📜

ᨶᨾᩮᩣ ᨲᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ

ᨡᩩᨴ᩠ᨴᨠᨶᩥᨠᩣᨿᩮ

ᩋᨸᨴᩣᨶ-ᩋᨭ᩠ᨮᨠᨳᩣ

(ᨴᩩᨲᩥᨿᩮᩣ ᨽᩣᨣᩮᩣ)

ᨳᩮᩁᩣᨸᨴᩣᨶᩴ

᪒. ᩈᩦᩉᩣᩈᨶᩥᨿᩅᨣ᩠ᨣᩮᩣ

᪑. ᩈᩦᩉᩣᩈᨶᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᩥᨻ᩠ᨻᩩᨲᩮ ¶ ¶ ᩃᩮᩣᨠᨶᩣᨳᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩦᩉᩣᩈᨶᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᩅᩥᨽᩅᩈᨾ᩠ᨸᨶ᩠ᨶᩮ ᩈᨴ᩠ᨵᩣᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ, ᨵᩁᨾᩣᨶᩮ ᨽᨣᩅᨲᩥ ᨴᩮᩅᩃᩮᩣᨠᩮ ᩅᩈᩥᨲ᩠ᩅᩣ ᨶᩥᨻ᩠ᨻᩩᨲᩮ ᨽᨣᩅᨲᩥ ᩏᨸ᩠ᨸᨶ᩠ᨶᨲ᩠ᨲᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨽᨣᩅᨲᩮᩣ ᩈᩣᩁᩦᩁᩥᨠᨧᩮᨲᩥᨿᩴ ᨴᩥᩈ᩠ᩅᩣ ‘‘ᩋᩉᩮᩣ ᨾᩮ ᩋᩃᩣᨽᩣ, ᨽᨣᩅᨲᩮᩣ ᨵᩁᨾᩣᨶᩮ ᨠᩣᩃᩮ ᩋᩈᨾ᩠ᨸᨲ᩠ᨲᩮᩣ’’ᨲᩥ ᨧᩥᨶ᩠ᨲᩮᨲ᩠ᩅᩣ ᨧᩮᨲᩥᨿᩮ ᨧᩥᨲ᩠ᨲᩴ ᨸᩈᩣᨴᩮᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᩈᨻ᩠ᨻᩁᨲᨶᨾᨿᩴ ᨴᩮᩅᨲᩣᨶᩥᨾ᩠ᨾᩥᨲᩈᨴᩥᩈᩴ ᨵᨾ᩠ᨾᩣᩈᨶᩮ ᩈᩦᩉᩣᩈᨶᩴ ᨠᩣᩁᩮᨲ᩠ᩅᩣ ᨩᩦᩅᨾᩣᨶᨠᨻᩩᨴ᩠ᨵᩔ ¶ ᩅᩥᨿ ᨸᩪᨩᩮᩈᩥ. ᨲᩔᩩᨸᩁᩥ ᨣᩮᩉᨾ᩠ᨸᩥ ᨴᩥᨻ᩠ᨻᩅᩥᨾᩣᨶᨾᩥᩅ ᨠᩣᩁᩮᩈᩥ, ᨸᩣᨴᨭ᩠ᨮᨸᨶᨸᩣᨴᨸᩦᨮᨾ᩠ᨸᩥ ᨠᩣᩁᩮᩈᩥ. ᩑᩅᩴ ᨿᩣᩅᨩᩦᩅᩴ ᨴᩦᨸᨵᩪᨸᨸᩩᨸ᩠ᨹᨣᨶ᩠ᨵᩣᨴᩦᩉᩥ ᩋᨶᩮᨠᩅᩥᨵᩴ ᨸᩪᨩᩴ ᨠᨲ᩠ᩅᩣ ᨲᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ ᨨ ᨠᩣᨾᩈᨣ᩠ᨣᩮ ᩋᨸᩁᩣᨸᩁᩴ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧᨠ᩠ᨠᩅᨲ᩠ᨲᩥᩈᨾ᩠ᨸᨲ᩠ᨲᩥᩴ ¶ ᩋᨶᩮᨠᨠ᩠ᨡᨲ᩠ᨲᩩᩴ ᩋᨶᩩᨽᩅᩥᨲ᩠ᩅᩣ ᩈᨦ᩠ᨡ᩠ᨿᩣᨲᩥᨠ᩠ᨠᨶ᩠ᨲᩴ ᨸᨴᩮᩈᩁᨩ᩠ᨩᩈᨾ᩠ᨸᨲ᩠ᨲᩥᨬ᩠ᨧ ᩋᨶᩩᨽᩅᩥᨲ᩠ᩅᩣ ᨠᩔᨸᩔ ᨽᨣᩅᨲᩮᩣ ᩈᩣᩈᨶᩮ ᨸᨻ᩠ᨻᨩᩥᨲ᩠ᩅᩣ ᩈᨾᨱᨵᨾ᩠ᨾᩴ ᨠᨲ᩠ᩅᩣ ᩑᨲ᩠ᨳᨶ᩠ᨲᩁᩮ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ¶ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᩅᩥᨽᩅᩈᨾ᩠ᨸᨶ᩠ᨶᩮ ᨠᩩᩃᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᩃᨴ᩠ᨵᩪᨸᩈᨾ᩠ᨸᨴᩮᩣ ᨠᨾ᩠ᨾᨭ᩠ᨮᩣᨶᩴ ᨣᩉᩮᨲ᩠ᩅᩣ ᨥᨭᩮᨶ᩠ᨲᩮᩣ ᩅᩣᨿᨾᨶ᩠ᨲᩮᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪑. ᩑᩅᩴ ᨸᨲ᩠ᨲᩋᩁᩉᨲ᩠ᨲᨹᩃᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᩴ ᩏᨸ᩠ᨸᩣᨴᩮᨲ᩠ᩅᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨶᩥᨻ᩠ᨻᩩᨲᩮ ᩃᩮᩣᨠᨶᩣᨳᨾ᩠ᩉᩦᨲᩥᩌᨴᩥᨾᩣᩉ. ᨲᨲ᩠ᨳ ᩃᩮᩣᨠᩔ ᨶᩣᨳᩮᩣ ᨸᨵᩣᨶᩮᩣᨲᩥ ᩃᩮᩣᨠᨶᩣᨳᩮᩣ, ᩃᩮᩣᨠᨲ᩠ᨲᨿᩈᩣᨾᩦᨲᩥ ᩋᨲ᩠ᨳᩮᩣ. ᩃᩮᩣᨠᨶᩣᨳᩮ ᩈᩥᨴ᩠ᨵᨲ᩠ᨳᨾ᩠ᩉᩥ ᨶᩥᨻ᩠ᨻᩩᨲᩮᨲᩥ ᩈᨾ᩠ᨻᨶ᩠ᨵᩮᩣ. ᩅᩥᨲ᩠ᨳᩣᩁᩥᨲᩮ ᨸᩣᩅᨧᨶᩮᨲᩥ ᨸᩣᩅᨧᨶᩮ ᨸᩥᨭᨠᨲ᩠ᨲᨿᩮ ᩅᩥᨲ᩠ᨳᩣᩁᩥᨲᩮ ᨸᨲ᩠ᨳᨭᩮ ᨸᩣᨠᨭᩮᨲᩥ ᩋᨲ᩠ᨳᩮᩣ. ᨻᩣᩉᩩᨩᨬ᩠ᨬᨾ᩠ᩉᩥ ᩈᩣᩈᨶᩮᨲᩥ ᩈᩥᨠ᩠ᨡᨲ᩠ᨲᨿᩈᨦ᩠ᨣᩉᩥᨲᩮ ᨻᩩᨴ᩠ᨵᩈᩣᩈᨶᩮ ᩋᨶᩮᨠᩈᨲᩈᩉᩔᨠᩮᩣᨭᩥᨡᩦᨱᩣᩈᩅᩈᨦ᩠ᨡᩣᨲᩮᩉᩥ ᨻᩉᩩᨩᨶᩮᩉᩥ ᨬᩣᨲᩮ ᩋᨵᩥᨣᨲᩮᨲᩥ ᩋᨲ᩠ᨳᩮᩣ.

᪒-᪓. ᨸᩈᨶ᩠ᨶᨧᩥᨲ᩠ᨲᩮᩣ ᩈᩩᨾᨶᩮᩣᨲᩥ ᨲᨴᩣ ᩋᩉᩴ ᨻᩩᨴ᩠ᨵᩔ ᨵᩁᨾᩣᨶᨠᩣᩃᩮ ᩋᩈᨾ᩠ᨸᨲ᩠ᨲᩮᩣ ᨶᩥᨻ᩠ᨻᩩᨲᩮ ᨲᩈ᩠ᨾᩥᩴ ᨴᩮᩅᩃᩮᩣᨠᩣ ᨧᩅᩥᨲ᩠ᩅᩣ ᨾᨶᩩᩔᩃᩮᩣᨠᩴ ᩏᨸᨸᨶ᩠ᨶᩮᩣ ᨲᩔ ᨽᨣᩅᨲᩮᩣ ᩈᩣᩁᩦᩁᩥᨠᨵᩣᨲᩩᨧᩮᨲᩥᨿᩴ ᨴᩥᩈ᩠ᩅᩣ ᨸᩈᨶ᩠ᨶᨧᩥᨲ᩠ᨲᩮᩣ ᩈᨴ᩠ᨵᩣᩈᨾ᩠ᨸᨿᩩᨲ᩠ᨲᨾᨶᩮᩣ ᩈᩩᨶ᩠ᨴᩁᨾᨶᩮᩣ ‘‘ᩋᩉᩮᩣ ᨾᨾᩣᨣᨾᨶᩴ ᩈ᩠ᩅᩣᨣᨾᨶ’’ᨶ᩠ᨲᩥ ᩈᨬ᩠ᨩᩣᨲᨸᩈᩣᨴᨻᩉᩩᨾᩣᨶᩮᩣ ‘‘ᨾᨿᩣ ᨶᩥᨻ᩠ᨻᩣᨶᩣᨵᩥᨣᨾᩣᨿ ᩑᨠᩴ ᨸᩩᨬ᩠ᨬᩴ ᨠᩣᨲᩩᩴ ᩅᨭ᩠ᨭᨲᩦ’’ᨲᩥ ᨧᩥᨶ᩠ᨲᩮᨲ᩠ᩅᩣ ᨽᨣᩅᨲᩮᩣ ᨧᩮᨲᩥᨿᩈᨾᩦᨸᩮ ᨽᨣᩅᨶ᩠ᨲᩴ ᩏᨴ᩠ᨴᩥᩔ ᩉᩥᩁᨬ᩠ᨬᩈᩩᩅᨱ᩠ᨱᩁᨲᨶᩣᨴᩦᩉᩥ ᩋᩃᨦ᩠ᨠᩁᩥᨲ᩠ᩅᩣᩅ ᩈᩦᩉᩣᩈᨶᩴ ᩋᨠᩣᩈᩥ. ᨲᨲᩕ ᨶᩥᩈᩥᨶ᩠ᨶᩔ ᨸᩣᨴᨭ᩠ᨮᨸᨶᨲ᩠ᨳᩣᨿ ᨸᩣᨴᨸᩦᨮᨬ᩠ᨧ ᨠᩣᩁᩮᩈᩥ. ᩈᩦᩉᩣᩈᨶᩔ ᩋᨲᩮᨾᨶᨲ᩠ᨳᩣᨿ ᨲᩔᩩᨸᩁᩥ ᨥᩁᨬ᩠ᨧ ᨠᩣᩁᩮᩈᩥ. ᨲᩮᨶ ᩅᩩᨲ᩠ᨲᩴ – ‘‘ᩈᩦᩉᩣᩈᨶᨾᨠᩣᩈᩉᩴ…ᨸᩮ… ᨥᩁᩴ ᨲᨲ᩠ᨳ ᩋᨠᩣᩈᩉ’’ᨶ᩠ᨲᩥ. ᨲᩮᨶ ᨧᩥᨲ᩠ᨲᨸ᩠ᨸᩈᩣᨴᩮᨶᩣᨲᩥ ᨵᩁᨾᩣᨶᩔ ᩅᩥᨿ ᨽᨣᩅᨲᩮᩣ ᩈᩦᩉᩣᩈᨶᩴ ᨾᨿᩣ ᨠᨲᩴ, ᨲᩮᨶ ᨧᩥᨲ᩠ᨲᨸ᩠ᨸᩈᩣᨴᩮᨶ. ᨲᩩᩈᩥᨲᩴ ᩏᨸᨸᨩ᩠ᨩᩉᨶ᩠ᨲᩥ ᨲᩩᩈᩥᨲᨽᩅᨶᩮ ᩏᨸᨸᨩ᩠ᨩᩥᨶ᩠ᨲᩥ ᩋᨲ᩠ᨳᩮᩣ.

᪔. ᩌᨿᩣᨾᩮᨶ ᨧᨲᩩᨻ᩠ᨻᩦᩈᩣᨲᩥ ᨲᨲᩕᩩᨸᨸᨶ᩠ᨶᩔ ᨴᩮᩅᨽᩪᨲᩔ ᩈᨲᩮᩣ ᨾᨿ᩠ᩉᩴ ᩈᩩᨠᨲᩴ ᨸᩩᨬ᩠ᨬᩮᨶ ᨶᩥᨻ᩠ᨻᨲ᩠ᨲᩥᨲᩴ ᨸᩣᨲᩩᨽᩪᨲᩴ ᩌᨿᩣᨾᩮᨶ ᩏᨧ᩠ᨧᨲᩮᩣ ᨧᨲᩩᨻ᩠ᨻᩦᩈᨿᩮᩣᨩᨶᩴ ᩅᩥᨲ᩠ᨳᩣᩁᩮᨶ ᨲᩥᩁᩥᨿᨲᩮᩣ ᨧᨲᩩᨴ᩠ᨴᩈᨿᩮᩣᨩᨶᩴ ᨲᩣᩅᨴᩮᩅ ᨶᩥᨻ᩠ᨻᨲ᩠ᨲᩥᨠ᩠ᨡᨱᩮᨿᩮᩅ ᩌᩈᩥ ᩋᩉᩮᩣᩈᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅ.

᪙. ᨧᨲᩩᨶ᩠ᨶᩅᩩᨲᩮ ¶ ¶ ᩍᨲᩮᩣ ᨠᨸ᩠ᨸᩮᨲᩥ ᩍᨲᩮᩣ ᨠᨸ᩠ᨸᨲᩮᩣ ᨧᨲᩩᨶᩅᩩᨲᩮ ᨠᨸ᩠ᨸᩮ ᨿᩴ ᨠᨾ᩠ᨾᩴ ᩋᨠᩁᩥᩴ ᩋᨠᩣᩈᩥᩴ, ᨲᨴᩣ ᨲᨲᩮᩣ ᨸᨭ᩠ᨮᩣᨿ ᨸᩩᨬ᩠ᨬᨻᩃᩮᨶ ᨠᨬ᩠ᨧᩥ ᨴᩩᨣ᩠ᨣᨲᩥᩴ ᨶᩣᨽᩥᨩᩣᨶᩣᨾᩥ, ᨶ ᩋᨶᩩᨽᩪᨲᨸᩩᨻ᩠ᨻᩣ ᨠᩣᨧᩥ ᨴᩩᨣ᩠ᨣᨲᩦᨲᩥ ᩋᨲ᩠ᨳᩮᩣ.

᪑᪐. ᨲᩮᩈᨲ᩠ᨲᨲᩥᨾ᩠ᩉᩥᨲᩮᩣ ᨠᨸ᩠ᨸᩮᨲᩥ ᩍᨲᩮᩣ ᨠᨸ᩠ᨸᨲᩮᩣ ᨲᩮᩈᨲ᩠ᨲᨲᩥᨠᨸ᩠ᨸᩮ. ᩍᨶ᩠ᨴᨶᩣᨾᩣ ᨲᨿᩮᩣ ᨩᨶᩣᨲᩥ ᩍᨶ᩠ᨴᨶᩣᨾᨠᩣ ᨲᨿᩮᩣ ᨧᨠ᩠ᨠᩅᨲ᩠ᨲᩥᩁᩣᨩᩣᨶᩮᩣ ᩑᨠᩈ᩠ᨾᩥᩴ ᨠᨸ᩠ᨸᩮ ᨲᩦᩈᩩ ᨩᩣᨲᩦᩈᩩ ᩍᨶ᩠ᨴᩮᩣ ᨶᩣᨾ ᨧᨠ᩠ᨠᩅᨲ᩠ᨲᩦ ᩁᩣᨩᩣ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ. ᨴ᩠ᩅᩮᩈᨲ᩠ᨲᨲᩥᨾ᩠ᩉᩥᨲᩮᩣ ¶ ᨠᨸ᩠ᨸᩮᨲᩥ ᩍᨲᩮᩣ ᨴ᩠ᩅᩮᩈᨲ᩠ᨲᨲᩥᨠᨸ᩠ᨸᩮ. ᩈᩩᨾᨶᨶᩣᨾᨠᩣ ᨲᨿᩮᩣ ᨩᨶᩣ ᨲᩥᨠ᩠ᨡᨲ᩠ᨲᩩᩴ ᨧᨠ᩠ᨠᩅᨲ᩠ᨲᩥᩁᩣᨩᩣᨶᩮᩣ ᩋᩉᩮᩈᩩᩴ.

᪑᪑. ᩈᨾᩈᨲ᩠ᨲᨲᩥᨲᩮᩣ ᨠᨸ᩠ᨸᩮᨲᩥ ᩍᨲᩮᩣ ᨠᨸ᩠ᨸᨲᩮᩣ ᩋᨶᩪᨶᩣᨵᩥᨠᩮ ᩈᨲ᩠ᨲᨲᩥᨾᩮ ᨠᨸ᩠ᨸᩮ ᩅᩁᩩᨱᨶᩣᨾᨠᩣ ᩅᩁᩩᨱᩮᩣ ᨧᨠ᩠ᨠᩅᨲ᩠ᨲᩦᨲᩥ ᩑᩅᩴᨶᩣᨾᨠᩣ ᨲᨿᩮᩣ ᨧᨠ᩠ᨠᩅᨲ᩠ᨲᩥᩁᩣᨩᩣᨶᩮᩣ ᨧᨠ᩠ᨠᩁᨲᨶᩈᨾ᩠ᨸᨶ᩠ᨶᩣ ᨧᨲᩩᨴᩦᨸᨾ᩠ᩉᩥ ᩍᩔᩁᩣ ᩋᩉᩮᩈᩩᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩈᩦᩉᩣᩈᨶᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᩑᨠᨲ᩠ᨳᨾ᩠ᨽᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩑᨠᨲ᩠ᨳᨾ᩠ᨽᨴᩣᨿᨠᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᩅᨶᨠᨾ᩠ᨾᩥᨠᩮᩣ ᩉᩩᨲ᩠ᩅᩣ ᩑᨠᩈ᩠ᨾᩥᩴ ᩅᩥᨽᩅᩈᨾ᩠ᨸᨶ᩠ᨶᩮ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ. ᨲᩈ᩠ᨾᩥᩴ ᩈᨾᨿᩮ ᩈᨻ᩠ᨻᩮ ᩈᨴ᩠ᨵᩣ ᨸᩈᨶ᩠ᨶᩣ ᩏᨸᩣᩈᨠᩣ ᩑᨠᨧ᩠ᨨᨶ᩠ᨴᩣ ‘‘ᨽᨣᩅᨲᩮᩣ ᩏᨸᨭ᩠ᨮᩣᨶᩈᩣᩃᩴ ᨠᩁᩮᩣᨾᩣ’’ᨲᩥ ᨴᨻ᩠ᨻᩈᨾ᩠ᨽᩣᩁᨲ᩠ᨳᩣᨿ ᩅᨶᩴ ᨸᩅᩥᩈᩥᨲ᩠ᩅᩣ ᨲᩴ ᩏᨸᩣᩈᨠᩴ ᨴᩥᩈ᩠ᩅᩣ ‘‘ᩋᨾ᩠ᩉᩣᨠᩴ ᩑᨠᩴ ᨳᨾ᩠ᨽᩴ ᨴᩮᨳᩣ’’ᨲᩥ ᨿᩣᨧᩥᩴᩈᩩ. ᩈᩮᩣ ᨲᩴ ᨸᩅᨲ᩠ᨲᩥᩴ ᩈᩩᨲ᩠ᩅᩣ ‘‘ᨲᩩᨾ᩠ᩉᩮ ᨾᩣ ᨧᩥᨶ᩠ᨲᨿᩥᨲ᩠ᨳᩣ’’ᨲᩥ ᨲᩮ ᩈᨻ᩠ᨻᩮ ᩏᨿ᩠ᨿᩮᩣᨩᩮᨲ᩠ᩅᩣ ᩑᨠᩴ ᩈᩣᩁᨾᨿᩴ ᨳᨾ᩠ᨽᩴ ᨣᩉᩮᨲ᩠ᩅᩣ ᩈᨲ᩠ᨳᩩ ᨴᩔᩮᨲ᩠ᩅᩣ ᨲᩮᩈᩴᨿᩮᩅ ᩋᨴᩣᩈᩥ. ᩈᩮᩣ ᨲᩮᨶᩮᩅ ᩈᩮᩣᨾᨶᩔᨩᩣᨲᩮᩣ ᨲᨴᩮᩅ ᨾᩪᩃᩴ ᨠᨲ᩠ᩅᩣ ᩋᨬ᩠ᨬᩣᨶᩥ ᨴᩣᨶᩣᨴᩦᨶᩥ ᨸᩩᨬ᩠ᨬᩣᨶᩥ ᨠᨲ᩠ᩅᩣ ᨲᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ ᩋᨸᩁᩣᨸᩁᩴ ᨨᩈᩩ ᨠᩣᨾᩣᩅᨧᩁᩮᩈᩩ ᨴᩥᨻ᩠ᨻᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧ ᩋᨣ᩠ᨣᨧᨠ᩠ᨠᩅᨲ᩠ᨲᩥᩈᨾ᩠ᨸᨲ᩠ᨲᩥᩴ ᩋᨶᩮᨠᩅᩣᩁᩴ ᩋᨶᩩᨽᩅᩥᨲ᩠ᩅᩣ ᩋᩈᨦ᩠ᨡ᩠ᨿᩮᨿ᩠ᨿᩴ ᨸᨴᩮᩈᩁᨩ᩠ᨩᩈᨾ᩠ᨸᨲ᩠ᨲᩥᨬ᩠ᨧ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᨴ᩠ᨵᩣᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ¶ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᨾᩣᨲᩣᨸᩥᨲᩪᩉᩥ ᩈᨴ᩠ᨵᩥᩴ ᨽᨣᩅᨲᩮᩣ ᩈᨶ᩠ᨲᩥᨠᩮ ᨵᨾ᩠ᨾᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᩃᨴ᩠ᨵᩪᨸᩈᨾ᩠ᨸᨴᩮᩣ ᨠᨾ᩠ᨾᨭ᩠ᨮᩣᨶᩴ ᨣᩉᩮᨲ᩠ᩅᩣ ᨾᨶᩈᩥᨠᩁᩮᩣᨶ᩠ᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑᪓. ᩈᩮᩣ ¶ ᩑᩅᩴ ᨸᨲ᩠ᨲᩋᩁᩉᨲ᩠ᨲᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔᩣᨲᩥᩌᨴᩥᨾᩣᩉ. ᨲᨲ᩠ᨳ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨽᨣ᩠ᨿᩈᨾ᩠ᨸᨶ᩠ᨶᩔ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ. ᨾᩉᩣᨸᩪᨣᨣᨱᩮᩣᨲᩥ ᨾᩉᩣᩏᨸᩣᩈᨠᩈᨾᩪᩉᩮᩣ ᩋᩉᩩ ᩋᩉᩮᩣᩈᩦᨲᩥ ᩋᨲ᩠ᨳᩮᩣ. ᩈᩁᨱᩴ ᨣᨲᩣ ᨧ ᨲᩮ ᨻᩩᨴ᩠ᨵᨶ᩠ᨲᩥ ‘‘ᨻᩩᨴ᩠ᨵᩴ ᩈᩁᨱ’’ᨶ᩠ᨲᩥ ᨣᨲᩣ ᨽᨩᩥᩴᩈᩩ ᨩᩣᨶᩥᩴᩈᩩ ᩅᩣ ᨲᩮ ᩏᨸᩣᩈᨠᩣ. ᨲᨳᩣᨣᨲᩴ ᩈᨴ᩠ᨴᩉᨶ᩠ᨲᩥ ᨻᩩᨴ᩠ᨵᨣᩩᨱᩴ ᩋᨲ᩠ᨲᨶᩮᩣ ᨧᩥᨲ᩠ᨲᩈᨶ᩠ᨲᩣᨶᩮ ᨮᨸᩮᨶ᩠ᨲᩦᨲᩥ ᩋᨲ᩠ᨳᩮᩣ.

᪑᪔. ᩈᨻ᩠ᨻᩮ ᩈᨦ᩠ᨣᨾ᩠ᨾ ᨾᨶ᩠ᨲᩮᨲ᩠ᩅᩣᨲᩥ ᩈᨻ᩠ᨻᩮ ᩈᨾᩣᨣᨾ᩠ᨾ ᩈᨶ᩠ᨶᩥᨸᨲᩥᨲ᩠ᩅᩣ ᨾᨶ᩠ᨲᩮᨲ᩠ᩅᩣ ᩋᨬ᩠ᨬᨾᨬ᩠ᨬᩴ ᩈᨬ᩠ᨬᩣᨸᩮᨲ᩠ᩅᩣ ᩑᨠᨧ᩠ᨨᨶ᩠ᨴᩣ ᩉᩩᨲ᩠ᩅᩣ ᨾᩣᩊᩴ ᩏᨸᨭ᩠ᨮᩣᨶᩈᩣᩃᩴ ᩈᨲ᩠ᨳᩩᨶᩮᩣ ᩋᨲ᩠ᨳᩣᨿ ᨠᩩᨻ᩠ᨻᨶ᩠ᨲᩥ ᨠᩁᩮᩣᨶ᩠ᨲᩦᨲᩥ ᩋᨲ᩠ᨳᩮᩣ. ᨴᨻ᩠ᨻᩈᨾ᩠ᨽᩣᩁᩮᩈᩩ ᩑᨠᨲ᩠ᨳᨾ᩠ᨽᩴ ᩋᩃᨽᨶ᩠ᨲᩣ ᨻᩕᩉᩣᩅᨶᩮ ᨾᩉᩣᩅᨶᩮ ᩅᩥᨧᩥᨶᨶ᩠ᨲᩦᨲᩥ ᩈᨾ᩠ᨻᨶ᩠ᨵᩮᩣ.

᪑᪕. ᨲᩮᩉᩴ ¶ ᩋᩁᨬ᩠ᨬᩮ ᨴᩥᩈ᩠ᩅᩣᨶᩣᨲᩥ ᩋᩉᩴ ᨲᩮ ᩏᨸᩣᩈᨠᩮ ᩋᩁᨬ᩠ᨬᩮ ᨴᩥᩈ᩠ᩅᩣᨶ ᨣᨱᩴ ᩈᨾᩪᩉᩴ ᩏᨸᨣᨾ᩠ᨾ ᩈᨾᩦᨸᩴ ᨣᨶ᩠ᨲ᩠ᩅᩣ ᩋᨬ᩠ᨩᩃᩥᩴ ᨸᨣ᩠ᨣᩉᩮᨲ᩠ᩅᩣᨶ ᨴᩈᨦ᩠ᨣᩩᩃᩥᩈᨾᩮᩣᨵᩣᨶᩴ ᩋᨬ᩠ᨩᩃᩥᩴ ᩈᩥᩁᩈᩥ ᨠᨲ᩠ᩅᩣ ᩋᩉᩴ ᨣᨱᩴ ᩏᨸᩣᩈᨠᩈᨾᩪᩉᩴ ‘‘ᨲᩩᨾ᩠ᩉᩮ ᩍᨾᩴ ᩅᨶᩴ ᨠᩥᨾᨲ᩠ᨳᩴ ᩌᨣᨲᨲ᩠ᨳᩣ’’ᨲᩥ ᨲᨴᩣ ᨲᩈ᩠ᨾᩥᩴ ᨠᩣᩃᩮ ᨸᩁᩥᨸᩩᨧ᩠ᨨᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

᪑᪖. ᨲᩮ ᩈᩦᩃᩅᨶ᩠ᨲᩮᩣ ᩏᨸᩣᩈᨠᩣ ᨾᩮ ᨾᨿᩣ ᨸᩩᨭ᩠ᨮᩣ ‘‘ᨾᩣᩊᩴ ᨾᨿᩴ ᨠᨲ᩠ᨲᩩᨠᩣᨾᩣ ᩉᩩᨲ᩠ᩅᩣ ᩑᨠᨲ᩠ᨳᨾ᩠ᨽᩮᩣ ᩋᨾ᩠ᩉᩮᩉᩥ ᨶ ᩃᨻ᩠ᨽᨲᩦ’’ᨲᩥ ᩅᩥᨿᩣᨠᩴᩈᩩ ᩅᩥᩈᩮᩈᩮᨶ ᨠᨳᨿᩥᩴᩈᩪᨲᩥ ᩈᨾ᩠ᨻᨶ᩠ᨵᩮᩣ.

᪑᪗. ᨾᨾᩴ ᨾᨿ᩠ᩉᩴ ᩑᨠᨲ᩠ᨳᨾ᩠ᨽᩴ ᨴᩮᨳ, ᩋᩉᩴ ᨲᩴ ᨴᩔᩣᨾᩥ ᩈᨲ᩠ᨳᩩᨶᩮᩣ ᩈᨶ᩠ᨲᩥᨠᩴ ᩋᩉᩴ ᨳᨾ᩠ᨽᩴ ᩌᩉᩁᩥᩔᩣᨾᩥ, ᨲᩮ ᨽᩅᨶ᩠ᨲᩮᩣ ᨳᨾ᩠ᨽᩉᩁᨱᩮ ᩋᨸ᩠ᨸᩮᩣᩔᩩᨠ᩠ᨠᩣ ᩏᩔᩣᩉᩁᩉᩥᨲᩣ ᨽᩅᨶ᩠ᨲᩪᨲᩥ ᩈᨾ᩠ᨻᨶ᩠ᨵᩮᩣ.

᪒᪔. ᨿᩴ ᨿᩴ ᨿᩮᩣᨶᩩᨸᨸᨩ᩠ᨩᩣᨾᩦᨲᩥ ᨿᩴ ᨿᩴ ᨿᩮᩣᨶᩥᩴ ᨴᩮᩅᨲ᩠ᨲᩴ ᩋᨳ ᨾᩣᨶᩩᩈᩴ ᩏᨸᨣᨧ᩠ᨨᩣᨾᩦᨲᩥ ᩋᨲ᩠ᨳᩮᩣ. ᨽᩩᨾ᩠ᨾᨲ᩠ᨳᩮ ᩅᩣ ᩏᨸᨿᩮᩣᨣᩅᨧᨶᩴ, ᨿᩈ᩠ᨾᩥᩴ ᨿᩈ᩠ᨾᩥᩴ ᨴᩮᩅᩃᩮᩣᨠᩮ ᩅᩣ ᨾᨶᩩᩔᩃᩮᩣᨠᩮ ᩅᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩑᨠᨲ᩠ᨳᨾ᩠ᨽᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᨶᨶ᩠ᨴᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᩔ ¶ ¶ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨶᨶ᩠ᨴᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩉᩴᩈᩅᨲᩦᨶᨣᩁᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨽᨣᩅᨲᩮᩣ ᩈᨶ᩠ᨲᩥᨠᩮ ᨵᨾ᩠ᨾᩴ ᩈᩩᨱᨶ᩠ᨲᩮᩣ ᩈᨲ᩠ᨳᩣᩁᩴ ᩑᨠᩴ ᨽᩥᨠ᩠ᨡᩩᩴ ᩍᨶ᩠ᨴᩕᩥᨿᩮᩈᩩ ᨣᩩᨲ᩠ᨲᨴ᩠ᩅᩣᩁᩣᨶᩴ ᩋᨣ᩠ᨣᨭ᩠ᨮᩣᨶᩮ ᨮᨸᩮᨶ᩠ᨲᩴ ᨴᩥᩈ᩠ᩅᩣ ᩈᨿᩴ ᨲᩴ ᨮᩣᨶᨶ᩠ᨲᩁᩴ ᨸᨲ᩠ᨳᩮᨶ᩠ᨲᩮᩣ ᨽᨣᩅᨲᩮᩣ ᨽᩥᨠ᩠ᨡᩩᩈᨦ᩠ᨥᩔ ᨧ ᨸᩪᨩᩣᩈᨠ᩠ᨠᩣᩁᨻᩉᩩᩃᩴ ᨾᩉᩣᨴᩣᨶᩴ ᨸᩅᨲ᩠ᨲᩮᨲ᩠ᩅᩣ ‘‘ᩋᩉᩴ, ᨽᨶ᩠ᨲᩮ, ᩋᨶᩣᨣᨲᩮ ᨲᩩᨾ᩠ᩉᩣᨴᩥᩈᩔ ᨻᩩᨴ᩠ᨵᩔ ᩑᩅᩁᩪᨸᩮᩣ ᩈᩣᩅᨠᩮᩣ ᨽᩅᩮᨿ᩠ᨿ’’ᨶ᩠ᨲᩥ ᨸᨱᩥᨵᩣᨶᩴ ᩋᨠᩣᩈᩥ.

ᩈᩮᩣ ᨲᨲᩮᩣ ᨸᨭ᩠ᨮᩣᨿ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩋᨲ᩠ᨳᨴᩔᩥᩔ ᨽᨣᩅᨲᩮᩣ ᨠᩣᩃᩮ ᨵᨾ᩠ᨾᨲᩣᨿ ᨶᩣᨾ ᨶᨴᩥᨿᩣ ᨾᩉᨶ᩠ᨲᩮᩣ ᨠᨧ᩠ᨨᨸᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩮᩣ ᩑᨠᨴᩥᩅᩈᩴ ᩈᨲ᩠ᨳᩣᩁᩴ ᨶᨴᩥᩴ ᨲᩁᩥᨲᩩᩴ ᨲᩦᩁᩮ ᨮᩥᨲᩴ ᨴᩥᩈ᩠ᩅᩣ ᩈᨿᩴ ᨽᨣᩅᨶ᩠ᨲᩴ ᨲᩣᩁᩮᨲᩩᨠᩣᨾᩮᩣ ᩈᨲ᩠ᨳᩩ ᨸᩣᨴᨾᩪᩃᩮ ᨶᩥᨸᨩ᩠ᨩᩥ. ᩈᨲ᩠ᨳᩣ ᨲᩔ ᩋᨩ᩠ᨫᩣᩈᨿᩴ ᨬᨲ᩠ᩅᩣ ᨸᩥᨭ᩠ᨮᩥᩴ ᩋᨽᩥᩁᩩᩉᩥ. ᩈᩮᩣ ᩉᨭ᩠ᨮᨲᩩᨭ᩠ᨮᩮᩣ ᩅᩮᨣᩮᨶ ᩈᩮᩣᨲᩴ ᨨᩥᨶ᩠ᨴᨶ᩠ᨲᩮᩣ ᩈᩦᨥᨲᩁᩴ ᨸᩁᨲᩦᩁᩴ ᨸᩣᨸᩮᩈᩥ. ᨽᨣᩅᩣ ᨲᩔ ᩋᨶᩩᨾᩮᩣᨴᨶᩴ ᩅᨴᨶ᩠ᨲᩮᩣ ᨽᩣᩅᩥᨶᩥᩴ ᩈᨾ᩠ᨸᨲ᩠ᨲᩥᩴ ᨠᨳᩮᨲ᩠ᩅᩣ ᨸᨠ᩠ᨠᩣᨾᩥ.

ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᩈᩩᨣᨲᩦᩈᩩᨿᩮᩅ ᩈᩴᩈᩁᨶ᩠ᨲᩮᩣ ¶ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᨸᩥᩃᩅᨲ᩠ᨳᩩᩈ᩠ᨾᩥᩴ ᩈᩩᨴ᩠ᨵᩮᩣᨴᨶᨾᩉᩣᩁᩣᨩᩔ ᩋᨣ᩠ᨣᨾᩉᩮᩈᩥᨿᩣ ᨾᩉᩣᨸᨩᩣᨸᨲᩥᨣᩮᩣᨲᨾᩥᨿᩣ ᨠᩩᨧ᩠ᨨᩥᨾ᩠ᩉᩥ ᨶᩥᨻ᩠ᨻᨲ᩠ᨲᩮᩣ, ᨲᩔ ᨶᩣᨾᨣ᩠ᨣᩉᨱᨴᩥᩅᩈᩮ ᨬᩣᨲᩥᩈᨦ᩠ᨥᩴ ᨶᨶ᩠ᨴᨿᨶ᩠ᨲᩮᩣ ᨩᩣᨲᩮᩣᨲᩥ ‘‘ᨶᨶ᩠ᨴᩮᩣ’’ᨲ᩠ᩅᩮᩅ ᨶᩣᨾᩴ ᩋᨠᩴᩈᩩ. ᨲᩔ ᩅᨿᨸ᩠ᨸᨲ᩠ᨲᨠᩣᩃᩮ ᨽᨣᩅᩣ ᨸᩅᨲ᩠ᨲᩥᨲᩅᩁᨵᨾ᩠ᨾᨧᨠ᩠ᨠᩮᩣ ᩃᩮᩣᨠᩣᨶᩩᨣ᩠ᨣᩉᩴ ᨠᩁᩮᩣᨶ᩠ᨲᩮᩣ ᩋᨶᩩᨠ᩠ᨠᨾᩮᨶ ᨠᨸᩥᩃᩅᨲ᩠ᨳᩩᩴ ᨣᨶ᩠ᨲ᩠ᩅᩣ ᨬᩣᨲᩥᩈᨾᩣᨣᨾᩮ ᨸᩮᩣᨠ᩠ᨡᩁᩅᩔᩴ ᩋᨭ᩠ᨮᩩᨸ᩠ᨸᨲ᩠ᨲᩥᩴ ᨠᨲ᩠ᩅᩣ ᩅᩮᩔᨶ᩠ᨲᩁᨩᩣᨲᨠᩴ (ᨩᩣ. ᪒.᪒᪒.᪑᪖᪕᪕ ᩌᨴᨿᩮᩣ) ᨠᨳᩮᨲ᩠ᩅᩣ ᨴᩩᨲᩥᨿᨴᩥᩅᩈᩮ ᨸᩥᨱ᩠ᨯᩣᨿ ᨸᩅᩥᨭ᩠ᨮᩮᩣ ‘‘ᩏᨲ᩠ᨲᩥᨭ᩠ᨮᩮ ᨶᨸ᩠ᨸᨾᨩ᩠ᨩᩮᨿ᩠ᨿᩣ’’ᨲᩥ (ᨵ. ᨸ. ᪑᪖᪘) ᨣᩣᨳᩣᨿ ᨸᩥᨲᩁᩴ ᩈᩮᩣᨲᩣᨸᨲ᩠ᨲᩥᨹᩃᩮ ᨸᨲᩥᨭ᩠ᨮᩣᨸᩮᨲ᩠ᩅᩣ ᨶᩥᩅᩮᩈᨶᩴ ᨣᨶ᩠ᨲ᩠ᩅᩣ ‘‘ᨵᨾ᩠ᨾᨬ᩠ᨧᩁᩮ ᩈᩩᨧᩁᩥᨲ’’ᨶ᩠ᨲᩥ (ᨵ. ᨸ. ᪑᪖᪙) ᨣᩣᨳᩣᨿ ᨾᩉᩣᨸᨩᩣᨸᨲᩥᩴ ᩈᩮᩣᨲᩣᨸᨲ᩠ᨲᩥᨹᩃᩮ ᩁᩣᨩᩣᨶᩴ ᩈᨠᨴᩣᨣᩣᨾᩥᨹᩃᩮ ᨸᨲᩥᨭ᩠ᨮᩣᨸᩮᨲ᩠ᩅᩣ ᨲᨲᩥᨿᨴᩥᩅᩈᩮ ᨶᨶ᩠ᨴᨠᩩᨾᩣᩁᩔ ᩋᨽᩥᩈᩮᨠᨣᩮᩉᨸᩅᩮᩈᨶᩌᩅᩣᩉᨾᨦ᩠ᨣᩃᩮᩈᩩ ᩅᨲ᩠ᨲᨾᩣᨶᩮᩈᩩ ᨸᩥᨱ᩠ᨯᩣᨿ ᨸᩣᩅᩥᩈᩥ. ᩈᨲ᩠ᨳᩣ ᨶᨶ᩠ᨴᨠᩩᨾᩣᩁᩔ ᩉᨲ᩠ᨳᩮ ᨸᨲ᩠ᨲᩴ ᨴᨲ᩠ᩅᩣ ᨾᨦ᩠ᨣᩃᩴ ᩅᨲ᩠ᩅᩣ ᨲᩔ ᩉᨲ᩠ᨳᨲᩮᩣ ᨸᨲ᩠ᨲᩴ ᩋᨣ᩠ᨣᩉᩮᨲ᩠ᩅᩣᩅ ᩅᩥᩉᩣᩁᩴ ᨣᨲᩮᩣ ¶ , ᨲᩴ ᨸᨲ᩠ᨲᩉᨲ᩠ᨳᩴ ᩅᩥᩉᩣᩁᩴ ᩌᨣᨲᩴ ᩋᨶᩥᨧ᩠ᨨᨾᩣᨶᩴᨿᩮᩅ ᨸᨻ᩠ᨻᩣᨩᩮᨲ᩠ᩅᩣ ᨲᨳᩣᨸᨻ᩠ᨻᩣᨩᩥᨲᨲ᩠ᨲᩣᨿᩮᩅ ᩋᨶᨽᩥᩁᨲᩥᨿᩣ ᨸᩦᩊᩥᨲᩴ ᨬᨲ᩠ᩅᩣ ᩏᨸᩣᨿᩮᨶ ᨲᩔ ᨲᩴ ᩋᨶᨽᩥᩁᨲᩥᩴ ᩅᩥᨶᩮᩣᨴᩮᩈᩥ. ᩈᩮᩣ ᨿᩮᩣᨶᩥᩈᩮᩣ ᨸᨭᩥᩈᨦ᩠ᨡᩣᨿ ᩅᩥᨸᩔᨶᩴ ᨸᨭ᩠ᨮᨸᩮᨲ᩠ᩅᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ. ᨳᩮᩁᩮᩣ ᨸᩩᨶ ᨴᩥᩅᩈᩮ ᨽᨣᩅᨶ᩠ᨲᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᩅᨾᩣᩉ – ‘‘ᨿᩴ ᨾᩮ, ᨽᨶ᩠ᨲᩮ, ᨽᨣᩅᩣ ᨸᩣᨭᩥᨽᩮᩣᨣᩮᩣ ᨸᨬ᩠ᨧᨶ᩠ᨶᩴ ᩋᨧ᩠ᨨᩁᩣᩈᨲᩣᨶᩴ ᨸᨭᩥᩃᩣᨽᩣᨿ ¶ ᨠᨠᩩᨭᨸᩣᨴᩣᨶᩴ, ᨾᩩᨬ᩠ᨧᩣᨾᩉᩴ, ᨽᨶ᩠ᨲᩮ, ᨽᨣᩅᨶ᩠ᨲᩴ ᩑᨲᩈ᩠ᨾᩣ ᨸᨭᩥᩔᩅᩣ’’ᨲᩥ. ᨽᨣᩅᩣᨸᩥ ‘‘ᨿᨴᩮᩅ ᨲᩮ, ᨶᨶ᩠ᨴ, ᩋᨶᩩᨸᩣᨴᩣᨿ ᩌᩈᩅᩮᩉᩥ ᨧᩥᨲ᩠ᨲᩴ ᩅᩥᨾᩩᨲ᩠ᨲᩴ, ᨲᨴᩣᩉᩴ ᨾᩩᨲ᩠ᨲᩮᩣ ᩑᨲᩈ᩠ᨾᩣ ᨸᨭᩥᩔᩅᩣ’’ᨲᩥ ᩌᩉ. ᩋᨳᩔ ᨽᨣᩅᩣ ᩈᩅᩥᩈᩮᩈᩴ ᩍᨶ᩠ᨴᩕᩥᨿᩮᩈᩩ ᨣᩩᨲ᩠ᨲᨴ᩠ᩅᩣᩁᨲᩴ ᨬᨲ᩠ᩅᩣ ᨲᩴ ᨣᩩᨱᩴ ᩅᩥᨽᩣᩅᩮᨶ᩠ᨲᩮᩣ ‘‘ᩑᨲᨴᨣ᩠ᨣᩴ, ᨽᩥᨠ᩠ᨡᩅᩮ, ᨾᨾ ᩈᩣᩅᨠᩣᨶᩴ ᨽᩥᨠ᩠ᨡᩪᨶᩴ ᩍᨶ᩠ᨴᩕᩥᨿᩮᩈᩩ ᨣᩩᨲ᩠ᨲᨴ᩠ᩅᩣᩁᩣᨶᩴ ᨿᨴᩥᨴᩴ ᨶᨶ᩠ᨴᩮᩣ’’ᨲᩥ (ᩋ. ᨶᩥ. ᪑.᪒᪑᪙, ᪒᪓᪐) ᩍᨶ᩠ᨴᩕᩥᨿᩮᩈᩩ ᨣᩩᨲ᩠ᨲᨴ᩠ᩅᩣᩁᨽᩣᩅᩮᨶ ᨶᩴ ᩑᨲᨴᨣ᩠ᨣᩮ ᨮᨸᩮᩈᩥ. ᨳᩮᩁᩮᩣ ᩉᩥ ‘‘ᩍᨶ᩠ᨴᩕᩥᨿᩣᩈᩴᩅᩁᩴ ᨶᩥᩔᩣᨿ ᩍᨾᩴ ᩅᩥᨸ᩠ᨸᨠᩣᩁᩴ ᨸᨲ᩠ᨲᩮᩣ, ᨲᨾᩉᩴ ᩈᩩᨭ᩠ᨮᩩ ᨶᩥᨣ᩠ᨣᨱ᩠ᩉᩥᩔᩣᨾᩦ’’ᨲᩥ ᩏᩔᩣᩉᨩᩣᨲᩮᩣ ᨻᩃᩅᩉᩥᩁᩮᩣᨲ᩠ᨲᨸ᩠ᨸᩮᩣ ᨲᨲ᩠ᨳ ᨧ ᨠᨲᩣᨵᩥᨠᩣᩁᨲ᩠ᨲᩣ ᩍᨶ᩠ᨴᩕᩥᨿᩈᩴᩅᩁᩮ ᩏᨠ᩠ᨠᩴᩈᨸᩣᩁᨾᩥᩴ ᩋᨣᨾᩣᩈᩥ.

᪒᪗. ᩑᩅᩴ ᩈᩮᩣ ᩑᨲᨴᨣ᩠ᨣᨭ᩠ᨮᩣᨶᩴ ᨸᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨸ᩠ᨸᨲ᩠ᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣᨲᩥᩌᨴᩥᨾᩣᩉ. ᩅᨲ᩠ᨳᩴ ᨡᩮᩣᨾᩴ ᨾᨿᩣ ᨴᩥᨶ᩠ᨶᨶ᩠ᨲᩥ ᨡᩮᩣᨾᩁᨭ᩠ᨮᩮ ᨩᩣᨲᩴ ᩅᨲ᩠ᨳᩴ ᨽᨣᩅᨲᩥ ᨧᩥᨲ᩠ᨲᨸ᩠ᨸᩈᩣᨴᩮᨶ ᨣᩣᩁᩅᨻᩉᩩᨾᩣᨶᩮᨶ ᨾᨿᩣ ᨸᩁᨾᩈᩩᨡᩩᨾᩴ ᨡᩮᩣᨾᩅᨲ᩠ᨳᩴ ᨴᩥᨶ᩠ᨶᨶ᩠ᨲᩥ ᩋᨲ᩠ᨳᩮᩣ. ᩈᨿᨾ᩠ᨽᩩᩔᩣᨲᩥ ¶ ᩈᨿᨾᩮᩅ ᨽᩪᨲᩔ ᨩᩣᨲᩔ ᩋᩁᩥᨿᩣᨿ ᨩᩣᨲᩥᨿᩣ ᨶᩥᨻ᩠ᨻᨲ᩠ᨲᩔ. ᨾᩉᩮᩈᩥᨶᩮᩣᨲᩥ ᨾᩉᨶ᩠ᨲᩮ ᩈᩦᩃᩈᨾᩣᨵᩥᨸᨬ᩠ᨬᩣᩅᩥᨾᩩᨲ᩠ᨲᩥᩅᩥᨾᩩᨲ᩠ᨲᩥᨬᩣᨱᨴᩔᨶᨠ᩠ᨡᨶ᩠ᨵᩮ ᩑᩈᩥ ᨣᩅᩮᩈᩦᨲᩥ ᨾᩉᩮᩈᩥ, ᨲᩔ ᨾᩉᩮᩈᩥᨶᩮᩣ ᩈᨿᨾ᩠ᨽᩩᩔ ᨧᩦᩅᩁᨲ᩠ᨳᩣᨿ ᨡᩮᩣᨾᩅᨲ᩠ᨳᩴ ᨾᨿᩣ ᨴᩥᨶ᩠ᨶᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

᪒᪘. ᨲᩴ ᨾᩮ ᨻᩩᨴ᩠ᨵᩮᩣ ᩅᩥᨿᩣᨠᩣᩈᩦᨲᩥ ᩑᨲ᩠ᨳ ᨲᨶ᩠ᨲᩥ ᩈᩣᨾ᩠ᨿᨲ᩠ᨳᩮ ᩏᨸᨿᩮᩣᨣᩅᨧᨶᩴ, ᨲᩔ ᩅᨲ᩠ᨳᨴᩣᨿᨠᩔ ᨾᩮ ᨴᩣᨶᨹᩃᩴ ᩅᩥᩈᩮᩈᩮᨶ ᩋᨠᩣᩈᩥ ᨠᨳᩮᩈᩥ ᨻᩩᨴ᩠ᨵᩮᩣᨲᩥ ᩋᨲ᩠ᨳᩮᩣ. ᨩᩃᨩᩩᨲ᩠ᨲᨾᨶᩣᨾᨠᩮᩣᨲᩥ ᨸᨴᩩᨾᩩᨲ᩠ᨲᩁᨶᩣᨾᨠᩮᩣ. ‘‘ᨩᩃᩁᩩᨲ᩠ᨲᨾᨶᩣᨿᨠᩮᩣ’’ᨲᩥᨸᩥ ᨸᩣᨮᩮᩣ, ᨲᩔ ᨩᩃᨾᩣᨶᩣᨶᩴ ᨴᩮᩅᨻᩕᩉ᩠ᨾᩣᨶᩴ ᩏᨲ᩠ᨲᨾᨶᩣᨿᨠᩮᩣ ᨸᨵᩣᨶᩮᩣᨲᩥ ᩋᨲ᩠ᨳᩮᩣ. ᩍᨾᩥᨶᩣ ᩅᨲ᩠ᨳᨴᩣᨶᩮᨶᩣᨲᩥ ᩍᨾᩥᨶᩣ ᩅᨲ᩠ᨳᨴᩣᨶᩔ ᨶᩥᩔᨶ᩠ᨴᩮᨶ ᨲ᩠ᩅᩴ ᩋᨶᩣᨣᨲᩮ ᩉᩮᨾᩅᨱ᩠ᨱᩮᩣ ᩈᩩᩅᨱ᩠ᨱᩅᨱ᩠ᨱᩮᩣ ᨽᩅᩥᩔᩈᩥ.

᪒᪙. ᨴ᩠ᩅᩮ ¶ ᩈᨾ᩠ᨸᨲ᩠ᨲᩥᩴ ᩋᨶᩩᨽᩮᩣᨲ᩠ᩅᩣᨲᩥ ᨴᩥᨻ᩠ᨻᨾᨶᩩᩔᩈᨦ᩠ᨡᩣᨲᩣ ᨴ᩠ᩅᩮ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ. ᨠᩩᩈᩃᨾᩪᩃᩮᩉᩥ ᨧᩮᩣᨴᩥᨲᩮᩣᨲᩥ ᨠᩩᩈᩃᩣᩅᨿᩅᩮᩉᩥ ᨠᩩᩈᩃᨠᩮᩣᨭ᩠ᨮᩣᩈᩮᩉᩥ ᨧᩮᩣᨴᩥᨲᩮᩣ ᨸᩮᩈᩥᨲᩮᩣ, ‘‘ᨲ᩠ᩅᩴ ᩍᨾᩥᨶᩣ ᨸᩩᨬ᩠ᨬᩮᨶ ᩈᨲ᩠ᨳᩩ ᨠᩩᩃᩴ ᨸᩈᩅᩣᩉᩦ’’ᨲᩥ ᨸᩮᩈᩥᨲᩮᩣ ᩅᩥᨿᩣᨲᩥ ᩋᨲ᩠ᨳᩮᩣ. ‘‘ᨣᩮᩣᨲᨾᩔ ᨽᨣᩅᨲᩮᩣ ᨠᨶᩥᨭ᩠ᨮᩮᩣ ᨲ᩠ᩅᩴ ᨽᩅᩥᩔᩈᩦ’’ᨲᩥ ᨻ᩠ᨿᩣᨠᩣᩈᩦᨲᩥ ᩈᨾ᩠ᨻᨶ᩠ᨵᩮᩣ.

᪓᪐. ᩁᩣᨣᩁᨲ᩠ᨲᩮᩣ ᩈᩩᨡᩈᩦᩃᩮᩣᨲᩥ ᨠᩥᩃᩮᩈᨠᩣᨾᩮᩉᩥ ᩁᨲ᩠ᨲᩮᩣ ᩋᩃ᩠ᩃᩦᨶᩮᩣ ᨠᩣᨿᩈᩩᨡᨧᩥᨲ᩠ᨲᩈᩩᨡᩣᨶᩩᨽᩅᨶᩈᨽᩣᩅᩮᩣ. ᨠᩣᨾᩮᩈᩩ ᨣᩮᨵᨾᩣᨿᩩᨲᩮᩣᨲᩥ ᩅᨲ᩠ᨳᩩᨠᩣᨾᩮᩈᩩ ᨣᩮᨵᩈᨦ᩠ᨡᩣᨲᩣᨿ ᨲᨱ᩠ᩉᩣᨿ ᩌᨿᩩᨲᩮᩣ ᨿᩮᩣᨩᩥᨲᩮᩣᨲᩥ ᩋᨲ᩠ᨳᩮᩣ. ᨻᩩᨴ᩠ᨵᩮᨶ ᨧᩮᩣᨴᩥᨲᩮᩣ ᩈᨶ᩠ᨲᩮᩣ, ᨲᨴᩣ ᨲ᩠ᩅᨶ᩠ᨲᩥ ᨿᩈ᩠ᨾᩣ ᨠᩣᨾᩮᩈᩩ ᨣᩮᨵᩥᨲᩮᩣ, ᨲᨴᩣ ᨲᩈ᩠ᨾᩣ ¶ ᨲ᩠ᩅᩴ ᩋᨲ᩠ᨲᨶᩮᩣ ᨽᩣᨲᩩᨠᩮᨶ ᨣᩮᩣᨲᨾᨻᩩᨴ᩠ᨵᩮᨶ ᨧᩮᩣᨴᩥᨲᩮᩣ ᨸᨻ᩠ᨻᨩ᩠ᨩᩣᨿ ᩏᨿ᩠ᨿᩮᩣᨩᩥᨲᩮᩣ ᨲᩔ ᩈᨶ᩠ᨲᩥᨠᩮ ᨸᨻ᩠ᨻᨩᩥᩔᩈᩦᨲᩥ ᩈᨾ᩠ᨻᨶ᩠ᨵᩮᩣ.

᪓᪑. ᨸᨻ᩠ᨻᨩᩥᨲ᩠ᩅᩣᨶ ᨲ᩠ᩅᩴ ᨲᨲ᩠ᨳᩣᨲᩥ ᨲᩈ᩠ᨾᩥᩴ ᨣᩮᩣᨲᨾᩔ ᨽᨣᩅᨲᩮᩣ ᩈᩣᩈᨶᩮ ᨲ᩠ᩅᩴ ᨸᨻ᩠ᨻᨩᩥᨲ᩠ᩅᩣ ᨠᩩᩈᩃᨾᩪᩃᩮᨶ ᨾᩪᩃᨽᩪᨲᩮᨶ ᨸᩩᨬ᩠ᨬᩈᨾ᩠ᨽᩣᩁᩮᨶ ᨧᩮᩣᨴᩥᨲᩮᩣ ᨽᩣᩅᨶᩣᨿᩴ ᨶᩥᨿᩮᩣᨩᩥᨲᩮᩣ ᩈᨻ᩠ᨻᩣᩈᩅᩮ ᩈᨠᩃᩣᩈᩅᩮ ᨸᩁᩥᨬ᩠ᨬᩣᨿ ᨩᩣᨶᩥᨲ᩠ᩅᩣ ᨸᨩᩉᩥᨲ᩠ᩅᩣ ᩋᨶᩣᨾᨿᩮᩣ ᨶᩥᨴ᩠ᨴᩩᨠ᩠ᨡᩮᩣ ᨶᩥᨻ᩠ᨻᩣᨿᩥᩔᩈᩥ ᩋᨴᩔᨶᩴ ᨸᩣᨸᩮᩔᩈᩥ, ᩋᨸᨱ᩠ᨱᨲ᩠ᨲᩥᨠᨽᩣᩅᩴ ᨣᨾᩥᩔᩈᩦᨲᩥ ᩋᨲ᩠ᨳᩮᩣ.

᪓᪒. ᩈᨲᨠᨸ᩠ᨸᩈᩉᩔᨾ᩠ᩉᩦᨲᩥ ᩍᨲᩮᩣ ᨠᨸ᩠ᨸᨲᩮᩣ ᨸᩩᨻ᩠ᨻᩮ ᩈᨲᨠᨸ᩠ᨸᩣᨵᩥᨠᩮ ᩈᩉᩔᨾᩮ ᨠᨸ᩠ᨸᨾ᩠ᩉᩥ ᨧᩮᩊᨶᩣᨾᨠᩣ ᨧᨲ᩠ᨲᩣᩁᩮᩣ ᨧᨠ᩠ᨠᩅᨲ᩠ᨲᩥᩁᩣᨩᩣᨶᩮᩣ ᩋᩉᩮᩈᩩᨶ᩠ᨲᩥ ᩋᨲ᩠ᨳᩮᩣ. ᩈᨭ᩠ᨮᩥ ᨠᨸ᩠ᨸᩈᩉᩔᩣᨶᩦᨲᩥ ᨠᨸ᩠ᨸᩈᩉᩔᩣᨶᩥ ᩈᨭ᩠ᨮᩥ ᨧ ᩋᨲᩥᨠ᩠ᨠᨾᩥᨲ᩠ᩅᩣ ᩉᩮᨭ᩠ᨮᩣ ᩑᨠᩈ᩠ᨾᩥᩴ ᨠᨸ᩠ᨸᩮ ᨧᨲ᩠ᨲᩣᩁᩮᩣ ᨩᨶᩣ ᩏᨸᨧᩮᩊᩣ ᨶᩣᨾ ᨧᨠ᩠ᨠᩅᨲ᩠ᨲᩥᩁᩣᨩᩣᨶᩮᩣ ᨧᨲᩪᩈᩩ ᨩᩣᨲᩦᩈᩩ ᩋᩉᩮᩈᩩᨶ᩠ᨲᩥ ᩋᨲ᩠ᨳᩮᩣ.

᪓᪓. ᨸᨬ᩠ᨧᨠᨸ᩠ᨸᩈᩉᩔᨾ᩠ᩉᩦᨲᩥ ᨸᨬ᩠ᨧᨠᨸ᩠ᨸᩣᨵᩥᨠᩮ ᩈᩉᩔᨾᩮ ᨠᨸ᩠ᨸᨾ᩠ᩉᩥ ᨧᩮᩊᩣ ᨶᩣᨾ ᨧᨲ᩠ᨲᩣᩁᩮᩣ ᨩᨶᩣ ᨧᨠ᩠ᨠᩅᨲ᩠ᨲᩥᩁᩣᨩᩣᨶᩮᩣ ᩈᨲ᩠ᨲᩉᩥ ᩁᨲᨶᩮᩉᩥ ᩈᨾ᩠ᨸᨶ᩠ᨶᩣ ᩈᨾᨦ᩠ᨣᩦᨽᩪᨲᩣ ᨩᨾ᩠ᨻᩩᨴᩦᨸᩋᨸᩁᨣᩮᩣᨿᩣᨶᩏᨲ᩠ᨲᩁᨠᩩᩁᩩᨸᩩᨻ᩠ᨻᩅᩥᨴᩮᩉᨴᩦᨸᩈᨦ᩠ᨡᩣᨲᩮ ¶ ᨧᨲᩩᨴᩦᨸᨾ᩠ᩉᩥ ᩍᩔᩁᩣ ᨸᨵᩣᨶᩣ ᩅᩥᩈᩩᩴ ᩋᩉᩮᩈᩩᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩅᩩᨲ᩠ᨲᨶᨿᨾᩮᩅᩣᨲᩥ.

ᨶᨶ᩠ᨴᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᨧᩪᩊᨸᨶ᩠ᨳᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᩮᩣ ¶ ᨶᩣᨾ ᨩᩥᨶᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨧᩪᩊᨸᨶ᩠ᨳᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨿᨴᩮᨲ᩠ᨳ ᩋᨭ᩠ᨮᩩᨸ᩠ᨸᨲ᩠ᨲᩥᩅᩈᩮᨶ ᩅᨲ᩠ᨲᨻ᩠ᨻᩴ, ᨲᩴ ᩋᨭ᩠ᨮᨠᨶᩥᨸᩣᨲᩮ ᨾᩉᩣᨸᨶ᩠ᨳᨠᩅᨲ᩠ᨳᩩᩈ᩠ᨾᩥᩴ (ᨳᩮᩁᨣᩣ. ᪕᪑᪐ ᩌᨴᨿᩮᩣ) ᩅᩩᨲ᩠ᨲᨾᩮᩅ. ᩋᨿᩴ ᨸᨶ ᩅᩥᩈᩮᩈᩮᩣ – ᨾᩉᩣᨸᨶ᩠ᨳᨠᨲ᩠ᨳᩮᩁᩮᩣ ᩋᩁᩉᨲ᩠ᨲᩴ ᨸᨲ᩠ᩅᩣ ᨹᩃᩈᨾᩣᨸᨲ᩠ᨲᩥᩈᩩᨡᩮᨶ ᩅᩦᨲᩥᨶᩣᨾᩮᨶ᩠ᨲᩮᩣ ᨧᩥᨶ᩠ᨲᩮᩈᩥ – ‘‘ᨠᨳᩴ ᨶᩩ ᨡᩮᩣ ᩈᨠ᩠ᨠᩣ ᨧᩪᩊᨸᨶ᩠ᨳᨠᨾ᩠ᨸᩥ ᩍᨾᩈ᩠ᨾᩥᩴ ᩈᩩᨡᩮ ᨸᨲᩥᨭ᩠ᨮᩣᨸᩮᨲᩩ’’ᨶ᩠ᨲᩥ. ᩈᩮᩣ ᩋᨲ᩠ᨲᨶᩮᩣ ᩋᨿ᩠ᨿᨠᩴ ᨵᨶᩈᩮᨭ᩠ᨮᩥᩴ ᩏᨸᩈᨦ᩠ᨠᨾᩥᨲ᩠ᩅᩣ ᩌᩉ – ‘‘ᩈᨧᩮ, ᨾᩉᩣᩈᩮᨭ᩠ᨮᩥ ¶ , ᩋᨶᩩᨩᩣᨶᩣᨳ, ᩋᩉᩴ ᨧᩪᩊᨸᨶ᩠ᨳᨠᩴ ᨸᨻ᩠ᨻᩣᨩᩮᨿ᩠ᨿ’’ᨶ᩠ᨲᩥ. ‘‘ᨸᨻ᩠ᨻᩣᨩᩮᨳ, ᨽᨶ᩠ᨲᩮ’’ᨲᩥ. ᨳᩮᩁᩮᩣ ᨲᩴ ᨸᨻ᩠ᨻᩣᨩᩮᩈᩥ. ᩈᩮᩣ ᨴᩈᩈᩩ ᩈᩦᩃᩮᩈᩩ ᨸᨲᩥᨭ᩠ᨮᩥᨲᩮᩣ ᨽᩣᨲᩩ ᩈᨶ᩠ᨲᩥᨠᩮ –

‘‘ᨸᨴᩩᨾᩴ ᨿᨳᩣ ᨠᩮᩣᨠᨶᨴᩴ ᩈᩩᨣᨶ᩠ᨵᩴ, ᨸᩣᨲᩮᩣ ᩈᩥᨿᩣ ᨹᩩᩃ᩠ᩃᨾᩅᩦᨲᨣᨶ᩠ᨵᩴ;

ᩋᨦ᩠ᨣᩦᩁᩈᩴ ᨸᩔ ᩅᩥᩁᩮᩣᨧᨾᩣᨶᩴ, ᨲᨸᨶ᩠ᨲᨾᩣᨴᩥᨧ᩠ᨧᨾᩥᩅᨶ᩠ᨲᩃᩥᨠ᩠ᨡᩮ’’ᨲᩥ. (ᩈᩴ. ᨶᩥ. ᪑.᪑᪒᪓; ᩋ. ᨶᩥ. ᪕.᪑᪙᪕) –

ᨣᩣᨳᩴ ᩏᨣ᩠ᨣᨱ᩠ᩉᨶ᩠ᨲᩮᩣ ᨧᨲᩪᩉᩥ ᨾᩣᩈᩮᩉᩥ ᩏᨣ᩠ᨣᩉᩮᨲᩩᩴ ᨶᩣᩈᨠ᩠ᨡᩥ, ᨣᩉᩥᨲᨾ᩠ᨸᩥ ᩉᨴᨿᩮ ᨶ ᨲᩥᨭ᩠ᨮᨲᩥ. ᩋᨳ ᨶᩴ ᨾᩉᩣᨸᨶ᩠ᨳᨠᩮᩣ, ‘‘ᨧᩪᩊᨸᨶ᩠ᨳᨠ, ᨲ᩠ᩅᩴ ᩍᨾᩈ᩠ᨾᩥᩴ ᩈᩣᩈᨶᩮ ᩋᨽᨻ᩠ᨻᩮᩣ, ᨧᨲᩪᩉᩥ ᨾᩣᩈᩮᩉᩥ ᩑᨠᩴ ᨣᩣᨳᨾ᩠ᨸᩥ ᨣᩉᩮᨲᩩᩴ ᨶ ᩈᨠ᩠ᨠᩮᩣᩈᩥ, ᨸᨻ᩠ᨻᨩᩥᨲᨠᩥᨧ᩠ᨧᩴ ᨸᨶ ᨲ᩠ᩅᩴ ᨠᨳᩴ ᨾᨲ᩠ᨳᨠᩴ ᨸᩣᨸᩮᩔᩈᩥ, ᨶᩥᨠ᩠ᨡᨾ ᩍᨲᩮᩣ’’ᨲᩥ ᩈᩮᩣ ᨳᩮᩁᩮᨶ ᨸᨱᩣᨾᩥᨠᩮᩣ ᨴ᩠ᩅᩣᩁᨠᩮᩣᨭ᩠ᨮᨠᩈᨾᩦᨸᩮ ᩁᩮᩣᨴᨾᩣᨶᩮᩣ ᩋᨭ᩠ᨮᩣᩈᩥ.

ᨲᩮᨶ ᨧ ᩈᨾᨿᩮᨶ ᩈᨲ᩠ᨳᩣ ᨩᩦᩅᨠᨾ᩠ᨻᩅᨶᩮ ᩅᩥᩉᩁᨲᩥ. ᩋᨳ ᨩᩦᩅᨠᩮᩣ ᨸᩩᩁᩥᩈᩴ ᨸᩮᩈᩮᩈᩥ – ‘‘ᨣᨧ᩠ᨨ, ᨸᨬ᩠ᨧᩉᩥ ᨽᩥᨠ᩠ᨡᩩᩈᨲᩮᩉᩥ ᩈᨴ᩠ᨵᩥᩴ ᩈᨲ᩠ᨳᩣᩁᩴ ᨶᩥᨾᨶ᩠ᨲᩮᩉᩦ’’ᨲᩥ. ᨲᩮᨶ ᨧ ᩈᨾᨿᩮᨶ ᩌᨿᩈ᩠ᨾᩣ ᨾᩉᩣᨸᨶ᩠ᨳᨠᩮᩣ ᨽᨲ᩠ᨲᩩᨴ᩠ᨴᩮᩈᨠᩮᩣ ᩉᩮᩣᨲᩥ. ᩈᩮᩣ ‘‘ᨸᨬ᩠ᨧᨶ᩠ᨶᩴ ᨽᩥᨠ᩠ᨡᩩᩈᨲᩣᨶᩴ ᨽᩥᨠ᩠ᨡᩴ ᨸᨭᩥᨧ᩠ᨨᨳᩣ’’ᨲᩥ ᩅᩩᨲ᩠ᨲᩮᩣ ‘‘ᨧᩪᩊᨸᨶ᩠ᨳᨠᩴ ᨮᨸᩮᨲ᩠ᩅᩣ ᩈᩮᩈᩣᨶᩴ ᨸᨭᩥᨧ᩠ᨨᩣᨾᩦ’’ᨲᩥ ᩌᩉ. ᨲᩴ ᩈᩩᨲ᩠ᩅᩣ ᨧᩪᩊᨸᨶ᩠ᨳᨠᩮᩣ ᨽᩥᨿ᩠ᨿᩮᩣᩈᩮᩣᨾᨲ᩠ᨲᩣᨿ ᨴᩮᩣᨾᨶᩔᨸ᩠ᨸᨲ᩠ᨲᩮᩣ ᩋᩉᩮᩣᩈᩥ. ᩈᨲ᩠ᨳᩣ ᨲᩔ ᨧᩥᨲ᩠ᨲᨠ᩠ᨡᩮᨴᩴ ᨬᨲ᩠ᩅᩣ ‘‘ᨧᩪᩊᨸᨶ᩠ᨳᨠᩮᩣ ᨾᨿᩣ ᨠᨲᩮᨶ ᩏᨸᩣᨿᩮᨶ ᨻᩩᨩ᩠ᨫᩥᩔᨲᩦ’’ᨲᩥ ¶ ᨲᩔ ᩋᩅᩥᨴᩪᩁᨭ᩠ᨮᩣᨶᩮ ᩋᨲ᩠ᨲᩣᨶᩴ ᨴᩔᩮᨲ᩠ᩅᩣ ‘‘ᨠᩥᩴ, ᨸᨶ᩠ᨳᨠ, ᩁᩮᩣᨴᩈᩦ’’ᨲᩥ ᨸᩩᨧ᩠ᨨᩥ. ‘‘ᨽᩣᨲᩣ ᨾᩴ, ᨽᨶ᩠ᨲᩮ, ᨸᨱᩣᨾᩮᨲᩦ’’ᨲᩥ ᩌᩉ. ‘‘ᨸᨶ᩠ᨳᨠ, ᨾᩣ ᨧᩥᨶ᩠ᨲᨿᩥ, ᨾᨾ ᩈᩣᩈᨶᩮ ¶ ᨲᩩᨿ᩠ᩉᩴ ᨸᨻ᩠ᨻᨩ᩠ᨩᩣ, ᩑᩉᩥ ᩍᨾᩴ ᨣᩉᩮᨲ᩠ᩅᩣ ‘ᩁᨩᩮᩣᩉᩁᨱᩴ, ᩁᨩᩮᩣᩉᩁᨱ’ᨶ᩠ᨲᩥ ᨾᨶᩈᩥ ᨠᩁᩮᩣᩉᩦ’’ᨲᩥ ᩍᨴ᩠ᨵᩥᨿᩣ ᩈᩩᨴ᩠ᨵᩴ ᨧᩮᩣᩊᨠ᩠ᨡᨱ᩠ᨯᩴ ᩋᨽᩥᩈᨦ᩠ᨡᩁᩥᨲ᩠ᩅᩣ ᩋᨴᩣᩈᩥ. ᩈᩮᩣ ᩈᨲ᩠ᨳᩣᩁᩣ ᨴᩥᨶ᩠ᨶᩴ ᨧᩮᩣᩊᨠ᩠ᨡᨱ᩠ᨯᩴ ‘‘ᩁᨩᩮᩣᩉᩁᨱᩴ, ᩁᨩᩮᩣᩉᩁᨱ’’ᨶ᩠ᨲᩥ ᩉᨲ᩠ᨳᩮᨶ ᨸᩁᩥᨾᨩ᩠ᨩᨶ᩠ᨲᩮᩣ ᨶᩥᩈᩦᨴᩥ. ᨲᩔ ᨲᩴ ᨸᩁᩥᨾᨩ᩠ᨩᨶ᩠ᨲᩔ ᨠᩥᩃᩥᨭ᩠ᨮᨵᩣᨲᩩᨠᩴ ᨩᩣᨲᩴ, ᨸᩩᨶ ᨸᩁᩥᨾᨩ᩠ᨩᨶ᩠ᨲᩔ ᩏᨠ᩠ᨡᩃᩥᨸᩁᩥᨸᩩᨬ᩠ᨨᨶᩈᨴᩥᩈᩴ ᨩᩣᨲᩴ. ᩈᩮᩣ ᨬᩣᨱᨸᩁᩥᨸᩣᨠᨲ᩠ᨲᩣ ᩑᩅᩴ ᨧᩥᨶ᩠ᨲᩮᩈᩥ – ‘‘ᩍᨴᩴ ᨧᩮᩣᩊᨠ᩠ᨡᨱ᩠ᨯᩴ ᨸᨠᨲᩥᨿᩣ ᨸᩁᩥᩈᩩᨴ᩠ᨵᩴ, ᩍᨾᩴ ᩏᨸᩣᨴᩥᨱ᩠ᨱᨠᩈᩁᩦᩁᩴ ᨶᩥᩔᩣᨿ ᨠᩥᩃᩥᨭ᩠ᨮᩴ ᩋᨬ᩠ᨬᨳᩣ ᨩᩣᨲᩴ, ᨲᩈ᩠ᨾᩣ ᩋᨶᩥᨧ᩠ᨧᩴ ᨿᨳᩣᨸᩮᨲᩴ, ᩑᩅᩴ ᨧᩥᨲ᩠ᨲᨾ᩠ᨸᩦ’’ᨲᩥ ᨡᨿᩅᨿᩴ ᨸᨭ᩠ᨮᨸᩮᨲ᩠ᩅᩣ ᨲᩈ᩠ᨾᩥᩴᨿᩮᩅ ᨶᩥᨾᩥᨲ᩠ᨲᩮ ᨫᩣᨶᩣᨶᩥ ᨶᩥᨻ᩠ᨻᨲ᩠ᨲᩮᨲ᩠ᩅᩣ ᨫᩣᨶᨸᩣᨴᨠᩴ ᨠᨲ᩠ᩅᩣ ᩅᩥᨸᩔᨶᩴ ᨸᨭ᩠ᨮᨸᩮᨲ᩠ᩅᩣ ᩈᩉ ᨸᨭᩥᩈᨾ᩠ᨽᩥᨴᩣᩉᩥ ᩋᩁᩉᨲ᩠ᨲᩴ ᨸᩣᨸᩩᨱᩥ. ᩋᩁᩉᨲ᩠ᨲᨸᨲ᩠ᨲᩔᩮᩅᩔ ᨲᩮᨸᩥᨭᨠᩴ ᨸᨬ᩠ᨧᩣᨽᩥᨬ᩠ᨬᩣ ᨧ ᩌᨣᨾᩥᩴᩈᩩ.

ᩈᨲ᩠ᨳᩣ ᩑᨠᩪᨶᩮᩉᩥ ᨸᨬ᩠ᨧᨽᩥᨠ᩠ᨡᩩᩈᨲᩮᩉᩥ ᩈᨴ᩠ᨵᩥᩴ ᨣᨶ᩠ᨲ᩠ᩅᩣ ᨩᩦᩅᨠᩔ ᨶᩥᩅᩮᩈᨶᩮ ᨸᨬ᩠ᨬᨲ᩠ᨲᩮ ᩌᩈᨶᩮ ᨶᩥᩈᩦᨴᩥ. ᨧᩪᩊᨸᨶ᩠ᨳᨠᩮᩣ ᨸᨶ ᩋᨲ᩠ᨲᨶᩮᩣ ᨽᩥᨠ᩠ᨡᩣᨿ ᩋᨸ᩠ᨸᨭᩥᨧ᩠ᨨᩥᨲᨲ᩠ᨲᩣ ᩑᩅ ᨶ ᨣᨲᩮᩣ. ᨩᩦᩅᨠᩮᩣ ᨿᩣᨣᩩᩴ ᨴᩣᨲᩩᩴ ¶ ᩌᩁᨽᩥ. ᩈᨲ᩠ᨳᩣ ᩉᨲ᩠ᨳᩮᨶ ᨸᨲ᩠ᨲᩴ ᨸᩥᨴᩉᩥ. ‘‘ᨠᩈ᩠ᨾᩣ, ᨽᨶ᩠ᨲᩮ, ᨶ ᨣᨱ᩠ᩉᨳᩣ’’ᨲᩥ ᩅᩩᨲ᩠ᨲᩮ ‘‘ᩅᩥᩉᩣᩁᩮ ᩑᨠᩮᩣ ᨽᩥᨠ᩠ᨡᩩ ᩋᨲ᩠ᨳᩥ, ᨩᩦᩅᨠᩣ’’ᨲᩥ. ᩈᩮᩣ ᨸᩩᩁᩥᩈᩴ ᨸᩮᩈᩮᩈᩥ – ‘‘ᨣᨧ᩠ᨨ, ᨽᨱᩮ, ᩅᩥᩉᩣᩁᩮ ᨶᩥᩈᩥᨶ᩠ᨶᩴ ᩋᨿ᩠ᨿᩴ ᨣᩉᩮᨲ᩠ᩅᩣ ᩑᩉᩦ’’ᨲᩥ. ᨧᩪᩊᨸᨶ᩠ᨳᨠᨲ᩠ᨳᩮᩁᩮᩣᨸᩥ ᩁᩪᨸᩮᨶ ᨠᩥᩁᩥᨿᩣᨿ ᨧ ᩑᨠᨾ᩠ᨸᩥ ᩑᨠᩮᨶ ᩋᩈᨴᩥᩈᩴ ᨽᩥᨠ᩠ᨡᩩᩈᩉᩔᩴ ᨶᩥᨾ᩠ᨾᩥᨶᩥᨲ᩠ᩅᩣ ᨶᩥᩈᩦᨴᩥ. ᩈᩮᩣ ᨸᩩᩁᩥᩈᩮᩣ ᩅᩥᩉᩣᩁᩮ ᨽᩥᨠ᩠ᨡᩪᨶᩴ ᨻᩉᩩᨽᩣᩅᩴ ᨴᩥᩈ᩠ᩅᩣ ᨣᨶ᩠ᨲ᩠ᩅᩣ ᨩᩦᩅᨠᩔ ᨠᨳᩮᩈᩥ – ‘‘ᩍᨾᩈ᩠ᨾᩣ ᨽᩥᨠ᩠ᨡᩩᩈᨦ᩠ᨥᩣ ᩅᩥᩉᩣᩁᩮ ᨽᩥᨠ᩠ᨡᩩᩈᨦ᩠ᨥᩮᩣ ᨻᩉᩩᨲᩁᩮᩣ, ᨸᨠ᩠ᨠᩮᩣᩈᩥᨲᨻ᩠ᨻᩴ ᩋᨿ᩠ᨿᩴ ᨶ ᨩᩣᨶᩣᨾᩦ’’ᨲᩥ. ᨩᩦᩅᨠᩮᩣ ᩈᨲ᩠ᨳᩣᩁᩴ ᨸᩩᨧ᩠ᨨᩥ – ‘‘ᨠᩮᩣ ᨶᩣᨾᩮᩣ, ᨽᨶ᩠ᨲᩮ, ᩅᩥᩉᩣᩁᩮ ᨶᩥᩈᩥᨶ᩠ᨶᩮᩣ ᨽᩥᨠ᩠ᨡᩪ’’ᨲᩥ? ‘‘ᨧᩪᩊᨸᨶ᩠ᨳᨠᩮᩣ ᨶᩣᨾ, ᨩᩦᩅᨠᩣ’’ᨲᩥ. ‘‘ᨣᨧ᩠ᨨ, ᨽᨱᩮ, ‘ᨧᩪᩊᨸᨶ᩠ᨳᨠᩮᩣ ᨶᩣᨾ ᨠᨲᩁᩮᩣ’ᨲᩥ ᨸᩩᨧ᩠ᨨᩥᨲ᩠ᩅᩣ ᨲᩴ ᩌᨶᩮᩉᩦ’’ᨲᩥ. ᩈᩮᩣ ᩅᩥᩉᩣᩁᩴ ᨣᨶ᩠ᨲ᩠ᩅᩣ ‘‘ᨧᩪᩊᨸᨶ᩠ᨳᨠᩮᩣ ᨶᩣᨾ ᨠᨲᩁᩮᩣ, ᨽᨶ᩠ᨲᩮ’’ᨲᩥ ᨸᩩᨧ᩠ᨨᩥ. ‘‘ᩋᩉᩴ ᨧᩪᩊᨸᨶ᩠ᨳᨠᩮᩣ, ᩋᩉᩴ ᨧᩪᩊᨸᨶ᩠ᨳᨠᩮᩣ’’ᨲᩥ ᩑᨠᨸ᩠ᨸᩉᩣᩁᩮᨶ ᨽᩥᨠ᩠ᨡᩩᩈᩉᩔᨾ᩠ᨸᩥ ᨠᨳᩮᩈᩥ. ᩈᩮᩣ ᨸᩩᨶᩣᨣᨶ᩠ᨲ᩠ᩅᩣ ᨲᩴ ᨸᩅᨲ᩠ᨲᩥᩴ ᨩᩦᩅᨠᩔ ᩌᩁᩮᩣᨧᩮᩈᩥ ᨩᩦᩅᨠᩮᩣ ᨸᨭᩥᩅᩥᨴ᩠ᨵᩈᨧ᩠ᨧᨲ᩠ᨲᩣ ‘‘ᩍᨴ᩠ᨵᩥᨾᩣ ᨾᨬ᩠ᨬᩮ, ᩋᨿ᩠ᨿᩮᩣ’’ᨲᩥ ᨶᨿᨲᩮᩣ ᨬᨲ᩠ᩅᩣ ‘‘ᨣᨧ᩠ᨨ, ᨽᨱᩮ, ᨸᨮᨾᩴ ᨠᨳᩮᨶ᩠ᨲᩴ ᩋᨿ᩠ᨿᨾᩮᩅ ‘ᨲᩩᨾ᩠ᩉᩮ ᩈᨲ᩠ᨳᩣ ᨸᨠ᩠ᨠᩮᩣᩈᨲᩦ’ᨲᩥ ᩅᨲ᩠ᩅᩣ ᨧᩦᩅᩁᨠᨱ᩠ᨱᩮ ᨣᨱ᩠ᩉᩣᩉᩦ’’ᨲᩥ ᩌᩉ. ᩈᩮᩣ ᩅᩥᩉᩣᩁᩴ ᨣᨶ᩠ᨲ᩠ᩅᩣ ᨲᨳᩣ ᩋᨠᩣᩈᩥ. ᨲᩣᩅᨴᩮᩅ ᨶᩥᨾ᩠ᨾᩥᨲᨽᩥᨠ᩠ᨡᩪ ᩋᨶ᩠ᨲᩁᨵᩣᨿᩥᩴᩈᩩ. ᩈᩮᩣ ᨳᩮᩁᩴ ᨣᩉᩮᨲ᩠ᩅᩣ ᩋᨣᨾᩣᩈᩥ.

ᩈᨲ᩠ᨳᩣ ¶ ᨲᩈ᩠ᨾᩥᩴ ᨡᨱᩮ ᨿᩣᨣᩩᨬ᩠ᨧ ᨡᨩ᩠ᨩᨠᩣᨴᩥᨽᩮᨴᨬ᩠ᨧ ᨸᨭᩥᨣ᩠ᨣᨱ᩠ᩉᩥ. ᨠᨲᨽᨲ᩠ᨲᨠᩥᨧ᩠ᨧᩮᩣ ᨽᨣᩅᩣ ᩌᨿᩈ᩠ᨾᨶ᩠ᨲᩴ ᨧᩪᩊᨸᨶ᩠ᨳᨠᩴ ᩌᨱᩣᨸᩮᩈᩥ ‘‘ᩋᨶᩩᨾᩮᩣᨴᨶᩴ ᨠᩁᩮᩣᩉᩦ’’ᨲᩥ. ᩈᩮᩣ ᨸᨽᩥᨶ᩠ᨶᨸᨭᩥᩈᨾ᩠ᨽᩥᨴᩮᩣ ᩈᩥᨶᩮᩁᩩᩴ ᨣᩉᩮᨲ᩠ᩅᩣ ¶ ᨾᩉᩣᩈᨾᩩᨴ᩠ᨴᩴ ᨾᨶ᩠ᨳᩮᨶ᩠ᨲᩮᩣ ᩅᩥᨿ ᨲᩮᨸᩥᨭᨠᩴ ᨻᩩᨴ᩠ᨵᩅᨧᨶᩴ ᩈᨦ᩠ᨡᩮᩣᨽᩮᨶ᩠ᨲᩮᩣ ᩈᨲ᩠ᨳᩩ ᩋᨩ᩠ᨫᩣᩈᨿᩴ ᨣᨱ᩠ᩉᨶ᩠ᨲᩮᩣ ᩋᨶᩩᨾᩮᩣᨴᨶᩴ ᩋᨠᩣᩈᩥ. ᨴᩈᨻᩃᩮ ᨽᨲ᩠ᨲᨠᩥᨧ᩠ᨧᩴ ᨠᨲ᩠ᩅᩣ ᩅᩥᩉᩣᩁᩴ ᨣᨲᩮ ᨵᨾ᩠ᨾᩈᨽᩣᨿᩴ ᨠᨳᩣ ᩏᨴᨸᩣᨴᩥ ‘ᩋᩉᩮᩣ ᨻᩩᨴ᩠ᨵᩣᨶᩴ ᩌᨶᩩᨽᩣᩅᩮᩣ, ᨿᨲᩕ ᩉᩥ ᨶᩣᨾ ᨧᨲ᩠ᨲᩣᩁᩮᩣ ᨾᩣᩈᩮ ᩑᨠᨣᩣᨳᩴ ᨣᩉᩮᨲᩩᩴ ᩋᩈᨠ᩠ᨠᩮᩣᨶ᩠ᨲᨾ᩠ᨸᩥ ᩃᩉᩩᨠᩮᨶ ᨡᨱᩮᨶᩮᩅ ᩑᩅᩴ ᨾᩉᩥᨴ᩠ᨵᩥᨠᩴ ᩋᨠᩴᩈᩪ’ᨲᩥ, ᨲᨳᩣ ᩉᩥ ᨩᩦᩅᨠᩔ ᨶᩥᩅᩮᩈᨶᩮ ᨶᩥᩈᩥᨶ᩠ᨶᩮᩣ ᨽᨣᩅᩣ ‘ᩑᩅᩴ ᨧᩪᩊᨸᨶ᩠ᨳᨠᩔ ᨧᩥᨲ᩠ᨲᩴ ᩈᨾᩣᩉᩥᨲᩴ, ᩅᩦᨳᩥᨸᨭᩥᨸᨶ᩠ᨶᩣ ᩅᩥᨸᩔᨶᩣ’ᨲᩥ ᨬᨲ᩠ᩅᩣ ᨿᨳᩣᨶᩥᩈᩥᨶ᩠ᨶᩮᩣᨿᩮᩅ ᩋᨲ᩠ᨲᩣᨶᩴ ᨴᩔᩮᨲ᩠ᩅᩣ, ‘ᨸᨶ᩠ᨳᨠ, ᨶᩮᩅᩣᨿᩴ ᨸᩥᩃᩮᩣᨲᩥᨠᩣ ᨠᩥᩃᩥᨭ᩠ᨮᩣ ᩁᨩᩣᨶᩩᨠᩥᨱ᩠ᨱᩣ, ᩍᨲᩮᩣ ᨸᨶ ᩋᨬ᩠ᨬᩮᩣᨸᩥ ᩋᩁᩥᨿᩔ ᩅᩥᨶᨿᩮ ᩈᩴᨠᩥᩃᩮᩈᩮᩣ ᩁᨩᩮᩣ’ᨲᩥ ᨴᩔᩮᨶ᩠ᨲᩮᩣ –

‘‘ᩁᩣᨣᩮᩣ ᩁᨩᩮᩣ ᨶ ᨧ ᨸᨶ ᩁᩮᨱᩩ ᩅᩩᨧ᩠ᨧᨲᩥ, ᩁᩣᨣᩔᩮᨲᩴ ᩋᨵᩥᩅᨧᨶᩴ ᩁᨩᩮᩣᨲᩥ;

ᩑᨲᩴ ᩁᨩᩴ ᩅᩥᨸ᩠ᨸᨩᩉᩥᨲ᩠ᩅᩣ ᨽᩥᨠ᩠ᨡᩅᩮᩣ, ᩅᩥᩉᩁᨶ᩠ᨲᩥ ᨲᩮ ᩅᩥᨣᨲᩁᨩᩔ ᩈᩣᩈᨶᩮ.

‘‘ᨴᩮᩣᩈᩮᩣ ᩁᨩᩮᩣ…ᨸᩮ… ᩅᩥᨣᨲᩁᨩᩔ ᩈᩣᩈᨶᩮ.

‘‘ᨾᩮᩣᩉᩮᩣ ¶ ᩁᨩᩮᩣ…ᨸᩮ… ᩅᩥᨣᨲᩁᨩᩔ ᩈᩣᩈᨶᩮ’’ᨲᩥ. (ᨾᩉᩣᨶᩥ. ᪒᪐᪙; ᨧᩪᩊᨶᩥ. ᩏᨴᨿᨾᩣᨱᩅᨸᩩᨧ᩠ᨨᩣᨶᩥᨴ᩠ᨴᩮᩈ ᪗᪔) –

ᩍᨾᩣ ᨲᩥᩔᩮᩣ ᨣᩣᨳᩣᨿᩮᩣ ᩋᨽᩣᩈᩥ. ᨣᩣᨳᩣᨸᩁᩥᨿᩮᩣᩈᩣᨶᩮ ᨧᩪᩊᨸᨶ᩠ᨳᨠᩮᩣ ᩈᩉᨸᨭᩥᩈᨾ᩠ᨽᩥᨴᩣᩉᩥ ᩋᩁᩉᨲ᩠ᨲᩴ ᨸᩣᨸᩩᨱᩦᨲᩥ. ᩈᨲ᩠ᨳᩣ ᨲᩮᩈᩴ ᨽᩥᨠ᩠ᨡᩪᨶᩴ ᨠᨳᩣᩈᩃ᩠ᩃᩣᨸᩴ ᩈᩩᨲ᩠ᩅᩣ ᩌᨣᨶ᩠ᨲ᩠ᩅᩣ ᨻᩩᨴ᩠ᨵᩣᩈᨶᩮ ᨶᩥᩈᩦᨴᩥᨲ᩠ᩅᩣ ‘‘ᨠᩥᩴ ᩅᨴᩮᨳ, ᨽᩥᨠ᩠ᨡᩅᩮ’’ᨲᩥ ᨸᩩᨧ᩠ᨨᩥᨲ᩠ᩅᩣ ‘‘ᩍᨾᩴ ᨶᩣᨾ, ᨽᨶ᩠ᨲᩮ’’ᨲᩥ ᩅᩩᨲ᩠ᨲᩮ ‘‘ᨽᩥᨠ᩠ᨡᩅᩮ, ᨧᩪᩊᨸᨶ᩠ᨳᨠᩮᨶ ᩍᨴᩣᨶᩥ ᨾᨿ᩠ᩉᩴ ᩒᩅᩣᨴᩮ ᨮᨲ᩠ᩅᩣ ᩃᩮᩣᨠᩩᨲ᩠ᨳᩁᨴᩣᨿᨩ᩠ᨩᩴ ᩃᨴ᩠ᨵᩴ, ᨸᩩᨻ᩠ᨻᩮ ᨸᨶ ᩃᩮᩣᨠᩥᨿᨴᩣᨿᨩ᩠ᨩᩴ ᩃᨴ᩠ᨵ’’ᨶ᩠ᨲᩥ ᩅᨲ᩠ᩅᩣ ᨲᩮᩉᩥ ᨿᩣᨧᩥᨲᩮᩣ ᨧᩪᩊᩈᩮᨭ᩠ᨮᩥᨩᩣᨲᨠᩴ (ᨩᩣ. ᪑.᪑.᪔) ᨠᨳᩮᩈᩥ. ᩋᨸᩁᨽᩣᨣᩮ ᨶᩴ ᩈᨲ᩠ᨳᩣ ᩋᩁᩥᨿᨣᨱᨸᩁᩥᩅᩩᨲᩮᩣ ᨵᨾ᩠ᨾᩣᩈᨶᩮ ᨶᩥᩈᩥᨶ᩠ᨶᩮᩣ ᨾᨶᩮᩣᨾᨿᩴ ᨠᩣᨿᩴ ᩋᨽᩥᨶᩥᨾ᩠ᨾᩥᨶᨶ᩠ᨲᩣᨶᩴ ᨽᩥᨠ᩠ᨡᩪᨶᩴ ᨧᩮᨲᩮᩣᩅᩥᩅᨭ᩠ᨭᨠᩩᩈᩃᩣᨶᨬ᩠ᨧ ᩋᨣ᩠ᨣᨭ᩠ᨮᩣᨶᩮ ᨮᨸᩮᩈᩥ.

᪓᪕. ᩑᩅᩴ ᩈᩮᩣ ᨸᨲ᩠ᨲᩑᨲᨴᨣ᩠ᨣᨭ᩠ᨮᩣᨶᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᨸᩦᨲᩥᩈᩮᩣᨾᨶᩔᩅᩈᩮᨶ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩮᩣ ᨶᩣᨾ ᨩᩥᨶᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᨸᩩᩁᩥᨾᨸᨴᨴ᩠ᩅᨿᩴ ᩅᩩᨲ᩠ᨲᨲ᩠ᨳᨾᩮᩅ. ᨣᨱᨾ᩠ᩉᩣ ᩅᩪᨸᨠᨭ᩠ᨮᩮᩣ ¶ ᩈᩮᩣᨲᩥ ᩈᩮᩣ ᨸᨴᩩᨾᩩᨲ᩠ᨲᩁᩮᩣ ᨶᩣᨾ ᩈᨲ᩠ᨳᩣ ᨣᨱᨾ᩠ᩉᩣ ᨾᩉᨲᩣ ᨽᩥᨠ᩠ᨡᩩᩈᨾᩪᩉᨲᩮᩣ ᩅᩪᨸᨠᨭ᩠ᨮᩮᩣ ᩅᩥᩈᩩᩴ ᨽᩪᨲᩮᩣ ᩅᩥᩅᩮᨠᩴ ᩏᨸᨣᨲᩮᩣ. ᨲᨴᩣ ¶ ᨾᨾ ᨲᩣᨸᩈᨠᩣᩃᩮ ᩉᩥᨾᩅᨶ᩠ᨲᩮ ᩉᩥᨾᩣᩃᨿᨸᨻ᩠ᨻᨲᩈᨾᩦᨸᩮ ᩅᩈᩥ ᩅᩣᩈᩴ ᨠᨸ᩠ᨸᩮᩈᩥ, ᨧᨲᩪᩉᩥ ᩍᩁᩥᨿᩣᨸᨳᩮᩉᩥ ᩅᩥᩉᩣᩈᩦᨲᩥ ᩋᨲ᩠ᨳᩮᩣ.

᪓᪖. ᩋᩉᨾ᩠ᨸᩥ…ᨸᩮ… ᨲᨴᩣᨲᩥ ᨿᨴᩣ ᩈᩮᩣ ᨽᨣᩅᩣ ᩉᩥᨾᩅᨶ᩠ᨲᩴ ᩏᨸᨣᨶ᩠ᨲ᩠ᩅᩣ ᩅᩈᩥ, ᨲᨴᩣ ᩋᩉᨾ᩠ᨸᩥ ᩉᩥᨾᩅᨶ᩠ᨲᩈᨾᩦᨸᩮ ᨠᨲᩋᩔᨾᩮ ᩌ ᩈᨾᨶ᩠ᨲᨲᩮᩣ ᨠᩣᨿᨧᩥᨲ᩠ᨲᨸᩦᩊᩣᩈᨦ᩠ᨡᩣᨲᩣ ᨸᩁᩥᩔᨿᩣ ᩈᨾᨶ᩠ᨲᩥ ᩑᨲ᩠ᨳᩣᨲᩥ ᩋᩔᨾᩮᩣᨲᩥ ᩃᨴ᩠ᨵᨶᩣᨾᩮ ᩋᩁᨬ᩠ᨬᩣᩅᩣᩈᩮ ᩅᩈᩣᨾᩦᨲᩥ ᩈᨾ᩠ᨻᨶ᩠ᨵᩮᩣ. ᩋᨧᩥᩁᩣᨣᨲᩴ ᨾᩉᩣᩅᩦᩁᨶ᩠ᨲᩥ ᩋᨧᩥᩁᩴ ᩌᨣᨲᩴ ᨾᩉᩣᩅᩦᩁᩥᨿᩅᨶ᩠ᨲᩴ ᩃᩮᩣᨠᨶᩣᨿᨠᩴ ᨸᨵᩣᨶᩴ ᨲᩴ ᨽᨣᩅᨶ᩠ᨲᩴ ᩏᨸᩮᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ, ᩌᨣᨲᨠ᩠ᨡᨱᩮᨿᩮᩅ ᩏᨸᩣᨣᨾᩥᨶ᩠ᨲᩥ ᩋᨲ᩠ᨳᩮᩣ.

᪓᪗. ᨸᩩᨸ᩠ᨹᨧ᩠ᨨᨲ᩠ᨲᩴ ᨣᩉᩮᨲ᩠ᩅᩣᨶᩣᨲᩥ ᩑᩅᩴ ᩏᨸᨣᨧ᩠ᨨᨶ᩠ᨲᩮᩣ ᨧ ᨸᨴᩩᨾᩩᨸ᩠ᨸᩃᨸᩩᨸ᩠ᨹᩣᨴᩦᩉᩥ ᨨᩣᨴᩥᨲᩴ ᨸᩩᨸ᩠ᨹᨾᨿᩴ ᨨᨲ᩠ᨲᩴ ᨣᩉᩮᨲ᩠ᩅᩣ ᨶᩁᩣᩈᨽᩴ ᨶᩁᩣᨶᩴ ᩈᩮᨭ᩠ᨮᩴ ᨽᨣᩅᨶ᩠ᨲᩴ ᨨᩣᨴᩮᨶ᩠ᨲᩮᩣ ᩏᨸᨣᨧ᩠ᨨᩥᩴ ᩈᨾᩦᨸᩴ ᨣᨲᩮᩣᩈ᩠ᨾᩦᨲᩥ ᩋᨲ᩠ᨳᩮᩣ. ᩈᨾᩣᨵᩥᩴ ᩈᨾᩣᨸᨩ᩠ᨩᨶ᩠ᨲᨶ᩠ᨲᩥ ᩁᩪᨸᩣᩅᨧᩁᩈᨾᩣᨵᩥᨩ᩠ᨫᩣᨶᩴ ᩈᨾᩣᨸᨩ᩠ᨩᨶ᩠ᨲᩴ ᩋᨸ᩠ᨸᩮᨲ᩠ᩅᩣ ᨶᩥᩈᩥᨶ᩠ᨶᩔ ᩋᨶ᩠ᨲᩁᩣᨿᩴ ᩋᩉᩴ ᩋᨠᩣᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

᪓᪘. ᩏᨽᩮᩣ ᩉᨲ᩠ᨳᩮᩉᩥ ᨸᨣ᩠ᨣᨿ᩠ᩉᩣᨲᩥ ᨲᩴ ᩈᩩᩈᨩ᩠ᨩᩥᨲᩴ ᨸᩩᨸ᩠ᨹᨧ᩠ᨨᨲ᩠ᨲᩴ ᨴ᩠ᩅᩦᩉᩥ ᩉᨲ᩠ᨳᩮᩉᩥ ᩏᨠ᩠ᨡᩥᨸᩥᨲ᩠ᩅᩣ ᩋᩉᩴ ¶ ᨽᨣᩅᨲᩮᩣ ᩋᨴᩣᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨸᨭᩥᨣ᩠ᨣᩉᩮᩈᩦᨲᩥ ᨲᩴ ᨾᨿᩣ ᨴᩥᨶ᩠ᨶᩴ ᨸᩩᨸ᩠ᨹᨧ᩠ᨨᨲ᩠ᨲᩴ ᨸᨴᩩᨾᩩᨲ᩠ᨲᩁᩮᩣ ᨽᨣᩅᩣ ᩈᨾ᩠ᨸᨭᩥᨧ᩠ᨨᩥ, ᩈᩣᨴᩁᩴ ᩈᩣᨴᩥᨿᩦᨲᩥ ᩋᨲ᩠ᨳᩮᩣ.

᪔᪑. ᩈᨲᨸᨲ᩠ᨲᨨᨲ᩠ᨲᩴ ᨸᨣ᩠ᨣᨿ᩠ᩉᩣᨲᩥ ᩑᨠᩮᨠᩈ᩠ᨾᩥᩴ ᨸᨴᩩᨾᨸᩩᨸ᩠ᨹᩮ ᩈᨲᩈᨲᨸᨲ᩠ᨲᩣᨶᩴ ᩅᩈᩮᨶ ᩈᨲᨸᨲ᩠ᨲᩮᩉᩥ ᨸᨴᩩᨾᨸᩩᨸ᩠ᨹᩮᩉᩥ ᨨᩣᨴᩥᨲᩴ ᨸᩩᨸ᩠ᨹᨧ᩠ᨨᨲ᩠ᨲᩴ ᨸᨠᩣᩁᩮᨶ ᩌᨴᩁᩮᨶ ᨣᩉᩮᨲ᩠ᩅᩣ ᨲᩣᨸᩈᩮᩣ ᨾᨾ ᩋᨴᩣᩈᩦᨲᩥ ᩋᨲ᩠ᨳᩮᩣ. ᨲᨾᩉᩴ ᨠᩥᨲ᩠ᨲᨿᩥᩔᩣᨾᩦᨲᩥ ᨲᩴ ᨲᩣᨸᩈᩴ ᩋᩉᩴ ᨠᩥᨲ᩠ᨲᨿᩥᩔᩣᨾᩥ ᨸᩣᨠᨭᩴ ᨠᩁᩥᩔᩣᨾᩦᨲᩥ ᩋᨲ᩠ᨳᩮᩣ. ᨾᨾ ᨽᩣᩈᨲᩮᩣ ᨽᩣᩈᨾᩣᨶᩔ ᩅᨧᨶᩴ ᩈᩩᨱᩮᩣᨳ ᨾᨶᩈᩥ ᨠᩁᩮᩣᨳ.

᪔᪒. ᨸᨬ᩠ᨧᩅᩦᩈᨲᩥᨠᨸ᩠ᨸᩣᨶᩦᨲᩥ ᩍᨾᩥᨶᩣ ᨸᩩᨸ᩠ᨹᨧ᩠ᨨᨲ᩠ᨲᨴᩣᨶᩮᨶ ᨸᨬ᩠ᨧᩅᩦᩈᨲᩥᩅᩣᩁᩮ ᨲᩣᩅᨲᩥᩴᩈᨽᩅᨶᩮ ᩈᨠ᩠ᨠᩮᩣ ᩉᩩᨲ᩠ᩅᩣ ᨴᩮᩅᩁᨩ᩠ᨩᩴ ᨠᩁᩥᩔᨲᩦᨲᩥ ᩈᨾ᩠ᨻᨶ᩠ᨵᩮᩣ. ᨧᨲᩩᨲ᩠ᨲᩥᩴᩈᨲᩥᨠ᩠ᨡᨲ᩠ᨲᩩᨬ᩠ᨧᩣᨲᩥ ᨧᨲᩩᨲ᩠ᨲᩥᩴᩈᨲᩥᩅᩣᩁᩮ ᨾᨶᩩᩔᩃᩮᩣᨠᩮ ᨧᨠ᩠ᨠᩅᨲ᩠ᨲᩦ ᩁᩣᨩᩣ ᨽᩅᩥᩔᨲᩥ.

᪔᪓. ᨿᩴ ¶ ᨿᩴ ᨿᩮᩣᨶᩥᨶ᩠ᨲᩥ ᨾᨶᩩᩔᨿᩮᩣᨶᩥᩌᨴᩦᩈᩩ ᨿᩴ ᨿᩴ ᨩᩣᨲᩥᩴ ᩈᩴᩈᩁᨲᩥ ᨣᨧ᩠ᨨᨲᩥ ᩏᨸᨸᨩ᩠ᨩᨲᩥ. ᨲᨲ᩠ᨳ ᨲᨲ᩠ᨳ ᨿᩮᩣᨶᩥᨿᩴ ᩋᨻ᩠ᨽᩮᩣᨠᩣᩈᩮ ᩈᩩᨬ᩠ᨬᨭ᩠ᨮᩣᨶᩮ ᨸᨲᩥᨭ᩠ᨮᨶ᩠ᨲᩴ ᨶᩥᩈᩥᨶ᩠ᨶᩴ ᨮᩥᨲᩴ ᩅᩣ ᨸᨴᩩᨾᩴ ᨵᩣᩁᨿᩥᩔᨲᩥ ᩏᨸᩁᩥ ᨨᩣᨴᨿᩥᩔᨲᩦᨲᩥ ᩋᨲ᩠ᨳᩮᩣ.

᪔᪕. ᨸᨠᩣᩈᩥᨲᩮ ᨸᩣᩅᨧᨶᩮᨲᩥ ᨲᩮᨶ ᨽᨣᩅᨲᩮᩣ ᩈᨠᩃᨸᩥᨭᨠᨲ᩠ᨲᨿᩮ ᨸᨠᩣᩈᩥᨲᩮ ᨴᩦᨸᩥᨲᩮ ᨾᨶᩩᩔᨲ᩠ᨲᩴ ᨾᨶᩩᩔᨩᩣᨲᩥᩴ ᩃᨽᩥᩔᨲᩥ ᩏᨸᨸᨩ᩠ᨩᩥᩔᨲᩥ. ᨾᨶᩮᩣᨾᨿᨾ᩠ᩉᩥ ᨠᩣᨿᨾ᩠ᩉᩦᨲᩥ ᨾᨶᩮᨶ ᨫᩣᨶᨧᩥᨲ᩠ᨲᩮᨶ ᨶᩥᨻ᩠ᨻᨲ᩠ᨲᩮᩣᨲᩥ ᨾᨶᩮᩣᨾᨿᩮᩣ, ᨿᨳᩣ ᨧᩥᨲ᩠ᨲᩴ ᨸᩅᨲ᩠ᨲᨲᩥ, ᨲᨳᩣ ᨠᩣᨿᩴ ᨸᩅᨲ᩠ᨲᩮᨲᩥ ᨧᩥᨲ᩠ᨲᨣᨲᩥᨠᩴ ᨠᩁᩮᩣᨲᩦᨲᩥ ¶ ᩋᨲ᩠ᨳᩮᩣ. ᨲᨾ᩠ᩉᩥ ᨾᨶᩮᩣᨾᨿᩮ ᨠᩣᨿᨾ᩠ᩉᩥ ᩈᩮᩣ ᨲᩣᨸᩈᩮᩣ ᨧᩪᩊᨸᨶ᩠ᨳᨠᩮᩣ ᨶᩣᨾ ᩉᩩᨲ᩠ᩅᩣ ᩏᨲ᩠ᨲᨾᩮᩣ ᩋᨣ᩠ᨣᩮᩣ ᨽᩅᩥᩔᨲᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨲᩣ ᩏᨲ᩠ᨲᩣᨶᨲ᩠ᨲᩣ ᨧ ᩈᩩᩅᩥᨬ᩠ᨬᩮᨿ᩠ᨿᨾᩮᩅ.

᪕᪒. ᩈᩁᩥᩴ ᨠᩮᩣᨠᨶᨴᩴ ᩋᩉᨶ᩠ᨲᩥ ᩋᩉᩴ ᨽᨣᩅᨲᩮᩣ ᨶᩥᨾ᩠ᨾᩥᨲᨧᩮᩣᩊᨠᩴ ᨸᩁᩥᨾᨩ᩠ᨩᨶ᩠ᨲᩮᩣ ᨠᩮᩣᨠᨶᨴᩴ ᨸᨴᩩᨾᩴ ᩈᩁᩥᨶ᩠ᨲᩥ ᩋᨲ᩠ᨳᩮᩣ. ᨲᨲ᩠ᨳ ᨧᩥᨲ᩠ᨲᩴ ᩅᩥᨾᩩᨧ᩠ᨧᩥ ᨾᩮᨲᩥ ᨲᩈ᩠ᨾᩥᩴ ᨠᩮᩣᨠᨶᨴᩮ ᨸᨴᩩᨾᩮ ᨾᨿ᩠ᩉᩴ ᨧᩥᨲ᩠ᨲᩴ ᩋᨵᩥᨾᩩᨧ᩠ᨧᩥ ᩋᩃ᩠ᩃᩦᨶᩮᩣ, ᨲᨲᩮᩣ ᩋᩉᩴ ᩋᩁᩉᨲ᩠ᨲᩴ ᨸᩣᨸᩩᨱᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

᪕᪓. ᩋᩉᩴ ᨾᨶᩮᩣᨾᨿᩮᩈᩩ ᨧᩥᨲ᩠ᨲᨣᨲᩥᨠᩮᩈᩩ ᨠᩣᨿᩮᩈᩩ ᩈᨻ᩠ᨻᨲ᩠ᨳ ᩈᨻ᩠ᨻᩮᩈᩩ ᨸᩣᩁᨾᩥᩴ ᨸᩁᩥᨿᩮᩣᩈᩣᨶᩴ ᨣᨲᩮᩣ ᨸᨲ᩠ᨲᩮᩣᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩅᩩᨲ᩠ᨲᨶᨿᨾᩮᩅᩣᨲᩥ.

ᨧᩪᩊᨸᨶ᩠ᨳᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᨸᩥᩃᩥᨶ᩠ᨴᩅᨧ᩠ᨨᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᩥᨻ᩠ᨻᩩᨲᩮ ¶ ᩃᩮᩣᨠᨶᩣᨳᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᩥᩃᩥᨶ᩠ᨴᩅᨧ᩠ᨨᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩉᩴᩈᩅᨲᩦᨶᨣᩁᩮ ᨾᩉᩣᨽᩮᩣᨣᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩉᩮᨭ᩠ᨮᩣ ᩅᩩᨲ᩠ᨲᨶᨿᩮᨶ ᩈᨲ᩠ᨳᩩ ᩈᨶ᩠ᨲᩥᨠᩮ ᨵᨾ᩠ᨾᩴ ᩈᩩᨱᨶ᩠ᨲᩮᩣ ᩈᨲ᩠ᨳᩣᩁᩴ ᩑᨠᩴ ᨽᩥᨠ᩠ᨡᩩᩴ ᨴᩮᩅᨲᩣᨶᩴ ᨸᩥᨿᨾᨶᩣᨸᨽᩣᩅᩮᨶ ᩋᨣ᩠ᨣᨭ᩠ᨮᩣᨶᩮ ᨮᨸᩮᨶ᩠ᨲᩴ ᨴᩥᩈ᩠ᩅᩣ ᨲᩴ ᨮᩣᨶᨶ᩠ᨲᩁᩴ ᨸᨲ᩠ᨳᩮᨲ᩠ᩅᩣ ᨿᩣᩅᨩᩦᩅᩴ ᨠᩩᩈᩃᩴ ᨠᨲ᩠ᩅᩣ ᨲᨲᩮᩣ ᨧᩩᨲᩮᩣ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩈᩩᨾᩮᨵᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ. ᨸᩁᩥᨶᩥᨻ᩠ᨻᩩᨲᩮ ᨽᨣᩅᨲᩥ ᨲᩔ ᨳᩪᨸᩴ ᨸᩪᨩᩮᨲ᩠ᩅᩣ ᩈᨦ᩠ᨥᩔ ᨾᩉᩣᨴᩣᨶᩴ ᨸᩅᨲ᩠ᨲᩮᨲ᩠ᩅᩣ ᨲᨲᩮᩣ ᨧᩅᩥᨲ᩠ᩅᩣ ᨴᩮᩅᨾᨶᩩᩔᩮᩈᩩ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ¶ ᩋᨶᩩᨽᩅᩥᨲ᩠ᩅᩣ ᩋᨶᩩᨸ᩠ᨸᨶ᩠ᨶᩮ ᨻᩩᨴ᩠ᨵᩮ ᨧᨠ᩠ᨠᩅᨲ᩠ᨲᩦ ᩁᩣᨩᩣ ᩉᩩᨲ᩠ᩅᩣ ᨾᩉᩣᨩᨶᩴ ᨸᨬ᩠ᨧᩈᩦᩃᩮᩈᩩ ᨸᨲᩥᨭ᩠ᨮᩣᨸᩮᨲ᩠ᩅᩣ ᩈᨣ᩠ᨣᨸᩁᩣᨿᨶᩴ ᩋᨠᩣᩈᩥ. ᩈᩮᩣ ᩋᨶᩩᨸ᩠ᨸᨶ᩠ᨶᩮᨿᩮᩅ ᩋᨾ᩠ᩉᩣᨠᩴ ᨽᨣᩅᨲᩥ ᩈᩣᩅᨲ᩠ᨳᩥᨿᩴ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩥ, ᨸᩥᩃᩥᨶ᩠ᨴᩮᩣᨲᩥᩔ ᨶᩣᨾᩴ ᩋᨠᩴᩈᩩ. ᩅᨧ᩠ᨨᩮᩣᨲᩥ ᨣᩮᩣᨲ᩠ᨲᩴ. ᩈᩮᩣ ᩋᨸᩁᨽᩣᨣᩮ ᨸᩥᩃᩥᨶ᩠ᨴᩅᨧ᩠ᨨᩮᩣᨲᩥ ᨸᨬ᩠ᨬᩣᨿᩥᨲ᩠ᨳ. ᩈᩴᩈᩣᩁᩮ ᨸᨶ ᩈᩴᩅᩮᨣᨻᩉᩩᩃᨲᩣᨿ ᨸᩁᩥᨻ᩠ᨻᩣᨩᨠᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᨧᩪᩊᨣᨶ᩠ᨵᩣᩁᩴ ᨶᩣᨾ ᩅᩥᨩ᩠ᨩᩴ ᩈᩣᨵᩮᨲ᩠ᩅᩣ ᨲᩣᨿ ᩅᩥᨩ᩠ᨩᩣᨿ ᩌᨠᩣᩈᨧᩣᩁᩦ ᨸᩁᨧᩥᨲ᩠ᨲᩅᩥᨴᩪ ᨧ ᩉᩩᨲ᩠ᩅᩣ ᩁᩣᨩᨣᩉᩮ ᩃᩣᨽᨣ᩠ᨣᨿᩈᨣ᩠ᨣᨸᨲ᩠ᨲᩮᩣ ᨸᨭᩥᩅᩈᨲᩥ.

ᩋᨳ ᩋᨾ᩠ᩉᩣᨠᩴ ᨽᨣᩅᩣ ᩋᨽᩥᩈᨾ᩠ᨻᩩᨴ᩠ᨵᩮᩣ ᩉᩩᨲ᩠ᩅᩣ ᩋᨶᩩᨠ᩠ᨠᨾᩮᨶ ᩁᩣᨩᨣᩉᩴ ᩏᨸᨣᨲᩮᩣ. ᨲᨲᩮᩣ ᨸᨭ᩠ᨮᩣᨿ ᨻᩩᨴ᩠ᨵᩣᨶᩩᨽᩣᩅᩮᨶ ᨲᩔ ᩈᩣ ᩅᩥᨩ᩠ᨩᩣ ᨶ ᩈᨾ᩠ᨸᨩ᩠ᨩᨲᩥ, ᩋᨲ᩠ᨲᨶᩮᩣ ᨠᩥᨧ᩠ᨧᩴ ᨶ ᩈᩣᨵᩮᨲᩥ. ᩈᩮᩣ ᨧᩥᨶ᩠ᨲᩮᩈᩥ – ‘‘ᩈᩩᨲᩴ ᨡᩮᩣ ᨸᨶᩮᨲᩴ ᩌᨧᩁᩥᨿᨸᩣᨧᩁᩥᨿᩣᨶᩴ ᨽᩣᩈᨾᩣᨶᩣᨶᩴ ‘ᨿᨲ᩠ᨳ ᨾᩉᩣᨣᨶ᩠ᨵᩣᩁᩅᩥᨩ᩠ᨩᩣ ᨵᩁᨲᩥ ¶ , ᨲᨲ᩠ᨳ ᨧᩪᩊᨣᨶ᩠ᨵᩣᩁᩅᩥᨩ᩠ᨩᩣ ᨶ ᩈᨾ᩠ᨸᨩ᩠ᨩᨲᩦ’ᨲᩥ ᩈᨾᨱᩔ ᨸᨶ ᨣᩮᩣᨲᨾᩔ ᩌᨣᨲᨠᩣᩃᨲᩮᩣ ᨸᨭ᩠ᨮᩣᨿ ᨶᩣᨿᩴ ᨾᨾ ᩅᩥᨩ᩠ᨩᩣ ᩈᨾ᩠ᨸᨩ᩠ᨩᨲᩥ, ᨶᩥᩔᩴᩈᨿᩴ ᩈᨾᨱᩮᩣ ᨣᩮᩣᨲᨾᩮᩣ ᨾᩉᩣᨣᨶ᩠ᨵᩣᩁᩅᩥᨩ᩠ᨩᩴ ᨩᩣᨶᩣᨲᩥ, ᨿᩴᨶᩪᨶᩣᩉᩴ ᨲᩴ ᨸᨿᩥᩁᩩᨸᩣᩈᩥᨲ᩠ᩅᩣ ᨲᩔ ᩈᨶ᩠ᨲᩥᨠᩮ ᨲᩴ ᩅᩥᨩ᩠ᨩᩴ ᨸᩁᩥᨿᩣᨸᩩᨱᩮᨿ᩠ᨿ’’ᨶ᩠ᨲᩥ. ᩈᩮᩣ ᨽᨣᩅᨶ᩠ᨲᩴ ᩏᨸᩈᨦ᩠ᨠᨾᩥᨲ᩠ᩅᩣ ᩑᨲᨴᩅᩮᩣᨧ – ‘‘ᩋᩉᩴ, ᨾᩉᩣᩈᨾᨱ, ᨲᩅ ᩈᨶ᩠ᨲᩥᨠᩮ ᩑᨠᩴ ᩅᩥᨩ᩠ᨩᩴ ᨸᩁᩥᨿᩣᨸᩩᨱᩥᨲᩩᨠᩣᨾᩮᩣ, ᩒᨠᩣᩈᩴ ᨾᩮ ᨠᩁᩮᩣᩉᩦ’’ᨲᩥ. ‘‘ᨲᩮᨶ ᩉᩥ ᨾᨾ ᩈᨶ᩠ᨲᩥᨠᩮ ᨸᨻ᩠ᨻᨩᩣᩉᩦ’’ᨲᩥ ᩌᩉ. ᩈᩮᩣ ‘‘ᩅᩥᨩ᩠ᨩᩣᨿ ᨸᩁᩥᨠᨾ᩠ᨾᩴ ᨸᨻ᩠ᨻᨩ᩠ᨩᩣ’’ᨲᩥ ᨾᨬ᩠ᨬᨾᩣᨶᩮᩣ ᨸᨻ᩠ᨻᨩᩥ. ᨲᩔ ᨽᨣᩅᩣ ᨵᨾ᩠ᨾᩴ ᨠᨳᩮᨲ᩠ᩅᩣ ᨧᩁᩥᨲᩣᨶᩩᨠᩪᩃᩴ ᨠᨾ᩠ᨾᨭ᩠ᨮᩣᨶᩴ ᩋᨴᩣᩈᩥ. ᩈᩮᩣ ᩏᨸᨶᩥᩔᨿᩈᨾ᩠ᨸᨶ᩠ᨶᨲᩣᨿ ᨶᨧᩥᩁᩔᩮᩅ ᩅᩥᨸᩔᨶᩴ ᨸᨭ᩠ᨮᨸᩮᨲ᩠ᩅᩣ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪕᪕. ᨿᩣ ᨸᨶ ᨸᩩᩁᩥᨾᨩᩣᨲᩥᨿᩴ ᨲᩔᩮᩣᩅᩣᨴᩮ ᨮᨲ᩠ᩅᩣ ᩈᨣ᩠ᨣᩮ ᨶᩥᨻ᩠ᨻᨲ᩠ᨲᩣ ᨴᩮᩅᨲᩣ, ᨲᩣ ᨠᨲᨬ᩠ᨬᩩᨲᩴ ᨶᩥᩔᩣᨿ ᨲᩈ᩠ᨾᩥᩴ ᩈᨬ᩠ᨩᩣᨲᨻᩉᩩᨾᩣᨶᩣ ᩈᩣᨿᩴ ᨸᩣᨲᩴ ᨳᩮᩁᩴ ᨸᨿᩥᩁᩩᨸᩣᩈᩥᨲ᩠ᩅᩣ ᨣᨧ᩠ᨨᨶ᩠ᨲᩥ. ᨲᩈ᩠ᨾᩣ ᨶᩴ ᨽᨣᩅᩣ ᨴᩮᩅᨲᩣᨶᩴ ᩋᨲᩥᩅᩥᨿ ᨸᩥᨿᨾᨶᩣᨸᨽᩣᩅᩮᨶ ᩋᨣ᩠ᨣᨽᩣᩅᩮ ᨮᨸᩮᩈᩥ ‘‘ᩑᨲᨴᨣ᩠ᨣᩴ, ᨽᩥᨠ᩠ᨡᩅᩮ, ᨾᨾ ᩈᩣᩅᨠᩣᨶᩴ ᨽᩥᨠ᩠ᨡᩪᨶᩴ ¶ ᨴᩮᩅᨲᩣᨶᩴ ᨸᩥᨿᨾᨶᩣᨸᩣᨶᩴ ᨿᨴᩥᨴᩴ ᨸᩥᩃᩥᨶ᩠ᨴᩅᨧ᩠ᨨᩮᩣ’’ᨲᩥ (ᩋ. ᨶᩥ. ᪑.᪒᪐᪙, ᪒᪑᪕). ᩑᩅᩴ ᩈᩮᩣ ᨸᨲ᩠ᨲᩋᨣ᩠ᨣᨭ᩠ᨮᩣᨶᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩋᨶᩩᩔᩁᩥᨲ᩠ᩅᩣ ᨸᩦᨲᩥᩈᩮᩣᨾᨶᩔᩅᩈᩮᨶ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨶᩥᨻ᩠ᨻᩩᨲᩮ ᩃᩮᩣᨠᨶᩣᨳᨾ᩠ᩉᩦᨲᩥᩌᨴᩥᨾᩣᩉ.

ᨲᨲ᩠ᨳ ¶ ᨠᩣᨾᩁᩪᨸᩣᩁᩪᨸᩃᩮᩣᨠᩔ ᨶᩣᨳᩮᩣ ᨸᨵᩣᨶᩮᩣᨲᩥ ᩃᩮᩣᨠᨶᩣᨳᩮᩣ. ᨾᩮᨵᩣ ᩅᩩᨧ᩠ᨧᨶ᩠ᨲᩥ ᩈᨻ᩠ᨻᨬ᩠ᨬᩩᨲᨬ᩠ᨬᩣᨱᩋᨶᩣᩅᩁᨱᨬᩣᨱᩣᨴᨿᩮᩣ, ᩈᩩᨶ᩠ᨴᩁᩣ, ᨸᩈᨭ᩠ᨮᩣ ᩅᩣ ᨾᩮᨵᩣ ᨿᩔ ᩈᩮᩣ ᩈᩩᨾᩮᨵᩮᩣ, ᩋᨣ᩠ᨣᩮᩣ ᨧ ᩈᩮᩣ ᨸᩩᨣ᩠ᨣᩃᩮᩣ ᨧᩣᨲᩥ ᩋᨣ᩠ᨣᨸᩩᨣ᩠ᨣᩃᩮᩣ, ᨲᩈ᩠ᨾᩥᩴ ᩈᩩᨾᩮᨵᩮ ᩃᩮᩣᨠᨶᩣᨿᨠᩮ ᩋᨣ᩠ᨣᨸᩩᨣ᩠ᨣᩃᩮ ᨡᨶ᩠ᨵᨸᩁᩥᨶᩥᨻ᩠ᨻᩣᨶᩮᨶ ᨶᩥᨻ᩠ᨻᩩᨲᩮ ᩈᨲᩦᨲᩥ ᩈᨾ᩠ᨻᨶ᩠ᨵᩮᩣ. ᨸᩈᨶ᩠ᨶᨧᩥᨲ᩠ᨲᩮᩣ ᩈᩩᨾᨶᩮᩣᨲᩥ ᩈᨴ᩠ᨵᩣᨿ ᨸᩈᩣᨴᩥᨲᨧᩥᨲ᩠ᨲᩮᩣ ᩈᩮᩣᨾᨶᩔᩮᨶ ᩈᩩᨶ᩠ᨴᩁᨾᨶᩮᩣ ᩋᩉᩴ ᨲᩔ ᩈᩩᨾᩮᨵᩔ ᨽᨣᩅᨲᩮᩣ ᨳᩪᨸᨸᩪᨩᩴ ᨧᩮᨲᩥᨿᨸᩪᨩᩴ ᩋᨠᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪕᪖. ᨿᩮ ᨧ ᨡᩦᨱᩣᩈᩅᩣ ᨲᨲ᩠ᨳᩣᨲᩥ ᨲᩈ᩠ᨾᩥᩴ ᩈᨾᩣᨣᨾᩮ ᨿᩮ ᨧ ᨡᩦᨱᩣᩈᩅᩣ ᨸᩉᩦᨶᨠᩥᩃᩮᩈᩣ ᨨᩊᨽᩥᨬ᩠ᨬᩣ ᨨᩉᩥ ᩋᨽᩥᨬ᩠ᨬᩣᩉᩥ ᩈᨾᨶ᩠ᨶᩣᨣᨲᩣ ᨾᩉᩥᨴ᩠ᨵᩥᨠᩣ ᨾᩉᨶ᩠ᨲᩮᩉᩥ ᩍᨴ᩠ᨵᩦᩉᩥ ᩈᨾᨶ᩠ᨶᩣᨣᨲᩣ ᩈᨶ᩠ᨲᩥ, ᨲᩮ ᩈᨻ᩠ᨻᩮ ᨡᩦᨱᩣᩈᩅᩮ ᩋᩉᩴ ᨲᨲ᩠ᨳ ᩈᨾᩣᨶᩮᨲ᩠ᩅᩣ ᩈᩩᨭ᩠ᨮᩩ ᩌᨴᩁᩮᨶ ᩌᨶᩮᨲ᩠ᩅᩣ ᩈᨦ᩠ᨥᨽᨲ᩠ᨲᩴ ᩈᨠᩃᩈᨦ᩠ᨥᩔ ᨴᩣᨲᨻ᩠ᨻᨽᨲ᩠ᨲᩴ ᩋᨠᩣᩈᩥᩴ ᨲᩮᩈᩴ ᨽᩮᩣᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪕᪗. ᩏᨸᨭ᩠ᨮᩣᨠᩮᩣ ᨲᨴᩣ ᩋᩉᩪᨲᩥ ᨲᨴᩣ ᨾᨾ ᩈᨦ᩠ᨥᨽᨲ᩠ᨲᨴᩣᨶᨠᩣᩃᩮ ᩈᩩᨾᩮᨵᩔ ᨽᨣᩅᨲᩮᩣ ᨶᩣᨾᩮᨶ ᩈᩩᨾᩮᨵᩮᩣ ᨶᩣᨾ ᩏᨸᨭ᩠ᨮᩣᨠᩈᩣᩅᨠᩮᩣ ᩋᩉᩩ ᩋᩉᩮᩣᩈᩦᨲᩥ ᩋᨲ᩠ᨳᩮᩣ. ᩈᩮᩣ ᩈᩣᩅᨠᩮᩣ ᨾᨿ᩠ᩉᩴ ᨸᩪᨩᩣᩈᨠ᩠ᨠᩣᩁᩴ ᩋᨶᩩᨾᩮᩣᨴᩥᨲ᩠ᨳ ᩋᨶᩩᨾᩮᩣᨴᩥᨲᩮᩣ ᩌᨶᩥᩈᩴᩈᩴ ᨠᨳᩮᩈᩦᨲᩥ ᩋᨲ᩠ᨳᩮᩣ.

᪕᪘. ᨲᩮᨶ ᨧᩥᨲ᩠ᨲᨸ᩠ᨸᩈᩣᨴᩮᨶᩣᨲᩥ ᨲᩮᨶ ᨳᩪᨸᨸᩪᨩᩣᨠᩁᨱᩅᩈᩮᨶ ᩏᨸ᩠ᨸᨶ᩠ᨶᩮᨶ ¶ ᨧᩥᨲ᩠ᨲᨸ᩠ᨸᩈᩣᨴᩮᨶ ᨴᩮᩅᩃᩮᩣᨠᩮ ᨴᩥᨻ᩠ᨻᩅᩥᨾᩣᨶᩴ ᩏᨸᨸᨩ᩠ᨩᩥᩴ ᩏᨸᨣᨲᩮᩣ ᩋᩈ᩠ᨾᩦᨲᩥ ᩋᨲ᩠ᨳᩮᩣ, ᨲᨲ᩠ᨳ ᨶᩥᨻ᩠ᨻᨲ᩠ᨲᩮᩣᨾ᩠ᩉᩦᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨨᩊᩣᩈᩦᨲᩥᩈᩉᩔᩣᨶᩦᨲᩥ ᨲᩈ᩠ᨾᩥᩴ ᩅᩥᨾᩣᨶᩮ ᨨ ᩋᩈᩦᨲᩥᩈᩉᩔᩣᨶᩥ ᨴᩮᩅᨧ᩠ᨨᩁᩣᨿᩮᩣ ᨾᩮ ᨾᨿ᩠ᩉᩴ ᨧᩥᨲ᩠ᨲᩴ ᩁᨾᩥᩴᩈᩩ ᩁᨾᩣᨸᩮᩈᩩᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

᪕᪙. ᨾᨾᩮᩅ ᩋᨶᩩᩅᨲ᩠ᨲᨶ᩠ᨲᩦᨲᩥ ᨲᩣ ᩋᨧ᩠ᨨᩁᩣᨿᩮᩣ ᩈᨻ᩠ᨻᨠᩣᨾᩮᩉᩥ ᨴᩥᨻ᩠ᨻᩮᩉᩥ ᩁᩪᨸᩣᨴᩥᩅᨲ᩠ᨳᩩᨠᩣᨾᩮᩉᩥ ᩏᨸᨭ᩠ᨮᩉᨶ᩠ᨲᩥᨿᩮᩣ ᨾᨾᩴ ᩑᩅ ᩋᨶᩩᩅᨲ᩠ᨲᨶ᩠ᨲᩥ ᨾᨾ ᩅᨧᨶᩴ ᩋᨶᩩᨠᩁᩮᩣᨶ᩠ᨲᩥ ᩈᨴᩣ ᨶᩥᨧ᩠ᨧᨠᩣᩃᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨸᩥᩃᩥᨶ᩠ᨴᩅᨧ᩠ᨨᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᩁᩣᩉᩩᩃᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᩔ ¶ ¶ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩁᩣᩉᩩᩃᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᩌᨿᩈ᩠ᨾᩣ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨱᨶ᩠ᨲᩮᩣ ᩈᨲ᩠ᨳᩣᩁᩴ ᩑᨠᩴ ᨽᩥᨠ᩠ᨡᩩᩴ ᩈᩥᨠ᩠ᨡᩣᨠᩣᨾᩣᨶᩴ ᩋᨣ᩠ᨣᨭ᩠ᨮᩣᨶᩮ ᨮᨸᩮᨶ᩠ᨲᩴ ᨴᩥᩈ᩠ᩅᩣ ᩈᨿᨾ᩠ᨸᩥ ᨲᩴ ᨮᩣᨶᨶ᩠ᨲᩁᩴ ᨸᨲ᩠ᨳᩮᨶ᩠ᨲᩮᩣ ᩈᩮᨶᩣᩈᨶᩅᩥᩈᩮᩣᨵᨶᩅᩥᨩ᩠ᨩᩮᩣᨲᨶᩣᨴᩥᨠᩴ ᩏᩊᩣᩁᩴ ᨸᩩᨬ᩠ᨬᩴ ᨠᨲ᩠ᩅᩣ ᨸᨱᩥᨵᩣᨶᩴ ᩋᨠᩣᩈᩥ. ᩈᩮᩣ ᨲᨲᩮᩣ ᨧᩅᩥᨲ᩠ᩅᩣ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩋᨾ᩠ᩉᩣᨠᩴ ᨻᩮᩣᨵᩥᩈᨲ᩠ᨲᩴ ᨸᨭᩥᨧ᩠ᨧ ᨿᩈᩮᩣᨵᩁᩣᨿ ᨴᩮᩅᩥᨿᩣ ᨠᩩᨧ᩠ᨨᩥᨾ᩠ᩉᩥ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩁᩣᩉᩩᩃᩮᩣᨲᩥ ᩃᨴ᩠ᨵᨶᩣᨾᩮᩣ ᨾᩉᨲᩣ ᨡᨲ᩠ᨲᩥᨿᨸᩁᩥᩅᩣᩁᩮᨶ ᩅᨯ᩠ᨰᩥ. ᨲᩔ ᨸᨻ᩠ᨻᨩ᩠ᨩᩣᩅᩥᨵᩣᨶᩴ ᨡᨶ᩠ᨵᨠᩮ (ᨾᩉᩣᩅ. ᪑᪐᪕) ᩌᨣᨲᨾᩮᩅ. ᩈᩮᩣ ᨸᨻ᩠ᨻᨩᩥᨲ᩠ᩅᩣ ᩈᨲ᩠ᨳᩩ ᩈᨶ᩠ᨲᩥᨠᩮ ᩋᨶᩮᨠᩮᩉᩥ ᩈᩩᨲ᩠ᨲᨸᨴᩮᩉᩥ ᩈᩩᩃᨴ᩠ᨵᩮᩣᩅᩣᨴᩮᩣ ᨸᩁᩥᨸᨠ᩠ᨠᨬᩣᨱᩮᩣ ᩅᩥᨸᩔᨶᩴ ᩏᩔᩩᨠ᩠ᨠᩣᨸᩮᨲ᩠ᩅᩣ ᩋᩁᩉᨲ᩠ᨲᩴ ᨸᩣᨸᩩᨱᩥ. ᩋᩁᩉᩣ ᨸᨶ ᩉᩩᨲ᩠ᩅᩣ ᩋᨲ᩠ᨲᨶᩮᩣ ᨸᨭᩥᨸᨲ᩠ᨲᩥᩴ ᨸᨧ᩠ᨧᩅᩮᨠ᩠ᨡᩥᨲ᩠ᩅᩣ ᩋᨬ᩠ᨬᩴ ᨻ᩠ᨿᩣᨠᩁᩮᩣᨶ᩠ᨲᩮᩣ –

‘‘ᩏᨽᨿᩮᨶᩮᩅ ᩈᨾ᩠ᨸᨶ᩠ᨶᩮᩣ, ᩁᩣᩉᩩᩃᨽᨴ᩠ᨴᩮᩣᨲᩥ ᨾᩴ ᩅᩥᨴᩪ;

ᨿᨬ᩠ᨧᨾ᩠ᩉᩥ ᨸᩩᨲ᩠ᨲᩮᩣ ᨻᩩᨴ᩠ᨵᩔ, ᨿᨬ᩠ᨧ ᨵᨾ᩠ᨾᩮᩈᩩ ᨧᨠ᩠ᨡᩩᨾᩣ.

‘‘ᨿᨬ᩠ᨧ ᨾᩮ ᩌᩈᩅᩣ ᨡᩦᨱᩣ, ᨿᨬ᩠ᨧ ᨶᨲ᩠ᨳᩥ ᨸᩩᨶᨻ᩠ᨽᩅᩮᩣ;

ᩋᩁᩉᩣ ᨴᨠ᩠ᨡᩥᨱᩮᨿ᩠ᨿᩮᩣᨾ᩠ᩉᩥ, ᨲᩮᩅᩥᨩ᩠ᨩᩮᩣ ᩋᨾᨲᨴ᩠ᨴᩈᩮᩣ.

‘‘ᨠᩣᨾᨶ᩠ᨵᩣ ᨩᩣᩃᨸᨧ᩠ᨨᨶ᩠ᨶᩣ, ᨲᨱ᩠ᩉᩣᨨᨴᨶᨨᩣᨴᩥᨲᩣ;

ᨸᨾᨲ᩠ᨲᨻᨶ᩠ᨵᩩᨶᩣ ᨻᨶ᩠ᨵᩣ, ᨾᨧ᩠ᨨᩣᩅ ᨠᩩᨾᩥᨶᩣ ᨾᩩᨡᩮ.

‘‘ᨲᩴ ᨠᩣᨾᩴ ᩋᩉᨾᩩᨩ᩠ᨫᩥᨲ᩠ᩅᩣ, ᨨᩮᨲ᩠ᩅᩣ ᨾᩣᩁᩔ ᨻᨶ᩠ᨵᨶᩴ;

ᩈᨾᩪᩃᩴ ᨲᨱ᩠ᩉᨾᨻ᩠ᨻᩩᨿ᩠ᩉ, ᩈᩦᨲᩥᨽᩪᨲᩮᩣᩈ᩠ᨾᩥ ᨶᩥᨻ᩠ᨻᩩᨲᩮᩣ’’ᨲᩥ. (ᨳᩮᩁᨣᩣ. ᪒᪙᪕-᪒᪙᪘);

ᨧᨲᩔᩮᩣ ᨣᩣᨳᩣ ᩋᨽᩣᩈᩥ. ᨲᨲ᩠ᨳ ¶ ᩏᨽᨿᩮᨶᩮᩅ ᩈᨾ᩠ᨸᨶ᩠ᨶᩮᩣᨲᩥ ᨩᩣᨲᩥᩈᨾ᩠ᨸᨴᩣ ᨸᨭᩥᨸᨲ᩠ᨲᩥᩈᨾ᩠ᨸᨴᩣᨲᩥ ᩏᨽᨿᩈᨾ᩠ᨸᨲ᩠ᨲᩥᨿᩣᨸᩥ ᩈᨾ᩠ᨸᨶ᩠ᨶᩮᩣ ᩈᨾᨶ᩠ᨶᩣᨣᨲᩮᩣ. ᩁᩣᩉᩩᩃᨽᨴ᩠ᨴᩮᩣᨲᩥ ᨾᩴ ᩅᩥᨴᩪᨲᩥ ‘‘ᩁᩣᩉᩩᩃᨽᨴ᩠ᨴᩮᩣ’’ᨲᩥ ᨾᩴ ᩈᨻᩕᩉ᩠ᨾᨧᩣᩁᩥᨶᩮᩣ ¶ ᩈᨬ᩠ᨩᩣᨶᨶ᩠ᨲᩥ. ᨲᩔ ᩉᩥ ᨩᩣᨲᩈᩣᩈᨶᩴ ᩈᩩᨲ᩠ᩅᩣ ᨻᩮᩣᨵᩥᩈᨲ᩠ᨲᩮᨶ, ‘‘ᩁᩣᩉᩩ, ᨩᩣᨲᩮᩣ, ᨻᨶ᩠ᨵᨶᩴ ᨩᩣᨲ’’ᨶ᩠ᨲᩥ ᩅᩩᨲ᩠ᨲᩅᨧᨶᩴ ᩏᨸᩣᨴᩣᨿ ᩈᩩᨴ᩠ᨵᩮᩣᨴᨶᨾᩉᩣᩁᩣᨩᩣ ‘‘ᩁᩣᩉᩩᩃᩮᩣ’’ᨲᩥ ᨶᩣᨾᩴ ¶ ᨣᨱ᩠ᩉᩥ. ᨲᨲ᩠ᨳ ᩌᨴᩥᨲᩮᩣ ᨸᩥᨲᩁᩣ ᩅᩩᨲ᩠ᨲᨸᩁᩥᨿᩣᨿᨾᩮᩅ ᨣᩉᩮᨲ᩠ᩅᩣ ᩌᩉ – ‘‘ᩁᩣᩉᩩᩃᨽᨴ᩠ᨴᩮᩣᨲᩥ ᨾᩴ ᩅᩥᨴᩪ’’ᨲᩥ. ᨽᨴ᩠ᨴᩮᩣᨲᩥ ᨸᩈᩴᩈᩣᩅᨧᨶᨾᩮᩅ. ᩋᨸᩁᨽᩣᨣᩮ ᩈᨲ᩠ᨳᩣ ᨲᩴ ᩈᩥᨠ᩠ᨡᩣᨠᩣᨾᨽᩣᩅᩮᨶ ᩋᨣ᩠ᨣᨭ᩠ᨮᩣᨶᩮ ᨮᨸᩮᩈᩥ ‘‘ᩑᨲᨴᨣ᩠ᨣᩴ, ᨽᩥᨠ᩠ᨡᩅᩮ, ᨾᨾ ᩈᩣᩅᨠᩣᨶᩴ ᨽᩥᨠ᩠ᨡᩪᨶᩴ ᩈᩥᨠ᩠ᨡᩣᨠᩣᨾᩣᨶᩴ ᨿᨴᩥᨴᩴ ᩁᩣᩉᩩᩃᩮᩣ’’ᨲᩥ (ᩋ. ᨶᩥ. ᪑.᪒᪐᪙).

᪖᪘. ᩑᩅᩴ ᩈᩮᩣ ᨸᨲ᩠ᨲᩑᨲᨴᨣ᩠ᨣᨭ᩠ᨮᩣᨶᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣᨲᩥᩌᨴᩥᨾᩣᩉ. ᩈᨲ᩠ᨲᨽᩪᨾᩥᨾ᩠ᩉᩥ ᨸᩣᩈᩣᨴᩮᨲᩥ ᨸᩈᩣᨴᩴ ᩈᩮᩣᨾᨶᩔᩴ ᨩᨶᩮᨲᩦᨲᩥ ᨸᩣᩈᩣᨴᩮᩣ. ᩏᨸᩁᩪᨸᩁᩥ ᨮᩥᨲᩣ ᩈᨲ᩠ᨲ ᨽᩪᨾᩥᨿᩮᩣ ᨿᩈ᩠ᨾᩥᩴ ᨸᩣᩈᩣᨴᩮ ᩈᩮᩣᨿᩴ ᩈᨲ᩠ᨲᨽᩪᨾᩥ, ᨲᩈ᩠ᨾᩥᩴ ᩈᨲ᩠ᨲᨽᩪᨾᩥᨾ᩠ᩉᩥ ᨸᩣᩈᩣᨴᩮ. ᩌᨴᩣᩈᩴ ᩈᨶ᩠ᨳᩁᩥᩴ ᩋᩉᨶ᩠ᨲᩥ ᩌᨴᩣᩈᨲᩃᩴ ᨶᩥᨸ᩠ᨹᩣᨴᩮᨲ᩠ᩅᩣ ᩃᩮᩣᨠᨩᩮᨭ᩠ᨮᩔ ᨽᨣᩅᨲᩮᩣ ᨲᩣᨴᩥᨶᩮᩣ ᩋᩉᩴ ᩈᨶ᩠ᨳᩁᩴ ᩋᨴᩣᩈᩥᩴ, ᩈᨶ᩠ᨳᩁᩥᨲ᩠ᩅᩣ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪖᪙. ᨡᩦᨱᩣᩈᩅᩈᩉᩔᩮᩉᩦᨲᩥ ᩋᩁᩉᨶ᩠ᨲᩈᩉᩔᩮᩉᩥ ᨸᩁᩥᨠᩥᨱ᩠ᨱᩮᩣ ᨸᩁᩥᩅᩩᨲᩮᩣ. ᨴ᩠ᩅᩥᨸᨴᩥᨶ᩠ᨴᩮᩣ ᨴ᩠ᩅᩥᨸᨴᩣᨶᩴ ᩍᨶ᩠ᨴᩮᩣ ᩈᩣᨾᩥ ᨶᩁᩣᩈᨽᩮᩣ ᨾᩉᩣᨾᩩᨶᩥ ᨣᨶ᩠ᨵᨠᩩᨭᩥᩴ ᨲᩮᩉᩥ ᩈᩉ ᩏᨸᩣᨣᨾᩥ ᨸᩣᩅᩥᩈᩦᨲᩥ ᩋᨲ᩠ᨳᩮᩣ.

᪗᪐. ᩅᩥᩁᩮᩣᨧᩮᨶ᩠ᨲᩮᩣ ᨣᨶ᩠ᨵᨠᩩᨭᩥᨶ᩠ᨲᩥ ᨲᩴ ᨣᨶ᩠ᨵᨠᩩᨭᩥᩴ ᩈᩮᩣᨽᨿᨾᩣᨶᩮᩣ ᨴᩮᩅᩣᨶᩴ ᨴᩮᩅᩮᩣ ᨴᩮᩅᨴᩮᩅᩮᩣ ᨶᩁᩣᨶᩴ ᩌᩈᨽᩮᩣ ᨶᩁᩣᩈᨽᩮᩣ ᨩᩮᨭ᩠ᨮᩮᩣ ᩈᨲ᩠ᨳᩣ ᨽᩥᨠ᩠ᨡᩩᩈᨦ᩠ᨥᨾᨩ᩠ᨫᩮ ᨶᩥᩈᩦᨴᩥᨲ᩠ᩅᩣ ᩍᨾᩣ ᨻ᩠ᨿᩣᨠᩁᨱᨣᩣᨳᩣᨿᩮᩣ ᩋᨽᩣᩈᨳ ᨠᨳᩮᩈᩦᨲᩥ ᩈᨾ᩠ᨻᨶ᩠ᨵᩮᩣ.

᪗᪑. ᨿᩮᨶᩣᨿᩴ ᨩᩮᩣᨲᩥᨲᩣ ᩈᩮᨿ᩠ᨿᩣᨲᩥ ᨿᩮᨶ ᩏᨸᩣᩈᨠᩮᨶ ᩋᨿᩴ ᨸᩣᩈᩣᨴᩈᨦ᩠ᨡᩣᨲᩣ ᩈᩮᨿ᩠ᨿᩣ ᨩᩮᩣᨲᩥᨲᩣ ᨸᨽᩣᩈᩥᨲᩣ ᨸᨩ᩠ᨩᩃᩥᨲᩣ. ᩌᨴᩣᩈᩮᩣᩅ ᨠᩴᩈᩃᩮᩣᩉᨾᨿᩴ ᩌᨴᩣᩈᨲᩃᩴ ᩍᩅ ᩈᩩᨭ᩠ᨮᩩ ᩈᨾᩴ ᨠᨲ᩠ᩅᩣ ᩈᨶ᩠ᨳᨲᩣ. ᨲᩴ ᩏᨸᩣᩈᨠᩴ ᨠᩥᨲ᩠ᨲᨿᩥᩔᩣᨾᩥ ᨸᩣᨠᨭᩴ ᨠᩁᩥᩔᩣᨾᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅ.

᪘᪑. ᩋᨭ᩠ᨮᩣᨶᨾᩮᨲᩴ ᨿᩴ ᨲᩣᨴᩦᨲᩥ ᨿᩴ ᨿᩮᨶ ᨠᩣᩁᨱᩮᨶ ᨲᩣᨴᩦ ᩍᨭ᩠ᨮᩣᨶᩥᨭ᩠ᨮᩮᩈᩩ ᩋᨠᨾ᩠ᨸᩥᨿᩈᨽᩣᩅᨲ᩠ᨲᩣ ᨲᩣᨴᩦ ᩋᨣᩣᩁᩮ ᨥᩁᩣᩅᩣᩈᩮ ᩁᨲᩥᩴ ᩋᩃ᩠ᩃᩦᨶᨽᩣᩅᩴ ᩋᨩ᩠ᨫᨣᩣ ᨸᩣᨸᩩᨱᩥ, ᩑᨲᩴ ᨠᩣᩁᨱᩴ ᩋᨭ᩠ᨮᩣᨶᩴ ᩋᨠᩣᩁᨱᨶ᩠ᨲᩥ ᩋᨲ᩠ᨳᩮᩣ.

᪘᪒. ᨶᩥᨠ᩠ᨡᨾᩥᨲ᩠ᩅᩣ ¶ ᩋᨣᩣᩁᩈ᩠ᨾᩣᨲᩥ ᨥᩁᩣᩅᩣᩈᨲᩮᩣ ᨶᩥᨠ᩠ᨡᨾᩥᨲ᩠ᩅᩣ ᨲᩴ ᨲᩥᨱᨴᩃᨾᩥᩅ ᨸᩁᩥᨧ᩠ᨧᨩᩥᨲ᩠ᩅᩣ ᩈᩩᨻ᩠ᨻᨲᩮᩣ ᩈᩩᩈᩥᨠ᩠ᨡᩥᨲᩮᩣ ᨸᨻ᩠ᨻᨩᩥᩔᨲᩥ. ᩁᩣᩉᩩᩃᩮᩣ ᨶᩣᨾ ¶ ᨶᩣᨾᩮᨶᩣᨲᩥ ᩈᩩᨴ᩠ᨵᩮᩣᨴᨶᨾᩉᩣᩁᩣᨩᩮᨶ ᨸᩮᩈᩥᨲᩴ ¶ ᨠᩩᨾᩣᩁᩔ ᨩᩣᨲᩈᩣᩈᨶᩴ ᩈᩩᨲ᩠ᩅᩣ ᨸᩥᨲᩁᩣ ᩈᩥᨴ᩠ᨵᨲ᩠ᨳᩮᨶ, ‘‘ᩁᩣᩉᩩ ᨩᩣᨲᩮᩣ, ᨻᨶ᩠ᨵᨶᩴ ᨩᩣᨲ’’ᨶ᩠ᨲᩥ ᩅᩩᨲ᩠ᨲᨶᩣᨾᨲ᩠ᨲᩣ ᩁᩣᩉᩩᩃᩮᩣ ᨶᩣᨾᩣᨲᩥ ᩋᨲ᩠ᨳᩮᩣ. ‘‘ᨿᨳᩣ ᨧᨶ᩠ᨴᩈᩪᩁᩥᨿᩣᨶᩴ ᩅᩥᨾᩣᨶᨸᨽᩣᨿ ᨠᩥᩃᩥᨭ᩠ᨮᨠᩁᨱᩮᨶ ᩁᩣᩉᩩ ᩋᩈᩩᩁᩥᨶ᩠ᨴᩮᩣ ᩏᨸᩮᨲᩥ ᨣᨧ᩠ᨨᨲᩥ, ᩑᩅᨾᩮᩅᩣᨿᩴ ᨾᨾ ᩋᨽᩥᨶᩥᨠ᩠ᨡᨾᨶᨸᨻ᩠ᨻᨩ᩠ᨩᩣᨴᩦᨶᩴ ᩋᨶ᩠ᨲᩁᩣᨿᩴ ᨠᩁᩮᩣᨶ᩠ᨲᩮᩣᩁᩥᩅ ᨩᩣᨲᩮᩣ’’ᨲᩥ ᩋᨵᩥᨸ᩠ᨸᩣᨿᩮᨶ, ‘‘ᩁᩣᩉᩩ ᨩᩣᨲᩮᩣᨲᩥ ᩌᩉᩣ’’ᨲᩥ ᨴᨭ᩠ᨮᨻ᩠ᨻᩴ. ᩋᩁᩉᩣ ᩈᩮᩣ ᨽᩅᩥᩔᨲᩦᨲᩥ ᩈᩮᩣ ᨲᩣᨴᩥᩈᩮᩣ ᩏᨸᨶᩥᩔᨿᩈᨾ᩠ᨸᨶ᩠ᨶᩮᩣ ᩅᩥᨸᩔᨶᩣᨿᩴ ᨿᩩᨲ᩠ᨲᨸ᩠ᨸᨿᩩᨲ᩠ᨲᩮᩣ ᩋᩁᩉᩣ ᨡᩦᨱᩣᩈᩅᩮᩣ ᨽᩅᩥᩔᨲᩦᨲᩥ ᩋᨲ᩠ᨳᩮᩣ.

᪘᪓. ᨠᩥᨠᩦᩅ ᩋᨱ᩠ᨯᩴ ᩁᨠ᩠ᨡᩮᨿ᩠ᨿᩣᨲᩥ ᩋᨱ᩠ᨯᩴ ᨻᩦᨩᩴ ᩁᨠ᩠ᨡᨾᩣᨶᩣ ᨠᩥᨠᩦ ᩈᨠᩩᨱᩦ ᩍᩅ ᩋᨸ᩠ᨸᨾᨲ᩠ᨲᩮᩣ ᩈᩦᩃᩴ ᩁᨠ᩠ᨡᩮᨿ᩠ᨿ, ᨧᩣᨾᩁᩦ ᩅᩥᨿ ᩅᩣᩃᨵᩥᨶ᩠ᨲᩥ ᩅᩣᩃᩴ ᩁᨠ᩠ᨡᨾᩣᨶᩣ ᨠᨱ᩠ᨯᨠᩮᩈᩩ ᩅᩣᩃᩮ ᩃᨣ᩠ᨣᨶ᩠ᨲᩮ ᨽᩥᨶ᩠ᨴᨶᨽᨿᩮᨶ ᩋᨶᩣᨠᨯ᩠ᨰᩥᨲ᩠ᩅᩣ ᨾᩁᨾᩣᨶᩣ ᨧᩣᨾᩁᩦ ᩅᩥᨿ ᨩᩦᩅᩥᨲᨾ᩠ᨸᩥ ᨸᩁᩥᨧ᩠ᨧᨩᩥᨲ᩠ᩅᩣ ᩈᩦᩃᩴ ᩋᨽᩥᨶ᩠ᨴᩥᨲ᩠ᩅᩣ ᩁᨠ᩠ᨡᩮᨿ᩠ᨿ. ᨶᩥᨸᨠᩮᩣ ᩈᩦᩃᩈᨾ᩠ᨸᨶ᩠ᨶᩮᩣᨲᩥ ᨶᩮᨸᨠ᩠ᨠᩴ ᩅᩩᨧ᩠ᨧᨲᩥ ᨸᨬ᩠ᨬᩣ, ᨲᩮᨶ ᨶᩮᨸᨠ᩠ᨠᩮᨶ ᩈᨾᨶ᩠ᨶᩣᨣᨲᩮᩣ ᨶᩥᨸᨠᩮᩣ ᨡᨱ᩠ᨯᨨᩥᨴ᩠ᨴᩣᨴᩥᨽᩣᩅᩴ ᩋᨸᩣᨸᩮᨲ᩠ᩅᩣ ᩁᨠ᩠ᨡᨱᨲᩮᩣ ᩈᩦᩃᩈᨾ᩠ᨸᨶ᩠ᨶᩮᩣ ᨽᩅᩥᩔᨲᩦᨲᩥ ᩑᩅᩴ ᩈᩮᩣ ᨽᨣᩅᩣ ᨻ᩠ᨿᩣᨠᩁᨱᨾᨠᩣᩈᩥ. ᩈᩮᩣ ᩑᩅᩴ ᨸᨲ᩠ᨲᩋᩁᩉᨲ᩠ᨲᨹᩃᩮᩣ ᩑᨠᨴᩥᩅᩈᩴ ᩅᩥᩅᩮᨠᨭ᩠ᨮᩣᨶᩮ ᨶᩥᩈᩥᨶ᩠ᨶᩮᩣ ᩈᩮᩣᨾᨶᩔᩅᩈᩮᨶ ᩑᩅᩴ ᩁᨠ᩠ᨡᩥᩴ ᨾᩉᩣᨾᩩᨶᩦᨲᩥᩌᨴᩥᨾᩣᩉ. ᨲᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩁᩣᩉᩩᩃᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᩏᨸᩈᩮᨶᩅᨦ᩠ᨣᨶ᩠ᨲᨸᩩᨲ᩠ᨲᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᩴ ᨽᨣᩅᨶ᩠ᨲᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩏᨸᩈᩮᨶᩅᨦ᩠ᨣᨶ᩠ᨲᨸᩩᨲ᩠ᨲᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩉᩴᩈᩅᨲᩦᨶᨣᩁᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩅᨿᨸ᩠ᨸᨲ᩠ᨲᩮᩣ ᩈᨲ᩠ᨳᩩ ᩈᨶ᩠ᨲᩥᨠᩴ ᨣᨶ᩠ᨲ᩠ᩅᩣ ᨵᨾ᩠ᨾᩴ ᩈᩩᨱᨶ᩠ᨲᩮᩣ ᩈᨲ᩠ᨳᩣᩁᩴ ᩑᨠᩴ ᨽᩥᨠ᩠ᨡᩩᩴ ᩈᨾᨶ᩠ᨲᨸᩣᩈᩣᨴᩥᨠᩣᨶᩴ ᩋᨣ᩠ᨣᨭ᩠ᨮᩣᨶᩮ ᨮᨸᩮᨶ᩠ᨲᩴ ᨴᩥᩈ᩠ᩅᩣ ᩈᨲ᩠ᨳᩩ ᩋᨵᩥᨠᩣᩁᨠᨾ᩠ᨾᩴ ᨠᨲ᩠ᩅᩣ ᨲᩴ ᨮᩣᨶᨶ᩠ᨲᩁᩴ ᨸᨲ᩠ᨳᩮᨲ᩠ᩅᩣ ᨿᩣᩅᨩᩦᩅᩴ ᨠᩩᩈᩃᩴ ᨠᨲ᩠ᩅᩣ ¶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨶᩣᩃᨠᨣᩣᨾᩮ ᩁᩪᨸᩈᩣᩁᩦ ᨻᩕᩣᩉ᩠ᨾᨱᩥᨿᩣ ᨠᩩᨧ᩠ᨨᩥᨾ᩠ᩉᩥ ᨶᩥᨻ᩠ᨻᨲ᩠ᨲᩥ, ᩏᨸᩈᩮᨶᩮᩣᨲᩥᩔ ᨶᩣᨾᩴ ᩋᩉᩮᩣᩈᩥ. ᩈᩮᩣ ᩅᨿᨸ᩠ᨸᨲ᩠ᨲᩮᩣ ᨲᨿᩮᩣ ᩅᩮᨴᩮ ᩏᨣ᩠ᨣᨱ᩠ᩉᩥᨲ᩠ᩅᩣ ᩈᨲ᩠ᨳᩩ ᩈᨶ᩠ᨲᩥᨠᩮ ᨵᨾ᩠ᨾᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᩏᨸᩈᨾ᩠ᨸᨴᩣᨿ ᩑᨠᩅᩔᩥᨠᩮᩣ ‘‘ᩋᩁᩥᨿᨣᨻ᩠ᨽᩴ ᩅᨯ᩠ᨰᩮᨾᩦ’’ᨲᩥ ᩑᨠᩴ ᨠᩩᩃᨸᩩᨲ᩠ᨲᩴ ᩋᨲ᩠ᨲᨶᩮᩣ ᩈᨶ᩠ᨲᩥᨠᩮ ᩏᨸᩈᨾ᩠ᨸᩣᨴᩮᨲ᩠ᩅᩣ ᨲᩮᨶ ᩈᨴ᩠ᨵᩥᩴ ᩈᨲ᩠ᨳᩩ ᩈᨶ᩠ᨲᩥᨠᩴ ᨣᨲᩮᩣ. ᩈᨲ᩠ᨳᩣᩁᩣ ᨧᩔ ᨲᩔ ᩋᩅᩔᩥᨠᩔ ᨽᩥᨠ᩠ᨡᩩᨶᩮᩣ ᩈᨴ᩠ᨵᩥᩅᩥᩉᩣᩁᩥᨠᨽᩣᩅᩴ ᩈᩩᨲ᩠ᩅᩣ ‘‘ᩋᨲᩥᩃᩉᩩᩴ ᨡᩮᩣ ᨲ᩠ᩅᩴ, ᨾᩮᩣᨥᨸᩩᩁᩥᩈ, ᨻᩣᩉᩩᩃ᩠ᩃᩣᨿ ᩌᩅᨲ᩠ᨲᩮᩣ’’ᨲᩥ (ᨾᩉᩣᩅ. ᪗᪕) ᨣᩁᩉᩥᨲᩮᩣ ‘‘ᩍᨴᩣᨶᩣᩉᩴ ᨿᨴᩥ ᨸᩁᩥᩈᩴ ᨶᩥᩔᩣᨿ ᩈᨲ᩠ᨳᩣᩁᩣ ᨣᩁᩉᩥᨲᩮᩣ, ᨸᩁᩥᩈᩴᨿᩮᩅ ᨸᨶ ᨶᩥᩔᩣᨿ ¶ ᩈᨲ᩠ᨳᩩ ¶ ᨸᩈᩣᨴᩴ ᨠᩁᩥᩔᩣᨾᩦ’’ᨲᩥ ᩅᩥᨸᩔᨶᩣᨿ ᨠᨾ᩠ᨾᩴ ᨠᩁᩮᩣᨶ᩠ᨲᩮᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ. ᩋᩁᩉᩣ ᨸᨶ ᩉᩩᨲ᩠ᩅᩣ ᩈᨿᨾ᩠ᨸᩥ ᩈᨻ᩠ᨻᩮ ᨵᩩᨲᨦ᩠ᨣᨵᨾ᩠ᨾᩮ ᩈᨾᩣᨴᩣᨿ ᩅᨲ᩠ᨲᨲᩥ, ᩋᨬ᩠ᨬᩮᨸᩥ ᨲᨴᨲ᩠ᨳᩣᨿ ᩈᨾᩣᨴᨸᩮᩈᩥ, ᨲᩮᨶ ᨶᩴ ᨽᨣᩅᩣ ᩈᨾᨶ᩠ᨲᨸᩣᩈᩣᨴᩥᨠᩣᨶᩴ ᩋᨣ᩠ᨣᨭ᩠ᨮᩣᨶᩮ ᨮᨸᩮᩈᩥ. ᩈᩮᩣ ᩋᨸᩁᩮᨶ ᩈᨾᨿᩮᨶ ᨠᩮᩣᩈᨾ᩠ᨻᩥᨿᩴ ᨠᩃᩉᩮ ᩏᨸ᩠ᨸᨶ᩠ᨶᩮ ᨽᩥᨠ᩠ᨡᩩᩈᨦ᩠ᨥᩮ ᨧ ᨴ᩠ᩅᩥᨵᩣᨽᩪᨲᩮ ᩑᨠᩮᨶ ᨽᩥᨠ᩠ᨡᩩᨶᩣ ᨲᩴ ᨠᩃᩉᩴ ᨸᩁᩥᩅᨩ᩠ᨩᩥᨲᩩᨠᩣᨾᩮᨶ ‘‘ᩑᨲᩁᩉᩥ ᨡᩮᩣ ᨠᩃᩉᩮᩣ ᩏᨸ᩠ᨸᨶ᩠ᨶᩮᩣ, ᨽᩥᨠ᩠ᨡᩩᩈᨦ᩠ᨥᩮᩣ ᨧ ᨴ᩠ᩅᩥᨵᩣᨽᩪᨲᩮᩣ, ᨠᨳᩴ ᨶᩩ ᨡᩮᩣ ᨾᨿᩣ ᨸᨭᩥᨸᨩ᩠ᨩᩥᨲᨻ᩠ᨻ’’ᨶ᩠ᨲᩥ ᨸᩩᨭ᩠ᨮᩮᩣ ᩅᩥᩅᩮᨠᩅᩣᩈᨲᩮᩣ ᨸᨭ᩠ᨮᩣᨿ ᨲᩔ ᨸᨭᩥᨸᨲ᩠ᨲᩥᩴ ᨠᨳᩮᩈᩥ. ᩑᩅᩴ ᨳᩮᩁᩮᩣ ᨲᩔ ᨽᩥᨠ᩠ᨡᩩᨶᩮᩣ ᩒᩅᩣᨴᨴᩣᨶᩣᨸᨴᩮᩈᩮᨶ ᩋᨲ᩠ᨲᨶᩮᩣ ᨲᨳᩣ ᨸᨭᩥᨸᨶ᩠ᨶᨽᩣᩅᩴ ᨴᩦᨸᩮᨶ᩠ᨲᩮᩣ ᩋᨬ᩠ᨬᩴ ᨻ᩠ᨿᩣᨠᩣᩈᩥ.

᪘᪖. ᩈᩮᩣ ᩑᩅᩴ ᨸᨲ᩠ᨲᩑᨲᨴᨣ᩠ᨣᨭ᩠ᨮᩣᨶᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᩅᩈᩮᨶ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩴ ᨽᨣᩅᨶ᩠ᨲᨶ᩠ᨲᩥᩌᨴᩥᨾᩣᩉ. ᨸᨻ᩠ᨽᩣᩁᨾ᩠ᩉᩥ ᨶᩥᩈᩦᨴᨶ᩠ᨲᨶ᩠ᨲᩥ ᨸᩩᩁᨲᩮᩣ ᨽᩣᩁᩴ ᨶᨾᩥᨲᩴ ᩒᨶᨾᩥᨲᨶ᩠ᨲᩥ ᨸᨻ᩠ᨽᩣᩁᩴ ᩅᩥᩅᩮᨠᨠᩣᨾᩴ ᩅᨶᨾᨩ᩠ᨫᩮ ᩈᨿᩴᨩᩣᨲᨸᨻ᩠ᨻᨲᨸᨻ᩠ᨽᩣᩁᩮ ᨶᩥᩈᩥᨶ᩠ᨶᩴ ᨶᩁᩩᨲ᩠ᨲᨾᩴ ᨽᨣᩅᨶ᩠ᨲᩴ ᩋᩉᩴ ᩏᨸᨣᨧ᩠ᨨᩥᩴ ᩈᨾᩦᨸᩴ ᨣᨲᩮᩣᨲᩥ ᩋᨲ᩠ᨳᩮᩣ.

᪘᪗. ᨠᨱᩥᨠᩣᩁᨸᩩᨸ᩠ᨹ ᨴᩥᩈ᩠ᩅᩣᨲᩥ ᨲᨳᩣ ᩏᨸᨣᨧ᩠ᨨᨶ᩠ᨲᩮᩣ ᨲᩈ᩠ᨾᩥᩴ ᨸᨴᩮᩈᩮ ᩈᩩᨸᩩᨸ᩠ᨹᩥᨲᩴ ᨠᨱᩥᨠᩣᩁᩴ ᨴᩥᩈ᩠ᩅᩣ. ᩅᨱ᩠ᨭᩮ ᨨᩮᨲ᩠ᩅᩣᨶᩉᩴ ᨲᨴᩣᨲᩥ ᨲᩈ᩠ᨾᩥᩴ ᨲᨳᩣᨣᨲᩔ ᨴᩥᨭ᩠ᨮᨠᩣᩃᩮ ᨲᩴ ᨸᩩᨸ᩠ᨹᩴ ᩅᨱ᩠ᨭᩮ ᩅᨱ᩠ᨭᩈ᩠ᨾᩥᩴ ᨨᩮᨲ᩠ᩅᩣᨶ ᨨᩥᨶ᩠ᨴᩥᨲ᩠ᩅᩣᨶ. ᩋᩃᨦ᩠ᨠᩁᩥᨲ᩠ᩅᩣ ᨨᨲ᩠ᨲᨾ᩠ᩉᩦᨲᩥ ᨲᩮᨶ ᨸᩩᨸ᩠ᨹᩮᨶ ᨨᨲ᩠ᨲᩴ ᨨᩣᨴᩮᨲ᩠ᩅᩣ. ᨻᩩᨴ᩠ᨵᩔ ᩋᨽᩥᩁᩮᩣᨸᨿᩥᨶ᩠ᨲᩥ ᨸᨻ᩠ᨽᩣᩁᩮ ᨶᩥᩈᩥᨶ᩠ᨶᩔ ᨻᩩᨴ᩠ᨵᩔ ᨾᩩᨴ᩠ᨵᨶᩥ ᩋᨠᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪘᪘. ᨸᩥᨱ᩠ᨯᨸᩣᨲᨬ᩠ᨧ ¶ ᨸᩣᨴᩣᩈᩥᨶ᩠ᨲᩥ ᨲᩈ᩠ᨾᩥᩴᨿᩮᩅ ᨶᩥᩈᩥᨶ᩠ᨶᩔ ᨽᨣᩅᨲᩮᩣ ᨸᩥᨱ᩠ᨯᨸᩣᨲᩴ ᨸᨠᩣᩁᩮᨶ ᩋᨴᩣᩈᩥᩴ ᨽᩮᩣᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᨸᩁᨾᨶ᩠ᨶᩴ ᩈᩩᨽᩮᩣᨩᨶᨶ᩠ᨲᩥ ᩈᩩᨶ᩠ᨴᩁᨽᩮᩣᨩᨶᩈᨦ᩠ᨡᩣᨲᩴ ᨸᩁᨾᨶ᩠ᨶᩴ ᩏᨲ᩠ᨲᨾᩣᩉᩣᩁᩴ. ᨻᩩᨴ᩠ᨵᩮᨶ ᨶᩅᨾᩮ ᨲᨲ᩠ᨳᩣᨲᩥ ᨲᩈ᩠ᨾᩥᩴ ᩅᩥᩅᩮᨠᨭ᩠ᨮᩣᨶᩮ ᨻᩩᨴ᩠ᨵᩮᨶ ᩈᩉ ᨶᩅᨾᩮ ᩋᨭ᩠ᨮ ᩈᨾᨱᩮ ᩈᨾᩥᨲᨸᩣᨸᩮ ᨡᩦᨱᩣᩈᩅᨽᩥᨠ᩠ᨡᩪ ᨽᩮᩣᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

ᨿᩴ ᩅᨴᨶ᩠ᨲᩥ ᩈᩩᨾᩮᨵᩮᩣᨲᩥ ᨿᩴ ᨣᩮᩣᨲᨾᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᨽᩪᩁᩥᨸᨬ᩠ᨬᩴ ᨸᨳᩅᩥᩈᨾᩣᨶᩴ ᨸᨬ᩠ᨬᩴ ᩈᩩᨾᩮᨵᩴ ᩈᩩᨶ᩠ᨴᩁᩴ ᩈᨻ᩠ᨻᨬ᩠ᨬᩩᨲᩣᨴᩥᨸᨬ᩠ᨬᩅᨶ᩠ᨲᩴ. ᩈᩩᨾᩮᨵᩮᩣ ᩍᨲᩥ ᩈᩩᨶ᩠ᨴᩁᨸᨬ᩠ᨬᩮᩣ ᩍᨲᩥ ᩅᨴᨶ᩠ᨲᩥ ᨸᨱ᩠ᨯᩥᨲᩣ ᩍᨲᩮᩣ ᨠᨸ᩠ᨸᨲᩮᩣ ᩈᨲᩈᩉᩔᩮ ᨠᨸ᩠ᨸᩮ ᩑᩈᩮᩣ ᨣᩮᩣᨲᨾᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨽᩅᩥᩔᨲᩦᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩏᨸᩈᩮᨶᩅᨦ᩠ᨣᨶ᩠ᨲᨸᩩᨲ᩠ᨲᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᩁᨭ᩠ᨮᨸᩣᩃᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᩔ ¶ ¶ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩁᨭ᩠ᨮᨸᩣᩃᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩣᨿᩈ᩠ᨾᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᩏᨸ᩠ᨸᨲ᩠ᨲᩥᨲᩮᩣ ᨸᩩᩁᩮᨲᩁᨾᩮᩅ ᩉᩴᩈᩅᨲᩦᨶᨣᩁᩮ ᨣᩉᨸᨲᩥᨾᩉᩣᩈᩣᩃᨠᩩᩃᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩅᨿᨸ᩠ᨸᨲ᩠ᨲᩮᩣ ᨸᩥᨲᩩ ᩋᨧ᩠ᨧᨿᩮᨶ ᨥᩁᩣᩅᩣᩈᩮ ᨸᨲᩥᨭ᩠ᨮᩥᨲᩮᩣ ᩁᨲᨶᨠᩮᩣᨭ᩠ᨮᩣᨣᩣᩁᨠᨾ᩠ᨾᩥᨠᩮᨶ ᨴᩔᩥᨲᩴ ᩋᨸᩁᩥᨾᩣᨱᩴ ᩅᩴᩈᩣᨶᩩᨣᨲᩴ ᨵᨶᩴ ᨴᩥᩈ᩠ᩅᩣ ‘‘ᩍᨾᩴ ᩑᨲ᩠ᨲᨠᩴ ᨵᨶᩁᩣᩈᩥᩴ ᨾᨿ᩠ᩉᩴ ᨸᩥᨲᩩᩋᨿ᩠ᨿᨠᨸᨿ᩠ᨿᨠᩣᨴᨿᩮᩣ ᩋᨲ᩠ᨲᨶᩣ ᩈᨴ᩠ᨵᩥᩴ ᨣᩉᩮᨲ᩠ᩅᩣ ᨣᨶ᩠ᨲᩩᩴ ᨶᩣᩈᨠ᩠ᨡᩥᩴᩈᩩ, ᨾᨿᩣ ᨸᨶ ᨣᩉᩮᨲ᩠ᩅᩣ ᨣᨶ᩠ᨲᩩᩴ ᩅᨭ᩠ᨭᨲᩦ’’ᨲᩥ ᨧᩥᨶ᩠ᨲᩮᨲ᩠ᩅᩣ ᨠᨸᨱᨴ᩠ᨵᩥᨠᩣᨴᩦᨶᩴ ᨾᩉᩣᨴᩣᨶᩴ ᩋᨴᩣᩈᩥ. ᩈᩮᩣ ᩋᨽᩥᨬ᩠ᨬᩣᩃᩣᨽᩥᩴ ᩑᨠᩴ ᨲᩣᨸᩈᩴ ᩏᨸᩈᨦ᩠ᨠᨾᩥᨲ᩠ᩅᩣ ᨲᩮᨶ ᨴᩮᩅᩃᩮᩣᨠᩣᨵᩥᨸᨧ᩠ᨧᩮ ᨶᩥᨿᩮᩣᨩᩥᨲᩮᩣ ᨿᩣᩅᨩᩦᩅᩴ ᨸᩩᨬ᩠ᨬᩣᨶᩥ ᨠᨲ᩠ᩅᩣ ᨲᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᩋᨶᩩᨽᩅᨶ᩠ᨲᩮᩣ ᨲᨲ᩠ᨳ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᨲᨲᩮᩣ ᨧᩩᨲᩮᩣ ᨾᨶᩩᩔᩃᩮᩣᨠᩮ ᨽᩥᨶ᩠ᨶᩴ ᩁᨭ᩠ᨮᩴ ᩈᨶ᩠ᨵᩣᩁᩮᨲᩩᩴ ᩈᨾᨲ᩠ᨳᩔ ᨠᩩᩃᩔ ᩑᨠᨸᩩᨲ᩠ᨲᨠᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩥ. ᨲᩮᨶ ᩈᨾᨿᩮᨶ ᨸᨴᩩᨾᩩᨲ᩠ᨲᩁᩮᩣ ᨽᨣᩅᩣ ᩃᩮᩣᨠᩮ ᩏᨸ᩠ᨸᨩ᩠ᨩᩥᨲ᩠ᩅᩣ ᨸᩅᨲ᩠ᨲᩥᨲᩅᩁᨵᨾ᩠ᨾᨧᨠ᩠ᨠᩮᩣ ᩅᩮᨶᩮᨿ᩠ᨿᩈᨲ᩠ᨲᩮ ᨶᩥᨻ᩠ᨻᩣᨶᨾᩉᩣᨶᨣᩁᩈᨦ᩠ᨡᩣᨲᩴ ᨡᩮᨾᨶ᩠ᨲᨽᩪᨾᩥᩴ ᩈᨾ᩠ᨸᩣᨸᩮᩈᩥ. ᩋᨳ ᩈᩮᩣ ᨠᩩᩃᨸᩩᨲ᩠ᨲᩮᩣ ᩋᨶᩩᨠ᩠ᨠᨾᩮᨶ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩑᨠᨴᩥᩅᩈᩴ ᩏᨸᩣᩈᨠᩮᩉᩥ ᩈᨴ᩠ᨵᩥᩴ ᩅᩥᩉᩣᩁᩴ ᨣᨶ᩠ᨲ᩠ᩅᩣ ᩈᨲ᩠ᨳᩣᩁᩴ ᨵᨾ᩠ᨾᩴ ᨴᩮᩈᩮᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨧᩥᨲ᩠ᨲᩮᩣ ᨸᩁᩥᩈᨸᩁᩥᨿᨶ᩠ᨲᩮ ᨶᩥᩈᩦᨴᩥ.

ᨲᩮᨶ ¶ ᨡᩮᩣ ᨸᨶ ᩈᨾᨿᩮᨶ ᩈᨲ᩠ᨳᩣ ᩑᨠᩴ ᨽᩥᨠ᩠ᨡᩩᩴ ᩈᨴ᩠ᨵᩣᨸᨻ᩠ᨻᨩᩥᨲᩣᨶᩴ ᩋᨣ᩠ᨣᨭ᩠ᨮᩣᨶᩮ ᨮᨸᩮᩈᩥ. ᩈᩮᩣ ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩈᨲᩈᩉᩔᨽᩥᨠ᩠ᨡᩩᨸᩁᩥᩅᩩᨲᩔ ᨽᨣᩅᨲᩮᩣ ᩈᨲ᩠ᨲᩣᩉᩴ ᨾᩉᩣᨴᩣᨶᩴ ᨴᨲ᩠ᩅᩣ ᨲᩴ ᨮᩣᨶᩴ ᨸᨲ᩠ᨳᩮᩈᩥ. ᩈᨲ᩠ᨳᩣ ᩋᨶᨶ᩠ᨲᩁᩣᨿᩮᨶ ᩈᨾᩥᨩ᩠ᨫᨶᨽᩣᩅᩴ ᨴᩥᩈ᩠ᩅᩣ ‘‘ᩋᨿᩴ ᩋᨶᩣᨣᨲᩮ ᨣᩮᩣᨲᨾᩔ ᨶᩣᨾ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩈᩣᩈᨶᩮ ᩈᨴ᩠ᨵᩣᨸᨻ᩠ᨻᨩᩥᨲᩣᨶᩴ ᩋᨣ᩠ᨣᩮᩣ ᨽᩅᩥᩔᨲᩦ’’ᨲᩥ ᨻ᩠ᨿᩣᨠᩣᩈᩥ. ᩈᩮᩣ ᩈᨲ᩠ᨳᩣᩁᩴ ᨽᩥᨠ᩠ᨡᩩᩈᨦ᩠ᨥᨬ᩠ᨧ ᩅᨶ᩠ᨴᩥᨲ᩠ᩅᩣ ᩏᨭ᩠ᨮᩣᨿᩣᩈᨶᩣ ᨸᨠ᩠ᨠᩣᨾᩥ. ᩈᩮᩣ ᨿᩣᩅᨲᩣᨿᩩᨠᩴ ᨸᩩᨬ᩠ᨬᩣᨶᩥ ᨠᨲ᩠ᩅᩣ ᨲᨲᩮᩣ ᨧᩅᩥᨲ᩠ᩅᩣ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩍᨲᩮᩣ ᨴ᩠ᩅᩮᨶᩅᩩᨲᩮ ᨠᨸ᩠ᨸᩮ ᨹᩩᩔᩔ ᨽᨣᩅᨲᩮᩣ ᨠᩣᩃᩮ ᩈᨲ᩠ᨳᩩ ᩅᩮᨾᩣᨲᩥᨠᩮᩈᩩ ᨲᩦᩈᩩ ᩁᩣᨩᨸᩩᨲ᩠ᨲᩮᩈᩩ ᩈᨲ᩠ᨳᩣᩁᩴ ᩏᨸᨭ᩠ᨮᩉᨶ᩠ᨲᩮᩈᩩ ᨲᩮᩈᩴ ᨸᩩᨬ᩠ᨬᨠᩥᩁᩥᨿᩣᩈᩩ ᩈᩉᩣᨿᨠᩥᨧ᩠ᨧᩴ ᩋᨠᩣᩈᩥ. ᩑᩅᩴ ᨲᨲ᩠ᨳ ᨲᨲ᩠ᨳ ᨽᩅᩮ ᨻᩉᩩᩴ ᨠᩩᩈᩃᩴ ᩏᨸᨧᩥᨶᩥᨲ᩠ᩅᩣ ᩈᩩᨣᨲᩦᩈᩩᨿᩮᩅ ᩈᩴᩈᩁᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩁᩩᩁᨭ᩠ᨮᩮ ᨳᩩᩃ᩠ᩃᨠᩮᩣᨭ᩠ᨮᩥᨠᨶᩥᨣᨾᩮ ᩁᨭ᩠ᨮᨸᩣᩃᩈᩮᨭ᩠ᨮᩥᨶᩮᩣ ᨣᩮᩉᩮ ᨶᩥᨻ᩠ᨻᨲ᩠ᨲᩥ, ᨲᩔ ᨽᩥᨶ᩠ᨶᩴ ᩁᨭ᩠ᨮᩴ ᩈᨶ᩠ᨵᩣᩁᩮᨲᩩᩴ ᩈᨾᨲ᩠ᨳᨠᩩᩃᩮ ᨶᩥᨻ᩠ᨻᨲ᩠ᨲᨲ᩠ᨲᩣ ᩁᨭ᩠ᨮᨸᩣᩃᩮᩣᨲᩥ ᩅᩴᩈᩣᨶᩩᨣᨲᨾᩮᩅ ᨶᩣᨾᩴ ᩋᩉᩮᩣᩈᩥ. ᩈᩮᩣ ᨾᩉᨲᩣ ᨸᩁᩥᩅᩣᩁᩮᨶ ᩅᨯ᩠ᨰᨶ᩠ᨲᩮᩣ ᩋᨶᩩᨠ᩠ᨠᨾᩮᨶ ᨿᩮᩣᨻ᩠ᨻᨶᨸ᩠ᨸᨲ᩠ᨲᩮᩣ ᨾᩣᨲᩣᨸᩥᨲᩪᩉᩥ ᨸᨲᩥᩁᩪᨸᩮᨶ ᨴᩣᩁᩮᨶ ᩈᩴᨿᩮᩣᨩᩥᨲᩮᩣ ᨾᩉᨶ᩠ᨲᩮ ¶ ᨧ ᨿᩈᩮ ᨸᨲᩥᨭ᩠ᨮᩣᨸᩥᨲᩮᩣ ᨴᩥᨻ᩠ᨻᩈᨾ᩠ᨸᨲ᩠ᨲᩥᩈᨴᩥᩈᩈᨾ᩠ᨸᨲ᩠ᨲᩥᩴ ᨸᨧ᩠ᨧᨶᩩᨽᩮᩣᨲᩥ.

ᩋᨳ ¶ ᨽᨣᩅᩣ ᨠᩩᩁᩩᩁᨭ᩠ᨮᩮ ᨩᨶᨸᨴᨧᩣᩁᩥᨠᩴ ᨧᩁᨶ᩠ᨲᩮᩣ ᨳᩩᩃ᩠ᩃᨠᩮᩣᨭ᩠ᨮᩥᨠᩴ ᩋᨶᩩᨸᩣᨸᩩᨱᩥ. ᨲᩴ ᩈᩩᨲ᩠ᩅᩣ ᩁᨭ᩠ᨮᨸᩣᩃᩮᩣ ᨠᩩᩃᨸᩩᨲ᩠ᨲᩮᩣ ᩈᨲ᩠ᨳᩣᩁᩴ ᩏᨸᩈᨦ᩠ᨠᨾᩥᨲ᩠ᩅᩣ ᩈᨲ᩠ᨳᩩ ᩈᨶ᩠ᨲᩥᨠᩮ ᨵᨾ᩠ᨾᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲᩩᨠᩣᨾᩮᩣ ᩈᨲ᩠ᨲᩣᩉᩴ ᨽᨲ᩠ᨲᨧ᩠ᨨᩮᨴᩴ ᨠᨲ᩠ᩅᩣ ᨠᩥᨧ᩠ᨨᩮᨶ ᨠᩈᩥᩁᩮᨶ ᨾᩣᨲᩣᨸᩥᨲᩁᩮᩣ ᩋᨶᩩᨩᩣᨶᩣᨸᩮᨲ᩠ᩅᩣ ᩈᨲ᩠ᨳᩣᩁᩴ ᩏᨸᩈᨦ᩠ᨠᨾᩥᨲ᩠ᩅᩣ ᨸᨻ᩠ᨻᨩ᩠ᨩᩴ ᨿᩣᨧᩥᨲ᩠ᩅᩣ ᩈᨲ᩠ᨳᩩ ᩌᨱᨲ᩠ᨲᩥᨿᩣ ᩋᨬ᩠ᨬᨲᩁᩔ ᩈᨶ᩠ᨲᩥᨠᩮ ᨸᨻ᩠ᨻᨩᩥᨲ᩠ᩅᩣ ᨿᩮᩣᨶᩥᩈᩮᩣᨾᨶᩈᩥᨠᩣᩁᩮᨶ ᨠᨾ᩠ᨾᩴ ᨠᩁᩮᩣᨶ᩠ᨲᩮᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᩋᩁᩉᨲ᩠ᨲᩴ ᨸᩣᨸᩩᨱᩥ. ᩋᩁᩉᨲ᩠ᨲᩴ ᨸᨶ ᨸᨲ᩠ᩅᩣ ᩈᨲ᩠ᨳᩣᩁᩴ ᩋᨶᩩᨩᩣᨶᩣᨸᩮᨲ᩠ᩅᩣ ᨾᩣᨲᩣᨸᩥᨲᩁᩮᩣ ᨸᩔᩥᨲᩩᩴ ᨳᩩᩃ᩠ᩃᨠᩮᩣᨭ᩠ᨮᩥᨠᩴ ᨣᨶ᩠ᨲ᩠ᩅᩣ ᨲᨲ᩠ᨳ ᩈᨸᨴᩣᨶᩴ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᨸᩥᨲᩩ ᨶᩥᩅᩮᩈᨶᩮ ᩌᨽᩥᨴᩮᩣᩈᩥᨠᩴ ᨠᩩᨾ᩠ᨾᩣᩈᩴ ᩃᨽᩥᨲ᩠ᩅᩣ ᨲᩴ ᩋᨾᨲᩴ ᩅᩥᨿ ᨸᩁᩥᨽᩩᨬ᩠ᨩᨶ᩠ᨲᩮᩣ ᨸᩥᨲᩁᩣ ᨶᩥᨾᨶ᩠ᨲᩥᨲᩮᩣ ᩈ᩠ᩅᩣᨲᨶᩣᨿ ᩋᨵᩥᩅᩣᩈᩮᨲ᩠ᩅᩣ ᨴᩩᨲᩥᨿᨴᩥᩅᩈᩮ ᨸᩥᨲᩩ ᨶᩥᩅᩮᩈᨶᩮ ᨸᩥᨱ᩠ᨯᨸᩣᨲᩴ ᨸᩁᩥᨽᩩᨬ᩠ᨩᩥᨲ᩠ᩅᩣ ᩋᩃᨦ᩠ᨠᨲᨸᨭᩥᨿᨲ᩠ᨲᩮ ᩍᨲ᩠ᨳᩣᨣᩣᩁᨩᨶᩮ ᩏᨸᨣᨶ᩠ᨲ᩠ᩅᩣ ‘‘ᨠᩦᨴᩥᩈᩣ ᨶᩣᨾ ᨲᩣ, ᩋᨿ᩠ᨿᨸᩩᨲ᩠ᨲ, ᩋᨧ᩠ᨨᩁᩣᨿᩮᩣ, ᨿᩣᩈᩴ ᨲ᩠ᩅᩴ ᩉᩮᨲᩩ ᨻᩕᩉ᩠ᨾᨧᩁᩥᨿᩴ ᨧᩁᩈᩦ’’ᨲᩥᩌᨴᩦᨶᩥ (ᨾ. ᨶᩥ. ᪒.᪓᪐᪑) ᩅᨲ᩠ᩅᩣ ᨸᩃᩮᩣᨽᨶᨠᨾ᩠ᨾᩴ ᨠᩣᨲᩩᩴ ᩌᩁᨴ᩠ᨵᩮ ᨲᩔᩣᨵᩥᨸ᩠ᨸᩣᨿᩴ ᩅᩥᨸᩁᩥᩅᨲ᩠ᨲᩮᨲ᩠ᩅᩣ ᩋᨶᩥᨧ᩠ᨧᨲᩣᨴᩥᨸᨭᩥᩈᩴᨿᩩᨲ᩠ᨲᩴ ᨵᨾ᩠ᨾᩴ ᨠᨳᩮᨶ᩠ᨲᩮᩣ –

‘‘ᨸᩔ ¶ ᨧᩥᨲ᩠ᨲᨠᨲᩴ ᨻᩥᨾ᩠ᨻᩴ, ᩋᩁᩩᨠᩣᨿᩴ ᩈᨾᩩᩔᩥᨲᩴ;

ᩌᨲᩩᩁᩴ ᨻᩉᩩᩈᨦ᩠ᨠᨸ᩠ᨸᩴ, ᨿᩔ ᨶᨲ᩠ᨳᩥ ᨵᩩᩅᩴ ᨮᩥᨲᩥ.

‘‘ᨸᩔ ᨧᩥᨲ᩠ᨲᨠᨲᩴ ᩁᩪᨸᩴ, ᨾᨱᩥᨶᩣ ᨠᩩᨱ᩠ᨯᩃᩮᨶ ᨧ;

ᩋᨭ᩠ᨮᩥᩴ ᨲᨧᩮᨶ ᩒᨶᨴ᩠ᨵᩴ, ᩈᩉ ᩅᨲ᩠ᨳᩮᩉᩥ ᩈᩮᩣᨽᨲᩥ.

‘‘ᩋᩃᨲ᩠ᨲᨠᨠᨲᩣ ᨸᩣᨴᩣ, ᨾᩩᨡᩴ ᨧᩩᨱ᩠ᨱᨠᨾᨠ᩠ᨡᩥᨲᩴ;

ᩋᩃᩴ ᨻᩣᩃᩔ ᨾᩮᩣᩉᩣᨿ, ᨶᩮᩣ ᨧ ᨸᩣᩁᨣᩅᩮᩈᩥᨶᩮᩣ.

‘‘ᩋᨭ᩠ᨮᩣᨸᨴᨠᨲᩣ ᨠᩮᩈᩣ, ᨶᩮᨲ᩠ᨲᩣ ᩋᨬ᩠ᨩᨶᨾᨠ᩠ᨡᩥᨲᩣ;

ᩋᩃᩴ ᨻᩣᩃᩔ ᨾᩮᩣᩉᩣᨿ, ᨶᩮᩣ ᨧ ᨸᩣᩁᨣᩅᩮᩈᩥᨶᩮᩣ.

‘‘ᩋᨬ᩠ᨩᨶᩦᩅ ᨶᩅᩣ ᨧᩥᨲ᩠ᨲᩣ, ᨸᩪᨲᩥᨠᩣᨿᩮᩣ ᩋᩃᨦ᩠ᨠᨲᩮᩣ;

ᩋᩃᩴ ᨻᩣᩃᩔ ᨾᩮᩣᩉᩣᨿ, ᨶᩮᩣ ᨧ ᨸᩣᩁᨣᩅᩮᩈᩥᨶᩮᩣ.

‘‘ᩒᨴᩉᩥ ¶ ᨾᩥᨣᩅᩮᩣ ᨸᩣᩈᩴ, ᨶᩣᩈᨴᩣ ᩅᩣᨣᩩᩁᩴ ᨾᩥᨣᩮᩣ;

ᨽᩩᨲ᩠ᩅᩣ ᨶᩥᩅᩣᨸᩴ ᨣᨧ᩠ᨨᩣᨾ, ᨠᨶ᩠ᨴᨶ᩠ᨲᩮ ᨾᩥᨣᨻᨶ᩠ᨵᨠᩮ.

‘‘ᨨᩥᨶ᩠ᨶᩮᩣ ¶ ᨸᩣᩈᩮᩣ ᨾᩥᨣᩅᩔ, ᨶᩣᩈᨴᩣ ᩅᩣᨣᩩᩁᩴ ᨾᩥᨣᩮᩣ;

ᨽᩩᨲ᩠ᩅᩣ ᨶᩥᩅᩣᨸᩴ ᨣᨧ᩠ᨨᩣᨾ, ᩈᩮᩣᨧᨶ᩠ᨲᩮ ᨾᩥᨣᩃᩩᨴ᩠ᨴᨠᩮ’’ᨲᩥ. (ᨾ. ᨶᩥ. ᪒.᪓᪐᪒; ᨳᩮᩁᨣᩣ. ᪗᪖᪙-᪗᪗᪕);

ᩍᨾᩣ ᨣᩣᨳᩣᨿᩮᩣ ᩋᨽᩣᩈᩥ. ᩍᨾᩣ ᨣᩣᨳᩣ ᩅᨲ᩠ᩅᩣ ᩅᩮᩉᩣᩈᩴ ᩋᨻ᩠ᨽᩩᨣ᩠ᨣᨶ᩠ᨲ᩠ᩅᩣ ᩁᨬ᩠ᨬᩮᩣ ᨠᩮᩣᩁᨻ᩠ᨿᩔ ᨾᩥᨣᩣᨩᩥᨶᩅᨶᩩᨿ᩠ᨿᩣᨶᩮ ᨾᨦ᩠ᨣᩃᩈᩥᩃᩣᨸᨭ᩠ᨭᩮ ᨶᩥᩈᩦᨴᩥ. ᨳᩮᩁᩔ ᨠᩥᩁ ᨸᩥᨲᩣ ᩈᨲ᩠ᨲᩈᩩ ᨴ᩠ᩅᩣᩁᨠᩮᩣᨭ᩠ᨮᨠᩮᩈᩩ ᩋᨣ᩠ᨣᩊᩴ ᨴᩣᨸᩮᨲ᩠ᩅᩣ ᨾᩃ᩠ᩃᩮ ᩌᨱᩣᨸᩮᩈᩥ ‘‘ᨶᩥᨠ᩠ᨡᨾᩥᨲᩩᩴ ᨾᩣ ᨴᩮᨳ, ᨠᩣᩈᩣᨿᩣᨶᩥ ᩋᨸᨶᩮᨲ᩠ᩅᩣ ᩈᩮᨲᨠᩣᨶᩥ ᨶᩥᩅᩣᩈᩣᨸᩮᨳᩣ’’ᨲᩥ. ᨲᩈ᩠ᨾᩣ ᨳᩮᩁᩮᩣ ᩌᨠᩣᩈᩮᨶ ᩋᨣᨾᩣᩈᩥ. ᩋᨳ ᩁᩣᨩᩣ ᨠᩮᩣᩁᨻ᩠ᨿᩮᩣ ᨳᩮᩁᩔ ᨲᨲ᩠ᨳ ᨶᩥᩈᩥᨶ᩠ᨶᨽᩣᩅᩴ ᩈᩩᨲ᩠ᩅᩣ ᨲᩴ ᩏᨸᩈᨦ᩠ᨠᨾᩥᨲ᩠ᩅᩣ ᩈᨾ᩠ᨾᩮᩣᨴᨶᩦᨿᩴ ᨠᨳᩴ ᩈᩣᩁᨱᩦᨿᩴ ᩅᩦᨲᩥᩈᩣᩁᩮᨲ᩠ᩅᩣ ‘‘ᩍᨵ, ᨽᩮᩣ ᩁᨭ᩠ᨮᨸᩣᩃ, ᨸᨻ᩠ᨻᨩᨶ᩠ᨲᩮᩣ ᨻ᩠ᨿᩣᨵᩥᨸᩣᩁᩥᨩᩩᨬ᩠ᨬᩴ ᩅᩣ ᨩᩁᩣᨽᩮᩣᨣᨬᩣᨲᩥᨸᩣᩁᩥᨩᩩᨬ᩠ᨬᩴ ᩅᩣ ᨸᨲ᩠ᨲᩮᩣ ᨸᨻ᩠ᨻᨩᨲᩥ, ᨲ᩠ᩅᩴ ᨸᨶ ᨠᩥᨬ᩠ᨧᩥᨸᩥ ᨸᩣᩁᩥᨩᩩᨬ᩠ᨬᩴ ᩋᨶᩩᨸᨣᨲᩮᩣ ᩑᩅ ᨠᩈ᩠ᨾᩣ ᨸᨻ᩠ᨻᨩᩈᩦ’’ᨲᩥ ᨸᩩᨧ᩠ᨨᩥ. ᩋᨳᩔ ᨳᩮᩁᩮᩣ ‘‘ᩏᨸᨶᩥᨿ᩠ᨿᨲᩥ ᩃᩮᩣᨠᩮᩣ ᩋᨴ᩠ᨵᩩᩅᩮᩣ, ᩋᨲᩣᨱᩮᩣ ᩃᩮᩣᨠᩮᩣ ᩋᨶᨽᩥᩔᩁᩮᩣ, ᩋᩈᩁᨱᩮᩣ ᩃᩮᩣᨠᩮᩣ ᩈᨻ᩠ᨻᩴ ᨸᩉᩣᨿ ᨣᨾᨶᩦᨿᩴ, ᩐᨶᩮᩣ ᩃᩮᩣᨠᩮᩣ ᩋᨲᩥᨲ᩠ᨲᩮᩣ ᨲᨱ᩠ᩉᩣᨴᩣᩈᩮᩣ’’ᨲᩥ (ᨾ. ᨶᩥ. ᪒.᪓᪐᪕) ᩍᨾᩮᩈᩴ ᨧᨲᩩᨶ᩠ᨶᩴ ᨵᨾ᩠ᨾᩩᨴ᩠ᨴᩮᩈᩣᨶᩴ ᩋᨲ᩠ᨲᨶᩣ ᩅᩥᨴᩥᨲᨽᩣᩅᩴ ᨠᨳᩮᨲ᩠ᩅᩣ ᨲᩔᩣ ᨴᩮᩈᨶᩣᨿ ᩋᨶᩩᨣᩦᨲᩥᩴ ᨠᨳᩮᨶ᩠ᨲᩮᩣ –

‘‘ᨸᩔᩣᨾᩥ ¶ ᩃᩮᩣᨠᩮ ᩈᨵᨶᩮ ᨾᨶᩩᩔᩮ, ᩃᨴ᩠ᨵᩣᨶ ᩅᩥᨲ᩠ᨲᩴ ᨶ ᨴᨴᨶ᩠ᨲᩥ ᨾᩮᩣᩉᩣ;

ᩃᩩᨴ᩠ᨵᩣ ᨵᨶᩴ ᩈᨶ᩠ᨶᩥᨧᨿᩴ ᨠᩁᩮᩣᨶ᩠ᨲᩥ, ᨽᩥᨿ᩠ᨿᩮᩣᩅ ᨠᩣᨾᩮ ᩋᨽᩥᨸᨲ᩠ᨳᨿᨶ᩠ᨲᩥ.

‘‘ᩁᩣᨩᩣ ᨸᩈᨿ᩠ᩉᨸ᩠ᨸᨳᩅᩥᩴ ᩅᩥᨩᩮᨲ᩠ᩅᩣ, ᩈᩈᩣᨣᩁᨶ᩠ᨲᩴ ᨾᩉᩥᨾᩣᩅᩈᨶ᩠ᨲᩮᩣ;

ᩒᩁᩴ ᩈᨾᩩᨴ᩠ᨴᩔ ᩋᨲᩥᨲ᩠ᨲᩁᩪᨸᩮᩣ, ᨸᩣᩁᩴ ᩈᨾᩩᨴ᩠ᨴᩔᨸᩥ ᨸᨲ᩠ᨳᨿᩮᨳ.

‘‘ᩁᩣᨩᩣ ᨧ ᩋᨬ᩠ᨬᩮ ᨧ ᨻᩉᩪ ᨾᨶᩩᩔᩣ, ᩋᩅᩦᨲᨲᨱ᩠ᩉᩣ ᨾᩁᨱᩴ ᩏᨸᩮᨶ᩠ᨲᩥ;

ᩐᨶᩣᩅ ᩉᩩᨲ᩠ᩅᩣᨶ ᨩᩉᨶ᩠ᨲᩥ ᨴᩮᩉᩴ, ᨠᩣᨾᩮᩉᩥ ᩃᩮᩣᨠᨾ᩠ᩉᩥ ᨶ ᩉᨲ᩠ᨳᩥ ᨲᩥᨲ᩠ᨲᩥ.

‘‘ᨠᨶ᩠ᨴᨶ᩠ᨲᩥ ¶ ᨶᩴ ᨬᩣᨲᩦ ᨸᨠᩥᩁᩥᨿ ᨠᩮᩈᩮ, ‘ᩋᩉᩮᩣ ᩅᨲᩣ ᨶᩮᩣ ᩋᨾᩁᩣ’ᨲᩥ ᨧᩣᩉᩩ;

ᩅᨲ᩠ᨳᩮᨶ ᨶᩴ ᨸᩣᩁᩩᨲᩴ ᨶᩦᩉᩁᩥᨲ᩠ᩅᩣ, ᨧᩥᨲᩴ ᩈᨾᩮᩣᨵᩣᨿ ᨲᨲᩮᩣ ᨯᩉᨶ᩠ᨲᩥ.

‘‘ᩈᩮᩣ ᨯᨿ᩠ᩉᨲᩥ ᩈᩪᩃᩮᩉᩥ ᨲᩩᨩ᩠ᨩᨾᩣᨶᩮᩣ, ᩑᨠᩮᨶ ᩅᨲ᩠ᨳᩮᨶ ᨸᩉᩣᨿ ᨽᩮᩣᨣᩮ;

ᨶ ᨾᩦᨿᨾᩣᨶᩔ ᨽᩅᨶ᩠ᨲᩥ ᨲᩣᨱᩣ, ᨬᩣᨲᩦ ᨧ ᨾᩥᨲ᩠ᨲᩣ ᩋᨳ ᩅᩣ ᩈᩉᩣᨿᩣ.

