩᨸᩔᩮᨿ᩠ᨿᩩᩴ, ᨲᩮ ᨲᩣᩅᨲᨠᩮᨶᩮᩅ ᨸᨭᩣᨠᩴ ᨸᩁᩥᩉᩁᩮᨿ᩠ᨿᩩᩴ. ᩋᨧ᩠ᨨᩁᩥᨿᩴ, ᨽᨶ᩠ᨲᩮ, ᩋᨻ᩠ᨽᩩᨲᩴ, ᨽᨶ᩠ᨲᩮ, ᨲᨳᩣᨣᨲᩔ ᩋᨸ᩠ᨸᩥᨧ᩠ᨨᨲᩣ ᩈᨶ᩠ᨲᩩᨭ᩠ᨮᩥᨲᩣ ᩈᩃ᩠ᩃᩮᨡᨲᩣ. ᨿᨲᩕ ᩉᩥ ᨶᩣᨾ ᨲᨳᩣᨣᨲᩮᩣ ᩑᩅᩴ ᨾᩉᩥᨴ᩠ᨵᩥᨠᩮᩣ ᩑᩅᩴᨾᩉᩣᨶᩩᨽᩣᩅᩮᩣ. ᩋᨳ ᨧ ᨸᨶ ᨶᩮᩅᨲ᩠ᨲᩣᨶᩴ ᨸᩣᨲᩩᨠᩁᩥᩔᨲᩦ’’ᨲᩥ!

‘‘ᨸᩔ ᨡᩮᩣ ᨲ᩠ᩅᩴ, ᩏᨴᩣᨿᩥ, ‘ᨲᨳᩣᨣᨲᩔ ᩋᨸ᩠ᨸᩥᨧ᩠ᨨᨲᩣ ᩈᨶ᩠ᨲᩩᨭ᩠ᨮᩥᨲᩣ ᩈᩃ᩠ᩃᩮᨡᨲᩣ. ᨿᨲᩕ ᩉᩥ ᨶᩣᨾ ᨲᨳᩣᨣᨲᩮᩣ ᩑᩅᩴᨾᩉᩥᨴ᩠ᨵᩥᨠᩮᩣ ᩑᩅᩴᨾᩉᩣᨶᩩᨽᩣᩅᩮᩣ, ᩋᨳ ᨧ ᨸᨶ ᨶᩮᩅᨲ᩠ᨲᩣᨶᩴ ᨸᩣᨲᩩᨠᩁᩥᩔᨲᩥ’! ᩑᨠᨾᩮᨠᨬ᩠ᨧᩮᨸᩥ ᩍᨲᩮᩣ, ᩏᨴᩣᨿᩥ, ᨵᨾ᩠ᨾᩴ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩋᨲ᩠ᨲᨶᩥ ᩈᨾᨶᩩᨸᩔᩮᨿ᩠ᨿᩩᩴ, ᨲᩮ ᨲᩣᩅᨲᨠᩮᨶᩮᩅ ᨸᨭᩣᨠᩴ ᨸᩁᩥᩉᩁᩮᨿ᩠ᨿᩩᩴ. ᨸᩔ ᨡᩮᩣ ᨲ᩠ᩅᩴ, ᩏᨴᩣᨿᩥ, ‘ᨲᨳᩣᨣᨲᩔ ᩋᨸ᩠ᨸᩥᨧ᩠ᨨᨲᩣ ᩈᨶ᩠ᨲᩩᨭ᩠ᨮᩥᨲᩣ ᩈᩃ᩠ᩃᩮᨡᨲᩣ. ᨿᨲᩕ ᩉᩥ ᨶᩣᨾ ᨲᨳᩣᨣᨲᩮᩣ ᩑᩅᩴᨾᩉᩥᨴ᩠ᨵᩥᨠᩮᩣ ᩑᩅᩴᨾᩉᩣᨶᩩᨽᩣᩅᩮᩣ, ᩋᨳ ᨧ ᨸᨶ ᨶᩮᩅᨲ᩠ᨲᩣᨶᩴ ᨸᩣᨲᩩᨠᩁᩥᩔᨲᩦ’’’ᨲᩥ!

᪑᪖᪓. ᩋᨳ ᨡᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᩈᩣᩁᩥᨸᩩᨲ᩠ᨲᩴ ᩌᨾᨶ᩠ᨲᩮᩈᩥ – ‘‘ᨲᩈ᩠ᨾᩣ ᨲᩥᩉ ᨲ᩠ᩅᩴ, ᩈᩣᩁᩥᨸᩩᨲ᩠ᨲ, ᩍᨾᩴ ᨵᨾ᩠ᨾᨸᩁᩥᨿᩣᨿᩴ ᩋᨽᩥᨠ᩠ᨡᨱᩴ ᨽᩣᩈᩮᨿ᩠ᨿᩣᩈᩥ ᨽᩥᨠ᩠ᨡᩪᨶᩴ ᨽᩥᨠ᩠ᨡᩩᨶᩦᨶᩴ ᩏᨸᩣᩈᨠᩣᨶᩴ ᩏᨸᩣᩈᩥᨠᩣᨶᩴ. ᨿᩮᩈᨾ᩠ᨸᩥ ᩉᩥ, ᩈᩣᩁᩥᨸᩩᨲ᩠ᨲ, ᨾᩮᩣᨥᨸᩩᩁᩥᩈᩣᨶᩴ ᨽᩅᩥᩔᨲᩥ ᨲᨳᩣᨣᨲᩮ ᨠᨦ᩠ᨡᩣ ᩅᩣ ᩅᩥᨾᨲᩥ ᩅᩣ, ᨲᩮᩈᨾᩥᨾᩴ ᨵᨾ᩠ᨾᨸᩁᩥᨿᩣᨿᩴ ᩈᩩᨲ᩠ᩅᩣ ᨲᨳᩣᨣᨲᩮ ᨠᨦ᩠ᨡᩣ ᩅᩣ ᩅᩥᨾᨲᩥ ᩅᩣ, ᩈᩣ ᨸᩉᩦᨿᩥᩔᨲᩦ’’ᨲᩥ. ᩍᨲᩥ ᩉᩥᨴᩴ ᩌᨿᩈ᩠ᨾᩣ ᩈᩣᩁᩥᨸᩩᨲ᩠ᨲᩮᩣ ᨽᨣᩅᨲᩮᩣ ᩈᨾ᩠ᨾᩩᨡᩣ ᩈᨾ᩠ᨸᩈᩣᨴᩴ ᨸᩅᩮᨴᩮᩈᩥ. ᨲᩈ᩠ᨾᩣ ᩍᨾᩔ ᩅᩮᨿ᩠ᨿᩣᨠᩁᨱᩔ ᩈᨾ᩠ᨸᩈᩣᨴᨶᩦᨿᩴ ᨲ᩠ᩅᩮᩅ ᩋᨵᩥᩅᨧᨶᨶ᩠ᨲᩥ.

ᩈᨾ᩠ᨸᩈᩣᨴᨶᩦᨿᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᨸᨬ᩠ᨧᨾᩴ.

᪖. ᨸᩣᩈᩣᨴᩥᨠᩈᩩᨲ᩠ᨲᩴ

᪑᪖᪔. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᩈᨠ᩠ᨠᩮᩈᩩ ᩅᩥᩉᩁᨲᩥ ᩅᩮᨵᨬ᩠ᨬᩣ ᨶᩣᨾ ᩈᨠ᩠ᨿᩣ, ᨲᩮᩈᩴ ᩋᨾ᩠ᨻᩅᨶᩮ ᨸᩣᩈᩣᨴᩮ.

ᨶᩥᨣᨱ᩠ᨮᨶᩣᨭᨸᩩᨲ᩠ᨲᨠᩣᩃᨦ᩠ᨠᩥᩁᩥᨿᩣ

ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨶᩥᨣᨱ᩠ᨮᩮᩣ ᨶᩣᨭᨸᩩᨲ᩠ᨲᩮᩣ [ᨶᩣᨳᨸᩩᨲ᩠ᨲᩮᩣ (ᩈᩦ. ᨸᩦ.)] ᨸᩣᩅᩣᨿᩴ ᩋᨵᩩᨶᩣᨠᩣᩃᨦ᩠ᨠᨲᩮᩣ ᩉᩮᩣᨲᩥ. ᨲᩔ ᨠᩣᩃᨦ᩠ᨠᩥᩁᩥᨿᩣᨿ ᨽᩥᨶ᩠ᨶᩣ ᨶᩥᨣᨱ᩠ᨮᩣ ᨴ᩠ᩅᩮᨵᩥᨠᨩᩣᨲᩣ ᨽᨱ᩠ᨯᨶᨩᩣᨲᩣ ᨠᩃᩉᨩᩣᨲᩣ ᩅᩥᩅᩣᨴᩣᨸᨶ᩠ᨶᩣ ᩋᨬ᩠ᨬᨾᨬ᩠ᨬᩴ ᨾᩩᨡᩈᨲ᩠ᨲᩦᩉᩥ ᩅᩥᨲᩩᨴᨶ᩠ᨲᩣ ᩅᩥᩉᩁᨶ᩠ᨲᩥ – ‘‘ᨶ ᨲ᩠ᩅᩴ ᩍᨾᩴ ᨵᨾ᩠ᨾᩅᩥᨶᨿᩴ ᩌᨩᩣᨶᩣᩈᩥ, ᩋᩉᩴ ᩍᨾᩴ ᨵᨾ᩠ᨾᩅᩥᨶᨿᩴ ᩌᨩᩣᨶᩣᨾᩥ, ᨠᩥᩴ ᨲ᩠ᩅᩴ ᩍᨾᩴ ᨵᨾ᩠ᨾᩅᩥᨶᨿᩴ ᩌᨩᩣᨶᩥᩔᩈᩥ? ᨾᩥᨧ᩠ᨨᩣᨸᨭᩥᨸᨶ᩠ᨶᩮᩣ ᨲ᩠ᩅᨾᩈᩥ, ᩋᩉᨾᩈ᩠ᨾᩥ ᩈᨾ᩠ᨾᩣᨸᨭᩥᨸᨶ᩠ᨶᩮᩣ. ᩈᩉᩥᨲᩴ ᨾᩮ, ᩋᩈᩉᩥᨲᩴ ᨲᩮ. ᨸᩩᩁᩮᩅᨧᨶᩦᨿᩴ ᨸᨧ᩠ᨨᩣ ᩋᩅᨧ, ᨸᨧ᩠ᨨᩣᩅᨧᨶᩦᨿᩴ ᨸᩩᩁᩮ ᩋᩅᨧ. ᩋᨵᩥᨧᩥᨱ᩠ᨱᩴ ᨲᩮ ᩅᩥᨸᩁᩣᩅᨲ᩠ᨲᩴ, ᩌᩁᩮᩣᨸᩥᨲᩮᩣ ᨲᩮ ᩅᩣᨴᩮᩣ, ᨶᩥᨣ᩠ᨣᩉᩥᨲᩮᩣ ᨲ᩠ᩅᨾᩈᩥ, ᨧᩁ ᩅᩣᨴᨸ᩠ᨸᨾᩮᩣᨠ᩠ᨡᩣᨿ, ᨶᩥᨻ᩠ᨻᩮᨮᩮᩉᩥ ᩅᩣ ᩈᨧᩮ ᨸᩉᩮᩣᩈᩦ’’ᨲᩥ. ᩅᨵᩮᩣᨿᩮᩅ ᨡᩮᩣ [ᩅᨵᩮᩣᨿᩮᩅᩮᨠᩮᩣ (ᨠ.)] ᨾᨬ᩠ᨬᩮ ᨶᩥᨣᨱ᩠ᨮᩮᩈᩩ ᨶᩣᨭᨸᩩᨲ᩠ᨲᩥᨿᩮᩈᩩ ᩅᨲ᩠ᨲᨲᩥ [ᩋᨶᩩᩅᨲ᩠ᨲᨲᩥ (ᩈ᩠ᨿᩣ. ᨠ.)]. ᨿᩮᨸᩥ ᨶᩥᨣᨱ᩠ᨮᩔ ᨶᩣᨭᨸᩩᨲ᩠ᨲᩔ ᩈᩣᩅᨠᩣ ᨣᩥᩉᩦ ᩒᨴᩣᨲᩅᩈᨶᩣ, ᨲᩮᨸᩥ [ᨲᩮ ᨲᩮᩈᩩ (ᨠ.)] ᨶᩥᨣᨱ᩠ᨮᩮᩈᩩ ᨶᩣᨭᨸᩩᨲ᩠ᨲᩥᨿᩮᩈᩩ ᨶᩥᨻ᩠ᨻᩥᨶ᩠ᨶᩁᩪᨸᩣ [ᨶᩥᨻ᩠ᨻᩥᨶ᩠ᨴᩁᩪᨸᩣ (ᨠ.)] ᩅᩥᩁᨲ᩠ᨲᩁᩪᨸᩣ ᨸᨭᩥᩅᩣᨶᩁᩪᨸᩣ, ᨿᨳᩣ ᨲᩴ ᨴᩩᩁᨠ᩠ᨡᩣᨲᩮ ᨵᨾ᩠ᨾᩅᩥᨶᨿᩮ ᨴᩩᨸ᩠ᨸᩅᩮᨴᩥᨲᩮ ᩋᨶᩥᨿ᩠ᨿᩣᨶᩥᨠᩮ ᩋᨶᩩᨸᩈᨾᩈᩴᩅᨲ᩠ᨲᨶᩥᨠᩮ ᩋᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮ ᨽᩥᨶ᩠ᨶᨳᩪᨸᩮ ᩋᨸ᩠ᨸᨭᩥᩈᩁᨱᩮ.

᪑᪖᪕. ᩋᨳ ᨡᩮᩣ ᨧᩩᨶ᩠ᨴᩮᩣ ᩈᨾᨱᩩᨴ᩠ᨴᩮᩈᩮᩣ ᨸᩣᩅᩣᨿᩴ ᩅᩔᩴᩅᩩᨭ᩠ᨮᩮᩣ [ᩅᩔᩴᩅᩩᨲ᩠ᨳᩮᩣ (ᩈᩦ. ᩈ᩠ᨿᩣ. ᨸᩦ.)] ᨿᩮᨶ ᩈᩣᨾᨣᩣᨾᩮᩣ, ᨿᩮᨶᩣᨿᩈ᩠ᨾᩣ ᩌᨶᨶ᩠ᨴᩮᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᨧᩩᨶ᩠ᨴᩮᩣ ᩈᨾᨱᩩᨴ᩠ᨴᩮᩈᩮᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᩑᨲᨴᩅᩮᩣᨧ – ‘‘ᨶᩥᨣᨱ᩠ᨮᩮᩣ, ᨽᨶ᩠ᨲᩮ, ᨶᩣᨭᨸᩩᨲ᩠ᨲᩮᩣ ᨸᩣᩅᩣᨿᩴ ᩋᨵᩩᨶᩣᨠᩣᩃᨦ᩠ᨠᨲᩮᩣ. ᨲᩔ ᨠᩣᩃᨦ᩠ᨠᩥᩁᩥᨿᩣᨿ ᨽᩥᨶ᩠ᨶᩣ ᨶᩥᨣᨱ᩠ᨮᩣ ᨴ᩠ᩅᩮᨵᩥᨠᨩᩣᨲᩣ…ᨸᩮ… ᨽᩥᨶ᩠ᨶᨳᩪᨸᩮ ᩋᨸ᩠ᨸᨭᩥᩈᩁᨱᩮ’’ᨲᩥ.

ᩑᩅᩴ ᩅᩩᨲ᩠ᨲᩮ, ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨧᩩᨶ᩠ᨴᩴ ᩈᨾᨱᩩᨴ᩠ᨴᩮᩈᩴ ᩑᨲᨴᩅᩮᩣᨧ – ‘‘ᩋᨲ᩠ᨳᩥ ᨡᩮᩣ ᩍᨴᩴ, ᩌᩅᩩᩈᩮᩣ ᨧᩩᨶ᩠ᨴ, ᨠᨳᩣᨸᩣᨽᨲᩴ ᨽᨣᩅᨶ᩠ᨲᩴ ᨴᩔᨶᩣᨿ. ᩌᨿᩣᨾᩣᩅᩩᩈᩮᩣ ᨧᩩᨶ᩠ᨴ, ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥᩔᩣᨾ; ᩏᨸᩈᨦ᩠ᨠᨾᩥᨲ᩠ᩅᩣ ᩑᨲᨾᨲ᩠ᨳᩴ ᨽᨣᩅᨲᩮᩣ ᩌᩁᩮᩣᨧᩮᩔᩣᨾᩣ’’ᨲᩥ [ᩌᩁᩮᩣᨧᩮᨿ᩠ᨿᩣᨾᩣᨲᩥ (ᩈ᩠ᨿᩣ.)]. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᨧᩩᨶ᩠ᨴᩮᩣ ᩈᨾᨱᩩᨴ᩠ᨴᩮᩈᩮᩣ ᩌᨿᩈ᩠ᨾᨲᩮᩣ ᩌᨶᨶ᩠ᨴᩔ ᨸᨧ᩠ᨧᩔᩮᩣᩈᩥ.

ᩋᨳ ᨡᩮᩣ ᩌᨿᩈ᩠ᨾᩣ ᨧ ᩌᨶᨶ᩠ᨴᩮᩣ ᨧᩩᨶ᩠ᨴᩮᩣ ᨧ ᩈᨾᨱᩩᨴ᩠ᨴᩮᩈᩮᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩋᨿᩴ, ᨽᨶ᩠ᨲᩮ, ᨧᩩᨶ᩠ᨴᩮᩣ ᩈᨾᨱᩩᨴ᩠ᨴᩮᩈᩮᩣ ᩑᩅᨾᩣᩉ, ‘ᨶᩥᨣᨱ᩠ᨮᩮᩣ, ᨽᨶ᩠ᨲᩮ, ᨶᩣᨭᨸᩩᨲ᩠ᨲᩮᩣ ᨸᩣᩅᩣᨿᩴ ᩋᨵᩩᨶᩣᨠᩣᩃᨦ᩠ᨠᨲᩮᩣ, ᨲᩔ ᨠᩣᩃᨦ᩠ᨠᩥᩁᩥᨿᩣᨿ ᨽᩥᨶ᩠ᨶᩣ ᨶᩥᨣᨱ᩠ᨮᩣ…ᨸᩮ… ᨽᩥᨶ᩠ᨶᨳᩪᨸᩮ ᩋᨸ᩠ᨸᨭᩥᩈᩁᨱᩮ’’’ᨲᩥ.

ᩋᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᨵᨾ᩠ᨾᩅᩥᨶᨿᩮᩣ

᪑᪖᪖. ‘‘ᩑᩅᩴ ᩉᩮᨲᩴ, ᨧᩩᨶ᩠ᨴ, ᩉᩮᩣᨲᩥ ᨴᩩᩁᨠ᩠ᨡᩣᨲᩮ ᨵᨾ᩠ᨾᩅᩥᨶᨿᩮ ᨴᩩᨸ᩠ᨸᩅᩮᨴᩥᨲᩮ ᩋᨶᩥᨿ᩠ᨿᩣᨶᩥᨠᩮ ᩋᨶᩩᨸᩈᨾᩈᩴᩅᨲ᩠ᨲᨶᩥᨠᩮ ᩋᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮ. ᩍᨵ, ᨧᩩᨶ᩠ᨴ, ᩈᨲ᩠ᨳᩣ ᨧ ᩉᩮᩣᨲᩥ ᩋᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨵᨾ᩠ᨾᩮᩣ ᨧ ᨴᩩᩁᨠ᩠ᨡᩣᨲᩮᩣ ᨴᩩᨸ᩠ᨸᩅᩮᨴᩥᨲᩮᩣ ᩋᨶᩥᨿ᩠ᨿᩣᨶᩥᨠᩮᩣ ᩋᨶᩩᨸᩈᨾᩈᩴᩅᨲ᩠ᨲᨶᩥᨠᩮᩣ ᩋᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮᩣ, ᩈᩣᩅᨠᩮᩣ ᨧ ᨲᩈ᩠ᨾᩥᩴ ᨵᨾ᩠ᨾᩮ ᨶ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩮᩣ ᩅᩥᩉᩁᨲᩥ ᨶ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩮᩣ ᨶ ᩋᨶᩩᨵᨾ᩠ᨾᨧᩣᩁᩦ, ᩅᩮᩣᨠ᩠ᨠᨾ᩠ᨾ ᨧ ᨲᨾ᩠ᩉᩣ ᨵᨾ᩠ᨾᩣ ᩅᨲ᩠ᨲᨲᩥ. ᩈᩮᩣ ᩑᩅᨾᩔ ᩅᨧᨶᩦᨿᩮᩣ – ‘ᨲᩔ ᨲᩮ, ᩌᩅᩩᩈᩮᩣ, ᩃᩣᨽᩣ, ᨲᩔ ᨲᩮ ᩈᩩᩃᨴ᩠ᨵᩴ, ᩈᨲ᩠ᨳᩣ ᨧ ᨲᩮ ᩋᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨵᨾ᩠ᨾᩮᩣ ᨧ ᨴᩩᩁᨠ᩠ᨡᩣᨲᩮᩣ ᨴᩩᨸ᩠ᨸᩅᩮᨴᩥᨲᩮᩣ ᩋᨶᩥᨿ᩠ᨿᩣᨶᩥᨠᩮᩣ ᩋᨶᩩᨸᩈᨾᩈᩴᩅᨲ᩠ᨲᨶᩥᨠᩮᩣ ᩋᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮᩣ. ᨲ᩠ᩅᨬ᩠ᨧ ᨲᩈ᩠ᨾᩥᩴ ᨵᨾ᩠ᨾᩮ ᨶ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩮᩣ ᩅᩥᩉᩁᩈᩥ, ᨶ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩮᩣ, ᨶ ᩋᨶᩩᨵᨾ᩠ᨾᨧᩣᩁᩦ, ᩅᩮᩣᨠ᩠ᨠᨾ᩠ᨾ ᨧ ᨲᨾ᩠ᩉᩣ ᨵᨾ᩠ᨾᩣ ᩅᨲ᩠ᨲᩈᩦ’ᨲᩥ. ᩍᨲᩥ ᨡᩮᩣ, ᨧᩩᨶ᩠ᨴ, ᩈᨲ᩠ᨳᩣᨸᩥ ᨲᨲ᩠ᨳ ᨣᩣᩁᨿ᩠ᩉᩮᩣ, ᨵᨾ᩠ᨾᩮᩣᨸᩥ ᨲᨲ᩠ᨳ ᨣᩣᩁᨿ᩠ᩉᩮᩣ, ᩈᩣᩅᨠᩮᩣ ᨧ ᨲᨲ᩠ᨳ ᩑᩅᩴ ᨸᩣᩈᩴᩈᩮᩣ. ᨿᩮᩣ ᨡᩮᩣ, ᨧᩩᨶ᩠ᨴ, ᩑᩅᩁᩪᨸᩴ ᩈᩣᩅᨠᩴ ᩑᩅᩴ ᩅᨴᩮᨿ᩠ᨿ – ‘ᩑᨲᩣᨿᩈ᩠ᨾᩣ ᨲᨳᩣ ᨸᨭᩥᨸᨩ᩠ᨩᨲᩩ, ᨿᨳᩣ ᨲᩮ ᩈᨲ᩠ᨳᩣᩁᩣ ᨵᨾ᩠ᨾᩮᩣ ᨴᩮᩈᩥᨲᩮᩣ ᨸᨬ᩠ᨬᨲ᩠ᨲᩮᩣ’ᨲᩥ. ᨿᩮᩣ ᨧ ᩈᨾᩣᨴᨸᩮᨲᩥ [ᩈᨾᩣᨴᩣᨸᩮᨲᩥ (ᩈᩦ. ᨭ᩠ᨮ.)], ᨿᨬ᩠ᨧ ᩈᨾᩣᨴᨸᩮᨲᩥ, ᨿᩮᩣ ᨧ ᩈᨾᩣᨴᨸᩥᨲᩮᩣ [ᩈᨾᩣᨴᩣᨸᩥᨲᩮᩣ (ᩈᩦ. ᨭ᩠ᨮ.)] ᨲᨳᨲ᩠ᨲᩣᨿ ᨸᨭᩥᨸᨩ᩠ᨩᨲᩥ. ᩈᨻ᩠ᨻᩮ ᨲᩮ ᨻᩉᩩᩴ ᩋᨸᩩᨬ᩠ᨬᩴ ᨸᩈᩅᨶ᩠ᨲᩥ. ᨲᩴ ᨠᩥᩔ ᩉᩮᨲᩩ? ᩑᩅᩴ ᩉᩮᨲᩴ, ᨧᩩᨶ᩠ᨴ, ᩉᩮᩣᨲᩥ ᨴᩩᩁᨠ᩠ᨡᩣᨲᩮ ᨵᨾ᩠ᨾᩅᩥᨶᨿᩮ ᨴᩩᨸ᩠ᨸᩅᩮᨴᩥᨲᩮ ᩋᨶᩥᨿ᩠ᨿᩣᨶᩥᨠᩮ ᩋᨶᩩᨸᩈᨾᩈᩴᩅᨲ᩠ᨲᨶᩥᨠᩮ ᩋᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮ.

᪑᪖᪗. ‘‘ᩍᨵ ᨸᨶ, ᨧᩩᨶ᩠ᨴ, ᩈᨲ᩠ᨳᩣ ᨧ ᩉᩮᩣᨲᩥ ᩋᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨵᨾ᩠ᨾᩮᩣ ᨧ ᨴᩩᩁᨠ᩠ᨡᩣᨲᩮᩣ ᨴᩩᨸ᩠ᨸᩅᩮᨴᩥᨲᩮᩣ ᩋᨶᩥᨿ᩠ᨿᩣᨶᩥᨠᩮᩣ ᩋᨶᩩᨸᩈᨾᩈᩴᩅᨲ᩠ᨲᨶᩥᨠᩮᩣ ᩋᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮᩣ, ᩈᩣᩅᨠᩮᩣ ᨧ ᨲᩈ᩠ᨾᩥᩴ ᨵᨾ᩠ᨾᩮ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩮᩣ ᩅᩥᩉᩁᨲᩥ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩮᩣ ᩋᨶᩩᨵᨾ᩠ᨾᨧᩣᩁᩦ, ᩈᨾᩣᨴᩣᨿ ᨲᩴ ᨵᨾ᩠ᨾᩴ ᩅᨲ᩠ᨲᨲᩥ. ᩈᩮᩣ ᩑᩅᨾᩔ ᩅᨧᨶᩦᨿᩮᩣ – ‘ᨲᩔ ᨲᩮ, ᩌᩅᩩᩈᩮᩣ, ᩋᩃᩣᨽᩣ, ᨲᩔ ᨲᩮ ᨴᩩᩃ᩠ᩃᨴ᩠ᨵᩴ, ᩈᨲ᩠ᨳᩣ ᨧ ᨲᩮ ᩋᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨵᨾ᩠ᨾᩮᩣ ᨧ ᨴᩩᩁᨠ᩠ᨡᩣᨲᩮᩣ ᨴᩩᨸ᩠ᨸᩅᩮᨴᩥᨲᩮᩣ ᩋᨶᩥᨿ᩠ᨿᩣᨶᩥᨠᩮᩣ ᩋᨶᩩᨸᩈᨾᩈᩴᩅᨲ᩠ᨲᨶᩥᨠᩮᩣ ᩋᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮᩣ. ᨲ᩠ᩅᨬ᩠ᨧ ᨲᩈ᩠ᨾᩥᩴ ᨵᨾ᩠ᨾᩮ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩮᩣ ᩅᩥᩉᩁᩈᩥ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩮᩣ ᩋᨶᩩᨵᨾ᩠ᨾᨧᩣᩁᩦ, ᩈᨾᩣᨴᩣᨿ ᨲᩴ ᨵᨾ᩠ᨾᩴ ᩅᨲ᩠ᨲᩈᩦ’ᨲᩥ. ᩍᨲᩥ ᨡᩮᩣ, ᨧᩩᨶ᩠ᨴ, ᩈᨲ᩠ᨳᩣᨸᩥ ᨲᨲ᩠ᨳ ᨣᩣᩁᨿ᩠ᩉᩮᩣ, ᨵᨾ᩠ᨾᩮᩣᨸᩥ ᨲᨲ᩠ᨳ ᨣᩣᩁᨿ᩠ᩉᩮᩣ, ᩈᩣᩅᨠᩮᩣᨸᩥ ᨲᨲ᩠ᨳ ᩑᩅᩴ ᨣᩣᩁᨿ᩠ᩉᩮᩣ. ᨿᩮᩣ ᨡᩮᩣ, ᨧᩩᨶ᩠ᨴ, ᩑᩅᩁᩪᨸᩴ ᩈᩣᩅᨠᩴ ᩑᩅᩴ ᩅᨴᩮᨿ᩠ᨿ – ‘ᩋᨴ᩠ᨵᩣᨿᩈ᩠ᨾᩣ ᨬᩣᨿᨸ᩠ᨸᨭᩥᨸᨶ᩠ᨶᩮᩣ ᨬᩣᨿᨾᩣᩁᩣᨵᩮᩔᨲᩦ’ᨲᩥ. ᨿᩮᩣ ᨧ ᨸᩈᩴᩈᨲᩥ, ᨿᨬ᩠ᨧ ᨸᩈᩴᩈᨲᩥ, ᨿᩮᩣ ᨧ ᨸᩈᩴᩈᩥᨲᩮᩣ ᨽᩥᨿ᩠ᨿᩮᩣᩈᩮᩣ ᨾᨲ᩠ᨲᩣᨿ ᩅᩦᩁᩥᨿᩴ ᩌᩁᨽᨲᩥ. ᩈᨻ᩠ᨻᩮ ᨲᩮ ᨻᩉᩩᩴ ᩋᨸᩩᨬ᩠ᨬᩴ ᨸᩈᩅᨶ᩠ᨲᩥ. ᨲᩴ ᨠᩥᩔ ᩉᩮᨲᩩ? ᩑᩅᨬ᩠ᩉᩮᨲᩴ, ᨧᩩᨶ᩠ᨴ, ᩉᩮᩣᨲᩥ ᨴᩩᩁᨠ᩠ᨡᩣᨲᩮ ᨵᨾ᩠ᨾᩅᩥᨶᨿᩮ ᨴᩩᨸ᩠ᨸᩅᩮᨴᩥᨲᩮ ᩋᨶᩥᨿ᩠ᨿᩣᨶᩥᨠᩮ ᩋᨶᩩᨸᩈᨾᩈᩴᩅᨲ᩠ᨲᨶᩥᨠᩮ ᩋᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮ.

ᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᨵᨾ᩠ᨾᩅᩥᨶᨿᩮᩣ

᪑᪖᪘. ‘‘ᩍᨵ ᨸᨶ, ᨧᩩᨶ᩠ᨴ, ᩈᨲ᩠ᨳᩣ ᨧ ᩉᩮᩣᨲᩥ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨵᨾ᩠ᨾᩮᩣ ᨧ ᩈ᩠ᩅᩣᨠ᩠ᨡᩣᨲᩮᩣ ᩈᩩᨸ᩠ᨸᩅᩮᨴᩥᨲᩮᩣ ᨶᩥᨿ᩠ᨿᩣᨶᩥᨠᩮᩣ ᩏᨸᩈᨾᩈᩴᩅᨲ᩠ᨲᨶᩥᨠᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮᩣ, ᩈᩣᩅᨠᩮᩣ ᨧ ᨲᩈ᩠ᨾᩥᩴ ᨵᨾ᩠ᨾᩮ ᨶ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩮᩣ ᩅᩥᩉᩁᨲᩥ, ᨶ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩮᩣ, ᨶ ᩋᨶᩩᨵᨾ᩠ᨾᨧᩣᩁᩦ, ᩅᩮᩣᨠ᩠ᨠᨾ᩠ᨾ ᨧ ᨲᨾ᩠ᩉᩣ ᨵᨾ᩠ᨾᩣ ᩅᨲ᩠ᨲᨲᩥ. ᩈᩮᩣ ᩑᩅᨾᩔ ᩅᨧᨶᩦᨿᩮᩣ – ‘ᨲᩔ ᨲᩮ, ᩌᩅᩩᩈᩮᩣ, ᩋᩃᩣᨽᩣ, ᨲᩔ ᨲᩮ ᨴᩩᩃ᩠ᩃᨴ᩠ᨵᩴ, ᩈᨲ᩠ᨳᩣ ᨧ ᨲᩮ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨵᨾ᩠ᨾᩮᩣ ᨧ ᩈ᩠ᩅᩣᨠ᩠ᨡᩣᨲᩮᩣ ᩈᩩᨸ᩠ᨸᩅᩮᨴᩥᨲᩮᩣ ᨶᩥᨿ᩠ᨿᩣᨶᩥᨠᩮᩣ ᩏᨸᩈᨾᩈᩴᩅᨲ᩠ᨲᨶᩥᨠᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮᩣ. ᨲ᩠ᩅᨬ᩠ᨧ ᨲᩈ᩠ᨾᩥᩴ ᨵᨾ᩠ᨾᩮ ᨶ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩮᩣ ᩅᩥᩉᩁᩈᩥ, ᨶ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩮᩣ, ᨶ ᩋᨶᩩᨵᨾ᩠ᨾᨧᩣᩁᩦ, ᩅᩮᩣᨠ᩠ᨠᨾ᩠ᨾ ᨧ ᨲᨾ᩠ᩉᩣ ᨵᨾ᩠ᨾᩣ ᩅᨲ᩠ᨲᩈᩦ’ᨲᩥ. ᩍᨲᩥ ᨡᩮᩣ, ᨧᩩᨶ᩠ᨴ, ᩈᨲ᩠ᨳᩣᨸᩥ ᨲᨲ᩠ᨳ ᨸᩣᩈᩴᩈᩮᩣ, ᨵᨾ᩠ᨾᩮᩣᨸᩥ ᨲᨲ᩠ᨳ ᨸᩣᩈᩴᩈᩮᩣ, ᩈᩣᩅᨠᩮᩣ ᨧ ᨲᨲ᩠ᨳ ᩑᩅᩴ ᨣᩣᩁᨿ᩠ᩉᩮᩣ. ᨿᩮᩣ ᨡᩮᩣ, ᨧᩩᨶ᩠ᨴ, ᩑᩅᩁᩪᨸᩴ ᩈᩣᩅᨠᩴ ᩑᩅᩴ ᩅᨴᩮᨿ᩠ᨿ – ‘ᩑᨲᩣᨿᩈ᩠ᨾᩣ ᨲᨳᩣ ᨸᨭᩥᨸᨩ᩠ᨩᨲᩩ ᨿᨳᩣ ᨲᩮ ᩈᨲ᩠ᨳᩣᩁᩣ ᨵᨾ᩠ᨾᩮᩣ ᨴᩮᩈᩥᨲᩮᩣ ᨸᨬ᩠ᨬᨲ᩠ᨲᩮᩣ’ᨲᩥ. ᨿᩮᩣ ᨧ ᩈᨾᩣᨴᨸᩮᨲᩥ, ᨿᨬ᩠ᨧ ᩈᨾᩣᨴᨸᩮᨲᩥ, ᨿᩮᩣ ᨧ ᩈᨾᩣᨴᨸᩥᨲᩮᩣ ᨲᨳᨲ᩠ᨲᩣᨿ ᨸᨭᩥᨸᨩ᩠ᨩᨲᩥ. ᩈᨻ᩠ᨻᩮ ᨲᩮ ᨻᩉᩩᩴ ᨸᩩᨬ᩠ᨬᩴ ᨸᩈᩅᨶ᩠ᨲᩥ. ᨲᩴ ᨠᩥᩔ ᩉᩮᨲᩩ? ᩑᩅᨬ᩠ᩉᩮᨲᩴ, ᨧᩩᨶ᩠ᨴ, ᩉᩮᩣᨲᩥ ᩈ᩠ᩅᩣᨠ᩠ᨡᩣᨲᩮ ᨵᨾ᩠ᨾᩅᩥᨶᨿᩮ ᩈᩩᨸ᩠ᨸᩅᩮᨴᩥᨲᩮ ᨶᩥᨿ᩠ᨿᩣᨶᩥᨠᩮ ᩏᨸᩈᨾᩈᩴᩅᨲ᩠ᨲᨶᩥᨠᩮ ᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮ.

᪑᪖᪙. ‘‘ᩍᨵ ᨸᨶ, ᨧᩩᨶ᩠ᨴ, ᩈᨲ᩠ᨳᩣ ᨧ ᩉᩮᩣᨲᩥ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨵᨾ᩠ᨾᩮᩣ ᨧ ᩈ᩠ᩅᩣᨠ᩠ᨡᩣᨲᩮᩣ ᩈᩩᨸ᩠ᨸᩅᩮᨴᩥᨲᩮᩣ ᨶᩥᨿ᩠ᨿᩣᨶᩥᨠᩮᩣ ᩏᨸᩈᨾᩈᩴᩅᨲ᩠ᨲᨶᩥᨠᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮᩣ, ᩈᩣᩅᨠᩮᩣ ᨧ ᨲᩈ᩠ᨾᩥᩴ ᨵᨾ᩠ᨾᩮ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩮᩣ ᩅᩥᩉᩁᨲᩥ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩮᩣ ᩋᨶᩩᨵᨾ᩠ᨾᨧᩣᩁᩦ, ᩈᨾᩣᨴᩣᨿ ᨲᩴ ᨵᨾ᩠ᨾᩴ ᩅᨲ᩠ᨲᨲᩥ. ᩈᩮᩣ ᩑᩅᨾᩔ ᩅᨧᨶᩦᨿᩮᩣ – ‘ᨲᩔ ᨲᩮ, ᩌᩅᩩᩈᩮᩣ, ᩃᩣᨽᩣ, ᨲᩔ ᨲᩮ ᩈᩩᩃᨴ᩠ᨵᩴ, ᩈᨲ᩠ᨳᩣ ᨧ ᨲᩮ [ᩈᨲ᩠ᨳᩣ ᨧ ᨲᩮ ᩋᩁᩉᩴ (ᩈ᩠ᨿᩣ.)] ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨵᨾ᩠ᨾᩮᩣ ᨧ ᩈ᩠ᩅᩣᨠ᩠ᨡᩣᨲᩮᩣ ᩈᩩᨸ᩠ᨸᩅᩮᨴᩥᨲᩮᩣ ᨶᩥᨿ᩠ᨿᩣᨶᩥᨠᩮᩣ ᩏᨸᩈᨾᩈᩴᩅᨲ᩠ᨲᨶᩥᨠᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮᩣ. ᨲ᩠ᩅᨬ᩠ᨧ ᨲᩈ᩠ᨾᩥᩴ ᨵᨾ᩠ᨾᩮ ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨶ᩠ᨶᩮᩣ ᩅᩥᩉᩁᩈᩥ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩮᩣ ᩋᨶᩩᨵᨾ᩠ᨾᨧᩣᩁᩦ, ᩈᨾᩣᨴᩣᨿ ᨲᩴ ᨵᨾ᩠ᨾᩴ ᩅᨲ᩠ᨲᩈᩦ’ᨲᩥ. ᩍᨲᩥ ᨡᩮᩣ, ᨧᩩᨶ᩠ᨴ, ᩈᨲ᩠ᨳᩣᨸᩥ ᨲᨲ᩠ᨳ ᨸᩣᩈᩴᩈᩮᩣ, ᨵᨾ᩠ᨾᩮᩣᨸᩥ ᨲᨲ᩠ᨳ ᨸᩣᩈᩴᩈᩮᩣ, ᩈᩣᩅᨠᩮᩣᨸᩥ ᨲᨲ᩠ᨳ ᩑᩅᩴ ᨸᩣᩈᩴᩈᩮᩣ. ᨿᩮᩣ ᨡᩮᩣ, ᨧᩩᨶ᩠ᨴ, ᩑᩅᩁᩪᨸᩴ ᩈᩣᩅᨠᩴ ᩑᩅᩴ ᩅᨴᩮᨿ᩠ᨿ – ‘ᩋᨴ᩠ᨵᩣᨿᩈ᩠ᨾᩣ ᨬᩣᨿᨸ᩠ᨸᨭᩥᨸᨶ᩠ᨶᩮᩣ ᨬᩣᨿᨾᩣᩁᩣᨵᩮᩔᨲᩦ’ᨲᩥ. ᨿᩮᩣ ᨧ ᨸᩈᩴᩈᨲᩥ, ᨿᨬ᩠ᨧ ᨸᩈᩴᩈᨲᩥ, ᨿᩮᩣ ᨧ ᨸᩈᩴᩈᩥᨲᩮᩣ [ᨸᩈᨲ᩠ᨳᩮᩣ (ᩈ᩠ᨿᩣ.)] ᨽᩥᨿ᩠ᨿᩮᩣᩈᩮᩣ ᨾᨲ᩠ᨲᩣᨿ ᩅᩦᩁᩥᨿᩴ ᩌᩁᨽᨲᩥ. ᩈᨻ᩠ᨻᩮ ᨲᩮ ᨻᩉᩩᩴ ᨸᩩᨬ᩠ᨬᩴ ᨸᩈᩅᨶ᩠ᨲᩥ. ᨲᩴ ᨠᩥᩔ ᩉᩮᨲᩩ? ᩑᩅᨬ᩠ᩉᩮᨲᩴ, ᨧᩩᨶ᩠ᨴ, ᩉᩮᩣᨲᩥ ᩈ᩠ᩅᩣᨠ᩠ᨡᩣᨲᩮ ᨵᨾ᩠ᨾᩅᩥᨶᨿᩮ ᩈᩩᨸ᩠ᨸᩅᩮᨴᩥᨲᩮ ᨶᩥᨿ᩠ᨿᩣᨶᩥᨠᩮ ᩏᨸᩈᨾᩈᩴᩅᨲ᩠ᨲᨶᩥᨠᩮ ᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮ.

ᩈᩣᩅᨠᩣᨶᩩᨲᨸ᩠ᨸᩈᨲ᩠ᨳᩩ

᪑᪗᪐. ‘‘ᩍᨵ ᨸᨶ, ᨧᩩᨶ᩠ᨴ, ᩈᨲ᩠ᨳᩣ ᨧ ᩃᩮᩣᨠᩮ ᩏᨴᨸᩣᨴᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨵᨾ᩠ᨾᩮᩣ ᨧ ᩈ᩠ᩅᩣᨠ᩠ᨡᩣᨲᩮᩣ ᩈᩩᨸ᩠ᨸᩅᩮᨴᩥᨲᩮᩣ ᨶᩥᨿ᩠ᨿᩣᨶᩥᨠᩮᩣ ᩏᨸᩈᨾᩈᩴᩅᨲ᩠ᨲᨶᩥᨠᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮᩣ, ᩋᩅᩥᨬ᩠ᨬᩣᨸᩥᨲᨲ᩠ᨳᩣ ᨧᩔ ᩉᩮᩣᨶ᩠ᨲᩥ ᩈᩣᩅᨠᩣ ᩈᨴ᩠ᨵᨾ᩠ᨾᩮ, ᨶ ᨧ ᨲᩮᩈᩴ ᨠᩮᩅᩃᩴ ᨸᩁᩥᨸᩪᩁᩴ ᨻᩕᩉ᩠ᨾᨧᩁᩥᨿᩴ ᩌᩅᩥᨠᨲᩴ ᩉᩮᩣᨲᩥ ᩏᨲ᩠ᨲᩣᨶᩦᨠᨲᩴ ᩈᨻ᩠ᨻᩈᨦ᩠ᨣᩣᩉᨸᨴᨠᨲᩴ ᩈᨸ᩠ᨸᩣᨭᩥᩉᩦᩁᨠᨲᩴ ᨿᩣᩅ ᨴᩮᩅᨾᨶᩩᩔᩮᩉᩥ ᩈᩩᨸ᩠ᨸᨠᩣᩈᩥᨲᩴ. ᩋᨳ ᨶᩮᩈᩴ ᩈᨲ᩠ᨳᩩᨶᩮᩣ ᩋᨶ᩠ᨲᩁᨵᩣᨶᩴ ᩉᩮᩣᨲᩥ. ᩑᩅᩁᩪᨸᩮᩣ ᨡᩮᩣ, ᨧᩩᨶ᩠ᨴ, ᩈᨲ᩠ᨳᩣ ᩈᩣᩅᨠᩣᨶᩴ ᨠᩣᩃᨦ᩠ᨠᨲᩮᩣ ᩋᨶᩩᨲᨸ᩠ᨸᩮᩣ ᩉᩮᩣᨲᩥ. ᨲᩴ ᨠᩥᩔ ᩉᩮᨲᩩ? ᩈᨲ᩠ᨳᩣ ᨧ ᨶᩮᩣ ᩃᩮᩣᨠᩮ ᩏᨴᨸᩣᨴᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨵᨾ᩠ᨾᩮᩣ ᨧ ᩈ᩠ᩅᩣᨠ᩠ᨡᩣᨲᩮᩣ ᩈᩩᨸ᩠ᨸᩅᩮᨴᩥᨲᩮᩣ ᨶᩥᨿ᩠ᨿᩣᨶᩥᨠᩮᩣ ᩏᨸᩈᨾᩈᩴᩅᨲ᩠ᨲᨶᩥᨠᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮᩣ, ᩋᩅᩥᨬ᩠ᨬᩣᨸᩥᨲᨲ᩠ᨳᩣ ᨧᨾ᩠ᩉ ᩈᨴ᩠ᨵᨾ᩠ᨾᩮ, ᨶ ᨧ ᨶᩮᩣ ᨠᩮᩅᩃᩴ ᨸᩁᩥᨸᩪᩁᩴ ᨻᩕᩉ᩠ᨾᨧᩁᩥᨿᩴ ᩌᩅᩥᨠᨲᩴ ᩉᩮᩣᨲᩥ ᩏᨲ᩠ᨲᩣᨶᩦᨠᨲᩴ ᩈᨻ᩠ᨻᩈᨦ᩠ᨣᩣᩉᨸᨴᨠᨲᩴ ᩈᨸ᩠ᨸᩣᨭᩥᩉᩦᩁᨠᨲᩴ ᨿᩣᩅ ᨴᩮᩅᨾᨶᩩᩔᩮᩉᩥ ᩈᩩᨸ᩠ᨸᨠᩣᩈᩥᨲᩴ. ᩋᨳ ᨶᩮᩣ ᩈᨲ᩠ᨳᩩᨶᩮᩣ ᩋᨶ᩠ᨲᩁᨵᩣᨶᩴ ᩉᩮᩣᨲᩦᨲᩥ. ᩑᩅᩁᩪᨸᩮᩣ ᨡᩮᩣ, ᨧᩩᨶ᩠ᨴ, ᩈᨲ᩠ᨳᩣ ᩈᩣᩅᨠᩣᨶᩴ ᨠᩣᩃᨦ᩠ᨠᨲᩮᩣ ᩋᨶᩩᨲᨸ᩠ᨸᩮᩣ ᩉᩮᩣᨲᩥ.

ᩈᩣᩅᨠᩣᨶᨶᩩᨲᨸ᩠ᨸᩈᨲ᩠ᨳᩩ

᪑᪗᪑. ‘‘ᩍᨵ ᨸᨶ, ᨧᩩᨶ᩠ᨴ, ᩈᨲ᩠ᨳᩣ ᨧ ᩃᩮᩣᨠᩮ ᩏᨴᨸᩣᨴᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ. ᨵᨾ᩠ᨾᩮᩣ ᨧ ᩈ᩠ᩅᩣᨠ᩠ᨡᩣᨲᩮᩣ ᩈᩩᨸ᩠ᨸᩅᩮᨴᩥᨲᩮᩣ ᨶᩥᨿ᩠ᨿᩣᨶᩥᨠᩮᩣ ᩏᨸᩈᨾᩈᩴᩅᨲ᩠ᨲᨶᩥᨠᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮᩣ. ᩅᩥᨬ᩠ᨬᩣᨸᩥᨲᨲ᩠ᨳᩣ ᨧᩔ ᩉᩮᩣᨶ᩠ᨲᩥ ᩈᩣᩅᨠᩣ ᩈᨴ᩠ᨵᨾ᩠ᨾᩮ, ᨠᩮᩅᩃᨬ᩠ᨧ ᨲᩮᩈᩴ ᨸᩁᩥᨸᩪᩁᩴ ᨻᩕᩉ᩠ᨾᨧᩁᩥᨿᩴ ᩌᩅᩥᨠᨲᩴ ᩉᩮᩣᨲᩥ ᩏᨲ᩠ᨲᩣᨶᩦᨠᨲᩴ ᩈᨻ᩠ᨻᩈᨦ᩠ᨣᩣᩉᨸᨴᨠᨲᩴ ᩈᨸ᩠ᨸᩣᨭᩥᩉᩦᩁᨠᨲᩴ ᨿᩣᩅ ᨴᩮᩅᨾᨶᩩᩔᩮᩉᩥ ᩈᩩᨸ᩠ᨸᨠᩣᩈᩥᨲᩴ. ᩋᨳ ᨶᩮᩈᩴ ᩈᨲ᩠ᨳᩩᨶᩮᩣ ᩋᨶ᩠ᨲᩁᨵᩣᨶᩴ ᩉᩮᩣᨲᩥ. ᩑᩅᩁᩪᨸᩮᩣ ᨡᩮᩣ, ᨧᩩᨶ᩠ᨴ, ᩈᨲ᩠ᨳᩣ ᩈᩣᩅᨠᩣᨶᩴ ᨠᩣᩃᨦ᩠ᨠᨲᩮᩣ ᩋᨶᨶᩩᨲᨸ᩠ᨸᩮᩣ ᩉᩮᩣᨲᩥ. ᨲᩴ ᨠᩥᩔ ᩉᩮᨲᩩ? ᩈᨲ᩠ᨳᩣ ᨧ ᨶᩮᩣ ᩃᩮᩣᨠᩮ ᩏᨴᨸᩣᨴᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ. ᨵᨾ᩠ᨾᩮᩣ ᨧ ᩈ᩠ᩅᩣᨠ᩠ᨡᩣᨲᩮᩣ ᩈᩩᨸ᩠ᨸᩅᩮᨴᩥᨲᩮᩣ ᨶᩥᨿ᩠ᨿᩣᨶᩥᨠᩮᩣ ᩏᨸᩈᨾᩈᩴᩅᨲ᩠ᨲᨶᩥᨠᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮᩣ. ᩅᩥᨬ᩠ᨬᩣᨸᩥᨲᨲ᩠ᨳᩣ ᨧᨾ᩠ᩉ ᩈᨴ᩠ᨵᨾ᩠ᨾᩮ, ᨠᩮᩅᩃᨬ᩠ᨧ ᨶᩮᩣ ᨸᩁᩥᨸᩪᩁᩴ ᨻᩕᩉ᩠ᨾᨧᩁᩥᨿᩴ ᩌᩅᩥᨠᨲᩴ ᩉᩮᩣᨲᩥ ᩏᨲ᩠ᨲᩣᨶᩦᨠᨲᩴ ᩈᨻ᩠ᨻᩈᨦ᩠ᨣᩣᩉᨸᨴᨠᨲᩴ ᩈᨸ᩠ᨸᩣᨭᩥᩉᩦᩁᨠᨲᩴ ᨿᩣᩅ ᨴᩮᩅᨾᨶᩩᩔᩮᩉᩥ ᩈᩩᨸ᩠ᨸᨠᩣᩈᩥᨲᩴ. ᩋᨳ ᨶᩮᩣ ᩈᨲ᩠ᨳᩩᨶᩮᩣ ᩋᨶ᩠ᨲᩁᨵᩣᨶᩴ ᩉᩮᩣᨲᩦᨲᩥ. ᩑᩅᩁᩪᨸᩮᩣ ᨡᩮᩣ, ᨧᩩᨶ᩠ᨴ, ᩈᨲ᩠ᨳᩣ ᩈᩣᩅᨠᩣᨶᩴ ᨠᩣᩃᨦ᩠ᨠᨲᩮᩣ ᩋᨶᨶᩩᨲᨸ᩠ᨸᩮᩣ ᩉᩮᩣᨲᩥ.

ᨻᩕᩉ᩠ᨾᨧᩁᩥᨿᩋᨸᩁᩥᨸᩪᩁᩣᨴᩥᨠᨳᩣ

᪑᪗᪒. ‘‘ᩑᨲᩮᩉᩥ ᨧᩮᨸᩥ, ᨧᩩᨶ᩠ᨴ, ᩋᨦ᩠ᨣᩮᩉᩥ ᩈᨾᨶ᩠ᨶᩣᨣᨲᩴ ᨻᩕᩉ᩠ᨾᨧᩁᩥᨿᩴ ᩉᩮᩣᨲᩥ, ᨶᩮᩣ ᨧ ᨡᩮᩣ ᩈᨲ᩠ᨳᩣ ᩉᩮᩣᨲᩥ ᨳᩮᩁᩮᩣ ᩁᨲ᩠ᨲᨬ᩠ᨬᩪ ᨧᩥᩁᨸᨻ᩠ᨻᨩᩥᨲᩮᩣ ᩋᨴ᩠ᨵᨣᨲᩮᩣ ᩅᨿᩮᩣᩋᨶᩩᨸ᩠ᨸᨲ᩠ᨲᩮᩣ. ᩑᩅᩴ ᨲᩴ ᨻᩕᩉ᩠ᨾᨧᩁᩥᨿᩴ ᩋᨸᩁᩥᨸᩪᩁᩴ ᩉᩮᩣᨲᩥ ᨲᩮᨶᨦ᩠ᨣᩮᨶ.

‘‘ᨿᨲᩮᩣ ᨧ ᨡᩮᩣ, ᨧᩩᨶ᩠ᨴ, ᩑᨲᩮᩉᩥ ᨧᩮᩅ ᩋᨦ᩠ᨣᩮᩉᩥ ᩈᨾᨶ᩠ᨶᩣᨣᨲᩴ ᨻᩕᩉ᩠ᨾᨧᩁᩥᨿᩴ ᩉᩮᩣᨲᩥ, ᩈᨲ᩠ᨳᩣ ᨧ ᩉᩮᩣᨲᩥ ᨳᩮᩁᩮᩣ ᩁᨲ᩠ᨲᨬ᩠ᨬᩪ ᨧᩥᩁᨸᨻ᩠ᨻᨩᩥᨲᩮᩣ ᩋᨴ᩠ᨵᨣᨲᩮᩣ ᩅᨿᩮᩣᩋᨶᩩᨸ᩠ᨸᨲ᩠ᨲᩮᩣ. ᩑᩅᩴ ᨲᩴ ᨻᩕᩉ᩠ᨾᨧᩁᩥᨿᩴ ᨸᩁᩥᨸᩪᩁᩴ ᩉᩮᩣᨲᩥ ᨲᩮᨶᨦ᩠ᨣᩮᨶ.

᪑᪗᪓. ‘‘ᩑᨲᩮᩉᩥ ᨧᩮᨸᩥ, ᨧᩩᨶ᩠ᨴ, ᩋᨦ᩠ᨣᩮᩉᩥ ᩈᨾᨶ᩠ᨶᩣᨣᨲᩴ ᨻᩕᩉ᩠ᨾᨧᩁᩥᨿᩴ ᩉᩮᩣᨲᩥ, ᩈᨲ᩠ᨳᩣ ᨧ ᩉᩮᩣᨲᩥ ᨳᩮᩁᩮᩣ ᩁᨲ᩠ᨲᨬ᩠ᨬᩪ ᨧᩥᩁᨸᨻ᩠ᨻᨩᩥᨲᩮᩣ ᩋᨴ᩠ᨵᨣᨲᩮᩣ ᩅᨿᩮᩣᩋᨶᩩᨸ᩠ᨸᨲ᩠ᨲᩮᩣ, ᨶᩮᩣ ᨧ ᨡ᩠ᩅᩔ ᨳᩮᩁᩣ ᨽᩥᨠ᩠ᨡᩪ ᩈᩣᩅᨠᩣ ᩉᩮᩣᨶ᩠ᨲᩥ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨸᨲ᩠ᨲᨿᩮᩣᨣᨠ᩠ᨡᩮᨾᩣ. ᩋᩃᩴ ᩈᨾᨠ᩠ᨡᩣᨲᩩᩴ ᩈᨴ᩠ᨵᨾ᩠ᨾᩔ, ᩋᩃᩴ ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᩉᩥ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᨲᩩᩴ. ᩑᩅᩴ ᨲᩴ ᨻᩕᩉ᩠ᨾᨧᩁᩥᨿᩴ ᩋᨸᩁᩥᨸᩪᩁᩴ ᩉᩮᩣᨲᩥ ᨲᩮᨶᨦ᩠ᨣᩮᨶ.

‘‘ᨿᨲᩮᩣ ᨧ ᨡᩮᩣ, ᨧᩩᨶ᩠ᨴ, ᩑᨲᩮᩉᩥ ᨧᩮᩅ ᩋᨦ᩠ᨣᩮᩉᩥ ᩈᨾᨶ᩠ᨶᩣᨣᨲᩴ ᨻᩕᩉ᩠ᨾᨧᩁᩥᨿᩴ ᩉᩮᩣᨲᩥ, ᩈᨲ᩠ᨳᩣ ᨧ ᩉᩮᩣᨲᩥ ᨳᩮᩁᩮᩣ ᩁᨲ᩠ᨲᨬ᩠ᨬᩪ ᨧᩥᩁᨸᨻ᩠ᨻᨩᩥᨲᩮᩣ ᩋᨴ᩠ᨵᨣᨲᩮᩣ ᩅᨿᩮᩣᩋᨶᩩᨸ᩠ᨸᨲ᩠ᨲᩮᩣ, ᨳᩮᩁᩣ ᨧᩔ ᨽᩥᨠ᩠ᨡᩪ ᩈᩣᩅᨠᩣ ᩉᩮᩣᨶ᩠ᨲᩥ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨸᨲ᩠ᨲᨿᩮᩣᨣᨠ᩠ᨡᩮᨾᩣ. ᩋᩃᩴ ᩈᨾᨠ᩠ᨡᩣᨲᩩᩴ ᩈᨴ᩠ᨵᨾ᩠ᨾᩔ, ᩋᩃᩴ ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᩉᩥ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᨲᩩᩴ. ᩑᩅᩴ ᨲᩴ ᨻᩕᩉ᩠ᨾᨧᩁᩥᨿᩴ ᨸᩁᩥᨸᩪᩁᩴ ᩉᩮᩣᨲᩥ ᨲᩮᨶᨦ᩠ᨣᩮᨶ.

᪑᪗᪔. ‘‘ᩑᨲᩮᩉᩥ ᨧᩮᨸᩥ, ᨧᩩᨶ᩠ᨴ, ᩋᨦ᩠ᨣᩮᩉᩥ ᩈᨾᨶ᩠ᨶᩣᨣᨲᩴ ᨻᩕᩉ᩠ᨾᨧᩁᩥᨿᩴ ᩉᩮᩣᨲᩥ, ᩈᨲ᩠ᨳᩣ ᨧ ᩉᩮᩣᨲᩥ ᨳᩮᩁᩮᩣ ᩁᨲ᩠ᨲᨬ᩠ᨬᩪ ᨧᩥᩁᨸᨻ᩠ᨻᨩᩥᨲᩮᩣ ᩋᨴ᩠ᨵᨣᨲᩮᩣ ᩅᨿᩮᩣᩋᨶᩩᨸ᩠ᨸᨲ᩠ᨲᩮᩣ, ᨳᩮᩁᩣ ᨧᩔ ᨽᩥᨠ᩠ᨡᩪ ᩈᩣᩅᨠᩣ ᩉᩮᩣᨶ᩠ᨲᩥ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨸᨲ᩠ᨲᨿᩮᩣᨣᨠ᩠ᨡᩮᨾᩣ. ᩋᩃᩴ ᩈᨾᨠ᩠ᨡᩣᨲᩩᩴ ᩈᨴ᩠ᨵᨾ᩠ᨾᩔ, ᩋᩃᩴ ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᩉᩥ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᨲᩩᩴ. ᨶᩮᩣ ᨧ ᨡ᩠ᩅᩔ ᨾᨩ᩠ᨫᩥᨾᩣ ᨽᩥᨠ᩠ᨡᩪ ᩈᩣᩅᨠᩣ ᩉᩮᩣᨶ᩠ᨲᩥ…ᨸᩮ… ᨾᨩ᩠ᨫᩥᨾᩣ ᨧᩔ ᨽᩥᨠ᩠ᨡᩪ ᩈᩣᩅᨠᩣ ᩉᩮᩣᨶ᩠ᨲᩥ, ᨶᩮᩣ ᨧ ᨡ᩠ᩅᩔ ᨶᩅᩣ ᨽᩥᨠ᩠ᨡᩪ ᩈᩣᩅᨠᩣ ᩉᩮᩣᨶ᩠ᨲᩥ…ᨸᩮ… ᨶᩅᩣ ᨧᩔ ᨽᩥᨠ᩠ᨡᩪ ᩈᩣᩅᨠᩣ ᩉᩮᩣᨶ᩠ᨲᩥ, ᨶᩮᩣ ᨧ ᨡ᩠ᩅᩔ ᨳᩮᩁᩣ ᨽᩥᨠ᩠ᨡᩩᨶᩥᨿᩮᩣ ᩈᩣᩅᩥᨠᩣ ᩉᩮᩣᨶ᩠ᨲᩥ…ᨸᩮ… ᨳᩮᩁᩣ ᨧᩔ ᨽᩥᨠ᩠ᨡᩩᨶᩥᨿᩮᩣ ᩈᩣᩅᩥᨠᩣ ᩉᩮᩣᨶ᩠ᨲᩥ, ᨶᩮᩣ ᨧ ᨡ᩠ᩅᩔ ᨾᨩ᩠ᨫᩥᨾᩣ ᨽᩥᨠ᩠ᨡᩩᨶᩥᨿᩮᩣ ᩈᩣᩅᩥᨠᩣ ᩉᩮᩣᨶ᩠ᨲᩥ…ᨸᩮ… ᨾᨩ᩠ᨫᩥᨾᩣ ᨧᩔ ᨽᩥᨠ᩠ᨡᩩᨶᩥᨿᩮᩣ ᩈᩣᩅᩥᨠᩣ ᩉᩮᩣᨶ᩠ᨲᩥ, ᨶᩮᩣ ᨧ ᨡ᩠ᩅᩔ ᨶᩅᩣ ᨽᩥᨠ᩠ᨡᩩᨶᩥᨿᩮᩣ ᩈᩣᩅᩥᨠᩣ ᩉᩮᩣᨶ᩠ᨲᩥ…ᨸᩮ… ᨶᩅᩣ ᨧᩔ ᨽᩥᨠ᩠ᨡᩩᨶᩥᨿᩮᩣ ᩈᩣᩅᩥᨠᩣ ᩉᩮᩣᨶ᩠ᨲᩥ, ᨶᩮᩣ ᨧ ᨡ᩠ᩅᩔ ᩏᨸᩣᩈᨠᩣ ᩈᩣᩅᨠᩣ ᩉᩮᩣᨶ᩠ᨲᩥ ᨣᩥᩉᩦ ᩒᨴᩣᨲᩅᩈᨶᩣ ᨻᩕᩉ᩠ᨾᨧᩣᩁᩥᨶᩮᩣ…ᨸᩮ… ᩏᨸᩣᩈᨠᩣ ᨧᩔ ᩈᩣᩅᨠᩣ ᩉᩮᩣᨶ᩠ᨲᩥ ᨣᩥᩉᩦ ᩒᨴᩣᨲᩅᩈᨶᩣ ᨻᩕᩉ᩠ᨾᨧᩣᩁᩥᨶᩮᩣ, ᨶᩮᩣ ᨧ ᨡ᩠ᩅᩔ ᩏᨸᩣᩈᨠᩣ ᩈᩣᩅᨠᩣ ᩉᩮᩣᨶ᩠ᨲᩥ ᨣᩥᩉᩦ ᩒᨴᩣᨲᩅᩈᨶᩣ ᨠᩣᨾᨽᩮᩣᨣᩥᨶᩮᩣ…ᨸᩮ… ᩏᨸᩣᩈᨠᩣ ᨧᩔ ᩈᩣᩅᨠᩣ ᩉᩮᩣᨶ᩠ᨲᩥ ᨣᩥᩉᩦ ᩒᨴᩣᨲᩅᩈᨶᩣ ᨠᩣᨾᨽᩮᩣᨣᩥᨶᩮᩣ, ᨶᩮᩣ ᨧ ᨡ᩠ᩅᩔ ᩏᨸᩣᩈᩥᨠᩣ ᩈᩣᩅᩥᨠᩣ ᩉᩮᩣᨶ᩠ᨲᩥ ᨣᩥᩉᩥᨶᩥᨿᩮᩣ ᩒᨴᩣᨲᩅᩈᨶᩣ ᨻᩕᩉ᩠ᨾᨧᩣᩁᩥᨶᩥᨿᩮᩣ…ᨸᩮ… ᩏᨸᩣᩈᩥᨠᩣ ᨧᩔ ᩈᩣᩅᩥᨠᩣ ᩉᩮᩣᨶ᩠ᨲᩥ ᨣᩥᩉᩥᨶᩥᨿᩮᩣ ᩒᨴᩣᨲᩅᩈᨶᩣ ᨻᩕᩉ᩠ᨾᨧᩣᩁᩥᨶᩥᨿᩮᩣ, ᨶᩮᩣ ᨧ ᨡ᩠ᩅᩔ ᩏᨸᩣᩈᩥᨠᩣ ᩈᩣᩅᩥᨠᩣ ᩉᩮᩣᨶ᩠ᨲᩥ ᨣᩥᩉᩥᨶᩥᨿᩮᩣ ᩒᨴᩣᨲᩅᩈᨶᩣ ᨠᩣᨾᨽᩮᩣᨣᩥᨶᩥᨿᩮᩣ…ᨸᩮ… ᩏᨸᩣᩈᩥᨠᩣ ᨧᩔ ᩈᩣᩅᩥᨠᩣ ᩉᩮᩣᨶ᩠ᨲᩥ ᨣᩥᩉᩥᨶᩥᨿᩮᩣ ᩒᨴᩣᨲᩅᩈᨶᩣ ᨠᩣᨾᨽᩮᩣᨣᩥᨶᩥᨿᩮᩣ, ᨶᩮᩣ ᨧ ᨡ᩠ᩅᩔ ᨻᩕᩉ᩠ᨾᨧᩁᩥᨿᩴ ᩉᩮᩣᨲᩥ ᩍᨴ᩠ᨵᨬ᩠ᨧᩮᩅ ᨹᩦᨲᨬ᩠ᨧ ᩅᩥᨲ᩠ᨳᩣᩁᩥᨠᩴ ᨻᩣᩉᩩᨩᨬ᩠ᨬᩴ ᨸᩩᨳᩩᨽᩪᨲᩴ ᨿᩣᩅ ᨴᩮᩅᨾᨶᩩᩔᩮᩉᩥ ᩈᩩᨸ᩠ᨸᨠᩣᩈᩥᨲᩴ…ᨸᩮ… ᨻᩕᩉ᩠ᨾᨧᩁᩥᨿᨬ᩠ᨧᩔ ᩉᩮᩣᨲᩥ ᩍᨴ᩠ᨵᨬ᩠ᨧᩮᩅ ᨹᩦᨲᨬ᩠ᨧ ᩅᩥᨲ᩠ᨳᩣᩁᩥᨠᩴ ᨻᩣᩉᩩᨩᨬ᩠ᨬᩴ ᨸᩩᨳᩩᨽᩪᨲᩴ ᨿᩣᩅ ᨴᩮᩅᨾᨶᩩᩔᩮᩉᩥ ᩈᩩᨸ᩠ᨸᨠᩣᩈᩥᨲᩴ, ᨶᩮᩣ ᨧ ᨡᩮᩣ ᩃᩣᨽᨣ᩠ᨣᨿᩈᨣ᩠ᨣᨸ᩠ᨸᨲ᩠ᨲᩴ. ᩑᩅᩴ ᨲᩴ ᨻᩕᩉ᩠ᨾᨧᩁᩥᨿᩴ ᩋᨸᩁᩥᨸᩪᩁᩴ ᩉᩮᩣᨲᩥ ᨲᩮᨶᨦ᩠ᨣᩮᨶ.

‘‘ᨿᨲᩮᩣ ᨧ ᨡᩮᩣ, ᨧᩩᨶ᩠ᨴ, ᩑᨲᩮᩉᩥ ᨧᩮᩅ ᩋᨦ᩠ᨣᩮᩉᩥ ᩈᨾᨶ᩠ᨶᩣᨣᨲᩴ ᨻᩕᩉ᩠ᨾᨧᩁᩥᨿᩴ ᩉᩮᩣᨲᩥ, ᩈᨲ᩠ᨳᩣ ᨧ ᩉᩮᩣᨲᩥ ᨳᩮᩁᩮᩣ ᩁᨲ᩠ᨲᨬ᩠ᨬᩪ ᨧᩥᩁᨸᨻ᩠ᨻᨩᩥᨲᩮᩣ ᩋᨴ᩠ᨵᨣᨲᩮᩣ ᩅᨿᩮᩣᩋᨶᩩᨸ᩠ᨸᨲ᩠ᨲᩮᩣ, ᨳᩮᩁᩣ ᨧᩔ ᨽᩥᨠ᩠ᨡᩪ ᩈᩣᩅᨠᩣ ᩉᩮᩣᨶ᩠ᨲᩥ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨸᨲ᩠ᨲᨿᩮᩣᨣᨠ᩠ᨡᩮᨾᩣ. ᩋᩃᩴ ᩈᨾᨠ᩠ᨡᩣᨲᩩᩴ ᩈᨴ᩠ᨵᨾ᩠ᨾᩔ, ᩋᩃᩴ ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᩉᩥ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᨲᩩᩴ. ᨾᨩ᩠ᨫᩥᨾᩣ ᨧᩔ ᨽᩥᨠ᩠ᨡᩪ ᩈᩣᩅᨠᩣ ᩉᩮᩣᨶ᩠ᨲᩥ…ᨸᩮ… ᨶᩅᩣ ᨧᩔ ᨽᩥᨠ᩠ᨡᩪ ᩈᩣᩅᨠᩣ ᩉᩮᩣᨶ᩠ᨲᩥ…ᨸᩮ… ᨳᩮᩁᩣ ᨧᩔ ᨽᩥᨠ᩠ᨡᩩᨶᩥᨿᩮᩣ ᩈᩣᩅᩥᨠᩣ ᩉᩮᩣᨶ᩠ᨲᩥ…ᨸᩮ… ᨾᨩ᩠ᨫᩥᨾᩣ ᨧᩔ ᨽᩥᨠ᩠ᨡᩩᨶᩥᨿᩮᩣ ᩈᩣᩅᩥᨠᩣ ᩉᩮᩣᨶ᩠ᨲᩥ…ᨸᩮ… ᨶᩅᩣ ᨧᩔ ᨽᩥᨠ᩠ᨡᩩᨶᩥᨿᩮᩣ ᩈᩣᩅᩥᨠᩣ ᩉᩮᩣᨶ᩠ᨲᩥ…ᨸᩮ… ᩏᨸᩣᩈᨠᩣ ᨧᩔ ᩈᩣᩅᨠᩣ ᩉᩮᩣᨶ᩠ᨲᩥ…ᨸᩮ… ᨣᩥᩉᩦ ᩒᨴᩣᨲᩅᩈᨶᩣ ᨻᩕᩉ᩠ᨾᨧᩣᩁᩥᨶᩮᩣ. ᩏᨸᩣᩈᨠᩣ ᨧᩔ ᩈᩣᩅᨠᩣ ᩉᩮᩣᨶ᩠ᨲᩥ ᨣᩥᩉᩦ ᩒᨴᩣᨲᩅᩈᨶᩣ ᨠᩣᨾᨽᩮᩣᨣᩥᨶᩮᩣ…ᨸᩮ… ᩏᨸᩣᩈᩥᨠᩣ ᨧᩔ ᩈᩣᩅᩥᨠᩣ ᩉᩮᩣᨶ᩠ᨲᩥ ᨣᩥᩉᩥᨶᩥᨿᩮᩣ ᩒᨴᩣᨲᩅᩈᨶᩣ ᨻᩕᩉ᩠ᨾᨧᩣᩁᩥᨶᩥᨿᩮᩣ…ᨸᩮ… ᩏᨸᩣᩈᩥᨠᩣ ᨧᩔ ᩈᩣᩅᩥᨠᩣ ᩉᩮᩣᨶ᩠ᨲᩥ ᨣᩥᩉᩥᨶᩥᨿᩮᩣ ᩒᨴᩣᨲᩅᩈᨶᩣ ᨠᩣᨾᨽᩮᩣᨣᩥᨶᩥᨿᩮᩣ…ᨸᩮ… ᨻᩕᩉ᩠ᨾᨧᩁᩥᨿᨬ᩠ᨧᩔ ᩉᩮᩣᨲᩥ ᩍᨴ᩠ᨵᨬ᩠ᨧᩮᩅ ᨹᩦᨲᨬ᩠ᨧ ᩅᩥᨲ᩠ᨳᩣᩁᩥᨠᩴ ᨻᩣᩉᩩᨩᨬ᩠ᨬᩴ ᨸᩩᨳᩩᨽᩪᨲᩴ ᨿᩣᩅ ᨴᩮᩅᨾᨶᩩᩔᩮᩉᩥ ᩈᩩᨸ᩠ᨸᨠᩣᩈᩥᨲᩴ, ᩃᩣᨽᨣ᩠ᨣᨸ᩠ᨸᨲ᩠ᨲᨬ᩠ᨧ ᨿᩈᨣ᩠ᨣᨸ᩠ᨸᨲ᩠ᨲᨬ᩠ᨧ. ᩑᩅᩴ ᨲᩴ ᨻᩕᩉ᩠ᨾᨧᩁᩥᨿᩴ ᨸᩁᩥᨸᩪᩁᩴ ᩉᩮᩣᨲᩥ ᨲᩮᨶᨦ᩠ᨣᩮᨶ.

᪑᪗᪕. ‘‘ᩋᩉᩴ ᨡᩮᩣ ᨸᨶ, ᨧᩩᨶ᩠ᨴ, ᩑᨲᩁᩉᩥ ᩈᨲ᩠ᨳᩣ ᩃᩮᩣᨠᩮ ᩏᨸ᩠ᨸᨶ᩠ᨶᩮᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ. ᨵᨾ᩠ᨾᩮᩣ ᨧ ᩈ᩠ᩅᩣᨠ᩠ᨡᩣᨲᩮᩣ ᩈᩩᨸ᩠ᨸᩅᩮᨴᩥᨲᩮᩣ ᨶᩥᨿ᩠ᨿᩣᨶᩥᨠᩮᩣ ᩏᨸᩈᨾᩈᩴᩅᨲ᩠ᨲᨶᩥᨠᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮᩣ. ᩅᩥᨬ᩠ᨬᩣᨸᩥᨲᨲ᩠ᨳᩣ ᨧ ᨾᩮ ᩈᩣᩅᨠᩣ ᩈᨴ᩠ᨵᨾ᩠ᨾᩮ, ᨠᩮᩅᩃᨬ᩠ᨧ ᨲᩮᩈᩴ ᨸᩁᩥᨸᩪᩁᩴ ᨻᩕᩉ᩠ᨾᨧᩁᩥᨿᩴ ᩌᩅᩥᨠᨲᩴ ᩏᨲ᩠ᨲᩣᨶᩦᨠᨲᩴ ᩈᨻ᩠ᨻᩈᨦ᩠ᨣᩣᩉᨸᨴᨠᨲᩴ ᩈᨸ᩠ᨸᩣᨭᩥᩉᩦᩁᨠᨲᩴ ᨿᩣᩅ ᨴᩮᩅᨾᨶᩩᩔᩮᩉᩥ ᩈᩩᨸ᩠ᨸᨠᩣᩈᩥᨲᩴ. ᩋᩉᩴ ᨡᩮᩣ ᨸᨶ, ᨧᩩᨶ᩠ᨴ, ᩑᨲᩁᩉᩥ ᩈᨲ᩠ᨳᩣ ᨳᩮᩁᩮᩣ ᩁᨲ᩠ᨲᨬ᩠ᨬᩪ ᨧᩥᩁᨸᨻ᩠ᨻᨩᩥᨲᩮᩣ ᩋᨴ᩠ᨵᨣᨲᩮᩣ ᩅᨿᩮᩣᩋᨶᩩᨸ᩠ᨸᨲ᩠ᨲᩮᩣ.

‘‘ᩈᨶ᩠ᨲᩥ ᨡᩮᩣ ᨸᨶ ᨾᩮ, ᨧᩩᨶ᩠ᨴ, ᩑᨲᩁᩉᩥ ᨳᩮᩁᩣ ᨽᩥᨠ᩠ᨡᩪ ᩈᩣᩅᨠᩣ ᩉᩮᩣᨶ᩠ᨲᩥ ᩅᩥᨿᨲ᩠ᨲᩣ ᩅᩥᨶᩦᨲᩣ ᩅᩥᩈᩣᩁᨴᩣ ᨸᨲ᩠ᨲᨿᩮᩣᨣᨠ᩠ᨡᩮᨾᩣ. ᩋᩃᩴ ᩈᨾᨠ᩠ᨡᩣᨲᩩᩴ ᩈᨴ᩠ᨵᨾ᩠ᨾᩔ, ᩋᩃᩴ ᩏᨸ᩠ᨸᨶ᩠ᨶᩴ ᨸᩁᨸ᩠ᨸᩅᩣᨴᩴ ᩈᩉᨵᨾ᩠ᨾᩮᩉᩥ ᩈᩩᨶᩥᨣ᩠ᨣᩉᩥᨲᩴ ᨶᩥᨣ᩠ᨣᩉᩮᨲ᩠ᩅᩣ ᩈᨸ᩠ᨸᩣᨭᩥᩉᩣᩁᩥᨿᩴ ᨵᨾ᩠ᨾᩴ ᨴᩮᩈᩮᨲᩩᩴ. ᩈᨶ᩠ᨲᩥ ᨡᩮᩣ ᨸᨶ ᨾᩮ, ᨧᩩᨶ᩠ᨴ, ᩑᨲᩁᩉᩥ ᨾᨩ᩠ᨫᩥᨾᩣ ᨽᩥᨠ᩠ᨡᩪ ᩈᩣᩅᨠᩣ…ᨸᩮ… ᩈᨶ᩠ᨲᩥ ᨡᩮᩣ ᨸᨶ ᨾᩮ, ᨧᩩᨶ᩠ᨴ, ᩑᨲᩁᩉᩥ ᨶᩅᩣ ᨽᩥᨠ᩠ᨡᩪ ᩈᩣᩅᨠᩣ…ᨸᩮ… ᩈᨶ᩠ᨲᩥ ᨡᩮᩣ ᨸᨶ ᨾᩮ, ᨧᩩᨶ᩠ᨴ, ᩑᨲᩁᩉᩥ ᨳᩮᩁᩣ ᨽᩥᨠ᩠ᨡᩩᨶᩥᨿᩮᩣ ᩈᩣᩅᩥᨠᩣ…ᨸᩮ… ᩈᨶ᩠ᨲᩥ ᨡᩮᩣ ᨸᨶ ᨾᩮ, ᨧᩩᨶ᩠ᨴ, ᩑᨲᩁᩉᩥ ᨾᨩ᩠ᨫᩥᨾᩣ ᨽᩥᨠ᩠ᨡᩩᨶᩥᨿᩮᩣ ᩈᩣᩅᩥᨠᩣ…ᨸᩮ… ᩈᨶ᩠ᨲᩥ ᨡᩮᩣ ᨸᨶ ᨾᩮ, ᨧᩩᨶ᩠ᨴ, ᩑᨲᩁᩉᩥ ᨶᩅᩣ ᨽᩥᨠ᩠ᨡᩩᨶᩥᨿᩮᩣ ᩈᩣᩅᩥᨠᩣ…ᨸᩮ… ᩈᨶ᩠ᨲᩥ ᨡᩮᩣ ᨸᨶ ᨾᩮ, ᨧᩩᨶ᩠ᨴ, ᩑᨲᩁᩉᩥ ᩏᨸᩣᩈᨠᩣ ᩈᩣᩅᨠᩣ ᨣᩥᩉᩦ ᩒᨴᩣᨲᩅᩈᨶᩣ ᨻᩕᩉ᩠ᨾᨧᩣᩁᩥᨶᩮᩣ…ᨸᩮ… ᩈᨶ᩠ᨲᩥ ᨡᩮᩣ ᨸᨶ ᨾᩮ, ᨧᩩᨶ᩠ᨴ, ᩑᨲᩁᩉᩥ ᩏᨸᩣᩈᨠᩣ ᩈᩣᩅᨠᩣ ᨣᩥᩉᩦ ᩒᨴᩣᨲᩅᩈᨶᩣ ᨠᩣᨾᨽᩮᩣᨣᩥᨶᩮᩣ…ᨸᩮ… ᩈᨶ᩠ᨲᩥ ᨡᩮᩣ ᨸᨶ ᨾᩮ, ᨧᩩᨶ᩠ᨴ, ᩑᨲᩁᩉᩥ ᩏᨸᩣᩈᩥᨠᩣ ᩈᩣᩅᩥᨠᩣ ᨣᩥᩉᩥᨶᩥᨿᩮᩣ ᩒᨴᩣᨲᩅᩈᨶᩣ ᨻᩕᩉ᩠ᨾᨧᩣᩁᩥᨶᩥᨿᩮᩣ…ᨸᩮ… ᩈᨶ᩠ᨲᩥ ᨡᩮᩣ ᨸᨶ ᨾᩮ, ᨧᩩᨶ᩠ᨴ, ᩑᨲᩁᩉᩥ ᩏᨸᩣᩈᩥᨠᩣ ᩈᩣᩅᩥᨠᩣ ᨣᩥᩉᩥᨶᩥᨿᩮᩣ ᩒᨴᩣᨲᩅᩈᨶᩣ ᨠᩣᨾᨽᩮᩣᨣᩥᨶᩥᨿᩮᩣ…ᨸᩮ… ᩑᨲᩁᩉᩥ ᨡᩮᩣ ᨸᨶ ᨾᩮ, ᨧᩩᨶ᩠ᨴ, ᨻᩕᩉ᩠ᨾᨧᩁᩥᨿᩴ ᩍᨴ᩠ᨵᨬ᩠ᨧᩮᩅ ᨹᩦᨲᨬ᩠ᨧ ᩅᩥᨲ᩠ᨳᩣᩁᩥᨠᩴ ᨻᩣᩉᩩᨩᨬ᩠ᨬᩴ ᨸᩩᨳᩩᨽᩪᨲᩴ ᨿᩣᩅ ᨴᩮᩅᨾᨶᩩᩔᩮᩉᩥ ᩈᩩᨸ᩠ᨸᨠᩣᩈᩥᨲᩴ.

᪑᪗᪖. ‘‘ᨿᩣᩅᨲᩣ ᨡᩮᩣ, ᨧᩩᨶ᩠ᨴ, ᩑᨲᩁᩉᩥ ᩈᨲ᩠ᨳᩣᩁᩮᩣ ᩃᩮᩣᨠᩮ ᩏᨸ᩠ᨸᨶ᩠ᨶᩣ, ᨶᩣᩉᩴ, ᨧᩩᨶ᩠ᨴ, ᩋᨬ᩠ᨬᩴ ᩑᨠᩈᨲ᩠ᨳᩣᩁᨾ᩠ᨸᩥ ᩈᨾᨶᩩᨸᩔᩣᨾᩥ ᩑᩅᩴᩃᩣᨽᨣ᩠ᨣᨿᩈᨣ᩠ᨣᨸ᩠ᨸᨲ᩠ᨲᩴ ᨿᨳᩁᩥᩅᩣᩉᩴ. ᨿᩣᩅᨲᩣ ᨡᩮᩣ ᨸᨶ, ᨧᩩᨶ᩠ᨴ, ᩑᨲᩁᩉᩥ ᩈᨦ᩠ᨥᩮᩣ ᩅᩣ ᨣᨱᩮᩣ ᩅᩣ ᩃᩮᩣᨠᩮ ᩏᨸ᩠ᨸᨶ᩠ᨶᩮᩣ; ᨶᩣᩉᩴ, ᨧᩩᨶ᩠ᨴ, ᩋᨬ᩠ᨬᩴ ᩑᨠᩴ ᩈᩴᨥᨾ᩠ᨸᩥ ᩈᨾᨶᩩᨸᩔᩣᨾᩥ ᩑᩅᩴᩃᩣᨽᨣ᩠ᨣᨿᩈᨣ᩠ᨣᨸ᩠ᨸᨲ᩠ᨲᩴ ᨿᨳᩁᩥᩅᩣᨿᩴ, ᨧᩩᨶ᩠ᨴ, ᨽᩥᨠ᩠ᨡᩩᩈᨦ᩠ᨥᩮᩣ. ᨿᩴ ᨡᩮᩣ ᨲᩴ, ᨧᩩᨶ᩠ᨴ, ᩈᨾ᩠ᨾᩣ ᩅᨴᨾᩣᨶᩮᩣ ᩅᨴᩮᨿ᩠ᨿ – ‘ᩈᨻ᩠ᨻᩣᨠᩣᩁᩈᨾ᩠ᨸᨶ᩠ᨶᩴ ᩈᨻ᩠ᨻᩣᨠᩣᩁᨸᩁᩥᨸᩪᩁᩴ ᩋᨶᩪᨶᨾᨶᨵᩥᨠᩴ ᩈ᩠ᩅᩣᨠ᩠ᨡᩣᨲᩴ ᨠᩮᩅᩃᩴ ᨸᩁᩥᨸᩪᩁᩴ ᨻᩕᩉ᩠ᨾᨧᩁᩥᨿᩴ ᩈᩩᨸ᩠ᨸᨠᩣᩈᩥᨲ’ᨶ᩠ᨲᩥ. ᩍᨴᨾᩮᩅ ᨲᩴ ᩈᨾ᩠ᨾᩣ ᩅᨴᨾᩣᨶᩮᩣ ᩅᨴᩮᨿ᩠ᨿ – ‘ᩈᨻ᩠ᨻᩣᨠᩣᩁᩈᨾ᩠ᨸᨶ᩠ᨶᩴ…ᨸᩮ… ᩈᩩᨸ᩠ᨸᨠᩣᩈᩥᨲ’ᨶ᩠ᨲᩥ.

‘‘ᩏᨴᨠᩮᩣ [ᩏᨴ᩠ᨴᨠᩮᩣ (ᩈᩦ. ᩈ᩠ᨿᩣ. ᨸᩦ.)] ᩈᩩᨴᩴ, ᨧᩩᨶ᩠ᨴ, ᩁᩣᨾᨸᩩᨲ᩠ᨲᩮᩣ ᩑᩅᩴ ᩅᩣᨧᩴ ᨽᩣᩈᨲᩥ – ‘ᨸᩔᩴ ᨶ ᨸᩔᨲᩦ’ᨲᩥ. ᨠᩥᨬ᩠ᨧ ᨸᩔᩴ ᨶ ᨸᩔᨲᩦᨲᩥ? ᨡᩩᩁᩔ ᩈᩣᨵᩩᨶᩥᩈᩥᨲᩔ ᨲᩃᨾᩔ ᨸᩔᨲᩥ, ᨵᩣᩁᨬ᩠ᨧ ᨡ᩠ᩅᩔ ᨶ ᨸᩔᨲᩥ. ᩍᨴᩴ ᩅᩩᨧ᩠ᨧᨲᩥ – ‘ᨸᩔᩴ ᨶ ᨸᩔᨲᩦ’ᨲᩥ. ᨿᩴ ᨡᩮᩣ ᨸᨶᩮᨲᩴ, ᨧᩩᨶ᩠ᨴ, ᩏᨴᨠᩮᨶ ᩁᩣᨾᨸᩩᨲ᩠ᨲᩮᨶ ᨽᩣᩈᩥᨲᩴ ᩉᩦᨶᩴ ᨣᨾ᩠ᨾᩴ ᨸᩮᩣᨳᩩᨩ᩠ᨩᨶᩥᨠᩴ ᩋᨶᩁᩥᨿᩴ ᩋᨶᨲ᩠ᨳᩈᩴᩉᩥᨲᩴ ᨡᩩᩁᨾᩮᩅ ᩈᨶ᩠ᨵᩣᨿ. ᨿᨬ᩠ᨧ ᨲᩴ [ᨿᨬ᩠ᨧᩮᨲᩴ (ᩈ᩠ᨿᩣ. ᨠ.)], ᨧᩩᨶ᩠ᨴ, ᩈᨾ᩠ᨾᩣ ᩅᨴᨾᩣᨶᩮᩣ ᩅᨴᩮᨿ᩠ᨿ – ‘ᨸᩔᩴ ᨶ ᨸᩔᨲᩦ’ᨲᩥ, ᩍᨴᨾᩮᩅ ᨲᩴ [ᩍᨴᨾᩮᩅᩮᨲᩴ (ᨠ.)] ᩈᨾ᩠ᨾᩣ ᩅᨴᨾᩣᨶᩮᩣ ᩅᨴᩮᨿ᩠ᨿ – ‘ᨸᩔᩴ ᨶ ᨸᩔᨲᩦ’ᨲᩥ. ᨠᩥᨬ᩠ᨧ ᨸᩔᩴ ᨶ ᨸᩔᨲᩦᨲᩥ? ᩑᩅᩴ ᩈᨻ᩠ᨻᩣᨠᩣᩁᩈᨾ᩠ᨸᨶ᩠ᨶᩴ ᩈᨻ᩠ᨻᩣᨠᩣᩁᨸᩁᩥᨸᩪᩁᩴ ᩋᨶᩪᨶᨾᨶᨵᩥᨠᩴ ᩈ᩠ᩅᩣᨠ᩠ᨡᩣᨲᩴ ᨠᩮᩅᩃᩴ ᨸᩁᩥᨸᩪᩁᩴ ᨻᩕᩉ᩠ᨾᨧᩁᩥᨿᩴ ᩈᩩᨸ᩠ᨸᨠᩣᩈᩥᨲᨶ᩠ᨲᩥ, ᩍᨲᩥ ᩉᩮᨲᩴ ᨸᩔᨲᩥ [ᩈᩩᨸ᩠ᨸᨠᩣᩈᩥᨲᩴ, ᩍᨲᩥ ᩉᩮᨲᩴ ᨶ ᨸᩔᨲᩦᨲᩥ (ᩈ᩠ᨿᩣ. ᨠ.)]. ᩍᨴᨾᩮᨲ᩠ᨳ ᩋᨸᨠᨯ᩠ᨰᩮᨿ᩠ᨿ, ᩑᩅᩴ ᨲᩴ ᨸᩁᩥᩈᩩᨴ᩠ᨵᨲᩁᩴ ᩋᩔᩣᨲᩥ, ᩍᨲᩥ ᩉᩮᨲᩴ ᨶ ᨸᩔᨲᩥ [ᨶ ᨸᩔᨲᩦᨲᩥ (ᩈ᩠ᨿᩣ. ᨠ.)]. ᩍᨴᨾᩮᨲ᩠ᨳ ᩏᨸᨠᨯ᩠ᨰᩮᨿ᩠ᨿ, ᩑᩅᩴ ᨲᩴ ᨸᩁᩥᨸᩪᩁᩴ [ᨸᩁᩥᩈᩩᨴ᩠ᨵᨲᩁᩴ (ᩈ᩠ᨿᩣ. ᨠ.), ᨸᩁᩥᨸᩪᩁᨲᩁᩴ (?)] ᩋᩔᩣᨲᩥ, ᩍᨲᩥ ᩉᩮᨲᩴ ᨶ ᨸᩔᨲᩥ. ᩍᨴᩴ ᩅᩩᨧ᩠ᨧᨲᩥ ᨧᩩᨶ᩠ᨴ – ‘ᨸᩔᩴ ᨶ ᨸᩔᨲᩦ’ᨲᩥ. ᨿᩴ ᨡᩮᩣ ᨲᩴ, ᨧᩩᨶ᩠ᨴ, ᩈᨾ᩠ᨾᩣ ᩅᨴᨾᩣᨶᩮᩣ ᩅᨴᩮᨿ᩠ᨿ – ‘ᩈᨻ᩠ᨻᩣᨠᩣᩁᩈᨾ᩠ᨸᨶ᩠ᨶᩴ…ᨸᩮ… ᨻᩕᩉ᩠ᨾᨧᩁᩥᨿᩴ ᩈᩩᨸ᩠ᨸᨠᩣᩈᩥᨲ’ᨶ᩠ᨲᩥ. ᩍᨴᨾᩮᩅ ᨲᩴ ᩈᨾ᩠ᨾᩣ ᩅᨴᨾᩣᨶᩮᩣ ᩅᨴᩮᨿ᩠ᨿ – ‘ᩈᨻ᩠ᨻᩣᨠᩣᩁᩈᨾ᩠ᨸᨶ᩠ᨶᩴ ᩈᨻ᩠ᨻᩣᨠᩣᩁᨸᩁᩥᨸᩪᩁᩴ ᩋᨶᩪᨶᨾᨶᨵᩥᨠᩴ ᩈ᩠ᩅᩣᨠ᩠ᨡᩣᨲᩴ ᨠᩮᩅᩃᩴ ᨸᩁᩥᨸᩪᩁᩴ ᨻᩕᩉ᩠ᨾᨧᩁᩥᨿᩴ ᩈᩩᨸ᩠ᨸᨠᩣᩈᩥᨲ’ᨶ᩠ᨲᩥ.

ᩈᨦ᩠ᨣᩣᨿᩥᨲᨻ᩠ᨻᨵᨾ᩠ᨾᩮᩣ

᪑᪗᪗. ᨲᩈ᩠ᨾᩣᨲᩥᩉ, ᨧᩩᨶ᩠ᨴ, ᨿᩮ ᩅᩮᩣ ᨾᨿᩣ ᨵᨾ᩠ᨾᩣ ᩋᨽᩥᨬ᩠ᨬᩣ ᨴᩮᩈᩥᨲᩣ, ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᨾ᩠ᨾ ᩈᨾᩣᨣᨾ᩠ᨾ ᩋᨲ᩠ᨳᩮᨶ ᩋᨲ᩠ᨳᩴ ᨻ᩠ᨿᨬ᩠ᨩᨶᩮᨶ ᨻ᩠ᨿᨬ᩠ᨩᨶᩴ ᩈᨦ᩠ᨣᩣᨿᩥᨲᨻ᩠ᨻᩴ ᨶ ᩅᩥᩅᨴᩥᨲᨻ᩠ᨻᩴ, ᨿᨳᨿᩥᨴᩴ ᨻᩕᩉ᩠ᨾᨧᩁᩥᨿᩴ ᩋᨴ᩠ᨵᨶᩥᨿᩴ ᩋᩔ ᨧᩥᩁᨭ᩠ᨮᩥᨲᩥᨠᩴ, ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᨠᨲᨾᩮ ᨧ ᨲᩮ, ᨧᩩᨶ᩠ᨴ, ᨵᨾ᩠ᨾᩣ ᨾᨿᩣ ᩋᨽᩥᨬ᩠ᨬᩣ ᨴᩮᩈᩥᨲᩣ, ᨿᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᨾ᩠ᨾ ᩈᨾᩣᨣᨾ᩠ᨾ ᩋᨲ᩠ᨳᩮᨶ ᩋᨲ᩠ᨳᩴ ᨻ᩠ᨿᨬ᩠ᨩᨶᩮᨶ ᨻ᩠ᨿᨬ᩠ᨩᨶᩴ ᩈᨦ᩠ᨣᩣᨿᩥᨲᨻ᩠ᨻᩴ ᨶ ᩅᩥᩅᨴᩥᨲᨻ᩠ᨻᩴ, ᨿᨳᨿᩥᨴᩴ ᨻᩕᩉ᩠ᨾᨧᩁᩥᨿᩴ ᩋᨴ᩠ᨵᨶᩥᨿᩴ ᩋᩔ ᨧᩥᩁᨭ᩠ᨮᩥᨲᩥᨠᩴ, ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ? ᩈᩮᨿ᩠ᨿᨳᩥᨴᩴ – ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩣ, ᨧᨲ᩠ᨲᩣᩁᩮᩣ ᩈᨾ᩠ᨾᨸ᩠ᨸᨵᩣᨶᩣ, ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ, ᨸᨬ᩠ᨧᩥᨶ᩠ᨴᩕᩥᨿᩣᨶᩥ, ᨸᨬ᩠ᨧ ᨻᩃᩣᨶᩥ, ᩈᨲ᩠ᨲ ᨻᩮᩣᨩ᩠ᨫᨦ᩠ᨣᩣ, ᩋᩁᩥᨿᩮᩣ ᩋᨭ᩠ᨮᨦ᩠ᨣᩥᨠᩮᩣ ᨾᨣ᩠ᨣᩮᩣ. ᩍᨾᩮ ᨡᩮᩣ ᨲᩮ, ᨧᩩᨶ᩠ᨴ, ᨵᨾ᩠ᨾᩣ ᨾᨿᩣ ᩋᨽᩥᨬ᩠ᨬᩣ ᨴᩮᩈᩥᨲᩣ. ᨿᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᨾ᩠ᨾ ᩈᨾᩣᨣᨾ᩠ᨾ ᩋᨲ᩠ᨳᩮᨶ ᩋᨲ᩠ᨳᩴ ᨻ᩠ᨿᨬ᩠ᨩᨶᩮᨶ ᨻ᩠ᨿᨬ᩠ᨩᨶᩴ ᩈᨦ᩠ᨣᩣᨿᩥᨲᨻ᩠ᨻᩴ ᨶ ᩅᩥᩅᨴᩥᨲᨻ᩠ᨻᩴ, ᨿᨳᨿᩥᨴᩴ ᨻᩕᩉ᩠ᨾᨧᩁᩥᨿᩴ ᩋᨴ᩠ᨵᨶᩥᨿᩴ ᩋᩔ ᨧᩥᩁᨭ᩠ᨮᩥᨲᩥᨠᩴ, ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ.

ᩈᨬ᩠ᨬᩣᨸᩮᨲᨻ᩠ᨻᩅᩥᨵᩥ

᪑᪗᪘. ‘‘ᨲᩮᩈᨬ᩠ᨧ ᩅᩮᩣ, ᨧᩩᨶ᩠ᨴ, ᩈᨾᨣ᩠ᨣᩣᨶᩴ ᩈᨾ᩠ᨾᩮᩣᨴᨾᩣᨶᩣᨶᩴ ᩋᩅᩥᩅᨴᨾᩣᨶᩣᨶᩴ ᩈᩥᨠ᩠ᨡᨲᩴ [ᩈᩥᨠ᩠ᨡᩥᨲᨻ᩠ᨻᩴ (ᨻᩉᩪᩈᩩ)] ᩋᨬ᩠ᨬᨲᩁᩮᩣ ᩈᨻᩕᩉ᩠ᨾᨧᩣᩁᩦ ᩈᨦ᩠ᨥᩮ ᨵᨾ᩠ᨾᩴ ᨽᩣᩈᩮᨿ᩠ᨿ. ᨲᨲᩕ ᨧᩮ ᨲᩩᨾ᩠ᩉᩣᨠᩴ ᩑᩅᨾᩔ – ‘ᩋᨿᩴ ᨡᩮᩣ ᩌᨿᩈ᩠ᨾᩣ ᩋᨲ᩠ᨳᨬ᩠ᨧᩮᩅ ᨾᩥᨧ᩠ᨨᩣ ᨣᨱ᩠ᩉᩣᨲᩥ, ᨻ᩠ᨿᨬ᩠ᨩᨶᩣᨶᩥ ᨧ ᨾᩥᨧ᩠ᨨᩣ ᩁᩮᩣᨸᩮᨲᩦ’ᨲᩥ. ᨲᩔ ᨶᩮᩅ ᩋᨽᩥᨶᨶ᩠ᨴᩥᨲᨻ᩠ᨻᩴ ᨶ ᨸᨭᩥᨠ᩠ᨠᩮᩣᩈᩥᨲᨻ᩠ᨻᩴ, ᩋᨶᨽᩥᨶᨶ᩠ᨴᩥᨲ᩠ᩅᩣ ᩋᨸ᩠ᨸᨭᩥᨠ᩠ᨠᩮᩣᩈᩥᨲ᩠ᩅᩣ ᩈᩮᩣ ᩑᩅᨾᩔ ᩅᨧᨶᩦᨿᩮᩣ – ‘ᩍᨾᩔ ᨶᩩ ᨡᩮᩣ, ᩌᩅᩩᩈᩮᩣ, ᩋᨲ᩠ᨳᩔ ᩍᨾᩣᨶᩥ ᩅᩣ ᨻ᩠ᨿᨬ᩠ᨩᨶᩣᨶᩥ ᩑᨲᩣᨶᩥ ᩅᩣ ᨻ᩠ᨿᨬ᩠ᨩᨶᩣᨶᩥ ᨠᨲᨾᩣᨶᩥ ᩒᨸᩣᨿᩥᨠᨲᩁᩣᨶᩥ, ᩍᨾᩮᩈᨬ᩠ᨧ [ᩍᨾᩮᩈᩴ ᩅᩣ (ᩈ᩠ᨿᩣ. ᨸᩦ. ᨠ.), ᩍᨾᩮᩈᩴ (ᩈᩦ.)] ᨻ᩠ᨿᨬ᩠ᨩᨶᩣᨶᩴ ᩋᨿᩴ ᩅᩣ ᩋᨲ᩠ᨳᩮᩣ ᩑᩈᩮᩣ ᩅᩣ ᩋᨲ᩠ᨳᩮᩣ ᨠᨲᨾᩮᩣ ᩒᨸᩣᨿᩥᨠᨲᩁᩮᩣ’ᨲᩥ? ᩈᩮᩣ ᨧᩮ ᩑᩅᩴ ᩅᨴᩮᨿ᩠ᨿ – ‘ᩍᨾᩔ ᨡᩮᩣ, ᩌᩅᩩᩈᩮᩣ, ᩋᨲ᩠ᨳᩔ ᩍᨾᩣᨶᩮᩅ ᨻ᩠ᨿᨬ᩠ᨩᨶᩣᨶᩥ ᩒᨸᩣᨿᩥᨠᨲᩁᩣᨶᩥ, ᨿᩣ ᨧᩮᩅ [ᨿᨬ᩠ᨧᩮᩅ (ᩈᩦ. ᨠ.), ᨭᩦᨠᩣ ᩒᩃᩮᩣᨠᩮᨲᨻ᩠ᨻᩣ] ᩑᨲᩣᨶᩥ; ᩍᨾᩮᩈᨬ᩠ᨧ [ᩍᨾᩮᨴᩴ (ᩈᨻ᩠ᨻᨲ᩠ᨳ)] ᨻ᩠ᨿᨬ᩠ᨩᨶᩣᨶᩴ ᩋᨿᨾᩮᩅ ᩋᨲ᩠ᨳᩮᩣ ᩒᨸᩣᨿᩥᨠᨲᩁᩮᩣ, ᨿᩣ ᨧᩮᩅ [ᨿᨬ᩠ᨧᩮᩅ (ᩈᩦ. ᨠ.), ᨭᩦᨠᩣ ᩒᩃᩮᩣᨠᩮᨲᨻ᩠ᨻᩣ] ᩑᩈᩮᩣ’ᨲᩥ. ᩈᩮᩣ ᨶᩮᩅ ᩏᩔᩣᨴᩮᨲᨻ᩠ᨻᩮᩣ ᨶ ᩋᨸᩈᩣᨴᩮᨲᨻ᩠ᨻᩮᩣ, ᩋᨶᩩᩔᩣᨴᩮᨲ᩠ᩅᩣ ᩋᨶᨸᩈᩣᨴᩮᨲ᩠ᩅᩣ ᩈ᩠ᩅᩮᩅ ᩈᩣᨵᩩᨠᩴ ᩈᨬ᩠ᨬᩣᨸᩮᨲᨻ᩠ᨻᩮᩣ ᨲᩔ ᨧ ᩋᨲ᩠ᨳᩔ ᨲᩮᩈᨬ᩠ᨧ ᨻ᩠ᨿᨬ᩠ᨩᨶᩣᨶᩴ ᨶᩥᩈᨶ᩠ᨲᩥᨿᩣ.

᪑᪗᪙. ‘‘ᩋᨸᩁᩮᩣᨸᩥ ᨧᩮ, ᨧᩩᨶ᩠ᨴ, ᩈᨻᩕᩉ᩠ᨾᨧᩣᩁᩦ ᩈᨦ᩠ᨥᩮ ᨵᨾ᩠ᨾᩴ ᨽᩣᩈᩮᨿ᩠ᨿ. ᨲᨲᩕ ᨧᩮ ᨲᩩᨾ᩠ᩉᩣᨠᩴ ᩑᩅᨾᩔ – ‘ᩋᨿᩴ ᨡᩮᩣ ᩌᨿᩈ᩠ᨾᩣ ᩋᨲ᩠ᨳᨬ᩠ᩉᩥ ᨡᩮᩣ ᨾᩥᨧ᩠ᨨᩣ ᨣᨱ᩠ᩉᩣᨲᩥ ᨻ᩠ᨿᨬ᩠ᨩᨶᩣᨶᩥ ᩈᨾ᩠ᨾᩣ ᩁᩮᩣᨸᩮᨲᩦ’ᨲᩥ. ᨲᩔ ᨶᩮᩅ ᩋᨽᩥᨶᨶ᩠ᨴᩥᨲᨻ᩠ᨻᩴ ᨶ ᨸᨭᩥᨠ᩠ᨠᩮᩣᩈᩥᨲᨻ᩠ᨻᩴ, ᩋᨶᨽᩥᨶᨶ᩠ᨴᩥᨲ᩠ᩅᩣ ᩋᨸ᩠ᨸᨭᩥᨠ᩠ᨠᩮᩣᩈᩥᨲ᩠ᩅᩣ ᩈᩮᩣ ᩑᩅᨾᩔ ᩅᨧᨶᩦᨿᩮᩣ – ‘ᩍᨾᩮᩈᩴ ᨶᩩ ᨡᩮᩣ, ᩌᩅᩩᩈᩮᩣ, ᨻ᩠ᨿᨬ᩠ᨩᨶᩣᨶᩴ ᩋᨿᩴ ᩅᩣ ᩋᨲ᩠ᨳᩮᩣ ᩑᩈᩮᩣ ᩅᩣ ᩋᨲ᩠ᨳᩮᩣ ᨠᨲᨾᩮᩣ ᩒᨸᩣᨿᩥᨠᨲᩁᩮᩣ’ᨲᩥ? ᩈᩮᩣ ᨧᩮ ᩑᩅᩴ ᩅᨴᩮᨿ᩠ᨿ – ‘ᩍᨾᩮᩈᩴ ᨡᩮᩣ, ᩌᩅᩩᩈᩮᩣ, ᨻ᩠ᨿᨬ᩠ᨩᨶᩣᨶᩴ ᩋᨿᨾᩮᩅ ᩋᨲ᩠ᨳᩮᩣ ᩒᨸᩣᨿᩥᨠᨲᩁᩮᩣ, ᨿᩣ ᨧᩮᩅ ᩑᩈᩮᩣ’ᨲᩥ. ᩈᩮᩣ ᨶᩮᩅ ᩏᩔᩣᨴᩮᨲᨻ᩠ᨻᩮᩣ ᨶ ᩋᨸᩈᩣᨴᩮᨲᨻ᩠ᨻᩮᩣ, ᩋᨶᩩᩔᩣᨴᩮᨲ᩠ᩅᩣ ᩋᨶᨸᩈᩣᨴᩮᨲ᩠ᩅᩣ ᩈ᩠ᩅᩮᩅ ᩈᩣᨵᩩᨠᩴ ᩈᨬ᩠ᨬᩣᨸᩮᨲᨻ᩠ᨻᩮᩣ ᨲᩔᩮᩅ ᩋᨲ᩠ᨳᩔ ᨶᩥᩈᨶ᩠ᨲᩥᨿᩣ.

᪑᪘᪐. ‘‘ᩋᨸᩁᩮᩣᨸᩥ ᨧᩮ, ᨧᩩᨶ᩠ᨴ, ᩈᨻᩕᩉ᩠ᨾᨧᩣᩁᩦ ᩈᨦ᩠ᨥᩮ ᨵᨾ᩠ᨾᩴ ᨽᩣᩈᩮᨿ᩠ᨿ. ᨲᨲᩕ ᨧᩮ ᨲᩩᨾ᩠ᩉᩣᨠᩴ ᩑᩅᨾᩔ – ‘ᩋᨿᩴ ᨡᩮᩣ ᩌᨿᩈ᩠ᨾᩣ ᩋᨲ᩠ᨳᨬ᩠ᩉᩥ ᨡᩮᩣ ᩈᨾ᩠ᨾᩣ ᨣᨱ᩠ᩉᩣᨲᩥ ᨻ᩠ᨿᨬ᩠ᨩᨶᩣᨶᩥ ᨾᩥᨧ᩠ᨨᩣ ᩁᩮᩣᨸᩮᨲᩦ’ᨲᩥ. ᨲᩔ ᨶᩮᩅ ᩋᨽᩥᨶᨶ᩠ᨴᩥᨲᨻ᩠ᨻᩴ ᨶ ᨸᨭᩥᨠ᩠ᨠᩮᩣᩈᩥᨲᨻ᩠ᨻᩴ; ᩋᨶᨽᩥᨶᨶ᩠ᨴᩥᨲ᩠ᩅᩣ ᩋᨸ᩠ᨸᨭᩥᨠ᩠ᨠᩮᩣᩈᩥᨲ᩠ᩅᩣ ᩈᩮᩣ ᩑᩅᨾᩔ ᩅᨧᨶᩦᨿᩮᩣ – ‘ᩍᨾᩔ ᨶᩩ ᨡᩮᩣ, ᩌᩅᩩᩈᩮᩣ, ᩋᨲ᩠ᨳᩔ ᩍᨾᩣᨶᩥ ᩅᩣ ᨻ᩠ᨿᨬ᩠ᨩᨶᩣᨶᩥ ᩑᨲᩣᨶᩥ ᩅᩣ ᨻ᩠ᨿᨬ᩠ᨩᨶᩣᨶᩥ ᨠᨲᨾᩣᨶᩥ ᩒᨸᩣᨿᩥᨠᨲᩁᩣᨶᩦ’ᨲᩥ? ᩈᩮᩣ ᨧᩮ ᩑᩅᩴ ᩅᨴᩮᨿ᩠ᨿ – ‘ᩍᨾᩔ ᨡᩮᩣ, ᩌᩅᩩᩈᩮᩣ, ᩋᨲ᩠ᨳᩔ ᩍᨾᩣᨶᩮᩅ ᨻ᩠ᨿᨬ᩠ᨩᨶᩣᨶᩥ ᩒᨸᨿᩥᨠᨲᩁᩣᨶᩥ, ᨿᩣᨶᩥ ᨧᩮᩅ ᩑᨲᩣᨶᩦ’ᨲᩥ. ᩈᩮᩣ ᨶᩮᩅ ᩏᩔᩣᨴᩮᨲᨻ᩠ᨻᩮᩣ ᨶ ᩋᨸᩈᩣᨴᩮᨲᨻ᩠ᨻᩮᩣ; ᩋᨶᩩᩔᩣᨴᩮᨲ᩠ᩅᩣ ᩋᨶᨸᩈᩣᨴᩮᨲ᩠ᩅᩣ ᩈ᩠ᩅᩮᩅ ᩈᩣᨵᩩᨠᩴ ᩈᨬ᩠ᨬᩣᨸᩮᨲᨻ᩠ᨻᩮᩣ ᨲᩮᩈᨬ᩠ᨬᩮᩅ ᨻ᩠ᨿᨬ᩠ᨩᨶᩣᨶᩴ ᨶᩥᩈᨶ᩠ᨲᩥᨿᩣ.

᪑᪘᪑. ‘‘ᩋᨸᩁᩮᩣᨸᩥ ᨧᩮ, ᨧᩩᨶ᩠ᨴ, ᩈᨻᩕᩉ᩠ᨾᨧᩣᩁᩦ ᩈᨦ᩠ᨥᩮ ᨵᨾ᩠ᨾᩴ ᨽᩣᩈᩮᨿ᩠ᨿ. ᨲᨲᩕ ᨧᩮ ᨲᩩᨾ᩠ᩉᩣᨠᩴ ᩑᩅᨾᩔ – ‘ᩋᨿᩴ ᨡᩮᩣ ᩌᨿᩈ᩠ᨾᩣ ᩋᨲ᩠ᨳᨬ᩠ᨧᩮᩅ ᩈᨾ᩠ᨾᩣ ᨣᨱ᩠ᩉᩣᨲᩥ ᨻ᩠ᨿᨬ᩠ᨩᨶᩣᨶᩥ ᨧ ᩈᨾ᩠ᨾᩣ ᩁᩮᩣᨸᩮᨲᩦ’ᨲᩥ. ᨲᩔ ‘ᩈᩣᨵᩪ’ᨲᩥ ᨽᩣᩈᩥᨲᩴ ᩋᨽᩥᨶᨶ᩠ᨴᩥᨲᨻ᩠ᨻᩴ ᩋᨶᩩᨾᩮᩣᨴᩥᨲᨻ᩠ᨻᩴ; ᨲᩔ ‘ᩈᩣᨵᩪ’ᨲᩥ ᨽᩣᩈᩥᨲᩴ ᩋᨽᩥᨶᨶ᩠ᨴᩥᨲ᩠ᩅᩣ ᩋᨶᩩᨾᩮᩣᨴᩥᨲ᩠ᩅᩣ ᩈᩮᩣ ᩑᩅᨾᩔ ᩅᨧᨶᩦᨿᩮᩣ – ‘ᩃᩣᨽᩣ ᨶᩮᩣ ᩌᩅᩩᩈᩮᩣ, ᩈᩩᩃᨴ᩠ᨵᩴ ᨶᩮᩣ ᩌᩅᩩᩈᩮᩣ, ᨿᩮ ᨾᨿᩴ ᩌᨿᩈ᩠ᨾᨶ᩠ᨲᩴ ᨲᩣᨴᩥᩈᩴ ᩈᨻᩕᩉ᩠ᨾᨧᩣᩁᩥᩴ ᨸᩔᩣᨾ ᩑᩅᩴ ᩋᨲ᩠ᨳᩩᨸᩮᨲᩴ ᨻ᩠ᨿᨬ᩠ᨩᨶᩩᨸᩮᨲ’ᨶ᩠ᨲᩥ.

ᨸᨧ᩠ᨧᨿᩣᨶᩩᨬ᩠ᨬᩣᨲᨠᩣᩁᨱᩴ

᪑᪘᪒. ‘‘ᨶ ᩅᩮᩣ ᩋᩉᩴ, ᨧᩩᨶ᩠ᨴ, ᨴᩥᨭ᩠ᨮᨵᨾ᩠ᨾᩥᨠᩣᨶᩴᨿᩮᩅ ᩌᩈᩅᩣᨶᩴ ᩈᩴᩅᩁᩣᨿ ᨵᨾ᩠ᨾᩴ ᨴᩮᩈᩮᨾᩥ. ᨶ ᨸᨶᩣᩉᩴ, ᨧᩩᨶ᩠ᨴ, ᩈᨾ᩠ᨸᩁᩣᨿᩥᨠᩣᨶᩴᨿᩮᩅ ᩌᩈᩅᩣᨶᩴ ᨸᨭᩥᨥᩣᨲᩣᨿ ᨵᨾ᩠ᨾᩴ ᨴᩮᩈᩮᨾᩥ. ᨴᩥᨭ᩠ᨮᨵᨾ᩠ᨾᩥᨠᩣᨶᩴ ᨧᩮᩅᩣᩉᩴ, ᨧᩩᨶ᩠ᨴ, ᩌᩈᩅᩣᨶᩴ ᩈᩴᩅᩁᩣᨿ ᨵᨾ᩠ᨾᩴ ᨴᩮᩈᩮᨾᩥ; ᩈᨾ᩠ᨸᩁᩣᨿᩥᨠᩣᨶᨬ᩠ᨧ ᩌᩈᩅᩣᨶᩴ ᨸᨭᩥᨥᩣᨲᩣᨿ. ᨲᩈ᩠ᨾᩣᨲᩥᩉ, ᨧᩩᨶ᩠ᨴ, ᨿᩴ ᩅᩮᩣ ᨾᨿᩣ ᨧᩦᩅᩁᩴ ᩋᨶᩩᨬ᩠ᨬᩣᨲᩴ, ᩋᩃᩴ ᩅᩮᩣ ᨲᩴ – ᨿᩣᩅᨴᩮᩅ ᩈᩦᨲᩔ ᨸᨭᩥᨥᩣᨲᩣᨿ, ᩏᨱ᩠ᩉᩔ ᨸᨭᩥᨥᩣᨲᩣᨿ, ᨯᩴᩈᨾᨠᩈᩅᩣᨲᩣᨲᨸᩈᩁᩦᩈᨸ [ᩈᩥᩁᩥᩴᩈᨸ (ᩈ᩠ᨿᩣ.)] ᩈᨾ᩠ᨹᩔᩣᨶᩴ ᨸᨭᩥᨥᩣᨲᩣᨿ, ᨿᩣᩅᨴᩮᩅ ᩉᩥᩁᩥᨠᩮᩣᨸᩦᨶᨸᨭᩥᨧ᩠ᨨᩣᨴᨶᨲ᩠ᨳᩴ. ᨿᩮᩣ ᩅᩮᩣ ᨾᨿᩣ ᨸᩥᨱ᩠ᨯᨸᩣᨲᩮᩣ ᩋᨶᩩᨬ᩠ᨬᩣᨲᩮᩣ, ᩋᩃᩴ ᩅᩮᩣ ᩈᩮᩣ ᨿᩣᩅᨴᩮᩅ ᩍᨾᩔ ᨠᩣᨿᩔ ᨮᩥᨲᩥᨿᩣ ᨿᩣᨸᨶᩣᨿ ᩅᩥᩉᩥᩴᩈᩪᨸᩁᨲᩥᨿᩣ ᨻᩕᩉ᩠ᨾᨧᩁᩥᨿᩣᨶᩩᨣ᩠ᨣᩉᩣᨿ, ᩍᨲᩥ ᨸᩩᩁᩣᨱᨬ᩠ᨧ ᩅᩮᨴᨶᩴ ᨸᨭᩥᩉᨦ᩠ᨡᩣᨾᩥ, ᨶᩅᨬ᩠ᨧ ᩅᩮᨴᨶᩴ ᨶ ᩏᨸ᩠ᨸᩣᨴᩮᩔᩣᨾᩥ, ᨿᩣᨲᩕᩣ ᨧ ᨾᩮ ᨽᩅᩥᩔᨲᩥ ᩋᨶᩅᨩ᩠ᨩᨲᩣ ᨧ ᨹᩣᩈᩩᩅᩥᩉᩣᩁᩮᩣ ᨧ [ᨧᩣᨲᩥ (ᨻᩉᩪᩈᩩ)]. ᨿᩴ ᩅᩮᩣ ᨾᨿᩣ ᩈᩮᨶᩣᩈᨶᩴ ᩋᨶᩩᨬ᩠ᨬᩣᨲᩴ, ᩋᩃᩴ ᩅᩮᩣ ᨲᩴ ᨿᩣᩅᨴᩮᩅ ᩈᩦᨲᩔ ᨸᨭᩥᨥᩣᨲᩣᨿ, ᩏᨱ᩠ᩉᩔ ᨸᨭᩥᨥᩣᨲᩣᨿ, ᨯᩴᩈᨾᨠᩈᩅᩣᨲᩣᨲᨸᩈᩁᩦᩈᨸᩈᨾ᩠ᨹᩔᩣᨶᩴ ᨸᨭᩥᨥᩣᨲᩣᨿ, ᨿᩣᩅᨴᩮᩅ ᩏᨲᩩᨸᩁᩥᩔᨿᩅᩥᨶᩮᩣᨴᨶ ᨸᨭᩥᩈᩃ᩠ᩃᩣᨶᩣᩁᩣᨾᨲ᩠ᨳᩴ. ᨿᩮᩣ ᩅᩮᩣ ᨾᨿᩣ ᨣᩥᩃᩣᨶᨸᨧ᩠ᨧᨿᨽᩮᩈᨩ᩠ᨩ ᨸᩁᩥᨠ᩠ᨡᩣᩁᩮᩣ ᩋᨶᩩᨬ᩠ᨬᩣᨲᩮᩣ, ᩋᩃᩴ ᩅᩮᩣ ᩈᩮᩣ ᨿᩣᩅᨴᩮᩅ ᩏᨸ᩠ᨸᨶ᩠ᨶᩣᨶᩴ ᩅᩮᨿ᩠ᨿᩣᨻᩣᨵᩥᨠᩣᨶᩴ ᩅᩮᨴᨶᩣᨶᩴ ᨸᨭᩥᨥᩣᨲᩣᨿ ᩋᨻ᩠ᨿᩣᨸᨩ᩠ᨩᨸᩁᨾᨲᩣᨿ [ᩋᨻ᩠ᨿᩣᨸᨩ᩠ᨫᨸᩁᨾᨲᩣᨿᩣᨲᩥ (ᩈᩦ. ᩈ᩠ᨿᩣ. ᨸᩦ.), ᩋᨻ᩠ᨿᩣᨻᨩ᩠ᨫᨸᩁᨾᨲᩣᨿ (?)].

ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩮᩣ

᪑᪘᪓. ‘‘ᨮᩣᨶᩴ ᨡᩮᩣ ᨸᨶᩮᨲᩴ, ᨧᩩᨶ᩠ᨴ, ᩅᩥᨩ᩠ᨩᨲᩥ ᨿᩴ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᩴ ᩅᨴᩮᨿ᩠ᨿᩩᩴ – ‘ᩈᩩᨡᩃ᩠ᩃᩥᨠᩣᨶᩩᨿᩮᩣᨣᨾᨶᩩᨿᩩᨲ᩠ᨲᩣ ᩈᨾᨱᩣ ᩈᨠ᩠ᨿᨸᩩᨲ᩠ᨲᩥᨿᩣ ᩅᩥᩉᩁᨶ᩠ᨲᩦ’ᨲᩥ. ᩑᩅᩴᩅᩣᨴᩥᨶᩮᩣ [ᩅᨴᨾᩣᨶᩣ (ᩈ᩠ᨿᩣ.)], ᨧᩩᨶ᩠ᨴ, ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᨾᩔᩩ ᩅᨧᨶᩦᨿᩣ – ‘ᨠᨲᨾᩮᩣ ᩈᩮᩣ, ᩌᩅᩩᩈᩮᩣ, ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩮᩣ? ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩣ ᩉᩥ ᨻᩉᩪ ᩋᨶᩮᨠᩅᩥᩉᩥᨲᩣ ᨶᩣᨶᨸ᩠ᨸᨠᩣᩁᨠᩣ’ᨲᩥ.

‘‘ᨧᨲ᩠ᨲᩣᩁᩮᩣᨾᩮ, ᨧᩩᨶ᩠ᨴ, ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩣ ᩉᩦᨶᩣ ᨣᨾ᩠ᨾᩣ ᨸᩮᩣᨳᩩᨩ᩠ᨩᨶᩥᨠᩣ ᩋᨶᩁᩥᨿᩣ ᩋᨶᨲ᩠ᨳᩈᩴᩉᩥᨲᩣ ᨶ ᨶᩥᨻ᩠ᨻᩥᨴᩣᨿ ᨶ ᩅᩥᩁᩣᨣᩣᨿ ᨶ ᨶᩥᩁᩮᩣᨵᩣᨿ ᨶ ᩏᨸᩈᨾᩣᨿ ᨶ ᩋᨽᩥᨬ᩠ᨬᩣᨿ ᨶ ᩈᨾ᩠ᨻᩮᩣᨵᩣᨿ ᨶ ᨶᩥᨻ᩠ᨻᩣᨶᩣᨿ ᩈᩴᩅᨲ᩠ᨲᨶ᩠ᨲᩥ. ᨠᨲᨾᩮ ᨧᨲ᩠ᨲᩣᩁᩮᩣ?

‘‘ᩍᨵ, ᨧᩩᨶ᩠ᨴ, ᩑᨠᨧ᩠ᨧᩮᩣ ᨻᩣᩃᩮᩣ ᨸᩣᨱᩮ ᩅᨵᩥᨲ᩠ᩅᩣ ᩅᨵᩥᨲ᩠ᩅᩣ ᩋᨲ᩠ᨲᩣᨶᩴ ᩈᩩᨡᩮᨲᩥ ᨸᩦᨱᩮᨲᩥ. ᩋᨿᩴ ᨸᨮᨾᩮᩣ ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩮᩣ.

‘‘ᨸᩩᨶ ᨧᨸᩁᩴ, ᨧᩩᨶ᩠ᨴ, ᩍᨵᩮᨠᨧ᩠ᨧᩮᩣ ᩋᨴᩥᨶ᩠ᨶᩴ ᩌᨴᩥᨿᩥᨲ᩠ᩅᩣ ᩌᨴᩥᨿᩥᨲ᩠ᩅᩣ ᩋᨲ᩠ᨲᩣᨶᩴ ᩈᩩᨡᩮᨲᩥ ᨸᩦᨱᩮᨲᩥ. ᩋᨿᩴ ᨴᩩᨲᩥᨿᩮᩣ ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩮᩣ.

‘‘ᨸᩩᨶ ᨧᨸᩁᩴ, ᨧᩩᨶ᩠ᨴ, ᩍᨵᩮᨠᨧ᩠ᨧᩮᩣ ᨾᩩᩈᩣ ᨽᨱᩥᨲ᩠ᩅᩣ ᨽᨱᩥᨲ᩠ᩅᩣ ᩋᨲ᩠ᨲᩣᨶᩴ ᩈᩩᨡᩮᨲᩥ ᨸᩦᨱᩮᨲᩥ. ᩋᨿᩴ ᨲᨲᩥᨿᩮᩣ ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩮᩣ.

‘‘ᨸᩩᨶ ᨧᨸᩁᩴ, ᨧᩩᨶ᩠ᨴ, ᩍᨵᩮᨠᨧ᩠ᨧᩮᩣ ᨸᨬ᩠ᨧᩉᩥ ᨠᩣᨾᨣᩩᨱᩮᩉᩥ ᩈᨾᨸ᩠ᨸᩥᨲᩮᩣ ᩈᨾᨦ᩠ᨣᩦᨽᩪᨲᩮᩣ ᨸᩁᩥᨧᩣᩁᩮᨲᩥ. ᩋᨿᩴ ᨧᨲᩩᨲ᩠ᨳᩮᩣ ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩮᩣ.

‘‘ᩍᨾᩮ ᨡᩮᩣ, ᨧᩩᨶ᩠ᨴ, ᨧᨲ᩠ᨲᩣᩁᩮᩣ ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩣ ᩉᩦᨶᩣ ᨣᨾ᩠ᨾᩣ ᨸᩮᩣᨳᩩᨩ᩠ᨩᨶᩥᨠᩣ ᩋᨶᩁᩥᨿᩣ ᩋᨶᨲ᩠ᨳᩈᩴᩉᩥᨲᩣ ᨶ ᨶᩥᨻ᩠ᨻᩥᨴᩣᨿ ᨶ ᩅᩥᩁᩣᨣᩣᨿ ᨶ ᨶᩥᩁᩮᩣᨵᩣᨿ ᨶ ᩏᨸᩈᨾᩣᨿ ᨶ ᩋᨽᩥᨬ᩠ᨬᩣᨿ ᨶ ᩈᨾ᩠ᨻᩮᩣᨵᩣᨿ ᨶ ᨶᩥᨻ᩠ᨻᩣᨶᩣᨿ ᩈᩴᩅᨲ᩠ᨲᨶ᩠ᨲᩥ.

‘‘ᨮᩣᨶᩴ ᨡᩮᩣ ᨸᨶᩮᨲᩴ, ᨧᩩᨶ᩠ᨴ, ᩅᩥᨩ᩠ᨩᨲᩥ ᨿᩴ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᩴ ᩅᨴᩮᨿ᩠ᨿᩩᩴ – ‘‘ᩍᨾᩮ ᨧᨲ᩠ᨲᩣᩁᩮᩣ ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩮ ᩋᨶᩩᨿᩩᨲ᩠ᨲᩣ ᩈᨾᨱᩣ ᩈᨠ᩠ᨿᨸᩩᨲ᩠ᨲᩥᨿᩣ ᩅᩥᩉᩁᨶ᩠ᨲᩦ’ᨲᩥ. ᨲᩮ ᩅᩮᩣ [ᨲᩮ (ᩈᩦ. ᨸᩦ.)] ‘ᨾᩣᩉᩮᩅᩴ’ ᨲᩥᩔᩩ ᩅᨧᨶᩦᨿᩣ. ᨶ ᨲᩮ ᩅᩮᩣ ᩈᨾ᩠ᨾᩣ ᩅᨴᨾᩣᨶᩣ ᩅᨴᩮᨿ᩠ᨿᩩᩴ, ᩋᨻ᩠ᨽᩣᨧᩥᨠ᩠ᨡᩮᨿ᩠ᨿᩩᩴ ᩋᩈᨲᩣ ᩋᨽᩪᨲᩮᨶ.

᪑᪘᪔. ‘‘ᨧᨲ᩠ᨲᩣᩁᩮᩣᨾᩮ, ᨧᩩᨶ᩠ᨴ, ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩣ ᩑᨠᨶ᩠ᨲᨶᩥᨻ᩠ᨻᩥᨴᩣᨿ ᩅᩥᩁᩣᨣᩣᨿ ᨶᩥᩁᩮᩣᨵᩣᨿ ᩏᨸᩈᨾᩣᨿ ᩋᨽᩥᨬ᩠ᨬᩣᨿ ᩈᨾ᩠ᨻᩮᩣᨵᩣᨿ ᨶᩥᨻ᩠ᨻᩣᨶᩣᨿ ᩈᩴᩅᨲ᩠ᨲᨶ᩠ᨲᩥ. ᨠᨲᨾᩮ ᨧᨲ᩠ᨲᩣᩁᩮᩣ?

‘‘ᩍᨵ, ᨧᩩᨶ᩠ᨴ, ᨽᩥᨠ᩠ᨡᩩ ᩅᩥᩅᩥᨧ᩠ᨧᩮᩅ ᨠᩣᨾᩮᩉᩥ ᩅᩥᩅᩥᨧ᩠ᨧ ᩋᨠᩩᩈᩃᩮᩉᩥ ᨵᨾ᩠ᨾᩮᩉᩥ ᩈᩅᩥᨲᨠ᩠ᨠᩴ ᩈᩅᩥᨧᩣᩁᩴ ᩅᩥᩅᩮᨠᨩᩴ ᨸᩦᨲᩥᩈᩩᨡᩴ ᨸᨮᨾᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ ᨸᨮᨾᩮᩣ ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩮᩣ.

‘‘ᨸᩩᨶ ᨧᨸᩁᩴ, ᨧᩩᨶ᩠ᨴ, ᨽᩥᨠ᩠ᨡᩩ ᩅᩥᨲᨠ᩠ᨠᩅᩥᨧᩣᩁᩣᨶᩴ ᩅᩪᨸᩈᨾᩣ…ᨸᩮ… ᨴᩩᨲᩥᨿᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ ᨴᩩᨲᩥᨿᩮᩣ ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩮᩣ.

‘‘ᨸᩩᨶ ᨧᨸᩁᩴ, ᨧᩩᨶ᩠ᨴ, ᨽᩥᨠ᩠ᨡᩩ ᨸᩦᨲᩥᨿᩣ ᨧ ᩅᩥᩁᩣᨣᩣ…ᨸᩮ… ᨲᨲᩥᨿᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ ᨲᨲᩥᨿᩮᩣ ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩮᩣ.

‘‘ᨸᩩᨶ ᨧᨸᩁᩴ, ᨧᩩᨶ᩠ᨴ, ᨽᩥᨠ᩠ᨡᩩ ᩈᩩᨡᩔ ᨧ ᨸᩉᩣᨶᩣ ᨴᩩᨠ᩠ᨡᩔ ᨧ ᨸᩉᩣᨶᩣ…ᨸᩮ… ᨧᨲᩩᨲ᩠ᨳᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ ᨧᨲᩩᨲ᩠ᨳᩮᩣ ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩮᩣ.

‘‘ᩍᨾᩮ ᨡᩮᩣ, ᨧᩩᨶ᩠ᨴ, ᨧᨲ᩠ᨲᩣᩁᩮᩣ ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩣ ᩑᨠᨶ᩠ᨲᨶᩥᨻ᩠ᨻᩥᨴᩣᨿ ᩅᩥᩁᩣᨣᩣᨿ ᨶᩥᩁᩮᩣᨵᩣᨿ ᩏᨸᩈᨾᩣᨿ ᩋᨽᩥᨬ᩠ᨬᩣᨿ ᩈᨾ᩠ᨻᩮᩣᨵᩣᨿ ᨶᩥᨻ᩠ᨻᩣᨶᩣᨿ ᩈᩴᩅᨲ᩠ᨲᨶ᩠ᨲᩥ.

‘‘ᨮᩣᨶᩴ ᨡᩮᩣ ᨸᨶᩮᨲᩴ, ᨧᩩᨶ᩠ᨴ, ᩅᩥᨩ᩠ᨩᨲᩥ ᨿᩴ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᩴ ᩅᨴᩮᨿ᩠ᨿᩩᩴ – ‘‘ᩍᨾᩮ ᨧᨲ᩠ᨲᩣᩁᩮᩣ ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩮ ᩋᨶᩩᨿᩩᨲ᩠ᨲᩣ ᩈᨾᨱᩣ ᩈᨠ᩠ᨿᨸᩩᨲ᩠ᨲᩥᨿᩣ ᩅᩥᩉᩁᨶ᩠ᨲᩦ’ᨲᩥ. ᨲᩮ ᩅᩮᩣ ‘ᩑᩅᩴ’ ᨲᩥᩔᩩ ᩅᨧᨶᩦᨿᩣ. ᩈᨾ᩠ᨾᩣ ᨲᩮ ᩅᩮᩣ ᩅᨴᨾᩣᨶᩣ ᩅᨴᩮᨿ᩠ᨿᩩᩴ, ᨶ ᨲᩮ ᩅᩮᩣ ᩋᨻ᩠ᨽᩣᨧᩥᨠ᩠ᨡᩮᨿ᩠ᨿᩩᩴ ᩋᩈᨲᩣ ᩋᨽᩪᨲᩮᨶ.

ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩣᨶᩥᩈᩴᩈᩮᩣ

᪑᪘᪕. ‘‘ᨮᩣᨶᩴ ᨡᩮᩣ ᨸᨶᩮᨲᩴ, ᨧᩩᨶ᩠ᨴ, ᩅᩥᨩ᩠ᨩᨲᩥ, ᨿᩴ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᩴ ᩅᨴᩮᨿ᩠ᨿᩩᩴ – ‘ᩍᨾᩮ ᨸᨶᩣᩅᩩᩈᩮᩣ, ᨧᨲ᩠ᨲᩣᩁᩮᩣ ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩮ ᩋᨶᩩᨿᩩᨲ᩠ᨲᩣᨶᩴ ᩅᩥᩉᩁᨲᩴ ᨠᨲᩥ ᨹᩃᩣᨶᩥ ᨠᨲᩣᨶᩥᩈᩴᩈᩣ ᨸᩣᨭᩥᨠᨦ᩠ᨡᩣ’ᨲᩥ? ᩑᩅᩴᩅᩣᨴᩥᨶᩮᩣ, ᨧᩩᨶ᩠ᨴ, ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᨾᩔᩩ ᩅᨧᨶᩦᨿᩣ – ‘ᩍᨾᩮ ᨡᩮᩣ, ᩌᩅᩩᩈᩮᩣ, ᨧᨲ᩠ᨲᩣᩁᩮᩣ ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩮ ᩋᨶᩩᨿᩩᨲ᩠ᨲᩣᨶᩴ ᩅᩥᩉᩁᨲᩴ ᨧᨲ᩠ᨲᩣᩁᩥ ᨹᩃᩣᨶᩥ ᨧᨲ᩠ᨲᩣᩁᩮᩣ ᩌᨶᩥᩈᩴᩈᩣ ᨸᩣᨭᩥᨠᨦ᩠ᨡᩣ. ᨠᨲᨾᩮ ᨧᨲ᩠ᨲᩣᩁᩮᩣ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩈᩮᩣᨲᩣᨸᨶ᩠ᨶᩮᩣ ᩉᩮᩣᨲᩥ ᩋᩅᩥᨶᩥᨸᩣᨲᨵᨾ᩠ᨾᩮᩣ ᨶᩥᨿᨲᩮᩣ ᩈᨾ᩠ᨻᩮᩣᨵᩥᨸᩁᩣᨿᨱᩮᩣ. ᩍᨴᩴ ᨸᨮᨾᩴ ᨹᩃᩴ, ᨸᨮᨾᩮᩣ ᩌᨶᩥᩈᩴᩈᩮᩣ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨲᩥᨱ᩠ᨱᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩁᩣᨣᨴᩮᩣᩈᨾᩮᩣᩉᩣᨶᩴ ᨲᨶᩩᨲ᩠ᨲᩣ ᩈᨠᨴᩣᨣᩣᨾᩦ ᩉᩮᩣᨲᩥ, ᩈᨠᩥᨴᩮᩅ ᩍᨾᩴ ᩃᩮᩣᨠᩴ ᩌᨣᨶ᩠ᨲ᩠ᩅᩣ ᨴᩩᨠ᩠ᨡᩔᨶ᩠ᨲᩴ ᨠᩁᩮᩣᨲᩥ. ᩍᨴᩴ ᨴᩩᨲᩥᨿᩴ ᨹᩃᩴ, ᨴᩩᨲᩥᨿᩮᩣ ᩌᨶᩥᩈᩴᩈᩮᩣ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨸᨬ᩠ᨧᨶ᩠ᨶᩴ ᩒᩁᨾ᩠ᨽᩣᨣᩥᨿᩣᨶᩴ ᩈᩴᨿᩮᩣᨩᨶᩣᨶᩴ ᨸᩁᩥᨠ᩠ᨡᨿᩣ ᩒᨸᨸᩣᨲᩥᨠᩮᩣ ᩉᩮᩣᨲᩥ, ᨲᨲ᩠ᨳ ᨸᩁᩥᨶᩥᨻ᩠ᨻᩣᨿᩦ ᩋᨶᩣᩅᨲ᩠ᨲᩥᨵᨾ᩠ᨾᩮᩣ ᨲᩈ᩠ᨾᩣ ᩃᩮᩣᨠᩣ. ᩍᨴᩴ ᨲᨲᩥᨿᩴ ᨹᩃᩴ, ᨲᨲᩥᨿᩮᩣ ᩌᨶᩥᩈᩴᩈᩮᩣ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᩌᩈᩅᩣᨶᩴ ᨡᨿᩣ ᩋᨶᩣᩈᩅᩴ ᨧᩮᨲᩮᩣᩅᩥᨾᩩᨲ᩠ᨲᩥᩴ ᨸᨬ᩠ᨬᩣᩅᩥᨾᩩᨲ᩠ᨲᩥᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩍᨴᩴ ᨧᨲᩩᨲ᩠ᨳᩴ ᨹᩃᩴ ᨧᨲᩩᨲ᩠ᨳᩮᩣ ᩌᨶᩥᩈᩴᩈᩮᩣ. ᩍᨾᩮ ᨡᩮᩣ, ᩌᩅᩩᩈᩮᩣ, ᨧᨲ᩠ᨲᩣᩁᩮᩣ ᩈᩩᨡᩃ᩠ᩃᩥᨠᩣᨶᩩᨿᩮᩣᨣᩮ ᩋᨶᩩᨿᩩᨲ᩠ᨲᩣᨶᩴ ᩅᩥᩉᩁᨲᩴ ᩍᨾᩣᨶᩥ ᨧᨲ᩠ᨲᩣᩁᩥ ᨹᩃᩣᨶᩥ, ᨧᨲ᩠ᨲᩣᩁᩮᩣ ᩌᨶᩥᩈᩴᩈᩣ ᨸᩣᨭᩥᨠᨦ᩠ᨡᩣ’’ᨲᩥ.

ᨡᩦᨱᩣᩈᩅᩋᨽᨻ᩠ᨻᨮᩣᨶᩴ

᪑᪘᪖. ‘‘ᨮᩣᨶᩴ ᨡᩮᩣ ᨸᨶᩮᨲᩴ, ᨧᩩᨶ᩠ᨴ, ᩅᩥᨩ᩠ᨩᨲᩥ ᨿᩴ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᩴ ᩅᨴᩮᨿ᩠ᨿᩩᩴ – ‘ᩋᨭ᩠ᨮᩥᨲᨵᨾ᩠ᨾᩣ ᩈᨾᨱᩣ ᩈᨠ᩠ᨿᨸᩩᨲ᩠ᨲᩥᨿᩣ ᩅᩥᩉᩁᨶ᩠ᨲᩦ’ᨲᩥ. ᩑᩅᩴᩅᩣᨴᩥᨶᩮᩣ, ᨧᩩᨶ᩠ᨴ, ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᨾᩔᩩ ᩅᨧᨶᩦᨿᩣ – ‘ᩋᨲ᩠ᨳᩥ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᩈᩣᩅᨠᩣᨶᩴ ᨵᨾ᩠ᨾᩣ ᨴᩮᩈᩥᨲᩣ ᨸᨬ᩠ᨬᨲ᩠ᨲᩣ ᨿᩣᩅᨩᩦᩅᩴ ᩋᨶᨲᩥᨠ᩠ᨠᨾᨶᩦᨿᩣ. ᩈᩮᨿ᩠ᨿᨳᩣᨸᩥ, ᩌᩅᩩᩈᩮᩣ, ᩍᨶ᩠ᨴᨡᩦᩃᩮᩣ ᩅᩣ ᩋᨿᩮᩣᨡᩦᩃᩮᩣ ᩅᩣ ᨣᨾ᩠ᨽᩦᩁᨶᩮᨾᩮᩣ ᩈᩩᨶᩥᨡᩣᨲᩮᩣ ᩋᨧᩃᩮᩣ ᩋᩈᨾ᩠ᨸᩅᩮᨵᩦ. ᩑᩅᨾᩮᩅ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᩈᩣᩅᨠᩣᨶᩴ ᨵᨾ᩠ᨾᩣ ᨴᩮᩈᩥᨲᩣ ᨸᨬ᩠ᨬᨲ᩠ᨲᩣ ᨿᩣᩅᨩᩦᩅᩴ ᩋᨶᨲᩥᨠ᩠ᨠᨾᨶᩦᨿᩣ. ᨿᩮᩣ ᩈᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩋᩁᩉᩴ ᨡᩦᨱᩣᩈᩅᩮᩣ ᩅᩩᩈᩥᨲᩅᩣ ᨠᨲᨠᩁᨱᩦᨿᩮᩣ ᩒᩉᩥᨲᨽᩣᩁᩮᩣ ᩋᨶᩩᨸ᩠ᨸᨲ᩠ᨲᩈᨴᨲ᩠ᨳᩮᩣ ᨸᩁᩥᨠ᩠ᨡᩦᨱᨽᩅᩈᩴᨿᩮᩣᨩᨶᩮᩣ ᩈᨾ᩠ᨾᨴᨬ᩠ᨬᩣ ᩅᩥᨾᩩᨲ᩠ᨲᩮᩣ, ᩋᨽᨻ᩠ᨻᩮᩣ ᩈᩮᩣ ᨶᩅ ᨮᩣᨶᩣᨶᩥ ᩋᨩ᩠ᨫᩣᨧᩁᩥᨲᩩᩴ. ᩋᨽᨻ᩠ᨻᩮᩣ, ᩌᩅᩩᩈᩮᩣ, ᨡᩦᨱᩣᩈᩅᩮᩣ ᨽᩥᨠ᩠ᨡᩩ ᩈᨬ᩠ᨧᩥᨧ᩠ᨧ ᨸᩣᨱᩴ ᨩᩦᩅᩥᨲᩣ ᩅᩮᩣᩁᩮᩣᨸᩮᨲᩩᩴ; ᩋᨽᨻ᩠ᨻᩮᩣ ᨡᩦᨱᩣᩈᩅᩮᩣ ᨽᩥᨠ᩠ᨡᩩ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩥᨲᩩᩴ; ᩋᨽᨻ᩠ᨻᩮᩣ ᨡᩦᨱᩣᩈᩅᩮᩣ ᨽᩥᨠ᩠ᨡᩩ ᨾᩮᨳᩩᨶᩴ ᨵᨾ᩠ᨾᩴ ᨸᨭᩥᩈᩮᩅᩥᨲᩩᩴ; ᩋᨽᨻ᩠ᨻᩮᩣ ᨡᩦᨱᩣᩈᩅᩮᩣ ᨽᩥᨠ᩠ᨡᩩ ᩈᨾ᩠ᨸᨩᩣᨶᨾᩩᩈᩣ ᨽᩣᩈᩥᨲᩩᩴ; ᩋᨽᨻ᩠ᨻᩮᩣ ᨡᩦᨱᩣᩈᩅᩮᩣ ᨽᩥᨠ᩠ᨡᩩ ᩈᨶ᩠ᨶᩥᨵᩥᨠᩣᩁᨠᩴ ᨠᩣᨾᩮ ᨸᩁᩥᨽᩩᨬ᩠ᨩᩥᨲᩩᩴ ᩈᩮᨿ᩠ᨿᨳᩣᨸᩥ ᨸᩩᨻ᩠ᨻᩮ ᩌᨣᩣᩁᩥᨠᨽᩪᨲᩮᩣ; ᩋᨽᨻ᩠ᨻᩮᩣ ᨡᩦᨱᩣᩈᩅᩮᩣ ᨽᩥᨠ᩠ᨡᩩ ᨨᨶ᩠ᨴᩣᨣᨲᩥᩴ ᨣᨶ᩠ᨲᩩᩴ; ᩋᨽᨻ᩠ᨻᩮᩣ ᨡᩦᨱᩣᩈᩅᩮᩣ ᨽᩥᨠ᩠ᨡᩩ ᨴᩮᩣᩈᩣᨣᨲᩥᩴ ᨣᨶ᩠ᨲᩩᩴ; ᩋᨽᨻ᩠ᨻᩮᩣ ᨡᩦᨱᩣᩈᩅᩮᩣ ᨽᩥᨠ᩠ᨡᩩ ᨾᩮᩣᩉᩣᨣᨲᩥᩴ ᨣᨶ᩠ᨲᩩᩴ; ᩋᨽᨻ᩠ᨻᩮᩣ ᨡᩦᨱᩣᩈᩅᩮᩣ ᨽᩥᨠ᩠ᨡᩩ ᨽᨿᩣᨣᨲᩥᩴ ᨣᨶ᩠ᨲᩩᩴ. ᨿᩮᩣ ᩈᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩋᩁᩉᩴ ᨡᩦᨱᩣᩈᩅᩮᩣ ᩅᩩᩈᩥᨲᩅᩣ ᨠᨲᨠᩁᨱᩦᨿᩮᩣ ᩒᩉᩥᨲᨽᩣᩁᩮᩣ ᩋᨶᩩᨸ᩠ᨸᨲ᩠ᨲᩈᨴᨲ᩠ᨳᩮᩣ ᨸᩁᩥᨠ᩠ᨡᩦᨱᨽᩅᩈᩴᨿᩮᩣᨩᨶᩮᩣ ᩈᨾ᩠ᨾᨴᨬ᩠ᨬᩣ ᩅᩥᨾᩩᨲ᩠ᨲᩮᩣ, ᩋᨽᨻ᩠ᨻᩮᩣ ᩈᩮᩣ ᩍᨾᩣᨶᩥ ᨶᩅ ᨮᩣᨶᩣᨶᩥ ᩋᨩ᩠ᨫᩣᨧᩁᩥᨲᩩ’’ᨶ᩠ᨲᩥ.

ᨸᨬ᩠ᩉᩣᨻ᩠ᨿᩣᨠᩁᨱᩴ

᪑᪘᪗. ‘‘ᨮᩣᨶᩴ ᨡᩮᩣ ᨸᨶᩮᨲᩴ, ᨧᩩᨶ᩠ᨴ, ᩅᩥᨩ᩠ᨩᨲᩥ, ᨿᩴ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᩴ ᩅᨴᩮᨿ᩠ᨿᩩᩴ – ‘ᩋᨲᩦᨲᩴ ᨡᩮᩣ ᩋᨴ᩠ᨵᩣᨶᩴ ᩌᩁᨻ᩠ᨽ ᩈᨾᨱᩮᩣ ᨣᩮᩣᨲᨾᩮᩣ ᩋᨲᩦᩁᨠᩴ ᨬᩣᨱᨴᩔᨶᩴ ᨸᨬ᩠ᨬᨸᩮᨲᩥ, ᨶᩮᩣ ᨧ ᨡᩮᩣ ᩋᨶᩣᨣᨲᩴ ᩋᨴ᩠ᨵᩣᨶᩴ ᩌᩁᨻ᩠ᨽ ᩋᨲᩦᩁᨠᩴ ᨬᩣᨱᨴᩔᨶᩴ ᨸᨬ᩠ᨬᨸᩮᨲᩥ, ᨲᨿᩥᨴᩴ ᨠᩥᩴᩈᩩ ᨲᨿᩥᨴᩴ ᨠᨳᩴᩈᩪ’ᨲᩥ? ᨲᩮ ᨧ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩋᨬ᩠ᨬᩅᩥᩉᩥᨲᨠᩮᨶ ᨬᩣᨱᨴᩔᨶᩮᨶ ᩋᨬ᩠ᨬᩅᩥᩉᩥᨲᨠᩴ ᨬᩣᨱᨴᩔᨶᩴ ᨸᨬ᩠ᨬᨸᩮᨲᨻ᩠ᨻᩴ ᨾᨬ᩠ᨬᨶ᩠ᨲᩥ ᨿᨳᩁᩥᩅ ᨻᩣᩃᩣ ᩋᨻ᩠ᨿᨲ᩠ᨲᩣ. ᩋᨲᩦᨲᩴ ᨡᩮᩣ, ᨧᩩᨶ᩠ᨴ, ᩋᨴ᩠ᨵᩣᨶᩴ ᩌᩁᨻ᩠ᨽ ᨲᨳᩣᨣᨲᩔ ᩈᨲᩣᨶᩩᩈᩣᩁᩥ ᨬᩣᨱᩴ ᩉᩮᩣᨲᩥ; ᩈᩮᩣ ᨿᩣᩅᨲᨠᩴ ᩌᨠᨦ᩠ᨡᨲᩥ ᨲᩣᩅᨲᨠᩴ ᩋᨶᩩᩔᩁᨲᩥ. ᩋᨶᩣᨣᨲᨬ᩠ᨧ ᨡᩮᩣ ᩋᨴ᩠ᨵᩣᨶᩴ ᩌᩁᨻ᩠ᨽ ᨲᨳᩣᨣᨲᩔ ᨻᩮᩣᨵᩥᨩᩴ ᨬᩣᨱᩴ ᩏᨸ᩠ᨸᨩ᩠ᨩᨲᩥ – ‘ᩋᨿᨾᨶ᩠ᨲᩥᨾᩣ ᨩᩣᨲᩥ, ᨶᨲ᩠ᨳᩥᨴᩣᨶᩥ ᨸᩩᨶᨻ᩠ᨽᩅᩮᩣ’ᨲᩥ. ‘ᩋᨲᩦᨲᩴ ᨧᩮᨸᩥ, ᨧᩩᨶ᩠ᨴ, ᩉᩮᩣᨲᩥ ᩋᨽᩪᨲᩴ ᩋᨲᨧ᩠ᨨᩴ ᩋᨶᨲ᩠ᨳᩈᩴᩉᩥᨲᩴ, ᨶ ᨲᩴ ᨲᨳᩣᨣᨲᩮᩣ ᨻ᩠ᨿᩣᨠᩁᩮᩣᨲᩥ. ᩋᨲᩦᨲᩴ ᨧᩮᨸᩥ, ᨧᩩᨶ᩠ᨴ, ᩉᩮᩣᨲᩥ ᨽᩪᨲᩴ ᨲᨧ᩠ᨨᩴ ᩋᨶᨲ᩠ᨳᩈᩴᩉᩥᨲᩴ, ᨲᨾ᩠ᨸᩥ ᨲᨳᩣᨣᨲᩮᩣ ᨶ ᨻ᩠ᨿᩣᨠᩁᩮᩣᨲᩥ. ᩋᨲᩦᨲᩴ ᨧᩮᨸᩥ ᨧᩩᨶ᩠ᨴ, ᩉᩮᩣᨲᩥ ᨽᩪᨲᩴ ᨲᨧ᩠ᨨᩴ ᩋᨲ᩠ᨳᩈᩴᩉᩥᨲᩴ, ᨲᨲᩕ ᨠᩣᩃᨬ᩠ᨬᩪ ᨲᨳᩣᨣᨲᩮᩣ ᩉᩮᩣᨲᩥ ᨲᩔ ᨸᨬ᩠ᩉᩔ ᩅᩮᨿ᩠ᨿᩣᨠᩁᨱᩣᨿ. ᩋᨶᩣᨣᨲᩴ ᨧᩮᨸᩥ, ᨧᩩᨶ᩠ᨴ, ᩉᩮᩣᨲᩥ ᩋᨽᩪᨲᩴ ᩋᨲᨧ᩠ᨨᩴ ᩋᨶᨲ᩠ᨳᩈᩴᩉᩥᨲᩴ, ᨶ ᨲᩴ ᨲᨳᩣᨣᨲᩮᩣ ᨻ᩠ᨿᩣᨠᩁᩮᩣᨲᩥ…ᨸᩮ… ᨲᩔ ᨸᨬ᩠ᩉᩔ ᩅᩮᨿ᩠ᨿᩣᨠᩁᨱᩣᨿ. ᨸᨧ᩠ᨧᩩᨸ᩠ᨸᨶ᩠ᨶᩴ ᨧᩮᨸᩥ, ᨧᩩᨶ᩠ᨴ, ᩉᩮᩣᨲᩥ ᩋᨽᩪᨲᩴ ᩋᨲᨧ᩠ᨨᩴ ᩋᨶᨲ᩠ᨳᩈᩴᩉᩥᨲᩴ, ᨶ ᨲᩴ ᨲᨳᩣᨣᨲᩮᩣ ᨻ᩠ᨿᩣᨠᩁᩮᩣᨲᩥ. ᨸᨧ᩠ᨧᩩᨸ᩠ᨸᨶ᩠ᨶᩴ ᨧᩮᨸᩥ, ᨧᩩᨶ᩠ᨴ, ᩉᩮᩣᨲᩥ ᨽᩪᨲᩴ ᨲᨧ᩠ᨨᩴ ᩋᨶᨲ᩠ᨳᩈᩴᩉᩥᨲᩴ, ᨲᨾ᩠ᨸᩥ ᨲᨳᩣᨣᨲᩮᩣ ᨶ ᨻ᩠ᨿᩣᨠᩁᩮᩣᨲᩥ. ᨸᨧ᩠ᨧᩩᨸ᩠ᨸᨶ᩠ᨶᩴ ᨧᩮᨸᩥ, ᨧᩩᨶ᩠ᨴ, ᩉᩮᩣᨲᩥ ᨽᩪᨲᩴ ᨲᨧ᩠ᨨᩴ ᩋᨲ᩠ᨳᩈᩴᩉᩥᨲᩴ, ᨲᨲᩕ ᨠᩣᩃᨬ᩠ᨬᩪ ᨲᨳᩣᨣᨲᩮᩣ ᩉᩮᩣᨲᩥ ᨲᩔ ᨸᨬ᩠ᩉᩔ ᩅᩮᨿ᩠ᨿᩣᨠᩁᨱᩣᨿ.

᪑᪘᪘. ‘‘ᩍᨲᩥ ᨡᩮᩣ, ᨧᩩᨶ᩠ᨴ, ᩋᨲᩦᨲᩣᨶᩣᨣᨲᨸᨧ᩠ᨧᩩᨸ᩠ᨸᨶ᩠ᨶᩮᩈᩩ ᨵᨾ᩠ᨾᩮᩈᩩ ᨲᨳᩣᨣᨲᩮᩣ ᨠᩣᩃᩅᩣᨴᩦ [ᨠᩣᩃᩅᩣᨴᩦ ᩈᨧ᩠ᨧᩅᩣᨴᩦ (ᩈ᩠ᨿᩣ.)] ᨽᩪᨲᩅᩣᨴᩦ ᩋᨲ᩠ᨳᩅᩣᨴᩦ ᨵᨾ᩠ᨾᩅᩣᨴᩦ ᩅᩥᨶᨿᩅᩣᨴᩦ, ᨲᩈ᩠ᨾᩣ ‘ᨲᨳᩣᨣᨲᩮᩣ’ᨲᩥ ᩅᩩᨧ᩠ᨧᨲᩥ. ᨿᨬ᩠ᨧ ᨡᩮᩣ, ᨧᩩᨶ᩠ᨴ, ᩈᨴᩮᩅᨠᩔ ᩃᩮᩣᨠᩔ ᩈᨾᩣᩁᨠᩔ ᩈᨻᩕᩉ᩠ᨾᨠᩔ ᩈᩔᨾᨱᨻᩕᩣᩉ᩠ᨾᨱᩥᨿᩣ ᨸᨩᩣᨿ ᩈᨴᩮᩅᨾᨶᩩᩔᩣᨿ ᨴᩥᨭ᩠ᨮᩴ ᩈᩩᨲᩴ ᨾᩩᨲᩴ ᩅᩥᨬ᩠ᨬᩣᨲᩴ ᨸᨲ᩠ᨲᩴ ᨸᩁᩥᨿᩮᩈᩥᨲᩴ ᩋᨶᩩᩅᩥᨧᩁᩥᨲᩴ ᨾᨶᩈᩣ, ᩈᨻ᩠ᨻᩴ ᨲᨳᩣᨣᨲᩮᨶ ᩋᨽᩥᩈᨾ᩠ᨻᩩᨴ᩠ᨵᩴ, ᨲᩈ᩠ᨾᩣ ‘ᨲᨳᩣᨣᨲᩮᩣ’ᨲᩥ ᩅᩩᨧ᩠ᨧᨲᩥ. ᨿᨬ᩠ᨧ, ᨧᩩᨶ᩠ᨴ, ᩁᨲ᩠ᨲᩥᩴ ᨲᨳᩣᨣᨲᩮᩣ ᩋᨶᩩᨲ᩠ᨲᩁᩴ ᩈᨾ᩠ᨾᩣᩈᨾ᩠ᨻᩮᩣᨵᩥᩴ ᩋᨽᩥᩈᨾ᩠ᨻᩩᨩ᩠ᨫᨲᩥ, ᨿᨬ᩠ᨧ ᩁᨲ᩠ᨲᩥᩴ ᩋᨶᩩᨸᩣᨴᩥᩈᩮᩈᩣᨿ ᨶᩥᨻ᩠ᨻᩣᨶᨵᩣᨲᩩᨿᩣ ᨸᩁᩥᨶᩥᨻ᩠ᨻᩣᨿᨲᩥ, ᨿᩴ ᩑᨲᩈ᩠ᨾᩥᩴ ᩋᨶ᩠ᨲᩁᩮ ᨽᩣᩈᨲᩥ ᩃᨸᨲᩥ ᨶᩥᨴ᩠ᨴᩥᩈᨲᩥ. ᩈᨻ᩠ᨻᩴ ᨲᩴ ᨲᨳᩮᩅ ᩉᩮᩣᨲᩥ ᨶᩮᩣ ᩋᨬ᩠ᨬᨳᩣ, ᨲᩈ᩠ᨾᩣ ‘ᨲᨳᩣᨣᨲᩮᩣ’ᨲᩥ ᩅᩩᨧ᩠ᨧᨲᩥ. ᨿᨳᩣᩅᩣᨴᩦ, ᨧᩩᨶ᩠ᨴ, ᨲᨳᩣᨣᨲᩮᩣ ᨲᨳᩣᨠᩣᩁᩦ, ᨿᨳᩣᨠᩣᩁᩦ ᨲᨳᩣᩅᩣᨴᩦ. ᩍᨲᩥ ᨿᨳᩣᩅᩣᨴᩦ ᨲᨳᩣᨠᩣᩁᩦ, ᨿᨳᩣᨠᩣᩁᩦ ᨲᨳᩣᩅᩣᨴᩦ, ᨲᩈ᩠ᨾᩣ ‘ᨲᨳᩣᨣᨲᩮᩣ’ᨲᩥ ᩅᩩᨧ᩠ᨧᨲᩥ. ᩈᨴᩮᩅᨠᩮ ᩃᩮᩣᨠᩮ, ᨧᩩᨶ᩠ᨴ, ᩈᨾᩣᩁᨠᩮ ᩈᨻᩕᩉ᩠ᨾᨠᩮ ᩈᩔᨾᨱᨻᩕᩣᩉ᩠ᨾᨱᩥᨿᩣ ᨸᨩᩣᨿ ᩈᨴᩮᩅᨾᨶᩩᩔᩣᨿ ᨲᨳᩣᨣᨲᩮᩣ ᩋᨽᩥᨽᩪ ᩋᨶᨽᩥᨽᩪᨲᩮᩣ ᩋᨬ᩠ᨬᨴᨲ᩠ᨳᩩᨴᩈᩮᩣ ᩅᩈᩅᨲ᩠ᨲᩦ, ᨲᩈ᩠ᨾᩣ ‘ᨲᨳᩣᨣᨲᩮᩣ’ᨲᩥ ᩅᩩᨧ᩠ᨧᨲᩥ.

ᩋᨻ᩠ᨿᩣᨠᨲᨭ᩠ᨮᩣᨶᩴ

᪑᪘᪙. ‘‘ᨮᩣᨶᩴ ᨡᩮᩣ ᨸᨶᩮᨲᩴ, ᨧᩩᨶ᩠ᨴ, ᩅᩥᨩ᩠ᨩᨲᩥ ᨿᩴ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᩴ ᩅᨴᩮᨿ᩠ᨿᩩᩴ – ‘ᨠᩥᩴ ᨶᩩ ᨡᩮᩣ, ᩌᩅᩩᩈᩮᩣ, ᩉᩮᩣᨲᩥ ᨲᨳᩣᨣᨲᩮᩣ ᨸᩁᩴ ᨾᩁᨱᩣ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ? ᩑᩅᩴᩅᩣᨴᩥᨶᩮᩣ, ᨧᩩᨶ᩠ᨴ, ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᨾᩔᩩ ᩅᨧᨶᩦᨿᩣ – ‘ᩋᨻ᩠ᨿᩣᨠᨲᩴ ᨡᩮᩣ, ᩌᩅᩩᩈᩮᩣ, ᨽᨣᩅᨲᩣ – ‘‘ᩉᩮᩣᨲᩥ ᨲᨳᩣᨣᨲᩮᩣ ᨸᩁᩴ ᨾᩁᨱᩣ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’’’ᨶ᩠ᨲᩥ.

‘‘ᨮᩣᨶᩴ ᨡᩮᩣ ᨸᨶᩮᨲᩴ, ᨧᩩᨶ᩠ᨴ, ᩅᩥᨩ᩠ᨩᨲᩥ, ᨿᩴ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᩴ ᩅᨴᩮᨿ᩠ᨿᩩᩴ – ‘ᨠᩥᩴ ᨸᨶᩣᩅᩩᩈᩮᩣ, ᨶ ᩉᩮᩣᨲᩥ ᨲᨳᩣᨣᨲᩮᩣ ᨸᩁᩴ ᨾᩁᨱᩣ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ? ᩑᩅᩴᩅᩣᨴᩥᨶᩮᩣ, ᨧᩩᨶ᩠ᨴ, ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᨾᩔᩩ ᩅᨧᨶᩦᨿᩣ – ‘ᩑᨲᨾ᩠ᨸᩥ ᨡᩮᩣ, ᩌᩅᩩᩈᩮᩣ, ᨽᨣᩅᨲᩣ ᩋᨻ᩠ᨿᩣᨠᨲᩴ – ‘‘ᨶ ᩉᩮᩣᨲᩥ ᨲᨳᩣᨣᨲᩮᩣ ᨸᩁᩴ ᨾᩁᨱᩣ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’’’ᨶ᩠ᨲᩥ.

‘‘ᨮᩣᨶᩴ ᨡᩮᩣ ᨸᨶᩮᨲᩴ, ᨧᩩᨶ᩠ᨴ, ᩅᩥᨩ᩠ᨩᨲᩥ, ᨿᩴ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᩴ ᩅᨴᩮᨿ᩠ᨿᩩᩴ – ‘ᨠᩥᩴ ᨸᨶᩣᩅᩩᩈᩮᩣ, ᩉᩮᩣᨲᩥ ᨧ ᨶ ᨧ ᩉᩮᩣᨲᩥ ᨲᨳᩣᨣᨲᩮᩣ ᨸᩁᩴ ᨾᩁᨱᩣ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ? ᩑᩅᩴᩅᩣᨴᩥᨶᩮᩣ, ᨧᩩᨶ᩠ᨴ, ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᨾᩔᩩ ᩅᨧᨶᩦᨿᩣ – ‘ᩋᨻ᩠ᨿᩣᨠᨲᩴ ᨡᩮᩣ ᩑᨲᩴ, ᩌᩅᩩᩈᩮᩣ, ᨽᨣᩅᨲᩣ – ‘‘ᩉᩮᩣᨲᩥ ᨧ ᨶ ᨧ ᩉᩮᩣᨲᩥ ᨲᨳᩣᨣᨲᩮᩣ ᨸᩁᩴ ᨾᩁᨱᩣ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’’’ᨶ᩠ᨲᩥ.

‘‘ᨮᩣᨶᩴ ᨡᩮᩣ ᨸᨶᩮᨲᩴ, ᨧᩩᨶ᩠ᨴ, ᩅᩥᨩ᩠ᨩᨲᩥ, ᨿᩴ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᩴ ᩅᨴᩮᨿ᩠ᨿᩩᩴ – ‘ᨠᩥᩴ ᨸᨶᩣᩅᩩᩈᩮᩣ, ᨶᩮᩅ ᩉᩮᩣᨲᩥ ᨶ ᨶ ᩉᩮᩣᨲᩥ ᨲᨳᩣᨣᨲᩮᩣ ᨸᩁᩴ ᨾᩁᨱᩣ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ? ᩑᩅᩴᩅᩣᨴᩥᨶᩮᩣ, ᨧᩩᨶ᩠ᨴ, ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᨾᩔᩩ ᩅᨧᨶᩦᨿᩣ – ‘ᩑᨲᨾ᩠ᨸᩥ ᨡᩮᩣ, ᩌᩅᩩᩈᩮᩣ, ᨽᨣᩅᨲᩣ ᩋᨻ᩠ᨿᩣᨠᨲᩴ – ‘‘ᨶᩮᩅ ᩉᩮᩣᨲᩥ ᨶ ᨶ ᩉᩮᩣᨲᩥ ᨲᨳᩣᨣᨲᩮᩣ ᨸᩁᩴ ᨾᩁᨱᩣ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’’’ᨶ᩠ᨲᩥ.

