📜

ᨶᨾᩮᩣ ᨲᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ

ᨠᨦ᩠ᨡᩣᩅᩥᨲᩁᨱᩦᨸᩩᩁᩣᨱ-ᨭᩦᨠᩣ

ᨣᨶ᩠ᨳᩣᩁᨾ᩠ᨽᨠᨳᩣ

ᨻᩩᨴ᩠ᨵᩴ ᨵᨾ᩠ᨾᨬ᩠ᨧ ᩈᨦ᩠ᨥᨶ᩠ᨲᩥ-ᩌᨴᩥᨶᩣ ᨿᩣ ᨸᨠᩣᩈᩥᨲᩣ;

ᨽᨴᨶ᩠ᨲᨻᩩᨴ᩠ᨵᨥᩮᩣᩈᩮᨶ, ᨾᩣᨲᩥᨠᩣᨭ᩠ᨮᨠᨳᩣ ᩈᩩᨽᩣ;

ᨲᩔᩣ ᩉᩥ ᩃᩦᨶᨸᨴᩴ ᩅᩥ-ᨠᩣᩈᨶᨠᩮᩣᨿᨾᩣᩁᨾ᩠ᨽᩮᩣ.

ᨣᨶ᩠ᨳᩣᩁᨾ᩠ᨽᨠᨳᩣᩅᨱ᩠ᨱᨶᩣ

ᩅᩥᨸ᩠ᨸᩈᨶ᩠ᨶᩮᨶᩣᨲᩥ ᩅᩥᩅᩥᨵᨸ᩠ᨸᩈᨶ᩠ᨶᩮᨶ. ᨠᨳᩴ? ‘‘ᩍᨲᩥᨸᩥ ᩈᩮᩣ…ᨸᩮ… ᨻᩩᨴ᩠ᨵᩮᩣ ᨽᨣᩅᩣ, ᩈ᩠ᩅᩣᨠ᩠ᨡᩣᨲᩮᩣ…ᨸᩮ… ᩅᩥᨬ᩠ᨬᩪᩉᩥ, ᩈᩩᨸ᩠ᨸᨭᩥᨸᨶ᩠ᨶᩮᩣ…ᨸᩮ… ᩃᩮᩣᨠᩔᩣ’’ᨲᩥ (ᩋ. ᨶᩥ. ᪕.᪑᪐) ᩑᩅᨾᩣᨴᩥᨶᩣ. ‘‘ᨧᩮᨲᩈᩣ’’ᨲᩥ ᩅᩩᨲ᩠ᨲᨲ᩠ᨲᩣ ᨲᩦᩈᩩ ᩅᨶ᩠ᨴᨶᩣᩈᩩ ᨧᩮᨲᩮᩣᩅᨶ᩠ᨴᨶᩣ ᩋᨵᩥᨸ᩠ᨸᩮᨲᩣ. ᨲᨶ᩠ᨶᩥᨶ᩠ᨶᨲᩣᨴᩥᩅᩈᩮᨶ ᨠᩣᨿᩣᨴᩦᩉᩥ ᨸᨱᩣᨾᨠᩁᨱᩴ ᩅᨶ᩠ᨴᨶᩣ, ᨣᩩᨱᩅᩈᩮᨶ ᨾᨶᩈᩣᨸᩥ ᨲᨳᩣᩅ ᨠᩁᨱᩴ ᨾᩣᨶᩴ, ᨸᨧ᩠ᨧᨿᨸ᩠ᨸᨭᩥᨸᨲ᩠ᨲᩥᨿᩣᨴᩦᩉᩥ ᨸᩪᨩᩣᨠᩁᨱᩴ ᨸᩪᨩᩣ, ᨸᨧ᩠ᨧᨿᩣᨴᩦᨶᩴ ᩋᨽᩥᩈᨦ᩠ᨡᩁᨱᩴ ᩈᨠ᩠ᨠᨧ᩠ᨧ ᨠᩁᨱᩴ ᩈᨠ᩠ᨠᩣᩁᩮᩣ, ᨲᩮᩈᩴ. ᨽᩣᨩᨶᨶ᩠ᨲᩥ ᩌᨵᩣᩁᩮᩣ, ᩋᨵᩥᨠᩁᨱᩴ ᩅᩣ.