‘‘ᨴᩣᨿᩣᨴᨠᩣ ¶ ᨲᩔ ᨵᨶᩴ ᩉᩁᨶ᩠ᨲᩥ, ᩈᨲ᩠ᨲᩮᩣ ᨸᨶ ᨣᨧ᩠ᨨᨲᩥ ᨿᩮᨶ ᨠᨾ᩠ᨾᩴ;

ᨶ ᨾᩦᨿᨾᩣᨶᩴ ᨵᨶᨾᨶ᩠ᩅᩮᨲᩥ ᨠᩥᨬ᩠ᨧᩥ, ᨸᩩᨲ᩠ᨲᩣ ᨧ ᨴᩣᩁᩣ ᨧ ᨵᨶᨬ᩠ᨧ ᩁᨭ᩠ᨮᩴ.

‘‘ᨶ ᨴᩦᨥᨾᩣᨿᩩᩴ ᩃᨽᨲᩮ ᨵᨶᩮᨶ, ᨶ ᨧᩣᨸᩥ ᩅᩥᨲ᩠ᨲᩮᨶ ᨩᩁᩴ ᩅᩥᩉᨶ᩠ᨲᩥ;

ᩋᨸ᩠ᨸᩴ ᩉᩥᨴᩴ ᨩᩦᩅᩥᨲᨾᩣᩉᩩ ᨵᩦᩁᩣ, ᩋᩈᩔᨲᩴ ᩅᩥᨸ᩠ᨸᩁᩥᨱᩣᨾᨵᨾ᩠ᨾᩴ.

‘‘ᩋᨯ᩠ᨰᩣ ¶ ᨴᩃᩥᨴ᩠ᨴᩣ ᨧ ᨹᩩᩈᨶ᩠ᨲᩥ ᨹᩔᩴ, ᨻᩣᩃᩮᩣ ᨧ ᨵᩦᩁᩮᩣ ᨧ ᨲᨳᩮᩅ ᨹᩩᨭ᩠ᨮᩮᩣ;

ᨻᩣᩃᩮᩣ ᩉᩥ ᨻᩣᩃ᩠ᨿᩣ ᩅᨵᩥᨲᩮᩣᩅ ᩈᩮᨲᩥ, ᨵᩦᩁᩮᩣ ᨧ ᨶᩮᩣ ᩅᩮᨵᨲᩥ ᨹᩔᨹᩩᨭ᩠ᨮᩮᩣ.

‘‘ᨲᩈ᩠ᨾᩣ ᩉᩥ ᨸᨬ᩠ᨬᩣᩅ ᨵᨶᩮᨶ ᩈᩮᨿ᩠ᨿᩣ, ᨿᩣᨿ ᩅᩮᩣᩈᩣᨶᨾᩥᨵᩣᨵᩥᨣᨧ᩠ᨨᨲᩥ;

ᩋᨻ᩠ᨿᩮᩣᩈᩥᨲᨲ᩠ᨲᩣ ᩉᩥ ᨽᩅᩣᨽᩅᩮᩈᩩ, ᨸᩣᨸᩣᨶᩥ ᨠᨾ᩠ᨾᩣᨶᩥ ᨠᩁᩮᩣᨲᩥ ᨾᩮᩣᩉᩣ.

‘‘ᩏᨸᩮᨲᩥ ᨣᨻ᩠ᨽᨬ᩠ᨧ ᨸᩁᨬ᩠ᨧ ᩃᩮᩣᨠᩴ, ᩈᩴᩈᩣᩁᨾᩣᨸᨩ᩠ᨩᨸᩁᨾ᩠ᨸᩁᩣᨿ;

ᨲᩔᨸ᩠ᨸᨸᨬ᩠ᨬᩮᩣ ᩋᨽᩥᩈᨴ᩠ᨴᩉᨶ᩠ᨲᩮᩣ, ᩏᨸᩮᨲᩥ ᨣᨻ᩠ᨽᨬ᩠ᨧ ᨸᩁᨬ᩠ᨧ ᩃᩮᩣᨠᩴ.

‘‘ᨧᩮᩣᩁᩮᩣ ¶ ᨿᨳᩣ ᩈᨶ᩠ᨵᩥᨾᩩᨡᩮ ᨣᩉᩦᨲᩮᩣ, ᩈᨠᨾ᩠ᨾᩩᨶᩣ ᩉᨬ᩠ᨬᨲᩥ ᨸᩣᨸᨵᨾ᩠ᨾᩮᩣ;

ᩑᩅᩴ ᨸᨩᩣ ᨸᩮᨧ᩠ᨧ ᨸᩁᨾ᩠ᩉᩥ ᩃᩮᩣᨠᩮ, ᩈᨠᨾ᩠ᨾᩩᨶᩣ ᩉᨬ᩠ᨬᨲᩥ ᨸᩣᨸᨵᨾ᩠ᨾᩮᩣ.

‘‘ᨠᩣᨾᩣ ᩉᩥ ᨧᩥᨲᩕᩣ ᨾᨵᩩᩁᩣ ᨾᨶᩮᩣᩁᨾᩣ, ᩅᩥᩁᩪᨸᩁᩪᨸᩮᨶ ᨾᨳᩮᨶ᩠ᨲᩥ ᨧᩥᨲ᩠ᨲᩴ;

ᩌᨴᩦᨶᩅᩴ ᨠᩣᨾᨣᩩᨱᩮᩈᩩ ᨴᩥᩈ᩠ᩅᩣ, ᨲᩈ᩠ᨾᩣ ᩋᩉᩴ ᨸᨻ᩠ᨻᨩᩥᨲᩮᩣᨾ᩠ᩉᩥ ᩁᩣᨩ.

‘‘ᨴᩩᨾᨸ᩠ᨹᩃᩣᨶᩦᩅ ᨸᨲᨶ᩠ᨲᩥ ᨾᩣᨱᩅᩣ, ᨴᩉᩁᩣ ᨧ ᩅᩩᨯ᩠ᨰᩣ ᨧ ᩈᩁᩦᩁᨽᩮᨴᩣ;

ᩑᨲᨾ᩠ᨸᩥ ᨴᩥᩈ᩠ᩅᩣᨶ ᨸᨻ᩠ᨻᨩᩥᨲᩮᩣᨾ᩠ᩉᩥ ᩁᩣᨩ, ᩋᨸᨱ᩠ᨱᨠᩴ ᩈᩣᨾᨬ᩠ᨬᨾᩮᩅ ᩈᩮᨿ᩠ᨿᩮᩣ.

‘‘ᩈᨴ᩠ᨵᩣᨿᩣᩉᩴ ᨸᨻ᩠ᨻᨩᩥᨲᩮᩣ, ᩏᨸᩮᨲᩮᩣ ᨩᩥᨶᩈᩣᩈᨶᩮ;

ᩋᩅᨬ᩠ᨫᩣ ᨾᨿ᩠ᩉᩴ ᨸᨻ᩠ᨻᨩ᩠ᨩᩣ, ᩋᨶᨱᩮᩣ ᨽᩩᨬ᩠ᨩᩣᨾᩥ ᨽᩮᩣᨩᨶᩴ.

‘‘ᨠᩣᨾᩮ ᩌᨴᩥᨲ᩠ᨲᨲᩮᩣ ᨴᩥᩈ᩠ᩅᩣ, ᨩᩣᨲᩁᩪᨸᩣᨶᩥ ᩈᨲ᩠ᨳᨲᩮᩣ;

ᨣᨻ᩠ᨽᩣᩅᩮᩣᨠ᩠ᨠᨶ᩠ᨲᩥᨲᩮᩣ ᨴᩩᨠ᩠ᨡᩴ, ᨶᩥᩁᨿᩮᩈᩩ ᨾᩉᨻ᩠ᨽᨿᩴ.

‘‘ᩑᨲᨾᩣᨴᩦᨶᩅᩴ ¶ ¶ ᨬᨲ᩠ᩅᩣ, ᩈᩴᩅᩮᨣᩴ ᩋᩃᨽᩥᩴ ᨲᨴᩣ;

ᩈᩮᩣᩉᩴ ᩅᩥᨴ᩠ᨵᩮᩣ ᨲᨴᩣ ᩈᨶ᩠ᨲᩮᩣ, ᩈᨾ᩠ᨸᨲ᩠ᨲᩮᩣ ᩌᩈᩅᨠ᩠ᨡᨿᩴ.

‘‘ᨸᩁᩥᨧᩥᨱ᩠ᨱᩮᩣ ᨾᨿᩣ ᩈᨲ᩠ᨳᩣ, ᨠᨲᩴ ᨻᩩᨴ᩠ᨵᩔ ᩈᩣᩈᨶᩴ;

ᩒᩉᩥᨲᩮᩣ ᨣᩁᩩᨠᩮᩣ ᨽᩣᩁᩮᩣ, ᨽᩅᨶᩮᨲ᩠ᨲᩥ ᩈᨾᩪᩉᨲᩣ.

‘‘ᨿᩔᨲ᩠ᨳᩣᨿ ᨸᨻ᩠ᨻᨩᩥᨲᩮᩣ, ᩋᨣᩣᩁᩈ᩠ᨾᩣᨶᨣᩣᩁᩥᨿᩴ;

ᩈᩮᩣ ᨾᩮ ᩋᨲ᩠ᨳᩮᩣ ᩋᨶᩩᨸ᩠ᨸᨲ᩠ᨲᩮᩣ, ᩈᨻ᩠ᨻᩈᩴᨿᩮᩣᨩᨶᨠ᩠ᨡᨿᩮᩣ’’ᨲᩥ. (ᨳᩮᩁᨣᩣ. ᪗᪗᪖-᪗᪙᪓) –

ᩍᨾᩣ ᨣᩣᨳᩣ ᩋᩅᩮᩣᨧ. ᩑᩅᩴ ᨳᩮᩁᩮᩣ ᩁᨬ᩠ᨬᩮᩣ ᨠᩮᩣᩁᨻ᩠ᨿᩔ ᨵᨾ᩠ᨾᩴ ᨴᩮᩈᩮᨲ᩠ᩅᩣ ᩈᨲ᩠ᨳᩩ ᩈᨶ᩠ᨲᩥᨠᨾᩮᩅ ᨣᨲᩮᩣ. ᩈᨲ᩠ᨳᩣ ᨧ ᩋᨸᩁᨽᩣᨣᩮ ᩋᩁᩥᨿᨣᨱᨾᨩ᩠ᨫᩮ ᨶᩥᩈᩥᨶ᩠ᨶᩮᩣ ᨳᩮᩁᩴ ᩈᨴ᩠ᨵᩣᨸᨻ᩠ᨻᨩᩥᨲᩣᨶᩴ ᩋᨣ᩠ᨣᨭ᩠ᨮᩣᨶᩮ ᨮᨸᩮᩈᩥ.

᪙᪗-᪘. ᩑᩅᩴ ¶ ᩈᩮᩣ ᨳᩮᩁᩮᩣ ᨸᨲ᩠ᨲᩑᨲᨴᨣ᩠ᨣᨭ᩠ᨮᩣᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣᨲᩥᩌᨴᩥᨾᩣᩉ. ᩅᩁᨶᩣᨣᩮᩣ ᨾᨿᩣ ᨴᩥᨶ᩠ᨶᩮᩣᨲᩥ ᨲᩔ ᨽᨣᩅᨲᩮᩣ ᩁᩪᨸᨠᩣᨿᩮ ᨸᩈᩦᨴᩥᨲ᩠ᩅᩣ ᩅᩁᩮᩣ ᩏᨲ᩠ᨲᨾᩮᩣ ᩈᩮᨭ᩠ᨮᩮᩣ ᩎᩈᩣᨴᨶ᩠ᨲᩮᩣ ᩁᨳᩦᩈᩣᩈᨴᩥᩈᨴᨶ᩠ᨲᩮᩣ ᩏᩁᩪᩊ᩠ᩉᩅᩣ ᨽᩣᩁᩅᩉᩮᩣ ᩁᩣᨩᩣᩁᩉᩮᩣ ᩅᩣ. ᩈᩮᨲᨧ᩠ᨨᨲ᩠ᨲᩮᩣᨸᩈᩮᩣᨽᩥᨲᩮᩣᨲᩥ ᩉᨲ᩠ᨳᩥᨠ᩠ᨡᨶ᩠ᨵᩮ ᩏᩔᩣᨸᩥᨲᩈᩮᨲᨧ᩠ᨨᨲ᩠ᨲᩮᨶ ᩏᨸᩈᩮᩅᩥᨲᩮᩣ ᩈᩮᩣᨽᨾᩣᨶᩮᩣ. ᨸᩩᨶᨸᩥ ᨠᩥᩴ ᩅᩥᩈᩥᨭ᩠ᨮᩮᩣ ᩅᩁᨶᩣᨣᩮᩣ? ᩈᨠᨸ᩠ᨸᨶᩮᩣ ᩉᨲ᩠ᨳᩣᩃᨦ᩠ᨠᩣᩁᩈᩉᩥᨲᩮᩣ. ᩈᨦ᩠ᨥᩣᩁᩣᨾᩴ ᨻᩩᨴ᩠ᨵᨸ᩠ᨸᨾᩩᨡᩔ ᨽᩥᨠ᩠ᨡᩩᩈᨦ᩠ᨥᩔ ᩅᩈᨶᨲ᩠ᨳᩣᨿ ᩌᩁᩣᨾᩴ ᩅᩥᩉᩣᩁᩴ ᩋᨠᩣᩁᨿᩥᩴ ᨠᩣᩁᩮᩈᩥᩴ.

᪙᪙. ᨧᨲᩩᨸᨬ᩠ᨬᩣᩈᩈᩉᩔᩣᨶᩦᨲᩥ ᨲᩈ᩠ᨾᩥᩴ ᨠᩣᩁᩣᨸᩥᨲᩮ ᩅᩥᩉᩣᩁᨻ᩠ᨽᨶ᩠ᨲᩁᩮ ᨧᨲᩩᨸᨬ᩠ᨬᩣᩈᩈᩉᩔᩣᨶᩥ ᨸᩣᩈᩣᨴᩣᨶᩥ ᨧ ᩋᩉᩴ ᩋᨠᩣᩁᨿᩥᩴ ᨠᩣᩁᩮᩈᩥᨶ᩠ᨲᩥ ᩋᨲ᩠ᨳᩮᩣ. ᨾᩉᩮᩣᨥᨴᩣᨶᩴ ᨠᩁᩥᨲ᩠ᩅᩣᨶᩣᨲᩥ ᩈᨻ᩠ᨻᨸᩁᩥᨠ᩠ᨡᩣᩁᩈᩉᩥᨲᩴ ᨾᩉᩮᩣᨥᩈᨴᩥᩈᩴ ᨾᩉᩣᨴᩣᨶᩴ ᩈᨩ᩠ᨩᩮᨲ᩠ᩅᩣ ᨾᩉᩮᩈᩥᨶᩮᩣ ᨾᩩᨶᩥᨶᩮᩣ ᨶᩥᨿ᩠ᨿᩣᨴᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪑᪐᪐. ᩋᨶᩩᨾᩮᩣᨴᩥ ᨾᩉᩣᩅᩦᩁᩮᩣᨲᩥ ᨧᨲᩩᩁᩣᩈᨦ᩠ᨡ᩠ᨿᩮᨿ᩠ᨿᩈᨲᩈᩉᩔᩮᩈᩩ ᨠᨸ᩠ᨸᩮᩈᩩ ᩋᨻ᩠ᨻᩮᩣᨧ᩠ᨨᩥᨶ᩠ᨶᩏᩔᩣᩉᩈᨦ᩠ᨡᩣᨲᩮᨶ ᩅᩦᩁᩥᨿᩮᨶ ᨾᩉᩣᩅᩦᩁᩮᩣ ᩈᨿᨾ᩠ᨽᩪ ᩈᨿᨾᩮᩅ ᨽᩪᨲᩮᩣ ᨩᩣᨲᩮᩣ ᩃᨴ᩠ᨵᩈᨻ᩠ᨻᨬ᩠ᨬᩩᨲᨬ᩠ᨬᩣᨱᩮᩣ ᩋᨣ᩠ᨣᩮᩣ ᩈᩮᨭ᩠ᨮᩮᩣ ᨸᩩᨣ᩠ᨣᩃᩮᩣ ᩋᨶᩩᨾᩮᩣᨴᩥ ᩅᩥᩉᩣᩁᩣᨶᩩᨾᩮᩣᨴᨶᩴ ᩋᨠᩣᩈᩥ. ᩈᨻ᩠ᨻᩮ ᨩᨶᩮ ᩉᩣᩈᨿᨶ᩠ᨲᩮᩣᨲᩥ ᩈᨠᩃᩣᨶᨶ᩠ᨲᩣᨸᩁᩥᨾᩣᨱᩮ ᨴᩮᩅᨾᨶᩩᩔᩮ ᩉᩣᩈᨿᨶ᩠ᨲᩮᩣ ᩈᨶ᩠ᨲᩩᨭ᩠ᨮᩮ ¶ ᨠᩩᩁᩩᨾᩣᨶᩮᩣ ᩋᨾᨲᨶᩥᨻ᩠ᨻᩣᨶᨸᨭᩥᩈᩴᨿᩩᨲ᩠ᨲᩴ ᨧᨲᩩᩈᨧ᩠ᨧᨵᨾ᩠ᨾᨴᩮᩈᨶᩴ ᨴᩮᩈᩮᩈᩥ ᨸᨠᩣᩈᩮᩈᩥ ᩅᩥᩅᩁᩥ ᩅᩥᨽᨩᩥ ᩏᨲ᩠ᨲᩣᨶᩦ ᩋᨠᩣᩈᩦᨲᩥ ᩋᨲ᩠ᨳᩮᩣ.

᪑᪐᪑. ᨲᩴ ¶ ᨾᩮ ᩅᩥᨿᩣᨠᩣᩈᩦᨲᩥ ᨲᩴ ᨾᨿ᩠ᩉᩴ ᨠᨲᨸᩩᨬ᩠ᨬᩴ ᨻᩃᩴ ᩅᩥᩈᩮᩈᩮᨶ ᨸᩣᨠᨭᩴ ᩋᨠᩣᩈᩥ. ᨩᩃᨩᩩᨲ᩠ᨲᨾᨶᩣᨾᨠᩮᩣᨲᩥ ᨩᩃᩮ ᨩᩣᨲᩴ ᨩᩃᨩᩴ ᨸᨴᩩᨾᩴ, ᨸᨴᩩᨾᩩᨲ᩠ᨲᩁᨶᩣᨾᨠᩮᩣᨲᩥ ᩋᨲ᩠ᨳᩮᩣ. ‘‘ᨩᩃᨶᩩᨲ᩠ᨲᨾᨶᩣᨿᨠᩮᩣ’’ᨲᩥᨸᩥ ᨸᩣᨮᩮᩣ. ᨲᨲ᩠ᨳ ᩋᨲ᩠ᨲᨶᩮᩣ ᨸᨽᩣᨿ ᨩᩃᨶ᩠ᨲᩦᨲᩥ ᨩᩃᨶᩣ, ᨧᨶ᩠ᨴᩥᨾᩈᩪᩁᩥᨿᨴᩮᩅᨻᩕᩉ᩠ᨾᩣᨶᩮᩣ, ᨲᩮᩈᩴ ᨩᩃᨶᩣᨶᩴ ᩏᨲ᩠ᨲᨾᩮᩣᨲᩥ ᨩᩃᨶᩩᨲ᩠ᨲᨾᩮᩣ. ᩈᨻ᩠ᨻᩈᨲ᩠ᨲᩣᨶᩴ ᨶᩣᨿᨠᩮᩣ ᩏᨲ᩠ᨲᨾᩮᩣᨲᩥ ᨶᩣᨿᨠᩮᩣ, ᩈᨾ᩠ᨽᩣᩁᩅᨶ᩠ᨲᩮ ᩈᨲ᩠ᨲᩮ ᨶᩥᨻ᩠ᨻᩣᨶᩴ ᨶᩮᨲᩥ ᨸᩣᨸᩮᨲᩦᨲᩥ ᩅᩣ ᨶᩣᨿᨠᩮᩣ, ᨩᩃᨶᩩᨲ᩠ᨲᨾᩮᩣ ᨧ ᩈᩮᩣ ᨶᩣᨿᨠᩮᩣ ᨧᩣᨲᩥ ᨩᩃᨶᩩᨲ᩠ᨲᨾᨶᩣᨿᨠᩮᩣ. ᨽᩥᨠ᩠ᨡᩩᩈᨦ᩠ᨥᩮ ᨶᩥᩈᩦᨴᩥᨲ᩠ᩅᩣᨲᩥ ᨽᩥᨠ᩠ᨡᩩᩈᨦ᩠ᨥᩔ ᨾᨩ᩠ᨫᩮ ᨶᩥᩈᩥᨶ᩠ᨶᩮᩣ ᩍᨾᩣ ᨣᩣᨳᩣ ᩋᨽᩣᩈᨳ ᨸᩣᨠᨭᩴ ᨠᨲ᩠ᩅᩣ ᨠᨳᩮᩈᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩁᨭ᩠ᨮᨸᩣᩃᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᩈᩮᩣᨸᩣᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨻ᩠ᨽᩣᩁᩴ ᩈᩮᩣᨵᨿᨶ᩠ᨲᩔᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩮᩣᨸᩣᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ¶ ᨠᩣᩃᩮ ᩋᨬ᩠ᨬᨲᩁᩔ ᨠᩩᨭᩩᨾ᩠ᨻᩥᨠᩔ ᨸᩩᨲ᩠ᨲᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩥ. ᩑᨠᨴᩥᩅᩈᩴ ᩈᨲ᩠ᨳᩣᩁᩴ ᨴᩥᩈ᩠ᩅᩣ ᨻᩦᨩᨸᩪᩁᨹᩃᩣᨶᩥ ᩈᨲ᩠ᨳᩩ ᩏᨸᨶᩮᩈᩥ, ᨸᩁᩥᨽᩩᨬ᩠ᨩᩥ ᨽᨣᩅᩣ ᨲᩔᩣᨶᩩᨠᨾ᩠ᨸᩴ ᩏᨸᩣᨴᩣᨿ. ᩈᩮᩣ ᨽᩥᨠ᩠ᨡᩩ ᩈᨲ᩠ᨳᩁᩥ ᩈᨦ᩠ᨥᩮ ᨧ ᩋᨽᩥᨸ᩠ᨸᩈᨶ᩠ᨶᩮᩣ ᩈᩃᩣᨠᨽᨲ᩠ᨲᩴ ᨸᨭ᩠ᨮᨸᩮᨲ᩠ᩅᩣ ᩈᨦ᩠ᨥᩩᨴ᩠ᨴᩮᩈᩅᩈᩮᨶ ᨲᩥᨱ᩠ᨱᩴ ᨽᩥᨠ᩠ᨡᩪᨶᩴ ᨿᩣᩅᨲᩣᨿᩩᨠᩴ ᨡᩦᩁᨽᨲ᩠ᨲᩴ ᩋᨴᩣᩈᩥ. ᩈᩮᩣ ᨲᩮᩉᩥ ᨸᩩᨬ᩠ᨬᩮᩉᩥ ᩋᨸᩁᩣᨸᩁᩴ ᨴᩮᩅᨾᨶᩩᩔᩮᩈᩩ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᨶ᩠ᨲᩮᩣ ᩑᨠᨴᩣ ᨾᨶᩩᩔᨿᩮᩣᨶᩥᨿᩴ ᨶᩥᨻ᩠ᨻᨲ᩠ᨲᩮᩣ ᩑᨠᩔ ᨸᨧ᩠ᨧᩮᨠᨻᩩᨴ᩠ᨵᩔ ᨡᩦᩁᨽᨲ᩠ᨲᩴ ᩋᨴᩣᩈᩥ.

ᩑᩅᩴ ᨲᨲ᩠ᨳ ᨲᨲ᩠ᨳ ᨸᩩᨬ᩠ᨬᩣᨶᩥ ᨠᨲ᩠ᩅᩣ ᩈᩩᨣᨲᩦᩈᩩᨿᩮᩅ ᨸᩁᩥᨻ᩠ᨽᨾᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨸᩩᩁᩥᨾᨠᨾ᩠ᨾᨶᩥᩔᨶ᩠ᨴᩮᨶ ᩈᩣᩅᨲ᩠ᨳᩥᨿᩴ ᩋᨬ᩠ᨬᨲᩁᩣᨿ ᨴᩩᨣ᩠ᨣᨲᩥᨲ᩠ᨳᩥᨿᩣ ᨠᩩᨧ᩠ᨨᩥᨾ᩠ᩉᩥ ᨸᨭᩥᩈᨶ᩠ᨵᩥᩴ ᨣᨱ᩠ᩉᩥ. ᩈᩣ ᨲᩴ ᨴᩈᨾᩣᩈᩮ ᨠᩩᨧ᩠ᨨᩥᨶᩣ ᨸᩁᩥᩉᩁᩥᨲ᩠ᩅᩣ ᨸᩁᩥᨸᨠ᩠ᨠᩮ ᨣᨻ᩠ᨽᩮ ᩅᩥᨩᩣᨿᨶᨠᩣᩃᩮ ᩅᩥᨩᩣᨿᩥᨲᩩᩴ ᩋᩈᨠ᩠ᨠᩮᩣᨶ᩠ᨲᩦ ᨾᩩᨧ᩠ᨨᩴ ᩌᨸᨩ᩠ᨩᩥᨲ᩠ᩅᩣ ᨻᩉᩩᩅᩮᩃᩴ ᨾᨲᩣ ᩅᩥᨿ ᨶᩥᨸᨩ᩠ᨩᩥ. ᨬᩣᨲᨠᩣ ‘‘ᨾᨲᩣ’’ᨲᩥ ᩈᨬ᩠ᨬᩣᨿ ᩈᩩᩈᩣᨶᩴ ᨶᩮᨲ᩠ᩅᩣ ᨧᩥᨲᨠᩴ ᩌᩁᩮᩣᨸᩮᨲ᩠ᩅᩣ ¶ ᨴᩮᩅᨲᩣᨶᩩᨽᩣᩅᩮᨶ ᩅᩣᨲᩅᩩᨭ᩠ᨮᩥᨿᩣ ᩏᨭ᩠ᨮᩥᨲᩣᨿ ᩋᨣ᩠ᨣᩥᩴ ᩋᨴᨲ᩠ᩅᩣ ᨸᨠ᩠ᨠᨾᩥᩴᩈᩩ. ᨴᩣᩁᨠᩮᩣ ᨸᨧ᩠ᨨᩥᨾᨽᩅᩥᨠᨲ᩠ᨲᩣ ᨴᩮᩅᨲᩣᨶᩩᨽᩣᩅᩮᨶᩮᩅ ᩋᩁᩮᩣᨣᩮᩣ ᩉᩩᨲ᩠ᩅᩣ ᨾᩣᨲᩩᨠᩩᨧ᩠ᨨᩥᨲᩮᩣ ᨶᩥᨠ᩠ᨡᨾᩥ. ᨾᩣᨲᩣ ᨸᨶ ᨠᩣᩃᨾᨠᩣᩈᩥ. ᨴᩮᩅᨲᩣ ᨾᨶᩩᩔᩁᩪᨸᩮᨶᩩᨸᨣᨾ᩠ᨾ ᨲᩴ ᨣᩉᩮᨲ᩠ᩅᩣ ᩈᩩᩈᩣᨶᨣᩮᩣᨸᨠᩔ ᨣᩮᩉᩮ ᨮᨸᩮᨲ᩠ᩅᩣ ᨠᨲᩥᨸᩣᩉᩴ ᨠᩣᩃᩴ ᨸᨲᩥᩁᩪᨸᩮᨶ ᩌᩉᩣᩁᩮᨶ ᨸᩮᩣᩈᩮᩈᩥ. ᨲᨲᩮᩣ ᨸᩁᩴ ᩈᩩᩈᩣᨶᨣᩮᩣᨸᨠᩮᩣ ᩋᨲ᩠ᨲᨶᩮᩣ ᨸᩩᨲ᩠ᨲᩴ ᨠᨲ᩠ᩅᩣ ᩅᨯ᩠ᨰᩮᩈᩥ. ᩈᩮᩣ ¶ ᨲᨳᩣ ᩅᨯ᩠ᨰᩮᨶ᩠ᨲᩮᩣ ᨲᩔ ᨸᩩᨲ᩠ᨲᩮᨶ ᩈᩩᨸ᩠ᨸᩥᨿᩮᨶ ᨶᩣᨾ ᨴᩣᩁᨠᩮᨶ ᩈᨴ᩠ᨵᩥᩴ ᨠᩦᩊᨶ᩠ᨲᩮᩣ ᩅᩥᨧᩁᩥ. ᨲᩔ ᩈᩩᩈᩣᨶᩮ ᨩᩣᨲᩈᩴᩅᨯ᩠ᨰᨽᩣᩅᨲᩮᩣ ᩈᩮᩣᨸᩣᨠᩮᩣᨲᩥ ᩈᨾᨬ᩠ᨬᩣ ᩋᩉᩮᩣᩈᩥ.

ᩋᨳᩮᨠᨴᩥᩅᩈᩴ ᩈᨲ᩠ᨲᩅᩔᩥᨠᩴ ᨲᩴ ᨽᨣᩅᩣ ᨸᨧ᩠ᨧᩪᩈᩅᩮᩃᩣᨿᩴ ᨬᩣᨱᨩᩣᩃᩴ ᨸᨲ᩠ᨳᩁᩥᨲ᩠ᩅᩣ ᩅᩮᨶᩮᨿ᩠ᨿᨻᨶ᩠ᨵᩅᩮ ᩒᩃᩮᩣᨠᩮᨶ᩠ᨲᩮᩣ ᨬᩣᨱᨩᩣᩃᩔ ᩋᨶ᩠ᨲᩮᩣᨣᨲᩴ ᨴᩥᩈ᩠ᩅᩣ ᩈᩩᩈᩣᨶᨭ᩠ᨮᩣᨶᩴ ᩋᨣᨾᩣᩈᩥ. ᨴᩣᩁᨠᩮᩣ ᨸᩩᨻ᩠ᨻᩉᩮᨲᩩᨶᩣ ᨧᩮᩣᨴᩥᨿᨾᩣᨶᩮᩣ ᨸᩈᨶ᩠ᨶᨾᩣᨶᩈᩮᩣ ᩈᨲ᩠ᨳᩣᩁᩴ ᩏᨸᩈᨦ᩠ᨠᨾᩥᨲ᩠ᩅᩣ ᩅᨶ᩠ᨴᩥᨲ᩠ᩅᩣ ᩋᨭ᩠ᨮᩣᩈᩥ. ᩈᨲ᩠ᨳᩣ ᨲᩔ ᨵᨾ᩠ᨾᩴ ᨠᨳᩮᩈᩥ. ᩈᩮᩣ ᨵᨾ᩠ᨾᩴ ᩈᩩᨲ᩠ᩅᩣ ᨸᨻ᩠ᨻᨩ᩠ᨩᩴ ᨿᩣᨧᩥᨲ᩠ᩅᩣ ᨸᩥᨲᩁᩣ ‘‘ᩋᨶᩩᨬ᩠ᨬᩣᨲᩮᩣᩈᩦ’’ᨲᩥ ᩅᩩᨲ᩠ᨲᩮᩣ ᨸᩥᨲᩁᩴ ᩈᨲ᩠ᨳᩩ ᩈᨶ᩠ᨲᩥᨠᩴ ᩌᨶᩮᩈᩥ. ᨲᩔ ᨸᩥᨲᩣ ᩈᨲ᩠ᨳᩣᩁᩴ ᩅᨶ᩠ᨴᩥᨲ᩠ᩅᩣ ‘‘ᩍᨾᩴ ᨴᩣᩁᨠᩴ ᨸᨻ᩠ᨻᩣᨩᩮᨳ, ᨽᨶ᩠ᨲᩮ’’ᨲᩥ ᩋᨶᩩᨩᩣᨶᩥ, ᨲᩴ ᨸᨻ᩠ᨻᩣᨩᩮᨲ᩠ᩅᩣ ᨽᨣᩅᩣ ᨾᩮᨲ᩠ᨲᩣᨽᩣᩅᨶᩣᨿ ᨶᩥᨿᩮᩣᨩᩮᩈᩥ. ᩈᩮᩣ ᨾᩮᨲ᩠ᨲᩣᨠᨾ᩠ᨾᨭ᩠ᨮᩣᨶᩴ ᨣᩉᩮᨲ᩠ᩅᩣ ᩈᩩᩈᩣᨶᩮ ᩅᩥᩉᩁᨶ᩠ᨲᩮᩣ ᨶᨧᩥᩁᩔᩮᩅ ᨾᩮᨲ᩠ᨲᩣᨫᩣᨶᩴ ᨸᩣᨴᨠᩴ ᨠᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᩋᩁᩉᨲ᩠ᨲᩴ ᩈᨧ᩠ᨨᩣᨠᩣᩈᩥ. ᩋᩁᩉᩣ ᩉᩩᨲ᩠ᩅᩣᨸᩥ ᩋᨬ᩠ᨬᩮᩈᩴ ᩈᩮᩣᩈᩣᨶᩥᨠᨽᩥᨠ᩠ᨡᩪᨶᩴ ᨾᩮᨲ᩠ᨲᩣᨽᩣᩅᨶᩣᩅᩥᨵᩥᩴ ᨴᩔᩮᨶ᩠ᨲᩮᩣ ‘‘ᨿᨳᩣᨸᩥ ᩑᨠᨸᩩᨲ᩠ᨲᩈ᩠ᨾᩥ’’ᨶ᩠ᨲᩥ (ᨳᩮᩁᨣᩣ. ᪓᪓) ᨣᩣᨳᩴ ᩋᨽᩣᩈᩥ. ᩍᨴᩴ ¶ ᩅᩩᨲ᩠ᨲᩴ ᩉᩮᩣᨲᩥ – ᨿᨳᩣ ᩑᨠᨸᩩᨲ᩠ᨲᨠᩮ ᨸᩥᨿᩮ ᨾᨶᩣᨸᩮ ᨾᩣᨲᩣ ᨸᩥᨲᩣ ᨧ ᨠᩩᩈᩃᩦ ᩑᨠᨶ᩠ᨲᩉᩥᨲᩮᩈᩦ ᨽᩅᩮᨿ᩠ᨿ, ᩑᩅᩴ ᨸᩩᩁᨲ᩠ᨳᩥᨾᩣᨴᩥᨽᩮᨴᩣᩈᩩ ᩈᨻ᩠ᨻᩣᩈᩩ ᨴᩥᩈᩣᩈᩩ ᨠᩣᨾᨽᩅᩣᨴᩥᨽᩮᨴᩮᩈᩩ ᩅᩣ ᩈᨻ᩠ᨻᩮᩈᩩ ᨽᩅᩮᩈᩩ ᨴᩉᩁᩣᨴᩥᨽᩮᨴᩣᩈᩩ ᩈᨻ᩠ᨻᩣᩈᩩ ᩋᩅᨲ᩠ᨳᩣᩈᩩᨸᩥ ᨮᩥᨲᩮᩈᩩ ᩈᨻ᩠ᨻᩮᩈᩩ ᩈᨲ᩠ᨲᩮᩈᩩ ᩑᨠᨶ᩠ᨲᩉᩥᨲᩮᩈᩥᨲᩣᨿ ᨠᩩᩈᩃᩦ ᨽᩅᩮᨿ᩠ᨿ ‘‘ᨾᩥᨲ᩠ᨲᩮᩣ, ᩏᨴᩣᩈᩥᨶᩮᩣ, ᨸᨧ᩠ᨧᨲ᩠ᨳᩥᨠᩮᩣ’’ᨲᩥ ᩈᩦᨾᩴ ᩋᨠᨲ᩠ᩅᩣ ᩈᩦᨾᩣᨿ ᩈᨾ᩠ᨽᩮᨴᩅᩈᩮᨶ ᩈᨻ᩠ᨻᨲ᩠ᨳ ᩑᨠᩁᩈᩴ ᨾᩮᨲ᩠ᨲᩴ ᨽᩣᩅᩮᨿ᩠ᨿᩣᨲᩥ ᩍᨾᩴ ᨸᨶ ᨣᩣᨳᩴ ᩅᨲ᩠ᩅᩣ ‘‘ᩈᨧᩮ ᨲᩩᨾ᩠ᩉᩮ ᩌᨿᩈ᩠ᨾᨶ᩠ᨲᩮᩣ ᩑᩅᩴ ᨾᩮᨲ᩠ᨲᩴ ᨽᩣᩅᩮᨿ᩠ᨿᩣᨳ, ᨿᩮ ᨲᩮ ᨽᨣᩅᨲᩣ ‘ᩈᩩᨡᩴ ᩈᩩᨸᨲᩦ’ᨲᩥᩌᨴᩥᨶᩣ (ᩋ. ᨶᩥ. ᪑᪑.᪑᪕; ᨸᩁᩥ. ᪓᪓᪑; ᨾᩥ. ᨸ. ᪔.᪔.᪖) ᩑᨠᩣᨴᩈ ᨾᩮᨲ᩠ᨲᩣᨶᩥᩈᩴᩈᩣ ᨧ ᩅᩩᨲ᩠ᨲᩣ, ᩑᨠᩴᩈᩮᨶ ᨲᩮᩈᩴ ᨽᩣᨣᩥᨶᩮᩣ ᨽᩅᨳᩣ’’ᨲᩥ ᩒᩅᩣᨴᩴ ᩋᨴᩣᩈᩥ.

᪑᪑᪒. ᩑᩅᩴ ¶ ᩈᩮᩣ ᨸᨲ᩠ᨲᨹᩃᩣᨵᩥᨣᨾᩮᩣ ᩋᨲ᩠ᨲᨶᩮᩣ ᨠᨲᨸᩩᨬ᩠ᨬᩴ ᨸᨧ᩠ᨧᩅᩮᨠ᩠ᨡᩥᨲ᩠ᩅᩣ ᩈᨬ᩠ᨩᩣᨲᩈᩮᩣᨾᨶᩔᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨴᩔᩮᨶ᩠ᨲᩮᩣ ᨸᨻ᩠ᨽᩣᩁᩴ ᩈᩮᩣᨵᨿᨶ᩠ᨲᩔᩣᨲᩥᩌᨴᩥᨾᩣᩉ. ᨲᨲ᩠ᨳ ᨸᨻ᩠ᨽᩣᩁᨶ᩠ᨲᩥ ᩈᩥᩃᩣᨸᨻ᩠ᨻᨲᩔ ᩅᩥᩅᩮᨠᨭ᩠ᨮᩣᨶᩴ, ᨲᩴ ᨸᨻ᩠ᨻᨩᩥᨲᩣᨶᩩᩁᩪᨸᨲ᩠ᨲᩣ ᩍᨭ᩠ᨮᨠᨸᩣᨠᩣᩁᩴ ᨠᨲ᩠ᩅᩣ ᨴ᩠ᩅᩣᩁᨠᩅᩣᨭᩴ ᨿᩮᩣᨩᩮᨲ᩠ᩅᩣ ᨽᩥᨠ᩠ᨡᩪᨶᩴ ᩅᩈᨶᨲ᩠ᨳᩣᨿ ᩋᨴᩣᩈᩥ, ᨸᨠᩣᩁᩮᨶ ᨽᩁᩮᩣ ᨸᨲ᩠ᨳᩮᨲᨻ᩠ᨻᩮᩣᨲᩥ ᨸᨻ᩠ᨽᩣᩁᩮᩣ, ᨲᩴ ᩈᩮᩣᨵᨿᨶ᩠ᨲᩔ ᨾᨾ ᩈᨶ᩠ᨲᩥᨠᩴ ᩈᩥᨴ᩠ᨵᨲ᩠ᨳᩮᩣ ᨶᩣᨾ ᨽᨣᩅᩣ ᩌᨣᨧ᩠ᨨᩥ ᨸᩣᨸᩩᨱᩥ.

᪑᪑᪓. ᨻᩩᨴ᩠ᨵᩴ ᩏᨸᨣᨲᩴ ᨴᩥᩈ᩠ᩅᩣᨲᩥ ᩑᩅᩴ ᨾᨾ ᩈᨶ᩠ᨲᩥᨠᩴ ᩌᨣᨲᩴ ᨴᩥᩈ᩠ᩅᩣ ᨲᩣᨴᩥᨶᩮᩣ ᩍᨭ᩠ᨮᩣᨶᩥᨭ᩠ᨮᩮᩈᩩ ᩋᨠᨾ᩠ᨸᩥᨿᩈᨽᩣᩅᨲ᩠ᨲᩣ ᨲᩣᨴᩥᨣᩩᨱᨿᩩᨲ᩠ᨲᩔ ᩃᩮᩣᨠᨩᩮᨭ᩠ᨮᩔ ᨻᩩᨴ᩠ᨵᩔ ᩈᨶ᩠ᨳᩁᩴ ᨲᩥᨱᨸᨱ᩠ᨱᩣᨴᩥᩈᨶ᩠ᨳᩁᩴ ᨠᨭ᩠ᨮᨲ᩠ᨳᩁᩴ ᨸᨬ᩠ᨬᩣᨸᩮᨲ᩠ᩅᩣ ᨶᩥᨭ᩠ᨮᩣᨸᩮᨲ᩠ᩅᩣ ᨸᩩᨸ᩠ᨹᩣᩈᨶᩴ ᨸᩩᨸ᩠ᨹᨾᨿᩴ ᩌᩈᨶᩴ ᩋᩉᩴ ᩋᨴᩣᩈᩥᩴ.

᪑᪑᪔. ᨸᩩᨸ᩠ᨹᩣᩈᨶᩮ ¶ ᨶᩥᩈᩦᨴᩥᨲ᩠ᩅᩣᨲᩥ ᨲᩈ᩠ᨾᩥᩴ ᨸᨬ᩠ᨬᨲ᩠ᨲᩮ ᨸᩩᨸ᩠ᨹᩣᩈᨶᩮ ᨶᩥᩈᩦᨴᩥᨲ᩠ᩅᩣ ᩃᩮᩣᨠᨶᩣᨿᨠᩮᩣ ᩈᩥᨴ᩠ᨵᨲ᩠ᨳᩮᩣ ᨽᨣᩅᩣ. ᨾᨾᨬ᩠ᨧ ᨣᨲᩥᨾᨬ᩠ᨬᩣᨿᩣᨲᩥ ᨾᨿ᩠ᩉᩴ ᨣᨲᩥᩴ ᩌᨿᨲᩥᩴ ᩏᨸ᩠ᨸᨲ᩠ᨲᩥᨭ᩠ᨮᩣᨶᩴ ᩋᨬ᩠ᨬᩣᨿ ᨩᩣᨶᩥᨲ᩠ᩅᩣ ᩋᨶᩥᨧ᩠ᨧᨲᩴ ᩋᨶᩥᨧ᩠ᨧᨽᩣᩅᩴ ᩏᨴᩣᩉᩁᩥ ᨠᨳᩮᩈᩥ.

᪑᪑᪕. ᩋᨶᩥᨧ᩠ᨧᩣ ᩅᨲ ᩈᨦ᩠ᨡᩣᩁᩣᨲᩥ ᩅᨲ ᩑᨠᨶ᩠ᨲᩮᨶ ᩈᨦ᩠ᨡᩣᩁᩣ ᨸᨧ᩠ᨧᨿᩮᩉᩥ ᩈᨾᩮᨧ᩠ᨧ ᩈᨾᩣᨣᨶ᩠ᨲ᩠ᩅᩣ ᨠᩁᩦᨿᨾᩣᨶᩣ ᩈᨻ᩠ᨻᩮ ᩈᨸ᩠ᨸᨧ᩠ᨧᨿᨵᨾ᩠ᨾᩣ ᩉᩩᨲ᩠ᩅᩣ ᩋᨽᩣᩅᨭ᩠ᨮᩮᨶ ᩋᨶᩥᨧ᩠ᨧᩣ. ᩏᨸ᩠ᨸᩣᨴᩅᨿᨵᨾ᩠ᨾᩥᨶᩮᩣᨲᩥ ᩏᨸ᩠ᨸᨩ᩠ᨩᩥᨲ᩠ᩅᩣ ᩅᩥᨶᩔᨶᩈᨽᩣᩅᩣ ᩏᨸ᩠ᨸᨩ᩠ᨩᩥᨲ᩠ᩅᩣ ᨸᩣᨲᩩᨽᩅᩥᨲ᩠ᩅᩣ ᩑᨲᩮ ᩈᨦ᩠ᨡᩣᩁᩣ ᨶᩥᩁᩩᨩ᩠ᨫᨶ᩠ᨲᩥ ᩅᩥᨶᩔᨶ᩠ᨲᩦᨲᩥ ᩋᨲ᩠ᨳᩮᩣ. ᨲᩮᩈᩴ ᩅᩪᨸᩈᨾᩮᩣ ᩈᩩᨡᩮᩣᨲᩥ ᨲᩮᩈᩴ ᩈᨦ᩠ᨡᩣᩁᩣᨶᩴ ᩅᩥᩈᩮᩈᩮᨶ ᩏᨸᩈᨾᩮᩣ ᩈᩩᨡᩮᩣ, ᨲᩮᩈᩴ ᩅᩪᨸᩈᨾᨠᩁᩴ ᨶᩥᨻ᩠ᨻᩣᨶᨾᩮᩅ ᩑᨠᨶ᩠ᨲᩈᩩᨡᨶ᩠ᨲᩥ ᩋᨲ᩠ᨳᩮᩣ.

᪑᪑᪖. ᩍᨴᩴ ᩅᨲ᩠ᩅᩣᨶ ᩈᨻ᩠ᨻᨬ᩠ᨬᩪᨲᩥ ᩈᨻ᩠ᨻᨵᨾ᩠ᨾᨩᩣᨶᨶᨠᩮᩣ ᨽᨣᩅᩣ ᩃᩮᩣᨠᩣᨶᩴ ᨩᩮᨭ᩠ᨮᩮᩣ ᩅᩩᨯ᩠ᨰᩮᩣ ᨶᩁᩣᨶᩴ ᩌᩈᨽᩮᩣ ᨸᨵᩣᨶᩮᩣ ᩅᩦᩁᩮᩣ ᩍᨴᩴ ᩋᨶᩥᨧ᩠ᨧᨸᨭᩥᩈᩴᨿᩩᨲ᩠ᨲᩴ ¶ ᨵᨾ᩠ᨾᨴᩮᩈᨶᩴ ᩅᨲ᩠ᩅᩣᨶ ᨠᨳᩮᨲ᩠ᩅᩣ ᩋᨾ᩠ᨻᩁᩮ ᩌᨠᩣᩈᩮ ᩉᩴᩈᩁᩣᨩᩣ ᩍᩅ ᨶᨽᩴ ᩌᨠᩣᩈᩴ ᩋᨻ᩠ᨽᩩᨣ᩠ᨣᨾᩦᨲᩥ ᩈᨾ᩠ᨻᨶ᩠ᨵᩮᩣ.

᪑᪑᪗. ᩈᨠᩴ ᨴᩥᨭ᩠ᨮᩥᩴ ᩋᨲ᩠ᨲᨶᩮᩣ ᩃᨴ᩠ᨵᩥᩴ ᨡᨶ᩠ᨲᩥᩴ ᩁᩩᨧᩥᩴ ᩋᨩ᩠ᨫᩣᩈᨿᩴ ᨩᩉᩥᨲ᩠ᩅᩣᨶ ᨸᩉᩣᨿ. ᨽᩣᩅᨿᩣᨶᩥᨧ᩠ᨧᩈᨬ᩠ᨬᩉᨶ᩠ᨲᩥ ᩋᨶᩥᨧ᩠ᨧᩮ ᩋᨶᩥᨧ᩠ᨧᨶ᩠ᨲᩥ ᨸᩅᨲ᩠ᨲᩈᨬ᩠ᨬᩴ ᩋᩉᩴ ᨽᩣᩅᨿᩥᩴ ᩅᨯ᩠ᨰᩮᩈᩥᩴ ᨾᨶᩈᩥ ᩋᨠᩣᩈᩥᩴ. ᨲᨲ᩠ᨳ ᨠᩣᩃᩴ ᨠᨲᩮᩣ ᩋᩉᨶ᩠ᨲᩥ ᨲᨲ᩠ᨳ ᨲᩥᩔᩴ ᨩᩣᨲᩥᨿᩴ ᨲᨲᩮᩣ ᨩᩣᨲᩥᨲᩮᩣ ᩋᩉᩴ ᨠᩣᩃᩴ ᨠᨲᩮᩣ ᨾᨲᩮᩣ.

᪑᪑᪘. ᨴ᩠ᩅᩮ ¶ ᩈᨾ᩠ᨸᨲ᩠ᨲᩦ ᩋᨶᩩᨽᩮᩣᨲ᩠ᩅᩣᨲᩥ ᨾᨶᩩᩔᩈᨾ᩠ᨸᨲ᩠ᨲᩥᨴᩥᨻ᩠ᨻᩈᨾ᩠ᨸᨲ᩠ᨲᩥᩈᨦ᩠ᨡᩣᨲᩣ ᨴ᩠ᩅᩮ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ. ᩈᩩᨠ᩠ᨠᨾᩪᩃᩮᨶ ᨧᩮᩣᨴᩥᨲᩮᩣᨲᩥ ᨸᩩᩁᩣᨱᨠᩩᩈᩃᨾᩪᩃᩮᨶ, ᨾᩪᩃᨽᩪᨲᩮᨶ ᨠᩩᩈᩃᩮᨶ ᩅᩣ ᨧᩮᩣᨴᩥᨲᩮᩣ ᩈᨬ᩠ᨧᩮᩣᨴᩥᨲᩮᩣ. ᨸᨧ᩠ᨨᩥᨾᩮ ᨽᩅᩮ ᩈᨾ᩠ᨸᨲ᩠ᨲᩮᨲᩥ ᨸᩁᩥᨿᩮᩣᩈᩣᨶᩮ ᨽᩅᩮ ᩈᨾ᩠ᨸᨲ᩠ᨲᩮ ᨸᩣᨸᩩᨱᩥᨲᩮ. ᩈᨸᩣᨠᨿᩮᩣᨶᩩᨸᩣᨣᨾᩥᨶ᩠ᨲᩥ ᩈᨠᩴ ᨸᨧᩥᨲᨽᨲ᩠ᨲᩴ ᩈᨸᩣᨠᩴ ᨿᩮᩣᨶᩥᩴ ᩏᨸᩣᨣᨾᩥᩴ. ᨿᩔ ᨠᩩᩃᩔ ᩋᨲ᩠ᨲᨶᩮᩣ ᨸᨧᩥᨲᨽᨲ᩠ᨲᩴ ᩋᨬ᩠ᨬᩮᩉᩥ ᩋᨽᩩᨬ᩠ᨩᨶᩦᨿᩴ, ᨲᩈ᩠ᨾᩥᩴ ᨧᨱ᩠ᨯᩣᩃᨠᩩᩃᩮ ᨶᩥᨻ᩠ᨻᨲ᩠ᨲᩮᩣᩈ᩠ᨾᩦᨲᩥ ᩋᨲ᩠ᨳᩮᩣ. ᩋᨳ ᩅᩣ ᩈᩣ ᩅᩩᨧ᩠ᨧᨲᩥ ᩈᩩᨶᨡᩮᩣ, ᩈᩩᨶᨡᩮᩣᨧ᩠ᨨᩥᨭ᩠ᨮᨽᨲ᩠ᨲᨽᩩᨬ᩠ᨩᨶᨠᨧᨱ᩠ᨯᩣᩃᨠᩩᩃᩮ ᨩᩣᨲᩮᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩈᩮᩣᨸᩣᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᩈᩩᨾᨦ᩠ᨣᩃᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩌᩉᩩᨲᩥᩴ ¶ ᨿᩥᨭ᩠ᨮᩩᨠᩣᨾᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩩᨾᨦ᩠ᨣᩃᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩣᨿᩈ᩠ᨾᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᩥᨿᨴᩔᩥᩔ ᨽᨣᩅᨲᩮᩣ ᨠᩣᩃᩮ ᩁᩩᨠ᩠ᨡᨴᩮᩅᨲᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩥ. ᩈᩮᩣ ᩑᨠᨴᩥᩅᩈᩴ ᩈᨲ᩠ᨳᩣᩁᩴ ᨶ᩠ᩉᨲ᩠ᩅᩣ ᩑᨠᨧᩦᩅᩁᩴ ᨮᩥᨲᩴ ᨴᩥᩈ᩠ᩅᩣ ᩈᩮᩣᨾᨶᩔᨸ᩠ᨸᨲ᩠ᨲᩮᩣ ᩋᨸ᩠ᨹᩮᩣᨭᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩣ ᩋᩅᩥᨴᩪᩁᩮ ᩋᨬ᩠ᨬᨲᩁᩈ᩠ᨾᩥᩴ ᨣᩣᨾᨠᩮ ᨲᩣᨴᩥᩈᩮᨶ ᨠᨾ᩠ᨾᨶᩥᩔᨶ᩠ᨴᩮᨶ ᨴᩃᩥᨴ᩠ᨴᨠᩩᩃᩮ ᨶᩥᨻ᩠ᨻᨲ᩠ᨲᩥ, ᨲᩔ ᩈᩩᨾᨦ᩠ᨣᩃᩮᩣᨲᩥ ᨶᩣᨾᩴ ᩋᩉᩮᩣᩈᩥ. ᩈᩮᩣ ᩅᨿᨸ᩠ᨸᨲ᩠ᨲᩮᩣ ᨡᩩᨩ᩠ᨩᨠᩣᩈᩥᨲᨶᨦ᩠ᨣᩃᨠᩩᨴ᩠ᨴᩣᩃᨸᩁᩥᨠ᩠ᨡᩣᩁᩮᩣ ᩉᩩᨲ᩠ᩅᩣ ᨠᩈᩥᨿᩣ ᨩᩦᩅᩥᨠᩴ ᨠᨸ᩠ᨸᩮᩈᩥ. ᩈᩮᩣ ᩑᨠᨴᩥᩅᩈᩴ ᩁᨬ᩠ᨬᩣ ᨸᩈᩮᨶᨴᩥᨶᩣ ᨠᩮᩣᩈᩃᩮᨶ ᨽᨣᩅᨲᩮᩣ ᨽᩥᨠ᩠ᨡᩩᩈᨦ᩠ᨥᩔ ᨧ ᨾᩉᩣᨴᩣᨶᩮ ᨸᩅᨲ᩠ᨲᩥᨿᨾᩣᨶᩮ ᨴᩣᨶᩪᨸᨠᩁᨱᩣᨶᩥ ᨣᩉᩮᨲ᩠ᩅᩣ ᩌᨣᨧ᩠ᨨᨶ᩠ᨲᩮᩉᩥ ᨾᨶᩩᩔᩮᩉᩥ ᩈᨴ᩠ᨵᩥᩴ ᨴᨵᩥᨥᨭᩴ ᨣᩉᩮᨲ᩠ᩅᩣ ᩌᨣᨲᩮᩣ ᨽᩥᨠ᩠ᨡᩪᨶᩴ ᩈᨠ᩠ᨠᩣᩁᩈᨾ᩠ᨾᩣᨶᩴ ᨴᩥᩈ᩠ᩅᩣ ‘‘ᩍᨾᩮ ᩈᨾᨱᩣ ᩈᨠ᩠ᨿᨸᩩᨲ᩠ᨲᩥᨿᩣ ᩈᩩᨡᩩᨾᩅᨲ᩠ᨳᨶᩥᩅᨲ᩠ᨳᩣ ᩈᩩᨽᩮᩣᨩᨶᩣᨶᩥ ᨽᩩᨬ᩠ᨩᩥᨲ᩠ᩅᩣ ᨶᩥᩅᩣᨲᩮᩈᩩ ᩈᩮᨶᩣᩈᨶᩮᩈᩩ ᩅᩥᩉᩁᨶ᩠ᨲᩥ, ᨿᩴᨶᩪᨶᩣᩉᨾ᩠ᨸᩥ ᨸᨻ᩠ᨻᨩᩮᨿ᩠ᨿ’’ᨶ᩠ᨲᩥ ᨧᩥᨶ᩠ᨲᩮᨲ᩠ᩅᩣ ᩋᨬ᩠ᨬᨲᩁᩴ ᨾᩉᩣᨳᩮᩁᩴ ᩏᨸᩈᨦ᩠ᨠᨾᩥᨲ᩠ᩅᩣ ᩋᨲ᩠ᨲᨶᩮᩣ ᨸᨻ᩠ᨻᨩᩣᨵᩥᨸ᩠ᨸᩣᨿᩴ ᨶᩥᩅᩮᨴᩮᩈᩥ. ᩈᩮᩣ ᨲᩴ ᨠᩁᩩᨱᩣᨿᨶ᩠ᨲᩮᩣ ᨸᨻ᩠ᨻᩣᨩᩮᨲ᩠ᩅᩣ ᨠᨾ᩠ᨾᨭ᩠ᨮᩣᨶᩴ ¶ ᩌᨧᩥᨠ᩠ᨡᩥ. ᩈᩮᩣ ᩋᩁᨬ᩠ᨬᩮ ¶ ᩅᩥᩉᩁᨶ᩠ᨲᩮᩣ ᩑᨠᨠᩅᩥᩉᩣᩁᩮ ᨶᩥᨻ᩠ᨻᩥᨶ᩠ᨶᩮᩣ ᩏᨠ᩠ᨠᨱ᩠ᨮᩥᨲᩮᩣ ᩉᩩᨲ᩠ᩅᩣ ᩅᩥᨻ᩠ᨽᨾᩥᨲᩩᨠᩣᨾᩮᩣ ᨬᩣᨲᩥᨣᩣᨾᩴ ᨣᨧ᩠ᨨᨶ᩠ᨲᩮᩣ ᩋᨶ᩠ᨲᩁᩣᨾᨣ᩠ᨣᩮ ᨠᨧ᩠ᨨᩴ ᨻᨶ᩠ᨵᩥᨲ᩠ᩅᩣ ᨡᩮᨲ᩠ᨲᩴ ᨠᩈᨶ᩠ᨲᩮ ᨠᩥᩃᩥᨭ᩠ᨮᩅᨲ᩠ᨳᨶᩥᩅᨲ᩠ᨳᩮ ᩈᨾᨶ᩠ᨲᨲᩮᩣ ᩁᨩᩮᩣᨠᩥᨱ᩠ᨱᩈᩁᩦᩁᩮ ᩅᩣᨲᩣᨲᨸᩮᨶ ᩈᩩᩔᨶ᩠ᨲᩮ ᨡᩮᨲ᩠ᨲᩴ ᨠᩔᨠᩮ ᨾᨶᩩᩔᩮ ᨴᩥᩈ᩠ᩅᩣ ‘‘ᨾᩉᨶ᩠ᨲᩴ ᩅᨲᩥᨾᩮ ᩈᨲ᩠ᨲᩣ ᨩᩦᩅᩥᨠᨶᩥᨾᩥᨲ᩠ᨲᩴ ᨴᩩᨠ᩠ᨡᩴ ᨸᨧ᩠ᨧᨶᩩᨽᩅᨶ᩠ᨲᩦ’’ᨲᩥ ᩈᩴᩅᩮᨣᩴ ᨸᨭᩥᩃᨽᩥ. ᨬᩣᨱᩔ ᨸᩁᩥᨸᩣᨠᨣᨲᨲ᩠ᨲᩣ ᨧᩔ ᨿᨳᩣᨣᩉᩥᨲᩴ ᨠᨾ᩠ᨾᨭ᩠ᨮᩣᨶᩴ ᩏᨸᨭ᩠ᨮᩣᩈᩥ. ᩈᩮᩣ ᩋᨬ᩠ᨬᨲᩁᩴ ᩁᩩᨠ᩠ᨡᨾᩪᩃᩴ ᩏᨸᨣᨶ᩠ᨲ᩠ᩅᩣ ᩅᩥᩅᩮᨠᩴ ᩃᨽᩥᨲ᩠ᩅᩣ ᨿᩮᩣᨶᩥᩈᩮᩣᨾᨶᩈᩥᨠᩁᩮᩣᨶ᩠ᨲᩮᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨾᨣ᩠ᨣᨸᨭᩥᨸᩣᨭᩥᨿᩣ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪑᪒᪔. ᩑᩅᩴ ᩈᩮᩣ ᨸᨲ᩠ᨲᩋᩁᩉᨲ᩠ᨲᨹᩃᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᩅᩈᩮᨶ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩌᩉᩩᨲᩥᩴ ᨿᩥᨭ᩠ᨮᩩᨠᩣᨾᩮᩣᩉᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᩌᩉᩩᨲᩥᨶ᩠ᨲᩥ ᩋᨶ᩠ᨶᨸᩣᨶᩣᨴᩥᩋᨶᩮᨠᩅᩥᨵᩴ ᨸᩪᨩᩣᩈᨠ᩠ᨠᩣᩁᩪᨸᨠᩁᨱᩴ. ᨿᩥᨭ᩠ᨮᩩᨠᩣᨾᩮᩣᨲᩥ ᨿᨩᩥᨲᩩᨠᩣᨾᩮᩣ, ᨴᩣᨶᩴ ᨴᩣᨲᩩᨠᩣᨾᩮᩣ ᩋᩉᩴ. ᨸᨭᩥᨿᩣᨴᩮᨲ᩠ᩅᩣᨶ ᨽᩮᩣᨩᨶᨶ᩠ᨲᩥ ᩌᩉᩣᩁᩴ ᨸᨭᩥᨿᩣᨴᩮᨲ᩠ᩅᩣ ᨶᩥᨸ᩠ᨹᩣᨴᩮᨲ᩠ᩅᩣ. ᨻᩕᩣᩉ᩠ᨾᨱᩮ ᨸᨭᩥᨾᩣᨶᩮᨶ᩠ᨲᩮᩣᨲᩥ ᨸᨭᩥᨣ᩠ᨣᩣᩉᨠᩮ ᩈᩩᨴ᩠ᨵᨸᨻ᩠ᨻᨩᩥᨲᩮ ᨸᩁᩥᨿᩮᩈᨶ᩠ᨲᩮᩣ. ᩅᩥᩈᩣᩃᩮ ᨾᩣᩊᨠᩮ ᨮᩥᨲᩮᩣᨲᩥ ᨸᩁᩥᩈᩩᨴ᩠ᨵᨸᨱ᩠ᨯᩁᨸᩩᩃᩥᨶᨲᩃᩣᨽᩥᩁᩣᨾᩮ ᩅᩥᨸᩩᩃᩮ ᨾᩣᩊᨠᩮ ᨮᩥᨲᩮᩣ.

᪑᪒᪕-᪗. ᩋᨳᨴ᩠ᨴᩈᩣᩈᩥᩴ ᩈᨾ᩠ᨻᩩᨴ᩠ᨵᨶ᩠ᨲᩥᩌᨴᩦᩈᩩ ᨾᩉᩣᨿᩈᩴ ᨾᩉᩣᨸᩁᩥᩅᩣᩁᩴ ᩈᨻ᩠ᨻᩃᩮᩣᨠᩴ ᩈᨠᩃᩈᨲ᩠ᨲᩃᩮᩣᨠᩴ ᩅᩥᨶᩮᨲᩣᨶᩴ ᩅᩥᩈᩮᩈᩮᨶ ᨶᩮᨲᩣᩁᩴ ᨶᩥᨻ᩠ᨻᩣᨶᩈᨾ᩠ᨸᩣᨸᨠᩴ ᩈᨿᨾ᩠ᨽᩩᩴ ᩈᨿᨾᩮᩅ ᨽᩪᨲᩴ ᩋᨶᩣᨧᩁᩥᨿᨠᩴ ¶ ᩋᨣ᩠ᨣᨸᩩᨣ᩠ᨣᩃᩴ ᩈᩮᨭ᩠ᨮᨸᩩᨣ᩠ᨣᩃᩴ ᨽᨣᩅᨶ᩠ᨲᩴ ᨽᨣ᩠ᨿᩅᨶ᩠ᨲᩣᨴᩥᨣᩩᨱᨿᩩᨲ᩠ᨲᩴ ᨩᩩᨲᩥᨾᨶ᩠ᨲᩴ ᨶᩦᩃᨸᩦᨲᩣᨴᩥᨸᨽᩣᩈᨾ᩠ᨸᨶ᩠ᨶᩴ ᩈᩣᩅᨠᩮᩉᩥ ᨸᩩᩁᨠ᩠ᨡᨲᩴ ᨸᩁᩥᩅᩣᩁᩥᨲᩴ ᩌᨴᩥᨧ᩠ᨧᨾᩥᩅ ᩈᩪᩁᩥᨿᨾᩥᩅ ᩁᩮᩣᨧᨶ᩠ᨲᩴ ᩈᩮᩣᨽᨾᩣᨶᩴ ᩁᨳᩥᨿᩴ ᩅᩦᨳᩥᨿᩴ ᨸᨭᩥᨸᨶ᩠ᨶᨠᩴ ᨣᨧ᩠ᨨᨶ᩠ᨲᩴ ᨸᩥᨿᨴᩔᩥᩴ ᨶᩣᨾ ᩈᨾ᩠ᨻᩩᨴ᩠ᨵᩴ ᩋᨴ᩠ᨴᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᩋᨬ᩠ᨩᩃᩥᩴ ᨸᨣ᩠ᨣᩉᩮᨲ᩠ᩅᩣᨶᩣᨲᩥ ᨻᨶ᩠ᨵᨬ᩠ᨩᩃᩥᨸᩩᨭᩴ ᩈᩥᩁᩈᩥ ᨠᨲ᩠ᩅᩣ ᩈᨠᩴ ᨧᩥᨲ᩠ᨲᩴ ᩋᨲ᩠ᨲᨶᩮᩣ ᨧᩥᨲ᩠ᨲᩴ ᨸᩈᩣᨴᨿᩥᩴ ᩍᨲ᩠ᨳᨾ᩠ᨽᩪᨲᩔ ᨽᨣᩅᨲᩮᩣ ᨣᩩᨱᩮ ᨸᩈᩣᨴᩮᩈᩥᩴ ᨸᩈᨶ᩠ᨶᨾᨠᩣᩈᩥᨶ᩠ᨲᩥ ᩋᨲ᩠ᨳᩮᩣ. ᨾᨶᩈᩣᩅ ᨶᩥᨾᨶ᩠ᨲᩮᩈᩥᨶ᩠ᨲᩥ ᨧᩥᨲ᩠ᨲᩮᨶ ᨸᩅᩣᩁᩮᩈᩥᩴ. ᩌᨣᨧ᩠ᨨᨲᩩ ᨾᩉᩣᨾᩩᨶᩦᨲᩥ ᨾᩉᩥᨲᩮᩣ ᨸᩪᨩᩣᩁᩉᩮᩣ ᨾᩩᨶᩥ ᨽᨣᩅᩣ ᨾᨾ ᨶᩥᩅᩮᩈᨶᩴ ᩌᨣᨧ᩠ᨨᨲᩩ.

᪑᪒᪘. ᨾᨾ ᩈᨦ᩠ᨠᨸ᩠ᨸᨾᨬ᩠ᨬᩣᨿᩣᨲᩥ ᨾᨿ᩠ᩉᩴ ᨧᩥᨲ᩠ᨲᩈᨦ᩠ᨠᨸ᩠ᨸᩴ ᨬᨲ᩠ᩅᩣ ᩃᩮᩣᨠᩮ ᩈᨲ᩠ᨲᩃᩮᩣᨠᩮ ᩋᨶᩩᨲ᩠ᨲᩁᩮᩣ ᩏᨲ᩠ᨲᩁᩅᩥᩁᩉᩥᨲᩮᩣ ᩈᨲ᩠ᨳᩣ ᨡᩦᨱᩣᩈᩅᩈᩉᩔᩮᩉᩥ ᩋᩁᩉᨶ᩠ᨲᩈᩉᩔᩮᩉᩥ ¶ ᨸᩁᩥᩅᩩᨲᩮᩣ ᨾᨾ ᨴ᩠ᩅᩣᩁᩴ ᨾᨿ᩠ᩉᩴ ᨣᩮᩉᨴ᩠ᩅᩣᩁᩴ ᩏᨸᩣᨣᨾᩥ ᩈᨾ᩠ᨸᩣᨸᩩᨱᩥ.

᪑᪒᪙. ᨲᩔ ᩈᨾ᩠ᨸᨲ᩠ᨲᩔ ᩈᨲ᩠ᨳᩩᨶᩮᩣ ᩑᩅᩴ ᨶᨾᨠ᩠ᨠᩣᩁᨾᨠᩣᩈᩥᩴ. ᨸᩩᩁᩥᩈᩣᨩᨬ᩠ᨬ ᨸᩩᩁᩥᩈᩣᨶᩴ ᩌᨩᨬ᩠ᨬ, ᩈᩮᨭ᩠ᨮ, ᨾᨾ ᨶᨾᨠ᩠ᨠᩣᩁᩮᩣ ᨲᩮ ᨲᩩᨿ᩠ᩉᩴ ᩋᨲ᩠ᨳᩩ ᨽᩅᨲᩩ. ᨸᩩᩁᩥᩈᩩᨲ᩠ᨲᨾ ᨸᩩᩁᩥᩈᩣᨶᩴ ᩏᨲ᩠ᨲᨾ ᩋᨵᩥᨠᨣᩩᨱᩅᩥᩈᩥᨭ᩠ᨮ ᨲᩮ ᨲᩩᨿ᩠ᩉᩴ ᨾᨾ ᨶᨾᨠ᩠ᨠᩣᩁᩮᩣ ᩋᨲ᩠ᨳᩩ. ᨸᩣᩈᩣᨴᩴ ᨸᩈᩣᨴᨩᨶᨠᩴ ᨾᨾ ᨶᩥᩅᩮᩈᨶᩴ ¶ ᩋᨽᩥᩁᩩᩉᩥᨲ᩠ᩅᩣ ᩈᩦᩉᩣᩈᨶᩮ ᩏᨲ᩠ᨲᨾᩣᩈᨶᩮ ᨶᩥᩈᩦᨴᨲᨶ᩠ᨲᩥ ᩌᨿᩣᨧᩥᨶ᩠ᨲᩥ ᩋᨲ᩠ᨳᩮᩣ.

᪑᪓᪐. ᨴᨶ᩠ᨲᩮᩣ ᨴᨶ᩠ᨲᨸᩁᩥᩅᩣᩁᩮᩣᨲᩥ ᩈᨿᩴ ᨴ᩠ᩅᩣᩁᨲ᩠ᨲᨿᩮᨶ ᨴᨶ᩠ᨲᩮᩣ ᨲᨳᩣ ᨴᨶ᩠ᨲᩣᩉᩥ ᨽᩥᨠ᩠ᨡᩩᨽᩥᨠ᩠ᨡᩩᨶᩦᩏᨸᩣᩈᨠᩏᨸᩣᩈᩥᨠᩣᩈᨦ᩠ᨡᩣᨲᩣᩉᩥ ᨧᨲᩪᩉᩥ ᨸᩁᩥᩈᩣᩉᩥ ᨸᩁᩥᩅᩣᩁᩥᨲᩮᩣ. ᨲᩥᨱ᩠ᨱᩮᩣ ᨲᩣᩁᨿᨲᩴ ᩅᩁᩮᩣᨲᩥ ᩈᨿᩴ ᨲᩥᨱ᩠ᨱᩮᩣ ᩈᩴᩈᩣᩁᨲᩮᩣ ᩏᨲ᩠ᨲᩥᨱ᩠ᨱᩮᩣ ᨶᩥᨠ᩠ᨡᨶ᩠ᨲᩮᩣ ᨲᩣᩁᨿᨲᩴ ᨲᩣᩁᨿᨶ᩠ᨲᩣᨶᩴ ᩅᩥᩈᩥᨭ᩠ᨮᨸᩩᨣ᩠ᨣᩃᩣᨶᩴ ᩅᩁᩮᩣ ᩏᨲ᩠ᨲᨾᩮᩣ ᨽᨣᩅᩣ ᨾᨾᩣᩁᩣᨵᨶᩮᨶ ᨸᩣᩈᩣᨴᩴ ᩋᨽᩥᩁᩩᩉᩥᨲ᩠ᩅᩣ ᨸᩅᩁᩣᩈᨶᩮ ᩏᨲ᩠ᨲᨾᩣᩈᨶᩮ ᨶᩥᩈᩦᨴᩥ ᨶᩥᩈᨩ᩠ᨩᩴ ᨠᨸ᩠ᨸᩮᩈᩥ.

᪑᪓᪑. ᨿᩴ ᨾᩮ ᩋᨲ᩠ᨳᩥ ᩈᨠᩮ ᨣᩮᩉᩮᨲᩥ ᩋᨲ᩠ᨲᨶᩮᩣ ᨣᩮᩉᩮ ᨿᩴ ᩌᨾᩥᩈᩴ ᨸᨧ᩠ᨧᩩᨸᨭ᩠ᨮᩥᨲᩴ ᩈᨾ᩠ᨸᩣᨴᩥᨲᩴ ᩁᩣᩈᩥᨠᨲᩴ ᩋᨲ᩠ᨳᩥ. ᨲᩣᩉᩴ ᨻᩩᨴ᩠ᨵᩔ ᨸᩣᨴᩣᩈᩥᨶ᩠ᨲᩥ ᨻᩩᨴ᩠ᨵᩔ ᨻᩩᨴ᩠ᨵᨸ᩠ᨸᨾᩩᨡᩔ ᩈᨦ᩠ᨥᩔ ᨲᩴ ᩌᨾᩥᩈᩴ ᨸᩣᨴᩣᩈᩥᩴ ᨸ-ᨠᩣᩁᩮᨶ ᩌᨴᩁᩮᨶ ᩅᩣ ᩋᨴᩣᩈᩥᨶ᩠ᨲᩥ ᩋᨲ᩠ᨳᩮᩣ. ᨸᩈᨶ᩠ᨶᩮᩣ ᩈᩮᩉᩥ ᨸᩣᨱᩥᨽᩦᨲᩥ ᩋᨲ᩠ᨲᨶᩮᩣ ᨴ᩠ᩅᩦᩉᩥ ᩉᨲ᩠ᨳᩮᩉᩥ ᨸᩔᨶ᩠ᨶᨧᩥᨲ᩠ᨲᩮᩣ ᨣᩉᩮᨲ᩠ᩅᩣ ᨸᩣᨴᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪑᪓᪒. ᨸᩈᨶ᩠ᨶᨧᩥᨲ᩠ᨲᩮᩣ ᨸᩈᩣᨴᩥᨲᨾᨶᩈᨦ᩠ᨠᨸ᩠ᨸᩮᩣ ᩈᩩᨾᨶᩮᩣ ᩈᩩᨶ᩠ᨴᩁᨾᨶᩮᩣ. ᩅᩮᨴᨩᩣᨲᩮᩣ ᨩᩣᨲᩅᩮᨴᩮᩣ ᩏᨸ᩠ᨸᨶ᩠ᨶᩈᩮᩣᨾᨶᩔᩮᩣ ᨠᨲᨬ᩠ᨩᩃᩦ ᩈᩥᩁᩈᩥ ᨮᨸᩥᨲᩋᨬ᩠ᨩᩃᩥᨸᩩᨭᩮᩣ ᨻᩩᨴ᩠ᨵᩈᩮᨭ᩠ᨮᩴ ᨶᨾᩔᩣᨾᩥ ᩈᩮᨭ᩠ᨮᩔ ᨻᩩᨴ᩠ᨵᩔ ᨸᨱᩣᨾᩴ ᨠᩁᩮᩣᨾᩦᨲᩥ ᩋᨲ᩠ᨳᩮᩣ. ᩋᩉᩮᩣ ᨻᩩᨴ᩠ᨵᩔᩩᩊᩣᩁᨲᩣᨲᩥ ᨸᨭᩥᩅᩥᨴ᩠ᨵᨧᨲᩩᩈᨧ᩠ᨧᩔ ᩈᨲ᩠ᨳᩩᨶᩮᩣ ᩏᩊᩣᩁᨲᩣ ᨾᩉᨶ᩠ᨲᨽᩣᩅᩮᩣ ᩋᩉᩮᩣ ᩋᨧ᩠ᨨᩁᩥᨿᨶ᩠ᨲᩥ ᩋᨲ᩠ᨳᩮᩣ.

᪑᪓᪓. ᩋᨭ᩠ᨮᨶ᩠ᨶᩴ ¶ ᨸᨿᩥᩁᩪᨸᩣᩈᨲᨶ᩠ᨲᩥ ᨸᨿᩥᩁᩩᨸᩣᩈᨶ᩠ᨲᩣᨶᩴ ᨽᩩᨬ᩠ᨩᩴ ᨽᩩᨬ᩠ᨩᨶ᩠ᨲᩣᨶᩴ ᩋᨭ᩠ᨮᨶ᩠ᨶᩴ ᩋᩁᩥᨿᨸᩩᨣ᩠ᨣᩃᩣᨶᩴ ᩋᨶ᩠ᨲᩁᩮ ᨡᩦᨱᩣᩈᩅᩣ ᩋᩁᩉᨶ᩠ᨲᩮᩣᩅ ᨻᩉᩪᨲᩥ ᩋᨲ᩠ᨳᩮᩣ. ᨲᩩᨿ᩠ᩉᩮᩅᩮᩈᩮᩣ ᩌᨶᩩᨽᩣᩅᩮᩣᨲᩥ ᩑᩈᩮᩣ ᩌᨠᩣᩈᨧᩁᨱᩏᨾ᩠ᨾᩩᨩ᩠ᨩᨶᨶᩥᨾᩩᨩ᩠ᨩᨶᩣᨴᩥᩌᨶᩩᨽᩣᩅᩮᩣ ᨲᩩᨿ᩠ᩉᩮᩅ ᨲᩩᨿ᩠ᩉᩴ ᩑᩅ ᩌᨶᩩᨽᩣᩅᩮᩣ, ᨶᩣᨬ᩠ᨬᩮᩈᩴ. ᩈᩁᨱᩴ ᨲᩴ ᩏᨸᩮᨾᩉᨶ᩠ᨲᩥ ᨲᩴ ᩍᨲ᩠ᨳᨾ᩠ᨽᩪᨲᩴ ᨲᩩᩅᩴ ᩈᩁᨱᩴ ᨲᩣᨱᩴ ᩃᩮᨱᩴ ᨸᩁᩣᨿᨶᨶ᩠ᨲᩥ ᩏᨸᩮᨾᩥ ᨣᨧ᩠ᨨᩣᨾᩥ ᨩᩣᨶᩣᨾᩥ ᩅᩣᨲᩥ ᩋᨲ᩠ᨳᩮᩣ.

᪑᪓᪔. ᩃᩮᩣᨠᨩᩮᨭ᩠ᨮᩮᩣ ¶ ᨶᩁᩣᩈᨽᩮᩣ ᨸᩥᨿᨴᩔᩦ ᨽᨣᩅᩣ ᨽᩥᨠ᩠ᨡᩩᩈᨦ᩠ᨥᨾᨩ᩠ᨫᩮ ᨶᩥᩈᩦᨴᩥᨲ᩠ᩅᩣ ᩍᨾᩣ ᨻ᩠ᨿᩣᨠᩁᨱᨣᩣᨳᩣ ᩋᨽᩣᩈᨳ ᨠᨳᩮᩈᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩈᩩᨾᨦ᩠ᨣᩃᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᨴᩩᨲᩥᨿᩔ ᩈᩦᩉᩣᩈᨶᩅᨣ᩠ᨣᩔ ᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᩈᩩᨽᩪᨲᩥᩅᨣ᩠ᨣᩮᩣ

᪑. ᩈᩩᨽᩪᨲᩥᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨠᩴ ¶ ᩌᨿᩈ᩠ᨾᨲᩮᩣ ᩈᩩᨽᩪᨲᩥᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩍᨲᩮᩣ ᨠᨸ᩠ᨸᩈᨲᩈᩉᩔᨾᨲ᩠ᨳᨠᩮ ᩋᨶᩩᨸ᩠ᨸᨶ᩠ᨶᩮᨿᩮᩅ ᨸᨴᩩᨾᩩᨲ᩠ᨲᩁᩮ ᨽᨣᩅᨲᩥ ᩃᩮᩣᨠᨶᩣᨳᩮ ᩉᩴᩈᩅᨲᩦᨶᨣᩁᩮ ¶ ᩋᨬ᩠ᨬᨲᩁᩔ ᨻᩕᩣᩉ᩠ᨾᨱᨾᩉᩣᩈᩣᩃᩔ ᩑᨠᨸᩩᨲ᩠ᨲᨠᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩥ, ᨲᩔ ᨶᨶ᩠ᨴᨾᩣᨱᩅᩮᩣᨲᩥ ᨶᩣᨾᩴ ᩋᨠᩴᩈᩩ. ᩈᩮᩣ ᩅᨿᨸ᩠ᨸᨲ᩠ᨲᩮᩣ ᨲᨿᩮᩣ ᩅᩮᨴᩮ ᩏᨣ᩠ᨣᨱ᩠ᩉᩥᨲ᩠ᩅᩣ ᨲᨲ᩠ᨳ ᩈᩣᩁᩴ ᩋᨸᩔᨶ᩠ᨲᩮᩣ ᩋᨲ᩠ᨲᨶᩮᩣ ᨸᩁᩥᩅᩣᩁᨽᩪᨲᩮᩉᩥ ᨧᨲᩩᨧᨲ᩠ᨲᩣᩃᩦᩈᩣᨿ ᨾᩣᨱᩅᩈᩉᩔᩮᩉᩥ ᩈᨴ᩠ᨵᩥᩴ ᨸᨻ᩠ᨻᨲᨸᩣᨴᩮ ᩍᩈᩥᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩋᨭ᩠ᨮ ᩈᨾᩣᨸᨲ᩠ᨲᩥᨿᩮᩣ ᨸᨬ᩠ᨧᩣᨽᩥᨬ᩠ᨬᩣᨿᩮᩣ ᨧ ᨶᩥᨻ᩠ᨻᨲ᩠ᨲᩮᩈᩥ. ᩋᨶ᩠ᨲᩮᩅᩣᩈᩥᨠᩣᨶᨾ᩠ᨸᩥ ᨠᨾ᩠ᨾᨭ᩠ᨮᩣᨶᩴ ᩌᨧᩥᨠ᩠ᨡᩥ. ᨲᩮᨸᩥ ᨶᨧᩥᩁᩔᩮᩅ ᨫᩣᨶᩃᩣᨽᩥᨶᩮᩣ ᩋᩉᩮᩈᩩᩴ.

ᨲᩮᨶ ᨧ ᩈᨾᨿᩮᨶ ᨸᨴᩩᨾᩩᨲ᩠ᨲᩁᩮᩣ ᨽᨣᩅᩣ ᩃᩮᩣᨠᩮ ᩏᨸ᩠ᨸᨩ᩠ᨩᩥᨲ᩠ᩅᩣ ᩉᩴᩈᩅᨲᩦᨶᨣᩁᩴ ᩏᨸᨶᩥᩔᩣᨿ ᩅᩥᩉᩁᨶ᩠ᨲᩮᩣ ᩑᨠᨴᩥᩅᩈᩴ ᨸᨧ᩠ᨧᩪᩈᩈᨾᨿᩮ ᩃᩮᩣᨠᩴ ᩅᩮᩣᩃᩮᩣᨠᩮᨶ᩠ᨲᩮᩣ ᨶᨶ᩠ᨴᨲᩣᨸᩈᩔ ᩋᨶ᩠ᨲᩮᩅᩣᩈᩥᨠᨩᨭᩥᩃᩣᨶᩴ ᩋᩁᩉᨲ᩠ᨲᩪᨸᨶᩥᩔᨿᩴ, ᨶᨶ᩠ᨴᨲᩣᨸᩈᩔ ᨧ ᨴ᩠ᩅᩦᩉᨦ᩠ᨣᩮᩉᩥ ᩈᨾᨶ᩠ᨶᩣᨣᨲᩔ ᩈᩣᩅᨠᨭ᩠ᨮᩣᨶᨶ᩠ᨲᩁᩔ ᨸᨲ᩠ᨳᨶᩴ ᨴᩥᩈ᩠ᩅᩣ ᨸᩣᨲᩮᩣᩅ ᩈᩁᩦᩁᨸᨭᩥᨩᨣ᩠ᨣᨶᩴ ᨠᨲ᩠ᩅᩣ ᨸᩩᨻ᩠ᨻᨱ᩠ᩉᩈᨾᨿᩮ ᨸᨲ᩠ᨲᨧᩦᩅᩁᨾᩣᨴᩣᨿ ᩋᨬ᩠ᨬᩴ ᨠᨬ᩠ᨧᩥ ᩋᨶᩣᨾᨶ᩠ᨲᩮᨲ᩠ᩅᩣ ᩈᩦᩉᩮᩣ ᩅᩥᨿ ᩑᨠᨧᩁᩮᩣ ᨶᨶ᩠ᨴᨲᩣᨸᩈᩔ ᩋᨶ᩠ᨲᩮᩅᩣᩈᩥᨠᩮᩈᩩ ᨹᩃᩣᨹᩃᨲ᩠ᨳᩣᨿ ᨣᨲᩮᩈᩩ ‘‘ᨻᩩᨴ᩠ᨵᨽᩣᩅᩴ ᨾᩮ ᨩᩣᨶᩣᨲᩪ’’ᨲᩥ ᨸᩔᨶ᩠ᨲᩔᩮᩅ ᨶᨶ᩠ᨴᨲᩣᨸᩈᩔ ᩌᨠᩣᩈᨲᩮᩣ ᩒᨲᩁᩥᨲ᩠ᩅᩣ ᨸᨳᩅᩥᨿᩴ ᨸᨲᩥᨭ᩠ᨮᩣᩈᩥ. ᨶᨶ᩠ᨴᨲᩣᨸᩈᩮᩣ ᨻᩩᨴ᩠ᨵᩣᨶᩩᨽᩣᩅᨬ᩠ᨧᩮᩅ ᩃᨠ᩠ᨡᨱᨸᩣᩁᩥᨸᩪᩁᩥᨬ᩠ᨧ ᨴᩥᩈ᩠ᩅᩣ ᩃᨠ᩠ᨡᨱᨾᨶ᩠ᨲᩮ ᩈᨾ᩠ᨾᩈᩥᨲ᩠ᩅᩣ ‘‘ᩍᨾᩮᩉᩥ ᩃᨠ᩠ᨡᨱᩮᩉᩥ ᩈᨾᨶ᩠ᨶᩣᨣᨲᩮᩣ ᨶᩣᨾ ᩋᨣᩣᩁᩴ ᩋᨩ᩠ᨫᩣᩅᩈᨶ᩠ᨲᩮᩣ ᩁᩣᨩᩣ ᩉᩮᩣᨲᩥ ᨧᨠ᩠ᨠᩅᨲ᩠ᨲᩦ, ᨸᨻ᩠ᨻᨩᨶ᩠ᨲᩮᩣ ᩃᩮᩣᨠᩮ ᩅᩥᩅᨭᨧ᩠ᨨᩮᨴᩮᩣ ¶ ᩈᨻ᩠ᨻᨬ᩠ᨬᩪ ᨻᩩᨴ᩠ᨵᩮᩣ ᩉᩮᩣᨲᩥ, ᩋᨿᩴ ᨸᩩᩁᩥᩈᩣᨩᩣᨶᩦᨿᩮᩣ ᨶᩥᩔᩴᩈᨿᩴ ᨻᩩᨴ᩠ᨵᩮᩣ’’ᨲᩥ ᨬᨲ᩠ᩅᩣ ᨸᨧ᩠ᨧᩩᨣ᩠ᨣᨾᨶᩴ ᨠᨲ᩠ᩅᩣ ᨸᨬ᩠ᨧᨸᨲᩥᨭ᩠ᨮᩥᨲᩮᨶ ᩅᨶ᩠ᨴᩥᨲ᩠ᩅᩣ ᩌᩈᨶᩴ ᨸᨬ᩠ᨬᩣᨸᩮᨲ᩠ᩅᩣ ᩋᨴᩣᩈᩥ. ᨶᩥᩈᩦᨴᩥ ᨽᨣᩅᩣ ᨸᨬ᩠ᨬᨲ᩠ᨲᩮ ᩌᩈᨶᩮ. ᨶᨶ᩠ᨴᨲᩣᨸᩈᩮᩣᨸᩥ ᩋᨲ᩠ᨲᨶᩮᩣ ᩋᨶᩩᨧ᩠ᨨᩅᩥᨠᩴ ᩌᩈᨶᩴ ᨣᩉᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᨲᩈ᩠ᨾᩥᩴ ᩈᨾᨿᩮ ᨧᨲᩩᨧᨲ᩠ᨲᩣᩃᩦᩈᩈᩉᩔᨩᨭᩥᩃᩣ ᨸᨱᩦᨲᨸᨱᩦᨲᩣᨶᩥ ᩒᨩᩅᨶ᩠ᨲᩣᨶᩥ ᨹᩃᩣᨹᩃᩣᨶᩥ ᨣᩉᩮᨲ᩠ᩅᩣ ᩌᨧᩁᩥᨿᩔ ᩈᨶ᩠ᨲᩥᨠᩴ ᩈᨾ᩠ᨸᨲ᩠ᨲᩣ ᨻᩩᨴ᩠ᨵᩣᨶᨬ᩠ᨧᩮᩅ ᩌᨧᩁᩥᨿᩔ ᨧ ᨶᩥᩈᩥᨶ᩠ᨶᩣᨠᩣᩁᩴ ᩒᩃᩮᩣᨠᩮᨲ᩠ᩅᩣ ᩌᩉᩴᩈᩩ – ‘‘ᩌᨧᩁᩥᨿ, ᨾᨿᩴ ‘ᩍᨾᩈ᩠ᨾᩥᩴ ᩃᩮᩣᨠᩮ ᨲᩩᨾ᩠ᩉᩮᩉᩥ ᨾᩉᨶ᩠ᨲᨲᩁᩮᩣ ᨶᨲ᩠ᨳᩦ’ᨲᩥ ᩅᩥᨧᩁᩣᨾ, ᩋᨿᩴ ᨸᨶ ᨸᩩᩁᩥᩈᩮᩣ ᨲᩩᨾ᩠ᩉᩮᩉᩥ ᨾᩉᨶ᩠ᨲᨲᩁᩮᩣ ᨾᨬ᩠ᨬᩮ’’ᨲᩥ. ᨶᨶ᩠ᨴᨲᩣᨸᩈᩮᩣ – ‘‘ᨲᩣᨲᩣ ¶ , ᨠᩥᩴ ᩅᨴᩮᨳ, ᨲᩩᨾ᩠ᩉᩮ ᩈᩣᩈᨸᩮᨶ ᩈᨴ᩠ᨵᩥᩴ ᩋᨭ᩠ᨮᩈᨭ᩠ᨮᩥᨿᩮᩣᨩᨶᩈᨲᩈᩉᩔᩩᨻ᩠ᨻᩮᨵᩴ ᩈᩥᨶᩮᩁᩩᩴ ᩏᨸᨾᩮᨲᩩᩴ ᩍᨧ᩠ᨨᨳ, ᩈᨻ᩠ᨻᨬ᩠ᨬᩩᨻᩩᨴ᩠ᨵᩮᨶ ᩈᨴ᩠ᨵᩥᩴ ᨾᩣ ᨾᩴ ᩏᨸᨾᩥᨲ᩠ᨳᩣ’’ᨲᩥ ᩌᩉ. ᩋᨳ ᨲᩮ ᨲᩣᨸᩈᩣ – ‘‘ᩈᨧᩮ ᩋᨿᩴ ᩒᩁᨠᩮᩣ ᩋᨽᩅᩥᩔ, ᨶ ᩋᨾ᩠ᩉᩣᨠᩴ ᩌᨧᩁᩥᨿᩮᩣ ᩑᩅᩴ ᩏᨸᨾᩴ ᩌᩉᩁᩮᨿ᩠ᨿ. ᨿᩣᩅ ᨾᩉᩣᩅᨲᩣᨿᩴ ᨸᩩᩁᩥᩈᩣᨩᩣᨶᩦᨿᩮᩣ’’ᨲᩥ ᨸᩣᨴᩮᩈᩩ ᨶᩥᨸᨲᩥᨲ᩠ᩅᩣ ᩈᩥᩁᩈᩣ ᩅᨶ᩠ᨴᩥᩴᩈᩩ. ᩋᨳ ᨲᩮ ᩌᨧᩁᩥᨿᩮᩣ ᩌᩉ – ‘‘ᨲᩣᨲᩣ, ᩋᨾ᩠ᩉᩣᨠᩴ ᨻᩩᨴ᩠ᨵᩣᨶᩴ ᩋᨶᩩᨧ᩠ᨨᩅᩥᨠᩮᩣ ᨴᩮᨿ᩠ᨿᨵᨾ᩠ᨾᩮᩣ ᨶᨲ᩠ᨳᩥ, ᨽᨣᩅᩣ ᨧ ᨽᩥᨠ᩠ᨡᩣᨧᩣᩁᩅᩮᩃᩣᨿᩴ ᩍᨵᩣᨣᨲᩮᩣ, ᨲᩈ᩠ᨾᩣ ᨾᨿᩴ ᨿᨳᩣᨻᩃᩴ ᨴᩮᨿ᩠ᨿᨵᨾ᩠ᨾᩴ ᨴᩔᩣᨾ, ᨲᩩᨾ᩠ᩉᩮᩉᩥ ᨿᩴ ᨿᩴ ᨸᨱᩦᨲᩴ ᨹᩃᩣᨹᩃᩴ ᩌᨽᨲᩴ, ᨲᩴ ᨲᩴ ᩌᩉᩁᨳᩣ’’ᨲᩥ ᩌᩉᩁᩣᨸᩮᨲ᩠ᩅᩣ ᩈᩉᨲ᩠ᨳᩮᨶᩮᩅ ᨵᩮᩣᩅᩥᨲ᩠ᩅᩣ ᩈᨿᩴ ¶ ᨲᨳᩣᨣᨲᩔ ᨸᨲ᩠ᨲᩮ ᨸᨲᩥᨭ᩠ᨮᩣᨸᩮᩈᩥ. ᩈᨲ᩠ᨳᩣᩁᩣ ᨹᩃᩣᨹᩃᩮ ᨸᨭᩥᨣ᩠ᨣᩉᩥᨲᨾᨲ᩠ᨲᩮ ᨴᩮᩅᨲᩣ ᨴᩥᨻ᩠ᨻᩮᩣᨩᩴ ᨸᨠ᩠ᨡᩥᨸᩥᩴᩈᩩ. ᨲᩣᨸᩈᩮᩣ ᩏᨴᨠᨾ᩠ᨸᩥ ᩈᨿᨾᩮᩅ ᨸᩁᩥᩔᩣᩅᩮᨲ᩠ᩅᩣ ᩋᨴᩣᩈᩥ. ᨲᨲᩮᩣ ᨽᩮᩣᨩᨶᨠᩥᨧ᩠ᨧᩴ ᨶᩥᨭ᩠ᨮᩣᨸᩮᨲ᩠ᩅᩣ ᨶᩥᩈᩥᨶ᩠ᨶᩮ ᩈᨲ᩠ᨳᩁᩥ ᩈᨻ᩠ᨻᩮ ᩋᨶ᩠ᨲᩮᩅᩣᩈᩥᨠᩮ ᨸᨠ᩠ᨠᩮᩣᩈᩥᨲ᩠ᩅᩣ ᩈᨲ᩠ᨳᩩ ᩈᨶ᩠ᨲᩥᨠᩮ ᩈᩣᩁᨱᩦᨿᩴ ᨠᨳᩴ ᨠᨳᩮᨶ᩠ᨲᩮᩣ ᨶᩥᩈᩦᨴᩥ. ᩈᨲ᩠ᨳᩣ ‘‘ᨽᩥᨠ᩠ᨡᩩᩈᨦ᩠ᨥᩮᩣ ᩌᨣᨧ᩠ᨨᨲᩪ’’ᨲᩥ ᨧᩥᨶ᩠ᨲᩮᩈᩥ. ᩈᨲ᩠ᨳᩩ ᨧᩥᨲ᩠ᨲᩴ ᨬᨲ᩠ᩅᩣ ᩈᨲᩈᩉᩔᨾᨲ᩠ᨲᩣ ᨡᩦᨱᩣᩈᩅᩣ ᩌᨣᨶ᩠ᨲ᩠ᩅᩣ ᩈᨲ᩠ᨳᩣᩁᩴ ᩅᨶ᩠ᨴᩥᨲ᩠ᩅᩣ ᩋᨭ᩠ᨮᩴᩈᩩ.

ᩋᨳ ᨶᨶ᩠ᨴᨲᩣᨸᩈᩮᩣ ᩋᨶ᩠ᨲᩮᩅᩣᩈᩥᨠᩮ ᩌᨾᨶ᩠ᨲᩮᩈᩥ – ‘‘ᨲᩣᨲᩣ, ᨻᩩᨴ᩠ᨵᩣᨶᩴ ᨶᩥᩈᩥᨶ᩠ᨶᩣᩈᨶᨾ᩠ᨸᩥ ᨶᩦᨧᩴ, ᩈᨾᨱᩈᨲᩈᩉᩔᩔᨸᩥ ᩌᩈᨶᩴ ᨶᨲ᩠ᨳᩥ. ᨲᩩᨾ᩠ᩉᩮᩉᩥ ᩋᨩ᩠ᨩ ᩏᩊᩣᩁᩴ ᨽᨣᩅᨲᩮᩣ ᨽᩥᨠ᩠ᨡᩩᩈᨦ᩠ᨥᩔ ᨧ ᩈᨠ᩠ᨠᩣᩁᩴ ᨠᩣᨲᩩᩴ ᩅᨭ᩠ᨭᨲᩥ, ᨸᨻ᩠ᨻᨲᨸᩣᨴᨲᩮᩣ ᩅᨱ᩠ᨱᨣᨶ᩠ᨵᩈᨾ᩠ᨸᨶ᩠ᨶᩣᨶᩥ ᨸᩩᨸ᩠ᨹᩣᨶᩥ ᩌᩉᩁᨳᩣ’’ᨲᩥ ᩌᩉ. ᩋᨧᩥᨶ᩠ᨲᩮᨿ᩠ᨿᨲ᩠ᨲᩣ ᩍᨴ᩠ᨵᩥᩅᩥᩈᨿᩔ ᨲᩮ ᨾᩩᩉᩩᨲ᩠ᨲᩮᨶᩮᩅ ᩅᨱ᩠ᨱᨣᨶ᩠ᨵᩁᩈᩈᨾ᩠ᨸᨶ᩠ᨶᩣᨶᩥ ᨸᩩᨸ᩠ᨹᩣᨶᩥ ᩌᩉᩁᩥᨲ᩠ᩅᩣ ᨻᩩᨴ᩠ᨵᩣᨶᩴ ᨿᩮᩣᨩᨶᨸ᩠ᨸᨾᩣᨱᩴ ᨸᩩᨸ᩠ᨹᩣᩈᨶᩴ ᨸᨬ᩠ᨬᩣᨸᩮᩈᩩᩴ. ᩋᨣ᩠ᨣᩈᩣᩅᨠᩣᨶᩴ ᨲᩥᨣᩣᩅᩩᨲᩴ, ᩈᩮᩈᨽᩥᨠ᩠ᨡᩪᨶᩴ ¶ ᩋᨯ᩠ᨰᨿᩮᩣᨩᨶᩣᨴᩥᨽᩮᨴᩴ, ᩈᨦ᩠ᨥᨶᩅᨠᩔ ᩏᩈᨽᨾᨲ᩠ᨲᩴ ᨸᨬ᩠ᨬᩣᨸᩮᩈᩩᩴ. ᩑᩅᩴ ᨸᨬ᩠ᨬᨲ᩠ᨲᩮᩈᩩ ᩌᩈᨶᩮᩈᩩ ᨶᨶ᩠ᨴᨲᩣᨸᩈᩮᩣ ᨲᨳᩣᨣᨲᩔ ᨸᩩᩁᨲᩮᩣ ᩋᨬ᩠ᨩᩃᩥᩴ ᨸᨣ᩠ᨣᨿ᩠ᩉ ᨮᩥᨲᩮᩣ, ‘‘ᨽᨶ᩠ᨲᩮ, ᩋᨾ᩠ᩉᩣᨠᩴ ᨴᩦᨥᩁᨲ᩠ᨲᩴ ᩉᩥᨲᩣᨿ ᩈᩩᨡᩣᨿ ᩍᨾᩴ ᨸᩩᨸ᩠ᨹᩣᩈᨶᩴ ᩌᩁᩩᨿ᩠ᩉ ᨶᩥᩈᩦᨴᨳᩣ’’ᨲᩥ ᩌᩉ. ᨶᩥᩈᩦᨴᩥ ᨽᨣᩅᩣ ᨸᩩᨸ᩠ᨹᩣᩈᨶᩮ. ᩑᩅᩴ ᨶᩥᩈᩥᨶ᩠ᨶᩮ ᩈᨲ᩠ᨳᩁᩥ ᩈᨲ᩠ᨳᩩ ᩌᨠᩣᩁᩴ ᨬᨲ᩠ᩅᩣ ᨽᩥᨠ᩠ᨡᩪ ᩋᨲ᩠ᨲᨶᩮᩣ ᩋᨲ᩠ᨲᨶᩮᩣ ᨸᨲ᩠ᨲᩣᩈᨶᩮ ᨶᩥᩈᩦᨴᩥᩴᩈᩩ. ᨶᨶ᩠ᨴᨲᩣᨸᩈᩮᩣ ᨾᩉᨶ᩠ᨲᩴ ᨸᩩᨸ᩠ᨹᨧ᩠ᨨᨲ᩠ᨲᩴ ᨣᩉᩮᨲ᩠ᩅᩣ ᨲᨳᩣᨣᨲᩔ ᨾᨲ᩠ᨳᨠᩮ ᨵᩣᩁᩮᨶ᩠ᨲᩮᩣ ᩋᨭ᩠ᨮᩣᩈᩥ. ᩈᨲ᩠ᨳᩣ ‘‘ᨲᩣᨸᩈᩣᨶᩴ ᩋᨿᩴ ᩈᨠ᩠ᨠᩣᩁᩮᩣ ᨾᩉᨸ᩠ᨹᩃᩮᩣ ᩉᩮᩣᨲᩪ’’ᨲᩥ ᨶᩥᩁᩮᩣᨵᩈᨾᩣᨸᨲ᩠ᨲᩥᩴ ᩈᨾᩣᨸᨩ᩠ᨩᩥ. ᩈᨲ᩠ᨳᩩ ᩈᨾᩣᨸᨶ᩠ᨶᨽᩣᩅᩴ ᨬᨲ᩠ᩅᩣ ᨽᩥᨠ᩠ᨡᩪᨸᩥ ᩈᨾᩣᨸᨲ᩠ᨲᩥᩴ ᩈᨾᩣᨸᨩ᩠ᨩᩥᩴᩈᩩ. ᨲᨳᩣᨣᨲᩮ ᩈᨲ᩠ᨲᩣᩉᩴ ᨶᩥᩁᩮᩣᨵᩴ ᩈᨾᩣᨸᨩ᩠ᨩᩥᨲ᩠ᩅᩣ ᨶᩥᩈᩥᨶ᩠ᨶᩮ ᩋᨶ᩠ᨲᩮᩅᩣᩈᩥᨠᩣ ᨽᩥᨠ᩠ᨡᩣᨧᩣᩁᨠᩣᩃᩮ ᩈᨾ᩠ᨸᨲ᩠ᨲᩮ ᩅᨶᨾᩪᩃᨹᩃᩣᨹᩃᩴ ᨸᩁᩥᨽᩩᨬ᩠ᨩᩥᨲ᩠ᩅᩣ ᩈᩮᩈᨠᩣᩃᩮ ᨻᩩᨴ᩠ᨵᩣᨶᩴ ᩋᨬ᩠ᨩᩃᩥᩴ ᨸᨣ᩠ᨣᨿ᩠ᩉ ᩋᨭ᩠ᨮᩴᩈᩩ. ᨶᨶ᩠ᨴᨲᩣᨸᩈᩮᩣ ᨸᨶ ᨽᩥᨠ᩠ᨡᩣᨧᩣᩁᨾ᩠ᨸᩥ ᩋᨣᨶ᩠ᨲ᩠ᩅᩣ ᨸᩩᨸ᩠ᨹᨧ᩠ᨨᨲ᩠ᨲᩴ ᨵᩣᩁᩮᨶ᩠ᨲᩮᩣᨿᩮᩅ ᩈᨲ᩠ᨲᩣᩉᩴ ᨸᩦᨲᩥᩈᩩᨡᩮᨶᩮᩅ ᩅᩦᨲᩥᨶᩣᨾᩮᩈᩥ.

ᩈᨲ᩠ᨳᩣ ᨶᩥᩁᩮᩣᨵᨲᩮᩣ ᩅᩩᨭ᩠ᨮᩣᨿ ᩋᩁᨱᩅᩥᩉᩣᩁᩥᩋᨦ᩠ᨣᩮᨶ ᨴᨠ᩠ᨡᩥᨱᩮᨿ᩠ᨿᨦ᩠ᨣᩮᨶ ᨧᩣᨲᩥ ᨴ᩠ᩅᩦᩉᩥ ᩋᨦ᩠ᨣᩮᩉᩥ ᩈᨾᨶ᩠ᨶᩣᨣᨲᩴ ᩑᨠᩴ ᩈᩣᩅᨠᩴ ‘‘ᩍᩈᩥᨣᨱᩔ ᨸᩩᨸ᩠ᨹᩣᩈᨶᩣᨶᩩᨾᩮᩣᨴᨶᩴ ᨠᩁᩮᩣᩉᩦ’’ᨲᩥ ᩌᨱᩣᨸᩮᩈᩥ. ᩈᩮᩣ ᨧᨠ᩠ᨠᩅᨲ᩠ᨲᩥᩁᨬ᩠ᨬᩮᩣ ᩈᨶ᩠ᨲᩥᨠᩣ ᨸᨭᩥᩃᨴ᩠ᨵᨾᩉᩣᩃᩣᨽᩮᩣ ᨾᩉᩣᨿᩮᩣᨵᩮᩣ ᩅᩥᨿ ᨲᩩᨭ᩠ᨮᨾᩣᨶᩈᩮᩣ ᩋᨲ᩠ᨲᨶᩮᩣ ᩅᩥᩈᨿᩮ ᨮᨲ᩠ᩅᩣ ᨲᩮᨸᩥᨭᨠᩴ ᨻᩩᨴ᩠ᨵᩅᨧᨶᩴ ᩈᨾ᩠ᨾᩈᩥᨲ᩠ᩅᩣ ¶ ᩋᨶᩩᨾᩮᩣᨴᨶᨾᨠᩣᩈᩥ. ᨲᩔ ᨴᩮᩈᨶᩣᩅᩈᩣᨶᩮ ᩈᨲ᩠ᨳᩣ ᩈᨿᩴ ᨵᨾ᩠ᨾᩴ ᨴᩮᩈᩮᩈᩥ. ᩈᨲ᩠ᨳᩩ ᨴᩮᩈᨶᩣᩅᩈᩣᨶᩮ ᩈᨻ᩠ᨻᩮᨸᩥ ᨧᨲᩩᨧᨲ᩠ᨲᩣᩃᩦᩈᩈᩉᩔᨲᩣᨸᩈᩣ ᩋᩁᩉᨲ᩠ᨲᩴ ᨸᩣᨸᩩᨱᩥᩴᩈᩩ. ᩈᨲ᩠ᨳᩣ – ‘‘ᩑᨳ ᨽᩥᨠ᩠ᨡᩅᩮᩣ’’ᨲᩥ ᩉᨲ᩠ᨳᩴ ᨸᩈᩣᩁᩮᩈᩥ. ᨲᩮᩈᩴ ᨲᩣᩅᨴᩮᩅ ᨠᩮᩈᨾᩔᩪ ᩋᨶ᩠ᨲᩁᨵᩣᨿᩥᩴᩈᩩ ¶ . ᩋᨭ᩠ᨮ ᨸᩁᩥᨠ᩠ᨡᩣᩁᩣ ᩈᩁᩦᩁᩮ ᨸᨭᩥᨾᩩᨠ᩠ᨠᩣᩅ ᩋᩉᩮᩈᩩᩴ. ᨲᩮ ᩈᨭ᩠ᨮᩥᩅᩔᩥᨠᨲ᩠ᨳᩮᩁᩣ ᩅᩥᨿ ᩈᨲ᩠ᨳᩣᩁᩴ ᨸᩁᩥᩅᩣᩁᨿᩥᩴᩈᩩ. ᨶᨶ᩠ᨴᨲᩣᨸᩈᩮᩣ ᨸᨶ ᩅᩥᨠ᩠ᨡᩥᨲ᩠ᨲᨧᩥᨲ᩠ᨲᨲᩣᨿ ᩅᩥᩈᩮᩈᩴ ᨶᩣᨵᩥᨣᨬ᩠ᨨᩥ. ᨲᩔ ᨠᩥᩁ ᩋᩁᨱᩅᩥᩉᩣᩁᩥᨲ᩠ᨳᩮᩁᩔ ᨵᨾ᩠ᨾᩴ ᩈᩮᩣᨲᩩᩴ ᩌᩁᨴ᩠ᨵᨠᩣᩃᨲᩮᩣ ᨸᨭ᩠ᨮᩣᨿ – ‘‘ᩋᩉᩮᩣ ᩅᨲᩣᩉᨾ᩠ᨸᩥ ᩋᨶᩣᨣᨲᩮ ᩑᨠᩔ ᨻᩩᨴ᩠ᨵᩔ ᩈᩣᩈᨶᩮ ᩍᨾᩥᨶᩣ ᩈᩣᩅᨠᩮᨶ ᩃᨴ᩠ᨵᨣᩩᨱᩴ ᩃᨽᩮᨿ᩠ᨿ’’ᨶ᩠ᨲᩥ ᨧᩥᨲ᩠ᨲᩴ ᩏᨴᨸᩣᨴᩥ. ᩈᩮᩣ ᨲᩮᨶ ᩅᩥᨲᨠ᩠ᨠᩮᨶ ᨾᨣ᩠ᨣᨹᩃᨸᨭᩥᩅᩮᨵᩴ ᨠᩣᨲᩩᩴ ᨶᩣᩈᨠ᩠ᨡᩥ. ᨲᨳᩣᨣᨲᩴ ᨸᨶ ᩅᨶ᩠ᨴᩥᨲ᩠ᩅᩣ ᩋᨬ᩠ᨩᩃᩥᩴ ᨸᨣ᩠ᨣᨿ᩠ᩉ ᩈᨾ᩠ᨾᩩᨡᩮ ᨮᩥᨲᩮᩣ ᩑᩅᨾᩣᩉ – ‘‘ᨽᨶ᩠ᨲᩮ, ᨿᩮᨶ ᨽᩥᨠ᩠ᨡᩩᨶᩣ ᩍᩈᩥᨣᨱᩔ ᨸᩩᨸ᩠ᨹᩣᩈᨶᩣᨶᩩᨾᩮᩣᨴᨶᩣ ᨠᨲᩣ, ᨠᩮᩣ ᨶᩣᨾᩣᨿᩴ ᨲᩩᨾ᩠ᩉᩣᨠᩴ ᩈᩣᩈᨶᩮ’’ᨲᩥ? ‘‘ᩋᩁᨱᩅᩥᩉᩣᩁᩥᩋᨦ᩠ᨣᩮᨶ ᨧ ᨴᨠ᩠ᨡᩥᨱᩮᨿ᩠ᨿᨦ᩠ᨣᩮᨶ ᨧ ᩑᨲᨴᨣ᩠ᨣᨭ᩠ᨮᩣᨶᩴ ᨸᨲ᩠ᨲᩮᩣ ᩑᩈᩮᩣ ᨽᩥᨠ᩠ᨡᩪ’’ᨲᩥ. ‘‘ᨽᨶ᩠ᨲᩮ, ᨿ᩠ᩅᩣᨿᩴ ᨾᨿᩣ ᩈᨲ᩠ᨲᩣᩉᩴ ᨸᩩᨸ᩠ᨹᨧ᩠ᨨᨲ᩠ᨲᩴ ᨵᩣᩁᩮᨶ᩠ᨲᩮᨶ ¶ ᩈᨠ᩠ᨠᩣᩁᩮᩣ ᨠᨲᩮᩣ, ᨲᩮᨶ ᩋᨵᩥᨠᩣᩁᩮᨶ ᩋᨬ᩠ᨬᩴ ᩈᨾ᩠ᨸᨲ᩠ᨲᩥᩴ ᨶ ᨸᨲ᩠ᨳᩮᨾᩥ, ᩋᨶᩣᨣᨲᩮ ᨸᨶ ᩑᨠᩔ ᨻᩩᨴ᩠ᨵᩔ ᩈᩣᩈᨶᩮ ᩋᨿᩴ ᨳᩮᩁᩮᩣ ᩅᩥᨿ ᨴ᩠ᩅᩦᩉᨦ᩠ᨣᩮᩉᩥ ᩈᨾᨶ᩠ᨶᩣᨣᨲᩮᩣ ᩈᩣᩅᨠᩮᩣ ᨽᩅᩮᨿ᩠ᨿ’’ᨶ᩠ᨲᩥ ᨸᨲ᩠ᨳᨶᩴ ᩋᨠᩣᩈᩥ.

ᩈᨲ᩠ᨳᩣ ‘‘ᩈᨾᩥᨩ᩠ᨫᩥᩔᨲᩥ ᨶᩩ ᨡᩮᩣ ᩍᨾᩔ ᨲᩣᨸᩈᩔ ᨸᨲ᩠ᨳᨶᩣ’’ᨲᩥ ᩋᨶᩣᨣᨲᩴᩈᨬᩣᨱᩴ ᨸᩮᩈᩮᨲ᩠ᩅᩣ ᩒᩃᩮᩣᨠᩮᨶ᩠ᨲᩮᩣ ᨠᨸ᩠ᨸᩈᨲᩈᩉᩔᩴ ᩋᨲᩥᨠ᩠ᨠᨾᩥᨲ᩠ᩅᩣ ᩈᨾᩥᨩ᩠ᨫᨶᨠᨽᩣᩅᩴ ᨴᩥᩈ᩠ᩅᩣ, ‘‘ᨲᩣᨸᩈ, ᨶ ᨲᩮ ᩋᨿᩴ ᨸᨲ᩠ᨳᨶᩣ ᨾᩮᩣᨥᩴ ᨽᩅᩥᩔᨲᩥ, ᩋᨶᩣᨣᨲᩮ ᨠᨸ᩠ᨸᩈᨲᩈᩉᩔᩴ ᩋᨲᩥᨠ᩠ᨠᨾᩥᨲ᩠ᩅᩣ ᨣᩮᩣᨲᨾᩮᩣ ᨶᩣᨾ ᨻᩩᨴ᩠ᨵᩮᩣ ᩏᨸ᩠ᨸᨩ᩠ᨩᩥᩔᨲᩥ, ᨲᩔ ᩈᨶ᩠ᨲᩥᨠᩮ ᩈᨾᩥᨩ᩠ᨫᩥᩔᨲᩦ’’ᨲᩥ ᨵᨾ᩠ᨾᨠᨳᩴ ᨠᨳᩮᨲ᩠ᩅᩣ ᨽᩥᨠ᩠ᨡᩩᩈᨦ᩠ᨥᨸᩁᩥᩅᩩᨲᩮᩣ ᩌᨠᩣᩈᩴ ᨸᨠ᩠ᨡᨶ᩠ᨴᩥ. ᨶᨶ᩠ᨴᨲᩣᨸᩈᩮᩣ ᨿᩣᩅ ᨧᨠ᩠ᨡᩩᨸᨳᩴ ᨶ ᩈᨾᨲᩥᨠ᩠ᨠᨾᨲᩥ, ᨲᩣᩅ ᩈᨲ᩠ᨳᩩ ᨽᩥᨠ᩠ᨡᩩᩈᨦ᩠ᨥᩔ ᨧ ᩋᨬ᩠ᨩᩃᩥᩴ ᨸᨣ᩠ᨣᩉᩮᨲ᩠ᩅᩣ ᩋᨭ᩠ᨮᩣᩈᩥ. ᩈᩮᩣ ᩋᨸᩁᨽᩣᨣᩮ ᨠᩣᩃᩮᨶ ᨠᩣᩃᩴ ᩈᨲ᩠ᨳᩣᩁᩴ ᩏᨸᩈᨦ᩠ᨠᨾᩥᨲ᩠ᩅᩣ ᨵᨾ᩠ᨾᩴ ᩈᩩᨱᩥᨲ᩠ᩅᩣ ᩋᨸᩁᩥᩉᩦᨶᨩ᩠ᨫᩣᨶᩮᩣᩅ ᨠᩣᩃᩴ ᨠᨲ᩠ᩅᩣ ᨻᩕᩉ᩠ᨾᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ. ᨲᨲᩮᩣ ᨸᨶ ᨧᩩᨲᩮᩣ ᩋᨸᩁᩣᨶᩥᨸᩥ ᨸᨬ᩠ᨧ ᨩᩣᨲᩥᩈᨲᩣᨶᩥ ᨸᨻ᩠ᨻᨩᩥᨲ᩠ᩅᩣ ᩌᩁᨬ᩠ᨬᨠᩮᩣᩅ ᩋᩉᩮᩣᩈᩥ, ᨠᩔᨸᩈᨾ᩠ᨾᩣᩈᨾ᩠ᨻᩩᨴ᩠ᨵᨠᩣᩃᩮᨸᩥ ᨸᨻ᩠ᨻᨩᩥᨲ᩠ᩅᩣ ᩌᩁᨬ᩠ᨬᨠᩮᩣ ᩉᩩᨲ᩠ᩅᩣ ᨣᨲᨸᨧ᩠ᨧᩣᨣᨲᩅᨲ᩠ᨲᩴ ᨸᩪᩁᩮᩈᩥ. ᩑᨲᩴ ᨠᩥᩁ ᩅᨲ᩠ᨲᩴ ᩋᨸᩁᩥᨸᩪᩁᩮᨲ᩠ᩅᩣ ᨾᩉᩣᩈᩣᩅᨠᨽᩣᩅᩴ ᨸᩣᨸᩩᨱᨶ᩠ᨲᩣ ᨶᩣᨾ ᨶᨲ᩠ᨳᩥ, ᨣᨲᨸᨧ᩠ᨧᩣᨣᨲᩅᨲ᩠ᨲᩴ ᨸᨶ ᩌᨣᨾᨭ᩠ᨮᨠᨳᩣᩈᩩ ᩅᩩᨲ᩠ᨲᨶᨿᩮᨶᩮᩅ ᩅᩮᨴᩥᨲᨻ᩠ᨻᩴ. ᩈᩮᩣ ᩅᩦᩈᨲᩥᩅᩔᩈᩉᩔᩣᨶᩥ ᨣᨲᨸᨧ᩠ᨧᩣᨣᨲᩅᨲ᩠ᨲᩴ ᨸᩪᩁᩮᨲ᩠ᩅᩣ ᨠᩣᩃᩴ ᨠᨲ᩠ᩅᩣ ᨲᩣᩅᨲᩥᩴᩈᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩥ.

ᩑᩅᩴ ᩈᩮᩣ ᨲᩣᩅᨲᩥᩴᩈᨽᩅᨶᩮ ᩋᨸᩁᩣᨸᩁᩴ ᩏᨸ᩠ᨸᨩ᩠ᨩᨶᩅᩈᩮᨶ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᨲᨲᩮᩣ ᨧᩩᨲᩮᩣ ᨾᨶᩩᩔᩃᩮᩣᨠᩮ ᩋᨶᩮᨠᩈᨲᨠ᩠ᨡᨲ᩠ᨲᩩᩴ ᨧᨠ᩠ᨠᩅᨲ᩠ᨲᩥᩁᩣᨩᩣ ᨸᨴᩮᩈᩁᩣᨩᩣ ᨧ ᩉᩩᨲ᩠ᩅᩣ ᩏᩊᩣᩁᩴ ᨾᨶᩩᩔᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩋᨾ᩠ᩉᩣᨠᩴ ᨽᨣᩅᨲᩮᩣ ᩏᨸ᩠ᨸᨶ᩠ᨶᨠᩣᩃᩮ ᩈᩣᩅᨲ᩠ᨳᩥᨿᩴ ᩈᩩᨾᨶᩈᩮᨭ᩠ᨮᩥᩔ ᨣᩮᩉᩮ ᩋᨶᩣᨳᨸᩥᨱ᩠ᨯᩥᨠᩔ ¶ ᨠᨶᩥᨭ᩠ᨮᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩥ. ᩈᩩᨽᩪᨲᩦᨲᩥᩔ ᨶᩣᨾᩴ ᩋᩉᩮᩣᩈᩥ.

ᨲᩮᨶ ¶ ᨧ ᩈᨾᨿᩮᨶ ᩋᨾ᩠ᩉᩣᨠᩴ ᨽᨣᩅᩣ ᩃᩮᩣᨠᩮ ᩏᨸ᩠ᨸᨩ᩠ᨩᩥᨲ᩠ᩅᩣ ᨸᩅᨲ᩠ᨲᩥᨲᩅᩁᨵᨾ᩠ᨾᨧᨠ᩠ᨠᩮᩣ ᩋᨶᩩᨸᩩᨻ᩠ᨻᩮᨶ ᩁᩣᨩᨣᩉᩴ ᨣᨶ᩠ᨲ᩠ᩅᩣ ᨲᨲ᩠ᨳ ᩅᩮᩊᩩᩅᨶᨸᨭᩥᨣ᩠ᨣᩉᨱᩣᨴᩥᨶᩣ ᩃᩮᩣᨠᩣᨶᩩᨣ᩠ᨣᩉᩴ ᨠᩁᩮᩣᨶ᩠ᨲᩮᩣ ᩁᩣᨩᨣᩉᩴ ᩏᨸᨶᩥᩔᩣᨿ ᩈᩦᨲᩅᨶᩮ ᩅᩥᩉᩣᩈᩥ. ᨲᨴᩣ ᩋᨶᩣᨳᨸᩥᨱ᩠ᨯᩥᨠᩮᩣ ᩈᩮᨭ᩠ᨮᩥ ᩈᩣᩅᨲ᩠ᨳᩥᨿᩴ ᩏᨭ᩠ᨮᩣᨶᨠᩴ ᨽᨱ᩠ᨯᩴ ᨣᩉᩮᨲ᩠ᩅᩣ ᩋᨲ᩠ᨲᨶᩮᩣ ᩈᩉᩣᨿᩔ ᩁᩣᨩᨣᩉᩈᩮᨭ᩠ᨮᩥᨶᩮᩣ ᨣᩮᩉᩴ ᨣᨶ᩠ᨲ᩠ᩅᩣ ᨻᩩᨴ᩠ᨵᩩᨸ᩠ᨸᩣᨴᩴ ᩈᩩᨲ᩠ᩅᩣ ᩈᨲ᩠ᨳᩣᩁᩴ ᩈᩦᨲᩅᨶᩮ ᩅᩥᩉᩁᨶ᩠ᨲᩴ ᩏᨸᩈᨦ᩠ᨠᨾᩥᨲ᩠ᩅᩣ ᨸᨮᨾᨴᩔᨶᩮᨶᩮᩅ ᩈᩮᩣᨲᩣᨸᨲ᩠ᨲᩥᨹᩃᩮ ᨸᨲᩥᨭ᩠ᨮᩣᨿ ¶ ᩈᨲ᩠ᨳᩣᩁᩴ ᩈᩣᩅᨲ᩠ᨳᩥᩴ ᩌᨣᨾᨶᨲ᩠ᨳᩣᨿ ᨿᩣᨧᩥᨲ᩠ᩅᩣ ᨲᨲᩮᩣ ᨸᨬ᩠ᨧᨧᨲ᩠ᨲᩣᩃᩦᩈᨿᩮᩣᨩᨶᩮ ᨾᨣ᩠ᨣᩮ ᨿᩮᩣᨩᨶᩮ ᨿᩮᩣᨩᨶᩮ ᩈᨲᩈᩉᩔᨸᩁᩥᨧ᩠ᨧᩣᨣᩮᨶ ᩅᩥᩉᩣᩁᩮ ᨸᨲᩥᨭ᩠ᨮᩣᨸᩮᨲ᩠ᩅᩣ ᩈᩣᩅᨲ᩠ᨳᩥᨿᩴ ᩋᨭ᩠ᨮᨠᩁᩦᩈᨸ᩠ᨸᨾᩣᨱᩴ ᨩᩮᨲᩔ ᨠᩩᨾᩣᩁᩔ ᩏᨿ᩠ᨿᩣᨶᨽᩪᨾᩥᩴ ᨠᩮᩣᨭᩥᩈᨶ᩠ᨳᩣᩁᩮᨶ ᨠᩥᨱᩥᨲ᩠ᩅᩣ ᨲᨲ᩠ᨳ ᨽᨣᩅᨲᩮᩣ ᩅᩥᩉᩣᩁᩴ ᨠᩣᩁᩮᨲ᩠ᩅᩣ ᩋᨴᩣᩈᩥ. ᩅᩥᩉᩣᩁᨾᩉᨴᩥᩅᩈᩮ ᩋᨿᩴ ᩈᩩᨽᩪᨲᩥᨠᩩᨭᩩᨾ᩠ᨻᩥᨠᩮᩣ ᩋᨶᩣᨳᨸᩥᨱ᩠ᨯᩥᨠᩈᩮᨭ᩠ᨮᩥᨶᩣ ᩈᨴ᩠ᨵᩥᩴ ᨣᨶ᩠ᨲ᩠ᩅᩣ ᨵᨾ᩠ᨾᩴ ᩈᩩᨱᨶ᩠ᨲᩮᩣ ᩈᨴ᩠ᨵᩴ ᨸᨭᩥᩃᨽᩥᨲ᩠ᩅᩣ ᨸᨻ᩠ᨻᨩᩥ. ᩈᩮᩣ ᩏᨸᩈᨾ᩠ᨸᨶ᩠ᨶᩮᩣ ᨴ᩠ᩅᩮ ᨾᩣᨲᩥᨠᩣ ᨸᨣᩩᨱᩣ ᨠᨲ᩠ᩅᩣ ᨠᨾ᩠ᨾᨭ᩠ᨮᩣᨶᩴ ᨠᨳᩣᨸᩮᨲ᩠ᩅᩣ ᩋᩁᨬ᩠ᨬᩮ ᩈᨾᨱᨵᨾ᩠ᨾᩴ ᨠᩁᩮᩣᨶ᩠ᨲᩮᩣ ᨾᩮᨲ᩠ᨲᩣᨫᩣᨶᩴ ᨶᩥᨻ᩠ᨻᨲ᩠ᨲᩮᨲ᩠ᩅᩣ ᨲᩴ ᨸᩣᨴᨠᩴ ᨠᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᩋᩁᩉᨲ᩠ᨲᩴ ᨸᩣᨸᩩᨱᩥ.

ᩈᩮᩣ ᨵᨾ᩠ᨾᩴ ᨴᩮᩈᩮᨶ᩠ᨲᩮᩣ ᨿᩈ᩠ᨾᩣ ᩈᨲ᩠ᨳᩣᩁᩣ ᨴᩮᩈᩥᨲᨶᩥᨿᩣᨾᩮᨶ ᩋᨶᩮᩣᨴᩥᩔᨠᩴ ᨠᨲ᩠ᩅᩣ ᨴᩮᩈᩮᨲᩥ, ᨲᩈ᩠ᨾᩣ ᩋᩁᨱᩅᩥᩉᩣᩁᩦᨶᩴ ᩋᨣ᩠ᨣᩮᩣ ᨶᩣᨾ ᨩᩣᨲᩮᩣ. ᨿᩈ᩠ᨾᩣ ᨧ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᨥᩁᩮ ᨥᩁᩮ ᨾᩮᨲ᩠ᨲᩣᨫᩣᨶᩴ ᩈᨾᩣᨸᨩ᩠ᨩᩥᨲ᩠ᩅᩣ ᩅᩩᨭ᩠ᨮᩣᨿ ᨽᩥᨠ᩠ᨡᩴ ᨸᨭᩥᨣ᩠ᨣᨱ᩠ᩉᩣᨲᩥ ‘‘ᩑᩅᩴ ᨴᩣᨿᨠᩣᨶᩴ ᨾᩉᨸ᩠ᨹᩃᩴ ᨽᩅᩥᩔᨲᩦ’’ᨲᩥ, ᨲᩈ᩠ᨾᩣ ᨴᨠ᩠ᨡᩥᨱᩮᨿ᩠ᨿᩣᨶᩴ ᩋᨣ᩠ᨣᩮᩣ ᨶᩣᨾ ᨩᩣᨲᩮᩣ. ᨲᩮᨶ ᨶᩴ ᨽᨣᩅᩣ ‘‘ᩑᨲᨴᨣ᩠ᨣᩴ, ᨽᩥᨠ᩠ᨡᩅᩮ, ᨾᨾ ᩈᩣᩅᨠᩣᨶᩴ ᨽᩥᨠ᩠ᨡᩪᨶᩴ ᩋᩁᨱᩅᩥᩉᩣᩁᩦᨶᩴ ᨴᨠ᩠ᨡᩥᨱᩮᨿ᩠ᨿᩣᨶᨬ᩠ᨧ ᨿᨴᩥᨴᩴ ᩈᩩᨽᩪᨲᩦ’’ᨲᩥ (ᩋ. ᨶᩥ. ᪑.᪑᪙᪘, ᪒᪐᪑) ᨴ᩠ᩅᨿᨦ᩠ᨣᩈᨾᨶ᩠ᨶᩣᨣᨲᩮ ᩋᨣ᩠ᨣᨭ᩠ᨮᩣᨶᩮ ᨮᨸᩮᩈᩥ. ᩑᩅᨾᨿᩴ ᨾᩉᩣᨳᩮᩁᩮᩣ ᩋᨲ᩠ᨲᨶᩣ ᨸᩪᩁᩥᨲᨸᩣᩁᨾᩦᨶᩴ ᨹᩃᩔ ᨾᨲ᩠ᨳᨠᩴ ᩋᩁᩉᨲ᩠ᨲᩴ ᨸᨲ᩠ᩅᩣ ᩃᩮᩣᨠᩮ ᩋᨽᩥᨬ᩠ᨬᩣᨲᩮᩣ ᩋᨽᩥᩃᨠ᩠ᨡᩥᨲᩮᩣ ᩉᩩᨲ᩠ᩅᩣ ᨻᩉᩩᨩᨶᩉᩥᨲᩣᨿ ᨩᨶᨸᨴᨧᩣᩁᩥᨠᩴ ᨧᩁᨶ᩠ᨲᩮᩣ ᩋᨶᩩᨸᩩᨻ᩠ᨻᩮᨶ ᩁᩣᨩᨣᩉᩴ ᩋᨣᨾᩣᩈᩥ.

ᩁᩣᨩᩣ ᨻᩥᨾ᩠ᨻᩥᩈᩣᩁᩮᩣ ᨳᩮᩁᩔ ᩌᨣᨾᨶᩴ ᩈᩩᨲ᩠ᩅᩣ ᩏᨸᩈᨦ᩠ᨠᨾᩥᨲ᩠ᩅᩣ ᩅᨶ᩠ᨴᩥᨲ᩠ᩅᩣ ‘‘ᩍᨵᩮᩅ, ᨽᨶ᩠ᨲᩮ, ᩅᩈᨳ, ᩅᩈᨶᨭ᩠ᨮᩣᨶᩴ ᩅᩮᩣ ᨠᩁᩥᩔᩣᨾᩦ’’ᨲᩥ ᩅᨲ᩠ᩅᩣ ᨸᨠ᩠ᨠᨶ᩠ᨲᩮᩣ ᩅᩥᩔᩁᩥ. ᨳᩮᩁᩮᩣ ᩈᩮᨶᩣᩈᨶᩴ ᩋᩃᨽᨶ᩠ᨲᩮᩣ ᩋᨻ᩠ᨽᩮᩣᨠᩣᩈᩮ ᩅᩦᨲᩥᨶᩣᨾᩮᩈᩥ. ᨳᩮᩁᩔᩣᨶᩩᨽᩣᩅᩮᨶ ᨴᩮᩅᩮᩣ ᨶ ᩅᩔᨲᩥ. ᨾᨶᩩᩔᩣ ᩋᩅᩩᨭ᩠ᨮᩥᨲᩣᨿ ᩏᨸᨴ᩠ᨴᩩᨲᩣ ᩁᨬ᩠ᨬᩮᩣ ᨶᩥᩅᩮᩈᨶᨴ᩠ᩅᩣᩁᩮ ᩏᨠ᩠ᨠᩩᨭ᩠ᨮᩥᩴ ᩋᨠᩴᩈᩩ. ᩁᩣᨩᩣ ‘‘ᨠᩮᨶ ᨶᩩ ᨡᩮᩣ ᨠᩣᩁᨱᩮᨶ ᨴᩮᩅᩮᩣ ᨶ ᩅᩔᨲᩦ’’ᨲᩥ ᩅᩦᨾᩴᩈᨶ᩠ᨲᩮᩣ ‘‘ᨳᩮᩁᩔ ᩋᨻ᩠ᨽᩮᩣᨠᩣᩈᩅᩣᩈᩮᨶ ᨾᨬ᩠ᨬᩮ ᨶ ᩅᩔᨲᩦ’’ᨲᩥ ᨧᩥᨶ᩠ᨲᩮᨲ᩠ᩅᩣ ᨲᩔ ᨸᨱ᩠ᨱᨠᩩᨭᩥᩴ ᨠᩣᩁᩣᨸᩮᨲ᩠ᩅᩣ ‘‘ᩍᨾᩥᩔᩴ, ᨽᨶ᩠ᨲᩮ, ᨸᨱ᩠ᨱᨠᩩᨭᩥᨿᩴ ᩅᩈᨳᩣ’’ᨲᩥ ᩅᨲ᩠ᩅᩣ ᩅᨶ᩠ᨴᩥᨲ᩠ᩅᩣ ᨸᨠ᩠ᨠᩣᨾᩥ. ᨳᩮᩁᩮᩣ ᨠᩩᨭᩥᩴ ᨸᩅᩥᩈᩥᨲ᩠ᩅᩣ ᨲᩥᨱᩈᨶ᩠ᨳᩣᩁᨠᩮ ᨸᩃ᩠ᩃᨦ᩠ᨠᩮᨶ ᨶᩥᩈᩦᨴᩥ. ᨲᨴᩣ ᨴᩮᩅᩮᩣ ᨳᩮᩣᨠᩴ ¶ ᨳᩮᩣᨠᩴ ᨹᩩᩈᩣᨿᨲᩥ, ᨶ ᩈᨾ᩠ᨾᩣᨵᩣᩁᩴ ᩋᨶᩩᨸᩅᩮᨧ᩠ᨨᨲᩥ. ᩋᨳ ᨳᩮᩁᩮᩣ ᩃᩮᩣᨠᩔ ᩋᩅᩩᨭ᩠ᨮᩥᨠᨽᨿᩴ ᩅᩥᨵᨾᩥᨲᩩᨠᩣᨾᩮᩣ ¶ ᩋᨲ᩠ᨲᨶᩮᩣ ᩋᨩ᩠ᨫᨲ᩠ᨲᩥᨠᨻᩣᩉᩥᩁᩅᨲ᩠ᨳᩩᨠᩔ ¶ ᨸᩁᩥᩔᨿᩔ ᩋᨽᩣᩅᩴ ᨸᩅᩮᨴᩮᨶ᩠ᨲᩮᩣ ‘‘ᨨᨶ᩠ᨶᩣ ᨾᩮ ᨠᩩᨭᩥᨠᩣ’’ᨲᩥ (ᨳᩮᩁᨣᩣ. ᪑) ᨣᩣᨳᨾᩣᩉ. ᨲᩔᨲ᩠ᨳᩮᩣ ᨳᩮᩁᨣᩣᨳᩣᨿᩴ ᩅᩩᨲ᩠ᨲᩮᩣᨿᩮᩅ.

ᨠᩈ᩠ᨾᩣ ᨸᨶᩮᨲᩮ ᨾᩉᩣᨳᩮᩁᩣ ᩋᨲ᩠ᨲᨶᩮᩣ ᨣᩩᨱᩮ ᨸᨠᩣᩈᩮᨶ᩠ᨲᩦᨲᩥ? ᩍᨾᩥᨶᩣ ᨴᩦᨥᩮᨶ ᩋᨴ᩠ᨵᩩᨶᩣ ᩋᨶᨵᩥᨣᨲᨸᩩᨻ᩠ᨻᩴ ᨸᩁᨾᨣᨾ᩠ᨽᩦᩁᩴ ᩋᨲᩥᩅᩥᨿ ᩈᨶ᩠ᨲᩴ ᨸᨱᩦᨲᩴ ᩋᨲ᩠ᨲᨶᩣ ᩋᨵᩥᨣᨲᩃᩮᩣᨠᩩᨲ᩠ᨲᩁᨵᨾ᩠ᨾᩴ ᨸᨧ᩠ᨧᩅᩮᨠ᩠ᨡᩥᨲ᩠ᩅᩣ ᨸᩦᨲᩥᩅᩮᨣᩈᨾᩩᩔᩣᩉᩥᨲᩏᨴᩣᨶᨴᩦᨸᨶᨲ᩠ᨳᩴ ᩈᩣᩈᨶᩔ ᨶᩥᨿ᩠ᨿᩣᨶᩥᨠᨽᩣᩅᩅᩥᨽᩣᩅᨶᨲ᩠ᨳᨬ᩠ᨧ ᨸᩁᨾᨸ᩠ᨸᩥᨧ᩠ᨨᩣ ᩋᩁᩥᨿᩣ ᩋᨲ᩠ᨲᨶᩮᩣ ᨣᩩᨱᩮ ᨸᨠᩣᩈᩮᨶ᩠ᨲᩥ. ᨿᨳᩣ ᨲᩴ ᩃᩮᩣᨠᨶᩣᨳᩮᩣ ᨻᩮᩣᨵᨶᩮᨿ᩠ᨿᩣᨶᩴ ᩋᨩ᩠ᨫᩣᩈᨿᩅᩈᩮᨶ ‘‘ᨴᩈᨻᩃᩈᨾᨶ᩠ᨶᩣᨣᨲᩮᩣ, ᨽᩥᨠ᩠ᨡᩅᩮ, ᨲᨳᩣᨣᨲᩮᩣ ᨧᨲᩩᩅᩮᩈᩣᩁᨩ᩠ᨩᩅᩥᩈᩣᩁᨴᩮᩣ’’ᨲᩥᩌᨴᩥᨶᩣ (ᩋ. ᨶᩥ. ᪑᪐.᪒᪑; ᨾ. ᨶᩥ. ᪑. ᪑᪔᪘ ᩋᨲ᩠ᨳᨲᩮᩣ ᩈᨾᩣᨶᩴ) ᩋᨲ᩠ᨲᨶᩮᩣ ᨣᩩᨱᩮ ᨸᨠᩣᩈᩮᨲᩥ. ᩑᩅᨾᨿᩴ ᨳᩮᩁᩔ ᩋᨬ᩠ᨬᩣᨻ᩠ᨿᩣᨠᩁᨱᨣᩣᨳᩣᨸᩥ ᩋᩉᩮᩣᩈᩦᨲᩥ.

᪑. ᩑᩅᩴ ᩈᩮᩣ ᨸᨲ᩠ᨲᩋᩁᩉᨲ᩠ᨲᨹᩃᩮᩣ ᨸᨲ᩠ᨲᩑᨲᨴᨣ᩠ᨣᨭ᩠ᨮᩣᨶᩮᩣ ᨧ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨾᩣᩉ. ᨲᨲ᩠ᨳ ᩉᩥᨾᩅᨶ᩠ᨲᩔᩣᨲᩥ ᩉᩥᨾᩣᩃᨿᨸᨻ᩠ᨻᨲᩔ ᩋᩅᩥᨴᩪᩁᩮ ᩌᩈᨶ᩠ᨶᩮ ᩈᨾᩦᨸᩮ ᨸᨻ᩠ᨻᨲᨸᩣᨴᩮ ᨾᨶᩩᩔᩣᨶᩴ ᨣᨾᨶᩣᨣᨾᨶᩈᨾ᩠ᨸᨶ᩠ᨶᩮ ᩈᨬ᩠ᨧᩁᨱᨭ᩠ᨮᩣᨶᩮᨲᩥ ᩋᨲ᩠ᨳᩮᩣ. ᨶᩥᩈᨽᩮᩣ ᨶᩣᨾ ᨸᨻ᩠ᨻᨲᩮᩣᨲᩥ ᨸᨻ᩠ᨻᨲᩣᨶᩴ ᨩᩮᨭ᩠ᨮᨲ᩠ᨲᩣ ᨶᩣᨾᩮᨶ ᨶᩥᩈᨽᩮᩣ ᨶᩣᨾ ᩈᩮᩃᨾᨿᨸᨻ᩠ᨻᨲᩮᩣ ᩋᩉᩮᩣᩈᩦᨲᩥ ᩈᨾ᩠ᨻᨶ᩠ᨵᩮᩣ. ᩋᩔᨾᩮᩣ ᩈᩩᨠᨲᩮᩣ ᨾᨿ᩠ᩉᨶ᩠ᨲᩥ ᨲᨲ᩠ᨳ ᨸᨻ᩠ᨻᨲᩮ ᨾᨿ᩠ᩉᩴ ᩅᩈᨶᨲ᩠ᨳᩣᨿ ᩋᩔᨾᩮᩣ ᩋᩁᨬ᩠ᨬᩣᩅᩣᩈᩮᩣ ᩈᩩᨭ᩠ᨮᩩ ᨠᨲᩮᩣ. ᨠᩩᨭᩥᩁᨲ᩠ᨲᩥᨭ᩠ᨮᩣᨶᨴᩥᩅᩣᨭ᩠ᨮᩣᨶᩅᨲᩥᨸᩁᩥᨠ᩠ᨡᩮᨸᩣᨴᩥᩅᩈᩮᨶ ᩈᩩᨶ᩠ᨴᩁᩣᨠᩣᩁᩮᨶ ᨠᨲᩮᩣᨲᩥ ᩋᨲ᩠ᨳᩮᩣ. ᨸᨱ᩠ᨱᩈᩣᩃᩣ ᩈᩩᨾᩣᨸᩥᨲᩣᨲᩥ ᨸᨱ᩠ᨱᩮᩉᩥ ᨨᩣᨴᩥᨲᩣ ᩈᩣᩃᩣ ᨾᨿ᩠ᩉᩴ ᨶᩥᩅᩣᩈᨶᨲ᩠ᨳᩣᨿ ᩈᩩᨭ᩠ᨮᩩ ᨾᩣᨸᩥᨲᩣ ᨶᩥᨭ᩠ᨮᩣᨸᩥᨲᩣᨲᩥ ᩋᨲ᩠ᨳᩮᩣ.

᪒. ᨠᩮᩣᩈᩥᨿᩮᩣ ᨶᩣᨾ ᨶᩣᨾᩮᨶᩣᨲᩥ ᨾᩣᨲᩣᨸᩥᨲᩪᩉᩥ ᨠᨲᨶᩣᨾᨵᩮᨿ᩠ᨿᩮᨶ ᨠᩮᩣᩈᩥᨿᩮᩣ ᨶᩣᨾ. ᩏᨣ᩠ᨣᨲᩣᨸᨶᩮᩣ ᨸᩣᨠᨭᨲᨸᩮᩣ ᨥᩮᩣᩁᨲᨸᩮᩣ. ᩑᨠᩣᨠᩥᨿᩮᩣ ᩋᨬ᩠ᨬᩮᩈᩴ ᩋᨽᩣᩅᩣ ᩋᩉᩴ ᩑᩅ ᩑᨠᩮᩣ. ᩋᨴᩩᨲᩥᨿᩮᩣ ᨴᩩᨲᩥᨿᨲᩣᨸᩈᩁᩉᩥᨲᩮᩣ ᨩᨭᩥᩃᩮᩣ ᨩᨭᩣᨵᩣᩁᩦ ᨲᩣᨸᩈᩮᩣ ᨲᨴᩣ ᨲᩈ᩠ᨾᩥᩴ ᨠᩣᩃᩮ ᨶᩥᩈᨽᩮ ᨸᨻ᩠ᨻᨲᩮ ᩅᩈᩣᨾᩥ ᩅᩥᩉᩁᩣᨾᩦᨲᩥ ᩈᨾ᩠ᨻᨶ᩠ᨵᩮᩣ.

᪓. ᨹᩃᩴ ᨾᩪᩃᨬ᩠ᨧ ᨸᨱ᩠ᨱᨬ᩠ᨧ, ᨶ ᨽᩩᨬ᩠ᨩᩣᨾᩥ ᩋᩉᩴ ᨲᨴᩣᨲᩥ ᨲᨴᩣ ᨲᩈ᩠ᨾᩥᩴ ᨶᩥᩈᨽᨸᨻ᩠ᨻᨲᩮ ᩅᩈᨶᨠᩣᩃᩮ ᨲᩥᨱ᩠ᨯᩩᨠᩣᨴᩥᨹᩃᩴ ᨾᩩᩊᩣᩃᩣᨴᩥᨾᩪᩃᩴ, ᨠᩣᩁᨸᨱ᩠ᨱᩣᨴᩥᨸᨱ᩠ᨱᨬ᩠ᨧ ᩁᩩᨠ᩠ᨡᨲᩮᩣ ¶ ᩒᨧᩥᨶᩥᨲ᩠ᩅᩣ ᨶ ᨽᩩᨬ᩠ᨩᩣᨾᩦᨲᩥ ᩋᨲ᩠ᨳᩮᩣ. ᩑᩅᩴ ᩈᨲᩥ ᨠᨳᩴ ᨩᩦᩅᨲᩦᨲᩥ ᨲᩴ ᨴᩔᩮᨶ᩠ᨲᩮᩣ ᨸᩅᨲ᩠ᨲᩴᩅ ᩈᩩᨸᩣᨲᩣᩉᨶ᩠ᨲᩥ ¶ ᩌᩉ. ᨲᨲ᩠ᨳ ᨸᩅᨲ᩠ᨲᩴ ᩈᨿᨾᩮᩅ ᨩᩣᨲᩴ ᩈᩩᨸᩣᨲᩴ ᩋᨲ᩠ᨲᨶᩮᩣ ᨵᨾ᩠ᨾᨲᩣᨿ ᨸᨲᩥᨲᩴ ᨸᨱ᩠ᨱᩣᨴᩥᨠᩴ ᨶᩥᩔᩣᨿ ᩌᩉᩣᩁᩴ ᨠᨲ᩠ᩅᩣ ᩋᩉᩴ ᨲᩣᩅᨴᩮ ᨲᩈ᩠ᨾᩥᩴ ᨠᩣᩃᩮ ᨩᩦᩅᩣᨾᩥ ᨩᩦᩅᩥᨠᩴ ᨠᨸ᩠ᨸᩮᨾᩦᨲᩥ ᩈᨾ᩠ᨻᨶ᩠ᨵᩮᩣ. ‘‘ᨸᩅᨲ᩠ᨲᨸᨱ᩠ᨯᩩᨸᨱ᩠ᨱᩣᨶᩦ’’ᨲᩥ ¶ ᩅᩣ ᨸᩣᨮᩮᩣ, ᨲᩔ ᩈᨿᨾᩮᩅ ᨸᨲᩥᨲᩣᨶᩥ ᨸᨱ᩠ᨯᩩᨸᨱ᩠ᨱᩣᨶᩥ ᩁᩩᨠ᩠ᨡᨸᨲ᩠ᨲᩣᨶᩥ ᩏᨸᨶᩥᩔᩣᨿ ᨩᩦᩅᩣᨾᩦᨲᩥ ᩋᨲ᩠ᨳᩮᩣ.

᪔. ᨶᩣᩉᩴ ᨠᩮᩣᨸᩮᨾᩥ ᩌᨩᩦᩅᨶ᩠ᨲᩥ ᩋᩉᩴ ᨩᩦᩅᩥᨲᩴ ᨧᨩᨾᩣᨶᩮᩣᨸᩥ ᨸᩁᩥᨧ᩠ᨧᩣᨣᩴ ᨠᩩᩁᩩᨾᩣᨶᩮᩣᨸᩥ ᨲᨱ᩠ᩉᩣᩅᩈᩮᨶ ᨹᩃᨾᩪᩃᩣᨴᩥᩌᩉᩣᩁᨸᩁᩥᨿᩮᩈᨶᩣᨿ ᩈᨾ᩠ᨾᩣ ᩌᨩᩦᩅᩴ ᨶ ᨠᩮᩣᨸᩮᨾᩥ ᨶ ᨶᩣᩈᩮᨾᩦᨲᩥ ᩈᨾ᩠ᨻᨶ᩠ᨵᩮᩣ. ᩌᩁᩣᨵᩮᨾᩥ ᩈᨠᩴ ᨧᩥᨲ᩠ᨲᨶ᩠ᨲᩥ ᩈᨠᩴ ᨧᩥᨲ᩠ᨲᩴ ᩋᨲ᩠ᨲᨶᩮᩣ ᨾᨶᩴ ᩋᨸ᩠ᨸᩥᨧ᩠ᨨᨲᩣᨿ ᩈᨶ᩠ᨲᩩᨭ᩠ᨮᩥᨿᩣ ᨧ ᩌᩁᩣᨵᩮᨾᩥ ᨸᩈᩣᨴᩮᨾᩥ. ᩅᩥᩅᨩ᩠ᨩᩮᨾᩥ ᩋᨶᩮᩈᨶᨶ᩠ᨲᩥ ᩅᩮᨩ᩠ᨩᨠᨾ᩠ᨾᨴᩪᨲᨠᨾ᩠ᨾᩣᨴᩥᩅᩈᩮᨶ ᩋᨶᩮᩈᨶᩴ ᩋᨿᩩᨲ᩠ᨲᨸᩁᩥᨿᩮᩈᨶᩴ ᩅᩥᩅᨩ᩠ᨩᩮᨾᩥ ᨴᩪᩁᩴ ᨠᩁᩮᩣᨾᩥ.

᪕. ᩁᩣᨣᩪᨸᩈᩴᩉᩥᨲᩴ ᨧᩥᨲ᩠ᨲᨶ᩠ᨲᩥ ᨿᨴᩣ ᨿᩈ᩠ᨾᩥᩴ ᨠᩣᩃᩮ ᨾᨾ ᩁᩣᨣᩮᨶ ᩈᨾ᩠ᨸᨿᩩᨲ᩠ᨲᩴ ᨧᩥᨲ᩠ᨲᩴ ᩏᨸ᩠ᨸᨩ᩠ᨩᨲᩥ, ᨲᨴᩣ ᩈᨿᨾᩮᩅ ᩋᨲ᩠ᨲᨶᩣᨿᩮᩅ ᨸᨧ᩠ᨧᩅᩮᨠ᩠ᨡᩣᨾᩥ ᨬᩣᨱᩮᨶ ᨸᨭᩥᩅᩮᨠ᩠ᨡᩥᨲ᩠ᩅᩣ ᩅᩥᨶᩮᩣᨴᩮᨾᩥ. ᩑᨠᨣ᩠ᨣᩮᩣ ᨲᩴ ᨴᨾᩮᨾᩉᨶ᩠ᨲᩥ ᩋᩉᩴ ᩑᨠᩈ᩠ᨾᩥᩴ ᨠᨾ᩠ᨾᨭ᩠ᨮᩣᨶᩣᩁᨾ᩠ᨾᨱᩮ ᩋᨣ᩠ᨣᩮᩣ ᩈᨾᩣᩉᩥᨲᩮᩣ ᨲᩴ ᩁᩣᨣᨧᩥᨲ᩠ᨲᩴ ᨴᨾᩮᨾᩥ ᨴᨾᨶᩴ ᨠᩁᩮᩣᨾᩥ.

᪖. ᩁᨩ᩠ᨩᩈᩮ ᩁᨩ᩠ᨩᨶᩦᨿᩮ ᨧᩣᨲᩥ ᩁᨩ᩠ᨩᨶᩦᨿᩮ ᩋᩃ᩠ᩃᩦᨿᩥᨲᨻ᩠ᨻᩮ ᩁᩪᨸᩣᩁᨾ᩠ᨾᨱᩣᨴᩥᩅᨲ᩠ᨳᩩᩈ᩠ᨾᩥᩴ ᩁᨩ᩠ᨩᩈᩮ ᩋᩃ᩠ᩃᩦᨶᩮᩣ ᩋᩈᩥ ᨽᩅᩈᩥ. ᨴᩩᩔᨶᩦᨿᩮ ᨧ ᨴᩩᩔᩈᩮᨲᩥ ᨴᩪᩈᩥᨲᨻ᩠ᨻᩮ ᨴᩮᩣᩈᨠᩁᨱᩅᨲ᩠ᨳᩩᩈ᩠ᨾᩥᩴ ᨴᩪᩈᨠᩮᩣ ᩋᩈᩥ. ᨾᩩᨿ᩠ᩉᩈᩮ ᨾᩮᩣᩉᨶᩦᨿᩮ ᨧᩣᨲᩥ ᨾᩮᩣᩉᩥᨲᨻ᩠ᨻᩮ ᨾᩮᩣᩉᨠᩁᨱᩅᨲ᩠ᨳᩩᩈ᩠ᨾᩥᩴ ᨾᩮᩣᨿ᩠ᩉᩈᩥ ᨾᩪᩊ᩠ᩉᩮᩣ ᩋᩈᩥ ᨽᩅᩈᩥ. ᨲᩈ᩠ᨾᩣ ᨲᩩᩅᩴ ᩅᨶᩣ ᩅᨶᨲᩮᩣ ᩋᩁᨬ᩠ᨬᩅᩣᩈᨲᩮᩣ ᨶᩥᨠ᩠ᨡᨾᩔᩩ ᩋᨸᨣᨧ᩠ᨨᩣᩉᩦᨲᩥ ᩑᩅᩴ ᩋᨲ᩠ᨲᩣᨶᩴ ᨴᨾᩮᨾᩦᨲᩥ ᩈᨾ᩠ᨻᨶ᩠ᨵᩮᩣ.

᪒᪔. ᨲᩥᨾ᩠ᨻᩁᩪᩈᨠᩅᨱ᩠ᨱᩣᨽᩮᩣᨲᩥ ᩈᩩᩅᨱ᩠ᨱᨲᩥᨾ᩠ᨻᩁᩪᩈᨠᩅᨱ᩠ᨱᩣᨽᩮᩣ, ᨩᨾ᩠ᨻᩮᩣᨶᨴᩈᩩᩅᨱ᩠ᨱᩅᨱ᩠ᨱᩮᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩈᩩᨽᩪᨲᩥᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᩏᨸᩅᩣᨶᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᩮᩣ ¶ ᨶᩣᨾ ᨩᩥᨶᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩏᨸᩅᩣᨶᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩣᨿᩈ᩠ᨾᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨴᩃᩥᨴ᩠ᨴᨠᩩᩃᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨽᨣᩅᨲᩥ ᨸᩁᩥᨶᩥᨻ᩠ᨻᩩᨲᩮ ᨲᩔ ᨵᩣᨲᩩᩴ ᨣᩉᩮᨲ᩠ᩅᩣ ᨾᨶᩩᩔᨴᩮᩅᨶᩣᨣᨣᩁᩩᩊᨠᩩᨾ᩠ᨽᨱ᩠ᨯᨿᨠ᩠ᨡᨣᨶ᩠ᨵᨻ᩠ᨻᩮᩉᩥ ᩈᨲ᩠ᨲᩁᨲᨶᨾᨿᩮ ᩈᨲ᩠ᨲᨿᩮᩣᨩᨶᩥᨠᩮ ᨳᩪᨸᩮ ᨠᨲᩮ ᨲᨲ᩠ᨳ ᩈᩩᨵᩮᩣᨲᩴ ᩋᨲ᩠ᨲᨶᩮᩣ ᩏᨲ᩠ᨲᩁᩈᩣᨭᨠᩴ ᩅᩮᩊᨣ᩠ᨣᩮ ᩃᨣ᩠ᨣᩮᨲ᩠ᩅᩣ ᩌᨻᨶ᩠ᨵᩥᨲ᩠ᩅᩣ ᨵᨩᩴ ᨠᨲ᩠ᩅᩣ ᨸᩪᨩᩴ ᩋᨠᩣᩈᩥ. ᨲᩴ ᨣᩉᩮᨲ᩠ᩅᩣ ᩋᨽᩥᩈᨾ᩠ᨾᨲᨠᩮᩣ ¶ ¶ ᨶᩣᨾ ᨿᨠ᩠ᨡᩈᩮᨶᩣᨸᨲᩥ ᨴᩮᩅᩮᩉᩥ ᨧᩮᨲᩥᨿᨸᩪᨩᩣᩁᨠ᩠ᨡᨱᨲ᩠ᨳᩴ ᨮᨸᩥᨲᩮᩣ ᩋᨴᩥᩔᨾᩣᨶᨠᩣᨿᩮᩣ ᨲᩴ ᩌᨠᩣᩈᩮ ᨵᩣᩁᩮᨶ᩠ᨲᩮᩣ ᨧᩮᨲᩥᨿᩴ ᨲᩥᨠ᩠ᨡᨲ᩠ᨲᩩᩴ ᨸᨴᨠ᩠ᨡᩥᨱᩴ ᩋᨠᩣᩈᩥ. ᩈᩮᩣ ᨲᩴ ᨴᩥᩈ᩠ᩅᩣ ᨽᩥᨿ᩠ᨿᩮᩣᩈᩮᩣᨾᨲ᩠ᨲᩣᨿ ᨸᩈᨶ᩠ᨶᨾᩣᨶᩈᩮᩣ ᩉᩩᨲ᩠ᩅᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩏᨸᩅᩣᨶᩮᩣᨲᩥ ᩃᨴ᩠ᨵᨶᩣᨾᩮᩣ ᩅᨿᨸ᩠ᨸᨲ᩠ᨲᩮᩣ ᨩᩮᨲᩅᨶᨸᨭᩥᨣ᩠ᨣᩉᨱᩮ ᨻᩩᨴ᩠ᨵᩣᨶᩩᨽᩣᩅᩴ ᨴᩥᩈ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩣᨿ ᨠᨾ᩠ᨾᩴ ᨠᩁᩮᩣᨶ᩠ᨲᩮᩣ ᩋᩁᩉᨲ᩠ᨲᩴ ᨸᨲ᩠ᩅᩣ ᨨᩊᨽᩥᨬ᩠ᨬᩮᩣ ᩋᩉᩮᩣᩈᩥ. ᨿᨴᩣ ᨽᨣᩅᨲᩮᩣ ᩋᨹᩣᩈᩩ ᩋᩉᩮᩣᩈᩥ, ᨲᨴᩣ ᨳᩮᩁᩮᩣ ᩏᨱ᩠ᩉᩮᩣᨴᨠᩴ ᨲᨳᩣᩁᩪᨸᩴ ᨸᩣᨶᨠᨬ᩠ᨧ ᨽᩮᩈᨩ᩠ᨩᩴ ᨽᨣᩅᨲᩮᩣ ᩏᨸᨶᩣᨾᩮᩈᩥ. ᨲᩮᨶᩔ ᩈᨲ᩠ᨳᩩᨶᩮᩣ ᩁᩮᩣᨣᩮᩣ ᩅᩪᨸᩈᨾᩥ. ᨲᩔ ᨽᨣᩅᩣ ᩋᨶᩩᨾᩮᩣᨴᨶᩴ ᩋᨠᩣᩈᩥ.

᪕᪒. ᩑᩅᩴ ᩈᩮᩣ ᨸᨲ᩠ᨲᩋᩁᩉᨲ᩠ᨲᨹᩃᩮᩣ ᩋᨵᩥᨣᨲᩑᨲᨴᨣ᩠ᨣᨭ᩠ᨮᩣᨶᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᩅᩈᩮᨶ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩮᩣ ᨶᩣᨾ ᨩᩥᨶᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᩈᨻ᩠ᨻᩮᩈᩴ ᩃᩮᩣᨠᩥᨿᩃᩮᩣᨠᩩᨲ᩠ᨲᩁᨵᨾ᩠ᨾᩣᨶᩴ ᨸᩣᩁᨣᩪ ᨸᩁᩥᨿᩮᩣᩈᩣᨶᩴ ᨶᩥᨻ᩠ᨻᩣᨶᩴ ᨣᨲᩮᩣ ᨸᨲ᩠ᨲᩮᩣ ᨸᨴᩩᨾᩩᨲ᩠ᨲᩁᩮᩣ ᨶᩣᨾ ᨩᩥᨶᩮᩣ ᨩᩥᨲᨸᨬ᩠ᨧᨾᩣᩁᩮᩣ ᨽᨣᩅᩣ ᩋᨣ᩠ᨣᩥᨠ᩠ᨡᨶ᩠ᨵᩮᩣ ᩍᩅ ᨨᨻ᩠ᨻᨱ᩠ᨱᩣ ᨻᩩᨴ᩠ᨵᩁᩴᩈᩥᨿᩮᩣ ᨩᩃᩥᨲ᩠ᩅᩣ ᩈᨻ᩠ᨻᩃᩮᩣᨠᩴ ᨵᨾ᩠ᨾᨸᨩ᩠ᨩᩮᩣᨲᩮᨶ ᩒᨽᩣᩈᩮᨲ᩠ᩅᩣ ᩈᨾ᩠ᨻᩩᨴ᩠ᨵᩮᩣ ᩈᩩᨭ᩠ᨮᩩ ᨻᩩᨴ᩠ᨵᩮᩣ ᩋᩅᩥᨩ᩠ᨩᩣᨶᩥᨴ᩠ᨴᩪᨸᨣᨲᩣᨿ ᨸᨩᩣᨿ ᩈᩅᩣᩈᨶᩣᨿ ᨠᩥᩃᩮᩈᨶᩥᨴ᩠ᨴᩣᨿ ᨸᨭᩥᨻᩩᨴ᩠ᨵᩮᩣ ᩅᩥᨠᩈᩥᨲᨶᩮᨲ᩠ᨲᨸᨦ᩠ᨠᨩᩮᩣ ᨸᩁᩥᨶᩥᨻ᩠ᨻᩩᨲᩮᩣ ᨡᨶ᩠ᨵᨸᩁᩥᨶᩥᨻ᩠ᨻᩣᨶᩮᨶ ᨶᩥᨻ᩠ᨻᩩᨲᩮᩣ ᩋᨴᩔᨶᩴ ᨣᨲᩮᩣᨲᩥ ᩈᨾ᩠ᨻᨶ᩠ᨵᩮᩣ.

᪕᪗. ᨩᨦ᩠ᨥᩣᨲᩥ ᨧᩮᨲᩥᨿᨠᩁᨱᨠᩣᩃᩮ ᩏᨸᨧᩥᨶᩥᨲᨻ᩠ᨻᩣᨶᩴ ᩍᨭ᩠ᨮᨠᩣᨶᩴ ᨮᨸᨶᨲ᩠ᨳᩣᨿ, ᨶᩥᨻᨶ᩠ᨵᩥᨿᨾᩣᨶᩈᩮᩣᨸᩣᨶᨸᨶ᩠ᨲᩥ.

᪘᪘. ᩈᩩᨵᩮᩣᨲᩴ ¶ ᩁᨩᨠᩮᨶᩣᩉᨶ᩠ᨲᩥ ᩅᨲ᩠ᨳᨵᩮᩣᩅᨠᩮᨶ ᨸᩩᩁᩥᩈᩮᨶ ᩈᩩᨭ᩠ᨮᩩ ᨵᩮᩣᩅᩥᨲᩴ ᩈᩩᩅᩥᩈᩩᨴ᩠ᨵᨠᨲᩴ, ᩏᨲ᩠ᨲᩁᩮᨿ᩠ᨿᨸᨭᩴ ᨾᨾ ᩏᨲ᩠ᨲᩁᩈᩣᨭᨠᩴ ᩋᩉᩴ ᩅᩮᩊᨣ᩠ᨣᩮ ᩃᨣ᩠ᨣᩥᨲ᩠ᩅᩣ ᨵᨩᩴ ᨠᨲ᩠ᩅᩣ ᩏᨠ᩠ᨡᩥᨸᩥᩴ, ᩋᨾ᩠ᨻᩁᩮ ᩌᨠᩣᩈᩮ ᩏᩔᩣᨸᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩏᨸᩅᩣᨶᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᨲᩥᩈᩁᨱᨣᨾᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᨣᩁᩮ ᨻᨶ᩠ᨵᩩᨾᨲᩥᨿᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨲᩥᩈᩁᨱᨣᨾᨶᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᨻᨶ᩠ᨵᩩᨾᨲᩦᨶᨣᩁᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩋᨶ᩠ᨵᨾᩣᨲᩣᨸᩥᨲᩁᩮᩣ ᩏᨸᨭ᩠ᨮᩣᩈᩥ. ᩈᩮᩣ ᩑᨠᨴᩥᩅᩈᩴ ᨧᩥᨶ᩠ᨲᩮᩈᩥ – ‘‘ᩋᩉᩴ ᨾᩣᨲᩣᨸᩥᨲᩁᩮᩣ ᩏᨸᨭ᩠ᨮᩉᨶ᩠ᨲᩮᩣ ᨸᨻ᩠ᨻᨩᩥᨲᩩᩴ ᨶ ᩃᨽᩣᨾᩥ, ᨿᩴᨶᩪᨶᩣᩉᩴ ᨲᩦᨱᩥ ᩈᩁᨱᩣᨶᩥ ¶ ᨣᨱ᩠ᩉᩥᩔᩣᨾᩥ ¶ , ᩑᩅᩴ ᨴᩩᨣ᩠ᨣᨲᩥᨲᩮᩣ ᨾᩮᩣᨧᩮᩔᩣᨾᩦ’’ᨲᩥ ᨶᩥᩈᨽᩴ ᨶᩣᨾ ᩅᩥᨸᩔᩥᩔ ᨽᨣᩅᨲᩮᩣ ᩋᨣ᩠ᨣᩈᩣᩅᨠᩴ ᩏᨸᩈᨦ᩠ᨠᨾᩥᨲ᩠ᩅᩣ ᨲᩦᨱᩥ ᩈᩁᨱᩣᨶᩥ ᨣᨱ᩠ᩉᩥ. ᩈᩮᩣ ᨲᩣᨶᩥ ᩅᩔᩈᨲᩈᩉᩔᩣᨶᩥ ᩁᨠ᩠ᨡᩥᨲ᩠ᩅᩣ ᨲᩮᨶᩮᩅ ᨠᨾ᩠ᨾᩮᨶ ᨲᩣᩅᨲᩥᩴᩈᨽᩅᨶᩮ ᨶᩥᨻ᩠ᨻᨲ᩠ᨲᩮᩣ, ᨲᨲᩮᩣ ᨸᩁᩴ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨶᨣᩁᩮ ᨾᩉᩣᩈᩣᩃᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨲᩅᩔᩥᨠᩮᩣᩅ ᨴᩣᩁᨠᩮᩉᩥ ᨸᩁᩥᩅᩩᨲᩮᩣ ᩑᨠᩴ ᩈᨦ᩠ᨥᩣᩁᩣᨾᩴ ᩋᨣᨾᩣᩈᩥ. ᨲᨲ᩠ᨳ ᩑᨠᩮᩣ ᨡᩦᨱᩣᩈᩅᨲ᩠ᨳᩮᩁᩮᩣ ᨲᩔ ᨵᨾ᩠ᨾᩴ ᨴᩮᩈᩮᨲ᩠ᩅᩣ ᩈᩁᨱᩣᨶᩥ ᩋᨴᩣᩈᩥ. ᩈᩮᩣ ᨲᩣᨶᩥ ᨣᩉᩮᨲ᩠ᩅᩣ ᨸᩩᨻ᩠ᨻᩮ ᩋᨲ᩠ᨲᨶᩮᩣ ᩁᨠ᩠ᨡᩥᨲᩣᨶᩥ ᩈᩁᨱᩣᨶᩥ ᩈᩁᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᩋᩁᩉᨲ᩠ᨲᩴ ᨸᩣᨸᩩᨱᩥ. ᨲᩴ ᩋᩁᩉᨲ᩠ᨲᨸ᩠ᨸᨲ᩠ᨲᩴ ᨽᨣᩅᩣ ᩏᨸᩈᨾ᩠ᨸᩣᨴᩮᩈᩥ.

᪑᪐᪖. ᩈᩮᩣ ᩋᩁᩉᨲ᩠ᨲᨸ᩠ᨸᨲ᩠ᨲᩮᩣ ᩏᨸᩈᨾ᩠ᨸᨶ᩠ᨶᩮᩣ ᩉᩩᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᩅᩈᩮᨶ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨶᨣᩁᩮ ᨻᨶ᩠ᨵᩩᨾᨲᩥᨿᩣᨲᩥᩌᨴᩥᨾᩣᩉ. ᨲᨲ᩠ᨳ ᨾᩣᨲᩩ ᩏᨸᨭ᩠ᨮᩣᨠᩮᩣ ᩋᩉᩩᨶ᩠ᨲᩥ ᩋᩉᩴ ᨾᩣᨲᩣᨸᩥᨲᩪᨶᩴ ᩏᨸᨭ᩠ᨮᩣᨠᩮᩣ ᨽᩁᨠᩮᩣ ᨻᨶ᩠ᨵᩩᨾᨲᩦᨶᨣᩁᩮ ᩋᩉᩮᩣᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

᪑᪐᪘. ᨲᨾᨶ᩠ᨵᨠᩣᩁᨸᩥᩉᩥᨲᩣᨲᩥ ¶ ᨾᩮᩣᩉᨶ᩠ᨵᨠᩣᩁᩮᨶ ᨸᩥᩉᩥᨲᩣ ᨨᩣᨴᩥᨲᩣ. ᨲᩥᩅᩥᨵᨣ᩠ᨣᩦᩉᩥ ᨯᨿ᩠ᩉᩁᩮᨲᩥ ᩁᩣᨣᨣ᩠ᨣᩥᨴᩮᩣᩈᨣ᩠ᨣᩥᨾᩮᩣᩉᨣ᩠ᨣᩥᩈᨦ᩠ᨡᩣᨲᩮᩉᩥ ᨲᩦᩉᩥ ᩋᨣ᩠ᨣᩦᩉᩥ ᨯᨿ᩠ᩉᩁᩮ ᨯᨿ᩠ᩉᨶ᩠ᨲᩥ ᩈᨻ᩠ᨻᩮ ᩈᨲ᩠ᨲᩣᨲᩥ ᩈᨾ᩠ᨻᨶ᩠ᨵᩮᩣ.

᪑᪑᪔. ᩋᨭ᩠ᨮ ᩉᩮᨲᩪ ᩃᨽᩣᨾᩉᨶ᩠ᨲᩥ ᩋᨭ᩠ᨮ ᨠᩣᩁᨱᩣᨶᩥ ᩈᩩᨡᩔ ᨸᨧ᩠ᨧᨿᨽᩪᨲᩣᨶᩥ ᨠᩣᩁᨱᩣᨶᩥ ᩃᨽᩣᨾᩥ ᩋᩉᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨲᩥᩈᩁᨱᨣᨾᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᨸᨬ᩠ᨧᩈᩦᩃᩈᨾᩣᨴᩣᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᨣᩁᩮ ᨧᨶ᩠ᨴᩅᨲᩥᨿᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᨬ᩠ᨧᩈᩦᩃᩈᨾᩣᨴᩣᨶᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨶᩮᩣᨾᨴᩔᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᨸᩩᩁᩥᨾᨽᩅᩮ ᨠᨲᩣᨠᩩᩈᩃᨠᨾ᩠ᨾᩣᨶᩩᩁᩪᨸᩮᨶ ᨴᩃᩥᨴ᩠ᨴᩮᩣ ᩉᩩᨲ᩠ᩅᩣ ᩋᨸ᩠ᨸᨶ᩠ᨶᨸᩣᨶᨽᩮᩣᨩᨶᩮᩣ ᨸᩁᩮᩈᩴ ᨽᨲᩥᩴ ᨠᨲ᩠ᩅᩣ ᨩᩦᩅᨶ᩠ᨲᩮᩣ ᩈᩴᩈᩣᩁᩮ ᩌᨴᩦᨶᩅᩴ ᨬᨲ᩠ᩅᩣ ᨸᨻ᩠ᨻᨩᩥᨲᩩᨠᩣᨾᩮᩣᨸᩥ ᨸᨻ᩠ᨻᨩ᩠ᨩᩴ ᩋᩃᨽᨾᩣᨶᩮᩣ ᩋᨶᩮᩣᨾᨴᩔᩥᩔ ᨽᨣᩅᨲᩮᩣ ᩈᩣᩅᨠᩔ ᨶᩥᩈᨽᨲ᩠ᨳᩮᩁᩔ ᩈᨶ᩠ᨲᩥᨠᩮ ᨸᨬ᩠ᨧ ᩈᩥᨠ᩠ᨡᩣᨸᨴᩣᨶᩥ ᩈᨾᩣᨴᩥᨿᩥ. ᨴᩦᨥᩣᨿᩩᨠᨠᩣᩃᩮ ᩏᨸ᩠ᨸᨶ᩠ᨶᨲ᩠ᨲᩣ ᩅᩔᩈᨲᩈᩉᩔᩣᨶᩥ ᩈᩦᩃᩴ ᨸᩁᩥᨸᩣᩃᩮᩈᩥ. ᨲᩮᨶ ᨠᨾ᩠ᨾᩮᨶ ᩈᩮᩣ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩮᩈᩣᩃᩥᨿᩴ ᨾᩉᩣᨽᩮᩣᨣᨠᩩᩃᩮ ᨶᩥᨻ᩠ᨻᨲ᩠ᨲᩮᩣ. ᨾᩣᨲᩣᨸᩥᨲᩁᩮᩣ ᩈᩦᩃᩴ ᩈᨾᩣᨴᩥᨿᨶ᩠ᨲᩮ ᨴᩥᩈ᩠ᩅᩣ ᩋᨲ᩠ᨲᨶᩮᩣ ᩈᩦᩃᩴ ᩈᩁᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᩋᩁᩉᨲ᩠ᨲᩴ ᨸᨲ᩠ᩅᩣ ᨸᨻ᩠ᨻᨩᩥ.

᪑᪓᪔. ᩈᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᩏᨴᩣᨶᩅᩈᩮᨶ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ¶ ᨶᨣᩁᩮ ᨧᨶ᩠ᨴᩅᨲᩥᨿᩣᨲᩥᩌᨴᩥᨾᩣᩉ. ᨽᨲᨠᩮᩣ ¶ ᩌᩈᩉᩴ ᨲᨴᩣᨲᩥ ᨲᨴᩣ ᨾᨾ ᨸᩩᨬ᩠ᨬᨠᩁᨱᨠᩣᩃᩮ ᩋᩉᩴ ᨽᨲᨠᩮᩣ ᨽᨲᩥᨿᩣ ᨠᨾ᩠ᨾᨠᩣᩁᨠᩮᩣ ᩌᩈᩥᩴ ᩋᩉᩮᩣᩈᩥᩴ. ᨸᩁᨠᨾ᩠ᨾᩣᨿᨶᩮ ᨿᩩᨲ᩠ᨲᩮᩣᨲᩥ ᨽᨲᩥᨿᩣ ᨸᩁᩮᩈᩴ ᨠᨾ᩠ᨾᨠᩁᨱᩮ ᩌᨿᩩᨲ᩠ᨲᩮᩣ ᨿᩮᩣᨩᩥᨲᩮᩣ ᩒᨠᩣᩈᩣᨽᩣᩅᩮᨶ ᩈᩴᩈᩣᩁᨲᩮᩣ ᨾᩩᨧ᩠ᨧᨶᨲ᩠ᨳᩣᨿ ᩋᩉᩴ ᨸᨻ᩠ᨻᨩ᩠ᨩᩴ ᨶ ᩃᨽᩣᨾᩥ.

᪑᪓᪕. ᨾᩉᨶ᩠ᨵᨠᩣᩁᨸᩥᩉᩥᨲᩣᨲᩥ ᨾᩉᨶ᩠ᨲᩮᩉᩥ ᨠᩥᩃᩮᩈᨶ᩠ᨵᨠᩣᩁᩮᩉᩥ ᨸᩥᩉᩥᨲᩣ ᩈᩴᩅᩩᨲᩣ ᨳᨠᩥᨲᩣ. ᨲᩥᩅᩥᨵᨣ᩠ᨣᩦᩉᩥ ᨯᨿ᩠ᩉᩁᩮᨲᩥ ᨶᩁᨠᨣ᩠ᨣᩥᨸᩮᨲᨣ᩠ᨣᩥᩈᩴᩈᩣᩁᨣ᩠ᨣᩥᩈᨦ᩠ᨡᩣᨲᩮᩉᩥ ᨲᩦᩉᩥ ¶ ᩋᨣ᩠ᨣᩦᩉᩥ ᨯᨿ᩠ᩉᨶ᩠ᨲᩥ. ᩋᩉᩴ ᨸᨶ ᨠᩮᨶ ᩏᨸᩣᨿᩮᨶ ᨠᩮᨶ ᨠᩣᩁᨱᩮᨶ ᩅᩥᩈᩴᨿᩩᨲ᩠ᨲᩮᩣ ᨽᩅᩮᨿ᩠ᨿᨶ᩠ᨲᩥ ᩋᨲ᩠ᨳᩮᩣ.

᪑᪓᪖. ᨴᩮᨿ᩠ᨿᨵᨾ᩠ᨾᩮᩣ ᩋᨶ᩠ᨶᨸᩣᨶᩣᨴᩥᨴᩣᨲᨻ᩠ᨻᨿᩩᨲ᩠ᨲᨠᩴ ᩅᨲ᩠ᨳᩩ ᨾᨿ᩠ᩉᩴ ᨶᨲ᩠ᨳᩥ, ᨲᩔᩣᨽᩣᩅᩮᨶ ᩋᩉᩴ ᩅᩁᩣᨠᩮᩣ ᨴᩩᨠ᩠ᨡᩥᨲᩮᩣ ᨽᨲᨠᩮᩣ ᨽᨲᩥᨿᩣ ᨩᩦᩅᨶᨠᩮᩣ ᨿᩴᨶᩪᨶᩣᩉᩴ ᨸᨬ᩠ᨧᩈᩦᩃᩴ ᩁᨠ᩠ᨡᩮᨿ᩠ᨿᩴ ᨸᩁᩥᨸᩪᩁᨿᨶ᩠ᨲᩥ ᨸᨬ᩠ᨧᩈᩦᩃᩴ ᩈᨾᩣᨴᩥᨿᩥᨲ᩠ᩅᩣ ᨸᩁᩥᨸᩪᩁᩮᨶ᩠ᨲᩮᩣ ᨿᩴᨶᩪᨶ ᩁᨠ᩠ᨡᩮᨿ᩠ᨿᩴ ᩈᩣᨵᩩᨠᩴ ᨽᨴ᩠ᨴᨠᩴ ᩈᩩᨶ᩠ᨴᩁᩴ ᨠᨲ᩠ᩅᩣ ᨸᩁᩥᨸᩣᩃᩮᨿ᩠ᨿᨶ᩠ᨲᩥ ᩋᨲ᩠ᨳᩮᩣ.

᪑᪔᪘. ᩈ᩠ᩅᩣᩉᩴ ᨿᩈᨾᨶᩩᨽᩅᩥᨶ᩠ᨲᩥ ᩈᩮᩣ ᩋᩉᩴ ᨴᩮᩅᨾᨶᩩᩔᩮᩈᩩ ᨾᩉᨶ᩠ᨲᩴ ᨿᩈᩴ ᩋᨶᩩᨽᩅᩥᩴ ᨲᩮᩈᩴ ᩈᩦᩃᩣᨶᩴ ᩅᩣᩉᩈᩣ ᩌᨶᩩᨽᩣᩅᩮᨶᩣᨲᩥ ᩋᨲ᩠ᨳᩮᩣ. ᨠᨸ᩠ᨸᨠᩮᩣᨭᩥᨾ᩠ᨸᩥ ᨲᩮᩈᩴ ᩈᩦᩃᩣᨶᩴ ᨹᩃᩴ ᨠᩥᨲ᩠ᨲᩮᨶ᩠ᨲᩮᩣ ᩑᨠᨠᩮᩣᨭ᩠ᨮᩣᩈᨾᩮᩅ ᨠᩥᨲ᩠ᨲᨿᩮ ᨸᩣᨠᨭᩴ ᨠᩁᩮᨿ᩠ᨿᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨸᨬ᩠ᨧᩈᩦᩃᩈᨾᩣᨴᩣᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᩋᨶ᩠ᨶᩈᩴᩈᩣᩅᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩩᩅᨱ᩠ᨱᩅᨱ᩠ᨱᩴ ᩈᨾ᩠ᨻᩩᨴ᩠ᨵᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩋᨶ᩠ᨶᩈᩴᩈᩣᩅᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨸᩥᨱ᩠ᨯᩣᨿ ᨧᩁᨶ᩠ᨲᩴ ᨴ᩠ᩅᨲ᩠ᨲᩥᩴᩈᨾᩉᩣᨸᩩᩁᩥᩈᩃᨠ᩠ᨡᨱᨻ᩠ᨿᩣᨾᨸ᩠ᨸᨽᩣᨾᨱ᩠ᨯᩃᩮᩣᨸᩈᩮᩣᨽᩥᨲᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨽᨣᩅᨶ᩠ᨲᩴ ᨶᩥᨾᨶ᩠ᨲᩮᨲ᩠ᩅᩣ ᨣᩮᩉᩴ ᨶᩮᨲ᩠ᩅᩣ ᩅᩁᩋᨶ᩠ᨶᨸᩣᨶᩮᨶ ᩈᨶ᩠ᨲᨸ᩠ᨸᩮᨲ᩠ᩅᩣ ᩈᨾ᩠ᨸᩅᩣᩁᩮᨲ᩠ᩅᩣ ᨽᩮᩣᨩᩮᩈᩥ. ᩈᩮᩣ ᨲᩮᨶᩮᩅ ᨧᩥᨲ᩠ᨲᨸ᩠ᨸᩈᩣᨴᩮᨶ ᨲᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᨲᨲᩮᩣ ᨧᩅᩥᨲ᩠ᩅᩣ ᨾᨶᩩᩔᩃᩮᩣᨠᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᨾᨶᩩᩔᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᨲᨲᩮᩣ ᩋᨸᩁᩣᨸᩁᩴ ᨴᩮᩅᨾᨶᩩᩔᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩈᩣᩈᨶᩮ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᩋᩁᩉᨲ᩠ᨲᩴ ᨸᩣᨸᩩᨱᩥ. ᩈᩮᩣ ᨸᩩᨻ᩠ᨻᩮ ᨠᨲᨸᩩᨬ᩠ᨬᨶᩣᨾᩅᩈᩮᨶ ᩋᨶ᩠ᨶᩈᩴᩈᩣᩅᨠᨲ᩠ᨳᩮᩁᩮᩣᨲᩥ ᨸᩣᨠᨭᨶᩣᨾᩮᩣ ᩋᩉᩮᩣᩈᩥ.

᪑᪕᪕-᪖. ᩈᩮᩣ ¶ ¶ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ‘‘ᩑᩅᩴ ᨾᨿᩣ ᩍᨾᩥᨶᩣ ᨸᩩᨬ᩠ᨬᩈᨾ᩠ᨽᩣᩁᩣᨶᩩᨽᩣᩅᩮᨶ ᨸᨲ᩠ᨲᩴ ᩋᩁᩉᨲ᩠ᨲ’’ᨶ᩠ᨲᩥ ᩋᨲ᩠ᨲᨶᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᩏᨴᩣᨶᩅᩈᩮᨶ ᨸᨠᩣᩈᩮᨶ᩠ᨲᩮᩣ ᩈᩩᩅᨱ᩠ᨱᩅᨱ᩠ᨱᨶ᩠ᨲᩥᩌᨴᩥᨾᩣᩉ ¶ . ᨲᨲ᩠ᨳ ᩈᩩᩅᨱ᩠ᨱᩔ ᩅᨱ᩠ᨱᩮᩣ ᩅᩥᨿ ᩅᨱ᩠ᨱᩮᩣ ᨿᩔ ᨽᨣᩅᨲᩮᩣ ᩈᩮᩣᨿᩴ ᩈᩩᩅᨱ᩠ᨱᩅᨱ᩠ᨱᩮᩣ, ᨲᩴ ᩈᩩᩅᨱ᩠ᨱᩅᨱ᩠ᨱᩴ ᩈᨾ᩠ᨻᩩᨴ᩠ᨵᩴ ᩈᩥᨴ᩠ᨵᨲ᩠ᨳᨶ᩠ᨲᩥ ᩋᨲ᩠ᨳᩮᩣ. ᨣᨧ᩠ᨨᨶ᩠ᨲᩴ ᩋᨶ᩠ᨲᩁᩣᨸᨱᩮᨲᩥ ᩅᩮᩔᩣᨶᩴ ᩌᨸᨱᨸᨶ᩠ᨲᩦᨶᩴ ᩋᨶ᩠ᨲᩁᩅᩦᨳᩥᨿᩴ ᨣᨧ᩠ᨨᨾᩣᨶᩴ. ᨠᨬ᩠ᨧᨶᨣ᩠ᨥᩥᨿᩈᩴᨠᩣᩈᨶ᩠ᨲᩥ ᩈᩩᩅᨱ᩠ᨱᨲᩮᩣᩁᨱᩈᨴᩥᩈᩴ ᨻᩣᨲ᩠ᨲᩥᩴᩈᩅᩁᩃᨠ᩠ᨡᨱᩴ ᨴ᩠ᩅᨲ᩠ᨲᩥᩴᩈᩅᩁᩃᨠ᩠ᨡᨱᩮᩉᩥ ᩈᨾ᩠ᨸᨶ᩠ᨶᩴ ᩃᩮᩣᨠᨸᨩ᩠ᨩᩮᩣᨲᩴ ᩈᨠᩃᩃᩮᩣᨠᨴᩦᨸᨽᩪᨲᩴ ᩋᨸ᩠ᨸᨾᩮᨿ᩠ᨿᩴ ᨸᨾᩣᨱᩅᩥᩁᩉᩥᨲᩴ ᩋᨶᩮᩣᨸᨾᩴ ᩏᨸᨾᩣᩅᩥᩁᩉᩥᨲᩴ ᨩᩩᨲᩥᨶ᩠ᨵᩁᩴ ᨸᨽᩣᨵᩣᩁᩴ ᨶᩦᩃᨸᩦᨲᩣᨴᩥᨨᨻ᩠ᨻᨱ᩠ᨱᨻᩩᨴ᩠ᨵᩁᩴᩈᩥᨿᩮᩣ ᨵᩣᩁᨠᩴ ᩈᩥᨴ᩠ᨵᨲ᩠ᨳᩴ ᨴᩥᩈ᩠ᩅᩣ ᨸᩁᨾᩴ ᩏᨲ᩠ᨲᨾᩴ ᨸᩦᨲᩥᩴ ᩋᩃᨲ᩠ᨳᩴ ᩋᩃᨽᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩋᨶ᩠ᨶᩈᩴᩈᩣᩅᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᨵᩪᨸᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨵᩪᨸᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᩥᨴ᩠ᨵᨲ᩠ᨳᩮ ᨽᨣᩅᨲᩥ ᨧᩥᨲ᩠ᨲᩴ ᨸᩈᩣᨴᩮᨲ᩠ᩅᩣ ᨲᩔ ᨽᨣᩅᨲᩮᩣ ᨣᨶ᩠ᨵᨠᩩᨭᩥᨿᩴ ᨧᨶ᩠ᨴᨶᩣᨣᩁᩩᨠᩣᩊᩣᨶᩩᩈᩣᩁᩥᩌᨴᩥᨶᩣ ᨠᨲᩮᩉᩥ ᩋᨶᩮᨠᩮᩉᩥ ᨵᩪᨸᩮᩉᩥ ᨵᩪᨸᨸᩪᨩᩴ ᩋᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᩮᩈᩩ ᨧ ᨾᨶᩩᩔᩮᩈᩩ ᨧ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᨶ᩠ᨲᩮᩣ ᨶᩥᨻ᩠ᨻᨲ᩠ᨲᨶᩥᨻ᩠ᨻᨲ᩠ᨲᨽᩅᩮ ᨸᩪᨩᨶᩦᨿᩮᩣ ᩉᩩᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨸᩩᨬ᩠ᨬᩈᨾ᩠ᨽᩣᩁᩣᨶᩩᨽᩣᩅᩮᨶ ᩈᩣᩈᨶᩮ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᩋᩁᩉᨲ᩠ᨲᩴ ᨸᨲ᩠ᩅᩣ ᨠᨲᨵᩪᨸᨸᩪᨩᩣᨸᩩᨬ᩠ᨬᨲ᩠ᨲᩣ ᨶᩣᨾᩮᨶ ᨵᩪᨸᨴᩣᨿᨠᨲ᩠ᨳᩮᩁᩮᩣᨲᩥ ᩈᨻ᩠ᨻᨲ᩠ᨳ ᨸᩣᨠᨭᩮᩣ. ᩈᩮᩣ ᨸᨲ᩠ᨲᩋᩁᩉᨲ᩠ᨲᨹᩃᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨴᩔᩮᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣᨲᩥᩌᨴᩥᨾᩣᩉ. ᩈᩥᨴ᩠ᨵᩮᩣ ᨸᩁᩥᨸᩩᨱ᩠ᨱᩮᩣ ᩈᨻ᩠ᨻᨬ᩠ᨬᩩᨲᨬ᩠ᨬᩣᨱᩣᨴᩥᨣᩩᨱᩈᨦ᩠ᨡᩣᨲᩮᩣ ᩋᨲ᩠ᨳᩮᩣ ᨸᨿᩮᩣᨩᨶᩴ ᨿᩔ ᨽᨣᩅᨲᩮᩣ ᩈᩮᩣᨿᩴ ᩈᩥᨴ᩠ᨵᨲ᩠ᨳᩮᩣ, ᨲᩔ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨽᨣ᩠ᨿᩣᨴᩥᨣᩩᨱᩅᨶ᩠ᨲᩔ ᩃᩮᩣᨠᨩᩮᨭ᩠ᨮᩔ ᩈᨠᩃᩃᩮᩣᨠᩩᨲ᩠ᨲᨾᩔ ᨲᩣᨴᩥᨶᩮᩣ ᩍᨭ᩠ᨮᩣᨶᩥᨭ᩠ᨮᩮᩈᩩ ¶ ᨲᩣᨴᩥᩈᩔ ᩋᨧᩃᩈᨽᩣᩅᩔᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨵᩪᨸᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᨸᩩᩃᩥᨶᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩅᩥᨸᩔᩥᩔ ¶ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᩩᩃᩥᨶᨸᩪᨩᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩈᩣᩈᨶᩮ ᨸᩈᨶ᩠ᨶᨧᩥᨲ᩠ᨲᩮᩣ ᨧᩮᨲᩥᨿᨦ᩠ᨣᨱᨻᩮᩣᨵᩥᨿᨦ᩠ᨣᨱᩮᩈᩩ ¶ ᨸᩩᩁᩣᨱᩅᩣᩃᩩᨠᩴ ᩋᨸᨶᩮᨲ᩠ᩅᩣ ᨶᩅᩴ ᨾᩩᨲ᩠ᨲᩣᨴᩃᩈᨴᩥᩈᨸᨱ᩠ᨯᩁᨸᩩᩃᩥᨶᩴ ᩒᨠᩥᩁᩥᨲ᩠ᩅᩣ ᨾᩣᩊᨠᩴ ᩋᩃᨦ᩠ᨠᩁᩥ. ᨲᩮᨶ ᨠᨾ᩠ᨾᩮᨶ ᩈᩮᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ ᨲᨲ᩠ᨳ ᨴᩥᨻ᩠ᨻᩮᩉᩥ ᩁᨲᨶᩮᩉᩥ ᩅᩥᨩ᩠ᨩᩮᩣᨲᨾᩣᨶᩮ ᩋᨶᩮᨠᨿᩮᩣᨩᨶᩮ ᨠᨶᨠᩅᩥᨾᩣᨶᩮ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᨲᨲᩮᩣ ᨧᩩᨲᩮᩣ ᨾᨶᩩᩔᩃᩮᩣᨠᩮ ᩈᨲ᩠ᨲᩁᨲᨶᩈᨾ᩠ᨸᨶ᩠ᨶᩮᩣ ᨧᨠ᩠ᨠᩅᨲ᩠ᨲᩦ ᩁᩣᨩᩣ ᩉᩩᨲ᩠ᩅᩣ ᨾᨶᩩᩔᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩋᨸᩁᩣᨸᩁᩴ ᩈᩴᩈᩁᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩈᩣᩈᨶᩮ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᩋᩁᩉᨲ᩠ᨲᩴ ᨸᩣᨸᩩᨱᩥ. ᩈᩮᩣ ᩋᨲ᩠ᨲᨶᩮᩣ ᨠᨲᨸᩩᨬ᩠ᨬᨶᩣᨾᩈᨴᩥᩈᩮᨶ ᨶᩣᨾᩮᨶ ᨸᩩᩃᩥᨶᨸᩪᨩᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪑᪖᪕. ᩈᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨴᩔᩮᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᩅᩥᩅᩥᨵᩴ ᨸᩔᨲᩦᨲᩥ ᩅᩥᨸᩔᩦ, ᩅᩥᩅᩥᨧ᩠ᨧ ᨸᩔᨲᩦᨲᩥ ᩅᩣ ᩅᩥᨸᩔᩦ, ᩅᩥᩅᩥᨵᩮ ᩋᨲ᩠ᨲᨲ᩠ᨳᨸᩁᨲ᩠ᨳᩣᨴᩥᨽᩮᨴᩮ ᩋᨲ᩠ᨳᩮ ᨸᩔᨲᩦᨲᩥ ᩅᩣ ᩅᩥᨸᩔᩦ, ᩅᩥᩅᩥᨵᩮ ᩅᩮᩣᩉᩣᩁᨸᩁᨾᨲ᩠ᨳᩣᨴᩥᨽᩮᨴᩮ ᨸᩔᨲᩦᨲᩥ ᩅᩣ ᩅᩥᨸᩔᩦ, ᨲᩔ ᩅᩥᨸᩔᩥᩔ ᨻᩮᩣᨵᩥᨿᩣ ᨸᩣᨴᨸᩩᨲ᩠ᨲᨾᩮ ᩏᨲ᩠ᨲᨾᩮ ᨻᩮᩣᨵᩥᩁᩩᨠ᩠ᨡᨾᨱ᩠ᨯᩃᨾᩣᩊᨠᩮ ᨸᩩᩁᩣᨱᨸᩩᩃᩥᨶᩴ ᩅᩣᩃᩩᨠᩴ ᨨᨯ᩠ᨯᩮᨲ᩠ᩅᩣ ᩈᩩᨴ᩠ᨵᩴ ᨸᨱ᩠ᨯᩁᩴ ᨸᩩᩃᩥᨶᩴ ᩌᨠᩥᩁᩥᩴ ᩈᨶ᩠ᨳᩁᩥᩴ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨸᩩᩃᩥᨶᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᩏᨲ᩠ᨲᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨧᨶ᩠ᨴᨽᩣᨣᩣᨶᨴᩦᨲᩦᩁᩮᨲᩥᩌᨴᩥᨠᩴ ¶ ᩌᨿᩈ᩠ᨾᨲᩮᩣ ᩏᨲ᩠ᨲᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᨧᨶ᩠ᨴᨽᩣᨣᩣᨶᨴᩥᨿᩴ ᩈᩩᩈᩩᨾᩣᩁᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩮᩣ ᨶᨴᩦᨲᩦᩁᩴ ᩏᨸᨣᨲᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨧᩥᨲ᩠ᨲᩮᩣ ᨸᩣᩁᩴ ᨶᩮᨲᩩᨠᩣᨾᩮᩣ ᨲᩦᩁᩈᨾᩦᨸᩮᨿᩮᩅ ᨶᩥᨸᨩ᩠ᨩᩥ. ᨽᨣᩅᩣ ᨲᩔ ᩋᨶᩩᨠᨾ᩠ᨸᩣᨿ ᨸᩥᨭ᩠ᨮᩥᨿᩴ ᨸᩣᨴᩮ ᨮᨸᩮᩈᩥ. ᩈᩮᩣ ᨲᩩᨭ᩠ᨮᩮᩣ ᩏᨴᨣ᩠ᨣᩮᩣ ᨸᩦᨲᩥᩅᩮᨣᩮᨶ ᨾᩉᩩᩔᩣᩉᩮᩣ ᩉᩩᨲ᩠ᩅᩣ ᩈᩮᩣᨲᩴ ᨨᩥᨶ᩠ᨴᨶ᩠ᨲᩮᩣ ᩈᩦᨥᩮᨶ ᨩᩅᩮᨶ ᨽᨣᩅᨶ᩠ᨲᩴ ᨸᩁᨲᩦᩁᩴ ᨶᩮᩈᩥ. ᨽᨣᩅᩣ ᨲᩔ ᨧᩥᨲ᩠ᨲᨸ᩠ᨸᩈᩣᨴᩴ ᨬᨲ᩠ᩅᩣ ‘‘ᩋᨿᩴ ᩍᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩥᩔᨲᩥ ¶ , ᨲᨲᩮᩣ ᨸᨭ᩠ᨮᩣᨿ ᩈᩩᨣᨲᩦᩈᩩᨿᩮᩅ ᩈᩴᩈᩁᨶ᩠ᨲᩮᩣ ᩍᨲᩮᩣ ᨧᨲᩩᨶ᩠ᨶᩅᩩᨲᩥᨠᨸ᩠ᨸᩮ ᩋᨾᨲᩴ ᨸᩣᨸᩩᨱᩥᩔᨲᩦ’’ᨲᩥ ᨻ᩠ᨿᩣᨠᩁᩥᨲ᩠ᩅᩣ ᨸᨠ᩠ᨠᩣᨾᩥ.

ᩈᩮᩣ ᨲᨳᩣ ᩈᩩᨣᨲᩦᩈᩩᨿᩮᩅ ᩈᩴᩈᩁᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᩋᨬ᩠ᨬᨲᩁᩔ ᨻᩕᩣᩉ᩠ᨾᨱᩔ ᨸᩩᨲ᩠ᨲᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩥ, ᩏᨲ᩠ᨲᩥᨿᩮᩣᨲᩥᩔ ᨶᩣᨾᩴ ᩋᨠᩴᩈᩩ. ᩈᩮᩣ ᩅᨿᨸ᩠ᨸᨲ᩠ᨲᩮᩣ ‘‘ᩋᨾᨲᩴ ᨸᩁᩥᨿᩮᩈᩥᩔᩣᨾᩦ’’ᨲᩥ ᨸᩁᩥᨻ᩠ᨻᩣᨩᨠᩮᩣ ᩉᩩᨲ᩠ᩅᩣ ᩑᨠᨴᩥᩅᩈᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᩏᨸᩈᨦ᩠ᨠᨾᩥᨲ᩠ᩅᩣ ᩅᨶ᩠ᨴᩥᨲ᩠ᩅᩣ ᨵᨾ᩠ᨾᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᩉᩩᨲ᩠ᩅᩣ ᩈᩣᩈᨶᩮ ᨸᨻ᩠ᨻᨩᩥᨲ᩠ᩅᩣ ᩈᩦᩃᨴᩥᨭ᩠ᨮᩦᨶᩴ ᩋᩅᩥᩈᩮᩣᨵᩥᨲᨲ᩠ᨲᩣ ᩅᩥᩈᩮᩈᩴ ᨶᩥᨻ᩠ᨻᨲ᩠ᨲᩮᨲᩩᩴ ᩋᩈᨠ᩠ᨠᩮᩣᨶ᩠ᨲᩮᩣ ᩋᨬ᩠ᨬᩴ ᨽᩥᨠ᩠ᨡᩩᩴ ᩅᩥᩈᩮᩈᩴ ᨶᩥᨻ᩠ᨻᨲ᩠ᨲᩮᨲ᩠ᩅᩣ ᩋᨬ᩠ᨬᩴ ᨻ᩠ᨿᩣᨠᩁᩮᩣᨶ᩠ᨲᩴ ᨴᩥᩈ᩠ᩅᩣ ᩈᨲ᩠ᨳᩣᩁᩴ ᩏᨸᩈᨦ᩠ᨠᨾᩥᨲ᩠ᩅᩣ ᩈᨦ᩠ᨡᩮᨸᩮᨶ ᩒᩅᩣᨴᩴ ᨿᩣᨧᩥ. ᩈᨲ᩠ᨳᩣᨸᩥ ᨲᩔ ¶ , ‘‘ᨲᩈ᩠ᨾᩣᨲᩥᩉ ᨲ᩠ᩅᩴ, ᩏᨲ᩠ᨲᩥᨿ, ᩌᨴᩥᨾᩮᩅ ᩅᩥᩈᩮᩣᨵᩮᩉᩦ’’ᨲᩥᩌᨴᩥᨶᩣ (ᩈᩴ. ᨶᩥ. ᪕.᪓᪘᪒) ᩈᨦ᩠ᨡᩮᨸᩮᨶᩮᩅ ᩒᩅᩣᨴᩴ ᩋᨴᩣᩈᩥ. ᩈᩮᩣ ᩈᨲ᩠ᨳᩩ ᩒᩅᩣᨴᩮ ᨮᨲ᩠ᩅᩣ ᩅᩥᨸᩔᨶᩴ ᩌᩁᨽᩥ. ᨲᩔ ᩌᩁᨴ᩠ᨵᩅᩥᨸᩔᨠᩔ ᩌᨻᩣᨵᩮᩣ ᩏᨸ᩠ᨸᨩ᩠ᨩᩥ. ᩏᨸ᩠ᨸᨶ᩠ᨶᩮ ᩌᨻᩣᨵᩮ ᨩᩣᨲᩈᩴᩅᩮᨣᩮᩣ ᩅᩦᩁᩥᨿᩣᩁᨾ᩠ᨽᩅᨲ᩠ᨳᩩᩴ ᨬᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪑᪖᪙. ᩑᩅᩴ ᩈᩮᩣ ᨠᨲᩈᨾ᩠ᨽᩣᩁᩣᨶᩩᩁᩪᨸᩮᨶ ᨸᨲ᩠ᨲᩋᩁᩉᨲ᩠ᨲᨹᩃᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨧᨶ᩠ᨴᨽᩣᨣᩣᨶᨴᩦᨲᩦᩁᩮᨲᩥᩌᨴᩥᨾᩣᩉ. ᨲᨲ᩠ᨳ ᨧᨶ᩠ᨴᨽᩣᨣᩣᨶᨴᩦᨲᩦᩁᩮᨲᩥ ᨸᩁᩥᩈᩩᨴ᩠ᨵᨸᨱ᩠ᨯᩁᨸᩩᩃᩥᨶᨲᩃᩮᩉᩥ ᨧ ᨸᨽᩣᩈᨾ᩠ᨸᨶ᩠ᨶᨸᩈᨶ᩠ᨶᨾᨵᩩᩁᩮᩣᨴᨠᨸᩁᩥᨸᩩᨱ᩠ᨱᨲᩣᨿ ᨧ ᨧᨶ᩠ᨴᨸ᩠ᨸᨽᩣᨠᩥᩁᨱᩈᩔᩥᩁᩦᨠᩣᨽᩣ ᨶᨴᨾᩣᨶᩣ ᩈᨴ᩠ᨴᩴ ᨠᩩᩁᩩᨾᩣᨶᩣ ᨣᨧ᩠ᨨᨲᩦᨲᩥ ᨧᨶ᩠ᨴᨽᩣᨣᩣᨶᨴᩦ, ᨲᩔᩣ ᨧᨶ᩠ᨴᨽᩣᨣᩣᨶᨴᩥᨿᩣ ᨲᩦᩁᩮ ᩈᩩᩈᩩᨾᩣᩁᩮᩣ ᩋᩉᩮᩣᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨲᨲ᩠ᨳ ¶ ᩈᩩᩈᩩᨾᩣᩁᩮᩣᨲᩥ ᨡᩩᨴ᩠ᨴᨠᨾᨧ᩠ᨨᨣᩩᨾ᩠ᨻᩮ ᨡᨱ᩠ᨯᩣᨡᨱ᩠ᨯᩥᨠᩴ ᨠᩁᩮᩣᨶ᩠ᨲᩮᩣ ᨾᩣᩁᩮᨲᩦᨲᩥ ᩈᩩᩈᩩᨾᩣᩁᩮᩣ, ᨧᨱ᩠ᨯᨾᨧ᩠ᨨᩮᩣ ᨠᩩᨾ᩠ᨽᩦᩃᩮᩣᨲᩥ ᩋᨲ᩠ᨳᩮᩣ. ᩈᨽᩮᩣᨩᨶᨸᩈᩩᨲᩮᩣᩉᨶ᩠ᨲᩥ ᩋᩉᩴ ᩈᨽᩮᩣᨩᨶᩮ ᩈᨠᨣᩮᩣᨧᩁᩮ ᨸᩈᩩᨲᩮᩣ ᨻ᩠ᨿᩣᩅᨭᩮᩣ. ᨶᨴᩦᨲᩥᨲ᩠ᨳᩴ ᩋᨣᨧ᩠ᨨᩉᨶ᩠ᨲᩥ ᨽᨣᩅᨲᩮᩣ ᩌᨣᨾᨶᨠᩣᩃᩮ ᩋᩉᩴ ᨶᨴᩦᨲᩥᨲ᩠ᨳᩴ ᩋᨣᨧ᩠ᨨᩥᩴ ᨸᨲ᩠ᨲᩮᩣᨾ᩠ᩉᩥ.