‘‘ᨮᩣᨶᩴ ᨡᩮᩣ ᨸᨶᩮᨲᩴ, ᨧᩩᨶ᩠ᨴ, ᩅᩥᨩ᩠ᨩᨲᩥ, ᨿᩴ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᩴ ᩅᨴᩮᨿ᩠ᨿᩩᩴ – ‘ᨠᩈ᩠ᨾᩣ ᨸᨶᩮᨲᩴ, ᩌᩅᩩᩈᩮᩣ, ᩈᨾᨱᩮᨶ ᨣᩮᩣᨲᨾᩮᨶ ᩋᨻ᩠ᨿᩣᨠᨲ’ᨶ᩠ᨲᩥ? ᩑᩅᩴᩅᩣᨴᩥᨶᩮᩣ, ᨧᩩᨶ᩠ᨴ, ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᨾᩔᩩ ᩅᨧᨶᩦᨿᩣ – ‘ᨶ ᩉᩮᨲᩴ, ᩌᩅᩩᩈᩮᩣ, ᩋᨲ᩠ᨳᩈᩴᩉᩥᨲᩴ ᨶ ᨵᨾ᩠ᨾᩈᩴᩉᩥᨲᩴ ᨶ ᩌᨴᩥᨻᩕᩉ᩠ᨾᨧᩁᩥᨿᨠᩴ ᨶ ᨶᩥᨻ᩠ᨻᩥᨴᩣᨿ ᨶ ᩅᩥᩁᩣᨣᩣᨿ ᨶ ᨶᩥᩁᩮᩣᨵᩣᨿ ᨶ ᩏᨸᩈᨾᩣᨿ ᨶ ᩋᨽᩥᨬ᩠ᨬᩣᨿ ᨶ ᩈᨾ᩠ᨻᩮᩣᨵᩣᨿ ᨶ ᨶᩥᨻ᩠ᨻᩣᨶᩣᨿ ᩈᩴᩅᨲ᩠ᨲᨲᩥ, ᨲᩈ᩠ᨾᩣ ᨲᩴ ᨽᨣᩅᨲᩣ ᩋᨻ᩠ᨿᩣᨠᨲ’ᨶ᩠ᨲᩥ.

ᨻ᩠ᨿᩣᨠᨲᨭ᩠ᨮᩣᨶᩴ

᪑᪙᪐. ‘‘ᨮᩣᨶᩴ ᨡᩮᩣ ᨸᨶᩮᨲᩴ, ᨧᩩᨶ᩠ᨴ, ᩅᩥᨩ᩠ᨩᨲᩥ, ᨿᩴ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᩴ ᩅᨴᩮᨿ᩠ᨿᩩᩴ – ‘ᨠᩥᩴ ᨸᨶᩣᩅᩩᩈᩮᩣ, ᩈᨾᨱᩮᨶ ᨣᩮᩣᨲᨾᩮᨶ ᨻ᩠ᨿᩣᨠᨲ’ᨶ᩠ᨲᩥ? ᩑᩅᩴᩅᩣᨴᩥᨶᩮᩣ, ᨧᩩᨶ᩠ᨴ, ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᨾᩔᩩ ᩅᨧᨶᩦᨿᩣ – ‘ᩍᨴᩴ ᨴᩩᨠ᩠ᨡᨶ᩠ᨲᩥ ᨡᩮᩣ, ᩌᩅᩩᩈᩮᩣ, ᨽᨣᩅᨲᩣ ᨻ᩠ᨿᩣᨠᨲᩴ, ᩋᨿᩴ ᨴᩩᨠ᩠ᨡᩈᨾᩩᨴᨿᩮᩣᨲᩥ ᨡᩮᩣ, ᩌᩅᩩᩈᩮᩣ, ᨽᨣᩅᨲᩣ ᨻ᩠ᨿᩣᨠᨲᩴ, ᩋᨿᩴ ᨴᩩᨠ᩠ᨡᨶᩥᩁᩮᩣᨵᩮᩣᨲᩥ ᨡᩮᩣ, ᩌᩅᩩᩈᩮᩣ, ᨽᨣᩅᨲᩣ ᨻ᩠ᨿᩣᨠᨲᩴ, ᩋᨿᩴ ᨴᩩᨠ᩠ᨡᨶᩥᩁᩮᩣᨵᨣᩣᨾᩥᨶᩦ ᨸᨭᩥᨸᨴᩣᨲᩥ ᨡᩮᩣ, ᩌᩅᩩᩈᩮᩣ, ᨽᨣᩅᨲᩣ ᨻ᩠ᨿᩣᨠᨲ’ᨶ᩠ᨲᩥ.

‘‘ᨮᩣᨶᩴ ᨡᩮᩣ ᨸᨶᩮᨲᩴ, ᨧᩩᨶ᩠ᨴ, ᩅᩥᨩ᩠ᨩᨲᩥ, ᨿᩴ ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᩴ ᩅᨴᩮᨿ᩠ᨿᩩᩴ – ‘ᨠᩈ᩠ᨾᩣ ᨸᨶᩮᨲᩴ, ᩌᩅᩩᩈᩮᩣ, ᩈᨾᨱᩮᨶ ᨣᩮᩣᨲᨾᩮᨶ ᨻ᩠ᨿᩣᨠᨲ’ᨶ᩠ᨲᩥ? ᩑᩅᩴᩅᩣᨴᩥᨶᩮᩣ, ᨧᩩᨶ᩠ᨴ, ᩋᨬ᩠ᨬᨲᩥᨲ᩠ᨳᩥᨿᩣ ᨸᩁᩥᨻ᩠ᨻᩣᨩᨠᩣ ᩑᩅᨾᩔᩩ ᩅᨧᨶᩦᨿᩣ – ‘ᩑᨲᨬ᩠ᩉᩥ, ᩌᩅᩩᩈᩮᩣ, ᩋᨲ᩠ᨳᩈᩴᩉᩥᨲᩴ, ᩑᨲᩴ ᨵᨾ᩠ᨾᩈᩴᩉᩥᨲᩴ, ᩑᨲᩴ ᩌᨴᩥᨻᩕᩉ᩠ᨾᨧᩁᩥᨿᨠᩴ ᩑᨠᨶ᩠ᨲᨶᩥᨻ᩠ᨻᩥᨴᩣᨿ ᩅᩥᩁᩣᨣᩣᨿ ᨶᩥᩁᩮᩣᨵᩣᨿ ᩏᨸᩈᨾᩣᨿ ᩋᨽᩥᨬ᩠ᨬᩣᨿ ᩈᨾ᩠ᨻᩮᩣᨵᩣᨿ ᨶᩥᨻ᩠ᨻᩣᨶᩣᨿ ᩈᩴᩅᨲ᩠ᨲᨲᩥ. ᨲᩈ᩠ᨾᩣ ᨲᩴ ᨽᨣᩅᨲᩣ ᨻ᩠ᨿᩣᨠᨲ’ᨶ᩠ᨲᩥ.

ᨸᩩᨻ᩠ᨻᨶ᩠ᨲᩈᩉᨣᨲᨴᩥᨭ᩠ᨮᩥᨶᩥᩔᨿᩣ

᪑᪙᪑. ‘‘ᨿᩮᨸᩥ ᨲᩮ, ᨧᩩᨶ᩠ᨴ, ᨸᩩᨻ᩠ᨻᨶ᩠ᨲᩈᩉᨣᨲᩣ ᨴᩥᨭ᩠ᨮᩥᨶᩥᩔᨿᩣ, ᨲᩮᨸᩥ ᩅᩮᩣ ᨾᨿᩣ ᨻ᩠ᨿᩣᨠᨲᩣ, ᨿᨳᩣ ᨲᩮ ᨻ᩠ᨿᩣᨠᩣᨲᨻ᩠ᨻᩣ. ᨿᨳᩣ ᨧ ᨲᩮ ᨶ ᨻ᩠ᨿᩣᨠᩣᨲᨻ᩠ᨻᩣ, ᨠᩥᩴ ᩅᩮᩣ ᩋᩉᩴ ᨲᩮ ᨲᨳᩣ [ᨲᨲ᩠ᨳ (ᩈ᩠ᨿᩣ. ᨠ.)] ᨻ᩠ᨿᩣᨠᩁᩥᩔᩣᨾᩥ? ᨿᩮᨸᩥ ᨲᩮ, ᨧᩩᨶ᩠ᨴ, ᩋᨸᩁᨶ᩠ᨲᩈᩉᨣᨲᩣ ᨴᩥᨭ᩠ᨮᩥᨶᩥᩔᨿᩣ, ᨲᩮᨸᩥ ᩅᩮᩣ ᨾᨿᩣ ᨻ᩠ᨿᩣᨠᨲᩣ, ᨿᨳᩣ ᨲᩮ ᨻ᩠ᨿᩣᨠᩣᨲᨻ᩠ᨻᩣ. ᨿᨳᩣ ᨧ ᨲᩮ ᨶ ᨻ᩠ᨿᩣᨠᩣᨲᨻ᩠ᨻᩣ, ᨠᩥᩴ ᩅᩮᩣ ᩋᩉᩴ ᨲᩮ ᨲᨳᩣ ᨻ᩠ᨿᩣᨠᩁᩥᩔᩣᨾᩥ? ᨠᨲᨾᩮ ᨧ ᨲᩮ, ᨧᩩᨶ᩠ᨴ, ᨸᩩᨻ᩠ᨻᨶ᩠ᨲᩈᩉᨣᨲᩣ ᨴᩥᨭ᩠ᨮᩥᨶᩥᩔᨿᩣ, ᨿᩮ ᩅᩮᩣ ᨾᨿᩣ ᨻ᩠ᨿᩣᨠᨲᩣ, ᨿᨳᩣ ᨲᩮ ᨻ᩠ᨿᩣᨠᩣᨲᨻ᩠ᨻᩣ. (ᨿᨳᩣ ᨧ ᨲᩮ ᨶ ᨻ᩠ᨿᩣᨠᩣᨲᨻ᩠ᨻᩣ, ᨠᩥᩴ ᩅᩮᩣ ᩋᩉᩴ ᨲᩮ ᨲᨳᩣ ᨻ᩠ᨿᩣᨠᩁᩥᩔᩣᨾᩥ) [(ᨿᨳᩣ ᨧ ᨲᩮ ᨶ ᨻ᩠ᨿᩣᨠᩣᨲᨻ᩠ᨻᩣ) ᩈᨻ᩠ᨻᨲ᩠ᨳ]? ᩈᨶ᩠ᨲᩥ ᨡᩮᩣ, ᨧᩩᨶ᩠ᨴ, ᩑᨠᩮ ᩈᨾᨱᨻᩕᩣᩉ᩠ᨾᨱᩣ ᩑᩅᩴᩅᩣᨴᩥᨶᩮᩣ ᩑᩅᩴᨴᩥᨭ᩠ᨮᩥᨶᩮᩣ – ‘ᩈᩔᨲᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ. ᩈᨶ᩠ᨲᩥ ᨸᨶ, ᨧᩩᨶ᩠ᨴ, ᩑᨠᩮ ᩈᨾᨱᨻᩕᩣᩉ᩠ᨾᨱᩣ ᩑᩅᩴᩅᩣᨴᩥᨶᩮᩣ ᩑᩅᩴᨴᩥᨭ᩠ᨮᩥᨶᩮᩣ – ‘ᩋᩈᩔᨲᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ…ᨸᩮ… ᩈᩔᨲᩮᩣ ᨧ ᩋᩈᩔᨲᩮᩣ ᨧ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ… ᨶᩮᩅ ᩈᩔᨲᩮᩣ ᨶᩣᩈᩔᨲᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ… ᩈᨿᩴᨠᨲᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ… ᨸᩁᩴᨠᨲᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ… ᩈᨿᩴᨠᨲᩮᩣ ᨧ ᨸᩁᩴᨠᨲᩮᩣ ᨧ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ… ᩋᩈᨿᩴᨠᩣᩁᩮᩣ ᩋᨸᩁᩴᨠᩣᩁᩮᩣ ᩋᨵᩥᨧ᩠ᨧᩈᨾᩩᨸ᩠ᨸᨶ᩠ᨶᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ. ᩈᩔᨲᩴ ᩈᩩᨡᨴᩩᨠ᩠ᨡᩴ… ᩋᩈᩔᨲᩴ ᩈᩩᨡᨴᩩᨠ᩠ᨡᩴ… ᩈᩔᨲᨬ᩠ᨧ ᩋᩈᩔᨲᨬ᩠ᨧ ᩈᩩᨡᨴᩩᨠ᩠ᨡᩴ… ᨶᩮᩅᩈᩔᨲᩴ ᨶᩣᩈᩔᨲᩴ ᩈᩩᨡᨴᩩᨠ᩠ᨡᩴ… ᩈᨿᩴᨠᨲᩴ ᩈᩩᨡᨴᩩᨠ᩠ᨡᩴ… ᨸᩁᩴᨠᨲᩴ ᩈᩩᨡᨴᩩᨠ᩠ᨡᩴ… ᩈᨿᩴᨠᨲᨬ᩠ᨧ ᨸᩁᩴᨠᨲᨬ᩠ᨧ ᩈᩩᨡᨴᩩᨠ᩠ᨡᩴ… ᩋᩈᨿᩴᨠᩣᩁᩴ ᩋᨸᩁᩴᨠᩣᩁᩴ ᩋᨵᩥᨧ᩠ᨧᩈᨾᩩᨸ᩠ᨸᨶ᩠ᨶᩴ ᩈᩩᨡᨴᩩᨠ᩠ᨡᩴ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ.

᪑᪙᪒. ‘‘ᨲᨲᩕ, ᨧᩩᨶ᩠ᨴ, ᨿᩮ ᨲᩮ ᩈᨾᨱᨻᩕᩣᩉ᩠ᨾᨱᩣ ᩑᩅᩴᩅᩣᨴᩥᨶᩮᩣ ᩑᩅᩴᨴᩥᨭ᩠ᨮᩥᨶᩮᩣ – ‘ᩈᩔᨲᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ. ᨲ᩠ᨿᩣᩉᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᩴ ᩅᨴᩣᨾᩥ – ‘ᩋᨲ᩠ᨳᩥ ᨶᩩ ᨡᩮᩣ ᩍᨴᩴ, ᩌᩅᩩᩈᩮᩣ, ᩅᩩᨧ᩠ᨧᨲᩥ – ‘‘ᩈᩔᨲᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧᩣ’’ᨲᩥ? ᨿᨬ᩠ᨧ ᨡᩮᩣ ᨲᩮ ᩑᩅᨾᩣᩉᩴᩈᩩ – ‘ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ. ᨲᩴ ᨲᩮᩈᩴ ᨶᩣᨶᩩᨩᩣᨶᩣᨾᩥ. ᨲᩴ ᨠᩥᩔ ᩉᩮᨲᩩ? ᩋᨬ᩠ᨬᨳᩣᩈᨬ᩠ᨬᩥᨶᩮᩣᨸᩥ ᩉᩮᨲ᩠ᨳ, ᨧᩩᨶ᩠ᨴ, ᩈᨶ᩠ᨲᩮᨠᩮ ᩈᨲ᩠ᨲᩣ. ᩍᨾᩣᨿᨸᩥ ᨡᩮᩣ ᩋᩉᩴ, ᨧᩩᨶ᩠ᨴ, ᨸᨬ᩠ᨬᨲ᩠ᨲᩥᨿᩣ ᨶᩮᩅ ᩋᨲ᩠ᨲᨶᩣ ᩈᨾᩈᨾᩴ ᩈᨾᨶᩩᨸᩔᩣᨾᩥ ᨠᩩᨲᩮᩣ ᨽᩥᨿ᩠ᨿᩮᩣ. ᩋᨳ ᨡᩮᩣ ᩋᩉᨾᩮᩅ ᨲᨲ᩠ᨳ ᨽᩥᨿ᩠ᨿᩮᩣ ᨿᨴᩥᨴᩴ ᩋᨵᩥᨸᨬ᩠ᨬᨲ᩠ᨲᩥ.

᪑᪙᪓. ‘‘ᨲᨲᩕ, ᨧᩩᨶ᩠ᨴ, ᨿᩮ ᨲᩮ ᩈᨾᨱᨻᩕᩣᩉ᩠ᨾᨱᩣ ᩑᩅᩴᩅᩣᨴᩥᨶᩮᩣ ᩑᩅᩴᨴᩥᨭ᩠ᨮᩥᨶᩮᩣ – ‘ᩋᩈᩔᨲᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ…ᨸᩮ… ᩈᩔᨲᩮᩣ ᨧ ᩋᩈᩔᨲᩮᩣ ᨧ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ… ᨶᩮᩅᩈᩔᨲᩮᩣ ᨶᩣᩈᩔᨲᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ… ᩈᨿᩴᨠᨲᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ… ᨸᩁᩴᨠᨲᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ… ᩈᨿᩴᨠᨲᩮᩣ ᨧ ᨸᩁᩴᨠᨲᩮᩣ ᨧ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ… ᩋᩈᨿᩴᨠᩣᩁᩮᩣ ᩋᨸᩁᩴᨠᩣᩁᩮᩣ ᩋᨵᩥᨧ᩠ᨧᩈᨾᩩᨸ᩠ᨸᨶ᩠ᨶᩮᩣ ᩋᨲ᩠ᨲᩣ ᨧ ᩃᩮᩣᨠᩮᩣ ᨧ… ᩈᩔᨲᩴ ᩈᩩᨡᨴᩩᨠ᩠ᨡᩴ… ᩋᩈᩔᨲᩴ ᩈᩩᨡᨴᩩᨠ᩠ᨡᩴ… ᩈᩔᨲᨬ᩠ᨧ ᩋᩈᩔᨲᨬ᩠ᨧ ᩈᩩᨡᨴᩩᨠ᩠ᨡᩴ… ᨶᩮᩅᩈᩔᨲᩴ ᨶᩣᩈᩔᨲᩴ ᩈᩩᨡᨴᩩᨠ᩠ᨡᩴ… ᩈᨿᩴᨠᨲᩴ ᩈᩩᨡᨴᩩᨠ᩠ᨡᩴ… ᨸᩁᩴᨠᨲᩴ ᩈᩩᨡᨴᩩᨠ᩠ᨡᩴ… ᩈᨿᩴᨠᨲᨬ᩠ᨧ ᨸᩁᩴᨠᨲᨬ᩠ᨧ ᩈᩩᨡᨴᩩᨠ᩠ᨡᩴ… ᩋᩈᨿᩴᨠᩣᩁᩴ ᩋᨸᩁᩴᨠᩣᩁᩴ ᩋᨵᩥᨧ᩠ᨧᩈᨾᩩᨸ᩠ᨸᨶ᩠ᨶᩴ ᩈᩩᨡᨴᩩᨠ᩠ᨡᩴ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ. ᨲ᩠ᨿᩣᩉᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᩴ ᩅᨴᩣᨾᩥ – ‘ᩋᨲ᩠ᨳᩥ ᨶᩩ ᨡᩮᩣ ᩍᨴᩴ, ᩌᩅᩩᩈᩮᩣ, ᩅᩩᨧ᩠ᨧᨲᩥ – ‘‘ᩋᩈᨿᩴᨠᩣᩁᩴ ᩋᨸᩁᩴᨠᩣᩁᩴ ᩋᨵᩥᨧ᩠ᨧᩈᨾᩩᨸ᩠ᨸᨶ᩠ᨶᩴ ᩈᩩᨡᨴᩩᨠ᩠ᨡ’’’ᨶ᩠ᨲᩥ? ᨿᨬ᩠ᨧ ᨡᩮᩣ ᨲᩮ ᩑᩅᨾᩣᩉᩴᩈᩩ – ‘ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ. ᨲᩴ ᨲᩮᩈᩴ ᨶᩣᨶᩩᨩᩣᨶᩣᨾᩥ. ᨲᩴ ᨠᩥᩔ ᩉᩮᨲᩩ? ᩋᨬ᩠ᨬᨳᩣᩈᨬ᩠ᨬᩥᨶᩮᩣᨸᩥ ᩉᩮᨲ᩠ᨳ, ᨧᩩᨶ᩠ᨴ, ᩈᨶ᩠ᨲᩮᨠᩮ ᩈᨲ᩠ᨲᩣ. ᩍᨾᩣᨿᨸᩥ ᨡᩮᩣ ᩋᩉᩴ, ᨧᩩᨶ᩠ᨴ, ᨸᨬ᩠ᨬᨲ᩠ᨲᩥᨿᩣ ᨶᩮᩅ ᩋᨲ᩠ᨲᨶᩣ ᩈᨾᩈᨾᩴ ᩈᨾᨶᩩᨸᩔᩣᨾᩥ ᨠᩩᨲᩮᩣ ᨽᩥᨿ᩠ᨿᩮᩣ. ᩋᨳ ᨡᩮᩣ ᩋᩉᨾᩮᩅ ᨲᨲ᩠ᨳ ᨽᩥᨿ᩠ᨿᩮᩣ ᨿᨴᩥᨴᩴ ᩋᨵᩥᨸᨬ᩠ᨬᨲ᩠ᨲᩥ. ᩍᨾᩮ ᨡᩮᩣ ᨲᩮ, ᨧᩩᨶ᩠ᨴ, ᨸᩩᨻ᩠ᨻᨶ᩠ᨲᩈᩉᨣᨲᩣ ᨴᩥᨭ᩠ᨮᩥᨶᩥᩔᨿᩣ, ᨿᩮ ᩅᩮᩣ ᨾᨿᩣ ᨻ᩠ᨿᩣᨠᨲᩣ, ᨿᨳᩣ ᨲᩮ ᨻ᩠ᨿᩣᨠᩣᨲᨻ᩠ᨻᩣ. ᨿᨳᩣ ᨧ ᨲᩮ ᨶ ᨻ᩠ᨿᩣᨠᩣᨲᨻ᩠ᨻᩣ, ᨠᩥᩴ ᩅᩮᩣ ᩋᩉᩴ ᨲᩮ ᨲᨳᩣ ᨻ᩠ᨿᩣᨠᩁᩥᩔᩣᨾᩦᨲᩥ [ᨻ᩠ᨿᩣᨠᩁᩥᩔᩣᨾᩦᨲᩥ (ᩈᩦ. ᨠ.)]?

ᩋᨸᩁᨶ᩠ᨲᩈᩉᨣᨲᨴᩥᨭ᩠ᨮᩥᨶᩥᩔᨿᩣ

᪑᪙᪔. ‘‘ᨠᨲᨾᩮ ᨧ ᨲᩮ, ᨧᩩᨶ᩠ᨴ, ᩋᨸᩁᨶ᩠ᨲᩈᩉᨣᨲᩣ ᨴᩥᨭ᩠ᨮᩥᨶᩥᩔᨿᩣ, ᨿᩮ ᩅᩮᩣ ᨾᨿᩣ ᨻ᩠ᨿᩣᨠᨲᩣ, ᨿᨳᩣ ᨲᩮ ᨻ᩠ᨿᩣᨠᩣᨲᨻ᩠ᨻᩣ. (ᨿᨳᩣ ᨧ ᨲᩮ ᨶ ᨻ᩠ᨿᩣᨠᩣᨲᨻ᩠ᨻᩣ, ᨠᩥᩴ ᩅᩮᩣ ᩋᩉᩴ ᨲᩮ ᨲᨳᩣ ᨻ᩠ᨿᩣᨠᩁᩥᩔᩣᨾᩦ) [( ) ᩑᨲ᩠ᨳᨶ᩠ᨲᩁᩮ ᨸᩣᨮᩮᩣ ᩈᨻ᩠ᨻᨲ᩠ᨳᨸᩥ ᨸᩁᩥᨸᩩᨱ᩠ᨱᩮᩣ ᨴᩥᩔᨲᩥ]? ᩈᨶ᩠ᨲᩥ, ᨧᩩᨶ᩠ᨴ, ᩑᨠᩮ ᩈᨾᨱᨻᩕᩣᩉ᩠ᨾᨱᩣ ᩑᩅᩴᩅᩣᨴᩥᨶᩮᩣ ᩑᩅᩴᨴᩥᨭ᩠ᨮᩥᨶᩮᩣ – ‘ᩁᩪᨸᩦ ᩋᨲ᩠ᨲᩣ ᩉᩮᩣᨲᩥ ᩋᩁᩮᩣᨣᩮᩣ ᨸᩁᩴ ᨾᩁᨱᩣ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ. ᩈᨶ᩠ᨲᩥ ᨸᨶ, ᨧᩩᨶ᩠ᨴ, ᩑᨠᩮ ᩈᨾᨱᨻᩕᩣᩉ᩠ᨾᨱᩣ ᩑᩅᩴᩅᩣᨴᩥᨶᩮᩣ ᩑᩅᩴᨴᩥᨭ᩠ᨮᩥᨶᩮᩣ – ‘ᩋᩁᩪᨸᩦ ᩋᨲ᩠ᨲᩣ ᩉᩮᩣᨲᩥ…ᨸᩮ… ᩁᩪᨸᩦ ᨧ ᩋᩁᩪᨸᩦ ᨧ ᩋᨲ᩠ᨲᩣ ᩉᩮᩣᨲᩥ… ᨶᩮᩅᩁᩪᨸᩦ ᨶᩣᩁᩪᨸᩦ ᩋᨲ᩠ᨲᩣ ᩉᩮᩣᨲᩥ… ᩈᨬ᩠ᨬᩦ ᩋᨲ᩠ᨲᩣ ᩉᩮᩣᨲᩥ… ᩋᩈᨬ᩠ᨬᩦ ᩋᨲ᩠ᨲᩣ ᩉᩮᩣᨲᩥ… ᨶᩮᩅᩈᨬ᩠ᨬᩦᨶᩣᩈᨬ᩠ᨬᩦ ᩋᨲ᩠ᨲᩣ ᩉᩮᩣᨲᩥ… ᩋᨲ᩠ᨲᩣ ᩏᨧ᩠ᨨᩥᨩ᩠ᨩᨲᩥ ᩅᩥᨶᩔᨲᩥ ᨶ ᩉᩮᩣᨲᩥ ᨸᩁᩴ ᨾᩁᨱᩣ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ. ᨲᨲᩕ, ᨧᩩᨶ᩠ᨴ, ᨿᩮ ᨲᩮ ᩈᨾᨱᨻᩕᩣᩉ᩠ᨾᨱᩣ ᩑᩅᩴᩅᩣᨴᩥᨶᩮᩣ ᩑᩅᩴᨴᩥᨭ᩠ᨮᩥᨶᩮᩣ – ‘ᩁᩪᨸᩦ ᩋᨲ᩠ᨲᩣ ᩉᩮᩣᨲᩥ ᩋᩁᩮᩣᨣᩮᩣ ᨸᩁᩴ ᨾᩁᨱᩣ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ. ᨲ᩠ᨿᩣᩉᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᩴ ᩅᨴᩣᨾᩥ – ‘ᩋᨲ᩠ᨳᩥ ᨶᩩ ᨡᩮᩣ ᩍᨴᩴ, ᩌᩅᩩᩈᩮᩣ, ᩅᩩᨧ᩠ᨧᨲᩥ – ‘‘ᩁᩪᨸᩦ ᩋᨲ᩠ᨲᩣ ᩉᩮᩣᨲᩥ ᩋᩁᩮᩣᨣᩮᩣ ᨸᩁᩴ ᨾᩁᨱᩣ’’’ᨲᩥ? ᨿᨬ᩠ᨧ ᨡᩮᩣ ᨲᩮ ᩑᩅᨾᩣᩉᩴᩈᩩ – ‘ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ. ᨲᩴ ᨲᩮᩈᩴ ᨶᩣᨶᩩᨩᩣᨶᩣᨾᩥ. ᨲᩴ ᨠᩥᩔ ᩉᩮᨲᩩ? ᩋᨬ᩠ᨬᨳᩣᩈᨬ᩠ᨬᩥᨶᩮᩣᨸᩥ ᩉᩮᨲ᩠ᨳ, ᨧᩩᨶ᩠ᨴ, ᩈᨶ᩠ᨲᩮᨠᩮ ᩈᨲ᩠ᨲᩣ. ᩍᨾᩣᨿᨸᩥ ᨡᩮᩣ ᩋᩉᩴ, ᨧᩩᨶ᩠ᨴ, ᨸᨬ᩠ᨬᨲ᩠ᨲᩥᨿᩣ ᨶᩮᩅ ᩋᨲ᩠ᨲᨶᩣ ᩈᨾᩈᨾᩴ ᩈᨾᨶᩩᨸᩔᩣᨾᩥ ᨠᩩᨲᩮᩣ ᨽᩥᨿ᩠ᨿᩮᩣ. ᩋᨳ ᨡᩮᩣ ᩋᩉᨾᩮᩅ ᨲᨲ᩠ᨳ ᨽᩥᨿ᩠ᨿᩮᩣ ᨿᨴᩥᨴᩴ ᩋᨵᩥᨸᨬ᩠ᨬᨲ᩠ᨲᩥ.

᪑᪙᪕. ‘‘ᨲᨲᩕ, ᨧᩩᨶ᩠ᨴ, ᨿᩮ ᨲᩮ ᩈᨾᨱᨻᩕᩣᩉ᩠ᨾᨱᩣ ᩑᩅᩴᩅᩣᨴᩥᨶᩮᩣ ᩑᩅᩴᨴᩥᨭ᩠ᨮᩥᨶᩮᩣ – ‘ᩋᩁᩪᨸᩦ ᩋᨲ᩠ᨲᩣ ᩉᩮᩣᨲᩥ…ᨸᩮ… ᩁᩪᨸᩦ ᨧ ᩋᩁᩪᨸᩦ ᨧ ᩋᨲ᩠ᨲᩣ ᩉᩮᩣᨲᩥ… ᨶᩮᩅᩁᩪᨸᩦᨶᩣᩁᩪᨸᩦ ᩋᨲ᩠ᨲᩣ ᩉᩮᩣᨲᩥ… ᩈᨬ᩠ᨬᩦ ᩋᨲ᩠ᨲᩣ ᩉᩮᩣᨲᩥ… ᩋᩈᨬ᩠ᨬᩦ ᩋᨲ᩠ᨲᩣ ᩉᩮᩣᨲᩥ… ᨶᩮᩅᩈᨬ᩠ᨬᩦᨶᩣᩈᨬ᩠ᨬᩦ ᩋᨲ᩠ᨲᩣ ᩉᩮᩣᨲᩥ… ᩋᨲ᩠ᨲᩣ ᩏᨧ᩠ᨨᩥᨩ᩠ᨩᨲᩥ ᩅᩥᨶᩔᨲᩥ ᨶ ᩉᩮᩣᨲᩥ ᨸᩁᩴ ᨾᩁᨱᩣ, ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ. ᨲ᩠ᨿᩣᩉᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᩴ ᩅᨴᩣᨾᩥ – ‘ᩋᨲ᩠ᨳᩥ ᨶᩩ ᨡᩮᩣ ᩍᨴᩴ, ᩌᩅᩩᩈᩮᩣ, ᩅᩩᨧ᩠ᨧᨲᩥ – ‘‘ᩋᨲ᩠ᨲᩣ ᩏᨧ᩠ᨨᩥᨩ᩠ᨩᨲᩥ ᩅᩥᨶᩔᨲᩥ ᨶ ᩉᩮᩣᨲᩥ ᨸᩁᩴ ᨾᩁᨱᩣ’’’ᨲᩥ? ᨿᨬ᩠ᨧ ᨡᩮᩣ ᨲᩮ, ᨧᩩᨶ᩠ᨴ, ᩑᩅᨾᩣᩉᩴᩈᩩ – ‘ᩍᨴᨾᩮᩅ ᩈᨧ᩠ᨧᩴ ᨾᩮᩣᨥᨾᨬ᩠ᨬ’ᨶ᩠ᨲᩥ. ᨲᩴ ᨲᩮᩈᩴ ᨶᩣᨶᩩᨩᩣᨶᩣᨾᩥ. ᨲᩴ ᨠᩥᩔ ᩉᩮᨲᩩ? ᩋᨬ᩠ᨬᨳᩣᩈᨬ᩠ᨬᩥᨶᩮᩣᨸᩥ ᩉᩮᨲ᩠ᨳ, ᨧᩩᨶ᩠ᨴ, ᩈᨶ᩠ᨲᩮᨠᩮ ᩈᨲ᩠ᨲᩣ. ᩍᨾᩣᨿᨸᩥ ᨡᩮᩣ ᩋᩉᩴ, ᨧᩩᨶ᩠ᨴ, ᨸᨬ᩠ᨬᨲ᩠ᨲᩥᨿᩣ ᨶᩮᩅ ᩋᨲ᩠ᨲᨶᩣ ᩈᨾᩈᨾᩴ ᩈᨾᨶᩩᨸᩔᩣᨾᩥ, ᨠᩩᨲᩮᩣ ᨽᩥᨿ᩠ᨿᩮᩣ. ᩋᨳ ᨡᩮᩣ ᩋᩉᨾᩮᩅ ᨲᨲ᩠ᨳ ᨽᩥᨿ᩠ᨿᩮᩣ ᨿᨴᩥᨴᩴ ᩋᨵᩥᨸᨬ᩠ᨬᨲ᩠ᨲᩥ. ᩍᨾᩮ ᨡᩮᩣ ᨲᩮ, ᨧᩩᨶ᩠ᨴ, ᩋᨸᩁᨶ᩠ᨲᩈᩉᨣᨲᩣ ᨴᩥᨭ᩠ᨮᩥᨶᩥᩔᨿᩣ, ᨿᩮ ᩅᩮᩣ ᨾᨿᩣ ᨻ᩠ᨿᩣᨠᨲᩣ, ᨿᨳᩣ ᨲᩮ ᨻ᩠ᨿᩣᨠᩣᨲᨻ᩠ᨻᩣ. ᨿᨳᩣ ᨧ ᨲᩮ ᨶ ᨻ᩠ᨿᩣᨠᩣᨲᨻ᩠ᨻᩣ, ᨠᩥᩴ ᩅᩮᩣ ᩋᩉᩴ ᨲᩮ ᨲᨳᩣ ᨻ᩠ᨿᩣᨠᩁᩥᩔᩣᨾᩦᨲᩥ [ᨻ᩠ᨿᩣᨠᩁᩥᩔᩣᨾᩦᨲᩥ (ᩈᩦ. ᨠ.)]?

᪑᪙᪖. ‘‘ᩍᨾᩮᩈᨬ᩠ᨧ, ᨧᩩᨶ᩠ᨴ, ᨸᩩᨻ᩠ᨻᨶ᩠ᨲᩈᩉᨣᨲᩣᨶᩴ ᨴᩥᨭ᩠ᨮᩥᨶᩥᩔᨿᩣᨶᩴ ᩍᨾᩮᩈᨬ᩠ᨧ ᩋᨸᩁᨶ᩠ᨲᩈᩉᨣᨲᩣᨶᩴ ᨴᩥᨭ᩠ᨮᩥᨶᩥᩔᨿᩣᨶᩴ ᨸᩉᩣᨶᩣᨿ ᩈᨾᨲᩥᨠ᩠ᨠᨾᩣᨿ ᩑᩅᩴ ᨾᨿᩣ ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩣ ᨴᩮᩈᩥᨲᩣ ᨸᨬ᩠ᨬᨲ᩠ᨲᩣ. ᨠᨲᨾᩮ ᨧᨲ᩠ᨲᩣᩁᩮᩣ? ᩍᨵ, ᨧᩩᨶ᩠ᨴ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ. ᩅᩮᨴᨶᩣᩈᩩ ᩅᩮᨴᨶᩣᨶᩩᨸᩔᩦ…ᨸᩮ… ᨧᩥᨲ᩠ᨲᩮ ᨧᩥᨲ᩠ᨲᩣᨶᩩᨸᩔᩦ… ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ, ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ. ᩍᨾᩮᩈᨬ᩠ᨧ ᨧᩩᨶ᩠ᨴ, ᨸᩩᨻ᩠ᨻᨶ᩠ᨲᩈᩉᨣᨲᩣᨶᩴ ᨴᩥᨭ᩠ᨮᩥᨶᩥᩔᨿᩣᨶᩴ ᩍᨾᩮᩈᨬ᩠ᨧ ᩋᨸᩁᨶ᩠ᨲᩈᩉᨣᨲᩣᨶᩴ ᨴᩥᨭ᩠ᨮᩥᨶᩥᩔᨿᩣᨶᩴ ᨸᩉᩣᨶᩣᨿ ᩈᨾᨲᩥᨠ᩠ᨠᨾᩣᨿ. ᩑᩅᩴ ᨾᨿᩣ ᩍᨾᩮ ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩣ ᨴᩮᩈᩥᨲᩣ ᨸᨬ᩠ᨬᨲ᩠ᨲᩣ’’ᨲᩥ.

᪑᪙᪗. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩌᨿᩈ᩠ᨾᩣ ᩏᨸᩅᩣᨱᩮᩣ ᨽᨣᩅᨲᩮᩣ ᨸᩥᨭ᩠ᨮᩥᨲᩮᩣ ᨮᩥᨲᩮᩣ ᩉᩮᩣᨲᩥ ᨽᨣᩅᨶ᩠ᨲᩴ ᨻᩦᨩᨿᨾᩣᨶᩮᩣ. ᩋᨳ ᨡᩮᩣ ᩌᨿᩈ᩠ᨾᩣ ᩏᨸᩅᩣᨱᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩋᨧ᩠ᨨᩁᩥᨿᩴ, ᨽᨶ᩠ᨲᩮ, ᩋᨻ᩠ᨽᩩᨲᩴ, ᨽᨶ᩠ᨲᩮ! ᨸᩣᩈᩣᨴᩥᨠᩮᩣ ᩅᨲᩣᨿᩴ, ᨽᨶ᩠ᨲᩮ, ᨵᨾ᩠ᨾᨸᩁᩥᨿᩣᨿᩮᩣ; ᩈᩩᨸᩣᩈᩣᨴᩥᨠᩮᩣ ᩅᨲᩣᨿᩴ ᨽᨶ᩠ᨲᩮ, ᨵᨾ᩠ᨾᨸᩁᩥᨿᩣᨿᩮᩣ, ᨠᩮᩣ ᨶᩣᨾᩣᨿᩴ ᨽᨶ᩠ᨲᩮ ᨵᨾ᩠ᨾᨸᩁᩥᨿᩣᨿᩮᩣ’’ᨲᩥ? ‘‘ᨲᩈ᩠ᨾᩣᨲᩥᩉ ᨲ᩠ᩅᩴ, ᩏᨸᩅᩣᨱ, ᩍᨾᩴ ᨵᨾ᩠ᨾᨸᩁᩥᨿᩣᨿᩴ ‘ᨸᩣᩈᩣᨴᩥᨠᩮᩣ’ ᨲ᩠ᩅᩮᩅ ᨶᩴ ᨵᩣᩁᩮᩉᩦ’’ᨲᩥ. ᩍᨴᨾᩅᩮᩣᨧ ᨽᨣᩅᩣ. ᩋᨲ᩠ᨲᨾᨶᩮᩣ ᩌᨿᩈ᩠ᨾᩣ ᩏᨸᩅᩣᨱᩮᩣ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩦᨲᩥ.

ᨸᩣᩈᩣᨴᩥᨠᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᨨᨭ᩠ᨮᩴ.

᪗. ᩃᨠ᩠ᨡᨱᩈᩩᨲ᩠ᨲᩴ

ᨴ᩠ᩅᨲ᩠ᨲᩥᩴᩈᨾᩉᩣᨸᩩᩁᩥᩈᩃᨠ᩠ᨡᨱᩣᨶᩥ

᪑᪙᪘. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᩈᩣᩅᨲ᩠ᨳᩥᨿᩴ ᩅᩥᩉᩁᨲᩥ ᨩᩮᨲᩅᨶᩮ ᩋᨶᩣᨳᨸᩥᨱ᩠ᨯᩥᨠᩔ ᩌᩁᩣᨾᩮ. ᨲᨲᩕ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᨽᩥᨠ᩠ᨡᩅᩮᩣ’’ᨲᩥ. ‘‘ᨽᨴ᩠ᨴᨶ᩠ᨲᩮ’’ᨲᩥ [ᨽᨴᨶ᩠ᨲᩮᨲᩥ (ᩈᩦ. ᩈ᩠ᨿᩣ. ᨸᩦ.)] ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩩᩴ. ᨽᨣᩅᩣ ᩑᨲᨴᩅᩮᩣᨧ –

᪑᪙᪙. ‘‘ᨴ᩠ᩅᨲ᩠ᨲᩥᩴᩈᩥᨾᩣᨶᩥ, ᨽᩥᨠ᩠ᨡᩅᩮ, ᨾᩉᩣᨸᩩᩁᩥᩈᩔ ᨾᩉᩣᨸᩩᩁᩥᩈᩃᨠ᩠ᨡᨱᩣᨶᩥ, ᨿᩮᩉᩥ ᩈᨾᨶ᩠ᨶᩣᨣᨲᩔ ᨾᩉᩣᨸᩩᩁᩥᩈᩔ ᨴ᩠ᩅᩮᩅ ᨣᨲᩥᨿᩮᩣ ᨽᩅᨶ᩠ᨲᩥ ᩋᨶᨬ᩠ᨬᩣ. ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ ᨵᨾ᩠ᨾᩥᨠᩮᩣ ᨵᨾ᩠ᨾᩁᩣᨩᩣ ᨧᩣᨲᩩᩁᨶ᩠ᨲᩮᩣ ᩅᩥᨩᩥᨲᩣᩅᩦ ᨩᨶᨸᨴᨲ᩠ᨳᩣᩅᩁᩥᨿᨸ᩠ᨸᨲ᩠ᨲᩮᩣ ᩈᨲ᩠ᨲᩁᨲᨶᩈᨾᨶ᩠ᨶᩣᨣᨲᩮᩣ. ᨲᩔᩥᨾᩣᨶᩥ ᩈᨲ᩠ᨲ ᩁᨲᨶᩣᨶᩥ ᨽᩅᨶ᩠ᨲᩥ; ᩈᩮᨿ᩠ᨿᨳᩥᨴᩴ, ᨧᨠ᩠ᨠᩁᨲᨶᩴ ᩉᨲ᩠ᨳᩥᩁᨲᨶᩴ ᩋᩔᩁᨲᨶᩴ ᨾᨱᩥᩁᨲᨶᩴ ᩍᨲ᩠ᨳᩥᩁᨲᨶᩴ ᨣᩉᨸᨲᩥᩁᨲᨶᩴ ᨸᩁᩥᨱᩣᨿᨠᩁᨲᨶᨾᩮᩅ ᩈᨲ᩠ᨲᨾᩴ. ᨸᩁᩮᩣᩈᩉᩔᩴ ᨡᩮᩣ ᨸᨶᩔ ᨸᩩᨲ᩠ᨲᩣ ᨽᩅᨶ᩠ᨲᩥ ᩈᩪᩁᩣ ᩅᩦᩁᨦ᩠ᨣᩁᩪᨸᩣ ᨸᩁᩈᩮᨶᨸ᩠ᨸᨾᨴ᩠ᨴᨶᩣ. ᩈᩮᩣ ᩍᨾᩴ ᨸᨳᩅᩥᩴ ᩈᩣᨣᩁᨸᩁᩥᨿᨶ᩠ᨲᩴ ᩋᨴᨱ᩠ᨯᩮᨶ ᩋᩈᨲ᩠ᨳᩮᨶ ᨵᨾ᩠ᨾᩮᨶ ᩋᨽᩥᩅᩥᨩᩥᨿ ᩋᨩ᩠ᨫᩣᩅᩈᨲᩥ. ᩈᨧᩮ ᨡᩮᩣ ᨸᨶ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨲᩥ, ᩋᩁᩉᩴ ᩉᩮᩣᨲᩥ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩅᩥᩅᨭ᩠ᨭᨧ᩠ᨨᨴᩮᩣ [ᩅᩥᩅᨭᨧ᩠ᨨᨴᩮᩣ (ᩈ᩠ᨿᩣ. ᨠ.), ᩅᩥᩅᨲ᩠ᨲᨧ᩠ᨨᨴᩮᩣ (ᩈᩦ. ᨸᩦ.)].

᪒᪐᪐. ‘‘ᨠᨲᨾᩣᨶᩥ ᨧ ᨲᩣᨶᩥ, ᨽᩥᨠ᩠ᨡᩅᩮ, ᨴ᩠ᩅᨲ᩠ᨲᩥᩴᩈ ᨾᩉᩣᨸᩩᩁᩥᩈᩔ ᨾᩉᩣᨸᩩᩁᩥᩈᩃᨠ᩠ᨡᨱᩣᨶᩥ, ᨿᩮᩉᩥ ᩈᨾᨶ᩠ᨶᩣᨣᨲᩔ ᨾᩉᩣᨸᩩᩁᩥᩈᩔ ᨴ᩠ᩅᩮᩅ ᨣᨲᩥᨿᩮᩣ ᨽᩅᨶ᩠ᨲᩥ ᩋᨶᨬ᩠ᨬᩣ? ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩈᨧᩮ ᨡᩮᩣ ᨸᨶ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨲᩥ, ᩋᩁᩉᩴ ᩉᩮᩣᨲᩥ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩅᩥᩅᨭ᩠ᨭᨧ᩠ᨨᨴᩮᩣ.

‘‘ᩍᨵ, ᨽᩥᨠ᩠ᨡᩅᩮ, ᨾᩉᩣᨸᩩᩁᩥᩈᩮᩣ ᩈᩩᨸ᩠ᨸᨲᩥᨭ᩠ᨮᩥᨲᨸᩣᨴᩮᩣ ᩉᩮᩣᨲᩥ. ᨿᨾ᩠ᨸᩥ, ᨽᩥᨠ᩠ᨡᩅᩮ, ᨾᩉᩣᨸᩩᩁᩥᩈᩮᩣ ᩈᩩᨸ᩠ᨸᨲᩥᨭ᩠ᨮᩥᨲᨸᩣᨴᩮᩣ ᩉᩮᩣᨲᩥ, ᩍᨴᨾ᩠ᨸᩥ, ᨽᩥᨠ᩠ᨡᩅᩮ, ᨾᩉᩣᨸᩩᩁᩥᩈᩔ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨽᩅᨲᩥ.

‘‘ᨸᩩᨶ ᨧᨸᩁᩴ, ᨽᩥᨠ᩠ᨡᩅᩮ, ᨾᩉᩣᨸᩩᩁᩥᩈᩔ ᩉᩮᨭ᩠ᨮᩣᨸᩣᨴᨲᩃᩮᩈᩩ ᨧᨠ᩠ᨠᩣᨶᩥ ᨩᩣᨲᩣᨶᩥ ᩉᩮᩣᨶ᩠ᨲᩥ ᩈᩉᩔᩣᩁᩣᨶᩥ ᩈᨶᩮᨾᩥᨠᩣᨶᩥ ᩈᨶᩣᨽᩥᨠᩣᨶᩥ ᩈᨻ᩠ᨻᩣᨠᩣᩁᨸᩁᩥᨸᩪᩁᩣᨶᩥ [ᩈᨻ᩠ᨻᩣᨠᩣᩁᨸᩁᩥᨸᩪᩁᩣᨶᩥ ᩈᩩᩅᩥᨽᨲ᩠ᨲᨶ᩠ᨲᩁᩣᨶᩥ (ᩈᩦ. ᨸᩦ.)]. ᨿᨾ᩠ᨸᩥ, ᨽᩥᨠ᩠ᨡᩅᩮ, ᨾᩉᩣᨸᩩᩁᩥᩈᩔ ᩉᩮᨭ᩠ᨮᩣᨸᩣᨴᨲᩃᩮᩈᩩ ᨧᨠ᩠ᨠᩣᨶᩥ ᨩᩣᨲᩣᨶᩥ ᩉᩮᩣᨶ᩠ᨲᩥ ᩈᩉᩔᩣᩁᩣᨶᩥ ᩈᨶᩮᨾᩥᨠᩣᨶᩥ ᩈᨶᩣᨽᩥᨠᩣᨶᩥ ᩈᨻ᩠ᨻᩣᨠᩣᩁᨸᩁᩥᨸᩪᩁᩣᨶᩥ, ᩍᨴᨾ᩠ᨸᩥ, ᨽᩥᨠ᩠ᨡᩅᩮ, ᨾᩉᩣᨸᩩᩁᩥᩈᩔ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨽᩅᨲᩥ.

‘‘ᨸᩩᨶ ᨧᨸᩁᩴ, ᨽᩥᨠ᩠ᨡᩅᩮ, ᨾᩉᩣᨸᩩᩁᩥᩈᩮᩣ ᩌᨿᨲᨸᨱ᩠ᩉᩥ ᩉᩮᩣᨲᩥ…ᨸᩮ… ᨴᩦᨥᨦ᩠ᨣᩩᩃᩥ ᩉᩮᩣᨲᩥ… ᨾᩩᨴᩩᨲᩃᩩᨶᩉᨲ᩠ᨳᨸᩣᨴᩮᩣ ᩉᩮᩣᨲᩥ… ᨩᩣᩃᩉᨲ᩠ᨳᨸᩣᨴᩮᩣ ᩉᩮᩣᨲᩥ… ᩏᩔᨦ᩠ᨡᨸᩣᨴᩮᩣ ᩉᩮᩣᨲᩥ… ᩑᨱᩥᨩᨦ᩠ᨥᩮᩣ ᩉᩮᩣᨲᩥ… ᨮᩥᨲᨠᩮᩣᩅ ᩋᨶᩮᩣᨶᨾᨶ᩠ᨲᩮᩣ ᩏᨽᩮᩣᩉᩥ ᨸᩣᨱᩥᨲᩃᩮᩉᩥ ᨩᨱ᩠ᨱᩩᨠᩣᨶᩥ ᨸᩁᩥᨾᩈᨲᩥ ᨸᩁᩥᨾᨩ᩠ᨩᨲᩥ… ᨠᩮᩣᩈᩮᩣᩉᩥᨲᩅᨲ᩠ᨳᨣᩩᨿ᩠ᩉᩮᩣ ᩉᩮᩣᨲᩥ… ᩈᩩᩅᨱ᩠ᨱᩅᨱ᩠ᨱᩮᩣ ᩉᩮᩣᨲᩥ ᨠᨬ᩠ᨧᨶᩈᨶ᩠ᨶᩥᨽᨲ᩠ᨲᨧᩮᩣ… ᩈᩩᨡᩩᨾᨧ᩠ᨨᩅᩥ ᩉᩮᩣᨲᩥ, ᩈᩩᨡᩩᨾᨲ᩠ᨲᩣ ᨨᩅᩥᨿᩣ ᩁᨩᩮᩣᨩᩃ᩠ᩃᩴ ᨠᩣᨿᩮ ᨶ ᩏᨸᩃᩥᨾ᩠ᨸᨲᩥ… ᩑᨠᩮᨠᩃᩮᩣᨾᩮᩣ ᩉᩮᩣᨲᩥ, ᩑᨠᩮᨠᩣᨶᩥ ᩃᩮᩣᨾᩣᨶᩥ ᩃᩮᩣᨾᨠᩪᨸᩮᩈᩩ ᨩᩣᨲᩣᨶᩥ… ᩏᨴ᩠ᨵᨣ᩠ᨣᩃᩮᩣᨾᩮᩣ ᩉᩮᩣᨲᩥ, ᩏᨴ᩠ᨵᨣ᩠ᨣᩣᨶᩥ ᩃᩮᩣᨾᩣᨶᩥ ᨩᩣᨲᩣᨶᩥ ᨶᩦᩃᩣᨶᩥ ᩋᨬ᩠ᨩᨶᩅᨱ᩠ᨱᩣᨶᩥ ᨠᩩᨱ᩠ᨯᩃᩣᩅᨭ᩠ᨭᩣᨶᩥ [ᨠᩩᨱ᩠ᨯᩃᩣᩅᨲ᩠ᨲᩣᨶᩥ (ᨻᩉᩪᩈᩩ)] ᨴᨠ᩠ᨡᩥᨱᩣᩅᨭ᩠ᨭᨠᨩᩣᨲᩣᨶᩥ [ᨴᨠ᩠ᨡᩥᨱᩣᩅᨲ᩠ᨲᨠᨩᩣᨲᩣᨶᩥ (ᩈᩦ. ᩈ᩠ᨿᩣ. ᨸᩦ.)] … ᨻᩕᩉ᩠ᨾᩩᨩᩩᨣᨲ᩠ᨲᩮᩣ ᩉᩮᩣᨲᩥ… ᩈᨲ᩠ᨲᩩᩔᨴᩮᩣ ᩉᩮᩣᨲᩥ… ᩈᩦᩉᨸᩩᨻ᩠ᨻᨴ᩠ᨵᨠᩣᨿᩮᩣ ᩉᩮᩣᨲᩥ… ᨧᩥᨲᨶ᩠ᨲᩁᩴᩈᩮᩣ [ᨸᩥᨲᨶ᩠ᨲᩁᩴᩈᩮᩣ (ᩈ᩠ᨿᩣ.)] ᩉᩮᩣᨲᩥ… ᨶᩥᨣᩕᩮᩣᨵᨸᩁᩥᨾᨱ᩠ᨯᩃᩮᩣ ᩉᩮᩣᨲᩥ, ᨿᩣᩅᨲᨠ᩠ᩅᩔ ᨠᩣᨿᩮᩣ ᨲᩣᩅᨲᨠ᩠ᩅᩔ ᨻ᩠ᨿᩣᨾᩮᩣ ᨿᩣᩅᨲᨠ᩠ᩅᩔ ᨻ᩠ᨿᩣᨾᩮᩣ ᨲᩣᩅᨲᨠ᩠ᩅᩔ ᨠᩣᨿᩮᩣ… ᩈᨾᩅᨭ᩠ᨭᨠ᩠ᨡᨶ᩠ᨵᩮᩣ ᩉᩮᩣᨲᩥ… ᩁᩈᨣ᩠ᨣᩈᨣ᩠ᨣᩦ ᩉᩮᩣᨲᩥ… ᩈᩦᩉᩉᨶᩩ ᩉᩮᩣᨲᩥ… ᨧᨲ᩠ᨲᩣᩃᩦᩈᨴᨶ᩠ᨲᩮᩣ ᩉᩮᩣᨲᩥ … ᩈᨾᨴᨶ᩠ᨲᩮᩣ ᩉᩮᩣᨲᩥ… ᩋᩅᩥᩁᩊᨴᨶ᩠ᨲᩮᩣ ᩉᩮᩣᨲᩥ… ᩈᩩᩈᩩᨠ᩠ᨠᨴᩣᨮᩮᩣ ᩉᩮᩣᨲᩥ… ᨸᩉᩪᨲᨩᩥᩅ᩠ᩉᩮᩣ ᩉᩮᩣᨲᩥ… ᨻᩕᩉ᩠ᨾᩔᩁᩮᩣ ᩉᩮᩣᨲᩥ ᨠᩁᩅᩦᨠᨽᩣᨱᩦ… ᩋᨽᩥᨶᩦᩃᨶᩮᨲ᩠ᨲᩮᩣ ᩉᩮᩣᨲᩥ… ᨣᩮᩣᨸᨡᩩᨾᩮᩣ ᩉᩮᩣᨲᩥ… ᩏᨱ᩠ᨱᩣ ᨽᨾᩩᨠᨶ᩠ᨲᩁᩮ ᨩᩣᨲᩣ ᩉᩮᩣᨲᩥ, ᩒᨴᩣᨲᩣ ᨾᩩᨴᩩᨲᩪᩃᩈᨶ᩠ᨶᩥᨽᩣ. ᨿᨾ᩠ᨸᩥ, ᨽᩥᨠ᩠ᨡᩅᩮ, ᨾᩉᩣᨸᩩᩁᩥᩈᩔ ᩏᨱ᩠ᨱᩣ ᨽᨾᩩᨠᨶ᩠ᨲᩁᩮ ᨩᩣᨲᩣ ᩉᩮᩣᨲᩥ, ᩒᨴᩣᨲᩣ ᨾᩩᨴᩩᨲᩪᩃᩈᨶ᩠ᨶᩥᨽᩣ, ᩍᨴᨾ᩠ᨸᩥ, ᨽᩥᨠ᩠ᨡᩅᩮ, ᨾᩉᩣᨸᩩᩁᩥᩈᩔ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨽᩅᨲᩥ.

‘‘ᨸᩩᨶ ᨧᨸᩁᩴ, ᨽᩥᨠ᩠ᨡᩅᩮ, ᨾᩉᩣᨸᩩᩁᩥᩈᩮᩣ ᩏᨱ᩠ᩉᩦᩈᩈᩦᩈᩮᩣ ᩉᩮᩣᨲᩥ. ᨿᨾ᩠ᨸᩥ, ᨽᩥᨠ᩠ᨡᩅᩮ, ᨾᩉᩣᨸᩩᩁᩥᩈᩮᩣ ᩏᨱ᩠ᩉᩦᩈᩈᩦᩈᩮᩣ ᩉᩮᩣᨲᩥ, ᩍᨴᨾ᩠ᨸᩥ, ᨽᩥᨠ᩠ᨡᩅᩮ, ᨾᩉᩣᨸᩩᩁᩥᩈᩔ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨽᩅᨲᩥ.

‘‘ᩍᨾᩣᨶᩥ ᨡᩮᩣ ᨲᩣᨶᩥ, ᨽᩥᨠ᩠ᨡᩅᩮ, ᨴ᩠ᩅᨲ᩠ᨲᩥᩴᩈ ᨾᩉᩣᨸᩩᩁᩥᩈᩔ ᨾᩉᩣᨸᩩᩁᩥᩈᩃᨠ᩠ᨡᨱᩣᨶᩥ, ᨿᩮᩉᩥ ᩈᨾᨶ᩠ᨶᩣᨣᨲᩔ ᨾᩉᩣᨸᩩᩁᩥᩈᩔ ᨴ᩠ᩅᩮᩅ ᨣᨲᩥᨿᩮᩣ ᨽᩅᨶ᩠ᨲᩥ ᩋᨶᨬ᩠ᨬᩣ. ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩈᨧᩮ ᨡᩮᩣ ᨸᨶ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨲᩥ, ᩋᩁᩉᩴ ᩉᩮᩣᨲᩥ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩅᩥᩅᨭ᩠ᨭᨧ᩠ᨨᨴᩮᩣ.

‘‘ᩍᨾᩣᨶᩥ ᨡᩮᩣ, ᨽᩥᨠ᩠ᨡᩅᩮ, ᨴ᩠ᩅᨲ᩠ᨲᩥᩴᩈ ᨾᩉᩣᨸᩩᩁᩥᩈᩔ ᨾᩉᩣᨸᩩᩁᩥᩈᩃᨠ᩠ᨡᨱᩣᨶᩥ ᨻᩣᩉᩥᩁᨠᩣᨸᩥ ᩍᩈᨿᩮᩣ ᨵᩣᩁᩮᨶ᩠ᨲᩥ, ᨶᩮᩣ ᨧ ᨡᩮᩣ ᨲᩮ ᨩᩣᨶᨶ᩠ᨲᩥ – ‘ᩍᨾᩔ ᨠᨾ᩠ᨾᩔ ᨠᨭᨲ᩠ᨲᩣ ᩍᨴᩴ ᩃᨠ᩠ᨡᨱᩴ ᨸᨭᩥᩃᨽᨲᩦ’ᨲᩥ.

(᪑) ᩈᩩᨸ᩠ᨸᨲᩥᨭ᩠ᨮᩥᨲᨸᩣᨴᨲᩣᩃᨠ᩠ᨡᨱᩴ

᪒᪐᪑. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᨴᩊ᩠ᩉᩈᨾᩣᨴᩣᨶᩮᩣ ᩋᩉᩮᩣᩈᩥ ᨠᩩᩈᩃᩮᩈᩩ ᨵᨾ᩠ᨾᩮᩈᩩ, ᩋᩅᨲ᩠ᨳᩥᨲᩈᨾᩣᨴᩣᨶᩮᩣ ᨠᩣᨿᩈᩩᨧᩁᩥᨲᩮ ᩅᨧᩦᩈᩩᨧᩁᩥᨲᩮ ᨾᨶᩮᩣᩈᩩᨧᩁᩥᨲᩮ ᨴᩣᨶᩈᩴᩅᩥᨽᩣᨣᩮ ᩈᩦᩃᩈᨾᩣᨴᩣᨶᩮ ᩏᨸᩮᩣᩈᨳᩩᨸᩅᩣᩈᩮ ᨾᨲ᩠ᨲᩮᨿ᩠ᨿᨲᩣᨿ ᨸᩮᨲ᩠ᨲᩮᨿ᩠ᨿᨲᩣᨿ ᩈᩣᨾᨬ᩠ᨬᨲᩣᨿ ᨻᩕᩉ᩠ᨾᨬ᩠ᨬᨲᩣᨿ ᨠᩩᩃᩮ ᨩᩮᨭ᩠ᨮᩣᨸᨧᩣᨿᩥᨲᩣᨿ ᩋᨬ᩠ᨬᨲᩁᨬ᩠ᨬᨲᩁᩮᩈᩩ ᨧ ᩋᨵᩥᨠᩩᩈᩃᩮᩈᩩ ᨵᨾ᩠ᨾᩮᩈᩩ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ ᩏᨸᨧᩥᨲᨲ᩠ᨲᩣ ᩏᩔᨶ᩠ᨶᨲ᩠ᨲᩣ ᩅᩥᨸᩩᩃᨲ᩠ᨲᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨲᩥ. ᩈᩮᩣ ᨲᨲ᩠ᨳ ᩋᨬ᩠ᨬᩮ ᨴᩮᩅᩮ ᨴᩈᩉᩥ ᨮᩣᨶᩮᩉᩥ ᩋᨵᩥᨣ᩠ᨣᨱ᩠ᩉᩣᨲᩥ ᨴᩥᨻ᩠ᨻᩮᨶ ᩌᨿᩩᨶᩣ ᨴᩥᨻ᩠ᨻᩮᨶ ᩅᨱ᩠ᨱᩮᨶ ᨴᩥᨻ᩠ᨻᩮᨶ ᩈᩩᨡᩮᨶ ᨴᩥᨻ᩠ᨻᩮᨶ ᨿᩈᩮᨶ ᨴᩥᨻ᩠ᨻᩮᨶ ᩌᨵᩥᨸᨲᩮᨿ᩠ᨿᩮᨶ ᨴᩥᨻ᩠ᨻᩮᩉᩥ ᩁᩪᨸᩮᩉᩥ ᨴᩥᨻ᩠ᨻᩮᩉᩥ ᩈᨴ᩠ᨴᩮᩉᩥ ᨴᩥᨻ᩠ᨻᩮᩉᩥ ᨣᨶ᩠ᨵᩮᩉᩥ ᨴᩥᨻ᩠ᨻᩮᩉᩥ ᩁᩈᩮᩉᩥ ᨴᩥᨻ᩠ᨻᩮᩉᩥ ᨹᩮᩣᨭ᩠ᨮᨻ᩠ᨻᩮᩉᩥ. ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩴ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨸᨭᩥᩃᨽᨲᩥ. ᩈᩩᨸ᩠ᨸᨲᩥᨭ᩠ᨮᩥᨲᨸᩣᨴᩮᩣ ᩉᩮᩣᨲᩥ. ᩈᨾᩴ ᨸᩣᨴᩴ ᨽᩪᨾᩥᨿᩴ ᨶᩥᨠ᩠ᨡᩥᨸᨲᩥ, ᩈᨾᩴ ᩏᨴ᩠ᨵᩁᨲᩥ, ᩈᨾᩴ ᩈᨻ᩠ᨻᩣᩅᨶ᩠ᨲᩮᩉᩥ ᨸᩣᨴᨲᩃᩮᩉᩥ ᨽᩪᨾᩥᩴ ᨹᩩᩈᨲᩥ.

᪒᪐᪒. ‘‘ᩈᩮᩣ ᨲᩮᨶ ᩃᨠ᩠ᨡᨱᩮᨶ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ ᨵᨾ᩠ᨾᩥᨠᩮᩣ ᨵᨾ᩠ᨾᩁᩣᨩᩣ ᨧᩣᨲᩩᩁᨶ᩠ᨲᩮᩣ ᩅᩥᨩᩥᨲᩣᩅᩦ ᨩᨶᨸᨴᨲ᩠ᨳᩣᩅᩁᩥᨿᨸ᩠ᨸᨲ᩠ᨲᩮᩣ ᩈᨲ᩠ᨲᩁᨲᨶᩈᨾᨶ᩠ᨶᩣᨣᨲᩮᩣ. ᨲᩔᩥᨾᩣᨶᩥ ᩈᨲ᩠ᨲ ᩁᨲᨶᩣᨶᩥ ᨽᩅᨶ᩠ᨲᩥ; ᩈᩮᨿ᩠ᨿᨳᩥᨴᩴ, ᨧᨠ᩠ᨠᩁᨲᨶᩴ ᩉᨲ᩠ᨳᩥᩁᨲᨶᩴ ᩋᩔᩁᨲᨶᩴ ᨾᨱᩥᩁᨲᨶᩴ ᩍᨲ᩠ᨳᩥᩁᨲᨶᩴ ᨣᩉᨸᨲᩥᩁᨲᨶᩴ ᨸᩁᩥᨱᩣᨿᨠᩁᨲᨶᨾᩮᩅ ᩈᨲ᩠ᨲᨾᩴ. ᨸᩁᩮᩣᩈᩉᩔᩴ ᨡᩮᩣ ᨸᨶᩔ ᨸᩩᨲ᩠ᨲᩣ ᨽᩅᨶ᩠ᨲᩥ ᩈᩪᩁᩣ ᩅᩦᩁᨦ᩠ᨣᩁᩪᨸᩣ ᨸᩁᩈᩮᨶᨸ᩠ᨸᨾᨴ᩠ᨴᨶᩣ. ᩈᩮᩣ ᩍᨾᩴ ᨸᨳᩅᩥᩴ ᩈᩣᨣᩁᨸᩁᩥᨿᨶ᩠ᨲᩴ ᩋᨡᩥᩃᨾᨶᩥᨾᩥᨲ᩠ᨲᨾᨠᨱ᩠ᨭᨠᩴ ᩍᨴ᩠ᨵᩴ ᨹᩦᨲᩴ ᨡᩮᨾᩴ ᩈᩥᩅᩴ ᨶᩥᩁᨻ᩠ᨻᩩᨴᩴ ᩋᨴᨱ᩠ᨯᩮᨶ ᩋᩈᨲ᩠ᨳᩮᨶ ᨵᨾ᩠ᨾᩮᨶ ᩋᨽᩥᩅᩥᨩᩥᨿ ᩋᨩ᩠ᨫᩣᩅᩈᨲᩥ. ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩋᨠ᩠ᨡᨾ᩠ᨽᩥᨿᩮᩣ [ᩋᩅᩥᨠ᩠ᨡᨾ᩠ᨽᩥᨿᩮᩣ (ᩈᩦ. ᨸᩦ.)] ᩉᩮᩣᨲᩥ ᨠᩮᨶᨧᩥ ᨾᨶᩩᩔᨽᩪᨲᩮᨶ ᨸᨧ᩠ᨧᨲ᩠ᨳᩥᨠᩮᨶ ᨸᨧ᩠ᨧᩣᨾᩥᨲ᩠ᨲᩮᨶ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ. ‘‘ᩈᨧᩮ ᨡᩮᩣ ᨸᨶ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨲᩥ, ᩋᩁᩉᩴ ᩉᩮᩣᨲᩥ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩅᩥᩅᨭ᩠ᨭᨧ᩠ᨨᨴᩮᩣ. ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩋᨠ᩠ᨡᨾ᩠ᨽᩥᨿᩮᩣ ᩉᩮᩣᨲᩥ ᩋᨻ᩠ᨽᨶ᩠ᨲᩁᩮᩉᩥ ᩅᩣ ᨻᩣᩉᩥᩁᩮᩉᩥ ᩅᩣ ᨸᨧ᩠ᨧᨲ᩠ᨳᩥᨠᩮᩉᩥ ᨸᨧ᩠ᨧᩣᨾᩥᨲ᩠ᨲᩮᩉᩥ ᩁᩣᨣᩮᨶ ᩅᩣ ᨴᩮᩣᩈᩮᨶ ᩅᩣ ᨾᩮᩣᩉᩮᨶ ᩅᩣ ᩈᨾᨱᩮᨶ ᩅᩣ ᨻᩕᩣᩉ᩠ᨾᨱᩮᨶ ᩅᩣ ᨴᩮᩅᩮᨶ ᩅᩣ ᨾᩣᩁᩮᨶ ᩅᩣ ᨻᩕᩉ᩠ᨾᩩᨶᩣ ᩅᩣ ᨠᩮᨶᨧᩥ ᩅᩣ ᩃᩮᩣᨠᩈ᩠ᨾᩥᩴ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪐᪓. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᩈᨧ᩠ᨧᩮ ᨧ ᨵᨾ᩠ᨾᩮ ᨧ ᨴᨾᩮ ᨧ ᩈᩴᨿᨾᩮ,

ᩈᩮᩣᨧᩮᨿ᩠ᨿᩈᩦᩃᩣᩃᨿᩩᨸᩮᩣᩈᨳᩮᩈᩩ ᨧ;

ᨴᩣᨶᩮ ᩋᩉᩥᩴᩈᩣᨿ ᩋᩈᩣᩉᩈᩮ ᩁᨲᩮᩣ,

ᨴᩊ᩠ᩉᩴ ᩈᨾᩣᨴᩣᨿ ᩈᨾᨲ᩠ᨲᨾᩣᨧᩁᩥ [ᩈᨾᨶ᩠ᨲᨾᩣᨧᩁᩥ (ᩈ᩠ᨿᩣ. ᨠ.)].

‘‘ᩈᩮᩣ ᨲᩮᨶ ᨠᨾ᩠ᨾᩮᨶ ᨴᩥᩅᩴ ᩈᨾᨠ᩠ᨠᨾᩥ [ᩋᨸᨠ᩠ᨠᨾᩥ (ᩈ᩠ᨿᩣ. ᨠ.)],

ᩈᩩᨡᨬ᩠ᨧ ᨡᩥᨯ᩠ᨯᩣᩁᨲᩥᨿᩮᩣ ᨧ ᩋᨶ᩠ᩅᨽᩥ [ᩋᩴᨶ᩠ᩅᨽᩥ (ᨭᩦᨠᩣ)];

ᨲᨲᩮᩣ ᨧᩅᩥᨲ᩠ᩅᩣ ᨸᩩᨶᩁᩣᨣᨲᩮᩣ ᩍᨵ,

ᩈᨾᩮᩉᩥ ᨸᩣᨴᩮᩉᩥ ᨹᩩᩈᩦ ᩅᩈᩩᨶ᩠ᨵᩁᩴ.

‘‘ᨻ᩠ᨿᩣᨠᩴᩈᩩ ᩅᩮᨿ᩠ᨿᨬ᩠ᨩᨶᩥᨠᩣ ᩈᨾᩣᨣᨲᩣ,

ᩈᨾᨸ᩠ᨸᨲᩥᨭ᩠ᨮᩔ ᨶ ᩉᩮᩣᨲᩥ ᨡᨾ᩠ᨽᨶᩣ;

ᨣᩥᩉᩥᩔ ᩅᩣ ᨸᨻ᩠ᨻᨩᩥᨲᩔ ᩅᩣ ᨸᩩᨶ [ᨸᨶ (ᩈ᩠ᨿᩣ.)],

ᨲᩴ ᩃᨠ᩠ᨡᨱᩴ ᨽᩅᨲᩥ ᨲᨴᨲ᩠ᨳᨩᩮᩣᨲᨠᩴ.

‘‘ᩋᨠ᩠ᨡᨾ᩠ᨽᩥᨿᩮᩣ ᩉᩮᩣᨲᩥ ᩋᨣᩣᩁᨾᩣᩅᩈᩴ,

ᨸᩁᩣᨽᩥᨽᩪ ᩈᨲ᩠ᨲᩩᨽᩥ ᨶᨸ᩠ᨸᨾᨴ᩠ᨴᨶᩮᩣ;

ᨾᨶᩩᩔᨽᩪᨲᩮᨶᩥᨵ ᩉᩮᩣᨲᩥ ᨠᩮᨶᨧᩥ,

ᩋᨠ᩠ᨡᨾ᩠ᨽᩥᨿᩮᩣ ᨲᩔ ᨹᩃᩮᨶ ᨠᨾ᩠ᨾᩩᨶᩮᩣ.

‘‘ᩈᨧᩮ ᨧ ᨸᨻ᩠ᨻᨩ᩠ᨩᨾᩩᨸᩮᨲᩥ ᨲᩣᨴᩥᩈᩮᩣ,

ᨶᩮᨠ᩠ᨡᨾ᩠ᨾᨨᨶ᩠ᨴᩣᨽᩥᩁᨲᩮᩣ ᩅᩥᨧᨠ᩠ᨡᨱᩮᩣ;

ᩋᨣ᩠ᨣᩮᩣ ᨶ ᩈᩮᩣ ᨣᨧ᩠ᨨᨲᩥ ᨩᩣᨲᩩ ᨡᨾ᩠ᨽᨶᩴ,

ᨶᩁᩩᨲ᩠ᨲᨾᩮᩣ ᩑᩈ ᩉᩥ ᨲᩔ ᨵᨾ᩠ᨾᨲᩣ’’ᨲᩥ.

(᪒) ᨸᩣᨴᨲᩃᨧᨠ᩠ᨠᩃᨠ᩠ᨡᨱᩴ

᪒᪐᪔. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᨻᩉᩩᨩᨶᩔ ᩈᩩᨡᩣᩅᩉᩮᩣ ᩋᩉᩮᩣᩈᩥ, ᩏᨻ᩠ᨻᩮᨣᩏᨲ᩠ᨲᩣᩈᨽᨿᩴ ᩋᨸᨶᩩᨴᩥᨲᩣ, ᨵᨾ᩠ᨾᩥᨠᨬ᩠ᨧ ᩁᨠ᩠ᨡᩣᩅᩁᨱᨣᩩᨲ᩠ᨲᩥᩴ ᩈᩴᩅᩥᨵᩣᨲᩣ, ᩈᨸᩁᩥᩅᩣᩁᨬ᩠ᨧ ᨴᩣᨶᩴ ᩋᨴᩣᩈᩥ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ ᩏᨸᨧᩥᨲᨲ᩠ᨲᩣ ᩏᩔᨶ᩠ᨶᨲ᩠ᨲᩣ ᩅᩥᨸᩩᩃᨲ᩠ᨲᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨲᩥ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩴ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨸᨭᩥᩃᨽᨲᩥ. ᩉᩮᨭ᩠ᨮᩣᨸᩣᨴᨲᩃᩮᩈᩩ ᨧᨠ᩠ᨠᩣᨶᩥ ᨩᩣᨲᩣᨶᩥ ᩉᩮᩣᨶ᩠ᨲᩥ ᩈᩉᩔᩣᩁᩣᨶᩥ ᩈᨶᩮᨾᩥᨠᩣᨶᩥ ᩈᨶᩣᨽᩥᨠᩣᨶᩥ ᩈᨻ᩠ᨻᩣᨠᩣᩁᨸᩁᩥᨸᩪᩁᩣᨶᩥ ᩈᩩᩅᩥᨽᨲ᩠ᨲᨶ᩠ᨲᩁᩣᨶᩥ.

‘‘ᩈᩮᩣ ᨲᩮᨶ ᩃᨠ᩠ᨡᨱᩮᨶ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᨾᩉᩣᨸᩁᩥᩅᩣᩁᩮᩣ ᩉᩮᩣᨲᩥ; ᨾᩉᩣᩔ ᩉᩮᩣᨶ᩠ᨲᩥ ᨸᩁᩥᩅᩣᩁᩣ ᨻᩕᩣᩉ᩠ᨾᨱᨣᩉᨸᨲᩥᨠᩣ ᨶᩮᨣᨾᨩᩣᨶᨸᨴᩣ ᨣᨱᨠᨾᩉᩣᨾᨲ᩠ᨲᩣ ᩋᨶᩦᨠᨭ᩠ᨮᩣ ᨴᩮᩣᩅᩣᩁᩥᨠᩣ ᩋᨾᨧ᩠ᨧᩣ ᨸᩣᩁᩥᩈᨩ᩠ᨩᩣ ᩁᩣᨩᩣᨶᩮᩣ ᨽᩮᩣᨣᩥᨿᩣ ᨠᩩᨾᩣᩁᩣ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ. ᩈᨧᩮ ᨡᩮᩣ ᨸᨶ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨲᩥ, ᩋᩁᩉᩴ ᩉᩮᩣᨲᩥ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩅᩥᩅᨭ᩠ᨭᨧ᩠ᨨᨴᩮᩣ. ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᨾᩉᩣᨸᩁᩥᩅᩣᩁᩮᩣ ᩉᩮᩣᨲᩥ; ᨾᩉᩣᩔ ᩉᩮᩣᨶ᩠ᨲᩥ ᨸᩁᩥᩅᩣᩁᩣ ᨽᩥᨠ᩠ᨡᩪ ᨽᩥᨠ᩠ᨡᩩᨶᩥᨿᩮᩣ ᩏᨸᩣᩈᨠᩣ ᩏᨸᩣᩈᩥᨠᩣᨿᩮᩣ ᨴᩮᩅᩣ ᨾᨶᩩᩔᩣ ᩋᩈᩩᩁᩣ ᨶᩣᨣᩣ ᨣᨶ᩠ᨵᨻ᩠ᨻᩣ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪐᪕. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᨸᩩᩁᩮ ᨸᩩᩁᨲ᩠ᨳᩣ ᨸᩩᩁᩥᨾᩣᩈᩩ ᨩᩣᨲᩥᩈᩩ,

ᨾᨶᩩᩔᨽᩪᨲᩮᩣ ᨻᩉᩩᨶᩴ ᩈᩩᨡᩣᩅᩉᩮᩣ;

ᩏᨻ᩠ᨽᩮᨣᩏᨲ᩠ᨲᩣᩈᨽᨿᩣᨸᨶᩪᨴᨶᩮᩣ,

ᨣᩩᨲ᩠ᨲᩦᩈᩩ ᩁᨠ᩠ᨡᩣᩅᩁᨱᩮᩈᩩ ᩏᩔᩩᨠᩮᩣ.

‘‘ᩈᩮᩣ ᨲᩮᨶ ᨠᨾ᩠ᨾᩮᨶ ᨴᩥᩅᩴ ᩈᨾᨠ᩠ᨠᨾᩥ,

ᩈᩩᨡᨬ᩠ᨧ ᨡᩥᨯ᩠ᨯᩣᩁᨲᩥᨿᩮᩣ ᨧ ᩋᨶ᩠ᩅᨽᩥ;

ᨲᨲᩮᩣ ᨧᩅᩥᨲ᩠ᩅᩣ ᨸᩩᨶᩁᩣᨣᨲᩮᩣ ᩍᨵ,

ᨧᨠ᩠ᨠᩣᨶᩥ ᨸᩣᨴᩮᩈᩩ ᨴᩩᩅᩮᩈᩩ ᩅᩥᨶ᩠ᨴᨲᩥ.

‘‘ᩈᨾᨶ᩠ᨲᨶᩮᨾᩦᨶᩥ ᩈᩉᩔᩁᩣᨶᩥ ᨧ,

ᨻ᩠ᨿᩣᨠᩴᩈᩩ ᩅᩮᨿ᩠ᨿᨬ᩠ᨩᨶᩥᨠᩣ ᩈᨾᩣᨣᨲᩣ;

ᨴᩥᩈ᩠ᩅᩣ ᨠᩩᨾᩣᩁᩴ ᩈᨲᨸᩩᨬ᩠ᨬᩃᨠ᩠ᨡᨱᩴ,

ᨸᩁᩥᩅᩣᩁᩅᩣ ᩉᩮᩔᨲᩥ ᩈᨲ᩠ᨲᩩᨾᨴ᩠ᨴᨶᩮᩣ.

ᨲᨳᩣ ᩉᩦ ᨧᨠ᩠ᨠᩣᨶᩥ ᩈᨾᨶ᩠ᨲᨶᩮᨾᩥᨶᩥ,

ᩈᨧᩮ ᨶ ᨸᨻ᩠ᨻᨩ᩠ᨩᨾᩩᨸᩮᨲᩥ ᨲᩣᨴᩥᩈᩮᩣ;

ᩅᨲ᩠ᨲᩮᨲᩥ ᨧᨠ᩠ᨠᩴ ᨸᨳᩅᩥᩴ ᨸᩈᩣᩈᨲᩥ,

ᨲᩔᩣᨶᩩᨿᨶ᩠ᨲᩣᨵ [ᨲᩔᩣᨶᩩᨿᩩᨲ᩠ᨲᩣ ᩍᨵ (ᩈᩦ. ᨸᩦ.), ᨲᩔᩣᨶᩩᨿᨶ᩠ᨲᩣ ᩍᨵ (ᩈ᩠ᨿᩣ. ᨠ.)] ᨽᩅᨶ᩠ᨲᩥ ᨡᨲ᩠ᨲᩥᨿᩣ.

‘‘ᨾᩉᩣᨿᩈᩴ ᩈᩴᨸᩁᩥᩅᩣᩁᨿᨶ᩠ᨲᩥ ᨶᩴ,

ᩈᨧᩮ ᨧ ᨸᨻ᩠ᨻᨩ᩠ᨩᨾᩩᨸᩮᨲᩥ ᨲᩣᨴᩥᩈᩮᩣ;

ᨶᩮᨠ᩠ᨡᨾ᩠ᨾᨨᨶ᩠ᨴᩣᨽᩥᩁᨲᩮᩣ ᩅᩥᨧᨠ᩠ᨡᨱᩮᩣ,

ᨴᩮᩅᩣᨾᨶᩩᩔᩣᩈᩩᩁᩈᨠ᩠ᨠᩁᨠ᩠ᨡᩈᩣ [ᩈᨲ᩠ᨲᩁᨠ᩠ᨡᩈᩣ (ᨠ.) ᩈᩦ. ᩈ᩠ᨿᩣᩋᨭ᩠ᨮᨠᨳᩣ ᩒᩃᩮᩣᨠᩮᨲᨻ᩠ᨻᩣ].

‘‘ᨣᨶ᩠ᨵᨻ᩠ᨻᨶᩣᨣᩣ ᩅᩥᩉᨣᩣ ᨧᨲᩩᨸ᩠ᨸᨴᩣ,

ᩋᨶᩩᨲ᩠ᨲᩁᩴ ᨴᩮᩅᨾᨶᩩᩔᨸᩪᨩᩥᨲᩴ;

ᨾᩉᩣᨿᩈᩴ ᩈᩴᨸᩁᩥᩅᩣᩁᨿᨶ᩠ᨲᩥ ᨶ’’ᨶ᩠ᨲᩥ.

(᪓-᪕) ᩌᨿᨲᨸᨱ᩠ᩉᩥᨲᩣᨴᩥᨲᩥᩃᨠ᩠ᨡᨱᩴ

᪒᪐᪖. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᨸᩣᨱᩣᨲᩥᨸᩣᨲᩴ ᨸᩉᩣᨿ ᨸᩣᨱᩣᨲᩥᨸᩣᨲᩣ ᨸᨭᩥᩅᩥᩁᨲᩮᩣ ᩋᩉᩮᩣᩈᩥ ᨶᩥᩉᩥᨲᨴᨱ᩠ᨯᩮᩣ ᨶᩥᩉᩥᨲᩈᨲ᩠ᨳᩮᩣ ᩃᨩ᩠ᨩᩦ ᨴᨿᩣᨸᨶ᩠ᨶᩮᩣ, ᩈᨻ᩠ᨻᨸᩣᨱᨽᩪᨲᩉᩥᨲᩣᨶᩩᨠᨾ᩠ᨸᩦ ᩅᩥᩉᩣᩈᩥ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ ᩏᨸᨧᩥᨲᨲ᩠ᨲᩣ ᩏᩔᨶ᩠ᨶᨲ᩠ᨲᩣ ᩅᩥᨸᩩᩃᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩣᨶᩥ ᨲᩦᨱᩥ ᨾᩉᩣᨸᩩᩁᩥᩈᩃᨠ᩠ᨡᨱᩣᨶᩥ ᨸᨭᩥᩃᨽᨲᩥ. ᩌᨿᨲᨸᨱ᩠ᩉᩥ ᨧ ᩉᩮᩣᨲᩥ, ᨴᩦᨥᨦ᩠ᨣᩩᩃᩥ ᨧ ᨻᩕᩉ᩠ᨾᩩᨩᩩᨣᨲ᩠ᨲᩮᩣ ᨧ.

‘‘ᩈᩮᩣ ᨲᩮᩉᩥ ᩃᨠ᩠ᨡᨱᩮᩉᩥ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᨴᩦᨥᩣᨿᩩᨠᩮᩣ ᩉᩮᩣᨲᩥ ᨧᩥᩁᨭ᩠ᨮᩥᨲᩥᨠᩮᩣ, ᨴᩦᨥᨾᩣᨿᩩᩴ ᨸᩣᩃᩮᨲᩥ, ᨶ ᩈᨠ᩠ᨠᩣ ᩉᩮᩣᨲᩥ ᩋᨶ᩠ᨲᩁᩣ ᨩᩦᩅᩥᨲᩣ ᩅᩮᩣᩁᩮᩣᨸᩮᨲᩩᩴ ᨠᩮᨶᨧᩥ ᨾᨶᩩᩔᨽᩪᨲᩮᨶ ᨸᨧ᩠ᨧᨲ᩠ᨳᩥᨠᩮᨶ ᨸᨧ᩠ᨧᩣᨾᩥᨲ᩠ᨲᩮᨶ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ… ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᨴᩦᨥᩣᨿᩩᨠᩮᩣ ᩉᩮᩣᨲᩥ ᨧᩥᩁᨭ᩠ᨮᩥᨲᩥᨠᩮᩣ, ᨴᩦᨥᨾᩣᨿᩩᩴ ᨸᩣᩃᩮᨲᩥ, ᨶ ᩈᨠ᩠ᨠᩣ ᩉᩮᩣᨲᩥ ᩋᨶ᩠ᨲᩁᩣ ᨩᩦᩅᩥᨲᩣ ᩅᩮᩣᩁᩮᩣᨸᩮᨲᩩᩴ ᨸᨧ᩠ᨧᨲ᩠ᨳᩥᨠᩮᩉᩥ ᨸᨧ᩠ᨧᩣᨾᩥᨲ᩠ᨲᩮᩉᩥ ᩈᨾᨱᩮᨶ ᩅᩣ ᨻᩕᩣᩉ᩠ᨾᨱᩮᨶ ᩅᩣ ᨴᩮᩅᩮᨶ ᩅᩣ ᨾᩣᩁᩮᨶ ᩅᩣ ᨻᩕᩉ᩠ᨾᩩᨶᩣ ᩅᩣ ᨠᩮᨶᨧᩥ ᩅᩣ ᩃᩮᩣᨠᩈ᩠ᨾᩥᩴ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪐᪗. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᨾᩣᩁᨱᩅᨵᨽᨿᨲ᩠ᨲᨶᩮᩣ [ᨾᩁᨱᩅᨵᨽᨿᨲ᩠ᨲᨶᩮᩣ (ᩈᩦ. ᨸᩦ. ᨠ.), ᨾᩁᨱᩅᨵᨽᨿᨾᨲ᩠ᨲᨶᩮᩣ (ᩈ᩠ᨿᩣ.)] ᩅᩥᨴᩥᨲ᩠ᩅᩣ,

ᨸᨭᩥᩅᩥᩁᨲᩮᩣ ᨸᩁᩴ ᨾᩣᩁᨱᩣᨿᩉᩮᩣᩈᩥ;

ᨲᩮᨶ ᩈᩩᨧᩁᩥᨲᩮᨶ ᩈᨣ᩠ᨣᨾᨣᨾᩣ [ᨲᩮᨶ ᩈᩮᩣ ᩈᩩᨧᩁᩥᨲᩮᨶ ᩈᨣ᩠ᨣᨾᨣᨾᩣᩈᩥ (ᩈ᩠ᨿᩣ.)],

ᩈᩩᨠᨲᨹᩃᩅᩥᨸᩣᨠᨾᨶᩩᨽᩮᩣᩈᩥ.

‘‘ᨧᩅᩥᨿ ᨸᩩᨶᩁᩥᨵᩣᨣᨲᩮᩣ ᩈᨾᩣᨶᩮᩣ,

ᨸᨭᩥᩃᨽᨲᩥ ᩍᨵ ᨲᩦᨱᩥ ᩃᨠ᩠ᨡᨱᩣᨶᩥ;

ᨽᩅᨲᩥ ᩅᩥᨸᩩᩃᨴᩦᨥᨸᩣᩈᨱ᩠ᩉᩥᨠᩮᩣ,

ᨻᩕᩉ᩠ᨾᩣᩅ ᩈᩩᨩᩩ ᩈᩩᨽᩮᩣ ᩈᩩᨩᩣᨲᨣᨲ᩠ᨲᩮᩣ.

‘‘ᩈᩩᨽᩩᨩᩮᩣ ᩈᩩᩈᩩ ᩈᩩᩈᨱ᩠ᨮᩥᨲᩮᩣ ᩈᩩᨩᩣᨲᩮᩣ,

ᨾᩩᨴᩩᨲᩃᩩᨶᨦ᩠ᨣᩩᩃᩥᨿᩔ ᩉᩮᩣᨶ᩠ᨲᩥ;

ᨴᩦᨥᩣ ᨲᩦᨽᩥ ᨸᩩᩁᩥᩈᩅᩁᨣ᩠ᨣᩃᨠ᩠ᨡᨱᩮᩉᩥ,

ᨧᩥᩁᨿᨸᨶᩣᨿ [ᨧᩥᩁᨿᩣᨸᨶᩣᨿ (ᩈ᩠ᨿᩣ.)] ᨠᩩᨾᩣᩁᨾᩣᨴᩥᩈᨶ᩠ᨲᩥ.

‘‘ᨽᩅᨲᩥ ᨿᨴᩥ ᨣᩥᩉᩦ ᨧᩥᩁᩴ ᨿᨸᩮᨲᩥ,

ᨧᩥᩁᨲᩁᩴ ᨸᨻ᩠ᨻᨩᨲᩥ ᨿᨴᩥ ᨲᨲᩮᩣ ᩉᩥ;

ᨿᩣᨸᨿᨲᩥ ᨧ ᩅᩈᩥᨴ᩠ᨵᩥᨽᩣᩅᨶᩣᨿ,

ᩍᨲᩥ ᨴᩦᨥᩣᨿᩩᨠᨲᩣᨿ ᨲᩴ ᨶᩥᨾᩥᨲ᩠ᨲ’’ᨶ᩠ᨲᩥ.

(᪖) ᩈᨲ᩠ᨲᩩᩔᨴᨲᩣᩃᨠ᩠ᨡᨱᩴ

᪒᪐᪘. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᨴᩣᨲᩣ ᩋᩉᩮᩣᩈᩥ ᨸᨱᩦᨲᩣᨶᩴ ᩁᩈᩥᨲᩣᨶᩴ ᨡᩣᨴᨶᩦᨿᩣᨶᩴ ᨽᩮᩣᨩᨶᩦᨿᩣᨶᩴ ᩈᩣᨿᨶᩦᨿᩣᨶᩴ ᩃᩮᩉᨶᩦᨿᩣᨶᩴ ᨸᩣᨶᩣᨶᩴ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩴ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨸᨭᩥᩃᨽᨲᩥ, ᩈᨲ᩠ᨲᩩᩔᨴᩮᩣ ᩉᩮᩣᨲᩥ, ᩈᨲ᩠ᨲᩔ ᩏᩔᨴᩣ ᩉᩮᩣᨶ᩠ᨲᩥ; ᩏᨽᩮᩣᩈᩩ ᩉᨲ᩠ᨳᩮᩈᩩ ᩏᩔᨴᩣ ᩉᩮᩣᨶ᩠ᨲᩥ, ᩏᨽᩮᩣᩈᩩ ᨸᩣᨴᩮᩈᩩ ᩏᩔᨴᩣ ᩉᩮᩣᨶ᩠ᨲᩥ, ᩏᨽᩮᩣᩈᩩ ᩋᩴᩈᨠᩪᨭᩮᩈᩩ ᩏᩔᨴᩣ ᩉᩮᩣᨶ᩠ᨲᩥ, ᨡᨶ᩠ᨵᩮ ᩏᩔᨴᩮᩣ ᩉᩮᩣᨲᩥ.

‘‘ᩈᩮᩣ ᨲᩮᨶ ᩃᨠ᩠ᨡᨱᩮᨶ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩃᩣᨽᩦ ᩉᩮᩣᨲᩥ ᨸᨱᩦᨲᩣᨶᩴ ᩁᩈᩥᨲᩣᨶᩴ ᨡᩣᨴᨶᩦᨿᩣᨶᩴ ᨽᩮᩣᨩᨶᩦᨿᩣᨶᩴ ᩈᩣᨿᨶᩦᨿᩣᨶᩴ ᩃᩮᩉᨶᩦᨿᩣᨶᩴ ᨸᩣᨶᩣᨶᩴ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ… ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩃᩣᨽᩦ ᩉᩮᩣᨲᩥ ᨸᨱᩦᨲᩣᨶᩴ ᩁᩈᩥᨲᩣᨶᩴ ᨡᩣᨴᨶᩦᨿᩣᨶᩴ ᨽᩮᩣᨩᨶᩦᨿᩣᨶᩴ ᩈᩣᨿᨶᩦᨿᩣᨶᩴ ᩃᩮᩉᨶᩦᨿᩣᨶᩴ ᨸᩣᨶᩣᨶᩴ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪐᪙. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᨡᨩ᩠ᨩᨽᩮᩣᨩ᩠ᨩᨾᨳ ᩃᩮᨿ᩠ᨿ ᩈᩣᨿᩥᨿᩴ,

ᩏᨲ᩠ᨲᨾᨣ᩠ᨣᩁᩈᨴᩣᨿᨠᩮᩣ ᩋᩉᩩ;

ᨲᩮᨶ ᩈᩮᩣ ᩈᩩᨧᩁᩥᨲᩮᨶ ᨠᨾ᩠ᨾᩩᨶᩣ,

ᨶᨶ᩠ᨴᨶᩮ ᨧᩥᩁᨾᨽᩥᨸ᩠ᨸᨾᩮᩣᨴᨲᩥ.

‘‘ᩈᨲ᩠ᨲ ᨧᩩᩔᨴᩮ ᩍᨵᩣᨵᩥᨣᨧ᩠ᨨᨲᩥ,

ᩉᨲ᩠ᨳᨸᩣᨴᨾᩩᨴᩩᨲᨬ᩠ᨧ ᩅᩥᨶ᩠ᨴᨲᩥ;

ᩌᩉᩩ ᨻ᩠ᨿᨬ᩠ᨩᨶᨶᩥᨾᩥᨲ᩠ᨲᨠᩮᩣᩅᩥᨴᩣ,

ᨡᨩ᩠ᨩᨽᩮᩣᨩ᩠ᨩᩁᩈᩃᩣᨽᩥᨲᩣᨿ ᨶᩴ.

‘‘ᨿᩴ ᨣᩥᩉᩥᩔᨸᩥ [ᨶ ᨲᩴ ᨣᩥᩉᩥᩔᩣᨸᩥ (ᩈ᩠ᨿᩣ.)] ᨲᨴᨲ᩠ᨳᨩᩮᩣᨲᨠᩴ,

ᨸᨻ᩠ᨻᨩ᩠ᨩᨾ᩠ᨸᩥ ᨧ ᨲᨴᩣᨵᩥᨣᨧ᩠ᨨᨲᩥ;

ᨡᨩ᩠ᨩᨽᩮᩣᨩ᩠ᨩᩁᩈᩃᩣᨽᩥᩁᩩᨲ᩠ᨲᨾᩴ,

ᩌᩉᩩ ᩈᨻ᩠ᨻᨣᩥᩉᩥᨻᨶ᩠ᨵᨶᨧ᩠ᨨᩥᨴ’’ᨶ᩠ᨲᩥ.

(᪗-᪘) ᨠᩁᨧᩁᨱᨾᩩᨴᩩᨩᩣᩃᨲᩣᩃᨠ᩠ᨡᨱᩣᨶᩥ

᪒᪑᪐. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᨧᨲᩪᩉᩥ ᩈᨦ᩠ᨣᩉᩅᨲ᩠ᨳᩪᩉᩥ ᨩᨶᩴ ᩈᨦ᩠ᨣᩣᩉᨠᩮᩣ ᩋᩉᩮᩣᩈᩥ – ᨴᩣᨶᩮᨶ ᨸᩮᨿ᩠ᨿᩅᨩ᩠ᨩᩮᨶ [ᨸᩥᨿᩅᩣᨧᩮᨶ (ᩈ᩠ᨿᩣ. ᨠ.)] ᩋᨲ᩠ᨳᨧᩁᩥᨿᩣᨿ ᩈᨾᩣᨶᨲ᩠ᨲᨲᩣᨿ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩣᨶᩥ ᨴ᩠ᩅᩮ ᨾᩉᩣᨸᩩᩁᩥᩈᩃᨠ᩠ᨡᨱᩣᨶᩥ ᨸᨭᩥᩃᨽᨲᩥ. ᨾᩩᨴᩩᨲᩃᩩᨶᩉᨲ᩠ᨳᨸᩣᨴᩮᩣ ᨧ ᩉᩮᩣᨲᩥ ᨩᩣᩃᩉᨲ᩠ᨳᨸᩣᨴᩮᩣ ᨧ.

‘‘ᩈᩮᩣ ᨲᩮᩉᩥ ᩃᨠ᩠ᨡᨱᩮᩉᩥ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩈᩩᩈᨦ᩠ᨣᩉᩥᨲᨸᩁᩥᨩᨶᩮᩣ ᩉᩮᩣᨲᩥ, ᩈᩩᩈᨦ᩠ᨣᩉᩥᨲᩣᩔ ᩉᩮᩣᨶ᩠ᨲᩥ ᨻᩕᩣᩉ᩠ᨾᨱᨣᩉᨸᨲᩥᨠᩣ ᨶᩮᨣᨾᨩᩣᨶᨸᨴᩣ ᨣᨱᨠᨾᩉᩣᨾᨲ᩠ᨲᩣ ᩋᨶᩦᨠᨭ᩠ᨮᩣ ᨴᩮᩣᩅᩣᩁᩥᨠᩣ ᩋᨾᨧ᩠ᨧᩣ ᨸᩣᩁᩥᩈᨩ᩠ᨩᩣ ᩁᩣᨩᩣᨶᩮᩣ ᨽᩮᩣᨣᩥᨿᩣ ᨠᩩᨾᩣᩁᩣ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ… ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩈᩩᩈᨦ᩠ᨣᩉᩥᨲᨸᩁᩥᨩᨶᩮᩣ ᩉᩮᩣᨲᩥ, ᩈᩩᩈᨦ᩠ᨣᩉᩥᨲᩣᩔ ᩉᩮᩣᨶ᩠ᨲᩥ ᨽᩥᨠ᩠ᨡᩪ ᨽᩥᨠ᩠ᨡᩩᨶᩥᨿᩮᩣ ᩏᨸᩣᩈᨠᩣ ᩏᨸᩣᩈᩥᨠᩣᨿᩮᩣ ᨴᩮᩅᩣ ᨾᨶᩩᩔᩣ ᩋᩈᩩᩁᩣ ᨶᩣᨣᩣ ᨣᨶ᩠ᨵᨻ᩠ᨻᩣ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪑᪑. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᨴᩣᨶᨾ᩠ᨸᩥ ᨧᨲ᩠ᨳᨧᩁᩥᨿᨲᨬ᩠ᨧ [ᨴᩣᨶᨾ᩠ᨸᩥ ᨧ ᩋᨲ᩠ᨳᨧᩁᩥᨿᨲᨾ᩠ᨸᩥ ᨧ (ᩈᩦ. ᨸᩦ.)],

ᨸᩥᨿᩅᩣᨴᩥᨲᨬ᩠ᨧ ᩈᨾᩣᨶᨲ᩠ᨲᨲᨬ᩠ᨧ [ᨸᩥᨿᩅᨴᨲᨬ᩠ᨧ ᩈᨾᩣᨶᨨᨶ᩠ᨴᨲᨬ᩠ᨧ (ᩈᩦ. ᨸᩦ.)];

ᨠᩁᩥᨿᨧᩁᩥᨿᩈᩩᩈᨦ᩠ᨣᩉᩴ ᨻᩉᩪᨶᩴ,

ᩋᨶᩅᨾᨲᩮᨶ ᨣᩩᨱᩮᨶ ᨿᩣᨲᩥ ᩈᨣ᩠ᨣᩴ.

‘‘ᨧᩅᩥᨿ ᨸᩩᨶᩁᩥᨵᩣᨣᨲᩮᩣ ᩈᨾᩣᨶᩮᩣ,

ᨠᩁᨧᩁᨱᨾᩩᨴᩩᨲᨬ᩠ᨧ ᨩᩣᩃᩥᨶᩮᩣ ᨧ;

ᩋᨲᩥᩁᩩᨧᩥᩁᩈᩩᩅᨣ᩠ᨣᩩᨴᩔᨶᩮᨿ᩠ᨿᩴ,

ᨸᨭᩥᩃᨽᨲᩥ ᨴᩉᩁᩮᩣ ᩈᩩᩈᩩ ᨠᩩᨾᩣᩁᩮᩣ.

‘‘ᨽᩅᨲᩥ ᨸᩁᩥᨩᨶᩔᩅᩮᩣ ᩅᩥᨵᩮᨿ᩠ᨿᩮᩣ,

ᨾᩉᩥᨾᩴ ᩌᩅᩈᩥᨲᩮᩣ ᩈᩩᩈᨦ᩠ᨣᩉᩥᨲᩮᩣ;

ᨸᩥᨿᩅᨴᩪ ᩉᩥᨲᩈᩩᨡᨲᩴ ᨩᩥᨣᩦᩈᨾᩣᨶᩮᩣ [ᨩᩥᨣᩥᩴ ᩈᨾᩣᨶᩮᩣ (ᩈᩦ. ᩈ᩠ᨿᩣ. ᨸᩦ.)],

ᩋᨽᩥᩁᩩᨧᩥᨲᩣᨶᩥ ᨣᩩᨱᩣᨶᩥ ᩌᨧᩁᨲᩥ.

‘‘ᨿᨴᩥ ᨧ ᨩᩉᨲᩥ ᩈᨻ᩠ᨻᨠᩣᨾᨽᩮᩣᨣᩴ,

ᨠᨳᨿᨲᩥ ᨵᨾ᩠ᨾᨠᨳᩴ ᨩᩥᨶᩮᩣ ᨩᨶᩔ;

ᩅᨧᨶᨸᨭᩥᨠᩁᩔᩣᨽᩥᨸ᩠ᨸᩈᨶ᩠ᨶᩣ,

ᩈᩩᨲ᩠ᩅᩣᨶ ᨵᨾ᩠ᨾᩣᨶᩩᨵᨾ᩠ᨾᨾᩣᨧᩁᨶ᩠ᨲᩦ’’ᨲᩥ.

(᪙-᪑᪐) ᩏᩔᨦ᩠ᨡᨸᩣᨴᩏᨴ᩠ᨵᨣ᩠ᨣᩃᩮᩣᨾᨲᩣᩃᨠ᩠ᨡᨱᩣᨶᩥ

᪒᪑᪒. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ [ᩈᨾᩣᨶᩮᩣ ᨻᩉᩩᨶᩮᩣ ᨩᨶᩔ (ᩈᩦ. ᨸᩦ.)] ᩋᨲ᩠ᨳᩪᨸᩈᩴᩉᩥᨲᩴ ᨵᨾ᩠ᨾᩪᨸᩈᩴᩉᩥᨲᩴ ᩅᩣᨧᩴ ᨽᩣᩈᩥᨲᩣ ᩋᩉᩮᩣᩈᩥ, ᨻᩉᩩᨩᨶᩴ ᨶᩥᨴᩴᩈᩮᩈᩥ, ᨸᩣᨱᩦᨶᩴ ᩉᩥᨲᩈᩩᨡᩣᩅᩉᩮᩣ ᨵᨾ᩠ᨾᨿᩣᨣᩦ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩣᨶᩥ ᨴ᩠ᩅᩮ ᨾᩉᩣᨸᩩᩁᩥᩈᩃᨠ᩠ᨡᨱᩣᨶᩥ ᨸᨭᩥᩃᨽᨲᩥ. ᩏᩔᨦ᩠ᨡᨸᩣᨴᩮᩣ ᨧ ᩉᩮᩣᨲᩥ, ᩏᨴ᩠ᨵᨣ᩠ᨣᩃᩮᩣᨾᩮᩣ ᨧ.

‘‘ᩈᩮᩣ ᨲᩮᩉᩥ ᩃᨠ᩠ᨡᨱᩮᩉᩥ ᩈᨾᨶ᩠ᨶᩣᨣᨲᩮᩣ, ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩋᨣ᩠ᨣᩮᩣ ᨧ ᩉᩮᩣᨲᩥ ᩈᩮᨭ᩠ᨮᩮᩣ ᨧ ᨸᩣᨾᩮᩣᨠ᩠ᨡᩮᩣ ᨧ ᩏᨲ᩠ᨲᨾᩮᩣ ᨧ ᨸᩅᩁᩮᩣ ᨧ ᨠᩣᨾᨽᩮᩣᨣᩦᨶᩴ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ… ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩋᨣ᩠ᨣᩮᩣ ᨧ ᩉᩮᩣᨲᩥ ᩈᩮᨭ᩠ᨮᩮᩣ ᨧ ᨸᩣᨾᩮᩣᨠ᩠ᨡᩮᩣ ᨧ ᩏᨲ᩠ᨲᨾᩮᩣ ᨧ ᨸᩅᩁᩮᩣ ᨧ ᩈᨻ᩠ᨻᩈᨲ᩠ᨲᩣᨶᩴ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪑᪓. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᩋᨲ᩠ᨳᨵᨾ᩠ᨾᩈᩉᩥᨲᩴ [ᩋᨲ᩠ᨳᨵᨾ᩠ᨾᩈᩴᩉᩥᨲᩴ (ᨠ. ᩈᩦ. ᨸᩦ.), ᩋᨲ᩠ᨳᨵᨾ᩠ᨾᩩᨸᩈᩴᩉᩥᨲᩴ (ᨠ.)] ᨸᩩᩁᩮ ᨣᩥᩁᩴ,

ᩑᩁᨿᩴ ᨻᩉᩩᨩᨶᩴ ᨶᩥᨴᩴᩈᨿᩥ;

ᨸᩣᨱᩥᨶᩴ ᩉᩥᨲᩈᩩᨡᩣᩅᩉᩮᩣ ᩋᩉᩩ,

ᨵᨾ᩠ᨾᨿᩣᨣᨾᨿᨩᩦ [ᨵᨾ᩠ᨾᨿᩣᨣᩴ ᩋᩔᨩᩥ (ᨠ.)] ᩋᨾᨧ᩠ᨨᩁᩦ.

‘‘ᨲᩮᨶ ᩈᩮᩣ ᩈᩩᨧᩁᩥᨲᩮᨶ ᨠᨾ᩠ᨾᩩᨶᩣ,

ᩈᩩᨣ᩠ᨣᨲᩥᩴ ᩅᨩᨲᩥ ᨲᨲ᩠ᨳ ᨾᩮᩣᨴᨲᩥ;

ᩃᨠ᩠ᨡᨱᩣᨶᩥ ᨧ ᨴᩩᩅᩮ ᩍᨵᩣᨣᨲᩮᩣ,

ᩏᨲ᩠ᨲᨾᨸ᩠ᨸᨾᩩᨡᨲᩣᨿ [ᩏᨲ᩠ᨲᨾᩈᩩᨡᨲᩣᨿ (ᩈ᩠ᨿᩣ.), ᩏᨲ᩠ᨲᨾᨸᨾᩩᨠ᩠ᨡᨲᩣᨿ (ᨠ.)] ᩅᩥᨶ᩠ᨴᨲᩥ.

‘‘ᩏᨻ᩠ᨽᨾᩩᨸ᩠ᨸᨲᩥᨲᩃᩮᩣᨾᩅᩣ ᩈᩈᩮᩣ,

ᨸᩣᨴᨣᨱ᩠ᨮᩥᩁᩉᩩ ᩈᩣᨵᩩᩈᨱ᩠ᨮᩥᨲᩣ;

ᨾᩴᩈᩃᩮᩣᩉᩥᨲᩣᨧᩥᨲᩣ ᨲᨧᩮᩣᨲ᩠ᨳᨲᩣ,

ᩏᨸᩁᩥᨧᩁᨱᩈᩮᩣᨽᨶᩣ [ᩏᨸᩁᩥᨩᩣᨶᩩᩈᩮᩣᨽᨶᩣ (ᩈ᩠ᨿᩣ.), ᩏᨸᩁᩥ ᨧ ᨸᨶ ᩈᩮᩣᨽᨶᩣ (ᩈᩦ. ᨸᩦ.)] ᩋᩉᩩ.

‘‘ᨣᩮᩉᨾᩣᩅᩈᨲᩥ ᨧᩮ ᨲᨳᩣᩅᩥᨵᩮᩣ,

ᩋᨣ᩠ᨣᨲᩴ ᩅᨩᨲᩥ ᨠᩣᨾᨽᩮᩣᨣᩥᨶᩴ;

ᨲᩮᨶ ᩏᨲ᩠ᨲᩁᩥᨲᩁᩮᩣ ᨶ ᩅᩥᨩ᩠ᨩᨲᩥ,

ᨩᨾ᩠ᨻᩩᨴᩦᨸᨾᨽᩥᨽᩩᨿ᩠ᨿ ᩍᩁᩥᨿᨲᩥ.

‘‘ᨸᨻ᩠ᨻᨩᨾ᩠ᨸᩥ ᨧ ᩋᨶᩮᩣᨾᨶᩥᨠ᩠ᨠᨾᩮᩣ,

ᩋᨣ᩠ᨣᨲᩴ ᩅᨩᨲᩥ ᩈᨻ᩠ᨻᨸᩣᨱᩥᨶᩴ;

ᨲᩮᨶ ᩏᨲ᩠ᨲᩁᩥᨲᩁᩮᩣ ᨶ ᩅᩥᨩ᩠ᨩᨲᩥ,

ᩈᨻ᩠ᨻᩃᩮᩣᨠᨾᨽᩥᨽᩩᨿ᩠ᨿ ᩅᩥᩉᩁᨲᩦ’’ᨲᩥ.

(᪑᪑) ᩑᨱᩥᨩᨦ᩠ᨥᩃᨠ᩠ᨡᨱᩴ

᪒᪑᪔. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᩈᨠ᩠ᨠᨧ᩠ᨧᩴ ᩅᩣᨧᩮᨲᩣ ᩋᩉᩮᩣᩈᩥ ᩈᩥᨸ᩠ᨸᩴ ᩅᩣ ᩅᩥᨩ᩠ᨩᩴ ᩅᩣ ᨧᩁᨱᩴ ᩅᩣ ᨠᨾ᩠ᨾᩴ ᩅᩣ – ‘ᨠᩥᩴ ᨲᩥᨾᩮ ᨡᩥᨸ᩠ᨸᩴ ᩅᩥᨩᩣᨶᩮᨿ᩠ᨿᩩᩴ, ᨡᩥᨸ᩠ᨸᩴ ᨸᨭᩥᨸᨩ᩠ᨩᩮᨿ᩠ᨿᩩᩴ, ᨶ ᨧᩥᩁᩴ ᨠᩥᩃᩥᩔᩮᨿ᩠ᨿᩩ’’ᨶ᩠ᨲᩥ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩴ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨸᨭᩥᩃᨽᨲᩥ. ᩑᨱᩥᨩᨦ᩠ᨥᩮᩣ ᩉᩮᩣᨲᩥ.

‘‘ᩈᩮᩣ ᨲᩮᨶ ᩃᨠ᩠ᨡᨱᩮᨶ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᨿᩣᨶᩥ ᨲᩣᨶᩥ ᩁᩣᨩᩣᩁᩉᩣᨶᩥ ᩁᩣᨩᨦ᩠ᨣᩣᨶᩥ ᩁᩣᨩᩪᨸᨽᩮᩣᨣᩣᨶᩥ ᩁᩣᨩᩣᨶᩩᨧ᩠ᨨᩅᩥᨠᩣᨶᩥ ᨲᩣᨶᩥ ᨡᩥᨸ᩠ᨸᩴ ᨸᨭᩥᩃᨽᨲᩥ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ… ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᨿᩣᨶᩥ ᨲᩣᨶᩥ ᩈᨾᨱᩣᩁᩉᩣᨶᩥ ᩈᨾᨱᨦ᩠ᨣᩣᨶᩥ ᩈᨾᨱᩪᨸᨽᩮᩣᨣᩣᨶᩥ ᩈᨾᨱᩣᨶᩩᨧ᩠ᨨᩅᩥᨠᩣᨶᩥ, ᨲᩣᨶᩥ ᨡᩥᨸ᩠ᨸᩴ ᨸᨭᩥᩃᨽᨲᩥ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪑᪕. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᩈᩥᨸ᩠ᨸᩮᩈᩩ ᩅᩥᨩ᩠ᨩᩣᨧᩁᨱᩮᩈᩩ ᨠᨾ᩠ᨾᩮᩈᩩ [ᨠᨾ᩠ᨾᩈᩩ (ᩈᩦ. ᨸᩦ.)],

ᨠᨳᩴ ᩅᩥᨩᩣᨶᩮᨿ᩠ᨿᩩᩴ [ᩅᩥᨩᩣᨶᩮᨿ᩠ᨿ (ᩈᩦ. ᨸᩦ.), ᩅᩥᨩᩣᨶᩮᨿ᩠ᨿᩩ (ᩈ᩠ᨿᩣ.)] ᩃᩉᩩᨶ᩠ᨲᩥ ᩍᨧ᩠ᨨᨲᩥ;

ᨿᨴᩪᨸᨥᩣᨲᩣᨿ ᨶ ᩉᩮᩣᨲᩥ ᨠᩔᨧᩥ,

ᩅᩣᨧᩮᨲᩥ ᨡᩥᨸ᩠ᨸᩴ ᨶ ᨧᩥᩁᩴ ᨠᩥᩃᩥᩔᨲᩥ.

‘‘ᨲᩴ ᨠᨾ᩠ᨾᩴ ᨠᨲ᩠ᩅᩣ ᨠᩩᩈᩃᩴ ᩈᩩᨡᩩᨴᩕᨿᩴ [ᩈᩩᨡᩥᨶ᩠ᨴᩕᩥᨿᩴ (ᨠ.)],

ᨩᨦ᩠ᨥᩣ ᨾᨶᩩᨬ᩠ᨬᩣ ᩃᨽᨲᩮ ᩈᩩᩈᨱ᩠ᨮᩥᨲᩣ;

ᩅᨭ᩠ᨭᩣ ᩈᩩᨩᩣᨲᩣ ᩋᨶᩩᨸᩩᨻ᩠ᨻᨾᩩᨣ᩠ᨣᨲᩣ,

ᩏᨴ᩠ᨵᨣ᩠ᨣᩃᩮᩣᨾᩣ ᩈᩩᨡᩩᨾᨲ᩠ᨲᨧᩮᩣᨲ᩠ᨳᨲᩣ.

‘‘ᩑᨱᩮᨿ᩠ᨿᨩᨦ᩠ᨥᩮᩣᨲᩥ ᨲᨾᩣᩉᩩ ᨸᩩᨣ᩠ᨣᩃᩴ,

ᩈᨾ᩠ᨸᨲ᩠ᨲᩥᨿᩣ ᨡᩥᨸ᩠ᨸᨾᩥᨵᩣᩉᩩ [ᨡᩥᨸ᩠ᨸᨾᩥᨴᩣᩉᩩ (?)] ᩃᨠ᩠ᨡᨱᩴ;

ᨣᩮᩉᩣᨶᩩᩃᩮᩣᨾᩣᨶᩥ ᨿᨴᩣᨽᩥᨠᨦ᩠ᨡᨲᩥ,

ᩋᨸᨻ᩠ᨻᨩᩴ ᨡᩥᨸ᩠ᨸᨾᩥᨵᩣᨵᩥᨣᨧ᩠ᨨᨲᩥ [ᨡᩥᨸ᩠ᨸᨾᩥᨴᩣᨵᩥᨣᨧ᩠ᨨᨲᩥ (?)].

‘‘ᩈᨧᩮ ᨧ ᨸᨻ᩠ᨻᨩ᩠ᨩᨾᩩᨸᩮᨲᩥ ᨲᩣᨴᩥᩈᩮᩣ,

ᨶᩮᨠ᩠ᨡᨾ᩠ᨾᨨᨶ᩠ᨴᩣᨽᩥᩁᨲᩮᩣ ᩅᩥᨧᨠ᩠ᨡᨱᩮᩣ;

ᩋᨶᩩᨧ᩠ᨨᩅᩥᨠᩔ ᨿᨴᩣᨶᩩᩃᩮᩣᨾᩥᨠᩴ,

ᨲᩴ ᩅᩥᨶ᩠ᨴᨲᩥ ᨡᩥᨸ᩠ᨸᨾᨶᩮᩣᨾᩅᩥᨠ᩠ᨠᨾᩮᩣ [ᨶᩥᨠ᩠ᨠᨾᩮᩣ (ᩈᩦ. ᩈ᩠ᨿᩣ. ᨸᩦ.)]’’ᨲᩥ.

(᪑᪒) ᩈᩩᨡᩩᨾᨧ᩠ᨨᩅᩥᩃᨠ᩠ᨡᨱᩴ

᪒᪑᪖. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᩈᨾᨱᩴ ᩅᩣ ᨻᩕᩣᩉ᩠ᨾᨱᩴ ᩅᩣ ᩏᨸᩈᨦ᩠ᨠᨾᩥᨲ᩠ᩅᩣ ᨸᩁᩥᨸᩩᨧ᩠ᨨᩥᨲᩣ ᩋᩉᩮᩣᩈᩥ – ‘‘ᨠᩥᩴ, ᨽᨶ᩠ᨲᩮ, ᨠᩩᩈᩃᩴ, ᨠᩥᩴ ᩋᨠᩩᩈᩃᩴ, ᨠᩥᩴ ᩈᩣᩅᨩ᩠ᨩᩴ, ᨠᩥᩴ ᩋᨶᩅᨩ᩠ᨩᩴ, ᨠᩥᩴ ᩈᩮᩅᩥᨲᨻ᩠ᨻᩴ, ᨠᩥᩴ ᨶ ᩈᩮᩅᩥᨲᨻ᩠ᨻᩴ, ᨠᩥᩴ ᨾᩮ ᨠᩁᩦᨿᨾᩣᨶᩴ ᨴᩦᨥᩁᨲ᩠ᨲᩴ ᩋᩉᩥᨲᩣᨿ ᨴᩩᨠ᩠ᨡᩣᨿ ᩋᩔ, ᨠᩥᩴ ᩅᩣ ᨸᨶ ᨾᩮ ᨠᩁᩦᨿᨾᩣᨶᩴ ᨴᩦᨥᩁᨲ᩠ᨲᩴ ᩉᩥᨲᩣᨿ ᩈᩩᨡᩣᨿ ᩋᩔᩣ’’ᨲᩥ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩴ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨸᨭᩥᩃᨽᨲᩥ. ᩈᩩᨡᩩᨾᨧ᩠ᨨᩅᩥ ᩉᩮᩣᨲᩥ, ᩈᩩᨡᩩᨾᨲ᩠ᨲᩣ ᨨᩅᩥᨿᩣ ᩁᨩᩮᩣᨩᩃ᩠ᩃᩴ ᨠᩣᨿᩮ ᨶ ᩏᨸᩃᩥᨾ᩠ᨸᨲᩥ.

‘‘ᩈᩮᩣ ᨲᩮᨶ ᩃᨠ᩠ᨡᨱᩮᨶ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᨾᩉᩣᨸᨬ᩠ᨬᩮᩣ ᩉᩮᩣᨲᩥ, ᨶᩣᩔ ᩉᩮᩣᨲᩥ ᨠᩮᩣᨧᩥ ᨸᨬ᩠ᨬᩣᨿ ᩈᨴᩥᩈᩮᩣ ᩅᩣ ᩈᩮᨭ᩠ᨮᩮᩣ ᩅᩣ ᨠᩣᨾᨽᩮᩣᨣᩦᨶᩴ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ… ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᨾᩉᩣᨸᨬ᩠ᨬᩮᩣ ᩉᩮᩣᨲᩥ ᨸᩩᨳᩩᨸᨬ᩠ᨬᩮᩣ ᩉᩣᩈᨸᨬ᩠ᨬᩮᩣ [ᩉᩣᩈᩩᨸᨬ᩠ᨬᩮᩣ (ᩈᩦ. ᨸᩦ.)] ᨩᩅᨶᨸᨬ᩠ᨬᩮᩣ ᨲᩥᨠ᩠ᨡᨸᨬ᩠ᨬᩮᩣ ᨶᩥᨻ᩠ᨻᩮᨵᩥᨠᨸᨬ᩠ᨬᩮᩣ, ᨶᩣᩔ ᩉᩮᩣᨲᩥ ᨠᩮᩣᨧᩥ ᨸᨬ᩠ᨬᩣᨿ ᩈᨴᩥᩈᩮᩣ ᩅᩣ ᩈᩮᨭ᩠ᨮᩮᩣ ᩅᩣ ᩈᨻ᩠ᨻᩈᨲ᩠ᨲᩣᨶᩴ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪑᪗. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᨸᩩᩁᩮ ᨸᩩᩁᨲ᩠ᨳᩣ ᨸᩩᩁᩥᨾᩣᩈᩩ ᨩᩣᨲᩥᩈᩩ,

ᩋᨬ᩠ᨬᩣᨲᩩᨠᩣᨾᩮᩣ ᨸᩁᩥᨸᩩᨧ᩠ᨨᩥᨲᩣ ᩋᩉᩩ;

ᩈᩩᩔᩪᩈᩥᨲᩣ ᨸᨻ᩠ᨻᨩᩥᨲᩴ ᩏᨸᩣᩈᩥᨲᩣ,

ᩋᨲ᩠ᨳᨶ᩠ᨲᩁᩮᩣ ᩋᨲ᩠ᨳᨠᨳᩴ ᨶᩥᩈᩣᨾᨿᩥ.

‘‘ᨸᨬ᩠ᨬᩣᨸᨭᩥᩃᩣᨽᨣᨲᩮᨶ [ᨸᨬ᩠ᨬᩣᨸᨭᩥᩃᩣᨽᨠᨲᩮᨶ (ᩈᩦ. ᨸᩦ.) ᨭᩦᨠᩣ ᩒᩃᩮᩣᨠᩮᨲᨻ᩠ᨻᩣ] ᨠᨾ᩠ᨾᩩᨶᩣ,

ᨾᨶᩩᩔᨽᩪᨲᩮᩣ ᩈᩩᨡᩩᨾᨧ᩠ᨨᩅᩦ ᩋᩉᩩ;

ᨻ᩠ᨿᩣᨠᩴᩈᩩ ᩏᨸ᩠ᨸᩣᨴᨶᩥᨾᩥᨲ᩠ᨲᨠᩮᩣᩅᩥᨴᩣ,

ᩈᩩᨡᩩᨾᩣᨶᩥ ᩋᨲ᩠ᨳᩣᨶᩥ ᩋᩅᩮᨧ᩠ᨧ ᨴᨠ᩠ᨡᩥᨲᩥ.

‘‘ᩈᨧᩮ ᨶ ᨸᨻ᩠ᨻᨩ᩠ᨩᨾᩩᨸᩮᨲᩥ ᨲᩣᨴᩥᩈᩮᩣ,

ᩅᨲ᩠ᨲᩮᨲᩥ ᨧᨠ᩠ᨠᩴ ᨸᨳᩅᩥᩴ ᨸᩈᩣᩈᨲᩥ;

ᩋᨲ᩠ᨳᩣᨶᩩᩈᩥᨭ᩠ᨮᩦᩈᩩ ᨸᩁᩥᨣ᩠ᨣᩉᩮᩈᩩ ᨧ,

ᨶ ᨲᩮᨶ ᩈᩮᨿ᩠ᨿᩮᩣ ᩈᨴᩥᩈᩮᩣ ᨧ ᩅᩥᨩ᩠ᨩᨲᩥ.

‘‘ᩈᨧᩮ ᨧ ᨸᨻ᩠ᨻᨩ᩠ᨩᨾᩩᨸᩮᨲᩥ ᨲᩣᨴᩥᩈᩮᩣ,

ᨶᩮᨠ᩠ᨡᨾ᩠ᨾᨨᨶ᩠ᨴᩣᨽᩥᩁᨲᩮᩣ ᩅᩥᨧᨠ᩠ᨡᨱᩮᩣ;

ᨸᨬ᩠ᨬᩣᩅᩥᩈᩥᨭ᩠ᨮᩴ ᩃᨽᨲᩮ ᩋᨶᩩᨲ᩠ᨲᩁᩴ,

ᨸᨸ᩠ᨸᩮᩣᨲᩥ ᨻᩮᩣᨵᩥᩴ ᩅᩁᨽᩪᩁᩥᨾᩮᨵᩈᩮᩣ’’ᨲᩥ.

(᪑᪓) ᩈᩩᩅᨱ᩠ᨱᩅᨱ᩠ᨱᩃᨠ᩠ᨡᨱᩴ

᪒᪑᪘. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᩋᨠ᩠ᨠᩮᩣᨵᨶᩮᩣ ᩋᩉᩮᩣᩈᩥ ᩋᨶᩩᨸᩣᨿᩣᩈᨻᩉᩩᩃᩮᩣ, ᨻᩉᩩᨾ᩠ᨸᩥ ᩅᩩᨲ᩠ᨲᩮᩣ ᩈᨾᩣᨶᩮᩣ ᨶᩣᨽᩥᩈᨩ᩠ᨩᩥ ᨶ ᨠᩩᨸ᩠ᨸᩥ ᨶ ᨻ᩠ᨿᩣᨸᨩ᩠ᨩᩥ ᨶ ᨸᨲᩥᨲ᩠ᨳᩦᨿᩥ, ᨶ ᨠᩮᩣᨸᨬ᩠ᨧ ᨴᩮᩣᩈᨬ᩠ᨧ ᩋᨸ᩠ᨸᨧ᩠ᨧᨿᨬ᩠ᨧ ᨸᩣᨲ᩠ᩅᩣᨠᩣᩈᩥ. ᨴᩣᨲᩣ ᨧ ᩋᩉᩮᩣᩈᩥ ᩈᩩᨡᩩᨾᩣᨶᩴ ᨾᩩᨴᩩᨠᩣᨶᩴ ᩋᨲ᩠ᨳᩁᨱᩣᨶᩴ ᨸᩣᩅᩩᩁᨱᩣᨶᩴ [ᨸᩣᨸᩩᩁᨱᩣᨶᩴ (ᩈᩦ. ᩈ᩠ᨿᩣ. ᨸᩦ.)] ᨡᩮᩣᨾᩈᩩᨡᩩᨾᩣᨶᩴ ᨠᨸ᩠ᨸᩣᩈᩥᨠᩈᩩᨡᩩᨾᩣᨶᩴ ᨠᩮᩣᩈᩮᨿ᩠ᨿᩈᩩᨡᩩᨾᩣᨶᩴ ᨠᨾ᩠ᨻᩃᩈᩩᨡᩩᨾᩣᨶᩴ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ ᩏᨸᨧᩥᨲᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩴ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨸᨭᩥᩃᨽᨲᩥ. ᩈᩩᩅᨱ᩠ᨱᩅᨱ᩠ᨱᩮᩣ ᩉᩮᩣᨲᩥ ᨠᨬ᩠ᨧᨶᩈᨶ᩠ᨶᩥᨽᨲ᩠ᨲᨧᩮᩣ.

‘‘ᩈᩮᩣ ᨲᩮᨶ ᩃᨠ᩠ᨡᨱᩮᨶ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩃᩣᨽᩦ ᩉᩮᩣᨲᩥ ᩈᩩᨡᩩᨾᩣᨶᩴ ᨾᩩᨴᩩᨠᩣᨶᩴ ᩋᨲ᩠ᨳᩁᨱᩣᨶᩴ ᨸᩣᩅᩩᩁᨱᩣᨶᩴ ᨡᩮᩣᨾᩈᩩᨡᩩᨾᩣᨶᩴ ᨠᨸ᩠ᨸᩣᩈᩥᨠᩈᩩᨡᩩᨾᩣᨶᩴ ᨠᩮᩣᩈᩮᨿ᩠ᨿᩈᩩᨡᩩᨾᩣᨶᩴ ᨠᨾ᩠ᨻᩃᩈᩩᨡᩩᨾᩣᨶᩴ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ… ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩃᩣᨽᩦ ᩉᩮᩣᨲᩥ ᩈᩩᨡᩩᨾᩣᨶᩴ ᨾᩩᨴᩩᨠᩣᨶᩴ ᩋᨲ᩠ᨳᩁᨱᩣᨶᩴ ᨸᩣᩅᩩᩁᨱᩣᨶᩴ ᨡᩮᩣᨾᩈᩩᨡᩩᨾᩣᨶᩴ ᨠᨸ᩠ᨸᩣᩈᩥᨠᩈᩩᨡᩩᨾᩣᨶᩴ ᨠᩮᩣᩈᩮᨿ᩠ᨿᩈᩩᨡᩩᨾᩣᨶᩴ ᨠᨾ᩠ᨻᩃᩈᩩᨡᩩᨾᩣᨶᩴ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪑᪙. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᩋᨠ᩠ᨠᩮᩣᨵᨬ᩠ᨧ ᩋᨵᩥᨭ᩠ᨮᩉᩥ ᩋᨴᩣᩈᩥ [ᩋᨴᩣᩈᩥ ᨧ (ᩈᩦ. ᨸᩦ.)],

ᨴᩣᨶᨬ᩠ᨧ ᩅᨲ᩠ᨳᩣᨶᩥ ᩈᩩᨡᩩᨾᩣᨶᩥ ᩈᩩᨧ᩠ᨨᩅᩦᨶᩥ;

ᨸᩩᩁᩥᨾᨲᩁᨽᩅᩮ ᨮᩥᨲᩮᩣ ᩋᨽᩥᩅᩥᩔᨩᩥ,

ᨾᩉᩥᨾᩥᩅ ᩈᩩᩁᩮᩣ ᩋᨽᩥᩅᩔᩴ.

‘‘ᨲᩴ ᨠᨲ᩠ᩅᩣᨶ ᩍᨲᩮᩣ ᨧᩩᨲᩮᩣ ᨴᩥᨻ᩠ᨻᩴ,

ᩏᨸᨸᨩ᩠ᨩᩥ [ᩏᨸᨸᨩ᩠ᨩ (ᩈᩦ. ᨸᩦ.)] ᩈᩩᨠᨲᨹᩃᩅᩥᨸᩣᨠᨾᨶᩩᨽᩩᨲ᩠ᩅᩣ;

ᨠᨶᨠᨲᨶᩩᩈᨶ᩠ᨶᩥᨽᩮᩣ ᩍᨵᩣᨽᩥᨽᩅᨲᩥ,

ᩈᩩᩁᩅᩁᨲᩁᩮᩣᩁᩥᩅ ᩍᨶ᩠ᨴᩮᩣ.

‘‘ᨣᩮᩉᨬ᩠ᨧᩣᩅᩈᨲᩥ ᨶᩁᩮᩣ ᩋᨸᨻ᩠ᨻᨩ᩠ᨩ,

ᨾᩥᨧ᩠ᨨᩴ ᨾᩉᨲᩥᨾᩉᩥᩴ ᩋᨶᩩᩈᩣᩈᨲᩥ [ᨸᩈᩣᩈᨲᩥ (ᩈ᩠ᨿᩣ.)];

ᨸᩈᨿ᩠ᩉ ᩈᩉᩥᨵ ᩈᨲ᩠ᨲᩁᨲᨶᩴ [ᨸᩈᨿ᩠ᩉ ᩋᨽᩥᩅᩈᨶ-ᩅᩁᨲᩁᩴ (ᩈᩦ. ᨸᩦ.)],

ᨸᨭᩥᩃᨽᨲᩥ ᩅᩥᨾᩃ [ᩅᩥᨸᩩᩃ (ᩈ᩠ᨿᩣ.), ᩅᩥᨸᩩᩃᩴ (ᩈᩦ. ᨸᩦ.)] ᩈᩩᨡᩩᨾᨧ᩠ᨨᩅᩥᩴ ᩈᩩᨧᩥᨬ᩠ᨧ.

‘‘ᩃᩣᨽᩦ ᩋᨧ᩠ᨨᩣᨴᨶᩅᨲ᩠ᨳᨾᩮᩣᨠ᩠ᨡᨸᩣᩅᩩᩁᨱᩣᨶᩴ,

ᨽᩅᨲᩥ ᨿᨴᩥ ᩋᨶᩣᨣᩣᩁᩥᨿᨲᩴ ᩏᨸᩮᨲᩥ;

ᩈᩉᩥᨲᩮᩣ [ᩈᩩᩉᩥᨲ (ᩈ᩠ᨿᩣ.), ᩈ ᩉᩥ (ᩈᩦ. ᨸᩦ.)] ᨸᩩᩁᩥᨾᨠᨲᨹᩃᩴ ᩋᨶᩩᨽᩅᨲᩥ,

ᨶ ᨽᩅᨲᩥ ᨠᨲᩔ ᨸᨶᩣᩈᩮᩣ’’ᨲᩥ.

(᪑᪔) ᨠᩮᩣᩈᩮᩣᩉᩥᨲᩅᨲ᩠ᨳᨣᩩᨿ᩠ᩉᩃᨠ᩠ᨡᨱᩴ

᪒᪒᪐. ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᨧᩥᩁᨸ᩠ᨸᨶᨭ᩠ᨮᩮ ᩈᩩᨧᩥᩁᨸ᩠ᨸᩅᩣᩈᩥᨶᩮᩣ ᨬᩣᨲᩥᨾᩥᨲ᩠ᨲᩮ ᩈᩩᩉᨩ᩠ᨩᩮ ᩈᨡᩥᨶᩮᩣ ᩈᨾᩣᨶᩮᨲᩣ ᩋᩉᩮᩣᩈᩥ. ᨾᩣᨲᩁᨾ᩠ᨸᩥ ᨸᩩᨲ᩠ᨲᩮᨶ ᩈᨾᩣᨶᩮᨲᩣ ᩋᩉᩮᩣᩈᩥ, ᨸᩩᨲ᩠ᨲᨾ᩠ᨸᩥ ᨾᩣᨲᩁᩣ ᩈᨾᩣᨶᩮᨲᩣ ᩋᩉᩮᩣᩈᩥ, ᨸᩥᨲᩁᨾ᩠ᨸᩥ ᨸᩩᨲ᩠ᨲᩮᨶ ᩈᨾᩣᨶᩮᨲᩣ ᩋᩉᩮᩣᩈᩥ, ᨸᩩᨲ᩠ᨲᨾ᩠ᨸᩥ ᨸᩥᨲᩁᩣ ᩈᨾᩣᨶᩮᨲᩣ ᩋᩉᩮᩣᩈᩥ, ᨽᩣᨲᩁᨾ᩠ᨸᩥ ᨽᩣᨲᩁᩣ ᩈᨾᩣᨶᩮᨲᩣ ᩋᩉᩮᩣᩈᩥ, ᨽᩣᨲᩁᨾ᩠ᨸᩥ ᨽᨣᩥᨶᩥᨿᩣ ᩈᨾᩣᨶᩮᨲᩣ ᩋᩉᩮᩣᩈᩥ, ᨽᨣᩥᨶᩥᨾ᩠ᨸᩥ ᨽᩣᨲᩁᩣ ᩈᨾᩣᨶᩮᨲᩣ ᩋᩉᩮᩣᩈᩥ, ᨽᨣᩥᨶᩥᨾ᩠ᨸᩥ ᨽᨣᩥᨶᩥᨿᩣ ᩈᨾᩣᨶᩮᨲᩣ ᩋᩉᩮᩣᩈᩥ, ᩈᨾᨦ᩠ᨣᩦᨠᨲ᩠ᩅᩣ [ᩈᨾᨣ᩠ᨣᩥᩴ ᨠᨲ᩠ᩅᩣ (ᩈᩦ. ᩈ᩠ᨿᩣ. ᨸᩦ.)] ᨧ ᩋᨻ᩠ᨽᨶᩩᨾᩮᩣᨴᩥᨲᩣ ᩋᩉᩮᩣᩈᩥ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩴ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨸᨭᩥᩃᨽᨲᩥ – ᨠᩮᩣᩈᩮᩣᩉᩥᨲᩅᨲ᩠ᨳᨣᩩᨿ᩠ᩉᩮᩣ ᩉᩮᩣᨲᩥ.

‘‘ᩈᩮᩣ ᨲᩮᨶ ᩃᨠ᩠ᨡᨱᩮᨶ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᨸᩉᩪᨲᨸᩩᨲ᩠ᨲᩮᩣ ᩉᩮᩣᨲᩥ, ᨸᩁᩮᩣᩈᩉᩔᩴ ᨡᩮᩣ ᨸᨶᩔ ᨸᩩᨲ᩠ᨲᩣ ᨽᩅᨶ᩠ᨲᩥ ᩈᩪᩁᩣ ᩅᩦᩁᨦ᩠ᨣᩁᩪᨸᩣ ᨸᩁᩈᩮᨶᨸ᩠ᨸᨾᨴ᩠ᨴᨶᩣ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ… ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᨸᩉᩪᨲᨸᩩᨲ᩠ᨲᩮᩣ ᩉᩮᩣᨲᩥ, ᩋᨶᩮᨠᩈᩉᩔᩴ ᨡᩮᩣ ᨸᨶᩔ ᨸᩩᨲ᩠ᨲᩣ ᨽᩅᨶ᩠ᨲᩥ ᩈᩪᩁᩣ ᩅᩦᩁᨦ᩠ᨣᩁᩪᨸᩣ ᨸᩁᩈᩮᨶᨸ᩠ᨸᨾᨴ᩠ᨴᨶᩣ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪒᪑. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᨸᩩᩁᩮ ᨸᩩᩁᨲ᩠ᨳᩣ ᨸᩩᩁᩥᨾᩣᩈᩩ ᨩᩣᨲᩥᩈᩩ,

ᨧᩥᩁᨸ᩠ᨸᨶᨭ᩠ᨮᩮ ᩈᩩᨧᩥᩁᨸ᩠ᨸᩅᩣᩈᩥᨶᩮᩣ;

ᨬᩣᨲᩦ ᩈᩩᩉᨩ᩠ᨩᩮ ᩈᨡᩥᨶᩮᩣ ᩈᨾᩣᨶᨿᩥ,

ᩈᨾᨦ᩠ᨣᩥᨠᨲ᩠ᩅᩣ ᩋᨶᩩᨾᩮᩣᨴᩥᨲᩣ ᩋᩉᩩ.

‘‘ᩈᩮᩣ ᨲᩮᨶ [ᩈ ᨲᩮᨶ (ᨠ.)] ᨠᨾ᩠ᨾᩮᨶ ᨴᩥᩅᩴ ᩈᨾᨠ᩠ᨠᨾᩥ,

ᩈᩩᨡᨬ᩠ᨧ ᨡᩥᨯ᩠ᨯᩣᩁᨲᩥᨿᩮᩣ ᨧ ᩋᨶ᩠ᩅᨽᩥ;

ᨲᨲᩮᩣ ᨧᩅᩥᨲ᩠ᩅᩣ ᨸᩩᨶᩁᩣᨣᨲᩮᩣ ᩍᨵ,

ᨠᩮᩣᩈᩮᩣᩉᩥᨲᩴ ᩅᩥᨶ᩠ᨴᨲᩥ ᩅᨲ᩠ᨳᨨᩣᨴᩥᨿᩴ.

‘‘ᨸᩉᩪᨲᨸᩩᨲ᩠ᨲᩮᩣ ᨽᩅᨲᩦ ᨲᨳᩣᩅᩥᨵᩮᩣ,

ᨸᩁᩮᩣᩈᩉᩔᨬ᩠ᨧ [ᨸᩁᩮᩣᩈᩉᩔᩔ (ᩈᩦ. ᨸᩦ.)] ᨽᩅᨶ᩠ᨲᩥ ᩋᨲᩕᨩᩣ;

ᩈᩪᩁᩣ ᨧ ᩅᩦᩁᩣ ᨧ [ᩈᩪᩁᩣ ᨧ ᩅᩦᩁᨦ᩠ᨣᩁᩪᨸᩣ (ᨠ.)] ᩋᨾᩥᨲ᩠ᨲᨲᩣᨸᨶᩣ,

ᨣᩥᩉᩥᩔ ᨸᩦᨲᩥᩴᨩᨶᨶᩣ ᨸᩥᨿᩴᩅᨴᩣ.

‘‘ᨻᩉᩪᨲᩁᩣ ᨸᨻ᩠ᨻᨩᩥᨲᩔ ᩍᩁᩥᨿᨲᩮᩣ,

ᨽᩅᨶ᩠ᨲᩥ ᨸᩩᨲ᩠ᨲᩣ ᩅᨧᨶᩣᨶᩩᩈᩣᩁᩥᨶᩮᩣ;

ᨣᩥᩉᩥᩔ ᩅᩣ ᨸᨻ᩠ᨻᨩᩥᨲᩔ ᩅᩣ ᨸᩩᨶ,

ᨲᩴ ᩃᨠ᩠ᨡᨱᩴ ᨩᩣᨿᨲᩥ ᨲᨴᨲ᩠ᨳᨩᩮᩣᨲᨠ’’ᨶ᩠ᨲᩥ.

ᨸᨮᨾᨽᩣᨱᩅᩣᩁᩮᩣ ᨶᩥᨭ᩠ᨮᩥᨲᩮᩣ.

(᪑᪕-᪑᪖) ᨸᩁᩥᨾᨱ᩠ᨯᩃᩋᨶᩮᩣᨶᨾᨩᨱ᩠ᨱᩩᨸᩁᩥᨾᩈᨶᩃᨠ᩠ᨡᨱᩣᨶᩥ

᪒᪒᪒. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᨾᩉᩣᨩᨶᩈᨦ᩠ᨣᩉᩴ [ᨾᩉᩣᨩᨶᩈᨦ᩠ᨣᩣᩉᨠᩴ (ᨠ.)] ᩈᨾᩮᨠ᩠ᨡᨾᩣᨶᩮᩣ [ᩈᨾᨸᩮᨠ᩠ᨡᨾᩣᨶᩮᩣ (ᨠ.)] ᩈᨾᩴ ᨩᩣᨶᩣᨲᩥ ᩈᩣᨾᩴ ᨩᩣᨶᩣᨲᩥ, ᨸᩩᩁᩥᩈᩴ ᨩᩣᨶᩣᨲᩥ ᨸᩩᩁᩥᩈᩅᩥᩈᩮᩈᩴ ᨩᩣᨶᩣᨲᩥ – ‘ᩋᨿᨾᩥᨴᨾᩁᩉᨲᩥ ᩋᨿᨾᩥᨴᨾᩁᩉᨲᩦ’ᨲᩥ ᨲᨲ᩠ᨳ ᨲᨲ᩠ᨳ ᨸᩩᩁᩥᩈᩅᩥᩈᩮᩈᨠᩁᩮᩣ ᩋᩉᩮᩣᩈᩥ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩣᨶᩥ ᨴ᩠ᩅᩮ ᨾᩉᩣᨸᩩᩁᩥᩈᩃᨠ᩠ᨡᨱᩣᨶᩥ ᨸᨭᩥᩃᨽᨲᩥ. ᨶᩥᨣᩕᩮᩣᨵ ᨸᩁᩥᨾᨱ᩠ᨯᩃᩮᩣ ᨧ ᩉᩮᩣᨲᩥ, ᨮᩥᨲᨠᩮᩣᨿᩮᩅ ᨧ ᩋᨶᩮᩣᨶᨾᨶ᩠ᨲᩮᩣ ᩏᨽᩮᩣᩉᩥ ᨸᩣᨱᩥᨲᩃᩮᩉᩥ ᨩᨱ᩠ᨱᩩᨠᩣᨶᩥ ᨸᩁᩥᨾᩈᨲᩥ ᨸᩁᩥᨾᨩ᩠ᨩᨲᩥ.

‘‘ᩈᩮᩣ ᨲᩮᩉᩥ ᩃᨠ᩠ᨡᨱᩮᩉᩥ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩋᨯ᩠ᨰᩮᩣ ᩉᩮᩣᨲᩥ ᨾᩉᨴ᩠ᨵᨶᩮᩣ ᨾᩉᩣᨽᩮᩣᨣᩮᩣ ᨸᩉᩪᨲᨩᩣᨲᩁᩪᨸᩁᨩᨲᩮᩣ ᨸᩉᩪᨲᩅᩥᨲ᩠ᨲᩪᨸᨠᩁᨱᩮᩣ ᨸᩉᩪᨲᨵᨶᨵᨬ᩠ᨬᩮᩣ ᨸᩁᩥᨸᩩᨱ᩠ᨱᨠᩮᩣᩈᨠᩮᩣᨭ᩠ᨮᩣᨣᩣᩁᩮᩣ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ…ᨸᩮ… ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩋᨯ᩠ᨰᩮᩣ ᩉᩮᩣᨲᩥ ᨾᩉᨴ᩠ᨵᨶᩮᩣ ᨾᩉᩣᨽᩮᩣᨣᩮᩣ. ᨲᩔᩥᨾᩣᨶᩥ ᨵᨶᩣᨶᩥ ᩉᩮᩣᨶ᩠ᨲᩥ, ᩈᩮᨿ᩠ᨿᨳᩥᨴᩴ, ᩈᨴ᩠ᨵᩣᨵᨶᩴ ᩈᩦᩃᨵᨶᩴ ᩉᩥᩁᩥᨵᨶᩴ ᩒᨲ᩠ᨲᨸ᩠ᨸᨵᨶᩴ ᩈᩩᨲᨵᨶᩴ ᨧᩣᨣᨵᨶᩴ ᨸᨬ᩠ᨬᩣᨵᨶᩴ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪒᪓. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᨲᩩᩃᩥᨿ ᨸᨭᩥᩅᩥᨧᨿ ᨧᩥᨶ᩠ᨲᨿᩥᨲ᩠ᩅᩣ,

ᨾᩉᩣᨩᨶᩈᨦ᩠ᨣᩉᨶᩴ [ᨾᩉᩣᨩᨶᩴ ᩈᨦ᩠ᨣᩣᩉᨠᩴ (ᨠ.)] ᩈᨾᩮᨠ᩠ᨡᨾᩣᨶᩮᩣ;

ᩋᨿᨾᩥᨴᨾᩁᩉᨲᩥ ᨲᨲ᩠ᨳ ᨲᨲ᩠ᨳ,

ᨸᩩᩁᩥᩈᩅᩥᩈᩮᩈᨠᩁᩮᩣ ᨸᩩᩁᩮ ᩋᩉᩮᩣᩈᩥ.

‘‘ᨾᩉᩥᨬ᩠ᨧ ᨸᨶ [ᩈᨾᩣ ᨧ ᨸᨶ (ᩈ᩠ᨿᩣ.), ᩈ ᩉᩥ ᨧ ᨸᨶ (ᩈᩦ. ᨸᩦ.)] ᨮᩥᨲᩮᩣ ᩋᨶᩮᩣᨶᨾᨶ᩠ᨲᩮᩣ,

ᨹᩩᩈᨲᩥ ᨠᩁᩮᩉᩥ ᩏᨽᩮᩣᩉᩥ ᨩᨱ᩠ᨱᩩᨠᩣᨶᩥ;

ᨾᩉᩥᩁᩩᩉᨸᩁᩥᨾᨱ᩠ᨯᩃᩮᩣ ᩋᩉᩮᩣᩈᩥ,

ᩈᩩᨧᩁᩥᨲᨠᨾ᩠ᨾᩅᩥᨸᩣᨠᩈᩮᩈᨠᩮᨶ.

‘‘ᨻᩉᩩᩅᩥᩅᩥᨵᨶᩥᨾᩥᨲ᩠ᨲᩃᨠ᩠ᨡᨱᨬ᩠ᨬᩪ,

ᩋᨲᩥᨶᩥᨸᩩᨱᩣ ᨾᨶᩩᨩᩣ ᨻ᩠ᨿᩣᨠᩁᩥᩴᩈᩩ;

ᨻᩉᩩᩅᩥᩅᩥᨵᩣ ᨣᩥᩉᩦᨶᩴ ᩋᩁᩉᩣᨶᩥ,

ᨸᨭᩥᩃᨽᨲᩥ ᨴᩉᩁᩮᩣ ᩈᩩᩈᩩ ᨠᩩᨾᩣᩁᩮᩣ.

‘‘ᩍᨵ ᨧ ᨾᩉᩦᨸᨲᩥᩔ ᨠᩣᨾᨽᩮᩣᨣᩦ,

ᨣᩥᩉᩥᨸᨲᩥᩁᩪᨸᨠᩣ ᨻᩉᩪ ᨽᩅᨶ᩠ᨲᩥ;

ᨿᨴᩥ ᨧ ᨩᩉᨲᩥ ᩈᨻ᩠ᨻᨠᩣᨾᨽᩮᩣᨣᩴ,

ᩃᨽᨲᩥ ᩋᨶᩩᨲ᩠ᨲᩁᩴ ᩏᨲ᩠ᨲᨾᨵᨶᨣ᩠ᨣ’’ᨶ᩠ᨲᩥ.

(᪑᪗-᪑᪙) ᩈᩦᩉᨸᩩᨻ᩠ᨻᨴ᩠ᨵᨠᩣᨿᩣᨴᩥᨲᩥᩃᨠ᩠ᨡᨱᩴ

᪒᪒᪔. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᨻᩉᩩᨩᨶᩔ ᩋᨲ᩠ᨳᨠᩣᨾᩮᩣ ᩋᩉᩮᩣᩈᩥ ᩉᩥᨲᨠᩣᨾᩮᩣ ᨹᩣᩈᩩᨠᩣᨾᩮᩣ ᨿᩮᩣᨣᨠ᩠ᨡᩮᨾᨠᩣᨾᩮᩣ – ‘ᨠᩥᨶ᩠ᨲᩥᨾᩮ ᩈᨴ᩠ᨵᩣᨿ ᩅᨯ᩠ᨰᩮᨿ᩠ᨿᩩᩴ, ᩈᩦᩃᩮᨶ ᩅᨯ᩠ᨰᩮᨿ᩠ᨿᩩᩴ, ᩈᩩᨲᩮᨶ ᩅᨯ᩠ᨰᩮᨿ᩠ᨿᩩᩴ [ᩈᩩᨲᩮᨶ ᩅᨯ᩠ᨰᩮᨿ᩠ᨿᩩᩴ, ᨻᩩᨴ᩠ᨵᩥᨿᩣ ᩅᨯ᩠ᨰᩮᨿ᩠ᨿᩩᩴ (ᩈ᩠ᨿᩣ.)], ᨧᩣᨣᩮᨶ ᩅᨯ᩠ᨰᩮᨿ᩠ᨿᩩᩴ, ᨵᨾ᩠ᨾᩮᨶ ᩅᨯ᩠ᨰᩮᨿ᩠ᨿᩩᩴ, ᨸᨬ᩠ᨬᩣᨿ ᩅᨯ᩠ᨰᩮᨿ᩠ᨿᩩᩴ, ᨵᨶᨵᨬ᩠ᨬᩮᨶ ᩅᨯ᩠ᨰᩮᨿ᩠ᨿᩩᩴ, ᨡᩮᨲ᩠ᨲᩅᨲ᩠ᨳᩩᨶᩣ ᩅᨯ᩠ᨰᩮᨿ᩠ᨿᩩᩴ, ᨴ᩠ᩅᩥᨸᨴᨧᨲᩩᨸ᩠ᨸᨴᩮᩉᩥ ᩅᨯ᩠ᨰᩮᨿ᩠ᨿᩩᩴ, ᨸᩩᨲ᩠ᨲᨴᩣᩁᩮᩉᩥ ᩅᨯ᩠ᨰᩮᨿ᩠ᨿᩩᩴ, ᨴᩣᩈᨠᨾ᩠ᨾᨠᩁᨸᩮᩣᩁᩥᩈᩮᩉᩥ ᩅᨯ᩠ᨰᩮᨿ᩠ᨿᩩᩴ, ᨬᩣᨲᩦᩉᩥ ᩅᨯ᩠ᨰᩮᨿ᩠ᨿᩩᩴ, ᨾᩥᨲ᩠ᨲᩮᩉᩥ ᩅᨯ᩠ᨰᩮᨿ᩠ᨿᩩᩴ, ᨻᨶ᩠ᨵᩅᩮᩉᩥ ᩅᨯ᩠ᨰᩮᨿ᩠ᨿᩩ’ᨶ᩠ᨲᩥ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩣᨶᩥ ᨲᩦᨱᩥ ᨾᩉᩣᨸᩩᩁᩥᩈᩃᨠ᩠ᨡᨱᩣᨶᩥ ᨸᨭᩥᩃᨽᨲᩥ. ᩈᩦᩉᨸᩩᨻ᩠ᨻᨴ᩠ᨵᨠᩣᨿᩮᩣ ᨧ ᩉᩮᩣᨲᩥ ᨧᩥᨲᨶ᩠ᨲᩁᩴᩈᩮᩣ ᨧ ᩈᨾᩅᨭ᩠ᨭᨠ᩠ᨡᨶ᩠ᨵᩮᩣ ᨧ.

‘‘ᩈᩮᩣ ᨲᩮᩉᩥ ᩃᨠ᩠ᨡᨱᩮᩉᩥ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩋᨸᩁᩥᩉᩣᨶᨵᨾ᩠ᨾᩮᩣ ᩉᩮᩣᨲᩥ, ᨶ ᨸᩁᩥᩉᩣᨿᨲᩥ ᨵᨶᨵᨬ᩠ᨬᩮᨶ ᨡᩮᨲ᩠ᨲᩅᨲ᩠ᨳᩩᨶᩣ ᨴ᩠ᩅᩥᨸᨴᨧᨲᩩᨸ᩠ᨸᨴᩮᩉᩥ ᨸᩩᨲ᩠ᨲᨴᩣᩁᩮᩉᩥ ᨴᩣᩈᨠᨾ᩠ᨾᨠᩁᨸᩮᩣᩁᩥᩈᩮᩉᩥ ᨬᩣᨲᩦᩉᩥ ᨾᩥᨲ᩠ᨲᩮᩉᩥ ᨻᨶ᩠ᨵᩅᩮᩉᩥ, ᨶ ᨸᩁᩥᩉᩣᨿᨲᩥ ᩈᨻ᩠ᨻᩈᨾ᩠ᨸᨲ᩠ᨲᩥᨿᩣ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ… ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩋᨸᩁᩥᩉᩣᨶᨵᨾ᩠ᨾᩮᩣ ᩉᩮᩣᨲᩥ, ᨶ ᨸᩁᩥᩉᩣᨿᨲᩥ ᩈᨴ᩠ᨵᩣᨿ ᩈᩦᩃᩮᨶ ᩈᩩᨲᩮᨶ ᨧᩣᨣᩮᨶ ᨸᨬ᩠ᨬᩣᨿ, ᨶ ᨸᩁᩥᩉᩣᨿᨲᩥ ᩈᨻ᩠ᨻᩈᨾ᩠ᨸᨲ᩠ᨲᩥᨿᩣ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪒᪕. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᩈᨴ᩠ᨵᩣᨿ ᩈᩦᩃᩮᨶ ᩈᩩᨲᩮᨶ ᨻᩩᨴ᩠ᨵᩥᨿᩣ,

ᨧᩣᨣᩮᨶ ᨵᨾ᩠ᨾᩮᨶ ᨻᩉᩪᩉᩥ ᩈᩣᨵᩩᩉᩥ;

ᨵᨶᩮᨶ ᨵᨬ᩠ᨬᩮᨶ ᨧ ᨡᩮᨲ᩠ᨲᩅᨲ᩠ᨳᩩᨶᩣ,

ᨸᩩᨲ᩠ᨲᩮᩉᩥ ᨴᩣᩁᩮᩉᩥ ᨧᨲᩩᨸ᩠ᨸᨴᩮᩉᩥ ᨧ.

‘‘ᨬᩣᨲᩦᩉᩥ ᨾᩥᨲ᩠ᨲᩮᩉᩥ ᨧ ᨻᨶ᩠ᨵᩅᩮᩉᩥ ᨧ,

ᨻᩃᩮᨶ ᩅᨱ᩠ᨱᩮᨶ ᩈᩩᨡᩮᨶ ᨧᩪᨽᨿᩴ;

ᨠᨳᩴ ᨶ ᩉᩣᨿᩮᨿ᩠ᨿᩩᩴ ᨸᩁᩮᨲᩥ ᩍᨧ᩠ᨨᨲᩥ,

ᩋᨲ᩠ᨳᩔ ᨾᩥᨴ᩠ᨵᩦ ᨧ [ᩍᨴᩴ ᩈᨾᩥᨴ᩠ᨵᨬ᩠ᨧ (ᨠ.), ᩋᨴ᩠ᨵᩴ ᩈᨾᩥᨴ᩠ᨵᨬ᩠ᨧ (ᩈ᩠ᨿᩣ.)] ᨸᨶᩣᨽᩥᨠᨦ᩠ᨡᨲᩥ.

‘‘ᩈ ᩈᩦᩉᨸᩩᨻ᩠ᨻᨴ᩠ᨵᩈᩩᩈᨱ᩠ᨮᩥᨲᩮᩣ ᩋᩉᩩ,

ᩈᨾᩅᨭ᩠ᨭᨠ᩠ᨡᨶ᩠ᨵᩮᩣ ᨧ ᨧᩥᨲᨶ᩠ᨲᩁᩴᩈᩮᩣ;

ᨸᩩᨻ᩠ᨻᩮ ᩈᩩᨧᩥᨱ᩠ᨱᩮᨶ ᨠᨲᩮᨶ ᨠᨾ᩠ᨾᩩᨶᩣ,

ᩋᩉᩣᨶᩥᨿᩴ ᨸᩩᨻ᩠ᨻᨶᩥᨾᩥᨲ᩠ᨲᨾᩔ ᨲᩴ.

‘‘ᨣᩥᩉᩦᨸᩥ ᨵᨬ᩠ᨬᩮᨶ ᨵᨶᩮᨶ ᩅᨯ᩠ᨰᨲᩥ,

ᨸᩩᨲ᩠ᨲᩮᩉᩥ ᨴᩣᩁᩮᩉᩥ ᨧᨲᩩᨸ᩠ᨸᨴᩮᩉᩥ ᨧ;

ᩋᨠᩥᨬ᩠ᨧᨶᩮᩣ ᨸᨻ᩠ᨻᨩᩥᨲᩮᩣ ᩋᨶᩩᨲ᩠ᨲᩁᩴ,

ᨸᨸ᩠ᨸᩮᩣᨲᩥ ᨻᩮᩣᨵᩥᩴ ᩋᩈᩉᩣᨶᨵᨾ᩠ᨾᨲ’’ᨶ᩠ᨲᩥ [ᩈᨾ᩠ᨻᩮᩣᨵᩥᨾᩉᩣᨶᨵᨾ᩠ᨾᨲᨶ᩠ᨲᩥ (ᩈ᩠ᨿᩣ. ᨠ.) ᨭᩦᨠᩣ ᩒᩃᩮᩣᨠᩮᨲᨻ᩠ᨻᩣ].

(᪒᪐) ᩁᩈᨣ᩠ᨣᩈᨣ᩠ᨣᩥᨲᩣᩃᨠ᩠ᨡᨱᩴ

᪒᪒᪖. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᩈᨲ᩠ᨲᩣᨶᩴ ᩋᩅᩥᩉᩮᨮᨠᨩᩣᨲᩥᨠᩮᩣ ᩋᩉᩮᩣᩈᩥ ᨸᩣᨱᩥᨶᩣ ᩅᩣ ᩃᩮᨯ᩠ᨯᩩᨶᩣ ᩅᩣ ᨴᨱ᩠ᨯᩮᨶ ᩅᩣ ᩈᨲ᩠ᨳᩮᨶ ᩅᩣ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ ᩏᨸᨧᩥᨲᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩴ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨸᨭᩥᩃᨽᨲᩥ, ᩁᩈᨣ᩠ᨣᩈᨣ᩠ᨣᩦ ᩉᩮᩣᨲᩥ, ᩏᨴ᩠ᨵᨣ᩠ᨣᩣᩔ ᩁᩈᩉᩁᨱᩦᨿᩮᩣ ᨣᩦᩅᩣᨿ ᨩᩣᨲᩣ ᩉᩮᩣᨶ᩠ᨲᩥ ᩈᨾᩣᨽᩥᩅᩣᩉᩥᨶᩥᨿᩮᩣ [ᩈᨾᩅᩣᩉᩁᩈᩉᩁᨱᩥᨿᩮᩣ (ᩈ᩠ᨿᩣ.)].

‘‘ᩈᩮᩣ ᨲᩮᨶ ᩃᨠ᩠ᨡᨱᩮᨶ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩋᨸ᩠ᨸᩣᨻᩣᨵᩮᩣ ᩉᩮᩣᨲᩥ ᩋᨸ᩠ᨸᩣᨲᨦ᩠ᨠᩮᩣ, ᩈᨾᩅᩮᨸᩣᨠᩥᨶᩥᨿᩣ ᨣᩉᨱᩥᨿᩣ ᩈᨾᨶ᩠ᨶᩣᨣᨲᩮᩣ ᨶᩣᨲᩥᩈᩦᨲᩣᨿ ᨶᩣᨧ᩠ᨧᩩᨱ᩠ᩉᩣᨿ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ… ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩋᨸ᩠ᨸᩣᨻᩣᨵᩮᩣ ᩉᩮᩣᨲᩥ ᩋᨸ᩠ᨸᩣᨲᨦ᩠ᨠᩮᩣ ᩈᨾᩅᩮᨸᩣᨠᩥᨶᩥᨿᩣ ᨣᩉᨱᩥᨿᩣ ᩈᨾᨶ᩠ᨶᩣᨣᨲᩮᩣ ᨶᩣᨲᩥᩈᩦᨲᩣᨿ ᨶᩣᨧ᩠ᨧᩩᨱ᩠ᩉᩣᨿ ᨾᨩ᩠ᨫᩥᨾᩣᨿ ᨸᨵᩣᨶᨠ᩠ᨡᨾᩣᨿ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪒᪗. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᨶ ᨸᩣᨱᩥᨴᨱ᩠ᨯᩮᩉᩥ ᨸᨶᩣᨳ ᩃᩮᨯ᩠ᨯᩩᨶᩣ,

ᩈᨲ᩠ᨳᩮᨶ ᩅᩣ ᨾᩁᨱᩅᨵᩮᨶ [ᨾᩣᩁᨱᩅᨵᩮᨶ (ᨠ.)] ᩅᩣ ᨸᨶ;

ᩏᨻ᩠ᨻᩣᨵᨶᩣᨿ ᨸᩁᩥᨲᨩ᩠ᨩᨶᩣᨿ ᩅᩣ,

ᨶ ᩉᩮᨮᨿᩦ ᨩᨶᨲᨾᩉᩮᨮᨠᩮᩣ ᩋᩉᩩ.

‘‘ᨲᩮᨶᩮᩅ ᩈᩮᩣ ᩈᩩᨣᨲᩥᨾᩩᨸᩮᨧ᩠ᨧ ᨾᩮᩣᨴᨲᩥ,

ᩈᩩᨡᨸ᩠ᨹᩃᩴ ᨠᩁᩥᨿ ᩈᩩᨡᩣᨶᩥ ᩅᩥᨶ᩠ᨴᨲᩥ;

ᩈᨾᩮᩣᨩᩈᩣ [ᩈᨾ᩠ᨸᨩ᩠ᨩᩈᩣ (ᩈᩦ. ᨸᩦ.), ᨸᩣᨾᩩᨬ᩠ᨩᩈᩣ (ᩈ᩠ᨿᩣ.), ᩈᩣᨾᨬ᩠ᨧ ᩈᩣ (ᨠ.)] ᩁᩈᩉᩁᨱᩦ ᩈᩩᩈᨱ᩠ᨮᩥᨲᩣ,

ᩍᨵᩣᨣᨲᩮᩣ ᩃᨽᨲᩥ ᩁᩈᨣ᩠ᨣᩈᨣ᩠ᨣᩥᨲᩴ.

‘‘ᨲᩮᨶᩣᩉᩩ ᨶᩴ ᩋᨲᩥᨶᩥᨸᩩᨱᩣ ᩅᩥᨧᨠ᩠ᨡᨱᩣ,

ᩋᨿᩴ ᨶᩁᩮᩣ ᩈᩩᨡᨻᩉᩩᩃᩮᩣ ᨽᩅᩥᩔᨲᩥ;

ᨣᩥᩉᩥᩔ ᩅᩣ ᨸᨻ᩠ᨻᨩᩥᨲᩔ ᩅᩣ ᨸᩩᨶ [ᨸᨶ (ᩈ᩠ᨿᩣ.)],

ᨲᩴ ᩃᨠ᩠ᨡᨱᩴ ᨽᩅᨲᩥ ᨲᨴᨲ᩠ᨳᨩᩮᩣᨲᨠ’’ᨶ᩠ᨲᩥ.

(᪒᪑-᪒᪒) ᩋᨽᩥᨶᩦᩃᨶᩮᨲ᩠ᨲᨣᩮᩣᨸᨡᩩᨾᩃᨠ᩠ᨡᨱᩣᨶᩥ

᪒᪒᪘. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᨶ ᨧ ᩅᩥᩈᨭᩴ, ᨶ ᨧ ᩅᩥᩈᩣᨧᩥ [ᨶ ᨧ ᩅᩥᩈᩣᨧᩥᨲᩴ (ᩈᩦ. ᨸᩦ.), ᨶ ᨧ ᩅᩥᩈᩣᩅᩥ (ᩈ᩠ᨿᩣ.)], ᨶ ᨧ ᨸᨶ ᩅᩥᨧᩮᨿ᩠ᨿ ᨸᩮᨠ᩠ᨡᩥᨲᩣ, ᩏᨩᩩᩴ ᨲᨳᩣ ᨸᩈᨭᨾᩩᨩᩩᨾᨶᩮᩣ, ᨸᩥᨿᨧᨠ᩠ᨡᩩᨶᩣ ᨻᩉᩩᨩᨶᩴ ᩏᨴᩥᨠ᩠ᨡᩥᨲᩣ ᩋᩉᩮᩣᩈᩥ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩣᨶᩥ ᨴ᩠ᩅᩮ ᨾᩉᩣᨸᩩᩁᩥᩈᩃᨠ᩠ᨡᨱᩣᨶᩥ ᨸᨭᩥᩃᨽᨲᩥ. ᩋᨽᩥᨶᩦᩃᨶᩮᨲ᩠ᨲᩮᩣ ᨧ ᩉᩮᩣᨲᩥ ᨣᩮᩣᨸᨡᩩᨾᩮᩣ ᨧ.