ᨳᩮᩁᩣ ᨾᩉᩣᨠᩔᨸᩣᨴᨿᩮᩣ, ᨲᩮᩈᩴ ᩅᩴᩈᩮᩣᨲᩥ ᨳᩮᩁᩅᩴᩈᩮᩣ, ᩌᨣᨾᩣᨵᩥᨣᨾᩈᨾ᩠ᨸᨴᩣᨿ ᨲᩔ ᩅᩴᩈᩔ ᨸᨴᩦᨸᨽᩪᨲᩣᨲᩥ ᨳᩮᩁᩅᩴᩈᨸ᩠ᨸᨴᩦᨸᩣ, ᨲᩮᩈᩴ ᨳᩮᩁᩅᩴᩈᨸ᩠ᨸᨴᩦᨸᩣᨶᩴ. ᩋᩈᩴᩉᩦᩁᨲ᩠ᨲᩣ ᨳᩥᩁᩣᨶᩴ. ᩅᩥᨶᨿᨠ᩠ᨠᨾᩮᨲᩥ ᩅᩥᨶᨿᨸᩥᨭᨠᩮ, ᩌᩁᨾ᩠ᨽᩣᨶᩩᩁᩪᨸᩅᨧᨶᨾᩮᨲᩴ. ᩈᩩᨲ᩠ᨲᩣᨽᩥᨵᨾ᩠ᨾᩮᩈᩩᨸᩥ ᨲᩮ ᨳᩥᩁᩣ ᩑᩅ. ‘‘ᨻᩩᨴ᩠ᨵᩴ ᨵᨾ᩠ᨾᨬ᩠ᨧ ᩈᨦ᩠ᨥᨬ᩠ᨧ ᨸᩩᨻ᩠ᨻᩣᨧᩁᩥᨿᩈᩦᩉᩣᨶᨬ᩠ᨧᩣ’’ᨲᩥ ᩋᩅᨲ᩠ᩅᩣ ᨠᩈ᩠ᨾᩣ ᩅᩥᩈᩩᩴ ᩅᩩᨲ᩠ᨲᨶ᩠ᨲᩥ ᨧᩮ? ᨸᨿᩮᩣᨩᨶᩅᩥᩈᩮᩈᨴᩔᨶᨲ᩠ᨳᩴ. ᩅᨲ᩠ᨳᩩᨲ᩠ᨲᨿᩔ ᩉᩥ ᨸᨱᩣᨾᨠᩁᨱᩔ ᩋᨶ᩠ᨲᩁᩣᨿᨶᩥᩅᩣᩁᨱᩴ ᨸᨿᩮᩣᨩᨶᩴ ᩋᨲ᩠ᨲᨶᩮᩣ ᨶᩥᩔᨿᨽᩪᨲᩣᨶᩴ ᩌᨧᩁᩥᨿᩣᨶᩴ ᨸᨱᩣᨾᨠᩁᨱᩔ ᩏᨸᨠᩣᩁᨬ᩠ᨬᩩᨲᩣᨴᩔᨶᩴ. ᨲᩮᨶ ᨻᩩᨴ᩠ᨵᨬ᩠ᨧ ᨵᨾ᩠ᨾᨬ᩠ᨧ ᩈᨦ᩠ᨥᨬ᩠ᨧ ᩅᨶ᩠ᨴᩥᨲ᩠ᩅᩣ, ᨧ-ᩈᨴ᩠ᨴᩮᨶ ᨸᩩᨻ᩠ᨻᩣᨧᩁᩥᨿᩈᩦᩉᩣᨶᨬ᩠ᨧ ᨶᨾᩮᩣ ᨠᨲ᩠ᩅᩣᨲᩥ ᨿᩮᩣᨩᨶᩣ. ᩋᨳ ᩅᩣ ‘‘ᩅᨶ᩠ᨴᩥᨲ᩠ᩅᩣ’’ᨲᩥ ᨧᩮᨲᩮᩣᩅᨶ᩠ᨴᨶᩴ ᨴᩔᩮᨲ᩠ᩅᩣ ᨲᨲᩮᩣ ‘‘ᨶᨾᩮᩣ ᨠᨲ᩠ᩅᩣ’’ᨲᩥ ᩅᩣᨧᩣᩅᨶ᩠ᨴᨶᩣ, ‘‘ᨠᨲᨬ᩠ᨩᩃᩦ’’ᨲᩥ ᨠᩣᨿᩅᨶ᩠ᨴᨶᩣᨸᩥ ᨴᩔᩥᨲᩣᨲᩥ ᨿᩮᩣᨩᩮᨲᨻ᩠ᨻᩴ.