᪑᪗᪐. ᩈᩥᨴ᩠ᨵᨲ᩠ᨳᩮᩣ ᨲᨾ᩠ᩉᩥ ᩈᨾᨿᩮᨲᩥ ᨲᩈ᩠ᨾᩥᩴ ᨾᨾ ᨲᩥᨲ᩠ᨳᨣᨾᨶᨠᩣᩃᩮ ᩈᩥᨴ᩠ᨵᨲ᩠ᨳᩮᩣ ᨽᨣᩅᩣ ᩋᨣ᩠ᨣᨸᩩᨣ᩠ᨣᩃᩮᩣ ᩈᨻ᩠ᨻᩈᨲ᩠ᨲᩮᩈᩩ ᨩᩮᨭ᩠ᨮᩮᩣ ᩈᩮᨭ᩠ᨮᩮᩣ ᩈᨿᨾ᩠ᨽᩪ ᩈᨿᨾᩮᩅ ᨽᩪᨲᩮᩣ ᨩᩣᨲᩮᩣ ᨻᩩᨴ᩠ᨵᨽᩪᨲᩮᩣ ᩈᩮᩣ ᨽᨣᩅᩣ ᨶᨴᩥᩴ ᨲᩁᩥᨲᩩᨠᩣᨾᩮᩣ ᨶᨴᩦᨲᩦᩁᩴ ᩏᨸᩣᨣᨾᩥ.

᪑᪗᪒. ᨸᩮᨲ᩠ᨲᩥᨠᩴ ᩅᩥᩈᨿᩴ ᨾᨿ᩠ᩉᨶ᩠ᨲᩥ ᨾᨿ᩠ᩉᩴ ᨸᩥᨲᩩᨸᩥᨲᩣᨾᩉᩣᨴᩦᩉᩥ ᨸᩁᨾ᩠ᨸᩁᩣᨶᩦᨲᩴ, ᨿᨴᩥᨴᩴ ᩈᨾ᩠ᨸᨲ᩠ᨲᩈᨾ᩠ᨸᨲ᩠ᨲᨾᩉᩣᨶᩩᨽᩣᩅᩣᨶᩴ ᨲᩁᨱᨶ᩠ᨲᩥ ᩋᨲ᩠ᨳᩮᩣ.

᪑᪗᪓. ᨾᨾ ¶ ᩏᨣ᩠ᨣᨩ᩠ᨩᨶᩴ ᩈᩩᨲ᩠ᩅᩣᨲᩥ ᨾᨿ᩠ᩉᩴ ᩏᨣ᩠ᨣᨩ᩠ᨩᨶᩴ ᩌᩁᩣᨵᨶᩴ ᩈᩩᨲ᩠ᩅᩣ ᨾᩉᩣᨾᩩᨶᩥ ᨽᨣᩅᩣ ᩋᨽᩥᩁᩩᩉᩦᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩏᨲ᩠ᨲᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᩑᨠᨬ᩠ᨩᩃᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩩᩅᨱ᩠ᨱᩅᨱ᩠ᨱᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩑᨠᨬ᩠ᨩᩃᩥᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᨸᩥᨱ᩠ᨯᩣᨿ ᨧᩁᨶ᩠ᨲᩴ ᩅᩥᨸᩔᩥᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩋᨬ᩠ᨩᩃᩥᩴ ᨸᨣ᩠ᨣᩉᩮᨲ᩠ᩅᩣ ᩋᨭ᩠ᨮᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩈᨻ᩠ᨻᨲ᩠ᨳ ᨸᩪᨩᨶᩦᨿᩮᩣ ᩉᩩᨲ᩠ᩅᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ¶ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᨠᩩᩃᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩈᩣᩈᨶᩮ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᩋᩁᩉᨲ᩠ᨲᩮ ᨸᨲᩥᨭ᩠ᨮᩣᩈᩥ. ᨸᩩᨻ᩠ᨻᩮ ᨠᨲᨸᩩᨬ᩠ᨬᩅᩈᩮᨶ ᩑᨠᨬ᩠ᨩᩃᩥᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪑᪘᪐. ᩈᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᨲᩴ ᩉᨲ᩠ᨳᨲᩃᩮ ᩌᨾᩃᨠᩴ ᩅᩥᨿ ᨴᩥᩈ᩠ᩅᩣ ᩏᨴᩣᨶᩅᩈᩮᨶ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩩᩅᨱ᩠ᨱᩅᨱ᩠ᨱᨶ᩠ᨲᩥᩌᨴᩥᨾᩣᩉ. ᩅᩥᨸᩔᩥᩴ ᩈᨲ᩠ᨳᩅᩣᩉᨣ᩠ᨣᨶ᩠ᨲᩥ ᩅᩣᨱᩥᨩᩮ ᨠᨶ᩠ᨲᩣᩁᩣ ᩅᩉᨲᩥ ᨲᩣᩁᩮᨲᩦᨲᩥ ᩈᨲ᩠ᨳᩅᩣᩉᩮᩣ ¶ . ᩅᩣᩊᨠᨶ᩠ᨲᩣᩁᩣ ᨧᩮᩣᩊᨠᨶ᩠ᨲᩣᩁᩣ ᨴᩩᨻ᩠ᨽᩥᨠ᩠ᨡᨠᨶ᩠ᨲᩣᩁᩣ ᨶᩥᩁᩩᨴᨠᨠᨶ᩠ᨲᩣᩁᩣ ᨿᨠ᩠ᨡᨠᨶ᩠ᨲᩣᩁᩣ ᩋᨸ᩠ᨸᨽᨠ᩠ᨡᨠᨶ᩠ᨲᩣᩁᩣ ᨧ ᨲᩣᩁᩮᨲᩥ ᩏᨲ᩠ᨲᩣᩁᩮᨲᩥ ᨸᨲᩣᩁᩮᨲᩥ ᨶᩥᨲ᩠ᨲᩣᩁᩮᨲᩥ ᨡᩮᨾᨶ᩠ᨲᨽᩪᨾᩥᩴ ᨸᩣᨸᩮᨲᩦᨲᩥ ᩋᨲ᩠ᨳᩮᩣ. ᨠᩮᩣ ᩈᩮᩣ? ᩅᩣᨱᩥᨩᨩᩮᨭ᩠ᨮᨠᩮᩣ. ᩈᨲ᩠ᨳᩅᩣᩉᩈᨴᩥᩈᨲ᩠ᨲᩣ ᩋᨿᨾ᩠ᨸᩥ ᨽᨣᩅᩣ ᩈᨲ᩠ᨳᩅᩣᩉᩮᩣ. ᨲᨳᩣ ᩉᩥ ᩈᩮᩣ ᨲᩥᩅᩥᨵᩴ ᨻᩮᩣᨵᩥᩴ ᨸᨲ᩠ᨳᨿᨶ᩠ᨲᩮ ᨠᨲᨸᩩᨬ᩠ᨬᩈᨾ᩠ᨽᩣᩁᩮ ᩈᨲ᩠ᨲᩮ ᨩᩣᨲᩥᨠᨶ᩠ᨲᩣᩁᩣ ᨩᩁᩣᨠᨶ᩠ᨲᩣᩁᩣ ᨻ᩠ᨿᩣᨵᩥᨠᨶ᩠ᨲᩣᩁᩣ ᨾᩁᨱᨠᨶ᩠ᨲᩣᩁᩣ ᩈᩮᩣᨠᨸᩁᩥᨴᩮᩅᨴᩩᨠ᩠ᨡᨴᩮᩣᨾᨶᩔᩩᨸᩣᨿᩣᩈᨠᨶ᩠ᨲᩣᩁᩣ ᨧ ᩈᨻ᩠ᨻᩈ᩠ᨾᩣ ᩈᩴᩈᩣᩁᨠᨶ᩠ᨲᩣᩁᩣ ᨧ ᨲᩣᩁᩮᨲᩥ ᩏᨲ᩠ᨲᩣᩁᩮᨲᩥ ᨸᨲᩣᩁᩮᨲᩥ ᨶᩥᨲ᩠ᨲᩣᩁᩮᨲᩥ ᨶᩥᨻ᩠ᨻᩣᨶᨳᩃᩴ ᨸᩣᨸᩮᨲᩦᨲᩥ ᩋᨲ᩠ᨳᩮᩣ. ᩈᨲ᩠ᨳᩅᩣᩉᩮᩣ ᨧ ᩈᩮᩣ ᩋᨣ᩠ᨣᩮᩣ ᩈᩮᨭ᩠ᨮᩮᩣ ᨸᨵᩣᨶᩮᩣ ᨧᩣᨲᩥ ᩈᨲ᩠ᨳᩅᩣᩉᨣ᩠ᨣᩮᩣ, ᨲᩴ ᩈᨲ᩠ᨳᩅᩣᩉᨣ᩠ᨣᩴ ᩅᩥᨸᩔᩥᩴ ᩈᨾ᩠ᨻᩩᨴ᩠ᨵᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨶᩁᩅᩁᩴ ᩅᩥᨶᩣᨿᨠᨶ᩠ᨲᩥ ᨶᩁᩣᨶᩴ ᩋᨶ᩠ᨲᩁᩮ ᩋᩈᩥᨳᩥᩃᨸᩁᨠ᩠ᨠᨾᩮᩣᨲᩥ ᨶᩁᩅᩦᩁᩮᩣ, ᨲᩴ. ᩅᩥᩈᩮᩈᩮᨶ ᨠᨲᨸᩩᨬ᩠ᨬᩈᨾ᩠ᨽᩣᩁᩮ ᩈᨲ᩠ᨲᩮ ᨶᩮᨲᩥ ᨶᩥᨻ᩠ᨻᩣᨶᨸᩩᩁᩴ ᨸᩣᨸᩮᨲᩦᨲᩥ ᩅᩥᨶᩣᨿᨠᩮᩣ, ᨲᩴ.

᪑᪘᪑. ᩋᨴᨶ᩠ᨲᨴᨾᨶᩴ ᨲᩣᨴᩥᨶ᩠ᨲᩥ ᩁᩣᨣᨴᩮᩣᩈᨾᩮᩣᩉᩣᨴᩥᨠᩥᩃᩮᩈᩈᨾ᩠ᨸᨿᩩᨲ᩠ᨲᨲ᩠ᨲᩣ ᨠᩣᨿᩅᨧᩦᨾᨶᩮᩣᨴ᩠ᩅᩣᩁᩮᩉᩥ ᩋᨴᨶ᩠ᨲᩮ ᩈᨲ᩠ᨲᩮ ᨴᨾᩮᨲᩦᨲᩥ ᩋᨴᨶ᩠ᨲᨴᨾᨶᩮᩣ, ᨲᩴ. ᩍᨭ᩠ᨮᩣᨶᩥᨭ᩠ᨮᩮᩈᩩ ᩋᨠᨾ᩠ᨸᩥᨿᨲᩣᨴᩥᨣᩩᨱᨿᩩᨲ᩠ᨲᩮᩣᨲᩥ ᨲᩣᨴᩦ, ᨲᩴ. ᨾᩉᩣᩅᩣᨴᩥᩴ ᨾᩉᩣᨾᨲᩥᨶ᩠ᨲᩥ ᩈᨠᩈᨾᨿᨸᩁᩈᨾᨿᩅᩣᨴᩦᨶᩴ ᩋᨶ᩠ᨲᩁᩮ ᩋᨲ᩠ᨲᨶᩣ ᩈᨾᨵᩥᨠᨸᩩᨣ᩠ᨣᩃᩅᩥᩁᩉᩥᨲᨲ᩠ᨲᩣ ᨾᩉᩣᩅᩣᨴᩦ ¶ , ᨾᩉᨲᩦ ᨸᨳᩅᩥᩈᨾᩣᨶᩣ ᨾᩮᩁᩩᩈᨾᩣᨶᩣ ᨧ ᨾᨲᩥ ᨿᩔ ᩈᩮᩣ ᨾᩉᩣᨾᨲᩥ, ᨲᩴ ᨾᩉᩣᩅᩣᨴᩥᩴ ᨾᩉᩣᨾᨲᩥᩴ ᩈᨾ᩠ᨻᩩᨴ᩠ᨵᨶ᩠ᨲᩥ ᩍᨾᩥᨶᩣ ᨲᩩᩃ᩠ᨿᩣᨵᩥᨠᩁᨱᩴ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩑᨠᨬ᩠ᨩᩃᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᨡᩮᩣᨾᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᨣᩁᩮ ᨻᨶ᩠ᨵᩩᨾᨲᩥᨿᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨡᩮᩣᨾᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᨿᨸ᩠ᨸᨲ᩠ᨲᩮᩣ ᩈᩣᩈᨶᩮ ᩋᨽᩥᨸ᩠ᨸᩈᨶ᩠ᨶᩮᩣ ᩁᨲᨶᨲ᩠ᨲᨿᨾᩣᨾᨠᩮᩣ ᩅᩥᨸᩔᩥᩔ ᨽᨣᩅᨲᩮᩣ ᩈᨶ᩠ᨲᩥᨠᩮ ᨵᨾ᩠ᨾᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨡᩮᩣᨾᨴᩩᩔᩮᨶ ᨸᩪᨩᩴ ᩋᨠᩣᩈᩥ. ᩈᩮᩣ ᨲᨴᩮᩅ ᨾᩪᩃᩴ ᨠᨲ᩠ᩅᩣ ᨿᩣᩅᨩᩦᩅᩴ ᨸᩩᨬ᩠ᨬᩣᨶᩥ ᨠᨲ᩠ᩅᩣ ᨲᨲᩮᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ. ᨨᩈᩩ ¶ ᨴᩮᩅᩮᩈᩩ ᩋᨸᩁᩣᨸᩁᩴ ᨴᩥᨻ᩠ᨻᩈᩩᨡᩴ ¶ ᩋᨶᩩᨽᩅᩥᨲ᩠ᩅᩣ ᨲᨲᩮᩣ ᨧᩅᩥᨲ᩠ᩅᩣ ᨾᨶᩩᩔᩃᩮᩣᨠᩮ ᨧᨠ᩠ᨠᩅᨲ᩠ᨲᩥᩌᨴᩥᩋᨶᩮᨠᩅᩥᨵᨾᨶᩩᩔᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᨸᩁᩥᨸᩣᨠᨣᨲᩮ ᨸᩩᨬ᩠ᨬᩈᨾ᩠ᨽᩣᩁᩮ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᨿᨸ᩠ᨸᨲ᩠ᨲᩮᩣ ᩈᨲ᩠ᨳᩩ ᩈᨶ᩠ᨲᩥᨠᩮ ᨵᨾ᩠ᨾᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ. ᨠᨲᨸᩩᨬ᩠ᨬᨶᩣᨾᩮᨶ ᨡᩮᩣᨾᨴᩣᨿᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪑᪘᪔. ᩈᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨴᩔᩮᨶ᩠ᨲᩮᩣ ᨶᨣᩁᩮ ᨻᨶ᩠ᨵᩩᨾᨲᩥᨿᩣᨲᩥᩌᨴᩥᨾᩣᩉ. ᨲᨲ᩠ᨳ ᨻᨶ᩠ᨵᩩ ᩅᩩᨧ᩠ᨧᨲᩥ ᨬᩣᨲᨠᩮᩣ, ᨲᩮ ᨻᨶ᩠ᨵᩪ ᨿᩈ᩠ᨾᩥᩴ ᨶᨣᩁᩮ ᩋᨬ᩠ᨬᨾᨬ᩠ᨬᩴ ᩈᨦ᩠ᨥᨭᩥᨲᩣ ᩅᩈᨶ᩠ᨲᩥ, ᨲᩴ ᨶᨣᩁᩴ ‘‘ᨻᨶ᩠ᨵᩩᨾᨲᩦ’’ᨲᩥ ᩅᩩᨧ᩠ᨧᨲᩥ. ᩁᩮᩣᨸᩮᨾᩥ ᨻᩦᨩᩈᨾ᩠ᨸᨴᨶ᩠ᨲᩥ ᨴᩣᨶᩈᩦᩃᩣᨴᩥᨸᩩᨬ᩠ᨬᨻᩦᨩᩈᨾ᩠ᨸᨲ᩠ᨲᩥᩴ ᩁᩮᩣᨸᩮᨾᩥ ᨸᨭ᩠ᨮᨸᩮᨾᩦᨲᩥ ᩋᨲ᩠ᨳᩮᩣ.

ᨡᩮᩣᨾᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᨲᨲᩥᨿᩔ ᩈᩩᨽᩪᨲᩥᩅᨣ᩠ᨣᩔ ᩅᨱ᩠ᨱᨶᩣ ᩈᨾᨲ᩠ᨲᩣ.

ᨧᨲᩩᨽᩣᨱᩅᩣᩁᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪔. ᨠᩩᨱ᩠ᨯᨵᩣᨶᩅᨣ᩠ᨣᩮᩣ

᪑. ᨠᩩᨱ᩠ᨯᨵᩣᨶᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᨲ᩠ᨲᩣᩉᩴ ¶ ᨸᨭᩥᩈᩃ᩠ᩃᩦᨶᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨠᩩᨱ᩠ᨯᨵᩣᨶᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩉᩴᩈᩅᨲᩦᨶᨣᩁᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨲ᩠ᨲᨶᨿᩮᨶ ᨽᨣᩅᨶ᩠ᨲᩴ ᩏᨸᩈᨦ᩠ᨠᨾᩥᨲ᩠ᩅᩣ ᨵᨾ᩠ᨾᩴ ᩈᩩᨱᨶ᩠ᨲᩮᩣ ᩈᨲ᩠ᨳᩣᩁᩴ ᩑᨠᩴ ᨽᩥᨠ᩠ᨡᩩᩴ ᨸᨮᨾᩴ ᩈᩃᩣᨠᩴ ᨣᨱ᩠ᩉᨶ᩠ᨲᩣᨶᩴ ᩋᨣ᩠ᨣᨭ᩠ᨮᩣᨶᩮ ᨮᨸᩮᨶ᩠ᨲᩴ ᨴᩥᩈ᩠ᩅᩣ ᨲᩴ ᨮᩣᨶᨶ᩠ᨲᩁᩴ ᨸᨲ᩠ᨳᩮᨲ᩠ᩅᩣ ᨲᨴᨶᩩᩁᩪᨸᩴ ᨸᩩᨬ᩠ᨬᩴ ᨠᩁᩮᩣᨶ᩠ᨲᩮᩣ ᩅᩥᨧᩁᩥ. ᩈᩮᩣ ᩑᨠᨴᩥᩅᩈᩴ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨶᩥᩁᩮᩣᨵᩈᨾᩣᨸᨲ᩠ᨲᩥᨲᩮᩣ ᩅᩩᨭ᩠ᨮᩣᨿ ᨶᩥᩈᩥᨶ᩠ᨶᩔ ᨾᨶᩮᩣᩈᩥᩃᩣᨧᩩᨱ᩠ᨱᨸᩥᨬ᩠ᨩᩁᩴ ᨾᩉᨶ᩠ᨲᩴ ᨠᨴᩃᩥᨹᩃᨠᨱ᩠ᨱᩥᨠᩴ ᩏᨸᨶᩮᩈᩥ, ᨲᩴ ᨽᨣᩅᩣ ᨸᨭᩥᨣ᩠ᨣᩉᩮᨲ᩠ᩅᩣ ᨸᩁᩥᨽᩩᨬ᩠ᨩᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᩑᨠᩣᨴᩈᨠ᩠ᨡᨲ᩠ᨲᩩᩴ ᨴᩮᩅᩮᩈᩩ ᨴᩮᩅᩁᨩ᩠ᨩᩴ ᨠᩣᩁᩮᩈᩥ. ᨧᨲᩩᩅᩦᩈᨲᩥᩅᩣᩁᩮ ᨧ ᩁᩣᨩᩣ ᩋᩉᩮᩣᩈᩥ ᨧᨠ᩠ᨠᩅᨲ᩠ᨲᩦ.

ᩈᩮᩣ ¶ ᩑᩅᩴ ᩋᨸᩁᩣᨸᩁᩴ ᨸᩩᨬ᩠ᨬᩣᨶᩥ ᨠᨲ᩠ᩅᩣ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᨠᩔᨸᨻᩩᨴ᩠ᨵᨠᩣᩃᩮ ᨽᩩᨾ᩠ᨾᨴᩮᩅᨲᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩥ. ᨴᩦᨥᩣᨿᩩᨠᨻᩩᨴ᩠ᨵᩣᨶᨬ᩠ᨧ ᨶᩣᨾ ᨶ ᩋᨶ᩠ᩅᨴ᩠ᨵᨾᩣᩈᩥᨠᩮᩣ ᩏᨸᩮᩣᩈᨳᩮᩣ ᩉᩮᩣᨲᩥ. ᨲᨳᩣ ᩉᩥ ᩅᩥᨸᩔᩥᩔ ᨽᨣᩅᨲᩮᩣ ᨨᨻ᩠ᨻᩔᨶ᩠ᨲᩁᩮ ᨨᨻ᩠ᨻᩔᨶ᩠ᨲᩁᩮ ᩏᨸᩮᩣᩈᨳᩮᩣ ᩋᩉᩮᩣᩈᩥ, ᨠᩔᨸᨴᩈᨻᩃᩮᩣ ᨸᨶ ᨨᨭ᩠ᨮᩮ ᨨᨭ᩠ᨮᩮ ᨾᩣᩈᩮ ᨸᩣᨲᩥᨾᩮᩣᨠ᩠ᨡᩴ ᩒᩈᩣᩁᩮᩈᩥ, ᨲᩔ ᨸᩣᨲᩥᨾᩮᩣᨠ᩠ᨡᩔ ᩒᩈᩣᩁᨱᨠᩣᩃᩮ ᨴᩥᩈᩣᩅᩣᩈᩥᨠᩣ ᨴ᩠ᩅᩮ ᩈᩉᩣᨿᨠᩣ ᨽᩥᨠ᩠ᨡᩪ ‘‘ᩏᨸᩮᩣᩈᨳᩴ ᨠᩁᩥᩔᩣᨾᩣ’’ᨲᩥ ᨣᨧ᩠ᨨᨶ᩠ᨲᩥ. ᩋᨿᩴ ᨽᩩᨾ᩠ᨾᨴᩮᩅᨲᩣ ᨧᩥᨶ᩠ᨲᩮᩈᩥ – ‘‘ᩍᨾᩮᩈᩴ ᨴ᩠ᩅᩥᨶ᩠ᨶᩴ ¶ ᨽᩥᨠ᩠ᨡᩪᨶᩴ ᨾᩮᨲ᩠ᨲᩥ ᩋᨲᩥᩅᩥᨿ ᨴᩊ᩠ᩉᩣ, ᨠᩥᩴ ᨶᩩ ᨡᩮᩣ ᨽᩮᨴᨠᩮ ᩈᨲᩥ ᨽᩥᨩ᩠ᨩᩮᨿ᩠ᨿ, ᨶ ᨽᩥᨩ᩠ᨩᩮᨿ᩠ᨿᩣ’’ᨲᩥ. ᨲᩮᩈᩴ ᩒᨠᩣᩈᩴ ᩒᩃᩮᩣᨠᨿᨾᩣᨶᩣ ᨲᩮᩈᩴ ᩋᩅᩥᨴᩪᩁᩮ ᨣᨧ᩠ᨨᨲᩥ.

ᩋᨳᩮᨠᩮᩣ ᨳᩮᩁᩮᩣ ᩑᨠᩔ ᩉᨲ᩠ᨳᩮ ᨸᨲ᩠ᨲᨧᩦᩅᩁᩴ ᨴᨲ᩠ᩅᩣ ᩈᩁᩦᩁᩅᩊᨬ᩠ᨩᨶᨲ᩠ᨳᩴ ᩏᨴᨠᨹᩣᩈᩩᨠᨭ᩠ᨮᩣᨶᩴ ᨣᨶ᩠ᨲ᩠ᩅᩣ ᨵᩮᩣᨲᩉᨲ᩠ᨳᨸᩣᨴᩮᩣ ᩉᩩᨲ᩠ᩅᩣ ᨣᩩᨾ᩠ᨻᩈᨾᩦᨸᨲᩮᩣ ᨶᩥᨠ᩠ᨡᨾᨲᩥ. ᨽᩩᨾ᩠ᨾᨴᩮᩅᨲᩣ ᨲᩔ ᨳᩮᩁᩔ ᨸᨧ᩠ᨨᨲᩮᩣ ᨸᨧ᩠ᨨᨲᩮᩣ ᩏᨲ᩠ᨲᨾᩁᩪᨸᩣ ᩍᨲ᩠ᨳᩦ ᩉᩩᨲ᩠ᩅᩣ ᨠᩮᩈᩮ ᩅᩥᨵᩩᨶᩥᨲ᩠ᩅᩣ ᩈᩴᩅᩥᨵᩣᨿ ᨻᨶ᩠ᨵᨶ᩠ᨲᩦ ᩅᩥᨿ ᨸᩥᨭ᩠ᨮᩥᨿᩴ ᨸᩴᩈᩩᩴ ᨸᩩᨬ᩠ᨨᨾᩣᨶᩣ ᩅᩥᨿ ᩈᩣᨭᨠᩴ ᩈᩴᩅᩥᨵᩣᨿ ᨶᩥᩅᩣᩈᨿᨾᩣᨶᩣ ᩅᩥᨿ ᨧ ᩉᩩᨲ᩠ᩅᩣ ᨳᩮᩁᩔ ᨸᨴᩣᨶᩩᨸᨴᩥᨠᩣ ᩉᩩᨲ᩠ᩅᩣ ᨣᩩᨾ᩠ᨻᨲᩮᩣ ᨶᩥᨠ᩠ᨡᨶ᩠ᨲᩣ ¶ . ᩑᨠᨾᨶ᩠ᨲᩮ ᨮᩥᨲᩮᩣ ᩈᩉᩣᨿᨠᨲ᩠ᨳᩮᩁᩮᩣ ᨲᩴ ᨠᩣᩁᨱᩴ ᨴᩥᩈ᩠ᩅᩣᩅ ᨴᩮᩣᨾᨶᩔᨩᩣᨲᩮᩣ ‘‘ᨶᨭ᩠ᨮᩮᩣ ᨴᩣᨶᩥ ᨾᩮ ᩍᨾᩥᨶᩣ ᨽᩥᨠ᩠ᨡᩩᨶᩣ ᩈᨴ᩠ᨵᩥᩴ ᨴᩦᨥᩁᨲ᩠ᨲᩣᨶᩩᨣᨲᩮᩣ ᩈᩥᨶᩮᩉᩮᩣ, ᩈᨧᩣᩉᩴ ᩑᩅᩴᩅᩥᨵᨽᩣᩅᩴ ᨩᩣᨶᩮᨿ᩠ᨿᩴ, ᩑᨲ᩠ᨲᨠᩴ ᨠᩣᩃᩴ ᩍᨾᩥᨶᩣ ᩈᨴ᩠ᨵᩥᩴ ᩅᩥᩔᩣᩈᩴ ᨶ ᨠᩁᩮᨿ᩠ᨿ’’ᨶ᩠ᨲᩥ ᨧᩥᨶ᩠ᨲᩮᨲ᩠ᩅᩣ ᩌᨣᨧ᩠ᨨᨶ᩠ᨲᩴᨿᩮᩅ ᨶᩴ ‘‘ᨣᨱ᩠ᩉᩣᩉᩣᩅᩩᩈᩮᩣ, ᨲᩩᨿ᩠ᩉᩴ ᨸᨲ᩠ᨲᨧᩦᩅᩁᩴ, ᨲᩣᨴᩥᩈᩮᨶ ᨸᩣᨸᩮᨶ ᩈᨴ᩠ᨵᩥᩴ ᩑᨠᨾᨣ᩠ᨣᩮᨶ ᨶ ᨣᨧ᩠ᨨᩣᨾᩦ’’ᨲᩥ ᩌᩉ. ᨲᩴ ᨠᨳᩴ ᩈᩩᨲ᩠ᩅᩣ ᨲᩔ ᩃᨩ᩠ᨩᩥᨽᩥᨠ᩠ᨡᩩᨶᩮᩣ ᩉᨴᨿᩴ ᨲᩥᨡᩥᨱᩈᨲ᩠ᨲᩥᩴ ᨣᩉᩮᨲ᩠ᩅᩣ ᩅᩥᨴ᩠ᨵᩴ ᩅᩥᨿ ᩋᩉᩮᩣᩈᩥ. ᨲᨲᩮᩣ ᨶᩴ ᩌᩉ – ‘‘ᩌᩅᩩᩈᩮᩣ, ᨠᩥᨶ᩠ᨶᩣᨾᩮᨲᩴ ᩅᨴᩈᩥ, ᩋᩉᩴ ᩑᨲ᩠ᨲᨠᩴ ᨠᩣᩃᩴ ᨴᩩᨠ᩠ᨠᨭᨾᨲ᩠ᨲᨾ᩠ᨸᩥ ᩌᨸᨲ᩠ᨲᩥᩴ ᨶ ᨩᩣᨶᩣᨾᩥ, ᨲ᩠ᩅᩴ ᨸᨶ ᨾᩴ ᩋᨩ᩠ᨩ ‘ᨸᩣᨸᩮᩣ’ᨲᩥ ᩅᨴᩈᩥ, ᨠᩥᩴ ᨲᩮ ᨴᩥᨭ᩠ᨮᨶ᩠ᨲᩥ, ᨠᩥᩴ ᩋᨬ᩠ᨬᩮᨶ ᨴᩥᨭ᩠ᨮᩮᨶ, ᨠᩥᩴ ᨲ᩠ᩅᩴ ᩑᩅᩴᩅᩥᨵᩮᨶ ᩋᩃᨦ᩠ᨠᨲᨸᨭᩥᨿᨲ᩠ᨲᩮᨶ ᨾᩣᨲᩩᨣᩣᨾᩮᨶ ᩈᨴ᩠ᨵᩥᩴ ᩑᨠᨭ᩠ᨮᩣᨶᩮ ᩉᩩᨲ᩠ᩅᩣ ᨶᩥᨠ᩠ᨡᨶ᩠ᨲᩮᩣ’’ᨲᩥ? ‘‘ᨶᨲ᩠ᨳᩮᨲᩴ, ᩌᩅᩩᩈᩮᩣ, ᨾᨿ᩠ᩉᩴ, ᨶᩣᩉᩴ ᩑᩅᩁᩪᨸᩴ ᨾᩣᨲᩩᨣᩣᨾᩴ ᨸᩔᩣᨾᩦ’’ᨲᩥ ᨲᩔ ᨿᩣᩅᨲᨲᩥᨿᩴ ᨠᨳᩮᨶ᩠ᨲᩔᩣᨸᩥ ᩍᨲᩁᩮᩣ ᨳᩮᩁᩮᩣ ᨠᨳᩴ ᩋᩈᨴ᩠ᨴᩉᩥᨲ᩠ᩅᩣ ᩋᨲ᩠ᨲᨶᩣ ᨴᩥᨭ᩠ᨮᨠᩣᩁᨱᩴᨿᩮᩅ ᨽᩪᨲᨲ᩠ᨲᩴ ᨠᨲ᩠ᩅᩣ ᨣᨱ᩠ᩉᨶ᩠ᨲᩮᩣ ᨲᩮᨶ ᩈᨴ᩠ᨵᩥᩴ ᩑᨠᨾᨣ᩠ᨣᩮᨶ ᩋᨣᨶ᩠ᨲ᩠ᩅᩣ ᩋᨬ᩠ᨬᩮᨶ ᨾᨣ᩠ᨣᩮᨶ ᩈᨲ᩠ᨳᩩ ᩈᨶ᩠ᨲᩥᨠᩴ ᨣᨲᩮᩣ. ᩍᨲᩁᩮᩣᨸᩥ ᨽᩥᨠ᩠ᨡᩩ ᩋᨬ᩠ᨬᩮᨶ ᨾᨣ᩠ᨣᩮᨶ ᩈᨲ᩠ᨳᩩ ᩈᨶ᩠ᨲᩥᨠᩴᨿᩮᩅ ᨣᨲᩮᩣ.

ᨲᨲᩮᩣ ¶ ᨽᩥᨠ᩠ᨡᩩᩈᨦ᩠ᨥᩔ ᩏᨸᩮᩣᩈᨳᩣᨣᩣᩁᩴ ᨸᩅᩥᩈᨶᩅᩮᩃᩣᨿ ᩈᩮᩣ ᨽᩥᨠ᩠ᨡᩩ ᨲᩴ ᨽᩥᨠ᩠ᨡᩩᩴ ᩏᨸᩮᩣᩈᨳᨣ᩠ᨣᩮ ᨴᩥᩈ᩠ᩅᩣ ᩈᨬ᩠ᨩᩣᨶᩥᨲ᩠ᩅᩣ ‘‘ᩍᨾᩈ᩠ᨾᩥᩴ ᩏᨸᩮᩣᩈᨳᨣ᩠ᨣᩮ ᩑᩅᩁᩪᨸᩮᩣ ᨶᩣᨾ ᨸᩣᨸᨽᩥᨠ᩠ᨡᩩ ᩋᨲ᩠ᨳᩥ, ᨶᩣᩉᩴ ᨲᩮᨶ ᩈᨴ᩠ᨵᩥᩴ ᩏᨸᩮᩣᩈᨳᩴ ᨠᩁᩥᩔᩣᨾᩦ’’ᨲᩥ ᨶᩥᨠ᩠ᨡᨾᩥᨲ᩠ᩅᩣ ᨻᩉᩥ ᩋᨭ᩠ᨮᩣᩈᩥ. ᩋᨳ ᨽᩩᨾ᩠ᨾᨴᩮᩅᨲᩣ ‘‘ᨽᩣᩁᩥᨿᩴ ᨾᨿᩣ ᨠᨾ᩠ᨾᩴ ᨠᨲ’’ᨶ᩠ᨲᩥ ᨾᩉᩃ᩠ᩃᨠᩏᨸᩣᩈᨠᩅᨱ᩠ᨱᩮᨶ ᨲᩔ ᩈᨶ᩠ᨲᩥᨠᩴ ᨣᨶ᩠ᨲ᩠ᩅᩣ – ‘‘ᨠᩈ᩠ᨾᩣ, ᨽᨶ᩠ᨲᩮ, ᩋᨿ᩠ᨿᩮᩣ ᩍᨾᩈ᩠ᨾᩥᩴ ᨮᩣᨶᩮ ᨮᩥᨲᩮᩣ’’ᨲᩥ ᩌᩉ. ‘‘ᩏᨸᩣᩈᨠ, ᩍᨾᩴ ᩏᨸᩮᩣᩈᨳᨣ᩠ᨣᩴ ᩑᨠᩮᩣ ᨸᩣᨸᨽᩥᨠ᩠ᨡᩩ ᨸᩅᩥᨭ᩠ᨮᩮᩣ, ‘ᩋᩉᩴ ᨲᩮᨶ ᩈᨴ᩠ᨵᩥᩴ ᩏᨸᩮᩣᩈᨳᩴ ᨶ ᨠᩁᩮᩣᨾᩦ’ᨲᩥ ᨻᩉᩥ ᨮᩥᨲᩮᩣᨾ᩠ᩉᩦ’’ᨲᩥ. ‘‘ᨽᨶ᩠ᨲᩮ, ᨾᩣ ᩑᩅᩴ ᨣᨱ᩠ᩉᨳ, ᨸᩁᩥᩈᩩᨴ᩠ᨵᩈᩦᩃᩮᩣ ᩑᩈ ᨽᩥᨠ᩠ᨡᩩ, ᨲᩩᨾ᩠ᩉᩮᩉᩥ ᨴᩥᨭ᩠ᨮᨾᩣᨲᩩᨣᩣᨾᩮᩣ ᨶᩣᨾ ᩋᩉᩴ. ᨾᨿᩣ ᨲᩩᨾ᩠ᩉᩣᨠᩴ ᩅᩦᨾᩴᩈᨶᨲ᩠ᨳᩣᨿ ¶ ‘ᨴᩊ᩠ᩉᩣ ᨶᩩ ᨡᩮᩣ ᩍᨾᩮᩈᩴ ᨳᩮᩁᩣᨶᩴ ᨾᩮᨲ᩠ᨲᩥ, ᨶᩮᩣ ᨴᩊ᩠ᩉᩣ’ᨲᩥ ᨽᩥᨩ᩠ᨩᨶᩣᨽᩥᨩ᩠ᨩᨶᨽᩣᩅᩴ ᩒᩃᩮᩣᨠᩮᨶ᩠ᨲᩮᨶ ᨲᩴ ᨠᨾ᩠ᨾᩴ ᨠᨲ’’ᨶ᩠ᨲᩥ. ‘‘ᨠᩮᩣ ᨸᨶ ᨲ᩠ᩅᩴ, ᩈᨸ᩠ᨸᩩᩁᩥᩈᩣ’’ᨲᩥ? ‘‘ᩋᩉᩴ ᩑᨠᩣ ᨽᩩᨾ᩠ᨾᨴᩮᩅᨲᩣ, ᨽᨶ᩠ᨲᩮ’’ᨲᩥ. ᨴᩮᩅᨸᩩᨲ᩠ᨲᩮᩣ ᨠᨳᩮᨶ᩠ᨲᩮᩣᨿᩮᩅ ᨴᩥᨻ᩠ᨻᩣᨶᩩᨽᩣᩅᩮᨶ ᨮᨲ᩠ᩅᩣ ᨳᩮᩁᩔ ᨸᩣᨴᨾᩪᩃᩮ ᨸᨲᩥᨲ᩠ᩅᩣ ‘‘ᨾᨿ᩠ᩉᩴ, ᨽᨶ᩠ᨲᩮ, ᨡᨾᨳ, ᨳᩮᩁᩔ ᩑᩈᩮᩣ ᨴᩮᩣᩈᩮᩣ ᨶᨲ᩠ᨳᩥ, ᩏᨸᩮᩣᩈᨳᩴ ᨠᩁᩮᩣᨳᩣ’’ᨲᩥ ᨳᩮᩁᩴ ᨿᩣᨧᩥᨲ᩠ᩅᩣ ᩏᨸᩮᩣᩈᨳᨣ᩠ᨣᩴ ᨸᩅᩮᩈᩮᩈᩥ. ᩈᩮᩣ ᨳᩮᩁᩮᩣ ᩏᨸᩮᩣᩈᨳᩴ ᨲᩣᩅ ᩑᨠᨭ᩠ᨮᩣᨶᩮ ᩋᨠᩣᩈᩥ. ᨾᩥᨲ᩠ᨲᩈᨶ᩠ᨳᩅᩅᩈᩮᨶ ᨸᨶ ᨸᩩᨶ ᨲᩮᨶ ᩈᨴ᩠ᨵᩥᩴ ᨶ ᩑᨠᨭ᩠ᨮᩣᨶᩮ ᩅᩈᩥ. ᩍᨾᩔ ᨳᩮᩁᩔ ᨴᩮᩣᩈᩴ ᨶ ᨠᨳᩮᩈᩥ. ᩋᨸᩁᨽᩣᨣᩮ ᨧᩩᨴᩥᨲᨠᨲ᩠ᨳᩮᩁᩮᩣ ᨸᨶ ᩅᩥᨸᩔᨶᩣᨿ ᨠᨾ᩠ᨾᩴ ᨠᩁᩮᩣᨶ᩠ᨲᩮᩣ ᩋᩁᩉᨲ᩠ᨲᩴ ᨸᩣᨸᩩᨱᩥ.

ᨽᩩᨾ᩠ᨾᨴᩮᩅᨲᩣ ᨲᩔ ᨠᨾ᩠ᨾᩔ ᨶᩥᩔᨶ᩠ᨴᩮᨶ ᩑᨠᩴ ᨻᩩᨴ᩠ᨵᨶ᩠ᨲᩁᩴ ᩋᨸᩣᨿᨲᩮᩣ ᨶ ᨾᩩᨧ᩠ᨧᩥᨲ᩠ᨳ. ᩈᨧᩮ ᨸᨶ ᨠᩣᩃᩮᨶ ᨠᩣᩃᩴ ᨾᨶᩩᩔᨲ᩠ᨲᩴ ᩌᨣᨧ᩠ᨨᨲᩥ, ᩋᨬ᩠ᨬᩮᨶ ᨿᩮᨶ ᨠᩮᨶᨧᩥ ᨠᨲᩮᩣ ᨴᩮᩣᩈᩮᩣ ᨲᩔᩮᩅ ᩏᨸᩁᩥ ᨸᨲᨲᩥ. ᩈᩮᩣ ᩋᨾ᩠ᩉᩣᨠᩴ ᨽᨣᩅᨲᩮᩣ ᩏᨸ᩠ᨸᨶ᩠ᨶᨠᩣᩃᩮ ᩈᩣᩅᨲ᩠ᨳᩥᨿᩴ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩥ, ᨵᩣᨶᨾᩣᨱᩅᩮᩣᨲᩥᩔ ᨶᩣᨾᩴ ¶ ᩋᨠᩴᩈᩩ. ᩈᩮᩣ ᩅᨿᨸ᩠ᨸᨲ᩠ᨲᩮᩣ ᨲᨿᩮᩣ ᩅᩮᨴᩮ ᩏᨣ᩠ᨣᨱ᩠ᩉᩥᨲ᩠ᩅᩣ ᨾᩉᩃ᩠ᩃᨠᨠᩣᩃᩮ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᩈᩣᩈᨶᩮ ᨸᨻ᩠ᨻᨩᩥ. ᨲᩔ ᩏᨸᩈᨾ᩠ᨸᨶ᩠ᨶᨴᩥᩅᩈᨲᩮᩣ ᨸᨭ᩠ᨮᩣᨿ ᩑᨠᩣ ᩋᩃᨦ᩠ᨠᨲᨸᨭᩥᨿᨲ᩠ᨲᩣ ᩍᨲ᩠ᨳᩦ ᨲᩈ᩠ᨾᩥᩴ ᨣᩣᨾᩴ ᨸᩅᩥᩈᨶ᩠ᨲᩮ ᩈᨴ᩠ᨵᩥᩴᨿᩮᩅ ᨸᩅᩥᩈᨲᩥ, ᨶᩥᨠ᩠ᨡᨾᨶ᩠ᨲᩮ ᨶᩥᨠ᩠ᨡᨾᨲᩥ, ᩅᩥᩉᩣᩁᩴ ᨸᩅᩥᩈᨶ᩠ᨲᩮᨸᩥ ᩈᨴ᩠ᨵᩥᩴ ᨸᩅᩥᩈᨲᩥ, ᨲᩥᨭ᩠ᨮᨶ᩠ᨲᩮᨸᩥ ᨲᩥᨭ᩠ᨮᨲᩦᨲᩥ ᩑᩅᩴ ᨶᩥᨧ᩠ᨧᩣᨶᩩᨻᨶ᩠ᨵᩣ ᨸᨬ᩠ᨬᩣᨿᨲᩥ. ᨳᩮᩁᩮᩣ ᨲᩴ ᨶ ᨸᩔᨲᩥ. ᨲᩔ ᨸᨶ ᨸᩩᩁᩥᨾᨠᨾ᩠ᨾᩔ ᨶᩥᩔᨶ᩠ᨴᩮᨶ ᩈᩣ ᩋᨬ᩠ᨬᩮᩈᩴ ᩏᨸᨭ᩠ᨮᩣᩈᩥ.

ᨣᩣᨾᩮ ¶ ᨿᩣᨣᩩᨽᩥᨠ᩠ᨡᩴ ᨴᨴᨾᩣᨶᩣ ᩍᨲ᩠ᨳᩥᨿᩮᩣ, ‘‘ᨽᨶ᩠ᨲᩮ, ᩋᨿᩴ ᩑᨠᩮᩣ ᨿᩣᨣᩩᩏᩊᩩᨦ᩠ᨠᩮᩣ ᨲᩩᨾ᩠ᩉᩣᨠᩴ, ᩑᨠᩮᩣ ᩍᨾᩥᩔᩣ ᩋᨾ᩠ᩉᩣᨠᩴ ᩈᩉᩣᨿᩥᨠᩣᨿᩣ’’ᨲᩥ ᨸᩁᩥᩉᩣᩈᩴ ᨠᩁᩮᩣᨶ᩠ᨲᩥ. ᨳᩮᩁᩔ ᨾᩉᨲᩦ ᩅᩥᩉᩮᩈᩣ ᩉᩮᩣᨲᩥ. ᩅᩥᩉᩣᩁᨣᨲᨾ᩠ᨸᩥ ᨶᩴ ᩈᩣᨾᨱᩮᩁᩣ ᨧᩮᩅ ᨴᩉᩁᨽᩥᨠ᩠ᨡᩪ ᨧ ᨸᩁᩥᩅᩣᩁᩮᨲ᩠ᩅᩣ ‘‘ᨵᩣᨶᩮᩣ ᨠᩮᩣᨱ᩠ᨯᩮᩣ ᨩᩣᨲᩮᩣ’’ᨲᩥ ᨸᩁᩥᩉᩣᩈᩴ ᨠᩁᩮᩣᨶ᩠ᨲᩥ. ᩋᨳᩔ ᨲᩮᨶᩮᩅ ᨠᩣᩁᨱᩮᨶ ᨠᩩᨱ᩠ᨯᨵᩣᨶᩮᩣ ᨳᩮᩁᩮᩣᨲᩥ ᨶᩣᨾᩴ ᨩᩣᨲᩴ. ᩈᩮᩣ ᩏᨭ᩠ᨮᩣᨿ ᩈᨾᩩᨭ᩠ᨮᩣᨿ ᨲᩮᩉᩥ ᨠᩁᩥᨿᨾᩣᨶᩴ ᨠᩮᩊᩥᩴ ᩈᩉᩥᨲᩩᩴ ᩋᩈᨠ᩠ᨠᩮᩣᨶ᩠ᨲᩮᩣ ᩏᨾ᩠ᨾᩣᨴᩴ ᨣᩉᩮᨲ᩠ᩅᩣ ‘‘ᨲᩩᨾ᩠ᩉᩮ ᨠᩮᩣᨱ᩠ᨯᩣ, ᨲᩩᨾ᩠ᩉᩣᨠᩴ ᩏᨸᨩ᩠ᨫᩣᨿᩮᩣ ᨠᩮᩣᨱ᩠ᨯᩮᩣ, ᩌᨧᩁᩥᨿᩮᩣ ᨠᩮᩣᨱ᩠ᨯᩮᩣ’’ᨲᩥ ᩅᨴᨲᩥ. ᩋᨳ ᨶᩴ ᩈᨲ᩠ᨳᩩ ᩌᩁᩮᩣᨧᩮᩈᩩᩴ – ‘‘ᨠᩩᨱ᩠ᨯᨵᩣᨶᩮᩣ, ᨽᨶ᩠ᨲᩮ, ᨴᩉᩁᩈᩣᨾᨱᩮᩁᩮᩉᩥ ᩈᨴ᩠ᨵᩥᩴ ᩑᩅᩴ ᨹᩁᩩᩈᩅᩣᨧᩴ ᩅᨴᨲᩦ’’ᨲᩥ. ᩈᨲ᩠ᨳᩣ ᨲᩴ ᨸᨠ᩠ᨠᩮᩣᩈᩣᨸᩮᨲ᩠ᩅᩣ ‘‘ᩈᨧ᩠ᨧᩴ ᨠᩥᩁ ᨲ᩠ᩅᩴ, ᨵᩣᨶ, ᨴᩉᩁᩈᩣᨾᨱᩮᩁᩮᩉᩥ ᩈᨴ᩠ᨵᩥᩴ ᨹᩁᩩᩈᩅᩣᨧᩴ ᩅᨴᩈᩦ’’ᨲᩥ ᨸᩩᨧ᩠ᨨᩥ. ᨲᩮᨶ ‘‘ᩈᨧ᩠ᨧᩴ ᨽᨣᩅᩣ’’ᨲᩥ ᩅᩩᨲ᩠ᨲᩮ – ‘‘ᨠᩈ᩠ᨾᩣ ᩑᩅᩴ ᩅᨴᩈᩦ’’ᨲᩥ ᩌᩉ. ‘‘ᨽᨶ᩠ᨲᩮ, ᨶᩥᨻᨴ᩠ᨵᩴ ᩅᩥᩉᩮᩈᩴ ᩈᩉᩥᨲᩩᩴ ᩋᩈᨠ᩠ᨠᩮᩣᨶ᩠ᨲᩮᩣ ᩑᩅᩴ ᨠᨳᩮᨾᩦ’’ᨲᩥ ¶ . ‘‘ᨲ᩠ᩅᩴ ᨸᩩᨻ᩠ᨻᩮ ᨠᨲᨠᨾ᩠ᨾᩴ ᨿᩣᩅᨩ᩠ᨩᨴᩥᩅᩈᩣ ᨩᩦᩁᩣᨸᩮᨲᩩᩴ ᨶ ᩈᨠ᩠ᨠᩮᩣᩈᩥ, ᨸᩩᨶ ᩑᩅᩴ ᨹᩁᩩᩈᩅᩣᨧᩴ ᨾᩣ ᩅᨴ ᨽᩥᨠ᩠ᨡᩪ’’ᨲᩥ ᩅᨲ᩠ᩅᩣ ᩌᩉ –

‘‘ᨾᩣᩅᩮᩣᨧ ᨹᩁᩩᩈᩴ ᨠᨬ᩠ᨧᩥ, ᩅᩩᨲ᩠ᨲᩣ ᨸᨭᩥᩅᨴᩮᨿ᩠ᨿᩩ ᨲᩴ;

ᨴᩩᨠ᩠ᨡᩣ ᩉᩥ ᩈᩣᩁᨾ᩠ᨽᨠᨳᩣ, ᨸᨭᩥᨴᨱ᩠ᨯᩣ ᨹᩩᩈᩮᨿ᩠ᨿᩩ ᨲᩴ.

‘‘ᩈᨧᩮ ᨶᩮᩁᩮᩈᩥ ᩋᨲ᩠ᨲᩣᨶᩴ, ᨠᩴᩈᩮᩣ ᩏᨸᩉᨲᩮᩣ ᨿᨳᩣ;

ᩑᩈ ᨸᨲ᩠ᨲᩮᩣᩈᩥ ᨶᩥᨻ᩠ᨻᩣᨶᩴ, ᩈᩣᩁᨾ᩠ᨽᩮᩣ ᨲᩮ ᨶ ᩅᩥᨩ᩠ᨩᨲᩦ’’ᨲᩥ. (ᨵ. ᨸ. ᪑᪓᪓-᪑᪓᪔) –

ᩍᨾᨬ᩠ᨧ ᨸᨶ ᨲᩔ ᨳᩮᩁᩔ ᨾᩣᨲᩩᨣᩣᨾᩮᨶ ᩈᨴ᩠ᨵᩥᩴ ᩅᩥᨧᩁᨱᨽᩣᩅᩴ ᨠᩮᩣᩈᩃᩁᨬ᩠ᨬᩮᩣᨸᩥ ᨠᨳᨿᩥᩴᩈᩩ. ᩁᩣᨩᩣ ‘‘ᨣᨧ᩠ᨨᨳ, ᨽᨱᩮ, ᨶᩴ ᩅᩦᨾᩴᩈᨳᩣ’’ᨲᩥ ᨸᩮᩈᩮᨲ᩠ᩅᩣ ᩈᨿᨾ᩠ᨸᩥ ᨾᨶ᩠ᨴᩮᨶᩮᩅ ᨸᩁᩥᩅᩣᩁᩮᨶ ᩈᨴ᩠ᨵᩥᩴ ᨳᩮᩁᩔ ᩈᨶ᩠ᨲᩥᨠᩴ ᨣᨶ᩠ᨲ᩠ᩅᩣ ᩑᨠᨾᨶ᩠ᨲᩮ ᩒᩃᩮᩣᨠᩮᨶ᩠ᨲᩮᩣ ᩋᨭ᩠ᨮᩣᩈᩥ. ᨲᩈ᩠ᨾᩥᩴ ᨡᨱᩮ ᨳᩮᩁᩮᩣ ᩈᩪᨧᩥᨠᨾ᩠ᨾᩴ ᨠᩁᩮᩣᨶ᩠ᨲᩮᩣ ᨶᩥᩈᩥᨶ᩠ᨶᩮᩣ ᩉᩮᩣᨲᩥ. ᩈᩣᨸᩥ ᩍᨲ᩠ᨳᩦ ᩋᩅᩥᨴᩪᩁᩮ ᨮᩣᨶᩮ ᨮᩥᨲᩣ ᩅᩥᨿ ᨸᨬ᩠ᨬᩣᨿᨲᩥ.

ᩁᩣᨩᩣ ¶ ᨲᩴ ᨴᩥᩈ᩠ᩅᩣ ‘‘ᩋᨲ᩠ᨳᩥ ᨲᩴ ᨠᩣᩁᨱ’’ᨶ᩠ᨲᩥ ᨲᩔᩣ ᨮᩥᨲᨭ᩠ᨮᩣᨶᩴ ᩋᨣᨾᩣᩈᩥ. ᩈᩣ ᨲᩈ᩠ᨾᩥᩴ ᩌᨣᨧ᩠ᨨᨶ᩠ᨲᩮ ᨳᩮᩁᩔ ᩅᩈᨶᨸᨱ᩠ᨱᩈᩣᩃᩴ ᨸᩅᩥᨭ᩠ᨮᩣ ᩅᩥᨿ ᩋᩉᩮᩣᩈᩥ. ᩁᩣᨩᩣᨸᩥ ᨲᩣᨿ ᩈᨴ᩠ᨵᩥᩴ ᩑᩅ ᨸᨱ᩠ᨱᩈᩣᩃᩣᨿᩴ ᨸᩅᩥᩈᩥᨲ᩠ᩅᩣ ᩈᨻ᩠ᨻᨲ᩠ᨳ ᩒᩃᩮᩣᨠᩮᨶ᩠ᨲᩮᩣ ᩋᨴᩥᩈ᩠ᩅᩣ ‘‘ᨶᩣᨿᩴ ᨾᩣᨲᩩᨣᩣᨾᩮᩣ, ᨳᩮᩁᩔ ᩑᨠᩮᩣ ᨠᨾ᩠ᨾᩅᩥᨸᩣᨠᩮᩣ’’ᨲᩥ ᩈᨬ᩠ᨬᩴ ᨠᨲ᩠ᩅᩣ ᨸᨮᨾᩴ ᨳᩮᩁᩔ ᩈᨾᩦᨸᩮᨶ ᨣᨧ᩠ᨨᨶ᩠ᨲᩮᩣᨸᩥ ᨳᩮᩁᩴ ᩋᩅᨶ᩠ᨴᩥᨲ᩠ᩅᩣ ᨲᩔ ᨠᩣᩁᨱᩔ ᩋᨽᩪᨲᨽᩣᩅᩴ ᨬᨲ᩠ᩅᩣ ᨸᨱ᩠ᨱᩈᩣᩃᨲᩮᩣ ᨶᩥᨠ᩠ᨡᨾᩥᨲ᩠ᩅᩣ ᨳᩮᩁᩴ ᩅᨶ᩠ᨴᩥᨲ᩠ᩅᩣ ᩑᨠᨾᨶ᩠ᨲᩮ ¶ ᨶᩥᩈᩥᨶ᩠ᨶᩮᩣ ‘‘ᨠᨧ᩠ᨧᩥ, ᨽᨶ᩠ᨲᩮ, ᨸᩥᨱ᩠ᨯᨠᩮᨶ ᨶ ᨠᩥᩃᨾᨳᩣ’’ᨲᩥ ᨸᩩᨧ᩠ᨨᩥ. ᨳᩮᩁᩮᩣ ‘‘ᩅᨭ᩠ᨭᨲᩥ, ᨾᩉᩣᩁᩣᨩᩣ’’ᨲᩥ ᩌᩉ. ‘‘ᨩᩣᨶᩣᨾᩉᩴ, ᨽᨶ᩠ᨲᩮ, ᩋᨿ᩠ᨿᩔ ᨠᨳᩴ, ᩑᩅᩁᩪᨸᩮᨶᩩᨸᨠ᩠ᨠᩥᩃᩮᩈᩮᨶ ᩈᨴ᩠ᨵᩥᩴ ᨧᩁᨶ᩠ᨲᩣᨶᩴ ᨲᩩᨾ᩠ᩉᩣᨠᩴ ᨠᩮ ᨶᩣᨾ ᨸᩈᩦᨴᩥᩔᨶ᩠ᨲᩥ, ᩍᨲᩮᩣ ᨸᨭ᩠ᨮᩣᨿ ᩅᩮᩣ ᨠᨲ᩠ᨳᨧᩥ ᨣᨾᨶᨠᩥᨧ᩠ᨧᩴ ᨶᨲ᩠ᨳᩥ. ᩋᩉᩴ ᨧᨲᩪᩉᩥ ᨸᨧ᩠ᨧᨿᩮᩉᩥ ᩏᨸᨭ᩠ᨮᩉᩥᩔᩣᨾᩥ, ᨲᩩᨾ᩠ᩉᩮ ᨿᩮᩣᨶᩥᩈᩮᩣᨾᨶᩈᩥᨠᩣᩁᩮ ᨾᩣ ᨸᨾᨩ᩠ᨩᩥᨲ᩠ᨳᩣ’’ᨲᩥ ᩅᨲ᩠ᩅᩣ ᨶᩥᨻᨴ᩠ᨵᨽᩥᨠ᩠ᨡᩴ ᨸᨭ᩠ᨮᨸᩮᩈᩥ. ᨳᩮᩁᩮᩣ ᩁᩣᨩᩣᨶᩴ ᩏᨸᨲ᩠ᨳᨾ᩠ᨽᨠᩴ ᩃᨽᩥᨲ᩠ᩅᩣ ᨽᩮᩣᨩᨶᩈᨸ᩠ᨸᩣᨿᩮᨶ ᩑᨠᨣ᩠ᨣᨧᩥᨲ᩠ᨲᩮᩣ ᩉᩩᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᩋᩁᩉᨲ᩠ᨲᩴ ᨸᩣᨸᩩᨱᩥ. ᨲᨲᩮᩣ ᨸᨭ᩠ᨮᩣᨿ ᩈᩣ ᩍᨲ᩠ᨳᩦ ᩋᨶ᩠ᨲᩁᨵᩣᨿᩥ.

ᨲᨴᩣ ᨾᩉᩣᩈᩩᨽᨴ᩠ᨴᩣ ᩏᨣ᩠ᨣᨶᨣᩁᩮ ᨾᩥᨧ᩠ᨨᩣᨴᩥᨭ᩠ᨮᩥᨠᩩᩃᩮ ᩅᩈᨾᩣᨶᩣ ‘‘ᩈᨲ᩠ᨳᩣ ᨾᩴ ᩋᨶᩩᨠᨾ᩠ᨸᨲᩪ’’ᨲᩥ ᩏᨸᩮᩣᩈᨳᨦ᩠ᨣᩴ ᩋᨵᩥᨭ᩠ᨮᩣᨿ ᨶᩥᩁᩣᨾᨣᨶ᩠ᨵᩣ ᩉᩩᨲ᩠ᩅᩣ ᩏᨸᩁᩥᨸᩣᩈᩣᨴᨲᩃᩮ ᨮᩥᨲᩣ ‘‘ᩍᨾᩣᨶᩥ ᨸᩩᨸ᩠ᨹᩣᨶᩥ ᩋᨶ᩠ᨲᩁᩮ ᩋᨭ᩠ᨮᨲ᩠ᩅᩣ ᨴᩈᨻᩃᩔ ᨾᨲ᩠ᨳᨠᩮ ᩅᩥᨲᩣᨶᩴ ᩉᩩᨲ᩠ᩅᩣ ᨲᩥᨭ᩠ᨮᨶ᩠ᨲᩩ, ᨴᩈᨻᩃᩮᩣ ᩍᨾᩣᨿ ᩈᨬ᩠ᨬᩣᨿ ᩈ᩠ᩅᩮ ᨸᨬ᩠ᨧᩉᩥ ᨽᩥᨠ᩠ᨡᩩᩈᨲᩮᩉᩥ ᩈᨴ᩠ᨵᩥᩴ ᨾᨿ᩠ᩉᩴ ᨽᩥᨠ᩠ᨡᩴ ᨣᨱ᩠ᩉᨲᩪ’’ᨲᩥ ᩈᨧ᩠ᨧᨠᩥᩁᩥᨿᩴ ᨠᨲ᩠ᩅᩣ ᩋᨭ᩠ᨮ ᩈᩩᨾᨶᨸᩩᨸ᩠ᨹᨾᩩᨭ᩠ᨮᩥᨿᩮᩣ ᩅᩥᩔᨩ᩠ᨩᩮᩈᩥ. ᨸᩩᨸ᩠ᨹᩣᨶᩥ ᨣᨶ᩠ᨲ᩠ᩅᩣ ᨵᨾ᩠ᨾᨴᩮᩈᨶᩣᩅᩮᩃᩣᨿ ᩈᨲ᩠ᨳᩩ ᨾᨲ᩠ᨳᨠᩮ ᩅᩥᨲᩣᨶᩴ ᩉᩩᨲ᩠ᩅᩣ ᩋᨭ᩠ᨮᩴᩈᩩ. ᩈᨲ᩠ᨳᩣ ᨲᩴ ᩈᩩᨾᨶᨸᩩᨸ᩠ᨹᩅᩥᨲᩣᨶᩴ ᨴᩥᩈ᩠ᩅᩣ ᨧᩥᨲ᩠ᨲᩮᨶᩮᩅ ᩈᩩᨽᨴ᩠ᨴᩣᨿ ᨽᩥᨠ᩠ᨡᩴ ᩋᨵᩥᩅᩣᩈᩮᨲ᩠ᩅᩣ ᨸᩩᨶᨴᩥᩅᩈᩮ ᩋᩁᩩᨱᩮ ᩏᨭ᩠ᨮᩥᨲᩮ ¶ ᩌᨶᨶ᩠ᨴᨲ᩠ᨳᩮᩁᩴ ᩌᩉ – ‘‘ᩌᨶᨶ᩠ᨴ, ᨾᨿᩴ ᩋᨩ᩠ᨩ ᨴᩪᩁᩴ ᨽᩥᨠ᩠ᨡᩣᨧᩣᩁᩴ ᨣᨾᩥᩔᩣᨾ, ᨸᩩᨳᩩᨩ᩠ᨩᨶᩣᨶᩴ ᩋᨴᨲ᩠ᩅᩣ ᩋᩁᩥᨿᩣᨶᩴᨿᩮᩅ ᩈᩃᩣᨠᩴ ᨴᩮᩉᩦ’’ᨲᩥ. ᨳᩮᩁᩮᩣ ᨽᩥᨠ᩠ᨡᩪᨶᩴ ᩌᩁᩮᩣᨧᩮᩈᩥ – ‘‘ᩌᩅᩩᩈᩮᩣ, ᩈᨲ᩠ᨳᩣ ᩋᨩ᩠ᨩ ᨴᩪᩁᩴ ᨽᩥᨠ᩠ᨡᩣᨧᩣᩁᩴ ᨣᨾᩥᩔᨲᩥ. ᨸᩩᨳᩩᨩ᩠ᨩᨶᩣ ᨾᩣ ᨣᨱ᩠ᩉᨶ᩠ᨲᩩ, ᩋᩁᩥᨿᩣᩅ ᩈᩃᩣᨠᩴ ᨣᨱ᩠ᩉᨶ᩠ᨲᩪ’’ᨲᩥ. ᨠᩩᨱ᩠ᨯᨵᩣᨶᨲ᩠ᨳᩮᩁᩮᩣ – ‘‘ᩌᩉᩁᩣᩅᩩᩈᩮᩣ, ᩈᩃᩣᨠ’’ᨶ᩠ᨲᩥ ᨸᨮᨾᩴᨿᩮᩅ ᩉᨲ᩠ᨳᩴ ᨸᩈᩣᩁᩮᩈᩥ. ᩌᨶᨶ᩠ᨴᩮᩣ ‘‘ᩈᨲ᩠ᨳᩣ ᨲᩣᨴᩥᩈᩣᨶᩴ ᨽᩥᨠ᩠ᨡᩪᨶᩴ ᩈᩃᩣᨠᩴ ᨶ ᨴᩣᨸᩮᨲᩥ, ᩋᩁᩥᨿᩣᨶᩴᨿᩮᩅ ᨴᩣᨸᩮᨲᩦ’’ᨲᩥ ᩅᩥᨲᨠ᩠ᨠᩴ ᩏᨸ᩠ᨸᩣᨴᩮᨲ᩠ᩅᩣ ᨣᨶ᩠ᨲ᩠ᩅᩣ ᩈᨲ᩠ᨳᩩ ᩌᩁᩮᩣᨧᩮᩈᩥ. ᩈᨲ᩠ᨳᩣ ‘‘ᩌᩉᩁᩣᨸᩮᨶ᩠ᨲᩔ ᩈᩃᩣᨠᩴ ᨴᩮᩉᩦ’’ᨲᩥ ᩌᩉ. ᨳᩮᩁᩮᩣ ᨧᩥᨶ᩠ᨲᩮᩈᩥ – ‘‘ᩈᨧᩮ ᨠᩩᨱ᩠ᨯᨵᩣᨶᩔ ᩈᩃᩣᨠᩣ ᨴᩣᨲᩩᩴ ᨶ ᨿᩩᨲ᩠ᨲᩣ, ᩋᨳ ᩈᨲ᩠ᨳᩣ ᨸᨭᩥᨻᩣᩉᩮᨿ᩠ᨿ, ᨽᩅᩥᩔᨲᩥ ᩑᨲ᩠ᨳ ᨠᩣᩁᨱ’’ᨶ᩠ᨲᩥ ‘‘ᨠᩩᨱ᩠ᨯᨵᩣᨶᩔ ᩈᩃᩣᨠᩴ ᨴᩔᩣᨾᩦ’’ᨲᩥ ᨣᨾᨶᩴ ᩋᨽᩥᨶᩦᩉᩁᩥ. ᨠᩩᨱ᩠ᨯᨵᩣᨶᩮᩣ ᨲᩔ ᨸᩩᩁᩣᨣᨾᨶᩣ ᩑᩅ ᩋᨽᩥᨬ᩠ᨬᩣᨸᩣᨴᨠᩴ ᨧᨲᩩᨲ᩠ᨳᨩ᩠ᨫᩣᨶᩴ ᩈᨾᩣᨸᨩ᩠ᨩᩥᨲ᩠ᩅᩣ ᩍᨴ᩠ᨵᩥᨿᩣ ᩌᨠᩣᩈᩮ ᨮᨲ᩠ᩅᩣ ‘‘ᩌᩉᩁᩣᩅᩩᩈᩮᩣ ᩌᨶᨶ᩠ᨴ, ᩈᨲ᩠ᨳᩣ ᨾᩴ ᨩᩣᨶᩣᨲᩥ, ᨾᩣᨴᩥᩈᩴ ᨽᩥᨠ᩠ᨡᩩᩴ ᨸᨮᨾᩴ ᩈᩃᩣᨠᩴ ᨣᨱ᩠ᩉᨶ᩠ᨲᩴ ᨶ ᩈᨲ᩠ᨳᩣ ᩅᩣᩁᩮᨲᩦ’’ᨲᩥ ᩉᨲ᩠ᨳᩴ ᨸᩈᩣᩁᩮᨲ᩠ᩅᩣ ᩈᩃᩣᨠᩴ ᨣᨱ᩠ᩉᩥ. ᩈᨲ᩠ᨳᩣ ᨲᩴ ᩋᨭ᩠ᨮᩩᨸ᩠ᨸᨲ᩠ᨲᩥᩴ ᨠᨲ᩠ᩅᩣ ᨳᩮᩁᩴ ᩍᨾᩈ᩠ᨾᩥᩴ ᩈᩣᩈᨶᩮ ᨸᨮᨾᩴ ᩈᩃᩣᨠᩴ ᨣᨱ᩠ᩉᨶ᩠ᨲᩣᨶᩴ ᩋᨣ᩠ᨣᨭ᩠ᨮᩣᨶᩮ ᨮᨸᩮᩈᩥ. ᨿᩈ᩠ᨾᩣ ¶ ᩋᨿᩴ ᨳᩮᩁᩮᩣ ᩁᩣᨩᩣᨶᩴ ᩏᨸᨲ᩠ᨳᨾ᩠ᨽᩴ ᩃᨽᩥᨲ᩠ᩅᩣ ᩈᨸ᩠ᨸᩣᨿᩣᩉᩣᩁᨸᨭᩥᩃᩣᨽᩮᨶ ¶ ᩈᨾᩣᩉᩥᨲᨧᩥᨲ᩠ᨲᩮᩣ ᩅᩥᨸᩔᨶᩣᨿ ᨠᨾ᩠ᨾᩴ ᨠᩁᩮᩣᨶ᩠ᨲᩮᩣ ᩏᨸᨶᩥᩔᨿᩈᨾ᩠ᨸᨶ᩠ᨶᨲᩣᨿ ᨨᩊᨽᩥᨬ᩠ᨬᩮᩣ ᩋᩉᩮᩣᩈᩥ. ᩑᩅᩴᨽᩪᨲᩔᩣᨸᩥ ᩍᨾᩔ ᨳᩮᩁᩔ ᨣᩩᨱᩮ ᩋᨩᩣᨶᨶ᩠ᨲᩣ ᨿᩮ ᨸᩩᨳᩩᨩ᩠ᨩᨶᩣ ᨽᩥᨠ᩠ᨡᩪ ‘‘ᩋᨿᩴ ᨸᨮᨾᩴ ᩈᩃᩣᨠᩴ ᨣᨱ᩠ᩉᨲᩥ, ᨠᩥᩴ ᨶᩩ ᨡᩮᩣ ᩑᨲ’’ᨶ᩠ᨲᩥ ᩅᩥᨾᨲᩥᩴ ᩏᨸ᩠ᨸᩣᨴᩮᨶ᩠ᨲᩥ. ᨲᩮᩈᩴ ᨲᩴ ᩅᩥᨾᨲᩥᩅᩥᨵᨾᨶᨲ᩠ᨳᩴ ᨳᩮᩁᩮᩣ ᩌᨠᩣᩈᩴ ᩋᨻ᩠ᨽᩩᨣ᩠ᨣᨶ᩠ᨲ᩠ᩅᩣ ᩍᨴ᩠ᨵᩥᨸᩣᨭᩥᩉᩣᩁᩥᨿᩴ ᨴᩔᩮᨲ᩠ᩅᩣ ᩋᨬ᩠ᨬᩣᨸᨴᩮᩈᩮᨶ ᩋᨬ᩠ᨬᩴ ᨻ᩠ᨿᩣᨠᩁᩮᩣᨶ᩠ᨲᩮᩣ ‘‘ᨸᨬ᩠ᨧ ᨨᩥᨶ᩠ᨴᩮ’’ᨲᩥ ᨣᩣᨳᩴ ᩋᨽᩣᩈᩥ.

᪑. ᩑᩅᩴ ᩈᩮᩣ ᨸᩪᩁᩥᨲᨸᩩᨬ᩠ᨬᩈᨾ᩠ᨽᩣᩁᩣᨶᩩᩁᩪᨸᩮᨶ ᩋᩁᩉᩣ ᩉᩩᨲ᩠ᩅᩣ ᨸᨲ᩠ᨲᩑᨲᨴᨣ᩠ᨣᨭ᩠ᨮᩣᨶᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᩅᩈᩮᨶ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᨲ᩠ᨲᩣᩉᩴ ᨸᨭᩥᩈᩃ᩠ᩃᩦᨶᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᩈᨲ᩠ᨳᩣᩉᩴ ᩈᨲ᩠ᨲᨴᩥᩅᩈᩴ ᨶᩥᩁᩮᩣᨵᩈᨾᩣᨸᨲ᩠ᨲᩥᩅᩥᩉᩣᩁᩮᨶ ᨸᨭᩥᩈᩃ᩠ᩃᩦᨶᩴ ᩅᩥᩅᩮᨠᨽᩪᨲᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨠᩩᨱ᩠ᨯᨵᩣᨶᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᩈᩣᨣᨲᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩮᩣᨽᩥᨲᩮᩣ ᨶᩣᨾ ᨶᩣᨾᩮᨶᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩣᨣᨲᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ¶ ᨠᩣᩃᩮ ᩑᨠᩈ᩠ᨾᩥᩴ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩈᨻ᩠ᨻᩈᩥᨸ᩠ᨸᩮᩈᩩ ᨶᩥᨸ᩠ᨹᨲ᩠ᨲᩥᩴ ᨸᨲ᩠ᨲᩮᩣ ᨶᩣᨾᩮᨶ ᩈᩮᩣᨽᩥᨲᩮᩣ ᨶᩣᨾ ᩉᩩᨲ᩠ᩅᩣ ᨲᩥᨱ᩠ᨱᩴ ᩅᩮᨴᩣᨶᩴ ᨸᩣᩁᨣᩪ ᩈᨶᩥᨥᨱ᩠ᨯᩩᨠᩮᨭᩩᨽᩣᨶᩴ ᩈᩣᨠ᩠ᨡᩁᨸ᩠ᨸᨽᩮᨴᩣᨶᩴ ᩍᨲᩥᩉᩣᩈᨸᨬ᩠ᨧᨾᩣᨶᩴ ᨸᨴᨠᩮᩣ ᩅᩮᨿ᩠ᨿᩣᨠᩁᨱᩮᩣ ᩃᩮᩣᨠᩣᨿᨲᨾᩉᩣᨸᩩᩁᩥᩈᩃᨠ᩠ᨡᨱᩮᩈᩩ ᩋᨶᩅᨿᩮᩣ. ᩈᩮᩣ ᩑᨠᨴᩥᩅᩈᩴ ᨸᨴᩩᨾᩩᨲ᩠ᨲᩁᩴ ᨽᨣᩅᨶ᩠ᨲᩴ ᨴ᩠ᩅᨲ᩠ᨲᩥᩴᩈᨾᩉᩣᨸᩩᩁᩥᩈᩃᨠ᩠ᨡᨱᩈᩥᩁᩥᨿᩣ ᩈᩮᩣᨽᨾᩣᨶᩴ ᩏᨿ᩠ᨿᩣᨶᨴ᩠ᩅᩣᩁᩮᨶ ᨣᨧ᩠ᨨᨶ᩠ᨲᩴ ᨴᩥᩈ᩠ᩅᩣ ᩋᨲᩦᩅ ᨸᩈᨶ᩠ᨶᨾᩣᨶᩈᩮᩣ ᩋᨶᩮᨠᩮᩉᩥ ᩏᨸᩣᨿᩮᩉᩥ ᩋᨶᩮᨠᩮᩉᩥ ᨣᩩᨱᩅᨱ᩠ᨱᩮᩉᩥ ᨳᩮᩣᨾᨶᩴ ᩋᨠᩣᩈᩥ. ᨽᨣᩅᩣ ᨲᩔ ᨳᩮᩣᨾᨶᩴ ᩈᩩᨲ᩠ᩅᩣ ‘‘ᩋᨶᩣᨣᨲᩮ ᨣᩮᩣᨲᨾᩔ ᨽᨣᩅᨲᩮᩣ ᩈᩣᩈᨶᩮ ᩈᩣᨣᨲᩮᩣ ᨶᩣᨾ ᩈᩣᩅᨠᩮᩣ ᨽᩅᩥᩔᨲᩦ’’ᨲᩥ ᨻ᩠ᨿᩣᨠᩁᨱᩴ ᩋᨴᩣᩈᩥ. ᩈᩮᩣ ᨲᨲᩮᩣ ᨸᨭ᩠ᨮᩣᨿ ᨸᩩᨬ᩠ᨬᩣᨶᩥ ᨠᩁᩮᩣᨶ᩠ᨲᩮᩣ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᨲᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ. ᨠᨸ᩠ᨸᩈᨲᩈᩉᩔᨴᩮᩅᨾᨶᩩᩔᩮᩈᩩ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ. ᨲᩔ ᨾᩣᨲᩣᨸᩥᨲᩁᩮᩣ ¶ ᩈᩮᩣᨾᨶᩔᩴ ᩅᨯ᩠ᨰᩮᨶ᩠ᨲᩮᩣ ᩈᩩᨩᩣᨲᩮᩣ ᩌᨣᨲᩮᩣᨲᩥ ᩈᩣᨣᨲᩮᩣᨲᩥ ᨶᩣᨾᩴ ᨠᩁᩥᩴᩈᩩ. ᩈᩮᩣ ᩈᩣᩈᨶᩮ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᩋᩁᩉᨲ᩠ᨲᩴ ᨸᨲ᩠ᨲᩮᩣ.

᪑᪗. ᩑᩅᩴ ᩈᩮᩣ ᨸᩩᨬ᩠ᨬᩈᨾ᩠ᨽᩣᩁᩣᨶᩩᩁᩪᨸᩮᨶ ᨸᨲ᩠ᨲᩋᩁᩉᨲ᩠ᨲᨹᩃᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ¶ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩮᩣᨽᩥᨲᩮᩣ ᨶᩣᨾ ᨶᩣᨾᩮᨶᩣᨲᩥᩌᨴᩥᨾᩣᩉ. ᨲᨲ᩠ᨳ ᨲᨴᩣ ᨸᩩᨬ᩠ᨬᩈᨾ᩠ᨽᩣᩁᩔ ᨸᩁᩥᨸᩪᩁᨱᩈᨾᨿᩮ ᨶᩣᨾᩮᨶ ᩈᩮᩣᨽᩥᨲᩮᩣ ᨶᩣᨾ ᨻᩕᩣᩉ᩠ᨾᨱᩮᩣ ᩋᩉᩮᩣᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

᪒᪑. ᩅᩥᨸᨳᩣ ᩏᨴ᩠ᨵᩁᩥᨲ᩠ᩅᩣᨶᩣᨲᩥ ᩅᩥᩁᩩᨴ᩠ᨵᨸᨳᩣ ᨠᩩᨾᨣ᩠ᨣᩣ, ᩏᨸ᩠ᨸᨳᩣ ᩅᩣ ᩏᨴ᩠ᨵᩁᩥᨲ᩠ᩅᩣ ᩋᨸᨶᩮᨲ᩠ᩅᩣ. ᨸᨳᩴ ᩌᨧᩥᨠ᩠ᨡᩈᩮᨲᩥ, ᨽᨶ᩠ᨲᩮ, ᩈᨻ᩠ᨻᨬ᩠ᨬᩩ ᨲᩩᩅᩴ ᨸᨳᩴ ᩈᨸ᩠ᨸᩩᩁᩥᩈᨾᨣ᩠ᨣᩴ ᨶᩥᨻ᩠ᨻᩣᨶᩣᨵᩥᨣᨾᨶᩩᨸᩣᨿᩴ ᩌᨧᩥᨠ᩠ᨡᩈᩮ ᨠᨳᩮᩈᩥ ᨴᩮᩈᩮᩈᩥ ᩅᩥᨽᨩᩥ ᩏᨲ᩠ᨲᩣᨶᩥᩴ ᩋᨠᩣᩈᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩈᩣᨣᨲᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᨾᩉᩣᨠᨧ᩠ᨧᩣᨶᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᨶᩣᨳᩔᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨠᨧ᩠ᨧᩣᨶᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨣᩉᨸᨲᩥᨾᩉᩣᩈᩣᩃᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᨲ᩠ᩅᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩑᨠᨴᩥᩅᩈᩴ ᩈᨲ᩠ᨳᩩ ᩈᨶ᩠ᨲᩥᨠᩮ ᨵᨾ᩠ᨾᩴ ᩈᩩᨱᨶ᩠ᨲᩮᩣ ᩈᨲ᩠ᨳᩣᩁᩴ ᩑᨠᩴ ᨽᩥᨠ᩠ᨡᩩᩴ ᩈᩴᨡᩥᨲ᩠ᨲᩮᨶ ᨽᩣᩈᩥᨲᩔ ᩅᩥᨲ᩠ᨳᩣᩁᩮᨶ ᩋᨲ᩠ᨳᩴ ᩅᩥᨽᨩᨶ᩠ᨲᩣᨶᩴ ᩋᨣ᩠ᨣᨭ᩠ᨮᩣᨶᩮ ᨮᨸᩮᨶ᩠ᨲᩴ ¶ ᨴᩥᩈ᩠ᩅᩣ ᩈᨿᨾ᩠ᨸᩥ ᨲᩴ ᨮᩣᨶᨶ᩠ᨲᩁᩴ ᨸᨲ᩠ᨳᩮᨶ᩠ᨲᩮᩣ ᨴᩣᨶᩣᨴᩦᨶᩥ ᨸᩩᨬ᩠ᨬᩣᨶᩥ ᨠᨲ᩠ᩅᩣ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩈᩩᨾᩮᨵᩔ ᨽᨣᩅᨲᩮᩣ ᨠᩣᩃᩮ ᩅᩥᨩ᩠ᨩᩣᨵᩁᩮᩣ ᩉᩩᨲ᩠ᩅᩣ ᩌᨠᩣᩈᩮᨶ ᨣᨧ᩠ᨨᨶ᩠ᨲᩮᩣ ᩈᨲ᩠ᨳᩣᩁᩴ ᩑᨠᩈ᩠ᨾᩥᩴ ᩅᨶᩈᨱ᩠ᨯᩮ ᨶᩥᩈᩥᨶ᩠ᨶᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨠᨱᩥᨠᩣᩁᨸᩩᨸ᩠ᨹᩮᩉᩥ ᨸᩪᨩᩴ ᩋᨠᩣᩈᩥ.

ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᩋᨸᩁᩣᨸᩁᩴ ᩈᩩᨣᨲᩦᩈᩩᨿᩮᩅ ᨸᩁᩥᩅᨲ᩠ᨲᩮᨲ᩠ᩅᩣ ᨠᩔᨸᨴᩈᨻᩃᩔ ᨠᩣᩃᩮ ᨻᩣᩁᩣᨱᩈᩥᨿᩴ ᨠᩩᩃᨥᩁᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᨸᩁᩥᨶᩥᨻ᩠ᨻᩩᨲᩮ ᨽᨣᩅᨲᩥ ᩈᩩᩅᨱ᩠ᨱᨧᩮᨲᩥᨿᨠᩁᨱᨭ᩠ᨮᩣᨶᩴ ᨴᩈᩈᩉᩔᨣ᩠ᨥᨶᩥᨠᩣᨿ ᩈᩩᩅᨱ᩠ᨱᩥᨭ᩠ᨮᨠᩣᨿ ᨸᩪᨩᩴ ᨠᨲ᩠ᩅᩣ ‘‘ᨽᨣᩅᩣ ᨾᨿ᩠ᩉᩴ ᨶᩥᨻ᩠ᨻᨲ᩠ᨲᨶᩥᨻ᩠ᨻᨲ᩠ᨲᨭ᩠ᨮᩣᨶᩮ ᩈᩁᩦᩁᩴ ᩈᩩᩅᨱ᩠ᨱᩅᨱ᩠ᨱᩴ ᩉᩮᩣᨲᩪ’’ᨲᩥ ᨸᨲ᩠ᨳᩁᩴ ᩋᨠᩣᩈᩥ. ᨲᨲᩮᩣ ᨿᩣᩅᨩᩦᩅᩴ ᨠᩩᩈᩃᩴ ᨠᨲ᩠ᩅᩣ ᩑᨠᩴ ᨻᩩᨴ᩠ᨵᨶ᩠ᨲᩁᩴ ᨴᩮᩅᨾᨶᩩᩔᩮᩈᩩ ¶ ᩈᩴᩈᩁᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩏᨩ᩠ᨩᩮᨶᩥᨿᩴ ᩁᨬ᩠ᨬᩮᩣ ᨧᨱ᩠ᨯᨸᨩ᩠ᨩᩮᩣᨲᩔ ᨸᩩᩁᩮᩣᩉᩥᨲᩔ ᨣᩮᩉᩮ ᨶᩥᨻ᩠ᨻᨲ᩠ᨲᩥ, ᨲᩔ ᨶᩣᨾᨣ᩠ᨣᩉᨱᨴᩥᩅᩈᩮ ᨾᩣᨲᩣᨸᩥᨲᩁᩮᩣ ‘‘ᩋᨾ᩠ᩉᩣᨠᩴ ᨸᩩᨲ᩠ᨲᩮᩣ ᩈᩩᩅᨱ᩠ᨱᩅᨱ᩠ᨱᩮᩣ ᩋᨲ᩠ᨲᨶᩮᩣ ᨶᩣᨾᩴ ᨣᩉᩮᨲ᩠ᩅᩣ ᩌᨣᨲᩮᩣ’’ᨲᩥ ᨠᨬ᩠ᨧᨶᨾᩣᨱᩅᩮᩣᨲ᩠ᩅᩮᩅ ᨶᩣᨾᩴ ᨠᩁᩥᩴᩈᩩ. ᩈᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨲᨿᩮᩣ ᩅᩮᨴᩮ ᩏᨣ᩠ᨣᨱ᩠ᩉᩥᨲ᩠ᩅᩣ ᨸᩥᨲᩩ ᩋᨧ᩠ᨧᨿᩮᨶ ᨸᩩᩁᩮᩣᩉᩥᨲᨭ᩠ᨮᩣᨶᩴ ᩃᨽᩥ. ᩈᩮᩣ ᨣᩮᩣᨲ᩠ᨲᩅᩈᩮᨶ ᨠᨧ᩠ᨧᩣᨶᩮᩣᨲᩥ ᨸᨬ᩠ᨬᩣᨿᩥᨲ᩠ᨳ.

ᩁᩣᨩᩣ ᨧᨱ᩠ᨯᨸᨩ᩠ᨩᩮᩣᨲᩮᩣ ᨻᩩᨴ᩠ᨵᩩᨸ᩠ᨸᩣᨴᩴ ᩈᩩᨲ᩠ᩅᩣ, ‘‘ᩌᨧᩁᩥᨿ, ᨲ᩠ᩅᩴ ᨲᨲ᩠ᨳ ᨣᨶ᩠ᨲ᩠ᩅᩣ ᩈᨲ᩠ᨳᩣᩁᩴ ᩍᨵᩣᨶᩮᩉᩦ’’ᨲᩥ ¶ ᨸᩮᩈᩮᩈᩥ. ᩈᩮᩣ ᩋᨲ᩠ᨲᨭ᩠ᨮᨾᩮᩣ ᩈᨲ᩠ᨳᩩ ᩈᨶ᩠ᨲᩥᨠᩴ ᩏᨸᨣᨲᩮᩣ. ᨲᩔ ᩈᨲ᩠ᨳᩣ ᨵᨾ᩠ᨾᩴ ᨴᩮᩈᩮᩈᩥ. ᨴᩮᩈᨶᩣᨸᩁᩥᨿᩮᩣᩈᩣᨶᩮ ᩈᩮᩣ ᩈᨲ᩠ᨲᩉᩥ ᨩᨶᩮᩉᩥ ᩈᨴ᩠ᨵᩥᩴ ᩈᩉᨸᨭᩥᩈᨾ᩠ᨽᩥᨴᩣᩉᩥ ᩋᩁᩉᨲ᩠ᨲᩮ ᨸᨲᩥᨭ᩠ᨮᩣᩈᩥ. ᩋᨳ ᩈᨲ᩠ᨳᩣ ‘‘ᩑᨳ, ᨽᩥᨠ᩠ᨡᩅᩮᩣ’’ᨲᩥ ᩉᨲ᩠ᨳᩴ ᨸᩈᩣᩁᩮᩈᩥ. ᨲᩮ ᨲᩣᩅᨴᩮᩅ ᨴ᩠ᩅᨦ᩠ᨣᩩᩃᨾᨲ᩠ᨲᨠᩮᩈᨾᩔᩩᨠᩣ ᩍᨴ᩠ᨵᩥᨾᨿᨸᨲ᩠ᨲᨧᩦᩅᩁᨵᩁᩣ ᩅᩔᩈᨭ᩠ᨮᩥᨠᨲ᩠ᨳᩮᩁᩣ ᩅᩥᨿ ᩋᩉᩮᩈᩩᩴ. ᩑᩅᩴ ᨳᩮᩁᩮᩣ ᩈᨴᨲ᩠ᨳᩴ ᨶᩥᨸ᩠ᨹᩣᨴᩮᨲ᩠ᩅᩣ, ‘‘ᨽᨶ᩠ᨲᩮ, ᩁᩣᨩᩣ ᨸᨩ᩠ᨩᩮᩣᨲᩮᩣ ᨲᩩᨾ᩠ᩉᩣᨠᩴ ᨸᩣᨴᩮ ᩅᨶ᩠ᨴᩥᨲᩩᩴ ᨵᨾ᩠ᨾᨬ᩠ᨧ ᩈᩮᩣᨲᩩᩴ ᩍᨧ᩠ᨨᨲᩦ’’ᨲᩥ ᩈᨲ᩠ᨳᩩ ᩌᩁᩮᩣᨧᩮᩈᩥ. ᩈᨲ᩠ᨳᩣ ‘‘ᨲ᩠ᩅᩴᨿᩮᩅ ᨽᩥᨠ᩠ᨡᩩ ᨲᨲ᩠ᨳ ᨣᨧ᩠ᨨ, ᨲᨿᩥ ᨣᨲᩮᨸᩥ ᩁᩣᨩᩣ ᨸᩈᩦᨴᩥᩔᨲᩦ’’ᨲᩥ ᩌᩉ. ᨳᩮᩁᩮᩣ ᩋᨲ᩠ᨲᨭ᩠ᨮᨾᩮᩣ ᨲᨲ᩠ᨳ ᨣᨶ᩠ᨲ᩠ᩅᩣ ᩁᩣᨩᩣᨶᩴ ᨸᩈᩣᨴᩮᨲ᩠ᩅᩣ ᩋᩅᨶ᩠ᨲᩦᩈᩩ ᩈᩣᩈᨶᩴ ᨸᨲᩥᨭ᩠ᨮᩣᨸᩮᨲ᩠ᩅᩣ ᨸᩩᨶ ᩈᨲ᩠ᨳᩩ ᩈᨶ᩠ᨲᩥᨠᨾᩮᩅ ᨣᨲᩮᩣ.

᪓᪑. ᩑᩅᩴ ᩈᩮᩣ ᨸᨲ᩠ᨲᩋᩁᩉᨲ᩠ᨲᨹᩃᩮᩣ ‘‘ᩑᨲᨴᨣ᩠ᨣᩴ, ᨽᩥᨠ᩠ᨡᩅᩮ, ᨾᨾ ᩈᩣᩅᨠᩣᨶᩴ ᩈᩴᨡᩥᨲ᩠ᨲᩮᨶ ᨽᩣᩈᩥᨲᩔ ᩅᩥᨲ᩠ᨳᩣᩁᩮᨶ ᩋᨲ᩠ᨳᩴ ᩅᩥᨽᨩᨶ᩠ᨲᩣᨶᩴ ᨿᨴᩥᨴᩴ ᨾᩉᩣᨠᨧ᩠ᨧᩣᨶᩮᩣ’’ᨲᩥ (ᩋ. ᨶᩥ. ᪑.᪑᪘᪘, ᪑᪙᪗) ᩑᨲᨴᨣ᩠ᨣᨭ᩠ᨮᩣᨶᩴ ᨸᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᨶᩣᨳᩔᩣᨲᩥᩌᨴᩥᨾᩣᩉ. ᨲᨲ᩠ᨳ ᨸᨴᩩᨾᩴ ᨶᩣᨾ ᨧᩮᨲᩥᨿᨶ᩠ᨲᩥ ᨸᨴᩩᨾᩮᩉᩥ ᨨᩣᨴᩥᨲᨲ᩠ᨲᩣ ᩅᩣ ᨸᨴᩩᨾᩣᨠᩣᩁᩮᩉᩥ ᨠᨲᨲ᩠ᨲᩣ ᩅᩣ ᨽᨣᩅᨲᩮᩣ ᩅᩈᨶᨣᨶ᩠ᨵᨠᩩᨭᩥᩅᩥᩉᩣᩁᩮᩣᩅ ᨸᩪᨩᨶᩦᨿᨽᩣᩅᩮᨶ ᨧᩮᨲᩥᨿᩴ, ᨿᨳᩣ ‘‘ᨣᩮᩣᨲᨾᨠᨧᩮᨲᩥᨿᩴ, ᩌᩊᩅᨠᨧᩮᨲᩥᨿ’’ᨶ᩠ᨲᩥ ᩅᩩᨲ᩠ᨲᩮ ᨲᩮᩈᩴ ᨿᨠ᩠ᨡᩣᨶᩴ ᨶᩥᩅᩈᨶᨭ᩠ᨮᩣᨶᩴ ᨸᩪᨩᨶᩦᨿᨭ᩠ᨮᩣᨶᨲ᩠ᨲᩣ ¶ ᨧᩮᨲᩥᨿᨶ᩠ᨲᩥ ᩅᩩᨧ᩠ᨧᨲᩥ, ᩑᩅᨾᩥᨴᩴ ᨽᨣᩅᨲᩮᩣ ᩅᩈᨶᨭ᩠ᨮᩣᨶᩴ ᨧᩮᨲᩥᨿᨶ᩠ᨲᩥ ᩅᩩᨧ᩠ᨧᨲᩥ, ᨶ ᨵᩣᨲᩩᨶᩥᨵᩣᨿᨠᨧᩮᨲᩥᨿᨶ᩠ᨲᩥ ᩅᩮᨴᩥᨲᨻ᩠ᨻᩴ. ᨶ ᩉᩥ ᩋᨸᩁᩥᨶᩥᨻ᩠ᨻᩩᨲᩔ ᨽᨣᩅᨲᩮᩣ ᩈᩁᩦᩁᨵᩣᨲᩪᨶᩴ ᩋᨽᩣᩅᩣ ᨵᩣᨲᩩᨧᩮᨲᩥᨿᩴ ᩋᨠᩁᩥ. ᩈᩥᩃᩣᩈᨶᩴ ᨠᩣᩁᨿᩥᨲ᩠ᩅᩣᨲᩥ ᨲᩔᩣ ᨸᨴᩩᨾᨶᩣᨾᩥᨠᩣᨿ ᨣᨶ᩠ᨵᨠᩩᨭᩥᨿᩣ ᨸᩩᨸ᩠ᨹᩣᨵᩣᩁᨲ᩠ᨳᩣᨿ ᩉᩮᨭ᩠ᨮᩣ ᨹᩃᩥᨠᨾᨿᩴ ᩈᩥᩃᩣᩈᨶᩴ ᨠᩣᩁᩮᨲ᩠ᩅᩣ. ᩈᩩᩅᨱ᩠ᨱᩮᨶᩣᨽᩥᩃᩮᨸᨿᩥᨶ᩠ᨲᩥ ᨲᩴ ᩈᩥᩃᩣᩈᨶᩴ ᨩᨾ᩠ᨻᩮᩣᨶᨴᩈᩩᩅᨱ᩠ᨱᩮᨶ ᩋᨽᩥᩅᩥᩈᩮᩈᩮᨶ ᩃᩮᨸᨿᩥᩴ ᨨᩣᨴᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪓᪒. ᩁᨲᨶᩣᨾᨿᩴ ¶ ᩈᨲ᩠ᨲᩉᩥ ᩁᨲᨶᩮᩉᩥ ᨠᨲᩴ ᨨᨲ᩠ᨲᩴ ᨸᨣ᩠ᨣᨿ᩠ᩉ ᨾᩩᨴ᩠ᨵᨶᩥ ᨵᩣᩁᩮᨲ᩠ᩅᩣ ᩅᩣᩊᨻᩦᨩᨶᩥᨬ᩠ᨧ ᩈᩮᨲᨸᩅᩁᨧᩣᨾᩁᩥᨬ᩠ᨧ ᨸᨣ᩠ᨣᨿ᩠ᩉ ᨻᩩᨴ᩠ᨵᩔ ᩋᨽᩥᩁᩮᩣᨸᨿᩥᩴ. ᩃᩮᩣᨠᨻᨶ᩠ᨵᩩᩔ ᨲᩣᨴᩥᨶᩮᩣᨲᩥ ᩈᨠᩃᩃᩮᩣᨠᨻᨶ᩠ᨵᩩᩈᨴᩥᩈᩔ ᨲᩣᨴᩥᨣᩩᨱᩈᨾᨦ᩠ᨣᩥᩔ ᨻᩩᨴ᩠ᨵᩔ ᨵᩣᩁᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨾᩉᩣᨠᨧ᩠ᨧᩣᨶᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᨠᩣᩊᩩᨴᩣᨿᩥᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨠᩣᩊᩩᨴᩣᨿᩥᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ¶ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩉᩴᩈᩅᨲᩦᨶᨣᩁᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨱᨶ᩠ᨲᩮᩣ ᩈᨲ᩠ᨳᩣᩁᩴ ᩑᨠᩴ ᨽᩥᨠ᩠ᨡᩩᩴ ᨠᩩᩃᨸ᩠ᨸᩈᩣᨴᨠᩣᨶᩴ ᨽᩥᨠ᩠ᨡᩪᨶᩴ ᩋᨣ᩠ᨣᨭ᩠ᨮᩣᨶᩮ ᨮᨸᩮᨶ᩠ᨲᩴ ᨴᩥᩈ᩠ᩅᩣ ᨲᨩ᩠ᨩᩴ ᩋᨽᩥᨶᩦᩉᩣᩁᩴ ᨠᨲ᩠ᩅᩣ ᨲᩴ ᨮᩣᨶᨶ᩠ᨲᩁᩴ ᨸᨲ᩠ᨳᩮᩈᩥ.

ᩈᩮᩣ ᨿᩣᩅᨩᩦᩅᩴ ᨠᩩᩈᩃᩴ ᨠᨲ᩠ᩅᩣ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩋᨾ᩠ᩉᩣᨠᩴ ᨻᩮᩣᨵᩥᩈᨲ᩠ᨲᩔ ᨾᩣᨲᩩᨠᩩᨧ᩠ᨨᩥᨿᩴ ᨸᨭᩥᩈᨶ᩠ᨵᩥᨣ᩠ᨣᩉᨱᨴᩥᩅᩈᩮ ᨠᨸᩥᩃᩅᨲ᩠ᨳᩩᩈ᩠ᨾᩥᩴᨿᩮᩅ ᩋᨾᨧ᩠ᨧᨣᩮᩉᩮ ᨸᨭᩥᩈᨶ᩠ᨵᩥᩴ ᨣᨱ᩠ᩉᩥ, ᨻᩮᩣᨵᩥᩈᨲ᩠ᨲᩮᨶ ᩈᨴ᩠ᨵᩥᩴ ᩑᨠᨴᩥᩅᩈᩴᨿᩮᩅ ᨩᩣᨲᩮᩣᨲᩥ ᨲᩴ ᨴᩥᩅᩈᩴᨿᩮᩅ ᨶᩴ ᨴᩩᨠᩪᩃᨧᩩᨾ᩠ᨻᨭᨠᩮ ᨶᩥᨸᨩ᩠ᨩᩣᨸᩮᨲ᩠ᩅᩣ ᨻᩮᩣᨵᩥᩈᨲ᩠ᨲᩔ ᩏᨸᨭ᩠ᨮᩣᨶᨲ᩠ᨳᩣᨿ ᨶᨿᩥᩴᩈᩩ. ᨻᩮᩣᨵᩥᩈᨲ᩠ᨲᩮᨶ ᩉᩥ ᩈᨴ᩠ᨵᩥᩴ ᨻᩮᩣᨵᩥᩁᩩᨠ᩠ᨡᩮᩣ, ᩁᩣᩉᩩᩃᨾᩣᨲᩣ, ᨧᨲ᩠ᨲᩣᩁᩮᩣ ᨶᩥᨵᩦ, ᩌᩁᩮᩣᩉᨶᩉᨲ᩠ᨳᩦ, ᩋᩔᨠᨱ᩠ᨯᨠᩮᩣ, ᩌᨶᨶ᩠ᨴᩮᩣ, ᨨᨶ᩠ᨶᩮᩣ, ᨠᩣᩊᩩᨴᩣᨿᩦᨲᩥ ᩍᨾᩮ ᩈᨲ᩠ᨲ ᩑᨠᨴᩥᩅᩈᩮ ᨩᩣᨲᨲ᩠ᨲᩣ ᩈᩉᨩᩣᨲᩣ ᨶᩣᨾ ᩋᩉᩮᩈᩩᩴ. ᩋᨳᩔ ᨶᩣᨾᨣ᩠ᨣᩉᨱᨴᩥᩅᩈᩮ ᩈᨠᩃᨶᨣᩁᩔ ᩏᨴᨣ᩠ᨣᨧᩥᨲ᩠ᨲᨴᩥᩅᩈᩮ ᨩᩣᨲᨲ᩠ᨲᩣ ᩏᨴᩣᨿᩥᨲ᩠ᩅᩮᩅ ᨶᩣᨾᩴ ᩋᨠᩴᩈᩩ. ᨳᩮᩣᨠᩴ ᨠᩣᩊᨵᩣᨲᩩᨠᨲ᩠ᨲᩣ ᨸᨶ ᨠᩣᩊᩩᨴᩣᨿᩦᨲᩥ ᨸᨬ᩠ᨬᩣᨿᩥᨲ᩠ᨳ. ᩈᩮᩣ ᨻᩮᩣᨵᩥᩈᨲ᩠ᨲᩮᨶ ᩈᨴ᩠ᨵᩥᩴ ᨠᩩᨾᩣᩁᨠᩦᩊᩴ ᨠᩦᩊᨶ᩠ᨲᩮᩣ ᩅᩩᨴ᩠ᨵᩥᩴ ᩋᨣᨾᩣᩈᩥ.

ᩋᨸᩁᨽᩣᨣᩮ ᩃᩮᩣᨠᨶᩣᨳᩮ ᨾᩉᩣᨽᩥᨶᩥᨠ᩠ᨡᨾᨶᩴ ᨶᩥᨠ᩠ᨡᨾᩥᨲ᩠ᩅᩣ ᩋᨶᩩᨠ᩠ᨠᨾᩮᨶ ᩈᨻ᩠ᨻᨬ᩠ᨬᩩᨲᩴ ᨸᨲ᩠ᩅᩣ ᨸᩅᨲ᩠ᨲᩥᨲᩅᩁᨵᨾ᩠ᨾᨧᨠ᩠ᨠᩮ ᩁᩣᨩᨣᩉᩴ ᩏᨸᨶᩥᩔᩣᨿ ᩅᩮᩊᩩᩅᨶᩮ ᩅᩥᩉᩁᨶ᩠ᨲᩮ ᩈᩩᨴ᩠ᨵᩮᩣᨴᨶᨾᩉᩣᩁᩣᨩᩣ ᨲᩴ ᨸᩅᨲ᩠ᨲᩥᩴ ᩈᩩᨲ᩠ᩅᩣ ¶ ᨸᩩᩁᩥᩈᩈᩉᩔᨸᩁᩥᩅᩣᩁᩴ ᩑᨠᩴ ¶ ᩋᨾᨧ᩠ᨧᩴ ‘‘ᨸᩩᨲ᩠ᨲᩴ ᨾᩮ ᩍᨵᩣᨶᩮᩉᩦ’’ᨲᩥ ᨸᩮᩈᩮᩈᩥ. ᩈᩮᩣ ᨵᨾ᩠ᨾᨴᩮᩈᨶᩣᩅᩮᩃᩣᨿᩴ ᩈᨲ᩠ᨳᩩ ᩈᨶ᩠ᨲᩥᨠᩴ ᨣᨶ᩠ᨲ᩠ᩅᩣ ᨸᩁᩥᩈᨸᩁᩥᨿᨶ᩠ᨲᩮ ᨮᩥᨲᩮᩣ ᨵᨾ᩠ᨾᩴ ᩈᩩᨲ᩠ᩅᩣ ᩈᨸᩁᩥᩅᩣᩁᩮᩣ ᩋᩁᩉᨲ᩠ᨲᩴ ᨸᩣᨸᩩᨱᩥ. ᩋᨳ ᨶᩮ ᩈᨲ᩠ᨳᩣ ‘‘ᩑᨳ, ᨽᩥᨠ᩠ᨡᩅᩮᩣ’’ᨲᩥ ᩉᨲ᩠ᨳᩴ ᨸᩈᩣᩁᩮᩈᩥ. ᩈᨻ᩠ᨻᩮ ᨲᨦ᩠ᨡᨱᨬ᩠ᨬᩮᩅ ᩍᨴ᩠ᨵᩥᨾᨿᨸᨲ᩠ᨲᨧᩦᩅᩁᨵᩁᩣ ᩅᩔᩈᨭ᩠ᨮᩥᨠᨲ᩠ᨳᩮᩁᩣ ᩅᩥᨿ ᩋᩉᩮᩈᩩᩴ. ᩋᩁᩉᨲ᩠ᨲᨸ᩠ᨸᨲ᩠ᨲᩥᨲᩮᩣ ᨸᨭ᩠ᨮᩣᨿ ᨸᨶ ᩋᩁᩥᨿᩣ ᨾᨩ᩠ᨫᨲ᩠ᨲᩣᩅ ᩉᩮᩣᨶ᩠ᨲᩥ. ᨲᩈ᩠ᨾᩣ ᩁᨬ᩠ᨬᩣ ᨸᩉᩥᨲᩈᩣᩈᨶᩴ ᨴᩈᨻᩃᩔ ᨶ ᨠᨳᩮᩈᩥ. ᩁᩣᨩᩣ ‘‘ᨶᩮᩅ ᨣᨲᩮᩣ ᩌᨣᨧ᩠ᨨᨲᩥ, ᨶ ᩈᩣᩈᨶᩴ ᩈᩩᨿ᩠ᨿᨲᩦ’’ᨲᩥ ᩋᨸᩁᩴ ᩋᨾᨧ᩠ᨧᩴ ᨸᩩᩁᩥᩈᩈᩉᩔᩮᩉᩥ ᨸᩮᩈᩮᩈᩥ. ᨲᩈ᩠ᨾᩥᨾ᩠ᨸᩥ ᨲᨳᩣ ᨸᨭᩥᨸᨶ᩠ᨶᩮ ᩋᨸᩁᨾ᩠ᨸᩥ ᨸᩮᩈᩮᩈᩦᨲᩥ ᩑᩅᩴ ᨶᩅᩉᩥ ᨸᩩᩁᩥᩈᩈᩉᩔᩮᩉᩥ ᩈᨴ᩠ᨵᩥᩴ ᨶᩅ ᩋᨾᨧ᩠ᨧᩮ ᨸᩮᩈᩮᩈᩥ. ᩈᨻ᩠ᨻᩮ ᩋᩁᩉᨲ᩠ᨲᩴ ᨸᨲ᩠ᩅᩣ ᨲᩩᨱ᩠ᩉᩦ ᩋᩉᩮᩈᩩᩴ.

ᩋᨳ ᩁᩣᨩᩣ ᨧᩥᨶ᩠ᨲᩮᩈᩥ – ‘‘ᩑᨲ᩠ᨲᨠᩣ ᨩᨶᩣ ᨾᨿᩥ ᩈᩥᨶᩮᩉᩣᨽᩣᩅᩮᨶ ᨴᩈᨻᩃᩔ ᩍᨵᩣᨣᨾᨶᨲ᩠ᨳᩣᨿ ᨶ ᨠᩥᨬ᩠ᨧᩥ ᨠᨳᨿᩥᩴᩈᩩ, ᩋᨿᩴ ᨡᩮᩣ ᩏᨴᩣᨿᩥ ᨴᩈᨻᩃᩮᨶ ᩈᨾᩅᨿᩮᩣ, ᩈᩉᨸᩴᩈᩩᨠᩦᩊᩥᨠᩮᩣ, ᨾᨿᩥ ᨧ ᩈᩥᨶᩮᩉᩮᩣ ᩋᨲ᩠ᨳᩥ, ᩍᨾᩴ ᨸᩮᩈᩮᩔᩣᨾᩦ’’ᨲᩥ ᨲᩴ ᨸᨠ᩠ᨠᩮᩣᩈᩣᨸᩮᨲ᩠ᩅᩣ, ‘‘ᨲᩣᨲ, ᨲ᩠ᩅᩴ ᨸᩩᩁᩥᩈᩈᩉᩔᨸᩁᩥᩅᩣᩁᩮᩣ ᩁᩣᨩᨣᩉᩴ ᨣᨶ᩠ᨲ᩠ᩅᩣ ᨴᩈᨻᩃᩴ ᩍᨵᩣᨶᩮᩉᩦ’’ᨲᩥ ᩅᨲ᩠ᩅᩣ ᨸᩮᩈᩮᩈᩥ. ᩈᩮᩣ ᨸᨶ ᨣᨧ᩠ᨨᨶ᩠ᨲᩮᩣ ‘‘ᩈᨧᩣᩉᩴ, ᨴᩮᩅ, ᨸᨻ᩠ᨻᨩᩥᨲᩩᩴ ᩃᨽᩥᩔᩣᨾᩥ, ᩑᩅᩣᩉᩴ ᨽᨣᩅᨶ᩠ᨲᩴ ᩍᨵᩣᨶᩮᩔᩣᨾᩦ’’ᨲᩥ ᩅᨲ᩠ᩅᩣ ‘‘ᨿᩴ ᨠᩥᨬ᩠ᨧᩥ ᨠᨲ᩠ᩅᩣ ᨾᨾ ᨸᩩᨲ᩠ᨲᩴ ᨴᩔᩮᩉᩦ’’ᨲᩥ ᩅᩩᨲ᩠ᨲᩮᩣ ᩁᩣᨩᨣᩉᩴ ᨣᨶ᩠ᨲ᩠ᩅᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩅᩮᩃᩣᨿᩴ ᨸᩁᩥᩈᨸᩁᩥᨿᨶ᩠ᨲᩮ ᨮᩥᨲᩮᩣ ᨵᨾ᩠ᨾᩴ ᩈᩩᨲ᩠ᩅᩣ ᩈᨸᩁᩥᩅᩣᩁᩮᩣ ¶ ᩋᩁᩉᨲ᩠ᨲᩴ ᨸᨲ᩠ᩅᩣ ᩑᩉᩥᨽᩥᨠ᩠ᨡᩩᨽᩣᩅᩮ ᨸᨲᩥᨭ᩠ᨮᩣᩈᩥ. ᩋᩁᩉᨲ᩠ᨲᩴ ᨸᨶ ᨸᨲ᩠ᩅᩣ ‘‘ᨶ ᨲᩣᩅᩣᨿᩴ ᨴᩈᨻᩃᩔ ᨠᩩᩃᨶᨣᩁᩴ ᨣᨶ᩠ᨲᩩᩴ ᨠᩣᩃᩮᩣ, ᩅᩈᨶ᩠ᨲᩮ ᨸᨶ ᩏᨸᨣᨲᩮ ᨸᩩᨸ᩠ᨹᩥᨲᩮ ᩅᨶᩈᨱ᩠ᨯᩮ ᩉᩁᩥᨲᨲᩥᨱᩈᨬ᩠ᨨᨶ᩠ᨶᩣᨿ ᨽᩪᨾᩥᨿᩣ ᨣᨾᨶᨠᩣᩃᩮᩣ ᨽᩅᩥᩔᨲᩦ’’ᨲᩥ ᨠᩣᩃᩴ ᨸᨭᩥᨾᩣᨶᩮᨶ᩠ᨲᩮᩣ ᩅᩈᨶ᩠ᨲᩮ ᩈᨾ᩠ᨸᨲ᩠ᨲᩮ ᩈᨲ᩠ᨳᩩ ᨠᩩᩃᨶᨣᩁᩴ ᨣᨶ᩠ᨲᩩᩴ ᨣᨾᨶᨾᨣ᩠ᨣᩅᨱ᩠ᨱᩴ ᩈᩴᩅᨱ᩠ᨱᩮᨶ᩠ᨲᩮᩣ –

‘‘ᩋᨦ᩠ᨣᩣᩁᩥᨶᩮᩣ ᨴᩣᨶᩥ ᨴᩩᨾᩣ ᨽᨴᨶ᩠ᨲᩮ, ᨹᩃᩮᩈᩥᨶᩮᩣ ᨨᨴᨶᩴ ᩅᩥᨸ᩠ᨸᩉᩣᨿ;

ᨲᩮ ᩋᨧ᩠ᨧᩥᨾᨶ᩠ᨲᩮᩣᩅ ᨸᨽᩣᩈᨿᨶ᩠ᨲᩥ, ᩈᨾᨿᩮᩣ ᨾᩉᩣᩅᩦᩁ ᨽᩣᨣᩦ ᩁᨳᩣᨶᩴ.

‘‘ᨴᩩᨾᩣᨶᩥ ᨹᩩᩃ᩠ᩃᩣᨶᩥ ᨾᨶᩮᩣᩁᨾᩣᨶᩥ, ᩈᨾᨶ᩠ᨲᨲᩮᩣ ᩈᨻ᩠ᨻᨴᩥᩈᩣ ᨸᩅᨶ᩠ᨲᩥ;

ᨸᨲ᩠ᨲᩴ ᨸᩉᩣᨿ ᨹᩃᨾᩣᩈᩈᩣᨶᩣ, ᨠᩣᩃᩮᩣ ᩍᨲᩮᩣ ᨸᨠ᩠ᨠᨾᨶᩣᨿ ᩅᩦᩁ.

‘‘ᨶᩮᩅᩣᨲᩥᩈᩦᨲᩴ ¶ ¶ ᨶ ᨸᨶᩣᨲᩥᩏᨱ᩠ᩉᩴ, ᩈᩩᨡᩣ ᩏᨲᩩ ᩋᨴ᩠ᨵᨶᩥᨿᩣ ᨽᨴᨶ᩠ᨲᩮ;

ᨸᩔᨶ᩠ᨲᩩ ᨲᩴ ᩈᩣᨠᩥᨿᩣ ᨠᩮᩣᩊᩥᨿᩣ ᨧ, ᨸᨧ᩠ᨨᩣᨾᩩᨡᩴ ᩁᩮᩣᩉᩥᨶᩥᨿᩴ ᨲᩁᨶ᩠ᨲᩴ.

‘‘ᩌᩈᩣᨿ ᨠᩈᨲᩮ ᨡᩮᨲ᩠ᨲᩴ, ᨻᩦᨩᩴ ᩌᩈᩣᨿ ᩅᨸ᩠ᨸᨲᩥ;

ᩌᩈᩣᨿ ᩅᩣᨱᩥᨩᩣ ᨿᨶ᩠ᨲᩥ, ᩈᨾᩩᨴ᩠ᨴᩴ ᨵᨶᩉᩣᩁᨠᩣ;

ᨿᩣᨿ ᩌᩈᩣᨿ ᨲᩥᨭ᩠ᨮᩣᨾᩥ, ᩈᩣ ᨾᩮ ᩌᩈᩣ ᩈᨾᩥᨩ᩠ᨫᨲᩩ. (ᨳᩮᩁᨣᩣ. ᪕᪒᪗-᪕᪓᪐);

‘‘ᨶᩣᨲᩥᩈᩦᨲᩴ ᨶᩣᨲᩥᩏᨱ᩠ᩉᩴ, ᨶᩣᨲᩥᨴᩩᨻ᩠ᨽᩥᨠ᩠ᨡᨨᩣᨲᨠᩴ;

ᩈᨴ᩠ᨴᩃᩣ ᩉᩁᩥᨲᩣ ᨽᩪᨾᩥ, ᩑᩈ ᨠᩣᩃᩮᩣ ᨾᩉᩣᨾᩩᨶᩥ. (ᩋ. ᨶᩥ. ᩋᨭ᩠ᨮ. ᪑.᪑.᪒᪒᪕);

‘‘ᨸᩩᨶᨸ᩠ᨸᩩᨶᨬ᩠ᨧᩮᩅ ᩅᨸᨶ᩠ᨲᩥ ᨻᩦᨩᩴ, ᨸᩩᨶᨸ᩠ᨸᩩᨶᩴ ᩅᩔᨲᩥ ᨴᩮᩅᩁᩣᨩᩣ;

ᨸᩩᨶᨸ᩠ᨸᩩᨶᩴ ᨡᩮᨲ᩠ᨲᩴ ᨠᩈᨶ᩠ᨲᩥ ᨠᩔᨠᩣ, ᨸᩩᨶᨸ᩠ᨸᩩᨶᩴ ᨵᨬ᩠ᨬᨾᩩᨸᩮᨲᩥ ᩁᨭ᩠ᨮᩴ.

‘‘ᨸᩩᨶᨸ᩠ᨸᩩᨶᩴ ᨿᩣᨧᨶᨠᩣ ᨧᩁᨶ᩠ᨲᩥ, ᨸᩩᨶᨸ᩠ᨸᩩᨶᩴ ᨴᩣᨶᨸ᩠ᨸᨲᩦ ᨴᨴᨶ᩠ᨲᩥ;

ᨸᩩᨶᨸ᩠ᨸᩩᨶᩴ ᨴᩣᨶᨸ᩠ᨸᨲᩦ ᨴᨴᩥᨲ᩠ᩅᩣ, ᨸᩩᨶᨸ᩠ᨸᩩᨶᩴ ᩈᨣ᩠ᨣᨾᩩᨸᩮᨶ᩠ᨲᩥ ᨮᩣᨶᩴ.

‘‘ᩅᩦᩁᩮᩣ ¶ ᩉᩅᩮ ᩈᨲ᩠ᨲᨿᩩᨣᩴ ᨸᩩᨶᩮᨲᩥ, ᨿᩈ᩠ᨾᩥᩴ ᨠᩩᩃᩮ ᨩᩣᨿᨲᩥ ᨽᩪᩁᩥᨸᨬ᩠ᨬᩮᩣ;

ᨾᨬ᩠ᨬᩣᨾᩉᩴ ᩈᨠ᩠ᨠᨲᩥ ᨴᩮᩅᨴᩮᩅᩮᩣ, ᨲᨿᩣ ᩉᩥ ᨩᩣᨲᩮᩣ ᨾᩩᨶᩥ ᩈᨧ᩠ᨧᨶᩣᨾᩮᩣ.

‘‘ᩈᩩᨴ᩠ᨵᩮᩣᨴᨶᩮᩣ ᨶᩣᨾ ᨸᩥᨲᩣ ᨾᩉᩮᩈᩥᨶᩮᩣ, ᨻᩩᨴ᩠ᨵᩔ ᨾᩣᨲᩣ ᨸᨶ ᨾᩣᨿᨶᩣᨾᩣ;

ᨿᩣ ᨻᩮᩣᨵᩥᩈᨲ᩠ᨲᩴ ᨸᩁᩥᩉᩁᩥᨿ ᨠᩩᨧ᩠ᨨᩥᨶᩣ, ᨠᩣᨿᩔ ᨽᩮᨴᩣ ᨲᩥᨴᩥᩅᨾ᩠ᩉᩥ ᨾᩮᩣᨴᨲᩥ.

‘‘ᩈᩣ ᨣᩮᩣᨲᨾᩦ ᨠᩣᩃᨠᨲᩣ ᩍᨲᩮᩣ ᨧᩩᨲᩣ, ᨴᩥᨻ᩠ᨻᩮᩉᩥ ᨠᩣᨾᩮᩉᩥ ᩈᨾᨦ᩠ᨣᩥᨽᩪᨲᩣ;

ᩈᩣ ᨾᩮᩣᨴᨲᩥ ᨠᩣᨾᨣᩩᨱᩮᩉᩥ ᨸᨬ᩠ᨧᩉᩥ, ᨸᩁᩥᩅᩣᩁᩥᨲᩣ ᨴᩮᩅᨣᨱᩮᩉᩥ ᨲᩮᩉᩦ’’ᨲᩥ. (ᨳᩮᩁᨣᩣ. ᪕᪓᪑-᪕᪓᪕);

ᩍᨾᩣ ¶ ᨣᩣᨳᩣ ᩋᨽᩣᩈᩥ. ᨲᨲ᩠ᨳ ᩋᨦ᩠ᨣᩣᩁᩥᨶᩮᩣᨲᩥ ᩋᨦ᩠ᨣᩣᩁᩣᨶᩥ ᩅᩥᨿᩣᨲᩥ ᩋᨦ᩠ᨣᩣᩁᩣᨶᩥ. ᩋᨦ᩠ᨣᩣᩁᩣᨶᩥ ᩁᨲ᩠ᨲᨸᩅᩣᩊᩅᨱ᩠ᨱᩣᨶᩥ ᩁᩩᨠ᩠ᨡᩣᨶᩴ ᨸᩩᨸ᩠ᨹᨹᩃᩣᨶᩥ, ᨲᩣᨶᩥ ᩑᨲᩮᩈᩴ ᩈᨶ᩠ᨲᩦᨲᩥ ¶ ᩋᨦ᩠ᨣᩣᩁᩥᨶᩮᩣ, ᩋᨽᩥᩃᩮᩣᩉᩥᨲᨠᩩᩈᩩᨾᨠᩥᩈᩃᨿᩮᩉᩥ ᩋᨦ᩠ᨣᩣᩁᩅᩩᨭ᩠ᨮᩥᩈᨾ᩠ᨸᩁᩥᨠᩥᨱ᩠ᨱᩣ ᩅᩥᨿᩣᨲᩥ ᩋᨲ᩠ᨳᩮᩣ. ᨴᩣᨶᩦᨲᩥ ᩍᨾᩈ᩠ᨾᩥᩴ ᨠᩣᩃᩮ. ᨴᩩᨾᩣᨲᩥ ᩁᩩᨠ᩠ᨡᩣ. ᨽᨴᨶ᩠ᨲᩮᨲᩥ ᨽᨴ᩠ᨴᩴ ᩋᨶ᩠ᨲᩮ ᩑᨲᩔᩣᨲᩥ, ‘‘ᨽᨴᨶ᩠ᨲᩮ’’ᨲᩥ ᩑᨠᩔ ᨴ-ᨠᩣᩁᩔ ᩃᩮᩣᨸᩴ ᨠᨲ᩠ᩅᩣ ᩅᩩᨧ᩠ᨧᨲᩥ. ᨣᩩᨱᩅᩥᩈᩮᩈᨿᩩᨲ᩠ᨲᩮᩣ, ᨣᩩᨱᩅᩥᩈᩮᩈᨿᩩᨲ᩠ᨲᩣᨶᨬ᩠ᨧ ᩋᨣ᩠ᨣᨽᩪᨲᩮᩣ ᩈᨲ᩠ᨳᩣ. ᨲᩈ᩠ᨾᩣ, ᨽᨴᨶ᩠ᨲᩮᨲᩥ ᩈᨲ᩠ᨳᩩ ᩌᩃᨸᨶᨾᩮᩅ, ᨸᨧ᩠ᨧᨲ᩠ᨲᩅᨧᨶᨬ᩠ᨧᩮᨲᩴ ᩑᨠᩣᩁᨶ᩠ᨲᩴ ‘‘ᩈᩩᨣᨲᩮ ᨸᨭᩥᨠᨾ᩠ᨾᩮ ᩈᩩᨡᩮ ᨴᩩᨠ᩠ᨡᩮ ᨩᩦᩅᩮ’’ᨲᩥᩌᨴᩦᩈᩩ ᩅᩥᨿ. ᩍᨵ ᨸᨶ ᩈᨾ᩠ᨻᩮᩣᨵᨶᨭ᩠ᨮᩮ ᨴᨭ᩠ᨮᨻ᩠ᨻᩴ. ᨲᩮᨶ ᩅᩩᨲ᩠ᨲᩴ, ‘‘ᨽᨴᨶ᩠ᨲᩮᨲᩥ ᩌᩃᨸᨶ’’ᨶ᩠ᨲᩥ. ‘‘ᨽᨴ᩠ᨴᩈᨴ᩠ᨴᩮᨶ ᩈᨾᩣᨶᨲ᩠ᨳᩴ ᨸᨴᨶ᩠ᨲᩁᨾᩮᨠ’’ᨶ᩠ᨲᩥ ᨠᩮᨧᩥ. ᨹᩃᩣᨶᩥ ᩑᩈᨶ᩠ᨲᩦᨲᩥ ᨹᩃᩮᩈᩥᨶᩮᩣ. ᩋᨧᩮᨲᨶᩮᨸᩥ ᩉᩥ ᩈᨧᩮᨲᨶᨠᩥᩁᩥᨿᩴ ᩌᩉ. ᩑᩅᩴ ᨳᩮᩁᩮᨶ ᨿᩣᨧᩥᨲᩮᩣ ᨽᨣᩅᩣ ᨲᨲ᩠ᨳ ᨣᨾᨶᩮ ᨻᩉᩪᨶᩴ ᩅᩥᩈᩮᩈᩣᨵᩥᨣᨾᨶᩴ ᨴᩥᩈ᩠ᩅᩣ ᩅᩦᩈᨲᩥᩈᩉᩔᨡᩦᨱᩣᩈᩅᨸᩁᩥᩅᩩᨲᩮᩣ ᩁᩣᨩᨣᩉᨲᩮᩣ ᩋᨲᩩᩁᩥᨲᨧᩣᩁᩥᨠᩣᩅᩈᩮᨶ ᨠᨸᩥᩃᩅᨲ᩠ᨳᩩᨣᩣᨾᩥᨾᨣ᩠ᨣᩴ ᨸᨭᩥᨸᨩ᩠ᨩᩥ. ᨳᩮᩁᩮᩣ ᩍᨴ᩠ᨵᩥᨿᩣ ᨠᨸᩥᩃᩅᨲ᩠ᨳᩩᩴ ᨣᨶ᩠ᨲ᩠ᩅᩣ ᩁᨬ᩠ᨬᩮᩣ ᨸᩩᩁᨲᩮᩣ ᩌᨠᩣᩈᩮ ᨮᩥᨲᩮᩣᩅ ᩋᨴᩥᨭ᩠ᨮᨸᩩᨻ᩠ᨻᩅᩮᩈᩴ ᨴᩥᩈ᩠ᩅᩣ ᩁᨬ᩠ᨬᩣ ‘‘ᨠᩮᩣᩈᩥ ᨲ᩠ᩅ’’ᨶ᩠ᨲᩥ ᨸᩩᨧ᩠ᨨᩥᨲᩮᩣ ‘‘ᩋᨾᨧ᩠ᨧᨸᩩᨲ᩠ᨲᩴ ᨲᨿᩣ ᨽᨣᩅᨲᩮᩣ ᩈᨶ᩠ᨲᩥᨠᩴ ᨸᩮᩈᩥᨲᩴ ᨾᩴ ᨶ ᨩᩣᨶᩣᩈᩥ, ᨲ᩠ᩅᩴ ᩑᩅᩴ ᨸᨶ ᨩᩣᨶᩣᩉᩦ’’ᨲᩥ ᨴᩔᩮᨶ᩠ᨲᩮᩣ –

‘‘ᨻᩩᨴ᩠ᨵᩔ ᨸᩩᨲ᩠ᨲᩮᩣᨾ᩠ᩉᩥ ᩋᩈᨿ᩠ᩉᩈᩣᩉᩥᨶᩮᩣ, ᩋᨦ᩠ᨣᩦᩁᩈᩔᨸ᩠ᨸᨭᩥᨾᩔ ᨲᩣᨴᩥᨶᩮᩣ;

ᨸᩥᨲᩩᨸᩥᨲᩣ ᨾᨿ᩠ᩉᩴ ᨲᩩᩅᩴᩈᩥ ᩈᨠ᩠ᨠ, ᨵᨾ᩠ᨾᩮᨶ ᨾᩮ ᨣᩮᩣᨲᨾ ᩋᨿ᩠ᨿᨠᩮᩣᩈᩦ’’ᨲᩥ. (ᨳᩮᩁᨣᩣ. ᪕᪓᪖) –

ᨣᩣᨳᨾᩣᩉ.

ᨲᨲ᩠ᨳ ¶ ᨻᩩᨴ᩠ᨵᩔ ᨸᩩᨲ᩠ᨲᩮᩣᨾ᩠ᩉᩦᨲᩥ ᩈᨻ᩠ᨻᨬ᩠ᨬᩩᨻᩩᨴ᩠ᨵᩔ ᩒᩁᩔ ᨸᩩᨲ᩠ᨲᩮᩣ ᩋᨾ᩠ᩉᩥ. ᩋᩈᨿ᩠ᩉᩈᩣᩉᩥᨶᩮᩣᨲᩥ ᩋᨽᩥᩈᨾ᩠ᨻᩮᩣᨵᩥᨲᩮᩣ ᨸᩩᨻ᩠ᨻᩮ ᨮᨸᩮᨲ᩠ᩅᩣ ᨾᩉᩣᨻᩮᩣᨵᩥᩈᨲ᩠ᨲᩴ ᩋᨬ᩠ᨬᩮᩉᩥ ᩈᩉᩥᨲᩩᩴ ᩅᩉᩥᨲᩩᩴ ᩋᩈᨠ᩠ᨠᩩᨱᩮᨿ᩠ᨿᨲ᩠ᨲᩣ ᩋᩈᨿ᩠ᩉᩔ ᩈᨠᩃᩔ ᨻᩮᩣᨵᩥᩈᨾ᩠ᨽᩣᩁᩔ ᨾᩉᩣᨠᩣᩁᩩᨱᩥᨠᩣᨵᩥᨠᩣᩁᩔ ᨧ ᩈᩉᨶᨲᩮᩣ ᩅᩉᨶᨲᩮᩣ, ᨲᨲᩮᩣ ᨸᩁᨾ᩠ᨸᩥ ᩋᨬ᩠ᨬᩮᩉᩥ ᩈᩉᩥᨲᩩᩴ ᩋᨽᩥᨽᩅᩥᨲᩩᩴ ᩋᩈᨠ᩠ᨠᩩᨱᩮᨿ᩠ᨿᨲ᩠ᨲᩣ ᩋᩈᨿ᩠ᩉᩣᨶᩴ ᨸᨬ᩠ᨧᨶ᩠ᨶᩴ ᨾᩣᩁᩣᨶᩴ ᩈᩉᨶᨲᩮᩣ ᩋᨽᩥᨽᩅᨶᨲᩮᩣ, ᩌᩈᨿᩣᨶᩩᩈᨿᨧᩁᩥᨲᩣᨵᩥᨾᩩᨲ᩠ᨲᩥᩌᨴᩥᩅᩥᨽᩣᨣᩣᩅᨻᩮᩣᨵᨶᩮᨶ ᨿᨳᩣᩁᩉᩴ ᩅᩮᨶᩮᨿ᩠ᨿᩣᨶᩴ ᨴᩥᨭ᩠ᨮᨵᨾ᩠ᨾᩥᨠᩈᨾ᩠ᨸᩁᩣᨿᩥᨠᨸᩁᨾᨲ᩠ᨳᩮᩉᩥ ᩋᨶᩩᩈᩣᩈᨶᩦᩈᨦ᩠ᨡᩣᨲᩔ ᩋᨬ᩠ᨬᩮᩉᩥ ᩋᩈᨿ᩠ᩉᩔ ᨻᩩᨴ᩠ᨵᨠᩥᨧ᩠ᨧᩔ ¶ ᩈᩉᨶᨲᩮᩣ, ᨲᨲ᩠ᨳ ᩅᩣ ᩈᩣᨵᩩᨠᩣᩁᩥᨽᩣᩅᨲᩮᩣ ᩋᩈᨿ᩠ᩉᩈᩣᩉᩥᨶᩮᩣ. ᩋᨦ᩠ᨣᩦᩁᩈᩔᩣᨲᩥ ᩋᨦ᩠ᨣᩦᨠᨲᩈᩦᩃᩣᨴᩥᩈᨾ᩠ᨸᨲ᩠ᨲᩥᨠᩔ. ᩋᨦ᩠ᨣᨾᨦ᩠ᨣᩮᩉᩥ ᨶᩥᨧ᩠ᨨᩁᨱᨠᩒᨽᩣᩈᩔᩣᨲᩥ ᩋᨸᩁᩮ. ᨠᩮᨧᩥ ᨸᨶ ‘‘ᩋᨦ᩠ᨣᩦᩁᩈᩮᩣ, ᩈᩥᨴ᩠ᨵᨲ᩠ᨳᩮᩣᨲᩥ ᨴ᩠ᩅᩮ ᨶᩣᨾᩣᨶᩥ ᨸᩥᨲᩁᩣᨿᩮᩅ ᨣᩉᩥᨲᩣᨶᩦ’’ᨲᩥ ᩅᨴᨶ᩠ᨲᩥ. ᩋᨸ᩠ᨸᨭᩥᨾᩔᩣᨲᩥ ᩋᨶᩪᨸᨾᩔ. ᩍᨭ᩠ᨮᩣᨶᩥᨭ᩠ᨮᩮᩈᩩ ᨲᩣᨴᩥᩃᨠ᩠ᨡᨱᨸ᩠ᨸᨲ᩠ᨲᩥᨿᩣ ¶ ᨲᩣᨴᩥᨶᩮᩣ. ᨸᩥᨲᩩᨸᩥᨲᩣ ᨾᨿ᩠ᩉᩴ ᨲᩩᩅᩴᩈᩦᨲᩥ ᩋᩁᩥᨿᨩᩣᨲᩥᩅᩈᩮᨶ ᨾᨿ᩠ᩉᩴ ᨸᩥᨲᩩ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩃᩮᩣᨠᩅᩮᩣᩉᩣᩁᩮᨶ ᨲ᩠ᩅᩴ ᨸᩥᨲᩣ ᩋᩈᩥ. ᩈᨠ᩠ᨠᩣᨲᩥ ᨩᩣᨲᩥᩅᩈᩮᨶ ᩁᩣᨩᩣᨶᩴ ᩌᩃᨸᨲᩥ. ᨵᨾ᩠ᨾᩮᨶᩣᨲᩥ ᩈᨽᩣᩅᩮᨶ ᩋᩁᩥᨿᨩᩣᨲᩥ ᩃᩮᩣᨠᩥᨿᨩᩣᨲᩦᨲᩥ ᨴ᩠ᩅᩥᨶ᩠ᨶᩴ ᨩᩣᨲᩦᨶᩴ ᩈᨽᩣᩅᩈᨾᩮᩣᨵᩣᨶᩮᨶ. ᨣᩮᩣᨲᨾᩣᨲᩥ ᩁᩣᨩᩣᨶᩴ ᨣᩮᩣᨲ᩠ᨲᩮᨶ ᩌᩃᨸᨲᩥ. ᩋᨿ᩠ᨿᨠᩮᩣᩈᩦᨲᩥ ᨸᩥᨲᩣᨾᩉᩮᩣ ᩋᩈᩥ. ᩑᨲ᩠ᨳ ᨧ ‘‘ᨻᩩᨴ᩠ᨵᩔ ᨸᩩᨲ᩠ᨲᩮᩣᨾ᩠ᩉᩦ’’ᨲᩥᩌᨴᩥᩴ ᩅᨴᨶ᩠ᨲᩮᩣ ᨳᩮᩁᩮᩣ ᩋᨬ᩠ᨬᩴ ᨻ᩠ᨿᩣᨠᩣᩈᩥ.

ᩑᩅᩴ ᨸᨶ ᩋᨲ᩠ᨲᩣᨶᩴ ᨩᩣᨶᩣᨸᩮᨲ᩠ᩅᩣ ᩉᨭ᩠ᨮᨲᩩᨭ᩠ᨮᩮᨶ ᩁᨬ᩠ᨬᩣ ᨾᩉᩣᩁᩉᩮ ᨸᩃ᩠ᩃᨦ᩠ᨠᩮ ᨶᩥᩈᩦᨴᩣᨸᩮᨲ᩠ᩅᩣ ᩋᨲ᩠ᨲᨶᩮᩣ ᨸᨭᩥᨿᩣᨴᩥᨲᩔ ᨶᩣᨶᨣ᩠ᨣᩁᩈᨽᩮᩣᨩᨶᩔ ᨸᨲ᩠ᨲᩴ ᨸᩪᩁᩮᨲ᩠ᩅᩣ ᨴᩥᨶ᩠ᨶᩮ ᨣᨾᨶᩣᨠᩣᩁᩴ ᨴᩔᩮᩈᩥ. ‘‘ᨠᩈ᩠ᨾᩣ, ᨽᨶ᩠ᨲᩮ, ᨣᨶ᩠ᨲᩩᨠᩣᨾᨲ᩠ᨳ, ᨽᩩᨬ᩠ᨩᨳᩣ’’ᨲᩥ ᨧ ᩅᩩᨲ᩠ᨲᩮ, ‘‘ᩈᨲ᩠ᨳᩩ ᩈᨶ᩠ᨲᩥᨠᩴ ᨣᨶ᩠ᨲ᩠ᩅᩣ ᨽᩩᨬ᩠ᨩᩥᩔᩣᨾᩦ’’ᨲᩥ. ‘‘ᨠᩉᩴ ᨸᨶ ᩈᨲ᩠ᨳᩣ’’ᨲᩥ? ‘‘ᩅᩦᩈᨲᩥᩈᩉᩔᨽᩥᨠ᩠ᨡᩩᨸᩁᩥᩅᩣᩁᩮᩣ ᨲᩩᨾ᩠ᩉᩣᨠᩴ ᨴᩔᨶᨲ᩠ᨳᩣᨿ ᨾᨣ᩠ᨣᩴ ᨸᨭᩥᨸᨶ᩠ᨶᩮᩣ’’ᨲᩥ. ‘‘ᨲᩩᨾ᩠ᩉᩮ ᩍᨾᩴ ᨸᩥᨱ᩠ᨯᨸᩣᨲᩴ ᨽᩩᨬ᩠ᨩᨳ, ᩋᨬ᩠ᨬᩴ ᨽᨣᩅᨲᩮᩣ ᩉᩁᩥᩔᨳ. ᨿᩣᩅ ᨧ ᨾᨾ ᨸᩩᨲ᩠ᨲᩮᩣ ᩍᨾᩴ ᨶᨣᩁᩴ ᩈᨾ᩠ᨸᩣᨸᩩᨱᩣᨲᩥ, ᨲᩣᩅᩔ ᩍᨲᩮᩣ ᨸᩥᨱ᩠ᨯᨸᩣᨲᩴ ᩉᩁᨳᩣ’’ᨲᩥ ᩅᩩᨲ᩠ᨲᩮ ᨳᩮᩁᩮᩣ ᨽᨲ᩠ᨲᨠᩥᨧ᩠ᨧᩴ ᨠᨲ᩠ᩅᩣ ᩁᨬ᩠ᨬᩮᩣ ᨸᩁᩥᩈᩣᨿ ᨧ ᨵᨾ᩠ᨾᩴ ᨠᨳᩮᨲ᩠ᩅᩣ ᩈᨲ᩠ᨳᩩ ᩌᨣᨾᨶᨲᩮᩣ ᨸᩩᩁᩮᨲᩁᨾᩮᩅ ᩈᨠᩃᩁᩣᨩᨶᩥᩅᩮᩈᨶᩴ ᩁᨲᨶᨲ᩠ᨲᨿᩮ ᩋᨽᩥᨸ᩠ᨸᩈᨶ᩠ᨶᩴ ᨠᩁᩮᩣᨶ᩠ᨲᩮᩣ ᩈᨻ᩠ᨻᩮᩈᩴ ᨸᩔᨶ᩠ᨲᩣᨶᩴᨿᩮᩅ ᩈᨲ᩠ᨳᩩ ᩌᩉᩁᩥᨲᨻ᩠ᨻᨽᨲ᩠ᨲᨸᩩᨱ᩠ᨱᩴ ᨸᨲ᩠ᨲᩴ ᩌᨠᩣᩈᩮ ᩅᩥᩔᨩ᩠ᨩᩮᨲ᩠ᩅᩣ ᩈᨿᨾ᩠ᨸᩥ ᩅᩮᩉᩣᩈᩴ ᩋᨻ᩠ᨽᩩᨣ᩠ᨣᨶ᩠ᨲ᩠ᩅᩣ ᨸᩥᨱ᩠ᨯᨸᩣᨲᩴ ᩏᨸᨶᩣᨾᩮᨲ᩠ᩅᩣ ᩈᨲ᩠ᨳᩩ ᩉᨲ᩠ᨳᩮ ᨮᨸᩮᩈᩥ. ᩈᨲ᩠ᨳᩣ ᨲᩴ ᨸᩥᨱ᩠ᨯᨸᩣᨲᩴ ᨸᩁᩥᨽᩩᨬ᩠ᨩᩥ. ᩑᩅᩴ ᩈᨭ᩠ᨮᩥᨿᩮᩣᨩᨶᨾᨣ᩠ᨣᩮ ᨴᩥᩅᩈᩮ ᨴᩥᩅᩈᩮ ᨿᩮᩣᨩᨶᩴ ᨣᨧ᩠ᨨᨶ᩠ᨲᩔ ᨽᨣᩅᨲᩮᩣ ᩁᩣᨩᨣᩮᩉᨲᩮᩣᨿᩮᩅ ᨸᩥᨱ᩠ᨯᨸᩣᨲᩴ ᩌᩉᩁᩥᨲ᩠ᩅᩣ ᩋᨴᩣᩈᩥ. ᩋᨳ ᨶᩴ ᨽᨣᩅᩣ ‘‘ᩋᨿᩴ ᨾᨿ᩠ᩉᩴ ᨸᩥᨲᩩᨶᩮᩣ ᩈᨠᩃᨶᩥᩅᩮᩈᨶᩴ ᨸᩈᩣᨴᩮᨲᩦ’’ᨲᩥ ‘‘ᩑᨲᨴᨣ᩠ᨣᩴ, ᨽᩥᨠ᩠ᨡᩅᩮ, ᨾᨾ ᩈᩣᩅᨠᩣᨶᩴ ᨠᩩᩃᨸ᩠ᨸᩈᩣᨴᨠᩣᨶᩴ ᨽᩥᨠ᩠ᨡᩪᨶᩴ ᨿᨴᩥᨴᩴ ᨠᩣᩊᩩᨴᩣᨿᩦ’’ᨲᩥ (ᩋ. ᨶᩥ. ᪑.᪒᪑᪙, ᪒᪒᪕) ᨠᩩᩃᨸ᩠ᨸᩈᩣᨴᨠᩣᨶᩴ ᩋᨣ᩠ᨣᨭ᩠ᨮᩣᨶᩮ ᨮᨸᩮᩈᩥ.

᪔᪘-᪙. ᩑᩅᩴ ᩈᩮᩣ ᨠᨲᨸᩩᨬ᩠ᨬᩈᨾ᩠ᨽᩣᩁᩣᨶᩩᩁᩪᨸᩮᨶ ᩋᩁᩉᨲ᩠ᨲᩴ ᨸᨲ᩠ᩅᩣ ᨸᨲ᩠ᨲᩑᨲᨴᨣ᩠ᨣᨭ᩠ᨮᩣᨶᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ¶ ᩈᩁᩥᨲ᩠ᩅᩣ ᩈᩮᩣᨾᨶᩔᩅᩈᩮᨶ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ¶ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨻᩩᨴ᩠ᨵᩔᩣᨲᩥᩌᨴᩥᨾᩣᩉ. ᩋᨴ᩠ᨵᩣᨶᩴ ᨸᨭᩥᨸᨶ᩠ᨶᩔᩣᨲᩥ ᩋᨸᩁᩁᨭ᩠ᨮᩴ ᨣᨾᨶᨲ᩠ᨳᩣᨿ ᨴᩪᩁᨾᨣ᩠ᨣᩴ ᨸᨭᩥᨸᨩ᩠ᨩᨶ᩠ᨲᩔ. ᨧᩁᨲᩮᩣ ᨧᩣᩁᩥᨠᩴ ᨲᨴᩣᨲᩥ ᩋᨶ᩠ᨲᩮᩣᨾᨱ᩠ᨯᩃᩴ ᨾᨩ᩠ᨫᩮᨾᨱ᩠ᨯᩃᩴ ᨻᩉᩥᨾᨱ᩠ᨯᩃᨶ᩠ᨲᩥ ᨲᩦᨱᩥ ᨾᨱ᩠ᨯᩃᩣᨶᩥ ᨲᨴᩣ ᨧᩣᩁᩥᨠᩴ ᨧᩁᨲᩮᩣ ᨧᩁᨶ᩠ᨲᩔ ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔ ᨽᨣᩅᨲᩮᩣ ᩈᩩᨹᩩᩃ᩠ᩃᩴ ᩈᩩᨭ᩠ᨮᩩ ᨹᩩᩃ᩠ᩃᩴ ᨸᨻᩮᩣᨵᩥᨲᩴ ᨣᨿ᩠ᩉ ᨣᩉᩮᨲ᩠ᩅᩣ ᨶ ᨠᩮᩅᩃᨾᩮᩅ ᨸᨴᩩᨾᩴ, ᩏᨸ᩠ᨸᩃᨬ᩠ᨧ ᨾᩃ᩠ᩃᩥᨠᩴ ᩅᩥᨠᩈᩥᨲᩴ ᩋᩉᩴ ᨣᨿ᩠ᩉ ᩏᨽᩮᩣᩉᩥ ᩉᨲ᩠ᨳᩮᩉᩥ ᨣᩉᩮᨲ᩠ᩅᩣ ᨸᩪᩁᩮᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨸᩁᨾᨶ᩠ᨶᩴ ᨣᩉᩮᨲ᩠ᩅᩣᨶᩣᨲᩥ ᨸᩁᨾᩴ ᩏᨲ᩠ᨲᨾᩴ ᩈᩮᨭ᩠ᨮᩴ ᨾᨵᩩᩁᩴ ᩈᨻ᩠ᨻᩈᩩᨸᨠ᩠ᨠᩴ ᩈᩣᩃᩥᩒᨴᨶᩴ ᨣᩉᩮᨲ᩠ᩅᩣ ᩈᨲ᩠ᨳᩩᨶᩮᩣ ᩋᨴᩣᩈᩥᩴ ᨽᩮᩣᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪙᪗. ᩈᨠ᩠ᨿᩣᨶᩴ ¶ ᨶᨶ᩠ᨴᩥᨩᨶᨶᩮᩣᨲᩥ ᩈᨠ᩠ᨿᩁᩣᨩᨠᩩᩃᩣᨶᩴ ᨽᨣᩅᨲᩮᩣ ᨬᩣᨲᩦᨶᩴ ᩌᩁᩮᩣᩉᨸᩁᩥᨱᩣᩉᩁᩪᨸᨿᩮᩣᨻ᩠ᨻᨶᩅᨧᨶᩣᩃᨸᨶᩈᨾ᩠ᨸᨲ᩠ᨲᩥᨿᩣ ᨶᨶ᩠ᨴᩴ ᨲᩩᨭ᩠ᨮᩥᩴ ᨩᨶᩮᨶ᩠ᨲᩮᩣ ᩏᨸ᩠ᨸᩣᨴᩮᨶ᩠ᨲᩮᩣ. ᨬᩣᨲᩥᨻᨶ᩠ᨵᩩ ᨽᩅᩥᩔᨲᩦᨲᩥ ᨬᩣᨲᩮᩣ ᨸᩣᨠᨭᩮᩣ ᨻᨶ᩠ᨵᩩ ᨽᩅᩥᩔᨲᩥ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨠᩣᩊᩩᨴᩣᨿᩥᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᨾᩮᩣᨥᩁᩣᨩᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩋᨲ᩠ᨳᨴᩔᩦ ᨲᩩ ᨽᨣᩅᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨾᩮᩣᨥᩁᩣᨩᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩑᨠᨴᩥᩅᩈᩴ ᩈᨲ᩠ᨳᩩ ᩈᨶ᩠ᨲᩥᨠᩮ ᨵᨾ᩠ᨾᩴ ᩈᩩᨱᨶ᩠ᨲᩮᩣ ᩈᨲ᩠ᨳᩣᩁᩴ ᩑᨠᩴ ᨽᩥᨠ᩠ᨡᩩᩴ ᩃᩪᨡᨧᩦᩅᩁᨵᩁᩣᨶᩴ ᩋᨣ᩠ᨣᨭ᩠ᨮᩣᨶᩮ ᨮᨸᩮᨶ᩠ᨲᩴ ᨴᩥᩈ᩠ᩅᩣ ᨲᩴ ᨮᩣᨶᨶ᩠ᨲᩁᩴ ᩌᨠᨦ᩠ᨡᨶ᩠ᨲᩮᩣ ᨸᨱᩥᨵᩣᨶᩴ ᨠᨲ᩠ᩅᩣ ᨲᨲ᩠ᨳ ᨲᨲ᩠ᨳ ᨽᩅᩮ ᨸᩩᨬ᩠ᨬᩣᨶᩥ ᨠᩁᩮᩣᨶ᩠ᨲᩮᩣ ᩋᨲ᩠ᨳᨴᩔᩥᩔ ᨽᨣᩅᨲᩮᩣ ᨠᩣᩃᩮ ᨸᩩᨶ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᨻᩕᩣᩉ᩠ᨾᨱᩣᨶᩴ ᩅᩥᨩ᩠ᨩᩣᩈᩥᨸ᩠ᨸᩮᩈᩩ ᨶᩥᨸ᩠ᨹᨲ᩠ᨲᩥᩴ ᨣᨲᩮᩣ ᩑᨠᨴᩥᩅᩈᩴ ᩋᨲ᩠ᨳᨴᩔᩥᩴ ᨽᨣᩅᨶ᩠ᨲᩴ ᨽᩥᨠ᩠ᨡᩩᩈᨦ᩠ᨥᨸᩁᩥᩅᩩᨲᩴ ᩁᨳᩥᨿᩴ ᨣᨧ᩠ᨨᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨸᨬ᩠ᨧᨸᨲᩥᨭ᩠ᨮᩥᨲᩮᨶ ᩅᨶ᩠ᨴᩥᨲ᩠ᩅᩣ ᩈᩥᩁᩈᩥ ᩋᨬ᩠ᨩᩃᩥᩴ ᨠᨲ᩠ᩅᩣ ‘‘ᨿᩣᩅᨲᩣ ᩁᩪᨸᩥᨶᩮᩣ ᩈᨲ᩠ᨳᩣ’’ᨲᩥᩌᨴᩦᩉᩥ ᨨᩉᩥ ᨣᩣᨳᩣᩉᩥ ᩋᨽᩥᨲ᩠ᨳᩅᩥᨲ᩠ᩅᩣ ᨽᩣᨩᨶᩴ ᨸᩪᩁᩮᨲ᩠ᩅᩣ ᨾᨵᩩᩴ ᩏᨸᨶᩮᩈᩥ. ᩈᨲ᩠ᨳᩣ ᨲᩴ ᨸᨭᩥᨣ᩠ᨣᩉᩮᨲ᩠ᩅᩣ ᩋᨶᩩᨾᩮᩣᨴᨶᩴ ᩋᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᨠᩔᨸᨽᨣᩅᨲᩮᩣ ᨠᩣᩃᩮ ᨠᨭ᩠ᨮᩅᩣᩉᨶᩔ ᨶᩣᨾ ᩁᨬ᩠ᨬᩮᩣ ᩋᨾᨧ᩠ᨧᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩮᩣ ᨲᩮᨶ ᩈᨲ᩠ᨳᩩ ᩌᨶᨿᨶᨲ᩠ᨳᩣᨿ ¶ ᨸᩮᩈᩥᨲᩮᩣ ᩈᨲ᩠ᨳᩩ ᩈᨶ᩠ᨲᩥᨠᩴ ᨣᨶ᩠ᨲ᩠ᩅᩣ ᨵᨾ᩠ᨾᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᩅᩦᩈᨲᩥᩅᩔᩈᩉᩔᩣᨶᩥ ᩈᨾᨱᨵᨾ᩠ᨾᩴ ᨠᨲ᩠ᩅᩣ ᨲᨲᩮᩣ ᨧᩩᨲᩮᩣ ᩑᨠᩴ ᨻᩩᨴ᩠ᨵᨶ᩠ᨲᩁᩴ ᩈᩩᨣᨲᩦᩈᩩᨿᩮᩅ ᨸᩁᩥᩅᨲ᩠ᨲᩮᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᨾᩮᩣᨥᩁᩣᨩᩣᨲᩥ ᩃᨴ᩠ᨵᨶᩣᨾᩮᩣ ᨻᩣᩅᩁᩦᨿᨻᩕᩣᩉ᩠ᨾᨱᩔ ¶ ᩈᨶ᩠ᨲᩥᨠᩮ ᩏᨣ᩠ᨣᩉᩥᨲᩈᩥᨸ᩠ᨸᩮᩣ ᩈᩴᩅᩮᨣᨩᩣᨲᩮᩣ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᨲᩣᨸᩈᩈᩉᩔᨸᩁᩥᩅᩣᩁᩮᩣ ᩋᨩᩥᨲᩣᨴᩦᩉᩥ ᩈᨴ᩠ᨵᩥᩴ ᩈᨲ᩠ᨳᩩ ᩈᨶ᩠ᨲᩥᨠᩴ ᨸᩮᩈᩥᨲᩮᩣ ᨲᩮᩈᩴ ᨸᨶ᩠ᨶᩁᩈᨾᩮᩣ ᩉᩩᨲ᩠ᩅᩣ ᨸᨬ᩠ᩉᩴ ᨸᩩᨧ᩠ᨨᩥᨲ᩠ᩅᩣ ᩅᩥᩔᨩ᩠ᨩᨶᨸᩁᩥᨿᩮᩣᩈᩣᨶᩮ ᩋᩁᩉᨲ᩠ᨲᩴ ᨸᩣᨸᩩᨱᩥ. ᩋᩁᩉᨲ᩠ᨲᩴ ᨸᨶ ᨸᨲ᩠ᩅᩣ ᩈᨲ᩠ᨳᩃᩪᨡᩴ ᩈᩩᨲ᩠ᨲᩃᩪᨡᩴ ᩁᨩᨶᩃᩪᨡᨶ᩠ᨲᩥ ᩅᩥᩈᩮᩈᩮᨶ ᨲᩥᩅᩥᨵᩮᨶᨸᩥ ᩃᩪᨡᩮᨶ ᩈᨾᨶ᩠ᨶᩣᨣᨲᩴ ᨸᩴᩈᩩᨠᩪᩃᩴ ᨵᩣᩁᩮᩈᩥ. ᨲᩮᨶ ᨶᩴ ᩈᨲ᩠ᨳᩣ ᩃᩪᨡᨧᩦᩅᩁᨵᩁᩣᨶᩴ ᩋᨣ᩠ᨣᨭ᩠ᨮᩣᨶᩮ ᨮᨸᩮᩈᩥ.

᪖᪔. ᩑᩅᩴ ¶ ᩈᩮᩣ ᨸᨱᩥᨵᩣᨶᩣᨶᩩᩁᩪᨸᩮᨶ ᩋᩁᩉᨲ᩠ᨲᨹᩃᩴ ᨸᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᩈᨾ᩠ᨽᩣᩁᩴ ᨴᩥᩈ᩠ᩅᩣ ᨸᩩᨻ᩠ᨻᨠᨾ᩠ᨾᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩋᨲ᩠ᨳᨴᩔᩦ ᨲᩩ ᨽᨣᩅᩣᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩏᨲ᩠ᨲᩣᨶᨲ᩠ᨳᨾᩮᩅ.

᪗᪓. ᨸᩩᨭᨠᩴ ᨸᩪᩁᨿᩥᨲ᩠ᩅᩣᨶᩣᨲᩥ ᨸᩩᨭᨠᩴ ᩅᩩᨧ᩠ᨧᨲᩥ ᩅᩣᩁᨠᩴ, ᨥᨭᩴ ᩅᩣ. ᩋᨶᩮᩊᨠᩴ ᨶᩥᨴ᩠ᨴᩮᩣᩈᩴ ᨾᨠ᩠ᨡᩥᨠᨱ᩠ᨯᩅᩥᩁᩉᩥᨲᩴ ᨡᩩᨴ᩠ᨴᨾᨵᩩᨶᩣ ᨥᨭᩴ ᨸᩪᩁᩮᨲ᩠ᩅᩣ ᨲᩴ ᩏᨽᩮᩣᩉᩥ ᩉᨲ᩠ᨳᩮᩉᩥ ᨸᨣ᩠ᨣᨿ᩠ᩉ ᨸᨠᩣᩁᩮᨶ ᩌᨴᩁᩮᨶ ᨣᩉᩮᨲ᩠ᩅᩣ ᨾᩉᩮᩈᩥᨶᩮᩣ ᨽᨣᩅᨲᩮᩣ ᩏᨸᨶᩮᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨾᩮᩣᨥᩁᩣᨩᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᩋᨵᩥᨾᩩᨲ᩠ᨲᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᩥᨻ᩠ᨻᩩᨲᩮ ᩃᩮᩣᨠᨶᩣᨳᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩋᨵᩥᨾᩩᨲ᩠ᨲᨲ᩠ᨳᩮᩁᩔ ᩋᨸᨴᩣᨶᩴ (ᨳᩮᩁᨣᩣ. ᩋᨭ᩠ᨮ. ᪒.ᩋᨵᩥᨾᩩᨲ᩠ᨲᨲ᩠ᨳᩮᩁᨣᩣᨳᩣᩅᨱ᩠ᨱᨶᩣ). ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨲ᩠ᨳᨴᩔᩥᨾ᩠ᩉᩥ ᩃᩮᩣᨠᨶᩣᨳᩮ ᨸᩁᩥᨶᩥᨻ᩠ᨻᩩᨲᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᨽᩥᨠ᩠ᨡᩩᩈᨦ᩠ᨥᩴ ᨶᩥᨾᨶ᩠ᨲᩮᨲ᩠ᩅᩣ ᩏᨧ᩠ᨨᩪᩉᩥ ᨾᨱ᩠ᨯᨸᩴ ᨠᩣᩁᩮᨲ᩠ᩅᩣ ᨾᩉᩣᨴᩣᨶᩴ ᨸᩅᨲ᩠ᨲᩮᨲ᩠ᩅᩣ ᨸᩁᩥᨿᩮᩣᩈᩣᨶᩮ ᩈᨶ᩠ᨲᩥᨸᨴᩴ ᨸᨱᩥᨵᩮᩈᩥ. ᩈᩮᩣ ᨲᨲᩮᩣ ᨧᩩᨲᩮᩣ ᨴᩮᩅᩮᩈᩩ ᨧ ᨾᨶᩩᩔᩮᩈᩩ ᨧ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᩣᩈᨶᩮ ᨸᩈᩦᨴᩥᨲ᩠ᩅᩣ ᩈᨴ᩠ᨵᩣᨿ ᨸᨲᩥᨭ᩠ᨮᩥᨲᨲ᩠ᨲᩣ ᩋᨵᩥᨾᩩᨲ᩠ᨲᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪘᪔. ᩑᩅᩴ ¶ ᨠᨲᩈᨾ᩠ᨽᩣᩁᩅᩈᩮᨶ ᩋᩁᩉᨲ᩠ᨲᩴ ᨸᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨶᩥᨻ᩠ᨻᩩᨲᩮ ᩃᩮᩣᨠᨶᩣᨳᨾ᩠ᩉᩦᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩋᨵᩥᨾᩩᨲ᩠ᨲᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᩃᩈᩩᨱᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨠᩴ ¶ ᩌᨿᩈ᩠ᨾᨲᩮᩣ ᩃᩈᩩᨱᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩑᩈᩮᩣᨸᩣᨿᩈ᩠ᨾᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨥᩁᩣᩅᩣᩈᩮ ᩌᨴᩦᨶᩅᩴ ᨴᩥᩈ᩠ᩅᩣ ᨣᩮᩉᩴ ᨸᩉᩣᨿ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩉᩥᨾᩅᨶ᩠ᨲᩴ ᨶᩥᩔᩣᨿ ᩅᨶᩮ ᩅᩈᨶ᩠ᨲᩮᩣ ᨻᩉᩪᨶᩥ ᩃᩈᩩᨱᩣᨶᩥ ᩁᩮᩣᨸᩮᨲ᩠ᩅᩣ ᨲᨴᩮᩅ ᩅᨶᨾᩪᩃᨹᩃᨬ᩠ᨧ ᨡᩣᨴᨶ᩠ᨲᩮᩣ ᩅᩥᩉᩣᩈᩥ. ᩈᩮᩣ ᨻᩉᩪᨶᩥ ᩃᩈᩩᨱᩣᨶᩥ ᨠᩣᨩᩮᨶᩣᨴᩣᨿ ᨾᨶᩩᩔᨸᨳᩴ ᩌᩉᩁᩥᨲ᩠ᩅᩣ ᨸᩈᨶ᩠ᨶᩮᩣ ᨴᩣᨶᩴ ᨴᨲ᩠ᩅᩣ ᨻᩩᨴ᩠ᨵᨸ᩠ᨸᨾᩩᨡᩔ ᨽᩥᨠ᩠ᨡᩩᩈᨦ᩠ᨥᩔ ᨽᩮᩈᨩ᩠ᨩᨲ᩠ᨳᩣᨿ ᨴᨲ᩠ᩅᩣ ᨣᨧ᩠ᨨᨲᩥ. ᩑᩅᩴ ᩈᩮᩣ ᨿᩣᩅᨩᩦᩅᩴ ᨸᩩᨬ᩠ᨬᩣᨶᩥ ᨠᨲ᩠ᩅᩣ ᨲᩮᨶᩮᩅ ᨸᩩᨬ᩠ᨬᨻᩃᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᨠᨾᩮᨶ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩏᨸ᩠ᨸᨶ᩠ᨶᩮᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ¶ ᩅᨯ᩠ᨰᩮᨲ᩠ᩅᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᨲ᩠ᨲᩮᩣ ᨸᩩᨻ᩠ᨻᨠᨾ᩠ᨾᩅᩈᩮᨶ ᩃᩈᩩᨱᨴᩣᨿᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪘᪙. ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨾᩣᩉ. ᨲᨲ᩠ᨳ ᩉᩥᨾᩣᩃᨿᨸᨻ᩠ᨻᨲᩔ ᨸᩁᩥᨿᩮᩣᩈᩣᨶᩮ ᨾᨶᩩᩔᩣᨶᩴ ᩈᨬ᩠ᨧᩁᨱᨭ᩠ᨮᩣᨶᩮ ᨿᨴᩣ ᩅᩥᨸᩔᩦ ᨽᨣᩅᩣ ᩏᨴᨸᩣᨴᩥ, ᨲᨴᩣ ᩋᩉᩴ ᨲᩣᨸᩈᩮᩣ ᩋᩉᩮᩣᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᩃᩈᩩᨱᩴ ᩏᨸᨩᩦᩅᩣᨾᩦᨲᩥ ᩁᨲ᩠ᨲᩃᩈᩩᨱᩴ ᩁᩮᩣᨸᩮᨲ᩠ᩅᩣ ᨲᨴᩮᩅ ᨣᩮᩣᨧᩁᩴ ᨠᨲ᩠ᩅᩣ ᨩᩦᩅᩥᨠᩴ ᨠᨸ᩠ᨸᩮᨾᩦᨲᩥ ᩋᨲ᩠ᨳᩮᩣ. ᨲᩮᨶ ᩅᩩᨲ᩠ᨲᩴ ‘‘ᩃᩈᩩᨱᩴ ᨾᨿ᩠ᩉᨽᩮᩣᨩᨶ’’ᨶ᩠ᨲᩥ.

᪙᪐. ᨡᩣᩁᩥᨿᩮᩣ ᨸᩪᩁᨿᩥᨲ᩠ᩅᩣᨶᩣᨲᩥ ᨲᩣᨸᩈᨽᩣᨩᨶᩣᨶᩥ ᩃᩈᩩᨱᩮᨶ ᨸᩪᩁᨿᩥᨲ᩠ᩅᩣ ᨠᩣᨩᩮᨶᩣᨴᩣᨿ ᩈᨦ᩠ᨥᩣᩁᩣᨾᩴ ᩈᨦ᩠ᨥᩔ ᩅᩈᨶᨭ᩠ᨮᩣᨶᩴ ᩉᩮᨾᨶ᩠ᨲᩣᨴᩦᩈᩩ ᨲᩦᩈᩩ ᨠᩣᩃᩮᩈᩩ ᩈᨦ᩠ᨥᩔ ᨧᨲᩪᩉᩥ ᩍᩁᩥᨿᩣᨸᨳᩮᩉᩥ ᩅᩈᨶᩅᩥᩉᩣᩁᩴ ᩋᨣᨧ᩠ᨨᩥᩴ ᩋᨣᨾᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩉᨭ᩠ᨮᩮᩣ ᩉᨭ᩠ᨮᩮᨶ ᨧᩥᨲ᩠ᨲᩮᨶᩣᨲᩥ ᩋᩉᩴ ᩈᨶ᩠ᨲᩩᨭ᩠ᨮᩮᩣ ᩈᩮᩣᨾᨶᩔᨿᩩᨲ᩠ᨲᨧᩥᨲ᩠ᨲᩮᨶ ᩈᨦ᩠ᨥᩔ ᩃᩈᩩᨱᩴ ᩋᨴᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪙᪑. ᩅᩥᨸᩔᩥᩔ…ᨸᩮ… ¶ ᨶᩥᩁᨲᩔᩉᨶ᩠ᨲᩥ ᨶᩁᩣᨶᩴ ᩋᨣ᩠ᨣᩔ ᩈᩮᨭ᩠ᨮᩔ ᩋᩔ ᩅᩥᨸᩔᩥᩔ ᨽᨣᩅᨲᩮᩣ ᩈᩣᩈᨶᩮ ᨶᩥᩁᨲᩮᩣ ᨶᩥᩔᩮᩈᩮᨶ ᩁᨲᩮᩣ ᩋᩉᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᩈᨦ᩠ᨥᩔ…ᨸᩮ… ᨾᩮᩣᨴᩉᨶ᩠ᨲᩥ ᩋᩉᩴ ᩈᨦ᩠ᨥᩔ ᩃᩈᩩᨱᨴᩣᨶᩴ ᨴᨲ᩠ᩅᩣ ᩈᨣ᩠ᨣᨾ᩠ᩉᩥ ᩈᩩᨭ᩠ᨮᩩ ᩋᨣ᩠ᨣᩈ᩠ᨾᩥᩴ ᨴᩮᩅᩃᩮᩣᨠᩮ ᩌᨿᩩᨠᨸ᩠ᨸᩴ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᩋᨶᩩᨽᩅᨾᩣᨶᩮᩣ ᨾᩮᩣᨴᩥᩴ, ᩈᨶ᩠ᨲᩩᨭ᩠ᨮᩮᩣ ᨽᩅᩣᨾᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩃᩈᩩᨱᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᩌᨿᩣᨣᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᩥᨻ᩠ᨻᩩᨲᩮ ¶ ᩃᩮᩣᨠᨶᩣᨳᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩌᨿᩣᨣᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨡᩥᩔ ᨽᨣᩅᨲᩮᩣ ᨸᩁᩥᨶᩥᨻ᩠ᨻᩩᨲᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᩣᩈᨶᩮ ᨸᩈᨶ᩠ᨶᩮᩣ ᩅᨯ᩠ᨰᨠᩦᨶᩴ ᨾᩪᩃᩴ ᨴᨲ᩠ᩅᩣ ᩋᨲᩥᨾᨶᩮᩣᩉᩁᩴ ᨴᩦᨥᩴ ᨽᩮᩣᨩᨶᩈᩣᩃᩴ ᨠᩣᩁᩣᨸᩮᨲ᩠ᩅᩣ ᨽᩥᨠ᩠ᨡᩩᩈᨦ᩠ᨥᩴ ᨶᩥᨾᨶ᩠ᨲᩮᨲ᩠ᩅᩣ ᨸᨱᩦᨲᩮᨶᩣᩉᩣᩁᩮᨶ ᨽᩮᩣᨩᩮᨲ᩠ᩅᩣ ᨾᩉᩣᨴᩣᨶᩴ ᨴᨲ᩠ᩅᩣ ᨧᩥᨲ᩠ᨲᩴ ᨸᩈᩣᨴᩮᩈᩥ. ᩈᩮᩣ ᨿᩣᩅᨲᩣᨿᩩᨠᩴ ᨸᩩᨬ᩠ᨬᩣᨶᩥ ᨠᨲ᩠ᩅᩣ ᨴᩮᩅᨾᨶᩩᩔᩮᩈᩩᨿᩮᩅ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᨥᨭᩮᨶ᩠ᨲᩮᩣ ᩅᩣᨿᨾᨶ᩠ᨲᩮᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨶ ᨧᩥᩁᩔᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ. ᨸᩩᨻ᩠ᨻᩮ ᨠᨲᨸᩩᨬ᩠ᨬᩅᩈᩮᨶ ᩌᨿᩣᨣᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪙᪔. ᩑᩅᩴ ᩈᩮᩣ ᨠᨲᨸᩩᨬ᩠ᨬᩈᨾ᩠ᨽᩣᩁᩅᩈᩮᨶ ᩋᩁᩉᨲ᩠ᨲᩴ ᨸᨲ᩠ᩅᩣ ᩋᨲ᩠ᨲᨶᩣ ᨸᩩᨻ᩠ᨻᩮ ᨠᨲᨠᩩᩈᩃᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨶᩥᨻ᩠ᨻᩩᨲᩮ ᩃᩮᩣᨠᨶᩣᨳᨾ᩠ᩉᩦᨲᩥᩌᨴᩥᨾᩣᩉ. ᨲᨲ᩠ᨳ ᨶᩥᨻ᩠ᨻᩩᨲᩮᨲᩥ ᩅᨴᨲᩴ ‘‘ᨾᨿᩴ ᨻᩩᨴ᩠ᨵᩣ’’ᨲᩥ ᩅᨴᨶ᩠ᨲᩣᨶᩴ ᩋᨶ᩠ᨲᩁᩮ ᩅᩁᩮ ¶ ᩏᨲ᩠ᨲᨾᩮ ᩈᩥᨡᩥᨾ᩠ᩉᩥ ᨽᨣᩅᨲᩥ ᨸᩁᩥᨶᩥᨻ᩠ᨻᩩᨲᩮᨲᩥ ᩋᨲ᩠ᨳᩮᩣ. ᩉᨭ᩠ᨮᩮᩣ ᩉᨭ᩠ᨮᩮᨶ ᨧᩥᨲ᩠ᨲᩮᨶᩣᨲᩥ ᩈᨴ᩠ᨵᨲᩣᨿ ᩉᨭ᩠ᨮᨸᩉᨭ᩠ᨮᩮᩣ ᩈᩮᩣᨾᨶᩔᨿᩩᨲ᩠ᨲᨧᩥᨲ᩠ᨲᨲᩣᨿ ᨸᩉᨭ᩠ᨮᩮᨶ ᨧᩥᨲ᩠ᨲᩮᨶ ᩏᨲ᩠ᨲᨾᩴ ᨳᩪᨸᩴ ᩈᩮᨭ᩠ᨮᩴ ᨧᩮᨲᩥᨿᩴ ᩋᩅᨶ᩠ᨴᩥᩴ ᨸᨱᩣᨾᨿᩥᨶ᩠ᨲᩥ ᩋᨲ᩠ᨳᩮᩣ.

᪙᪕. ᩅᨯ᩠ᨰᨠᩦᩉᩥ ᨠᨳᩣᨸᩮᨲ᩠ᩅᩣᨲᩥ ‘‘ᨽᩮᩣᨩᨶᩈᩣᩃᩣᨿ ᨸᨾᩣᨱᩴ ᨠᩥᨲ᩠ᨲᨠ’’ᨶ᩠ᨲᩥ ᨸᨾᩣᨱᩴ ᨠᨳᩣᨸᩮᨲ᩠ᩅᩣᨲᩥ ᩋᨲ᩠ᨳᩮᩣ. ᨾᩪᩃᩴ ᨴᨲ᩠ᩅᩣᨶᩉᩴ ᨲᨴᩣᨲᩥ ᨲᨴᩣ ᨲᩈ᩠ᨾᩥᩴ ᨠᩣᩃᩮ ᩋᩉᩴ ᨠᨾ᩠ᨾᨠᩁᨱᨲ᩠ᨳᩣᨿ ᨲᩮᩈᩴ ᩅᨯ᩠ᨰᨠᩦᨶᩴ ᨾᩪᩃᩴ ᨴᨲ᩠ᩅᩣ ᩌᨿᩣᨣᩴ ¶ ᩌᨿᨲᩴ ᨴᩦᨥᩴ ᨽᩮᩣᨩᨶᩈᩣᩃᩴ ᩋᩉᩴ ᩈᨶ᩠ᨲᩩᨭ᩠ᨮᩮᩣ ᩈᩮᩣᨾᨶᩔᨧᩥᨲ᩠ᨲᩮᨶ ᨠᩣᩁᨸᩮᩈᩉᩴ ᨠᩣᩁᩣᨸᩮᩈᩥᩴ ᩋᩉᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

᪙᪗. ᩌᨿᩣᨣᩔ ᩍᨴᩴ ᨹᩃᨶ᩠ᨲᩥ ᨽᩮᩣᨩᨶᩈᩣᩃᨴᩣᨶᩔ ᩍᨴᩴ ᩅᩥᨸᩣᨠᨶ᩠ᨲᩥ ᩋᨲ᩠ᨳᩮᩣ.

ᩌᨿᩣᨣᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᨵᨾ᩠ᨾᨧᨠ᩠ᨠᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨵᨾ᩠ᨾᨧᨠ᩠ᨠᩥᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ¶ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨸᩩᨲ᩠ᨲᨴᩣᩁᩮᩉᩥ ᩅᨯ᩠ᨰᩥᨲᩮᩣ ᩅᩥᨽᩅᩈᨾ᩠ᨸᨶ᩠ᨶᩮᩣ ᨾᩉᩣᨽᩮᩣᨣᩮᩣ, ᩈᩮᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᩈᨴ᩠ᨵᩣᨩᩣᨲᩮᩣ ᨵᨾ᩠ᨾᩈᨽᩣᨿᩴ ᨵᨾ᩠ᨾᩣᩈᨶᩔ ᨸᩥᨭ᩠ᨮᩥᨲᩮᩣ ᩁᨲᨶᨾᨿᩴ ᨵᨾ᩠ᨾᨧᨠ᩠ᨠᩴ ᨠᩣᩁᩮᨲ᩠ᩅᩣ ᨸᩪᨩᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᨾᨶᩩᩔᩮᩈᩩ ᨶᩥᨻ᩠ᨻᨲ᩠ᨲᨭ᩠ᨮᩣᨶᩮᩈᩩ ᩈᨠ᩠ᨠᩈᨾ᩠ᨸᨲ᩠ᨲᩥᩴ ᨧᨠ᩠ᨠᩅᨲ᩠ᨲᩥᩈᨾ᩠ᨸᨲ᩠ᨲᩥᨬ᩠ᨧ ᩋᨶᩩᨽᩅᩥᨲ᩠ᩅᩣ ᨠᨾᩮᨶ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᩏᨸ᩠ᨸᨶ᩠ᨶᩮᩣ ᩅᩥᨽᩅᩈᨾ᩠ᨸᨶ᩠ᨶᩮᩣ ᩈᨬ᩠ᨩᩣᨲᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᨲ᩠ᩅᩣ ᨸᩩᨻ᩠ᨻᩮ ᨠᨲᨠᩩᩈᩃᨶᩣᨾᩈᨴᩥᩈᨶᩣᨾᩮᨶ ᨵᨾ᩠ᨾᨧᨠ᩠ᨠᩥᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ ᨩᩣᨲᩮᩣ ᩋᩉᩮᩣᩈᩥ.

᪑᪐᪒. ᩈᩮᩣ ᨸᩩᨬ᩠ᨬᩈᨾ᩠ᨽᩣᩁᩣᨶᩩᩁᩪᨸᩮᨶ ᨸᨲ᩠ᨲᩋᩁᩉᨲ᩠ᨲᨹᩃᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᨩᩣᨲᩈᩮᩣᨾᨶᩔᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣᨲᩥᩌᨴᩥᨾᩣᩉ. ᩈᩦᩉᩣᩈᨶᩔ ᩈᨾ᩠ᨾᩩᨡᩣᨲᩥ ᩈᩦᩉᩔ ᨽᨣᩅᨲᩮᩣ ᨶᩥᩈᩥᨶ᩠ᨶᩔ ᩈᨾ᩠ᨾᩩᨡᩣ ᨻᩩᨴ᩠ᨵᩣᩈᨶᩔ ᩋᨽᩥᨾᩩᨡᨭ᩠ᨮᩣᨶᩮᨲᩥ ᩋᨲ᩠ᨳᩮᩣ, ᨵᨾ᩠ᨾᨧᨠ᩠ᨠᩴ ᨾᩮ ᨮᨸᩥᨲᨶ᩠ᨲᩥ ᨾᨿᩣ ᨵᨾ᩠ᨾᨧᨠ᩠ᨠᩣᨠᩣᩁᩮᨶ ᩏᨽᨲᩮᩣ ᩈᩦᩉᩁᩪᨸᩴ ᨴᩔᩮᨲ᩠ᩅᩣ ᨾᨩ᩠ᨫᩮ ᩌᨴᩣᩈᩈᨴᩥᩈᩴ ᨠᩣᩁᩮᨲ᩠ᩅᩣ ᨠᨲᩴ ᨵᨾ᩠ᨾᨧᨠ᩠ᨠᩴ ᨮᨸᩥᨲᩴ ᨸᩪᨩᩥᨲᩴ. ᨠᩥᩴ ᨽᩪᨲᩴ? ᩅᩥᨬ᩠ᨬᩪᩉᩥ ᨾᩮᨵᩣᩅᩦᩉᩥ ‘‘ᩋᨲᩦᩅ ᩈᩩᨶ᩠ᨴᩁ’’ᨶ᩠ᨲᩥ ᩅᨱ᩠ᨱᩥᨲᩴ ᨳᩮᩣᨾᩥᨲᩴ ᩈᩩᨠᨲᩴ ᨵᨾ᩠ᨾᨧᨠ᩠ᨠᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

᪑᪐᪓. ᨧᩣᩁᩩᩅᨱ᩠ᨱᩮᩣᩅ ¶ ᩈᩮᩣᨽᩣᨾᩦᨲᩥ ᩈᩩᩅᨱ᩠ᨱᩅᨱ᩠ᨱᩮᩣ ᩍᩅ ᩈᩮᩣᨽᩣᨾᩥ ᩅᩥᩁᩮᩣᨧᩣᨾᩦᨲᩥ ¶ ᩋᨲ᩠ᨳᩮᩣ. ‘‘ᨧᨲᩩᩅᨱ᩠ᨱᩮᩉᩥ ᩈᩮᩣᨽᩣᨾᩦ’’ᨲᩥᨸᩥ ᨸᩣᨮᩮᩣ, ᨲᩔ ᨡᨲ᩠ᨲᩥᨿᨻᩕᩣᩉ᩠ᨾᨱᩅᩮᩔᩈᩩᨴ᩠ᨴᨩᩣᨲᩥᩈᨦ᩠ᨡᩣᨲᩮᩉᩥ ᨧᨲᩪᩉᩥ ᩅᨱ᩠ᨱᩮᩉᩥ ᩈᩮᩣᨽᩣᨾᩥ ᩅᩥᩁᩮᩣᨧᩣᨾᩦᨲᩥ ᩋᨲ᩠ᨳᩮᩣ. ᩈᨿᩮᩣᨣ᩠ᨣᨻᩃᩅᩣᩉᨶᩮᩣᨲᩥ ᩈᩩᩅᨱ᩠ᨱᩈᩥᩅᩥᨠᩣᨴᩦᩉᩥ ᨿᩮᩣᨣ᩠ᨣᩮᩉᩥ ᨧ ᩈᩮᨶᩣᨸᨲᩥᨾᩉᩣᨾᨲ᩠ᨲᩣᨴᩦᩉᩥ ᩈᩮᩅᨠᩮᩉᩥ ᨻᩃᩮᩉᩥ ᨧ ᩉᨲ᩠ᨳᩥᩋᩔᩁᨳᩈᨦ᩠ᨡᩣᨲᩮᩉᩥ ᩅᩣᩉᨶᩮᩉᩥ ᨧ ᩈᩉᩥᨲᩮᩣᨲᩥ ᩋᨲ᩠ᨳᩮᩣ. ᨻᩉᩩᨩ᩠ᨩᨶᩣ ᨻᩉᩅᩮᩣ ᨾᨶᩩᩔᩣ ᩋᨶᩩᨿᨶ᩠ᨲᩣ ᨾᨾᩣᨶᩩᩅᨲ᩠ᨲᨶ᩠ᨲᩣ ᨶᩥᨧ᩠ᨧᩴ ᨶᩥᨧ᩠ᨧᨠᩣᩃᩴ ᨸᩁᩥᩅᩣᩁᩮᨶ᩠ᨲᩦᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨵᨾ᩠ᨾᨧᨠ᩠ᨠᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᨠᨸ᩠ᨸᩁᩩᨠ᩠ᨡᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨠᨸ᩠ᨸᩁᩩᨠ᩠ᨡᩥᨿᨲ᩠ᨳᩮᩁᩔ ᩋᨸᨴᩣᨶᩴ (ᨳᩮᩁᨣᩣ. ᩋᨭ᩠ᨮ. ᪒.᪕᪗᪖). ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᩮᩈᩩ ᨲᩮᩈᩩ ᨽᩅᩮᩈᩩ ᨶᩥᨻ᩠ᨻᩣᨶᩣᨵᩥᨣᨾᩪᨸᩣᨿᨽᩪᨲᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᨾᩉᨴ᩠ᨵᨶᩮᩣ ᨾᩉᩣᨽᩮᩣᨣᩮᩣ ¶ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᩈᨲ᩠ᨲᩉᩥ ᩁᨲᨶᩮᩉᩥ ᩅᩥᨧᩥᨲ᩠ᨲᩴ ᩈᩩᩅᨱ᩠ᨱᨾᨿᩴ ᨠᨸ᩠ᨸᩁᩩᨠ᩠ᨡᩴ ᨠᩣᩁᩮᨲ᩠ᩅᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨧᩮᨲᩥᨿᩔ ᩈᨾ᩠ᨾᩩᨡᩮ ᨮᨸᩮᨲ᩠ᩅᩣ ᨸᩪᨩᩮᩈᩥ. ᩈᩮᩣ ᩑᩅᩁᩪᨸᩴ ᨸᩩᨬ᩠ᨬᩴ ᨠᨲ᩠ᩅᩣ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᨲᨲᩮᩣ ᨧᩩᨲᩮᩣ ᩈᩩᨣᨲᩦᩈᩩᨿᩮᩅ ᩈᩴᩈᩁᨶ᩠ᨲᩮᩣ ᨠᨾᩮᨶ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᨵᨾ᩠ᨾᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᩈᨲ᩠ᨳᩩ ᩌᩁᩣᨵᩮᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᨲ᩠ᩅᩣ ᨸᩩᨻ᩠ᨻᩮ ᨠᨲᨠᩩᩈᩃᨶᩣᨾᩮᨶ ᨠᨸ᩠ᨸᩁᩩᨠ᩠ᨡᩥᨿᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ ᩋᩉᩮᩣᩈᩥ.

᪑᪐᪘. ᩈᩮᩣ ᩑᩅᩴ ᨸᨲ᩠ᨲᩋᩁᩉᨲ᩠ᨲᨹᩃᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᩅᩈᩮᨶ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣᨲᩥᩌᨴᩥᨾᩣᩉ. ᨳᩪᨸᩈᩮᨭ᩠ᨮᩔ ᩈᨾ᩠ᨾᩩᨡᩣᨲᩥ ᩈᩮᨭ᩠ᨮᩔ ᩏᨲ᩠ᨲᨾᩔ ᨵᩣᨲᩩᨶᩥᩉᩥᨲᨳᩪᨸᩔ ᨧᩮᨲᩥᨿᩔ ᩈᨾ᩠ᨾᩩᨡᨭ᩠ᨮᩣᨶᩮ ᩅᩥᨧᩥᨲ᩠ᨲᨴᩩᩔᩮ ᩋᨶᩮᨠᩅᨱ᩠ᨱᩮᩉᩥ ᩅᩥᩈᨾᩮᨶ ᩅᩥᩈᨴᩥᩈᩮᨶ ᨧᩥᨲ᩠ᨲᩮᨶ ᨾᨶᩮᩣᩉᩁᩮ ᨧᩥᨶᨸᨭ᩠ᨭᩈᩮᩣᨾᩣᩁᨸᨭ᩠ᨭᩣᨴᩥᨠᩮ ᨴᩩᩔᩮ ¶ . ᩃᨣᩮᨲ᩠ᩅᩣ ᩒᩃᨣ᩠ᨣᩮᨲ᩠ᩅᩣ ᨠᨸ᩠ᨸᩁᩩᨠ᩠ᨡᩴ ᨮᨸᩮᩈᩥᩴ ᩋᩉᩴ ᨸᨲᩥᨭ᩠ᨮᨸᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨠᨸ᩠ᨸᩁᩩᨠ᩠ᨡᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᨧᨲᩩᨲ᩠ᨳᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᩏᨸᩣᩃᩥᩅᨣ᩠ᨣᩮᩣ

᪑. ᨽᩣᨣᩥᨶᩮᨿ᩠ᨿᩩᨸᩣᩃᩥᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨡᩦᨱᩣᩈᩅᩈᩉᩔᩮᩉᩦᨲᩥᩌᨴᩥᨠᩴ ¶ ᩌᨿᩈ᩠ᨾᨲᩮᩣ ᩏᨸᩣᩃᩥᨲ᩠ᨳᩮᩁᩔ ᨽᩣᨣᩥᨶᩮᨿ᩠ᨿᩩᨸᩣᩃᩥᨲ᩠ᨳᩮᩁᩔ ᩋᨸᨴᩣᨶᩴ. ᩑᩈᩮᩣ ᩉᩥ ᨳᩮᩁᩮᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ¶ ᨲᩈ᩠ᨾᩥᩴ ᨲᩈ᩠ᨾᩥᩴ ᨽᩅᩮ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨥᩁᩣᩅᩣᩈᩮ ᩌᨴᩦᨶᩅᩴ ᨴᩥᩈ᩠ᩅᩣ ᨣᩮᩉᩴ ᨸᩉᩣᨿ ᩍᩈᩥᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᨸᨬ᩠ᨧᩣᨽᩥᨬ᩠ᨬᩣᩋᨭ᩠ᨮᩈᨾᩣᨸᨲ᩠ᨲᩥᩃᩣᨽᩦ ᩉᩩᨲ᩠ᩅᩣ ᩉᩥᨾᩅᨶ᩠ᨲᩮ ᩅᩣᩈᩴ ᨠᨸ᩠ᨸᩮᩈᩥ. ᨲᩈ᩠ᨾᩥᩴ ᩈᨾᨿᩮ ᨸᨴᩩᨾᩩᨲ᩠ᨲᩁᩮᩣ ᨽᨣᩅᩣ ᩅᩥᩅᩮᨠᨠᩣᨾᩮᩣ ᩉᩥᨾᩅᨶ᩠ᨲᩴ ᨸᩣᩅᩥᩈᩥ. ᨲᩣᨸᩈᩮᩣ ᨽᨣᩅᨶ᩠ᨲᩴ ᨸᩩᨱ᩠ᨱᨧᨶ᩠ᨴᨾᩥᩅ ᩅᩥᩁᩮᩣᨧᨾᩣᨶᩴ ᨴᩪᩁᨲᩮᩣᩅ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩋᨩᩥᨶᨧᨾ᩠ᨾᩴ ᩋᩴᩈᩮ ᨠᨲ᩠ᩅᩣ ᩋᨬ᩠ᨩᩃᩥᩴ ᨸᨣ᩠ᨣᨿ᩠ᩉ ᩅᨶ᩠ᨴᩥᨲ᩠ᩅᩣ ᨮᩥᨲᨠᩮᩣᩅ ᨴᩈᨶᨡᩈᨾᩮᩣᨵᩣᨶᨬ᩠ᨩᩃᩥᩴ ᩈᩥᩁᩈᩥ ᨸᨲᩥᨭ᩠ᨮᨸᩮᨲ᩠ᩅᩣ ᩋᨶᩮᨠᩣᩉᩥ ᩏᨸᨾᩣᩉᩥ ᩋᨶᩮᨠᩮᩉᩥ ᨳᩩᨲᩥᩅᨧᨶᩮᩉᩥ ᨽᨣᩅᨶ᩠ᨲᩴ ᨳᩮᩣᨾᩮᩈᩥ. ᨲᩴ ᩈᩩᨲ᩠ᩅᩣ ᨽᨣᩅᩣ – ‘‘ᩋᨿᩴ ᨲᩣᨸᩈᩮᩣ ᩋᨶᩣᨣᨲᩮ ᨣᩮᩣᨲᨾᩔ ᨶᩣᨾ ᨽᨣᩅᨲᩮᩣ ᩈᩣᩈᨶᩮ ᨸᨻ᩠ᨻᨩᩥᨲ᩠ᩅᩣ ᩅᩥᨶᨿᩮ ᨲᩥᨡᩥᨱᨸᨬ᩠ᨬᩣᨶᩴ ᩋᨣ᩠ᨣᩮᩣ ᨽᩅᩥᩔᨲᩦ’’ᨲᩥ ᨻ᩠ᨿᩣᨠᩁᨱᨾᨴᩣᩈᩥ. ᩈᩮᩣ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᩋᨸᩁᩥᩉᩦᨶᨩ᩠ᨫᩣᨶᩮᩣ ᨻᩕᩉ᩠ᨾᩃᩮᩣᨠᩮ ᨶᩥᨻ᩠ᨻᨲ᩠ᨲᩥ. ᨲᨲᩮᩣ ᨧᩩᨲᩮᩣ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᨸᩥᩃᩅᨲ᩠ᨳᩩᨶᨣᩁᩮ ᩏᨸᩣᩃᩥᨲ᩠ᨳᩮᩁᩔ ᨽᩣᨣᩥᨶᩮᨿ᩠ᨿᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩥ. ᩈᩮᩣ ᨠᨾᩮᨶ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨾᩣᨲᩩᩃᩔ ᩏᨸᩣᩃᩥᨲ᩠ᨳᩮᩁᩈ ᩈᨶ᩠ᨲᩥᨠᩮ ᨸᨻ᩠ᨻᨩᩥᨲ᩠ᩅᩣ ᨠᨾ᩠ᨾᨭ᩠ᨮᩣᨶᩴ ᨣᩉᩮᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ. ᩈᩮᩣ ᩋᨲ᩠ᨲᨶᩮᩣ ᩌᨧᩁᩥᨿᩔ ᩈᨾᩦᨸᩮ ᩅᩈᩥᨲᨲ᩠ᨲᩣ ᩅᩥᨶᨿᨸᨬ᩠ᩉᩮ ᨲᩥᨡᩥᨱᨬᩣᨱᩮᩣ ᩋᩉᩮᩣᩈᩥ. ᩋᨳ ᨽᨣᩅᩣ ‘‘ᩑᨲᨴᨣ᩠ᨣᩴ, ᨽᩥᨠ᩠ᨡᩅᩮ, ᨾᨾ ᩈᩣᩅᨠᩣᨶᩴ ᨽᩥᨠ᩠ᨡᩪᨶᩴ ᩅᩥᨶᨿᨸᨬ᩠ᩉᩮ ᨲᩥᨡᩥᨱᨸᨬ᩠ᨬᩣᨶᩴ ᨽᩥᨠ᩠ᨡᩪᨶᩴ ᨿᨴᩥᨴᩴ ᨽᩣᨣᩥᨶᩮᨿ᩠ᨿᩩᨸᩣᩃᩦ’’ᨲᩥ ᨲᩴ ᩑᨲᨴᨣ᩠ᨣᨭ᩠ᨮᩣᨶᩮ ᨮᨸᩮᩈᩥ.

᪑. ᩈᩮᩣ ¶ ᩑᩅᩴ ᩑᨲᨴᨣ᩠ᨣᨭ᩠ᨮᩣᨶᩴ ᨸᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨡᩦᨱᩣᩈᩅᩈᩉᩔᩮᩉᩦᨲᩥᩌᨴᩥᨾᩣᩉ. ᨲᨲ᩠ᨳ ᩌ ᩈᨾᨶ᩠ᨲᨲᩮᩣ ᨿᩣᩅᨽᩅᨣ᩠ᨣᩣ ᩈᩅᨶ᩠ᨲᩥ ᨸᩅᨲ᩠ᨲᨶ᩠ᨲᩦᨲᩥ ᩌᩈᩅᩣ. ᨠᩣᨾᩣᩈᩅᩣᨴᨿᩮᩣ ᨧᨲ᩠ᨲᩣᩁᩮᩣ ᩌᩈᩅᩣ, ᨲᩮ ᨡᩦᨱᩣ ᩈᩮᩣᩈᩥᨲᩣ ᩅᩥᩈᩮᩣᩈᩥᨲᩣ ᩅᩥᨴ᩠ᨵᩴᩈᩥᨲᩣ ᨿᩮᩉᩥ ᨲᩮᨲᩥ ᨡᩦᨱᩣᩈᩅᩣ, ᨲᩮᨿᩮᩅ ᩈᩉᩔᩣ ᨡᩦᨱᩣᩈᩅᩈᩉᩔᩣ, ᨲᩮᩉᩥ ᨡᩦᨱᩣᩈᩅᩈᩉᩔᩮᩉᩥ ¶ . ᨸᩁᩮᨲᩮᩣ ᨸᩁᩥᩅᩩᨲᩮᩣ ᩃᩮᩣᨠᨶᩣᨿᨠᩮᩣ ᩃᩮᩣᨠᩔ ᨶᩥᨻ᩠ᨻᩣᨶᨸᩣᨸᨶᨠᩮᩣ ᩅᩥᩅᩮᨠᩴ ᩋᨶᩩᨿᩩᨲ᩠ᨲᩮᩣ ᨸᨭᩥᩈᩃ᩠ᩃᩥᨲᩩᩴ ᩑᨠᩦᨽᩅᩥᨲᩩᩴ ᨣᨧ᩠ᨨᨲᩮᨲᩥ ᩈᨾ᩠ᨻᨶ᩠ᨵᩮᩣ.

᪒. ᩋᨩᩥᨶᩮᨶ ᨶᩥᩅᨲ᩠ᨳᩮᩣᩉᨶ᩠ᨲᩥ ᩋᩉᩴ ᩋᨩᩥᨶᨾᩥᨣᨧᨾ᩠ᨾᩮᨶ ᨸᨭᩥᨧ᩠ᨨᨶ᩠ᨶᩮᩣ, ᩋᨩᩥᨶᨧᨾ᩠ᨾᩅᩈᨶᩮᩣᨲᩥ ᩋᨲ᩠ᨳᩮᩣ. ᨲᩥᨴᨱ᩠ᨯᨸᩁᩥᨵᩣᩁᨠᩮᩣᨲᩥ ᨠᩩᨱ᩠ᨯᩥᨠᨭ᩠ᨮᨸᨶᨲ᩠ᨳᩣᨿ ᨲᩥᨴᨱ᩠ᨯᩴ ᨣᩉᩮᨲ᩠ᩅᩣ ᨵᩣᩁᩮᨶ᩠ᨲᩮᩣᨲᩥ ᩋᨲ᩠ᨳᩮᩣ. ᨽᩥᨠ᩠ᨡᩩᩈᨦ᩠ᨥᩮᨶ ᨸᩁᩥᨻ᩠ᨿᩪᩊ᩠ᩉᩴ ᨸᩁᩥᩅᩣᩁᩥᨲᩴ ᩃᩮᩣᨠᨶᩣᨿᨠᩴ ᩋᨴ᩠ᨴᩈᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᨸᩣᨠᨭᨾᩮᩅᩣᨲᩥ.