‘‘ᩈᩮᩣ ᨲᩮᩉᩥ ᩃᨠ᩠ᨡᨱᩮᩉᩥ ᩈᨾᨶ᩠ᨶᩣᨣᨲᩮᩣ, ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᨸᩥᨿᨴᩔᨶᩮᩣ ᩉᩮᩣᨲᩥ ᨻᩉᩩᨶᩮᩣ ᨩᨶᩔ, ᨸᩥᨿᩮᩣ ᩉᩮᩣᨲᩥ ᨾᨶᩣᨸᩮᩣ ᨻᩕᩣᩉ᩠ᨾᨱᨣᩉᨸᨲᩥᨠᩣᨶᩴ ᨶᩮᨣᨾᨩᩣᨶᨸᨴᩣᨶᩴ ᨣᨱᨠᨾᩉᩣᨾᨲ᩠ᨲᩣᨶᩴ ᩋᨶᩦᨠᨭ᩠ᨮᩣᨶᩴ ᨴᩮᩣᩅᩣᩁᩥᨠᩣᨶᩴ ᩋᨾᨧ᩠ᨧᩣᨶᩴ ᨸᩣᩁᩥᩈᨩ᩠ᨩᩣᨶᩴ ᩁᩣᨩᩪᨶᩴ ᨽᩮᩣᨣᩥᨿᩣᨶᩴ ᨠᩩᨾᩣᩁᩣᨶᩴ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ…ᨸᩮ… ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᨸᩥᨿᨴᩔᨶᩮᩣ ᩉᩮᩣᨲᩥ ᨻᩉᩩᨶᩮᩣ ᨩᨶᩔ, ᨸᩥᨿᩮᩣ ᩉᩮᩣᨲᩥ ᨾᨶᩣᨸᩮᩣ ᨽᩥᨠ᩠ᨡᩪᨶᩴ ᨽᩥᨠ᩠ᨡᩩᨶᩦᨶᩴ ᩏᨸᩣᩈᨠᩣᨶᩴ ᩏᨸᩣᩈᩥᨠᩣᨶᩴ ᨴᩮᩅᩣᨶᩴ ᨾᨶᩩᩔᩣᨶᩴ ᩋᩈᩩᩁᩣᨶᩴ ᨶᩣᨣᩣᨶᩴ ᨣᨶ᩠ᨵᨻ᩠ᨻᩣᨶᩴ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪒᪙. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᨶ ᨧ ᩅᩥᩈᨭᩴ ᨶ ᨧ ᩅᩥᩈᩣᨧᩥ [ᩅᩥᩈᩣᨧᩥᨲᩴ (ᩈᩦ. ᨸᩦ.), ᩅᩥᩈᩣᩅᩥ (ᩈ᩠ᨿᩣ.)], ᨶ ᨧ ᨸᨶ ᩅᩥᨧᩮᨿ᩠ᨿᨸᩮᨠ᩠ᨡᩥᨲᩣ;

ᩏᨩᩩᩴ ᨲᨳᩣ ᨸᩈᨭᨾᩩᨩᩩᨾᨶᩮᩣ, ᨸᩥᨿᨧᨠ᩠ᨡᩩᨶᩣ ᨻᩉᩩᨩᨶᩴ ᩏᨴᩥᨠ᩠ᨡᩥᨲᩣ.

‘‘ᩈᩩᨣᨲᩦᩈᩩ ᩈᩮᩣ ᨹᩃᩅᩥᨸᩣᨠᩴ,

ᩋᨶᩩᨽᩅᨲᩥ ᨲᨲ᩠ᨳ ᨾᩮᩣᨴᨲᩥ;

ᩍᨵ ᨧ ᨸᨶ ᨽᩅᨲᩥ ᨣᩮᩣᨸᨡᩩᨾᩮᩣ,

ᩋᨽᩥᨶᩦᩃᨶᩮᨲ᩠ᨲᨶᨿᨶᩮᩣ ᩈᩩᨴᩔᨶᩮᩣ.

‘‘ᩋᨽᩥᨿᩮᩣᨣᩥᨶᩮᩣ ᨧ ᨶᩥᨸᩩᨱᩣ,

ᨻᩉᩪ ᨸᨶ ᨶᩥᨾᩥᨲ᩠ᨲᨠᩮᩣᩅᩥᨴᩣ;

ᩈᩩᨡᩩᨾᨶᨿᨶᨠᩩᩈᩃᩣ ᨾᨶᩩᨩᩣ,

ᨸᩥᨿᨴᩔᨶᩮᩣᨲᩥ ᩋᨽᩥᨶᩥᨴ᩠ᨴᩥᩈᨶ᩠ᨲᩥ ᨶᩴ.

‘‘ᨸᩥᨿᨴᩔᨶᩮᩣ ᨣᩥᩉᩦᨸᩥ ᩈᨶ᩠ᨲᩮᩣ ᨧ,

ᨽᩅᨲᩥ ᨻᩉᩩᨩᨶᨸᩥᨿᩣᨿᩥᨲᩮᩣ;

ᨿᨴᩥ ᨧ ᨶ ᨽᩅᨲᩥ ᨣᩥᩉᩦ ᩈᨾᨱᩮᩣ ᩉᩮᩣᨲᩥ,

ᨸᩥᨿᩮᩣ ᨻᩉᩪᨶᩴ ᩈᩮᩣᨠᨶᩣᩈᨶᩮᩣ’’ᨲᩥ.

(᪒᪓) ᩏᨱ᩠ᩉᩦᩈᩈᩦᩈᩃᨠ᩠ᨡᨱᩴ

᪒᪓᪐. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᨻᩉᩩᨩᨶᨸᩩᨻ᩠ᨻᨦ᩠ᨣᨾᩮᩣ ᩋᩉᩮᩣᩈᩥ ᨠᩩᩈᩃᩮᩈᩩ ᨵᨾ᩠ᨾᩮᩈᩩ ᨻᩉᩩᨩᨶᨸᩣᨾᩮᩣᨠ᩠ᨡᩮᩣ ᨠᩣᨿᩈᩩᨧᩁᩥᨲᩮ ᩅᨧᩦᩈᩩᨧᩁᩥᨲᩮ ᨾᨶᩮᩣᩈᩩᨧᩁᩥᨲᩮ ᨴᩣᨶᩈᩴᩅᩥᨽᩣᨣᩮ ᩈᩦᩃᩈᨾᩣᨴᩣᨶᩮ ᩏᨸᩮᩣᩈᨳᩩᨸᩅᩣᩈᩮ ᨾᨲ᩠ᨲᩮᨿ᩠ᨿᨲᩣᨿ ᨸᩮᨲ᩠ᨲᩮᨿ᩠ᨿᨲᩣᨿ ᩈᩣᨾᨬ᩠ᨬᨲᩣᨿ ᨻᩕᩉ᩠ᨾᨬ᩠ᨬᨲᩣᨿ ᨠᩩᩃᩮ ᨩᩮᨭ᩠ᨮᩣᨸᨧᩣᨿᩥᨲᩣᨿ ᩋᨬ᩠ᨬᨲᩁᨬ᩠ᨬᨲᩁᩮᩈᩩ ᨧ ᩋᨵᩥᨠᩩᩈᩃᩮᩈᩩ ᨵᨾ᩠ᨾᩮᩈᩩ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩴ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨸᨭᩥᩃᨽᨲᩥ – ᩏᨱ᩠ᩉᩦᩈᩈᩦᩈᩮᩣ ᩉᩮᩣᨲᩥ.

‘‘ᩈᩮᩣ ᨲᩮᨶ ᩃᨠ᩠ᨡᨱᩮᨶ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᨾᩉᩣᩔ ᨩᨶᩮᩣ ᩋᨶ᩠ᩅᩣᨿᩥᨠᩮᩣ ᩉᩮᩣᨲᩥ, ᨻᩕᩣᩉ᩠ᨾᨱᨣᩉᨸᨲᩥᨠᩣ ᨶᩮᨣᨾᨩᩣᨶᨸᨴᩣ ᨣᨱᨠᨾᩉᩣᨾᨲ᩠ᨲᩣ ᩋᨶᩦᨠᨭ᩠ᨮᩣ ᨴᩮᩣᩅᩣᩁᩥᨠᩣ ᩋᨾᨧ᩠ᨧᩣ ᨸᩣᩁᩥᩈᨩ᩠ᨩᩣ ᩁᩣᨩᩣᨶᩮᩣ ᨽᩮᩣᨣᩥᨿᩣ ᨠᩩᨾᩣᩁᩣ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ… ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᨾᩉᩣᩔ ᨩᨶᩮᩣ ᩋᨶ᩠ᩅᩣᨿᩥᨠᩮᩣ ᩉᩮᩣᨲᩥ, ᨽᩥᨠ᩠ᨡᩪ ᨽᩥᨠ᩠ᨡᩩᨶᩥᨿᩮᩣ ᩏᨸᩣᩈᨠᩣ ᩏᨸᩣᩈᩥᨠᩣᨿᩮᩣ ᨴᩮᩅᩣ ᨾᨶᩩᩔᩣ ᩋᩈᩩᩁᩣ ᨶᩣᨣᩣ ᨣᨶ᩠ᨵᨻ᩠ᨻᩣ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪓᪑. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᨸᩩᨻ᩠ᨻᨦ᩠ᨣᨾᩮᩣ ᩈᩩᨧᩁᩥᨲᩮᩈᩩ ᩋᩉᩩ,

ᨵᨾ᩠ᨾᩮᩈᩩ ᨵᨾ᩠ᨾᨧᩁᩥᨿᩣᨽᩥᩁᨲᩮᩣ;

ᩋᨶ᩠ᩅᩣᨿᩥᨠᩮᩣ ᨻᩉᩩᨩᨶᩔ ᩋᩉᩩ,

ᩈᨣ᩠ᨣᩮᩈᩩ ᩅᩮᨴᨿᩥᨲ᩠ᨳ ᨸᩩᨬ᩠ᨬᨹᩃᩴ.

‘‘ᩅᩮᨴᩥᨲ᩠ᩅᩣ ᩈᩮᩣ ᩈᩩᨧᩁᩥᨲᩔ ᨹᩃᩴ,

ᩏᨱ᩠ᩉᩦᩈᩈᩦᩈᨲ᩠ᨲᨾᩥᨵᨩ᩠ᨫᨣᨾᩣ;

ᨻ᩠ᨿᩣᨠᩴᩈᩩ ᨻ᩠ᨿᨬ᩠ᨩᨶᨶᩥᨾᩥᨲ᩠ᨲᨵᩁᩣ,

ᨸᩩᨻ᩠ᨻᨦ᩠ᨣᨾᩮᩣ ᨻᩉᩩᨩᨶᩴ ᩉᩮᩔᨲᩥ.

‘‘ᨸᨭᩥᨽᩮᩣᨣᩥᨿᩣ ᨾᨶᩩᨩᩮᩈᩩ ᩍᨵ,

ᨸᩩᨻ᩠ᨻᩮᩅ ᨲᩔ ᩋᨽᩥᩉᩁᨶ᩠ᨲᩥ ᨲᨴᩣ;

ᨿᨴᩥ ᨡᨲ᩠ᨲᩥᨿᩮᩣ ᨽᩅᨲᩥ ᨽᩪᨾᩥᨸᨲᩥ,

ᨸᨭᩥᩉᩣᩁᨠᩴ ᨻᩉᩩᨩᨶᩮ ᩃᨽᨲᩥ.

‘‘ᩋᨳ ᨧᩮᨸᩥ ᨸᨻ᩠ᨻᨩᨲᩥ ᩈᩮᩣ ᨾᨶᩩᨩᩮᩣ,

ᨵᨾ᩠ᨾᩮᩈᩩ ᩉᩮᩣᨲᩥ ᨸᨣᩩᨱᩮᩣ ᩅᩥᩈᩅᩦ;

ᨲᩔᩣᨶᩩᩈᩣᩈᨶᩥᨣᩩᨱᩣᨽᩥᩁᨲᩮᩣ,

ᩋᨶ᩠ᩅᩣᨿᩥᨠᩮᩣ ᨻᩉᩩᨩᨶᩮᩣ ᨽᩅᨲᩦ’’ᨲᩥ.

(᪒᪔-᪒᪕) ᩑᨠᩮᨠᩃᩮᩣᨾᨲᩣᩏᨱ᩠ᨱᩣᩃᨠ᩠ᨡᨱᩣᨶᩥ

᪒᪓᪒. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᨾᩩᩈᩣᩅᩣᨴᩴ ᨸᩉᩣᨿ ᨾᩩᩈᩣᩅᩣᨴᩣ ᨸᨭᩥᩅᩥᩁᨲᩮᩣ ᩋᩉᩮᩣᩈᩥ, ᩈᨧ᩠ᨧᩅᩣᨴᩦ ᩈᨧ᩠ᨧᩈᨶ᩠ᨵᩮᩣ ᨳᩮᨲᩮᩣ ᨸᨧ᩠ᨧᨿᩥᨠᩮᩣ ᩋᩅᩥᩈᩴᩅᩣᨴᨠᩮᩣ ᩃᩮᩣᨠᩔ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ ᩏᨸᨧᩥᨲᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩣᨶᩥ ᨴ᩠ᩅᩮ ᨾᩉᩣᨸᩩᩁᩥᩈᩃᨠ᩠ᨡᨱᩣᨶᩥ ᨸᨭᩥᩃᨽᨲᩥ. ᩑᨠᩮᨠᩃᩮᩣᨾᩮᩣ ᨧ ᩉᩮᩣᨲᩥ, ᩏᨱ᩠ᨱᩣ ᨧ ᨽᨾᩩᨠᨶ᩠ᨲᩁᩮ ᨩᩣᨲᩣ ᩉᩮᩣᨲᩥ ᩒᨴᩣᨲᩣ ᨾᩩᨴᩩᨲᩪᩃᩈᨶ᩠ᨶᩥᨽᩣ.

‘‘ᩈᩮᩣ ᨲᩮᩉᩥ ᩃᨠ᩠ᨡᨱᩮᩉᩥ ᩈᨾᨶ᩠ᨶᩣᨣᨲᩮᩣ, ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᨾᩉᩣᩔ ᨩᨶᩮᩣ ᩏᨸᩅᨲ᩠ᨲᨲᩥ, ᨻᩕᩣᩉ᩠ᨾᨱᨣᩉᨸᨲᩥᨠᩣ ᨶᩮᨣᨾᨩᩣᨶᨸᨴᩣ ᨣᨱᨠᨾᩉᩣᨾᨲ᩠ᨲᩣ ᩋᨶᩦᨠᨭ᩠ᨮᩣ ᨴᩮᩣᩅᩣᩁᩥᨠᩣ ᩋᨾᨧ᩠ᨧᩣ ᨸᩣᩁᩥᩈᨩ᩠ᨩᩣ ᩁᩣᨩᩣᨶᩮᩣ ᨽᩮᩣᨣᩥᨿᩣ ᨠᩩᨾᩣᩁᩣ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ… ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᨾᩉᩣᩔ ᨩᨶᩮᩣ ᩏᨸᩅᨲ᩠ᨲᨲᩥ, ᨽᩥᨠ᩠ᨡᩪ ᨽᩥᨠ᩠ᨡᩩᨶᩥᨿᩮᩣ ᩏᨸᩣᩈᨠᩣ ᩏᨸᩣᩈᩥᨠᩣᨿᩮᩣ ᨴᩮᩅᩣ ᨾᨶᩩᩔᩣ ᩋᩈᩩᩁᩣ ᨶᩣᨣᩣ ᨣᨶ᩠ᨵᨻ᩠ᨻᩣ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪓᪓. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᩈᨧ᩠ᨧᨸ᩠ᨸᨭᩥᨬ᩠ᨬᩮᩣ ᨸᩩᩁᩥᨾᩣᩈᩩ ᨩᩣᨲᩥᩈᩩ,

ᩋᨴ᩠ᩅᩮᨩ᩠ᨫᩅᩣᨧᩮᩣ ᩋᩃᩥᨠᩴ ᩅᩥᩅᨩ᩠ᨩᨿᩥ;

ᨶ ᩈᩮᩣ ᩅᩥᩈᩴᩅᩣᨴᨿᩥᨲᩣᨸᩥ ᨠᩔᨧᩥ,

ᨽᩪᨲᩮᨶ ᨲᨧ᩠ᨨᩮᨶ ᨲᨳᩮᨶ ᨽᩣᩈᨿᩥ [ᨲᩮᩣᩈᨿᩥ (ᩈᩦ. ᨸᩦ.)].

‘‘ᩈᩮᨲᩣ ᩈᩩᩈᩩᨠ᩠ᨠᩣ ᨾᩩᨴᩩᨲᩪᩃᩈᨶ᩠ᨶᩥᨽᩣ,

ᩏᨱ᩠ᨱᩣ ᩈᩩᨩᩣᨲᩣ [ᩏᨱ᩠ᨱᩣᩔ ᨩᩣᨲᩣ (ᨠ. ᩈᩦ.)] ᨽᨾᩩᨠᨶ᩠ᨲᩁᩮ ᩋᩉᩩ;

ᨶ ᩃᩮᩣᨾᨠᩪᨸᩮᩈᩩ ᨴᩩᩅᩮ ᩋᨩᩣᨿᩥᩈᩩᩴ,

ᩑᨠᩮᨠᩃᩮᩣᨾᩪᨸᨧᩥᨲᨦ᩠ᨣᩅᩣ ᩋᩉᩩ.

‘‘ᨲᩴ ᩃᨠ᩠ᨡᨱᨬ᩠ᨬᩪ ᨻᩉᩅᩮᩣ ᩈᨾᩣᨣᨲᩣ,

ᨻ᩠ᨿᩣᨠᩴᩈᩩ ᩏᨸ᩠ᨸᩣᨴᨶᩥᨾᩥᨲ᩠ᨲᨠᩮᩣᩅᩥᨴᩣ;

ᩏᨱ᩠ᨱᩣ ᨧ ᩃᩮᩣᨾᩣ ᨧ ᨿᨳᩣ ᩈᩩᩈᨱ᩠ᨮᩥᨲᩣ,

ᩏᨸᩅᨲ᩠ᨲᨲᩦ ᩎᨴᩥᩈᨠᩴ ᨻᩉᩩᨩ᩠ᨩᨶᩮᩣ.

‘‘ᨣᩥᩉᩥᨾ᩠ᨸᩥ ᩈᨶ᩠ᨲᩴ ᩏᨸᩅᨲ᩠ᨲᨲᩦ ᨩᨶᩮᩣ,

ᨻᩉᩩ ᨸᩩᩁᨲ᩠ᨳᩣᨸᨠᨲᩮᨶ ᨠᨾ᩠ᨾᩩᨶᩣ;

ᩋᨠᩥᨬ᩠ᨧᨶᩴ ᨸᨻ᩠ᨻᨩᩥᨲᩴ ᩋᨶᩩᨲ᩠ᨲᩁᩴ,

ᨻᩩᨴ᩠ᨵᨾ᩠ᨸᩥ ᩈᨶ᩠ᨲᩴ ᩏᨸᩅᨲ᩠ᨲᨲᩥ ᨩᨶᩮᩣ’’ᨲᩥ.

(᪒᪖-᪒᪗) ᨧᨲ᩠ᨲᩣᩃᩦᩈᩋᩅᩥᩁᩊᨴᨶ᩠ᨲᩃᨠ᩠ᨡᨱᩣᨶᩥ

᪒᪓᪔. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᨸᩥᩈᩩᨱᩴ ᩅᩣᨧᩴ ᨸᩉᩣᨿ ᨸᩥᩈᩩᨱᩣᨿ ᩅᩣᨧᩣᨿ ᨸᨭᩥᩅᩥᩁᨲᩮᩣ ᩋᩉᩮᩣᩈᩥ. ᩍᨲᩮᩣ ᩈᩩᨲ᩠ᩅᩣ ᨶ ᩋᨾᩩᨲᩕ ᩋᨠ᩠ᨡᩣᨲᩣ ᩍᨾᩮᩈᩴ ᨽᩮᨴᩣᨿ, ᩋᨾᩩᨲᩕ ᩅᩣ ᩈᩩᨲ᩠ᩅᩣ ᨶ ᩍᨾᩮᩈᩴ ᩋᨠ᩠ᨡᩣᨲᩣ ᩋᨾᩪᩈᩴ ᨽᩮᨴᩣᨿ, ᩍᨲᩥ ᨽᩥᨶ᩠ᨶᩣᨶᩴ ᩅᩣ ᩈᨶ᩠ᨵᩣᨲᩣ, ᩈᩉᩥᨲᩣᨶᩴ ᩅᩣ ᩋᨶᩩᨸ᩠ᨸᨴᩣᨲᩣ, ᩈᨾᨣ᩠ᨣᩣᩁᩣᨾᩮᩣ ᩈᨾᨣ᩠ᨣᩁᨲᩮᩣ ᩈᨾᨣ᩠ᨣᨶᨶ᩠ᨴᩦ ᩈᨾᨣ᩠ᨣᨠᩁᨱᩥᩴ ᩅᩣᨧᩴ ᨽᩣᩈᩥᨲᩣ ᩋᩉᩮᩣᩈᩥ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩣᨶᩥ ᨴ᩠ᩅᩮ ᨾᩉᩣᨸᩩᩁᩥᩈᩃᨠ᩠ᨡᨱᩣᨶᩥ ᨸᨭᩥᩃᨽᨲᩥ. ᨧᨲ᩠ᨲᩣᩃᩦᩈᨴᨶ᩠ᨲᩮᩣ ᨧ ᩉᩮᩣᨲᩥ ᩋᩅᩥᩁᩊᨴᨶ᩠ᨲᩮᩣ ᨧ.

‘‘ᩈᩮᩣ ᨲᩮᩉᩥ ᩃᨠ᩠ᨡᨱᩮᩉᩥ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩋᨽᩮᨩ᩠ᨩᨸᩁᩥᩈᩮᩣ ᩉᩮᩣᨲᩥ, ᩋᨽᩮᨩ᩠ᨩᩣᩔ ᩉᩮᩣᨶ᩠ᨲᩥ ᨸᩁᩥᩈᩣ, ᨻᩕᩣᩉ᩠ᨾᨱᨣᩉᨸᨲᩥᨠᩣ ᨶᩮᨣᨾᨩᩣᨶᨸᨴᩣ ᨣᨱᨠᨾᩉᩣᨾᨲ᩠ᨲᩣ ᩋᨶᩦᨠᨭ᩠ᨮᩣ ᨴᩮᩣᩅᩣᩁᩥᨠᩣ ᩋᨾᨧ᩠ᨧᩣ ᨸᩣᩁᩥᩈᨩ᩠ᨩᩣ ᩁᩣᨩᩣᨶᩮᩣ ᨽᩮᩣᨣᩥᨿᩣ ᨠᩩᨾᩣᩁᩣ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ … ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩋᨽᩮᨩ᩠ᨩᨸᩁᩥᩈᩮᩣ ᩉᩮᩣᨲᩥ, ᩋᨽᩮᨩ᩠ᨩᩣᩔ ᩉᩮᩣᨶ᩠ᨲᩥ ᨸᩁᩥᩈᩣ, ᨽᩥᨠ᩠ᨡᩪ ᨽᩥᨠ᩠ᨡᩩᨶᩥᨿᩮᩣ ᩏᨸᩣᩈᨠᩣ ᩏᨸᩣᩈᩥᨠᩣᨿᩮᩣ ᨴᩮᩅᩣ ᨾᨶᩩᩔᩣ ᩋᩈᩩᩁᩣ ᨶᩣᨣᩣ ᨣᨶ᩠ᨵᨻ᩠ᨻᩣ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪓᪕. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᩅᩮᨽᩪᨲᩥᨿᩴ ᩈᩉᩥᨲᨽᩮᨴᨠᩣᩁᩥᩴ,

ᨽᩮᨴᨸ᩠ᨸᩅᨯ᩠ᨰᨶᩅᩥᩅᩣᨴᨠᩣᩁᩥᩴ;

ᨠᩃᩉᨸ᩠ᨸᩅᨯ᩠ᨰᨶᩌᨠᩥᨧ᩠ᨧᨠᩣᩁᩥᩴ,

ᩈᩉᩥᨲᩣᨶᩴ ᨽᩮᨴᨩᨶᨶᩥᩴ ᨶ ᨽᨱᩥ.

‘‘ᩋᩅᩥᩅᩣᨴᩅᨯ᩠ᨰᨶᨠᩁᩥᩴ ᩈᩩᨣᩥᩁᩴ,

ᨽᩥᨶ᩠ᨶᩣᨶᩩᩈᨶ᩠ᨵᩥᨩᨶᨶᩥᩴ ᩋᨽᨱᩥ;

ᨠᩃᩉᩴ ᨩᨶᩔ ᨸᨶᩩᨴᩦ ᩈᨾᨦ᩠ᨣᩦ,

ᩈᩉᩥᨲᩮᩉᩥ ᨶᨶ᩠ᨴᨲᩥ ᨸᨾᩮᩣᨴᨲᩥ ᨧ.

‘‘ᩈᩩᨣᨲᩦᩈᩩ ᩈᩮᩣ ᨹᩃᩅᩥᨸᩣᨠᩴ,

ᩋᨶᩩᨽᩅᨲᩥ ᨲᨲ᩠ᨳ ᨾᩮᩣᨴᨲᩥ;

ᨴᨶ᩠ᨲᩣ ᩍᨵ ᩉᩮᩣᨶ᩠ᨲᩥ ᩋᩅᩥᩁᩊᩣ ᩈᩉᩥᨲᩣ,

ᨧᨲᩩᩁᩮᩣ ᨴᩈᩔ ᨾᩩᨡᨩᩣ ᩈᩩᩈᨱ᩠ᨮᩥᨲᩣ.

‘‘ᨿᨴᩥ ᨡᨲ᩠ᨲᩥᨿᩮᩣ ᨽᩅᨲᩥ ᨽᩪᨾᩥᨸᨲᩥ,

ᩋᩅᩥᨽᩮᨴᩥᨿᩣᩔ ᨸᩁᩥᩈᩣ ᨽᩅᨲᩥ;

ᩈᨾᨱᩮᩣ ᨧ ᩉᩮᩣᨲᩥ ᩅᩥᩁᨩᩮᩣ ᩅᩥᨾᩃᩮᩣ,

ᨸᩁᩥᩈᩣᩔ ᩉᩮᩣᨲᩥ ᩋᨶᩩᨣᨲᩣ ᩋᨧᩃᩣ’’ᨲᩥ.

(᪒᪘-᪒᪙) ᨸᩉᩪᨲᨩᩥᩅ᩠ᩉᩣᨻᩕᩉ᩠ᨾᩔᩁᩃᨠ᩠ᨡᨱᩣᨶᩥ

᪒᪓᪖. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᨹᩁᩩᩈᩴ ᩅᩣᨧᩴ ᨸᩉᩣᨿ ᨹᩁᩩᩈᩣᨿ ᩅᩣᨧᩣᨿ ᨸᨭᩥᩅᩥᩁᨲᩮᩣ ᩋᩉᩮᩣᩈᩥ. ᨿᩣ ᩈᩣ ᩅᩣᨧᩣ ᨶᩮᩃᩣ ᨠᨱ᩠ᨱᩈᩩᨡᩣ ᨸᩮᨾᨶᩦᨿᩣ ᩉᨴᨿᨦ᩠ᨣᨾᩣ ᨸᩮᩣᩁᩦ ᨻᩉᩩᨩᨶᨠᨶ᩠ᨲᩣ ᨻᩉᩩᨩᨶᨾᨶᩣᨸᩣ, ᨲᨳᩣᩁᩪᨸᩥᩴ ᩅᩣᨧᩴ ᨽᩣᩈᩥᨲᩣ ᩋᩉᩮᩣᩈᩥ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ ᩏᨸᨧᩥᨲᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩣᨶᩥ ᨴ᩠ᩅᩮ ᨾᩉᩣᨸᩩᩁᩥᩈᩃᨠ᩠ᨡᨱᩣᨶᩥ ᨸᨭᩥᩃᨽᨲᩥ. ᨸᩉᩪᨲᨩᩥᩅ᩠ᩉᩮᩣ ᨧ ᩉᩮᩣᨲᩥ ᨻᩕᩉ᩠ᨾᩔᩁᩮᩣ ᨧ ᨠᩁᩅᩦᨠᨽᩣᨱᩦ.

‘‘ᩈᩮᩣ ᨲᩮᩉᩥ ᩃᨠ᩠ᨡᨱᩮᩉᩥ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩌᨴᩮᨿ᩠ᨿᩅᩣᨧᩮᩣ ᩉᩮᩣᨲᩥ, ᩌᨴᩥᨿᨶ᩠ᨲᩥᩔ ᩅᨧᨶᩴ ᨻᩕᩣᩉ᩠ᨾᨱᨣᩉᨸᨲᩥᨠᩣ ᨶᩮᨣᨾᨩᩣᨶᨸᨴᩣ ᨣᨱᨠᨾᩉᩣᨾᨲ᩠ᨲᩣ ᩋᨶᩦᨠᨭ᩠ᨮᩣ ᨴᩮᩣᩅᩣᩁᩥᨠᩣ ᩋᨾᨧ᩠ᨧᩣ ᨸᩣᩁᩥᩈᨩ᩠ᨩᩣ ᩁᩣᨩᩣᨶᩮᩣ ᨽᩮᩣᨣᩥᨿᩣ ᨠᩩᨾᩣᩁᩣ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ… ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩌᨴᩮᨿ᩠ᨿᩅᩣᨧᩮᩣ ᩉᩮᩣᨲᩥ, ᩌᨴᩥᨿᨶ᩠ᨲᩥᩔ ᩅᨧᨶᩴ ᨽᩥᨠ᩠ᨡᩪ ᨽᩥᨠ᩠ᨡᩩᨶᩥᨿᩮᩣ ᩏᨸᩣᩈᨠᩣ ᩏᨸᩣᩈᩥᨠᩣᨿᩮᩣ ᨴᩮᩅᩣ ᨾᨶᩩᩔᩣ ᩋᩈᩩᩁᩣ ᨶᩣᨣᩣ ᨣᨶ᩠ᨵᨻ᩠ᨻᩣ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪓᪗. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᩋᨠ᩠ᨠᩮᩣᩈᨽᨱ᩠ᨯᨶᩅᩥᩉᩮᩈᨠᩣᩁᩥᩴ,

ᩏᨻ᩠ᨻᩣᨵᩥᨠᩴ [ᩏᨻ᩠ᨻᩣᨵᨠᩁᩴ (ᩈ᩠ᨿᩣ.)] ᨻᩉᩩᨩᨶᨸ᩠ᨸᨾᨴ᩠ᨴᨶᩴ;

ᩋᨻᩣᩊ᩠ᩉᩴ ᨣᩥᩁᩴ ᩈᩮᩣ ᨶ ᨽᨱᩥ ᨹᩁᩩᩈᩴ,

ᨾᨵᩩᩁᩴ ᨽᨱᩥ ᩈᩩᩈᩴᩉᩥᨲᩴ [ᩈᩩᩈᩉᩥᨲᩴ (ᩈ᩠ᨿᩣ.)] ᩈᨡᩥᩃᩴ.

‘‘ᨾᨶᩈᩮᩣ ᨸᩥᨿᩣ ᩉᨴᨿᨣᩣᨾᩥᨶᩥᨿᩮᩣ,

ᩅᩣᨧᩣ ᩈᩮᩣ ᩑᩁᨿᨲᩥ ᨠᨱ᩠ᨱᩈᩩᨡᩣ;

ᩅᩣᨧᩣᩈᩩᨧᩥᨱ᩠ᨱᨹᩃᨾᨶᩩᨽᩅᩥ,

ᩈᨣ᩠ᨣᩮᩈᩩ ᩅᩮᨴᨿᨳ [ᩅᩮᨴᨿᨲᩥ (?) ᨭᩦᨠᩣ ᩒᩃᩮᩣᨠᩮᨲᨻ᩠ᨻᩣ] ᨸᩩᨬ᩠ᨬᨹᩃᩴ.

‘‘ᩅᩮᨴᩥᨲ᩠ᩅᩣ ᩈᩮᩣ ᩈᩩᨧᩁᩥᨲᩔ ᨹᩃᩴ,

ᨻᩕᩉ᩠ᨾᩔᩁᨲ᩠ᨲᨾᩥᨵᨾᨩ᩠ᨫᨣᨾᩣ;

ᨩᩥᩅ᩠ᩉᩣᩔ ᩉᩮᩣᨲᩥ ᩅᩥᨸᩩᩃᩣ ᨸᩩᨳᩩᩃᩣ,

ᩌᨴᩮᨿ᩠ᨿᩅᩣᨠ᩠ᨿᩅᨧᨶᩮᩣ ᨽᩅᨲᩥ.

‘‘ᨣᩥᩉᩥᨶᩮᩣᨸᩥ ᩍᨩ᩠ᨫᨲᩥ ᨿᨳᩣ ᨽᨱᨲᩮᩣ,

ᩋᨳ ᨧᩮ ᨸᨻ᩠ᨻᨩᨲᩥ ᩈᩮᩣ ᨾᨶᩩᨩᩮᩣ;

ᩌᨴᩥᨿᨶ᩠ᨲᩥᩔ ᩅᨧᨶᩴ ᨩᨶᨲᩣ,

ᨻᩉᩩᨶᩮᩣ ᨻᩉᩩᩴ ᩈᩩᨽᨱᩥᨲᩴ ᨽᨱᨲᩮᩣ’’ᨲᩥ.

(᪓᪐) ᩈᩦᩉᩉᨶᩩᩃᨠ᩠ᨡᨱᩴ

᪒᪓᪘. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᩈᨾ᩠ᨹᨸ᩠ᨸᩃᩣᨸᩴ ᨸᩉᩣᨿ ᩈᨾ᩠ᨹᨸ᩠ᨸᩃᩣᨸᩣ ᨸᨭᩥᩅᩥᩁᨲᩮᩣ ᩋᩉᩮᩣᩈᩥ ᨠᩣᩃᩅᩣᨴᩦ ᨽᩪᨲᩅᩣᨴᩦ ᩋᨲ᩠ᨳᩅᩣᨴᩦ ᨵᨾ᩠ᨾᩅᩣᨴᩦ ᩅᩥᨶᨿᩅᩣᨴᩦ, ᨶᩥᨵᩣᨶᩅᨲᩥᩴ ᩅᩣᨧᩴ ᨽᩣᩈᩥᨲᩣ ᩋᩉᩮᩣᩈᩥ ᨠᩣᩃᩮᨶ ᩈᩣᨸᨴᩮᩈᩴ ᨸᩁᩥᨿᨶ᩠ᨲᩅᨲᩥᩴ ᩋᨲ᩠ᨳᩈᩴᩉᩥᨲᩴ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ…ᨸᩮ… ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩴ ᨾᩉᩣᨸᩩᩁᩥᩈᩃᨠ᩠ᨡᨱᩴ ᨸᨭᩥᩃᨽᨲᩥ, ᩈᩦᩉᩉᨶᩩ ᩉᩮᩣᨲᩥ.

‘‘ᩈᩮᩣ ᨲᩮᨶ ᩃᨠ᩠ᨡᨱᩮᨶ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ…ᨸᩮ… ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩋᨸ᩠ᨸᨵᩴᩈᩥᨿᩮᩣ ᩉᩮᩣᨲᩥ ᨠᩮᨶᨧᩥ ᨾᨶᩩᩔᨽᩪᨲᩮᨶ ᨸᨧ᩠ᨧᨲ᩠ᨳᩥᨠᩮᨶ ᨸᨧ᩠ᨧᩣᨾᩥᨲ᩠ᨲᩮᨶ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ… ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩋᨸ᩠ᨸᨵᩴᩈᩥᨿᩮᩣ ᩉᩮᩣᨲᩥ ᩋᨻ᩠ᨽᨶ᩠ᨲᩁᩮᩉᩥ ᩅᩣ ᨻᩣᩉᩥᩁᩮᩉᩥ ᩅᩣ ᨸᨧ᩠ᨧᨲ᩠ᨳᩥᨠᩮᩉᩥ ᨸᨧ᩠ᨧᩣᨾᩥᨲ᩠ᨲᩮᩉᩥ, ᩁᩣᨣᩮᨶ ᩅᩣ ᨴᩮᩣᩈᩮᨶ ᩅᩣ ᨾᩮᩣᩉᩮᨶ ᩅᩣ ᩈᨾᨱᩮᨶ ᩅᩣ ᨻᩕᩣᩉ᩠ᨾᨱᩮᨶ ᩅᩣ ᨴᩮᩅᩮᨶ ᩅᩣ ᨾᩣᩁᩮᨶ ᩅᩣ ᨻᩕᩉ᩠ᨾᩩᨶᩣ ᩅᩣ ᨠᩮᨶᨧᩥ ᩅᩣ ᩃᩮᩣᨠᩈ᩠ᨾᩥᩴ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪓᪙. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᨶ ᩈᨾ᩠ᨹᨸ᩠ᨸᩃᩣᨸᩴ ᨶ ᨾᩩᨴ᩠ᨵᨲᩴ [ᨻᩩᨴ᩠ᨵᨲᨶ᩠ᨲᩥ (ᨠ.)],

ᩋᩅᩥᨠᩥᨱ᩠ᨱᩅᨧᨶᨻ᩠ᨿᨸ᩠ᨸᨳᩮᩣ ᩋᩉᩮᩣᩈᩥ;

ᩋᩉᩥᨲᨾᨸᩥ ᨧ ᩋᨸᨶᩩᨴᩥ,

ᩉᩥᨲᨾᨸᩥ ᨧ ᨻᩉᩩᨩᨶᩈᩩᨡᨬ᩠ᨧ ᩋᨽᨱᩥ.

‘‘ᨲᩴ ᨠᨲ᩠ᩅᩣ ᩍᨲᩮᩣ ᨧᩩᨲᩮᩣ ᨴᩥᩅᨾᩩᨸᨸᨩ᩠ᨩᩥ,

ᩈᩩᨠᨲᨹᩃᩅᩥᨸᩣᨠᨾᨶᩩᨽᩮᩣᩈᩥ;

ᨧᩅᩥᨿ ᨸᩩᨶᩁᩥᨵᩣᨣᨲᩮᩣ ᩈᨾᩣᨶᩮᩣ,

ᨴ᩠ᩅᩥᨴᩩᨣᨾᩅᩁᨲᩁᩉᨶᩩᨲ᩠ᨲᨾᩃᨲ᩠ᨳ.

‘‘ᩁᩣᨩᩣ ᩉᩮᩣᨲᩥ ᩈᩩᨴᩩᨸ᩠ᨸᨵᩴᩈᩥᨿᩮᩣ,

ᨾᨶᩩᨩᩥᨶ᩠ᨴᩮᩣ ᨾᨶᩩᨩᩣᨵᩥᨸᨲᩥ ᨾᩉᩣᨶᩩᨽᩣᩅᩮᩣ;

ᨲᩥᨴᩥᩅᨸᩩᩁᩅᩁᩈᨾᩮᩣ ᨽᩅᨲᩥ,

ᩈᩩᩁᩅᩁᨲᩁᩮᩣᩁᩥᩅ ᩍᨶ᩠ᨴᩮᩣ.

‘‘ᨣᨶ᩠ᨵᨻ᩠ᨻᩣᩈᩩᩁᨿᨠ᩠ᨡᩁᨠ᩠ᨡᩈᩮᨽᩥ [ᩈᩩᩁᩈᨠ᩠ᨠᩁᨠ᩠ᨡᩈᩮᨽᩥ (ᩈ᩠ᨿᩣ.)],

ᩈᩩᩁᩮᩉᩥ ᨶ ᩉᩥ ᨽᩅᨲᩥ ᩈᩩᨸ᩠ᨸᨵᩴᩈᩥᨿᩮᩣ;

ᨲᨳᨲ᩠ᨲᩮᩣ ᨿᨴᩥ ᨽᩅᨲᩥ ᨲᨳᩣᩅᩥᨵᩮᩣ,

ᩍᨵ ᨴᩥᩈᩣ ᨧ ᨸᨭᩥᨴᩥᩈᩣ ᨧ ᩅᩥᨴᩥᩈᩣ ᨧᩣ’’ᨲᩥ.

(᪓᪑-᪓᪒) ᩈᨾᨴᨶ᩠ᨲᩈᩩᩈᩩᨠ᩠ᨠᨴᩣᨮᩣᩃᨠ᩠ᨡᨱᩣᨶᩥ

᪒᪔᪐. ‘‘ᨿᨾ᩠ᨸᩥ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨸᩩᩁᩥᨾᩴ ᨩᩣᨲᩥᩴ ᨸᩩᩁᩥᨾᩴ ᨽᩅᩴ ᨸᩩᩁᩥᨾᩴ ᨶᩥᨠᩮᨲᩴ ᨸᩩᨻ᩠ᨻᩮ ᨾᨶᩩᩔᨽᩪᨲᩮᩣ ᩈᨾᩣᨶᩮᩣ ᨾᩥᨧ᩠ᨨᩣᨩᩦᩅᩴ ᨸᩉᩣᨿ ᩈᨾ᩠ᨾᩣᩌᨩᩦᩅᩮᨶ ᨩᩦᩅᩥᨠᩴ ᨠᨸ᩠ᨸᩮᩈᩥ, ᨲᩩᩃᩣᨠᩪᨭ ᨠᩴᩈᨠᩪᨭ ᨾᩣᨶᨠᩪᨭ ᩏᨠ᩠ᨠᩮᩣᨭᨶ ᩅᨬ᩠ᨧᨶ ᨶᩥᨠᨲᩥ ᩈᩣᨧᩥᨿᩮᩣᨣ ᨨᩮᨴᨶ ᩅᨵ ᨻᨶ᩠ᨵᨶ ᩅᩥᨸᩁᩣᨾᩮᩣᩈ ᩌᩃᩮᩣᨸ ᩈᩉᩈᩣᨠᩣᩁᩣ [ᩈᩣᩉᩈᩣᨠᩣᩁᩣ (ᩈᩦ. ᩈ᩠ᨿᩣ. ᨸᩦ.)] ᨸᨭᩥᩅᩥᩁᨲᩮᩣ ᩋᩉᩮᩣᩈᩥ. ᩈᩮᩣ ᨲᩔ ᨠᨾ᩠ᨾᩔ ᨠᨭᨲ᩠ᨲᩣ ᩏᨸᨧᩥᨲᨲ᩠ᨲᩣ ᩏᩔᨶ᩠ᨶᨲ᩠ᨲᩣ ᩅᩥᨸᩩᩃᨲ᩠ᨲᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨲᩥ. ᩈᩮᩣ ᨲᨲ᩠ᨳ ᩋᨬ᩠ᨬᩮ ᨴᩮᩅᩮ ᨴᩈᩉᩥ ᨮᩣᨶᩮᩉᩥ ᩋᨵᩥᨣᨱ᩠ᩉᩣᨲᩥ ᨴᩥᨻ᩠ᨻᩮᨶ ᩌᨿᩩᨶᩣ ᨴᩥᨻ᩠ᨻᩮᨶ ᩅᨱ᩠ᨱᩮᨶ ᨴᩥᨻ᩠ᨻᩮᨶ ᩈᩩᨡᩮᨶ ᨴᩥᨻ᩠ᨻᩮᨶ ᨿᩈᩮᨶ ᨴᩥᨻ᩠ᨻᩮᨶ ᩌᨵᩥᨸᨲᩮᨿ᩠ᨿᩮᨶ ᨴᩥᨻ᩠ᨻᩮᩉᩥ ᩁᩪᨸᩮᩉᩥ ᨴᩥᨻ᩠ᨻᩮᩉᩥ ᩈᨴ᩠ᨴᩮᩉᩥ ᨴᩥᨻ᩠ᨻᩮᩉᩥ ᨣᨶ᩠ᨵᩮᩉᩥ ᨴᩥᨻ᩠ᨻᩮᩉᩥ ᩁᩈᩮᩉᩥ ᨴᩥᨻ᩠ᨻᩮᩉᩥ ᨹᩮᩣᨭ᩠ᨮᨻ᩠ᨻᩮᩉᩥ. ᩈᩮᩣ ᨲᨲᩮᩣ ᨧᩩᨲᩮᩣ ᩍᨲ᩠ᨳᨲ᩠ᨲᩴ ᩌᨣᨲᩮᩣ ᩈᨾᩣᨶᩮᩣ ᩍᨾᩣᨶᩥ ᨴ᩠ᩅᩮ ᨾᩉᩣᨸᩩᩁᩥᩈᩃᨠ᩠ᨡᨱᩣᨶᩥ ᨸᨭᩥᩃᨽᨲᩥ, ᩈᨾᨴᨶ᩠ᨲᩮᩣ ᨧ ᩉᩮᩣᨲᩥ ᩈᩩᩈᩩᨠ᩠ᨠᨴᩣᨮᩮᩣ ᨧ.

‘‘ᩈᩮᩣ ᨲᩮᩉᩥ ᩃᨠ᩠ᨡᨱᩮᩉᩥ ᩈᨾᨶ᩠ᨶᩣᨣᨲᩮᩣ ᩈᨧᩮ ᩋᨣᩣᩁᩴ ᩋᨩ᩠ᨫᩣᩅᩈᨲᩥ, ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ ᨵᨾ᩠ᨾᩥᨠᩮᩣ ᨵᨾ᩠ᨾᩁᩣᨩᩣ ᨧᩣᨲᩩᩁᨶ᩠ᨲᩮᩣ ᩅᩥᨩᩥᨲᩣᩅᩦ ᨩᨶᨸᨴᨲ᩠ᨳᩣᩅᩁᩥᨿᨸ᩠ᨸᨲ᩠ᨲᩮᩣ ᩈᨲ᩠ᨲᩁᨲᨶᩈᨾᨶ᩠ᨶᩣᨣᨲᩮᩣ. ᨲᩔᩥᨾᩣᨶᩥ ᩈᨲ᩠ᨲ ᩁᨲᨶᩣᨶᩥ ᨽᩅᨶ᩠ᨲᩥ, ᩈᩮᨿ᩠ᨿᨳᩥᨴᩴ – ᨧᨠ᩠ᨠᩁᨲᨶᩴ ᩉᨲ᩠ᨳᩥᩁᨲᨶᩴ ᩋᩔᩁᨲᨶᩴ ᨾᨱᩥᩁᨲᨶᩴ ᩍᨲ᩠ᨳᩥᩁᨲᨶᩴ ᨣᩉᨸᨲᩥᩁᨲᨶᩴ ᨸᩁᩥᨱᩣᨿᨠᩁᨲᨶᨾᩮᩅ ᩈᨲ᩠ᨲᨾᩴ. ᨸᩁᩮᩣᩈᩉᩔᩴ ᨡᩮᩣ ᨸᨶᩔ ᨸᩩᨲ᩠ᨲᩣ ᨽᩅᨶ᩠ᨲᩥ ᩈᩪᩁᩣ ᩅᩦᩁᨦ᩠ᨣᩁᩪᨸᩣ ᨸᩁᩈᩮᨶᨸ᩠ᨸᨾᨴ᩠ᨴᨶᩣ. ᩈᩮᩣ ᩍᨾᩴ ᨸᨳᩅᩥᩴ ᩈᩣᨣᩁᨸᩁᩥᨿᨶ᩠ᨲᩴ ᩋᨡᩥᩃᨾᨶᩥᨾᩥᨲ᩠ᨲᨾᨠᨱ᩠ᨭᨠᩴ ᩍᨴ᩠ᨵᩴ ᨹᩦᨲᩴ ᨡᩮᨾᩴ ᩈᩥᩅᩴ ᨶᩥᩁᨻ᩠ᨻᩩᨴᩴ ᩋᨴᨱ᩠ᨯᩮᨶ ᩋᩈᨲ᩠ᨳᩮᨶ ᨵᨾ᩠ᨾᩮᨶ ᩋᨽᩥᩅᩥᨩᩥᨿ ᩋᨩ᩠ᨫᩣᩅᩈᨲᩥ. ᩁᩣᨩᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩈᩩᨧᩥᨸᩁᩥᩅᩣᩁᩮᩣ ᩉᩮᩣᨲᩥ ᩈᩩᨧᩥᩔ ᩉᩮᩣᨶ᩠ᨲᩥ ᨸᩁᩥᩅᩣᩁᩣ ᨻᩕᩣᩉ᩠ᨾᨱᨣᩉᨸᨲᩥᨠᩣ ᨶᩮᨣᨾᨩᩣᨶᨸᨴᩣ ᨣᨱᨠᨾᩉᩣᨾᨲ᩠ᨲᩣ ᩋᨶᩦᨠᨭ᩠ᨮᩣ ᨴᩮᩣᩅᩣᩁᩥᨠᩣ ᩋᨾᨧ᩠ᨧᩣ ᨸᩣᩁᩥᩈᨩ᩠ᨩᩣ ᩁᩣᨩᩣᨶᩮᩣ ᨽᩮᩣᨣᩥᨿᩣ ᨠᩩᨾᩣᩁᩣ. ᩁᩣᨩᩣ ᩈᨾᩣᨶᩮᩣ ᩍᨴᩴ ᩃᨽᨲᩥ.

‘‘ᩈᨧᩮ ᨡᩮᩣ ᨸᨶ ᩋᨣᩣᩁᩈ᩠ᨾᩣ ᩋᨶᨣᩣᩁᩥᨿᩴ ᨸᨻ᩠ᨻᨩᨲᩥ, ᩋᩁᩉᩴ ᩉᩮᩣᨲᩥ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩃᩮᩣᨠᩮ ᩅᩥᩅᨭ᩠ᨭᨧ᩠ᨨᨴᩮᩣ. ᨻᩩᨴ᩠ᨵᩮᩣ ᩈᨾᩣᨶᩮᩣ ᨠᩥᩴ ᩃᨽᨲᩥ? ᩈᩩᨧᩥᨸᩁᩥᩅᩣᩁᩮᩣ ᩉᩮᩣᨲᩥ, ᩈᩩᨧᩥᩔ ᩉᩮᩣᨶ᩠ᨲᩥ ᨸᩁᩥᩅᩣᩁᩣ, ᨽᩥᨠ᩠ᨡᩪ ᨽᩥᨠ᩠ᨡᩩᨶᩥᨿᩮᩣ ᩏᨸᩣᩈᨠᩣ ᩏᨸᩣᩈᩥᨠᩣᨿᩮᩣ ᨴᩮᩅᩣ ᨾᨶᩩᩔᩣ ᩋᩈᩩᩁᩣ ᨶᩣᨣᩣ ᨣᨶ᩠ᨵᨻ᩠ᨻᩣ. ᨻᩩᨴ᩠ᨵᩮᩣ ᩈᨾᩣᨶᩮᩣ ᩍᨴᩴ ᩃᨽᨲᩥ’’. ᩑᨲᨾᨲ᩠ᨳᩴ ᨽᨣᩅᩣ ᩋᩅᩮᩣᨧ.

᪒᪔᪑. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ –

‘‘ᨾᩥᨧ᩠ᨨᩣᨩᩦᩅᨬ᩠ᨧ ᩋᩅᩔᨩᩥ ᩈᨾᩮᨶ ᩅᩩᨲ᩠ᨲᩥᩴ,

ᩈᩩᨧᩥᨶᩣ ᩈᩮᩣ ᨩᨶᨿᩥᨲ᩠ᨳ ᨵᨾ᩠ᨾᩥᨠᩮᨶ;

ᩋᩉᩥᨲᨾᨸᩥ ᨧ ᩋᨸᨶᩩᨴᩥ,

ᩉᩥᨲᨾᨸᩥ ᨧ ᨻᩉᩩᨩᨶᩈᩩᨡᨬ᩠ᨧ ᩋᨧᩁᩥ.

‘‘ᩈᨣ᩠ᨣᩮ ᩅᩮᨴᨿᨲᩥ ᨶᩁᩮᩣ ᩈᩩᨡᨸ᩠ᨹᩃᩣᨶᩥ,

ᨠᩁᩥᨲ᩠ᩅᩣ ᨶᩥᨸᩩᨱᩮᨽᩥ ᩅᩥᨴᩪᩉᩥ ᩈᨻ᩠ᨽᩥ;

ᩅᨱ᩠ᨱᩥᨲᩣᨶᩥ ᨲᩥᨴᩥᩅᨸᩩᩁᩅᩁᩈᨾᩮᩣ,

ᩋᨽᩥᩁᨾᨲᩥ ᩁᨲᩥᨡᩥᨯ᩠ᨯᩣᩈᨾᨦ᩠ᨣᩦ.

‘‘ᩃᨴ᩠ᨵᩣᨶᩴ ᨾᩣᨶᩩᩈᨠᩴ ᨽᩅᩴ ᨲᨲᩮᩣ,

ᨧᩅᩥᨲ᩠ᩅᩣᨶ ᩈᩩᨠᨲᨹᩃᩅᩥᨸᩣᨠᩴ;

ᩈᩮᩈᨠᩮᨶ ᨸᨭᩥᩃᨽᨲᩥ ᩃᨸᨶᨩᩴ,

ᩈᨾᨾᨸᩥ ᩈᩩᨧᩥᩈᩩᩈᩩᨠ᩠ᨠᩴ [ᩃᨴ᩠ᨵᩣᨶ ᨾᨶᩩᩔᨠᩴ ᨽᩅᩴ ᨲᨲᩮᩣ ᨧᩅᩥᨿ, ᨸᩩᨶ ᩈᩩᨠᨲᨹᩃᩅᩥᨸᩣᨠᩈᩮᩈᨠᩮᨶ; ᨸᨭᩥᩃᨽᨲᩥ ᩃᨸᨶᨩᩴ ᩈᨾᨾᨸᩥ, ᩈᩩᨧᩥ ᨧ ᩈᩩᩅᩥᩈᩩᨴ᩠ᨵᩈᩩᩈᩩᨠ᩠ᨠᩴ (ᩈ᩠ᨿᩣ.)].

‘‘ᨲᩴ ᩅᩮᨿ᩠ᨿᨬ᩠ᨩᨶᩥᨠᩣ ᩈᨾᩣᨣᨲᩣ ᨻᩉᩅᩮᩣ,

ᨻ᩠ᨿᩣᨠᩴᩈᩩ ᨶᩥᨸᩩᨱᩈᨾ᩠ᨾᨲᩣ ᨾᨶᩩᨩᩣ;

ᩈᩩᨧᩥᨩᨶᨸᩁᩥᩅᩣᩁᨣᨱᩮᩣ ᨽᩅᨲᩥ,

ᨴᩥᨩᩈᨾᩈᩩᨠ᩠ᨠᩈᩩᨧᩥᩈᩮᩣᨽᨶᨴᨶ᩠ᨲᩮᩣ.

‘‘ᩁᨬ᩠ᨬᩮᩣ ᩉᩮᩣᨲᩥ ᨻᩉᩩᨩᨶᩮᩣ,

ᩈᩩᨧᩥᨸᩁᩥᩅᩣᩁᩮᩣ ᨾᩉᨲᩥᩴ ᨾᩉᩥᩴ ᩋᨶᩩᩈᩣᩈᨲᩮᩣ;

ᨸᩈᨿ᩠ᩉ ᨶ ᨧ ᨩᨶᨸᨴᨲᩩᨴᨶᩴ,

ᩉᩥᨲᨾᨸᩥ ᨧ ᨻᩉᩩᨩᨶᩈᩩᨡᨬ᩠ᨧ ᨧᩁᨶ᩠ᨲᩥ.

‘‘ᩋᨳ ᨧᩮ ᨸᨻ᩠ᨻᨩᨲᩥ ᨽᩅᨲᩥ ᩅᩥᨸᩣᨸᩮᩣ,

ᩈᨾᨱᩮᩣ ᩈᨾᩥᨲᩁᨩᩮᩣ ᩅᩥᩅᨭ᩠ᨭᨧ᩠ᨨᨴᩮᩣ;

ᩅᩥᨣᨲᨴᩁᨳᨠᩥᩃᨾᨳᩮᩣ,

ᩍᨾᨾᨸᩥ ᨧ ᨸᩁᨾᨸᩥ ᨧ [ᩍᨾᨾ᩠ᨸᩥ ᨧ ᨸᩁᨾ᩠ᨸᩥ ᨧ (ᨸᩦ.), ᨸᩁᩴᨸᩥ ᨸᩁᨾᩴᨸᩥ ᨧ (ᩈ᩠ᨿᩣ.)] ᨸᩔᨲᩥ ᩃᩮᩣᨠᩴ.

‘‘ᨲᩔᩮᩣᩅᩣᨴᨠᩁᩣ ᨻᩉᩩᨣᩥᩉᩦ ᨧ ᨸᨻ᩠ᨻᨩᩥᨲᩣ ᨧ,

ᩋᩈᩩᨧᩥᩴ ᨣᩁᩉᩥᨲᩴ ᨵᩩᨶᨶ᩠ᨲᩥ ᨸᩣᨸᩴ;

ᩈ ᩉᩥ ᩈᩩᨧᩥᨽᩥ ᨸᩁᩥᩅᩩᨲᩮᩣ ᨽᩅᨲᩥ,

ᨾᩃᨡᩥᩃᨠᩃᩥᨠᩥᩃᩮᩈᩮ ᨸᨶᩩᨴᩮᩉᩦ’’ᨲᩥ [ᨲᩔᩮᩣᩅᩣᨴᨠᩁᩣ ᨻᩉᩩᨣᩥᩉᩦ ᨧ, ᨸᨻ᩠ᨻᨩᩥᨲᩣ ᨧ ᩋᩈᩩᨧᩥᩅᩥᨣᩁᩉᩥᨲ; ᨸᨶᩩᨴᩥᨸᩣᨸᩔ ᩉᩥ ᩈᩩᨧᩥᨽᩥᨸᩁᩥᩅᩩᨲᩮᩣ, ᨽᩅᨲᩥ ᨾᩃᨡᩥᩃᨠᨠᩥᩃᩮᩈᩮ ᨸᨶᩩᨴᩮᨲᩥ (ᩈ᩠ᨿᩣ.)].

ᩍᨴᨾᩅᩮᩣᨧ ᨽᨣᩅᩣ. ᩋᨲ᩠ᨲᨾᨶᩣ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩩᨶ᩠ᨲᩥ.

ᩃᨠ᩠ᨡᨱᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᩈᨲ᩠ᨲᨾᩴ.

᪘. ᩈᩥᨦ᩠ᨣᩣᩃᩈᩩᨲ᩠ᨲᩴ

᪒᪔᪒. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᩁᩣᨩᨣᩉᩮ ᩅᩥᩉᩁᨲᩥ ᩅᩮᩊᩩᩅᨶᩮ ᨠᩃᨶ᩠ᨴᨠᨶᩥᩅᩣᨸᩮ. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᩈᩥᨦ᩠ᨣᩣᩃᨠᩮᩣ [ᩈᩥᨣᩣᩃᨠᩮᩣ (ᩈᩦ.)] ᨣᩉᨸᨲᩥᨸᩩᨲ᩠ᨲᩮᩣ ᨠᩣᩃᩔᩮᩅ ᩏᨭ᩠ᨮᩣᨿ ᩁᩣᨩᨣᩉᩣ ᨶᩥᨠ᩠ᨡᨾᩥᨲ᩠ᩅᩣ ᩋᩃ᩠ᩃᩅᨲ᩠ᨳᩮᩣ ᩋᩃ᩠ᩃᨠᩮᩈᩮᩣ ᨸᨬ᩠ᨩᩃᩥᨠᩮᩣ ᨸᩩᨳᩩᨴᩥᩈᩣ [ᨸᩩᨳᩩᨴ᩠ᨴᩥᩈᩣ (ᩈᩦ. ᩈ᩠ᨿᩣ. ᨸᩦ.)] ᨶᨾᩔᨲᩥ – ᨸᩩᩁᨲ᩠ᨳᩥᨾᩴ ᨴᩥᩈᩴ ᨴᨠ᩠ᨡᩥᨱᩴ ᨴᩥᩈᩴ ᨸᨧ᩠ᨨᩥᨾᩴ ᨴᩥᩈᩴ ᩏᨲ᩠ᨲᩁᩴ ᨴᩥᩈᩴ ᩉᩮᨭ᩠ᨮᩥᨾᩴ ᨴᩥᩈᩴ ᩏᨸᩁᩥᨾᩴ ᨴᩥᩈᩴ.

᪒᪔᪓. ᩋᨳ ᨡᩮᩣ ᨽᨣᩅᩣ ᨸᩩᨻ᩠ᨻᨱ᩠ᩉᩈᨾᨿᩴ ᨶᩥᩅᩣᩈᩮᨲ᩠ᩅᩣ ᨸᨲ᩠ᨲᨧᩦᩅᩁᨾᩣᨴᩣᨿ ᩁᩣᨩᨣᩉᩴ ᨸᩥᨱ᩠ᨯᩣᨿ ᨸᩣᩅᩥᩈᩥ. ᩋᨴ᩠ᨴᩈᩣ ᨡᩮᩣ ᨽᨣᩅᩣ ᩈᩥᨦ᩠ᨣᩣᩃᨠᩴ ᨣᩉᨸᨲᩥᨸᩩᨲ᩠ᨲᩴ ᨠᩣᩃᩔᩮᩅ ᩅᩩᨭ᩠ᨮᩣᨿ ᩁᩣᨩᨣᩉᩣ ᨶᩥᨠ᩠ᨡᨾᩥᨲ᩠ᩅᩣ ᩋᩃ᩠ᩃᩅᨲ᩠ᨳᩴ ᩋᩃ᩠ᩃᨠᩮᩈᩴ ᨸᨬ᩠ᨩᩃᩥᨠᩴ ᨸᩩᨳᩩᨴᩥᩈᩣ ᨶᨾᩔᨶ᩠ᨲᩴ – ᨸᩩᩁᨲ᩠ᨳᩥᨾᩴ ᨴᩥᩈᩴ ᨴᨠ᩠ᨡᩥᨱᩴ ᨴᩥᩈᩴ ᨸᨧ᩠ᨨᩥᨾᩴ ᨴᩥᩈᩴ ᩏᨲ᩠ᨲᩁᩴ ᨴᩥᩈᩴ ᩉᩮᨭ᩠ᨮᩥᨾᩴ ᨴᩥᩈᩴ ᩏᨸᩁᩥᨾᩴ ᨴᩥᩈᩴ. ᨴᩥᩈ᩠ᩅᩣ ᩈᩥᨦ᩠ᨣᩣᩃᨠᩴ ᨣᩉᨸᨲᩥᨸᩩᨲ᩠ᨲᩴ ᩑᨲᨴᩅᩮᩣᨧ – ‘‘ᨠᩥᩴ ᨶᩩ ᨡᩮᩣ ᨲ᩠ᩅᩴ, ᨣᩉᨸᨲᩥᨸᩩᨲ᩠ᨲ, ᨠᩣᩃᩔᩮᩅ ᩏᨭ᩠ᨮᩣᨿ ᩁᩣᨩᨣᩉᩣ ᨶᩥᨠ᩠ᨡᨾᩥᨲ᩠ᩅᩣ ᩋᩃ᩠ᩃᩅᨲ᩠ᨳᩮᩣ ᩋᩃ᩠ᩃᨠᩮᩈᩮᩣ ᨸᨬ᩠ᨩᩃᩥᨠᩮᩣ ᨸᩩᨳᩩᨴᩥᩈᩣ ᨶᨾᩔᩈᩥ – ᨸᩩᩁᨲ᩠ᨳᩥᨾᩴ ᨴᩥᩈᩴ ᨴᨠ᩠ᨡᩥᨱᩴ ᨴᩥᩈᩴ ᨸᨧ᩠ᨨᩥᨾᩴ ᨴᩥᩈᩴ ᩏᨲ᩠ᨲᩁᩴ ᨴᩥᩈᩴ ᩉᩮᨭ᩠ᨮᩥᨾᩴ ᨴᩥᩈᩴ ᩏᨸᩁᩥᨾᩴ ᨴᩥᩈ’’ᨶ᩠ᨲᩥ? ‘‘ᨸᩥᨲᩣ ᨾᩴ, ᨽᨶ᩠ᨲᩮ, ᨠᩣᩃᩴ ᨠᩁᩮᩣᨶ᩠ᨲᩮᩣ ᩑᩅᩴ ᩋᩅᨧ – ‘ᨴᩥᩈᩣ, ᨲᩣᨲ, ᨶᨾᩔᩮᨿ᩠ᨿᩣᩈᩦ’ᨲᩥ. ᩈᩮᩣ ᨡᩮᩣ ᩋᩉᩴ, ᨽᨶ᩠ᨲᩮ, ᨸᩥᨲᩩᩅᨧᨶᩴ ᩈᨠ᩠ᨠᩁᩮᩣᨶ᩠ᨲᩮᩣ ᨣᩁᩩᩴ ᨠᩁᩮᩣᨶ᩠ᨲᩮᩣ ᨾᩣᨶᩮᨶ᩠ᨲᩮᩣ ᨸᩪᨩᩮᨶ᩠ᨲᩮᩣ ᨠᩣᩃᩔᩮᩅ ᩏᨭ᩠ᨮᩣᨿ ᩁᩣᨩᨣᩉᩣ ᨶᩥᨠ᩠ᨡᨾᩥᨲ᩠ᩅᩣ ᩋᩃ᩠ᩃᩅᨲ᩠ᨳᩮᩣ ᩋᩃ᩠ᩃᨠᩮᩈᩮᩣ ᨸᨬ᩠ᨩᩃᩥᨠᩮᩣ ᨸᩩᨳᩩᨴᩥᩈᩣ ᨶᨾᩔᩣᨾᩥ – ᨸᩩᩁᨲ᩠ᨳᩥᨾᩴ ᨴᩥᩈᩴ ᨴᨠ᩠ᨡᩥᨱᩴ ᨴᩥᩈᩴ ᨸᨧ᩠ᨨᩥᨾᩴ ᨴᩥᩈᩴ ᩏᨲ᩠ᨲᩁᩴ ᨴᩥᩈᩴ ᩉᩮᨭ᩠ᨮᩥᨾᩴ ᨴᩥᩈᩴ ᩏᨸᩁᩥᨾᩴ ᨴᩥᩈ’’ᨶ᩠ᨲᩥ.

ᨨ ᨴᩥᩈᩣ

᪒᪔᪔. ‘‘ᨶ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᩋᩁᩥᨿᩔ ᩅᩥᨶᨿᩮ ᩑᩅᩴ ᨨ ᨴᩥᩈᩣ [ᨨᨴ᩠ᨴᩥᩈᩣ (ᩈᩦ. ᨸᩦ.)] ᨶᨾᩔᩥᨲᨻ᩠ᨻᩣ’’ᨲᩥ. ‘‘ᨿᨳᩣ ᨠᨳᩴ ᨸᨶ, ᨽᨶ᩠ᨲᩮ, ᩋᩁᩥᨿᩔ ᩅᩥᨶᨿᩮ ᨨ ᨴᩥᩈᩣ [ᨨᨴ᩠ᨴᩥᩈᩣ (ᩈᩦ. ᨸᩦ.)] ᨶᨾᩔᩥᨲᨻ᩠ᨻᩣ? ᩈᩣᨵᩩ ᨾᩮ, ᨽᨶ᩠ᨲᩮ, ᨽᨣᩅᩣ ᨲᨳᩣ ᨵᨾ᩠ᨾᩴ ᨴᩮᩈᩮᨲᩩ, ᨿᨳᩣ ᩋᩁᩥᨿᩔ ᩅᩥᨶᨿᩮ ᨨ ᨴᩥᩈᩣ [ᨨᨴ᩠ᨴᩥᩈᩣ (ᩈᩦ. ᨸᩦ.)] ᨶᨾᩔᩥᨲᨻ᩠ᨻᩣ’’ᨲᩥ.

‘‘ᨲᩮᨶ ᩉᩥ, ᨣᩉᨸᨲᩥᨸᩩᨲ᩠ᨲ ᩈᩩᨱᩮᩣᩉᩥ ᩈᩣᨵᩩᨠᩴ ᨾᨶᩈᩥᨠᩁᩮᩣᩉᩥ ᨽᩣᩈᩥᩔᩣᨾᩦ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩈᩥᨦ᩠ᨣᩣᩃᨠᩮᩣ ᨣᩉᨸᨲᩥᨸᩩᨲ᩠ᨲᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ. ᨽᨣᩅᩣ ᩑᨲᨴᩅᩮᩣᨧ –

‘‘ᨿᨲᩮᩣ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᩋᩁᩥᨿᩈᩣᩅᨠᩔ ᨧᨲ᩠ᨲᩣᩁᩮᩣ ᨠᨾ᩠ᨾᨠᩥᩃᩮᩈᩣ ᨸᩉᩦᨶᩣ ᩉᩮᩣᨶ᩠ᨲᩥ, ᨧᨲᩪᩉᩥ ᨧ ᨮᩣᨶᩮᩉᩥ ᨸᩣᨸᨠᨾ᩠ᨾᩴ ᨶ ᨠᩁᩮᩣᨲᩥ, ᨨ ᨧ ᨽᩮᩣᨣᩣᨶᩴ ᩋᨸᩣᨿᨾᩩᨡᩣᨶᩥ ᨶ ᩈᩮᩅᨲᩥ, ᩈᩮᩣ ᩑᩅᩴ ᨧᩩᨴ᩠ᨴᩈ ᨸᩣᨸᨠᩣᨸᨣᨲᩮᩣ ᨨᨴ᩠ᨴᩥᩈᩣᨸᨭᩥᨧ᩠ᨨᩣᨴᩦ [ᨸᨭᩥᨧ᩠ᨨᩣᨴᩦ ᩉᩮᩣᨲᩥ (ᩈ᩠ᨿᩣ.)] ᩏᨽᩮᩣᩃᩮᩣᨠᩅᩥᨩᨿᩣᨿ ᨸᨭᩥᨸᨶ᩠ᨶᩮᩣ ᩉᩮᩣᨲᩥ. ᨲᩔ ᩋᨿᨬ᩠ᨧᩮᩅ ᩃᩮᩣᨠᩮᩣ ᩌᩁᨴ᩠ᨵᩮᩣ ᩉᩮᩣᨲᩥ ᨸᩁᩮᩣ ᨧ ᩃᩮᩣᨠᩮᩣ. ᩈᩮᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨲᩥ.

ᨧᨲ᩠ᨲᩣᩁᩮᩣᨠᨾ᩠ᨾᨠᩥᩃᩮᩈᩣ

᪒᪔᪕. ‘‘ᨠᨲᨾᩔ ᨧᨲ᩠ᨲᩣᩁᩮᩣ ᨠᨾ᩠ᨾᨠᩥᩃᩮᩈᩣ ᨸᩉᩦᨶᩣ ᩉᩮᩣᨶ᩠ᨲᩥ? ᨸᩣᨱᩣᨲᩥᨸᩣᨲᩮᩣ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨠᨾ᩠ᨾᨠᩥᩃᩮᩈᩮᩣ, ᩋᨴᩥᨶ᩠ᨶᩣᨴᩣᨶᩴ ᨠᨾ᩠ᨾᨠᩥᩃᩮᩈᩮᩣ, ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩮᩣ ᨠᨾ᩠ᨾᨠᩥᩃᩮᩈᩮᩣ, ᨾᩩᩈᩣᩅᩣᨴᩮᩣ ᨠᨾ᩠ᨾᨠᩥᩃᩮᩈᩮᩣ. ᩍᨾᩔ ᨧᨲ᩠ᨲᩣᩁᩮᩣ ᨠᨾ᩠ᨾᨠᩥᩃᩮᩈᩣ ᨸᩉᩦᨶᩣ ᩉᩮᩣᨶ᩠ᨲᩦ’’ᨲᩥ. ᩍᨴᨾᩅᩮᩣᨧ ᨽᨣᩅᩣ, ᩍᨴᩴ ᩅᨲ᩠ᩅᩣᨶ [ᩍᨴᩴ ᩅᨲ᩠ᩅᩣ (ᩈᩦ. ᨸᩦ.) ᩑᩅᨾᩦᨴᩥᩈᩮᩈᩩ ᨮᩣᨶᩮᩈᩩ] ᩈᩩᨣᨲᩮᩣ ᩋᨳᩣᨸᩁᩴ ᩑᨲᨴᩅᩮᩣᨧ ᩈᨲ᩠ᨳᩣ –

‘‘ᨸᩣᨱᩣᨲᩥᨸᩣᨲᩮᩣ ᩋᨴᩥᨶ᩠ᨶᩣᨴᩣᨶᩴ, ᨾᩩᩈᩣᩅᩣᨴᩮᩣ ᨧ ᩅᩩᨧ᩠ᨧᨲᩥ;

ᨸᩁᨴᩣᩁᨣᨾᨶᨬ᩠ᨧᩮᩅ, ᨶᨸ᩠ᨸᩈᩴᩈᨶ᩠ᨲᩥ ᨸᨱ᩠ᨯᩥᨲᩣ’’ᨲᩥ.

ᨧᨲᩩᨭ᩠ᨮᩣᨶᩴ

᪒᪔᪖. ‘‘ᨠᨲᨾᩮᩉᩥ ᨧᨲᩪᩉᩥ ᨮᩣᨶᩮᩉᩥ ᨸᩣᨸᨠᨾ᩠ᨾᩴ ᨶ ᨠᩁᩮᩣᨲᩥ? ᨨᨶ᩠ᨴᩣᨣᨲᩥᩴ ᨣᨧ᩠ᨨᨶ᩠ᨲᩮᩣ ᨸᩣᨸᨠᨾ᩠ᨾᩴ ᨠᩁᩮᩣᨲᩥ, ᨴᩮᩣᩈᩣᨣᨲᩥᩴ ᨣᨧ᩠ᨨᨶ᩠ᨲᩮᩣ ᨸᩣᨸᨠᨾ᩠ᨾᩴ ᨠᩁᩮᩣᨲᩥ, ᨾᩮᩣᩉᩣᨣᨲᩥᩴ ᨣᨧ᩠ᨨᨶ᩠ᨲᩮᩣ ᨸᩣᨸᨠᨾ᩠ᨾᩴ ᨠᩁᩮᩣᨲᩥ, ᨽᨿᩣᨣᨲᩥᩴ ᨣᨧ᩠ᨨᨶ᩠ᨲᩮᩣ ᨸᩣᨸᨠᨾ᩠ᨾᩴ ᨠᩁᩮᩣᨲᩥ. ᨿᨲᩮᩣ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᩋᩁᩥᨿᩈᩣᩅᨠᩮᩣ ᨶᩮᩅ ᨨᨶ᩠ᨴᩣᨣᨲᩥᩴ ᨣᨧ᩠ᨨᨲᩥ, ᨶ ᨴᩮᩣᩈᩣᨣᨲᩥᩴ ᨣᨧ᩠ᨨᨲᩥ, ᨶ ᨾᩮᩣᩉᩣᨣᨲᩥᩴ ᨣᨧ᩠ᨨᨲᩥ, ᨶ ᨽᨿᩣᨣᨲᩥᩴ ᨣᨧ᩠ᨨᨲᩥ; ᩍᨾᩮᩉᩥ ᨧᨲᩪᩉᩥ ᨮᩣᨶᩮᩉᩥ ᨸᩣᨸᨠᨾ᩠ᨾᩴ ᨶ ᨠᩁᩮᩣᨲᩦ’’ᨲᩥ. ᩍᨴᨾᩅᩮᩣᨧ ᨽᨣᩅᩣ, ᩍᨴᩴ ᩅᨲ᩠ᩅᩣᨶ ᩈᩩᨣᨲᩮᩣ ᩋᨳᩣᨸᩁᩴ ᩑᨲᨴᩅᩮᩣᨧ ᩈᨲ᩠ᨳᩣ –

‘‘ᨨᨶ᩠ᨴᩣ ᨴᩮᩣᩈᩣ ᨽᨿᩣ ᨾᩮᩣᩉᩣ, ᨿᩮᩣ ᨵᨾ᩠ᨾᩴ ᩋᨲᩥᩅᨲ᩠ᨲᨲᩥ;

ᨶᩥᩉᩦᨿᨲᩥ ᨿᩈᩮᩣ ᨲᩔ [ᨲᩔ ᨿᩮᩈᩮᩣ (ᨻᩉᩪᩈᩩ, ᩅᩥᨶᨿᩮᨸᩥ)], ᨠᩣᩊᨸᨠ᩠ᨡᩮᩅ ᨧᨶ᩠ᨴᩥᨾᩣ.

‘‘ᨨᨶ᩠ᨴᩣ ᨴᩮᩣᩈᩣ ᨽᨿᩣ ᨾᩮᩣᩉᩣ, ᨿᩮᩣ ᨵᨾ᩠ᨾᩴ ᨶᩣᨲᩥᩅᨲ᩠ᨲᨲᩥ;

ᩌᨸᩪᩁᨲᩥ ᨿᩈᩮᩣ ᨲᩔ [ᨲᩔ ᨿᩮᩈᩮᩣ (ᨻᩉᩪᩈᩩ, ᩅᩥᨶᨿᩮᨸᩥ)], ᩈᩩᨠ᩠ᨠᨸᨠ᩠ᨡᩮᩅ [ᨩᩩᨱ᩠ᩉᨸᨠ᩠ᨡᩮᩅ (ᨠ.)] ᨧᨶ᩠ᨴᩥᨾᩣ’’ᨲᩥ.

ᨨ ᩋᨸᩣᨿᨾᩩᨡᩣᨶᩥ

᪒᪔᪗. ‘‘ᨠᨲᨾᩣᨶᩥ ᨨ ᨽᩮᩣᨣᩣᨶᩴ ᩋᨸᩣᨿᨾᩩᨡᩣᨶᩥ ᨶ ᩈᩮᩅᨲᩥ? ᩈᩩᩁᩣᨾᩮᩁᨿᨾᨩ᩠ᨩᨸ᩠ᨸᨾᩣᨴᨭ᩠ᨮᩣᨶᩣᨶᩩᨿᩮᩣᨣᩮᩣ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨽᩮᩣᨣᩣᨶᩴ ᩋᨸᩣᨿᨾᩩᨡᩴ, ᩅᩥᨠᩣᩃᩅᩥᩈᩥᨡᩣᨧᩁᩥᨿᩣᨶᩩᨿᩮᩣᨣᩮᩣ ᨽᩮᩣᨣᩣᨶᩴ ᩋᨸᩣᨿᨾᩩᨡᩴ, ᩈᨾᨩ᩠ᨩᩣᨽᩥᨧᩁᨱᩴ ᨽᩮᩣᨣᩣᨶᩴ ᩋᨸᩣᨿᨾᩩᨡᩴ, ᨩᩪᨲᨸ᩠ᨸᨾᩣᨴᨭ᩠ᨮᩣᨶᩣᨶᩩᨿᩮᩣᨣᩮᩣ ᨽᩮᩣᨣᩣᨶᩴ ᩋᨸᩣᨿᨾᩩᨡᩴ, ᨸᩣᨸᨾᩥᨲ᩠ᨲᩣᨶᩩᨿᩮᩣᨣᩮᩣ ᨽᩮᩣᨣᩣᨶᩴ ᩋᨸᩣᨿᨾᩩᨡᩴ, ᩌᩃᩈ᩠ᨿᩣᨶᩩᨿᩮᩣᨣᩮᩣ [ᩌᩃᩈᩣᨶᩩᨿᩮᩣᨣᩮᩣ (ᩈᩦ. ᩈ᩠ᨿᩣ. ᨸᩦ.)] ᨽᩮᩣᨣᩣᨶᩴ ᩋᨸᩣᨿᨾᩩᨡᩴ.

ᩈᩩᩁᩣᨾᩮᩁᨿᩔ ᨨ ᩌᨴᩦᨶᩅᩣ

᪒᪔᪘. ‘‘ᨨ ᨡᩮᩣᨾᩮ, ᨣᩉᨸᨲᩥᨸᩩᨲ᩠ᨲ, ᩌᨴᩦᨶᩅᩣ ᩈᩩᩁᩣᨾᩮᩁᨿᨾᨩ᩠ᨩᨸ᩠ᨸᨾᩣᨴᨭ᩠ᨮᩣᨶᩣᨶᩩᨿᩮᩣᨣᩮ. ᩈᨶ᩠ᨴᩥᨭ᩠ᨮᩥᨠᩣ ᨵᨶᨩᩣᨶᩥ [ᨵᨶᨬ᩠ᨩᩣᨶᩥ (ᩈᩦ. ᨸᩦ.)], ᨠᩃᩉᨸ᩠ᨸᩅᨯ᩠ᨰᨶᩦ, ᩁᩮᩣᨣᩣᨶᩴ ᩌᨿᨲᨶᩴ, ᩋᨠᩥᨲ᩠ᨲᩥᩈᨬ᩠ᨩᨶᨶᩦ, ᨠᩮᩣᨸᩦᨶᨶᩥᨴᩴᩈᨶᩦ, ᨸᨬ᩠ᨬᩣᨿ ᨴᩩᨻ᩠ᨻᩃᩥᨠᩁᨱᩦᨲ᩠ᩅᩮᩅ ᨨᨭ᩠ᨮᩴ ᨸᨴᩴ ᨽᩅᨲᩥ. ᩍᨾᩮ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨨ ᩌᨴᩦᨶᩅᩣ ᩈᩩᩁᩣᨾᩮᩁᨿᨾᨩ᩠ᨩᨸ᩠ᨸᨾᩣᨴᨭ᩠ᨮᩣᨶᩣᨶᩩᨿᩮᩣᨣᩮ.

ᩅᩥᨠᩣᩃᨧᩁᩥᨿᩣᨿ ᨨ ᩌᨴᩦᨶᩅᩣ

᪒᪔᪙. ‘‘ᨨ ᨡᩮᩣᨾᩮ, ᨣᩉᨸᨲᩥᨸᩩᨲ᩠ᨲ, ᩌᨴᩦᨶᩅᩣ ᩅᩥᨠᩣᩃᩅᩥᩈᩥᨡᩣᨧᩁᩥᨿᩣᨶᩩᨿᩮᩣᨣᩮ. ᩋᨲ᩠ᨲᩣᨸᩥᩔ ᩋᨣᩩᨲ᩠ᨲᩮᩣ ᩋᩁᨠ᩠ᨡᩥᨲᩮᩣ ᩉᩮᩣᨲᩥ, ᨸᩩᨲ᩠ᨲᨴᩣᩁᩮᩣᨸᩥᩔ ᩋᨣᩩᨲ᩠ᨲᩮᩣ ᩋᩁᨠ᩠ᨡᩥᨲᩮᩣ ᩉᩮᩣᨲᩥ, ᩈᩣᨸᨲᩮᨿ᩠ᨿᩴᨸᩥᩔ ᩋᨣᩩᨲ᩠ᨲᩴ ᩋᩁᨠ᩠ᨡᩥᨲᩴ ᩉᩮᩣᨲᩥ, ᩈᨦ᩠ᨠᩥᨿᩮᩣ ᨧ ᩉᩮᩣᨲᩥ ᨸᩣᨸᨠᩮᩈᩩ ᨮᩣᨶᩮᩈᩩ [ᨲᩮᩈᩩ ᨲᩮᩈᩩ ᨮᩣᨶᩮᩈᩩ (ᩈ᩠ᨿᩣ.)], ᩋᨽᩪᨲᩅᨧᨶᨬ᩠ᨧ ᨲᩈ᩠ᨾᩥᩴ ᩁᩪᩉᨲᩥ, ᨻᩉᩪᨶᨬ᩠ᨧ ᨴᩩᨠ᩠ᨡᨵᨾ᩠ᨾᩣᨶᩴ ᨸᩩᩁᨠ᩠ᨡᨲᩮᩣ ᩉᩮᩣᨲᩥ. ᩍᨾᩮ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨨ ᩌᨴᩦᨶᩅᩣ ᩅᩥᨠᩣᩃᩅᩥᩈᩥᨡᩣᨧᩁᩥᨿᩣᨶᩩᨿᩮᩣᨣᩮ.

ᩈᨾᨩ᩠ᨩᩣᨽᩥᨧᩁᨱᩔ ᨨ ᩌᨴᩦᨶᩅᩣ

᪒᪕᪐. ‘‘ᨨ ᨡᩮᩣᨾᩮ, ᨣᩉᨸᨲᩥᨸᩩᨲ᩠ᨲ, ᩌᨴᩦᨶᩅᩣ ᩈᨾᨩ᩠ᨩᩣᨽᩥᨧᩁᨱᩮ. ᨠ᩠ᩅ [ᨠᩩᩅᩴ (ᨠ. ᩈᩦ. ᨸᩦ.)] ᨶᨧ᩠ᨧᩴ, ᨠ᩠ᩅ ᨣᩦᨲᩴ, ᨠ᩠ᩅ ᩅᩣᨴᩥᨲᩴ, ᨠ᩠ᩅ ᩋᨠ᩠ᨡᩣᨶᩴ, ᨠ᩠ᩅ ᨸᩣᨱᩥᩔᩁᩴ, ᨠ᩠ᩅ ᨠᩩᨾ᩠ᨽᨳᩩᨶᨶ᩠ᨲᩥ. ᩍᨾᩮ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨨ ᩌᨴᩦᨶᩅᩣ ᩈᨾᨩ᩠ᨩᩣᨽᩥᨧᩁᨱᩮ.

ᨩᩪᨲᨸ᩠ᨸᨾᩣᨴᩔ ᨨ ᩌᨴᩦᨶᩅᩣ

᪒᪕᪑. ‘‘ᨨ ᨡᩮᩣᨾᩮ, ᨣᩉᨸᨲᩥᨸᩩᨲ᩠ᨲ, ᩌᨴᩦᨶᩅᩣ ᨩᩪᨲᨸ᩠ᨸᨾᩣᨴᨭ᩠ᨮᩣᨶᩣᨶᩩᨿᩮᩣᨣᩮ. ᨩᨿᩴ ᩅᩮᩁᩴ ᨸᩈᩅᨲᩥ, ᨩᩥᨶᩮᩣ ᩅᩥᨲ᩠ᨲᨾᨶᩩᩈᩮᩣᨧᨲᩥ, ᩈᨶ᩠ᨴᩥᨭ᩠ᨮᩥᨠᩣ ᨵᨶᨩᩣᨶᩥ, ᩈᨽᩣᨣᨲᩔ [ᩈᨽᩣᨿᩮ ᨲᩔ (ᨠ.)] ᩅᨧᨶᩴ ᨶ ᩁᩪᩉᨲᩥ, ᨾᩥᨲ᩠ᨲᩣᨾᨧ᩠ᨧᩣᨶᩴ ᨸᩁᩥᨽᩪᨲᩮᩣ ᩉᩮᩣᨲᩥ, ᩌᩅᩣᩉᩅᩥᩅᩣᩉᨠᩣᨶᩴ ᩋᨸᨲ᩠ᨳᩥᨲᩮᩣ ᩉᩮᩣᨲᩥ – ‘ᩋᨠ᩠ᨡᨵᩩᨲ᩠ᨲᩮᩣ ᩋᨿᩴ ᨸᩩᩁᩥᩈᨸᩩᨣ᩠ᨣᩃᩮᩣ ᨶᩣᩃᩴ ᨴᩣᩁᨽᩁᨱᩣᨿᩣ’ᨲᩥ. ᩍᨾᩮ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨨ ᩌᨴᩦᨶᩅᩣ ᨩᩪᨲᨸ᩠ᨸᨾᩣᨴᨭ᩠ᨮᩣᨶᩣᨶᩩᨿᩮᩣᨣᩮ.

ᨸᩣᨸᨾᩥᨲ᩠ᨲᨲᩣᨿ ᨨ ᩌᨴᩦᨶᩅᩣ

᪒᪕᪒. ‘‘ᨨ ᨡᩮᩣᨾᩮ, ᨣᩉᨸᨲᩥᨸᩩᨲ᩠ᨲ, ᩌᨴᩦᨶᩅᩣ ᨸᩣᨸᨾᩥᨲ᩠ᨲᩣᨶᩩᨿᩮᩣᨣᩮ. ᨿᩮ ᨵᩩᨲ᩠ᨲᩣ, ᨿᩮ ᩈᩮᩣᨱ᩠ᨯᩣ, ᨿᩮ ᨸᩥᨸᩣᩈᩣ, ᨿᩮ ᨶᩮᨠᨲᩥᨠᩣ, ᨿᩮ ᩅᨬ᩠ᨧᨶᩥᨠᩣ, ᨿᩮ ᩈᩣᩉᩈᩥᨠᩣ. ᨲ᩠ᨿᩣᩔ ᨾᩥᨲ᩠ᨲᩣ ᩉᩮᩣᨶ᩠ᨲᩥ ᨲᩮ ᩈᩉᩣᨿᩣ. ᩍᨾᩮ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨨ ᩌᨴᩦᨶᩅᩣ ᨸᩣᨸᨾᩥᨲ᩠ᨲᩣᨶᩩᨿᩮᩣᨣᩮ.

ᩌᩃᩈ᩠ᨿᩔ ᨨ ᩌᨴᩦᨶᩅᩣ

᪒᪕᪓. ‘‘ᨨ ᨡᩮᩣᨾᩮ, ᨣᩉᨸᨲᩥᨸᩩᨲ᩠ᨲ, ᩌᨴᩦᨶᩅᩣ ᩌᩃᩈ᩠ᨿᩣᨶᩩᨿᩮᩣᨣᩮ. ᩋᨲᩥᩈᩦᨲᨶ᩠ᨲᩥ ᨠᨾ᩠ᨾᩴ ᨶ ᨠᩁᩮᩣᨲᩥ, ᩋᨲᩥᩏᨱ᩠ᩉᨶ᩠ᨲᩥ ᨠᨾ᩠ᨾᩴ ᨶ ᨠᩁᩮᩣᨲᩥ, ᩋᨲᩥᩈᩣᨿᨶ᩠ᨲᩥ ᨠᨾ᩠ᨾᩴ ᨶ ᨠᩁᩮᩣᨲᩥ, ᩋᨲᩥᨸᩣᨲᩮᩣᨲᩥ ᨠᨾ᩠ᨾᩴ ᨶ ᨠᩁᩮᩣᨲᩥ, ᩋᨲᩥᨨᩣᨲᩮᩣᩈ᩠ᨾᩦᨲᩥ ᨠᨾ᩠ᨾᩴ ᨶ ᨠᩁᩮᩣᨲᩥ, ᩋᨲᩥᨵᩣᨲᩮᩣᩈ᩠ᨾᩦᨲᩥ ᨠᨾ᩠ᨾᩴ ᨶ ᨠᩁᩮᩣᨲᩥ. ᨲᩔ ᩑᩅᩴ ᨠᩥᨧ᩠ᨧᩣᨸᨴᩮᩈᨻᩉᩩᩃᩔ ᩅᩥᩉᩁᨲᩮᩣ ᩋᨶᩩᨸ᩠ᨸᨶ᩠ᨶᩣ ᨧᩮᩅ ᨽᩮᩣᨣᩣ ᨶᩩᨸ᩠ᨸᨩ᩠ᨩᨶ᩠ᨲᩥ, ᩏᨸ᩠ᨸᨶ᩠ᨶᩣ ᨧ ᨽᩮᩣᨣᩣ ᨸᩁᩥᨠ᩠ᨡᨿᩴ ᨣᨧ᩠ᨨᨶ᩠ᨲᩥ. ᩍᨾᩮ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨨ ᩌᨴᩦᨶᩅᩣ ᩌᩃᩈ᩠ᨿᩣᨶᩩᨿᩮᩣᨣᩮ’’ᨲᩥ. ᩍᨴᨾᩅᩮᩣᨧ ᨽᨣᩅᩣ, ᩍᨴᩴ ᩅᨲ᩠ᩅᩣᨶ ᩈᩩᨣᨲᩮᩣ ᩋᨳᩣᨸᩁᩴ ᩑᨲᨴᩅᩮᩣᨧ ᩈᨲ᩠ᨳᩣ –

‘‘ᩉᩮᩣᨲᩥ ᨸᩣᨶᩈᨡᩣ ᨶᩣᨾ,

ᩉᩮᩣᨲᩥ ᩈᨾ᩠ᨾᩥᨿᩈᨾ᩠ᨾᩥᨿᩮᩣ;

ᨿᩮᩣ ᨧ ᩋᨲ᩠ᨳᩮᩈᩩ ᨩᩣᨲᩮᩈᩩ,

ᩈᩉᩣᨿᩮᩣ ᩉᩮᩣᨲᩥ ᩈᩮᩣ ᩈᨡᩣ.

‘‘ᩏᩔᩪᩁᩈᩮᨿ᩠ᨿᩣ ᨸᩁᨴᩣᩁᩈᩮᩅᨶᩣ,

ᩅᩮᩁᨸ᩠ᨸᩈᩅᩮᩣ [ᩅᩮᩁᨸ᩠ᨸᩈᨦ᩠ᨣᩮᩣ (ᩈᩦ. ᩈ᩠ᨿᩣ. ᨸᩦ.)] ᨧ ᩋᨶᨲ᩠ᨳᨲᩣ ᨧ;

ᨸᩣᨸᩣ ᨧ ᨾᩥᨲ᩠ᨲᩣ ᩈᩩᨠᨴᩁᩥᨿᨲᩣ ᨧ,

ᩑᨲᩮ ᨨ ᨮᩣᨶᩣ ᨸᩩᩁᩥᩈᩴ ᨵᩴᩈᨿᨶ᩠ᨲᩥ.

‘‘ᨸᩣᨸᨾᩥᨲ᩠ᨲᩮᩣ ᨸᩣᨸᩈᨡᩮᩣ,

ᨸᩣᨸᩌᨧᩣᩁᨣᩮᩣᨧᩁᩮᩣ;

ᩋᩈ᩠ᨾᩣ ᩃᩮᩣᨠᩣ ᨸᩁᨾ᩠ᩉᩣ ᨧ,

ᩏᨽᨿᩣ ᨵᩴᩈᨲᩮ ᨶᩁᩮᩣ.

‘‘ᩋᨠ᩠ᨡᩥᨲ᩠ᨳᩥᨿᩮᩣ ᩅᩣᩁᩩᨱᩦ ᨶᨧ᩠ᨧᨣᩦᨲᩴ,

ᨴᩥᩅᩣ ᩈᩮᩣᨸ᩠ᨸᩴ ᨸᩣᩁᩥᨧᩁᩥᨿᩣ ᩋᨠᩣᩃᩮ;

ᨸᩣᨸᩣ ᨧ ᨾᩥᨲ᩠ᨲᩣ ᩈᩩᨠᨴᩁᩥᨿᨲᩣ ᨧ,

ᩑᨲᩮ ᨨ ᨮᩣᨶᩣ ᨸᩩᩁᩥᩈᩴ ᨵᩴᩈᨿᨶ᩠ᨲᩥ.

‘‘ᩋᨠ᩠ᨡᩮᩉᩥ ᨴᩥᨻ᩠ᨻᨶ᩠ᨲᩥ ᩈᩩᩁᩴ ᨸᩥᩅᨶ᩠ᨲᩥ,

ᨿᨶ᩠ᨲᩥᨲ᩠ᨳᩥᨿᩮᩣ ᨸᩣᨱᩈᨾᩣ ᨸᩁᩮᩈᩴ;

ᨶᩥᩉᩦᨶᩈᩮᩅᩦ ᨶ ᨧ ᩅᩩᨴ᩠ᨵᩈᩮᩅᩦ [ᩅᩩᨴ᩠ᨵᩥᩈᩮᩅᩦ (ᩈ᩠ᨿᩣ.), ᨻᩩᨴ᩠ᨵᩥᩈᩮᩅᩦ (ᨠ.)],

ᨶᩥᩉᩦᨿᨲᩮ ᨠᩣᩊᨸᨠ᩠ᨡᩮᩅ ᨧᨶ᩠ᨴᩮᩣ.

‘‘ᨿᩮᩣ ᩅᩣᩁᩩᨱᩦ ᩋᨴ᩠ᨵᨶᩮᩣ ᩋᨠᩥᨬ᩠ᨧᨶᩮᩣ,

ᨸᩥᨸᩣᩈᩮᩣ ᨸᩥᩅᩴ ᨸᨸᩣᨣᨲᩮᩣ [ᨸᩥᨸᩣᩈᩮᩣᩈᩥ ᩋᨲ᩠ᨳᨸᩣᨣᨲᩮᩣ (ᩈ᩠ᨿᩣ.), ᨸᩥᨸᩣᩈᩮᩣᨸᩥ ᩈᨾᨸ᩠ᨸᨸᩣᨣᨲᩮᩣ (ᨠ.)];

ᩏᨴᨠᨾᩥᩅ ᩍᨱᩴ ᩅᩥᨣᩣᩉᨲᩥ,

ᩋᨠᩩᩃᩴ [ᩌᨠᩩᩃᩴ (ᩈ᩠ᨿᩣ. ᨠ.)] ᨠᩣᩉᩥᨲᩥ ᨡᩥᨸ᩠ᨸᨾᨲ᩠ᨲᨶᩮᩣ.

‘‘ᨶ ᨴᩥᩅᩣ ᩈᩮᩣᨸ᩠ᨸᩈᩦᩃᩮᨶ, ᩁᨲ᩠ᨲᩥᨾᩩᨭ᩠ᨮᩣᨶᨴᩮᩔᩥᨶᩣ [ᩁᨲ᩠ᨲᩥᨶᩩᨭ᩠ᨮᩣᨶᨴᩔᩥᨶᩣ (ᩈᩦ. ᨸᩦ.), ᩁᨲ᩠ᨲᩥᨶᩩᨭ᩠ᨮᩣᨶᩈᩦᩃᩥᨶᩣ (?)];

ᨶᩥᨧ᩠ᨧᩴ ᨾᨲ᩠ᨲᩮᨶ ᩈᩮᩣᨱ᩠ᨯᩮᨶ, ᩈᨠ᩠ᨠᩣ ᩌᩅᩈᩥᨲᩩᩴ ᨥᩁᩴ.

‘‘ᩋᨲᩥᩈᩦᨲᩴ ᩋᨲᩥᩏᨱ᩠ᩉᩴ, ᩋᨲᩥᩈᩣᨿᨾᩥᨴᩴ ᩋᩉᩩ;

ᩍᨲᩥ ᩅᩥᩔᨭ᩠ᨮᨠᨾ᩠ᨾᨶ᩠ᨲᩮ, ᩋᨲ᩠ᨳᩣ ᩋᨧ᩠ᨧᩮᨶ᩠ᨲᩥ ᨾᩣᨱᩅᩮ.

‘‘ᨿᩮᩣᨵ ᩈᩦᨲᨬ᩠ᨧ ᩏᨱ᩠ᩉᨬ᩠ᨧ, ᨲᩥᨱᩣ ᨽᩥᨿ᩠ᨿᩮᩣ ᨶ ᨾᨬ᩠ᨬᨲᩥ;

ᨠᩁᩴ ᨸᩩᩁᩥᩈᨠᩥᨧ᩠ᨧᩣᨶᩥ, ᩈᩮᩣ ᩈᩩᨡᩴ [ᩈᩩᨡᩣ (ᩈᨻ᩠ᨻᨲ᩠ᨳ) ᩋᨭ᩠ᨮᨠᨳᩣ ᩒᩃᩮᩣᨠᩮᨲᨻ᩠ᨻᩣ] ᨶ ᩅᩥᩉᩣᨿᨲᩦ’’ᨲᩥ.

ᨾᩥᨲ᩠ᨲᨸᨲᩥᩁᩪᨸᨠᩣ

᪒᪕᪔. ‘‘ᨧᨲ᩠ᨲᩣᩁᩮᩣᨾᩮ, ᨣᩉᨸᨲᩥᨸᩩᨲ᩠ᨲ, ᩋᨾᩥᨲ᩠ᨲᩣ ᨾᩥᨲ᩠ᨲᨸᨲᩥᩁᩪᨸᨠᩣ ᩅᩮᨴᩥᨲᨻ᩠ᨻᩣ. ᩋᨬ᩠ᨬᨴᨲ᩠ᨳᩩᩉᩁᩮᩣ ᩋᨾᩥᨲ᩠ᨲᩮᩣ ᨾᩥᨲ᩠ᨲᨸᨲᩥᩁᩪᨸᨠᩮᩣ ᩅᩮᨴᩥᨲᨻ᩠ᨻᩮᩣ, ᩅᨧᩦᨸᩁᨾᩮᩣ ᩋᨾᩥᨲ᩠ᨲᩮᩣ ᨾᩥᨲ᩠ᨲᨸᨲᩥᩁᩪᨸᨠᩮᩣ ᩅᩮᨴᩥᨲᨻ᩠ᨻᩮᩣ, ᩋᨶᩩᨸ᩠ᨸᩥᨿᨽᩣᨱᩦ ᩋᨾᩥᨲ᩠ᨲᩮᩣ ᨾᩥᨲ᩠ᨲᨸᨲᩥᩁᩪᨸᨠᩮᩣ ᩅᩮᨴᩥᨲᨻ᩠ᨻᩮᩣ, ᩋᨸᩣᨿᩈᩉᩣᨿᩮᩣ ᩋᨾᩥᨲ᩠ᨲᩮᩣ ᨾᩥᨲ᩠ᨲᨸᨲᩥᩁᩪᨸᨠᩮᩣ ᩅᩮᨴᩥᨲᨻ᩠ᨻᩮᩣ.

᪒᪕᪕. ‘‘ᨧᨲᩪᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨮᩣᨶᩮᩉᩥ ᩋᨬ᩠ᨬᨴᨲ᩠ᨳᩩᩉᩁᩮᩣ ᩋᨾᩥᨲ᩠ᨲᩮᩣ ᨾᩥᨲ᩠ᨲᨸᨲᩥᩁᩪᨸᨠᩮᩣ ᩅᩮᨴᩥᨲᨻ᩠ᨻᩮᩣ.

‘‘ᩋᨬ᩠ᨬᨴᨲ᩠ᨳᩩᩉᩁᩮᩣ ᩉᩮᩣᨲᩥ, ᩋᨸ᩠ᨸᩮᨶ ᨻᩉᩩᨾᩥᨧ᩠ᨨᨲᩥ;

ᨽᨿᩔ ᨠᩥᨧ᩠ᨧᩴ ᨠᩁᩮᩣᨲᩥ, ᩈᩮᩅᨲᩥ ᩋᨲ᩠ᨳᨠᩣᩁᨱᩣ.

‘‘ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨧᨲᩪᩉᩥ ᨮᩣᨶᩮᩉᩥ ᩋᨬ᩠ᨬᨴᨲ᩠ᨳᩩᩉᩁᩮᩣ ᩋᨾᩥᨲ᩠ᨲᩮᩣ ᨾᩥᨲ᩠ᨲᨸᨲᩥᩁᩪᨸᨠᩮᩣ ᩅᩮᨴᩥᨲᨻ᩠ᨻᩮᩣ.

᪒᪕᪖. ‘‘ᨧᨲᩪᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨮᩣᨶᩮᩉᩥ ᩅᨧᩦᨸᩁᨾᩮᩣ ᩋᨾᩥᨲ᩠ᨲᩮᩣ ᨾᩥᨲ᩠ᨲᨸᨲᩥᩁᩪᨸᨠᩮᩣ ᩅᩮᨴᩥᨲᨻ᩠ᨻᩮᩣ. ᩋᨲᩦᨲᩮᨶ ᨸᨭᩥᩈᨶ᩠ᨳᩁᨲᩥ [ᨸᨭᩥᩈᨶ᩠ᨵᩁᨲᩥ (ᨠ.)], ᩋᨶᩣᨣᨲᩮᨶ ᨸᨭᩥᩈᨶ᩠ᨳᩁᨲᩥ, ᨶᩥᩁᨲ᩠ᨳᨠᩮᨶ ᩈᨦ᩠ᨣᨱ᩠ᩉᩣᨲᩥ, ᨸᨧ᩠ᨧᩩᨸ᩠ᨸᨶ᩠ᨶᩮᩈᩩ ᨠᩥᨧ᩠ᨧᩮᩈᩩ ᨻ᩠ᨿᩈᨶᩴ ᨴᩔᩮᨲᩥ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨧᨲᩪᩉᩥ ᨮᩣᨶᩮᩉᩥ ᩅᨧᩦᨸᩁᨾᩮᩣ ᩋᨾᩥᨲ᩠ᨲᩮᩣ ᨾᩥᨲ᩠ᨲᨸᨲᩥᩁᩪᨸᨠᩮᩣ ᩅᩮᨴᩥᨲᨻ᩠ᨻᩮᩣ.

᪒᪕᪗. ‘‘ᨧᨲᩪᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨮᩣᨶᩮᩉᩥ ᩋᨶᩩᨸ᩠ᨸᩥᨿᨽᩣᨱᩦ ᩋᨾᩥᨲ᩠ᨲᩮᩣ ᨾᩥᨲ᩠ᨲᨸᨲᩥᩁᩪᨸᨠᩮᩣ ᩅᩮᨴᩥᨲᨻ᩠ᨻᩮᩣ. ᨸᩣᨸᨠᩴᨸᩥᩔ [ᨸᩣᨸᨠᨾ᩠ᨾᩴᨸᩥᩔ (ᩈ᩠ᨿᩣ.)] ᩋᨶᩩᨩᩣᨶᩣᨲᩥ, ᨠᩃ᩠ᨿᩣᨱᩴᨸᩥᩔ ᩋᨶᩩᨩᩣᨶᩣᨲᩥ, ᩈᨾ᩠ᨾᩩᨡᩣᩔ ᩅᨱ᩠ᨱᩴ ᨽᩣᩈᨲᩥ, ᨸᩁᨾ᩠ᨾᩩᨡᩣᩔ ᩋᩅᨱ᩠ᨱᩴ ᨽᩣᩈᨲᩥ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨧᨲᩪᩉᩥ ᨮᩣᨶᩮᩉᩥ ᩋᨶᩩᨸ᩠ᨸᩥᨿᨽᩣᨱᩦ ᩋᨾᩥᨲ᩠ᨲᩮᩣ ᨾᩥᨲ᩠ᨲᨸᨲᩥᩁᩪᨸᨠᩮᩣ ᩅᩮᨴᩥᨲᨻ᩠ᨻᩮᩣ.

᪒᪕᪘. ‘‘ᨧᨲᩪᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨮᩣᨶᩮᩉᩥ ᩋᨸᩣᨿᩈᩉᩣᨿᩮᩣ ᩋᨾᩥᨲ᩠ᨲᩮᩣ ᨾᩥᨲ᩠ᨲᨸᨲᩥᩁᩪᨸᨠᩮᩣ ᩅᩮᨴᩥᨲᨻ᩠ᨻᩮᩣ. ᩈᩩᩁᩣᨾᩮᩁᨿ ᨾᨩ᩠ᨩᨸ᩠ᨸᨾᩣᨴᨭ᩠ᨮᩣᨶᩣᨶᩩᨿᩮᩣᨣᩮ ᩈᩉᩣᨿᩮᩣ ᩉᩮᩣᨲᩥ, ᩅᩥᨠᩣᩃ ᩅᩥᩈᩥᨡᩣ ᨧᩁᩥᨿᩣᨶᩩᨿᩮᩣᨣᩮ ᩈᩉᩣᨿᩮᩣ ᩉᩮᩣᨲᩥ, ᩈᨾᨩ᩠ᨩᩣᨽᩥᨧᩁᨱᩮ ᩈᩉᩣᨿᩮᩣ ᩉᩮᩣᨲᩥ, ᨩᩪᨲᨸ᩠ᨸᨾᩣᨴᨭ᩠ᨮᩣᨶᩣᨶᩩᨿᩮᩣᨣᩮ ᩈᩉᩣᨿᩮᩣ ᩉᩮᩣᨲᩥ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨧᨲᩪᩉᩥ ᨮᩣᨶᩮᩉᩥ ᩋᨸᩣᨿᩈᩉᩣᨿᩮᩣ ᩋᨾᩥᨲ᩠ᨲᩮᩣ ᨾᩥᨲ᩠ᨲᨸᨲᩥᩁᩪᨸᨠᩮᩣ ᩅᩮᨴᩥᨲᨻ᩠ᨻᩮᩣ’’ᨲᩥ.

᪒᪕᪙. ᩍᨴᨾᩅᩮᩣᨧ ᨽᨣᩅᩣ, ᩍᨴᩴ ᩅᨲ᩠ᩅᩣᨶ ᩈᩩᨣᨲᩮᩣ ᩋᨳᩣᨸᩁᩴ ᩑᨲᨴᩅᩮᩣᨧ ᩈᨲ᩠ᨳᩣ –

‘‘ᩋᨬ᩠ᨬᨴᨲ᩠ᨳᩩᩉᩁᩮᩣ ᨾᩥᨲ᩠ᨲᩮᩣ, ᨿᩮᩣ ᨧ ᨾᩥᨲ᩠ᨲᩮᩣ ᩅᨧᩦᨸᩁᩮᩣ [ᩅᨧᩦᨸᩁᨾᩮᩣ (ᩈ᩠ᨿᩣ.)];

ᩋᨶᩩᨸ᩠ᨸᩥᨿᨬ᩠ᨧ ᨿᩮᩣ ᩌᩉ, ᩋᨸᩣᨿᩮᩈᩩ ᨧ ᨿᩮᩣ ᩈᨡᩣ.

ᩑᨲᩮ ᩋᨾᩥᨲ᩠ᨲᩮ ᨧᨲ᩠ᨲᩣᩁᩮᩣ, ᩍᨲᩥ ᩅᩥᨬ᩠ᨬᩣᨿ ᨸᨱ᩠ᨯᩥᨲᩮᩣ;

ᩌᩁᨠᩣ ᨸᩁᩥᩅᨩ᩠ᨩᩮᨿ᩠ᨿ, ᨾᨣ᩠ᨣᩴ ᨸᨭᩥᨽᨿᩴ ᨿᨳᩣ’’ᨲᩥ.

ᩈᩩᩉᨴᨾᩥᨲ᩠ᨲᩮᩣ

᪒᪖᪐. ‘‘ᨧᨲ᩠ᨲᩣᩁᩮᩣᨾᩮ, ᨣᩉᨸᨲᩥᨸᩩᨲ᩠ᨲ, ᨾᩥᨲ᩠ᨲᩣ ᩈᩩᩉᨴᩣ ᩅᩮᨴᩥᨲᨻ᩠ᨻᩣ. ᩏᨸᨠᩣᩁᩮᩣ [ᩏᨸᨠᩣᩁᨠᩮᩣ (ᩈ᩠ᨿᩣ.)] ᨾᩥᨲ᩠ᨲᩮᩣ ᩈᩩᩉᨴᩮᩣ ᩅᩮᨴᩥᨲᨻ᩠ᨻᩮᩣ, ᩈᨾᩣᨶᩈᩩᨡᨴᩩᨠ᩠ᨡᩮᩣ ᨾᩥᨲ᩠ᨲᩮᩣ ᩈᩩᩉᨴᩮᩣ ᩅᩮᨴᩥᨲᨻ᩠ᨻᩮᩣ, ᩋᨲ᩠ᨳᨠ᩠ᨡᩣᨿᩦ ᨾᩥᨲ᩠ᨲᩮᩣ ᩈᩩᩉᨴᩮᩣ ᩅᩮᨴᩥᨲᨻ᩠ᨻᩮᩣ, ᩋᨶᩩᨠᨾ᩠ᨸᨠᩮᩣ ᨾᩥᨲ᩠ᨲᩮᩣ ᩈᩩᩉᨴᩮᩣ ᩅᩮᨴᩥᨲᨻ᩠ᨻᩮᩣ.

᪒᪖᪑. ‘‘ᨧᨲᩪᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨮᩣᨶᩮᩉᩥ ᩏᨸᨠᩣᩁᩮᩣ ᨾᩥᨲ᩠ᨲᩮᩣ ᩈᩩᩉᨴᩮᩣ ᩅᩮᨴᩥᨲᨻ᩠ᨻᩮᩣ. ᨸᨾᨲ᩠ᨲᩴ ᩁᨠ᩠ᨡᨲᩥ, ᨸᨾᨲ᩠ᨲᩔ ᩈᩣᨸᨲᩮᨿ᩠ᨿᩴ ᩁᨠ᩠ᨡᨲᩥ, ᨽᩦᨲᩔ ᩈᩁᨱᩴ ᩉᩮᩣᨲᩥ, ᩏᨸ᩠ᨸᨶ᩠ᨶᩮᩈᩩ ᨠᩥᨧ᩠ᨧᨠᩁᨱᩦᨿᩮᩈᩩ ᨲᨴ᩠ᨴᩥᨣᩩᨱᩴ ᨽᩮᩣᨣᩴ ᩋᨶᩩᨸ᩠ᨸᨴᩮᨲᩥ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨧᨲᩪᩉᩥ ᨮᩣᨶᩮᩉᩥ ᩏᨸᨠᩣᩁᩮᩣ ᨾᩥᨲ᩠ᨲᩮᩣ ᩈᩩᩉᨴᩮᩣ ᩅᩮᨴᩥᨲᨻ᩠ᨻᩮᩣ.

᪒᪖᪒. ‘‘ᨧᨲᩪᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨮᩣᨶᩮᩉᩥ ᩈᨾᩣᨶᩈᩩᨡᨴᩩᨠ᩠ᨡᩮᩣ ᨾᩥᨲ᩠ᨲᩮᩣ ᩈᩩᩉᨴᩮᩣ ᩅᩮᨴᩥᨲᨻ᩠ᨻᩮᩣ. ᨣᩩᨿ᩠ᩉᨾᩔ ᩌᨧᩥᨠ᩠ᨡᨲᩥ, ᨣᩩᨿ᩠ᩉᨾᩔ ᨸᩁᩥᨣᩪᩉᨲᩥ, ᩌᨸᨴᩣᩈᩩ ᨶ ᩅᩥᨩᩉᨲᩥ, ᨩᩦᩅᩥᨲᩴᨸᩥᩔ ᩋᨲ᩠ᨳᩣᨿ ᨸᩁᩥᨧ᩠ᨧᨲ᩠ᨲᩴ ᩉᩮᩣᨲᩥ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨧᨲᩪᩉᩥ ᨮᩣᨶᩮᩉᩥ ᩈᨾᩣᨶᩈᩩᨡᨴᩩᨠ᩠ᨡᩮᩣ ᨾᩥᨲ᩠ᨲᩮᩣ ᩈᩩᩉᨴᩮᩣ ᩅᩮᨴᩥᨲᨻ᩠ᨻᩮᩣ.

᪒᪖᪓. ‘‘ᨧᨲᩪᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨮᩣᨶᩮᩉᩥ ᩋᨲ᩠ᨳᨠ᩠ᨡᩣᨿᩦ ᨾᩥᨲ᩠ᨲᩮᩣ ᩈᩩᩉᨴᩮᩣ ᩅᩮᨴᩥᨲᨻ᩠ᨻᩮᩣ. ᨸᩣᨸᩣ ᨶᩥᩅᩣᩁᩮᨲᩥ, ᨠᩃ᩠ᨿᩣᨱᩮ ᨶᩥᩅᩮᩈᩮᨲᩥ, ᩋᩔᩩᨲᩴ ᩈᩣᩅᩮᨲᩥ, ᩈᨣ᩠ᨣᩔ ᨾᨣ᩠ᨣᩴ ᩌᨧᩥᨠ᩠ᨡᨲᩥ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨧᨲᩪᩉᩥ ᨮᩣᨶᩮᩉᩥ ᩋᨲ᩠ᨳᨠ᩠ᨡᩣᨿᩦ ᨾᩥᨲ᩠ᨲᩮᩣ ᩈᩩᩉᨴᩮᩣ ᩅᩮᨴᩥᨲᨻ᩠ᨻᩮᩣ.

᪒᪖᪔. ‘‘ᨧᨲᩪᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨮᩣᨶᩮᩉᩥ ᩋᨶᩩᨠᨾ᩠ᨸᨠᩮᩣ ᨾᩥᨲ᩠ᨲᩮᩣ ᩈᩩᩉᨴᩮᩣ ᩅᩮᨴᩥᨲᨻ᩠ᨻᩮᩣ. ᩋᨽᩅᩮᨶᩔ ᨶ ᨶᨶ᩠ᨴᨲᩥ, ᨽᩅᩮᨶᩔ ᨶᨶ᩠ᨴᨲᩥ, ᩋᩅᨱ᩠ᨱᩴ ᨽᨱᨾᩣᨶᩴ ᨶᩥᩅᩣᩁᩮᨲᩥ, ᩅᨱ᩠ᨱᩴ ᨽᨱᨾᩣᨶᩴ ᨸᩈᩴᩈᨲᩥ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨧᨲᩪᩉᩥ ᨮᩣᨶᩮᩉᩥ ᩋᨶᩩᨠᨾ᩠ᨸᨠᩮᩣ ᨾᩥᨲ᩠ᨲᩮᩣ ᩈᩩᩉᨴᩮᩣ ᩅᩮᨴᩥᨲᨻ᩠ᨻᩮᩣ’’ᨲᩥ.

᪒᪖᪕. ᩍᨴᨾᩅᩮᩣᨧ ᨽᨣᩅᩣ, ᩍᨴᩴ ᩅᨲ᩠ᩅᩣᨶ ᩈᩩᨣᨲᩮᩣ ᩋᨳᩣᨸᩁᩴ ᩑᨲᨴᩅᩮᩣᨧ ᩈᨲ᩠ᨳᩣ –

‘‘ᩏᨸᨠᩣᩁᩮᩣ ᨧ ᨿᩮᩣ ᨾᩥᨲ᩠ᨲᩮᩣ, ᩈᩩᨡᩮ ᨴᩩᨠ᩠ᨡᩮ [ᩈᩩᨡᨴᩩᨠ᩠ᨡᩮᩣ (ᩈ᩠ᨿᩣ. ᨠ.)] ᨧ ᨿᩮᩣ ᩈᨡᩣ [ᨿᩮᩣ ᨧ ᨾᩥᨲ᩠ᨲᩮᩣ ᩈᩩᨡᩮ ᨴᩩᨠ᩠ᨡᩮ (ᩈᩦ. ᨸᩦ.)];

ᩋᨲ᩠ᨳᨠ᩠ᨡᩣᨿᩦ ᨧ ᨿᩮᩣ ᨾᩥᨲ᩠ᨲᩮᩣ, ᨿᩮᩣ ᨧ ᨾᩥᨲ᩠ᨲᩣᨶᩩᨠᨾ᩠ᨸᨠᩮᩣ.

‘‘ᩑᨲᩮᨸᩥ ᨾᩥᨲ᩠ᨲᩮ ᨧᨲ᩠ᨲᩣᩁᩮᩣ, ᩍᨲᩥ ᩅᩥᨬ᩠ᨬᩣᨿ ᨸᨱ᩠ᨯᩥᨲᩮᩣ;

ᩈᨠ᩠ᨠᨧ᩠ᨧᩴ ᨸᨿᩥᩁᩩᨸᩣᩈᩮᨿ᩠ᨿ, ᨾᩣᨲᩣ ᨸᩩᨲ᩠ᨲᩴ ᩅ ᩒᩁᩈᩴ;

ᨸᨱ᩠ᨯᩥᨲᩮᩣ ᩈᩦᩃᩈᨾ᩠ᨸᨶ᩠ᨶᩮᩣ, ᨩᩃᩴ ᩋᨣ᩠ᨣᩦᩅ ᨽᩣᩈᨲᩥ.

‘‘ᨽᩮᩣᨣᩮ ᩈᩴᩉᩁᨾᩣᨶᩔ, ᨽᨾᩁᩔᩮᩅ ᩍᩁᩦᨿᨲᩮᩣ;

ᨽᩮᩣᨣᩣ ᩈᨶ᩠ᨶᩥᨧᨿᩴ ᨿᨶ᩠ᨲᩥ, ᩅᨾ᩠ᨾᩥᨠᩮᩣᩅᩩᨸᨧᩦᨿᨲᩥ.

‘‘ᩑᩅᩴ ᨽᩮᩣᨣᩮ ᩈᨾᩣᩉᨲ᩠ᩅᩣ [ᩈᨾᩣᩉᩁᩥᨲ᩠ᩅᩣ (ᩈ᩠ᨿᩣ.)], ᩋᩃᨾᨲ᩠ᨲᩮᩣ ᨠᩩᩃᩮ ᨣᩥᩉᩦ;

ᨧᨲᩩᨵᩣ ᩅᩥᨽᨩᩮ ᨽᩮᩣᨣᩮ, ᩈ ᩅᩮ ᨾᩥᨲ᩠ᨲᩣᨶᩥ ᨣᨶ᩠ᨳᨲᩥ.

‘‘ᩑᨠᩮᨶ ᨽᩮᩣᨣᩮ ᨽᩩᨬ᩠ᨩᩮᨿ᩠ᨿ, ᨴ᩠ᩅᩦᩉᩥ ᨠᨾ᩠ᨾᩴ ᨸᨿᩮᩣᨩᨿᩮ;

ᨧᨲᩩᨲ᩠ᨳᨬ᩠ᨧ ᨶᩥᨵᩣᨸᩮᨿ᩠ᨿ, ᩌᨸᨴᩣᩈᩩ ᨽᩅᩥᩔᨲᩦ’’ᨲᩥ.

ᨨᨴ᩠ᨴᩥᩈᩣᨸᨭᩥᨧ᩠ᨨᩣᨴᨶᨠᨱ᩠ᨯᩴ

᪒᪖᪖. ‘‘ᨠᨳᨬ᩠ᨧ, ᨣᩉᨸᨲᩥᨸᩩᨲ᩠ᨲ, ᩋᩁᩥᨿᩈᩣᩅᨠᩮᩣ ᨨᨴ᩠ᨴᩥᩈᩣᨸᨭᩥᨧ᩠ᨨᩣᨴᩦ ᩉᩮᩣᨲᩥ? ᨨ ᩍᨾᩣ, ᨣᩉᨸᨲᩥᨸᩩᨲ᩠ᨲ, ᨴᩥᩈᩣ ᩅᩮᨴᩥᨲᨻ᩠ᨻᩣ. ᨸᩩᩁᨲ᩠ᨳᩥᨾᩣ ᨴᩥᩈᩣ ᨾᩣᨲᩣᨸᩥᨲᩁᩮᩣ ᩅᩮᨴᩥᨲᨻ᩠ᨻᩣ, ᨴᨠ᩠ᨡᩥᨱᩣ ᨴᩥᩈᩣ ᩌᨧᩁᩥᨿᩣ ᩅᩮᨴᩥᨲᨻ᩠ᨻᩣ, ᨸᨧ᩠ᨨᩥᨾᩣ ᨴᩥᩈᩣ ᨸᩩᨲ᩠ᨲᨴᩣᩁᩣ ᩅᩮᨴᩥᨲᨻ᩠ᨻᩣ, ᩏᨲ᩠ᨲᩁᩣ ᨴᩥᩈᩣ ᨾᩥᨲ᩠ᨲᩣᨾᨧ᩠ᨧᩣ ᩅᩮᨴᩥᨲᨻ᩠ᨻᩣ, ᩉᩮᨭ᩠ᨮᩥᨾᩣ ᨴᩥᩈᩣ ᨴᩣᩈᨠᨾ᩠ᨾᨠᩁᩣ ᩅᩮᨴᩥᨲᨻ᩠ᨻᩣ, ᩏᨸᩁᩥᨾᩣ ᨴᩥᩈᩣ ᩈᨾᨱᨻᩕᩣᩉ᩠ᨾᨱᩣ ᩅᩮᨴᩥᨲᨻ᩠ᨻᩣ.

᪒᪖᪗. ‘‘ᨸᨬ᩠ᨧᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨮᩣᨶᩮᩉᩥ ᨸᩩᨲ᩠ᨲᩮᨶ ᨸᩩᩁᨲ᩠ᨳᩥᨾᩣ ᨴᩥᩈᩣ ᨾᩣᨲᩣᨸᩥᨲᩁᩮᩣ ᨸᨧ᩠ᨧᩩᨸᨭ᩠ᨮᩣᨲᨻ᩠ᨻᩣ – ᨽᨲᩮᩣ ᨶᩮ [ᨶᩮᩈᩴ (ᨻᩉᩪᩈᩩ)] ᨽᩁᩥᩔᩣᨾᩥ, ᨠᩥᨧ᩠ᨧᩴ ᨶᩮᩈᩴ ᨠᩁᩥᩔᩣᨾᩥ, ᨠᩩᩃᩅᩴᩈᩴ ᨮᨸᩮᩔᩣᨾᩥ, ᨴᩣᨿᨩ᩠ᨩᩴ ᨸᨭᩥᨸᨩ᩠ᨩᩣᨾᩥ, ᩋᨳ ᩅᩣ ᨸᨶ ᨸᩮᨲᩣᨶᩴ ᨠᩣᩃᨦ᩠ᨠᨲᩣᨶᩴ ᨴᨠ᩠ᨡᩥᨱᩴ ᩋᨶᩩᨸ᩠ᨸᨴᩔᩣᨾᩦᨲᩥ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨸᨬ᩠ᨧᩉᩥ ᨮᩣᨶᩮᩉᩥ ᨸᩩᨲ᩠ᨲᩮᨶ ᨸᩩᩁᨲ᩠ᨳᩥᨾᩣ ᨴᩥᩈᩣ ᨾᩣᨲᩣᨸᩥᨲᩁᩮᩣ ᨸᨧ᩠ᨧᩩᨸᨭ᩠ᨮᩥᨲᩣ ᨸᨬ᩠ᨧᩉᩥ ᨮᩣᨶᩮᩉᩥ ᨸᩩᨲ᩠ᨲᩴ ᩋᨶᩩᨠᨾ᩠ᨸᨶ᩠ᨲᩥ. ᨸᩣᨸᩣ ᨶᩥᩅᩣᩁᩮᨶ᩠ᨲᩥ, ᨠᩃ᩠ᨿᩣᨱᩮ ᨶᩥᩅᩮᩈᩮᨶ᩠ᨲᩥ, ᩈᩥᨸ᩠ᨸᩴ ᩈᩥᨠ᩠ᨡᩣᨸᩮᨶ᩠ᨲᩥ, ᨸᨲᩥᩁᩪᨸᩮᨶ ᨴᩣᩁᩮᨶ ᩈᩴᨿᩮᩣᨩᩮᨶ᩠ᨲᩥ, ᩈᨾᨿᩮ ᨴᩣᨿᨩ᩠ᨩᩴ ᨶᩥᨿ᩠ᨿᩣᨴᩮᨶ᩠ᨲᩥ [ᨶᩥᨿ᩠ᨿᩣᨲᩮᨶ᩠ᨲᩥ (ᨠ. ᩈᩦ.)]. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨸᨬ᩠ᨧᩉᩥ ᨮᩣᨶᩮᩉᩥ ᨸᩩᨲ᩠ᨲᩮᨶ ᨸᩩᩁᨲ᩠ᨳᩥᨾᩣ ᨴᩥᩈᩣ ᨾᩣᨲᩣᨸᩥᨲᩁᩮᩣ ᨸᨧ᩠ᨧᩩᨸᨭ᩠ᨮᩥᨲᩣ ᩍᨾᩮᩉᩥ ᨸᨬ᩠ᨧᩉᩥ ᨮᩣᨶᩮᩉᩥ ᨸᩩᨲ᩠ᨲᩴ ᩋᨶᩩᨠᨾ᩠ᨸᨶ᩠ᨲᩥ. ᩑᩅᨾᩔ ᩑᩈᩣ ᨸᩩᩁᨲ᩠ᨳᩥᨾᩣ ᨴᩥᩈᩣ ᨸᨭᩥᨧ᩠ᨨᨶ᩠ᨶᩣ ᩉᩮᩣᨲᩥ ᨡᩮᨾᩣ ᩋᨸ᩠ᨸᨭᩥᨽᨿᩣ.

᪒᪖᪘. ‘‘ᨸᨬ᩠ᨧᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨮᩣᨶᩮᩉᩥ ᩋᨶ᩠ᨲᩮᩅᩣᩈᩥᨶᩣ ᨴᨠ᩠ᨡᩥᨱᩣ ᨴᩥᩈᩣ ᩌᨧᩁᩥᨿᩣ ᨸᨧ᩠ᨧᩩᨸᨭ᩠ᨮᩣᨲᨻ᩠ᨻᩣ – ᩏᨭ᩠ᨮᩣᨶᩮᨶ ᩏᨸᨭ᩠ᨮᩣᨶᩮᨶ ᩈᩩᩔᩩᩈᩣᨿ ᨸᩣᩁᩥᨧᩁᩥᨿᩣᨿ ᩈᨠ᩠ᨠᨧ᩠ᨧᩴ ᩈᩥᨸ᩠ᨸᨸᨭᩥᨣ᩠ᨣᩉᨱᩮᨶ [ᩈᩥᨸ᩠ᨸᩴ ᨸᨭᩥᨣ᩠ᨣᩉᨱᩮᨶ (ᩈ᩠ᨿᩣ.), ᩈᩥᨸ᩠ᨸᩏᨣ᩠ᨣᩉᨱᩮᨶ (ᨠ.)]. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨸᨬ᩠ᨧᩉᩥ ᨮᩣᨶᩮᩉᩥ ᩋᨶ᩠ᨲᩮᩅᩣᩈᩥᨶᩣ ᨴᨠ᩠ᨡᩥᨱᩣ ᨴᩥᩈᩣ ᩌᨧᩁᩥᨿᩣ ᨸᨧ᩠ᨧᩩᨸᨭ᩠ᨮᩥᨲᩣ ᨸᨬ᩠ᨧᩉᩥ ᨮᩣᨶᩮᩉᩥ ᩋᨶ᩠ᨲᩮᩅᩣᩈᩥᩴ ᩋᨶᩩᨠᨾ᩠ᨸᨶ᩠ᨲᩥ – ᩈᩩᩅᩥᨶᩦᨲᩴ ᩅᩥᨶᩮᨶ᩠ᨲᩥ, ᩈᩩᨣ᩠ᨣᩉᩥᨲᩴ ᨣᩣᩉᩣᨸᩮᨶ᩠ᨲᩥ, ᩈᨻ᩠ᨻᩈᩥᨸ᩠ᨸᩔᩩᨲᩴ ᩈᨾᨠ᩠ᨡᩣᨿᩥᨶᩮᩣ ᨽᩅᨶ᩠ᨲᩥ, ᨾᩥᨲ᩠ᨲᩣᨾᨧ᩠ᨧᩮᩈᩩ ᨸᨭᩥᨿᩣᨴᩮᨶ᩠ᨲᩥ [ᨸᨭᩥᩅᩮᨴᩮᨶ᩠ᨲᩥ (ᩈ᩠ᨿᩣ.)], ᨴᩥᩈᩣᩈᩩ ᨸᩁᩥᨲ᩠ᨲᩣᨱᩴ ᨠᩁᩮᩣᨶ᩠ᨲᩥ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨸᨬ᩠ᨧᩉᩥ ᨮᩣᨶᩮᩉᩥ ᩋᨶ᩠ᨲᩮᩅᩣᩈᩥᨶᩣ ᨴᨠ᩠ᨡᩥᨱᩣ ᨴᩥᩈᩣ ᩌᨧᩁᩥᨿᩣ ᨸᨧ᩠ᨧᩩᨸᨭ᩠ᨮᩥᨲᩣ ᩍᨾᩮᩉᩥ ᨸᨬ᩠ᨧᩉᩥ ᨮᩣᨶᩮᩉᩥ ᩋᨶ᩠ᨲᩮᩅᩣᩈᩥᩴ ᩋᨶᩩᨠᨾ᩠ᨸᨶ᩠ᨲᩥ. ᩑᩅᨾᩔ ᩑᩈᩣ ᨴᨠ᩠ᨡᩥᨱᩣ ᨴᩥᩈᩣ ᨸᨭᩥᨧ᩠ᨨᨶ᩠ᨶᩣ ᩉᩮᩣᨲᩥ ᨡᩮᨾᩣ ᩋᨸ᩠ᨸᨭᩥᨽᨿᩣ.

᪒᪖᪙. ‘‘ᨸᨬ᩠ᨧᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨮᩣᨶᩮᩉᩥ ᩈᩣᨾᩥᨠᩮᨶ ᨸᨧ᩠ᨨᩥᨾᩣ ᨴᩥᩈᩣ ᨽᩁᩥᨿᩣ ᨸᨧ᩠ᨧᩩᨸᨭ᩠ᨮᩣᨲᨻ᩠ᨻᩣ – ᩈᨾ᩠ᨾᩣᨶᨶᩣᨿ ᩋᨶᩅᨾᩣᨶᨶᩣᨿ [ᩋᩅᩥᨾᩣᨶᨶᩣᨿ (ᩈ᩠ᨿᩣ. ᨸᩦ.)] ᩋᨶᨲᩥᨧᩁᩥᨿᩣᨿ ᩍᩔᩁᩥᨿᩅᩮᩣᩔᨣ᩠ᨣᩮᨶ ᩋᩃᨦ᩠ᨠᩣᩁᩣᨶᩩᨸ᩠ᨸᨴᩣᨶᩮᨶ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨸᨬ᩠ᨧᩉᩥ ᨮᩣᨶᩮᩉᩥ ᩈᩣᨾᩥᨠᩮᨶ ᨸᨧ᩠ᨨᩥᨾᩣ ᨴᩥᩈᩣ ᨽᩁᩥᨿᩣ ᨸᨧ᩠ᨧᩩᨸᨭ᩠ᨮᩥᨲᩣ ᨸᨬ᩠ᨧᩉᩥ ᨮᩣᨶᩮᩉᩥ ᩈᩣᨾᩥᨠᩴ ᩋᨶᩩᨠᨾ᩠ᨸᨲᩥ – ᩈᩩᩈᩴᩅᩥᩉᩥᨲᨠᨾ᩠ᨾᨶ᩠ᨲᩣ ᨧ ᩉᩮᩣᨲᩥ, ᩈᨦ᩠ᨣᩉᩥᨲᨸᩁᩥᨩᨶᩣ [ᩈᩩᩈᨦ᩠ᨣᩉᩥᨲᨸᩁᩥᨩᨶᩣ (ᩈᩦ. ᩈ᩠ᨿᩣ. ᨸᩦ.)] ᨧ, ᩋᨶᨲᩥᨧᩣᩁᩥᨶᩦ ᨧ, ᩈᨾ᩠ᨽᨲᨬ᩠ᨧ ᩋᨶᩩᩁᨠ᩠ᨡᨲᩥ, ᨴᨠ᩠ᨡᩣ ᨧ ᩉᩮᩣᨲᩥ ᩋᨶᩃᩈᩣ ᩈᨻ᩠ᨻᨠᩥᨧ᩠ᨧᩮᩈᩩ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨸᨬ᩠ᨧᩉᩥ ᨮᩣᨶᩮᩉᩥ ᩈᩣᨾᩥᨠᩮᨶ ᨸᨧ᩠ᨨᩥᨾᩣ ᨴᩥᩈᩣ ᨽᩁᩥᨿᩣ ᨸᨧ᩠ᨧᩩᨸᨭ᩠ᨮᩥᨲᩣ ᩍᨾᩮᩉᩥ ᨸᨬ᩠ᨧᩉᩥ ᨮᩣᨶᩮᩉᩥ ᩈᩣᨾᩥᨠᩴ ᩋᨶᩩᨠᨾ᩠ᨸᨲᩥ. ᩑᩅᨾᩔ ᩑᩈᩣ ᨸᨧ᩠ᨨᩥᨾᩣ ᨴᩥᩈᩣ ᨸᨭᩥᨧ᩠ᨨᨶ᩠ᨶᩣ ᩉᩮᩣᨲᩥ ᨡᩮᨾᩣ ᩋᨸ᩠ᨸᨭᩥᨽᨿᩣ.

᪒᪗᪐. ‘‘ᨸᨬ᩠ᨧᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨮᩣᨶᩮᩉᩥ ᨠᩩᩃᨸᩩᨲ᩠ᨲᩮᨶ ᩏᨲ᩠ᨲᩁᩣ ᨴᩥᩈᩣ ᨾᩥᨲ᩠ᨲᩣᨾᨧ᩠ᨧᩣ ᨸᨧ᩠ᨧᩩᨸᨭ᩠ᨮᩣᨲᨻ᩠ᨻᩣ – ᨴᩣᨶᩮᨶ ᨸᩮᨿ᩠ᨿᩅᨩ᩠ᨩᩮᨶ [ᩅᩥᨿᩅᨩ᩠ᨩᩮᨶ (ᩈ᩠ᨿᩣ. ᨠ.)] ᩋᨲ᩠ᨳᨧᩁᩥᨿᩣᨿ ᩈᨾᩣᨶᨲ᩠ᨲᨲᩣᨿ ᩋᩅᩥᩈᩴᩅᩣᨴᨶᨲᩣᨿ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨸᨬ᩠ᨧᩉᩥ ᨮᩣᨶᩮᩉᩥ ᨠᩩᩃᨸᩩᨲ᩠ᨲᩮᨶ ᩏᨲ᩠ᨲᩁᩣ ᨴᩥᩈᩣ ᨾᩥᨲ᩠ᨲᩣᨾᨧ᩠ᨧᩣ ᨸᨧ᩠ᨧᩩᨸᨭ᩠ᨮᩥᨲᩣ ᨸᨬ᩠ᨧᩉᩥ ᨮᩣᨶᩮᩉᩥ ᨠᩩᩃᨸᩩᨲ᩠ᨲᩴ ᩋᨶᩩᨠᨾ᩠ᨸᨶ᩠ᨲᩥ – ᨸᨾᨲ᩠ᨲᩴ ᩁᨠ᩠ᨡᨶ᩠ᨲᩥ, ᨸᨾᨲ᩠ᨲᩔ ᩈᩣᨸᨲᩮᨿ᩠ᨿᩴ ᩁᨠ᩠ᨡᨶ᩠ᨲᩥ, ᨽᩦᨲᩔ ᩈᩁᨱᩴ ᩉᩮᩣᨶ᩠ᨲᩥ, ᩌᨸᨴᩣᩈᩩ ᨶ ᩅᩥᨩᩉᨶ᩠ᨲᩥ, ᩋᨸᩁᨸᨩᩣ ᨧᩔ ᨸᨭᩥᨸᩪᨩᩮᨶ᩠ᨲᩥ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨸᨬ᩠ᨧᩉᩥ ᨮᩣᨶᩮᩉᩥ ᨠᩩᩃᨸᩩᨲ᩠ᨲᩮᨶ ᩏᨲ᩠ᨲᩁᩣ ᨴᩥᩈᩣ ᨾᩥᨲ᩠ᨲᩣᨾᨧ᩠ᨧᩣ ᨸᨧ᩠ᨧᩩᨸᨭ᩠ᨮᩥᨲᩣ ᩍᨾᩮᩉᩥ ᨸᨬ᩠ᨧᩉᩥ ᨮᩣᨶᩮᩉᩥ ᨠᩩᩃᨸᩩᨲ᩠ᨲᩴ ᩋᨶᩩᨠᨾ᩠ᨸᨶ᩠ᨲᩥ. ᩑᩅᨾᩔ ᩑᩈᩣ ᩏᨲ᩠ᨲᩁᩣ ᨴᩥᩈᩣ ᨸᨭᩥᨧ᩠ᨨᨶ᩠ᨶᩣ ᩉᩮᩣᨲᩥ ᨡᩮᨾᩣ ᩋᨸ᩠ᨸᨭᩥᨽᨿᩣ.

᪒᪗᪑. ‘‘ᨸᨬ᩠ᨧᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨮᩣᨶᩮᩉᩥ ᩋᨿ᩠ᨿᩥᩁᨠᩮᨶ [ᩋᨿᩥᩁᨠᩮᨶ (ᩈᩦ. ᩈ᩠ᨿᩣ. ᨸᩦ.)] ᩉᩮᨭ᩠ᨮᩥᨾᩣ ᨴᩥᩈᩣ ᨴᩣᩈᨠᨾ᩠ᨾᨠᩁᩣ ᨸᨧ᩠ᨧᩩᨸᨭ᩠ᨮᩣᨲᨻ᩠ᨻᩣ – ᨿᨳᩣᨻᩃᩴ ᨠᨾ᩠ᨾᨶ᩠ᨲᩈᩴᩅᩥᨵᩣᨶᩮᨶ ᨽᨲ᩠ᨲᩅᩮᨲᨶᩣᨶᩩᨸ᩠ᨸᨴᩣᨶᩮᨶ ᨣᩥᩃᩣᨶᩩᨸᨭ᩠ᨮᩣᨶᩮᨶ ᩋᨧ᩠ᨨᩁᩥᨿᩣᨶᩴ ᩁᩈᩣᨶᩴ ᩈᩴᩅᩥᨽᩣᨣᩮᨶ ᩈᨾᨿᩮ ᩅᩮᩣᩔᨣ᩠ᨣᩮᨶ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨸᨬ᩠ᨧᩉᩥ ᨮᩣᨶᩮᩉᩥ ᩋᨿ᩠ᨿᩥᩁᨠᩮᨶ ᩉᩮᨭ᩠ᨮᩥᨾᩣ ᨴᩥᩈᩣ ᨴᩣᩈᨠᨾ᩠ᨾᨠᩁᩣ ᨸᨧ᩠ᨧᩩᨸᨭ᩠ᨮᩥᨲᩣ ᨸᨬ᩠ᨧᩉᩥ ᨮᩣᨶᩮᩉᩥ ᩋᨿ᩠ᨿᩥᩁᨠᩴ ᩋᨶᩩᨠᨾ᩠ᨸᨶ᩠ᨲᩥ – ᨸᩩᨻ᩠ᨻᩩᨭ᩠ᨮᩣᨿᩥᨶᩮᩣ ᨧ ᩉᩮᩣᨶ᩠ᨲᩥ, ᨸᨧ᩠ᨨᩣ ᨶᩥᨸᩣᨲᩥᨶᩮᩣ ᨧ, ᨴᩥᨶ᩠ᨶᩣᨴᩣᨿᩥᨶᩮᩣ ᨧ, ᩈᩩᨠᨲᨠᨾ᩠ᨾᨠᩁᩣ ᨧ, ᨠᩥᨲ᩠ᨲᩥᩅᨱ᩠ᨱᩉᩁᩣ ᨧ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨸᨬ᩠ᨧᩉᩥ ᨮᩣᨶᩮᩉᩥ ᩋᨿ᩠ᨿᩥᩁᨠᩮᨶ ᩉᩮᨭ᩠ᨮᩥᨾᩣ ᨴᩥᩈᩣ ᨴᩣᩈᨠᨾ᩠ᨾᨠᩁᩣ ᨸᨧ᩠ᨧᩩᨸᨭ᩠ᨮᩥᨲᩣ ᩍᨾᩮᩉᩥ ᨸᨬ᩠ᨧᩉᩥ ᨮᩣᨶᩮᩉᩥ ᩋᨿ᩠ᨿᩥᩁᨠᩴ ᩋᨶᩩᨠᨾ᩠ᨸᨶ᩠ᨲᩥ. ᩑᩅᨾᩔ ᩑᩈᩣ ᩉᩮᨭ᩠ᨮᩥᨾᩣ ᨴᩥᩈᩣ ᨸᨭᩥᨧ᩠ᨨᨶ᩠ᨶᩣ ᩉᩮᩣᨲᩥ ᨡᩮᨾᩣ ᩋᨸ᩠ᨸᨭᩥᨽᨿᩣ.

᪒᪗᪒. ‘‘ᨸᨬ᩠ᨧᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨮᩣᨶᩮᩉᩥ ᨠᩩᩃᨸᩩᨲ᩠ᨲᩮᨶ ᩏᨸᩁᩥᨾᩣ ᨴᩥᩈᩣ ᩈᨾᨱᨻᩕᩣᩉ᩠ᨾᨱᩣ ᨸᨧ᩠ᨧᩩᨸᨭ᩠ᨮᩣᨲᨻ᩠ᨻᩣ – ᨾᩮᨲ᩠ᨲᩮᨶ ᨠᩣᨿᨠᨾ᩠ᨾᩮᨶ ᨾᩮᨲ᩠ᨲᩮᨶ ᩅᨧᩦᨠᨾ᩠ᨾᩮᨶ ᨾᩮᨲ᩠ᨲᩮᨶ ᨾᨶᩮᩣᨠᨾ᩠ᨾᩮᨶ ᩋᨶᩣᩅᨭᨴ᩠ᩅᩣᩁᨲᩣᨿ ᩌᨾᩥᩈᩣᨶᩩᨸ᩠ᨸᨴᩣᨶᩮᨶ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨸᨬ᩠ᨧᩉᩥ ᨮᩣᨶᩮᩉᩥ ᨠᩩᩃᨸᩩᨲ᩠ᨲᩮᨶ ᩏᨸᩁᩥᨾᩣ ᨴᩥᩈᩣ ᩈᨾᨱᨻᩕᩣᩉ᩠ᨾᨱᩣ ᨸᨧ᩠ᨧᩩᨸᨭ᩠ᨮᩥᨲᩣ ᨨᩉᩥ ᨮᩣᨶᩮᩉᩥ ᨠᩩᩃᨸᩩᨲ᩠ᨲᩴ ᩋᨶᩩᨠᨾ᩠ᨸᨶ᩠ᨲᩥ – ᨸᩣᨸᩣ ᨶᩥᩅᩣᩁᩮᨶ᩠ᨲᩥ, ᨠᩃ᩠ᨿᩣᨱᩮ ᨶᩥᩅᩮᩈᩮᨶ᩠ᨲᩥ, ᨠᩃ᩠ᨿᩣᨱᩮᨶ ᨾᨶᩈᩣ ᩋᨶᩩᨠᨾ᩠ᨸᨶ᩠ᨲᩥ, ᩋᩔᩩᨲᩴ ᩈᩣᩅᩮᨶ᩠ᨲᩥ, ᩈᩩᨲᩴ ᨸᩁᩥᨿᩮᩣᨴᩣᨸᩮᨶ᩠ᨲᩥ, ᩈᨣ᩠ᨣᩔ ᨾᨣ᩠ᨣᩴ ᩌᨧᩥᨠ᩠ᨡᨶ᩠ᨲᩥ. ᩍᨾᩮᩉᩥ ᨡᩮᩣ, ᨣᩉᨸᨲᩥᨸᩩᨲ᩠ᨲ, ᨸᨬ᩠ᨧᩉᩥ ᨮᩣᨶᩮᩉᩥ ᨠᩩᩃᨸᩩᨲ᩠ᨲᩮᨶ ᩏᨸᩁᩥᨾᩣ ᨴᩥᩈᩣ ᩈᨾᨱᨻᩕᩣᩉ᩠ᨾᨱᩣ ᨸᨧ᩠ᨧᩩᨸᨭ᩠ᨮᩥᨲᩣ ᩍᨾᩮᩉᩥ ᨨᩉᩥ ᨮᩣᨶᩮᩉᩥ ᨠᩩᩃᨸᩩᨲ᩠ᨲᩴ ᩋᨶᩩᨠᨾ᩠ᨸᨶ᩠ᨲᩥ. ᩑᩅᨾᩔ ᩑᩈᩣ ᩏᨸᩁᩥᨾᩣ ᨴᩥᩈᩣ ᨸᨭᩥᨧ᩠ᨨᨶ᩠ᨶᩣ ᩉᩮᩣᨲᩥ ᨡᩮᨾᩣ ᩋᨸ᩠ᨸᨭᩥᨽᨿᩣ’’ᨲᩥ.

᪒᪗᪓. ᩍᨴᨾᩅᩮᩣᨧ ᨽᨣᩅᩣ. ᩍᨴᩴ ᩅᨲ᩠ᩅᩣᨶ ᩈᩩᨣᨲᩮᩣ ᩋᨳᩣᨸᩁᩴ ᩑᨲᨴᩅᩮᩣᨧ ᩈᨲ᩠ᨳᩣ –

‘‘ᨾᩣᨲᩣᨸᩥᨲᩣ ᨴᩥᩈᩣ ᨸᩩᨻ᩠ᨻᩣ, ᩌᨧᩁᩥᨿᩣ ᨴᨠ᩠ᨡᩥᨱᩣ ᨴᩥᩈᩣ;

ᨸᩩᨲ᩠ᨲᨴᩣᩁᩣ ᨴᩥᩈᩣ ᨸᨧ᩠ᨨᩣ, ᨾᩥᨲ᩠ᨲᩣᨾᨧ᩠ᨧᩣ ᨧ ᩏᨲ᩠ᨲᩁᩣ.

‘‘ᨴᩣᩈᨠᨾ᩠ᨾᨠᩁᩣ ᩉᩮᨭ᩠ᨮᩣ, ᩏᨴ᩠ᨵᩴ ᩈᨾᨱᨻᩕᩣᩉ᩠ᨾᨱᩣ;

ᩑᨲᩣ ᨴᩥᩈᩣ ᨶᨾᩔᩮᨿ᩠ᨿ, ᩋᩃᨾᨲ᩠ᨲᩮᩣ ᨠᩩᩃᩮ ᨣᩥᩉᩦ.

‘‘ᨸᨱ᩠ᨯᩥᨲᩮᩣ ᩈᩦᩃᩈᨾ᩠ᨸᨶ᩠ᨶᩮᩣ, ᩈᨱ᩠ᩉᩮᩣ ᨧ ᨸᨭᩥᨽᩣᨶᩅᩣ;

ᨶᩥᩅᩣᨲᩅᩩᨲ᩠ᨲᩥ ᩋᨲ᩠ᨳᨴ᩠ᨵᩮᩣ, ᨲᩣᨴᩥᩈᩮᩣ ᩃᨽᨲᩮ ᨿᩈᩴ.

‘‘ᩏᨭ᩠ᨮᩣᨶᨠᩮᩣ ᩋᨶᩃᩈᩮᩣ, ᩌᨸᨴᩣᩈᩩ ᨶ ᩅᩮᨵᨲᩥ;

ᩋᨧ᩠ᨨᩥᨶ᩠ᨶᩅᩩᨲ᩠ᨲᩥ ᨾᩮᨵᩣᩅᩦ, ᨲᩣᨴᩥᩈᩮᩣ ᩃᨽᨲᩮ ᨿᩈᩴ.

‘‘ᩈᨦ᩠ᨣᩣᩉᨠᩮᩣ ᨾᩥᨲ᩠ᨲᨠᩁᩮᩣ, ᩅᨴᨬ᩠ᨬᩪ ᩅᩦᨲᨾᨧ᩠ᨨᩁᩮᩣ;

ᨶᩮᨲᩣ ᩅᩥᨶᩮᨲᩣ ᩋᨶᩩᨶᩮᨲᩣ, ᨲᩣᨴᩥᩈᩮᩣ ᩃᨽᨲᩮ ᨿᩈᩴ.

‘‘ᨴᩣᨶᨬ᩠ᨧ ᨸᩮᨿ᩠ᨿᩅᨩ᩠ᨩᨬ᩠ᨧ, ᩋᨲ᩠ᨳᨧᩁᩥᨿᩣ ᨧ ᨿᩣ ᩍᨵ;

ᩈᨾᩣᨶᨲ᩠ᨲᨲᩣ ᨧ ᨵᨾ᩠ᨾᩮᩈᩩ, ᨲᨲ᩠ᨳ ᨲᨲ᩠ᨳ ᨿᨳᩣᩁᩉᩴ;

ᩑᨲᩮ ᨡᩮᩣ ᩈᨦ᩠ᨣᩉᩣ ᩃᩮᩣᨠᩮ, ᩁᨳᩔᩣᨱᩦᩅ ᨿᩣᨿᨲᩮᩣ.

‘‘ᩑᨲᩮ ᨧ ᩈᨦ᩠ᨣᩉᩣ ᨶᩣᩔᩩ, ᨶ ᨾᩣᨲᩣ ᨸᩩᨲ᩠ᨲᨠᩣᩁᨱᩣ;

ᩃᨽᩮᨳ ᨾᩣᨶᩴ ᨸᩪᨩᩴ ᩅᩣ, ᨸᩥᨲᩣ ᩅᩣ ᨸᩩᨲ᩠ᨲᨠᩣᩁᨱᩣ.

‘‘ᨿᩈ᩠ᨾᩣ ᨧ ᩈᨦ᩠ᨣᩉᩣ [ᩈᨦ᩠ᨣᩉᩮ (ᨠ.) ᩋᨭ᩠ᨮᨠᨳᩣᨿᩴ ᩍᨧ᩠ᨨᩥᨲᨸᩣᨮᩮᩣ] ᩑᨲᩮ, ᩈᨾ᩠ᨾᨸᩮᨠ᩠ᨡᨶ᩠ᨲᩥ [ᩈᨾᩅᩮᨠ᩠ᨡᨶ᩠ᨲᩥ (ᩈᩦ. ᨸᩦ. ᨠ.)] ᨸᨱ᩠ᨯᩥᨲᩣ;

ᨲᩈ᩠ᨾᩣ ᨾᩉᨲ᩠ᨲᩴ ᨸᨸ᩠ᨸᩮᩣᨶ᩠ᨲᩥ, ᨸᩣᩈᩴᩈᩣ ᨧ ᨽᩅᨶ᩠ᨲᩥ ᨲᩮ’’ᨲᩥ.

᪒᪗᪔. ᩑᩅᩴ ᩅᩩᨲ᩠ᨲᩮ, ᩈᩥᨦ᩠ᨣᩣᩃᨠᩮᩣ ᨣᩉᨸᨲᩥᨸᩩᨲ᩠ᨲᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩋᨽᩥᨠ᩠ᨠᨶ᩠ᨲᩴ, ᨽᨶ᩠ᨲᩮ! ᩋᨽᩥᨠ᩠ᨠᨶ᩠ᨲᩴ, ᨽᨶ᩠ᨲᩮ! ᩈᩮᨿ᩠ᨿᨳᩣᨸᩥ, ᨽᨶ᩠ᨲᩮ, ᨶᩥᨠ᩠ᨠᩩᨩ᩠ᨩᩥᨲᩴ ᩅᩣ ᩏᨠ᩠ᨠᩩᨩ᩠ᨩᩮᨿ᩠ᨿ, ᨸᨭᩥᨧ᩠ᨨᨶ᩠ᨶᩴ ᩅᩣ ᩅᩥᩅᩁᩮᨿ᩠ᨿ, ᨾᩪᩊ᩠ᩉᩔ ᩅᩣ ᨾᨣ᩠ᨣᩴ ᩌᨧᩥᨠ᩠ᨡᩮᨿ᩠ᨿ, ᩋᨶ᩠ᨵᨠᩣᩁᩮ ᩅᩣ ᨲᩮᩃᨸᨩ᩠ᨩᩮᩣᨲᩴ ᨵᩣᩁᩮᨿ᩠ᨿ ‘ᨧᨠ᩠ᨡᩩᨾᨶ᩠ᨲᩮᩣ ᩁᩪᨸᩣᨶᩥ ᨴᨠ᩠ᨡᨶ᩠ᨲᩦ’ᨲᩥ. ᩑᩅᨾᩮᩅᩴ ᨽᨣᩅᨲᩣ ᩋᨶᩮᨠᨸᩁᩥᨿᩣᨿᩮᨶ ᨵᨾ᩠ᨾᩮᩣ ᨸᨠᩣᩈᩥᨲᩮᩣ. ᩑᩈᩣᩉᩴ, ᨽᨶ᩠ᨲᩮ, ᨽᨣᩅᨶ᩠ᨲᩴ ᩈᩁᨱᩴ ᨣᨧ᩠ᨨᩣᨾᩥ ᨵᨾ᩠ᨾᨬ᩠ᨧ ᨽᩥᨠ᩠ᨡᩩᩈᩴᨥᨬ᩠ᨧ. ᩏᨸᩣᩈᨠᩴ ᨾᩴ ᨽᨣᩅᩣ ᨵᩣᩁᩮᨲᩩ, ᩋᨩ᩠ᨩᨲᨣ᩠ᨣᩮ ᨸᩣᨱᩩᨸᩮᨲᩴ ᩈᩁᨱᩴ ᨣᨲ’’ᨶ᩠ᨲᩥ.

ᩈᩥᨦ᩠ᨣᩣᩃᩈᩩᨲ᩠ᨲᩴ [ᩈᩥᨦ᩠ᨣᩣᩃᩮᩣᩅᩣᨴᩈᩩᨲ᩠ᨲᨶ᩠ᨲᩴ (ᨸᩦ.)] ᨶᩥᨭ᩠ᨮᩥᨲᩴ ᩋᨭ᩠ᨮᨾᩴ.

᪙. ᩌᨭᩣᨶᩣᨭᩥᨿᩈᩩᨲ᩠ᨲᩴ

ᨸᨮᨾᨽᩣᨱᩅᩣᩁᩮᩣ

᪒᪗᪕. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᩁᩣᨩᨣᩉᩮ ᩅᩥᩉᩁᨲᩥ ᨣᩥᨩ᩠ᨫᨠᩪᨭᩮ ᨸᨻ᩠ᨻᨲᩮ. ᩋᨳ ᨡᩮᩣ ᨧᨲ᩠ᨲᩣᩁᩮᩣ ᨾᩉᩣᩁᩣᨩᩣ [ᨾᩉᩣᩁᩣᨩᩣᨶᩮᩣ (ᨠ.)] ᨾᩉᨲᩥᨿᩣ ᨧ ᨿᨠ᩠ᨡᩈᩮᨶᩣᨿ ᨾᩉᨲᩥᨿᩣ ᨧ ᨣᨶ᩠ᨵᨻ᩠ᨻᩈᩮᨶᩣᨿ ᨾᩉᨲᩥᨿᩣ ᨧ ᨠᩩᨾ᩠ᨽᨱ᩠ᨯᩈᩮᨶᩣᨿ ᨾᩉᨲᩥᨿᩣ ᨧ ᨶᩣᨣᩈᩮᨶᩣᨿ ᨧᨲᩩᨴ᩠ᨴᩥᩈᩴ ᩁᨠ᩠ᨡᩴ ᨮᨸᩮᨲ᩠ᩅᩣ ᨧᨲᩩᨴ᩠ᨴᩥᩈᩴ ᨣᩩᨾ᩠ᨻᩴ ᨮᨸᩮᨲ᩠ᩅᩣ ᨧᨲᩩᨴ᩠ᨴᩥᩈᩴ ᩒᩅᩁᨱᩴ ᨮᨸᩮᨲ᩠ᩅᩣ ᩋᨽᩥᨠ᩠ᨠᨶ᩠ᨲᩣᨿ ᩁᨲ᩠ᨲᩥᨿᩣ ᩋᨽᩥᨠ᩠ᨠᨶ᩠ᨲᩅᨱ᩠ᨱᩣ ᨠᩮᩅᩃᨠᨸ᩠ᨸᩴ ᨣᩥᨩ᩠ᨫᨠᩪᨭᩴ ᨸᨻ᩠ᨻᨲᩴ ᩒᨽᩣᩈᩮᨲ᩠ᩅᩣ [ᨣᩥᨩ᩠ᨫᨠᩪᨭᩴ ᩒᨽᩣᩈᩮᨲ᩠ᩅᩣ (ᩈᩦ. ᩈ᩠ᨿᩣ. ᨸᩦ.)] ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ. ᨲᩮᨸᩥ ᨡᩮᩣ ᨿᨠ᩠ᨡᩣ ᩋᨸ᩠ᨸᩮᨠᨧ᩠ᨧᩮ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ, ᩋᨸ᩠ᨸᩮᨠᨧ᩠ᨧᩮ ᨽᨣᩅᨲᩣ ᩈᨴ᩠ᨵᩥᩴ ᩈᨾ᩠ᨾᩮᩣᨴᩥᩴᩈᩩ, ᩈᨾ᩠ᨾᩮᩣᨴᨶᩦᨿᩴ ᨠᨳᩴ ᩈᩣᩁᨱᩦᨿᩴ ᩅᩦᨲᩥᩈᩣᩁᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ, ᩋᨸ᩠ᨸᩮᨠᨧ᩠ᨧᩮ ᨿᩮᨶ ᨽᨣᩅᩣ ᨲᩮᨶᨬ᩠ᨩᩃᩥᩴ ᨸᨱᩣᨾᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ, ᩋᨸ᩠ᨸᩮᨠᨧ᩠ᨧᩮ ᨶᩣᨾᨣᩮᩣᨲ᩠ᨲᩴ ᩈᩣᩅᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ, ᩋᨸ᩠ᨸᩮᨠᨧ᩠ᨧᩮ ᨲᩩᨱ᩠ᩉᩦᨽᩪᨲᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ.

᪒᪗᪖. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᩅᩮᩔᩅᨱᩮᩣ ᨾᩉᩣᩁᩣᨩᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᩈᨶ᩠ᨲᩥ ᩉᩥ, ᨽᨶ᩠ᨲᩮ, ᩏᩊᩣᩁᩣ ᨿᨠ᩠ᨡᩣ ᨽᨣᩅᨲᩮᩣ ᩋᨸ᩠ᨸᩈᨶ᩠ᨶᩣ. ᩈᨶ᩠ᨲᩥ ᩉᩥ, ᨽᨶ᩠ᨲᩮ, ᩏᩊᩣᩁᩣ ᨿᨠ᩠ᨡᩣ ᨽᨣᩅᨲᩮᩣ ᨸᩈᨶ᩠ᨶᩣ. ᩈᨶ᩠ᨲᩥ ᩉᩥ, ᨽᨶ᩠ᨲᩮ, ᨾᨩ᩠ᨫᩥᨾᩣ ᨿᨠ᩠ᨡᩣ ᨽᨣᩅᨲᩮᩣ ᩋᨸ᩠ᨸᩈᨶ᩠ᨶᩣ. ᩈᨶ᩠ᨲᩥ ᩉᩥ, ᨽᨶ᩠ᨲᩮ, ᨾᨩ᩠ᨫᩥᨾᩣ ᨿᨠ᩠ᨡᩣ ᨽᨣᩅᨲᩮᩣ ᨸᩈᨶ᩠ᨶᩣ. ᩈᨶ᩠ᨲᩥ ᩉᩥ, ᨽᨶ᩠ᨲᩮ, ᨶᩦᨧᩣ ᨿᨠ᩠ᨡᩣ ᨽᨣᩅᨲᩮᩣ ᩋᨸ᩠ᨸᩈᨶ᩠ᨶᩣ. ᩈᨶ᩠ᨲᩥ ᩉᩥ, ᨽᨶ᩠ᨲᩮ, ᨶᩦᨧᩣ ᨿᨠ᩠ᨡᩣ ᨽᨣᩅᨲᩮᩣ ᨸᩈᨶ᩠ᨶᩣ. ᨿᩮᨽᩩᨿ᩠ᨿᩮᨶ ᨡᩮᩣ ᨸᨶ, ᨽᨶ᩠ᨲᩮ, ᨿᨠ᩠ᨡᩣ ᩋᨸ᩠ᨸᩈᨶ᩠ᨶᩣᨿᩮᩅ ᨽᨣᩅᨲᩮᩣ. ᨲᩴ ᨠᩥᩔ ᩉᩮᨲᩩ? ᨽᨣᩅᩣ ᩉᩥ, ᨽᨶ᩠ᨲᩮ, ᨸᩣᨱᩣᨲᩥᨸᩣᨲᩣ ᩅᩮᩁᨾᨱᩥᨿᩣ ᨵᨾ᩠ᨾᩴ ᨴᩮᩈᩮᨲᩥ, ᩋᨴᩥᨶ᩠ᨶᩣᨴᩣᨶᩣ ᩅᩮᩁᨾᨱᩥᨿᩣ ᨵᨾ᩠ᨾᩴ ᨴᩮᩈᩮᨲᩥ, ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ ᩅᩮᩁᨾᨱᩥᨿᩣ ᨵᨾ᩠ᨾᩴ ᨴᩮᩈᩮᨲᩥ, ᨾᩩᩈᩣᩅᩣᨴᩣ ᩅᩮᩁᨾᨱᩥᨿᩣ ᨵᨾ᩠ᨾᩴ ᨴᩮᩈᩮᨲᩥ, ᩈᩩᩁᩣᨾᩮᩁᨿᨾᨩ᩠ᨩᨸ᩠ᨸᨾᩣᨴᨭ᩠ᨮᩣᨶᩣ ᩅᩮᩁᨾᨱᩥᨿᩣ ᨵᨾ᩠ᨾᩴ ᨴᩮᩈᩮᨲᩥ. ᨿᩮᨽᩩᨿ᩠ᨿᩮᨶ ᨡᩮᩣ ᨸᨶ, ᨽᨶ᩠ᨲᩮ, ᨿᨠ᩠ᨡᩣ ᩋᨸ᩠ᨸᨭᩥᩅᩥᩁᨲᩣᨿᩮᩅ ᨸᩣᨱᩣᨲᩥᨸᩣᨲᩣ, ᩋᨸ᩠ᨸᨭᩥᩅᩥᩁᨲᩣ ᩋᨴᩥᨶ᩠ᨶᩣᨴᩣᨶᩣ, ᩋᨸ᩠ᨸᨭᩥᩅᩥᩁᨲᩣ ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ, ᩋᨸ᩠ᨸᨭᩥᩅᩥᩁᨲᩣ ᨾᩩᩈᩣᩅᩣᨴᩣ, ᩋᨸ᩠ᨸᨭᩥᩅᩥᩁᨲᩣ ᩈᩩᩁᩣᨾᩮᩁᨿᨾᨩ᩠ᨩᨸ᩠ᨸᨾᩣᨴᨭ᩠ᨮᩣᨶᩣ. ᨲᩮᩈᩴ ᨲᩴ ᩉᩮᩣᨲᩥ ᩋᨸ᩠ᨸᩥᨿᩴ ᩋᨾᨶᩣᨸᩴ. ᩈᨶ᩠ᨲᩥ ᩉᩥ, ᨽᨶ᩠ᨲᩮ, ᨽᨣᩅᨲᩮᩣ ᩈᩣᩅᨠᩣ ᩋᩁᨬ᩠ᨬᩅᨶᨸᨲ᩠ᨳᩣᨶᩥ ᨸᨶ᩠ᨲᩣᨶᩥ ᩈᩮᨶᩣᩈᨶᩣᨶᩥ ᨸᨭᩥᩈᩮᩅᨶ᩠ᨲᩥ ᩋᨸ᩠ᨸᩈᨴ᩠ᨴᩣᨶᩥ ᩋᨸ᩠ᨸᨶᩥᨣ᩠ᨥᩮᩣᩈᩣᨶᩥ ᩅᩥᨩᨶᩅᩣᨲᩣᨶᩥ ᨾᨶᩩᩔᩁᩣᩉᩔᩮᨿ᩠ᨿᨠᩣᨶᩥ [ᨾᨶᩩᩔᩁᩣᩉᩈᩮᨿ᩠ᨿᨠᩣᨶᩥ (ᩈᩦ. ᩈ᩠ᨿᩣ. ᨸᩦ.)] ᨸᨭᩥᩈᩃ᩠ᩃᩣᨶᩈᩣᩁᩩᨸ᩠ᨸᩣᨶᩥ. ᨲᨲ᩠ᨳ ᩈᨶ᩠ᨲᩥ ᩏᩊᩣᩁᩣ ᨿᨠ᩠ᨡᩣ ᨶᩥᩅᩣᩈᩥᨶᩮᩣ, ᨿᩮ ᩍᨾᩈ᩠ᨾᩥᩴ ᨽᨣᩅᨲᩮᩣ ᨸᩣᩅᨧᨶᩮ ᩋᨸ᩠ᨸᩈᨶ᩠ᨶᩣ. ᨲᩮᩈᩴ ᨸᩈᩣᨴᩣᨿ ᩏᨣ᩠ᨣᨱ᩠ᩉᩣᨲᩩ, ᨽᨶ᩠ᨲᩮ, ᨽᨣᩅᩣ ᩌᨭᩣᨶᩣᨭᩥᨿᩴ ᩁᨠ᩠ᨡᩴ ᨽᩥᨠ᩠ᨡᩪᨶᩴ ᨽᩥᨠ᩠ᨡᩩᨶᩦᨶᩴ ᩏᨸᩣᩈᨠᩣᨶᩴ ᩏᨸᩣᩈᩥᨠᩣᨶᩴ ᨣᩩᨲ᩠ᨲᩥᨿᩣ ᩁᨠ᩠ᨡᩣᨿ ᩋᩅᩥᩉᩥᩴᩈᩣᨿ ᨹᩣᩈᩩᩅᩥᩉᩣᩁᩣᨿᩣ’’ᨲᩥ. ᩋᨵᩥᩅᩣᩈᩮᩈᩥ ᨽᨣᩅᩣ ᨲᩩᨱ᩠ᩉᩦᨽᩣᩅᩮᨶ.