ᩍᨴᩣᨶᩥ ᩋᨽᩥᨵᩣᨶᨸ᩠ᨸᨿᩮᩣᨩᨶᩴ ᨴᩔᩮᨲᩩᩴ ‘‘ᨸᩣᨾᩮᩣᨠ᩠ᨡ’’ᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨸᩣᨾᩮᩣᨠ᩠ᨡᨶ᩠ᨲᩥ ᨸᨵᩣᨶᩴ. ᩈᩦᩃᨬ᩠ᩉᩥ ᩈᨻ᩠ᨻᩮᩈᩴ ᨠᩩᩈᩃᨵᨾ᩠ᨾᩣᨶᩴ ᨸᨵᩣᨶᩴ ᩌᨴᩥᨽᩣᩅᨲᩮᩣ. ᨿᨳᩣ ᨧ ᩈᨲ᩠ᨲᩣᨶᩴ ᨡᨩ᩠ᨩᨽᩮᩣᨩ᩠ᨩᩃᩮᨿ᩠ᨿᨸᩮᨿ᩠ᨿᩅᩈᩮᨶ ᨧᨲᩩᨻ᩠ᨻᩥᨵᩮᩣᨸᩥ ᩌᩉᩣᩁᩮᩣ ᨾᩩᨡᩮᨶ ᨸᩅᩥᩈᩥᨲ᩠ᩅᩣ ᩋᨦ᩠ᨣᨾᨦ᩠ᨣᩣᨶᩥ ᨹᩁᨲᩥ, ᩑᩅᩴ ᨿᩮᩣᨣᩥᨶᩮᩣᨸᩥ ᨧᩣᨲᩩᨽᩪᨾᨠᩴ ᨠᩩᩈᩃᩴ ᩈᩦᩃᨾᩩᨡᩮᨶ ᨸᩅᩥᩈᩥᨲ᩠ᩅᩣ ᩋᨲ᩠ᨳᩈᩥᨴ᩠ᨵᩥᩴ ᩈᨾ᩠ᨸᩣᨴᩮᨲᩥ. ᨲᩮᨶ ᩅᩩᨲ᩠ᨲᩴ ‘‘ᨾᩩᨡ’’ᨶ᩠ᨲᩥᩌᨴᩥ. ᩋᨳ ᩅᩣ ᨾᩩᨡᨶ᩠ᨲᩥ ᩏᨸᩣᨿᩮᩣ, ᨲᩮᨶ ᨾᩮᩣᨠ᩠ᨡᨸ᩠ᨸᩅᩮᩈᩣᨿ ᨶᩥᨻ᩠ᨻᩣᨶᩈᨧ᩠ᨨᩥᨠᩥᩁᩥᨿᩣᨿ ᨾᩩᨡᩴ ᩏᨸᩣᨿᩮᩣᨲᩥ ᩋᨲ᩠ᨳᩮᩣ. ᨾᩉᩮᩈᩥᨶᩣ ᨿᩴ ᨸᩣᨲᩥᨾᩮᩣᨠ᩠ᨡᩴ ᨸᨠᩣᩈᩥᨲᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨾᩉᨶ᩠ᨲᩮ ᩈᩦᩃᩣᨴᩥᨠ᩠ᨡᨶ᩠ᨵᩮ ᩑᩈᩥ ᨣᩅᩮᩈᩦᨲᩥ ᨾᩉᩮᩈᩥ.