ᨽᩣᨣᩥᨶᩮᨿ᩠ᨿᩩᨸᩣᩃᩥᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᩈᩮᩣᨱᨠᩮᩣᩊᩥᩅᩥᩈᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩋᨶᩮᩣᨾᨴᩔᩥᩔ ¶ ᨾᩩᨶᩥᨶᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨠᩮᩣᩊᩥᩅᩥᩈᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨶᩮᩣᨾᨴᩔᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᨿᨸ᩠ᨸᨲ᩠ᨲᩮᩣ ᨸᩩᨲ᩠ᨲᨴᩣᩁᩮᩉᩥ ᩅᨯ᩠ᨰᩥᨲᩮᩣ ᩅᩥᨽᩅᩈᨾ᩠ᨸᨶ᩠ᨶᩮᩣ ᨽᨣᩅᨲᩮᩣ ᨧᨦ᩠ᨠᨾᨶᨲ᩠ᨳᩣᨿ ᩈᩮᩣᨽᨶᩴ ᨧᨦ᩠ᨠᨾᩴ ᨠᩣᩁᩮᨲ᩠ᩅᩣ ᩈᩩᨵᩣᨸᩁᩥᨠᨾ᩠ᨾᩴ ᨠᩣᩁᩮᨲ᩠ᩅᩣ ᩌᨴᩣᩈᨲᩃᨾᩥᩅ ᩈᨾᩴ ᩅᩥᨩ᩠ᨩᩮᩣᨲᨾᩣᨶᩴ ᨠᨲ᩠ᩅᩣ ᨴᩦᨸᨵᩪᨸᨸᩩᨸ᩠ᨹᩣᨴᩦᩉᩥ ᩈᨩ᩠ᨩᩮᨲ᩠ᩅᩣ ᨽᨣᩅᨲᩮᩣ ᨶᩥᨿ᩠ᨿᩣᨴᩮᨲ᩠ᩅᩣ ᨻᩩᨴ᩠ᨵᨸ᩠ᨸᨾᩩᨡᩴ ᨽᩥᨠ᩠ᨡᩩᩈᨦ᩠ᨥᩴ ᨸᨱᩦᨲᩮᨶᩣᩉᩣᩁᩮᨶ ᨸᩪᨩᩮᩈᩥ. ᩈᩮᩣ ᩑᩅᩴ ᨿᩣᩅᨩᩦᩅᩴ ᨸᩩᨬ᩠ᨬᩣᨶᩥ ᨠᨲ᩠ᩅᩣ ᨲᨲᩮᩣ ᨧᩅᩥᨲ᩠ᩅᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ. ᨲᨲ᩠ᨳ ᨸᩣᩊᩥᨿᩣ ᩅᩩᨲ᩠ᨲᨶᨿᩮᨶ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩋᨶ᩠ᨲᩁᩣ ᩒᨠ᩠ᨠᩣᨠᨠᩩᩃᨸ᩠ᨸᩈᩩᨲᩮᩣᨲᩥ ᨲᩴ ᩈᨻ᩠ᨻᩴ ᨸᩣᩊᩥᨿᩣ ᩅᩩᨲ᩠ᨲᩣᨶᩩᩈᩣᩁᩮᨶ ᩅᩮᨴᩥᨲᨻ᩠ᨻᩴ. ᨸᨧ᩠ᨨᩥᨾᨽᩅᩮ ᨸᨶ ᨠᩮᩣᩃᩥᨿᩁᩣᨩᩅᩴᩈᩮ ᨩᩣᨲᩮᩣ ᩅᨿᨸ᩠ᨸᨲ᩠ᨲᩮᩣ ᨠᩮᩣᨭᩥᩋᨣ᩠ᨥᨶᨠᩔ ᨠᨱ᩠ᨱᨸᩥᩊᨶ᩠ᨵᨶᩔ ᨵᩣᩁᩥᨲᨲ᩠ᨲᩣ ᨠᩮᩣᨭᩥᨠᨱ᩠ᨱᩮᩣᨲᩥ, ᨠᩩᨭᩥᨠᨱ᩠ᨱᩮᩣᨲᩥ ᨧ ᨸᩣᨠᨭᩮᩣ ᩋᩉᩮᩣᩈᩥ. ᩈᩮᩣ ᨽᨣᩅᨲᩥ ᨸᩈᨶ᩠ᨶᩮᩣ ¶ ᨵᨾ᩠ᨾᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪒᪕. ᩈᩮᩣ ᩋᩁᩉᩣ ᩉᩩᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩋᨶᩮᩣᨾᨴᩔᩥᩔ ᨾᩩᨶᩥᨶᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᩋᨶᩮᩣᨾᨴᩔᩥᩔᩣᨲᩥ ᩋᨶᩮᩣᨾᩴ ᩋᩃᩣᨾᨠᩴ ᩈᩩᨶ᩠ᨴᩁᩴ ᨴᩔᨶᩴ ᨴ᩠ᩅᨲ᩠ᨲᩥᩴᩈᨾᩉᩣᨸᩩᩁᩥᩈᩃᨠ᩠ᨡᨱᨸᨭᩥᨾᨱ᩠ᨯᩥᨲᨲ᩠ᨲᩣ ᨻ᩠ᨿᩣᨾᨸ᩠ᨸᨽᩣᨾᨱ᩠ᨯᩃᩮᩣᨸᩈᩮᩣᨽᩥᨲᨲ᩠ᨲᩣ ᩌᩁᩮᩣᩉᨸᩁᩥᨱᩣᩉᩮᨶ ᩈᨾᨶ᩠ᨶᩣᨣᨲᨲ᩠ᨲᩣ ᨧ ᨴᩔᨶᩦᨿᩴ ᩈᩁᩦᩁᩴ ᨿᩔ ᨽᨣᩅᨲᩮᩣ ᩈᩮᩣ ᩋᨶᩮᩣᨾᨴᩔᩦ, ᨲᩔ ᩋᨶᩮᩣᨾᨴᩔᩥᩔ ᨾᩩᨶᩥᨶᩮᩣᨲᩥ ᩋᨲ᩠ᨳᩮᩣ. ᨲᩣᨴᩥᨶᩮᩣᨲᩥ ᩍᨭ᩠ᨮᩣᨶᩥᨭ᩠ᨮᩮᩈᩩ ᩋᨠᨾ᩠ᨸᩥᨿᩈᨽᩣᩅᩔ. ᩈᩩᨵᩣᨿ ᩃᩮᨸᨶᩴ ᨠᨲ᩠ᩅᩣᨲᩥ ¶ ᩈᩩᨵᩣᨿ ᩋᩅᩃᩥᨲ᩠ᨲᩴ ᨠᨲ᩠ᩅᩣ ᨴᩦᨸᨵᩪᨸᨸᩩᨸ᩠ᨹᨵᨩᨸᨭᩣᨠᩣᨴᩦᩉᩥ ᨧ ᩋᩃᨦ᩠ᨠᨲᩴ ᨧᨦ᩠ᨠᨾᩴ ᨠᩣᩁᨿᩥᩴ ᩋᨠᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᨣᩣᨳᩣᨶᩴ ᩋᨲ᩠ᨳᩮᩣ ᨸᩣᩊᩥᨿᩣ ᩋᨶᩩᩈᩣᩁᩮᨶ ᩈᩩᩅᩥᨬ᩠ᨬᩮᨿ᩠ᨿᩮᩣᩅ.

᪓᪕. ᨸᩁᩥᩅᩣᩁᩈᨾ᩠ᨸᨲ᩠ᨲᩥᨵᨶᩈᨾ᩠ᨸᨲ᩠ᨲᩥᩈᨦ᩠ᨡᩣᨲᩴ ᨿᩈᩴ ᨵᩣᩁᩮᨲᩦᨲᩥ ᨿᩈᩮᩣᨵᩁᩮᩣ, ᩈᨻ᩠ᨻᩮ ᩑᨲᩮ ᩈᨲ᩠ᨲᩈᨲ᩠ᨲᨲᩥᨧᨠ᩠ᨠᩅᨲ᩠ᨲᩥᩁᩣᨩᩣᨶᩮᩣ ᨿᩈᩮᩣᨵᩁᨶᩣᨾᩮᨶ ᩑᨠᨶᩣᨾᨠᩣᨲᩥ ᩈᨾ᩠ᨻᨶ᩠ᨵᩮᩣ.

᪕᪒. ᩋᨦ᩠ᨣᩦᩁᩈᩮᩣᨲᩥ ᩋᨦ᩠ᨣᨲᩮᩣ ᩈᩁᩦᩁᨲᩮᩣ ᨶᩥᨣ᩠ᨣᨲᩣ ᩁᩈ᩠ᨾᩥ ᨿᩔ ᩈᩮᩣ ᩋᨦ᩠ᨣᩦᩁᩈᩮᩣ, ᨨᨶ᩠ᨴᨴᩮᩣᩈᨾᩮᩣᩉᨽᨿᩣᨣᨲᩦᩉᩥ ᩅᩣ ᨸᩣᨸᩣᨧᩣᩁᩅᩈᩮᨶ ᩅᩣ ᨧᨲᩩᩁᩣᨸᩣᨿᩴ ᨶ ᨣᨧ᩠ᨨᨲᩦᨲᩥ ᨶᩣᨣᩮᩣ, ᨾᩉᨶ᩠ᨲᩮᩣ ᨸᩪᨩᩥᨲᩮᩣ ᨧ ᩈᩮᩣ ᨶᩣᨣᩮᩣ ᨧᩮᨲᩥ ᨾᩉᩣᨶᩣᨣᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨠᩮᩣᩊᩥᩅᩥᩈᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᨠᩣᩊᩥᨣᩮᩣᨵᩣᨸᩩᨲ᩠ᨲᨽᨴ᩠ᨴᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᩈᨾ᩠ᨻᩩᨴ᩠ᨵᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨽᨴ᩠ᨴᩥᨿᩔ ᨠᩣᩊᩥᨣᩮᩣᨵᩣᨸᩩᨲ᩠ᨲᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ¶ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨸᩩᨲ᩠ᨲᨴᩣᩁᩮᩉᩥ ᩅᨯ᩠ᨰᩥᨲᩮᩣ ᨶᨣᩁᩅᩣᩈᩥᨶᩮᩣ ᨸᩩᨬ᩠ᨬᩣᨶᩥ ᨠᩁᩮᩣᨶ᩠ᨲᩮ ᨴᩥᩈ᩠ᩅᩣ ᩈᨿᨾ᩠ᨸᩥ ᨸᩩᨬ᩠ᨬᩣᨶᩥ ᨠᩣᨲᩩᨠᩣᨾᩮᩣ ¶ ᨻᩩᨴ᩠ᨵᨸ᩠ᨸᨾᩩᨡᩴ ᨽᩥᨠ᩠ᨡᩩᩈᨦ᩠ᨥᩴ ᨶᩥᨾᨶ᩠ᨲᩮᨲ᩠ᩅᩣ ᨳᩪᩃᨸᨭᩃᩥᨠᩣᨴᩥᩋᨶᩮᨠᩣᨶᩥ ᨾᩉᩣᩁᩉᩣᨶᩥ ᩈᨿᨶᩣᨶᩥ ᨸᨬ᩠ᨬᩣᨸᩮᨲ᩠ᩅᩣ ᨲᨲ᩠ᨳ ᨶᩥᩈᩥᨶ᩠ᨶᩮ ᨽᨣᩅᨲᩥ ᩈᩈᨦ᩠ᨥᩮ ᨸᨱᩦᨲᩮᨶᩣᩉᩣᩁᩮᨶ ᨽᩮᩣᨩᩮᨲ᩠ᩅᩣ ᨾᩉᩣᨴᩣᨶᩴ ᩋᨴᩣᩈᩥ. ᩈᩮᩣ ᩑᩅᩴ ᨿᩣᩅᨲᩣᨿᩩᨠᩴ ᨸᩩᨬ᩠ᨬᩣᨶᩥ ᨠᨲ᩠ᩅᩣ ᨴᩮᩅᨾᨶᩩᩔᩮᩈᩩ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩋᨸᩁᨽᩣᨣᩮ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩣᩊᩥᨣᩮᩣᨵᩣᨿ ᨶᩣᨾ ᨴᩮᩅᩥᨿᩣ ᨸᩩᨲ᩠ᨲᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩥ. ᩈᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩌᩁᩮᩣᩉᨸᩁᩥᨱᩣᩉᩉᨲ᩠ᨳᨸᩣᨴᩁᩪᨸᩈᨾ᩠ᨸᨲ᩠ᨲᩥᨿᩣ ᨽᨴ᩠ᨴᨲ᩠ᨲᩣ ᨧ ᨠᩣᩊᩥᨣᩮᩣᨵᩣᨿ ᨴᩮᩅᩥᨿᩣ ᨸᩩᨲ᩠ᨲᨲ᩠ᨲᩣ ᨧ ᨽᨴ᩠ᨴᩥᨿᩮᩣ ᨠᩣᩊᩥᨣᩮᩣᨵᩣᨸᩩᨲ᩠ᨲᩮᩣᨲᩥ ᨸᩣᨠᨭᩮᩣ. ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨾᩣᨲᩣᨸᩥᨲᩁᩮᩣ ᩌᩁᩣᨵᩮᨲ᩠ᩅᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪕᪔. ᩈᩮᩣ ᩋᩁᩉᩣ ᩉᩩᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩈᨾ᩠ᨻᩩᨴ᩠ᨵᨶ᩠ᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨳᨾᩮᩅ. ᨾᩮᨲ᩠ᨲᨧᩥᨲ᩠ᨲᨶ᩠ᨲᩥ ᨾᩥᨩ᩠ᨩᨲᩥ ᩈᩥᨶᩮᩉᨲᩥ ᨶᨶ᩠ᨴᨲᩥ ᩈᨻ᩠ᨻᩈᨲ᩠ᨲᩮᨲᩥ ᨾᩮᨲ᩠ᨲᩣ, ᨾᩮᨲ᩠ᨲᩣᨿ ᩈᩉᨣᨲᩴ ᨧᩥᨲ᩠ᨲᩴ ᨾᩮᨲ᩠ᨲᨧᩥᨲ᩠ᨲᩴ, ᨲᩴ ᨿᩔ ᨽᨣᩅᨲᩮᩣ ᩋᨲ᩠ᨳᩦᨲᩥ ᨾᩮᨲ᩠ᨲᨧᩥᨲ᩠ᨲᩮᩣ, ᨲᩴ ᨾᩮᨲ᩠ᨲᨧᩥᨲ᩠ᨲᩴ. ᨾᩉᩣᨾᩩᨶᩥᨶ᩠ᨲᩥ ᩈᨠᩃᨽᩥᨠ᩠ᨡᩪᨶᩴ ᨾᩉᨶ᩠ᨲᨲ᩠ᨲᩣ ᨾᩉᩣᨾᩩᨶᩥ, ᨲᩴ ᨸᨴᩩᨾᩩᨲ᩠ᨲᩁᩴ ᩈᨾ᩠ᨻᩩᨴ᩠ᨵᨶ᩠ᨲᩥ ¶ ᩈᨾ᩠ᨻᨶ᩠ᨵᩮᩣ. ᨩᨶᨲᩣ ᩈᨻ᩠ᨻᩣᨲᩥ ᩈᨻ᩠ᨻᩮᩣ ᨩᨶᨠᩣᨿᩮᩣ, ᩈᨻ᩠ᨻᨶᨣᩁᩅᩣᩈᩥᨶᩮᩣᨲᩥ ᩋᨲ᩠ᨳᩮᩣ. ᩈᨻ᩠ᨻᩃᩮᩣᨠᨣ᩠ᨣᨶᩣᨿᨠᨶ᩠ᨲᩥ ᩈᨠᩃᩃᩮᩣᨠᩔ ᩋᨣ᩠ᨣᩴ ᩈᩮᨭ᩠ᨮᩴ ᨶᩥᨻ᩠ᨻᩣᨶᩔ ᨶᨿᨶᨲᩮᩣ ᨸᩣᨸᨶᨲᩮᩣ ᨶᩣᨿᨠᩴ ᨸᨴᩩᨾᩩᨲ᩠ᨲᩁᩈᨾ᩠ᨻᩩᨴ᩠ᨵᩴ ᨩᨶᨲᩣ ᩏᨸᩮᨲᩥ ᩈᨾᩦᨸᩴ ᨣᨧ᩠ᨨᨲᩦᨲᩥ ᩈᨾ᩠ᨻᨶ᩠ᨵᩮᩣ.

᪕᪕. ᩈᨲ᩠ᨲᩩᨠᨬ᩠ᨧ ᨻᨴ᩠ᨵᨠᨬ᩠ᨧᩣᨲᩥ ᨻᨴ᩠ᨵᩈᨲ᩠ᨲᩩᩋᨻᨴ᩠ᨵᩈᨲ᩠ᨲᩩᩈᨦ᩠ᨡᩣᨲᩴ ᩌᨾᩥᩈᩴ. ᩋᨳ ᩅᩣ ᨽᨲ᩠ᨲᨸᩪᨸᨡᨩ᩠ᨩᨽᩮᩣᨩ᩠ᨩᨿᩣᨣᩩᩌᨴᨿᩮᩣ ᨿᩣᩅᨠᩣᩃᩥᨠᨲ᩠ᨲᩣ ᩌᨾᩥᩈᩴ ᨸᩣᨶᨽᩮᩣᨩᨶᨬ᩠ᨧ ᨣᩉᩮᨲ᩠ᩅᩣ ᨸᩩᨬ᩠ᨬᨠ᩠ᨡᩮᨲ᩠ᨲᩮ ᩋᨶᩩᨲ᩠ᨲᩁᩮ ᩈᨲ᩠ᨳᩩᨶᩮᩣ ᨴᨴᨶ᩠ᨲᩦᨲᩥ ᩈᨾ᩠ᨻᨶ᩠ᨵᩮᩣ.

᪕᪘. ᩌᩈᨶᩴ ᨻᩩᨴ᩠ᨵᨿᩩᨲ᩠ᨲᨠᨶ᩠ᨲᩥ ᨻᩩᨴ᩠ᨵᨿᩮᩣᨣ᩠ᨣᩴ ᨻᩩᨴ᩠ᨵᩣᩁᩉᩴ ᨻᩩᨴ᩠ᨵᩣᨶᩩᨧ᩠ᨨᩅᩥᨠᩴ ᩈᨲ᩠ᨲᩁᨲᨶᨾᨿᩴ ᩌᩈᨶᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᨶᨿᩣᨶᩩᨿᩮᩣᨣᩮᨶ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨠᩣᩊᩥᨣᩮᩣᨵᩣᨸᩩᨲ᩠ᨲᨽᨴ᩠ᨴᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᩈᨶ᩠ᨶᩥᨭ᩠ᨮᩣᨸᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩋᩁᨬ᩠ᨬᩮ ¶ ᨠᩩᨭᩥᨠᩴ ᨠᨲ᩠ᩅᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᨶ᩠ᨶᩥᨭ᩠ᨮᩣᨸᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨥᩁᨻᨶ᩠ᨵᨶᩮᨶ ¶ ᨻᨴ᩠ᨵᩮᩣ ᨥᩁᩣᩅᩣᩈᩮ ᩌᨴᩦᨶᩅᩴ ᨴᩥᩈ᩠ᩅᩣ ᩅᨲ᩠ᨳᩩᨠᩣᨾᨠᩥᩃᩮᩈᨠᩣᨾᩮ ᨸᩉᩣᨿ ᩉᩥᨾᩅᨶ᩠ᨲᩔ ᩋᩅᩥᨴᩪᩁᩮ ᨸᨻ᩠ᨻᨲᨶ᩠ᨲᩁᩮ ᩋᩁᨬ᩠ᨬᩅᩣᩈᩴ ᨠᨸ᩠ᨸᩮᩈᩥ. ᨲᩈ᩠ᨾᩥᩴ ᨠᩣᩃᩮ ᨸᨴᩩᨾᩩᨲ᩠ᨲᩁᩮᩣ ᨽᨣᩅᩣ ᩅᩥᩅᩮᨠᨠᩣᨾᨲᩣᨿ ᨲᩴ ᨮᩣᨶᩴ ᨸᩣᨸᩩᨱᩥ. ᩋᨳ ᩈᩮᩣ ᨲᩣᨸᩈᩮᩣ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩅᨶ᩠ᨴᩥᨲ᩠ᩅᩣ ᨶᩥᩈᩦᨴᨶᨲ᩠ᨳᩣᨿ ᨲᩥᨱᩈᨶ᩠ᨳᩁᩴ ᨸᨬ᩠ᨬᩣᨸᩮᨲ᩠ᩅᩣ ᩋᨴᩣᩈᩥ. ᨲᨲ᩠ᨳ ᨶᩥᩈᩥᨶ᩠ᨶᩴ ᨽᨣᩅᨶ᩠ᨲᩴ ᩋᨶᩮᨠᩮᩉᩥ ᨾᨵᩩᩁᩮᩉᩥ ᨲᩥᨱ᩠ᨯᩩᨠᩣᨴᩦᩉᩥ ᨹᩃᩣᨹᩃᩮᩉᩥ ᩈᨶ᩠ᨲᨸ᩠ᨸᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨲᨲᩮᩣ ᨧᩩᨲᩮᩣ ᨴᩮᩅᩮᩈᩩ ᨧ ᨾᨶᩩᩔᩮᩈᩩ ᨧ ᩋᨸᩁᩣᨸᩁᩴ ᩈᩴᩈᩁᨶ᩠ᨲᩮᩣ ᨴ᩠ᩅᩮ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᨴ᩠ᨵᩣᩈᨾ᩠ᨸᨶ᩠ᨶᩮᩣ ᨸᨻ᩠ᨻᨩᩥᨲᩮᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ. ᨡᩩᩁᨣ᩠ᨣᩮ ᩋᩁᩉᨲ᩠ᨲᨹᩃᨸ᩠ᨸᨲ᩠ᨲᩥᨿᩴ ᩅᩥᨿ ᨶᩥᩁᩩᩔᩣᩉᩮᨶᩮᩅ ᩈᨶ᩠ᨲᩥᨸᨴᩈᨦ᩠ᨡᩣᨲᩮ ᨶᩥᨻ᩠ᨻᩣᨶᩮ ᩈᩩᨭ᩠ᨮᩩ ᨮᩥᨲᨲ᩠ᨲᩣ ᩈᨶ᩠ᨶᩥᨭ᩠ᨮᩣᨸᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪗᪐. ᩋᩁᩉᩣ ᨸᨶ ᩉᩩᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩋᩁᨬ᩠ᨬᩮ ᨠᩩᨭᩥᨠᩴ ᨠᨲ᩠ᩅᩣᨲᩥᩌᨴᩥᨾᩣᩉ. ᨲᨲ᩠ᨳ ᩋᩁᨬ᩠ᨬᩮᨲᩥ ᩈᩦᩉᨻ᩠ᨿᨣ᩠ᨥᩣᨴᩦᨶᩴ ᨽᨿᩮᨶ ᨾᨶᩩᩔᩣ ᩑᨲ᩠ᨳ ¶ ᨶ ᩁᨩ᩠ᨩᨶ᩠ᨲᩥ ᨶ ᩁᨾᨶ᩠ᨲᩥ ᨶ ᩋᩃ᩠ᩃᩦᨿᨶ᩠ᨲᩦᨲᩥ ᩋᩁᨬ᩠ᨬᩴ, ᨲᩈ᩠ᨾᩥᩴ ᩋᩁᨬ᩠ᨬᩮ. ᨠᩩᨭᩥᨠᨶ᩠ᨲᩥ ᨲᩥᨱᨧ᩠ᨨᨴᨶᨠᩩᨭᩥᨠᩴ ᨠᨲ᩠ᩅᩣ ᨸᨻ᩠ᨻᨲᨶ᩠ᨲᩁᩮ ᩅᩈᩣᨾᩥ ᩅᩣᩈᩴ ᨠᨸ᩠ᨸᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩃᩣᨽᩮᨶ ᨧ ᩋᩃᩣᨽᩮᨶ ᨧ ᨿᩈᩮᨶ ᨧ ᩋᨿᩈᩮᨶ ᨧ ᩈᨶ᩠ᨲᩩᨭ᩠ᨮᩮᩣ ᩅᩥᩉᩣᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

᪗᪒. ᨩᩃᨩᩩᨲ᩠ᨲᨾᨶᩣᨾᨠᨶ᩠ᨲᩥ ᨩᩃᩮ ᨩᩣᨲᩴ ᨩᩃᨩᩴ, ᨸᨴᩩᨾᩴ, ᨩᩃᨩᩴ ᩏᨲ᩠ᨲᨾᩴ ᨩᩃᨩᩩᨲ᩠ᨲᨾᩴ, ᨩᩃᨩᩩᨲ᩠ᨲᨾᩮᨶ ᩈᨾᩣᨶᩴ ᨶᩣᨾᩴ ᨿᩔ ᩈᩮᩣ ᨩᩃᨩᩩᨲ᩠ᨲᨾᨶᩣᨾᨠᩮᩣ, ᨲᩴ ᨩᩃᨩᩩᨲ᩠ᨲᨾᨶᩣᨾᨠᩴ ᨻᩩᨴ᩠ᨵᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᨸᩣᩊᩥᨶᨿᩣᨶᩩᨿᩮᩣᨣᩮᨶ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩈᨶ᩠ᨶᩥᨭ᩠ᨮᩣᨸᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᨸᨬ᩠ᨧᩉᨲ᩠ᨳᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩩᨾᩮᨵᩮᩣ ¶ ᨶᩣᨾ ᩈᨾ᩠ᨻᩩᨴ᩠ᨵᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᨬ᩠ᨧᩉᨲ᩠ᨳᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩩᨾᩮᨵᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᩅᩥᩉᩣᩈᩥ. ᨲᩈ᩠ᨾᩥᩴ ᩈᨾᨿᩮ ᨸᨬ᩠ᨧᩏᨸ᩠ᨸᩃᩉᨲ᩠ᨳᩣᨶᩥ ᩌᨶᩮᩈᩩᩴ. ᩈᩮᩣ ᨲᩮᩉᩥ ᨸᨬ᩠ᨧᩏᨸ᩠ᨸᩃᩉᨲ᩠ᨳᩮᩉᩥ ᩅᩦᨳᩥᨿᩴ ᨧᩁᨾᩣᨶᩴ ᩈᩩᨾᩮᨵᩴ ᨽᨣᩅᨶ᩠ᨲᩴ ᨸᩪᨩᩮᩈᩥ. ᨲᩣᨶᩥ ᨣᨶ᩠ᨲ᩠ᩅᩣ ᩌᨠᩣᩈᩮ ᩅᩥᨲᩣᨶᩴ ᩉᩩᨲ᩠ᩅᩣ ᨨᩣᨿᩴ ᨠᩩᩁᩩᨾᩣᨶᩣᨶᩥ ᨲᨳᩣᨣᨲᩮᨶᩮᩅ ᩈᨴ᩠ᨵᩥᩴ ᨣᨧ᩠ᨨᩥᩴᩈᩩ. ᩈᩮᩣ ᨲᩴ ᨴᩥᩈ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩦᨲᩥᨿᩣ ᨹᩩᨭ᩠ᨮᩈᩁᩦᩁᩮᩣ ᨿᩣᩅᨩᩦᩅᩴ ᨲᨴᩮᩅ ᨸᩩᨬ᩠ᨬᩴ ᩋᨶᩩᩔᩁᩥᨲ᩠ᩅᩣ ᨲᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ ᩋᨸᩁᩣᨸᩁᩴ ᩈᩴᩈᩁᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲ᩠ᩅᩣ ¶ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ. ᨠᨲᨠᩩᩈᩃᨶᩣᨾᩮᨶ ᨸᨬ᩠ᨧᩉᨲ᩠ᨳᩥᨿᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪗᪗. ᩈᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᨸᨧ᩠ᨧᨠ᩠ᨡᨲᩮᩣ ᨸᨬ᩠ᨬᩣᨿ ᨴᩥᨭ᩠ᨮᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩩᨾᩮᨵᩮᩣ ᨶᩣᨾ ᩈᨾ᩠ᨻᩩᨴ᩠ᨵᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᩈᩩᨾᩮᨵᩮᩣᨲᩥ ᩈᩩᨶ᩠ᨴᩁᩣ ᨾᩮᨵᩣ ᨧᨲᩩᩈᨧ᩠ᨧᨸᨭᩥᩅᩮᨵᨸᨭᩥᩈᨾ᩠ᨽᩥᨴᩣᨴᨿᩮᩣ ᨸᨬ᩠ᨬᩣ ᨿᩔ ᩈᩮᩣ ᨽᨣᩅᩣ ᩈᩩᨾᩮᨵᩮᩣ ᩈᨾ᩠ᨻᩩᨴ᩠ᨵᩮᩣ ᩋᨶ᩠ᨲᩁᩣᨸᨱᩮ ᩋᨶ᩠ᨲᩁᩅᩦᨳᩥᨿᩴ ᨣᨧ᩠ᨨᨲᩦᨲᩥ ᩈᨾ᩠ᨻᨶ᩠ᨵᩮᩣ. ᩒᨠ᩠ᨡᩥᨲ᩠ᨲᨧᨠ᩠ᨡᩪᨲᩥ ᩋᨵᩮᩣᨡᩥᨲ᩠ᨲᨧᨠ᩠ᨡᩩ. ᨾᩥᨲᨽᩣᨱᩦᨲᩥ ᨸᨾᩣᨱᩴ ᨬᨲ᩠ᩅᩣ ᨽᨱᨶᩈᩦᩃᩮᩣ, ᨸᨾᩣᨱᩴ ᨩᩣᨶᩥᨲ᩠ᩅᩣ ᨵᨾ᩠ᨾᩴ ᨴᩮᩈᩮᩈᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨸᨬ᩠ᨧᩉᨲ᩠ᨳᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᨸᨴᩩᨾᨧ᩠ᨨᨴᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᩥᨻ᩠ᨻᩩᨲᩮ ¶ ᩃᩮᩣᨠᨶᩣᨳᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᨴᩩᨾᨧ᩠ᨨᨴᨶᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᨸᩩᨬ᩠ᨬᩈᨾ᩠ᨽᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᨸᩁᩥᨶᩥᨻ᩠ᨻᩩᨲᩔ ᩅᩥᨸᩔᩥᩔ ᨽᨣᩅᨲᩮᩣ ᨧᩥᨲᨠᩴ ᨸᨴᩩᨾᨸᩩᨸ᩠ᨹᩮᩉᩥ ᨸᩪᨩᩮᩈᩥ. ᩈᩮᩣ ᨲᩮᨶᩮᩅ ¶ ᨧᩥᨲ᩠ᨲᨸ᩠ᨸᩈᩣᨴᩮᨶ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᨲᨲᩮᩣ ᩈᩩᨣᨲᩦᩈᩩᨿᩮᩅ ᩈᩴᩈᩁᨶ᩠ᨲᩮᩣ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᨾᨶᩩᩔᩈᨾ᩠ᨸᨲ᩠ᨲᩥᨬ᩠ᨧᩣᨲᩥ ᨴ᩠ᩅᩮ ᩈᨾ᩠ᨸᨲ᩠ᨲᩥᨿᩮᩣ ᩋᨶᩮᨠᨠ᩠ᨡᨲ᩠ᨲᩩᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᩋᨾ᩠ᩉᩣᨠᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᩈᩣᩈᨶᩮ ᨸᨻ᩠ᨻᨩᩥᨲᩮᩣ ᨥᨭᩮᨶ᩠ᨲᩮᩣ ᩅᩣᨿᨾᨶ᩠ᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ. ᨲᩔ ᩁᨲ᩠ᨲᩥᨭ᩠ᨮᩣᨶᨴᩥᩅᩣᨭ᩠ᨮᩣᨶᩣᨴᩦᩈᩩ ᨲᨲ᩠ᨳ ᨲᨲ᩠ᨳ ᩅᩥᩉᩁᨶ᩠ᨲᩔ ᩅᩥᩉᩣᩁᩮᩣ ᨸᨴᩩᨾᨸᩩᨸ᩠ᨹᩮᩉᩥ ᨨᩣᨴᩦᨿᨲᩥ, ᨲᩮᨶ ᩈᩮᩣ ᨸᨴᩩᨾᨧ᩠ᨨᨴᨶᩥᨿᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪘᪓. ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᩅᩈᩮᨶ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨶᩥᨻ᩠ᨻᩩᨲᩮ ᩃᩮᩣᨠᨶᩣᨳᨾ᩠ᩉᩦᨲᩥᩌᨴᩥᨾᩣᩉ. ᨲᨲ᩠ᨳ ᨶᩥᨻ᩠ᨻᩩᨲᩮᨲᩥ ᨡᨶ᩠ᨵᨸᩁᩥᨶᩥᨻ᩠ᨻᩣᨶᩮᨶ ᨸᩁᩥᨶᩥᨻ᩠ᨻᩩᨲᩮ ᩈᨲ᩠ᨳᩁᩥ, ᩅᩥᨸᩔᩥᩔ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩈᩁᩦᩁᩮ ᨧᩥᨲᨾᩣᨶᩥᨿᨾᩣᨶᩮ ᨧᩥᨲᨠᩮ ᩌᩁᩮᩣᨸᩥᨲᩮ ᩈᩩᨹᩩᩃ᩠ᩃᩴ ᨸᨴᩩᨾᨠᩃᩣᨸᩴ ᩋᩉᩴ ᨣᩉᩮᨲ᩠ᩅᩣ ᨧᩥᨲᨠᩴ ᩌᩁᩮᩣᨸᨿᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᨣᩣᨳᩣᩈᩩ ᩉᩮᨭ᩠ᨮᩣ ᩅᩩᨲ᩠ᨲᨶᨿᨲ᩠ᨲᩣ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨸᨴᩩᨾᨧ᩠ᨨᨴᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᩈᨿᨶᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᨿᨶᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ¶ ᩋᨬ᩠ᨬᨲᩁᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᩉᨲ᩠ᨳᩥᨴᨱ᩠ᨯᩈᩩᩅᨱ᩠ᨱᩣᨴᩦᩉᩥ ᩈᨿᨶᨲ᩠ᨳᩣᨿ ᨾᨬ᩠ᨧᩴ ᨠᩣᩁᩮᨲ᩠ᩅᩣ ᩋᨶᨣ᩠ᨥᩮᩉᩥ ᩅᩥᨧᩥᨲ᩠ᨲᨲ᩠ᨳᩁᨱᩮᩉᩥ ᩋᨲ᩠ᨳᩁᩥᨲ᩠ᩅᩣ ᨽᨣᩅᨶ᩠ᨲᩴ ᨸᩪᨩᩮᩈᩥ. ᩈᩮᩣ ᨽᨣᩅᩣ ᨲᩔᩣᨶᩩᨠᨾ᩠ᨸᩣᨿ ᨸᨭᩥᨣ᩠ᨣᩉᩮᨲ᩠ᩅᩣ ᩋᨶᩩᨽᩅᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩥᨻ᩠ᨻᨾᨶᩩᩔᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨲ᩠ᨳᩩ ᩈᩣᩈᨶᩮ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩌᩁᨽᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ. ᨸᩩᨻ᩠ᨻᩮ ᨠᨲᨸᩩᨬ᩠ᨬᨶᩣᨾᩮᨶ ᩈᨿᨶᨴᩣᨿᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪘᪘. ᩈᩮᩣ ¶ ᩑᨠᨴᩥᩅᩈᩴ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᨸᩣᩊᩥᨶᨿᩣᨶᩩᩈᩣᩁᩮᨶ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩈᨿᨶᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᨧᨦ᩠ᨠᨾᨶᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩋᨲ᩠ᨳᨴᩔᩥᩔ ¶ ᨾᩩᨶᩥᨶᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨧᨦ᩠ᨠᨾᨶᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩣᨿᩈ᩠ᨾᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᩮᩈᩩ ᨲᩮᩈᩩ ᨽᩅᩮᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨲ᩠ᨳᨴᩔᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᩏᨧ᩠ᨧᩅᨲ᩠ᨳᩩᨠᩴ ᩈᩩᨵᩣᨸᩁᩥᨠᨾ᩠ᨾᨠᨲᩴ ᩁᨩᨲᩁᩣᩈᩥᩈᨴᩥᩈᩴ ᩈᩮᩣᨽᨾᩣᨶᩴ ᨧᨦ᩠ᨠᨾᩴ ᨠᩣᩁᩮᨲ᩠ᩅᩣ ᨾᩩᨲ᩠ᨲᨴᩃᩈᨴᩥᩈᩴ ᩈᩮᨲᨸᩩᩃᩥᨶᩴ ᩋᨲ᩠ᨳᩁᩥᨲ᩠ᩅᩣ ᨽᨣᩅᨲᩮᩣ ᩋᨴᩣᩈᩥ. ᨸᨭᩥᨣ᩠ᨣᩉᩮᩈᩥ ᨽᨣᩅᩣ, ᨧᨦ᩠ᨠᨾᩴ ᨸᨭᩥᨣ᩠ᨣᩉᩮᨲ᩠ᩅᩣ ᨧ ᨸᨶ ᩈᩩᨡᩴ ᨠᩣᨿᨧᩥᨲ᩠ᨲᩈᨾᩣᨵᩥᩴ ᩋᨸ᩠ᨸᩮᨲ᩠ᩅᩣ ‘‘ᩋᨿᩴ ᩋᨶᩣᨣᨲᩮ ᨣᩮᩣᨲᨾᩔ ᨽᨣᩅᨲᩮᩣ ᩈᩣᩈᨶᩮ ᩈᩣᩅᨠᩮᩣ ᨽᩅᩥᩔᨲᩦ’’ᨲᩥ ᨻ᩠ᨿᩣᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᨾᨶᩩᩔᩮᩈᩩ ᩋᨸᩁᩣᨸᩁᩴ ᩈᩴᩈᩁᨶ᩠ᨲᩮᩣ ᨴ᩠ᩅᩮ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨴ᩠ᨵᩣᩈᨾ᩠ᨸᨶ᩠ᨶᩮᩣ ᩈᩣᩈᨶᩮ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᨲ᩠ᩅᩣ ᨠᨲᨸᩩᨬ᩠ᨬᨶᩣᨾᩮᨶ ᨧᨦ᩠ᨠᨾᨶᨴᩣᨿᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ ᩋᩉᩮᩣᩈᩥ.

᪙᪓. ᩈᩮᩣ ᩑᨠᨴᩥᩅᩈᩴ ᩋᨲ᩠ᨲᨶᩣ ᨸᩩᨻ᩠ᨻᩮ ᨠᨲᨸᩩᨬ᩠ᨬᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩋᨲ᩠ᨳᨴᩔᩥᩔ ᨾᩩᨶᩥᨶᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᩋᨲ᩠ᨳᨴᩔᩥᩔᩣᨲᩥ ᩋᨲ᩠ᨳᩴ ᨸᨿᩮᩣᨩᨶᩴ ᩅᩩᨴ᩠ᨵᩥᩴ ᩅᩥᩁᩪᩊ᩠ᩉᩥᩴ ᨶᩥᨻ᩠ᨻᩣᨶᩴ ᨴᨠ᩠ᨡᨲᩥ ᨸᩔᨲᩦᨲᩥ ᩋᨲ᩠ᨳᨴᩔᩦ, ᩋᨳ ᩅᩣ ᩋᨲ᩠ᨳᩴ ᨶᩥᨻ᩠ᨻᩣᨶᩴ ᨴᩔᨶᩈᩦᩃᩮᩣ ᨩᩣᨶᨶᩈᩦᩃᩮᩣᨲᩥ ᩋᨲ᩠ᨳᨴᩔᩦ, ᨲᩔ ᩋᨲ᩠ᨳᨴᩔᩥᩔ ᨾᩩᨶᩥᨶᩮᩣ ᨾᩮᩣᨶᩮᨶ ᨬᩣᨱᩮᨶ ᩈᨾᨶ᩠ᨶᩣᨣᨲᩔ ᨽᨣᩅᨲᩮᩣ ᨾᨶᩮᩣᩁᨾᩴ ᨾᨶᩃ᩠ᩃᩦᨶᩴ ᨽᩣᩅᨶᩦᨿᩴ ᨾᨶᩈᩥ ᨠᩣᨲᨻ᩠ᨻᩴ ᨧᨦ᩠ᨠᨾᩴ ᨠᩣᩁᩮᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩅᩩᨲ᩠ᨲᨶᨿᩣᨶᩩᩈᩣᩁᩮᨶᩮᩅ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨧᨦ᩠ᨠᨾᨶᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᩈᩩᨽᨴ᩠ᨴᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᩮᩣ ¶ ᩃᩮᩣᨠᩅᩥᨴᩪᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩩᨽᨴ᩠ᨴᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ¶ ᨲᨲ᩠ᨳ ᨲᨲ᩠ᨳ ᨽᩅᩮ ᨶᩥᨻ᩠ᨻᩣᨶᩣᨵᩥᨣᨾᨶᨲ᩠ᨳᩣᨿ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩅᩥᨽᩅᩈᨾ᩠ᨸᨶ᩠ᨶᩮ ¶ ᩈᨴ᩠ᨵᩣᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᨥᩁᨻᨶ᩠ᨵᨶᩮᨶ ᨻᨴ᩠ᨵᩮᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᨸᩁᩥᨶᩥᨻ᩠ᨻᩣᨶᨾᨬ᩠ᨧᩮ ᨶᩥᨸᨶ᩠ᨶᩴ ᨸᨴᩩᨾᩩᨲ᩠ᨲᩁᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᩈᨶ᩠ᨶᩥᨸᨲᩥᨲᩣ ᨴᩈᩈᩉᩔᨧᨠ᩠ᨠᩅᩣᩊᨴᩮᩅᨲᩣᨿᩮᩣ ᨧ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨶᩥᨣ᩠ᨣᩩᨱ᩠ᨯᩥᨠᩮᨭᨠᨶᩦᩃᨠᩣᩈᩮᩣᨠᩣᩈᩥᨲᩣᨴᩥᩋᨶᩮᨠᩮᩉᩥ ᩈᩩᨣᨶ᩠ᨵᨸᩩᨸ᩠ᨹᩮᩉᩥ ᨸᩪᨩᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᨲᨲᩮᩣ ᨧᩅᩥᨲ᩠ᩅᩣ ᨲᩩᩈᩥᨲᩣᨴᩦᩈᩩ ᨴᩥᨻ᩠ᨻᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᨲᨲᩮᩣ ᨾᨶᩩᩔᩮᩈᩩ ᨾᨶᩩᩔᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᨶᩥᨻ᩠ᨻᨲ᩠ᨲᨶᩥᨻ᩠ᨻᨲ᩠ᨲᨭ᩠ᨮᩣᨶᩮᩈᩩ ᨧ ᩈᩩᨣᨶ᩠ᨵᩮᩉᩥ ᨸᩩᨸ᩠ᨹᩮᩉᩥ ᨸᩪᨩᩥᨲᩮᩣ ᩋᩉᩮᩣᩈᩥ. ᩍᨾᩈ᩠ᨾᩥᩴ ᨸᨶ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᩅᩥᨽᩅᩈᨾ᩠ᨸᨶ᩠ᨶᩮ ᨠᩩᩃᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨠᩣᨾᩮᩈᩩ ᩌᨴᩦᨶᩅᩴ ᨴᩥᩈ᩠ᩅᩣᨸᩥ ᨿᩣᩅ ᨻᩩᨴ᩠ᨵᩔ ᨽᨣᩅᨲᩮᩣ ᨸᩁᩥᨶᩥᨻ᩠ᨻᩣᨶᨠᩣᩃᩮᩣ ᨲᩣᩅ ᩋᩃᨴ᩠ᨵᨻᩩᨴ᩠ᨵᨴᩔᨶᩮᩣ ᨽᨣᩅᨲᩮᩣ ᨸᩁᩥᨶᩥᨻ᩠ᨻᩣᨶᨾᨬ᩠ᨧᩮ ᨶᩥᨸᨶ᩠ᨶᨠᩣᩃᩮᨿᩮᩅ ᨸᨻ᩠ᨻᨩᩥᨲ᩠ᩅᩣ ᩋᩁᩉᨲ᩠ᨲᩴ ᨸᩣᨸᩩᨱᩥ. ᨸᩩᨻ᩠ᨻᩮ ᨠᨲᨸᩩᨬ᩠ᨬᨶᩣᨾᩮᨶ ᩈᩩᨽᨴ᩠ᨴᩮᩣᨲᩥ ᨸᩣᨠᨭᩮᩣ ᩋᩉᩮᩣᩈᩥ.

᪑᪐᪑. ᩈᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᩅᩈᩮᨶ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩮᩣ ᩃᩮᩣᨠᩅᩥᨴᩪᨲᩥᩌᨴᩥᨾᩣᩉ. ᨲᩴ ᩏᨲ᩠ᨲᩣᨶᨲ᩠ᨳᨾᩮᩅ. ᩈᩩᨱᩣᨳ ᨾᨾ ᨽᩣᩈᨲᩮᩣ…ᨸᩮ… ᨶᩥᨻ᩠ᨻᩣᨿᩥᩔᨲᩥᨶᩣᩈᩅᩮᩣᨲᩥ ᩍᨴᩴ ᨸᩁᩥᨶᩥᨻ᩠ᨻᩣᨶᨾᨬ᩠ᨧᩮ ᨶᩥᨸᨶ᩠ᨶᩮᩣᩅ ᨸᨴᩩᨾᩩᨲ᩠ᨲᩁᩮᩣ ᨽᨣᩅᩣ ᨻ᩠ᨿᩣᨠᩣᩈᩥ.

ᨸᨬ᩠ᨧᨾᨽᩣᨱᩅᩣᩁᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪑᪕. ᩈᩮᩣ ᩋᨲ᩠ᨲᨶᩮᩣ ᨸᨭᩥᨸᨲ᩠ᨲᩥᩴ ᨴᩔᩮᨶ᩠ᨲᩮᩣ ᨸᩩᨻ᩠ᨻᨠᨾ᩠ᨾᩮᨶ ᩈᩴᨿᩩᨲ᩠ᨲᩮᩣᨲᩥᩌᨴᩥᨾᩣᩉ. ᩑᨠᨣ᩠ᨣᩮᩣᨲᩥ ᩑᨠᨣ᩠ᨣᨧᩥᨲ᩠ᨲᩮᩣ. ᩈᩩᩈᨾᩣᩉᩥᨲᩮᩣᨲᩥ ᩈᩩᨭ᩠ᨮᩩ ᩈᨾᩣᩉᩥᨲᩮᩣ, ᩈᨶ᩠ᨲᨠᩣᨿᨧᩥᨲ᩠ᨲᩮᩣᨲᩥ ᩋᨲ᩠ᨳᩮᩣ. ᨻᩩᨴ᩠ᨵᩔ ᩒᩁᩈᩮᩣ ᨸᩩᨲ᩠ᨲᩮᩣᨲᩥ ᨻᩩᨴ᩠ᨵᩔ ᩏᩁᩈᩣ ᩉᨴᨿᩮᨶ ᨶᩥᨣ᩠ᨣᨲᩒᩅᩣᨴᩣᨶᩩᩈᩣᩈᨶᩥᩴ ᩈᩩᨲ᩠ᩅᩣ ᨸᨲ᩠ᨲᩋᩁᩉᨲ᩠ᨲᨹᩃᩮᩣᨲᩥ ᩋᨲ᩠ᨳᩮᩣ. ᨵᨾ᩠ᨾᨩᩮᩣᨾ᩠ᩉᩥ ᩈᩩᨶᩥᨾ᩠ᨾᩥᨲᩮᩣᨲᩥ ᨵᨾ᩠ᨾᨲᩮᩣ ᨠᨾ᩠ᨾᨭ᩠ᨮᩣᨶᨵᨾ᩠ᨾᨲᩮᩣ ᨩᩣᨲᩮᩣ ᩋᩁᩥᨿᩣᨿ ᨩᩣᨲᩥᨿᩣ ᩈᩩᨶᩥᨾ᩠ᨾᩥᨲᩮᩣ ᩈᩩᨭ᩠ᨮᩩ ᨶᩥᨸ᩠ᨹᩣᨴᩥᨲᩈᨻ᩠ᨻᨠᩥᨧ᩠ᨧᩮᩣ ᩋᨾ᩠ᩉᩥ ᨽᩅᩣᨾᩦᨲᩥ ᩋᨲ᩠ᨳᩮᩣ.

᪑᪑᪖. ᨵᨾ᩠ᨾᩁᩣᨩᩴ ᩏᨸᨣᨾ᩠ᨾᩣᨲᩥ ᨵᨾ᩠ᨾᩮᨶ ᩈᨻ᩠ᨻᩈᨲ᩠ᨲᩣᨶᩴ ᩁᩣᨩᩣᨶᩴ ᩍᩔᩁᨽᩪᨲᩴ ᨽᨣᩅᨶ᩠ᨲᩴ ᩏᨸᨣᨶ᩠ᨲ᩠ᩅᩣ ᩈᨾᩦᨸᩴ ᨣᨶ᩠ᨲ᩠ᩅᩣᨲᩥ ᩋᨲ᩠ᨳᩮᩣ. ᩋᨸᩩᨧ᩠ᨨᩥᩴ ᨸᨬ᩠ᩉᨾᩩᨲ᩠ᨲᨾᨶ᩠ᨲᩥ ᩏᨲ᩠ᨲᨾᩴ ᨡᨶ᩠ᨵᩣᨿᨲᨶᨵᩣᨲᩩᩈᨧ᩠ᨧᩈᨾᩩᨸ᩠ᨸᩣᨴᩣᨴᩥᨸᨭᩥᩈᩴᨿᩩᨲ᩠ᨲᩴ ᨸᨬ᩠ᩉᩴ ᩋᨸᩩᨧ᩠ᨨᩥᨶ᩠ᨲᩥ ᩋᨲ᩠ᨳᩮᩣ. ᨠᨳᨿᨶ᩠ᨲᩮᩣ ¶ ᨧ ᨾᩮ ᨸᨬ᩠ᩉᨶ᩠ᨲᩥ ᩑᩈᩮᩣ ᩋᨾ᩠ᩉᩣᨠᩴ ᨽᨣᩅᩣ ᨾᩮ ᨾᨿ᩠ᩉᩴ ᨸᨬ᩠ᩉᩴ ᨠᨳᨿᨶ᩠ᨲᩮᩣ ᨻ᩠ᨿᩣᨠᩁᩮᩣᨶ᩠ᨲᩮᩣ. ᨵᨾ᩠ᨾᩈᩮᩣᨲᩴ ᩏᨸᩣᨶᨿᩦᨲᩥ ᩋᨶᩩᨸᩣᨴᩥᩈᩮᩈᨶᩥᨻ᩠ᨻᩣᨶᨵᩣᨲᩩᩈᨦ᩠ᨡᩣᨲᩴ ᨵᨾ᩠ᨾᩈᩮᩣᨲᩴ ᨵᨾ᩠ᨾᨸᩅᩣᩉᩴ ᩏᨸᩣᨶᨿᩥ ᨸᩣᩅᩥᩈᩦᨲᩥ ᩋᨲ᩠ᨳᩮᩣ.

᪑᪑᪘. ᨩᩃᨩᩩᨲ᩠ᨲᨾᨶᩣᨿᨠᩮᩣᨲᩥ ¶ ᨸᨴᩩᨾᩩᨲ᩠ᨲᩁᨶᩣᨾᨠᩮᩣ ᨾ-ᨠᩣᩁᩔ ᨿ-ᨠᩣᩁᩴ ᨠᨲ᩠ᩅᩣ ᨠᨲᩅᩮᩣᩉᩣᩁᩮᩣ. ᨶᩥᨻ᩠ᨻᩣᨿᩥ ¶ ᩋᨶᩩᨸᩣᨴᩣᨶᩮᩣᨲᩥ ᩏᨸᩣᨴᩣᨶᩮ ᨸᨬ᩠ᨧᨠ᩠ᨡᨶ᩠ᨵᩮ ᩋᨣ᩠ᨣᩉᩮᨲ᩠ᩅᩣ ᨶᩥᨻ᩠ᨻᩣᨿᩥ ᨶ ᨸᨬ᩠ᨬᩣᨿᩥ ᩋᨴᩔᨶᩴ ᩋᨣᨾᩣᩈᩥ, ᨾᨶᩩᩔᩃᩮᩣᨠᩣᨴᩦᩈᩩ ᨠᨲ᩠ᨳᨧᩥᨸᩥ ᩋᨸᨲᩥᨭ᩠ᨮᩥᨲᩮᩣᨲᩥ ᩋᨲ᩠ᨳᩮᩣ. ᨴᩦᨸᩮᩣᩅ ᨲᩮᩃᩈᨦ᩠ᨡᨿᩣᨲᩥ ᩅᨭ᩠ᨭᩥᨲᩮᩃᩣᨶᩴ ᩈᨦ᩠ᨡᨿᩣ ᩋᨽᩣᩅᩣ ᨸᨴᩦᨸᩮᩣ ᩍᩅ ᨶᩥᨻ᩠ᨻᩣᨿᩦᨲᩥ ᩈᨾ᩠ᨻᨶ᩠ᨵᩮᩣ.

᪑᪑᪙. ᩈᨲ᩠ᨲᨿᩮᩣᨩᨶᩥᨠᩴ ᩌᩈᩦᨲᩥ ᨲᩔ ᨸᩁᩥᨶᩥᨻ᩠ᨻᩩᨲᩔ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᩁᨲᨶᨾᨿᩴ ᨳᩪᨸᩴ ᩈᨲ᩠ᨲᨿᩮᩣᨩᨶᩩᨻ᩠ᨻᩮᨵᩴ ᩌᩈᩥ ᩋᩉᩮᩣᩈᩦᨲᩥ ᩋᨲ᩠ᨳᩮᩣ. ᨵᨩᩴ ᨲᨲ᩠ᨳ ᩋᨸᩪᨩᩮᩈᩥᨶ᩠ᨲᩥ ᨲᨲ᩠ᨳ ᨲᩈ᩠ᨾᩥᩴ ᨧᩮᨲᩥᨿᩮ ᩈᨻ᩠ᨻᨽᨴ᩠ᨴᩴ ᩈᨻ᩠ᨻᨲᩮᩣ ᨽᨴ᩠ᨴᩴ ᩈᨻ᩠ᨻᩈᩮᩣ ᨾᨶᩮᩣᩁᨾᩴ ᨵᨩᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪑᪒᪐. ᨠᩔᨸᩔ ᨧ ᨻᩩᨴ᩠ᨵᩔᩣᨲᩥ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᨲᩮᩣ ᨸᨭ᩠ᨮᩣᨿ ᩌᨣᨲᩔ ᨴᩮᩅᨾᨶᩩᩔᩮᩈᩩ ᩈᩴᩈᩁᨲᩮᩣ ᨾᩮ ᨾᨿ᩠ᩉᩴ ᩒᩁᩈᩮᩣ ᨸᩩᨲ᩠ᨲᩮᩣ ᨲᩥᩔᩮᩣ ᨶᩣᨾ ᨠᩔᨸᩔ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩋᨣ᩠ᨣᩈᩣᩅᨠᩮᩣ ᨩᩥᨶᩈᩣᩈᨶᩮ ᨻᩩᨴ᩠ᨵᩈᩣᩈᨶᩮ ᨴᩣᨿᩣᨴᩮᩣ ᩌᩈᩥ ᩋᩉᩮᩣᩈᩦᨲᩥ ᩈᨾ᩠ᨻᨶ᩠ᨵᩮᩣ.

᪑᪒᪑. ᨲᩔ ᩉᩦᨶᩮᨶ ᨾᨶᩈᩣᨲᩥ ᨲᩔ ᨾᨾ ᨸᩩᨲ᩠ᨲᩔ ᨲᩥᩔᩔ ᩋᨣ᩠ᨣᩈᩣᩅᨠᩔ ᩉᩦᨶᩮᨶ ᩃᩣᨾᨠᩮᨶ ᨾᨶᩈᩣ ᨧᩥᨲ᩠ᨲᩮᨶ ᩋᨽᨴ᩠ᨴᨠᩴ ᩋᩈᩩᨶ᩠ᨴᩁᩴ ᩋᨿᩩᨲ᩠ᨲᨠᩴ ‘‘ᩋᨶ᩠ᨲᨠᩮᩣ ᨸᨧ᩠ᨨᩥᨾᩮᩣ’’ᨲᩥ ᩅᩣᨧᩴ ᩅᨧᨶᩴ ᩋᨽᩣᩈᩥᩴ ᨠᨳᩮᩈᩥᨶ᩠ᨲᩥ ᩋᨲ᩠ᨳᩮᩣ. ᨲᩮᨶ ᨠᨾ᩠ᨾᩅᩥᨸᩣᨠᩮᨶᩣᨲᩥ ᨲᩮᨶ ᩋᩁᩉᨶ᩠ᨲᨽᨠ᩠ᨡᩣᨶᩈᨦ᩠ᨡᩣᨲᩔ ᩋᨠᩩᩈᩃᨠᨾ᩠ᨾᩔ ᩅᩥᨸᩣᨠᩮᨶ. ᨸᨧ᩠ᨨᩥᨾᩮ ᩋᨴ᩠ᨴᩈᩴ ᨩᩥᨶᨶ᩠ᨲᩥ ᨸᨧ᩠ᨨᩥᨾᩮ ᨸᩁᩥᨿᩮᩣᩈᩣᨶᩮ ᨸᩁᩥᨶᩥᨻ᩠ᨻᩣᨶᨠᩣᩃᩮ ᨾᩃ᩠ᩃᩣᨶᩴ ᩏᨸᩅᨲ᩠ᨲᨶᩮ ᩈᩣᩃᩅᨶᩮ ᨸᩁᩥᨶᩥᨻ᩠ᨻᩣᨶᨾᨬ᩠ᨧᩮ ᨶᩥᨸᨶ᩠ᨶᩴ ᨩᩥᨶᩴ ᨩᩥᨲᩈᨻ᩠ᨻᨾᩣᩁᩴ ᩋᨾ᩠ᩉᩣᨠᩴ ᨣᩮᩣᨲᨾᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᩋᨴ᩠ᨴᩈᩴ ᩋᩉᨶ᩠ᨲᩥ ᩋᨲ᩠ᨳᩮᩣ. ‘‘ᨸᨧ᩠ᨨᩣ ᨾᩮ ᩌᩈᩥ ᨽᨴ᩠ᨴᨠ’’ᨶ᩠ᨲᩥᨸᩥ ᨸᩣᨮᩮᩣ. ᨲᩔ ᨸᨧ᩠ᨨᩣ ᨲᩔ ᨽᨣᩅᨲᩮᩣ ᩋᩅᩈᩣᨶᨠᩣᩃᩮ ᨶᩥᨻ᩠ᨻᩣᨶᩣᩈᨶ᩠ᨶᨠᩣᩃᩮ ᨾᩮ ᨾᨿ᩠ᩉᩴ ᨽᨴ᩠ᨴᨠᩴ ᩈᩩᨶ᩠ᨴᩁᩴ ᨧᨲᩩᩈᨧ᩠ᨧᨸᨭᩥᩅᩥᨩ᩠ᨫᨶᩴ ᩌᩈᩥ ᩋᩉᩮᩣᩈᩦᨲᩥ ᩋᨲ᩠ᨳᩮᩣ.

᪑᪒᪒. ᨸᨻ᩠ᨻᩣᨩᩮᩈᩥ ᨾᩉᩣᩅᩦᩁᩮᩣᨲᩥ ᨾᩉᩣᩅᩦᩁᩥᨿᩮᩣ ᩈᨻ᩠ᨻᩈᨲ᩠ᨲᩉᩥᨲᩮᩣ ᨠᩁᩩᨱᩣᨿᩩᨲ᩠ᨲᩮᩣ ᨩᩥᨲᨾᩣᩁᩮᩣ ᨾᩩᨶᩥ ᨾᩃ᩠ᩃᩣᨶᩴ ᩏᨸᩅᨲ᩠ᨲᨶᩮ ᩈᩣᩃᩅᨶᩮ ᨸᨧ᩠ᨨᩥᨾᩮ ᩈᨿᨶᩮ ᨸᩁᩥᨶᩥᨻ᩠ᨻᩣᨶᨾᨬ᩠ᨧᩮ ᩈᨿᩥᨲᩮᩣᩅ ᨾᩴ ᨸᨻ᩠ᨻᩣᨩᩮᩈᩦᨲᩥ ᩈᨾ᩠ᨻᨶ᩠ᨵᩮᩣ.

᪑᪒᪓. ᩋᨩ᩠ᨩᩮᩅ ¶ ᨴᩣᨶᩥ ᨸᨻ᩠ᨻᨩ᩠ᨩᩣᨲᩥ ᩋᨩ᩠ᨩ ᩑᩅ ᨽᨣᩅᨲᩮᩣ ᨸᩁᩥᨶᩥᨻ᩠ᨻᩣᨶᨴᩥᩅᩈᩮᨿᩮᩅ ᨾᨾ ᨸᨻ᩠ᨻᨩ᩠ᨩᩣ, ᨲᨳᩣ ᩋᨩ᩠ᨩ ᩑᩅ ᩏᨸᩈᨾ᩠ᨸᨴᩣ, ᩋᨩ᩠ᨩ ᩑᩅ ᨴ᩠ᩅᩥᨸᨴᩩᨲ᩠ᨲᨾᩔ ᩈᨾ᩠ᨾᩩᨡᩣ ᨸᩁᩥᨶᩥᨻ᩠ᨻᩣᨶᩴ ᩋᩉᩮᩣᩈᩦᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩈᩩᨽᨴ᩠ᨴᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᨧᩩᨶ᩠ᨴᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩥᨴ᩠ᨵᨲ᩠ᨳᩔ ¶ ¶ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨧᩩᨶ᩠ᨴᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᨸᩩᨬ᩠ᨬᩈᨾ᩠ᨽᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᩅᩥᨽᩅᩈᨾ᩠ᨸᨶ᩠ᨶᩮ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᩈᨲ᩠ᨲᩁᨲᨶᨾᨿᩴ ᩈᩩᩅᨱ᩠ᨱᨣ᩠ᨥᩥᨿᩴ ᨠᩣᩁᩮᨲ᩠ᩅᩣ ᩈᩩᨾᨶᨸᩩᨸ᩠ᨹᩮᩉᩥ ᨨᩣᨴᩮᨲ᩠ᩅᩣ ᨽᨣᩅᨶ᩠ᨲᩴ ᨸᩪᨩᩮᩈᩥ. ᨲᩣᨶᩥ ᨸᩩᨸ᩠ᨹᩣᨶᩥ ᩌᨠᩣᩈᩴ ᩈᨾᩩᨣ᩠ᨣᨶ᩠ᨲ᩠ᩅᩣ ᩅᩥᨲᩣᨶᩣᨠᩣᩁᩮᨶ ᩋᨭ᩠ᨮᩴᩈᩩ. ᩋᨳ ᨶᩴ ᨽᨣᩅᩣ ‘‘ᩋᨶᩣᨣᨲᩮ ᨣᩮᩣᨲᨾᩔ ᨶᩣᨾ ᨽᨣᩅᨲᩮᩣ ᩈᩣᩈᨶᩮ ᨧᩩᨶ᩠ᨴᩮᩣ ᨶᩣᨾ ᩈᩣᩅᨠᩮᩣ ᨽᩅᩥᩔᨲᩦ’’ᨲᩥ ᨻ᩠ᨿᩣᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨲᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮ ᩏᨸᨸᨶ᩠ᨶᩮᩣ ᨠᨾᩮᨶ ᨨᩈᩩ ᨠᩣᨾᩣᩅᨧᩁᨴᩮᩅᩮᩈᩩ ᩈᩩᨡᩴ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧᨠ᩠ᨠᩅᨲ᩠ᨲᩥᩌᨴᩥᩈᨾ᩠ᨸᨲ᩠ᨲᩥᨿᩮᩣ ᨧ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨻᩕᩣᩉ᩠ᨾᨱᨠᩩᩃᩮ ᩁᩪᨸᩈᩣᩁᩥᨿᩣ ᨸᩩᨲ᩠ᨲᩮᩣ ᩈᩣᩁᩥᨸᩩᨲ᩠ᨲᨲ᩠ᨳᩮᩁᩔ ᨠᨶᩥᨭ᩠ᨮᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩥ. ᨲᩔ ᩅᩥᨬ᩠ᨬᩩᨲᩴ ᨸᨲ᩠ᨲᩔ ᩌᩁᩮᩣᩉᨸᩁᩥᨱᩣᩉᩁᩪᨸᩅᨿᩣᨶᩴ ᩈᩩᨶ᩠ᨴᩁᨲᩣᨿ ᩈᨠᩣᩁᩔ ᨧᨠᩣᩁᩴ ᨠᨲ᩠ᩅᩣ ᨧᩩᨶ᩠ᨴᩮᩣᨲᩥ ᨶᩣᨾᩴ ᨠᩁᩥᩴᩈᩩ. ᩈᩮᩣ ᩅᨿᨸ᩠ᨸᨲ᩠ᨲᩮᩣ ᨥᩁᩣᩅᩣᩈᩮ ᩌᨴᩦᨶᩅᩴ ᨸᨻ᩠ᨻᨩ᩠ᨩᩣᨿ ᨧ ᩌᨶᩥᩈᩴᩈᩴ ᨴᩥᩈ᩠ᩅᩣ ᨽᩣᨲᩩᨲ᩠ᨳᩮᩁᩔ ᩈᨶ᩠ᨲᩥᨠᩮ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪑᪒᪕. ᩈᩮᩣ ᨸᨲ᩠ᨲᩋᩁᩉᨲ᩠ᨲᨹᩃᩮᩣ ᩑᨠᨴᩥᩅᩈᩴ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨳᨾᩮᩅ. ᩋᨣ᩠ᨥᩥᨿᨶ᩠ᨲᩥᩌᨴᨿᩮᩣᨸᩥ ᩏᨲ᩠ᨲᩣᨶᨲ᩠ᨳᩣᨿᩮᩅ.

᪑᪒᪘. ᩅᩥᨲᩥᨱ᩠ᨱᨠᨦ᩠ᨡᩮᩣ ᩈᨾ᩠ᨻᩩᨴ᩠ᨵᩮᩣᨲᩥ ᩅᩥᩈᩮᩈᩮᨶ ᨾᨣ᩠ᨣᩣᨵᩥᨣᨾᩮᨶ ᩅᩥᨧᩥᨠᩥᨧ᩠ᨨᩣᨿ ᨡᩮᨸᩥᨲᨲ᩠ᨲᩣ ᩅᩥᨲᩥᨱ᩠ᨱᨠᨦ᩠ᨡᩮᩣ ᩋᩈᩴᩈᨿᩮᩣ ᩈᨾ᩠ᨻᩩᨴ᩠ᨵᩮᩣ. ᨲᩥᨱ᩠ᨱᩮᩣᨥᩮᩉᩥ ᨸᩩᩁᨠ᩠ᨡᨲᩮᩣᨲᩥ ᨠᩣᨾᩮᩣᨥᩣᨴᩦᨶᩴ ᨧᨲᩩᨶ᩠ᨶᩴ ᩒᨥᩣᨶᩴ ᨲᩥᨱ᩠ᨱᨲ᩠ᨲᩣ ᩋᨲᩥᨠ᩠ᨠᨶ᩠ᨲᨲ᩠ᨲᩣ ᩒᨥᨲᩥᨱ᩠ᨱᩮᩉᩥ ¶ ᨡᩦᨱᩣᩈᩅᩮᩉᩥ ᨸᩩᩁᨠ᩠ᨡᨲᩮᩣ ᨸᩁᩥᩅᩣᩁᩥᨲᩮᩣᨲᩥ ᩋᨲ᩠ᨳᩮᩣ. ᨻ᩠ᨿᩣᨠᩁᨱᨣᩣᨳᩣ ᩏᨲ᩠ᨲᩣᨶᨲ᩠ᨳᩣᨿᩮᩅ.

᪑᪓᪙. ᩏᨸᨭ᩠ᨮᩉᩥᩴ ᨾᩉᩣᩅᩦᩁᨶ᩠ᨲᩥ ᩏᨲ᩠ᨲᨾᨲ᩠ᨳᩔ ᨶᩥᨻ᩠ᨻᩣᨶᩔ ᨸᨲ᩠ᨲᩥᨿᩣ ᨸᩣᨸᩩᨱᨶᨲ᩠ᨳᩣᨿ ᨠᨸ᩠ᨸᩈᨲᩈᩉᩔᩣᨵᩥᨠᩮᩈᩩ ᨧᨲᩩᩁᩣᩈᨦ᩠ᨡ᩠ᨿᩮᨿ᩠ᨿᩮᩈᩩ ᨠᨸ᩠ᨸᩮᩈᩩ ᨸᩣᩁᨾᩥᨿᩮᩣ ᨸᩪᩁᩮᨶ᩠ᨲᩮᨶ ᨠᨲᩅᩦᩁᩥᨿᨲ᩠ᨲᩣ ᨾᩉᩣᩅᩦᩁᩴ ᨻᩩᨴ᩠ᨵᩴ ᩏᨸᨭ᩠ᨮᩉᩥᩴ ᩏᨸᨭ᩠ᨮᩣᨶᩴ ᩋᨠᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩋᨬ᩠ᨬᩮ ᨧ ᨸᩮᩈᩃᩮ ᨻᩉᩪᨲᩥ ᨶ ᨠᩮᩅᩃᨾᩮᩅ ᨻᩩᨴ᩠ᨵᩴ ᩏᨸᨭ᩠ᨮᩉᩥᩴ, ᨸᩮᩈᩃᩮ ᨸᩥᨿᩈᩦᩃᩮ ᩈᩦᩃᩅᨶ᩠ᨲᩮ ᩋᨬ᩠ᨬᩮ ᨧ ᨻᩉᩩᩋᨣ᩠ᨣᨸ᩠ᨸᨲ᩠ᨲᩮ ᩈᩣᩅᨠᩮ, ᨾᩮ ᨾᨿ᩠ᩉᩴ ᨽᩣᨲᩁᩴ ᩈᩣᩁᩥᨸᩩᨲ᩠ᨲᨲ᩠ᨳᩮᩁᨬ᩠ᨧ ᩏᨸᨭ᩠ᨮᩉᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

᪑᪔᪐. ᨽᩣᨲᩁᩴ ¶ ᨾᩮ ᩏᨸᨭ᩠ᨮᩉᩥᨲ᩠ᩅᩣᨲᩥ ᨾᨿ᩠ᩉᩴ ᨽᩣᨲᩁᩴ ᩏᨸᨭ᩠ᨮᩉᩥᨲ᩠ᩅᩣ ᩅᨲ᩠ᨲᨸᨭᩥᩅᨲ᩠ᨲᩴ ᨠᨲ᩠ᩅᩣ ᨲᩔ ᨸᩁᩥᨶᩥᨻ᩠ᨻᩩᨲᨠᩣᩃᩮ ᨽᨣᩅᨲᩮᩣ ᨸᨮᨾᩴ ᨸᩁᩥᨶᩥᨻ᩠ᨻᩩᨲᨲ᩠ᨲᩣ ᨲᩔ ᨵᩣᨲᩩᨿᩮᩣ ᨣᩉᩮᨲ᩠ᩅᩣ ᨸᨲ᩠ᨲᨾ᩠ᩉᩥ ᩒᨠᩥᩁᩥᨲ᩠ᩅᩣ ᩃᩮᩣᨠᨩᩮᨭ᩠ᨮᩔ ¶ ᨶᩁᩣᨶᩴ ᩌᩈᨽᩔ ᨻᩩᨴ᩠ᨵᩔ ᩏᨸᨶᩣᨾᩮᩈᩥᩴ ᩋᨴᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪑᪔᪑. ᩏᨽᩮᩣ ᩉᨲ᩠ᨳᩮᩉᩥ ᨸᨣ᩠ᨣᨿ᩠ᩉᩣᨲᩥ ᨲᩴ ᨾᩉᩣ ᨴᩥᨶ᩠ᨶᩴ ᨵᩣᨲᩩᩴ ᩈᩮᩣ ᨽᨣᩅᩣ ᩋᨲ᩠ᨲᨶᩮᩣ ᩏᨽᩮᩣᩉᩥ ᩉᨲ᩠ᨳᩮᩉᩥ ᨸᨠᩣᩁᩮᨶ ᨣᩉᩮᨲ᩠ᩅᩣ ᨲᩴ ᨵᩣᨲᩩᩴ ᩈᩴᩈᩩᨭ᩠ᨮᩩ ᨴᩔᨿᨶ᩠ᨲᩮᩣ ᩋᨣ᩠ᨣᩈᩣᩅᨠᩴ ᩈᩣᩁᩥᨸᩩᨲ᩠ᨲᨲ᩠ᨳᩮᩁᩴ ᨠᩥᨲ᩠ᨲᨿᩥ ᨸᨠᩣᩈᩮᩈᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨧᩩᨶ᩠ᨴᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᨸᨬ᩠ᨧᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᨻᩦᨩᨶᩥᩅᨣ᩠ᨣᩮᩣ

᪑. ᩅᩥᨵᩪᨸᨶᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨠᩴ ¶ ᩌᨿᩈ᩠ᨾᨲᩮᩣ ᩅᩥᨵᩪᨸᨶᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨸᩪᩁᩥᨲᨸᩩᨬ᩠ᨬᩈᨾ᩠ᨽᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩅᩥᨽᩅᩈᨾ᩠ᨸᨶ᩠ᨶᩮᩣ ᩈᨴ᩠ᨵᩣᨩᩣᨲᩮᩣ ᨽᨣᩅᨲᩥ ᨸᩈᨶ᩠ᨶᩮᩣ ᨣᩥᨾ᩠ᩉᨠᩣᩃᩮ ᩈᩩᩅᨱ᩠ᨱᩁᨩᨲᨾᩩᨲ᩠ᨲᩣᨾᨱᩥᨾᨿᩴ ᨻᩦᨩᨶᩥᩴ ᨠᩣᩁᩮᨲ᩠ᩅᩣ ᨽᨣᩅᨲᩮᩣ ᩋᨴᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᩮᩈᩩ ᨧ ᨾᨶᩩᩔᩮᩈᩩ ᨧ ᩈᩴᩈᩁᨶ᩠ᨲᩮᩣ ¶ ᨴ᩠ᩅᩮ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩔ ᩋᨾ᩠ᩉᩣᨠᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩏᨸ᩠ᨸᨶ᩠ᨶᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨥᩁᨻᨶ᩠ᨵᨶᩮᨶ ᨻᨶ᩠ᨵᩥᨲ᩠ᩅᩣ ᨥᩁᩣᩅᩣᩈᩮ ᩌᨴᩦᨶᩅᩴ ᨴᩥᩈ᩠ᩅᩣ ᨸᨻ᩠ᨻᨩ᩠ᨩᩣᨿ ᨧ ᩌᨶᩥᩈᩴᩈᩴ ᨴᩥᩈ᩠ᩅᩣ ᩈᨴ᩠ᨵᩣᩈᨾ᩠ᨸᨶ᩠ᨶᩮᩣ ᩈᩣᩈᨶᩮ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑. ᩈᩮᩣ ‘‘ᨠᩮᨶ ᨾᨿᩣ ᨸᩩᨬ᩠ᨬᨠᨾ᩠ᨾᩮᨶ ᩋᨿᩴ ᩃᩮᩣᨠᩩᨲ᩠ᨲᩁᩈᨾ᩠ᨸᨲ᩠ᨲᩥ ᩃᨴ᩠ᨵᩣ’’ᨲᩥ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩋᨶᩩᩔᩁᨶ᩠ᨲᩮᩣ ᨲᩴ ᨸᨧ᩠ᨧᨠ᩠ᨡᨲᩮᩣ ᨬᨲ᩠ᩅᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨳᨾᩮᩅ. ᨻᩦᨩᨶᩥᨠᩣ ᨾᨿᩣ ᨴᩥᨶ᩠ᨶᩣᨲᩥ ᩅᩥᩈᩮᩈᩮᨶ ᩈᨶ᩠ᨲᩣᨸᨿᨶ᩠ᨲᩣᨶᩴ ᩈᨲ᩠ᨲᩣᨶᩴ ᩈᨶ᩠ᨲᩣᨸᩴ ᨶᩥᨻ᩠ᨻᩣᨸᩮᨶ᩠ᨲᩥ ᩈᩦᨲᩃᩴ ᩅᩣᨲᩴ ᨩᨶᩮᨲᩦᨲᩥ ᨻᩦᨩᨶᩦ, ᨻᩦᨩᨶᩦᨿᩮᩅ ᨻᩦᨩᨶᩥᨠᩣ, ᩈᩣ ᩈᨲ᩠ᨲᩁᨲᨶᨾᨿᩣ ᩅᩥᨩ᩠ᨩᩮᩣᨲᨾᩣᨶᩣ ᨻᩦᨩᨶᩥᨠᩣ ᨾᨿᩣ ᨠᩣᩁᩣᨸᩮᨲ᩠ᩅᩣ ᨴᩥᨶ᩠ᨶᩣᨲᩥ ᩋᨲ᩠ᨳᩮᩣ.

ᩅᩥᨵᩪᨸᨶᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᩈᨲᩁᩴᩈᩥᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩏᨧ᩠ᨧᩥᨿᩴ ᩈᩮᩃᨾᩣᩁᩩᨿ᩠ᩉᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᨲᩁᩴᩈᩥᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨠ᩠ᨠᨭᨻ᩠ᨿᩣᨠᩁᨱᩮ ᩅᩮᨴᨲ᩠ᨲᨿᩮ ᨧ ᨸᩣᩁᨦ᩠ᨣᨲᩮᩣ ᨥᩁᩣᩅᩣᩈᩴ ¶ ᨸᩉᩣᨿ ᩋᩁᨬ᩠ᨬᩴ ᨸᩅᩥᩈᩥᨲ᩠ᩅᩣ ᩍᩈᩥᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩉᩥᨾᩅᨶ᩠ᨲᩮ ᩅᩣᩈᩴ ᨠᨸ᩠ᨸᩮᩈᩥ. ᨲᩈ᩠ᨾᩥᩴ ¶ ᩈᨾᨿᩮ ᨸᨴᩩᨾᩩᨲ᩠ᨲᩁᩮᩣ ᨽᨣᩅᩣ ᩅᩥᩅᩮᨠᨠᩣᨾᨲᩣᨿ ᩏᨧ᩠ᨧᩴ ᩑᨠᩴ ᨸᨻ᩠ᨻᨲᩴ ᩌᩁᩩᨿ᩠ᩉ ᨩᩃᩥᨲᨣ᩠ᨣᩥᨠ᩠ᨡᨶ᩠ᨲᩮᩣ ᩅᩥᨿ ᨶᩥᩈᩦᨴᩥ. ᨲᩴ ᨲᨳᩣᨶᩥᩈᩥᨶ᩠ᨶᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨲᩣᨸᩈᩮᩣ ᩈᩮᩣᨾᨶᩔᨩᩣᨲᩮᩣ ᩋᨬ᩠ᨩᩃᩥᩴ ᨸᨣ᩠ᨣᨿ᩠ᩉ ᩋᨶᩮᨠᩮᩉᩥ ᨠᩣᩁᨱᩮᩉᩥ ᨳᩮᩣᨾᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨲᨲᩮᩣ ᨧᩩᨲᩮᩣ ᨨᩈᩩ ᨠᩣᨾᩣᩅᨧᩁᨴᩮᩅᩮᩈᩩ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᨲᨲᩮᩣ ᨾᨶᩩᩔᩃᩮᩣᨠᩮ ᩈᨲᩁᩴᩈᩦ ᨶᩣᨾ ᨧᨠ᩠ᨠᩅᨲ᩠ᨲᩦ ᩁᩣᨩᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩥ. ᨲᨾ᩠ᨸᩥ ᩈᨾ᩠ᨸᨲ᩠ᨲᩥᩴ ᩋᨶᩮᨠᨠ᩠ᨡᨲ᩠ᨲᩩᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨸᩩᨻ᩠ᨻᨸᩩᨬ᩠ᨬᩈᨾ᩠ᨽᩣᩁᩅᩈᩮᨶ ᨬᩣᨱᩔ ᨸᩁᩥᨸᨠ᩠ᨠᨲ᩠ᨲᩣ ᩈᨲ᩠ᨲᩅᩔᩥᨠᩮᩣᩅ ᨸᨻ᩠ᨻᨩᩥᨲ᩠ᩅᩣ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪘-᪙. ᩈᩮᩣ ¶ ‘‘ᩋᩉᩴ ᨠᩮᨶ ᨠᨾ᩠ᨾᩮᨶ ᩈᨲ᩠ᨲᩅᩔᩥᨠᩮᩣᩅ ᩈᨶ᩠ᨲᩥᨸᨴᩴ ᩋᨶᩩᨸ᩠ᨸᨲ᩠ᨲᩮᩣᩈ᩠ᨾᩦ’’ᨲᩥ ᩈᩁᨾᩣᨶᩮᩣ ᨸᩩᨻ᩠ᨻᨠᨾ᩠ᨾᩴ ᨬᩣᨱᩮᨶ ᨸᨧ᩠ᨧᨠ᩠ᨡᨲᩮᩣ ᨴᩥᩈ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᩏᨴᩣᨶᩅᩈᩮᨶ ᨸᨠᩣᩈᩮᨶ᩠ᨲᩮᩣ ᩏᨧ᩠ᨧᩥᨿᩴ ᩈᩮᩃᨾᩣᩁᩩᨿ᩠ᩉᩣᨲᩥᩌᨴᩥᨾᩣᩉ. ᨲᨲ᩠ᨳ ᩏᨧ᩠ᨧᩥᨿᨶ᩠ᨲᩥ ᩏᨧ᩠ᨧᩴ ᩈᩮᩃᨾᨿᩴ ᨸᨻ᩠ᨻᨲᩴ ᩌᩁᩩᨿ᩠ᩉ ᨶᩥᩈᩦᨴᩥ ᨸᨴᩩᨾᩩᨲ᩠ᨲᩁᩮᩣᨲᩥ ᩈᨾ᩠ᨻᨶ᩠ᨵᩮᩣ. ᨸᨻ᩠ᨻᨲᩔᩣᩅᩥᨴᩪᩁᨾ᩠ᩉᩦᨲᩥ ᨽᨣᩅᨲᩮᩣ ᨶᩥᩈᩥᨶ᩠ᨶᩔ ᨸᨻ᩠ᨻᨲᩔ ᩌᩈᨶ᩠ᨶᨭ᩠ᨮᩣᨶᩮᨲᩥ ᩋᨲ᩠ᨳᩮᩣ. ᨻᩕᩣᩉ᩠ᨾᨱᩮᩣ ᨾᨶ᩠ᨲᨸᩣᩁᨣᩪᨲᩥ ᨾᨶ᩠ᨲᩈᨦ᩠ᨡᩣᨲᩔ ᩅᩮᨴᨲ᩠ᨲᨿᩔ ᨸᩣᩁᩴ ᨸᩁᩥᨿᩮᩣᩈᩣᨶᩴ ᨠᩮᩣᨭᩥᩴ ᨣᨲᩮᩣ ᩑᨠᩮᩣ ᨻᩕᩣᩉ᩠ᨾᨱᩮᩣᨲᩥ ᩋᨲ᩠ᨳᩮᩣ, ᩋᨬ᩠ᨬᩴ ᩅᩥᨿ ᩋᨲ᩠ᨲᩣᨶᩴ ᨶᩥᨴ᩠ᨴᩥᩈᨲᩥ ᩋᨿᩴ ᨾᨶ᩠ᨲᨸᩣᩁᨣᩪᨲᩥ. ᩏᨸᩅᩥᨭ᩠ᨮᩴ ᨾᩉᩣᩅᩦᩁᨶ᩠ᨲᩥ ᨲᩈ᩠ᨾᩥᩴ ᨸᨻ᩠ᨻᨲᩮ ᨶᩥᩈᩥᨶ᩠ᨶᩴ ᩅᩦᩁᩅᨶ᩠ᨲᩴ ᨩᩥᨶᩴ, ᨠᩥᩴ ᩅᩥᩈᩥᨭ᩠ᨮᩴ? ᨴᩮᩅᨴᩮᩅᩴ ᩈᨠᩃᨨᨠᩣᨾᩣᩅᨧᩁᨻᩕᩉ᩠ᨾᨴᩮᩅᩣᨶᩴ ᩋᨲᩥᨴᩮᩅᩴ ᨶᩁᩣᩈᨽᩴ ᨶᩁᩣᨶᩴ ᩌᩈᨲᩴ ᩈᩮᨭ᩠ᨮᩴ ᩃᩮᩣᨠᨶᩣᨿᨠᩴ ᩈᨠᩃᩈᨲ᩠ᨲᩃᩮᩣᨠᩴ ᨶᨿᨶ᩠ᨲᩴ ᨶᩥᨻ᩠ᨻᩣᨶᩴ ᨸᩣᨸᩮᨶ᩠ᨲᩴ ᩋᩉᩴ ᩋᨬ᩠ᨩᩃᩥᩴ ᨴᩈᨶᨡᩈᨾᩮᩣᨵᩣᨶᨬ᩠ᨩᩃᩥᨸᩩᨭᩴ ᩈᩥᩁᩈᩥ ᨾᩩᨴ᩠ᨵᨶᩥ ᨸᨣ᩠ᨣᩉᩮᨲ᩠ᩅᩣᨶ ᨸᨲᩥᨭ᩠ᨮᨸᩮᨲ᩠ᩅᩣ ᩈᨶ᩠ᨳᩅᩥᩴ ᩈᩩᨭ᩠ᨮᩩᩴ ᨳᩮᩣᨾᩮᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

᪑᪒. ᩋᨽᩣᩈᨳᩣᨲᩥ ‘‘ᨿᩮᨶᩣᨿᩴ ᩋᨬ᩠ᨩᩃᩦ ᨴᩥᨶ᩠ᨶᩮᩣ…ᨸᩮ… ᩋᩁᩉᩣ ᩈᩮᩣ ᨽᩅᩥᩔᨲᩦ’’ᨲᩥ ᨻ᩠ᨿᩣᨠᩣᩈᩥ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩈᨲᩁᩴᩈᩥᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᩈᨿᨶᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᨿᨶᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ¶ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᩈᩩᨡᨾᨶᩩᨽᩅᨶ᩠ᨲᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨴᨶ᩠ᨲᩈᩩᩅᨱ᩠ᨱᩁᨩᨲᨾᩩᨲ᩠ᨲᨾᨱᩥᨾᨿᩴ ᨾᩉᩣᩁᩉᩴ ᨾᨬ᩠ᨧᩴ ᨠᩣᩁᩣᨸᩮᨲ᩠ᩅᩣ ᨧᩦᨶᨸᨭ᩠ᨭᨠᨾ᩠ᨻᩃᩣᨴᩦᨶᩥ ᩋᨲ᩠ᨳᩁᩥᨲ᩠ᩅᩣ ᩈᨿᨶᨲ᩠ᨳᩣᨿ ᨽᨣᩅᨲᩮᩣ ᩋᨴᩣᩈᩥ. ᨽᨣᩅᩣ ᨲᩔ ᩋᨶᩩᨣ᩠ᨣᩉᩴ ᨠᩁᩮᩣᨶ᩠ᨲᩮᩣ ᨲᨲ᩠ᨳ ᩈᨿᩥ ¶ . ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᨲᨴᨶᩩᩁᩪᨸᩴ ᩌᨠᩣᩈᨣᨾᨶᩈᩩᨡᩈᩮᨿ᩠ᨿᩣᨴᩥᩈᩩᨡᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩅᩥᨬ᩠ᨬᩩᨲᩴ ᨸᩣᨸᩩᨱᩥᨲ᩠ᩅᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶ᩠ᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪒᪐. ᩈᩮᩣ ¶ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨳᨾᩮᩅ.

᪒᪑. ᩈᩩᨡᩮᨲ᩠ᨲᩮ ᨻᩦᨩᩈᨾ᩠ᨸᨴᩣᨲᩥ ᨿᨳᩣ ᨲᩥᨱᨠᨧᩅᩁᩁᩉᩥᨲᩮ ᨠᨴ᩠ᨴᨾᩣᨴᩥᩈᨾ᩠ᨸᨶ᩠ᨶᩮ ᩈᩩᨡᩮᨲ᩠ᨲᩮ ᩅᩩᨲ᩠ᨲᨻᩦᨩᩣᨶᩥ ᩈᩣᨴᩩᨹᩃᩣᨶᩥ ᨶᩥᨸ᩠ᨹᩣᨴᩮᨶ᩠ᨲᩥ, ᩑᩅᨾᩮᩅ ᩁᩣᨣᨴᩮᩣᩈᩣᨴᩥᨴᩥᨿᨯ᩠ᨰᩈᩉᩔᨠᩥᩃᩮᩈᩈᨦ᩠ᨡᩣᨲᨲᩥᨱᨠᨧᩅᩁᩁᩉᩥᨲᩮ ᩈᩩᨴ᩠ᨵᩈᨶ᩠ᨲᩣᨶᩮ ᨸᩩᨬ᩠ᨬᨠ᩠ᨡᩮᨲ᩠ᨲᩮ ᩅᩩᨲ᩠ᨲᨴᩣᨶᩣᨶᩥ ᩋᨸ᩠ᨸᩣᨶᩥᨸᩥ ᩈᨾᩣᨶᩣᨶᩥ ᨾᩉᨸ᩠ᨹᩃᩣᨶᩥ ᩉᩮᩣᨶ᩠ᨲᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩈᨿᨶᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᨣᨶ᩠ᨵᩮᩣᨴᨠᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨣᨶ᩠ᨵᩮᩣᨴᨠᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨾᩩᨶᩥᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨸᩁᩥᨶᩥᨻ᩠ᨻᩩᨲᩮ ᨽᨣᩅᨲᩥ ᨶᨣᩁᩅᩣᩈᩥᨶᩮᩣ ᨻᩮᩣᨵᩥᨸᩪᨩᩴ ᨠᩩᩁᩩᨾᩣᨶᩮ ᨴᩥᩈ᩠ᩅᩣ ᩅᩥᨧᩥᨲ᩠ᨲᨥᨭᩮ ᨧᨶ᩠ᨴᨶᨠᨸ᩠ᨸᩩᩁᩣᨣᩁᩩᩌᨴᩥᨾᩥᩔᨠᩈᩩᨣᨶ᩠ᨵᩮᩣᨴᨠᩮᨶ ᨸᩪᩁᩮᨲ᩠ᩅᩣ ᨻᩮᩣᨵᩥᩁᩩᨠ᩠ᨡᩴ ᩋᨽᩥᩈᩥᨬ᩠ᨧᩥ. ᨲᩈ᩠ᨾᩥᩴ ᨡᨱᩮ ᨴᩮᩅᩮᩣ ᨾᩉᩣᨵᩣᩁᩣᩉᩥ ᨸᩅᩔᩥ. ᨲᨴᩣ ᩈᩮᩣ ᩋᩈᨶᩥᩅᩮᨣᩮᨶ ᨠᩣᩃᩴ ᨠᨲᩮᩣ. ᨲᩮᨶᩮᩅ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩥ, ᨲᨲ᩠ᨳᩮᩅ ᨮᩥᨲᩮᩣ ‘‘ᩋᩉᩮᩣ ᨻᩩᨴ᩠ᨵᩮᩣ, ᩋᩉᩮᩣ ᨵᨾ᩠ᨾᩮᩣ’’ᨲᩥᩌᨴᩥᨣᩣᨳᩣᨿᩮᩣ ᩋᨽᩣᩈᩥ. ᩑᩅᩴ ᩈᩮᩣ ᨴᩮᩅᨾᨶᩩᩔᩮᩈᩩ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩈᨻ᩠ᨻᨸᩁᩥᩊᩣᩉᩅᩥᨸ᩠ᨸᨾᩩᨲ᩠ᨲᩮᩣ ᨶᩥᨻ᩠ᨻᨲ᩠ᨲᨶᩥᨻ᩠ᨻᨲ᩠ᨲᨭ᩠ᨮᩣᨶᩮ ᩈᩦᨲᩥᨽᩣᩅᨾᩩᨸᨣᨲᩮᩣ ᩈᩩᨡᩥᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ¶ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨠᨾ᩠ᨾᨭ᩠ᨮᩣᨶᩴ ᩌᩁᨽᩥᨲ᩠ᩅᩣ ᩅᩥᨸᩔᨶ᩠ᨲᩮᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ. ᨸᩩᨻ᩠ᨻᩮ ᨠᨲᨸᩩᨬ᩠ᨬᩮᨶ ᨣᨶ᩠ᨵᩮᩣᨴᨠᩥᨿᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ ᩋᩉᩮᩣᩈᩥ.

᪒᪕. ᩈᩮᩣ ᩑᨠᨴᩥᩅᩈᩴ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲᩁᩔᩣᨲᩥᩌᨴᩥᨾᩣᩉ. ᨲᩴ ᩅᩩᨲ᩠ᨲᨲ᩠ᨳᨾᩮᩅ. ᨾᩉᩣᨻᩮᩣᨵᩥᨾᩉᩮᩣ ᩋᩉᩪᨲᩥ ᨾᩉᩣᨻᩮᩣᨵᩥᩁᩩᨠ᩠ᨡᩔ ᨸᩪᨩᩣ ᩋᩉᩮᩣᩈᩦᨲᩥ ᩋᨲ᩠ᨳᩮᩣ. ᩅᩥᨧᩥᨲ᩠ᨲᩴ ᨥᨭᨾᩣᨴᩣᨿᩣᨲᩥ ᩋᨶᩮᨠᩮᩉᩥ ᨧᩥᨲ᩠ᨲᨠᨾ᩠ᨾᩈᩩᩅᨱ᩠ᨱᨠᨾ᩠ᨾᩮᩉᩥ ᩅᩥᨧᩥᨲ᩠ᨲᩴ ᩈᩮᩣᨽᨾᩣᨶᩴ ᨣᨶ᩠ᨵᩮᩣᨴᨠᨸᩩᨱ᩠ᨱᩴ ᨥᨭᩴ ᨣᩉᩮᨲ᩠ᩅᩣᨲᩥ ᩋᨲ᩠ᨳᩮᩣ ¶ . ᨣᨶ᩠ᨵᩮᩣᨴᨠᨾᨴᩣᩈᩉᨶ᩠ᨲᩥ ᨣᨶ᩠ᨵᩮᩣᨴᨠᩴ ᩋᨴᩣᩈᩥᩴ, ᩋᩉᩴ ᨣᨶ᩠ᨵᩮᩣᨴᨠᩮᨶ ᩋᨽᩥᩈᩥᨬ᩠ᨧᩥᨶ᩠ᨲᩥ ᩋᨲ᩠ᨳᩮᩣ.

᪒᪖. ᨶ᩠ᩉᩣᨶᨠᩣᩃᩮ ¶ ᨧ ᨻᩮᩣᨵᩥᨿᩣᨲᩥ ᨻᩮᩣᨵᩥᨿᩣ ᨸᩪᨩᩣᨠᩁᨱᩈᨾᨿᩮᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨣᨶ᩠ᨵᩮᩣᨴᨠᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᩒᨸᩅᨿ᩠ᩉᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩒᨸᩅᨿ᩠ᩉᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᨩᩥᨶᩣᨴᩥᨧ᩠ᨧᩮ ᩃᩮᩣᨠᩮ ᨸᩣᨲᩩᨽᩪᨲᩮ ᩑᨠᩈ᩠ᨾᩥᩴ ᩅᩥᨽᩅᩈᨾ᩠ᨸᨶ᩠ᨶᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨾᩉᨴ᩠ᨵᨶᩮᩣ ᨾᩉᩣᨽᩮᩣᨣᩮᩣ ᨥᩁᩣᩅᩣᩈᩴ ᩅᩈᨾᩣᨶᩮᩣ ᩈᩣᩈᨶᩮ ᨸᩈᨶ᩠ᨶᩮᩣ ᩈᨲ᩠ᨳᩁᩥ ᨸᩈᩣᨴᨻᩉᩩᨾᩣᨶᩮᩣ ᩌᨩᩣᨶᩦᨿᩮᨶ ᩈᩥᨶ᩠ᨵᩅᩮᨶ ᨸᩪᨩᩴ ᩋᨠᩣᩈᩥ, ᨸᩪᨩᩮᨲ᩠ᩅᩣ ᨧ ᨸᨶ ‘‘ᨻᩩᨴ᩠ᨵᩣᨴᩦᨶᩴ ᩈᨾᨱᩣᨶᩴ ᩉᨲ᩠ᨳᩥᩋᩔᩣᨴᨿᩮᩣ ᨶ ᨠᨸ᩠ᨸᨶ᩠ᨲᩥ, ᨠᨸ᩠ᨸᩥᨿᨽᨱ᩠ᨯᩴ ᨴᩔᩣᨾᩦ’’ᨲᩥ ᨧᩥᨶ᩠ᨲᩮᨲ᩠ᩅᩣ ᨲᩴ ᩋᨣ᩠ᨥᩣᨸᩮᨲ᩠ᩅᩣ ᨲᨴᨣ᩠ᨥᨶᨠᩮᨶ ᨠᩉᩣᨸᨱᩮᨶ ᨠᨸ᩠ᨸᩥᨿᩴ ᨠᨸ᩠ᨸᩣᩈᩥᨠᨠᨾ᩠ᨻᩃᨠᩮᩣᨩᩅᩣᨴᩥᨠᩴ ᨧᩦᩅᩁᩴ ᨠᨸ᩠ᨸᩪᩁᨲᨠ᩠ᨠᩮᩣᩃᩣᨴᩥᨠᩴ ᨽᩮᩈᨩ᩠ᨩᨸᩁᩥᨠ᩠ᨡᩣᩁᨬ᩠ᨧ ᩋᨴᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᨲᨲᩮᩣ ᨧᩩᨲᩮᩣ ᨴᩮᩅᩮᩈᩩ ᨧ ᨾᨶᩩᩔᩮᩈᩩ ᨧ ᩉᨲ᩠ᨳᩥᩋᩔᩣᨴᩥᩋᨶᩮᨠᩅᩣᩉᨶᩈᨾ᩠ᨸᨶ᩠ᨶᩮᩣ ᩈᩩᨡᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨴ᩠ᨵᩣᩈᨾ᩠ᨸᨶ᩠ᨶᩮᩣ ᩈᩣᩈᨶᩮ ᨸᨻ᩠ᨻᨩᩥᨲ᩠ᩅᩣ ᨠᨾ᩠ᨾᨭ᩠ᨮᩣᨶᩴ ᨣᩉᩮᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨾᨣ᩠ᨣᨸᨭᩥᨸᩣᨭᩥᨿᩣ ᩋᩁᩉᨲ᩠ᨲᩮ ᨸᨲᩥᨭ᩠ᨮᩣᩈᩥ, ᨸᩩᨻ᩠ᨻᩮ ᨠᨲᨸᩩᨬ᩠ᨬᩈᨾ᩠ᨽᩣᩁᩅᩈᩮᨶ ᩒᨸᩅᨿ᩠ᩉᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ ᩋᩉᩮᩣᩈᩥ.

᪓᪓. ᩈᩮᩣ ‘‘ᨠᩮᨶ ᨶᩩ ᨡᩮᩣ ᨠᩣᩁᨱᩮᨶ ᩍᨴᩴ ᨾᨿᩣ ᩈᨶ᩠ᨲᩥᨸᨴᩴ ᩋᨵᩥᨣᨲ’’ᨶ᩠ᨲᩥ ᩏᨸᨵᩣᩁᩮᨶ᩠ᨲᩮᩣ ᨸᩩᨻ᩠ᨻᨠᨾ᩠ᨾᩴ ¶ ᨬᩣᨱᩮᨶ ᨸᨧ᩠ᨧᨠ᩠ᨡᨲᩮᩣ ᨬᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᩏᨴᩣᨶᩅᩈᩮᨶ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨾᩣᩉ. ᨲᩴ ᩅᩩᨲ᩠ᨲᨲ᩠ᨳᨾᩮᩅ. ᩌᨩᩣᨶᩦᨿᨾᨴᩣᩈᩉᨶ᩠ᨲᩥ ᩌᨩᩣᨶᩦᨿᩴ ᩏᨲ᩠ᨲᨾᨩᩣᨲᩥᩈᩥᨶ᩠ᨵᩅᩴ ᩋᩉᩴ ᩋᨴᩣᩈᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪓᪕. ᩈᨸᨲ᩠ᨲᨽᩣᩁᩮᩣᨲᩥ ᩈᩔ ᩋᨲ᩠ᨲᨶᩮᩣ ᨸᨲ᩠ᨲᩣᨶᩥ ᩋᨭ᩠ᨮ ᨸᩁᩥᨠ᩠ᨡᩣᩁᩣᨶᩥ ᨽᩣᩁᩣᨶᩥ ᨿᩔ ᩈᩮᩣ ᩈᨸᨲ᩠ᨲᨽᩣᩁᩮᩣ, ᩋᨭ᩠ᨮᨸᩁᩥᨠ᩠ᨡᩣᩁᨿᩩᨲ᩠ᨲᩮᩣᨲᩥ ᩋᨲ᩠ᨳᩮᩣ.

᪓᪖. ᨡᨾᨶᩦᨿᨾᨴᩣᩈᩉᨶ᩠ᨲᩥ ¶ ᨡᨾᨶᩦᨿᨿᩮᩣᨣ᩠ᨣᩴ ᨧᩦᩅᩁᩣᨴᩥᨠᨸ᩠ᨸᩥᨿᨸᩁᩥᨠ᩠ᨡᩣᩁᨶ᩠ᨲᩥ ᩋᨲ᩠ᨳᩮᩣ.

᪔᪐. ᨧᩁᩥᨾᩮᩣᨲᩥ ᨸᩁᩥᨿᩮᩣᩈᩣᨶᩮᩣ ᨠᩮᩣᨭᩥᨸ᩠ᨸᨲ᩠ᨲᩮᩣ ᨽᩅᩮᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩒᨸᩅᨿ᩠ᩉᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᩈᨸᩁᩥᩅᩣᩁᩣᩈᨶᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᨸᩁᩥᩅᩣᩁᩣᩈᨶᨲ᩠ᨳᩮᩁᩔ ᩋᨸᨴᩣᨶᩴ. ᩈᩮᩣᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ¶ ᨲᨲ᩠ᨳ ᨽᩅᩮᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩅᩥᨽᩅᩈᨾ᩠ᨸᨶ᩠ᨶᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨴ᩠ᨵᩣᨩᩣᨲᩮᩣ ᩈᩣᩈᨶᩮ ᨸᩈᨶ᩠ᨶᩮᩣ ᨴᩣᨶᨹᩃᩴ ᩈᨴ᩠ᨴᩉᨶ᩠ᨲᩮᩣ ᨶᩣᨶᨣ᩠ᨣᩁᩈᨽᩮᩣᨩᨶᩮᨶ ᨽᨣᩅᨲᩮᩣ ᨸᩥᨱ᩠ᨯᨸᩣᨲᩴ ᩋᨴᩣᩈᩥ, ᨴᨲ᩠ᩅᩣ ᨧ ᨸᨶ ᨽᩮᩣᨩᨶᩈᩣᩃᩣᨿᩴ ᨽᩮᩣᨩᨶᨲ᩠ᨳᩣᨿ ᨶᩥᩈᩥᨶ᩠ᨶᩣᩈᨶᩴ ᨩᩣᨲᩥᩈᩩᨾᨶᨾᩃ᩠ᩃᩥᨠᩣᨴᩦᩉᩥ ᩋᩃᨦ᩠ᨠᩁᩥ. ᨽᨣᩅᩣ ᨧ ᨽᨲ᩠ᨲᩣᨶᩩᨾᩮᩣᨴᨶᨾᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩋᨶᩮᨠᩅᩥᨵᩴ ᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨴ᩠ᨵᩮᩣ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶ ᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪔᪓. ᩈᩮᩣ ᩑᩅᩴ ᨸᨲ᩠ᨲᩈᨶ᩠ᨲᩥᨸᨴᩮᩣ ‘‘ᨠᩮᨶ ᨶᩩ ᨡᩮᩣ ᨸᩩᨬ᩠ᨬᩮᨶ ᩍᨴᩴ ᩈᨶ᩠ᨲᩥᨸᨴᩴ ᩋᨶᩩᨸ᩠ᨸᨲ᩠ᨲ’’ᨶ᩠ᨲᩥ ᨬᩣᨱᩮᨶ ᩏᨸᨵᩣᩁᩮᨶ᩠ᨲᩮᩣ ᨸᩩᨻ᩠ᨻᨠᨾ᩠ᨾᩴ ᨴᩥᩈ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨾᩣᩉ. ᨲᩴ ᩅᩩᨲ᩠ᨲᨲ᩠ᨳᨾᩮᩅ. ᨸᩥᨱ᩠ᨯᨸᩣᨲᩴ ᩋᨴᩣᩈᩉᨶ᩠ᨲᩥ ᨲᨲ᩠ᨳ ᨲᨲ᩠ᨳ ᩃᨴ᩠ᨵᩣᨶᩴ ᨸᩥᨱ᩠ᨯᩣᨶᩴ ᨠᨻᩊᩴ ᨠᨻᩊᩴ ᨠᨲ᩠ᩅᩣ ᨸᩣᨲᨻ᩠ᨻᨲᩮᩣ ᨡᩣᨴᩥᨲᨻ᩠ᨻᨲᩮᩣ ᩌᩉᩣᩁᩮᩣ ᨸᩥᨱ᩠ᨯᨸᩣᨲᩮᩣ, ᨲᩴ ᨸᩥᨱ᩠ᨯᨸᩣᨲᩴ ᨽᨣᩅᨲᩮᩣ ᩋᨴᩣᩈᩥᩴ, ᨽᨣᩅᨶ᩠ᨲᩴ ᨽᩮᩣᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪔᪔. ᩋᨠᩥᨲ᩠ᨲᨿᩥ ¶ ᨸᩥᨱ᩠ᨯᨸᩣᨲᨶ᩠ᨲᩥ ᨾᨿᩣ ᨴᩥᨶ᩠ᨶᨸᩥᨱ᩠ᨯᨸᩣᨲᩔ ᨣᩩᨱᩴ ᩌᨶᩥᩈᩴᩈᩴ ᨸᨠᩣᩈᩮᩈᩦᨲᩥ ᩋᨲ᩠ᨳᩮᩣ.

᪔᪘. ᩈᩴᩅᩩᨲᩮᩣ ᨸᩣᨲᩥᨾᩮᩣᨠ᩠ᨡᩈ᩠ᨾᩥᨶ᩠ᨲᩥ ᨸᩣᨲᩥᨾᩮᩣᨠ᩠ᨡᩈᩴᩅᩁᩈᩦᩃᩮᨶ ᩈᩴᩅᩩᨲᩮᩣ ᨸᩥᩉᩥᨲᩮᩣ ᨸᨭᩥᨧ᩠ᨨᨶ᩠ᨶᩮᩣᨲᩥ ᩋᨲ᩠ᨳᩮᩣ. ᩍᨶ᩠ᨴᩕᩥᨿᩮᩈᩩ ᨧ ᨸᨬ᩠ᨧᩈᩪᨲᩥ ᨧᨠ᩠ᨡᩩᨶ᩠ᨴᩕᩥᨿᩣᨴᩦᩈᩩ ᨸᨬ᩠ᨧᩈᩩ ¶ ᩍᨶ᩠ᨴᩕᩥᨿᩮᩈᩩ ᩁᩪᨸᩣᨴᩦᩉᩥ ᨣᩮᩣᨸᩥᨲᩮᩣ ᩍᨶ᩠ᨴᩕᩥᨿᩈᩴᩅᩁᩈᩦᩃᨬ᩠ᨧ ᨣᩮᩣᨸᩥᨲᩮᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩈᨸᩁᩥᩅᩣᩁᩣᩈᨶᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᨸᨬ᩠ᨧᨴᩦᨸᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᨬ᩠ᨧᨴᩦᨸᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᨽᩅᩮᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨥᩁᩣᩅᩣᩈᩮ ᩅᩈᨶ᩠ᨲᩮᩣ ᨽᨣᩅᨲᩮᩣ ᨵᨾ᩠ᨾᩴ ᩈᩩᨲ᩠ᩅᩣ ᩈᨾ᩠ᨾᩣᨴᩥᨭ᩠ᨮᩥᨿᩴ ᨸᨲᩥᨭ᩠ᨮᩥᨲᩮᩣ ᩈᨴ᩠ᨵᩮᩣ ᨸᩈᨶ᩠ᨶᩮᩣ ᨾᩉᩣᨩᨶᩮᩉᩥ ᨻᩮᩣᨵᩥᨸᩪᨩᩴ ᨠᨿᩥᩁᨾᩣᨶᩴ ᨴᩥᩈ᩠ᩅᩣ ᩈᨿᨾ᩠ᨸᩥ ᨻᩮᩣᨵᩥᩴ ᨸᩁᩥᩅᩣᩁᩮᨲ᩠ᩅᩣ ᨴᩦᨸᩴ ᨩᩣᩃᩮᨲ᩠ᩅᩣ ᨸᩪᨩᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᨧᨠ᩠ᨠᩅᨲ᩠ᨲᩥᩈᨾ᩠ᨸᨲ᩠ᨲᩥᩌᨴᨿᩮᩣ ᩋᨶᩩᨽᩅᩥᨲ᩠ᩅᩣ ᩈᨻ᩠ᨻᨲ᩠ᨳᩮᩅ ᩏᨸ᩠ᨸᨶ᩠ᨶᨽᩅᩮ ᨩᩃᨾᩣᨶᩮᩣ ᨩᩮᩣᨲᩥᩈᨾ᩠ᨸᨶ᩠ᨶᩅᩥᨾᩣᨶᩣᨴᩦᩈᩩ ᩅᩈᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᩅᩥᨽᩅᩈᨾ᩠ᨸᨶ᩠ᨶᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ, ᨴᩦᨸᨸᩪᨩᩣᨶᩥᩔᨶ᩠ᨴᩮᨶ ᨴᩦᨸᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪕᪐. ᩈᩮᩣ ¶ ᩑᨠᨴᩥᩅᩈᩴ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨾᩣᩉ. ᨲᩴ ᩅᩩᨲ᩠ᨲᨲ᩠ᨳᨾᩮᩅ. ᩏᨩᩩᨴᩥᨭ᩠ᨮᩥ ᩋᩉᩮᩣᩈᩉᨶ᩠ᨲᩥ ᩅᨦ᩠ᨠᩴ ᨾᩥᨧ᩠ᨨᩣᨴᩥᨭ᩠ᨮᩥᩴ ᨨᨯ᩠ᨯᩮᨲ᩠ᩅᩣ ᩏᨩᩩ ᩋᩅᨦ᩠ᨠᩴ ᨶᩥᨻ᩠ᨻᩣᨶᩣᨽᩥᨾᩩᨡᩴ ᨸᩣᨸᩩᨱᨶᩈᨾ᩠ᨾᩣᨴᩥᨭ᩠ᨮᩥ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪕᪑. ᨸᨴᩦᨸᨴᩣᨶᩴ ᨸᩣᨴᩣᩈᩥᨶ᩠ᨲᩥ ᩑᨲ᩠ᨳ ᨸᨠᩣᩁᩮᨶ ᨴᩥᨻ᩠ᨻᨲᩥ ᨩᩮᩣᨲᨲᩦᨲᩥ ᨸᨴᩦᨸᩮᩣ, ᨲᩔ ᨴᩣᨶᩴ ᨸᨴᩦᨸᨴᩣᨶᩴ, ᨲᩴ ᩋᨴᩣᩈᩥᩴ ᨸᨴᩦᨸᨸᩪᨩᩴ ᩋᨠᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨸᨬ᩠ᨧᨴᩦᨸᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᨵᨩᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨠᩴ ¶ ¶ ᩌᨿᩈ᩠ᨾᨲᩮᩣ ᨵᨩᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᩈᩩᨶ᩠ᨴᩁᩮᩉᩥ ᩋᨶᩮᨠᩮᩉᩥ ᩅᨲ᩠ᨳᩮᩉᩥ ᨵᨩᩴ ᨠᩣᩁᩣᨸᩮᨲ᩠ᩅᩣ ᨵᨩᨸᩪᨩᩴ ᩋᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᨽᩅᩮ ᩏᨧ᩠ᨧᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᨸᩪᨩᨶᩥᨿᩮᩣ ᩋᩉᩮᩣᩈᩥ. ᩋᨸᩁᨽᩣᨣᩮ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨸᩩᨲ᩠ᨲᨴᩣᩁᩮᩉᩥ ᩅᨯ᩠ᨰᩥᨲ᩠ᩅᩣ ᨾᩉᩣᨽᩮᩣᨣᩮᩣ ᨿᩈᩅᩣ ᩈᨴ᩠ᨵᩣᨩᩣᨲᩮᩣ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨥᩁᩣᩅᩣᩈᩴ ᨸᩉᩣᨿ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪕᪗. ᩈᩮᩣ ᨸᨲ᩠ᨲᩋᩁᩉᨲ᩠ᨲᨹᩃᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨾᩣᩉ. ᨲᩔᨲ᩠ᨳᩮᩣ ᨸᩩᨻ᩠ᨻᩮ ᩅᩩᨲ᩠ᨲᩮᩣᨿᩮᩅ. ᩉᨭ᩠ᨮᩮᩣ ᩉᨭ᩠ᨮᩮᨶ ᨧᩥᨲ᩠ᨲᩮᨶᩣᨲᩥ ᩈᩮᩣᨾᨶᩔᩈᩉᨣᨲᨧᩥᨲ᩠ᨲᨿᩩᨲ᩠ᨲᨲ᩠ᨲᩣ ᩉᨭ᩠ᨮᩮᩣ ᨸᩁᩥᨸᩩᨱ᩠ᨱᩁᩪᨸᨠᩣᨿᩮᩣ ᩈᨴ᩠ᨵᩣᩈᨾ᩠ᨸᨿᩩᨲ᩠ᨲᨧᩥᨲ᩠ᨲᨲᩣᨿ ᩉᨭ᩠ᨮᩮᨶ ᨧᩥᨲ᩠ᨲᩮᨶ ᩈᨶ᩠ᨲᩩᨭ᩠ᨮᩮᨶ ᨧᩥᨲ᩠ᨲᩮᨶᩣᨲᩥ ᩋᨲ᩠ᨳᩮᩣ. ᨵᨩᨾᩣᩁᩮᩣᨸᨿᩥᩴ ᩋᩉᨶ᩠ᨲᩥ ᨵᩩᨶᩣᨲᩥ ᨠᨾ᩠ᨸᨲᩥ ᨧᩃᨲᩦᨲᩥ ᨵᨩᩴ, ᨲᩴ ᨵᨩᩴ ᩌᩁᩮᩣᨸᨿᩥᩴ ᩅᩮᩊᨣ᩠ᨣᩮ ᩃᨣ᩠ᨣᩮᨲ᩠ᩅᩣ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪕᪘-᪙. ᨸᨲᩥᨲᨸᨲ᩠ᨲᩣᨶᩥ ᨣᨱ᩠ᩉᩥᨲ᩠ᩅᩣᨲᩥ ᨸᨲᩥᨲᩣᨶᩥ ᨻᩮᩣᨵᩥᨸᨲ᩠ᨲᩣᨶᩥ ᨣᩉᩮᨲ᩠ᩅᩣ ᩋᩉᩴ ᨻᩉᩥ ᨨᨯ᩠ᨯᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩋᨶ᩠ᨲᩮᩣᩈᩩᨴ᩠ᨵᩴ ᨻᩉᩥᩈᩩᨴ᩠ᨵᨶ᩠ᨲᩥ ᩋᨶ᩠ᨲᩮᩣ ᨧᩥᨲ᩠ᨲᩈᨶ᩠ᨲᩣᨶᨶᩣᨾᨠᩣᨿᨲᩮᩣ ᨧ ᨻᩉᩥ ᨧᨠ᩠ᨡᩩᩈᩮᩣᨲᩣᨴᩥᩁᩪᨸᨠᩣᨿᨲᩮᩣ ᨧ ᩈᩩᨴ᩠ᨵᩥᩴ ᩋᨵᩥ ᩅᩥᩈᩮᩈᩮᨶ ᨾᩩᨲ᩠ᨲᩴ ᨠᩥᩃᩮᩈᨲᩮᩣ ᩅᩥᨾᩩᨲ᩠ᨲᩴ ᩋᨶᩣᩈᩅᩴ ᩈᨾ᩠ᨻᩩᨴ᩠ᨵᩴ ᩅᩥᨿ ᩈᨾ᩠ᨾᩩᨡᩣ ᩏᨲ᩠ᨲᨾᩴ ᨻᩮᩣᨵᩥᩴ ᩋᩅᨶ᩠ᨴᩥᩴ ᨸᨱᩣᨾᨾᨠᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨵᨩᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᨸᨴᩩᨾᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨧᨲᩩᩈᨧ᩠ᨧᩴ ᨸᨠᩣᩈᩮᨶ᩠ᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᨴᩩᨾᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᨠᩩᩈᩃᩈᨾ᩠ᨽᩣᩁᩮᩣ ᨸᨴᩩᨾᩩᨲ᩠ᨲᩁᨾᩩᨶᩥᨶᩣ ¶ ᨵᨾ᩠ᨾᨸᨩ᩠ᨩᩮᩣᨲᩮ ᨩᩮᩣᨲᨾᩣᨶᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ¶ ᨽᩮᩣᨣᩈᨾ᩠ᨸᨶ᩠ᨶᩮᩣᨲᩥ ᨸᩣᨠᨭᩮᩣ. ᩈᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨾᩉᩣᨩᨶᩮᨶ ᩈᨴ᩠ᨵᩥᩴ ᨵᨾ᩠ᨾᩴ ᩈᩩᨱᨶ᩠ᨲᩮᩣ ᨵᨩᩮᨶ ᩈᩉ ᨸᨴᩩᨾᨠᩃᩣᨸᩴ ᨣᩉᩮᨲ᩠ᩅᩣ ᩋᨭ᩠ᨮᩣᩈᩥ, ᩈᨵᨩᩴ ᨲᩴ ᨸᨴᩩᨾᨠᩃᩣᨸᩴ ᩌᨠᩣᩈᨾᩩᨠ᩠ᨡᩥᨸᩥᩴ, ᨲᩴ ¶ ᩋᨧ᩠ᨨᩁᩥᨿᩴ ᨴᩥᩈ᩠ᩅᩣ ᩋᨲᩥᩅᩥᨿ ᩈᩮᩣᨾᨶᩔᨩᩣᨲᩮᩣ ᩋᩉᩮᩣᩈᩥ. ᩈᩮᩣ ᨿᩣᩅᨩᩦᩅᩴ ᨠᩩᩈᩃᩴ ᨠᨲ᩠ᩅᩣ ᨩᩦᩅᩥᨲᨸᩁᩥᨿᩮᩣᩈᩣᨶᩮ ᩈᨣ᩠ᨣᩮ ᨶᩥᨻ᩠ᨻᨲ᩠ᨲᩮᩣ ᨵᨩᨾᩥᩅ ᨨᨠᩣᨾᩣᩅᨧᩁᩮ ᨸᩣᨠᨭᩮᩣ ᨸᩪᨩᩥᨲᩮᩣ ᨧ ᨴᩥᨻ᩠ᨻᩈᨾ᩠ᨸᨲ᩠ᨲᩥᨾᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧ ᨧᨠ᩠ᨠᩅᨲ᩠ᨲᩥᩈᨾ᩠ᨸᨲ᩠ᨲᩥᨾᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᩈᨴ᩠ᨵᩣᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨴ᩠ᨵᩣᨩᩣᨲᩮᩣ ᨸᨬ᩠ᨧᩅᩔᩥᨠᩮᩣᩅ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩉᩩᨲ᩠ᩅᩣ ᨠᨲᨸᩩᨬ᩠ᨬᨶᩣᨾᩮᨶ ᨸᨴᩩᨾᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪖᪗. ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨧᨲᩩᩈᨧ᩠ᨧᩴ ᨸᨠᩣᩈᩮᨶ᩠ᨲᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᩈᨧ᩠ᨧᨶ᩠ᨲᩥ ᨲᨳᩴ ᩋᩅᩥᨲᨳᩴ ᩋᩅᩥᨸᩁᩦᨲᩴ ᩈᨧ᩠ᨧᩴ, ᨴᩩᨠ᩠ᨡᩈᨾᩩᨴᨿᨶᩥᩁᩮᩣᨵᨾᨣ᩠ᨣᩅᩈᩮᨶ ᨧᨲ᩠ᨲᩣᩁᩥ ᩈᨧ᩠ᨧᩣᨶᩥ ᩈᨾᩣᩉᨭᩣᨶᩦᨲᩥ ᨧᨲᩩᩈᨧ᩠ᨧᩴ, ᨲᩴ ᨧᨲᩩᩈᨧ᩠ᨧᩴ ᨸᨠᩣᩈᩮᨶ᩠ᨲᩮᩣ ᩃᩮᩣᨠᩮ ᨸᩣᨠᨭᩴ ᨠᩁᩮᩣᨶ᩠ᨲᩮᩣᨲᩥ ᩋᨲ᩠ᨳᩮᩣ. ᩅᩁᨵᨾ᩠ᨾᨸ᩠ᨸᩅᨲ᩠ᨲᨠᩮᩣᨲᩥ ᩏᨲ᩠ᨲᨾᨵᨾ᩠ᨾᨸ᩠ᨸᩅᨲ᩠ᨲᨠᩮᩣ ᨸᨠᩣᩈᨠᩮᩣᨲᩥ ᩋᨲ᩠ᨳᩮᩣ. ᩋᨾᨲᩴ ᩅᩩᨭ᩠ᨮᩥᨶ᩠ᨲᩥ ᩋᨾᨲᨾᩉᩣᨶᩥᨻ᩠ᨻᩣᨶᩅᩩᨭ᩠ᨮᩥᨵᩣᩁᩴ ᨸᩅᩔᨶ᩠ᨲᩮᩣ ᨸᨣ᩠ᨥᩁᨶ᩠ᨲᩮᩣ ᩈᨴᩮᩅᨠᩴ ᩃᩮᩣᨠᩴ ᨲᩮᨾᩮᨶ᩠ᨲᩮᩣ ᩈᨻ᩠ᨻᨠᩥᩃᩮᩈᨸᩁᩥᩊᩣᩉᩴ ᨶᩥᨻ᩠ᨻᩣᨸᩮᨶ᩠ᨲᩮᩣ ᨵᨾ᩠ᨾᩅᩔᩴ ᩅᩔᨲᩦᨲᩥ ᩋᨲ᩠ᨳᩮᩣ.

᪖᪘. ᩈᨵᨩᩴ ᨸᨴᩩᨾᩴ ᨣᨿ᩠ᩉᩣᨲᩥ ᨵᨩᩮᨶ ᩈᩉ ᩑᨠᨲᩮᩣ ᨠᨲ᩠ᩅᩣ ᨸᨴᩩᨾᩴ ᨸᨴᩩᨾᨠᩃᩣᨸᩴ ᨣᩉᩮᨲ᩠ᩅᩣᨲᩥ ᩋᨲ᩠ᨳᩮᩣ. ᩋᨯ᩠ᨰᨠᩮᩣᩈᩮ ᨮᩥᨲᩮᩣ ᩋᩉᨶ᩠ᨲᩥ ᩏᨽᩮᩣ ᩏᨠ᩠ᨡᩥᨸᩥᨲ᩠ᩅᩣ ᨮᩥᨲᩮᩣ ᩋᩉᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨸᨴᩩᨾᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᩋᩈᨶᨻᩮᩣᨵᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨩᩣᨲᩥᨿᩣ ᩈᨲ᩠ᨲᩅᩔᩮᩣᩉᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩋᩈᨶᨻᩮᩣᨵᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨲᩥᩔᩔ ᨽᨣᩅᨲᩮᩣ ᨠᩣᩃᩮ ᩋᨬ᩠ᨬᨲᩁᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᩩᨡᨸ᩠ᨸᨲ᩠ᨲᩮᩣ ᩈᩣᩈᨶᩮ ᨸᩈᨶ᩠ᨶᩮᩣ ¶ ᩋᩈᨶᨻᩮᩣᨵᩥᨲᩮᩣ ᨹᩃᩴ ᨣᩉᩮᨲ᩠ᩅᩣ ᨲᨲᩮᩣ ᩅᩩᨭ᩠ᨮᩥᨲᨻᩮᩣᨵᩥᨲᩁᩩᨱᩮ ᨣᩉᩮᨲ᩠ᩅᩣ ᨻᩮᩣᨵᩥᩴ ᩁᩮᩣᨸᩮᩈᩥ, ᨿᨳᩣ ᨶ ᩅᩥᨶᩔᨲᩥ ᨲᨳᩣ ᩏᨴᨠᩣᩈᩥᨬ᩠ᨧᨶᩣᨴᩥᨠᨾ᩠ᨾᩮᨶ ᩁᨠ᩠ᨡᩥᨲ᩠ᩅᩣ ᨸᩪᨩᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨸᩁᩥᨸᨠ᩠ᨠᩈᨾ᩠ᨽᩣᩁᨲ᩠ᨲᩣ ¶ ᩈᨲ᩠ᨲᩅᩔᩥᨠᩮᩣᩅ ᩈᨾᩣᨶᩮᩣ ᨸᨻ᩠ᨻᨩᩥᨲ᩠ᩅᩣ ᨡᩩᩁᨣ᩠ᨣᩮᨿᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ, ᨸᩩᩁᩣᨠᨲᨸᩩᨬ᩠ᨬᨶᩣᨾᩮᨶ ᩋᩈᨶᨻᩮᩣᨵᩥᨿᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪗᪘. ᩈᩮᩣ ¶ ᨸᩩᨻ᩠ᨻᩈᨾ᩠ᨽᩣᩁᨾᨶᩩᩔᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨩᩣᨲᩥᨿᩣ ᩈᨲ᩠ᨲᩅᩔᩮᩣᩉᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨩᩣᨲᩥᨿᩣᨲᩥ ᨾᩣᨲᩩᨣᨻ᩠ᨽᨲᩮᩣ ᨶᩥᨠ᩠ᨡᨶ᩠ᨲᨠᩣᩃᨲᩮᩣ ᨸᨭ᩠ᨮᩣᨿᩣᨲᩥ ᩋᨲ᩠ᨳᩮᩣ. ᩈᨲ᩠ᨲᩅᩔᩮᩣ ᨸᩁᩥᨸᩩᨱ᩠ᨱᩈᩁᨴᩮᩣ ᩋᩉᩴ ᩃᩮᩣᨠᨶᩣᨿᨠᩴ ᨲᩥᩔᩴ ᨽᨣᩅᨶ᩠ᨲᩴ ᩋᨴ᩠ᨴᩈᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨸᩈᨶ᩠ᨶᨧᩥᨲ᩠ᨲᩮᩣ ᩈᩩᨾᨶᩮᩣᨲᩥ ᨸᨠᩣᩁᩮᨶ ᨸᩈᨶ᩠ᨶᩋᨶᩣᩃᩩᩊᩥᨲᩋᩅᩥᨠᨾ᩠ᨸᩥᨲᨧᩥᨲ᩠ᨲᩮᩣ, ᩈᩩᨾᨶᩮᩣ ᩈᩩᨶ᩠ᨴᩁᨾᨶᩮᩣ ᩈᩮᩣᨾᨶᩔᩈᩉᨣᨲᨧᩥᨲ᩠ᨲᩮᩣᨲᩥ ᩋᨲ᩠ᨳᩮᩣ.

᪗᪙. ᨲᩥᩔᩔᩣᩉᩴ ᨽᨣᩅᨲᩮᩣᨲᩥ ᨲᩥᨠ᩠ᨡᨲ᩠ᨲᩩᩴ ᨩᩣᨲᩮᩣᨲᩥ ᨲᩥᩔᩮᩣ, ᩈᩮᩣ ᨾᩣᨲᩩᨣᨻ᩠ᨽᨲᩮᩣ, ᨾᨶᩩᩔᨩᩣᨲᩥᨲᩮᩣ, ᨸᨬ᩠ᨧᨠ᩠ᨡᨶ᩠ᨵᨲᩮᩣ ᨧ ᨾᩩᨲ᩠ᨲᩮᩣ ᩉᩩᨲ᩠ᩅᩣ ᨩᩣᨲᩮᩣ ᨶᩥᨻ᩠ᨻᨲ᩠ᨲᩮᩣ ᨻᩩᨴ᩠ᨵᩮᩣ ᨩᩣᨲᩮᩣᨲᩥ ᩋᨲ᩠ᨳᩮᩣ. ᨲᩔ ᨲᩥᩔᩔ ᨽᨣᩅᨲᩮᩣ ᨲᩣᨴᩥᨶᩮᩣ, ᩃᩮᩣᨠᨩᩮᨭ᩠ᨮᩔ ᩋᩈᨶᨻᩮᩣᨵᩥᩴ ᩏᨲ᩠ᨲᨾᩴ ᩁᩮᩣᨸᨿᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

᪘᪐. ᩋᩈᨶᩮᩣ ᨶᩣᨾᨵᩮᨿ᩠ᨿᩮᨶᩣᨲᩥ ᨶᩣᨾᨸᨬ᩠ᨬᨲ᩠ᨲᩥᨿᩣ ᨶᩣᨾᩈᨬ᩠ᨬᩣᨿ ᩋᩈᨶᩮᩣ ᨶᩣᨾ ᩋᩈᨶᩁᩩᨠ᩠ᨡᩮᩣ ᨻᩮᩣᨵᩥ ᩋᩉᩮᩣᩈᩦᨲᩥ ᩋᨲ᩠ᨳᩮᩣ. ᨵᩁᨱᩦᩁᩩᩉᨸᩣᨴᨸᩮᩣᨲᩥ ᩅᩃ᩠ᩃᩥᩁᩩᨠ᩠ᨡᨸᨻ᩠ᨻᨲᨣᨦ᩠ᨣᩣᩈᩣᨣᩁᩣᨴᨿᩮᩣ ᨵᩣᩁᩮᨲᩦᨲᩥ ᨵᩁᨱᩦ, ᨠᩣ ᩈᩣ? ᨸᨳᩅᩦ, ᨲᩔᩴ ᩁᩩᩉᨲᩥ ᨸᨲᩥᨭ᩠ᨮᩉᨲᩦᨲᩥ ᨵᩁᨱᩦᩁᩩᩉᩮᩣ, ᨸᩣᨴᩮᨶ ᨸᩥᩅᨲᩦᨲᩥ ᨸᩣᨴᨸᩮᩣ, ᨸᩣᨴᩈᨦ᩠ᨡᩣᨲᩮᨶ ᨾᩪᩃᩮᨶ ᩈᩥᨬ᩠ᨧᩥᨲᩮᩣᨴᨠᩴ ᨸᩥᩅᨲᩥ ᩌᨸᩮᩣᩁᩈᩴ ᩈᩥᨶᩮᩉᩴ ᨵᩣᩁᩮᨲᩦᨲᩥ ᩋᨲ᩠ᨳᩮᩣ. ᨵᩁᨱᩦᩁᩩᩉᩮᩣ ᨧ ᩈᩮᩣ ᨸᩣᨴᨸᩮᩣ ᨧᩣᨲᩥ ᨵᩁᨱᩦᩁᩩᩉᨸᩣᨴᨸᩮᩣ, ᨲᩴ ᩏᨲ᩠ᨲᨾᩴ ᩋᩈᨶᩴ ᨻᩮᩣᨵᩥᩴ ᨸᨬ᩠ᨧ ᩅᩔᩣᨶᩥ ᨸᩁᩥᨧᩁᩥᩴ ᨸᩮᩣᩈᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪘᪑. ᨸᩩᨸ᩠ᨹᩥᨲᩴ ᨸᩣᨴᨸᩴ ᨴᩥᩈ᩠ᩅᩣᨲᩥ ᨲᩴ ᨾᨿᩣ ᨸᩮᩣᩈᩥᨲᩴ ᩋᩈᨶᨻᩮᩣᨵᩥᩁᩩᨠ᩠ᨡᩴ ᨸᩩᨸ᩠ᨹᩥᨲᩴ ᩋᨧ᩠ᨨᩁᨿᩮᩣᨣ᩠ᨣᨽᩪᨲᨸᩩᨸ᩠ᨹᨲ᩠ᨲᩣ ᩋᨻ᩠ᨽᩩᨲᩴ ᩃᩮᩣᨾᩉᩴᩈᨠᩁᨱᩴ ᨴᩥᩈ᩠ᩅᩣ ᩈᨠᩴ ¶ ᨠᨾ᩠ᨾᩴ ᩋᨲ᩠ᨲᨶᩮᩣ ᨠᨾ᩠ᨾᩴ ᨸᨠᩥᨲ᩠ᨲᩮᨶ᩠ᨲᩮᩣ ᨸᨠᩣᩁᩮᨶ ᨠᨳᨿᨶ᩠ᨲᩮᩣ ᨻᩩᨴ᩠ᨵᩈᩮᨭ᩠ᨮᩔ ᩈᨶ᩠ᨲᩥᨠᩴ ᩋᨣᨾᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩋᩈᨶᨻᩮᩣᨵᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᨨᨭ᩠ᨮᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᩈᨠᨧᩥᨶ᩠ᨲᨶᩥᨿᩅᨣ᩠ᨣᩮᩣ

᪑. ᩈᨠᨧᩥᨶ᩠ᨲᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᩅᨶᩴ ¶ ᨠᩣᨶᨶᩴ ᨴᩥᩈ᩠ᩅᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᨠᨧᩥᨶ᩠ᨲᨶᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨲᩔ ᨽᨣᩅᨲᩮᩣ ᩌᨿᩩᨸᩁᩥᨿᩮᩣᩈᩣᨶᩮ ᩏᨸ᩠ᨸᨶ᩠ᨶᩮᩣ ¶ ᨵᩁᨾᩣᨶᩴ ᨽᨣᩅᨶ᩠ᨲᩴ ᩋᨸᩣᨸᩩᨱᩥᨲ᩠ᩅᩣ ᨸᩁᩥᨶᩥᨻ᩠ᨻᩩᨲᨠᩣᩃᩮ ᩍᩈᩥᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩉᩥᨾᩅᨶ᩠ᨲᩮ ᩅᩈᨶ᩠ᨲᩮᩣ ᩅᩥᩅᩮᨠᩴ ᩁᨾᨱᩦᨿᩴ ᩑᨠᩴ ᩅᨶᩴ ᨸᨲ᩠ᩅᩣ ᨲᨲ᩠ᨳᩮᩅᩮᨠᩣᨿ ᨠᨶ᩠ᨴᩁᩣᨿ ᨸᩩᩃᩥᨶᨧᩮᨲᩥᨿᩴ ᨠᨲ᩠ᩅᩣ ᨽᨣᩅᨲᩥ ᩈᨬ᩠ᨬᩴ ᨠᨲ᩠ᩅᩣ ᩈᨵᩣᨲᩩᨠᩈᨬ᩠ᨬᨬ᩠ᨧ ᨠᨲ᩠ᩅᩣ ᩅᨶᨸᩩᨸ᩠ᨹᩮᩉᩥ ᨸᩪᨩᩮᨲ᩠ᩅᩣ ᨶᨾᩔᨾᩣᨶᩮᩣ ᨸᩁᩥᨧᩁᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᨴ᩠ᩅᩦᩈᩩ ᩋᨣ᩠ᨣᩴ ᩋᨣ᩠ᨣᩈᨾ᩠ᨸᨲ᩠ᨲᩥᩴ ᩋᨣ᩠ᨣᨬ᩠ᨧ ᨧᨠ᩠ᨠᩅᨲ᩠ᨲᩥᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨽᩅᩈᨾ᩠ᨸᨶ᩠ᨶᩮᩣ ᩈᨴ᩠ᨵᩣᩈᨾ᩠ᨸᨶ᩠ᨶᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲ᩠ᩅᩣ ᩋᩁᩉᩣ ᨨᩊᨽᩥᨬ᩠ᨬᩮᩣ ᩋᩉᩮᩣᩈᩥ.

᪑. ᩈᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᩅᨶᩴ ᨠᩣᨶᨶᩴ ᨴᩥᩈ᩠ᩅᩣᨲᩥᩌᨴᩥᨾᩣᩉ. ᨲᨲ᩠ᨳ ᨸᩅᨶᨶ᩠ᨲᩥ ᨸᨠᩣᩁᩮᨶ ᩅᨶᩴ ᨸᨲ᩠ᨳᨭᩴ ᩅᩥᨲ᩠ᨳᩥᨱ᩠ᨱᩴ ᨣᩉᨶᨽᩪᨲᨶ᩠ᨲᩥ ᨸᩅᨶᩴ. ᨠᩣᨶᨶᩴ ᩋᩅᨠᩩᨧ᩠ᨨᩥᨲᩴ ᩌᨶᨶᩴ ᩋᩅᩉᨶᩴ ᩈᨲᨲᩴ ᩈᩦᩉᨻ᩠ᨿᨣ᩠ᨥᨿᨠ᩠ᨡᩁᨠ᩠ᨡᩈᨾᨴ᩠ᨴᩉᨲ᩠ᨳᩥᩋᩔᩈᩩᨸᨱ᩠ᨱᩏᩁᨣᩮᩉᩥ ᩅᩥᩉᨦ᩠ᨣᨣᨱᩈᨴ᩠ᨴᨠᩩᨠ᩠ᨠᩩᨭᨠᩮᩣᨠᩥᩃᩮᩉᩥ ᩅᩣ ᨻᩉᩃᨶ᩠ᨲᩥ ᨠᩣᨶᨶᩴ, ᨲᩴ ᨠᩣᨶᨶᩈᨦ᩠ᨡᩣᨲᩴ ᨸᩅᨶᩴ ᨾᨶᩩᩔᩈᨴ᩠ᨴᩅᩥᩁᩉᩥᨲᨲ᩠ᨲᩣ ᩋᨸ᩠ᨸᩈᨴ᩠ᨴᩴ ᨶᩥᩔᨴ᩠ᨴᨶ᩠ᨲᩥ ᩋᨲ᩠ᨳᩮᩣ. ᩋᨶᩣᩅᩥᩃᨶ᩠ᨲᩥ ᨶ ᩌᩅᩥᩃᩴ ᩏᨸᨴ᩠ᨴᩅᩁᩉᩥᨲᨶ᩠ᨲᩥ ᩋᨲ᩠ᨳᩮᩣ. ᩍᩈᩦᨶᩴ ᩋᨶᩩᨧᩥᨱ᩠ᨱᨶ᩠ᨲᩥ ᨻᩩᨴ᩠ᨵᨸᨧ᩠ᨧᩮᨠᨻᩩᨴ᩠ᨵᩋᩁᩉᨶ᩠ᨲᨡᩦᨱᩣᩈᩅᩈᨦ᩠ᨡᩣᨲᩣᨶᩴ ᩍᩈᩦᨶᩴ ᩋᨶᩩᨧᩥᨱ᩠ᨱᩴ ᨶᩥᩈᩮᩅᩥᨲᨶ᩠ᨲᩥ ᩋᨲ᩠ᨳᩮᩣ. ᩌᩉᩩᨲᩦᨶᩴ ¶ ᨸᨭᩥᨣ᩠ᨣᩉᨶ᩠ᨲᩥ ᩌᩉᩩᨶᩴ ᩅᩩᨧ᩠ᨧᨲᩥ ᨸᩪᨩᩣᩈᨠ᩠ᨠᩣᩁᩴ ᨸᨭᩥᨣ᩠ᨣᩉᩴ ᨣᩮᩉᩈᨴᩥᩈᨶ᩠ᨲᩥ ᩋᨲ᩠ᨳᩮᩣ.

᪒. ᨳᩪᨸᩴ ᨠᨲ᩠ᩅᩣᨶ ᩅᩮᩊᩩᨶᩣᨲᩥ ᩅᩮᩊᩩᨸᩮᩈᩥᨠᩣᩉᩥ ᨧᩮᨲᩥᨿᩴ ᨠᨲ᩠ᩅᩣᨲᩥ ᩋᨲ᩠ᨳᩮᩣ. ᨶᩣᨶᩣᨸᩩᨸ᩠ᨹᩴ ᩈᨾᩮᩣᨠᩥᩁᩥᨶ᩠ᨲᩥ ᨧᨾ᩠ᨸᨠᩣᨴᩦᩉᩥ ᩋᨶᩮᨠᩮᩉᩥ ᨸᩩᨸ᩠ᨹᩮᩉᩥ ᩈᨾᩮᩣᨠᩥᩁᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᨾ᩠ᨾᩩᨡᩣ ᩅᩥᨿ ᩈᨾ᩠ᨻᩩᨴ᩠ᨵᨶ᩠ᨲᩥ ¶ ᩈᨩᩦᩅᨾᩣᨶᩔ ᩈᨾ᩠ᨻᩩᨴ᩠ᨵᩔ ᩈᨾ᩠ᨾᩩᨡᩣ ᩍᩅ ᨶᩥᨾ᩠ᨾᩥᨲᩴ ᩏᨸ᩠ᨸᩣᨴᩥᨲᩴ ᨧᩮᨲᩥᨿᩴ ᩋᩉᩴ ᩋᨽᩥ ᩅᩥᩈᩮᩈᩮᨶ ᩅᨶ᩠ᨴᩥᩴ ᨸᨱᩣᨾᨾᨠᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩈᨠᨧᩥᨶ᩠ᨲᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᩋᩅᩮᩣᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩅᩥᩉᩣᩁᩣ ᩋᨽᩥᨶᩥᨠ᩠ᨡᨾ᩠ᨾᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩋᩅᩮᩣᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨡᩥᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨴ᩠ᨵᩣᩈᨾ᩠ᨸᨶ᩠ᨶᩮᩣ ᨵᨾ᩠ᨾᩴ ᩈᩩᨲ᩠ᩅᩣ ᩈᩮᩣᨾᨶᩔᨸ᩠ᨸᨲ᩠ᨲᩮᩣ ᨶᩣᨶᩣᨸᩩᨸ᩠ᨹᩣᨶᩥ ᩏᨽᩮᩣᩉᩥ ᩉᨲ᩠ᨳᩮᩉᩥ ᨣᩉᩮᨲ᩠ᩅᩣ ᨻᩩᨴ᩠ᨵᩔ ᩏᨸᩁᩥ ᩋᨻ᩠ᨽᩩᨠ᩠ᨠᩥᩁᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ¶ ᩈᨣ᩠ᨣᩈᨾ᩠ᨸᨲ᩠ᨲᩥᨬ᩠ᨧ ᨧᨠ᩠ᨠᩅᨲ᩠ᨲᩥᩈᨾ᩠ᨸᨲ᩠ᨲᩥᨬ᩠ᨧ ᩋᨶᩩᨽᩅᩥᨲ᩠ᩅᩣ ᩈᨻ᩠ᨻᨲ᩠ᨳ ᨸᩪᨩᩥᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᩣᩈᨶᩮ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ. ᩌ ᩈᨾᨶ᩠ᨲᨲᩮᩣ ᨠᩣᩈᨲᩥ ᨴᩥᨸ᩠ᨸᨲᩦᨲᩥ ᩌᨠᩣᩈᩮᩣ, ᨲᩈ᩠ᨾᩥᩴ ᩌᨠᩣᩈᩮ ᨸᩩᨸ᩠ᨹᩣᨶᩴ ᩋᩅᨠᩥᩁᩥᨲᨲ᩠ᨲᩣ ᩋᩅᩮᩣᨸᩩᨸ᩠ᨹᩥᨿᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪗. ᩑᩅᩴ ᨸᨲ᩠ᨲᩈᨶ᩠ᨲᩥᨸᨴᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩅᩥᩉᩣᩁᩣ ᩋᨽᩥᨶᩥᨠ᩠ᨡᨾ᩠ᨾᩣᨲᩥᩌᨴᩥᨾᩣᩉ. ᨲᨲ᩠ᨳ ᩅᩥᩉᩣᩁᩣᨲᩥ ᩅᩥᩈᩮᩈᩮᨶ ᩉᩁᨲᩥ ᨧᨲᩪᩉᩥ ᩍᩁᩥᨿᩣᨸᨳᩮᩉᩥ ᩋᨸᨲᨶ᩠ᨲᩴ ᩋᨲ᩠ᨲᨽᩣᩅᩴ ᩌᩉᩁᨲᩥ ᨸᩅᨲ᩠ᨲᩮᨲᩥ ᩑᨲ᩠ᨳᩣᨲᩥ ᩅᩥᩉᩣᩁᩮᩣ, ᨲᩈ᩠ᨾᩣ ᩅᩥᩉᩣᩁᩣ ᩋᨽᩥ ᩅᩥᩈᩮᩈᩮᨶ ᨶᩥᨠ᩠ᨡᨾ᩠ᨾ ᨶᩥᨠ᩠ᨡᨾᩥᨲ᩠ᩅᩣ. ᩋᨻ᩠ᨽᩩᨭ᩠ᨮᩣᩈᩥ ᨧ ᨧᨦ᩠ᨠᨾᩮᨲᩥ ᨧᨦ᩠ᨠᨾᨶᨲ᩠ᨳᩣᨿ ᩈᨭ᩠ᨮᩥᩁᨲᨶᩮ ᨧᨦ᩠ᨠᨾᩮ ᩋᨽᩥᩅᩥᩈᩮᩈᩮᨶ ᩏᨭ᩠ᨮᩣᩈᩥ, ᩋᨽᩥᩁᩩᩉᩦᨲᩥ ᩋᨲ᩠ᨳᩮᩣ. ᨧᨲᩩᩈᨧ᩠ᨧᩴ ¶ ᨸᨠᩣᩈᩮᨶ᩠ᨲᩮᩣᨲᩥ ᨲᩈ᩠ᨾᩥᩴ ᨧᨦ᩠ᨠᨾᩮ ᨧᨦ᩠ᨠᨾᨶ᩠ᨲᩮᩣ ᨴᩩᨠ᩠ᨡᩈᨾᩩᨴᨿᨶᩥᩁᩮᩣᨵᨾᨣ᩠ᨣᩈᨧ᩠ᨧᩈᨦ᩠ᨡᩣᨲᩴ ᨧᨲᩩᩈᨧ᩠ᨧᩴ ᨸᨠᩣᩈᩮᨶ᩠ᨲᩮᩣ ᨸᩣᨠᨭᩴ ᨠᩁᩮᩣᨶ᩠ᨲᩮᩣ ᩋᨾᨲᩴ ᨸᨴᩴ ᨶᩥᨻ᩠ᨻᩣᨶᩴ ᨴᩮᩈᩮᨶ᩠ᨲᩮᩣ ᩅᩥᨽᨩᨶ᩠ᨲᩮᩣ ᩏᨲ᩠ᨲᩣᨶᩦᨠᩁᩮᩣᨶ᩠ᨲᩮᩣ ᨲᩈ᩠ᨾᩥᩴ ᨧᨦ᩠ᨠᨾᩮᨲᩥ ᩈᨾ᩠ᨻᨶ᩠ᨵᩮᩣ.

᪘. ᩈᩥᨡᩥᩔ ᨣᩥᩁᨾᨬ᩠ᨬᩣᨿ, ᨻᩩᨴ᩠ᨵᩈᩮᨭ᩠ᨮᩔ ᨲᩣᨴᩥᨶᩮᩣᨲᩥ ᩈᩮᨭ᩠ᨮᩔ ᨲᩣᨴᩥᨣᩩᨱᩈᨾᨦ᩠ᨣᩥᩔ ᩈᩥᨡᩥᩔ ᨻᩩᨴ᩠ᨵᩔ ᨣᩥᩁᩴ ᩈᨴ᩠ᨴᩴ ᨥᩮᩣᩈᩴ ᩋᨬ᩠ᨬᩣᨿ ᨩᩣᨶᩥᨲ᩠ᩅᩣ. ᨶᩣᨶᩣᨸᩩᨸ᩠ᨹᩴ ᨣᩉᩮᨲ᩠ᩅᩣᨶᩣᨲᩥ ᨶᩣᨣᨸᩩᨶ᩠ᨶᩣᨣᩣᨴᩥᩋᨶᩮᨠᩣᨶᩥ ᨸᩩᨸ᩠ᨹᩣᨶᩥ ᨣᩉᩮᨲ᩠ᩅᩣ ᩌᩉᩁᩥᨲ᩠ᩅᩣ. ᩌᨠᩣᩈᨾ᩠ᩉᩥ ᩈᨾᩮᩣᨠᩥᩁᩥᨶ᩠ᨲᩥ ᨧᨦ᩠ᨠᨾᨶ᩠ᨲᩔ ᨽᨣᩅᨲᩮᩣ ᨾᩩᨴ᩠ᨵᨶᩥ ᩌᨠᩣᩈᩮ ᩒᨠᩥᩁᩥᩴ ᨸᩪᨩᩮᩈᩥᩴ.

᪙. ᨲᩮᨶ ᨠᨾ᩠ᨾᩮᨶ ᨴ᩠ᩅᩥᨸᨴᩥᨶ᩠ᨴᩣᨲᩥ ᨴ᩠ᩅᩥᨸᨴᩣᨶᩴ ᨴᩮᩅᨻᩕᩉ᩠ᨾᨾᨶᩩᩔᩣᨶᩴ ᩍᨶ᩠ᨴ ᨸᨵᩣᨶᨽᩪᨲ. ᨶᩁᩣᩈᨽ ᨶᩁᩣᨶᩴ ¶ ᩌᩈᨽᨽᩪᨲ. ᨸᨲ᩠ᨲᩮᩣᨾ᩠ᩉᩥ ᩋᨧᩃᩴ ᨮᩣᨶᨶ᩠ᨲᩥ ᨲᩩᨾ᩠ᩉᩣᨠᩴ ᩈᨶ᩠ᨲᩥᨠᩮ ᨸᨻ᩠ᨻᨩᩥᨲ᩠ᩅᩣ ᩋᨧᩃᩴ ᨮᩣᨶᩴ ᨶᩥᨻ᩠ᨻᩣᨶᩴ ᨸᨲ᩠ᨲᩮᩣ ᩋᨾ᩠ᩉᩥ ᨽᩅᩣᨾᩥ. ᩉᩥᨲ᩠ᩅᩣ ᨩᨿᨸᩁᩣᨩᨿᨶ᩠ᨲᩥ ᨴᩥᨻ᩠ᨻᨾᨶᩩᩔᩈᨾ᩠ᨸᨲ᩠ᨲᩥᩈᨦ᩠ᨡᩣᨲᩴ ᨩᨿᨬ᩠ᨧ ᨧᨲᩩᩁᩣᨸᩣᨿᨴᩩᨠ᩠ᨡᩈᨦ᩠ᨡᩣᨲᩴ ᨸᩁᩣᨩᨿᨬ᩠ᨧ ᩉᩥᨲ᩠ᩅᩣ ᨨᨯ᩠ᨯᩮᨲ᩠ᩅᩣ ᨶᩥᨻ᩠ᨻᩣᨶᩴ ᨸᨲ᩠ᨲᩮᩣᩈ᩠ᨾᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩋᩅᩮᩣᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩮᩣ.

᪓. ᨸᨧ᩠ᨧᩣᨣᨾᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩥᨶ᩠ᨵᩩᨿᩣ ᨶᨴᩥᨿᩣ ᨲᩦᩁᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᨧ᩠ᨧᩣᨣᨾᨶᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᩈᩥᨶ᩠ᨵᩩᨿᩣ ᨣᨦ᩠ᨣᩣᨿ ᩈᨾᩦᨸᩮ ᨧᨠ᩠ᨠᩅᩣᨠᨿᩮᩣᨶᩥᨿᩴ ᨶᩥᨻ᩠ᨻᨲ᩠ᨲᩮᩣ ᨸᩩᨻ᩠ᨻᩈᨾ᩠ᨽᩣᩁᨿᩩᨲ᩠ᨲᨲ᩠ᨲᩣ ᨸᩣᨱᩥᨶᩮᩣ ᩋᨡᩣᨴᨶ᩠ᨲᩮᩣ ᩈᩮᩅᩣᩃᨾᩮᩅ ᨽᨠ᩠ᨡᨿᨶ᩠ᨲᩮᩣ ᨧᩁᨲᩥ. ᨲᩈ᩠ᨾᩥᩴ ᩈᨾᨿᩮ ᩅᩥᨸᩔᩥᨽᨣᩅᩣ ᩈᨲ᩠ᨲᩣᨶᩩᨣ᩠ᨣᩉᩴ ᨠᩁᩮᩣᨶ᩠ᨲᩮᩣ ᨲᨲ᩠ᨳ ᩋᨣᨾᩣᩈᩥ. ᨲᩈ᩠ᨾᩥᩴ ᨡᨱᩮ ᩈᩮᩣ ᨧᨠ᩠ᨠᩅᩣᨠᩮᩣ ᩅᩥᨩ᩠ᨩᩮᩣᨲᨾᩣᨶᩴ ¶ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨲᩩᨱ᩠ᨯᩮᨶ ᩈᩣᩃᩁᩩᨠ᩠ᨡᨲᩮᩣ ᩈᩣᩃᨸᩩᨸ᩠ᨹᩴ ᨨᩥᨶ᩠ᨴᩥᨲ᩠ᩅᩣ ᩌᨣᨾ᩠ᨾ ᨸᩪᨩᩮᩈᩥ. ᩈᩮᩣ ᨲᩮᨶᩮᩅ ᨧᩥᨲ᩠ᨲᨸ᩠ᨸᩈᩣᨴᩮᨶ ᨲᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮ ᩏᨸ᩠ᨸᨶ᩠ᨶᩮᩣ ᩋᨸᩁᩣᨸᩁᩴ ᨨᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᨲᨲᩮᩣ ᨧᩩᨲᩮᩣ ᨾᨶᩩᩔᩃᩮᩣᨠᩮ ᩏᨸ᩠ᨸᨩ᩠ᨩᩥᨲ᩠ᩅᩣ ᨧᨠ᩠ᨠᩅᨲ᩠ᨲᩥᩈᨾ᩠ᨸᨲ᩠ᨲᩥᩌᨴᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ¶ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨸᩩᨻ᩠ᨻᨧᩁᩥᨲᩅᩈᩮᨶ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ, ᨧᨠ᩠ᨠᩅᩣᨠᩮᩣ ᩉᩩᨲ᩠ᩅᩣ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨠᨲ᩠ᨳᨧᩥ ᨣᨶ᩠ᨲ᩠ᩅᩣ ᨸᩩᨸ᩠ᨹᨾᩣᩉᩁᩥᨲ᩠ᩅᩣ ᨸᩪᨩᩥᨲᨲ᩠ᨲᩣ ᨸᩩᨻ᩠ᨻᨸᩩᨬ᩠ᨬᨶᩣᨾᩮᨶ ᨸᨧ᩠ᨧᩣᨣᨾᨶᩥᨿᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪑᪓. ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩥᨶ᩠ᨵᩩᨿᩣ ᨶᨴᩥᨿᩣ ᨲᩦᩁᩮᨲᩥᩌᨴᩥᨾᩣᩉ. ᩈᩦᨲᩥ ᩈᨴ᩠ᨴᩴ ᨠᩩᩁᩩᨾᩣᨶᩣ ᨵᩩᨶᩣᨲᩥ ᨠᨾ᩠ᨸᨲᩦᨲᩥ ᩈᩥᨶ᩠ᨵᩩ, ᨶᨴᨲᩥ ᩈᨴ᩠ᨴᩴ ᨠᩁᩮᩣᨶ᩠ᨲᩮᩣ ᨣᨧ᩠ᨨᨲᩦᨲᩥ ᨶᨴᩥ. ᨧᨠ᩠ᨠᩅᩣᨠᩮᩣ ᩋᩉᩴ ᨲᨴᩣᨲᩥ ᨧᨠ᩠ᨠᩴ ᩈᩦᨥᩴ ᨣᨧ᩠ᨨᨶ᩠ᨲᩴ ᩍᩅ ᩏᨴᨠᩮ ᩅᩣ ᨳᩃᩮ ᩅᩣ ᩌᨠᩣᩈᩮ ᩅᩣ ᩈᩦᨥᩴ ᩅᩣᨲᩥ ᨣᨧ᩠ᨨᨲᩦᨲᩥ ᨧᨠ᩠ᨠᩅᩣᨠᩮᩣ. ᨲᨴᩣ ᩅᩥᨸᩔᩥᩴ ᨽᨣᩅᨶ᩠ᨲᩴ ᨴᩔᨶᨠᩣᩃᩮ ᩋᩉᩴ ᨧᨠ᩠ᨠᩅᩣᨠᩮᩣ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩩᨴ᩠ᨵᩈᩮᩅᩣᩃᨽᨠ᩠ᨡᩮᩣᩉᨶ᩠ᨲᩥ ᩋᨬ᩠ᨬᨣᩮᩣᨧᩁᩋᨾᩥᩔᨲ᩠ᨲᩣ ᩈᩩᨴ᩠ᨵᩈᩮᩅᩣᩃᨾᩮᩅ ᨡᩣᨴᨶ᩠ᨲᩮᩣ ᩋᩉᩴ ᩅᩈᩣᨾᩥ. ᨸᩣᨸᩮᩈᩩ ᨧ ᩈᩩᩈᨬ᩠ᨬᨲᩮᩣᨲᩥ ᨸᩩᨻ᩠ᨻᩅᩣᩈᨶᩣᩅᩈᩮᨶ ᨸᩣᨸᨠᩁᨱᩮ ᩈᩩᨭ᩠ᨮᩩ ᩈᨬ᩠ᨬᨲᩮᩣ ᨲᩦᩉᩥ ᨴ᩠ᩅᩣᩁᩮᩉᩥ ᩈᨬ᩠ᨬᨲᩮᩣ ᩈᩩᩈᩥᨠ᩠ᨡᩥᨲᩮᩣ.

᪑᪔. ᩋᨴ᩠ᨴᩈᩴ ¶ ᩅᩥᩁᨩᩴ ᨻᩩᨴ᩠ᨵᨶ᩠ᨲᩥ ᩁᩣᨣᨴᩮᩣᩈᨾᩮᩣᩉᩅᩥᩁᩉᩥᨲᨲ᩠ᨲᩣ ᩅᩥᩁᨩᩴ ᨶᩥᨠ᩠ᨠᩥᩃᩮᩈᩴ ᨻᩩᨴ᩠ᨵᩴ ᩋᨴ᩠ᨴᩈᩴ ᩋᨴ᩠ᨴᨠ᩠ᨡᩥᩴ. ᨣᨧ᩠ᨨᨶ᩠ᨲᩴ ᩋᨶᩥᩃᨬ᩠ᨩᩈᩮᨲᩥ ᩋᨶᩥᩃᨬ᩠ᨩᩈᩮ ᩌᨠᩣᩈᨸᨳᩮ ᨣᨧ᩠ᨨᨶ᩠ᨲᩴ ᨻᩩᨴ᩠ᨵᩴ. ᨲᩩᨱ᩠ᨯᩮᨶ ᨾᨿ᩠ᩉᩴ ᨾᩩᨡᨲᩩᨱ᩠ᨯᩮᨶ ᨲᩣᩃᩴ ᩈᩣᩃᨸᩩᨸ᩠ᨹᩴ ᨸᨣ᩠ᨣᨿ᩠ᩉ ᨸᨣ᩠ᨣᩉᩮᨲ᩠ᩅᩣ ᩅᩥᨸᩔᩥᩔᩣᨽᩥᩁᩮᩣᨸᨿᩥᩴ ᩅᩥᨸᩔᩥᩔ ᨽᨣᩅᨲᩮᩣ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨸᨧ᩠ᨧᩣᨣᨾᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᨸᩁᨸ᩠ᨸᩈᩣᨴᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩏᩈᨽᩴ ᨸᩅᩁᩴ ᩅᩦᩁᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᩁᨸ᩠ᨸᩈᩣᨴᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᨲᩥᨱ᩠ᨱᩴ ᩅᩮᨴᩣᨶᩴ ᨸᩣᩁᨣᩪ ᩍᨲᩥᩉᩣᩈᨸᨬ᩠ᨧᨾᩣᨶᩴ ᨸᨴᨠᩮᩣ ᩅᩮᨿ᩠ᨿᩣᨠᩁᨱᩮᩣ ᩈᨶᩥᨥᨱ᩠ᨯᩩᨠᩮᨭᩩᨽᩣᨶᩴ ᩈᩣᨠ᩠ᨡᩁᨸ᩠ᨸᨽᩮᨴᩣᨶᩴ ᩃᩮᩣᨠᩣᨿᨲᨾᩉᩣᨸᩩᩁᩥᩈᩃᨠ᩠ᨡᨱᩮᩈᩩ ᩋᨶᩅᨿᩮᩣ ᨶᩣᨾᩮᨶ ᩈᩮᩃᨻᩕᩣᩉ᩠ᨾᨱᩮᩣᨲᩥ ᨸᩣᨠᨭᩮᩣ ᩈᩥᨴ᩠ᨵᨲ᩠ᨳᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨴ᩠ᩅᨲ᩠ᨲᩥᩴᩈᨾᩉᩣᨸᩩᩁᩥᩈᩃᨠ᩠ᨡᨱᩮᩉᩥ ᩋᩈᩦᨲᩥᩋᨶᩩᨻ᩠ᨿᨬ᩠ᨩᨶᩮᩉᩥ ᨧᩣᨲᩥ ᩈᨿᩴ ᩈᩮᩣᨽᨾᩣᨶᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩋᨶᩮᨠᩮᩉᩥ ᨠᩣᩁᨱᩮᩉᩥ ¶ ᩋᨶᩮᨠᩣᩉᩥ ¶ ᩏᨸᨾᩣᩉᩥ ᨳᩮᩣᨾᨶᩴ ᨸᨠᩣᩈᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᩃᩮᩣᨠᩮ ᩈᨠ᩠ᨠᨾᩣᩁᩣᨴᨿᩮᩣ ᨨ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧᨠ᩠ᨠᩅᨲ᩠ᨲᩥᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᩈ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᨧᨲᩩᨸᨭᩥᩈᨾ᩠ᨽᩥᨴᩣᨨᩊᨽᩥᨬ᩠ᨬᨸ᩠ᨸᨲ᩠ᨲᩮᩣ ᨾᩉᩣᨡᩦᨱᩣᩈᩅᩮᩣ ᩋᩉᩮᩣᩈᩥ, ᨻᩩᨴ᩠ᨵᩔ ᨳᩩᨲᩥᨿᩣ ᩈᨲ᩠ᨲᩣᨶᩴ ᩈᨻ᩠ᨻᩮᩈᩴ ᨧᩥᨲ᩠ᨲᨸ᩠ᨸᩈᩣᨴᨠᩁᨱᨲᩮᩣ ᨸᩁᨸ᩠ᨸᩈᩣᨴᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪒᪐. ᩑᨠᨴᩥᩅᩈᩴ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩏᩈᨽᩴ ᨸᩅᩁᩴ ᩅᩦᩁᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᩏᩈᨽᨶ᩠ᨲᩥ ᩅᩈᨽᩮᩣ ᨶᩥᩈᨽᩮᩣ ᩅᩥᩈᨽᩮᩣ ᩌᩈᨽᩮᩣᨲᩥ ᨧᨲ᩠ᨲᩣᩁᩮᩣ ᨩᩮᨭ᩠ᨮᨸᩩᨦ᩠ᨣᩅᩣ. ᨲᨲ᩠ᨳ ᨣᩅᩈᨲᨩᩮᨭ᩠ᨮᨠᩮᩣ ᩅᩈᨽᩮᩣ, ᨣᩅᩈᩉᩔᨩᩮᨭ᩠ᨮᨠᩮᩣ ᨶᩥᩈᨽᩮᩣ, ᨣᩅᩈᨲᩈᩉᩔᨩᩮᨭ᩠ᨮᨠᩮᩣ ᩅᩥᩈᨽᩮᩣ, ᨣᩅᨠᩮᩣᨭᩥᩈᨲᩈᩉᩔᨩᩮᨭ᩠ᨮᨠᩮᩣ ᩌᩈᨽᩮᩣᨲᩥ ᨧ ᨿᩔ ᨠᩔᨧᩥ ᨳᩩᨲᩥᩴ ᨠᩁᩮᩣᨶ᩠ᨲᩣ ᨻᩕᩣᩉ᩠ᨾᨱᨸᨱ᩠ᨯᩥᨲᩣ ᨻᩉᩩᩔᩩᨲᩣ ᩋᨲ᩠ᨲᨶᩮᩣ ᩋᨲ᩠ᨲᨶᩮᩣ ᨸᨬ᩠ᨬᩣᩅᩈᩮᨶ ᨳᩩᨲᩥᩴ ᨠᩁᩮᩣᨶ᩠ᨲᩥ, ᨻᩩᨴ᩠ᨵᩣᨶᩴ ᨸᨶ ᩈᨻ᩠ᨻᩣᨠᩣᩁᩮᨶ ᨳᩩᨲᩥᩴ ᨠᩣᨲᩩᩴ ᩈᨾᨲ᩠ᨳᩮᩣ ᩑᨠᩮᩣᨸᩥ ᨶᨲ᩠ᨳᩥ. ᩋᨸ᩠ᨸᨾᩮᨿ᩠ᨿᩮᩣ ᩉᩥ ᨻᩩᨴ᩠ᨵᩮᩣ. ᩅᩩᨲ᩠ᨲᨬ᩠ᩉᩮᨲᩴ –

‘‘ᨻᩩᨴ᩠ᨵᩮᩣᨸᩥ ¶ ᨻᩩᨴ᩠ᨵᩔ ᨽᨱᩮᨿ᩠ᨿ ᩅᨱ᩠ᨱᩴ, ᨠᨸ᩠ᨸᨾ᩠ᨸᩥ ᨧᩮ ᩋᨬ᩠ᨬᨾᨽᩣᩈᨾᩣᨶᩮᩣ;

ᨡᩦᨿᩮᨳ ᨠᨸ᩠ᨸᩮᩣ ᨧᩥᩁᨴᩦᨥᨾᨶ᩠ᨲᩁᩮ, ᩅᨱ᩠ᨱᩮᩣ ᨶ ᨡᩦᨿᩮᨳ ᨲᨳᩣᨣᨲᩔᩣ’’ᨲᩥ. (ᨴᩦ. ᨶᩥ. ᩋᨭ᩠ᨮ. ᪑.᪓᪐᪔; ᪓.᪑᪔᪑; ᨾ. ᨶᩥ. ᩋᨭ᩠ᨮ. ᪒.᪔᪒᪕; ᩏᨴᩣ. ᩋᨭ᩠ᨮ. ᪕᪓) –

ᩌᨴᩥᨠᩴ. ᩋᨿᨾ᩠ᨸᩥ ᨻᩕᩣᩉ᩠ᨾᨱᩮᩣ ᨾᩩᨡᩣᩁᩪᩊ᩠ᩉᩅᩈᩮᨶ ᩑᨠᨸᩈᩦᨴᨶᩅᩈᩮᨶ ‘‘ᩌᩈᨽ’’ᨶ᩠ᨲᩥ ᩅᨲ᩠ᨲᨻ᩠ᨻᩮ ‘‘ᩏᩈᨽ’’ᨶ᩠ᨲᩥᩌᨴᩥᨾᩣᩉ. ᩅᩁᩥᨲᨻ᩠ᨻᩮᩣ ᨸᨲ᩠ᨳᩮᨲᨻ᩠ᨻᩮᩣᨲᩥ ᩅᩁᩮᩣ. ᩋᨶᩮᨠᩮᩈᩩ ᨠᨸ᩠ᨸᩈᨲᩈᩉᩔᩮᩈᩩ ᨠᨲᩅᩦᩁᩥᨿᨲ᩠ᨲᩣ ᩅᩦᩁᩮᩣ. ᨾᩉᨶ᩠ᨲᩴ ᩈᩦᩃᨠ᩠ᨡᨶ᩠ᨵᩣᨴᩥᨠᩴ ᩑᩈᨲᩥ ᨣᩅᩮᩈᨲᩦᨲᩥ ᨾᩉᩮᩈᩦ, ᨲᩴ ᨾᩉᩮᩈᩥᩴ ᨻᩩᨴ᩠ᨵᩴ. ᩅᩥᩈᩮᩈᩮᨶ ᨠᩥᩃᩮᩈᨡᨶ᩠ᨵᨾᩣᩁᩣᨴᨿᩮᩣ ᨾᩣᩁᩮ ᨩᩥᨲᩅᩣᨲᩥ ᩅᩥᨩᩥᨲᩣᩅᩦ, ᨲᩴ ᩅᩥᨩᩥᨲᩣᩅᩥᨶᩴ ᩈᨾ᩠ᨻᩩᨴ᩠ᨵᩴ. ᩈᩩᩅᨱ᩠ᨱᩔ ᩅᨱ᩠ᨱᩮᩣ ᩍᩅ ᩅᨱ᩠ᨱᩮᩣ ᨿᩔ ᩈᨾ᩠ᨻᩩᨴ᩠ᨵᩔ ᩈᩮᩣ ᩈᩩᩅᨱ᩠ᨱᩅᨱ᩠ᨱᩮᩣ, ᨲᩴ ᩈᩩᩅᨱ᩠ᨱᩅᨱ᩠ᨱᩴ ᩈᨾ᩠ᨻᩩᨴ᩠ᨵᩴ ᨴᩥᩈ᩠ᩅᩣ ᨠᩮᩣ ᨶᩣᨾ ᩈᨲ᩠ᨲᩮᩣ ᨶᨸ᩠ᨸᩈᩦᨴᨲᩦᨲᩥ.

ᨸᩁᨸ᩠ᨸᩈᩣᨴᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᨽᩥᩈᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩅᩮᩔᨽᩪ ¶ ᨶᩣᨾ ᨶᩣᨾᩮᨶᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨽᩥᩈᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩮᩔᨽᩩᩔ ᨽᨣᩅᨲᩮᩣ ᨠᩣᩃᩮ ᩉᩥᨾᩅᨶ᩠ᨲᩈ᩠ᨾᩥᩴ ᩉᨲ᩠ᨳᩥᨿᩮᩣᨶᩥᨿᩴ ᨶᩥᨻ᩠ᨻᨲ᩠ᨲᩮᩣ ᨲᩈ᩠ᨾᩥᩴ ᨸᨭᩥᩅᩈᨲᩥ. ᨲᩈ᩠ᨾᩥᩴ ᩈᨾᨿᩮ ᩅᩮᩔᨽᩪ ᨽᨣᩅᩣ ᩅᩥᩅᩮᨠᨠᩣᨾᩮᩣ ᩉᩥᨾᩅᨶ᩠ᨲᨾᨣᨾᩣᩈᩥ. ᨲᩴ ᨴᩥᩈ᩠ᩅᩣ ᩈᩮᩣ ᩉᨲ᩠ᨳᩥᨶᩣᨣᩮᩣ ᨸᩈᨶ᩠ᨶᨾᩣᨶᩈᩮᩣ ᨽᩥᩈᨾᩩᩊᩣᩃᩴ ¶ ᨣᩉᩮᨲ᩠ᩅᩣ ᨽᨣᩅᨶ᩠ᨲᩴ ᨽᩮᩣᨩᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᩉᨲ᩠ᨳᩥᨿᩮᩣᨶᩥᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮ ᩏᨸ᩠ᨸᨩ᩠ᨩᩥᨲ᩠ᩅᩣ ᨲᨲ᩠ᨳ ᨨ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᨾᨶᩩᩔᨲ᩠ᨲᨾᩣᨣᨲᩮᩣ ᨾᨶᩩᩔᩮᩈᩩ ᨧᨠ᩠ᨠᩅᨲ᩠ᨲᩥᩈᨾ᩠ᨸᨲ᩠ᨲᩥᩌᨴᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨾᩉᩣᨽᩮᩣᨣᩮ ᩋᨬ᩠ᨬᨲᩁᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᨸᩩᨻ᩠ᨻᩅᩣᩈᨶᩣᨻᩃᩮᨶ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ, ᩈᩮᩣ ᨸᩩᨻ᩠ᨻᩮ ᨠᨲᨠᩩᩈᩃᨶᩣᨾᩮᨶ ᨽᩥᩈᨴᩣᨿᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪒᪙. ᩈᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨴᩔᩮᨶ᩠ᨲᩮᩣ ᩅᩮᩔᨽᩪ ᨶᩣᨾ ᨶᩣᨾᩮᨶᩣᨲᩥᩌᨴᩥᨾᩣᩉ. ᨲᨲ᩠ᨳ ᩅᩮᩔᨽᩪᨲᩥ ᩅᩮᩔᩴ ᨽᩩᨶᩣᨲᩥ ᩋᨲᩥᨠ᩠ᨠᨾᨲᩦᨲᩥ ᩅᩮᩔᨽᩪ. ᩋᨳ ᩅᩣ ᩅᩮᩔᩮ ᩅᩣᨱᩥᨩᨠᨾ᩠ᨾᩮ ᩅᩣ ᨠᩣᨾᩁᩣᨣᩣᨴᩥᨠᩮ ᩅᩣ ᨠᩩᩈᩃᩣᨴᩥᨠᨾ᩠ᨾᩮ ᩅᩣ ᩅᨲ᩠ᨳᩩᨠᩣᨾᨠᩥᩃᩮᩈᨠᩣᨾᩮ ᩅᩣ ᨽᩩᨶᩣᨲᩥ ᩋᨽᩥᨽᩅᨲᩦᨲᩥ ¶ ᩅᩮᩔᨽᩪ, ᩈᩮᩣ ᨶᩣᨾᩮᨶ ᩅᩮᩔᨽᩪ ᨶᩣᨾ ᨽᨣᩅᩣ. ᩍᩈᩦᨶᩴ ᨲᨲᩥᨿᩮᩣ ᩋᩉᩪᨲᩥ ᨠᩩᩈᩃᨵᨾ᩠ᨾᩮ ᩑᩈᨲᩥ ᨣᩅᩮᩈᨲᩦᨲᩥ ᩍᩈᩥ, ‘‘ᩅᩥᨸᩔᩦ, ᩈᩥᨡᩦ, ᩅᩮᩔᨽᩪ’’ᨲᩥ ᩅᩩᨲ᩠ᨲᨲ᩠ᨲᩣ ᨲᨲᩥᨿᩮᩣ ᩍᩈᩥ ᨲᨲᩥᨿᩮᩣ ᨽᨣᩅᩣ ᩋᩉᩩ ᩋᩉᩮᩣᩈᩦᨲᩥ ᩋᨲ᩠ᨳᩮᩣ. ᨠᩣᨶᨶᩴ ᩅᨶᨾᩮᩣᨣ᩠ᨣᨿ᩠ᩉᩣᨲᩥ ᨠᩣᨶᨶᩈᨦ᩠ᨡᩣᨲᩴ ᩅᨶᩴ ᩒᨣᨿ᩠ᩉ ᩒᨣᩉᩮᨲ᩠ᩅᩣ ᨸᩣᩅᩥᩈᩦᨲᩥ ᩋᨲ᩠ᨳᩮᩣ.

᪓᪐. ᨽᩥᩈᨾᩩᩊᩣᩃᩴ ᨣᨱ᩠ᩉᩥᨲ᩠ᩅᩣᨲᩥ ᨴ᩠ᩅᩥᨸᨴᨧᨲᩩᨸ᩠ᨸᨴᩣᨶᩴ ᨨᩣᨲᨠᩴ ᨽᩥᩈᨲᩥ ᩉᩥᩴᩈᨲᩥ ᩅᩥᨶᩣᩈᩮᨲᩦᨲᩥ ᨽᩥᩈᩴ, ᨠᩮᩣ ᩈᩮᩣ? ᨸᨴᩩᨾᨠᨶ᩠ᨴᩮᩣ, ᨽᩥᩈᨬ᩠ᨧ ᨾᩩᩊᩣᩃᨬ᩠ᨧ ᨽᩥᩈᨾᩩᩊᩣᩃᩴ, ᨲᩴ ᨽᩥᩈᨾᩩᩊᩣᩃᩴ ᨣᩉᩮᨲ᩠ᩅᩣᨲᩥ ᩋᨲ᩠ᨳᩮᩣ.

᪓᪑. ᨠᩁᩮᨶ ᨧ ᨸᩁᩣᨾᨭ᩠ᨮᩮᩣᨲᩥ ᨲᩴ ᨾᨿᩣ ᨴᩥᨶ᩠ᨶᨴᩣᨶᩴ, ᩅᩮᩔᨽᩪᩅᩁᨻᩩᨴ᩠ᨵᩥᨶᩣ ᩏᨲ᩠ᨲᨾᨻᩩᨴ᩠ᨵᩥᨶᩣ ᩅᩮᩔᨽᩩᨶᩣ ᨠᩁᩮᨶ ᩉᨲ᩠ᨳᨲᩃᩮᨶ ᨸᩁᩣᨾᨭ᩠ᨮᩮᩣ ᨠᨲᩈᨾ᩠ᨹᩔᩮᩣ ᩋᩉᩮᩣᩈᩥ. ᩈᩩᨡᩣᩉᩴ ᨶᩣᨽᩥᨩᩣᨶᩣᨾᩥ, ᩈᨾᩴ ᨲᩮᨶ ᨠᩩᨲᩮᩣᨲ᩠ᨲᩁᩥᨶ᩠ᨲᩥ ᨲᩮᨶ ᩈᩩᨡᩮᨶ ¶ ᩈᨾᩴ ᩈᩩᨡᩴ ᨶᩣᨽᩥᨩᩣᨶᩣᨾᩥ, ᨲᨲᩮᩣ ᩏᨲ᩠ᨲᩁᩥᩴ ᨲᨲᩮᩣ ᨸᩁᩴ ᨲᨲᩮᩣ ᩋᨵᩥᨠᩴ ᩈᩩᨡᩴ ᨠᩩᨲᩮᩣᨲᩥ ᩋᨲ᩠ᨳᩮᩣ. ᩈᩮᩈᩴ ᨶᨿᩣᨶᩩᩈᩣᩁᩮᨶ ᩈᩩᩅᩥᨬ᩠ᨬᩮᨿ᩠ᨿᨶ᩠ᨲᩥ.

ᨽᩥᩈᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᩈᩩᨧᩥᨶ᩠ᨲᩥᨲᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨣᩥᩁᩥᨴᩩᨣ᩠ᨣᨧᩁᩮᩣ ᩌᩈᩥᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩩᨧᩥᨶ᩠ᨲᩥᨲᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨲ᩠ᨳᨴᩔᩥᩔ ᨽᨣᩅᨲᩮᩣ ᨠᩣᩃᩮ ᩉᩥᨾᩅᨶ᩠ᨲᨸ᩠ᨸᨴᩮᩈᩮ ᨶᩮᩈᩣᨴᨠᩩᩃᩮ ᩏᨸ᩠ᨸᨶ᩠ᨶᩮᩣ ᨾᩥᨣᩈᩪᨠᩁᩣᨴᨿᩮᩣ ᩅᨵᩥᨲ᩠ᩅᩣ ᨡᩣᨴᨶ᩠ᨲᩮᩣ ᩅᩥᩉᩁᨲᩥ. ᨲᨴᩣ ᩃᩮᩣᨠᨶᩣᨳᩮᩣ ᩃᩮᩣᨠᩣᨶᩩᨣ᩠ᨣᩉᩴ ᩈᨲ᩠ᨲᩣᨶᩩᨴ᩠ᨴᨿᨲᨬ᩠ᨧ ᨸᨭᩥᨧ᩠ᨧ ᩉᩥᨾᩅᨶ᩠ᨲᨾᨣᨾᩣᩈᩥ. ᨲᨴᩣ ᩈᩮᩣ ᨶᩮᩈᩣᨴᩮᩣ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩋᨲ᩠ᨲᨶᩮᩣ ᨡᩣᨴᨶᨲ᩠ᨳᩣᨿ ᩌᨶᩦᨲᩴ ᩅᩁᨾᨵᩩᩁᨾᩴᩈᩴ ᩋᨴᩣᩈᩥ. ᨸᨭᩥᨣ᩠ᨣᩉᩮᩈᩥ ᨽᨣᩅᩣ ᨲᩔᩣᨶᩩᨠᨾ᩠ᨸᩣᨿ, ᨲᩴ ᨽᩩᨬ᩠ᨩᩥᨲ᩠ᩅᩣ ᩋᨶᩩᨾᩮᩣᨴᨶᩴ ᩅᨲ᩠ᩅᩣ ᨸᨠ᩠ᨠᩣᨾᩥ. ᩈᩮᩣ ᨲᩮᨶᩮᩅ ᨸᩩᨬ᩠ᨬᩮᨶ ¶ ᨲᩮᨶᩮᩅ ᩈᩮᩣᨾᨶᩔᩮᨶ ᨲᨲᩮᩣ ᨧᩩᨲᩮᩣ ᩈᩩᨣᨲᩦᩈᩩ ᩈᩴᩈᩁᨶ᩠ᨲᩮᩣ ᨨ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧᨠ᩠ᨠᩅᨲ᩠ᨲᩥᩈᨾ᩠ᨸᨲ᩠ᨲᩥᩌᨴᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪓᪖. ᨧᨲᩩᨸᨭᩥᩈᨾ᩠ᨽᩥᨴᩣᨸᨬ᩠ᨧᩣᨽᩥᨬ᩠ᨬᩣᨴᩥᨽᩮᨴᩴ ᨸᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ¶ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨣᩥᩁᩥᨴᩩᨣ᩠ᨣᨧᩁᩮᩣ ᩌᩈᩥᨶ᩠ᨲᩥᩌᨴᩥᨾᩣᩉ. ᨣᩥᩁᨲᩥ ᩈᨴ᩠ᨴᩴ ᨠᩁᩮᩣᨲᩦᨲᩥ ᨣᩥᩁᩥ, ᨠᩮᩣ ᩈᩮᩣ? ᩈᩥᩃᩣᨸᩴᩈᩩᨾᨿᨸᨻ᩠ᨻᨲᩮᩣ, ᨴᩩᨭ᩠ᨮᩩ ᨴᩩᨠ᩠ᨡᩮᨶ ᨣᨾᨶᩦᨿᩴ ᨴᩩᨣ᩠ᨣᩴ, ᨣᩥᩁᩦᩉᩥ ᨴᩩᨣ᩠ᨣᩴ ᨣᩥᩁᩥᨴᩩᨣ᩠ᨣᩴ, ᨴᩩᨣ᩠ᨣᨾᩮᩣᨲᩥ ᩋᨲ᩠ᨳᩮᩣ. ᨲᩈ᩠ᨾᩥᩴ ᨣᩥᩁᩥᨴᩩᨣ᩠ᨣᩮ ᨸᨻ᩠ᨻᨲᨶ᩠ᨲᩁᩮ ᨧᩁᩮᩣ ᨧᩁᨱᩈᩦᩃᩮᩣ ᩌᩈᩥᩴ ᩋᩉᩮᩣᩈᩥᩴ. ᩋᨽᩥᨩᩣᨲᩮᩣᩅ ᨠᩮᩈᩁᩦᨲᩥ ᩋᨽᩥ ᩅᩥᩈᩮᩈᩮᨶ ᨩᩣᨲᩮᩣ ᨶᩥᨻ᩠ᨻᨲ᩠ᨲᩮᩣ ᨠᩮᩈᩁᩦᩅ ᨠᩮᩈᩁᩈᩦᩉᩮᩣ ᩍᩅ ᨣᩥᩁᩥᨴᩩᨣ᩠ᨣᩈ᩠ᨾᩥᩴ ᨧᩁᩣᨾᩦᨲᩥ ᩋᨲ᩠ᨳᩮᩣ.

᪔᪐. ᨣᩥᩁᩥᨴᩩᨣ᩠ᨣᩴ ᨸᩅᩥᩈᩥᩴ ᩋᩉᨶ᩠ᨲᩥ ᩋᩉᩴ ᨲᨴᩣ ᨲᩮᨶ ᨾᩴᩈᨴᩣᨶᩮᨶ ᨸᩦᨲᩥᩈᩮᩣᨾᨶᩔᨩᩣᨲᩮᩣ ᨸᨻ᩠ᨻᨲᨶ᩠ᨲᩁᩴ ᨸᩣᩅᩥᩈᩥᩴ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩈᩩᨧᩥᨶ᩠ᨲᩥᨲᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᩅᨲ᩠ᨳᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨠ᩠ᨡᩥᨩᩣᨲᩮᩣ ¶ ᨲᨴᩣ ᩌᩈᩥᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩅᨲ᩠ᨳᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨲ᩠ᨳᨴᩔᩥᩔ ᨽᨣᩅᨲᩮᩣ ᨠᩣᩃᩮ ᩈᩩᨸᨱ᩠ᨱᨿᩮᩣᨶᩥᨿᩴ ᨶᩥᨻ᩠ᨻᨲ᩠ᨲᩮᩣ ᨣᨶ᩠ᨵᨾᩣᨴᨶᨸᨻ᩠ᨻᨲᩴ ᨣᨧ᩠ᨨᨶ᩠ᨲᩴ ᩋᨲ᩠ᨳᨴᩔᩥᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩈᩩᨸᨱ᩠ᨱᩅᨱ᩠ᨱᩴ ᩅᩥᨩᩉᩥᨲ᩠ᩅᩣ ᨾᩣᨱᩅᨠᩅᨱ᩠ᨱᩴ ᨶᩥᨾ᩠ᨾᩥᨶᩥᨲ᩠ᩅᩣ ᨾᩉᨣ᩠ᨥᩴ ᨴᩥᨻ᩠ᨻᩅᨲ᩠ᨳᩴ ᩌᨴᩣᨿ ᨽᨣᩅᨶ᩠ᨲᩴ ᨸᩪᨩᩮᩈᩥ. ᩈᩮᩣᨸᩥ ᨽᨣᩅᩣ ᨸᨭᩥᨣ᩠ᨣᩉᩮᨲ᩠ᩅᩣ ᩋᨶᩩᨾᩮᩣᨴᨶᩴ ᩅᨲ᩠ᩅᩣ ᨸᨠ᩠ᨠᩣᨾᩥ. ᩈᩮᩣ ᨲᩮᨶᩮᩅ ᩈᩮᩣᨾᨶᩔᩮᨶ ᩅᩦᨲᩥᨶᩣᨾᩮᨲ᩠ᩅᩣ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᨲᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ ᨲᨲ᩠ᨳ ᩋᨸᩁᩣᨸᩁᩴ ᩈᩴᩈᩁᨶ᩠ᨲᩮᩣ ᨸᩩᨬ᩠ᨬᩣᨶᩥ ᩋᨶᩩᨽᩅᩥᨲ᩠ᩅᩣ ᨲᨲᩮᩣ ᨾᨶᩩᩔᩮᩈᩩ ᨾᨶᩩᩔᩈᨾ᩠ᨸᨲ᩠ᨲᩥᨶ᩠ᨲᩥ ᩈᨻ᩠ᨻᨲ᩠ᨳ ᨾᩉᨣ᩠ᨥᩴ ᩅᨲ᩠ᨳᩣᨽᩁᨱᩴ ᩃᨴ᩠ᨵᩴ, ᨲᨲᩮᩣ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᨽᩅᩮ ᩅᨲ᩠ᨳᨧ᩠ᨨᩣᨿᩣᨿ ᨣᨲᨣᨲᨭ᩠ᨮᩣᨶᩮ ᩅᩈᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᨨᩊᨽᩥᨬ᩠ᨬᨸ᩠ᨸᨲ᩠ᨲᨡᩦᨱᩣᩈᩅᩮᩣ ᩋᩉᩮᩣᩈᩥ, ᨸᩩᨻ᩠ᨻᩮ ᨠᨲᨸᩩᨬ᩠ᨬᨶᩣᨾᩮᨶ ᩅᨲ᩠ᨳᨴᩣᨿᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪔᪕. ᩈᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨠ᩠ᨡᩥᨩᩣᨲᩮᩣ ᨲᨴᩣ ᩌᩈᩥᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨸᨠ᩠ᨡᩥᨩᩣᨲᩮᩣᨲᩥ ᨸᨠ᩠ᨡᨶ᩠ᨴᨲᩥ ᩏᨸᩃᩅᨲᩥ ᩈᨠᩩᨱᩮᩣ ᩑᨲᩮᨶᩣᨲᩥ ᨸᨠ᩠ᨡᩴ, ᨸᨠ᩠ᨡᨾᩔ ᩋᨲ᩠ᨳᩦᨲᩥ ᨸᨠ᩠ᨡᩦ, ᨸᨠ᩠ᨡᩥᨿᩮᩣᨶᩥᨿᩴ ᨩᩣᨲᩮᩣ ᨶᩥᨻ᩠ᨻᨲ᩠ᨲᩮᩣᨲᩥ ᩋᨲ᩠ᨳᩮᩣ. ᩈᩩᨸᨱ᩠ᨱᩮᩣᨲᩥ ᩈᩩᨶ᩠ᨴᩁᩴ ᨸᨱ᩠ᨱᩴ ᨸᨲ᩠ᨲᩴ ᨿᩔ ᩈᩮᩣ ᩈᩩᨸᨱ᩠ᨱᩮᩣ, ᩅᩣᨲᨣ᩠ᨣᩣᩉᩈᩩᩅᨱ᩠ᨱᩅᨱ᩠ᨱᨩᩃᨾᩣᨶᨸᨲ᩠ᨲᨾᩉᩣᨽᩣᩁᩮᩣᨲᩥ ¶ ¶ ᩋᨲ᩠ᨳᩮᩣ. ᨣᩁᩩᩊᩣᨵᩥᨸᩮᩣᨲᩥ ᨶᩣᨣᩮ ᨣᨱ᩠ᩉᨶᨲ᩠ᨳᩣᨿ ᨣᩁᩩᩴ ᨽᩣᩁᩴ ᨸᩣᩈᩣᨱᩴ ᨣᩥᩊᨶ᩠ᨲᩦᨲᩥ ᨣᩁᩩᩊᩣ, ᨣᩁᩩᩊᩣᨶᩴ ᩋᨵᩥᨸᩮᩣ ᩁᩣᨩᩣᨲᩥ ᨣᩁᩩᩊᩣᨵᩥᨸᩮᩣ, ᩅᩥᩁᨩᩴ ᨻᩩᨴ᩠ᨵᩴ ᩋᨴ᩠ᨴᩈᩣᩉᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

ᩅᨲ᩠ᨳᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᩋᨾ᩠ᨻᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩋᨶᩮᩣᨾᨴᩔᩦ ᨽᨣᩅᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩋᨾ᩠ᨻᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨶᩮᩣᨾᨴᩔᩥᩔ ᨽᨣᩅᨲᩮᩣ ᨠᩣᩃᩮ ᩅᩣᨶᩁᨿᩮᩣᨶᩥᨿᩴ ¶ ᨶᩥᨻ᩠ᨻᨲ᩠ᨲᩮᩣ ᩉᩥᨾᩅᨶ᩠ᨲᩮ ᨠᨸᩥᩁᩣᨩᩣ ᩉᩩᨲ᩠ᩅᩣ ᨸᨭᩥᩅᩈᨲᩥ. ᨲᩈ᩠ᨾᩥᩴ ᩈᨾᨿᩮ ᩋᨶᩮᩣᨾᨴᩔᩦ ᨽᨣᩅᩣ ᨲᩔᩣᨶᩩᨠᨾ᩠ᨸᩣᨿ ᩉᩥᨾᩅᨶ᩠ᨲᨾᨣᨾᩣᩈᩥ. ᩋᨳ ᩈᩮᩣ ᨠᨸᩥᩁᩣᨩᩣ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩈᩩᨾᨵᩩᩁᩴ ᩋᨾ᩠ᨻᨹᩃᩴ ᨡᩩᨴ᩠ᨴᨾᨵᩩᨶᩣ ᩋᨴᩣᩈᩥ. ᩋᨳ ᨽᨣᩅᩣ ᨲᩔ ᨸᩔᨶ᩠ᨲᩔᩮᩅ ᨲᩴ ᩈᨻ᩠ᨻᩴ ᨸᩁᩥᨽᩩᨬ᩠ᨩᩥᨲ᩠ᩅᩣ ᩋᨶᩩᨾᩮᩣᨴᨶᩴ ᩅᨲ᩠ᩅᩣ ᨸᨠ᩠ᨠᩣᨾᩥ. ᩋᨳ ᩈᩮᩣ ᩈᩮᩣᨾᨶᩔᩈᨾ᩠ᨸᨶ᩠ᨶᩉᨴᨿᩮᩣ ᨲᩮᨶᩮᩅ ᨸᩦᨲᩥᩈᩮᩣᨾᨶᩔᩮᨶ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᨲᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ ᩋᨸᩁᩣᨸᩁᩴ ᨲᨲ᩠ᨳ ᨴᩥᨻ᩠ᨻᩈᩩᨡᨾᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧ ᨾᨶᩩᩔᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᨨᩊᨽᩥᨬ᩠ᨬᨸ᩠ᨸᨲ᩠ᨲᩮᩣ ᩋᩉᩮᩣᩈᩥ. ᨸᩩᨻ᩠ᨻᨸᩩᨬ᩠ᨬᨶᩣᨾᩮᨶ ᩋᨾ᩠ᨻᨴᩣᨿᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪕᪓. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩣ ᨠᨲᨠᩩᩈᩃᨻᩦᨩᩴ ᨴᩥᩈ᩠ᩅᩣ ᩈᩮᩣᨾᨶᩔᨩᩣᨲᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩋᨶᩮᩣᨾᨴᩔᩦ ᨽᨣᩅᩣᨲᩥᩌᨴᩥᨾᩣᩉ. ᨾᩮᨲ᩠ᨲᩣᨿ ᩋᨹᩁᩥ ᩃᩮᩣᨠᩮ, ᩋᨸ᩠ᨸᨾᩣᨱᩮ ᨶᩥᩁᩪᨸᨵᩦᨲᩥ ᩈᩮᩣ ᨽᨣᩅᩣ ᩈᨻ᩠ᨻᩃᩮᩣᨠᩮ ᩋᨸ᩠ᨸᨾᩣᨱᩮ ᩈᨲ᩠ᨲᩮ ‘‘ᩈᩩᨡᩦ ᩉᩮᩣᨶ᩠ᨲᩪ’’ᨲᩥᩌᨴᩥᨶᩣ ᨶᩥᩁᩩᨸᨵᩥ ᩏᨸᨵᩥᩅᩥᩁᩉᩥᨲᩴ ᨠᨲ᩠ᩅᩣ ᨾᩮᨲ᩠ᨲᩣᨿ ᨾᩮᨲ᩠ᨲᨧᩥᨲ᩠ᨲᩮᨶ ᩋᨹᩁᩥ ᨸᨲ᩠ᨳᩁᩥ ᩅᨯ᩠ᨰᩮᩈᩦᨲᩥ ᩋᨲ᩠ᨳᩮᩣ.

᪕᪔. ᨠᨸᩥ ᩋᩉᩴ ᨲᨴᩣ ᩌᩈᩥᨶ᩠ᨲᩥ ᨲᨴᩣ ᨲᩔᩣᨣᨾᨶᨠᩣᩃᩮ ᨠᨸᩥᩁᩣᨩᩣ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ.

ᩋᨾ᩠ᨻᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᩈᩩᨾᨶᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩩᨾᨶᩮᩣ ¶ ᨶᩣᨾ ᨶᩣᨾᩮᨶᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩩᨾᨶᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨡᩥᩔ ᨽᨣᩅᨲᩮᩣ ᨠᩣᩃᩮ ᨾᩣᩃᩣᨠᩣᩁᩔ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨴ᩠ᨵᩣᨩᩣᨲᩮᩣ ᨽᨣᩅᨲᩥ ᨸᩈᨶ᩠ᨶᨾᩣᨶᩈᩮᩣ ᩈᩩᨾᨶᨾᩣᩃᩣᨾᩩᨭ᩠ᨮᩥᨿᩮᩣ ᨣᩉᩮᨲ᩠ᩅᩣ ᩏᨽᩮᩣᩉᩥ ¶ ᩉᨲ᩠ᨳᩮᩉᩥ ᨸᩪᨩᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᨴ᩠ᩅᩮ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨸᩩᨲ᩠ᨲᨴᩣᩁᩮᩉᩥ ᩅᨯ᩠ᨰᩥᨲ᩠ᩅᩣ ᩈᩩᨾᨶᨶᩣᨾᩮᨶ ¶ ᨸᩣᨠᨭᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪖᪒. ᩈᩮᩣ ᩋᩁᩉᩣ ᩉᩩᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩩᨾᨶᩮᩣ ᨶᩣᨾ ᨶᩣᨾᩮᨶᩣᨲᩥᩌᨴᩥᨾᩣᩉ. ᩈᩩᨶ᩠ᨴᩁᩴ ᨾᨶᩴ ᨧᩥᨲ᩠ᨲᩴ ᨿᩔ ᩈᩮᩣ ᩈᩩᨾᨶᩮᩣ. ᩈᨴ᩠ᨵᩣᨸᩈᩣᨴᨻᩉᩩᨾᩣᨶᩮᨶ ᨿᩩᨲ᩠ᨲᩮᩣ ᨶᩣᨾᩮᨶ ᩈᩩᨾᨶᩮᩣ ᨶᩣᨾ ᨾᩣᩃᩣᨠᩣᩁᩮᩣ ᨲᨴᩣ ᩋᩉᩴ ᩋᩉᩮᩣᩈᩥᩴ.