ᩋᨳ ᨡᩮᩣ ᩅᩮᩔᩅᨱᩮᩣ ᨾᩉᩣᩁᩣᨩᩣ ᨽᨣᩅᨲᩮᩣ ᩋᨵᩥᩅᩣᩈᨶᩴ ᩅᩥᨴᩥᨲ᩠ᩅᩣ ᨲᩣᨿᩴ ᩅᩮᩃᩣᨿᩴ ᩍᨾᩴ ᩌᨭᩣᨶᩣᨭᩥᨿᩴ ᩁᨠ᩠ᨡᩴ ᩋᨽᩣᩈᩥ –

᪒᪗᪗. ‘‘ᩅᩥᨸᩔᩥᩔ ᨧ [ᩍᨾᩮ ᨧᨠᩣᩁᩣ ᨸᩮᩣᩁᩣᨱᨸᩮᩣᨲ᩠ᨳᨠᩮᩈᩩ ᨶᨲ᩠ᨳᩥ] ᨶᨾᨲ᩠ᨳᩩ, ᨧᨠ᩠ᨡᩩᨾᨶ᩠ᨲᩔ ᩈᩥᩁᩦᨾᨲᩮᩣ.

ᩈᩥᨡᩥᩔᨸᩥ ᨧ [ᩍᨾᩮ ᨧᨠᩣᩁᩣ ᨸᩮᩣᩁᩣᨱᨸᩮᩣᨲ᩠ᨳᨠᩮᩈᩩ ᨶᨲ᩠ᨳᩥ] ᨶᨾᨲ᩠ᨳᩩ, ᩈᨻ᩠ᨻᨽᩪᨲᩣᨶᩩᨠᨾ᩠ᨸᩥᨶᩮᩣ.

‘‘ᩅᩮᩔᨽᩩᩔ ᨧ [ᩍᨾᩮ ᨧᨠᩣᩁᩣ ᨸᩮᩣᩁᩣᨱᨸᩮᩣᨲ᩠ᨳᨠᩮᩈᩩ ᨶᨲ᩠ᨳᩥ] ᨶᨾᨲ᩠ᨳᩩ, ᨶ᩠ᩉᩣᨲᨠᩔ ᨲᨸᩔᩥᨶᩮᩣ;

ᨶᨾᨲ᩠ᨳᩩ ᨠᨠᩩᩈᨶ᩠ᨵᩔ, ᨾᩣᩁᩈᩮᨶᩣᨸᨾᨴ᩠ᨴᩥᨶᩮᩣ.

‘‘ᨠᩮᩣᨱᩣᨣᨾᨶᩔ ᨶᨾᨲ᩠ᨳᩩ, ᨻᩕᩣᩉ᩠ᨾᨱᩔ ᩅᩩᩈᩦᨾᨲᩮᩣ;

ᨠᩔᨸᩔ ᨧ [ᩍᨾᩮ ᨧᨠᩣᩁᩣ ᨸᩮᩣᩁᩣᨱᨸᩮᩣᨲ᩠ᨳᨠᩮᩈᩩ ᨶᨲ᩠ᨳᩥ] ᨶᨾᨲ᩠ᨳᩩ, ᩅᩥᨸ᩠ᨸᨾᩩᨲ᩠ᨲᩔ ᩈᨻ᩠ᨻᨵᩥ.

‘‘ᩋᨦ᩠ᨣᩦᩁᩈᩔ ᨶᨾᨲ᩠ᨳᩩ, ᩈᨠ᩠ᨿᨸᩩᨲ᩠ᨲᩔ ᩈᩥᩁᩦᨾᨲᩮᩣ;

ᨿᩮᩣ ᩍᨾᩴ ᨵᨾ᩠ᨾᩴ ᨴᩮᩈᩮᩈᩥ [ᨵᨾ᩠ᨾᨾᨴᩮᩈᩮᩈᩥ (ᩈᩦ. ᩈ᩠ᨿᩣ. ᨸᩦ.), ᨵᨾ᩠ᨾᩴ ᨴᩮᩈᩮᨲᩥ (?)], ᩈᨻ᩠ᨻᨴᩩᨠ᩠ᨡᩣᨸᨶᩪᨴᨶᩴ.

‘‘ᨿᩮ ᨧᩣᨸᩥ ᨶᩥᨻ᩠ᨻᩩᨲᩣ ᩃᩮᩣᨠᩮ, ᨿᨳᩣᨽᩪᨲᩴ ᩅᩥᨸᩔᩥᩈᩩᩴ;

ᨲᩮ ᨩᨶᩣ ᩋᨸᩥᩈᩩᨱᩣᨳ [ᩋᨸᩥᩈᩩᨱᩣ (ᩈᩦ. ᩈ᩠ᨿᩣ. ᨸᩦ.)], ᨾᩉᨶ᩠ᨲᩣ ᩅᩦᨲᩈᩣᩁᨴᩣ.

‘‘ᩉᩥᨲᩴ ᨴᩮᩅᨾᨶᩩᩔᩣᨶᩴ, ᨿᩴ ᨶᨾᩔᨶ᩠ᨲᩥ ᨣᩮᩣᨲᨾᩴ;

ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩴ, ᨾᩉᨶ᩠ᨲᩴ ᩅᩦᨲᩈᩣᩁᨴᩴ.

᪒᪗᪘. ‘‘ᨿᨲᩮᩣ ᩏᨣ᩠ᨣᨧ᩠ᨨᨲᩥ ᩈᩪᩁᩥᨿᩮᩣ [ᩈᩩᩁᩥᨿᩮᩣ (ᩈᩦ. ᩈ᩠ᨿᩣ. ᨸᩦ.)], ᩌᨴᩥᨧ᩠ᨧᩮᩣ ᨾᨱ᩠ᨯᩃᩦ ᨾᩉᩣ.

ᨿᩔ ᨧᩩᨣ᩠ᨣᨧ᩠ᨨᨾᩣᨶᩔ, ᩈᩴᩅᩁᩦᨸᩥ ᨶᩥᩁᩩᨩ᩠ᨫᨲᩥ;

ᨿᩔ ᨧᩩᨣ᩠ᨣᨲᩮ ᩈᩪᩁᩥᨿᩮ, ‘ᨴᩥᩅᩈᩮᩣ’ᨲᩥ ᨸᩅᩩᨧ᩠ᨧᨲᩥ.

‘‘ᩁᩉᨴᩮᩣᨸᩥ ᨲᨲ᩠ᨳ ᨣᨾ᩠ᨽᩦᩁᩮᩣ, ᩈᨾᩩᨴ᩠ᨴᩮᩣ ᩈᩁᩥᨲᩮᩣᨴᨠᩮᩣ;

ᩑᩅᩴ ᨲᩴ ᨲᨲ᩠ᨳ ᨩᩣᨶᨶ᩠ᨲᩥ, ‘ᩈᨾᩩᨴ᩠ᨴᩮᩣ ᩈᩁᩥᨲᩮᩣᨴᨠᩮᩣ’.

‘‘ᩍᨲᩮᩣ ‘ᩈᩣ ᨸᩩᩁᩥᨾᩣ ᨴᩥᩈᩣ’, ᩍᨲᩥ ᨶᩴ ᩌᨧᩥᨠ᩠ᨡᨲᩦ ᨩᨶᩮᩣ;

ᨿᩴ ᨴᩥᩈᩴ ᩋᨽᩥᨸᩣᩃᩮᨲᩥ, ᨾᩉᩣᩁᩣᨩᩣ ᨿᩈᩔᩥ ᩈᩮᩣ.

‘‘ᨣᨶ᩠ᨵᨻ᩠ᨻᩣᨶᩴ ᩋᨵᩥᨸᨲᩥ [ᩌᨵᩥᨸᨲᩥ (ᩈᩦ. ᩈ᩠ᨿᩣ. ᨸᩦ.) ᩑᩅᨾᩩᨸᩁᩥᨸᩥ], ‘ᨵᨲᩁᨭ᩠ᨮᩮᩣ’ᨲᩥ ᨶᩣᨾᩈᩮᩣ;

ᩁᨾᨲᩦ ᨶᨧ᩠ᨧᨣᩦᨲᩮᩉᩥ, ᨣᨶ᩠ᨵᨻ᩠ᨻᩮᩉᩥ ᨸᩩᩁᨠ᩠ᨡᨲᩮᩣ.

‘‘ᨸᩩᨲ᩠ᨲᩣᨸᩥ ᨲᩔ ᨻᩉᩅᩮᩣ, ᩑᨠᨶᩣᨾᩣᨲᩥ ᨾᩮ ᩈᩩᨲᩴ;

ᩋᩈᩦᨲᩥ ᨴᩈ ᩑᨠᩮᩣ ᨧ, ᩍᨶ᩠ᨴᨶᩣᨾᩣ ᨾᩉᨻ᩠ᨻᩃᩣ.

ᨲᩮ ᨧᩣᨸᩥ ᨻᩩᨴ᩠ᨵᩴ ᨴᩥᩈ᩠ᩅᩣᨶ, ᨻᩩᨴ᩠ᨵᩴ ᩌᨴᩥᨧ᩠ᨧᨻᨶ᩠ᨵᩩᨶᩴ;

ᨴᩪᩁᨲᩮᩣᩅ ᨶᨾᩔᨶ᩠ᨲᩥ, ᨾᩉᨶ᩠ᨲᩴ ᩅᩦᨲᩈᩣᩁᨴᩴ.

‘‘ᨶᨾᩮᩣ ᨲᩮ ᨸᩩᩁᩥᩈᩣᨩᨬ᩠ᨬ, ᨶᨾᩮᩣ ᨲᩮ ᨸᩩᩁᩥᩈᩩᨲ᩠ᨲᨾ;

ᨠᩩᩈᩃᩮᨶ ᩈᨾᩮᨠ᩠ᨡᩈᩥ, ᩋᨾᨶᩩᩔᩣᨸᩥ ᨲᩴ ᩅᨶ᩠ᨴᨶ᩠ᨲᩥ;

ᩈᩩᨲᩴ ᨶᩮᨲᩴ ᩋᨽᩥᨱ᩠ᩉᩈᩮᩣ, ᨲᩈ᩠ᨾᩣ ᩑᩅᩴ ᩅᨴᩮᨾᩈᩮ.

‘‘‘ᨩᩥᨶᩴ ᩅᨶ᩠ᨴᨳ ᨣᩮᩣᨲᨾᩴ, ᨩᩥᨶᩴ ᩅᨶ᩠ᨴᩣᨾ ᨣᩮᩣᨲᨾᩴ;

ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩴ, ᨻᩩᨴ᩠ᨵᩴ ᩅᨶ᩠ᨴᩣᨾ ᨣᩮᩣᨲᨾᩴ’.

᪒᪗᪙. ‘‘ᨿᩮᨶ ᨸᩮᨲᩣ ᨸᩅᩩᨧ᩠ᨧᨶ᩠ᨲᩥ, ᨸᩥᩈᩩᨱᩣ ᨸᩥᨭ᩠ᨮᩥᨾᩴᩈᩥᨠᩣ.

ᨸᩣᨱᩣᨲᩥᨸᩣᨲᩥᨶᩮᩣ ᩃᩩᨴ᩠ᨴᩣ [ᩃᩩᨴ᩠ᨵᩣ (ᨸᩦ. ᨠ.)], ᨧᩮᩣᩁᩣ ᨶᩮᨠᨲᩥᨠᩣ ᨩᨶᩣ.

‘‘ᩍᨲᩮᩣ ‘ᩈᩣ ᨴᨠ᩠ᨡᩥᨱᩣ ᨴᩥᩈᩣ’, ᩍᨲᩥ ᨶᩴ ᩌᨧᩥᨠ᩠ᨡᨲᩦ ᨩᨶᩮᩣ;

ᨿᩴ ᨴᩥᩈᩴ ᩋᨽᩥᨸᩣᩃᩮᨲᩥ, ᨾᩉᩣᩁᩣᨩᩣ ᨿᩈᩔᩥ ᩈᩮᩣ.

‘‘ᨠᩩᨾ᩠ᨽᨱ᩠ᨯᩣᨶᩴ ᩋᨵᩥᨸᨲᩥ, ‘ᩅᩥᩁᩪᩊ᩠ᩉᩮᩣ’ ᩍᨲᩥ ᨶᩣᨾᩈᩮᩣ;

ᩁᨾᨲᩦ ᨶᨧ᩠ᨧᨣᩦᨲᩮᩉᩥ, ᨠᩩᨾ᩠ᨽᨱ᩠ᨯᩮᩉᩥ ᨸᩩᩁᨠ᩠ᨡᨲᩮᩣ.

‘‘ᨸᩩᨲ᩠ᨲᩣᨸᩥ ᨲᩔ ᨻᩉᩅᩮᩣ, ᩑᨠᨶᩣᨾᩣᨲᩥ ᨾᩮ ᩈᩩᨲᩴ;

ᩋᩈᩦᨲᩥ ᨴᩈ ᩑᨠᩮᩣ ᨧ, ᩍᨶ᩠ᨴᨶᩣᨾᩣ ᨾᩉᨻ᩠ᨻᩃᩣ.

ᨲᩮ ᨧᩣᨸᩥ ᨻᩩᨴ᩠ᨵᩴ ᨴᩥᩈ᩠ᩅᩣᨶ, ᨻᩩᨴ᩠ᨵᩴ ᩌᨴᩥᨧ᩠ᨧᨻᨶ᩠ᨵᩩᨶᩴ;

ᨴᩪᩁᨲᩮᩣᩅ ᨶᨾᩔᨶ᩠ᨲᩥ, ᨾᩉᨶ᩠ᨲᩴ ᩅᩦᨲᩈᩣᩁᨴᩴ.

‘‘ᨶᨾᩮᩣ ᨲᩮ ᨸᩩᩁᩥᩈᩣᨩᨬ᩠ᨬ, ᨶᨾᩮᩣ ᨲᩮ ᨸᩩᩁᩥᩈᩩᨲ᩠ᨲᨾ;

ᨠᩩᩈᩃᩮᨶ ᩈᨾᩮᨠ᩠ᨡᩈᩥ, ᩋᨾᨶᩩᩔᩣᨸᩥ ᨲᩴ ᩅᨶ᩠ᨴᨶ᩠ᨲᩥ;

ᩈᩩᨲᩴ ᨶᩮᨲᩴ ᩋᨽᩥᨱ᩠ᩉᩈᩮᩣ, ᨲᩈ᩠ᨾᩣ ᩑᩅᩴ ᩅᨴᩮᨾᩈᩮ.

‘‘‘ᨩᩥᨶᩴ ᩅᨶ᩠ᨴᨳ ᨣᩮᩣᨲᨾᩴ, ᨩᩥᨶᩴ ᩅᨶ᩠ᨴᩣᨾ ᨣᩮᩣᨲᨾᩴ;

ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩴ, ᨻᩩᨴ᩠ᨵᩴ ᩅᨶ᩠ᨴᩣᨾ ᨣᩮᩣᨲᨾᩴ’.

᪒᪘᪐. ‘‘ᨿᨲ᩠ᨳ ᨧᩮᩣᨣ᩠ᨣᨧ᩠ᨨᨲᩥ ᩈᩪᩁᩥᨿᩮᩣ, ᩌᨴᩥᨧ᩠ᨧᩮᩣ ᨾᨱ᩠ᨯᩃᩦ ᨾᩉᩣ.

ᨿᩔ ᨧᩮᩣᨣ᩠ᨣᨧ᩠ᨨᨾᩣᨶᩔ, ᨴᩥᩅᩈᩮᩣᨸᩥ ᨶᩥᩁᩩᨩ᩠ᨫᨲᩥ;

ᨿᩔ ᨧᩮᩣᨣ᩠ᨣᨲᩮ ᩈᩪᩁᩥᨿᩮ, ‘ᩈᩴᩅᩁᩦ’ᨲᩥ ᨸᩅᩩᨧ᩠ᨧᨲᩥ.

‘‘ᩁᩉᨴᩮᩣᨸᩥ ᨲᨲ᩠ᨳ ᨣᨾ᩠ᨽᩦᩁᩮᩣ, ᩈᨾᩩᨴ᩠ᨴᩮᩣ ᩈᩁᩥᨲᩮᩣᨴᨠᩮᩣ;

ᩑᩅᩴ ᨲᩴ ᨲᨲ᩠ᨳ ᨩᩣᨶᨶ᩠ᨲᩥ, ‘ᩈᨾᩩᨴ᩠ᨴᩮᩣ ᩈᩁᩥᨲᩮᩣᨴᨠᩮᩣ’.

‘‘ᩍᨲᩮᩣ ‘ᩈᩣ ᨸᨧ᩠ᨨᩥᨾᩣ ᨴᩥᩈᩣ’, ᩍᨲᩥ ᨶᩴ ᩌᨧᩥᨠ᩠ᨡᨲᩦ ᨩᨶᩮᩣ;

ᨿᩴ ᨴᩥᩈᩴ ᩋᨽᩥᨸᩣᩃᩮᨲᩥ, ᨾᩉᩣᩁᩣᨩᩣ ᨿᩈᩔᩥ ᩈᩮᩣ.

‘‘ᨶᩣᨣᩣᨶᨬ᩠ᨧ ᩋᨵᩥᨸᨲᩥ, ‘ᩅᩥᩁᩪᨸᨠ᩠ᨡᩮᩣ’ᨲᩥ ᨶᩣᨾᩈᩮᩣ;

ᩁᨾᨲᩦ ᨶᨧ᩠ᨧᨣᩦᨲᩮᩉᩥ, ᨶᩣᨣᩮᩉᩮᩅ ᨸᩩᩁᨠ᩠ᨡᨲᩮᩣ.

‘‘ᨸᩩᨲ᩠ᨲᩣᨸᩥ ᨲᩔ ᨻᩉᩅᩮᩣ, ᩑᨠᨶᩣᨾᩣᨲᩥ ᨾᩮ ᩈᩩᨲᩴ;

ᩋᩈᩦᨲᩥ ᨴᩈ ᩑᨠᩮᩣ ᨧ, ᩍᨶ᩠ᨴᨶᩣᨾᩣ ᨾᩉᨻ᩠ᨻᩃᩣ.

ᨲᩮ ᨧᩣᨸᩥ ᨻᩩᨴ᩠ᨵᩴ ᨴᩥᩈ᩠ᩅᩣᨶ, ᨻᩩᨴ᩠ᨵᩴ ᩌᨴᩥᨧ᩠ᨧᨻᨶ᩠ᨵᩩᨶᩴ;

ᨴᩪᩁᨲᩮᩣᩅ ᨶᨾᩔᨶ᩠ᨲᩥ, ᨾᩉᨶ᩠ᨲᩴ ᩅᩦᨲᩈᩣᩁᨴᩴ.

‘‘ᨶᨾᩮᩣ ᨲᩮ ᨸᩩᩁᩥᩈᩣᨩᨬ᩠ᨬ, ᨶᨾᩮᩣ ᨲᩮ ᨸᩩᩁᩥᩈᩩᨲ᩠ᨲᨾ;

ᨠᩩᩈᩃᩮᨶ ᩈᨾᩮᨠ᩠ᨡᩈᩥ, ᩋᨾᨶᩩᩔᩣᨸᩥ ᨲᩴ ᩅᨶ᩠ᨴᨶ᩠ᨲᩥ;

ᩈᩩᨲᩴ ᨶᩮᨲᩴ ᩋᨽᩥᨱ᩠ᩉᩈᩮᩣ, ᨲᩈ᩠ᨾᩣ ᩑᩅᩴ ᩅᨴᩮᨾᩈᩮ.

‘‘‘ᨩᩥᨶᩴ ᩅᨶ᩠ᨴᨳ ᨣᩮᩣᨲᨾᩴ, ᨩᩥᨶᩴ ᩅᨶ᩠ᨴᩣᨾ ᨣᩮᩣᨲᨾᩴ;

ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩴ, ᨻᩩᨴ᩠ᨵᩴ ᩅᨶ᩠ᨴᩣᨾ ᨣᩮᩣᨲᨾᩴ’.

᪒᪘᪑. ‘‘ᨿᩮᨶ ᩏᨲ᩠ᨲᩁᨠᩩᩁᩩᩅ᩠ᩉᩮᩣ [ᩏᨲ᩠ᨲᩁᨠᩩᩁᩪ ᩁᨾ᩠ᨾᩣ (ᩈᩦ. ᩈ᩠ᨿᩣ. ᨸᩦ.)], ᨾᩉᩣᨶᩮᩁᩩ ᩈᩩᨴᩔᨶᩮᩣ.

ᨾᨶᩩᩔᩣ ᨲᨲ᩠ᨳ ᨩᩣᨿᨶ᩠ᨲᩥ, ᩋᨾᨾᩣ ᩋᨸᩁᩥᨣ᩠ᨣᩉᩣ.

‘‘ᨶ ᨲᩮ ᨻᩦᨩᩴ ᨸᩅᨸᨶ᩠ᨲᩥ, ᨶᨸᩥ ᨶᩦᨿᨶ᩠ᨲᩥ ᨶᨦ᩠ᨣᩃᩣ;

ᩋᨠᨭ᩠ᨮᨸᩣᨠᩥᨾᩴ ᩈᩣᩃᩥᩴ, ᨸᩁᩥᨽᩩᨬ᩠ᨩᨶ᩠ᨲᩥ ᨾᩣᨶᩩᩈᩣ.

‘‘ᩋᨠᨱᩴ ᩋᨳᩩᩈᩴ ᩈᩩᨴ᩠ᨵᩴ, ᩈᩩᨣᨶ᩠ᨵᩴ ᨲᨱ᩠ᨯᩩᩃᨸ᩠ᨹᩃᩴ;

ᨲᩩᨱ᩠ᨯᩥᨠᩦᩁᩮ ᨸᨧᩥᨲ᩠ᩅᩣᨶ, ᨲᨲᩮᩣ ᨽᩩᨬ᩠ᨩᨶ᩠ᨲᩥ ᨽᩮᩣᨩᨶᩴ.

‘‘ᨣᩣᩅᩥᩴ ᩑᨠᨡᩩᩁᩴ ᨠᨲ᩠ᩅᩣ, ᩋᨶᩩᨿᨶ᩠ᨲᩥ ᨴᩥᩈᩮᩣᨴᩥᩈᩴ;

ᨸᩈᩩᩴ ᩑᨠᨡᩩᩁᩴ ᨠᨲ᩠ᩅᩣ, ᩋᨶᩩᨿᨶ᩠ᨲᩥ ᨴᩥᩈᩮᩣᨴᩥᩈᩴ.

‘‘ᩍᨲ᩠ᨳᩥᩴ ᩅᩣ ᩅᩣᩉᨶᩴ [ᩍᨲ᩠ᨳᩦ-ᩅᩣᩉᨶᩴ (ᩈᩦ. ᨸᩦ.), ᩍᨲ᩠ᨳᩦᩴ ᩅᩣᩉᨶᩴ (ᩈ᩠ᨿᩣ.)] ᨠᨲ᩠ᩅᩣ, ᩋᨶᩩᨿᨶ᩠ᨲᩥ ᨴᩥᩈᩮᩣᨴᩥᩈᩴ;

ᨸᩩᩁᩥᩈᩴ ᩅᩣᩉᨶᩴ ᨠᨲ᩠ᩅᩣ, ᩋᨶᩩᨿᨶ᩠ᨲᩥ ᨴᩥᩈᩮᩣᨴᩥᩈᩴ.

‘‘ᨠᩩᨾᩣᩁᩥᩴ ᩅᩣᩉᨶᩴ ᨠᨲ᩠ᩅᩣ, ᩋᨶᩩᨿᨶ᩠ᨲᩥ ᨴᩥᩈᩮᩣᨴᩥᩈᩴ;

ᨠᩩᨾᩣᩁᩴ ᩅᩣᩉᨶᩴ ᨠᨲ᩠ᩅᩣ, ᩋᨶᩩᨿᨶ᩠ᨲᩥ ᨴᩥᩈᩮᩣᨴᩥᩈᩴ.

‘‘ᨲᩮ ᨿᩣᨶᩮ ᩋᨽᩥᩁᩩᩉᩥᨲ᩠ᩅᩣ,

ᩈᨻ᩠ᨻᩣ ᨴᩥᩈᩣ ᩋᨶᩩᨸᩁᩥᨿᩣᨿᨶ᩠ᨲᩥ [ᩋᨶᩩᨸᩁᩥᨿᨶ᩠ᨲᩥ (ᩈ᩠ᨿᩣ.)];

ᨸᨧᩣᩁᩣ ᨲᩔ ᩁᩣᨩᩥᨶᩮᩣ.

‘‘ᩉᨲ᩠ᨳᩥᨿᩣᨶᩴ ᩋᩔᨿᩣᨶᩴ, ᨴᩥᨻ᩠ᨻᩴ ᨿᩣᨶᩴ ᩏᨸᨭ᩠ᨮᩥᨲᩴ;

ᨸᩣᩈᩣᨴᩣ ᩈᩥᩅᩥᨠᩣ ᨧᩮᩅ, ᨾᩉᩣᩁᩣᨩᩔ ᨿᩈᩔᩥᨶᩮᩣ.

‘‘ᨲᩔ ᨧ ᨶᨣᩁᩣ ᩋᩉᩩ,

ᩋᨶ᩠ᨲᩃᩥᨠ᩠ᨡᩮ ᩈᩩᨾᩣᨸᩥᨲᩣ;

ᩌᨭᩣᨶᩣᨭᩣ ᨠᩩᩈᩥᨶᩣᨭᩣ ᨸᩁᨠᩩᩈᩥᨶᩣᨭᩣ,

ᨶᩣᨭᩈᩩᩁᩥᨿᩣ [ᨶᩣᨭᨸᩩᩁᩥᨿᩣ (ᩈᩦ. ᨸᩦ.), ᨶᩣᨭᨸᩁᩥᨿᩣ (ᩈ᩠ᨿᩣ.)] ᨸᩁᨠᩩᩈᩥᨭᨶᩣᨭᩣ.

‘‘ᩏᨲ᩠ᨲᩁᩮᨶ ᨠᩈᩥᩅᨶ᩠ᨲᩮᩣ [ᨠᨸᩥᩅᨶ᩠ᨲᩮᩣ (ᩈᩦ. ᩈ᩠ᨿᩣ. ᨸᩦ)],

ᨩᨶᩮᩣᨥᨾᨸᩁᩮᨶ ᨧ;

ᨶᩅᨶᩅᩩᨲᩥᨿᩮᩣ ᩋᨾ᩠ᨻᩁᩋᨾ᩠ᨻᩁᩅᨲᩥᨿᩮᩣ,

ᩌᩊᨠᨾᨶ᩠ᨴᩣ ᨶᩣᨾ ᩁᩣᨩᨵᩣᨶᩦ.

‘‘ᨠᩩᩅᩮᩁᩔ ᨡᩮᩣ ᨸᨶ, ᨾᩣᩁᩥᩈ, ᨾᩉᩣᩁᩣᨩᩔ ᩅᩥᩈᩣᨱᩣ ᨶᩣᨾ ᩁᩣᨩᨵᩣᨶᩦ;

ᨲᩈ᩠ᨾᩣ ᨠᩩᩅᩮᩁᩮᩣ ᨾᩉᩣᩁᩣᨩᩣ, ‘ᩅᩮᩔᩅᨱᩮᩣ’ᨲᩥ ᨸᩅᩩᨧ᩠ᨧᨲᩥ.

‘‘ᨸᨧ᩠ᨧᩮᩈᨶ᩠ᨲᩮᩣ ᨸᨠᩣᩈᩮᨶ᩠ᨲᩥ, ᨲᨲᩮᩣᩃᩣ ᨲᨲ᩠ᨲᩃᩣ ᨲᨲᩮᩣᨲᩃᩣ;

ᩒᨩᩈᩥ ᨲᩮᨩᩈᩥ ᨲᨲᩮᩣᨩᩈᩦ, ᩈᩪᩁᩮᩣ ᩁᩣᨩᩣ ᩋᩁᩥᨭ᩠ᨮᩮᩣ ᨶᩮᨾᩥ.

‘‘ᩁᩉᨴᩮᩣᨸᩥ ᨲᨲ᩠ᨳ ᨵᩁᨱᩦ ᨶᩣᨾ, ᨿᨲᩮᩣ ᨾᩮᨥᩣ ᨸᩅᩔᨶ᩠ᨲᩥ;

ᩅᩔᩣ ᨿᨲᩮᩣ ᨸᨲᩣᨿᨶ᩠ᨲᩥ, ᩈᨽᩣᨸᩥ ᨲᨲ᩠ᨳ ᩈᩣᩃᩅᨲᩦ [ᨽᨣᩃᩅᨲᩦ (ᩈᩦ. ᩈ᩠ᨿᩣ. ᨸᩦ.)] ᨶᩣᨾ.

‘‘ᨿᨲ᩠ᨳ ᨿᨠ᩠ᨡᩣ ᨸᨿᩥᩁᩩᨸᩣᩈᨶ᩠ᨲᩥ, ᨲᨲ᩠ᨳ ᨶᩥᨧ᩠ᨧᨹᩃᩣ ᩁᩩᨠ᩠ᨡᩣ;

ᨶᩣᨶᩣ ᨴᩥᨩᨣᨱᩣ ᨿᩩᨲᩣ, ᨾᨿᩪᩁᨠᩮᩣᨬ᩠ᨧᩣᨽᩥᩁᩩᨴᩣ;

ᨠᩮᩣᨠᩥᩃᩣᨴᩦᩉᩥ ᩅᨣ᩠ᨣᩩᩉᩥ.

‘‘ᨩᩦᩅᨬ᩠ᨩᩦᩅᨠᩈᨴ᩠ᨴᩮᨲ᩠ᨳ, ᩋᨳᩮᩣ ᩒᨭ᩠ᨮᩅᨧᩥᨲ᩠ᨲᨠᩣ;

ᨠᩩᨠ᩠ᨠᩩᨭᨠᩣ [ᨠᩩᨠᩩᨲ᩠ᨳᨠᩣ (ᩈᩦ. ᨸᩦ.)] ᨠᩩᩊᩦᩁᨠᩣ, ᩅᨶᩮ ᨸᩮᩣᨠ᩠ᨡᩁᩈᩣᨲᨠᩣ.

‘‘ᩈᩩᨠᩈᩣᩊᩥᨠᩈᨴ᩠ᨴᩮᨲ᩠ᨳ, ᨴᨱ᩠ᨯᨾᩣᨱᩅᨠᩣᨶᩥ ᨧ;

ᩈᩮᩣᨽᨲᩥ ᩈᨻ᩠ᨻᨠᩣᩃᩴ ᩈᩣ, ᨠᩩᩅᩮᩁᨶᩊᩥᨶᩦ ᩈᨴᩣ.

‘‘ᩍᨲᩮᩣ ‘ᩈᩣ ᩏᨲ᩠ᨲᩁᩣ ᨴᩥᩈᩣ’, ᩍᨲᩥ ᨶᩴ ᩌᨧᩥᨠ᩠ᨡᨲᩦ ᨩᨶᩮᩣ;

ᨿᩴ ᨴᩥᩈᩴ ᩋᨽᩥᨸᩣᩃᩮᨲᩥ, ᨾᩉᩣᩁᩣᨩᩣ ᨿᩈᩔᩥ ᩈᩮᩣ.

‘‘ᨿᨠ᩠ᨡᩣᨶᨬ᩠ᨧ ᩋᨵᩥᨸᨲᩥ, ‘ᨠᩩᩅᩮᩁᩮᩣ’ ᩍᨲᩥ ᨶᩣᨾᩈᩮᩣ;

ᩁᨾᨲᩦ ᨶᨧ᩠ᨧᨣᩦᨲᩮᩉᩥ, ᨿᨠ᩠ᨡᩮᩉᩮᩅ ᨸᩩᩁᨠ᩠ᨡᨲᩮᩣ.

‘‘ᨸᩩᨲ᩠ᨲᩣᨸᩥ ᨲᩔ ᨻᩉᩅᩮᩣ, ᩑᨠᨶᩣᨾᩣᨲᩥ ᨾᩮ ᩈᩩᨲᩴ;

ᩋᩈᩦᨲᩥ ᨴᩈ ᩑᨠᩮᩣ ᨧ, ᩍᨶ᩠ᨴᨶᩣᨾᩣ ᨾᩉᨻ᩠ᨻᩃᩣ.

‘‘ᨲᩮ ᨧᩣᨸᩥ ᨻᩩᨴ᩠ᨵᩴ ᨴᩥᩈ᩠ᩅᩣᨶ, ᨻᩩᨴ᩠ᨵᩴ ᩌᨴᩥᨧ᩠ᨧᨻᨶ᩠ᨵᩩᨶᩴ;

ᨴᩪᩁᨲᩮᩣᩅ ᨶᨾᩔᨶ᩠ᨲᩥ, ᨾᩉᨶ᩠ᨲᩴ ᩅᩦᨲᩈᩣᩁᨴᩴ.

‘‘ᨶᨾᩮᩣ ᨲᩮ ᨸᩩᩁᩥᩈᩣᨩᨬ᩠ᨬ, ᨶᨾᩮᩣ ᨲᩮ ᨸᩩᩁᩥᩈᩩᨲ᩠ᨲᨾ;

ᨠᩩᩈᩃᩮᨶ ᩈᨾᩮᨠ᩠ᨡᩈᩥ, ᩋᨾᨶᩩᩔᩣᨸᩥ ᨲᩴ ᩅᨶ᩠ᨴᨶ᩠ᨲᩥ;

ᩈᩩᨲᩴ ᨶᩮᨲᩴ ᩋᨽᩥᨱ᩠ᩉᩈᩮᩣ, ᨲᩈ᩠ᨾᩣ ᩑᩅᩴ ᩅᨴᩮᨾᩈᩮ.

‘‘‘ᨩᩥᨶᩴ ᩅᨶ᩠ᨴᨳ ᨣᩮᩣᨲᨾᩴ, ᨩᩥᨶᩴ ᩅᨶ᩠ᨴᩣᨾ ᨣᩮᩣᨲᨾᩴ;

ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩴ, ᨻᩩᨴ᩠ᨵᩴ ᩅᨶ᩠ᨴᩣᨾ ᨣᩮᩣᨲᨾ’’’ᨶ᩠ᨲᩥ.

‘‘ᩋᨿᩴ ᨡᩮᩣ ᩈᩣ, ᨾᩣᩁᩥᩈ, ᩌᨭᩣᨶᩣᨭᩥᨿᩣ ᩁᨠ᩠ᨡᩣ ᨽᩥᨠ᩠ᨡᩪᨶᩴ ᨽᩥᨠ᩠ᨡᩩᨶᩦᨶᩴ ᩏᨸᩣᩈᨠᩣᨶᩴ ᩏᨸᩣᩈᩥᨠᩣᨶᩴ ᨣᩩᨲ᩠ᨲᩥᨿᩣ ᩁᨠ᩠ᨡᩣᨿ ᩋᩅᩥᩉᩥᩴᩈᩣᨿ ᨹᩣᩈᩩᩅᩥᩉᩣᩁᩣᨿ.

᪒᪘᪒. ‘‘ᨿᩔ ᨠᩔᨧᩥ, ᨾᩣᩁᩥᩈ, ᨽᩥᨠ᩠ᨡᩩᩔ ᩅᩣ ᨽᩥᨠ᩠ᨡᩩᨶᩥᨿᩣ ᩅᩣ ᩏᨸᩣᩈᨠᩔ ᩅᩣ ᩏᨸᩣᩈᩥᨠᩣᨿ ᩅᩣ ᩋᨿᩴ ᩌᨭᩣᨶᩣᨭᩥᨿᩣ ᩁᨠ᩠ᨡᩣ ᩈᩩᨣ᩠ᨣᩉᩥᨲᩣ ᨽᩅᩥᩔᨲᩥ ᩈᨾᨲ᩠ᨲᩣ ᨸᩁᩥᨿᩣᨸᩩᨲᩣ [ᨸᩁᩥᨿᩣᨸᩩᨭᩣ (ᨠ.)]. ᨲᩴ ᨧᩮ ᩋᨾᨶᩩᩔᩮᩣ ᨿᨠ᩠ᨡᩮᩣ ᩅᩣ ᨿᨠ᩠ᨡᩥᨶᩦ ᩅᩣ ᨿᨠ᩠ᨡᨸᩮᩣᨲᨠᩮᩣ ᩅᩣ ᨿᨠ᩠ᨡᨸᩮᩣᨲᩥᨠᩣ ᩅᩣ ᨿᨠ᩠ᨡᨾᩉᩣᨾᨲ᩠ᨲᩮᩣ ᩅᩣ ᨿᨠ᩠ᨡᨸᩣᩁᩥᩈᨩ᩠ᨩᩮᩣ ᩅᩣ ᨿᨠ᩠ᨡᨸᨧᩣᩁᩮᩣ ᩅᩣ, ᨣᨶ᩠ᨵᨻ᩠ᨻᩮᩣ ᩅᩣ ᨣᨶ᩠ᨵᨻ᩠ᨻᩦ ᩅᩣ ᨣᨶ᩠ᨵᨻ᩠ᨻᨸᩮᩣᨲᨠᩮᩣ ᩅᩣ ᨣᨶ᩠ᨵᨻ᩠ᨻᨸᩮᩣᨲᩥᨠᩣ ᩅᩣ ᨣᨶ᩠ᨵᨻ᩠ᨻᨾᩉᩣᨾᨲ᩠ᨲᩮᩣ ᩅᩣ ᨣᨶ᩠ᨵᨻ᩠ᨻᨸᩣᩁᩥᩈᨩ᩠ᨩᩮᩣ ᩅᩣ ᨣᨶ᩠ᨵᨻ᩠ᨻᨸᨧᩣᩁᩮᩣ ᩅᩣ, ᨠᩩᨾ᩠ᨽᨱ᩠ᨯᩮᩣ ᩅᩣ ᨠᩩᨾ᩠ᨽᨱ᩠ᨯᩦ ᩅᩣ ᨠᩩᨾ᩠ᨽᨱ᩠ᨯᨸᩮᩣᨲᨠᩮᩣ ᩅᩣ ᨠᩩᨾ᩠ᨽᨱ᩠ᨯᨸᩮᩣᨲᩥᨠᩣ ᩅᩣ ᨠᩩᨾ᩠ᨽᨱ᩠ᨯᨾᩉᩣᨾᨲ᩠ᨲᩮᩣ ᩅᩣ ᨠᩩᨾ᩠ᨽᨱ᩠ᨯᨸᩣᩁᩥᩈᨩ᩠ᨩᩮᩣ ᩅᩣ ᨠᩩᨾ᩠ᨽᨱ᩠ᨯᨸᨧᩣᩁᩮᩣ ᩅᩣ, ᨶᩣᨣᩮᩣ ᩅᩣ ᨶᩣᨣᩦ ᩅᩣ ᨶᩣᨣᨸᩮᩣᨲᨠᩮᩣ ᩅᩣ ᨶᩣᨣᨸᩮᩣᨲᩥᨠᩣ ᩅᩣ ᨶᩣᨣᨾᩉᩣᨾᨲ᩠ᨲᩮᩣ ᩅᩣ ᨶᩣᨣᨸᩣᩁᩥᩈᨩ᩠ᨩᩮᩣ ᩅᩣ ᨶᩣᨣᨸᨧᩣᩁᩮᩣ ᩅᩣ, ᨸᨴᩩᨭ᩠ᨮᨧᩥᨲ᩠ᨲᩮᩣ ᨽᩥᨠ᩠ᨡᩩᩴ ᩅᩣ ᨽᩥᨠ᩠ᨡᩩᨶᩥᩴ ᩅᩣ ᩏᨸᩣᩈᨠᩴ ᩅᩣ ᩏᨸᩣᩈᩥᨠᩴ ᩅᩣ ᨣᨧ᩠ᨨᨶ᩠ᨲᩴ ᩅᩣ ᩋᨶᩩᨣᨧ᩠ᨨᩮᨿ᩠ᨿ, ᨮᩥᨲᩴ ᩅᩣ ᩏᨸᨲᩥᨭ᩠ᨮᩮᨿ᩠ᨿ, ᨶᩥᩈᩥᨶ᩠ᨶᩴ ᩅᩣ ᩏᨸᨶᩥᩈᩦᨴᩮᨿ᩠ᨿ, ᨶᩥᨸᨶ᩠ᨶᩴ ᩅᩣ ᩏᨸᨶᩥᨸᨩ᩠ᨩᩮᨿ᩠ᨿ. ᨶ ᨾᩮ ᩈᩮᩣ, ᨾᩣᩁᩥᩈ, ᩋᨾᨶᩩᩔᩮᩣ ᩃᨽᩮᨿ᩠ᨿ ᨣᩣᨾᩮᩈᩩ ᩅᩣ ᨶᩥᨣᨾᩮᩈᩩ ᩅᩣ ᩈᨠ᩠ᨠᩣᩁᩴ ᩅᩣ ᨣᩁᩩᨠᩣᩁᩴ ᩅᩣ. ᨶ ᨾᩮ ᩈᩮᩣ, ᨾᩣᩁᩥᩈ, ᩋᨾᨶᩩᩔᩮᩣ ᩃᨽᩮᨿ᩠ᨿ ᩌᩊᨠᨾᨶ᩠ᨴᩣᨿ ᨶᩣᨾ ᩁᩣᨩᨵᩣᨶᩥᨿᩣ ᩅᨲ᩠ᨳᩩᩴ ᩅᩣ ᩅᩣᩈᩴ ᩅᩣ. ᨶ ᨾᩮ ᩈᩮᩣ, ᨾᩣᩁᩥᩈ, ᩋᨾᨶᩩᩔᩮᩣ ᩃᨽᩮᨿ᩠ᨿ ᨿᨠ᩠ᨡᩣᨶᩴ ᩈᨾᩥᨲᩥᩴ ᨣᨶ᩠ᨲᩩᩴ. ᩋᨸᩥᩔᩩ ᨶᩴ, ᨾᩣᩁᩥᩈ, ᩋᨾᨶᩩᩔᩣ ᩋᨶᩣᩅᨿ᩠ᩉᨾ᩠ᨸᩥ ᨶᩴ ᨠᩁᩮᨿ᩠ᨿᩩᩴ ᩋᩅᩥᩅᨿ᩠ᩉᩴ. ᩋᨸᩥᩔᩩ ᨶᩴ, ᨾᩣᩁᩥᩈ, ᩋᨾᨶᩩᩔᩣ ᩋᨲ᩠ᨲᩣᩉᩥᨸᩥ ᨸᩁᩥᨸᩩᨱ᩠ᨱᩣᩉᩥ ᨸᩁᩥᨽᩣᩈᩣᩉᩥ ᨸᩁᩥᨽᩣᩈᩮᨿ᩠ᨿᩩᩴ. ᩋᨸᩥᩔᩩ ᨶᩴ, ᨾᩣᩁᩥᩈ, ᩋᨾᨶᩩᩔᩣ ᩁᩥᨲ᩠ᨲᩴᨸᩥᩔ ᨸᨲ᩠ᨲᩴ ᩈᩦᩈᩮ ᨶᩥᨠ᩠ᨠᩩᨩ᩠ᨩᩮᨿ᩠ᨿᩩᩴ. ᩋᨸᩥᩔᩩ ᨶᩴ, ᨾᩣᩁᩥᩈ, ᩋᨾᨶᩩᩔᩣ ᩈᨲ᩠ᨲᨵᩣᨸᩥᩔ ᨾᩩᨴ᩠ᨵᩴ ᨹᩣᩃᩮᨿ᩠ᨿᩩᩴ.

‘‘ᩈᨶ᩠ᨲᩥ ᩉᩥ, ᨾᩣᩁᩥᩈ, ᩋᨾᨶᩩᩔᩣ ᨧᨱ᩠ᨯᩣ ᩁᩩᨴ᩠ᨵᩣ [ᩁᩩᨴ᩠ᨴᩣ (ᩈᩦ. ᨸᩦ.)] ᩁᨽᩈᩣ, ᨲᩮ ᨶᩮᩅ ᨾᩉᩣᩁᩣᨩᩣᨶᩴ ᩌᨴᩥᨿᨶ᩠ᨲᩥ, ᨶ ᨾᩉᩣᩁᩣᨩᩣᨶᩴ ᨸᩩᩁᩥᩈᨠᩣᨶᩴ ᩌᨴᩥᨿᨶ᩠ᨲᩥ, ᨶ ᨾᩉᩣᩁᩣᨩᩣᨶᩴ ᨸᩩᩁᩥᩈᨠᩣᨶᩴ ᨸᩩᩁᩥᩈᨠᩣᨶᩴ ᩌᨴᩥᨿᨶ᩠ᨲᩥ. ᨲᩮ ᨡᩮᩣ ᨲᩮ, ᨾᩣᩁᩥᩈ, ᩋᨾᨶᩩᩔᩣ ᨾᩉᩣᩁᩣᨩᩣᨶᩴ ᩋᩅᩁᩩᨴ᩠ᨵᩣ ᨶᩣᨾ ᩅᩩᨧ᩠ᨧᨶ᩠ᨲᩥ. ᩈᩮᨿ᩠ᨿᨳᩣᨸᩥ, ᨾᩣᩁᩥᩈ, ᩁᨬ᩠ᨬᩮᩣ ᨾᩣᨣᨵᩔ ᩅᩥᨩᩥᨲᩮ ᨾᩉᩣᨧᩮᩣᩁᩣ. ᨲᩮ ᨶᩮᩅ ᩁᨬ᩠ᨬᩮᩣ ᨾᩣᨣᨵᩔ ᩌᨴᩥᨿᨶ᩠ᨲᩥ, ᨶ ᩁᨬ᩠ᨬᩮᩣ ᨾᩣᨣᨵᩔ ᨸᩩᩁᩥᩈᨠᩣᨶᩴ ᩌᨴᩥᨿᨶ᩠ᨲᩥ, ᨶ ᩁᨬ᩠ᨬᩮᩣ ᨾᩣᨣᨵᩔ ᨸᩩᩁᩥᩈᨠᩣᨶᩴ ᨸᩩᩁᩥᩈᨠᩣᨶᩴ ᩌᨴᩥᨿᨶ᩠ᨲᩥ. ᨲᩮ ᨡᩮᩣ ᨲᩮ, ᨾᩣᩁᩥᩈ, ᨾᩉᩣᨧᩮᩣᩁᩣ ᩁᨬ᩠ᨬᩮᩣ ᨾᩣᨣᨵᩔ ᩋᩅᩁᩩᨴ᩠ᨵᩣ ᨶᩣᨾ ᩅᩩᨧ᩠ᨧᨶ᩠ᨲᩥ. ᩑᩅᨾᩮᩅ ᨡᩮᩣ, ᨾᩣᩁᩥᩈ, ᩈᨶ᩠ᨲᩥ ᩋᨾᨶᩩᩔᩣ ᨧᨱ᩠ᨯᩣ ᩁᩩᨴ᩠ᨵᩣ ᩁᨽᩈᩣ, ᨲᩮ ᨶᩮᩅ ᨾᩉᩣᩁᩣᨩᩣᨶᩴ ᩌᨴᩥᨿᨶ᩠ᨲᩥ, ᨶ ᨾᩉᩣᩁᩣᨩᩣᨶᩴ ᨸᩩᩁᩥᩈᨠᩣᨶᩴ ᩌᨴᩥᨿᨶ᩠ᨲᩥ, ᨶ ᨾᩉᩣᩁᩣᨩᩣᨶᩴ ᨸᩩᩁᩥᩈᨠᩣᨶᩴ ᨸᩩᩁᩥᩈᨠᩣᨶᩴ ᩌᨴᩥᨿᨶ᩠ᨲᩥ. ᨲᩮ ᨡᩮᩣ ᨲᩮ, ᨾᩣᩁᩥᩈ, ᩋᨾᨶᩩᩔᩣ ᨾᩉᩣᩁᩣᨩᩣᨶᩴ ᩋᩅᩁᩩᨴ᩠ᨵᩣ ᨶᩣᨾ ᩅᩩᨧ᩠ᨧᨶ᩠ᨲᩥ. ᨿᩮᩣ ᩉᩥ ᨠᩮᩣᨧᩥ, ᨾᩣᩁᩥᩈ, ᩋᨾᨶᩩᩔᩮᩣ ᨿᨠ᩠ᨡᩮᩣ ᩅᩣ ᨿᨠ᩠ᨡᩥᨶᩦ ᩅᩣ…ᨸᩮ… ᨣᨶ᩠ᨵᨻ᩠ᨻᩮᩣ ᩅᩣ ᨣᨶ᩠ᨵᨻ᩠ᨻᩦ ᩅᩣ … ᨠᩩᨾ᩠ᨽᨱ᩠ᨯᩮᩣ ᩅᩣ ᨠᩩᨾ᩠ᨽᨱ᩠ᨯᩦ ᩅᩣ… ᨶᩣᨣᩮᩣ ᩅᩣ ᨶᩣᨣᩦ ᩅᩣ ᨶᩣᨣᨸᩮᩣᨲᨠᩮᩣ ᩅᩣ ᨶᩣᨣᨸᩮᩣᨲᩥᨠᩣ ᩅᩣ ᨶᩣᨣᨾᩉᩣᨾᨲ᩠ᨲᩮᩣ ᩅᩣ ᨶᩣᨣᨸᩣᩁᩥᩈᨩ᩠ᨩᩮᩣ ᩅᩣ ᨶᩣᨣᨸᨧᩣᩁᩮᩣ ᩅᩣ ᨸᨴᩩᨭ᩠ᨮᨧᩥᨲ᩠ᨲᩮᩣ ᨽᩥᨠ᩠ᨡᩩᩴ ᩅᩣ ᨽᩥᨠ᩠ᨡᩩᨶᩥᩴ ᩅᩣ ᩏᨸᩣᩈᨠᩴ ᩅᩣ ᩏᨸᩣᩈᩥᨠᩴ ᩅᩣ ᨣᨧ᩠ᨨᨶ᩠ᨲᩴ ᩅᩣ ᩋᨶᩩᨣᨧ᩠ᨨᩮᨿ᩠ᨿ, ᨮᩥᨲᩴ ᩅᩣ ᩏᨸᨲᩥᨭ᩠ᨮᩮᨿ᩠ᨿ, ᨶᩥᩈᩥᨶ᩠ᨶᩴ ᩅᩣ ᩏᨸᨶᩥᩈᩦᨴᩮᨿ᩠ᨿ, ᨶᩥᨸᨶ᩠ᨶᩴ ᩅᩣ ᩏᨸᨶᩥᨸᨩ᩠ᨩᩮᨿ᩠ᨿ. ᩍᨾᩮᩈᩴ ᨿᨠ᩠ᨡᩣᨶᩴ ᨾᩉᩣᨿᨠ᩠ᨡᩣᨶᩴ ᩈᩮᨶᩣᨸᨲᩦᨶᩴ ᨾᩉᩣᩈᩮᨶᩣᨸᨲᩦᨶᩴ ᩏᨩ᩠ᨫᩣᨸᩮᨲᨻ᩠ᨻᩴ ᩅᩥᨠ᩠ᨠᨶ᩠ᨴᩥᨲᨻ᩠ᨻᩴ ᩅᩥᩁᩅᩥᨲᨻ᩠ᨻᩴ – ‘ᩋᨿᩴ ᨿᨠ᩠ᨡᩮᩣ ᨣᨱ᩠ᩉᩣᨲᩥ, ᩋᨿᩴ ᨿᨠ᩠ᨡᩮᩣ ᩌᩅᩥᩈᨲᩥ, ᩋᨿᩴ ᨿᨠ᩠ᨡᩮᩣ ᩉᩮᨮᩮᨲᩥ, ᩋᨿᩴ ᨿᨠ᩠ᨡᩮᩣ ᩅᩥᩉᩮᨮᩮᨲᩥ, ᩋᨿᩴ ᨿᨠ᩠ᨡᩮᩣ ᩉᩥᩴᩈᨲᩥ, ᩋᨿᩴ ᨿᨠ᩠ᨡᩮᩣ ᩅᩥᩉᩥᩴᩈᨲᩥ, ᩋᨿᩴ ᨿᨠ᩠ᨡᩮᩣ ᨶ ᨾᩩᨬ᩠ᨧᨲᩦ’ᨲᩥ.

᪒᪘᪓. ‘‘ᨠᨲᨾᩮᩈᩴ ᨿᨠ᩠ᨡᩣᨶᩴ ᨾᩉᩣᨿᨠ᩠ᨡᩣᨶᩴ ᩈᩮᨶᩣᨸᨲᩦᨶᩴ ᨾᩉᩣᩈᩮᨶᩣᨸᨲᩦᨶᩴ?

‘‘ᩍᨶ᩠ᨴᩮᩣ ᩈᩮᩣᨾᩮᩣ ᩅᩁᩩᨱᩮᩣ ᨧ, ᨽᩣᩁᨴ᩠ᩅᩣᨩᩮᩣ ᨸᨩᩣᨸᨲᩥ;

ᨧᨶ᩠ᨴᨶᩮᩣ ᨠᩣᨾᩈᩮᨭ᩠ᨮᩮᩣ ᨧ, ᨠᩥᨶ᩠ᨶᩩᨥᨱ᩠ᨯᩩ ᨶᩥᨥᨱ᩠ᨯᩩ ᨧ.

‘‘ᨸᨶᩣᨴᩮᩣ ᩒᨸᨾᨬ᩠ᨬᩮᩣ ᨧ, ᨴᩮᩅᩈᩪᨲᩮᩣ ᨧ ᨾᩣᨲᩃᩥ;

ᨧᩥᨲ᩠ᨲᩈᩮᨶᩮᩣ ᨧ ᨣᨶ᩠ᨵᨻ᩠ᨻᩮᩣ, ᨶᩊᩮᩣ ᩁᩣᨩᩣ ᨩᨶᩮᩈᨽᩮᩣ [ᨩᨶᩮᩣᩈᨽᩮᩣ (ᩈ᩠ᨿᩣ.)].

‘‘ᩈᩣᨲᩣᨣᩥᩁᩮᩣ ᩉᩮᨾᩅᨲᩮᩣ, ᨸᩩᨱ᩠ᨱᨠᩮᩣ ᨠᩁᨲᩥᨿᩮᩣ ᨣᩩᩊᩮᩣ;

ᩈᩥᩅᨠᩮᩣ ᨾᩩᨧᩃᩥᨶ᩠ᨴᩮᩣ ᨧ, ᩅᩮᩔᩣᨾᩥᨲ᩠ᨲᩮᩣ ᨿᩩᨣᨶ᩠ᨵᩁᩮᩣ.

‘‘ᨣᩮᩣᨸᩣᩃᩮᩣ ᩈᩩᨸ᩠ᨸᩁᩮᩣᨵᩮᩣ ᨧ [ᩈᩩᨸ᩠ᨸᨣᩮᨵᩮᩣ ᨧ (ᩈᩦ. ᩈ᩠ᨿᩣ. ᨸᩦ.)], ᩉᩥᩁᩥ ᨶᩮᨲ᩠ᨲᩥ [ᩉᩥᩁᩦ ᨶᩮᨲ᩠ᨲᩦ (ᩈᩦ. ᨸᩦ.)] ᨧ ᨾᨶ᩠ᨴᩥᨿᩮᩣ;

ᨸᨬ᩠ᨧᩣᩃᨧᨱ᩠ᨯᩮᩣ ᩌᩊᩅᨠᩮᩣ, ᨸᨩ᩠ᨩᩩᨶ᩠ᨶᩮᩣ ᩈᩩᨾᨶᩮᩣ ᩈᩩᨾᩩᨡᩮᩣ;

ᨴᨵᩥᨾᩩᨡᩮᩣ ᨾᨱᩥ ᨾᩣᨱᩥᩅᩁᩮᩣ [ᨾᨱᩥ ᨾᩣᨶᩥᨧᩁᩮᩣ (ᩈ᩠ᨿᩣ. ᨸᩦ.)] ᨴᩦᨥᩮᩣ, ᩋᨳᩮᩣ ᩈᩮᩁᩦᩈᨠᩮᩣ ᩈᩉ.

‘‘ᩍᨾᩮᩈᩴ ᨿᨠ᩠ᨡᩣᨶᩴ ᨾᩉᩣᨿᨠ᩠ᨡᩣᨶᩴ ᩈᩮᨶᩣᨸᨲᩦᨶᩴ ᨾᩉᩣᩈᩮᨶᩣᨸᨲᩦᨶᩴ ᩏᨩ᩠ᨫᩣᨸᩮᨲᨻ᩠ᨻᩴ ᩅᩥᨠ᩠ᨠᨶ᩠ᨴᩥᨲᨻ᩠ᨻᩴ ᩅᩥᩁᩅᩥᨲᨻ᩠ᨻᩴ – ‘ᩋᨿᩴ ᨿᨠ᩠ᨡᩮᩣ ᨣᨱ᩠ᩉᩣᨲᩥ, ᩋᨿᩴ ᨿᨠ᩠ᨡᩮᩣ ᩌᩅᩥᩈᨲᩥ, ᩋᨿᩴ ᨿᨠ᩠ᨡᩮᩣ ᩉᩮᨮᩮᨲᩥ, ᩋᨿᩴ ᨿᨠ᩠ᨡᩮᩣ ᩅᩥᩉᩮᨮᩮᨲᩥ, ᩋᨿᩴ ᨿᨠ᩠ᨡᩮᩣ ᩉᩥᩴᩈᨲᩥ, ᩋᨿᩴ ᨿᨠ᩠ᨡᩮᩣ ᩅᩥᩉᩥᩴᩈᨲᩥ, ᩋᨿᩴ ᨿᨠ᩠ᨡᩮᩣ ᨶ ᨾᩩᨬ᩠ᨧᨲᩦ’ᨲᩥ.

‘‘ᩋᨿᩴ ᨡᩮᩣ ᩈᩣ, ᨾᩣᩁᩥᩈ, ᩌᨭᩣᨶᩣᨭᩥᨿᩣ ᩁᨠ᩠ᨡᩣ ᨽᩥᨠ᩠ᨡᩪᨶᩴ ᨽᩥᨠ᩠ᨡᩩᨶᩦᨶᩴ ᩏᨸᩣᩈᨠᩣᨶᩴ ᩏᨸᩣᩈᩥᨠᩣᨶᩴ ᨣᩩᨲ᩠ᨲᩥᨿᩣ ᩁᨠ᩠ᨡᩣᨿ ᩋᩅᩥᩉᩥᩴᩈᩣᨿ ᨹᩣᩈᩩᩅᩥᩉᩣᩁᩣᨿ. ᩉᨶ᩠ᨴ ᨧ ᨴᩣᨶᩥ ᨾᨿᩴ, ᨾᩣᩁᩥᩈ, ᨣᨧ᩠ᨨᩣᨾ ᨻᩉᩩᨠᩥᨧ᩠ᨧᩣ ᨾᨿᩴ ᨻᩉᩩᨠᩁᨱᩦᨿᩣ’’ᨲᩥ. ‘‘ᨿᩔᨴᩣᨶᩥ ᨲᩩᨾ᩠ᩉᩮ ᨾᩉᩣᩁᩣᨩᩣᨶᩮᩣ ᨠᩣᩃᩴ ᨾᨬ᩠ᨬᨳᩣ’’ᨲᩥ.

᪒᪘᪔. ᩋᨳ ᨡᩮᩣ ᨧᨲ᩠ᨲᩣᩁᩮᩣ ᨾᩉᩣᩁᩣᨩᩣ ᩏᨭ᩠ᨮᩣᨿᩣᩈᨶᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨲᨲ᩠ᨳᩮᩅᨶ᩠ᨲᩁᨵᩣᨿᩥᩴᩈᩩ. ᨲᩮᨸᩥ ᨡᩮᩣ ᨿᨠ᩠ᨡᩣ ᩏᨭ᩠ᨮᩣᨿᩣᩈᨶᩣ ᩋᨸ᩠ᨸᩮᨠᨧ᩠ᨧᩮ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨲᨲ᩠ᨳᩮᩅᨶ᩠ᨲᩁᨵᩣᨿᩥᩴᩈᩩ. ᩋᨸ᩠ᨸᩮᨠᨧ᩠ᨧᩮ ᨽᨣᩅᨲᩣ ᩈᨴ᩠ᨵᩥᩴ ᩈᨾ᩠ᨾᩮᩣᨴᩥᩴᩈᩩ, ᩈᨾ᩠ᨾᩮᩣᨴᨶᩦᨿᩴ ᨠᨳᩴ ᩈᩣᩁᨱᩦᨿᩴ ᩅᩦᨲᩥᩈᩣᩁᩮᨲ᩠ᩅᩣ ᨲᨲ᩠ᨳᩮᩅᨶ᩠ᨲᩁᨵᩣᨿᩥᩴᩈᩩ. ᩋᨸ᩠ᨸᩮᨠᨧ᩠ᨧᩮ ᨿᩮᨶ ᨽᨣᩅᩣ ᨲᩮᨶᨬ᩠ᨩᩃᩥᩴ ᨸᨱᩣᨾᩮᨲ᩠ᩅᩣ ᨲᨲ᩠ᨳᩮᩅᨶ᩠ᨲᩁᨵᩣᨿᩥᩴᩈᩩ. ᩋᨸ᩠ᨸᩮᨠᨧ᩠ᨧᩮ ᨶᩣᨾᨣᩮᩣᨲ᩠ᨲᩴ ᩈᩣᩅᩮᨲ᩠ᩅᩣ ᨲᨲ᩠ᨳᩮᩅᨶ᩠ᨲᩁᨵᩣᨿᩥᩴᩈᩩ. ᩋᨸ᩠ᨸᩮᨠᨧ᩠ᨧᩮ ᨲᩩᨱ᩠ᩉᩦᨽᩪᨲᩣ ᨲᨲ᩠ᨳᩮᩅᨶ᩠ᨲᩁᨵᩣᨿᩥᩴᩈᩪᨲᩥ.

ᨸᨮᨾᨽᩣᨱᩅᩣᩁᩮᩣ ᨶᩥᨭ᩠ᨮᩥᨲᩮᩣ.

ᨴᩩᨲᩥᨿᨽᩣᨱᩅᩣᩁᩮᩣ

᪒᪘᪕. ᩋᨳ ᨡᩮᩣ ᨽᨣᩅᩣ ᨲᩔᩣ ᩁᨲ᩠ᨲᩥᨿᩣ ᩋᨧ᩠ᨧᨿᩮᨶ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᩍᨾᩴ, ᨽᩥᨠ᩠ᨡᩅᩮ, ᩁᨲ᩠ᨲᩥᩴ ᨧᨲ᩠ᨲᩣᩁᩮᩣ ᨾᩉᩣᩁᩣᨩᩣ ᨾᩉᨲᩥᨿᩣ ᨧ ᨿᨠ᩠ᨡᩈᩮᨶᩣᨿ ᨾᩉᨲᩥᨿᩣ ᨧ ᨣᨶ᩠ᨵᨻ᩠ᨻᩈᩮᨶᩣᨿ ᨾᩉᨲᩥᨿᩣ ᨧ ᨠᩩᨾ᩠ᨽᨱ᩠ᨯᩈᩮᨶᩣᨿ ᨾᩉᨲᩥᨿᩣ ᨧ ᨶᩣᨣᩈᩮᨶᩣᨿ ᨧᨲᩩᨴ᩠ᨴᩥᩈᩴ ᩁᨠ᩠ᨡᩴ ᨮᨸᩮᨲ᩠ᩅᩣ ᨧᨲᩩᨴ᩠ᨴᩥᩈᩴ ᨣᩩᨾ᩠ᨻᩴ ᨮᨸᩮᨲ᩠ᩅᩣ ᨧᨲᩩᨴ᩠ᨴᩥᩈᩴ ᩒᩅᩁᨱᩴ ᨮᨸᩮᨲ᩠ᩅᩣ ᩋᨽᩥᨠ᩠ᨠᨶ᩠ᨲᩣᨿ ᩁᨲ᩠ᨲᩥᨿᩣ ᩋᨽᩥᨠ᩠ᨠᨶ᩠ᨲᩅᨱ᩠ᨱᩣ ᨠᩮᩅᩃᨠᨸ᩠ᨸᩴ ᨣᩥᨩ᩠ᨫᨠᩪᨭᩴ ᨸᨻ᩠ᨻᨲᩴ ᩒᨽᩣᩈᩮᨲ᩠ᩅᩣ ᨿᩮᨶᩣᩉᩴ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᨾᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ. ᨲᩮᨸᩥ ᨡᩮᩣ, ᨽᩥᨠ᩠ᨡᩅᩮ, ᨿᨠ᩠ᨡᩣ ᩋᨸ᩠ᨸᩮᨠᨧ᩠ᨧᩮ ᨾᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ. ᩋᨸ᩠ᨸᩮᨠᨧ᩠ᨧᩮ ᨾᨿᩣ ᩈᨴ᩠ᨵᩥᩴ ᩈᨾ᩠ᨾᩮᩣᨴᩥᩴᩈᩩ, ᩈᨾ᩠ᨾᩮᩣᨴᨶᩦᨿᩴ ᨠᨳᩴ ᩈᩣᩁᨱᩦᨿᩴ ᩅᩦᨲᩥᩈᩣᩁᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ. ᩋᨸ᩠ᨸᩮᨠᨧ᩠ᨧᩮ ᨿᩮᨶᩣᩉᩴ ᨲᩮᨶᨬ᩠ᨩᩃᩥᩴ ᨸᨱᩣᨾᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ. ᩋᨸ᩠ᨸᩮᨠᨧ᩠ᨧᩮ ᨶᩣᨾᨣᩮᩣᨲ᩠ᨲᩴ ᩈᩣᩅᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ. ᩋᨸ᩠ᨸᩮᨠᨧ᩠ᨧᩮ ᨲᩩᨱ᩠ᩉᩦᨽᩪᨲᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ.

᪒᪘᪖. ‘‘ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ, ᨽᩥᨠ᩠ᨡᩅᩮ, ᩅᩮᩔᩅᨱᩮᩣ ᨾᩉᩣᩁᩣᨩᩣ ᨾᩴ ᩑᨲᨴᩅᩮᩣᨧ – ‘ᩈᨶ᩠ᨲᩥ ᩉᩥ, ᨽᨶ᩠ᨲᩮ, ᩏᩊᩣᩁᩣ ᨿᨠ᩠ᨡᩣ ᨽᨣᩅᨲᩮᩣ ᩋᨸ᩠ᨸᩈᨶ᩠ᨶᩣ…ᨸᩮ… ᩈᨶ᩠ᨲᩥ ᩉᩥ, ᨽᨶ᩠ᨲᩮ ᨶᩦᨧᩣ ᨿᨠ᩠ᨡᩣ ᨽᨣᩅᨲᩮᩣ ᨸᩈᨶ᩠ᨶᩣ. ᨿᩮᨽᩩᨿ᩠ᨿᩮᨶ ᨡᩮᩣ ᨸᨶ, ᨽᨶ᩠ᨲᩮ, ᨿᨠ᩠ᨡᩣ ᩋᨸ᩠ᨸᩈᨶ᩠ᨶᩣᨿᩮᩅ ᨽᨣᩅᨲᩮᩣ. ᨲᩴ ᨠᩥᩔ ᩉᩮᨲᩩ? ᨽᨣᩅᩣ ᩉᩥ, ᨽᨶ᩠ᨲᩮ, ᨸᩣᨱᩣᨲᩥᨸᩣᨲᩣ ᩅᩮᩁᨾᨱᩥᨿᩣ ᨵᨾ᩠ᨾᩴ ᨴᩮᩈᩮᨲᩥ… ᩈᩩᩁᩣᨾᩮᩁᨿᨾᨩ᩠ᨩᨸ᩠ᨸᨾᩣᨴᨭ᩠ᨮᩣᨶᩣ ᩅᩮᩁᨾᨱᩥᨿᩣ ᨵᨾ᩠ᨾᩴ ᨴᩮᩈᩮᨲᩥ. ᨿᩮᨽᩩᨿ᩠ᨿᩮᨶ ᨡᩮᩣ ᨸᨶ, ᨽᨶ᩠ᨲᩮ, ᨿᨠ᩠ᨡᩣ ᩋᨸ᩠ᨸᨭᩥᩅᩥᩁᨲᩣᨿᩮᩅ ᨸᩣᨱᩣᨲᩥᨸᩣᨲᩣ… ᩋᨸ᩠ᨸᨭᩥᩅᩥᩁᨲᩣ ᩈᩩᩁᩣᨾᩮᩁᨿᨾᨩ᩠ᨩᨸ᩠ᨸᨾᩣᨴᨭ᩠ᨮᩣᨶᩣ. ᨲᩮᩈᩴ ᨲᩴ ᩉᩮᩣᨲᩥ ᩋᨸ᩠ᨸᩥᨿᩴ ᩋᨾᨶᩣᨸᩴ. ᩈᨶ᩠ᨲᩥ ᩉᩥ, ᨽᨶ᩠ᨲᩮ, ᨽᨣᩅᨲᩮᩣ ᩈᩣᩅᨠᩣ ᩋᩁᨬ᩠ᨬᩅᨶᨸᨲ᩠ᨳᩣᨶᩥ ᨸᨶ᩠ᨲᩣᨶᩥ ᩈᩮᨶᩣᩈᨶᩣᨶᩥ ᨸᨭᩥᩈᩮᩅᨶ᩠ᨲᩥ ᩋᨸ᩠ᨸᩈᨴ᩠ᨴᩣᨶᩥ ᩋᨸ᩠ᨸᨶᩥᨣ᩠ᨥᩮᩣᩈᩣᨶᩥ ᩅᩥᨩᨶᩅᩣᨲᩣᨶᩥ ᨾᨶᩩᩔᩁᩣᩉᩔᩮᨿ᩠ᨿᨠᩣᨶᩥ ᨸᨭᩥᩈᩃ᩠ᩃᩣᨶᩈᩣᩁᩩᨸ᩠ᨸᩣᨶᩥ. ᨲᨲ᩠ᨳ ᩈᨶ᩠ᨲᩥ ᩏᩊᩣᩁᩣ ᨿᨠ᩠ᨡᩣ ᨶᩥᩅᩣᩈᩥᨶᩮᩣ, ᨿᩮ ᩍᨾᩈ᩠ᨾᩥᩴ ᨽᨣᩅᨲᩮᩣ ᨸᩣᩅᨧᨶᩮ ᩋᨸ᩠ᨸᩈᨶ᩠ᨶᩣ, ᨲᩮᩈᩴ ᨸᩈᩣᨴᩣᨿ ᩏᨣ᩠ᨣᨱ᩠ᩉᩣᨲᩩ, ᨽᨶ᩠ᨲᩮ, ᨽᨣᩅᩣ ᩌᨭᩣᨶᩣᨭᩥᨿᩴ ᩁᨠ᩠ᨡᩴ ᨽᩥᨠ᩠ᨡᩪᨶᩴ ᨽᩥᨠ᩠ᨡᩩᨶᩦᨶᩴ ᩏᨸᩣᩈᨠᩣᨶᩴ ᩏᨸᩣᩈᩥᨠᩣᨶᩴ ᨣᩩᨲ᩠ᨲᩥᨿᩣ ᩁᨠ᩠ᨡᩣᨿ ᩋᩅᩥᩉᩥᩴᩈᩣᨿ ᨹᩣᩈᩩᩅᩥᩉᩣᩁᩣᨿᩣ’ᨲᩥ. ᩋᨵᩥᩅᩣᩈᩮᩈᩥᩴ ᨡᩮᩣ ᩋᩉᩴ, ᨽᩥᨠ᩠ᨡᩅᩮ, ᨲᩩᨱ᩠ᩉᩦᨽᩣᩅᩮᨶ. ᩋᨳ ᨡᩮᩣ, ᨽᩥᨠ᩠ᨡᩅᩮ, ᩅᩮᩔᩅᨱᩮᩣ ᨾᩉᩣᩁᩣᨩᩣ ᨾᩮ ᩋᨵᩥᩅᩣᩈᨶᩴ ᩅᩥᨴᩥᨲ᩠ᩅᩣ ᨲᩣᨿᩴ ᩅᩮᩃᩣᨿᩴ ᩍᨾᩴ ᩌᨭᩣᨶᩣᨭᩥᨿᩴ ᩁᨠ᩠ᨡᩴ ᩋᨽᩣᩈᩥ –

᪒᪘᪗. ‘ᩅᩥᨸᩔᩥᩔ ᨧ ᨶᨾᨲ᩠ᨳᩩ, ᨧᨠ᩠ᨡᩩᨾᨶ᩠ᨲᩔ ᩈᩥᩁᩦᨾᨲᩮᩣ.

ᩈᩥᨡᩥᩔᨸᩥ ᨧ ᨶᨾᨲ᩠ᨳᩩ, ᩈᨻ᩠ᨻᨽᩪᨲᩣᨶᩩᨠᨾ᩠ᨸᩥᨶᩮᩣ.

‘ᩅᩮᩔᨽᩩᩔ ᨧ ᨶᨾᨲ᩠ᨳᩩ, ᨶ᩠ᩉᩣᨲᨠᩔ ᨲᨸᩔᩥᨶᩮᩣ;

ᨶᨾᨲ᩠ᨳᩩ ᨠᨠᩩᩈᨶ᩠ᨵᩔ, ᨾᩣᩁᩈᩮᨶᩣᨸᨾᨴ᩠ᨴᩥᨶᩮᩣ.

‘ᨠᩮᩣᨱᩣᨣᨾᨶᩔ ᨶᨾᨲ᩠ᨳᩩ, ᨻᩕᩣᩉ᩠ᨾᨱᩔ ᩅᩩᩈᩦᨾᨲᩮᩣ;

ᨠᩔᨸᩔ ᨧ ᨶᨾᨲ᩠ᨳᩩ, ᩅᩥᨸ᩠ᨸᨾᩩᨲ᩠ᨲᩔ ᩈᨻ᩠ᨻᨵᩥ.

‘ᩋᨦ᩠ᨣᩦᩁᩈᩔ ᨶᨾᨲ᩠ᨳᩩ, ᩈᨠ᩠ᨿᨸᩩᨲ᩠ᨲᩔ ᩈᩥᩁᩦᨾᨲᩮᩣ;

ᨿᩮᩣ ᩍᨾᩴ ᨵᨾ᩠ᨾᩴ ᨴᩮᩈᩮᩈᩥ, ᩈᨻ᩠ᨻᨴᩩᨠ᩠ᨡᩣᨸᨶᩪᨴᨶᩴ.

‘ᨿᩮ ᨧᩣᨸᩥ ᨶᩥᨻ᩠ᨻᩩᨲᩣ ᩃᩮᩣᨠᩮ, ᨿᨳᩣᨽᩪᨲᩴ ᩅᩥᨸᩔᩥᩈᩩᩴ;

ᨲᩮ ᨩᨶᩣ ᩋᨸᩥᩈᩩᨱᩣᨳ, ᨾᩉᨶ᩠ᨲᩣ ᩅᩦᨲᩈᩣᩁᨴᩣ.

‘ᩉᩥᨲᩴ ᨴᩮᩅᨾᨶᩩᩔᩣᨶᩴ, ᨿᩴ ᨶᨾᩔᨶ᩠ᨲᩥ ᨣᩮᩣᨲᨾᩴ;

ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩴ, ᨾᩉᨶ᩠ᨲᩴ ᩅᩦᨲᩈᩣᩁᨴᩴ.

᪒᪘᪘. ‘ᨿᨲᩮᩣ ᩏᨣ᩠ᨣᨧ᩠ᨨᨲᩥ ᩈᩪᩁᩥᨿᩮᩣ, ᩌᨴᩥᨧ᩠ᨧᩮᩣ ᨾᨱ᩠ᨯᩃᩦ ᨾᩉᩣ.

ᨿᩔ ᨧᩩᨣ᩠ᨣᨧ᩠ᨨᨾᩣᨶᩔ, ᩈᩴᩅᩁᩦᨸᩥ ᨶᩥᩁᩩᨩ᩠ᨫᨲᩥ;

ᨿᩔ ᨧᩩᨣ᩠ᨣᨲᩮ ᩈᩪᩁᩥᨿᩮ, ‘‘ᨴᩥᩅᩈᩮᩣ’’ᨲᩥ ᨸᩅᩩᨧ᩠ᨧᨲᩥ.

‘ᩁᩉᨴᩮᩣᨸᩥ ᨲᨲ᩠ᨳ ᨣᨾ᩠ᨽᩦᩁᩮᩣ, ᩈᨾᩩᨴ᩠ᨴᩮᩣ ᩈᩁᩥᨲᩮᩣᨴᨠᩮᩣ;

ᩑᩅᩴ ᨲᩴ ᨲᨲ᩠ᨳ ᨩᩣᨶᨶ᩠ᨲᩥ, ‘‘ᩈᨾᩩᨴ᩠ᨴᩮᩣ ᩈᩁᩥᨲᩮᩣᨴᨠᩮᩣ’’.

‘ᩍᨲᩮᩣ ‘‘ᩈᩣ ᨸᩩᩁᩥᨾᩣ ᨴᩥᩈᩣ’’, ᩍᨲᩥ ᨶᩴ ᩌᨧᩥᨠ᩠ᨡᨲᩦ ᨩᨶᩮᩣ;

ᨿᩴ ᨴᩥᩈᩴ ᩋᨽᩥᨸᩣᩃᩮᨲᩥ, ᨾᩉᩣᩁᩣᨩᩣ ᨿᩈᩔᩥ ᩈᩮᩣ.

‘ᨣᨶ᩠ᨵᨻ᩠ᨻᩣᨶᩴ ᩋᨵᩥᨸᨲᩥ, ‘‘ᨵᨲᩁᨭ᩠ᨮᩮᩣ’’ᨲᩥ ᨶᩣᨾᩈᩮᩣ;

ᩁᨾᨲᩦ ᨶᨧ᩠ᨧᨣᩦᨲᩮᩉᩥ, ᨣᨶ᩠ᨵᨻ᩠ᨻᩮᩉᩥ ᨸᩩᩁᨠ᩠ᨡᨲᩮᩣ.

‘ᨸᩩᨲ᩠ᨲᩣᨸᩥ ᨲᩔ ᨻᩉᩅᩮᩣ, ᩑᨠᨶᩣᨾᩣᨲᩥ ᨾᩮ ᩈᩩᨲᩴ;

ᩋᩈᩦᨲᩥ ᨴᩈ ᩑᨠᩮᩣ ᨧ, ᩍᨶ᩠ᨴᨶᩣᨾᩣ ᨾᩉᨻ᩠ᨻᩃᩣ.

‘ᨲᩮ ᨧᩣᨸᩥ ᨻᩩᨴ᩠ᨵᩴ ᨴᩥᩈ᩠ᩅᩣᨶ, ᨻᩩᨴ᩠ᨵᩴ ᩌᨴᩥᨧ᩠ᨧᨻᨶ᩠ᨵᩩᨶᩴ;

ᨴᩪᩁᨲᩮᩣᩅ ᨶᨾᩔᨶ᩠ᨲᩥ, ᨾᩉᨶ᩠ᨲᩴ ᩅᩦᨲᩈᩣᩁᨴᩴ.

‘ᨶᨾᩮᩣ ᨲᩮ ᨸᩩᩁᩥᩈᩣᨩᨬ᩠ᨬ, ᨶᨾᩮᩣ ᨲᩮ ᨸᩩᩁᩥᩈᩩᨲ᩠ᨲᨾ;

ᨠᩩᩈᩃᩮᨶ ᩈᨾᩮᨠ᩠ᨡᩈᩥ, ᩋᨾᨶᩩᩔᩣᨸᩥ ᨲᩴ ᩅᨶ᩠ᨴᨶ᩠ᨲᩥ;

ᩈᩩᨲᩴ ᨶᩮᨲᩴ ᩋᨽᩥᨱ᩠ᩉᩈᩮᩣ, ᨲᩔᩣ ᩑᩅᩴ ᩅᨴᩮᨾᩈᩮ.

‘‘ᨩᩥᨶᩴ ᩅᨶ᩠ᨴᨳ ᨣᩮᩣᨲᨾᩴ, ᨩᩥᨶᩴ ᩅᨶ᩠ᨴᩣᨾ ᨣᩮᩣᨲᨾᩴ;

ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩴ, ᨻᩩᨴ᩠ᨵᩴ ᩅᨶ᩠ᨴᩣᨾ ᨣᩮᩣᨲᨾᩴ’’.

᪒᪘᪙. ‘ᨿᩮᨶ ᨸᩮᨲᩣ ᨸᩅᩩᨧ᩠ᨧᨶ᩠ᨲᩥ, ᨸᩥᩈᩩᨱᩣ ᨸᩥᨭ᩠ᨮᩥᨾᩴᩈᩥᨠᩣ.

ᨸᩣᨱᩣᨲᩥᨸᩣᨲᩥᨶᩮᩣ ᩃᩩᨴ᩠ᨴᩣ, ᨧᩮᩣᩁᩣ ᨶᩮᨠᨲᩥᨠᩣ ᨩᨶᩣ.

‘ᩍᨲᩮᩣ ‘‘ᩈᩣ ᨴᨠ᩠ᨡᩥᨱᩣ ᨴᩥᩈᩣ’’, ᩍᨲᩥ ᨶᩴ ᩌᨧᩥᨠ᩠ᨡᨲᩦ ᨩᨶᩮᩣ;

ᨿᩴ ᨴᩥᩈᩴ ᩋᨽᩥᨸᩣᩃᩮᨲᩥ, ᨾᩉᩣᩁᩣᨩᩣ ᨿᩈᩔᩥ ᩈᩮᩣ.

‘ᨠᩩᨾ᩠ᨽᨱ᩠ᨯᩣᨶᩴ ᩋᨵᩥᨸᨲᩥ, ‘‘ᩅᩥᩁᩪᩊ᩠ᩉᩮᩣ’’ ᩍᨲᩥ ᨶᩣᨾᩈᩮᩣ;

ᩁᨾᨲᩦ ᨶᨧ᩠ᨧᨣᩦᨲᩮᩉᩥ, ᨠᩩᨾ᩠ᨽᨱ᩠ᨯᩮᩉᩥ ᨸᩩᩁᨠ᩠ᨡᨲᩮᩣ.

‘ᨸᩩᨲ᩠ᨲᩣᨸᩥ ᨲᩔ ᨻᩉᩅᩮᩣ, ᩑᨠᨶᩣᨾᩣᨲᩥ ᨾᩮ ᩈᩩᨲᩴ;

ᩋᩈᩦᨲᩥ ᨴᩈ ᩑᨠᩮᩣ ᨧ, ᩍᨶ᩠ᨴᨶᩣᨾᩣ ᨾᩉᨻ᩠ᨻᩃᩣ.

‘ᨲᩮ ᨧᩣᨸᩥ ᨻᩩᨴ᩠ᨵᩴ ᨴᩥᩈ᩠ᩅᩣᨶ, ᨻᩩᨴ᩠ᨵᩴ ᩌᨴᩥᨧ᩠ᨧᨻᨶ᩠ᨵᩩᨶᩴ;

ᨴᩪᩁᨲᩮᩣᩅ ᨶᨾᩔᨶ᩠ᨲᩥ, ᨾᩉᨶ᩠ᨲᩴ ᩅᩦᨲᩈᩣᩁᨴᩴ.

‘ᨶᨾᩮᩣ ᨲᩮ ᨸᩩᩁᩥᩈᩣᨩᨬ᩠ᨬ, ᨶᨾᩮᩣ ᨲᩮ ᨸᩩᩁᩥᩈᩩᨲ᩠ᨲᨾ;

ᨠᩩᩈᩃᩮᨶ ᩈᨾᩮᨠ᩠ᨡᩈᩥ, ᩋᨾᨶᩩᩔᩣᨸᩥ ᨲᩴ ᩅᨶ᩠ᨴᨶ᩠ᨲᩥ;

ᩈᩩᨲᩴ ᨶᩮᨲᩴ ᩋᨽᩥᨱ᩠ᩉᩈᩮᩣ, ᨲᩈ᩠ᨾᩣ ᩑᩅᩴ ᩅᨴᩮᨾᩈᩮ.

‘‘ᨩᩥᨶᩴ ᩅᨶ᩠ᨴᨳ ᨣᩮᩣᨲᨾᩴ, ᨩᩥᨶᩴ ᩅᨶ᩠ᨴᩣᨾ ᨣᩮᩣᨲᨾᩴ;

ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩴ, ᨻᩩᨴ᩠ᨵᩴ ᩅᨶ᩠ᨴᩣᨾ ᨣᩮᩣᨲᨾᩴ’’.

᪒᪙᪐. ‘ᨿᨲ᩠ᨳ ᨧᩮᩣᨣ᩠ᨣᨧ᩠ᨨᨲᩥ ᩈᩪᩁᩥᨿᩮᩣ, ᩌᨴᩥᨧ᩠ᨧᩮᩣ ᨾᨱ᩠ᨯᩃᩦ ᨾᩉᩣ.

ᨿᩔ ᨧᩮᩣᨣ᩠ᨣᨧ᩠ᨨᨾᩣᨶᩔ, ᨴᩥᩅᩈᩮᩣᨸᩥ ᨶᩥᩁᩩᨩ᩠ᨫᨲᩥ;

ᨿᩔ ᨧᩮᩣᨣ᩠ᨣᨲᩮ ᩈᩪᩁᩥᨿᩮ, ‘‘ᩈᩴᩅᩁᩦ’’ᨲᩥ ᨸᩅᩩᨧ᩠ᨧᨲᩥ.

‘ᩁᩉᨴᩮᩣᨸᩥ ᨲᨲ᩠ᨳ ᨣᨾ᩠ᨽᩦᩁᩮᩣ, ᩈᨾᩩᨴ᩠ᨴᩮᩣ ᩈᩁᩥᨲᩮᩣᨴᨠᩮᩣ;

ᩑᩅᩴ ᨲᩴ ᨲᨲ᩠ᨳ ᨩᩣᨶᨶ᩠ᨲᩥ, ᩈᨾᩩᨴ᩠ᨴᩮᩣ ᩈᩁᩥᨲᩮᩣᨴᨠᩮᩣ.

‘ᩍᨲᩮᩣ ‘‘ᩈᩣ ᨸᨧ᩠ᨨᩥᨾᩣ ᨴᩥᩈᩣ’’, ᩍᨲᩥ ᨶᩴ ᩌᨧᩥᨠ᩠ᨡᨲᩦ ᨩᨶᩮᩣ;

ᨿᩴ ᨴᩥᩈᩴ ᩋᨽᩥᨸᩣᩃᩮᨲᩥ, ᨾᩉᩣᩁᩣᨩᩣ ᨿᩈᩔᩥ ᩈᩮᩣ.

‘ᨶᩣᨣᩣᨶᨬ᩠ᨧ ᩋᨵᩥᨸᨲᩥ, ‘‘ᩅᩥᩁᩪᨸᨠ᩠ᨡᩮᩣ’’ᨲᩥ ᨶᩣᨾᩈᩮᩣ;

ᩁᨾᨲᩦ ᨶᨧ᩠ᨧᨣᩦᨲᩮᩉᩥ, ᨶᩣᨣᩮᩉᩮᩅ ᨸᩩᩁᨠ᩠ᨡᨲᩮᩣ.

‘ᨸᩩᨲ᩠ᨲᩣᨸᩥ ᨲᩔ ᨻᩉᩅᩮᩣ, ᩑᨠᨶᩣᨾᩣᨲᩥ ᨾᩮ ᩈᩩᨲᩴ;

ᩋᩈᩦᨲᩥ ᨴᩈ ᩑᨠᩮᩣ ᨧ, ᩍᨶ᩠ᨴᨶᩣᨾᩣ ᨾᩉᨻ᩠ᨻᩃᩣ.

‘ᨲᩮ ᨧᩣᨸᩥ ᨻᩩᨴ᩠ᨵᩴ ᨴᩥᩈ᩠ᩅᩣᨶ, ᨻᩩᨴ᩠ᨵᩴ ᩌᨴᩥᨧ᩠ᨧᨻᨶ᩠ᨵᩩᨶᩴ;

ᨴᩪᩁᨲᩮᩣᩅ ᨶᨾᩔᨶ᩠ᨲᩥ, ᨾᩉᨶ᩠ᨲᩴ ᩅᩦᨲᩈᩣᩁᨴᩴ.

‘ᨶᨾᩮᩣ ᨲᩮ ᨸᩩᩁᩥᩈᩣᨩᨬ᩠ᨬ, ᨶᨾᩮᩣ ᨲᩮ ᨸᩩᩁᩥᩈᩩᨲ᩠ᨲᨾ;

ᨠᩩᩈᩃᩮᨶ ᩈᨾᩮᨠ᩠ᨡᩈᩥ, ᩋᨾᨶᩩᩔᩣᨸᩥ ᨲᩴ ᩅᨶ᩠ᨴᨶ᩠ᨲᩥ;

ᩈᩩᨲᩴ ᨶᩮᨲᩴ ᩋᨽᩥᨱ᩠ᩉᩈᩮᩣ, ᨲᩈ᩠ᨾᩣ ᩑᩅᩴ ᩅᨴᩮᨾᩈᩮ.

‘‘ᨩᩥᨶᩴ ᩅᨶ᩠ᨴᨳ ᨣᩮᩣᨲᨾᩴ, ᨩᩥᨶᩴ ᩅᨶ᩠ᨴᩣᨾ ᨣᩮᩣᨲᨾᩴ;

ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩴ, ᨻᩩᨴ᩠ᨵᩴ ᩅᨶ᩠ᨴᩣᨾ ᨣᩮᩣᨲᨾᩴ’’.

᪒᪙᪑. ‘ᨿᩮᨶ ᩏᨲ᩠ᨲᩁᨠᩩᩁᩩᩅ᩠ᩉᩮᩣ, ᨾᩉᩣᨶᩮᩁᩩ ᩈᩩᨴᩔᨶᩮᩣ.

ᨾᨶᩩᩔᩣ ᨲᨲ᩠ᨳ ᨩᩣᨿᨶ᩠ᨲᩥ, ᩋᨾᨾᩣ ᩋᨸᩁᩥᨣ᩠ᨣᩉᩣ.

‘ᨶ ᨲᩮ ᨻᩦᨩᩴ ᨸᩅᨸᨶ᩠ᨲᩥ, ᨶᩣᨸᩥ ᨶᩦᨿᨶ᩠ᨲᩥ ᨶᨦ᩠ᨣᩃᩣ;

ᩋᨠᨭ᩠ᨮᨸᩣᨠᩥᨾᩴ ᩈᩣᩃᩥᩴ, ᨸᩁᩥᨽᩩᨬ᩠ᨩᨶ᩠ᨲᩥ ᨾᩣᨶᩩᩈᩣ.

‘ᩋᨠᨱᩴ ᩋᨳᩩᩈᩴ ᩈᩩᨴ᩠ᨵᩴ, ᩈᩩᨣᨶ᩠ᨵᩴ ᨲᨱ᩠ᨯᩩᩃᨸ᩠ᨹᩃᩴ;

ᨲᩩᨱ᩠ᨯᩥᨠᩦᩁᩮ ᨸᨧᩥᨲ᩠ᩅᩣᨶ, ᨲᨲᩮᩣ ᨽᩩᨬ᩠ᨩᨶ᩠ᨲᩥ ᨽᩮᩣᨩᨶᩴ.

‘ᨣᩣᩅᩥᩴ ᩑᨠᨡᩩᩁᩴ ᨠᨲ᩠ᩅᩣ, ᩋᨶᩩᨿᨶ᩠ᨲᩥ ᨴᩥᩈᩮᩣᨴᩥᩈᩴ;

ᨸᩈᩩᩴ ᩑᨠᨡᩩᩁᩴ ᨠᨲ᩠ᩅᩣ, ᩋᨶᩩᨿᨶ᩠ᨲᩥ ᨴᩥᩈᩮᩣᨴᩥᩈᩴ.

‘ᩍᨲ᩠ᨳᩥᩴ ᩅᩣ ᩅᩣᩉᨶᩴ ᨠᨲ᩠ᩅᩣ, ᩋᨶᩩᨿᨶ᩠ᨲᩥ ᨴᩥᩈᩮᩣᨴᩥᩈᩴ;

ᨸᩩᩁᩥᩈᩴ ᩅᩣᩉᨶᩴ ᨠᨲ᩠ᩅᩣ, ᩋᨶᩩᨿᨶ᩠ᨲᩥ ᨴᩥᩈᩮᩣᨴᩥᩈᩴ.

‘ᨠᩩᨾᩣᩁᩥᩴ ᩅᩣᩉᨶᩴ ᨠᨲ᩠ᩅᩣ, ᩋᨶᩩᨿᨶ᩠ᨲᩥ ᨴᩥᩈᩮᩣᨴᩥᩈᩴ;

ᨠᩩᨾᩣᩁᩴ ᩅᩣᩉᨶᩴ ᨠᨲ᩠ᩅᩣ, ᩋᨶᩩᨿᨶ᩠ᨲᩥ ᨴᩥᩈᩮᩣᨴᩥᩈᩴ.

‘ᨲᩮ ᨿᩣᨶᩮ ᩋᨽᩥᩁᩩᩉᩥᨲ᩠ᩅᩣ,

ᩈᨻ᩠ᨻᩣ ᨴᩥᩈᩣ ᩋᨶᩩᨸᩁᩥᨿᩣᨿᨶ᩠ᨲᩥ;

ᨸᨧᩣᩁᩣ ᨲᩔ ᩁᩣᨩᩥᨶᩮᩣ.

‘ᩉᨲ᩠ᨳᩥᨿᩣᨶᩴ ᩋᩔᨿᩣᨶᩴ,

ᨴᩥᨻ᩠ᨻᩴ ᨿᩣᨶᩴ ᩏᨸᨭ᩠ᨮᩥᨲᩴ;

ᨸᩣᩈᩣᨴᩣ ᩈᩥᩅᩥᨠᩣ ᨧᩮᩅ,

ᨾᩉᩣᩁᩣᨩᩔ ᨿᩈᩔᩥᨶᩮᩣ.

‘ᨲᩔ ᨧ ᨶᨣᩁᩣ ᩋᩉᩩ,

ᩋᨶ᩠ᨲᩃᩥᨠ᩠ᨡᩮ ᩈᩩᨾᩣᨸᩥᨲᩣ;

ᩌᨭᩣᨶᩣᨭᩣ ᨠᩩᩈᩥᨶᩣᨭᩣ ᨸᩁᨠᩩᩈᩥᨶᩣᨭᩣ,

ᨶᩣᨭᩈᩩᩁᩥᨿᩣ ᨸᩁᨠᩩᩈᩥᨭᨶᩣᨭᩣ.

‘ᩏᨲ᩠ᨲᩁᩮᨶ ᨠᩈᩥᩅᨶ᩠ᨲᩮᩣ,

ᨩᨶᩮᩣᨥᨾᨸᩁᩮᨶ ᨧ;

ᨶᩅᨶᩅᩩᨲᩥᨿᩮᩣ ᩋᨾ᩠ᨻᩁᩋᨾ᩠ᨻᩁᩅᨲᩥᨿᩮᩣ,

ᩌᩊᨠᨾᨶ᩠ᨴᩣ ᨶᩣᨾ ᩁᩣᨩᨵᩣᨶᩦ.

‘ᨠᩩᩅᩮᩁᩔ ᨡᩮᩣ ᨸᨶ, ᨾᩣᩁᩥᩈ, ᨾᩉᩣᩁᩣᨩᩔ ᩅᩥᩈᩣᨱᩣ ᨶᩣᨾ ᩁᩣᨩᨵᩣᨶᩦ;

ᨲᩈ᩠ᨾᩣ ᨠᩩᩅᩮᩁᩮᩣ ᨾᩉᩣᩁᩣᨩᩣ, ‘‘ᩅᩮᩔᩅᨱᩮᩣ’’ᨲᩥ ᨸᩅᩩᨧ᩠ᨧᨲᩥ.

‘ᨸᨧ᩠ᨧᩮᩈᨶ᩠ᨲᩮᩣ ᨸᨠᩣᩈᩮᨶ᩠ᨲᩥ, ᨲᨲᩮᩣᩃᩣ ᨲᨲ᩠ᨲᩃᩣ ᨲᨲᩮᩣᨲᩃᩣ;

ᩒᨩᩈᩥ ᨲᩮᨩᩈᩥ ᨲᨲᩮᩣᨩᩈᩦ, ᩈᩪᩁᩮᩣ ᩁᩣᨩᩣ ᩋᩁᩥᨭ᩠ᨮᩮᩣ ᨶᩮᨾᩥ.

‘ᩁᩉᨴᩮᩣᨸᩥ ᨲᨲ᩠ᨳ ᨵᩁᨱᩦ ᨶᩣᨾ, ᨿᨲᩮᩣ ᨾᩮᨥᩣ ᨸᩅᩔᨶ᩠ᨲᩥ;

ᩅᩔᩣ ᨿᨲᩮᩣ ᨸᨲᩣᨿᨶ᩠ᨲᩥ, ᩈᨽᩣᨸᩥ ᨲᨲ᩠ᨳ ᩈᩣᩃᩅᨲᩦ ᨶᩣᨾ.

‘ᨿᨲ᩠ᨳ ᨿᨠ᩠ᨡᩣ ᨸᨿᩥᩁᩩᨸᩣᩈᨶ᩠ᨲᩥ, ᨲᨲ᩠ᨳ ᨶᩥᨧ᩠ᨧᨹᩃᩣ ᩁᩩᨠ᩠ᨡᩣ;

ᨶᩣᨶᩣ ᨴᩥᨩᨣᨱᩣ ᨿᩩᨲᩣ, ᨾᨿᩪᩁᨠᩮᩣᨬ᩠ᨧᩣᨽᩥᩁᩩᨴᩣ;

ᨠᩮᩣᨠᩥᩃᩣᨴᩦᩉᩥ ᩅᨣ᩠ᨣᩩᩉᩥ.

‘ᨩᩦᩅᨬ᩠ᨩᩦᩅᨠᩈᨴ᩠ᨴᩮᨲ᩠ᨳ, ᩋᨳᩮᩣ ᩒᨭ᩠ᨮᩅᨧᩥᨲ᩠ᨲᨠᩣ;

ᨠᩩᨠ᩠ᨠᩩᨭᨠᩣ ᨠᩩᩊᩦᩁᨠᩣ, ᩅᨶᩮ ᨸᩮᩣᨠ᩠ᨡᩁᩈᩣᨲᨠᩣ.

‘ᩈᩩᨠᩈᩣᩊᩥᨠ ᩈᨴ᩠ᨴᩮᨲ᩠ᨳ, ᨴᨱ᩠ᨯᨾᩣᨱᩅᨠᩣᨶᩥ ᨧ;

ᩈᩮᩣᨽᨲᩥ ᩈᨻ᩠ᨻᨠᩣᩃᩴ ᩈᩣ, ᨠᩩᩅᩮᩁᨶᩊᩥᨶᩦ ᩈᨴᩣ.

‘ᩍᨲᩮᩣ ‘‘ᩈᩣ ᩏᨲ᩠ᨲᩁᩣ ᨴᩥᩈᩣ’’, ᩍᨲᩥ ᨶᩴ ᩌᨧᩥᨠ᩠ᨡᨲᩦ ᨩᨶᩮᩣ;

ᨿᩴ ᨴᩥᩈᩴ ᩋᨽᩥᨸᩣᩃᩮᨲᩥ, ᨾᩉᩣᩁᩣᨩᩣ ᨿᩈᩔᩥ ᩈᩮᩣ.

‘ᨿᨠ᩠ᨡᩣᨶᨬ᩠ᨧ ᩋᨵᩥᨸᨲᩥ, ‘‘ᨠᩩᩅᩮᩁᩮᩣ’’ ᩍᨲᩥ ᨶᩣᨾᩈᩮᩣ;

ᩁᨾᨲᩦ ᨶᨧ᩠ᨧᨣᩦᨲᩮᩉᩥ, ᨿᨠ᩠ᨡᩮᩉᩮᩅ ᨸᩩᩁᨠ᩠ᨡᨲᩮᩣ.

‘ᨸᩩᨲ᩠ᨲᩣᨸᩥ ᨲᩔ ᨻᩉᩅᩮᩣ, ᩑᨠᨶᩣᨾᩣᨲᩥ ᨾᩮ ᩈᩩᨲᩴ;

ᩋᩈᩦᨲᩥ ᨴᩈ ᩑᨠᩮᩣ ᨧ, ᩍᨶ᩠ᨴᨶᩣᨾᩣ ᨾᩉᨻ᩠ᨻᩃᩣ.

‘ᨲᩮ ᨧᩣᨸᩥ ᨻᩩᨴ᩠ᨵᩴ ᨴᩥᩈ᩠ᩅᩣᨶ, ᨻᩩᨴ᩠ᨵᩴ ᩌᨴᩥᨧ᩠ᨧᨻᨶ᩠ᨵᩩᨶᩴ;

ᨴᩪᩁᨲᩮᩣᩅ ᨶᨾᩔᨶ᩠ᨲᩥ, ᨾᩉᨶ᩠ᨲᩴ ᩅᩦᨲᩈᩣᩁᨴᩴ.

‘ᨶᨾᩮᩣ ᨲᩮ ᨸᩩᩁᩥᩈᩣᨩᨬ᩠ᨬ, ᨶᨾᩮᩣ ᨲᩮ ᨸᩩᩁᩥᩈᩩᨲ᩠ᨲᨾ;

ᨠᩩᩈᩃᩮᨶ ᩈᨾᩮᨠ᩠ᨡᩈᩥ, ᩋᨾᨶᩩᩔᩣᨸᩥ ᨲᩴ ᩅᨶ᩠ᨴᨶ᩠ᨲᩥ;

ᩈᩩᨲᩴ ᨶᩮᨲᩴ ᩋᨽᩥᨱ᩠ᩉᩈᩮᩣ, ᨲᩈ᩠ᨾᩣ ᩑᩅᩴ ᩅᨴᩮᨾᩈᩮ.

‘‘ᨩᩥᨶᩴ ᩅᨶ᩠ᨴᨳ ᨣᩮᩣᨲᨾᩴ, ᨩᩥᨶᩴ ᩅᨶ᩠ᨴᩣᨾ ᨣᩮᩣᨲᨾᩴ;

ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩴ, ᨻᩩᨴ᩠ᨵᩴ ᩅᨶ᩠ᨴᩣᨾ ᨣᩮᩣᨲᨾ’’ᨶ᩠ᨲᩥ.

᪒᪙᪒. ‘ᩋᨿᩴ ᨡᩮᩣ ᩈᩣ, ᨾᩣᩁᩥᩈ, ᩌᨭᩣᨶᩣᨭᩥᨿᩣ ᩁᨠ᩠ᨡᩣ ᨽᩥᨠ᩠ᨡᩪᨶᩴ ᨽᩥᨠ᩠ᨡᩩᨶᩦᨶᩴ ᩏᨸᩣᩈᨠᩣᨶᩴ ᩏᨸᩣᩈᩥᨠᩣᨶᩴ ᨣᩩᨲ᩠ᨲᩥᨿᩣ ᩁᨠ᩠ᨡᩣᨿ ᩋᩅᩥᩉᩥᩴᩈᩣᨿ ᨹᩣᩈᩩᩅᩥᩉᩣᩁᩣᨿ. ᨿᩔ ᨠᩔᨧᩥ, ᨾᩣᩁᩥᩈ, ᨽᩥᨠ᩠ᨡᩩᩔ ᩅᩣ ᨽᩥᨠ᩠ᨡᩩᨶᩥᨿᩣ ᩅᩣ ᩏᨸᩣᩈᨠᩔ ᩅᩣ ᩏᨸᩣᩈᩥᨠᩣᨿ ᩅᩣ ᩋᨿᩴ ᩌᨭᩣᨶᩣᨭᩥᨿᩣ ᩁᨠ᩠ᨡᩣ ᩈᩩᨣ᩠ᨣᩉᩥᨲᩣ ᨽᩅᩥᩔᨲᩥ ᩈᨾᨲ᩠ᨲᩣ ᨸᩁᩥᨿᩣᨸᩩᨲᩣ ᨲᩴ ᨧᩮ ᩋᨾᨶᩩᩔᩮᩣ ᨿᨠ᩠ᨡᩮᩣ ᩅᩣ ᨿᨠ᩠ᨡᩥᨶᩦ ᩅᩣ…ᨸᩮ… ᨣᨶ᩠ᨵᨻ᩠ᨻᩮᩣ ᩅᩣ ᨣᨶ᩠ᨵᨻ᩠ᨻᩦ ᩅᩣ…ᨸᩮ… ᨠᩩᨾ᩠ᨽᨱ᩠ᨯᩮᩣ ᩅᩣ ᨠᩩᨾ᩠ᨽᨱ᩠ᨯᩦ ᩅᩣ…ᨸᩮ… ᨶᩣᨣᩮᩣ ᩅᩣ ᨶᩣᨣᩦ ᩅᩣ ᨶᩣᨣᨸᩮᩣᨲᨠᩮᩣ ᩅᩣ ᨶᩣᨣᨸᩮᩣᨲᩥᨠᩣ ᩅᩣ ᨶᩣᨣᨾᩉᩣᨾᨲ᩠ᨲᩮᩣ ᩅᩣ ᨶᩣᨣᨸᩣᩁᩥᩈᨩ᩠ᨩᩮᩣ ᩅᩣ ᨶᩣᨣᨸᨧᩣᩁᩮᩣ ᩅᩣ, ᨸᨴᩩᨭ᩠ᨮᨧᩥᨲ᩠ᨲᩮᩣ ᨽᩥᨠ᩠ᨡᩩᩴ ᩅᩣ ᨽᩥᨠ᩠ᨡᩩᨶᩥᩴ ᩅᩣ ᩏᨸᩣᩈᨠᩴ ᩅᩣ ᩏᨸᩣᩈᩥᨠᩴ ᩅᩣ ᨣᨧ᩠ᨨᨶ᩠ᨲᩴ ᩅᩣ ᩋᨶᩩᨣᨧ᩠ᨨᩮᨿ᩠ᨿ, ᨮᩥᨲᩴ ᩅᩣ ᩏᨸᨲᩥᨭ᩠ᨮᩮᨿ᩠ᨿ, ᨶᩥᩈᩥᨶ᩠ᨶᩴ ᩅᩣ ᩏᨸᨶᩥᩈᩦᨴᩮᨿ᩠ᨿ, ᨶᩥᨸᨶ᩠ᨶᩴ ᩅᩣ ᩏᨸᨶᩥᨸᨩ᩠ᨩᩮᨿ᩠ᨿ. ᨶ ᨾᩮ ᩈᩮᩣ, ᨾᩣᩁᩥᩈ, ᩋᨾᨶᩩᩔᩮᩣ ᩃᨽᩮᨿ᩠ᨿ ᨣᩣᨾᩮᩈᩩ ᩅᩣ ᨶᩥᨣᨾᩮᩈᩩ ᩅᩣ ᩈᨠ᩠ᨠᩣᩁᩴ ᩅᩣ ᨣᩁᩩᨠᩣᩁᩴ ᩅᩣ. ᨶ ᨾᩮ ᩈᩮᩣ, ᨾᩣᩁᩥᩈ, ᩋᨾᨶᩩᩔᩮᩣ ᩃᨽᩮᨿ᩠ᨿ ᩌᩊᨠᨾᨶ᩠ᨴᩣᨿ ᨶᩣᨾ ᩁᩣᨩᨵᩣᨶᩥᨿᩣ ᩅᨲ᩠ᨳᩩᩴ ᩅᩣ ᩅᩣᩈᩴ ᩅᩣ. ᨶ ᨾᩮ ᩈᩮᩣ, ᨾᩣᩁᩥᩈ, ᩋᨾᨶᩩᩔᩮᩣ ᩃᨽᩮᨿ᩠ᨿ ᨿᨠ᩠ᨡᩣᨶᩴ ᩈᨾᩥᨲᩥᩴ ᨣᨶ᩠ᨲᩩᩴ. ᩋᨸᩥᩔᩩ ᨶᩴ, ᨾᩣᩁᩥᩈ, ᩋᨾᨶᩩᩔᩣ ᩋᨶᩣᩅᨿ᩠ᩉᨾ᩠ᨸᩥ ᨶᩴ ᨠᩁᩮᨿ᩠ᨿᩩᩴ ᩋᩅᩥᩅᨿ᩠ᩉᩴ. ᩋᨸᩥᩔᩩ ᨶᩴ, ᨾᩣᩁᩥᩈ, ᩋᨾᨶᩩᩔᩣ ᩋᨲ᩠ᨲᩣᩉᩥ ᨸᩁᩥᨸᩩᨱ᩠ᨱᩣᩉᩥ ᨸᩁᩥᨽᩣᩈᩣᩉᩥ ᨸᩁᩥᨽᩣᩈᩮᨿ᩠ᨿᩩᩴ. ᩋᨸᩥᩔᩩ ᨶᩴ, ᨾᩣᩁᩥᩈ, ᩋᨾᨶᩩᩔᩣ ᩁᩥᨲ᩠ᨲᩴᨸᩥᩔ ᨸᨲ᩠ᨲᩴ ᩈᩦᩈᩮ ᨶᩥᨠ᩠ᨠᩩᨩ᩠ᨩᩮᨿ᩠ᨿᩩᩴ. ᩋᨸᩥᩔᩩ ᨶᩴ, ᨾᩣᩁᩥᩈ, ᩋᨾᨶᩩᩔᩣ ᩈᨲ᩠ᨲᨵᩣᨸᩥᩔ ᨾᩩᨴ᩠ᨵᩴ ᨹᩣᩃᩮᨿ᩠ᨿᩩᩴ. ᩈᨶ᩠ᨲᩥ ᩉᩥ, ᨾᩣᩁᩥᩈ, ᩋᨾᨶᩩᩔᩣ ᨧᨱ᩠ᨯᩣ ᩁᩩᨴ᩠ᨵᩣ ᩁᨽᩈᩣ, ᨲᩮ ᨶᩮᩅ ᨾᩉᩣᩁᩣᨩᩣᨶᩴ ᩌᨴᩥᨿᨶ᩠ᨲᩥ, ᨶ ᨾᩉᩣᩁᩣᨩᩣᨶᩴ ᨸᩩᩁᩥᩈᨠᩣᨶᩴ ᩌᨴᩥᨿᨶ᩠ᨲᩥ, ᨶ ᨾᩉᩣᩁᩣᨩᩣᨶᩴ ᨸᩩᩁᩥᩈᨠᩣᨶᩴ ᨸᩩᩁᩥᩈᨠᩣᨶᩴ ᩌᨴᩥᨿᨶ᩠ᨲᩥ. ᨲᩮ ᨡᩮᩣ ᨲᩮ, ᨾᩣᩁᩥᩈ, ᩋᨾᨶᩩᩔᩣ ᨾᩉᩣᩁᩣᨩᩣᨶᩴ ᩋᩅᩁᩩᨴ᩠ᨵᩣ ᨶᩣᨾ ᩅᩩᨧ᩠ᨧᨶ᩠ᨲᩥ. ᩈᩮᨿ᩠ᨿᨳᩣᨸᩥ, ᨾᩣᩁᩥᩈ, ᩁᨬ᩠ᨬᩮᩣ ᨾᩣᨣᨵᩔ ᩅᩥᨩᩥᨲᩮ ᨾᩉᩣᨧᩮᩣᩁᩣ. ᨲᩮ ᨶᩮᩅ ᩁᨬ᩠ᨬᩮᩣ ᨾᩣᨣᨵᩔ ᩌᨴᩥᨿᨶ᩠ᨲᩥ, ᨶ ᩁᨬ᩠ᨬᩮᩣ ᨾᩣᨣᨵᩔ ᨸᩩᩁᩥᩈᨠᩣᨶᩴ ᩌᨴᩥᨿᨶ᩠ᨲᩥ, ᨶ ᩁᨬ᩠ᨬᩮᩣ ᨾᩣᨣᨵᩔ ᨸᩩᩁᩥᩈᨠᩣᨶᩴ ᨸᩩᩁᩥᩈᨠᩣᨶᩴ ᩌᨴᩥᨿᨶ᩠ᨲᩥ. ᨲᩮ ᨡᩮᩣ ᨲᩮ, ᨾᩣᩁᩥᩈ, ᨾᩉᩣᨧᩮᩣᩁᩣ ᩁᨬ᩠ᨬᩮᩣ ᨾᩣᨣᨵᩔ ᩋᩅᩁᩩᨴ᩠ᨵᩣ ᨶᩣᨾ ᩅᩩᨧ᩠ᨧᨶ᩠ᨲᩥ. ᩑᩅᨾᩮᩅ ᨡᩮᩣ, ᨾᩣᩁᩥᩈ, ᩈᨶ᩠ᨲᩥ ᩋᨾᨶᩩᩔᩣ ᨧᨱ᩠ᨯᩣ ᩁᩩᨴ᩠ᨵᩣ ᩁᨽᩈᩣ, ᨲᩮ ᨶᩮᩅ ᨾᩉᩣᩁᩣᨩᩣᨶᩴ ᩌᨴᩥᨿᨶ᩠ᨲᩥ, ᨶ ᨾᩉᩣᩁᩣᨩᩣᨶᩴ ᨸᩩᩁᩥᩈᨠᩣᨶᩴ ᩌᨴᩥᨿᨶ᩠ᨲᩥ, ᨶ ᨾᩉᩣᩁᩣᨩᩣᨶᩴ ᨸᩩᩁᩥᩈᨠᩣᨶᩴ ᨸᩩᩁᩥᩈᨠᩣᨶᩴ ᩌᨴᩥᨿᨶ᩠ᨲᩥ. ᨲᩮ ᨡᩮᩣ ᨲᩮ, ᨾᩣᩁᩥᩈ, ᩋᨾᨶᩩᩔᩣ ᨾᩉᩣᩁᩣᨩᩣᨶᩴ ᩋᩅᩁᩩᨴ᩠ᨵᩣ ᨶᩣᨾ ᩅᩩᨧ᩠ᨧᨶ᩠ᨲᩥ. ᨿᩮᩣ ᩉᩥ ᨠᩮᩣᨧᩥ, ᨾᩣᩁᩥᩈ, ᩋᨾᨶᩩᩔᩮᩣ ᨿᨠ᩠ᨡᩮᩣ ᩅᩣ ᨿᨠ᩠ᨡᩥᨶᩦ ᩅᩣ…ᨸᩮ… ᨣᨶ᩠ᨵᨻ᩠ᨻᩮᩣ ᩅᩣ ᨣᨶ᩠ᨵᨻ᩠ᨻᩦ ᩅᩣ…ᨸᩮ… ᨠᩩᨾ᩠ᨽᨱ᩠ᨯᩮᩣ ᩅᩣ ᨠᩩᨾ᩠ᨽᨱ᩠ᨯᩦ ᩅᩣ…ᨸᩮ… ᨶᩣᨣᩮᩣ ᩅᩣ ᨶᩣᨣᩦ ᩅᩣ…ᨸᩮ… ᨸᨴᩩᨭ᩠ᨮᨧᩥᨲ᩠ᨲᩮᩣ ᨽᩥᨠ᩠ᨡᩩᩴ ᩅᩣ ᨽᩥᨠ᩠ᨡᩩᨶᩥᩴ ᩅᩣ ᩏᨸᩣᩈᨠᩴ ᩅᩣ ᩏᨸᩣᩈᩥᨠᩴ ᩅᩣ ᨣᨧ᩠ᨨᨶ᩠ᨲᩴ ᩅᩣ ᩏᨸᨣᨧ᩠ᨨᩮᨿ᩠ᨿ, ᨮᩥᨲᩴ ᩅᩣ ᩏᨸᨲᩥᨭ᩠ᨮᩮᨿ᩠ᨿ, ᨶᩥᩈᩥᨶ᩠ᨶᩴ ᩅᩣ ᩏᨸᨶᩥᩈᩦᨴᩮᨿ᩠ᨿ, ᨶᩥᨸᨶ᩠ᨶᩴ ᩅᩣ ᩏᨸᨶᩥᨸᨩ᩠ᨩᩮᨿ᩠ᨿ. ᩍᨾᩮᩈᩴ ᨿᨠ᩠ᨡᩣᨶᩴ ᨾᩉᩣᨿᨠ᩠ᨡᩣᨶᩴ ᩈᩮᨶᩣᨸᨲᩦᨶᩴ ᨾᩉᩣᩈᩮᨶᩣᨸᨲᩦᨶᩴ ᩏᨩ᩠ᨫᩣᨸᩮᨲᨻ᩠ᨻᩴ ᩅᩥᨠ᩠ᨠᨶ᩠ᨴᩥᨲᨻ᩠ᨻᩴ ᩅᩥᩁᩅᩥᨲᨻ᩠ᨻᩴ – ‘ᩋᨿᩴ ᨿᨠ᩠ᨡᩮᩣ ᨣᨱ᩠ᩉᩣᨲᩥ, ᩋᨿᩴ ᨿᨠ᩠ᨡᩮᩣ ᩌᩅᩥᩈᨲᩥ, ᩋᨿᩴ ᨿᨠ᩠ᨡᩮᩣ ᩉᩮᨮᩮᨲᩥ, ᩋᨿᩴ ᨿᨠ᩠ᨡᩮᩣ ᩅᩥᩉᩮᨮᩮᨲᩥ, ᩋᨿᩴ ᨿᨠ᩠ᨡᩮᩣ ᩉᩥᩴᩈᨲᩥ, ᩋᨿᩴ ᨿᨠ᩠ᨡᩮᩣ ᩅᩥᩉᩥᩴᩈᨲᩥ, ᩋᨿᩴ ᨿᨠ᩠ᨡᩮᩣ ᨶ ᨾᩩᨬ᩠ᨧᨲᩦ’ᨲᩥ.

᪒᪙᪓. ‘ᨠᨲᨾᩮᩈᩴ ᨿᨠ᩠ᨡᩣᨶᩴ ᨾᩉᩣᨿᨠ᩠ᨡᩣᨶᩴ ᩈᩮᨶᩣᨸᨲᩦᨶᩴ ᨾᩉᩣᩈᩮᨶᩣᨸᨲᩦᨶᩴ?

‘ᩍᨶ᩠ᨴᩮᩣ ᩈᩮᩣᨾᩮᩣ ᩅᩁᩩᨱᩮᩣ ᨧ, ᨽᩣᩁᨴ᩠ᩅᩣᨩᩮᩣ ᨸᨩᩣᨸᨲᩥ;

ᨧᨶ᩠ᨴᨶᩮᩣ ᨠᩣᨾᩈᩮᨭ᩠ᨮᩮᩣ ᨧ, ᨠᩥᨶ᩠ᨶᩩᨥᨱ᩠ᨯᩩ ᨶᩥᨥᨱ᩠ᨯᩩ ᨧ.

‘ᨸᨶᩣᨴᩮᩣ ᩒᨸᨾᨬ᩠ᨬᩮᩣ ᨧ, ᨴᩮᩅᩈᩪᨲᩮᩣ ᨧ ᨾᩣᨲᩃᩥ;

ᨧᩥᨲ᩠ᨲᩈᩮᨶᩮᩣ ᨧ ᨣᨶ᩠ᨵᨻ᩠ᨻᩮᩣ, ᨶᩊᩮᩣ ᩁᩣᨩᩣ ᨩᨶᩮᩈᨽᩮᩣ.

‘ᩈᩣᨲᩣᨣᩥᩁᩮᩣ ᩉᩮᩅᨾᨲᩮᩣ, ᨸᩩᨱ᩠ᨱᨠᩮᩣ ᨠᩁᨲᩥᨿᩮᩣ ᨣᩩᩊᩮᩣ;

ᩈᩥᩅᨠᩮᩣ ᨾᩩᨧᩃᩥᨶ᩠ᨴᩮᩣ ᨧ, ᩅᩮᩔᩣᨾᩥᨲ᩠ᨲᩮᩣ ᨿᩩᨣᨶ᩠ᨵᩁᩮᩣ.

‘ᨣᩮᩣᨸᩣᩃᩮᩣ ᩈᩩᨸ᩠ᨸᩁᩮᩣᨵᩮᩣ ᨧ, ᩉᩥᩁᩥ ᨶᩮᨲ᩠ᨲᩥ ᨧ ᨾᨶ᩠ᨴᩥᨿᩮᩣ;

ᨸᨬ᩠ᨧᩣᩃᨧᨱ᩠ᨯᩮᩣ ᩌᩊᩅᨠᩮᩣ, ᨸᨩ᩠ᨩᩩᨶ᩠ᨶᩮᩣ ᩈᩩᨾᨶᩮᩣ ᩈᩩᨾᩩᨡᩮᩣ;

ᨴᨵᩥᨾᩩᨡᩮᩣ ᨾᨱᩥ ᨾᩣᨱᩥᩅᩁᩮᩣ ᨴᩦᨥᩮᩣ, ᩋᨳᩮᩣ ᩈᩮᩁᩦᩈᨠᩮᩣ ᩈᩉ.

‘ᩍᨾᩮᩈᩴ ᨿᨠ᩠ᨡᩣᨶᩴ ᨾᩉᩣᨿᨠ᩠ᨡᩣᨶᩴ ᩈᩮᨶᩣᨸᨲᩦᨶᩴ ᨾᩉᩣᩈᩮᨶᩣᨸᨲᩦᨶᩴ ᩏᨩ᩠ᨫᩣᨸᩮᨲᨻ᩠ᨻᩴ ᩅᩥᨠ᩠ᨠᨶ᩠ᨴᩥᨲᨻ᩠ᨻᩴ ᩅᩥᩁᩅᩥᨲᨻ᩠ᨻᩴ – ‘‘ᩋᨿᩴ ᨿᨠ᩠ᨡᩮᩣ ᨣᨱ᩠ᩉᩣᨲᩥ, ᩋᨿᩴ ᨿᨠ᩠ᨡᩮᩣ ᩌᩅᩥᩈᨲᩥ, ᩋᨿᩴ ᨿᨠ᩠ᨡᩮᩣ ᩉᩮᨮᩮᨲᩥ, ᩋᨿᩴ ᨿᨠ᩠ᨡᩮᩣ ᩅᩥᩉᩮᨮᩮᨲᩥ, ᩋᨿᩴ ᨿᨠ᩠ᨡᩮᩣ ᩉᩥᩴᩈᨲᩥ, ᩋᨿᩴ ᨿᨠ᩠ᨡᩮᩣ ᩅᩥᩉᩥᩴᩈᨲᩥ, ᩋᨿᩴ ᨿᨠ᩠ᨡᩮᩣ ᨶ ᨾᩩᨬ᩠ᨧᨲᩦ’’ᨲᩥ. ᩋᨿᩴ ᨡᩮᩣ, ᨾᩣᩁᩥᩈ, ᩌᨭᩣᨶᩣᨭᩥᨿᩣ ᩁᨠ᩠ᨡᩣ ᨽᩥᨠ᩠ᨡᩪᨶᩴ ᨽᩥᨠ᩠ᨡᩩᨶᩦᨶᩴ ᩏᨸᩣᩈᨠᩣᨶᩴ ᩏᨸᩣᩈᩥᨠᩣᨶᩴ ᨣᩩᨲ᩠ᨲᩥᨿᩣ ᩁᨠ᩠ᨡᩣᨿ ᩋᩅᩥᩉᩥᩴᩈᩣᨿ ᨹᩣᩈᩩᩅᩥᩉᩣᩁᩣᨿ. ᩉᨶ᩠ᨴ ᨧ ᨴᩣᨶᩥ ᨾᨿᩴ, ᨾᩣᩁᩥᩈ, ᨣᨧ᩠ᨨᩣᨾ, ᨻᩉᩩᨠᩥᨧ᩠ᨧᩣ ᨾᨿᩴ ᨻᩉᩩᨠᩁᨱᩦᨿᩣ’’’ᨲᩥ. ‘‘‘ᨿᩔ ᨴᩣᨶᩥ ᨲᩩᨾ᩠ᩉᩮ ᨾᩉᩣᩁᩣᨩᩣᨶᩮᩣ ᨠᩣᩃᩴ ᨾᨬ᩠ᨬᨳᩣ’’’ᨲᩥ.

᪒᪙᪔. ‘‘ᩋᨳ ᨡᩮᩣ, ᨽᩥᨠ᩠ᨡᩅᩮ, ᨧᨲ᩠ᨲᩣᩁᩮᩣ ᨾᩉᩣᩁᩣᨩᩣ ᩏᨭ᩠ᨮᩣᨿᩣᩈᨶᩣ ᨾᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨲᨲ᩠ᨳᩮᩅᨶ᩠ᨲᩁᨵᩣᨿᩥᩴᩈᩩ. ᨲᩮᨸᩥ ᨡᩮᩣ, ᨽᩥᨠ᩠ᨡᩅᩮ, ᨿᨠ᩠ᨡᩣ ᩏᨭ᩠ᨮᩣᨿᩣᩈᨶᩣ ᩋᨸ᩠ᨸᩮᨠᨧ᩠ᨧᩮ ᨾᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨲᨲ᩠ᨳᩮᩅᨶ᩠ᨲᩁᨵᩣᨿᩥᩴᩈᩩ. ᩋᨸ᩠ᨸᩮᨠᨧ᩠ᨧᩮ ᨾᨿᩣ ᩈᨴ᩠ᨵᩥᩴ ᩈᨾ᩠ᨾᩮᩣᨴᩥᩴᩈᩩ, ᩈᨾ᩠ᨾᩮᩣᨴᨶᩦᨿᩴ ᨠᨳᩴ ᩈᩣᩁᨱᩦᨿᩴ ᩅᩦᨲᩥᩈᩣᩁᩮᨲ᩠ᩅᩣ ᨲᨲ᩠ᨳᩮᩅᨶ᩠ᨲᩁᨵᩣᨿᩥᩴᩈᩩ. ᩋᨸ᩠ᨸᩮᨠᨧ᩠ᨧᩮ ᨿᩮᨶᩣᩉᩴ ᨲᩮᨶᨬ᩠ᨩᩃᩥᩴ ᨸᨱᩣᨾᩮᨲ᩠ᩅᩣ ᨲᨲ᩠ᨳᩮᩅᨶ᩠ᨲᩁᨵᩣᨿᩥᩴᩈᩩ. ᩋᨸ᩠ᨸᩮᨠᨧ᩠ᨧᩮ ᨶᩣᨾᨣᩮᩣᨲ᩠ᨲᩴ ᩈᩣᩅᩮᨲ᩠ᩅᩣ ᨲᨲ᩠ᨳᩮᩅᨶ᩠ᨲᩁᨵᩣᨿᩥᩴᩈᩩ. ᩋᨸ᩠ᨸᩮᨠᨧ᩠ᨧᩮ ᨲᩩᨱ᩠ᩉᩦᨽᩪᨲᩣ ᨲᨲ᩠ᨳᩮᩅᨶ᩠ᨲᩁᨵᩣᨿᩥᩴᩈᩩ.

᪒᪙᪕. ‘‘ᩏᨣ᩠ᨣᨱ᩠ᩉᩣᨳ, ᨽᩥᨠ᩠ᨡᩅᩮ, ᩌᨭᩣᨶᩣᨭᩥᨿᩴ ᩁᨠ᩠ᨡᩴ. ᨸᩁᩥᨿᩣᨸᩩᨱᩣᨳ, ᨽᩥᨠ᩠ᨡᩅᩮ, ᩌᨭᩣᨶᩣᨭᩥᨿᩴ ᩁᨠ᩠ᨡᩴ. ᨵᩣᩁᩮᨳ, ᨽᩥᨠ᩠ᨡᩅᩮ, ᩌᨭᩣᨶᩣᨭᩥᨿᩴ ᩁᨠ᩠ᨡᩴ. ᩋᨲ᩠ᨳᩈᩴᩉᩥᨲᩣ [ᩋᨲ᩠ᨳᩈᩴᩉᩥᨲᩣᨿᩴ (ᩈ᩠ᨿᩣ.)], ᨽᩥᨠ᩠ᨡᩅᩮ, ᩌᨭᩣᨶᩣᨭᩥᨿᩣ ᩁᨠ᩠ᨡᩣ ᨽᩥᨠ᩠ᨡᩪᨶᩴ ᨽᩥᨠ᩠ᨡᩩᨶᩦᨶᩴ ᩏᨸᩣᩈᨠᩣᨶᩴ ᩏᨸᩣᩈᩥᨠᩣᨶᩴ ᨣᩩᨲ᩠ᨲᩥᨿᩣ ᩁᨠ᩠ᨡᩣᨿ ᩋᩅᩥᩉᩥᩴᩈᩣᨿ ᨹᩣᩈᩩᩅᩥᩉᩣᩁᩣᨿᩣ’’ᨲᩥ. ᩍᨴᨾᩅᩮᩣᨧ ᨽᨣᩅᩣ. ᩋᨲ᩠ᨲᨾᨶᩣ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨽᩣᩈᩥᨲᩴ ᩋᨽᩥᨶᨶ᩠ᨴᩩᨶ᩠ᨲᩥ.

ᩌᨭᩣᨶᩣᨭᩥᨿᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᨶᩅᨾᩴ.

᪑᪐. ᩈᨦ᩠ᨣᩦᨲᩥᩈᩩᨲ᩠ᨲᩴ

᪒᪙᪖. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᨾᩃ᩠ᩃᩮᩈᩩ ᨧᩣᩁᩥᨠᩴ ᨧᩁᨾᩣᨶᩮᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨸᨬ᩠ᨧᨾᨲ᩠ᨲᩮᩉᩥ ᨽᩥᨠ᩠ᨡᩩᩈᨲᩮᩉᩥ ᨿᩮᨶ ᨸᩣᩅᩣ ᨶᩣᨾ ᨾᩃ᩠ᩃᩣᨶᩴ ᨶᨣᩁᩴ ᨲᨴᩅᩈᩁᩥ. ᨲᨲᩕ ᩈᩩᨴᩴ ᨽᨣᩅᩣ ᨸᩣᩅᩣᨿᩴ ᩅᩥᩉᩁᨲᩥ ᨧᩩᨶ᩠ᨴᩔ ᨠᨾ᩠ᨾᩣᩁᨸᩩᨲ᩠ᨲᩔ ᩋᨾ᩠ᨻᩅᨶᩮ.

ᩏᨻ᩠ᨽᨲᨠᨶᩅᩈᨶ᩠ᨵᩣᨣᩣᩁᩴ

᪒᪙᪗. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨸᩣᩅᩮᨿ᩠ᨿᨠᩣᨶᩴ ᨾᩃ᩠ᩃᩣᨶᩴ ᩏᨻ᩠ᨽᨲᨠᩴ ᨶᩣᨾ ᨶᩅᩴ ᩈᨶ᩠ᨵᩣᨣᩣᩁᩴ [ᩈᨶ᩠ᨳᩣᨣᩣᩁᩴ (ᩈᩦ. ᨸᩦ.), ᩈᨱ᩠ᨮᩣᨣᩣᩁᩴ (ᩈ᩠ᨿᩣ. ᨠᩴ.)] ᩋᨧᩥᩁᨠᩣᩁᩥᨲᩴ ᩉᩮᩣᨲᩥ ᩋᨶᨩ᩠ᨫᩣᩅᩩᨭ᩠ᨮᩴ [ᩋᨶᨩ᩠ᨫᩣᩅᩩᨲ᩠ᨳᩴ (ᩈᩦ. ᩈ᩠ᨿᩣ. ᨸᩦ. ᨠ.)] ᩈᨾᨱᩮᨶ ᩅᩣ ᨻᩕᩣᩉ᩠ᨾᨱᩮᨶ ᩅᩣ ᨠᩮᨶᨧᩥ ᩅᩣ ᨾᨶᩩᩔᨽᩪᨲᩮᨶ. ᩋᩔᩮᩣᩈᩩᩴ ᨡᩮᩣ ᨸᩣᩅᩮᨿ᩠ᨿᨠᩣ ᨾᩃ᩠ᩃᩣ – ‘‘ᨽᨣᩅᩣ ᨠᩥᩁ ᨾᩃ᩠ᩃᩮᩈᩩ ᨧᩣᩁᩥᨠᩴ ᨧᩁᨾᩣᨶᩮᩣ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨸᨬ᩠ᨧᨾᨲ᩠ᨲᩮᩉᩥ ᨽᩥᨠ᩠ᨡᩩᩈᨲᩮᩉᩥ ᨸᩣᩅᩴ ᩋᨶᩩᨸ᩠ᨸᨲ᩠ᨲᩮᩣ ᨸᩣᩅᩣᨿᩴ ᩅᩥᩉᩁᨲᩥ ᨧᩩᨶ᩠ᨴᩔ ᨠᨾ᩠ᨾᩣᩁᨸᩩᨲ᩠ᨲᩔ ᩋᨾ᩠ᨻᩅᨶᩮ’’ᨲᩥ. ᩋᨳ ᨡᩮᩣ ᨸᩣᩅᩮᨿ᩠ᨿᨠᩣ ᨾᩃ᩠ᩃᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥᩴᩈᩩ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩣ ᨡᩮᩣ ᨸᩣᩅᩮᨿ᩠ᨿᨠᩣ ᨾᩃ᩠ᩃᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧᩩᩴ – ‘‘ᩍᨵ, ᨽᨶ᩠ᨲᩮ, ᨸᩣᩅᩮᨿ᩠ᨿᨠᩣᨶᩴ ᨾᩃ᩠ᩃᩣᨶᩴ ᩏᨻ᩠ᨽᨲᨠᩴ ᨶᩣᨾ ᨶᩅᩴ ᩈᨶ᩠ᨵᩣᨣᩣᩁᩴ ᩋᨧᩥᩁᨠᩣᩁᩥᨲᩴ ᩉᩮᩣᨲᩥ ᩋᨶᨩ᩠ᨫᩣᩅᩩᨭ᩠ᨮᩴ ᩈᨾᨱᩮᨶ ᩅᩣ ᨻᩕᩣᩉ᩠ᨾᨱᩮᨶ ᩅᩣ ᨠᩮᨶᨧᩥ ᩅᩣ ᨾᨶᩩᩔᨽᩪᨲᩮᨶ. ᨲᨬ᩠ᨧ ᨡᩮᩣ, ᨽᨶ᩠ᨲᩮ, ᨽᨣᩅᩣ ᨸᨮᨾᩴ ᨸᩁᩥᨽᩩᨬ᩠ᨩᨲᩩ, ᨽᨣᩅᨲᩣ ᨸᨮᨾᩴ ᨸᩁᩥᨽᩩᨲ᩠ᨲᩴ ᨸᨧ᩠ᨨᩣ ᨸᩣᩅᩮᨿ᩠ᨿᨠᩣ ᨾᩃ᩠ᩃᩣ ᨸᩁᩥᨽᩩᨬ᩠ᨩᩥᩔᨶ᩠ᨲᩥ. ᨲᨴᩔ ᨸᩣᩅᩮᨿ᩠ᨿᨠᩣᨶᩴ ᨾᩃ᩠ᩃᩣᨶᩴ ᨴᩦᨥᩁᨲ᩠ᨲᩴ ᩉᩥᨲᩣᨿ ᩈᩩᨡᩣᨿᩣ’’ᨲᩥ. ᩋᨵᩥᩅᩣᩈᩮᩈᩥ ᨡᩮᩣ ᨽᨣᩅᩣ ᨲᩩᨱ᩠ᩉᩦᨽᩣᩅᩮᨶ.

᪒᪙᪘. ᩋᨳ ᨡᩮᩣ ᨸᩣᩅᩮᨿ᩠ᨿᨠᩣ ᨾᩃ᩠ᩃᩣ ᨽᨣᩅᨲᩮᩣ ᩋᨵᩥᩅᩣᩈᨶᩴ ᩅᩥᨴᩥᨲ᩠ᩅᩣ ᩏᨭ᩠ᨮᩣᨿᩣᩈᨶᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨿᩮᨶ ᩈᨶ᩠ᨵᩣᨣᩣᩁᩴ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᩈᨻ᩠ᨻᩈᨶ᩠ᨳᩁᩥᩴ [ᩈᨻ᩠ᨻᩈᨶ᩠ᨳᩁᩥᩴ ᩈᨶ᩠ᨳᨲᩴ (ᨠ.)] ᩈᨶ᩠ᨵᩣᨣᩣᩁᩴ ᩈᨶ᩠ᨳᩁᩥᨲ᩠ᩅᩣ ᨽᨣᩅᨲᩮᩣ ᩌᩈᨶᩣᨶᩥ ᨸᨬ᩠ᨬᩣᨸᩮᨲ᩠ᩅᩣ ᩏᨴᨠᨾᨱᩥᨠᩴ ᨸᨲᩥᨭ᩠ᨮᨸᩮᨲ᩠ᩅᩣ ᨲᩮᩃᨸᨴᩦᨸᩴ ᩌᩁᩮᩣᨸᩮᨲ᩠ᩅᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥᩴᩈᩩ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᩋᨭ᩠ᨮᩴᩈᩩ. ᩑᨠᨾᨶ᩠ᨲᩴ ᨮᩥᨲᩣ ᨡᩮᩣ ᨲᩮ ᨸᩣᩅᩮᨿ᩠ᨿᨠᩣ ᨾᩃ᩠ᩃᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧᩩᩴ – ‘‘ᩈᨻ᩠ᨻᩈᨶ᩠ᨳᩁᩥᩈᨶ᩠ᨳᨲᩴ [ᩈᨻ᩠ᨻᩈᨶ᩠ᨳᩁᩥᩴ ᩈᨶ᩠ᨳᨲᩴ (ᩈᩦ. ᨸᩦ. ᨠ.)], ᨽᨶ᩠ᨲᩮ, ᩈᨶ᩠ᨵᩣᨣᩣᩁᩴ, ᨽᨣᩅᨲᩮᩣ ᩌᩈᨶᩣᨶᩥ ᨸᨬ᩠ᨬᨲ᩠ᨲᩣᨶᩥ, ᩏᨴᨠᨾᨱᩥᨠᩮᩣ ᨸᨲᩥᨭ᩠ᨮᩣᨸᩥᨲᩮᩣ, ᨲᩮᩃᨸᨴᩦᨸᩮᩣ ᩌᩁᩮᩣᨸᩥᨲᩮᩣ. ᨿᩔᨴᩣᨶᩥ, ᨽᨶ᩠ᨲᩮ, ᨽᨣᩅᩣ ᨠᩣᩃᩴ ᨾᨬ᩠ᨬᨲᩦ’’ᨲᩥ.

᪒᪙᪙. ᩋᨳ ᨡᩮᩣ ᨽᨣᩅᩣ ᨶᩥᩅᩣᩈᩮᨲ᩠ᩅᩣ ᨸᨲ᩠ᨲᨧᩦᩅᩁᨾᩣᨴᩣᨿ ᩈᨴ᩠ᨵᩥᩴ ᨽᩥᨠ᩠ᨡᩩᩈᨦ᩠ᨥᩮᨶ ᨿᩮᨶ ᩈᨶ᩠ᨵᩣᨣᩣᩁᩴ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨸᩣᨴᩮ ᨸᨠ᩠ᨡᩣᩃᩮᨲ᩠ᩅᩣ ᩈᨶ᩠ᨵᩣᨣᩣᩁᩴ ᨸᩅᩥᩈᩥᨲ᩠ᩅᩣ ᨾᨩ᩠ᨫᩥᨾᩴ ᨳᨾ᩠ᨽᩴ ᨶᩥᩔᩣᨿ ᨸᩩᩁᨲ᩠ᨳᩣᨽᩥᨾᩩᨡᩮᩣ ᨶᩥᩈᩦᨴᩥ. ᨽᩥᨠ᩠ᨡᩩᩈᨦ᩠ᨥᩮᩣᨸᩥ ᨡᩮᩣ ᨸᩣᨴᩮ ᨸᨠ᩠ᨡᩣᩃᩮᨲ᩠ᩅᩣ ᩈᨶ᩠ᨵᩣᨣᩣᩁᩴ ᨸᩅᩥᩈᩥᨲ᩠ᩅᩣ ᨸᨧ᩠ᨨᩥᨾᩴ ᨽᩥᨲ᩠ᨲᩥᩴ ᨶᩥᩔᩣᨿ ᨸᩩᩁᨲ᩠ᨳᩣᨽᩥᨾᩩᨡᩮᩣ ᨶᩥᩈᩦᨴᩥ ᨽᨣᩅᨶ᩠ᨲᩴᨿᩮᩅ ᨸᩩᩁᨠ᩠ᨡᨲ᩠ᩅᩣ. ᨸᩣᩅᩮᨿ᩠ᨿᨠᩣᨸᩥ ᨡᩮᩣ ᨾᩃ᩠ᩃᩣ ᨸᩣᨴᩮ ᨸᨠ᩠ᨡᩣᩃᩮᨲ᩠ᩅᩣ ᩈᨶ᩠ᨵᩣᨣᩣᩁᩴ ᨸᩅᩥᩈᩥᨲ᩠ᩅᩣ ᨸᩩᩁᨲ᩠ᨳᩥᨾᩴ ᨽᩥᨲ᩠ᨲᩥᩴ ᨶᩥᩔᩣᨿ ᨸᨧ᩠ᨨᩥᨾᩣᨽᩥᨾᩩᨡᩣ ᨶᩥᩈᩦᨴᩥᩴᩈᩩ ᨽᨣᩅᨶ᩠ᨲᩴᨿᩮᩅ ᨸᩩᩁᨠ᩠ᨡᨲ᩠ᩅᩣ. ᩋᨳ ᨡᩮᩣ ᨽᨣᩅᩣ ᨸᩣᩅᩮᨿ᩠ᨿᨠᩮ ᨾᩃ᩠ᩃᩮ ᨻᩉᩩᨴᩮᩅ ᩁᨲ᩠ᨲᩥᩴ ᨵᨾ᩠ᨾᩥᨿᩣ ᨠᨳᩣᨿ ᩈᨶ᩠ᨴᩔᩮᨲ᩠ᩅᩣ ᩈᨾᩣᨴᨸᩮᨲ᩠ᩅᩣ ᩈᨾᩩᨲ᩠ᨲᩮᨩᩮᨲ᩠ᩅᩣ ᩈᨾ᩠ᨸᩉᩴᩈᩮᨲ᩠ᩅᩣ ᩏᨿ᩠ᨿᩮᩣᨩᩮᩈᩥ – ‘‘ᩋᨽᩥᨠ᩠ᨠᨶ᩠ᨲᩣ ᨡᩮᩣ, ᩅᩣᩈᩮᨭ᩠ᨮᩣ, ᩁᨲ᩠ᨲᩥ. ᨿᩔᨴᩣᨶᩥ ᨲᩩᨾ᩠ᩉᩮ ᨠᩣᩃᩴ ᨾᨬ᩠ᨬᨳᩣ’’ᨲᩥ. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᨸᩣᩅᩮᨿ᩠ᨿᨠᩣ ᨾᩃ᩠ᩃᩣ ᨽᨣᩅᨲᩮᩣ ᨸᨭᩥᩔᩩᨲ᩠ᩅᩣ ᩏᨭ᩠ᨮᩣᨿᩣᩈᨶᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨸᨠ᩠ᨠᨾᩥᩴᩈᩩ.

᪓᪐᪐. ᩋᨳ ᨡᩮᩣ ᨽᨣᩅᩣ ᩋᨧᩥᩁᨸᨠ᩠ᨠᨶ᩠ᨲᩮᩈᩩ ᨸᩣᩅᩮᨿ᩠ᨿᨠᩮᩈᩩ ᨾᩃ᩠ᩃᩮᩈᩩ ᨲᩩᨱ᩠ᩉᩦᨽᩪᨲᩴ ᨲᩩᨱ᩠ᩉᩦᨽᩪᨲᩴ ᨽᩥᨠ᩠ᨡᩩᩈᩴᨥᩴ ᩋᨶᩩᩅᩥᩃᩮᩣᨠᩮᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩈᩣᩁᩥᨸᩩᨲ᩠ᨲᩴ ᩌᨾᨶ᩠ᨲᩮᩈᩥ – ‘‘ᩅᩥᨣᨲᨳᩥᨶᨾᩥᨴ᩠ᨵᩮᩣ [ᩅᩥᨣᨲᨳᩦᨶᨾᩥᨴ᩠ᨵᩮᩣ (ᩈᩦ. ᩈ᩠ᨿᩣ. ᨠᩴ. ᨸᩦ.)] ᨡᩮᩣ, ᩈᩣᩁᩥᨸᩩᨲ᩠ᨲ, ᨽᩥᨠ᩠ᨡᩩᩈᨦ᩠ᨥᩮᩣ. ᨸᨭᩥᨽᩣᨲᩩ ᨲᩴ, ᩈᩣᩁᩥᨸᩩᨲ᩠ᨲ, ᨽᩥᨠ᩠ᨡᩪᨶᩴ ᨵᨾ᩠ᨾᩦᨠᨳᩣ. ᨸᩥᨭ᩠ᨮᩥ ᨾᩮ ᩌᨣᩥᩃᩣᨿᨲᩥ. ᨲᨾᩉᩴ ᩌᨿᨾᩥᩔᩣᨾᩦ’’ᨲᩥ [ᩌᨿᨾᩮᨿ᩠ᨿᩣᨾᩦᨲᩥ (ᩈ᩠ᨿᩣ. ᨠᩴ.)]. ‘‘ᩑᩅᩴ, ᨽᨶ᩠ᨲᩮ’’ᨲᩥ ᨡᩮᩣ ᩌᨿᩈ᩠ᨾᩣ ᩈᩣᩁᩥᨸᩩᨲ᩠ᨲᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ. ᩋᨳ ᨡᩮᩣ ᨽᨣᩅᩣ ᨧᨲᩩᨣ᩠ᨣᩩᨱᩴ ᩈᨦ᩠ᨥᩣᨭᩥᩴ ᨸᨬ᩠ᨬᨸᩮᨲ᩠ᩅᩣ ᨴᨠ᩠ᨡᩥᨱᩮᨶ ᨸᩔᩮᨶ ᩈᩦᩉᩈᩮᨿ᩠ᨿᩴ ᨠᨸ᩠ᨸᩮᩈᩥ ᨸᩣᨴᩮ ᨸᩣᨴᩴ ᩋᨧ᩠ᨧᩣᨵᩣᨿ, ᩈᨲᩮᩣ ᩈᨾ᩠ᨸᨩᩣᨶᩮᩣ ᩏᨭ᩠ᨮᩣᨶᩈᨬ᩠ᨬᩴ ᨾᨶᩈᩥ ᨠᩁᩥᨲ᩠ᩅᩣ.

ᨽᩥᨶ᩠ᨶᨶᩥᨣᨱ᩠ᨮᩅᨲ᩠ᨳᩩ

᪓᪐᪑. ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨶᩥᨣᨱ᩠ᨮᩮᩣ ᨶᩣᨭᨸᩩᨲ᩠ᨲᩮᩣ ᨸᩣᩅᩣᨿᩴ ᩋᨵᩩᨶᩣᨠᩣᩃᨦ᩠ᨠᨲᩮᩣ ᩉᩮᩣᨲᩥ. ᨲᩔ ᨠᩣᩃᨦ᩠ᨠᩥᩁᩥᨿᩣᨿ ᨽᩥᨶ᩠ᨶᩣ ᨶᩥᨣᨱ᩠ᨮᩣ ᨴ᩠ᩅᩮᨵᩥᨠᨩᩣᨲᩣ [ᨴ᩠ᨵᩮᩊ᩠ᩉᨠᨩᩣᨲᩣ (ᩈ᩠ᨿᩣ. ᨠᩴ.)] ᨽᨱ᩠ᨯᨶᨩᩣᨲᩣ ᨠᩃᩉᨩᩣᨲᩣ ᩅᩥᩅᩣᨴᩣᨸᨶ᩠ᨶᩣ ᩋᨬ᩠ᨬᨾᨬ᩠ᨬᩴ ᨾᩩᨡᩈᨲ᩠ᨲᩦᩉᩥ ᩅᩥᨲᩩᨴᨶ᩠ᨲᩣ ᩅᩥᩉᩁᨶ᩠ᨲᩥ [ᩅᩥᨧᩁᨶ᩠ᨲᩥ (ᩈ᩠ᨿᩣ. ᨠᩴ.)] – ‘‘ᨶ ᨲ᩠ᩅᩴ ᩍᨾᩴ ᨵᨾ᩠ᨾᩅᩥᨶᨿᩴ ᩌᨩᩣᨶᩣᩈᩥ, ᩋᩉᩴ ᩍᨾᩴ ᨵᨾ᩠ᨾᩅᩥᨶᨿᩴ ᩌᨩᩣᨶᩣᨾᩥ, ᨠᩥᩴ ᨲ᩠ᩅᩴ ᩍᨾᩴ ᨵᨾ᩠ᨾᩅᩥᨶᨿᩴ ᩌᨩᩣᨶᩥᩔᩈᩥ! ᨾᩥᨧ᩠ᨨᩣᨸᨭᩥᨸᨶ᩠ᨶᩮᩣ ᨲ᩠ᩅᨾᩈᩥ, ᩋᩉᨾᩈ᩠ᨾᩥ ᩈᨾ᩠ᨾᩣᨸᨭᩥᨸᨶ᩠ᨶᩮᩣ. ᩈᩉᩥᨲᩴ ᨾᩮ, ᩋᩈᩉᩥᨲᩴ ᨲᩮ. ᨸᩩᩁᩮᩅᨧᨶᩦᨿᩴ ᨸᨧ᩠ᨨᩣ ᩋᩅᨧ, ᨸᨧ᩠ᨨᩣᩅᨧᨶᩦᨿᩴ ᨸᩩᩁᩮ ᩋᩅᨧ. ᩋᨵᩥᨧᩥᨱ᩠ᨱᩴ ᨲᩮ ᩅᩥᨸᩁᩣᩅᨲ᩠ᨲᩴ, ᩌᩁᩮᩣᨸᩥᨲᩮᩣ ᨲᩮ ᩅᩣᨴᩮᩣ, ᨶᩥᨣ᩠ᨣᩉᩥᨲᩮᩣ ᨲ᩠ᩅᨾᩈᩥ, ᨧᩁ ᩅᩣᨴᨸ᩠ᨸᨾᩮᩣᨠ᩠ᨡᩣᨿ, ᨶᩥᨻ᩠ᨻᩮᨮᩮᩉᩥ ᩅᩣ ᩈᨧᩮ ᨸᩉᩮᩣᩈᩦ’’ᨲᩥ. ᩅᨵᩮᩣᨿᩮᩅ ᨡᩮᩣ ᨾᨬ᩠ᨬᩮ ᨶᩥᨣᨱ᩠ᨮᩮᩈᩩ ᨶᩣᨭᨸᩩᨲ᩠ᨲᩥᨿᩮᩈᩩ ᩅᨲ᩠ᨲᨲᩥ. ᨿᩮᨸᩥ [ᨿᩮᨸᩥ ᨲᩮ (ᩈᩦ. ᨸᩦ.)] ᨶᩥᨣᨱ᩠ᨮᩔ ᨶᩣᨭᨸᩩᨲ᩠ᨲᩔ ᩈᩣᩅᨠᩣ ᨣᩥᩉᩦ ᩒᨴᩣᨲᩅᩈᨶᩣ, ᨲᩮᨸᩥ ᨶᩥᨣᨱ᩠ᨮᩮᩈᩩ ᨶᩣᨭᨸᩩᨲ᩠ᨲᩥᨿᩮᩈᩩ ᨶᩥᨻ᩠ᨻᩥᨶ᩠ᨶᩁᩪᨸᩣ ᩅᩥᩁᨲ᩠ᨲᩁᩪᨸᩣ ᨸᨭᩥᩅᩣᨶᩁᩪᨸᩣ, ᨿᨳᩣ ᨲᩴ ᨴᩩᩁᨠ᩠ᨡᩣᨲᩮ ᨵᨾ᩠ᨾᩅᩥᨶᨿᩮ ᨴᩩᨸ᩠ᨸᩅᩮᨴᩥᨲᩮ ᩋᨶᩥᨿ᩠ᨿᩣᨶᩥᨠᩮ ᩋᨶᩩᨸᩈᨾᩈᩴᩅᨲ᩠ᨲᨶᩥᨠᩮ ᩋᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮ ᨽᩥᨶ᩠ᨶᨳᩪᨸᩮ ᩋᨸ᩠ᨸᨭᩥᩈᩁᨱᩮ.

᪓᪐᪒. ᩋᨳ ᨡᩮᩣ ᩌᨿᩈ᩠ᨾᩣ ᩈᩣᩁᩥᨸᩩᨲ᩠ᨲᩮᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᨶᩥᨣᨱ᩠ᨮᩮᩣ, ᩌᩅᩩᩈᩮᩣ, ᨶᩣᨭᨸᩩᨲ᩠ᨲᩮᩣ ᨸᩣᩅᩣᨿᩴ ᩋᨵᩩᨶᩣᨠᩣᩃᨦ᩠ᨠᨲᩮᩣ, ᨲᩔ ᨠᩣᩃᨦ᩠ᨠᩥᩁᩥᨿᩣᨿ ᨽᩥᨶ᩠ᨶᩣ ᨶᩥᨣᨱ᩠ᨮᩣ ᨴ᩠ᩅᩮᨵᩥᨠᨩᩣᨲᩣ…ᨸᩮ… ᨽᩥᨶ᩠ᨶᨳᩪᨸᩮ ᩋᨸ᩠ᨸᨭᩥᩈᩁᨱᩮ’’. ‘‘ᩑᩅᨬ᩠ᩉᩮᨲᩴ, ᩌᩅᩩᩈᩮᩣ, ᩉᩮᩣᨲᩥ ᨴᩩᩁᨠ᩠ᨡᩣᨲᩮ ᨵᨾ᩠ᨾᩅᩥᨶᨿᩮ ᨴᩩᨸ᩠ᨸᩅᩮᨴᩥᨲᩮ ᩋᨶᩥᨿ᩠ᨿᩣᨶᩥᨠᩮ ᩋᨶᩩᨸᩈᨾᩈᩴᩅᨲ᩠ᨲᨶᩥᨠᩮ ᩋᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮ. ᩋᨿᩴ ᨡᩮᩣ ᨸᨶᩣᩅᩩᩈᩮᩣ ᩋᨾ᩠ᩉᩣᨠᩴ [ᩋᩈ᩠ᨾᩣᨠᩴ (ᨸᩦ.)] ᨽᨣᩅᨲᩣ [ᨽᨣᩅᨲᩮᩣ (ᨠ. ᩈᩦ.)] ᨵᨾ᩠ᨾᩮᩣ ᩈ᩠ᩅᩣᨠ᩠ᨡᩣᨲᩮᩣ ᩈᩩᨸ᩠ᨸᩅᩮᨴᩥᨲᩮᩣ ᨶᩥᨿ᩠ᨿᩣᨶᩥᨠᩮᩣ ᩏᨸᩈᨾᩈᩴᩅᨲ᩠ᨲᨶᩥᨠᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮᩣ. ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ, ᨶ ᩅᩥᩅᨴᩥᨲᨻ᩠ᨻᩴ, ᨿᨳᨿᩥᨴᩴ ᨻᩕᩉ᩠ᨾᨧᩁᩥᨿᩴ ᩋᨴ᩠ᨵᨶᩥᨿᩴ ᩋᩔ ᨧᩥᩁᨭ᩠ᨮᩥᨲᩥᨠᩴ, ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ.

‘‘ᨠᨲᨾᩮᩣ ᨧᩣᩅᩩᩈᩮᩣ, ᩋᨾ᩠ᩉᩣᨠᩴ ᨽᨣᩅᨲᩣ [ᨽᨣᩅᨲᩮᩣ (ᨠ. ᩈᩦ.)] ᨵᨾ᩠ᨾᩮᩣ ᩈ᩠ᩅᩣᨠ᩠ᨡᩣᨲᩮᩣ ᩈᩩᨸ᩠ᨸᩅᩮᨴᩥᨲᩮᩣ ᨶᩥᨿ᩠ᨿᩣᨶᩥᨠᩮᩣ ᩏᨸᩈᨾᩈᩴᩅᨲ᩠ᨲᨶᩥᨠᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᨸ᩠ᨸᩅᩮᨴᩥᨲᩮᩣ; ᨿᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ, ᨶ ᩅᩥᩅᨴᩥᨲᨻ᩠ᨻᩴ, ᨿᨳᨿᩥᨴᩴ ᨻᩕᩉ᩠ᨾᨧᩁᩥᨿᩴ ᩋᨴ᩠ᨵᨶᩥᨿᩴ ᩋᩔ ᨧᩥᩁᨭ᩠ᨮᩥᨲᩥᨠᩴ, ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ?

ᩑᨠᨠᩴ

᪓᪐᪓. ‘‘ᩋᨲ᩠ᨳᩥ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᩑᨠᩮᩣ ᨵᨾ᩠ᨾᩮᩣ ᩈᨾ᩠ᨾᨴᨠ᩠ᨡᩣᨲᩮᩣ. ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ, ᨶ ᩅᩥᩅᨴᩥᨲᨻ᩠ᨻᩴ, ᨿᨳᨿᩥᨴᩴ ᨻᩕᩉ᩠ᨾᨧᩁᩥᨿᩴ ᩋᨴ᩠ᨵᨶᩥᨿᩴ ᩋᩔ ᨧᩥᩁᨭ᩠ᨮᩥᨲᩥᨠᩴ, ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᨠᨲᨾᩮᩣ ᩑᨠᩮᩣ ᨵᨾ᩠ᨾᩮᩣ? ᩈᨻ᩠ᨻᩮ ᩈᨲ᩠ᨲᩣ ᩌᩉᩣᩁᨭ᩠ᨮᩥᨲᩥᨠᩣ. ᩈᨻ᩠ᨻᩮ ᩈᨲ᩠ᨲᩣ ᩈᨦ᩠ᨡᩣᩁᨭ᩠ᨮᩥᨲᩥᨠᩣ. ᩋᨿᩴ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᩑᨠᩮᩣ ᨵᨾ᩠ᨾᩮᩣ ᩈᨾ᩠ᨾᨴᨠ᩠ᨡᩣᨲᩮᩣ. ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ, ᨶ ᩅᩥᩅᨴᩥᨲᨻ᩠ᨻᩴ, ᨿᨳᨿᩥᨴᩴ ᨻᩕᩉ᩠ᨾᨧᩁᩥᨿᩴ ᩋᨴ᩠ᨵᨶᩥᨿᩴ ᩋᩔ ᨧᩥᩁᨭ᩠ᨮᩥᨲᩥᨠᩴ, ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ.

ᨴᩩᨠᩴ

᪓᪐᪔. ‘‘ᩋᨲ᩠ᨳᩥ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨴ᩠ᩅᩮ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ. ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ, ᨶ ᩅᩥᩅᨴᩥᨲᨻ᩠ᨻᩴ, ᨿᨳᨿᩥᨴᩴ ᨻᩕᩉ᩠ᨾᨧᩁᩥᨿᩴ ᩋᨴ᩠ᨵᨶᩥᨿᩴ ᩋᩔ ᨧᩥᩁᨭ᩠ᨮᩥᨲᩥᨠᩴ, ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᨠᨲᨾᩮ ᨴ᩠ᩅᩮ [ᨴ᩠ᩅᩮ ᨵᨾ᩠ᨾᩮᩣ (ᩈ᩠ᨿᩣ. ᨠᩴ.) ᩑᩅᨾᩩᨸᩁᩥᨸᩥ]?

‘‘ᨶᩣᨾᨬ᩠ᨧ ᩁᩪᨸᨬ᩠ᨧ.

‘‘ᩋᩅᩥᨩ᩠ᨩᩣ ᨧ ᨽᩅᨲᨱ᩠ᩉᩣ ᨧ.

‘‘ᨽᩅᨴᩥᨭ᩠ᨮᩥ ᨧ ᩅᩥᨽᩅᨴᩥᨭ᩠ᨮᩥ ᨧ.

‘‘ᩋᩉᩥᩁᩥᨠᨬ᩠ᨧ [ᩋᩉᩥᩁᩦᨠᨬ᩠ᨧ (ᨠᨲ᩠ᨳᨧᩥ)] ᩋᨶᩮᩣᨲ᩠ᨲᨸ᩠ᨸᨬ᩠ᨧ.

‘‘ᩉᩥᩁᩦ ᨧ ᩒᨲ᩠ᨲᨸ᩠ᨸᨬ᩠ᨧ.

‘‘ᨴᩮᩣᩅᨧᩔᨲᩣ ᨧ ᨸᩣᨸᨾᩥᨲ᩠ᨲᨲᩣ ᨧ.

‘‘ᩈᩮᩣᩅᨧᩔᨲᩣ ᨧ ᨠᩃ᩠ᨿᩣᨱᨾᩥᨲ᩠ᨲᨲᩣ ᨧ.

‘‘ᩌᨸᨲ᩠ᨲᩥᨠᩩᩈᩃᨲᩣ ᨧ ᩌᨸᨲ᩠ᨲᩥᩅᩩᨭ᩠ᨮᩣᨶᨠᩩᩈᩃᨲᩣ ᨧ.

‘‘ᩈᨾᩣᨸᨲ᩠ᨲᩥᨠᩩᩈᩃᨲᩣ ᨧ ᩈᨾᩣᨸᨲ᩠ᨲᩥᩅᩩᨭ᩠ᨮᩣᨶᨠᩩᩈᩃᨲᩣ ᨧ.

‘‘ᨵᩣᨲᩩᨠᩩᩈᩃᨲᩣ ᨧ ᨾᨶᩈᩥᨠᩣᩁᨠᩩᩈᩃᨲᩣ ᨧ.

‘‘ᩌᨿᨲᨶᨠᩩᩈᩃᨲᩣ ᨧ ᨸᨭᩥᨧ᩠ᨧᩈᨾᩩᨸ᩠ᨸᩣᨴᨠᩩᩈᩃᨲᩣ ᨧ.

‘‘ᨮᩣᨶᨠᩩᩈᩃᨲᩣ ᨧ ᩋᨭ᩠ᨮᩣᨶᨠᩩᩈᩃᨲᩣ ᨧ.

‘‘ᩋᨩ᩠ᨩᩅᨬ᩠ᨧ ᩃᨩ᩠ᨩᩅᨬ᩠ᨧ.

‘‘ᨡᨶ᩠ᨲᩥ ᨧ ᩈᩮᩣᩁᨧ᩠ᨧᨬ᩠ᨧ.

‘‘ᩈᩣᨡᩃ᩠ᨿᨬ᩠ᨧ ᨸᨭᩥᩈᨶ᩠ᨳᩣᩁᩮᩣ ᨧ.

‘‘ᩋᩅᩥᩉᩥᩴᩈᩣ ᨧ ᩈᩮᩣᨧᩮᨿ᩠ᨿᨬ᩠ᨧ.

‘‘ᨾᩩᨭ᩠ᨮᩔᨧ᩠ᨧᨬ᩠ᨧ ᩋᩈᨾ᩠ᨸᨩᨬ᩠ᨬᨬ᩠ᨧ.

‘‘ᩈᨲᩥ ᨧ ᩈᨾ᩠ᨸᨩᨬ᩠ᨬᨬ᩠ᨧ.

‘‘ᩍᨶ᩠ᨴᩕᩥᨿᩮᩈᩩ ᩋᨣᩩᨲ᩠ᨲᨴ᩠ᩅᩣᩁᨲᩣ ᨧ ᨽᩮᩣᨩᨶᩮ ᩋᨾᨲ᩠ᨲᨬ᩠ᨬᩩᨲᩣ ᨧ.

‘‘ᩍᨶ᩠ᨴᩕᩥᨿᩮᩈᩩ ᨣᩩᨲ᩠ᨲᨴ᩠ᩅᩣᩁᨲᩣ ᨧ ᨽᩮᩣᨩᨶᩮ ᨾᨲ᩠ᨲᨬ᩠ᨬᩩᨲᩣ ᨧ.

‘‘ᨸᨭᩥᩈᨦ᩠ᨡᩣᨶᨻᩃᨬ᩠ᨧ [ᨸᨭᩥᩈᨶ᩠ᨵᩣᨶᨻᩃᨬ᩠ᨧ (ᩈ᩠ᨿᩣ.)] ᨽᩣᩅᨶᩣᨻᩃᨬ᩠ᨧ.

‘‘ᩈᨲᩥᨻᩃᨬ᩠ᨧ ᩈᨾᩣᨵᩥᨻᩃᨬ᩠ᨧ.

‘‘ᩈᨾᨳᩮᩣ ᨧ ᩅᩥᨸᩔᨶᩣ ᨧ.

‘‘ᩈᨾᨳᨶᩥᨾᩥᨲ᩠ᨲᨬ᩠ᨧ ᨸᨣ᩠ᨣᩉᨶᩥᨾᩥᨲ᩠ᨲᨬ᩠ᨧ.

‘‘ᨸᨣ᩠ᨣᩉᩮᩣ ᨧ ᩋᩅᩥᨠ᩠ᨡᩮᨸᩮᩣ ᨧ.

‘‘ᩈᩦᩃᩅᩥᨸᨲ᩠ᨲᩥ ᨧ ᨴᩥᨭ᩠ᨮᩥᩅᩥᨸᨲ᩠ᨲᩥ ᨧ.

‘‘ᩈᩦᩃᩈᨾ᩠ᨸᨴᩣ ᨧ ᨴᩥᨭ᩠ᨮᩥᩈᨾ᩠ᨸᨴᩣ ᨧ.

‘‘ᩈᩦᩃᩅᩥᩈᩩᨴ᩠ᨵᩥ ᨧ ᨴᩥᨭ᩠ᨮᩥᩅᩥᩈᩩᨴ᩠ᨵᩥ ᨧ.

‘‘ᨴᩥᨭ᩠ᨮᩥᩅᩥᩈᩩᨴ᩠ᨵᩥ ᨡᩮᩣ ᨸᨶ ᨿᨳᩣ ᨴᩥᨭ᩠ᨮᩥᩔ ᨧ ᨸᨵᩣᨶᩴ.

‘‘ᩈᩴᩅᩮᨣᩮᩣ ᨧ ᩈᩴᩅᩮᨩᨶᩦᨿᩮᩈᩩ ᨮᩣᨶᩮᩈᩩ ᩈᩴᩅᩥᨣ᩠ᨣᩔ ᨧ ᨿᩮᩣᨶᩥᩈᩮᩣ ᨸᨵᩣᨶᩴ.

‘‘ᩋᩈᨶ᩠ᨲᩩᨭ᩠ᨮᩥᨲᩣ ᨧ ᨠᩩᩈᩃᩮᩈᩩ ᨵᨾ᩠ᨾᩮᩈᩩ ᩋᨸ᩠ᨸᨭᩥᩅᩣᨶᩥᨲᩣ ᨧ ᨸᨵᩣᨶᩈ᩠ᨾᩥᩴ.

‘‘ᩅᩥᨩ᩠ᨩᩣ ᨧ ᩅᩥᨾᩩᨲ᩠ᨲᩥ ᨧ.

‘‘ᨡᨿᩮᨬᩣᨱᩴ ᩋᨶᩩᨸ᩠ᨸᩣᨴᩮᨬᩣᨱᩴ.

‘‘ᩍᨾᩮ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨴ᩠ᩅᩮ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ. ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ, ᨶ ᩅᩥᩅᨴᩥᨲᨻ᩠ᨻᩴ, ᨿᨳᨿᩥᨴᩴ ᨻᩕᩉ᩠ᨾᨧᩁᩥᨿᩴ ᩋᨴ᩠ᨵᨶᩥᨿᩴ ᩋᩔ ᨧᩥᩁᨭ᩠ᨮᩥᨲᩥᨠᩴ, ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ.

ᨲᩥᨠᩴ

᪓᪐᪕. ‘‘ᩋᨲ᩠ᨳᩥ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨲᨿᩮᩣ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ. ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ…ᨸᩮ… ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᨠᨲᨾᩮ ᨲᨿᩮᩣ?