ᩈᩪᩁᨲᩮᨶ ᨶᩥᩅᩣᨲᩮᨶᩣᨲᩥ ‘‘ᨲᨲ᩠ᨳ ᨠᨲᨾᩴ ᩈᩮᩣᩁᨧ᩠ᨧᩴ? ᨿᩮᩣ ᨠᩣᨿᩥᨠᩮᩣ ᩋᩅᩦᨲᩥᨠ᩠ᨠᨾᩮᩣ’’ᨲᩥᩌᨴᩥᨶᩣ (ᨵ. ᩈ. ᪑᪓᪔᪙) ᩈᩪᩁᨲᩮᨶ, ᨶᩦᨧᩅᩩᨲ᩠ᨲᩥᨶᩣ ᨾᩣᨶᩩᨴ᩠ᨵᨧ᩠ᨧᩅᩈᩮᨶ ᩋᨲ᩠ᨲᩣᨶᩴ ᩋᨶᩩᨠ᩠ᨡᩥᨸᨶᨽᩣᩅᩮᨶ ᨶᩥᩅᩣᨲᩮᨶ. ᩅᩥᨶᨿᩣᨧᩣᩁᨿᩩᨲ᩠ᨲᩮᨶ ᨧᩣᩁᩥᨲ᩠ᨲᩅᩣᩁᩥᨲ᩠ᨲᩮᩉᩥ ᨿᩩᨲ᩠ᨲᩮᨶ. ‘‘ᩈᩮᩣᨱᨲ᩠ᨳᩮᩁᩮᨶ ᨿᩣᨧᩥᨲᩮᩣ’’ᨲᩥ ᩋᩅᨲ᩠ᩅᩣ ‘‘ᩈᩪᩁᨲᩮᨶᩣ’’ᨲᩥᩌᨴᩥ ᨠᩈ᩠ᨾᩣ ᩅᩩᨲ᩠ᨲᩴ, ᨠᩥᩴ ᨴᩩᩔᩦᩃᩮᨶ ᩅᩣ ᨴᩩᨭ᩠ᨮᩮᨶ ᩅᩣ ᩋᩃᨩ᩠ᨩᩥᨶᩣ ᩅᩣ ᨿᩣᨧᩥᨲᩮᨶ ᩅᨱ᩠ᨱᨶᩣ ᨠᩣᨲᩩᩴ ᨶ ᩅᨭ᩠ᨭᨲᩦᨲᩥ ᨧᩮ? ᨶ ᨶ ᩅᨭ᩠ᨭᨲᩥ. ᨳᩮᩁᩔ ᩅᨧᨶᩴ ᨸᨭᩥᨠ᩠ᨡᩥᨸᩥᨲᩩᩴ ᨶ ᩈᨠ᩠ᨠᩣ, ᩑᩅᩁᩪᨸᨣᩩᨱᩮᩣ ᨳᩮᩁᩮᩣᩅ, ᨿᩣᨧᨶᩅᩈᩮᨶ ᨠᨲ᩠ᨲᨻ᩠ᨻᩮᩣ ᩌᨴᩁᩮᨶᩣᨲᩥ ᨴᩔᩮᨲᩩᩴ ᩅᩩᨲ᩠ᨲᩴ.

ᨶᩣᨾᩮᨶᩣᨲᩥ ᩋᨲ᩠ᨲᨶᩮᩣ ᨣᩩᨱᨶᩣᨾᩮᨶ. ᩈᨴ᩠ᨴᩃᨠ᩠ᨡᨱᩈᩩᨽᨲᩮᩣ, ᩅᩥᨶᩥᨧ᩠ᨨᨿᩈᩩᨽᨲᩮᩣ, ᩅᩥᨬ᩠ᨬᩮᨿ᩠ᨿᩈᩩᨽᨲᩮᩣ ᨧ ᩈᩩᨽᩴ.