᪖᪓. ᩈᩥᨡᩥᨶᩮᩣ ᩃᩮᩣᨠᨻᨶ᩠ᨵᩩᨶᩮᩣᨲᩥ ᩈᩥᨡᩣ ᨾᩩᨴ᩠ᨵᩣ ᨠᩣᩈᨲᩦᨲᩥ ᩈᩥᨡᩦ. ᩋᨳ ᩅᩣ ᩈᨾ᩠ᨸᨿᩩᨲ᩠ᨲᩈᨾ᩠ᨸᨿᩮᩣᨣᩮ ᨡᩣᨴᨲᩥ ᩅᩥᨴ᩠ᨵᩴᩈᩮᨲᩦᨲᩥ ᩈᩥᨡᩦ, ᨠᩣ ᩈᩣ? ᩋᨣ᩠ᨣᩥᩈᩥᨡᩣ, ᩋᨣ᩠ᨣᩥᩈᩥᨡᩣ ᩅᩥᨿ ᩈᩥᨡᩣᨿ ᨴᩥᨸ᩠ᨸᨶᨲᩮᩣ ᩈᩥᨡᩦ. ᨿᨳᩣ ᩋᨣ᩠ᨣᩥᩈᩥᨡᩣ ᨩᩮᩣᨲᨲᩥ ᨸᩣᨠᨭᩣ ᩉᩮᩣᨲᩥ, ᩈᩥᨡᩦ ᨸᨲ᩠ᨲᨲᩥᨱᨠᨭ᩠ᨮᨸᩃᩣᩈᩣᨴᩥᨠᩮ ᨴᩉᨲᩥ, ᩑᩅᨾᨿᨾ᩠ᨸᩥ ᨽᨣᩅᩣ ᨶᩦᩃᨸᩦᨲᩣᨴᩥᩁᩴᩈᩦᩉᩥ ᨩᩮᩣᨲᨲᩥ ᩈᨠᩃᩃᩮᩣᨠᩈᨶ᩠ᨶᩥᩅᩣᩈᩮ ᨸᩣᨠᨭᩮᩣ ᩉᩮᩣᨲᩥ. ᩈᨠᩈᨶ᩠ᨲᩣᨶᨣᨲᩈᨻ᩠ᨻᨠᩥᩃᩮᩈᩮ ᩈᩮᩣᩈᩮᨲᩥ ᩅᩥᨴ᩠ᨵᩴᩈᩮᨲᩥ ᨫᩣᨸᩮᨲᩦᨲᩥ ᩅᩮᩣᩉᩣᩁᨶᩣᨾᩴ ᨶᩣᨾᨠᨾ᩠ᨾᩴ ᨶᩣᨾᨵᩮᨿ᩠ᨿᩴ, ᨲᩔ ᩈᩥᨡᩥᨶᩮᩣ. ᩈᨠᩃᩃᩮᩣᨠᩔ ᨻᨶ᩠ᨵᩩᨬᩣᨲᨠᩮᩣᨲᩥ ᩃᩮᩣᨠᨻᨶ᩠ᨵᩩ, ᨲᩔ ᩈᩥᨡᩥᨶᩮᩣ ᩃᩮᩣᨠᨻᨶ᩠ᨵᩩᨶᩮᩣ ᨽᨣᩅᨲᩮᩣ ᩈᩩᨾᨶᨸᩩᨸ᩠ᨹᩴ ᩋᨽᩥᩁᩮᩣᨸᨿᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

ᩈᩩᨾᨶᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᨸᩩᨸ᩠ᨹᨧᨦ᩠ᨠᩮᩣᨭᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩋᨽᩦᨲᩁᩪᨸᩴ ᩈᩦᩉᩴ ᩅᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᩩᨸ᩠ᨹᨧᨦ᩠ᨠᩮᩣᨭᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨡᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨾᩉᩣᩅᩥᨽᩅᩈᨾ᩠ᨸᨶ᩠ᨶᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᩈᨶ᩠ᨶᩣᨠᩣᩁᩴ ᨴᩔᩮᨶ᩠ᨲᩮᩣ ᩈᩩᩅᨱ᩠ᨱᩅᨱ᩠ᨱᩴ ᩋᨶᩮᩣᨩᨸᩩᨸ᩠ᨹᨾᩮᩣᨧᩥᨶᩥᨲ᩠ᩅᩣ ᨧᨦ᩠ᨠᩮᩣᨭᨠᩴ ᨸᩪᩁᩮᨲ᩠ᩅᩣ ᨽᨣᩅᨶ᩠ᨲᩴ ᨸᩪᨩᩮᨲ᩠ᩅᩣ ‘‘ᨽᨣᩅᩣ ¶ , ᩍᨾᩔ ᨶᩥᩔᨶ᩠ᨴᩮᨶ ᨶᩥᨻ᩠ᨻᨲ᩠ᨲᨶᩥᨻ᩠ᨻᨲ᩠ᨲᨭ᩠ᨮᩣᨶᩮ ᩈᩩᩅᨱ᩠ᨱᩅᨱ᩠ᨱᩮᩣ ᨸᩪᨩᨶᩦᨿᩮᩣ ᩉᩩᨲ᩠ᩅᩣ ᨶᩥᨻ᩠ᨻᩣᨶᩴ ᨸᩣᨸᩩᨱᩮᨿ᩠ᨿ’’ᨶ᩠ᨲᩥ ᨸᨲ᩠ᨳᨶᨾᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᨾᨶᩩᩔᩮᩈᩩ ᨶᩥᨻ᩠ᨻᨲ᩠ᨲᩮᩣ ᩈᨻ᩠ᨻᨲ᩠ᨳ ᨸᩪᨩᩥᨲᩮᩣ ¶ ᩈᩩᩅᨱ᩠ᨱᩅᨱ᩠ᨱᩮᩣ ᩋᨽᩥᩁᩪᨸᩮᩣ ᩋᩉᩮᩣᩈᩥ. ᩈᩮᩣ ᩋᨸᩁᨽᩣᨣᩮ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪖᪘-᪙. ᩈᩮᩣ ¶ ᨸᨲ᩠ᨲᩋᩁᩉᨲ᩠ᨲᨹᩃᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩋᨽᩦᨲᩁᩪᨸᩴ ᩈᩦᩉᩴ ᩅᩣᨲᩥᩌᨴᩥᨾᩣᩉ. ᨲᨲ᩠ᨳ ᩈᩦᩉᨶ᩠ᨲᩥ ᨴ᩠ᩅᩥᨸᨴᨧᨲᩩᨸ᩠ᨸᨴᩣᨴᨿᩮᩣ ᩈᨲ᩠ᨲᩮ ᩋᨽᩥᨽᩅᨲᩥ ᩋᨩ᩠ᨫᩮᩣᨲ᩠ᨳᩁᨲᩦᨲᩥ ᩈᩦᩉᩮᩣ, ᩋᨽᩦᨲᩁᩪᨸᩮᩣ ᩋᨽᩦᨲᩈᨽᩣᩅᩮᩣ, ᨲᩴ ᩋᨽᩦᨲᩁᩪᨸᩴ ᩈᩦᩉᩴ ᩍᩅ ᨶᩥᩈᩥᨶ᩠ᨶᩴ ᨸᩪᨩᩮᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨸᨠ᩠ᨡᩦᨶᩴ ᩋᨣ᩠ᨣᩴ ᨣᩁᩩᩊᩁᩣᨩᩴ ᩍᩅ ᨸᩅᩁᩴ ᩏᨲ᩠ᨲᨾᩴ ᨻ᩠ᨿᨣ᩠ᨥᩁᩣᨩᩴ ᩍᩅ ᩋᨽᩥ ᩅᩥᩈᩮᩈᩮᨶ ᨩᩣᨲᩴ ᩈᨻ᩠ᨻᩈᩦᩉᩣᨶᩴ ᩅᩥᩈᩮᩈᩴ ᨠᩮᩈᩁᩈᩦᩉᩴ ᩍᩅ ᨲᩥᩃᩮᩣᨠᩔ ᩈᩁᨱᩴ ᩈᩥᨡᩥᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ. ᨠᩥᩴ ᨽᩪᨲᩴ? ᩋᨶᩮᨩᩴ ᨶᩥᨠ᩠ᨠᩥᩃᩮᩈᩴ ᨡᨶ᩠ᨵᨾᩣᩁᩣᨴᩦᩉᩥ ᩋᨸᩁᩣᨩᩥᨲᩴ ᨶᩥᩈᩥᨶ᩠ᨶᩴ ᩈᩥᨡᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨾᩣᩁᨱᩣᨶᨣ᩠ᨣᨶ᩠ᨲᩥ ᩈᨻ᩠ᨻᨠᩥᩃᩮᩈᩣᨶᩴ ᨾᩣᩁᨱᩮ ᩈᩮᩣᩈᨶᩮ ᩅᩥᨴ᩠ᨵᩴᩈᨶᩮ ᩋᨣ᩠ᨣᩴ ᩈᩮᨭ᩠ᨮᩴ ᨠᩥᩃᩮᩈᩮ ᨾᩣᩁᩮᨶ᩠ᨲᩣᨶᩴ ᨸᨧ᩠ᨧᩮᨠᨻᩩᨴ᩠ᨵᨻᩩᨴ᩠ᨵᩈᩣᩅᨠᩣᨶᩴ ᩅᩥᨩ᩠ᨩᨾᩣᨶᩣᨶᨾ᩠ᨸᩥ ᨲᩮᩈᩴ ᩋᨣ᩠ᨣᨶ᩠ᨲᩥ ᩋᨲ᩠ᨳᩮᩣ. ᨽᩥᨠ᩠ᨡᩩᩈᨦ᩠ᨥᨸᩩᩁᨠ᩠ᨡᨲᩴ ᨸᩁᩥᩅᩣᩁᩥᨲᩴ ᨸᩁᩥᩅᩣᩁᩮᨲ᩠ᩅᩣ ᨶᩥᩈᩥᨶ᩠ᨶᩴ ᩈᩥᨡᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

᪗᪐. ᨧᨦ᩠ᨠᩮᩣᨭᨠᩮ ᨮᨸᩮᨲ᩠ᩅᩣᨶᩣᨲᩥ ᩏᨲ᩠ᨲᨾᩴ ᩋᨶᩮᩣᨩᨸᩩᨸ᩠ᨹᩴ ᨠᩁᨱ᩠ᨯᨠᩮ ᨸᩪᩁᩮᨲ᩠ᩅᩣ ᩈᩥᨡᩦᩈᨾ᩠ᨻᩩᨴ᩠ᨵᩴ ᩈᩮᨭ᩠ᨮᩴ ᩈᨾᩮᩣᨠᩥᩁᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

ᨸᩩᨸ᩠ᨹᨧᨦ᩠ᨠᩮᩣᨭᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᩈᨲ᩠ᨲᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᨶᩣᨣᩈᨾᩣᩃᩅᨣ᩠ᨣᩮᩣ

᪑. ᨶᩣᨣᩈᨾᩣᩃᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩌᨸᩣᨭᩃᩥᩴ ¶ ᩋᩉᩴ ᨸᩩᨸ᩠ᨹᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨶᩣᨣᩈᨾᩣᩃᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨡᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᨲᨳᩣᩁᩪᨸᩈᨩ᩠ᨩᨶᩈᩴᩈᨣ᩠ᨣᩔ ¶ ᩋᩃᩣᨽᩮᨶ ᩈᨲ᩠ᨳᩁᩥ ᨵᩁᨾᩣᨶᨠᩣᩃᩮ ᨴᩔᨶᩈᩅᨶᨸᩪᨩᩣᨠᨾ᩠ᨾᨾᨠᩁᩥᨲ᩠ᩅᩣ ᨸᩁᩥᨶᩥᨻ᩠ᨻᩩᨲᨠᩣᩃᩮ ᨲᩔ ᨽᨣᩅᨲᩮᩣ ᩈᩣᩁᩦᩁᩥᨠᨵᩣᨲᩩᩴ ᨶᩥᨴᩉᩥᨲ᩠ᩅᩣ ᨠᨲᨧᩮᨲᩥᨿᨾ᩠ᩉᩥ ᨧᩥᨲ᩠ᨲᩴ ᨸᩈᩣᨴᩮᨲ᩠ᩅᩣ ᨸᩣᨭᩃᩥᨸᩩᨸ᩠ᨹᩴ ᨸᩪᨩᩮᨲ᩠ᩅᩣ ᩈᩮᩣᨾᨶᩔᩴ ᩏᨸ᩠ᨸᩣᨴᩮᨲ᩠ᩅᩣ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᨲᩮᨶᩮᩅ ᩈᩮᩣᨾᨶᩔᩮᨶ ᨲᨲᩮᩣ ᨠᩣᩃᩴ ᨠᨲᩮᩣ ᨲᩩᩈᩥᨲᩣᨴᩦᩈᩩ ᨨᩈᩩ ᨴᩮᩅᩃᩮᩣᨠᩮᩈᩩ ᩈᩩᨡᨾᨶᩩᨽᩅᩥᨲ᩠ᩅᩣ ᩋᨸᩁᨽᩣᨣᩮ ᨾᨶᩩᩔᩮᩈᩩ ᨾᨶᩩᩔᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨶᩣᨣᩁᩩᨠ᩠ᨡᨸᩃ᩠ᩃᩅᨠᩮᩣᨾᩊᩈᨴᩥᩈᩈᩁᩦᩁᨲ᩠ᨲᩣ ᨶᩣᨣᩈᨾᩣᩃᩮᩣᨲᩥ ᨾᩣᨲᩣᨸᩥᨲᩪᩉᩥ ᨠᨲᨶᩣᨾᨵᩮᨿ᩠ᨿᩮᩣ ᨽᨣᩅᨲᩥ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑. ᩈᩮᩣ ¶ ᨸᨧ᩠ᨨᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩌᨸᩣᨭᩃᩥᩴ ᩋᩉᩴ ᨸᩩᨸ᩠ᨹᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᩌᨸᩣᨭᩃᩥᨶ᩠ᨲᩥ ᩌ ᩈᨾᨶ᩠ᨲᨲᩮᩣ, ᩌᨴᩁᩮᨶ ᩅᩣ ᨸᩣᨭᩃᩥᨸᩩᨸ᩠ᨹᩴ ᨣᩉᩮᨲ᩠ᩅᩣ ᩋᩉᩴ ᨳᩪᨸᨾ᩠ᩉᩥ ᩋᨽᩥᩁᩮᩣᨸᩮᩈᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩏᨩ᩠ᨫᩥᨲᩴ ᩈᩩᨾᩉᩣᨸᨳᩮᨲᩥ ᩈᨻ᩠ᨻᨶᨣᩁᩅᩣᩈᩦᨶᩴ ᩅᨶ᩠ᨴᨶᨸᩪᨩᨶᨲ᩠ᨳᩣᨿ ᨾᩉᩣᨸᨳᩮ ᨶᨣᩁᨾᨩ᩠ᨫᩮ ᩅᩦᨳᩥᨿᩴ ᩏᨩ᩠ᨫᩥᨲᩴ ᩏᨭ᩠ᨮᩣᨸᩥᨲᩴ, ᩍᨭ᩠ᨮᨠᨠᨾ᩠ᨾᩈᩩᨵᩣᨠᨾ᩠ᨾᩣᨴᩦᩉᩥ ᨶᩥᨸ᩠ᨹᩣᨴᩥᨲᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩉᩮᨭ᩠ᨮᩣ ᩅᩩᨲ᩠ᨲᨶᨿᨲ᩠ᨲᩣ ᩏᨲ᩠ᨲᩣᨶᨲ᩠ᨳᨲ᩠ᨲᩣ ᨧ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨶᩣᨣᩈᨾᩣᩃᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᨸᨴᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩋᨠ᩠ᨠᨶ᩠ᨲᨬ᩠ᨧ ᨸᨴᩴ ᨴᩥᩈ᩠ᩅᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᨴᩈᨬ᩠ᨬᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ¶ ᨠᨲᩣᨵᩥᨠᩣᩁᩮᩣ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨲᩥᩔᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᩈᨴ᩠ᨵᩣᩈᨾ᩠ᨸᨶ᩠ᨶᩮ ᩏᨸᩣᩈᨠᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᨽᨣᩅᨲᩣ ᨲᩔ ᩋᨶᩩᨠᨾ᩠ᨸᩣᨿ ᨴᩔᩥᨲᩴ ᨸᨴᨧᩮᨲᩥᨿᩴ ᨴᩥᩈ᩠ᩅᩣ ᨸᩈᨶ᩠ᨶᩮᩣ ᩃᩮᩣᨾᩉᨭ᩠ᨮᨩᩣᨲᩮᩣ ᩅᨶ᩠ᨴᨶᨸᩪᨩᨶᩣᨴᩥᨻᩉᩩᨾᩣᨶᨾᨠᩣᩈᩥ. ᩈᩮᩣ ᨲᩮᨶᩮᩅ ᩈᩩᨡᩮᨲ᩠ᨲᩮ ᩈᩩᨠᨲᩮᨶ ᨸᩩᨬ᩠ᨬᩮᨶ ᨲᨲᩮᩣ ᨧᩩᨲᩮᩣ ᩈᨣ᩠ᨣᩮ ᨶᩥᨻ᩠ᨻᨲ᩠ᨲᩮᩣ ᨲᨲ᩠ᨳ ᨴᩥᨻ᩠ᨻᩈᩩᨡᨾᨶᩩᨽᩅᩥᨲ᩠ᩅᩣ ᩋᨸᩁᨽᩣᨣᩮ ᨾᨶᩩᩔᩮᩈᩩ ᨩᩣᨲᩮᩣ ᨾᨶᩩᩔᩈᨾ᩠ᨸᨲ᩠ᨲᩥᩴ ᩈᨻ᩠ᨻᨾᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨴ᩠ᨵᩣᨩᩣᨲᩮᩣ ¶ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ, ᨸᩩᩁᩣᨠᨲᨸᩩᨬ᩠ᨬᨶᩣᨾᩮᨶ ᨸᨴᩈᨬ᩠ᨬᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪕. ᩈᩮᩣ ᩑᨠᨴᩥᩅᩈᩴ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩋᨠ᩠ᨠᨶ᩠ᨲᨬ᩠ᨧ ᨸᨴᩴ ᨴᩥᩈ᩠ᩅᩣᨲᩥᩌᨴᩥᨾᩣᩉ. ᨲᨲ᩠ᨳ ᩋᨠ᩠ᨠᨶ᩠ᨲᨶ᩠ᨲᩥ ᩋᨠ᩠ᨠᨾᩥᨲᩴ ᨴᩔᩥᨲᩴ. ᩈᨻ᩠ᨻᨻᩩᨴ᩠ᨵᩣᨶᩴ ᩈᨻ᩠ᨻᨴᩣ ᨧᨲᩩᩁᨦ᩠ᨣᩩᩃᩮᩣᨸᩁᩥᨿᩮᩅ ᨣᨾᨶᩴ, ᩋᨿᩴ ᨸᨶ ᨲᩔ ᩈᨴ᩠ᨵᩣᩈᨾ᩠ᨸᨶ᩠ᨶᨲᩴ ᨬᨲ᩠ᩅᩣ ‘‘ᩑᩈᩮᩣ ᩍᨾᩴ ᨸᩔᨲᩪ’’ᨲᩥ ᨸᨴᨧᩮᨲᩥᨿᩴ ᨴᩔᩮᩈᩥ, ᨲᩈ᩠ᨾᩣ ᩈᩮᩣ ᨲᩈ᩠ᨾᩥᩴ ᨸᩈᩦᨴᩥᨲ᩠ᩅᩣ ᩅᨶ᩠ᨴᨶᨸᩪᨩᨶᩣᨴᩥᩈᨠ᩠ᨠᩣᩁᨾᨠᩣᩈᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨸᨴᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᨻᩩᨴ᩠ᨵᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨴᩩᨾᨣ᩠ᨣᩮ ᨸᩴᩈᩩᨠᩪᩃᩥᨠᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨻᩩᨴ᩠ᨵᩈᨬ᩠ᨬᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨲᩥᩔᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ¶ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨴ᩠ᨵᩣᨩᩣᨲᩮᩣ ᨴᩩᨾᨣ᩠ᨣᩮ ᩃᨣ᩠ᨣᩥᨲᩴ ᨽᨣᩅᨲᩮᩣ ᨸᩴᩈᩩᨠᩪᩃᨧᩦᩅᩁᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ‘‘ᩋᩁᩉᨴ᩠ᨵᨩ’’ᨶ᩠ᨲᩥ ᨧᩥᨶ᩠ᨲᩮᨲ᩠ᩅᩣ ᩅᨶ᩠ᨴᨶᨸᩪᨩᨶᩣᨴᩥᩈᨠ᩠ᨠᩣᩁᨾᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᨾᨶᩩᩔᩈᨾ᩠ᨸᨲ᩠ᨲᩥᨾᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪙. ᩈᩮᩣ ᨸᨲ᩠ᨲᩋᩁᩉᨲ᩠ᨲᩣᨵᩥᨣᨾᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨴᩩᨾᨣ᩠ᨣᩮ ᨸᩴᩈᩩᨠᩪᩃᩥᨠᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨵᩩᨶᩣᨲᩥ ᨠᨾ᩠ᨸᨲᩦᨲᩥ ᨴᩩᨾᩮᩣ. ᨴᩩᩉᨲᩥ ᨸᩪᩁᩮᨲᩥ ᩌᨠᩣᩈᨲᩃᨶ᩠ᨲᩥ ᩅᩣ ᨴᩩᨾᩮᩣ, ᨴᩩᨾᩔ ᩋᨣ᩠ᨣᩮᩣ ᨠᩮᩣᨭᩦᨲᩥ ᨴᩩᨾᨣ᩠ᨣᩮᩣ, ᨲᩈ᩠ᨾᩥᩴ ᨴᩩᨾᨣ᩠ᨣᩮ. ᨸᩴᩈᩩᨾᩥᩅ ᨸᨭᩥᨠ᩠ᨠᩪᩃᨽᩣᩅᩴ ᩋᨾᨶᩩᨬ᩠ᨬᨽᩣᩅᩴ ᩏᩃᨲᩥ ᨣᨧ᩠ᨨᨲᩦᨲᩥ ᨸᩴᩈᩩᨠᩪᩃᩴ, ᨸᩴᩈᩩᨠᩪᩃᨾᩮᩅ ᨸᩴᩈᩩᨠᩪᩃᩥᨠᩴ, ᩈᨲ᩠ᨳᩩᨶᩮᩣ ¶ ᨸᩴᩈᩩᨠᩪᩃᩴ ᨴᩩᨾᨣ᩠ᨣᩮ ᩃᨣ᩠ᨣᩥᨲᩴ ᨴᩥᩈ᩠ᩅᩣ ᩋᩉᩴ ᩋᨬ᩠ᨩᩃᩥᩴ ᨸᨣ᩠ᨣᩉᩮᨲ᩠ᩅᩣ ᨲᩴ ᨸᩴᩈᩩᨠᩪᩃᩴ ᩋᩅᨶ᩠ᨴᩥᩴ ᨸᨱᩣᨾᨾᨠᩣᩈᩥᨶ᩠ᨲᩥ ᩋᨲ᩠ᨳᩮᩣ. ᨲᨶ᩠ᨲᩥ ᨶᩥᨸᩣᨲᨾᨲ᩠ᨲᩴ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨻᩩᨴ᩠ᨵᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᨽᩥᩈᩣᩃᩩᩅᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨠᩣᨶᨶᩴ ¶ ᩅᨶᨾᩮᩣᨣ᩠ᨣᨿ᩠ᩉᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨽᩥᩈᩣᩃᩩᩅᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᩉᩥᨾᩅᨶ᩠ᨲᩔ ᩈᨾᩦᨸᩮ ᩋᩁᨬ᩠ᨬᩣᩅᩣᩈᩮ ᩅᩈᨶ᩠ᨲᩮᩣ ᩅᨶᨾᩪᩃᨹᩃᩣᩉᩣᩁᩮᩣ ᩅᩥᩅᩮᨠᩅᩈᩮᨶᩣᨣᨲᩴ ᩅᩥᨸᩔᩥᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨸᨬ᩠ᨧᨽᩥᩈᩣᩃᩩᩅᩮ ᩋᨴᩣᩈᩥ. ᨽᨣᩅᩣ ᨲᩔ ᨧᩥᨲ᩠ᨲᩴ ᨸᩈᩣᨴᩮᨲᩩᩴ ᨸᩔᨶ᩠ᨲᩔᩮᩅ ᨸᩁᩥᨽᩩᨬ᩠ᨩᩥ. ᩈᩮᩣ ᨲᩮᨶ ᨧᩥᨲ᩠ᨲᨸ᩠ᨸᩈᩣᨴᩮᨶ ᨠᩣᩃᩴ ᨠᨲ᩠ᩅᩣ ᨲᩩᩈᩥᨲᩣᨴᩦᩈᩩ ᩈᨾ᩠ᨸᨲ᩠ᨲᩥᨾᨶᩩᨽᩅᩥᨲ᩠ᩅᩣ ᨸᨧ᩠ᨨᩣ ᨾᨶᩩᩔᩈᨾ᩠ᨸᨲ᩠ᨲᩥᨬ᩠ᨧ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨽᩅᩈᨾ᩠ᨸᨲ᩠ᨲᩥᩴ ᨸᨲ᩠ᨲᩮᩣ ᨲᩴ ᨸᩉᩣᨿ ᩈᩣᩈᨶᩮ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪑᪓. ᩈᩮᩣ ᨲᨲᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨠᩣᨶᨶᩴ ᩅᨶᨾᩮᩣᨣ᩠ᨣᨿ᩠ᩉᩣᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨳᨾᩮᩅ. ᩅᩈᩣᨾᩥ ᩅᩥᨸᩥᨶᩮ ᩋᩉᨶ᩠ᨲᩥ ᩅᩥᩅᩮᨠᩅᩣᩈᩮᩣ ᩋᩉᩴ ᩅᩈᩣᨾᩦᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨽᩥᩈᩣᩃᩩᩅᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᨨᨭ᩠ᨮᨽᩣᨱᩅᩣᩁᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪕. ᩑᨠᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨡᨱ᩠ᨯᩮᩣ ¶ ᨶᩣᨾᩣᩈᩥ ᨶᩣᨾᩮᨶᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩑᨠᩈᨬ᩠ᨬᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᨾᩣᨶᩈᩮᩣ ᨲᩔ ᩈᨲ᩠ᨳᩩᨶᩮᩣ ᨡᨱ᩠ᨯᩴ ᨶᩣᨾ ᩋᨣ᩠ᨣᩈᩣᩅᨠᩴ ᨽᩥᨠ᩠ᨡᩣᨿ ᨧᩁᨾᩣᨶᩴ ᨴᩥᩈ᩠ᩅᩣ ᩈᨴ᩠ᨴᩉᩥᨲ᩠ᩅᩣ ᨸᩥᨱ᩠ᨯᨸᩣᨲᨾᨴᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ¶ ᨴᩮᩅᨾᨶᩩᩔᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ. ᩈᩮᩣ ᩑᨠᨴᩥᩅᩈᩴ ᨸᩥᨱ᩠ᨯᨸᩣᨲᩔ ᩈᨬ᩠ᨬᩴ ᨾᨶᩈᩥᨠᩁᩥᨲ᩠ᩅᩣ ᨸᨭᩥᩃᨴ᩠ᨵᩅᩥᩈᩮᩈᨲ᩠ᨲᩣ ᩑᨠᩈᨬ᩠ᨬᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪑᪘. ᩈᩮᩣ ¶ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨡᨱ᩠ᨯᩮᩣ ᨶᩣᨾᩣᩈᩥ ᨶᩣᨾᩮᨶᩣᨲᩥᩌᨴᩥᨾᩣᩉ. ᨲᨲ᩠ᨳ ᨲᩔ ᩋᨣ᩠ᨣᩈᩣᩅᨠᨲ᩠ᨳᩮᩁᩔ ᨠᩥᩃᩮᩈᩣᨶᩴ ᨡᨱ᩠ᨯᩥᨲᨲ᩠ᨲᩣ ᨡᨱ᩠ᨯᩮᩣᨲᩥ ᨶᩣᨾᩴ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᩑᨠᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᨲᩥᨱᩈᨶ᩠ᨳᩁᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨲᩥᨱᩈᨶ᩠ᨳᩁᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨲᩥᩔᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨻᩩᨴ᩠ᨵᩩᨸ᩠ᨸᩣᨴᨲᩮᩣ ᨸᨣᩮᩅ ᩏᨸ᩠ᨸᨶ᩠ᨶᨲ᩠ᨲᩣ ᨥᩁᩣᩅᩣᩈᩴ ᨸᩉᩣᨿ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩉᩥᨾᩅᨶ᩠ᨲᩔ ᩋᩅᩥᨴᩪᩁᩮ ᩑᨠᩴ ᩈᩁᩴ ᨶᩥᩔᩣᨿ ᨸᨭᩥᩅᩈᨲᩥ. ᨲᩈ᩠ᨾᩥᩴ ᩈᨾᨿᩮ ᨲᩥᩔᩮᩣ ᨽᨣᩅᩣ ᨲᩔᩣᨶᩩᨠᨾ᩠ᨸᩣᨿ ᩌᨠᩣᩈᩮᨶ ᩋᨣᨾᩣᩈᩥ. ᩋᨳ ᨡᩮᩣ ᩈᩮᩣ ᨲᩣᨸᩈᩮᩣ ᩌᨠᩣᩈᨲᩮᩣ ᩒᩁᩩᨿ᩠ᩉ ᨮᩥᨲᩴ ᨲᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨲᩥᨱᩴ ᩃᩣᨿᩥᨲ᩠ᩅᩣ ᨲᩥᨱᩈᨶ᩠ᨳᩁᩴ ᨠᨲ᩠ᩅᩣ ᨶᩥᩈᩦᨴᩣᨸᩮᨲ᩠ᩅᩣ ᨻᩉᩩᨾᩣᨶᩣᨴᩁᩮᨶ ᨸᨬ᩠ᨧᨸᨲᩥᨭ᩠ᨮᩥᨲᩮᨶ ᩅᨶ᩠ᨴᩥᨲ᩠ᩅᩣ ᨸᨭᩥᨠᩩᨭᩥᨠᩮᩣ ᩉᩩᨲ᩠ᩅᩣ ᨸᨠ᩠ᨠᩣᨾᩥ. ᩈᩮᩣ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᨲᨲᩮᩣ ᨧᩅᩥᨲ᩠ᩅᩣ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩋᨶᩮᨠᩅᩥᨵᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪒᪒. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨳᨾᩮᩅ. ᨾᩉᩣᨩᩣᨲᩔᩁᩮᩣᨲᩥ ᩑᨲ᩠ᨳ ᨸᨶ ᩈᩁᨶ᩠ᨲᩥ ᩑᨲ᩠ᨳ ᨸᩣᨶᩦᨿᨲ᩠ᨳᩥᨠᩣ ᨴ᩠ᩅᩥᨸᨴᨧᨲᩩᨸ᩠ᨸᨴᩣᨴᨿᩮᩣ ᩈᨲ᩠ᨲᩣᨲᩥ ᩈᩁᩴ, ᩋᨳ ᩅᩣ ᩈᩁᨶ᩠ᨲᩥ ᩑᨲ᩠ᨳ ᨶᨴᩦᨠᨶ᩠ᨴᩁᩣᨴᨿᩮᩣᨲᩥ ᩈᩁᩴ, ᨾᩉᨶ᩠ᨲᩮᩣ ¶ ᨧ ᩈᩮᩣ ᩈᨿᨾᩮᩅ ᨩᩣᨲᨲ᩠ᨲᩣ ᩈᩁᩮᩣ ᨧᩮᨲᩥ ᨾᩉᩣᨩᩣᨲᩔᩁᩮᩣ. ᩋᨶᩮᩣᨲᨲ᩠ᨲᨨᨴ᩠ᨴᨶ᩠ᨲᨴᩉᩣᨴᨿᩮᩣ ᩅᩥᨿ ᩋᨸᩣᨠᨭᨶᩣᨾᨲ᩠ᨲᩣ ‘‘ᨾᩉᩣᨩᩣᨲᩔᩁᩮᩣ’’ᨲᩥ ᩅᩩᨲ᩠ᨲᩮᩣᨲᩥ ᨴᨭ᩠ᨮᨻ᩠ᨻᩮᩣ. ᩈᨲᨸᨲ᩠ᨲᩮᩉᩥ ¶ ᩈᨬ᩠ᨨᨶ᩠ᨶᩮᩣᨲᩥ ᩑᨠᩮᨠᩈ᩠ᨾᩥᩴ ᨸᩩᨸ᩠ᨹᩮ ᩈᨲᩈᨲᨸᨲ᩠ᨲᩣᨶᩴ ᩅᩈᩮᨶ ᩈᨲᨸᨲ᩠ᨲᩮᩣ, ᩈᨲᨸᨲ᩠ᨲᩈᩮᨲᨸᨴᩩᨾᩮᩉᩥ ¶ ᩈᨬ᩠ᨨᨶ᩠ᨶᩮᩣ ᨣᩉᨶᩦᨽᩪᨲᩮᩣᨲᩥ ᩋᨲ᩠ᨳᩮᩣ. ᨶᩣᨶᩣᩈᨠᩩᨱᨾᩣᩃᨿᩮᩣᨲᩥ ᩋᨶᩮᨠᩮ ᩉᩴᩈᨠᩩᨠ᩠ᨠᩩᨭᨠᩩᨠ᩠ᨠᩩᩉᨴᩮᨱ᩠ᨯᩥᨽᩣᨴᨿᩮᩣ ᩑᨠᨲᩮᩣ ᨠᩩᨱᨶ᩠ᨲᩥ ᩈᨴ᩠ᨴᩴ ᨠᩁᩮᩣᨶ᩠ᨲᩦᨲᩥ ᩈᨠᩩᨱᩣᨲᩥ ᩃᨴ᩠ᨵᨶᩣᨾᩣᨶᩴ ᨸᨠ᩠ᨡᩦᨶᩴ ᩌᩃᨿᩮᩣ ᩌᨵᩣᩁᨽᩪᨲᩮᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨲᩥᨱᩈᨶ᩠ᨳᩁᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᩈᩪᨧᩥᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨲᩥᩴᩈᨠᨸ᩠ᨸᩈᩉᩔᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩪᨧᩥᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩩᨾᩮᨵᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨽᨣᩅᨲᩮᩣ ᨧᩦᩅᩁᨠᨾ᩠ᨾᩴ ᨠᩣᨲᩩᩴ ᨸᨬ᩠ᨧ ᩈᩪᨧᩥᨿᩮᩣ ᩋᨴᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᨸᩩᨬ᩠ᨬᨾᨶᩩᨽᩅᩥᨲ᩠ᩅᩣ ᩅᩥᨧᩁᨶ᩠ᨲᩮᩣ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᨽᩅᩮ ᨲᩥᨠ᩠ᨡᨸᨬ᩠ᨬᩮᩣ ᩉᩩᨲ᩠ᩅᩣ ᨸᩣᨠᨭᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᨶ᩠ᨲᩮᩣ ᨲᩥᨠ᩠ᨡᨸᨬ᩠ᨬᨲᩣᨿ ᨡᩩᩁᨣ᩠ᨣᩮᨿᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪓᪐. ᩈᩮᩣ ᩋᨸᩁᨽᩣᨣᩮ ᨸᩩᨬ᩠ᨬᩴ ᨸᨧ᩠ᨧᩅᩮᨠ᩠ᨡᨶ᩠ᨲᩮᩣ ᨲᩴ ᨴᩥᩈ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨲᩥᩴᩈᨠᨸ᩠ᨸᩈᩉᩔᨾ᩠ᩉᩦᨲᩥᩌᨴᩥᨾᩣᩉ. ᩋᨶ᩠ᨲᩁᨶ᩠ᨲᩁᩴ ᨸᨶᩮᨲ᩠ᨳ ᩈᩩᩅᩥᨬ᩠ᨬᩮᨿ᩠ᨿᨾᩮᩅ.

᪓᪑. ᨸᨬ᩠ᨧᩈᩪᨧᩦ ᨾᨿᩣ ᨴᩥᨶ᩠ᨶᩣᨲᩥ ᩑᨲ᩠ᨳ ᩈᩪᨧᨲᩥ ᨨᩥᨴ᩠ᨴᩴ ᨠᩁᩮᩣᨲᩥ ᩅᩥᨩ᩠ᨫᨲᩦᨲᩥ ᩈᩪᨧᩥ, ᨸᨬ᩠ᨧᨾᨲ᩠ᨲᩣ ᩈᩪᨧᩦ ᨸᨬ᩠ᨧᩈᩪᨧᩦ ᨾᨿᩣ ᨴᩥᨶ᩠ᨶᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩈᩪᨧᩥᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᨸᩣᨭᩃᩥᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩩᩅᨱ᩠ᨱᩅᨱ᩠ᨱᩴ ᩈᨾ᩠ᨻᩩᨴ᩠ᨵᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᩣᨭᩃᩥᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨲᩥᩔᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ¶ ᨠᩩᩃᨣᩮᩉᩮ ᩈᩮᨭ᩠ᨮᩥᨸᩩᨲ᩠ᨲᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨠᩩᩈᩃᩣᨠᩩᩈᩃᨬ᩠ᨬᩪ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᩣᨭᩃᩥᨸᩩᨸ᩠ᨹᩴ ᨣᩉᩮᨲ᩠ᩅᩣ ᩈᨲ᩠ᨳᩩ ᨸᩪᨩᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨻᩉᩩᨵᩣ ¶ ᩈᩩᨡᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᨶ᩠ᨲᩮᩣ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪓᪖. ᩈᩮᩣ ᩋᨸᩁᨽᩣᨣᩮ ¶ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩩᩅᨱ᩠ᨱᩅᨱ᩠ᨱᩴ ᩈᨾ᩠ᨻᩩᨴ᩠ᨵᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᩋᨶ᩠ᨲᩁᩣᨸᨱᩮᨲᩥ ᩌ ᩈᨾᨶ᩠ᨲᨲᩮᩣ ᩉᩥᩁᨬ᩠ᨬᩈᩩᩅᨱ᩠ᨱᩣᨴᩥᨠᩴ ᨽᨱ᩠ᨯᩴ ᨸᨱᩮᨶ᩠ᨲᩥ ᩅᩥᨠ᩠ᨠᩥᨱᨶ᩠ᨲᩥ ᨸᨲ᩠ᨳᩁᨶ᩠ᨲᩥ ᩑᨲ᩠ᨳᩣᨲᩥ ᩌᨸᨱᩴ, ᩌᨸᨱᩔ ᩋᨶ᩠ᨲᩁᩴ ᩅᩦᨳᩦᨲᩥ ᩋᨶ᩠ᨲᩁᩣᨸᨱᩴ, ᨲᩈ᩠ᨾᩥᩴ ᩋᨶ᩠ᨲᩁᩣᨸᨱᩮ. ᩈᩩᩅᨱ᩠ᨱᩅᨱ᩠ᨱᩴ ᨠᨬ᩠ᨧᨶᨣ᩠ᨥᩥᨿᩈᩴᨠᩣᩈᩴ ᨴ᩠ᩅᨲ᩠ᨲᩥᩴᩈᩅᩁᩃᨠ᩠ᨡᨱᩴ ᩈᨾ᩠ᨻᩩᨴ᩠ᨵᩴ ᨴᩥᩈ᩠ᩅᩣ ᨸᩣᨭᩃᩥᨸᩩᨸ᩠ᨹᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨸᩣᨭᩃᩥᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᨮᩥᨲᨬ᩠ᨩᩃᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨾᩥᨣᩃᩩᨴ᩠ᨴᩮᩣ ᨸᩩᩁᩮ ᩌᩈᩥᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨮᩥᨲᨬ᩠ᨩᩃᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳᩩᨸ᩠ᨸᨶ᩠ᨶᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨲᩥᩔᩔ ᨽᨣᩅᨲᩮᩣ ᨠᩣᩃᩮ ᨸᩩᩁᩣᨠᨲᩮᨶ ᩑᨠᩮᨶ ᨠᨾ᩠ᨾᨧ᩠ᨨᩥᨴ᩠ᨴᩮᨶ ᨶᩮᩈᩣᨴᨿᩮᩣᨶᩥᨿᩴ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨾᩥᨣᩈᩪᨠᩁᩣᨴᨿᩮᩣ ᨾᩣᩁᩮᨲ᩠ᩅᩣ ᨶᩮᩈᩣᨴᨠᨾ᩠ᨾᩮᨶ ᩋᩁᨬ᩠ᨬᩮ ᩅᩣᩈᩴ ᨠᨸ᩠ᨸᩮᩈᩥ. ᨲᩈ᩠ᨾᩥᩴ ᩈᨾᨿᩮ ᨲᩥᩔᩮᩣ ᨽᨣᩅᩣ ᨲᩔᩣᨶᩩᨠᨾ᩠ᨸᩣᨿ ᩉᩥᨾᩅᨶ᩠ᨲᩴ ᩋᨣᨾᩣᩈᩥ. ᩈᩮᩣ ᨲᩴ ᨴ᩠ᩅᨲ᩠ᨲᩥᩴᩈᩅᩁᩃᨠ᩠ᨡᨱᩮᩉᩥ ᩋᩈᩦᨲᩣᨶᩩᨻ᩠ᨿᨬ᩠ᨩᨶᨻ᩠ᨿᩣᨾᨸ᩠ᨸᨽᩣᩉᩥ ᨧ ᨩᩃᨾᩣᨶᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᨱᩣᨾᩴ ᨠᨲ᩠ᩅᩣ ᨣᨶ᩠ᨲ᩠ᩅᩣ ᨸᨱ᩠ᨱᩈᨶ᩠ᨳᩁᩮ ᨶᩥᩈᩦᨴᩥ. ᨲᩈ᩠ᨾᩥᩴ ᨡᨱᩮ ᨴᩮᩅᩮᩣ ᨣᨩ᩠ᨩᨶ᩠ᨲᩮᩣ ᩋᩈᨶᩥ ᨸᨲᩥ, ᨲᨲᩮᩣ ᨾᩁᨱᩈᨾᨿᩮ ᨻᩩᨴ᩠ᨵᨾᨶᩩᩔᩁᩥᨲ᩠ᩅᩣ ᨸᩩᨶᨬ᩠ᨩᩃᩥᨾᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᩈᩩᨡᩮᨲ᩠ᨲᩮ ᨠᨲᨠᩩᩈᩃᨲ᩠ᨲᩣ ᩋᨠᩩᩈᩃᩅᩥᨸᩣᨠᩴ ᨸᨭᩥᨻᩣᩉᩥᨲ᩠ᩅᩣ ᩈᨣ᩠ᨣᩮ ᨶᩥᨻ᩠ᨻᨲ᩠ᨲᩮᩣ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨾᨶᩩᩔᩈᨾ᩠ᨸᨲ᩠ᨲᩥᨿᩮᩣ ᨧ ᩋᨶᩩᨽᩅᩥᨲ᩠ᩅᩣ ᩋᨸᩁᨽᩣᨣᩮ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨸᩩᩁᩣᨠᨲᩅᩣᩈᨶᩣᨿ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪔᪒. ᩈᩮᩣ ¶ ᨲᨲᩮᩣ ᨸᩁᩴ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨾᩥᨣᩃᩩᨴ᩠ᨴᩮᩣ ᨸᩩᩁᩮ ᩌᩈᩥᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨾᩥᨣᩃᩩᨴ᩠ᨴᩮᩣᨲᩥ ᨾᩥᨣᩣᨶᩴ ᨾᩣᩁᨱᩴ ᩏᨸᨣᨧ᩠ᨨᨲᩦᨲᩥ ᨾᩥᨣᩃᩩᨴ᩠ᨴᩮᩣ. ᨾᩥᨣᨶ᩠ᨲᩥ ᩈᩦᨥᩴ ᩅᩣᨲᩅᩮᨣᩮᨶ ᨣᨧ᩠ᨨᨶ᩠ᨲᩥ ᨵᩣᩅᨶ᩠ᨲᩦᨲᩥ ᨾᩥᨣᩣ, ᨲᩮᩈᩴ ᨾᩥᨣᩣᨶᩴ ᨾᩣᩁᨱᩮ ᩃᩩᨴ᩠ᨴᩮᩣ ᨴᩣᩁᩩᨱᩮᩣ ᩃᩮᩣᨽᩦᨲᩥ ᨾᩥᨣᩃᩩᨴ᩠ᨴᩮᩣ. ᩈᩮᩣ ᩋᩉᩴ ᨸᩩᩁᩮ ᨽᨣᩅᨲᩮᩣ ᨴᩔᨶᩈᨾᨿᩮ ᨾᩥᨣᩃᩩᨴ᩠ᨴᩮᩣ ᩌᩈᩥᩴ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ ¶ . ᩋᩁᨬ᩠ᨬᩮ ᨠᩣᨶᨶᩮᨲᩥ ᩋᩁᨲᩥ ᨣᨧ᩠ᨨᨲᩥ ᨾᩥᨣᩈᨾᩪᩉᩮᩣ ᩑᨲ᩠ᨳᩣᨲᩥ ᩋᩁᨬ᩠ᨬᩴ, ᩋᨳ ᩅᩣ ᩌ ᩈᨾᨶ᩠ᨲᨲᩮᩣ ᩁᨩ᩠ᨩᨶ᩠ᨲᩥ ᨲᨲ᩠ᨳ ᩅᩥᩅᩮᨠᩣᨽᩥᩁᨲᩣ ᨻᩩᨴ᩠ᨵᨸᨧ᩠ᨧᩮᨠᨻᩩᨴ᩠ᨵᩣᨴᨿᩮᩣ ¶ ᨾᩉᩣᩈᩣᩁᨸ᩠ᨸᨲ᩠ᨲᩣ ᩈᨸ᩠ᨸᩩᩁᩥᩈᩣᨲᩥ ᩋᩁᨬ᩠ᨬᩴ. ᨠᩣ ᨠᩩᨧ᩠ᨨᩥᨲᩣᨠᩣᩁᩮᨶ ᩅᩣ ᨽᨿᩣᨶᨠᩣᨠᩣᩁᩮᨶ ᩅᩣ ᨶᨴᨶ᩠ᨲᩥ ᩈᨴ᩠ᨴᩴ ᨠᩁᩮᩣᨶ᩠ᨲᩥ, ᩌᨶᨶ᩠ᨲᩥ ᩅᩥᨶ᩠ᨴᨶ᩠ᨲᩦᨲᩥ ᩅᩣ ᨠᩣᨶᨶᩴ, ᨲᩈ᩠ᨾᩥᩴ ᩋᩁᨬ᩠ᨬᩮ ᨠᩣᨶᨶᩮ ᨾᩥᨣᩃᩩᨴ᩠ᨴᩮᩣ ᨸᩩᩁᩮ ᩌᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨲᨲ᩠ᨳ ᩋᨴ᩠ᨴᩈᩴ ᩈᨾ᩠ᨻᩩᨴ᩠ᨵᨶ᩠ᨲᩥ ᨲᨲ᩠ᨳ ᨲᩈ᩠ᨾᩥᩴ ᩋᩁᨬ᩠ᨬᩮ ᩏᨸᨣᨲᩴ ᩈᨾ᩠ᨻᩩᨴ᩠ᨵᩴ ᩋᨴ᩠ᨴᩈᩴ ᩋᨴ᩠ᨴᨠ᩠ᨡᩥᨶ᩠ᨲᩥ ᩋᨲ᩠ᨳᩮᩣ. ᨴᩔᨶᩴ ᨸᩩᩁᩮ ᩋᩉᩮᩣᩈᩥ ᩋᩅᩥᨴᩪᩁᩮ, ᨲᩈ᩠ᨾᩣ ᨾᨶᩮᩣᨴ᩠ᩅᩣᩁᩣᨶᩩᩈᩣᩁᩮᨶ ᨧᨠ᩠ᨡᩩᩅᩥᨬ᩠ᨬᩣᨱᩴ ᨸᩩᩁᩮᨧᩣᩁᩥᨠᩴ ᨠᩣᨿᩅᩥᨬ᩠ᨬᩣᨱᩈᨾᨦ᩠ᨣᩥᩴ ᨸᩣᨸᩮᨲᩥ ᩋᨸ᩠ᨸᩮᨲᩦᨲᩥ ᩋᨲ᩠ᨳᩮᩣ.

᪔᪔. ᨲᨲᩮᩣ ᨾᩮ ᩋᩈᨶᩦᨸᩣᨲᩮᩣᨲᩥ ᩌ ᩈᨾᨶ᩠ᨲᨲᩮᩣ ᩈᨶᨶ᩠ᨲᩮᩣ ᨣᨩ᩠ᨩᨶ᩠ᨲᩮᩣ ᨸᨲᨲᩦᨲᩥ ᩋᩈᨶᩥ, ᩋᩈᨶᩥᨿᩣ ᨸᩣᨲᩮᩣ ᨸᨲᨶᩴ ᩋᩈᨶᩦᨸᩣᨲᩮᩣ, ᨴᩮᩅᨴᨱ᩠ᨯᩮᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨮᩥᨲᨬ᩠ᨩᩃᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᨲᩥᨸᨴᩩᨾᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᩮᩣ ᨶᩣᨾ ᨩᩥᨶᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨲᩥᨸᨴᩩᨾᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩉᩴᩈᩅᨲᩥᨿᩴ ᨾᩣᩃᩣᨠᩣᩁᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨾᩣᩃᩣᨠᩣᩁᨠᨾ᩠ᨾᩴ ᨠᨲ᩠ᩅᩣ ᩅᩈᨶ᩠ᨲᩮᩣ ᩑᨠᨴᩥᩅᩈᩴ ᩋᨶᩮᨠᩅᩥᨵᩣᨶᩥ ᨩᩃᨩᨳᩃᨩᨸᩩᨸ᩠ᨹᩣᨶᩥ ᨣᩉᩮᨲ᩠ᩅᩣ ᩁᨬ᩠ᨬᩮᩣ ᩈᨶ᩠ᨲᩥᨠᩴ ᨣᨶ᩠ᨲᩩᨠᩣᨾᩮᩣ ᩑᩅᩴ ᨧᩥᨶ᩠ᨲᩮᩈᩥ – ‘‘ᩁᩣᨩᩣ ᩍᨾᩣᨶᩥ ᨲᩣᩅ ᨸᩩᨸ᩠ᨹᩣᨶᩥ ᨴᩥᩈ᩠ᩅᩣ ᨸᩈᨶ᩠ᨶᩮᩣ ᩈᩉᩔᩴ ᩅᩣ ᨵᨶᩴ ᨣᩣᨾᩣᨴᩥᨠᩴ ᩅᩣ ᨴᨴᩮᨿ᩠ᨿ, ᩃᩮᩣᨠᨶᩣᨳᩴ ᨸᨶ ᨸᩪᨩᩮᨲ᩠ᩅᩣ ᨶᩥᨻ᩠ᨻᩣᨶᩣᨾᨲᨵᨶᩴ ᩃᨽᩣᨾᩥ, ᨠᩥᩴ ᨾᩮ ᩑᨲᩮᩈᩩ ᩈᩩᨶ᩠ᨴᩁ’’ᨶ᩠ᨲᩥ ᨲᩮᨶ ‘‘ᨽᨣᩅᨶ᩠ᨲᩴ ¶ ᨸᩪᨩᩮᨲ᩠ᩅᩣ ᩈᨣ᩠ᨣᨾᩮᩣᨠ᩠ᨡᩈᨾ᩠ᨸᨲ᩠ᨲᩥᨿᩮᩣ ᨶᩥᨸ᩠ᨹᩣᨴᩮᨲᩩᩴ ᩅᨭ᩠ᨭᨲᩦ’’ᨲᩥ ᨧᩥᨶ᩠ᨲᩮᨲ᩠ᩅᩣ ᩅᨱ᩠ᨱᩅᨶ᩠ᨲᩴ ᩋᨲᩦᩅ ᩁᨲ᩠ᨲᨸᩩᨸ᩠ᨹᨲ᩠ᨲᨿᩴ ᨣᩉᩮᨲ᩠ᩅᩣ ᨸᩪᨩᩮᩈᩥ. ᨲᩣᨶᩥ ᨣᨶ᩠ᨲ᩠ᩅᩣ ᩌᨠᩣᩈᩴ ᨨᩣᨴᩮᨲ᩠ᩅᩣ ᨸᨲ᩠ᨳᩁᩥᨲ᩠ᩅᩣ ᩋᨭ᩠ᨮᩴᩈᩩ. ᨶᨣᩁᩅᩣᩈᩥᨶᩮᩣ ᩋᨧ᩠ᨨᩁᩥᨿᨻ᩠ᨽᩩᨲᨧᩥᨲ᩠ᨲᨩᩣᨲᩣ ᨧᩮᩃᩩᨠ᩠ᨡᩮᨸᩈᩉᩔᩣᨶᩥ ᨸᩅᨲ᩠ᨲᨿᩥᩴᩈᩩ. ᨲᩴ ᨴᩥᩈ᩠ᩅᩣ ᨽᨣᩅᩣ ᩋᨶᩩᨾᩮᩣᨴᨶᩴ ᩋᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨣᩉᨸᨲᩥᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨵᨾ᩠ᨾᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪔᪘. ᩈᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩮᩣ ¶ ᨶᩣᨾ ᨩᩥᨶᩮᩣᨲᩥᩌᨴᩥᨾᩣᩉ. ᨲᩔᨲ᩠ᨳᩮᩣ ᩉᩮᨭ᩠ᨮᩣ ᩅᩩᨲ᩠ᨲᩮᩣᩅ. ᩈᨻ᩠ᨻᨵᨾ᩠ᨾᩣᨶ ᨸᩣᩁᨣᩪᨲᩥ ᩈᨻ᩠ᨻᩮᩈᩴ ᨶᩅᩃᩮᩣᨠᩩᨲ᩠ᨲᩁᨵᨾ᩠ᨾᩣᨶᩴ ᨸᩣᩁᩴ ᨶᩥᨻ᩠ᨻᩣᨶᩴ ᨣᨲᩮᩣ ᨸᨧ᩠ᨧᨠ᩠ᨡᩴ ᨠᨲᩮᩣᨲᩥ ᩋᨲ᩠ᨳᩮᩣ. ᨴᨶ᩠ᨲᩮᩣ ᨴᨶ᩠ᨲᨸᩁᩥᩅᩩᨲᩮᩣᨲᩥ ᩈᨿᩴ ᨠᩣᨿᩅᩣᨧᩣᨴᩦᩉᩥ ¶ ᨴᨶ᩠ᨲᩮᩣ ᩑᨲᨴᨣ᩠ᨣᩮ ᨮᨸᩥᨲᩮᩉᩥ ᩈᩣᩅᨠᩮᩉᩥ ᨸᩁᩥᩅᩩᨲᩮᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩈᨾ᩠ᨻᨶ᩠ᨵᩅᩈᩮᨶ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨲᩥᨸᨴᩩᨾᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᩋᨭ᩠ᨮᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᨲᩥᨾᩥᩁᩅᨣ᩠ᨣᩮᩣ

᪑. ᨲᩥᨾᩥᩁᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨧᨶ᩠ᨴᨽᩣᨣᩣᨶᨴᩦᨲᩦᩁᩮᨲᩥᩌᨴᩥᨠᩴ ¶ ᩌᨿᩈ᩠ᨾᨲᩮᩣ ᨲᩥᨾᩥᩁᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᨠᩣ ᩏᨸ᩠ᨸᨲ᩠ᨲᩥ? ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᩅᩈᨶ᩠ᨲᩮᩣ ᨠᩣᨾᩮᩈᩩ ᩌᨴᩦᨶᩅᩴ ᨴᩥᩈ᩠ᩅᩣ ᨥᩁᩣᩅᩣᩈᩴ ᨸᩉᩣᨿ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᨧᨶ᩠ᨴᨽᩣᨣᩣᨿ ᨶᨴᩥᨿᩣ ᩈᨾᩦᨸᩮ ᩅᩈᨲᩥ, ᩅᩥᩅᩮᨠᨠᩣᨾᨲᩣᨿ ᩉᩥᨾᩅᨶ᩠ᨲᩴ ᨣᨶ᩠ᨲ᩠ᩅᩣ ᨶᩥᩈᩥᨶ᩠ᨶᩴ ᩈᩥᨴ᩠ᨵᨲ᩠ᨳᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᩅᨶ᩠ᨴᩥᨲ᩠ᩅᩣ ᨲᩔ ᨣᩩᨱᩴ ᨸᩈᩦᨴᩥᨲ᩠ᩅᩣ ᨲᩥᨾᩥᩁᨸᩩᨸ᩠ᨹᩴ ᨣᩉᩮᨲ᩠ᩅᩣ ᨸᩪᨩᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᩮᩈᩩ ᨧ ᨾᨶᩩᩔᩮᩈᩩ ᨧ ¶ ᩈᨾ᩠ᨸᨲ᩠ᨲᩥᨾᨶᩩᨽᩅᨶ᩠ᨲᩮᩣ ᩈᩴᩈᩁᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑. ᩈᩮᩣ ᩋᨸᩁᨽᩣᨣᩮ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨧᨶ᩠ᨴᨽᩣᨣᩣᨶᨴᩦᨲᩦᩁᩮᨲᩥᩌᨴᩥᨾᩣᩉ. ᨲᩔᨲ᩠ᨳᩮᩣ ᩉᩮᨭ᩠ᨮᩣ ᩅᩩᨲ᩠ᨲᩮᩣᩅ. ᩋᨶᩩᨽᩮᩣᨲᩴ ᩅᨩᩣᨾᩉᨶ᩠ᨲᩥ ᨣᨦ᩠ᨣᩣᨿ ᩌᩈᨶ᩠ᨶᩮ ᩅᩈᨶᨽᩣᩅᩮᨶ ᩈᨻ᩠ᨻᨲ᩠ᨳ ᩁᨾ᩠ᨾᨽᩣᩅᩮᨶ ᨣᨦ᩠ᨣᩣᨲᩮᩣ ᩉᩮᨭ᩠ᨮᩣ ᩈᩮᩣᨲᩣᨶᩩᩈᩣᩁᩮᨶ ᩋᩉᩴ ᩅᨩᩣᨾᩥ ᨣᨧ᩠ᨨᩣᨾᩥ ᨲᨲ᩠ᨳ ᨲᨲ᩠ᨳ ᩅᩈᩣᨾᩦᨲᩥ ᩋᨲ᩠ᨳᩮᩣ. ᨶᩥᩈᩥᨶ᩠ᨶᩴ ᩈᨾᨱᩴ ᨴᩥᩈ᩠ᩅᩣᨲᩥ ᩈᨾᩥᨲᨸᩣᨸᨲ᩠ᨲᩣ ᩈᩮᩣᩈᩥᨲᨸᩣᨸᨲ᩠ᨲᩣ ᩈᨾᨱᩈᨦ᩠ᨡᩣᨲᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᨴᩥᩈ᩠ᩅᩣᨲᩥ ᩋᨲ᩠ᨳᩮᩣ.

᪒. ᩑᩅᩴ ᨧᩥᨶ᩠ᨲᩮᩈᩉᩴ ᨲᨴᩣᨲᩥ ᩋᨿᩴ ᨽᨣᩅᩣ ᩈᨿᩴ ᨲᩥᨱ᩠ᨱᩮᩣ ᩈᨻ᩠ᨻᩈᨲ᩠ᨲᩮ ᨲᩣᩁᨿᩥᩔᨲᩥ ᩈᩴᩈᩣᩁᨲᩮᩣ ᩏᨲ᩠ᨲᩣᩁᩮᨲᩥ ᩈᨿᩴ ᨠᩣᨿᨴ᩠ᩅᩣᩁᩣᨴᩦᩉᩥ ᨴᨾᩥᨲᩮᩣ ᩋᨿᩴ ᨽᨣᩅᩣ ᨸᩁᩮ ᨴᨾᩮᨲᩥ.

᪓. ᩈᨿᩴ ᩋᩔᨲ᩠ᨳᩮᩣ ᩋᩔᩣᩈᨾ᩠ᨸᨲ᩠ᨲᩮᩣ, ᨠᩥᩃᩮᩈᨸᩁᩥᩊᩣᩉᨲᩮᩣ ᨾᩩᨲ᩠ᨲᩮᩣ ᩈᨻ᩠ᨻᩈᨲ᩠ᨲᩮ ᩋᩔᩣᩈᩮᨲᩥ, ᩈᨶ᩠ᨲᨽᩣᩅᩴ ᩌᨸᩣᨸᩮᨲᩥ. ᩈᨿᩴ ᩈᨶ᩠ᨲᩮᩣ ᩈᨶ᩠ᨲᨠᩣᨿᨧᩥᨲ᩠ᨲᩮᩣ ᨸᩁᩮᩈᩴ ᩈᨶ᩠ᨲᨠᩣᨿᨧᩥᨲ᩠ᨲᩴ ᨸᩣᨸᩮᨲᩥ. ᩈᨿᩴ ᨾᩩᨲ᩠ᨲᩮᩣ ᩈᩴᩈᩣᩁᨲᩮᩣ ᨾᩩᨧ᩠ᨧᩥᨲᩮᩣ ᨸᩁᩮ ᩈᩴᩈᩣᩁᨲᩮᩣ ᨾᩮᩣᨧᨿᩥᩔᨲᩥ. ᩈᩮᩣ ᩋᨿᩴ ᨽᨣᩅᩣ ᩈᨿᩴ ᨶᩥᨻ᩠ᨻᩩᨲᩮᩣ ᨠᩥᩃᩮᩈᨣ᩠ᨣᩦᩉᩥ ᨶᩥᨻ᩠ᨻᩩᨲᩮᩣ ᨸᩁᩮᩈᨾ᩠ᨸᩥ ᨠᩥᩃᩮᩈᨣ᩠ᨣᩦᩉᩥ ᨶᩥᨻ᩠ᨻᩣᨸᩮᩔᨲᩦᨲᩥ ᩋᩉᩴ ᨲᨴᩣ ᩑᩅᩴ ᨧᩥᨶ᩠ᨲᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪔. ᨣᩉᩮᨲ᩠ᩅᩣ ᨲᩥᨾᩥᩁᨸᩩᨸ᩠ᨹᨶ᩠ᨲᩥ ᩈᨠᩃᩴ ᩅᨶᨶ᩠ᨲᩴ ᨶᩦᩃᨠᩣᩊᩁᩴᩈᩦᩉᩥ ᩋᨶ᩠ᨵᨠᩣᩁᩴ ᩅᩥᨿ ᨠᩩᩁᩩᨾᩣᨶᩴ ᨡᩣᨿᨲᩦᨲᩥ ¶ ᨲᩥᨾᩥᩁᩴ ᨸᩩᨸ᩠ᨹᩴ ᨲᩴ ᨣᩉᩮᨲ᩠ᩅᩣ ᨠᨱ᩠ᨱᩥᨠᩣᩅᨱ᩠ᨭᩴ ᨣᩉᩮᨲ᩠ᩅᩣ ᨾᨲ᩠ᨳᨠᩮ ᩈᩦᩈᩔ ᩏᨸᩁᩥ ᩌᨠᩣᩈᩮ ᩒᨠᩥᩁᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨲᩥᨾᩥᩁᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᨣᨲᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨩᩣᨲᩥᨿᩣ ¶ ᩈᨲ᩠ᨲᩅᩔᩮᩣᩉᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨣᨲᩈᨬ᩠ᨬᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨲᩥᩔᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ¶ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨸᩩᩁᩣᨠᨲᩅᩣᩈᨶᩣᩅᩈᩮᨶ ᩈᨴ᩠ᨵᩣᨩᩣᨲᩮᩣ ᩈᨲ᩠ᨲᩅᩔᩥᨠᨠᩣᩃᩮᨿᩮᩅ ᨸᨻ᩠ᨻᨩᩥᨲᩮᩣ ᨽᨣᩅᨲᩮᩣ ᨸᨱᩣᨾᨠᩁᨱᩮᨶᩮᩅ ᨸᩣᨠᨭᩮᩣ ᩋᩉᩮᩣᩈᩥ. ᩈᩮᩣ ᩑᨠᨴᩥᩅᩈᩴ ᩋᨲᩦᩅ ᨶᩦᩃᨾᨱᩥᨸ᩠ᨸᨽᩣᨶᩥ ᨶᨦ᩠ᨣᩃᨠᩈᩥᨲᨭ᩠ᨮᩣᨶᩮ ᩏᨭ᩠ᨮᩥᨲᩈᨲ᩠ᨲᨸᩩᨸ᩠ᨹᩣᨶᩥ ᨣᩉᩮᨲ᩠ᩅᩣ ᩌᨠᩣᩈᩮ ᨸᩪᨩᩮᩈᩥ. ᩈᩮᩣ ᨿᩣᩅᨲᩣᨿᩩᨠᩴ ᩈᨾᨱᨵᨾ᩠ᨾᩴ ᨠᨲ᩠ᩅᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑᪐. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨩᩣᨲᩥᨿᩣ ᩈᨲ᩠ᨲᩅᩔᩮᩣᩉᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨩᩣᨲᩥᨿᩣ ᩈᨲ᩠ᨲᩅᩔᩮᩣᨲᩥ ᨾᩣᨲᩩᨣᨻ᩠ᨽᨲᩮᩣ ᨶᩥᨠ᩠ᨡᨶ᩠ᨲᨠᩣᩃᨲᩮᩣ ᨸᨭ᩠ᨮᩣᨿ ᨸᩁᩥᨸᩩᨱ᩠ᨱᩈᨲ᩠ᨲᩅᩔᩥᨠᩮᩣᨲᩥ ᩋᨲ᩠ᨳᩮᩣ. ᨸᨻ᩠ᨻᨩᩥᩴ ᩋᨶᨣᩣᩁᩥᨿᨶ᩠ᨲᩥ ᩋᨣᩣᩁᩔ ᩉᩥᨲᩴ ᩌᨣᩣᩁᩥᨿᩴ ᨠᩈᩥᩅᩣᨱᩥᨩ᩠ᨩᩣᨴᩥᨠᨾ᩠ᨾᩴ ᨶᨲ᩠ᨳᩥ ᩌᨣᩣᩁᩥᨿᨶ᩠ᨲᩥ ᩋᨶᨣᩣᩁᩥᨿᩴ, ᨻᩩᨴ᩠ᨵᩈᩣᩈᨶᩮ ᨸᨻ᩠ᨻᨩᩥᩴ ᩋᩉᨶ᩠ᨲᩥ ᩋᨲ᩠ᨳᩮᩣ.

᪑᪒. ᩈᩩᨣᨲᩣᨶᩩᨣᨲᩴ ᨾᨣ᩠ᨣᨶ᩠ᨲᩥ ᨻᩩᨴ᩠ᨵᩮᨶ ᨣᨲᩴ ᨾᨣ᩠ᨣᩴ. ᩋᨳ ᩅᩣ ᩈᩩᨣᨲᩮᨶ ᨴᩮᩈᩥᨲᩴ ᨵᨾ᩠ᨾᩣᨶᩩᨵᨾ᩠ᨾᨸᨭᩥᨸᨲ᩠ᨲᩥᨸᩪᩁᨱᩅᩈᩮᨶ ᩉᨭ᩠ᨮᨾᩣᨶᩈᩮᩣ ᨲᩩᨭ᩠ᨮᨧᩥᨲ᩠ᨲᩮᩣ ᨸᩪᨩᩮᨲ᩠ᩅᩣᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨣᨲᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᨶᩥᨸᨶ᩠ᨶᨬ᩠ᨩᩃᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩁᩩᨠ᩠ᨡᨾᩪᩃᩮ ¶ ᨶᩥᩈᩥᨶ᩠ᨶᩮᩣᩉᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨶᩥᨸᨶ᩠ᨶᨬ᩠ᨩᩃᩥᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩮᩈᩩ ᨽᩅᩮᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨲᩥᩔᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨸᨻ᩠ᨻᨩᩥᨲ᩠ᩅᩣ ᩁᩩᨠ᩠ᨡᨾᩪᩃᩥᨠᨦ᩠ᨣᩴ ᨸᩪᩁᨿᨾᩣᨶᩮᩣ ᩋᩁᨬ᩠ᨬᩮ ᩅᩥᩉᩁᨲᩥ. ᨲᩈ᩠ᨾᩥᩴ ᩈᨾᨿᩮ ᨡᩁᩮᩣ ᩌᨻᩣᨵᩮᩣ ᩏᨸ᩠ᨸᨩ᩠ᨩᩥ, ᨲᩮᨶ ᨸᩦᩊᩥᨲᩮᩣ ᨸᩁᨾᨠᩣᩁᩩᨬ᩠ᨬᨸ᩠ᨸᨲ᩠ᨲᩮᩣ ᩋᩉᩮᩣᩈᩥ. ᨲᨴᩣ ᨽᨣᩅᩣ ᨲᩔ ᨠᩣᩁᩩᨬ᩠ᨬᩮᨶ ᨲᨲ᩠ᨳ ᩋᨣᨾᩣᩈᩥ. ᩋᨳ ᩈᩮᩣ ᨶᩥᨸᨶ᩠ᨶᨠᩮᩣᩅ ᩏᨭ᩠ᨮᩥᨲᩩᩴ ᩋᩈᨠ᩠ᨠᩮᩣᨶ᩠ᨲᩮᩣ ᩈᩥᩁᩈᩥ ᩋᨬ᩠ᨩᩃᩥᩴ ᨠᨲ᩠ᩅᩣ ᨽᨣᩅᨲᩮᩣ ᨸᨱᩣᨾᩴ ᩋᨠᩣᩈᩥ. ᩈᩮᩣ ᨲᨲᩮᩣ ᨧᩩᨲᩮᩣ ᨲᩩᩈᩥᨲᨽᩅᨶᩮ ᩏᨸ᩠ᨸᨶ᩠ᨶᩮᩣ ᨲᨲ᩠ᨳ ᩈᨾ᩠ᨸᨲ᩠ᨲᩥᨾᨶᩩᨽᩅᩥᨲ᩠ᩅᩣ ᩑᩅᩴ ᨨ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ¶ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ, ᨸᩩᩁᩣᨠᨲᨸᩩᨬ᩠ᨬᩅᩈᩮᨶ ᨶᩥᨸᨶ᩠ᨶᨬ᩠ᨩᩃᩥᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪑᪖. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨬ᩠ᨬᩈᨾ᩠ᨸᨲ᩠ᨲᩥᨿᩮᩣ ᩒᩃᩮᩣᨠᩮᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ¶ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩁᩩᨠ᩠ᨡᨾᩪᩃᩮ ᨶᩥᩈᩥᨶ᩠ᨶᩮᩣᩉᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᩁᩩᩉᨲᩥ ᨸᨭᩥᩁᩩᩉᨲᩥ ᩏᨴ᩠ᨵᨾᩩᨴ᩠ᨵᩴ ᩌᩁᩮᩣᩉᨲᩦᨲᩥ ᩁᩩᨠ᩠ᨡᩮᩣ, ᨲᩔ ᩁᩩᨠ᩠ᨡᩔ ᨾᩪᩃᩮ ᩈᨾᩦᨸᩮᨲᩥ ᩋᨲ᩠ᨳᩮᩣ. ᨻ᩠ᨿᩣᨵᩥᨲᩮᩣ ᨸᩁᨾᩮᨶ ᨧᩣᨲᩥ ᨸᩁᨾᩮᨶ ᩋᨵᩥᨠᩮᨶ ᨡᩁᩮᨶ ᨠᨠ᩠ᨡᩊᩮᨶ ᨻ᩠ᨿᩣᨵᩥᨶᩣ ᩁᩮᩣᨣᩮᨶ ᨻ᩠ᨿᩣᨵᩥᨲᩮᩣ, ᨻ᩠ᨿᩣᨵᩥᨶᩣ ᩋᩉᩴ ᩈᨾᨶ᩠ᨶᩣᨣᨲᩮᩣᨲᩥ ᩋᨲ᩠ᨳᩮᩣ. ᨸᩁᨾᨠᩣᩁᩩᨬ᩠ᨬᨸ᩠ᨸᨲ᩠ᨲᩮᩣᨾ᩠ᩉᩦᨲᩥ ᨸᩁᨾᩴ ᩋᨵᩥᨠᩴ ᨠᩣᩁᩩᨬ᩠ᨬᩴ ᨴᩦᨶᨽᩣᩅᩴ ᨴᩩᨠ᩠ᨡᩥᨲᨽᩣᩅᩴ ᨸᨲ᩠ᨲᩮᩣᨾ᩠ᩉᩥ ᩋᩁᨬ᩠ᨬᩮ ᨠᩣᨶᨶᩮᨲᩥ ᩈᨾ᩠ᨻᨶ᩠ᨵᩮᩣ.

᪒᪐. ᨸᨬ᩠ᨧᩮᩅᩣᩈᩩᩴ ᨾᩉᩣᩈᩥᨡᩣᨲᩥ ᩈᩥᩁᩈᩥ ᨸᩥᩊᨶ᩠ᨵᨶᨲ᩠ᨳᩮᨶ ᩈᩥᨡᩣ ᩅᩩᨧ᩠ᨧᨲᩥ ᨧᩪᩊᩣ. ᨾᨱᩦᨲᩥ ᨩᩮᩣᨲᨾᩣᨶᩴ ᨾᨠᩩᨭᩴ ᨲᩔ ᩋᨲ᩠ᨳᩦᨲᩥ ᩈᩥᨡᩮᩣ, ᨧᨠ᩠ᨠᩅᨲ᩠ᨲᩥᨶᩮᩣ ᩑᨠᨶᩣᨾᨠᩣ ᨸᨬ᩠ᨧᩮᩅ ᨧᨠ᩠ᨠᩅᨲ᩠ᨲᩥᨶᩮᩣ ᩌᩈᩩᩴ ᩋᩉᩮᩈᩩᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨶᩥᨸᨶ᩠ᨶᨬ᩠ᨩᩃᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᩋᨵᩮᩣᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩋᨽᩥᨽᩪ ᨶᩣᨾ ᩈᩮᩣ ᨽᩥᨠ᩠ᨡᩪᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩋᨵᩮᩣᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩮᩈᩩ ᨽᩅᩮᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨡᩥᩔ ᨽᨣᩅᨲᩮᩣ ¶ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᩋᨸᩁᨽᩣᨣᩮ ᨠᩣᨾᩮᩈᩩ ᩌᨴᩦᨶᩅᩴ ᨴᩥᩈ᩠ᩅᩣ ᨲᩴ ᨸᩉᩣᨿ ᩍᩈᩥᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᨸᨬ᩠ᨧᩣᨽᩥᨬ᩠ᨬᩣᩋᨭ᩠ᨮᩈᨾᩣᨸᨲ᩠ᨲᩥᩃᩣᨽᩦ ᩍᨴ᩠ᨵᩦᩈᩩ ᨧ ᩅᩈᩦᨽᩣᩅᩴ ᨸᨲ᩠ᩅᩣ ᩉᩥᨾᩅᨶ᩠ᨲᩈ᩠ᨾᩥᩴ ᨸᨭᩥᩅᩈᨲᩥ. ᨲᩔ ᩈᩥᨡᩥᩔ ᨽᨣᩅᨲᩮᩣ ᩋᨽᩥᨽᩪ ᨶᩣᨾ ᩋᨣ᩠ᨣᩈᩣᩅᨠᩮᩣ ᩅᩥᩅᩮᨠᩣᨽᩥᩁᨲᩮᩣ ᩉᩥᨾᩅᨶ᩠ᨲᨾᨣᨾᩣᩈᩥ. ᩋᨳ ᩈᩮᩣ ᨲᩣᨸᩈᩮᩣ ᨲᩴ ᩋᨣ᩠ᨣᩈᩣᩅᨠᨲ᩠ᨳᩮᩁᩴ ᨴᩥᩈ᩠ᩅᩣ ᨳᩮᩁᩔ ᨮᩥᨲᨸᨻ᩠ᨻᨲᩴ ᩌᩁᩩᩉᨶ᩠ᨲᩮᩣ ᨸᨻ᩠ᨻᨲᩔ ᩉᩮᨭ᩠ᨮᩣᨲᩃᨲᩮᩣ ᩈᩩᨣᨶ᩠ᨵᩣᨶᩥ ᩅᨱ᩠ᨱᩈᨾ᩠ᨸᨶ᩠ᨶᩣᨶᩥ ᩈᨲ᩠ᨲ ᨸᩩᨸ᩠ᨹᩣᨶᩥ ᨣᩉᩮᨲ᩠ᩅᩣ ᨸᩪᨩᩮᩈᩥ. ᩋᨳ ᩈᩮᩣ ᨳᩮᩁᩮᩣ ᨲᩔᩣᨶᩩᨾᩮᩣᨴᨶᨾᨠᩣᩈᩥ. ᩈᩮᩣᨸᩥ ᨲᩣᨸᩈᩮᩣ ᩈᨠᩔᨾᩴ ᩋᨣᨾᩣᩈᩥ. ᨲᨲ᩠ᨳ ᩑᨠᩮᨶ ᩋᨩᨣᩁᩮᨶ ᨸᩦᩊᩥᨲᩮᩣ ᩋᨸᩁᨽᩣᨣᩮ ᩋᨸᩁᩥᩉᩦᨶᨩ᩠ᨫᩣᨶᩮᩣ ¶ ᨲᩮᨶᩮᩅ ᩏᨸᨴ᩠ᨴᩅᩮᨶ ᩏᨸᨴ᩠ᨴᩩᨲᩮᩣ ᨠᩣᩃᩴ ᨠᨲ᩠ᩅᩣ ᨻᩕᩉ᩠ᨾᩃᩮᩣᨠᨸᩁᩣᨿᨶᩮᩣ ᩉᩩᨲ᩠ᩅᩣ ᨻᩕᩉ᩠ᨾᩈᨾ᩠ᨸᨲ᩠ᨲᩥᩴ ᨨᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨬ᩠ᨧ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨾᨶᩩᩔᩈᨾ᩠ᨸᨲ᩠ᨲᩥᨿᩮᩣ ᨧ ᨡᩮᨸᩮᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨽᨣᩅᨲᩮᩣ ᨵᨾ᩠ᨾᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨠᨲᨸᩩᨬ᩠ᨬᨶᩣᨾᩮᨶ ᩋᨵᩮᩣᨸᩩᨸ᩠ᨹᩥᨿᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪒᪒. ᩈᩮᩣ ᩑᨠᨴᩥᩅᩈᩴ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩋᨽᩥᨽᩪ ᨶᩣᨾ ᩈᩮᩣ ᨽᩥᨠ᩠ᨡᩪᨲᩥᩌᨴᩥᨾᩣᩉ. ᨲᨲ᩠ᨳ ᩈᩦᩃᩈᨾᩣᨵᩦᩉᩥ ᨸᩁᩮ ᩋᨽᩥᨽᩅᨲᩦᨲᩥ ᩋᨽᩥᨽᩪ, ᨡᨶ᩠ᨵᨾᩣᩁᩣᨴᩥᨾᩣᩁᩮ ¶ ᩋᨽᩥᨽᩅᨲᩥ ᩋᨩ᩠ᨫᩮᩣᨲ᩠ᨳᩁᨲᩦᨲᩥ ᩅᩣ ᩋᨽᩥᨽᩪ, ᩈᩈᨶ᩠ᨲᩣᨶᨸᩁᩈᨶ᩠ᨲᩣᨶᨣᨲᨠᩥᩃᩮᩈᩮ ᩋᨽᩥᨽᩅᨲᩥ ᩅᩥᩉᩮᩈᩮᨲᩥ ᩅᩥᨴ᩠ᨵᩴᩈᩮᨲᩦᨲᩥ ᩅᩣ ᩋᨽᩥᨽᩪ. ᨽᩥᨠ᩠ᨡᨶᩈᩦᩃᩮᩣ ᨿᩣᨧᨶᩈᩦᩃᩮᩣᨲᩥ ᨽᩥᨠ᩠ᨡᩩ, ᨨᩥᨶ᩠ᨶᨽᩥᨶ᩠ᨶᨸᨭᨵᩁᩮᩣᨲᩥ ᩅᩣ ᨽᩥᨠ᩠ᨡᩩ. ᩋᨽᩥᨽᩪ ᨶᩣᨾ ᩋᨣ᩠ᨣᩈᩣᩅᨠᩮᩣ ᩈᩮᩣ ᨽᩥᨠ᩠ᨡᩪᨲᩥ ᩋᨲ᩠ᨳᩮᩣ, ᩈᩥᨡᩥᩔ ᨽᨣᩅᨲᩮᩣ ᩋᨣ᩠ᨣᩈᩣᩅᨠᩮᩣᨲᩥ ᩈᨾ᩠ᨻᨶ᩠ᨵᩮᩣ.

᪒᪗. ᩋᨩᨣᩁᩮᩣ ᨾᩴ ᨸᩦᩊᩮᩈᩦᨲᩥ ᨲᨳᩣᩁᩪᨸᩴ ᩈᩦᩃᩈᨾ᩠ᨸᨶ᩠ᨶᩴ ᨫᩣᨶᩈᨾ᩠ᨸᨶ᩠ᨶᩴ ᨲᩣᨸᩈᩴ ᨸᩩᨻ᩠ᨻᩮ ᨠᨲᨸᩣᨸᩮᨶ ᩅᩮᩁᩮᨶ ᨧ ᨾᩉᨶ᩠ᨲᩮᩣ ᩋᨩᨣᩁᩈᨸ᩠ᨸᩮᩣ ᨸᩦᩊᩮᩈᩥ. ᩈᩮᩣ ᨲᩮᨶᩮᩅ ᩏᨸᨴ᩠ᨴᩅᩮᨶ ᩏᨸᨴ᩠ᨴᩩᨲᩮᩣ ᩋᨸᩁᩥᩉᩦᨶᨩ᩠ᨫᩣᨶᩮᩣ ᨠᩣᩃᩴ ᨠᨲ᩠ᩅᩣ ᨻᩕᩉ᩠ᨾᩃᩮᩣᨠᨸᩁᩣᨿᨱᩮᩣ ᩌᩈᩥ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᩋᨵᩮᩣᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᩁᩴᩈᩥᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨻ᩠ᨻᨲᩮ ᩉᩥᨾᩅᨶ᩠ᨲᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩁᩴᩈᩥᩈᨬ᩠ᨬᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᩮᩈᩩ ᨲᩮᩈᩩ ᨽᩅᩮᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ¶ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᨠᩣᨾᩮᩈᩩ ᩌᨴᩦᨶᩅᩴ ᨴᩥᩈ᩠ᩅᩣ ᨥᩁᩣᩅᩣᩈᩴ ᨸᩉᩣᨿ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩋᨩᩥᨶᨧᨾ᩠ᨾᨵᩁᩮᩣ ᩉᩥᨾᩅᨶ᩠ᨲᨾ᩠ᩉᩥ ᩅᩣᩈᩴ ᨠᨸ᩠ᨸᩮᩈᩥ. ᨲᩈ᩠ᨾᩥᩴ ᩈᨾᨿᩮ ᩅᩥᨸᩔᩦ ᨽᨣᩅᩣ ᩉᩥᨾᩅᨶ᩠ᨲᨾᨣᨾᩣᩈᩥ. ᩋᨳ ᩈᩮᩣ ᨲᩣᨸᩈᩮᩣ ᨲᨾᩩᨸᨣᨲᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨲᩔ ᨽᨣᩅᨲᩮᩣ ¶ ᩈᩁᩦᩁᨲᩮᩣ ᨶᩥᨠ᩠ᨡᨶ᩠ᨲᨨᨻ᩠ᨻᨱ᩠ᨱᨻᩩᨴ᩠ᨵᩁᩴᩈᩦᩈᩩ ᨸᩈᩦᨴᩥᨲ᩠ᩅᩣ ᩋᨬ᩠ᨩᩃᩥᩴ ᨸᨣ᩠ᨣᨿ᩠ᩉ ᨸᨬ᩠ᨧᨦ᩠ᨣᩮᨶ ᨶᨾᨠ᩠ᨠᩣᩁᨾᨠᩣᩈᩥ. ᩈᩮᩣ ᨲᩮᨶᩮᩅ ᨸᩩᨬ᩠ᨬᩮᨶ ᩍᨲᩮᩣ ᨧᩩᨲᩮᩣ ᨲᩩᩈᩥᨲᩣᨴᩦᩈᩩ ᨴᩥᨻ᩠ᨻᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩋᨸᩁᨽᩣᨣᩮ ᨾᨶᩩᩔᩈᨾ᩠ᨸᨲ᩠ᨲᩥᨿᩮᩣ ᨧ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᨲᨲ᩠ᨳᩣᨴᩦᨶᩅᩴ ᨴᩥᩈ᩠ᩅᩣ ᨣᩮᩉᩴ ᨸᩉᩣᨿ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪓᪐. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨻ᩠ᨻᨲᩮ ᩉᩥᨾᩅᨶ᩠ᨲᨾ᩠ᩉᩦᨲᩥᩌᨴᩥᨾᩣᩉ. ᨲᨲ᩠ᨳ ᨸᨻ᩠ᨻᨲᩮᨲᩥ ᨸᨠᩣᩁᩮᨶ ᨻᩕᩪᩉᨲᩥ ᩅᨯ᩠ᨰᩮᨲᩦᨲᩥ ᨸᨻ᩠ᨻᨲᩮᩣ, ᩉᩥᨾᩮᩣ ᩋᩔ ᩋᨲ᩠ᨳᩦᨲᩥ ᩉᩥᨾᩅᨶ᩠ᨲᩮᩣ, ᩉᩥᨾᩅᨶ᩠ᨲᩮᩣ ᨧ ᩈᩮᩣ ᨸᨻ᩠ᨻᨲᩮᩣ ᨧᩣᨲᩥ ᩉᩥᨾᩅᨶ᩠ᨲᨸᨻ᩠ᨻᨲᩮᩣ. ᩉᩥᨾᩅᨶ᩠ᨲᨸᨻ᩠ᨻᨲᩮᨲᩥ ᩅᨲ᩠ᨲᨻ᩠ᨻᩮ ᨣᩣᨳᩣᩅᨧᨶᩈᩩᨡᨲ᩠ᨳᩴ ‘‘ᨸᨻ᩠ᨻᨲᩮ ᩉᩥᨾᩅᨶ᩠ᨲᨾ᩠ᩉᩦ’’ᨲᩥ ᩅᩩᨲ᩠ᨲᩴ. ᨲᩈ᩠ᨾᩥᩴ ᩉᩥᨾᩅᨶ᩠ᨲᨾ᩠ᩉᩥ ᨸᨻ᩠ᨻᨲᩮ ᩅᩣᩈᩴ ᨠᨸ᩠ᨸᩮᩈᩥᩴ ᨸᩩᩁᩮ ᩋᩉᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᨶᨿᩣᨶᩩᩈᩣᩁᩮᨶ ᩏᨲ᩠ᨲᩣᨶᨾᩮᩅᩣᨲᩥ.

ᩁᩴᩈᩥᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᨴᩩᨲᩥᨿᩁᩴᩈᩥᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨻ᩠ᨻᨲᩮ ¶ ᩉᩥᨾᩅᨶ᩠ᨲᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨴᩩᨲᩥᨿᩁᩴᩈᩥᩈᨬ᩠ᨬᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᨠᩩᩈᩃᩮᩣ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨹᩩᩔᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᨲᨲ᩠ᨳ ᨴᩮᩣᩈᩴ ᨴᩥᩈ᩠ᩅᩣ ᨲᩴ ᨸᩉᩣᨿ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩉᩥᨾᩅᨶ᩠ᨲᨸᨻ᩠ᨻᨲᩮ ᩅᩈᨶ᩠ᨲᩮᩣ ᩅᩣᨠᨧᩦᩁᨶᩥᩅᩈᨶᩮᩣ ᩅᩥᩅᩮᨠᩈᩩᨡᩮᨶ ᩅᩥᩉᩁᨲᩥ. ᨲᩈ᩠ᨾᩥᩴ ᩈᨾᨿᩮ ᩈᩮᩣ ᨹᩩᩔᩴ ᨽᨣᩅᨶ᩠ᨲᩴ ᨲᩴ ᨸᨴᩮᩈᩴ ᩈᨾ᩠ᨸᨲ᩠ᨲᩴ ᨴᩥᩈ᩠ᩅᩣ ᨲᩔ ᩈᩁᩦᩁᨲᩮᩣ ᨶᩥᨠ᩠ᨡᨶ᩠ᨲᨨᨻ᩠ᨻᨱ᩠ᨱᨻᩩᨴ᩠ᨵᩁᩴᩈᩥᨿᩮᩣ ᩍᨲᩮᩣ ᨧᩥᨲᩮᩣ ᩅᩥᨵᩣᩅᨶ᩠ᨲᩥᨿᩮᩣ ᨴᨱ᩠ᨯᨴᩦᨸᩥᨠᩣᨶᩥᨠ᩠ᨡᨶ᩠ᨲᩅᩥᨸ᩠ᨹᩩᩁᨶ᩠ᨲᨾᩥᩅ ᨴᩥᩈ᩠ᩅᩣ ᨲᩈ᩠ᨾᩥᩴ ᨸᩈᨶ᩠ᨶᩮᩣ ᩋᨬ᩠ᨩᩃᩥᩴ ᨸᨣ᩠ᨣᩉᩮᨲ᩠ᩅᩣ ᩅᨶ᩠ᨴᩥᨲ᩠ᩅᩣ ᨧᩥᨲ᩠ᨲᩴ ᨸᩈᩣᨴᩮᨲ᩠ᩅᩣ ᨲᩮᨶᩮᩅ ᨸᩦᨲᩥᩈᩮᩣᨾᨶᩔᩮᨶ ᨠᩣᩃᩴ ᨠᨲ᩠ᩅᩣ ᨲᩩᩈᩥᨲᩣᨴᩦᩈᩩ ᨶᩥᨻ᩠ᨻᨲ᩠ᨲᩮᩣ ᨲᨲ᩠ᨳ ᨨ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨿᩮᩣ ᨧ ᩋᨶᩩᨽᩅᩥᨲ᩠ᩅᩣ ᩋᨸᩁᨽᩣᨣᩮ ᨾᨶᩩᩔᩈᨾ᩠ᨸᨲ᩠ᨲᩥᨿᩮᩣ ¶ ᨧ ¶ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨸᩩᨻ᩠ᨻᩅᩣᩈᨶᩣᩅᩈᩮᨶ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪓᪕. ᩈᩮᩣ ᩋᨸᩁᨽᩣᨣᩮ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨻ᩠ᨻᨲᩮ ᩉᩥᨾᩅᨶ᩠ᨲᨾ᩠ᩉᩦᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨴᩩᨲᩥᨿᩁᩴᩈᩥᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᨹᩃᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨻ᩠ᨻᨲᩮ ᩉᩥᨾᩅᨶ᩠ᨲᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨹᩃᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᨠᩩᩈᩃᩈᨾ᩠ᨽᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨹᩩᩔᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᩩᨡᨸ᩠ᨸᨲ᩠ᨲᩮᩣ ᨲᩴ ᩈᨻ᩠ᨻᩴ ᨸᩉᩣᨿ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᨡᩁᩣᨩᩥᨶᨧᨾ᩠ᨾᨵᩣᩁᩦ ᩉᩩᨲ᩠ᩅᩣ ᩅᩥᩉᩁᨲᩥ. ᨲᩈ᩠ᨾᩥᨬ᩠ᨧ ᩈᨾᨿᩮ ᨹᩩᩔᩴ ᨽᨣᩅᨶ᩠ᨲᩴ ᨲᨲ᩠ᨳ ᩈᨾ᩠ᨸᨲ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨾᨵᩩᩁᩣᨶᩥ ᨹᩃᩣᨶᩥ ᨣᩉᩮᨲ᩠ᩅᩣ ᨽᩮᩣᨩᩮᩈᩥ. ᩈᩮᩣ ᨲᩮᨶᩮᩅ ᨠᩩᩈᩃᩮᨶ ᨴᩮᩅᩃᩮᩣᨠᩣᨴᩦᩈᩩ ᨸᩩᨬ᩠ᨬᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪓᪙. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩋᨶᩩᩔᩁᩥᨲ᩠ᩅᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨻ᩠ᨻᨲᩮ ᩉᩥᨾᩅᨶ᩠ᨲᨾ᩠ᩉᩦᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩉᩮᨭ᩠ᨮᩣ ᩅᩩᨲ᩠ᨲᨶᨿᨲ᩠ᨲᩣ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨹᩃᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᩈᨴ᩠ᨴᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨻ᩠ᨻᨲᩮ ᩉᩥᨾᩅᨶ᩠ᨲᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᨴ᩠ᨴᩈᨬ᩠ᨬᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ¶ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨹᩩᩔᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ¶ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨴ᩠ᨵᩣᨩᩣᨲᩮᩣ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩉᩥᨾᩅᨶ᩠ᨲᨾ᩠ᩉᩥ ᩋᩁᨬ᩠ᨬᩣᩅᩣᩈᩮ ᩅᩈᨶ᩠ᨲᩮᩣ ᩋᨲ᩠ᨲᨶᩮᩣ ᩋᨶᩩᨠᨾ᩠ᨸᩣᨿ ᩏᨸᨣᨲᩔ ᨽᨣᩅᨲᩮᩣ ᨵᨾ᩠ᨾᩴ ᩈᩩᨲ᩠ᩅᩣ ᨵᨾ᩠ᨾᩮᩈᩩ ¶ ᨧᩥᨲ᩠ᨲᩴ ᨸᩈᩣᨴᩮᨲ᩠ᩅᩣ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᩋᨸᩁᨽᩣᨣᩮ ᨠᩣᩃᩴ ᨠᨲ᩠ᩅᩣ ᨲᩩᩈᩥᨲᩣᨴᩦᩈᩩ ᨨᩈᩩ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨿᩮᩣ ᨧ ᨾᨶᩩᩔᩮᩈᩩ ᨾᨶᩩᩔᩈᨾ᩠ᨸᨲ᩠ᨲᩥᨿᩮᩣ ᨧ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪔᪓. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨻ᩠ᨻᨲᩮ ᩉᩥᨾᩅᨶ᩠ᨲᨾ᩠ᩉᩦᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩈᨴ᩠ᨴᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᨻᩮᩣᨵᩥᩈᩥᨬ᩠ᨧᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩅᩥᨸᩔᩥᩔ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨻᩮᩣᨵᩥᩈᩥᨬ᩠ᨧᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩣᩈᩩ ᨩᩣᨲᩦᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᩣᩈᨶᩮ ᨸᨻ᩠ᨻᨩᩥᨲ᩠ᩅᩣ ᩅᨲ᩠ᨲᨸᨭᩥᨸᨲ᩠ᨲᩥᨿᩣ ᩈᩣᩈᨶᩴ ᩈᩮᩣᨽᨿᨶ᩠ᨲᩮᩣ ᨾᩉᩣᨩᨶᩮ ᨻᩮᩣᨵᩥᨸᩪᨩᩴ ᨠᩩᩁᩩᨾᩣᨶᩮ ᨴᩥᩈ᩠ᩅᩣ ᩋᨶᩮᨠᩣᨶᩥ ᨸᩩᨸ᩠ᨹᩣᨶᩥ ᩈᩩᨣᨶ᩠ᨵᩮᩣᨴᨠᩣᨶᩥ ᨧ ᨣᩣᩉᩣᨸᩮᨲ᩠ᩅᩣ ᨸᩪᨩᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ ᨨ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪔᪖. ᩈᩮᩣ ᩋᩁᩉᩣ ᩉᩩᨲ᩠ᩅᩣ ᨫᩣᨶᨹᩃᩈᩩᨡᩮᨶ ᩅᩦᨲᩥᨶᩣᨾᩮᨲ᩠ᩅᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᩅᩥᩈᩮᩈᩴ ᨸᩁᨾᨲ᩠ᨳᩴ ᨶᩥᨻ᩠ᨻᩣᨶᩴ ᨸᩔᨲᩦᨲᩥ ᩅᩥᨸᩔᩦ, ᩅᩥᩈᩮᩈᩮᨶ ᨽᨻ᩠ᨻᩣᨽᨻ᩠ᨻᨩᨶᩮ ᨸᩔᨲᩦᨲᩥ ᩅᩣ ᩅᩥᨸᩔᩦ, ᩅᩥᨸᩔᨶ᩠ᨲᩮᩣ ᨧᨲᩩᩈᨧ᩠ᨧᩴ ᨸᩔᨶᨴᨠ᩠ᨡᨶᩈᩦᩃᩮᩣᨲᩥ ᩅᩣ ᩅᩥᨸᩔᩦ, ᨲᩔ ᩅᩥᨸᩔᩥᩔ ᨽᨣᩅᨲᩮᩣ ᨾᩉᩣᨻᩮᩣᨵᩥᨾᩉᩮᩣ ¶ ᩋᩉᩪᨲᩥ ᩈᨾ᩠ᨻᨶ᩠ᨵᩮᩣ. ᨲᨲᩕᩣᨸᩥ ᨾᩉᩣᨻᩮᩣᨵᩦᨲᩥ ᨻᩮᩣᨵᩥ ᩅᩩᨧ᩠ᨧᨲᩥ ᨧᨲᩪᩈᩩ ᨾᨣ᩠ᨣᩮᩈᩩ ᨬᩣᨱᩴ, ᨲᨾᩮᨲ᩠ᨳ ᨶᩥᩈᩥᨶ᩠ᨶᩮᩣ ᨽᨣᩅᩣ ᨸᨭᩥᩅᩥᨩ᩠ᨫᨲᩦᨲᩥ ᨠᨱᩥᨠᩣᩁᨸᩣᨴᨸᩁᩩᨠ᩠ᨡᩮᩣᨸᩥ ᨻᩮᩣᨵᩥᨧ᩠ᨧᩮᩅ ᩅᩩᨧ᩠ᨧᨲᩥ, ᨾᩉᩥᨲᩮᩣ ᨧ ᩈᩮᩣ ᨴᩮᩅᨻᩕᩉ᩠ᨾᨶᩁᩣᩈᩩᩁᩮᩉᩥ ᨻᩮᩣᨵᩥ ᨧᩮᨲᩥ ᨾᩉᩣᨻᩮᩣᨵᩥ, ᨾᩉᨲᩮᩣ ᨻᩩᨴ᩠ᨵᩔ ᨽᨣᩅᨲᩮᩣ ᨻᩮᩣᨵᩦᨲᩥ ᩅᩣ ᨾᩉᩣᨻᩮᩣᨵᩥ, ᨲᩔ ᨾᩉᩮᩣ ᨸᩪᨩᩣ ᩋᩉᩮᩣᩈᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨻᩮᩣᨵᩥᩈᩥᨬ᩠ᨧᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᨸᨴᩩᨾᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᩮᩣᨠ᩠ᨡᩁᩅᨶᩴ ¶ ¶ ᨸᩅᩥᨭ᩠ᨮᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᨴᩩᨾᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨹᩩᩔᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨸᨴᩩᨾᩈᨾ᩠ᨸᨶ᩠ᨶᩴ ᩑᨠᩴ ᨸᩮᩣᨠ᩠ᨡᩁᨱᩥᩴ ᨸᩅᩥᩈᩥᨲ᩠ᩅᩣ ᨽᩥᩈᨾᩩᩊᩣᩃᩮ ᨡᩣᨴᨶ᩠ᨲᩮᩣ ᨸᩮᩣᨠ᩠ᨡᩁᨱᩥᨿᩣ ᩋᩅᩥᨴᩪᩁᩮ ᨣᨧ᩠ᨨᨾᩣᨶᩴ ᨹᩩᩔᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨲᨲᩮᩣ ᨸᨴᩩᨾᩣᨶᩥ ᩒᨧᩥᨶᩥᨲ᩠ᩅᩣ ᩌᨠᩣᩈᩮ ᩏᨠ᩠ᨡᩥᨸᩥᨲ᩠ᩅᩣ ᨽᨣᩅᨶ᩠ᨲᩴ ᨸᩪᨩᩮᩈᩥ, ᨲᩣᨶᩥ ᨸᩩᨸ᩠ᨹᩣᨶᩥ ᩌᨠᩣᩈᩮ ᩅᩥᨲᩣᨶᩴ ᩉᩩᨲ᩠ᩅᩣ ᩋᨭ᩠ᨮᩴᩈᩩ. ᩈᩮᩣ ᨽᩥᨿ᩠ᨿᩮᩣᩈᩮᩣᨾᨲ᩠ᨲᩣᨿ ᨸᩈᨶ᩠ᨶᨾᩣᨶᩈᩮᩣ ᨸᨻ᩠ᨻᨩᩥᨲ᩠ᩅᩣ ᩅᨲ᩠ᨲᨸᨭᩥᨸᨲ᩠ᨲᩥᩈᩣᩁᩮᩣ ᩈᨾᨱᨵᨾ᩠ᨾᩴ ᨸᩪᩁᩮᨲ᩠ᩅᩣ ᨲᨲᩮᩣ ᨧᩩᨲᩮᩣ ᨲᩩᩈᩥᨲᨽᩅᨶᨾᩃᩴ ᨠᩩᩁᩩᨾᩣᨶᩮᩣ ᩅᩥᨿ ᨲᨲ᩠ᨳ ᩏᨸ᩠ᨸᨩ᩠ᨩᩥᨲ᩠ᩅᩣ ᨠᨾᩮᨶ ᨨ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨿᩮᩣ ᨧ ᨾᨶᩩᩔᩈᨾ᩠ᨸᨲ᩠ᨲᩥᨿᩮᩣ ᨧ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪕᪑. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᩮᩣᨠ᩠ᨡᩁᩅᨶᩴ ᨸᩅᩥᨭ᩠ᨮᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᨸᨠᩣᩁᩮᨶ ᨶᩊᨴᨱ᩠ᨯᨸᨲ᩠ᨲᩣᨴᩦᩉᩥ ᨡᩁᨶ᩠ᨲᩦᨲᩥ ᨸᩮᩣᨠ᩠ᨡᩁᩣ, ᨸᩮᩣᨠ᩠ᨡᩁᩣᨶᩴ ᩈᨾᩩᨭ᩠ᨮᩥᨲᨭ᩠ᨮᩮᨶ ᩈᨾᩪᩉᨶ᩠ᨲᩥ ᨸᩮᩣᨠ᩠ᨡᩁᩅᨶᩴ, ᨸᨴᩩᨾᨣᨧ᩠ᨨᩈᨱ᩠ᨯᩮᩉᩥ ᨾᨱ᩠ᨯᩥᨲᩴ ᨾᨩ᩠ᨫᩴ ᨸᩅᩥᨭ᩠ᨮᩮᩣ ᩋᩉᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᨸᨴᩩᨾᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᨶᩅᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᩈᩩᨵᩣᩅᨣ᩠ᨣᩮᩣ

᪑. ᩈᩩᨵᩣᨸᩥᨱ᩠ᨯᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᩪᨩᩣᩁᩉᩮ ¶ ¶ ᨸᩪᨩᨿᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩩᨵᩣᨸᩥᨱ᩠ᨯᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᨽᨣᩅᨲᩥ ᨵᩁᨾᩣᨶᩮ ᨸᩩᨬ᩠ᨬᩴ ᨠᩣᨲᩩᨾᩈᨠ᩠ᨠᩮᩣᨶ᩠ᨲᩮᩣ ᨸᩁᩥᨶᩥᨻ᩠ᨻᩩᨲᩮ ᨽᨣᩅᨲᩥ ᨲᩔ ᨵᩣᨲᩩᩴ ᨶᩥᨴᩉᩥᨲ᩠ᩅᩣ ᨧᩮᨲᩥᨿᩮ ᨠᩁᩦᨿᨾᩣᨶᩮ ᩈᩩᨵᩣᨸᩥᨱ᩠ᨯᨾᨴᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨧᨲᩩᨶ᩠ᨶᩅᩩᨲᩥᨠᨸ᩠ᨸᨲᩮᩣ ᨸᨭ᩠ᨮᩣᨿ ᩑᨲ᩠ᨳᨶ᩠ᨲᩁᩮ ᨧᨲᩩᩁᩣᨸᩣᨿᨾᨴᩥᩈ᩠ᩅᩣ ᨴᩮᩅᨾᨶᩩᩔᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑-᪒. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᩪᨩᩣᩁᩉᩮᨲᩥᩌᨴᩥᨾᩣᩉ. ᨲᨲ᩠ᨳ ᨸᩪᨩᩣᩁᩉᩣ ᨶᩣᨾ ᨻᩩᨴ᩠ᨵᨸᨧ᩠ᨧᩮᨠᨻᩩᨴ᩠ᨵᩋᩁᩥᨿᩈᩣᩅᨠᩣᨧᩁᩥᨿᩩᨸᨩ᩠ᨫᩣᨿᨾᩣᨲᩣᨸᩥᨲᩩᨣᩁᩩᩌᨴᨿᩮᩣ, ᨲᩮᩈᩩ ᨸᩪᨩᩣᩁᩉᩮᩈᩩ ᨾᩣᩃᩣᨴᩥᨸᨴᩩᨾᩅᨲ᩠ᨳᩣᨽᩁᨱᨧᨲᩩᨸᨧ᩠ᨧᨿᩣᨴᩦᩉᩥ ¶ ᨸᩪᨩᨿᨲᩮᩣ ᨸᩪᨩᨿᨶ᩠ᨲᩔ ᨸᩩᨣ᩠ᨣᩃᩔ ᨸᩩᨬ᩠ᨬᨠᩮᩣᨭ᩠ᨮᩣᩈᩴ ᩈᩉᩔᩈᨲᩈᩉᩔᩣᨴᩥᩅᩈᩮᨶ ᩈᨦ᩠ᨡ᩠ᨿᩴ ᨠᩣᨲᩩᩴ ᨠᩮᨶᨧᩥ ᨾᩉᩣᨶᩩᨽᩣᩅᩮᨶᩣᨸᩥ ᨶ ᩈᨠ᩠ᨠᩣᨲᩥ ᩋᨲ᩠ᨳᩮᩣ. ᨶ ᨠᩮᩅᩃᨾᩮᩅ ᨵᩁᨾᩣᨶᩮ ᨻᩩᨴ᩠ᨵᩣᨴᨿᩮᩣ ᨸᩪᨩᨿᨲᩮᩣ, ᨸᩁᩥᨶᩥᨻ᩠ᨻᩩᨲᩔᩣᨸᩥ ᨽᨣᩅᨲᩮᩣ ᨧᩮᨲᩥᨿᨸᨭᩥᨾᩣᨻᩮᩣᨵᩥᩌᨴᩦᩈᩩᨸᩥ ᩑᩈᩮᩅ ᨶᨿᩮᩣ.

᪓. ᨲᩴ ᨴᩦᨸᩮᨲᩩᩴ ᨧᨲᩩᨶ᩠ᨶᨾᨸᩥ ᨴᩦᨸᩣᨶᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨧᨲᩩᨶ᩠ᨶᨾᨸᩥ ᨴᩦᨸᩣᨶᨶ᩠ᨲᩥ ᨩᨾ᩠ᨻᩩᨴᩦᨸᩋᨸᩁᨣᩮᩣᨿᩣᨶᩏᨲ᩠ᨲᩁᨠᩩᩁᩩᨸᩩᨻ᩠ᨻᩅᩥᨴᩮᩉᩈᨦ᩠ᨡᩣᨲᩣᨶᩴ ᨧᨲᩩᨶ᩠ᨶᩴ ᨴᩦᨸᩣᨶᩴ ᨲᨴᨶᩩᨣᨲᩣᨶᩴ ᨴ᩠ᩅᩥᩈᩉᩔᨸᩁᩥᨲ᩠ᨲᨴᩦᨸᩣᨶᨬ᩠ᨧ ᩑᨠᨲᩮᩣ ᨠᨲ᩠ᩅᩣ ᩈᨠᩃᨧᨠ᩠ᨠᩅᩣᩊᨣᨻ᩠ᨽᩮ ᩍᩔᩁᩴ ᨧᨠ᩠ᨠᩅᨲ᩠ᨲᩥᩁᨩ᩠ᨩᩴ ᨠᩁᩮᨿ᩠ᨿᩣᨲᩥ ᩋᨲ᩠ᨳᩮᩣ. ᩑᨠᩥᩔᩣ ᨸᩪᨩᨶᩣᨿᩮᨲᨶ᩠ᨲᩥ ᨵᩣᨲᩩᨣᨻ᩠ᨽᩮ ᨧᩮᨲᩥᨿᩮ ᨠᨲᩣᨿ ᩑᨠᩥᩔᩣ ᨸᩪᨩᩣᨿ ᩑᨲᩴ ᩈᨠᩃᨩᨾ᩠ᨻᩩᨴᩦᨸᩮ ᩈᨲ᩠ᨲᩁᨲᨶᩣᨴᩥᨠᩴ ᩈᨠᩃᩴ ᨵᨶᩴ. ᨠᩃᩴ ᨶᩣᨣ᩠ᨥᨲᩥ ᩈᩮᩣᩊᩈᩥᨶ᩠ᨲᩥ ᨧᩮᨲᩥᨿᩮ ᨠᨲᨸᩪᨩᩣᨿ ᩈᩮᩣᩊᩈᨠ᩠ᨡᨲ᩠ᨲᩩᩴ ᩅᩥᨽᨲ᩠ᨲᩔ ᩈᩮᩣᩊᩈᨾᨠᩮᩣᨭ᩠ᨮᩣᩈᩔ ᨶ ᩋᨣ᩠ᨥᨲᩦᨲᩥ ᩋᨲ᩠ᨳᩮᩣ.

᪔. ᩈᩥᨴ᩠ᨵᨲ᩠ᨳᩔ…ᨸᩮ… ¶ ᨹᩃᩥᨲᨶ᩠ᨲᩁᩮᨲᩥ ᨶᩁᩣᨶᩴ ᩋᨣ᩠ᨣᩔ ᩈᩮᨭ᩠ᨮᩔ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨧᩮᨲᩥᨿᩮ ¶ ᨵᩣᨲᩩᨣᨻ᩠ᨽᨾ᩠ᩉᩥ ᩈᩩᨵᩣᨠᨾ᩠ᨾᩮ ᨠᩁᩦᨿᨾᩣᨶᩮ ᨸᩁᩥᨧ᩠ᨨᩮᨴᩣᨶᩴ ᩏᨽᩥᨶ᩠ᨶᨾᨶ᩠ᨲᩁᩮ ᩅᩮᨾᨩ᩠ᨫᩮ, ᩋᨳ ᩅᩣ ᨸᩩᨸ᩠ᨹᨴᩣᨶᨭ᩠ᨮᩣᨶᩣᨶᩴ ᩋᨶ᩠ᨲᩁᩮ ᨹᩃᨶ᩠ᨲᩥᨿᩣ ᨾᨿᩣ ᩈᩩᨵᩣᨸᩥᨱ᩠ᨯᩮᩣ ᨴᩥᨶ᩠ᨶᩮᩣ ᨾᨠ᩠ᨡᩥᨲᩮᩣᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᩈᩩᨵᩣᨸᩥᨱ᩠ᨯᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᩈᩩᨧᩥᨶ᩠ᨲᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨲᩥᩔᩔ ᩃᩮᩣᨠᨶᩣᨳᩔᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩩᨧᩥᨶ᩠ᨲᩥᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩣᩈᩩ ᨩᩣᨲᩦᩈᩩ ᨶᩥᨻ᩠ᨻᩣᨶᩣᨵᩥᨣᨾᩣᨿ ᨸᩩᨬ᩠ᨬᩴ ᩏᨸᨧᩥᨶᩥᨲ᩠ᩅᩣ ᨲᩥᩔᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᩈᨲ᩠ᨳᩩ ᨶᩥᩈᩦᨴᨶᨲ᩠ᨳᩣᨿ ᨸᩁᩥᩈᩩᨴ᩠ᨵᩴ ᩈᩥᩃᩥᨭ᩠ᨮᩴ ᨠᨭ᩠ᨮᨾᨿᨾᨶᨣ᩠ᨥᨸᩦᨮᨾᨴᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᩈᩩᨣᨲᩥᩈᩩᨡᨾᨶᩩᨽᩅᩥᨲ᩠ᩅᩣ ᨲᨲ᩠ᨳ ᨲᨲ᩠ᨳ ᩈᩴᩈᩁᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪘. ᩈᩮᩣ ᨸᨲ᩠ᨲᩋᩁᩉᨲ᩠ᨲᨹᩃᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨲᩥᩔᩔ ᩃᩮᩣᨠᨶᩣᨳᩔᩣᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩈᩩᨧᩥᨶ᩠ᨲᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᩋᨯ᩠ᨰᨧᩮᩊᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨲᩥᩔᩔᩣᩉᩴ ¶ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩋᨯ᩠ᨰᨧᩮᩊᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨳᩮᩁᩮᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨲᩥᩔᩔ ᨽᨣᩅᨲᩮᩣ ᨠᩣᩃᩮ ᩑᨠᩮᨶᩣᨠᩩᩈᩃᩮᨶ ᨠᨾ᩠ᨾᩮᨶ ᨴᩩᨣ᩠ᨣᨲᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨴ᩠ᨵᨾ᩠ᨾᨴᩮᩈᨶᩴ ᨬᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨧᩦᩅᩁᨲ᩠ᨳᩣᨿ ᩋᨯ᩠ᨰᨽᩣᨣᩴ ᩑᨠᩴ ᨴᩩᩔᨾᨴᩣᩈᩥ. ᩈᩮᩣ ¶ ᨲᩮᨶᩮᩅ ᨸᩦᨲᩥᩈᩮᩣᨾᨶᩔᩮᨶ ᨠᩣᩃᩴ ᨠᨲ᩠ᩅᩣ ᩈᨣ᩠ᨣᩮ ᨶᩥᨻ᩠ᨻᨲ᩠ᨲᩮᩣ ᨨ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨾᨶᩩᨽᩅᩥᨲ᩠ᩅᩣ ᨲᨲᩮᩣ ᨧᩩᨲᩮᩣ ᨾᨶᩩᩔᩮᩈᩩ ᨾᨶᩩᩔᩈᨾ᩠ᨸᨲ᩠ᨲᩦᨶᩴ ᩋᨣ᩠ᨣᨽᩪᨲᩴ ᨧᨠ᩠ᨠᩅᨲ᩠ᨲᩥᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᩋᨴ᩠ᨵᨠᩩᩃᩮ ¶ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑᪔. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨲᩥᩔᩔᩣᩉᩴ ᨽᨣᩅᨲᩮᩣᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩋᨯ᩠ᨰᨧᩮᩊᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᩈᩪᨧᩥᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨠᨾ᩠ᨾᩣᩁᩮᩣᩉᩴ ᨸᩩᩁᩮ ᩌᩈᩥᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩪᨧᩥᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶ᩠ᨲᩁᨶ᩠ᨲᩁᩣ ᨠᩩᩈᩃᨻᩦᨩᩣᨶᩥ ᨸᩪᩁᩮᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᩋᨶ᩠ᨲᩁᨶ᩠ᨲᩁᩣ ᨠᨲᩮᨶ ᩑᨠᩮᨶ ᨠᨾ᩠ᨾᨧ᩠ᨨᩥᨴ᩠ᨴᩮᨶ ᨠᨾ᩠ᨾᩣᩁᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨠᩈᩥᨸ᩠ᨸᩮᩈᩩ ᨶᩥᨸ᩠ᨹᨲ᩠ᨲᩥᩴ ᨸᨲ᩠ᨲᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨧᩦᩅᩁᩈᩥᨻ᩠ᨻᨶᨲ᩠ᨳᩣᨿ ᩈᩪᨧᩥᨴᩣᨶᨾᨴᩣᩈᩥ, ᨲᩮᨶ ᨸᩩᨬ᩠ᨬᩮᨶ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩋᨸᩁᨽᩣᨣᩮ ᨾᨶᩩᩔᩮᩈᩩ ᩏᨸ᩠ᨸᨶ᩠ᨶᩮᩣ ᨧᨠ᩠ᨠᩅᨲ᩠ᨲᩣᨴᨿᩮᩣ ᩈᨾ᩠ᨸᨲ᩠ᨲᩥᨿᩮᩣ ᨧ ᩋᨶᩩᨽᩅᨶ᩠ᨲᩮᩣ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᨽᩅᩮ ᨲᩥᨠ᩠ᨡᨸᨬ᩠ᨬᩮᩣ ᩅᨩᩦᩁᨬᩣᨱᩮᩣ ᩋᩉᩮᩣᩈᩥ. ᩈᩮᩣ ᨠᨾᩮᨶ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨾᩉᨴ᩠ᨵᨶᩮᩣ ᩈᨴ᩠ᨵᩣᨩᩣᨲᩮᩣ ᨲᩥᨠ᩠ᨡᨸᨬ᩠ᨬᩮᩣ ᩋᩉᩮᩣᩈᩥ. ᩈᩮᩣ ᩑᨠᨴᩥᩅᩈᩴ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨵᨾ᩠ᨾᩣᨶᩩᩈᩣᩁᩮᨶ ᨬᩣᨱᩴ ᨸᩮᩈᩮᨲ᩠ᩅᩣ ᨶᩥᩈᩥᨶ᩠ᨶᩣᩈᨶᩮᨿᩮᩅ ᩋᩁᩉᩣ ᩋᩉᩮᩣᩈᩥ.

᪑᪙. ᩈᩮᩣ ᩋᩁᩉᩣ ᩈᨾᩣᨶᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨠᨾ᩠ᨾᩣᩁᩮᩣᩉᩴ ᨸᩩᩁᩮ ᩌᩈᩥᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨠᨾ᩠ᨾᩣᩁᩮᩣᨲᩥ ᩋᨿᩮᩣᨠᨾ᩠ᨾᩃᩮᩣᩉᨠᨾ᩠ᨾᩣᨴᩥᨶᩣ ᨠᨾ᩠ᨾᩮᨶ ᨩᩦᩅᨲᩥ ᩁᩩᩉᨲᩥ ᩅᩩᨴ᩠ᨵᩥᩴ ᩅᩥᩁᩪᩊ᩠ᩉᩥᩴ ᩌᨸᨩ᩠ᨩᨲᩦᨲᩥ ᨠᨾ᩠ᨾᩣᩁᩮᩣ, ᨸᩩᨻ᩠ᨻᩮ ᨸᩩᨬ᩠ᨬᨠᩁᨱᨠᩣᩃᩮ ᨠᨾ᩠ᨾᩣᩁᩮᩣ ᩌᩈᩥᩴ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᩈᩪᨧᩥᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᨣᨶ᩠ᨵᨾᩣᩃᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩥᨴ᩠ᨵᨲ᩠ᨳᩔ ¶ ¶ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨣᨶ᩠ᨵᨾᩣᩃᩥᨿᨲ᩠ᨳᩮᩁᩔ ᩋᨸᨴᩣᨶ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ¶ ᨠᨲᩣᨵᩥᨠᩣᩁᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨾᩉᨴ᩠ᨵᨶᩮᩣ ᨾᩉᩣᨽᩮᩣᨣᩮᩣ ᩋᩉᩮᩣᩈᩥ. ᩈᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨧᨶ᩠ᨴᨶᩣᨣᩁᩩᨠᨸ᩠ᨸᩪᩁᨠᩔᨲᩩᩁᩣᨴᩦᨶᩥ ᩋᨶᩮᨠᩣᨶᩥ ᩈᩩᨣᨶ᩠ᨵᩣᨶᩥ ᩅᨯ᩠ᨰᩮᨲ᩠ᩅᩣ ᩈᨲ᩠ᨳᩩ ᨣᨶ᩠ᨵᨳᩪᨸᩴ ᨠᩣᩁᩮᩈᩥ. ᨲᩔᩩᨸᩁᩥ ᩈᩩᨾᨶᨸᩩᨸ᩠ᨹᩮᩉᩥ ᨨᩣᨴᩮᩈᩥ, ᨻᩩᨴ᩠ᨵᨬ᩠ᨧ ᩋᨭ᩠ᨮᨦ᩠ᨣᨶᨾᨠ᩠ᨠᩣᩁᩴ ᩋᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᨾᨶᩩᩔᩮᩈᩩ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪒᪔. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨣᨶ᩠ᨵᨾᩣᩃᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᨲᩥᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨾᩥᨣᩃᩩᨴ᩠ᨴᩮᩣ ᨸᩩᩁᩮ ᩌᩈᩥᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨲᩥᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶ᩠ᨲᩁᩣ ᨠᩮᨶᨧᩥ ᩋᨠᩩᩈᩃᨧ᩠ᨨᩥᨴ᩠ᨴᩮᨶ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᨶᩮᩈᩣᨴᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᨾᩥᨣᩃᩩᨴ᩠ᨴᩮᩣ ᩉᩩᨲ᩠ᩅᩣ ᩋᩁᨬ᩠ᨬᩮ ᩅᩥᩉᩁᨲᩥ. ᨲᨴᩣ ᩅᩥᨸᩔᩥᩔ ᨽᨣᩅᨲᩮᩣ ᨸᩣᨭᩃᩥᨻᩮᩣᨵᩥᩴ ᩈᨾ᩠ᨸᩩᨱ᩠ᨱᨸᨲ᩠ᨲᨸᩃ᩠ᩃᩅᩴ ᩉᩁᩥᨲᩅᨱ᩠ᨱᩴ ᨶᩦᩃᩮᩣᨽᩣᩈᩴ ᨾᨶᩮᩣᩁᨾᩴ ᨴᩥᩈ᩠ᩅᩣ ᨲᩦᩉᩥ ᨸᩩᨸ᩠ᨹᩮᩉᩥ ᨸᩪᨩᩮᨲ᩠ᩅᩣ ᨸᩩᩁᩣᨱᨸᨲ᩠ᨲᩴ ᨨᨯ᩠ᨯᩮᨲ᩠ᩅᩣ ᨽᨣᩅᨲᩮᩣ ᩈᨾ᩠ᨾᩩᨡᩣ ᩅᩥᨿ ᨸᩣᨭᩃᩥᨾᩉᩣᨻᩮᩣᨵᩥᩴ ᩅᨶ᩠ᨴᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨲᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮ ᩏᨸ᩠ᨸᨶ᩠ᨶᩮᩣ ᨲᨲ᩠ᨳ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᩋᨸᩁᩣᨸᩁᩴ ᩋᨶᩩᨽᩅᩥᨲ᩠ᩅᩣ ᨲᨲᩮᩣ ᨧᩩᨲᩮᩣ ᨾᨶᩩᩔᩮᩈᩩ ᨩᩣᨲᩮᩣ ᨲᨲ᩠ᨳ ᨧᨠ᩠ᨠᩅᨲ᩠ᨲᩥᩈᨾ᩠ᨸᨲ᩠ᨲᩥᩌᨴᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᩮᩣᨾᨶᩔᩉᨴᨿᩮᩣ ᨣᩮᩉᩴ ᨸᩉᩣᨿ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪓᪑. ᩈᩮᩣ ¶ ᩑᩅᩴ ᩈᩥᨴ᩠ᨵᩥᨸ᩠ᨸᨲ᩠ᨲᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨾᩥᨣᩃᩩᨴ᩠ᨴᩮᩣ ᨸᩩᩁᩮ ᩌᩈᩥᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨾᩁᨱᩣᨿ ᨣᨧ᩠ᨨᨲᩥ ᨸᩣᨸᩩᨱᩣᨲᩦᨲᩥ ᨾᩥᨣᩮᩣ, ᩋᨳ ᩅᩣ ᨾᨣᨿᨾᩣᨶᩮᩣ ᩍᩉᨲᩥ ᨸᩅᨲ᩠ᨲᨲᩦᨲᩥ ᨾᩥᨣᩮᩣ, ᨾᩥᨣᩣᨶᩴ ᨾᩣᩁᨱᩮ ᩃᩩᨴ᩠ᨴᩮᩣ ᩃᩮᩣᨽᩦ ᨣᩮᨵᩮᩣᨲᩥ ᨾᩥᨣᩃᩩᨴ᩠ᨴᩮᩣ, ᨸᩩᩁᩮ ᨾᨿ᩠ᩉᩴ ᨸᩩᨬ᩠ᨬᨠᩁᨱᩈᨾᨿᩮ ᨠᩣᨶᨶᩈᨦ᩠ᨡᩣᨲᩮ ᨾᩉᩣᩋᩁᨬ᩠ᨬᩮ ᨾᩥᨣᩃᩩᨴ᩠ᨴᩮᩣ ᩌᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨸᩣᨭᩃᩥᩴ ᩉᩁᩥᨲᩴ ᨴᩥᩈ᩠ᩅᩣᨲᩥ ᨲᨲ᩠ᨳ ᨸᨠᩣᩁᩮᨶ ᨲᩃᩮᨶ ᩁᨲ᩠ᨲᩅᨱ᩠ᨱᩮᨶ ᨽᩅᨲᩦᨲᩥ ᨸᩣᨭᩃᩥ ¶ , ᨸᩩᨸ᩠ᨹᩣᨶᩴ ¶ ᩁᨲ᩠ᨲᩅᨱ᩠ᨱᨲᩣᨿ ᨸᩣᨭᩃᩦᨲᩥ ᩅᩮᩣᩉᩣᩁᩮᩣ, ᨸᨲ᩠ᨲᩣᨶᩴ ᩉᩁᩥᨲᨲᩣᨿ ᩉᩁᩥᨲᩴ ᨶᩦᩃᩅᨱ᩠ᨱᩴ ᨸᩣᨭᩃᩥᨻᩮᩣᨵᩥᩴ ᨴᩥᩈ᩠ᩅᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨲᩥᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᨾᨵᩩᨸᩥᨱ᩠ᨯᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩅᩥᩅᨶᩮ ᨠᩣᨶᨶᩮ ᨴᩥᩈ᩠ᩅᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨾᨵᩩᨸᩥᨱ᩠ᨯᩥᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᨶᩮᩈᩣᨴᨿᩮᩣᨶᩥᨿᩴ ᨶᩥᨻ᩠ᨻᨲ᩠ᨲᩮᩣ ᨾᩉᩣᩋᩁᨬ᩠ᨬᩮ ᨸᨭᩥᩅᩈᨲᩥ. ᨲᨴᩣ ᩅᩥᩅᩮᨠᩣᨽᩥᩁᨲᩥᨿᩣ ᩈᨾ᩠ᨸᨲ᩠ᨲᩴ ᩈᩥᨴ᩠ᨵᨲ᩠ᨳᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᩈᨾᩣᨵᩥᨲᩮᩣ ᩅᩩᨭ᩠ᨮᩥᨲᩔ ᨲᩔ ᩈᩩᨾᨵᩩᩁᩴ ᨾᨵᩩᨾᨴᩣᩈᩥ. ᨲᨲ᩠ᨳ ᨧ ᨸᩈᨶ᩠ᨶᨾᩣᨶᩈᩮᩣ ᩅᨶ᩠ᨴᩥᨲ᩠ᩅᩣ ᨸᨠ᩠ᨠᩣᨾᩥ. ᩈᩮᩣ ᨲᩮᨶᩮᩅ ᨸᩩᨬ᩠ᨬᩮᨶ ᩈᨾ᩠ᨸᨲ᩠ᨲᩥᩴ ᩋᨶᩩᨽᩅᨶ᩠ᨲᩮᩣ ᨴᩮᩅᨾᨶᩩᩔᩮᩈᩩ ᩈᩴᩈᩁᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪓᪗. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩅᩥᩅᨶᩮ ᨠᩣᨶᨶᩮ ᨴᩥᩈ᩠ᩅᩣᨲᩥᩌᨴᩥᨾᩣᩉ. ᨲᨲ᩠ᨳ ᩅᩥᩅᨶᩮᨲᩥ ᩅᩥᩈᩮᩈᩮᨶ ᩅᨶᩴ ᨸᨲ᩠ᨳᨭᩴ ᩅᩥᩅᨶᩴ, ᩉᨲ᩠ᨳᩥᩋᩔᩁᨳᩈᨴ᩠ᨴᩮᩉᩥ ᨽᩮᩁᩥᩈᨴ᩠ᨴᩮᩉᩥ ᨧ ᩅᨲ᩠ᨳᩩᨠᩣᨾᨠᩥᩃᩮᩈᨠᩣᨾᩮᩉᩥ ᨧ ᩅᩥᨣᨲᩴ ᨻ᩠ᨿᩣᨸᨣᨲᨶ᩠ᨲᩥ ᩋᨲ᩠ᨳᩮᩣ, ᨠᩣᨶᨶᩈᨦ᩠ᨡᩣᨲᩮ ᨾᩉᩣᩋᩁᨬ᩠ᨬᩮ ᩅᩥᩅᨶᩮᨲᩥ ᩈᨾ᩠ᨻᨶ᩠ᨵᩮᩣ. ᩒᩈᨵᩥᩴᩅ ᩅᩥᩁᩮᩣᨧᨶ᩠ᨲᨶ᩠ᨲᩥ ᨽᩅᩅᨯ᩠ᨰᨠᩥᨩᨶᩣᨶᩴ ᩍᨧ᩠ᨨᩥᨲᩥᨧ᩠ᨨᩥᨲᩴ ᨶᩥᨸ᩠ᨹᩣᨴᩮᨲᩦᨲᩥ ᩒᩈᨵᩴ. ᩒᨩᩣᨶᩥᨻ᩠ᨻᨲ᩠ᨲᩥᨠᩣᩁᨱᩴ ᨸᨭᩥᨧ᩠ᨧ ᨿᩣᨿ ᨲᩣᩁᨠᩣᨿ ᩏᨣ᩠ᨣᨲᩣᨿ ᩏᨴ᩠ᨵᩁᨶ᩠ᨲᩥ ᨣᨱ᩠ᩉᨶ᩠ᨲᩦᨲᩥ ᩈᩣ ᩒᩈᨵᩥ. ᩒᩈᨵᩥᨲᩣᩁᨠᩣ ¶ ᩍᩅ ᩅᩥᩁᩮᩣᨧᨶ᩠ᨲᩦᨲᩥ ᩅᨲ᩠ᨲᨻ᩠ᨻᩮ ᨣᩣᨳᩣᨻᨶ᩠ᨵᩈᩩᨡᨲ᩠ᨳᩴ ‘‘ᩒᩈᨵᩥᩴᩅ ᩅᩥᩁᩮᩣᨧᨶ᩠ᨲ’’ᨶ᩠ᨲᩥ ᨧ ᩅᩩᨲ᩠ᨲᩴ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᨾᨵᩩᨸᩥᨱ᩠ᨯᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᩈᩮᨶᩣᩈᨶᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩮᨶᩣᩈᨶᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ¶ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᩋᨲ᩠ᨲᨶᩮᩣ ᩅᩈᨶᨭ᩠ᨮᩣᨶᩴ ᩅᨶᨶ᩠ᨲᩁᩴ ᩈᨾ᩠ᨸᨲ᩠ᨲᩔ ᨽᨣᩅᨲᩮᩣ ᨸᨱᩣᨾᩴ ᨠᨲ᩠ᩅᩣ ᨸᨱ᩠ᨱᩈᨶ᩠ᨳᩁᩴ ᩈᨶ᩠ᨳᩁᩥᨲ᩠ᩅᩣ ᩋᨴᩣᩈᩥ. ᨽᨣᩅᨲᩮᩣ ᨶᩥᩈᩥᨶ᩠ᨶᨭ᩠ᨮᩣᨶᩔ ᩈᨾᨶ᩠ᨲᨲᩮᩣ ᨽᩥᨲ᩠ᨲᩥᨸᩁᩥᨧ᩠ᨨᩮᨴᩴ ᨠᨲ᩠ᩅᩣ ᨸᩩᨸ᩠ᨹᨸᩪᨩᨾᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ¶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪔᪕. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨴᩔᩮᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩉᩮᨭ᩠ᨮᩣ ᩅᩩᨲ᩠ᨲᨶᨿᨲ᩠ᨲᩣ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩈᩮᨶᩣᩈᨶᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᩅᩮᨿ᩠ᨿᩣᩅᨧ᩠ᨧᨠᩁᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩅᩥᨸᩔᩥᩔ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩅᩮᨿ᩠ᨿᩣᩅᨧ᩠ᨧᨠᩁᨲ᩠ᨳᩮᩁᩔ ᩋᨸᨴᩣᨶᩴ. ᨲᩔ ᩏᨸ᩠ᨸᨲ᩠ᨲᩥᩌᨴᨿᩮᩣ ᩉᩮᨭ᩠ᨮᩣ ᩅᩩᨲ᩠ᨲᨶᩥᨿᩣᨾᩮᨶᩮᩅ ᨴᨭ᩠ᨮᨻ᩠ᨻᩣ.

ᩅᩮᨿ᩠ᨿᩣᩅᨧ᩠ᨧᨠᩁᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᨻᩩᨴ᩠ᨵᩩᨸᨭ᩠ᨮᩣᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩅᩥᨸᩔᩥᩔ ¶ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨻᩩᨴ᩠ᨵᩩᨸᨭ᩠ᨮᩣᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᩈᨦ᩠ᨡᨵᨾᨠᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩋᨲ᩠ᨲᨶᩮᩣ ᩈᩥᨸ᩠ᨸᩮ ᩈᨦ᩠ᨡᨵᨾᨶᩮ ᨨᩮᨠᩮᩣ ᩋᩉᩮᩣᩈᩥ, ᨶᩥᨧ᩠ᨧᨠᩣᩃᩴ ᨽᨣᩅᨲᩮᩣ ᩈᨦ᩠ᨡᩴ ᨵᨾᩮᨲ᩠ᩅᩣ ᩈᨦ᩠ᨡᩈᨴ᩠ᨴᩮᨶᩮᩅ ᨸᩪᨩᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩈᨻ᩠ᨻᨲ᩠ᨳ ᨸᩣᨠᨭᩮᩣ ᨾᩉᩣᨥᩮᩣᩈᩮᩣ ᨾᩉᩣᨶᩣᨴᩦ ᨾᨵᩩᩁᩔᩁᩮᩣ ᩋᩉᩮᩣᩈᩥ, ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨸᩣᨠᨭᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨾᨵᩩᩁᩔᩁᩮᩣᨲᩥ ᨸᩣᨠᨭᩮᩣ, ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ, ᩋᨸᩁᨽᩣᨣᩮ ᨾᨵᩩᩁᩔᩁᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪕᪑. ᩈᩮᩣ ¶ ᩑᨠᨴᩥᩅᩈᩴ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨾᩮᩅ. ᩋᩉᩮᩣᩈᩥᩴ ᩈᨦ᩠ᨡᨵᨾᨠᩮᩣᨲᩥ ᩈᩴ ᩈᩩᨭ᩠ᨮᩩ ᨡᨶᨶ᩠ᨲᩮᩣ ᨣᨧ᩠ᨨᨲᩦᨲᩥ ᩈᨦ᩠ᨡᩮᩣ, ᩈᨾᩩᨴ᩠ᨴᨩᩃᨸᩁᩥᨿᨶ᩠ᨲᩮ ᨧᩁᨾᩣᨶᩮᩣ ᨣᨧ᩠ᨨᨲᩥ ᩅᩥᨧᩁᨲᩦᨲᩥ ᩋᨲ᩠ᨳᩮᩣ. ᨲᩴ ᩈᨦ᩠ᨡᩴ ᨵᨾᨲᩥ ᨥᩮᩣᩈᩴ ᨠᩁᩮᩣᨲᩦᨲᩥ ᩈᨦ᩠ᨡᨵᨾᨠᩮᩣ, ᩈᩮᩣᩉᩴ ᩈᨦ᩠ᨡᨵᨾᨠᩮᩣᩅ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᨻᩩᨴ᩠ᨵᩩᨸᨭ᩠ᨮᩣᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᨴᩈᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪑. ᨽᩥᨠ᩠ᨡᨴᩣᨿᩥᩅᨣ᩠ᨣᩮᩣ

᪑. ᨽᩥᨠ᩠ᨡᩣᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩩᩅᨱ᩠ᨱᩅᨱ᩠ᨱᩴ ¶ ¶ ᩈᨾ᩠ᨻᩩᨴ᩠ᨵᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨽᩥᨠ᩠ᨡᩣᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩅᩥᨽᩅᩈᨾ᩠ᨸᨶ᩠ᨶᩮᩣ ᩈᨴ᩠ᨵᩣᨩᩣᨲᩮᩣ ᩅᩥᩉᩣᩁᨲᩮᩣ ᨶᩥᨠ᩠ᨡᨾᩥᨲ᩠ᩅᩣ ᨸᩥᨱ᩠ᨯᩣᨿ ᨧᩁᨾᩣᨶᩴ ᩈᩥᨴ᩠ᨵᨲ᩠ᨳᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩌᩉᩣᩁᨾᨴᩣᩈᩥ. ᨽᨣᩅᩣ ᨲᩴ ᨸᨭᩥᨣ᩠ᨣᩉᩮᨲ᩠ᩅᩣ ᩋᨶᩩᨾᩮᩣᨴᨶᩴ ᩅᨲ᩠ᩅᩣ ¶ ᨸᨠ᩠ᨠᩣᨾᩥ. ᩈᩮᩣ ᨲᩮᨶᩮᩅ ᨠᩩᩈᩃᩮᨶ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᩌᨿᩩᨸᩁᩥᨿᩮᩣᩈᩣᨶᩮ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ ᨲᨲ᩠ᨳ ᨨ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧ ᨾᨶᩩᩔᩈᨾ᩠ᨸᨲ᩠ᨲᩥᨾᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩋᨶᩩᩔᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩩᩅᨱ᩠ᨱᩅᨱ᩠ᨱᩴ ᩈᨾ᩠ᨻᩩᨴ᩠ᨵᨶ᩠ᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩉᩮᨭ᩠ᨮᩣ ᩅᩩᨲ᩠ᨲᨶᨿᨾᩮᩅ. ᨸᩅᩁᩣ ᩋᨽᩥᨶᩥᨠ᩠ᨡᨶ᩠ᨲᨶ᩠ᨲᩥ ᨸᨠᩣᩁᩮᨶ ᩅᩁᩥᨲᨻ᩠ᨻᩴ ᨸᨲ᩠ᨳᩮᨲᨻ᩠ᨻᨶ᩠ᨲᩥ ᨸᩅᩁᩴ, ᩁᨾ᩠ᨾᨽᩪᨲᨲᩮᩣ ᩅᩥᩅᩮᨠᨽᩪᨲᨲᩮᩣ ᩈᨠᩅᩥᩉᩣᩁᨲᩮᩣ ᩋᨽᩥ ᩅᩥᩈᩮᩈᩮᨶ ᨶᩥᨠ᩠ᨡᨶ᩠ᨲᨶ᩠ᨲᩥ ᩋᨲ᩠ᨳᩮᩣ. ᩅᩣᨶᩣ ᨶᩥᨻ᩠ᨻᩣᨶᨾᩣᨣᨲᨶ᩠ᨲᩥ ᩅᩣᨶᩴ ᩅᩩᨧ᩠ᨧᨲᩥ ᨲᨱ᩠ᩉᩣ, ᨲᨲᩮᩣ ᨶᩥᨠ᩠ᨡᨶ᩠ᨲᨲ᩠ᨲᩣ ᨶᩥᨻ᩠ᨻᩣᨶᩴ, ᩅᩣᨶᨶᩣᨾᩴ ᨲᨱ᩠ᩉᩴ ᨸᨵᩣᨶᩴ ᨠᨲ᩠ᩅᩣ ᩈᨻ᩠ᨻᨠᩥᩃᩮᩈᩮ ᨸᩉᩣᨿ ᨶᩥᨻ᩠ᨻᩣᨶᩴ ᨸᨲ᩠ᨲᨶ᩠ᨲᩥ ᩋᨲ᩠ᨳᩮᩣ.

᪒. ᨠᨭᨧ᩠ᨨᩩᨽᩥᨠ᩠ᨡᩴ ᨴᨲ᩠ᩅᩣᨶᩣᨲᩥ ᨠᩁᨲᩃᩮᨶ ᨣᩉᩮᨲᨻ᩠ᨻᩣ ᨴᨻ᩠ᨻᩥ ᨠᨭᨧ᩠ᨨᩩ, ᨽᩥᨠ᩠ᨡᩦᨿᨲᩥ ᩌᨿᩣᨧᩦᨿᨲᩦᨲᩥ ᨽᩥᨠ᩠ᨡᩣ, ᩋᨽᩥ ᩅᩥᩈᩮᩈᩮᨶ ᨡᩣᨴᩥᨲᨻ᩠ᨻᩣ ᨽᨠ᩠ᨡᩥᨲᨻ᩠ᨻᩣᨲᩥ ᩅᩣ ᨽᩥᨠ᩠ᨡᩣ, ᨠᨭᨧ᩠ᨨᩩᨶᩣ ᨣᩉᩮᨲᨻ᩠ᨻᩣ ᨽᩥᨠ᩠ᨡᩣ ᨠᨭᨧ᩠ᨨᩩᨽᩥᨠ᩠ᨡᩣ, ᨴᨻ᩠ᨻᩥᨿᩣ ᨽᨲ᩠ᨲᩴ ᨴᨲ᩠ᩅᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨽᩥᨠ᩠ᨡᩣᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᨬᩣᨱᩈᨬ᩠ᨬᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩩᩅᨱ᩠ᨱᩅᨱ᩠ᨱᩴ ¶ ᩈᨾ᩠ᨻᩩᨴ᩠ᨵᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨬᩣᨱᩈᨬ᩠ᨬᩥᨠᨲ᩠ᨳᩮᩁᩔ ᩋᨸᨴᩣᨶᩴ. ᨠᩣ ᩏᨸ᩠ᨸᨲ᩠ᨲᩥ? ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨴ᩠ᨵᩣᨩᩣᨲᩮᩣ ᩈᨴ᩠ᨵᨾ᩠ᨾᩔᩅᨶᩮ ᩈᩣᨴᩁᩮᩣ ᩈᩣᩃᨿᩮᩣ ᨽᨣᩅᨲᩮᩣ ᨵᨾ᩠ᨾᨴᩮᩈᨶᩣᨶᩩᩈᩣᩁᩮᨶ ᨬᩣᨱᩴ ᨸᩮᩈᩮᨲ᩠ᩅᩣ ᨥᩮᩣᩈᨸᨾᩣᨱᨲ᩠ᨲᩣ ᨽᨣᩅᨲᩮᩣ ᨬᩣᨱᩮ ᨸᩈᨶ᩠ᨶᩮᩣ ᨸᨬ᩠ᨧᨦ᩠ᨣᩋᨭ᩠ᨮᨦ᩠ᨣᨶᨾᨠ᩠ᨠᩣᩁᩅᩈᩮᨶ ᨸᨱᩣᨾᩴ ᨠᨲ᩠ᩅᩣ ᨸᨠ᩠ᨠᩣᨾᩥ. ᩈᩮᩣ ᨲᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮᩈᩩ ᩏᨸ᩠ᨸᨶ᩠ᨶᩮᩣ ᨲᨲ᩠ᨳ ᨨ ᨠᩣᨾᩣᩅᨧᩁᩮ ᨴᩥᨻ᩠ᨻᩈᨾ᩠ᨸᨲ᩠ᨲᩥᨾᨶᩩᨽᩅᨶ᩠ᨲᩮᩣ ᨲᨲᩮᩣ ᨧᩅᩥᨲ᩠ᩅᩣ ᨾᨶᩩᩔᩃᩮᩣᨠᩮ ᨩᩣᨲᩮᩣ ᨲᨲ᩠ᨳᨣ᩠ᨣᨽᩪᨲᩣ ᨧᨠ᩠ᨠᩅᨲ᩠ᨲᩥᩈᨾ᩠ᨸᨴᩣᨴᨿᩮᩣ ¶ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ¶ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪗. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩩᩅᨱ᩠ᨱᩅᨱ᩠ᨱᩴ ᩈᨾ᩠ᨻᩩᨴ᩠ᨵᨶ᩠ᨲᩥᩌᨴᩥᨾᩣᩉ. ᨲᩴ ᩅᩩᨲ᩠ᨲᨲ᩠ᨳᨾᩮᩅ. ᨶᩥᩈᨽᩣᨩᩣᨶᩥᨿᩴ ᨿᨳᩣᨲᩥ ᨣᩅᩈᨲᩈᩉᩔᨩᩮᨭ᩠ᨮᩮᩣ ᨶᩥᩈᨽᩮᩣ, ᨶᩥᩈᨽᩮᩣ ᨧ ᩈᩮᩣ ᩌᨩᩣᨶᩥᨿᩮᩣ ᩈᩮᨭ᩠ᨮᩮᩣ ᩏᨲ᩠ᨲᨾᩮᩣ ᨧᩮᨲᩥ ᨶᩥᩈᨽᩣᨩᩣᨶᩥᨿᩮᩣ. ᨿᨳᩣ ᨶᩥᩈᨽᩣᨩᩣᨶᩥᨿᩮᩣ, ᨲᨳᩮᩅ ᨽᨣᩅᩣᨲᩥ ᩋᨲ᩠ᨳᩮᩣ. ᩃᩮᩣᨠᩅᩥᩈᨿᩈᨬ᩠ᨬᩣᨲᩴ ᨸᨬ᩠ᨬᨲ᩠ᨲᩥᩅᩈᩮᨶ ᩑᩅᩴ ᩅᩩᨲ᩠ᨲᩴ. ᩋᨶᩩᨸᨾᩮᨿ᩠ᨿᩮᩣ ᩉᩥ ᨽᨣᩅᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨬᩣᨱᩈᨬ᩠ᨬᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᩏᨸ᩠ᨸᩃᩉᨲ᩠ᨳᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨲᩥᩅᩁᩣᨿᩴ ᨶᩥᩅᩣᩈᩦᩉᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩏᨸ᩠ᨸᩃᩉᨲ᩠ᨳᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᨠᩩᩈᩃᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᨾᩣᩃᩣᨠᩣᩁᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨾᩣᩃᩣᨠᩣᩁᨠᨾ᩠ᨾᩮᨶ ᩋᨶᩮᨠᩣᨶᩥ ᨸᩩᨸ᩠ᨹᩣᨶᩥ ᩅᩥᨠ᩠ᨠᩥᨱᨶ᩠ᨲᩮᩣ ᨩᩦᩅᨲᩥ. ᩋᨳᩮᨠᨴᩥᩅᩈᩴ ᨸᩩᨸ᩠ᨹᩣᨶᩥ ᨣᩉᩮᨲ᩠ᩅᩣ ᨧᩁᨶ᩠ᨲᩮᩣ ᨽᨣᩅᨶ᩠ᨲᩴ ᩁᨲᨶᨣ᩠ᨥᩥᨠᨾᩥᩅ ᨧᩁᨾᩣᨶᩴ ᨴᩥᩈ᩠ᩅᩣ ᩁᨲ᩠ᨲᩩᨸ᩠ᨸᩃᨠᩃᩣᨸᩮᨶ ᨸᩪᨩᩮᩈᩥ. ᩈᩮᩣ ᨲᨲᩮᩣ ᨧᩩᨲᩮᩣ ᨲᩮᨶᩮᩅ ᨸᩩᨬ᩠ᨬᩮᨶ ᩈᩩᨣᨲᩦᩈᩩ ᨸᩩᨬ᩠ᨬᨾᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑᪓. ᩈᩮᩣ ¶ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨲᩥᩅᩁᩣᨿᩴ ᨶᩥᩅᩣᩈᩦᩉᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨲᩥᩅᩁᩣᨲᩥ ᨲᩦᩉᩥ ᩅᩣᩁᩮᩉᩥ ᨠᩣᩁᩥᨲᩴ ᩈᨬ᩠ᨧᩁᩥᨲᩴ ᨸᨭᩥᨧ᩠ᨨᨶ᩠ᨶᩴ ᨶᨣᩁᩴ, ᨲᩔᩴ ᨲᩥᩅᩁᩣᨿᩴ ᨶᩥᩅᩣᩈᩦ, ᩅᩈᨶᩈᩦᩃᩮᩣ ᨶᩥᩅᩣᩈᨶᨭ᩠ᨮᩣᨶᨣᩮᩉᩮ ᩅᩣ ᩅᩈᨶ᩠ᨲᩮᩣ ᩋᩉᨶ᩠ᨲᩥ ᩋᨲ᩠ᨳᩮᩣ. ᩋᩉᩮᩣᩈᩥᩴ ᨾᩣᩃᩥᨠᩮᩣ ᨲᨴᩣᨲᩥ ᨲᨴᩣ ᨶᩥᨻ᩠ᨻᩣᨶᨲ᩠ᨳᩣᨿ ᨸᩩᨬ᩠ᨬᩈᨾ᩠ᨽᩣᩁᨠᩁᨱᩈᨾᨿᩮ ᨾᩣᩃᩥᨠᩮᩣ ᨾᩣᩃᩣᨠᩣᩁᩮᩣᩅ ᨸᩩᨸ᩠ᨹᩣᨶᩥ ᨠᨿᩅᩥᨠ᩠ᨠᨿᩴ ᨠᨲ᩠ᩅᩣ ᨩᩦᩅᨶ᩠ᨲᩮᩣ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪑᪔. ᨸᩩᨸ᩠ᨹᩉᨲ᩠ᨳᨾᨴᩣᩈᩉᨶ᩠ᨲᩥ ¶ ᩈᩥᨴ᩠ᨵᨲ᩠ᨳᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᩏᨸ᩠ᨸᩃᨠᩃᩣᨸᩴ ᩋᨴᩣᩈᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩏᨸ᩠ᨸᩃᩉᨲ᩠ᨳᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᨸᨴᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩥᨴ᩠ᨵᨲ᩠ᨳᩔ ¶ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᨴᨸᩪᨩᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᩈᩩᨾᨶᨸᩩᨸ᩠ᨹᩮᨶ ᨸᩣᨴᨾᩪᩃᩮ ᨸᩪᨩᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩈᨠ᩠ᨠᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᩋᩁᩉᨲ᩠ᨲᨹᩃᩮ ᨸᨲᩥᨭ᩠ᨮᩣᩈᩥ.

᪑᪙. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣᨲᩥᩌᨴᩥᨾᩣᩉ. ᨩᩣᨲᩥᨸᩩᨸ᩠ᨹᨾᨴᩣᩈᩉᨶ᩠ᨲᩥ ᨩᩣᨲᩥᩈᩩᨾᨶᨸᩩᨸ᩠ᨹᩴ ᩋᨴᩣᩈᩥᩴ ᩋᩉᨶ᩠ᨲᩥ ᩅᨲ᩠ᨲᨻ᩠ᨻᩮ ᨣᩣᨳᩣᨻᨶ᩠ᨵᩈᩩᨡᨲ᩠ᨳᩴ ᩈᩩᨾᨶᩈᨴ᩠ᨴᩔ ᩃᩮᩣᨸᩴ ᨠᨲ᩠ᩅᩣ ᩅᩩᨲ᩠ᨲᩴ. ᨲᨲ᩠ᨳ ᨩᩣᨲᩥᨿᩣ ᨶᩥᨻ᩠ᨻᨲ᩠ᨲᩮᩣ ᩅᩥᨠᩈᨾᩣᨶᩮᩣᨿᩮᩅ ᩈᩩᨾᨶᩴ ᨩᨶᩣᨶᩴ ᩈᩮᩣᨾᨶᩔᩴ ᨠᩁᩮᩣᨲᩦᨲᩥ ᩈᩩᨾᨶᩴ, ᨸᩩᨸ᩠ᨹᨶᨭ᩠ᨮᩮᨶ ᩅᩥᨠᩈᨶᨭ᩠ᨮᩮᨶ ᨸᩩᨸ᩠ᨹᩴ, ᩈᩩᨾᨶᨬ᩠ᨧ ᨲᩴ ᨸᩩᨸ᩠ᨹᨬ᩠ᨧᩣᨲᩥ ᩈᩩᨾᨶᨸᩩᨸ᩠ᨹᩴ, ᨲᩣᨶᩥ ᩈᩩᨾᨶᨸᩩᨸ᩠ᨹᩣᨶᩥ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᩋᩉᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᨸᨴᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᨾᩩᨭ᩠ᨮᩥᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩩᨴᩔᨶᩮᩣ ¶ ᨶᩣᨾ ᨶᩣᨾᩮᨶᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨾᩩᨭ᩠ᨮᩥᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨾᩣᩃᩣᨠᩣᩁᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨠᩈᩥᨸ᩠ᨸᩮ ᨶᩥᨸ᩠ᨹᨲ᩠ᨲᩥᩴ ᨸᨲ᩠ᨲᩮᩣ ᩑᨠᨴᩥᩅᩈᩴ ¶ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨩᩣᨲᩥᩈᩩᨾᨶᨸᩩᨸ᩠ᨹᩣᨶᩥ ᩏᨽᩮᩣᩉᩥ ᩉᨲ᩠ᨳᩮᩉᩥ ᨽᨣᩅᨲᩮᩣ ᨸᩣᨴᨾᩪᩃᩮ ᩒᨠᩥᩁᩥᨲ᩠ᩅᩣ ᨸᩪᨩᩮᩈᩥ. ᩈᩮᩣ ᨲᩮᨶ ᨠᩩᩈᩃᩈᨾ᩠ᨽᩣᩁᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᩮᩣ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨸᩩᨻ᩠ᨻᩅᩣᩈᨶᩣᩅᩈᩮᨶ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑᪔-᪒᪕. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩋᨶᩩᩔᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩩᨴᩔᨶᩮᩣ ᨶᩣᨾ ᨶᩣᨾᩮᨶᩣᨲᩥᩌᨴᩥᨾᩣᩉ. ᨲᨲ᩠ᨳ ᩈᩩᨴᩔᨶᩮᩣᨲᩥ ᩌᩁᩮᩣᩉᨸᩁᩥᨱᩣᩉᩁᩪᨸᩈᨱ᩠ᨮᩣᨶᨿᩮᩣᨻ᩠ᨻᨬ᩠ᨬᩈᩮᩣᨽᨶᩮᨶ ᩈᩩᨶ᩠ᨴᩁᩮᩣ ᨴᩔᨶᩮᩣᨲᩥ ᩈᩩᨴᩔᨶᩮᩣ, ᨶᩣᨾᩮᨶ ᩈᩩᨴᩔᨶᩮᩣ ᨶᩣᨾ ᨾᩣᩃᩣᨠᩣᩁᩮᩣ ᩉᩩᨲ᩠ᩅᩣ ᨩᩣᨲᩥᩈᩩᨾᨶᨸᩩᨸ᩠ᨹᩮᩉᩥ ᨸᨴᩩᨾᩩᨲ᩠ᨲᩁᩴ ᨽᨣᩅᨶ᩠ᨲᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᨾᩩᨭ᩠ᨮᩥᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᩏᨴᨠᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩩᩅᨱ᩠ᨱᩅᨱ᩠ᨱᩴ ¶ ᩈᨾ᩠ᨻᩩᨴ᩠ᨵᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩏᨴᨠᨸᩪᨩᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨸᩪᩁᩥᨲᨠᩩᩈᩃᩈᨬ᩠ᨧᨿᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᨸᩁᩥᨸᩪᩁᩥᨿᨾᩣᨶᩮᩣ ᨸᩩᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨠᩩᩈᩃᩣᨠᩩᩈᩃᩴ ᨩᩣᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᩌᨠᩣᩈᩮ ᨣᨧ᩠ᨨᨲᩮᩣ ᨶᩥᨠ᩠ᨡᨶ᩠ᨲᨨᨻ᩠ᨻᨱ᩠ᨱᨻᩩᨴ᩠ᨵᩁᩴᩈᩦᩈᩩ ᨸᩈᨶ᩠ᨶᩮᩣ ᩏᨽᩮᩣᩉᩥ ᩉᨲ᩠ᨳᩮᩉᩥ ᩏᨴᨠᩴ ᨣᩉᩮᨲ᩠ᩅᩣ ᨸᩪᨩᩮᩈᩥ. ᨲᩮᨶ ᨸᩪᨩᩥᨲᩴ ᩏᨴᨠᩴ ᩁᨩᨲᨻᩩᨻ᩠ᨻᩩᩃᩴ ᩅᩥᨿ ᩌᨠᩣᩈᩮ ᩋᨭ᩠ᨮᩣᩈᩥ. ᩈᩮᩣ ᩋᨽᩥᨸ᩠ᨸᩈᨶ᩠ᨶᩮᩣ ᨲᩮᨶᩮᩅ ᩈᩮᩣᨾᨶᩔᩮᨶ ᨲᩩᩈᩥᨲᩣᨴᩦᩈᩩ ᨶᩥᨻ᩠ᨻᨲ᩠ᨲᩮᩣ ᨴᩥᨻ᩠ᨻᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩋᨸᩁᨽᩣᨣᩮ ᨾᨶᩩᩔᩈᨾ᩠ᨸᨲ᩠ᨲᩥᨿᩮᩣ ᨧ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪒᪙. ᩈᩮᩣ ¶ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩩᩅᨱ᩠ᨱᩅᨱ᩠ᨱᩴ ᩈᨾ᩠ᨻᩩᨴ᩠ᨵᨶ᩠ᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨾᩮᩅ. ᨥᨲᩣᩈᨶᩴᩅ ᨩᩃᩥᨲᨶ᩠ᨲᩥ ᨥᨲᩴ ᩅᩩᨧ᩠ᨧᨲᩥ ᩈᨸ᩠ᨸᩥ, ᨥᨲᩔ ᩌᩈᨶᩴ ᩌᨵᩣᩁᨶ᩠ᨲᩥ ᨥᨲᩣᩈᨶᩴ, ᩋᨣ᩠ᨣᩥ, ᩋᨳ ᩅᩣ ᨲᩴ ᩋᩈᨲᩥ ᨽᩩᨬ᩠ᨩᨲᩦᨲᩥ ᨥᨲᩣᩈᨶᩴ ¶ , ᩋᨣ᩠ᨣᩥᨿᩮᩅ. ᨿᨳᩣ ᨥᨲᩮ ᩌᩈᩥᨲ᩠ᨲᩮ ᩋᨣ᩠ᨣᩥᨾ᩠ᩉᩥ ᩋᨣ᩠ᨣᩥᩈᩥᨡᩣ ᩋᨲᩦᩅ ᨩᩃᨲᩥ, ᩑᩅᩴ ᩋᨣ᩠ᨣᩥᨠ᩠ᨡᨶ᩠ᨵᩴ ᩍᩅ ᨩᩃᨾᩣᨶᩴ ᨽᨣᩅᨶ᩠ᨲᨶ᩠ᨲᩥ ᩋᨲ᩠ᨳᩮᩣ. ᩌᨴᩥᨲ᩠ᨲᩴᩅ ᩉᩩᨲᩣᩈᨶᨶ᩠ᨲᩥ ᩉᩩᨲᩴ ᩅᩩᨧ᩠ᨧᨲᩥ ᨸᩪᨩᩣᩈᨠ᩠ᨠᩣᩁᩮ, ᩉᩩᨲᩔ ᨸᩪᨩᩣᩈᨠ᩠ᨠᩣᩁᩔ ᩌᩈᨶᨶ᩠ᨲᩥ ᩉᩩᨲᩣᩈᨶᩴ, ᨩᩃᨾᩣᨶᩴ ᩈᩪᩁᩥᨿᩴ ᩍᩅ ᨴ᩠ᩅᨲ᩠ᨲᩥᩴᩈᨾᩉᩣᨸᩩᩁᩥᩈᩃᨠ᩠ᨡᨱᩮᩉᩥ ᨻ᩠ᨿᩣᨾᨸ᩠ᨸᨽᩣᨾᨱ᩠ᨯᩃᩮᩉᩥ ᩅᩥᨩ᩠ᨩᩮᩣᨲᨾᩣᨶᩴ ᩈᩩᩅᨱ᩠ᨱᩅᨱ᩠ᨱᩴ ᩈᨾ᩠ᨻᩩᨴ᩠ᨵᩴ ᩋᨶᩥᩃᨬ᩠ᨩᩈᩮ ᩌᨠᩣᩈᩮ ᨣᨧ᩠ᨨᨶ᩠ᨲᩴ ᩋᨴ᩠ᨴᩈᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᩏᨴᨠᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᨶᩊᨾᩣᩃᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨶᩊᨾᩣᩃᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩑᩈᩮᩣᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩣᩈᩩ ᨩᩣᨲᩦᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨠᩩᩈᩃᨠᨾ᩠ᨾᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᨠᩣᨾᩮ ᩌᨴᩦᨶᩅᩴ ᨴᩥᩈ᩠ᩅᩣ ᨣᩮᩉᩴ ᨸᩉᩣᨿ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩉᩥᨾᩅᨶ᩠ᨲᩮ ᩅᩈᨶ᩠ᨲᩮᩣ ᨲᨲ᩠ᨳᩣᨣᨲᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᩮᩣ ᩅᨶ᩠ᨴᩥᨲ᩠ᩅᩣ ᨲᩥᨱᩈᨶ᩠ᨳᩁᩴ ᩈᨶ᩠ᨳᩁᩥᨲ᩠ᩅᩣ ᨲᨲ᩠ᨳ ᨶᩥᩈᩥᨶ᩠ᨶᩔ ᨽᨣᩅᨲᩮᩣ ᨶᩊᨾᩣᩃᩮᩉᩥ ᨻᩦᨩᨶᩥᩴ ᨠᨲ᩠ᩅᩣ ᨻᩦᨩᩮᨲ᩠ᩅᩣ ᩋᨴᩣᩈᩥ. ᨸᨭᩥᨣ᩠ᨣᩉᩮᩈᩥ ᨽᨣᩅᩣ ᨲᩔᩣᨶᩩᨠᨾ᩠ᨸᩣᨿ, ᩋᨶᩩᨾᩮᩣᨴᨶᨬ᩠ᨧ ᩋᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᨽᩅᩮ ᨸᩁᩥᩊᩣᩉᩈᨶ᩠ᨲᩣᨸᩅᩥᩅᨩ᩠ᨩᩥᨲᩮᩣ ᨠᩣᨿᨧᩥᨲ᩠ᨲᨧᩮᨲᩈᩥᨠᩈᩩᨡᨸ᩠ᨸᨲ᩠ᨲᩮᩣ ᩋᨶᩮᨠᩈᩩᨡᨾᨶᩩᨽᩅᩥᨲ᩠ᩅᩣ ¶ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨸᩩᨻ᩠ᨻᩅᩣᩈᨶᩣᨻᩃᩮᨶ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪓᪖. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨾᩮᩅ.

᪓᪗. ᨶᩊᨾᩣᩃᩴ ᨣᩉᩮᨲ᩠ᩅᩣᨶᩣᨲᩥ ᨶᩊᨲᩥ ᩋᩈᩣᩁᩮᩣ ᨶᩥᩔᩣᩁᩮᩣ ᩉᩩᨲ᩠ᩅᩣ ᩅᩮᩊᩩᩅᩴᩈᨲᩮᩣᨸᩥ ᨲᨶᩩᨠᩮᩣ ᩈᩃ᩠ᩃᩉᩩᨠᩮᩣ ᨩᩣᨲᩮᩣᨲᩥ ᨶᩊᩮᩣ, ᨶᩊᩔ ᨾᩣᩃᩣ ¶ ᨸᩩᨸ᩠ᨹᩴ ᨶᩊᨾᩣᩃᩴ, ᨲᩮᨶ ᨶᩊᨾᩣᩃᩮᨶ ᨻᩦᨩᨶᩥᩴ ᨠᩣᩁᩮᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ ¶ . ᨻᩦᨩᩥᩔᨲᩥ ᨩᨶᩥᩔᨲᩥ ᩅᩣᨲᩮᩣ ᩋᨶᩮᨶᩣᨲᩥ ᨻᩦᨩᨶᩦ, ᨲᩴ ᨻᩦᨩᨶᩥᩴ ᨻᩩᨴ᩠ᨵᩔ ᩏᨸᨶᩣᨾᩮᩈᩥᩴ, ᨸᨭᩥᨣ᩠ᨣᩉᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᨶᩊᨾᩣᩃᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᩈᨲ᩠ᨲᨾᨽᩣᨱᩅᩣᩁᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᩌᩈᨶᩩᨸᨭ᩠ᨮᩣᩉᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨠᩣᨶᨶᩴ ᩅᨶᨾᩮᩣᨣ᩠ᨣᨿ᩠ᩉᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩌᩈᨶᩩᨸᨭ᩠ᨮᩣᩉᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨲ᩠ᨳᨴᩔᩥᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨥᩁᩣᩅᩣᩈᩴ ᩅᩈᨶ᩠ᨲᩮᩣ ᨲᨲ᩠ᨳ ᨴᩮᩣᩈᩴ ᨴᩥᩈ᩠ᩅᩣ ᨥᩁᩣᩅᩣᩈᩴ ᨸᩉᩣᨿ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩉᩥᨾᩅᨶ᩠ᨲᩮ ᩅᩈᨶ᩠ᨲᩮᩣ ᨲᨲ᩠ᨳ ᩈᨾ᩠ᨸᨲ᩠ᨲᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᩮᩣ ᩈᩦᩉᩣᩈᨶᩴ ᩋᨴᩣᩈᩥ, ᨲᨲ᩠ᨳ ᨶᩥᩈᩥᨶ᩠ᨶᩴ ᨽᨣᩅᨶ᩠ᨲᩴ ᨾᩣᩃᩣᨠᩃᩣᨸᩴ ᨣᩉᩮᨲ᩠ᩅᩣ ᨸᩪᨩᩮᨲ᩠ᩅᩣ ᨲᩴ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨸᨠ᩠ᨠᩣᨾᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᨶᩥᨻ᩠ᨻᨲ᩠ᨲᨶᩥᨻ᩠ᨻᨲ᩠ᨲᨽᩅᩮ ᩏᨧ᩠ᨧᨠᩩᩃᩥᨠᩮᩣ ᩅᩥᨽᩅᩈᨾ᩠ᨸᨶ᩠ᨶᩮᩣ ᩋᩉᩮᩣᩈᩥ. ᩈᩮᩣ ᨠᩣᩃᨶ᩠ᨲᩁᩮᨶ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪔᪗. ᩈᩮᩣ ᩋᩁᩉᩣ ᩈᨾᩣᨶᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨠᩣᨶᨶᩴ ᩅᨶᨾᩮᩣᨣ᩠ᨣᨿ᩠ᩉᩣᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨳᨾᩮᩅᩣᨲᩥ.

ᩌᩈᨶᩩᨸᨭ᩠ᨮᩣᩉᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᨻᩥᩊᩣᩃᩥᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨻᩥᩊᩣᩃᩥᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ¶ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨥᩁᩣᩅᩣᩈᩴ ᩅᩈᨶ᩠ᨲᩮᩣ ᨲᨲ᩠ᨳᩣᨴᩦᨶᩅᩴ ¶ ᨴᩥᩈ᩠ᩅᩣ ᨥᩁᩣᩅᩣᩈᩴ ᨸᩉᩣᨿ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩉᩥᨾᩅᨶ᩠ᨲᩮ ᩅᩈᨶ᩠ᨲᩮᩣ ᩋᨲᩦᩅ ᩋᨸ᩠ᨸᩥᨧ᩠ᨨᩈᨶ᩠ᨲᩩᨭ᩠ᨮᩮᩣ ᩌᩃᩩᩅᩣᨴᩦᩉᩥ ᨿᩣᨸᩮᨶ᩠ᨲᩮᩣ ᩅᩈᨲᩥ. ᨲᨴᩣ ᨸᨴᩩᨾᩩᨲ᩠ᨲᩁᩮᩣ ᨽᨣᩅᩣ ᨲᩔ ᩋᨶᩩᨠᨾ᩠ᨸᩣᨿ ᨲᩴ ᩉᩥᨾᩅᨶ᩠ᨲᩴ ᩋᨣᨾᩣᩈᩥ ¶ . ᨲᩴ ᨴᩥᩈ᩠ᩅᩣ ᨸᩈᨶ᩠ᨶᩮᩣ ᩅᨶ᩠ᨴᩥᨲ᩠ᩅᩣ ᨻᩥᩊᩣᩃᩥᨿᩮᩣ ᨣᩉᩮᨲ᩠ᩅᩣ ᨸᨲ᩠ᨲᩮ ᩒᨠᩥᩁᩥ. ᨲᩴ ᨲᨳᩣᨣᨲᩮᩣ ᨲᩔᩣᨶᩩᨠᨾ᩠ᨸᩣᨿ ᩈᩮᩣᨾᨶᩔᩩᨸ᩠ᨸᩣᨴᨿᨶ᩠ᨲᩮᩣ ᨸᩁᩥᨽᩩᨬ᩠ᨩᩥ. ᩈᩮᩣ ᨲᩮᨶ ᨠᨾ᩠ᨾᩮᨶ ᨲᨲᩮᩣ ᨧᩩᨲᩮᩣ ᨴᩮᩅᨾᨶᩩᩔᩮᩈᩩ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᩈᩣᩈᨶᩮ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪕᪓. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨠᩩᩈᩃᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩉᩮᨭ᩠ᨮᩣ ᩅᩩᨲ᩠ᨲᨶᨿᨲ᩠ᨲᩣ ᩏᨲ᩠ᨲᩣᨶᨲ᩠ᨳᨾᩮᩅ. ᩌᩃᩩᩅᨠᩁᨾ᩠ᨽᩣᨴᨿᩮᩣ ᨲᩮᩈᩴ ᨲᩮᩈᩴ ᨠᨶ᩠ᨴᨩᩣᨲᩦᨶᩴ ᨶᩣᨾᩣᨶᩮᩅᩣᨲᩥ.

ᨻᩥᩊᩣᩃᩥᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᩁᩮᨱᩩᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩩᩅᨱ᩠ᨱᩅᨱ᩠ᨱᩴ ᩈᨾ᩠ᨻᩩᨴ᩠ᨵᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩁᩮᨱᩩᨸᩪᨩᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩋᨣ᩠ᨣᩥᨠ᩠ᨡᨶ᩠ᨵᩴ ᩅᩥᨿ ᩅᩥᨩ᩠ᨩᩮᩣᨲᨾᩣᨶᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨶᩣᨣᨸᩩᨸ᩠ᨹᨠᩮᩈᩁᩴ ᨣᩉᩮᨲ᩠ᩅᩣ ᨸᩪᨩᩮᩈᩥ. ᩋᨳ ᨽᨣᩅᩣ ᩋᨶᩩᨾᩮᩣᨴᨶᨾᨠᩣᩈᩥ.

᪖᪒-᪓. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨲᨲᩮᩣ ᨧᩩᨲᩮᩣ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᨽᩅᩮ ᩈᨻ᩠ᨻᨲ᩠ᨳ ᨸᩪᨩᩥᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨸᩩᨻ᩠ᨻᩅᩣᩈᨶᩣᨻᩃᩮᨶ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᩈᩣᩈᨶᩮ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩉᩩᨲ᩠ᩅᩣ ᨴᩥᨻ᩠ᨻᨧᨠ᩠ᨡᩩᨶᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᨴᩥᩈ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩩᩅᨱ᩠ᨱᩅᨱ᩠ᨱᩴ ᩈᨾ᩠ᨻᩩᨴ᩠ᨵᨶ᩠ᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨳᨾᩮᩅ. ᩈᨲᩁᩴᩈᩥᩴᩅ ᨽᩣᨱᩩᨾᨶ᩠ᨲᩥ ᩈᨲᨾᨲ᩠ᨲᩣ ᩈᨲᨸ᩠ᨸᨾᩣᨱᩣ ᩁᩴᩈᩥ ᨸᨽᩣ ᨿᩔ ᩈᩪᩁᩥᨿᩔ ¶ ᩈᩮᩣ ᩈᨲᩁᩴᩈᩥ, ᨣᩣᨳᩣᨻᨶ᩠ᨵᩈᩩᨡᨲ᩠ᨳᩴ ᩈᨲᩁᩴᩈᩦᨲᩥ ᩅᩩᨲ᩠ᨲᩴ, ᩋᨶᩮᨠᩈᨲᩔ ᩋᨶᩮᨠᩈᨲᩈᩉᩔᩁᩴᩈᩦᨲᩥ ᩋᨲ᩠ᨳᩮᩣ. ᨽᩣᨱᩩ ᩅᩩᨧ᩠ᨧᨲᩥ ᨸᨽᩣ, ᨽᩣᨱᩩ ᨸᨽᩣ ᨿᩔ ᩈᩮᩣ ᨽᩣᨱᩩᨾᩣ, ᨽᩣᨱᩩᨾᩈᨦ᩠ᨡᩣᨲᩴ ᩈᩪᩁᩥᨿᩴ ᩍᩅ ᩅᩥᨸᩔᩥᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᩈᨠᩮᩈᩁᩴ ᨶᩣᨣᨸᩩᨸ᩠ᨹᩴ ᨣᩉᩮᨲ᩠ᩅᩣ ᩋᨽᩥᩁᩮᩣᨸᨿᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨾᩮᩅᩣᨲᩥ.

ᩁᩮᨱᩩᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᩑᨠᩣᨴᩈᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪒. ᨾᩉᩣᨸᩁᩥᩅᩣᩁᩅᨣ᩠ᨣᩮᩣ

᪑. ᨾᩉᩣᨸᩁᩥᩅᩣᩁᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩅᩥᨸᩔᩦ ¶ ¶ ᨶᩣᨾ ᨽᨣᩅᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨾᩉᩣᨸᩁᩥᩅᩣᩁᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᩏᨸ᩠ᨸᨶ᩠ᨶᩈᨾᨿᩮ ᨿᨠ᩠ᨡᨿᩮᩣᨶᩥᨿᩴ ᨶᩥᨻ᩠ᨻᨲ᩠ᨲᩮᩣ ᩋᨶᩮᨠᨿᨠ᩠ᨡᩈᨲᩈᩉᩔᨸᩁᩥᩅᩣᩁᩮᩣ ᩑᨠᩈ᩠ᨾᩥᩴ ᨡᩩᨴ᩠ᨴᨠᨴᩦᨸᩮ ᨴᩥᨻ᩠ᨻᩈᩩᨡᨾᨶᩩᨽᩅᨶ᩠ᨲᩮᩣ ᩅᩥᩉᩁᨲᩥ. ᨲᩈ᩠ᨾᩥᨬ᩠ᨧ ᨴᩦᨸᩮ ᨧᩮᨲᩥᨿᩣᨽᩥᩈᩮᩣᨽᩥᨲᩮᩣ ᩅᩥᩉᩣᩁᩮᩣ ᩋᨲ᩠ᨳᩥ, ᨲᨲ᩠ᨳ ᨽᨣᩅᩣ ᩋᨣᨾᩣᩈᩥ. ᩋᨳ ᩈᩮᩣ ᨿᨠ᩠ᨡᩈᩮᨶᩣᨵᩥᨸᨲᩥ ᨲᩴ ᨽᨣᩅᨶ᩠ᨲᩴ ᨲᨲ᩠ᨳ ᨣᨲᨽᩣᩅᩴ ᨴᩥᩈ᩠ᩅᩣ ᨴᩥᨻ᩠ᨻᩅᨲ᩠ᨳᩣᨶᩥ ᨣᩉᩮᨲ᩠ᩅᩣ ᨣᨶ᩠ᨲ᩠ᩅᩣ ᨽᨣᩅᨶ᩠ᨲᩴ ᩅᨶ᩠ᨴᩥᨲ᩠ᩅᩣ ᨴᩥᨻ᩠ᨻᩅᨲ᩠ᨳᩮᩉᩥ ᨸᩪᨩᩮᩈᩥ, ᩈᨸᩁᩥᩅᩣᩁᩮᩣ ᩈᩁᨱᨾᨣᨾᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨲᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᨲᨲ᩠ᨳ ᨨ ᨠᩣᨾᩣᩅᨧᩁᩈᩩᨡᨾᨶᩩᨽᩅᩥᨲ᩠ᩅᩣ ᨲᨲᩮᩣ ᨧᩩᨲᩮᩣ ᨾᨶᩩᩔᩮᩈᩩ ᩋᨣ᩠ᨣᨧᨠ᩠ᨠᩅᨲ᩠ᨲᩥᩌᨴᩥᩈᩩᨡᨾᨶᩩᨽᩅᩥᨲ᩠ᩅᩣ ᩋᨸᩁᨽᩣᨣᩮ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑-᪒. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩅᩥᨸᩔᩦ ᨶᩣᨾ ᨽᨣᩅᩣᨲᩥᩌᨴᩥᨾᩣᩉ. ᨲᨲ᩠ᨳ ᩅᩥᩈᩮᩈᩴ ᨸᩁᨾᨲ᩠ᨳᩴ ᨶᩥᨻ᩠ᨻᩣᨶᩴ ᨸᩔᨲᩦᨲᩥ ᩅᩥᨸᩔᩦ, ᩅᩥᩅᩥᨵᩮ ᩈᨲᩥᨸᨭ᩠ᨮᩣᨶᩣᨴᨿᩮᩣ ᩈᨲ᩠ᨲᨲᩥᩴᩈᨻᩮᩣᨵᩥᨸᨠ᩠ᨡᩥᨿᨵᨾ᩠ᨾᩮ ᨸᩔᨲᩦᨲᩥ ᩅᩣ ᩅᩥᨸᩔᩦ, ᩅᩥᩅᩥᨵᩮ ¶ ᩋᨶᩮᨠᨸ᩠ᨸᨠᩣᩁᩮ ᨻᩮᩣᨵᨶᩮᨿ᩠ᨿᩈᨲ᩠ᨲᩮ ᩅᩥᩈᩩᩴ ᩅᩥᩈᩩᩴ ᨸᩔᨲᩦᨲᩥ ᩅᩣ ᩅᩥᨸᩔᩦ, ᩈᩮᩣ ᩅᩥᨸᩔᩦ ᨽᨣᩅᩣ ᨴᩦᨸᨧᩮᨲᩥᨿᩴ ᨴᩦᨸᩮ ᨸᩪᨩᨶᩦᨿᨭ᩠ᨮᩣᨶᩴ ᩅᩥᩉᩣᩁᨾᨣᨾᩣᩈᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᨾᩉᩣᨸᩁᩥᩅᩣᩁᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᩈᩩᨾᨦ᩠ᨣᩃᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩋᨲ᩠ᨳᨴᩔᩦ ᨩᩥᨶᩅᩁᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩩᨾᨦ᩠ᨣᩃᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ¶ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨲ᩠ᨳᨴᩔᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨲᩊᩣᨠᩈᨾᩦᨸᩮ ᩁᩩᨠ᩠ᨡᨴᩮᩅᨲᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩥ. ᨲᩈ᩠ᨾᩥᩴ ᩈᨾᨿᩮ ᨽᨣᩅᩣ ᩅᩥᩉᩣᩁᨲᩮᩣ ᨶᩥᨠ᩠ᨡᨾᩥᨲ᩠ᩅᩣ ᨶᩉᩣᨿᩥᨲᩩᨠᩣᨾᩮᩣ ᨲᩔ ᨲᩊᩣᨠᩔ ᨲᩦᩁᩴ ᨣᨶ᩠ᨲ᩠ᩅᩣ ᨲᨲ᩠ᨳ ᨶ᩠ᩉᨲ᩠ᩅᩣ ᩑᨠᨧᩦᩅᩁᩮᩣ ᨩᩃᨾᩣᨶᩮᩣ ᨻᩕᩉ᩠ᨾᩣ ᩅᩥᨿ ᩈᩪᩁᩥᨿᩮᩣ ᩅᩥᨿ ᩈᩩᩅᨱ᩠ᨱᨻᩥᨾ᩠ᨻᩴ ᩅᩥᨿ ᩋᨭ᩠ᨮᩣᩈᩥ. ᩋᨳ ᩈᩮᩣ ᨴᩮᩅᨸᩩᨲ᩠ᨲᩮᩣ ᩈᩮᩣᨾᨶᩔᨩᩣᨲᩮᩣ ᨸᨬ᩠ᨩᩃᩥᨠᩮᩣ ᨳᩮᩣᨾᨶᨾᨠᩣᩈᩥ, ᩋᨲ᩠ᨲᨶᩮᩣ ᨴᩥᨻ᩠ᨻᨣᩦᨲᨲᩪᩁᩥᨿᩮᩉᩥ ¶ ᩏᨸᩉᩣᩁᨬ᩠ᨧ ᩋᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᨾᨶᩩᩔᩮᩈᩩ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩋᨸᩁᨽᩣᨣᩮ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑᪑. ᩈᩮᩣ ᨸᨧ᩠ᨨᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩋᨲ᩠ᨳᨴᩔᩦ ᨩᩥᨶᩅᩁᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᨸᩁᨾᨲ᩠ᨳᩴ ᨶᩥᨻ᩠ᨻᩣᨶᩴ ᨴᨠ᩠ᨡᨲᩥ ᨸᩔᨲᩦᨲᩥ ᩋᨲ᩠ᨳᨴᩔᩦ, ᩋᨳ ᩅᩣ ᩈᨻ᩠ᨻᩈᨲ᩠ᨲᩣᨶᩴ ᨧᨲᩩᩁᩣᩁᩥᨿᩈᨧ᩠ᨧᩈᨦ᩠ᨡᩣᨲᩴ ᩋᨲ᩠ᨳᨸᨿᩮᩣᨩᨶᩴ ᨴᩔᨶᩈᩦᩃᩮᩣᨲᩥ ᩋᨲ᩠ᨳᨴᩔᩦ, ᨠᩥᩃᩮᩈᩮ ᩋᨩᩥᨶᩥ ᨩᩥᨶᩣᨲᩥ ᨩᩥᨶᩥᩔᨲᩦᨲᩥ ᨩᩥᨶᩮᩣ. ᩅᩁᩥᨲᨻ᩠ᨻᩮᩣ ᨸᨲ᩠ᨳᩮᨲᨻ᩠ᨻᩮᩣ ᩈᨻ᩠ᨻᩈᨲ᩠ᨲᩮᩉᩦᨲᩥ ᩅᩁᩮᩣ, ᩋᨲ᩠ᨳᨴᩔᩦ ᨩᩥᨶᩮᩣ ᨧ ᩈᩮᩣ ᩅᩁᩮᩣ ᨧᩣᨲᩥ ᩋᨲ᩠ᨳᨴᩔᩦ ᨩᩥᨶᩅᩁᩮᩣ. ᩃᩮᩣᨠᨩᩮᨭ᩠ᨮᩮᩣᨲᩥ ᩃᩩᨩ᩠ᨩᨲᩥ ᨸᩃᩩᨩ᩠ᨩᨲᩦᨲᩥ ᩃᩮᩣᨠᩮᩣ, ᩃᩮᩣᨠᩦᨿᨲᩥ ᨸᩔᩦᨿᨲᩥ ᨻᩩᨴ᩠ᨵᩣᨴᩦᩉᩥ ᨸᩣᩁᨸ᩠ᨸᨲ᩠ᨲᩮᩣᨲᩥ ᩅᩣ ᩃᩮᩣᨠᩮᩣ, ᩃᩮᩣᨠᩮᩣ ᨧ ᩃᩮᩣᨠᩮᩣ ᨧ ᩃᩮᩣᨠᩮᩣ ᨧᩣᨲᩥ ᩃᩮᩣᨠᩮᩣ. ᩑᨠᩈᩮᩈᩈᨾᩣᩈᩅᩈᩮᨶ ‘‘ᩃᩮᩣᨠᩣ’’ᨲᩥ ᩅᨲ᩠ᨲᨻ᩠ᨻᩮ ‘‘ᩃᩮᩣᨠᩮᩣ’’ᨲᩥ ᩅᩩᨲ᩠ᨲᩮᩣ. ᩃᩮᩣᨠᩔ ᨩᩮᨭ᩠ᨮᩮᩣ ᩃᩮᩣᨠᨩᩮᨭ᩠ᨮᩮᩣ, ᩈᩮᩣ ᩃᩮᩣᨠᨩᩮᨭ᩠ᨮᩮᩣ ᨶᩁᩣᩈᨽᩮᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᩈᩩᨾᨦ᩠ᨣᩃᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᩈᩁᨱᨣᨾᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩏᨽᩥᨶ᩠ᨶᩴ ¶ ᨴᩮᩅᩁᩣᨩᩪᨶᨶ᩠ᨲ᩠ᨿᩣᨴᩥᨠᩴ ᩌᨿᩈ᩠ᨾᨲᩮᩣ ᩈᩁᨱᨣᨾᨶᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩮ ᨽᨣᩅᨲᩥ ᩏᨸ᩠ᨸᨶ᩠ᨶᩮ ᩋᨿᩴ ᩉᩥᨾᩅᨶ᩠ᨲᩮ ᨴᩮᩅᩁᩣᨩᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩥ, ᨲᩈ᩠ᨾᩥᩴ ᩋᨸᩁᩮᨶ ᨿᨠ᩠ᨡᨴᩮᩅᩁᨬ᩠ᨬᩣ ᩈᨴ᩠ᨵᩥᩴ ᩈᨦ᩠ᨣᩣᨾᨲ᩠ᨳᩣᨿ ᩏᨸᨭ᩠ᨮᩥᨲᩮ ᨴ᩠ᩅᩮ ᩋᨶᩮᨠᨿᨠ᩠ᨡᩈᩉᩔᨸᩁᩥᩅᩣᩁᩣ ᨹᩃᨠᩣᩅᩩᨵᩣᨴᩥᩉᨲ᩠ᨳᩣ ᩈᨦ᩠ᨣᩣᨾᨲ᩠ᨳᩣᨿ ᩈᨾᩩᨸᨻ᩠ᨿᩪᩊ᩠ᩉᩣ ᩋᩉᩮᩈᩩᩴ. ᨲᨴᩣ ᨸᨴᩩᨾᩩᨲ᩠ᨲᩁᩮᩣ ᨽᨣᩅᩣ ᨲᩮᩈᩩ ᩈᨲ᩠ᨲᩮᩈᩩ ᨠᩣᩁᩩᨬ᩠ᨬᩴ ᩏᨸ᩠ᨸᩣᨴᩮᨲ᩠ᩅᩣ ᩌᨠᩣᩈᩮᨶ ᨲᨲ᩠ᨳ ᨣᨶ᩠ᨲ᩠ᩅᩣ ᩈᨸᩁᩥᩅᩣᩁᩣᨶᩴ ᨴ᩠ᩅᩥᨶ᩠ᨶᩴ ᨴᩮᩅᩁᩣᨩᩪᨶᩴ ᨵᨾ᩠ᨾᩴ ᨴᩮᩈᩮᩈᩥ. ᨲᨴᩣ ᨲᩮ ᩈᨻ᩠ᨻᩮ ᨹᩃᨠᩣᩅᩩᨵᩣᨶᩥ ᨨᨯ᩠ᨯᩮᨲ᩠ᩅᩣ ᨽᨣᩅᨶ᩠ᨲᩴ ᨣᩣᩁᩅᨻᩉᩩᨾᩣᨶᩮᨶ ᩅᨶ᩠ᨴᩥᨲ᩠ᩅᩣ ᩈᩁᨱᨾᨣᨾᩴᩈᩩ. ᨲᩮᩈᩴ ᩋᨿᩴ ᨸᨮᨾᩴ ᩈᩁᨱᨾᨣᨾᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ¶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪒᪐. ᩈᩮᩣ ᩋᨸᩁᨽᩣᨣᩮ ᨸᩩᨻ᩠ᨻᨠᩩᩈᩃᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩏᨽᩥᨶ᩠ᨶᩴ ᨴᩮᩅᩁᩣᨩᩪᨶᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᩈᩩᨧᩥᩃᩮᩣᨾᨡᩁᩃᩮᩣᨾᩌᩊᩅᨠᨠᩩᨾ᩠ᨽᩦᩁᨠᩩᩅᩮᩁᩣᨴᨿᩮᩣ ᩅᩥᨿ ᨶᩣᨾᨣᩮᩣᨲ᩠ᨲᩮᨶ ᩋᨸᩣᨠᨭᩣ ᨴ᩠ᩅᩮ ᨿᨠ᩠ᨡᩁᩣᨩᩣᨶᩮᩣ ᩋᨬ᩠ᨬᩣᨸᨴᩮᩈᩮᨶ ᨴᩔᩮᨶ᩠ᨲᩮᩣ ‘‘ᩏᨽᩥᨶ᩠ᨶᩴ ᨴᩮᩅᩁᩣᨩᩪᨶ’’ᨶ᩠ᨲᩥᩌᨴᩥᨾᩣᩉ. ᩈᨦ᩠ᨣᩣᨾᩮᩣ ᩈᨾᩩᨸᨭ᩠ᨮᩥᨲᩮᩣᨲᩥ ¶ ᩈᩴ ᩈᩩᨭ᩠ᨮᩩ ᨣᩣᨾᩮᩣ ᨠᩃᩉᨲ᩠ᨳᩣᨿ ᩏᨸᨣᨾᨶᨶ᩠ᨲᩥ ᩈᨦ᩠ᨣᩣᨾᩮᩣ, ᩈᩮᩣ ᩈᨦ᩠ᨣᩣᨾᩮᩣ ᩈᩴ ᩈᩩᨭ᩠ᨮᩩ ᩏᨸᨭ᩠ᨮᩥᨲᩮᩣ, ᩑᨠᨭ᩠ᨮᩣᨶᩮ ᩏᨸᨣᨶ᩠ᨲ᩠ᩅᩣ ᨮᩥᨲᩮᩣᨲᩥ ᩋᨲ᩠ᨳᩮᩣ. ᩋᩉᩮᩣᩈᩥ ᩈᨾᩩᨸᨻ᩠ᨿᩪᩊ᩠ᩉᩮᩣᨲᩥ ᩈᩴ ᩈᩩᨭ᩠ᨮᩩ ᩏᨸᩈᨾᩦᨸᩮ ᩁᩣᩈᩥᨽᩪᨲᩮᩣᨲᩥ ᩋᨲ᩠ᨳᩮᩣ.

᪒᪑. ᩈᩴᩅᩮᨩᩮᩈᩥ ᨾᩉᩣᨩᨶᨶ᩠ᨲᩥ ᨲᩮᩈᩴ ᩁᩣᩈᩥᨽᩪᨲᩣᨶᩴ ᨿᨠ᩠ᨡᩣᨶᩴ ᩌᨠᩣᩈᩮ ᨶᩥᩈᩥᨶ᩠ᨶᩮᩣ ᨽᨣᩅᩣ ᨧᨲᩩᩈᨧ᩠ᨧᨵᨾ᩠ᨾᨴᩮᩈᨶᩣᨿ ᩈᩴ ᩈᩩᨭ᩠ᨮᩩ ᩅᩮᨩᩮᩈᩥ, ᩌᨴᩦᨶᩅᨴᩔᨶᩮᨶ ᨣᨱ᩠ᩉᩣᨸᩮᩈᩥ ᩅᩥᨬ᩠ᨬᩣᨸᩮᩈᩥ ᨻᩮᩣᨵᩮᩈᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᩈᩁᨱᨣᨾᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᩑᨠᩣᩈᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩅᩁᩩᨱᩮᩣ ¶ ᨶᩣᨾ ᨶᩣᨾᩮᨶᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩑᨠᩣᩈᨶᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨲ᩠ᨳᨴᩔᩥᩔ ᨽᨣᩅᨲᩮᩣ ᨠᩣᩃᩮ ᩅᩁᩩᨱᩮᩣ ᨶᩣᨾ ᨴᩮᩅᩁᩣᨩᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩥ. ᩈᩮᩣ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨣᨶ᩠ᨵᨾᩣᩃᩣᨴᩦᩉᩥ ᨣᩦᨲᩅᩣᨴᩥᨲᩮᩉᩥ ᨧ ᩏᨸᨭ᩠ᨮᨿᨾᩣᨶᩮᩣ ᩈᨸᩁᩥᩅᩣᩁᩮᩣ ᨸᩪᨩᩮᩈᩥ. ᨲᨲᩮᩣ ᩋᨸᩁᨽᩣᨣᩮ ᨽᨣᩅᨲᩥ ᨸᩁᩥᨶᩥᨻ᩠ᨻᩩᨲᩮ ᨲᩔ ᨾᩉᩣᨻᩮᩣᨵᩥᩁᩩᨠ᩠ᨡᩴ ᨻᩩᨴ᩠ᨵᨴᩔᨶᩴ ᩅᩥᨿ ᩈᨻ᩠ᨻᨲᩪᩁᩥᨿᨲᩣᩊᩣᩅᨧᩁᩮᩉᩥ ᩈᨸᩁᩥᩅᩣᩁᩮᩣ ᩏᨸᩉᩣᩁᨾᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨲᨲᩮᩣ ᨠᩣᩃᨦ᩠ᨠᨲ᩠ᩅᩣ ᨶᩥᨾ᩠ᨾᩣᨶᩁᨲᩥᨴᩮᩅᩃᩮᩣᨠᩮ ᩏᨸ᩠ᨸᨩ᩠ᨩᩥ. ᩑᩅᩴ ᨴᩮᩅᩈᨾ᩠ᨸᨲ᩠ᨲᩥᨾᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧ ᨾᨶᩩᩔᨽᩪᨲᩮᩣ ᨧᨠ᩠ᨠᩅᨲ᩠ᨲᩥᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨲ᩠ᨳᩩ ᩈᩣᩈᨶᩮ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪓᪑. ᩈᩮᩣ ᨸᨧ᩠ᨨᩣ ᩈᨠᨠᨾ᩠ᨾᩴ ᩈᩁᩥᨲ᩠ᩅᩣ ᨲᩴ ᨲᨳᨲᩮᩣ ᨬᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ¶ ᩅᩁᩩᨱᩮᩣ ᨶᩣᨾ ᨶᩣᨾᩮᨶᩣᨲᩥᩌᨴᩥᨾᩣᩉ. ᨲᨲ᩠ᨳ ᨿᨴᩣ ᩋᩉᩴ ᩈᨾ᩠ᨻᩮᩣᨵᨶᨲ᩠ᨳᩣᨿ ᨻᩩᨴ᩠ᨵᩴ ᨻᩮᩣᨵᩥᨬ᩠ᨧ ᨸᩪᨩᩮᩈᩥᩴ, ᨲᨴᩣ ᩅᩁᩩᨱᩮᩣ ᨶᩣᨾ ᨴᩮᩅᩁᩣᨩᩣ ᩋᩉᩮᩣᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

᪓᪔. ᨵᩁᨱᩦᩁᩩᩉᨸᩣᨴᨸᨶ᩠ᨲᩥ ᩑᨲ᩠ᨳ ᩁᩩᨠ᩠ᨡᩃᨲᩣᨸᨻ᩠ᨻᨲᩈᨲ᩠ᨳᩁᨲᨶᩣᨴᨿᩮᩣ ᨵᩣᩁᩮᨲᩦᨲᩥ ᨵᩁᨱᩦ, ᨲᩈ᩠ᨾᩥᩴ ᩁᩩᩉᨲᩥ ᨸᨲᩥᨭ᩠ᨮᩉᨲᩦᨲᩥ ᨵᩁᨱᩦᩁᩩᩉᩮᩣ. ᨸᩣᨴᩮᨶ ᨸᩥᩅᨲᩦᨲᩥ ᨸᩣᨴᨸᩮᩣ, ᩈᩥᨬ᩠ᨧᩥᨲᩈᩥᨬ᩠ᨧᩥᨲᩮᩣᨴᨠᩴ ᨸᩣᨴᩮᨶ ᨾᩪᩃᩮᨶ ᨸᩥᩅᨲᩥ ᩁᩩᨠ᩠ᨡᨠ᩠ᨡᨶ᩠ᨵᩈᩣᨡᩣᩅᩥᨭᨸᩮᩉᩥ ᩌᨸᩮᩣᩁᩈᩴ ᨸᨲ᩠ᨳᩁᩥᨿᨲᩦᨲᩥ ᩋᨲ᩠ᨳᩮᩣ, ᨲᩴ ᨵᩁᨱᩦᩁᩩᩉᨸᩣᨴᨸᩴ ᨻᩮᩣᨵᩥᩁᩩᨠ᩠ᨡᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

᪓᪕. ᩈᨠᨠᨾ᩠ᨾᩣᨽᩥᩁᨴ᩠ᨵᩮᩣᨲᩥ ᩋᨲ᩠ᨲᨶᩮᩣ ᨠᩩᩈᩃᨠᨾ᩠ᨾᩮᨶ ᩋᨽᩥᩁᨴ᩠ᨵᩮᩣ ᨸᩈᨶ᩠ᨶᩮᩣ ᩏᨲ᩠ᨲᨾᩮ ᨻᩮᩣᨵᩥᨾ᩠ᩉᩥ ᨸᩈᨶ᩠ᨶᩮᩣᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᩑᨠᩣᩈᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᩈᩩᩅᨱ᩠ᨱᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩅᩥᨸᩔᩦ ¶ ᨶᩣᨾ ᨽᨣᩅᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩩᩅᨱ᩠ᨱᨸᩩᨸ᩠ᨹᩥᨿᨲ᩠ᨳᩮᩁᩔ ¶ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨮᩣᨶᩮ ᨽᩪᨾᨭ᩠ᨮᨠᨴᩮᩅᨸᩩᨲ᩠ᨲᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩮᩣ ᨲᩔ ᨽᨣᩅᨲᩮᩣ ᨵᨾ᩠ᨾᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨧᨲᩪᩉᩥ ᩈᩩᩅᨱ᩠ᨱᨸᩩᨸ᩠ᨹᩮᩉᩥ ᨸᩪᨩᩮᩈᩥ. ᨲᩣᨶᩥ ᨸᩩᨸ᩠ᨹᩣᨶᩥ ᩌᨠᩣᩈᩮ ᩈᩩᩅᨱ᩠ᨱᩅᩥᨲᩣᨶᩴ ᩉᩩᨲ᩠ᩅᩣ ᨨᩣᨴᩮᩈᩩᩴ, ᩈᩩᩅᨱ᩠ᨱᨸᨽᩣ ᨧ ᨻᩩᨴ᩠ᨵᩔ ᩈᩁᩦᩁᨸᨽᩣ ᨧ ᩑᨠᨲᩮᩣ ᩉᩩᨲ᩠ᩅᩣ ᨾᩉᩣᩒᨽᩣᩈᩮᩣ ᩋᩉᩮᩣᩈᩥ. ᩈᩮᩣ ᩋᨲᩥᩁᩮᨠᨲᩁᩴ ᨸᩈᨶ᩠ᨶᩮᩣ ᩈᨠᨽᩅᨶᩴ ᨣᨲᩮᩣᨸᩥ ᩈᩁᨲᩥᨿᩮᩅ. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨲᩩᩈᩥᨲᨽᩅᨶᩣᨴᩥᩈᩩᨣᨲᩦᩈᩩᨿᩮᩅ ᩈᩴᩈᩁᨶ᩠ᨲᩮᩣ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᩈᩣᩈᨶᩮ ᩏᩁᩴ ᨴᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪔᪐. ᩈᩮᩣ ᩋᨸᩁᨽᩣᨣᩮ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩅᩥᨸᩔᩦ ᨶᩣᨾ ᨽᨣᩅᩣᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨳᨾᩮᩅ.

᪔᪔. ᨸᩣᨾᩮᩣᨩ᩠ᨩᩴ ᨩᨶᨿᩥᨲ᩠ᩅᩣᨶᩣᨲᩥ ᨻᩃᩅᨸᩦᨲᩥᩴ ᩏᨸ᩠ᨸᩣᨴᩮᨲ᩠ᩅᩣ ‘‘ᨸᩣᨾᩮᩣᨩ᩠ᨩᩴ ᩌᨾᩮᩣᨴᨶᩣ ᨸᨾᩮᩣᨴᨶᩣ ᩉᩣᩈᩮᩣ ¶ ᨸᩉᩣᩈᩮᩣ ᩅᩥᨲ᩠ᨲᩥ ᩒᨴᨣ᩠ᨿᩴ ᩋᨲ᩠ᨲᨾᨶᨲᩣ ᨧᩥᨲ᩠ᨲᩔᩣ’’ᨲᩥᩌᨴᩦᩈᩩ (ᨵ. ᩈ. ᪙, ᪘᪖; ᨾᩉᩣᨶᩥ. ᪑) ᩅᩥᨿ ᩋᨲ᩠ᨲᨾᨶᨲᩣ ᩈᨠᨽᩣᩅᩴ ᩏᨸ᩠ᨸᩣᨴᩮᨲ᩠ᩅᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᩈᩩᩅᨱ᩠ᨱᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᨧᩥᨲᨠᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩅᩈᩣᨾᩥ ᩁᩣᨩᩣᨿᨲᨶᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨧᩥᨲᨠᨸᩪᨩᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲᩮᩣ ᨸᩁᩴ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨡᩥᩔ ᨽᨣᩅᨲᩮᩣ ᨠᩣᩃᩮ ᩁᩣᨩᩣᨿᨲᨶᩁᩩᨠ᩠ᨡᨴᩮᩅᨲᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩮᩣ ᩋᨶ᩠ᨲᩁᨶ᩠ᨲᩁᩣ ᨴᩮᩅᨲᩣᩉᩥ ᩈᨴ᩠ᨵᩥᩴ ᨵᨾ᩠ᨾᩴ ¶ ᩈᩩᨲ᩠ᩅᩣ ᨸᩈᨶ᩠ᨶᩮᩣ ᨽᨣᩅᨲᩥ ᨸᩁᩥᨶᩥᨻ᩠ᨻᩩᨲᩮ ᩈᨸᩁᩥᩅᩣᩁᩮᩣ ᨣᨶ᩠ᨵᨴᩦᨸᨵᩪᨸᨸᩩᨸ᩠ᨹᨽᩮᩁᩥᩌᨴᩦᨶᩥ ᨣᩣᩉᩣᨸᩮᨲ᩠ᩅᩣ ᨽᨣᩅᨲᩮᩣ ᩌᩊᩉᨶᨭ᩠ᨮᩣᨶᩴ ᨣᨶ᩠ᨲ᩠ᩅᩣ ᨴᩦᨸᩣᨴᩦᨶᩥ ᨸᩪᨩᩮᨲ᩠ᩅᩣ ᩋᨶᩮᨠᩮᩉᩥ ᨲᩪᩁᩥᨿᩮᩉᩥ ᩋᨶᩮᨠᩮᩉᩥ ᩅᩣᨴᩥᨲᩮᩉᩥ ᨲᩴ ᨸᩪᨩᩮᩈᩥ. ᨲᨲᩮᩣ ᨸᨭ᩠ᨮᩣᨿ ᩈᨠᨽᩅᨶᩴ ᩏᨸᩅᩥᨭ᩠ᨮᩮᩣᨸᩥ ᨽᨣᩅᨶ᩠ᨲᨾᩮᩅ ᩈᩁᩥᨲ᩠ᩅᩣ ᩈᨾ᩠ᨾᩩᨡᩣ ᩅᩥᨿ ᩅᨶ᩠ᨴᨲᩥ. ᩈᩮᩣ ᨲᩮᨶᩮᩅ ᨸᩩᨬ᩠ᨬᩮᨶ ᨲᩮᨶ ᨧᩥᨲ᩠ᨲᨸ᩠ᨸᩈᩣᨴᩮᨶ ᩁᩣᨩᩣᨿᨲᨶᨲᩮᩣ ᨠᩣᩃᩴ ᨠᨲᩮᩣ ᨲᩩᩈᩥᨲᩣᨴᩦᩈᩩ ᨶᩥᨻ᩠ᨻᨲ᩠ᨲᩮᩣ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᨲᨲᩮᩣ ᨾᨶᩩᩔᩮᩈᩩ ᨾᨶᩩᩔᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨽᨣᩅᨲᩥ ᩏᨸ᩠ᨸᨶ᩠ᨶᨧᩥᨲ᩠ᨲᨸ᩠ᨸᩈᩣᨴᩮᩣ ᨽᨣᩅᨲᩮᩣ ᩈᩣᩈᨶᩮ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪔᪙. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩅᩈᩣᨾᩥ ᩁᩣᨩᩣᨿᨲᨶᩮᨲᩥᩌᨴᩥᨾᩣᩉ. ᩁᩣᨩᩣᨿᨲᨶᩮᨲᩥ ¶ ᨴᩮᩅᩁᩣᨩᩪᨶᩴ ᩌᨿᨲᨶᩴ ᩁᩣᨩᩣᨿᨲᨶᩴ, ᨲᩔ ᩁᩩᨠ᩠ᨡᩔ ᨶᩣᨾᨵᩮᨿ᩠ᨿᩮᩣ ᩅᩣ. ᨸᩁᩥᨶᩥᨻ᩠ᨻᩩᨲᩮ ᨽᨣᩅᨲᩦᨲᩥ ᨸᩁᩥᩈᨾᨶ᩠ᨲᨲᩮᩣ ᨠᩥᨬ᩠ᨧᩥ ᩋᨶᩅᩈᩮᩈᩮᨲ᩠ᩅᩣ ᨡᨶ᩠ᨵᨸᩁᩥᨶᩥᨻ᩠ᨻᩣᨶᨠᩣᩃᩮ ᨸᩁᩥᨶᩥᨻ᩠ᨻᩣᨶᩈᨾᨿᩮ ᨸᩁᩥᨶᩥᨻ᩠ᨻᩣᨶᨸ᩠ᨸᨲ᩠ᨲᩔ ᩈᩥᨡᩥᨶᩮᩣ ᩃᩮᩣᨠᨻᨶ᩠ᨵᩩᨶᩮᩣᨲᩥ ᩈᨾ᩠ᨻᨶ᩠ᨵᩮᩣ.

᪕᪐. ᨧᩥᨲᨠᩴ ᩋᨣᨾᩣᩈᩉᨶ᩠ᨲᩥ ᨧᨶ᩠ᨴᨶᩣᨣᩁᩩᨴᩮᩅᨴᩣᩁᩩᨠᨸ᩠ᨸᩪᩁᨲᨠ᩠ᨠᩮᩣᩃᩣᨴᩥᩈᩩᨣᨶ᩠ᨵᨴᩣᩁᩪᩉᩥ ᨧᩥᨲᩴ ᩁᩣᩈᩥᨣᨲᨶ᩠ᨲᩥ ᨧᩥᨲᩴ, ᨧᩥᨲᨾᩮᩅ ᨧᩥᨲᨠᩴ, ᨻᩩᨴ᩠ᨵᨣᩣᩁᩅᩮᨶ ᨧᩥᨲᨠᩴ ᨸᩪᨩᨶᨲ᩠ᨳᩣᨿ ᨧᩥᨲᨠᩔ ᩈᨾᩦᨸᩴ ᩋᩉᩴ ᩋᨣᨾᩣᩈᩥᨶ᩠ᨲᩥ ᩋᨲ᩠ᨳᩮᩣ. ᨲᨲ᩠ᨳ ᨣᨶ᩠ᨲ᩠ᩅᩣ ᨠᨲᨠᩥᨧ᩠ᨧᩴ ᨴᩔᩮᨶ᩠ᨲᩮᩣ ᨲᩪᩁᩥᨿᩴ ᨲᨲ᩠ᨳ ᩅᩣᨴᩮᨲ᩠ᩅᩣᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨧᩥᨲᨠᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᨻᩩᨴ᩠ᨵᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨿᨴᩣ ¶ ᩅᩥᨸᩔᩦ ᩃᩮᩣᨠᨣ᩠ᨣᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨻᩩᨴ᩠ᨵᩈᨬ᩠ᨬᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨽᩪᨾᨭ᩠ᨮᨠᩅᩥᨾᩣᨶᩮ ᨴᩮᩅᨸᩩᨲ᩠ᨲᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩥ. ᨲᨴᩣ ᩅᩥᨸᩔᩦ ᨽᨣᩅᩣ ᩌᨿᩩᩈᨦ᩠ᨡᩣᩁᩴ ᩅᩮᩣᩔᨩ᩠ᨩᩥ. ᩋᨳ ᩈᨠᩃᨴᩈᩈᩉᩔᩥᩃᩮᩣᨠᨵᩣᨲᩩ ᩈᩈᩣᨣᩁᨸᨻ᩠ᨻᨲᩣ ᨸᨠᨾ᩠ᨸᩥᨲ᩠ᨳ. ᨲᨴᩣ ᨲᩔ ᨴᩮᩅᨸᩩᨲ᩠ᨲᩔ ᨽᩅᨶᨾ᩠ᨸᩥ ᨠᨾ᩠ᨸᩥᨲ᩠ᨳ. ᨲᩈ᩠ᨾᩥᩴ ᨡᨱᩮ ᩈᩮᩣ ᨴᩮᩅᨸᩩᨲ᩠ᨲᩮᩣ ¶ ᩈᩴᩈᨿᨩᩣᨲᩮᩣ – ‘‘ᨠᩥᩴ ᨶᩩ ᨡᩮᩣ ᨸᨳᩅᩦᨠᨾ᩠ᨸᩣᨿ ᨶᩥᨻ᩠ᨻᨲ᩠ᨲᩦ’’ᨲᩥ ᨧᩥᨶ᩠ᨲᩮᨲ᩠ᩅᩣ ᨻᩩᨴ᩠ᨵᩔ ᩌᨿᩩᩈᨦ᩠ᨡᩣᩁᩅᩮᩣᩔᨩ᩠ᨩᨽᩣᩅᩴ ᨬᨲ᩠ᩅᩣ ᨾᩉᩣᩈᩮᩣᨠᩴ ᨴᩮᩣᨾᨶᩔᩴ ᩏᨸ᩠ᨸᩣᨴᩮᩈᩥ. ᨲᨴᩣ ᩅᩮᩔᩅᨱᩮᩣ ᨾᩉᩣᩁᩣᨩᩣ ᩌᨣᨶ᩠ᨲ᩠ᩅᩣ ‘‘ᨾᩣ ᨧᩥᨶ᩠ᨲᨿᩥᨲ᩠ᨳᩣ’’ᨲᩥ ᩋᩔᩣᩈᩮᩈᩥ. ᩈᩮᩣ ᨴᩮᩅᨸᩩᨲ᩠ᨲᩮᩣ ᨲᨲᩮᩣ ᨧᩩᨲᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨥᩁᩣᩅᩣᩈᩴ ᨸᩉᩣᨿ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪕᪗. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨿᨴᩣ ᩅᩥᨸᩔᩦ ᩃᩮᩣᨠᨣ᩠ᨣᩮᩣᨲᩥᩌᨴᩥᨾᩣᩉ. ᩌᨿᩩᩈᨦ᩠ᨡᩣᩁᨾᩮᩣᩔᨩ᩠ᨩᩦᨲᩥ ᩌ ᩈᨾᨶ᩠ᨲᨲᩮᩣ ᨿᩩᨶᩮᩣᨲᩥ ᨸᩣᩃᩮᨲᩥ ᩈᨲ᩠ᨲᩮᨲᩥ ᩌᨿᩩ, ᩌᨿᩩᩔ ᩈᨦ᩠ᨡᩣᩁᩮᩣ ᩁᩣᩈᩥᨽᩣᩅᩮᩣ ᩌᨿᩩᩈᨦ᩠ᨡᩣᩁᩮᩣ, ᨲᩴ ᩌᨿᩩᩈᨦ᩠ᨡᩣᩁᩴ ᩒᩔᨩ᩠ᨩᩥ ᨸᩁᩥᨧ᩠ᨧᨩᩥ ᨩᩉᩣᩈᩦᨲᩥ ᩋᨲ᩠ᨳᩮᩣ. ᨲᩈ᩠ᨾᩥᩴ ᩌᨿᩩᩈᨦ᩠ᨡᩣᩁᩅᩮᩣᩔᨩ᩠ᨩᨶᩮ. ᨩᩃᨾᩮᨡᩃᩣᩈᩣᨣᩁᩮᩣᨴᨠᨾᩮᨡᩃᩣᩈᩉᩥᨲᩣ ᩈᨠᩃᨴᩈᩈᩉᩔᨧᨠ᩠ᨠᩅᩣᩊᨸᨳᩅᩦ ᨠᨾ᩠ᨸᩥᨲ᩠ᨳᩣᨲᩥ ᩈᨾ᩠ᨻᨶ᩠ᨵᩮᩣ.

᪕᪘. ᩒᨲᨲᩴ ᩅᩥᨲ᩠ᨳᨲᩴ ᨾᨿ᩠ᩉᨶ᩠ᨲᩥ ᨾᨿ᩠ᩉᩴ ᨽᩅᨶᩴ ᩒᨲᨲᩴ ᩅᩥᨲ᩠ᨳᨲᩴ ᨧᩥᨲ᩠ᨲᩴ ᩅᩥᨧᩥᨲ᩠ᨲᩴ ᩈᩩᨧᩥ ᩈᩩᨸᩁᩥᩈᩩᨴ᩠ᨵᩴ ᨧᩥᨲ᩠ᨲᩴ ᩋᨶᩮᨠᩮᩉᩥ ¶ ᩈᨲ᩠ᨲᩉᩥ ᩁᨲᨶᩮᩉᩥ ᩅᩥᨧᩥᨲ᩠ᨲᩴ ᩈᩮᩣᨽᨾᩣᨶᩴ ᨸᨠᨾ᩠ᨸᩥᨲ᩠ᨳ ᨸᨠᩣᩁᩮᨶ ᨠᨾ᩠ᨸᩥᨲ᩠ᨳᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᨻᩩᨴ᩠ᨵᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᨾᨣ᩠ᨣᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨾᨣ᩠ᨣᩈᨬ᩠ᨬᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲᩮᩣ ᩒᩁᩴ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩉᩥᨾᩅᨶ᩠ᨲᩮ ᨴᩮᩅᨸᩩᨲ᩠ᨲᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩮᩣ ᩋᩁᨬ᩠ᨬᩴ ᨣᨶ᩠ᨲ᩠ᩅᩣ ᨾᨣ᩠ᨣᨾᩪᩊ᩠ᩉᩣᨶᩴ ᨾᨣ᩠ᨣᩴ ¶ ᨣᩅᩮᩈᨶ᩠ᨲᩣᨶᩴ ᨲᩔ ᩈᩣᩅᨠᩣᨶᩴ ᨽᩮᩣᨩᩮᨲ᩠ᩅᩣ ᨾᨣ᩠ᨣᩴ ᩌᨧᩥᨠ᩠ᨡᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩈᨾ᩠ᨸᨲ᩠ᨲᩥᨾᨶᩩᨽᩅᩥᨲ᩠ᩅᩣ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᨽᩅᩮ ᩈᨻ᩠ᨻᨲ᩠ᨳ ᩋᨾᩪᩊ᩠ᩉᩮᩣ ᩈᨬ᩠ᨬᩅᩣ ᩋᩉᩮᩣᩈᩥ. ᩋᨳ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨥᩁᩣᩅᩣᩈᩮ ᩋᨶᩃ᩠ᩃᩦᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪖᪖. ᩈᩮᩣ ¶ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᨻᩩᨴ᩠ᨵᩔᩣᨲᩥᩌᨴᩥᨾᩣᩉ. ᩈᩣᩅᨠᩣ ᩅᨶᨧᩣᩁᩥᨶᩮᩣᨲᩥ ᨽᨣᩅᨲᩮᩣ ᩅᩩᨲ᩠ᨲᩅᨧᨶᩴ ᩈᨾ᩠ᨾᩣ ᩌᨴᩁᩮᨶ ᩈᩩᨱᨶ᩠ᨲᩦᨲᩥ ᩈᩣᩅᨠᩣ, ᩋᨳ ᩅᩣ ᨽᨣᩅᨲᩮᩣ ᨴᩮᩈᨶᩣᨶᩩᩈᩣᩁᩮᨶ ᨬᩣᨱᩴ ᨸᩮᩈᩮᨲ᩠ᩅᩣ ᩈᨴ᩠ᨵᨾ᩠ᨾᩴ ᩈᩩᨱᨶ᩠ᨲᩦᨲᩥ ᩈᩣᩅᨠᩣ. ᩅᨶᨧᩣᩁᩥᨶᩮᩣ ᩅᨶᩮ ᩅᩥᨧᩁᨱᨠᩣ ᩈᩣᩅᨠᩣ ᩅᩥᨸ᩠ᨸᨶᨭ᩠ᨮᩣ ᨾᨣ᩠ᨣᨾᩪᩊ᩠ᩉᩣ ᨾᩉᩣᩋᩁᨬ᩠ᨬᩮ ᩋᨶ᩠ᨵᩣᩅ ᨧᨠ᩠ᨡᩩᩅᩥᩁᩉᩥᨲᩣᩅ ᩋᨶᩩᩈᩩᨿ᩠ᨿᩁᩮ ᩅᩥᨧᩁᨶ᩠ᨲᩦᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᨾᨣ᩠ᨣᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᨸᨧ᩠ᨧᩩᨸᨭ᩠ᨮᩣᨶᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩋᨲ᩠ᨳᨴᩔᩥᨾ᩠ᩉᩥ ᩈᩩᨣᨲᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᨧ᩠ᨧᩩᨸᨭ᩠ᨮᩣᨶᩈᨬ᩠ᨬᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨲ᩠ᨳᨴᩔᩥᩔ ᨽᨣᩅᨲᩮᩣ ᨠᩣᩃᩮ ᨿᨠ᩠ᨡᨿᩮᩣᨶᩥᨿᩴ ᨶᩥᨻ᩠ᨻᨲ᩠ᨲᩮᩣ ᨽᨣᩅᨲᩥ ᨵᩁᨾᩣᨶᩮ ᨴᩔᨶᩔ ᩋᩃᨴ᩠ᨵᨲ᩠ᨲᩣ ᨸᨧ᩠ᨨᩣ ᨸᩁᩥᨶᩥᨻ᩠ᨻᩩᨲᩮ ᨾᩉᩣᩈᩮᩣᨠᨸ᩠ᨸᨲ᩠ᨲᩮᩣ ᩅᩥᩉᩣᩈᩥ. ᨲᨴᩣ ᩉᩥᩔ ᨽᨣᩅᨲᩮᩣ ᩈᩣᨣᨲᩮᩣ ᨶᩣᨾ ᩋᨣ᩠ᨣᩈᩣᩅᨠᩮᩣ ᩋᨶᩩᩈᩣᩈᨶ᩠ᨲᩮᩣ ᨽᨣᩅᨲᩮᩣ ᩈᩣᩁᩦᩁᩥᨠᨵᩣᨲᩩᨸᩪᨩᩣ ᨽᨣᩅᨲᩥ ᨵᩁᨾᩣᨶᩮ ᨠᨲᨸᩪᨩᩣ ᩅᩥᨿ ᨧᩥᨲ᩠ᨲᨸ᩠ᨸᩈᩣᨴᩅᩈᩣ ᨾᩉᨸ᩠ᨹᩃᩴ ᨽᩅᨲᩦ’’ᨲᩥ ᩅᨲ᩠ᩅᩣ ‘‘ᨳᩪᨸᩴ ᨠᩁᩮᩣᩉᩦ’’ᨲᩥ ᨶᩥᨿᩮᩣᨩᩥᨲᩮᩣ ᨳᩪᨸᩴ ᨠᩣᩁᩮᩈᩥ, ᨲᩴ ᨸᩪᨩᩮᨲ᩠ᩅᩣ ᨲᨲᩮᩣ ᨧᩩᨲᩮᩣ ᨴᩮᩅᨾᨶᩩᩔᩮᩈᩩ ᩈᨠ᩠ᨠᨧᨠ᩠ᨠᩅᨲ᩠ᨲᩥᩈᨾ᩠ᨸᨲ᩠ᨲᩥᨾᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ¶ ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪗᪒. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨬ᩠ᨬᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩋᨲ᩠ᨳᨴᩔᩥᨾ᩠ᩉᩥ ᩈᩩᨣᨲᩮᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨾᩮᩅ. ᨿᨠ᩠ᨡᨿᩮᩣᨶᩥᩴ ᩏᨸᨸᨩ᩠ᨩᩥᨶ᩠ᨲᩥ ᩑᨲ᩠ᨳ ᨸᨶ ᩋᨲ᩠ᨲᨶᩮᩣ ᩈᨠᩣᩈᩴ ᩈᨾ᩠ᨸᨲ᩠ᨲᩈᨾ᩠ᨸᨲ᩠ᨲᩮ ᨡᩣᨴᨶ᩠ᨲᩣ ᨿᨶ᩠ᨲᩥ ᨣᨧ᩠ᨨᨶ᩠ᨲᩦᨲᩥ ᨿᨠ᩠ᨡᩣ, ᨿᨠ᩠ᨡᩣᨶᩴ ᨿᩮᩣᨶᩥ ᨩᩣᨲᩦᨲᩥ ᨿᨠ᩠ᨡᨿᩮᩣᨶᩥ, ᨿᨠ᩠ᨡᨿᩮᩣᨶᩥᨿᩴ ᨶᩥᨻ᩠ᨻᨲ᩠ᨲᩮᩣᨲᩥ ᩋᨲ᩠ᨳᩮᩣ.

᪗᪓. ᨴᩩᩃ᩠ᩃᨴ᩠ᨵᩴ ¶ ᩅᨲ ᨾᩮ ᩌᩈᩦᨲᩥ ᨾᩮ ᨾᨿᩣ ᩃᨴ᩠ᨵᨿᩈᩴ ᨴᩩᩃ᩠ᩃᨴ᩠ᨵᩴ, ᨻᩩᨴ᩠ᨵᨽᩪᨲᩔ ᩈᨲ᩠ᨳᩩᨶᩮᩣ ᩈᨠ᩠ᨠᩣᩁᩴ ᩋᨠᨲᨲ᩠ᨲᩣ ᩅᩥᩁᩣᨵᩮᨲ᩠ᩅᩣ ᩃᨴ᩠ᨵᨶ᩠ᨲᩥ ᩋᨲ᩠ᨳᩮᩣ. ᨴᩩᨸ᩠ᨸᨽᩣᨲᨶ᩠ᨲᩥ ᨴᩩᨭ᩠ᨮᩩ ¶ ᨸᨽᩣᨲᩴ ᩁᨲ᩠ᨲᩥᨿᩣ ᨸᨽᩣᨲᨠᩁᨱᩴ, ᨾᨿ᩠ᩉᩴ ᨶ ᩈᩩᨭ᩠ᨮᩩᩴ ᨸᨽᩣᨲᨶ᩠ᨲᩥ ᩋᨲ᩠ᨳᩮᩣ. ᨴᩩᩁᩩᨭ᩠ᨮᩥᨲᨶ᩠ᨲᩥ ᨴᩩᩏᨭ᩠ᨮᩥᨲᩴ, ᩈᩪᩁᩥᨿᩔ ᩏᨣ᩠ᨣᨾᨶᩴ ᨾᨿ᩠ᩉᩴ ᨴᩩᩏᨣ᩠ᨣᨾᨶᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᨸᨧ᩠ᨧᩩᨸᨭ᩠ᨮᩣᨶᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᨩᩣᨲᩥᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨩᩣᨿᩴ ᨲᩔ ᩅᩥᨸᩔᩥᩔᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨩᩣᨲᩥᨸᩪᨩᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨶᨠ᩠ᨡᨲ᩠ᨲᨸᩣᨮᨠᩮᩉᩥ ᩅᩥᨸᩔᩥᨻᩮᩣᨵᩥᩈᨲ᩠ᨲᩔ ᩅᩩᨲ᩠ᨲᩃᨠ᩠ᨡᨱᨶᩥᨾᩥᨲ᩠ᨲᩴ ᩈᩩᨲ᩠ᩅᩣ ‘‘ᩋᨿᩴ ᨠᩥᩁ ᨠᩩᨾᩣᩁᩮᩣ ᨻᩩᨴ᩠ᨵᩮᩣ ᩉᩩᨲ᩠ᩅᩣ ᩈᨠᩃᩃᩮᩣᨠᩔ ᩋᨣ᩠ᨣᩮᩣ ᩈᩮᨭ᩠ᨮᩮᩣ ᩈᩩᨲ᩠ᩅᩣ ᩈᨻ᩠ᨻᩈᨲ᩠ᨲᩮ ᩈᩴᩈᩣᩁᨲᩮᩣ ᩏᨴ᩠ᨵᩁᩥᩔᨲᩦ’’ᨲᩥ ᩈᩩᨲ᩠ᩅᩣ ᨲᩴ ᨽᨣᩅᨶ᩠ᨲᩴ ᨠᩩᨾᩣᩁᨠᩣᩃᩮᨿᩮᩅ ᨻᩩᨴ᩠ᨵᩔ ᩅᩥᨿ ᨾᩉᩣᨸᩪᨩᨾᨠᩣᩈᩥ. ᨸᨧ᩠ᨨᩣ ᨠᨾᩮᨶ ᨠᩩᨾᩣᩁᨠᩣᩃᩴ ᩁᩣᨩᨠᩩᨾᩣᩁᨠᩣᩃᩴ ᩁᨩ᩠ᨩᨠᩣᩃᨶ᩠ᨲᩥ ᨠᩣᩃᨲ᩠ᨲᨿᨾᨲᩥᨠ᩠ᨠᨾ᩠ᨾ ᨻᩩᨴ᩠ᨵᩮ ᨩᩣᨲᩮᨸᩥ ᨾᩉᩣᨸᩪᨩᩴ ᨠᨲ᩠ᩅᩣ ᨲᨲᩮᩣ ᨧᩩᨲᩮᩣ ᨲᩩᩈᩥᨲᩣᨴᩦᩈᩩ ᨶᩥᨻ᩠ᨻᨲ᩠ᨲᩮᩣ ᨴᩥᨻ᩠ᨻᩈᩩᨡᨾᨶᩩᨽᩅᩥᨲ᩠ᩅᩣ ᨸᨧ᩠ᨨᩣ ᨾᨶᩩᩔᩮᩈᩩ ᨧᨠ᩠ᨠᩅᨲ᩠ᨲᩣᨴᩥᨾᨶᩩᩔᩈᩩᨡᨾᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᨲ᩠ᨲᨭ᩠ᨮᩅᩔᨠᩣᩃᩮᨿᩮᩅ ᨽᨣᩅᨲᩥ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪘᪒. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨩᩣᨿᩴ ᨲᩔ ᩅᩥᨸᩔᩥᩔᩣᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨳᨾᩮᩅ.

᪘᪔. ᨶᩮᨾᩥᨲ᩠ᨲᩣᨶᩴ ᩈᩩᨱᩥᨲ᩠ᩅᩣᨶᩣᨲᩥ ᩑᨲ᩠ᨳ ᨶᩥᨾᩥᨲ᩠ᨲᩴ ᨠᩣᩁᨱᩴ ᩈᩩᨡᨴᩩᨠ᩠ᨡᨸ᩠ᨸᨲ᩠ᨲᩥᩉᩮᨲᩩᩴ ᨩᩣᨶᨶ᩠ᨲᩦᨲᩥ ᨶᩮᨾᩥᨲ᩠ᨲᩣ, ᨲᩮᩈᩴ ᨶᩮᨾᩥᨲ᩠ᨲᩣᨶᩴ ᨶᨠ᩠ᨡᨲ᩠ᨲᨸᩣᨮᨠᩣᨶᩴ ¶ ᩅᨧᨶᩴ ᩈᩩᨱᩥᨲ᩠ᩅᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᨩᩣᨲᩥᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᨴ᩠ᩅᩣᨴᩈᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪓. ᩈᩮᩁᩮᨿ᩠ᨿᩅᨣ᩠ᨣᩮᩣ

᪑. ᩈᩮᩁᩮᨿ᩠ᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩋᨩ᩠ᨫᩣᨿᨠᩮᩣ ¶ ¶ ᨾᨶ᩠ᨲᨵᩁᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩮᩁᩮᨿ᩠ᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲᩮᩣ ᨸᩁᩮᩈᩩ ᩋᨲ᩠ᨲᨽᩣᩅᩈᩉᩔᩮᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᨲᩥᨱ᩠ᨱᩴ ᩅᩮᨴᩣᨶᩴ ᨸᩣᩁᩴ ᨣᨶ᩠ᨲ᩠ᩅᩣ ᩍᨲᩥᩉᩣᩈᩣᨴᩥᩈᨠᩃᨻᩕᩣᩉ᩠ᨾᨱᨵᨾ᩠ᨾᩮᩈᩩ ᨠᩮᩣᨭᩥᨸ᩠ᨸᨲ᩠ᨲᩮᩣ ᩑᨠᩈ᩠ᨾᩥᩴ ᨴᩥᩅᩈᩮ ᩋᨻ᩠ᨽᩮᩣᨠᩣᩈᩮ ᩈᨸᩁᩥᩅᩣᩁᩮᩣ ᨮᩥᨲᩮᩣ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩈᩮᩁᩮᨿ᩠ᨿᨸᩩᨸ᩠ᨹᩴ ᨣᩉᩮᨲ᩠ᩅᩣ ᩌᨠᩣᩈᩮ ᨡᩥᨸᨶ᩠ᨲᩮᩣ ᨸᩪᨩᩮᩈᩥ. ᨲᩣᨶᩥ ᨸᩩᨸ᩠ᨹᩣᨶᩥ ᩌᨠᩣᩈᩮ ᩅᩥᨲᩣᨶᩴ ᩉᩩᨲ᩠ᩅᩣ ᩈᨲ᩠ᨲᩣᩉᩴ ᨮᨲ᩠ᩅᩣ ᨸᨧ᩠ᨨᩣ ᩋᨶ᩠ᨲᩁᨵᩣᨿᩥᩴᩈᩩ. ᩈᩮᩣ ᨲᩴ ᩋᨧ᩠ᨨᩁᩥᨿᩴ ᨴᩥᩈ᩠ᩅᩣ ᩋᨲᩦᩅ ᨸᩈᨶ᩠ᨶᨾᩣᨶᩈᩮᩣ ᨲᩮᨶᩮᩅ ᨸᩦᨲᩥᩈᩮᩣᨾᨶᩔᩮᨶ ᨠᩣᩃᩴ ᨠᨲ᩠ᩅᩣ ᨲᩩᩈᩥᨲᩣᨴᩦᩈᩩ ᨶᩥᨻ᩠ᨻᨲ᩠ᨲᩮᩣ ᨲᨲ᩠ᨳ ᨴᩥᨻ᩠ᨻᩈᩩᨡᨾᨶᩩᨽᩅᩥᨲ᩠ᩅᩣ ᨲᨲᩮᩣ ᨾᨶᩩᩔᩈᩩᨡᨾᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᩣᨸᩩᨱᩥᨲ᩠ᩅᩣ ᨸᩩᨻ᩠ᨻᩅᩣᩈᨶᩣᨻᩃᩮᨶ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑. ᩈᩮᩣ ᩋᨸᩁᨽᩣᨣᩮ ᨸᩩᩁᩣᨠᨲᨠᩩᩈᩃᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩋᨩ᩠ᨫᩣᨿᨠᩮᩣ ᨾᨶ᩠ᨲᨵᩁᩮᩣᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨳᨾᩮᩅ.

᪓. ᩈᩮᩁᩮᨿ᩠ᨿᨠᩴ ᨣᩉᩮᨲ᩠ᩅᩣᨶᩣᨲᩥ ᩈᩥᩁᩥᩈᩮ ᨽᩅᩴ ᨩᩣᨲᩥᨸᩩᨸ᩠ᨹᩴ ᩈᩮᩁᩮᨿ᩠ᨿᩴ, ᩈᩮᩁᩮᨿ᩠ᨿᨾᩮᩅ ᩈᩮᩁᩮᨿ᩠ᨿᨠᩴ, ᨲᩴ ᩈᩮᩁᩮᨿ᩠ᨿᨠᩴ ᨣᩉᩮᨲ᩠ᩅᩣᨶᩣᨲᩥ ᩈᨾ᩠ᨻᨶ᩠ᨵᩮᩣ. ᨽᨣᩅᨲᩥ ᨸᩈᨶ᩠ᨶᩮᩣ ᨩᩣᨲᩥᩈᩩᨾᨶᨾᨠᩩᩊᨧᨾ᩠ᨸᨠᩣᨴᩦᨶᩥ ᨸᩩᨸ᩠ᨹᩣᨶᩥ ᨸᨲᩥᨭ᩠ᨮᨸᩮᨲ᩠ᩅᩣ ᨸᩪᨩᩮᨲᩩᩴ ᨠᩣᩃᩴ ᨶᨲ᩠ᨳᩥᨲᩣᨿ ᨲᨲ᩠ᨳ ᩈᨾ᩠ᨸᨲ᩠ᨲᩴ ᨲᩴ ᩈᩮᩁᩮᨿ᩠ᨿᨠᩴ ᨸᩩᨸ᩠ᨹᩴ ᨣᩉᩮᨲ᩠ᩅᩣ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᩈᩮᩁᩮᨿ᩠ᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᨸᩩᨸ᩠ᨹᨳᩪᨸᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨠᩴ ¶ ᩌᨿᩈ᩠ᨾᨲᩮᩣ ᨸᩩᨸ᩠ᨹᨳᩪᨸᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᨻᩩᨴ᩠ᨵᩔ ᨽᨣᩅᨲᩮᩣ ᨠᩣᩃᩮ ¶ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨠᩈᩥᨸ᩠ᨸᩮ ᨶᩥᨸ᩠ᨹᨲ᩠ᨲᩥᩴ ᨸᨲ᩠ᨲᩮᩣ ᨲᨲ᩠ᨳ ᩈᩣᩁᩴ ᩋᨸᩔᨶ᩠ᨲᩮᩣ ᨣᩮᩉᩴ ᨸᩉᩣᨿ ᩉᩥᨾᩅᨶ᩠ᨲᩴ ᨸᩅᩥᩈᩥᨲ᩠ᩅᩣ ᩋᨲ᩠ᨲᨶᩣ ᩈᩉᨣᨲᩮᩉᩥ ᨸᨬ᩠ᨧᩈᩥᩔᩈᩉᩔᩮᩉᩥ ᩈᨴ᩠ᨵᩥᩴ ᨸᨬ᩠ᨧᩣᨽᩥᨬ᩠ᨬᩣ ᩋᨭ᩠ᨮ ¶ ᩈᨾᩣᨸᨲ᩠ᨲᩥᨿᩮᩣ ᨶᩥᨻ᩠ᨻᨲ᩠ᨲᩮᨲ᩠ᩅᩣ ᨠᩩᨠ᩠ᨠᩩᩁᨶᩣᨾᨸᨻ᩠ᨻᨲᩈᨾᩦᨸᩮ ᨸᨱ᩠ᨱᩈᩣᩃᩴ ᨠᩣᩁᩮᨲ᩠ᩅᩣ ᨸᨭᩥᩅᩈᨲᩥ. ᨲᨴᩣ ᨻᩩᨴ᩠ᨵᩩᨸ᩠ᨸᩣᨴᨽᩣᩅᩴ ᩈᩩᨲ᩠ᩅᩣ ᩈᩥᩔᩮᩉᩥ ᩈᩉ ᨻᩩᨴ᩠ᨵᩔ ᩈᨶ᩠ᨲᩥᨠᩴ ᨣᨶ᩠ᨲᩩᨠᩣᨾᩮᩣ ᨠᩮᨶᨧᩥ ᨻ᩠ᨿᩣᨵᩥᨶᩣ ᨸᩦᩊᩥᨲᩮᩣ ᨸᨱ᩠ᨱᩈᩣᩃᩴ ᨸᩅᩥᩈᩥᨲ᩠ᩅᩣ ᩈᩥᩔᩈᨶ᩠ᨲᩥᨠᩣ ᨻᩩᨴ᩠ᨵᩔᩣᨶᩩᨽᩣᩅᩴ ᩃᨠ᩠ᨡᨱᨬ᩠ᨧ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩉᩥᨾᩅᨶ᩠ᨲᨲᩮᩣ ᨧᨾ᩠ᨸᨠᩣᩈᩮᩣᨠᨲᩥᩃᨠᨠᩮᨭᨠᩣᨴ᩠ᨿᨶᩮᨠᩮ ᨸᩩᨸ᩠ᨹᩮ ᩌᩉᩁᩣᨸᩮᨲ᩠ᩅᩣ ᨳᩪᨸᩴ ᨠᨲ᩠ᩅᩣ ᨻᩩᨴ᩠ᨵᩴ ᩅᩥᨿ ᨸᩪᨩᩮᨲ᩠ᩅᩣ ᨠᩣᩃᩴ ᨠᨲ᩠ᩅᩣ ᨻᩕᩉ᩠ᨾᩃᩮᩣᨠᩪᨸᨣᩮᩣ ᩋᩉᩮᩣᩈᩥ. ᩋᨳ ᨲᩮ ᩈᩥᩔᩣ ᨲᩔ ᩌᩊᩉᨶᩴ ᨠᨲ᩠ᩅᩣ ᨻᩩᨴ᩠ᨵᩈᨶ᩠ᨲᩥᨠᩴ ᨣᨶ᩠ᨲ᩠ᩅᩣ ᨲᩴ ᨸᩅᨲ᩠ᨲᩥᩴ ᩌᩁᩮᩣᨧᩮᩈᩩᩴ. ᩋᨳ ᨽᨣᩅᩣ ᨻᩩᨴ᩠ᨵᨧᨠ᩠ᨡᩩᨶᩣ ᩒᩃᩮᩣᨠᩮᨲ᩠ᩅᩣ ᩋᨶᩣᨣᨲᩴᩈᨬᩣᨱᩮᨶ ᨸᩣᨠᨭᩦᨠᩁᨱᨾᨠᩣᩈᩥ. ᩈᩮᩣ ᩋᨸᩁᨽᩣᨣᩮ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨸᩩᨻ᩠ᨻᩅᩣᩈᨶᩣᨻᩃᩮᨶ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑᪐. ᩋᨳ ᩈᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᩩᩈᩃᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨳᨾᩮᩅ. ᨠᩩᨠ᩠ᨠᩩᩁᩮᩣ ᨶᩣᨾ ᨸᨻ᩠ᨻᨲᩮᩣᨲᩥ ᨸᨻ᩠ᨻᨲᩔ ᩈᩥᨡᩁᩴ ᨠᩩᨠ᩠ᨠᩩᩁᩣᨠᩣᩁᩮᨶ ᩈᩩᨶᨡᩣᨠᩣᩁᩮᨶ ᩈᨱ᩠ᨮᩥᨲᨲ᩠ᨲᩣ ‘‘ᨠᩩᨠ᩠ᨠᩩᩁᨸᨻ᩠ᨻᨲᩮᩣ’’ᨲᩥ ᩈᨦ᩠ᨡ᩠ᨿᩴ ᨣᨲᩮᩣ, ᨲᩔ ᩈᨾᩦᨸᩮ ᨸᨱ᩠ᨱᩈᩣᩃᩴ ᨠᨲ᩠ᩅᩣ ᨸᨬ᩠ᨧᨲᩣᨸᩈᩈᩉᩔᩮᩉᩥ ᩈᩉ ᩅᩈᨾᩣᨶᩮᩣᨲᩥ ᩋᨲ᩠ᨳᩮᩣ. ᨶᨿᩣᨶᩩᩈᩣᩁᩮᨶ ᩈᩮᩈᩴ ᩈᨻ᩠ᨻᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨸᩩᨸ᩠ᨹᨳᩪᨸᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᨸᩣᨿᩈᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩩᩅᨱ᩠ᨱᩅᨱ᩠ᨱᩮᩣ ᩈᨾ᩠ᨻᩩᨴ᩠ᨵᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᩣᨿᩈᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ¶ ᩅᩥᨽᩅᩈᨾ᩠ᨸᨶ᩠ᨶᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᨥᩁᩣᩅᩣᩈᩴ ᩅᩈᨶ᩠ᨲᩮᩣ ᩉᨲ᩠ᨳᩥᩋᩔᨵᨶᨵᨬ᩠ᨬᩈᨲ᩠ᨲᩁᨲᨶᩣᨴᩥᩅᩥᨽᩅᩈᨾ᩠ᨸᨶ᩠ᨶᩮᩣ ᩈᨴ᩠ᨵᩣᩈᨾ᩠ᨸᨶ᩠ᨶᩮᩣ ᨠᨾ᩠ᨾᨹᩃᩴ ᩈᨴ᩠ᨴᩉᩥᨲ᩠ᩅᩣ ᩈᩉᩔᨾᨲ᩠ᨲᩣ ᩈᩩᩅᨱ᩠ᨱᨸᩣᨲᩥᨿᩮᩣ ᨠᩣᩁᩮᨲ᩠ᩅᩣ ᨲᩈ᩠ᨾᩥᩴ ᨡᩦᩁᨸᩣᨿᩈᩈᩉᩔᩔ ᨸᩪᩁᩮᨲ᩠ᩅᩣ ᨲᩣ ᩈᨻ᩠ᨻᩣ ᨣᩣᩉᩣᨸᩮᨲ᩠ᩅᩣ ᩈᩥᨾ᩠ᨻᩃᩥᩅᨶᩴ ᩋᨣᨾᩣᩈᩥ. ᨲᩈ᩠ᨾᩥᩴ ᩈᨾᨿᩮ ᩅᩥᨸᩔᩦ ᨽᨣᩅᩣ ᨨᨻ᩠ᨻᨱ᩠ᨱᩁᩴᩈᩥᨿᩮᩣ ᩅᩥᩔᨩ᩠ᨩᩮᨲ᩠ᩅᩣ ᩌᨠᩣᩈᩮ ᨧᨦ᩠ᨠᨾᩴ ᨾᩣᨸᩮᨲ᩠ᩅᩣ ᨧᨦ᩠ᨠᨾᨲᩥ. ᩈᩮᩣ ᨸᨶ ᩈᩮᨭ᩠ᨮᩥ ᨲᩴ ᩋᨧ᩠ᨨᩁᩥᨿᩴ ᨴᩥᩈ᩠ᩅᩣ ᩋᨲᩦᩅ ᨸᩈᨶ᩠ᨶᩮᩣ ᨸᩣᨲᩥᨿᩮᩣ ᨮᨸᩮᨲ᩠ᩅᩣ ᩅᨶ᩠ᨴᩥᨲ᩠ᩅᩣ ᩌᩁᩮᩣᨧᩮᩈᩥ ᨸᨭᩥᨣ᩠ᨣᩉᨱᩣᨿ. ᩋᨳ ᨽᨣᩅᩣ ᩋᨶᩩᨠᨾ᩠ᨸᩴ ᩏᨸᩣᨴᩣᨿ ᨸᨭᩥᨣ᩠ᨣᩉᩮᩈᩥ, ᨸᨭᩥᨣ᩠ᨣᩉᩮᨲ᩠ᩅᩣ ᨧ ᨸᨶ ᨲᩔ ¶ ᩈᩮᩣᨾᨶᩩᩔᩩᨸ᩠ᨸᩣᨴᨶᨲ᩠ᨳᩴ ᩈᩉᩔᨾᨲ᩠ᨲᩮᩉᩥ ᨽᩥᨠ᩠ᨡᩩᩈᨦ᩠ᨥᩮᩉᩥ ᩈᨴ᩠ᨵᩥᩴ ᨸᩁᩥᨽᩩᨬ᩠ᨩᩥ, ᨲᨴᩅᩈᩮᩈᩴ ᩋᨶᩮᨠᩈᩉᩔᨽᩥᨠ᩠ᨡᩪ ᨸᩁᩥᨽᩩᨬ᩠ᨩᩥᩴᩈᩩ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᩈᩩᨣᨲᩦᩈᩩᨿᩮᩅ ᩈᩴᩈᩁᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ¶ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪒᪖. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨠᩩᩈᩃᩴ ᨸᨧ᩠ᨧᩅᩮᨠ᩠ᨡᨾᩣᨶᩮᩣ ᨲᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩩᩅᨱ᩠ᨱᩅᨱ᩠ᨱᩮᩣ ᩈᨾ᩠ᨻᩩᨴ᩠ᨵᩮᩣᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨾᩮᩅ.

᪒᪘. ᨧᨦ᩠ᨠᨾᩴ ᩈᩩᩈᨾᩣᩁᩪᩊ᩠ᩉᩮᩣᨲᩥ ᨧᨴᩥᨶᨶ᩠ᨲᩮᩣ ᨸᨴᩅᩥᨠ᩠ᨡᩮᨸᩴ ᨠᩁᩮᩣᨶ᩠ᨲᩮᩣ ᨠᨾᨲᩥ ᨣᨧ᩠ᨨᨲᩦᨲᩥ ᨧᨦ᩠ᨠᨾᩴ, ᨧᨦ᩠ᨠᨾᩔ ᨸᨴᩅᩥᨠ᩠ᨡᩮᨸᩔ ᩌᨵᩣᩁᨽᩪᨲᨸᨳᩅᩥᨸᨴᩮᩈᩮᩣ ᨧᨦ᩠ᨠᨾᩴ ᨶᩣᨾᩣᨲᩥ ᩋᨲ᩠ᨳᩮᩣ, ᩑᨲᩴ ᨧᨦ᩠ᨠᨾᩴᩈᩩ ᩅᩥᩈᩮᩈᩮᨶ ᩌᩁᩪᩊ᩠ᩉᩮᩣᨲᩥ ᩈᨾ᩠ᨻᨶ᩠ᨵᩮᩣ. ᩋᨾ᩠ᨻᩁᩮ ᩋᨶᩥᩃᩣᨿᨶᩮᨲᩥ ᩅᩁᩦᨿᨲᩥ ᨨᩣᨴᩥᨿᨲᩥ ᩋᨶᩮᨶᩣᨲᩥ ᩅᩁᩴ, ᨶ ᨻᩁᨶ᩠ᨲᩥ ᩋᨾ᩠ᨻᩁᩴ, ᩈᩮᨲᩅᨲ᩠ᨳᩈᨴᩥᩈᩴ ᩌᨠᩣᩈᨶ᩠ᨲᩥ ᩋᨲ᩠ᨳᩮᩣ. ᨶᨲ᩠ᨳᩥ ᨶᩥᩃᩦᨿᨶᩴ ᨣᩮᩣᨸᨶᩴ ᩑᨲ᩠ᨳᩣᨲᩥ ᩋᨶᩥᩃᩴ, ᩌ ᩈᨾᨶ᩠ᨲᨲᩮᩣ ᨿᨶ᩠ᨲᩥ ᨣᨧ᩠ᨨᨶ᩠ᨲᩥ ᩋᨶᩮᨶ ᩍᨴ᩠ᨵᩥᨾᨶ᩠ᨲᩮᩣᨲᩥ ᩌᨿᨶᩴ, ᩋᨶᩥᩃᨬ᩠ᨧ ᨲᩴ ᩌᨿᨶᨬ᩠ᨧᩮᨲᩥ ᩋᨶᩥᩃᩣᨿᨶᩴ, ᨲᩈ᩠ᨾᩥᩴ ᩋᨾ᩠ᨻᩁᩮ ᩋᨶᩥᩃᩣᨿᨶᩮ ᨧᨦ᩠ᨠᨾᩴ ᨾᩣᨸᨿᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᨸᩣᨿᩈᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᨣᨶ᩠ᨵᩮᩣᨴᨠᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᩥᩈᨩ᩠ᨩ ᨸᩣᩈᩣᨴᩅᩁᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨣᨶ᩠ᨵᩮᩣᨴᨠᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᨶᩥᨻ᩠ᨻᩣᨶᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩦᨽᨣᩅᨲᩮᩣ ᨠᩣᩃᩮ ᩈᩮᨭ᩠ᨮᩥᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ¶ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᨾᩉᨴ᩠ᨵᨶᩮᩣ ᨾᩉᩣᨽᩮᩣᨣᩮᩣ ᨴᩥᨻ᩠ᨻᩈᩩᨡᨾᨶᩩᨽᩅᨶ᩠ᨲᩮᩣ ᩅᩥᨿ ᨾᨶᩩᩔᩈᩩᨡᨾᨶᩩᨽᩅᨶ᩠ᨲᩮᩣ ᩑᨠᩈ᩠ᨾᩥᩴ ᨴᩥᩅᩈᩮ ᨸᩣᩈᩣᨴᩅᩁᩮ ᨶᩥᩈᩥᨶ᩠ᨶᩮᩣ ᩉᩮᩣᨲᩥ. ᨲᨴᩣ ᨽᨣᩅᩣ ᩈᩩᩅᨱ᩠ᨱᨾᩉᩣᨾᩮᩁᩩ ᩅᩥᨿ ᩅᩦᨳᩥᨿᩣ ᩅᩥᨧᩁᨲᩥ, ᨲᩴ ᩅᩥᨧᩁᨾᩣᨶᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨣᨶ᩠ᨲ᩠ᩅᩣ ᩅᨶ᩠ᨴᩥᨲ᩠ᩅᩣ ᩈᩩᨣᨶ᩠ᨵᩮᩣᨴᨠᩮᨶ ᨽᨣᩅᨶ᩠ᨲᩴ ᩒᩈᩥᨬ᩠ᨧᨾᩣᨶᩮᩣ ᨸᩪᨩᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨥᩁᩣᩅᩣᩈᩮᨶ ᩋᨶᩃ᩠ᩃᩦᨶᩮᩣ ᩈᨲ᩠ᨳᩩ ᩈᨶ᩠ᨲᩥᨠᩮ ᨸᨻ᩠ᨻᨩᩥᨲ᩠ᩅᩣ ᨠᨾ᩠ᨾᨭ᩠ᨮᩣᨶᩴ ᨣᩉᩮᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪓᪕. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᩩᩈᩃᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨶᩥᩈᨩ᩠ᨩ ᨸᩣᩈᩣᨴᩅᩁᩮᨲᩥᩌᨴᩥᨾᩣᩉ. ᨲᨲ᩠ᨳ ᨸᩣᩈᩣᨴᩮᩣᨲᩥ ᨸᩈᩣᨴᩴ ᩈᩮᩣᨾᨶᩔᩴ ᨩᨶᩮᨲᩥ ᩏᨸ᩠ᨸᩣᨴᩮᨲᩦᨲᩥ ᨸᩣᩈᩣᨴᩮᩣ ¶ , ᨾᩣᩃᩣᨠᨾ᩠ᨾᨧᩥᨲ᩠ᨲᨠᨾ᩠ᨾᩈᩩᩅᨱ᩠ᨱᨠᨾ᩠ᨾᩣᨴ᩠ᨿᨶᩮᨠᩅᩥᨧᩥᨲ᩠ᨲᩴ ᨴᩥᩈ᩠ᩅᩣ ᨲᨲ᩠ᨳ ᨸᩅᩥᨭ᩠ᨮᩣᨶᩴ ᨩᨶᩣᨶᩴ ᨸᩈᩣᨴᩴ ᨩᨶᨿᨲᩦᨲᩥ ᩋᨲ᩠ᨳᩮᩣ. ᨸᩣᩈᩣᨴᩮᩣ ¶ ᨧ ᩈᩮᩣ ᨸᨲ᩠ᨳᩮᨲᨻ᩠ᨻᨭ᩠ᨮᩮᨶ ᩅᩁᩮᩣ ᨧᩣᨲᩥ ᨸᩣᩈᩣᨴᩅᩁᩮᩣ, ᨲᩈ᩠ᨾᩥᩴ ᨸᩣᩈᩣᨴᩅᩁᩮ ᨶᩥᩈᨩ᩠ᨩ ᨶᩥᩈᩦᨴᩥᨲ᩠ᩅᩣ ᩅᩥᨸᩔᩥᩴ ᨩᩥᨶᩅᩁᩴ ᩋᨴ᩠ᨴᩈᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᨣᨶ᩠ᨵᩮᩣᨴᨠᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᩈᨾ᩠ᨾᩩᨡᩣᨳᩅᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨩᩣᨿᨾᩣᨶᩮ ᩅᩥᨸᩔᩥᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᨾ᩠ᨾᩩᨡᩣᨳᩅᩥᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩈᨲ᩠ᨲᩅᩔᩥᨠᨠᩣᩃᩮᨿᩮᩅ ᩈᨠᩈᩥᨸ᩠ᨸᩮ ᨶᩥᨸ᩠ᨹᨲ᩠ᨲᩥᩴ ᨸᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᩅᩈᨶ᩠ᨲᩮᩣ ᩅᩥᨸᩔᩥᨾ᩠ᩉᩥ ᨻᩮᩣᨵᩥᩈᨲ᩠ᨲᩮ ᩏᨸ᩠ᨸᨶ᩠ᨶᩮ ᩈᨻ᩠ᨻᨻᩩᨴ᩠ᨵᩣᨶᩴ ᩃᨠ᩠ᨡᨱᩣᨶᩥ ᩅᩮᨴᨲ᩠ᨲᨿᩮ ᨴᩥᩔᨾᩣᨶᩣᨶᩥ ᨲᩣᨶᩥ ᩁᩣᨩᨸ᩠ᨸᨾᩩᨡᩔ ᨩᨶᨠᩣᨿᩔ ᩅᩥᨸᩔᩦᨻᩮᩣᨵᩥᩈᨲ᩠ᨲᩔ ᩃᨠ᩠ᨡᨱᨬ᩠ᨧ ᨻᩩᨴ᩠ᨵᨽᩣᩅᨬ᩠ᨧ ᨻ᩠ᨿᩣᨠᩁᩥᨲ᩠ᩅᩣ ᨩᨶᩣᨶᩴ ᨾᩣᨶᩈᩴ ᨶᩥᨻ᩠ᨻᩣᨸᩮᩈᩥ, ᩋᨶᩮᨠᩣᨶᩥ ᨧ ᨳᩩᨲᩥᩅᨧᨶᩣᨶᩥ ᨶᩥᩅᩮᨴᩮᩈᩥ. ᩈᩮᩣ ᨲᩮᨶ ᨠᩩᩈᩃᨠᨾ᩠ᨾᩮᨶ ᨨ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧ ᨧᨠ᩠ᨠᩅᨲ᩠ᨲᩥᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ. ᨠᨲᨠᩩᩈᩃᨶᩣᨾᩮᨶ ᩈᨾ᩠ᨾᩩᨡᩣᨳᩅᩥᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪔᪑. ᩈᩮᩣ ¶ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨩᩣᨿᨾᩣᨶᩮ ᩅᩥᨸᩔᩥᨾ᩠ᩉᩦᨲᩥᩌᨴᩥᨾᩣᩉ. ᩅᩥᨸᩔᩥᨾ᩠ᩉᩥ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮ ᨩᩣᨿᨾᩣᨶᩮ ᩏᨸ᩠ᨸᨩ᩠ᨩᨾᩣᨶᩮ ᨾᩣᨲᩩᨠᩩᨧ᩠ᨨᩥᨲᩮᩣ ᨶᩥᨠ᩠ᨡᨶ᩠ᨲᩮ ᩋᩉᩴ ᨸᩣᨲᩩᨽᩪᨲᩴ ᨶᩥᨾᩥᨲ᩠ᨲᩴ ᨠᩣᩁᨱᩴ ᨻᩩᨴ᩠ᨵᨽᩣᩅᩔ ᩉᩮᨲᩩᩴ ᨻ᩠ᨿᩣᨠᩁᩥᩴ ᨠᨳᩮᩈᩥᩴ, ᩋᨶᩮᨠᩣᨶᩥ ᩋᨧ᩠ᨨᩁᩥᨿᩣᨶᩥ ᨸᩣᨠᨭᩣᨶᩥ ᩋᨠᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩅᩩᨲ᩠ᨲᨶᨿᩣᨶᩩᩈᩣᩁᩮᨶ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩈᨾ᩠ᨾᩩᨡᩣᨳᩅᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᨠᩩᩈᩩᨾᩣᩈᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᨣᩁᩮ ᨵᨬ᩠ᨬᩅᨲᩥᨿᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨠᩩᩈᩩᨾᩣᩈᨶᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ¶ ᨽᨣᩅᨲᩮᩣ ᨠᩣᩃᩮ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨾᩉᨴ᩠ᨵᨶᩮᩣ ᨾᩉᩣᨽᩮᩣᨣᩮᩣ ᨲᩥᨱ᩠ᨱᩴ ᩅᩮᨴᩣᨶᩴ ᨸᩣᩁᩴ ᨣᨲᩮᩣ ᨻᩕᩣᩉ᩠ᨾᨱᩈᩥᨸ᩠ᨸᩮᩈᩩ ᨠᩮᩣᨭᩥᨸ᩠ᨸᨲ᩠ᨲᩮᩣ ᩈᨠᨸᩁᩈᨾᨿᨠᩩᩈᩃᩮᩣ ᨾᩣᨲᩣᨸᩥᨲᩁᩮᩣ ᨸᩪᨩᩮᨲᩩᨠᩣᨾᩮᩣ ᨸᨬ᩠ᨧ ᩏᨸ᩠ᨸᩃᨠᩃᩣᨸᩮ ᩋᨲ᩠ᨲᨶᩮᩣ ᩈᨾᩦᨸᩮ ᨮᨸᩮᨲ᩠ᩅᩣ ᨶᩥᩈᩥᨶ᩠ᨶᩮᩣ ᨽᩥᨠ᩠ᨡᩩᩈᨦ᩠ᨥᨸᩁᩥᩅᩩᨲᩴ ᩅᩥᨸᩔᩥᩴ ᨽᨣᩅᨶ᩠ᨲᩴ ᩌᨣᨧ᩠ᨨᨶ᩠ᨲᩴ ᨴᩥᩈ᩠ᩅᩣ ᨶᩦᩃᨸᩦᨲᩣᨴᩥᨥᨶᨻᩩᨴ᩠ᨵᩁᩈ᩠ᨾᩥᨿᩮᩣ ¶ ᨧ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩌᩈᨶᩴ ᨸᨬ᩠ᨬᩣᨸᩮᨲ᩠ᩅᩣ ᨲᨲ᩠ᨳ ᨲᩣᨶᩥ ᨸᩩᨸ᩠ᨹᩣᨶᩥ ᩈᨶ᩠ᨳᩁᩥᨲ᩠ᩅᩣ ᨽᨣᩅᨶ᩠ᨲᩴ ᨲᨲ᩠ᨳ ᨶᩥᩈᩦᨴᩣᨸᩮᨲ᩠ᩅᩣ ᩈᨠᨥᩁᩮ ᨾᩣᨲᩩ ᩋᨲ᩠ᨳᩣᨿ ᨸᨭᩥᨿᨲ᩠ᨲᩣᨶᩥ ᩈᨻ᩠ᨻᩣᨶᩥ ᨡᩣᨴᨶᩦᨿᨽᩮᩣᨩᨶᩦᨿᩣᨶᩥ ᨣᩉᩮᨲ᩠ᩅᩣ ᩈᨸᩁᩥᩅᩣᩁᩴ ᨽᨣᩅᨶ᩠ᨲᩴ ᩈᩉᨲ᩠ᨳᩮᨶ ᩈᨶ᩠ᨲᨸ᩠ᨸᩮᨶ᩠ᨲᩮᩣ ᨽᩮᩣᨩᩮᩈᩥ. ᨽᩮᩣᨩᨶᩣᩅᩈᩣᨶᩮ ᩑᨠᩴ ᩏᨸ᩠ᨸᩃᩉᨲ᩠ᨳᩴ ᩋᨴᩣᩈᩥ. ᨲᩮᨶ ᩈᩮᩣᨾᨶᩔᨩᩣᨲᩮᩣ ᨸᨲ᩠ᨳᨶᩴ ᩋᨠᩣᩈᩥ. ᨽᨣᩅᩣᨸᩥ ᩋᨶᩩᨾᩮᩣᨴᨶᩴ ᨠᨲ᩠ᩅᩣ ᨸᨠᩣᨾᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᨴ᩠ᩅᩮ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨽᩮᩣᨣᨿᩈᩮᩉᩥ ᩅᨯ᩠ᨰᩥᨲᩮᩣ ᨠᩣᨾᩮᩈᩩ ᩌᨴᩦᨶᩅᩴ ᨴᩥᩈ᩠ᩅᩣ ᨥᩁᩣᩅᩣᩈᩴ ᨸᩉᩣᨿ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪖᪕. ᩈᩮᩣ ᩋᨸᩁᨽᩣᨣᩮ ᨸᩩᨻ᩠ᨻᩮ ᨠᨲᨠᩩᩈᩃᩴ ᨸᩩᨻ᩠ᨻᩮᨶᩥᩅᩣᩈᨬᩣᨱᩮᨶ ᩈᩁᩥᨲ᩠ᩅᩣ ᩈᩮᩣᨾᨶᩔᨸ᩠ᨸᨲ᩠ᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨶᨣᩁᩮ ᨵᨬ᩠ᨬᩅᨲᩥᨿᩣᨲᩥᩌᨴᩥᨾᩣᩉ. ᨵᨬ᩠ᨬᩣᨶᩴ ᨸᩩᨬ᩠ᨬᩅᨶ᩠ᨲᩣᨶᩴ ᨡᨲ᩠ᨲᩥᨿᨻᩕᩣᩉ᩠ᨾᨱᨣᩉᨸᨲᩥᨾᩉᩣᩈᩣᩃᩣᨶᩴ ᩋᨶᩮᨠᩮᩈᩴ ᨠᩩᩃᩣᨶᩴ ᩌᨠᩁᨲ᩠ᨲᩣ ᨵᨬ᩠ᨬᩅᨲᩦ, ᩋᨳ ᩅᩣ ᨾᩩᨲ᩠ᨲᩣᨾᨱᩥᩌᨴᩥᩈᨲ᩠ᨲᩁᨲᨶᩣᨶᩴ ¶ ᩈᨲ᩠ᨲᩅᩥᨵᨵᨬ᩠ᨬᩣᨶᩴ ᩏᨸᨽᩮᩣᨣᨸᩁᩥᨽᩮᩣᨣᩣᨶᩴ ᩌᨠᩁᨲ᩠ᨲᩣ ᨵᨬ᩠ᨬᩅᨲᩦ, ᩋᨳ ᩅᩣ ᨵᨬ᩠ᨬᩣᨶᩴ ᨻᩩᨴ᩠ᨵᨸᨧ᩠ᨧᩮᨠᨻᩩᨴ᩠ᨵᨡᩦᨱᩣᩈᩅᩣᨶᩴ ᩅᩈᨶᨭ᩠ᨮᩣᨶᩴ ᩌᩁᩣᨾᩅᩥᩉᩣᩁᩣᨴᩦᨶᩴ ᩌᨠᩁᨲ᩠ᨲᩣ ᨵᨬ᩠ᨬᩅᨲᩦ, ᨲᩔᩣ ᨵᨬ᩠ᨬᩅᨲᩥᨿᩣ. ᨶᨣᩁᨶ᩠ᨲᩥ ᨸᨲ᩠ᨳᩮᨶ᩠ᨲᩥ ᩑᨲ᩠ᨳ ᩏᨸᨽᩮᩣᨣᨸᩁᩥᨽᩮᩣᨣᨲ᩠ᨳᩥᨠᩣ ᨩᨶᩣᨲᩥ ᨶᨣᩁᩴ, ᨶ ᨣᨧ᩠ᨨᨲᩦᨲᩥ ᩅᩣ ᨶᨣᩴ, ᩁᩣᨩᨿᩩᩅᩁᩣᨩᨾᩉᩣᨾᨲ᩠ᨲᩣᨴᩦᨶᩴ ᩅᩈᨶᨭ᩠ᨮᩣᨶᩴ. ᨶᨣᩴ ᩁᩣᨲᩥ ᩌᨴᨴᩣᨲᩥ ᨣᨱ᩠ᩉᩣᨲᩦᨲᩥ ᨶᨣᩁᩴ, ᩁᩣᨩᩣᨴᩦᨶᩴ ᩅᩈᨶᨭ᩠ᨮᩣᨶᩈᨾᩪᩉᨽᩪᨲᩴ ᨸᩣᨠᩣᩁᨸᩁᩥᨡᩣᨴᩦᩉᩥ ᨸᩁᩥᨠ᩠ᨡᩥᨲ᩠ᨲᩴ ᨸᩁᩥᨧ᩠ᨨᩥᨶ᩠ᨶᨭ᩠ᨮᩣᨶᩴ ᨶᨣᩁᩴ ᨶᩣᨾᩣᨲᩥ ᩋᨲ᩠ᨳᩮᩣ. ᨶᨣᩁᩮ ᨿᨴᩣ ᩋᩉᩴ ᩅᩥᨸᩔᩥᩔ ᨽᨣᩅᨲᩮᩣ ᩈᨶ᩠ᨲᩥᨠᩮ ᨻ᩠ᨿᩣᨠᩁᨱᩴ ᩋᩃᨽᩥᩴ, ᨲᨴᩣ ᨲᩈ᩠ᨾᩥᩴ ᨵᨬ᩠ᨬᩅᨲᩥᨿᩣ ᨶᨣᩁᩮ ᨻᩕᩣᩉ᩠ᨾᨱᩮᩣ ᩋᩉᩮᩣᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᨠᩩᩈᩩᨾᩣᩈᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᨹᩃᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩋᨩ᩠ᨫᩣᨿᨠᩮᩣ ᨾᨶ᩠ᨲᨵᩁᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨹᩃᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩮᩈᩩ ᨽᩅᩮᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩅᩮᨴᨲ᩠ᨲᨿᩣᨴᩥᩈᨠᩈᩥᨸ᩠ᨸᩮᩈᩩ ᨸᩣᩁᨸ᩠ᨸᨲ᩠ᨲᩮᩣ ᩋᨶᩮᨠᩮᩈᩴ ᨻᩕᩣᩉ᩠ᨾᨱᩈᩉᩔᩣᨶᩥᩴ ¶ ᨸᩣᨾᩮᩣᨠ᩠ᨡᩮᩣ ᩌᨧᩁᩥᨿᩮᩣ ᩈᨠᩈᩥᨸ᩠ᨸᩣᨶᩴ ᨸᩁᩥᨿᩮᩣᩈᩣᨶᩴ ᩋᨴᩥᩈ᩠ᩅᩣ ᨲᨲ᩠ᨳ ᨧ ᩈᩣᩁᩴ ᩋᨸᩔᨶ᩠ᨲᩮᩣ ¶ ᨥᩁᩣᩅᩣᩈᩴ ᨸᩉᩣᨿ ᩍᩈᩥᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩉᩥᨾᩅᨶ᩠ᨲᩔ ᩋᩅᩥᨴᩪᩁᩮ ᩋᩔᨾᩴ ᨠᩣᩁᩮᨲ᩠ᩅᩣ ᩈᩉ ᩈᩥᩔᩮᩉᩥ ᩅᩣᩈᩴ ᨠᨸ᩠ᨸᩮᩈᩥ, ᨲᩈ᩠ᨾᩥᩴ ᩈᨾᨿᩮ ᨸᨴᩩᨾᩩᨲ᩠ᨲᩁᩮᩣ ᨽᨣᩅᩣ ᨽᩥᨠ᩠ᨡᩣᨿ ᨧᩁᨾᩣᨶᩮᩣ ᨲᩔᩣᨶᩩᨠᨾ᩠ᨸᩣᨿ ᨲᩴ ᨸᨴᩮᩈᩴ ᩈᨾ᩠ᨸᩣᨸᩩᨱᩥ. ᨲᩣᨸᩈᩮᩣ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩋᨲ᩠ᨲᨶᩮᩣ ᩋᨲ᩠ᨳᩣᨿ ᨸᩩᨭᨠᩮ ᨶᩥᨠ᩠ᨡᩥᨸᩥᨲ᩠ᩅᩣ ᩁᩩᨠ᩠ᨡᨣ᩠ᨣᩮ ᩃᨣ᩠ᨣᩥᨲᩣᨶᩥ ᨾᨵᩩᩁᩣᨶᩥ ᨸᨴᩩᨾᨹᩃᩣᨶᩥ ᨾᨵᩩᨶᩣ ᩈᩉ ᩋᨴᩣᩈᩥ. ᨽᨣᩅᩣ ᨲᩔ ᩈᩮᩣᨾᨶᩔᩩᨸ᩠ᨸᩣᨴᨶᨲ᩠ᨳᩴ ᨸᩔᨶ᩠ᨲᩔᩮᩅ ᨸᩁᩥᨽᩩᨬ᩠ᨩᩥᨲ᩠ᩅᩣ ᩌᨠᩣᩈᩮ ᨮᩥᨲᩮᩣ ᨹᩃᨴᩣᨶᩣᨶᩥᩈᩴᩈᩴ ᨠᨳᩮᨲ᩠ᩅᩣ ᨸᨠ᩠ᨠᩣᨾᩥ.

᪗᪕. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᨲ᩠ᨲᩅᩔᩥᨠᩮᩣᨿᩮᩅ ᩋᩁᩉᨲ᩠ᨲᩴ ᨸᨲ᩠ᩅᩣ ᨸᩩᨻ᩠ᨻᩮ ᨠᨲᨠᩩᩈᩃᨠᨾ᩠ᨾᩴ ¶ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩋᨩ᩠ᨫᩣᨿᨠᩮᩣ ᨾᨶ᩠ᨲᨵᩁᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᩋᨩ᩠ᨫᩮᨲᩥ ᨧᩥᨶ᩠ᨲᩮᨲᩦᨲᩥ ᩋᨩ᩠ᨫᩣᨿᩥ, ᩋᨩ᩠ᨫᩣᨿᩥᨿᩮᩅ ᩋᨩ᩠ᨫᩣᨿᨠᩮᩣ. ᩑᨲ᩠ᨳ ᩉᩥ ᩋᨠᩣᩁᩮᩣ ‘‘ᨸᨭᩥᩈᩮᨵᩮ ᩅᩩᨴ᩠ᨵᩥᨲᨻ᩠ᨽᩣᩅᩮ…ᨸᩮ… ᩋᨠᩣᩁᩮᩣ ᩅᩥᩁᩉᨸ᩠ᨸᨠᩮ’’ᨲᩥ ᩑᩅᩴ ᩅᩩᨲ᩠ᨲᩮᩈᩩ ᨴᩈᩈᩩ ᩋᨲ᩠ᨳᩮᩈᩩ ᨲᨻ᩠ᨽᩣᩅᩮ ᩅᨲ᩠ᨲᨲᩥ. ᩈᩥᩔᩣᨶᩴ ᩈᩅᨶᨵᩣᩁᨱᩣᨴᩥᩅᩈᩮᨶ ᩉᩥᨲᩴ ᩋᨩ᩠ᨫᩮᨲᩥ ᨧᩥᨶ᩠ᨲᩮᨲᩥ ᩈᨩ᩠ᨫᩣᨿᩴ ᨠᩁᩮᩣᨲᩦᨲᩥ ᩋᨩ᩠ᨫᩣᨿᨠᩮᩣ, ᨧᩥᨶ᩠ᨲᨠᩮᩣᨲᩥ ᩋᨲ᩠ᨳᩮᩣ. ᩌᨧᩁᩥᨿᩔ ᩈᨶ᩠ᨲᩥᨠᩮ ᩏᨣ᩠ᨣᩉᩥᨲᩴ ᩈᨻ᩠ᨻᩴ ᨾᨶ᩠ᨲᩴ ᨾᨶᩮᨶ ᨵᩣᩁᩮᨲᩥ ᨸᩅᨲ᩠ᨲᩮᨲᩦᨲᩥ ᨾᨶ᩠ᨲᨵᩁᩮᩣ. ᨲᩥᨱ᩠ᨱᩴ ᩅᩮᨴᩣᨶ ᨸᩣᩁᨣᩪᨲᩥ ᩅᩮᨴᩴ ᩅᩩᨧ᩠ᨧᨲᩥ ᨬᩣᨱᩴ, ᩅᩮᨴᩮᨶ ᩅᩮᨴᩥᨲᨻ᩠ᨻᩣ ᨻᩩᨩ᩠ᨫᩥᨲᨻ᩠ᨻᩣᨲᩥ ᩅᩮᨴᩣ, ᩍᩁᩩᩅᩮᨴᨿᨩᩩᩅᩮᨴᩈᩣᨾᩅᩮᨴᩈᨦ᩠ᨡᩣᨲᩣ ᨲᨿᩮᩣ ᨣᨶ᩠ᨳᩣ, ᨲᩮᩈᩴ ᩅᩮᨴᩣᨶᩴ ᨸᩣᩁᩴ ᨸᩁᩥᨿᩮᩣᩈᩣᨶᩴ ᨠᩮᩣᨭᩥᩴ ᨣᨲᩮᩣ ᨸᨲ᩠ᨲᩮᩣᨲᩥ ᨸᩣᩁᨣᩪ. ᩈᩮᩈᩴ ᨸᩣᨠᨭᨾᩮᩅᩣᨲᩥ

ᨹᩃᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᨬᩣᨱᩈᨬ᩠ᨬᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨻ᩠ᨻᨲᩮ ᩉᩥᨾᩅᨶ᩠ᨲᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨬᩣᨱᩈᨬ᩠ᨬᩥᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᩈ᩠ᨾᩥᩴ ᨲᩈ᩠ᨾᩥᩴ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᩮ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨥᩁᩣᩅᩣᩈᩴ ᨸᩉᩣᨿ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩉᩥᨾᩅᨶ᩠ᨲᩔ ᩋᩅᩥᨴᩪᩁᩮ ᨸᨻ᩠ᨻᨲᨶ᩠ᨲᩁᩮ ᨸᨱ᩠ᨱᩈᩣᩃᩴ ¶ ᨠᩣᩁᩮᨲ᩠ᩅᩣ ᨸᨬ᩠ᨧᩣᨽᩥᨬ᩠ᨬᩣᩋᨭ᩠ᨮᩈᨾᩣᨸᨲ᩠ᨲᩥᨿᩮᩣ ᨶᩥᨻ᩠ᨻᨲ᩠ᨲᩮᨲ᩠ᩅᩣ ¶ ᩅᩈᨶ᩠ᨲᩮᩣ ᩑᨠᨴᩥᩅᩈᩴ ᨸᩁᩥᩈᩩᨴ᩠ᨵᩴ ᨸᨱ᩠ᨯᩁᩴ ᨸᩩᩃᩥᨶᨲᩃᩴ ᨴᩥᩈ᩠ᩅᩣ ‘‘ᩎᨴᩥᩈᩣ ᨸᩁᩥᩈᩩᨴ᩠ᨵᩣ ᨻᩩᨴ᩠ᨵᩣ, ᩎᨴᩥᩈᩴᩅ ᨸᩁᩥᩈᩩᨴ᩠ᨵᩴ ᨻᩩᨴ᩠ᨵᨬᩣᨱ’’ᨶ᩠ᨲᩥ ᨻᩩᨴ᩠ᨵᨬ᩠ᨧ ᨲᩔ ᨬᩣᨱᨬ᩠ᨧ ᩋᨶᩩᩔᩁᩥ ᨳᩮᩣᨾᩮᩈᩥ ᨧ.

᪘᪔. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᩣᩈᨶᩮ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᨲ᩠ᨲᩮᩣ ᨸᩩᨻ᩠ᨻᩮ ᨠᨲᨸᩩᨬ᩠ᨬᩴ ᩋᨶᩩᩔᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ‘‘ᨸᨻ᩠ᨻᨲᩮ ᩉᩥᨾᩅᨶ᩠ᨲᨾ᩠ᩉᩦ’’ᨲᩥᩌᨴᩥᨾᩣᩉ. ᨸᩩᩃᩥᨶᩴ ᩈᩮᩣᨽᨶᩴ ᨴᩥᩈ᩠ᩅᩣᨲᩥ ᨸᩁᩥᨸᩩᨱ᩠ᨱᨠᨲᩴ ᩅᩥᨿ ᨸᩩᩃᩣᨠᩣᩁᩮᨶ ᨸᩁᩥᩈᩮᩣᨵᩥᨲᩣᨠᩣᩁᩮᨶ ᨸᩅᨲ᩠ᨲᩴ ᨮᩥᨲᨶ᩠ᨲᩥ ᨸᩩᩃᩥᨶᩴ, ᩈᩮᩣᨽᨶᩴ ¶ ᩅᩣᩃᩩᨠᩴ ᨴᩥᩈ᩠ᩅᩣ ᩈᩮᨭ᩠ᨮᩴ ᨻᩩᨴ᩠ᨵᩴ ᩋᨶᩩᩔᩁᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨬᩣᨱᩈᨬ᩠ᨬᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᨣᨱ᩠ᨮᩥᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩩᩅᨱ᩠ᨱᩅᨱ᩠ᨱᩮᩣ ᩈᨾ᩠ᨻᩩᨴ᩠ᨵᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨣᨱ᩠ᨮᩥᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩣᩈᩩ ᨩᩣᨲᩦᩈᩩ ᨠᨲᨸᩩᨬ᩠ᨬᩈᨬ᩠ᨧᨿᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩏᨸᨽᩮᩣᨣᨸᩁᩥᨽᩮᩣᨣᩮᩉᩥ ᩋᨶᩪᨶᩮᩣ ᩑᨠᨴᩥᩅᩈᩴ ᩅᩥᨸᩔᩥᩴ ᨽᨣᩅᨶ᩠ᨲᩴ ᩈᨣᨱᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩃᩣᨩᩣᨸᨬ᩠ᨧᨾᩮᩉᩥ ᨸᩩᨸ᩠ᨹᩮᩉᩥ ᨸᩪᨩᩮᩈᩥ. ᩈᩮᩣ ᨲᩮᨶᩮᩅ ᨧᩥᨲ᩠ᨲᨸ᩠ᨸᩈᩣᨴᩮᨶ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᨲᨲᩮᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩋᨸᩁᨽᩣᨣᩮ ᨾᨶᩩᩔᩮᩈᩩ ᨾᨶᩩᩔᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪙᪑. ᩈᩮᩣ ᩑᨠᨴᩥᩅᩈᩴ ᨸᩩᨻ᩠ᨻᩮ ᨠᨲᨸᩩᨬ᩠ᨬᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ‘‘ᩍᨾᩥᨶᩣ ᨠᩩᩈᩃᩮᨶᩣᩉᩴ ᨶᩥᨻ᩠ᨻᩣᨶᩴ ᨸᨲ᩠ᨲᩮᩣ’’ᨲᩥ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩩᩅᨱ᩠ᨱᩅᨱ᩠ᨱᩮᩣ ᩈᨾ᩠ᨻᩩᨴ᩠ᨵᩮᩣᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩉᩮᨭ᩠ᨮᩣ ᩅᩩᨲ᩠ᨲᨶᨿᨲ᩠ᨲᩣ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨣᨱ᩠ᨮᩥᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᨸᨴᩩᨾᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨠᩴ ¶ ᩌᨿᩈ᩠ᨾᨲᩮᩣ ᨸᨴᩩᨾᨸᩪᨩᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨠᩈᩥᨸ᩠ᨸᩮ ᨶᩥᨸ᩠ᨹᨲ᩠ᨲᩥᩴ ᨸᨲ᩠ᩅᩣ ᨲᨲ᩠ᨳ ᩈᩣᩁᩴ ᩋᨸᩔᨶ᩠ᨲᩮᩣ ᨻᩩᨴ᩠ᨵᩩᨸ᩠ᨸᨲ᩠ᨲᩥᨲᩮᩣ ᨸᩩᩁᩮᨲᩁᩴ ¶ ᩏᨸ᩠ᨸᨶ᩠ᨶᨲ᩠ᨲᩣ ᩒᩅᩣᨴᩣᨶᩩᩈᩣᩈᨶᩴ ᩋᩃᨽᩥᨲ᩠ᩅᩣ ᨥᩁᩣᩅᩣᩈᩴ ᨸᩉᩣᨿ ᩍᩈᩥᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩉᩥᨾᩅᨶ᩠ᨲᩔ ᩋᩅᩥᨴᩪᩁᩮ ᨣᩮᩣᨲᨾᨠᩴ ¶ ᨶᩣᨾ ᨸᨻ᩠ᨻᨲᩴ ᨶᩥᩔᩣᨿ ᩋᩔᨾᩴ ᨠᩣᩁᩮᨲ᩠ᩅᩣ ᨸᨬ᩠ᨧᩣᨽᩥᨬ᩠ᨬᩣ ᩋᨭ᩠ᨮ ᩈᨾᩣᨸᨲ᩠ᨲᩥᨿᩮᩣ ᨶᩥᨻ᩠ᨻᨲ᩠ᨲᩮᨲ᩠ᩅᩣ ᨫᩣᨶᩈᩩᨡᩮᨶᩮᩅ ᩅᩥᩉᩣᩈᩥ. ᨲᨴᩣ ᨸᨴᩩᨾᩩᨲ᩠ᨲᩁᩮᩣ ᨽᨣᩅᩣ ᨻᩩᨴ᩠ᨵᩮᩣ ᩉᩩᨲ᩠ᩅᩣ ᩈᨲ᩠ᨲᩮ ᩈᩴᩈᩣᩁᨲᩮᩣ ᩏᨴ᩠ᨵᩁᨶ᩠ᨲᩮᩣ ᨲᩔᩣᨶᩩᨠᨾ᩠ᨸᩣᨿ ᩉᩥᨾᩅᨶ᩠ᨲᩴ ᩋᨣᨾᩣᩈᩥ. ᨲᩣᨸᩈᩮᩣ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩈᨠᩈᩥᩔᩮ ᩈᨾᩣᨶᩮᨲ᩠ᩅᩣ ᨲᩮᩉᩥ ᨸᨴᩩᨾᨸᩩᨸ᩠ᨹᩣᨶᩥ ᩌᩉᩁᩣᨸᩮᨲ᩠ᩅᩣ ᨸᩪᨩᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᨴ᩠ᨵᩮᩣ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪙᪗. ᩈᩮᩣ ᩋᨲ᩠ᨲᨶᩮᩣ ᨸᩩᨬ᩠ᨬᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨾᩣᩉ. ᨣᩮᩣᨲᨾᩮᩣ ᨶᩣᨾ ᨸᨻ᩠ᨻᨲᩮᩣᨲᩥ ᩋᨶᩮᨠᩮᩈᩴ ᨿᨠ᩠ᨡᨴᩮᩅᨲᩣᨶᩴ ᩌᩅᩣᩈᨽᩣᩅᩮᨶ ᩋᨵᩥᨭ᩠ᨮᩣᨶᩅᩈᩮᨶ ᨣᩮᩣᨲᨾᩔ ᨽᩅᨶᨲ᩠ᨲᩣ ᨣᩮᩣᨲᨾᩮᩣᨲᩥ ᨸᩣᨠᨭᩮᩣ ᩋᩉᩮᩣᩈᩥ. ᨸᩅᨲ᩠ᨲᨲᩥ ᨲᩥᨭ᩠ᨮᨲᩦᨲᩥ ᨸᨻ᩠ᨻᨲᩮᩣ. ᨶᩣᨣᩁᩩᨠ᩠ᨡᩮᩉᩥ ᩈᨬ᩠ᨨᨶ᩠ᨶᩮᩣᨲᩥ ᩁᩩᩉᨲᩥ ᨲᩥᨭ᩠ᨮᨲᩦᨲᩥ ᩁᩩᨠ᩠ᨡᩮᩣ. ᩋᨳ ᩅᩣ ᨸᨳᩅᩥᩴ ᨡᨶᨶ᩠ᨲᩮᩣ ᩏᨴ᩠ᨵᩴ ᩁᩩᩉᨲᩦᨲᩥ ᩁᩩᨠ᩠ᨡᩮᩣ, ᨶᩣᨶᩣ ᩋᨶᩮᨠᨸ᩠ᨸᨠᩣᩁᩣ ᨧᨾ᩠ᨸᨠᨠᨸ᩠ᨸᩪᩁᨶᩣᨣᩋᨣᩁᩩᨧᨶ᩠ᨴᨶᩣᨴᨿᩮᩣ ᩁᩩᨠ᩠ᨡᩣᨲᩥ ᨶᩣᨶᩣᩁᩩᨠ᩠ᨡᩣ, ᨲᩮᩉᩥ ᨶᩣᨶᩣᩁᩩᨠ᩠ᨡᩮᩉᩥ ᩈᨬ᩠ᨨᨶ᩠ᨶᩮᩣ ᨸᩁᩥᨠᩥᨱ᩠ᨱᩮᩣ ᨣᩮᩣᨲᨾᩮᩣ ᨸᨻ᩠ᨻᨲᩮᩣᨲᩥ ᩈᨾ᩠ᨻᨶ᩠ᨵᩮᩣ. ᨾᩉᩣᨽᩪᨲᨣᨱᩣᩃᨿᩮᩣᨲᩥ ᨽᩅᨶ᩠ᨲᩥ ᨩᩣᨿᨶ᩠ᨲᩥ ᩏᨸ᩠ᨸᨩ᩠ᨩᨶ᩠ᨲᩥ ᩅᨯ᩠ᨰᨶ᩠ᨲᩥ ᨧᩣᨲᩥ ᨽᩪᨲᩣ, ᨾᩉᨶ᩠ᨲᩣ ᨧ ᨲᩮ ᨽᩪᨲᩣ ᨧᩣᨲᩥ ᨾᩉᩣᨽᩪᨲᩣ, ᨾᩉᩣᨽᩪᨲᩣᨶᩴ ᨣᨱᩮᩣ ᩈᨾᩪᩉᩮᩣᨲᩥ ᨾᩉᩣᨽᩪᨲᨣᨱᩮᩣ, ᨾᩉᩣᨽᩪᨲᨣᨱᩔ ᩌᩃᨿᩮᩣ ᨸᨲᩥᨭ᩠ᨮᩣᨲᩥ ᨾᩉᩣᨽᩪᨲᨣᨱᩣᩃᨿᩮᩣ.

᪙᪘. ᩅᩮᨾᨩ᩠ᨫᨾ᩠ᩉᩥ ᨧ ᨲᩔᩣᩈᩦᨲᩥ ᨲᩔ ᨣᩮᩣᨲᨾᩔ ᨸᨻ᩠ᨻᨲᩔ ᩅᩮᨾᨩ᩠ᨫᩮ ᩋᨻ᩠ᨽᨶ᩠ᨲᩁᩮ ᩋᩔᨾᩮᩣ ᩋᨽᩥᨶᩥᨾ᩠ᨾᩥᨲᩮᩣ ᨶᩥᨸ᩠ᨹᩣᨴᩥᨲᩮᩣ ᨠᨲᩮᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨾᩮᩅᩣᨲᩥ.

ᨸᨴᩩᨾᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᨲᩮᩁᩈᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪔. ᩈᩮᩣᨽᩥᨲᩅᨣ᩠ᨣᩮᩣ

᪑. ᩈᩮᩣᨽᩥᨲᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᩮᩣ ¶ ¶ ᨶᩣᨾ ᨩᩥᨶᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩮᩣᨽᩥᨲᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᩑᨠᨴᩥᩅᩈᩴ ¶ ᩈᨲ᩠ᨳᩣᩁᩣ ᨵᨾ᩠ᨾᩮ ᨴᩮᩈᩥᨿᨾᩣᨶᩮ ᩈᩮᩣᨾᨶᩔᩮᨶ ᨸᩈᨶ᩠ᨶᨾᩣᨶᩈᩮᩣ ᨶᩣᨶᨸ᩠ᨸᨠᩣᩁᩮᩉᩥ ᨳᩮᩣᨾᩮᩈᩥ. ᩈᩮᩣ ᨲᩮᨶᩮᩅ ᩈᩮᩣᨾᨶᩔᩮᨶ ᨠᩣᩃᩴ ᨠᨲ᩠ᩅᩣ ᨴᩮᩅᩮᩈᩩ ᨶᩥᨻ᩠ᨻᨲ᩠ᨲᩮᩣ ᨲᨲ᩠ᨳ ᨴᩥᨻ᩠ᨻᩈᩩᨡᩴ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧ ᨾᨶᩩᩔᩈᩩᨡᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᨲ᩠ᨲᩅᩔᩥᨠᩮᩣᩅ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᨨᩊᨽᩥᨬ᩠ᨬᩮᩣ ᩋᩁᩉᩣ ᩋᩉᩮᩣᩈᩥ.

᪑. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩮᩣ ᨶᩣᨾ ᨩᩥᨶᩮᩣᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩉᩮᨭ᩠ᨮᩣ ᩅᩩᨲ᩠ᨲᨶᨿᨲ᩠ᨲᩣ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩈᩮᩣᨽᩥᨲᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᩈᩩᨴᩔᨶᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩅᩥᨲ᩠ᨳᨲᩣᨿ ᨶᨴᩦᨲᩦᩁᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩩᨴᩔᨶᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᨠᨲᨸᩩᨬ᩠ᨬᩪᨸᨧᨿᩮᩣ ᩈᩥᨡᩥᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᩅᩈᨶ᩠ᨲᩮᩣ ᩅᩥᨲ᩠ᨳᨲᩣᨿ ᨶᩣᨾ ᨣᨦ᩠ᨣᩣᨿ ᩈᨾᩦᨸᩮ ᨸᩥᩃᨠ᩠ᨡᩩᨹᩃᩥᨲᩴ ᨸᩁᩥᨿᩮᩈᨶ᩠ᨲᩮᩣ ᨲᩔᩣ ᨲᩦᩁᩮ ᨶᩥᩈᩥᨶ᩠ᨶᩴ ᨩᩃᨾᩣᨶᩋᨣ᩠ᨣᩥᩈᩥᨡᩴ ᩍᩅ ᩈᩥᨡᩥᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨠᩮᨲᨠᩦᨸᩩᨸ᩠ᨹᩴ ᩅᨱ᩠ᨭᩮᨶᩮᩅ ᨨᩥᨶ᩠ᨴᩥᨲ᩠ᩅᩣ ᨸᩪᨩᩮᨶ᩠ᨲᩮᩣ ᩑᩅᨾᩣᩉ – ‘‘ᨽᨶ᩠ᨲᩮ, ᨿᩮᨶ ᨬᩣᨱᩮᨶ ᨲ᩠ᩅᩴ ᩑᩅᩴ ᨾᩉᩣᨶᩩᨽᩣᩅᩮᩣ ᩈᨻ᩠ᨻᨬ᩠ᨬᩩᨻᩩᨴ᩠ᨵᩮᩣ ᨩᩣᨲᩮᩣ, ᨲᩴ ᨬᩣᨱᩴ ᩋᩉᩴ ᨸᩪᨩᩮᨾᩦ’’ᨲᩥ. ᩋᨳ ᨽᨣᩅᩣ ᩋᨶᩩᨾᩮᩣᨴᨶᨾᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᨩᩣᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑᪐. ¶ ᩈᩮᩣ ¶ ᩋᨲ᩠ᨲᨶᩮᩣ ᨠᨲᨠᩩᩈᩃᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩅᩥᨲ᩠ᨳᨲᩣᨿ ᨶᨴᩦᨲᩦᩁᩮᨲᩥᩌᨴᩥᨾᩣᩉ. ᨲᨲ᩠ᨳ ᩅᩥᨲ᩠ᨳᨲᩣᨿᩣᨲᩥ ᩅᩥᨲ᩠ᨳᩁᨲᩥ ᨸᨲ᩠ᨳᩁᨲᩥ ᩅᩥᨲ᩠ᨳᩥᨱ᩠ᨱᩣ ᩉᩮᩣᨲᩦᨲᩥ ᩅᩥᨲ᩠ᨳᨲᩣ, ᨶᨴᨶ᩠ᨲᩥ ᩈᨴ᩠ᨴᩴ ᨠᩁᩮᩣᨶ᩠ᨲᩥ ᩍᨲᩣ ᨣᨲᩣ ᨸᩅᨲ᩠ᨲᩣᨲᩥ ᨶᨴᩦ, ᨶᨴᩥᩴ ᨲᩁᨶ᩠ᨲᩣ ᩑᨲᩴ ᨸᨲ᩠ᩅᩣ ᨲᩥᨱ᩠ᨱᩣ ᨶᩣᨾ ᩉᩮᩣᨶ᩠ᨲᩦᨲᩥ ᨲᩦᩁᩴ, ᨲᩔᩣ ᩅᩥᨲ᩠ᨳᨲᩣᨿ ᨶᨴᩥᨿᩣ ᨲᩦᩁᩮ ᨲᩦᩁᩈᨾᩦᨸᩮᨲᩥ ᩋᨲ᩠ᨳᩮᩣ. ᨠᩮᨲᨠᩥᩴ ᨸᩩᨸ᩠ᨹᩥᨲᩴ ᨴᩥᩈ᩠ᩅᩣᨲᩥ ᨠᩩᨧ᩠ᨨᩥᨲᩣᨠᩣᩁᩮᨶ ᨣᨱ᩠ᩉᨶ᩠ᨲᩣᨶᩴ ᩉᨲ᩠ᨳᩴ ᨠᨱ᩠ᨯᨠᩮᩣ ᨨᩥᨶ᩠ᨴᨲᩥ ᩅᩥᨩ᩠ᨫᨲᩦᨲᩥ ᨠᩮᨲᩴ, ᨠᩮᨲᩔ ᩑᩈᩣ ᨠᩮᨲᨠᩦᨸᩩᨸ᩠ᨹᩴ, ᨲᩴ ᨴᩥᩈ᩠ᩅᩣ ᩅᨱ᩠ᨭᩴ ᨨᩥᨶ᩠ᨴᩥᨲ᩠ᩅᩣᨲᩥ ᩈᨾ᩠ᨻᨶ᩠ᨵᩮᩣ.

᪑᪑. ᩈᩥᨡᩥᨶᩮᩣ ᩃᩮᩣᨠᨻᨶ᩠ᨵᩩᨶᩮᩣᨲᩥ ᩈᩥᨡᩦ ᩅᩩᨧ᩠ᨧᨲᩥ ᩋᨣ᩠ᨣᩥ, ᩈᩥᨡᩦᩈᨴᩥᩈᩣ ᨶᩦᩃᨸᩦᨲᩣᨴᩥᨽᩮᨴᩣ ᨩᩃᨾᩣᨶᩣ ᨨᨻ᩠ᨻᨱ᩠ᨱᨥᨶᩁᩴᩈᩥᨿᩮᩣ ᨿᩔ ᩈᩮᩣ ᩈᩥᨡᩦ, ᩃᩮᩣᨠᩔ ᩈᨠᩃᩃᩮᩣᨠᨲ᩠ᨲᨿᩔ ᨻᨶ᩠ᨵᩩ ᨬᩣᨲᨠᩮᩣᨲᩥ ᩃᩮᩣᨠᨻᨶ᩠ᨵᩩ, ᨲᩔ ᩈᩥᨡᩥᨶᩮᩣ ᩃᩮᩣᨠᨻᨶ᩠ᨵᩩᨶᩮᩣ ᨠᩮᨲᨠᩦᨸᩩᨸ᩠ᨹᩴ ¶ ᩅᨱ᩠ᨭᩮ ᨨᩥᨶ᩠ᨴᩥᨲ᩠ᩅᩣ ᨸᩪᨩᩮᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩈᩩᨴᩔᨶᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᨧᨶ᩠ᨴᨶᨸᩪᨩᨶᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨧᨶ᩠ᨴᨽᩣᨣᩣᨶᨴᩦᨲᩦᩁᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨧᨶ᩠ᨴᨶᨸᩪᨩᨶᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨲ᩠ᨳᨴᩔᩥᩔ ᨽᨣᩅᨲᩮᩣ ᨠᩣᩃᩮ ᩉᩥᨾᩅᨶ᩠ᨲᩮ ᨧᨶ᩠ᨴᨽᩣᨣᩣᨶᨴᩥᨿᩣ ᩈᨾᩦᨸᩮ ᨠᩥᨶ᩠ᨶᩁᨿᩮᩣᨶᩥᨿᩴ ᨶᩥᨻ᩠ᨻᨲ᩠ᨲᩮᩣ ᨸᩩᨸ᩠ᨹᨽᨠ᩠ᨡᩮᩣ ᨸᩩᨸ᩠ᨹᨶᩥᩅᩈᨶᩮᩣ ᨧᨶ᩠ᨴᨶᩋᨣᩁᩩᩌᨴᩦᩈᩩ ᨣᨶ᩠ᨵᩅᩥᨽᩪᩈᩥᨲᩮᩣ ᩉᩥᨾᩅᨶ᩠ᨲᩮ ᨽᩩᨾ᩠ᨾᨴᩮᩅᨲᩣ ᩅᩥᨿ ᩏᨿ᩠ᨿᩣᨶᨠᩦᩊᨩᩃᨠᩦᩊᩣᨴᩥᩋᨶᩮᨠᩈᩩᨡᩴ ᩋᨶᩩᨽᩅᨶ᩠ᨲᩮᩣ ᩅᩣᩈᩴ ᨠᨸ᩠ᨸᩮᩈᩥ. ᨲᨴᩣ ᩋᨲ᩠ᨳᨴᩔᩦ ᨽᨣᩅᩣ ᨲᩔᩣᨶᩩᨠᨾ᩠ᨸᩣᨿ ᩉᩥᨾᩅᨶ᩠ᨲᩴ ᨣᨶ᩠ᨲ᩠ᩅᩣ ᩌᨠᩣᩈᨲᩮᩣ ᩒᩁᩩᨿ᩠ᩉ ᩈᨦ᩠ᨥᩣᨭᩥᩴ ᨸᨬ᩠ᨬᩣᨸᩮᨲ᩠ᩅᩣ ᨶᩥᩈᩦᨴᩥ. ᩈᩮᩣ ᨠᩥᨶ᩠ᨶᩁᩮᩣ ᨲᩴ ᨽᨣᩅᨶ᩠ᨲᩴ ᩅᩥᨩ᩠ᨩᩮᩣᨲᨾᩣᨶᩴ ᨲᨲ᩠ᨳ ᨶᩥᩈᩥᨶ᩠ᨶᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩈᩩᨣᨶ᩠ᨵᨧᨶ᩠ᨴᨶᩮᨶ ᨸᩪᨩᩮᩈᩥ. ᨲᩔ ᨽᨣᩅᩣ ᩋᨶᩩᨾᩮᩣᨴᨶᩴ ᩋᨠᩣᩈᩥ.

᪑᪗. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨲᩮᨶ ᩈᩮᩣᨾᨶᩔᩮᨶ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᨲᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ ᩋᨸᩁᩣᨸᩁᩴ ᨨ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧᨠ᩠ᨠᩅᨲ᩠ᨲᩥᩁᨩ᩠ᨩᨸᨴᩮᩈᩁᨩ᩠ᨩᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ¶ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨧᨶ᩠ᨴᨽᩣᨣᩣᨶᨴᩦᨲᩦᩁᩮᨲᩥᩌᨴᩥᨾᩣᩉ. ᨲᨲ᩠ᨳ ᨧᨶ᩠ᨴᩴ ᨾᨶᩴ ᩁᩩᨧᩥᩴ ᩋᨩ᩠ᨫᩣᩈᨿᩴ ᨬᨲ᩠ᩅᩣ ᩅᩥᨿ ᨩᩣᨲᩮᩣᨲᩥ ᨧᨶ᩠ᨴᩮᩣ. ᨧᨶ᩠ᨴᨾᨱ᩠ᨯᩃᩮᨶ ᨸᩈᨶ᩠ᨶᨶᩥᨾ᩠ᨾᩃᩮᩣᨴᨠᩮᨶ ᩏᨽᩮᩣᩈᩩ ᨸᩔᩮᩈᩩ ᨾᩩᨲ᩠ᨲᩣᨴᩃᩈᨴᩥᩈᩈᨶ᩠ᨳᩁᨵᩅᩃᨸᩩᩃᩥᨶᨲᩃᩮᨶ ¶ ᨧ ᩈᨾᨶ᩠ᨶᩣᨣᨲᨲ᩠ᨲᩣ ᨧᨶ᩠ᨴᩮᨶ ᨽᩣᨣᩣ ᩈᨴᩥᩈᩣᨲᩥ ᨧᨶ᩠ᨴᨽᩣᨣᩣ, ᨲᩔᩣ ᨧᨶ᩠ᨴᨽᩣᨣᩣᨿ ᨶᨴᩥᨿᩣ ᨲᩦᩁᩮ ᩈᨾᩦᨸᩮᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᩴ ᩉᩮᨭ᩠ᨮᩣ ᩅᩩᨲ᩠ᨲᨶᨿᨲ᩠ᨲᩣ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨧᨶ᩠ᨴᨶᨸᩪᨩᨶᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᩋᨭ᩠ᨮᨾᨽᩣᨱᩅᩣᩁᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᨸᩩᨸ᩠ᨹᨧ᩠ᨨᨴᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩩᨶᨶ᩠ᨴᩮᩣ ᨶᩣᨾ ᨶᩣᨾᩮᨶᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᩩᨸ᩠ᨹᨧ᩠ᨨᨴᨶᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩮᩈᩩ ᨽᩅᩮᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨠᩈᩥᨸ᩠ᨸᩮᩈᩩ ᨶᩥᨸ᩠ᨹᨲ᩠ᨲᩥᩴ ᨸᨲ᩠ᨲᩮᩣ ᨾᩉᩣᨽᩮᩣᨣᩮᩣ ᨾᩉᩣᨿᩈᩮᩣ ᨴᩣᨶᩣᨽᩥᩁᨲᩮᩣ ᩋᩉᩮᩣᩈᩥ. ᩑᨠᨴᩥᩅᩈᩴ ᩈᩮᩣ ‘‘ᩈᨠᩃᨩᨾ᩠ᨻᩩᨴᩦᨸᩮ ᩍᨾᩮ ᨿᩣᨧᨠᩣ ᨶᩣᨾ ‘ᩋᩉᩴ ᨴᩣᨶᩴ ᨶ ᩃᨴ᩠ᨵᩮᩣᩈ᩠ᨾᩦ’ᨲᩥ ¶ ᩅᨲ᩠ᨲᩩᩴ ᨾᩣ ᩃᨽᨶ᩠ᨲᩪ’’ᨲᩥ ᨾᩉᩣᨴᩣᨶᩴ ᩈᨩ᩠ᨩᩮᩈᩥ. ᨲᨴᩣ ᨸᨴᩩᨾᩩᨲ᩠ᨲᩁᩮᩣ ᨽᨣᩅᩣ ᩈᨸᩁᩥᩅᩣᩁᩮᩣ ᩌᨠᩣᩈᩮᨶ ᨣᨧ᩠ᨨᨲᩥ. ᨻᩕᩣᩉ᩠ᨾᨱᩮᩣ ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨧᩥᨲ᩠ᨲᩮᩣ ᩈᨠᩈᩥᩔᩮ ᨸᨠ᩠ᨠᩮᩣᩈᩣᨸᩮᨲ᩠ᩅᩣ ᨸᩩᨸ᩠ᨹᩣᨶᩥ ᩌᩉᩁᩣᨸᩮᨲ᩠ᩅᩣ ᩌᨠᩣᩈᩮ ᩏᨠ᩠ᨡᩥᨸᩥᨲ᩠ᩅᩣ ᨸᩪᨩᩮᩈᩥ. ᨲᩣᨶᩥ ᩈᨠᩃᨶᨣᩁᩴ ᨨᩣᨴᩮᨲ᩠ᩅᩣ ᩈᨲ᩠ᨲ ᨴᩥᩅᩈᩣᨶᩥ ᩋᨭ᩠ᨮᩴᩈᩩ.

᪒᪖. ᩈᩮᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᨴᩮᩅᨾᨶᩩᩔᩮᩈᩩ ᩈᩩᨡᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲ᩠ᩅᩣ ᨡᩩᩁᨣ᩠ᨣᩮᨿᩮᩅ ᩋᩁᩉᨲ᩠ᨲᩴ ᨸᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩩᨶᨶ᩠ᨴᩮᩣ ᨶᩣᨾ ᨶᩣᨾᩮᨶᩣᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨶᨿᨲ᩠ᨲᩣ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨸᩩᨸ᩠ᨹᨧ᩠ᨨᨴᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᩁᩉᩮᩣᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨠᩴ ¶ ᩌᨿᩈ᩠ᨾᨲᩮᩣ ᩁᩉᩮᩣᩈᨬ᩠ᨬᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩑᨠᩈ᩠ᨾᩥᩴ ᨻᩩᨴ᩠ᨵᩈᩩᨬ᩠ᨬᨠᩣᩃᩮ ᨾᨩ᩠ᨫᩥᨾᨴᩮᩈᩮ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨠᩈᩥᨸ᩠ᨸᩮᩈᩩ ᨶᩥᨸ᩠ᨹᨲ᩠ᨲᩥᩴ ᨸᨲ᩠ᩅᩣ ᨲᨲ᩠ᨳ ᩈᩣᩁᩴ ᩋᨸᩔᨶ᩠ᨲᩮᩣ ᨠᩮᩅᩃᩴ ᩏᨴᩁᩴ ᨸᩪᩁᩮᨲ᩠ᩅᩣ ᨠᩮᩣᨵᨾᨴᨾᩣᨶᩣᨴᨿᩮᩣ ᩋᨠᩩᩈᩃᩮᨿᩮᩅ ᨴᩥᩈ᩠ᩅᩣ ᨥᩁᩣᩅᩣᩈᩴ ᨸᩉᩣᨿ ᩉᩥᨾᩅᨶ᩠ᨲᩴ ᨸᩅᩥᩈᩥᨲ᩠ᩅᩣ ᩍᩈᩥᨸᨻ᩠ᨻᨩ᩠ᨩᩴ ¶ ᨸᨻ᩠ᨻᨩᩥᨲ᩠ᩅᩣ ᩋᨶᩮᨠᨲᩣᨸᩈᩈᨲᨸᩁᩥᩅᩣᩁᩮᩣ ᩅᩈᨽᨸᨻ᩠ᨻᨲᩈᨾᩦᨸᩮ ᩋᩔᨾᩴ ᨾᩣᨸᩮᨲ᩠ᩅᩣ ᨲᩦᨱᩥ ᩅᩔᩈᩉᩔᩣᨶᩥ ᩉᩥᨾᩅᨶ᩠ᨲᩮᨿᩮᩅ ᩅᩈᨾᩣᨶᩮᩣ ‘‘ᩋᩉᩴ ᩑᨲ᩠ᨲᨠᩣᨶᩴ ᩈᩥᩔᩣᨶᩴ ᩌᨧᩁᩥᨿᩮᩣᨲᩥ ᩈᨾ᩠ᨾᨲᩮᩣ ᨣᩁᩩᨭ᩠ᨮᩣᨶᩥᨿᩮᩣ ᨣᩁᩩᨠᩣᨲᨻ᩠ᨻᩮᩣ ᩅᨶ᩠ᨴᨶᩦᨿᩮᩣ, ᩌᨧᩁᩥᨿᩮᩣ ᨾᩮ ᨶᨲ᩠ᨳᩦ’’ᨲᩥ ᨴᩮᩣᨾᨶᩔᨸ᩠ᨸᨲ᩠ᨲᩮᩣ ᨲᩮ ᩈᨻ᩠ᨻᩮ ᩈᩥᩔᩮ ᩈᨶ᩠ᨶᩥᨸᩣᨲᩮᨲ᩠ᩅᩣ ᨻᩩᨴ᩠ᨵᩣᨶᩴ ᩋᨽᩣᩅᩮ ᨶᩥᨻ᩠ᨻᩣᨶᩣᨵᩥᨣᨾᩣᨽᩣᩅᩴ ᨸᨠᩣᩈᩮᨲ᩠ᩅᩣ ᩈᨿᩴ ᩑᨠᨠᩮᩣ ᩁᩉᩮᩣ ᩅᩥᩅᩮᨠᨭ᩠ᨮᩣᨶᩮᩅ ᨶᩥᩈᩥᨶ᩠ᨶᩮᩣ ᨻᩩᨴ᩠ᨵᩔ ᩈᨾ᩠ᨾᩩᨡᩣ ᨶᩥᩈᩥᨶ᩠ᨶᩮᩣ ᩅᩥᨿ ᨻᩩᨴ᩠ᨵᩈᨬ᩠ᨬᩴ ᨾᨶᩈᩥ ᨠᩁᩥᨲ᩠ᩅᩣ ᨻᩩᨴ᩠ᨵᩣᩁᨾ᩠ᨾᨱᩴ ᨸᩦᨲᩥᩴ ᩏᨸ᩠ᨸᩣᨴᩮᨲ᩠ᩅᩣ ᩈᩣᩃᩣᨿᩴ ᨸᩃ᩠ᩃᨦ᩠ᨠᩴ ᩌᨽᩩᨩᩥᨲ᩠ᩅᩣ ᨶᩥᩈᩥᨶ᩠ᨶᩮᩣ ᨠᩣᩃᩴ ᨠᨲ᩠ᩅᩣ ᨻᩕᩉ᩠ᨾᩃᩮᩣᨠᩮ ᨶᩥᨻ᩠ᨻᨲ᩠ᨲᩥ.

᪓᪔. ᩈᩮᩣ ᨲᨲ᩠ᨳ ᨫᩣᨶᩈᩩᨡᩮᨶ ᨧᩥᩁᩴ ᩅᩈᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨠᩣᨾᩮᩈᩩ ᩋᨶᩃ᩠ᩃᩦᨶᩮᩣ ᩈᨲ᩠ᨲᩅᩔᩥᨠᩮᩣ ᨸᨻ᩠ᨻᨩᩥᨲ᩠ᩅᩣ ᨡᩩᩁᨣ᩠ᨣᩮᨿᩮᩅ ᩋᩁᩉᨲ᩠ᨲᩴ ᨸᨲ᩠ᩅᩣ ᨨᩊᨽᩥᨬ᩠ᨬᩮᩣ ᩉᩩᨲ᩠ᩅᩣ ᨸᩩᨻ᩠ᨻᩮᨶᩥᩅᩣᩈᨬᩣᨱᩮᨶ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᨬ᩠ᨩᩣᨲᩈᩮᩣᨾᨶᩔᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨾᩣᩉ. ᩅᩈᨽᩮᩣ ᨶᩣᨾ ᨸᨻ᩠ᨻᨲᩮᩣᨲᩥ ᩉᩥᨾᩅᨶ᩠ᨲᨸᨻ᩠ᨻᨲᩴ ᩅᩥᨶᩣ ᩈᩮᩈᨸᨻ᩠ᨻᨲᩣᨶᩴ ᩏᨧ᩠ᨧᨲᩁᨽᩣᩅᩮᨶ ᩈᩮᨭ᩠ᨮᨲᩁᨽᩣᩅᩮᨶ ᩅᩈᨽᩮᩣᨲᩥ ᩈᨦ᩠ᨡᩴ ᨣᨲᩮᩣ ᨸᨻ᩠ᨻᨲᩮᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩁᩉᩮᩣᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᨧᨾ᩠ᨸᨠᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨠᨱᩥᨠᩣᩁᩴᩅ ¶ ᨩᩮᩣᨲᨶ᩠ᨲᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨧᨾ᩠ᨸᨠᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩮᩔᨽᩩᩔ ᨽᨣᩅᨲᩮᩣ ᨠᩣᩃᩮ ᨻᩕᩣᩉ᩠ᨾᨱᨠᩩᩃᩮ ¶ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨠᩈᩥᨸ᩠ᨸᩮᩈᩩ ᨶᩥᨸ᩠ᨹᨲ᩠ᨲᩥᩴ ᨸᨲ᩠ᩅᩣ ᨲᨲ᩠ᨳ ᩈᩣᩁᩴ ᩋᨸᩔᨶ᩠ᨲᩮᩣ ᨥᩁᩣᩅᩣᩈᩴ ᨸᩉᩣᨿ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩅᨶᨶ᩠ᨲᩁᩮ ᩅᩈᨶ᩠ᨲᩮᩣ ᩅᩮᩔᨽᩩᩴ ᨽᨣᩅᨶ᩠ᨲᩴ ᩏᨴ᩠ᨴᩥᩔ ᩈᩥᩔᩮᩉᩥ ᩌᨶᩦᨲᩮᩉᩥ ᨧᨾ᩠ᨸᨠᨸᩩᨸ᩠ᨹᩮᩉᩥ ᨸᩪᨩᩮᩈᩥ. ᨽᨣᩅᩣ ᩋᨶᩩᨾᩮᩣᨴᨶᩴ ᩋᨠᩣᩈᩥ. ᩈᩮᩣ ᨲᩮᨶᩮᩅ ᨠᩩᩈᩃᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᩣᨸᩩᨱᩥᨲ᩠ᩅᩣ ᨸᩩᨻ᩠ᨻᩅᩣᩈᨶᩣᨻᩃᩮᨶ ᨥᩁᩣᩅᩣᩈᩮ ᩋᨶᩃ᩠ᩃᩦᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪔᪑. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨸᩩᨬ᩠ᨬᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨠᨱᩥᨠᩣᩁᩴᩅ ᨩᩮᩣᨲᨶ᩠ᨲᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨠᨱᩥᨠᩣᩁᨶ᩠ᨲᩥ ᩈᨠᩃᨸᨲ᩠ᨲᨸᩃᩣᩈᩣᨶᩥ ᨸᩁᩥᨽᨩ᩠ᨩ ᨸᩣᨲᩮᨲ᩠ᩅᩣ ᨸᩩᨸ᩠ᨹᨣᩉᨱᩈᨾᨿᩮ ᨠᨱ᩠ᨱᩥᨠᩣᨻᨴ᩠ᨵᩮᩣ ᩉᩩᨲ᩠ᩅᩣ ᨸᩩᨸ᩠ᨹᨾᨠᩩᩊᩣᨶᩴ ᨣᩉᨱᨲᩮᩣ ᨠᨱ᩠ᨱᩥᨠᩣᨠᩣᩁᩮᨶ ᨸᨠᨲᩮᩣᨲᩥ ᨠᨱᩥᨠᩣᩁᩮᩣ, ‘‘ᨠᨱ᩠ᨱᩥᨠᩣᩁᩮᩣ’’ᨲᩥ ᩅᨲ᩠ᨲᨻ᩠ᨻᩮ ᨶᩥᩁᩩᨲ᩠ᨲᩥᨶᨿᩮᨶ ᩑᨠᩔ ᨸᩩᨻ᩠ᨻ ᨱ-ᨠᩣᩁᩔ ᩃᩮᩣᨸᩴ ᨠᨲ᩠ᩅᩣ ‘‘ᨠᨱᩥᨠᩣᩁ’’ᨶ᩠ᨲᩥ ¶ ᩅᩩᨲ᩠ᨲᨶ᩠ᨲᩥ ᨴᨭ᩠ᨮᨻ᩠ᨻᩴ. ᨲᩴ ᨸᩩᨸ᩠ᨹᩥᨲᩴ ᨠᨱᩥᨠᩣᩁᩁᩩᨠ᩠ᨡᩴ ᩍᩅ ᨩᩮᩣᨲᨶ᩠ᨲᩴ ᨻᩩᨴ᩠ᨵᩴ ᩋᨴ᩠ᨴᩈᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨧᨾ᩠ᨸᨠᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᩋᨲ᩠ᨳᩈᨶ᩠ᨴᩔᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩅᩥᩈᩣᩃᨾᩣᩊᩮ ᩌᩈᩦᨶᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩋᨲ᩠ᨳᩈᨶ᩠ᨴᩔᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩮᩈᩩ ᩋᨲ᩠ᨲᨽᩣᩅᩮᩈᩩ ᨠᨲᨸᩩᨬ᩠ᨬᩪᨸᨧᨿᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨠᩈᩥᨸ᩠ᨸᩮᩈᩩ ᨶᩥᨸ᩠ᨹᨲ᩠ᨲᩥᩴ ᨸᨲ᩠ᨲᩮᩣ ᨲᨲ᩠ᨳ ᩈᩣᩁᩴ ᩋᨸᩔᨶ᩠ᨲᩮᩣ ᨣᩮᩉᩴ ᨸᩉᩣᨿ ᩉᩥᨾᩅᨶ᩠ᨲᩴ ᨣᨶ᩠ᨲ᩠ᩅᩣ ᩁᨾᨱᩦᨿᩮ ᨮᩣᨶᩮ ᨸᨱ᩠ᨱᩈᩣᩃᩴ ᨠᨲ᩠ᩅᩣ ᨸᨭᩥᩅᩈᨲᩥ, ᨲᨴᩣ ᩈᨲ᩠ᨲᩣᨶᩩᨠᨾ᩠ᨸᩣᨿ ᩉᩥᨾᩅᨶ᩠ᨲᨾᩣᨣᨲᩴ ᨸᨴᩩᨾᩩᨲ᩠ᨲᩁᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨸᨬ᩠ᨧᨦ᩠ᨣᩈᨾᨶ᩠ᨶᩣᨣᨲᩮᩣ ᩅᨶ᩠ᨴᩥᨲ᩠ᩅᩣ ᨳᩩᨲᩥᩅᨧᨶᩮᩉᩥ ᨳᩮᩣᨾᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨿᩣᩅᨲᩣᨿᩩᨠᩴ ᨠᨲ᩠ᩅᩣ ᨠᩣᩃᨦ᩠ᨠᨲ᩠ᩅᩣ ᨻᩕᩉ᩠ᨾᩃᩮᩣᨠᩪᨸᨣᩮᩣ ᩋᩉᩮᩣᩈᩥ. ᩈᩮᩣ ᩋᨸᩁᨽᩣᨣᩮ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪔᪗. ᩈᩮᩣ ¶ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩅᩥᩈᩣᩃᨾᩣᩊᩮ ᩌᩈᩦᨶᩮᩣᨲᩥᩌᨴᩥᨾᩣᩉ. ᨲᨲ᩠ᨳ ¶ ᩅᩥᩈᩣᩃᨾᩣᩊᩮᨲᩥ ᩅᩥᩈᩣᩃᩴ ᨸᨲ᩠ᨳᨭᩴ ᩅᩥᨲ᩠ᨳᩥᨱ᩠ᨱᩴ ᨾᩉᨶ᩠ᨲᩴ ᨾᩣᩊᩴ ᩅᩥᩈᩣᩃᨾᩣᩊᩴ, ᨲᩈ᩠ᨾᩥᩴ ᩅᩥᩈᩣᩃᨾᩣᩊᩮ ᩌᩈᩦᨶᩮᩣ ᨶᩥᩈᩥᨶ᩠ᨶᩮᩣ ᩋᩉᩴ ᩃᩮᩣᨠᨶᩣᨿᨠᩴ ᩋᨴ᩠ᨴᩈᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨲᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩋᨲ᩠ᨳᩈᨶ᩠ᨴᩔᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᩑᨠᨸᩈᩣᨴᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᩣᩁᨴᩮᩣ ᩍᨲᩥ ᨾᩮ ᨶᩣᨾᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩑᨠᨸᩈᩣᨴᨶᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩣᩈᩩ ᨩᩣᨲᩦᩈᩩ ᨠᨲᨠᩩᩈᩃᩮᩣ ᩋᨲ᩠ᨳᨴᩔᩥᩔ ᨽᨣᩅᨲᩮᩣ ᨠᩣᩃᩮ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᨠᩮᩈᩅᩮᩣᨲᩥ ᨸᩣᨠᨭᩮᩣ ᩉᩩᨲ᩠ᩅᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᨥᩁᩣᩅᩣᩈᩴ ᨸᩉᩣᨿ ᨸᨻ᩠ᨻᨩᩥᨲ᩠ᩅᩣ ᩅᩈᨶ᩠ᨲᩮᩣ ᩑᨠᨴᩥᩅᩈᩴ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩋᨬ᩠ᨩᩃᩥᩴ ᨸᨣ᩠ᨣᨿ᩠ᩉ ᩋᨲᩥᩅᩥᨿ ᨸᩦᨲᩥᩈᩮᩣᨾᨶᩔᨩᩣᨲᩮᩣ ᨸᨠ᩠ᨠᩣᨾᩥ. ᩈᩮᩣ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᨲᩮᨶᩮᩅ ᩈᩮᩣᨾᨶᩔᩮᨶ ᨠᩣᩃᩴ ᨠᨲ᩠ᩅᩣ ᨴᩮᩅᩮᩈᩩ ᨶᩥᨻ᩠ᨻᨲ᩠ᨲᩮᩣ ᨲᨲ᩠ᨳ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᩏᨸ᩠ᨸᨶ᩠ᨶᩮᩣ ᨲᨲ᩠ᨳ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩋᨬ᩠ᨬᨲᩁᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪕᪕. ᩈᩮᩣ ¶ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨠᨲᨠᩩᩈᩃᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨶᩣᩁᨴᩮᩣ ᩍᨲᩥ ᨾᩮ ᨶᩣᨾᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨶᩣᩁᨴᩮᩣᨲᩥ ᨩᩣᨲᩥᩅᩈᩮᨶ ᩈᩩᨴ᩠ᨵᩈᩁᩦᩁᨲ᩠ᨲᩣ ᨶᨲ᩠ᨳᩥ ᩁᨩᩮᩣ ᨵᩪᩃᩥ ᨾᩃᩴ ᩑᨲᩔᩣᨲᩥ ᨶᩣᩁᨴᩮᩣ, ᨩ-ᨠᩣᩁᩔ ᨴ-ᨠᩣᩁᩴ ᨠᨲ᩠ᩅᩣ ᨶᩣᩁᨴᩮᩣᨲᩥ ᨠᩩᩃᨴᨲ᩠ᨲᩥᨠᩴ ᨶᩣᨾᩴ. ᨠᩮᩈᩅᩮᩣᨲᩥ ᨠᩥᩈᩅᨧ᩠ᨨᨣᩮᩣᨲ᩠ᨲᩮ ᨩᩣᨲᨲ᩠ᨲᩣ ᨠᩮᩈᩅᩮᩣ ᨶᩣᩁᨴᨠᩮᩈᩅᩮᩣ ᩍᨲᩥ ᨾᩴ ᨩᨶᩣ ᩅᩥᨴᩪ ᨩᩣᨶᨶ᩠ᨲᩦᨲᩥ ᩋᨲ᩠ᨳᩮᩣ. ᩈᩮᩈᩴ ᨸᩣᨠᨭᨾᩮᩅᩣᨲᩥ.

ᩑᨠᨸᩈᩣᨴᨶᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᩈᩣᩃᨸᩩᨸ᩠ᨹᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨾᩥᨣᩁᩣᨩᩣ ¶ ᨲᨴᩣ ᩌᩈᩥᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩣᩃᨸᩩᨸ᩠ᨹᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᨠᨲᨠᩩᩈᩃᩈᨬ᩠ᨧᨿᩮᩣ ᨠᩮᨶᨧᩥ ᨠᨾ᩠ᨾᨧ᩠ᨨᩥᨴ᩠ᨴᩮᨶ ᩉᩥᨾᩅᨶ᩠ᨲᩮ ᩈᩦᩉᨿᩮᩣᨶᩥᨿᩴ ᨶᩥᨻ᩠ᨻᨲ᩠ᨲᩮᩣ ᩋᨶᩮᨠᩈᩦᩉᨸᩁᩥᩅᩣᩁᩮᩣ ᩅᩥᩉᩣᩈᩥ. ᨲᨴᩣ ᩈᩥᨡᩦ ᨽᨣᩅᩣ ᨲᩔᩣᨶᩩᨠᨾ᩠ᨸᩣᨿ ᩉᩥᨾᩅᨶ᩠ᨲᩴ ᩋᨣᨾᩣᩈᩥ. ᩈᩦᩉᩮᩣ ᨲᩴ ᩏᨸᨣᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩈᩣᨡᩣᨽᨦ᩠ᨣᩮᨶ ᩈᨠᨱ᩠ᨱᩥᨠᩈᩣᩃᨸᩩᨸ᩠ᨹᩴ ᨣᩉᩮᨲ᩠ᩅᩣ ᨸᩪᨩᩮᩈᩥ. ᨽᨣᩅᩣ ᨲᩔ ᩋᨶᩩᨾᩮᩣᨴᨶᩴ ᩋᨠᩣᩈᩥ.

᪖᪐. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᩋᩁᩉᨲ᩠ᨲᩴ ᨸᨲ᩠ᨲᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ¶ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨾᩥᨣᩁᩣᨩᩣ ᨲᨴᩣ ᩌᩈᩥᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨾᩁᨱᩴ ᨣᨧ᩠ᨨᨶ᩠ᨲᩦᨲᩥ ᨾᩥᨣᩣ, ᩋᨳ ᩅᩣ ᨥᩣᩈᩴ ᨾᨣ᩠ᨣᨶ᩠ᨲᩥ ᨣᩅᩮᩈᨶ᩠ᨲᩦᨲᩥ ᨾᩥᨣᩣ, ᨾᩥᨣᩣᨶᩴ ᩁᩣᨩᩣ ᨾᩥᨣᩁᩣᨩᩣ. ᩈᨠᩃᨧᨲᩩᨸ᩠ᨸᨴᩣᨶᩴ ᩁᩣᨩᨽᩣᩅᩮ ᩈᨲᩥᨸᩥ ᨣᩣᨳᩣᨻᨶ᩠ᨵᩈᩩᨡᨲ᩠ᨳᩴ ᨾᩥᨣᩮ ᩌᨴᩥᩴ ᨠᨲ᩠ᩅᩣ ᨾᩥᨣᩁᩣᨩᩣᨲᩥ ᩅᩩᨲ᩠ᨲᩴ. ᨿᨴᩣ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᩈᨸᩩᨸ᩠ᨹᩴ ᩈᩣᩃᩈᩣᨡᩴ ᨽᨬ᩠ᨩᩥᨲ᩠ᩅᩣ ᨸᩪᨩᩮᩈᩥᩴ, ᨲᨴᩣ ᩋᩉᩴ ᨾᩥᨣᩁᩣᨩᩣ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪖᪒. ᩈᨠᩮᩣᩈᩴ ᨸᩩᨸ᩠ᨹᨾᩣᩉᩁᩥᨶ᩠ᨲᩥ ᩈᨠᨱ᩠ᨱᩥᨠᩴ ᩈᩣᩃᨸᩩᨸ᩠ᨹᩴ ᩌᩉᩁᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩈᩣᩃᨸᩩᨸ᩠ᨹᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᨸᩥᨿᩣᩃᨹᩃᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᩁᩮᩣᨵᨠᩮᩣ ¶ ᨲᨴᩣ ᩌᩈᩥᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᩥᨿᩣᩃᨹᩃᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨡᩥᩔ ᨽᨣᩅᨲᩮᩣ ᨠᩣᩃᩮ ᨶᩮᩈᩣᨴᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩉᩥᨾᩅᨶ᩠ᨲᩮ ᩑᨠᩈ᩠ᨾᩥᩴ ᨸᨻ᩠ᨽᩣᩁᩮ ᨾᩥᨣᩮ ᩅᨵᩥᨲ᩠ᩅᩣ ᨩᩦᩅᩥᨠᩴ ᨠᨸ᩠ᨸᩮᨲ᩠ᩅᩣ ᩅᩈᨲᩥ. ᨲᩈ᩠ᨾᩥᩴ ᨠᩣᩃᩮ ᨲᨲ᩠ᨳ ᨣᨲᩴ ᩈᩥᨡᩥᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩈᩣᨿᩴ ᨸᩣᨲᩴ ᨶᨾᩔᨾᩣᨶᩮᩣ ᨠᨬ᩠ᨧᩥ ᨴᩮᨿ᩠ᨿᨵᨾ᩠ᨾᩴ ᩋᨸᩔᨶ᩠ᨲᩮᩣ ᨾᨵᩩᩁᩣᨶᩥ ¶ ᨸᩥᨿᩣᩃᨹᩃᩣᨶᩥ ᩏᨧ᩠ᨧᩥᨶᩥᨲ᩠ᩅᩣ ᩋᨴᩣᩈᩥ. ᨽᨣᩅᩣ ᨲᩣᨶᩥ ᨸᩁᩥᨽᩩᨬ᩠ᨩᩥ. ᩈᩮᩣ ᨶᩮᩈᩣᨴᩮᩣ ᨻᩩᨴ᩠ᨵᩣᩁᨾ᩠ᨾᨱᩣᨿ ᨸᩦᨲᩥᨿᩣ ᨶᩥᩁᨶ᩠ᨲᩁᩴ ᨹᩩᨭ᩠ᨮᩈᩁᩦᩁᩮᩣ ᨸᩣᨸᨠᨾ᩠ᨾᩮ ᩅᩥᩁᨲ᩠ᨲᨧᩥᨲ᩠ᨲᩮᩣ ᨾᩪᩃᨹᩃᩣᩉᩣᩁᩮᩣ ᨶᨧᩥᩁᩔᩮᩅ ᨠᩣᩃᩴ ᨠᨲ᩠ᩅᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩥ.

᪖᪖. ᩈᩮᩣ ᨲᨲ᩠ᨳ ᨴᩥᨻ᩠ᨻᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧ ᩋᨶᩮᨠᩅᩥᨵᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨣᩉᨸᨲᩥᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᨲᨲ᩠ᨳ ᩋᨶᨽᩥᩁᨲᩮᩣ ᨣᩮᩉᩴ ᨸᩉᩣᨿ ᩈᨲ᩠ᨳᩩ ᩈᨶ᩠ᨲᩥᨠᩮ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᨲ᩠ᨲᩮᩣ ᩋᨲ᩠ᨲᨶᩮᩣ ᨠᨲᨹᩃᨴᩣᨶᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᩁᩮᩣᨵᨠᩮᩣ ᨲᨴᩣ ᩌᩈᩥᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨿᨴᩣ ᩋᩉᩴ ᨸᩥᨿᩣᩃᨹᩃᩴ ᨴᨲ᩠ᩅᩣ ᨧᩥᨲ᩠ᨲᩴ ᨸᩈᩣᨴᩮᩈᩥᩴ, ᨲᨴᩣ ᩋᩉᩴ ᨸᩁᩮᩣᨵᨠᩮᩣ ᩌᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨸᩁᩮᩣᨵᨠᩮᩣᨲᩥ ᨸᩁᩈᨲ᩠ᨲᩁᩮᩣᨵᨠᩮᩣ ᩅᩥᩉᩮᩈᨠᩮᩣ. ‘‘ᨸᩁᩁᩮᩣᨵᨠᩮᩣ’’ᨲᩥ ᩅᨲ᩠ᨲᨻ᩠ᨻᩮ ᨸᩩᨻ᩠ᨻᩔ ᩁ-ᨠᩣᩁᩔ ᩃᩮᩣᨸᩴ ᨠᨲ᩠ᩅᩣ ‘‘ᨸᩁᩮᩣᨵᨠᩮᩣ’’ᨲᩥ ᩅᩩᨲ᩠ᨲᩴ.

᪖᪙. ᨸᩁᩥᨧᩣᩁᩥᩴ ᩅᩥᨶᩣᨿᨠᨶ᩠ᨲᩥ ᨲᩴ ᨶᩥᨻ᩠ᨻᩣᨶᨸᩣᨸᨠᩴ ᩈᨲ᩠ᨳᩣᩁᩴ, ‘‘ᨽᨶ᩠ᨲᩮ ¶ , ᩍᨾᩴ ᨹᩃᩴ ᨸᩁᩥᨽᩩᨬ᩠ᨩᨳᩣ’’ᨲᩥ ᨸᩅᩣᩁᩥᩴ ᨶᩥᨾᨶ᩠ᨲᩮᩈᩥᩴ ᩌᩁᩣᨵᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨸᩥᨿᩣᩃᨹᩃᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᨧᩩᨴ᩠ᨴᩈᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪕. ᨨᨲ᩠ᨲᩅᨣ᩠ᨣᩮᩣ

᪑. ᩋᨲᩥᨨᨲ᩠ᨲᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᩁᩥᨶᩥᨻ᩠ᨻᩩᨲᩮ ¶ ᨽᨣᩅᨲᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩋᨲᩥᨨᨲ᩠ᨲᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨲ᩠ᨳᨴᩔᩥᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨵᩁᨾᩣᨶᩔ ᨽᨣᩅᨲᩮᩣ ᩋᨴᩥᨭ᩠ᨮᨲ᩠ᨲᩣ ᨸᩁᩥᨶᩥᨻ᩠ᨻᩩᨲᨠᩣᩃᩮ ‘‘ᩋᩉᩮᩣ ᨾᨾ ᨸᩁᩥᩉᩣᨶᩦ’’ᨲᩥ ᨧᩥᨶ᩠ᨲᩮᨲ᩠ᩅᩣ ‘‘ᨾᨾ ᨩᩣᨲᩥᩴ ᩈᨹᩃᩴ ᨠᩁᩥᩔᩣᨾᩦ’’ᨲᩥ ᨠᨲᩈᨶ᩠ᨶᩥᨭ᩠ᨮᩣᨶᩮᩣ ᨨᨲ᩠ᨲᩣᨵᩥᨨᨲ᩠ᨲᩴ ᨠᩣᩁᩮᨲ᩠ᩅᩣ ᨲᩔ ᨽᨣᩅᨲᩮᩣ ᩈᩁᩦᩁᨵᩣᨲᩩᩴ ᨶᩥᩉᩥᨲᨵᩣᨲᩩᨣᨻ᩠ᨽᩴ ᨸᩪᨩᩮᩈᩥ. ᩋᨸᩁᨽᩣᨣᩮ ᨸᩩᨸ᩠ᨹᨧ᩠ᨨᨲ᩠ᨲᩴ ᨠᩣᩁᩮᨲ᩠ᩅᩣ ᨲᨾᩮᩅ ᨵᩣᨲᩩᨣᨻ᩠ᨽᩴ ¶ ᨸᩪᨩᩮᩈᩥ. ᩈᩮᩣ ᨲᩮᨶᩮᩅ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨣᩉᨸᨲᩥᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨠᨾ᩠ᨾᨭ᩠ᨮᩣᨶᩴ ᨣᩉᩮᨲ᩠ᩅᩣ ᩅᩣᨿᨾᨶ᩠ᨲᩮᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪑. ᩈᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᩁᩥᨶᩥᨻ᩠ᨻᩩᨲᩮ ᨽᨣᩅᨲᩦᨲᩥᩌᨴᩥᨾᩣᩉ. ᨲᨲ᩠ᨳ ᨨᨲ᩠ᨲᩣᨲᩥᨨᨲ᩠ᨲᨶ᩠ᨲᩥ ᨨᩣᨴᩥᨿᨲᩥ ᩈᩴᩅᩁᩥᨿᨲᩥ ᩌᨲᨸᩣᨴᩥᨶ᩠ᨲᩥ ᨨᨲ᩠ᨲᩴ, ᨨᨲ᩠ᨲᩔ ᩋᨲᩥᨨᨲ᩠ᨲᩴ ᨨᨲ᩠ᨲᩔ ᩏᨸᩁᩥ ᨠᨲᨨᨲ᩠ᨲᩴ ᨨᨲ᩠ᨲᩣᨲᩥᨨᨲ᩠ᨲᩴ, ᨨᨲ᩠ᨲᩔ ᩏᨸᩁᩪᨸᩁᩥ ᨨᨲ᩠ᨲᨶ᩠ᨲᩥ ᩋᨲ᩠ᨳᩮᩣ. ᨳᩪᨸᨾ᩠ᩉᩥ ᩋᨽᩥᩁᩮᩣᨸᨿᩥᨶ᩠ᨲᩥ ᨳᩪᨸᩥᨿᨲᩥ ᩁᩣᩈᩥᨠᩁᩦᨿᨲᩦᨲᩥ ᨳᩪᨸᩮᩣ, ᩋᨳ ᩅᩣ ᨳᩪᨸᨲᩥ ᨳᩥᩁᨽᩣᩅᩮᨶ ᩅᩩᨴ᩠ᨵᩥᩴ ᩅᩥᩁᩪᩊ᩠ᩉᩥᩴ ᩅᩮᨸᩩᩃ᩠ᩃᩴ ᩌᨸᨩ᩠ᨩᨾᩣᨶᩮᩣ ᨸᨲᩥᨭ᩠ᨮᩣᨲᩦᨲᩥ ᨳᩪᨸᩮᩣ, ᨲᩈ᩠ᨾᩥᩴ ᨳᩪᨸᨾ᩠ᩉᩥ ᨾᨿᩣ ᨠᩣᩁᩥᨲᩴ ᨨᨲ᩠ᨲᩴ ᩏᨸᩁᩪᨸᩁᩥ ᨮᨸᨶᩅᩈᩮᨶ ᩋᨽᩥ ᩅᩥᩈᩮᩈᩮᨶ ᩌᩁᩮᩣᨸᨿᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪒. ᨸᩩᨸ᩠ᨹᨧ᩠ᨨᨴᨶᩴ ᨠᨲ᩠ᩅᩣᨶᩣᨲᩥ ᩅᩥᨠᩈᩥᨲᩮᩉᩥ ᩈᩩᨣᨶ᩠ᨵᩮᩉᩥ ᩋᨶᩮᨠᩮᩉᩥ ᨹᩩᨸ᩠ᨹᩮᩉᩥ ᨨᨴᨶᩴ ᨨᨲ᩠ᨲᩩᨸᩁᩥ ᩅᩥᨲᩣᨶᩴ ᨠᨲ᩠ᩅᩣ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩋᨲᩥᨨᨲ᩠ᨲᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᨳᨾ᩠ᨽᩣᩁᩮᩣᨸᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᩥᨻ᩠ᨻᩩᨲᩮ ¶ ᩃᩮᩣᨠᨶᩣᨳᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨳᨾ᩠ᨽᩣᩁᩮᩣᨸᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨵᨾ᩠ᨾᨴᩔᩥᩔ ᨽᨣᩅᨲᩮᩣ ¶ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩈᨴ᩠ᨵᩮᩣ ᨸᩈᨶ᩠ᨶᩮᩣ ᨸᩁᩥᨶᩥᨻ᩠ᨻᩩᨲᩮ ᨽᨣᩅᨲᩥ ᨲᩔ ᨽᨣᩅᨲᩮᩣ ᨵᩣᨲᩩᨣᨻ᩠ᨽᨾᩣᩊᨠᩮ ᨳᨾ᩠ᨽᩴ ᨶᩥᨡᨶᩥᨲ᩠ᩅᩣ ᨵᨩᩴ ᩌᩁᩮᩣᨸᩮᩈᩥ. ᨻᩉᩪᨶᩥ ᨩᩣᨲᩥᩈᩩᨾᨶᨸᩩᨸ᩠ᨹᩣᨶᩥ ᨣᨶ᩠ᨳᩥᨲ᩠ᩅᩣ ᨶᩥᩔᩮᨱᩥᨿᩣ ᩌᩁᩮᩣᩉᩥᨲ᩠ᩅᩣ ᨸᩪᨩᩮᩈᩥ.

᪕. ᩈᩮᩣ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᨠᩣᩃᩴ ᨠᨲ᩠ᩅᩣ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩈᨻ᩠ᨻᨲ᩠ᨳ ᨸᩪᨩᩥᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨴᩉᩁᨠᩣᩃᨲᩮᩣ ᨸᨽᩩᨲᩥ ᨸᩪᨩᨶᩦᨿᩮᩣ ᩈᩣᩈᨶᩮ ᨻᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᩈᩉ ᨸᨭᩥᩈᨾ᩠ᨽᩥᨴᩣᩉᩥ ᩋᩁᩉᨲ᩠ᨲᩴ ᨸᨲ᩠ᨲᩮᩣ ¶ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨶᩥᨻ᩠ᨻᩩᨲᩮ ᩃᩮᩣᨠᨶᩣᨳᨾ᩠ᩉᩦᨲᩥᩌᨴᩥᨾᩣᩉ. ᨲᨲ᩠ᨳ ᨶᩥᨻ᩠ᨻᩩᨲᩮ ᩃᩮᩣᨠᨶᩣᨳᨾ᩠ᩉᩦᨲᩥ ᩈᨠᩃᩃᩮᩣᨠᩔ ᨶᩣᨳᩮ ᨸᨵᩣᨶᨽᩪᨲᩮ ᨸᨭᩥᩈᩁᨱᩮ ᨧ ᩈᨲ᩠ᨳᩁᩥ ᨡᨶ᩠ᨵᨸᩁᩥᨶᩥᨻ᩠ᨻᩣᨶᩮᨶ ᨶᩥᨻ᩠ᨻᩩᨲᩮ ᨶᩥᨻ᩠ᨻᩩᨲᨴᩦᨸᩈᩥᨡᩣ ᩅᩥᨿ ᩋᨴᩔᨶᩴ ᨣᨲᩮᨲᩥ ᩋᨲ᩠ᨳᩮᩣ. ᨵᨾ᩠ᨾᨴᩔᩦᨶᩁᩣᩈᨽᩮᨲᩥ ᨧᨲᩩᩈᨧ᩠ᨧᨵᨾ᩠ᨾᩴ ᨸᩔᨲᩦᨲᩥ ᨵᨾ᩠ᨾᨴᩔᩦ, ᩋᨳ ᩅᩣ ᩈᨲᩥᨸᨭ᩠ᨮᩣᨶᩣᨴᩥᨠᩮ ᩈᨲ᩠ᨲᨲᩥᩴᩈᨻᩮᩣᨵᩥᨸᨠ᩠ᨡᩥᨿᨵᨾ᩠ᨾᩮ ᨴᩔᨶᩈᩦᩃᩮᩣ ᨸᩔᨶᩈᩦᩃᩮᩣᨲᩥ ᨵᨾ᩠ᨾᨴᩔᩦ, ᨶᩁᩣᨶᩴ ᩌᩈᨽᩮᩣ ᨸᩅᩁᩮᩣ ᩏᨲ᩠ᨲᨾᩮᩣᨲᩥ ᨶᩁᩣᩈᨽᩮᩣ, ᨵᨾ᩠ᨾᨴᩔᩦ ᨧ ᩈᩮᩣ ᨶᩁᩣᩈᨽᩮᩣ ᨧᩮᨲᩥ ᨵᨾ᩠ᨾᨴᩔᩦᨶᩁᩣᩈᨽᩮᩣ, ᨲᩈ᩠ᨾᩥᩴ ᨵᨾ᩠ᨾᨴᩔᩦᨶᩁᩣᩈᨽᩮ. ᩌᩁᩮᩣᨸᩮᩈᩥᩴ ᨵᨩᩴ ᨳᨾ᩠ᨽᨶ᩠ᨲᩥ ᨧᩮᨲᩥᨿᨾᩣᩊᨠᩮ ᨳᨾ᩠ᨽᩴ ᨶᩥᨡᨶᩥᨲ᩠ᩅᩣ ᨲᨲ᩠ᨳ ᨵᨩᩴ ᩌᩁᩮᩣᨸᩮᩈᩥᩴ ᨻᨶ᩠ᨵᩥᨲ᩠ᩅᩣ ᨮᨸᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪖. ᨶᩥᩔᩮᨱᩥᩴ ᨾᩣᨸᨿᩥᨲ᩠ᩅᩣᨶᩣᨲᩥ ᨶᩥᩔᩣᨿ ᨲᩴ ᩍᨱᨶ᩠ᨲᩥ ᨣᨧ᩠ᨨᨶ᩠ᨲᩥ ᩌᩁᩮᩣᩉᨶ᩠ᨲᩥ ᩏᨸᩁᩦᨲᩥ ᨶᩥᩔᩮᨱᩥ, ᨲᩴ ᨶᩥᩔᩮᨱᩥᩴ ᨾᩣᨸᨿᩥᨲ᩠ᩅᩣ ᨠᩣᩁᩮᨲ᩠ᩅᩣ ᨻᨶ᩠ᨵᩥᨲ᩠ᩅᩣ ᨳᩪᨸᩈᩮᨭ᩠ᨮᩴ ᩈᨾᩣᩁᩩᩉᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨩᩣᨲᩥᨸᩩᨸ᩠ᨹᩴ ᨣᩉᩮᨲ᩠ᩅᩣᨶᩣᨲᩥ ᨩᩣᨿᨾᩣᨶᨾᩮᩅ ᨩᨶᩣᨶᩴ ᩈᩩᨶ᩠ᨴᩁᩴ ᨾᨶᩴ ᨠᩁᩮᩣᨲᩦᨲᩥ ᨩᩣᨲᩥᩈᩩᨾᨶᩴ, ᨩᩣᨲᩥᩈᩩᨾᨶᨾᩮᩅ ᨸᩩᨸ᩠ᨹᩴ ‘‘ᨩᩣᨲᩥᩈᩩᨾᨶᨸᩩᨸ᩠ᨹ’’ᨶ᩠ᨲᩥ ᩅᨲ᩠ᨲᨻ᩠ᨻᩮ ᨣᩣᨳᩣᨻᨶ᩠ᨵᩈᩩᨡᨲ᩠ᨳᩴ ᩈᩩᨾᨶᩈᨴ᩠ᨴᩔ ᩃᩮᩣᨸᩴ ᨠᨲ᩠ᩅᩣ ‘‘ᨩᩣᨲᩥᨸᩩᨸ᩠ᨹ’’ᨶ᩠ᨲᩥ ᩅᩩᨲ᩠ᨲᩴ, ᨲᩴ ᨩᩣᨲᩥᩈᩩᨾᨶᨸᩩᨸ᩠ᨹᩴ ᨣᩉᩮᨲ᩠ᩅᩣ ᨣᨶ᩠ᨳᩥᨲ᩠ᩅᩣ ᨳᩪᨸᨾ᩠ᩉᩥ ᩌᩁᩮᩣᨸᨿᩥᩴ, ᩌᩁᩮᩣᨸᩮᨲ᩠ᩅᩣ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨳᨾ᩠ᨽᩣᩁᩮᩣᨸᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᩅᩮᨴᩥᨠᩣᩁᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᩥᨻ᩠ᨻᩩᨲᩮ ¶ ᩃᩮᩣᨠᨶᩣᨳᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩅᩮᨴᩥᨠᩣᩁᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᩥᨿᨴᩔᩥᩔ ᨽᨣᩅᨲᩮᩣ ᨠᩣᩃᩮ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᨶᩥᨻ᩠ᨻᩩᨲᩮ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨲᩔ ᨧᩮᨲᩥᨿᩮ ᩅᩃᨿᩴ ᨠᩣᩁᩮᩈᩥ, ᩈᨲ᩠ᨲᩉᩥ ᩁᨲᨶᩮᩉᩥ ᨸᩁᩥᨸᩪᩁᩮᨲ᩠ᩅᩣ ᨾᩉᩣᨸᩪᨩᩴ ᨠᩣᩁᩮᩈᩥ. ᩈᩮᩣ ¶ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩋᨶᩮᨠᩮᩈᩩ ᨩᩣᨲᩥᩈᨲᩈᩉᩔᩮᩈᩩ ᨸᩪᨩᨶᩦᨿᩮᩣ ᨾᩉᨴ᩠ᨵᨶᩮᩣ ᨾᩉᩣᨽᩮᩣᨣᩮᩣ ᩏᨽᨿᩈᩩᨡᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨽᩅᩈᨾ᩠ᨸᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᩅᩣᨿᨾᨶ᩠ᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑᪐. ᩈᩮᩣ ¶ ᩑᨠᨴᩥᩅᩈᩴ ᩋᨲ᩠ᨲᨶᩮᩣ ᨸᩩᨻ᩠ᨻᩮ ᨠᨲᨠᩩᩈᩃᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨶᩥᨻ᩠ᨻᩩᨲᩮ ᩃᩮᩣᨠᨶᩣᨳᨾ᩠ᩉᩦᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨳᨾᩮᩅ. ᨸᩥᨿᨴᩔᩦᨶᩁᩩᨲ᩠ᨲᨾᩮᨲᩥ ᨸᩥᨿᩴ ᩈᩮᩣᨾᨶᩔᩣᨠᩣᩁᩴ ᨴᩔᨶᩴ ᨿᩔ ᩈᩮᩣ ᨸᩥᨿᨴᩔᩦ, ᩌᩁᩮᩣᩉᨸᩁᩥᨱᩣᩉᨴ᩠ᩅᨲ᩠ᨲᩥᩴᩈᨾᩉᩣᨸᩩᩁᩥᩈᩃᨠ᩠ᨡᨱᩋᩈᩦᨲᩣᨶᩩᨻ᩠ᨿᨬ᩠ᨩᨶᨻ᩠ᨿᩣᨾᨸ᩠ᨸᨽᩣᨾᨱ᩠ᨯᩃᩮᩉᩥ ᩈᩣᨵᩩ ᨾᩉᩣᨩᨶᨸ᩠ᨸᩈᩣᨴᩴ ᨩᨶᨿᨶᩣᨠᩣᩁᨴᩔᨶᩮᩣᨲᩥ ᩋᨲ᩠ᨳᩮᩣ. ᨶᩁᩣᨶᩴ ᩏᨲ᩠ᨲᨾᩮᩣᨲᩥ ᨶᩁᩩᨲ᩠ᨲᨾᩮᩣ, ᨸᩥᨿᨴᩔᩦ ᨧ ᩈᩮᩣ ᨶᩁᩩᨲ᩠ᨲᨾᩮᩣ ᨧᩮᨲᩥ ᨸᩥᨿᨴᩔᩦᨶᩁᩩᨲ᩠ᨲᨾᩮᩣ, ᨲᩈ᩠ᨾᩥᩴ ᨸᩥᨿᨴᩔᩦᨶᩁᩩᨲ᩠ᨲᨾᩮ ᨶᩥᨻ᩠ᨻᩩᨲᩮ ᨵᩣᨲᩩᨣᨻ᩠ᨽᨾ᩠ᩉᩥ ᨾᩩᨲ᩠ᨲᩅᩮᨴᩥᩴ ᩋᩉᩴ ᩋᨠᩣᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨸᩩᨸ᩠ᨹᩣᨵᩣᩁᨲ᩠ᨳᩣᨿ ᨸᩁᩥᨿᩮᩣᩈᩣᨶᩮ ᩅᩮᨴᩥᨠᩣᩅᩃᨿᩴ ᩋᨠᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪑᪑. ᨾᨱᩦᩉᩥ ᨸᩁᩥᩅᩣᩁᩮᨲ᩠ᩅᩣᨲᩥ ᨾᨱᨲᩥ ᨩᩮᩣᨲᨲᩥ ᨸᨽᩣᩈᨲᩦᨲᩥ ᨾᨱᩥ, ᩋᨳ ᩅᩣ ᨩᨶᩣᨶᩴ ᨾᨶᩴ ᨸᩪᩁᩮᨶ᩠ᨲᩮᩣ ᩈᩮᩣᨾᨶᩔᩴ ᨠᩁᩮᩣᨶ᩠ᨲᩮᩣ ᩍᨲᩮᩣ ᨣᨲᩮᩣ ᨸᩅᨲ᩠ᨲᩮᩣᨲᩥ ᨾᨱᩥ, ᨩᩣᨲᩥᩁᨦ᩠ᨣᨾᨱᩥᩅᩮᩊᩩᩁᩥᨿᨾᨱᩥᩌᨴᩦᩉᩥ ᩋᨶᩮᨠᩮᩉᩥ ᨾᨱᩦᩉᩥ ᨠᨲᩅᩮᨴᩥᨠᩣᩅᩃᨿᩴ ᨸᩁᩥᩅᩣᩁᩮᨲ᩠ᩅᩣ ᩏᨲ᩠ᨲᨾᩴ ᨾᩉᩣᨸᩪᨩᩴ ᩋᨠᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩅᩮᨴᩥᨠᩣᩁᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᩈᨸᩁᩥᩅᩣᩁᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᩮᩣ ᨶᩣᨾ ᨩᩥᨶᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᨸᩁᩥᩅᩣᩁᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩣᩈᩩ ᨩᩣᨲᩦᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ¶ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨾᩉᨴ᩠ᨵᨶᩮᩣ ᨾᩉᩣᨽᩮᩣᨣᩮᩣ ᩋᩉᩮᩣᩈᩥ. ᩋᨳ ᨸᨴᩩᨾᩩᨲ᩠ᨲᩁᩮ ᨽᨣᩅᨲᩥ ᨸᩁᩥᨶᩥᨻ᩠ᨻᩩᨲᩮ ᨾᩉᩣᨩᨶᩮᩣ ᨲᩔ ᨵᩣᨲᩩᩴ ᨶᩥᨴᩉᩥᨲ᩠ᩅᩣ ᨾᩉᨶ᩠ᨲᩴ ᨧᩮᨲᩥᨿᩴ ᨠᩣᩁᩮᨲ᩠ᩅᩣ ᨸᩪᨩᩮᩈᩥ. ᨲᩈ᩠ᨾᩥᩴ ᨠᩣᩃᩮ ᩋᨿᩴ ᩏᨸᩣᩈᨠᩮᩣ ᨲᩔᩩᨸᩁᩥ ᨧᨶ᩠ᨴᨶᩈᩣᩁᩮᨶ ᨧᩮᨲᩥᨿᨥᩁᩴ ᨠᩁᩥᨲ᩠ᩅᩣ ᨾᩉᩣᨸᩪᨩᩴ ᩋᨠᩣᩈᩥ. ᩈᩮᩣ ᨲᩮᨶᩮᩅ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨠᩩᩈᩃᩴ ᨠᨲ᩠ᩅᩣ ᩈᨴ᩠ᨵᩣᨿ ᩈᩣᩈᨶᩮ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑᪕-᪘. ᩈᩮᩣ ¶ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩮᩣ ᨶᩣᨾ ᨩᩥᨶᩮᩣᨲᩥᩌᨴᩥᨾᩣᩉ. ᨲᨲ᩠ᨳ ¶ ᩒᨾᨲ᩠ᨲᨶ᩠ᨲᩥ ᩃᩣᨾᨠᨽᩣᩅᩴ ᨶᩦᨧᨽᩣᩅᩴ ᨴᩩᨠ᩠ᨡᩥᨲᨽᩣᩅᩴ ᩅᩣ ᨶ ᨸᩔᩣᨾᩥ ᨶ ᨩᩣᨶᩣᨾᩥ, ᨶ ᨴᩥᨭ᩠ᨮᨸᩩᨻ᩠ᨻᩮᩣ ᨾᨿᩣ ᨶᩦᨧᨽᩣᩅᩮᩣᨲᩥ ᩋᨲ᩠ᨳᩮᩣ. ᩈᩮᩈᩴ ᨸᩣᨠᨭᨾᩮᩅᩣᨲᩥ.

ᩈᨸᩁᩥᩅᩣᩁᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᩏᨾᩣᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᩥᨻ᩠ᨻᩩᨲᩮ ᩃᩮᩣᨠᨾᩉᩥᨲᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩏᨾᩣᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᩅᩈᨶ᩠ᨲᩮᩣ ᨶᩥᨻ᩠ᨻᩩᨲᩔ ᨽᨣᩅᨲᩮᩣ ᨧᩮᨲᩥᨿᨾᩉᩮ ᩅᨲ᩠ᨲᨾᩣᨶᩮ ᩍᨶ᩠ᨴᨶᩦᩃᨾᨱᩥᩅᨱ᩠ᨱᩴ ᩏᨾᩣᨸᩩᨸ᩠ᨹᩴ ᨣᩉᩮᨲ᩠ᩅᩣ ᨸᩪᨩᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᩈᩩᨣᨲᩦᩈᩩᨿᩮᩅ ᩈᩴᩈᩁᨶ᩠ᨲᩮᩣ ᨴᩥᨻ᩠ᨻᨾᩣᨶᩩᩈᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᨽᩅᩮ ᨻᩉᩩᩃᩴ ᨶᩦᩃᩅᨱ᩠ᨱᩮᩣ ᨩᩣᨲᩥᩈᨾ᩠ᨸᨶ᩠ᨶᩮᩣ ᩅᩥᨽᩅᩈᨾ᩠ᨸᨶ᩠ᨶᩮᩣ ᩋᩉᩮᩣᩈᩥ. ᩈᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪒᪑. ᩈᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨶᩥᨻ᩠ᨻᩩᨲᩮ ᩃᩮᩣᨠᨾᩉᩥᨲᩮᨲᩥᩌᨴᩥ ᩅᩩᨲ᩠ᨲᩴ. ᨲᨲ᩠ᨳ ᩃᩮᩣᨠᨾᩉᩥᨲᩮᨲᩥ ᩃᩮᩣᨠᩮᩉᩥ ᨾᩉᩥᨲᩮᩣ ᨸᩪᨩᩥᨲᩮᩣᨲᩥ ᩃᩮᩣᨠᨾᩉᩥᨲᩮᩣ, ᨲᩈ᩠ᨾᩥᩴ ᩃᩮᩣᨠᨾᩉᩥᨲᩮ ᩈᩥᨴ᩠ᨵᨲ᩠ᨳᨾ᩠ᩉᩥ ᨽᨣᩅᨲᩥ ᨸᩁᩥᨶᩥᨻ᩠ᨻᩩᨲᩮᨲᩥ ᩈᨾ᩠ᨻᨶ᩠ᨵᩮᩣ. ᩌᩉᩩᨲᩦᨶᩴᨸᨭᩥᨣ᩠ᨣᩉᩮᨲᩥ ᩌᩉᩩᨲᩥᨶᩮᩣ ᩅᩩᨧ᩠ᨧᨶ᩠ᨲᩥ ᨸᩪᨩᩣᩈᨠ᩠ᨠᩣᩁᩣ, ᨲᩮᩈᩴ ᩌᩉᩩᨲᩦᨶᩴ ᨸᨭᩥᨣ᩠ᨣᩉᩮᨲᩩᩴ ᩋᩁᩉᨲᩦᨲᩥ ᩌᩉᩩᨲᩦᨶᩴᨸᨭᩥᨣ᩠ᨣᩉᩮᩣ, ᩋᩃᩩᨲ᩠ᨲᨠᩥᨲᨶ᩠ᨲᩈᨾᩣᩈᩮᩣ, ᨲᩈ᩠ᨾᩥᩴ ᩌᩉᩩᨲᩦᨶᩴᨸᨭᩥᨣ᩠ᨣᩉᩮ ᨽᨣᩅᨲᩥ ᨸᩁᩥᨶᩥᨻ᩠ᨻᩩᨲᩮᨲᩥ ᩋᨲ᩠ᨳᩮᩣ.

᪒᪒. ᩏᨾᩣᨸᩩᨸ᩠ᨹᨶ᩠ᨲᩥ ¶ ᩏᨴ᩠ᨵᨾᩩᨴ᩠ᨵᩴ ᨶᩦᩃᨸᨽᩴ ᨾᩩᨬ᩠ᨧᨾᩣᨶᩴ ᨸᩩᨸ᩠ᨹᨲᩥ ᩅᩥᨠᩈᨲᩦᨲᩥ ᩏᨾᩣᨸᩩᨸ᩠ᨹᩴ, ᨲᩴ ᩏᨾᩣᨸᩩᨸ᩠ᨹᩴ ᨣᩉᩮᨲ᩠ᩅᩣ ᨧᩮᨲᩥᨿᩮ ᨸᩪᨩᩴ ᩋᨠᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩏᨾᩣᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᩋᨶᩩᩃᩮᨸᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩋᨶᩮᩣᨾᨴᩔᩦᨾᩩᨶᩥᨶᩮᩣᨲᩥᩌᨴᩥᨠᩴ ¶ ᩌᨿᩈ᩠ᨾᨲᩮᩣ ᩋᨶᩩᩃᩮᨸᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨶᩮᩣᨾᨴᩔᩥᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨾᩉᨴ᩠ᨵᨶᩮᩣ ᨾᩉᩣᨽᩮᩣᨣᩮᩣ ᨲᩔ ᨽᨣᩅᨲᩮᩣ ᨻᩮᩣᨵᩥᩁᩩᨠ᩠ᨡᩔ ᩅᩮᨴᩥᨠᩣᩅᩃᨿᩴ ᨠᩣᩁᩮᨲ᩠ᩅᩣ ᩈᩩᨵᩣᨠᨾ᩠ᨾᨬ᩠ᨧ ᨠᩣᩁᩮᨲ᩠ᩅᩣ ᩅᩣᩃᩩᨠᩈᨶ᩠ᨳᩁᨱᩴ ᨴᨴ᩠ᨴᩊ᩠ᩉᨾᩣᨶᩴ ᩁᨩᨲᩅᩥᨾᩣᨶᨾᩥᩅ ᨠᩣᩁᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᩈᩩᨡᨸ᩠ᨸᨲ᩠ᨲᩮᩣ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᨽᩅᩮ ᩁᨩᨲᩅᩥᨾᩣᨶᩁᨩᨲᨣᩮᩉᩁᨩᨲᨸᩣᩈᩣᨴᩮᩈᩩ ¶ ᩈᩩᨡᨾᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᨾᨶᩩᨿᩩᨲ᩠ᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪒᪖. ᩈᩮᩣ ᩋᨸᩁᨽᩣᨣᩮ ‘‘ᨠᩥᩴ ᨶᩩ ᨡᩮᩣ ᨠᩩᩈᩃᩴ ᨠᨲ᩠ᩅᩣ ᨾᨿᩣ ᩋᨿᩴ ᩅᩥᩈᩮᩈᩮᩣ ᩋᨵᩥᨣᨲᩮᩣ’’ᨲᩥ ᨸᩩᨻ᩠ᨻᩮᨶᩥᩅᩣᩈᩣᨶᩩᩔᨲᩥᨬᩣᨱᩮᨶ ᨸᨭᩥᨸᩣᨭᩥᨿᩣ ᩋᨶᩩᩔᩁᩥᨲ᩠ᩅᩣ ᨸᩩᨻ᩠ᨻᩮ ᨠᨲᨠᩩᩈᩃᩴ ᨩᩣᨶᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩋᨶᩮᩣᨾᨴᩔᩦᨾᩩᨶᩥᨶᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᩋᨶᩮᩣᨾᩴ ᩋᩃᩣᨾᨠᩴ ᨴᩔᨶᩴ ᨴᩔᨶᩦᨿᩴ ᩈᩁᩦᩁᩴ ᨿᩔ ᩈᩮᩣ ᩋᨶᩮᩣᨾᨴᩔᩦ, ᨴ᩠ᩅᨲ᩠ᨲᩥᩴᩈᨾᩉᩣᨸᩩᩁᩥᩈᩃᨠ᩠ᨡᨱᩋᩈᩦᨲᩣᨶᩩᨻ᩠ᨿᨬ᩠ᨩᨶᨻ᩠ᨿᩣᨾᨸ᩠ᨸᨽᩣᩈᨾᩩᨩ᩠ᨩᩃᩅᩥᩁᩣᨩᩥᨲᩈᩁᩦᩁᨲ᩠ᨲᩣ ᩈᩩᨶ᩠ᨴᩁᨴᩔᨶᩮᩣᨲᩥ ᩋᨲ᩠ᨳᩮᩣ. ᩈᩩᨵᩣᨿ ᨸᩥᨱ᩠ᨯᩴ ᨴᨲ᩠ᩅᩣᨶᩣᨲᩥ ᨻᩮᩣᨵᩥᨥᩁᩮ ᩅᩮᨴᩥᨠᩣᩅᩃᨿᩴ ᨠᩣᩁᩮᨲ᩠ᩅᩣ ᩈᨠᩃᩮ ᨻᩮᩣᨵᩥᨥᩁᩮ ᩈᩩᨵᩣᩃᩮᨸᨶᩴ ᨠᨲ᩠ᩅᩣᨲᩥ ᩋᨲ᩠ᨳᩮᩣ. ᨸᩣᨱᩥᨠᨾ᩠ᨾᩴ ᩋᨠᩣᩈᩉᨶ᩠ᨲᩥ ᩈᩣᩁᨠᨭ᩠ᨮᩮᨶ ᨹᩃᨠᨸᩣᨱᩥᨿᩮᩣ ᨠᨲ᩠ᩅᩣ ᨲᩣᩉᩥ ᨸᩣᨱᩦᩉᩥ ᨾᨭ᩠ᨮᨠᨾ᩠ᨾᩴ ᩋᨠᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩋᨶᩩᩃᩮᨸᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᨾᨣ᩠ᨣᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩏᨲ᩠ᨲᩁᩥᨲ᩠ᩅᩣᨶ ᨶᨴᩥᨠᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨾᨣ᩠ᨣᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ¶ ᨠᨲᩣᨵᩥᨠᩣᩁᩮᩣ ᩋᨶᩮᨠᩮᩈᩩ ᨽᩅᩮᩈᩩ ᨶᩥᨻ᩠ᨻᩣᨶᩣᨵᩥᨣᨾᨲ᩠ᨳᩣᨿ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᩃᩮᩣᨠᩈᨾ᩠ᨾᨲᩮ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨥᩁᩣᩅᩣᩈᩴ ᩅᩈᨶ᩠ᨲᩮᩣ ᩑᨠᨴᩥᩅᩈᩴ ᨽᨣᩅᨶ᩠ᨲᩴ ᩑᨠᩴ ᨶᨴᩥᩴ ᩏᨲ᩠ᨲᩁᩥᨲ᩠ᩅᩣ ᩅᨶᨶ᩠ᨲᩁᩴ ᨣᨧ᩠ᨨᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ‘‘ᩍᨴᩣᨶᩥ ᨾᨿᩣ ᨽᨣᩅᨲᩮᩣ ᨾᨣ᩠ᨣᩴ ᩈᨾᩴ ᨠᩣᨲᩩᩴ ᩅᨭ᩠ᨭᨲᩦ’’ᨲᩥ ᨧᩥᨶ᩠ᨲᩮᨲ᩠ᩅᩣ ᨠᩩᨴᩣᩃᨬ᩠ᨧ ᨸᩥᨭᨠᨬ᩠ᨧ ¶ ᩌᨴᩣᨿ ᨽᨣᩅᨲᩮᩣ ᨣᨾᨶᨾᨣ᩠ᨣᩴ ᩈᨾᩴ ᨠᨲ᩠ᩅᩣ ᩅᩣᩃᩩᨠᩴ ᩒᨠᩥᩁᩥᨲ᩠ᩅᩣ ᨽᨣᩅᨲᩮᩣ ᨸᩣᨴᩮ ᩅᨶ᩠ᨴᩥᨲ᩠ᩅᩣ, ‘‘ᨽᨶ᩠ᨲᩮ, ᩍᨾᩥᨶᩣ ᨾᨣ᩠ᨣᩣᩃᨦ᩠ᨠᩣᩁᨠᩁᨱᩮᨶ ᨶᩥᨻ᩠ᨻᨲ᩠ᨲᨶᩥᨻ᩠ᨻᨲ᩠ᨲᨭ᩠ᨮᩣᨶᩮ ᨸᩪᨩᨶᩦᨿᩮᩣ ᨽᩅᩮᨿ᩠ᨿᩴ, ᨶᩥᨻ᩠ᨻᩣᨶᨬ᩠ᨧ ᨸᩣᨸᩩᨱᩮᨿ᩠ᨿ’’ᨶ᩠ᨲᩥ ᨸᨲ᩠ᨳᨶᩴ ᩋᨠᩣᩈᩥ. ᨽᨣᩅᩣ ‘‘ᨿᨳᩣᨵᩥᨸ᩠ᨸᩣᨿᩴ ᩈᨾᩥᨩ᩠ᨫᨲᩪ’’ᨲᩥ ᩋᨶᩩᨾᩮᩣᨴᨶᩴ ᩅᨲ᩠ᩅᩣ ᨸᨠ᩠ᨠᩣᨾᩥ.

᪓᪒-᪓. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩈᨻ᩠ᨻᨲ᩠ᨳ ᨸᩪᨩᩥᨲᩮᩣ ᩋᩉᩮᩣᩈᩥ. ᩍᨾᩈ᩠ᨾᩥᩴ ᨸᨶ ᨻᩩᨴ᩠ᨵᩩᨸ᩠ᨸᩣᨴᩮ ᨸᩣᨠᨭᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᨸᨧ᩠ᨧᨠ᩠ᨡᨲᩮᩣ ᨬᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩏᨲ᩠ᨲᩁᩥᨲ᩠ᩅᩣᨶ ᨶᨴᩥᨠᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨶᨴᨲᩥ ᩈᨴ᩠ᨴᩴ ᨠᩁᩮᩣᨲᩥ ᨣᨧ᩠ᨨᨲᩦᨲᩥ ᨶᨴᩦ, ᨶᨴᩦᨿᩮᩅ ᨶᨴᩥᨠᩣ, ᨲᩴ ᨶᨴᩥᨠᩴ ᩏᨲ᩠ᨲᩁᩥᨲ᩠ᩅᩣ ᩋᨲᩥᨠ᩠ᨠᨾᩥᨲ᩠ᩅᩣᨲᩥ ᩋᨲ᩠ᨳᩮᩣ. ᨠᩩᨴᩣᩃᨸᩥᨭᨠᨾᩣᨴᩣᨿᩣᨲᩥ ¶ ᨠᩩ ᩅᩩᨧ᩠ᨧᨲᩥ ᨸᨳᩅᩦ, ᨲᩴ ᩅᩥᨴᩣᩃᨶᩮ ᨸᨴᩣᩃᨶᩮ ᨨᩥᨶ᩠ᨴᨶᩮ ᩋᩃᨶ᩠ᨲᩥ ᨠᩩᨴᩣᩃᩴ, ᨸᩥᨭᨠᩴ ᩅᩩᨧ᩠ᨧᨲᩥ ᨸᩴᩈᩩᩅᩣᩃᩥᨠᩣᨴᩥᩅᩣᩉᨠᩴ, ᨲᩣᩃᨸᨱ᩠ᨱᩅᩮᨲ᩠ᨲᩃᨲᩣᨴᩦᩉᩥ ᨠᨲᨽᩣᨩᨶᩴ, ᨠᩩᨴᩣᩃᨬ᩠ᨧ ᨸᩥᨭᨠᨬ᩠ᨧ ᨠᩩᨴᩣᩃᨸᩥᨭᨠᩴ, ᨲᩴ ᩌᨴᩣᨿ ᨣᩉᩮᨲ᩠ᩅᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨾᨣ᩠ᨣᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᨹᩃᨠᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨿᩣᨶᨠᩣᩁᩮᩣ ᨸᩩᩁᩮ ᩌᩈᩥᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨹᩃᨠᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩮᩈᩩ ᩋᨲ᩠ᨲᨽᩣᩅᩮᩈᩩ ᨠᨲᨸᩩᨬ᩠ᨬᩈᨾ᩠ᨽᩣᩁᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᩅᨯ᩠ᨰᨠᩥᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᨧᨶ᩠ᨴᨶᩮᨶ ᩌᩃᨾ᩠ᨻᨶᨹᩃᨠᩴ ᨠᨲ᩠ᩅᩣ ᨽᨣᩅᨲᩮᩣ ᩋᨴᩣᩈᩥ. ᨽᨣᩅᩣ ᨲᩔᩣᨶᩩᨾᩮᩣᨴᨶᩴ ᩋᨠᩣᩈᩥ.

᪓᪗. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩈᨻ᩠ᨻᨲ᩠ᨳ ᨠᩣᩃᩮ ᨧᩥᨲ᩠ᨲᩈᩩᨡᨸᩦᨱᩥᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᩈᨬ᩠ᨩᩣᨲᨸ᩠ᨸᩈᩣᨴᩮᩣ ᨸᨻ᩠ᨻᨩᩥᨲ᩠ᩅᩣ ᩅᩣᨿᨾᨶ᩠ᨲᩮᩣ ᨶᨧᩥᩁᩔᩮᩅ ᩈᩉ ᨸᨭᩥᩈᨾ᩠ᨽᩥᨴᩣᩉᩥ ᩋᩁᩉᨲ᩠ᨲᩴ ¶ ᨸᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ¶ ᨿᩣᨶᨠᩣᩁᩮᩣ ᨸᩩᩁᩮ ᩌᩈᩥᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨿᩣᨶᨠᩣᩁᩮᩣᨲᩥ ᨿᨶ᩠ᨲᩥ ᩑᨲᩮᨶ ᩍᨧ᩠ᨨᩥᨲᩥᨧ᩠ᨨᩥᨲᨭ᩠ᨮᩣᨶᨶ᩠ᨲᩥ ᨿᩣᨶᩴ, ᨲᩴ ᨠᩁᩮᩣᨲᩦᨲᩥ ᨿᩣᨶᨠᩣᩁᩮᩣ, ᨸᩩᩁᩮ ᨻᩩᨴ᩠ᨵᨴᩔᨶᩈᨾᨿᩮ ᩋᩉᩴ ᨿᩣᨶᨠᩣᩁᩮᩣ ᩌᩈᩥᩴ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ. ᨧᨶ᩠ᨴᨶᩴ ᨹᩃᨠᩴ ᨠᨲ᩠ᩅᩣᨲᩥ ᨧᨶ᩠ᨴᨲᩥ ᨸᩁᩥᩊᩣᩉᩴ ᩅᩪᨸᩈᨾᩮᨲᩦᨲᩥ ᨧᨶ᩠ᨴᨶᩴ. ᩋᨳ ᩅᩣ ᨧᨶ᩠ᨴᨶ᩠ᨲᩥ ᩈᩩᨣᨶ᩠ᨵᩅᩣᩈᨶᨲ᩠ᨳᩴ ᩈᩁᩦᩁᩴ ᩅᩥᩃᩥᨾ᩠ᨸᨶ᩠ᨲᩥ ᩑᨲᩮᨶᩣᨲᩥ ᨧᨶ᩠ᨴᨶᩴ, ᨲᩴ ᩌᩃᨾ᩠ᨻᨶᨹᩃᨠᩴ ᨠᨲ᩠ᩅᩣ. ᩃᩮᩣᨠᨻᨶ᩠ᨵᩩᨶᩮᩣᨲᩥ ᩈᨠᩃᩃᩮᩣᨠᩔ ᨻᨶ᩠ᨵᩩ ᨬᩣᨲᩥᨽᩪᨲᩮᩣᨲᩥ ᩃᩮᩣᨠᨻᨶ᩠ᨵᩩ, ᨲᩔ ᩃᩮᩣᨠᨻᨶ᩠ᨵᩩᨶᩮᩣ ᩈᨲ᩠ᨳᩩᩔ ᩋᨴᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨹᩃᨠᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᩅᨭᩴᩈᨠᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩩᨾᩮᨵᩮᩣ ᨶᩣᨾ ᨶᩣᨾᩮᨶᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩅᨭᩴᩈᨠᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨾᩩᨶᩥᨶ᩠ᨴᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩩᨾᩮᨵᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᨲᨲ᩠ᨳ ᩌᨴᩦᨶᩅᩴ ᨴᩥᩈ᩠ᩅᩣ ᨣᩮᩉᩴ ᨸᩉᩣᨿ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᨾᩉᩣᩅᨶᩮ ᩅᩥᩉᩣᩈᩥ. ᨲᩈ᩠ᨾᩥᩴ ᩈᨾᨿᩮ ᩈᩩᨾᩮᨵᩮᩣ ᨽᨣᩅᩣ ᩅᩥᩅᩮᨠᨠᩣᨾᨲᩣᨿ ᨲᩴ ᩅᨶᩴ ᩈᨾ᩠ᨸᩣᨸᩩᨱᩥ. ᩋᨳ ᩈᩮᩣ ᨲᩣᨸᩈᩮᩣ ᨽᨣᩅᨶ᩠ᨲᩴ ¶ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩅᩥᨠᩈᩥᨲᩴ ᩈᩊᩃᨸᩩᨸ᩠ᨹᩴ ᨣᩉᩮᨲ᩠ᩅᩣ ᩅᨭᩴᩈᨠᩣᨠᩣᩁᩮᨶ ᨣᨶ᩠ᨳᩮᨲ᩠ᩅᩣ ᨽᨣᩅᨲᩮᩣ ᨸᩣᨴᨾᩪᩃᩮ ᨮᨸᩮᨲ᩠ᩅᩣ ᨸᩪᨩᩮᩈᩥ. ᨽᨣᩅᩣ ᨲᩔ ᨧᩥᨲ᩠ᨲᨸ᩠ᨸᩈᩣᨴᨲ᩠ᨳᩣᨿ ᩋᨶᩩᨾᩮᩣᨴᨶᨾᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᨠᩩᩃᩮ ᨩᩣᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨴ᩠ᨵᩮᩣ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪔᪓. ᩈᩮᩣ ᩋᨸᩁᨽᩣᨣᩮ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩩᨾᩮᨵᩮᩣ ᨶᩣᨾ ᨶᩣᨾᩮᨶᩣᨲᩥᩌᨴᩥ ᩅᩩᨲ᩠ᨲᩴ. ᩅᩥᩅᩮᨠᨾᨶᩩᨻᩕᩪᩉᨶ᩠ᨲᩮᩣᨲᩥ ᨩᨶᩣᨠᩥᨱ᩠ᨱᨲᩴ ᨸᩉᩣᨿ ᨩᨶᩅᩥᩅᩮᨠᩴ ᨧᩥᨲ᩠ᨲᩅᩥᩅᩮᨠᨬ᩠ᨧ ᩋᨶᩩᨻᩕᩪᩉᨶ᩠ᨲᩮᩣ ᩅᨯ᩠ᨰᩮᨶ᩠ᨲᩮᩣ ᨻᩉᩩᩃᩦᨠᩁᩮᩣᨶ᩠ᨲᩮᩣ ᨾᩉᩣᩅᨶᩴ ᩋᨩ᩠ᨫᩮᩣᨣᩣᩉᩥ ᨸᩣᩅᩥᩈᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩅᨭᩴᩈᨠᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᨸᩃ᩠ᩃᨦ᩠ᨠᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩩᨾᩮᨵᩔ ¶ ¶ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᩃ᩠ᩃᨦ᩠ᨠᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩮᩈᩩ ᨽᩅᩮᩈᩩ ᨶᩥᨻ᩠ᨻᩣᨶᩣᨵᩥᨣᨾᨲ᩠ᨳᩣᨿ ᨠᨲᨸᩩᨬ᩠ᨬᩪᨸᨧᨿᩮᩣ ᩈᩩᨾᩮᨵᩔ ᨽᨣᩅᨲᩮᩣ ᨠᩣᩃᩮ ᨣᩉᨸᨲᩥᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨾᩉᩣᨽᩮᩣᨣᩈᨾ᩠ᨸᨶ᩠ᨶᩮᩣ ᩈᨲ᩠ᨳᩁᩥ ᨸᩈᩦᨴᩥᨲ᩠ᩅᩣ ᨵᨾ᩠ᨾᩴ ᩈᩩᨲ᩠ᩅᩣ ᨲᩔ ᩈᨲ᩠ᨳᩩᨶᩮᩣ ᩈᨲ᩠ᨲᩁᨲᨶᨾᨿᩴ ᨸᩃ᩠ᩃᨦ᩠ᨠᩴ ᨠᩣᩁᩮᨲ᩠ᩅᩣ ᨾᩉᨶ᩠ᨲᩴ ᨸᩪᨩᩴ ᩋᨠᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩈᨻ᩠ᨻᨲ᩠ᨳ ᨸᩪᨩᩥᨲᩮᩣ ᩋᩉᩮᩣᩈᩥ. ᩈᩮᩣ ᩋᨶᩩᨠ᩠ᨠᨾᩮᨶ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᨲ᩠ᩅᩣ ᨸᩩᨻ᩠ᨻᩮ ᨠᨲᨸᩩᨬ᩠ᨬᨶᩣᨾᩮᨶ ᨸᩃ᩠ᩃᨦ᩠ᨠᨴᩣᨿᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ ᩋᩉᩮᩣᩈᩥ. ᩉᩮᨭ᩠ᨮᩣ ᩅᩥᨿ ᩏᨸᩁᩥᨸᩥ ᨸᩩᨻ᩠ᨻᩮ ᨠᨲᨸᩩᨬ᩠ᨬᨶᩣᨾᩮᨶ ᨳᩮᩁᩣᨶᩴ ᨶᩣᨾᩣᨶᩥ ᩑᩅᨾᩮᩅ ᩅᩮᨴᩥᨲᨻ᩠ᨻᩣᨶᩥ.

᪔᪗. ᩈᩮᩣ ᩑᨠᨴᩥᩅᩈᩴ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩩᨾᩮᨵᩔ ᨽᨣᩅᨲᩮᩣᨲᩥᩌᨴᩥᨾᩣᩉ. ᨸᩃ᩠ᩃᨦ᩠ᨠᩮᩣ ᩉᩥ ᨾᨿᩣ ᨴᩥᨶ᩠ᨶᩮᩣᨲᩥ ᨸᩃ᩠ᩃᨦ᩠ᨠᩴ ᩐᩁᩩᨻᨴ᩠ᨵᩣᩈᨶᩴ ᨠᨲ᩠ᩅᩣ ᨿᨲ᩠ᨳ ᩏᨸᩅᩦᩈᨶ᩠ᨲᩥ ᨶᩥᩈᩦᨴᨶ᩠ᨲᩥ, ᩈᩮᩣ ᨸᩃ᩠ᩃᨦ᩠ᨠᩮᩣᨲᩥ ᩅᩩᨧ᩠ᨧᨲᩥ, ᩈᩮᩣ ᨸᩃ᩠ᩃᨦ᩠ᨠᩮᩣ ᩈᨲ᩠ᨲᩁᨲᨶᨾᨿᩮᩣ ᨾᨿᩣ ᨴᩥᨶ᩠ᨶᩮᩣ ᨸᩪᨩᩥᨲᩮᩣᨲᩥ ᩋᨲ᩠ᨳᩮᩣ. ᩈᩏᨲ᩠ᨲᩁᩈᨸᨧ᩠ᨨᨴᩮᩣᨲᩥ ᩈᩉ ᩏᨲ᩠ᨲᩁᨧ᩠ᨨᨴᩮᨶ ᩈᩉ ᨸᨧ᩠ᨨᨴᩮᨶ ᩈᩏᨲ᩠ᨲᩁᩈᨸᨧ᩠ᨨᨴᩮᩣ, ᩏᨸᩁᩥᩅᩥᨲᩣᨶᩴ ᨻᨶ᩠ᨵᩥᨲ᩠ᩅᩣ ᩌᩈᨶᩴ ᩏᨲ᩠ᨲᨾᩅᨲ᩠ᨳᩮᩉᩥ ᩋᨧ᩠ᨨᩣᨴᩮᨲ᩠ᩅᩣᨲᩥ ᩋᨲ᩠ᨳᩮᩣ. ᩈᩮᩈᩴ ᨸᩣᨠᨭᨾᩮᩅᩣᨲᩥ.

ᨸᩃ᩠ᩃᨦ᩠ᨠᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᨸᨶ᩠ᨶᩁᩈᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪖. ᨻᨶ᩠ᨵᩩᨩᩦᩅᨠᩅᨣ᩠ᨣᩮᩣ

᪑. ᨻᨶ᩠ᨵᩩᨩᩦᩅᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨧᨶ᩠ᨴᩴᩅ ¶ ¶ ᩅᩥᨾᩃᩴ ᩈᩩᨴ᩠ᨵᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨻᨶ᩠ᨵᩩᨩᩦᩅᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩣᨿᩈ᩠ᨾᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨡᩥᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ¶ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᩅᩈᨶ᩠ᨲᩮᩣ ᩈᩥᨡᩥᩔ ᨽᨣᩅᨲᩮᩣ ᩁᩪᨸᨠᩣᨿᩈᨾ᩠ᨸᨲ᩠ᨲᩥᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨻᨶ᩠ᨵᩩᨩᩦᩅᨠᨸᩩᨸ᩠ᨹᩣᨶᩥ ᨣᩉᩮᨲ᩠ᩅᩣ ᨽᨣᩅᨲᩮᩣ ᨸᩣᨴᨾᩪᩃᩮ ᨸᩪᨩᩮᩈᩥ. ᨽᨣᩅᩣ ᨲᩔ ᨧᩥᨲ᩠ᨲᨸ᩠ᨸᩈᩣᨴᩅᨯ᩠ᨰᨶᨲ᩠ᨳᩣᨿ ᩋᨶᩩᨾᩮᩣᨴᨶᨾᨠᩣᩈᩥ. ᩈᩮᩣ ᨿᩣᩅᨲᩣᨿᩩᨲᩴ ᨮᨲ᩠ᩅᩣ ᨲᩮᨶᩮᩅ ᨸᩩᨬ᩠ᨬᩮᨶ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ ᨨ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧ ᨧᨠ᩠ᨠᩅᨲ᩠ᨲᩥᩌᨴᩥᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩔ ᩋᨾ᩠ᩉᩣᨠᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ ᩏᨸ᩠ᨸᨶ᩠ᨶᨠᩣᩃᩮ ᨣᩉᨸᨲᩥᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩁᩪᨸᨣ᩠ᨣᨿᩈᨣ᩠ᨣᨸ᩠ᨸᨲ᩠ᨲᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᩈᨴ᩠ᨵᩣᨩᩣᨲᩮᩣ ᨣᩮᩉᩴ ᨸᩉᩣᨿ ᨸᨻ᩠ᨻᨩᩥᨲᩮᩣ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪑. ᩈᩮᩣ ᨸᩩᨻ᩠ᨻᩮᨶᩥᩅᩣᩈᨬᩣᨱᩮᨶ ᨸᩩᨻ᩠ᨻᩮ ᨠᨲᨠᩩᩈᩃᨠᨾ᩠ᨾᩴ ᩋᨶᩩᩔᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨧᨶ᩠ᨴᩴᩅ ᩅᩥᨾᩃᩴ ᩈᩩᨴ᩠ᨵᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨧᨶ᩠ᨴᩴᩅ ᩅᩥᨾᩃᩴ ᩈᩩᨴ᩠ᨵᨶ᩠ᨲᩥ ᩋᨻ᩠ᨽᩣ, ᨾᩉᩥᨠᩣ, ᨵᩩᨾᩮᩣ, ᩁᨩᩮᩣ, ᩁᩣᩉᩪᨲᩥ ᩍᨾᩮᩉᩥ ᩏᨸᨠ᩠ᨠᩥᩃᩮᩈᨾᩃᩮᩉᩥ ᩅᩥᨾᩩᨲ᩠ᨲᩴ ᨧᨶ᩠ᨴᩴ ᩍᩅ ᨴᩥᨿᨯ᩠ᨰᩈᩉᩔᩩᨸᨠ᩠ᨠᩥᩃᩮᩈᨾᩃᩣᨶᩴ ᨸᩉᩦᨶᨲ᩠ᨲᩣ ᩅᩥᨾᩃᩴ ᨶᩥᨠ᩠ᨠᩥᩃᩮᩈᨲ᩠ᨲᩣ ᩈᩩᨴ᩠ᨵᩴ ᨸᩈᨶ᩠ᨶᩴ ᩈᩥᨡᩥᩴ ᩈᨾ᩠ᨻᩩᨴ᩠ᨵᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨠᩥᩃᩮᩈᨠᨴ᩠ᨴᨾᩣᨶᩴ ᩋᨽᩣᩅᩮᨶ ᩋᨶᩣᩅᩥᩃᩴ. ᨶᨶ᩠ᨴᩦᨽᩅᩈᨦ᩠ᨡᩣᨲᩣᨿ ᨻᩃᩅᩈ᩠ᨶᩮᩉᩣᨿ ᨸᩁᩥᩈᨾᨶ᩠ᨲᨲᩮᩣ ᨡᩦᨱᨲ᩠ᨲᩣ ᨶᨶ᩠ᨴᩦᨽᩅᨸᩁᩥᨠ᩠ᨡᩦᨱᩴ. ᨲᩥᨱ᩠ᨱᩴ ᩃᩮᩣᨠᩮᨲᩥ ᩃᩮᩣᨠᨲ᩠ᨲᨿᨲᩮᩣ ᨲᩥᨱ᩠ᨱᩴ ᩏᨲ᩠ᨲᩥᨱ᩠ᨱᩴ ᩋᨲᩥᨠ᩠ᨠᨶ᩠ᨲᩴ. ᩅᩥᩈᨲ᩠ᨲᩥᨠᨶ᩠ᨲᩥ ᩅᩥᩈᨲ᩠ᨲᩥᨠᩴ ᩅᩩᨧ᩠ᨧᨲᩥ ᨲᨱ᩠ᩉᩣ, ᨶᩥᨲ᩠ᨲᨱ᩠ᩉᨶ᩠ᨲᩥ ᩋᨲ᩠ᨳᩮᩣ.

᪒. ᨶᩥᨻ᩠ᨻᩣᨸᨿᨶ᩠ᨲᩴ ᨩᨶᨲᨶ᩠ᨲᩥ ᨵᨾ᩠ᨾᩅᩔᩴ ᩅᩔᨶ᩠ᨲᩮᩣ ᨩᨶᨲᩴ ᨩᨶᩈᨾᩪᩉᩴ ᨠᩥᩃᩮᩈᨸᩁᩥᩊᩣᩉᩣᨽᩣᩅᩮᨶ ᨶᩥᨻ᩠ᨻᩣᨸᨿᨶ᩠ᨲᩴ ᩅᩪᨸᩈᨾᩮᨶ᩠ᨲᩴ. ᩈᨿᩴ ᩈᩴᩈᩣᩁᨲᩮᩣ ᨲᩥᨱ᩠ᨱᩴ, ᩈᨻ᩠ᨻᩈᨲ᩠ᨲᩮ ᩈᩴᩈᩣᩁᨲᩮᩣ ᨲᩣᩁᨿᨶ᩠ᨲᩴ ᩋᨲᩥᨠ᩠ᨠᨾᩮᨶ᩠ᨲᩴ ᨧᨲᩩᨶ᩠ᨶᩴ ᩈᨧ᩠ᨧᩣᨶᩴ ᨾᩩᨶᨶᨲᩮᩣ ᨩᩣᨶᨶᨲᩮᩣ ᨾᩩᨶᩥᩴ ᩈᩥᨡᩥᩴ ᩈᨾ᩠ᨻᩩᨴ᩠ᨵᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᩅᨶᩈ᩠ᨾᩥᩴ ᨫᩣᨿᨾᩣᨶᨶ᩠ᨲᩥ ᩌᩁᨾ᩠ᨾᨱᩪᨸᨶᩥᨩ᩠ᨫᩣᨶᩃᨠ᩠ᨡᨱᩪᨸᨶᩥᨩ᩠ᨫᩣᨶᩮᩉᩥ ᨫᩣᨿᨶ᩠ᨲᩴ ᨧᩥᨶ᩠ᨲᩮᨶ᩠ᨲᩴ ᨧᩥᨲ᩠ᨲᩮᨶ ᨽᩣᩅᩮᨶ᩠ᨲᩴ ᩅᨶᨾᨩ᩠ᨫᩮᨲᩥ ᩋᨲ᩠ᨳᩮᩣ. ᩑᨠᨣ᩠ᨣᩴ ¶ ᩑᨠᨣ᩠ᨣᨧᩥᨲ᩠ᨲᩴ ᩈᩩᩈᨾᩣᩉᩥᨲᩴ ᩈᩩᨭ᩠ᨮᩩ ᩌᩁᨾ᩠ᨾᨱᩮ ᩌᩉᩥᨲᩴ ᨮᨸᩥᨲᨧᩥᨲ᩠ᨲᩴ ᩈᩥᨡᩥᩴ ᨾᩩᨶᩥᩴ ᨴᩥᩈ᩠ᩅᩣᨲᩥ ᩈᨾ᩠ᨻᨶ᩠ᨵᩮᩣ.

᪓. ᨻᨶ᩠ᨵᩩᨩᩦᩅᨠᨸᩩᨸ᩠ᨹᩣᨶᩦᨲᩥ ᨻᨶ᩠ᨵᩪᨶᩴ ᨬᩣᨲᩦᨶᩴ ᨩᩦᩅᨠᩴ ᨩᩦᩅᩥᨲᨶᩥᩔᨿᩴ ᩉᨴᨿᨾᩴᩈᩃᩮᩣᩉᩥᨲᩴ ᨻᨶ᩠ᨵᩩᨩᩦᩅᨠᩴ ᩉᨴᨿᨾᩴᩈᩃᩮᩣᩉᩥᨲᩈᨾᩣᨶᩅᨱ᩠ᨱᩴ ᨸᩩᨸ᩠ᨹᩴ ᨻᨶ᩠ᨵᩩᨩᩦᩅᨠᨸᩩᨸ᩠ᨹᩴ ᨣᩉᩮᨲ᩠ᩅᩣ ᩈᩥᨡᩥᨶᩮᩣ ᩃᩮᩣᨠᨻᨶ᩠ᨵᩩᨶᩮᩣ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨻᨶ᩠ᨵᩩᨩᩦᩅᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᨲᨾ᩠ᨻᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᩁᨠᨾ᩠ᨾᩣᨿᨶᩮ ¶ ¶ ᨿᩩᨲ᩠ᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨲᨾ᩠ᨻᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᩌᨿᩈ᩠ᨾᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᩥᨿᨴᩔᩥᩔ ᨽᨣᩅᨲᩮᩣ ᨠᩣᩃᩮ ᨠᩮᨶᨧᩥ ᨸᩩᩁᩮ ᨠᨲᩮᨶ ᩋᨠᩩᩈᩃᨠᨾ᩠ᨾᩮᨶ ᨴᩩᨣ᩠ᨣᨲᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨸᩁᩮᩈᩴ ᨠᨾ᩠ᨾᩴ ᨠᨲ᩠ᩅᩣ ᨽᨲᩥᨿᩣ ᨩᩦᩅᩥᨠᩴ ᨠᨸ᩠ᨸᩮᩈᩥ. ᩈᩮᩣ ᩑᩅᩴ ᨴᩩᨠ᩠ᨡᩮᨶ ᩅᩈᨶ᩠ᨲᩮᩣ ᨸᩁᩮᩈᩴ ᩋᨸᩁᩣᨵᩴ ᨠᨲ᩠ᩅᩣ ᨾᩁᨱᨽᨿᩮᨶ ᨸᩃᩣᨿᩥᨲ᩠ᩅᩣ ᩅᨶᩴ ᨸᩣᩅᩥᩈᩥ. ᨲᨲ᩠ᨳ ᨣᨲᨭ᩠ᨮᩣᨶᩮ ᨸᩣᨭᩃᩥᨻᩮᩣᨵᩥᩴ ᨴᩥᩈ᩠ᩅᩣ ᩅᨶ᩠ᨴᩥᨲ᩠ᩅᩣ ᩈᨾ᩠ᨾᨩ᩠ᨩᩥᨲ᩠ᩅᩣ ᩑᨠᩈ᩠ᨾᩥᩴ ᩁᩩᨠ᩠ᨡᩮ ᨲᨾ᩠ᨻᩅᨱ᩠ᨱᩴ ᨸᩩᨸ᩠ᨹᩴ ᨴᩥᩈ᩠ᩅᩣ ᨲᩴ ᩈᨻ᩠ᨻᩴ ᨠᨱ᩠ᨱᩥᨠᩮ ᩒᨧᩥᨶᩥᨲ᩠ᩅᩣ ᨻᩮᩣᨵᩥᨸᩪᨩᩴ ᩋᨠᩣᩈᩥ. ᨲᨲ᩠ᨳ ᨧᩥᨲ᩠ᨲᩴ ᨸᩈᩣᨴᩮᨲ᩠ᩅᩣ ᩅᨶ᩠ᨴᩥᨲ᩠ᩅᩣ ᨸᩃ᩠ᩃᨦ᩠ᨠᨾᩣᨽᩩᨩᩥᨲ᩠ᩅᩣ ᨶᩥᩈᩦᨴᩥ. ᨲᩈ᩠ᨾᩥᩴ ᨡᨱᩮ ᨲᩮ ᨾᨶᩩᩔᩣ ᨸᨴᩣᨶᩩᨸᨴᩥᨠᩴ ᩋᨶᩩᨻᨶ᩠ᨵᩥᨲ᩠ᩅᩣ ᨲᨲ᩠ᨳ ᩋᨣᨾᩴᩈᩩ. ᩈᩮᩣ ᨲᩮ ᨴᩥᩈ᩠ᩅᩣ ᨻᩮᩣᨵᩥᩴ ᩌᩅᨩ᩠ᨩᩮᨶ᩠ᨲᩮᩣᩅ ᨸᩃᩣᨿᩥᨲ᩠ᩅᩣ ᨽᨿᩣᨶᨠᩮ ᨣᩦᩁᩥᨴᩩᨣ᩠ᨣᨸᨸᩣᨲᩮ ᨸᨲᩥᨲ᩠ᩅᩣ ᨾᩁᩥ.

᪗. ᩈᩮᩣ ᨻᩮᩣᨵᩥᨸᩪᨩᩣᨿ ᩋᨶᩩᩔᩁᩥᨲᨲ᩠ᨲᩣ ᨲᩮᨶᩮᩅ ᨸᩦᨲᩥᩈᩮᩣᨾᨶᩔᩮᨶ ᨲᩣᩅᨲᩥᩴᩈᩣᨴᩦᩈᩩ ᩏᨸᨸᨶ᩠ᨶᩮᩣ ᨨ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧ ᨧᨠ᩠ᨠᩅᨲ᩠ᨲᩥᩌᨴᩥᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩉᩩᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᩁᨠᨾ᩠ᨾᩣᨿᨶᩮ ᨿᩩᨲ᩠ᨲᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᨸᩁᩮᩈᩴ ᨠᨾ᩠ᨾᩣᨶᩥ ᨸᩁᨠᨾ᩠ᨾᩣᨶᩥ, ᨸᩁᨠᨾ᩠ᨾᩣᨶᩴ ᩌᨿᨶᩮ ᨠᩁᨱᩮ ᩅᩣᩉᨶᩮ ᨵᩣᩁᨱᩮ ᨿᩩᨲ᩠ᨲᩮᩣ ᨿᩮᩣᨩᩥᨲᩮᩣ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᨸᩣᨠᨭᨾᩮᩅᩣᨲᩥ.

ᨲᨾ᩠ᨻᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᩅᩦᨳᩥᩈᨾ᩠ᨾᨩ᩠ᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩏᨴᩮᨶ᩠ᨲᩴ ¶ ᩈᨲᩁᩴᩈᩥᩴ ᩅᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩅᩦᨳᩥᩈᨾ᩠ᨾᨩ᩠ᨩᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩮᩈᩩ ᨩᩣᨲᩥᩈᨲᩮᩈᩩ ᨠᨲᨸᩩᨬ᩠ᨬᩈᨬ᩠ᨧᨿᩮᩣ ᩈᩥᨡᩥᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨥᩁᩣᩅᩣᩈᩴ ᩅᩈᨶ᩠ᨲᩮᩣ ᨶᨣᩁᩅᩣᩈᩦᩉᩥ ᩈᨴ᩠ᨵᩥᩴ ᩅᩦᨳᩥᩴ ᩈᨩ᩠ᨩᩮᨲ᩠ᩅᩣ ᨶᩦᨿᨾᩣᨶᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩅᩦᨳᩥᩴ ᩈᨾᩴ ᨠᨲ᩠ᩅᩣ ᨵᨩᩴ ᨲᨲ᩠ᨳ ᩏᩔᩣᨸᩮᩈᩥ.

᪑᪕. ᩈᩮᩣ ¶ ᨲᩮᨶᩮᩅ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨻᩉᩩᨾᩣᨶᩉᨴᨿᩮᩣ ᨸᨻ᩠ᨻᨩᩥᨲ᩠ᩅᩣ ᩃᨴ᩠ᨵᩪᨸᩈᨾ᩠ᨸᨴᩮᩣ ᨶᨧᩥᩁᩔᩮᩅ ᩋᩁᩉᩣ ᩉᩩᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩋᨶᩩᩔᩁᨶ᩠ᨲᩮᩣ ᨸᨧ᩠ᨧᨠ᩠ᨡᨲᩮᩣ ᨩᩣᨶᩥᨲ᩠ᩅᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩏᨴᩮᨶ᩠ᨲᩴ ᩈᨲᩁᩴᩈᩥᩴ ᩅᩣᨲᩥᩌᨴᩥᨾᩣᩉ. ᨲᨲ᩠ᨳ ¶ ᩏᨴᩮᨶ᩠ᨲᩴ ᩏᨣ᩠ᨣᨧ᩠ᨨᨶ᩠ᨲᩴ ᩈᨲᩁᩴᩈᩥᩴ ᩈᨲᨸᨽᩴ. ᩈᨲᩁᩴᩈᩦᨲᩥ ᨴᩮᩈᨶᩣᩈᩦᩈᨾᨲ᩠ᨲᩴ, ᩋᨶᩮᨠᩈᨲᩈᩉᩔᨸᨽᩴ ᩈᩪᩁᩥᨿᩴ ᩍᩅᩣᨲᩥ ᩋᨲ᩠ᨳᩮᩣ. ᨸᩦᨲᩁᩴᩈᩥᩴᩅ ᨽᩣᨱᩩᨾᨶ᩠ᨲᩥ ᨸᩦᨲᩁᩴᩈᩥᩴ ᩈᩴᨠᩩᨧᩥᨲᨸᨽᩴ ᨽᩣᨱᩩᨾᩴ ᨸᨽᩣᩅᨶ᩠ᨲᩴ ᨧᨶ᩠ᨴᨾᨱ᩠ᨯᩃᩴ ᩍᩅ ᩈᨾ᩠ᨻᩩᨴ᩠ᨵᩴ ᨴᩥᩈ᩠ᩅᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩅᩦᨳᩥᩈᨾ᩠ᨾᨩ᩠ᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᨠᨠ᩠ᨠᩣᩁᩩᨸᩩᨸ᩠ᨹᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨴᩮᩅᨸᩩᨲ᩠ᨲᩮᩣ ᩋᩉᩴ ᩈᨶ᩠ᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨠᨠ᩠ᨠᩣᩁᩩᨸᩩᨸ᩠ᨹᨸᩪᨩᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᨠᨲᨸᩩᨬ᩠ᨬᩈᨬ᩠ᨧᨿᩮᩣ ᩈᩥᨡᩥᩔ ᨽᨣᩅᨲᩮᩣ ᨠᩣᩃᩮ ᨽᩩᨾ᩠ᨾᨭ᩠ᨮᨠᨴᩮᩅᨸᩩᨲ᩠ᨲᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩮᩣ ᩈᩥᨡᩥᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᨴᩥᩈ᩠ᩅᩣ ᨴᩥᨻ᩠ᨻᨠᨠ᩠ᨠᩣᩁᩩᨸᩩᨸ᩠ᨹᩴ ᨣᩉᩮᨲ᩠ᩅᩣ ᨸᩪᨩᩮᩈᩥ.

᪒᪑. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩑᨠᨲᩥᩴᩈᨠᨸ᩠ᨸᨻ᩠ᨽᨶ᩠ᨲᩁᩮ ᩏᨽᨿᩈᩩᨡᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩁᩥ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩉᩩᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᨸᨧ᩠ᨧᨠ᩠ᨡᨲᩮᩣ ᨬᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨴᩮᩅᨸᩩᨲ᩠ᨲᩮᩣ ᩋᩉᩴ ᩈᨶ᩠ᨲᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᨴᩥᨻ᩠ᨻᨶ᩠ᨲᩥ ᨠᩦᩊᨶ᩠ᨲᩥ ᨸᨬ᩠ᨧᩉᩥ ᨴᩥᨻ᩠ᨻᩮᩉᩥ ᨠᩣᨾᨣᩩᨱᩮᩉᩦᨲᩥ ᨴᩮᩅᩣ, ᨴᩮᩅᩣᨶᩴ ᨸᩩᨲ᩠ᨲᩮᩣ, ᨴᩮᩅᩮᩣ ᩑᩅ ᩅᩣ ᨸᩩᨲ᩠ᨲᩮᩣ ᨴᩮᩅᨸᩩᨲ᩠ᨲᩮᩣ, ᩋᩉᩴ ᨴᩮᩅᨸᩩᨲ᩠ᨲᩮᩣ ¶ ᩈᨶ᩠ᨲᩮᩣ ᩅᩥᨩ᩠ᨩᨾᩣᨶᩮᩣ ᨴᩥᨻ᩠ᨻᩴ ᨠᨠ᩠ᨠᩣᩁᩩᨸᩩᨸ᩠ᨹᩴ ᨸᨣ᩠ᨣᨿ᩠ᩉ ᨸᨠᩣᩁᩮᨶ, ᨣᩉᩮᨲ᩠ᩅᩣ ᩈᩥᨡᩥᩔ ᨽᨣᩅᨲᩮᩣ ᩋᨽᩥᩁᩮᩣᨸᨿᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨠᨠ᩠ᨠᩣᩁᩩᨸᩩᨸ᩠ᨹᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᨾᨶ᩠ᨴᩣᩁᩅᨸᩩᨸ᩠ᨹᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨴᩮᩅᨸᩩᨲ᩠ᨲᩮᩣ ¶ ᩋᩉᩴ ᩈᨶ᩠ᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨾᨶ᩠ᨴᩣᩁᩅᨸᩩᨸ᩠ᨹᨸᩪᨩᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨳᩮᩁᩮᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨡᩥᩔ ᨽᨣᩅᨲᩮᩣ ᨠᩣᩃᩮ ᨽᩩᨾ᩠ᨾᨭ᩠ᨮᨠᨴᩮᩅᨸᩩᨲ᩠ᨲᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩮᩣ ᩈᩥᨡᩥᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨴᩥᨻ᩠ᨻᨾᨶ᩠ᨴᩣᩁᩅᨸᩩᨸ᩠ᨹᩮᩉᩥ ᨸᩪᨩᩮᩈᩥ.

᪒᪕. ᩈᩮᩣ ᨲᩮᨶ ᨸᩩᨬ᩠ᨬᩮᨶᩣᨲᩥᩌᨴᩥᨠᩴ ᩈᨻ᩠ᨻᩴ ᩋᨶᨶ᩠ᨲᩁᨲ᩠ᨳᩮᩁᩔ ᩋᨸᨴᩣᨶᩅᨱ᩠ᨱᨶᩣᨿ ᩅᩩᨲ᩠ᨲᨶᨿᩮᨶᩮᩅ ᩅᩮᨴᩥᨲᨻ᩠ᨻᨶ᩠ᨲᩥ.

ᨾᨶ᩠ᨴᩣᩁᩅᨸᩩᨸ᩠ᨹᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᨠᨴᨾ᩠ᨻᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨠᨴᨾ᩠ᨻᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩈᩩᨬ᩠ᨬᩮ ᩃᩮᩣᨠᩮ ᩑᨠᩈ᩠ᨾᩥᩴ ¶ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨥᩁᩣᩅᩣᩈᩴ ᩅᩈᨶ᩠ᨲᩮᩣ ᨲᨲ᩠ᨳ ᩌᨴᩦᨶᩅᩴ ᨴᩥᩈ᩠ᩅᩣ ᨥᩁᩣᩅᩣᩈᩴ ᨸᩉᩣᨿ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩉᩥᨾᩅᨶ᩠ᨲᩈᨾᩦᨸᩮ ᨠᩩᨠ᩠ᨠᩩᨭᩮ ᨶᩣᨾ ᨸᨻ᩠ᨻᨲᩮ ᩋᩔᨾᩴ ᨠᨲ᩠ᩅᩣ ᩅᩥᩉᩣᩈᩥ. ᩈᩮᩣ ᨲᨲ᩠ᨳ ᩈᨲ᩠ᨲ ᨸᨧ᩠ᨧᩮᨠᨻᩩᨴ᩠ᨵᩮ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨸᩩᨸ᩠ᨹᩥᨲᩴ ᨠᨴᨾ᩠ᨻᨸᩩᨸ᩠ᨹᩴ ᩒᨧᩥᨶᩥᨲ᩠ᩅᩣ ᨲᩮ ᨸᨧ᩠ᨧᩮᨠᨻᩩᨴ᩠ᨵᩮ ᨸᩪᨩᩮᩈᩥ. ᨲᩮᨸᩥ ‘‘ᩍᨧ᩠ᨨᩥᨲᩴ ᨸᨲ᩠ᨳᩥᨲ’’ᨶ᩠ᨲᩥᩌᨴᩥᨶᩣ ᩋᨶᩩᨾᩮᩣᨴᨶᩴ ᩋᨠᩴᩈᩩ.

᪓᪐. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩉᩩᨲ᩠ᩅᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ¶ ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨾᩣᩉ. ᨲᩴ ᩅᩩᨲ᩠ᨲᨲ᩠ᨳᨾᩮᩅ. ᨠᩩᨠ᩠ᨠᩩᨭᩮᩣ ᨶᩣᨾ ᨸᨻ᩠ᨻᨲᩮᩣᨲᩥ ᨲᩔ ᩏᨽᩮᩣᩈᩩ ᨸᩔᩮᩈᩩ ᨠᩩᨠ᩠ᨠᩩᨭᨧᩪᩊᩣᨠᩣᩁᩮᨶ ᨸᨻ᩠ᨻᨲᨠᩪᨭᩣᨶᩴ ᩅᩥᨩ᩠ᨩᨾᩣᨶᨲ᩠ᨲᩣ ᨠᩩᨠ᩠ᨠᩩᨭᩮᩣᨲᩥ ᩈᨦ᩠ᨡᩴ ᨣᨲᩮᩣ. ᨸᨠᩣᩁᩮᨶ ᨲᩥᩁᩮᩣ ᩉᩩᨲ᩠ᩅᩣ ᨸᨲᩥᨭ᩠ᨮᩉᨲᩦᨲᩥ ᨸᨻ᩠ᨻᨲᩮᩣ. ᨲᨾ᩠ᩉᩥ ᨸᨻ᩠ᨻᨲᨸᩣᨴᨾ᩠ᩉᩦᨲᩥ ᨲᩈ᩠ᨾᩥᩴ ᨸᨻ᩠ᨻᨲᩈᨾᩦᨸᩮ. ᩈᨲ᩠ᨲ ᨻᩩᨴ᩠ᨵᩣ ᩅᩈᨶ᩠ᨲᩦᨲᩥ ᩈᨲ᩠ᨲ ᨸᨧ᩠ᨧᩮᨠᨻᩩᨴ᩠ᨵᩣ ᨲᩈ᩠ᨾᩥᩴ ᨠᩩᨠ᩠ᨠᩩᨭᨸᨻ᩠ᨻᨲᨸᩣᨴᩮ ᨸᨱ᩠ᨱᩈᩣᩃᩣᨿᩴ ᩅᩈᨶ᩠ᨲᩦᨲᩥ ᩋᨲ᩠ᨳᩮᩣ.

᪓᪑. ᨴᩦᨸᩁᩣᨩᩴᩅ ¶ ᩏᨣ᩠ᨣᨲᨶ᩠ᨲᩥ ᨴᩦᨸᩣᨶᩴ ᩁᩣᨩᩣ ᨴᩦᨸᩁᩣᨩᩣ, ᩈᨻ᩠ᨻᩮᩈᩴ ᨴᩦᨸᩣᨶᩴ ᨩᩃᨾᩣᨶᩣᨶᩴ ᨲᩣᩁᨠᩣᨶᩴ ᩁᩣᨩᩣ ᨧᨶ᩠ᨴᩮᩣᨲᩥ ᩋᨲ᩠ᨳᩮᩣ. ᩋᨳ ᩅᩣ ᩈᨻ᩠ᨻᩮᩈᩩ ᨩᨾ᩠ᨻᩩᨴᩦᨸᨸᩩᨻ᩠ᨻᩅᩥᨴᩮᩉᩋᨸᩁᨣᩮᩣᨿᩣᨶᩏᨲ᩠ᨲᩁᨠᩩᩁᩩᩈᨦ᩠ᨡᩣᨲᩮᩈᩩ ᨧᨲᩪᩈᩩ ᨴᩦᨸᩮᩈᩩ ᨴ᩠ᩅᩥᩈᩉᩔᨸᩁᩥᨲ᩠ᨲᨴᩦᨸᩮᩈᩩ ᨧ ᩁᩣᨩᩣ ᩌᩃᩮᩣᨠᨹᩁᨱᨲᩮᩣ ᨧᨶ᩠ᨴᩮᩣ ᨴᩦᨸᩁᩣᨩᩣᨲᩥ ᩅᩩᨧ᩠ᨧᨲᩥ, ᨲᩴ ᨶᨽᩮ ᩏᨣ᩠ᨣᨲᩴ ᨧᨶ᩠ᨴᩴ ᩍᩅ ᨸᩩᨸ᩠ᨹᩥᨲᩴ ᨹᩩᩃ᩠ᩃᩥᨲᩴ ᨠᨴᨾ᩠ᨻᩁᩩᨠ᩠ᨡᩴ ᨴᩥᩈ᩠ᩅᩣ ᨲᨲᩮᩣ ᨸᩩᨸ᩠ᨹᩴ ᩒᨧᩥᨶᩥᨲ᩠ᩅᩣ ᩏᨽᩮᩣᩉᩥ ᩉᨲ᩠ᨳᩮᩉᩥ ᨸᨣ᩠ᨣᨿ᩠ᩉ ᨸᨠᩣᩁᩮᨶ ᨣᩉᩮᨲ᩠ᩅᩣ ᩈᨲ᩠ᨲ ᨸᨧ᩠ᨧᩮᨠᨻᩩᨴ᩠ᨵᩮ ᩈᨾᩮᩣᨠᩥᩁᩥᩴ ᩈᩩᨭ᩠ᨮᩩ ᩒᨠᩥᩁᩥᩴ, ᩌᨴᩁᩮᨶ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨠᨴᨾ᩠ᨻᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᨲᩥᨱᩈᩪᩃᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨲᩥᨱᩈᩪᩃᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨳᩮᩁᩮᩣ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᨸᩩᨬ᩠ᨬᩈᨾ᩠ᨽᩣᩁᩮᩣ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᨽᩅᩮ ᨠᩩᩈᩃᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨡᩥᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᨲᨲ᩠ᨳ ᨴᩮᩣᩈᩴ ᨴᩥᩈ᩠ᩅᩣ ᨲᩴ ᨸᩉᩣᨿ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩅᩈᨶ᩠ᨲᩮᩣ ᩉᩥᨾᩅᨶ᩠ᨲᩈᨾᩦᨸᩮ ᨽᩪᨲᨣᨱᩮ ᨶᩣᨾ ᨸᨻ᩠ᨻᨲᩮ ᩅᩈᨶ᩠ᨲᩴ ᩑᨠᨲᩴ ᩅᩥᩅᩮᨠᨾᨶᩩᨻᩕᩪᩉᨶ᩠ᨲᩴ ᩈᩥᨡᩥᩴ ᩈᨾ᩠ᨻᩩᨴ᩠ᨵᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨲᩥᨱᩈᩪᩃᨸᩩᨸ᩠ᨹᩴ ᨣᩉᩮᨲ᩠ᩅᩣ ᨸᩣᨴᨾᩪᩃᩮ ᨸᩪᨩᩮᩈᩥ. ᨻᩩᨴ᩠ᨵᩮᩣᨸᩥ ᨲᩔ ᩋᨶᩩᨾᩮᩣᨴᨶᩴ ᩋᨠᩣᩈᩥ.