‘‘ᨲᩦᨱᩥ ᩋᨠᩩᩈᩃᨾᩪᩃᩣᨶᩥ – ᩃᩮᩣᨽᩮᩣ ᩋᨠᩩᩈᩃᨾᩪᩃᩴ, ᨴᩮᩣᩈᩮᩣ ᩋᨠᩩᩈᩃᨾᩪᩃᩴ, ᨾᩮᩣᩉᩮᩣ ᩋᨠᩩᩈᩃᨾᩪᩃᩴ.

‘‘ᨲᩦᨱᩥ ᨠᩩᩈᩃᨾᩪᩃᩣᨶᩥ – ᩋᩃᩮᩣᨽᩮᩣ ᨠᩩᩈᩃᨾᩪᩃᩴ, ᩋᨴᩮᩣᩈᩮᩣ ᨠᩩᩈᩃᨾᩪᩃᩴ, ᩋᨾᩮᩣᩉᩮᩣ ᨠᩩᩈᩃᨾᩪᩃᩴ.

‘‘ᨲᩦᨱᩥ ᨴᩩᨧ᩠ᨧᩁᩥᨲᩣᨶᩥ – ᨠᩣᨿᨴᩩᨧ᩠ᨧᩁᩥᨲᩴ, ᩅᨧᩦᨴᩩᨧ᩠ᨧᩁᩥᨲᩴ, ᨾᨶᩮᩣᨴᩩᨧ᩠ᨧᩁᩥᨲᩴ.

‘‘ᨲᩦᨱᩥ ᩈᩩᨧᩁᩥᨲᩣᨶᩥ – ᨠᩣᨿᩈᩩᨧᩁᩥᨲᩴ, ᩅᨧᩦᩈᩩᨧᩁᩥᨲᩴ, ᨾᨶᩮᩣᩈᩩᨧᩁᩥᨲᩴ.

‘‘ᨲᨿᩮᩣ ᩋᨠᩩᩈᩃᩅᩥᨲᨠ᩠ᨠᩣ – ᨠᩣᨾᩅᩥᨲᨠ᩠ᨠᩮᩣ, ᨻ᩠ᨿᩣᨸᩣᨴᩅᩥᨲᨠ᩠ᨠᩮᩣ, ᩅᩥᩉᩥᩴᩈᩣᩅᩥᨲᨠ᩠ᨠᩮᩣ.

‘‘ᨲᨿᩮᩣ ᨠᩩᩈᩃᩅᩥᨲᨠ᩠ᨠᩣ – ᨶᩮᨠ᩠ᨡᨾ᩠ᨾᩅᩥᨲᨠ᩠ᨠᩮᩣ, ᩋᨻ᩠ᨿᩣᨸᩣᨴᩅᩥᨲᨠ᩠ᨠᩮᩣ, ᩋᩅᩥᩉᩥᩴᩈᩣᩅᩥᨲᨠ᩠ᨠᩮᩣ.

‘‘ᨲᨿᩮᩣ ᩋᨠᩩᩈᩃᩈᨦ᩠ᨠᨸ᩠ᨸᩣ – ᨠᩣᨾᩈᨦ᩠ᨠᨸ᩠ᨸᩮᩣ, ᨻ᩠ᨿᩣᨸᩣᨴᩈᨦ᩠ᨠᨸ᩠ᨸᩮᩣ, ᩅᩥᩉᩥᩴᩈᩣᩈᨦ᩠ᨠᨸ᩠ᨸᩮᩣ.

‘‘ᨲᨿᩮᩣ ᨠᩩᩈᩃᩈᨦ᩠ᨠᨸ᩠ᨸᩣ – ᨶᩮᨠ᩠ᨡᨾ᩠ᨾᩈᨦ᩠ᨠᨸ᩠ᨸᩮᩣ, ᩋᨻ᩠ᨿᩣᨸᩣᨴᩈᨦ᩠ᨠᨸ᩠ᨸᩮᩣ, ᩋᩅᩥᩉᩥᩴᩈᩣᩈᨦ᩠ᨠᨸ᩠ᨸᩮᩣ.

‘‘ᨲᩥᩔᩮᩣ ᩋᨠᩩᩈᩃᩈᨬ᩠ᨬᩣ – ᨠᩣᨾᩈᨬ᩠ᨬᩣ, ᨻ᩠ᨿᩣᨸᩣᨴᩈᨬ᩠ᨬᩣ, ᩅᩥᩉᩥᩴᩈᩣᩈᨬ᩠ᨬᩣ.

‘‘ᨲᩥᩔᩮᩣ ᨠᩩᩈᩃᩈᨬ᩠ᨬᩣ – ᨶᩮᨠ᩠ᨡᨾ᩠ᨾᩈᨬ᩠ᨬᩣ, ᩋᨻ᩠ᨿᩣᨸᩣᨴᩈᨬ᩠ᨬᩣ, ᩋᩅᩥᩉᩥᩴᩈᩣᩈᨬ᩠ᨬᩣ.

‘‘ᨲᩥᩔᩮᩣ ᩋᨠᩩᩈᩃᨵᩣᨲᩩᨿᩮᩣ – ᨠᩣᨾᨵᩣᨲᩩ, ᨻ᩠ᨿᩣᨸᩣᨴᨵᩣᨲᩩ, ᩅᩥᩉᩥᩴᩈᩣᨵᩣᨲᩩ.

‘‘ᨲᩥᩔᩮᩣ ᨠᩩᩈᩃᨵᩣᨲᩩᨿᩮᩣ – ᨶᩮᨠ᩠ᨡᨾ᩠ᨾᨵᩣᨲᩩ, ᩋᨻ᩠ᨿᩣᨸᩣᨴᨵᩣᨲᩩ, ᩋᩅᩥᩉᩥᩴᩈᩣᨵᩣᨲᩩ.

‘‘ᩋᨸᩁᩣᨸᩥ ᨲᩥᩔᩮᩣ ᨵᩣᨲᩩᨿᩮᩣ – ᨠᩣᨾᨵᩣᨲᩩ, ᩁᩪᨸᨵᩣᨲᩩ, ᩋᩁᩪᨸᨵᩣᨲᩩ.

‘‘ᩋᨸᩁᩣᨸᩥ ᨲᩥᩔᩮᩣ ᨵᩣᨲᩩᨿᩮᩣ – ᩁᩪᨸᨵᩣᨲᩩ, ᩋᩁᩪᨸᨵᩣᨲᩩ, ᨶᩥᩁᩮᩣᨵᨵᩣᨲᩩ.

‘‘ᩋᨸᩁᩣᨸᩥ ᨲᩥᩔᩮᩣ ᨵᩣᨲᩩᨿᩮᩣ – ᩉᩦᨶᨵᩣᨲᩩ, ᨾᨩ᩠ᨫᩥᨾᨵᩣᨲᩩ, ᨸᨱᩦᨲᨵᩣᨲᩩ.

‘‘ᨲᩥᩔᩮᩣ ᨲᨱ᩠ᩉᩣ – ᨠᩣᨾᨲᨱ᩠ᩉᩣ, ᨽᩅᨲᨱ᩠ᩉᩣ, ᩅᩥᨽᩅᨲᨱ᩠ᩉᩣ.

‘‘ᩋᨸᩁᩣᨸᩥ ᨲᩥᩔᩮᩣ ᨲᨱ᩠ᩉᩣ – ᨠᩣᨾᨲᨱ᩠ᩉᩣ, ᩁᩪᨸᨲᨱ᩠ᩉᩣ, ᩋᩁᩪᨸᨲᨱ᩠ᩉᩣ.

‘‘ᩋᨸᩁᩣᨸᩥ ᨲᩥᩔᩮᩣ ᨲᨱ᩠ᩉᩣ – ᩁᩪᨸᨲᨱ᩠ᩉᩣ, ᩋᩁᩪᨸᨲᨱ᩠ᩉᩣ, ᨶᩥᩁᩮᩣᨵᨲᨱ᩠ᩉᩣ.

‘‘ᨲᩦᨱᩥ ᩈᩴᨿᩮᩣᨩᨶᩣᨶᩥ – ᩈᨠ᩠ᨠᩣᨿᨴᩥᨭ᩠ᨮᩥ, ᩅᩥᨧᩥᨠᩥᨧ᩠ᨨᩣ, ᩈᩦᩃᨻ᩠ᨻᨲᨸᩁᩣᨾᩣᩈᩮᩣ.

‘‘ᨲᨿᩮᩣ ᩌᩈᩅᩣ – ᨠᩣᨾᩣᩈᩅᩮᩣ, ᨽᩅᩣᩈᩅᩮᩣ, ᩋᩅᩥᨩ᩠ᨩᩣᩈᩅᩮᩣ.

‘‘ᨲᨿᩮᩣ ᨽᩅᩣ – ᨠᩣᨾᨽᩅᩮᩣ, ᩁᩪᨸᨽᩅᩮᩣ, ᩋᩁᩪᨸᨽᩅᩮᩣ.

‘‘ᨲᩥᩔᩮᩣ ᩑᩈᨶᩣ – ᨠᩣᨾᩮᩈᨶᩣ, ᨽᩅᩮᩈᨶᩣ, ᨻᩕᩉ᩠ᨾᨧᩁᩥᨿᩮᩈᨶᩣ.

‘‘ᨲᩥᩔᩮᩣ ᩅᩥᨵᩣ – ᩈᩮᨿ᩠ᨿᩮᩣᩉᨾᩈ᩠ᨾᩦᨲᩥ ᩅᩥᨵᩣ, ᩈᨴᩥᩈᩮᩣᩉᨾᩈ᩠ᨾᩦᨲᩥ ᩅᩥᨵᩣ, ᩉᩦᨶᩮᩣᩉᨾᩈ᩠ᨾᩦᨲᩥ ᩅᩥᨵᩣ.

‘‘ᨲᨿᩮᩣ ᩋᨴ᩠ᨵᩣ – ᩋᨲᩦᨲᩮᩣ ᩋᨴ᩠ᨵᩣ, ᩋᨶᩣᨣᨲᩮᩣ ᩋᨴ᩠ᨵᩣ, ᨸᨧ᩠ᨧᩩᨸ᩠ᨸᨶ᩠ᨶᩮᩣ ᩋᨴ᩠ᨵᩣ.

‘‘ᨲᨿᩮᩣ ᩋᨶ᩠ᨲᩣ – ᩈᨠ᩠ᨠᩣᨿᩮᩣ ᩋᨶ᩠ᨲᩮᩣ, ᩈᨠ᩠ᨠᩣᨿᩈᨾᩩᨴᨿᩮᩣ ᩋᨶ᩠ᨲᩮᩣ, ᩈᨠ᩠ᨠᩣᨿᨶᩥᩁᩮᩣᨵᩮᩣ ᩋᨶ᩠ᨲᩮᩣ.

‘‘ᨲᩥᩔᩮᩣ ᩅᩮᨴᨶᩣ – ᩈᩩᨡᩣ ᩅᩮᨴᨶᩣ, ᨴᩩᨠ᩠ᨡᩣ ᩅᩮᨴᨶᩣ, ᩋᨴᩩᨠ᩠ᨡᨾᩈᩩᨡᩣ ᩅᩮᨴᨶᩣ.

‘‘ᨲᩥᩔᩮᩣ ᨴᩩᨠ᩠ᨡᨲᩣ – ᨴᩩᨠ᩠ᨡᨴᩩᨠ᩠ᨡᨲᩣ, ᩈᨦ᩠ᨡᩣᩁᨴᩩᨠ᩠ᨡᨲᩣ, ᩅᩥᨸᩁᩥᨱᩣᨾᨴᩩᨠ᩠ᨡᨲᩣ.

‘‘ᨲᨿᩮᩣ ᩁᩣᩈᩦ – ᨾᩥᨧ᩠ᨨᨲ᩠ᨲᨶᩥᨿᨲᩮᩣ ᩁᩣᩈᩥ, ᩈᨾ᩠ᨾᨲ᩠ᨲᨶᩥᨿᨲᩮᩣ ᩁᩣᩈᩥ, ᩋᨶᩥᨿᨲᩮᩣ ᩁᩣᩈᩥ.

‘‘ᨲᨿᩮᩣ ᨲᨾᩣ [ᨲᩥᩔᩮᩣ ᨠᨦ᩠ᨡᩣ (ᨻᩉᩪᩈᩩ) ᩋᨭ᩠ᨮᨠᨳᩣ ᩒᩃᩮᩣᨠᩮᨲᨻ᩠ᨻᩣ] – ᩋᨲᩦᨲᩴ ᩅᩣ ᩋᨴ᩠ᨵᩣᨶᩴ ᩌᩁᨻ᩠ᨽ ᨠᨦ᩠ᨡᨲᩥ ᩅᩥᨧᩥᨠᩥᨧ᩠ᨨᨲᩥ ᨶᩣᨵᩥᨾᩩᨧ᩠ᨧᨲᩥ ᨶ ᩈᨾ᩠ᨸᩈᩦᨴᨲᩥ, ᩋᨶᩣᨣᨲᩴ ᩅᩣ ᩋᨴ᩠ᨵᩣᨶᩴ ᩌᩁᨻ᩠ᨽ ᨠᨦ᩠ᨡᨲᩥ ᩅᩥᨧᩥᨠᩥᨧ᩠ᨨᨲᩥ ᨶᩣᨵᩥᨾᩩᨧ᩠ᨧᨲᩥ ᨶ ᩈᨾ᩠ᨸᩈᩦᨴᨲᩥ, ᩑᨲᩁᩉᩥ ᩅᩣ ᨸᨧ᩠ᨧᩩᨸ᩠ᨸᨶ᩠ᨶᩴ ᩋᨴ᩠ᨵᩣᨶᩴ ᩌᩁᨻ᩠ᨽ ᨠᨦ᩠ᨡᨲᩥ ᩅᩥᨧᩥᨠᩥᨧ᩠ᨨᨲᩥ ᨶᩣᨵᩥᨾᩩᨧ᩠ᨧᨲᩥ ᨶ ᩈᨾ᩠ᨸᩈᩦᨴᨲᩥ.

‘‘ᨲᩦᨱᩥ ᨲᨳᩣᨣᨲᩔ ᩋᩁᨠ᩠ᨡᩮᨿ᩠ᨿᩣᨶᩥ – ᨸᩁᩥᩈᩩᨴ᩠ᨵᨠᩣᨿᩈᨾᩣᨧᩣᩁᩮᩣ ᩌᩅᩩᩈᩮᩣ ᨲᨳᩣᨣᨲᩮᩣ, ᨶᨲ᩠ᨳᩥ ᨲᨳᩣᨣᨲᩔ ᨠᩣᨿᨴᩩᨧ᩠ᨧᩁᩥᨲᩴ, ᨿᩴ ᨲᨳᩣᨣᨲᩮᩣ ᩁᨠ᩠ᨡᩮᨿ᩠ᨿ – ‘ᨾᩣ ᨾᩮ ᩍᨴᩴ ᨸᩁᩮᩣ ᩋᨬ᩠ᨬᩣᩈᩦ’ᨲᩥ. ᨸᩁᩥᩈᩩᨴ᩠ᨵᩅᨧᩦᩈᨾᩣᨧᩣᩁᩮᩣ ᩌᩅᩩᩈᩮᩣ, ᨲᨳᩣᨣᨲᩮᩣ, ᨶᨲ᩠ᨳᩥ ᨲᨳᩣᨣᨲᩔ ᩅᨧᩦᨴᩩᨧ᩠ᨧᩁᩥᨲᩴ, ᨿᩴ ᨲᨳᩣᨣᨲᩮᩣ ᩁᨠ᩠ᨡᩮᨿ᩠ᨿ – ‘ᨾᩣ ᨾᩮ ᩍᨴᩴ ᨸᩁᩮᩣ ᩋᨬ᩠ᨬᩣᩈᩦ’ᨲᩥ. ᨸᩁᩥᩈᩩᨴ᩠ᨵᨾᨶᩮᩣᩈᨾᩣᨧᩣᩁᩮᩣ, ᩌᩅᩩᩈᩮᩣ, ᨲᨳᩣᨣᨲᩮᩣ, ᨶᨲ᩠ᨳᩥ ᨲᨳᩣᨣᨲᩔ ᨾᨶᩮᩣᨴᩩᨧ᩠ᨧᩁᩥᨲᩴ ᨿᩴ ᨲᨳᩣᨣᨲᩮᩣ ᩁᨠ᩠ᨡᩮᨿ᩠ᨿ – ‘ᨾᩣ ᨾᩮ ᩍᨴᩴ ᨸᩁᩮᩣ ᩋᨬ᩠ᨬᩣᩈᩦ’ᨲᩥ.

‘‘ᨲᨿᩮᩣ ᨠᩥᨬ᩠ᨧᨶᩣ – ᩁᩣᨣᩮᩣ ᨠᩥᨬ᩠ᨧᨶᩴ, ᨴᩮᩣᩈᩮᩣ ᨠᩥᨬ᩠ᨧᨶᩴ, ᨾᩮᩣᩉᩮᩣ ᨠᩥᨬ᩠ᨧᨶᩴ.

‘‘ᨲᨿᩮᩣ ᩋᨣ᩠ᨣᩦ – ᩁᩣᨣᨣ᩠ᨣᩥ, ᨴᩮᩣᩈᨣ᩠ᨣᩥ, ᨾᩮᩣᩉᨣ᩠ᨣᩥ.

‘‘ᩋᨸᩁᩮᨸᩥ ᨲᨿᩮᩣ ᩋᨣ᩠ᨣᩦ – ᩌᩉᩩᨶᩮᨿ᩠ᨿᨣ᩠ᨣᩥ, ᨣᩉᨸᨲᨣ᩠ᨣᩥ, ᨴᨠ᩠ᨡᩥᨱᩮᨿ᩠ᨿᨣ᩠ᨣᩥ.

‘‘ᨲᩥᩅᩥᨵᩮᨶ ᩁᩪᨸᩈᨦ᩠ᨣᩉᩮᩣ – ᩈᨶᩥᨴᩔᨶᩈᨸ᩠ᨸᨭᩥᨥᩴ ᩁᩪᨸᩴ [ᩈᨶᩥᨴᩔᨶᩈᨸ᩠ᨸᨭᩥᨥᩁᩪᨸᩴ (ᩈ᩠ᨿᩣ. ᨠᩴ.) ᩑᩅᨾᩥᨲᩁᨴ᩠ᩅᨿᩮᨸᩥ], ᩋᨶᩥᨴᩔᨶᩈᨸ᩠ᨸᨭᩥᨥᩴ ᩁᩪᨸᩴ, ᩋᨶᩥᨴᩔᨶᩋᨸ᩠ᨸᨭᩥᨥᩴ ᩁᩪᨸᩴ.

‘‘ᨲᨿᩮᩣ ᩈᨦ᩠ᨡᩣᩁᩣ – ᨸᩩᨬ᩠ᨬᩣᨽᩥᩈᨦ᩠ᨡᩣᩁᩮᩣ, ᩋᨸᩩᨬ᩠ᨬᩣᨽᩥᩈᨦ᩠ᨡᩣᩁᩮᩣ, ᩌᨶᩮᨬ᩠ᨩᩣᨽᩥᩈᨦ᩠ᨡᩣᩁᩮᩣ.

‘‘ᨲᨿᩮᩣ ᨸᩩᨣ᩠ᨣᩃᩣ – ᩈᩮᨠ᩠ᨡᩮᩣ ᨸᩩᨣ᩠ᨣᩃᩮᩣ, ᩋᩈᩮᨠ᩠ᨡᩮᩣ ᨸᩩᨣ᩠ᨣᩃᩮᩣ, ᨶᩮᩅᩈᩮᨠ᩠ᨡᩮᩣᨶᩣᩈᩮᨠ᩠ᨡᩮᩣ ᨸᩩᨣ᩠ᨣᩃᩮᩣ.

‘‘ᨲᨿᩮᩣ ᨳᩮᩁᩣ – ᨩᩣᨲᩥᨳᩮᩁᩮᩣ, ᨵᨾ᩠ᨾᨳᩮᩁᩮᩣ, ᩈᨾ᩠ᨾᩩᨲᩥᨳᩮᩁᩮᩣ [ᩈᨾ᩠ᨾᨲᩥᨳᩮᩁᩮᩣ (ᩈ᩠ᨿᩣ. ᨠᩴ.)].

‘‘ᨲᩦᨱᩥ ᨸᩩᨬ᩠ᨬᨠᩥᩁᩥᨿᩅᨲ᩠ᨳᩪᨶᩥ – ᨴᩣᨶᨾᨿᩴ ᨸᩩᨬ᩠ᨬᨠᩥᩁᩥᨿᩅᨲ᩠ᨳᩩ, ᩈᩦᩃᨾᨿᩴ ᨸᩩᨬ᩠ᨬᨠᩥᩁᩥᨿᩅᨲ᩠ᨳᩩ, ᨽᩣᩅᨶᩣᨾᨿᩴ ᨸᩩᨬ᩠ᨬᨠᩥᩁᩥᨿᩅᨲ᩠ᨳᩩ.

‘‘ᨲᩦᨱᩥ ᨧᩮᩣᨴᨶᩣᩅᨲ᩠ᨳᩪᨶᩥ – ᨴᩥᨭ᩠ᨮᩮᨶ, ᩈᩩᨲᩮᨶ, ᨸᩁᩥᩈᨦ᩠ᨠᩣᨿ.

‘‘ᨲᩥᩔᩮᩣ ᨠᩣᨾᩪᨸᨸᨲ᩠ᨲᩥᨿᩮᩣ [ᨠᩣᨾᩩᨸ᩠ᨸᨲ᩠ᨲᩥᨿᩮᩣ (ᩈᩦ.), ᨠᩣᨾᩩᨸᨸᨲ᩠ᨲᩥᨿᩮᩣ (ᩈ᩠ᨿᩣ. ᨸᩦ. ᨠ.)] – ᩈᨶ᩠ᨲᩣᩅᩩᩈᩮᩣ ᩈᨲ᩠ᨲᩣ ᨸᨧ᩠ᨧᩩᨸᨭ᩠ᨮᩥᨲᨠᩣᨾᩣ, ᨲᩮ ᨸᨧ᩠ᨧᩩᨸᨭ᩠ᨮᩥᨲᩮᩈᩩ ᨠᩣᨾᩮᩈᩩ ᩅᩈᩴ ᩅᨲ᩠ᨲᩮᨶ᩠ᨲᩥ, ᩈᩮᨿ᩠ᨿᨳᩣᨸᩥ ᨾᨶᩩᩔᩣ ᩑᨠᨧ᩠ᨧᩮ ᨧ ᨴᩮᩅᩣ ᩑᨠᨧ᩠ᨧᩮ ᨧ ᩅᩥᨶᩥᨸᩣᨲᩥᨠᩣ. ᩋᨿᩴ ᨸᨮᨾᩣ ᨠᩣᨾᩪᨸᨸᨲ᩠ᨲᩥ. ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᨶᩥᨾ᩠ᨾᩥᨲᨠᩣᨾᩣ, ᨲᩮ ᨶᩥᨾ᩠ᨾᩥᨶᩥᨲ᩠ᩅᩣ ᨶᩥᨾ᩠ᨾᩥᨶᩥᨲ᩠ᩅᩣ ᨠᩣᨾᩮᩈᩩ ᩅᩈᩴ ᩅᨲ᩠ᨲᩮᨶ᩠ᨲᩥ, ᩈᩮᨿ᩠ᨿᨳᩣᨸᩥ ᨴᩮᩅᩣ ᨶᩥᨾ᩠ᨾᩣᨶᩁᨲᩦ. ᩋᨿᩴ ᨴᩩᨲᩥᨿᩣ ᨠᩣᨾᩪᨸᨸᨲ᩠ᨲᩥ. ᩈᨶ᩠ᨲᩣᩅᩩᩈᩮᩣ ᩈᨲ᩠ᨲᩣ ᨸᩁᨶᩥᨾ᩠ᨾᩥᨲᨠᩣᨾᩣ, ᨲᩮ ᨸᩁᨶᩥᨾ᩠ᨾᩥᨲᩮᩈᩩ ᨠᩣᨾᩮᩈᩩ ᩅᩈᩴ ᩅᨲ᩠ᨲᩮᨶ᩠ᨲᩥ, ᩈᩮᨿ᩠ᨿᨳᩣᨸᩥ ᨴᩮᩅᩣ ᨸᩁᨶᩥᨾ᩠ᨾᩥᨲᩅᩈᩅᨲ᩠ᨲᩦ. ᩋᨿᩴ ᨲᨲᩥᨿᩣ ᨠᩣᨾᩪᨸᨸᨲ᩠ᨲᩥ.

‘‘ᨲᩥᩔᩮᩣ ᩈᩩᨡᩪᨸᨸᨲ᩠ᨲᩥᨿᩮᩣ [ᩈᩩᨡᩩᨸᨸᨲ᩠ᨲᩥᨿᩮᩣ (ᩈ᩠ᨿᩣ. ᨸᩦ. ᨠ.)] – ᩈᨶ᩠ᨲᩣᩅᩩᩈᩮᩣ ᩈᨲ᩠ᨲᩣ [ᩈᨲ᩠ᨲᩣ ᩈᩩᨡᩴ (ᩈ᩠ᨿᩣ. ᨠᩴ.)] ᩏᨸ᩠ᨸᩣᨴᩮᨲ᩠ᩅᩣ ᩏᨸ᩠ᨸᩣᨴᩮᨲ᩠ᩅᩣ ᩈᩩᨡᩴ ᩅᩥᩉᩁᨶ᩠ᨲᩥ, ᩈᩮᨿ᩠ᨿᨳᩣᨸᩥ ᨴᩮᩅᩣ ᨻᩕᩉ᩠ᨾᨠᩣᨿᩥᨠᩣ. ᩋᨿᩴ ᨸᨮᨾᩣ ᩈᩩᨡᩪᨸᨸᨲ᩠ᨲᩥ. ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩈᩩᨡᩮᨶ ᩋᨽᩥᩈᨶ᩠ᨶᩣ ᨸᩁᩥᩈᨶ᩠ᨶᩣ ᨸᩁᩥᨸᩪᩁᩣ ᨸᩁᩥᨸ᩠ᨹᩩᨭᩣ. ᨲᩮ ᨠᨴᩣᨧᩥ ᨠᩁᩉᨧᩥ ᩏᨴᩣᨶᩴ ᩏᨴᩣᨶᩮᨶ᩠ᨲᩥ – ‘ᩋᩉᩮᩣ ᩈᩩᨡᩴ, ᩋᩉᩮᩣ ᩈᩩᨡ’ᨶ᩠ᨲᩥ, ᩈᩮᨿ᩠ᨿᨳᩣᨸᩥ ᨴᩮᩅᩣ ᩌᨽᩔᩁᩣ. ᩋᨿᩴ ᨴᩩᨲᩥᨿᩣ ᩈᩩᨡᩪᨸᨸᨲ᩠ᨲᩥ. ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩈᩩᨡᩮᨶ ᩋᨽᩥᩈᨶ᩠ᨶᩣ ᨸᩁᩥᩈᨶ᩠ᨶᩣ ᨸᩁᩥᨸᩪᩁᩣ ᨸᩁᩥᨸ᩠ᨹᩩᨭᩣ. ᨲᩮ ᩈᨶ᩠ᨲᩴᨿᩮᩅ ᨲᩩᩈᩥᨲᩣ [ᩈᨶ᩠ᨲᩩᩈᩥᨲᩣ (ᩈ᩠ᨿᩣ. ᨠᩴ.)] ᩈᩩᨡᩴ [ᨧᩥᨲ᩠ᨲᩈᩩᨡᩴ (ᩈ᩠ᨿᩣ. ᨠ.)] ᨸᨭᩥᩈᩴᩅᩮᨴᩮᨶ᩠ᨲᩥ, ᩈᩮᨿ᩠ᨿᨳᩣᨸᩥ ᨴᩮᩅᩣ ᩈᩩᨽᨠᩥᨱ᩠ᩉᩣ. ᩋᨿᩴ ᨲᨲᩥᨿᩣ ᩈᩩᨡᩪᨸᨸᨲ᩠ᨲᩥ.

‘‘ᨲᩥᩔᩮᩣ ᨸᨬ᩠ᨬᩣ – ᩈᩮᨠ᩠ᨡᩣ ᨸᨬ᩠ᨬᩣ, ᩋᩈᩮᨠ᩠ᨡᩣ ᨸᨬ᩠ᨬᩣ, ᨶᩮᩅᩈᩮᨠ᩠ᨡᩣᨶᩣᩈᩮᨠ᩠ᨡᩣ ᨸᨬ᩠ᨬᩣ.

‘‘ᩋᨸᩁᩣᨸᩥ ᨲᩥᩔᩮᩣ ᨸᨬ᩠ᨬᩣ – ᨧᩥᨶ᩠ᨲᩣᨾᨿᩣ ᨸᨬ᩠ᨬᩣ, ᩈᩩᨲᨾᨿᩣ ᨸᨬ᩠ᨬᩣ, ᨽᩣᩅᨶᩣᨾᨿᩣ ᨸᨬ᩠ᨬᩣ.

‘‘ᨲᩦᨱᩣᩅᩩᨵᩣᨶᩥ – ᩈᩩᨲᩣᩅᩩᨵᩴ, ᨸᩅᩥᩅᩮᨠᩣᩅᩩᨵᩴ, ᨸᨬ᩠ᨬᩣᩅᩩᨵᩴ.

‘‘ᨲᩦᨱᩥᨶ᩠ᨴᩕᩥᨿᩣᨶᩥ – ᩋᨶᨬ᩠ᨬᩣᨲᨬ᩠ᨬᩔᩣᨾᩦᨲᩥᨶ᩠ᨴᩕᩥᨿᩴ, ᩋᨬ᩠ᨬᩥᨶ᩠ᨴᩕᩥᨿᩴ, ᩋᨬ᩠ᨬᩣᨲᩣᩅᩥᨶ᩠ᨴᩕᩥᨿᩴ.

‘‘ᨲᩦᨱᩥ ᨧᨠ᩠ᨡᩪᨶᩥ – ᨾᩴᩈᨧᨠ᩠ᨡᩩ, ᨴᩥᨻ᩠ᨻᨧᨠ᩠ᨡᩩ, ᨸᨬ᩠ᨬᩣᨧᨠ᩠ᨡᩩ.

‘‘ᨲᩥᩔᩮᩣ ᩈᩥᨠ᩠ᨡᩣ – ᩋᨵᩥᩈᩦᩃᩈᩥᨠ᩠ᨡᩣ, ᩋᨵᩥᨧᩥᨲ᩠ᨲᩈᩥᨠ᩠ᨡᩣ, ᩋᨵᩥᨸᨬ᩠ᨬᩣᩈᩥᨠ᩠ᨡᩣ.

‘‘ᨲᩥᩔᩮᩣ ᨽᩣᩅᨶᩣ – ᨠᩣᨿᨽᩣᩅᨶᩣ, ᨧᩥᨲ᩠ᨲᨽᩣᩅᨶᩣ, ᨸᨬ᩠ᨬᩣᨽᩣᩅᨶᩣ.

‘‘ᨲᩦᨱᩥ ᩋᨶᩩᨲ᩠ᨲᩁᩥᨿᩣᨶᩥ – ᨴᩔᨶᩣᨶᩩᨲ᩠ᨲᩁᩥᨿᩴ, ᨸᨭᩥᨸᨴᩣᨶᩩᨲ᩠ᨲᩁᩥᨿᩴ, ᩅᩥᨾᩩᨲ᩠ᨲᩣᨶᩩᨲ᩠ᨲᩁᩥᨿᩴ.

‘‘ᨲᨿᩮᩣ ᩈᨾᩣᨵᩦ – ᩈᩅᩥᨲᨠ᩠ᨠᩈᩅᩥᨧᩣᩁᩮᩣ ᩈᨾᩣᨵᩥ, ᩋᩅᩥᨲᨠ᩠ᨠᩅᩥᨧᩣᩁᨾᨲ᩠ᨲᩮᩣ ᩈᨾᩣᨵᩥ, ᩋᩅᩥᨲᨠ᩠ᨠᩋᩅᩥᨧᩣᩁᩮᩣ ᩈᨾᩣᨵᩥ.

‘‘ᩋᨸᩁᩮᨸᩥ ᨲᨿᩮᩣ ᩈᨾᩣᨵᩦ – ᩈᩩᨬ᩠ᨬᨲᩮᩣ ᩈᨾᩣᨵᩥ, ᩋᨶᩥᨾᩥᨲ᩠ᨲᩮᩣ ᩈᨾᩣᨵᩥ, ᩋᨸ᩠ᨸᨱᩥᩉᩥᨲᩮᩣ ᩈᨾᩣᨵᩥ.

‘‘ᨲᩦᨱᩥ ᩈᩮᩣᨧᩮᨿ᩠ᨿᩣᨶᩥ – ᨠᩣᨿᩈᩮᩣᨧᩮᨿ᩠ᨿᩴ, ᩅᨧᩦᩈᩮᩣᨧᩮᨿ᩠ᨿᩴ, ᨾᨶᩮᩣᩈᩮᩣᨧᩮᨿ᩠ᨿᩴ.

‘‘ᨲᩦᨱᩥ ᨾᩮᩣᨶᩮᨿ᩠ᨿᩣᨶᩥ – ᨠᩣᨿᨾᩮᩣᨶᩮᨿ᩠ᨿᩴ, ᩅᨧᩦᨾᩮᩣᨶᩮᨿ᩠ᨿᩴ, ᨾᨶᩮᩣᨾᩮᩣᨶᩮᨿ᩠ᨿᩴ.

‘‘ᨲᩦᨱᩥ ᨠᩮᩣᩈᩃ᩠ᩃᩣᨶᩥ – ᩌᨿᨠᩮᩣᩈᩃ᩠ᩃᩴ, ᩋᨸᩣᨿᨠᩮᩣᩈᩃ᩠ᩃᩴ, ᩏᨸᩣᨿᨠᩮᩣᩈᩃ᩠ᩃᩴ.

‘‘ᨲᨿᩮᩣ ᨾᨴᩣ – ᩌᩁᩮᩣᨣ᩠ᨿᨾᨴᩮᩣ, ᨿᩮᩣᨻ᩠ᨻᨶᨾᨴᩮᩣ, ᨩᩦᩅᩥᨲᨾᨴᩮᩣ.

‘‘ᨲᩦᨱᩥ ᩌᨵᩥᨸᨲᩮᨿ᩠ᨿᩣᨶᩥ – ᩋᨲ᩠ᨲᩣᨵᩥᨸᨲᩮᨿ᩠ᨿᩴ, ᩃᩮᩣᨠᩣᨵᩥᨸᨲᩮᨿ᩠ᨿᩴ, ᨵᨾ᩠ᨾᩣᨵᩥᨸᨲᩮᨿ᩠ᨿᩴ.

‘‘ᨲᩦᨱᩥ ᨠᨳᩣᩅᨲ᩠ᨳᩪᨶᩥ – ᩋᨲᩦᨲᩴ ᩅᩣ ᩋᨴ᩠ᨵᩣᨶᩴ ᩌᩁᨻ᩠ᨽ ᨠᨳᩴ ᨠᨳᩮᨿ᩠ᨿ – ‘ᩑᩅᩴ ᩋᩉᩮᩣᩈᩥ ᩋᨲᩦᨲᨾᨴ᩠ᨵᩣᨶ’ᨶ᩠ᨲᩥ; ᩋᨶᩣᨣᨲᩴ ᩅᩣ ᩋᨴ᩠ᨵᩣᨶᩴ ᩌᩁᨻ᩠ᨽ ᨠᨳᩴ ᨠᨳᩮᨿ᩠ᨿ – ‘ᩑᩅᩴ ᨽᩅᩥᩔᨲᩥ ᩋᨶᩣᨣᨲᨾᨴ᩠ᨵᩣᨶ’ᨶ᩠ᨲᩥ; ᩑᨲᩁᩉᩥ ᩅᩣ ᨸᨧ᩠ᨧᩩᨸ᩠ᨸᨶ᩠ᨶᩴ ᩋᨴ᩠ᨵᩣᨶᩴ ᩌᩁᨻ᩠ᨽ ᨠᨳᩴ ᨠᨳᩮᨿ᩠ᨿ – ‘ᩑᩅᩴ ᩉᩮᩣᨲᩥ ᩑᨲᩁᩉᩥ ᨸᨧ᩠ᨧᩩᨸ᩠ᨸᨶ᩠ᨶᩴ ᩋᨴ᩠ᨵᩣᨶ’ᨶ᩠ᨲᩥ.

‘‘ᨲᩥᩔᩮᩣ ᩅᩥᨩ᩠ᨩᩣ – ᨸᩩᨻ᩠ᨻᩮᨶᩥᩅᩣᩈᩣᨶᩩᩔᨲᩥᨬᩣᨱᩴ ᩅᩥᨩ᩠ᨩᩣ, ᩈᨲ᩠ᨲᩣᨶᩴ ᨧᩩᨲᩪᨸᨸᩣᨲᩮᨬᩣᨱᩴ ᩅᩥᨩ᩠ᨩᩣ, ᩌᩈᩅᩣᨶᩴ ᨡᨿᩮᨬᩣᨱᩴ ᩅᩥᨩ᩠ᨩᩣ.

‘‘ᨲᨿᩮᩣ ᩅᩥᩉᩣᩁᩣ – ᨴᩥᨻ᩠ᨻᩮᩣ ᩅᩥᩉᩣᩁᩮᩣ, ᨻᩕᩉ᩠ᨾᩣ ᩅᩥᩉᩣᩁᩮᩣ, ᩋᩁᩥᨿᩮᩣ ᩅᩥᩉᩣᩁᩮᩣ.

‘‘ᨲᩦᨱᩥ ᨸᩣᨭᩥᩉᩣᩁᩥᨿᩣᨶᩥ – ᩍᨴ᩠ᨵᩥᨸᩣᨭᩥᩉᩣᩁᩥᨿᩴ, ᩌᨴᩮᩈᨶᩣᨸᩣᨭᩥᩉᩣᩁᩥᨿᩴ, ᩋᨶᩩᩈᩣᩈᨶᩦᨸᩣᨭᩥᩉᩣᩁᩥᨿᩴ.

‘‘ᩍᨾᩮ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨲᨿᩮᩣ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ. ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ…ᨸᩮ… ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ.

ᨧᨲᩩᨠ᩠ᨠᩴ

᪓᪐᪖. ‘‘ᩋᨲ᩠ᨳᩥ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ. ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ, ᨶ ᩅᩥᩅᨴᩥᨲᨻ᩠ᨻᩴ…ᨸᩮ… ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᨠᨲᨾᩮ ᨧᨲ᩠ᨲᩣᩁᩮᩣ?

‘‘ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ, ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ. ᩅᩮᨴᨶᩣᩈᩩ ᩅᩮᨴᨶᩣᨶᩩᨸᩔᩦ…ᨸᩮ… ᨧᩥᨲ᩠ᨲᩮ ᨧᩥᨲ᩠ᨲᩣᨶᩩᨸᩔᩦ…ᨸᩮ… ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ.

‘‘ᨧᨲ᩠ᨲᩣᩁᩮᩣ ᩈᨾ᩠ᨾᨸ᩠ᨸᨵᩣᨶᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩋᨶᩩᨸ᩠ᨸᨶ᩠ᨶᩣᨶᩴ ᨸᩣᨸᨠᩣᨶᩴ ᩋᨠᩩᩈᩃᩣᨶᩴ ᨵᨾ᩠ᨾᩣᨶᩴ ᩋᨶᩩᨸ᩠ᨸᩣᨴᩣᨿ ᨨᨶ᩠ᨴᩴ ᨩᨶᩮᨲᩥ ᩅᩣᨿᨾᨲᩥ ᩅᩦᩁᩥᨿᩴ ᩌᩁᨽᨲᩥ ᨧᩥᨲ᩠ᨲᩴ ᨸᨣ᩠ᨣᨱ᩠ᩉᩣᨲᩥ ᨸᨴᩉᨲᩥ. ᩏᨸ᩠ᨸᨶ᩠ᨶᩣᨶᩴ ᨸᩣᨸᨠᩣᨶᩴ ᩋᨠᩩᩈᩃᩣᨶᩴ ᨵᨾ᩠ᨾᩣᨶᩴ ᨸᩉᩣᨶᩣᨿ ᨨᨶ᩠ᨴᩴ ᨩᨶᩮᨲᩥ ᩅᩣᨿᨾᨲᩥ ᩅᩦᩁᩥᨿᩴ ᩌᩁᨽᨲᩥ ᨧᩥᨲ᩠ᨲᩴ ᨸᨣ᩠ᨣᨱ᩠ᩉᩣᨲᩥ ᨸᨴᩉᨲᩥ. ᩋᨶᩩᨸ᩠ᨸᨶ᩠ᨶᩣᨶᩴ ᨠᩩᩈᩃᩣᨶᩴ ᨵᨾ᩠ᨾᩣᨶᩴ ᩏᨸ᩠ᨸᩣᨴᩣᨿ ᨨᨶ᩠ᨴᩴ ᨩᨶᩮᨲᩥ ᩅᩣᨿᨾᨲᩥ ᩅᩦᩁᩥᨿᩴ ᩌᩁᨽᨲᩥ ᨧᩥᨲ᩠ᨲᩴ ᨸᨣ᩠ᨣᨱ᩠ᩉᩣᨲᩥ ᨸᨴᩉᨲᩥ. ᩏᨸ᩠ᨸᨶ᩠ᨶᩣᨶᩴ ᨠᩩᩈᩃᩣᨶᩴ ᨵᨾ᩠ᨾᩣᨶᩴ ᨮᩥᨲᩥᨿᩣ ᩋᩈᨾ᩠ᨾᩮᩣᩈᩣᨿ ᨽᩥᨿ᩠ᨿᩮᩣᨽᩣᩅᩣᨿ ᩅᩮᨸᩩᩃ᩠ᩃᩣᨿ ᨽᩣᩅᨶᩣᨿ ᨸᩣᩁᩥᨸᩪᩁᩥᨿᩣ ᨨᨶ᩠ᨴᩴ ᨩᨶᩮᨲᩥ ᩅᩣᨿᨾᨲᩥ ᩅᩦᩁᩥᨿᩴ ᩌᩁᨽᨲᩥ ᨧᩥᨲ᩠ᨲᩴ ᨸᨣ᩠ᨣᨱ᩠ᩉᩣᨲᩥ ᨸᨴᩉᨲᩥ.

‘‘ᨧᨲ᩠ᨲᩣᩁᩮᩣ ᩍᨴ᩠ᨵᩥᨸᩣᨴᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨨᨶ᩠ᨴᩈᨾᩣᨵᩥᨸᨵᩣᨶᩈᨦ᩠ᨡᩣᩁᩈᨾᨶ᩠ᨶᩣᨣᨲᩴ ᩍᨴ᩠ᨵᩥᨸᩣᨴᩴ ᨽᩣᩅᩮᨲᩥ. ᨧᩥᨲ᩠ᨲᩈᨾᩣᨵᩥᨸᨵᩣᨶᩈᨦ᩠ᨡᩣᩁᩈᨾᨶ᩠ᨶᩣᨣᨲᩴ ᩍᨴ᩠ᨵᩥᨸᩣᨴᩴ ᨽᩣᩅᩮᨲᩥ. ᩅᩦᩁᩥᨿᩈᨾᩣᨵᩥᨸᨵᩣᨶᩈᨦ᩠ᨡᩣᩁᩈᨾᨶ᩠ᨶᩣᨣᨲᩴ ᩍᨴ᩠ᨵᩥᨸᩣᨴᩴ ᨽᩣᩅᩮᨲᩥ. ᩅᩦᨾᩴᩈᩣᩈᨾᩣᨵᩥᨸᨵᩣᨶᩈᨦ᩠ᨡᩣᩁᩈᨾᨶ᩠ᨶᩣᨣᨲᩴ ᩍᨴ᩠ᨵᩥᨸᩣᨴᩴ ᨽᩣᩅᩮᨲᩥ.

‘‘ᨧᨲ᩠ᨲᩣᩁᩥ ᨫᩣᨶᩣᨶᩥ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩅᩥᩅᩥᨧ᩠ᨧᩮᩅ ᨠᩣᨾᩮᩉᩥ ᩅᩥᩅᩥᨧ᩠ᨧ ᩋᨠᩩᩈᩃᩮᩉᩥ ᨵᨾ᩠ᨾᩮᩉᩥ ᩈᩅᩥᨲᨠ᩠ᨠᩴ ᩈᩅᩥᨧᩣᩁᩴ ᩅᩥᩅᩮᨠᨩᩴ ᨸᩦᨲᩥᩈᩩᨡᩴ ᨸᨮᨾᩴ ᨫᩣᨶᩴ [ᨸᨮᨾᨩ᩠ᨫᩣᨶᩴ (ᩈ᩠ᨿᩣ. ᨠᩴ.)] ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩅᩥᨲᨠ᩠ᨠᩅᩥᨧᩣᩁᩣᨶᩴ ᩅᩪᨸᩈᨾᩣ ᩋᨩ᩠ᨫᨲ᩠ᨲᩴ ᩈᨾ᩠ᨸᩈᩣᨴᨶᩴ ᨧᩮᨲᩈᩮᩣ ᩑᨠᩮᩣᨴᩥᨽᩣᩅᩴ ᩋᩅᩥᨲᨠ᩠ᨠᩴ ᩋᩅᩥᨧᩣᩁᩴ ᩈᨾᩣᨵᩥᨩᩴ ᨸᩦᨲᩥᩈᩩᨡᩴ ᨴᩩᨲᩥᨿᩴ ᨫᩣᨶᩴ [ᨴᩩᨲᩥᨿᨩ᩠ᨫᩣᨶᩴ (ᩈ᩠ᨿᩣ. ᨠᩴ.)] ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᨸᩦᨲᩥᨿᩣ ᨧ ᩅᩥᩁᩣᨣᩣ ᩏᨸᩮᨠ᩠ᨡᨠᩮᩣ ᨧ ᩅᩥᩉᩁᨲᩥ ᩈᨲᩮᩣ ᨧ ᩈᨾ᩠ᨸᨩᩣᨶᩮᩣ, ᩈᩩᨡᨬ᩠ᨧ ᨠᩣᨿᩮᨶ ᨸᨭᩥᩈᩴᩅᩮᨴᩮᨲᩥ, ᨿᩴ ᨲᩴ ᩋᩁᩥᨿᩣ ᩌᨧᩥᨠ᩠ᨡᨶ᩠ᨲᩥ – ‘ᩏᨸᩮᨠ᩠ᨡᨠᩮᩣ ᩈᨲᩥᨾᩣ ᩈᩩᨡᩅᩥᩉᩣᩁᩦ’ᨲᩥ ᨲᨲᩥᨿᩴ ᨫᩣᨶᩴ [ᨲᨲᩥᨿᨩ᩠ᨫᩣᨶᩴ (ᩈ᩠ᨿᩣ. ᨠᩴ.)] ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᩩᨡᩔ ᨧ ᨸᩉᩣᨶᩣ ᨴᩩᨠ᩠ᨡᩔ ᨧ ᨸᩉᩣᨶᩣ, ᨸᩩᨻ᩠ᨻᩮᩅ ᩈᩮᩣᨾᨶᩔᨴᩮᩣᨾᨶᩔᩣᨶᩴ ᩋᨲ᩠ᨳᨦ᩠ᨣᨾᩣ, ᩋᨴᩩᨠ᩠ᨡᨾᩈᩩᨡᩴ ᩏᨸᩮᨠ᩠ᨡᩣᩈᨲᩥᨸᩣᩁᩥᩈᩩᨴ᩠ᨵᩥᩴ ᨧᨲᩩᨲ᩠ᨳᩴ ᨫᩣᨶᩴ [ᨧᨲᩩᨲ᩠ᨳᨩ᩠ᨫᩣᨶᩴ (ᩈ᩠ᨿᩣ. ᨠᩴ.)] ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ.

᪓᪐᪗. ‘‘ᨧᨲᩔᩮᩣ ᩈᨾᩣᨵᩥᨽᩣᩅᨶᩣ. ᩋᨲ᩠ᨳᩣᩅᩩᩈᩮᩣ, ᩈᨾᩣᨵᩥᨽᩣᩅᨶᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨴᩥᨭ᩠ᨮᨵᨾ᩠ᨾᩈᩩᨡᩅᩥᩉᩣᩁᩣᨿ ᩈᩴᩅᨲ᩠ᨲᨲᩥ. ᩋᨲ᩠ᨳᩣᩅᩩᩈᩮᩣ, ᩈᨾᩣᨵᩥᨽᩣᩅᨶᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨬᩣᨱᨴᩔᨶᨸᨭᩥᩃᩣᨽᩣᨿ ᩈᩴᩅᨲ᩠ᨲᨲᩥ. ᩋᨲ᩠ᨳᩣᩅᩩᩈᩮᩣ ᩈᨾᩣᨵᩥᨽᩣᩅᨶᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᩈᨲᩥᩈᨾ᩠ᨸᨩᨬ᩠ᨬᩣᨿ ᩈᩴᩅᨲ᩠ᨲᨲᩥ. ᩋᨲ᩠ᨳᩣᩅᩩᩈᩮᩣ ᩈᨾᩣᨵᩥᨽᩣᩅᨶᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᩌᩈᩅᩣᨶᩴ ᨡᨿᩣᨿ ᩈᩴᩅᨲ᩠ᨲᨲᩥ.

‘‘ᨠᨲᨾᩣ ᨧᩣᩅᩩᩈᩮᩣ, ᩈᨾᩣᨵᩥᨽᩣᩅᨶᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨴᩥᨭ᩠ᨮᨵᨾ᩠ᨾᩈᩩᨡᩅᩥᩉᩣᩁᩣᨿ ᩈᩴᩅᨲ᩠ᨲᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩅᩥᩅᩥᨧ᩠ᨧᩮᩅ ᨠᩣᨾᩮᩉᩥ ᩅᩥᩅᩥᨧ᩠ᨧ ᩋᨠᩩᩈᩃᩮᩉᩥ ᨵᨾ᩠ᨾᩮᩉᩥ ᩈᩅᩥᨲᨠ᩠ᨠᩴ…ᨸᩮ… ᨧᨲᩩᨲ᩠ᨳᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ, ᩌᩅᩩᩈᩮᩣ, ᩈᨾᩣᨵᩥᨽᩣᩅᨶᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨴᩥᨭ᩠ᨮᨵᨾ᩠ᨾᩈᩩᨡᩅᩥᩉᩣᩁᩣᨿ ᩈᩴᩅᨲ᩠ᨲᨲᩥ.

‘‘ᨠᨲᨾᩣ ᨧᩣᩅᩩᩈᩮᩣ, ᩈᨾᩣᨵᩥᨽᩣᩅᨶᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨬᩣᨱᨴᩔᨶᨸᨭᩥᩃᩣᨽᩣᨿ ᩈᩴᩅᨲ᩠ᨲᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩌᩃᩮᩣᨠᩈᨬ᩠ᨬᩴ ᨾᨶᩈᩥ ᨠᩁᩮᩣᨲᩥ, ᨴᩥᩅᩣᩈᨬ᩠ᨬᩴ ᩋᨵᩥᨭ᩠ᨮᩣᨲᩥ ᨿᨳᩣ ᨴᩥᩅᩣ ᨲᨳᩣ ᩁᨲ᩠ᨲᩥᩴ, ᨿᨳᩣ ᩁᨲ᩠ᨲᩥᩴ ᨲᨳᩣ ᨴᩥᩅᩣ. ᩍᨲᩥ ᩅᩥᩅᨭᩮᨶ ᨧᩮᨲᩈᩣ ᩋᨸᩁᩥᨿᩮᩣᨶᨴ᩠ᨵᩮᨶ ᩈᨸ᩠ᨸᨽᩣᩈᩴ ᨧᩥᨲ᩠ᨲᩴ ᨽᩣᩅᩮᨲᩥ. ᩋᨿᩴ, ᩌᩅᩩᩈᩮᩣ ᩈᨾᩣᨵᩥᨽᩣᩅᨶᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨬᩣᨱᨴᩔᨶᨸᨭᩥᩃᩣᨽᩣᨿ ᩈᩴᩅᨲ᩠ᨲᨲᩥ.

‘‘ᨠᨲᨾᩣ ᨧᩣᩅᩩᩈᩮᩣ, ᩈᨾᩣᨵᩥᨽᩣᩅᨶᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᩈᨲᩥᩈᨾ᩠ᨸᨩᨬ᩠ᨬᩣᨿ ᩈᩴᩅᨲ᩠ᨲᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩅᩥᨴᩥᨲᩣ ᩅᩮᨴᨶᩣ ᩏᨸ᩠ᨸᨩ᩠ᨩᨶ᩠ᨲᩥ, ᩅᩥᨴᩥᨲᩣ ᩏᨸᨭ᩠ᨮᩉᨶ᩠ᨲᩥ, ᩅᩥᨴᩥᨲᩣ ᩋᨻ᩠ᨽᨲ᩠ᨳᩴ ᨣᨧ᩠ᨨᨶ᩠ᨲᩥ. ᩅᩥᨴᩥᨲᩣ ᩈᨬ᩠ᨬᩣ ᩏᨸ᩠ᨸᨩ᩠ᨩᨶ᩠ᨲᩥ, ᩅᩥᨴᩥᨲᩣ ᩏᨸᨭ᩠ᨮᩉᨶ᩠ᨲᩥ, ᩅᩥᨴᩥᨲᩣ ᩋᨻ᩠ᨽᨲ᩠ᨳᩴ ᨣᨧ᩠ᨨᨶ᩠ᨲᩥ. ᩅᩥᨴᩥᨲᩣ ᩅᩥᨲᨠ᩠ᨠᩣ ᩏᨸ᩠ᨸᨩ᩠ᨩᨶ᩠ᨲᩥ, ᩅᩥᨴᩥᨲᩣ ᩏᨸᨭ᩠ᨮᩉᨶ᩠ᨲᩥ, ᩅᩥᨴᩥᨲᩣ ᩋᨻ᩠ᨽᨲ᩠ᨳᩴ ᨣᨧ᩠ᨨᨶ᩠ᨲᩥ. ᩋᨿᩴ, ᩌᩅᩩᩈᩮᩣ, ᩈᨾᩣᨵᩥᨽᩣᩅᨶᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᩈᨲᩥᩈᨾ᩠ᨸᨩᨬ᩠ᨬᩣᨿ ᩈᩴᩅᨲ᩠ᨲᨲᩥ.

‘‘ᨠᨲᨾᩣ ᨧᩣᩅᩩᩈᩮᩣ, ᩈᨾᩣᨵᩥᨽᩣᩅᨶᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᩌᩈᩅᩣᨶᩴ ᨡᨿᩣᨿ ᩈᩴᩅᨲ᩠ᨲᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨸᨬ᩠ᨧᩈᩩ ᩏᨸᩣᨴᩣᨶᨠ᩠ᨡᨶ᩠ᨵᩮᩈᩩ ᩏᨴᨿᨻ᩠ᨻᨿᩣᨶᩩᨸᩔᩦ ᩅᩥᩉᩁᨲᩥ. ᩍᨲᩥ ᩁᩪᨸᩴ, ᩍᨲᩥ ᩁᩪᨸᩔ ᩈᨾᩩᨴᨿᩮᩣ, ᩍᨲᩥ ᩁᩪᨸᩔ ᩋᨲ᩠ᨳᨦ᩠ᨣᨾᩮᩣ. ᩍᨲᩥ ᩅᩮᨴᨶᩣ…ᨸᩮ… ᩍᨲᩥ ᩈᨬ᩠ᨬᩣ… ᩍᨲᩥ ᩈᨦ᩠ᨡᩣᩁᩣ… ᩍᨲᩥ ᩅᩥᨬ᩠ᨬᩣᨱᩴ, ᩍᨲᩥ ᩅᩥᨬ᩠ᨬᩣᨱᩔ ᩈᨾᩩᨴᨿᩮᩣ, ᩍᨲᩥ ᩅᩥᨬ᩠ᨬᩣᨱᩔ ᩋᨲ᩠ᨳᨦ᩠ᨣᨾᩮᩣ. ᩋᨿᩴ, ᩌᩅᩩᩈᩮᩣ, ᩈᨾᩣᨵᩥᨽᩣᩅᨶᩣ ᨽᩣᩅᩥᨲᩣ ᨻᩉᩩᩃᩦᨠᨲᩣ ᩌᩈᩅᩣᨶᩴ ᨡᨿᩣᨿ ᩈᩴᩅᨲ᩠ᨲᨲᩥ.

᪓᪐᪘. ‘‘ᨧᨲᩔᩮᩣ ᩋᨸ᩠ᨸᨾᨬ᩠ᨬᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨾᩮᨲ᩠ᨲᩣᩈᩉᨣᨲᩮᨶ ᨧᩮᨲᩈᩣ ᩑᨠᩴ ᨴᩥᩈᩴ ᨹᩁᩥᨲ᩠ᩅᩣ ᩅᩥᩉᩁᨲᩥ. ᨲᨳᩣ ᨴᩩᨲᩥᨿᩴ. ᨲᨳᩣ ᨲᨲᩥᨿᩴ. ᨲᨳᩣ ᨧᨲᩩᨲ᩠ᨳᩴ. ᩍᨲᩥ ᩏᨴ᩠ᨵᨾᨵᩮᩣ ᨲᩥᩁᩥᨿᩴ ᩈᨻ᩠ᨻᨵᩥ ᩈᨻ᩠ᨻᨲ᩠ᨲᨲᩣᨿ ᩈᨻ᩠ᨻᩣᩅᨶ᩠ᨲᩴ ᩃᩮᩣᨠᩴ ᨾᩮᨲ᩠ᨲᩣᩈᩉᨣᨲᩮᨶ ᨧᩮᨲᩈᩣ ᩅᩥᨸᩩᩃᩮᨶ ᨾᩉᨣ᩠ᨣᨲᩮᨶ ᩋᨸ᩠ᨸᨾᩣᨱᩮᨶ ᩋᩅᩮᩁᩮᨶ ᩋᨻ᩠ᨿᩣᨸᨩ᩠ᨩᩮᨶ [ᩋᨻ᩠ᨿᩣᨸᨩ᩠ᨫᩮᨶ (ᩈᩦ. ᩈ᩠ᨿᩣ. ᨠᩴ. ᨸᩦ.)] ᨹᩁᩥᨲ᩠ᩅᩣ ᩅᩥᩉᩁᨲᩥ. ᨠᩁᩩᨱᩣᩈᩉᨣᨲᩮᨶ ᨧᩮᨲᩈᩣ…ᨸᩮ… ᨾᩩᨴᩥᨲᩣᩈᩉᨣᨲᩮᨶ ᨧᩮᨲᩈᩣ…ᨸᩮ… ᩏᨸᩮᨠ᩠ᨡᩣᩈᩉᨣᨲᩮᨶ ᨧᩮᨲᩈᩣ ᩑᨠᩴ ᨴᩥᩈᩴ ᨹᩁᩥᨲ᩠ᩅᩣ ᩅᩥᩉᩁᨲᩥ. ᨲᨳᩣ ᨴᩩᨲᩥᨿᩴ. ᨲᨳᩣ ᨲᨲᩥᨿᩴ. ᨲᨳᩣ ᨧᨲᩩᨲ᩠ᨳᩴ. ᩍᨲᩥ ᩏᨴ᩠ᨵᨾᨵᩮᩣ ᨲᩥᩁᩥᨿᩴ ᩈᨻ᩠ᨻᨵᩥ ᩈᨻ᩠ᨻᨲ᩠ᨲᨲᩣᨿ ᩈᨻ᩠ᨻᩣᩅᨶ᩠ᨲᩴ ᩃᩮᩣᨠᩴ ᩏᨸᩮᨠ᩠ᨡᩣᩈᩉᨣᨲᩮᨶ ᨧᩮᨲᩈᩣ ᩅᩥᨸᩩᩃᩮᨶ ᨾᩉᨣ᩠ᨣᨲᩮᨶ ᩋᨸ᩠ᨸᨾᩣᨱᩮᨶ ᩋᩅᩮᩁᩮᨶ ᩋᨻ᩠ᨿᩣᨸᨩ᩠ᨩᩮᨶ ᨹᩁᩥᨲ᩠ᩅᩣ ᩅᩥᩉᩁᨲᩥ.

‘‘ᨧᨲ᩠ᨲᩣᩁᩮᩣ ᩌᩁᩩᨸ᩠ᨸᩣ. [ᩋᩁᩪᨸᩣ (ᩈ᩠ᨿᩣ. ᨠᩴ. ᨸᩦ.)] ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨻ᩠ᨻᩈᩮᩣ ᩁᩪᨸᩈᨬ᩠ᨬᩣᨶᩴ ᩈᨾᨲᩥᨠ᩠ᨠᨾᩣ ᨸᨭᩥᨥᩈᨬ᩠ᨬᩣᨶᩴ ᩋᨲ᩠ᨳᨦ᩠ᨣᨾᩣ ᨶᩣᨶᨲ᩠ᨲᩈᨬ᩠ᨬᩣᨶᩴ ᩋᨾᨶᩈᩥᨠᩣᩁᩣ ‘ᩋᨶᨶ᩠ᨲᩮᩣ ᩌᨠᩣᩈᩮᩣ’ᨲᩥ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᨻ᩠ᨻᩈᩮᩣ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᩋᨶᨶ᩠ᨲᩴ ᩅᩥᨬ᩠ᨬᩣᨱ’ᨶ᩠ᨲᩥ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᨻ᩠ᨻᩈᩮᩣ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᨶᨲ᩠ᨳᩥ ᨠᩥᨬ᩠ᨧᩦ’ᨲᩥ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᨻ᩠ᨻᩈᩮᩣ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ.

‘‘ᨧᨲ᩠ᨲᩣᩁᩥ ᩋᨸᩔᩮᨶᩣᨶᩥ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨦ᩠ᨡᩣᨿᩮᨠᩴ ᨸᨭᩥᩈᩮᩅᨲᩥ, ᩈᨦ᩠ᨡᩣᨿᩮᨠᩴ ᩋᨵᩥᩅᩣᩈᩮᨲᩥ, ᩈᨦ᩠ᨡᩣᨿᩮᨠᩴ ᨸᩁᩥᩅᨩ᩠ᨩᩮᨲᩥ, ᩈᨦ᩠ᨡᩣᨿᩮᨠᩴ ᩅᩥᨶᩮᩣᨴᩮᨲᩥ.

᪓᪐᪙. ‘‘ᨧᨲ᩠ᨲᩣᩁᩮᩣ ᩋᩁᩥᨿᩅᩴᩈᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨶ᩠ᨲᩩᨭ᩠ᨮᩮᩣ ᩉᩮᩣᨲᩥ ᩍᨲᩁᩦᨲᩁᩮᨶ ᨧᩦᩅᩁᩮᨶ, ᩍᨲᩁᩦᨲᩁᨧᩦᩅᩁᩈᨶ᩠ᨲᩩᨭ᩠ᨮᩥᨿᩣ ᨧ ᩅᨱ᩠ᨱᩅᩣᨴᩦ, ᨶ ᨧ ᨧᩦᩅᩁᩉᩮᨲᩩ ᩋᨶᩮᩈᨶᩴ ᩋᨸ᩠ᨸᨲᩥᩁᩪᨸᩴ ᩌᨸᨩ᩠ᨩᨲᩥ; ᩋᩃᨴ᩠ᨵᩣ ᨧ ᨧᩦᩅᩁᩴ ᨶ ᨸᩁᩥᨲᩔᨲᩥ, ᩃᨴ᩠ᨵᩣ ᨧ ᨧᩦᩅᩁᩴ ᩋᨣᨵᩥᨲᩮᩣ [ᩋᨣᨳᩥᨲᩮᩣ (ᩈᩦ. ᨸᩦ.)] ᩋᨾᩩᨧ᩠ᨨᩥᨲᩮᩣ ᩋᨶᨩ᩠ᨫᩣᨸᨶ᩠ᨶᩮᩣ ᩌᨴᩦᨶᩅᨴᩔᩣᩅᩦ ᨶᩥᩔᩁᨱᨸᨬ᩠ᨬᩮᩣ ᨸᩁᩥᨽᩩᨬ᩠ᨩᨲᩥ; ᨲᩣᨿ ᨧ ᨸᨶ ᩍᨲᩁᩦᨲᩁᨧᩦᩅᩁᩈᨶ᩠ᨲᩩᨭ᩠ᨮᩥᨿᩣ ᨶᩮᩅᨲ᩠ᨲᩣᨶᩩᨠ᩠ᨠᩴᩈᩮᨲᩥ ᨶ ᨸᩁᩴ ᩅᨾ᩠ᨽᩮᨲᩥ. ᨿᩮᩣ ᩉᩥ ᨲᨲ᩠ᨳ ᨴᨠ᩠ᨡᩮᩣ ᩋᨶᩃᩈᩮᩣ ᩈᨾ᩠ᨸᨩᩣᨶᩮᩣ ᨸᨭᩥᩔᨲᩮᩣ, ᩋᨿᩴ ᩅᩩᨧ᩠ᨧᨲᩣᩅᩩᩈᩮᩣ – ‘ᨽᩥᨠ᩠ᨡᩩ ᨸᩮᩣᩁᩣᨱᩮ ᩋᨣ᩠ᨣᨬ᩠ᨬᩮ ᩋᩁᩥᨿᩅᩴᩈᩮ ᨮᩥᨲᩮᩣ’.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᨶ᩠ᨲᩩᨭ᩠ᨮᩮᩣ ᩉᩮᩣᨲᩥ ᩍᨲᩁᩦᨲᩁᩮᨶ ᨸᩥᨱ᩠ᨯᨸᩣᨲᩮᨶ, ᩍᨲᩁᩦᨲᩁᨸᩥᨱ᩠ᨯᨸᩣᨲᩈᨶ᩠ᨲᩩᨭ᩠ᨮᩥᨿᩣ ᨧ ᩅᨱ᩠ᨱᩅᩣᨴᩦ, ᨶ ᨧ ᨸᩥᨱ᩠ᨯᨸᩣᨲᩉᩮᨲᩩ ᩋᨶᩮᩈᨶᩴ ᩋᨸ᩠ᨸᨲᩥᩁᩪᨸᩴ ᩌᨸᨩ᩠ᨩᨲᩥ; ᩋᩃᨴ᩠ᨵᩣ ᨧ ᨸᩥᨱ᩠ᨯᨸᩣᨲᩴ ᨶ ᨸᩁᩥᨲᩔᨲᩥ, ᩃᨴ᩠ᨵᩣ ᨧ ᨸᩥᨱ᩠ᨯᨸᩣᨲᩴ ᩋᨣᨵᩥᨲᩮᩣ ᩋᨾᩩᨧ᩠ᨨᩥᨲᩮᩣ ᩋᨶᨩ᩠ᨫᩣᨸᨶ᩠ᨶᩮᩣ ᩌᨴᩦᨶᩅᨴᩔᩣᩅᩦ ᨶᩥᩔᩁᨱᨸᨬ᩠ᨬᩮᩣ ᨸᩁᩥᨽᩩᨬ᩠ᨩᨲᩥ; ᨲᩣᨿ ᨧ ᨸᨶ ᩍᨲᩁᩦᨲᩁᨸᩥᨱ᩠ᨯᨸᩣᨲᩈᨶ᩠ᨲᩩᨭ᩠ᨮᩥᨿᩣ ᨶᩮᩅᨲ᩠ᨲᩣᨶᩩᨠ᩠ᨠᩴᩈᩮᨲᩥ ᨶ ᨸᩁᩴ ᩅᨾ᩠ᨽᩮᨲᩥ. ᨿᩮᩣ ᩉᩥ ᨲᨲ᩠ᨳ ᨴᨠ᩠ᨡᩮᩣ ᩋᨶᩃᩈᩮᩣ ᩈᨾ᩠ᨸᨩᩣᨶᩮᩣ ᨸᨭᩥᩔᨲᩮᩣ, ᩋᨿᩴ ᩅᩩᨧ᩠ᨧᨲᩣᩅᩩᩈᩮᩣ – ‘ᨽᩥᨠ᩠ᨡᩩ ᨸᩮᩣᩁᩣᨱᩮ ᩋᨣ᩠ᨣᨬ᩠ᨬᩮ ᩋᩁᩥᨿᩅᩴᩈᩮ ᨮᩥᨲᩮᩣ’.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᨶ᩠ᨲᩩᨭ᩠ᨮᩮᩣ ᩉᩮᩣᨲᩥ ᩍᨲᩁᩦᨲᩁᩮᨶ ᩈᩮᨶᩣᩈᨶᩮᨶ, ᩍᨲᩁᩦᨲᩁᩈᩮᨶᩣᩈᨶᩈᨶ᩠ᨲᩩᨭ᩠ᨮᩥᨿᩣ ᨧ ᩅᨱ᩠ᨱᩅᩣᨴᩦ, ᨶ ᨧ ᩈᩮᨶᩣᩈᨶᩉᩮᨲᩩ ᩋᨶᩮᩈᨶᩴ ᩋᨸ᩠ᨸᨲᩥᩁᩪᨸᩴ ᩌᨸᨩ᩠ᨩᨲᩥ; ᩋᩃᨴ᩠ᨵᩣ ᨧ ᩈᩮᨶᩣᩈᨶᩴ ᨶ ᨸᩁᩥᨲᩔᨲᩥ, ᩃᨴ᩠ᨵᩣ ᨧ ᩈᩮᨶᩣᩈᨶᩴ ᩋᨣᨵᩥᨲᩮᩣ ᩋᨾᩩᨧ᩠ᨨᩥᨲᩮᩣ ᩋᨶᨩ᩠ᨫᩣᨸᨶ᩠ᨶᩮᩣ ᩌᨴᩦᨶᩅᨴᩔᩣᩅᩦ ᨶᩥᩔᩁᨱᨸᨬ᩠ᨬᩮᩣ ᨸᩁᩥᨽᩩᨬ᩠ᨩᨲᩥ; ᨲᩣᨿ ᨧ ᨸᨶ ᩍᨲᩁᩦᨲᩁᩈᩮᨶᩣᩈᨶᩈᨶ᩠ᨲᩩᨭ᩠ᨮᩥᨿᩣ ᨶᩮᩅᨲ᩠ᨲᩣᨶᩩᨠ᩠ᨠᩴᩈᩮᨲᩥ ᨶ ᨸᩁᩴ ᩅᨾ᩠ᨽᩮᨲᩥ. ᨿᩮᩣ ᩉᩥ ᨲᨲ᩠ᨳ ᨴᨠ᩠ᨡᩮᩣ ᩋᨶᩃᩈᩮᩣ ᩈᨾ᩠ᨸᨩᩣᨶᩮᩣ ᨸᨭᩥᩔᨲᩮᩣ, ᩋᨿᩴ ᩅᩩᨧ᩠ᨧᨲᩣᩅᩩᩈᩮᩣ – ‘ᨽᩥᨠ᩠ᨡᩩ ᨸᩮᩣᩁᩣᨱᩮ ᩋᨣ᩠ᨣᨬ᩠ᨬᩮ ᩋᩁᩥᨿᩅᩴᩈᩮ ᨮᩥᨲᩮᩣ’.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨸᩉᩣᨶᩣᩁᩣᨾᩮᩣ ᩉᩮᩣᨲᩥ ᨸᩉᩣᨶᩁᨲᩮᩣ, ᨽᩣᩅᨶᩣᩁᩣᨾᩮᩣ ᩉᩮᩣᨲᩥ ᨽᩣᩅᨶᩣᩁᨲᩮᩣ; ᨲᩣᨿ ᨧ ᨸᨶ ᨸᩉᩣᨶᩣᩁᩣᨾᨲᩣᨿ ᨸᩉᩣᨶᩁᨲᩥᨿᩣ ᨽᩣᩅᨶᩣᩁᩣᨾᨲᩣᨿ ᨽᩣᩅᨶᩣᩁᨲᩥᨿᩣ ᨶᩮᩅᨲ᩠ᨲᩣᨶᩩᨠ᩠ᨠᩴᩈᩮᨲᩥ ᨶ ᨸᩁᩴ ᩅᨾ᩠ᨽᩮᨲᩥ. ᨿᩮᩣ ᩉᩥ ᨲᨲ᩠ᨳ ᨴᨠ᩠ᨡᩮᩣ ᩋᨶᩃᩈᩮᩣ ᩈᨾ᩠ᨸᨩᩣᨶᩮᩣ ᨸᨭᩥᩔᨲᩮᩣ ᩋᨿᩴ ᩅᩩᨧ᩠ᨧᨲᩣᩅᩩᩈᩮᩣ – ‘ᨽᩥᨠ᩠ᨡᩩ ᨸᩮᩣᩁᩣᨱᩮ ᩋᨣ᩠ᨣᨬ᩠ᨬᩮ ᩋᩁᩥᨿᩅᩴᩈᩮ ᨮᩥᨲᩮᩣ’.

᪓᪑᪐. ‘‘ᨧᨲ᩠ᨲᩣᩁᩥ ᨸᨵᩣᨶᩣᨶᩥ. ᩈᩴᩅᩁᨸᨵᩣᨶᩴ ᨸᩉᩣᨶᨸᨵᩣᨶᩴ ᨽᩣᩅᨶᩣᨸᨵᩣᨶᩴ [ᨽᩣᩅᨶᩣᨸ᩠ᨸᨵᩣᨶᩴ (ᩈ᩠ᨿᩣ.)] ᩋᨶᩩᩁᨠ᩠ᨡᨱᩣᨸᨵᩣᨶᩴ [ᩋᨶᩩᩁᨠ᩠ᨡᨶᩣᨸ᩠ᨸᨵᩣᨶᩴ (ᩈ᩠ᨿᩣ.)]. ᨠᨲᨾᨬ᩠ᨧᩣᩅᩩᩈᩮᩣ, ᩈᩴᩅᩁᨸᨵᩣᨶᩴ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨧᨠ᩠ᨡᩩᨶᩣ ᩁᩪᨸᩴ ᨴᩥᩈ᩠ᩅᩣ ᨶ ᨶᩥᨾᩥᨲ᩠ᨲᨣ᩠ᨣᩣᩉᩦ ᩉᩮᩣᨲᩥ ᨶᩣᨶᩩᨻ᩠ᨿᨬ᩠ᨩᨶᨣ᩠ᨣᩣᩉᩦ. ᨿᨲ᩠ᩅᩣᨵᩥᨠᩁᨱᨾᩮᨶᩴ ᨧᨠ᩠ᨡᩩᨶ᩠ᨴᩕᩥᨿᩴ ᩋᩈᩴᩅᩩᨲᩴ ᩅᩥᩉᩁᨶ᩠ᨲᩴ ᩋᨽᩥᨩ᩠ᨫᩣᨴᩮᩣᨾᨶᩔᩣ ᨸᩣᨸᨠᩣ ᩋᨠᩩᩈᩃᩣ ᨵᨾ᩠ᨾᩣ ᩋᨶ᩠ᩅᩣᩔᩅᩮᨿ᩠ᨿᩩᩴ, ᨲᩔ ᩈᩴᩅᩁᩣᨿ ᨸᨭᩥᨸᨩ᩠ᨩᨲᩥ, ᩁᨠ᩠ᨡᨲᩥ ᨧᨠ᩠ᨡᩩᨶ᩠ᨴᩕᩥᨿᩴ, ᨧᨠ᩠ᨡᩩᨶ᩠ᨴᩕᩥᨿᩮ ᩈᩴᩅᩁᩴ ᩌᨸᨩ᩠ᨩᨲᩥ. ᩈᩮᩣᨲᩮᨶ ᩈᨴ᩠ᨴᩴ ᩈᩩᨲ᩠ᩅᩣ… ᨥᩣᨶᩮᨶ ᨣᨶ᩠ᨵᩴ ᨥᩣᨿᩥᨲ᩠ᩅᩣ… ᨩᩥᩅ᩠ᩉᩣᨿ ᩁᩈᩴ ᩈᩣᨿᩥᨲ᩠ᩅᩣ… ᨠᩣᨿᩮᨶ ᨹᩮᩣᨭ᩠ᨮᨻ᩠ᨻᩴ ᨹᩩᩈᩥᨲ᩠ᩅᩣ… ᨾᨶᩈᩣ ᨵᨾ᩠ᨾᩴ ᩅᩥᨬ᩠ᨬᩣᨿ ᨶ ᨶᩥᨾᩥᨲ᩠ᨲᨣ᩠ᨣᩣᩉᩦ ᩉᩮᩣᨲᩥ ᨶᩣᨶᩩᨻ᩠ᨿᨬ᩠ᨩᨶᨣ᩠ᨣᩣᩉᩦ. ᨿᨲ᩠ᩅᩣᨵᩥᨠᩁᨱᨾᩮᨶᩴ ᨾᨶᩥᨶ᩠ᨴᩕᩥᨿᩴ ᩋᩈᩴᩅᩩᨲᩴ ᩅᩥᩉᩁᨶ᩠ᨲᩴ ᩋᨽᩥᨩ᩠ᨫᩣᨴᩮᩣᨾᨶᩔᩣ ᨸᩣᨸᨠᩣ ᩋᨠᩩᩈᩃᩣ ᨵᨾ᩠ᨾᩣ ᩋᨶ᩠ᩅᩣᩔᩅᩮᨿ᩠ᨿᩩᩴ, ᨲᩔ ᩈᩴᩅᩁᩣᨿ ᨸᨭᩥᨸᨩ᩠ᨩᨲᩥ, ᩁᨠ᩠ᨡᨲᩥ ᨾᨶᩥᨶ᩠ᨴᩕᩥᨿᩴ, ᨾᨶᩥᨶ᩠ᨴᩕᩥᨿᩮ ᩈᩴᩅᩁᩴ ᩌᨸᨩ᩠ᨩᨲᩥ. ᩍᨴᩴ ᩅᩩᨧ᩠ᨧᨲᩣᩅᩩᩈᩮᩣ, ᩈᩴᩅᩁᨸᨵᩣᨶᩴ.

‘‘ᨠᨲᨾᨬ᩠ᨧᩣᩅᩩᩈᩮᩣ, ᨸᩉᩣᨶᨸᨵᩣᨶᩴ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩏᨸ᩠ᨸᨶ᩠ᨶᩴ ᨠᩣᨾᩅᩥᨲᨠ᩠ᨠᩴ ᨶᩣᨵᩥᩅᩣᩈᩮᨲᩥ ᨸᨩᩉᨲᩥ ᩅᩥᨶᩮᩣᨴᩮᨲᩥ ᨻ᩠ᨿᨶ᩠ᨲᩥᩴ ᨠᩁᩮᩣᨲᩥ [ᨻ᩠ᨿᨶ᩠ᨲᩦ ᨠᩁᩮᩣᨲᩥ (ᩈ᩠ᨿᩣ. ᨠᩴ.)] ᩋᨶᨽᩣᩅᩴ ᨣᨾᩮᨲᩥ. ᩏᨸ᩠ᨸᨶ᩠ᨶᩴ ᨻ᩠ᨿᩣᨸᩣᨴᩅᩥᨲᨠ᩠ᨠᩴ…ᨸᩮ… ᩏᨸ᩠ᨸᨶ᩠ᨶᩴ ᩅᩥᩉᩥᩴᩈᩣᩅᩥᨲᨠ᩠ᨠᩴ… ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᩮ ᨸᩣᨸᨠᩮ ᩋᨠᩩᩈᩃᩮ ᨵᨾ᩠ᨾᩮ ᨶᩣᨵᩥᩅᩣᩈᩮᨲᩥ ᨸᨩᩉᨲᩥ ᩅᩥᨶᩮᩣᨴᩮᨲᩥ ᨻ᩠ᨿᨶ᩠ᨲᩥᩴ ᨠᩁᩮᩣᨲᩥ ᩋᨶᨽᩣᩅᩴ ᨣᨾᩮᨲᩥ. ᩍᨴᩴ ᩅᩩᨧ᩠ᨧᨲᩣᩅᩩᩈᩮᩣ, ᨸᩉᩣᨶᨸᨵᩣᨶᩴ.

‘‘ᨠᨲᨾᨬ᩠ᨧᩣᩅᩩᩈᩮᩣ, ᨽᩣᩅᨶᩣᨸᨵᩣᨶᩴ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᨲᩥ ᩅᩥᩅᩮᨠᨶᩥᩔᩥᨲᩴ ᩅᩥᩁᩣᨣᨶᩥᩔᩥᨲᩴ ᨶᩥᩁᩮᩣᨵᨶᩥᩔᩥᨲᩴ ᩅᩮᩣᩔᨣ᩠ᨣᨸᩁᩥᨱᩣᨾᩥᩴ. ᨵᨾ᩠ᨾᩅᩥᨧᨿᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᨲᩥ… ᩅᩦᩁᩥᨿᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᨲᩥ… ᨸᩦᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᨲᩥ… ᨸᩔᨴ᩠ᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᨲᩥ… ᩈᨾᩣᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᨲᩥ… ᩏᨸᩮᨠ᩠ᨡᩣᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᨲᩥ ᩅᩥᩅᩮᨠᨶᩥᩔᩥᨲᩴ ᩅᩥᩁᩣᨣᨶᩥᩔᩥᨲᩴ ᨶᩥᩁᩮᩣᨵᨶᩥᩔᩥᨲᩴ ᩅᩮᩣᩔᨣ᩠ᨣᨸᩁᩥᨱᩣᨾᩥᩴ. ᩍᨴᩴ ᩅᩩᨧ᩠ᨧᨲᩣᩅᩩᩈᩮᩣ, ᨽᩣᩅᨶᩣᨸᨵᩣᨶᩴ.

‘‘ᨠᨲᨾᨬ᩠ᨧᩣᩅᩩᩈᩮᩣ, ᩋᨶᩩᩁᨠ᩠ᨡᨱᩣᨸᨵᩣᨶᩴ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩏᨸ᩠ᨸᨶ᩠ᨶᩴ ᨽᨴᩕᨠᩴ [ᨽᨴ᩠ᨴᨠᩴ (ᩈ᩠ᨿᩣ. ᨠᩴ. ᨸᩦ.)] ᩈᨾᩣᨵᩥᨶᩥᨾᩥᨲ᩠ᨲᩴ ᩋᨶᩩᩁᨠ᩠ᨡᨲᩥ – ᩋᨭ᩠ᨮᩥᨠᩈᨬ᩠ᨬᩴ, ᨸᩩᩊᩩᩅᨠᩈᨬ᩠ᨬᩴ [ᨸᩩᩊᩅᨠᩈᨬ᩠ᨬᩴ (ᩈᩦ. ᨸᩦ.)], ᩅᩥᨶᩦᩃᨠᩈᨬ᩠ᨬᩴ, ᩅᩥᨧ᩠ᨨᩥᨴ᩠ᨴᨠᩈᨬ᩠ᨬᩴ, ᩏᨴ᩠ᨵᩩᨾᩣᨲᨠᩈᨬ᩠ᨬᩴ. ᩍᨴᩴ ᩅᩩᨧ᩠ᨧᨲᩣᩅᩩᩈᩮᩣ, ᩋᨶᩩᩁᨠ᩠ᨡᨱᩣᨸᨵᩣᨶᩴ.

‘‘ᨧᨲ᩠ᨲᩣᩁᩥ ᨬᩣᨱᩣᨶᩥ – ᨵᨾ᩠ᨾᩮ ᨬᩣᨱᩴ, ᩋᨶ᩠ᩅᨿᩮ ᨬᩣᨱᩴ, ᨸᩁᩥᨿᩮ [ᨸᩁᩥᨧ᩠ᨧᩮ (ᩈᩦ. ᨠ.), ᨸᩁᩥᨧ᩠ᨨᩮᨴᩮ (ᩈ᩠ᨿᩣ. ᨸᩦ. ᨠ.) ᨭᩦᨠᩣ ᩒᩃᩮᩣᨠᩮᨲᨻ᩠ᨻᩣ] ᨬᩣᨱᩴ, ᩈᨾ᩠ᨾᩩᨲᩥᨿᩣ ᨬᩣᨱᩴ [ᩈᨾ᩠ᨾᨲᩥᨬᩣᨱᩴ (ᩈ᩠ᨿᩣ. ᨠᩴ.)].

‘‘ᩋᨸᩁᩣᨶᩥᨸᩥ ᨧᨲ᩠ᨲᩣᩁᩥ ᨬᩣᨱᩣᨶᩥ – ᨴᩩᨠ᩠ᨡᩮ ᨬᩣᨱᩴ, ᨴᩩᨠ᩠ᨡᩈᨾᩩᨴᨿᩮ ᨬᩣᨱᩴ, ᨴᩩᨠ᩠ᨡᨶᩥᩁᩮᩣᨵᩮ ᨬᩣᨱᩴ, ᨴᩩᨠ᩠ᨡᨶᩥᩁᩮᩣᨵᨣᩣᨾᩥᨶᩥᨿᩣ ᨸᨭᩥᨸᨴᩣᨿ ᨬᩣᨱᩴ.

᪓᪑᪑. ‘‘ᨧᨲ᩠ᨲᩣᩁᩥ ᩈᩮᩣᨲᩣᨸᨲ᩠ᨲᩥᨿᨦ᩠ᨣᩣᨶᩥ – ᩈᨸ᩠ᨸᩩᩁᩥᩈᩈᩴᩈᩮᩅᩮᩣ, ᩈᨴ᩠ᨵᨾ᩠ᨾᩔᩅᨶᩴ, ᨿᩮᩣᨶᩥᩈᩮᩣᨾᨶᩈᩥᨠᩣᩁᩮᩣ, ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨲ᩠ᨲᩥ.

‘‘ᨧᨲ᩠ᨲᩣᩁᩥ ᩈᩮᩣᨲᩣᨸᨶ᩠ᨶᩔ ᩋᨦ᩠ᨣᩣᨶᩥ. ᩍᨵᩣᩅᩩᩈᩮᩣ, ᩋᩁᩥᨿᩈᩣᩅᨠᩮᩣ ᨻᩩᨴ᩠ᨵᩮ ᩋᩅᩮᨧ᩠ᨧᨸ᩠ᨸᩈᩣᨴᩮᨶ ᩈᨾᨶ᩠ᨶᩣᨣᨲᩮᩣ ᩉᩮᩣᨲᩥ – ‘ᩍᨲᩥᨸᩥ ᩈᩮᩣ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩮᩣ ᩈᩩᨣᨲᩮᩣ ᩃᩮᩣᨠᩅᩥᨴᩪ ᩋᨶᩩᨲ᩠ᨲᩁᩮᩣ ᨸᩩᩁᩥᩈᨴᨾ᩠ᨾᩈᩣᩁᨳᩥ ᩈᨲ᩠ᨳᩣ ᨴᩮᩅᨾᨶᩩᩔᩣᨶᩴ ᨻᩩᨴ᩠ᨵᩮᩣ, ᨽᨣᩅᩣ’ᨲᩥ. ᨵᨾ᩠ᨾᩮ ᩋᩅᩮᨧ᩠ᨧᨸ᩠ᨸᩈᩣᨴᩮᨶ ᩈᨾᨶ᩠ᨶᩣᨣᨲᩮᩣ ᩉᩮᩣᨲᩥ – ‘ᩈ᩠ᩅᩣᨠ᩠ᨡᩣᨲᩮᩣ ᨽᨣᩅᨲᩣ ᨵᨾ᩠ᨾᩮᩣ ᩈᨶ᩠ᨴᩥᨭ᩠ᨮᩥᨠᩮᩣ ᩋᨠᩣᩃᩥᨠᩮᩣ ᩑᩉᩥᨸᩔᩥᨠᩮᩣ ᩒᨸᨶᩮᨿ᩠ᨿᩥᨠᩮᩣ [ᩒᨸᨶᨿᩥᨠᩮᩣ (ᩈ᩠ᨿᩣ. ᨠᩴ.)] ᨸᨧ᩠ᨧᨲ᩠ᨲᩴ ᩅᩮᨴᩥᨲᨻ᩠ᨻᩮᩣ ᩅᩥᨬ᩠ᨬᩪᩉᩦ’ᨲᩥ. ᩈᨦ᩠ᨥᩮ ᩋᩅᩮᨧ᩠ᨧᨸ᩠ᨸᩈᩣᨴᩮᨶ ᩈᨾᨶ᩠ᨶᩣᨣᨲᩮᩣ ᩉᩮᩣᨲᩥ – ‘ᩈᩩᨸ᩠ᨸᨭᩥᨸᨶ᩠ᨶᩮᩣ ᨽᨣᩅᨲᩮᩣ ᩈᩣᩅᨠᩈᨦ᩠ᨥᩮᩣ ᩏᨩᩩᨸ᩠ᨸᨭᩥᨸᨶ᩠ᨶᩮᩣ ᨽᨣᩅᨲᩮᩣ ᩈᩣᩅᨠᩈᨦ᩠ᨥᩮᩣ ᨬᩣᨿᨸ᩠ᨸᨭᩥᨸᨶ᩠ᨶᩮᩣ ᨽᨣᩅᨲᩮᩣ ᩈᩣᩅᨠᩈᨦ᩠ᨥᩮᩣ ᩈᩣᨾᩦᨧᩥᨸ᩠ᨸᨭᩥᨸᨶ᩠ᨶᩮᩣ ᨽᨣᩅᨲᩮᩣ ᩈᩣᩅᨠᩈᨦ᩠ᨥᩮᩣ ᨿᨴᩥᨴᩴ ᨧᨲ᩠ᨲᩣᩁᩥ ᨸᩩᩁᩥᩈᨿᩩᨣᩣᨶᩥ ᩋᨭ᩠ᨮ ᨸᩩᩁᩥᩈᨸᩩᨣ᩠ᨣᩃᩣ, ᩑᩈ ᨽᨣᩅᨲᩮᩣ ᩈᩣᩅᨠᩈᨦ᩠ᨥᩮᩣ ᩌᩉᩩᨶᩮᨿ᩠ᨿᩮᩣ ᨸᩣᩉᩩᨶᩮᨿ᩠ᨿᩮᩣ ᨴᨠ᩠ᨡᩥᨱᩮᨿ᩠ᨿᩮᩣ ᩋᨬ᩠ᨩᩃᩥᨠᩁᨱᩦᨿᩮᩣ ᩋᨶᩩᨲ᩠ᨲᩁᩴ ᨸᩩᨬ᩠ᨬᨠ᩠ᨡᩮᨲ᩠ᨲᩴ ᩃᩮᩣᨠᩔᩣ’ᨲᩥ. ᩋᩁᩥᨿᨠᨶ᩠ᨲᩮᩉᩥ ᩈᩦᩃᩮᩉᩥ ᩈᨾᨶ᩠ᨶᩣᨣᨲᩮᩣ ᩉᩮᩣᨲᩥ ᩋᨡᨱ᩠ᨯᩮᩉᩥ ᩋᨧ᩠ᨨᩥᨴ᩠ᨴᩮᩉᩥ ᩋᩈᨻᩃᩮᩉᩥ ᩋᨠᨾ᩠ᨾᩣᩈᩮᩉᩥ ᨽᩩᨩᩥᩔᩮᩉᩥ ᩅᩥᨬ᩠ᨬᩩᨸ᩠ᨸᩈᨲ᩠ᨳᩮᩉᩥ ᩋᨸᩁᩣᨾᨭ᩠ᨮᩮᩉᩥ ᩈᨾᩣᨵᩥᩈᩴᩅᨲ᩠ᨲᨶᩥᨠᩮᩉᩥ.

‘‘ᨧᨲ᩠ᨲᩣᩁᩥ ᩈᩣᨾᨬ᩠ᨬᨹᩃᩣᨶᩥ – ᩈᩮᩣᨲᩣᨸᨲ᩠ᨲᩥᨹᩃᩴ, ᩈᨠᨴᩣᨣᩣᨾᩥᨹᩃᩴ, ᩋᨶᩣᨣᩣᨾᩥᨹᩃᩴ, ᩋᩁᩉᨲ᩠ᨲᨹᩃᩴ.

‘‘ᨧᨲᩔᩮᩣ ᨵᩣᨲᩩᨿᩮᩣ – ᨸᨳᩅᩦᨵᩣᨲᩩ, ᩌᨸᩮᩣᨵᩣᨲᩩ, ᨲᩮᨩᩮᩣᨵᩣᨲᩩ, ᩅᩣᨿᩮᩣᨵᩣᨲᩩ.

‘‘ᨧᨲ᩠ᨲᩣᩁᩮᩣ ᩌᩉᩣᩁᩣ – ᨠᨻᩊᩦᨠᩣᩁᩮᩣ ᩌᩉᩣᩁᩮᩣ ᩒᩊᩣᩁᩥᨠᩮᩣ ᩅᩣ ᩈᩩᨡᩩᨾᩮᩣ ᩅᩣ, ᨹᩔᩮᩣ ᨴᩩᨲᩥᨿᩮᩣ, ᨾᨶᩮᩣᩈᨬ᩠ᨧᩮᨲᨶᩣ ᨲᨲᩥᨿᩣ, ᩅᩥᨬ᩠ᨬᩣᨱᩴ ᨧᨲᩩᨲ᩠ᨳᩴ.

‘‘ᨧᨲᩔᩮᩣ ᩅᩥᨬ᩠ᨬᩣᨱᨭ᩠ᨮᩥᨲᩥᨿᩮᩣ. ᩁᩪᨸᩪᨸᩣᨿᩴ ᩅᩣ, ᩌᩅᩩᩈᩮᩣ, ᩅᩥᨬ᩠ᨬᩣᨱᩴ ᨲᩥᨭ᩠ᨮᨾᩣᨶᩴ ᨲᩥᨭ᩠ᨮᨲᩥ ᩁᩪᨸᩣᩁᨾ᩠ᨾᨱᩴ [ᩁᩪᨸᩣᩁᨾᨱᩴ (?)] ᩁᩪᨸᨸ᩠ᨸᨲᩥᨭ᩠ᨮᩴ ᨶᨶ᩠ᨴᩪᨸᩈᩮᨧᨶᩴ ᩅᩩᨴ᩠ᨵᩥᩴ ᩅᩥᩁᩪᩊ᩠ᩉᩥᩴ ᩅᩮᨸᩩᩃ᩠ᩃᩴ ᩌᨸᨩ᩠ᨩᨲᩥ; ᩅᩮᨴᨶᩪᨸᩣᨿᩴ ᩅᩣ ᩌᩅᩩᩈᩮᩣ…ᨸᩮ… ᩈᨬ᩠ᨬᩪᨸᩣᨿᩴ ᩅᩣ, ᩌᩅᩩᩈᩮᩣ…ᨸᩮ… ᩈᨦ᩠ᨡᩣᩁᩪᨸᩣᨿᩴ ᩅᩣ, ᩌᩅᩩᩈᩮᩣ, ᩅᩥᨬ᩠ᨬᩣᨱᩴ ᨲᩥᨭ᩠ᨮᨾᩣᨶᩴ ᨲᩥᨭ᩠ᨮᨲᩥ ᩈᨦ᩠ᨡᩣᩁᩣᩁᨾ᩠ᨾᨱᩴ ᩈᨦ᩠ᨡᩣᩁᨸ᩠ᨸᨲᩥᨭ᩠ᨮᩴ ᨶᨶ᩠ᨴᩪᨸᩈᩮᨧᨶᩴ ᩅᩩᨴ᩠ᨵᩥᩴ ᩅᩥᩁᩪᩊ᩠ᩉᩥᩴ ᩅᩮᨸᩩᩃ᩠ᩃᩴ ᩌᨸᨩ᩠ᨩᨲᩥ.

‘‘ᨧᨲ᩠ᨲᩣᩁᩥ ᩋᨣᨲᩥᨣᨾᨶᩣᨶᩥ – ᨨᨶ᩠ᨴᩣᨣᨲᩥᩴ ᨣᨧ᩠ᨨᨲᩥ, ᨴᩮᩣᩈᩣᨣᨲᩥ ᨣᨧ᩠ᨨᨲᩥ, ᨾᩮᩣᩉᩣᨣᨲᩥᩴ ᨣᨧ᩠ᨨᨲᩥ, ᨽᨿᩣᨣᨲᩥᩴ ᨣᨧ᩠ᨨᨲᩥ.

‘‘ᨧᨲ᩠ᨲᩣᩁᩮᩣ ᨲᨱ᩠ᩉᩩᨸ᩠ᨸᩣᨴᩣ – ᨧᩦᩅᩁᩉᩮᨲᩩ ᩅᩣ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨲᨱ᩠ᩉᩣ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ; ᨸᩥᨱ᩠ᨯᨸᩣᨲᩉᩮᨲᩩ ᩅᩣ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨲᨱ᩠ᩉᩣ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ; ᩈᩮᨶᩣᩈᨶᩉᩮᨲᩩ ᩅᩣ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨲᨱ᩠ᩉᩣ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ; ᩍᨲᩥᨽᩅᩣᨽᩅᩉᩮᨲᩩ ᩅᩣ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨲᨱ᩠ᩉᩣ ᩏᨸ᩠ᨸᨩ᩠ᨩᨾᩣᨶᩣ ᩏᨸ᩠ᨸᨩ᩠ᨩᨲᩥ.

‘‘ᨧᨲᩔᩮᩣ ᨸᨭᩥᨸᨴᩣ – ᨴᩩᨠ᩠ᨡᩣ ᨸᨭᩥᨸᨴᩣ ᨴᨶ᩠ᨵᩣᨽᩥᨬ᩠ᨬᩣ, ᨴᩩᨠ᩠ᨡᩣ ᨸᨭᩥᨸᨴᩣ ᨡᩥᨸ᩠ᨸᩣᨽᩥᨬ᩠ᨬᩣ, ᩈᩩᨡᩣ ᨸᨭᩥᨸᨴᩣ ᨴᨶ᩠ᨵᩣᨽᩥᨬ᩠ᨬᩣ, ᩈᩩᨡᩣ ᨸᨭᩥᨸᨴᩣ ᨡᩥᨸ᩠ᨸᩣᨽᩥᨬ᩠ᨬᩣ.

‘‘ᩋᨸᩁᩣᨸᩥ ᨧᨲᩔᩮᩣ ᨸᨭᩥᨸᨴᩣ – ᩋᨠ᩠ᨡᨾᩣ ᨸᨭᩥᨸᨴᩣ, ᨡᨾᩣ ᨸᨭᩥᨸᨴᩣ, ᨴᨾᩣ ᨸᨭᩥᨸᨴᩣ, ᩈᨾᩣ ᨸᨭᩥᨸᨴᩣ.

‘‘ᨧᨲ᩠ᨲᩣᩁᩥ ᨵᨾ᩠ᨾᨸᨴᩣᨶᩥ – ᩋᨶᨽᩥᨩ᩠ᨫᩣ ᨵᨾ᩠ᨾᨸᨴᩴ, ᩋᨻ᩠ᨿᩣᨸᩣᨴᩮᩣ ᨵᨾ᩠ᨾᨸᨴᩴ, ᩈᨾ᩠ᨾᩣᩈᨲᩥ ᨵᨾ᩠ᨾᨸᨴᩴ, ᩈᨾ᩠ᨾᩣᩈᨾᩣᨵᩥ ᨵᨾ᩠ᨾᨸᨴᩴ.

‘‘ᨧᨲ᩠ᨲᩣᩁᩥ ᨵᨾ᩠ᨾᩈᨾᩣᨴᩣᨶᩣᨶᩥ – ᩋᨲ᩠ᨳᩣᩅᩩᩈᩮᩣ, ᨵᨾ᩠ᨾᩈᨾᩣᨴᩣᨶᩴ ᨸᨧ᩠ᨧᩩᨸ᩠ᨸᨶ᩠ᨶᨴᩩᨠ᩠ᨡᨬ᩠ᨧᩮᩅ ᩌᨿᨲᩥᨬ᩠ᨧ ᨴᩩᨠ᩠ᨡᩅᩥᨸᩣᨠᩴ. ᩋᨲ᩠ᨳᩣᩅᩩᩈᩮᩣ, ᨵᨾ᩠ᨾᩈᨾᩣᨴᩣᨶᩴ ᨸᨧ᩠ᨧᩩᨸ᩠ᨸᨶ᩠ᨶᨴᩩᨠ᩠ᨡᩴ ᩌᨿᨲᩥᩴ ᩈᩩᨡᩅᩥᨸᩣᨠᩴ. ᩋᨲ᩠ᨳᩣᩅᩩᩈᩮᩣ, ᨵᨾ᩠ᨾᩈᨾᩣᨴᩣᨶᩴ ᨸᨧ᩠ᨧᩩᨸ᩠ᨸᨶ᩠ᨶᩈᩩᨡᩴ ᩌᨿᨲᩥᩴ ᨴᩩᨠ᩠ᨡᩅᩥᨸᩣᨠᩴ. ᩋᨲ᩠ᨳᩣᩅᩩᩈᩮᩣ, ᨵᨾ᩠ᨾᩈᨾᩣᨴᩣᨶᩴ ᨸᨧ᩠ᨧᩩᨸ᩠ᨸᨶ᩠ᨶᩈᩩᨡᨬ᩠ᨧᩮᩅ ᩌᨿᨲᩥᨬ᩠ᨧ ᩈᩩᨡᩅᩥᨸᩣᨠᩴ.

‘‘ᨧᨲ᩠ᨲᩣᩁᩮᩣ ᨵᨾ᩠ᨾᨠ᩠ᨡᨶ᩠ᨵᩣ – ᩈᩦᩃᨠ᩠ᨡᨶ᩠ᨵᩮᩣ, ᩈᨾᩣᨵᩥᨠ᩠ᨡᨶ᩠ᨵᩮᩣ, ᨸᨬ᩠ᨬᩣᨠ᩠ᨡᨶ᩠ᨵᩮᩣ, ᩅᩥᨾᩩᨲ᩠ᨲᩥᨠ᩠ᨡᨶ᩠ᨵᩮᩣ.

‘‘ᨧᨲ᩠ᨲᩣᩁᩥ ᨻᩃᩣᨶᩥ – ᩅᩦᩁᩥᨿᨻᩃᩴ, ᩈᨲᩥᨻᩃᩴ, ᩈᨾᩣᨵᩥᨻᩃᩴ, ᨸᨬ᩠ᨬᩣᨻᩃᩴ.

‘‘ᨧᨲ᩠ᨲᩣᩁᩥ ᩋᨵᩥᨭ᩠ᨮᩣᨶᩣᨶᩥ – ᨸᨬ᩠ᨬᩣᨵᩥᨭ᩠ᨮᩣᨶᩴ, ᩈᨧ᩠ᨧᩣᨵᩥᨭ᩠ᨮᩣᨶᩴ, ᨧᩣᨣᩣᨵᩥᨭ᩠ᨮᩣᨶᩴ, ᩏᨸᩈᨾᩣᨵᩥᨭ᩠ᨮᩣᨶᩴ.

᪓᪑᪒. ‘‘ᨧᨲ᩠ᨲᩣᩁᩥ ᨸᨬ᩠ᩉᨻ᩠ᨿᩣᨠᩁᨱᩣᨶᩥ – [ᨧᨲ᩠ᨲᩣᩁᩮᩣ ᨸᨬ᩠ᩉᩣᨻ᩠ᨿᩣᨠᩁᨱᩣ (ᩈᩦ. ᩈ᩠ᨿᩣ. ᨠᩴ. ᨸᩦ.)] ᩑᨠᩴᩈᨻ᩠ᨿᩣᨠᩁᨱᩦᨿᩮᩣ ᨸᨬ᩠ᩉᩮᩣ, ᨸᨭᩥᨸᩩᨧ᩠ᨨᩣᨻ᩠ᨿᩣᨠᩁᨱᩦᨿᩮᩣ ᨸᨬ᩠ᩉᩮᩣ, ᩅᩥᨽᨩ᩠ᨩᨻ᩠ᨿᩣᨠᩁᨱᩦᨿᩮᩣ ᨸᨬ᩠ᩉᩮᩣ, ᨮᨸᨶᩦᨿᩮᩣ ᨸᨬ᩠ᩉᩮᩣ.

‘‘ᨧᨲ᩠ᨲᩣᩁᩥ ᨠᨾ᩠ᨾᩣᨶᩥ – ᩋᨲ᩠ᨳᩣᩅᩩᩈᩮᩣ, ᨠᨾ᩠ᨾᩴ ᨠᨱ᩠ᩉᩴ ᨠᨱ᩠ᩉᩅᩥᨸᩣᨠᩴ; ᩋᨲ᩠ᨳᩣᩅᩩᩈᩮᩣ, ᨠᨾ᩠ᨾᩴ ᩈᩩᨠ᩠ᨠᩴ ᩈᩩᨠ᩠ᨠᩅᩥᨸᩣᨠᩴ; ᩋᨲ᩠ᨳᩣᩅᩩᩈᩮᩣ, ᨠᨾ᩠ᨾᩴ ᨠᨱ᩠ᩉᩈᩩᨠ᩠ᨠᩴ ᨠᨱ᩠ᩉᩈᩩᨠ᩠ᨠᩅᩥᨸᩣᨠᩴ; ᩋᨲ᩠ᨳᩣᩅᩩᩈᩮᩣ, ᨠᨾ᩠ᨾᩴ ᩋᨠᨱ᩠ᩉᩋᩈᩩᨠ᩠ᨠᩴ ᩋᨠᨱ᩠ᩉᩋᩈᩩᨠ᩠ᨠᩅᩥᨸᩣᨠᩴ ᨠᨾ᩠ᨾᨠ᩠ᨡᨿᩣᨿ ᩈᩴᩅᨲ᩠ᨲᨲᩥ.

‘‘ᨧᨲ᩠ᨲᩣᩁᩮᩣ ᩈᨧ᩠ᨨᩥᨠᩁᨱᩦᨿᩣ ᨵᨾ᩠ᨾᩣ – ᨸᩩᨻ᩠ᨻᩮᨶᩥᩅᩣᩈᩮᩣ ᩈᨲᩥᨿᩣ ᩈᨧ᩠ᨨᩥᨠᩁᨱᩦᨿᩮᩣ; ᩈᨲ᩠ᨲᩣᨶᩴ ᨧᩩᨲᩪᨸᨸᩣᨲᩮᩣ ᨧᨠ᩠ᨡᩩᨶᩣ ᩈᨧ᩠ᨨᩥᨠᩁᨱᩦᨿᩮᩣ; ᩋᨭ᩠ᨮ ᩅᩥᨾᩮᩣᨠ᩠ᨡᩣ ᨠᩣᨿᩮᨶ ᩈᨧ᩠ᨨᩥᨠᩁᨱᩦᨿᩣ; ᩌᩈᩅᩣᨶᩴ ᨡᨿᩮᩣ ᨸᨬ᩠ᨬᩣᨿ ᩈᨧ᩠ᨨᩥᨠᩁᨱᩦᨿᩮᩣ.

‘‘ᨧᨲ᩠ᨲᩣᩁᩮᩣ ᩒᨥᩣ – ᨠᩣᨾᩮᩣᨥᩮᩣ, ᨽᩅᩮᩣᨥᩮᩣ, ᨴᩥᨭ᩠ᨮᩮᩣᨥᩮᩣ, ᩋᩅᩥᨩ᩠ᨩᩮᩣᨥᩮᩣ.

‘‘ᨧᨲ᩠ᨲᩣᩁᩮᩣ ᨿᩮᩣᨣᩣ – ᨠᩣᨾᨿᩮᩣᨣᩮᩣ, ᨽᩅᨿᩮᩣᨣᩮᩣ, ᨴᩥᨭ᩠ᨮᩥᨿᩮᩣᨣᩮᩣ, ᩋᩅᩥᨩ᩠ᨩᩣᨿᩮᩣᨣᩮᩣ.

‘‘ᨧᨲ᩠ᨲᩣᩁᩮᩣ ᩅᩥᩈᨬ᩠ᨬᩮᩣᨣᩣ – ᨠᩣᨾᨿᩮᩣᨣᩅᩥᩈᨬ᩠ᨬᩮᩣᨣᩮᩣ, ᨽᩅᨿᩮᩣᨣᩅᩥᩈᨬ᩠ᨬᩮᩣᨣᩮᩣ, ᨴᩥᨭ᩠ᨮᩥᨿᩮᩣᨣᩅᩥᩈᨬ᩠ᨬᩮᩣᨣᩮᩣ, ᩋᩅᩥᨩ᩠ᨩᩣᨿᩮᩣᨣᩅᩥᩈᨬ᩠ᨬᩮᩣᨣᩮᩣ.

‘‘ᨧᨲ᩠ᨲᩣᩁᩮᩣ ᨣᨶ᩠ᨳᩣ – ᩋᨽᩥᨩ᩠ᨫᩣ ᨠᩣᨿᨣᨶ᩠ᨳᩮᩣ, ᨻ᩠ᨿᩣᨸᩣᨴᩮᩣ ᨠᩣᨿᨣᨶ᩠ᨳᩮᩣ, ᩈᩦᩃᨻ᩠ᨻᨲᨸᩁᩣᨾᩣᩈᩮᩣ ᨠᩣᨿᨣᨶ᩠ᨳᩮᩣ, ᩍᨴᩴᩈᨧ᩠ᨧᩣᨽᩥᨶᩥᩅᩮᩈᩮᩣ ᨠᩣᨿᨣᨶ᩠ᨳᩮᩣ.

‘‘ᨧᨲ᩠ᨲᩣᩁᩥ ᩏᨸᩣᨴᩣᨶᩣᨶᩥ – ᨠᩣᨾᩩᨸᩣᨴᩣᨶᩴ [ᨠᩣᨾᩪᨸᩣᨴᩣᨶᩴ (ᩈᩦ. ᨸᩦ.) ᩑᩅᨾᩥᨲᩁᩮᩈᩩᨸᩥ], ᨴᩥᨭ᩠ᨮᩩᨸᩣᨴᩣᨶᩴ, ᩈᩦᩃᨻ᩠ᨻᨲᩩᨸᩣᨴᩣᨶᩴ, ᩋᨲ᩠ᨲᩅᩣᨴᩩᨸᩣᨴᩣᨶᩴ.

‘‘ᨧᨲᩔᩮᩣ ᨿᩮᩣᨶᩥᨿᩮᩣ – ᩋᨱ᩠ᨯᨩᨿᩮᩣᨶᩥ, ᨩᩃᩣᨻᩩᨩᨿᩮᩣᨶᩥ, ᩈᩴᩈᩮᨴᨩᨿᩮᩣᨶᩥ, ᩒᨸᨸᩣᨲᩥᨠᨿᩮᩣᨶᩥ.

‘‘ᨧᨲᩔᩮᩣ ᨣᨻ᩠ᨽᩣᩅᨠ᩠ᨠᨶ᩠ᨲᩥᨿᩮᩣ. ᩍᨵᩣᩅᩩᩈᩮᩣ, ᩑᨠᨧ᩠ᨧᩮᩣ ᩋᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨾᨲᩥ, ᩋᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩈ᩠ᨾᩥᩴ ᨮᩣᨲᩥ, ᩋᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᨾ᩠ᩉᩣ ᨶᩥᨠ᩠ᨡᨾᨲᩥ, ᩋᨿᩴ ᨸᨮᨾᩣ ᨣᨻ᩠ᨽᩣᩅᨠ᩠ᨠᨶ᩠ᨲᩥ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᩍᨵᩮᨠᨧ᩠ᨧᩮᩣ ᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨾᨲᩥ, ᩋᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩈ᩠ᨾᩥᩴ ᨮᩣᨲᩥ, ᩋᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᨾ᩠ᩉᩣ ᨶᩥᨠ᩠ᨡᨾᨲᩥ, ᩋᨿᩴ ᨴᩩᨲᩥᨿᩣ ᨣᨻ᩠ᨽᩣᩅᨠ᩠ᨠᨶ᩠ᨲᩥ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᩍᨵᩮᨠᨧ᩠ᨧᩮᩣ ᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨾᨲᩥ, ᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩈ᩠ᨾᩥᩴ ᨮᩣᨲᩥ, ᩋᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᨾ᩠ᩉᩣ ᨶᩥᨠ᩠ᨡᨾᨲᩥ, ᩋᨿᩴ ᨲᨲᩥᨿᩣ ᨣᨻ᩠ᨽᩣᩅᨠ᩠ᨠᨶ᩠ᨲᩥ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᩍᨵᩮᨠᨧ᩠ᨧᩮᩣ ᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩴ ᩒᨠ᩠ᨠᨾᨲᩥ, ᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᩈ᩠ᨾᩥᩴ ᨮᩣᨲᩥ, ᩈᨾ᩠ᨸᨩᩣᨶᩮᩣ ᨾᩣᨲᩩᨠᩩᨧ᩠ᨨᩥᨾ᩠ᩉᩣ ᨶᩥᨠ᩠ᨡᨾᨲᩥ, ᩋᨿᩴ ᨧᨲᩩᨲ᩠ᨳᩣ ᨣᨻ᩠ᨽᩣᩅᨠ᩠ᨠᨶ᩠ᨲᩥ.

‘‘ᨧᨲ᩠ᨲᩣᩁᩮᩣ ᩋᨲ᩠ᨲᨽᩣᩅᨸᨭᩥᩃᩣᨽᩣ. ᩋᨲ᩠ᨳᩣᩅᩩᩈᩮᩣ, ᩋᨲ᩠ᨲᨽᩣᩅᨸᨭᩥᩃᩣᨽᩮᩣ, ᨿᩈ᩠ᨾᩥᩴ ᩋᨲ᩠ᨲᨽᩣᩅᨸᨭᩥᩃᩣᨽᩮ ᩋᨲ᩠ᨲᩈᨬ᩠ᨧᩮᨲᨶᩣᨿᩮᩅ ᨠᨾᨲᩥ, ᨶᩮᩣ ᨸᩁᩈᨬ᩠ᨧᩮᨲᨶᩣ. ᩋᨲ᩠ᨳᩣᩅᩩᩈᩮᩣ, ᩋᨲ᩠ᨲᨽᩣᩅᨸᨭᩥᩃᩣᨽᩮᩣ, ᨿᩈ᩠ᨾᩥᩴ ᩋᨲ᩠ᨲᨽᩣᩅᨸᨭᩥᩃᩣᨽᩮ ᨸᩁᩈᨬ᩠ᨧᩮᨲᨶᩣᨿᩮᩅ ᨠᨾᨲᩥ, ᨶᩮᩣ ᩋᨲ᩠ᨲᩈᨬ᩠ᨧᩮᨲᨶᩣ. ᩋᨲ᩠ᨳᩣᩅᩩᩈᩮᩣ, ᩋᨲ᩠ᨲᨽᩣᩅᨸᨭᩥᩃᩣᨽᩮᩣ, ᨿᩈ᩠ᨾᩥᩴ ᩋᨲ᩠ᨲᨽᩣᩅᨸᨭᩥᩃᩣᨽᩮ ᩋᨲ᩠ᨲᩈᨬ᩠ᨧᩮᨲᨶᩣ ᨧᩮᩅ ᨠᨾᨲᩥ ᨸᩁᩈᨬ᩠ᨧᩮᨲᨶᩣ ᨧ. ᩋᨲ᩠ᨳᩣᩅᩩᩈᩮᩣ, ᩋᨲ᩠ᨲᨽᩣᩅᨸᨭᩥᩃᩣᨽᩮᩣ, ᨿᩈ᩠ᨾᩥᩴ ᩋᨲ᩠ᨲᨽᩣᩅᨸᨭᩥᩃᩣᨽᩮ ᨶᩮᩅ ᩋᨲ᩠ᨲᩈᨬ᩠ᨧᩮᨲᨶᩣ ᨠᨾᨲᩥ, ᨶᩮᩣ ᨸᩁᩈᨬ᩠ᨧᩮᨲᨶᩣ.

᪓᪑᪓. ‘‘ᨧᨲᩔᩮᩣ ᨴᨠ᩠ᨡᩥᨱᩣᩅᩥᩈᩩᨴ᩠ᨵᩥᨿᩮᩣ. ᩋᨲ᩠ᨳᩣᩅᩩᩈᩮᩣ, ᨴᨠ᩠ᨡᩥᨱᩣ ᨴᩣᨿᨠᨲᩮᩣ ᩅᩥᩈᩩᨩ᩠ᨫᨲᩥ ᨶᩮᩣ ᨸᨭᩥᨣ᩠ᨣᩣᩉᨠᨲᩮᩣ. ᩋᨲ᩠ᨳᩣᩅᩩᩈᩮᩣ, ᨴᨠ᩠ᨡᩥᨱᩣ ᨸᨭᩥᨣ᩠ᨣᩣᩉᨠᨲᩮᩣ ᩅᩥᩈᩩᨩ᩠ᨫᨲᩥ ᨶᩮᩣ ᨴᩣᨿᨠᨲᩮᩣ. ᩋᨲ᩠ᨳᩣᩅᩩᩈᩮᩣ, ᨴᨠ᩠ᨡᩥᨱᩣ ᨶᩮᩅ ᨴᩣᨿᨠᨲᩮᩣ ᩅᩥᩈᩩᨩ᩠ᨫᨲᩥ ᨶᩮᩣ ᨸᨭᩥᨣ᩠ᨣᩣᩉᨠᨲᩮᩣ. ᩋᨲ᩠ᨳᩣᩅᩩᩈᩮᩣ, ᨴᨠ᩠ᨡᩥᨱᩣ ᨴᩣᨿᨠᨲᩮᩣ ᨧᩮᩅ ᩅᩥᩈᩩᨩ᩠ᨫᨲᩥ ᨸᨭᩥᨣ᩠ᨣᩣᩉᨠᨲᩮᩣ ᨧ.

‘‘ᨧᨲ᩠ᨲᩣᩁᩥ ᩈᨦ᩠ᨣᩉᩅᨲ᩠ᨳᩪᨶᩥ – ᨴᩣᨶᩴ, ᨸᩮᨿ᩠ᨿᩅᨩ᩠ᨩᩴ [ᨸᩥᨿᩅᨩ᩠ᨩᩴ (ᩈ᩠ᨿᩣ. ᨠᩴ. ᨠ.)], ᩋᨲ᩠ᨳᨧᩁᩥᨿᩣ, ᩈᨾᩣᨶᨲ᩠ᨲᨲᩣ.

‘‘ᨧᨲ᩠ᨲᩣᩁᩮᩣ ᩋᨶᩁᩥᨿᩅᩮᩣᩉᩣᩁᩣ – ᨾᩩᩈᩣᩅᩣᨴᩮᩣ, ᨸᩥᩈᩩᨱᩣᩅᩣᨧᩣ, ᨹᩁᩩᩈᩣᩅᩣᨧᩣ, ᩈᨾ᩠ᨹᨸ᩠ᨸᩃᩣᨸᩮᩣ.

‘‘ᨧᨲ᩠ᨲᩣᩁᩮᩣ ᩋᩁᩥᨿᩅᩮᩣᩉᩣᩁᩣ – ᨾᩩᩈᩣᩅᩣᨴᩣ ᩅᩮᩁᨾᨱᩦ [ᩅᩮᩁᨾᨱᩥ (ᨠ.)], ᨸᩥᩈᩩᨱᩣᨿ ᩅᩣᨧᩣᨿ ᩅᩮᩁᨾᨱᩦ, ᨹᩁᩩᩈᩣᨿ ᩅᩣᨧᩣᨿ ᩅᩮᩁᨾᨱᩦ, ᩈᨾ᩠ᨹᨸ᩠ᨸᩃᩣᨸᩣ ᩅᩮᩁᨾᨱᩦ.

‘‘ᩋᨸᩁᩮᨸᩥ ᨧᨲ᩠ᨲᩣᩁᩮᩣ ᩋᨶᩁᩥᨿᩅᩮᩣᩉᩣᩁᩣ – ᩋᨴᩥᨭ᩠ᨮᩮ ᨴᩥᨭ᩠ᨮᩅᩣᨴᩥᨲᩣ, ᩋᩔᩩᨲᩮ ᩈᩩᨲᩅᩣᨴᩥᨲᩣ, ᩋᨾᩩᨲᩮ ᨾᩩᨲᩅᩣᨴᩥᨲᩣ, ᩋᩅᩥᨬ᩠ᨬᩣᨲᩮ ᩅᩥᨬ᩠ᨬᩣᨲᩅᩣᨴᩥᨲᩣ.

‘‘ᩋᨸᩁᩮᨸᩥ ᨧᨲ᩠ᨲᩣᩁᩮᩣ ᩋᩁᩥᨿᩅᩮᩣᩉᩣᩁᩣ – ᩋᨴᩥᨭ᩠ᨮᩮ ᩋᨴᩥᨭ᩠ᨮᩅᩣᨴᩥᨲᩣ, ᩋᩔᩩᨲᩮ ᩋᩔᩩᨲᩅᩣᨴᩥᨲᩣ, ᩋᨾᩩᨲᩮ ᩋᨾᩩᨲᩅᩣᨴᩥᨲᩣ, ᩋᩅᩥᨬ᩠ᨬᩣᨲᩮ ᩋᩅᩥᨬ᩠ᨬᩣᨲᩅᩣᨴᩥᨲᩣ.

‘‘ᩋᨸᩁᩮᨸᩥ ᨧᨲ᩠ᨲᩣᩁᩮᩣ ᩋᨶᩁᩥᨿᩅᩮᩣᩉᩣᩁᩣ – ᨴᩥᨭ᩠ᨮᩮ ᩋᨴᩥᨭ᩠ᨮᩅᩣᨴᩥᨲᩣ, ᩈᩩᨲᩮ ᩋᩔᩩᨲᩅᩣᨴᩥᨲᩣ, ᨾᩩᨲᩮ ᩋᨾᩩᨲᩅᩣᨴᩥᨲᩣ, ᩅᩥᨬ᩠ᨬᩣᨲᩮ ᩋᩅᩥᨬ᩠ᨬᩣᨲᩅᩣᨴᩥᨲᩣ.

‘‘ᩋᨸᩁᩮᨸᩥ ᨧᨲ᩠ᨲᩣᩁᩮᩣ ᩋᩁᩥᨿᩅᩮᩣᩉᩣᩁᩣ – ᨴᩥᨭ᩠ᨮᩮ ᨴᩥᨭ᩠ᨮᩅᩣᨴᩥᨲᩣ, ᩈᩩᨲᩮ ᩈᩩᨲᩅᩣᨴᩥᨲᩣ, ᨾᩩᨲᩮ ᨾᩩᨲᩅᩣᨴᩥᨲᩣ, ᩅᩥᨬ᩠ᨬᩣᨲᩮ ᩅᩥᨬ᩠ᨬᩣᨲᩅᩣᨴᩥᨲᩣ.

᪓᪑᪔. ‘‘ᨧᨲ᩠ᨲᩣᩁᩮᩣ ᨸᩩᨣ᩠ᨣᩃᩣ. ᩍᨵᩣᩅᩩᩈᩮᩣ, ᩑᨠᨧ᩠ᨧᩮᩣ ᨸᩩᨣ᩠ᨣᩃᩮᩣ ᩋᨲ᩠ᨲᨶ᩠ᨲᨸᩮᩣ ᩉᩮᩣᨲᩥ ᩋᨲ᩠ᨲᨸᩁᩥᨲᩣᨸᨶᩣᨶᩩᨿᩮᩣᨣᨾᨶᩩᨿᩩᨲ᩠ᨲᩮᩣ. ᩍᨵᩣᩅᩩᩈᩮᩣ, ᩑᨠᨧ᩠ᨧᩮᩣ ᨸᩩᨣ᩠ᨣᩃᩮᩣ ᨸᩁᨶ᩠ᨲᨸᩮᩣ ᩉᩮᩣᨲᩥ ᨸᩁᨸᩁᩥᨲᩣᨸᨶᩣᨶᩩᨿᩮᩣᨣᨾᨶᩩᨿᩩᨲ᩠ᨲᩮᩣ. ᩍᨵᩣᩅᩩᩈᩮᩣ, ᩑᨠᨧ᩠ᨧᩮᩣ ᨸᩩᨣ᩠ᨣᩃᩮᩣ ᩋᨲ᩠ᨲᨶ᩠ᨲᨸᩮᩣ ᨧ ᩉᩮᩣᨲᩥ ᩋᨲ᩠ᨲᨸᩁᩥᨲᩣᨸᨶᩣᨶᩩᨿᩮᩣᨣᨾᨶᩩᨿᩩᨲ᩠ᨲᩮᩣ, ᨸᩁᨶ᩠ᨲᨸᩮᩣ ᨧ ᨸᩁᨸᩁᩥᨲᩣᨸᨶᩣᨶᩩᨿᩮᩣᨣᨾᨶᩩᨿᩩᨲ᩠ᨲᩮᩣ. ᩍᨵᩣᩅᩩᩈᩮᩣ, ᩑᨠᨧ᩠ᨧᩮᩣ ᨸᩩᨣ᩠ᨣᩃᩮᩣ ᨶᩮᩅ ᩋᨲ᩠ᨲᨶ᩠ᨲᨸᩮᩣ ᩉᩮᩣᨲᩥ ᨶ ᩋᨲ᩠ᨲᨸᩁᩥᨲᩣᨸᨶᩣᨶᩩᨿᩮᩣᨣᨾᨶᩩᨿᩩᨲ᩠ᨲᩮᩣ ᨶ ᨸᩁᨶ᩠ᨲᨸᩮᩣ ᨶ ᨸᩁᨸᩁᩥᨲᩣᨸᨶᩣᨶᩩᨿᩮᩣᨣᨾᨶᩩᨿᩩᨲ᩠ᨲᩮᩣ. ᩈᩮᩣ ᩋᨶᨲ᩠ᨲᨶ᩠ᨲᨸᩮᩣ ᩋᨸᩁᨶ᩠ᨲᨸᩮᩣ ᨴᩥᨭ᩠ᨮᩮᩅ ᨵᨾ᩠ᨾᩮ ᨶᩥᨧ᩠ᨨᩣᨲᩮᩣ ᨶᩥᨻ᩠ᨻᩩᨲᩮᩣ ᩈᩦᨲᩦᨽᩪᨲᩮᩣ [ᩈᩦᨲᩥᨽᩪᨲᩮᩣ (ᨠ.)] ᩈᩩᨡᨸ᩠ᨸᨭᩥᩈᩴᩅᩮᨴᩦ ᨻᩕᩉ᩠ᨾᨽᩪᨲᩮᨶ ᩋᨲ᩠ᨲᨶᩣ ᩅᩥᩉᩁᨲᩥ.

‘‘ᩋᨸᩁᩮᨸᩥ ᨧᨲ᩠ᨲᩣᩁᩮᩣ ᨸᩩᨣ᩠ᨣᩃᩣ. ᩍᨵᩣᩅᩩᩈᩮᩣ, ᩑᨠᨧ᩠ᨧᩮᩣ ᨸᩩᨣ᩠ᨣᩃᩮᩣ ᩋᨲ᩠ᨲᩉᩥᨲᩣᨿ ᨸᨭᩥᨸᨶ᩠ᨶᩮᩣ ᩉᩮᩣᨲᩥ ᨶᩮᩣ ᨸᩁᩉᩥᨲᩣᨿ. ᩍᨵᩣᩅᩩᩈᩮᩣ, ᩑᨠᨧ᩠ᨧᩮᩣ ᨸᩩᨣ᩠ᨣᩃᩮᩣ ᨸᩁᩉᩥᨲᩣᨿ ᨸᨭᩥᨸᨶ᩠ᨶᩮᩣ ᩉᩮᩣᨲᩥ ᨶᩮᩣ ᩋᨲ᩠ᨲᩉᩥᨲᩣᨿ. ᩍᨵᩣᩅᩩᩈᩮᩣ, ᩑᨠᨧ᩠ᨧᩮᩣ ᨸᩩᨣ᩠ᨣᩃᩮᩣ ᨶᩮᩅ ᩋᨲ᩠ᨲᩉᩥᨲᩣᨿ ᨸᨭᩥᨸᨶ᩠ᨶᩮᩣ ᩉᩮᩣᨲᩥ ᨶᩮᩣ ᨸᩁᩉᩥᨲᩣᨿ. ᩍᨵᩣᩅᩩᩈᩮᩣ, ᩑᨠᨧ᩠ᨧᩮᩣ ᨸᩩᨣ᩠ᨣᩃᩮᩣ ᩋᨲ᩠ᨲᩉᩥᨲᩣᨿ ᨧᩮᩅ ᨸᨭᩥᨸᨶ᩠ᨶᩮᩣ ᩉᩮᩣᨲᩥ ᨸᩁᩉᩥᨲᩣᨿ ᨧ.

‘‘ᩋᨸᩁᩮᨸᩥ ᨧᨲ᩠ᨲᩣᩁᩮᩣ ᨸᩩᨣ᩠ᨣᩃᩣ – ᨲᨾᩮᩣ ᨲᨾᨸᩁᩣᨿᨶᩮᩣ, ᨲᨾᩮᩣ ᨩᩮᩣᨲᩥᨸᩁᩣᨿᨶᩮᩣ, ᨩᩮᩣᨲᩥ ᨲᨾᨸᩁᩣᨿᨶᩮᩣ, ᨩᩮᩣᨲᩥ ᨩᩮᩣᨲᩥᨸᩁᩣᨿᨶᩮᩣ.

‘‘ᩋᨸᩁᩮᨸᩥ ᨧᨲ᩠ᨲᩣᩁᩮᩣ ᨸᩩᨣ᩠ᨣᩃᩣ – ᩈᨾᨱᨾᨧᩃᩮᩣ, ᩈᨾᨱᨸᨴᩩᨾᩮᩣ, ᩈᨾᨱᨸᩩᨱ᩠ᨯᩁᩦᨠᩮᩣ, ᩈᨾᨱᩮᩈᩩ ᩈᨾᨱᩈᩩᨡᩩᨾᩣᩃᩮᩣ.

‘‘ᩍᨾᩮ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ; ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ…ᨸᩮ… ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ.

ᨸᨮᨾᨽᩣᨱᩅᩣᩁᩮᩣ ᨶᩥᨭ᩠ᨮᩥᨲᩮᩣ.

ᨸᨬ᩠ᨧᨠᩴ

᪓᪑᪕. ‘‘ᩋᨲ᩠ᨳᩥ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨸᨬ᩠ᨧ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ. ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ…ᨸᩮ… ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᨠᨲᨾᩮ ᨸᨬ᩠ᨧ?

‘‘ᨸᨬ᩠ᨧᨠ᩠ᨡᨶ᩠ᨵᩣ. ᩁᩪᨸᨠ᩠ᨡᨶ᩠ᨵᩮᩣ ᩅᩮᨴᨶᩣᨠ᩠ᨡᨶ᩠ᨵᩮᩣ ᩈᨬ᩠ᨬᩣᨠ᩠ᨡᨶ᩠ᨵᩮᩣ ᩈᨦ᩠ᨡᩣᩁᨠ᩠ᨡᨶ᩠ᨵᩮᩣ ᩅᩥᨬ᩠ᨬᩣᨱᨠ᩠ᨡᨶ᩠ᨵᩮᩣ.

‘‘ᨸᨬ᩠ᨧᩩᨸᩣᨴᩣᨶᨠ᩠ᨡᨶ᩠ᨵᩣ. ᩁᩪᨸᩩᨸᩣᨴᩣᨶᨠ᩠ᨡᨶ᩠ᨵᩮᩣ [ᩁᩪᨸᩪᨸᩣᨴᩣᨶᨠ᩠ᨡᨶ᩠ᨵᩮᩣ (ᩈᩦ. ᩈ᩠ᨿᩣ. ᨠᩴ. ᨸᩦ.) ᩑᩅᨾᩥᨲᩁᩮᩈᩩᨸᩥ] ᩅᩮᨴᨶᩩᨸᩣᨴᩣᨶᨠ᩠ᨡᨶ᩠ᨵᩮᩣ ᩈᨬ᩠ᨬᩩᨸᩣᨴᩣᨶᨠ᩠ᨡᨶ᩠ᨵᩮᩣ ᩈᨦ᩠ᨡᩣᩁᩩᨸᩣᨴᩣᨶᨠ᩠ᨡᨶ᩠ᨵᩮᩣ ᩅᩥᨬ᩠ᨬᩣᨱᩩᨸᩣᨴᩣᨶᨠ᩠ᨡᨶ᩠ᨵᩮᩣ.

‘‘ᨸᨬ᩠ᨧ ᨠᩣᨾᨣᩩᨱᩣ. ᨧᨠ᩠ᨡᩩᩅᩥᨬ᩠ᨬᩮᨿ᩠ᨿᩣ ᩁᩪᨸᩣ ᩍᨭ᩠ᨮᩣ ᨠᨶ᩠ᨲᩣ ᨾᨶᩣᨸᩣ ᨸᩥᨿᩁᩪᨸᩣ ᨠᩣᨾᩪᨸᩈᨬ᩠ᩉᩥᨲᩣ ᩁᨩᨶᩦᨿᩣ, ᩈᩮᩣᨲᩅᩥᨬ᩠ᨬᩮᨿ᩠ᨿᩣ ᩈᨴ᩠ᨴᩣ… ᨥᩣᨶᩅᩥᨬ᩠ᨬᩮᨿ᩠ᨿᩣ ᨣᨶ᩠ᨵᩣ… ᨩᩥᩅ᩠ᩉᩣᩅᩥᨬ᩠ᨬᩮᨿ᩠ᨿᩣ ᩁᩈᩣ… ᨠᩣᨿᩅᩥᨬ᩠ᨬᩮᨿ᩠ᨿᩣ ᨹᩮᩣᨭ᩠ᨮᨻ᩠ᨻᩣ ᩍᨭ᩠ᨮᩣ ᨠᨶ᩠ᨲᩣ ᨾᨶᩣᨸᩣ ᨸᩥᨿᩁᩪᨸᩣ ᨠᩣᨾᩪᨸᩈᨬ᩠ᩉᩥᨲᩣ ᩁᨩᨶᩦᨿᩣ.

‘‘ᨸᨬ᩠ᨧ ᨣᨲᩥᨿᩮᩣ – ᨶᩥᩁᨿᩮᩣ, ᨲᩥᩁᨧ᩠ᨨᩣᨶᨿᩮᩣᨶᩥ, ᨸᩮᨲ᩠ᨲᩥᩅᩥᩈᨿᩮᩣ, ᨾᨶᩩᩔᩣ, ᨴᩮᩅᩣ.

‘‘ᨸᨬ᩠ᨧ ᨾᨧ᩠ᨨᩁᩥᨿᩣᨶᩥ – ᩌᩅᩣᩈᨾᨧ᩠ᨨᩁᩥᨿᩴ, ᨠᩩᩃᨾᨧ᩠ᨨᩁᩥᨿᩴ, ᩃᩣᨽᨾᨧ᩠ᨨᩁᩥᨿᩴ, ᩅᨱ᩠ᨱᨾᨧ᩠ᨨᩁᩥᨿᩴ, ᨵᨾ᩠ᨾᨾᨧ᩠ᨨᩁᩥᨿᩴ.

‘‘ᨸᨬ᩠ᨧ ᨶᩦᩅᩁᨱᩣᨶᩥ – ᨠᩣᨾᨧ᩠ᨨᨶ᩠ᨴᨶᩦᩅᩁᨱᩴ, ᨻ᩠ᨿᩣᨸᩣᨴᨶᩦᩅᩁᨱᩴ, ᨳᩥᨶᨾᩥᨴ᩠ᨵᨶᩦᩅᩁᨱᩴ, ᩏᨴ᩠ᨵᨧ᩠ᨧᨠᩩᨠ᩠ᨠᩩᨧ᩠ᨧᨶᩦᩅᩁᨱᩴ, ᩅᩥᨧᩥᨠᩥᨧ᩠ᨨᩣᨶᩦᩅᩁᨱᩴ.

‘‘ᨸᨬ᩠ᨧ ᩒᩁᨾ᩠ᨽᩣᨣᩥᨿᩣᨶᩥ ᩈᨬ᩠ᨬᩮᩣᨩᨶᩣᨶᩥ – ᩈᨠ᩠ᨠᩣᨿᨴᩥᨭ᩠ᨮᩥ, ᩅᩥᨧᩥᨠᩥᨧ᩠ᨨᩣ, ᩈᩦᩃᨻ᩠ᨻᨲᨸᩁᩣᨾᩣᩈᩮᩣ, ᨠᩣᨾᨧ᩠ᨨᨶ᩠ᨴᩮᩣ, ᨻ᩠ᨿᩣᨸᩣᨴᩮᩣ.

‘‘ᨸᨬ᩠ᨧ ᩏᨴ᩠ᨵᨾ᩠ᨽᩣᨣᩥᨿᩣᨶᩥ ᩈᨬ᩠ᨬᩮᩣᨩᨶᩣᨶᩥ – ᩁᩪᨸᩁᩣᨣᩮᩣ, ᩋᩁᩪᨸᩁᩣᨣᩮᩣ, ᨾᩣᨶᩮᩣ, ᩏᨴ᩠ᨵᨧ᩠ᨧᩴ, ᩋᩅᩥᨩ᩠ᨩᩣ.

‘‘ᨸᨬ᩠ᨧ ᩈᩥᨠ᩠ᨡᩣᨸᨴᩣᨶᩥ – ᨸᩣᨱᩣᨲᩥᨸᩣᨲᩣ ᩅᩮᩁᨾᨱᩦ, ᩋᨴᩥᨶ᩠ᨶᩣᨴᩣᨶᩣ ᩅᩮᩁᨾᨱᩦ, ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ ᩅᩮᩁᨾᨱᩦ, ᨾᩩᩈᩣᩅᩣᨴᩣ ᩅᩮᩁᨾᨱᩦ, ᩈᩩᩁᩣᨾᩮᩁᨿᨾᨩ᩠ᨩᨸ᩠ᨸᨾᩣᨴᨭ᩠ᨮᩣᨶᩣ ᩅᩮᩁᨾᨱᩦ.

᪓᪑᪖. ‘‘ᨸᨬ᩠ᨧ ᩋᨽᨻ᩠ᨻᨭ᩠ᨮᩣᨶᩣᨶᩥ. ᩋᨽᨻ᩠ᨻᩮᩣ, ᩌᩅᩩᩈᩮᩣ, ᨡᩦᨱᩣᩈᩅᩮᩣ ᨽᩥᨠ᩠ᨡᩩ ᩈᨬ᩠ᨧᩥᨧ᩠ᨧ ᨸᩣᨱᩴ ᨩᩦᩅᩥᨲᩣ ᩅᩮᩣᩁᩮᩣᨸᩮᨲᩩᩴ. ᩋᨽᨻ᩠ᨻᩮᩣ ᨡᩦᨱᩣᩈᩅᩮᩣ ᨽᩥᨠ᩠ᨡᩩ ᩋᨴᩥᨶ᩠ᨶᩴ ᨳᩮᨿ᩠ᨿᩈᨦ᩠ᨡᩣᨲᩴ ᩌᨴᩥᨿᩥᨲᩩᩴ [ᩌᨴᩣᨲᩩᩴ (ᩈ᩠ᨿᩣ. ᨠᩴ. ᨸᩦ.)]. ᩋᨽᨻ᩠ᨻᩮᩣ ᨡᩦᨱᩣᩈᩅᩮᩣ ᨽᩥᨠ᩠ᨡᩩ ᨾᩮᨳᩩᨶᩴ ᨵᨾ᩠ᨾᩴ ᨸᨭᩥᩈᩮᩅᩥᨲᩩᩴ. ᩋᨽᨻ᩠ᨻᩮᩣ ᨡᩦᨱᩣᩈᩅᩮᩣ ᨽᩥᨠ᩠ᨡᩩ ᩈᨾ᩠ᨸᨩᩣᨶᨾᩩᩈᩣ ᨽᩣᩈᩥᨲᩩᩴ. ᩋᨽᨻ᩠ᨻᩮᩣ ᨡᩦᨱᩣᩈᩅᩮᩣ ᨽᩥᨠ᩠ᨡᩩ ᩈᨶ᩠ᨶᩥᨵᩥᨠᩣᩁᨠᩴ ᨠᩣᨾᩮ ᨸᩁᩥᨽᩩᨬ᩠ᨩᩥᨲᩩᩴ, ᩈᩮᨿ᩠ᨿᨳᩣᨸᩥ ᨸᩩᨻ᩠ᨻᩮ ᩌᨣᩣᩁᩥᨠᨽᩪᨲᩮᩣ.

‘‘ᨸᨬ᩠ᨧ ᨻ᩠ᨿᩈᨶᩣᨶᩥ – ᨬᩣᨲᩥᨻ᩠ᨿᩈᨶᩴ, ᨽᩮᩣᨣᨻ᩠ᨿᩈᨶᩴ, ᩁᩮᩣᨣᨻ᩠ᨿᩈᨶᩴ, ᩈᩦᩃᨻ᩠ᨿᩈᨶᩴ, ᨴᩥᨭ᩠ᨮᩥᨻ᩠ᨿᩈᨶᩴ. ᨶᩣᩅᩩᩈᩮᩣ, ᩈᨲ᩠ᨲᩣ ᨬᩣᨲᩥᨻ᩠ᨿᩈᨶᩉᩮᨲᩩ ᩅᩣ ᨽᩮᩣᨣᨻ᩠ᨿᩈᨶᩉᩮᨲᩩ ᩅᩣ ᩁᩮᩣᨣᨻ᩠ᨿᩈᨶᩉᩮᨲᩩ ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨩ᩠ᨩᨶ᩠ᨲᩥ. ᩈᩦᩃᨻ᩠ᨿᩈᨶᩉᩮᨲᩩ ᩅᩣ, ᩌᩅᩩᩈᩮᩣ, ᩈᨲ᩠ᨲᩣ ᨴᩥᨭ᩠ᨮᩥᨻ᩠ᨿᩈᨶᩉᩮᨲᩩ ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨩ᩠ᨩᨶ᩠ᨲᩥ.

‘‘ᨸᨬ᩠ᨧ ᩈᨾ᩠ᨸᨴᩣ – ᨬᩣᨲᩥᩈᨾ᩠ᨸᨴᩣ, ᨽᩮᩣᨣᩈᨾ᩠ᨸᨴᩣ, ᩌᩁᩮᩣᨣ᩠ᨿᩈᨾ᩠ᨸᨴᩣ, ᩈᩦᩃᩈᨾ᩠ᨸᨴᩣ, ᨴᩥᨭ᩠ᨮᩥᩈᨾ᩠ᨸᨴᩣ. ᨶᩣᩅᩩᩈᩮᩣ, ᩈᨲ᩠ᨲᩣ ᨬᩣᨲᩥᩈᨾ᩠ᨸᨴᩣᩉᩮᨲᩩ ᩅᩣ ᨽᩮᩣᨣᩈᨾ᩠ᨸᨴᩣᩉᩮᨲᩩ ᩅᩣ ᩌᩁᩮᩣᨣ᩠ᨿᩈᨾ᩠ᨸᨴᩣᩉᩮᨲᩩ ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨶ᩠ᨲᩥ. ᩈᩦᩃᩈᨾ᩠ᨸᨴᩣᩉᩮᨲᩩ ᩅᩣ, ᩌᩅᩩᩈᩮᩣ, ᩈᨲ᩠ᨲᩣ ᨴᩥᨭ᩠ᨮᩥᩈᨾ᩠ᨸᨴᩣᩉᩮᨲᩩ ᩅᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨶ᩠ᨲᩥ.

‘‘ᨸᨬ᩠ᨧ ᩌᨴᩦᨶᩅᩣ ᨴᩩᩔᩦᩃᩔ ᩈᩦᩃᩅᩥᨸᨲ᩠ᨲᩥᨿᩣ. ᩍᨵᩣᩅᩩᩈᩮᩣ, ᨴᩩᩔᩦᩃᩮᩣ ᩈᩦᩃᩅᩥᨸᨶ᩠ᨶᩮᩣ ᨸᨾᩣᨴᩣᨵᩥᨠᩁᨱᩴ ᨾᩉᨲᩥᩴ ᨽᩮᩣᨣᨩᩣᨶᩥᩴ ᨶᩥᨣᨧ᩠ᨨᨲᩥ, ᩋᨿᩴ ᨸᨮᨾᩮᩣ ᩌᨴᩦᨶᩅᩮᩣ ᨴᩩᩔᩦᩃᩔ ᩈᩦᩃᩅᩥᨸᨲ᩠ᨲᩥᨿᩣ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨴᩩᩔᩦᩃᩔ ᩈᩦᩃᩅᩥᨸᨶ᩠ᨶᩔ ᨸᩣᨸᨠᩮᩣ ᨠᩥᨲ᩠ᨲᩥᩈᨴ᩠ᨴᩮᩣ ᩋᨻ᩠ᨽᩩᨣ᩠ᨣᨧ᩠ᨨᨲᩥ, ᩋᨿᩴ ᨴᩩᨲᩥᨿᩮᩣ ᩌᨴᩦᨶᩅᩮᩣ ᨴᩩᩔᩦᩃᩔ ᩈᩦᩃᩅᩥᨸᨲ᩠ᨲᩥᨿᩣ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨴᩩᩔᩦᩃᩮᩣ ᩈᩦᩃᩅᩥᨸᨶ᩠ᨶᩮᩣ ᨿᨬ᩠ᨬᨴᩮᩅ ᨸᩁᩥᩈᩴ ᩏᨸᩈᨦ᩠ᨠᨾᨲᩥ ᨿᨴᩥ ᨡᨲ᩠ᨲᩥᨿᨸᩁᩥᩈᩴ ᨿᨴᩥ ᨻᩕᩣᩉ᩠ᨾᨱᨸᩁᩥᩈᩴ ᨿᨴᩥ ᨣᩉᨸᨲᩥᨸᩁᩥᩈᩴ ᨿᨴᩥ ᩈᨾᨱᨸᩁᩥᩈᩴ, ᩋᩅᩥᩈᩣᩁᨴᩮᩣ ᩏᨸᩈᨦ᩠ᨠᨾᨲᩥ ᨾᨦ᩠ᨠᩩᨽᩪᨲᩮᩣ, ᩋᨿᩴ ᨲᨲᩥᨿᩮᩣ ᩌᨴᩦᨶᩅᩮᩣ ᨴᩩᩔᩦᩃᩔ ᩈᩦᩃᩅᩥᨸᨲ᩠ᨲᩥᨿᩣ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨴᩩᩔᩦᩃᩮᩣ ᩈᩦᩃᩅᩥᨸᨶ᩠ᨶᩮᩣ ᩈᨾ᩠ᨾᩪᩊ᩠ᩉᩮᩣ ᨠᩣᩃᩴ ᨠᩁᩮᩣᨲᩥ, ᩋᨿᩴ ᨧᨲᩩᨲ᩠ᨳᩮᩣ ᩌᨴᩦᨶᩅᩮᩣ ᨴᩩᩔᩦᩃᩔ ᩈᩦᩃᩅᩥᨸᨲ᩠ᨲᩥᨿᩣ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨴᩩᩔᩦᩃᩮᩣ ᩈᩦᩃᩅᩥᨸᨶ᩠ᨶᩮᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨩ᩠ᨩᨲᩥ, ᩋᨿᩴ ᨸᨬ᩠ᨧᨾᩮᩣ ᩌᨴᩦᨶᩅᩮᩣ ᨴᩩᩔᩦᩃᩔ ᩈᩦᩃᩅᩥᨸᨲ᩠ᨲᩥᨿᩣ.

‘‘ᨸᨬ᩠ᨧ ᩌᨶᩥᩈᩴᩈᩣ ᩈᩦᩃᩅᨲᩮᩣ ᩈᩦᩃᩈᨾ᩠ᨸᨴᩣᨿ. ᩍᨵᩣᩅᩩᩈᩮᩣ, ᩈᩦᩃᩅᩣ ᩈᩦᩃᩈᨾ᩠ᨸᨶ᩠ᨶᩮᩣ ᩋᨸ᩠ᨸᨾᩣᨴᩣᨵᩥᨠᩁᨱᩴ ᨾᩉᨶ᩠ᨲᩴ ᨽᩮᩣᨣᨠ᩠ᨡᨶ᩠ᨵᩴ ᩋᨵᩥᨣᨧ᩠ᨨᨲᩥ, ᩋᨿᩴ ᨸᨮᨾᩮᩣ ᩌᨶᩥᩈᩴᩈᩮᩣ ᩈᩦᩃᩅᨲᩮᩣ ᩈᩦᩃᩈᨾ᩠ᨸᨴᩣᨿ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᩈᩦᩃᩅᨲᩮᩣ ᩈᩦᩃᩈᨾ᩠ᨸᨶ᩠ᨶᩔ ᨠᩃ᩠ᨿᩣᨱᩮᩣ ᨠᩥᨲ᩠ᨲᩥᩈᨴ᩠ᨴᩮᩣ ᩋᨻ᩠ᨽᩩᨣ᩠ᨣᨧ᩠ᨨᨲᩥ, ᩋᨿᩴ ᨴᩩᨲᩥᨿᩮᩣ ᩌᨶᩥᩈᩴᩈᩮᩣ ᩈᩦᩃᩅᨲᩮᩣ ᩈᩦᩃᩈᨾ᩠ᨸᨴᩣᨿ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᩈᩦᩃᩅᩣ ᩈᩦᩃᩈᨾ᩠ᨸᨶ᩠ᨶᩮᩣ ᨿᨬ᩠ᨬᨴᩮᩅ ᨸᩁᩥᩈᩴ ᩏᨸᩈᨦ᩠ᨠᨾᨲᩥ ᨿᨴᩥ ᨡᨲ᩠ᨲᩥᨿᨸᩁᩥᩈᩴ ᨿᨴᩥ ᨻᩕᩣᩉ᩠ᨾᨱᨸᩁᩥᩈᩴ ᨿᨴᩥ ᨣᩉᨸᨲᩥᨸᩁᩥᩈᩴ ᨿᨴᩥ ᩈᨾᨱᨸᩁᩥᩈᩴ, ᩅᩥᩈᩣᩁᨴᩮᩣ ᩏᨸᩈᨦ᩠ᨠᨾᨲᩥ ᩋᨾᨦ᩠ᨠᩩᨽᩪᨲᩮᩣ, ᩋᨿᩴ ᨲᨲᩥᨿᩮᩣ ᩌᨶᩥᩈᩴᩈᩮᩣ ᩈᩦᩃᩅᨲᩮᩣ ᩈᩦᩃᩈᨾ᩠ᨸᨴᩣᨿ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᩈᩦᩃᩅᩣ ᩈᩦᩃᩈᨾ᩠ᨸᨶ᩠ᨶᩮᩣ ᩋᩈᨾ᩠ᨾᩪᩊ᩠ᩉᩮᩣ ᨠᩣᩃᩴ ᨠᩁᩮᩣᨲᩥ, ᩋᨿᩴ ᨧᨲᩩᨲ᩠ᨳᩮᩣ ᩌᨶᩥᩈᩴᩈᩮᩣ ᩈᩦᩃᩅᨲᩮᩣ ᩈᩦᩃᩈᨾ᩠ᨸᨴᩣᨿ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᩈᩦᩃᩅᩣ ᩈᩦᩃᩈᨾ᩠ᨸᨶ᩠ᨶᩮᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨲᩥ, ᩋᨿᩴ ᨸᨬ᩠ᨧᨾᩮᩣ ᩌᨶᩥᩈᩴᩈᩮᩣ ᩈᩦᩃᩅᨲᩮᩣ ᩈᩦᩃᩈᨾ᩠ᨸᨴᩣᨿ.

‘‘ᨧᩮᩣᨴᨠᩮᨶ, ᩌᩅᩩᩈᩮᩣ, ᨽᩥᨠ᩠ᨡᩩᨶᩣ ᨸᩁᩴ ᨧᩮᩣᨴᩮᨲᩩᨠᩣᨾᩮᨶ ᨸᨬ᩠ᨧ ᨵᨾ᩠ᨾᩮ ᩋᨩ᩠ᨫᨲ᩠ᨲᩴ ᩏᨸᨭ᩠ᨮᨸᩮᨲ᩠ᩅᩣ ᨸᩁᩮᩣ ᨧᩮᩣᨴᩮᨲᨻ᩠ᨻᩮᩣ. ᨠᩣᩃᩮᨶ ᩅᨠ᩠ᨡᩣᨾᩥ ᨶᩮᩣ ᩋᨠᩣᩃᩮᨶ, ᨽᩪᨲᩮᨶ ᩅᨠ᩠ᨡᩣᨾᩥ ᨶᩮᩣ ᩋᨽᩪᨲᩮᨶ, ᩈᨱ᩠ᩉᩮᨶ ᩅᨠ᩠ᨡᩣᨾᩥ ᨶᩮᩣ ᨹᩁᩩᩈᩮᨶ, ᩋᨲ᩠ᨳᩈᩴᩉᩥᨲᩮᨶ ᩅᨠ᩠ᨡᩣᨾᩥ ᨶᩮᩣ ᩋᨶᨲ᩠ᨳᩈᩴᩉᩥᨲᩮᨶ, ᨾᩮᨲ᩠ᨲᨧᩥᨲ᩠ᨲᩮᨶ [ᨾᩮᨲ᩠ᨲᩣᨧᩥᨲ᩠ᨲᩮᨶ (ᨠᨲ᩠ᨳᨧᩥ)] ᩅᨠ᩠ᨡᩣᨾᩥ ᨶᩮᩣ ᨴᩮᩣᩈᨶ᩠ᨲᩁᩮᨶᩣᨲᩥ. ᨧᩮᩣᨴᨠᩮᨶ, ᩌᩅᩩᩈᩮᩣ, ᨽᩥᨠ᩠ᨡᩩᨶᩣ ᨸᩁᩴ ᨧᩮᩣᨴᩮᨲᩩᨠᩣᨾᩮᨶ ᩍᨾᩮ ᨸᨬ᩠ᨧ ᨵᨾ᩠ᨾᩮ ᩋᨩ᩠ᨫᨲ᩠ᨲᩴ ᩏᨸᨭ᩠ᨮᨸᩮᨲ᩠ᩅᩣ ᨸᩁᩮᩣ ᨧᩮᩣᨴᩮᨲᨻ᩠ᨻᩮᩣ.

᪓᪑᪗. ‘‘ᨸᨬ᩠ᨧ ᨸᨵᩣᨶᩥᨿᨦ᩠ᨣᩣᨶᩥ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨴ᩠ᨵᩮᩣ ᩉᩮᩣᨲᩥ, ᩈᨴ᩠ᨴᩉᨲᩥ ᨲᨳᩣᨣᨲᩔ ᨻᩮᩣᨵᩥᩴ – ‘ᩍᨲᩥᨸᩥ ᩈᩮᩣ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩮᩣ ᩈᩩᨣᨲᩮᩣ, ᩃᩮᩣᨠᩅᩥᨴᩪ ᩋᨶᩩᨲ᩠ᨲᩁᩮᩣ ᨸᩩᩁᩥᩈᨴᨾ᩠ᨾᩈᩣᩁᨳᩥ ᩈᨲ᩠ᨳᩣ ᨴᩮᩅᨾᨶᩩᩔᩣᨶᩴ ᨻᩩᨴ᩠ᨵᩮᩣ ᨽᨣᩅᩣ’ᨲᩥ. ᩋᨸ᩠ᨸᩣᨻᩣᨵᩮᩣ ᩉᩮᩣᨲᩥ ᩋᨸ᩠ᨸᩣᨲᨦ᩠ᨠᩮᩣ, ᩈᨾᩅᩮᨸᩣᨠᩥᨶᩥᨿᩣ ᨣᩉᨱᩥᨿᩣ ᩈᨾᨶ᩠ᨶᩣᨣᨲᩮᩣ ᨶᩣᨲᩥᩈᩦᨲᩣᨿ ᨶᩣᨧ᩠ᨧᩩᨱ᩠ᩉᩣᨿ ᨾᨩ᩠ᨫᩥᨾᩣᨿ ᨸᨵᩣᨶᨠ᩠ᨡᨾᩣᨿ. ᩋᩈᨮᩮᩣ ᩉᩮᩣᨲᩥ ᩋᨾᩣᨿᩣᩅᩦ, ᨿᨳᩣᨽᩪᨲᩴ ᩋᨲ᩠ᨲᩣᨶᩴ ᩌᩅᩥᨠᨲ᩠ᨲᩣ ᩈᨲ᩠ᨳᩁᩥ ᩅᩣ ᩅᩥᨬ᩠ᨬᩪᩈᩩ ᩅᩣ ᩈᨻᩕᩉ᩠ᨾᨧᩣᩁᩦᩈᩩ. ᩌᩁᨴ᩠ᨵᩅᩦᩁᩥᨿᩮᩣ ᩅᩥᩉᩁᨲᩥ ᩋᨠᩩᩈᩃᩣᨶᩴ ᨵᨾ᩠ᨾᩣᨶᩴ ᨸᩉᩣᨶᩣᨿ ᨠᩩᩈᩃᩣᨶᩴ ᨵᨾ᩠ᨾᩣᨶᩴ ᩏᨸᩈᨾ᩠ᨸᨴᩣᨿ ᨳᩣᨾᩅᩣ ᨴᩊ᩠ᩉᨸᩁᨠ᩠ᨠᨾᩮᩣ ᩋᨶᩥᨠ᩠ᨡᩥᨲ᩠ᨲᨵᩩᩁᩮᩣ ᨠᩩᩈᩃᩮᩈᩩ ᨵᨾ᩠ᨾᩮᩈᩩ. ᨸᨬ᩠ᨬᩅᩣ ᩉᩮᩣᨲᩥ ᩏᨴᨿᨲ᩠ᨳᨣᩣᨾᩥᨶᩥᨿᩣ ᨸᨬ᩠ᨬᩣᨿ ᩈᨾᨶ᩠ᨶᩣᨣᨲᩮᩣ ᩋᩁᩥᨿᩣᨿ ᨶᩥᨻ᩠ᨻᩮᨵᩥᨠᩣᨿ ᩈᨾ᩠ᨾᩣᨴᩩᨠ᩠ᨡᨠ᩠ᨡᨿᨣᩣᨾᩥᨶᩥᨿᩣ.

᪓᪑᪘. ‘‘ᨸᨬ᩠ᨧ ᩈᩩᨴ᩠ᨵᩣᩅᩣᩈᩣ – ᩋᩅᩥᩉᩣ, ᩋᨲᨸ᩠ᨸᩣ, ᩈᩩᨴᩔᩣ, ᩈᩩᨴᩔᩦ, ᩋᨠᨶᩥᨭ᩠ᨮᩣ.

‘‘ᨸᨬ᩠ᨧ ᩋᨶᩣᨣᩣᨾᩥᨶᩮᩣ – ᩋᨶ᩠ᨲᩁᩣᨸᩁᩥᨶᩥᨻ᩠ᨻᩣᨿᩦ, ᩏᨸᩉᨧ᩠ᨧᨸᩁᩥᨶᩥᨻ᩠ᨻᩣᨿᩦ, ᩋᩈᨦ᩠ᨡᩣᩁᨸᩁᩥᨶᩥᨻ᩠ᨻᩣᨿᩦ, ᩈᩈᨦ᩠ᨡᩣᩁᨸᩁᩥᨶᩥᨻ᩠ᨻᩣᨿᩦ, ᩏᨴ᩠ᨵᩴᩈᩮᩣᨲᩮᩣᩋᨠᨶᩥᨭ᩠ᨮᨣᩣᨾᩦ.

᪓᪑᪙. ‘‘ᨸᨬ᩠ᨧ ᨧᩮᨲᩮᩣᨡᩥᩃᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨲ᩠ᨳᩁᩥ ᨠᨦ᩠ᨡᨲᩥ ᩅᩥᨧᩥᨠᩥᨧ᩠ᨨᨲᩥ ᨶᩣᨵᩥᨾᩩᨧ᩠ᨧᨲᩥ ᨶ ᩈᨾ᩠ᨸᩈᩦᨴᨲᩥ. ᨿᩮᩣ ᩈᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᨲ᩠ᨳᩁᩥ ᨠᨦ᩠ᨡᨲᩥ ᩅᩥᨧᩥᨠᩥᨧ᩠ᨨᨲᩥ ᨶᩣᨵᩥᨾᩩᨧ᩠ᨧᨲᩥ ᨶ ᩈᨾ᩠ᨸᩈᩦᨴᨲᩥ, ᨲᩔ ᨧᩥᨲ᩠ᨲᩴ ᨶ ᨶᨾᨲᩥ ᩌᨲᨸ᩠ᨸᩣᨿ ᩋᨶᩩᨿᩮᩣᨣᩣᨿ ᩈᩣᨲᨧ᩠ᨧᩣᨿ ᨸᨵᩣᨶᩣᨿ, ᨿᩔ ᨧᩥᨲ᩠ᨲᩴ ᨶ ᨶᨾᨲᩥ ᩌᨲᨸ᩠ᨸᩣᨿ ᩋᨶᩩᨿᩮᩣᨣᩣᨿ ᩈᩣᨲᨧ᩠ᨧᩣᨿ ᨸᨵᩣᨶᩣᨿ, ᩋᨿᩴ ᨸᨮᨾᩮᩣ ᨧᩮᨲᩮᩣᨡᩥᩃᩮᩣ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨵᨾ᩠ᨾᩮ ᨠᨦ᩠ᨡᨲᩥ ᩅᩥᨧᩥᨠᩥᨧ᩠ᨨᨲᩥ…ᨸᩮ… ᩈᨦ᩠ᨥᩮ ᨠᨦ᩠ᨡᨲᩥ ᩅᩥᨧᩥᨠᩥᨧ᩠ᨨᨲᩥ… ᩈᩥᨠ᩠ᨡᩣᨿ ᨠᨦ᩠ᨡᨲᩥ ᩅᩥᨧᩥᨠᩥᨧ᩠ᨨᨲᩥ… ᩈᨻᩕᩉ᩠ᨾᨧᩣᩁᩦᩈᩩ ᨠᩩᨸᩥᨲᩮᩣ ᩉᩮᩣᨲᩥ ᩋᨶᨲ᩠ᨲᨾᨶᩮᩣ ᩌᩉᨲᨧᩥᨲ᩠ᨲᩮᩣ ᨡᩥᩃᨩᩣᨲᩮᩣ. ᨿᩮᩣ ᩈᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᨻᩕᩉ᩠ᨾᨧᩣᩁᩦᩈᩩ ᨠᩩᨸᩥᨲᩮᩣ ᩉᩮᩣᨲᩥ ᩋᨶᨲ᩠ᨲᨾᨶᩮᩣ ᩌᩉᨲᨧᩥᨲ᩠ᨲᩮᩣ ᨡᩥᩃᨩᩣᨲᩮᩣ, ᨲᩔ ᨧᩥᨲ᩠ᨲᩴ ᨶ ᨶᨾᨲᩥ ᩌᨲᨸ᩠ᨸᩣᨿ ᩋᨶᩩᨿᩮᩣᨣᩣᨿ ᩈᩣᨲᨧ᩠ᨧᩣᨿ ᨸᨵᩣᨶᩣᨿ, ᨿᩔ ᨧᩥᨲ᩠ᨲᩴ ᨶ ᨶᨾᨲᩥ ᩌᨲᨸ᩠ᨸᩣᨿ ᩋᨶᩩᨿᩮᩣᨣᩣᨿ ᩈᩣᨲᨧ᩠ᨧᩣᨿ ᨸᨵᩣᨶᩣᨿ, ᩋᨿᩴ ᨸᨬ᩠ᨧᨾᩮᩣ ᨧᩮᨲᩮᩣᨡᩥᩃᩮᩣ.

᪓᪒᪐. ‘‘ᨸᨬ᩠ᨧ ᨧᩮᨲᩈᩮᩣᩅᩥᨶᩥᨻᨶ᩠ᨵᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨠᩣᨾᩮᩈᩩ ᩋᩅᩦᨲᩁᩣᨣᩮᩣ ᩉᩮᩣᨲᩥ ᩋᩅᩥᨣᨲᨧ᩠ᨨᨶ᩠ᨴᩮᩣ ᩋᩅᩥᨣᨲᨸᩮᨾᩮᩣ ᩋᩅᩥᨣᨲᨸᩥᨸᩣᩈᩮᩣ ᩋᩅᩥᨣᨲᨸᩁᩥᩊᩣᩉᩮᩣ ᩋᩅᩥᨣᨲᨲᨱ᩠ᩉᩮᩣ. ᨿᩮᩣ ᩈᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᨠᩣᨾᩮᩈᩩ ᩋᩅᩦᨲᩁᩣᨣᩮᩣ ᩉᩮᩣᨲᩥ ᩋᩅᩥᨣᨲᨧ᩠ᨨᨶ᩠ᨴᩮᩣ ᩋᩅᩥᨣᨲᨸᩮᨾᩮᩣ ᩋᩅᩥᨣᨲᨸᩥᨸᩣᩈᩮᩣ ᩋᩅᩥᨣᨲᨸᩁᩥᩊᩣᩉᩮᩣ ᩋᩅᩥᨣᨲᨲᨱ᩠ᩉᩮᩣ, ᨲᩔ ᨧᩥᨲ᩠ᨲᩴ ᨶ ᨶᨾᨲᩥ ᩌᨲᨸ᩠ᨸᩣᨿ ᩋᨶᩩᨿᩮᩣᨣᩣᨿ ᩈᩣᨲᨧ᩠ᨧᩣᨿ ᨸᨵᩣᨶᩣᨿ. ᨿᩔ ᨧᩥᨲ᩠ᨲᩴ ᨶ ᨶᨾᨲᩥ ᩌᨲᨸ᩠ᨸᩣᨿ ᩋᨶᩩᨿᩮᩣᨣᩣᨿ ᩈᩣᨲᨧ᩠ᨧᩣᨿ ᨸᨵᩣᨶᩣᨿ. ᩋᨿᩴ ᨸᨮᨾᩮᩣ ᨧᩮᨲᩈᩮᩣ ᩅᩥᨶᩥᨻᨶ᩠ᨵᩮᩣ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨠᩣᨿᩮ ᩋᩅᩦᨲᩁᩣᨣᩮᩣ ᩉᩮᩣᨲᩥ…ᨸᩮ… ᩁᩪᨸᩮ ᩋᩅᩦᨲᩁᩣᨣᩮᩣ ᩉᩮᩣᨲᩥ…ᨸᩮ… ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨿᩣᩅᨴᨲ᩠ᨳᩴ ᩏᨴᩁᩣᩅᨴᩮᩉᨠᩴ ᨽᩩᨬ᩠ᨩᩥᨲ᩠ᩅᩣ ᩈᩮᨿ᩠ᨿᩈᩩᨡᩴ ᨸᩔᩈᩩᨡᩴ ᨾᩥᨴ᩠ᨵᩈᩩᨡᩴ ᩋᨶᩩᨿᩩᨲ᩠ᨲᩮᩣ ᩅᩥᩉᩁᨲᩥ…ᨸᩮ… ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᩋᨬ᩠ᨬᨲᩁᩴ ᨴᩮᩅᨶᩥᨠᩣᨿᩴ ᨸᨱᩥᨵᩣᨿ ᨻᩕᩉ᩠ᨾᨧᩁᩥᨿᩴ ᨧᩁᨲᩥ – ‘ᩍᨾᩥᨶᩣᩉᩴ ᩈᩦᩃᩮᨶ ᩅᩣ ᩅᨲᩮᨶ ᩅᩣ ᨲᨸᩮᨶ ᩅᩣ ᨻᩕᩉ᩠ᨾᨧᩁᩥᨿᩮᨶ ᩅᩣ ᨴᩮᩅᩮᩣ ᩅᩣ ᨽᩅᩥᩔᩣᨾᩥ ᨴᩮᩅᨬ᩠ᨬᨲᩁᩮᩣ ᩅᩣ’ᨲᩥ. ᨿᩮᩣ ᩈᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩋᨬ᩠ᨬᨲᩁᩴ ᨴᩮᩅᨶᩥᨠᩣᨿᩴ ᨸᨱᩥᨵᩣᨿ ᨻᩕᩉ᩠ᨾᨧᩁᩥᨿᩴ ᨧᩁᨲᩥ – ‘ᩍᨾᩥᨶᩣᩉᩴ ᩈᩦᩃᩮᨶ ᩅᩣ ᩅᨲᩮᨶ ᩅᩣ ᨲᨸᩮᨶ ᩅᩣ ᨻᩕᩉ᩠ᨾᨧᩁᩥᨿᩮᨶ ᩅᩣ ᨴᩮᩅᩮᩣ ᩅᩣ ᨽᩅᩥᩔᩣᨾᩥ ᨴᩮᩅᨬ᩠ᨬᨲᩁᩮᩣ ᩅᩣ’ᨲᩥ, ᨲᩔ ᨧᩥᨲ᩠ᨲᩴ ᨶ ᨶᨾᨲᩥ ᩌᨲᨸ᩠ᨸᩣᨿ ᩋᨶᩩᨿᩮᩣᨣᩣᨿ ᩈᩣᨲᨧ᩠ᨧᩣᨿ ᨸᨵᩣᨶᩣᨿ. ᨿᩔ ᨧᩥᨲ᩠ᨲᩴ ᨶ ᨶᨾᨲᩥ ᩌᨲᨸ᩠ᨸᩣᨿ ᩋᨶᩩᨿᩮᩣᨣᩣᨿ ᩈᩣᨲᨧ᩠ᨧᩣᨿ ᨸᨵᩣᨶᩣᨿ. ᩋᨿᩴ ᨸᨬ᩠ᨧᨾᩮᩣ ᨧᩮᨲᩈᩮᩣ ᩅᩥᨶᩥᨻᨶ᩠ᨵᩮᩣ.