ᨣᨶ᩠ᨳᩣᩁᨾ᩠ᨽᨠᨳᩣᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨶᩥᨴᩣᨶᩅᨱ᩠ᨱᨶᩣ

‘‘ᩌᩅᩥᨠᨲᩣ ᩉᩥᩔ ᨹᩣᩈᩩ ᩉᩮᩣᨲᩥ, ᨲᨲ᩠ᨳᩣᨿᩈ᩠ᨾᨶ᩠ᨲᩮ ᨸᩩᨧ᩠ᨨᩣᨾᩥ…ᨸᩮ… ᨲᩩᨱ᩠ᩉᩦ, ᩑᩅᨾᩮᨲᩴ ᨵᩣᩁᨿᩣᨾᩦ’’ᨲᩥ ᩅᨲ᩠ᩅᩣ ‘‘ᩏᨴ᩠ᨴᩥᨭ᩠ᨮᩴ ᨡᩮᩣ ᩌᨿᩈ᩠ᨾᨶ᩠ᨲᩮᩣ ᨶᩥᨴᩣᨶ’’ᨶ᩠ᨲᩥᩌᨴᩥᨶᩣ ᨶᨿᩮᨶ ᩅᩩᨲ᩠ᨲᩴ. ᩑᨲ᩠ᨳᩮᩅ ᨿᩣᩅᨲᨲᩥᨿᩣᨶᩩᩈᩣᩅᨶᨠᨳᩣᩅᩈᩣᨶᩮ ᩋᨳ ᨡᩮᩣ ᩏᨴ᩠ᨴᩮᩈᨠᩣᩃᩮ ‘‘ᩌᩅᩥᨠᨲᩣ ᩉᩥᩔ ᨹᩣᩈᩩ ᩉᩮᩣᨲᩦ’’ᨲᩥ ᩅᨲ᩠ᩅᩣ ‘‘ᩏᨴ᩠ᨴᩥᨭ᩠ᨮᩴ ᨡᩮᩣ ᩌᨿᩈ᩠ᨾᨶ᩠ᨲᩮᩣ ᨶᩥᨴᩣᨶᩴ. ᨲᨲ᩠ᨳᩣᨿᩈ᩠ᨾᨶ᩠ᨲᩮ ᨸᩩᨧ᩠ᨨᩣᨾᩦ’’ᨲᩥᩌᨴᩥᨶᩣ ᨶᨿᩮᨶ ᩌᨣᨲᩴ. ᩏᨸᩮᩣᩈᨳᨠ᩠ᨡᨶ᩠ᨵᨠᩮᨸᩥ ᩑᩅᨾᩮᩅ ᩌᨣᨲᩴ. ᨲᨲ᩠ᨳ ᨸᩩᨻ᩠ᨻᩮ ᩅᩩᨲ᩠ᨲᩴ ᨸᨧ᩠ᨨᩣ ᩌᨣᨲᩈᩩᨲ᩠ᨲᩮᨶ ᩅᩥᩁᩩᨩ᩠ᨫᨲᩥ. ᨲᩈ᩠ᨾᩣ ᨿᨳᩣ ᨶ ᩅᩥᩁᩩᨩ᩠ᨫᨲᩥ, ᨲᨳᩣ ᩏᨸᨸᩁᩥᨠ᩠ᨡᩥᨲ᩠ᩅᩣ ᨣᩉᩮᨲᨻ᩠ᨻᩴ. ᩑᩅᩴ ᨶ ᩅᩥᩁᩩᨩ᩠ᨫᨲᩦᨲᩥ ᩑᨠᩮ. ᨠᨳᩴ? ‘‘ᩌᩅᩥᨠᨲᩣ ᩉᩥᩔ ᨹᩣᩈᩩ ᩉᩮᩣᨲᩦ’’ᨲᩥ ᩅᨲ᩠ᩅᩣ ‘‘ᩏᨴ᩠ᨴᩥᨭ᩠ᨮᩴ ᨡᩮᩣ ᩌᨿᩈ᩠ᨾᨶ᩠ᨲᩮᩣ ᨶᩥᨴᩣᨶᩴ. ᨲᨲ᩠ᨳᩣᨿᩈ᩠ᨾᨶ᩠ᨲᩮ ᨸᩩᨧ᩠ᨨᩣᨾᩦ’’ᨲᩥᩌᨴᩥᨶᩣ ᩈᩩᩏᨴ᩠ᨴᩥᨭ᩠ᨮᩴ ᩉᩮᩣᨲᩦᨲᩥ ᩑᨲᩴ ᩏᨴ᩠ᨴᩮᩈᩃᨠ᩠ᨡᨱᩴ ᩍᨵᩣᨸᩥ ᨡᨶ᩠ᨵᨠᩮᨸᩥ ᩅᩩᨲ᩠ᨲᨲ᩠ᨲᩣ. ᨲᩈ᩠ᨾᩣ ‘‘ᨹᩣᩈᩩ ᩉᩮᩣᨲᩦ’’ᨲᩥ ᩅᨲ᩠ᩅᩣ ‘‘ᨲᨲ᩠ᨳᩣᨿᩈ᩠ᨾᨶ᩠ᨲᩮ ᨸᩩᨧ᩠ᨨᩣᨾᩦ’’ᨲᩥ ᩅᩩᨲ᩠ᨲᨭ᩠ᨮᩣᨶᩮ ᩋᩅᩩᨲ᩠ᨲᨾ᩠ᨸᩥ ᩌᨶᩮᨲ᩠ᩅᩣ ᨣᩉᩮᨲᨻ᩠ᨻᩴ. ᨠᩈ᩠ᨾᩣ? ᩍᨵ ᨶᩥᨴᩣᨶᩴ ᨶ ᨴᩔᩥᨲᩴ, ᩏᨴ᩠ᨴᩮᩈᩮᩣ ᩏᨴ᩠ᨴᩮᩈᨠᩣᩃᩮ ᩏᨴ᩠ᨴᩥᩈᩥᨲᨻ᩠ᨻᩃᨠ᩠ᨡᨱᩔ ᨲᨲ᩠ᨳ ᩅᩩᨲ᩠ᨲᨲ᩠ᨲᩣ. ᩋᨸᩥᨧ ‘‘ᨶᩥᨴᩣᨶᩩᨴ᩠ᨴᩮᩈᩮᩣ’’ᨲᩥ ᨸᨴᩴ ᩏᨴ᩠ᨵᩁᩥᨲ᩠ᩅᩣ ᨶᩥᨴᩣᨶᩩᨴ᩠ᨴᩮᩈᩴ ᨴᩔᩮᨲᩩᨠᩣᨾᩮᩣᨸᩥ ‘‘ᩈᩩᨱᩣᨲᩩ ᨾᩮ, ᨽᨶ᩠ᨲᩮ, ᩈᨦ᩠ᨥᩮᩣ…ᨸᩮ… ᩌᩅᩥᨠᨲᩣ ᩉᩥᩔ ᨹᩣᩈᩩ ᩉᩮᩣᨲᩦ’’ᨲᩥ ᨸᩣᨮᩅᩈᩮᨶ ᩌᨣᨲᩴ ᨶᩥᨴᩣᨶᩴ ᨶᩥᨭ᩠ᨮᩣᨸᩮᨲ᩠ᩅᩣ ᩏᨸᩁᩥ ᩋᨭ᩠ᨮᨠᨳᩣᩅᩈᩮᨶ ᨿᩮᩣᨩᩮᨲᨻ᩠ᨻᩴ ᨸᩣᩊᩥᩴ ᩍᨵ ᨿᩮᩣᨩᩮᨲ᩠ᩅᩣ ‘‘ᨲᨲ᩠ᨳᩣᨿᩈ᩠ᨾᨶ᩠ᨲᩮ ᨸᩩᨧ᩠ᨨᩣᨾᩥ…ᨸᩮ… ᨵᩣᩁᨿᩣᨾᩦ’’ᨲᩥ ᨶᩥᨴᩣᨶᨸᩣᩊᩥᩴ ᨸᩁᩥᨸᩩᨱ᩠ᨱᩴ ᨠᨲ᩠ᩅᩣ ᨸᩩᨶ ‘‘ᨲᨲ᩠ᨳ ᨶᩥᨴᩣᨶᩩᨴ᩠ᨴᩮᩈᩮᩣ’’ᨲᩥ ᩏᨴ᩠ᨵᨭᨸᨴᩅᩈᩮᨶ ᩈᨦ᩠ᨡᩮᨸᨲᩮᩣ ᨶᩥᨴᩣᨶᩩᨴ᩠ᨴᩮᩈᩃᨠ᩠ᨡᨱᩴ ᨴᩔᩮᨲᩩᩴ ‘‘ᩑᩅᨾᩮᨲᩴ ᨵᩣᩁᨿᩣᨾᩦ’’ᨲᩥ ᩅᨲ᩠ᩅᩣ ‘‘ᩏᨴ᩠ᨴᩥᨭ᩠ᨮᩴ ᨡᩮᩣ ᩌᨿᩈ᩠ᨾᨶ᩠ᨲᩮᩣ ᨶᩥᨴᩣᨶ’’ᨶ᩠ᨲᩥᩌᨴᩥ ᩅᩩᨲ᩠ᨲᩴ, ᨲᩈ᩠ᨾᩣ ᩑᩅᩴ ᩏᨸᩁᩥ ᨧ ᨡᨶ᩠ᨵᨠᩮ ᨧ, ᩋᨳ ᨡᩮᩣ ᩏᨴ᩠ᨴᩮᩈᨠᩣᩃᩮ ‘‘ᩌᩅᩥᨠᨲᩣ ᩉᩥᩔ ᨹᩣᩈᩩ ᩉᩮᩣᨲᩦ’’ᨲᩥ ᩅᨲ᩠ᩅᩣ ‘‘ᩏᨴ᩠ᨴᩥᨭ᩠ᨮᩴ ᨡᩮᩣ ᩌᨿᩈ᩠ᨾᨶ᩠ᨲᩮᩣ ᨶᩥᨴᩣᨶᩴ. ᨲᨲ᩠ᨳᩣᨿᩈ᩠ᨾᨶ᩠ᨲᩮ ᨸᩩᨧ᩠ᨨᩣᨾᩦ’’ᨲᩥᩌᨴᩥ ᨶᩥᨴᩣᨶᩩᨴ᩠ᨴᩮᩈᩮᩣᩅ ᨴᩔᩥᨲᩮᩣ, ᨶ ᨶᩥᨴᩣᨶᩴ.