᪓᪕. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᩅᩥᨽᩅᩈᨾ᩠ᨸᨶ᩠ᨶᩮ ¶ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᩣᩈᨶᩮ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᩏᨸᨶᩥᩔᨿᩈᨾ᩠ᨸᨶ᩠ᨶᨲ᩠ᨲᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥᨲ᩠ᩅᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨸ᩠ᨸᨲ᩠ᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨾᩣᩉ. ᨽᩪᨲᨣᨱᩮᩣ ᨶᩣᨾ ᨸᨻ᩠ᨻᨲᩮᩣᨲᩥ ᨽᩪᨲᨣᨱᩣᨶᩴ ᨴᩮᩅᨿᨠ᩠ᨡᩈᨾᩪᩉᩣᨶᩴ ᩌᩅᩣᩈᨽᩪᨲᨲ᩠ᨲᩣ ᨽᩅᨶᩈᨴᩥᩈᨲ᩠ᨲᩣ ᩋᩅᩥᩁᩪᩊ᩠ᩉᨽᩣᩅᩮᨶ ᨸᩅᨲ᩠ᨲᨲ᩠ᨲᩣ ¶ ᨧ ᨽᩪᨲᨣᨱᩮᩣ ᨶᩣᨾ ᨸᨻ᩠ᨻᨲᩮᩣ, ᨲᩈ᩠ᨾᩥᩴ ᩑᨠᩮᩣ ᩋᨴᩩᨲᩥᨿᩮᩣ ᨩᩥᨶᩮᩣ ᨩᩥᨲᨾᩣᩁᩮᩣ ᨻᩩᨴ᩠ᨵᩮᩣ ᩅᩈᨲᩮ ᨴᩥᨻ᩠ᨻᨻᩕᩉ᩠ᨾᩋᩁᩥᨿᩍᩁᩥᨿᩣᨸᨳᩅᩥᩉᩣᩁᩮᩉᩥ ᩅᩥᩉᩁᨲᩦᨲᩥ ᩋᨲ᩠ᨳᩮᩣ.

᪓᪖. ᩑᨠᩪᨶᩈᨲᩈᩉᩔᩴ ¶ , ᨠᨸ᩠ᨸᩴ ᨶ ᩅᩥᨶᩥᨸᩣᨲᩥᨠᩮᩣᨲᩥ ᨲᩮᨶ ᨲᩥᨱᩈᩪᩃᨸᩩᨸ᩠ᨹᨸᩪᨩᩣᨠᩁᨱᨹᩃᩮᨶ ᨶᩥᩁᨶ᩠ᨲᩁᩴ ᩑᨠᩪᨶᩈᨲᩈᩉᩔᨠᨸ᩠ᨸᩣᨶᩴ ᩋᩅᩥᨶᩥᨸᩣᨲᨠᩮᩣ ᨧᨲᩩᩁᩣᨸᩣᨿᩅᩥᨶᩥᨾᩩᨲ᩠ᨲᩮᩣ ᩈᨣ᩠ᨣᩈᨾ᩠ᨸᨲ᩠ᨲᩥᨽᩅᨾᩮᩅ ᩏᨸᨸᨶ᩠ᨶᩮᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨲᩥᨱᩈᩪᩃᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᨶᩣᨣᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩩᩅᨧ᩠ᨨᩮᩣ ᨶᩣᨾ ᨶᩣᨾᩮᨶᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨶᩣᨣᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨳᩮᩁᩮᩣ ᨸᩩᩁᩥᨾᨩᩥᨶᨶᩥᩈᨽᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᨽᨣᩅᨲᩮᩣ ᨠᩣᩃᩮ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩅᩮᨴᨲ᩠ᨲᨿᩣᨴᩦᩈᩩ ᩈᨠᩈᩥᨸ᩠ᨸᩮᩈᩩ ᨶᩥᨸ᩠ᨹᨲ᩠ᨲᩥᩴ ᨸᨲ᩠ᩅᩣ ᨲᨲ᩠ᨳ ᩈᩣᩁᩴ ᩋᨴᩥᩈ᩠ᩅᩣ ᩉᩥᨾᩅᨶ᩠ᨲᩴ ᨸᩅᩥᩈᩥᨲ᩠ᩅᩣ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᨫᩣᨶᩈᨾᩣᨸᨲ᩠ᨲᩥᩈᩩᨡᩮᨶ ᩅᩦᨲᩥᨶᩣᨾᩮᩈᩥ. ᨲᩈ᩠ᨾᩥᩴ ᩈᨾᨿᩮ ᨸᨴᩩᨾᩩᨲ᩠ᨲᩁᩮᩣ ᨽᨣᩅᩣ ᨲᩔᩣᨶᩩᨠᨾ᩠ᨸᩣᨿ ᨲᨲ᩠ᨳ ᩋᨣᨾᩣᩈᩥ. ᩈᩮᩣ ᨲᩣᨸᩈᩮᩣ ᨲᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᩃᨠ᩠ᨡᨱᩈᨲ᩠ᨳᩮᩈᩩ ᨨᩮᨠᨲ᩠ᨲᩣ ᨽᨣᩅᨲᩮᩣ ᩃᨠ᩠ᨡᨱᩁᩪᨸᩈᨾ᩠ᨸᨲ᩠ᨲᩥᨿᩣ ᨸᩈᨶ᩠ᨶᩮᩣ ᩅᨶ᩠ᨴᩥᨲ᩠ᩅᩣ ᩋᨬ᩠ᨩᩃᩥᩴ ᨸᨣ᩠ᨣᨿ᩠ᩉ ᩋᨭ᩠ᨮᩣᩈᩥ. ᩌᨠᩣᩈᨲᩮᩣ ᩋᨶᩮᩣᨲᩥᨱ᩠ᨱᨲ᩠ᨲᩣ ᨸᩪᨩᩣᩈᨠ᩠ᨠᩣᩁᩮ ᩋᨠᨲᩮᨿᩮᩅ ᩌᨠᩣᩈᩮᨶᩮᩅ ᨸᨠ᩠ᨠᩣᨾᩥ. ᩋᨳ ᩈᩮᩣ ᨲᩣᨸᩈᩮᩣ ᩈᩈᩥᩔᩮᩣ ᨶᩣᨣᨸᩩᨸ᩠ᨹᩴ ᩒᨧᩥᨶᩥᨲ᩠ᩅᩣ ᨲᩮᨶ ᨸᩩᨸ᩠ᨹᩮᨶ ᨽᨣᩅᨲᩮᩣ ᨣᨲᨴᩥᩈᩣᨽᩣᨣᨾᨣ᩠ᨣᩴ ᨸᩪᨩᩮᩈᩥ.

᪓᪙. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᨶ᩠ᨲᩮᩣ ᩈᨻ᩠ᨻᨲ᩠ᨳ ᨸᩪᨩᩥᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨴ᩠ᨵᩣᩈᨾ᩠ᨸᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᩅᨲ᩠ᨲᨸᨭᩥᨸᨲ᩠ᨲᩥᨿᩣ ᩈᩣᩈᨶᩴ ᩈᩮᩣᨽᨿᨾᩣᨶᩮᩣ ᨶᨧᩥᩁᩔᩮᩅ ᩋᩁᩉᩣ ᩉᩩᨲ᩠ᩅᩣ ‘‘ᨠᩮᨶ ᨶᩩ ᨡᩮᩣ ᨠᩩᩈᩃᨠᨾ᩠ᨾᩮᨶ ᨾᨿᩣ ᩋᨿᩴ ᩃᩮᩣᨠᩩᨲ᩠ᨲᩁᩈᨾ᩠ᨸᨲ᩠ᨲᩥ ᩃᨴ᩠ᨵᩣ’’ᨲᩥ ᩋᨲᩦᨲᨠᨾ᩠ᨾᩴ ᩈᩁᨶ᩠ᨲᩮᩣ ᨸᩩᨻ᩠ᨻᨠᨾ᩠ᨾᩴ ᨸᨧ᩠ᨧᨠ᩠ᨡᨲᩮᩣ ᨬᨲ᩠ᩅᩣ ᩈᨬ᩠ᨩᩣᨲᩈᩮᩣᨾᨶᩔᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩩᩅᨧ᩠ᨨᩮᩣ ᨶᩣᨾ ᨶᩣᨾᩮᨶᩣᨲᩥᩌᨴᩥᨾᩣᩉ. ᨲᨲ᩠ᨳ ᩅᨧ᩠ᨨᨣᩮᩣᨲ᩠ᨲᩮ ᨩᩣᨲᨲ᩠ᨲᩣ ᩅᨧ᩠ᨨᩮᩣ, ᩈᩩᨶ᩠ᨴᩁᩮᩣ ᨧ ᩈᩮᩣ ᩅᨧ᩠ᨨᩮᩣ ᨧᩮᨲᩥ ᩈᩩᩅᨧ᩠ᨨᩮᩣ. ᨶᩣᨾᩮᨶ ᩈᩩᩅᨧ᩠ᨨᩮᩣ ᨶᩣᨾ ᨻᩕᩣᩉ᩠ᨾᨱᩮᩣ ᨾᨶ᩠ᨲᨸᩣᩁᨣᩪ ᩅᩮᨴᨲ᩠ᨲᨿᩣᨴᩥᩈᨠᩃᨾᨶ᩠ᨲᩈᨲ᩠ᨳᩮ ¶ ᨠᩮᩣᨭᩥᨸ᩠ᨸᨲ᩠ᨲᩮᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩉᩮᨭ᩠ᨮᩣ ᩅᩩᨲ᩠ᨲᨶᨿᨲ᩠ᨲᩣ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨶᩣᨣᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᨸᩩᨶ᩠ᨶᩣᨣᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨠᩣᨶᨶᩴ ¶ ¶ ᩅᨶᨾᩮᩣᨣᨿ᩠ᩉᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᩩᨶ᩠ᨶᩣᨣᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨹᩩᩔᩔ ᨽᨣᩅᨲᩮᩣ ᨠᩣᩃᩮ ᨶᩮᩈᩣᨴᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᨾᩉᩣᩅᨶᩴ ᨸᩅᩥᨭ᩠ᨮᩮᩣ ᨲᨲ᩠ᨳ ᩈᩩᨸᩩᨸ᩠ᨹᩥᨲᨸᩩᨶ᩠ᨶᩣᨣᨸᩩᨸ᩠ᨹᩴ ᨴᩥᩈ᩠ᩅᩣ ᩉᩮᨲᩩᩈᨾ᩠ᨸᨶ᩠ᨶᨲ᩠ᨲᩣ ᨻᩩᨴ᩠ᨵᩣᩁᨾ᩠ᨾᨱᨸᩦᨲᩥᩅᩈᩮᨶ ᨽᨣᩅᨶ᩠ᨲᩴ ᩈᩁᩥᨲ᩠ᩅᩣ ᨲᩴ ᨸᩩᨸ᩠ᨹᩴ ᩈᩉ ᨠᨱ᩠ᨱᩥᨠᩣᩉᩥ ᩒᨧᩥᨶᩥᨲ᩠ᩅᩣ ᩅᩣᩃᩩᨠᩣᩉᩥ ᨧᩮᨲᩥᨿᩴ ᨠᨲ᩠ᩅᩣ ᨸᩪᨩᩮᩈᩥ.

᪔᪖. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴ᩠ᩅᩮᨶᩅᩩᨲᩥᨠᨸ᩠ᨸᩮ ᨶᩥᩁᨶ᩠ᨲᩁᩴ ᨴᩮᩅᨾᨶᩩᩔᩈᨾ᩠ᨸᨲ᩠ᨲᩥᨿᩮᩣᨿᩮᩅ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᩅᩥᨽᩅᩈᨾ᩠ᨸᨶ᩠ᨶᩮ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨸᩩᨻ᩠ᨻᩅᩣᩈᨶᩣᨻᩃᩮᨶ ᩈᩣᩈᨶᩮ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᩅᩣᨿᨾᨶ᩠ᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩉᩩᨲ᩠ᩅᩣ ᨸᩩᨻ᩠ᨻᩮ ᨠᨲᨠᩩᩈᩃᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨠᩣᨶᨶᩴ ᩅᨶᨾᩮᩣᨣᨿ᩠ᩉᩣᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨲᩣ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨸᩩᨶ᩠ᨶᩣᨣᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᨠᩩᨾᩩᨴᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨠᩩᨾᩩᨴᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨳᩮᩁᩮᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩮᩈᩩ ᨽᩅᩮᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩉᩥᨾᩅᨶ᩠ᨲᩔ ᩌᩈᨶ᩠ᨶᩮ ᨾᩉᨶ᩠ᨲᩮ ᨩᩣᨲᩔᩁᩮ ᨠᩩᨠᩩᨲ᩠ᨳᩮᩣ ᨶᩣᨾ ᨸᨠ᩠ᨡᩦ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩮᩣ ᨠᩮᨶᨧᩥ ᩋᨠᩩᩈᩃᩮᨶ ᨸᨠ᩠ᨡᩦ ᩈᨾᩣᨶᩮᩣᨸᩥ ᨸᩩᨻ᩠ᨻᩮ ᨠᨲᩈᨾ᩠ᨽᩣᩁᩮᨶ ᨻᩩᨴ᩠ᨵᩥᩈᨾ᩠ᨸᨶ᩠ᨶᩮᩣ ᨸᩩᨬ᩠ᨬᩣᨸᩩᨬ᩠ᨬᩮᩈᩩ ᨨᩮᨠᩮᩣ ᩈᩦᩃᩅᩣ ᨸᩣᨱᨣᩮᩣᨧᩁᨲᩮᩣ ᨸᨭᩥᩅᩥᩁᨲᩮᩣ ᩋᩉᩮᩣᩈᩥ. ᨲᩈ᩠ᨾᩥᩴ ᩈᨾᨿᩮ ᨸᨴᩩᨾᩩᨲ᩠ᨲᩁᩮᩣ ᨽᨣᩅᩣ ᩌᨠᩣᩈᩮᨶᩣᨣᨶ᩠ᨲ᩠ᩅᩣ ᨲᩔ ᩈᨾᩦᨸᩮ ᨧᨦ᩠ᨠᨾᨲᩥ. ᩋᨳ ᩈᩮᩣ ᩈᨠᩩᨱᩮᩣ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨧᩥᨲ᩠ᨲᩮᩣ ᨠᩩᨾᩩᨴᨸᩩᨸ᩠ᨹᩴ ᨯᩴᩈᩥᨲ᩠ᩅᩣ ᨽᨣᩅᨲᩮᩣ ᨸᩣᨴᨾᩪᩃᩮ ᨸᩪᨩᩮᩈᩥ. ᨽᨣᩅᩣ ᨲᩔ ᩈᩮᩣᨾᨶᩔᩩᨸ᩠ᨸᩣᨴᨶᨲ᩠ᨳᩴ ᨸᨭᩥᨣ᩠ᨣᩉᩮᨲ᩠ᩅᩣ ᩋᨶᩩᨾᩮᩣᨴᨶᨾᨠᩣᩈᩥ.

᪕᪑. ᩈᩮᩣ ¶ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩏᨽᨿᩈᨾ᩠ᨸᨲ᩠ᨲᩥᩈᩩᨡᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᩋᨬ᩠ᨬᨲᩁᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨾᩉᨴ᩠ᨵᨶᩮᩣ ᨾᩉᩣᨽᩮᩣᨣᩮᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩉᩩᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᨸᨧ᩠ᨧᨠ᩠ᨡᨲᩮᩣ ᨬᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨾᩣᩉ. ᨸᨴᩩᨾᩩᨸ᩠ᨸᩃᩈᨬ᩠ᨨᨶ᩠ᨶᩮᩣᨲᩥ ¶ ¶ ᩑᨲ᩠ᨳ ᩈᨲᨸᨲ᩠ᨲᩮᩉᩥ ᩈᨾ᩠ᨸᩩᨱ᩠ᨱᩮᩣ ᩈᩮᨲᨸᨴᩩᨾᩮᩣ ᨧ ᨲᩦᨱᩥ ᨶᩦᩃᩁᨲ᩠ᨲᩈᩮᨲᩩᨸ᩠ᨸᩃᩣᨶᩥ ᨧ ᨸᨴᩩᨾᩩᨸ᩠ᨸᩃᩣᨶᩥ ᨲᩮᩉᩥ ᩈᨬ᩠ᨨᨶ᩠ᨶᩮᩣ ᨣᩉᨶᩦᨽᩪᨲᩮᩣ ᩈᨾ᩠ᨸᩩᨱ᩠ᨱᩮᩣ ᨾᩉᩣᨩᩣᨲᩔᩁᩮᩣ ᩋᩉᩪᨲᩥ ᩈᨾ᩠ᨻᨶ᩠ᨵᩮᩣ. ᨸᩩᨱ᩠ᨯᩁᩦᨠᩈᨾᩮᩣᨲ᩠ᨳᨭᩮᩣᨲᩥ ᨸᩩᨱ᩠ᨯᩁᩦᨠᩮᩉᩥ ᩁᨲ᩠ᨲᨸᨴᩩᨾᩮᩉᩥ ᩒᨲ᩠ᨳᨭᩮᩣ ᩈᨾ᩠ᨸᩩᨱ᩠ᨱᩮᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨠᩩᨾᩩᨴᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᩈᩮᩣᩊᩈᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪗. ᩈᩩᨸᩣᩁᩥᨧᩁᩥᨿᩅᨣ᩠ᨣᩮᩣ

᪑. ᩈᩩᨸᩣᩁᩥᨧᩁᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩮᩣ ¶ ᨶᩣᨾ ᨶᩣᨾᩮᨶᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩩᨸᩣᩁᩥᨧᩁᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨾᩩᨶᩥᨸᩩᨦ᩠ᨣᩅᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨿᨠ᩠ᨡᨿᩮᩣᨶᩥᨿᩴ ᨶᩥᨻ᩠ᨻᨲ᩠ᨲᩮᩣ ᩉᩥᨾᩅᨲᩥ ᨿᨠ᩠ᨡᩈᨾᩣᨣᨾᩴ ᨣᨲᩮᩣ ᨽᨣᩅᨲᩮᩣ ᨴᩮᩅᨿᨠ᩠ᨡᨣᨶ᩠ᨵᨻ᩠ᨻᨶᩣᨣᩣᨶᩴ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩏᨽᩮᩣ ᩉᨲ᩠ᨳᩮ ᩌᨽᩩᨩᩥᨲ᩠ᩅᩣ ᩋᨸ᩠ᨹᩮᩣᨭᩮᩈᩥ ᨶᨾᩔᩥ ᨧ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨲᨲᩮᩣ ᨧᩩᨲᩮᩣ ᩏᨸᩁᩥ ᨴᩮᩅᩃᩮᩣᨠᩮ ᩏᨸ᩠ᨸᨶ᩠ᨶᩮᩣ ᨲᨲ᩠ᨳ ᨴᩥᨻ᩠ᨻᩈᩩᨡᩴ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧ ᨧᨠ᩠ᨠᩅᨲᩥᩌᨴᩥᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᨣᩉᨸᨲᩥᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩋᨯ᩠ᨰᩮᩣ ᨾᩉᨴ᩠ᨵᨶᩮᩣ ᨾᩉᩣᨽᩮᩣᨣᩮᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪑. ᩈᩮᩣ ᩑᨠᨴᩥᩅᩈᩴ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩮᩣ ᨶᩣᨾ ᨶᩣᨾᩮᨶᩣᨲᩥᩌᨴᩥᨾᩣᩉ. ᨲᨲ᩠ᨳ ¶ ᨸᨴᩩᨾᩮᩣᨲᩥ ᨿᩔ ᨸᩣᨴᨶᩥᨠ᩠ᨡᩮᨸᩈᨾᨿᩮ ᨸᨳᩅᩥᩴ ᨽᩥᨶ᩠ᨴᩥᨲ᩠ᩅᩣ ᨸᨴᩩᨾᩴ ᩏᨣ᩠ᨣᨶ᩠ᨲ᩠ᩅᩣ ᨸᩣᨴᨲᩃᩴ ᩈᨾ᩠ᨸᨭᩥᨧ᩠ᨨᨲᩥ, ᨲᩮᨶ ᩈᨬ᩠ᨬᩣᨱᩮᨶ ᩈᩮᩣ ᨽᨣᩅᩣ ᨸᨴᩩᨾᩮᩣᨲᩥ ᩈᨦ᩠ᨡᩴ ᨣᨲᩮᩣ, ᩍᨵ ᨸᨴᩩᨾᩩᨲ᩠ᨲᩁᩮᩣ ᨽᨣᩅᩣ ᩋᨵᩥᨸ᩠ᨸᩮᨲᩮᩣ. ᩈᩮᩣ ᨽᨣᩅᩣ ᨸᩅᨶᩣ ᩅᩈᨶᩅᩥᩉᩣᩁᩣ ᩋᨽᩥᨶᩥᨠ᩠ᨡᨾ᩠ᨾ ᩅᨶᨾᨩ᩠ᨫᩴ ᨸᩅᩥᩈᩥᨲ᩠ᩅᩣ ᨵᨾ᩠ᨾᩴ ᨴᩮᩈᩮᨲᩦᨲᩥ ᩈᨾ᩠ᨻᨶ᩠ᨵᩮᩣ.

ᨿᨠ᩠ᨡᩣᨶᩴ ᩈᨾᨿᩮᩣᨲᩥ ᨴᩮᩅᩣᨶᩴ ᩈᨾᩣᨣᨾᩮᩣ ᩌᩈᩥ ᩋᩉᩮᩣᩈᩦᨲᩥ ᩋᨲ᩠ᨳᩮᩣ. ᩋᨩ᩠ᨫᩣᨸᩮᨠ᩠ᨡᩥᩴᩈᩩ ᨲᩣᩅᨴᩮᨲᩥ ᨲᩈ᩠ᨾᩥᩴ ᨴᩮᩈᨶᩣᨠᩣᩃᩮ ᩋᨵᩥᩋᨸᩮᨠ᩠ᨡᩥᩴᩈᩩ, ᩅᩥᩈᩮᩈᩮᨶ ᨸᩔᨶᩈᩦᩃᩣ ᩋᩉᩮᩈᩩᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᨸᩣᨠᨭᨾᩮᩅᩣᨲᩥ.

ᩈᩩᨸᩣᩁᩥᨧᩁᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᨠᨱᩅᩮᩁᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᩥᨴ᩠ᨵᨲ᩠ᨳᩮᩣ ¶ ᨶᩣᨾ ᨽᨣᩅᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨠᨱᩅᩮᩁᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᩈᩩᨴ᩠ᨴᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ¶ ᩁᨬ᩠ᨬᩮᩣ ᩋᨶ᩠ᨲᩮᨸᩩᩁᨸᩣᩃᨠᩮᩣ ᩋᩉᩮᩣᩈᩥ. ᨲᩈ᩠ᨾᩥᩴ ᩈᨾᨿᩮ ᩈᩥᨴ᩠ᨵᨲ᩠ᨳᩮᩣ ᨽᨣᩅᩣ ᨽᩥᨠ᩠ᨡᩩᩈᨦ᩠ᨥᨸᩁᩥᩅᩩᨲᩮᩣ ᩁᩣᨩᩅᩦᨳᩥᩴ ᨸᨭᩥᨸᨩ᩠ᨩᩥ. ᩋᨳ ᩈᩮᩣ ᩋᨶ᩠ᨲᩮᨸᩩᩁᨸᩣᩃᨠᩮᩣ ᨧᩁᨾᩣᨶᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩉᩩᨲ᩠ᩅᩣ ᨠᨱᩅᩮᩁᨸᩩᨸ᩠ᨹᩮᨶ ᨽᨣᩅᨶ᩠ᨲᩴ ᨸᩪᨩᩮᨲ᩠ᩅᩣ ᨶᨾᩔᨾᩣᨶᩮᩣ ᩋᨭ᩠ᨮᩣᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᩈᩩᨣᨲᩥᩈᨾ᩠ᨸᨲ᩠ᨲᩥᨿᩮᩣᨿᩮᩅ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪗. ᩈᩮᩣ ᨸᨲ᩠ᨲᩋᨣ᩠ᨣᨹᩃᩮᩣ ᨸᩩᨻ᩠ᨻᩮ ᨠᨲᨠᩩᩈᩃᩴ ᩈᩁᩥᨲ᩠ᩅᩣ ᩈᨬ᩠ᨩᩣᨲᩈᩮᩣᨾᨶᩔᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩈᩥᨴ᩠ᨵᨲ᩠ᨳᩮᩣ ᨶᩣᨾ ᨽᨣᩅᩣᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨲᩣ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨠᨱᩅᩮᩁᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᨡᨩ᩠ᨩᨠᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨲᩥᩔᩔ ᨡᩮᩣ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨡᨩ᩠ᨩᨠᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨲᩥᩔᩔ ᨽᨣᩅᨲᩮᩣ ᨠᩣᩃᩮ ¶ ᩈᩩᨴ᩠ᨴᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩋᨾ᩠ᨻᨩᨾ᩠ᨻᩩᩌᨴᩥᨾᨶᩮᨠᩴ ᨾᨵᩩᩁᨹᩃᩣᨹᩃᩴ ᨶᩣᩊᩥᨠᩮᩁᩴ ᨸᩪᩅᨡᨩ᩠ᨩᨠᨬ᩠ᨧ ᩋᨴᩣᩈᩥ. ᨽᨣᩅᩣ ᨲᩔ ᨸᩈᩣᨴᩅᨯ᩠ᨰᨶᨲ᩠ᨳᩣᨿ ᨸᩔᨶ᩠ᨲᩔᩮᩅ ᨸᩁᩥᨽᩩᨬ᩠ᨩᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᩈᩩᨣᨲᩥᩈᨾ᩠ᨸᨲ᩠ᨲᩥᨿᩮᩣᨿᩮᩅ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᩈᨬ᩠ᨩᩣᨲᩈᨴ᩠ᨵᩮᩣ ᨸᩈᩣᨴᨻᩉᩩᨾᩣᨶᩮᩣ ᨸᨻ᩠ᨻᨩᩥᨲ᩠ᩅᩣ ᩅᨲ᩠ᨲᨸᨭᩥᨸᨲ᩠ᨲᩥᨿᩣ ᩈᩣᩈᨶᩴ ᩈᩮᩣᨽᩮᨶ᩠ᨲᩮᩣ ᩈᩦᩃᩣᩃᨦ᩠ᨠᩣᩁᨸᨭᩥᨾᨱ᩠ᨯᩥᨲᩮᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪑᪓. ᩈᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᨶ᩠ᨲᩮᩣ ‘‘ᨸᩩᨻ᩠ᨻᩮ ᨾᨿᩣ ᩈᩩᨡᩮᨲ᩠ᨲᩮ ᨠᩩᩈᩃᩴ ᨠᨲᩴ ᩈᩩᨶ᩠ᨴᩁ’’ᨶ᩠ᨲᩥ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨲᩥᩔᩔ ᨡᩮᩣ ᨽᨣᩅᨲᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᨲᩥᩔᩮᩣᨸᩥ ᨽᩅᩈᨾ᩠ᨸᨲ᩠ᨲᩥᨿᩮᩣ ᨴᨴᨾᩣᨶᩮᩣ ᨩᩣᨲᩮᩣᨲᩥ ᨾᩣᨲᩣᨸᩥᨲᩪᩉᩥ ᨠᨲᨶᩣᨾᩅᩈᩮᨶ ᨲᩥᩔᩮᩣ. ᩋᨳ ᩅᩣ ᨲᩦᩉᩥ ¶ ᩈᩁᨱᨣᨾᨶᩮᩉᩥ ᩋᩔᩣᩈᩮᨶ᩠ᨲᩮᩣ ᩒᩅᨴᨶ᩠ᨲᩮᩣ ᩉᩮᨲᩩᩈᨾ᩠ᨸᨶ᩠ᨶᨸᩩᨣ᩠ᨣᩃᩮ ᩈᨣ᩠ᨣᨾᩮᩣᨠ᩠ᨡᨴ᩠ᩅᨿᩮ ᨸᨲᩥᨭ᩠ᨮᩣᨸᩮᨶ᩠ᨲᩮᩣ ᨻᩩᨴ᩠ᨵᩮᩣ ᨩᩣᨲᩮᩣᨲᩥ ᨲᩥᩔᩮᩣ. ᩈᨾᩣᨸᨲ᩠ᨲᩥᨣᩩᨱᩣᨴᩦᩉᩥ ᨽᨣᩮᩉᩥ ᨿᩩᨲ᩠ᨲᩮᩣᨲᩥ ᨽᨣᩅᩣ, ᨲᩔ ᨲᩥᩔᩔ ᨽᨣᩅᨲᩮᩣ ᨸᩩᨻ᩠ᨻᩮ ᩋᩉᩴ ᨹᩃᩴ ᩋᨴᩣᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨶᩣᩊᩥᨠᩮᩁᨬ᩠ᨧ ᨸᩣᨴᩣᩈᩥᨶ᩠ᨲᩥ ᨶᩣᩊᩥᨠᩣᨠᩣᩁᩮᨶ ᨸᩅᨲ᩠ᨲᩴ ᨹᩃᩴ ᨶᩣᩊᩥᨠᩮᩁᩴ, ᨲᨬ᩠ᨧ ᨹᩃᩴ ᩋᨴᩣᩈᩥᨶ᩠ᨲᩥ ᩋᨲ᩠ᨳᩮᩣ. ᨡᨩ᩠ᨩᨠᩴ ᩋᨽᩥᩈᨾ᩠ᨾᨲᨶ᩠ᨲᩥ ᨡᩣᨴᩥᨲᨻ᩠ᨻᩴ ᨡᨩ᩠ᨩᨠᩴ ᩋᨽᩥ ᩅᩥᩈᩮᩈᩮᨶ ᨾᨵᩩᩈᨠ᩠ᨠᩁᩣᨴᩦᩉᩥ ᩈᨾ᩠ᨾᩥᩔᩴ ¶ ᨠᨲ᩠ᩅᩣ ᨶᩥᨸ᩠ᨹᩣᨴᩥᨲᩴ ᩈᩩᨶ᩠ᨴᩁᩴ ᨾᨵᩩᩁᨶ᩠ᨲᩥ ᩈᨾ᩠ᨾᨲᩴ ᨬᩣᨲᩴ ᩋᨽᩥᩈᨾ᩠ᨾᨲᩴ ᨡᨩ᩠ᨩᨠᨬ᩠ᨧ ᩋᨴᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨡᨩ᩠ᨩᨠᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᨴᩮᩈᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩋᨲ᩠ᨳᨴᩔᩦ ᨲᩩ ᨽᨣᩅᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨴᩮᩈᨸᩪᨩᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨳᩮᩁᩮᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨲ᩠ᨳᨴᩔᩥᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨴ᩠ᨵᩮᩣ ᨸᩈᨶ᩠ᨶᩮᩣ ᨻᩩᨴ᩠ᨵᨾᩣᨾᨠᩮᩣ ᨵᨾ᩠ᨾᨾᩣᨾᨠᩮᩣ ᩈᨦ᩠ᨥᨾᩣᨾᨠᩮᩣ ᩋᩉᩮᩣᩈᩥ. ᨲᨴᩣ ᩋᨲ᩠ᨳᨴᩔᩦ ᨽᨣᩅᩣ ᨽᩥᨠ᩠ᨡᩩᩈᨦ᩠ᨥᨸᩁᩥᩅᩩᨲᩮᩣ ᨧᨶ᩠ᨴᩮᩣ ᩅᩥᨿ ᩈᩪᩁᩥᨿᩮᩣ ᩅᩥᨿ ᨧ ᩌᨠᩣᩈᩮᨶ ᨣᨧ᩠ᨨᨲᩥ. ᩈᩮᩣ ᩏᨸᩣᩈᨠᩮᩣ ᨽᨣᩅᨲᩮᩣ ᨣᨲᨴᩥᩈᩣᨽᩣᨣᩴ ᨣᨶ᩠ᨵᨾᩣᩃᩣᨴᩦᩉᩥ ᨸᩪᨩᩮᨶ᩠ᨲᩮᩣ ᩋᨬ᩠ᨩᩃᩥᩴ ᨸᨣ᩠ᨣᨿ᩠ᩉ ᨶᨾᩔᨾᩣᨶᩮᩣ ᩋᨭ᩠ᨮᩣᩈᩥ.

᪑᪘. ᩈᩮᩣ ¶ ᨲᩮᨶ ᨸᩩᨬ᩠ᨬᩮᨶ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ ᩈᨣ᩠ᨣᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧ ᨾᨶᩩᩔᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩏᨸᨽᩮᩣᨣᨸᩁᩥᨽᩮᩣᨣᩈᨾ᩠ᨸᨶ᩠ᨶᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨥᩁᩣᩅᩣᩈᩮ ᩋᨶᩃ᩠ᩃᩦᨶᩮᩣ ᨸᨻ᩠ᨻᨩᩥᨲ᩠ᩅᩣ ᩅᨲ᩠ᨲᩈᨾ᩠ᨸᨶ᩠ᨶᩮᩣ ᨶᨧᩥᩁᩔᩮᩅ ᩋᩁᩉᩣ ᩉᩩᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩋᨲ᩠ᨳᨴᩔᩦ ᨲᩩ ᨽᨣᩅᩣᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨳᨾᩮᩅ. ᩋᨶᩥᩃᨬ᩠ᨩᩈᩮᨲᩥ ‘‘ᨾᨣ᩠ᨣᩮᩣ ᨸᨶ᩠ᨳᩮᩣ ᨸᨳᩮᩣ ᨸᨩ᩠ᨩᩮᩣ, ᩋᨬ᩠ᨩᩈᩴ ᩅᨭᩩᨾᩣᨿᨶ’’ᨶ᩠ᨲᩥ (ᨧᩪᩊᨶᩥ. ᨸᩣᩁᩣᨿᨶᨲ᩠ᨳᩩᨲᩥᨣᩣᨳᩣᨶᩥᨴ᩠ᨴᩮᩈ ᪑᪐᪑) ᨸᩁᩥᨿᩣᨿᩔ ᩅᩩᨲ᩠ᨲᨲ᩠ᨲᩣ ᩋᨶᩥᩃᩔ ᩅᩣᨲᩔ ᩋᨬ᩠ᨩᩈᩴ ᨣᨾᨶᨾᨣ᩠ᨣᩮᩣᨲᩥ ᩋᨶᩥᩃᨬ᩠ᨩᩈᩴ, ᨲᩈ᩠ᨾᩥᩴ ᩋᨶᩥᩃᨬ᩠ᨩᩈᩮ, ᩌᨠᩣᩈᩮᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨴᩮᩈᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᨠᨱᩥᨠᩣᩁᨨᨲ᩠ᨲᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩅᩮᩔᨽᩪ ¶ ᨶᩣᨾ ᩈᨾ᩠ᨻᩩᨴ᩠ᨵᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨠᨱᩥᨠᩣᩁᨨᨲ᩠ᨲᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨳᩮᩁᩮᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩮᩔᨽᩩᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨴ᩠ᨵᩣᩈᨾ᩠ᨸᨶ᩠ᨶᩮᩣ ᩋᩉᩮᩣᩈᩥ. ᨲᩈ᩠ᨾᩥᩴ ᩈᨾᨿᩮ ᩅᩮᩔᨽᩪ ᨽᨣᩅᩣ ᩅᩥᩅᩮᨠᨠᩣᨾᩮᩣ ᨾᩉᩣᩅᨶᩴ ᨸᩅᩥᩈᩥᨲ᩠ᩅᩣ ᨶᩥᩈᩦᨴᩥ. ᩋᨳ ᩈᩮᩣᨸᩥ ᩏᨸᩣᩈᨠᩮᩣ ᨠᩮᨶᨧᩥᨴᩮᩅ ᨠᩁᨱᩦᨿᩮᨶ ᨲᨲ᩠ᨳ ᨣᨶ᩠ᨲ᩠ᩅᩣ ᨽᨣᩅᨶ᩠ᨲᩴ ᩋᨣ᩠ᨣᩥᨠ᩠ᨡᨶ᩠ᨵᩴ ᩅᩥᨿ ᨩᩃᨾᩣᨶᩴ ᨶᩥᩈᩥᨶ᩠ᨶᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨠᨱᩥᨠᩣᩁᨸᩩᨸ᩠ᨹᩴ ᩒᨧᩥᨶᩥᨲ᩠ᩅᩣ ᨨᨲ᩠ᨲᩴ ᨠᨲ᩠ᩅᩣ ᨽᨣᩅᨲᩮᩣ ᨶᩥᩈᩥᨶ᩠ᨶᨭ᩠ᨮᩣᨶᩮ ᩅᩥᨲᩣᨶᩴ ᨠᨲ᩠ᩅᩣ ᨸᩪᨩᩮᩈᩥ, ᨲᩴ ᨽᨣᩅᨲᩮᩣ ᩌᨶᩩᨽᩣᩅᩮᨶ ᩈᨲ᩠ᨲᩣᩉᩴ ᩋᨾᩥᩃᩣᨲᩴ ᩉᩩᨲ᩠ᩅᩣ ᨲᨳᩮᩅ ᩋᨭ᩠ᨮᩣᩈᩥ. ᨽᨣᩅᩣᨸᩥ ᨹᩃᩈᨾᩣᨸᨲ᩠ᨲᩥᩴ ᨶᩥᩁᩮᩣᨵᩈᨾᩣᨸᨲ᩠ᨲᩥᨬ᩠ᨧ ᩈᨾᩣᨸᨩ᩠ᨩᩥᨲ᩠ᩅᩣ ᩅᩥᩉᩣᩈᩥ ¶ , ᩈᩮᩣ ᨲᩴ ᩋᨧ᩠ᨨᩁᩥᨿᩴ ᨴᩥᩈ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨽᨣᩅᨶ᩠ᨲᩴ ᩅᨶ᩠ᨴᩥᨲ᩠ᩅᩣ ᩋᨬ᩠ᨩᩃᩥᩴ ᨸᨣ᩠ᨣᨿ᩠ᩉ ᩋᨭ᩠ᨮᩣᩈᩥ. ᨽᨣᩅᩣ ᩈᨾᩣᨸᨲ᩠ᨲᩥᨲᩮᩣ ᩅᩩᨭ᩠ᨮᩉᩥᨲ᩠ᩅᩣ ᩅᩥᩉᩣᩁᨾᩮᩅ ᩋᨣᨾᩣᩈᩥ.

᪒᪓. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨴ᩠ᨵᩣᩈᨾ᩠ᨸᨶ᩠ᨶᩮᩣ ᩈᨲ᩠ᨳᩩ ¶ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨥᩁᩣᩅᩣᩈᩮ ᩋᨶᩃ᩠ᩃᩦᨶᩮᩣ ᨸᨻ᩠ᨻᨩᩥᨲ᩠ᩅᩣ ᩅᨲ᩠ᨲᨸᨭᩥᨸᨲ᩠ᨲᩥᨿᩣ ᨩᩥᨶᩈᩣᩈᨶᩴ ᩈᩮᩣᨽᩮᨶ᩠ᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩉᩩᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩅᩮᩔᨽᩪ ᨶᩣᨾ ᩈᨾ᩠ᨻᩩᨴ᩠ᨵᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᩅᩮᩔᨽᩪᨲᩥ ᩅᩮᩔᩮ ᩅᩮᩔᨩᨶᩮ ᨽᩩᨶᩣᨲᩥ ᩋᨽᩥᨽᩅᨲᩦᨲᩥ ᩅᩮᩔᨽᩪ. ᩋᨳ ᩅᩣ ᩅᩮᩔᩮ ᨸᨬ᩠ᨧᩅᩥᨵᨾᩣᩁᩮ ᩋᨽᩥᨽᩩᨶᩣᨲᩥ ᩋᨩ᩠ᨫᩮᩣᨲ᩠ᨳᩁᨲᩦᨲᩥ ᩅᩮᩔᨽᩪ. ᩈᩣᨾᩴᨿᩮᩅ ᨻᩩᨩ᩠ᨫᩥᨲᩣ ᩈᨧ᩠ᨧᩣᨶᩦᨲᩥ ᩈᨾ᩠ᨻᩩᨴ᩠ᨵᩮᩣ, ᨶᩣᨾᩮᨶ ᩅᩮᩔᨽᩪ ᨶᩣᨾ ᩈᨾ᩠ᨻᩩᨴ᩠ᨵᩮᩣᨲᩥ ᩋᨲ᩠ᨳᩮᩣ. ᨴᩥᩅᩣᩅᩥᩉᩣᩁᩣᨿ ᨾᩩᨶᩦᨲᩥ ᨴᩥᨻ᩠ᨻᨲᩥ ᨸᨠᩣᩈᩮᨲᩥ ᨲᩴ ᨲᩴ ᩅᨲ᩠ᨳᩩᩴ ᨸᩣᨠᨭᩴ ᨠᩁᩮᩣᨲᩦᨲᩥ ᨴᩥᩅᩣ. ᩈᩪᩁᩥᨿᩩᨣ᩠ᨣᨾᨶᨲᩮᩣ ᨸᨭ᩠ᨮᩣᨿ ᨿᩣᩅ ᩋᨲ᩠ᨳᨦ᩠ᨣᨾᩮᩣ, ᨲᩣᩅ ᨸᩁᩥᨧ᩠ᨨᩥᨶ᩠ᨶᨠᩣᩃᩮᩣ, ᩅᩥᩉᩁᨱᩴ ᨧᨲᩪᩉᩥ ᩍᩁᩥᨿᩣᨸᨳᩮᩉᩥ ᨸᩅᨲ᩠ᨲᨶᩴ ᩅᩥᩉᩣᩁᩮᩣ, ᨴᩥᩅᩣᨿ ᩅᩥᩉᩣᩁᩮᩣ ᨴᩥᩅᩣᩅᩥᩉᩣᩁᩮᩣ, ᨲᩔ ᨴᩥᩅᩣᩅᩥᩉᩣᩁᩣᨿ ᩃᩮᩣᨠᨩᩮᨭ᩠ᨮᩮᩣ ᨶᩁᩣᩈᨽᩮᩣ ᨻᩩᨴ᩠ᨵᨾᩩᨶᩥ ᨾᩉᩣᩅᨶᩴ ᩒᨣᩣᩉᩥᨲ᩠ᩅᩣ ᨸᩅᩥᩈᩥᨲ᩠ᩅᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨠᨱᩥᨠᩣᩁᨨᨲ᩠ᨲᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᩈᨸ᩠ᨸᩥᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨹᩩᩔᩮᩣ ¶ ᨶᩣᨾᩣᨳ ᨽᨣᩅᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᨸ᩠ᨸᩥᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩮᩈᩩ ᨽᩅᩮᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨹᩩᩔᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩋᩉᩮᩣᩈᩥ. ᨲᨴᩣ ᨽᨣᩅᩣ ᨽᩥᨠ᩠ᨡᩩᩈᨦ᩠ᨥᨸᩁᩥᩅᩩᨲᩮᩣ ᩅᩦᨳᩥᨿᩴ ᨧᩁᨾᩣᨶᩮᩣ ᨲᩔ ᩏᨸᩣᩈᨠᩔ ᨣᩮᩉᨴ᩠ᩅᩣᩁᩴ ᩈᨾ᩠ᨸᩣᨸᩩᨱᩥ. ᩋᨳ ᩈᩮᩣ ᩏᨸᩣᩈᨠᩮᩣ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩅᨶ᩠ᨴᩥᨲ᩠ᩅᩣ ᨸᨲ᩠ᨲᨸᩪᩁᩴ ᩈᨸ᩠ᨸᩥᨲᩮᩃᩴ ᩋᨴᩣᩈᩥ, ᨽᨣᩅᩣ ᩋᨶᩩᨾᩮᩣᨴᨶᩴ ᨠᨲ᩠ᩅᩣ ᨸᨠ᩠ᨠᩣᨾᩥ. ᩈᩮᩣ ᨲᩮᨶᩮᩅ ᩈᩮᩣᨾᨶᩔᩮᨶ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᨲᨲᩮᩣ ᨧᩩᨲᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᩃᩮᩣᨠᩮ ᩏᨸ᩠ᨸᨶ᩠ᨶᩮᩣ ᨲᨲ᩠ᨳ ᨴᩥᨻ᩠ᨻᩈᩩᨡᩴ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧ ᨶᩥᨻ᩠ᨻᨲ᩠ᨲᩮᩣ ᩏᨸ᩠ᨸᨶ᩠ᨶᩩᨸ᩠ᨸᨶ᩠ᨶᨽᩅᩮ ᩈᨸ᩠ᨸᩥᨲᩮᩃᨾᨵᩩᨹᩣᨱᩥᨲᩣᨴᩥᨾᨵᩩᩁᩣᩉᩣᩁᩈᨾᨦ᩠ᨣᩦ ᩈᩩᨡᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨴ᩠ᨵᩮᩣ ᨻᩩᨴ᩠ᨵᩥᩈᨾ᩠ᨸᨶ᩠ᨶᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨸᨻ᩠ᨻᨩᩥᨲ᩠ᩅᩣ ᩅᨲ᩠ᨲᩈᨾ᩠ᨸᨶ᩠ᨶᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪒᪘. ᩈᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᨩᩣᨲᩈᩮᩣᨾᨶᩔᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨹᩩᩔᩮᩣ ᨶᩣᨾᩣᨳ ᨽᨣᩅᩣᨲᩥᩌᨴᩥᨾᩣᩉ. ᨲᨲ᩠ᨳ ᨹᩩᩔᩮᩣᨲᩥ ¶ ¶ ᨹᩩᩔᨶᨠ᩠ᨡᨲ᩠ᨲᨿᩮᩣᨣᩮᨶ ᨩᩣᨲᨲ᩠ᨲᩣ ᨾᩣᨲᩣᨸᩥᨲᩪᩉᩥ ᨠᨲᨶᩣᨾᨵᩮᨿ᩠ᨿᩮᨶ ᨹᩩᩔᩮᩣ. ᩋᨳ ᩅᩣ ᨶᩥᨻ᩠ᨻᩣᨶᩴ ᨹᩩᩈᩥ ᨸᩔᩥ ᩈᨧ᩠ᨨᩥ ᩋᨠᩣᩈᩦᨲᩥ ᨹᩩᩔᩮᩣ. ᩋᨳ ᩅᩣ ᩈᨾᨲᩥᩴᩈᨸᩣᩁᨾᩥᨲᩣᩈᨲ᩠ᨲᨲᩥᩴᩈᨻᩮᩣᨵᩥᨸᨠ᩠ᨡᩥᨿᨵᨾ᩠ᨾᩮ ᩈᨠᩃᩮ ᨧ ᨲᩮᨸᩥᨭᨠᩮ ᨸᩁᩥᨿᨲ᩠ᨲᩥᨵᨾ᩠ᨾᩮ ᨹᩩᩈᩥ ᨸᩔᩥ ᩋᨬ᩠ᨬᩣᩈᩦᨲᩥ ᨹᩩᩔᩮᩣ. ᨽᨣ᩠ᨣᩅᩣ ᨽᨣ᩠ᨿᩅᩣ ᨿᩩᨲ᩠ᨲᩮᩣᨲᩥᩌᨴᩥᨸᩩᨬ᩠ᨬᨠᩮᩣᨭ᩠ᨮᩣᩈᩈᨾᨦ᩠ᨣᩥᨲᩣᨿ ᨽᨣᩅᩣ. ᩌᩉᩩᨲᩦᨶᩴ ᨸᨭᩥᨣ᩠ᨣᩉᩮᩣᨲᩥ ᩌᩉᩩᨲᩥᨶᩮᩣ ᩅᩩᨧ᩠ᨧᨶ᩠ᨲᩥ ᨸᩪᨩᩣᩈᨠ᩠ᨠᩣᩁᩣ, ᨲᩮᩈᩴ ᩌᩉᩩᨲᩦᨶᩴ ᨸᨭᩥᨣ᩠ᨣᩉᩮᨲᩩᩴ ᩋᩁᩉᨲᩦᨲᩥ ᩌᩉᩩᨲᩦᨶᩴ ᨸᨭᩥᨣ᩠ᨣᩉᩮᩣ. ᨾᩉᩣᨩᨶᩴ ᨶᩥᨻ᩠ᨻᩣᨸᩮᨶ᩠ᨲᩮᩣ ᩅᩦᩁᩮᩣ ᨹᩩᩔᩮᩣ ᨶᩣᨾ ᨽᨣᩅᩣ ᩅᩦᨳᩥᨿᩴ ᩋᨳ ᨲᨴᩣ ᨣᨧ᩠ᨨᨲᩮᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᩴ ᨸᩣᨠᨭᨾᩮᩅᩣᨲᩥ.

ᩈᨸ᩠ᨸᩥᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᨿᩪᨳᩥᨠᩣᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨧᨶ᩠ᨴᨽᩣᨣᩣᨶᨴᩦᨲᩦᩁᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨿᩪᨳᩥᨠᩣᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᩌᨿᩈ᩠ᨾᩣ ᨸᩩᩁᩥᨾᨾᩩᨶᩥᨶ᩠ᨴᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩮᩈᩩ ᨧ ᨩᩣᨲᩥᩈᨲᩮᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨹᩩᩔᩔᩮᩅ ᨽᨣᩅᨲᩮᩣ ᨠᩣᩃᩮ ᩈᩩᨴ᩠ᨴᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨧᨶ᩠ᨴᨽᩣᨣᩣᨿ ᨶᨴᩥᨿᩣ ᨲᩦᩁᩮ ¶ ᨠᩮᨶᨧᩥᨴᩮᩅ ᨠᩁᨱᩦᨿᩮᨶ ᩋᨶᩩᩈᩮᩣᨲᩴ ᨧᩁᨾᩣᨶᩮᩣ ᨹᩩᩔᩴ ᨽᨣᩅᨶ᩠ᨲᩴ ᨶ᩠ᩉᩣᨿᩥᨲᩩᨠᩣᨾᩴ ᩋᨣ᩠ᨣᩥᨠ᩠ᨡᨶ᩠ᨵᩴ ᩅᩥᨿ ᨩᩃᨾᩣᨶᩴ ᨴᩥᩈ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨲᨲ᩠ᨳ ᨩᩣᨲᩴ ᨿᩪᨳᩥᨠᩣᨸᩩᨸ᩠ᨹᩴ ᩒᨧᩥᨶᩥᨲ᩠ᩅᩣ ᨽᨣᩅᨶ᩠ᨲᩴ ᨸᩪᨩᩮᩈᩥ. ᨽᨣᩅᩣ ᨲᩔ ᩋᨶᩩᨾᩮᩣᨴᨶᨾᨠᩣᩈᩥ.

᪓᪓. ᩈᩮᩣ ᨲᨲ᩠ᨳ ᨲᩮᨶ ᨸᩩᨬ᩠ᨬᨠᩮᩣᨭ᩠ᨮᩣᩈᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨽᨣᩅᨲᩮᩣ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨸᨻ᩠ᨻᨩᩥᨲ᩠ᩅᩣ ᩅᨲ᩠ᨲᨸᨭᩥᨸᨲ᩠ᨲᩥᨿᩣ ᩈᩣᩈᨶᩴ ᩈᩮᩣᨽᩮᨶ᩠ᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩉᩩᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨧᨶ᩠ᨴᨽᩣᨣᩣᨶᨴᩦᨲᩦᩁᩮᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨿᩪᨳᩥᨠᩣᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᨴᩩᩔᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨲᩥᩅᩁᩣᨿᩴ ¶ ᨸᩩᩁᩮ ᩁᨾ᩠ᨾᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨴᩩᩔᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩣᨿᩈ᩠ᨾᩣ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨠᩣᩃᩮ ᩁᩣᨩᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᨠᩣᩃᩮ ᨿᩩᩅᩁᩣᨩᨽᩣᩅᩴ ᨸᨲ᩠ᩅᩣ ᨸᩣᨠᨭᩮᩣ ᩑᨠᩴ ᨩᨶᨸᨴᩴ ᩃᨽᩥᨲ᩠ᩅᩣ ᨲᨲᩕᩣᨵᩥᨸᨲᩥᨽᩪᨲᩮᩣ ᩈᨠᩃᨩᨶᨸᨴᩅᩣᩈᩥᨶᩮᩣ ᨴᩣᨶᨸᩥᨿᩅᨧᨶᩋᨲ᩠ᨳᨧᩁᩥᨿᩣᩈᨾᩣᨶᨲ᩠ᨳᨲᩣᩈᨦ᩠ᨡᩣᨲᩮᩉᩥ ᨧᨲᩪᩉᩥ ᩈᨦ᩠ᨣᩉᩅᨲ᩠ᨳᩪᩉᩥ ᩈᨦ᩠ᨣᨱ᩠ᩉᩣᨲᩥ. ᨲᩈ᩠ᨾᩥᩴ ᩈᨾᨿᩮ ᩈᩥᨴ᩠ᨵᨲ᩠ᨳᩮᩣ ᨽᨣᩅᩣ ᨲᩴ ᨩᨶᨸᨴᩴ ᩈᨾ᩠ᨸᩣᨸᩩᨱᩥ. ᩋᨳ ᩈᩮᩣ ᨿᩩᩅᩁᩣᨩᩣ ᨸᨱ᩠ᨱᩣᨠᩣᩁᩴ ¶ ᩃᨽᩥᨲ᩠ᩅᩣ ᨲᨲ᩠ᨳ ᩈᩩᨡᩩᨾᩅᨲ᩠ᨳᩮᨶ ᨽᨣᩅᨶ᩠ᨲᩴ ᨸᩪᨩᩮᩈᩥ. ᨽᨣᩅᩣ ᨲᩴ ᩅᨲ᩠ᨳᩴ ᩉᨲ᩠ᨳᩮᨶ ᨸᩁᩣᨾᩈᩥᨲ᩠ᩅᩣ ᩌᨠᩣᩈᩴ ᨸᨠ᩠ᨡᨶ᩠ᨴᩥ. ᨲᨾ᩠ᨸᩥ ᩅᨲ᩠ᨳᩴ ᨽᨣᩅᨶ᩠ᨲᨾᩮᩅ ᩋᨶᩩᨻᨶ᩠ᨵᩥ. ᩋᨳ ᩈᩮᩣ ᨿᩩᩅᩁᩣᨩᩣ ᨲᩴ ᩋᨧ᩠ᨨᩁᩥᨿᩴ ᨴᩥᩈ᩠ᩅᩣ ᩋᨲᩦᩅ ᨸᩈᨶ᩠ᨶᩮᩣ ᩋᨬ᩠ᨩᩃᩥᩴ ᨸᨣ᩠ᨣᨿ᩠ᩉ ᩋᨭ᩠ᨮᩣᩈᩥ. ᨽᨣᩅᨲᩮᩣ ᩈᨾ᩠ᨸᨲ᩠ᨲᩈᨾ᩠ᨸᨲ᩠ᨲᨭ᩠ᨮᩣᨶᩮ ᩈᨻ᩠ᨻᩮ ᨩᨶᩣ ᨲᩴ ᩋᨧ᩠ᨨᩁᩥᨿᩴ ᨴᩥᩈ᩠ᩅᩣ ᩋᨧ᩠ᨨᩁᩥᨿᨻ᩠ᨽᩩᨲᨧᩥᨲ᩠ᨲᩣ ᩋᨬ᩠ᨩᩃᩥᩴ ᨸᨣ᩠ᨣᨿ᩠ᩉ ᩋᨭ᩠ᨮᩴᩈᩩ. ᨽᨣᩅᩣ ᩅᩥᩉᩣᩁᨾᩮᩅ ᩋᨣᨾᩣᩈᩥ. ᨿᩩᩅᩁᩣᨩᩣ ᨲᩮᨶᩮᩅ ᨠᩩᩈᩃᨠᨾ᩠ᨾᩮᨶ ᨲᨲᩮᩣ ᨧᩩᨲᩮᩣ ᨴᩮᩅᩃᩮᩣᨠᩮ ᩏᨸ᩠ᨸᨶ᩠ᨶᩮᩣ ᨲᨲ᩠ᨳ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧᨠ᩠ᨠᩅᨲ᩠ᨲᩥᩌᨴᩥᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᨽᨣᩅᨲᩮᩣ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᩅᩣᨿᨾᨶ᩠ᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪓᪘. ᩈᩮᩣ ¶ ᩑᨠᨴᩥᩅᩈᩴ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨲᩥᩅᩁᩣᨿᩴ ᨸᩩᩁᩮ ᩁᨾ᩠ᨾᩮᨲᩥᩌᨴᩥᨾᩣᩉ. ᨲᨲ᩠ᨳ ᨲᩥᩅᩁᨶᩣᨾᨠᩮ ᨶᨣᩁᩮ ᩁᨾᨱᩦᨿᩮ ᩋᩉᩴ ᩁᩣᨩᨸᩩᨲ᩠ᨲᩮᩣ ᩉᩩᨲ᩠ᩅᩣ ᩈᩥᨴ᩠ᨵᨲ᩠ᨳᩴ ᨽᨣᩅᨶ᩠ᨲᩴ ᩅᨲ᩠ᨳᩮᨶ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨴᩩᩔᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᩈᨾᩣᨴᨸᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᨣᩁᩮ ᨻᨶ᩠ᨵᩩᨾᨲᩥᨿᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᨾᩣᨴᨸᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨳᩮᩁᩮᩣ ᨸᩩᩁᩥᨾᨻᩩᨴ᩠ᨵᩣᨶᩴ ᩈᨶ᩠ᨲᩥᨠᩮ ᨠᨲᨠᩩᩈᩃᩈᨾ᩠ᨽᩣᩁᩮᩣ ᩋᨶᩮᨠᩮᩈᩩ ᨽᩅᩮᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ¶ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᨸᩩᨬ᩠ᨬᩣᨶᩥ ᨠᩁᩮᩣᨶ᩠ᨲᩮᩣ ᩅᩈᨾᩣᨶᩮᩣ ᩈᨴ᩠ᨵᩮᩣ ᨸᩈᨶ᩠ᨶᩮᩣ ᨻᩉᩪ ᩏᨸᩣᩈᨠᩮ ᩈᨶ᩠ᨶᩥᨸᩣᨲᩮᨲ᩠ᩅᩣ ᨣᨱᨩᩮᨭ᩠ᨮᨠᩮᩣ ᩉᩩᨲ᩠ᩅᩣ ‘‘ᨾᩣᩊᨠᩴ ᨠᩁᩥᩔᩣᨾᩣ’’ᨲᩥ ᨲᩮ ᩈᨻ᩠ᨻᩮ ᩈᨾᩣᨴᨸᩮᨲ᩠ᩅᩣ ᩑᨠᩴ ᨾᩣᩊᨠᩴ ᩈᨾᩴ ᨠᩣᩁᩮᨲ᩠ᩅᩣ ᨸᨱ᩠ᨯᩁᨸᩩᩃᩥᨶᩴ ᩒᨠᩥᩁᩥᨲ᩠ᩅᩣ ᨽᨣᩅᨲᩮᩣ ᨶᩥᨿ᩠ᨿᩣᨴᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᩃᩮᩣᨠᩮ ᩏᨸ᩠ᨸᨶ᩠ᨶᩮᩣ ᨨ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧ ᨧᨠ᩠ᨠᩅᨲ᩠ᨲᩥᩌᨴᩥᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨽᨣᩅᨲᩥ ᨸᩈᨶ᩠ᨶᩮᩣ ᨵᨾ᩠ᨾᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲ᩠ᩅᩣ ᩈᩦᩃᩈᨾ᩠ᨸᨶ᩠ᨶᩮᩣ ᩅᨲ᩠ᨲᩈᨾ᩠ᨸᨶ᩠ᨶᩮᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪔᪔. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨠᨲᨠᩩᩈᩃᩴ ᩈᩁᩥᨲ᩠ᩅᩣ ᩈᨬ᩠ᨩᩣᨲᩈᩮᩣᨾᨶᩔᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨶᨣᩁᩮ ᨻᨶ᩠ᨵᩩᨾᨲᩥᨿᩣᨲᩥᩌᨴᩥᨾᩣᩉ. ᨲᨲ᩠ᨳ ᨻᨶ᩠ᨵᨶ᩠ᨲᩥ ᨬᩣᨲᩥᨣᩮᩣᨲ᩠ᨲᩣᨴᩥᩅᩈᩮᨶ ᩑᨠᩈᨾ᩠ᨻᨶ᩠ᨵᩣ ᩉᩮᩣᨶ᩠ᨲᩥ ᩈᨠᩃᨶᨣᩁᩅᩣᩈᩥᨶᩮᩣᨲᩥ ᨻᨶ᩠ᨵᩪ, ᨻᨶ᩠ᨵᩪ ᩑᨲᩈ᩠ᨾᩥᩴ ᩅᩥᨩ᩠ᨩᨶ᩠ᨲᩦᨲᩥ ᨻᨶ᩠ᨵᩩᨾᨲᩦ, ᨲᩔᩣ ᨻᨶ᩠ᨵᩩᨾᨲᩥᨿᩣ ¶ ᨶᩣᨾ ᨶᨣᩁᩮ ᨾᩉᩣᨸᩪᨣᨣᨱᩮᩣ ᩏᨸᩣᩈᨠᩈᨾᩪᩉᩮᩣ ᩋᩉᩮᩣᩈᩦᨲᩥ ᩋᨲ᩠ᨳᩮᩣ. ᨾᩣᩊᩴ ᨠᩔᩣᨾ ᩈᨦ᩠ᨥᩔᩣᨲᩥ ᩑᨲ᩠ᨳ ᨾᩣᨲᩥ ᨣᨱ᩠ᩉᩣᨲᩥ ᩈᨾ᩠ᨸᨲ᩠ᨲᩈᨾ᩠ᨸᨲ᩠ᨲᨩᨶᩣᨶᩴ ᨧᩥᨲ᩠ᨲᨶ᩠ᨲᩥ ᨾᩣᩊᩴ, ᩋᨳ ᩅᩣ ᩈᨾ᩠ᨸᨲ᩠ᨲᨿᨲᩥᨣᨱᩣᨶᩴ ᨧᩥᨲ᩠ᨲᩔ ᩅᩥᩅᩮᨠᨠᩁᨱᩮ ᩋᩃᨶ᩠ᨲᩥ ᨾᩣᩊᩴ, ᨾᩣᩊᨾᩮᩅ ᨾᩣᩊᨠᩴ, ᨽᩥᨠ᩠ᨡᩩᩈᨦ᩠ᨥᩔ ᨹᩣᩈᩩᩅᩥᩉᩣᩁᨲ᩠ᨳᩣᨿ ᨾᩣᩊᨠᩴ ᨠᩁᩥᩔᩣᨾᩣᨲᩥ ᩋᨲ᩠ᨳᩮᩣ. ᩈᩮᩈᩴ ᨸᩣᨠᨭᨾᩮᩅᩣᨲᩥ.

ᩈᨾᩣᨴᨸᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᨸᨬ᩠ᨧᨦ᩠ᨣᩩᩃᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨲᩥᩔᩮᩣ ¶ ᨶᩣᨾᩣᩈᩥ ᨽᨣᩅᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᨬ᩠ᨧᨦ᩠ᨣᩩᩃᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨲᩥᩔᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᩅᩥᨽᩅᩈᨾ᩠ᨸᨶ᩠ᨶᩮᩣ ᩈᨴ᩠ᨵᩮᩣ ᨸᩈᨶ᩠ᨶᩮᩣ ᩅᩦᨳᩥᨲᩮᩣ ᩅᩥᩉᩣᩁᩴ ᨸᨭᩥᨸᨶ᩠ᨶᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨩᩣᨲᩥᩈᩩᨾᨶᩣᨴᩥᩋᨶᩮᨠᩣᨶᩥ ᩈᩩᨣᨶ᩠ᨵᨸᩩᨸ᩠ᨹᩣᨶᩥ ᨧᨶ᩠ᨴᨶᩣᨴᩦᨶᩥ ᨧ ᩅᩥᩃᩮᨸᨶᩣᨶᩥ ᨣᩣᩉᩣᨸᩮᨲ᩠ᩅᩣ ᩅᩥᩉᩣᩁᩴ ᨣᨲᩮᩣ ᨸᩩᨸ᩠ᨹᩮᩉᩥ ᨽᨣᩅᨶ᩠ᨲᩴ ᨸᩪᨩᩮᨲ᩠ᩅᩣ ᩅᩥᩃᩮᨸᨶᩮᩉᩥ ᨽᨣᩅᨲᩮᩣ ᩈᩁᩦᩁᩮ ᨸᨬ᩠ᨧᨦ᩠ᨣᩩᩃᩥᨠᩴ ᨠᨲ᩠ᩅᩣ ᩅᨶ᩠ᨴᩥᨲ᩠ᩅᩣ ᨸᨠ᩠ᨠᩣᨾᩥ.

᪕᪐. ᩈᩮᩣ ¶ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩉᩩᨲ᩠ᩅᩣ ᨸᩩᨻ᩠ᨻᨠᨾ᩠ᨾᩴ ᩈᩁᨶ᩠ᨲᩮᩣ ᨸᨧ᩠ᨧᨠ᩠ᨡᨲᩮᩣ ᨬᨲ᩠ᩅᩣ ‘‘ᩍᨾᩴ ᨶᩣᨾ ᨠᩩᩈᩃᨠᨾ᩠ᨾᩴ ᨠᨲ᩠ᩅᩣ ᩎᨴᩥᩈᩴ ᩃᩮᩣᨠᩩᨲ᩠ᨲᩁᩈᨾ᩠ᨸᨲ᩠ᨲᩥᩴ ᨸᨲ᩠ᨲᩮᩣᨾ᩠ᩉᩦ’’ᨲᩥ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨲᩥᩔᩮᩣ ᨶᩣᨾᩣᩈᩥ ᨽᨣᩅᩣᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨸᨬ᩠ᨧᨦ᩠ᨣᩩᩃᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᩈᨲ᩠ᨲᩁᩈᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪘. ᨠᩩᨾᩩᨴᩅᨣ᩠ᨣᩮᩣ

᪑. ᨠᩩᨾᩩᨴᨾᩣᩃᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨻ᩠ᨻᨲᩮ ¶ ᩉᩥᨾᩅᨶ᩠ᨲᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨠᩩᨾᩩᨴᨾᩣᩃᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨳᩮᩁᩮᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨲ᩠ᨳᨴᩔᩥᩔ ᨽᨣᩅᨲᩮᩣ ᨠᩣᩃᩮ ᩉᩥᨾᩅᨶ᩠ᨲᨸᨻ᩠ᨻᨲᩈᨾᩦᨸᩮ ᨩᩣᨲᩔᩁᩔ ᩌᩈᨶ᩠ᨶᩮ ᩁᨠ᩠ᨡᩈᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩮᩣ ᩋᨲ᩠ᨳᨴᩔᩥᩴ ᨽᨣᩅᨶ᩠ᨲᩴ ᨲᨲ᩠ᨳ ᩏᨸᨣᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨠᩩᨾᩩᨴᨸᩩᨸ᩠ᨹᩣᨶᩥ ᩒᨧᩥᨶᩥᨲ᩠ᩅᩣ ᨽᨣᩅᨶ᩠ᨲᩴ ᨸᩪᨩᩮᩈᩥ. ᨽᨣᩅᩣ ᩋᨶᩩᨾᩮᩣᨴᨶᩴ ᨠᨲ᩠ᩅᩣ ᨸᨠ᩠ᨠᩣᨾᩥ.

᪑. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨲᨲᩮᩣ ᨧᩅᩥᨲ᩠ᩅᩣ ᨴᩮᩅᩃᩮᩣᨠᩴ ᩏᨸᨸᨶ᩠ᨶᩮᩣ ᨨ ᨠᩣᨾᩣᩅᨧᩁᩈᨾ᩠ᨸᨲ᩠ᨲᩥᨿᩮᩣ ¶ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧ ᨧᨠ᩠ᨠᩅᨲ᩠ᨲᩥᩌᨴᩥᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᩅᩣᨿᨾᨶ᩠ᨲᩮᩣ ᨻᩕᩉ᩠ᨾᨧᩁᩥᨿᨸᩁᩥᨿᩮᩣᩈᩣᨶᩴ ᩋᩁᩉᨲ᩠ᨲᩴ ᨸᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨻ᩠ᨻᨲᩮ ᩉᩥᨾᩅᨶ᩠ᨲᨾ᩠ᩉᩦᨲᩥᩌᨴᩥᨾᩣᩉ. ᨲᨲ᩠ᨳ ᨲᨲ᩠ᨳᨩᩮᩣ ᩁᨠ᩠ᨡᩈᩮᩣ ᩌᩈᩥᨶ᩠ᨲᩥ ᨲᩈ᩠ᨾᩥᩴ ᨩᩣᨲᩔᩁᩈᨾᩦᨸᩮ ᨩᩣᨲᩮᩣ ᨶᩥᨻ᩠ᨻᨲ᩠ᨲᩮᩣ ᩁᨠ᩠ᨡᩈᩮᩣ ᨸᩁᩁᩩᨵᩥᩁᨾᩴᩈᨡᩣᨴᨠᩮᩣ ᨶᩥᨴ᩠ᨴᨿᩮᩣ ᨥᩮᩣᩁᩁᩪᨸᩮᩣ ᨽᨿᩣᨶᨠᩈᨽᩣᩅᩮᩣ ᨾᩉᩣᨻᩃᩮᩣ ᨾᩉᩣᨳᩣᨾᩮᩣ ᨠᨠ᩠ᨡᩊᩮᩣ ᨿᨠ᩠ᨡᩮᩣ ᩌᩈᩥᩴ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ.

ᨠᩩᨾᩩᨴᩴ ¶ ᨸᩩᨸ᩠ᨹᨲᩮ ᨲᨲ᩠ᨳᩣᨲᩥ ᨲᩈ᩠ᨾᩥᩴ ᨾᩉᩣᩈᩁᩮ ᩈᩪᩁᩥᨿᩁᩴᩈᩥᨿᩣ ᩋᨽᩣᩅᩮ ᩈᨲᩥ ᩈᩣᨿᨶ᩠ᩉᩮ ᨾᨠᩩᩊᩥᨲᩴ ᨠᩩᨬ᩠ᨧᩥᨲᩣᨠᩣᩁᩮᨶ ᨶᩥᨸ᩠ᨸᨽᩴ ᩋᩅᨱ᩠ᨱᩴ ᩉᩮᩣᨲᩦᨲᩥ ‘‘ᨠᩩᨾᩩᨴ’’ᨶ᩠ᨲᩥ ᩃᨴ᩠ᨵᨶᩣᨾᩴ ᨸᩩᨸ᩠ᨹᩴ ᨸᩩᨸ᩠ᨹᨲᩮ ᩅᩥᨠᩈᨲᩦᨲᩥ ᩋᨲ᩠ᨳᩮᩣ. ᨧᨠ᩠ᨠᨾᨲ᩠ᨲᩣᨶᩥ ᨩᩣᨿᩁᩮᨲᩥ ᨲᩣᨶᩥ ᨸᩩᨸ᩠ᨹᩣᨶᩥ ᩁᨳᨧᨠ᩠ᨠᨸᨾᩣᨱᩣᨶᩥ ᩉᩩᨲ᩠ᩅᩣ ᨩᩣᨿᨶ᩠ᨲᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨠᩩᨾᩩᨴᨾᩣᩃᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᨶᩥᩔᩮᨱᩥᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨠᩮᩣᨱ᩠ᨯᨬ᩠ᨬᩔ ¶ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨶᩥᩔᩮᨱᩥᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩣᩈᩩ ᨩᩣᨲᩦᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨠᩮᩣᨱ᩠ᨯᨬ᩠ᨬᩔ ᨽᨣᩅᨲᩮᩣ ᨠᩣᩃᩮ ᩅᨯ᩠ᨰᨠᩥᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩈᨴ᩠ᨵᩮᩣ ᨸᩈᨶ᩠ᨶᩮᩣ ᨽᨣᩅᨲᩮᩣ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨽᨣᩅᨲᩮᩣ ᩅᩈᨶᨸᩣᩈᩣᨴᩔᩣᩁᩮᩣᩉᨶᨲ᩠ᨳᩣᨿ ᩈᩣᩁᨠᨭ᩠ᨮᨾᨿᩴ ᨶᩥᩔᩮᨱᩥᩴ ᨠᨲ᩠ᩅᩣ ᩏᩔᩣᨸᩮᨲ᩠ᩅᩣ ᨮᨸᩮᩈᩥ. ᨽᨣᩅᩣ ᨲᩔ ᨸᩈᩣᨴᩈᩴᩅᨯ᩠ᨰᨶᨲ᩠ᨳᩣᨿ ᨸᩔᨶ᩠ᨲᩔᩮᩅ ᩏᨸᩁᩥᨸᩣᩈᩣᨴᩴ ᩌᩁᩩᩉᩥ. ᩈᩮᩣ ᩋᨲᩦᩅ ᨸᩈᨶ᩠ᨶᩮᩣ ᨲᩮᨶᩮᩅ ᨸᩦᨲᩥᩈᩮᩣᨾᨶᩔᩮᨶ ᨠᩣᩃᩴ ᨠᨲ᩠ᩅᩣ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ ᨲᨲ᩠ᨳ ᨴᩥᨻ᩠ᨻᩈᨾ᩠ᨸᨲ᩠ᨲᩥᩴ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨩᩣᨿᨾᩣᨶᩮᩣ ᨶᩥᩔᩮᨱᩥᨴᩣᨶᨶᩥᩔᨶ᩠ᨴᩮᨶ ᩏᨧ᩠ᨧᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᨾᨶᩩᩔᩈᩩᨡᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪙. ᩈᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨠᩮᩣᨱ᩠ᨯᨬ᩠ᨬᩔ ᨽᨣᩅᨲᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᨠᩮᩣᨱ᩠ᨯᨬ᩠ᨬᩔᩣᨲᩥ ᨠᩩᨧ᩠ᨨᩥᨲᩮᩣ ᩉᩩᨲ᩠ᩅᩣ ᨯᩮᨲᩥ ᨸᩅᨲ᩠ᨲᨲᩦᨲᩥ ᨠᩮᩣᨱ᩠ᨯᩮᩣ, ᩃᩣᨾᨠᩈᨲ᩠ᨲᩮᩣ, ᨠᩮᩣᨱ᩠ᨯᨲᩮᩣ ᩋᨬ᩠ᨬᩮᩣᨲᩥ ᨠᩮᩣᨱ᩠ᨯᨬ᩠ᨬᩮᩣ, ᩋᩃᩣᨾᨠᩮᩣ ᩏᨲ᩠ᨲᨾᨸᩩᩁᩥᩈᩮᩣᨲᩥ ᩋᨲ᩠ᨳᩮᩣ. ᩋᨳ ᩅᩣ ᨻᩕᩣᩉ᩠ᨾᨱᨣᩮᩣᨲ᩠ᨲᩮᩈᩩ ᨠᩮᩣᨱ᩠ᨯᨬ᩠ᨬᨣᩮᩣᨲ᩠ᨲᩮ ᩏᨸ᩠ᨸᨶ᩠ᨶᨲ᩠ᨲᩣ ‘‘ᨠᩮᩣᨱ᩠ᨯᨬ᩠ᨬᩮᩣ’’ᨲᩥ ¶ ᨣᩮᩣᨲ᩠ᨲᩅᩈᩮᨶ ᨲᩔ ᨶᩣᨾᩴ, ᨲᩔ ᨠᩮᩣᨱ᩠ᨯᨬ᩠ᨬᩔ. ᩈᩮᩈᩴ ᨸᩣᨠᨭᨾᩮᩅᩣᨲᩥ.

ᨶᩥᩔᩮᨱᩥᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪓. ᩁᨲ᩠ᨲᩥᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨾᩥᨣᩃᩩᨴ᩠ᨴᩮᩣ ¶ ᨸᩩᩁᩮ ᩌᩈᩥᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩁᨲ᩠ᨲᩥᨸᩩᨸ᩠ᨹᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᨶᩮᩈᩣᨴᨠᩩᩃᩮ ᩏᨸ᩠ᨸᨶ᩠ᨶᩮᩣ ᨾᩥᨣᩅᨵᩣᨿ ᩋᩁᨬ᩠ᨬᩮ ᩅᩥᨧᩁᨾᩣᨶᩮᩣ ᨲᩔ ᨠᩣᩁᩩᨬ᩠ᨬᩮᨶ ᩋᩁᨬ᩠ᨬᩮ ᨧᩁᨾᩣᨶᩴ ᩅᩥᨸᩔᩥᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨸᩩᨸ᩠ᨹᩥᨲᩴ ᩁᨲ᩠ᨲᩥᨠᩴ ᨶᩣᨾ ᨸᩩᨸ᩠ᨹᩴ ᨠᩩᨭᨩᨸᩩᨸ᩠ᨹᨬ᩠ᨧ ᩈᩉ ᩅᨱ᩠ᨭᩮᨶ ᩒᨧᩥᨶᩥᨲ᩠ᩅᩣ ᩈᩮᩣᨾᨶᩔᨧᩥᨲ᩠ᨲᩮᨶ ᨸᩪᨩᩮᩈᩥ. ᨽᨣᩅᩣ ᩋᨶᩩᨾᩮᩣᨴᨶᩴ ᨠᨲ᩠ᩅᩣ ᨸᨠ᩠ᨠᩣᨾᩥ.

᪑᪓. ᩈᩮᩣ ᨲᩮᨶᩮᩅ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨠᩣᨾᩮᩈᩩ ᩌᨴᩦᨶᩅᩴ ¶ ᨴᩥᩈ᩠ᩅᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᨲ᩠ᨲᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ‘‘ᨶᩮᩈᩣᨴᨽᩪᨲᩮᨶ ᨾᨿᩣ ᨠᨲᨠᩩᩈᩃᩴ ᩈᩩᨶ᩠ᨴᩁ’’ᨶ᩠ᨲᩥ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨾᩥᨣᩃᩩᨴ᩠ᨴᩮᩣ ᨸᩩᩁᩮ ᩌᩈᩥᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨾᩥᨣᩣᨶᩴ ᩃᩩᨴ᩠ᨴᩮᩣ ᩈᩣᩉᩈᩥᨠᩮᩣ ᨾᩣᩁᨠᩮᩣᨲᩥ ᨾᩥᨣᩃᩩᨴ᩠ᨴᩮᩣ, ᨾᩥᨣᩮᩈᩩ ᩅᩣ ᩃᩩᨴ᩠ᨴᩮᩣ ᩃᩮᩣᨽᩦᨲᩥ ᨾᩥᨣᩃᩩᨴ᩠ᨴᩮᩣ, ᨶᩮᩈᩣᨴᩮᩣ ᩌᩈᩥᩴ ᨸᩩᩁᩮᨲᩥ ᩋᨲ᩠ᨳᩮᩣ.

᪑᪔. ᩁᨲ᩠ᨲᩥᨠᩴ ᨸᩩᨸ᩠ᨹᩥᨲᩴ ᨴᩥᩈ᩠ᩅᩣᨲᩥ ᨸᨴᩩᨾᨸᩩᨸ᩠ᨹᩣᨴᩦᨶᩥ ᩋᨶᩮᨠᩣᨶᩥ ᨸᩩᨸ᩠ᨹᩣᨶᩥ ᩈᩪᩁᩥᨿᩁᩴᩈᩥᩈᨾ᩠ᨹᩔᩮᨶ ᨴᩥᩅᩣ ᨸᩩᨸ᩠ᨹᨶ᩠ᨲᩥ ᩁᨲ᩠ᨲᩥᨿᩴ ᨾᨠᩩᩊᩥᨲᩣᨶᩥ ᩉᩮᩣᨶ᩠ᨲᩥ. ᨩᩣᨲᩥᩈᩩᨾᨶᨾᩃ᩠ᩃᩥᨠᩣᨴᩦᨶᩥ ᩋᨶᩮᨠᩣᨶᩥ ᨸᩩᨸ᩠ᨹᩣᨶᩥ ᨸᨶ ᩁᨲ᩠ᨲᩥᨿᩴ ᨸᩩᨸ᩠ᨹᨶ᩠ᨲᩥ ᨶᩮᩣ ᨴᩥᩅᩣ. ᨲᩈ᩠ᨾᩣ ᩁᨲ᩠ᨲᩥᨿᩴ ᨸᩩᨸ᩠ᨹᨶᨲᩮᩣ ᩁᨲ᩠ᨲᩥᨸᩩᨸ᩠ᨹᨶᩣᨾᨠᩣᨶᩥ ᩋᨶᩮᨠᩣᨶᩥ ᩈᩩᨣᨶ᩠ᨵᨸᩩᨸ᩠ᨹᩣᨶᩥ ᨧ ᨠᩩᨭᨩᨸᩩᨸ᩠ᨹᩣᨶᩥ ᨧ ᨣᩉᩮᨲ᩠ᩅᩣ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩁᨲ᩠ᨲᩥᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪔. ᩏᨴᨸᩣᨶᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩅᩥᨸᩔᩥᨶᩮᩣ ᨽᨣᩅᨲᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩏᨴᨸᩣᨶᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨳᩮᩁᩮᩣ ᨸᩩᩁᩥᨾᨾᩩᨶᩥᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᩋᨶᩮᨠᩮᩈᩩ ᨽᩅᩮᩈᩩ ᨠᨲᨸᩩᨬ᩠ᨬᩈᨬ᩠ᨧᨿᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ¶ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ‘‘ᨸᩣᨶᩦᨿᨴᩣᨶᩴ ᨾᨿᩣ ᨴᩣᨲᨻ᩠ᨻᩴ, ᨲᨬ᩠ᨧ ᨶᩥᩁᨶ᩠ᨲᩁᩴ ᨠᨲ᩠ᩅᩣ ᨸᩅᨲ᩠ᨲᩮᨲᩩᩴ ᩅᨭ᩠ᨭᨲᩦ’’ᨲᩥ ᨧᩥᨶ᩠ᨲᩮᨲ᩠ᩅᩣ ᩑᨠᩴ ᨠᩪᨸᩴ ᨡᨶᩣᨸᩮᨲ᩠ᩅᩣ ᩏᨴᨠᩈᨾ᩠ᨸᨲ᩠ᨲᨠᩣᩃᩮ ᩍᨭ᩠ᨮᨠᩣᩉᩥ ᨧᩥᨶᩣᨸᩮᨲ᩠ᩅᩣ ᨳᩥᩁᩴ ᨠᨲ᩠ᩅᩣ ᨲᨲ᩠ᨳ ᩏᨭ᩠ᨮᩥᨲᩮᨶ ᩏᨴᨠᩮᨶ ᨸᩩᨱ᩠ᨱᩴ ᨲᩴ ᩏᨴᨸᩣᨶᩴ ᩅᩥᨸᩔᩥᩔ ᨽᨣᩅᨲᩮᩣ ᨶᩥᨿ᩠ᨿᩣᨴᩮᩈᩥ. ᨽᨣᩅᩣ ᨸᩣᨶᩦᨿᨴᩣᨶᩣᨶᩥᩈᩴᩈᨴᩦᨸᨠᩴ ᩋᨶᩩᨾᩮᩣᨴᨶᩴ ᩋᨠᩣᩈᩥ ¶ . ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᨶᩥᨻ᩠ᨻᨲ᩠ᨲᨶᩥᨻ᩠ᨻᨲ᩠ᨲᨭ᩠ᨮᩣᨶᩮ ᨸᩮᩣᨠ᩠ᨡᩁᨱᩦᩏᨴᨸᩣᨶᨸᩣᨶᩦᨿᩣᨴᩥᩈᨾ᩠ᨸᨶ᩠ᨶᩮᩣ ᩈᩩᨡᨾᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨴ᩠ᨵᩮᩣ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪑᪘. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩅᩥᨸᩔᩥᨶᩮᩣ ᨽᨣᩅᨲᩮᩣᨲᩥᩌᨴᩥᨾᩣᩉ. ᨲᨲ᩠ᨳ ᩏᨴᨸᩣᨶᩮᩣ ᨠᨲᩮᩣ ᨾᨿᩣᨲᩥ ᩏᨴᨠᩴ ᨸᩥᩅᨶ᩠ᨲᩥ ᩑᨲ᩠ᨳᩣᨲᩥ ᩏᨴᨸᩣᨶᩮᩣ, ᨠᩪᨸᨸᩮᩣᨠ᩠ᨡᩁᨱᩦᨲᩊᩣᨠᩣᨶᨾᩮᨲᩴ ᩋᨵᩥᩅᨧᨶᩴ. ᩈᩮᩣ ᩏᨴᨸᩣᨶᩮᩣ ᨠᩪᨸᩮᩣ ᩅᩥᨸᩔᩥᩔ ᨽᨣᩅᨲᩮᩣ ᩋᨲ᩠ᨳᩣᨿ ᨠᨲᩮᩣ ᨡᨶᩥᨲᩮᩣᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩏᨴᨸᩣᨶᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪕. ᩈᩦᩉᩣᩈᨶᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᩥᨻ᩠ᨻᩩᨲᩮ ¶ ᩃᩮᩣᨠᨶᩣᨳᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩦᩉᩣᩈᨶᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᨶᩥᨻ᩠ᨻᩣᨶᩣᨵᩥᨣᨾᨲ᩠ᨳᩣᨿ ᨠᨲᨸᩩᨬ᩠ᨬᩪᨸᨧᨿᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨣᩉᨸᨲᩥᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᨲᩈ᩠ᨾᩥᩴ ᨽᨣᩅᨲᩥ ᨸᩁᩥᨶᩥᨻ᩠ᨻᩩᨲᩮ ᩈᨲ᩠ᨲᩉᩥ ᩁᨲᨶᩮᩉᩥ ᨡᨧᩥᨲᩴ ᩈᩦᩉᩣᩈᨶᩴ ᨠᩣᩁᩣᨸᩮᨲ᩠ᩅᩣ ᨻᩮᩣᨵᩥᩁᩩᨠ᩠ᨡᩴ ᨸᩪᨩᩮᩈᩥ, ᨻᩉᩪᩉᩥ ᨾᩣᩃᩣᨣᨶ᩠ᨵᨵᩪᨸᩮᩉᩥ ᨧ ᨸᩪᨩᩮᩈᩥ.

᪒᪑. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩈᨻ᩠ᨻᨲ᩠ᨳ ᨸᩪᨩᩥᨲᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨥᩁᩣᩅᩣᩈᩴ ᩅᩈᨶ᩠ᨲᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨬᩣᨲᩥᩅᨣ᩠ᨣᩴ ᨸᩉᩣᨿ ᨸᨻ᩠ᨻᨩᩥᨲᩮᩣ ᨶᨧᩥᩁᩔᩮᩅ ᩋᩁᩉᩣ ᩉᩩᨲ᩠ᩅᩣ ¶ ᨸᩩᨻ᩠ᨻᩪᨸᨧᩥᨲᨠᩩᩈᩃᩈᨾ᩠ᨽᩣᩁᩴ ᩈᩁᩥᨲ᩠ᩅᩣ ᩈᨬ᩠ᨩᩣᨲᩈᩮᩣᨾᨶᩔᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨶᩥᨻ᩠ᨻᩩᨲᩮ ᩃᩮᩣᨠᨶᩣᨳᨾ᩠ᩉᩦᨲᩥᩌᨴᩥᨾᩣᩉ. ᨲᨲ᩠ᨳ ᩈᩦᩉᩣᩈᨶᨾᨴᩣᩈᩉᨶ᩠ᨲᩥ ᩈᩦᩉᩁᩪᨸᩉᩥᩁᨬ᩠ᨬᩈᩩᩅᨱ᩠ᨱᩁᨲᨶᩮᩉᩥ ᨡᨧᩥᨲᩴ ᩌᩈᨶᩴ ᩈᩦᩉᩣᩈᨶᩴ, ᩈᩦᩉᩔ ᩅᩣ ᩋᨽᩦᨲᩔ ᨽᨣᩅᨲᩮᩣ ᨶᩥᩈᩥᨶ᩠ᨶᩣᩁᩉᩴ, ᩈᩦᩉᩴ ᩅᩣ ᩈᩮᨭ᩠ᨮᩴ ᩏᨲ᩠ᨲᨾᩴ ᩌᩈᨶᨶ᩠ᨲᩥ ᩈᩦᩉᩣᩈᨶᩴ, ᨲᩴ ᩋᩉᩴ ᩋᨴᩣᩈᩥᩴ, ᨻᩮᩣᨵᩥᩁᩩᨠ᩠ᨡᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩈᩦᩉᩣᩈᨶᨴᩣᨿᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪖. ᨾᨣ᩠ᨣᨴᨲ᩠ᨲᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩋᨶᩮᩣᨾᨴᩔᩦ ᨽᨣᩅᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨾᨣ᩠ᨣᨴᨲ᩠ᨲᩥᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩣᨿᩈ᩠ᨾᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩋᨶᩮᩣᨾᨴᩔᩥᩔ ¶ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᩅᩈᨶ᩠ᨲᩮᩣ ᩋᨶᩮᩣᨾᨴᩔᩥᩴ ᨽᨣᩅᨶ᩠ᨲᩴ ᩌᨠᩣᩈᩮ ᨧᨦ᩠ᨠᨾᨶ᩠ᨲᩴ ᨸᩣᨴᩩᨴ᩠ᨵᩣᩁᩮ ᨸᩣᨴᩩᨴ᩠ᨵᩣᩁᨧᨦ᩠ᨠᨾᨶᨭ᩠ᨮᩣᨶᩮ ᨸᩩᨸ᩠ᨹᩣᨶᩴ ᩅᩥᨠᩥᩁᨱᩴ ᩋᨧ᩠ᨨᩁᩥᨿᨬ᩠ᨧ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨸᩩᨸ᩠ᨹᩣᨶᩥ ᩌᨠᩣᩈᩮ ᩏᨠ᩠ᨡᩥᨸᩥ, ᨲᩣᨶᩥ ᩅᩥᨲᩣᨶᩴ ᩉᩩᨲ᩠ᩅᩣ ᩋᨭ᩠ᨮᩴᩈᩩ.

᪒᪖. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᩈᩩᨣᨲᩦᩈᩩᨿᩮᩅ ᩈᩴᩈᩁᨶ᩠ᨲᩮᩣ ᩈᨻ᩠ᨻᨲ᩠ᨳ ᨸᩪᨩᩥᨲᩮᩣ ᩈᩩᨡᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᨠᨾᩮᨶ ᨿᩮᩣᨻ᩠ᨻᨬ᩠ᨬᩴ ᨸᩣᨸᩩᨱᩥᨲ᩠ᩅᩣ ᩈᨴ᩠ᨵᩣᨩᩣᨲᩮᩣ ᨸᨻ᩠ᨻᨩᩥᨲ᩠ᩅᩣ ᩅᨲ᩠ᨲᩈᨾ᩠ᨸᨶ᩠ᨶᩮᩣ ¶ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᨲ᩠ᨲᩮᩣ ᨧᨦ᩠ᨠᨾᨶᩔ ᨸᩪᨩᩥᨲᨲ᩠ᨲᩣ ᨾᨣ᩠ᨣᨴᨲ᩠ᨲᩥᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ. ᩈᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩋᨶᩮᩣᨾᨴᩔᩦ ᨽᨣᩅᩣᨲᩥᩌᨴᩥᨾᩣᩉ. ᨴᩥᨭ᩠ᨮᨵᨾ᩠ᨾᩈᩩᨡᨲ᩠ᨳᩣᨿᩣᨲᩥ ᩍᨾᩈ᩠ᨾᩥᩴ ᩋᨲ᩠ᨲᨽᩣᩅᩮ ᨧᨦ᩠ᨠᨾᨶᩮᨶ ᩈᩁᩦᩁᩈᩃ᩠ᩃᩉᩩᨠᩣᨴᩥᩈᩩᨡᩴ ᨸᨭᩥᨧ᩠ᨧᩣᨲᩥ ᩋᨲ᩠ᨳᩮᩣ. ᩋᨻ᩠ᨽᩮᩣᨠᩣᩈᨾ᩠ᩉᩥ ᨧᨦ᩠ᨠᨾᩦᨲᩥ ᩋᨻ᩠ᨽᩮᩣᨠᩣᩈᩮ ᩋᨦ᩠ᨣᨱᨭ᩠ᨮᩣᨶᩮ ᨧᨦ᩠ᨠᨾᩥ, ᨸᨴᩅᩥᨠ᩠ᨡᩮᨸᩴ ᨸᨴᩈᨬ᩠ᨧᩣᩁᩴ ᩋᨠᩣᩈᩦᨲᩥ ᩋᨲ᩠ᨳᩮᩣ.

ᩏᨴ᩠ᨵᨲᩮ ᨸᩣᨴᩮ ᨸᩩᨸ᩠ᨹᩣᨶᩦᨲᩥ ᨧᨦ᩠ᨠᨾᨶ᩠ᨲᩮᨶ ᨸᩣᨴᩮ ᩏᨴ᩠ᨵᨲᩮ ᨸᨴᩩᨾᩩᨸ᩠ᨸᩃᩣᨴᩦᨶᩥ ᨸᩩᨸ᩠ᨹᩣᨶᩥ ᨸᨳᩅᩥᨲᩮᩣ ᩏᨣ᩠ᨣᨶ᩠ᨲ᩠ᩅᩣ ᨧᨦ᩠ᨠᨾᩮ ᩅᩥᨠᩥᩁᩥᩴᩈᩪᨲᩥ ᩋᨲ᩠ᨳᩮᩣ. ᩈᩮᩣᨽᩴ ᨾᩩᨴ᩠ᨵᨶᩥ ᨲᩥᨭ᩠ᨮᩁᩮᨲᩥ ᨻᩩᨴ᩠ᨵᩔ ¶ ᨾᩩᨴ᩠ᨵᨶᩥ ᩈᩦᩈᩮ ᩈᩮᩣᨽᨿᨾᩣᨶᩣ ᨲᩣᨶᩥ ᨲᩥᨭ᩠ᨮᨶ᩠ᨲᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨾᨣ᩠ᨣᨴᨲ᩠ᨲᩥᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᩑᨠᨴᩦᨸᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨸᨴᩩᨾᩩᨲ᩠ᨲᩁᩔ ᨾᩩᨶᩥᨶᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩑᨠᨴᩦᨸᩥᨿᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩣᨿᩈ᩠ᨾᩣ ᨸᩩᩁᩥᨾᨩᩥᨶᩈᩮᨭ᩠ᨮᩮᩈᩩ ᨠᨲᨠᩩᩈᩃᩈᨾ᩠ᨽᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨣᩉᨸᨲᩥᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᨴ᩠ᨵᩮᩣ ᨸᩈᨶ᩠ᨶᩮᩣ ᨽᨣᩅᨲᩮᩣ ᩈᩃᩃᨾᩉᩣᨻᩮᩣᨵᩥᨾ᩠ᩉᩥ ᩑᨠᨸᨴᩦᨸᩴ ᨸᩪᨩᩮᩈᩥ, ᨳᩣᩅᩁᩴ ᨠᨲ᩠ᩅᩣ ᨶᩥᨧ᩠ᨧᨾᩮᨠᨸᨴᩦᨸᨸᩪᨩᨶᨲ᩠ᨳᩣᨿ ᨲᩮᩃᩅᨭ᩠ᨭᩴ ᨸᨭ᩠ᨮᨸᩮᩈᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩈᨻ᩠ᨻᨲ᩠ᨳ ᨩᩃᨾᩣᨶᩮᩣ ᨸᩈᨶ᩠ᨶᨧᨠ᩠ᨡᩩᨠᩮᩣ ᩏᨽᨿᩈᩩᨡᨾᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᩅᩥᨽᩅᩈᨾ᩠ᨸᨶ᩠ᨶᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᨲ᩠ᨲᩴ ᨸᨲ᩠ᨲᩮᩣ ᨴᩦᨸᨸᩪᨩᩣᨿ ᩃᨴ᩠ᨵᩅᩥᩈᩮᩈᩣᨵᩥᨣᨾᨲ᩠ᨲᩣ ᩑᨠᨴᩦᨸᩥᨿᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ.

᪓᪐. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨾᩩᨶᩥᨶᩮᩣᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩑᨠᨴᩦᨸᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪘. ᨾᨱᩥᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩒᩁᩮᨶ ¶ ¶ ᩉᩥᨾᩅᨶ᩠ᨲᩔᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨾᨱᩥᨸᩪᨩᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨳᩮᩁᩮᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᨲᨲ᩠ᨳᩣᨴᩦᨶᩅᩴ ᨴᩥᩈ᩠ᩅᩣ ᨥᩁᩣᩅᩣᩈᩴ ᨸᩉᩣᨿ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩉᩥᨾᩅᨶ᩠ᨲᩒᩁᨽᩣᨣᩮ ᩑᨠᩥᩔᩣ ᨶᨴᩥᨿᩣ ᩈᨾᩦᨸᩮ ᨸᨱ᩠ᨱᩈᩣᩃᩴ ᨠᩣᩁᩮᨲ᩠ᩅᩣ ᩅᩈᨶ᩠ᨲᩮᩣ ᩅᩥᩅᩮᨠᨠᩣᨾᨲᩣᨿ ᨲᩔᩣᨶᩩᨠᨾ᩠ᨸᩣᨿ ᨧ ᨲᨲ᩠ᨳ ᩏᨸᨣᨲᩴ ᨸᨴᩩᨾᩩᨲ᩠ᨲᩁᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨾᨱᩥᨸᩃ᩠ᩃᨦ᩠ᨠᩴ ¶ ᨽᨣᩅᨲᩮᩣ ᨸᩪᨩᩮᩈᩥ. ᨽᨣᩅᩣ ᨲᩔ ᨸᩈᩣᨴᩅᨯ᩠ᨰᨶᨲ᩠ᨳᩣᨿ ᨲᨲ᩠ᨳ ᨶᩥᩈᩦᨴᩥ. ᩈᩮᩣ ᨽᩥᨿ᩠ᨿᩮᩣᩈᩮᩣᨾᨲ᩠ᨲᩣᨿ ᨸᩈᨶ᩠ᨶᩮᩣ ᨶᩥᨻ᩠ᨻᩣᨶᩣᨵᩥᨣᨾᨲ᩠ᨳᩣᨿ ᨸᨲ᩠ᨳᨶᩴ ᩋᨠᩣᩈᩥ. ᨽᨣᩅᩣ ᩋᨶᩩᨾᩮᩣᨴᨶᩴ ᩅᨲ᩠ᩅᩣ ᨸᨠ᩠ᨠᩣᨾᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩈᨻ᩠ᨻᨲ᩠ᨳ ᨸᩪᨩᩥᨲᩮᩣ ᩈᩩᨡᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᩅᩥᨽᩅᩈᨾ᩠ᨸᨶ᩠ᨶᩮ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᨥᩁᩣᩅᩣᩈᩴ ᩅᩈᨶ᩠ᨲᩮᩣ ᩑᨠᨴᩥᩅᩈᩴ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩋᩉᩮᩣᩈᩥ.

᪓᪔. ᩈᩮᩣ ᩑᨠᨴᩥᩅᩈᩴ ᩋᨲ᩠ᨲᨶᩣ ᨠᨲᨠᩩᩈᩃᩴ ᩈᩁᩥᨲ᩠ᩅᩣ ᩈᨬ᩠ᨩᩣᨲᩈᩮᩣᨾᨶᩔᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩒᩁᩮᨶ ᩉᩥᨾᩅᨶ᩠ᨲᩔᩣᨲᩥᩌᨴᩥᨾᩣᩉ. ᨲᨲ᩠ᨳ ᩒᩁᩮᨶᩣᨲᩥ ᩉᩥᨾᩅᨶ᩠ᨲᩔ ᩋᨸᩁᩴ ᨽᩣᨣᩴ ᩅᩥᩉᩣᨿ ᩒᩁᩮᨶ, ᨽᩩᨾ᩠ᨾᨲ᩠ᨳᩮ ᨠᩁᨱᩅᨧᨶᩴ, ᩒᩁᩈ᩠ᨾᩥᩴ ᨴᩥᩈᩣᨽᩣᨣᩮᨲᩥ ᩋᨲ᩠ᨳᩮᩣ. ᨶᨴᩥᨠᩣ ᩈᨾ᩠ᨸᩅᨲ᩠ᨲᨳᩣᨲᩥ ᩋᨸᩣᨠᨭᨶᩣᨾᨵᩮᨿ᩠ᨿᩣ ᩑᨠᩣ ᨶᨴᩦ ᩈᩴᩈᩩᨭ᩠ᨮᩩ ᨸᩅᨲ᩠ᨲᩣᨶᩦ ᩅᩉᩣᨶᩦ ᩈᨶ᩠ᨴᨾᩣᨶᩣ ᩋᩉᩮᩣᩈᩦᨲᩥ ᩋᨲ᩠ᨳᩮᩣ. ᨲᩔᩣ ᨧᩣᨶᩩᨸᨡᩮᨲ᩠ᨲᨾ᩠ᩉᩦᨲᩥ ᨲᩔᩣ ᨶᨴᩥᨿᩣ ᩋᨶᩩᨸᨡᩮᨲ᩠ᨲᨾ᩠ᩉᩥ ᨲᩦᩁᩈᨾᩦᨸᩮᨲᩥ ᩋᨲ᩠ᨳᩮᩣ. ᩈᨿᨾ᩠ᨽᩪ ᩅᩈᨲᩮ ᨲᨴᩣᨲᩥ ᨿᨴᩣ ᩋᩉᩴ ᨾᨱᩥᨸᩃ᩠ᩃᨦ᩠ᨠᩴ ᨸᩪᨩᩮᩈᩥᩴ, ᨲᨴᩣ ᩋᨶᩣᨧᩁᩥᨿᨠᩮᩣ ᩉᩩᨲ᩠ᩅᩣ ᩈᨿᨾᩮᩅ ᨻᩩᨴ᩠ᨵᨽᩪᨲᩮᩣ ᨽᨣᩅᩣ ᩅᩈᨲᩮ ᩅᩥᩉᩁᨲᩦᨲᩥ ᩋᨲ᩠ᨳᩮᩣ.

᪓᪕. ᨾᨱᩥᩴ ᨸᨣ᩠ᨣᨿ᩠ᩉ ᨸᩃ᩠ᩃᨦ᩠ᨠᨶ᩠ᨲᩥ ᨾᨱᩥᨶ᩠ᨲᩥ ᨧᩥᨲ᩠ᨲᩴ ᩌᩁᩣᨵᩮᨲᩥ ᩈᩮᩣᨾᨶᩔᩴ ᨠᩁᩮᩣᨲᩦᨲᩥ ᨾᨱᩥ, ᩋᨳ ᩅᩣ ᨾᩣᨲᩥ ᨸᨾᩣᨱᩴ ᨠᩁᩮᩣᨲᩥ ᩌᨽᩁᨱᨶ᩠ᨲᩥ ᨾᨱᩥ, ᩋᨳ ᩅᩣ ᨾᩁᨶ᩠ᨲᩣᨸᩥ ᩁᩣᨩᨿᩩᩅᩁᩣᨩᩣᨴᨿᩮᩣ ᨲᩴ ᨶ ᨸᩁᩥᨧ᩠ᨧᨩᨶ᩠ᨲᩥ ᨲᨴᨲ᩠ᨳᩣᨿ ᩈᨦ᩠ᨣᩣᨾᩴ ᨠᩁᩮᩣᨶ᩠ᨲᩦᨲᩥ ᨾᨱᩥ, ᨲᩴ ᨾᨱᩥᩴ ᨾᨱᩥᨾᨿᩴ ᨸᩃ᩠ᩃᨦ᩠ᨠᩴ ᨾᨶᩮᩣᩁᨾᩴ ᩈᩣᨵᩩ ᨧᩥᨲ᩠ᨲᩴ ᩈᩩᨭ᩠ᨮᩩ ᩅᩥᨧᩥᨲ᩠ᨲᩴ ᨸᨣ᩠ᨣᨿ᩠ᩉ ᨣᩉᩮᨲ᩠ᩅᩣ ᨻᩩᨴ᩠ᨵᩈᩮᨭ᩠ᨮᩔ ᩋᨽᩥᩁᩮᩣᨸᨿᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᨻ᩠ᨻᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨾᨱᩥᨸᩪᨩᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪙. ᨲᩥᨠᩥᨧ᩠ᨨᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᨣᩁᩮ ¶ ᨻᨶ᩠ᨵᩩᨾᨲᩥᨿᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨲᩥᨠᩥᨧ᩠ᨨᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩣᨿᩈ᩠ᨾᩣ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ¶ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᨻᨶ᩠ᨵᩩᨾᨲᩦᨶᨣᩁᩮ ᩅᩮᨩ᩠ᨩᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᨻᩉᩩᩔᩩᨲᩮᩣ ᩈᩩᩈᩥᨠ᩠ᨡᩥᨲᩮᩣ ᩅᩮᨩ᩠ᨩᨠᨾ᩠ᨾᩮ ᨨᩮᨠᩮᩣ ¶ ᨻᩉᩪ ᩁᩮᩣᨣᩥᨶᩮᩣ ᨲᩥᨠᩥᨧ᩠ᨨᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᩏᨸᨭ᩠ᨮᩣᨠᩔ ᩋᩈᩮᩣᨠᨶᩣᨾᨲ᩠ᨳᩮᩁᩔ ᩁᩮᩣᨣᩴ ᨲᩥᨠᩥᨧ᩠ᨨᩥ. ᩈᩮᩣ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩋᨸᩁᩣᨸᩁᩴ ᩈᩩᨡᩴ ᩋᨶᩩᨽᩅᨶ᩠ᨲᩮᩣ ᨶᩥᨻ᩠ᨻᨲ᩠ᨲᨶᩥᨻ᩠ᨻᨲ᩠ᨲᨽᩅᩮ ᩋᩁᩮᩣᨣᩮᩣ ᨴᩦᨥᩣᨿᩩᨠᩮᩣ ᩈᩩᩅᨱ᩠ᨱᩅᨱ᩠ᨱᩈᩁᩦᩁᩮᩣ ᩋᩉᩮᩣᩈᩥ.

᪓᪙. ᩈᩮᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᨣᩉᨸᨲᩥᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᩈᨻ᩠ᨻᩈᩥᨸ᩠ᨸᩮᩈᩩ ᨶᩥᨸ᩠ᨹᨲ᩠ᨲᩥᩴ ᨸᨲ᩠ᨲᩮᩣ ᩋᩁᩮᩣᨣᩮᩣ ᩈᩩᨡᩥᨲᩮᩣ ᩅᩥᨽᩅᩈᨾ᩠ᨸᨶ᩠ᨶᩮᩣ ᩁᨲᨶᨲ᩠ᨲᨿᩮ ᨸᩈᨶ᩠ᨶᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨥᩁᩣᩅᩣᩈᩴ ᨸᩉᩣᨿ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩉᩩᨲ᩠ᩅᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨶᨣᩁᩮ ᨻᨶ᩠ᨵᩩᨾᨲᩥᨿᩣᨲᩥᩌᨴᩥᨾᩣᩉ. ᨲᩴ ᩈᨻ᩠ᨻᩴ ᩉᩮᨭ᩠ᨮᩣ ᩅᩩᨲ᩠ᨲᨶᨿᨲ᩠ᨲᩣ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨲᩥᨠᩥᨧ᩠ᨨᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᩈᨦ᩠ᨥᩩᨸᨭ᩠ᨮᩣᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩅᩮᩔᨽᩩᨾ᩠ᩉᩥ ᨽᨣᩅᨲᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᨦ᩠ᨥᩩᨸᨭ᩠ᨮᩣᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨳᩮᩁᩮᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᨠᩩᩈᩃᩈᨾ᩠ᨽᩣᩁᩮᩣ ᩋᨶᩮᨠᩮᩈᩩ ᨽᩅᩮᩈᩩ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩮᩔᨽᩩᩔ ᨽᨣᩅᨲᩮᩣ ᨠᩣᩃᩮ ᨲᩔᩣᩁᩣᨾᩥᨠᩔ ᨸᩩᨲ᩠ᨲᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨴ᩠ᨵᩮᩣ ᨸᩈᨶ᩠ᨶᩮᩣ ᩅᩥᩉᩣᩁᩮᩈᩩ ᩌᩁᩣᨾᩥᨠᨠᨾ᩠ᨾᩴ ᨠᩁᩮᩣᨶ᩠ᨲᩮᩣ ᩈᨠ᩠ᨠᨧ᩠ᨧᩴ ᩈᨦ᩠ᨥᩴ ᩏᨸᨭ᩠ᨮᩣᩈᩥ. ᩈᩮᩣ ᨲᩮᨶᩮᩅ ᨠᩩᩈᩃᨠᨾ᩠ᨾᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩈᩣᩅᨲ᩠ᨳᩥᨿᩴ ᨣᩉᨸᨲᩥᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩅᩥᨽᩅᩈᨾ᩠ᨸᨶ᩠ᨶᩮᩣ ᩈᩩᨡᨸ᩠ᨸᨲ᩠ᨲᩮᩣ ᨸᩣᨠᨭᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᩈᩣᩈᨶᩮ ᨸᩈᨶ᩠ᨶᩮᩣ ᨸᨻ᩠ᨻᨩᩥᨲ᩠ᩅᩣ ᩅᨲ᩠ᨲᩈᨾ᩠ᨸᨶ᩠ᨶᩮᩣ ᩈᩣᩈᨶᩴ ᩈᩮᩣᨽᨿᨾᩣᨶᩮᩣ ᩅᩥᨸᩔᨶᩴ ᩅᨯ᩠ᨰᩮᨶ᩠ᨲᩮᩣ ᨶᨧᩥᩁᩔᩮᩅ ᩈᩉ ᨸᨭᩥᩈᨾ᩠ᨽᩥᨴᩣᩉᩥ ᩋᩁᩉᨲ᩠ᨲᩴ ᨸᨲ᩠ᨲᩮᩣ ᨨᩊᨽᩥᨬ᩠ᨬᩮᩣ ᨸᩩᨻ᩠ᨻᩮ ᨠᨲᨠᩩᩈᩃᨠᨾ᩠ᨾᩅᩈᩮᨶ ᩈᨦ᩠ᨥᩩᨸᨭ᩠ᨮᩣᨠᨲ᩠ᨳᩮᩁᩮᩣᨲᩥ ᨸᩣᨠᨭᩮᩣ ᩋᩉᩮᩣᩈᩥ.

᪔᪕. ᩈᩮᩣ ¶ ᩑᨠᨴᩥᩅᩈᩴ ‘‘ᨸᩩᨻ᩠ᨻᩮ ᨾᨿᩣ ᨠᩥᩴ ᨶᩣᨾ ᨠᨾ᩠ᨾᩴ ᨠᨲ᩠ᩅᩣ ᩋᨿᩴ ᩃᩮᩣᨠᩩᨲ᩠ᨲᩁᩈᨾ᩠ᨸᨲ᩠ᨲᩥ ᩃᨴ᩠ᨵᩣ’’ᨲᩥ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᨸᨧ᩠ᨧᨠ᩠ᨡᨲᩮᩣ ᨩᩣᨶᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᩣᨠᨭᩴ ᨠᩁᩮᩣᨶ᩠ᨲᩮᩣ ᩅᩮᩔᨽᩩᨾ᩠ᩉᩥ ᨽᨣᩅᨲᩦᨲᩥᩌᨴᩥᨾᩣᩉ. ᨲᨲ᩠ᨳ ᩋᩉᩮᩣᩈᩣᩁᩣᨾᩥᨠᩮᩣ ᩋᩉᨶ᩠ᨲᩥ ᩋᩉᩴ ¶ ᩅᩮᩔᨽᩩᩔ ᨽᨣᩅᨲᩮᩣ ᩈᩣᩈᨶᩮ ᩌᩁᩣᨾᩥᨠᩮᩣ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩉᩮᨭ᩠ᨮᩣ ᩅᩩᨲ᩠ᨲᨶᨿᨲ᩠ᨲᩣ ᩏᨲ᩠ᨲᩣᨶᨲ᩠ᨳᨲ᩠ᨲᩣ ᨧ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩈᨦ᩠ᨥᩩᨸᨭ᩠ᨮᩣᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᩋᨭ᩠ᨮᩣᩁᩈᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪙. ᨠᩩᨭᨩᨸᩩᨸ᩠ᨹᩥᨿᩅᨣ᩠ᨣᩮᩣ

᪑-᪑᪐. ᨠᩩᨭᨩᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

ᩍᨲᩮᩣ ¶ ¶ ᨸᩁᨾ᩠ᨸᩥ ᩑᨠᩪᨶᩅᩦᩈᨲᩥᨾᩅᨣ᩠ᨣᩮ ᩌᨣᨲᩣᨶᩴ ᩍᨾᩮᩈᩴ ᨠᩩᨭᨩᨸᩩᨸ᩠ᨹᩥᨿᨲ᩠ᨳᩮᩁᩣᨴᩦᨶᩴ ᨴᩈᨶ᩠ᨶᩴ ᨳᩮᩁᩣᨶᩴ ᩋᨸᩩᨻ᩠ᨻᩴ ᨶᨲ᩠ᨳᩥ. ᨲᩮᩈᨬ᩠ᩉᩥ ᨳᩮᩁᩣᨶᩴ ᨸᩩᩁᩥᨾᨻᩩᨴ᩠ᨵᩣᨶᩴ ᩈᨶ᩠ᨲᩥᨠᩮ ᨠᨲᨸᩩᨬ᩠ᨬᩈᨾ᩠ᨽᩣᩁᩣᨶᩴ ᩅᩈᩮᨶ ᨸᩣᨠᨭᨶᩣᨾᩣᨶᩥ ᨧᩮᩅ ᨶᩥᩅᩣᩈᨶᨣᩁᩣᨴᩦᨶᩥ ᨧ ᩉᩮᨭ᩠ᨮᩣ ᩅᩩᨲ᩠ᨲᨶᨿᩮᨶᩮᩅ ᩅᩮᨴᩥᨲᨻ᩠ᨻᩣᨶᩦᨲᩥ ᨲᩴ ᩈᨻ᩠ᨻᩴ ᩋᨸᨴᩣᨶᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩑᨠᩪᨶᩅᩦᩈᨲᩥᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪒᪐. ᨲᨾᩣᩃᨸᩩᨸ᩠ᨹᩥᨿᩅᨣ᩠ᨣᩮᩣ

᪑-᪑᪐. ᨲᨾᩣᩃᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

ᩅᩦᩈᨲᩥᨾᩮ ¶ ᩅᨣ᩠ᨣᩮ ᨸᨮᨾᨲ᩠ᨳᩮᩁᩣᨸᨴᩣᨶᩴ ᩏᨲ᩠ᨲᩣᨶᨾᩮᩅ.

᪖. ᨴᩩᨲᩥᨿᨲ᩠ᨳᩮᩁᩣᨸᨴᩣᨶᩮ ᨿᩴ ᨴᩣᨿᩅᩣᩈᩥᨠᩮᩣ ᩍᩈᩦᨲᩥ ᩍᩈᩥᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩅᨶᩮ ᩅᩈᨶᨽᩣᩅᩮᨶ ᨴᩣᨿᩅᩣᩈᩥᨠᩮᩣ ᩍᩈᩦᨲᩥ ᩈᨦ᩠ᨡᩴ ᨣᨲᩮᩣ, ᩋᨲ᩠ᨲᨶᩮᩣ ᩋᨶᩩᨠᨾ᩠ᨸᩣᨿ ᨲᩴ ᩅᨶᩴ ᩏᨸᨣᨲᩔ ᩈᩥᨴ᩠ᨵᨲ᩠ᨳᩔ ᩈᨲ᩠ᨳᩩᨶᩮᩣ ᩅᩈᨶᨾᨱ᩠ᨯᨸᨧ᩠ᨨᩣᨴᨶᨲ᩠ᨳᩣᨿ ᨿᩴ ᨲᩥᨱᩴ, ᨲᩴ ᩃᩣᨿᨲᩥ ᨨᩥᨶ᩠ᨴᨲᩦᨲᩥ ᩋᨲ᩠ᨳᩮᩣ. ᨴᨻ᩠ᨻᨨᨴᨶᩴ ᨠᨲ᩠ᩅᩣ ᩋᨶᩮᨠᩮᩉᩥ ᨡᩩᨴ᩠ᨴᨠᨴᨱ᩠ᨯᨠᩮᩉᩥ ᨾᨱ᩠ᨯᨸᩴ ᨠᨲ᩠ᩅᩣ ᨲᩴ ᨲᩥᨱᩮᨶ ᨨᩣᨴᩮᨲ᩠ᩅᩣ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᩋᩉᩴ ᩋᨴᩣᩈᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪘. ᩈᨲ᩠ᨲᩣᩉᩴ ᨵᩣᩁᨿᩩᩴ ᨲᨲ᩠ᨳᩣᨲᩥ ᨲᩴ ᨾᨱ᩠ᨯᨸᩴ ᨲᨲ᩠ᨳ ᨮᩥᨲᩣ ᨴᩮᩅᨾᨶᩩᩔᩣ ᩈᨲ᩠ᨲᩣᩉᩴ ᨶᩥᩁᩮᩣᨵᩈᨾᩣᨸᨲ᩠ᨲᩥᩴ ᩈᨾᩣᨸᨩ᩠ᨩᩥᨲ᩠ᩅᩣ ᨶᩥᩈᩥᨶ᩠ᨶᩔ ᩈᨲ᩠ᨳᩩᨶᩮᩣ ᨵᩣᩁᨿᩩᩴ ᨵᩣᩁᩮᩈᩩᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨲᨲᩥᨿᨲ᩠ᨳᩮᩁᩔ ¶ ᩋᨸᨴᩣᨶᩮ ᨡᨱ᩠ᨯᨹᩩᩃ᩠ᩃᩥᨿᨲ᩠ᨳᩮᩁᩮᩣᨲᩥ ᩑᨲ᩠ᨳ ᨡᨱ᩠ᨯᨶ᩠ᨲᩥ ᨠᨭ᩠ᨮᩣᨶᩴ ᨩᩥᨱ᩠ᨱᨲ᩠ᨲᩣ ᨨᩥᨶ᩠ᨶᨽᩥᨶ᩠ᨶᨭ᩠ᨮᩣᨶᩴ, ᨹᩩᩃ᩠ᩃᨶ᩠ᨲᩥ ᨠᨭ᩠ᨮᩣᨶᩴ ᨩᩥᨱ᩠ᨱᨭ᩠ᨮᩣᨶᩮ ᨠᨱ᩠ᨱᨠᩥᨲᨾᩉᩥᨧ᩠ᨨᨲ᩠ᨲᨠᩣᨴᩥᨸᩩᨸ᩠ᨹᨶᩴ, ᨡᨱ᩠ᨯᨬ᩠ᨧ ᨹᩩᩃ᩠ᩃᨬ᩠ᨧ ᨡᨱ᩠ᨯᨹᩩᩃ᩠ᩃᩣᨶᩥ, ᨡᨱ᩠ᨯᨹᩩᩃ᩠ᩃᩣᨶᩴ ᨸᨭᩥᩈᨦ᩠ᨡᩁᨱᩴ ᨸᩩᨶᨸ᩠ᨸᩩᨶᩴ ᨳᩥᩁᨠᩁᨱᨶ᩠ᨲᩥ ᨡᨱ᩠ᨯᨹᩩᩃ᩠ᩃᨸᨭᩥᩈᨦ᩠ᨡᩁᨱᩴ. ᩍᨾᩔ ᨸᨶ ᨳᩮᩁᩔ ᩈᨾ᩠ᨽᩣᩁᨸᩪᩁᨱᨠᩣᩃᩮ ᨹᩩᩔᩔ ᨽᨣᩅᨲᩮᩣ ᨧᩮᨲᩥᨿᩮ ᨨᩥᨶ᩠ᨶᨽᩥᨶ᩠ᨶᨭ᩠ᨮᩣᨶᩮ ᩈᩩᨵᩣᨸᩥᨱ᩠ᨯᩴ ᨾᨠ᩠ᨡᩮᨲ᩠ᩅᩣ ᨳᩥᩁᨠᩁᨱᩴ ᨡᨱ᩠ᨯᨹᩩᩃ᩠ᩃᨸᨭᩥᩈᨦ᩠ᨡᩁᨱᩴ ᨶᩣᨾ. ᨲᩈ᩠ᨾᩣ ᩈᩮᩣ ᨡᨱ᩠ᨯᨹᩩᩃ᩠ᩃᩥᨿᩮᩣ ᨳᩮᩁᩮᩣᨲᩥ ᨸᩣᨠᨭᩮᩣ ᩋᩉᩮᩣᩈᩥ. ᨲᨲᩥᨿᩴ.

᪑᪗. ᨧᨲᩩᨲ᩠ᨳᨲ᩠ᨳᩮᩁᩔᩣᨸᨴᩣᨶᩮ ᩁᨬ᩠ᨬᩮᩣ ᨻᨴ᩠ᨵᨧᩁᩮᩣ ᩋᩉᨶ᩠ᨲᩥ ᩁᨬ᩠ᨬᩮᩣ ᨸᩁᩥᨧᩣᩁᨠᩮᩣ ᨠᨾ᩠ᨾᨠᩣᩁᨠᩮᩣ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪑᪙. ᨩᩃᨩᩩᨲ᩠ᨲᨾᨶᩣᨾᩥᨶᩮᩣᨲᩥ ¶ ᨩᩃᩮ ᩏᨴᨠᩮ ᨩᩣᨲᩴ ᨩᩃᨩᩴ, ᨠᩥᩴ ᨲᩴ ᨸᨴᩩᨾᩴ, ᨸᨴᩩᨾᩮᨶ ᩈᨾᩣᨶᨶᩣᨾᨲ᩠ᨲᩣ ¶ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣᨲᩥ ᩋᨲ᩠ᨳᩮᩣ. ᩏᨲ᩠ᨲᨾᨸᨴᩩᨾᨶᩣᨾᩔ ᨽᨣᩅᨲᩮᩣᨲᩥ ᩅᩣ ᩋᨲ᩠ᨳᩮᩣ. ᨧᨲᩩᨲ᩠ᨳᩴ.

ᨸᨬ᩠ᨧᨾᩴ ᩏᨲ᩠ᨲᩣᨶᨲ᩠ᨳᨾᩮᩅ.

᪒᪘. ᨨᨭ᩠ᨮᩮ ᨶᨣᩁᩮ ᨴ᩠ᩅᩣᩁᩅᨲᩥᨿᩣᨲᩥ ᨾᩉᩣᨴ᩠ᩅᩣᩁᩅᩣᨲᨸᩣᨶᨠᩅᩣᨭᨹᩃᨠᩣᩉᩥ ᩅᨲᩥᨸᩣᨠᩣᩁᨭ᩠ᨭᩣᩃᨣᩮᩣᨸᩩᩁᨠᨴ᩠ᨴᨾᩮᩣᨴᨠᨸᩁᩥᨡᩣᩉᩥ ᨧ ᩈᨾ᩠ᨸᨶ᩠ᨶᩴ ᨶᨣᩁᨶ᩠ᨲᩥ ᨴ᩠ᩅᩣᩁᩅᨲᩦᨶᨣᩁᩴ, ᨴ᩠ᩅᩣᩁᩴ ᩅᨲᩥᨬ᩠ᨧ ᨸᨵᩣᨶᩴ ᨠᨲ᩠ᩅᩣ ᨶᨣᩁᩔ ᩏᨸᩃᨠ᩠ᨡᩥᨲᨲ᩠ᨲᩣ ‘‘ᨴ᩠ᩅᩣᩁᩅᨲᩦ ᨶᨣᩁ’’ᨶ᩠ᨲᩥ ᩅᩮᩣᩉᩁᨶ᩠ᨲᩦᨲᩥ ᨶᨣᩁᩮ ᨴ᩠ᩅᩣᩁᩅᨲᩥᨿᩣᨲᩥ ᩅᩩᨲ᩠ᨲᩴ. ᨾᩣᩃᩣᩅᨧ᩠ᨨᩮᩣ ᨸᩩᨸ᩠ᨹᩣᩁᩣᨾᩮᩣ ᨾᨾ ᩋᩉᩮᩣᩈᩦᨲᩥ ᩋᨲ᩠ᨳᩮᩣ.

᪓᪑. ᨲᩮ ᨠᩥᩈᩃᨿᩣᨲᩥ ᨲᩮ ᩋᩈᩮᩣᨠᨸᩃ᩠ᩃᩅᩣ. ᨨᨭ᩠ᨮᩴ.

ᩈᨲ᩠ᨲᨾᨭ᩠ᨮᨾᨶᩅᨾᩣᨶᩥ ᩏᨲ᩠ᨲᩣᨶᨲ᩠ᨳᩣᨶᩮᩅ. ᨴᩈᨾᩮᨸᩥ ᩋᨸᩩᨻ᩠ᨻᩴ ᨶᨲ᩠ᨳᩦᨲᩥ.

ᩅᩦᩈᨲᩥᨾᩅᨱ᩠ᨱᨶᩣ ᩈᨾᨲ᩠ᨲᩣ.

᪒᪑-᪒᪓. ᨠᨱᩥᨠᩣᩁᨸᩩᨸ᩠ᨹᩥᨿᩣᨴᩥᩅᨣ᩠ᨣᩮᩣ

᪑-᪓᪐. ᨠᨱᩥᨠᩣᩁᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

ᩍᨲᩮᩣ ¶ ᨸᩁᩴ ᩈᨻ᩠ᨻᨲ᩠ᨳ ᩋᨶᩩᨲ᩠ᨲᩣᨶᨸᨴᩅᨱ᩠ᨱᨶᩴ ᨠᩁᩥᩔᩣᨾ. ᩑᨠᩅᩦᩈᨲᩥᨾᩮ ᨻᩣᩅᩦᩈᨲᩥᨾᩮ ᨲᩮᩅᩦᩈᨲᩥᨾᩮ ᨧ ᩅᨣ᩠ᨣᩮ ᩈᨻ᩠ᨻᩮᩈᩴ ᨳᩮᩁᩣᨶᩴ ᩈᨿᩴᨠᨲᩮᨶ ᨸᩩᨬ᩠ᨬᩮᨶ ᩃᨴ᩠ᨵᨶᩣᨾᩣᨶᩥ, ᨠᨲᨸᩩᨬ᩠ᨬᩣᨶᨬ᩠ᨧ ᨶᩣᨶᨲ᩠ᨲᩴ ᨲᩮᩈᩴ ᨻ᩠ᨿᩣᨠᩁᨱᨴᩣᨿᨠᩣᨶᩴ ᨻᩩᨴ᩠ᨵᩣᨶᩴ ᨶᩣᨾᩣᨶᩥ ¶ ᩅᩈᩥᨲᨶᨣᩁᩣᨶᩥ ᨧ ᩉᩮᨭ᩠ᨮᩣ ᩅᩩᨲ᩠ᨲᨶᨿᨲ᩠ᨲᩣ ᩈᨻ᩠ᨻᩣᨶᩥᨸᩥ ᩏᨲ᩠ᨲᩣᨶᩣᨶᩮᩅ. ᩋᨸᨴᩣᨶᨣᩣᨳᩣᨶᨾᨲ᩠ᨳᩮᩣ ᨧ ᨶᨿᩣᨶᩩᨿᩮᩣᨣᩮᨶ ᩈᩩᩅᩥᨬ᩠ᨬᩮᨿ᩠ᨿᩮᩣᨿᩮᩅᩣᨲᩥ.

᪒᪔. ᩏᨴᨠᩣᩈᨶᩅᨣ᩠ᨣᩮᩣ

᪑-᪑᪐.ᩏᨴᨠᩣᩈᨶᨴᩣᨿᨠᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

ᨧᨲᩩᩅᩦᩈᨲᩥᨾᩮ ¶ ᩅᨣ᩠ᨣᩮ ᨸᨮᨾᨴᩩᨲᩥᨿᩣᨸᨴᩣᨶᩣᨶᩥ ᩏᨲ᩠ᨲᩣᨶᩣᨶᩮᩅ.

᪙. ᨲᨲᩥᨿᩣᨸᨴᩣᨶᩮ ᩋᩁᩩᨱᩅᨲᩥᨿᩣ ᨶᨣᩁᩮᨲᩥ ᩌ ᩈᨾᨶ᩠ᨲᨲᩮᩣ ᩌᩃᩮᩣᨠᩴ ᨠᩁᩮᩣᨶ᩠ᨲᩮᩣ ᩏᨱᨲᩥ ᩏᨣ᩠ᨣᨧ᩠ᨨᨲᩦᨲᩥ ᩋᩁᩩᨱᩮᩣ, ᩈᩮᩣ ᨲᩈ᩠ᨾᩥᩴ ᩅᩥᨩ᩠ᨩᨲᩦᨲᩥ ᩋᩁᩩᨱᩅᨲᩦ, ᨲᩈ᩠ᨾᩥᩴ ᨶᨣᩁᩮ ᩌᩃᩮᩣᨠᩴ ᨠᩁᩮᩣᨶ᩠ᨲᩮᩣ ᩈᩪᩁᩥᨿᩮᩣ ᩏᨣ᩠ᨣᨧ᩠ᨨᨲᩦᨲᩥ ᩋᨲ᩠ᨳᩮᩣ. ᩈᩮᩈᨶᨣᩁᩮᩈᩩᨸᩥ ᩈᩪᩁᩥᨿᩩᨣ᩠ᨣᨾᨶᩮ ᩅᩥᨩ᩠ᨩᨾᩣᨶᩮᨸᩥ ᩅᩥᩈᩮᩈᩅᨧᨶᩴ ᩈᨻ᩠ᨻᨧᨲᩩᨸ᩠ᨸᨴᩣᨶᩴ ¶ ᨾᩉᩥᨿᩴ ᩈᨿᨶᩮᨸᩥ ᩈᨲᩥ ᨾᩉᩥᨿᩴ ᩈᨿᨲᩦᨲᩥ ᨾᩉᩥᩴᩈᩮᩣᨲᩥ ᩅᨧᨶᩴ ᩅᩥᨿ ᩁᩪᩊ᩠ᩉᩥᩅᩈᩮᨶ ᩅᩩᨲ᩠ᨲᨶ᩠ᨲᩥ ᩅᩮᨴᩥᨲᨻ᩠ᨻᩴ. ᩋᨳ ᩅᩣ ᨸᩣᨠᩣᩁᨸᩣᩈᩣᨴᩉᨾ᩠ᨾᩥᨿᩣᨴᩦᩈᩩ ᩈᩩᩅᨱ᩠ᨱᩁᨩᨲᨾᨱᩥᨾᩩᨲ᩠ᨲᩣᨴᩥᩈᨲ᩠ᨲᩁᨲᨶᨸᨽᩣᩉᩥ ᩋᩁᩩᨱᩩᨣ᩠ᨣᨾᨶᩴ ᩅᩥᨿ ᨸᨽᩣᩅᨲᩦ ᩋᩁᩩᨱᩅᨲᩦ ᨶᩣᨾ, ᨲᩈ᩠ᨾᩥᩴ ᩋᩁᩩᨱᩅᨲᩥᨿᩣ ᨶᨣᩁᩮ, ᨸᩪᨸᩥᨠᩮᩣ ᨸᩪᨸᩅᩥᨠ᩠ᨠᨿᩮᨶ ᨩᩦᩅᩥᨠᩴ ᨠᨸ᩠ᨸᩮᨶ᩠ᨲᩮᩣ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪑᪔. ᨧᨲᩩᨲ᩠ᨳᩣᨸᨴᩣᨶᩮ ᨲᩥᩅᩁᩣᨿᩴ ᨸᩩᩁᩮ ᩁᨾ᩠ᨾᩮᨲᩥ ᨲᩦᩉᩥ ᨸᩣᨠᩣᩁᩮᩉᩥ ᨸᩁᩥᩅᩣᩁᩥᨲᩣ ᨸᩁᩥᨠ᩠ᨡᩥᨲ᩠ᨲᩣᨲᩥ ᨲᩥᩅᩁᩣ, ᨡᨩ᩠ᨩᨽᩮᩣᨩ᩠ᨩᩣᨴᩥᩏᨸᨽᩮᩣᨣᩅᨲ᩠ᨳᩣᨽᩁᨱᩣᨴᩥᨶᨧ᩠ᨧᨣᩦᨲᩣᨴᩦᩉᩥ ᩁᨾᨱᩦᨿᨶ᩠ᨲᩥ ᩁᨾ᩠ᨾᩴ, ᨲᩈ᩠ᨾᩥᩴ ᨲᩥᩅᩁᩣᨿᩴ ᨸᩩᩁᩮ ᨶᨣᩁᩮ ᩁᨾ᩠ᨾᩮ ᨶᩊᨠᩣᩁᩮᩣ ᩋᩉᩴ ᩋᩉᩮᩣᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

ᨸᨬ᩠ᨧᨾᩣᨸᨴᩣᨶᩴ ᩏᨲ᩠ᨲᩣᨶᨲ᩠ᨳᨾᩮᩅ.

᪒᪓. ᨨᨭ᩠ᨮᩣᨸᨴᩣᨶᩮ ᩅᨱ᩠ᨱᨠᩣᩁᩮᩣ ᩋᩉᩴ ᨲᨴᩣᨲᩥ ᨶᩦᩃᨸᩦᨲᩁᨲ᩠ᨲᩣᨴᩥᩅᨱ᩠ᨱᩅᩈᩮᨶ ᩅᨲ᩠ᨳᩣᨶᩥ ᨠᩁᩮᩣᨲᩥ ᩁᨬ᩠ᨩᩮᨲᩦᨲᩥ ᩅᨱ᩠ᨱᨠᩣᩁᩮᩣ. ᩅᨲ᩠ᨳᩁᨩᨠᩮᩣ ᩉᩩᨲ᩠ᩅᩣ ᨧᩮᨲᩥᨿᩮ ᩅᨲ᩠ᨳᩮᩉᩥ ᩋᨧ᩠ᨨᩣᨴᨶᩈᨾᨿᩮ ᨶᩣᨶᩣᩅᨱ᩠ᨱᩮᩉᩥ ᨴᩩᩔᩣᨶᩥ ᩁᨬ᩠ᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪒᪗. ᩈᨲ᩠ᨲᨾᩣᨸᨴᩣᨶᩮ ᨸᩥᨿᩣᩃᩴ ᨸᩩᨸ᩠ᨹᩥᨲᩴ ᨴᩥᩈ᩠ᩅᩣᨲᩥ ᩈᩩᨸᩩᨸ᩠ᨹᩥᨲᩴ ᨸᩥᨿᩣᩃᩁᩩᨠ᩠ᨡᩴ ᨴᩥᩈ᩠ᩅᩣ. ᨣᨲᨾᨣ᩠ᨣᩮ ᨡᩥᨸᩥᩴ ¶ ᩋᩉᨶ᩠ᨲᩥ ᩋᩉᩴ ᨾᩥᨣᩃᩩᨴ᩠ᨴᩮᩣ ᨶᩮᩈᩣᨴᩮᩣ ᩉᩩᨲ᩠ᩅᩣ ᨸᩥᨿᩣᩃᨸᩩᨸ᩠ᨹᩴ ᩒᨧᩥᨶᩥᨲ᩠ᩅᩣ ᨻᩩᨴ᩠ᨵᩔ ᨣᨲᨾᨣ᩠ᨣᩮ ᨡᩥᨸᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪓᪐. ᩋᨭ᩠ᨮᨾᩣᨸᨴᩣᨶᩮ ¶ ᩈᨠᩮ ᩈᩥᨸ᩠ᨸᩮ ᩋᨸᨲ᩠ᨳᨴ᩠ᨵᩮᩣᨲᩥ ᩋᨲ᩠ᨲᨶᩮᩣ ᨲᨠ᩠ᨠᨻ᩠ᨿᩣᨠᩁᨱᩣᨴᩥᩈᩥᨸ᩠ᨸᩈ᩠ᨾᩥᩴ ᩋᨸᨲ᩠ᨳᨴ᩠ᨵᩮᩣ ᨸᨲᩥᨭ᩠ᨮᩥᨲᩮᩣ ᨨᩮᨠᩮᩣ ᩋᩉᩴ ᨠᩣᨶᨶᩴ ᩋᨣᨾᩴ ᨣᨲᩮᩣ ᩈᨾ᩠ᨻᩩᨴ᩠ᨵᩴ ᨿᨶ᩠ᨲᩴ ᨴᩥᩈ᩠ᩅᩣᨶᩣᨲᩥ ᩅᨶᨶ᩠ᨲᩁᩮ ᨣᨧ᩠ᨨᨶ᩠ᨲᩴ ᩅᩥᨸᩔᩥᩴ ᩈᨾ᩠ᨻᩩᨴ᩠ᨵᩴ ᨸᩔᩥᨲ᩠ᩅᩣ. ᩋᨾ᩠ᨻᨿᩣᨣᩴ ᩋᨴᩣᩈᩉᨶ᩠ᨲᩥ ᩋᩉᩴ ᩋᨾ᩠ᨻᨴᩣᨶᩴ ᩋᨴᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪓᪓. ᨶᩅᨾᩣᨸᨴᩣᨶᩮ ᨩᨣᨲᩦ ᨠᩣᩁᩥᨲᩣ ᨾᨿ᩠ᩉᨶ᩠ᨲᩥ ᩋᨲ᩠ᨳᨴᩔᩥᩔ ᨽᨣᩅᨲᩮᩣ ᩈᩁᩦᩁᨵᩣᨲᩩᨶᩥᨵᩣᨸᩥᨲᨧᩮᨲᩥᨿᩮ ᨩᨣᨲᩥ ᨨᩥᨶ᩠ᨶᨽᩥᨶ᩠ᨶᩌᩃᩥᨶ᩠ᨴᨸᩩᨸ᩠ᨹᩣᨵᩣᨶᩈᨦ᩠ᨡᩣᨲᩣ ᨩᨣᨲᩥ ᨾᨿᩣ ᨠᩣᩁᩥᨲᩣ ᨠᩣᩁᩣᨸᩥᨲᩣᨲᩥ ᩋᨲ᩠ᨳᩮᩣ.

ᨴᩈᨾᩣᨸᨴᩣᨶᩴ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᨧᨲᩩᩅᩦᩈᨲᩥᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪒᪕. ᨲᩩᩅᩁᨴᩣᨿᨠᩅᨣ᩠ᨣᩮᩣ

᪑-᪑᪐. ᨲᩩᩅᩁᨴᩣᨿᨠᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

᪑. ᨸᨬ᩠ᨧᩅᩦᩈᨲᩥᨾᩮ ¶ ¶ ᩅᨣ᩠ᨣᩮ ᨸᨮᨾᩣᨸᨴᩣᨶᩮ ᨽᩁᩥᨲ᩠ᩅᩣ ᨲᩩᩅᩁᨾᩣᨴᩣᨿᩣᨲᩥ ᨲᩩᩅᩁᩋᨭ᩠ᨮᩥᩴ ᨾᩩᨣ᩠ᨣᨠᩃᨿᩈᨴᩥᩈᩴ ᨲᩩᩅᩁᨭ᩠ᨮᩥᩴ ᨽᨩ᩠ᨩᩥᨲ᩠ᩅᩣ ᨸᩩᨸ᩠ᨹᩮᨲ᩠ᩅᩣ ᨽᩣᨩᨶᩮᨶ ᩌᨴᩣᨿ ᩈᨦ᩠ᨥᩔ ᩅᨶᨾᨩ᩠ᨫᩮᩣᨣᩣᩉᨠᩔ ᩋᨴᨴᩥᩴ ᩋᨴᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪔-᪕. ᨴᩩᨲᩥᨿᩣᨸᨴᩣᨶᩮ ᨵᨶᩩᩴ ᩋᨴ᩠ᩅᩮᨩ᩠ᨫᩴ ᨠᨲ᩠ᩅᩣᨶᩣᨲᩥ ᨾᩥᨣᩣᨴᩦᨶᩴ ᨾᩣᩁᨱᨲ᩠ᨳᩣᨿ ᨵᨶᩩᩴ ᩈᨶ᩠ᨶᨿ᩠ᩉᩥᨲ᩠ᩅᩣ ᨧᩁᨾᩣᨶᩮᩣ ᨠᩮᩈᩁᩴ ᩒᨣᨲᩴ ᨴᩥᩈ᩠ᩅᩣᨲᩥ ᩈᩩᨸᩩᨸ᩠ᨹᩥᨲᩴ ᨡᩩᨴ᩠ᨴᨠᩈᩁᩴ ᨴᩥᩈ᩠ᩅᩣ ᨻᩩᨴ᩠ᨵᩔ ᩋᨽᩥᩁᩮᩣᨸᩮᩈᩥᨶ᩠ᨲᩥ ᩋᩉᩴ ᨧᩥᨲ᩠ᨲᩴ ᨸᩈᩣᨴᩮᨲ᩠ᩅᩣ ᩅᨶᩴ ᩈᨾ᩠ᨸᨲ᩠ᨲᩔ ᨲᩥᩔᩔ ᨽᨣᩅᨲᩮᩣ ᩋᨽᩥᩁᩮᩣᨸᨿᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪙-᪑᪐. ᨲᨲᩥᨿᩣᨸᨴᩣᨶᩮ ᨩᩃᨠᩩᨠ᩠ᨠᩩᨭᩮᩣᨲᩥ ᨩᩣᨲᩔᩁᩮ ᨧᩁᨾᩣᨶᨠᩩᨠ᩠ᨠᩩᨭᩮᩣ. ᨲᩩᨱ᩠ᨯᩮᨶ ᨠᩮᩈᩁᩥᩴ ᨣᨿ᩠ᩉᩣᨲᩥ ᨸᨴᩩᨾᨸᩩᨸ᩠ᨹᩴ ᨾᩩᨡᨲᩩᨱ᩠ᨯᩮᨶ ᨯᩴᩈᩥᨲ᩠ᩅᩣ ᩌᨠᩣᩈᩮᨶ ᨣᨧ᩠ᨨᨶ᩠ᨲᩔ ᨲᩥᩔᩔ ᨽᨣᩅᨲᩮᩣ ᩋᨽᩥᩁᩮᩣᨸᩮᩈᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪑᪔. ᨧᨲᩩᨲ᩠ᨳᩣᨸᨴᩣᨶᩮ ᩅᩥᩁᩅᨸᩩᨸ᩠ᨹᨾᩣᨴᩣᨿᩣᨲᩥ ᩅᩥᩅᩥᨵᩴ ᩁᩅᨲᩥ ᩈᨴ᩠ᨴᩴ ᨠᩁᩮᩣᨲᩦᨲᩥ ᩅᩥᩁᩅᩴ, ᩈᨴ᩠ᨴᨠᩁᨱᩅᩮᩃᩣᨿᩴ ᩅᩥᨠᩈᨶᨲᩮᩣ ‘‘ᩅᩥᩁᩅ’’ᨶ᩠ᨲᩥ ᩃᨴ᩠ᨵᨶᩣᨾᩴ ᨸᩩᨸ᩠ᨹᩈᨾᩪᩉᩴ ᩌᨴᩣᨿ ᨣᩉᩮᨲ᩠ᩅᩣ ᩈᩥᨴ᩠ᨵᨲ᩠ᨳᩔ ᨻᩩᨴ᩠ᨵᩔ ᩋᨽᩥᩁᩮᩣᨸᨿᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪑᪗. ᨸᨬ᩠ᨧᨾᩣᨸᨴᩣᨶᩮ ᨠᩩᨭᩥᨣᩮᩣᨸᨠᩮᩣᨲᩥ ᩈᩮᨶᩣᩈᨶᨸᩣᩃᨠᩮᩣ. ᨠᩣᩃᩮᨶ ᨠᩣᩃᩴ ᨵᩪᨸᩮᩈᩥᨶ᩠ᨲᩥ ᩈᨾ᩠ᨸᨲ᩠ᨲᩈᨾ᩠ᨸᨲ᩠ᨲᨠᩣᩃᩣᨶᩩᨠᩣᩃᩮ ᨵᩪᨸᩮᩈᩥᩴ, ᨵᩪᨸᩮᨶ ᩈᩩᨣᨶ᩠ᨵᩴ ᩋᨠᩣᩈᩥᨶ᩠ᨲᩥ ¶ ᩋᨲ᩠ᨳᩮᩣ. ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨣᨶ᩠ᨵᨠᩩᨭᩥᨠᩣᩃᩣᨶᩩᩈᩣᩁᩥᨵᩪᨸᩮᨶ ᨵᩪᨸᩮᩈᩥᩴ ᩅᩣᩈᩮᩈᩥᨶ᩠ᨲᩥ ᩋᨲ᩠ᨳᩮᩣ.

ᨨᨭ᩠ᨮᩈᨲ᩠ᨲᨾᩣᨸᨴᩣᨶᩣᨶᩥ ᩏᨲ᩠ᨲᩣᨶᨲ᩠ᨳᩣᨶᩮᩅ.

᪒᪗. ᩋᨭ᩠ᨮᨾᩣᨸᨴᩣᨶᩮ ¶ ᩈᨲ᩠ᨲ ᩈᨲ᩠ᨲᩃᩥᨸᩩᨸ᩠ᨹᩣᨶᩦᨲᩥ ᩈᨲ᩠ᨲᩃᩥᩈᨦ᩠ᨡᩣᨲᩣᨶᩥ, ᩈᨲ᩠ᨲ ᨸᩩᨸ᩠ᨹᩣᨶᩥ ᩈᩦᩈᩮᨶᩣᨴᩣᨿ ᩅᩮᩔᨽᩩᩔ ᨽᨣᩅᨲᩮᩣ ᩋᨽᩥᩁᩮᩣᨸᩮᩈᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪓᪑. ᨶᩅᨾᩣᨸᨴᩣᨶᩮ ᨻᩥᨾ᩠ᨻᩥᨩᩣᩃᨠᨸᩩᨸ᩠ᨹᩣᨶᩦᨲᩥ ᩁᨲ᩠ᨲᨦ᩠ᨠᩩᩁᩅᨠᨸᩩᨸ᩠ᨹᩣᨶᩥ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪓᪕. ᨴᩈᨾᩣᨸᨴᩣᨶᩮ ᩏᨴ᩠ᨴᩣᩃᨠᩴ ᨣᩉᩮᨲ᩠ᩅᩣᨶᩣᨲᩥ ᨩᩣᨲᩔᩁᩮ ᩅᩥᩉᨦ᩠ᨣᩈᩮᩣᨻ᩠ᨽᩮ ᨩᩣᨲᩴ ᩏᨴ᩠ᨴᩣᩃᨠᨸᩩᨸ᩠ᨹᩴ ᩒᨧᩥᨶᩥᨲ᩠ᩅᩣ ᨠᨠᩩᩈᨶ᩠ᨵᩔ ᨽᨣᩅᨲᩮᩣ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨸᨬ᩠ᨧᩅᩦᩈᨲᩥᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪒᪖. ᨳᩮᩣᨾᨠᩅᨣ᩠ᨣᩮᩣ

᪑-᪑᪐. ᨳᩮᩣᨾᨠᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

ᨨᨻ᩠ᨻᩦᩈᨲᩥᨾᩮ ¶ ¶ ᩅᨣ᩠ᨣᩮ ᨸᨮᨾᩣᨸᨴᩣᨶᩴ ᩏᨲ᩠ᨲᩣᨶᨾᩮᩅ.

᪕-᪖. ᨴᩩᨲᩥᨿᩣᨸᨴᩣᨶᩮ ᩅᩥᨩᩉᩥᨲ᩠ᩅᩣ ᨴᩮᩅᩅᨱ᩠ᨱᨶ᩠ᨲᩥ ᨴᩮᩅᨲᩣ ᩈᩁᩦᩁᩴ ᩅᩥᨩᩉᩥᨲ᩠ᩅᩣ ᨨᨯ᩠ᨯᩮᨲ᩠ᩅᩣ, ᨾᨶᩩᩔᩈᩁᩦᩁᩴ ᨶᩥᨾ᩠ᨾᩥᨶᩥᨲ᩠ᩅᩣᨲᩥ ᩋᨲ᩠ᨳᩮᩣ. ᩋᨵᩥᨠᩣᩁᩴ ᨠᨲ᩠ᨲᩩᨠᩣᨾᩮᩣᨲᩥ ᩋᨵᩥᨠᨠᩥᩁᩥᨿᩴ ᨸᩩᨬ᩠ᨬᩈᨾ᩠ᨽᩣᩁᩴ ᨠᨲ᩠ᨲᩩᨠᩣᨾᩮᩣ ᨴᩮᩅᩁᩮᩣ ᨶᩣᨾ ᩋᩉᩴ ᨴᩮᩅᩁᩣᨩᩣ ᨽᩁᩥᨿᩣᨿ ᩈᩉ ᨻᩩᨴ᩠ᨵᩈᩮᨭ᩠ᨮᩔ ᩈᩣᩈᨶᩮ ᩈᩣᨴᩁᨲᩣᨿ ᩍᨵ ᩍᨾᩈ᩠ᨾᩥᩴ ᨾᨶᩩᩔᩃᩮᩣᨠᩮ ᩌᨣᨾᩥᩴ ᩌᨣᨲᩮᩣᨲᩥ ᩋᨲ᩠ᨳᩮᩣ. ᨲᩔ ᨽᩥᨠ᩠ᨡᩣ ᨾᨿᩣ ᨴᩥᨶ᩠ᨶᩣᨲᩥ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨿᩮᩣ ᨶᩣᨾᩮᨶ ᨴᩮᩅᩃᩮᩣ ᨶᩣᨾ ᩈᩣᩅᨠᩮᩣ ᩋᩉᩮᩣᩈᩥ, ᨲᩔ ᩈᩣᩅᨠᩔ ᨾᨿᩣ ᩅᩥᨸ᩠ᨸᩈᨶ᩠ᨶᩮᨶ ᨧᩮᨲᩈᩣ ᨽᩥᨠ᩠ᨡᩣ ᨴᩥᨶ᩠ᨶᩣ ᨸᩥᨱ᩠ᨯᨸᩣᨲᩮᩣ ᨴᩥᨶ᩠ᨶᩮᩣᨲᩥ ᩋᨲ᩠ᨳᩮᩣ.

᪙-᪑᪐. ᨲᨲᩥᨿᩣᨸᨴᩣᨶᩮ ᩌᨶᨶ᩠ᨴᩮᩣ ᨶᩣᨾ ᩈᨾ᩠ᨻᩩᨴ᩠ᨵᩮᩣᨲᩥ ᩌᨶᨶ᩠ᨴᩴ ᨲᩩᨭ᩠ᨮᩥᩴ ᨩᨶᨶᨲᩮᩣ ᩌᨶᨶ᩠ᨴᩮᩣ ᨶᩣᨾ ᨸᨧ᩠ᨧᩮᨠᨻᩩᨴ᩠ᨵᩮᩣᨲᩥ ᩋᨲ᩠ᨳᩮᩣ. ᩋᨾᨶᩩᩔᨾ᩠ᩉᩥ ᨠᩣᨶᨶᩮᨲᩥ ᩋᨾᨶᩩᩔᨸᩁᩥᨣ᩠ᨣᩉᩮ ᨠᩣᨶᨶᩮ ᨾᩉᩣᩋᩁᨬ᩠ᨬᩮ ᨸᩁᩥᨶᩥᨻ᩠ᨻᩣᨿᩥ ᩋᨶᩩᨸᩣᨴᩥᩈᩮᩈᨶᩥᨻ᩠ᨻᩣᨶᨵᩣᨲᩩᨿᩣ ¶ ᩋᨶ᩠ᨲᩁᨵᩣᨿᩥ, ᩋᨴᩔᨶᩴ ᩋᨣᨾᩣᩈᩦᨲᩥ ᩋᨲ᩠ᨳᩮᩣ. ᩈᩁᩦᩁᩴ ᨲᨲ᩠ᨳ ᨫᩣᨸᩮᩈᩥᨶ᩠ᨲᩥ ᩋᩉᩴ ᨴᩮᩅᩃᩮᩣᨠᩣ ᩍᨵᩣᨣᨶ᩠ᨲ᩠ᩅᩣ ᨲᩔ ᨽᨣᩅᨲᩮᩣ ᩈᩁᩦᩁᩴ ᨲᨲ᩠ᨳ ᩋᩁᨬ᩠ᨬᩮ ᨫᩣᨸᩮᩈᩥᩴ ᨴᩉᨶᩴ ᩋᨠᩣᩈᩥᨶ᩠ᨲᩥ ᩋᨲ᩠ᨳᩮᩣ.

ᨧᨲᩩᨲ᩠ᨳᨸᨬ᩠ᨧᨾᩣᨸᨴᩣᨶᩣᨶᩥ ᩏᨲ᩠ᨲᩣᨶᩣᨶᩮᩅ.

᪒᪐. ᨨᨭ᩠ᨮᩣᨸᨴᩣᨶᩮ ᩋᩉᩮᩣᩈᩥᩴ ᨧᨶ᩠ᨴᨶᩮᩣ ᨶᩣᨾᩣᨲᩥ ᨶᩣᨾᩮᨶ ᨸᨱ᩠ᨱᨲ᩠ᨲᩥᩅᩈᩮᨶ ᨧᨶ᩠ᨴᨶᩮᩣ ᨶᩣᨾ. ᩈᨾ᩠ᨻᩩᨴ᩠ᨵᩔᨲᩕᨩᩮᩣᨲᩥ ᨸᨧ᩠ᨧᩮᨠᩈᨾ᩠ᨻᩩᨴ᩠ᨵᨽᩪᨲᨲᩮᩣ ᨸᩩᨻ᩠ᨻᩮ ᨲᩔ ᩋᨲᩕᨩᩮᩣ ᨸᩩᨲ᩠ᨲᩮᩣ ᩋᩉᩴ. ᩑᨠᩮᩣᨸᩣᩉᨶᩮᩣ ᨾᨿᩣ ᨴᩥᨶ᩠ᨶᩮᩣᨲᩥ ᩑᨠᩴ ᩏᨸᩣᩉᨶᨿᩩᨣᩴ ᨾᨿᩣ ᨴᩥᨶ᩠ᨶᩴ. ᨻᩮᩣᨵᩥᩴ ᩈᨾ᩠ᨸᨩ᩠ᨩ ᨾᩮ ᨲᩩᩅᨶ᩠ᨲᩥ ᨲᩮᨶ ᩏᨸᩣᩉᨶᨿᩩᨣᩮᨶ ᨾᩮ ᨾᨿ᩠ᩉᩴ ᩈᩣᩅᨠᨻᩮᩣᨵᩥᩴ ᨲᩩᩅᩴ ᩈᨾ᩠ᨸᨩ᩠ᨩ ᨶᩥᨸ᩠ᨹᩣᨴᩮᩉᩦᨲᩥ ᩋᨲ᩠ᨳᩮᩣ.

᪒᪓-᪒᪔. ᩈᨲ᩠ᨲᨾᩣᨸᨴᩣᨶᩮ ¶ ᨾᨬ᩠ᨩᩁᩥᨠᩴ ᨠᩁᩥᨲ᩠ᩅᩣᨶᩣᨲᩥ ᨾᨬ᩠ᨩᩮᨭ᩠ᨮᩥᨸᩩᨸ᩠ᨹᩴ ᩉᩁᩥᨲᨧᨦ᩠ᨠᩮᩣᨭᨠᩴ ᨣᩉᩮᨲ᩠ᩅᩣ ᩁᨳᩥᨿᩴ ᩅᩦᨳᩥᨿᩣ ᨸᨭᩥᨸᨩ᩠ᨩᩥᩴ ᩋᩉᩴ ᨲᨳᩣ ᨸᨭᩥᨸᨶ᩠ᨶᩮᩣᩅ ᨽᩥᨠ᩠ᨡᩩᩈᨦ᩠ᨥᨸᩩᩁᨠ᩠ᨡᨲᩴ ᨽᩥᨠ᩠ᨡᩩᩈᨦ᩠ᨥᩮᨶ ᨸᩁᩥᩅᩩᨲᩴ ᩈᨾᨱᩣᨶᨣ᩠ᨣᩴ ᩈᨾᨱᩣᨶᩴ ᨽᩥᨠ᩠ᨡᩪᨶᩴ ᩋᨣ᩠ᨣᩴ ᩈᩮᨭ᩠ᨮᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᩋᨴ᩠ᨴᩈᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨻᩩᨴ᩠ᨵᩔ ᩋᨽᩥᩁᩮᩣᨸᨿᩥᨶ᩠ᨲᩥ ᨴᩥᩈ᩠ᩅᩣ ᨧ ᨸᨶ ᨲᩴ ᨸᩩᨸ᩠ᨹᩴ ᩏᨽᩮᩣᩉᩥ ᩉᨲ᩠ᨳᩮᩉᩥ ᨸᨣ᩠ᨣᨿ᩠ᩉ ᩏᨠ᩠ᨡᩥᨸᩥᨲ᩠ᩅᩣ ᨻᩩᨴ᩠ᨵᩔ ᨹᩩᩔᩔ ᨽᨣᩅᨲᩮᩣ ᩋᨽᩥᩁᩮᩣᨸᨿᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪒᪘-᪒᪙. ᩋᨭ᩠ᨮᨾᩣᨸᨴᩣᨶᩮ ᩋᩃᩮᩣᨱᨸᨱ᩠ᨱᨽᨠ᩠ᨡᩮᩣᨾ᩠ᩉᩦᨲᩥ ᨡᩦᩁᨸᨱ᩠ᨱᩣᨴᩦᨶᩥ ᩏᨬ᩠ᨨᩣᨧᩁᩥᨿᩣᨿ ᩌᩉᩁᩥᨲ᩠ᩅᩣ ᩃᩮᩣᨱᩅᩥᩁᩉᩥᨲᩣᨶᩥ ᨸᨱ᩠ᨱᩣᨶᩥ ᨸᨧᩥᨲ᩠ᩅᩣ ᨽᨠ᩠ᨡᩣᨾᩥ, ᩋᩃᩮᩣᨱᨸᨱ᩠ᨱᨽᨠ᩠ᨡᩮᩣ ¶ ᩋᨾ᩠ᩉᩥ ᨽᩅᩣᨾᩦᨲᩥ ᩋᨲ᩠ᨳᩮᩣ. ᨶᩥᨿᨾᩮᩈᩩ ᨧ ᩈᩴᩅᩩᨲᩮᩣᨲᩥ ᨶᩥᨿᨾᩈᨬ᩠ᨬᩥᨲᩮᩈᩩ ᨸᩣᨱᩣᨲᩥᨸᩣᨲᩣᩅᩮᩁᨾᨱᩥᩌᨴᩦᩈᩩ ᨶᩥᨧ᩠ᨧᨸᨬ᩠ᨧᩈᩦᩃᩮᩈᩩ ᩈᩴᩅᩩᨲᩮᩣ ᨸᩥᩉᩥᨲᩮᩣᨲᩥ ᩋᨲ᩠ᨳᩮᩣ. ᨸᩣᨲᩁᩣᩈᩮ ᩋᨶᩩᨸ᩠ᨸᨲ᩠ᨲᩮᨲᩥ ᨸᩩᩁᩮᨽᨲ᩠ᨲᨠᩣᩃᩮ ᩋᨶᩩᨸ᩠ᨸᨲ᩠ᨲᩮ. ᩈᩥᨴ᩠ᨵᨲ᩠ᨳᩮᩣ ᩏᨸᨣᨧ᩠ᨨᩥ ᨾᨶ᩠ᨲᩥ ᨾᨾ ᩈᨾᩦᨸᩴ ᩈᩥᨴ᩠ᨵᨲ᩠ᨳᩮᩣ ᨽᨣᩅᩣ ᩏᨸᨣᨬ᩠ᨨᩥ ᩈᨾ᩠ᨸᩣᨸᩩᨱᩥ. ᨲᩣᩉᩴ ᨻᩩᨴ᩠ᨵᩔ ᨸᩣᨴᩣᩈᩥᨶ᩠ᨲᩥ ᩋᩉᩴ ᨲᩴ ᩋᩃᩮᩣᨱᨸᨱ᩠ᨱᩴ ᨲᩔ ᨻᩩᨴ᩠ᨵᩔ ᩋᨴᩣᩈᩥᨶ᩠ᨲᩥ ᩋᨲ᩠ᨳᩮᩣ.

ᨶᩅᨾᩣᨸᨴᩣᨶᩴ ᩏᨲ᩠ᨲᩣᨶᨾᩮᩅ.

᪓᪗-᪓᪘. ᨴᩈᨾᩣᨸᨴᩣᨶᩮ ᩈᩥᨡᩥᨶᩴ ᩈᩥᨡᩥᨶᩴ ᨿᨳᩣᨲᩥ ᩈᩁᩦᩁᨲᩮᩣ ᨶᩥᨠ᩠ᨡᨶ᩠ᨲᨨᨻ᩠ᨻᨱ᩠ᨱᩁᩴᩈᩦᩉᩥ ᩒᨽᩣᩈᨿᨶ᩠ᨲᩴ ᨩᩃᨶ᩠ᨲᩴ ᩈᩥᨡᩦᨶᩴ ᩈᩥᨡᩦᨽᨣᩅᨶ᩠ᨲᩴ ᩈᩥᨡᩦᨶᩴ ᨿᨳᩣ ᨩᩃᨾᩣᨶᩋᨣ᩠ᨣᩥᨠ᩠ᨡᨶ᩠ᨵᩴ ᩅᩥᨿ. ᩋᨣ᩠ᨣᨩᩴ ᨸᩩᨸ᩠ᨹᨾᩣᨴᩣᨿᩣᨲᩥ ᩋᨣ᩠ᨣᨩᨶᩣᨾᨠᩴ ᨸᩩᨸ᩠ᨹᩴ ᨣᩉᩮᨲ᩠ᩅᩣ ᨻᩩᨴ᩠ᨵᩔ ᩈᩥᨡᩥᩔ ᨽᨣᩅᨲᩮᩣ ᩋᨽᩥᩁᩮᩣᨸᨿᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

ᨨᨻ᩠ᨻᩦᩈᨲᩥᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪒᪗. ᨸᨴᩩᨾᩩᨠ᩠ᨡᩥᨸᩅᨣ᩠ᨣᩮᩣ

᪑-᪑᪐. ᩌᨠᩣᩈᩩᨠ᩠ᨡᩥᨸᩥᨿᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

᪑-᪒. ᩈᨲ᩠ᨲᩅᩦᩈᨲᩥᨾᩮ ¶ ¶ ᩅᨣ᩠ᨣᩮ ᨸᨮᨾᩣᨸᨴᩣᨶᩮ ᨩᩃᨩᨣ᩠ᨣᩮ ᨴᩩᩅᩮ ᨣᨿ᩠ᩉᩣᨲᩥ ᨩᩃᩮ ᩏᨴᨠᩮ ᨩᩣᨲᩮ ᩋᨣ᩠ᨣᩮ ᩏᨸ᩠ᨸᩃᩣᨴᨿᩮᩣ ᨴ᩠ᩅᩮ ᨸᩩᨸ᩠ᨹᩮ ᨣᩉᩮᨲ᩠ᩅᩣ ᨻᩩᨴ᩠ᨵᩔ ᩈᨾᩦᨸᩴ ᨣᨶ᩠ᨲ᩠ᩅᩣ ᩑᨠᩴ ᨸᩩᨸ᩠ᨹᩴ ᨸᩣᨴᩮᩈᩩ ᨶᩥᨠ᩠ᨡᩥᨸᩥᩴ ᨸᩪᨩᩮᩈᩥᩴ, ᩑᨠᩴ ᨸᩩᨸ᩠ᨹᩴ ᩌᨠᩣᩈᩮ ᨡᩥᨸᩥᨶ᩠ᨲᩥ ᩋᨲ᩠ᨳᩮᩣ.

ᨴᩩᨲᩥᨿᩣᨸᨴᩣᨶᩴ ᨸᩣᨠᨭᨾᩮᩅ.

᪑᪐. ᨲᨲᩥᨿᩣᨸᨴᩣᨶᩮ ᨻᩮᩣᨵᩥᨿᩣ ᨸᩣᨴᨸᩩᨲ᩠ᨲᨾᩮᨲᩥ ᩏᨲ᩠ᨲᨾᩮ ᨻᩮᩣᨵᩥᨸᩣᨴᨸᩮ. ᩋᨯ᩠ᨰᨧᨶ᩠ᨴᩴ ᨾᨿᩣ ᨴᩥᨶ᩠ᨶᨶ᩠ᨲᩥ ᨲᩈ᩠ᨾᩥᩴ ᨻᩮᩣᨵᩥᨾᩪᩃᩮ ᩋᨯ᩠ᨰᨧᨶ᩠ᨴᩣᨠᩣᩁᩮᨶ ᨾᨿᩣ ᩋᨶᩮᨠᨸᩩᨸ᩠ᨹᩣᨶᩥ ᨸᩪᨩᩥᨲᩣᨶᩦᨲᩥ ᩋᨲ᩠ᨳᩮᩣ. ᨵᩁᨱᩦᩁᩩᩉᨸᩣᨴᨸᩮᨲᩥ ᩁᩩᨠ᩠ᨡᨸᨻ᩠ᨻᨲᩁᨲᨶᩣᨴᨿᩮᩣ ᨵᩣᩁᩮᨲᩦᨲᩥ ᨵᩁᨱᩦ, ᨸᨳᩅᩦ, ᨵᩁᨱᩥᨿᩣ ᩁᩩᩉᨲᩥ ᨸᨲᩥᨭ᩠ᨮᩉᨲᩦᨲᩥ ᨵᩁᨱᩦᩁᩩᩉᩮᩣ, ᨸᩣᨴᩈᨦ᩠ᨡᩣᨲᩮᨶ ᨾᩪᩃᩮᨶ ᩏᨴᨠᩴ ᨸᩥᩅᨲᩥ ᨡᨶ᩠ᨵᩅᩥᨭᨸᩣᨴᩦᩈᩩ ᨸᨲ᩠ᨳᩁᩥᨿᨲᩦᨲᩥ ᨸᩣᨴᨸᩮᩣ, ᨵᩁᨱᩦᩁᩩᩉᩮᩣ ᨧ ᩈᩮᩣ ᨸᩣᨴᨸᩮᩣ ᨧᩮᨲᩥ ᨵᩁᨱᩦᩁᩩᩉᨸᩣᨴᨸᩮᩣ, ᨲᩈ᩠ᨾᩥᩴ ᨵᩁᨱᩦᩁᩩᩉᨸᩣᨴᨸᩮ ᨸᩩᨸ᩠ᨹᩴ ᨾᨿᩣ ᨸᩪᨩᩥᨲᨶ᩠ᨲᩥ ᩋᨲ᩠ᨳᩮᩣ.

ᨧᨲᩩᨲ᩠ᨳᩣᨸᨴᩣᨶᩴ ᩏᨲ᩠ᨲᩣᨶᨲ᩠ᨳᨾᩮᩅ.

᪑᪘-᪑᪙. ᨸᨬ᩠ᨧᨾᩣᨸᨴᩣᨶᩮ ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥ ᩉᩥᨾᩅᨶ᩠ᨲᩔ ᩌᩈᨶ᩠ᨶᩮ. ᩁᩮᩣᨾᩈᩮᩣ ᨶᩣᨾ ᨸᨻ᩠ᨻᨲᩮᩣᨲᩥ ᩁᩩᨠ᩠ᨡᩃᨲᩣᨣᩩᨾ᩠ᨻᩣᨽᩣᩅᩣ ᨠᩮᩅᩃᩴ ᨴᨻ᩠ᨻᨲᩥᨱᩣᨴᩥᩈᨬ᩠ᨨᨶ᩠ᨶᨲ᩠ᨲᩣ ᩁᩮᩣᨾᩈᩮᩣ ᨶᩣᨾ ᨸᨻ᩠ᨻᨲᩮᩣ ᩋᩉᩮᩣᩈᩥ. ᨲᨾ᩠ᩉᩥ ᨸᨻ᩠ᨻᨲᨸᩣᨴᨾ᩠ᩉᩦᨲᩥ ¶ ᨲᩈ᩠ᨾᩥᩴ ᨸᨻ᩠ᨻᨲᨸᩁᩥᨿᨶ᩠ᨲᩮ. ᩈᨾᨱᩮᩣ ᨽᩣᩅᩥᨲᩥᨶ᩠ᨴᩕᩥᨿᩮᩣᨲᩥ ᩈᨾᩥᨲᨸᩣᨸᩮᩣ ᩅᩪᨸᩈᨶ᩠ᨲᨠᩥᩃᩮᩈᩮᩣ ᩈᨾᨱᩮᩣ ᩅᨯ᩠ᨰᩥᨲᩍᨶ᩠ᨴᩕᩥᨿᩮᩣ, ᩁᨠ᩠ᨡᩥᨲᨧᨠ᩠ᨡᩩᨶ᩠ᨴᩕᩥᨿᩣᨴᩥᩍᨶ᩠ᨴᩕᩥᨿᩮᩣᨲᩥ ᩋᨲ᩠ᨳᩮᩣ. ᩋᨳ ᩅᩣ ᩅᨯ᩠ᨰᩥᨲᩍᨶ᩠ᨴᩕᩥᨿᩮᩣ ᩅᨯ᩠ᨰᩥᨲᩈᨴ᩠ᨵᩥᨶ᩠ᨴᩕᩥᨿᩣᨴᩥᩍᨶ᩠ᨴᩕᩥᨿᩮᩣᨲᩥ ᩋᨲ᩠ᨳᩮᩣ. ᨲᩔ ᩈᨾᨱᩔ ᩋᩉᩴ ᨻᩥᩊᩣᩃᩥᩌᩃᩩᩅᩮ ᨣᩉᩮᨲ᩠ᩅᩣ ᩋᨴᩣᩈᩥᨶ᩠ᨲᩥ ᩋᨲ᩠ᨳᩮᩣ.

ᨨᨭ᩠ᨮᩈᨲ᩠ᨲᨾᨭ᩠ᨮᨾᨶᩅᨾᨴᩈᨾᩣᨸᨴᩣᨶᩣᨶᩥ ᩏᨲ᩠ᨲᩣᨶᨲ᩠ᨳᩣᨶᩮᩅᩣᨲᩥ.

ᩈᨲ᩠ᨲᩅᩦᩈᨲᩥᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪒᪘. ᩈᩩᩅᨱ᩠ᨱᨻᩥᨻ᩠ᨻᩮᩣᩉᨶᩅᨣ᩠ᨣᩮᩣ

᪑-᪑᪐. ᩈᩩᩅᨱ᩠ᨱᨻᩥᨻ᩠ᨻᩮᩣᩉᨶᩥᨿᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

ᩋᨭ᩠ᨮᩅᩦᩈᨲᩥᨾᩮ ¶ ᩅᨣ᩠ᨣᩮ ᨸᨮᨾᩣᨸᨴᩣᨶᩴ ᩏᨲ᩠ᨲᩣᨶᨾᩮᩅ.

᪕. ᨴᩩᨲᩥᨿᩣᨸᨴᩣᨶᩮ ᨾᨶᩮᩣᨾᨿᩮᨶ ᨠᩣᨿᩮᨶᩣᨲᩥ ᨿᨳᩣ ᨧᩥᨲ᩠ᨲᩅᩈᩮᨶ ᨸᩅᨲ᩠ᨲᨠᩣᨿᩮᨶᩣᨲᩥ ᩋᨲ᩠ᨳᩮᩣ.

᪑᪐. ᨲᨲᩥᨿᩣᨸᨴᩣᨶᩮ ¶ ᨾᩉᩣᩈᨾᩩᨴ᩠ᨴᩴ ᨶᩥᩔᩣᨿᩣᨲᩥ ᨾᩉᩣᩈᩣᨣᩁᩣᩈᨶ᩠ᨶᩮ ᨮᩥᨲᩔ ᨸᨻ᩠ᨻᨲᩔ ᩋᨶ᩠ᨲᩁᩮ ᨸᨻ᩠ᨻᨲᩃᩮᨱᩮᨲᩥ ᩋᨲ᩠ᨳᩮᩣ. ᩈᩥᨴ᩠ᨵᨲ᩠ᨳᩮᩣ ᨽᨣᩅᩣ ᩅᩥᩅᩮᨠᨠᩣᨾᨲᩣᨿ ᩅᩈᨲᩥ ᨸᨭᩥᩅᩈᨲᩦᨲᩥ ᩋᨲ᩠ᨳᩮᩣ. ᨸᨧ᩠ᨧᩩᨣ᩠ᨣᨶ᩠ᨲ᩠ᩅᩣᨶᨠᩣᩈᩉᨶ᩠ᨲᩥ ᩋᩉᩴ ᨲᩔ ᨽᨣᩅᨲᩮᩣ ᨸᨭᩥᩏᨣ᩠ᨣᨶ᩠ᨲ᩠ᩅᩣ ᩈᨾᩦᨸᩴ ᨣᨶ᩠ᨲ᩠ᩅᩣ ᩅᨶ᩠ᨴᨶᩣᨴᩥᨸᩩᨬ᩠ᨬᩴ ᩋᨠᩣᩈᩥᨶ᩠ᨲᩥ ᩋᨲ᩠ᨳᩮᩣ. ᨧᨦ᩠ᨠᩮᩣᨭᨠᨾᨴᩣᩈᩉᨶ᩠ᨲᩥ ᩈᩥᨴ᩠ᨵᨲ᩠ᨳᩔ ᨽᨣᩅᨲᩮᩣ ᩋᩉᩴ ᨸᩩᨸ᩠ᨹᨽᩁᩥᨲᩴ ᨧᨦ᩠ᨠᩮᩣᨭᨠᩴ ᨠᨴᨾ᩠ᨻᩴ ᩋᨴᩣᩈᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪑᪔. ᨧᨲᩩᨲ᩠ᨳᩣᨸᨴᩣᨶᩮ ᩋᨠᨠ᩠ᨠᩈᨧᩥᨲ᩠ᨲᩔᩣᨳᩣᨲᩥ ᩋᨹᩁᩩᩈᨧᩥᨲ᩠ᨲᩔ, ᩋᨳ-ᩈᨴ᩠ᨴᩮᩣ ᨸᨴᨸᩪᩁᨱᩮ.

᪑᪙. ᨸᨬ᩠ᨧᨾᩣᨸᨴᩣᨶᩮ ᩏᨴᩩᨾ᩠ᨻᩁᩮ ᩅᩈᨶ᩠ᨲᩔᩣᨲᩥ ᩏᨴᩩᨾ᩠ᨻᩁᩁᩩᨠ᩠ᨡᨾᩪᩃᩮ ᩁᩩᨠ᩠ᨡᨧ᩠ᨨᩣᨿᩣᨿ ᩅᩈᨶ᩠ᨲᩔ ᨲᩥᩔᩔ ᨽᨣᩅᨲᩮᩣ. ᨶᩥᨿᨲᩮ ᨸᨱ᩠ᨱᩈᨶ᩠ᨳᩁᩮᨲᩥ ᨶᩥᨿᩣᨾᩥᨲᩮ ᨸᨭᩥᨻᨴ᩠ᨵᩮ ᨸᨱ᩠ᨱᩈᨶ᩠ᨳᩁᩮ ᩈᩣᨡᩣᨽᨦ᩠ᨣᩣᩈᨶᩮ ᨶᩥᩈᩥᨶ᩠ᨶᩔ. ᩅᩩᨲ᩠ᨳᩮᩣᨠᩣᩈᩮᩣ ᨾᨿᩣ ᨴᩥᨶ᩠ᨶᩮᩣᨲᩥ ᩅᩥᩅᩥᨲ᩠ᨲᩮᩣᨠᩣᩈᩮ ᨾᨱ᩠ᨯᨸᨴ᩠ᩅᩣᩁᩣᨴᩦᩉᩥ ᨸᩥᩉᩥᨲᩮᩣᨠᩣᩈᩮᩣ ᨾᨿᩣ ᨴᩥᨶ᩠ᨶᩮᩣ ᩈᨾ᩠ᨸᩣᨴᩥᨲᩮᩣᨲᩥ ᩋᨲ᩠ᨳᩮᩣ.

᪒᪔. ᨨᨭ᩠ᨮᩣᨸᨴᩣᨶᩮ ᨸᩮᩣᨲ᩠ᨳᨴᩣᨶᩴ ᨾᨿᩣ ᨴᩥᨶ᩠ᨶᨶ᩠ᨲᩥ ᨸᩮᩣᨲ᩠ᨳᩅᨭ᩠ᨭᩥᩴ ᨸᩮᩣᨲ᩠ᨳᨨᩃ᩠ᩃᩥᩴ ᨲᩣᩊᩮᨲ᩠ᩅᩣ ᨠᨲᩴ ᩈᩣᨭᨠᩴ ᩅᩥᩈᨾᩴ ᨣᩮᩣᨹᩣᩈᩩᨠᩮᨶ ᨥᩴᩈᩥᨲ᩠ᩅᩣ ᨶᩥᨾ᩠ᨾᩥᨲᩴ ᩈᩩᨲ᩠ᨲᩴ ᨣᩉᩮᨲ᩠ᩅᩣ ᨠᨶ᩠ᨲᩥᨲ᩠ᩅᩣ ᨲᩮᨶ ᩈᩩᨲ᩠ᨲᩮᨶ ᨶᩥᩈᩦᨴᨶᨲ᩠ᨳᩣᨿ ᩅᩣ ᨽᩪᨾᨲ᩠ᨳᩁᨱᨲ᩠ᨳᩣᨿ ᩅᩣ ᩈᩣᨭᨠᩴ ᩅᩣᨿᩣᨸᩮᨲ᩠ᩅᩣ ᨲᩴ ᩈᩣᨭᨠᩴ ᨾᨿᩣ ᩁᨲᨶᨲ᩠ᨲᨿᩔ ᨴᩥᨶ᩠ᨶᨶ᩠ᨲᩥ ᩋᨲ᩠ᨳᩮᩣ.

᪒᪗. ᩈᨲ᩠ᨲᨾᩣᨸᨴᩣᨶᩮ ᨧᨶ᩠ᨴᨽᩣᨣᩣᨶᨴᩦᨲᩦᩁᩮᨲᩥ ᨧᨶ᩠ᨴᨽᩣᨣᩣᨿ ᨶᩣᨾ ᨶᨴᩥᨿᩣ ᨲᩦᩁᨲᩮᩣ, ᨶᩥᩔᨠ᩠ᨠᩮ ᨽᩩᨾ᩠ᨾᩅᨧᨶᩴ ¶ . ᩋᨶᩩᩈᩮᩣᨲᨶ᩠ᨲᩥ ᩈᩮᩣᨲᩔ ᩋᨶᩩ ᩉᩮᨭ᩠ᨮᩣᨣᨦ᩠ᨣᩴ ¶ ᩅᨩᩣᨾᩥ ᨣᨧ᩠ᨨᩣᨾᩥ ᩋᩉᨶ᩠ᨲᩥ ᩋᨲ᩠ᨳᩮᩣ. ᩈᨲ᩠ᨲ ᨾᩣᩃᩩᩅᨸᩩᨸ᩠ᨹᩣᨶᩥ, ᨧᩥᨲᨾᩣᩁᩮᩣᨸᨿᩥᩴ ᩋᩉᨶ᩠ᨲᩥ ᩋᩉᩴ ᨾᩣᩃᩩᩅᨸᩩᨸ᩠ᨹᩣᨶᩥ ᩈᨲ᩠ᨲ ᨸᨲ᩠ᨲᩣᨶᩥ ᨣᩉᩮᨲ᩠ᩅᩣ ᨧᩥᨲᨠᩮ ᩅᩣᩃᩩᨠᩁᩣᩈᩥᨾ᩠ᩉᩥ ᩅᩣᩃᩩᨠᩣᩉᩥ ᨳᩪᨸᩴ ᨠᨲ᩠ᩅᩣ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪓᪑-᪓᪒. ᩋᨭ᩠ᨮᨾᩣᨸᨴᩣᨶᩮ ᨾᩉᩣᩈᩥᨶ᩠ᨵᩩ ᩈᩩᨴᩔᨶᩣᨲᩥ ᩈᩩᨶ᩠ᨴᩁᨴᩔᨶᩈᩩᨶ᩠ᨴᩁᩮᩣᨴᨠᨵᩅᩃᨸᩩᩃᩥᨶᩮᩣᨸᩈᩮᩣᨽᩥᨲᨲ᩠ᨲᩣ ᩈᩩᨭ᩠ᨮᩩ ᨾᨶᩮᩣᩉᩁᩣ ᨾᩉᩣᩈᩥᨶ᩠ᨵᩩ ᨶᩣᨾ ᩅᩣᩁᩥᨶᨴᩦ ᩋᩉᩮᩣᩈᩥ. ᨲᨲ᩠ᨳ ᨲᩥᩔᩴ ᩈᩥᨶ᩠ᨵᩩᩅᩣᩁᩥᨶᨴᩥᨿᩴ ᩈᨸ᩠ᨸᨽᩣᩈᩴ ᨸᨽᩣᨿ ᩈᩉᩥᨲᩴ ᩈᩩᨴᩔᨶᩴ ᩈᩩᨶ᩠ᨴᩁᩁᩪᨸᩴ ᨸᩁᨾᩮᩣᨸᩈᨾᩮ ᨿᩩᨲ᩠ᨲᩴ ᩏᨲ᩠ᨲᨾᩮ ᩏᨸᩈᨾᩮ ᨿᩩᨲ᩠ᨲᩴ ᩈᨾᨦ᩠ᨣᩦᨽᩪᨲᩴ ᩅᩦᨲᩁᩣᨣᩴ ᩋᩉᩴ ᩋᨴ᩠ᨴᩈᨶ᩠ᨲᩥ ᩋᨲ᩠ᨳᩮᩣ. ᨴᩥᩈ᩠ᩅᩣᩉᩴ ᩅᩥᨾ᩠ᩉᩥᨲᩣᩈᨿᩮᩣᨲᩥ ¶ ‘‘ᩑᩅᩁᩪᨸᩴ ᨽᨿᩣᨶᨠᩴ ᩉᩥᨾᩅᨶ᩠ᨲᩴ ᨠᨳᩴ ᩈᨾ᩠ᨸᨲ᩠ᨲᩮᩣ’’ᨲᩥ ᩅᩥᨾ᩠ᩉᩥᨲᩋᨩ᩠ᨫᩣᩈᨿᩮᩣ ᩋᨧ᩠ᨨᩁᩥᨿᨻ᩠ᨽᩩᨲᨧᩥᨲ᩠ᨲᩮᩣᨲᩥ ᩋᨲ᩠ᨳᩮᩣ. ᩌᩃᩩᩅᩴ ᨲᩔ ᨸᩣᨴᩣᩈᩥᨶ᩠ᨲᩥ ᨲᩔ ᩋᩁᩉᨲᩮᩣ ᩋᩉᩴ ᨸᩈᨶ᩠ᨶᨾᩣᨶᩈᩮᩣ ᩌᩃᩩᩅᨠᨶ᩠ᨴᩴ ᨸᩣᨴᩣᩈᩥᩴ ᩌᨴᩁᩮᨶ ᩋᨴᩣᩈᩥᨶ᩠ᨲᩥ ᩋᨲ᩠ᨳᩮᩣ.

ᨶᩅᨾᨴᩈᨾᩣᨸᨴᩣᨶᩣᨶᩥ ᩏᨲ᩠ᨲᩣᨶᩣᨶᩮᩅᩣᨲᩥ.

ᩋᨭ᩠ᨮᩅᩦᩈᨲᩥᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪒᪙. ᨸᨱ᩠ᨱᨴᩣᨿᨠᩅᨣ᩠ᨣᩮᩣ

᪑-᪑᪐. ᨸᨱ᩠ᨱᨴᩣᨿᨠᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

᪑-᪒. ᩑᨠᩪᨶᨲᩥᩴᩈᨲᩥᨾᩮ ¶ ᩅᨣ᩠ᨣᩮ ᨸᨮᨾᩣᨸᨴᩣᨶᩮ ᨸᨱ᩠ᨱᨽᩮᩣᨩᨶᨽᩮᩣᨩᨶᩮᩣᨲᩥ ᨡᩦᩁᨸᨱ᩠ᨱᩣᨴᩥᨽᩮᩣᨩᨶᩔ ᨽᩩᨬ᩠ᨩᨶᨲ᩠ᨳᩣᨿ ᨸᨱ᩠ᨱᩈᩣᩃᩣᨿ ᨶᩥᩈᩥᨶ᩠ᨶᩮᩣ ᩋᨾ᩠ᩉᩥ ᨽᩅᩣᨾᩦᨲᩥ ᩋᨲ᩠ᨳᩮᩣ. ᩏᨸᩅᩥᨭ᩠ᨮᨬ᩠ᨧ ᨾᩴ ᩈᨶ᩠ᨲᨶ᩠ᨲᩥ ᨸᨱ᩠ᨱᩈᩣᩃᩣᨿᩴ ᩏᨸᩅᩥᨭ᩠ᨮᩴ ᩈᨶ᩠ᨲᩴ ᩅᩥᨩ᩠ᨩᨾᩣᨶᩴ ᨾᩴ. ᩏᨸᩣᨣᨧ᩠ᨨᩥ ᨾᩉᩣᩍᩈᩦᨲᩥ ᨾᩉᨶ᩠ᨲᩮ ᩈᩦᩃᩣᨴᩥᨡᨶ᩠ᨵᩮ ᩑᩈᨶᨲᩮᩣ ᨾᩉᩣᩍᩈᩥ. ᩃᩮᩣᨠᨸᨩ᩠ᨩᩮᩣᨲᩮᩣ ᩃᩮᩣᨠᨸᨴᩦᨸᩮᩣ ᩈᩥᨴ᩠ᨵᨲ᩠ᨳᩮᩣ ᨽᨣᩅᩣ ᩏᨸᨣᨧ᩠ᨨᩥ, ᨾᨾ ᩈᨾᩦᨸᩴ ᩋᨣᨾᩣᩈᩦᨲᩥ ᩋᨲ᩠ᨳᩮᩣ. ᨶᩥᩈᩥᨶ᩠ᨶᩔ ᨸᨱ᩠ᨱᩈᨶ᩠ᨳᩁᩮᨲᩥ ᩏᨸᨣᨶ᩠ᨲ᩠ᩅᩣ ᨸᨱ᩠ᨱᩈᨶ᩠ᨳᩁᩮ ᨶᩥᩈᩥᨶ᩠ᨶᩔ ᨡᩣᨴᨶᨲ᩠ᨳᩣᨿ ᩈᩮᨴᩥᨲᩴ ᨸᨱ᩠ᨱᩴ ᨾᨿᩣ ᨴᩥᨶ᩠ᨶᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

᪕-᪗. ᨴᩩᨲᩥᨿᩣᨸᨴᩣᨶᩮ ᩈᩥᨶᩮᩁᩩᩈᨾᩈᨶ᩠ᨲᩮᩣᩈᩮᩣ ᨵᩁᨱᩦᩈᨾᩈᩣᨴᩥᩈᩮᩣ ᩈᩥᨴ᩠ᨵᨲ᩠ᨳᩮᩣ ᨽᨣᩅᩣᨲᩥ ᩈᨾ᩠ᨻᨶ᩠ᨵᩮᩣ. ᩅᩩᨭ᩠ᨮᩉᩥᨲ᩠ᩅᩣ ᩈᨾᩣᨵᩥᨾ᩠ᩉᩣᨲᩥ ᨶᩥᩁᩮᩣᨵᩈᨾᩣᨸᨲ᩠ᨲᩥᨲᩮᩣ ᩅᩩᨭ᩠ᨮᩉᩥᨲ᩠ᩅᩣ ᩅᩥᩈᩩᩴ ᩉᩩᨲ᩠ᩅᩣᨲᩥ ᩋᨲ᩠ᨳᩮᩣ. ᨽᩥᨠ᩠ᨡᩣᨿ ᨾᨾᩩᨸᨭ᩠ᨮᩥᨲᩮᩣᨲᩥ ᨽᩥᨠ᩠ᨡᩣᨧᩣᩁᩅᩮᩃᩣᨿ ‘‘ᩋᨩ᩠ᨩ ᨾᨾ ᨿᩮᩣ ᨠᩮᩣᨧᩥ ᨠᩥᨬ᩠ᨧᩥ ᨴᩣᨶᩴ ᨴᨴᩣᨲᩥ, ᨲᩔ ᨾᩉᨸ᩠ᨹᩃ’’ᨶ᩠ᨲᩥ ᨧᩥᨶ᩠ᨲᩮᨲ᩠ᩅᩣ ᨶᩥᩈᩥᨶ᩠ᨶᩔ ᨾᨾ ᩈᨶ᩠ᨲᩥᨠᩴ ᩈᨾᩦᨸᩴ ᩏᨸᨭ᩠ᨮᩥᨲᩮᩣ ᩈᨾᩦᨸᨾᩣᨣᨲᩮᩣᨲᩥ ᩋᨲ᩠ᨳᩮᩣ. ᩉᩁᩦᨲᨠᩴ…ᨸᩮ… ᨹᩣᩁᩩᩈᨠᨹᩃᩣᨶᩥ ᨧᩣᨲᩥ ᩑᩅᩴ ᩈᨻ᩠ᨻᩴ ᨲᩴ ᨹᩃᩴ ᩈᨻ᩠ᨻᩃᩮᩣᨠᩣᨶᩩᨠᨾ᩠ᨸᩥᨶᩮᩣ ᨲᩔ ᩈᩥᨴ᩠ᨵᨲ᩠ᨳᩔ ᨾᩉᩮᩈᩥᩔ ᨾᨿᩣ ᩅᩥᨸ᩠ᨸᩈᨶ᩠ᨶᩮᨶ ᨧᩮᨲᩈᩣ ᨴᩥᨶ᩠ᨶᨶ᩠ᨲᩥ ᩋᨲ᩠ᨳᩮᩣ.

᪑᪑-᪑᪒. ᨲᨲᩥᨿᩣᨸᨴᩣᨶᩮ ¶ ᩈᩦᩉᩴ ᨿᨳᩣ ᩅᨶᨧᩁᨶ᩠ᨲᩥ ᩅᨶᩮ ᨧᩁᨾᩣᨶᩴ ᩈᩦᩉᩁᩣᨩᩴ ᩍᩅ ᨧᩁᨾᩣᨶᩴ ᩈᩥᨴ᩠ᨵᨲ᩠ᨳᩴ ᨽᨣᩅᨶ᩠ᨲᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨶᩥᩈᨽᩣᨩᩣᨶᩥᨿᩴ ᨿᨳᩣᨲᩥ ᩅᩈᨽᩮᩣ, ᨶᩥᩈᨽᩮᩣ, ᩅᩥᩈᨽᩮᩣ, ᩌᩈᨽᩮᩣᨲᩥ ᨧᨲ᩠ᨲᩣᩁᩮᩣ ᨣᩅᨩᩮᨭ᩠ᨮᨠᩣ. ᨲᩮᩈᩩ ᨣᩅᩈᨲᩔ ᨩᩮᨭ᩠ᨮᨠᩮᩣ ᩅᩈᨽᩮᩣ, ᨣᩅᩈᩉᩔᩔ ᨩᩮᨭ᩠ᨮᨠᩮᩣ ᨶᩥᩈᨽᩮᩣ, ᨣᩅᩈᨲᩈᩉᩔᩔ ᨩᩮᨭ᩠ᨮᨠᩮᩣ ᩅᩥᩈᨽᩮᩣ, ᨣᩅᨠᩮᩣᨭᩥᩈᨲᩈᩉᩔᩔ ¶ ᨩᩮᨭ᩠ᨮᨠᩮᩣ ᩌᩈᨽᩮᩣ. ᩍᨵ ᨸᨶ ᩌᩈᨽᩮᩣ ‘‘ᨶᩥᩈᨽᩮᩣ’’ᨲᩥ ᩅᩩᨲ᩠ᨲᩮᩣ, ᩌᨩᩣᨶᩦᨿᩴ ᩋᨽᩦᨲᩴ ᨶᩥᨧ᩠ᨧᩃᩴ ᩏᩈᨽᩁᩣᨩᩴ ᩍᩅᩣᨲᩥ ᩋᨲ᩠ᨳᩮᩣ. ᨠᨠᩩᨵᩴ ᩅᩥᩃᩈᨶ᩠ᨲᩴᩅᩣᨲᩥ ᨸᩩᨸ᩠ᨹᨸᩃ᩠ᩃᩅᩮᩉᩥ ᩈᩮᩣᨽᨾᩣᨶᩴ ᨠᨠᩩᨵᩁᩩᨠ᩠ᨡᩴ ᩍᩅ ᨶᩁᩣᩈᨽᩴ ᨶᩁᩣᨶᩴ ᩌᩈᨽᩴ ᩏᨲ᩠ᨲᨾᩴ ᩌᨣᨧ᩠ᨨᨶ᩠ᨲᩴ ᩈᩥᨴ᩠ᨵᨲ᩠ᨳᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᩈᨴ᩠ᨵᩣᨿ ᩈᨾ᩠ᨸᨿᩩᨲ᩠ᨲᨲ᩠ᨲᩣ ᩅᩥᨸ᩠ᨸᩈᨶ᩠ᨶᩮᨶ ᨧᩮᨲᩈᩣ ᨸᨧ᩠ᨧᩩᨣ᩠ᨣᨾᨶᩴ ᩋᨠᩣᩈᩥᨶ᩠ᨲᩥ ᩋᨲ᩠ᨳᩮᩣ.

ᨧᨲᩩᨲ᩠ᨳᩣᨸᨴᩣᨶᩣᨴᩦᨶᩥ ᨴᩈᨾᩣᩅᩈᩣᨶᩣᨶᩥ ᩈᩩᩅᩥᨬ᩠ᨬᩮᨿ᩠ᨿᩣᨶᩮᩅᩣᨲᩥ.

ᩑᨠᩪᨶᨲᩥᩴᩈᨲᩥᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪓᪐. ᨧᩥᨲᨠᨸᩪᨩᨠᩅᨣ᩠ᨣᩮᩣ

᪑-᪑᪐. ᨧᩥᨲᨠᨸᩪᨩᨠᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

᪑-᪒. ᨲᩥᩴᩈᨲᩥᨾᩮ ¶ ᩅᨣ᩠ᨣᩮ ᨸᨮᨾᩣᨸᨴᩣᨶᩮ ᩌᩉᩩᨲᩥᩴ ᨿᩥᨭ᩠ᨮᩩᨠᩣᨾᩮᩣᩉᨶ᩠ᨲᩥ ᨸᩪᨩᩣᩈᨠ᩠ᨠᩣᩁᩴ ᨠᩣᩁᩮᨲᩩᨠᩣᨾᩮᩣ ᩋᩉᩴ. ᨶᩣᨶᩣᨸᩩᨸ᩠ᨹᩴ ᩈᨾᩣᨶᨿᩥᨶ᩠ᨲᩥ ᨶᩣᨶᩣ ᩋᨶᩮᨠᩅᩥᨵᩴ ᨧᨾ᩠ᨸᨠᩈᩃᩃᩣᨴᩥᨸᩩᨸ᩠ᨹᩴ ᩈᩴ ᩈᩩᨭ᩠ᨮᩩ ᩌᨶᨿᩥᩴ, ᩁᩣᩈᩥᩴ ᩋᨠᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩈᩥᨡᩥᨶᩮᩣ ᩃᩮᩣᨠᨻᨶ᩠ᨵᩩᨶᩮᩣᨲᩥ ᩈᨠᩃᩃᩮᩣᨠᨲ᩠ᨲᨿᨻᨶ᩠ᨵᩩᩔ ᨬᩣᨲᨠᩔ ᩈᩥᨡᩥᩔ ᨽᨣᩅᨲᩮᩣ ᨸᩁᩥᨶᩥᨻ᩠ᨻᩩᨲᩔ ᨧᩥᨲᨠᩴ ᩌᩊᩣᩉᨶᨧᩥᨲᨠᩴ ᨴᩣᩁᩩᩁᩣᩈᩥᩴ ᨩᩃᨶ᩠ᨲᩴ ᩌᨴᩥᨲ᩠ᨲᩴ ᨴᩥᩈ᩠ᩅᩣ ᨲᨬ᩠ᨧ ᨾᨿᩣ ᩁᩣᩈᩦᨠᨲᩴ ᨸᩩᨸ᩠ᨹᩴ ᩒᨠᩥᩁᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪖-᪗. ᨴᩩᨲᩥᨿᩣᨸᨴᩣᨶᩮ ᩋᨩᩥᨶᩩᨲ᩠ᨲᩁᩅᩣᩈᨶᩮᩣᨲᩥ ᩋᨩᩥᨶᨾᩥᨣᨧᨾ᩠ᨾᩴ ᩏᨲ᩠ᨲᩁᩣᩈᨦ᩠ᨣᩴ ᨠᨲ᩠ᩅᩣ ᨶᩥᩅᩣᩈᩥᨶᩮᩣ ᩋᨧ᩠ᨨᩣᨴᨶᩮᩣᨲᩥ ᩋᨲ᩠ᨳᩮᩣ. ᩋᨽᩥᨬ᩠ᨬᩣ ᨸᨬ᩠ᨧ ᨶᩥᨻ᩠ᨻᨲ᩠ᨲᩣᨲᩥ ᩍᨴ᩠ᨵᩥᩅᩥᨵᩣᨴᨿᩮᩣ ᨸᨬ᩠ᨧ ᩋᨽᩥᨬ᩠ᨬᩣᨿᩮᩣ ᨸᨬ᩠ᨧ ᨬᩣᨱᩣᨶᩥ ᨶᩥᨻ᩠ᨻᨲ᩠ᨲᩣ ᩏᨸ᩠ᨸᩣᨴᩥᨲᩣ ᨶᩥᨸ᩠ᨹᩣᨴᩥᨲᩣ. ᨧᨶ᩠ᨴᩔ ᨸᩁᩥᨾᨩ᩠ᨩᨠᩮᩣᨲᩥ ᨧᨶ᩠ᨴᨾᨱ᩠ᨯᩃᩔ ᩈᨾᨶ᩠ᨲᨲᩮᩣ ᨾᨩ᩠ᨩᨠᩮᩣ, ᨹᩩᨭ᩠ᨮᩮᩣ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩅᩥᨸᩔᩥᩴ ᩃᩮᩣᨠᨸᨩ᩠ᨩᩮᩣᨲᨶ᩠ᨲᩥ ᩈᨠᩃᩃᩮᩣᨠᨲ᩠ᨲᨿᩮ ᨸᨴᩦᨸᩈᨴᩥᩈᩴ ᩅᩥᨸᩔᩥᩴ ᨽᨣᩅᨶ᩠ᨲᩴ ᨾᨾ ᩈᨶ᩠ᨲᩥᨠᩴ ᩋᨽᩥᨣᨲᩴ ᩅᩥᩈᩮᩈᩮᨶ ᩈᨾ᩠ᨸᨲ᩠ᨲᩴ ᩌᨣᨲᩴ. ᨴᩥᩈ᩠ᩅᩣ ᨸᩣᩁᩥᨧ᩠ᨨᨲ᩠ᨲᨠᨸᩩᨸ᩠ᨹᩣᨶᩦᨲᩥ ᨴᩮᩅᩃᩮᩣᨠᨲᩮᩣ ᨸᩣᩁᩥᨧ᩠ᨨᨲ᩠ᨲᨠᨸᩩᨸ᩠ᨹᩣᨶᩥ ᩌᩉᩁᩥᨲ᩠ᩅᩣ ᩅᩥᨸᩔᩥᩔ ᩈᨲ᩠ᨳᩩᨶᩮᩣ ᨾᨲ᩠ᨳᨠᩮ ᨨᨲ᩠ᨲᩣᨠᩣᩁᩮᨶ ᩋᩉᩴ ᨵᩣᩁᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪑᪑-᪑᪓. ᨲᨲᩥᨿᩣᨸᨴᩣᨶᩮ ᨸᩩᨲ᩠ᨲᩮᩣ ᨾᨾ ᨸᨻ᩠ᨻᨩᩥᨲᩮᩣᨲᩥ ᨾᨿ᩠ᩉᩴ ᨸᩩᨲ᩠ᨲᩮᩣ ᩈᨴ᩠ᨵᩣᨿ ᨸᨻ᩠ᨻᨩᩥᨲᩮᩣ. ᨠᩣᩈᩣᨿᩅᩈᨶᩮᩣ ᨲᨴᩣᨲᩥ ᨲᩈ᩠ᨾᩥᩴ ᨸᨻ᩠ᨻᨩᩥᨲᨠᩣᩃᩮ ᨠᩣᩈᩣᨿᨶᩥᩅᨲ᩠ᨳᩮᩣ ¶ , ᨶ ᨻᩣᩉᩥᩁᨠᨸᨻ᩠ᨻᨩ᩠ᨩᩣᨿ ᨸᨻ᩠ᨻᨩᩥᨲᩮᩣᨲᩥ ᩋᨲ᩠ᨳᩮᩣ. ᩈᩮᩣ ¶ ᨧ ᨻᩩᨴ᩠ᨵᨲ᩠ᨲᩴ ᩈᨾ᩠ᨸᨲ᩠ᨲᩮᩣᨲᩥ ᩈᩮᩣ ᨾᨿ᩠ᩉᩴ ᨸᩩᨲ᩠ᨲᩮᩣ ᨧᨲᩪᩈᩩ ᨻᩩᨴ᩠ᨵᩮᩈᩩ ᩈᩣᩅᨠᨻᩩᨴ᩠ᨵᨽᩣᩅᩴ ᩈᩴ ᩈᩩᨭ᩠ᨮᩩ ᨸᨲ᩠ᨲᩮᩣ, ᩋᩁᩉᨲ᩠ᨲᩴ ᨸᨲ᩠ᨲᩮᩣᨲᩥ ᩋᨲ᩠ᨳᩮᩣ. ᨶᩥᨻ᩠ᨻᩩᨲᩮᩣ ᩃᩮᩣᨠᨸᩪᨩᩥᨲᩮᩣᨲᩥ ᩈᨠᩃᩃᩮᩣᨠᩮᩉᩥ ᨠᨲᩈᨠ᩠ᨠᩣᩁᩮᩣ ᨡᨶ᩠ᨵᨸᩁᩥᨶᩥᨻ᩠ᨻᩣᨶᩮᨶ ᨸᩁᩥᨶᩥᨻ᩠ᨻᩩᨲᩮᩣᨲᩥ ᩋᨲ᩠ᨳᩮᩣ. ᩅᩥᨧᩥᨶᨶ᩠ᨲᩮᩣ ᩈᨠᩴ ᨸᩩᨲ᩠ᨲᨶ᩠ᨲᩥ ᩋᩉᩴ ᨲᩔ ᨣᨲᨴᩮᩈᩴ ᨸᩩᨧ᩠ᨨᩥᨲ᩠ᩅᩣ ᩈᨠᩴ ᨸᩩᨲ᩠ᨲᩴ ᩅᩥᨧᩥᨶᨶ᩠ᨲᩮᩣ ᨸᨧ᩠ᨨᨲᩮᩣ ᩋᨣᨾᩴ, ᩋᨶᩩᨣᨲᩮᩣ ᩋᩈ᩠ᨾᩦᨲᩥ ᩋᨲ᩠ᨳᩮᩣ. ᨶᩥᨻ᩠ᨻᩩᨲᩔ ᨾᩉᨶ᩠ᨲᩔᩣᨲᩥ ᨾᩉᨶ᩠ᨲᩮᩉᩥ ᩈᩦᩃᨠ᩠ᨡᨶ᩠ᨵᩣᨴᩦᩉᩥ ᨿᩩᨲ᩠ᨲᨲ᩠ᨲᩣ ᨾᩉᨶ᩠ᨲᩔ ᨲᩔ ᨾᨾ ᨸᩩᨲ᩠ᨲᩔ ᩋᩁᩉᨲᩮᩣ ᩌᨴᩉᨶᨭ᩠ᨮᩣᨶᩮ ᨧᩥᨲᨠᩴ ᨧᩥᨲᨠᨭ᩠ᨮᩣᨶᩴ ᩋᩉᩴ ᩋᨣᨾᩣᩈᩥᨶ᩠ᨲᩥ ᩋᨲ᩠ᨳᩮᩣ. ᨸᨣ᩠ᨣᨿ᩠ᩉ ᩋᨬ᩠ᨩᩃᩥᩴ ᨲᨲ᩠ᨳᩣᨲᩥ ᨲᩈ᩠ᨾᩥᩴ ᩌᨴᩉᨶᨭ᩠ᨮᩣᨶᩮ ¶ ᩋᨬ᩠ᨩᩃᩥᩴ ᨴᩈᨦ᩠ᨣᩩᩃᩥᩈᨾᩮᩣᨵᩣᨶᩴ ᨸᨣ᩠ᨣᩉᩮᨲ᩠ᩅᩣ ᩈᩥᩁᩈᩥ ᨠᨲ᩠ᩅᩣ ᩋᩉᩴ ᨧᩥᨲᨠᩴ ᨴᩉᨶᨴᩣᩁᩩᩁᩣᩈᩥᩴ ᩅᨶ᩠ᨴᩥᨲ᩠ᩅᩣ ᨸᨱᩣᨾᩴ ᨠᨲ᩠ᩅᩣ ᩈᩮᨲᨧ᩠ᨨᨲ᩠ᨲᨬ᩠ᨧ ᨸᨣ᩠ᨣᨿ᩠ᩉᩣᨲᩥ ᨶ ᨠᩮᩅᩃᨾᩮᩅ ᩅᨶ᩠ᨴᩥᨲ᩠ᩅᩣ ᨵᩅᩃᨧ᩠ᨨᨲ᩠ᨲᨬ᩠ᨧ ᨸᨣ᩠ᨣᨿ᩠ᩉ ᩏᨠ᩠ᨡᩥᨸᩥᨲ᩠ᩅᩣ ᩋᩉᩴ ᩌᩁᩮᩣᨸᩮᩈᩥᩴ ᨸᨲᩥᨭ᩠ᨮᨸᩮᩈᩥᨶ᩠ᨲᩥ ᩋᨲ᩠ᨳᩮᩣ.