‘‘ᨸᨬ᩠ᨧᩥᨶ᩠ᨴᩕᩥᨿᩣᨶᩥ – ᨧᨠ᩠ᨡᩩᨶ᩠ᨴᩕᩥᨿᩴ, ᩈᩮᩣᨲᩥᨶ᩠ᨴᩕᩥᨿᩴ, ᨥᩣᨶᩥᨶ᩠ᨴᩕᩥᨿᩴ, ᨩᩥᩅ᩠ᩉᩥᨶ᩠ᨴᩕᩥᨿᩴ, ᨠᩣᨿᩥᨶ᩠ᨴᩕᩥᨿᩴ.

‘‘ᩋᨸᩁᩣᨶᩥᨸᩥ ᨸᨬ᩠ᨧᩥᨶ᩠ᨴᩕᩥᨿᩣᨶᩥ – ᩈᩩᨡᩥᨶ᩠ᨴᩕᩥᨿᩴ, ᨴᩩᨠ᩠ᨡᩥᨶ᩠ᨴᩕᩥᨿᩴ, ᩈᩮᩣᨾᨶᩔᩥᨶ᩠ᨴᩕᩥᨿᩴ, ᨴᩮᩣᨾᨶᩔᩥᨶ᩠ᨴᩕᩥᨿᩴ, ᩏᨸᩮᨠ᩠ᨡᩥᨶ᩠ᨴᩕᩥᨿᩴ.

‘‘ᩋᨸᩁᩣᨶᩥᨸᩥ ᨸᨬ᩠ᨧᩥᨶ᩠ᨴᩕᩥᨿᩣᨶᩥ – ᩈᨴ᩠ᨵᩥᨶ᩠ᨴᩕᩥᨿᩴ, ᩅᩦᩁᩥᨿᩥᨶ᩠ᨴᩕᩥᨿᩴ, ᩈᨲᩥᨶ᩠ᨴᩕᩥᨿᩴ, ᩈᨾᩣᨵᩥᨶ᩠ᨴᩕᩥᨿᩴ, ᨸᨬ᩠ᨬᩥᨶ᩠ᨴᩕᩥᨿᩴ.

᪓᪒᪑. ‘‘ᨸᨬ᩠ᨧ ᨶᩥᩔᩁᨱᩥᨿᩣ [ᨶᩥᩔᩣᩁᨱᩦᨿᩣ (ᩈᩦ. ᩈ᩠ᨿᩣ. ᨠᩴ. ᨸᩦ.) ᨭᩦᨠᩣ ᩒᩃᩮᩣᨠᩮᨲᨻ᩠ᨻᩣ] ᨵᩣᨲᩩᨿᩮᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨠᩣᨾᩮ ᨾᨶᩈᩥᨠᩁᩮᩣᨲᩮᩣ ᨠᩣᨾᩮᩈᩩ ᨧᩥᨲ᩠ᨲᩴ ᨶ ᨸᨠ᩠ᨡᨶ᩠ᨴᨲᩥ ᨶ ᨸᩈᩦᨴᨲᩥ ᨶ ᩈᨶ᩠ᨲᩥᨭ᩠ᨮᨲᩥ ᨶ ᩅᩥᨾᩩᨧ᩠ᨧᨲᩥ. ᨶᩮᨠ᩠ᨡᨾ᩠ᨾᩴ ᨡᩮᩣ ᨸᨶᩔ ᨾᨶᩈᩥᨠᩁᩮᩣᨲᩮᩣ ᨶᩮᨠ᩠ᨡᨾ᩠ᨾᩮ ᨧᩥᨲ᩠ᨲᩴ ᨸᨠ᩠ᨡᨶ᩠ᨴᨲᩥ ᨸᩈᩦᨴᨲᩥ ᩈᨶ᩠ᨲᩥᨭ᩠ᨮᨲᩥ ᩅᩥᨾᩩᨧ᩠ᨧᨲᩥ. ᨲᩔ ᨲᩴ ᨧᩥᨲ᩠ᨲᩴ ᩈᩩᨣᨲᩴ ᩈᩩᨽᩣᩅᩥᨲᩴ ᩈᩩᩅᩩᨭ᩠ᨮᩥᨲᩴ ᩈᩩᩅᩥᨾᩩᨲ᩠ᨲᩴ ᩅᩥᩈᩴᨿᩩᨲ᩠ᨲᩴ ᨠᩣᨾᩮᩉᩥ. ᨿᩮ ᨧ ᨠᩣᨾᨸᨧ᩠ᨧᨿᩣ ᩏᨸ᩠ᨸᨩ᩠ᨩᨶ᩠ᨲᩥ ᩌᩈᩅᩣ ᩅᩥᨥᩣᨲᩣ ᨸᩁᩥᩊᩣᩉᩣ [ᩅᩥᨥᩣᨲᨸᩁᩥᩊᩣᩉᩣ (ᩈ᩠ᨿᩣ. ᨠᩴ.)], ᨾᩩᨲ᩠ᨲᩮᩣ ᩈᩮᩣ ᨲᩮᩉᩥ, ᨶ ᩈᩮᩣ ᨲᩴ ᩅᩮᨴᨶᩴ ᩅᩮᨴᩮᨲᩥ. ᩍᨴᨾᨠ᩠ᨡᩣᨲᩴ ᨠᩣᨾᩣᨶᩴ ᨶᩥᩔᩁᨱᩴ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨻ᩠ᨿᩣᨸᩣᨴᩴ ᨾᨶᩈᩥᨠᩁᩮᩣᨲᩮᩣ ᨻ᩠ᨿᩣᨸᩣᨴᩮ ᨧᩥᨲ᩠ᨲᩴ ᨶ ᨸᨠ᩠ᨡᨶ᩠ᨴᨲᩥ ᨶ ᨸᩈᩦᨴᨲᩥ ᨶ ᩈᨶ᩠ᨲᩥᨭ᩠ᨮᨲᩥ ᨶ ᩅᩥᨾᩩᨧ᩠ᨧᨲᩥ. ᩋᨻ᩠ᨿᩣᨸᩣᨴᩴ ᨡᩮᩣ ᨸᨶᩔ ᨾᨶᩈᩥᨠᩁᩮᩣᨲᩮᩣ ᩋᨻ᩠ᨿᩣᨸᩣᨴᩮ ᨧᩥᨲ᩠ᨲᩴ ᨸᨠ᩠ᨡᨶ᩠ᨴᨲᩥ ᨸᩈᩦᨴᨲᩥ ᩈᨶ᩠ᨲᩥᨭ᩠ᨮᨲᩥ ᩅᩥᨾᩩᨧ᩠ᨧᨲᩥ. ᨲᩔ ᨲᩴ ᨧᩥᨲ᩠ᨲᩴ ᩈᩩᨣᨲᩴ ᩈᩩᨽᩣᩅᩥᨲᩴ ᩈᩩᩅᩩᨭ᩠ᨮᩥᨲᩴ ᩈᩩᩅᩥᨾᩩᨲ᩠ᨲᩴ ᩅᩥᩈᩴᨿᩩᨲ᩠ᨲᩴ ᨻ᩠ᨿᩣᨸᩣᨴᩮᨶ. ᨿᩮ ᨧ ᨻ᩠ᨿᩣᨸᩣᨴᨸᨧ᩠ᨧᨿᩣ ᩏᨸ᩠ᨸᨩ᩠ᨩᨶ᩠ᨲᩥ ᩌᩈᩅᩣ ᩅᩥᨥᩣᨲᩣ ᨸᩁᩥᩊᩣᩉᩣ, ᨾᩩᨲ᩠ᨲᩮᩣ ᩈᩮᩣ ᨲᩮᩉᩥ, ᨶ ᩈᩮᩣ ᨲᩴ ᩅᩮᨴᨶᩴ ᩅᩮᨴᩮᨲᩥ. ᩍᨴᨾᨠ᩠ᨡᩣᨲᩴ ᨻ᩠ᨿᩣᨸᩣᨴᩔ ᨶᩥᩔᩁᨱᩴ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩅᩥᩉᩮᩈᩴ ᨾᨶᩈᩥᨠᩁᩮᩣᨲᩮᩣ ᩅᩥᩉᩮᩈᩣᨿ ᨧᩥᨲ᩠ᨲᩴ ᨶ ᨸᨠ᩠ᨡᨶ᩠ᨴᨲᩥ ᨶ ᨸᩈᩦᨴᨲᩥ ᨶ ᩈᨶ᩠ᨲᩥᨭ᩠ᨮᨲᩥ ᨶ ᩅᩥᨾᩩᨧ᩠ᨧᨲᩥ. ᩋᩅᩥᩉᩮᩈᩴ ᨡᩮᩣ ᨸᨶᩔ ᨾᨶᩈᩥᨠᩁᩮᩣᨲᩮᩣ ᩋᩅᩥᩉᩮᩈᩣᨿ ᨧᩥᨲ᩠ᨲᩴ ᨸᨠ᩠ᨡᨶ᩠ᨴᨲᩥ ᨸᩈᩦᨴᨲᩥ ᩈᨶ᩠ᨲᩥᨭ᩠ᨮᨲᩥ ᩅᩥᨾᩩᨧ᩠ᨧᨲᩥ. ᨲᩔ ᨲᩴ ᨧᩥᨲ᩠ᨲᩴ ᩈᩩᨣᨲᩴ ᩈᩩᨽᩣᩅᩥᨲᩴ ᩈᩩᩅᩩᨭ᩠ᨮᩥᨲᩴ ᩈᩩᩅᩥᨾᩩᨲ᩠ᨲᩴ ᩅᩥᩈᩴᨿᩩᨲ᩠ᨲᩴ ᩅᩥᩉᩮᩈᩣᨿ. ᨿᩮ ᨧ ᩅᩥᩉᩮᩈᩣᨸᨧ᩠ᨧᨿᩣ ᩏᨸ᩠ᨸᨩ᩠ᨩᨶ᩠ᨲᩥ ᩌᩈᩅᩣ ᩅᩥᨥᩣᨲᩣ ᨸᩁᩥᩊᩣᩉᩣ, ᨾᩩᨲ᩠ᨲᩮᩣ ᩈᩮᩣ ᨲᩮᩉᩥ, ᨶ ᩈᩮᩣ ᨲᩴ ᩅᩮᨴᨶᩴ ᩅᩮᨴᩮᨲᩥ. ᩍᨴᨾᨠ᩠ᨡᩣᨲᩴ ᩅᩥᩉᩮᩈᩣᨿ ᨶᩥᩔᩁᨱᩴ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩁᩪᨸᩮ ᨾᨶᩈᩥᨠᩁᩮᩣᨲᩮᩣ ᩁᩪᨸᩮᩈᩩ ᨧᩥᨲ᩠ᨲᩴ ᨶ ᨸᨠ᩠ᨡᨶ᩠ᨴᨲᩥ ᨶ ᨸᩈᩦᨴᨲᩥ ᨶ ᩈᨶ᩠ᨲᩥᨭ᩠ᨮᨲᩥ ᨶ ᩅᩥᨾᩩᨧ᩠ᨧᨲᩥ. ᩋᩁᩪᨸᩴ ᨡᩮᩣ ᨸᨶᩔ ᨾᨶᩈᩥᨠᩁᩮᩣᨲᩮᩣ ᩋᩁᩪᨸᩮ ᨧᩥᨲ᩠ᨲᩴ ᨸᨠ᩠ᨡᨶ᩠ᨴᨲᩥ ᨸᩈᩦᨴᨲᩥ ᩈᨶ᩠ᨲᩥᨭ᩠ᨮᨲᩥ ᩅᩥᨾᩩᨧ᩠ᨧᨲᩥ. ᨲᩔ ᨲᩴ ᨧᩥᨲ᩠ᨲᩴ ᩈᩩᨣᨲᩴ ᩈᩩᨽᩣᩅᩥᨲᩴ ᩈᩩᩅᩩᨭ᩠ᨮᩥᨲᩴ ᩈᩩᩅᩥᨾᩩᨲ᩠ᨲᩴ ᩅᩥᩈᩴᨿᩩᨲ᩠ᨲᩴ ᩁᩪᨸᩮᩉᩥ. ᨿᩮ ᨧ ᩁᩪᨸᨸᨧ᩠ᨧᨿᩣ ᩏᨸ᩠ᨸᨩ᩠ᨩᨶ᩠ᨲᩥ ᩌᩈᩅᩣ ᩅᩥᨥᩣᨲᩣ ᨸᩁᩥᩊᩣᩉᩣ, ᨾᩩᨲ᩠ᨲᩮᩣ ᩈᩮᩣ ᨲᩮᩉᩥ, ᨶ ᩈᩮᩣ ᨲᩴ ᩅᩮᨴᨶᩴ ᩅᩮᨴᩮᨲᩥ. ᩍᨴᨾᨠ᩠ᨡᩣᨲᩴ ᩁᩪᨸᩣᨶᩴ ᨶᩥᩔᩁᨱᩴ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩈᨠ᩠ᨠᩣᨿᩴ ᨾᨶᩈᩥᨠᩁᩮᩣᨲᩮᩣ ᩈᨠ᩠ᨠᩣᨿᩮ ᨧᩥᨲ᩠ᨲᩴ ᨶ ᨸᨠ᩠ᨡᨶ᩠ᨴᨲᩥ ᨶ ᨸᩈᩦᨴᨲᩥ ᨶ ᩈᨶ᩠ᨲᩥᨭ᩠ᨮᨲᩥ ᨶ ᩅᩥᨾᩩᨧ᩠ᨧᨲᩥ. ᩈᨠ᩠ᨠᩣᨿᨶᩥᩁᩮᩣᨵᩴ ᨡᩮᩣ ᨸᨶᩔ ᨾᨶᩈᩥᨠᩁᩮᩣᨲᩮᩣ ᩈᨠ᩠ᨠᩣᨿᨶᩥᩁᩮᩣᨵᩮ ᨧᩥᨲ᩠ᨲᩴ ᨸᨠ᩠ᨡᨶ᩠ᨴᨲᩥ ᨸᩈᩦᨴᨲᩥ ᩈᨶ᩠ᨲᩥᨭ᩠ᨮᨲᩥ ᩅᩥᨾᩩᨧ᩠ᨧᨲᩥ. ᨲᩔ ᨲᩴ ᨧᩥᨲ᩠ᨲᩴ ᩈᩩᨣᨲᩴ ᩈᩩᨽᩣᩅᩥᨲᩴ ᩈᩩᩅᩩᨭ᩠ᨮᩥᨲᩴ ᩈᩩᩅᩥᨾᩩᨲ᩠ᨲᩴ ᩅᩥᩈᩴᨿᩩᨲ᩠ᨲᩴ ᩈᨠ᩠ᨠᩣᨿᩮᨶ. ᨿᩮ ᨧ ᩈᨠ᩠ᨠᩣᨿᨸᨧ᩠ᨧᨿᩣ ᩏᨸ᩠ᨸᨩ᩠ᨩᨶ᩠ᨲᩥ ᩌᩈᩅᩣ ᩅᩥᨥᩣᨲᩣ ᨸᩁᩥᩊᩣᩉᩣ, ᨾᩩᨲ᩠ᨲᩮᩣ ᩈᩮᩣ ᨲᩮᩉᩥ, ᨶ ᩈᩮᩣ ᨲᩴ ᩅᩮᨴᨶᩴ ᩅᩮᨴᩮᨲᩥ. ᩍᨴᨾᨠ᩠ᨡᩣᨲᩴ ᩈᨠ᩠ᨠᩣᨿᩔ ᨶᩥᩔᩁᨱᩴ.

᪓᪒᪒. ‘‘ᨸᨬ᩠ᨧ ᩅᩥᨾᩩᨲ᩠ᨲᩣᨿᨲᨶᩣᨶᩥ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩈᨲ᩠ᨳᩣ ᨵᨾ᩠ᨾᩴ ᨴᩮᩈᩮᨲᩥ ᩋᨬ᩠ᨬᨲᩁᩮᩣ ᩅᩣ ᨣᩁᩩᨭ᩠ᨮᩣᨶᩥᨿᩮᩣ ᩈᨻᩕᩉ᩠ᨾᨧᩣᩁᩦ. ᨿᨳᩣ ᨿᨳᩣ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩈᨲ᩠ᨳᩣ ᨵᨾ᩠ᨾᩴ ᨴᩮᩈᩮᨲᩥ ᩋᨬ᩠ᨬᨲᩁᩮᩣ ᩅᩣ ᨣᩁᩩᨭ᩠ᨮᩣᨶᩥᨿᩮᩣ ᩈᨻᩕᩉ᩠ᨾᨧᩣᩁᩦ. ᨲᨳᩣ ᨲᨳᩣ ᩈᩮᩣ ᨲᩈ᩠ᨾᩥᩴ ᨵᨾ᩠ᨾᩮ ᩋᨲ᩠ᨳᨸᨭᩥᩈᩴᩅᩮᨴᩦ ᨧ ᩉᩮᩣᨲᩥ ᨵᨾ᩠ᨾᨸᨭᩥᩈᩴᩅᩮᨴᩦ ᨧ. ᨲᩔ ᩋᨲ᩠ᨳᨸᨭᩥᩈᩴᩅᩮᨴᩥᨶᩮᩣ ᨵᨾ᩠ᨾᨸᨭᩥᩈᩴᩅᩮᨴᩥᨶᩮᩣ ᨸᩣᨾᩮᩣᨩ᩠ᨩᩴ ᨩᩣᨿᨲᩥ, ᨸᨾᩩᨴᩥᨲᩔ ᨸᩦᨲᩥ ᨩᩣᨿᨲᩥ, ᨸᩦᨲᩥᨾᨶᩔ ᨠᩣᨿᩮᩣ ᨸᩔᨾ᩠ᨽᨲᩥ, ᨸᩔᨴ᩠ᨵᨠᩣᨿᩮᩣ ᩈᩩᨡᩴ ᩅᩮᨴᩮᨲᩥ, ᩈᩩᨡᩥᨶᩮᩣ ᨧᩥᨲ᩠ᨲᩴ ᩈᨾᩣᨵᩥᨿᨲᩥ. ᩍᨴᩴ ᨸᨮᨾᩴ ᩅᩥᨾᩩᨲ᩠ᨲᩣᨿᨲᨶᩴ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨶ ᩉᩮᩅ ᨡᩮᩣ ᩈᨲ᩠ᨳᩣ ᨵᨾ᩠ᨾᩴ ᨴᩮᩈᩮᨲᩥ ᩋᨬ᩠ᨬᨲᩁᩮᩣ ᩅᩣ ᨣᩁᩩᨭ᩠ᨮᩣᨶᩥᨿᩮᩣ ᩈᨻᩕᩉ᩠ᨾᨧᩣᩁᩦ, ᩋᨸᩥ ᨧ ᨡᩮᩣ ᨿᨳᩣᩈᩩᨲᩴ ᨿᨳᩣᨸᩁᩥᨿᨲ᩠ᨲᩴ ᨵᨾ᩠ᨾᩴ ᩅᩥᨲ᩠ᨳᩣᩁᩮᨶ ᨸᩁᩮᩈᩴ ᨴᩮᩈᩮᨲᩥ…ᨸᩮ… ᩋᨸᩥ ᨧ ᨡᩮᩣ ᨿᨳᩣᩈᩩᨲᩴ ᨿᨳᩣᨸᩁᩥᨿᨲ᩠ᨲᩴ ᨵᨾ᩠ᨾᩴ ᩅᩥᨲ᩠ᨳᩣᩁᩮᨶ ᩈᨩ᩠ᨫᩣᨿᩴ ᨠᩁᩮᩣᨲᩥ…ᨸᩮ… ᩋᨸᩥ ᨧ ᨡᩮᩣ ᨿᨳᩣᩈᩩᨲᩴ ᨿᨳᩣᨸᩁᩥᨿᨲ᩠ᨲᩴ ᨵᨾ᩠ᨾᩴ ᨧᩮᨲᩈᩣ ᩋᨶᩩᩅᩥᨲᨠ᩠ᨠᩮᨲᩥ ᩋᨶᩩᩅᩥᨧᩣᩁᩮᨲᩥ ᨾᨶᩈᩣᨶᩩᨸᩮᨠ᩠ᨡᨲᩥ…ᨸᩮ… ᩋᨸᩥ ᨧ ᨡ᩠ᩅᩔ ᩋᨬ᩠ᨬᨲᩁᩴ ᩈᨾᩣᨵᩥᨶᩥᨾᩥᨲ᩠ᨲᩴ ᩈᩩᨣ᩠ᨣᩉᩥᨲᩴ ᩉᩮᩣᨲᩥ ᩈᩩᨾᨶᩈᩥᨠᨲᩴ ᩈᩪᨸᨵᩣᩁᩥᨲᩴ ᩈᩩᨸ᩠ᨸᨭᩥᩅᩥᨴ᩠ᨵᩴ ᨸᨬ᩠ᨬᩣᨿ. ᨿᨳᩣ ᨿᨳᩣ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩋᨬ᩠ᨬᨲᩁᩴ ᩈᨾᩣᨵᩥᨶᩥᨾᩥᨲ᩠ᨲᩴ ᩈᩩᨣ᩠ᨣᩉᩥᨲᩴ ᩉᩮᩣᨲᩥ ᩈᩩᨾᨶᩈᩥᨠᨲᩴ ᩈᩪᨸᨵᩣᩁᩥᨲᩴ ᩈᩩᨸ᩠ᨸᨭᩥᩅᩥᨴ᩠ᨵᩴ ᨸᨬ᩠ᨬᩣᨿ ᨲᨳᩣ ᨲᨳᩣ ᩈᩮᩣ ᨲᩈ᩠ᨾᩥᩴ ᨵᨾ᩠ᨾᩮ ᩋᨲ᩠ᨳᨸᨭᩥᩈᩴᩅᩮᨴᩦ ᨧ ᩉᩮᩣᨲᩥ ᨵᨾ᩠ᨾᨸᨭᩥᩈᩴᩅᩮᨴᩦ ᨧ. ᨲᩔ ᩋᨲ᩠ᨳᨸᨭᩥᩈᩴᩅᩮᨴᩥᨶᩮᩣ ᨵᨾ᩠ᨾᨸᨭᩥᩈᩴᩅᩮᨴᩥᨶᩮᩣ ᨸᩣᨾᩮᩣᨩ᩠ᨩᩴ ᨩᩣᨿᨲᩥ, ᨸᨾᩩᨴᩥᨲᩔ ᨸᩦᨲᩥ ᨩᩣᨿᨲᩥ, ᨸᩦᨲᩥᨾᨶᩔ ᨠᩣᨿᩮᩣ ᨸᩔᨾ᩠ᨽᨲᩥ, ᨸᩔᨴ᩠ᨵᨠᩣᨿᩮᩣ ᩈᩩᨡᩴ ᩅᩮᨴᩮᨲᩥ, ᩈᩩᨡᩥᨶᩮᩣ ᨧᩥᨲ᩠ᨲᩴ ᩈᨾᩣᨵᩥᨿᨲᩥ. ᩍᨴᩴ ᨸᨬ᩠ᨧᨾᩴ ᩅᩥᨾᩩᨲ᩠ᨲᩣᨿᨲᨶᩴ.

‘‘ᨸᨬ᩠ᨧ ᩅᩥᨾᩩᨲ᩠ᨲᩥᨸᩁᩥᨸᩣᨧᨶᩦᨿᩣ ᩈᨬ᩠ᨬᩣ – ᩋᨶᩥᨧ᩠ᨧᩈᨬ᩠ᨬᩣ, ᩋᨶᩥᨧ᩠ᨧᩮ ᨴᩩᨠ᩠ᨡᩈᨬ᩠ᨬᩣ, ᨴᩩᨠ᩠ᨡᩮ ᩋᨶᨲ᩠ᨲᩈᨬ᩠ᨬᩣ, ᨸᩉᩣᨶᩈᨬ᩠ᨬᩣ, ᩅᩥᩁᩣᨣᩈᨬ᩠ᨬᩣ.

‘‘ᩍᨾᩮ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨸᨬ᩠ᨧ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ; ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ…ᨸᩮ… ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ [ᩈᨦ᩠ᨣᩥᨲᩥᨿᨸᨬ᩠ᨧᨠᩴ ᨶᩥᨭ᩠ᨮᩥᨲᩴ (ᩈ᩠ᨿᩣ. ᨠᩴ.)].

ᨨᨠ᩠ᨠᩴ

᪓᪒᪓. ‘‘ᩋᨲ᩠ᨳᩥ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨨ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ; ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ…ᨸᩮ… ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᨠᨲᨾᩮ ᨨ?

‘‘ᨨ ᩋᨩ᩠ᨫᨲ᩠ᨲᩥᨠᩣᨶᩥ ᩌᨿᨲᨶᩣᨶᩥ – ᨧᨠ᩠ᨡᩣᨿᨲᨶᩴ, ᩈᩮᩣᨲᩣᨿᨲᨶᩴ, ᨥᩣᨶᩣᨿᨲᨶᩴ, ᨩᩥᩅ᩠ᩉᩣᨿᨲᨶᩴ, ᨠᩣᨿᩣᨿᨲᨶᩴ, ᨾᨶᩣᨿᨲᨶᩴ.

‘‘ᨨ ᨻᩣᩉᩥᩁᩣᨶᩥ ᩌᨿᨲᨶᩣᨶᩥ – ᩁᩪᨸᩣᨿᨲᨶᩴ, ᩈᨴ᩠ᨴᩣᨿᨲᨶᩴ, ᨣᨶ᩠ᨵᩣᨿᨲᨶᩴ, ᩁᩈᩣᨿᨲᨶᩴ, ᨹᩮᩣᨭ᩠ᨮᨻ᩠ᨻᩣᨿᨲᨶᩴ, ᨵᨾ᩠ᨾᩣᨿᨲᨶᩴ.

‘‘ᨨ ᩅᩥᨬ᩠ᨬᩣᨱᨠᩣᨿᩣ – ᨧᨠ᩠ᨡᩩᩅᩥᨬ᩠ᨬᩣᨱᩴ, ᩈᩮᩣᨲᩅᩥᨬ᩠ᨬᩣᨱᩴ, ᨥᩣᨶᩅᩥᨬ᩠ᨬᩣᨱᩴ, ᨩᩥᩅ᩠ᩉᩣᩅᩥᨬ᩠ᨬᩣᨱᩴ, ᨠᩣᨿᩅᩥᨬ᩠ᨬᩣᨱᩴ, ᨾᨶᩮᩣᩅᩥᨬ᩠ᨬᩣᨱᩴ.

‘‘ᨨ ᨹᩔᨠᩣᨿᩣ – ᨧᨠ᩠ᨡᩩᩈᨾ᩠ᨹᩔᩮᩣ, ᩈᩮᩣᨲᩈᨾ᩠ᨹᩔᩮᩣ, ᨥᩣᨶᩈᨾ᩠ᨹᩔᩮᩣ, ᨩᩥᩅ᩠ᩉᩣᩈᨾ᩠ᨹᩔᩮᩣ, ᨠᩣᨿᩈᨾ᩠ᨹᩔᩮᩣ, ᨾᨶᩮᩣᩈᨾ᩠ᨹᩔᩮᩣ.

‘‘ᨨ ᩅᩮᨴᨶᩣᨠᩣᨿᩣ – ᨧᨠ᩠ᨡᩩᩈᨾ᩠ᨹᩔᨩᩣ ᩅᩮᨴᨶᩣ, ᩈᩮᩣᨲᩈᨾ᩠ᨹᩔᨩᩣ ᩅᩮᨴᨶᩣ, ᨥᩣᨶᩈᨾ᩠ᨹᩔᨩᩣ ᩅᩮᨴᨶᩣ, ᨩᩥᩅ᩠ᩉᩣᩈᨾ᩠ᨹᩔᨩᩣ ᩅᩮᨴᨶᩣ, ᨠᩣᨿᩈᨾ᩠ᨹᩔᨩᩣ ᩅᩮᨴᨶᩣ, ᨾᨶᩮᩣᩈᨾ᩠ᨹᩔᨩᩣ ᩅᩮᨴᨶᩣ.

‘‘ᨨ ᩈᨬ᩠ᨬᩣᨠᩣᨿᩣ – ᩁᩪᨸᩈᨬ᩠ᨬᩣ, ᩈᨴ᩠ᨴᩈᨬ᩠ᨬᩣ, ᨣᨶ᩠ᨵᩈᨬ᩠ᨬᩣ, ᩁᩈᩈᨬ᩠ᨬᩣ, ᨹᩮᩣᨭ᩠ᨮᨻ᩠ᨻᩈᨬ᩠ᨬᩣ, ᨵᨾ᩠ᨾᩈᨬ᩠ᨬᩣ.

‘‘ᨨ ᩈᨬ᩠ᨧᩮᨲᨶᩣᨠᩣᨿᩣ – ᩁᩪᨸᩈᨬ᩠ᨧᩮᨲᨶᩣ, ᩈᨴ᩠ᨴᩈᨬ᩠ᨧᩮᨲᨶᩣ, ᨣᨶ᩠ᨵᩈᨬ᩠ᨧᩮᨲᨶᩣ, ᩁᩈᩈᨬ᩠ᨧᩮᨲᨶᩣ, ᨹᩮᩣᨭ᩠ᨮᨻ᩠ᨻᩈᨬ᩠ᨧᩮᨲᨶᩣ, ᨵᨾ᩠ᨾᩈᨬ᩠ᨧᩮᨲᨶᩣ.

‘‘ᨨ ᨲᨱ᩠ᩉᩣᨠᩣᨿᩣ – ᩁᩪᨸᨲᨱ᩠ᩉᩣ, ᩈᨴ᩠ᨴᨲᨱ᩠ᩉᩣ, ᨣᨶ᩠ᨵᨲᨱ᩠ᩉᩣ, ᩁᩈᨲᨱ᩠ᩉᩣ, ᨹᩮᩣᨭ᩠ᨮᨻ᩠ᨻᨲᨱ᩠ᩉᩣ, ᨵᨾ᩠ᨾᨲᨱ᩠ᩉᩣ.

᪓᪒᪔. ‘‘ᨨ ᩋᨣᩣᩁᩅᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨲ᩠ᨳᩁᩥ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ; ᨵᨾ᩠ᨾᩮ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ; ᩈᨦ᩠ᨥᩮ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ; ᩈᩥᨠ᩠ᨡᩣᨿ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ; ᩋᨸ᩠ᨸᨾᩣᨴᩮ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ; ᨸᨭᩥᩈᨶ᩠ᨳᩣᩁᩮ [ᨸᨭᩥᩈᨶ᩠ᨵᩣᩁᩮ (ᨠ.)] ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ.

‘‘ᨨ ᨣᩣᩁᩅᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨲ᩠ᨳᩁᩥ ᩈᨣᩣᩁᩅᩮᩣ ᩅᩥᩉᩁᨲᩥ ᩈᨸ᩠ᨸᨲᩥᩔᩮᩣ; ᨵᨾ᩠ᨾᩮ ᩈᨣᩣᩁᩅᩮᩣ ᩅᩥᩉᩁᨲᩥ ᩈᨸ᩠ᨸᨲᩥᩔᩮᩣ; ᩈᨦ᩠ᨥᩮ ᩈᨣᩣᩁᩅᩮᩣ ᩅᩥᩉᩁᨲᩥ ᩈᨸ᩠ᨸᨲᩥᩔᩮᩣ; ᩈᩥᨠ᩠ᨡᩣᨿ ᩈᨣᩣᩁᩅᩮᩣ ᩅᩥᩉᩁᨲᩥ ᩈᨸ᩠ᨸᨲᩥᩔᩮᩣ; ᩋᨸ᩠ᨸᨾᩣᨴᩮ ᩈᨣᩣᩁᩅᩮᩣ ᩅᩥᩉᩁᨲᩥ ᩈᨸ᩠ᨸᨲᩥᩔᩮᩣ; ᨸᨭᩥᩈᨶ᩠ᨳᩣᩁᩮ ᩈᨣᩣᩁᩅᩮᩣ ᩅᩥᩉᩁᨲᩥ ᩈᨸ᩠ᨸᨲᩥᩔᩮᩣ.

‘‘ᨨ ᩈᩮᩣᨾᨶᩔᩪᨸᩅᩥᨧᩣᩁᩣ. ᨧᨠ᩠ᨡᩩᨶᩣ ᩁᩪᨸᩴ ᨴᩥᩈ᩠ᩅᩣ ᩈᩮᩣᨾᨶᩔᨭ᩠ᨮᩣᨶᩥᨿᩴ ᩁᩪᨸᩴ ᩏᨸᩅᩥᨧᩁᨲᩥ; ᩈᩮᩣᨲᩮᨶ ᩈᨴ᩠ᨴᩴ ᩈᩩᨲ᩠ᩅᩣ… ᨥᩣᨶᩮᨶ ᨣᨶ᩠ᨵᩴ ᨥᩣᨿᩥᨲ᩠ᩅᩣ… ᨩᩥᩅ᩠ᩉᩣᨿ ᩁᩈᩴ ᩈᩣᨿᩥᨲ᩠ᩅᩣ… ᨠᩣᨿᩮᨶ ᨹᩮᩣᨭ᩠ᨮᨻ᩠ᨻᩴ ᨹᩩᩈᩥᨲ᩠ᩅᩣ. ᨾᨶᩈᩣ ᨵᨾ᩠ᨾᩴ ᩅᩥᨬ᩠ᨬᩣᨿ ᩈᩮᩣᨾᨶᩔᨭ᩠ᨮᩣᨶᩥᨿᩴ ᨵᨾ᩠ᨾᩴ ᩏᨸᩅᩥᨧᩁᨲᩥ.

‘‘ᨨ ᨴᩮᩣᨾᨶᩔᩪᨸᩅᩥᨧᩣᩁᩣ. ᨧᨠ᩠ᨡᩩᨶᩣ ᩁᩪᨸᩴ ᨴᩥᩈ᩠ᩅᩣ ᨴᩮᩣᨾᨶᩔᨭ᩠ᨮᩣᨶᩥᨿᩴ ᩁᩪᨸᩴ ᩏᨸᩅᩥᨧᩁᨲᩥ…ᨸᩮ… ᨾᨶᩈᩣ ᨵᨾ᩠ᨾᩴ ᩅᩥᨬ᩠ᨬᩣᨿ ᨴᩮᩣᨾᨶᩔᨭ᩠ᨮᩣᨶᩥᨿᩴ ᨵᨾ᩠ᨾᩴ ᩏᨸᩅᩥᨧᩁᨲᩥ.

‘‘ᨨ ᩏᨸᩮᨠ᩠ᨡᩪᨸᩅᩥᨧᩣᩁᩣ. ᨧᨠ᩠ᨡᩩᨶᩣ ᩁᩪᨸᩴ ᨴᩥᩈ᩠ᩅᩣ ᩏᨸᩮᨠ᩠ᨡᩣᨭ᩠ᨮᩣᨶᩥᨿᩴ [ᩏᨸᩮᨠ᩠ᨡᩣᨮᩣᨶᩥᨿᩴ (ᨠ.)] ᩁᩪᨸᩴ ᩏᨸᩅᩥᨧᩁᨲᩥ…ᨸᩮ… ᨾᨶᩈᩣ ᨵᨾ᩠ᨾᩴ ᩅᩥᨬ᩠ᨬᩣᨿ ᩏᨸᩮᨠ᩠ᨡᩣᨭ᩠ᨮᩣᨶᩥᨿᩴ ᨵᨾ᩠ᨾᩴ ᩏᨸᩅᩥᨧᩁᨲᩥ.

‘‘ᨨ ᩈᩣᩁᨱᩦᨿᩣ ᨵᨾ᩠ᨾᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨾᩮᨲ᩠ᨲᩴ ᨠᩣᨿᨠᨾ᩠ᨾᩴ ᨸᨧ᩠ᨧᩩᨸᨭ᩠ᨮᩥᨲᩴ ᩉᩮᩣᨲᩥ ᩈᨻᩕᩉ᩠ᨾᨧᩣᩁᩦᩈᩩ ᩌᩅᩥ [ᩌᩅᩦ (ᨠ. ᩈᩦ. ᨸᩦ. ᨠ.)] ᨧᩮᩅ ᩁᩉᩮᩣ ᨧ. ᩋᨿᨾ᩠ᨸᩥ ᨵᨾ᩠ᨾᩮᩣ ᩈᩣᩁᨱᩦᨿᩮᩣ ᨸᩥᨿᨠᩁᨱᩮᩣ ᨣᩁᩩᨠᩁᨱᩮᩣ ᩈᨦ᩠ᨣᩉᩣᨿ ᩋᩅᩥᩅᩣᨴᩣᨿ ᩈᩣᨾᨣ᩠ᨣᩥᨿᩣ ᩑᨠᩦᨽᩣᩅᩣᨿ ᩈᩴᩅᨲ᩠ᨲᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨾᩮᨲ᩠ᨲᩴ ᩅᨧᩦᨠᨾ᩠ᨾᩴ ᨸᨧ᩠ᨧᩩᨸᨭ᩠ᨮᩥᨲᩴ ᩉᩮᩣᨲᩥ ᩈᨻᩕᩉ᩠ᨾᨧᩣᩁᩦᩈᩩ ᩌᩅᩥ ᨧᩮᩅ ᩁᩉᩮᩣ ᨧ. ᩋᨿᨾ᩠ᨸᩥ ᨵᨾ᩠ᨾᩮᩣ ᩈᩣᩁᨱᩦᨿᩮᩣ…ᨸᩮ… ᩑᨠᩦᨽᩣᩅᩣᨿ ᩈᩴᩅᨲ᩠ᨲᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨾᩮᨲ᩠ᨲᩴ ᨾᨶᩮᩣᨠᨾ᩠ᨾᩴ ᨸᨧ᩠ᨧᩩᨸᨭ᩠ᨮᩥᨲᩴ ᩉᩮᩣᨲᩥ ᩈᨻᩕᩉ᩠ᨾᨧᩣᩁᩦᩈᩩ ᩌᩅᩥ ᨧᩮᩅ ᩁᩉᩮᩣ ᨧ. ᩋᨿᨾ᩠ᨸᩥ ᨵᨾ᩠ᨾᩮᩣ ᩈᩣᩁᨱᩦᨿᩮᩣ…ᨸᩮ… ᩑᨠᩦᨽᩣᩅᩣᨿ ᩈᩴᩅᨲ᩠ᨲᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨿᩮ ᨲᩮ ᩃᩣᨽᩣ ᨵᨾ᩠ᨾᩥᨠᩣ ᨵᨾ᩠ᨾᩃᨴ᩠ᨵᩣ ᩋᨶ᩠ᨲᨾᩈᩮᩣ ᨸᨲ᩠ᨲᨸᩁᩥᨿᩣᨸᨶ᩠ᨶᨾᨲ᩠ᨲᨾ᩠ᨸᩥ, ᨲᨳᩣᩁᩪᨸᩮᩉᩥ ᩃᩣᨽᩮᩉᩥ ᩋᨸ᩠ᨸᨭᩥᩅᩥᨽᨲ᩠ᨲᨽᩮᩣᨣᩦ ᩉᩮᩣᨲᩥ ᩈᩦᩃᩅᨶ᩠ᨲᩮᩉᩥ ᩈᨻᩕᩉ᩠ᨾᨧᩣᩁᩦᩉᩥ ᩈᩣᨵᩣᩁᨱᨽᩮᩣᨣᩦ. ᩋᨿᨾ᩠ᨸᩥ ᨵᨾ᩠ᨾᩮᩣ ᩈᩣᩁᨱᩦᨿᩮᩣ…ᨸᩮ… ᩑᨠᩦᨽᩣᩅᩣᨿ ᩈᩴᩅᨲ᩠ᨲᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨿᩣᨶᩥ ᨲᩣᨶᩥ ᩈᩦᩃᩣᨶᩥ ᩋᨡᨱ᩠ᨯᩣᨶᩥ ᩋᨧ᩠ᨨᩥᨴ᩠ᨴᩣᨶᩥ ᩋᩈᨻᩃᩣᨶᩥ ᩋᨠᨾ᩠ᨾᩣᩈᩣᨶᩥ ᨽᩩᨩᩥᩔᩣᨶᩥ ᩅᩥᨬ᩠ᨬᩩᨸ᩠ᨸᩈᨲ᩠ᨳᩣᨶᩥ ᩋᨸᩁᩣᨾᨭ᩠ᨮᩣᨶᩥ ᩈᨾᩣᨵᩥᩈᩴᩅᨲ᩠ᨲᨶᩥᨠᩣᨶᩥ, ᨲᨳᩣᩁᩪᨸᩮᩈᩩ ᩈᩦᩃᩮᩈᩩ ᩈᩦᩃᩈᩣᨾᨬ᩠ᨬᨣᨲᩮᩣ ᩅᩥᩉᩁᨲᩥ ᩈᨻᩕᩉ᩠ᨾᨧᩣᩁᩦᩉᩥ ᩌᩅᩥ ᨧᩮᩅ ᩁᩉᩮᩣ ᨧ. ᩋᨿᨾ᩠ᨸᩥ ᨵᨾ᩠ᨾᩮᩣ ᩈᩣᩁᨱᩦᨿᩮᩣ…ᨸᩮ… ᩑᨠᩦᨽᩣᩅᩣᨿ ᩈᩴᩅᨲ᩠ᨲᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨿᩣᨿᩴ ᨴᩥᨭ᩠ᨮᩥ ᩋᩁᩥᨿᩣ ᨶᩥᨿ᩠ᨿᩣᨶᩥᨠᩣ ᨶᩥᨿ᩠ᨿᩣᨲᩥ ᨲᨠ᩠ᨠᩁᩔ ᩈᨾ᩠ᨾᩣ ᨴᩩᨠ᩠ᨡᨠ᩠ᨡᨿᩣᨿ, ᨲᨳᩣᩁᩪᨸᩣᨿ ᨴᩥᨭ᩠ᨮᩥᨿᩣ ᨴᩥᨭ᩠ᨮᩥᩈᩣᨾᨬ᩠ᨬᨣᨲᩮᩣ ᩅᩥᩉᩁᨲᩥ ᩈᨻᩕᩉ᩠ᨾᨧᩣᩁᩦᩉᩥ ᩌᩅᩥ ᨧᩮᩅ ᩁᩉᩮᩣ ᨧ. ᩋᨿᨾ᩠ᨸᩥ ᨵᨾ᩠ᨾᩮᩣ ᩈᩣᩁᨱᩦᨿᩮᩣ ᨸᩥᨿᨠᩁᨱᩮᩣ ᨣᩁᩩᨠᩁᨱᩮᩣ ᩈᨦ᩠ᨣᩉᩣᨿ ᩋᩅᩥᩅᩣᨴᩣᨿ ᩈᩣᨾᨣ᩠ᨣᩥᨿᩣ ᩑᨠᩦᨽᩣᩅᩣᨿ ᩈᩴᩅᨲ᩠ᨲᨲᩥ.

᪓᪒᪕. ᨨ ᩅᩥᩅᩣᨴᨾᩪᩃᩣᨶᩥ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨠᩮᩣᨵᨶᩮᩣ ᩉᩮᩣᨲᩥ ᩏᨸᨶᩣᩉᩦ. ᨿᩮᩣ ᩈᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᨠᩮᩣᨵᨶᩮᩣ ᩉᩮᩣᨲᩥ ᩏᨸᨶᩣᩉᩦ, ᩈᩮᩣ ᩈᨲ᩠ᨳᩁᩥᨸᩥ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ, ᨵᨾ᩠ᨾᩮᨸᩥ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ, ᩈᨦ᩠ᨥᩮᨸᩥ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ, ᩈᩥᨠ᩠ᨡᩣᨿᨸᩥ ᨶ ᨸᩁᩥᨸᩪᩁᨠᩣᩁᩦ [ᨸᩁᩥᨸᩪᩁᩦᨠᩣᩁᩦ (ᩈ᩠ᨿᩣ. ᨠᩴ.)] ᩉᩮᩣᨲᩥ. ᨿᩮᩣ ᩈᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᨲ᩠ᨳᩁᩥ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ, ᨵᨾ᩠ᨾᩮ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ, ᩈᨦ᩠ᨥᩮ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ, ᩈᩥᨠ᩠ᨡᩣᨿ ᨶ ᨸᩁᩥᨸᩪᩁᨠᩣᩁᩦ, ᩈᩮᩣ ᩈᨦ᩠ᨥᩮ ᩅᩥᩅᩣᨴᩴ ᨩᨶᩮᨲᩥ. ᨿᩮᩣ ᩉᩮᩣᨲᩥ ᩅᩥᩅᩣᨴᩮᩣ ᨻᩉᩩᨩᨶᩋᩉᩥᨲᩣᨿ ᨻᩉᩩᨩᨶᩋᩈᩩᨡᩣᨿ ᩋᨶᨲ᩠ᨳᩣᨿ ᩋᩉᩥᨲᩣᨿ ᨴᩩᨠ᩠ᨡᩣᨿ ᨴᩮᩅᨾᨶᩩᩔᩣᨶᩴ. ᩑᩅᩁᩪᨸᩴ ᨧᩮ ᨲᩩᨾ᩠ᩉᩮ, ᩌᩅᩩᩈᩮᩣ, ᩅᩥᩅᩣᨴᨾᩪᩃᩴ ᩋᨩ᩠ᨫᨲ᩠ᨲᩴ ᩅᩣ ᨻᩉᩥᨴ᩠ᨵᩣ ᩅᩣ ᩈᨾᨶᩩᨸᩔᩮᨿ᩠ᨿᩣᨳ. ᨲᨲᩕ ᨲᩩᨾ᩠ᩉᩮ, ᩌᩅᩩᩈᩮᩣ, ᨲᩔᩮᩅ ᨸᩣᨸᨠᩔ ᩅᩥᩅᩣᨴᨾᩪᩃᩔ ᨸᩉᩣᨶᩣᨿ ᩅᩣᨿᨾᩮᨿ᩠ᨿᩣᨳ. ᩑᩅᩁᩪᨸᩴ ᨧᩮ ᨲᩩᨾ᩠ᩉᩮ, ᩌᩅᩩᩈᩮᩣ, ᩅᩥᩅᩣᨴᨾᩪᩃᩴ ᩋᨩ᩠ᨫᨲ᩠ᨲᩴ ᩅᩣ ᨻᩉᩥᨴ᩠ᨵᩣ ᩅᩣ ᨶ ᩈᨾᨶᩩᨸᩔᩮᨿ᩠ᨿᩣᨳ. ᨲᨲᩕ ᨲᩩᨾ᩠ᩉᩮ, ᩌᩅᩩᩈᩮᩣ, ᨲᩔᩮᩅ ᨸᩣᨸᨠᩔ ᩅᩥᩅᩣᨴᨾᩪᩃᩔ ᩌᨿᨲᩥᩴ ᩋᨶᩅᩔᩅᩣᨿ ᨸᨭᩥᨸᨩ᩠ᨩᩮᨿ᩠ᨿᩣᨳ. ᩑᩅᨾᩮᨲᩔ ᨸᩣᨸᨠᩔ ᩅᩥᩅᩣᨴᨾᩪᩃᩔ ᨸᩉᩣᨶᩴ ᩉᩮᩣᨲᩥ. ᩑᩅᨾᩮᨲᩔ ᨸᩣᨸᨠᩔ ᩅᩥᩅᩣᨴᨾᩪᩃᩔ ᩌᨿᨲᩥᩴ ᩋᨶᩅᩔᩅᩮᩣ ᩉᩮᩣᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨾᨠ᩠ᨡᩦ ᩉᩮᩣᨲᩥ ᨸᩊᩣᩈᩦ…ᨸᩮ… ᩍᩔᩩᨠᩦ ᩉᩮᩣᨲᩥ ᨾᨧ᩠ᨨᩁᩦ…ᨸᩮ… ᩈᨮᩮᩣ ᩉᩮᩣᨲᩥ ᨾᩣᨿᩣᩅᩦ… ᨸᩣᨸᩥᨧ᩠ᨨᩮᩣ ᩉᩮᩣᨲᩥ ᨾᩥᨧ᩠ᨨᩣᨴᩥᨭ᩠ᨮᩦ… ᩈᨶ᩠ᨴᩥᨭ᩠ᨮᩥᨸᩁᩣᨾᩣᩈᩦ ᩉᩮᩣᨲᩥ ᩌᨵᩣᨶᨣ᩠ᨣᩣᩉᩦ ᨴᩩᨸ᩠ᨸᨭᩥᨶᩥᩔᨣ᩠ᨣᩦ…ᨸᩮ… ᨿᩮᩣ ᩈᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᨶ᩠ᨴᩥᨭ᩠ᨮᩥᨸᩁᩣᨾᩣᩈᩦ ᩉᩮᩣᨲᩥ ᩌᨵᩣᨶᨣ᩠ᨣᩣᩉᩦ ᨴᩩᨸ᩠ᨸᨭᩥᨶᩥᩔᨣ᩠ᨣᩦ, ᩈᩮᩣ ᩈᨲ᩠ᨳᩁᩥᨸᩥ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ, ᨵᨾ᩠ᨾᩮᨸᩥ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ, ᩈᨦ᩠ᨥᩮᨸᩥ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ, ᩈᩥᨠ᩠ᨡᩣᨿᨸᩥ ᨶ ᨸᩁᩥᨸᩪᩁᨠᩣᩁᩦ ᩉᩮᩣᨲᩥ. ᨿᩮᩣ ᩈᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᨲ᩠ᨳᩁᩥ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ, ᨵᨾ᩠ᨾᩮ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ, ᩈᨦ᩠ᨥᩮ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ, ᩈᩥᨠ᩠ᨡᩣᨿ ᨶ ᨸᩁᩥᨸᩪᩁᨠᩣᩁᩦ, ᩈᩮᩣ ᩈᨦ᩠ᨥᩮ ᩅᩥᩅᩣᨴᩴ ᨩᨶᩮᨲᩥ. ᨿᩮᩣ ᩉᩮᩣᨲᩥ ᩅᩥᩅᩣᨴᩮᩣ ᨻᩉᩩᨩᨶᩋᩉᩥᨲᩣᨿ ᨻᩉᩩᨩᨶᩋᩈᩩᨡᩣᨿ ᩋᨶᨲ᩠ᨳᩣᨿ ᩋᩉᩥᨲᩣᨿ ᨴᩩᨠ᩠ᨡᩣᨿ ᨴᩮᩅᨾᨶᩩᩔᩣᨶᩴ. ᩑᩅᩁᩪᨸᩴ ᨧᩮ ᨲᩩᨾ᩠ᩉᩮ, ᩌᩅᩩᩈᩮᩣ, ᩅᩥᩅᩣᨴᨾᩪᩃᩴ ᩋᨩ᩠ᨫᨲ᩠ᨲᩴ ᩅᩣ ᨻᩉᩥᨴ᩠ᨵᩣ ᩅᩣ ᩈᨾᨶᩩᨸᩔᩮᨿ᩠ᨿᩣᨳ. ᨲᨲᩕ ᨲᩩᨾ᩠ᩉᩮ, ᩌᩅᩩᩈᩮᩣ, ᨲᩔᩮᩅ ᨸᩣᨸᨠᩔ ᩅᩥᩅᩣᨴᨾᩪᩃᩔ ᨸᩉᩣᨶᩣᨿ ᩅᩣᨿᨾᩮᨿ᩠ᨿᩣᨳ. ᩑᩅᩁᩪᨸᩴ ᨧᩮ ᨲᩩᨾ᩠ᩉᩮ, ᩌᩅᩩᩈᩮᩣ, ᩅᩥᩅᩣᨴᨾᩪᩃᩴ ᩋᨩ᩠ᨫᨲ᩠ᨲᩴ ᩅᩣ ᨻᩉᩥᨴ᩠ᨵᩣ ᩅᩣ ᨶ ᩈᨾᨶᩩᨸᩔᩮᨿ᩠ᨿᩣᨳ. ᨲᨲᩕ ᨲᩩᨾ᩠ᩉᩮ, ᩌᩅᩩᩈᩮᩣ, ᨲᩔᩮᩅ ᨸᩣᨸᨠᩔ ᩅᩥᩅᩣᨴᨾᩪᩃᩔ ᩌᨿᨲᩥᩴ ᩋᨶᩅᩔᩅᩣᨿ ᨸᨭᩥᨸᨩ᩠ᨩᩮᨿ᩠ᨿᩣᨳ. ᩑᩅᨾᩮᨲᩔ ᨸᩣᨸᨠᩔ ᩅᩥᩅᩣᨴᨾᩪᩃᩔ ᨸᩉᩣᨶᩴ ᩉᩮᩣᨲᩥ. ᩑᩅᨾᩮᨲᩔ ᨸᩣᨸᨠᩔ ᩅᩥᩅᩣᨴᨾᩪᩃᩔ ᩌᨿᨲᩥᩴ ᩋᨶᩅᩔᩅᩮᩣ ᩉᩮᩣᨲᩥ.

‘‘ᨨ ᨵᩣᨲᩩᨿᩮᩣ – ᨸᨳᩅᩦᨵᩣᨲᩩ, ᩌᨸᩮᩣᨵᩣᨲᩩ, ᨲᩮᨩᩮᩣᨵᩣᨲᩩ, ᩅᩣᨿᩮᩣᨵᩣᨲᩩ, ᩌᨠᩣᩈᨵᩣᨲᩩ, ᩅᩥᨬ᩠ᨬᩣᨱᨵᩣᨲᩩ.

᪓᪒᪖. ‘‘ᨨ ᨶᩥᩔᩁᨱᩥᨿᩣ ᨵᩣᨲᩩᨿᩮᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩑᩅᩴ ᩅᨴᩮᨿ᩠ᨿ – ‘ᨾᩮᨲ᩠ᨲᩣ ᩉᩥ ᨡᩮᩣ ᨾᩮ ᨧᩮᨲᩮᩣᩅᩥᨾᩩᨲ᩠ᨲᩥ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ, ᩋᨳ ᨧ ᨸᨶ ᨾᩮ ᨻ᩠ᨿᩣᨸᩣᨴᩮᩣ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨲᩥᨭ᩠ᨮᨲᩦ’ᨲᩥ. ᩈᩮᩣ ‘ᨾᩣ ᩉᩮᩅᩴ’, ᨲᩥᩔ ᩅᨧᨶᩦᨿᩮᩣ, ‘ᨾᩣᨿᩈ᩠ᨾᩣ ᩑᩅᩴ ᩋᩅᨧ, ᨾᩣ ᨽᨣᩅᨶ᩠ᨲᩴ ᩋᨻ᩠ᨽᩣᨧᩥᨠ᩠ᨡᩥ, ᨶ ᩉᩥ ᩈᩣᨵᩩ ᨽᨣᩅᨲᩮᩣ ᩋᨻ᩠ᨽᨠ᩠ᨡᩣᨶᩴ, ᨶ ᩉᩥ ᨽᨣᩅᩣ ᩑᩅᩴ ᩅᨴᩮᨿ᩠ᨿ. ᩋᨭ᩠ᨮᩣᨶᨾᩮᨲᩴ, ᩌᩅᩩᩈᩮᩣ, ᩋᨶᩅᨠᩣᩈᩮᩣ, ᨿᩴ ᨾᩮᨲ᩠ᨲᩣᨿ ᨧᩮᨲᩮᩣᩅᩥᨾᩩᨲ᩠ᨲᩥᨿᩣ ᨽᩣᩅᩥᨲᩣᨿ ᨻᩉᩩᩃᩦᨠᨲᩣᨿ ᨿᩣᨶᩦᨠᨲᩣᨿ ᩅᨲ᩠ᨳᩩᨠᨲᩣᨿ ᩋᨶᩩᨭ᩠ᨮᩥᨲᩣᨿ ᨸᩁᩥᨧᩥᨲᩣᨿ ᩈᩩᩈᨾᩣᩁᨴ᩠ᨵᩣᨿ. ᩋᨳ ᨧ ᨸᨶᩔ ᨻ᩠ᨿᩣᨸᩣᨴᩮᩣ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨮᩔᨲᩥ, ᨶᩮᨲᩴ ᨮᩣᨶᩴ ᩅᩥᨩ᩠ᨩᨲᩥ. ᨶᩥᩔᩁᨱᩴ ᩉᩮᨲᩴ, ᩌᩅᩩᩈᩮᩣ, ᨻ᩠ᨿᩣᨸᩣᨴᩔ, ᨿᨴᩥᨴᩴ ᨾᩮᨲ᩠ᨲᩣ ᨧᩮᨲᩮᩣᩅᩥᨾᩩᨲ᩠ᨲᩦ’ᨲᩥ.

‘‘ᩍᨵ ᨸᨶᩣᩅᩩᩈᩮᩣ, ᨽᩥᨠ᩠ᨡᩩ ᩑᩅᩴ ᩅᨴᩮᨿ᩠ᨿ – ‘ᨠᩁᩩᨱᩣ ᩉᩥ ᨡᩮᩣ ᨾᩮ ᨧᩮᨲᩮᩣᩅᩥᨾᩩᨲ᩠ᨲᩥ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ. ᩋᨳ ᨧ ᨸᨶ ᨾᩮ ᩅᩥᩉᩮᩈᩣ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨲᩥᨭ᩠ᨮᨲᩦ’ᨲᩥ, ᩈᩮᩣ ‘ᨾᩣ ᩉᩮᩅᩴ’ ᨲᩥᩔ ᩅᨧᨶᩦᨿᩮᩣ ‘ᨾᩣᨿᩈ᩠ᨾᩣ ᩑᩅᩴ ᩋᩅᨧ, ᨾᩣ ᨽᨣᩅᨶ᩠ᨲᩴ ᩋᨻ᩠ᨽᩣᨧᩥᨠ᩠ᨡᩥ, ᨶ ᩉᩥ ᩈᩣᨵᩩ ᨽᨣᩅᨲᩮᩣ ᩋᨻ᩠ᨽᨠ᩠ᨡᩣᨶᩴ, ᨶ ᩉᩥ ᨽᨣᩅᩣ ᩑᩅᩴ ᩅᨴᩮᨿ᩠ᨿ. ᩋᨭ᩠ᨮᩣᨶᨾᩮᨲᩴ ᩌᩅᩩᩈᩮᩣ, ᩋᨶᩅᨠᩣᩈᩮᩣ, ᨿᩴ ᨠᩁᩩᨱᩣᨿ ᨧᩮᨲᩮᩣᩅᩥᨾᩩᨲ᩠ᨲᩥᨿᩣ ᨽᩣᩅᩥᨲᩣᨿ ᨻᩉᩩᩃᩦᨠᨲᩣᨿ ᨿᩣᨶᩦᨠᨲᩣᨿ ᩅᨲ᩠ᨳᩩᨠᨲᩣᨿ ᩋᨶᩩᨭ᩠ᨮᩥᨲᩣᨿ ᨸᩁᩥᨧᩥᨲᩣᨿ ᩈᩩᩈᨾᩣᩁᨴ᩠ᨵᩣᨿ, ᩋᨳ ᨧ ᨸᨶᩔ ᩅᩥᩉᩮᩈᩣ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨮᩔᨲᩥ, ᨶᩮᨲᩴ ᨮᩣᨶᩴ ᩅᩥᨩ᩠ᨩᨲᩥ. ᨶᩥᩔᩁᨱᩴ ᩉᩮᨲᩴ, ᩌᩅᩩᩈᩮᩣ, ᩅᩥᩉᩮᩈᩣᨿ, ᨿᨴᩥᨴᩴ ᨠᩁᩩᨱᩣ ᨧᩮᨲᩮᩣᩅᩥᨾᩩᨲ᩠ᨲᩦ’ᨲᩥ.

‘‘ᩍᨵ ᨸᨶᩣᩅᩩᩈᩮᩣ, ᨽᩥᨠ᩠ᨡᩩ ᩑᩅᩴ ᩅᨴᩮᨿ᩠ᨿ – ‘ᨾᩩᨴᩥᨲᩣ ᩉᩥ ᨡᩮᩣ ᨾᩮ ᨧᩮᨲᩮᩣᩅᩥᨾᩩᨲ᩠ᨲᩥ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ. ᩋᨳ ᨧ ᨸᨶ ᨾᩮ ᩋᩁᨲᩥ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨲᩥᨭ᩠ᨮᨲᩦ’ᨲᩥ, ᩈᩮᩣ ‘ᨾᩣ ᩉᩮᩅᩴ’ ᨲᩥᩔ ᩅᨧᨶᩦᨿᩮᩣ ‘‘ᨾᩣᨿᩈ᩠ᨾᩣ ᩑᩅᩴ ᩋᩅᨧ, ᨾᩣ ᨽᨣᩅᨶ᩠ᨲᩴ ᩋᨻ᩠ᨽᩣᨧᩥᨠ᩠ᨡᩥ, ᨶ ᩉᩥ ᩈᩣᨵᩩ ᨽᨣᩅᨲᩮᩣ ᩋᨻ᩠ᨽᨠ᩠ᨡᩣᨶᩴ, ᨶ ᩉᩥ ᨽᨣᩅᩣ ᩑᩅᩴ ᩅᨴᩮᨿ᩠ᨿ. ᩋᨭ᩠ᨮᩣᨶᨾᩮᨲᩴ, ᩌᩅᩩᩈᩮᩣ, ᩋᨶᩅᨠᩣᩈᩮᩣ, ᨿᩴ ᨾᩩᨴᩥᨲᩣᨿ ᨧᩮᨲᩮᩣᩅᩥᨾᩩᨲ᩠ᨲᩥᨿᩣ ᨽᩣᩅᩥᨲᩣᨿ ᨻᩉᩩᩃᩦᨠᨲᩣᨿ ᨿᩣᨶᩦᨠᨲᩣᨿ ᩅᨲ᩠ᨳᩩᨠᨲᩣᨿ ᩋᨶᩩᨭ᩠ᨮᩥᨲᩣᨿ ᨸᩁᩥᨧᩥᨲᩣᨿ ᩈᩩᩈᨾᩣᩁᨴ᩠ᨵᩣᨿ, ᩋᨳ ᨧ ᨸᨶᩔ ᩋᩁᨲᩥ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨮᩔᨲᩥ, ᨶᩮᨲᩴ ᨮᩣᨶᩴ ᩅᩥᨩ᩠ᨩᨲᩥ. ᨶᩥᩔᩁᨱᩴ ᩉᩮᨲᩴ, ᩌᩅᩩᩈᩮᩣ, ᩋᩁᨲᩥᨿᩣ, ᨿᨴᩥᨴᩴ ᨾᩩᨴᩥᨲᩣ ᨧᩮᨲᩮᩣᩅᩥᨾᩩᨲ᩠ᨲᩦ’ᨲᩥ.

‘‘ᩍᨵ ᨸᨶᩣᩅᩩᩈᩮᩣ, ᨽᩥᨠ᩠ᨡᩩ ᩑᩅᩴ ᩅᨴᩮᨿ᩠ᨿ – ‘ᩏᨸᩮᨠ᩠ᨡᩣ ᩉᩥ ᨡᩮᩣ ᨾᩮ ᨧᩮᨲᩮᩣᩅᩥᨾᩩᨲ᩠ᨲᩥ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ. ᩋᨳ ᨧ ᨸᨶ ᨾᩮ ᩁᩣᨣᩮᩣ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨲᩥᨭ᩠ᨮᨲᩦ’ᨲᩥ. ᩈᩮᩣ ‘ᨾᩣ ᩉᩮᩅᩴ’ ᨲᩥᩔ ᩅᨧᨶᩦᨿᩮᩣ ‘ᨾᩣᨿᩈ᩠ᨾᩣ ᩑᩅᩴ ᩋᩅᨧ, ᨾᩣ ᨽᨣᩅᨶ᩠ᨲᩴ ᩋᨻ᩠ᨽᩣᨧᩥᨠ᩠ᨡᩥ, ᨶ ᩉᩥ ᩈᩣᨵᩩ ᨽᨣᩅᨲᩮᩣ ᩋᨻ᩠ᨽᨠ᩠ᨡᩣᨶᩴ, ᨶ ᩉᩥ ᨽᨣᩅᩣ ᩑᩅᩴ ᩅᨴᩮᨿ᩠ᨿ. ᩋᨭ᩠ᨮᩣᨶᨾᩮᨲᩴ, ᩌᩅᩩᩈᩮᩣ, ᩋᨶᩅᨠᩣᩈᩮᩣ, ᨿᩴ ᩏᨸᩮᨠ᩠ᨡᩣᨿ ᨧᩮᨲᩮᩣᩅᩥᨾᩩᨲ᩠ᨲᩥᨿᩣ ᨽᩣᩅᩥᨲᩣᨿ ᨻᩉᩩᩃᩦᨠᨲᩣᨿ ᨿᩣᨶᩦᨠᨲᩣᨿ ᩅᨲ᩠ᨳᩩᨠᨲᩣᨿ ᩋᨶᩩᨭ᩠ᨮᩥᨲᩣᨿ ᨸᩁᩥᨧᩥᨲᩣᨿ ᩈᩩᩈᨾᩣᩁᨴ᩠ᨵᩣᨿ, ᩋᨳ ᨧ ᨸᨶᩔ ᩁᩣᨣᩮᩣ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨮᩔᨲᩥ ᨶᩮᨲᩴ ᨮᩣᨶᩴ ᩅᩥᨩ᩠ᨩᨲᩥ. ᨶᩥᩔᩁᨱᩴ ᩉᩮᨲᩴ, ᩌᩅᩩᩈᩮᩣ, ᩁᩣᨣᩔ, ᨿᨴᩥᨴᩴ ᩏᨸᩮᨠ᩠ᨡᩣ ᨧᩮᨲᩮᩣᩅᩥᨾᩩᨲ᩠ᨲᩦ’ᨲᩥ.

‘‘ᩍᨵ ᨸᨶᩣᩅᩩᩈᩮᩣ, ᨽᩥᨠ᩠ᨡᩩ ᩑᩅᩴ ᩅᨴᩮᨿ᩠ᨿ – ‘ᩋᨶᩥᨾᩥᨲ᩠ᨲᩣ ᩉᩥ ᨡᩮᩣ ᨾᩮ ᨧᩮᨲᩮᩣᩅᩥᨾᩩᨲ᩠ᨲᩥ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ. ᩋᨳ ᨧ ᨸᨶ ᨾᩮ ᨶᩥᨾᩥᨲ᩠ᨲᩣᨶᩩᩈᩣᩁᩥ ᩅᩥᨬ᩠ᨬᩣᨱᩴ ᩉᩮᩣᨲᩦ’ᨲᩥ. ᩈᩮᩣ ‘ᨾᩣ ᩉᩮᩅᩴ’ ᨲᩥᩔ ᩅᨧᨶᩦᨿᩮᩣ ‘ᨾᩣᨿᩈ᩠ᨾᩣ ᩑᩅᩴ ᩋᩅᨧ, ᨾᩣ ᨽᨣᩅᨶ᩠ᨲᩴ ᩋᨻ᩠ᨽᩣᨧᩥᨠ᩠ᨡᩥ, ᨶ ᩉᩥ ᩈᩣᨵᩩ ᨽᨣᩅᨲᩮᩣ ᩋᨻ᩠ᨽᨠ᩠ᨡᩣᨶᩴ, ᨶ ᩉᩥ ᨽᨣᩅᩣ ᩑᩅᩴ ᩅᨴᩮᨿ᩠ᨿ. ᩋᨭ᩠ᨮᩣᨶᨾᩮᨲᩴ, ᩌᩅᩩᩈᩮᩣ, ᩋᨶᩅᨠᩣᩈᩮᩣ, ᨿᩴ ᩋᨶᩥᨾᩥᨲ᩠ᨲᩣᨿ ᨧᩮᨲᩮᩣᩅᩥᨾᩩᨲ᩠ᨲᩥᨿᩣ ᨽᩣᩅᩥᨲᩣᨿ ᨻᩉᩩᩃᩦᨠᨲᩣᨿ ᨿᩣᨶᩦᨠᨲᩣᨿ ᩅᨲ᩠ᨳᩩᨠᨲᩣᨿ ᩋᨶᩩᨭ᩠ᨮᩥᨲᩣᨿ ᨸᩁᩥᨧᩥᨲᩣᨿ ᩈᩩᩈᨾᩣᩁᨴ᩠ᨵᩣᨿ, ᩋᨳ ᨧ ᨸᨶᩔ ᨶᩥᨾᩥᨲ᩠ᨲᩣᨶᩩᩈᩣᩁᩥ ᩅᩥᨬ᩠ᨬᩣᨱᩴ ᨽᩅᩥᩔᨲᩥ, ᨶᩮᨲᩴ ᨮᩣᨶᩴ ᩅᩥᨩ᩠ᨩᨲᩥ. ᨶᩥᩔᩁᨱᩴ ᩉᩮᨲᩴ, ᩌᩅᩩᩈᩮᩣ, ᩈᨻ᩠ᨻᨶᩥᨾᩥᨲ᩠ᨲᩣᨶᩴ, ᨿᨴᩥᨴᩴ ᩋᨶᩥᨾᩥᨲ᩠ᨲᩣ ᨧᩮᨲᩮᩣᩅᩥᨾᩩᨲ᩠ᨲᩦ’ᨲᩥ.

‘‘ᩍᨵ ᨸᨶᩣᩅᩩᩈᩮᩣ, ᨽᩥᨠ᩠ᨡᩩ ᩑᩅᩴ ᩅᨴᩮᨿ᩠ᨿ – ‘ᩋᩈ᩠ᨾᩦᨲᩥ ᨡᩮᩣ ᨾᩮ ᩅᩥᨣᨲᩴ [ᩅᩥᨥᩣᨲᩴ (ᩈᩦ. ᨸᩦ.), ᩅᩥᨣᨲᩮ (ᩈ᩠ᨿᩣ. ᨠ.)], ᩋᨿᨾᩉᨾᩈ᩠ᨾᩦᨲᩥ ᨶ ᩈᨾᨶᩩᨸᩔᩣᨾᩥ, ᩋᨳ ᨧ ᨸᨶ ᨾᩮ ᩅᩥᨧᩥᨠᩥᨧ᩠ᨨᩣᨠᨳᨦ᩠ᨠᨳᩣᩈᩃ᩠ᩃᩴ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨲᩥᨭ᩠ᨮᨲᩦ’ᨲᩥ. ᩈᩮᩣ ‘ᨾᩣ ᩉᩮᩅᩴ’ ᨲᩥᩔ ᩅᨧᨶᩦᨿᩮᩣ ‘ᨾᩣᨿᩈ᩠ᨾᩣ ᩑᩅᩴ ᩋᩅᨧ, ᨾᩣ ᨽᨣᩅᨶ᩠ᨲᩴ ᩋᨻ᩠ᨽᩣᨧᩥᨠ᩠ᨡᩥ, ᨶ ᩉᩥ ᩈᩣᨵᩩ ᨽᨣᩅᨲᩮᩣ ᩋᨻ᩠ᨽᨠ᩠ᨡᩣᨶᩴ, ᨶ ᩉᩥ ᨽᨣᩅᩣ ᩑᩅᩴ ᩅᨴᩮᨿ᩠ᨿ. ᩋᨭ᩠ᨮᩣᨶᨾᩮᨲᩴ, ᩌᩅᩩᩈᩮᩣ, ᩋᨶᩅᨠᩣᩈᩮᩣ, ᨿᩴ ᩋᩈ᩠ᨾᩦᨲᩥ ᩅᩥᨣᨲᩮ [ᩅᩥᨥᩣᨲᩮ (ᩈᩦ. ᨸᩦ.)] ᩋᨿᨾᩉᨾᩈ᩠ᨾᩦᨲᩥ ᩋᩈᨾᨶᩩᨸᩔᨲᩮᩣ, ᩋᨳ ᨧ ᨸᨶᩔ ᩅᩥᨧᩥᨠᩥᨧ᩠ᨨᩣᨠᨳᨦ᩠ᨠᨳᩣᩈᩃ᩠ᩃᩴ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨮᩔᨲᩥ, ᨶᩮᨲᩴ ᨮᩣᨶᩴ ᩅᩥᨩ᩠ᨩᨲᩥ. ᨶᩥᩔᩁᨱᩴ ᩉᩮᨲᩴ, ᩌᩅᩩᩈᩮᩣ, ᩅᩥᨧᩥᨠᩥᨧ᩠ᨨᩣᨠᨳᨦ᩠ᨠᨳᩣᩈᩃ᩠ᩃᩔ, ᨿᨴᩥᨴᩴ ᩋᩈ᩠ᨾᩥᨾᩣᨶᩈᨾᩩᨣ᩠ᨥᩣᨲᩮᩣ’ᨲᩥ.

᪓᪒᪗. ‘‘ᨨ ᩋᨶᩩᨲ᩠ᨲᩁᩥᨿᩣᨶᩥ – ᨴᩔᨶᩣᨶᩩᨲ᩠ᨲᩁᩥᨿᩴ, ᩈᩅᨶᩣᨶᩩᨲ᩠ᨲᩁᩥᨿᩴ, ᩃᩣᨽᩣᨶᩩᨲ᩠ᨲᩁᩥᨿᩴ, ᩈᩥᨠ᩠ᨡᩣᨶᩩᨲ᩠ᨲᩁᩥᨿᩴ, ᨸᩣᩁᩥᨧᩁᩥᨿᩣᨶᩩᨲ᩠ᨲᩁᩥᨿᩴ, ᩋᨶᩩᩔᨲᩣᨶᩩᨲ᩠ᨲᩁᩥᨿᩴ.

‘‘ᨨ ᩋᨶᩩᩔᨲᩥᨭ᩠ᨮᩣᨶᩣᨶᩥ – ᨻᩩᨴ᩠ᨵᩣᨶᩩᩔᨲᩥ, ᨵᨾ᩠ᨾᩣᨶᩩᩔᨲᩥ, ᩈᨦ᩠ᨥᩣᨶᩩᩔᨲᩥ, ᩈᩦᩃᩣᨶᩩᩔᨲᩥ, ᨧᩣᨣᩣᨶᩩᩔᨲᩥ, ᨴᩮᩅᨲᩣᨶᩩᩔᨲᩥ.

᪓᪒᪘. ‘‘ᨨ ᩈᨲᨲᩅᩥᩉᩣᩁᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨧᨠ᩠ᨡᩩᨶᩣ ᩁᩪᨸᩴ ᨴᩥᩈ᩠ᩅᩣ ᨶᩮᩅ ᩈᩩᨾᨶᩮᩣ ᩉᩮᩣᨲᩥ ᨶ ᨴᩩᨾ᩠ᨾᨶᩮᩣ, ᩏᨸᩮᨠ᩠ᨡᨠᩮᩣ [ᩏᨸᩮᨠ᩠ᨡᨠᩮᩣ ᨧ (ᩈ᩠ᨿᩣ. ᨠ.)] ᩅᩥᩉᩁᨲᩥ ᩈᨲᩮᩣ ᩈᨾ᩠ᨸᨩᩣᨶᩮᩣ. ᩈᩮᩣᨲᩮᨶ ᩈᨴ᩠ᨴᩴ ᩈᩩᨲ᩠ᩅᩣ…ᨸᩮ… ᨾᨶᩈᩣ ᨵᨾ᩠ᨾᩴ ᩅᩥᨬ᩠ᨬᩣᨿ ᨶᩮᩅ ᩈᩩᨾᨶᩮᩣ ᩉᩮᩣᨲᩥ ᨶ ᨴᩩᨾ᩠ᨾᨶᩮᩣ, ᩏᨸᩮᨠ᩠ᨡᨠᩮᩣ ᩅᩥᩉᩁᨲᩥ ᩈᨲᩮᩣ ᩈᨾ᩠ᨸᨩᩣᨶᩮᩣ.

᪓᪒᪙. ‘‘ᨨᩊᩣᨽᩥᨩᩣᨲᩥᨿᩮᩣ. ᩍᨵᩣᩅᩩᩈᩮᩣ, ᩑᨠᨧ᩠ᨧᩮᩣ ᨠᨱ᩠ᩉᩣᨽᩥᨩᩣᨲᩥᨠᩮᩣ ᩈᨾᩣᨶᩮᩣ ᨠᨱ᩠ᩉᩴ ᨵᨾ᩠ᨾᩴ ᩋᨽᩥᨩᩣᨿᨲᩥ. ᩍᨵ ᨸᨶᩣᩅᩩᩈᩮᩣ, ᩑᨠᨧ᩠ᨧᩮᩣ ᨠᨱ᩠ᩉᩣᨽᩥᨩᩣᨲᩥᨠᩮᩣ ᩈᨾᩣᨶᩮᩣ ᩈᩩᨠ᩠ᨠᩴ ᨵᨾ᩠ᨾᩴ ᩋᨽᩥᨩᩣᨿᨲᩥ. ᩍᨵ ᨸᨶᩣᩅᩩᩈᩮᩣ, ᩑᨠᨧ᩠ᨧᩮᩣ ᨠᨱ᩠ᩉᩣᨽᩥᨩᩣᨲᩥᨠᩮᩣ ᩈᨾᩣᨶᩮᩣ ᩋᨠᨱ᩠ᩉᩴ ᩋᩈᩩᨠ᩠ᨠᩴ ᨶᩥᨻ᩠ᨻᩣᨶᩴ ᩋᨽᩥᨩᩣᨿᨲᩥ. ᩍᨵ ᨸᨶᩣᩅᩩᩈᩮᩣ, ᩑᨠᨧ᩠ᨧᩮᩣ ᩈᩩᨠ᩠ᨠᩣᨽᩥᨩᩣᨲᩥᨠᩮᩣ ᩈᨾᩣᨶᩮᩣ ᩈᩩᨠ᩠ᨠᩴ ᨵᨾ᩠ᨾᩴ ᩋᨽᩥᨩᩣᨿᨲᩥ. ᩍᨵ ᨸᨶᩣᩅᩩᩈᩮᩣ, ᩑᨠᨧ᩠ᨧᩮᩣ ᩈᩩᨠ᩠ᨠᩣᨽᩥᨩᩣᨲᩥᨠᩮᩣ ᩈᨾᩣᨶᩮᩣ ᨠᨱ᩠ᩉᩴ ᨵᨾ᩠ᨾᩴ ᩋᨽᩥᨩᩣᨿᨲᩥ. ᩍᨵ ᨸᨶᩣᩅᩩᩈᩮᩣ, ᩑᨠᨧ᩠ᨧᩮᩣ ᩈᩩᨠ᩠ᨠᩣᨽᩥᨩᩣᨲᩥᨠᩮᩣ ᩈᨾᩣᨶᩮᩣ ᩋᨠᨱ᩠ᩉᩴ ᩋᩈᩩᨠ᩠ᨠᩴ ᨶᩥᨻ᩠ᨻᩣᨶᩴ ᩋᨽᩥᨩᩣᨿᨲᩥ.

‘‘ᨨ ᨶᩥᨻ᩠ᨻᩮᨵᨽᩣᨣᩥᨿᩣ ᩈᨬ᩠ᨬᩣ [ᨶᩥᨻ᩠ᨻᩮᨵᨽᩣᨣᩥᨿᩈᨬ᩠ᨬᩣ (ᩈ᩠ᨿᩣ. ᨠᩴ.)] – ᩋᨶᩥᨧ᩠ᨧᩈᨬ᩠ᨬᩣ ᩋᨶᩥᨧ᩠ᨧᩮ, ᨴᩩᨠ᩠ᨡᩈᨬ᩠ᨬᩣ ᨴᩩᨠ᩠ᨡᩮ, ᩋᨶᨲ᩠ᨲᩈᨬ᩠ᨬᩣ, ᨸᩉᩣᨶᩈᨬ᩠ᨬᩣ, ᩅᩥᩁᩣᨣᩈᨬ᩠ᨬᩣ, ᨶᩥᩁᩮᩣᨵᩈᨬ᩠ᨬᩣ.

‘‘ᩍᨾᩮ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨨ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ; ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ…ᨸᩮ… ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ.

ᩈᨲ᩠ᨲᨠᩴ

᪓᪓᪐. ‘‘ᩋᨲ᩠ᨳᩥ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᩈᨲ᩠ᨲ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ; ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ…ᨸᩮ… ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᨠᨲᨾᩮ ᩈᨲ᩠ᨲ?

‘‘ᩈᨲ᩠ᨲ ᩋᩁᩥᨿᨵᨶᩣᨶᩥ – ᩈᨴ᩠ᨵᩣᨵᨶᩴ, ᩈᩦᩃᨵᨶᩴ, ᩉᩥᩁᩥᨵᨶᩴ, ᩒᨲ᩠ᨲᨸ᩠ᨸᨵᨶᩴ, ᩈᩩᨲᨵᨶᩴ, ᨧᩣᨣᨵᨶᩴ, ᨸᨬ᩠ᨬᩣᨵᨶᩴ.

‘‘ᩈᨲ᩠ᨲ ᨻᩮᩣᨩ᩠ᨫᨦ᩠ᨣᩣ – ᩈᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ, ᨵᨾ᩠ᨾᩅᩥᨧᨿᩈᨾ᩠ᨻᩮᩣᨩ᩠ᨫᨦ᩠ᨣᩮᩣ, ᩅᩦᩁᩥᨿᩈᨾ᩠ᨻᩮᩣᨩ᩠ᨫᨦ᩠ᨣᩮᩣ, ᨸᩦᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ, ᨸᩔᨴ᩠ᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ, ᩈᨾᩣᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ, ᩏᨸᩮᨠ᩠ᨡᩣᩈᨾ᩠ᨻᩮᩣᨩ᩠ᨫᨦ᩠ᨣᩮᩣ.

‘‘ᩈᨲ᩠ᨲ ᩈᨾᩣᨵᩥᨸᩁᩥᨠ᩠ᨡᩣᩁᩣ – ᩈᨾ᩠ᨾᩣᨴᩥᨭ᩠ᨮᩥ, ᩈᨾ᩠ᨾᩣᩈᨦ᩠ᨠᨸ᩠ᨸᩮᩣ, ᩈᨾ᩠ᨾᩣᩅᩣᨧᩣ, ᩈᨾ᩠ᨾᩣᨠᨾ᩠ᨾᨶ᩠ᨲᩮᩣ, ᩈᨾ᩠ᨾᩣᩌᨩᩦᩅᩮᩣ, ᩈᨾ᩠ᨾᩣᩅᩣᨿᩣᨾᩮᩣ, ᩈᨾ᩠ᨾᩣᩈᨲᩥ.

‘‘ᩈᨲ᩠ᨲ ᩋᩈᨴ᩠ᨵᨾ᩠ᨾᩣ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩋᩔᨴ᩠ᨵᩮᩣ ᩉᩮᩣᨲᩥ, ᩋᩉᩥᩁᩥᨠᩮᩣ ᩉᩮᩣᨲᩥ, ᩋᨶᩮᩣᨲ᩠ᨲᨸ᩠ᨸᩦ ᩉᩮᩣᨲᩥ, ᩋᨸ᩠ᨸᩔᩩᨲᩮᩣ ᩉᩮᩣᨲᩥ, ᨠᩩᩈᩦᨲᩮᩣ ᩉᩮᩣᨲᩥ, ᨾᩩᨭ᩠ᨮᩔᨲᩥ ᩉᩮᩣᨲᩥ, ᨴᩩᨸ᩠ᨸᨬ᩠ᨬᩮᩣ ᩉᩮᩣᨲᩥ.

‘‘ᩈᨲ᩠ᨲ ᩈᨴ᩠ᨵᨾ᩠ᨾᩣ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨴ᩠ᨵᩮᩣ ᩉᩮᩣᨲᩥ, ᩉᩥᩁᩥᨾᩣ ᩉᩮᩣᨲᩥ, ᩒᨲ᩠ᨲᨸ᩠ᨸᩦ ᩉᩮᩣᨲᩥ, ᨻᩉᩩᩔᩩᨲᩮᩣ ᩉᩮᩣᨲᩥ, ᩌᩁᨴ᩠ᨵᩅᩦᩁᩥᨿᩮᩣ ᩉᩮᩣᨲᩥ, ᩏᨸᨭ᩠ᨮᩥᨲᩔᨲᩥ ᩉᩮᩣᨲᩥ, ᨸᨬ᩠ᨬᩅᩣ ᩉᩮᩣᨲᩥ.

‘‘ᩈᨲ᩠ᨲ ᩈᨸ᩠ᨸᩩᩁᩥᩈᨵᨾ᩠ᨾᩣ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨵᨾ᩠ᨾᨬ᩠ᨬᩪ ᨧ ᩉᩮᩣᨲᩥ ᩋᨲ᩠ᨳᨬ᩠ᨬᩪ ᨧ ᩋᨲ᩠ᨲᨬ᩠ᨬᩪ ᨧ ᨾᨲ᩠ᨲᨬ᩠ᨬᩪ ᨧ ᨠᩣᩃᨬ᩠ᨬᩪ ᨧ ᨸᩁᩥᩈᨬ᩠ᨬᩪ ᨧ ᨸᩩᨣ᩠ᨣᩃᨬ᩠ᨬᩪ ᨧ.

᪓᪓᪑. ‘‘ᩈᨲ᩠ᨲ ᨶᩥᨴ᩠ᨴᩈᩅᨲ᩠ᨳᩪᨶᩥ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᩥᨠ᩠ᨡᩣᩈᨾᩣᨴᩣᨶᩮ ᨲᩥᨻ᩠ᨻᨧ᩠ᨨᨶ᩠ᨴᩮᩣ ᩉᩮᩣᨲᩥ, ᩌᨿᨲᩥᨬ᩠ᨧ ᩈᩥᨠ᩠ᨡᩣᩈᨾᩣᨴᩣᨶᩮ ᩋᩅᩥᨣᨲᨸᩮᨾᩮᩣ. ᨵᨾ᩠ᨾᨶᩥᩈᨶ᩠ᨲᩥᨿᩣ ᨲᩥᨻ᩠ᨻᨧ᩠ᨨᨶ᩠ᨴᩮᩣ ᩉᩮᩣᨲᩥ, ᩌᨿᨲᩥᨬ᩠ᨧ ᨵᨾ᩠ᨾᨶᩥᩈᨶ᩠ᨲᩥᨿᩣ ᩋᩅᩥᨣᨲᨸᩮᨾᩮᩣ. ᩍᨧ᩠ᨨᩣᩅᩥᨶᨿᩮ ᨲᩥᨻ᩠ᨻᨧ᩠ᨨᨶ᩠ᨴᩮᩣ ᩉᩮᩣᨲᩥ, ᩌᨿᨲᩥᨬ᩠ᨧ ᩍᨧ᩠ᨨᩣᩅᩥᨶᨿᩮ ᩋᩅᩥᨣᨲᨸᩮᨾᩮᩣ. ᨸᨭᩥᩈᩃ᩠ᩃᩣᨶᩮ ᨲᩥᨻ᩠ᨻᨧ᩠ᨨᨶ᩠ᨴᩮᩣ ᩉᩮᩣᨲᩥ, ᩌᨿᨲᩥᨬ᩠ᨧ ᨸᨭᩥᩈᩃ᩠ᩃᩣᨶᩮ ᩋᩅᩥᨣᨲᨸᩮᨾᩮᩣ. ᩅᩦᩁᩥᨿᩣᩁᨾ᩠ᨽᩮ ᨲᩥᨻ᩠ᨻᨧ᩠ᨨᨶ᩠ᨴᩮᩣ ᩉᩮᩣᨲᩥ, ᩌᨿᨲᩥᨬ᩠ᨧ ᩅᩦᩁᩥᨿᩣᩁᨾ᩠ᨽᩮ ᩋᩅᩥᨣᨲᨸᩮᨾᩮᩣ. ᩈᨲᩥᨶᩮᨸᨠ᩠ᨠᩮ ᨲᩥᨻ᩠ᨻᨧ᩠ᨨᨶ᩠ᨴᩮᩣ ᩉᩮᩣᨲᩥ, ᩌᨿᨲᩥᨬ᩠ᨧ ᩈᨲᩥᨶᩮᨸᨠ᩠ᨠᩮ ᩋᩅᩥᨣᨲᨸᩮᨾᩮᩣ. ᨴᩥᨭ᩠ᨮᩥᨸᨭᩥᩅᩮᨵᩮ ᨲᩥᨻ᩠ᨻᨧ᩠ᨨᨶ᩠ᨴᩮᩣ ᩉᩮᩣᨲᩥ, ᩌᨿᨲᩥᨬ᩠ᨧ ᨴᩥᨭ᩠ᨮᩥᨸᨭᩥᩅᩮᨵᩮ ᩋᩅᩥᨣᨲᨸᩮᨾᩮᩣ.

‘‘ᩈᨲ᩠ᨲ ᩈᨬ᩠ᨬᩣ – ᩋᨶᩥᨧ᩠ᨧᩈᨬ᩠ᨬᩣ, ᩋᨶᨲ᩠ᨲᩈᨬ᩠ᨬᩣ, ᩋᩈᩩᨽᩈᨬ᩠ᨬᩣ, ᩌᨴᩦᨶᩅᩈᨬ᩠ᨬᩣ, ᨸᩉᩣᨶᩈᨬ᩠ᨬᩣ, ᩅᩥᩁᩣᨣᩈᨬ᩠ᨬᩣ, ᨶᩥᩁᩮᩣᨵᩈᨬ᩠ᨬᩣ.

‘‘ᩈᨲ᩠ᨲ ᨻᩃᩣᨶᩥ – ᩈᨴ᩠ᨵᩣᨻᩃᩴ, ᩅᩦᩁᩥᨿᨻᩃᩴ, ᩉᩥᩁᩥᨻᩃᩴ, ᩒᨲ᩠ᨲᨸ᩠ᨸᨻᩃᩴ, ᩈᨲᩥᨻᩃᩴ, ᩈᨾᩣᨵᩥᨻᩃᩴ, ᨸᨬ᩠ᨬᩣᨻᩃᩴ.

᪓᪓᪒. ‘‘ᩈᨲ᩠ᨲ ᩅᩥᨬ᩠ᨬᩣᨱᨭ᩠ᨮᩥᨲᩥᨿᩮᩣ. ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᨶᩣᨶᨲ᩠ᨲᨠᩣᨿᩣ ᨶᩣᨶᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨾᨶᩩᩔᩣ ᩑᨠᨧ᩠ᨧᩮ ᨧ ᨴᩮᩅᩣ ᩑᨠᨧ᩠ᨧᩮ ᨧ ᩅᩥᨶᩥᨸᩣᨲᩥᨠᩣ. ᩋᨿᩴ ᨸᨮᨾᩣ ᩅᩥᨬ᩠ᨬᩣᨱᨭ᩠ᨮᩥᨲᩥ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᨶᩣᨶᨲ᩠ᨲᨠᩣᨿᩣ ᩑᨠᨲ᩠ᨲᩈᨬ᩠ᨬᩥᨶᩮᩣ ᩈᩮᨿ᩠ᨿᨳᩣᨸᩥ ᨴᩮᩅᩣ ᨻᩕᩉ᩠ᨾᨠᩣᨿᩥᨠᩣ ᨸᨮᨾᩣᨽᩥᨶᩥᨻ᩠ᨻᨲ᩠ᨲᩣ. ᩋᨿᩴ ᨴᩩᨲᩥᨿᩣ ᩅᩥᨬ᩠ᨬᩣᨱᨭ᩠ᨮᩥᨲᩥ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩑᨠᨲ᩠ᨲᨠᩣᨿᩣ ᨶᩣᨶᨲ᩠ᨲᩈᨬ᩠ᨬᩥᨶᩮᩣ ᩈᩮᨿ᩠ᨿᨳᩣᨸᩥ ᨴᩮᩅᩣ ᩌᨽᩔᩁᩣ. ᩋᨿᩴ ᨲᨲᩥᨿᩣ ᩅᩥᨬ᩠ᨬᩣᨱᨭ᩠ᨮᩥᨲᩥ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩑᨠᨲ᩠ᨲᨠᩣᨿᩣ ᩑᨠᨲ᩠ᨲᩈᨬ᩠ᨬᩥᨶᩮᩣ ᩈᩮᨿ᩠ᨿᨳᩣᨸᩥ ᨴᩮᩅᩣ ᩈᩩᨽᨠᩥᨱ᩠ᩉᩣ. ᩋᨿᩴ ᨧᨲᩩᨲ᩠ᨳᩦ ᩅᩥᨬ᩠ᨬᩣᨱᨭ᩠ᨮᩥᨲᩥ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩈᨻ᩠ᨻᩈᩮᩣ ᩁᩪᨸᩈᨬ᩠ᨬᩣᨶᩴ ᩈᨾᨲᩥᨠ᩠ᨠᨾᩣ ᨸᨭᩥᨥᩈᨬ᩠ᨬᩣᨶᩴ ᩋᨲ᩠ᨳᨦ᩠ᨣᨾᩣ ᨶᩣᨶᨲ᩠ᨲᩈᨬ᩠ᨬᩣᨶᩴ ᩋᨾᨶᩈᩥᨠᩣᩁᩣ ‘ᩋᨶᨶ᩠ᨲᩮᩣ ᩌᨠᩣᩈᩮᩣ’ᨲᩥ ᩌᨠᩣᩈᩣᨶᨬ᩠ᨧᩣᨿᨲᨶᩪᨸᨣᩣ. ᩋᨿᩴ ᨸᨬ᩠ᨧᨾᩦ ᩅᩥᨬ᩠ᨬᩣᨱᨭ᩠ᨮᩥᨲᩥ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩈᨻ᩠ᨻᩈᩮᩣ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᩋᨶᨶ᩠ᨲᩴ ᩅᩥᨬ᩠ᨬᩣᨱ’ᨶ᩠ᨲᩥ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩪᨸᨣᩣ. ᩋᨿᩴ ᨨᨭ᩠ᨮᩦ ᩅᩥᨬ᩠ᨬᩣᨱᨭ᩠ᨮᩥᨲᩥ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩈᨻ᩠ᨻᩈᩮᩣ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᨶᨲ᩠ᨳᩥ ᨠᩥᨬ᩠ᨧᩦ’ᨲᩥ ᩌᨠᩥᨬ᩠ᨧᨬ᩠ᨬᩣᨿᨲᨶᩪᨸᨣᩣ. ᩋᨿᩴ ᩈᨲ᩠ᨲᨾᩦ ᩅᩥᨬ᩠ᨬᩣᨱᨭ᩠ᨮᩥᨲᩥ.

‘‘ᩈᨲ᩠ᨲ ᨸᩩᨣ᩠ᨣᩃᩣ ᨴᨠ᩠ᨡᩥᨱᩮᨿ᩠ᨿᩣ – ᩏᨽᨲᩮᩣᨽᩣᨣᩅᩥᨾᩩᨲ᩠ᨲᩮᩣ, ᨸᨬ᩠ᨬᩣᩅᩥᨾᩩᨲ᩠ᨲᩮᩣ, ᨠᩣᨿᩈᨠ᩠ᨡᩥ, ᨴᩥᨭ᩠ᨮᩥᨸ᩠ᨸᨲ᩠ᨲᩮᩣ, ᩈᨴ᩠ᨵᩣᩅᩥᨾᩩᨲ᩠ᨲᩮᩣ, ᨵᨾ᩠ᨾᩣᨶᩩᩈᩣᩁᩦ, ᩈᨴ᩠ᨵᩣᨶᩩᩈᩣᩁᩦ.

‘‘ᩈᨲ᩠ᨲ ᩋᨶᩩᩈᨿᩣ – ᨠᩣᨾᩁᩣᨣᩣᨶᩩᩈᨿᩮᩣ, ᨸᨭᩥᨥᩣᨶᩩᩈᨿᩮᩣ, ᨴᩥᨭ᩠ᨮᩣᨶᩩᩈᨿᩮᩣ, ᩅᩥᨧᩥᨠᩥᨧ᩠ᨨᩣᨶᩩᩈᨿᩮᩣ, ᨾᩣᨶᩣᨶᩩᩈᨿᩮᩣ, ᨽᩅᩁᩣᨣᩣᨶᩩᩈᨿᩮᩣ, ᩋᩅᩥᨩ᩠ᨩᩣᨶᩩᩈᨿᩮᩣ.

‘‘ᩈᨲ᩠ᨲ ᩈᨬ᩠ᨬᩮᩣᨩᨶᩣᨶᩥ – ᩋᨶᩩᨶᨿᩈᨬ᩠ᨬᩮᩣᨩᨶᩴ [ᨠᩣᨾᩈᨬ᩠ᨬᩮᩣᨩᨶᩴ (ᩈ᩠ᨿᩣ. ᨠᩴ.)], ᨸᨭᩥᨥᩈᨬ᩠ᨬᩮᩣᨩᨶᩴ, ᨴᩥᨭ᩠ᨮᩥᩈᨬ᩠ᨬᩮᩣᨩᨶᩴ, ᩅᩥᨧᩥᨠᩥᨧ᩠ᨨᩣᩈᨬ᩠ᨬᩮᩣᨩᨶᩴ, ᨾᩣᨶᩈᨬ᩠ᨬᩮᩣᨩᨶᩴ, ᨽᩅᩁᩣᨣᩈᨬ᩠ᨬᩮᩣᨩᨶᩴ, ᩋᩅᩥᨩ᩠ᨩᩣᩈᨬ᩠ᨬᩮᩣᨩᨶᩴ.

‘‘ᩈᨲ᩠ᨲ ᩋᨵᩥᨠᩁᨱᩈᨾᨳᩣ – ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᩣᨶᩴ ᩋᨵᩥᨠᩁᨱᩣᨶᩴ ᩈᨾᨳᩣᨿ ᩅᩪᨸᩈᨾᩣᨿ ᩈᨾ᩠ᨾᩩᨡᩣᩅᩥᨶᨿᩮᩣ ᨴᩣᨲᨻ᩠ᨻᩮᩣ, ᩈᨲᩥᩅᩥᨶᨿᩮᩣ ᨴᩣᨲᨻ᩠ᨻᩮᩣ, ᩋᨾᩪᩊ᩠ᩉᩅᩥᨶᨿᩮᩣ ᨴᩣᨲᨻ᩠ᨻᩮᩣ, ᨸᨭᩥᨬ᩠ᨬᩣᨿ ᨠᩣᩁᩮᨲᨻ᩠ᨻᩴ, ᨿᩮᨽᩩᨿ᩠ᨿᩈᩥᨠᩣ, ᨲᩔᨸᩣᨸᩥᨿᩈᩥᨠᩣ, ᨲᩥᨱᩅᨲ᩠ᨳᩣᩁᨠᩮᩣ.

‘‘ᩍᨾᩮ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᩈᨲ᩠ᨲ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ; ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ…ᨸᩮ… ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ.

ᨴᩩᨲᩥᨿᨽᩣᨱᩅᩣᩁᩮᩣ ᨶᩥᨭ᩠ᨮᩥᨲᩮᩣ.

ᩋᨭ᩠ᨮᨠᩴ

᪓᪓᪓. ‘‘ᩋᨲ᩠ᨳᩥ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᩋᨭ᩠ᨮ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ; ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ…ᨸᩮ… ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᨠᨲᨾᩮ ᩋᨭ᩠ᨮ?

‘‘ᩋᨭ᩠ᨮ ᨾᩥᨧ᩠ᨨᨲ᩠ᨲᩣ – ᨾᩥᨧ᩠ᨨᩣᨴᩥᨭ᩠ᨮᩥ, ᨾᩥᨧ᩠ᨨᩣᩈᨦ᩠ᨠᨸ᩠ᨸᩮᩣ, ᨾᩥᨧ᩠ᨨᩣᩅᩣᨧᩣ, ᨾᩥᨧ᩠ᨨᩣᨠᨾ᩠ᨾᨶ᩠ᨲᩮᩣ, ᨾᩥᨧ᩠ᨨᩣᩌᨩᩦᩅᩮᩣ, ᨾᩥᨧ᩠ᨨᩣᩅᩣᨿᩣᨾᩮᩣ ᨾᩥᨧ᩠ᨨᩣᩈᨲᩥ, ᨾᩥᨧ᩠ᨨᩣᩈᨾᩣᨵᩥ.

‘‘ᩋᨭ᩠ᨮ ᩈᨾ᩠ᨾᨲ᩠ᨲᩣ – ᩈᨾ᩠ᨾᩣᨴᩥᨭ᩠ᨮᩥ, ᩈᨾ᩠ᨾᩣᩈᨦ᩠ᨠᨸ᩠ᨸᩮᩣ, ᩈᨾ᩠ᨾᩣᩅᩣᨧᩣ, ᩈᨾ᩠ᨾᩣᨠᨾ᩠ᨾᨶ᩠ᨲᩮᩣ, ᩈᨾ᩠ᨾᩣᩌᨩᩦᩅᩮᩣ, ᩈᨾ᩠ᨾᩣᩅᩣᨿᩣᨾᩮᩣ, ᩈᨾ᩠ᨾᩣᩈᨲᩥ, ᩈᨾ᩠ᨾᩣᩈᨾᩣᨵᩥ.

‘‘ᩋᨭ᩠ᨮ ᨸᩩᨣ᩠ᨣᩃᩣ ᨴᨠ᩠ᨡᩥᨱᩮᨿ᩠ᨿᩣ – ᩈᩮᩣᨲᩣᨸᨶ᩠ᨶᩮᩣ, ᩈᩮᩣᨲᩣᨸᨲ᩠ᨲᩥᨹᩃᩈᨧ᩠ᨨᩥᨠᩥᩁᩥᨿᩣᨿ ᨸᨭᩥᨸᨶ᩠ᨶᩮᩣ; ᩈᨠᨴᩣᨣᩣᨾᩦ, ᩈᨠᨴᩣᨣᩣᨾᩥᨹᩃᩈᨧ᩠ᨨᩥᨠᩥᩁᩥᨿᩣᨿ ᨸᨭᩥᨸᨶ᩠ᨶᩮᩣ; ᩋᨶᩣᨣᩣᨾᩦ, ᩋᨶᩣᨣᩣᨾᩥᨹᩃᩈᨧ᩠ᨨᩥᨠᩥᩁᩥᨿᩣᨿ ᨸᨭᩥᨸᨶ᩠ᨶᩮᩣ; ᩋᩁᩉᩣ, ᩋᩁᩉᨲ᩠ᨲᨹᩃᩈᨧ᩠ᨨᩥᨠᩥᩁᩥᨿᩣᨿ ᨸᨭᩥᨸᨶ᩠ᨶᩮᩣ.

᪓᪓᪔. ‘‘ᩋᨭ᩠ᨮ ᨠᩩᩈᩦᨲᩅᨲ᩠ᨳᩪᨶᩥ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩣ ᨠᨾ᩠ᨾᩴ ᨠᩣᨲᨻ᩠ᨻᩴ ᩉᩮᩣᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᨠᨾ᩠ᨾᩴ ᨡᩮᩣ ᨾᩮ ᨠᩣᨲᨻ᩠ᨻᩴ ᨽᩅᩥᩔᨲᩥ, ᨠᨾ᩠ᨾᩴ ᨡᩮᩣ ᨸᨶ ᨾᩮ ᨠᩁᩮᩣᨶ᩠ᨲᩔ ᨠᩣᨿᩮᩣ ᨠᩥᩃᨾᩥᩔᨲᩥ, ᩉᨶ᩠ᨴᩣᩉᩴ ᨶᩥᨸᨩ᩠ᨩᩣᨾᩦ’ᨲᩥ! ᩈᩮᩣ ᨶᩥᨸᨩ᩠ᨩᨲᩥ ᨶ ᩅᩦᩁᩥᨿᩴ ᩌᩁᨽᨲᩥ ᩋᨸ᩠ᨸᨲ᩠ᨲᩔ ᨸᨲ᩠ᨲᩥᨿᩣ ᩋᨶᨵᩥᨣᨲᩔ ᩋᨵᩥᨣᨾᩣᨿ ᩋᩈᨧ᩠ᨨᩥᨠᨲᩔ ᩈᨧ᩠ᨨᩥᨠᩥᩁᩥᨿᩣᨿ. ᩍᨴᩴ ᨸᨮᨾᩴ ᨠᩩᩈᩦᨲᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩣ ᨠᨾ᩠ᨾᩴ ᨠᨲᩴ ᩉᩮᩣᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨠᨾ᩠ᨾᩴ ᩋᨠᩣᩈᩥᩴ, ᨠᨾ᩠ᨾᩴ ᨡᩮᩣ ᨸᨶ ᨾᩮ ᨠᩁᩮᩣᨶ᩠ᨲᩔ ᨠᩣᨿᩮᩣ ᨠᩥᩃᨶ᩠ᨲᩮᩣ, ᩉᨶ᩠ᨴᩣᩉᩴ ᨶᩥᨸᨩ᩠ᨩᩣᨾᩦ’ᨲᩥ! ᩈᩮᩣ ᨶᩥᨸᨩ᩠ᨩᨲᩥ ᨶ ᩅᩦᩁᩥᨿᩴ ᩌᩁᨽᨲᩥ…ᨸᩮ… ᩍᨴᩴ ᨴᩩᨲᩥᨿᩴ ᨠᩩᩈᩦᨲᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩣ ᨾᨣ᩠ᨣᩮᩣ ᨣᨶ᩠ᨲᨻ᩠ᨻᩮᩣ ᩉᩮᩣᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᨾᨣ᩠ᨣᩮᩣ ᨡᩮᩣ ᨾᩮ ᨣᨶ᩠ᨲᨻ᩠ᨻᩮᩣ ᨽᩅᩥᩔᨲᩥ, ᨾᨣ᩠ᨣᩴ ᨡᩮᩣ ᨸᨶ ᨾᩮ ᨣᨧ᩠ᨨᨶ᩠ᨲᩔ ᨠᩣᨿᩮᩣ ᨠᩥᩃᨾᩥᩔᨲᩥ, ᩉᨶ᩠ᨴᩣᩉᩴ ᨶᩥᨸᨩ᩠ᨩᩣᨾᩦ’ᨲᩥ! ᩈᩮᩣ ᨶᩥᨸᨩ᩠ᨩᨲᩥ ᨶ ᩅᩦᩁᩥᨿᩴ ᩌᩁᨽᨲᩥ… ᩍᨴᩴ ᨲᨲᩥᨿᩴ ᨠᩩᩈᩦᨲᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩣ ᨾᨣ᩠ᨣᩮᩣ ᨣᨲᩮᩣ ᩉᩮᩣᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨾᨣ᩠ᨣᩴ ᩋᨣᨾᩣᩈᩥᩴ, ᨾᨣ᩠ᨣᩴ ᨡᩮᩣ ᨸᨶ ᨾᩮ ᨣᨧ᩠ᨨᨶ᩠ᨲᩔ ᨠᩣᨿᩮᩣ ᨠᩥᩃᨶ᩠ᨲᩮᩣ, ᩉᨶ᩠ᨴᩣᩉᩴ ᨶᩥᨸᨩ᩠ᨩᩣᨾᩦ’ᨲᩥ! ᩈᩮᩣ ᨶᩥᨸᨩ᩠ᨩᨲᩥ ᨶ ᩅᩦᩁᩥᨿᩴ ᩌᩁᨽᨲᩥ… ᩍᨴᩴ ᨧᨲᩩᨲ᩠ᨳᩴ ᨠᩩᩈᩦᨲᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᨶ ᩃᨽᨲᩥ ᩃᩪᨡᩔ ᩅᩣ ᨸᨱᩦᨲᩔ ᩅᩣ ᨽᩮᩣᨩᨶᩔ ᨿᩣᩅᨴᨲ᩠ᨳᩴ ᨸᩣᩁᩥᨸᩪᩁᩥᩴ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᨶᩣᩃᨲ᩠ᨳᩴ ᩃᩪᨡᩔ ᩅᩣ ᨸᨱᩦᨲᩔ ᩅᩣ ᨽᩮᩣᨩᨶᩔ ᨿᩣᩅᨴᨲ᩠ᨳᩴ ᨸᩣᩁᩥᨸᩪᩁᩥᩴ, ᨲᩔ ᨾᩮ ᨠᩣᨿᩮᩣ ᨠᩥᩃᨶ᩠ᨲᩮᩣ ᩋᨠᨾ᩠ᨾᨬ᩠ᨬᩮᩣ, ᩉᨶ᩠ᨴᩣᩉᩴ ᨶᩥᨸᨩ᩠ᨩᩣᨾᩦ’ᨲᩥ! ᩈᩮᩣ ᨶᩥᨸᨩ᩠ᨩᨲᩥ ᨶ ᩅᩦᩁᩥᨿᩴ ᩌᩁᨽᨲᩥ… ᩍᨴᩴ ᨸᨬ᩠ᨧᨾᩴ ᨠᩩᩈᩦᨲᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᩃᨽᨲᩥ ᩃᩪᨡᩔ ᩅᩣ ᨸᨱᩦᨲᩔ ᩅᩣ ᨽᩮᩣᨩᨶᩔ ᨿᩣᩅᨴᨲ᩠ᨳᩴ ᨸᩣᩁᩥᨸᩪᩁᩥᩴ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᩋᩃᨲ᩠ᨳᩴ ᩃᩪᨡᩔ ᩅᩣ ᨸᨱᩦᨲᩔ ᩅᩣ ᨽᩮᩣᨩᨶᩔ ᨿᩣᩅᨴᨲ᩠ᨳᩴ ᨸᩣᩁᩥᨸᩪᩁᩥᩴ, ᨲᩔ ᨾᩮ ᨠᩣᨿᩮᩣ ᨣᩁᩩᨠᩮᩣ ᩋᨠᨾ᩠ᨾᨬ᩠ᨬᩮᩣ, ᨾᩣᩈᩣᨧᩥᨲᩴ ᨾᨬ᩠ᨬᩮ, ᩉᨶ᩠ᨴᩣᩉᩴ ᨶᩥᨸᨩ᩠ᨩᩣᨾᩦ’ᨲᩥ! ᩈᩮᩣ ᨶᩥᨸᨩ᩠ᨩᨲᩥ ᨶ ᩅᩦᩁᩥᨿᩴ ᩌᩁᨽᨲᩥ… ᩍᨴᩴ ᨨᨭ᩠ᨮᩴ ᨠᩩᩈᩦᨲᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩏᨸ᩠ᨸᨶ᩠ᨶᩮᩣ ᩉᩮᩣᨲᩥ ᩋᨸ᩠ᨸᨾᨲ᩠ᨲᨠᩮᩣ ᩌᨻᩣᨵᩮᩣ. ᨲᩔ ᩑᩅᩴ ᩉᩮᩣᨲᩥ – ‘ᩏᨸ᩠ᨸᨶ᩠ᨶᩮᩣ ᨡᩮᩣ ᨾᩮ ᩋᨿᩴ ᩋᨸ᩠ᨸᨾᨲ᩠ᨲᨠᩮᩣ ᩌᨻᩣᨵᩮᩣ; ᩋᨲ᩠ᨳᩥ ᨠᨸ᩠ᨸᩮᩣ ᨶᩥᨸᨩ᩠ᨩᩥᨲᩩᩴ, ᩉᨶ᩠ᨴᩣᩉᩴ ᨶᩥᨸᨩ᩠ᨩᩣᨾᩦ’ᨲᩥ! ᩈᩮᩣ ᨶᩥᨸᨩ᩠ᨩᨲᩥ ᨶ ᩅᩦᩁᩥᨿᩴ ᩌᩁᨽᨲᩥ… ᩍᨴᩴ ᩈᨲ᩠ᨲᨾᩴ ᨠᩩᩈᩦᨲᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨣᩥᩃᩣᨶᩣ ᩅᩩᨭ᩠ᨮᩥᨲᩮᩣ [ᨣᩥᩃᩣᨶᩅᩩᨭ᩠ᨮᩥᨲᩮᩣ (ᩈᨴ᩠ᨴᨶᩦᨲᩥ) ᩋ. ᨶᩥ. ᪖.᪑᪖ ᨶᨠᩩᩃᨸᩥᨲᩩᩈᩩᨲ᩠ᨲᨭᩦᨠᩣ ᨸᩔᩥᨲᨻ᩠ᨻᩣ] ᩉᩮᩣᨲᩥ ᩋᨧᩥᩁᩅᩩᨭ᩠ᨮᩥᨲᩮᩣ ᨣᩮᩃᨬ᩠ᨬᩣ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨣᩥᩃᩣᨶᩣ ᩅᩩᨭ᩠ᨮᩥᨲᩮᩣ ᩋᨧᩥᩁᩅᩩᨭ᩠ᨮᩥᨲᩮᩣ ᨣᩮᩃᨬ᩠ᨬᩣ, ᨲᩔ ᨾᩮ ᨠᩣᨿᩮᩣ ᨴᩩᨻ᩠ᨻᩃᩮᩣ ᩋᨠᨾ᩠ᨾᨬ᩠ᨬᩮᩣ, ᩉᨶ᩠ᨴᩣᩉᩴ ᨶᩥᨸᨩ᩠ᨩᩣᨾᩦ’ᨲᩥ! ᩈᩮᩣ ᨶᩥᨸᨩ᩠ᨩᨲᩥ ᨶ ᩅᩦᩁᩥᨿᩴ ᩌᩁᨽᨲᩥ ᩋᨸ᩠ᨸᨲ᩠ᨲᩔ ᨸᨲ᩠ᨲᩥᨿᩣ ᩋᨶᨵᩥᨣᨲᩔ ᩋᨵᩥᨣᨾᩣᨿ ᩋᩈᨧ᩠ᨨᩥᨠᨲᩔ ᩈᨧ᩠ᨨᩥᨠᩥᩁᩥᨿᩣᨿ. ᩍᨴᩴ ᩋᨭ᩠ᨮᨾᩴ ᨠᩩᩈᩦᨲᩅᨲ᩠ᨳᩩ.

᪓᪓᪕. ‘‘ᩋᨭ᩠ᨮ ᩌᩁᨾ᩠ᨽᩅᨲ᩠ᨳᩪᨶᩥ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩣ ᨠᨾ᩠ᨾᩴ ᨠᩣᨲᨻ᩠ᨻᩴ ᩉᩮᩣᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᨠᨾ᩠ᨾᩴ ᨡᩮᩣ ᨾᩮ ᨠᩣᨲᨻ᩠ᨻᩴ ᨽᩅᩥᩔᨲᩥ, ᨠᨾ᩠ᨾᩴ ᨡᩮᩣ ᨸᨶ ᨾᩮ ᨠᩁᩮᩣᨶ᩠ᨲᩮᨶ ᨶ ᩈᩩᨠᩁᩴ ᨻᩩᨴ᩠ᨵᩣᨶᩴ ᩈᩣᩈᨶᩴ ᨾᨶᩈᩥ ᨠᩣᨲᩩᩴ, ᩉᨶ᩠ᨴᩣᩉᩴ ᩅᩦᩁᩥᨿᩴ ᩌᩁᨽᩣᨾᩥ ᩋᨸ᩠ᨸᨲ᩠ᨲᩔ ᨸᨲ᩠ᨲᩥᨿᩣ ᩋᨶᨵᩥᨣᨲᩔ ᩋᨵᩥᨣᨾᩣᨿ, ᩋᩈᨧ᩠ᨨᩥᨠᨲᩔ ᩈᨧ᩠ᨨᩥᨠᩥᩁᩥᨿᩣᨿᩣ’ᨲᩥ! ᩈᩮᩣ ᩅᩦᩁᩥᨿᩴ ᩌᩁᨽᨲᩥ ᩋᨸ᩠ᨸᨲ᩠ᨲᩔ ᨸᨲ᩠ᨲᩥᨿᩣ, ᩋᨶᨵᩥᨣᨲᩔ ᩋᨵᩥᨣᨾᩣᨿ ᩋᩈᨧ᩠ᨨᩥᨠᨲᩔ ᩈᨧ᩠ᨨᩥᨠᩥᩁᩥᨿᩣᨿ. ᩍᨴᩴ ᨸᨮᨾᩴ ᩌᩁᨾ᩠ᨽᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩣ ᨠᨾ᩠ᨾᩴ ᨠᨲᩴ ᩉᩮᩣᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨠᨾ᩠ᨾᩴ ᩋᨠᩣᩈᩥᩴ, ᨠᨾ᩠ᨾᩴ ᨡᩮᩣ ᨸᨶᩣᩉᩴ ᨠᩁᩮᩣᨶ᩠ᨲᩮᩣ ᨶᩣᩈᨠ᩠ᨡᩥᩴ ᨻᩩᨴ᩠ᨵᩣᨶᩴ ᩈᩣᩈᨶᩴ ᨾᨶᩈᩥ ᨠᩣᨲᩩᩴ, ᩉᨶ᩠ᨴᩣᩉᩴ ᩅᩦᩁᩥᨿᩴ ᩌᩁᨽᩣᨾᩥ…ᨸᩮ… ᩈᩮᩣ ᩅᩦᩁᩥᨿᩴ ᩌᩁᨽᨲᩥ… ᩍᨴᩴ ᨴᩩᨲᩥᨿᩴ ᩌᩁᨾ᩠ᨽᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩣ ᨾᨣ᩠ᨣᩮᩣ ᨣᨶ᩠ᨲᨻ᩠ᨻᩮᩣ ᩉᩮᩣᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᨾᨣ᩠ᨣᩮᩣ ᨡᩮᩣ ᨾᩮ ᨣᨶ᩠ᨲᨻ᩠ᨻᩮᩣ ᨽᩅᩥᩔᨲᩥ, ᨾᨣ᩠ᨣᩴ ᨡᩮᩣ ᨸᨶ ᨾᩮ ᨣᨧ᩠ᨨᨶ᩠ᨲᩮᨶ ᨶ ᩈᩩᨠᩁᩴ ᨻᩩᨴ᩠ᨵᩣᨶᩴ ᩈᩣᩈᨶᩴ ᨾᨶᩈᩥ ᨠᩣᨲᩩᩴ. ᩉᨶ᩠ᨴᩣᩉᩴ ᩅᩦᩁᩥᨿᩴ ᩌᩁᨽᩣᨾᩥ…ᨸᩮ… ᩈᩮᩣ ᩅᩦᩁᩥᨿᩴ ᩌᩁᨽᨲᩥ… ᩍᨴᩴ ᨲᨲᩥᨿᩴ ᩌᩁᨾ᩠ᨽᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩣ ᨾᨣ᩠ᨣᩮᩣ ᨣᨲᩮᩣ ᩉᩮᩣᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨾᨣ᩠ᨣᩴ ᩋᨣᨾᩣᩈᩥᩴ, ᨾᨣ᩠ᨣᩴ ᨡᩮᩣ ᨸᨶᩣᩉᩴ ᨣᨧ᩠ᨨᨶ᩠ᨲᩮᩣ ᨶᩣᩈᨠ᩠ᨡᩥᩴ ᨻᩩᨴ᩠ᨵᩣᨶᩴ ᩈᩣᩈᨶᩴ ᨾᨶᩈᩥ ᨠᩣᨲᩩᩴ, ᩉᨶ᩠ᨴᩣᩉᩴ ᩅᩦᩁᩥᨿᩴ ᩌᩁᨽᩣᨾᩥ…ᨸᩮ… ᩈᩮᩣ ᩅᩦᩁᩥᨿᩴ ᩌᩁᨽᨲᩥ… ᩍᨴᩴ ᨧᨲᩩᨲ᩠ᨳᩴ ᩌᩁᨾ᩠ᨽᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᨶ ᩃᨽᨲᩥ ᩃᩪᨡᩔ ᩅᩣ ᨸᨱᩦᨲᩔ ᩅᩣ ᨽᩮᩣᨩᨶᩔ ᨿᩣᩅᨴᨲ᩠ᨳᩴ ᨸᩣᩁᩥᨸᩪᩁᩥᩴ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᨶᩣᩃᨲ᩠ᨳᩴ ᩃᩪᨡᩔ ᩅᩣ ᨸᨱᩦᨲᩔ ᩅᩣ ᨽᩮᩣᨩᨶᩔ ᨿᩣᩅᨴᨲ᩠ᨳᩴ ᨸᩣᩁᩥᨸᩪᩁᩥᩴ, ᨲᩔ ᨾᩮ ᨠᩣᨿᩮᩣ ᩃᩉᩩᨠᩮᩣ ᨠᨾ᩠ᨾᨬ᩠ᨬᩮᩣ, ᩉᨶ᩠ᨴᩣᩉᩴ ᩅᩦᩁᩥᨿᩴ ᩌᩁᨽᩣᨾᩥ…ᨸᩮ… ᩈᩮᩣ ᩅᩦᩁᩥᨿᩴ ᩌᩁᨽᨲᩥ… ᩍᨴᩴ ᨸᨬ᩠ᨧᨾᩴ ᩌᩁᨾ᩠ᨽᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᩃᨽᨲᩥ ᩃᩪᨡᩔ ᩅᩣ ᨸᨱᩦᨲᩔ ᩅᩣ ᨽᩮᩣᨩᨶᩔ ᨿᩣᩅᨴᨲ᩠ᨳᩴ ᨸᩣᩁᩥᨸᩪᩁᩥᩴ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᩋᩃᨲ᩠ᨳᩴ ᩃᩪᨡᩔ ᩅᩣ ᨸᨱᩦᨲᩔ ᩅᩣ ᨽᩮᩣᨩᨶᩔ ᨿᩣᩅᨴᨲ᩠ᨳᩴ ᨸᩣᩁᩥᨸᩪᩁᩥᩴ, ᨲᩔ ᨾᩮ ᨠᩣᨿᩮᩣ ᨻᩃᩅᩣ ᨠᨾ᩠ᨾᨬ᩠ᨬᩮᩣ, ᩉᨶ᩠ᨴᩣᩉᩴ ᩅᩦᩁᩥᨿᩴ ᩌᩁᨽᩣᨾᩥ…ᨸᩮ… ᩈᩮᩣ ᩅᩦᩁᩥᨿᩴ ᩌᩁᨽᨲᩥ… ᩍᨴᩴ ᨨᨭ᩠ᨮᩴ ᩌᩁᨾ᩠ᨽᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩏᨸ᩠ᨸᨶ᩠ᨶᩮᩣ ᩉᩮᩣᨲᩥ ᩋᨸ᩠ᨸᨾᨲ᩠ᨲᨠᩮᩣ ᩌᨻᩣᨵᩮᩣ. ᨲᩔ ᩑᩅᩴ ᩉᩮᩣᨲᩥ – ‘ᩏᨸ᩠ᨸᨶ᩠ᨶᩮᩣ ᨡᩮᩣ ᨾᩮ ᩋᨿᩴ ᩋᨸ᩠ᨸᨾᨲ᩠ᨲᨠᩮᩣ ᩌᨻᩣᨵᩮᩣ, ᨮᩣᨶᩴ ᨡᩮᩣ ᨸᨶᩮᨲᩴ ᩅᩥᨩ᩠ᨩᨲᩥ ᨿᩴ ᨾᩮ ᩌᨻᩣᨵᩮᩣ ᨸᩅᨯ᩠ᨰᩮᨿ᩠ᨿ, ᩉᨶ᩠ᨴᩣᩉᩴ ᩅᩦᩁᩥᨿᩴ ᩌᩁᨽᩣᨾᩥ…ᨸᩮ… ᩈᩮᩣ ᩅᩦᩁᩥᨿᩴ ᩌᩁᨽᨲᩥ… ᩍᨴᩴ ᩈᨲ᩠ᨲᨾᩴ ᩌᩁᨾ᩠ᨽᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨣᩥᩃᩣᨶᩣ ᩅᩩᨭ᩠ᨮᩥᨲᩮᩣ ᩉᩮᩣᨲᩥ ᩋᨧᩥᩁᩅᩩᨭ᩠ᨮᩥᨲᩮᩣ ᨣᩮᩃᨬ᩠ᨬᩣ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨣᩥᩃᩣᨶᩣ ᩅᩩᨭ᩠ᨮᩥᨲᩮᩣ ᩋᨧᩥᩁᩅᩩᨭ᩠ᨮᩥᨲᩮᩣ ᨣᩮᩃᨬ᩠ᨬᩣ, ᨮᩣᨶᩴ ᨡᩮᩣ ᨸᨶᩮᨲᩴ ᩅᩥᨩ᩠ᨩᨲᩥ ᨿᩴ ᨾᩮ ᩌᨻᩣᨵᩮᩣ ᨸᨧ᩠ᨧᩩᨴᩣᩅᨲ᩠ᨲᩮᨿ᩠ᨿ, ᩉᨶ᩠ᨴᩣᩉᩴ ᩅᩦᩁᩥᨿᩴ ᩌᩁᨽᩣᨾᩥ ᩋᨸ᩠ᨸᨲ᩠ᨲᩔ ᨸᨲ᩠ᨲᩥᨿᩣ ᩋᨶᨵᩥᨣᨲᩔ ᩋᨵᩥᨣᨾᩣᨿ ᩋᩈᨧ᩠ᨨᩥᨠᨲᩔ ᩈᨧ᩠ᨨᩥᨠᩥᩁᩥᨿᩣᨿᩣ’’ᨲᩥ! ᩈᩮᩣ ᩅᩦᩁᩥᨿᩴ ᩌᩁᨽᨲᩥ ᩋᨸ᩠ᨸᨲ᩠ᨲᩔ ᨸᨲ᩠ᨲᩥᨿᩣ ᩋᨶᨵᩥᨣᨲᩔ ᩋᨵᩥᨣᨾᩣᨿ ᩋᩈᨧ᩠ᨨᩥᨠᨲᩔ ᩈᨧ᩠ᨨᩥᨠᩥᩁᩥᨿᩣᨿ. ᩍᨴᩴ ᩋᨭ᩠ᨮᨾᩴ ᩌᩁᨾ᩠ᨽᩅᨲ᩠ᨳᩩ.

᪓᪓᪖. ‘‘ᩋᨭ᩠ᨮ ᨴᩣᨶᩅᨲ᩠ᨳᩪᨶᩥ. ᩌᩈᨩ᩠ᨩ ᨴᩣᨶᩴ ᨴᩮᨲᩥ, ᨽᨿᩣ ᨴᩣᨶᩴ ᨴᩮᨲᩥ, ‘ᩋᨴᩣᩈᩥ ᨾᩮ’ᨲᩥ ᨴᩣᨶᩴ ᨴᩮᨲᩥ, ‘ᨴᩔᨲᩥ ᨾᩮ’ᨲᩥ ᨴᩣᨶᩴ ᨴᩮᨲᩥ, ‘ᩈᩣᩉᩩ ᨴᩣᨶ’ᨶ᩠ᨲᩥ ᨴᩣᨶᩴ ᨴᩮᨲᩥ, ‘ᩋᩉᩴ ᨸᨧᩣᨾᩥ, ᩍᨾᩮ ᨶ ᨸᨧᨶ᩠ᨲᩥ, ᨶᩣᩁᩉᩣᨾᩥ ᨸᨧᨶ᩠ᨲᩮᩣ ᩋᨸᨧᨶ᩠ᨲᩣᨶᩴ ᨴᩣᨶᩴ ᨶ ᨴᩣᨲᩩ’ᨶ᩠ᨲᩥ ᨴᩣᨶᩴ ᨴᩮᨲᩥ, ‘ᩍᨴᩴ ᨾᩮ ᨴᩣᨶᩴ ᨴᨴᨲᩮᩣ ᨠᩃ᩠ᨿᩣᨱᩮᩣ ᨠᩥᨲ᩠ᨲᩥᩈᨴ᩠ᨴᩮᩣ ᩋᨻ᩠ᨽᩩᨣ᩠ᨣᨧ᩠ᨨᨲᩦ’ᨲᩥ ᨴᩣᨶᩴ ᨴᩮᨲᩥ. ᨧᩥᨲ᩠ᨲᩣᩃᨦ᩠ᨠᩣᩁ-ᨧᩥᨲ᩠ᨲᨸᩁᩥᨠ᩠ᨡᩣᩁᨲ᩠ᨳᩴ ᨴᩣᨶᩴ ᨴᩮᨲᩥ.

᪓᪓᪗. ‘‘ᩋᨭ᩠ᨮ ᨴᩣᨶᩪᨸᨸᨲ᩠ᨲᩥᨿᩮᩣ. ᩍᨵᩣᩅᩩᩈᩮᩣ, ᩑᨠᨧ᩠ᨧᩮᩣ ᨴᩣᨶᩴ ᨴᩮᨲᩥ ᩈᨾᨱᩔ ᩅᩣ ᨻᩕᩣᩉ᩠ᨾᨱᩔ ᩅᩣ ᩋᨶ᩠ᨶᩴ ᨸᩣᨶᩴ ᩅᨲ᩠ᨳᩴ ᨿᩣᨶᩴ ᨾᩣᩃᩣᨣᨶ᩠ᨵᩅᩥᩃᩮᨸᨶᩴ ᩈᩮᨿ᩠ᨿᩣᩅᩈᨳᨸᨴᩦᨸᩮᨿ᩠ᨿᩴ. ᩈᩮᩣ ᨿᩴ ᨴᩮᨲᩥ ᨲᩴ ᨸᨧ᩠ᨧᩣᩈᩦᩈᨲᩥ [ᨸᨧ᩠ᨧᩣᩈᩥᩴᩈᨲᩥ (ᩈᩦ. ᩈ᩠ᨿᩣ. ᨠᩴ. ᨸᩦ.)]. ᩈᩮᩣ ᨸᩔᨲᩥ ᨡᨲ᩠ᨲᩥᨿᨾᩉᩣᩈᩣᩃᩴ ᩅᩣ ᨻᩕᩣᩉ᩠ᨾᨱᨾᩉᩣᩈᩣᩃᩴ ᩅᩣ ᨣᩉᨸᨲᩥᨾᩉᩣᩈᩣᩃᩴ ᩅᩣ ᨸᨬ᩠ᨧᩉᩥ ᨠᩣᨾᨣᩩᨱᩮᩉᩥ ᩈᨾᨸ᩠ᨸᩥᨲᩴ ᩈᨾᨦ᩠ᨣᩦᨽᩪᨲᩴ ᨸᩁᩥᨧᩣᩁᨿᨾᩣᨶᩴ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩮᩣ ᩅᨲᩣᩉᩴ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᨡᨲ᩠ᨲᩥᨿᨾᩉᩣᩈᩣᩃᩣᨶᩴ ᩅᩣ ᨻᩕᩣᩉ᩠ᨾᨱᨾᩉᩣᩈᩣᩃᩣᨶᩴ ᩅᩣ ᨣᩉᨸᨲᩥᨾᩉᩣᩈᩣᩃᩣᨶᩴ ᩅᩣ ᩈᩉᨻ᩠ᨿᨲᩴ ᩏᨸᨸᨩ᩠ᨩᩮᨿ᩠ᨿ’ᨶ᩠ᨲᩥ! ᩈᩮᩣ ᨲᩴ ᨧᩥᨲ᩠ᨲᩴ ᨴᩉᨲᩥ, ᨲᩴ ᨧᩥᨲ᩠ᨲᩴ ᩋᨵᩥᨭ᩠ᨮᩣᨲᩥ, ᨲᩴ ᨧᩥᨲ᩠ᨲᩴ ᨽᩣᩅᩮᨲᩥ, ᨲᩔ ᨲᩴ ᨧᩥᨲ᩠ᨲᩴ ᩉᩦᨶᩮ ᩅᩥᨾᩩᨲ᩠ᨲᩴ ᩏᨲ᩠ᨲᩁᩥ ᩋᨽᩣᩅᩥᨲᩴ ᨲᨲᩕᩪᨸᨸᨲ᩠ᨲᩥᨿᩣ ᩈᩴᩅᨲ᩠ᨲᨲᩥ. ᨲᨬ᩠ᨧ ᨡᩮᩣ ᩈᩦᩃᩅᨲᩮᩣ ᩅᨴᩣᨾᩥ ᨶᩮᩣ ᨴᩩᩔᩦᩃᩔ. ᩍᨩ᩠ᨫᨲᩣᩅᩩᩈᩮᩣ, ᩈᩦᩃᩅᨲᩮᩣ ᨧᩮᨲᩮᩣᨸᨱᩥᨵᩥ ᩅᩥᩈᩩᨴ᩠ᨵᨲ᩠ᨲᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᩍᨵᩮᨠᨧ᩠ᨧᩮᩣ ᨴᩣᨶᩴ ᨴᩮᨲᩥ ᩈᨾᨱᩔ ᩅᩣ ᨻᩕᩣᩉ᩠ᨾᨱᩔ ᩅᩣ ᩋᨶ᩠ᨶᩴ ᨸᩣᨶᩴ…ᨸᩮ… ᩈᩮᨿ᩠ᨿᩣᩅᩈᨳᨸᨴᩦᨸᩮᨿ᩠ᨿᩴ. ᩈᩮᩣ ᨿᩴ ᨴᩮᨲᩥ ᨲᩴ ᨸᨧ᩠ᨧᩣᩈᩦᩈᨲᩥ. ᨲᩔ ᩈᩩᨲᩴ ᩉᩮᩣᨲᩥ – ‘ᨧᩣᨲᩩᨾᩉᩣᩁᩣᨩᩥᨠᩣ [ᨧᩣᨲᩩᨾ᩠ᨾᩉᩣᩁᩣᨩᩥᨠᩣ (ᩈᩦ. ᩈ᩠ᨿᩣ. ᨸᩦ.)] ᨴᩮᩅᩣ ᨴᩦᨥᩣᨿᩩᨠᩣ ᩅᨱ᩠ᨱᩅᨶ᩠ᨲᩮᩣ ᩈᩩᨡᨻᩉᩩᩃᩣ’’ᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩮᩣ ᩅᨲᩣᩉᩴ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᨧᩣᨲᩩᨾᩉᩣᩁᩣᨩᩥᨠᩣᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨩ᩠ᨩᩮᨿ᩠ᨿ’’ᨶ᩠ᨲᩥ! ᩈᩮᩣ ᨲᩴ ᨧᩥᨲ᩠ᨲᩴ ᨴᩉᨲᩥ, ᨲᩴ ᨧᩥᨲ᩠ᨲᩴ ᩋᨵᩥᨭ᩠ᨮᩣᨲᩥ, ᨲᩴ ᨧᩥᨲ᩠ᨲᩴ ᨽᩣᩅᩮᨲᩥ, ᨲᩔ ᨲᩴ ᨧᩥᨲ᩠ᨲᩴ ᩉᩦᨶᩮ ᩅᩥᨾᩩᨲ᩠ᨲᩴ ᩏᨲ᩠ᨲᩁᩥ ᩋᨽᩣᩅᩥᨲᩴ ᨲᨲᩕᩪᨸᨸᨲ᩠ᨲᩥᨿᩣ ᩈᩴᩅᨲ᩠ᨲᨲᩥ. ᨲᨬ᩠ᨧ ᨡᩮᩣ ᩈᩦᩃᩅᨲᩮᩣ ᩅᨴᩣᨾᩥ ᨶᩮᩣ ᨴᩩᩔᩦᩃᩔ. ᩍᨩ᩠ᨫᨲᩣᩅᩩᩈᩮᩣ, ᩈᩦᩃᩅᨲᩮᩣ ᨧᩮᨲᩮᩣᨸᨱᩥᨵᩥ ᩅᩥᩈᩩᨴ᩠ᨵᨲ᩠ᨲᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᩍᨵᩮᨠᨧ᩠ᨧᩮᩣ ᨴᩣᨶᩴ ᨴᩮᨲᩥ ᩈᨾᨱᩔ ᩅᩣ ᨻᩕᩣᩉ᩠ᨾᨱᩔ ᩅᩣ ᩋᨶ᩠ᨶᩴ ᨸᩣᨶᩴ…ᨸᩮ… ᩈᩮᨿ᩠ᨿᩣᩅᩈᨳᨸᨴᩦᨸᩮᨿ᩠ᨿᩴ. ᩈᩮᩣ ᨿᩴ ᨴᩮᨲᩥ ᨲᩴ ᨸᨧ᩠ᨧᩣᩈᩦᩈᨲᩥ. ᨲᩔ ᩈᩩᨲᩴ ᩉᩮᩣᨲᩥ – ‘ᨲᩣᩅᨲᩥᩴᩈᩣ ᨴᩮᩅᩣ…ᨸᩮ… ᨿᩣᨾᩣ ᨴᩮᩅᩣ…ᨸᩮ… ᨲᩩᩈᩥᨲᩣ ᨴᩮᩅᩣ …ᨸᩮ… ᨶᩥᨾ᩠ᨾᩣᨶᩁᨲᩦ ᨴᩮᩅᩣ…ᨸᩮ… ᨸᩁᨶᩥᨾ᩠ᨾᩥᨲᩅᩈᩅᨲ᩠ᨲᩦ ᨴᩮᩅᩣ ᨴᩦᨥᩣᨿᩩᨠᩣ ᩅᨱ᩠ᨱᩅᨶ᩠ᨲᩮᩣ ᩈᩩᨡᨻᩉᩩᩃᩣ’ᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩮᩣ ᩅᨲᩣᩉᩴ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᨸᩁᨶᩥᨾ᩠ᨾᩥᨲᩅᩈᩅᨲ᩠ᨲᩦᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨩ᩠ᨩᩮᨿ᩠ᨿ’’ᨶ᩠ᨲᩥ! ᩈᩮᩣ ᨲᩴ ᨧᩥᨲ᩠ᨲᩴ ᨴᩉᨲᩥ, ᨲᩴ ᨧᩥᨲ᩠ᨲᩴ ᩋᨵᩥᨭ᩠ᨮᩣᨲᩥ, ᨲᩴ ᨧᩥᨲ᩠ᨲᩴ ᨽᩣᩅᩮᨲᩥ, ᨲᩔ ᨲᩴ ᨧᩥᨲ᩠ᨲᩴ ᩉᩦᨶᩮ ᩅᩥᨾᩩᨲ᩠ᨲᩴ ᩏᨲ᩠ᨲᩁᩥ ᩋᨽᩣᩅᩥᨲᩴ ᨲᨲᩕᩪᨸᨸᨲ᩠ᨲᩥᨿᩣ ᩈᩴᩅᨲ᩠ᨲᨲᩥ. ᨲᨬ᩠ᨧ ᨡᩮᩣ ᩈᩦᩃᩅᨲᩮᩣ ᩅᨴᩣᨾᩥ ᨶᩮᩣ ᨴᩩᩔᩦᩃᩔ. ᩍᨩ᩠ᨫᨲᩣᩅᩩᩈᩮᩣ, ᩈᩦᩃᩅᨲᩮᩣ ᨧᩮᨲᩮᩣᨸᨱᩥᨵᩥ ᩅᩥᩈᩩᨴ᩠ᨵᨲ᩠ᨲᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᩍᨵᩮᨠᨧ᩠ᨧᩮᩣ ᨴᩣᨶᩴ ᨴᩮᨲᩥ ᩈᨾᨱᩔ ᩅᩣ ᨻᩕᩣᩉ᩠ᨾᨱᩔ ᩅᩣ ᩋᨶ᩠ᨶᩴ ᨸᩣᨶᩴ ᩅᨲ᩠ᨳᩴ ᨿᩣᨶᩴ ᨾᩣᩃᩣᨣᨶ᩠ᨵᩅᩥᩃᩮᨸᨶᩴ ᩈᩮᨿ᩠ᨿᩣᩅᩈᨳᨸᨴᩦᨸᩮᨿ᩠ᨿᩴ. ᩈᩮᩣ ᨿᩴ ᨴᩮᨲᩥ ᨲᩴ ᨸᨧ᩠ᨧᩣᩈᩦᩈᨲᩥ. ᨲᩔ ᩈᩩᨲᩴ ᩉᩮᩣᨲᩥ – ‘ᨻᩕᩉ᩠ᨾᨠᩣᨿᩥᨠᩣ ᨴᩮᩅᩣ ᨴᩦᨥᩣᨿᩩᨠᩣ ᩅᨱ᩠ᨱᩅᨶ᩠ᨲᩮᩣ ᩈᩩᨡᨻᩉᩩᩃᩣ’ᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩮᩣ ᩅᨲᩣᩉᩴ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᨻᩕᩉ᩠ᨾᨠᩣᨿᩥᨠᩣᨶᩴ ᨴᩮᩅᩣᨶᩴ ᩈᩉᨻ᩠ᨿᨲᩴ ᩏᨸᨸᨩ᩠ᨩᩮᨿ᩠ᨿ’ᨶ᩠ᨲᩥ! ᩈᩮᩣ ᨲᩴ ᨧᩥᨲ᩠ᨲᩴ ᨴᩉᨲᩥ, ᨲᩴ ᨧᩥᨲ᩠ᨲᩴ ᩋᨵᩥᨭ᩠ᨮᩣᨲᩥ, ᨲᩴ ᨧᩥᨲ᩠ᨲᩴ ᨽᩣᩅᩮᨲᩥ, ᨲᩔ ᨲᩴ ᨧᩥᨲ᩠ᨲᩴ ᩉᩦᨶᩮ ᩅᩥᨾᩩᨲ᩠ᨲᩴ ᩏᨲ᩠ᨲᩁᩥ ᩋᨽᩣᩅᩥᨲᩴ ᨲᨲᩕᩪᨸᨸᨲ᩠ᨲᩥᨿᩣ ᩈᩴᩅᨲ᩠ᨲᨲᩥ. ᨲᨬ᩠ᨧ ᨡᩮᩣ ᩈᩦᩃᩅᨲᩮᩣ ᩅᨴᩣᨾᩥ ᨶᩮᩣ ᨴᩩᩔᩦᩃᩔ; ᩅᩦᨲᩁᩣᨣᩔ ᨶᩮᩣ ᩈᩁᩣᨣᩔ. ᩍᨩ᩠ᨫᨲᩣᩅᩩᩈᩮᩣ, ᩈᩦᩃᩅᨲᩮᩣ ᨧᩮᨲᩮᩣᨸᨱᩥᨵᩥ ᩅᩦᨲᩁᩣᨣᨲ᩠ᨲᩣ.

‘‘ᩋᨭ᩠ᨮ ᨸᩁᩥᩈᩣ – ᨡᨲ᩠ᨲᩥᨿᨸᩁᩥᩈᩣ, ᨻᩕᩣᩉ᩠ᨾᨱᨸᩁᩥᩈᩣ, ᨣᩉᨸᨲᩥᨸᩁᩥᩈᩣ, ᩈᨾᨱᨸᩁᩥᩈᩣ, ᨧᩣᨲᩩᨾᩉᩣᩁᩣᨩᩥᨠᨸᩁᩥᩈᩣ, ᨲᩣᩅᨲᩥᩴᩈᨸᩁᩥᩈᩣ, ᨾᩣᩁᨸᩁᩥᩈᩣ, ᨻᩕᩉ᩠ᨾᨸᩁᩥᩈᩣ.

‘‘ᩋᨭ᩠ᨮ ᩃᩮᩣᨠᨵᨾ᩠ᨾᩣ – ᩃᩣᨽᩮᩣ ᨧ, ᩋᩃᩣᨽᩮᩣ ᨧ, ᨿᩈᩮᩣ ᨧ, ᩋᨿᩈᩮᩣ ᨧ, ᨶᩥᨶ᩠ᨴᩣ ᨧ, ᨸᩈᩴᩈᩣ ᨧ, ᩈᩩᨡᨬ᩠ᨧ, ᨴᩩᨠ᩠ᨡᨬ᩠ᨧ.

᪓᪓᪘. ‘‘ᩋᨭ᩠ᨮ ᩋᨽᩥᨽᩣᨿᨲᨶᩣᨶᩥ. ᩋᨩ᩠ᨫᨲ᩠ᨲᩴ ᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨸᩁᩥᨲ᩠ᨲᩣᨶᩥ ᩈᩩᩅᨱ᩠ᨱᨴᩩᨻ᩠ᨻᨱ᩠ᨱᩣᨶᩥ, ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨸᨮᨾᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩋᨸ᩠ᨸᨾᩣᨱᩣᨶᩥ ᩈᩩᩅᨱ᩠ᨱᨴᩩᨻ᩠ᨻᨱ᩠ᨱᩣᨶᩥ, ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ – ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨴᩩᨲᩥᨿᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨸᩁᩥᨲ᩠ᨲᩣᨶᩥ ᩈᩩᩅᨱ᩠ᨱᨴᩩᨻ᩠ᨻᨱ᩠ᨱᩣᨶᩥ, ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨲᨲᩥᨿᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩋᨸ᩠ᨸᨾᩣᨱᩣᨶᩥ ᩈᩩᩅᨱ᩠ᨱᨴᩩᨻ᩠ᨻᨱ᩠ᨱᩣᨶᩥ, ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨧᨲᩩᨲ᩠ᨳᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨶᩦᩃᩣᨶᩥ ᨶᩦᩃᩅᨱ᩠ᨱᩣᨶᩥ ᨶᩦᩃᨶᩥᨴᩔᨶᩣᨶᩥ ᨶᩦᩃᨶᩥᨽᩣᩈᩣᨶᩥ. ᩈᩮᨿ᩠ᨿᨳᩣᨸᩥ ᨶᩣᨾ ᩏᨾᩣᨸᩩᨸ᩠ᨹᩴ ᨶᩦᩃᩴ ᨶᩦᩃᩅᨱ᩠ᨱᩴ ᨶᩦᩃᨶᩥᨴᩔᨶᩴ ᨶᩦᩃᨶᩥᨽᩣᩈᩴ, ᩈᩮᨿ᩠ᨿᨳᩣ ᩅᩣ ᨸᨶ ᨲᩴ ᩅᨲ᩠ᨳᩴ ᨻᩣᩁᩣᨱᩈᩮᨿ᩠ᨿᨠᩴ ᩏᨽᨲᩮᩣᨽᩣᨣᩅᩥᨾᨭ᩠ᨮᩴ ᨶᩦᩃᩴ ᨶᩦᩃᩅᨱ᩠ᨱᩴ ᨶᩦᩃᨶᩥᨴᩔᨶᩴ ᨶᩦᩃᨶᩥᨽᩣᩈᩴ. ᩑᩅᨾᩮᩅ [ᩑᩅᨾᩮᩅᩴ (ᨠ.)] ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨶᩦᩃᩣᨶᩥ ᨶᩦᩃᩅᨱ᩠ᨱᩣᨶᩥ ᨶᩦᩃᨶᩥᨴᩔᨶᩣᨶᩥ ᨶᩦᩃᨶᩥᨽᩣᩈᩣᨶᩥ, ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨸᨬ᩠ᨧᨾᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨸᩦᨲᩣᨶᩥ ᨸᩦᨲᩅᨱ᩠ᨱᩣᨶᩥ ᨸᩦᨲᨶᩥᨴᩔᨶᩣᨶᩥ ᨸᩦᨲᨶᩥᨽᩣᩈᩣᨶᩥ. ᩈᩮᨿ᩠ᨿᨳᩣᨸᩥ ᨶᩣᨾ ᨠᨱᩥᨠᩣᩁᨸᩩᨸ᩠ᨹᩴ [ᨠᨱ᩠ᨱᩥᨠᩣᩁᨸᩩᨸ᩠ᨹᩴ (ᩈ᩠ᨿᩣ. ᨠᩴ.)] ᨸᩦᨲᩴ ᨸᩦᨲᩅᨱ᩠ᨱᩴ ᨸᩦᨲᨶᩥᨴᩔᨶᩴ ᨸᩦᨲᨶᩥᨽᩣᩈᩴ, ᩈᩮᨿ᩠ᨿᨳᩣ ᩅᩣ ᨸᨶ ᨲᩴ ᩅᨲ᩠ᨳᩴ ᨻᩣᩁᩣᨱᩈᩮᨿ᩠ᨿᨠᩴ ᩏᨽᨲᩮᩣᨽᩣᨣᩅᩥᨾᨭ᩠ᨮᩴ ᨸᩦᨲᩴ ᨸᩦᨲᩅᨱ᩠ᨱᩴ ᨸᩦᨲᨶᩥᨴᩔᨶᩴ ᨸᩦᨲᨶᩥᨽᩣᩈᩴ. ᩑᩅᨾᩮᩅ ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨸᩦᨲᩣᨶᩥ ᨸᩦᨲᩅᨱ᩠ᨱᩣᨶᩥ ᨸᩦᨲᨶᩥᨴᩔᨶᩣᨶᩥ ᨸᩦᨲᨶᩥᨽᩣᩈᩣᨶᩥ, ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨨᨭ᩠ᨮᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩃᩮᩣᩉᩥᨲᨠᩣᨶᩥ ᩃᩮᩣᩉᩥᨲᨠᩅᨱ᩠ᨱᩣᨶᩥ ᩃᩮᩣᩉᩥᨲᨠᨶᩥᨴᩔᨶᩣᨶᩥ ᩃᩮᩣᩉᩥᨲᨠᨶᩥᨽᩣᩈᩣᨶᩥ. ᩈᩮᨿ᩠ᨿᨳᩣᨸᩥ ᨶᩣᨾ ᨻᨶ᩠ᨵᩩᨩᩦᩅᨠᨸᩩᨸ᩠ᨹᩴ ᩃᩮᩣᩉᩥᨲᨠᩴ ᩃᩮᩣᩉᩥᨲᨠᩅᨱ᩠ᨱᩴ ᩃᩮᩣᩉᩥᨲᨠᨶᩥᨴᩔᨶᩴ ᩃᩮᩣᩉᩥᨲᨠᨶᩥᨽᩣᩈᩴ, ᩈᩮᨿ᩠ᨿᨳᩣ ᩅᩣ ᨸᨶ ᨲᩴ ᩅᨲ᩠ᨳᩴ ᨻᩣᩁᩣᨱᩈᩮᨿ᩠ᨿᨠᩴ ᩏᨽᨲᩮᩣᨽᩣᨣᩅᩥᨾᨭ᩠ᨮᩴ ᩃᩮᩣᩉᩥᨲᨠᩴ ᩃᩮᩣᩉᩥᨲᨠᩅᨱ᩠ᨱᩴ ᩃᩮᩣᩉᩥᨲᨠᨶᩥᨴᩔᨶᩴ ᩃᩮᩣᩉᩥᨲᨠᨶᩥᨽᩣᩈᩴ. ᩑᩅᨾᩮᩅ ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩃᩮᩣᩉᩥᨲᨠᩣᨶᩥ ᩃᩮᩣᩉᩥᨲᨠᩅᨱ᩠ᨱᩣᨶᩥ ᩃᩮᩣᩉᩥᨲᨠᨶᩥᨴᩔᨶᩣᨶᩥ ᩃᩮᩣᩉᩥᨲᨠᨶᩥᨽᩣᩈᩣᨶᩥ, ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᩈᨲ᩠ᨲᨾᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩒᨴᩣᨲᩣᨶᩥ ᩒᨴᩣᨲᩅᨱ᩠ᨱᩣᨶᩥ ᩒᨴᩣᨲᨶᩥᨴᩔᨶᩣᨶᩥ ᩒᨴᩣᨲᨶᩥᨽᩣᩈᩣᨶᩥ. ᩈᩮᨿ᩠ᨿᨳᩣᨸᩥ ᨶᩣᨾ ᩒᩈᨵᩥᨲᩣᩁᨠᩣ ᩒᨴᩣᨲᩣ ᩒᨴᩣᨲᩅᨱ᩠ᨱᩣ ᩒᨴᩣᨲᨶᩥᨴᩔᨶᩣ ᩒᨴᩣᨲᨶᩥᨽᩣᩈᩣ, ᩈᩮᨿ᩠ᨿᨳᩣ ᩅᩣ ᨸᨶ ᨲᩴ ᩅᨲ᩠ᨳᩴ ᨻᩣᩁᩣᨱᩈᩮᨿ᩠ᨿᨠᩴ ᩏᨽᨲᩮᩣᨽᩣᨣᩅᩥᨾᨭ᩠ᨮᩴ ᩒᨴᩣᨲᩴ ᩒᨴᩣᨲᩅᨱ᩠ᨱᩴ ᩒᨴᩣᨲᨶᩥᨴᩔᨶᩴ ᩒᨴᩣᨲᨶᩥᨽᩣᩈᩴ. ᩑᩅᨾᩮᩅ ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩒᨴᩣᨲᩣᨶᩥ ᩒᨴᩣᨲᩅᨱ᩠ᨱᩣᨶᩥ ᩒᨴᩣᨲᨶᩥᨴᩔᨶᩣᨶᩥ ᩒᨴᩣᨲᨶᩥᨽᩣᩈᩣᨶᩥ, ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᩋᨭ᩠ᨮᨾᩴ ᩋᨽᩥᨽᩣᨿᨲᨶᩴ.

᪓᪓᪙. ‘‘ᩋᨭ᩠ᨮ ᩅᩥᨾᩮᩣᨠ᩠ᨡᩣ. ᩁᩪᨸᩦ ᩁᩪᨸᩣᨶᩥ ᨸᩔᨲᩥ. ᩋᨿᩴ ᨸᨮᨾᩮᩣ ᩅᩥᨾᩮᩣᨠ᩠ᨡᩮᩣ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ. ᩋᨿᩴ ᨴᩩᨲᩥᨿᩮᩣ ᩅᩥᨾᩮᩣᨠ᩠ᨡᩮᩣ.

‘‘ᩈᩩᨽᨶ᩠ᨲᩮᩅ ᩋᨵᩥᨾᩩᨲ᩠ᨲᩮᩣ ᩉᩮᩣᨲᩥ. ᩋᨿᩴ ᨲᨲᩥᨿᩮᩣ ᩅᩥᨾᩮᩣᨠ᩠ᨡᩮᩣ.

‘‘ᩈᨻ᩠ᨻᩈᩮᩣ ᩁᩪᨸᩈᨬ᩠ᨬᩣᨶᩴ ᩈᨾᨲᩥᨠ᩠ᨠᨾᩣ ᨸᨭᩥᨥᩈᨬ᩠ᨬᩣᨶᩴ ᩋᨲ᩠ᨳᨦ᩠ᨣᨾᩣ ᨶᩣᨶᨲ᩠ᨲᩈᨬ᩠ᨬᩣᨶᩴ ᩋᨾᨶᩈᩥᨠᩣᩁᩣ ‘ᩋᨶᨶ᩠ᨲᩮᩣ ᩌᨠᩣᩈᩮᩣ’ᨲᩥ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ ᨧᨲᩩᨲ᩠ᨳᩮᩣ ᩅᩥᨾᩮᩣᨠ᩠ᨡᩮᩣ.

‘‘ᩈᨻ᩠ᨻᩈᩮᩣ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᩋᨶᨶ᩠ᨲᩴ ᩅᩥᨬ᩠ᨬᩣᨱ’ᨶ᩠ᨲᩥ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ ᨸᨬ᩠ᨧᨾᩮᩣ ᩅᩥᨾᩮᩣᨠ᩠ᨡᩮᩣ.

‘‘ᩈᨻ᩠ᨻᩈᩮᩣ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᨶᨲ᩠ᨳᩥ ᨠᩥᨬ᩠ᨧᩦ’ᨲᩥ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ ᨨᨭ᩠ᨮᩮᩣ ᩅᩥᨾᩮᩣᨠ᩠ᨡᩮᩣ.

‘‘ᩈᨻ᩠ᨻᩈᩮᩣ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ ᩈᨲ᩠ᨲᨾᩮᩣ ᩅᩥᨾᩮᩣᨠ᩠ᨡᩮᩣ.

‘‘ᩈᨻ᩠ᨻᩈᩮᩣ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ᩈᨬ᩠ᨬᩣᩅᩮᨴᨿᩥᨲ ᨶᩥᩁᩮᩣᨵᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ ᩋᨭ᩠ᨮᨾᩮᩣ ᩅᩥᨾᩮᩣᨠ᩠ᨡᩮᩣ.

‘‘ᩍᨾᩮ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᩋᨭ᩠ᨮ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ; ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ…ᨸᩮ… ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ.

ᨶᩅᨠᩴ

᪓᪔᪐. ‘‘ᩋᨲ᩠ᨳᩥ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨶᩅ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ; ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ…ᨸᩮ… ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᨠᨲᨾᩮ ᨶᩅ?

‘‘ᨶᩅ ᩌᨥᩣᨲᩅᨲ᩠ᨳᩪᨶᩥ. ‘ᩋᨶᨲ᩠ᨳᩴ ᨾᩮ ᩋᨧᩁᩦ’ᨲᩥ ᩌᨥᩣᨲᩴ ᨻᨶ᩠ᨵᨲᩥ; ‘ᩋᨶᨲ᩠ᨳᩴ ᨾᩮ ᨧᩁᨲᩦ’ᨲᩥ ᩌᨥᩣᨲᩴ ᨻᨶ᩠ᨵᨲᩥ; ‘ᩋᨶᨲ᩠ᨳᩴ ᨾᩮ ᨧᩁᩥᩔᨲᩦ’ᨲᩥ ᩌᨥᩣᨲᩴ ᨻᨶ᩠ᨵᨲᩥ; ‘ᨸᩥᨿᩔ ᨾᩮ ᨾᨶᩣᨸᩔ ᩋᨶᨲ᩠ᨳᩴ ᩋᨧᩁᩦ’ᨲᩥ ᩌᨥᩣᨲᩴ ᨻᨶ᩠ᨵᨲᩥ…ᨸᩮ… ᩋᨶᨲ᩠ᨳᩴ ᨧᩁᨲᩦᨲᩥ ᩌᨥᩣᨲᩴ ᨻᨶ᩠ᨵᨲᩥ…ᨸᩮ… ᩋᨶᨲ᩠ᨳᩴ ᨧᩁᩥᩔᨲᩦᨲᩥ ᩌᨥᩣᨲᩴ ᨻᨶ᩠ᨵᨲᩥ; ‘ᩋᨸ᩠ᨸᩥᨿᩔ ᨾᩮ ᩋᨾᨶᩣᨸᩔ ᩋᨲ᩠ᨳᩴ ᩋᨧᩁᩦ’ᨲᩥ ᩌᨥᩣᨲᩴ ᨻᨶ᩠ᨵᨲᩥ…ᨸᩮ… ᩋᨲ᩠ᨳᩴ ᨧᩁᨲᩦᨲᩥ ᩌᨥᩣᨲᩴ ᨻᨶ᩠ᨵᨲᩥ…ᨸᩮ… ᩋᨲ᩠ᨳᩴ ᨧᩁᩥᩔᨲᩦᨲᩥ ᩌᨥᩣᨲᩴ ᨻᨶ᩠ᨵᨲᩥ.

‘‘ᨶᩅ ᩌᨥᩣᨲᨸᨭᩥᩅᩥᨶᨿᩣ. ‘ᩋᨶᨲ᩠ᨳᩴ ᨾᩮ ᩋᨧᩁᩥ [ᩋᨧᩁᩦᨲᩥ (ᩈ᩠ᨿᩣ. ᨠ.) ᩑᩅᩴ ‘‘ᨧᩁᨲᩥ ᨧᩁᩥᩔᨲᩥ’’ ᨸᨴᩮᩈᩩᨸᩥ], ᨲᩴ ᨠᩩᨲᩮᨲ᩠ᨳ ᩃᨻ᩠ᨽᩣ’ᨲᩥ ᩌᨥᩣᨲᩴ ᨸᨭᩥᩅᩥᨶᩮᨲᩥ; ‘ᩋᨶᨲ᩠ᨳᩴ ᨾᩮ ᨧᩁᨲᩥ, ᨲᩴ ᨠᩩᨲᩮᨲ᩠ᨳ ᩃᨻ᩠ᨽᩣ’ᨲᩥ ᩌᨥᩣᨲᩴ ᨸᨭᩥᩅᩥᨶᩮᨲᩥ; ‘ᩋᨶᨲ᩠ᨳᩴ ᨾᩮ ᨧᩁᩥᩔᨲᩥ, ᨲᩴ ᨠᩩᨲᩮᨲ᩠ᨳ ᩃᨻ᩠ᨽᩣ’ᨲᩥ ᩌᨥᩣᨲᩴ ᨸᨭᩥᩅᩥᨶᩮᨲᩥ; ‘ᨸᩥᨿᩔ ᨾᩮ ᨾᨶᩣᨸᩔ ᩋᨶᨲ᩠ᨳᩴ ᩋᨧᩁᩥ…ᨸᩮ… ᩋᨶᨲ᩠ᨳᩴ ᨧᩁᨲᩥ…ᨸᩮ… ᩋᨶᨲ᩠ᨳᩴ ᨧᩁᩥᩔᨲᩥ, ᨲᩴ ᨠᩩᨲᩮᨲ᩠ᨳ ᩃᨻ᩠ᨽᩣ’ᨲᩥ ᩌᨥᩣᨲᩴ ᨸᨭᩥᩅᩥᨶᩮᨲᩥ; ‘ᩋᨸ᩠ᨸᩥᨿᩔ ᨾᩮ ᩋᨾᨶᩣᨸᩔ ᩋᨲ᩠ᨳᩴ ᩋᨧᩁᩥ…ᨸᩮ… ᩋᨲ᩠ᨳᩴ ᨧᩁᨲᩥ…ᨸᩮ… ᩋᨲ᩠ᨳᩴ ᨧᩁᩥᩔᨲᩥ, ᨲᩴ ᨠᩩᨲᩮᨲ᩠ᨳ ᩃᨻ᩠ᨽᩣ’ᨲᩥ ᩌᨥᩣᨲᩴ ᨸᨭᩥᩅᩥᨶᩮᨲᩥ.

᪓᪔᪑. ‘‘ᨶᩅ ᩈᨲ᩠ᨲᩣᩅᩣᩈᩣ. ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᨶᩣᨶᨲ᩠ᨲᨠᩣᨿᩣ ᨶᩣᨶᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨾᨶᩩᩔᩣ ᩑᨠᨧ᩠ᨧᩮ ᨧ ᨴᩮᩅᩣ ᩑᨠᨧ᩠ᨧᩮ ᨧ ᩅᩥᨶᩥᨸᩣᨲᩥᨠᩣ. ᩋᨿᩴ ᨸᨮᨾᩮᩣ ᩈᨲ᩠ᨲᩣᩅᩣᩈᩮᩣ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᨶᩣᨶᨲ᩠ᨲᨠᩣᨿᩣ ᩑᨠᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨴᩮᩅᩣ ᨻᩕᩉ᩠ᨾᨠᩣᨿᩥᨠᩣ ᨸᨮᨾᩣᨽᩥᨶᩥᨻ᩠ᨻᨲ᩠ᨲᩣ. ᩋᨿᩴ ᨴᩩᨲᩥᨿᩮᩣ ᩈᨲ᩠ᨲᩣᩅᩣᩈᩮᩣ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩑᨠᨲ᩠ᨲᨠᩣᨿᩣ ᨶᩣᨶᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨴᩮᩅᩣ ᩌᨽᩔᩁᩣ. ᩋᨿᩴ ᨲᨲᩥᨿᩮᩣ ᩈᨲ᩠ᨲᩣᩅᩣᩈᩮᩣ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩑᨠᨲ᩠ᨲᨠᩣᨿᩣ ᩑᨠᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨴᩮᩅᩣ ᩈᩩᨽᨠᩥᨱ᩠ᩉᩣ. ᩋᨿᩴ ᨧᨲᩩᨲ᩠ᨳᩮᩣ ᩈᨲ᩠ᨲᩣᩅᩣᩈᩮᩣ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩋᩈᨬ᩠ᨬᩥᨶᩮᩣ ᩋᨸ᩠ᨸᨭᩥᩈᩴᩅᩮᨴᩥᨶᩮᩣ, ᩈᩮᨿ᩠ᨿᨳᩣᨸᩥ ᨴᩮᩅᩣ ᩋᩈᨬ᩠ᨬᩈᨲ᩠ᨲᩣ [ᩋᩈᨬ᩠ᨬᩥᩈᨲ᩠ᨲᩣ (ᩈ᩠ᨿᩣ. ᨠᩴ.)]. ᩋᨿᩴ ᨸᨬ᩠ᨧᨾᩮᩣ ᩈᨲ᩠ᨲᩣᩅᩣᩈᩮᩣ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩈᨻ᩠ᨻᩈᩮᩣ ᩁᩪᨸᩈᨬ᩠ᨬᩣᨶᩴ ᩈᨾᨲᩥᨠ᩠ᨠᨾᩣ ᨸᨭᩥᨥᩈᨬ᩠ᨬᩣᨶᩴ ᩋᨲ᩠ᨳᨦ᩠ᨣᨾᩣ ᨶᩣᨶᨲ᩠ᨲᩈᨬ᩠ᨬᩣᨶᩴ ᩋᨾᨶᩈᩥᨠᩣᩁᩣ ‘ᩋᨶᨶ᩠ᨲᩮᩣ ᩌᨠᩣᩈᩮᩣ’ᨲᩥ ᩌᨠᩣᩈᩣᨶᨬ᩠ᨧᩣᨿᨲᨶᩪᨸᨣᩣ. ᩋᨿᩴ ᨨᨭ᩠ᨮᩮᩣ ᩈᨲ᩠ᨲᩣᩅᩣᩈᩮᩣ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩈᨻ᩠ᨻᩈᩮᩣ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᩋᨶᨶ᩠ᨲᩴ ᩅᩥᨬ᩠ᨬᩣᨱ’ᨶ᩠ᨲᩥ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩪᨸᨣᩣ. ᩋᨿᩴ ᩈᨲ᩠ᨲᨾᩮᩣ ᩈᨲ᩠ᨲᩣᩅᩣᩈᩮᩣ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩈᨻ᩠ᨻᩈᩮᩣ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᨶᨲ᩠ᨳᩥ ᨠᩥᨬ᩠ᨧᩦ’ᨲᩥ ᩌᨠᩥᨬ᩠ᨧᩣᨬ᩠ᨬᩣᨿᨲᨶᩪᨸᨣᩣ. ᩋᨿᩴ ᩋᨭ᩠ᨮᨾᩮᩣ ᩈᨲ᩠ᨲᩣᩅᩣᩈᩮᩣ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩈᨻ᩠ᨻᩈᩮᩣ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ [ᩈᨾᨲᩥᨠ᩠ᨠᨾ᩠ᨾ ᩈᨶ᩠ᨲᨾᩮᨲᩴ ᨸᨱᩦᨲᨾᩮᨲᨶ᩠ᨲᩥ (ᩈ᩠ᨿᩣ. ᨠᩴ.)] ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩪᨸᨣᩣ. ᩋᨿᩴ ᨶᩅᨾᩮᩣ ᩈᨲ᩠ᨲᩣᩅᩣᩈᩮᩣ.