ᩈᩅᨶᩣᨱᨲ᩠ᨲᩥᩅᨧᨶᨶ᩠ᨲᩥ ᩑᨲ᩠ᨳ ᩈᨦ᩠ᨥᨶᩅᨠᨲᩁᩮᨶ ᩅᨲ᩠ᨲᩩᩴ ᩋᨿᩩᨲ᩠ᨲᨶ᩠ᨲᩥ ᨧᩮ? ᨿᩩᨲ᩠ᨲᨾᩮᩅ. ‘‘ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᨠᩮᨶ ᩑᩅᩴ ᩅᨲ᩠ᨲᨻ᩠ᨻ’’ᨶ᩠ᨲᩥ ᨽᨣᩅᨲᩣ ᩅᩩᨲ᩠ᨲᨲ᩠ᨲᩣ ᨽᨣᩅᨲᩮᩣᩅ ᩌᨱᨲ᩠ᨲᩥ, ᨶ ᩏᨴ᩠ᨴᩮᩈᨠᩔ. ᩍᨵ ᨶᩅᨠᨲᩁᩅᩈᩮᨶ ᩅᩩᨲ᩠ᨲᩴ. ᨳᩮᩁᩮᩣᨸᩥ ᨸᨶ ᩏᨴ᩠ᨴᩥᩈᩥᨲᩩᩴ ᩃᨽᨲᩦᨲᩥ ᨴᩔᨶᨲ᩠ᨳᩴ ‘‘ᨳᩮᩁᩣᨵᩥᨠᩴ ᨸᩣᨲᩥᨾᩮᩣᨠ᩠ᨡ’’ᨶ᩠ᨲᩥ ᩅᩩᨲ᩠ᨲᩴ. ᩍᨾᩥᨶᩣ ᩈᩩᨲ᩠ᨲᩮᨶ ᨶᩅᨠᨲᩁᩮᩣ ᨶ ᩃᨽᨲᩦᨲᩥ ᨧᩮ? ᨲᩴ ᨴᩔᩮᨲᩩᩴ ‘‘ᨿᩮᩣ ᨲᨲ᩠ᨳ ᨽᩥᨠ᩠ᨡᩪ’’ᨲᩥᩌᨴᩥ ᩅᩩᨲ᩠ᨲᩴ.