᪑᪗-᪑᪘. ᨧᨲᩩᨲ᩠ᨳᩣᨸᨴᩣᨶᩮ ᩋᨶᩩᨣ᩠ᨣᨲᨾ᩠ᩉᩥ ᩌᨴᩥᨧ᩠ᨧᩮᨲᩥ ᩈᩪᩁᩥᨿᩮ ᩋᨶᩩᨣ᩠ᨣᨲᩮ ᩋᨶᩩᨭ᩠ᨮᩥᨲᩮ ᨸᨧ᩠ᨧᩪᩈᨠᩣᩃᩮᨲᩥ ᩋᨲ᩠ᨳᩮᩣ. ᨸᩈᩣᨴᩮᩣ ᩅᩥᨸᩩᩃᩮᩣ ᩋᩉᩪᨲᩥ ᩁᩮᩣᨣᨸᩦᩊᩥᨲᩔ ᨾᨿ᩠ᩉᩴ ᨧᩥᨲ᩠ᨲᨸ᩠ᨸᩈᩣᨴᩮᩣ ᩅᩥᨸᩩᩃᩮᩣ ᩋᨲᩥᩁᩮᨠᩮᩣ ᨻᩩᨴ᩠ᨵᩣᨶᩩᩔᩁᨱᩮᨶ ᩋᩉᩩ ᩋᩉᩮᩣᩈᩥ. ᨾᩉᩮᩈᩥᨶᩮᩣ ᨻᩩᨴ᩠ᨵᩈᩮᨭ᩠ᨮᩔ ᩃᩮᩣᨠᨾ᩠ᩉᩥ ᨸᩣᨲᩩᨽᩣᩅᩮᩣ ᨸᩣᨠᨭᨽᩣᩅᩮᩣ ᩋᩉᩮᩣᩈᩦᨲᩥ ᩈᨾ᩠ᨻᨶ᩠ᨵᩮᩣ. ᨥᩮᩣᩈᨾᩔᩮᩣᩈᩉᩴ ᨲᨲ᩠ᨳᩣᨲᩥ ᨲᩈ᩠ᨾᩥᩴ ᨸᩣᨲᩩᨽᩣᩅᩮ ᩈᨲᩥ ‘‘ᩋᩉᩴ ᨣᩥᩃᩣᨶᩮᩣ ᨻᩩᨴ᩠ᨵᩮᩣ ᩏᨸ᩠ᨸᨶ᩠ᨶᩮᩣ’’ᨲᩥ ᨥᩮᩣᩈᩴ ᩋᩔᩮᩣᩈᩥᩴ. ᨶ ᨧ ᨸᩔᩣᨾᩥ ᨲᩴ ᨩᩥᨶᨶ᩠ᨲᩥ ᨲᩴ ᨩᩥᨲᨸᨬ᩠ᨧᨾᩣᩁᩴ ᩈᨾ᩠ᨾᩣᩈᨾ᩠ᨻᩩᨴ᩠ᨵᩴ ᨶ ᨸᩔᩣᨾᩥ, ᨻᩣᩊ᩠ᩉᨣᩥᩃᩣᨶᨲ᩠ᨲᩣ ᨣᨶ᩠ᨲ᩠ᩅᩣ ᨸᩔᩥᨲᩩᩴ ᨶ ᩈᨠ᩠ᨠᩮᩣᨾᩦᨲᩥ ᩋᨲ᩠ᨳᩮᩣ. ᨾᩁᨱᨬ᩠ᨧ ᩋᨶᩩᨸ᩠ᨸᨲ᩠ᨲᩮᩣᨲᩥ ᨾᩁᨱᩣᩈᨶ᩠ᨶᨠᩣᩃᩴ ᩋᨶᩩᨸ᩠ᨸᨲ᩠ᨲᩮᩣ, ᩌᩈᨶ᩠ᨶᨾᩁᨱᩮᩣ ᩉᩩᨲ᩠ᩅᩣᨲᩥ ᩋᨲ᩠ᨳᩮᩣ. ᨻᩩᨴ᩠ᨵᩈᨬ᩠ᨬᨾᨶᩩᩔᩁᩥᨶ᩠ᨲᩥ ᨻᩩᨴ᩠ᨵᩮᩣᨲᩥᨶᩣᨾᩴ ᩋᨶᩩᩔᩁᩥᩴ, ᨻᩩᨴ᩠ᨵᩣᩁᨾ᩠ᨾᨱᩴ ᨾᨶᩈᩥ ᩋᨠᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪒᪑-᪒᪓. ᨸᨬ᩠ᨧᨾᩣᨸᨴᩣᨶᩮ ᩌᩁᩣᨾᨴ᩠ᩅᩣᩁᩣ ᨶᩥᨠ᩠ᨡᨾ᩠ᨾᩣᨲᩥ ᩌᩁᩣᨾᨴ᩠ᩅᩣᩁᨲᩮᩣ ᩈᨦ᩠ᨥᩔ ᨶᩥᨠ᩠ᨡᨾᨶᨴ᩠ᩅᩣᩁᨾᨣ᩠ᨣᩮᩉᩥ ᩋᨲ᩠ᨳᩮᩣ. ᨣᩮᩣᩈᩦᩈᩴ ᩈᨶ᩠ᨳᨲᩴ ᨾᨿᩣᨲᩥ ᨲᩈ᩠ᨾᩥᩴ ᨶᩥᨠ᩠ᨡᨾᨶᨴ᩠ᩅᩣᩁᨾᨣ᩠ᨣᩮ ‘‘ᨽᨣᩅᨲᩮᩣ ᨽᩥᨠ᩠ᨡᩩᩈᨦ᩠ᨥᩔ ᨧ ᨸᩣᨴᩣ ᨾᩣ ᨠᨴ᩠ᨴᨾᩴ ᩋᨠ᩠ᨠᨾᨶ᩠ᨲᩪ’’ᨲᩥ ᩋᨠ᩠ᨠᨾᨶᨲ᩠ᨳᩣᨿ ᨣᩮᩣᩈᩦᩈᨭ᩠ᨮᩥᩴ ᨾᨿᩣ ᩈᨶ᩠ᨳᩁᩥᨲᨶ᩠ᨲᩥ ᩋᨲ᩠ᨳᩮᩣ. ᩋᨶᩩᨽᩮᩣᨾᩥ ᩈᨠᩴ ᨠᨾ᩠ᨾᨶ᩠ᨲᩥ ᩋᨲ᩠ᨲᨶᩮᩣ ᨣᩮᩣᩈᩦᩈᩋᨲ᩠ᨳᩁᨱᨠᨾ᩠ᨾᩔ ᨻᩃᩮᨶ ᩌᨩᩣᨶᩦᨿᩣ ᩅᩣᨲᨩᩅᩣ ᩈᩥᨶ᩠ᨵᩅᩣ ᩈᩦᨥᩅᩣᩉᨶᩣᨴᩦᨶᩥ ᩅᩥᨸᩣᨠᨹᩃᩣᨶᩥ ᩋᨶᩩᨽᩮᩣᨾᩦᨲᩥ ᩋᨲ᩠ᨳᩮᩣ. ᩋᩉᩮᩣ ¶ ¶ ᨠᩣᩁᩴ ᨸᩁᨾᨠᩣᩁᨶ᩠ᨲᩥ ᩈᩩᨡᩮᨲ᩠ᨲᩮ ᩈᨦ᩠ᨥᩮ ᨾᨿᩣ ᩈᩩᨭ᩠ᨮᩩ ᨠᨲᩴ ᨠᩣᩁᩴ ᩋᨸ᩠ᨸᨠᨾ᩠ᨸᩥ ᨠᩥᨧ᩠ᨧᩴ ᨾᩉᨸ᩠ᨹᩃᨴᩣᨶᨲᩮᩣ ᨸᩁᨾᨠᩣᩁᩴ ᩏᨲ᩠ᨲᨾᨠᩥᨧ᩠ᨧᩴ ᩋᩉᩮᩣ ᩅᩥᨾ᩠ᩉᨿᨶ᩠ᨲᩥ ᩋᨲ᩠ᨳᩮᩣ. ᨿᨳᩣ ᨲᩥᨱᨴᩮᩣᩈᩣᨴᩥᩅᩥᩁᩉᩥᨲᩮᩈᩩ ᨡᩮᨲ᩠ᨲᩮᩈᩩ ᩅᨸ᩠ᨸᩥᨲᩴ ᩈᩣᩃᩥᨻᩦᨩᩴ ᨾᩉᨸ᩠ᨹᩃᩴ ᨴᩮᨲᩥ, ᩑᩅᨾᩮᩅ ᩁᩣᨣᨴᩮᩣᩈᩣᨴᩥᨴᩮᩣᩈᩁᩉᩥᨲᩮ ᨸᩁᩥᩈᩩᨴ᩠ᨵᨠᩣᨿᩅᨧᩦᩈᨾᩣᨧᩣᩁᩮ ᩈᨦ᩠ᨥᨡᩮᨲ᩠ᨲᩮ ᨣᩮᩣᩈᩦᩈᩋᨲ᩠ᨳᩁᨱᨠᨾ᩠ᨾᩴ ᨾᨿᩣ ᨠᨲᩴ, ᩍᨴᩴ ᨾᩉᨸ᩠ᨹᩃᩴ ᨴᩮᨲᩦᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨶ ᩋᨬ᩠ᨬᩴ ᨠᩃᨾᨣ᩠ᨥᨲᩦᨲᩥ ᩋᨬ᩠ᨬᩴ ᨻᩣᩉᩥᩁᩈᩣᩈᨶᩮ ᨠᨲᩴ ᨠᨾ᩠ᨾᩴ ᩈᨦ᩠ᨥᩮ ᨠᨲᩔ ᨠᩣᩁᩔ ᨸᩪᨩᩣᩈᨠ᩠ᨠᩣᩁᩔ ᨠᩃᩴ ᩈᩮᩣᩊᩈᩥᩴ ᨠᩃᩴ ᨠᩮᩣᨭ᩠ᨮᩣᩈᩴ ᨶ ᩋᨣ᩠ᨥᨲᩦᨲᩥ ᩈᨾ᩠ᨻᨶ᩠ᨵᩮᩣ.

ᨨᨭ᩠ᨮᩈᨲ᩠ᨲᨾᨭ᩠ᨮᨾᨶᩅᨾᨴᩈᨾᩣᨸᨴᩣᨶᩣᨶᩥ ᩏᨲ᩠ᨲᩣᨶᩣᨶᩮᩅᩣᨲᩥ.

ᨲᩥᩴᩈᨲᩥᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪓᪑. ᨸᨴᩩᨾᨠᩮᩈᩁᩅᨣ᩠ᨣᩮᩣ

᪑-᪑᪐. ᨸᨴᩩᨾᨠᩮᩈᩁᩥᨿᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

᪑-᪒. ᩑᨠᨲᩥᩴᩈᨲᩥᨾᩮ ¶ ᩅᨣ᩠ᨣᩮ ᨸᨮᨾᩣᨸᨴᩣᨶᩮ ᩍᩈᩥᩈᨦ᩠ᨥᩮ ᩋᩉᩴ ᨸᩩᨻ᩠ᨻᩮᨲᩥ ᩋᩉᩴ ᨸᩩᨻ᩠ᨻᩮ ᨻᩮᩣᨵᩥᩈᨾ᩠ᨽᩣᩁᨸᩪᩁᨱᨠᩣᩃᩮ ᩍᩈᩥᩈᨦ᩠ᨥᩮ ᨸᨧ᩠ᨧᩮᨠᨻᩩᨴ᩠ᨵᩍᩈᩥᩈᨾᩪᩉᩮ ᨲᩮᩈᩴ ᩈᨾᩦᨸᩮ ᩉᩥᨾᩅᨶ᩠ᨲᨸᨻ᩠ᨻᨲᩮ ᨾᩣᨲᨦ᩠ᨣᩉᨲ᩠ᨳᩥᨠᩩᩃᩮ ᩅᩣᩁᨱᩮᩣ ᨧᨱ᩠ᨯᩉᨲ᩠ᨳᩦ ᩋᩉᩮᩣᩈᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨾᨶᩩᩔᩣᨴᨿᩮᩣ ᩅᩣᩁᩮᨲᩦᨲᩥ ᩅᩣᩁᨱᩮᩣ, ᩋᨳ ᩅᩣ ᩅᩣᨧᩣᨿ ᩁᩅᨲᩥ ᨠᩮᩣᨬ᩠ᨧᨶᩣᨴᩴ ᨶᨴᨲᩦᨲᩥ ᩅᩣᩁᨱᩮᩣ. ᨾᩉᩮᩈᩦᨶᩴ ᨸᩈᩣᨴᩮᨶᩣᨲᩥ ᨸᨧ᩠ᨧᩮᨠᨻᩩᨴ᩠ᨵᨾᩉᩮᩈᩦᨶᩴ ᨸᩈᩣᨴᩮᨶ. ᨸᨧ᩠ᨧᩮᨠᨩᩥᨶᩈᩮᨭ᩠ᨮᩮᩈᩩ, ᨵᩩᨲᩁᩣᨣᩮᩈᩩ ᨲᩣᨴᩥᩈᩪᨲᩥ ᩃᩮᩣᨠᨵᨾ᩠ᨾᩮᩉᩥ ᨶᩥᨧ᩠ᨧᩃᩮᩈᩩ ᨸᨧ᩠ᨧᩮᨠᨻᩩᨴ᩠ᨵᩮᩈᩩ ᨸᨴ᩠ᨾᨠᩮᩈᩁᩴ ᨸᨴᩩᨾᩁᩮᨱᩩᩴ ᩒᨠᩥᩁᩥᩴ ᩋᩅᩈᩥᨬ᩠ᨧᩥᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

ᨴᩩᨲᩥᨿᨲᨲᩥᨿᩣᨸᨴᩣᨶᩣᨶᩥ ᩏᨲ᩠ᨲᩣᨶᩣᨶᩥ.

᪑᪓-᪑᪖. ᨧᨲᩩᨲ᩠ᨳᩣᨸᨴᩣᨶᩮ ᨾᩉᩣᨻᩮᩣᨵᩥᨾᩉᩮᩣ ᩋᩉᩪᨲᩥ ᩅᩥᨸᩔᩥᩔ ᨽᨣᩅᨲᩮᩣ ᨧᨲᩩᨾᨣ᩠ᨣᨬᩣᨱᩣᨵᩣᩁᨽᩣᩅᨲᩮᩣ ‘‘ᨻᩮᩣᨵᩦ’’ᨲᩥ ᩃᨴ᩠ᨵᨶᩣᨾᩔ ᩁᩩᨠ᩠ᨡᩔ ᨸᩪᨩᩣ ᩋᩉᩮᩣᩈᩦᨲᩥ ᩋᨲ᩠ᨳᩮᩣ. ᩁᩩᨠ᩠ᨡᨭ᩠ᨮᩔᩮᩅ ᩈᨾ᩠ᨻᩩᨴ᩠ᨵᩮᩣᨲᩥ ᩋᩔ ᨻᩮᩣᨵᩥᨸᩪᨩᩣᩈᨾᨿᩮ ᩈᨶ᩠ᨶᩥᨸᨲᩥᨲᩔ ᨾᩉᩣᨩᨶᩔ ᩈᨾ᩠ᨻᩩᨴ᩠ᨵᩮᩣ ᩃᩮᩣᨠᨩᩮᨭ᩠ᨮᩮᩣ ᨶᩁᩣᩈᨽᩮᩣ ᩁᩩᨠ᩠ᨡᨭ᩠ᨮᩮᩣ ᩍᩅ ᩁᩩᨠ᩠ᨡᩮ ᨮᩥᨲᩮᩣ ᩅᩥᨿ ᨸᨬ᩠ᨬᩣᨿᨲᩦᨲᩥ ᩋᨲ᩠ᨳᩮᩣ. ᨽᨣᩅᩣ ᨲᨾ᩠ᩉᩥ ᩈᨾᨿᩮᨲᩥ ᨲᩈ᩠ᨾᩥᩴ ᨻᩮᩣᨵᩥᨸᩪᨩᩣᨠᩁᨱᨠᩣᩃᩮ ᨽᨣᩅᩣ ᨽᩥᨠ᩠ᨡᩩᩈᨦ᩠ᨥᨸᩩᩁᨠ᩠ᨡᨲᩮᩣ ᨽᩥᨠ᩠ᨡᩩᩈᨦ᩠ᨥᩮᨶ ᨸᩁᩥᩅᩩᨲᩮᩣ. ᩅᩣᨧᩣᩈᨽᩥᨾᩩᨴᩦᩁᨿᨶ᩠ᨲᩥ ᨾᩩᨴᩩᩈᩥᩃᩥᨭ᩠ᨮᨾᨵᩩᩁᩏᨲ᩠ᨲᨾᨥᩮᩣᩈᩴ ᩏᨴᩦᩁᨿᩴ ᨠᨳᨿᨶ᩠ᨲᩮᩣ ᨶᩥᨧ᩠ᨨᩣᩁᩮᨶ᩠ᨲᩮᩣ ᨧᨲᩩᩈᨧ᩠ᨧᩴ ᨸᨠᩣᩈᩮᩈᩥ, ᨴᩮᩈᩮᩈᩦᨲᩥ ᩋᨲ᩠ᨳᩮᩣ. ᩈᩴᨡᩥᨲ᩠ᨲᩮᨶ ¶ ᨧ ᨴᩮᩈᩮᨶ᩠ᨲᩮᩣᨲᩥ ᩅᩮᨶᩮᨿ᩠ᨿᨸᩩᨣ᩠ᨣᩃᨩ᩠ᨫᩣᩈᨿᩣᨶᩩᩁᩪᨸᩮᨶ ᨴᩮᩈᩮᨶ᩠ᨲᩮᩣ ᩈᩴᨡᩥᨲ᩠ᨲᩮᨶ ᨧ ᩅᩥᨲ᩠ᨳᩣᩁᩮᨶ ᨧ ᨴᩮᩈᨿᩦᨲᩥ ᩋᨲ᩠ᨳᩮᩣ. ᩅᩥᩅᨭ᩠ᨭᨧ᩠ᨨᨴᩮᩣᨲᩥ ᩁᩣᨣᩮᩣ ¶ ᨨᨴᨶᩴ, ᨴᩮᩣᩈᩮᩣ ᨨᨴᨶᩴ, ᨾᩮᩣᩉᩮᩣ ᨨᨴᨶᩴ, ᩈᨻ᩠ᨻᨠᩥᩃᩮᩈᩣ ᨨᨴᨶᩣ’’ᨲᩥ ᩑᩅᩴ ᩅᩩᨲ᩠ᨲᩣ ᨨᨴᨶᩣ ᩅᩥᩅᨭᩣ ᩏᨣ᩠ᨥᩣᨭᩥᨲᩣ ᩅᩥᨴ᩠ᨵᩴᩈᩥᨲᩣ ᩋᨶᩮᨶᩣᨲᩥ ᩅᩥᩅᨭ᩠ᨭᨧ᩠ᨨᨴᩮᩣ, ᩈᨾ᩠ᨻᩩᨴ᩠ᨵᩮᩣ. ᨲᩴ ᨾᩉᩣᨩᨶᩴ ᨴᩮᩈᨶᩣᩅᩈᩮᨶ ᨶᩥᨻ᩠ᨻᩣᨸᩮᩈᩥ ᨸᩁᩥᩊᩣᩉᩴ ᩅᩪᨸᩈᨾᩮᩈᩦᨲᩥ ᩋᨲ᩠ᨳᩮᩣ. ᨲᩔᩣᩉᩴ ᨵᨾ᩠ᨾᩴ ᩈᩩᨲ᩠ᩅᩣᨶᩣᨲᩥ ᨲᩔ ᨽᨣᩅᨲᩮᩣ ᨴᩮᩈᩮᨶ᩠ᨲᩔ ᨵᨾ᩠ᨾᩴ ᩈᩩᨲ᩠ᩅᩣ.

᪒᪐. ᨸᨬ᩠ᨧᨾᩣᨸᨴᩣᨶᩮ ¶ ᨹᩃᩉᨲ᩠ᨳᩮᩣ ᩋᨸᩮᨠ᩠ᨡᩅᩣᨲᩥ ᩅᩥᨸᩔᩥᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨾᨵᩩᩁᩣᨶᩥ ᨹᩃᩣᨶᩥ ᨣᩉᩮᨲ᩠ᩅᩣ ᩋᨸᩮᨠ᩠ᨡᩅᩣ ᩋᨲᩩᩁᩥᨲᩮᩣ ᩈᨱᩥᨠᩴ ᩋᩔᨾᩴ ᨣᨬ᩠ᨨᩥᨶ᩠ᨲᩥ ᩋᨲ᩠ᨳᩮᩣ.

ᨨᨭ᩠ᨮᩈᨲ᩠ᨲᨾᩣᨸᨴᩣᨶᩣᨶᩥ ᩏᨲ᩠ᨲᩣᨶᩣᨶᩮᩅ.

᪔᪐. ᩋᨭ᩠ᨮᨾᩣᨸᨴᩣᨶᩮ ᨶᩥᨭ᩠ᨮᩥᨲᩮ ᨶᩅᨠᨾ᩠ᨾᩮ ᨧᩣᨲᩥ ᩈᩦᨾᩣᨿ ᨶᩅᨠᨾ᩠ᨾᩮ ᨶᩥᨭ᩠ᨮᩴ ᨣᨲᩮ ᩈᨲᩥ. ᩋᨶᩩᩃᩮᨸᨾᨴᩣᩈᩉᨶ᩠ᨲᩥ ᩋᨶᩩᨸᨧ᩠ᨨᩣ ᩈᩩᨵᩣᩃᩮᨸᩴ ᩋᨴᩣᩈᩥᩴ, ᩈᩩᨵᩣᨿ ᩃᩮᨸᩣᨸᩮᩈᩥᨶ᩠ᨲᩥ ᩋᨲ᩠ᨳᩮᩣ.

ᨶᩅᨾᨴᩈᨾᩣᨸᨴᩣᨶᩣᨶᩥ ᩏᨲ᩠ᨲᩣᨶᩣᨶᩥᨿᩮᩅᩣᨲᩥ.

ᩑᨠᨲᩥᩴᩈᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪓᪒. ᩌᩁᨠ᩠ᨡᨴᩣᨿᨠᩅᨣ᩠ᨣᩮᩣ

᪑-᪑᪐. ᩌᩁᨠ᩠ᨡᨴᩣᨿᨠᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

ᨻᩣᨲ᩠ᨲᩥᩴᩈᨲᩥᨾᩅᨣ᩠ᨣᩮ ¶ ᨸᨮᨾᨴᩩᨲᩥᨿᨲᨲᩥᨿᩣᨸᨴᩣᨶᩣᨶᩥ ᩈᩩᩅᩥᨬ᩠ᨬᩮᨿ᩠ᨿᩣᨶᩮᩅ.

᪑᪖. ᨧᨲᩩᨲ᩠ᨳᩣᨸᨴᩣᨶᩮ ᨩᩃᨩᨣ᩠ᨣᩮᩉᩥ ᩒᨠᩥᩁᩥᨶ᩠ᨲᩥ ᨩᩃᨩᩮᩉᩥ ᩏᨲ᩠ᨲᨾᩮᩉᩥ ᩏᨸ᩠ᨸᩃᨸᨴᩩᨾᩣᨴᩦᩉᩥ ᨸᩩᨸ᩠ᨹᩮᩉᩥ ᩒᨠᩥᩁᩥᩴ ᨸᩪᨩᩮᩈᩥᨶ᩠ᨲᩥ ᩋᨲ᩠ᨳᩮᩣ.

ᨸᨬ᩠ᨧᨾᩣᨸᨴᩣᨶᩴ ᩏᨲ᩠ᨲᩣᨶᨾᩮᩅ.

᪒᪖-᪒᪗. ᨨᨭ᩠ᨮᩣᨸᨴᩣᨶᩮ ᨧᩮᨲᩥᨿᩴ ᩏᨲ᩠ᨲᨾᩴ ᨶᩣᨾ, ᩈᩥᨡᩥᨶᩮᩣ ᩃᩮᩣᨠᨻᨶ᩠ᨵᩩᨶᩮᩣᨲᩥ ᩈᨠᩃᩃᩮᩣᨠᨲ᩠ᨲᨿᩔ ᨻᨶ᩠ᨵᩩᨶᩮᩣ ᨬᩣᨲᨠᩔ ᩈᩥᨡᩥᩔ ᨽᨣᩅᨲᩮᩣ ᩏᨲ᩠ᨲᨾᩴ ᨧᩮᨲᩥᨿᩴ. ᩍᩁᩦᨱᩮ ᨩᨶᩈᨬ᩠ᨧᩁᩅᩥᩁᩉᩥᨲᩮ ᩅᨶᩮ ᨾᨶᩩᩔᩣᨶᩴ ᨠᩮᩣᩃᩣᩉᩃᩅᩥᩁᩉᩥᨲᩮ ᨾᩉᩣᩋᩁᨬ᩠ᨬᩮ ᩋᩉᩮᩣᩈᩦᨲᩥ ᩈᨾ᩠ᨻᨶ᩠ᨵᩮᩣ. ᩋᨶ᩠ᨵᩣᩉᩥᨱ᩠ᨯᩣᨾᩉᩴ ᨲᨴᩣᨲᩥ ᨲᩈ᩠ᨾᩥᩴ ᨠᩣᩃᩮ ᩅᨶᩮ ᨾᨣ᩠ᨣᨾᩪᩊ᩠ᩉᨽᩣᩅᩮᨶ ᩋᨶ᩠ᨵᩮᩣ, ᨶ ᨧᨠ᩠ᨡᩩᨶᩣ ¶ ᩋᨶ᩠ᨵᩮᩣ, ᩋᩉᩴ ᩌᩉᩥᨱ᩠ᨯᩣᨾᩥ ᨾᨣ᩠ᨣᩴ ᨸᩁᩥᨿᩮᩈᩣᨾᩦᨲᩥ ᩋᨲ᩠ᨳᩮᩣ. ᨸᩅᨶᩣ ᨶᩥᨠ᩠ᨡᨾᨶ᩠ᨲᩮᨶᩣᨲᩥ ᨾᩉᩣᩅᨶᨲᩮᩣ ᨶᩥᨠ᩠ᨡᨾᨶ᩠ᨲᩮᨶ ᨾᨿᩣ ᩈᩦᩉᩣᩈᨶᩴ ᩏᨲ᩠ᨲᨾᩣᩈᨶᩴ, ᩈᩦᩉᩔ ᩅᩣ ᨽᨣᩅᨲᩮᩣ ᩌᩈᨶᩴ ᨴᩥᨭ᩠ᨮᨶ᩠ᨲᩥ ᩋᨲ᩠ᨳᩮᩣ. ᩑᨠᩴᩈᩴ ᩋᨬ᩠ᨩᩃᩥᩴ ᨠᨲ᩠ᩅᩣᨲᩥ ᩑᨠᩴᩈᩴ ᩏᨲ᩠ᨲᩁᩣᩈᨦ᩠ᨣᩴ ᨠᨲ᩠ᩅᩣ ᩈᩥᩁᩈᩥ ᩋᨬ᩠ᨩᩃᩥᩴ ᨮᨸᩮᨲ᩠ᩅᩣᨲᩥ ᩋᨲ᩠ᨳᩮᩣ. ᩈᨶ᩠ᨳᩅᩥᩴ ᩃᩮᩣᨠᨶᩣᨿᨠᨶ᩠ᨲᩥ ᩈᨠᩃᩃᩮᩣᨠᨲ᩠ᨲᨿᨶᨿᩴ ᨲᩴ ᨶᩥᨻ᩠ᨻᩣᨶᩴ ᨸᩣᨸᩮᨶ᩠ᨲᩴ ᨳᩮᩣᨾᩥᨲᩴ ᨳᩩᨲᩥᩴ ᩋᨠᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪓᪔. ᩈᨲ᩠ᨲᨾᩣᨸᨴᩣᨶᩮ ¶ ᩈᩩᨴᩔᨶᩮᩣ ᨾᩉᩣᩅᩦᩁᩮᩣᨲᩥ ᩈᩩᨶ᩠ᨴᩁᨴᩔᨶᩮᩣ ᨴ᩠ᩅᨲ᩠ᨲᩥᩴᩈᨾᩉᩣᨸᩩᩁᩥᩈᩃᨠ᩠ᨡᨱᩈᨾ᩠ᨸᨶ᩠ᨶᩈᩁᩦᩁᨲ᩠ᨲᩣ ᨾᨶᩮᩣᩉᩁᨴᩔᨶᩮᩣ ᨾᩉᩣᩅᩦᩁᩥᨿᩮᩣ ᩈᩥᨴ᩠ᨵᨲ᩠ᨳᩮᩣ ᨽᨣᩅᩣᨲᩥ ᩈᨾ᩠ᨻᨶ᩠ᨵᩮᩣ. ᩅᩈᨲᩥᨥᩁᨾᩩᨲ᩠ᨲᨾᩮᨲᩥ ᩏᨲ᩠ᨲᨾᩮ ᩅᩥᩉᩣᩁᩮ ᩅᩈᨲᩦᨲᩥ ᩋᨲ᩠ᨳᩮᩣ.

ᩋᨭ᩠ᨮᨾᨶᩅᨾᨴᩈᨾᩣᨸᨴᩣᨶᩣᨶᩥ ᩏᨲ᩠ᨲᩣᨶᩣᨶᩮᩅᩣᨲᩥ.

ᨻᩣᨲ᩠ᨲᩥᩴᩈᨲᩥᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪓᪓. ᩏᨾᩣᨸᩩᨸ᩠ᨹᩥᨿᩅᨣ᩠ᨣᩮᩣ

᪑-᪑᪐. ᩏᨾᩣᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

ᨲᩮᨲ᩠ᨲᩥᩴᩈᨲᩥᨾᩮ ¶ ᩅᨣ᩠ᨣᩮ ᨸᨮᨾᨴᩩᨲᩥᨿᨲᨲᩥᨿᨧᨲᩩᨲ᩠ᨳᨸᨬ᩠ᨧᨾᨨᨭ᩠ᨮᩣᨸᨴᩣᨶᩣᨶᩥ ᩏᨲ᩠ᨲᩣᨶᩣᨶᩥᨿᩮᩅ.

᪕᪕. ᩈᨲ᩠ᨲᨾᩣᨸᨴᩣᨶᩮ ᩈᨾᨿᩴ ᩋᨣᨾᩣᩈᩉᨶ᩠ᨲᩥ ᩈᨾᩪᩉᩴ ᩈᨾᩣᨣᨾᨭ᩠ᨮᩣᨶᩴ ᩋᩉᩴ ᩋᨣᨾᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪖᪒. ᩋᨻ᩠ᨻᩩᨴᨶᩥᩁᨻ᩠ᨻᩩᨴᩣᨶᩦᨲᩥ ‘‘ᨸᨠᩮᩣᨭᩥᩈᨲᩈᩉᩔᩣᨶᩴ ᩈᨲᩴ ᩋᨻ᩠ᨻᩩᨴᩴ, ᩋᨻ᩠ᨻᩩᨴᩈᨲᩈᩉᩔᩣᨶᩴ ᩈᨲᩴ ᨶᩥᩁᨻ᩠ᨻᩩᨴ’’ᨶ᩠ᨲᩥ ᩅᩩᨲ᩠ᨲᨲ᩠ᨲᩣ ᩌᨿᩩᨶᩣ ᩋᨻ᩠ᨻᩩᨴᨶᩥᩁᨻ᩠ᨻᩩᨴᩣᨶᩥ ᨣᨲᨾᩉᩣᩌᨿᩩᩅᨶ᩠ᨲᩣ ᨾᨶᩩᨩᩣᨵᩥᨸᩣ ᨧᨠ᩠ᨠᩅᨲ᩠ᨲᩥᨶᩮᩣ ᨡᨲ᩠ᨲᩥᨿᩣ ᩋᨭ᩠ᨮ ᩋᨭ᩠ᨮ ᩉᩩᨲ᩠ᩅᩣ ᨠᨸ᩠ᨸᩣᨶᩴ ᨸᨬ᩠ᨧᩅᩦᩈᩈᩉᩔᨾ᩠ᩉᩥ ᩌᩈᩥᩴᩈᩩ ᩋᩉᩮᩈᩩᨶ᩠ᨲᩥ ᩋᨲ᩠ᨳᩮᩣ. ᩋᨭ᩠ᨮᨾᨶᩅᨾᨴᩈᨾᩣᨸᨴᩣᨶᩣᨶᩥ ᨸᩣᨠᨭᩣᨶᩮᩅᩣᨲᩥ.

ᨲᩮᨲ᩠ᨲᩥᩴᩈᨲᩥᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪓᪔-᪓᪘. ᨣᨶ᩠ᨵᩮᩣᨴᨠᩣᨴᩥᩅᨣ᩠ᨣᩮᩣ

᪑-᪕᪐. ᨣᨶ᩠ᨵᨵᩪᨸᩥᨿᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

ᨧᨲᩩᨲᩥᩴᩈᨲᩥᨾᩅᨣ᩠ᨣᨸᨬ᩠ᨧᨲᩥᩴᩈᨲᩥᨾᩅᨣ᩠ᨣᨨᨲ᩠ᨲᩥᩴᩈᨲᩥᨾᩅᨣ᩠ᨣᩈᨲ᩠ᨲᨲᩥᩴᩈᨲᩥᨾᩅᨣ᩠ᨣᩋᨭ᩠ᨮᨲᩥᩴᩈᨲᩥᨾᩅᨣ᩠ᨣᩣ ¶ ¶ ᩏᨲ᩠ᨲᩣᨶᨲ᩠ᨳᩣᨿᩮᩅ.

ᩑᨠᩪᨶᨧᨲ᩠ᨲᩣᩃᩦᩈᨾᩅᨣ᩠ᨣᩮᨸᩥ ᨸᨮᨾᩣᨸᨴᩣᨶᩣᨴᩦᨶᩥ ᩋᨭ᩠ᨮᨾᩣᨸᨴᩣᨶᨶ᩠ᨲᩣᨶᩥ ᩏᨲ᩠ᨲᩣᨶᩣᨶᩮᩅᩣᨲᩥ.

᪓᪙. ᩋᩅᨭᨹᩃᩅᨣ᩠ᨣᩮᩣ

᪙. ᩈᩮᩣᨱᨠᩮᩣᨭᩥᩅᩦᩈᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨶᩅᨾᩣᨸᨴᩣᨶᩮ ¶ ᨸᨶ ᩅᩥᨸᩔᩥᨶᩮᩣ ᨸᩣᩅᨧᨶᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩈᩮᩣᨱᩔ ᨠᩮᩣᨭᩥᩅᩦᩈᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨳᩮᩁᩮᩣ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᨠᩣᩃᩮ ᨾᩉᩣᩅᩥᨽᩅᩮ ᩈᩮᨭ᩠ᨮᩥᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩈᩮᨭ᩠ᨮᩥ ᩉᩩᨲ᩠ᩅᩣ ᩏᨸᩣᩈᨠᩮᩉᩥ ᩈᨴ᩠ᨵᩥᩴ ᩅᩥᩉᩣᩁᩴ ᨣᨶ᩠ᨲ᩠ᩅᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ¶ ᨽᨣᩅᨲᩮᩣ ᨧᨦ᩠ᨠᨾᨶᨭ᩠ᨮᩣᨶᩮ ᩈᩩᨵᩣᨿ ᨸᩁᩥᨠᨾ᩠ᨾᩴ ᨠᩣᩁᩮᨲ᩠ᩅᩣ ᩑᨠᨬ᩠ᨧ ᩃᩮᨱᩴ ᨠᩣᩁᩮᨲ᩠ᩅᩣ ᨶᩣᨶᩣᩅᩥᩁᩣᨣᩅᨲ᩠ᨳᩮᩉᩥ ᩃᩮᨱᨽᩪᨾᩥᨿᩣ ᩈᨶ᩠ᨳᩁᩥᨲ᩠ᩅᩣ ᩏᨸᩁᩥ ᩅᩥᨲᩣᨶᨬ᩠ᨧ ᨠᨲ᩠ᩅᩣ ᨧᩣᨲᩩᨴ᩠ᨴᩥᩈᩔ ᩈᨦ᩠ᨥᩔ ᨶᩥᨿ᩠ᨿᩣᨴᩮᨲ᩠ᩅᩣ ᩈᨲ᩠ᨲᩣᩉᩴ ᨾᩉᩣᨴᩣᨶᩴ ᨴᨲ᩠ᩅᩣ ᨸᨱᩥᨵᩣᨶᩴ ᩋᨠᩣᩈᩥ. ᩈᨲ᩠ᨳᩣ ᩋᨶᩩᨾᩮᩣᨴᨶᩴ ᩋᨠᩣᩈᩥ. ᩈᩮᩣ ᨲᩮᨶ ᨠᩩᩈᩃᨠᨾ᩠ᨾᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨠᨸ᩠ᨸᩮ ᨸᩁᩥᨶᩥᨻ᩠ᨻᩩᨲᩮ ᨠᩔᨸᨴᩈᨻᩃᩮ ᩋᨶᩩᨸ᩠ᨸᨶ᩠ᨶᩮ ᩋᨾ᩠ᩉᩣᨠᩴ ᨽᨣᩅᨲᩥ ᨻᩣᩁᩣᨱᩈᩥᨿᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨣᨦ᩠ᨣᩣᨲᩦᩁᩮ ᨸᨱ᩠ᨱᩈᩣᩃᩴ ᨠᩁᩥᨲ᩠ᩅᩣ ᩅᩈᨶ᩠ᨲᩴ ᩑᨠᩴ ᨸᨧ᩠ᨧᩮᨠᨻᩩᨴ᩠ᨵᩴ ᨲᩮᨾᩣᩈᩴ ᨧᨲᩪᩉᩥ ᨸᨧ᩠ᨧᨿᩮᩉᩥ ᩈᨠ᩠ᨠᨧ᩠ᨧᩴ ᩏᨸᨭ᩠ᨮᩉᩥ. ᨸᨧ᩠ᨧᩮᨠᨻᩩᨴ᩠ᨵᩮᩣ ᩅᩩᨭ᩠ᨮᩅᩔᩮᩣ ᨸᩁᩥᨸᩩᨱ᩠ᨱᨸᩁᩥᨠ᩠ᨡᩣᩁᩮᩣ ᨣᨶ᩠ᨵᨾᩣᨴᨶᨾᩮᩅ ᩋᨣᨾᩣᩈᩥ. ᩈᩮᩣᨸᩥ ᨠᩩᩃᨸᩩᨲ᩠ᨲᩮᩣ ᨿᩣᩅᨩᩦᩅᩴ ᨲᨲ᩠ᨳ ᨸᩩᨬ᩠ᨬᩣᨶᩥ ᨠᨲ᩠ᩅᩣ ᨲᨲᩮᩣ ᨧᩅᩥᨲ᩠ᩅᩣ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩋᨾ᩠ᩉᩣᨠᩴ ᨽᨣᩅᨲᩮᩣ ᨠᩣᩃᩮ ᨧᨾ᩠ᨸᩣᨶᨣᩁᩮ ᩋᨣ᩠ᨣᩈᩮᨭ᩠ᨮᩥᩔ ᨣᩮᩉᩮ ᨸᨭᩥᩈᨶ᩠ᨵᩥᩴ ᨣᨱ᩠ᩉᩥ. ᨲᩔ ᨸᨭᩥᩈᨶ᩠ᨵᩥᨣ᩠ᨣᩉᨱᨠᩣᩃᨲᩮᩣ ᨸᨭ᩠ᨮᩣᨿ ᩈᩮᨭ᩠ᨮᩥᩔ ᨾᩉᩣᨽᩮᩣᨣᨠ᩠ᨡᨶ᩠ᨵᩮᩣ ᩋᨽᩥᩅᨯ᩠ᨰᩥ. ᨲᩔ ᨾᩣᨲᩩᨠᩩᨧ᩠ᨨᩥᨲᩮᩣ ᨶᩥᨠ᩠ᨡᨾᨶᨴᩥᩅᩈᩮ ᩈᨠᩃᨶᨣᩁᩮ ᨾᩉᩣᩃᩣᨽᩈᨠ᩠ᨠᩣᩁᩈᨾ᩠ᨾᩣᨶᩮᩣ ᩋᩉᩮᩣᩈᩥ, ᨲᩔ ᨸᩩᨻ᩠ᨻᩮ ᨸᨧ᩠ᨧᩮᨠᨻᩩᨴ᩠ᨵᩔ ᩈᨲᩈᩉᩔᨣ᩠ᨥᨶᩥᨠᩁᨲ᩠ᨲᨠᨾ᩠ᨻᩃᨸᩁᩥᨧ᩠ᨧᩣᨣᩮᨶ ᩈᩩᩅᨱ᩠ᨱᩅᨱ᩠ᨱᩮᩣ ᩈᩩᨡᩩᨾᩣᩃᨲᩁᩮᩣ ᨧ ᩋᨲ᩠ᨲᨽᩣᩅᩮᩣ ᩋᩉᩮᩣᩈᩥ, ᨲᩮᨶᩔ ᩈᩮᩣᨱᩮᩣᨲᩥ ᨶᩣᨾᩴ ᩋᨠᩴᩈᩩ. ᩈᩮᩣ ¶ ᨾᩉᨲᩣ ᨸᩁᩥᩅᩣᩁᩮᨶ ᩋᨽᩥᩅᨯ᩠ᨰᩥ. ᨲᩔ ᩉᨲ᩠ᨳᨸᩣᨴᨲᩃᩣᨶᩥ ᨻᨶ᩠ᨵᩩᨩᩦᩅᨠᨸᩩᨸ᩠ᨹᩅᨱ᩠ᨱᩣᨶᩥ ᩋᩉᩮᩈᩩᩴ, ᨲᩮᩈᩴ ᩈᨲᩅᩣᩁᩴ ᩅᩥᩉᨲᨠᨸ᩠ᨸᩣᩈᩴ ᩅᩥᨿ ᨾᩩᨴᩩᩈᨾ᩠ᨹᩔᩮᩣ ᩋᩉᩮᩣᩈᩥ. ᨸᩣᨴᨲᩃᩮᩈᩩ ᨾᨱᩥᨠᩩᨱ᩠ᨯᩃᩣᩅᨭ᩠ᨭᩅᨱ᩠ᨱᩃᩮᩣᨾᩣᨶᩥ ᨩᩣᨿᩥᩴᩈᩩ. ᩅᨿᨸ᩠ᨸᨲ᩠ᨲᩔ ᨲᩔ ᨲᩥᨱ᩠ᨱᩴ ᩏᨲᩪᨶᩴ ᩋᨶᩩᨧ᩠ᨨᩅᩥᨠᩮ ᨲᨿᩮᩣ ᨸᩣᩈᩣᨴᩮ ᨠᩣᩁᩣᨸᩮᨲ᩠ᩅᩣ ᨶᩣᨭᨠᩥᨲ᩠ᨳᩥᨿᩮᩣ ᩏᨸᨭ᩠ᨮᩣᨸᩮᩈᩩᩴ. ᩈᩮᩣ ᨲᨲ᩠ᨳ ᨾᩉᨲᩥᩴ ᩈᨾ᩠ᨸᨲ᩠ᨲᩥᩴ ᩋᨶᩩᨽᩅᨶ᩠ᨲᩮᩣ ᨴᩮᩅᨠᩩᨾᩣᩁᩮᩣ ᩅᩥᨿ ᨸᨭᩥᩅᩈᨲᩥ.

ᩋᨳ ᩋᨾ᩠ᩉᩣᨠᩴ ᨽᨣᩅᨲᩥ ᩈᨻ᩠ᨻᨬ᩠ᨬᩩᨲᩴ ᨸᨲ᩠ᩅᩣ ᨸᩅᨲ᩠ᨲᩥᨲᩅᩁᨵᨾ᩠ᨾᨧᨠ᩠ᨠᩮ ᩁᩣᨩᨣᩉᩴ ᩏᨸᨶᩥᩔᩣᨿ ᩅᩥᩉᩁᨶ᩠ᨲᩮ ᨻᩥᨾ᩠ᨻᩥᩈᩣᩁᩁᨬ᩠ᨬᩣ ᨸᨠ᩠ᨠᩮᩣᩈᩣᨸᩥᨲᩮᩣ ᨲᩮᩉᩥ ᩋᩈᩦᨲᩥᨿᩣ ᨣᩣᨾᩥᨠᩈᩉᩔᩮᩉᩥ ᩈᨴ᩠ᨵᩥᩴ ᩁᩣᨩᨣᩉᩴ ᩌᨣᨲᩮᩣ ᩈᨲ᩠ᨳᩩ ¶ ᩈᨶ᩠ᨲᩥᨠᩴ ᨣᨶ᩠ᨲ᩠ᩅᩣ ᨵᨾ᩠ᨾᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨾᩣᨲᩣᨸᩥᨲᩁᩮᩣ ᩋᨶᩩᨩᩣᨶᩣᨸᩮᨲ᩠ᩅᩣ ᨽᨣᩅᨲᩮᩣ ᩈᨶ᩠ᨲᩥᨠᩮ ᨸᨻ᩠ᨻᨩᩥᨲ᩠ᩅᩣ ᩃᨴ᩠ᨵᩪᨸᩈᨾ᩠ᨸᨴᩮᩣ ᩈᨲ᩠ᨳᩩ ᩈᨶ᩠ᨲᩥᨠᩮ ᨠᨾ᩠ᨾᨭ᩠ᨮᩣᨶᩴ ᨣᩉᩮᨲ᩠ᩅᩣ ᨩᨶᩈᩴᩈᨣ᩠ᨣᨸᩁᩥᩉᩁᨱᨲ᩠ᨳᩴ ¶ ᩈᩦᨲᩅᨶᩮ ᩅᩥᩉᩣᩈᩥ. ᩈᩮᩣ ᨲᨲ᩠ᨳ ᩅᩈᨶ᩠ᨲᩮᩣ ‘‘ᨾᨾ ᩈᩁᩦᩁᩴ ᩈᩩᨡᩩᨾᩣᩃᩴ, ᨶ ᨧ ᩈᨠ᩠ᨠᩣ ᩈᩩᨡᩮᨶᩮᩅ ᩈᩩᨡᩴ ᩋᨵᩥᨣᨶ᩠ᨲᩩᩴ, ᨠᩣᨿᩴ ᨠᩥᩃᨾᩮᨲ᩠ᩅᩣᨸᩥ ᩈᨾᨱᨵᨾ᩠ᨾᩴ ᨠᩣᨲᩩᩴ ᩅᨭ᩠ᨭᨲᩦ’’ᨲᩥ ᨧᩥᨶ᩠ᨲᩮᨲ᩠ᩅᩣ ᨮᩣᨶᨧᨦ᩠ᨠᨾᨾᩮᩅ ᩋᨵᩥᨭ᩠ᨮᩣᨿ ᨸᨵᩣᨶᨾᨶᩩᨿᩩᨬ᩠ᨩᨶ᩠ᨲᩮᩣ ᨸᩣᨴᨲᩃᩮᩈᩩ ᨹᩮᩣᨭᩮᩈᩩ ᩏᨭ᩠ᨮᩥᨲᩮᩈᩩᨸᩥ ᩅᩮᨴᨶᩴ ᩋᨩ᩠ᨫᩩᨸᩮᨠ᩠ᨡᩥᨲ᩠ᩅᩣ ᨴᩊ᩠ᩉᩴ ᩅᩦᩁᩥᨿᩴ ᨠᩁᩮᩣᨶ᩠ᨲᩮᩣ ᩋᨧ᩠ᨧᩣᩁᨴ᩠ᨵᩅᩦᩁᩥᨿᨲᩣᨿ ᩅᩥᩈᩮᩈᩴ ᨶᩥᨻ᩠ᨻᨲ᩠ᨲᩮᨲᩩᩴ ᩋᩈᨠ᩠ᨠᩮᩣᨶ᩠ᨲᩮᩣ ‘‘ᩑᩅᩴ ᩋᩉᩴ ᩅᩣᨿᨾᨶ᩠ᨲᩮᩣᨸᩥ ᨾᨣ᩠ᨣᨹᩃᩣᨶᩥ ᨶᩥᨻ᩠ᨻᨲ᩠ᨲᩮᨲᩩᩴ ᨶ ᩈᨠ᩠ᨠᩮᩣᨾᩥ, ᨠᩥᩴ ᨾᩮ ᨸᨻ᩠ᨻᨩ᩠ᨩᩣᨿ, ᩉᩦᨶᩣᨿᩣᩅᨲ᩠ᨲᩥᨲ᩠ᩅᩣ ᨽᩮᩣᨣᩮ ᨧ ᨽᩩᨬ᩠ᨩᩣᨾᩥ, ᨸᩩᨬ᩠ᨬᩣᨶᩥ ᨧ ᨠᩁᩥᩔᩣᨾᩦ’’ᨲᩥ ᨧᩥᨶ᩠ᨲᩮᩈᩥ. ᩋᨳ ᩈᨲ᩠ᨳᩣ ᨲᩔ ᨧᩥᨲ᩠ᨲᩣᨧᩣᩁᩴ ᨬᨲ᩠ᩅᩣ ᨲᨲ᩠ᨳ ᨣᨶ᩠ᨲ᩠ᩅᩣ ᩅᩦᨱᩮᩣᨸᨾᩮᩣᩅᩣᨴᩮᨶ (ᨾᩉᩣᩅ. ᪒᪔᪓) ᩒᩅᨴᩥᨲ᩠ᩅᩣ ᩅᩦᩁᩥᨿᩈᨾᨲᩣᨿᩮᩣᨩᨶᩅᩥᨵᩥᩴ ᨴᩔᩮᨶ᩠ᨲᩮᩣ ᨠᨾ᩠ᨾᨭ᩠ᨮᩣᨶᩴ ᩈᩮᩣᨵᩮᨲ᩠ᩅᩣ ᨣᩥᨩ᩠ᨫᨠᩪᨭᩴ ᨣᨲᩮᩣ. ᩈᩮᩣᨱᩮᩣᨸᩥ ᨡᩮᩣ ᩈᨲ᩠ᨳᩩ ᩈᨶ᩠ᨲᩥᨠᩣ ᩒᩅᩣᨴᩴ ᩃᨽᩥᨲ᩠ᩅᩣ ᩅᩦᩁᩥᨿᩈᨾᨲᩴ ᨿᩮᩣᨩᩮᨲ᩠ᩅᩣ ᩅᩥᨸᩔᨶᩴ ᩏᩔᩩᨠ᩠ᨠᩣᨸᩮᨲ᩠ᩅᩣ ᩋᩁᩉᨲ᩠ᨲᩮ ᨸᨲᩥᨭ᩠ᨮᩣᩈᩥ.

᪔᪙. ᩈᩮᩣ ᩋᩁᩉᩣ ᩉᩩᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩅᩥᨸᩔᩥᨶᩮᩣ ᨸᩣᩅᨧᨶᩮᨲᩥᩌᨴᩥᨾᩣᩉ. ᨲᨲ᩠ᨳ ᩅᩥᨸᩔᩦᨲᩥ ᩅᩥᩈᩮᩈᩮᨶ, ᩅᩥᩅᩥᨵᩴ ᩅᩣ ᨸᩔᨲᩦᨲᩥ ᩅᩥᨸᩔᩦ. ᨸᩣᩅᨧᨶᩮᨲᩥ ᨸᨠᩣᩁᩮᨶ ᩅᩩᨧ᩠ᨧᨲᩦᨲᩥ ᨸᩣᩅᨧᨶᩴ, ᨸᩥᨭᨠᨲ᩠ᨲᨿᩴ. ᨲᩔ ᩅᩥᨸᩔᩥᨶᩮᩣ ᨲᩈ᩠ᨾᩥᩴ ᨸᩣᩅᨧᨶᩮᨲᩥ ᩋᨲ᩠ᨳᩮᩣ. ᩃᩮᨱᨶ᩠ᨲᩥ ᩃᩥᨶᨶ᩠ᨲᩮ ᨶᩥᩃᩦᨿᨶ᩠ᨲᩮ ᩑᨲ᩠ᨳᩣᨲᩥ ᩃᩮᨱᩴ ᩅᩥᩉᩣᩁᩴ. ᨻᨶ᩠ᨵᩩᨾᩣᩁᩣᨩᨵᩣᨶᩥᨿᩣᨲᩥ ᨻᨶ᩠ᨵᨶ᩠ᨲᩥ ᨠᩩᩃᨸᩁᨾ᩠ᨸᩁᩣᨿ ᩅᩈᩮᨶ ᩋᨬ᩠ᨬᨾᨬ᩠ᨬᩴ ᩈᨾ᩠ᨻᨩ᩠ᨫᨶ᩠ᨲᩦᨲᩥ ᨻᨶ᩠ᨵᩪ, ᨬᩣᨲᨠᩣ. ᨲᩮ ᩑᨲ᩠ᨳ ᨸᨭᩥᩅᩈᨶ᩠ᨲᩦᨲᩥ ᨻᨶ᩠ᨵᩩᨾᩣ, ᨻᨶ᩠ᨵᩩ ᩋᩔ ᩋᨲ᩠ᨳᩦᨲᩥ ¶ ᩅᩣ ᨻᨶ᩠ᨵᩩᨾᩣ. ᩁᩣᨩᩪᨶᩴ ᩅᩈᨶᨭ᩠ᨮᩣᨶᨶ᩠ᨲᩥ ᩁᩣᨩᨵᩣᨶᩦ, ᨻᨶ᩠ᨵᩩᨾᩣ ᨧ ᩈᩣ ᩁᩣᨩᨵᩣᨶᩦ ᨧᩮᨲᩥ ᨻᨶ᩠ᨵᩩᨾᩣᩁᩣᨩᨵᩣᨶᩦ, ᨲᩔᩣ ᨻᨶ᩠ᨵᩩᨾᩣᩁᩣᨩᨵᩣᨶᩥᨿᩣ, ᩃᩮᨱᩴ ᨾᨿᩣ ᨠᨲᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᩈᩮᩈᨾᩮᨲ᩠ᨳ ᩏᨲ᩠ᨲᩣᨶᨲ᩠ᨳᨾᩮᩅᩣᨲᩥ.

ᩈᩮᩣᨱᨠᩮᩣᨭᩥᩅᩦᩈᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪑᪐. ᨸᩩᨻ᩠ᨻᨠᨾ᩠ᨾᨸᩥᩃᩮᩣᨲᩥᨠᨻᩩᨴ᩠ᨵᩋᨸᨴᩣᨶᩅᨱ᩠ᨱᨶᩣ

᪖᪔. ᨴᩈᨾᩣᨸᨴᩣᨶᩮ ᩋᨶᩮᩣᨲᨲ᩠ᨲᩈᩁᩣᩈᨶ᩠ᨶᩮᨲᩥ ᨸᨻ᩠ᨻᨲᨠᩪᨭᩮᩉᩥ ᨸᨭᩥᨧ᩠ᨨᨶ᩠ᨶᨲ᩠ᨲᩣ ᨧᨶ᩠ᨴᩥᨾᩈᩪᩁᩥᨿᩣᨶᩴ ᩈᨶ᩠ᨲᩣᨸᩮᩉᩥ ᩒᨲᨲ᩠ᨲᩴ ᩏᨱ᩠ᩉᩴ ᩏᨴᨠᩴ ᩑᨲ᩠ᨳ ᨶᨲ᩠ᨳᩦᨲᩥ ᩋᨶᩮᩣᨲᨲ᩠ᨲᩮᩣ. ᩈᩁᨶ᩠ᨲᩥ ᨣᨧ᩠ᨨᨶ᩠ᨲᩥ ᨸᨽᩅᨶ᩠ᨲᩥ ᩈᨶ᩠ᨴᨶ᩠ᨲᩥ ᩑᨲᩈ᩠ᨾᩣ ᨾᩉᩣᨶᨴᩥᨿᩮᩣᨲᩥ ᩈᩁᩮᩣ. ᩈᩦᩉᨾᩩᨡᩣᨴᩦᩉᩥ ᨶᩥᨠ᩠ᨡᨶ᩠ᨲᩣ ᨾᩉᩣᨶᨴᩥᨿᩮᩣ ᨲᩥᨠ᩠ᨡᨲ᩠ᨲᩩᩴ ᨲᩥᨠ᩠ᨡᨲ᩠ᨲᩩᩴ ᨸᨴᨠ᩠ᨡᩥᨱᩴ ᨠᨲ᩠ᩅᩣ ᨶᩥᨠ᩠ᨡᨶ᩠ᨲᨶᩥᨠ᩠ᨡᨶ᩠ᨲᨴᩥᩈᩣᨽᩣᨣᩮᨶ ᩈᩁᨶ᩠ᨲᩥ ᨣᨧ᩠ᨨᨶ᩠ᨲᩦᨲᩥ ᩋᨲ᩠ᨳᩮᩣ. ᩋᨶᩮᩣᨲᨲ᩠ᨲᩮᩣ ᨧ ᩈᩮᩣ ᩈᩁᩮᩣ ¶ ᨧᩣᨲᩥ ᩋᨶᩮᩣᨲᨲ᩠ᨲᩈᩁᩮᩣ ¶ . ᨲᩔ ᩌᩈᨶ᩠ᨶᩴ ᩈᨾᩦᨸᨭ᩠ᨮᩣᨶᨶ᩠ᨲᩥ ᩋᨶᩮᩣᨲᨲ᩠ᨲᩈᩁᩣᩈᨶ᩠ᨶᩴ, ᨲᩈ᩠ᨾᩥᩴ ᩋᨶᩮᩣᨲᨲ᩠ᨲᩈᩁᩣᩈᨶ᩠ᨶᩮ, ᩈᨾᩦᨸᩮᨲᩥ ᩋᨲ᩠ᨳᩮᩣ. ᩁᨾᨱᩦᨿᩮᨲᩥ ᨴᩮᩅᨴᩣᨶᩅᨣᨶ᩠ᨵᨻ᩠ᨻᨠᩥᨶ᩠ᨶᩁᩮᩣᩁᨣᨻᩩᨴ᩠ᨵᨸᨧ᩠ᨧᩮᨠᨻᩩᨴ᩠ᨵᩣᨴᩦᩉᩥ ᩁᨾᩥᨲᨻ᩠ᨻᩴ ᩋᩃ᩠ᩃᩦᨿᩥᨲᨻ᩠ᨻᨶ᩠ᨲᩥ ᩁᨾᨱᩦᨿᩴ, ᨲᩈ᩠ᨾᩥᩴ ᩁᨾᨱᩦᨿᩮ. ᩈᩥᩃᩣᨲᩃᩮᨲᩥ ᩑᨠᨣ᩠ᨥᨶᨸᨻ᩠ᨻᨲᩈᩥᩃᩣᨲᩃᩮᨲᩥ ᩋᨲ᩠ᨳᩮᩣ. ᨶᩣᨶᩣᩁᨲᨶᨸᨩ᩠ᨩᩮᩣᨲᩮᨲᩥ ᨸᨴᩩᨾᩁᩣᨣᩅᩮᩊᩩᩁᩥᨿᩣᨴᩥᨶᩣᨶᩣᩋᨶᩮᨠᩮᩉᩥ ᩁᨲᨶᩮᩉᩥ ᨸᨩ᩠ᨩᩮᩣᨲᩮ ᨸᨠᩣᩁᩮᨶ ᨩᩮᩣᨲᨾᩣᨶᩮ. ᨶᩣᨶᩣᨣᨶ᩠ᨵᩅᨶᨶ᩠ᨲᩁᩮᨲᩥ ᨶᩣᨶᨸ᩠ᨸᨠᩣᩁᩮᩉᩥ ᨧᨶ᩠ᨴᨶᩣᨣᩁᩩᨠᨸ᩠ᨸᩪᩁᨲᨾᩣᩃᨲᩥᩃᨠᩣᩈᩮᩣᨠᨶᩣᨣᨸᩩᨶ᩠ᨶᩣᨣᨠᩮᨲᨠᩣᨴᩦᩉᩥ ᩋᨶᩮᨠᩮᩉᩥ ᩈᩩᨣᨶ᩠ᨵᨸᩩᨸ᩠ᨹᩮᩉᩥ ᨣᩉᨶᩦᨽᩪᨲᩅᨶᨶ᩠ᨲᩁᩮ ᩈᩥᩃᩣᨲᩃᩮᨲᩥ ᩈᨾ᩠ᨻᨶ᩠ᨵᩮᩣ.

᪖᪕. ᨣᩩᨱᨾᩉᨶ᩠ᨲᨲᩣᨿ ᩈᨦ᩠ᨡ᩠ᨿᩣᨾᩉᨶ᩠ᨲᨲᩣᨿ ᨧ ᨾᩉᨲᩣ ᨽᩥᨠ᩠ᨡᩩᩈᨦ᩠ᨥᩮᨶ, ᨸᩁᩮᨲᩮᩣ ᨸᩁᩥᩅᩩᨲᩮᩣ ᩃᩮᩣᨠᨶᩣᨿᨠᩮᩣ ᩃᩮᩣᨠᨲ᩠ᨲᨿᩈᩣᨾᩥᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ ᨲᨲ᩠ᨳ ᩈᩥᩃᩣᩈᨶᩮ ᨶᩥᩈᩥᨶ᩠ᨶᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᩣᨶᩥ ᨠᨾ᩠ᨾᩣᨶᩥ ᨻ᩠ᨿᩣᨠᩁᩦ ᩅᩥᩈᩮᩈᩮᨶ ᨸᩣᨠᨭᨾᨠᩣᩈᩦᨲᩥ ᩋᨲ᩠ᨳᩮᩣ. ᩈᩮᩈᨾᩮᨲ᩠ᨳ ᩉᩮᨭ᩠ᨮᩣ ᨻᩩᨴ᩠ᨵᩣᨸᨴᩣᨶᩮ (ᩋᨸ. ᨳᩮᩁ ᪑.᪑.᪑ ᩌᨴᨿᩮᩣ) ᩅᩩᨲ᩠ᨲᨲ᩠ᨲᩣ ᩏᨲ᩠ᨲᩣᨶᨲ᩠ᨳᨲ᩠ᨲᩣ ᨧ ᩈᩩᩅᩥᨬ᩠ᨬᩮᨿ᩠ᨿᨾᩮᩅ. ᨻᩩᨴ᩠ᨵᩣᨸᨴᩣᨶᩮ ᩋᨶ᩠ᨲᩮᩣᨣᨵᨾ᩠ᨸᩥ ᩍᨵᩣᨸᨴᩣᨶᩮ ᨠᩩᩈᩃᩣᨠᩩᩈᩃᩴ ᨠᨾ᩠ᨾᩈᩴᩈᩪᨧᨠᨲ᩠ᨲᩣ ᩅᨣ᩠ᨣᩈᨦ᩠ᨣᩉᩅᩈᩮᨶ ᨵᨾ᩠ᨾᩈᨦ᩠ᨣᩣᩉᨠᨲ᩠ᨳᩮᩁᩣ ᩈᨦ᩠ᨣᩣᨿᩥᩴᩈᩪᨲᩥ.

ᨸᩩᨻ᩠ᨻᨠᨾ᩠ᨾᨸᩥᩃᩮᩣᨲᩥᨠᨻᩩᨴ᩠ᨵᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᩑᨠᩪᨶᨧᨲ᩠ᨲᩣᩃᩦᩈᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪔᪐. ᨸᩥᩃᩥᨶ᩠ᨴᩅᨧ᩠ᨨᩅᨣ᩠ᨣᩮᩣ

᪑. ᨸᩥᩃᩥᨶ᩠ᨴᩅᨧ᩠ᨨᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨧᨲ᩠ᨲᩣᩃᩦᩈᨾᩅᨣ᩠ᨣᩮ ¶ ¶ ᩋᨸᨴᩣᨶᩮ ᨶᨣᩁᩮ ᩉᩴᩈᩅᨲᩥᨿᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᩥᩃᩥᨶ᩠ᨴᩅᨧ᩠ᨨᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩉᩴᩈᩅᨲᩦᨶᨣᩁᩮ ᨴᩮᩣᩅᩣᩁᩥᨠᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᨾᩉᨴ᩠ᨵᨶᩮᩣ ᨾᩉᩣᨽᩮᩣᨣᩮᩣ ᩋᩉᩮᩣᩈᩥ. ᩈᩮᩣ ᨠᩮᩣᨭᩥᩈᨶ᩠ᨶᩥᨧᩥᨲᨵᨶᩁᩣᩈᩥᩴ ᩒᩃᩮᩣᨠᩮᨲ᩠ᩅᩣ ᩁᩉᩮᩣ ᨶᩥᩈᩥᨶ᩠ᨶᩮᩣ ‘‘ᩍᨾᩴ ᩈᨻ᩠ᨻᨵᨶᩴ ᨾᨿᩣ ᩈᨾ᩠ᨾᩣ ᨣᩉᩮᨲ᩠ᩅᩣ ᨣᨶ᩠ᨲᩩᩴ ᩅᨭ᩠ᨭᨲᩦ’’ᨲᩥ ᨧᩥᨶ᩠ᨲᩮᨲ᩠ᩅᩣ ‘‘ᨻᩩᨴ᩠ᨵᨸ᩠ᨸᨾᩩᨡᩔ ᨽᩥᨠ᩠ᨡᩩᩈᨦ᩠ᨥᩔ ᩈᨻ᩠ᨻᨸᩁᩥᨠ᩠ᨡᩣᩁᨴᩣᨶᩴ ᨴᩣᨲᩩᩴ ᩅᨭ᩠ᨭᨲᩦ’’ᨲᩥ ᩈᨶ᩠ᨶᩥᨭ᩠ᨮᩣᨶᩴ ᨠᨲ᩠ᩅᩣ ᨨᨲ᩠ᨲᩈᨲᩈᩉᩔᩴ ᩌᨴᩥᩴ ᨠᨲ᩠ᩅᩣ ᩈᨻ᩠ᨻᨸᩁᩥᨽᩮᩣᨣᨸᩁᩥᨠ᩠ᨡᩣᩁᩣᨶᩥᨸᩥ ᩈᨲᩈᩉᩔᩅᩈᩮᨶ ᨠᩣᩁᩮᨲ᩠ᩅᩣ ᨸᨴᩩᨾᩩᨲ᩠ᨲᩁᩴ ᨽᨣᩅᨶ᩠ᨲᩴ ᨶᩥᨾᨶ᩠ᨲᩮᨲ᩠ᩅᩣ ᨻᩩᨴ᩠ᨵᨸ᩠ᨸᨾᩩᨡᩔ ᨽᩥᨠ᩠ᨡᩩᩈᨦ᩠ᨥᩔ ᨾᩉᩣᨴᩣᨶᩴ ᩋᨴᩣᩈᩥ. ᩑᩅᩴ ᩈᨲ᩠ᨲᩣᩉᩴ ᨴᩣᨶᩴ ᨴᨲ᩠ᩅᩣ ᨸᩁᩥᨿᩮᩣᩈᩣᨶᨴᩥᩅᩈᩮ ᨶᩥᨻ᩠ᨻᩣᨶᩣᨵᩥᨣᨾᩴ ᨸᨲ᩠ᨳᩮᨲ᩠ᩅᩣ ᨿᩣᩅᨩᩦᩅᩴ ᨸᩩᨬ᩠ᨬᩣᨶᩥ ᨠᨲ᩠ᩅᩣ ¶ ᨩᩦᩅᩥᨲᨸᩁᩥᨿᩮᩣᩈᩣᨶᩮ ᨴᩮᩅᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ ᨨ ᨠᩣᨾᩣᩅᨧᩁᩮ ᨴᩥᨻ᩠ᨻᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᨾᨶᩩᩔᩮᩈᩩ ᨧ ᨧᨠ᩠ᨠᩅᨲ᩠ᨲᩥᩌᨴᩥᩈᨾ᩠ᨸᨲ᩠ᨲᩥᨿᩮᩣ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩈᨻ᩠ᨻᩈᩥᨸ᩠ᨸᩮᩈᩩ ᨶᩥᨸ᩠ᨹᨲ᩠ᨲᩥᩴ ᨸᨲ᩠ᨲᩮᩣ ᨣᩮᩣᨲ᩠ᨲᩅᩈᩮᨶ ᨸᩥᩃᩥᨶ᩠ᨴᩅᨧ᩠ᨨᩮᩣᨲᩥ ᨸᩣᨠᨭᩮᩣ ᩋᩉᩮᩣᩈᩥ.

᪑. ᩈᩮᩣ ᩑᨠᨴᩥᩅᩈᩴ ᩈᨲ᩠ᨳᩩ ᩈᨶ᩠ᨲᩥᨠᩮ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᨶᨧᩥᩁᩔᩮᩅ ᩋᩁᩉᩣ ᩉᩩᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᩏᨴᩣᨶᩅᩈᩮᨶ ᨲᩴ ᨸᨠᩣᩈᩮᨶ᩠ᨲᩮᩣ ᨶᨣᩁᩮ ᩉᩴᩈᩅᨲᩥᨿᩣᨲᩥᩌᨴᩥᨾᩣᩉ. ᨲᩔᨲ᩠ᨳᩮᩣ ᩉᩮᨭ᩠ᨮᩣ ᩅᩩᨲ᩠ᨲᩮᩣᩅ. ᩌᩈᩥᩴ ᨴᩮᩣᩅᩣᩁᩥᨠᩮᩣ ᩋᩉᨶ᩠ᨲᩥ ᩋᩉᩴ ᩉᩴᩈᩅᨲᩦᨶᨣᩁᩮ ᩁᨬ᩠ᨬᩮᩣ ᨣᩮᩉᨴ᩠ᩅᩣᩁᩮ ᨴ᩠ᩅᩣᩁᨸᩣᩃᨠᩮᩣ ᩌᩈᩥᩴ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ. ᩋᨠ᩠ᨡᩮᩣᨽᩴ ᩋᨾᩥᨲᩴ ᨽᩮᩣᨣᨶ᩠ᨲᩥ ᩁᨬ᩠ᨬᩮᩣ ᩅᩃ᩠ᩃᨽᨲ᩠ᨲᩣ ᩋᨬ᩠ᨬᩮᩉᩥ ᨡᩮᩣᨽᩮᨲᩩᩴ ᨧᩣᩃᩮᨲᩩᩴ ᩋᩈᨠ᩠ᨠᩩᨱᩮᨿ᩠ᨿᩴ ᩋᨾᩥᨲᩴ ᩋᨸᩁᩥᨾᩣᨱᨽᩮᩣᨣᩴ ᨵᨶᩴ ᨾᨾ ᨥᩁᩮ ᩈᨶ᩠ᨶᩥᨧᩥᨲᩴ ᩁᩣᩈᩦᨠᨲᩴ ᩋᩉᩮᩣᩈᩦᨲᩥ ᩋᨲ᩠ᨳᩮᩣ.

᪓. ᨻᩉᩪ ᨾᩮᨵᩥᨣᨲᩣ ᨽᩮᩣᨣᩣᨲᩥ ᩋᨶᩮᨠᩣ ᨽᩮᩣᨣᩣ ᨾᩮ ᨾᨿᩣ ᩋᨵᩥᨣᨲᩣ ᨸᨲ᩠ᨲᩣ ᨸᨭᩥᩃᨴ᩠ᨵᩣᨲᩥ ᩋᨲ᩠ᨳᩮᩣ ¶ . ᩈᨲ᩠ᨳᩅᩣᩈᩥᩌᨴᩦᨶᩴ ᨸᩁᩥᨠ᩠ᨡᩣᩁᩣᨶᩴ ᨶᩣᨾᩣᨶᩥ ᨶᨿᩣᨶᩩᨿᩮᩣᨣᩮᨶ ᩈᩩᩅᩥᨬ᩠ᨬᩮᨿ᩠ᨿᩣᨶᩥ. ᨸᩁᩥᨠ᩠ᨡᩣᩁᨴᩣᨶᩣᨶᩥᩈᩴᩈᩣᨶᩥ ᨧ ᩈᩩᩅᩥᨬ᩠ᨬᩮᨿ᩠ᨿᩣᨶᩮᩅᩣᨲᩥ.

ᨸᩥᩃᩥᨶ᩠ᨴᩅᨧ᩠ᨨᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᨴᩩᨲᩥᨿᨲᨲᩥᨿᨧᨲᩩᨲ᩠ᨳᨸᨬ᩠ᨧᨾᩣᨸᨴᩣᨶᩣᨶᩥ ᩏᨲ᩠ᨲᩣᨶᩣᨶᩮᩅᩣᨲᩥ.

᪖. ᨻᩣᨠᩩᩃᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨨᨭ᩠ᨮᩣᨸᨴᩣᨶᩮ ¶ ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨠᩴ ᨻᩣᨠᩩᩃᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᩴ ᨠᩥᩁ ᨳᩮᩁᩮᩣ ᩋᨲᩦᨲᩮ ᩍᨲᩮᩣ ᨠᨸ᩠ᨸᩈᨲᩈᩉᩔᩣᨵᩥᨠᩔ ᩋᩈᨦ᩠ᨡ᩠ᨿᩮᨿ᩠ᨿᩔ ᨾᨲ᩠ᨳᨠᩮ ᩋᨶᩮᩣᨾᨴᩔᩥᩔ ᨽᨣᩅᨲᩮᩣ ᩏᨸ᩠ᨸᨲ᩠ᨲᩥᨲᩮᩣ ᨸᩩᩁᩮᨲᩁᨾᩮᩅ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩅᨿᨸ᩠ᨸᨲ᩠ᨲᩮᩣ ᨲᨿᩮᩣ ᩅᩮᨴᩮ ᩏᨣ᩠ᨣᨱ᩠ᩉᩥᨲ᩠ᩅᩣ ᨲᨲ᩠ᨳ ᩈᩣᩁᩴ ᩋᨸᩔᨶ᩠ᨲᩮᩣ ‘‘ᩈᨾ᩠ᨸᩁᩣᨿᩥᨠᨲ᩠ᨳᩴ ᨣᩅᩮᩈᩥᩔᩣᨾᩦ’’ᨲᩥ ᩍᩈᩥᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᨸᨻ᩠ᨻᨲᨸᩣᨴᩮ ᩅᩥᩉᩁᨶ᩠ᨲᩮᩣ ᨸᨬ᩠ᨧᩣᨽᩥᨬ᩠ᨬᩣᩋᨭ᩠ᨮᩈᨾᩣᨸᨲ᩠ᨲᩦᨶᩴ ᩃᩣᨽᩦ ᩉᩩᨲ᩠ᩅᩣ ᩅᩥᩉᩁᨶ᩠ᨲᩮᩣ ᨻᩩᨴ᩠ᨵᩩᨸ᩠ᨸᩣᨴᩴ ᩈᩩᨲ᩠ᩅᩣ ᩈᨲ᩠ᨳᩩ ᩈᨶ᩠ᨲᩥᨠᩴ ᨣᨶ᩠ᨲ᩠ᩅᩣ ᨵᨾ᩠ᨾᩴ ᩈᩩᨲ᩠ᩅᩣ ᩈᩁᨱᩮᩈᩩ ᨸᨲᩥᨭ᩠ᨮᩥᨲᩮᩣ ᩈᨲ᩠ᨳᩩ ᩅᩣᨲᩣᨻᩣᨵᩮ ᩏᨸ᩠ᨸᨶ᩠ᨶᩮ ᩋᩁᨬ᩠ᨬᨲᩮᩣ ᨽᩮᩈᨩ᩠ᨩᩣᨶᩥ ᩌᨶᩮᨲ᩠ᩅᩣ ᨲᩴ ᩅᩪᨸᩈᨾᩮᨲ᩠ᩅᩣ ᨲᩴ ᨸᩩᨬ᩠ᨬᩴ ᩌᩁᩮᩣᨣ᩠ᨿᨲ᩠ᨳᩣᨿ ᨸᩁᩥᨱᩣᨾᩮᨲ᩠ᩅᩣ ᨲᨲᩮᩣ ᨧᩩᨲᩮᩣ ᨻᩕᩉ᩠ᨾᩃᩮᩣᨠᩮ ᨶᩥᨻ᩠ᨻᨲ᩠ᨲᩮᩣ ᩑᨠᩴ ᩋᩈᨦ᩠ᨡ᩠ᨿᩮᨿ᩠ᨿᩴ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᨸᨴᩩᨾᩩᨲ᩠ᨲᩁᨻᩩᨴ᩠ᨵᨠᩣᩃᩮ ᩉᩴᩈᩅᨲᩦᨶᨣᩁᩮ ᩑᨠᩈ᩠ᨾᩥᩴ ᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ¶ ᩈᨲ᩠ᨳᩣᩁᩴ ᩑᨠᩴ ᨽᩥᨠ᩠ᨡᩩᩴ ᩋᨸ᩠ᨸᩣᨻᩣᨵᩣᨶᩴ ᩋᨣ᩠ᨣᨭ᩠ᨮᩣᨶᩮ ᨮᨸᩮᨶ᩠ᨲᩴ ᨴᩥᩈ᩠ᩅᩣ ᩈᨿᩴ ᨲᩴ ᨮᩣᨶᨶ᩠ᨲᩁᩴ ᩌᨠᨦ᩠ᨡᨶ᩠ᨲᩮᩣ ᨸᨱᩥᨵᩣᨶᩴ ᨠᨲ᩠ᩅᩣ ᨿᩣᩅᨩᩦᩅᩴ ᨠᩩᩈᩃᨠᨾ᩠ᨾᩴ ᩏᨸᨧᩥᨶᩥᨲ᩠ᩅᩣ ᩈᩩᨣᨲᩦᩈᩩᨿᩮᩅ ᩈᩴᩈᩁᨶ᩠ᨲᩮᩣ ᩅᩥᨸᩔᩥᩔ ᨽᨣᩅᨲᩮᩣ ᩏᨸ᩠ᨸᨲ᩠ᨲᩥᨲᩮᩣ ᨸᩩᩁᩮᨲᩁᨾᩮᩅ ᨻᨶ᩠ᨵᩩᨾᨲᩦᨶᨣᩁᩮ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩈᨻ᩠ᨻᩈᩥᨸ᩠ᨸᩮᩈᩩ ᨶᩥᨸ᩠ᨹᨲ᩠ᨲᩥᩴ ᨸᨲ᩠ᨲᩮᩣ ᨲᨲ᩠ᨳ ᩈᩣᩁᩴ ᩋᨸᩔᨶ᩠ᨲᩮᩣ ᩍᩈᩥᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᨫᩣᨶᩣᨽᩥᨬ᩠ᨬᩣᩃᩣᨽᩦ ᩉᩩᨲ᩠ᩅᩣ ᨸᨻ᩠ᨻᨲᨸᩣᨴᩮ ᩅᩈᨶ᩠ᨲᩮᩣ ᨻᩩᨴ᩠ᨵᩩᨸ᩠ᨸᩣᨴᩴ ᩈᩩᨲ᩠ᩅᩣ ᩈᨲ᩠ᨳᩩ ᩈᨶ᩠ᨲᩥᨠᩴ ᨣᨶ᩠ᨲ᩠ᩅᩣ ᩈᩁᨱᩮᩈᩩ ᨸᨲᩥᨭ᩠ᨮᩣᨿ ᨽᩥᨠ᩠ᨡᩪᨶᩴ ᨲᩥᨱᨸᩩᨸ᩠ᨹᨠᩁᩮᩣᨣᩮ ᩏᨸ᩠ᨸᨶ᩠ᨶᩮ ᨲᩴ ᩅᩪᨸᩈᨾᩮᨲ᩠ᩅᩣ ᨲᨲ᩠ᨳ ᨿᩣᩅᨲᩣᨿᩩᨠᩴ ᨮᨲ᩠ᩅᩣ ᨲᨲᩮᩣ ᨧᩩᨲᩮᩣ ᨻᩕᩉ᩠ᨾᩃᩮᩣᨠᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᨲᨲᩮᩣ ᩑᨠᨶᩅᩩᨲᩥᨠᨸ᩠ᨸᩮ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᨠᩔᨸᩔ ᨽᨣᩅᨲᩮᩣ ᨠᩣᩃᩮ ᨻᩣᩁᩣᨱᩈᩥᨿᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᨥᩁᩣᩅᩣᩈᩴ ᩅᩈᨶ᩠ᨲᩮᩣ ᩑᨠᩴ ᨩᩥᨱ᩠ᨱᩴ ᩅᩥᨶᩔᨾᩣᨶᩴ ᨾᩉᩣᩅᩥᩉᩣᩁᩴ ᨴᩥᩈ᩠ᩅᩣ ᨲᨲ᩠ᨳ ᩏᨸᩮᩣᩈᨳᩣᨣᩣᩁᩣᨴᩥᨠᩴ ᩈᨻ᩠ᨻᩴ ᩌᩅᩈᨳᩴ ᨠᩣᩁᩣᨸᩮᨲ᩠ᩅᩣ ᨲᨲ᩠ᨳ ᨽᩥᨠ᩠ᨡᩩᩈᨦ᩠ᨥᩔ ᩈᨻ᩠ᨻᩴ ᨽᩮᩈᨩ᩠ᨩᩴ ᨸᨭᩥᨿᩣᨴᩮᨲ᩠ᩅᩣ ᨿᩣᩅᨩᩦᩅᩴ ᨠᩩᩈᩃᩴ ᨠᨲ᩠ᩅᩣ ᩑᨠᩴ ᨻᩩᨴ᩠ᨵᨶ᩠ᨲᩁᩴ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩋᨾ᩠ᩉᩣᨠᩴ ᨽᨣᩅᨲᩮᩣ ᩏᨸ᩠ᨸᨲ᩠ᨲᩥᨲᩮᩣ ᨸᩩᩁᩮᨲᩁᨾᩮᩅ ᨠᩮᩣᩈᨾ᩠ᨻᩥᨿᩴ ᩈᩮᨭ᩠ᨮᩥᨠᩩᩃᩮ ᨶᩥᨻ᩠ᨻᨲ᩠ᨲᩥ.

ᩈᩮᩣ ¶ ᨾᩣᨲᩩᨠᩩᨧ᩠ᨨᩥᨲᩮᩣ ᨶᩥᨠ᩠ᨡᨾᩥᨲ᩠ᩅᩣ ᨵᩣᨲᩦᩉᩥ ᩋᩁᩮᩣᨣᨽᩣᩅᩣᨿ ᨿᨾᩩᨶᩣᨿᩴ ᨶ᩠ᩉᩣᨸᩥᨿᨾᩣᨶᩮᩣ ᨲᩣᩈᩴ ᩉᨲ᩠ᨳᨲᩮᩣ ᨾᩩᨧ᩠ᨧᩥᨲ᩠ᩅᩣ ᨾᨧ᩠ᨨᩮᨶ ᨣᩥᩃᩥᨲᩮᩣ ᩋᩉᩮᩣᩈᩥ. ᨠᩮᩅᨭ᩠ᨭᩣ ᨲᩴ ᨾᨧ᩠ᨨᩴ ᨩᩣᩃᩣᨿ ᨣᩉᩮᨲ᩠ᩅᩣ ᨻᩣᩁᩣᨱᩈᩥᨿᩴ ᩈᩮᨭ᩠ᨮᩥᨽᩁᩥᨿᩣᨿ ᩅᩥᨠ᩠ᨠᩥᨱᩥᩴᩈᩩ. ᩈᩣ ᨲᩴ ᨣᩉᩮᨲ᩠ᩅᩣ ᨹᩣᩃᨿᨾᩣᨶᩣ ᨸᩩᨻ᩠ᨻᩮ ᨠᨲᨸᩩᨬ᩠ᨬᨹᩃᩮᨶ ᩋᩁᩮᩣᨣᩴ ¶ ᨴᩣᩁᨠᩴ ᨴᩥᩈ᩠ᩅᩣ ‘‘ᨸᩩᨲ᩠ᨲᩮᩣ ᨾᩮ ᩃᨴ᩠ᨵᩮᩣ’’ᨲᩥ ᨣᩉᩮᨲ᩠ᩅᩣ ᨸᩮᩣᩈᩮᩈᩥ. ᩈᩮᩣ ᨩᨶᨠᩮᩉᩥ ᨾᩣᨲᩣᨸᩥᨲᩪᩉᩥ ᨲᩴ ᨸᩅᨲ᩠ᨲᩥᩴ ᩈᩩᨲ᩠ᩅᩣ ᩌᨣᨶ᩠ᨲ᩠ᩅᩣ ‘‘ᩋᨿᩴ ᩋᨾ᩠ᩉᩣᨠᩴ ᨸᩩᨲ᩠ᨲᩮᩣ, ᨴᩮᨳ ᨶᩮᩣ ᨸᩩᨲ᩠ᨲ’’ᨶ᩠ᨲᩥ ᩋᨶᩩᨿᩮᩣᨣᩮ ᨠᨲᩮ ᩁᨬ᩠ᨬᩣ ‘‘ᩏᨽᨿᩮᩈᨾ᩠ᨸᩥ ᩈᩣᨵᩣᩁᨱᩮᩣ ᩉᩮᩣᨲᩪ’’ᨲᩥ ᨴ᩠ᩅᩥᨶ᩠ᨶᩴ ᨠᩩᩃᩣᨶᩴ ᨴᩣᨿᩣᨴᨽᩣᩅᩮᨶ ᩅᩥᨶᩥᨧ᩠ᨨᨿᩴ ᨠᨲ᩠ᩅᩣ ᨮᨸᩥᨲᨲ᩠ᨲᩣ ᨻᩣᨠᩩᩃᩮᩣᨲᩥ ᩃᨴ᩠ᨵᨶᩣᨾᩮᩣ ᩅᨿᨸ᩠ᨸᨲ᩠ᨲᩮᩣ ᨾᩉᩣᩈᨾ᩠ᨸᨲ᩠ᨲᩥᩴ ᩋᨶᩩᨽᩅᨶ᩠ᨲᩮᩣ ᨴ᩠ᩅᩦᩈᩩ ᩈᩮᨭ᩠ᨮᩥᨠᩩᩃᩮᩈᩩ ᩑᨠᩮᨠᩈ᩠ᨾᩥᩴ ᨨᨾᩣᩈᩴ ᨨᨾᩣᩈᩴ ᩅᩈᨲᩥ. ᨲᩮ ᩋᨲ᩠ᨲᨶᩮᩣ ᩅᩣᩁᩮ ᩈᨾ᩠ᨸᨲ᩠ᨲᩮ ᨶᩣᩅᩣᩈᨦ᩠ᨥᩣᨭᩴ ᨻᨶ᩠ᨵᩥᨲ᩠ᩅᩣ ᨲᨲᩕᩪᨸᩁᩥ ᩁᨲᨶᨾᨱ᩠ᨯᨸᩴ ᨠᩣᩁᩮᨲ᩠ᩅᩣ ᨸᨬ᩠ᨧᨦ᩠ᨣᩥᨠᨲᩪᩁᩥᨿᩮ ᨶᩥᨸ᩠ᨹᩣᨴᩮᨲ᩠ᩅᩣ ᨠᩩᨾᩣᩁᩴ ᨲᨲ᩠ᨳ ᨶᩥᩈᩦᨴᩣᨸᩮᨲ᩠ᩅᩣ ᩏᨽᨿᨶᨣᩁᨾᨩ᩠ᨫᨭ᩠ᨮᩣᨶᩴ ᨣᨦ᩠ᨣᩣᨿ ᩌᨣᨧ᩠ᨨᨶ᩠ᨲᩥ, ᩋᨸᩁᩈᩮᨭ᩠ᨮᩥᨾᨶᩩᩔᩣᨸᩥ ᩑᩅᨾᩮᩅ ᩈᨩ᩠ᨩᩮᨲ᩠ᩅᩣ ᨲᩴ ᨮᩣᨶᩴ ᨣᨶ᩠ᨲ᩠ᩅᩣ ᨠᩩᨾᩣᩁᩴ ᨲᨲ᩠ᨳ ᩌᩁᩮᩣᨸᩮᨲ᩠ᩅᩣ ᨣᨧ᩠ᨨᨶ᩠ᨲᩥ. ᩈᩮᩣ ᩑᩅᩴ ᩅᨯ᩠ᨰᨾᩣᨶᩮᩣ ᩌᩈᩦᨲᩥᨠᩮᩣ ᩉᩩᨲ᩠ᩅᩣ ᩏᨽᨿᩈᩮᨭ᩠ᨮᩥᨸᩩᨲ᩠ᨲᩮᩣᨲᩥ ᨸᩣᨠᨭᩮᩣ. ᩈᨲ᩠ᨳᩩ ᩈᨶ᩠ᨲᩥᨠᩴ ᨣᨶ᩠ᨲ᩠ᩅᩣ ᨵᨾ᩠ᨾᩴ ᩈᩩᨲ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᩈᨲ᩠ᨲᩣᩉᩴ ᩅᩣᨿᨾᨶ᩠ᨲᩮᩣ ᩋᨭ᩠ᨮᨾᩮ ᨴᩥᩅᩈᩮ ᩈᩉ ᨸᨭᩥᩈᨾ᩠ᨽᩥᨴᩣᨿ ᩋᩁᩉᨲ᩠ᨲᩴ ¶ ᨸᩣᨸᩩᨱᩥ.

᪓᪘᪖. ᩈᩮᩣ ᩋᩁᩉᩣ ᩉᩩᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨾᩣᩉ. ᨲᩔᨲ᩠ᨳᩮᩣ ᩉᩮᨭ᩠ᨮᩣ ᩅᩩᨲ᩠ᨲᩮᩣᩅ. ᩋᨸᨴᩣᨶᨸᩣᩊᩥᩋᨲ᩠ᨳᩮᩣᨸᩥ ᩈᩩᩅᩥᨬ᩠ᨬᩮᨿ᩠ᨿᩮᩣᩅ. ᩈᩮᩣ ᩋᩁᩉᨲ᩠ᨲᩴ ᨸᨲ᩠ᩅᩣ ᩅᩥᨾᩩᨲ᩠ᨲᩥᩈᩩᨡᩮᨶ ᩅᩥᩉᩁᨶ᩠ᨲᩮᩣ ᩈᨭ᩠ᨮᩥᩅᩔᩈᨲᩣᨿᩩᨠᩮᩣ ᩉᩩᨲ᩠ᩅᩣ ᨸᩁᩥᨶᩥᨻ᩠ᨻᩣᨿᩦᨲᩥ.

ᨻᩣᨠᩩᩃᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪗. ᨣᩥᩁᩥᨾᩣᨶᨶ᩠ᨴᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᩈᨲ᩠ᨲᨾᩣᨸᨴᩣᨶᩮ ᨽᩁᩥᨿᩣ ᨾᩮ ᨠᩣᩃᨦ᩠ᨠᨲᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨣᩥᩁᩥᨾᩣᨶᨶ᩠ᨴᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᩈᩩᨾᩮᨵᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᨿᨸ᩠ᨸᨲ᩠ᨲᩮᩣ ᨥᩁᩣᩅᩣᩈᩴ ᩈᨱ᩠ᨮᨸᩮᨲ᩠ᩅᩣ ᩅᩈᨶ᩠ᨲᩮᩣ ᩋᨲ᩠ᨲᨶᩮᩣ ᨽᩁᩥᨿᩣᨿ ᨧ ᨸᩩᨲ᩠ᨲᩮ ᨧ ᨠᩣᩃᨦ᩠ᨠᨲᩮ ᩈᩮᩣᨠᩈᩃ᩠ᩃᩈᨾᨸ᩠ᨸᩥᨲᩮᩣ ᩋᩁᨬ᩠ᨬᩴ ᨸᩅᩥᩈᩥᨲ᩠ᩅᩣ ᨸᩅᨲ᩠ᨲᨹᩃᨽᩮᩣᨩᨶᩮᩣ ᩁᩩᨠ᩠ᨡᨾᩪᩃᩮ ᩅᩥᩉᩣᩈᩥ. ᨲᨴᩣ ᩈᩩᨾᩮᨵᩮᩣ ᨽᨣᩅᩣ ᨲᩔᩣᨶᩩᨠᨾ᩠ᨸᩣᨿ ᨲᨲ᩠ᨳ ᨣᨶ᩠ᨲ᩠ᩅᩣ ᨵᨾ᩠ᨾᩴ ᨴᩮᩈᩮᨲ᩠ᩅᩣ ᩈᩮᩣᨠᩈᩃ᩠ᩃᩴ ᩋᨻ᩠ᨻᩪᩊ᩠ᩉᩮᩈᩥ ¶ . ᩈᩮᩣ ᨵᨾ᩠ᨾᩴ ᩈᩩᨲ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩈᩩᨣᨶ᩠ᨵᨸᩩᨸ᩠ᨹᩮᩉᩥ ᨽᨣᩅᨶ᩠ᨲᩴ ᨸᩪᨩᩮᨲ᩠ᩅᩣ ᨸᨬ᩠ᨧᨸᨲᩥᨭ᩠ᨮᩥᨲᩮᨶ ᩅᨶ᩠ᨴᩥᨲ᩠ᩅᩣ ᩈᩥᩁᩈᩥ ᩋᨬ᩠ᨩᩃᩥᩴ ᨠᨲ᩠ᩅᩣ ᩋᨽᩥᨲ᩠ᨳᩅᩥ.

ᩈᩮᩣ ¶ ᨲᩮᨶ ᨸᩩᨬ᩠ᨬᩮᨶ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩏᨽᨿᨲ᩠ᨳ ᩈᩩᨡᩴ ᩋᨶᩩᨽᩅᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩁᩣᨩᨣᩉᩮ ᨻᩥᨾ᩠ᨻᩥᩈᩣᩁᩁᨬ᩠ᨬᩮᩣ ᨸᩩᩁᩮᩣᩉᩥᨲᩔ ᨸᩩᨲ᩠ᨲᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩥ, ᨣᩥᩁᩥᨾᩣᨶᨶ᩠ᨴᩮᩣᨲᩥᩔ ᨶᩣᨾᩴ ᩋᩉᩮᩣᩈᩥ. ᩈᩮᩣ ᩅᩥᨬ᩠ᨬᩩᨲᩴ ᨸᨲ᩠ᩅᩣ ᩈᨲ᩠ᨳᩩ ᩁᩣᨩᨣᩉᩣᨣᨾᨶᩮ ᨻᩩᨴ᩠ᨵᩣᨶᩩᨽᩣᩅᩴ ᨴᩥᩈ᩠ᩅᩣ ᨸᨭᩥᩃᨴ᩠ᨵᩈᨴ᩠ᨵᩮᩣ ᨸᨻ᩠ᨻᨩᩥᨲ᩠ᩅᩣ ᩈᨾᨱᨵᨾ᩠ᨾᩴ ᨠᩁᩮᩣᨶ᩠ᨲᩮᩣ ᨠᨲᩥᨸᨿᩴ ᨴᩥᩅᩈᩴ ᨣᩣᨾᨠᩣᩅᩣᩈᩮ ᩅᩈᩥᨲ᩠ᩅᩣ ᩈᨲ᩠ᨳᩣᩁᩴ ᩅᨶ᩠ᨴᩥᨲᩩᩴ ᩁᩣᨩᨣᩉᩴ ᩋᨣᨾᩣᩈᩥ. ᨻᩥᨾ᩠ᨻᩥᩈᩣᩁᨾᩉᩣᩁᩣᨩᩣ ᨲᩔ ᩌᨣᨾᨶᩴ ᩈᩩᨲ᩠ᩅᩣ ᨲᩴ ᩏᨸᩈᨦ᩠ᨠᨾᩥᨲ᩠ᩅᩣ ‘‘ᩍᨵᩮᩅ, ᨽᨶ᩠ᨲᩮ, ᩅᩈᨳ, ᩋᩉᩴ ᨧᨲᩪᩉᩥ ᨸᨧ᩠ᨧᨿᩮᩉᩥ ᩏᨸᨭ᩠ᨮᩉᩣᨾᩦ’’ᨲᩥ ᩈᨾ᩠ᨸᩅᩣᩁᩮᨲ᩠ᩅᩣ ᨣᨲᩮᩣᨸᩥ ᨻᩉᩩᨠᩥᨧ᩠ᨧᨲ᩠ᨲᩣ ᨲᩴ ᨶ ᩈᩁᩥ. ‘‘ᨳᩮᩁᩮᩣ ᩋᨻ᩠ᨽᩮᩣᨠᩣᩈᩮᨿᩮᩅ ᩅᩈᨲᩦ’’ᨲᩥ. ᨴᩮᩅᨲᩣ ᨳᩮᩁᩔ ᨲᩮᨾᨶᨽᨿᩮᨶ ᩅᩔᨵᩣᩁᩴ ᩅᩣᩁᩮᩈᩩᩴ. ᩁᩣᨩᩣ ᩋᩅᩔᨶᨠᩣᩁᨱᩴ ᩏᨸᨵᩣᩁᩮᨲ᩠ᩅᩣ ᨬᨲ᩠ᩅᩣ ᨳᩮᩁᩔ ᨠᩩᨭᩥᨠᩴ ᨠᩣᩁᩣᨸᩮᩈᩥ. ᨳᩮᩁᩮᩣ ᨠᩩᨭᩥᨠᩣᨿᩴ ᩅᩈᨶ᩠ᨲᩮᩣ ᩈᩮᨶᩣᩈᨶᩈᨸ᩠ᨸᩣᨿᩃᩣᨽᩮᨶ ᨧᩥᨲ᩠ᨲᩈᨾᩣᨵᩣᨶᩴ ᩃᨽᩥᨲ᩠ᩅᩣ ᩅᩦᩁᩥᨿᩈᨾᨲᩴ ᨿᩮᩣᨩᩮᨲ᩠ᩅᩣ ᩅᩥᨸᩔᨶᩴ ᩏᩔᩩᨠ᩠ᨠᩣᨸᩮᨲ᩠ᩅᩣ ᩋᩁᩉᨲ᩠ᨲᩴ ᨸᩣᨸᩩᨱᩥ.

᪔᪑᪙. ᩈᩮᩣ ᩋᩁᩉᨲ᩠ᨲᩴ ᨸᨲ᩠ᩅᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᨬ᩠ᨩᩣᨲᩈᩮᩣᨾᨶᩔᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨽᩁᩥᨿᩣ ᨾᩮ ᨠᩣᩃᨦ᩠ᨠᨲᩣᨲᩥᩌᨴᩥᨾᩣᩉ. ᨲᩴ ᨽᨣᩅᨲᩮᩣ ᨶᩥᩅᩮᨴᨶᨬ᩠ᨧ ᨽᨣᩅᨲᩣ ᨠᨲᩣᨶᩩᩈᩣᩈᨶᨬ᩠ᨧ ᨾᨣ᩠ᨣᩴ ᨹᩃᩣᨵᩥᨣᨾᩣᨸᨴᩣᨶᨬ᩠ᨧ ᨸᩣᨮᩣᨶᩩᩈᩣᩁᩮᨶ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨣᩥᩁᩥᨾᩣᨶᨶ᩠ᨴᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᩋᨭ᩠ᨮᨾᨶᩅᨾᨴᩈᨾᩣᨸᨴᩣᨶᩣᨶᩥ ¶ ᩏᨲ᩠ᨲᩣᨶᨲ᩠ᨳᩣᨶᩮᩅᩣᨲᩥ.

ᨧᨲ᩠ᨲᩣᩃᩦᩈᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪔᪑. ᨾᩮᨲ᩠ᨲᩮᨿ᩠ᨿᩅᨣ᩠ᨣᩮᩣ

᪑. ᨲᩥᩔᨾᩮᨲ᩠ᨲᩮᨿ᩠ᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

᪑. ᩑᨠᨧᨲ᩠ᨲᩣᩃᩦᩈᨾᩮ ¶ ᩅᨣ᩠ᨣᩮ ᨸᨮᨾᩣᨸᨴᩣᨶᩮ ᨸᨻ᩠ᨽᩣᩁᨠᩪᨭᩴ ᨶᩥᩔᩣᨿᩣᨲᩥᩌᨴᩥᨠᩴ ᨲᩥᩔᨾᩮᨲ᩠ᨲᩮᨿ᩠ᨿᨲ᩠ᨳᩮᩁᩔ ᩋᨸᨴᩣᨶᩴ. ᨲᨲ᩠ᨳ ᨲᩣᨸᩈᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᩋᨩᩥᨶᨧᨾ᩠ᨾᩴ ᨶᩥᩈᩦᨴᨶᨲ᩠ᨳᩣᨿ ᨴᩥᨶ᩠ᨶᨾᩮᩅ ᨶᩣᨶᩴ. ᩈᩮᩈᩴ ᩋᨸᨴᩣᨶᨸᩣᩊᩥᨿᩣ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

᪒. ᨸᩩᨱ᩠ᨱᨠᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

᪒᪙. ᨴᩩᨲᩥᨿᩣᨸᨴᩣᨶᩮ ¶ ᨸᨻ᩠ᨽᩣᩁᨠᩪᨭᩴ ᨶᩥᩔᩣᨿᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨸᩩᨱ᩠ᨱᨠᨲ᩠ᨳᩮᩁᩔ ᩋᨸᨴᩣᨶᩴ. ᨲᨲ᩠ᨳ ᩉᩥᨾᩅᨶ᩠ᨲᩮ ᨿᨠ᩠ᨡᩈᩮᨶᩣᨸᨲᩥ ᩉᩩᨲ᩠ᩅᩣ ᨸᩁᩥᨶᩥᨻ᩠ᨻᩩᨲᩔ ᨸᨧ᩠ᨧᩮᨠᨻᩩᨴ᩠ᨵᩔ ᩌᩊᩉᨶᨠᩁᨱᨾᩮᩅ ᨶᩣᨶᨲ᩠ᨲᩴ. ᩈᩮᩈᩴ ᨸᩣᨮᩣᨶᩩᩈᩣᩁᩮᨶ ᩈᩩᩅᩥᨬ᩠ᨬᩮᨿ᩠ᨿᨾᩮᩅ.

᪔᪕. ᨲᨲᩥᨿᩣᨸᨴᩣᨶᩮ ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨾᩮᨲ᩠ᨲᨣᩩᨲ᩠ᨳᩮᩁᩔ ᩋᨸᨴᩣᨶᩴ. ᨲᨲ᩠ᨳ ᩉᩥᨾᩅᨶ᩠ᨲᩈᨾᩦᨸᩮ ᩋᩈᩮᩣᨠᨸᨻ᩠ᨻᨲᩮ ᩈᩮᩣ ᨲᩣᨸᩈᩮᩣ ᩉᩩᨲ᩠ᩅᩣ ᨸᨱ᩠ᨱᩈᩣᩃᩣᨿᩴ ᩅᩈᨶ᩠ᨲᩮᩣ ᩈᩩᨾᩮᨵᩈᨾ᩠ᨻᩩᨴ᩠ᨵᩴ ᨴᩥᩈ᩠ᩅᩣ ᨸᨲ᩠ᨲᩴ ᨣᩉᩮᨲ᩠ᩅᩣ ᩈᨸ᩠ᨸᩥᨸᩪᩁᨱᩴ ᩅᩥᩈᩮᩈᩮᩣ. ᩈᩮᩈᩴ ᨸᩩᨬ᩠ᨬᨹᩃᩣᨶᩥ ᨧ ᩈᩩᩅᩥᨬ᩠ᨬᩮᨿ᩠ᨿᩣᨶᩮᩅ. ᩋᨸᨴᩣᨶᨣᩣᨳᩣᨶᩴ ᩋᨲ᩠ᨳᩮᩣ ᨧ ᨸᩣᨠᨭᩮᩣᨿᩮᩅ.

᪗᪒. ᨧᨲᩩᨲ᩠ᨳᩣᨸᨴᩣᨶᩮ ᨣᨦ᩠ᨣᩣ ᨽᩣᨣᩦᩁᨳᩦ ᨶᩣᨾᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨵᩮᩣᨲᨠᨲ᩠ᨳᩮᩁᩔ ᩋᨸᨴᩣᨶᩴ. ᨲᨲᩕᩣᨸᩥ ᨻᩕᩣᩉ᩠ᨾᨱᩮᩣ ᩉᩩᨲ᩠ᩅᩣ ᨽᩣᨣᩦᩁᨳᩦᨣᨦ᩠ᨣᩣᨿ ᨲᩁᨾᩣᨶᩮ ᨽᩥᨠ᩠ᨡᩪ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᩈᩮᨲᩩᩴ ᨠᩣᩁᩣᨸᩮᨲ᩠ᩅᩣ ᨻᩩᨴ᩠ᨵᨸ᩠ᨸᨾᩩᨡᩔ ᨽᩥᨠ᩠ᨡᩩᩈᨦ᩠ᨥᩔ ᨶᩥᨿ᩠ᨿᩣᨴᩥᨲᨽᩣᩅᩮᩣᨿᩮᩅ ᩅᩥᩈᩮᩈᩮᩣ. ᨸᩩᨬ᩠ᨬᨹᩃᨸᩁᩥᨴᩦᨸᨶᨣᩣᨳᩣᨶᩴ ᩋᨲ᩠ᨳᩮᩣ ᨶᨿᩣᨶᩩᩈᩣᩁᩮᨶ ᩈᩩᩅᩥᨬ᩠ᨬᩮᨿ᩠ᨿᩮᩣᩅ.

᪑᪐᪐. ᨸᨬ᩠ᨧᨾᩣᨸᨴᩣᨶᩮ ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩏᨸᩈᩥᩅᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᨥᩁᩣᩅᩣᩈᩴ ᨸᩉᩣᨿ ᩍᩈᩥᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ¶ ᩉᩥᨾᩅᨶ᩠ᨲᩮ ᨸᨴᩩᨾᩩᨲ᩠ᨲᩁᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨲᩥᨱᩈᨶ᩠ᨳᩁᩴ ᩈᨶ᩠ᨳᩁᩥᨲ᩠ᩅᩣ ᨲᨲ᩠ᨳ ᨶᩥᩈᩥᨶ᩠ᨶᩔ ᨽᨣᩅᨲᩮᩣ ᩈᩣᩃᨸᩩᨸ᩠ᨹᨸᩪᨩᩴ ᩋᨠᩣᩈᩦᨲᩥ ᩋᨿᩴ ᩅᩥᩈᩮᩈᩮᩣ, ᩈᩮᩈᨾᩩᨲ᩠ᨲᩣᨶᨾᩮᩅ.

᪑᪖᪑. ᨨᨭ᩠ᨮᩣᨸᨴᩣᨶᩮ ᨾᩥᨣᩃᩩᨴ᩠ᨴᩮᩣ ᨸᩩᩁᩮ ᩌᩈᩥᨶ᩠ᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨶᨶ᩠ᨴᨠᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᩴ ᨠᩥᩁ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ¶ ᨠᩣᩃᩮ ᨠᩁᩅᩥᨠᩈᨠᩩᨱᩮᩣ ᩉᩩᨲ᩠ᩅᩣ ᨾᨵᩩᩁᨠᩪᨩᩥᨲᩴ ᨠᩁᩮᩣᨶ᩠ᨲᩮᩣ ᩈᨲ᩠ᨳᩣᩁᩴ ᨸᨴᨠ᩠ᨡᩥᨱᩴ ᩋᨠᩣᩈᩥ. ᩋᨸᩁᨽᩣᨣᩮ ᨾᨿᩪᩁᩮᩣ ᩉᩩᨲ᩠ᩅᩣ ᩋᨬ᩠ᨬᨲᩁᩔ ᨸᨧ᩠ᨧᩮᨠᨻᩩᨴ᩠ᨵᩔ ᩅᩈᨶᨣᩩᩉᩣᨴ᩠ᩅᩣᩁᩮ ᨸᩈᨶ᩠ᨶᨾᩣᨶᩈᩮᩣ ᨴᩥᩅᩈᩔ ᨲᩥᨠ᩠ᨡᨲ᩠ᨲᩩᩴ ᨾᨵᩩᩁᩮᨶ ᩅᩔᩥᨲᩴ ᩅᩔᩥ. ᩑᩅᩴ ᨲᨲ᩠ᨳ ᨲᨲ᩠ᨳ ᨽᩅᩮ ᨸᩩᨬ᩠ᨬᩣᨶᩥ ᨠᨲ᩠ᩅᩣ ᩋᨾ᩠ᩉᩣᨠᩴ ᨽᨣᩅᨲᩮᩣ ᨠᩣᩃᩮ ᩈᩣᩅᨲ᩠ᨳᩥᨿᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᨶᨶ᩠ᨴᨠᩮᩣᨲᩥ ᩃᨴ᩠ᨵᨶᩣᨾᩮᩣ ᩈᨲ᩠ᨳᩩ ᩈᨶ᩠ᨲᩥᨠᩮ ᨵᨾ᩠ᨾᩴ ¶ ᩈᩩᨲ᩠ᩅᩣ ᨸᨻ᩠ᨻᨩᩥᨲ᩠ᩅᩣ ᩅᩥᨸᩔᨶᩴ ᩅᨯ᩠ᨰᩮᨲ᩠ᩅᩣ ᩋᩁᩉᨲ᩠ᨲᩴ ᨸᩣᨸᩩᨱᩥ. ᩈᩮᩣ ᩋᨸᩁᨽᩣᨣᩮ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ᨸᨠᩣᩈᩮᨶ᩠ᨲᩮᩣ ᨾᩥᨣᩃᩩᨴ᩠ᨴᩮᩣ ᨸᩩᩁᩮ ᩌᩈᩥᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨸᨧ᩠ᨧᩮᨠᨻᩩᨴ᩠ᨵᩔ ᨾᨱ᩠ᨯᨸᩴ ᨠᨲ᩠ᩅᩣ ᨸᨴᩩᨾᨸᩩᨸ᩠ᨹᩮᩉᩥ ᨨᨴᨶᨾᩮᩅ ᩅᩥᩈᩮᩈᩮᩣ.

᪑᪘᪓. ᩈᨲ᩠ᨲᨾᩣᨸᨴᩣᨶᩮ ᨸᨻ᩠ᨽᩣᩁᨠᩪᨭᩴ ᨶᩥᩔᩣᨿᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩉᩮᨾᨠᨲ᩠ᨳᩮᩁᩔ ᩋᨸᨴᩣᨶᩴ. ᨲᨲ᩠ᨳᩣᨸᩥ ᩍᩈᩥᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩉᩥᨾᩅᨶ᩠ᨲᩮ ᩅᩈᨶ᩠ᨲᩮᩣ ᨸᩥᨿᨴᩔᩥᩴ ᨽᨣᩅᨶ᩠ᨲᩴ ᩏᨸᨣᨲᩴ ᨴᩥᩈ᩠ᩅᩣ ᩁᨲᨶᨾᨿᩴ ᨸᩦᨮᩴ ᩋᨲ᩠ᨳᩁᩥᨲ᩠ᩅᩣ ᩋᨭ᩠ᨮᩣᩈᩥ. ᨲᨲ᩠ᨳ ᨶᩥᩈᩥᨶ᩠ᨶᩔ ᨠᩩᨾ᩠ᨽᨾᨲ᩠ᨲᩴ ᨩᨾ᩠ᨻᩩᨹᩃᩴ ᩌᩉᩁᩥᨲ᩠ᩅᩣ ᩋᨴᩣᩈᩥ. ᨽᨣᩅᩣ ᨲᩔ ᨧᩥᨲ᩠ᨲᨸ᩠ᨸᩈᩣᨴᨲ᩠ᨳᩣᨿ ᨲᩴ ᨹᩃᩴ ᨸᩁᩥᨽᩩᨬ᩠ᨩᩥ. ᩑᨲ᩠ᨲᨠᨾᩮᩅ ᩅᩥᩈᩮᩈᩮᩣ.

᪒᪒᪔. ᩋᨭ᩠ᨮᨾᩣᨸᨴᩣᨶᩮ ᩁᩣᨩᩣᩈᩥ ᩅᩥᨩᨿᩮᩣ ᨶᩣᨾᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨲᩮᩣᨴᩮᨿ᩠ᨿᨲ᩠ᨳᩮᩁᩔ ᩋᨸᨴᩣᨶᩴ. ᨲᨲ᩠ᨳ ᩁᩣᨩᩣᩈᩥ ᩅᩥᨩᨿᩮᩣ ᨶᩣᨾᩣᨲᩥ ᨴᩉᩁᨠᩣᩃᨲᩮᩣ ᨸᨭ᩠ᨮᩣᨿ ᩈᨻ᩠ᨻᩈᨦ᩠ᨣᩣᨾᩮᩈᩩ ᨩᩥᨶᨲᩮᩣ, ᨧᨲᩪᩉᩥ ᩈᨦ᩠ᨣᩉᩅᨲ᩠ᨳᩪᩉᩥ ᨩᨶᩴ ᩁᨬ᩠ᨩᨶᨲᩮᩣ ᩋᩃ᩠ᩃᩦᨿᨶᨲᩮᩣ ᩅᩥᨩᨿᩮᩣ ᨶᩣᨾ ᩁᩣᨩᩣ ᩋᩉᩮᩣᩈᩦᨲᩥ ᩋᨲ᩠ᨳᩮᩣ. ᨠᩮᨲᩩᨾᨲᩦᨸᩩᩁᩩᨲ᩠ᨲᨾᩮᨲᩥ ᨠᩮᨲᩩ ᩅᩩᨧ᩠ᨧᨶ᩠ᨲᩥ ᨵᨩᨸᨭᩣᨠᩣ. ᩋᨳ ᩅᩣ ᨶᨣᩁᩈᩮᩣᨽᨶᨲ᩠ᨳᩣᨿ ᨶᨣᩁᨾᨩ᩠ᨫᩮ ᩏᩔᩣᨸᩥᨲᩁᨲᨶᨲᩮᩣᩁᨱᩣᨶᩥ, ᨲᩮ ᨠᩮᨲᩪ ᨶᩥᨧ᩠ᨧᩴ ᩏᩔᩣᨸᩥᨲᩣ ᩈᩮᩣᨽᨿᨾᩣᨶᩣ ᩋᩔᩣ ᩋᨲ᩠ᨳᩦᨲᩥ ᨠᩮᨲᩩᨾᨲᩦ. ᨸᩪᩁᩮᨲᩥ ᨵᨶᨵᨬ᩠ᨬᩮᩉᩥ ᩈᨻ᩠ᨻᨩᨶᩣᨶᩴ ᨾᨶᨶ᩠ᨲᩥ ᨸᩩᩁᩴ. ᨠᩮᨲᩩᨾᨲᩦ ᨧ ᩈᩣ ᨸᩩᩁᨬ᩠ᨧ ᩈᩮᨭ᩠ᨮᨭ᩠ᨮᩮᨶ ᩏᨲ᩠ᨲᨾᨬ᩠ᨧᩮᨲᩥ ᨠᩮᨲᩩᨾᨲᩦᨸᩩᩁᩩᨲ᩠ᨲᨾᩴ, ᨲᩈ᩠ᨾᩥᩴ ᨠᩮᨲᩩᨾᨲᩦᨸᩩᩁᩩᨲ᩠ᨲᨾᩮ. ᩈᩪᩁᩮᩣ ᩅᩥᨠ᩠ᨠᨾᩈᨾ᩠ᨸᨶ᩠ᨶᩮᩣᨲᩥ ᩋᨽᩦᨲᩮᩣ ᩅᩦᩁᩥᨿᩈᨾ᩠ᨸᨶ᩠ᨶᩮᩣ ᩅᩥᨩᨿᩮᩣ ᨶᩣᨾ ᩁᩣᨩᩣ ᩋᨩ᩠ᨫᩣᩅᩈᩦᨲᩥ ᩈᨾ᩠ᨻᨶ᩠ᨵᩮᩣ. ᩍᨲ᩠ᨳᩴ ¶ ᨽᩪᨲᩴ ᨸᩩᩁᨬ᩠ᨧ ᩈᨻ᩠ᨻᩅᨲ᩠ᨳᩩᩅᩣᩉᨶᨬ᩠ᨧ ᨨᨯ᩠ᨯᩮᨲ᩠ᩅᩣ ᩉᩥᨾᩅᨶ᩠ᨲᩴ ᨸᩅᩥᩈᩥᨲ᩠ᩅᩣ ᩍᩈᩥᨸᨻ᩠ᨻᨩ᩠ᨩᩴ ᨸᨻ᩠ᨻᨩᩥᨲ᩠ᩅᩣ ᩅᩈᨶ᩠ᨲᩮᩣ ᩈᩩᨾᩮᨵᨽᨣᩅᨶ᩠ᨲᩴ ᨴᩥᩈ᩠ᩅᩣ ᩈᩮᩣᨾᨶᩔᩴ ᩏᨸ᩠ᨸᩣᨴᩮᨲ᩠ᩅᩣ ᨧᨶ᩠ᨴᨶᩮᨶ ᨸᩪᨩᩣᨠᩁᨱᨾᩮᩅ ᩅᩥᩈᩮᩈᩮᩣ.

᪒᪗᪖. ᨶᩅᨾᩣᨸᨴᩣᨶᩮ ᨶᨣᩁᩮ ᩉᩴᩈᩅᨲᩥᨿᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨩᨲᩩᨠᨱ᩠ᨱᩥᨲ᩠ᨳᩮᩁᩔ ᩋᨸᨴᩣᨶᩴ ¶ . ᨲᨲ᩠ᨳ ᩈᩮᨭ᩠ᨮᩥᨸᩩᨲ᩠ᨲᩮᩣ ᩉᩩᨲ᩠ᩅᩣ ᩈᩩᩅᨱ᩠ᨱᨸᩣᩈᩣᨴᩮ ᩅᩈᨶᨽᩣᩅᩮᩣ ᨧ ᨸᨬ᩠ᨧᩉᩥ ᨠᩣᨾᨣᩩᨱᩮᩉᩥ ᩈᨾᨦ᩠ᨣᩦ ᩉᩩᨲ᩠ᩅᩣ ᩅᩈᨶᨽᩣᩅᩮᩣ ᨧ ᩈᨻ᩠ᨻᨴᩮᩈᩅᩣᩈᩦᨶᩴ ᩈᨻ᩠ᨻᩈᩥᨸ᩠ᨸᩅᩥᨬ᩠ᨬᩪᨶᨬ᩠ᨧ ᩌᨣᨶ᩠ᨲ᩠ᩅᩣ ᩈᩮᩅᨶᨽᩣᩅᩮᩣ ᨧ ᩅᩥᩈᩮᩈᩮᩣ.

᪓᪓᪐. ᨴᩈᨾᩣᨸᨴᩣᨶᩮ ᩉᩥᨾᩅᨶ᩠ᨲᩔᩣᩅᩥᨴᩪᩁᩮᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩏᨴᩮᨶᨲ᩠ᨳᩮᩁᩔ ᩋᨸᨴᩣᨶᩴ. ᨲᨲ᩠ᨳ ᩉᩥᨾᩅᨶ᩠ᨲᩈᨾᩦᨸᩮ ᨸᨴᩩᨾᨸᨻ᩠ᨻᨲᩴ ᨶᩥᩔᩣᨿ ᨲᩣᨸᩈᨸᨻ᩠ᨻᨩ᩠ᨩᩴ ¶ ᨸᨻ᩠ᨻᨩᩥᨲ᩠ᩅᩣ ᩅᩈᨶ᩠ᨲᩮᨶ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨸᨴᩩᨾᨸᩩᨸ᩠ᨹᩴ ᨣᩉᩮᨲ᩠ᩅᩣ ᨸᩪᨩᩥᨲᨽᩣᩅᩮᩣᩅ ᩅᩥᩈᩮᩈᩮᩣ. ᩈᩮᩈᩴ ᩈᨻ᩠ᨻᨲ᩠ᨳ ᩏᨲ᩠ᨲᩣᨶᨾᩮᩅᩣᨲᩥ.

ᩑᨠᨧᨲ᩠ᨲᩣᩃᩦᩈᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪔᪒. ᨽᨴ᩠ᨴᩣᩃᩥᩅᨣ᩠ᨣᩮᩣ

᪑-᪑᪐. ᨽᨴ᩠ᨴᩣᩃᩥᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

ᨻᩣᨧᨲ᩠ᨲᩣᩃᩦᩈᨾᩅᨣ᩠ᨣᩮ ¶ ᨸᨮᨾᩣᨸᨴᩣᨶᨬ᩠ᨧ ᨴᩩᨲᩥᨿᩣᨸᨴᩣᨶᨬ᩠ᨧ ᨲᨲᩥᨿᩣᨸᨴᩣᨶᨬ᩠ᨧ ᨶᨿᩣᨶᩩᩈᩣᩁᩮᨶ ᩈᩩᩅᩥᨬ᩠ᨬᩮᨿ᩠ᨿᨾᩮᩅ.

᪑᪐᪖. ᨧᨲᩩᨲ᩠ᨳᩣᨸᨴᩣᨶᩮ ᨶᨣᩁᩮ ᨻᨶ᩠ᨵᩩᨾᨲᩥᨿᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨾᨵᩩᨾᩴᩈᨴᩣᨿᨠᨲ᩠ᨳᩮᩁᩔ ᩋᨸᨴᩣᨶᩴ. ᨲᨲ᩠ᨳ ᩈᩪᨠᩁᩥᨠᩮᩣᨲᩥ ᩈᩪᨠᩁᨾᩴᩈᩴ ᩅᩥᨠ᩠ᨠᩥᨱᩥᨲ᩠ᩅᩣ ᨩᩦᩅᩥᨠᩴ ᨠᨸ᩠ᨸᩮᨶ᩠ᨲᩮᩣ. ᩏᨠ᩠ᨠᩮᩣᨭᨠᩴ ᩁᨶ᩠ᨵᨿᩥᨲ᩠ᩅᩣᨲᩥ ᨸᩥᩉᨠᨸᨸ᩠ᨹᩣᩈᨾᩴᩈᩴ ᨸᨧᩥᨲ᩠ᩅᩣ ᨾᨵᩩᨾᩴᩈᨾ᩠ᩉᩥ ᩒᨠᩥᩁᩥᩴ ᨸᨠ᩠ᨡᩥᨸᩥᩴ. ᨲᩮᨶ ᨾᩴᩈᩮᨶ ᨸᨲ᩠ᨲᩴ ᨸᩪᩁᩮᨲ᩠ᩅᩣ ᨽᩥᨠ᩠ᨡᩩᩈᨦ᩠ᨥᩔ ᨴᨲ᩠ᩅᩣ ᨲᩮᨶ ᨸᩩᨬ᩠ᨬᨠᨾ᩠ᨾᩮᨶ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩋᩁᩉᨲ᩠ᨲᩴ ᨸᩣᨸᩩᨱᩥᨶ᩠ᨲᩥ ᩋᨲ᩠ᨳᩮᩣ.

ᨶᩣᨣᨸᩃ᩠ᩃᩅᨲ᩠ᨳᩮᩁᩔ ᨸᨬ᩠ᨧᨾᩣᨸᨴᩣᨶᨾ᩠ᨸᩥ ᩑᨠᨴᩦᨸᩥᨿᨲ᩠ᨳᩮᩁᩔ ᨨᨭ᩠ᨮᩣᨸᨴᩣᨶᨾ᩠ᨸᩥ ᩏᨧ᩠ᨨᨦ᩠ᨣᨸᩩᨸ᩠ᨹᩥᨿᨲ᩠ᨳᩮᩁᩔ ᩈᨲ᩠ᨲᨾᩣᨸᨴᩣᨶᨾ᩠ᨸᩥ ᨿᩣᨣᩩᨴᩣᨿᨠᨲ᩠ᨳᩮᩁᩔ ᩋᨭ᩠ᨮᨾᩣᨸᨴᩣᨶᨾ᩠ᨸᩥ ᨸᨲ᩠ᨳᩮᩣᨴᨶᨴᩣᨿᨠᨲ᩠ᨳᩮᩁᩔ ᨶᩅᨾᩣᨸᨴᩣᨶᨾ᩠ᨸᩥ ᨾᨬ᩠ᨧᨴᩣᨿᨠᨲ᩠ᨳᩮᩁᩔ ᨴᩈᨾᩣᨸᨴᩣᨶᨾ᩠ᨸᩥ ᩈᨻ᩠ᨻᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᨻᩣᨧᨲ᩠ᨲᩣᩃᩦᩈᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪔᪓-᪔᪘. ᩈᨠᩥᩴᩈᨾ᩠ᨾᨩ᩠ᨩᨠᩣᨴᩥᩅᨣ᩠ᨣᩮᩣ

᪑-᪖᪐. ᩈᨠᩥᩴᩈᨾ᩠ᨾᨩ᩠ᨩᨠᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

ᨲᩮᨧᨲ᩠ᨲᩣᩃᩦᩈᨾᩅᨣ᩠ᨣᩮ ¶ ¶ ᩈᨻ᩠ᨻᨳᩮᩁᩣᨸᨴᩣᨶᩣᨶᩥ ᩏᨲ᩠ᨲᩣᨶᩣᨶᩮᩅ. ᨠᩮᩅᩃᩴ ᨳᩮᩁᩣᨶᩴ ᨶᩣᨾᨶᩣᨶᨲ᩠ᨲᩴ ᨸᩩᨬ᩠ᨬᨶᩣᨶᨲ᩠ᨲᨬ᩠ᨧ ᩅᩥᩈᩮᩈᩮᩣ.

ᨧᨲᩩᨧᨲ᩠ᨲᩣᩃᩦᩈᨾᩮ ᩅᨣ᩠ᨣᩮᨸᩥ ᩈᨻ᩠ᨻᩣᨶᩥ ᩋᨸᨴᩣᨶᩣᨶᩥ ᨸᩣᨠᨭᩣᨶᩮᩅ. ᨠᩮᩅᩃᩴ ᨸᩩᨬ᩠ᨬᨶᩣᨶᨲ᩠ᨲᩴ ᨹᩃᨶᩣᨶᨲ᩠ᨲᨬ᩠ᨧ ᩅᩥᩈᩮᩈᩮᩣ.

᪑. ᨸᨬ᩠ᨧᨧᨲ᩠ᨲᩣᩃᩦᩈᨾᩅᨣ᩠ᨣᩮ ᨸᨮᨾᩣᨸᨴᩣᨶᩮ ᨠᨠᩩᩈᨶ᩠ᨵᩮᩣ ᨾᩉᩣᩅᩦᩁᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩅᩥᨽᩦᨭᨠᨾᩥᨬ᩠ᨩᩥᨿᨲ᩠ᨳᩮᩁᩔ ᩋᨸᨴᩣᨶᩴ.

᪒. ᨲᨲ᩠ᨳ ¶ ᨻᩦᨩᨾᩥᨬ᩠ᨩᨾᨴᩣᩈᩉᨶ᩠ᨲᩥ ᩅᩥᨽᩦᨭᨠᨹᩃᩣᨶᩥ ᨹᩣᩃᩮᨲ᩠ᩅᩣ ᨻᩦᨩᩣᨶᩥ ᨾᩥᨬ᩠ᨩᩣᨶᩥ ᨣᩉᩮᨲ᩠ᩅᩣ ᨾᨵᩩᩈᨠ᩠ᨠᩁᩣᩉᩥ ᨿᩮᩣᨩᩮᨲ᩠ᩅᩣ ᨠᨠᩩᩈᨶ᩠ᨵᩔ ᨽᨣᩅᨲᩮᩣ ᩋᨴᩣᩈᩥᨶ᩠ᨲᩥ ᩋᨲ᩠ᨳᩮᩣ. ᨴᩩᨲᩥᨿᩣᨸᨴᩣᨶᩣᨴᩦᨶᩥ ᩈᨻ᩠ᨻᩣᨶᩥ ᩈᩩᩅᩥᨬ᩠ᨬᩮᨿ᩠ᨿᩣᨶᩮᩅ, ᨳᩮᩁᩣᨶᩴ ᨶᩣᨾᨶᩣᨶᨲ᩠ᨲᩣᨴᩦᨶᩥᨸᩥ ᨸᩣᨮᩣᨶᩩᩈᩣᩁᩮᨶ ᩅᩮᨴᩥᨲᨻ᩠ᨻᩣᨶᩥ.

᪑. ᨨᨧᨲ᩠ᨲᩣᩃᩦᩈᨾᩮ ᩅᨣ᩠ᨣᩮ ᨸᨮᨾᩣᨸᨴᩣᨶᩮ ᨩᨣᨲᩥᩴ ᨠᩣᩁᨿᩥᩴ ᩋᩉᨶ᩠ᨲᩥ ᩏᨲ᩠ᨲᨾᨻᩮᩣᨵᩥᩁᩩᨠ᩠ᨡᩔ ᩈᨾᨶ᩠ᨲᨲᩮᩣ ᩌᩊᩥᨶ᩠ᨴᩴ ᩋᩉᩴ ᨠᩣᩁᨿᩥᨶ᩠ᨲᩥ ᩋᨲ᩠ᨳᩮᩣ. ᩈᩮᩈᩣᨶᩥ ᨴᩩᨲᩥᨿᩣᨸᨴᩣᨶᩣᨴᩦᨶᩥ ᩈᨻ᩠ᨻᩣᨶᩥᨸᩥ ᩏᨲ᩠ᨲᩣᨶᩣᨶᩮᩅ.

ᩈᨲ᩠ᨲᨧᨲ᩠ᨲᩣᩃᩦᩈᨾᩮ ᩅᨣ᩠ᨣᩮ ᨸᨮᨾᩣᨸᨴᩣᨶᩣᨴᩦᨶᩥ ᨸᩣᩊᩥᩋᨶᩩᩈᩣᩁᩮᨶ ᩈᩩᩅᩥᨬ᩠ᨬᩮᨿ᩠ᨿᩣᨶᩮᩅ.

ᩋᨭ᩠ᨮᨧᨲ᩠ᨲᩣᩃᩦᩈᨾᩮ ᩅᨣ᩠ᨣᩮ ᨸᨮᨾᨴᩩᨲᩥᨿᩣᨸᨴᩣᨶᩣᨶᩥ ᩏᨲ᩠ᨲᩣᨶᩣᨶᩮᩅ.

᪓᪐. ᨲᨲᩥᨿᩣᨸᨴᩣᨶᩮ ᨠᩮᩣᩈᩥᨿᩮᩣ ᨶᩣᨾ ᨽᨣᩅᩣᨲᩥ ᨠᩮᩣᩈᩥᨿᨣᩮᩣᨲ᩠ᨲᩮ ᨩᩣᨲᨲ᩠ᨲᩣ ᨠᩮᩣᩈᩥᨿᩮᩣ ᨶᩣᨾ ᨸᨧ᩠ᨧᩮᨠᨻᩩᨴ᩠ᨵᩮᩣᨲᩥ ¶ ᩋᨲ᩠ᨳᩮᩣ. ᨧᩥᨲ᩠ᨲᨠᩪᨭᩮᨲᩥ ᨧᩥᨲ᩠ᨲᨠᩪᨭᨠᩮᩃᩣᩈᨠᩪᨭᩈᩣᨶᩩᨠᩪᨭᩣᨴᩦᩈᩩ ᩋᨶᩮᩣᨲᨲ᩠ᨲᨴᩉᩴ ᨸᨭᩥᨧ᩠ᨨᩣᨴᩮᨲ᩠ᩅᩣ ᨮᩥᨲᨸᨻ᩠ᨻᨲᨠᩪᨭᩮᩈᩩ ᨶᩣᨶᩣᩁᨲᨶᩒᩈᨵᩣᨴᩦᩉᩥ ᩅᩥᨧᩥᨲ᩠ᨲᩮ ᨧᩥᨲ᩠ᨲᨠᩪᨭᨸᨻ᩠ᨻᨲᩮ ᩈᩮᩣ ᨸᨧ᩠ᨧᩮᨠᨻᩩᨴ᩠ᨵᩮᩣ ᩅᩈᩦᨲᩥ ᩋᨲ᩠ᨳᩮᩣ.

ᨧᨲᩩᨲ᩠ᨳᨸᨬ᩠ᨧᨾᩣᨸᨴᩣᨶᩣᨶᩥ ᩏᨲ᩠ᨲᩣᨶᩣᨶᩮᩅ.

᪕᪖. ᨨᨭ᩠ᨮᩣᨸᨴᩣᨶᩮ ᨠᩩᩈᨭ᩠ᨮᨠᨾᨴᩣᩈᩉᨶ᩠ᨲᩥ ᨸᨠ᩠ᨡᩥᨠᨽᨲ᩠ᨲᩏᨸᩮᩣᩈᨳᩥᨠᨽᨲ᩠ᨲᨵᩩᩁᨽᨲ᩠ᨲᩈᩃᩣᨠᨽᨲ᩠ᨲᩣᨴᩦᩈᩩ ᨠᩩᩈᨸᨱ᩠ᨱᩅᩈᩮᨶ ᨴᩣᨲᨻ᩠ᨻᩴ ᩋᨭ᩠ᨮᩈᩃᩣᨠᨽᨲ᩠ᨲᩴ ᩋᩉᩴ ᩋᨴᩣᩈᩥᨶ᩠ᨲᩥ ᩋᨲ᩠ᨳᩮᩣ.

᪖᪑. ᩈᨲ᩠ᨲᨾᩣᨸᨴᩣᨶᩮ ᩈᩮᩣᨽᩥᨲᩮᩣ ᨶᩣᨾ ᩈᨾ᩠ᨻᩩᨴ᩠ᨵᩮᩣᨲᩥ ᩌᩁᩮᩣᩉᨸᩁᩥᨱᩣᩉᨴ᩠ᩅᨲ᩠ᨲᩥᩴᩈᨾᩉᩣᨸᩩᩁᩥᩈᩃᨠ᩠ᨡᨱᨻ᩠ᨿᩣᨾᨸ᩠ᨸᨽᩣᨴᩦᩉᩥ ᩈᩮᩣᨽᨾᩣᨶᩈᩁᩦᩁᨲ᩠ᨲᩣ ᩈᩮᩣᨽᩥᨲᩮᩣ ᨶᩣᨾ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣᨲᩥ ᩋᨲ᩠ᨳᩮᩣ.

᪖᪖. ᩋᨭ᩠ᨮᨾᩣᨸᨴᩣᨶᩮ ¶ ᨲᨠ᩠ᨠᩁᩣᨿᩴ ᩅᩈᩦ ᨲᨴᩣᨲᩥ ᨲᩴ ᨴᩈᨸᩩᨬ᩠ᨬᨠᩥᩁᩥᨿᩅᨲ᩠ᨳᩩᩴ ᨠᩁᩮᩣᨶ᩠ᨲᩣ ᨩᨶᩣ ᨸᨭᩥᩅᩈᨶ᩠ᨲᩥ ᩑᨲ᩠ᨳᩣᨲᩥ ᨲᨠ᩠ᨠᩁᩣ, ᩁᩣᨩᨵᩣᨶᩦ. ᨲᩥᩔᩴ ᨲᨠ᩠ᨠᩁᩣᨿᩴ, ᨲᨴᩣ ᩅᩈᩦᨲᩥ ᩋᨲ᩠ᨳᩮᩣ.

᪗᪒. ᨶᩅᨾᩣᨸᨴᩣᨶᩮ ¶ ᨸᩣᨶᨵᩥᩴ ᩈᩩᨠᨲᩴ ᨣᨿ᩠ᩉᩣᨲᩥ ᩏᨸᩣᩉᨶᨿᩩᨣᩴ ᩈᩩᨶ᩠ᨴᩁᩣᨠᩣᩁᩮᨶ ᨶᩥᨸ᩠ᨹᩣᨴᩥᨲᩴ ᨣᩉᩮᨲ᩠ᩅᩣᨲᩥ ᩋᨲ᩠ᨳᩮᩣ. ᨴᩈᨾᩣᨸᨴᩣᨶᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩋᨭ᩠ᨮᨧᨲ᩠ᨲᩣᩃᩦᩈᨾᩅᨣ᩠ᨣᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪔᪙. ᨸᩴᩈᩩᨠᩪᩃᩅᨣ᩠ᨣᩮᩣ

᪑-᪑᪐. ᨸᩴᩈᩩᨠᩪᩃᩈᨬ᩠ᨬᨠᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

ᩑᨠᩪᨶᨸᨬ᩠ᨬᩣᩈᨾᩅᨣ᩠ᨣᩮ ¶ ᨸᨮᨾᩣᨸᨴᩣᨶᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅ.

᪑᪔. ᨴᩩᨲᩥᨿᩣᨸᨴᩣᨶᩮ ᩋᨵᩥᨧ᩠ᨧᩩᨸ᩠ᨸᨲ᩠ᨲᩥᨠᩣ ᨻᩩᨴ᩠ᨵᩣᨲᩥ ᩋᨵᩥᨧ᩠ᨧᩮᨶ ᩋᨠᩣᩁᨱᩮᨶ ᩏᨸ᩠ᨸᨲ᩠ᨲᩥᨠᩣ ᩈᨿᨾ᩠ᨽᩪᨲᩣ, ᩋᨬ᩠ᨬᩮᩉᩥ ᨴᩮᩅᨻᩕᩉ᩠ᨾᨾᩣᩁᩣᨴᩦᩉᩥ ᩏᨸᨴᩮᩈᨴᩣᨿᨠᩮᩉᩥ ᩁᩉᩥᨲᩣ ᩈᨿᨾ᩠ᨽᩪᨬᩣᨱᩮᨶ ᩏᨸ᩠ᨸᨶ᩠ᨶᩣ ᨩᩣᨲᩣ ᨸᩣᨲᩩᨽᩪᨲᩣᨲᩥ ᩋᨲ᩠ᨳᩮᩣ.

᪑᪖. ᩒᨴᩩᨾ᩠ᨻᩁᩥᨠᨸᩩᨸ᩠ᨹᩴ ᩅᩣᨲᩥ ᩏᨴᩩᨾ᩠ᨻᩁᩁᩩᨠ᩠ᨡᩮ ᨸᩩᨸ᩠ᨹᩴ ᨴᩩᩃ᩠ᩃᨽᩴ ᨴᩩᩃ᩠ᩃᨽᩩᨸ᩠ᨸᨲ᩠ᨲᩥᨠᩴ ᩍᩅ. ᨧᨶ᩠ᨴᨾ᩠ᩉᩥ ᩈᩈᨠᩴ ᨿᨳᩣᨲᩥ ᨧᨶ᩠ᨴᨾᨱ᩠ᨯᩃᩮ ᩈᩈᩃᩮᨡᩣᨿ ᩁᩪᨸᩴ ᨴᩩᩃ᩠ᩃᨽᩴ ᨿᨳᩣ. ᩅᩣᨿᩈᩣᨶᩴ ᨿᨳᩣ ᨡᩦᩁᨶ᩠ᨲᩥ ᨠᩣᨠᩣᨶᩴ ᨶᩥᨧ᩠ᨧᩴ ᩁᨲ᩠ᨲᩥᨶ᩠ᨴᩥᩅᩴ ᨡᩩᨴ᩠ᨴᩣᨸᩦᩊᩥᨲᨽᩣᩅᩮᨶ ᨡᩦᩁᩴ ᨴᩩᩃ᩠ᩃᨽᩴ ᨿᨳᩣ, ᩑᩅᩴ ᨴᩩᩃ᩠ᩃᨽᩴ ᩃᩮᩣᨠᨶᩣᨿᨠᩴ ᨧᨲᩩᩁᩣᩈᨦ᩠ᨡ᩠ᨿᩮᨿ᩠ᨿᩴ ᩅᩣ ᩋᨭ᩠ᨮᩣᩈᨦ᩠ᨡ᩠ᨿᩮᨿ᩠ᨿᩴ ᩅᩣ ᩈᩮᩣᩊᩈᩣᩈᨦ᩠ᨡ᩠ᨿᩮᨿ᩠ᨿᩴ ᩅᩣ ᨠᨸ᩠ᨸᩈᨲᩈᩉᩔᩴ ᨸᩣᩁᨾᩥᨿᩮᩣ ᨸᩪᩁᩮᨲ᩠ᩅᩣ ᨻᩩᨴ᩠ᨵᨽᩣᩅᨲᩮᩣ ᨴᩩᩃ᩠ᩃᨽᩮᩣ ᩃᩮᩣᨠᨶᩣᨿᨠᩮᩣᨲᩥ ᩋᨲ᩠ᨳᩮᩣ.

᪓᪐. ᨲᨲᩥᨿᩣᨸᨴᩣᨶᩮ ᨾᨵᩩᩴ ᨽᩥᩈᩮᩉᩥ ᩈᩅᨲᩦᨲᩥ ᨸᩮᩣᨠ᩠ᨡᩁᨾᨵᩩᨸᨴᩩᨾᨠᩮᩈᩁᩮᩉᩥ ᩈᩅᨲᩥ ᨸᨣ᩠ᨥᩁᨲᩥ. ᨡᩦᩁᩴ ᩈᨸ᩠ᨸᩥᩴ ᨾᩩᩊᩣᩃᩥᨽᩦᨲᩥ ᨡᩦᩁᨬ᩠ᨧ ᩈᨸ᩠ᨸᩥᩁᩈᨬ᩠ᨧ ᨸᨴᩩᨾᨾᩩᩊᩣᩃᩮᩉᩥ ᩈᩅᨲᩥ ᨸᨣ᩠ᨥᩁᨲᩥ. ᨲᩈ᩠ᨾᩣ ᨲᨴᩩᨽᨿᩴ ᨾᨾ ᩈᨶ᩠ᨲᨠᩴ ᨻᩩᨴ᩠ᨵᩮᩣ ᨸᨭᩥᨣ᩠ᨣᨱ᩠ᩉᨲᩪᨲᩥ ᩋᨲ᩠ᨳᩮᩣ.

ᨧᨲᩩᨲ᩠ᨳᨸᨬ᩠ᨧᨾᨨᨭ᩠ᨮᩣᨸᨴᩣᨶᩣᨶᩥ ᩏᨲ᩠ᨲᩣᨶᩣᨶᩮᩅ.

᪑᪑᪙. ᩈᨲ᩠ᨲᨾᩣᨸᨴᩣᨶᩮ ᨧᨲ᩠ᨲᩣᩃᩦᩈᨴᩥᨩᩣᨸᩥ ᨧᩣᨲᩥ ᨴ᩠ᩅᩥᨠ᩠ᨡᨲ᩠ᨲᩩᩴ ᨩᩣᨲᩣᨲᩥ ᨴᩥᨩᩣ. ᨠᩩᨾᩣᩁᩅᨿᩮ ᩏᨭ᩠ᨮᩥᨲᨴᨶ᩠ᨲᩣᨶᩴ ᨸᨲᩥᨲᨲ᩠ᨲᩣ ᨸᩩᨶ ᩏᨭ᩠ᨮᩥᨲᨴᨶ᩠ᨲᩣ ᨴᩥᨩᩣ, ᨲᩮ ᨧ ᨴᨶ᩠ᨲᩣ. ᨻ᩠ᨿᩣᨠᩁᨱᨬ᩠ᨧ ᩉᩮᨭ᩠ᨮᩣ ᨶᩥᨴᩣᨶᨠᨳᩣᨿᩴ ᩅᩩᨲ᩠ᨲᨾᩮᩅ.

ᩋᨭ᩠ᨮᨾᩣᨸᨴᩣᨶᩴ ᩏᨲ᩠ᨲᩣᨶᨾᩮᩅᩣᨲᩥ.

᪑᪗᪑. ᨶᩅᨾᩣᨸᨴᩣᨶᩮ ¶ ᨲᨴᩣᩉᩴ ᨾᩣᨱᩅᩮᩣ ᩌᩈᩥᨶ᩠ᨲᩥ ᨿᨴᩣ ᩈᩩᨾᩮᨵᨸᨱ᩠ᨯᩥᨲᩮᩣ ᨴᩦᨸᨦ᩠ᨠᩁᨽᨣᩅᨲᩮᩣ ᩈᨶ᩠ᨲᩥᨠᩣ ᨻ᩠ᨿᩣᨠᩁᨱᩴ ᩃᨽᩥ, ᨲᨴᩣ ᩋᩉᩴ ᨾᩮᨥᩮᩣ ᨶᩣᨾ ᨻᩕᩣᩉ᩠ᨾᨱᨾᩣᨱᩅᩮᩣ ¶ ᩉᩩᨲ᩠ᩅᩣ ᩈᩩᨾᩮᨵᨲᩣᨸᩈᩮᨶ ᩈᩉ ᩍᩈᩥᨸᨻ᩠ᨻᨩ᩠ᨩᩴ ¶ ᨸᨻ᩠ᨻᨩᩥᨲ᩠ᩅᩣ ᩈᩥᨠ᩠ᨡᩣᨸᨴᩮᩈᩩ ᩈᩥᨠ᩠ᨡᩥᨲᩮᩣ ᨠᩮᨶᨧᩥ ᨸᩣᨸᩈᩉᩣᨿᩮᨶ ᩈᩴᩈᨭ᩠ᨮᩮᩣ ᩈᩴᩈᨣ᩠ᨣᨴᩮᩣᩈᩮᨶ ᨸᩣᨸᩅᩥᨲᨠ᩠ᨠᩣᨴᩥᩅᩈᩴ ᨣᨲᩮᩣ ᨾᩣᨲᩩᨥᩣᨲᨠᨾ᩠ᨾᩅᩈᩮᨶ ᨶᩁᨠᩮ ᩋᨣ᩠ᨣᩥᨩᩣᩃᩣᨴᩥᨴᩩᨠ᩠ᨡᨾᨶᩩᨽᩅᩥᨲ᩠ᩅᩣ ᨲᨲᩮᩣ ᨧᩩᨲᩮᩣ ᩈᨾᩩᨴ᩠ᨴᩮ ᨲᩥᨾᩥᨦ᩠ᨣᩃᨾᩉᩣᨾᨧ᩠ᨨᩮᩣ ᩉᩩᨲ᩠ᩅᩣ ᨶᩥᨻ᩠ᨻᨲ᩠ᨲᩮᩣ, ᩈᨾᩩᨴ᩠ᨴᨾᨩ᩠ᨫᩮ ᨣᨧ᩠ᨨᨶ᩠ᨲᩴ ᨾᩉᩣᨶᩣᩅᩴ ᨣᩥᩃᩥᨲᩩᨠᩣᨾᩮᩣ ᨣᨲᩮᩣ. ᨴᩥᩈ᩠ᩅᩣ ᨾᩴ ᩅᩣᨱᩥᨩᩣ ᨽᩦᨲᩣ ‘‘ᩋᩉᩮᩣ ᨣᩮᩣᨲᨾᩮᩣ ᨽᨣᩅᩣ’’ᨲᩥ ᩈᨴ᩠ᨴᨾᨠᩴᩈᩩ. ᩋᨳ ᨾᩉᩣᨾᨧ᩠ᨨᩮᩣ ᨸᩩᨻ᩠ᨻᩅᩣᩈᨶᩣᩅᩈᩮᨶ ᨻᩩᨴ᩠ᨵᨣᩣᩁᩅᩴ ᩏᨸ᩠ᨸᩣᨴᩮᨲ᩠ᩅᩣ ᨲᨲᩮᩣ ᨧᩩᨲᩮᩣ ᩈᩣᩅᨲ᩠ᨳᩥᨿᩴ ᩅᩥᨽᩅᩈᨾ᩠ᨸᨶ᩠ᨶᩮ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩮᩣ ᩈᨴ᩠ᨵᩮᩣ ᨸᩈᨶ᩠ᨶᩮᩣ ᩈᨲ᩠ᨳᩩ ᨵᨾ᩠ᨾᨴᩮᩈᨶᩴ ᩈᩩᨲ᩠ᩅᩣ ᨸᨻ᩠ᨻᨩᩥᨲ᩠ᩅᩣ ᩈᩉ ᨸᨭᩥᩈᨾ᩠ᨽᩥᨴᩣᩉᩥ ᩋᩁᩉᨲ᩠ᨲᩴ ᨸᩣᨸᩩᨱᩥᨲ᩠ᩅᩣ ᨴᩥᩅᩈᩔ ᨲᩥᨠ᩠ᨡᨲ᩠ᨲᩩᩴ ᩏᨸᨭ᩠ᨮᩣᨶᩴ ᨣᨶ᩠ᨲ᩠ᩅᩣ ᩈᩁᨾᩣᨶᩮᩣ ᩅᨶ᩠ᨴᨲᩥ. ᨲᨴᩣ ᨽᨣᩅᩣ ‘‘ᨧᩥᩁᩴ ᨵᨾ᩠ᨾᩁᩩᨧᩦ’’ᨲᩥ ᨾᩴ ᩌᩉ.

᪑᪘᪔. ᩋᨳ ᩈᩮᩣ ᨳᩮᩁᩮᩣ ‘‘ᩈᩩᨧᩥᩁᩴ ᩈᨲᨸᩩᨬ᩠ᨬᩃᨠ᩠ᨡᨱ’’ᨶ᩠ᨲᩥᩌᨴᩦᩉᩥ ᨣᩣᨳᩣᩉᩥ ᨳᩮᩣᨾᩮᩈᩥ. ᨽᨶ᩠ᨲᩮ, ᩈᨲᨸᩩᨬ᩠ᨬᩃᨠ᩠ᨡᨱᨵᩁ ᨣᩮᩣᨲᨾ. ᨸᨲᩥᨸᩩᨻ᩠ᨻᩮᨶ ᩅᩥᩈᩩᨴ᩠ᨵᨸᨧ᩠ᨧᨿᨶ᩠ᨲᩥ ᨸᩩᨻ᩠ᨻᩮ ᨴᩦᨸᨦ᩠ᨠᩁᨸᩣᨴᨾᩪᩃᩮ ᨸᩁᩥᨸᩩᨱ᩠ᨱᨸᩣᩁᨾᩦᨸᨧ᩠ᨧᨿᩈᨾ᩠ᨽᩣᩁᩮᩣ ᩈᩩᨭ᩠ᨮᩩ ᨧᩥᩁᩴ ᨠᩣᩃᩴ ᨾᨿᩣ ᨶ ᨴᩥᨭ᩠ᨮᩮᩣ ᩋᩈᩦᨲᩥ ᩋᨲ᩠ᨳᩮᩣ. ᩋᩉᨾᨩ᩠ᨩᩈᩩᨸᩮᨠ᩠ᨡᨶᨶ᩠ᨲᩥ ᩋᨩ᩠ᨩ ᩍᨾᩈ᩠ᨾᩥᩴ ᨴᩥᩅᩈᩮ ᩋᩉᩴ ᩈᩩᨸᩮᨠ᩠ᨡᨶᩴ ᩈᩩᨶ᩠ᨴᩁᨴᩔᨶᩴ, ᩈᩩᨶ᩠ᨴᩁᨴᩥᨭ᩠ᨮᩴ ᩅᩣ ᨶᩥᩁᩩᨸᨾᩴ ᩅᩥᨣ᩠ᨣᩉᩴ ᩏᨸᨾᩣᩁᩉᩥᨲᩈᩁᩦᩁᩴ ᨣᩮᩣᨲᨾᩴ ᩅᨲ ᩑᨠᨶ᩠ᨲᩮᨶ ᨸᩔᩣᨾᩥ ᨴᨠ᩠ᨡᩣᨾᩦᨲᩥ ᩋᨲ᩠ᨳᩮᩣ.

᪑᪘᪕-᪑᪘᪖. ᩈᩩᨧᩥᩁᩴ ᩅᩥᩉᨲᨲᨾᩮᩣ ᨾᨿᩣᨲᩥ ᩅᩥᩈᩮᩈᩮᨶ ᩉᨲᨲᨾᩮᩣ ᩅᩥᨴ᩠ᨵᩴᩈᩥᨲᨾᩮᩣᩉᩮᩣ ᨲ᩠ᩅᩴ ᨾᨿᩣᨸᩥ ᩈᩩᨭ᩠ᨮᩩ ᨧᩥᩁᩴ ᨳᩮᩣᨾᩥᨲᩮᩣᨲᩥ ᩋᨲ᩠ᨳᩮᩣ. ᩈᩩᨧᩥᩁᨠ᩠ᨡᩮᨶ ᨶᨴᩦ ᩅᩥᩈᩮᩣᩈᩥᨲᩣᨲᩥ ᩑᩈᩣ ᨲᨱ᩠ᩉᩣᨶᨴᩦ ᩈᩩᨶ᩠ᨴᩁᩁᨠ᩠ᨡᩮᨶ ᨣᩮᩣᨸᨶᩮᨶ ᩅᩥᩈᩮᩈᩮᨶ ᩈᩮᩣᩈᩥᨲᩣ, ᩋᨽᨻ᩠ᨻᩩᨸ᩠ᨸᨲ᩠ᨲᩥᨠᨲᩣ ᨲᨿᩣᨲᩥ ᩋᨲ᩠ᨳᩮᩣ. ᩈᩩᨧᩥᩁᩴ ᩋᨾᩃᩴ ᩅᩥᩈᩮᩣᨵᩥᨲᨶ᩠ᨲᩥ ᩈᩩᨭ᩠ᨮᩩ ᨧᩥᩁᩴ ᨴᩦᨥᩮᨶ ᩋᨴ᩠ᨵᩩᨶᩣ ᩋᨾᩃᩴ ᨶᩥᨻ᩠ᨻᩣᨶᩴ ᩅᩥᩈᩮᩈᩮᨶ ᩈᩮᩣᨵᩥᨲᩴ, ᩈᩩᨭ᩠ᨮᩩ ᨠᨲᩴ ᩋᨵᩥᨣᨲᩴ ᨲᨿᩣᨲᩥ ᩋᨲ᩠ᨳᩮᩣ. ᨶᨿᨶᩴ ᨬᩣᨱᨾᨿᩴ ᨾᩉᩣᨾᩩᨶᩮ. ᨧᩥᩁᨠᩣᩃᩈᨾᨦ᩠ᨣᩥᨲᩮᩣᨲᩥ ᨾᩉᩣᨾᩩᨶᩮ ᨾᩉᩣᩈᨾᨱ ᨬᩣᨱᨾᨿᩴ ᨶᨿᨶᩴ ᨴᩥᨻ᩠ᨻᨧᨠ᩠ᨡᩩᩴ ᨧᩥᩁᨠᩣᩃᩴ ᩈᨾᨵᩥᨣᨲᩮᩣ ᩈᨾ᩠ᨸᨲ᩠ᨲᩮᩣ ᨲ᩠ᩅᨶ᩠ᨲᩥ ᩋᨲ᩠ᨳᩮᩣ. ᩋᩅᩥᨶᨭ᩠ᨮᩮᩣ ᨸᩩᨶᩁᨶ᩠ᨲᩁᨶ᩠ᨲᩥ ᩋᩉᩴ ᨸᩩᨶ ᩋᨶ᩠ᨲᩁᩴ ᩋᨶ᩠ᨲᩁᩣᨽᩅᩮ ᨾᨩ᩠ᨫᩮ ᨸᩁᩥᨶᨭ᩠ᨮᩮᩣ ¶ ᨸᩁᩥᩉᩦᨶᩮᩣ ᩋᩉᩮᩣᩈᩥᨶ᩠ᨲᩥ ᩋᨲ᩠ᨳᩮᩣ. ᨸᩩᨶᩁᨩ᩠ᨩᩈᨾᩣᨣᨲᩮᩣ ᨲᨿᩣᨲᩥ ᩋᨩ᩠ᨩ ᩍᨾᩈ᩠ᨾᩥᩴ ᨠᩣᩃᩮ ᨲᨿᩣ ᩈᨴ᩠ᨵᩥᩴ ᨸᩩᨶᨸᩥ ᩈᨾᩣᨣᨲᩮᩣ ᩑᨠᩦᨽᩪᨲᩮᩣ ᩈᩉ ᩅᩈᩣᨾᩦᨲᩥ ᩋᨲ᩠ᨳᩮᩣ. ᨶ ᩉᩥ ᨶᩔᨶ᩠ᨲᩥ ᨠᨲᩣᨶᩥ ᨣᩮᩣᨲᨾᩣᨲᩥ ᨣᩮᩣᨲᨾ ᩈᨻ᩠ᨻᨬ᩠ᨬᩩᨻᩩᨴ᩠ᨵ, ᨲᨿᩣ ᩈᨴ᩠ᨵᩥᩴ ᨠᨲᩣᨶᩥ ᩈᨾᩣᨣᨾᩣᨴᩦᨶᩥ ¶ ᨶ ᩉᩥ ᨶᩔᨶ᩠ᨲᩥ ᨿᩣᩅ ᨡᨶ᩠ᨵᨸᩁᩥᨶᩥᨻ᩠ᨻᩣᨶᩣ ᨶ ᩅᩥᨶᩣ ᨽᩅᩥᩔᨶ᩠ᨲᩦᨲᩥ ᩋᨲ᩠ᨳᩮᩣ. ᩈᩮᩈᩴ ᩏᨲ᩠ᨲᩣᨶᨾᩮᩅᩣᨲᩥ.

ᨵᨾ᩠ᨾᩁᩩᨧᩥᨿᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

ᨴᩈᨾᩣᨸᨴᩣᨶᩴ ᩈᩩᩅᩥᨬ᩠ᨬᩮᨿ᩠ᨿᨾᩮᩅᩣᨲᩥ.

ᩑᨠᩪᨶᨸᨬ᩠ᨬᩣᩈᨾᩅᨣ᩠ᨣᩅᨱ᩠ᨱᨶᩣ ᩈᨾᨲ᩠ᨲᩣ.

᪕᪐-᪕᪓. ᨠᩥᨦ᩠ᨠᨱᩥᨸᩩᨸ᩠ᨹᩣᨴᩥᩅᨣ᩠ᨣᩮᩣ

᪑-᪔᪐. ᨠᩥᨦ᩠ᨠᨱᩥᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩣᨴᩥᩅᨱ᩠ᨱᨶᩣ

ᨸᨬ᩠ᨬᩣᩈᨾᩅᨣ᩠ᨣᩮ ¶ ᨧ ᩑᨠᨸᨬ᩠ᨬᩣᩈᨾᩅᨣ᩠ᨣᩮ ᨧ ᨴ᩠ᩅᩮᨸᨬ᩠ᨬᩣᩈᨾᩅᨣ᩠ᨣᩮ ᨧ ᨲᩮᨸᨬ᩠ᨬᩣᩈᨾᩅᨣ᩠ᨣᩮ ᨧ ᩈᨻ᩠ᨻᩣᨶᩥ ᩋᨸᨴᩣᨶᩣᨶᩥ ᩏᨲ᩠ᨲᩣᨶᩣᨶᩮᩅᩣᨲᩥ.

᪕᪔. ᨠᨧ᩠ᨧᩣᨿᨶᩅᨣ᩠ᨣᩮᩣ

᪑. ᨾᩉᩣᨠᨧ᩠ᨧᩣᨿᨶᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨧᨲᩩᨸᨬ᩠ᨬᩣᩈᨾᩅᨣ᩠ᨣᩮ ¶ ᨸᨮᨾᩣᨸᨴᩣᨶᩮ ᨸᨴᩩᨾᩩᨲ᩠ᨲᩁᩮᩣ ᨶᩣᨾ ᨩᩥᨶᩮᩣᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᨾᩉᩣᨠᨧ᩠ᨧᩣᨿᨶᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨸᩩᩁᩥᨾᨻᩩᨴ᩠ᨵᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᨣᩉᨸᨲᩥᨾᩉᩣᩈᩣᩃᨠᩩᩃᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᩑᨠᨴᩥᩅᩈᩴ ᩈᨲ᩠ᨳᩩ ᩈᨶ᩠ᨲᩥᨠᩮ ᨵᨾ᩠ᨾᩴ ᩈᩩᨱᨶ᩠ᨲᩮᩣ ᩈᨲ᩠ᨳᩣᩁᩣ ᩈᩴᨡᩥᨲ᩠ᨲᩮᨶ ᨽᩣᩈᩥᨲᩔ ᩅᩥᨲ᩠ᨳᩣᩁᩮᨶ ᩋᨲ᩠ᨳᩴ ᩅᩥᨽᨩᨶ᩠ᨲᩣᨶᩴ ᩋᨣ᩠ᨣᨭ᩠ᨮᩣᨶᩮ ᨮᨸᩥᨿᨾᩣᨶᩴ ᩑᨠᩴ ᨽᩥᨠ᩠ᨡᩩᩴ ᨴᩥᩈ᩠ᩅᩣ ᩈᨿᨾ᩠ᨸᩥ ᨲᩴ ᨮᩣᨶᨶ᩠ᨲᩁᩴ ᨸᨲ᩠ᨳᩮᨶ᩠ᨲᩮᩣ ᨸᨱᩥᨵᩣᨶᩴ ᨠᨲ᩠ᩅᩣ ᨴᩣᨶᩣᨴᩦᨶᩥ ᨸᩩᨬ᩠ᨬᩣᨶᩥ ᨠᨲ᩠ᩅᩣ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩈᩩᨾᩮᨵᩔ ᨽᨣᩅᨲᩮᩣ ᨠᩣᩃᩮ ᩅᩥᨩ᩠ᨩᩣᨵᩁᩮᩣ ᩉᩩᨲ᩠ᩅᩣ ᩌᨠᩣᩈᩮᨶ ᨣᨧ᩠ᨨᨶ᩠ᨲᩮᩣ ᩑᨠᩈ᩠ᨾᩥᩴ ᩅᨶᩈᨱ᩠ᨯᩮ ᨶᩥᩈᩥᨶ᩠ᨶᩴ ᨽᨣᩅᨶ᩠ᨲᩴ ᨴᩥᩈ᩠ᩅᩣ ᨸᩈᨶ᩠ᨶᨾᩣᨶᩈᩮᩣ ᨠᨱᩥᨠᩣᩁᨸᩩᨸ᩠ᨹᩮᩉᩥ ᨸᩪᨩᩴ ᩋᨠᩣᩈᩥ.

ᩈᩮᩣ ᨲᩮᨶ ᨸᩩᨬ᩠ᨬᩮᨶ ᩋᨸᩁᩣᨸᩁᩴ ᩈᩩᨣᨲᩦᩈᩩᨿᩮᩅ ᨸᩁᩥᩅᨲ᩠ᨲᩮᨶ᩠ᨲᩮᩣ ᨠᩔᨸᨴᩈᨻᩃᩔ ᨠᩣᩃᩮ ᨻᩣᩁᩣᨱᩈᩥᨿᩴ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩥᨲ᩠ᩅᩣ ᨸᩁᩥᨶᩥᨻ᩠ᨻᩩᨲᩮ ᨽᨣᩅᨲᩥ ᩈᩩᩅᨱ᩠ᨱᨧᩮᨲᩥᨿᨠᨾ᩠ᨾᨭ᩠ᨮᩣᨶᩮ ᩈᨲᩈᩉᩔᨣ᩠ᨥᨶᩥᨠᩣᨿ ᩈᩩᩅᨱ᩠ᨱᩥᨭ᩠ᨮᨠᩣᨿ ᨸᩪᨩᩴ ᨠᨲ᩠ᩅᩣ ‘‘ᩍᨾᩔ ᨶᩥᩔᨶ᩠ᨴᩮᨶ ᨶᩥᨻ᩠ᨻᨲ᩠ᨲᨶᩥᨻ᩠ᨻᨲ᩠ᨲᨭ᩠ᨮᩣᨶᩮ ᩈᩁᩦᩁᩴ ᨾᩮ ᩈᩩᩅᨱ᩠ᨱᩅᨱ᩠ᨱᩴ ᩉᩮᩣᨲᩪ’’ᨲᩥ ¶ ᨸᨲ᩠ᨳᨶᩴ ᩋᨠᩣᩈᩥ. ᨲᨲᩮᩣ ᨿᩣᩅᨩᩦᩅᩴ ᨠᩩᩈᩃᨠᨾ᩠ᨾᩴ ᨠᨲ᩠ᩅᩣ ᩑᨠᩴ ᨻᩩᨴ᩠ᨵᨶ᩠ᨲᩁᩴ ᨴᩮᩅᨾᨶᩩᩔᩮᩈᩩ ᩈᩴᩈᩁᩥᨲ᩠ᩅᩣ ᩍᨾᩈ᩠ᨾᩥᩴ ᨻᩩᨴ᩠ᨵᩩᨸ᩠ᨸᩣᨴᩮ ᩏᨩ᩠ᨩᩮᨶᩥᨿᩴ ᩁᨬ᩠ᨬᩮᩣ ᨧᨱ᩠ᨯᨸᨩ᩠ᨩᩮᩣᨲᩔ ᨸᩩᩁᩮᩣᩉᩥᨲᨣᩮᩉᩮ ᨶᩥᨻ᩠ᨻᨲ᩠ᨲᩥ, ᨲᩔ ᨶᩣᨾᨣ᩠ᨣᩉᨱᨴᩥᩅᩈᩮ ᨾᩣᨲᩣ ‘‘ᨾᨿ᩠ᩉᩴ ¶ ᨸᩩᨲ᩠ᨲᩮᩣ ᩈᩩᩅᨱ᩠ᨱᩅᨱ᩠ᨱᩮᩣ, ᩋᨲ᩠ᨲᨶᩮᩣ ᨶᩣᨾᩴ ᨣᩉᩮᨲ᩠ᩅᩣ ᩌᨣᨲᩮᩣ’’ᨲᩥ ᨠᨬ᩠ᨧᨶᨾᩣᨱᩅᩮᩣᨲ᩠ᩅᩮᩅ ᨶᩣᨾᩴ ᩋᨠᩣᩈᩥ. ᩈᩮᩣ ᩅᩩᨴ᩠ᨵᩥᨾᨶ᩠ᩅᩣᨿ ᨲᨿᩮᩣ ᩅᩮᨴᩮ ᩏᨣ᩠ᨣᨱ᩠ᩉᩥᨲ᩠ᩅᩣ ᨸᩥᨲᩩ ᩋᨧ᩠ᨧᨿᩮᨶ ᨸᩩᩁᩮᩣᩉᩥᨲᨭ᩠ᨮᩣᨶᩴ ᩃᨽᩥ. ᩈᩮᩣ ᨣᩮᩣᨲ᩠ᨲᩅᩈᩮᨶ ᨠᨧ᩠ᨧᩣᨿᨶᩮᩣᨲᩥ ᨸᨬ᩠ᨬᩣᨿᩥᨲ᩠ᨳ. ᩋᨳ ᩁᩣᨩᩣ ᨧᨱ᩠ᨯᨸᨩ᩠ᨩᩮᩣᨲᩮᩣ ᨻᩩᨴ᩠ᨵᩩᨸ᩠ᨸᩣᨴᩴ ᩈᩩᨲ᩠ᩅᩣ, ‘‘ᩌᨧᩁᩥᨿ, ᨲᩩᨾ᩠ᩉᩮ ᨲᨲ᩠ᨳ ᨣᨶ᩠ᨲ᩠ᩅᩣ ᩈᨲ᩠ᨳᩣᩁᩴ ᩍᨵᩣᨶᩮᨳᩣ’’ᨲᩥ ᨸᩮᩈᩮᩈᩥ. ᩈᩮᩣ ᩋᨲ᩠ᨲᨭ᩠ᨮᨾᩮᩣ ᩈᨲ᩠ᨳᩩ ᩈᨶ᩠ᨲᩥᨠᩴ ᩏᨸᨣᨲᩮᩣ ᨲᩔ ᩈᨲ᩠ᨳᩣ ᨵᨾ᩠ᨾᩴ ᨴᩮᩈᩮᩈᩥ, ᨴᩮᩈᨶᩣᨸᩁᩥᨿᩮᩣᩈᩣᨶᩮ ᩈᨲ᩠ᨲᩉᩥ ᨩᨶᩮᩉᩥ ᩈᨴ᩠ᨵᩥᩴ ᩈᩉ ᨸᨭᩥᩈᨾ᩠ᨽᩥᨴᩣᩉᩥ ᩋᩁᩉᨲ᩠ᨲᩮ ᨸᨲᩥᨭ᩠ᨮᩣᩈᩥ.

᪑. ᩈᩮᩣ ᩑᩅᩴ ᨸᨲ᩠ᨲᩋᩁᩉᨲ᩠ᨲᨹᩃᩮᩣ ᩋᨲ᩠ᨲᨶᩮᩣ ᨸᩩᨻ᩠ᨻᨠᨾ᩠ᨾᩴ ᩈᩁᩥᨲ᩠ᩅᩣ ᩈᩮᩣᨾᨶᩔᨩᩣᨲᩮᩣ ᨸᩩᨻ᩠ᨻᨧᩁᩥᨲᩣᨸᨴᩣᨶᩴ ¶ ᨸᨠᩣᩈᩮᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩮᩣ ᨶᩣᨾ ᨩᩥᨶᩮᩣᨲᩥᩌᨴᩥᨾᩣᩉ. ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨲ᩠ᨳᨾᩮᩅ. ᩋᨳ ᩈᨲ᩠ᨳᩣ ‘‘ᩑᨳ, ᨽᩥᨠ᩠ᨡᩅᩮᩣ’’ᨲᩥ ᩉᨲ᩠ᨳᩴ ᨸᩈᩣᩁᩮᩈᩥ. ᨲᩮ ᨲᩣᩅᨴᩮᩅ ᨴ᩠ᩅᨦ᩠ᨣᩩᩃᨾᨲ᩠ᨲᨠᩮᩈᨾᩔᩩᩍᨴ᩠ᨵᩥᨾᨿᨸᨲ᩠ᨲᨧᩦᩅᩁᨵᩁᩣ ᩅᩔᩈᨭ᩠ᨮᩥᨠᨲ᩠ᨳᩮᩁᩣ ᩅᩥᨿ ᩋᩉᩮᩈᩩᩴ. ᩑᩅᩴ ᨳᩮᩁᩮᩣ ᩈᨴᨲ᩠ᨳᩴ ᨶᩥᨸ᩠ᨹᩣᨴᩮᨲ᩠ᩅᩣ, ‘‘ᨽᨶ᩠ᨲᩮ, ᩁᩣᨩᩣ ᨸᨩ᩠ᨩᩮᩣᨲᩮᩣ ᨲᩩᨾ᩠ᩉᩣᨠᩴ ᨸᩣᨴᩮ ᩅᨶ᩠ᨴᩥᨲᩩᩴ ᨵᨾ᩠ᨾᨬ᩠ᨧ ᩈᩮᩣᨲᩩᩴ ᩍᨧ᩠ᨨᨲᩦ’’ᨲᩥ ᩌᩁᩮᩣᨧᩮᩈᩥ. ᩈᨲ᩠ᨳᩣ ‘‘ᨲ᩠ᩅᩴᨿᩮᩅ, ᨠᨧ᩠ᨧᩣᨶ, ᨲᨲ᩠ᨳ ᨣᨧ᩠ᨨ, ᨲᨿᩥ ᨣᨲᩮ ᩁᩣᨩᩣ ᨸᩈᩦᨴᩥᩔᨲᩦ’’ᨲᩥ ᩌᩉ. ᨳᩮᩁᩮᩣ ᩈᨲ᩠ᨳᩩ ᩌᨱᩣᨿ ᩋᨲ᩠ᨲᨭ᩠ᨮᨾᩮᩣ ᨲᨲ᩠ᨳ ᨣᨶ᩠ᨲ᩠ᩅᩣ ᩁᩣᨩᩣᨶᩴ ᨸᩈᩣᨴᩮᨲ᩠ᩅᩣ ᩋᩅᨶ᩠ᨲᩦᩈᩩ ᩈᩣᩈᨶᩴ ᨸᨲᩥᨭ᩠ᨮᩣᨸᩮᨲ᩠ᩅᩣ ᨸᩩᨶ ᩈᨲ᩠ᨳᩩ ᩈᨶ᩠ᨲᩥᨠᨾᩮᩅ ᩌᨣᨲᩮᩣ. ᩋᨲ᩠ᨲᨶᩮᩣ ᨸᩩᨻ᩠ᨻᨸᨲ᩠ᨳᨶᩣᩅᩈᩮᨶ ᨠᨧ᩠ᨧᩣᨿᨶᨸ᩠ᨸᨠᩁᨱᩴ ᨾᩉᩣᨶᩥᩁᩩᨲ᩠ᨲᩥᨸ᩠ᨸᨠᩁᨱᩴ ᨶᩮᨲ᩠ᨲᩥᨸ᩠ᨸᨠᩁᨱᨶ᩠ᨲᩥ ᨸᨠᩁᨱᨲ᩠ᨲᨿᩴ ᩈᨦ᩠ᨥᨾᨩ᩠ᨫᩮ ᨻ᩠ᨿᩣᨠᩣᩈᩥ. ᩋᨳ ᩈᨶ᩠ᨲᩩᨭ᩠ᨮᩮᨶ ᨽᨣᩅᨲᩣ ‘‘ᩑᨲᨴᨣ᩠ᨣᩴ, ᨽᩥᨠ᩠ᨡᩅᩮ, ᨾᨾ ᩈᩣᩅᨠᩣᨶᩴ ᩈᩴᨡᩥᨲ᩠ᨲᩮᨶ ᨽᩣᩈᩥᨲᩔ ᩅᩥᨲ᩠ᨳᩣᩁᩮᨶ ᩋᨲ᩠ᨳᩴ ᩅᩥᨽᨩᨶ᩠ᨲᩣᨶᩴ ᨿᨴᩥᨴᩴ ᨾᩉᩣᨠᨧ᩠ᨧᩣᨶᩮᩣ’’ᨲᩥ (ᩋ. ᨶᩥ. ᪑.᪑᪘᪘, ᪑᪙᪗) ᩑᨲᨴᨣ᩠ᨣᨭ᩠ᨮᩣᨶᩮ ᨮᨸᩥᨲᩮᩣ ᩋᨣ᩠ᨣᨹᩃᩈᩩᨡᩮᨶ ᩅᩥᩉᩣᩈᩦᨲᩥ.

ᨾᩉᩣᨠᨧ᩠ᨧᩣᨿᨶᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ ᩈᨾᨲ᩠ᨲᩣ.

᪒. ᩅᨠ᩠ᨠᩃᩥᨲ᩠ᨳᩮᩁᩋᨸᨴᩣᨶᩅᨱ᩠ᨱᨶᩣ

ᨴᩩᨲᩥᨿᩣᨸᨴᩣᨶᩮ ¶ ᩍᨲᩮᩣ ᩈᨲᩈᩉᩔᨾ᩠ᩉᩦᨲᩥᩌᨴᩥᨠᩴ ᩌᨿᩈ᩠ᨾᨲᩮᩣ ᩅᨠ᩠ᨠᩃᩥᨲ᩠ᨳᩮᩁᩔ ᩋᨸᨴᩣᨶᩴ. ᩋᨿᨾ᩠ᨸᩥ ᨳᩮᩁᩮᩣ ᨸᩩᩁᩥᨾᨩᩥᨶᩅᩁᩮᩈᩩ ᨠᨲᩣᨵᩥᨠᩣᩁᩮᩣ ᨲᨲ᩠ᨳ ᨲᨲ᩠ᨳ ᨽᩅᩮ ᩅᩥᩅᨭ᩠ᨭᩪᨸᨶᩥᩔᨿᩣᨶᩥ ᨸᩩᨬ᩠ᨬᩣᨶᩥ ᩏᨸᨧᩥᨶᨶ᩠ᨲᩮᩣ ᨸᨴᩩᨾᩩᨲ᩠ᨲᩁᩔ ᨽᨣᩅᨲᩮᩣ ᨠᩣᩃᩮ ᩉᩴᩈᩅᨲᩦᨶᨣᩁᩮ ᨠᩩᩃᨣᩮᩉᩮ ᨶᩥᨻ᩠ᨻᨲ᩠ᨲᩮᩣ ᩅᩥᨬ᩠ᨬᩩᨲᩴ ᨸᨲ᩠ᨲᩮᩣ ᩈᨲ᩠ᨳᩩ ᩈᨶ᩠ᨲᩥᨠᩴ ᨣᨧ᩠ᨨᨶ᩠ᨲᩮᩉᩥ ᩏᨸᩣᩈᨠᩮᩉᩥ ᩈᨴ᩠ᨵᩥᩴ ᩅᩥᩉᩣᩁᩴ ᨣᨶ᩠ᨲ᩠ᩅᩣ ᨸᩁᩥᩈᨸᩁᩥᨿᨶ᩠ᨲᩮ ᨮᩥᨲᩮᩣ ᨵᨾ᩠ᨾᩴ ᩈᩩᨱᨶ᩠ᨲᩮᩣ ᩈᨲ᩠ᨳᩣᩁᩣ ᩑᨠᩴ ᨽᩥᨠ᩠ᨡᩩᩴ ¶ ᩈᨴ᩠ᨵᩣᨵᩥᨾᩩᨲ᩠ᨲᩣᨶᩴ ᩋᨣ᩠ᨣᨭ᩠ᨮᩣᨶᩮ ᨮᨸᩥᨲᩴ ᨴᩥᩈ᩠ᩅᩣ ᩈᨿᨾ᩠ᨸᩥ ᨲᩴ ᨮᩣᨶᨶ᩠ᨲᩁᩴ ᨸᨲ᩠ᨳᩮᨶ᩠ᨲᩮᩣ ᩈᨲ᩠ᨲᩣᩉᩴ ᨻᩩᨴ᩠ᨵᨸ᩠ᨸᨾᩩᨡᩔ ᨽᩥᨠ᩠ᨡᩩᩈᨦ᩠ᨥᩔ ᨾᩉᩣᨴᩣᨶᩴ ᨴᨲ᩠ᩅᩣ ᨸᨱᩥᨵᩣᨶᩴ ᩋᨠᩣᩈᩥ. ᩈᨲ᩠ᨳᩣ ᨲᩔ ᩋᨶᨶ᩠ᨲᩁᩣᨿᩴ ᨴᩥᩈ᩠ᩅᩣ ᨻ᩠ᨿᩣᨠᩁᩥ.

ᩈᩮᩣ ᨿᩣᩅᨩᩦᩅᩴ ᨠᩩᩈᩃᩴ ᨠᨲ᩠ᩅᩣ ᨴᩮᩅᨾᨶᩩᩔᩮᩈᩩ ᩈᩴᩈᩁᨶ᩠ᨲᩮᩣ ᩋᨾ᩠ᩉᩣᨠᩴ ᨽᨣᩅᨲᩮᩣ ᨠᩣᩃᩮ ᩈᩣᩅᨲ᩠ᨳᩥᨿᩴ ᨻᩕᩣᩉ᩠ᨾᨱᨠᩩᩃᩮ ᨶᩥᨻ᩠ᨻᨲ᩠ᨲᩥ, ᨲᩔ ᩅᨠ᩠ᨠᩃᩦᨲᩥ ᨶᩣᨾᩴ ᨠᩁᩥᩴᩈᩩ. ᨲᨲ᩠ᨳ ᨠᩃᩦᨲᩥ ᩋᨸᩁᩣᨵᨲᩥᩃᨠᩣᩊᨠᩣᨴᩥᨴᩮᩣᩈᩔ ᩋᨵᩥᩅᨧᨶᩴ. ᨶᩥᨴ᩠ᨵᨶ᩠ᨲᩈᩩᩅᨱ᩠ᨱᨸᩥᨱ᩠ᨯᩈᨴᩥᩈᨲᩣᨿ ᩋᨸᨣᨲᩮᩣ ᨻ᩠ᨿᨸᨣᨲᩮᩣ ᨠᩃᩥ ᨴᩮᩣᩈᩮᩣ ᩋᩔᩣᨲᩥ ᩅ-ᨠᩣᩁᩣᨣᨾᩴ ᨠᨲ᩠ᩅᩣ ᩅᨠ᩠ᨠᩃᩦᨲᩥ ᩅᩩᨧ᩠ᨧᨲᩥ. ᩈᩮᩣ ᩅᩩᨴ᩠ᨵᩥᨸ᩠ᨸᨲ᩠ᨲᩮᩣ ᨲᨿᩮᩣ ᩅᩮᨴᩮ ᩏᨣ᩠ᨣᨱ᩠ᩉᩥᨲ᩠ᩅᩣ ᨻᩕᩣᩉ᩠ᨾᨱᩈᩥᨸ᩠ᨸᩮᩈᩩ ᨶᩥᨸ᩠ᨹᨲ᩠ᨲᩥᩴ ᨣᨲᩮᩣ, ᩈᨲ᩠ᨳᩣᩁᩴ ᨴᩥᩈ᩠ᩅᩣ ᩁᩪᨸᨠᩣᨿᩈᨾ᩠ᨸᨲ᩠ᨲᩥᨴᩔᨶᩮᨶ ᩋᨲᩥᨲ᩠ᨲᩮᩣ ᩈᨲ᩠ᨳᩣᩁᩣ ᩈᨴ᩠ᨵᩥᩴᨿᩮᩅ ᩅᩥᨧᩁᨲᩥ. ‘‘ᩋᨣᩣᩁᨾᨩ᩠ᨫᩮ ᩅᩈᨶ᩠ᨲᩮᩣ ᨶᩥᨧ᩠ᨧᨠᩣᩃᩴ ᩈᨲ᩠ᨳᩩ ᨴᩔᨶᩴ ᨶ ᩃᨽᩥᩔᩣᨾᩦ’’ᨲᩥ ¶ ᩈᨲ᩠ᨳᩩ ᩈᨶ᩠ᨲᩥᨠᩮ ᨸᨻ᩠ᨻᨩᩥᨲ᩠ᩅᩣ ᨮᨸᩮᨲ᩠ᩅᩣ ᨽᩮᩣᨩᨶᨠᩣᩃᩴ ᩈᩁᩦᩁᨠᩥᨧ᩠ᨧᨠᩣᩃᨬ᩠ᨧ ᩈᩮᩈᨠᩣᩃᩮ ᨿᨲ᩠ᨳ ᨮᩥᨲᩮᨶ ᩈᨠ᩠ᨠᩣ ᨴᩈᨻᩃᩴ ᨸᩔᩥᨲᩩᩴ, ᨲᨲ᩠ᨳ ᨮᩥᨲᩮᩣ ᩋᨬ᩠ᨬᩴ ᨠᩥᨧ᩠ᨧᩴ ᨸᩉᩣᨿ ᨽᨣᩅᨶ᩠ᨲᩴ ᩒᩃᩮᩣᨠᩮᨶ᩠ᨲᩮᩣᨿᩮᩅ ᩅᩥᩉᩁᨲᩥ. ᩈᨲ᩠ᨳᩣ ᨲᩔ ᨬᩣᨱᨸᩁᩥᨸᩣᨠᩴ ᩌᨣᨾᩮᨶ᩠ᨲᩮᩣ ᨻᩉᩩᨠᩣᩃᩴ ᨲᩈ᩠ᨾᩥᩴ ᩁᩪᨸᨴᩔᨶᩮᨶᩮᩅ ᩅᩥᨧᩁᨶ᩠ᨲᩮ ᨠᩥᨬ᩠ᨧᩥ ᩋᩅᨲ᩠ᩅᩣ ᨸᩩᨶᩮᨠᨴᩥᩅᩈᩴ – ‘‘ᨠᩥᩴ ᨲᩮ, ᩅᨠ᩠ᨠᩃᩥ, ᩍᨾᩥᨶᩣ ᨸᩪᨲᩥᨠᩣᨿᩮᨶ ᨴᩥᨭ᩠ᨮᩮᨶ? ᨿᩮᩣ ᨡᩮᩣ, ᩅᨠ᩠ᨠᩃᩥ, ᨵᨾ᩠ᨾᩴ ᨸᩔᨲᩥ, ᩈᩮᩣ ᨾᩴ ᨸᩔᨲᩥ; ᨿᩮᩣ ᨾᩴ ᨸᩔᨲᩥ, ᩈᩮᩣ ᨵᨾ᩠ᨾᩴ ᨸᩔᨲᩥ. ᨵᨾ᩠ᨾᨬ᩠ᩉᩥ, ᩅᨠ᩠ᨠᩃᩥ, ᨸᩔᨶ᩠ᨲᩮᩣ ᨾᩴ ᨸᩔᨲᩦ’’ᨲᩥ (ᩈᩴ. ᨶᩥ. ᪓.᪘᪗) ᩌᩉ. ᩈᨲ᩠ᨳᩁᩥ ᩑᩅᩴ ᩅᨴᨶ᩠ᨲᩮᨸᩥ ᨳᩮᩁᩮᩣ ᩈᨲ᩠ᨳᩩ ᨴᩔᨶᩴ ᨸᩉᩣᨿ ᩋᨬ᩠ᨬᨲ᩠ᨳ ᨣᨶ᩠ᨲᩩᩴ ᨶ ᩈᨠ᩠ᨠᩮᩣᨲᩥ. ᨲᨲᩮᩣ ᩈᨲ᩠ᨳᩣ, ‘‘ᨶᩣᨿᩴ ᨽᩥᨠ᩠ᨡᩩ ᩈᩴᩅᩮᨣᩴ ᩋᩃᨽᩥᨲ᩠ᩅᩣ ᨻᩩᨩ᩠ᨫᩥᩔᨲᩦ’’ᨲᩥ ᩅᩔᩪᨸᨶᩣᨿᩥᨠᨴᩥᩅᩈᩮ – ‘‘ᩋᨸᩮᩉᩥ, ᩅᨠ᩠ᨠᩃᩦ’’ᨲᩥ ᨳᩮᩁᩴ ᨸᨱᩣᨾᩮᩈᩥ. ᩈᩮᩣ ᩈᨲ᩠ᨳᩣᩁᩣ ᨸᨱᩣᨾᩥᨲᩮᩣ ᩈᨲ᩠ᨳᩩ ᩈᨾ᩠ᨾᩩᨡᩮ ᨮᩣᨲᩩᩴ ᩋᩈᨠ᩠ᨠᩮᩣᨶ᩠ᨲᩮᩣ – ‘‘ᨠᩥᩴ ᨾᨿ᩠ᩉᩴ ᨩᩦᩅᩥᨲᩮᨶ, ᨿᩮᩣᩉᩴ ᩈᨲ᩠ᨳᩣᩁᩴ ᨴᨭ᩠ᨮᩩᩴ ᨶ ᩃᨽᩣᨾᩦ’’ᨲᩥ ᨣᩥᨩ᩠ᨫᨠᩪᨭᩮ ᨸᨻ᩠ᨻᨲᩮ ᨸᨸᩣᨲᨭ᩠ᨮᩣᨶᩴ ¶ ᩋᨽᩥᩁᩩᩉᩥ? ᩈᨲ᩠ᨳᩣ ᨲᩔ ᨲᩴ ᨸᩅᨲ᩠ᨲᩥᩴ ᨬᨲ᩠ᩅᩣ – ‘‘ᩋᨿᩴ ᨽᩥᨠ᩠ᨡᩩ ᨾᨾ ᩈᨶ᩠ᨲᩥᨠᩣ ᩋᩔᩣᩈᩴ ᩋᩃᨽᨶ᩠ᨲᩮᩣ ᨾᨣ᩠ᨣᨹᩃᩣᨶᩴ ᩏᨸᨶᩥᩔᨿᩴ ᨶᩣᩈᩮᨿ᩠ᨿᩣ’’ᨲᩥ ᩋᨲ᩠ᨲᩣᨶᩴ ᨴᩔᩮᨲ᩠ᩅᩣ ᩒᨽᩣᩈᩴ ᩅᩥᩔᨩ᩠ᨩᩮᨶ᩠ᨲᩮᩣ –

‘‘ᨸᩣᨾᩮᩣᨩ᩠ᨩᨻᩉᩩᩃᩮᩣ ᨽᩥᨠ᩠ᨡᩩ, ᨸᩈᨶ᩠ᨶᩮᩣ ᨻᩩᨴ᩠ᨵᩈᩣᩈᨶᩮ;

ᩋᨵᩥᨣᨧ᩠ᨨᩮ ᨸᨴᩴ ᩈᨶ᩠ᨲᩴ, ᩈᨦ᩠ᨡᩣᩁᩪᨸᩈᨾᩴ ᩈᩩᨡ’’ᨶ᩠ᨲᩥ. (ᨵ. ᨸ. ᪓᪘᪑) –

ᨣᩣᨳᩴ ᩅᨲ᩠ᩅᩣ ‘‘ᩑᩉᩥ, ᩅᨠ᩠ᨠᩃᩦ’’ᨲᩥ (ᨵ. ᨸ. ᩋᨭ᩠ᨮ. ᪒.᪓᪘᪑) ᩉᨲ᩠ᨳᩴ ᨸᩈᩣᩁᩮᩈᩥ. ᨳᩮᩁᩮᩣ ‘‘ᨴᩈᨻᩃᩮᩣ ᨾᩮ ᨴᩥᨭ᩠ᨮᩮᩣ, ‘ᩑᩉᩦ’ᨲᩥ ᩋᩅ᩠ᩉᩣᨿᨶᨾ᩠ᨸᩥ ᩃᨴ᩠ᨵ’’ᨶ᩠ᨲᩥ ᨻᩃᩅᨸᩦᨲᩥᩈᩮᩣᨾᨶᩔᩴ ᩏᨸ᩠ᨸᩣᨴᩮᨲ᩠ᩅᩣ ‘‘ᨠᩩᨲᩮᩣ ᨣᨧ᩠ᨨᩣᨾᩦ’’ᨲᩥ ᩋᨲ᩠ᨲᨶᩮᩣ ᨣᨾᨶᨽᩣᩅᩴ ᩋᨩᩣᨶᩥᨲ᩠ᩅᩣᩅ ᩈᨲ᩠ᨳᩩ ᩈᨾ᩠ᨾᩩᨡᩮ ¶ ᩌᨠᩣᩈᩮ ᨸᨠ᩠ᨡᨶ᩠ᨴᩥᨲ᩠ᩅᩣ ᨸᨮᨾᩮᨶ ᨸᩣᨴᩮᨶ ᨸᨻ᩠ᨻᨲᩮ ᨮᩥᨲᩮᩣᨿᩮᩅ ᩈᨲ᩠ᨳᩣᩁᩣ ᩅᩩᨲ᩠ᨲᨣᩣᨳᩣᨿᩮᩣ ᩌᩅᨩ᩠ᨩᩮᨶ᩠ᨲᩮᩣ ᩌᨠᩣᩈᩮᨿᩮᩅ ᨸᩦᨲᩥᩴ ᩅᩥᨠ᩠ᨡᨾ᩠ᨽᩮᨲ᩠ᩅᩣ ᩈᩉ ᨸᨭᩥᩈᨾ᩠ᨽᩥᨴᩣᩉᩥ ᩋᩁᩉᨲ᩠ᨲᩴ ᨸᩣᨸᩩᨱᩦᨲᩥ ᩋᨦ᩠ᨣᩩᨲ᩠ᨲᩁᨭ᩠ᨮᨠᨳᩣᨿᩴ (ᩋ. ᨶᩥ. ᩋᨭ᩠ᨮ. ᪑.᪑.᪒᪐᪘) ᨵᨾ᩠ᨾᨸᨴᩅᨱ᩠ᨱᨶᩣᨿᨬ᩠ᨧ (ᨵ. ᨸ. ᩋᨭ᩠ᨮ. ᪒.᪓᪘᪑ ᩅᨠ᩠ᨠᩃᩥᨲ᩠ᨳᩮᩁᩅᨲ᩠ᨳᩩ) ᩌᨣᨲᩴ.

ᩍᨵ ᨸᨶ ᩑᩅᩴ ᩅᩮᨴᩥᨲᨻ᩠ᨻᩴ – ‘‘ᨠᩥᩴ ᨲᩮ, ᩅᨠ᩠ᨠᩃᩦ’’ᨲᩥᩌᨴᩥᨶᩣ ᩈᨲ᩠ᨳᩣᩁᩣ ᩒᩅᨴᩥᨲᩮᩣ ᨣᩥᨩ᩠ᨫᨠᩪᨭᩮ ᩅᩥᩉᩁᨶ᩠ᨲᩮᩣ ᩅᩥᨸᩔᨶᩴ ᨸᨭ᩠ᨮᨸᩮᩈᩥ, ᨲᩔ ᩈᨴ᩠ᨵᩣᨿ ᨻᩃᩅᨽᩣᩅᨲᩮᩣ ᩑᩅ ᩅᩥᨸᩔᨶᩣ ᩅᩦᨳᩥᩴ ᨶ ᩒᨲᩁᨲᩥ? ᨽᨣᩅᩣ ᨲᩴ ᨬᨲ᩠ᩅᩣ ᨠᨾ᩠ᨾᨭ᩠ᨮᩣᨶᩴ ᩈᩮᩣᨵᩮᨲ᩠ᩅᩣ ᩋᨴᩣᩈᩥ. ᩈᩮᩣ ᨸᩩᨶ ᩅᩥᨸᩔᨶᩴ ᨾᨲ᩠ᨳᨠᩴ ᨸᩣᨸᩮᨲᩩᩴ ᨶᩣᩈᨠ᩠ᨡᩥᨿᩮᩅ. ᩋᨳᩔ ᩌᩉᩣᩁᩅᩮᨠᩃ᩠ᩃᩮᨶ ᩅᩣᨲᩣᨻᩣᨵᩮᩣ ᩏᨸ᩠ᨸᨩ᩠ᨩᩥ, ᨲᩴ ᩅᩣᨲᩣᨻᩣᨵᩮᨶ ᨸᩦᩊᩥᨿᨾᩣᨶᩴ ᨬᨲ᩠ᩅᩣ ᨽᨣᩅᩣ ᨲᨲ᩠ᨳ ᨣᨶ᩠ᨲ᩠ᩅᩣ ᨸᩩᨧ᩠ᨨᨶ᩠ᨲᩮᩣ –

‘‘ᩅᩣᨲᩁᩮᩣᨣᩣᨽᩥᨶᩦᨲᩮᩣ ¶ ᨲ᩠ᩅᩴ, ᩅᩥᩉᩁᩴ ᨠᩣᨶᨶᩮ ᩅᨶᩮ;

ᨸᩅᩥᨴ᩠ᨵᨣᩮᩣᨧᩁᩮ ᩃᩪᨡᩮ, ᨠᨳᩴ ᨽᩥᨠ᩠ᨡᩩ ᨠᩁᩥᩔᩈᩦ’’ᨲᩥ. (ᨳᩮᩁᨣᩣ. ᪓᪕᪐) –

ᩌᩉ. ᨲᩴ ᩈᩩᨲ᩠ᩅᩣ ᨳᩮᩁᩮᩣ –

‘‘ᨸᩦᨲᩥᩈᩩᨡᩮᨶ ᩅᩥᨸᩩᩃᩮᨶ, ᨹᩁᨾᩣᨶᩮᩣ ᩈᨾᩩᩔᨿᩴ;

ᩃᩪᨡᨾ᩠ᨸᩥ ᩋᨽᩥᩈᨾ᩠ᨽᩮᩣᨶ᩠ᨲᩮᩣ, ᩅᩥᩉᩁᩥᩔᩣᨾᩥ ᨠᩣᨶᨶᩮ.

‘‘ᨽᩣᩅᩮᨶ᩠ᨲᩮᩣ ᩈᨲᩥᨸᨭ᩠ᨮᩣᨶᩮ, ᩍᨶ᩠ᨴᩕᩥᨿᩣᨶᩥ ᨻᩃᩣᨶᩥ ᨧ;

ᨻᩮᩣᨩ᩠ᨫᨦ᩠ᨣᩣᨶᩥ ᨧ ᨽᩣᩅᩮᨶ᩠ᨲᩮᩣ, ᩅᩥᩉᩁᩥᩔᩣᨾᩥ ᨠᩣᨶᨶᩮ.

‘‘ᩌᩁᨴ᩠ᨵᩅᩦᩁᩥᨿᩮ ᨸᩉᩥᨲᨲ᩠ᨲᩮ, ᨶᩥᨧ᩠ᨧᩴ ᨴᩊ᩠ᩉᨸᩁᨠ᩠ᨠᨾᩮ;

ᩈᨾᨣ᩠ᨣᩮ ᩈᩉᩥᨲᩮ ᨴᩥᩈ᩠ᩅᩣ, ᩅᩥᩉᩁᩥᩔᩣᨾᩥ ᨠᩣᨶᨶᩮ.

‘‘ᩋᨶᩩᩔᩁᨶ᩠ᨲᩮᩣ ¶ ᩈᨾ᩠ᨻᩩᨴ᩠ᨵᩴ, ᩋᨣ᩠ᨣᩴ ᨴᨶ᩠ᨲᩴ ᩈᨾᩣᩉᩥᨲᩴ;

ᩋᨲᨶ᩠ᨴᩥᨲᩮᩣ ᩁᨲ᩠ᨲᩥᨶ᩠ᨴᩥᩅᩴ, ᩅᩥᩉᩁᩥᩔᩣᨾᩥ ᨠᩣᨶᨶᩮ’’ᨲᩥ. (ᨳᩮᩁᨣᩣ. ᪓᪕᪑-᪓᪕᪔) –

ᨧᨲᩔᩮᩣ ᨣᩣᨳᩣᨿᩮᩣ ᩋᨽᩣᩈᩥ. ᨲᩣᩈᩴ ᩋᨲ᩠ᨳᩮᩣ ᨳᩮᩁᨣᩣᨳᩣᩅᨱ᩠ᨱᨶᩣᨿᩴ (ᨳᩮᩁᨣᩣ. ᩋᨭ᩠ᨮ. ᪒.᪓᪕᪑-᪓᪕᪔) ᩅᩩᨲ᩠