᪓᪔᪒. ‘‘ᨶᩅ ᩋᨠ᩠ᨡᨱᩣ ᩋᩈᨾᨿᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ. ᩍᨵᩣᩅᩩᩈᩮᩣ, ᨲᨳᩣᨣᨲᩮᩣ ᨧ ᩃᩮᩣᨠᩮ ᩏᨸ᩠ᨸᨶ᩠ᨶᩮᩣ ᩉᩮᩣᨲᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨵᨾ᩠ᨾᩮᩣ ᨧ ᨴᩮᩈᩥᨿᨲᩥ ᩒᨸᩈᨾᩥᨠᩮᩣ ᨸᩁᩥᨶᩥᨻ᩠ᨻᩣᨶᩥᨠᩮᩣ ᩈᨾ᩠ᨻᩮᩣᨵᨣᩣᨾᩦ ᩈᩩᨣᨲᨸ᩠ᨸᩅᩮᨴᩥᨲᩮᩣ. ᩋᨿᨬ᩠ᨧ ᨸᩩᨣ᩠ᨣᩃᩮᩣ ᨶᩥᩁᨿᩴ ᩏᨸᨸᨶ᩠ᨶᩮᩣ ᩉᩮᩣᨲᩥ. ᩋᨿᩴ ᨸᨮᨾᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨲᨳᩣᨣᨲᩮᩣ ᨧ ᩃᩮᩣᨠᩮ ᩏᨸ᩠ᨸᨶ᩠ᨶᩮᩣ ᩉᩮᩣᨲᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨵᨾ᩠ᨾᩮᩣ ᨧ ᨴᩮᩈᩥᨿᨲᩥ ᩒᨸᩈᨾᩥᨠᩮᩣ ᨸᩁᩥᨶᩥᨻ᩠ᨻᩣᨶᩥᨠᩮᩣ ᩈᨾ᩠ᨻᩮᩣᨵᨣᩣᨾᩦ ᩈᩩᨣᨲᨸ᩠ᨸᩅᩮᨴᩥᨲᩮᩣ. ᩋᨿᨬ᩠ᨧ ᨸᩩᨣ᩠ᨣᩃᩮᩣ ᨲᩥᩁᨧ᩠ᨨᩣᨶᨿᩮᩣᨶᩥᩴ ᩏᨸᨸᨶ᩠ᨶᩮᩣ ᩉᩮᩣᨲᩥ. ᩋᨿᩴ ᨴᩩᨲᩥᨿᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ.

‘‘ᨸᩩᨶ ᨧᨸᩁᩴ…ᨸᩮ… ᨸᩮᨲ᩠ᨲᩥᩅᩥᩈᨿᩴ ᩏᨸᨸᨶ᩠ᨶᩮᩣ ᩉᩮᩣᨲᩥ. ᩋᨿᩴ ᨲᨲᩥᨿᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ.

‘‘ᨸᩩᨶ ᨧᨸᩁᩴ…ᨸᩮ… ᩋᩈᩩᩁᨠᩣᨿᩴ ᩏᨸᨸᨶ᩠ᨶᩮᩣ ᩉᩮᩣᨲᩥ. ᩋᨿᩴ ᨧᨲᩩᨲ᩠ᨳᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ.

‘‘ᨸᩩᨶ ᨧᨸᩁᩴ…ᨸᩮ… ᩋᨬ᩠ᨬᨲᩁᩴ ᨴᩦᨥᩣᨿᩩᨠᩴ ᨴᩮᩅᨶᩥᨠᩣᨿᩴ ᩏᨸᨸᨶ᩠ᨶᩮᩣ ᩉᩮᩣᨲᩥ. ᩋᨿᩴ ᨸᨬ᩠ᨧᨾᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ.

‘‘ᨸᩩᨶ ᨧᨸᩁᩴ…ᨸᩮ… ᨸᨧ᩠ᨧᨶ᩠ᨲᩥᨾᩮᩈᩩ ᨩᨶᨸᨴᩮᩈᩩ ᨸᨧ᩠ᨧᩣᨩᩣᨲᩮᩣ ᩉᩮᩣᨲᩥ ᨾᩥᩃᨠ᩠ᨡᩮᩈᩩ [ᨾᩥᩃᨠ᩠ᨡᨠᩮᩈᩩ (ᩈ᩠ᨿᩣ. ᨠᩴ.) ᨾᩥᩃᨠ᩠ᨡᩪᩈᩩ (ᨠ.)] ᩋᩅᩥᨬ᩠ᨬᩣᨲᩣᩁᩮᩈᩩ, ᨿᨲ᩠ᨳ ᨶᨲ᩠ᨳᩥ ᨣᨲᩥ ᨽᩥᨠ᩠ᨡᩪᨶᩴ ᨽᩥᨠ᩠ᨡᩩᨶᩦᨶᩴ ᩏᨸᩣᩈᨠᩣᨶᩴ ᩏᨸᩣᩈᩥᨠᩣᨶᩴ. ᩋᨿᩴ ᨨᨭ᩠ᨮᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ.

‘‘ᨸᩩᨶ ᨧᨸᩁᩴ…ᨸᩮ… ᨾᨩ᩠ᨫᩥᨾᩮᩈᩩ ᨩᨶᨸᨴᩮᩈᩩ ᨸᨧ᩠ᨧᩣᨩᩣᨲᩮᩣ ᩉᩮᩣᨲᩥ. ᩈᩮᩣ ᨧ ᩉᩮᩣᨲᩥ ᨾᩥᨧ᩠ᨨᩣᨴᩥᨭ᩠ᨮᩥᨠᩮᩣ ᩅᩥᨸᩁᩦᨲᨴᩔᨶᩮᩣ – ‘ᨶᨲ᩠ᨳᩥ ᨴᩥᨶ᩠ᨶᩴ, ᨶᨲ᩠ᨳᩥ ᨿᩥᨭ᩠ᨮᩴ, ᨶᨲ᩠ᨳᩥ ᩉᩩᨲᩴ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ [ᩈᩩᨠᨭ ᨴᩩᨠ᩠ᨠᨭᩣᨶᩴ (ᩈᩦ. ᨸᩦ.)] ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ, ᨶᨲ᩠ᨳᩥ ᩋᨿᩴ ᩃᩮᩣᨠᩮᩣ, ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᨾᩣᨲᩣ, ᨶᨲ᩠ᨳᩥ ᨸᩥᨲᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩃᩮᩣᨠᩮ ᩈᨾᨱᨻᩕᩣᩉ᩠ᨾᨱᩣ ᩈᨾ᩠ᨾᨣ᩠ᨣᨲᩣ ᩈᨾ᩠ᨾᩣᨸᨭᩥᨸᨶ᩠ᨶᩣ ᨿᩮ ᩍᨾᨬ᩠ᨧ ᩃᩮᩣᨠᩴ ᨸᩁᨬ᩠ᨧ ᩃᩮᩣᨠᩴ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᨸᩅᩮᨴᩮᨶ᩠ᨲᩦ’ᨲᩥ. ᩋᨿᩴ ᩈᨲ᩠ᨲᨾᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ.

‘‘ᨸᩩᨶ ᨧᨸᩁᩴ…ᨸᩮ… ᨾᨩ᩠ᨫᩥᨾᩮᩈᩩ ᨩᨶᨸᨴᩮᩈᩩ ᨸᨧ᩠ᨧᩣᨩᩣᨲᩮᩣ ᩉᩮᩣᨲᩥ. ᩈᩮᩣ ᨧ ᩉᩮᩣᨲᩥ ᨴᩩᨸ᩠ᨸᨬ᩠ᨬᩮᩣ ᨩᩊᩮᩣ ᩑᩊᨾᩪᨣᩮᩣ, ᨶᨸ᩠ᨸᨭᩥᨻᩃᩮᩣ ᩈᩩᨽᩣᩈᩥᨲᨴᩩᨻ᩠ᨽᩣᩈᩥᨲᩣᨶᨾᨲ᩠ᨳᨾᨬ᩠ᨬᩣᨲᩩᩴ. ᩋᨿᩴ ᩋᨭ᩠ᨮᨾᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨲᨳᩣᨣᨲᩮᩣ ᨧ ᩃᩮᩣᨠᩮ ᨶ [ᨠᨲ᩠ᨳᨧᩥ ᨶᨠᩣᩁᩮᩣ ᨶ ᨴᩥᩔᨲᩥ] ᩏᨸ᩠ᨸᨶ᩠ᨶᩮᩣ ᩉᩮᩣᨲᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨵᨾ᩠ᨾᩮᩣ ᨧ ᨶ ᨴᩮᩈᩥᨿᨲᩥ ᩒᨸᩈᨾᩥᨠᩮᩣ ᨸᩁᩥᨶᩥᨻ᩠ᨻᩣᨶᩥᨠᩮᩣ ᩈᨾ᩠ᨻᩮᩣᨵᨣᩣᨾᩦ ᩈᩩᨣᨲᨸ᩠ᨸᩅᩮᨴᩥᨲᩮᩣ. ᩋᨿᨬ᩠ᨧ ᨸᩩᨣ᩠ᨣᩃᩮᩣ ᨾᨩ᩠ᨫᩥᨾᩮᩈᩩ ᨩᨶᨸᨴᩮᩈᩩ ᨸᨧ᩠ᨧᩣᨩᩣᨲᩮᩣ ᩉᩮᩣᨲᩥ, ᩈᩮᩣ ᨧ ᩉᩮᩣᨲᩥ ᨸᨬ᩠ᨬᩅᩣ ᩋᨩᩊᩮᩣ ᩋᨶᩮᩊᨾᩪᨣᩮᩣ, ᨸᨭᩥᨻᩃᩮᩣ ᩈᩩᨽᩣᩈᩥᨲ-ᨴᩩᨻ᩠ᨽᩣᩈᩥᨲᩣᨶᨾᨲ᩠ᨳᨾᨬ᩠ᨬᩣᨲᩩᩴ. ᩋᨿᩴ ᨶᩅᨾᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ.

᪓᪔᪓. ‘‘ᨶᩅ ᩋᨶᩩᨸᩩᨻ᩠ᨻᩅᩥᩉᩣᩁᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩅᩥᩅᩥᨧ᩠ᨧᩮᩅ ᨠᩣᨾᩮᩉᩥ ᩅᩥᩅᩥᨧ᩠ᨧ ᩋᨠᩩᩈᩃᩮᩉᩥ ᨵᨾ᩠ᨾᩮᩉᩥ ᩈᩅᩥᨲᨠ᩠ᨠᩴ ᩈᩅᩥᨧᩣᩁᩴ ᩅᩥᩅᩮᨠᨩᩴ ᨸᩦᨲᩥᩈᩩᨡᩴ ᨸᨮᨾᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩅᩥᨲᨠ᩠ᨠᩅᩥᨧᩣᩁᩣᨶᩴ ᩅᩪᨸᩈᨾᩣ…ᨸᩮ… ᨴᩩᨲᩥᨿᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᨸᩦᨲᩥᨿᩣ ᨧ ᩅᩥᩁᩣᨣᩣ…ᨸᩮ… ᨲᨲᩥᨿᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᩩᨡᩔ ᨧ ᨸᩉᩣᨶᩣ …ᨸᩮ… ᨧᨲᩩᨲ᩠ᨳᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᨻ᩠ᨻᩈᩮᩣ ᩁᩪᨸᩈᨬ᩠ᨬᩣᨶᩴ ᩈᨾᨲᩥᨠ᩠ᨠᨾᩣ…ᨸᩮ… ᩌᨠᩣᩈᩣᨶᨬ᩠ᨧᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᨻ᩠ᨻᩈᩮᩣ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᩋᨶᨶ᩠ᨲᩴ ᩅᩥᨬ᩠ᨬᩣᨱ’ᨶ᩠ᨲᩥ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᨻ᩠ᨻᩈᩮᩣ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᨶᨲ᩠ᨳᩥ ᨠᩥᨬ᩠ᨧᩦ’ᨲᩥ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᨻ᩠ᨻᩈᩮᩣ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᨻ᩠ᨻᩈᩮᩣ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ᩈᨬ᩠ᨬᩣᩅᩮᨴᨿᩥᨲᨶᩥᩁᩮᩣᨵᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ.

᪓᪔᪔. ‘‘ᨶᩅ ᩋᨶᩩᨸᩩᨻ᩠ᨻᨶᩥᩁᩮᩣᨵᩣ. ᨸᨮᨾᩴ ᨫᩣᨶᩴ ᩈᨾᩣᨸᨶ᩠ᨶᩔ ᨠᩣᨾᩈᨬ᩠ᨬᩣ ᨶᩥᩁᩩᨴ᩠ᨵᩣ ᩉᩮᩣᨲᩥ. ᨴᩩᨲᩥᨿᩴ ᨫᩣᨶᩴ ᩈᨾᩣᨸᨶ᩠ᨶᩔ ᩅᩥᨲᨠ᩠ᨠᩅᩥᨧᩣᩁᩣ ᨶᩥᩁᩩᨴ᩠ᨵᩣ ᩉᩮᩣᨶ᩠ᨲᩥ. ᨲᨲᩥᨿᩴ ᨫᩣᨶᩴ ᩈᨾᩣᨸᨶ᩠ᨶᩔ ᨸᩦᨲᩥ ᨶᩥᩁᩩᨴ᩠ᨵᩣ ᩉᩮᩣᨲᩥ. ᨧᨲᩩᨲ᩠ᨳᩴ ᨫᩣᨶᩴ ᩈᨾᩣᨸᨶ᩠ᨶᩔ ᩋᩔᩣᩈᨸᩔᩣᩔᩣ ᨶᩥᩁᩩᨴ᩠ᨵᩣ ᩉᩮᩣᨶ᩠ᨲᩥ. ᩌᨠᩣᩈᩣᨶᨬ᩠ᨧᩣᨿᨲᨶᩴ ᩈᨾᩣᨸᨶ᩠ᨶᩔ ᩁᩪᨸᩈᨬ᩠ᨬᩣ ᨶᩥᩁᩩᨴ᩠ᨵᩣ ᩉᩮᩣᨲᩥ. ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩈᨾᩣᨸᨶ᩠ᨶᩔ ᩌᨠᩣᩈᩣᨶᨬ᩠ᨧᩣᨿᨲᨶᩈᨬ᩠ᨬᩣ ᨶᩥᩁᩩᨴ᩠ᨵᩣ ᩉᩮᩣᨲᩥ. ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩈᨾᩣᨸᨶ᩠ᨶᩔ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩈᨬ᩠ᨬᩣ ᨶᩥᩁᩩᨴ᩠ᨵᩣ ᩉᩮᩣᨲᩥ. ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ ᩈᨾᩣᨸᨶ᩠ᨶᩔ ᩌᨠᩥᨬ᩠ᨧᨬ᩠ᨬᩣᨿᨲᨶᩈᨬ᩠ᨬᩣ ᨶᩥᩁᩩᨴ᩠ᨵᩣ ᩉᩮᩣᨲᩥ. ᩈᨬ᩠ᨬᩣᩅᩮᨴᨿᩥᨲᨶᩥᩁᩮᩣᨵᩴ ᩈᨾᩣᨸᨶ᩠ᨶᩔ ᩈᨬ᩠ᨬᩣ ᨧ ᩅᩮᨴᨶᩣ ᨧ ᨶᩥᩁᩩᨴ᩠ᨵᩣ ᩉᩮᩣᨶ᩠ᨲᩥ.

‘‘ᩍᨾᩮ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨶᩅ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ. ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ…ᨸᩮ… ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ.

ᨴᩈᨠᩴ

᪓᪔᪕. ‘‘ᩋᨲ᩠ᨳᩥ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨴᩈ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ. ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ…ᨸᩮ… ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶᩴ. ᨠᨲᨾᩮ ᨴᩈ?

‘‘ᨴᩈ ᨶᩣᨳᨠᩁᨱᩣ ᨵᨾ᩠ᨾᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᩦᩃᩅᩣ ᩉᩮᩣᨲᩥ. ᨸᩣᨲᩥᨾᩮᩣᨠ᩠ᨡᩈᩴᩅᩁᩈᩴᩅᩩᨲᩮᩣ ᩅᩥᩉᩁᨲᩥ ᩌᨧᩣᩁᨣᩮᩣᨧᩁᩈᨾ᩠ᨸᨶ᩠ᨶᩮᩣ, ᩋᨱᩩᨾᨲ᩠ᨲᩮᩈᩩ ᩅᨩ᩠ᨩᩮᩈᩩ ᨽᨿᨴᩔᩣᩅᩦ ᩈᨾᩣᨴᩣᨿ ᩈᩥᨠ᩠ᨡᨲᩥ ᩈᩥᨠ᩠ᨡᩣᨸᨴᩮᩈᩩ. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ ᩈᩦᩃᩅᩣ ᩉᩮᩣᨲᩥ, ᨸᩣᨲᩥᨾᩮᩣᨠ᩠ᨡᩈᩴᩅᩁᩈᩴᩅᩩᨲᩮᩣ ᩅᩥᩉᩁᨲᩥ, ᩌᨧᩣᩁᨣᩮᩣᨧᩁᩈᨾ᩠ᨸᨶ᩠ᨶᩮᩣ, ᩋᨱᩩᨾᨲ᩠ᨲᩮᩈᩩ ᩅᨩ᩠ᨩᩮᩈᩩ ᨽᨿᨴᩔᩣᩅᩦ ᩈᨾᩣᨴᩣᨿ ᩈᩥᨠ᩠ᨡᨲᩥ ᩈᩥᨠ᩠ᨡᩣᨸᨴᩮᩈᩩ. ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨻᩉᩩᩔᩩᨲᩮᩣ ᩉᩮᩣᨲᩥ ᩈᩩᨲᨵᩁᩮᩣ ᩈᩩᨲᩈᨶ᩠ᨶᩥᨧᨿᩮᩣ. ᨿᩮ ᨲᩮ ᨵᨾ᩠ᨾᩣ ᩌᨴᩥᨠᩃ᩠ᨿᩣᨱᩣ ᨾᨩ᩠ᨫᩮᨠᩃ᩠ᨿᩣᨱᩣ ᨸᩁᩥᨿᩮᩣᩈᩣᨶᨠᩃ᩠ᨿᩣᨱᩣ ᩈᩣᨲ᩠ᨳᩣ ᩈᨻ᩠ᨿᨬ᩠ᨩᨶᩣ [ᩈᩣᨲ᩠ᨳᩴ ᩈᨻ᩠ᨿᨬ᩠ᨩᨶᩴ (ᩈᩦ. ᩈ᩠ᨿᩣ. ᨸᩦ.)] ᨠᩮᩅᩃᨸᩁᩥᨸᩩᨱ᩠ᨱᩴ ᨸᩁᩥᩈᩩᨴ᩠ᨵᩴ ᨻᩕᩉ᩠ᨾᨧᩁᩥᨿᩴ ᩋᨽᩥᩅᨴᨶ᩠ᨲᩥ, ᨲᨳᩣᩁᩪᨸᩣᩔ ᨵᨾ᩠ᨾᩣ ᨻᩉᩩᩔᩩᨲᩣ ᩉᩮᩣᨶ᩠ᨲᩥ [ᨵᨲᩣ (ᨠ. ᩈᩦ. ᩈ᩠ᨿᩣ. ᨠᩴ.)] ᨵᩣᨲᩣ ᩅᨧᩈᩣ ᨸᩁᩥᨧᩥᨲᩣ ᨾᨶᩈᩣᨶᩩᨸᩮᨠ᩠ᨡᩥᨲᩣ ᨴᩥᨭ᩠ᨮᩥᨿᩣ ᩈᩩᨸ᩠ᨸᨭᩥᩅᩥᨴ᩠ᨵᩣ, ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ ᨻᩉᩩᩔᩩᨲᩮᩣ ᩉᩮᩣᨲᩥ…ᨸᩮ… ᨴᩥᨭ᩠ᨮᩥᨿᩣ ᩈᩩᨸ᩠ᨸᨭᩥᩅᩥᨴ᩠ᨵᩣ. ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨠᩃ᩠ᨿᩣᨱᨾᩥᨲ᩠ᨲᩮᩣ ᩉᩮᩣᨲᩥ ᨠᩃ᩠ᨿᩣᨱᩈᩉᩣᨿᩮᩣ ᨠᩃ᩠ᨿᩣᨱᩈᨾ᩠ᨸᩅᨦ᩠ᨠᩮᩣ. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ ᨠᩃ᩠ᨿᩣᨱᨾᩥᨲ᩠ᨲᩮᩣ ᩉᩮᩣᨲᩥ ᨠᩃ᩠ᨿᩣᨱᩈᩉᩣᨿᩮᩣ ᨠᩃ᩠ᨿᩣᨱᩈᨾ᩠ᨸᩅᨦ᩠ᨠᩮᩣ. ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᩩᩅᨧᩮᩣ ᩉᩮᩣᨲᩥ ᩈᩮᩣᩅᨧᩔᨠᩁᨱᩮᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨡᨾᩮᩣ ᨸᨴᨠ᩠ᨡᩥᨱᨣ᩠ᨣᩣᩉᩦ ᩋᨶᩩᩈᩣᩈᨶᩥᩴ. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ ᩈᩩᩅᨧᩮᩣ ᩉᩮᩣᨲᩥ…ᨸᩮ… ᨸᨴᨠ᩠ᨡᩥᨱᨣ᩠ᨣᩣᩉᩦ ᩋᨶᩩᩈᩣᩈᨶᩥᩴ. ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨿᩣᨶᩥ ᨲᩣᨶᩥ ᩈᨻᩕᩉ᩠ᨾᨧᩣᩁᩦᨶᩴ ᩏᨧ᩠ᨧᩣᩅᨧᩣᨶᩥ ᨠᩥᩴᨠᩁᨱᩦᨿᩣᨶᩥ, ᨲᨲ᩠ᨳ ᨴᨠ᩠ᨡᩮᩣ ᩉᩮᩣᨲᩥ ᩋᨶᩃᩈᩮᩣ ᨲᨲᩕᩩᨸᩣᨿᩣᨿ ᩅᩦᨾᩴᩈᩣᨿ ᩈᨾᨶ᩠ᨶᩣᨣᨲᩮᩣ, ᩋᩃᩴ ᨠᩣᨲᩩᩴ ᩋᩃᩴ ᩈᩴᩅᩥᨵᩣᨲᩩᩴ. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ ᨿᩣᨶᩥ ᨲᩣᨶᩥ ᩈᨻᩕᩉ᩠ᨾᨧᩣᩁᩦᨶᩴ…ᨸᩮ… ᩋᩃᩴ ᩈᩴᩅᩥᨵᩣᨲᩩᩴ. ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨵᨾ᩠ᨾᨠᩣᨾᩮᩣ ᩉᩮᩣᨲᩥ ᨸᩥᨿᩈᨾᩩᨴᩣᩉᩣᩁᩮᩣ, ᩋᨽᩥᨵᨾ᩠ᨾᩮ ᩋᨽᩥᩅᩥᨶᨿᩮ ᩏᩊᩣᩁᨸᩣᨾᩮᩣᨩ᩠ᨩᩮᩣ [ᩏᩊᩣᩁᨸᩣᨾᩩᨩ᩠ᨩᩮᩣ (ᩈᩦ. ᨸᩦ.), ᩒᩊᩣᩁᨸᩣᨾᩮᩣᨩ᩠ᨩᩮᩣ (ᩈ᩠ᨿᩣ. ᨠᩴ.)]. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ ᨵᨾ᩠ᨾᨠᩣᨾᩮᩣ ᩉᩮᩣᨲᩥ…ᨸᩮ… ᩏᩊᩣᩁᨸᩣᨾᩮᩣᨩ᩠ᨩᩮᩣ [ᩏᩊᩣᩁᨸᩣᨾᩩᨩ᩠ᨩᩮᩣ (ᩈᩦ. ᨸᩦ.), ᩒᩊᩣᩁᨸᩣᨾᩮᩣᨩ᩠ᨩᩮᩣ (ᩈ᩠ᨿᩣ. ᨠᩴ.)]. ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᨶ᩠ᨲᩩᨭ᩠ᨮᩮᩣ ᩉᩮᩣᨲᩥ ᩍᨲᩁᩦᨲᩁᩮᩉᩥ ᨧᩦᩅᩁᨸᩥᨱ᩠ᨯᨸᩣᨲᩈᩮᨶᩣᩈᨶᨣᩥᩃᩣᨶᨸ᩠ᨸᨧ᩠ᨧᨿᨽᩮᩈᨩ᩠ᨩᨸᩁᩥᨠ᩠ᨡᩣᩁᩮᩉᩥ. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ ᩈᨶ᩠ᨲᩩᨭ᩠ᨮᩮᩣ ᩉᩮᩣᨲᩥ…ᨸᩮ… ᨸᩁᩥᨠ᩠ᨡᩣᩁᩮᩉᩥ. ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᩌᩁᨴ᩠ᨵᩅᩦᩁᩥᨿᩮᩣ ᩅᩥᩉᩁᨲᩥ ᩋᨠᩩᩈᩃᩣᨶᩴ ᨵᨾ᩠ᨾᩣᨶᩴ ᨸᩉᩣᨶᩣᨿ ᨠᩩᩈᩃᩣᨶᩴ ᨵᨾ᩠ᨾᩣᨶᩴ ᩏᨸᩈᨾ᩠ᨸᨴᩣᨿ, ᨳᩣᨾᩅᩣ ᨴᩊ᩠ᩉᨸᩁᨠ᩠ᨠᨾᩮᩣ ᩋᨶᩥᨠ᩠ᨡᩥᨲ᩠ᨲᨵᩩᩁᩮᩣ ᨠᩩᩈᩃᩮᩈᩩ ᨵᨾ᩠ᨾᩮᩈᩩ. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ ᩌᩁᨴ᩠ᨵᩅᩦᩁᩥᨿᩮᩣ ᩅᩥᩉᩁᨲᩥ…ᨸᩮ… ᩋᨶᩥᨠ᩠ᨡᩥᨲ᩠ᨲᨵᩩᩁᩮᩣ ᨠᩩᩈᩃᩮᩈᩩ ᨵᨾ᩠ᨾᩮᩈᩩ. ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᨲᩥᨾᩣ ᩉᩮᩣᨲᩥ ᨸᩁᨾᩮᨶ ᩈᨲᩥᨶᩮᨸᨠ᩠ᨠᩮᨶ ᩈᨾᨶ᩠ᨶᩣᨣᨲᩮᩣ ᨧᩥᩁᨠᨲᨾ᩠ᨸᩥ ᨧᩥᩁᨽᩣᩈᩥᨲᨾ᩠ᨸᩥ ᩈᩁᩥᨲᩣ ᩋᨶᩩᩔᩁᩥᨲᩣ. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ ᩈᨲᩥᨾᩣ ᩉᩮᩣᨲᩥ…ᨸᩮ… ᩈᩁᩥᨲᩣ ᩋᨶᩩᩔᩁᩥᨲᩣ. ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨸᨬ᩠ᨬᩅᩣ ᩉᩮᩣᨲᩥ, ᩏᨴᨿᨲ᩠ᨳᨣᩣᨾᩥᨶᩥᨿᩣ ᨸᨬ᩠ᨬᩣᨿ ᩈᨾᨶ᩠ᨶᩣᨣᨲᩮᩣ ᩋᩁᩥᨿᩣᨿ ᨶᩥᨻ᩠ᨻᩮᨵᩥᨠᩣᨿ ᩈᨾ᩠ᨾᩣᨴᩩᨠ᩠ᨡᨠ᩠ᨡᨿᨣᩣᨾᩥᨶᩥᨿᩣ. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ ᨸᨬ᩠ᨬᩅᩣ ᩉᩮᩣᨲᩥ…ᨸᩮ… ᩈᨾ᩠ᨾᩣᨴᩩᨠ᩠ᨡᨠ᩠ᨡᨿᨣᩣᨾᩥᨶᩥᨿᩣ. ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

᪓᪔᪖. ᨴᩈ ᨠᩈᩥᨱᩣᨿᨲᨶᩣᨶᩥ. ᨸᨳᩅᩦᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ, ᩏᨴ᩠ᨵᩴ ᩋᨵᩮᩣ ᨲᩥᩁᩥᨿᩴ ᩋᨴ᩠ᩅᨿᩴ ᩋᨸ᩠ᨸᨾᩣᨱᩴ. ᩌᨸᩮᩣᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ…ᨸᩮ… ᨲᩮᨩᩮᩣᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ… ᩅᩣᨿᩮᩣᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ… ᨶᩦᩃᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ… ᨸᩦᨲᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ… ᩃᩮᩣᩉᩥᨲᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ… ᩒᨴᩣᨲᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ… ᩌᨠᩣᩈᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ… ᩅᩥᨬ᩠ᨬᩣᨱᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ, ᩏᨴ᩠ᨵᩴ ᩋᨵᩮᩣ ᨲᩥᩁᩥᨿᩴ ᩋᨴ᩠ᩅᨿᩴ ᩋᨸ᩠ᨸᨾᩣᨱᩴ.

᪓᪔᪗. ‘‘ᨴᩈ ᩋᨠᩩᩈᩃᨠᨾ᩠ᨾᨸᨳᩣ – ᨸᩣᨱᩣᨲᩥᨸᩣᨲᩮᩣ, ᩋᨴᩥᨶ᩠ᨶᩣᨴᩣᨶᩴ, ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩮᩣ, ᨾᩩᩈᩣᩅᩣᨴᩮᩣ, ᨸᩥᩈᩩᨱᩣ ᩅᩣᨧᩣ, ᨹᩁᩩᩈᩣ ᩅᩣᨧᩣ, ᩈᨾ᩠ᨹᨸ᩠ᨸᩃᩣᨸᩮᩣ, ᩋᨽᩥᨩ᩠ᨫᩣ, ᨻ᩠ᨿᩣᨸᩣᨴᩮᩣ, ᨾᩥᨧ᩠ᨨᩣᨴᩥᨭ᩠ᨮᩥ.

‘‘ᨴᩈ ᨠᩩᩈᩃᨠᨾ᩠ᨾᨸᨳᩣ – ᨸᩣᨱᩣᨲᩥᨸᩣᨲᩣ ᩅᩮᩁᨾᨱᩦ, ᩋᨴᩥᨶ᩠ᨶᩣᨴᩣᨶᩣ ᩅᩮᩁᨾᨱᩦ, ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ ᩅᩮᩁᨾᨱᩦ, ᨾᩩᩈᩣᩅᩣᨴᩣ ᩅᩮᩁᨾᨱᩦ, ᨸᩥᩈᩩᨱᩣᨿ ᩅᩣᨧᩣᨿ ᩅᩮᩁᨾᨱᩦ, ᨹᩁᩩᩈᩣᨿ ᩅᩣᨧᩣᨿ ᩅᩮᩁᨾᨱᩦ, ᩈᨾ᩠ᨹᨸ᩠ᨸᩃᩣᨸᩣ ᩅᩮᩁᨾᨱᩦ, ᩋᨶᨽᩥᨩ᩠ᨫᩣ, ᩋᨻ᩠ᨿᩣᨸᩣᨴᩮᩣ, ᩈᨾ᩠ᨾᩣᨴᩥᨭ᩠ᨮᩥ.

᪓᪔᪘. ‘‘ᨴᩈ ᩋᩁᩥᨿᩅᩣᩈᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨸᨬ᩠ᨧᨦ᩠ᨣᩅᩥᨸ᩠ᨸᩉᩦᨶᩮᩣ ᩉᩮᩣᨲᩥ, ᨨᩊᨦ᩠ᨣᩈᨾᨶ᩠ᨶᩣᨣᨲᩮᩣ, ᩑᨠᩣᩁᨠ᩠ᨡᩮᩣ, ᨧᨲᩩᩁᩣᨸᩔᩮᨶᩮᩣ, ᨸᨱᩩᨶ᩠ᨶᨸᨧ᩠ᨧᩮᨠᩈᨧ᩠ᨧᩮᩣ, ᩈᨾᩅᨿᩈᨭ᩠ᨮᩮᩈᨶᩮᩣ, ᩋᨶᩣᩅᩥᩃᩈᨦ᩠ᨠᨸ᩠ᨸᩮᩣ, ᨸᩔᨴ᩠ᨵᨠᩣᨿᩈᨦ᩠ᨡᩣᩁᩮᩣ, ᩈᩩᩅᩥᨾᩩᨲ᩠ᨲᨧᩥᨲ᩠ᨲᩮᩣ, ᩈᩩᩅᩥᨾᩩᨲ᩠ᨲᨸᨬ᩠ᨬᩮᩣ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᨸᨬ᩠ᨧᨦ᩠ᨣᩅᩥᨸ᩠ᨸᩉᩦᨶᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨠᩣᨾᨧ᩠ᨨᨶ᩠ᨴᩮᩣ ᨸᩉᩦᨶᩮᩣ ᩉᩮᩣᨲᩥ, ᨻ᩠ᨿᩣᨸᩣᨴᩮᩣ ᨸᩉᩦᨶᩮᩣ ᩉᩮᩣᨲᩥ, ᨳᩥᨶᨾᩥᨴ᩠ᨵᩴ ᨸᩉᩦᨶᩴ ᩉᩮᩣᨲᩥ, ᩏᨴ᩠ᨵᨧ᩠ᨧᨠᩩᨠᩩᨧ᩠ᨧᩴ ᨸᩉᩦᨶᩴ ᩉᩮᩣᨲᩥ, ᩅᩥᨧᩥᨠᩥᨧ᩠ᨨᩣ ᨸᩉᩦᨶᩣ ᩉᩮᩣᨲᩥ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᨸᨬ᩠ᨧᨦ᩠ᨣᩅᩥᨸ᩠ᨸᩉᩦᨶᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᨨᩊᨦ᩠ᨣᩈᨾᨶ᩠ᨶᩣᨣᨲᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨧᨠ᩠ᨡᩩᨶᩣ ᩁᩪᨸᩴ ᨴᩥᩈ᩠ᩅᩣ ᨶᩮᩅ ᩈᩩᨾᨶᩮᩣ ᩉᩮᩣᨲᩥ ᨶ ᨴᩩᨾ᩠ᨾᨶᩮᩣ, ᩏᨸᩮᨠ᩠ᨡᨠᩮᩣ ᩅᩥᩉᩁᨲᩥ ᩈᨲᩮᩣ ᩈᨾ᩠ᨸᨩᩣᨶᩮᩣ. ᩈᩮᩣᨲᩮᨶ ᩈᨴ᩠ᨴᩴ ᩈᩩᨲ᩠ᩅᩣ…ᨸᩮ… ᨾᨶᩈᩣ ᨵᨾ᩠ᨾᩴ ᩅᩥᨬ᩠ᨬᩣᨿ ᨶᩮᩅ ᩈᩩᨾᨶᩮᩣ ᩉᩮᩣᨲᩥ ᨶ ᨴᩩᨾ᩠ᨾᨶᩮᩣ, ᩏᨸᩮᨠ᩠ᨡᨠᩮᩣ ᩅᩥᩉᩁᨲᩥ ᩈᨲᩮᩣ ᩈᨾ᩠ᨸᨩᩣᨶᩮᩣ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᨨᩊᨦ᩠ᨣᩈᨾᨶ᩠ᨶᩣᨣᨲᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᩑᨠᩣᩁᨠ᩠ᨡᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨲᩣᩁᨠ᩠ᨡᩮᨶ ᨧᩮᨲᩈᩣ ᩈᨾᨶ᩠ᨶᩣᨣᨲᩮᩣ ᩉᩮᩣᨲᩥ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩑᨠᩣᩁᨠ᩠ᨡᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᨧᨲᩩᩁᩣᨸᩔᩮᨶᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨦ᩠ᨡᩣᨿᩮᨠᩴ ᨸᨭᩥᩈᩮᩅᨲᩥ, ᩈᨦ᩠ᨡᩣᨿᩮᨠᩴ ᩋᨵᩥᩅᩣᩈᩮᨲᩥ, ᩈᨦ᩠ᨡᩣᨿᩮᨠᩴ ᨸᩁᩥᩅᨩ᩠ᨩᩮᨲᩥ, ᩈᨦ᩠ᨡᩣᨿᩮᨠᩴ ᩅᩥᨶᩮᩣᨴᩮᨲᩥ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᨧᨲᩩᩁᩣᨸᩔᩮᨶᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᨸᨱᩩᨶ᩠ᨶᨸᨧ᩠ᨧᩮᨠᩈᨧ᩠ᨧᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨿᩣᨶᩥ ᨲᩣᨶᩥ ᨸᩩᨳᩩᩈᨾᨱᨻᩕᩣᩉ᩠ᨾᨱᩣᨶᩴ ᨸᩩᨳᩩᨸᨧ᩠ᨧᩮᨠᩈᨧ᩠ᨧᩣᨶᩥ, ᩈᨻ᩠ᨻᩣᨶᩥ ᨲᩣᨶᩥ ᨶᩩᨶ᩠ᨶᩣᨶᩥ ᩉᩮᩣᨶ᩠ᨲᩥ ᨸᨱᩩᨶ᩠ᨶᩣᨶᩥ ᨧᨲ᩠ᨲᩣᨶᩥ ᩅᨶ᩠ᨲᩣᨶᩥ ᨾᩩᨲ᩠ᨲᩣᨶᩥ ᨸᩉᩦᨶᩣᨶᩥ ᨸᨭᩥᨶᩥᩔᨭ᩠ᨮᩣᨶᩥ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᨸᨱᩩᨶ᩠ᨶᨸᨧ᩠ᨧᩮᨠᩈᨧ᩠ᨧᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᩈᨾᩅᨿᩈᨭ᩠ᨮᩮᩈᨶᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨠᩣᨾᩮᩈᨶᩣ ᨸᩉᩦᨶᩣ ᩉᩮᩣᨲᩥ, ᨽᩅᩮᩈᨶᩣ ᨸᩉᩦᨶᩣ ᩉᩮᩣᨲᩥ, ᨻᩕᩉ᩠ᨾᨧᩁᩥᨿᩮᩈᨶᩣ ᨸᨭᩥᨸ᩠ᨸᩔᨴ᩠ᨵᩣ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᨾᩅᨿᩈᨭ᩠ᨮᩮᩈᨶᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᩋᨶᩣᩅᩥᩃᩈᨦ᩠ᨠᨸ᩠ᨸᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨠᩣᨾᩈᨦ᩠ᨠᨸ᩠ᨸᩮᩣ ᨸᩉᩦᨶᩮᩣ ᩉᩮᩣᨲᩥ, ᨻ᩠ᨿᩣᨸᩣᨴᩈᨦ᩠ᨠᨸ᩠ᨸᩮᩣ ᨸᩉᩦᨶᩮᩣ ᩉᩮᩣᨲᩥ, ᩅᩥᩉᩥᩴᩈᩣᩈᨦ᩠ᨠᨸ᩠ᨸᩮᩣ ᨸᩉᩦᨶᩮᩣ ᩉᩮᩣᨲᩥ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩋᨶᩣᩅᩥᩃᩈᨦ᩠ᨠᨸ᩠ᨸᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᨸᩔᨴ᩠ᨵᨠᩣᨿᩈᨦ᩠ᨡᩣᩁᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᩩᨡᩔ ᨧ ᨸᩉᩣᨶᩣ ᨴᩩᨠ᩠ᨡᩔ ᨧ ᨸᩉᩣᨶᩣ ᨸᩩᨻ᩠ᨻᩮᩅ ᩈᩮᩣᨾᨶᩔᨴᩮᩣᨾᨶᩔᩣᨶᩴ ᩋᨲ᩠ᨳᨦ᩠ᨣᨾᩣ ᩋᨴᩩᨠ᩠ᨡᨾᩈᩩᨡᩴ ᩏᨸᩮᨠ᩠ᨡᩣᩈᨲᩥᨸᩣᩁᩥᩈᩩᨴ᩠ᨵᩥᩴ ᨧᨲᩩᨲ᩠ᨳᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᨸᩔᨴ᩠ᨵᨠᩣᨿᩈᨦ᩠ᨡᩣᩁᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᩈᩩᩅᩥᨾᩩᨲ᩠ᨲᨧᩥᨲ᩠ᨲᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩁᩣᨣᩣ ᨧᩥᨲ᩠ᨲᩴ ᩅᩥᨾᩩᨲ᩠ᨲᩴ ᩉᩮᩣᨲᩥ, ᨴᩮᩣᩈᩣ ᨧᩥᨲ᩠ᨲᩴ ᩅᩥᨾᩩᨲ᩠ᨲᩴ ᩉᩮᩣᨲᩥ, ᨾᩮᩣᩉᩣ ᨧᩥᨲ᩠ᨲᩴ ᩅᩥᨾᩩᨲ᩠ᨲᩴ ᩉᩮᩣᨲᩥ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᩩᩅᩥᨾᩩᨲ᩠ᨲᨧᩥᨲ᩠ᨲᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᩈᩩᩅᩥᨾᩩᨲ᩠ᨲᨸᨬ᩠ᨬᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ‘ᩁᩣᨣᩮᩣ ᨾᩮ ᨸᩉᩦᨶᩮᩣ ᩏᨧ᩠ᨨᩥᨶ᩠ᨶᨾᩪᩃᩮᩣ ᨲᩣᩃᩣᩅᨲ᩠ᨳᩩᨠᨲᩮᩣ ᩋᨶᨽᩣᩅᩴᨠᨲᩮᩣ ᩌᨿᨲᩥᩴ ᩋᨶᩩᨸ᩠ᨸᩣᨴᨵᨾ᩠ᨾᩮᩣ’ᨲᩥ ᨸᨩᩣᨶᩣᨲᩥ. ‘ᨴᩮᩣᩈᩮᩣ ᨾᩮ ᨸᩉᩦᨶᩮᩣ ᩏᨧ᩠ᨨᩥᨶ᩠ᨶᨾᩪᩃᩮᩣ ᨲᩣᩃᩣᩅᨲ᩠ᨳᩩᨠᨲᩮᩣ ᩋᨶᨽᩣᩅᩴᨠᨲᩮᩣ ᩌᨿᨲᩥᩴ ᩋᨶᩩᨸ᩠ᨸᩣᨴᨵᨾ᩠ᨾᩮᩣ’ᨲᩥ ᨸᨩᩣᨶᩣᨲᩥ. ‘ᨾᩮᩣᩉᩮᩣ ᨾᩮ ᨸᩉᩦᨶᩮᩣ ᩏᨧ᩠ᨨᩥᨶ᩠ᨶᨾᩪᩃᩮᩣ ᨲᩣᩃᩣᩅᨲ᩠ᨳᩩᨠᨲᩮᩣ ᩋᨶᨽᩣᩅᩴᨠᨲᩮᩣ ᩌᨿᨲᩥᩴ ᩋᨶᩩᨸ᩠ᨸᩣᨴᨵᨾ᩠ᨾᩮᩣ’ᨲᩥ ᨸᨩᩣᨶᩣᨲᩥ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᩩᩅᩥᨾᩩᨲ᩠ᨲᨸᨬ᩠ᨬᩮᩣ ᩉᩮᩣᨲᩥ.

‘‘ᨴᩈ ᩋᩈᩮᨠ᩠ᨡᩣ ᨵᨾ᩠ᨾᩣ – ᩋᩈᩮᨠ᩠ᨡᩣ ᩈᨾ᩠ᨾᩣᨴᩥᨭ᩠ᨮᩥ, ᩋᩈᩮᨠ᩠ᨡᩮᩣ ᩈᨾ᩠ᨾᩣᩈᨦ᩠ᨠᨸ᩠ᨸᩮᩣ, ᩋᩈᩮᨠ᩠ᨡᩣ ᩈᨾ᩠ᨾᩣᩅᩣᨧᩣ, ᩋᩈᩮᨠ᩠ᨡᩮᩣ ᩈᨾ᩠ᨾᩣᨠᨾ᩠ᨾᨶ᩠ᨲᩮᩣ, ᩋᩈᩮᨠ᩠ᨡᩮᩣ ᩈᨾ᩠ᨾᩣᩌᨩᩦᩅᩮᩣ, ᩋᩈᩮᨠ᩠ᨡᩮᩣ ᩈᨾ᩠ᨾᩣᩅᩣᨿᩣᨾᩮᩣ, ᩋᩈᩮᨠ᩠ᨡᩣ ᩈᨾ᩠ᨾᩣᩈᨲᩥ, ᩋᩈᩮᨠ᩠ᨡᩮᩣ ᩈᨾ᩠ᨾᩣᩈᨾᩣᨵᩥ, ᩋᩈᩮᨠ᩠ᨡᩴ ᩈᨾ᩠ᨾᩣᨬᩣᨱᩴ, ᩋᩈᩮᨠ᩠ᨡᩣ ᩈᨾ᩠ᨾᩣᩅᩥᨾᩩᨲ᩠ᨲᩥ.

‘‘ᩍᨾᩮ ᨡᩮᩣ, ᩌᩅᩩᩈᩮᩣ, ᨲᩮᨶ ᨽᨣᩅᨲᩣ ᨩᩣᨶᨲᩣ ᨸᩔᨲᩣ ᩋᩁᩉᨲᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᨶ ᨴᩈ ᨵᨾ᩠ᨾᩣ ᩈᨾ᩠ᨾᨴᨠ᩠ᨡᩣᨲᩣ. ᨲᨲ᩠ᨳ ᩈᨻ᩠ᨻᩮᩉᩮᩅ ᩈᨦ᩠ᨣᩣᨿᩥᨲᨻ᩠ᨻᩴ ᨶ ᩅᩥᩅᨴᩥᨲᨻ᩠ᨻᩴ, ᨿᨳᨿᩥᨴᩴ ᨻᩕᩉ᩠ᨾᨧᩁᩥᨿᩴ ᩋᨴ᩠ᨵᨶᩥᨿᩴ ᩋᩔ ᨧᩥᩁᨭ᩠ᨮᩥᨲᩥᨠᩴ, ᨲᨴᩔ ᨻᩉᩩᨩᨶᩉᩥᨲᩣᨿ ᨻᩉᩩᨩᨶᩈᩩᨡᩣᨿ ᩃᩮᩣᨠᩣᨶᩩᨠᨾ᩠ᨸᩣᨿ ᩋᨲ᩠ᨳᩣᨿ ᩉᩥᨲᩣᨿ ᩈᩩᨡᩣᨿ ᨴᩮᩅᨾᨶᩩᩔᩣᨶ’’ᨶ᩠ᨲᩥ.

᪓᪔᪙. ᩋᨳ ᨡᩮᩣ ᨽᨣᩅᩣ ᩏᨭ᩠ᨮᩉᩥᨲ᩠ᩅᩣ ᩌᨿᩈ᩠ᨾᨶ᩠ᨲᩴ ᩈᩣᩁᩥᨸᩩᨲ᩠ᨲᩴ ᩌᨾᨶ᩠ᨲᩮᩈᩥ – ‘ᩈᩣᨵᩩ ᩈᩣᨵᩩ, ᩈᩣᩁᩥᨸᩩᨲ᩠ᨲ, ᩈᩣᨵᩩ ᨡᩮᩣ ᨲ᩠ᩅᩴ, ᩈᩣᩁᩥᨸᩩᨲ᩠ᨲ, ᨽᩥᨠ᩠ᨡᩪᨶᩴ ᩈᨦ᩠ᨣᩦᨲᩥᨸᩁᩥᨿᩣᨿᩴ ᩋᨽᩣᩈᩦ’ᨲᩥ. ᩍᨴᨾᩅᩮᩣᨧᩣᨿᩈ᩠ᨾᩣ ᩈᩣᩁᩥᨸᩩᨲ᩠ᨲᩮᩣ, ᩈᨾᨶᩩᨬ᩠ᨬᩮᩣ ᩈᨲ᩠ᨳᩣ ᩋᩉᩮᩣᩈᩥ. ᩋᨲ᩠ᨲᨾᨶᩣ ᨲᩮ ᨽᩥᨠ᩠ᨡᩪ ᩌᨿᩈ᩠ᨾᨲᩮᩣ ᩈᩣᩁᩥᨸᩩᨲ᩠ᨲᩔ ᨽᩣᩈᩥᨲᩴ ᩋᨽᩥᨶᨶ᩠ᨴᩩᨶ᩠ᨲᩥ.

ᩈᨦ᩠ᨣᩦᨲᩥᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᨴᩈᨾᩴ.

᪑᪑. ᨴᩈᩩᨲ᩠ᨲᩁᩈᩩᨲ᩠ᨲᩴ

᪓᪕᪐. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᨧᨾ᩠ᨸᩣᨿᩴ ᩅᩥᩉᩁᨲᩥ ᨣᨣ᩠ᨣᩁᩣᨿ ᨸᩮᩣᨠ᩠ᨡᩁᨱᩥᨿᩣ ᨲᩦᩁᩮ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ ᩈᨴ᩠ᨵᩥᩴ ᨸᨬ᩠ᨧᨾᨲ᩠ᨲᩮᩉᩥ ᨽᩥᨠ᩠ᨡᩩᩈᨲᩮᩉᩥ. ᨲᨲᩕ ᨡᩮᩣ ᩌᨿᩈ᩠ᨾᩣ ᩈᩣᩁᩥᨸᩩᨲ᩠ᨲᩮᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᩌᩅᩩᩈᩮᩣ ᨽᩥᨠ᩠ᨡᩅᩮ’’ᨲᩥ! ‘‘ᩌᩅᩩᩈᩮᩣ’’ᨲᩥ ᨡᩮᩣ ᨲᩮ ᨽᩥᨠ᩠ᨡᩪ ᩌᨿᩈ᩠ᨾᨲᩮᩣ ᩈᩣᩁᩥᨸᩩᨲ᩠ᨲᩔ ᨸᨧ᩠ᨧᩔᩮᩣᩈᩩᩴ. ᩌᨿᩈ᩠ᨾᩣ ᩈᩣᩁᩥᨸᩩᨲ᩠ᨲᩮᩣ ᩑᨲᨴᩅᩮᩣᨧ –

‘‘ᨴᩈᩩᨲ᩠ᨲᩁᩴ ᨸᩅᨠ᩠ᨡᩣᨾᩥ, ᨵᨾ᩠ᨾᩴ ᨶᩥᨻ᩠ᨻᩣᨶᨸᨲ᩠ᨲᩥᨿᩣ;

ᨴᩩᨠ᩠ᨡᩔᨶ᩠ᨲᨠᩥᩁᩥᨿᩣᨿ, ᩈᨻ᩠ᨻᨣᨶ᩠ᨳᨸ᩠ᨸᨾᩮᩣᨧᨶᩴ’’.

ᩑᨠᩮᩣ ᨵᨾ᩠ᨾᩮᩣ

᪓᪕᪑. ‘‘ᩑᨠᩮᩣ, ᩌᩅᩩᩈᩮᩣ, ᨵᨾ᩠ᨾᩮᩣ ᨻᩉᩩᨠᩣᩁᩮᩣ, ᩑᨠᩮᩣ ᨵᨾ᩠ᨾᩮᩣ ᨽᩣᩅᩮᨲᨻ᩠ᨻᩮᩣ, ᩑᨠᩮᩣ ᨵᨾ᩠ᨾᩮᩣ ᨸᩁᩥᨬ᩠ᨬᩮᨿ᩠ᨿᩮᩣ, ᩑᨠᩮᩣ ᨵᨾ᩠ᨾᩮᩣ ᨸᩉᩣᨲᨻ᩠ᨻᩮᩣ, ᩑᨠᩮᩣ ᨵᨾ᩠ᨾᩮᩣ ᩉᩣᨶᨽᩣᨣᩥᨿᩮᩣ, ᩑᨠᩮᩣ ᨵᨾ᩠ᨾᩮᩣ ᩅᩥᩈᩮᩈᨽᩣᨣᩥᨿᩮᩣ, ᩑᨠᩮᩣ ᨵᨾ᩠ᨾᩮᩣ ᨴᩩᨸ᩠ᨸᨭᩥᩅᩥᨩ᩠ᨫᩮᩣ, ᩑᨠᩮᩣ ᨵᨾ᩠ᨾᩮᩣ ᩏᨸ᩠ᨸᩣᨴᩮᨲᨻ᩠ᨻᩮᩣ, ᩑᨠᩮᩣ ᨵᨾ᩠ᨾᩮᩣ ᩋᨽᩥᨬ᩠ᨬᩮᨿ᩠ᨿᩮᩣ, ᩑᨠᩮᩣ ᨵᨾ᩠ᨾᩮᩣ ᩈᨧ᩠ᨨᩥᨠᩣᨲᨻ᩠ᨻᩮᩣ.

(ᨠ) ‘‘ᨠᨲᨾᩮᩣ ᩑᨠᩮᩣ ᨵᨾ᩠ᨾᩮᩣ ᨻᩉᩩᨠᩣᩁᩮᩣ? ᩋᨸ᩠ᨸᨾᩣᨴᩮᩣ ᨠᩩᩈᩃᩮᩈᩩ ᨵᨾ᩠ᨾᩮᩈᩩ. ᩋᨿᩴ ᩑᨠᩮᩣ ᨵᨾ᩠ᨾᩮᩣ ᨻᩉᩩᨠᩣᩁᩮᩣ.

(ᨡ) ‘‘ᨠᨲᨾᩮᩣ ᩑᨠᩮᩣ ᨵᨾ᩠ᨾᩮᩣ ᨽᩣᩅᩮᨲᨻ᩠ᨻᩮᩣ? ᨠᩣᨿᨣᨲᩣᩈᨲᩥ ᩈᩣᨲᩈᩉᨣᨲᩣ. ᩋᨿᩴ ᩑᨠᩮᩣ ᨵᨾ᩠ᨾᩮᩣ ᨽᩣᩅᩮᨲᨻ᩠ᨻᩮᩣ.

(ᨣ) ‘‘ᨠᨲᨾᩮᩣ ᩑᨠᩮᩣ ᨵᨾ᩠ᨾᩮᩣ ᨸᩁᩥᨬ᩠ᨬᩮᨿ᩠ᨿᩮᩣ? ᨹᩔᩮᩣ ᩈᩣᩈᩅᩮᩣ ᩏᨸᩣᨴᩣᨶᩥᨿᩮᩣ. ᩋᨿᩴ ᩑᨠᩮᩣ ᨵᨾ᩠ᨾᩮᩣ ᨸᩁᩥᨬ᩠ᨬᩮᨿ᩠ᨿᩮᩣ.

(ᨥ) ‘‘ᨠᨲᨾᩮᩣ ᩑᨠᩮᩣ ᨵᨾ᩠ᨾᩮᩣ ᨸᩉᩣᨲᨻ᩠ᨻᩮᩣ? ᩋᩈ᩠ᨾᩥᨾᩣᨶᩮᩣ. ᩋᨿᩴ ᩑᨠᩮᩣ ᨵᨾ᩠ᨾᩮᩣ ᨸᩉᩣᨲᨻ᩠ᨻᩮᩣ.

(ᨦ) ‘‘ᨠᨲᨾᩮᩣ ᩑᨠᩮᩣ ᨵᨾ᩠ᨾᩮᩣ ᩉᩣᨶᨽᩣᨣᩥᨿᩮᩣ? ᩋᨿᩮᩣᨶᩥᩈᩮᩣ ᨾᨶᩈᩥᨠᩣᩁᩮᩣ. ᩋᨿᩴ ᩑᨠᩮᩣ ᨵᨾ᩠ᨾᩮᩣ ᩉᩣᨶᨽᩣᨣᩥᨿᩮᩣ.

(ᨧ) ‘‘ᨠᨲᨾᩮᩣ ᩑᨠᩮᩣ ᨵᨾ᩠ᨾᩮᩣ ᩅᩥᩈᩮᩈᨽᩣᨣᩥᨿᩮᩣ? ᨿᩮᩣᨶᩥᩈᩮᩣ ᨾᨶᩈᩥᨠᩣᩁᩮᩣ. ᩋᨿᩴ ᩑᨠᩮᩣ ᨵᨾ᩠ᨾᩮᩣ ᩅᩥᩈᩮᩈᨽᩣᨣᩥᨿᩮᩣ.

(ᨨ) ‘‘ᨠᨲᨾᩮᩣ ᩑᨠᩮᩣ ᨵᨾ᩠ᨾᩮᩣ ᨴᩩᨸ᩠ᨸᨭᩥᩅᩥᨩ᩠ᨫᩮᩣ? ᩌᨶᨶ᩠ᨲᩁᩥᨠᩮᩣ ᨧᩮᨲᩮᩣᩈᨾᩣᨵᩥ. ᩋᨿᩴ ᩑᨠᩮᩣ ᨵᨾ᩠ᨾᩮᩣ ᨴᩩᨸ᩠ᨸᨭᩥᩅᩥᨩ᩠ᨫᩮᩣ.

(ᨩ) ‘‘ᨠᨲᨾᩮᩣ ᩑᨠᩮᩣ ᨵᨾ᩠ᨾᩮᩣ ᩏᨸ᩠ᨸᩣᨴᩮᨲᨻ᩠ᨻᩮᩣ? ᩋᨠᩩᨸ᩠ᨸᩴ ᨬᩣᨱᩴ. ᩋᨿᩴ ᩑᨠᩮᩣ ᨵᨾ᩠ᨾᩮᩣ ᩏᨸ᩠ᨸᩣᨴᩮᨲᨻ᩠ᨻᩮᩣ.

(ᨫ) ‘‘ᨠᨲᨾᩮᩣ ᩑᨠᩮᩣ ᨵᨾ᩠ᨾᩮᩣ ᩋᨽᩥᨬ᩠ᨬᩮᨿ᩠ᨿᩮᩣ? ᩈᨻ᩠ᨻᩮ ᩈᨲ᩠ᨲᩣ ᩌᩉᩣᩁᨭ᩠ᨮᩥᨲᩥᨠᩣ. ᩋᨿᩴ ᩑᨠᩮᩣ ᨵᨾ᩠ᨾᩮᩣ ᩋᨽᩥᨬ᩠ᨬᩮᨿ᩠ᨿᩮᩣ.

(ᨬ) ‘‘ᨠᨲᨾᩮᩣ ᩑᨠᩮᩣ ᨵᨾ᩠ᨾᩮᩣ ᩈᨧ᩠ᨨᩥᨠᩣᨲᨻ᩠ᨻᩮᩣ? ᩋᨠᩩᨸ᩠ᨸᩣ ᨧᩮᨲᩮᩣᩅᩥᨾᩩᨲ᩠ᨲᩥ. ᩋᨿᩴ ᩑᨠᩮᩣ ᨵᨾ᩠ᨾᩮᩣ ᩈᨧ᩠ᨨᩥᨠᩣᨲᨻ᩠ᨻᩮᩣ.

‘‘ᩍᨲᩥ ᩍᨾᩮ ᨴᩈ ᨵᨾ᩠ᨾᩣ ᨽᩪᨲᩣ ᨲᨧ᩠ᨨᩣ ᨲᨳᩣ ᩋᩅᩥᨲᨳᩣ ᩋᨶᨬ᩠ᨬᨳᩣ ᩈᨾ᩠ᨾᩣ ᨲᨳᩣᨣᨲᩮᨶ ᩋᨽᩥᩈᨾ᩠ᨻᩩᨴ᩠ᨵᩣ.

ᨴ᩠ᩅᩮ ᨵᨾ᩠ᨾᩣ

᪓᪕᪒. ‘‘ᨴ᩠ᩅᩮ ᨵᨾ᩠ᨾᩣ ᨻᩉᩩᨠᩣᩁᩣ, ᨴ᩠ᩅᩮ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ, ᨴ᩠ᩅᩮ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ, ᨴ᩠ᩅᩮ ᨵᨾ᩠ᨾᩣ ᨸᩉᩣᨲᨻ᩠ᨻᩣ, ᨴ᩠ᩅᩮ ᨵᨾ᩠ᨾᩣ ᩉᩣᨶᨽᩣᨣᩥᨿᩣ, ᨴ᩠ᩅᩮ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ, ᨴ᩠ᩅᩮ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ, ᨴ᩠ᩅᩮ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ, ᨴ᩠ᩅᩮ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ, ᨴ᩠ᩅᩮ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

(ᨠ) ‘‘ᨠᨲᨾᩮ ᨴ᩠ᩅᩮ ᨵᨾ᩠ᨾᩣ ᨻᩉᩩᨠᩣᩁᩣ? ᩈᨲᩥ ᨧ ᩈᨾ᩠ᨸᨩᨬ᩠ᨬᨬ᩠ᨧ. ᩍᨾᩮ ᨴ᩠ᩅᩮ ᨵᨾ᩠ᨾᩣ ᨻᩉᩩᨠᩣᩁᩣ.

(ᨡ) ‘‘ᨠᨲᨾᩮ ᨴ᩠ᩅᩮ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ? ᩈᨾᨳᩮᩣ ᨧ ᩅᩥᨸᩔᨶᩣ ᨧ. ᩍᨾᩮ ᨴ᩠ᩅᩮ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ.

(ᨣ) ‘‘ᨠᨲᨾᩮ ᨴ᩠ᩅᩮ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ? ᨶᩣᨾᨬ᩠ᨧ ᩁᩪᨸᨬ᩠ᨧ. ᩍᨾᩮ ᨴ᩠ᩅᩮ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ.

(ᨥ) ‘‘ᨠᨲᨾᩮ ᨴ᩠ᩅᩮ ᨵᨾ᩠ᨾᩣ ᨸᩉᩣᨲᨻ᩠ᨻᩣ? ᩋᩅᩥᨩ᩠ᨩᩣ ᨧ ᨽᩅᨲᨱ᩠ᩉᩣ ᨧ. ᩍᨾᩮ ᨴ᩠ᩅᩮ ᨵᨾ᩠ᨾᩣ ᨸᩉᩣᨲᨻ᩠ᨻᩣ.

(ᨦ) ‘‘ᨠᨲᨾᩮ ᨴ᩠ᩅᩮ ᨵᨾ᩠ᨾᩣ ᩉᩣᨶᨽᩣᨣᩥᨿᩣ? ᨴᩮᩣᩅᨧᩔᨲᩣ ᨧ ᨸᩣᨸᨾᩥᨲ᩠ᨲᨲᩣ ᨧ. ᩍᨾᩮ ᨴ᩠ᩅᩮ ᨵᨾ᩠ᨾᩣ ᩉᩣᨶᨽᩣᨣᩥᨿᩣ.

(ᨧ) ‘‘ᨠᨲᨾᩮ ᨴ᩠ᩅᩮ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ? ᩈᩮᩣᩅᨧᩔᨲᩣ ᨧ ᨠᩃ᩠ᨿᩣᨱᨾᩥᨲ᩠ᨲᨲᩣ ᨧ. ᩍᨾᩮ ᨴ᩠ᩅᩮ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ.

(ᨨ) ‘‘ᨠᨲᨾᩮ ᨴ᩠ᩅᩮ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ? ᨿᩮᩣ ᨧ ᩉᩮᨲᩩ ᨿᩮᩣ ᨧ ᨸᨧ᩠ᨧᨿᩮᩣ ᩈᨲ᩠ᨲᩣᨶᩴ ᩈᩴᨠᩥᩃᩮᩈᩣᨿ, ᨿᩮᩣ ᨧ ᩉᩮᨲᩩ ᨿᩮᩣ ᨧ ᨸᨧ᩠ᨧᨿᩮᩣ ᩈᨲ᩠ᨲᩣᨶᩴ ᩅᩥᩈᩩᨴ᩠ᨵᩥᨿᩣ. ᩍᨾᩮ ᨴ᩠ᩅᩮ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ.

(ᨩ) ‘‘ᨠᨲᨾᩮ ᨴ᩠ᩅᩮ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ? ᨴ᩠ᩅᩮ ᨬᩣᨱᩣᨶᩥ – ᨡᨿᩮ ᨬᩣᨱᩴ, ᩋᨶᩩᨸ᩠ᨸᩣᨴᩮ ᨬᩣᨱᩴ. ᩍᨾᩮ ᨴ᩠ᩅᩮ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ.

(ᨫ) ‘‘ᨠᨲᨾᩮ ᨴ᩠ᩅᩮ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ? ᨴ᩠ᩅᩮ ᨵᩣᨲᩩᨿᩮᩣ – ᩈᨦ᩠ᨡᨲᩣ ᨧ ᨵᩣᨲᩩ ᩋᩈᨦ᩠ᨡᨲᩣ ᨧ ᨵᩣᨲᩩ. ᩍᨾᩮ ᨴ᩠ᩅᩮ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ.

(ᨬ) ‘‘ᨠᨲᨾᩮ ᨴ᩠ᩅᩮ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ? ᩅᩥᨩ᩠ᨩᩣ ᨧ ᩅᩥᨾᩩᨲ᩠ᨲᩥ ᨧ. ᩍᨾᩮ ᨴ᩠ᩅᩮ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

‘‘ᩍᨲᩥ ᩍᨾᩮ ᩅᩦᩈᨲᩥ ᨵᨾ᩠ᨾᩣ ᨽᩪᨲᩣ ᨲᨧ᩠ᨨᩣ ᨲᨳᩣ ᩋᩅᩥᨲᨳᩣ ᩋᨶᨬ᩠ᨬᨳᩣ ᩈᨾ᩠ᨾᩣ ᨲᨳᩣᨣᨲᩮᨶ ᩋᨽᩥᩈᨾ᩠ᨻᩩᨴ᩠ᨵᩣ.

ᨲᨿᩮᩣ ᨵᨾ᩠ᨾᩣ

᪓᪕᪓. ‘‘ᨲᨿᩮᩣ ᨵᨾ᩠ᨾᩣ ᨻᩉᩩᨠᩣᩁᩣ, ᨲᨿᩮᩣ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ…ᨸᩮ… ᨲᨿᩮᩣ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

(ᨠ) ‘‘ᨠᨲᨾᩮ ᨲᨿᩮᩣ ᨵᨾ᩠ᨾᩣ ᨻᩉᩩᨠᩣᩁᩣ? ᩈᨸ᩠ᨸᩩᩁᩥᩈᩈᩴᩈᩮᩅᩮᩣ, ᩈᨴ᩠ᨵᨾ᩠ᨾᩔᩅᨶᩴ, ᨵᨾ᩠ᨾᩣᨶᩩᨵᨾ᩠ᨾᨸ᩠ᨸᨭᩥᨸᨲ᩠ᨲᩥ. ᩍᨾᩮ ᨲᨿᩮᩣ ᨵᨾ᩠ᨾᩣ ᨻᩉᩩᨠᩣᩁᩣ.

(ᨡ) ‘‘ᨠᨲᨾᩮ ᨲᨿᩮᩣ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ? ᨲᨿᩮᩣ ᩈᨾᩣᨵᩦ – ᩈᩅᩥᨲᨠ᩠ᨠᩮᩣ ᩈᩅᩥᨧᩣᩁᩮᩣ ᩈᨾᩣᨵᩥ, ᩋᩅᩥᨲᨠ᩠ᨠᩮᩣ ᩅᩥᨧᩣᩁᨾᨲ᩠ᨲᩮᩣ ᩈᨾᩣᨵᩥ, ᩋᩅᩥᨲᨠ᩠ᨠᩮᩣ ᩋᩅᩥᨧᩣᩁᩮᩣ ᩈᨾᩣᨵᩥ. ᩍᨾᩮ ᨲᨿᩮᩣ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ.

(ᨣ) ‘‘ᨠᨲᨾᩮ ᨲᨿᩮᩣ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ? ᨲᩥᩔᩮᩣ ᩅᩮᨴᨶᩣ – ᩈᩩᨡᩣ ᩅᩮᨴᨶᩣ, ᨴᩩᨠ᩠ᨡᩣ ᩅᩮᨴᨶᩣ, ᩋᨴᩩᨠ᩠ᨡᨾᩈᩩᨡᩣ ᩅᩮᨴᨶᩣ. ᩍᨾᩮ ᨲᨿᩮᩣ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ.

(ᨥ) ‘‘ᨠᨲᨾᩮ ᨲᨿᩮᩣ ᨵᨾ᩠ᨾᩣ ᨸᩉᩣᨲᨻ᩠ᨻᩣ? ᨲᩥᩔᩮᩣ ᨲᨱ᩠ᩉᩣ – ᨠᩣᨾᨲᨱ᩠ᩉᩣ, ᨽᩅᨲᨱ᩠ᩉᩣ, ᩅᩥᨽᩅᨲᨱ᩠ᩉᩣ. ᩍᨾᩮ ᨲᨿᩮᩣ ᨵᨾ᩠ᨾᩣ ᨸᩉᩣᨲᨻ᩠ᨻᩣ.

(ᨦ) ‘‘ᨠᨲᨾᩮ ᨲᨿᩮᩣ ᨵᨾ᩠ᨾᩣ ᩉᩣᨶᨽᩣᨣᩥᨿᩣ? ᨲᩦᨱᩥ ᩋᨠᩩᩈᩃᨾᩪᩃᩣᨶᩥ – ᩃᩮᩣᨽᩮᩣ ᩋᨠᩩᩈᩃᨾᩪᩃᩴ, ᨴᩮᩣᩈᩮᩣ ᩋᨠᩩᩈᩃᨾᩪᩃᩴ, ᨾᩮᩣᩉᩮᩣ ᩋᨠᩩᩈᩃᨾᩪᩃᩴ. ᩍᨾᩮ ᨲᨿᩮᩣ ᨵᨾ᩠ᨾᩣ ᩉᩣᨶᨽᩣᨣᩥᨿᩣ.

(ᨧ) ‘‘ᨠᨲᨾᩮ ᨲᨿᩮᩣ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ? ᨲᩦᨱᩥ ᨠᩩᩈᩃᨾᩪᩃᩣᨶᩥ – ᩋᩃᩮᩣᨽᩮᩣ ᨠᩩᩈᩃᨾᩪᩃᩴ, ᩋᨴᩮᩣᩈᩮᩣ ᨠᩩᩈᩃᨾᩪᩃᩴ, ᩋᨾᩮᩣᩉᩮᩣ ᨠᩩᩈᩃᨾᩪᩃᩴ. ᩍᨾᩮ ᨲᨿᩮᩣ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ.

(ᨨ) ‘‘ᨠᨲᨾᩮ ᨲᨿᩮᩣ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ? ᨲᩥᩔᩮᩣ ᨶᩥᩔᩁᨱᩥᨿᩣ ᨵᩣᨲᩩᨿᩮᩣ – ᨠᩣᨾᩣᨶᨾᩮᨲᩴ ᨶᩥᩔᩁᨱᩴ ᨿᨴᩥᨴᩴ ᨶᩮᨠ᩠ᨡᨾ᩠ᨾᩴ, ᩁᩪᨸᩣᨶᨾᩮᨲᩴ ᨶᩥᩔᩁᨱᩴ ᨿᨴᩥᨴᩴ ᩋᩁᩪᨸᩴ, ᨿᩴ ᨡᩮᩣ ᨸᨶ ᨠᩥᨬ᩠ᨧᩥ ᨽᩪᨲᩴ ᩈᨦ᩠ᨡᨲᩴ ᨸᨭᩥᨧ᩠ᨧᩈᨾᩩᨸ᩠ᨸᨶ᩠ᨶᩴ, ᨶᩥᩁᩮᩣᨵᩮᩣ ᨲᩔ ᨶᩥᩔᩁᨱᩴ. ᩍᨾᩮ ᨲᨿᩮᩣ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ.

(ᨩ) ‘‘ᨠᨲᨾᩮ ᨲᨿᩮᩣ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ? ᨲᩦᨱᩥ ᨬᩣᨱᩣᨶᩥ – ᩋᨲᩦᨲᩴᩈᩮ ᨬᩣᨱᩴ, ᩋᨶᩣᨣᨲᩴᩈᩮ ᨬᩣᨱᩴ, ᨸᨧ᩠ᨧᩩᨸ᩠ᨸᨶ᩠ᨶᩴᩈᩮ ᨬᩣᨱᩴ. ᩍᨾᩮ ᨲᨿᩮᩣ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ.

(ᨫ) ‘‘ᨠᨲᨾᩮ ᨲᨿᩮᩣ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ? ᨲᩥᩔᩮᩣ ᨵᩣᨲᩩᨿᩮᩣ – ᨠᩣᨾᨵᩣᨲᩩ, ᩁᩪᨸᨵᩣᨲᩩ, ᩋᩁᩪᨸᨵᩣᨲᩩ. ᩍᨾᩮ ᨲᨿᩮᩣ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ.

(ᨬ) ‘‘ᨠᨲᨾᩮ ᨲᨿᩮᩣ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ? ᨲᩥᩔᩮᩣ ᩅᩥᨩ᩠ᨩᩣ – ᨸᩩᨻ᩠ᨻᩮᨶᩥᩅᩣᩈᩣᨶᩩᩔᨲᩥᨬᩣᨱᩴ ᩅᩥᨩ᩠ᨩᩣ, ᩈᨲ᩠ᨲᩣᨶᩴ ᨧᩩᨲᩪᨸᨸᩣᨲᩮ ᨬᩣᨱᩴ ᩅᩥᨩ᩠ᨩᩣ, ᩌᩈᩅᩣᨶᩴ ᨡᨿᩮ ᨬᩣᨱᩴ ᩅᩥᨩ᩠ᨩᩣ. ᩍᨾᩮ ᨲᨿᩮᩣ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

‘‘ᩍᨲᩥ ᩍᨾᩮ ᨲᩥᩴᩈ ᨵᨾ᩠ᨾᩣ ᨽᩪᨲᩣ ᨲᨧ᩠ᨨᩣ ᨲᨳᩣ ᩋᩅᩥᨲᨳᩣ ᩋᨶᨬ᩠ᨬᨳᩣ ᩈᨾ᩠ᨾᩣ ᨲᨳᩣᨣᨲᩮᨶ ᩋᨽᩥᩈᨾ᩠ᨻᩩᨴ᩠ᨵᩣ.

ᨧᨲ᩠ᨲᩣᩁᩮᩣ ᨵᨾ᩠ᨾᩣ

᪓᪕᪔. ‘‘ᨧᨲ᩠ᨲᩣᩁᩮᩣ ᨵᨾ᩠ᨾᩣ ᨻᩉᩩᨠᩣᩁᩣ, ᨧᨲ᩠ᨲᩣᩁᩮᩣ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ…ᨸᩮ… ᨧᨲ᩠ᨲᩣᩁᩮᩣ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

(ᨠ) ‘‘ᨠᨲᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᨻᩉᩩᨠᩣᩁᩣ? ᨧᨲ᩠ᨲᩣᩁᩥ ᨧᨠ᩠ᨠᩣᨶᩥ – ᨸᨲᩥᩁᩪᨸᨴᩮᩈᩅᩣᩈᩮᩣ, ᩈᨸ᩠ᨸᩩᩁᩥᩈᩪᨸᨶᩥᩔᨿᩮᩣ [ᩈᨸ᩠ᨸᩩᩁᩥᩈᩩᨸᩔᨿᩮᩣ (ᩈ᩠ᨿᩣ. ᨠᩴ.)], ᩋᨲ᩠ᨲᩈᨾ᩠ᨾᩣᨸᨱᩥᨵᩥ, ᨸᩩᨻ᩠ᨻᩮ ᨧ ᨠᨲᨸᩩᨬ᩠ᨬᨲᩣ. ᩍᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᨻᩉᩩᨠᩣᩁᩣ.

(ᨡ) ‘‘ᨠᨲᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ? ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩣ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨠᩣᨿᩮ ᨠᩣᨿᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ. ᩅᩮᨴᨶᩣᩈᩩ…ᨸᩮ… ᨧᩥᨲ᩠ᨲᩮ… ᨵᨾ᩠ᨾᩮᩈᩩ ᨵᨾ᩠ᨾᩣᨶᩩᨸᩔᩦ ᩅᩥᩉᩁᨲᩥ ᩌᨲᩣᨸᩦ ᩈᨾ᩠ᨸᨩᩣᨶᩮᩣ ᩈᨲᩥᨾᩣ ᩅᩥᨶᩮᨿ᩠ᨿ ᩃᩮᩣᨠᩮ ᩋᨽᩥᨩ᩠ᨫᩣᨴᩮᩣᨾᨶᩔᩴ. ᩍᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ.

(ᨣ) ‘‘ᨠᨲᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ? ᨧᨲ᩠ᨲᩣᩁᩮᩣ ᩌᩉᩣᩁᩣ – ᨠᨻᩊᩦᨠᩣᩁᩮᩣ [ᨠᩅᩊᩦᨠᩣᩁᩮᩣ (ᩈ᩠ᨿᩣ. ᨠᩴ.)] ᩌᩉᩣᩁᩮᩣ ᩒᩊᩣᩁᩥᨠᩮᩣ ᩅᩣ ᩈᩩᨡᩩᨾᩮᩣ ᩅᩣ, ᨹᩔᩮᩣ ᨴᩩᨲᩥᨿᩮᩣ, ᨾᨶᩮᩣᩈᨬ᩠ᨧᩮᨲᨶᩣ ᨲᨲᩥᨿᩣ, ᩅᩥᨬ᩠ᨬᩣᨱᩴ ᨧᨲᩩᨲ᩠ᨳᩴ. ᩍᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ.

(ᨥ) ‘‘ᨠᨲᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᨸᩉᩣᨲᨻ᩠ᨻᩣ? ᨧᨲ᩠ᨲᩣᩁᩮᩣ ᩒᨥᩣ – ᨠᩣᨾᩮᩣᨥᩮᩣ, ᨽᩅᩮᩣᨥᩮᩣ, ᨴᩥᨭ᩠ᨮᩮᩣᨥᩮᩣ, ᩋᩅᩥᨩ᩠ᨩᩮᩣᨥᩮᩣ. ᩍᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᨸᩉᩣᨲᨻ᩠ᨻᩣ.

(ᨦ) ‘‘ᨠᨲᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᩉᩣᨶᨽᩣᨣᩥᨿᩣ? ᨧᨲ᩠ᨲᩣᩁᩮᩣ ᨿᩮᩣᨣᩣ – ᨠᩣᨾᨿᩮᩣᨣᩮᩣ, ᨽᩅᨿᩮᩣᨣᩮᩣ, ᨴᩥᨭ᩠ᨮᩥᨿᩮᩣᨣᩮᩣ, ᩋᩅᩥᨩ᩠ᨩᩣᨿᩮᩣᨣᩮᩣ. ᩍᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᩉᩣᨶᨽᩣᨣᩥᨿᩣ.

(ᨧ) ‘‘ᨠᨲᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ? ᨧᨲ᩠ᨲᩣᩁᩮᩣ ᩅᩥᩈᨬ᩠ᨬᩮᩣᨣᩣ – ᨠᩣᨾᨿᩮᩣᨣᩅᩥᩈᩴᨿᩮᩣᨣᩮᩣ, ᨽᩅᨿᩮᩣᨣᩅᩥᩈᩴᨿᩮᩣᨣᩮᩣ, ᨴᩥᨭ᩠ᨮᩥᨿᩮᩣᨣᩅᩥᩈᩴᨿᩮᩣᨣᩮᩣ, ᩋᩅᩥᨩ᩠ᨩᩣᨿᩮᩣᨣᩅᩥᩈᩴᨿᩮᩣᨣᩮᩣ. ᩍᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ.

(ᨨ) ‘‘ᨠᨲᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ? ᨧᨲ᩠ᨲᩣᩁᩮᩣ ᩈᨾᩣᨵᩦ – ᩉᩣᨶᨽᩣᨣᩥᨿᩮᩣ ᩈᨾᩣᨵᩥ, ᨮᩥᨲᩥᨽᩣᨣᩥᨿᩮᩣ ᩈᨾᩣᨵᩥ, ᩅᩥᩈᩮᩈᨽᩣᨣᩥᨿᩮᩣ ᩈᨾᩣᨵᩥ, ᨶᩥᨻ᩠ᨻᩮᨵᨽᩣᨣᩥᨿᩮᩣ ᩈᨾᩣᨵᩥ. ᩍᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ.

(ᨩ) ‘‘ᨠᨲᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ? ᨧᨲ᩠ᨲᩣᩁᩥ ᨬᩣᨱᩣᨶᩥ – ᨵᨾ᩠ᨾᩮ ᨬᩣᨱᩴ, ᩋᨶ᩠ᩅᨿᩮ ᨬᩣᨱᩴ, ᨸᩁᩥᨿᩮ ᨬᩣᨱᩴ, ᩈᨾ᩠ᨾᩩᨲᩥᨿᩣ ᨬᩣᨱᩴ. ᩍᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ.

(ᨫ) ‘‘ᨠᨲᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ? ᨧᨲ᩠ᨲᩣᩁᩥ ᩋᩁᩥᨿᩈᨧ᩠ᨧᩣᨶᩥ – ᨴᩩᨠ᩠ᨡᩴ ᩋᩁᩥᨿᩈᨧ᩠ᨧᩴ, ᨴᩩᨠ᩠ᨡᩈᨾᩩᨴᨿᩴ [ᨴᩩᨠ᩠ᨡᩈᨾᩩᨴᨿᩮᩣ (ᩈ᩠ᨿᩣ. ᨠᩴ.)] ᩋᩁᩥᨿᩈᨧ᩠ᨧᩴ, ᨴᩩᨠ᩠ᨡᨶᩥᩁᩮᩣᨵᩴ [ᨴᩩᨠ᩠ᨡᨶᩥᩁᩮᩣᨵᩮᩣ (ᩈ᩠ᨿᩣ. ᨠᩴ.)] ᩋᩁᩥᨿᩈᨧ᩠ᨧᩴ, ᨴᩩᨠ᩠ᨡᨶᩥᩁᩮᩣᨵᨣᩣᨾᩥᨶᩦ ᨸᨭᩥᨸᨴᩣ ᩋᩁᩥᨿᩈᨧ᩠ᨧᩴ. ᩍᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ.

(ᨬ) ‘‘ᨠᨲᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ? ᨧᨲ᩠ᨲᩣᩁᩥ ᩈᩣᨾᨬ᩠ᨬᨹᩃᩣᨶᩥ – ᩈᩮᩣᨲᩣᨸᨲ᩠ᨲᩥᨹᩃᩴ, ᩈᨠᨴᩣᨣᩣᨾᩥᨹᩃᩴ, ᩋᨶᩣᨣᩣᨾᩥᨹᩃᩴ, ᩋᩁᩉᨲ᩠ᨲᨹᩃᩴ. ᩍᨾᩮ ᨧᨲ᩠ᨲᩣᩁᩮᩣ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

‘‘ᩍᨲᩥ ᩍᨾᩮ ᨧᨲ᩠ᨲᩣᩁᩦᩈᨵᨾ᩠ᨾᩣ ᨽᩪᨲᩣ ᨲᨧ᩠ᨨᩣ ᨲᨳᩣ ᩋᩅᩥᨲᨳᩣ ᩋᨶᨬ᩠ᨬᨳᩣ ᩈᨾ᩠ᨾᩣ ᨲᨳᩣᨣᨲᩮᨶ ᩋᨽᩥᩈᨾ᩠ᨻᩩᨴ᩠ᨵᩣ.

ᨸᨬ᩠ᨧ ᨵᨾ᩠ᨾᩣ

᪓᪕᪕. ‘‘ᨸᨬ᩠ᨧ ᨵᨾ᩠ᨾᩣ ᨻᩉᩩᨠᩣᩁᩣ…ᨸᩮ… ᨸᨬ᩠ᨧ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

(ᨠ) ‘‘ᨠᨲᨾᩮ ᨸᨬ᩠ᨧ ᨵᨾ᩠ᨾᩣ ᨻᩉᩩᨠᩣᩁᩣ? ᨸᨬ᩠ᨧ ᨸᨵᩣᨶᩥᨿᨦ᩠ᨣᩣᨶᩥ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨴ᩠ᨵᩮᩣ ᩉᩮᩣᨲᩥ, ᩈᨴ᩠ᨴᩉᨲᩥ ᨲᨳᩣᨣᨲᩔ ᨻᩮᩣᨵᩥᩴ – ‘ᩍᨲᩥᨸᩥ ᩈᩮᩣ ᨽᨣᩅᩣ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᩅᩥᨩ᩠ᨩᩣᨧᩁᨱᩈᨾ᩠ᨸᨶ᩠ᨶᩮᩣ ᩈᩩᨣᨲᩮᩣ ᩃᩮᩣᨠᩅᩥᨴᩪ ᩋᨶᩩᨲ᩠ᨲᩁᩮᩣ ᨸᩩᩁᩥᩈᨴᨾ᩠ᨾᩈᩣᩁᨳᩥ ᩈᨲ᩠ᨳᩣ ᨴᩮᩅᨾᨶᩩᩔᩣᨶᩴ ᨻᩩᨴ᩠ᨵᩮᩣ ᨽᨣᩅᩣ’ᨲᩥ. ᩋᨸ᩠ᨸᩣᨻᩣᨵᩮᩣ ᩉᩮᩣᨲᩥ ᩋᨸ᩠ᨸᩣᨲᨦ᩠ᨠᩮᩣ ᩈᨾᩅᩮᨸᩣᨠᩥᨶᩥᨿᩣ ᨣᩉᨱᩥᨿᩣ ᩈᨾᨶ᩠ᨶᩣᨣᨲᩮᩣ ᨶᩣᨲᩥᩈᩦᨲᩣᨿ ᨶᩣᨧ᩠ᨧᩩᨱ᩠ᩉᩣᨿ ᨾᨩ᩠ᨫᩥᨾᩣᨿ ᨸᨵᩣᨶᨠ᩠ᨡᨾᩣᨿ. ᩋᩈᨮᩮᩣ ᩉᩮᩣᨲᩥ ᩋᨾᩣᨿᩣᩅᩦ ᨿᨳᩣᨽᩪᨲᨾᨲ᩠ᨲᩣᨶᩴ ᩌᩅᩦᨠᨲ᩠ᨲᩣ ᩈᨲ᩠ᨳᩁᩥ ᩅᩣ ᩅᩥᨬ᩠ᨬᩪᩈᩩ ᩅᩣ ᩈᨻᩕᩉ᩠ᨾᨧᩣᩁᩦᩈᩩ. ᩌᩁᨴ᩠ᨵᩅᩦᩁᩥᨿᩮᩣ ᩅᩥᩉᩁᨲᩥ ᩋᨠᩩᩈᩃᩣᨶᩴ ᨵᨾ᩠ᨾᩣᨶᩴ ᨸᩉᩣᨶᩣᨿ, ᨠᩩᩈᩃᩣᨶᩴ ᨵᨾ᩠ᨾᩣᨶᩴ ᩏᨸᩈᨾ᩠ᨸᨴᩣᨿ, ᨳᩣᨾᩅᩣ ᨴᩊ᩠ᩉᨸᩁᨠ᩠ᨠᨾᩮᩣ ᩋᨶᩥᨠ᩠ᨡᩥᨲ᩠ᨲᨵᩩᩁᩮᩣ ᨠᩩᩈᩃᩮᩈᩩ ᨵᨾ᩠ᨾᩮᩈᩩ. ᨸᨬ᩠ᨬᩅᩣ ᩉᩮᩣᨲᩥ ᩏᨴᨿᨲ᩠ᨳᨣᩣᨾᩥᨶᩥᨿᩣ ᨸᨬ᩠ᨬᩣᨿ ᩈᨾᨶ᩠ᨶᩣᨣᨲᩮᩣ ᩋᩁᩥᨿᩣᨿ ᨶᩥᨻ᩠ᨻᩮᨵᩥᨠᩣᨿ ᩈᨾ᩠ᨾᩣ ᨴᩩᨠ᩠ᨡᨠ᩠ᨡᨿᨣᩣᨾᩥᨶᩥᨿᩣ. ᩍᨾᩮ ᨸᨬ᩠ᨧ ᨵᨾ᩠ᨾᩣ ᨻᩉᩩᨠᩣᩁᩣ.

(ᨡ) ‘‘ᨠᨲᨾᩮ ᨸᨬ᩠ᨧ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ? ᨸᨬ᩠ᨧᨦ᩠ᨣᩥᨠᩮᩣ ᩈᨾ᩠ᨾᩣᩈᨾᩣᨵᩥ – ᨸᩦᨲᩥᨹᩁᨱᨲᩣ, ᩈᩩᨡᨹᩁᨱᨲᩣ, ᨧᩮᨲᩮᩣᨹᩁᨱᨲᩣ, ᩌᩃᩮᩣᨠᨹᩁᨱᨲᩣ, ᨸᨧ᩠ᨧᩅᩮᨠ᩠ᨡᨱᨶᩥᨾᩥᨲ᩠ᨲᩴ [ᨸᨧ᩠ᨧᩅᩮᨠ᩠ᨡᨱᩣᨶᩥᨾᩥᨲ᩠ᨲᩴ (ᩈ᩠ᨿᩣ. ᨠᩴ.)]. ᩍᨾᩮ ᨸᨬ᩠ᨧ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ.

(ᨣ) ‘‘ᨠᨲᨾᩮ ᨸᨬ᩠ᨧ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ? ᨸᨬ᩠ᨧᩩᨸᩣᨴᩣᨶᨠ᩠ᨡᨶ᩠ᨵᩣ [ᩈᩮᨿ᩠ᨿᨳᩦᨴᩴ (ᩈᩦ. ᩈ᩠ᨿᩣ. ᨠᩴ. ᨸᩦ.)] – ᩁᩪᨸᩩᨸᩣᨴᩣᨶᨠ᩠ᨡᨶ᩠ᨵᩮᩣ, ᩅᩮᨴᨶᩩᨸᩣᨴᩣᨶᨠ᩠ᨡᨶ᩠ᨵᩮᩣ, ᩈᨬ᩠ᨬᩩᨸᩣᨴᩣᨶᨠ᩠ᨡᨶ᩠ᨵᩮᩣ, ᩈᨦ᩠ᨡᩣᩁᩩᨸᩣᨴᩣᨶᨠ᩠ᨡᨶ᩠ᨵᩮᩣ ᩅᩥᨬ᩠ᨬᩣᨱᩩᨸᩣᨴᩣᨶᨠ᩠ᨡᨶ᩠ᨵᩮᩣ. ᩍᨾᩮ ᨸᨬ᩠ᨧ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ.

(ᨥ) ‘‘ᨠᨲᨾᩮ ᨸᨬ᩠ᨧ ᨵᨾ᩠ᨾᩣ ᨸᩉᩣᨲᨻ᩠ᨻᩣ? ᨸᨬ᩠ᨧ ᨶᩦᩅᩁᨱᩣᨶᩥ – ᨠᩣᨾᨧ᩠ᨨᨶ᩠ᨴᨶᩦᩅᩁᨱᩴ, ᨻ᩠ᨿᩣᨸᩣᨴᨶᩦᩅᩁᨱᩴ, ᨳᩥᨶᨾᩥᨴ᩠ᨵᨶᩦᩅᩁᨱᩴ, ᩏᨴ᩠ᨵᨧ᩠ᨧᨠᩩᨠᩩᨧ᩠ᨧᨶᩦᩅᩁᨱᩴ, ᩅᩥᨧᩥᨠᩥᨧ᩠ᨨᩣᨶᩦᩅᩁᨱᩴ. ᩍᨾᩮ ᨸᨬ᩠ᨧ ᨵᨾ᩠ᨾᩣ ᨸᩉᩣᨲᨻ᩠ᨻᩣ.

(ᨦ) ‘‘ᨠᨲᨾᩮ ᨸᨬ᩠ᨧ ᨵᨾ᩠ᨾᩣ ᩉᩣᨶᨽᩣᨣᩥᨿᩣ? ᨸᨬ᩠ᨧ ᨧᩮᨲᩮᩣᨡᩥᩃᩣ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨲ᩠ᨳᩁᩥ ᨠᨦ᩠ᨡᨲᩥ ᩅᩥᨧᩥᨠᩥᨧ᩠ᨨᨲᩥ ᨶᩣᨵᩥᨾᩩᨧ᩠ᨧᨲᩥ ᨶ ᩈᨾ᩠ᨸᩈᩦᨴᨲᩥ. ᨿᩮᩣ ᩈᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᨲ᩠ᨳᩁᩥ ᨠᨦ᩠ᨡᨲᩥ ᩅᩥᨧᩥᨠᩥᨧ᩠ᨨᨲᩥ ᨶᩣᨵᩥᨾᩩᨧ᩠ᨧᨲᩥ ᨶ ᩈᨾ᩠ᨸᩈᩦᨴᨲᩥ, ᨲᩔ ᨧᩥᨲ᩠ᨲᩴ ᨶ ᨶᨾᨲᩥ ᩌᨲᨸ᩠ᨸᩣᨿ ᩋᨶᩩᨿᩮᩣᨣᩣᨿ ᩈᩣᨲᨧ᩠ᨧᩣᨿ ᨸᨵᩣᨶᩣᨿ. ᨿᩔ ᨧᩥᨲ᩠ᨲᩴ ᨶ ᨶᨾᨲᩥ ᩌᨲᨸ᩠ᨸᩣᨿ ᩋᨶᩩᨿᩮᩣᨣᩣᨿ ᩈᩣᨲᨧ᩠ᨧᩣᨿ ᨸᨵᩣᨶᩣᨿ. ᩋᨿᩴ ᨸᨮᨾᩮᩣ ᨧᩮᨲᩮᩣᨡᩥᩃᩮᩣ. ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨵᨾ᩠ᨾᩮ ᨠᨦ᩠ᨡᨲᩥ ᩅᩥᨧᩥᨠᩥᨧ᩠ᨨᨲᩥ…ᨸᩮ… ᩈᨦ᩠ᨥᩮ ᨠᨦ᩠ᨡᨲᩥ ᩅᩥᨧᩥᨠᩥᨧ᩠ᨨᨲᩥ…ᨸᩮ… ᩈᩥᨠ᩠ᨡᩣᨿ ᨠᨦ᩠ᨡᨲᩥ ᩅᩥᨧᩥᨠᩥᨧ᩠ᨨᨲᩥ…ᨸᩮ… ᩈᨻᩕᩉ᩠ᨾᨧᩣᩁᩦᩈᩩ ᨠᩩᨸᩥᨲᩮᩣ ᩉᩮᩣᨲᩥ ᩋᨶᨲ᩠ᨲᨾᨶᩮᩣ ᩌᩉᨲᨧᩥᨲ᩠ᨲᩮᩣ ᨡᩥᩃᨩᩣᨲᩮᩣ, ᨿᩮᩣ ᩈᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᨻᩕᩉ᩠ᨾᨧᩣᩁᩦᩈᩩ ᨠᩩᨸᩥᨲᩮᩣ ᩉᩮᩣᨲᩥ ᩋᨶᨲ᩠ᨲᨾᨶᩮᩣ ᩌᩉᨲᨧᩥᨲ᩠ᨲᩮᩣ ᨡᩥᩃᨩᩣᨲᩮᩣ, ᨲᩔ ᨧᩥᨲ᩠ᨲᩴ ᨶ ᨶᨾᨲᩥ ᩌᨲᨸ᩠ᨸᩣᨿ ᩋᨶᩩᨿᩮᩣᨣᩣᨿ ᩈᩣᨲᨧ᩠ᨧᩣᨿ ᨸᨵᩣᨶᩣᨿ. ᨿᩔ ᨧᩥᨲ᩠ᨲᩴ ᨶ ᨶᨾᨲᩥ ᩌᨲᨸ᩠ᨸᩣᨿ ᩋᨶᩩᨿᩮᩣᨣᩣᨿ ᩈᩣᨲᨧ᩠ᨧᩣᨿ ᨸᨵᩣᨶᩣᨿ. ᩋᨿᩴ ᨸᨬ᩠ᨧᨾᩮᩣ ᨧᩮᨲᩮᩣᨡᩥᩃᩮᩣ. ᩍᨾᩮ ᨸᨬ᩠ᨧ ᨵᨾ᩠ᨾᩣ ᩉᩣᨶᨽᩣᨣᩥᨿᩣ.

(ᨧ) ‘‘ᨠᨲᨾᩮ ᨸᨬ᩠ᨧ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ? ᨸᨬ᩠ᨧᩥᨶ᩠ᨴᩕᩥᨿᩣᨶᩥ – ᩈᨴ᩠ᨵᩥᨶ᩠ᨴᩕᩥᨿᩴ, ᩅᩦᩁᩥᨿᩥᨶ᩠ᨴᩕᩥᨿᩴ, ᩈᨲᩥᨶ᩠ᨴᩕᩥᨿᩴ, ᩈᨾᩣᨵᩥᨶ᩠ᨴᩕᩥᨿᩴ, ᨸᨬ᩠ᨬᩥᨶ᩠ᨴᩕᩥᨿᩴ. ᩍᨾᩮ ᨸᨬ᩠ᨧ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ.

(ᨨ) ‘‘ᨠᨲᨾᩮ ᨸᨬ᩠ᨧ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ? ᨸᨬ᩠ᨧ ᨶᩥᩔᩁᨱᩥᨿᩣ ᨵᩣᨲᩩᨿᩮᩣ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨠᩣᨾᩮ ᨾᨶᩈᩥᨠᩁᩮᩣᨲᩮᩣ ᨠᩣᨾᩮᩈᩩ ᨧᩥᨲ᩠ᨲᩴ ᨶ ᨸᨠ᩠ᨡᨶ᩠ᨴᨲᩥ ᨶ ᨸᩈᩦᨴᨲᩥ ᨶ ᩈᨶ᩠ᨲᩥᨭ᩠ᨮᨲᩥ ᨶ ᩅᩥᨾᩩᨧ᩠ᨧᨲᩥ. ᨶᩮᨠ᩠ᨡᨾ᩠ᨾᩴ ᨡᩮᩣ ᨸᨶᩔ ᨾᨶᩈᩥᨠᩁᩮᩣᨲᩮᩣ ᨶᩮᨠ᩠ᨡᨾ᩠ᨾᩮ ᨧᩥᨲ᩠ᨲᩴ ᨸᨠ᩠ᨡᨶ᩠ᨴᨲᩥ ᨸᩈᩦᨴᨲᩥ ᩈᨶ᩠ᨲᩥᨭ᩠ᨮᨲᩥ ᩅᩥᨾᩩᨧ᩠ᨧᨲᩥ. ᨲᩔ ᨲᩴ ᨧᩥᨲ᩠ᨲᩴ ᩈᩩᨣᨲᩴ ᩈᩩᨽᩣᩅᩥᨲᩴ ᩈᩩᩅᩩᨭ᩠ᨮᩥᨲᩴ ᩈᩩᩅᩥᨾᩩᨲ᩠ᨲᩴ ᩅᩥᩈᩴᨿᩩᨲ᩠ᨲᩴ ᨠᩣᨾᩮᩉᩥ. ᨿᩮ ᨧ ᨠᩣᨾᨸᨧ᩠ᨧᨿᩣ ᩏᨸ᩠ᨸᨩ᩠ᨩᨶ᩠ᨲᩥ ᩌᩈᩅᩣ ᩅᩥᨥᩣᨲᩣ ᨸᩁᩥᩊᩣᩉᩣ, ᨾᩩᨲ᩠ᨲᩮᩣ ᩈᩮᩣ ᨲᩮᩉᩥ. ᨶ ᩈᩮᩣ ᨲᩴ ᩅᩮᨴᨶᩴ ᩅᩮᨴᩮᨲᩥ. ᩍᨴᨾᨠ᩠ᨡᩣᨲᩴ ᨠᩣᨾᩣᨶᩴ ᨶᩥᩔᩁᨱᩴ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨻ᩠ᨿᩣᨸᩣᨴᩴ ᨾᨶᩈᩥᨠᩁᩮᩣᨲᩮᩣ ᨻ᩠ᨿᩣᨸᩣᨴᩮ ᨧᩥᨲ᩠ᨲᩴ ᨶ ᨸᨠ᩠ᨡᨶ᩠ᨴᨲᩥ ᨶ ᨸᩈᩦᨴᨲᩥ ᨶ ᩈᨶ᩠ᨲᩥᨭ᩠ᨮᨲᩥ ᨶ ᩅᩥᨾᩩᨧ᩠ᨧᨲᩥ. ᩋᨻ᩠ᨿᩣᨸᩣᨴᩴ ᨡᩮᩣ ᨸᨶᩔ ᨾᨶᩈᩥᨠᩁᩮᩣᨲᩮᩣ ᩋᨻ᩠ᨿᩣᨸᩣᨴᩮ ᨧᩥᨲ᩠ᨲᩴ ᨸᨠ᩠ᨡᨶ᩠ᨴᨲᩥ ᨸᩈᩦᨴᨲᩥ ᩈᨶ᩠ᨲᩥᨭ᩠ᨮᨲᩥ ᩅᩥᨾᩩᨧ᩠ᨧᨲᩥ. ᨲᩔ ᨲᩴ ᨧᩥᨲ᩠ᨲᩴ ᩈᩩᨣᨲᩴ ᩈᩩᨽᩣᩅᩥᨲᩴ ᩈᩩᩅᩩᨭ᩠ᨮᩥᨲᩴ ᩈᩩᩅᩥᨾᩩᨲ᩠ᨲᩴ ᩅᩥᩈᩴᨿᩩᨲ᩠ᨲᩴ ᨻ᩠ᨿᩣᨸᩣᨴᩮᨶ. ᨿᩮ ᨧ ᨻ᩠ᨿᩣᨸᩣᨴᨸᨧ᩠ᨧᨿᩣ ᩏᨸ᩠ᨸᨩ᩠ᨩᨶ᩠ᨲᩥ ᩌᩈᩅᩣ ᩅᩥᨥᩣᨲᩣ ᨸᩁᩥᩊᩣᩉᩣ, ᨾᩩᨲ᩠ᨲᩮᩣ ᩈᩮᩣ ᨲᩮᩉᩥ. ᨶ ᩈᩮᩣ ᨲᩴ ᩅᩮᨴᨶᩴ ᩅᩮᨴᩮᨲᩥ. ᩍᨴᨾᨠ᩠ᨡᩣᨲᩴ ᨻ᩠ᨿᩣᨸᩣᨴᩔ ᨶᩥᩔᩁᨱᩴ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩅᩥᩉᩮᩈᩴ ᨾᨶᩈᩥᨠᩁᩮᩣᨲᩮᩣ ᩅᩥᩉᩮᩈᩣᨿ ᨧᩥᨲ᩠ᨲᩴ ᨶ ᨸᨠ᩠ᨡᨶ᩠ᨴᨲᩥ ᨶ ᨸᩈᩦᨴᨲᩥ ᨶ ᩈᨶ᩠ᨲᩥᨭ᩠ᨮᨲᩥ ᨶ ᩅᩥᨾᩩᨧ᩠ᨧᨲᩥ. ᩋᩅᩥᩉᩮᩈᩴ ᨡᩮᩣ ᨸᨶᩔ ᨾᨶᩈᩥᨠᩁᩮᩣᨲᩮᩣ ᩋᩅᩥᩉᩮᩈᩣᨿ ᨧᩥᨲ᩠ᨲᩴ ᨸᨠ᩠ᨡᨶ᩠ᨴᨲᩥ ᨸᩈᩦᨴᨲᩥ ᩈᨶ᩠ᨲᩥᨭ᩠ᨮᨲᩥ ᩅᩥᨾᩩᨧ᩠ᨧᨲᩥ. ᨲᩔ ᨲᩴ ᨧᩥᨲ᩠ᨲᩴ ᩈᩩᨣᨲᩴ ᩈᩩᨽᩣᩅᩥᨲᩴ ᩈᩩᩅᩩᨭ᩠ᨮᩥᨲᩴ ᩈᩩᩅᩥᨾᩩᨲ᩠ᨲᩴ ᩅᩥᩈᩴᨿᩩᨲ᩠ᨲᩴ ᩅᩥᩉᩮᩈᩣᨿ. ᨿᩮ ᨧ ᩅᩥᩉᩮᩈᩣᨸᨧ᩠ᨧᨿᩣ ᩏᨸ᩠ᨸᨩ᩠ᨩᨶ᩠ᨲᩥ ᩌᩈᩅᩣ ᩅᩥᨥᩣᨲᩣ ᨸᩁᩥᩊᩣᩉᩣ, ᨾᩩᨲ᩠ᨲᩮᩣ ᩈᩮᩣ ᨲᩮᩉᩥ. ᨶ ᩈᩮᩣ ᨲᩴ ᩅᩮᨴᨶᩴ ᩅᩮᨴᩮᨲᩥ. ᩍᨴᨾᨠ᩠ᨡᩣᨲᩴ ᩅᩥᩉᩮᩈᩣᨿ ᨶᩥᩔᩁᨱᩴ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩁᩪᨸᩮ ᨾᨶᩈᩥᨠᩁᩮᩣᨲᩮᩣ ᩁᩪᨸᩮᩈᩩ ᨧᩥᨲ᩠ᨲᩴ ᨶ ᨸᨠ᩠ᨡᨶ᩠ᨴᨲᩥ ᨶ ᨸᩈᩦᨴᨲᩥ ᨶ ᩈᨶ᩠ᨲᩥᨭ᩠ᨮᨲᩥ ᨶ ᩅᩥᨾᩩᨧ᩠ᨧᨲᩥ. ᩋᩁᩪᨸᩴ ᨡᩮᩣ ᨸᨶᩔ ᨾᨶᩈᩥᨠᩁᩮᩣᨲᩮᩣ ᩋᩁᩪᨸᩮ ᨧᩥᨲ᩠ᨲᩴ ᨸᨠ᩠ᨡᨶ᩠ᨴᨲᩥ ᨸᩈᩦᨴᨲᩥ ᩈᨶ᩠ᨲᩥᨭ᩠ᨮᨲᩥ ᩅᩥᨾᩩᨧ᩠ᨧᨲᩥ. ᨲᩔ ᨲᩴ ᨧᩥᨲ᩠ᨲᩴ ᩈᩩᨣᨲᩴ ᩈᩩᨽᩣᩅᩥᨲᩴ ᩈᩩᩅᩩᨭ᩠ᨮᩥᨲᩴ ᩈᩩᩅᩥᨾᩩᨲ᩠ᨲᩴ ᩅᩥᩈᩴᨿᩩᨲ᩠ᨲᩴ ᩁᩪᨸᩮᩉᩥ. ᨿᩮ ᨧ ᩁᩪᨸᨸᨧ᩠ᨧᨿᩣ ᩏᨸ᩠ᨸᨩ᩠ᨩᨶ᩠ᨲᩥ ᩌᩈᩅᩣ ᩅᩥᨥᩣᨲᩣ ᨸᩁᩥᩊᩣᩉᩣ, ᨾᩩᨲ᩠ᨲᩮᩣ ᩈᩮᩣ ᨲᩮᩉᩥ. ᨶ ᩈᩮᩣ ᨲᩴ ᩅᩮᨴᨶᩴ ᩅᩮᨴᩮᨲᩥ. ᩍᨴᨾᨠ᩠ᨡᩣᨲᩴ ᩁᩪᨸᩣᨶᩴ ᨶᩥᩔᩁᨱᩴ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩈᨠ᩠ᨠᩣᨿᩴ ᨾᨶᩈᩥᨠᩁᩮᩣᨲᩮᩣ ᩈᨠ᩠ᨠᩣᨿᩮ ᨧᩥᨲ᩠ᨲᩴ ᨶ ᨸᨠ᩠ᨡᨶ᩠ᨴᨲᩥ ᨶ ᨸᩈᩦᨴᨲᩥ ᨶ ᩈᨶ᩠ᨲᩥᨭ᩠ᨮᨲᩥ ᨶ ᩅᩥᨾᩩᨧ᩠ᨧᨲᩥ. ᩈᨠ᩠ᨠᩣᨿᨶᩥᩁᩮᩣᨵᩴ ᨡᩮᩣ ᨸᨶᩔ ᨾᨶᩈᩥᨠᩁᩮᩣᨲᩮᩣ ᩈᨠ᩠ᨠᩣᨿᨶᩥᩁᩮᩣᨵᩮ ᨧᩥᨲ᩠ᨲᩴ ᨸᨠ᩠ᨡᨶ᩠ᨴᨲᩥ ᨸᩈᩦᨴᨲᩥ ᩈᨶ᩠ᨲᩥᨭ᩠ᨮᨲᩥ ᩅᩥᨾᩩᨧ᩠ᨧᨲᩥ. ᨲᩔ ᨲᩴ ᨧᩥᨲ᩠ᨲᩴ ᩈᩩᨣᨲᩴ ᩈᩩᨽᩣᩅᩥᨲᩴ ᩈᩩᩅᩩᨭ᩠ᨮᩥᨲᩴ ᩈᩩᩅᩥᨾᩩᨲ᩠ᨲᩴ ᩅᩥᩈᩴᨿᩩᨲ᩠ᨲᩴ ᩈᨠ᩠ᨠᩣᨿᩮᨶ. ᨿᩮ ᨧ ᩈᨠ᩠ᨠᩣᨿᨸᨧ᩠ᨧᨿᩣ ᩏᨸ᩠ᨸᨩ᩠ᨩᨶ᩠ᨲᩥ ᩌᩈᩅᩣ ᩅᩥᨥᩣᨲᩣ ᨸᩁᩥᩊᩣᩉᩣ, ᨾᩩᨲ᩠ᨲᩮᩣ ᩈᩮᩣ ᨲᩮᩉᩥ. ᨶ ᩈᩮᩣ ᨲᩴ ᩅᩮᨴᨶᩴ ᩅᩮᨴᩮᨲᩥ. ᩍᨴᨾᨠ᩠ᨡᩣᨲᩴ ᩈᨠ᩠ᨠᩣᨿᩔ ᨶᩥᩔᩁᨱᩴ. ᩍᨾᩮ ᨸᨬ᩠ᨧ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ.

(ᨩ) ‘‘ᨠᨲᨾᩮ ᨸᨬ᩠ᨧ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ? ᨸᨬ᩠ᨧ ᨬᩣᨱᩥᨠᩮᩣ ᩈᨾ᩠ᨾᩣᩈᨾᩣᨵᩥ – ‘ᩋᨿᩴ ᩈᨾᩣᨵᩥ ᨸᨧ᩠ᨧᩩᨸ᩠ᨸᨶ᩠ᨶᩈᩩᨡᩮᩣ ᨧᩮᩅ ᩌᨿᨲᩥᨬ᩠ᨧ ᩈᩩᨡᩅᩥᨸᩣᨠᩮᩣ’ᨲᩥ ᨸᨧ᩠ᨧᨲ᩠ᨲᩴᨿᩮᩅ ᨬᩣᨱᩴ ᩏᨸ᩠ᨸᨩ᩠ᨩᨲᩥ. ‘ᩋᨿᩴ ᩈᨾᩣᨵᩥ ᩋᩁᩥᨿᩮᩣ ᨶᩥᩁᩣᨾᩥᩈᩮᩣ’ᨲᩥ ᨸᨧ᩠ᨧᨲ᩠ᨲᨬ᩠ᨬᩮᩅ ᨬᩣᨱᩴ ᩏᨸ᩠ᨸᨩ᩠ᨩᨲᩥ. ‘ᩋᨿᩴ ᩈᨾᩣᨵᩥ ᩋᨠᩣᨸᩩᩁᩥᩈᩈᩮᩅᩥᨲᩮᩣ’ᨲᩥ ᨸᨧ᩠ᨧᨲ᩠ᨲᩴᨿᩮᩅ ᨬᩣᨱᩴ ᩏᨸ᩠ᨸᨩ᩠ᨩᨲᩥ. ‘ᩋᨿᩴ ᩈᨾᩣᨵᩥ ᩈᨶ᩠ᨲᩮᩣ ᨸᨱᩦᨲᩮᩣ ᨸᨭᩥᨸ᩠ᨸᩔᨴ᩠ᨵᩃᨴ᩠ᨵᩮᩣ ᩑᨠᩮᩣᨴᩥᨽᩣᩅᩣᨵᩥᨣᨲᩮᩣ, ᨶ ᩈᩈᨦ᩠ᨡᩣᩁᨶᩥᨣ᩠ᨣᨿ᩠ᩉᩅᩣᩁᩥᨲᨣᨲᩮᩣ’ᨲᩥ [ᨶ ᨧ ᩈᩈᨦ᩠ᨡᩣᩁᨶᩥᨣ᩠ᨣᨿ᩠ᩉ ᩅᩣᩁᩥᨲᩅᨲᩮᩣᨲᩥ (ᩈᩦ. ᩈ᩠ᨿᩣ. ᨠᩴ. ᨸᩦ.), ᨶ ᩈᩈᨦ᩠ᨡᩣᩁᨶᩥᨣ᩠ᨣᨿ᩠ᩉᩅᩣᩁᩥᩅᩣᩅᨲᩮᩣ (ᨠ.), ᨶ ᩈᩈᨦ᩠ᨡᩣᩁᨶᩥᨣ᩠ᨣᨿ᩠ᩉᩅᩣᩁᩥᨿᩣᨵᩥᨣᨲᩮᩣ (?)] ᨸᨧ᩠ᨧᨲ᩠ᨲᩴᨿᩮᩅ ᨬᩣᨱᩴ ᩏᨸ᩠ᨸᨩ᩠ᨩᨲᩥ. ‘ᩈᩮᩣ ᨡᩮᩣ ᨸᨶᩣᩉᩴ ᩍᨾᩴ ᩈᨾᩣᨵᩥᩴ ᩈᨲᩮᩣᩅ ᩈᨾᩣᨸᨩ᩠ᨩᩣᨾᩥ ᩈᨲᩮᩣ ᩅᩩᨭ᩠ᨮᩉᩣᨾᩦ’ᨲᩥ ᨸᨧ᩠ᨧᨲ᩠ᨲᩴᨿᩮᩅ ᨬᩣᨱᩴ ᩏᨸ᩠ᨸᨩ᩠ᨩᨲᩥ. ᩍᨾᩮ ᨸᨬ᩠ᨧ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ.

(ᨫ) ‘‘ᨠᨲᨾᩮ ᨸᨬ᩠ᨧ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ? ᨸᨬ᩠ᨧ ᩅᩥᨾᩩᨲ᩠ᨲᩣᨿᨲᨶᩣᨶᩥ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩈᨲ᩠ᨳᩣ ᨵᨾ᩠ᨾᩴ ᨴᩮᩈᩮᨲᩥ ᩋᨬ᩠ᨬᨲᩁᩮᩣ ᩅᩣ ᨣᩁᩩᨭ᩠ᨮᩣᨶᩥᨿᩮᩣ ᩈᨻᩕᩉ᩠ᨾᨧᩣᩁᩦ. ᨿᨳᩣ ᨿᨳᩣ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩈᨲ᩠ᨳᩣ ᨵᨾ᩠ᨾᩴ ᨴᩮᩈᩮᨲᩥ, ᩋᨬ᩠ᨬᨲᩁᩮᩣ ᩅᩣ ᨣᩁᩩᨭ᩠ᨮᩣᨶᩥᨿᩮᩣ ᩈᨻᩕᩉ᩠ᨾᨧᩣᩁᩦ, ᨲᨳᩣ ᨲᨳᩣ ᩈᩮᩣ [ᨽᩥᨠ᩠ᨡᩩ (ᩈ᩠ᨿᩣ. ᨠᩴ.)] ᨲᩈ᩠ᨾᩥᩴ ᨵᨾ᩠ᨾᩮ ᩋᨲ᩠ᨳᨸ᩠ᨸᨭᩥᩈᩴᩅᩮᨴᩦ ᨧ ᩉᩮᩣᨲᩥ ᨵᨾ᩠ᨾᨸᨭᩥᩈᩴᩅᩮᨴᩦ ᨧ. ᨲᩔ ᩋᨲ᩠ᨳᨸ᩠ᨸᨭᩥᩈᩴᩅᩮᨴᩥᨶᩮᩣ ᨵᨾ᩠ᨾᨸᨭᩥᩈᩴᩅᩮᨴᩥᨶᩮᩣ ᨸᩣᨾᩮᩣᨩ᩠ᨩᩴ ᨩᩣᨿᨲᩥ, ᨸᨾᩩᨴᩥᨲᩔ ᨸᩦᨲᩥ ᨩᩣᨿᨲᩥ, ᨸᩦᨲᩥᨾᨶᩔ ᨠᩣᨿᩮᩣ ᨸᩔᨾ᩠ᨽᨲᩥ, ᨸᩔᨴ᩠ᨵᨠᩣᨿᩮᩣ ᩈᩩᨡᩴ ᩅᩮᨴᩮᨲᩥ, ᩈᩩᨡᩥᨶᩮᩣ ᨧᩥᨲ᩠ᨲᩴ ᩈᨾᩣᨵᩥᨿᨲᩥ. ᩍᨴᩴ ᨸᨮᨾᩴ ᩅᩥᨾᩩᨲ᩠ᨲᩣᨿᨲᨶᩴ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨶ ᩉᩮᩅ ᨡᩮᩣ ᩈᨲ᩠ᨳᩣ ᨵᨾ᩠ᨾᩴ ᨴᩮᩈᩮᨲᩥ, ᩋᨬ᩠ᨬᨲᩁᩮᩣ ᩅᩣ ᨣᩁᩩᨭ᩠ᨮᩣᨶᩥᨿᩮᩣ ᩈᨻᩕᩉ᩠ᨾᨧᩣᩁᩦ, ᩋᨸᩥ ᨧ ᨡᩮᩣ ᨿᨳᩣᩈᩩᨲᩴ ᨿᨳᩣᨸᩁᩥᨿᨲ᩠ᨲᩴ ᨵᨾ᩠ᨾᩴ ᩅᩥᨲ᩠ᨳᩣᩁᩮᨶ ᨸᩁᩮᩈᩴ ᨴᩮᩈᩮᨲᩥ ᨿᨳᩣ ᨿᨳᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᨿᨳᩣᩈᩩᨲᩴ ᨿᨳᩣᨸᩁᩥᨿᨲ᩠ᨲᩴ ᨵᨾ᩠ᨾᩴ ᩅᩥᨲ᩠ᨳᩣᩁᩮᨶ ᨸᩁᩮᩈᩴ ᨴᩮᩈᩮᨲᩥ. ᨲᨳᩣ ᨲᨳᩣ ᩈᩮᩣ ᨲᩈ᩠ᨾᩥᩴ ᨵᨾ᩠ᨾᩮ ᩋᨲ᩠ᨳᨸ᩠ᨸᨭᩥᩈᩴᩅᩮᨴᩦ ᨧ ᩉᩮᩣᨲᩥ ᨵᨾ᩠ᨾᨸᨭᩥᩈᩴᩅᩮᨴᩦ ᨧ. ᨲᩔ ᩋᨲ᩠ᨳᨸ᩠ᨸᨭᩥᩈᩴᩅᩮᨴᩥᨶᩮᩣ ᨵᨾ᩠ᨾᨸᨭᩥᩈᩴᩅᩮᨴᩥᨶᩮᩣ ᨸᩣᨾᩮᩣᨩ᩠ᨩᩴ ᨩᩣᨿᨲᩥ, ᨸᨾᩩᨴᩥᨲᩔ ᨸᩦᨲᩥ ᨩᩣᨿᨲᩥ, ᨸᩦᨲᩥᨾᨶᩔ ᨠᩣᨿᩮᩣ ᨸᩔᨾ᩠ᨽᨲᩥ, ᨸᩔᨴ᩠ᨵᨠᩣᨿᩮᩣ ᩈᩩᨡᩴ ᩅᩮᨴᩮᨲᩥ, ᩈᩩᨡᩥᨶᩮᩣ ᨧᩥᨲ᩠ᨲᩴ ᩈᨾᩣᨵᩥᨿᨲᩥ. ᩍᨴᩴ ᨴᩩᨲᩥᨿᩴ ᩅᩥᨾᩩᨲ᩠ᨲᩣᨿᨲᨶᩴ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨶ ᩉᩮᩅ ᨡᩮᩣ ᩈᨲ᩠ᨳᩣ ᨵᨾ᩠ᨾᩴ ᨴᩮᩈᩮᨲᩥ, ᩋᨬ᩠ᨬᨲᩁᩮᩣ ᩅᩣ ᨣᩁᩩᨭ᩠ᨮᩣᨶᩥᨿᩮᩣ ᩈᨻᩕᩉ᩠ᨾᨧᩣᩁᩦ, ᨶᩣᨸᩥ ᨿᨳᩣᩈᩩᨲᩴ ᨿᨳᩣᨸᩁᩥᨿᨲ᩠ᨲᩴ ᨵᨾ᩠ᨾᩴ ᩅᩥᨲ᩠ᨳᩣᩁᩮᨶ ᨸᩁᩮᩈᩴ ᨴᩮᩈᩮᨲᩥ. ᩋᨸᩥ ᨧ ᨡᩮᩣ, ᨿᨳᩣᩈᩩᨲᩴ ᨿᨳᩣᨸᩁᩥᨿᨲ᩠ᨲᩴ ᨵᨾ᩠ᨾᩴ ᩅᩥᨲ᩠ᨳᩣᩁᩮᨶ ᩈᨩ᩠ᨫᩣᨿᩴ ᨠᩁᩮᩣᨲᩥ. ᨿᨳᩣ ᨿᨳᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᨿᨳᩣᩈᩩᨲᩴ ᨿᨳᩣᨸᩁᩥᨿᨲ᩠ᨲᩴ ᨵᨾ᩠ᨾᩴ ᩅᩥᨲ᩠ᨳᩣᩁᩮᨶ ᩈᨩ᩠ᨫᩣᨿᩴ ᨠᩁᩮᩣᨲᩥ ᨲᨳᩣ ᨲᨳᩣ ᩈᩮᩣ ᨲᩈ᩠ᨾᩥᩴ ᨵᨾ᩠ᨾᩮ ᩋᨲ᩠ᨳᨸ᩠ᨸᨭᩥᩈᩴᩅᩮᨴᩦ ᨧ ᩉᩮᩣᨲᩥ ᨵᨾ᩠ᨾᨸᨭᩥᩈᩴᩅᩮᨴᩦ ᨧ. ᨲᩔ ᩋᨲ᩠ᨳᨸ᩠ᨸᨭᩥᩈᩴᩅᩮᨴᩥᨶᩮᩣ ᨵᨾ᩠ᨾᨸᨭᩥᩈᩴᩅᩮᨴᩥᨶᩮᩣ ᨸᩣᨾᩮᩣᨩ᩠ᨩᩴ ᨩᩣᨿᨲᩥ, ᨸᨾᩩᨴᩥᨲᩔ ᨸᩦᨲᩥ ᨩᩣᨿᨲᩥ, ᨸᩦᨲᩥᨾᨶᩔ ᨠᩣᨿᩮᩣ ᨸᩔᨾ᩠ᨽᨲᩥ, ᨸᩔᨴ᩠ᨵᨠᩣᨿᩮᩣ ᩈᩩᨡᩴ ᩅᩮᨴᩮᨲᩥ, ᩈᩩᨡᩥᨶᩮᩣ ᨧᩥᨲ᩠ᨲᩴ ᩈᨾᩣᨵᩥᨿᨲᩥ. ᩍᨴᩴ ᨲᨲᩥᨿᩴ ᩅᩥᨾᩩᨲ᩠ᨲᩣᨿᨲᨶᩴ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨶ ᩉᩮᩅ ᨡᩮᩣ ᩈᨲ᩠ᨳᩣ ᨵᨾ᩠ᨾᩴ ᨴᩮᩈᩮᨲᩥ, ᩋᨬ᩠ᨬᨲᩁᩮᩣ ᩅᩣ ᨣᩁᩩᨭ᩠ᨮᩣᨶᩥᨿᩮᩣ ᩈᨻᩕᩉ᩠ᨾᨧᩣᩁᩦ, ᨶᩣᨸᩥ ᨿᨳᩣᩈᩩᨲᩴ ᨿᨳᩣᨸᩁᩥᨿᨲ᩠ᨲᩴ ᨵᨾ᩠ᨾᩴ ᩅᩥᨲ᩠ᨳᩣᩁᩮᨶ ᨸᩁᩮᩈᩴ ᨴᩮᩈᩮᨲᩥ, ᨶᩣᨸᩥ ᨿᨳᩣᩈᩩᨲᩴ ᨿᨳᩣᨸᩁᩥᨿᨲ᩠ᨲᩴ ᨵᨾ᩠ᨾᩴ ᩅᩥᨲ᩠ᨳᩣᩁᩮᨶ ᩈᨩ᩠ᨫᩣᨿᩴ ᨠᩁᩮᩣᨲᩥ. ᩋᨸᩥ ᨧ ᨡᩮᩣ, ᨿᨳᩣᩈᩩᨲᩴ ᨿᨳᩣᨸᩁᩥᨿᨲ᩠ᨲᩴ ᨵᨾ᩠ᨾᩴ ᨧᩮᨲᩈᩣ ᩋᨶᩩᩅᩥᨲᨠ᩠ᨠᩮᨲᩥ ᩋᨶᩩᩅᩥᨧᩣᩁᩮᨲᩥ ᨾᨶᩈᩣᨶᩩᨸᩮᨠ᩠ᨡᨲᩥ. ᨿᨳᩣ ᨿᨳᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᨿᨳᩣᩈᩩᨲᩴ ᨿᨳᩣᨸᩁᩥᨿᨲ᩠ᨲᩴ ᨵᨾ᩠ᨾᩴ ᨧᩮᨲᩈᩣ ᩋᨶᩩᩅᩥᨲᨠ᩠ᨠᩮᨲᩥ ᩋᨶᩩᩅᩥᨧᩣᩁᩮᨲᩥ ᨾᨶᩈᩣᨶᩩᨸᩮᨠ᩠ᨡᨲᩥ ᨲᨳᩣ ᨲᨳᩣ ᩈᩮᩣ ᨲᩈ᩠ᨾᩥᩴ ᨵᨾ᩠ᨾᩮ ᩋᨲ᩠ᨳᨸ᩠ᨸᨭᩥᩈᩴᩅᩮᨴᩦ ᨧ ᩉᩮᩣᨲᩥ ᨵᨾ᩠ᨾᨸᨭᩥᩈᩴᩅᩮᨴᩦ ᨧ. ᨲᩔ ᩋᨲ᩠ᨳᨸ᩠ᨸᨭᩥᩈᩴᩅᩮᨴᩥᨶᩮᩣ ᨵᨾ᩠ᨾᨸᨭᩥᩈᩴᩅᩮᨴᩥᨶᩮᩣ ᨸᩣᨾᩮᩣᨩ᩠ᨩᩴ ᨩᩣᨿᨲᩥ, ᨸᨾᩩᨴᩥᨲᩔ ᨸᩦᨲᩥ ᨩᩣᨿᨲᩥ, ᨸᩦᨲᩥᨾᨶᩔ ᨠᩣᨿᩮᩣ ᨸᩔᨾ᩠ᨽᨲᩥ, ᨸᩔᨴ᩠ᨵᨠᩣᨿᩮᩣ ᩈᩩᨡᩴ ᩅᩮᨴᩮᨲᩥ, ᩈᩩᨡᩥᨶᩮᩣ ᨧᩥᨲ᩠ᨲᩴ ᩈᨾᩣᨵᩥᨿᨲᩥ. ᩍᨴᩴ ᨧᨲᩩᨲ᩠ᨳᩴ ᩅᩥᨾᩩᨲ᩠ᨲᩣᨿᨲᨶᩴ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨶ ᩉᩮᩅ ᨡᩮᩣ ᩈᨲ᩠ᨳᩣ ᨵᨾ᩠ᨾᩴ ᨴᩮᩈᩮᨲᩥ, ᩋᨬ᩠ᨬᨲᩁᩮᩣ ᩅᩣ ᨣᩁᩩᨭ᩠ᨮᩣᨶᩥᨿᩮᩣ ᩈᨻᩕᩉ᩠ᨾᨧᩣᩁᩦ, ᨶᩣᨸᩥ ᨿᨳᩣᩈᩩᨲᩴ ᨿᨳᩣᨸᩁᩥᨿᨲ᩠ᨲᩴ ᨵᨾ᩠ᨾᩴ ᩅᩥᨲ᩠ᨳᩣᩁᩮᨶ ᨸᩁᩮᩈᩴ ᨴᩮᩈᩮᨲᩥ, ᨶᩣᨸᩥ ᨿᨳᩣᩈᩩᨲᩴ ᨿᨳᩣᨸᩁᩥᨿᨲ᩠ᨲᩴ ᨵᨾ᩠ᨾᩴ ᩅᩥᨲ᩠ᨳᩣᩁᩮᨶ ᩈᨩ᩠ᨫᩣᨿᩴ ᨠᩁᩮᩣᨲᩥ, ᨶᩣᨸᩥ ᨿᨳᩣᩈᩩᨲᩴ ᨿᨳᩣᨸᩁᩥᨿᨲ᩠ᨲᩴ ᨵᨾ᩠ᨾᩴ ᨧᩮᨲᩈᩣ ᩋᨶᩩᩅᩥᨲᨠ᩠ᨠᩮᨲᩥ ᩋᨶᩩᩅᩥᨧᩣᩁᩮᨲᩥ ᨾᨶᩈᩣᨶᩩᨸᩮᨠ᩠ᨡᨲᩥ; ᩋᨸᩥ ᨧ ᨡ᩠ᩅᩔ ᩋᨬ᩠ᨬᨲᩁᩴ ᩈᨾᩣᨵᩥᨶᩥᨾᩥᨲ᩠ᨲᩴ ᩈᩩᨣ᩠ᨣᩉᩥᨲᩴ ᩉᩮᩣᨲᩥ ᩈᩩᨾᨶᩈᩥᨠᨲᩴ ᩈᩪᨸᨵᩣᩁᩥᨲᩴ ᩈᩩᨸ᩠ᨸᨭᩥᩅᩥᨴ᩠ᨵᩴ ᨸᨬ᩠ᨬᩣᨿ. ᨿᨳᩣ ᨿᨳᩣ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩋᨬ᩠ᨬᨲᩁᩴ ᩈᨾᩣᨵᩥᨶᩥᨾᩥᨲ᩠ᨲᩴ ᩈᩩᨣ᩠ᨣᩉᩥᨲᩴ ᩉᩮᩣᨲᩥ ᩈᩩᨾᨶᩈᩥᨠᨲᩴ ᩈᩪᨸᨵᩣᩁᩥᨲᩴ ᩈᩩᨸ᩠ᨸᨭᩥᩅᩥᨴ᩠ᨵᩴ ᨸᨬ᩠ᨬᩣᨿ ᨲᨳᩣ ᨲᨳᩣ ᩈᩮᩣ ᨲᩈ᩠ᨾᩥᩴ ᨵᨾ᩠ᨾᩮ ᩋᨲ᩠ᨳᨸ᩠ᨸᨭᩥᩈᩴᩅᩮᨴᩦ ᨧ ᩉᩮᩣᨲᩥ ᨵᨾ᩠ᨾᨸ᩠ᨸᨭᩥᩈᩴᩅᩮᨴᩦ ᨧ. ᨲᩔ ᩋᨲ᩠ᨳᨸ᩠ᨸᨭᩥᩈᩴᩅᩮᨴᩥᨶᩮᩣ ᨵᨾ᩠ᨾᨸ᩠ᨸᨭᩥᩈᩴᩅᩮᨴᩥᨶᩮᩣ ᨸᩣᨾᩮᩣᨩ᩠ᨩᩴ ᨩᩣᨿᨲᩥ, ᨸᨾᩩᨴᩥᨲᩔ ᨸᩦᨲᩥ ᨩᩣᨿᨲᩥ, ᨸᩦᨲᩥᨾᨶᩔ ᨠᩣᨿᩮᩣ ᨸᩔᨾ᩠ᨽᨲᩥ, ᨸᩔᨴ᩠ᨵᨠᩣᨿᩮᩣ ᩈᩩᨡᩴ ᩅᩮᨴᩮᨲᩥ, ᩈᩩᨡᩥᨶᩮᩣ ᨧᩥᨲ᩠ᨲᩴ ᩈᨾᩣᨵᩥᨿᨲᩥ. ᩍᨴᩴ ᨸᨬ᩠ᨧᨾᩴ ᩅᩥᨾᩩᨲ᩠ᨲᩣᨿᨲᨶᩴ. ᩍᨾᩮ ᨸᨬ᩠ᨧ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ.

(ᨬ) ‘‘ᨠᨲᨾᩮ ᨸᨬ᩠ᨧ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ? ᨸᨬ᩠ᨧ ᨵᨾ᩠ᨾᨠ᩠ᨡᨶ᩠ᨵᩣ – ᩈᩦᩃᨠ᩠ᨡᨶ᩠ᨵᩮᩣ, ᩈᨾᩣᨵᩥᨠ᩠ᨡᨶ᩠ᨵᩮᩣ, ᨸᨬ᩠ᨬᩣᨠ᩠ᨡᨶ᩠ᨵᩮᩣ, ᩅᩥᨾᩩᨲ᩠ᨲᩥᨠ᩠ᨡᨶ᩠ᨵᩮᩣ, ᩅᩥᨾᩩᨲ᩠ᨲᩥᨬᩣᨱᨴᩔᨶᨠ᩠ᨡᨶ᩠ᨵᩮᩣ. ᩍᨾᩮ ᨸᨬ᩠ᨧ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

‘‘ᩍᨲᩥ ᩍᨾᩮ ᨸᨬ᩠ᨬᩣᩈ ᨵᨾ᩠ᨾᩣ ᨽᩪᨲᩣ ᨲᨧ᩠ᨨᩣ ᨲᨳᩣ ᩋᩅᩥᨲᨳᩣ ᩋᨶᨬ᩠ᨬᨳᩣ ᩈᨾ᩠ᨾᩣ ᨲᨳᩣᨣᨲᩮᨶ ᩋᨽᩥᩈᨾ᩠ᨻᩩᨴ᩠ᨵᩣ.

ᨨ ᨵᨾ᩠ᨾᩣ

᪓᪕᪖. ‘‘ᨨ ᨵᨾ᩠ᨾᩣ ᨻᩉᩩᨠᩣᩁᩣ…ᨸᩮ… ᨨ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

(ᨠ) ‘‘ᨠᨲᨾᩮ ᨨ ᨵᨾ᩠ᨾᩣ ᨻᩉᩩᨠᩣᩁᩣ? ᨨ ᩈᩣᩁᨱᩦᨿᩣ ᨵᨾ᩠ᨾᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨾᩮᨲ᩠ᨲᩴ ᨠᩣᨿᨠᨾ᩠ᨾᩴ ᨸᨧ᩠ᨧᩩᨸᨭ᩠ᨮᩥᨲᩴ ᩉᩮᩣᨲᩥ ᩈᨻᩕᩉ᩠ᨾᨧᩣᩁᩦᩈᩩ ᩌᩅᩥ ᨧᩮᩅ ᩁᩉᩮᩣ ᨧ, ᩋᨿᨾ᩠ᨸᩥ ᨵᨾ᩠ᨾᩮᩣ ᩈᩣᩁᨱᩦᨿᩮᩣ ᨸᩥᨿᨠᩁᨱᩮᩣ ᨣᩁᩩᨠᩁᨱᩮᩣ ᩈᨦ᩠ᨣᩉᩣᨿ ᩋᩅᩥᩅᩣᨴᩣᨿ ᩈᩣᨾᨣ᩠ᨣᩥᨿᩣ ᩑᨠᩦᨽᩣᩅᩣᨿ ᩈᩴᩅᨲ᩠ᨲᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨾᩮᨲ᩠ᨲᩴ ᩅᨧᩦᨠᨾ᩠ᨾᩴ…ᨸᩮ… ᩑᨠᩦᨽᩣᩅᩣᨿ ᩈᩴᩅᨲ᩠ᨲᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨾᩮᨲ᩠ᨲᩴ ᨾᨶᩮᩣᨠᨾ᩠ᨾᩴ…ᨸᩮ… ᩑᨠᩦᨽᩣᩅᩣᨿ ᩈᩴᩅᨲ᩠ᨲᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨿᩮ ᨲᩮ ᩃᩣᨽᩣ ᨵᨾ᩠ᨾᩥᨠᩣ ᨵᨾ᩠ᨾᩃᨴ᩠ᨵᩣ ᩋᨶ᩠ᨲᨾᩈᩮᩣ ᨸᨲ᩠ᨲᨸᩁᩥᨿᩣᨸᨶ᩠ᨶᨾᨲ᩠ᨲᨾ᩠ᨸᩥ, ᨲᨳᩣᩁᩪᨸᩮᩉᩥ ᩃᩣᨽᩮᩉᩥ ᩋᨸ᩠ᨸᨭᩥᩅᩥᨽᨲ᩠ᨲᨽᩮᩣᨣᩦ ᩉᩮᩣᨲᩥ ᩈᩦᩃᩅᨶ᩠ᨲᩮᩉᩥ ᩈᨻᩕᩉ᩠ᨾᨧᩣᩁᩦᩉᩥ ᩈᩣᨵᩣᩁᨱᨽᩮᩣᨣᩦ, ᩋᨿᨾ᩠ᨸᩥ ᨵᨾ᩠ᨾᩮᩣ ᩈᩣᩁᨱᩦᨿᩮᩣ…ᨸᩮ… ᩑᨠᩦᨽᩣᩅᩣᨿ ᩈᩴᩅᨲ᩠ᨲᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ, ᨿᩣᨶᩥ ᨲᩣᨶᩥ ᩈᩦᩃᩣᨶᩥ ᩋᨡᨱ᩠ᨯᩣᨶᩥ ᩋᨧ᩠ᨨᩥᨴ᩠ᨴᩣᨶᩥ ᩋᩈᨻᩃᩣᨶᩥ ᩋᨠᨾ᩠ᨾᩣᩈᩣᨶᩥ ᨽᩩᨩᩥᩔᩣᨶᩥ ᩅᩥᨬ᩠ᨬᩩᨸ᩠ᨸᩈᨲ᩠ᨳᩣᨶᩥ ᩋᨸᩁᩣᨾᨭ᩠ᨮᩣᨶᩥ ᩈᨾᩣᨵᩥᩈᩴᩅᨲ᩠ᨲᨶᩥᨠᩣᨶᩥ, ᨲᨳᩣᩁᩪᨸᩮᩈᩩ ᩈᩦᩃᩮᩈᩩ ᩈᩦᩃᩈᩣᨾᨬ᩠ᨬᨣᨲᩮᩣ ᩅᩥᩉᩁᨲᩥ ᩈᨻᩕᩉ᩠ᨾᨧᩣᩁᩦᩉᩥ ᩌᩅᩥ ᨧᩮᩅ ᩁᩉᩮᩣ ᨧ, ᩋᨿᨾ᩠ᨸᩥ ᨵᨾ᩠ᨾᩮᩣ ᩈᩣᩁᨱᩦᨿᩮᩣ…ᨸᩮ… ᩑᨠᩦᨽᩣᩅᩣᨿ ᩈᩴᩅᨲ᩠ᨲᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨿᩣᨿᩴ ᨴᩥᨭ᩠ᨮᩥ ᩋᩁᩥᨿᩣ ᨶᩥᨿ᩠ᨿᩣᨶᩥᨠᩣ ᨶᩥᨿ᩠ᨿᩣᨲᩥ ᨲᨠ᩠ᨠᩁᩔ ᩈᨾ᩠ᨾᩣ ᨴᩩᨠ᩠ᨡᨠ᩠ᨡᨿᩣᨿ, ᨲᨳᩣᩁᩪᨸᩣᨿ ᨴᩥᨭ᩠ᨮᩥᨿᩣ ᨴᩥᨭ᩠ᨮᩥ ᩈᩣᨾᨬ᩠ᨬᨣᨲᩮᩣ ᩅᩥᩉᩁᨲᩥ ᩈᨻᩕᩉ᩠ᨾᨧᩣᩁᩦᩉᩥ ᩌᩅᩥ ᨧᩮᩅ ᩁᩉᩮᩣ ᨧ, ᩋᨿᨾ᩠ᨸᩥ ᨵᨾ᩠ᨾᩮᩣ ᩈᩣᩁᨱᩦᨿᩮᩣ ᨸᩥᨿᨠᩁᨱᩮᩣ ᨣᩁᩩᨠᩁᨱᩮᩣ, ᩈᨦ᩠ᨣᩉᩣᨿ ᩋᩅᩥᩅᩣᨴᩣᨿ ᩈᩣᨾᨣ᩠ᨣᩥᨿᩣ ᩑᨠᩦᨽᩣᩅᩣᨿ ᩈᩴᩅᨲ᩠ᨲᨲᩥ. ᩍᨾᩮ ᨨ ᨵᨾ᩠ᨾᩣ ᨻᩉᩩᨠᩣᩁᩣ.

(ᨡ) ‘‘ᨠᨲᨾᩮ ᨨ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ? ᨨ ᩋᨶᩩᩔᨲᩥᨭ᩠ᨮᩣᨶᩣᨶᩥ – ᨻᩩᨴ᩠ᨵᩣᨶᩩᩔᨲᩥ, ᨵᨾ᩠ᨾᩣᨶᩩᩔᨲᩥ, ᩈᨦ᩠ᨥᩣᨶᩩᩔᨲᩥ, ᩈᩦᩃᩣᨶᩩᩔᨲᩥ, ᨧᩣᨣᩣᨶᩩᩔᨲᩥ, ᨴᩮᩅᨲᩣᨶᩩᩔᨲᩥ. ᩍᨾᩮ ᨨ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ.

(ᨣ) ‘‘ᨠᨲᨾᩮ ᨨ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ? ᨨ ᩋᨩ᩠ᨫᨲ᩠ᨲᩥᨠᩣᨶᩥ ᩌᨿᨲᨶᩣᨶᩥ – ᨧᨠ᩠ᨡᩣᨿᨲᨶᩴ, ᩈᩮᩣᨲᩣᨿᨲᨶᩴ, ᨥᩣᨶᩣᨿᨲᨶᩴ, ᨩᩥᩅ᩠ᩉᩣᨿᨲᨶᩴ, ᨠᩣᨿᩣᨿᨲᨶᩴ, ᨾᨶᩣᨿᨲᨶᩴ. ᩍᨾᩮ ᨨ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ.

(ᨥ) ‘‘ᨠᨲᨾᩮ ᨨ ᨵᨾ᩠ᨾᩣ ᨸᩉᩣᨲᨻ᩠ᨻᩣ? ᨨ ᨲᨱ᩠ᩉᩣᨠᩣᨿᩣ – ᩁᩪᨸᨲᨱ᩠ᩉᩣ, ᩈᨴ᩠ᨴᨲᨱ᩠ᩉᩣ, ᨣᨶ᩠ᨵᨲᨱ᩠ᩉᩣ, ᩁᩈᨲᨱ᩠ᩉᩣ, ᨹᩮᩣᨭ᩠ᨮᨻ᩠ᨻᨲᨱ᩠ᩉᩣ, ᨵᨾ᩠ᨾᨲᨱ᩠ᩉᩣ. ᩍᨾᩮ ᨨ ᨵᨾ᩠ᨾᩣ ᨸᩉᩣᨲᨻ᩠ᨻᩣ.

(ᨦ) ‘‘ᨠᨲᨾᩮ ᨨ ᨵᨾ᩠ᨾᩣ ᩉᩣᨶᨽᩣᨣᩥᨿᩣ? ᨨ ᩋᨣᩣᩁᩅᩣ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨲ᩠ᨳᩁᩥ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ. ᨵᨾ᩠ᨾᩮ…ᨸᩮ… ᩈᨦ᩠ᨥᩮ… ᩈᩥᨠ᩠ᨡᩣᨿ… ᩋᨸ᩠ᨸᨾᩣᨴᩮ… ᨸᨭᩥᩈᨶ᩠ᨳᩣᩁᩮ ᩋᨣᩣᩁᩅᩮᩣ ᩅᩥᩉᩁᨲᩥ ᩋᨸ᩠ᨸᨲᩥᩔᩮᩣ. ᩍᨾᩮ ᨨ ᨵᨾ᩠ᨾᩣ ᩉᩣᨶᨽᩣᨣᩥᨿᩣ.

(ᨧ) ‘‘ᨠᨲᨾᩮ ᨨ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ? ᨨ ᨣᩣᩁᩅᩣ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨲ᩠ᨳᩁᩥ ᩈᨣᩣᩁᩅᩮᩣ ᩅᩥᩉᩁᨲᩥ ᩈᨸ᩠ᨸᨲᩥᩔᩮᩣ ᨵᨾ᩠ᨾᩮ…ᨸᩮ… ᩈᨦ᩠ᨥᩮ… ᩈᩥᨠ᩠ᨡᩣᨿ… ᩋᨸ᩠ᨸᨾᩣᨴᩮ… ᨸᨭᩥᩈᨶ᩠ᨳᩣᩁᩮ ᩈᨣᩣᩁᩅᩮᩣ ᩅᩥᩉᩁᨲᩥ ᩈᨸ᩠ᨸᨲᩥᩔᩮᩣ. ᩍᨾᩮ ᨨ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ.

(ᨨ) ‘‘ᨠᨲᨾᩮ ᨨ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ? ᨨ ᨶᩥᩔᩁᨱᩥᨿᩣ ᨵᩣᨲᩩᨿᩮᩣ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩑᩅᩴ ᩅᨴᩮᨿ᩠ᨿ – ‘ᨾᩮᨲ᩠ᨲᩣ ᩉᩥ ᨡᩮᩣ ᨾᩮ, ᨧᩮᨲᩮᩣᩅᩥᨾᩩᨲ᩠ᨲᩥ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ, ᩋᨳ ᨧ ᨸᨶ ᨾᩮ ᨻ᩠ᨿᩣᨸᩣᨴᩮᩣ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨲᩥᨭ᩠ᨮᨲᩦ’ᨲᩥ. ᩈᩮᩣ ‘ᨾᩣ ᩉᩮᩅᩴ’ ᨲᩥᩔ ᩅᨧᨶᩦᨿᩮᩣ ‘ᨾᩣᨿᩈ᩠ᨾᩣ ᩑᩅᩴ ᩋᩅᨧ, ᨾᩣ ᨽᨣᩅᨶ᩠ᨲᩴ ᩋᨻ᩠ᨽᩣᨧᩥᨠ᩠ᨡᩥ. ᨶ ᩉᩥ ᩈᩣᨵᩩ ᨽᨣᩅᨲᩮᩣ ᩋᨻ᩠ᨽᨠ᩠ᨡᩣᨶᩴ, ᨶ ᩉᩥ ᨽᨣᩅᩣ ᩑᩅᩴ ᩅᨴᩮᨿ᩠ᨿ. ᩋᨭ᩠ᨮᩣᨶᨾᩮᨲᩴ ᩌᩅᩩᩈᩮᩣ ᩋᨶᩅᨠᩣᩈᩮᩣ ᨿᩴ ᨾᩮᨲ᩠ᨲᩣᨿ ᨧᩮᨲᩮᩣᩅᩥᨾᩩᨲ᩠ᨲᩥᨿᩣ ᨽᩣᩅᩥᨲᩣᨿ ᨻᩉᩩᩃᩦᨠᨲᩣᨿ ᨿᩣᨶᩦᨠᨲᩣᨿ ᩅᨲ᩠ᨳᩩᨠᨲᩣᨿ ᩋᨶᩩᨭ᩠ᨮᩥᨲᩣᨿ ᨸᩁᩥᨧᩥᨲᩣᨿ ᩈᩩᩈᨾᩣᩁᨴ᩠ᨵᩣᨿ. ᩋᨳ ᨧ ᨸᨶᩔ ᨻ᩠ᨿᩣᨸᩣᨴᩮᩣ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨮᩔᨲᩦᨲᩥ, ᨶᩮᨲᩴ ᨮᩣᨶᩴ ᩅᩥᨩ᩠ᨩᨲᩥ. ᨶᩥᩔᩁᨱᩴ ᩉᩮᨲᩴ, ᩌᩅᩩᩈᩮᩣ, ᨻ᩠ᨿᩣᨸᩣᨴᩔ, ᨿᨴᩥᨴᩴ ᨾᩮᨲ᩠ᨲᩣᨧᩮᨲᩮᩣᩅᩥᨾᩩᨲ᩠ᨲᩦ’ᨲᩥ.

‘‘ᩍᨵ ᨸᨶᩣᩅᩩᩈᩮᩣ, ᨽᩥᨠ᩠ᨡᩩ ᩑᩅᩴ ᩅᨴᩮᨿ᩠ᨿ – ‘ᨠᩁᩩᨱᩣ ᩉᩥ ᨡᩮᩣ ᨾᩮ ᨧᩮᨲᩮᩣᩅᩥᨾᩩᨲ᩠ᨲᩥ ᨽᩣᩅᩥᨲᩣ ᨻᩉᩩᩃᩦᨠᨲᩣ ᨿᩣᨶᩦᨠᨲᩣ ᩅᨲ᩠ᨳᩩᨠᨲᩣ ᩋᨶᩩᨭ᩠ᨮᩥᨲᩣ ᨸᩁᩥᨧᩥᨲᩣ ᩈᩩᩈᨾᩣᩁᨴ᩠ᨵᩣ. ᩋᨳ ᨧ ᨸᨶ ᨾᩮ ᩅᩥᩉᩮᩈᩣ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨲᩥᨭ᩠ᨮᨲᩦ’ᨲᩥ. ᩈᩮᩣ – ‘ᨾᩣ ᩉᩮᩅᩴ’ ᨲᩥᩔ ᩅᨧᨶᩦᨿᩮᩣ, ‘ᨾᩣᨿᩈ᩠ᨾᩣ ᩑᩅᩴ ᩋᩅᨧ, ᨾᩣ ᨽᨣᩅᨶ᩠ᨲᩴ ᩋᨻ᩠ᨽᩣᨧᩥᨠ᩠ᨡᩥ…ᨸᩮ… ᨶᩥᩔᩁᨱᩴ ᩉᩮᨲᩴ, ᩌᩅᩩᩈᩮᩣ, ᩅᩥᩉᩮᩈᩣᨿ, ᨿᨴᩥᨴᩴ ᨠᩁᩩᨱᩣᨧᩮᨲᩮᩣᩅᩥᨾᩩᨲ᩠ᨲᩦ’ᨲᩥ.

‘‘ᩍᨵ ᨸᨶᩣᩅᩩᩈᩮᩣ, ᨽᩥᨠ᩠ᨡᩩ ᩑᩅᩴ ᩅᨴᩮᨿ᩠ᨿ – ‘ᨾᩩᨴᩥᨲᩣ ᩉᩥ ᨡᩮᩣ ᨾᩮ ᨧᩮᨲᩮᩣᩅᩥᨾᩩᨲ᩠ᨲᩥ ᨽᩣᩅᩥᨲᩣ…ᨸᩮ… ᩋᨳ ᨧ ᨸᨶ ᨾᩮ ᩋᩁᨲᩥ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨲᩥᨭ᩠ᨮᨲᩦ’ᨲᩥ. ᩈᩮᩣ – ‘ᨾᩣ ᩉᩮᩅᩴ’ ᨲᩥᩔ ᩅᨧᨶᩦᨿᩮᩣ ‘ᨾᩣᨿᩈ᩠ᨾᩣ ᩑᩅᩴ ᩋᩅᨧ…ᨸᩮ… ᨶᩥᩔᩁᨱᩴ ᩉᩮᨲᩴ, ᩌᩅᩩᩈᩮᩣ ᩋᩁᨲᩥᨿᩣ, ᨿᨴᩥᨴᩴ ᨾᩩᨴᩥᨲᩣᨧᩮᨲᩮᩣᩅᩥᨾᩩᨲ᩠ᨲᩦ’ᨲᩥ.

‘‘ᩍᨵ ᨸᨶᩣᩅᩩᩈᩮᩣ, ᨽᩥᨠ᩠ᨡᩩ ᩑᩅᩴ ᩅᨴᩮᨿ᩠ᨿ – ‘ᩏᨸᩮᨠ᩠ᨡᩣ ᩉᩥ ᨡᩮᩣ ᨾᩮ ᨧᩮᨲᩮᩣᩅᩥᨾᩩᨲ᩠ᨲᩥ ᨽᩣᩅᩥᨲᩣ…ᨸᩮ… ᩋᨳ ᨧ ᨸᨶ ᨾᩮ ᩁᩣᨣᩮᩣ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨲᩥᨭ᩠ᨮᨲᩦ’ᨲᩥ. ᩈᩮᩣ – ‘ᨾᩣ ᩉᩮᩅᩴ’ ᨲᩥᩔ ᩅᨧᨶᩦᨿᩮᩣ ‘ᨾᩣᨿᩈ᩠ᨾᩣ ᩑᩅᩴ ᩋᩅᨧ…ᨸᩮ… ᨶᩥᩔᩁᨱᩴ ᩉᩮᨲᩴ, ᩌᩅᩩᩈᩮᩣ, ᩁᩣᨣᩔ ᨿᨴᩥᨴᩴ ᩏᨸᩮᨠ᩠ᨡᩣᨧᩮᨲᩮᩣᩅᩥᨾᩩᨲ᩠ᨲᩦ’ᨲᩥ.

‘‘ᩍᨵ ᨸᨶᩣᩅᩩᩈᩮᩣ, ᨽᩥᨠ᩠ᨡᩩ ᩑᩅᩴ ᩅᨴᩮᨿ᩠ᨿ – ‘ᩋᨶᩥᨾᩥᨲ᩠ᨲᩣ ᩉᩥ ᨡᩮᩣ ᨾᩮ ᨧᩮᨲᩮᩣᩅᩥᨾᩩᨲ᩠ᨲᩥ ᨽᩣᩅᩥᨲᩣ…ᨸᩮ… ᩋᨳ ᨧ ᨸᨶ ᨾᩮ ᨶᩥᨾᩥᨲ᩠ᨲᩣᨶᩩᩈᩣᩁᩥ ᩅᩥᨬ᩠ᨬᩣᨱᩴ ᩉᩮᩣᨲᩦ’ᨲᩥ. ᩈᩮᩣ – ‘ᨾᩣ ᩉᩮᩅᩴ’ ᨲᩥᩔ ᩅᨧᨶᩦᨿᩮᩣ ‘ᨾᩣᨿᩈ᩠ᨾᩣ ᩑᩅᩴ ᩋᩅᨧ…ᨸᩮ… ᨶᩥᩔᩁᨱᩴ ᩉᩮᨲᩴ, ᩌᩅᩩᩈᩮᩣ, ᩈᨻ᩠ᨻᨶᩥᨾᩥᨲ᩠ᨲᩣᨶᩴ ᨿᨴᩥᨴᩴ ᩋᨶᩥᨾᩥᨲ᩠ᨲᩣ ᨧᩮᨲᩮᩣᩅᩥᨾᩩᨲ᩠ᨲᩦ’ᨲᩥ.

‘‘ᩍᨵ ᨸᨶᩣᩅᩩᩈᩮᩣ, ᨽᩥᨠ᩠ᨡᩩ ᩑᩅᩴ ᩅᨴᩮᨿ᩠ᨿ – ‘ᩋᩈ᩠ᨾᩦᨲᩥ ᨡᩮᩣ ᨾᩮ ᩅᩥᨣᨲᩴ, ᩋᨿᨾᩉᨾᩈ᩠ᨾᩦᨲᩥ ᨶ ᩈᨾᨶᩩᨸᩔᩣᨾᩥ, ᩋᨳ ᨧ ᨸᨶ ᨾᩮ ᩅᩥᨧᩥᨠᩥᨧ᩠ᨨᩣᨠᨳᩴᨠᨳᩣᩈᩃ᩠ᩃᩴ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨲᩥᨭ᩠ᨮᨲᩦ’ᨲᩥ. ᩈᩮᩣ – ‘ᨾᩣ ᩉᩮᩅᩴ’ ᨲᩥᩔ ᩅᨧᨶᩦᨿᩮᩣ ‘ᨾᩣᨿᩈ᩠ᨾᩣ ᩑᩅᩴ ᩋᩅᨧ, ᨾᩣ ᨽᨣᩅᨶ᩠ᨲᩴ ᩋᨻ᩠ᨽᩣᨧᩥᨠ᩠ᨡᩥ, ᨶ ᩉᩥ ᩈᩣᨵᩩ ᨽᨣᩅᨲᩮᩣ ᩋᨻ᩠ᨽᨠ᩠ᨡᩣᨶᩴ, ᨶ ᩉᩥ ᨽᨣᩅᩣ ᩑᩅᩴ ᩅᨴᩮᨿ᩠ᨿ. ᩋᨭ᩠ᨮᩣᨶᨾᩮᨲᩴ, ᩌᩅᩩᩈᩮᩣ, ᩋᨶᩅᨠᩣᩈᩮᩣ ᨿᩴ ᩋᩈ᩠ᨾᩦᨲᩥ ᩅᩥᨣᨲᩮ ᩋᨿᨾᩉᨾᩈ᩠ᨾᩦᨲᩥ ᩋᩈᨾᨶᩩᨸᩔᨲᩮᩣ. ᩋᨳ ᨧ ᨸᨶᩔ ᩅᩥᨧᩥᨠᩥᨧ᩠ᨨᩣᨠᨳᩴᨠᨳᩣᩈᩃ᩠ᩃᩴ ᨧᩥᨲ᩠ᨲᩴ ᨸᩁᩥᨿᩣᨴᩣᨿ ᨮᩔᨲᩥ, ᨶᩮᨲᩴ ᨮᩣᨶᩴ ᩅᩥᨩ᩠ᨩᨲᩥ. ᨶᩥᩔᩁᨱᩴ ᩉᩮᨲᩴ, ᩌᩅᩩᩈᩮᩣ, ᩅᩥᨧᩥᨠᩥᨧ᩠ᨨᩣᨠᨳᩴᨠᨳᩣᩈᩃ᩠ᩃᩔ, ᨿᨴᩥᨴᩴ ᩋᩈ᩠ᨾᩥᨾᩣᨶᩈᨾᩩᨣ᩠ᨥᩣᨭᩮᩣ’ᨲᩥ. ᩍᨾᩮ ᨨ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ.

(ᨩ) ‘‘ᨠᨲᨾᩮ ᨨ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ? ᨨ ᩈᨲᨲᩅᩥᩉᩣᩁᩣ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨧᨠ᩠ᨡᩩᨶᩣ ᩁᩪᨸᩴ ᨴᩥᩈ᩠ᩅᩣ ᨶᩮᩅ ᩈᩩᨾᨶᩮᩣ ᩉᩮᩣᨲᩥ ᨶ ᨴᩩᨾ᩠ᨾᨶᩮᩣ, ᩏᨸᩮᨠ᩠ᨡᨠᩮᩣ ᩅᩥᩉᩁᨲᩥ ᩈᨲᩮᩣ ᩈᨾ᩠ᨸᨩᩣᨶᩮᩣ. ᩈᩮᩣᨲᩮᨶ ᩈᨴ᩠ᨴᩴ ᩈᩩᨲ᩠ᩅᩣ…ᨸᩮ… ᨥᩣᨶᩮᨶ ᨣᨶ᩠ᨵᩴ ᨥᩣᨿᩥᨲ᩠ᩅᩣ… ᨩᩥᩅ᩠ᩉᩣᨿ ᩁᩈᩴ ᩈᩣᨿᩥᨲ᩠ᩅᩣ… ᨠᩣᨿᩮᨶ ᨹᩮᩣᨭ᩠ᨮᨻ᩠ᨻᩴ ᨹᩩᩈᩥᨲ᩠ᩅᩣ… ᨾᨶᩈᩣ ᨵᨾ᩠ᨾᩴ ᩅᩥᨬ᩠ᨬᩣᨿ ᨶᩮᩅ ᩈᩩᨾᨶᩮᩣ ᩉᩮᩣᨲᩥ ᨶ ᨴᩩᨾ᩠ᨾᨶᩮᩣ, ᩏᨸᩮᨠ᩠ᨡᨠᩮᩣ ᩅᩥᩉᩁᨲᩥ ᩈᨲᩮᩣ ᩈᨾ᩠ᨸᨩᩣᨶᩮᩣ. ᩍᨾᩮ ᨨ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ.

(ᨫ) ‘‘ᨠᨲᨾᩮ ᨨ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ? ᨨ ᩋᨶᩩᨲ᩠ᨲᩁᩥᨿᩣᨶᩥ – ᨴᩔᨶᩣᨶᩩᨲ᩠ᨲᩁᩥᨿᩴ, ᩈᩅᨶᩣᨶᩩᨲ᩠ᨲᩁᩥᨿᩴ, ᩃᩣᨽᩣᨶᩩᨲ᩠ᨲᩁᩥᨿᩴ, ᩈᩥᨠ᩠ᨡᩣᨶᩩᨲ᩠ᨲᩁᩥᨿᩴ, ᨸᩣᩁᩥᨧᩁᩥᨿᩣᨶᩩᨲ᩠ᨲᩁᩥᨿᩴ, ᩋᨶᩩᩔᨲᩣᨶᩩᨲ᩠ᨲᩁᩥᨿᩴ. ᩍᨾᩮ ᨨ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ.

(ᨬ) ‘‘ᨠᨲᨾᩮ ᨨ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ? ᨨ ᩋᨽᩥᨬ᩠ᨬᩣ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩋᨶᩮᨠᩅᩥᩉᩥᨲᩴ ᩍᨴ᩠ᨵᩥᩅᩥᨵᩴ ᨸᨧ᩠ᨧᨶᩩᨽᩮᩣᨲᩥ – ᩑᨠᩮᩣᨸᩥ ᩉᩩᨲ᩠ᩅᩣ ᨻᩉᩩᨵᩣ ᩉᩮᩣᨲᩥ, ᨻᩉᩩᨵᩣᨸᩥ ᩉᩩᨲ᩠ᩅᩣ ᩑᨠᩮᩣ ᩉᩮᩣᨲᩥ. ᩌᩅᩥᨽᩣᩅᩴ ᨲᩥᩁᩮᩣᨽᩣᩅᩴ. ᨲᩥᩁᩮᩣᨠᩩᨭ᩠ᨭᩴ ᨲᩥᩁᩮᩣᨸᩣᨠᩣᩁᩴ ᨲᩥᩁᩮᩣᨸᨻ᩠ᨻᨲᩴ ᩋᩈᨩ᩠ᨩᨾᩣᨶᩮᩣ ᨣᨧ᩠ᨨᨲᩥ ᩈᩮᨿ᩠ᨿᨳᩣᨸᩥ ᩌᨠᩣᩈᩮ. ᨸᨳᩅᩥᨿᩣᨸᩥ ᩏᨾ᩠ᨾᩩᨩ᩠ᨩᨶᩥᨾᩩᨩ᩠ᨩᩴ ᨠᩁᩮᩣᨲᩥ ᩈᩮᨿ᩠ᨿᨳᩣᨸᩥ ᩏᨴᨠᩮ. ᩏᨴᨠᩮᨸᩥ ᩋᨽᩥᨩ᩠ᨩᨾᩣᨶᩮ ᨣᨧ᩠ᨨᨲᩥ ᩈᩮᨿ᩠ᨿᨳᩣᨸᩥ ᨸᨳᩅᩥᨿᩴ. ᩌᨠᩣᩈᩮᨸᩥ ᨸᩃ᩠ᩃᨦ᩠ᨠᩮᨶ ᨠᨾᨲᩥ ᩈᩮᨿ᩠ᨿᨳᩣᨸᩥ ᨸᨠ᩠ᨡᩦ ᩈᨠᩩᨱᩮᩣ. ᩍᨾᩮᨸᩥ ᨧᨶ᩠ᨴᩥᨾᩈᩪᩁᩥᨿᩮ ᩑᩅᩴᨾᩉᩥᨴ᩠ᨵᩥᨠᩮ ᩑᩅᩴᨾᩉᩣᨶᩩᨽᩣᩅᩮ ᨸᩣᨱᩥᨶᩣ ᨸᩁᩣᨾᩈᨲᩥ ᨸᩁᩥᨾᨩ᩠ᨩᨲᩥ. ᨿᩣᩅ ᨻᩕᩉ᩠ᨾᩃᩮᩣᨠᩣᨸᩥ ᨠᩣᨿᩮᨶ ᩅᩈᩴ ᩅᨲ᩠ᨲᩮᨲᩥ.

‘‘ᨴᩥᨻ᩠ᨻᩣᨿ ᩈᩮᩣᨲᨵᩣᨲᩩᨿᩣ ᩅᩥᩈᩩᨴ᩠ᨵᩣᨿ ᩋᨲᩥᨠ᩠ᨠᨶ᩠ᨲᨾᩣᨶᩩᩈᩥᨠᩣᨿ ᩏᨽᩮᩣ ᩈᨴ᩠ᨴᩮ ᩈᩩᨱᩣᨲᩥ ᨴᩥᨻ᩠ᨻᩮ ᨧ ᨾᩣᨶᩩᩈᩮ ᨧ, ᨿᩮ ᨴᩪᩁᩮ ᩈᨶ᩠ᨲᩥᨠᩮ ᨧ.

‘‘ᨸᩁᩈᨲ᩠ᨲᩣᨶᩴ ᨸᩁᨸᩩᨣ᩠ᨣᩃᩣᨶᩴ ᨧᩮᨲᩈᩣ ᨧᩮᨲᩮᩣ ᨸᩁᩥᨧ᩠ᨧ ᨸᨩᩣᨶᩣᨲᩥ [ᨩᩣᨶᩣᨲᩥ (ᩈ᩠ᨿᩣ. ᨠᩴ.)], ᩈᩁᩣᨣᩴ ᩅᩣ ᨧᩥᨲ᩠ᨲᩴ ᩈᩁᩣᨣᩴ ᨧᩥᨲ᩠ᨲᨶ᩠ᨲᩥ ᨸᨩᩣᨶᩣᨲᩥ …ᨸᩮ… ᩋᩅᩥᨾᩩᨲ᩠ᨲᩴ ᩅᩣ ᨧᩥᨲ᩠ᨲᩴ ᩋᩅᩥᨾᩩᨲ᩠ᨲᩴ ᨧᩥᨲ᩠ᨲᨶ᩠ᨲᩥ ᨸᨩᩣᨶᩣᨲᩥ.

‘‘ᩈᩮᩣ ᩋᨶᩮᨠᩅᩥᩉᩥᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ, ᩈᩮᨿ᩠ᨿᨳᩥᨴᩴ ᩑᨠᨾ᩠ᨸᩥ ᨩᩣᨲᩥᩴ…ᨸᩮ… ᩍᨲᩥ ᩈᩣᨠᩣᩁᩴ ᩈᩏᨴ᩠ᨴᩮᩈᩴ ᩋᨶᩮᨠᩅᩥᩉᩥᨲᩴ ᨸᩩᨻ᩠ᨻᩮᨶᩥᩅᩣᩈᩴ ᩋᨶᩩᩔᩁᨲᩥ.

‘‘ᨴᩥᨻ᩠ᨻᩮᨶ ᨧᨠ᩠ᨡᩩᨶᩣ ᩅᩥᩈᩩᨴ᩠ᨵᩮᨶ ᩋᨲᩥᨠ᩠ᨠᨶ᩠ᨲᨾᩣᨶᩩᩈᨠᩮᨶ ᩈᨲ᩠ᨲᩮ ᨸᩔᨲᩥ ᨧᩅᨾᩣᨶᩮ ᩏᨸᨸᨩ᩠ᨩᨾᩣᨶᩮ ᩉᩦᨶᩮ ᨸᨱᩦᨲᩮ ᩈᩩᩅᨱ᩠ᨱᩮ ᨴᩩᨻ᩠ᨻᨱ᩠ᨱᩮ ᩈᩩᨣᨲᩮ ᨴᩩᨣ᩠ᨣᨲᩮ ᨿᨳᩣᨠᨾ᩠ᨾᩪᨸᨣᩮ ᩈᨲ᩠ᨲᩮ ᨸᨩᩣᨶᩣᨲᩥ …ᨸᩮ…

‘‘ᩌᩈᩅᩣᨶᩴ ᨡᨿᩣ ᩋᨶᩣᩈᩅᩴ ᨧᩮᨲᩮᩣᩅᩥᨾᩩᨲ᩠ᨲᩥᩴ ᨸᨬ᩠ᨬᩣᩅᩥᨾᩩᨲ᩠ᨲᩥᩴ ᨴᩥᨭ᩠ᨮᩮᩅ ᨵᨾ᩠ᨾᩮ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩍᨾᩮ ᨨ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

‘‘ᩍᨲᩥ ᩍᨾᩮ ᩈᨭ᩠ᨮᩥ ᨵᨾ᩠ᨾᩣ ᨽᩪᨲᩣ ᨲᨧ᩠ᨨᩣ ᨲᨳᩣ ᩋᩅᩥᨲᨳᩣ ᩋᨶᨬ᩠ᨬᨳᩣ ᩈᨾ᩠ᨾᩣ ᨲᨳᩣᨣᨲᩮᨶ ᩋᨽᩥᩈᨾ᩠ᨻᩩᨴ᩠ᨵᩣ.

ᩈᨲ᩠ᨲ ᨵᨾ᩠ᨾᩣ

᪓᪕᪗. ‘‘ᩈᨲ᩠ᨲ ᨵᨾ᩠ᨾᩣ ᨻᩉᩩᨠᩣᩁᩣ…ᨸᩮ… ᩈᨲ᩠ᨲ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

(ᨠ) ‘‘ᨠᨲᨾᩮ ᩈᨲ᩠ᨲ ᨵᨾ᩠ᨾᩣ ᨻᩉᩩᨠᩣᩁᩣ? ᩈᨲ᩠ᨲ ᩋᩁᩥᨿᨵᨶᩣᨶᩥ – ᩈᨴ᩠ᨵᩣᨵᨶᩴ, ᩈᩦᩃᨵᨶᩴ, ᩉᩥᩁᩥᨵᨶᩴ, ᩒᨲ᩠ᨲᨸ᩠ᨸᨵᨶᩴ, ᩈᩩᨲᨵᨶᩴ, ᨧᩣᨣᨵᨶᩴ, ᨸᨬ᩠ᨬᩣᨵᨶᩴ. ᩍᨾᩮ ᩈᨲ᩠ᨲ ᨵᨾ᩠ᨾᩣ ᨻᩉᩩᨠᩣᩁᩣ.

(ᨡ) ‘‘ᨠᨲᨾᩮ ᩈᨲ᩠ᨲ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ? ᩈᨲ᩠ᨲ ᩈᨾ᩠ᨻᩮᩣᨩ᩠ᨫᨦ᩠ᨣᩣ – ᩈᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ, ᨵᨾ᩠ᨾᩅᩥᨧᨿᩈᨾ᩠ᨻᩮᩣᨩ᩠ᨫᨦ᩠ᨣᩮᩣ, ᩅᩦᩁᩥᨿᩈᨾ᩠ᨻᩮᩣᨩ᩠ᨫᨦ᩠ᨣᩮᩣ, ᨸᩦᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ, ᨸᩔᨴ᩠ᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ, ᩈᨾᩣᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩮᩣ, ᩏᨸᩮᨠ᩠ᨡᩣᩈᨾ᩠ᨻᩮᩣᨩ᩠ᨫᨦ᩠ᨣᩮᩣ. ᩍᨾᩮ ᩈᨲ᩠ᨲ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ.

(ᨣ) ‘‘ᨠᨲᨾᩮ ᩈᨲ᩠ᨲ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ? ᩈᨲ᩠ᨲ ᩅᩥᨬ᩠ᨬᩣᨱᨭ᩠ᨮᩥᨲᩥᨿᩮᩣ – ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᨶᩣᨶᨲ᩠ᨲᨠᩣᨿᩣ ᨶᩣᨶᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨾᨶᩩᩔᩣ ᩑᨠᨧ᩠ᨧᩮ ᨧ ᨴᩮᩅᩣ ᩑᨠᨧ᩠ᨧᩮ ᨧ ᩅᩥᨶᩥᨸᩣᨲᩥᨠᩣ. ᩋᨿᩴ ᨸᨮᨾᩣ ᩅᩥᨬ᩠ᨬᩣᨱᨭ᩠ᨮᩥᨲᩥ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᨶᩣᨶᨲ᩠ᨲᨠᩣᨿᩣ ᩑᨠᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨴᩮᩅᩣ ᨻᩕᩉ᩠ᨾᨠᩣᨿᩥᨠᩣ ᨸᨮᨾᩣᨽᩥᨶᩥᨻ᩠ᨻᨲ᩠ᨲᩣ. ᩋᨿᩴ ᨴᩩᨲᩥᨿᩣ ᩅᩥᨬ᩠ᨬᩣᨱᨭ᩠ᨮᩥᨲᩥ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩑᨠᨲ᩠ᨲᨠᩣᨿᩣ ᨶᩣᨶᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨴᩮᩅᩣ ᩌᨽᩔᩁᩣ. ᩋᨿᩴ ᨲᨲᩥᨿᩣ ᩅᩥᨬ᩠ᨬᩣᨱᨭ᩠ᨮᩥᨲᩥ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩑᨠᨲ᩠ᨲᨠᩣᨿᩣ ᩑᨠᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨴᩮᩅᩣ ᩈᩩᨽᨠᩥᨱ᩠ᩉᩣ. ᩋᨿᩴ ᨧᨲᩩᨲ᩠ᨳᩦ ᩅᩥᨬ᩠ᨬᩣᨱᨭ᩠ᨮᩥᨲᩥ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩈᨻ᩠ᨻᩈᩮᩣ ᩁᩪᨸᩈᨬ᩠ᨬᩣᨶᩴ ᩈᨾᨲᩥᨠ᩠ᨠᨾᩣ…ᨸᩮ… ‘ᩋᨶᨶ᩠ᨲᩮᩣ ᩌᨠᩣᩈᩮᩣ’ᨲᩥ ᩌᨠᩣᩈᩣᨶᨬ᩠ᨧᩣᨿᨲᨶᩪᨸᨣᩣ. ᩋᨿᩴ ᨸᨬ᩠ᨧᨾᩦ ᩅᩥᨬ᩠ᨬᩣᨱᨭ᩠ᨮᩥᨲᩥ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩈᨻ᩠ᨻᩈᩮᩣ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᩋᨶᨶ᩠ᨲᩴ ᩅᩥᨬ᩠ᨬᩣᨱ’ᨶ᩠ᨲᩥ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩪᨸᨣᩣ. ᩋᨿᩴ ᨨᨭ᩠ᨮᩦ ᩅᩥᨬ᩠ᨬᩣᨱᨭ᩠ᨮᩥᨲᩥ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩈᨻ᩠ᨻᩈᩮᩣ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᨶᨲ᩠ᨳᩥ ᨠᩥᨬ᩠ᨧᩦ’ᨲᩥ ᩌᨠᩥᨬ᩠ᨧᨬ᩠ᨬᩣᨿᨲᨶᩪᨸᨣᩣ. ᩋᨿᩴ ᩈᨲ᩠ᨲᨾᩦ ᩅᩥᨬ᩠ᨬᩣᨱᨭ᩠ᨮᩥᨲᩥ. ᩍᨾᩮ ᩈᨲ᩠ᨲ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ.

(ᨥ) ‘‘ᨠᨲᨾᩮ ᩈᨲ᩠ᨲ ᨵᨾ᩠ᨾᩣ ᨸᩉᩣᨲᨻ᩠ᨻᩣ? ᩈᨲ᩠ᨲᩣᨶᩩᩈᨿᩣ – ᨠᩣᨾᩁᩣᨣᩣᨶᩩᩈᨿᩮᩣ, ᨸᨭᩥᨥᩣᨶᩩᩈᨿᩮᩣ, ᨴᩥᨭ᩠ᨮᩣᨶᩩᩈᨿᩮᩣ, ᩅᩥᨧᩥᨠᩥᨧ᩠ᨨᩣᨶᩩᩈᨿᩮᩣ, ᨾᩣᨶᩣᨶᩩᩈᨿᩮᩣ, ᨽᩅᩁᩣᨣᩣᨶᩩᩈᨿᩮᩣ, ᩋᩅᩥᨩ᩠ᨩᩣᨶᩩᩈᨿᩮᩣ. ᩍᨾᩮ ᩈᨲ᩠ᨲ ᨵᨾ᩠ᨾᩣ ᨸᩉᩣᨲᨻ᩠ᨻᩣ.

(ᨦ) ‘‘ᨠᨲᨾᩮ ᩈᨲ᩠ᨲ ᨵᨾ᩠ᨾᩣ ᩉᩣᨶᨽᩣᨣᩥᨿᩣ? ᩈᨲ᩠ᨲ ᩋᩈᨴ᩠ᨵᨾ᩠ᨾᩣ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩋᩔᨴ᩠ᨵᩮᩣ ᩉᩮᩣᨲᩥ, ᩋᩉᩥᩁᩥᨠᩮᩣ ᩉᩮᩣᨲᩥ, ᩋᨶᩮᩣᨲ᩠ᨲᨸ᩠ᨸᩦ ᩉᩮᩣᨲᩥ, ᩋᨸ᩠ᨸᩔᩩᨲᩮᩣ ᩉᩮᩣᨲᩥ, ᨠᩩᩈᩦᨲᩮᩣ ᩉᩮᩣᨲᩥ, ᨾᩩᨭ᩠ᨮᩔᨲᩥ ᩉᩮᩣᨲᩥ, ᨴᩩᨸ᩠ᨸᨬ᩠ᨬᩮᩣ ᩉᩮᩣᨲᩥ. ᩍᨾᩮ ᩈᨲ᩠ᨲ ᨵᨾ᩠ᨾᩣ ᩉᩣᨶᨽᩣᨣᩥᨿᩣ.

(ᨧ) ‘‘ᨠᨲᨾᩮ ᩈᨲ᩠ᨲ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ? ᩈᨲ᩠ᨲ ᩈᨴ᩠ᨵᨾ᩠ᨾᩣ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨴ᩠ᨵᩮᩣ ᩉᩮᩣᨲᩥ, ᩉᩥᩁᩥᨾᩣ [ᩉᩥᩁᩥᨠᩮᩣ (ᩈ᩠ᨿᩣ. ᨠᩴ.)] ᩉᩮᩣᨲᩥ, ᩒᨲ᩠ᨲᨸ᩠ᨸᩦ ᩉᩮᩣᨲᩥ, ᨻᩉᩩᩔᩩᨲᩮᩣ ᩉᩮᩣᨲᩥ, ᩌᩁᨴ᩠ᨵᩅᩦᩁᩥᨿᩮᩣ ᩉᩮᩣᨲᩥ, ᩏᨸᨭ᩠ᨮᩥᨲᩔᨲᩥ ᩉᩮᩣᨲᩥ, ᨸᨬ᩠ᨬᩅᩣ ᩉᩮᩣᨲᩥ. ᩍᨾᩮ ᩈᨲ᩠ᨲ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ.

(ᨨ) ‘‘ᨠᨲᨾᩮ ᩈᨲ᩠ᨲ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ? ᩈᨲ᩠ᨲ ᩈᨸ᩠ᨸᩩᩁᩥᩈᨵᨾ᩠ᨾᩣ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨵᨾ᩠ᨾᨬ᩠ᨬᩪ ᨧ ᩉᩮᩣᨲᩥ ᩋᨲ᩠ᨳᨬ᩠ᨬᩪ ᨧ ᩋᨲ᩠ᨲᨬ᩠ᨬᩪ ᨧ ᨾᨲ᩠ᨲᨬ᩠ᨬᩪ ᨧ ᨠᩣᩃᨬ᩠ᨬᩪ ᨧ ᨸᩁᩥᩈᨬ᩠ᨬᩪ ᨧ ᨸᩩᨣ᩠ᨣᩃᨬ᩠ᨬᩪ ᨧ. ᩍᨾᩮ ᩈᨲ᩠ᨲ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ.

(ᨩ) ‘‘ᨠᨲᨾᩮ ᩈᨲ᩠ᨲ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ? ᩈᨲ᩠ᨲ ᩈᨬ᩠ᨬᩣ – ᩋᨶᩥᨧ᩠ᨧᩈᨬ᩠ᨬᩣ, ᩋᨶᨲ᩠ᨲᩈᨬ᩠ᨬᩣ, ᩋᩈᩩᨽᩈᨬ᩠ᨬᩣ, ᩌᨴᩦᨶᩅᩈᨬ᩠ᨬᩣ, ᨸᩉᩣᨶᩈᨬ᩠ᨬᩣ, ᩅᩥᩁᩣᨣᩈᨬ᩠ᨬᩣ, ᨶᩥᩁᩮᩣᨵᩈᨬ᩠ᨬᩣ. ᩍᨾᩮ ᩈᨲ᩠ᨲ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ.

(ᨫ) ‘‘ᨠᨲᨾᩮ ᩈᨲ᩠ᨲ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ? ᩈᨲ᩠ᨲ ᨶᩥᨴ᩠ᨴᩈᩅᨲ᩠ᨳᩪᨶᩥ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᩥᨠ᩠ᨡᩣᩈᨾᩣᨴᩣᨶᩮ ᨲᩥᨻ᩠ᨻᨧ᩠ᨨᨶ᩠ᨴᩮᩣ ᩉᩮᩣᨲᩥ, ᩌᨿᨲᩥᨬ᩠ᨧ ᩈᩥᨠ᩠ᨡᩣᩈᨾᩣᨴᩣᨶᩮ ᩋᩅᩥᨣᨲᨸᩮᨾᩮᩣ. ᨵᨾ᩠ᨾᨶᩥᩈᨶ᩠ᨲᩥᨿᩣ ᨲᩥᨻ᩠ᨻᨧ᩠ᨨᨶ᩠ᨴᩮᩣ ᩉᩮᩣᨲᩥ, ᩌᨿᨲᩥᨬ᩠ᨧ ᨵᨾ᩠ᨾᨶᩥᩈᨶ᩠ᨲᩥᨿᩣ ᩋᩅᩥᨣᨲᨸᩮᨾᩮᩣ. ᩍᨧ᩠ᨨᩣᩅᩥᨶᨿᩮ ᨲᩥᨻ᩠ᨻᨧ᩠ᨨᨶ᩠ᨴᩮᩣ ᩉᩮᩣᨲᩥ, ᩌᨿᨲᩥᨬ᩠ᨧ ᩍᨧ᩠ᨨᩣᩅᩥᨶᨿᩮ ᩋᩅᩥᨣᨲᨸᩮᨾᩮᩣ. ᨸᨭᩥᩈᩃ᩠ᩃᩣᨶᩮ ᨲᩥᨻ᩠ᨻᨧ᩠ᨨᨶ᩠ᨴᩮᩣ ᩉᩮᩣᨲᩥ, ᩌᨿᨲᩥᨬ᩠ᨧ ᨸᨭᩥᩈᩃ᩠ᩃᩣᨶᩮ ᩋᩅᩥᨣᨲᨸᩮᨾᩮᩣ. ᩅᩦᩁᩥᨿᩣᩁᨾ᩠ᨾᩮ ᨲᩥᨻ᩠ᨻᨧ᩠ᨨᨶ᩠ᨴᩮᩣ ᩉᩮᩣᨲᩥ, ᩌᨿᨲᩥᨬ᩠ᨧ ᩅᩦᩁᩥᨿᩣᩁᨾ᩠ᨾᩮ ᩋᩅᩥᨣᨲᨸᩮᨾᩮᩣ. ᩈᨲᩥᨶᩮᨸᨠ᩠ᨠᩮ ᨲᩥᨻ᩠ᨻᨧ᩠ᨨᨶ᩠ᨴᩮᩣ ᩉᩮᩣᨲᩥ, ᩌᨿᨲᩥᨬ᩠ᨧ ᩈᨲᩥᨶᩮᨸᨠ᩠ᨠᩮ ᩋᩅᩥᨣᨲᨸᩮᨾᩮᩣ. ᨴᩥᨭ᩠ᨮᩥᨸᨭᩥᩅᩮᨵᩮ ᨲᩥᨻ᩠ᨻᨧ᩠ᨨᨶ᩠ᨴᩮᩣ ᩉᩮᩣᨲᩥ, ᩌᨿᨲᩥᨬ᩠ᨧ ᨴᩥᨭ᩠ᨮᩥᨸᨭᩥᩅᩮᨵᩮ ᩋᩅᩥᨣᨲᨸᩮᨾᩮᩣ. ᩍᨾᩮ ᩈᨲ᩠ᨲ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ.

(ᨬ) ‘‘ᨠᨲᨾᩮ ᩈᨲ᩠ᨲ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ? ᩈᨲ᩠ᨲ ᨡᩦᨱᩣᩈᩅᨻᩃᩣᨶᩥ – ᩍᨵᩣᩅᩩᩈᩮᩣ, ᨡᩦᨱᩣᩈᩅᩔ ᨽᩥᨠ᩠ᨡᩩᨶᩮᩣ ᩋᨶᩥᨧ᩠ᨧᨲᩮᩣ ᩈᨻ᩠ᨻᩮ ᩈᨦ᩠ᨡᩣᩁᩣ ᨿᨳᩣᨽᩪᨲᩴ ᩈᨾ᩠ᨾᨸ᩠ᨸᨬ᩠ᨬᩣᨿ ᩈᩩᨴᩥᨭ᩠ᨮᩣ ᩉᩮᩣᨶ᩠ᨲᩥ. ᨿᩴᨸᩣᩅᩩᩈᩮᩣ, ᨡᩦᨱᩣᩈᩅᩔ ᨽᩥᨠ᩠ᨡᩩᨶᩮᩣ ᩋᨶᩥᨧ᩠ᨧᨲᩮᩣ ᩈᨻ᩠ᨻᩮ ᩈᨦ᩠ᨡᩣᩁᩣ ᨿᨳᩣᨽᩪᨲᩴ ᩈᨾ᩠ᨾᨸ᩠ᨸᨬ᩠ᨬᩣᨿ ᩈᩩᨴᩥᨭ᩠ᨮᩣ ᩉᩮᩣᨶ᩠ᨲᩥ, ᩍᨴᨾ᩠ᨸᩥ ᨡᩦᨱᩣᩈᩅᩔ ᨽᩥᨠ᩠ᨡᩩᨶᩮᩣ ᨻᩃᩴ ᩉᩮᩣᨲᩥ, ᨿᩴ ᨻᩃᩴ ᩌᨣᨾ᩠ᨾ ᨡᩦᨱᩣᩈᩅᩮᩣ ᨽᩥᨠ᩠ᨡᩩ ᩌᩈᩅᩣᨶᩴ ᨡᨿᩴ ᨸᨭᩥᨩᩣᨶᩣᨲᩥ – ‘ᨡᩦᨱᩣ ᨾᩮ ᩌᩈᩅᩣ’ᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨡᩦᨱᩣᩈᩅᩔ ᨽᩥᨠ᩠ᨡᩩᨶᩮᩣ ᩋᨦ᩠ᨣᩣᩁᨠᩣᩈᩪᨸᨾᩣ ᨠᩣᨾᩣ ᨿᨳᩣᨽᩪᨲᩴ ᩈᨾ᩠ᨾᨸ᩠ᨸᨬ᩠ᨬᩣᨿ ᩈᩩᨴᩥᨭ᩠ᨮᩣ ᩉᩮᩣᨶ᩠ᨲᩥ. ᨿᩴᨸᩣᩅᩩᩈᩮᩣ…ᨸᩮ… ‘ᨡᩦᨱᩣ ᨾᩮ ᩌᩈᩅᩣ’ᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨡᩦᨱᩣᩈᩅᩔ ᨽᩥᨠ᩠ᨡᩩᨶᩮᩣ ᩅᩥᩅᩮᨠᨶᩥᨶ᩠ᨶᩴ ᨧᩥᨲ᩠ᨲᩴ ᩉᩮᩣᨲᩥ ᩅᩥᩅᩮᨠᨸᩮᩣᨱᩴ ᩅᩥᩅᩮᨠᨸᨻ᩠ᨽᩣᩁᩴ ᩅᩥᩅᩮᨠᨭ᩠ᨮᩴ ᨶᩮᨠ᩠ᨡᨾ᩠ᨾᩣᨽᩥᩁᨲᩴ ᨻ᩠ᨿᨶ᩠ᨲᩦᨽᩪᨲᩴ ᩈᨻ᩠ᨻᩈᩮᩣ ᩌᩈᩅᨭ᩠ᨮᩣᨶᩥᨿᩮᩉᩥ ᨵᨾ᩠ᨾᩮᩉᩥ. ᨿᩴᨸᩣᩅᩩᩈᩮᩣ…ᨸᩮ… ‘ᨡᩦᨱᩣ ᨾᩮ ᩌᩈᩅᩣ’ᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨡᩦᨱᩣᩈᩅᩔ ᨽᩥᨠ᩠ᨡᩩᨶᩮᩣ ᨧᨲ᩠ᨲᩣᩁᩮᩣ ᩈᨲᩥᨸᨭ᩠ᨮᩣᨶᩣ ᨽᩣᩅᩥᨲᩣ ᩉᩮᩣᨶ᩠ᨲᩥ ᩈᩩᨽᩣᩅᩥᨲᩣ. ᨿᩴᨸᩣᩅᩩᩈᩮᩣ…ᨸᩮ… ‘ᨡᩦᨱᩣ ᨾᩮ ᩌᩈᩅᩣ’ᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨡᩦᨱᩣᩈᩅᩔ ᨽᩥᨠ᩠ᨡᩩᨶᩮᩣ ᨸᨬ᩠ᨧᩥᨶ᩠ᨴᩕᩥᨿᩣᨶᩥ ᨽᩣᩅᩥᨲᩣᨶᩥ ᩉᩮᩣᨶ᩠ᨲᩥ ᩈᩩᨽᩣᩅᩥᨲᩣᨶᩥ. ᨿᩴᨸᩣᩅᩩᩈᩮᩣ…ᨸᩮ… ‘ᨡᩦᨱᩣ ᨾᩮ ᩌᩈᩅᩣ’ᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨡᩦᨱᩣᩈᩅᩔ ᨽᩥᨠ᩠ᨡᩩᨶᩮᩣ ᩈᨲ᩠ᨲ ᨻᩮᩣᨩ᩠ᨫᨦ᩠ᨣᩣ ᨽᩣᩅᩥᨲᩣ ᩉᩮᩣᨶ᩠ᨲᩥ ᩈᩩᨽᩣᩅᩥᨲᩣ. ᨿᩴᨸᩣᩅᩩᩈᩮᩣ…ᨸᩮ… ‘ᨡᩦᨱᩣ ᨾᩮ ᩌᩈᩅᩣ’ᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨡᩦᨱᩣᩈᩅᩔ ᨽᩥᨠ᩠ᨡᩩᨶᩮᩣ ᩋᩁᩥᨿᩮᩣ ᩋᨭ᩠ᨮᨦ᩠ᨣᩥᨠᩮᩣ ᨾᨣ᩠ᨣᩮᩣ ᨽᩣᩅᩥᨲᩮᩣ ᩉᩮᩣᨲᩥ ᩈᩩᨽᩣᩅᩥᨲᩮᩣ. ᨿᩴᨸᩣᩅᩩᩈᩮᩣ, ᨡᩦᨱᩣᩈᩅᩔ ᨽᩥᨠ᩠ᨡᩩᨶᩮᩣ ᩋᩁᩥᨿᩮᩣ ᩋᨭ᩠ᨮᨦ᩠ᨣᩥᨠᩮᩣ ᨾᨣ᩠ᨣᩮᩣ ᨽᩣᩅᩥᨲᩮᩣ ᩉᩮᩣᨲᩥ ᩈᩩᨽᩣᩅᩥᨲᩮᩣ, ᩍᨴᨾ᩠ᨸᩥ ᨡᩦᨱᩣᩈᩅᩔ ᨽᩥᨠ᩠ᨡᩩᨶᩮᩣ ᨻᩃᩴ ᩉᩮᩣᨲᩥ, ᨿᩴ ᨻᩃᩴ ᩌᨣᨾ᩠ᨾ ᨡᩦᨱᩣᩈᩅᩮᩣ ᨽᩥᨠ᩠ᨡᩩ ᩌᩈᩅᩣᨶᩴ ᨡᨿᩴ ᨸᨭᩥᨩᩣᨶᩣᨲᩥ – ‘ᨡᩦᨱᩣ ᨾᩮ ᩌᩈᩅᩣ’ᨲᩥ. ᩍᨾᩮ ᩈᨲ᩠ᨲ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

‘‘ᩍᨲᩥᨾᩮ ᩈᨲ᩠ᨲᨲᩥ ᨵᨾ᩠ᨾᩣ ᨽᩪᨲᩣ ᨲᨧ᩠ᨨᩣ ᨲᨳᩣ ᩋᩅᩥᨲᨳᩣ ᩋᨶᨬ᩠ᨬᨳᩣ ᩈᨾ᩠ᨾᩣ ᨲᨳᩣᨣᨲᩮᨶ ᩋᨽᩥᩈᨾ᩠ᨻᩩᨴ᩠ᨵᩣ.

ᨸᨮᨾᨽᩣᨱᩅᩣᩁᩮᩣ ᨶᩥᨭ᩠ᨮᩥᨲᩮᩣ.

ᩋᨭ᩠ᨮ ᨵᨾ᩠ᨾᩣ

᪓᪕᪘. ‘‘ᩋᨭ᩠ᨮ ᨵᨾ᩠ᨾᩣ ᨻᩉᩩᨠᩣᩁᩣ…ᨸᩮ… ᩋᨭ᩠ᨮ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

(ᨠ) ‘‘ᨠᨲᨾᩮ ᩋᨭ᩠ᨮ ᨵᨾ᩠ᨾᩣ ᨻᩉᩩᨠᩣᩁᩣ? ᩋᨭ᩠ᨮ ᩉᩮᨲᩪ ᩋᨭ᩠ᨮ ᨸᨧ᩠ᨧᨿᩣ ᩌᨴᩥᨻᩕᩉ᩠ᨾᨧᩁᩥᨿᩥᨠᩣᨿ ᨸᨬ᩠ᨬᩣᨿ ᩋᨸ᩠ᨸᨭᩥᩃᨴ᩠ᨵᩣᨿ ᨸᨭᩥᩃᩣᨽᩣᨿ ᨸᨭᩥᩃᨴ᩠ᨵᩣᨿ ᨽᩥᨿ᩠ᨿᩮᩣᨽᩣᩅᩣᨿ ᩅᩮᨸᩩᩃ᩠ᩃᩣᨿ ᨽᩣᩅᨶᩣᨿ ᨸᩣᩁᩥᨸᩪᩁᩥᨿᩣ ᩈᩴᩅᨲ᩠ᨲᨶ᩠ᨲᩥ. ᨠᨲᨾᩮ ᩋᨭ᩠ᨮ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨲ᩠ᨳᩣᩁᩴ [ᩈᨲ᩠ᨳᩣᩁᩴ ᩅᩣ (ᩈ᩠ᨿᩣ. ᨠ.)] ᩏᨸᨶᩥᩔᩣᨿ ᩅᩥᩉᩁᨲᩥ ᩋᨬ᩠ᨬᨲᩁᩴ ᩅᩣ ᨣᩁᩩᨭ᩠ᨮᩣᨶᩥᨿᩴ ᩈᨻᩕᩉ᩠ᨾᨧᩣᩁᩥᩴ, ᨿᨲ᩠ᨳᩔ ᨲᩥᨻ᩠ᨻᩴ ᩉᩥᩁᩮᩣᨲ᩠ᨲᨸ᩠ᨸᩴ ᨸᨧ᩠ᨧᩩᨸᨭ᩠ᨮᩥᨲᩴ ᩉᩮᩣᨲᩥ ᨸᩮᨾᨬ᩠ᨧ ᨣᩣᩁᩅᩮᩣ ᨧ. ᩋᨿᩴ ᨸᨮᨾᩮᩣ ᩉᩮᨲᩩ ᨸᨮᨾᩮᩣ ᨸᨧ᩠ᨧᨿᩮᩣ ᩌᨴᩥᨻᩕᩉ᩠ᨾᨧᩁᩥᨿᩥᨠᩣᨿ ᨸᨬ᩠ᨬᩣᨿ ᩋᨸ᩠ᨸᨭᩥᩃᨴ᩠ᨵᩣᨿ ᨸᨭᩥᩃᩣᨽᩣᨿ. ᨸᨭᩥᩃᨴ᩠ᨵᩣᨿ ᨽᩥᨿ᩠ᨿᩮᩣᨽᩣᩅᩣᨿ ᩅᩮᨸᩩᩃ᩠ᩃᩣᨿ ᨽᩣᩅᨶᩣᨿ ᨸᩣᩁᩥᨸᩪᩁᩥᨿᩣ ᩈᩴᩅᨲ᩠ᨲᨲᩥ.

‘‘ᨲᩴ ᨡᩮᩣ ᨸᨶ ᩈᨲ᩠ᨳᩣᩁᩴ ᩏᨸᨶᩥᩔᩣᨿ ᩅᩥᩉᩁᨲᩥ ᩋᨬ᩠ᨬᨲᩁᩴ ᩅᩣ ᨣᩁᩩᨭ᩠ᨮᩣᨶᩥᨿᩴ ᩈᨻᩕᩉ᩠ᨾᨧᩣᩁᩥᩴ, ᨿᨲ᩠ᨳᩔ ᨲᩥᨻ᩠ᨻᩴ ᩉᩥᩁᩮᩣᨲ᩠ᨲᨸ᩠ᨸᩴ ᨸᨧ᩠ᨧᩩᨸᨭ᩠ᨮᩥᨲᩴ ᩉᩮᩣᨲᩥ ᨸᩮᨾᨬ᩠ᨧ ᨣᩣᩁᩅᩮᩣ ᨧ. ᨲᩮ ᨠᩣᩃᩮᨶ ᨠᩣᩃᩴ ᩏᨸᩈᨦ᩠ᨠᨾᩥᨲ᩠ᩅᩣ ᨸᩁᩥᨸᩩᨧ᩠ᨨᨲᩥ ᨸᩁᩥᨸᨬ᩠ᩉᨲᩥ – ‘ᩍᨴᩴ, ᨽᨶ᩠ᨲᩮ, ᨠᨳᩴ? ᩍᨾᩔ ᨠᩮᩣ ᩋᨲ᩠ᨳᩮᩣ’ᨲᩥ? ᨲᩔ ᨲᩮ ᩌᨿᩈ᩠ᨾᨶ᩠ᨲᩮᩣ ᩋᩅᩥᩅᨭᨬ᩠ᨧᩮᩅ ᩅᩥᩅᩁᨶ᩠ᨲᩥ, ᩋᨶᩩᨲ᩠ᨲᩣᨶᩦᨠᨲᨬ᩠ᨧ ᩏᨲ᩠ᨲᩣᨶᩦ [ᩋᨶᩩᨲ᩠ᨲᩣᨶᩥᨠᨲᨬ᩠ᨧ ᩏᨲ᩠ᨲᩣᨶᩥᩴ (ᨠ.)] ᨠᩁᩮᩣᨶ᩠ᨲᩥ, ᩋᨶᩮᨠᩅᩥᩉᩥᨲᩮᩈᩩ ᨧ ᨠᨦ᩠ᨡᩣᨭ᩠ᨮᩣᨶᩥᨿᩮᩈᩩ ᨵᨾ᩠ᨾᩮᩈᩩ ᨠᨦ᩠ᨡᩴ ᨸᨭᩥᩅᩥᨶᩮᩣᨴᩮᨶ᩠ᨲᩥ. ᩋᨿᩴ ᨴᩩᨲᩥᨿᩮᩣ ᩉᩮᨲᩩ ᨴᩩᨲᩥᨿᩮᩣ ᨸᨧ᩠ᨧᨿᩮᩣ ᩌᨴᩥᨻᩕᩉ᩠ᨾᨧᩁᩥᨿᩥᨠᩣᨿ ᨸᨬ᩠ᨬᩣᨿ ᩋᨸ᩠ᨸᨭᩥᩃᨴ᩠ᨵᩣᨿ ᨸᨭᩥᩃᩣᨽᩣᨿ, ᨸᨭᩥᩃᨴ᩠ᨵᩣᨿ ᨽᩥᨿ᩠ᨿᩮᩣᨽᩣᩅᩣᨿ, ᩅᩮᨸᩩᩃ᩠ᩃᩣᨿ ᨽᩣᩅᨶᩣᨿ ᨸᩣᩁᩥᨸᩪᩁᩥᨿᩣ ᩈᩴᩅᨲ᩠ᨲᨲᩥ.

‘‘ᨲᩴ ᨡᩮᩣ ᨸᨶ ᨵᨾ᩠ᨾᩴ ᩈᩩᨲ᩠ᩅᩣ ᨴ᩠ᩅᨿᩮᨶ ᩅᩪᨸᨠᩣᩈᩮᨶ ᩈᨾ᩠ᨸᩣᨴᩮᨲᩥ – ᨠᩣᨿᩅᩪᨸᨠᩣᩈᩮᨶ ᨧ ᨧᩥᨲ᩠ᨲᩅᩪᨸᨠᩣᩈᩮᨶ ᨧ. ᩋᨿᩴ ᨲᨲᩥᨿᩮᩣ ᩉᩮᨲᩩ ᨲᨲᩥᨿᩮᩣ ᨸᨧ᩠ᨧᨿᩮᩣ ᩌᨴᩥᨻᩕᩉ᩠ᨾᨧᩁᩥᨿᩥᨠᩣᨿ ᨸᨬ᩠ᨬᩣᨿ ᩋᨸ᩠ᨸᨭᩥᩃᨴ᩠ᨵᩣᨿ ᨸᨭᩥᩃᩣᨽᩣᨿ, ᨸᨭᩥᩃᨴ᩠ᨵᩣᨿ ᨽᩥᨿ᩠ᨿᩮᩣᨽᩣᩅᩣᨿ ᩅᩮᨸᩩᩃ᩠ᩃᩣᨿ ᨽᩣᩅᨶᩣᨿ ᨸᩣᩁᩥᨸᩪᩁᩥᨿᩣ ᩈᩴᩅᨲ᩠ᨲᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᩦᩃᩅᩣ ᩉᩮᩣᨲᩥ, ᨸᩣᨲᩥᨾᩮᩣᨠ᩠ᨡᩈᩴᩅᩁᩈᩴᩅᩩᨲᩮᩣ ᩅᩥᩉᩁᨲᩥ ᩌᨧᩣᩁᨣᩮᩣᨧᩁᩈᨾ᩠ᨸᨶ᩠ᨶᩮᩣ, ᩋᨱᩩᨾᨲ᩠ᨲᩮᩈᩩ ᩅᨩ᩠ᨩᩮᩈᩩ ᨽᨿᨴᩔᩣᩅᩦ ᩈᨾᩣᨴᩣᨿ ᩈᩥᨠ᩠ᨡᨲᩥ ᩈᩥᨠ᩠ᨡᩣᨸᨴᩮᩈᩩ. ᩋᨿᩴ ᨧᨲᩩᨲ᩠ᨳᩮᩣ ᩉᩮᨲᩩ ᨧᨲᩩᨲ᩠ᨳᩮᩣ ᨸᨧ᩠ᨧᨿᩮᩣ ᩌᨴᩥᨻᩕᩉ᩠ᨾᨧᩁᩥᨿᩥᨠᩣᨿ ᨸᨬ᩠ᨬᩣᨿ ᩋᨸ᩠ᨸᨭᩥᩃᨴ᩠ᨵᩣᨿ ᨸᨭᩥᩃᩣᨽᩣᨿ, ᨸᨭᩥᩃᨴ᩠ᨵᩣᨿ ᨽᩥᨿ᩠ᨿᩮᩣᨽᩣᩅᩣᨿ ᩅᩮᨸᩩᩃ᩠ᩃᩣᨿ ᨽᩣᩅᨶᩣᨿ ᨸᩣᩁᩥᨸᩪᩁᩥᨿᩣ ᩈᩴᩅᨲ᩠ᨲᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨻᩉᩩᩔᩩᨲᩮᩣ ᩉᩮᩣᨲᩥ ᩈᩩᨲᨵᩁᩮᩣ ᩈᩩᨲᩈᨶ᩠ᨶᩥᨧᨿᩮᩣ. ᨿᩮ ᨲᩮ ᨵᨾ᩠ᨾᩣ ᩌᨴᩥᨠᩃ᩠ᨿᩣᨱᩣ ᨾᨩ᩠ᨫᩮᨠᩃ᩠ᨿᩣᨱᩣ ᨸᩁᩥᨿᩮᩣᩈᩣᨶᨠᩃ᩠ᨿᩣᨱᩣ ᩈᩣᨲ᩠ᨳᩣ ᩈᨻ᩠ᨿᨬ᩠ᨩᨶᩣ ᨠᩮᩅᩃᨸᩁᩥᨸᩩᨱ᩠ᨱᩴ ᨸᩁᩥᩈᩩᨴ᩠ᨵᩴ ᨻᩕᩉ᩠ᨾᨧᩁᩥᨿᩴ ᩋᨽᩥᩅᨴᨶ᩠ᨲᩥ, ᨲᨳᩣᩁᩪᨸᩣᩔ ᨵᨾ᩠ᨾᩣ ᨻᩉᩩᩔᩩᨲᩣ ᩉᩮᩣᨶ᩠ᨲᩥ ᨵᩣᨲᩣ ᩅᨧᩈᩣ ᨸᩁᩥᨧᩥᨲᩣ ᨾᨶᩈᩣᨶᩩᨸᩮᨠ᩠ᨡᩥᨲᩣ ᨴᩥᨭ᩠ᨮᩥᨿᩣ ᩈᩩᨸ᩠ᨸᨭᩥᩅᩥᨴ᩠ᨵᩣ. ᩋᨿᩴ ᨸᨬ᩠ᨧᨾᩮᩣ ᩉᩮᨲᩩ ᨸᨬ᩠ᨧᨾᩮᩣ ᨸᨧ᩠ᨧᨿᩮᩣ ᩌᨴᩥᨻᩕᩉ᩠ᨾᨧᩁᩥᨿᩥᨠᩣᨿ ᨸᨬ᩠ᨬᩣᨿ ᩋᨸ᩠ᨸᨭᩥᩃᨴ᩠ᨵᩣᨿ ᨸᨭᩥᩃᩣᨽᩣᨿ, ᨸᨭᩥᩃᨴ᩠ᨵᩣᨿ ᨽᩥᨿ᩠ᨿᩮᩣᨽᩣᩅᩣᨿ ᩅᩮᨸᩩᩃ᩠ᩃᩣᨿ ᨽᩣᩅᨶᩣᨿ ᨸᩣᩁᩥᨸᩪᩁᩥᨿᩣ ᩈᩴᩅᨲ᩠ᨲᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᩌᩁᨴ᩠ᨵᩅᩦᩁᩥᨿᩮᩣ ᩅᩥᩉᩁᨲᩥ ᩋᨠᩩᩈᩃᩣᨶᩴ ᨵᨾ᩠ᨾᩣᨶᩴ ᨸᩉᩣᨶᩣᨿ, ᨠᩩᩈᩃᩣᨶᩴ ᨵᨾ᩠ᨾᩣᨶᩴ ᩏᨸᩈᨾ᩠ᨸᨴᩣᨿ, ᨳᩣᨾᩅᩣ ᨴᩊ᩠ᩉᨸᩁᨠ᩠ᨠᨾᩮᩣ ᩋᨶᩥᨠ᩠ᨡᩥᨲ᩠ᨲᨵᩩᩁᩮᩣ ᨠᩩᩈᩃᩮᩈᩩ ᨵᨾ᩠ᨾᩮᩈᩩ. ᩋᨿᩴ ᨨᨭ᩠ᨮᩮᩣ ᩉᩮᨲᩩ ᨨᨭ᩠ᨮᩮᩣ ᨸᨧ᩠ᨧᨿᩮᩣ ᩌᨴᩥᨻᩕᩉ᩠ᨾᨧᩁᩥᨿᩥᨠᩣᨿ ᨸᨬ᩠ᨬᩣᨿ ᩋᨸ᩠ᨸᨭᩥᩃᨴ᩠ᨵᩣᨿ ᨸᨭᩥᩃᩣᨽᩣᨿ, ᨸᨭᩥᩃᨴ᩠ᨵᩣᨿ ᨽᩥᨿ᩠ᨿᩮᩣᨽᩣᩅᩣᨿ ᩅᩮᨸᩩᩃ᩠ᩃᩣᨿ ᨽᩣᩅᨶᩣᨿ ᨸᩣᩁᩥᨸᩪᩁᩥᨿᩣ ᩈᩴᩅᨲ᩠ᨲᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᨲᩥᨾᩣ ᩉᩮᩣᨲᩥ ᨸᩁᨾᩮᨶ ᩈᨲᩥᨶᩮᨸᨠ᩠ᨠᩮᨶ ᩈᨾᨶ᩠ᨶᩣᨣᨲᩮᩣ. ᨧᩥᩁᨠᨲᨾ᩠ᨸᩥ ᨧᩥᩁᨽᩣᩈᩥᨲᨾ᩠ᨸᩥ ᩈᩁᩥᨲᩣ ᩋᨶᩩᩔᩁᩥᨲᩣ. ᩋᨿᩴ ᩈᨲ᩠ᨲᨾᩮᩣ ᩉᩮᨲᩩ ᩈᨲ᩠ᨲᨾᩮᩣ ᨸᨧ᩠ᨧᨿᩮᩣ ᩌᨴᩥᨻᩕᩉ᩠ᨾᨧᩁᩥᨿᩥᨠᩣᨿ ᨸᨬ᩠ᨬᩣᨿ ᩋᨸ᩠ᨸᨭᩥᩃᨴ᩠ᨵᩣᨿ ᨸᨭᩥᩃᩣᨽᩣᨿ, ᨸᨭᩥᩃᨴ᩠ᨵᩣᨿ ᨽᩥᨿ᩠ᨿᩮᩣᨽᩣᩅᩣᨿ ᩅᩮᨸᩩᩃ᩠ᩃᩣᨿ ᨽᩣᩅᨶᩣᨿ ᨸᩣᩁᩥᨸᩪᩁᩥᨿᩣ ᩈᩴᩅᨲ᩠ᨲᨲᩥ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨸᨬ᩠ᨧᩈᩩ ᩏᨸᩣᨴᩣᨶᨠ᩠ᨡᨶ᩠ᨵᩮᩈᩩ, ᩏᨴᨿᨻ᩠ᨻᨿᩣᨶᩩᨸᩔᩦ ᩅᩥᩉᩁᨲᩥ – ‘ᩍᨲᩥ ᩁᩪᨸᩴ ᩍᨲᩥ ᩁᩪᨸᩔ ᩈᨾᩩᨴᨿᩮᩣ ᩍᨲᩥ ᩁᩪᨸᩔ ᩋᨲ᩠ᨳᨦ᩠ᨣᨾᩮᩣ; ᩍᨲᩥ ᩅᩮᨴᨶᩣ ᩍᨲᩥ ᩅᩮᨴᨶᩣᨿ ᩈᨾᩩᨴᨿᩮᩣ ᩍᨲᩥ ᩅᩮᨴᨶᩣᨿ ᩋᨲ᩠ᨳᨦ᩠ᨣᨾᩮᩣ; ᩍᨲᩥ ᩈᨬ᩠ᨬᩣ ᩍᨲᩥ ᩈᨬ᩠ᨬᩣᨿ ᩈᨾᩩᨴᨿᩮᩣ ᩍᨲᩥ ᩈᨬ᩠ᨬᩣᨿ ᩋᨲ᩠ᨳᨦ᩠ᨣᨾᩮᩣ; ᩍᨲᩥ ᩈᨦ᩠ᨡᩣᩁᩣ ᩍᨲᩥ ᩈᨦ᩠ᨡᩣᩁᩣᨶᩴ ᩈᨾᩩᨴᨿᩮᩣ ᩍᨲᩥ ᩈᨦ᩠ᨡᩣᩁᩣᨶᩴ ᩋᨲ᩠ᨳᨦ᩠ᨣᨾᩮᩣ; ᩍᨲᩥ ᩅᩥᨬ᩠ᨬᩣᨱᩴ ᩍᨲᩥ ᩅᩥᨬ᩠ᨬᩣᨱᩔ ᩈᨾᩩᨴᨿᩮᩣ ᩍᨲᩥ ᩅᩥᨬ᩠ᨬᩣᨱᩔ ᩋᨲ᩠ᨳᨦ᩠ᨣᨾᩮᩣ’ᨲᩥ. ᩋᨿᩴ ᩋᨭ᩠ᨮᨾᩮᩣ ᩉᩮᨲᩩ ᩋᨭ᩠ᨮᨾᩮᩣ ᨸᨧ᩠ᨧᨿᩮᩣ ᩌᨴᩥᨻᩕᩉ᩠ᨾᨧᩁᩥᨿᩥᨠᩣᨿ ᨸᨬ᩠ᨬᩣᨿ ᩋᨸ᩠ᨸᨭᩥᩃᨴ᩠ᨵᩣᨿ ᨸᨭᩥᩃᩣᨽᩣᨿ, ᨸᨭᩥᩃᨴ᩠ᨵᩣᨿ ᨽᩥᨿ᩠ᨿᩮᩣᨽᩣᩅᩣᨿ ᩅᩮᨸᩩᩃ᩠ᩃᩣᨿ ᨽᩣᩅᨶᩣᨿ ᨸᩣᩁᩥᨸᩪᩁᩥᨿᩣ ᩈᩴᩅᨲ᩠ᨲᨲᩥ. ᩍᨾᩮ ᩋᨭ᩠ᨮ ᨵᨾ᩠ᨾᩣ ᨻᩉᩩᨠᩣᩁᩣ.

(ᨡ) ‘‘ᨠᨲᨾᩮ ᩋᨭ᩠ᨮ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ? ᩋᩁᩥᨿᩮᩣ ᩋᨭ᩠ᨮᨦ᩠ᨣᩥᨠᩮᩣ ᨾᨣ᩠ᨣᩮᩣ ᩈᩮᨿ᩠ᨿᨳᩥᨴᩴ – ᩈᨾ᩠ᨾᩣᨴᩥᨭ᩠ᨮᩥ, ᩈᨾ᩠ᨾᩣᩈᨦ᩠ᨠᨸ᩠ᨸᩮᩣ, ᩈᨾ᩠ᨾᩣᩅᩣᨧᩣ, ᩈᨾ᩠ᨾᩣᨠᨾ᩠ᨾᨶ᩠ᨲᩮᩣ, ᩈᨾ᩠ᨾᩣᩌᨩᩦᩅᩮᩣ, ᩈᨾ᩠ᨾᩣᩅᩣᨿᩣᨾᩮᩣ, ᩈᨾ᩠ᨾᩣᩈᨲᩥ, ᩈᨾ᩠ᨾᩣᩈᨾᩣᨵᩥ. ᩍᨾᩮ ᩋᨭ᩠ᨮ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ.

(ᨣ) ‘‘ᨠᨲᨾᩮ ᩋᨭ᩠ᨮ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ? ᩋᨭ᩠ᨮ ᩃᩮᩣᨠᨵᨾ᩠ᨾᩣ – ᩃᩣᨽᩮᩣ ᨧ, ᩋᩃᩣᨽᩮᩣ ᨧ, ᨿᩈᩮᩣ ᨧ, ᩋᨿᩈᩮᩣ ᨧ, ᨶᩥᨶ᩠ᨴᩣ ᨧ, ᨸᩈᩴᩈᩣ ᨧ, ᩈᩩᨡᨬ᩠ᨧ, ᨴᩩᨠ᩠ᨡᨬ᩠ᨧ. ᩍᨾᩮ ᩋᨭ᩠ᨮ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ.

(ᨥ) ‘‘ᨠᨲᨾᩮ ᩋᨭ᩠ᨮ ᨵᨾ᩠ᨾᩣ ᨸᩉᩣᨲᨻ᩠ᨻᩣ? ᩋᨭ᩠ᨮ ᨾᩥᨧ᩠ᨨᨲ᩠ᨲᩣ – ᨾᩥᨧ᩠ᨨᩣᨴᩥᨭ᩠ᨮᩥ, ᨾᩥᨧ᩠ᨨᩣᩈᨦ᩠ᨠᨸ᩠ᨸᩮᩣ, ᨾᩥᨧ᩠ᨨᩣᩅᩣᨧᩣ, ᨾᩥᨧ᩠ᨨᩣᨠᨾ᩠ᨾᨶ᩠ᨲᩮᩣ, ᨾᩥᨧ᩠ᨨᩣᩌᨩᩦᩅᩮᩣ, ᨾᩥᨧ᩠ᨨᩣᩅᩣᨿᩣᨾᩮᩣ, ᨾᩥᨧ᩠ᨨᩣᩈᨲᩥ, ᨾᩥᨧ᩠ᨨᩣᩈᨾᩣᨵᩥ. ᩍᨾᩮ ᩋᨭ᩠ᨮ ᨵᨾ᩠ᨾᩣ ᨸᩉᩣᨲᨻ᩠ᨻᩣ.

(ᨦ) ‘‘ᨠᨲᨾᩮ ᩋᨭ᩠ᨮ ᨵᨾ᩠ᨾᩣ ᩉᩣᨶᨽᩣᨣᩥᨿᩣ? ᩋᨭ᩠ᨮ ᨠᩩᩈᩦᨲᩅᨲ᩠ᨳᩪᨶᩥ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩣ ᨠᨾ᩠ᨾᩴ ᨠᩣᨲᨻ᩠ᨻᩴ ᩉᩮᩣᨲᩥ, ᨲᩔ ᩑᩅᩴ ᩉᩮᩣᨲᩥ – ‘ᨠᨾ᩠ᨾᩴ ᨡᩮᩣ ᨾᩮ ᨠᩣᨲᨻ᩠ᨻᩴ ᨽᩅᩥᩔᨲᩥ, ᨠᨾ᩠ᨾᩴ ᨡᩮᩣ ᨸᨶ ᨾᩮ ᨠᩁᩮᩣᨶ᩠ᨲᩔ ᨠᩣᨿᩮᩣ ᨠᩥᩃᨾᩥᩔᨲᩥ, ᩉᨶ᩠ᨴᩣᩉᩴ ᨶᩥᨸᨩ᩠ᨩᩣᨾᩦ’ᨲᩥ. ᩈᩮᩣ ᨶᩥᨸᨩ᩠ᨩᨲᩥ, ᨶ ᩅᩦᩁᩥᨿᩴ ᩌᩁᨽᨲᩥ ᩋᨸ᩠ᨸᨲ᩠ᨲᩔ ᨸᨲ᩠ᨲᩥᨿᩣ ᩋᨶᨵᩥᨣᨲᩔ ᩋᨵᩥᨣᨾᩣᨿ ᩋᩈᨧ᩠ᨨᩥᨠᨲᩔ ᩈᨧ᩠ᨨᩥᨠᩥᩁᩥᨿᩣᨿ. ᩍᨴᩴ ᨸᨮᨾᩴ ᨠᩩᩈᩦᨲᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩣ ᨠᨾ᩠ᨾᩴ ᨠᨲᩴ ᩉᩮᩣᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨠᨾ᩠ᨾᩴ ᩋᨠᩣᩈᩥᩴ, ᨠᨾ᩠ᨾᩴ ᨡᩮᩣ ᨸᨶ ᨾᩮ ᨠᩁᩮᩣᨶ᩠ᨲᩔ ᨠᩣᨿᩮᩣ ᨠᩥᩃᨶ᩠ᨲᩮᩣ, ᩉᨶ᩠ᨴᩣᩉᩴ ᨶᩥᨸᨩ᩠ᨩᩣᨾᩦ’ᨲᩥ. ᩈᩮᩣ ᨶᩥᨸᨩ᩠ᨩᨲᩥ, ᨶ ᩅᩦᩁᩥᨿᩴ ᩌᩁᨽᨲᩥ…ᨸᩮ… ᩍᨴᩴ ᨴᩩᨲᩥᨿᩴ ᨠᩩᩈᩦᨲᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩣ ᨾᨣ᩠ᨣᩮᩣ ᨣᨶ᩠ᨲᨻ᩠ᨻᩮᩣ ᩉᩮᩣᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᨾᨣ᩠ᨣᩮᩣ ᨡᩮᩣ ᨾᩮ ᨣᨶ᩠ᨲᨻ᩠ᨻᩮᩣ ᨽᩅᩥᩔᨲᩥ, ᨾᨣ᩠ᨣᩴ ᨡᩮᩣ ᨸᨶ ᨾᩮ ᨣᨧ᩠ᨨᨶ᩠ᨲᩔ ᨠᩣᨿᩮᩣ ᨠᩥᩃᨾᩥᩔᨲᩥ, ᩉᨶ᩠ᨴᩣᩉᩴ ᨶᩥᨸᨩ᩠ᨩᩣᨾᩦ’ᨲᩥ. ᩈᩮᩣ ᨶᩥᨸᨩ᩠ᨩᨲᩥ, ᨶ ᩅᩦᩁᩥᨿᩴ ᩌᩁᨽᨲᩥ…ᨸᩮ… ᩍᨴᩴ ᨲᨲᩥᨿᩴ ᨠᩩᩈᩦᨲᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩣ ᨾᨣ᩠ᨣᩮᩣ ᨣᨲᩮᩣ ᩉᩮᩣᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨾᨣ᩠ᨣᩴ ᩋᨣᨾᩣᩈᩥᩴ, ᨾᨣ᩠ᨣᩴ ᨡᩮᩣ ᨸᨶ ᨾᩮ ᨣᨧ᩠ᨨᨶ᩠ᨲᩔ ᨠᩣᨿᩮᩣ ᨠᩥᩃᨶ᩠ᨲᩮᩣ, ᩉᨶ᩠ᨴᩣᩉᩴ ᨶᩥᨸᨩ᩠ᨩᩣᨾᩦ’ᨲᩥ. ᩈᩮᩣ ᨶᩥᨸᨩ᩠ᨩᨲᩥ, ᨶ ᩅᩦᩁᩥᨿᩴ ᩌᩁᨽᨲᩥ…ᨸᩮ… ᩍᨴᩴ ᨧᨲᩩᨲ᩠ᨳᩴ ᨠᩩᩈᩦᨲᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᨶ ᩃᨽᨲᩥ ᩃᩪᨡᩔ ᩅᩣ ᨸᨱᩦᨲᩔ ᩅᩣ ᨽᩮᩣᨩᨶᩔ ᨿᩣᩅᨴᨲ᩠ᨳᩴ ᨸᩣᩁᩥᨸᩪᩁᩥᩴ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᨶᩣᩃᨲ᩠ᨳᩴ ᩃᩪᨡᩔ ᩅᩣ ᨸᨱᩦᨲᩔ ᩅᩣ ᨽᩮᩣᨩᨶᩔ ᨿᩣᩅᨴᨲ᩠ᨳᩴ ᨸᩣᩁᩥᨸᩪᩁᩥᩴ, ᨲᩔ ᨾᩮ ᨠᩣᨿᩮᩣ ᨠᩥᩃᨶ᩠ᨲᩮᩣ ᩋᨠᨾ᩠ᨾᨬ᩠ᨬᩮᩣ, ᩉᨶ᩠ᨴᩣᩉᩴ ᨶᩥᨸᨩ᩠ᨩᩣᨾᩦ’ᨲᩥ…ᨸᩮ… ᩍᨴᩴ ᨸᨬ᩠ᨧᨾᩴ ᨠᩩᩈᩦᨲᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᩃᨽᨲᩥ ᩃᩪᨡᩔ ᩅᩣ ᨸᨱᩦᨲᩔ ᩅᩣ ᨽᩮᩣᨩᨶᩔ ᨿᩣᩅᨴᨲ᩠ᨳᩴ ᨸᩣᩁᩥᨸᩪᩁᩥᩴ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᩋᩃᨲ᩠ᨳᩴ ᩃᩪᨡᩔ ᩅᩣ ᨸᨱᩦᨲᩔ ᩅᩣ ᨽᩮᩣᨩᨶᩔ ᨿᩣᩅᨴᨲ᩠ᨳᩴ ᨸᩣᩁᩥᨸᩪᩁᩥᩴ, ᨲᩔ ᨾᩮ ᨠᩣᨿᩮᩣ ᨣᩁᩩᨠᩮᩣ ᩋᨠᨾ᩠ᨾᨬ᩠ᨬᩮᩣ, ᨾᩣᩈᩣᨧᩥᨲᩴ ᨾᨬ᩠ᨬᩮ, ᩉᨶ᩠ᨴᩣᩉᩴ ᨶᩥᨸᨩ᩠ᨩᩣᨾᩦ’ᨲᩥ. ᩈᩮᩣ ᨶᩥᨸᨩ᩠ᨩᨲᩥ…ᨸᩮ… ᩍᨴᩴ ᨨᨭ᩠ᨮᩴ ᨠᩩᩈᩦᨲᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩏᨸ᩠ᨸᨶ᩠ᨶᩮᩣ ᩉᩮᩣᨲᩥ ᩋᨸ᩠ᨸᨾᨲ᩠ᨲᨠᩮᩣ ᩌᨻᩣᨵᩮᩣ, ᨲᩔ ᩑᩅᩴ ᩉᩮᩣᨲᩥ – ‘ᩏᨸ᩠ᨸᨶ᩠ᨶᩮᩣ ᨡᩮᩣ ᨾᩮ ᩋᨿᩴ ᩋᨸ᩠ᨸᨾᨲ᩠ᨲᨠᩮᩣ ᩌᨻᩣᨵᩮᩣ ᩋᨲ᩠ᨳᩥ ᨠᨸ᩠ᨸᩮᩣ ᨶᩥᨸᨩ᩠ᨩᩥᨲᩩᩴ, ᩉᨶ᩠ᨴᩣᩉᩴ ᨶᩥᨸᨩ᩠ᨩᩣᨾᩦ’ᨲᩥ. ᩈᩮᩣ ᨶᩥᨸᨩ᩠ᨩᨲᩥ…ᨸᩮ… ᩍᨴᩴ ᩈᨲ᩠ᨲᨾᩴ ᨠᩩᩈᩦᨲᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨣᩥᩃᩣᨶᩣᩅᩩᨭ᩠ᨮᩥᨲᩮᩣ ᩉᩮᩣᨲᩥ ᩋᨧᩥᩁᩅᩩᨭ᩠ᨮᩥᨲᩮᩣ ᨣᩮᩃᨬ᩠ᨬᩣ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨣᩥᩃᩣᨶᩣᩅᩩᨭ᩠ᨮᩥᨲᩮᩣ ᩋᨧᩥᩁᩅᩩᨭ᩠ᨮᩥᨲᩮᩣ ᨣᩮᩃᨬ᩠ᨬᩣ. ᨲᩔ ᨾᩮ ᨠᩣᨿᩮᩣ ᨴᩩᨻ᩠ᨻᩃᩮᩣ ᩋᨠᨾ᩠ᨾᨬ᩠ᨬᩮᩣ, ᩉᨶ᩠ᨴᩣᩉᩴ ᨶᩥᨸᨩ᩠ᨩᩣᨾᩦ’ᨲᩥ. ᩈᩮᩣ ᨶᩥᨸᨩ᩠ᨩᨲᩥ…ᨸᩮ… ᩍᨴᩴ ᩋᨭ᩠ᨮᨾᩴ ᨠᩩᩈᩦᨲᩅᨲ᩠ᨳᩩ. ᩍᨾᩮ ᩋᨭ᩠ᨮ ᨵᨾ᩠ᨾᩣ ᩉᩣᨶᨽᩣᨣᩥᨿᩣ.

(ᨧ) ‘‘ᨠᨲᨾᩮ ᩋᨭ᩠ᨮ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ? ᩋᨭ᩠ᨮ ᩌᩁᨾ᩠ᨽᩅᨲ᩠ᨳᩪᨶᩥ. ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩣ ᨠᨾ᩠ᨾᩴ ᨠᩣᨲᨻ᩠ᨻᩴ ᩉᩮᩣᨲᩥ, ᨲᩔ ᩑᩅᩴ ᩉᩮᩣᨲᩥ – ‘ᨠᨾ᩠ᨾᩴ ᨡᩮᩣ ᨾᩮ ᨠᩣᨲᨻ᩠ᨻᩴ ᨽᩅᩥᩔᨲᩥ, ᨠᨾ᩠ᨾᩴ ᨡᩮᩣ ᨸᨶ ᨾᩮ ᨠᩁᩮᩣᨶ᩠ᨲᩮᨶ ᨶ ᩈᩩᨠᩁᩴ ᨻᩩᨴ᩠ᨵᩣᨶᩴ ᩈᩣᩈᨶᩴ ᨾᨶᩈᩥᨠᩣᨲᩩᩴ, ᩉᨶ᩠ᨴᩣᩉᩴ ᩅᩦᩁᩥᨿᩴ ᩌᩁᨽᩣᨾᩥ ᩋᨸ᩠ᨸᨲ᩠ᨲᩔ ᨸᨲ᩠ᨲᩥᨿᩣ ᩋᨶᨵᩥᨣᨲᩔ ᩋᨵᩥᨣᨾᩣᨿ ᩋᩈᨧ᩠ᨨᩥᨠᨲᩔ ᩈᨧ᩠ᨨᩥᨠᩥᩁᩥᨿᩣᨿᩣ’ᨲᩥ. ᩈᩮᩣ ᩅᩦᩁᩥᨿᩴ ᩌᩁᨽᨲᩥ ᩋᨸ᩠ᨸᨲ᩠ᨲᩔ ᨸᨲ᩠ᨲᩥᨿᩣ ᩋᨶᨵᩥᨣᨲᩔ ᩋᨵᩥᨣᨾᩣᨿ ᩋᩈᨧ᩠ᨨᩥᨠᨲᩔ ᩈᨧ᩠ᨨᩥᨠᩥᩁᩥᨿᩣᨿ. ᩍᨴᩴ ᨸᨮᨾᩴ ᩌᩁᨾ᩠ᨽᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩣ ᨠᨾ᩠ᨾᩴ ᨠᨲᩴ ᩉᩮᩣᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨠᨾ᩠ᨾᩴ ᩋᨠᩣᩈᩥᩴ, ᨠᨾ᩠ᨾᩴ ᨡᩮᩣ ᨸᨶᩣᩉᩴ ᨠᩁᩮᩣᨶ᩠ᨲᩮᩣ ᨶᩣᩈᨠ᩠ᨡᩥᩴ ᨻᩩᨴ᩠ᨵᩣᨶᩴ ᩈᩣᩈᨶᩴ ᨾᨶᩈᩥᨠᩣᨲᩩᩴ, ᩉᨶ᩠ᨴᩣᩉᩴ ᩅᩦᩁᩥᨿᩴ ᩌᩁᨽᩣᨾᩥ…ᨸᩮ… ᩍᨴᩴ ᨴᩩᨲᩥᨿᩴ ᩌᩁᨾ᩠ᨽᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩣ ᨾᨣ᩠ᨣᩮᩣ ᨣᨶ᩠ᨲᨻ᩠ᨻᩮᩣ ᩉᩮᩣᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᨾᨣ᩠ᨣᩮᩣ ᨡᩮᩣ ᨾᩮ ᨣᨶ᩠ᨲᨻ᩠ᨻᩮᩣ ᨽᩅᩥᩔᨲᩥ, ᨾᨣ᩠ᨣᩴ ᨡᩮᩣ ᨸᨶ ᨾᩮ ᨣᨧ᩠ᨨᨶ᩠ᨲᩮᨶ ᨶ ᩈᩩᨠᩁᩴ ᨻᩩᨴ᩠ᨵᩣᨶᩴ ᩈᩣᩈᨶᩴ ᨾᨶᩈᩥᨠᩣᨲᩩᩴ, ᩉᨶ᩠ᨴᩣᩉᩴ ᩅᩦᩁᩥᨿᩴ ᩌᩁᨽᩣᨾᩥ…ᨸᩮ… ᩍᨴᩴ ᨲᨲᩥᨿᩴ ᩌᩁᨾ᩠ᨽᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩣ ᨾᨣ᩠ᨣᩮᩣ ᨣᨲᩮᩣ ᩉᩮᩣᨲᩥ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨾᨣ᩠ᨣᩴ ᩋᨣᨾᩣᩈᩥᩴ, ᨾᨣ᩠ᨣᩴ ᨡᩮᩣ ᨸᨶᩣᩉᩴ ᨣᨧ᩠ᨨᨶ᩠ᨲᩮᩣ ᨶᩣᩈᨠ᩠ᨡᩥᩴ ᨻᩩᨴ᩠ᨵᩣᨶᩴ ᩈᩣᩈᨶᩴ ᨾᨶᩈᩥᨠᩣᨲᩩᩴ, ᩉᨶ᩠ᨴᩣᩉᩴ ᩅᩦᩁᩥᨿᩴ ᩌᩁᨽᩣᨾᩥ…ᨸᩮ… ᩍᨴᩴ ᨧᨲᩩᨲ᩠ᨳᩴ ᩌᩁᨾ᩠ᨽᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᨶ ᩃᨽᨲᩥ ᩃᩪᨡᩔ ᩅᩣ ᨸᨱᩦᨲᩔ ᩅᩣ ᨽᩮᩣᨩᨶᩔ ᨿᩣᩅᨴᨲ᩠ᨳᩴ ᨸᩣᩁᩥᨸᩪᩁᩥᩴ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᨶᩣᩃᨲ᩠ᨳᩴ ᩃᩪᨡᩔ ᩅᩣ ᨸᨱᩦᨲᩔ ᩅᩣ ᨽᩮᩣᨩᨶᩔ ᨿᩣᩅᨴᨲ᩠ᨳᩴ ᨸᩣᩁᩥᨸᩪᩁᩥᩴ, ᨲᩔ ᨾᩮ ᨠᩣᨿᩮᩣ ᩃᩉᩩᨠᩮᩣ ᨠᨾ᩠ᨾᨬ᩠ᨬᩮᩣ, ᩉᨶ᩠ᨴᩣᩉᩴ ᩅᩦᩁᩥᨿᩴ ᩌᩁᨽᩣᨾᩥ…ᨸᩮ… ᩍᨴᩴ ᨸᨬ᩠ᨧᨾᩴ ᩌᩁᨾ᩠ᨽᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᩃᨽᨲᩥ ᩃᩪᨡᩔ ᩅᩣ ᨸᨱᩦᨲᩔ ᩅᩣ ᨽᩮᩣᨩᨶᩔ ᨿᩣᩅᨴᨲ᩠ᨳᩴ ᨸᩣᩁᩥᨸᩪᩁᩥᩴ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᩋᩃᨲ᩠ᨳᩴ ᩃᩪᨡᩔ ᩅᩣ ᨸᨱᩦᨲᩔ ᩅᩣ ᨽᩮᩣᨩᨶᩔ ᨿᩣᩅᨴᨲ᩠ᨳᩴ ᨸᩣᩁᩥᨸᩪᩁᩥᩴ. ᨲᩔ ᨾᩮ ᨠᩣᨿᩮᩣ ᨻᩃᩅᩣ ᨠᨾ᩠ᨾᨬ᩠ᨬᩮᩣ, ᩉᨶ᩠ᨴᩣᩉᩴ ᩅᩦᩁᩥᨿᩴ ᩌᩁᨽᩣᨾᩥ…ᨸᩮ… ᩍᨴᩴ ᨨᨭ᩠ᨮᩴ ᩌᩁᨾ᩠ᨽᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩏᨸ᩠ᨸᨶ᩠ᨶᩮᩣ ᩉᩮᩣᨲᩥ ᩋᨸ᩠ᨸᨾᨲ᩠ᨲᨠᩮᩣ ᩌᨻᩣᨵᩮᩣ. ᨲᩔ ᩑᩅᩴ ᩉᩮᩣᨲᩥ – ‘ᩏᨸ᩠ᨸᨶ᩠ᨶᩮᩣ ᨡᩮᩣ ᨾᩮ ᩋᨿᩴ ᩋᨸ᩠ᨸᨾᨲ᩠ᨲᨠᩮᩣ ᩌᨻᩣᨵᩮᩣ ᨮᩣᨶᩴ ᨡᩮᩣ ᨸᨶᩮᨲᩴ ᩅᩥᨩ᩠ᨩᨲᩥ, ᨿᩴ ᨾᩮ ᩌᨻᩣᨵᩮᩣ ᨸᩅᨯ᩠ᨰᩮᨿ᩠ᨿ, ᩉᨶ᩠ᨴᩣᩉᩴ ᩅᩦᩁᩥᨿᩴ ᩌᩁᨽᩣᨾᩥ…ᨸᩮ… ᩍᨴᩴ ᩈᨲ᩠ᨲᨾᩴ ᩌᩁᨾ᩠ᨽᩅᨲ᩠ᨳᩩ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨣᩥᩃᩣᨶᩣ ᩅᩩᨭ᩠ᨮᩥᨲᩮᩣ ᩉᩮᩣᨲᩥ ᩋᨧᩥᩁᩅᩩᨭ᩠ᨮᩥᨲᩮᩣ ᨣᩮᩃᨬ᩠ᨬᩣ. ᨲᩔ ᩑᩅᩴ ᩉᩮᩣᨲᩥ – ‘ᩋᩉᩴ ᨡᩮᩣ ᨣᩥᩃᩣᨶᩣ ᩅᩩᨭ᩠ᨮᩥᨲᩮᩣ ᩋᨧᩥᩁᩅᩩᨭ᩠ᨮᩥᨲᩮᩣ ᨣᩮᩃᨬ᩠ᨬᩣ, ᨮᩣᨶᩴ ᨡᩮᩣ ᨸᨶᩮᨲᩴ ᩅᩥᨩ᩠ᨩᨲᩥ, ᨿᩴ ᨾᩮ ᩌᨻᩣᨵᩮᩣ ᨸᨧ᩠ᨧᩩᨴᩣᩅᨲ᩠ᨲᩮᨿ᩠ᨿ, ᩉᨶ᩠ᨴᩣᩉᩴ ᩅᩦᩁᩥᨿᩴ ᩌᩁᨽᩣᨾᩥ ᩋᨸ᩠ᨸᨲ᩠ᨲᩔ ᨸᨲ᩠ᨲᩥᨿᩣ ᩋᨶᨵᩥᨣᨲᩔ ᩋᨵᩥᨣᨾᩣᨿ ᩋᩈᨧ᩠ᨨᩥᨠᨲᩔ ᩈᨧ᩠ᨨᩥᨠᩥᩁᩥᨿᩣᨿᩣ’ᨲᩥ. ᩈᩮᩣ ᩅᩦᩁᩥᨿᩴ ᩌᩁᨽᨲᩥ ᩋᨸ᩠ᨸᨲ᩠ᨲᩔ ᨸᨲ᩠ᨲᩥᨿᩣ ᩋᨶᨵᩥᨣᨲᩔ ᩋᨵᩥᨣᨾᩣᨿ ᩋᩈᨧ᩠ᨨᩥᨠᨲᩔ ᩈᨧ᩠ᨨᩥᨠᩥᩁᩥᨿᩣᨿ. ᩍᨴᩴ ᩋᨭ᩠ᨮᨾᩴ ᩌᩁᨾ᩠ᨽᩅᨲ᩠ᨳᩩ. ᩍᨾᩮ ᩋᨭ᩠ᨮ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ.

(ᨨ) ‘‘ᨠᨲᨾᩮ ᩋᨭ᩠ᨮ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ? ᩋᨭ᩠ᨮ ᩋᨠ᩠ᨡᨱᩣ ᩋᩈᨾᨿᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ. ᩍᨵᩣᩅᩩᩈᩮᩣ, ᨲᨳᩣᨣᨲᩮᩣ ᨧ ᩃᩮᩣᨠᩮ ᩏᨸ᩠ᨸᨶ᩠ᨶᩮᩣ ᩉᩮᩣᨲᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨵᨾ᩠ᨾᩮᩣ ᨧ ᨴᩮᩈᩥᨿᨲᩥ ᩒᨸᩈᨾᩥᨠᩮᩣ ᨸᩁᩥᨶᩥᨻ᩠ᨻᩣᨶᩥᨠᩮᩣ ᩈᨾ᩠ᨻᩮᩣᨵᨣᩣᨾᩦ ᩈᩩᨣᨲᨸ᩠ᨸᩅᩮᨴᩥᨲᩮᩣ. ᩋᨿᨬ᩠ᨧ ᨸᩩᨣ᩠ᨣᩃᩮᩣ ᨶᩥᩁᨿᩴ ᩏᨸᨸᨶ᩠ᨶᩮᩣ ᩉᩮᩣᨲᩥ. ᩋᨿᩴ ᨸᨮᨾᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨲᨳᩣᨣᨲᩮᩣ ᨧ ᩃᩮᩣᨠᩮ ᩏᨸ᩠ᨸᨶ᩠ᨶᩮᩣ ᩉᩮᩣᨲᩥ ᩋᩁᩉᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨵᨾ᩠ᨾᩮᩣ ᨧ ᨴᩮᩈᩥᨿᨲᩥ ᩒᨸᩈᨾᩥᨠᩮᩣ ᨸᩁᩥᨶᩥᨻ᩠ᨻᩣᨶᩥᨠᩮᩣ ᩈᨾ᩠ᨻᩮᩣᨵᨣᩣᨾᩦ ᩈᩩᨣᨲᨸ᩠ᨸᩅᩮᨴᩥᨲᩮᩣ, ᩋᨿᨬ᩠ᨧ ᨸᩩᨣ᩠ᨣᩃᩮᩣ ᨲᩥᩁᨧ᩠ᨨᩣᨶᨿᩮᩣᨶᩥᩴ ᩏᨸᨸᨶ᩠ᨶᩮᩣ ᩉᩮᩣᨲᩥ. ᩋᨿᩴ ᨴᩩᨲᩥᨿᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ.

‘‘ᨸᩩᨶ ᨧᨸᩁᩴ…ᨸᩮ… ᨸᩮᨲ᩠ᨲᩥᩅᩥᩈᨿᩴ ᩏᨸᨸᨶ᩠ᨶᩮᩣ ᩉᩮᩣᨲᩥ. ᩋᨿᩴ ᨲᨲᩥᨿᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ.

‘‘ᨸᩩᨶ ᨧᨸᩁᩴ…ᨸᩮ… ᩋᨬ᩠ᨬᨲᩁᩴ ᨴᩦᨥᩣᨿᩩᨠᩴ ᨴᩮᩅᨶᩥᨠᩣᨿᩴ ᩏᨸᨸᨶ᩠ᨶᩮᩣ ᩉᩮᩣᨲᩥ. ᩋᨿᩴ ᨧᨲᩩᨲ᩠ᨳᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ.

‘‘ᨸᩩᨶ ᨧᨸᩁᩴ…ᨸᩮ… ᨸᨧ᩠ᨧᨶ᩠ᨲᩥᨾᩮᩈᩩ ᨩᨶᨸᨴᩮᩈᩩ ᨸᨧ᩠ᨧᩣᨩᩣᨲᩮᩣ ᩉᩮᩣᨲᩥ ᨾᩥᩃᨠ᩠ᨡᩮᩈᩩ ᩋᩅᩥᨬ᩠ᨬᩣᨲᩣᩁᩮᩈᩩ, ᨿᨲ᩠ᨳ ᨶᨲ᩠ᨳᩥ ᨣᨲᩥ ᨽᩥᨠ᩠ᨡᩪᨶᩴ ᨽᩥᨠ᩠ᨡᩩᨶᩦᨶᩴ ᩏᨸᩣᩈᨠᩣᨶᩴ ᩏᨸᩣᩈᩥᨠᩣᨶᩴ. ᩋᨿᩴ ᨸᨬ᩠ᨧᨾᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ.

‘‘ᨸᩩᨶ ᨧᨸᩁᩴ…ᨸᩮ… ᩋᨿᨬ᩠ᨧ ᨸᩩᨣ᩠ᨣᩃᩮᩣ ᨾᨩ᩠ᨫᩥᨾᩮᩈᩩ ᨩᨶᨸᨴᩮᩈᩩ ᨸᨧ᩠ᨧᩣᨩᩣᨲᩮᩣ ᩉᩮᩣᨲᩥ, ᩈᩮᩣ ᨧ ᩉᩮᩣᨲᩥ ᨾᩥᨧ᩠ᨨᩣᨴᩥᨭ᩠ᨮᩥᨠᩮᩣ ᩅᩥᨸᩁᩦᨲᨴᩔᨶᩮᩣ – ‘ᨶᨲ᩠ᨳᩥ ᨴᩥᨶ᩠ᨶᩴ, ᨶᨲ᩠ᨳᩥ ᨿᩥᨭ᩠ᨮᩴ, ᨶᨲ᩠ᨳᩥ ᩉᩩᨲᩴ, ᨶᨲ᩠ᨳᩥ ᩈᩩᨠᨲᨴᩩᨠ᩠ᨠᨭᩣᨶᩴ ᨠᨾ᩠ᨾᩣᨶᩴ ᨹᩃᩴ ᩅᩥᨸᩣᨠᩮᩣ, ᨶᨲ᩠ᨳᩥ ᩋᨿᩴ ᩃᩮᩣᨠᩮᩣ, ᨶᨲ᩠ᨳᩥ ᨸᩁᩮᩣ ᩃᩮᩣᨠᩮᩣ, ᨶᨲ᩠ᨳᩥ ᨾᩣᨲᩣ, ᨶᨲ᩠ᨳᩥ ᨸᩥᨲᩣ, ᨶᨲ᩠ᨳᩥ ᩈᨲ᩠ᨲᩣ ᩒᨸᨸᩣᨲᩥᨠᩣ, ᨶᨲ᩠ᨳᩥ ᩃᩮᩣᨠᩮ ᩈᨾᨱᨻᩕᩣᩉ᩠ᨾᨱᩣ ᩈᨾ᩠ᨾᨣ᩠ᨣᨲᩣ ᩈᨾ᩠ᨾᩣᨸᨭᩥᨸᨶ᩠ᨶᩣ ᨿᩮ ᩍᨾᨬ᩠ᨧ ᩃᩮᩣᨠᩴ ᨸᩁᨬ᩠ᨧ ᩃᩮᩣᨠᩴ ᩈᨿᩴ ᩋᨽᩥᨬ᩠ᨬᩣ ᩈᨧ᩠ᨨᩥᨠᨲ᩠ᩅᩣ ᨸᩅᩮᨴᩮᨶ᩠ᨲᩦ’ᨲᩥ. ᩋᨿᩴ ᨨᨭ᩠ᨮᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ.

‘‘ᨸᩩᨶ ᨧᨸᩁᩴ…ᨸᩮ… ᩋᨿᨬ᩠ᨧ ᨸᩩᨣ᩠ᨣᩃᩮᩣ ᨾᨩ᩠ᨫᩥᨾᩮᩈᩩ ᨩᨶᨸᨴᩮᩈᩩ ᨸᨧ᩠ᨧᩣᨩᩣᨲᩮᩣ ᩉᩮᩣᨲᩥ, ᩈᩮᩣ ᨧ ᩉᩮᩣᨲᩥ ᨴᩩᨸ᩠ᨸᨬ᩠ᨬᩮᩣ ᨩᩊᩮᩣ ᩑᩊᨾᩪᨣᩮᩣ, ᨶᨸ᩠ᨸᨭᩥᨻᩃᩮᩣ ᩈᩩᨽᩣᩈᩥᨲᨴᩩᨻ᩠ᨽᩣᩈᩥᨲᩣᨶᨾᨲ᩠ᨳᨾᨬ᩠ᨬᩣᨲᩩᩴ. ᩋᨿᩴ ᩈᨲ᩠ᨲᨾᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ.

‘‘ᨸᩩᨶ ᨧᨸᩁᩴ…ᨸᩮ… ᩋᨿᨬ᩠ᨧ ᨸᩩᨣ᩠ᨣᩃᩮᩣ ᨾᨩ᩠ᨫᩥᨾᩮᩈᩩ ᨩᨶᨸᨴᩮᩈᩩ ᨸᨧ᩠ᨧᩣᨩᩣᨲᩮᩣ ᩉᩮᩣᨲᩥ, ᩈᩮᩣ ᨧ ᩉᩮᩣᨲᩥ ᨸᨬ᩠ᨬᩅᩣ ᩋᨩᩊᩮᩣ ᩋᨶᩮᩊᨾᩪᨣᩮᩣ, ᨸᨭᩥᨻᩃᩮᩣ ᩈᩩᨽᩣᩈᩥᨲᨴᩩᨻ᩠ᨽᩣᩈᩥᨲᩣᨶᨾᨲ᩠ᨳᨾᨬ᩠ᨬᩣᨲᩩᩴ. ᩋᨿᩴ ᩋᨭ᩠ᨮᨾᩮᩣ ᩋᨠ᩠ᨡᨱᩮᩣ ᩋᩈᨾᨿᩮᩣ ᨻᩕᩉ᩠ᨾᨧᩁᩥᨿᩅᩣᩈᩣᨿ. ᩍᨾᩮ ᩋᨭ᩠ᨮ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ.

(ᨩ) ‘‘ᨠᨲᨾᩮ ᩋᨭ᩠ᨮ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ? ᩋᨭ᩠ᨮ ᨾᩉᩣᨸᩩᩁᩥᩈᩅᩥᨲᨠ᩠ᨠᩣ – ᩋᨸ᩠ᨸᩥᨧ᩠ᨨᩔᩣᨿᩴ ᨵᨾ᩠ᨾᩮᩣ, ᨶᩣᨿᩴ ᨵᨾ᩠ᨾᩮᩣ ᨾᩉᩥᨧ᩠ᨨᩔ. ᩈᨶ᩠ᨲᩩᨭ᩠ᨮᩔᩣᨿᩴ ᨵᨾ᩠ᨾᩮᩣ, ᨶᩣᨿᩴ ᨵᨾ᩠ᨾᩮᩣ ᩋᩈᨶ᩠ᨲᩩᨭ᩠ᨮᩔ. ᨸᩅᩥᩅᩥᨲ᩠ᨲᩔᩣᨿᩴ ᨵᨾ᩠ᨾᩮᩣ, ᨶᩣᨿᩴ ᨵᨾ᩠ᨾᩮᩣ ᩈᨦ᩠ᨣᨱᩥᨠᩣᩁᩣᨾᩔ. ᩌᩁᨴ᩠ᨵᩅᩦᩁᩥᨿᩔᩣᨿᩴ ᨵᨾ᩠ᨾᩮᩣ, ᨶᩣᨿᩴ ᨵᨾ᩠ᨾᩮᩣ ᨠᩩᩈᩦᨲᩔ. ᩏᨸᨭ᩠ᨮᩥᨲᩈᨲᩥᩔᩣᨿᩴ ᨵᨾ᩠ᨾᩮᩣ, ᨶᩣᨿᩴ ᨵᨾ᩠ᨾᩮᩣ ᨾᩩᨭ᩠ᨮᩔᨲᩥᩔ. ᩈᨾᩣᩉᩥᨲᩔᩣᨿᩴ ᨵᨾ᩠ᨾᩮᩣ, ᨶᩣᨿᩴ ᨵᨾ᩠ᨾᩮᩣ ᩋᩈᨾᩣᩉᩥᨲᩔ. ᨸᨬ᩠ᨬᩅᨲᩮᩣ [ᨸᨬ᩠ᨬᩣᩅᨲᩮᩣ (ᩈᩦ. ᨸᩦ.)] ᩋᨿᩴ ᨵᨾ᩠ᨾᩮᩣ, ᨶᩣᨿᩴ ᨵᨾ᩠ᨾᩮᩣ ᨴᩩᨸ᩠ᨸᨬ᩠ᨬᩔ. ᨶᩥᨸ᩠ᨸᨸᨬ᩠ᨧᩔᩣᨿᩴ ᨵᨾ᩠ᨾᩮᩣ, ᨶᩣᨿᩴ ᨵᨾ᩠ᨾᩮᩣ ᨸᨸᨬ᩠ᨧᩣᩁᩣᨾᩔᩣᨲᩥ [ᨶᩥᨸ᩠ᨸᨸᨬ᩠ᨧᩣᩁᩣᨾᩔ ᩋᨿᩴ ᨵᨾ᩠ᨾᩮᩣ ᨶᩥᨸ᩠ᨸᨸᨬ᩠ᨧᩁᨲᩥᨶᩮᩣ, ᨶᩣᨿᩴ ᨵᨾ᩠ᨾᩮᩣ ᨸᨸᨬ᩠ᨧᩣᩁᩣᨾᩔ ᨸᨸᨬ᩠ᨧᩁᨲᩥᨶᩮᩣᨲᩥ (ᩈᩦ. ᩈ᩠ᨿᩣ. ᨸᩦ.) ᩋᨦ᩠ᨣᩩᨲ᩠ᨲᩁᩮᨸᩥ ᨲᨳᩮᩅ ᨴᩥᩔᨲᩥ. ᩋᨭ᩠ᨮᨠᨳᩣᨭᩦᨠᩣ ᨸᨶ ᩒᩃᩮᩣᨠᩮᨲᨻ᩠ᨻᩣ] ᩍᨾᩮ ᩋᨭ᩠ᨮ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ.

(ᨫ) ‘‘ᨠᨲᨾᩮ ᩋᨭ᩠ᨮ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ? ᩋᨭ᩠ᨮ ᩋᨽᩥᨽᩣᨿᨲᨶᩣᨶᩥ – ᩋᨩ᩠ᨫᨲ᩠ᨲᩴ ᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨸᩁᩥᨲ᩠ᨲᩣᨶᩥ ᩈᩩᩅᨱ᩠ᨱᨴᩩᨻ᩠ᨻᨱ᩠ᨱᩣᨶᩥ, ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ – ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨸᨮᨾᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩋᨸ᩠ᨸᨾᩣᨱᩣᨶᩥ ᩈᩩᩅᨱ᩠ᨱᨴᩩᨻ᩠ᨻᨱ᩠ᨱᩣᨶᩥ, ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ – ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨴᩩᨲᩥᨿᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨸᩁᩥᨲ᩠ᨲᩣᨶᩥ ᩈᩩᩅᨱ᩠ᨱᨴᩩᨻ᩠ᨻᨱ᩠ᨱᩣᨶᩥ, ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨲᨲᩥᨿᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩋᨸ᩠ᨸᨾᩣᨱᩣᨶᩥ ᩈᩩᩅᨱ᩠ᨱᨴᩩᨻ᩠ᨻᨱ᩠ᨱᩣᨶᩥ, ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨧᨲᩩᨲ᩠ᨳᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨶᩦᩃᩣᨶᩥ ᨶᩦᩃᩅᨱ᩠ᨱᩣᨶᩥ ᨶᩦᩃᨶᩥᨴᩔᨶᩣᨶᩥ ᨶᩦᩃᨶᩥᨽᩣᩈᩣᨶᩥ. ᩈᩮᨿ᩠ᨿᨳᩣᨸᩥ ᨶᩣᨾ ᩏᨾᩣᨸᩩᨸ᩠ᨹᩴ ᨶᩦᩃᩴ ᨶᩦᩃᩅᨱ᩠ᨱᩴ ᨶᩦᩃᨶᩥᨴᩔᨶᩴ ᨶᩦᩃᨶᩥᨽᩣᩈᩴ. ᩈᩮᨿ᩠ᨿᨳᩣ ᩅᩣ ᨸᨶ ᨲᩴ ᩅᨲ᩠ᨳᩴ ᨻᩣᩁᩣᨱᩈᩮᨿ᩠ᨿᨠᩴ ᩏᨽᨲᩮᩣᨽᩣᨣᩅᩥᨾᨭ᩠ᨮᩴ ᨶᩦᩃᩴ ᨶᩦᩃᩅᨱ᩠ᨱᩴ ᨶᩦᩃᨶᩥᨴᩔᨶᩴ ᨶᩦᩃᨶᩥᨽᩣᩈᩴ, ᩑᩅᨾᩮᩅ ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨶᩦᩃᩣᨶᩥ ᨶᩦᩃᩅᨱ᩠ᨱᩣᨶᩥ ᨶᩦᩃᨶᩥᨴᩔᨶᩣᨶᩥ ᨶᩦᩃᨶᩥᨽᩣᩈᩣᨶᩥ, ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨸᨬ᩠ᨧᨾᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨸᩦᨲᩣᨶᩥ ᨸᩦᨲᩅᨱ᩠ᨱᩣᨶᩥ ᨸᩦᨲᨶᩥᨴᩔᨶᩣᨶᩥ ᨸᩦᨲᨶᩥᨽᩣᩈᩣᨶᩥ. ᩈᩮᨿ᩠ᨿᨳᩣᨸᩥ ᨶᩣᨾ ᨠᨱᩥᨠᩣᩁᨸᩩᨸ᩠ᨹᩴ ᨸᩦᨲᩴ ᨸᩦᨲᩅᨱ᩠ᨱᩴ ᨸᩦᨲᨶᩥᨴᩔᨶᩴ ᨸᩦᨲᨶᩥᨽᩣᩈᩴ. ᩈᩮᨿ᩠ᨿᨳᩣ ᩅᩣ ᨸᨶ ᨲᩴ ᩅᨲ᩠ᨳᩴ ᨻᩣᩁᩣᨱᩈᩮᨿ᩠ᨿᨠᩴ ᩏᨽᨲᩮᩣᨽᩣᨣᩅᩥᨾᨭ᩠ᨮᩴ ᨸᩦᨲᩴ ᨸᩦᨲᩅᨱ᩠ᨱᩴ ᨸᩦᨲᨶᩥᨴᩔᨶᩴ ᨸᩦᨲᨶᩥᨽᩣᩈᩴ, ᩑᩅᨾᩮᩅ ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᨸᩦᨲᩣᨶᩥ ᨸᩦᨲᩅᨱ᩠ᨱᩣᨶᩥ ᨸᩦᨲᨶᩥᨴᩔᨶᩣᨶᩥ ᨸᩦᨲᨶᩥᨽᩣᩈᩣᨶᩥ, ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᨨᨭ᩠ᨮᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩃᩮᩣᩉᩥᨲᨠᩣᨶᩥ ᩃᩮᩣᩉᩥᨲᨠᩅᨱ᩠ᨱᩣᨶᩥ ᩃᩮᩣᩉᩥᨲᨠᨶᩥᨴᩔᨶᩣᨶᩥ ᩃᩮᩣᩉᩥᨲᨠᨶᩥᨽᩣᩈᩣᨶᩥ. ᩈᩮᨿ᩠ᨿᨳᩣᨸᩥ ᨶᩣᨾ ᨻᨶ᩠ᨵᩩᨩᩦᩅᨠᨸᩩᨸ᩠ᨹᩴ ᩃᩮᩣᩉᩥᨲᨠᩴ ᩃᩮᩣᩉᩥᨲᨠᩅᨱ᩠ᨱᩴ ᩃᩮᩣᩉᩥᨲᨠᨶᩥᨴᩔᨶᩴ ᩃᩮᩣᩉᩥᨲᨠᨶᩥᨽᩣᩈᩴ, ᩈᩮᨿ᩠ᨿᨳᩣ ᩅᩣ ᨸᨶ ᨲᩴ ᩅᨲ᩠ᨳᩴ ᨻᩣᩁᩣᨱᩈᩮᨿ᩠ᨿᨠᩴ ᩏᨽᨲᩮᩣᨽᩣᨣᩅᩥᨾᨭ᩠ᨮᩴ ᩃᩮᩣᩉᩥᨲᨠᩴ ᩃᩮᩣᩉᩥᨲᨠᩅᨱ᩠ᨱᩴ ᩃᩮᩣᩉᩥᨲᨠᨶᩥᨴᩔᨶᩴ ᩃᩮᩣᩉᩥᨲᨠᨶᩥᨽᩣᩈᩴ, ᩑᩅᨾᩮᩅ ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩃᩮᩣᩉᩥᨲᨠᩣᨶᩥ ᩃᩮᩣᩉᩥᨲᨠᩅᨱ᩠ᨱᩣᨶᩥ ᩃᩮᩣᩉᩥᨲᨠᨶᩥᨴᩔᨶᩣᨶᩥ ᩃᩮᩣᩉᩥᨲᨠᨶᩥᨽᩣᩈᩣᨶᩥ, ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᩈᨲ᩠ᨲᨾᩴ ᩋᨽᩥᨽᩣᨿᨲᨶᩴ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩒᨴᩣᨲᩣᨶᩥ ᩒᨴᩣᨲᩅᨱ᩠ᨱᩣᨶᩥ ᩒᨴᩣᨲᨶᩥᨴᩔᨶᩣᨶᩥ ᩒᨴᩣᨲᨶᩥᨽᩣᩈᩣᨶᩥ. ᩈᩮᨿ᩠ᨿᨳᩣᨸᩥ ᨶᩣᨾ ᩒᩈᨵᩥᨲᩣᩁᨠᩣ ᩒᨴᩣᨲᩣ ᩒᨴᩣᨲᩅᨱ᩠ᨱᩣ ᩒᨴᩣᨲᨶᩥᨴᩔᨶᩣ ᩒᨴᩣᨲᨶᩥᨽᩣᩈᩣ, ᩈᩮᨿ᩠ᨿᨳᩣ ᩅᩣ ᨸᨶ ᨲᩴ ᩅᨲ᩠ᨳᩴ ᨻᩣᩁᩣᨱᩈᩮᨿ᩠ᨿᨠᩴ ᩏᨽᨲᩮᩣᨽᩣᨣᩅᩥᨾᨭ᩠ᨮᩴ ᩒᨴᩣᨲᩴ ᩒᨴᩣᨲᩅᨱ᩠ᨱᩴ ᩒᨴᩣᨲᨶᩥᨴᩔᨶᩴ ᩒᨴᩣᨲᨶᩥᨽᩣᩈᩴ, ᩑᩅᨾᩮᩅ ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ ᩒᨴᩣᨲᩣᨶᩥ ᩒᨴᩣᨲᩅᨱ᩠ᨱᩣᨶᩥ ᩒᨴᩣᨲᨶᩥᨴᩔᨶᩣᨶᩥ ᩒᨴᩣᨲᨶᩥᨽᩣᩈᩣᨶᩥ, ‘ᨲᩣᨶᩥ ᩋᨽᩥᨽᩩᨿ᩠ᨿ ᨩᩣᨶᩣᨾᩥ ᨸᩔᩣᨾᩦ’ᨲᩥ ᩑᩅᩴᩈᨬ᩠ᨬᩦ ᩉᩮᩣᨲᩥ. ᩍᨴᩴ ᩋᨭ᩠ᨮᨾᩴ ᩋᨽᩥᨽᩣᨿᨲᨶᩴ. ᩍᨾᩮ ᩋᨭ᩠ᨮ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ.

(ᨬ) ‘‘ᨠᨲᨾᩮ ᩋᨭ᩠ᨮ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ? ᩋᨭ᩠ᨮ ᩅᩥᨾᩮᩣᨠ᩠ᨡᩣ – ᩁᩪᨸᩦ ᩁᩪᨸᩣᨶᩥ ᨸᩔᨲᩥ. ᩋᨿᩴ ᨸᨮᨾᩮᩣ ᩅᩥᨾᩮᩣᨠ᩠ᨡᩮᩣ.

‘‘ᩋᨩ᩠ᨫᨲ᩠ᨲᩴ ᩋᩁᩪᨸᩈᨬ᩠ᨬᩦ ᩑᨠᩮᩣ ᨻᩉᩥᨴ᩠ᨵᩣ ᩁᩪᨸᩣᨶᩥ ᨸᩔᨲᩥ. ᩋᨿᩴ ᨴᩩᨲᩥᨿᩮᩣ ᩅᩥᨾᩮᩣᨠ᩠ᨡᩮᩣ.

‘‘ᩈᩩᨽᨶ᩠ᨲᩮᩅ ᩋᨵᩥᨾᩩᨲ᩠ᨲᩮᩣ ᩉᩮᩣᨲᩥ. ᩋᨿᩴ ᨲᨲᩥᨿᩮᩣ ᩅᩥᨾᩮᩣᨠ᩠ᨡᩮᩣ.

‘‘ᩈᨻ᩠ᨻᩈᩮᩣ ᩁᩪᨸᩈᨬ᩠ᨬᩣᨶᩴ ᩈᨾᨲᩥᨠ᩠ᨠᨾᩣ ᨸᨭᩥᨥᩈᨬ᩠ᨬᩣᨶᩴ ᩋᨲ᩠ᨳᨦ᩠ᨣᨾᩣ ᨶᩣᨶᨲ᩠ᨲᩈᨬ᩠ᨬᩣᨶᩴ ᩋᨾᨶᩈᩥᨠᩣᩁᩣ ‘ᩋᨶᨶ᩠ᨲᩮᩣ ᩌᨠᩣᩈᩮᩣ’ᨲᩥ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ ᨧᨲᩩᨲ᩠ᨳᩮᩣ ᩅᩥᨾᩮᩣᨠ᩠ᨡᩮᩣ.

‘‘ᩈᨻ᩠ᨻᩈᩮᩣ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᩋᨶᨶ᩠ᨲᩴ ᩅᩥᨬ᩠ᨬᩣᨱ’ᨶ᩠ᨲᩥ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ ᨸᨬ᩠ᨧᨾᩮᩣ ᩅᩥᨾᩮᩣᨠ᩠ᨡᩮᩣ.

‘‘ᩈᨻ᩠ᨻᩈᩮᩣ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᨶᨲ᩠ᨳᩥ ᨠᩥᨬ᩠ᨧᩦ’ᨲᩥ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ ᨨᨭ᩠ᨮᩮᩣ ᩅᩥᨾᩮᩣᨠ᩠ᨡᩮᩣ.

‘‘ᩈᨻ᩠ᨻᩈᩮᩣ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ ᩈᨲ᩠ᨲᨾᩮᩣ ᩅᩥᨾᩮᩣᨠ᩠ᨡᩮᩣ.

‘‘ᩈᨻ᩠ᨻᩈᩮᩣ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ᩈᨬ᩠ᨬᩣᩅᩮᨴᨿᩥᨲᨶᩥᩁᩮᩣᨵᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩋᨿᩴ ᩋᨭ᩠ᨮᨾᩮᩣ ᩅᩥᨾᩮᩣᨠ᩠ᨡᩮᩣ. ᩍᨾᩮ ᩋᨭ᩠ᨮ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

‘‘ᩍᨲᩥ ᩍᨾᩮ ᩋᩈᩦᨲᩥ ᨵᨾ᩠ᨾᩣ ᨽᩪᨲᩣ ᨲᨧ᩠ᨨᩣ ᨲᨳᩣ ᩋᩅᩥᨲᨳᩣ ᩋᨶᨬ᩠ᨬᨳᩣ ᩈᨾ᩠ᨾᩣ ᨲᨳᩣᨣᨲᩮᨶ ᩋᨽᩥᩈᨾ᩠ᨻᩩᨴ᩠ᨵᩣ.

ᨶᩅ ᨵᨾ᩠ᨾᩣ

᪓᪕᪙. ‘‘ᨶᩅ ᨵᨾ᩠ᨾᩣ ᨻᩉᩩᨠᩣᩁᩣ…ᨸᩮ… ᨶᩅ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

(ᨠ) ‘‘ᨠᨲᨾᩮ ᨶᩅ ᨵᨾ᩠ᨾᩣ ᨻᩉᩩᨠᩣᩁᩣ? ᨶᩅ ᨿᩮᩣᨶᩥᩈᩮᩣᨾᨶᩈᩥᨠᩣᩁᨾᩪᩃᨠᩣ ᨵᨾ᩠ᨾᩣ, ᨿᩮᩣᨶᩥᩈᩮᩣᨾᨶᩈᩥᨠᩁᩮᩣᨲᩮᩣ ᨸᩣᨾᩮᩣᨩ᩠ᨩᩴ ᨩᩣᨿᨲᩥ, ᨸᨾᩩᨴᩥᨲᩔ ᨸᩦᨲᩥ ᨩᩣᨿᨲᩥ, ᨸᩦᨲᩥᨾᨶᩔ ᨠᩣᨿᩮᩣ ᨸᩔᨾ᩠ᨽᨲᩥ, ᨸᩔᨴ᩠ᨵᨠᩣᨿᩮᩣ ᩈᩩᨡᩴ ᩅᩮᨴᩮᨲᩥ, ᩈᩩᨡᩥᨶᩮᩣ ᨧᩥᨲ᩠ᨲᩴ ᩈᨾᩣᨵᩥᨿᨲᩥ, ᩈᨾᩣᩉᩥᨲᩮ ᨧᩥᨲ᩠ᨲᩮ ᨿᨳᩣᨽᩪᨲᩴ ᨩᩣᨶᩣᨲᩥ ᨸᩔᨲᩥ, ᨿᨳᩣᨽᩪᨲᩴ ᨩᩣᨶᩴ ᨸᩔᩴ ᨶᩥᨻ᩠ᨻᩥᨶ᩠ᨴᨲᩥ, ᨶᩥᨻ᩠ᨻᩥᨶ᩠ᨴᩴ ᩅᩥᩁᨩ᩠ᨩᨲᩥ, ᩅᩥᩁᩣᨣᩣ ᩅᩥᨾᩩᨧ᩠ᨧᨲᩥ. ᩍᨾᩮ ᨶᩅ ᨵᨾ᩠ᨾᩣ ᨻᩉᩩᨠᩣᩁᩣ.

(ᨡ) ‘‘ᨠᨲᨾᩮ ᨶᩅ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ? ᨶᩅ ᨸᩣᩁᩥᩈᩩᨴ᩠ᨵᩥᨸᨵᩣᨶᩥᨿᨦ᩠ᨣᩣᨶᩥ – ᩈᩦᩃᩅᩥᩈᩩᨴ᩠ᨵᩥ ᨸᩣᩁᩥᩈᩩᨴ᩠ᨵᩥᨸᨵᩣᨶᩥᨿᨦ᩠ᨣᩴ, ᨧᩥᨲ᩠ᨲᩅᩥᩈᩩᨴ᩠ᨵᩥ ᨸᩣᩁᩥᩈᩩᨴ᩠ᨵᩥᨸᨵᩣᨶᩥᨿᨦ᩠ᨣᩴ, ᨴᩥᨭ᩠ᨮᩥᩅᩥᩈᩩᨴ᩠ᨵᩥ ᨸᩣᩁᩥᩈᩩᨴ᩠ᨵᩥᨸᨵᩣᨶᩥᨿᨦ᩠ᨣᩴ, ᨠᨦ᩠ᨡᩣᩅᩥᨲᩁᨱᩅᩥᩈᩩᨴ᩠ᨵᩥ ᨸᩣᩁᩥᩈᩩᨴ᩠ᨵᩥᨸᨵᩣᨶᩥᨿᨦ᩠ᨣᩴ, ᨾᨣ᩠ᨣᩣᨾᨣ᩠ᨣᨬᩣᨱᨴᩔᨶ – ᩅᩥᩈᩩᨴ᩠ᨵᩥ ᨸᩣᩁᩥᩈᩩᨴ᩠ᨵᩥᨸᨵᩣᨶᩥᨿᨦ᩠ᨣᩴ, ᨸᨭᩥᨸᨴᩣᨬᩣᨱᨴᩔᨶᩅᩥᩈᩩᨴ᩠ᨵᩥ ᨸᩣᩁᩥᩈᩩᨴ᩠ᨵᩥᨸᨵᩣᨶᩥᨿᨦ᩠ᨣᩴ, ᨬᩣᨱᨴᩔᨶᩅᩥᩈᩩᨴ᩠ᨵᩥ ᨸᩣᩁᩥᩈᩩᨴ᩠ᨵᩥᨸᨵᩣᨶᩥᨿᨦ᩠ᨣᩴ, ᨸᨬ᩠ᨬᩣᩅᩥᩈᩩᨴ᩠ᨵᩥ ᨸᩣᩁᩥᩈᩩᨴ᩠ᨵᩥᨸᨵᩣᨶᩥᨿᨦ᩠ᨣᩴ, ᩅᩥᨾᩩᨲ᩠ᨲᩥᩅᩥᩈᩩᨴ᩠ᨵᩥ ᨸᩣᩁᩥᩈᩩᨴ᩠ᨵᩥᨸᨵᩣᨶᩥᨿᨦ᩠ᨣᩴ. ᩍᨾᩮ ᨶᩅ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ.

(ᨣ) ‘‘ᨠᨲᨾᩮ ᨶᩅ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ? ᨶᩅ ᩈᨲ᩠ᨲᩣᩅᩣᩈᩣ – ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᨶᩣᨶᨲ᩠ᨲᨠᩣᨿᩣ ᨶᩣᨶᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨾᨶᩩᩔᩣ ᩑᨠᨧ᩠ᨧᩮ ᨧ ᨴᩮᩅᩣ ᩑᨠᨧ᩠ᨧᩮ ᨧ ᩅᩥᨶᩥᨸᩣᨲᩥᨠᩣ. ᩋᨿᩴ ᨸᨮᨾᩮᩣ ᩈᨲ᩠ᨲᩣᩅᩣᩈᩮᩣ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᨶᩣᨶᨲ᩠ᨲᨠᩣᨿᩣ ᩑᨠᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨴᩮᩅᩣ ᨻᩕᩉ᩠ᨾᨠᩣᨿᩥᨠᩣ ᨸᨮᨾᩣᨽᩥᨶᩥᨻ᩠ᨻᨲ᩠ᨲᩣ. ᩋᨿᩴ ᨴᩩᨲᩥᨿᩮᩣ ᩈᨲ᩠ᨲᩣᩅᩣᩈᩮᩣ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩑᨠᨲ᩠ᨲᨠᩣᨿᩣ ᨶᩣᨶᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨴᩮᩅᩣ ᩌᨽᩔᩁᩣ. ᩋᨿᩴ ᨲᨲᩥᨿᩮᩣ ᩈᨲ᩠ᨲᩣᩅᩣᩈᩮᩣ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩑᨠᨲ᩠ᨲᨠᩣᨿᩣ ᩑᨠᨲ᩠ᨲᩈᨬ᩠ᨬᩥᨶᩮᩣ, ᩈᩮᨿ᩠ᨿᨳᩣᨸᩥ ᨴᩮᩅᩣ ᩈᩩᨽᨠᩥᨱ᩠ᩉᩣ. ᩋᨿᩴ ᨧᨲᩩᨲ᩠ᨳᩮᩣ ᩈᨲ᩠ᨲᩣᩅᩣᩈᩮᩣ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩋᩈᨬ᩠ᨬᩥᨶᩮᩣ ᩋᨸ᩠ᨸᨭᩥᩈᩴᩅᩮᨴᩥᨶᩮᩣ, ᩈᩮᨿ᩠ᨿᨳᩣᨸᩥ ᨴᩮᩅᩣ ᩋᩈᨬ᩠ᨬᩈᨲ᩠ᨲᩣ. ᩋᨿᩴ ᨸᨬ᩠ᨧᨾᩮᩣ ᩈᨲ᩠ᨲᩣᩅᩣᩈᩮᩣ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩈᨻ᩠ᨻᩈᩮᩣ ᩁᩪᨸᩈᨬ᩠ᨬᩣᨶᩴ ᩈᨾᨲᩥᨠ᩠ᨠᨾᩣ ᨸᨭᩥᨥᩈᨬ᩠ᨬᩣᨶᩴ ᩋᨲ᩠ᨳᨦ᩠ᨣᨾᩣ ᨶᩣᨶᨲ᩠ᨲᩈᨬ᩠ᨬᩣᨶᩴ ᩋᨾᨶᩈᩥᨠᩣᩁᩣ ‘ᩋᨶᨶ᩠ᨲᩮᩣ ᩌᨠᩣᩈᩮᩣ’ᨲᩥ ᩌᨠᩣᩈᩣᨶᨬ᩠ᨧᩣᨿᨲᨶᩪᨸᨣᩣ. ᩋᨿᩴ ᨨᨭ᩠ᨮᩮᩣ ᩈᨲ᩠ᨲᩣᩅᩣᩈᩮᩣ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩈᨻ᩠ᨻᩈᩮᩣ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᩋᨶᨶ᩠ᨲᩴ ᩅᩥᨬ᩠ᨬᩣᨱ’ᨶ᩠ᨲᩥ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩪᨸᨣᩣ. ᩋᨿᩴ ᩈᨲ᩠ᨲᨾᩮᩣ ᩈᨲ᩠ᨲᩣᩅᩣᩈᩮᩣ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩈᨻ᩠ᨻᩈᩮᩣ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᨶᨲ᩠ᨳᩥ ᨠᩥᨬ᩠ᨧᩦ’ᨲᩥ ᩌᨠᩥᨬ᩠ᨧᨬ᩠ᨬᩣᨿᨲᨶᩪᨸᨣᩣ. ᩋᨿᩴ ᩋᨭ᩠ᨮᨾᩮᩣ ᩈᨲ᩠ᨲᩣᩅᩣᩈᩮᩣ.

‘‘ᩈᨶ᩠ᨲᩣᩅᩩᩈᩮᩣ, ᩈᨲ᩠ᨲᩣ ᩈᨻ᩠ᨻᩈᩮᩣ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩪᨸᨣᩣ. ᩋᨿᩴ ᨶᩅᨾᩮᩣ ᩈᨲ᩠ᨲᩣᩅᩣᩈᩮᩣ. ᩍᨾᩮ ᨶᩅ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ.

(ᨥ) ‘‘ᨠᨲᨾᩮ ᨶᩅ ᨵᨾ᩠ᨾᩣ ᨸᩉᩣᨲᨻ᩠ᨻᩣ? ᨶᩅ ᨲᨱ᩠ᩉᩣᨾᩪᩃᨠᩣ ᨵᨾ᩠ᨾᩣ – ᨲᨱ᩠ᩉᩴ ᨸᨭᩥᨧ᩠ᨧ ᨸᩁᩥᨿᩮᩈᨶᩣ, ᨸᩁᩥᨿᩮᩈᨶᩴ ᨸᨭᩥᨧ᩠ᨧ ᩃᩣᨽᩮᩣ, ᩃᩣᨽᩴ ᨸᨭᩥᨧ᩠ᨧ ᩅᩥᨶᩥᨧ᩠ᨨᨿᩮᩣ, ᩅᩥᨶᩥᨧ᩠ᨨᨿᩴ ᨸᨭᩥᨧ᩠ᨧ ᨨᨶ᩠ᨴᩁᩣᨣᩮᩣ, ᨨᨶ᩠ᨴᩁᩣᨣᩴ ᨸᨭᩥᨧ᩠ᨧ ᩋᨩ᩠ᨫᩮᩣᩈᩣᨶᩴ, ᩋᨩ᩠ᨫᩮᩣᩈᩣᨶᩴ ᨸᨭᩥᨧ᩠ᨧ ᨸᩁᩥᨣ᩠ᨣᩉᩮᩣ, ᨸᩁᩥᨣ᩠ᨣᩉᩴ ᨸᨭᩥᨧ᩠ᨧ ᨾᨧ᩠ᨨᩁᩥᨿᩴ, ᨾᨧ᩠ᨨᩁᩥᨿᩴ ᨸᨭᩥᨧ᩠ᨧ ᩌᩁᨠ᩠ᨡᩮᩣ, ᩌᩁᨠ᩠ᨡᩣᨵᩥᨠᩁᨱᩴ [ᩌᩁᨠ᩠ᨡᩣᨵᩥᨠᩁᨱᩴ ᨸᨭᩥᨧ᩠ᨧ (ᩈ᩠ᨿᩣ. ᨸᩦ. ᨠ.)] ᨴᨱ᩠ᨯᩣᨴᩣᨶᩈᨲ᩠ᨳᩣᨴᩣᨶᨠᩃᩉᩅᩥᨣ᩠ᨣᩉᩅᩥᩅᩣᨴᨲᩩᩅᩴᨲᩩᩅᩴᨸᩮᩈᩩᨬ᩠ᨬᨾᩩᩈᩣᩅᩣᨴᩣ ᩋᨶᩮᨠᩮ ᨸᩣᨸᨠᩣ ᩋᨠᩩᩈᩃᩣ ᨵᨾ᩠ᨾᩣ ᩈᨾ᩠ᨽᩅᨶ᩠ᨲᩥ. ᩍᨾᩮ ᨶᩅ ᨵᨾ᩠ᨾᩣ ᨸᩉᩣᨲᨻ᩠ᨻᩣ.

(ᨦ) ‘‘ᨠᨲᨾᩮ ᨶᩅ ᨵᨾ᩠ᨾᩣ ᩉᩣᨶᨽᩣᨣᩥᨿᩣ? ᨶᩅ ᩌᨥᩣᨲᩅᨲ᩠ᨳᩪᨶᩥ – ‘ᩋᨶᨲ᩠ᨳᩴ ᨾᩮ ᩋᨧᩁᩦ’ᨲᩥ ᩌᨥᩣᨲᩴ ᨻᨶ᩠ᨵᨲᩥ, ‘ᩋᨶᨲ᩠ᨳᩴ ᨾᩮ ᨧᩁᨲᩦ’ᨲᩥ ᩌᨥᩣᨲᩴ ᨻᨶ᩠ᨵᨲᩥ, ‘ᩋᨶᨲ᩠ᨳᩴ ᨾᩮ ᨧᩁᩥᩔᨲᩦ’ᨲᩥ ᩌᨥᩣᨲᩴ ᨻᨶ᩠ᨵᨲᩥ; ‘ᨸᩥᨿᩔ ᨾᩮ ᨾᨶᩣᨸᩔ ᩋᨶᨲ᩠ᨳᩴ ᩋᨧᩁᩦ’ᨲᩥ ᩌᨥᩣᨲᩴ ᨻᨶ᩠ᨵᨲᩥ…ᨸᩮ… ‘ᩋᨶᨲ᩠ᨳᩴ ᨧᩁᨲᩦ’ᨲᩥ ᩌᨥᩣᨲᩴ ᨻᨶ᩠ᨵᨲᩥ…ᨸᩮ… ‘ᩋᨶᨲ᩠ᨳᩴ ᨧᩁᩥᩔᨲᩦ’ᨲᩥ ᩌᨥᩣᨲᩴ ᨻᨶ᩠ᨵᨲᩥ; ‘ᩋᨸ᩠ᨸᩥᨿᩔ ᨾᩮ ᩋᨾᨶᩣᨸᩔ ᩋᨲ᩠ᨳᩴ ᩋᨧᩁᩦ’ᨲᩥ ᩌᨥᩣᨲᩴ ᨻᨶ᩠ᨵᨲᩥ…ᨸᩮ… ‘ᩋᨲ᩠ᨳᩴ ᨧᩁᨲᩦ’ᨲᩥ ᩌᨥᩣᨲᩴ ᨻᨶ᩠ᨵᨲᩥ…ᨸᩮ… ‘ᩋᨲ᩠ᨳᩴ ᨧᩁᩥᩔᨲᩦ’ᨲᩥ ᩌᨥᩣᨲᩴ ᨻᨶ᩠ᨵᨲᩥ. ᩍᨾᩮ ᨶᩅ ᨵᨾ᩠ᨾᩣ ᩉᩣᨶᨽᩣᨣᩥᨿᩣ.

(ᨧ) ‘‘ᨠᨲᨾᩮ ᨶᩅ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ? ᨶᩅ ᩌᨥᩣᨲᨸᨭᩥᩅᩥᨶᨿᩣ – ‘ᩋᨶᨲ᩠ᨳᩴ ᨾᩮ ᩋᨧᩁᩥ, ᨲᩴ ᨠᩩᨲᩮᨲ᩠ᨳ ᩃᨻ᩠ᨽᩣ’ᨲᩥ ᩌᨥᩣᨲᩴ ᨸᨭᩥᩅᩥᨶᩮᨲᩥ; ‘ᩋᨶᨲ᩠ᨳᩴ ᨾᩮ ᨧᩁᨲᩥ, ᨲᩴ ᨠᩩᨲᩮᨲ᩠ᨳ ᩃᨻ᩠ᨽᩣ’ᨲᩥ ᩌᨥᩣᨲᩴ ᨸᨭᩥᩅᩥᨶᩮᨲᩥ; ‘ᩋᨶᨲ᩠ᨳᩴ ᨾᩮ ᨧᩁᩥᩔᨲᩥ, ᨲᩴ ᨠᩩᨲᩮᨲ᩠ᨳ ᩃᨻ᩠ᨽᩣ’ᨲᩥ ᩌᨥᩣᨲᩴ ᨸᨭᩥᩅᩥᨶᩮᨲᩥ; ‘ᨸᩥᨿᩔ ᨾᩮ ᨾᨶᩣᨸᩔ ᩋᨶᨲ᩠ᨳᩴ ᩋᨧᩁᩥ…ᨸᩮ… ᩋᨶᨲ᩠ᨳᩴ ᨧᩁᨲᩥ…ᨸᩮ… ᩋᨶᨲ᩠ᨳᩴ ᨧᩁᩥᩔᨲᩥ, ᨲᩴ ᨠᩩᨲᩮᨲ᩠ᨳ ᩃᨻ᩠ᨽᩣ’ᨲᩥ ᩌᨥᩣᨲᩴ ᨸᨭᩥᩅᩥᨶᩮᨲᩥ; ‘ᩋᨸ᩠ᨸᩥᨿᩔ ᨾᩮ ᩋᨾᨶᩣᨸᩔ ᩋᨲ᩠ᨳᩴ ᩋᨧᩁᩥ…ᨸᩮ… ᩋᨲ᩠ᨳᩴ ᨧᩁᨲᩥ…ᨸᩮ… ᩋᨲ᩠ᨳᩴ ᨧᩁᩥᩔᨲᩥ, ᨲᩴ ᨠᩩᨲᩮᨲ᩠ᨳ ᩃᨻ᩠ᨽᩣ’ᨲᩥ ᩌᨥᩣᨲᩴ ᨸᨭᩥᩅᩥᨶᩮᨲᩥ. ᩍᨾᩮ ᨶᩅ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ.

(ᨨ) ‘‘ᨠᨲᨾᩮ ᨶᩅ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ? ᨶᩅ ᨶᩣᨶᨲ᩠ᨲᩣ – ᨵᩣᨲᩩᨶᩣᨶᨲ᩠ᨲᩴ ᨸᨭᩥᨧ᩠ᨧ ᩏᨸ᩠ᨸᨩ᩠ᨩᨲᩥ ᨹᩔᨶᩣᨶᨲ᩠ᨲᩴ, ᨹᩔᨶᩣᨶᨲ᩠ᨲᩴ ᨸᨭᩥᨧ᩠ᨧ ᩏᨸ᩠ᨸᨩ᩠ᨩᨲᩥ ᩅᩮᨴᨶᩣᨶᩣᨶᨲ᩠ᨲᩴ, ᩅᩮᨴᨶᩣᨶᩣᨶᨲ᩠ᨲᩴ ᨸᨭᩥᨧ᩠ᨧ ᩏᨸ᩠ᨸᨩ᩠ᨩᨲᩥ ᩈᨬ᩠ᨬᩣᨶᩣᨶᨲ᩠ᨲᩴ, ᩈᨬ᩠ᨬᩣᨶᩣᨶᨲ᩠ᨲᩴ ᨸᨭᩥᨧ᩠ᨧ ᩏᨸ᩠ᨸᨩ᩠ᨩᨲᩥ ᩈᨦ᩠ᨠᨸ᩠ᨸᨶᩣᨶᨲ᩠ᨲᩴ, ᩈᨦ᩠ᨠᨸ᩠ᨸᨶᩣᨶᨲ᩠ᨲᩴ ᨸᨭᩥᨧ᩠ᨧ ᩏᨸ᩠ᨸᨩ᩠ᨩᨲᩥ ᨨᨶ᩠ᨴᨶᩣᨶᨲ᩠ᨲᩴ, ᨨᨶ᩠ᨴᨶᩣᨶᨲ᩠ᨲᩴ ᨸᨭᩥᨧ᩠ᨧ ᩏᨸ᩠ᨸᨩ᩠ᨩᨲᩥ ᨸᩁᩥᩊᩣᩉᨶᩣᨶᨲ᩠ᨲᩴ, ᨸᩁᩥᩊᩣᩉᨶᩣᨶᨲ᩠ᨲᩴ ᨸᨭᩥᨧ᩠ᨧ ᩏᨸ᩠ᨸᨩ᩠ᨩᨲᩥ ᨸᩁᩥᨿᩮᩈᨶᩣᨶᩣᨶᨲ᩠ᨲᩴ, ᨸᩁᩥᨿᩮᩈᨶᩣᨶᩣᨶᨲ᩠ᨲᩴ ᨸᨭᩥᨧ᩠ᨧ ᩏᨸ᩠ᨸᨩ᩠ᨩᨲᩥ ᩃᩣᨽᨶᩣᨶᨲ᩠ᨲᩴ. ᩍᨾᩮ ᨶᩅ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ.

(ᨩ) ‘‘ᨠᨲᨾᩮ ᨶᩅ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ? ᨶᩅ ᩈᨬ᩠ᨬᩣ – ᩋᩈᩩᨽᩈᨬ᩠ᨬᩣ, ᨾᩁᨱᩈᨬ᩠ᨬᩣ, ᩌᩉᩣᩁᩮᨸᨭᩥᨠᩪᩃᩈᨬ᩠ᨬᩣ, ᩈᨻ᩠ᨻᩃᩮᩣᨠᩮᩋᨶᨽᩥᩁᨲᩥᩈᨬ᩠ᨬᩣ [ᩋᨶᨽᩥᩁᨲᩈᨬ᩠ᨬᩣ (ᩈ᩠ᨿᩣ. ᨠ.)], ᩋᨶᩥᨧ᩠ᨧᩈᨬ᩠ᨬᩣ, ᩋᨶᩥᨧ᩠ᨧᩮ ᨴᩩᨠ᩠ᨡᩈᨬ᩠ᨬᩣ, ᨴᩩᨠ᩠ᨡᩮ ᩋᨶᨲ᩠ᨲᩈᨬ᩠ᨬᩣ, ᨸᩉᩣᨶᩈᨬ᩠ᨬᩣ, ᩅᩥᩁᩣᨣᩈᨬ᩠ᨬᩣ. ᩍᨾᩮ ᨶᩅ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ.

(ᨫ) ‘‘ᨠᨲᨾᩮ ᨶᩅ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ? ᨶᩅ ᩋᨶᩩᨸᩩᨻ᩠ᨻᩅᩥᩉᩣᩁᩣ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩅᩥᩅᩥᨧ᩠ᨧᩮᩅ ᨠᩣᨾᩮᩉᩥ ᩅᩥᩅᩥᨧ᩠ᨧ ᩋᨠᩩᩈᩃᩮᩉᩥ ᨵᨾ᩠ᨾᩮᩉᩥ ᩈᩅᩥᨲᨠ᩠ᨠᩴ ᩈᩅᩥᨧᩣᩁᩴ ᩅᩥᩅᩮᨠᨩᩴ ᨸᩦᨲᩥᩈᩩᨡᩴ ᨸᨮᨾᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩅᩥᨲᨠ᩠ᨠᩅᩥᨧᩣᩁᩣᨶᩴ ᩅᩪᨸᩈᨾᩣ…ᨸᩮ… ᨴᩩᨲᩥᨿᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᨸᩦᨲᩥᨿᩣ ᨧ ᩅᩥᩁᩣᨣᩣ …ᨸᩮ… ᨲᨲᩥᨿᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᩩᨡᩔ ᨧ ᨸᩉᩣᨶᩣ…ᨸᩮ… ᨧᨲᩩᨲ᩠ᨳᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᨻ᩠ᨻᩈᩮᩣ ᩁᩪᨸᩈᨬ᩠ᨬᩣᨶᩴ ᩈᨾᨲᩥᨠ᩠ᨠᨾᩣ…ᨸᩮ… ᩌᨠᩣᩈᩣᨶᨬ᩠ᨧᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᨻ᩠ᨻᩈᩮᩣ ᩌᨠᩣᩈᩣᨶᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᩋᨶᨶ᩠ᨲᩴ ᩅᩥᨬ᩠ᨬᩣᨱ’ᨶ᩠ᨲᩥ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᨻ᩠ᨻᩈᩮᩣ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ‘ᨶᨲ᩠ᨳᩥ ᨠᩥᨬ᩠ᨧᩦ’ᨲᩥ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᨻ᩠ᨻᩈᩮᩣ ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᨻ᩠ᨻᩈᩮᩣ ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ ᩈᨾᨲᩥᨠ᩠ᨠᨾ᩠ᨾ ᩈᨬ᩠ᨬᩣᩅᩮᨴᨿᩥᨲᨶᩥᩁᩮᩣᨵᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩍᨾᩮ ᨶᩅ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ.

(ᨬ) ‘‘ᨠᨲᨾᩮ ᨶᩅ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ? ᨶᩅ ᩋᨶᩩᨸᩩᨻ᩠ᨻᨶᩥᩁᩮᩣᨵᩣ – ᨸᨮᨾᩴ ᨫᩣᨶᩴ ᩈᨾᩣᨸᨶ᩠ᨶᩔ ᨠᩣᨾᩈᨬ᩠ᨬᩣ ᨶᩥᩁᩩᨴ᩠ᨵᩣ ᩉᩮᩣᨲᩥ, ᨴᩩᨲᩥᨿᩴ ᨫᩣᨶᩴ ᩈᨾᩣᨸᨶ᩠ᨶᩔ ᩅᩥᨲᨠ᩠ᨠᩅᩥᨧᩣᩁᩣ ᨶᩥᩁᩩᨴ᩠ᨵᩣ ᩉᩮᩣᨶ᩠ᨲᩥ, ᨲᨲᩥᨿᩴ ᨫᩣᨶᩴ ᩈᨾᩣᨸᨶ᩠ᨶᩔ ᨸᩦᨲᩥ ᨶᩥᩁᩩᨴ᩠ᨵᩣ ᩉᩮᩣᨲᩥ, ᨧᨲᩩᨲ᩠ᨳᩴ ᨫᩣᨶᩴ ᩈᨾᩣᨸᨶ᩠ᨶᩔ ᩋᩔᩣᩈᨸᩔᩣᩔᩣ ᨶᩥᩁᩩᨴ᩠ᨵᩣ ᩉᩮᩣᨶ᩠ᨲᩥ, ᩌᨠᩣᩈᩣᨶᨬ᩠ᨧᩣᨿᨲᨶᩴ ᩈᨾᩣᨸᨶ᩠ᨶᩔ ᩁᩪᨸᩈᨬ᩠ᨬᩣ ᨶᩥᩁᩩᨴ᩠ᨵᩣ ᩉᩮᩣᨲᩥ, ᩅᩥᨬ᩠ᨬᩣᨱᨬ᩠ᨧᩣᨿᨲᨶᩴ ᩈᨾᩣᨸᨶ᩠ᨶᩔ ᩌᨠᩣᩈᩣᨶᨬ᩠ᨧᩣᨿᨲᨶᩈᨬ᩠ᨬᩣ ᨶᩥᩁᩩᨴ᩠ᨵᩣ ᩉᩮᩣᨲᩥ, ᩌᨠᩥᨬ᩠ᨧᨬ᩠ᨬᩣᨿᨲᨶᩴ ᩈᨾᩣᨸᨶ᩠ᨶᩔ ᩅᩥᨬ᩠ᨬᩣᨱᨬ᩠ᨧᩣᨿᨲᨶᩈᨬ᩠ᨬᩣ ᨶᩥᩁᩩᨴ᩠ᨵᩣ ᩉᩮᩣᨲᩥ, ᨶᩮᩅᩈᨬ᩠ᨬᩣᨶᩣᩈᨬ᩠ᨬᩣᨿᨲᨶᩴ ᩈᨾᩣᨸᨶ᩠ᨶᩔ ᩌᨠᩥᨬ᩠ᨧᨬ᩠ᨬᩣᨿᨲᨶᩈᨬ᩠ᨬᩣ ᨶᩥᩁᩩᨴ᩠ᨵᩣ ᩉᩮᩣᨲᩥ, ᩈᨬ᩠ᨬᩣᩅᩮᨴᨿᩥᨲᨶᩥᩁᩮᩣᨵᩴ ᩈᨾᩣᨸᨶ᩠ᨶᩔ ᩈᨬ᩠ᨬᩣ ᨧ ᩅᩮᨴᨶᩣ ᨧ ᨶᩥᩁᩩᨴ᩠ᨵᩣ ᩉᩮᩣᨶ᩠ᨲᩥ. ᩍᨾᩮ ᨶᩅ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

‘‘ᩍᨲᩥ ᩍᨾᩮ ᨶᩅᩩᨲᩥ ᨵᨾ᩠ᨾᩣ ᨽᩪᨲᩣ ᨲᨧ᩠ᨨᩣ ᨲᨳᩣ ᩋᩅᩥᨲᨳᩣ ᩋᨶᨬ᩠ᨬᨳᩣ ᩈᨾ᩠ᨾᩣ ᨲᨳᩣᨣᨲᩮᨶ ᩋᨽᩥᩈᨾ᩠ᨻᩩᨴ᩠ᨵᩣ.

ᨴᩈ ᨵᨾ᩠ᨾᩣ

᪓᪖᪐. ‘‘ᨴᩈ ᨵᨾ᩠ᨾᩣ ᨻᩉᩩᨠᩣᩁᩣ…ᨸᩮ… ᨴᩈ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

(ᨠ) ‘‘ᨠᨲᨾᩮ ᨴᩈ ᨵᨾ᩠ᨾᩣ ᨻᩉᩩᨠᩣᩁᩣ? ᨴᩈ ᨶᩣᨳᨠᩁᨱᩣᨵᨾ᩠ᨾᩣ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᩦᩃᩅᩣ ᩉᩮᩣᨲᩥ, ᨸᩣᨲᩥᨾᩮᩣᨠ᩠ᨡᩈᩴᩅᩁᩈᩴᩅᩩᨲᩮᩣ ᩅᩥᩉᩁᨲᩥ ᩌᨧᩣᩁᨣᩮᩣᨧᩁᩈᨾ᩠ᨸᨶ᩠ᨶᩮᩣ, ᩋᨱᩩᨾᨲ᩠ᨲᩮᩈᩩ ᩅᨩ᩠ᨩᩮᩈᩩ ᨽᨿᨴᩔᩣᩅᩦ ᩈᨾᩣᨴᩣᨿ ᩈᩥᨠ᩠ᨡᨲᩥ ᩈᩥᨠ᩠ᨡᩣᨸᨴᩮᩈᩩ, ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ ᩈᩦᩃᩅᩣ ᩉᩮᩣᨲᩥ…ᨸᩮ… ᩈᩥᨠ᩠ᨡᨲᩥ ᩈᩥᨠ᩠ᨡᩣᨸᨴᩮᩈᩩ. ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨻᩉᩩᩔᩩᨲᩮᩣ …ᨸᩮ… ᨴᩥᨭ᩠ᨮᩥᨿᩣ ᩈᩩᨸ᩠ᨸᨭᩥᩅᩥᨴ᩠ᨵᩣ, ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ ᨻᩉᩩᩔᩩᨲᩮᩣ…ᨸᩮ… ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨠᩃ᩠ᨿᩣᨱᨾᩥᨲ᩠ᨲᩮᩣ ᩉᩮᩣᨲᩥ ᨠᩃ᩠ᨿᩣᨱᩈᩉᩣᨿᩮᩣ ᨠᩃ᩠ᨿᩣᨱᩈᨾ᩠ᨸᩅᨦ᩠ᨠᩮᩣ. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ…ᨸᩮ… ᨠᩃ᩠ᨿᩣᨱᩈᨾ᩠ᨸᩅᨦ᩠ᨠᩮᩣ. ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᩩᩅᨧᩮᩣ ᩉᩮᩣᨲᩥ ᩈᩮᩣᩅᨧᩔᨠᩁᨱᩮᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ, ᨡᨾᩮᩣ ᨸᨴᨠ᩠ᨡᩥᨱᨣ᩠ᨣᩣᩉᩦ ᩋᨶᩩᩈᩣᩈᨶᩥᩴ. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ…ᨸᩮ… ᩋᨶᩩᩈᩣᩈᨶᩥᩴ. ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨿᩣᨶᩥ ᨲᩣᨶᩥ ᩈᨻᩕᩉ᩠ᨾᨧᩣᩁᩦᨶᩴ ᩏᨧ᩠ᨧᩣᩅᨧᩣᨶᩥ ᨠᩥᩴᨠᩁᨱᩦᨿᩣᨶᩥ ᨲᨲ᩠ᨳ ᨴᨠ᩠ᨡᩮᩣ ᩉᩮᩣᨲᩥ ᩋᨶᩃᩈᩮᩣ ᨲᨲᩕᩩᨸᩣᨿᩣᨿ ᩅᩦᨾᩴᩈᩣᨿ ᩈᨾᨶ᩠ᨶᩣᨣᨲᩮᩣ, ᩋᩃᩴ ᨠᩣᨲᩩᩴ, ᩋᩃᩴ ᩈᩴᩅᩥᨵᩣᨲᩩᩴ. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ…ᨸᩮ… ᩋᩃᩴ ᩈᩴᩅᩥᨵᩣᨲᩩᩴ. ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨵᨾ᩠ᨾᨠᩣᨾᩮᩣ ᩉᩮᩣᨲᩥ ᨸᩥᨿᩈᨾᩩᨴᩣᩉᩣᩁᩮᩣ ᩋᨽᩥᨵᨾ᩠ᨾᩮ ᩋᨽᩥᩅᩥᨶᨿᩮ ᩏᩊᩣᩁᨸᩣᨾᩮᩣᨩ᩠ᨩᩮᩣ. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ…ᨸᩮ… ᩏᩊᩣᩁᨸᩣᨾᩮᩣᨩ᩠ᨩᩮᩣ. ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᨶ᩠ᨲᩩᨭ᩠ᨮᩮᩣ ᩉᩮᩣᨲᩥ ᩍᨲᩁᩦᨲᩁᩮᩉᩥ ᨧᩦᩅᩁᨸᩥᨱ᩠ᨯᨸᩣᨲᩈᩮᨶᩣᩈᨶᨣᩥᩃᩣᨶᨸ᩠ᨸᨧ᩠ᨧᨿᨽᩮᩈᨩ᩠ᨩᨸᩁᩥᨠ᩠ᨡᩣᩁᩮᩉᩥ. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ …ᨸᩮ… ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᩌᩁᨴ᩠ᨵᩅᩦᩁᩥᨿᩮᩣ ᩅᩥᩉᩁᨲᩥ…ᨸᩮ… ᨠᩩᩈᩃᩮᩈᩩ ᨵᨾ᩠ᨾᩮᩈᩩ. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ…ᨸᩮ… ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᨲᩥᨾᩣ ᩉᩮᩣᨲᩥ, ᨸᩁᨾᩮᨶ ᩈᨲᩥᨶᩮᨸᨠ᩠ᨠᩮᨶ ᩈᨾᨶ᩠ᨶᩣᨣᨲᩮᩣ, ᨧᩥᩁᨠᨲᨾ᩠ᨸᩥ ᨧᩥᩁᨽᩣᩈᩥᨲᨾ᩠ᨸᩥ ᩈᩁᩥᨲᩣ ᩋᨶᩩᩔᩁᩥᨲᩣ. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ…ᨸᩮ… ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ.

‘‘ᨸᩩᨶ ᨧᨸᩁᩴ, ᩌᩅᩩᩈᩮᩣ, ᨽᩥᨠ᩠ᨡᩩ ᨸᨬ᩠ᨬᩅᩣ ᩉᩮᩣᨲᩥ ᩏᨴᨿᨲ᩠ᨳᨣᩣᨾᩥᨶᩥᨿᩣ ᨸᨬ᩠ᨬᩣᨿ ᩈᨾᨶ᩠ᨶᩣᨣᨲᩮᩣ, ᩋᩁᩥᨿᩣᨿ ᨶᩥᨻ᩠ᨻᩮᨵᩥᨠᩣᨿ ᩈᨾ᩠ᨾᩣ ᨴᩩᨠ᩠ᨡᨠ᩠ᨡᨿᨣᩣᨾᩥᨶᩥᨿᩣ. ᨿᩴᨸᩣᩅᩩᩈᩮᩣ, ᨽᩥᨠ᩠ᨡᩩ…ᨸᩮ… ᩋᨿᨾ᩠ᨸᩥ ᨵᨾ᩠ᨾᩮᩣ ᨶᩣᨳᨠᩁᨱᩮᩣ. ᩍᨾᩮ ᨴᩈ ᨵᨾ᩠ᨾᩣ ᨻᩉᩩᨠᩣᩁᩣ.

(ᨡ) ‘‘ᨠᨲᨾᩮ ᨴᩈ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ? ᨴᩈ ᨠᩈᩥᨱᩣᨿᨲᨶᩣᨶᩥ – ᨸᨳᩅᩦᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ ᩏᨴ᩠ᨵᩴ ᩋᨵᩮᩣ ᨲᩥᩁᩥᨿᩴ ᩋᨴ᩠ᩅᨿᩴ ᩋᨸ᩠ᨸᨾᩣᨱᩴ. ᩌᨸᩮᩣᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ…ᨸᩮ… ᨲᩮᨩᩮᩣᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ… ᩅᩣᨿᩮᩣᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ… ᨶᩦᩃᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ… ᨸᩦᨲᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ… ᩃᩮᩣᩉᩥᨲᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ… ᩒᨴᩣᨲᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ… ᩌᨠᩣᩈᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ… ᩅᩥᨬ᩠ᨬᩣᨱᨠᩈᩥᨱᨾᩮᨠᩮᩣ ᩈᨬ᩠ᨩᩣᨶᩣᨲᩥ ᩏᨴ᩠ᨵᩴ ᩋᨵᩮᩣ ᨲᩥᩁᩥᨿᩴ ᩋᨴ᩠ᩅᨿᩴ ᩋᨸ᩠ᨸᨾᩣᨱᩴ. ᩍᨾᩮ ᨴᩈ ᨵᨾ᩠ᨾᩣ ᨽᩣᩅᩮᨲᨻ᩠ᨻᩣ.

(ᨣ) ‘‘ᨠᨲᨾᩮ ᨴᩈ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ? ᨴᩈᩣᨿᨲᨶᩣᨶᩥ – ᨧᨠ᩠ᨡᩣᨿᨲᨶᩴ, ᩁᩪᨸᩣᨿᨲᨶᩴ, ᩈᩮᩣᨲᩣᨿᨲᨶᩴ, ᩈᨴ᩠ᨴᩣᨿᨲᨶᩴ, ᨥᩣᨶᩣᨿᨲᨶᩴ, ᨣᨶ᩠ᨵᩣᨿᨲᨶᩴ, ᨩᩥᩅ᩠ᩉᩣᨿᨲᨶᩴ, ᩁᩈᩣᨿᨲᨶᩴ, ᨠᩣᨿᩣᨿᨲᨶᩴ, ᨹᩮᩣᨭ᩠ᨮᨻ᩠ᨻᩣᨿᨲᨶᩴ. ᩍᨾᩮ ᨴᩈ ᨵᨾ᩠ᨾᩣ ᨸᩁᩥᨬ᩠ᨬᩮᨿ᩠ᨿᩣ.

(ᨥ) ‘‘ᨠᨲᨾᩮ ᨴᩈ ᨵᨾ᩠ᨾᩣ ᨸᩉᩣᨲᨻ᩠ᨻᩣ? ᨴᩈ ᨾᩥᨧ᩠ᨨᨲ᩠ᨲᩣ – ᨾᩥᨧ᩠ᨨᩣᨴᩥᨭ᩠ᨮᩥ, ᨾᩥᨧ᩠ᨨᩣᩈᨦ᩠ᨠᨸ᩠ᨸᩮᩣ, ᨾᩥᨧ᩠ᨨᩣᩅᩣᨧᩣ, ᨾᩥᨧ᩠ᨨᩣᨠᨾ᩠ᨾᨶ᩠ᨲᩮᩣ, ᨾᩥᨧ᩠ᨨᩣᩌᨩᩦᩅᩮᩣ, ᨾᩥᨧ᩠ᨨᩣᩅᩣᨿᩣᨾᩮᩣ, ᨾᩥᨧ᩠ᨨᩣᩈᨲᩥ, ᨾᩥᨧ᩠ᨨᩣᩈᨾᩣᨵᩥ, ᨾᩥᨧ᩠ᨨᩣᨬᩣᨱᩴ, ᨾᩥᨧ᩠ᨨᩣᩅᩥᨾᩩᨲ᩠ᨲᩥ. ᩍᨾᩮ ᨴᩈ ᨵᨾ᩠ᨾᩣ ᨸᩉᩣᨲᨻ᩠ᨻᩣ.

(ᨦ) ‘‘ᨠᨲᨾᩮ ᨴᩈ ᨵᨾ᩠ᨾᩣ ᩉᩣᨶᨽᩣᨣᩥᨿᩣ? ᨴᩈ ᩋᨠᩩᩈᩃᨠᨾ᩠ᨾᨸᨳᩣ – ᨸᩣᨱᩣᨲᩥᨸᩣᨲᩮᩣ, ᩋᨴᩥᨶ᩠ᨶᩣᨴᩣᨶᩴ, ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩮᩣ, ᨾᩩᩈᩣᩅᩣᨴᩮᩣ, ᨸᩥᩈᩩᨱᩣ ᩅᩣᨧᩣ, ᨹᩁᩩᩈᩣ ᩅᩣᨧᩣ, ᩈᨾ᩠ᨹᨸ᩠ᨸᩃᩣᨸᩮᩣ, ᩋᨽᩥᨩ᩠ᨫᩣ, ᨻ᩠ᨿᩣᨸᩣᨴᩮᩣ, ᨾᩥᨧ᩠ᨨᩣᨴᩥᨭ᩠ᨮᩥ. ᩍᨾᩮ ᨴᩈ ᨵᨾ᩠ᨾᩣ ᩉᩣᨶᨽᩣᨣᩥᨿᩣ.

(ᨧ) ‘‘ᨠᨲᨾᩮ ᨴᩈ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ? ᨴᩈ ᨠᩩᩈᩃᨠᨾ᩠ᨾᨸᨳᩣ – ᨸᩣᨱᩣᨲᩥᨸᩣᨲᩣ ᩅᩮᩁᨾᨱᩦ, ᩋᨴᩥᨶ᩠ᨶᩣᨴᩣᨶᩣ ᩅᩮᩁᨾᨱᩦ, ᨠᩣᨾᩮᩈᩩᨾᩥᨧ᩠ᨨᩣᨧᩣᩁᩣ ᩅᩮᩁᨾᨱᩦ, ᨾᩩᩈᩣᩅᩣᨴᩣ ᩅᩮᩁᨾᨱᩦ, ᨸᩥᩈᩩᨱᩣᨿ ᩅᩣᨧᩣᨿ ᩅᩮᩁᨾᨱᩦ, ᨹᩁᩩᩈᩣᨿ ᩅᩣᨧᩣᨿ ᩅᩮᩁᨾᨱᩦ, ᩈᨾ᩠ᨹᨸ᩠ᨸᩃᩣᨸᩣ ᩅᩮᩁᨾᨱᩦ, ᩋᨶᨽᩥᨩ᩠ᨫᩣ, ᩋᨻ᩠ᨿᩣᨸᩣᨴᩮᩣ, ᩈᨾ᩠ᨾᩣᨴᩥᨭ᩠ᨮᩥ. ᩍᨾᩮ ᨴᩈ ᨵᨾ᩠ᨾᩣ ᩅᩥᩈᩮᩈᨽᩣᨣᩥᨿᩣ.

(ᨨ) ‘‘ᨠᨲᨾᩮ ᨴᩈ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ? ᨴᩈ ᩋᩁᩥᨿᩅᩣᩈᩣ – ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨸᨬ᩠ᨧᨦ᩠ᨣᩅᩥᨸ᩠ᨸᩉᩦᨶᩮᩣ ᩉᩮᩣᨲᩥ, ᨨᩊᨦ᩠ᨣᩈᨾᨶ᩠ᨶᩣᨣᨲᩮᩣ, ᩑᨠᩣᩁᨠ᩠ᨡᩮᩣ, ᨧᨲᩩᩁᩣᨸᩔᩮᨶᩮᩣ, ᨸᨱᩩᨶ᩠ᨶᨸᨧ᩠ᨧᩮᨠᩈᨧ᩠ᨧᩮᩣ, ᩈᨾᩅᨿᩈᨭ᩠ᨮᩮᩈᨶᩮᩣ, ᩋᨶᩣᩅᩥᩃᩈᨦ᩠ᨠᨸ᩠ᨸᩮᩣ, ᨸᩔᨴ᩠ᨵᨠᩣᨿᩈᨦ᩠ᨡᩣᩁᩮᩣ, ᩈᩩᩅᩥᨾᩩᨲ᩠ᨲᨧᩥᨲ᩠ᨲᩮᩣ, ᩈᩩᩅᩥᨾᩩᨲ᩠ᨲᨸᨬ᩠ᨬᩮᩣ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᨸᨬ᩠ᨧᨦ᩠ᨣᩅᩥᨸ᩠ᨸᩉᩦᨶᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨠᩣᨾᨧ᩠ᨨᨶ᩠ᨴᩮᩣ ᨸᩉᩦᨶᩮᩣ ᩉᩮᩣᨲᩥ, ᨻ᩠ᨿᩣᨸᩣᨴᩮᩣ ᨸᩉᩦᨶᩮᩣ ᩉᩮᩣᨲᩥ, ᨳᩥᨶᨾᩥᨴ᩠ᨵᩴ ᨸᩉᩦᨶᩴ ᩉᩮᩣᨲᩥ, ᩏᨴ᩠ᨵᨧ᩠ᨧᨠᩩᨠ᩠ᨠᩩᨧ᩠ᨧᩴ ᨸᩉᩦᨶᩴ ᩉᩮᩣᨲᩥ, ᩅᩥᨧᩥᨠᩥᨧ᩠ᨨᩣ ᨸᩉᩦᨶᩣ ᩉᩮᩣᨲᩥ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᨸᨬ᩠ᨧᨦ᩠ᨣᩅᩥᨸ᩠ᨸᩉᩦᨶᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᨨᩊᨦ᩠ᨣᩈᨾᨶ᩠ᨶᩣᨣᨲᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᨧᨠ᩠ᨡᩩᨶᩣ ᩁᩪᨸᩴ ᨴᩥᩈ᩠ᩅᩣ ᨶᩮᩅ ᩈᩩᨾᨶᩮᩣ ᩉᩮᩣᨲᩥ ᨶ ᨴᩩᨾ᩠ᨾᨶᩮᩣ, ᩏᨸᩮᨠ᩠ᨡᨠᩮᩣ ᩅᩥᩉᩁᨲᩥ ᩈᨲᩮᩣ ᩈᨾ᩠ᨸᨩᩣᨶᩮᩣ. ᩈᩮᩣᨲᩮᨶ ᩈᨴ᩠ᨴᩴ ᩈᩩᨲ᩠ᩅᩣ…ᨸᩮ… ᨥᩣᨶᩮᨶ ᨣᨶ᩠ᨵᩴ ᨥᩣᨿᩥᨲ᩠ᩅᩣ… ᨩᩥᩅ᩠ᩉᩣᨿ ᩁᩈᩴ ᩈᩣᨿᩥᨲ᩠ᩅᩣ… ᨠᩣᨿᩮᨶ ᨹᩮᩣᨭ᩠ᨮᨻ᩠ᨻᩴ ᨹᩩᩈᩥᨲ᩠ᩅᩣ… ᨾᨶᩈᩣ ᨵᨾ᩠ᨾᩴ ᩅᩥᨬ᩠ᨬᩣᨿ ᨶᩮᩅ ᩈᩩᨾᨶᩮᩣ ᩉᩮᩣᨲᩥ ᨶ ᨴᩩᨾ᩠ᨾᨶᩮᩣ, ᩏᨸᩮᨠ᩠ᨡᨠᩮᩣ ᩅᩥᩉᩁᨲᩥ ᩈᨲᩮᩣ ᩈᨾ᩠ᨸᨩᩣᨶᩮᩣ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᨨᩊᨦ᩠ᨣᩈᨾᨶ᩠ᨶᩣᨣᨲᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᩑᨠᩣᩁᨠ᩠ᨡᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨲᩣᩁᨠ᩠ᨡᩮᨶ ᨧᩮᨲᩈᩣ ᩈᨾᨶ᩠ᨶᩣᨣᨲᩮᩣ ᩉᩮᩣᨲᩥ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩑᨠᩣᩁᨠ᩠ᨡᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᨧᨲᩩᩁᩣᨸᩔᩮᨶᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᨦ᩠ᨡᩣᨿᩮᨠᩴ ᨸᨭᩥᩈᩮᩅᨲᩥ, ᩈᨦ᩠ᨡᩣᨿᩮᨠᩴ ᩋᨵᩥᩅᩣᩈᩮᨲᩥ, ᩈᨦ᩠ᨡᩣᨿᩮᨠᩴ ᨸᩁᩥᩅᨩ᩠ᨩᩮᨲᩥ, ᩈᨦ᩠ᨡᩣᨿᩮᨠᩴ ᩅᩥᨶᩮᩣᨴᩮᨲᩥ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᨧᨲᩩᩁᩣᨸᩔᩮᨶᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᨸᨱᩩᨶ᩠ᨶᨸᨧ᩠ᨧᩮᨠᩈᨧ᩠ᨧᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨿᩣᨶᩥ ᨲᩣᨶᩥ ᨸᩩᨳᩩᩈᨾᨱᨻᩕᩣᩉ᩠ᨾᨱᩣᨶᩴ ᨸᩩᨳᩩᨸᨧ᩠ᨧᩮᨠᩈᨧ᩠ᨧᩣᨶᩥ, ᩈᨻ᩠ᨻᩣᨶᩥ ᨲᩣᨶᩥ ᨶᩩᨶ᩠ᨶᩣᨶᩥ ᩉᩮᩣᨶ᩠ᨲᩥ ᨸᨱᩩᨶ᩠ᨶᩣᨶᩥ ᨧᨲ᩠ᨲᩣᨶᩥ ᩅᨶ᩠ᨲᩣᨶᩥ ᨾᩩᨲ᩠ᨲᩣᨶᩥ ᨸᩉᩦᨶᩣᨶᩥ ᨸᨭᩥᨶᩥᩔᨭ᩠ᨮᩣᨶᩥ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᨸᨱᩩᨶ᩠ᨶᨸᨧ᩠ᨧᩮᨠᩈᨧ᩠ᨧᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᩈᨾᩅᨿᩈᨭ᩠ᨮᩮᩈᨶᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨠᩣᨾᩮᩈᨶᩣ ᨸᩉᩦᨶᩣ ᩉᩮᩣᨲᩥ, ᨽᩅᩮᩈᨶᩣ ᨸᩉᩦᨶᩣ ᩉᩮᩣᨲᩥ, ᨻᩕᩉ᩠ᨾᨧᩁᩥᨿᩮᩈᨶᩣ ᨸᨭᩥᨸ᩠ᨸᩔᨴ᩠ᨵᩣ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᨾᩅᨿᩈᨭ᩠ᨮᩮᩈᨶᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᩋᨶᩣᩅᩥᩃᩈᨦ᩠ᨠᨸ᩠ᨸᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᨠᩣᨾᩈᨦ᩠ᨠᨸ᩠ᨸᩮᩣ ᨸᩉᩦᨶᩮᩣ ᩉᩮᩣᨲᩥ, ᨻ᩠ᨿᩣᨸᩣᨴᩈᨦ᩠ᨠᨸ᩠ᨸᩮᩣ ᨸᩉᩦᨶᩮᩣ ᩉᩮᩣᨲᩥ, ᩅᩥᩉᩥᩴᩈᩣᩈᨦ᩠ᨠᨸ᩠ᨸᩮᩣ ᨸᩉᩦᨶᩮᩣ ᩉᩮᩣᨲᩥ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩋᨶᩣᩅᩥᩃᩈᨦ᩠ᨠᨸ᩠ᨸᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᨸᩔᨴ᩠ᨵᨠᩣᨿᩈᨦ᩠ᨡᩣᩁᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ᩈᩩᨡᩔ ᨧ ᨸᩉᩣᨶᩣ ᨴᩩᨠ᩠ᨡᩔ ᨧ ᨸᩉᩣᨶᩣ ᨸᩩᨻ᩠ᨻᩮᩅ ᩈᩮᩣᨾᨶᩔᨴᩮᩣᨾᨶᩔᩣᨶᩴ ᩋᨲ᩠ᨳᨦ᩠ᨣᨾᩣ ᩋᨴᩩᨠ᩠ᨡᨾᩈᩩᨡᩴ ᩏᨸᩮᨠ᩠ᨡᩣᩈᨲᩥᨸᩣᩁᩥᩈᩩᨴ᩠ᨵᩥᩴ ᨧᨲᩩᨲ᩠ᨳᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᨸᩔᨴ᩠ᨵᨠᩣᨿᩈᨦ᩠ᨡᩣᩁᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᩈᩩᩅᩥᨾᩩᨲ᩠ᨲᨧᩥᨲ᩠ᨲᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩᨶᩮᩣ ᩁᩣᨣᩣ ᨧᩥᨲ᩠ᨲᩴ ᩅᩥᨾᩩᨲ᩠ᨲᩴ ᩉᩮᩣᨲᩥ, ᨴᩮᩣᩈᩣ ᨧᩥᨲ᩠ᨲᩴ ᩅᩥᨾᩩᨲ᩠ᨲᩴ ᩉᩮᩣᨲᩥ, ᨾᩮᩣᩉᩣ ᨧᩥᨲ᩠ᨲᩴ ᩅᩥᨾᩩᨲ᩠ᨲᩴ ᩉᩮᩣᨲᩥ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᩩᩅᩥᨾᩩᨲ᩠ᨲᨧᩥᨲ᩠ᨲᩮᩣ ᩉᩮᩣᨲᩥ.

‘‘ᨠᨳᨬ᩠ᨧᩣᩅᩩᩈᩮᩣ, ᨽᩥᨠ᩠ᨡᩩ ᩈᩩᩅᩥᨾᩩᨲ᩠ᨲᨸᨬ᩠ᨬᩮᩣ ᩉᩮᩣᨲᩥ? ᩍᨵᩣᩅᩩᩈᩮᩣ, ᨽᩥᨠ᩠ᨡᩩ ‘ᩁᩣᨣᩮᩣ ᨾᩮ ᨸᩉᩦᨶᩮᩣ ᩏᨧ᩠ᨨᩥᨶ᩠ᨶᨾᩪᩃᩮᩣ ᨲᩣᩃᩣᩅᨲ᩠ᨳᩩᨠᨲᩮᩣ ᩋᨶᨽᩣᩅᩴᨠᨲᩮᩣ ᩌᨿᨲᩥᩴ ᩋᨶᩩᨸ᩠ᨸᩣᨴᨵᨾ᩠ᨾᩮᩣ’ᨲᩥ ᨸᨩᩣᨶᩣᨲᩥ. ‘ᨴᩮᩣᩈᩮᩣ ᨾᩮ ᨸᩉᩦᨶᩮᩣ…ᨸᩮ… ᩌᨿᨲᩥᩴ ᩋᨶᩩᨸ᩠ᨸᩣᨴᨵᨾ᩠ᨾᩮᩣ’ᨲᩥ ᨸᨩᩣᨶᩣᨲᩥ. ‘ᨾᩮᩣᩉᩮᩣ ᨾᩮ ᨸᩉᩦᨶᩮᩣ …ᨸᩮ… ᩌᨿᨲᩥᩴ ᩋᨶᩩᨸ᩠ᨸᩣᨴᨵᨾ᩠ᨾᩮᩣ’ᨲᩥ ᨸᨩᩣᨶᩣᨲᩥ. ᩑᩅᩴ ᨡᩮᩣ, ᩌᩅᩩᩈᩮᩣ, ᨽᩥᨠ᩠ᨡᩩ ᩈᩩᩅᩥᨾᩩᨲ᩠ᨲᨸᨬ᩠ᨬᩮᩣ ᩉᩮᩣᨲᩥ. ᩍᨾᩮ ᨴᩈ ᨵᨾ᩠ᨾᩣ ᨴᩩᨸ᩠ᨸᨭᩥᩅᩥᨩ᩠ᨫᩣ.

(ᨩ) ‘‘ᨠᨲᨾᩮ ᨴᩈ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ? ᨴᩈ ᩈᨬ᩠ᨬᩣ – ᩋᩈᩩᨽᩈᨬ᩠ᨬᩣ, ᨾᩁᨱᩈᨬ᩠ᨬᩣ, ᩌᩉᩣᩁᩮᨸᨭᩥᨠᩪᩃᩈᨬ᩠ᨬᩣ, ᩈᨻ᩠ᨻᩃᩮᩣᨠᩮᩋᨶᨽᩥᩁᨲᩥᩈᨬ᩠ᨬᩣ, ᩋᨶᩥᨧ᩠ᨧᩈᨬ᩠ᨬᩣ, ᩋᨶᩥᨧ᩠ᨧᩮ ᨴᩩᨠ᩠ᨡᩈᨬ᩠ᨬᩣ, ᨴᩩᨠ᩠ᨡᩮ ᩋᨶᨲ᩠ᨲᩈᨬ᩠ᨬᩣ, ᨸᩉᩣᨶᩈᨬ᩠ᨬᩣ, ᩅᩥᩁᩣᨣᩈᨬ᩠ᨬᩣ, ᨶᩥᩁᩮᩣᨵᩈᨬ᩠ᨬᩣ. ᩍᨾᩮ ᨴᩈ ᨵᨾ᩠ᨾᩣ ᩏᨸ᩠ᨸᩣᨴᩮᨲᨻ᩠ᨻᩣ.

(ᨫ) ‘‘ᨠᨲᨾᩮ ᨴᩈ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ? ᨴᩈ ᨶᩥᨩ᩠ᨩᩁᩅᨲ᩠ᨳᩪᨶᩥ – ᩈᨾ᩠ᨾᩣᨴᩥᨭ᩠ᨮᩥᩔ ᨾᩥᨧ᩠ᨨᩣᨴᩥᨭ᩠ᨮᩥ ᨶᩥᨩ᩠ᨩᩥᨱ᩠ᨱᩣ ᩉᩮᩣᨲᩥ. ᨿᩮ ᨧ ᨾᩥᨧ᩠ᨨᩣᨴᩥᨭ᩠ᨮᩥᨸᨧ᩠ᨧᨿᩣ ᩋᨶᩮᨠᩮ ᨸᩣᨸᨠᩣ ᩋᨠᩩᩈᩃᩣ ᨵᨾ᩠ᨾᩣ ᩈᨾ᩠ᨽᩅᨶ᩠ᨲᩥ, ᨲᩮ ᨧᩔ ᨶᩥᨩ᩠ᨩᩥᨱ᩠ᨱᩣ ᩉᩮᩣᨶ᩠ᨲᩥ. ᩈᨾ᩠ᨾᩣᩈᨦ᩠ᨠᨸ᩠ᨸᩔ ᨾᩥᨧ᩠ᨨᩣᩈᨦ᩠ᨠᨸ᩠ᨸᩮᩣ…ᨸᩮ… ᩈᨾ᩠ᨾᩣᩅᩣᨧᩔ ᨾᩥᨧ᩠ᨨᩣᩅᩣᨧᩣ… ᩈᨾ᩠ᨾᩣᨠᨾ᩠ᨾᨶ᩠ᨲᩔ ᨾᩥᨧ᩠ᨨᩣᨠᨾ᩠ᨾᨶ᩠ᨲᩮᩣ… ᩈᨾ᩠ᨾᩣᩌᨩᩦᩅᩔ ᨾᩥᨧ᩠ᨨᩣᩌᨩᩦᩅᩮᩣ… ᩈᨾ᩠ᨾᩣᩅᩣᨿᩣᨾᩔ ᨾᩥᨧ᩠ᨨᩣᩅᩣᨿᩣᨾᩮᩣ… ᩈᨾ᩠ᨾᩣᩈᨲᩥᩔ ᨾᩥᨧ᩠ᨨᩣᩈᨲᩥ… ᩈᨾ᩠ᨾᩣᩈᨾᩣᨵᩥᩔ ᨾᩥᨧ᩠ᨨᩣᩈᨾᩣᨵᩥ… ᩈᨾ᩠ᨾᩣᨬᩣᨱᩔ ᨾᩥᨧ᩠ᨨᩣᨬᩣᨱᩴ ᨶᩥᨩ᩠ᨩᩥᨱ᩠ᨱᩴ ᩉᩮᩣᨲᩥ. ᩈᨾ᩠ᨾᩣᩅᩥᨾᩩᨲ᩠ᨲᩥᩔ ᨾᩥᨧ᩠ᨨᩣᩅᩥᨾᩩᨲ᩠ᨲᩥ ᨶᩥᨩ᩠ᨩᩥᨱ᩠ᨱᩣ ᩉᩮᩣᨲᩥ. ᨿᩮ ᨧ ᨾᩥᨧ᩠ᨨᩣᩅᩥᨾᩩᨲ᩠ᨲᩥᨸᨧ᩠ᨧᨿᩣ ᩋᨶᩮᨠᩮ ᨸᩣᨸᨠᩣ ᩋᨠᩩᩈᩃᩣ ᨵᨾ᩠ᨾᩣ ᩈᨾ᩠ᨽᩅᨶ᩠ᨲᩥ, ᨲᩮ ᨧᩔ ᨶᩥᨩ᩠ᨩᩥᨱ᩠ᨱᩣ ᩉᩮᩣᨶ᩠ᨲᩥ. ᩍᨾᩮ ᨴᩈ ᨵᨾ᩠ᨾᩣ ᩋᨽᩥᨬ᩠ᨬᩮᨿ᩠ᨿᩣ.

(ᨬ) ‘‘ᨠᨲᨾᩮ ᨴᩈ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ? ᨴᩈ ᩋᩈᩮᨠ᩠ᨡᩣ ᨵᨾ᩠ᨾᩣ – ᩋᩈᩮᨠ᩠ᨡᩣ ᩈᨾ᩠ᨾᩣᨴᩥᨭ᩠ᨮᩥ, ᩋᩈᩮᨠ᩠ᨡᩮᩣ ᩈᨾ᩠ᨾᩣᩈᨦ᩠ᨠᨸ᩠ᨸᩮᩣ, ᩋᩈᩮᨠ᩠ᨡᩣ ᩈᨾ᩠ᨾᩣᩅᩣᨧᩣ, ᩋᩈᩮᨠ᩠ᨡᩮᩣ ᩈᨾ᩠ᨾᩣᨠᨾ᩠ᨾᨶ᩠ᨲᩮᩣ, ᩋᩈᩮᨠ᩠ᨡᩮᩣ ᩈᨾ᩠ᨾᩣᩌᨩᩦᩅᩮᩣ, ᩋᩈᩮᨠ᩠ᨡᩮᩣ ᩈᨾ᩠ᨾᩣᩅᩣᨿᩣᨾᩮᩣ, ᩋᩈᩮᨠ᩠ᨡᩣ ᩈᨾ᩠ᨾᩣᩈᨲᩥ, ᩋᩈᩮᨠ᩠ᨡᩮᩣ ᩈᨾ᩠ᨾᩣᩈᨾᩣᨵᩥ, ᩋᩈᩮᨠ᩠ᨡᩴ ᩈᨾ᩠ᨾᩣᨬᩣᨱᩴ, ᩋᩈᩮᨠ᩠ᨡᩣ ᩈᨾ᩠ᨾᩣᩅᩥᨾᩩᨲ᩠ᨲᩥ. ᩍᨾᩮ ᨴᩈ ᨵᨾ᩠ᨾᩣ ᩈᨧ᩠ᨨᩥᨠᩣᨲᨻ᩠ᨻᩣ.

‘‘ᩍᨲᩥ ᩍᨾᩮ ᩈᨲᨵᨾ᩠ᨾᩣ ᨽᩪᨲᩣ ᨲᨧ᩠ᨨᩣ ᨲᨳᩣ ᩋᩅᩥᨲᨳᩣ ᩋᨶᨬ᩠ᨬᨳᩣ ᩈᨾ᩠ᨾᩣ ᨲᨳᩣᨣᨲᩮᨶ ᩋᨽᩥᩈᨾ᩠ᨻᩩᨴ᩠ᨵᩣ’’ᨲᩥ. ᩍᨴᨾᩅᩮᩣᨧᩣᨿᩈ᩠ᨾᩣ ᩈᩣᩁᩥᨸᩩᨲ᩠ᨲᩮᩣ. ᩋᨲ᩠ᨲᨾᨶᩣ ᨲᩮ ᨽᩥᨠ᩠ᨡᩪ ᩌᨿᩈ᩠ᨾᨲᩮᩣ ᩈᩣᩁᩥᨸᩩᨲ᩠ᨲᩔ ᨽᩣᩈᩥᨲᩴ ᩋᨽᩥᨶᨶ᩠ᨴᩩᨶ᩠ᨲᩥ.

ᨴᩈᩩᨲ᩠ᨲᩁᩈᩩᨲ᩠ᨲᩴ ᨶᩥᨭ᩠ᨮᩥᨲᩴ ᩑᨠᩣᨴᩈᨾᩴ.

ᨸᩣᨳᩥᨠᩅᨣ᩠ᨣᩮᩣ [ᨸᩣᨭᩥᨠᩅᨣ᩠ᨣᩮᩣ (ᩈᩦ. ᩈ᩠ᨿᩣ. ᨸᩦ.)] ᨶᩥᨭ᩠ᨮᩥᨲᩮᩣ.

ᨲᩔᩩᨴ᩠ᨴᩣᨶᩴ –

ᨸᩣᨳᩥᨠᩮᩣ ᨧ [ᨸᩣᨭᩥᨠᨬ᩠ᨧ (ᩈ᩠ᨿᩣ. ᨠᩴ.)] ᩏᨴᩩᨾ᩠ᨻᩁᩴ [ᨸᩣᨭᩥᨠᩮᩣᨴᩩᨾ᩠ᨻᩁᩦᨧᩮᩅ (ᩈᩦ. ᨸᩦ.)], ᨧᨠ᩠ᨠᩅᨲ᩠ᨲᩥ ᩋᨣ᩠ᨣᨬ᩠ᨬᨠᩴ;

ᩈᨾ᩠ᨸᩈᩣᨴᨶᨸᩣᩈᩣᨴᩴ [ᩈᨾ᩠ᨸᩈᩣᨴᨬ᩠ᨧ ᨸᩣᩈᩣᨴᩴ (ᩈᩦ. ᩈ᩠ᨿᩣ. ᨠᩴ. ᨸᩦ.)], ᨾᩉᩣᨸᩩᩁᩥᩈᩃᨠ᩠ᨡᨱᩴ.

ᩈᩥᨦ᩠ᨣᩣᩃᩣᨭᩣᨶᩣᨭᩥᨿᨠᩴ, ᩈᨦ᩠ᨣᩦᨲᩥ ᨧ ᨴᩈᩩᨲ᩠ᨲᩁᩴ;

ᩑᨠᩣᨴᩈᩉᩥ ᩈᩩᨲ᩠ᨲᩮᩉᩥ, ᨸᩣᨳᩥᨠᩅᨣ᩠ᨣᩮᩣᨲᩥ ᩅᩩᨧ᩠ᨧᨲᩥ.

ᨸᩣᨳᩥᨠᩅᨣ᩠ᨣᨸᩣᩊᩥ ᨶᩥᨭ᩠ᨮᩥᨲᩣ.

ᨲᩦᩉᩥ ᩅᨣ᩠ᨣᩮᩉᩥ ᨸᨭᩥᨾᨱ᩠ᨯᩥᨲᩮᩣ ᩈᨠᩃᩮᩣ

ᨴᩦᨥᨶᩥᨠᩣᨿᩮᩣ ᩈᨾᨲ᩠ᨲᩮᩣ.