ᨿᨳᩣ ᨧᨲᩩᩅᨣ᩠ᨣᩮᨶ ᨮᨸᩮᨲ᩠ᩅᩣ ᩏᨸᩈᨾ᩠ᨸᨴᩣᨸᩅᩣᩁᨱᩣᩋᨻ᩠ᨽᩣᨶᩣᨶᩥ ᩈᨻ᩠ᨻᩴ ᩈᨦ᩠ᨥᨠᨾ᩠ᨾᩴ ᨠᩣᨲᩩᩴ ᩅᨭ᩠ᨭᨲᩥ, ᩑᩅᩴ ‘‘ᩋᨲᩥᩁᩮᨠᩅᩦᩈᨲᩥᩅᨣ᩠ᨣᩮᨶ ᩍᨾᩴ ᨶᩣᨾ ᨠᨾ᩠ᨾᩴ ᨠᩣᨲᨻ᩠ᨻ’’ᨶ᩠ᨲᩥ ᩋᩅᨲ᩠ᩅᩣ ᩋᨲᩥᩁᩮᨠᩅᨧᨶᨲ᩠ᨲᩣ ᩋᨬ᩠ᨬᩴ ᩋᨲ᩠ᨳᩴ ᩈᩪᨧᩮᨲᩥ, ᨠᩥᩴ ᨲᨶ᩠ᨲᩥ ‘‘ᨧᨲᩩᩅᨣ᩠ᨣᩣᨴᩥᨶᩣ’’ᨲᩥᩌᨴᩥ. ᨲᨬ᩠ᩉᩥ ᨲᩮᩉᩥ ᩑᩅ ᩈᩥᨴ᩠ᨵᩴ. ᨠᨳᩴ? ᨧᨲᩩᩅᨣ᩠ᨣᩮᨶ ᩏᨸᩈᨾ᩠ᨸᨴᩣᨸᩅᩣᩁᨱᩣ…ᨸᩮ… ᩅᩦᩈᨲᩥᩅᨣ᩠ᨣᩮᨶ ᨶ ᨠᩥᨬ᩠ᨧᩥ ᩈᨦ᩠ᨥᨠᨾ᩠ᨾᩴ ᨠᩣᨲᩩᩴ ᨶ ᩅᨭ᩠ᨭᨲᩦᨲᩥ. ᩑᨲ᩠ᨳ ‘‘ᨴᩈᩅᨣ᩠ᨣᩮᨶ ᩋᨻ᩠ᨽᩣᨶᨠᨾ᩠ᨾᨾᨲ᩠ᨲᩴ ᨮᨸᩮᨲ᩠ᩅᩣ’’ᨲᩥ ᩅᨴᨶ᩠ᨲᩮᨶ ᨧᨲᩩᨸᨬ᩠ᨧᩅᨣ᩠ᨣᩮᨶ ᨠᩁᨱᩦᨿᩣᨶᩥᨸᩥ ᨴᩈᩅᨣ᩠ᨣᩮᨶ ᨠᩣᨲᩩᩴ ᩋᨶᩩᨬ᩠ᨬᩣᨲᩣᨶᩥ. ᨲᩈ᩠ᨾᩣ ᩋᨲᩥᩁᩮᨠᩮᨶ ᩅᨭ᩠ᨭᨲᩦᨲᩥ ᨴᩦᨸᩥᨲᩴ, ‘‘ᨮᨸᩮᨲ᩠ᩅᩣ’’ᨲᩥ ᩅᨧᨶᩮᨶ ᩐᨶᨲᩁᩮᨶ ᨶ ᩅᨭ᩠ᨭᨲᩦᨲᩥ ᨴᩦᨸᩥᨲᨾᩮᩅ. ᨲᩈ᩠ᨾᩣ ᨶ ᩅᨲ᩠ᨲᨻ᩠ᨻᩴ ᩋᨲᩥᩁᩮᨠᩅᩦᩈᨲᩥᩅᨣ᩠ᨣᩮᩣᨲᩥ ᨧᩮ? ᩅᨲ᩠ᨲᨻ᩠ᨻᨾᩮᩅ. ᨧᨲᩩᨸᨬ᩠ᨧᩅᨣ᩠ᨣᩮᨶ ᨠᨲ᩠ᨲᨻ᩠ᨻᩴ ᨨᩈᨲ᩠ᨲᩋᨭ᩠ᨮᨶᩅᩅᨣ᩠ᨣᩮᨶ ᨠᩣᨲᨻ᩠ᨻᨶ᩠ᨲᩥ ᨧ, ᨴᩈᩅᨣ᩠ᨣᩮᨶ ᨠᩣᨲᨻ᩠ᨻᩴ ᩑᨠᩣᨴᩈᨴ᩠ᩅᩣᨴᩈ…ᨸᩮ… ᩑᨠᩪᨶᩅᩦᩈᨲᩥᩅᨣ᩠ᨣᩮᨶ ᨠᩣᨲᨻ᩠ᨻᨶ᩠ᨲᩥ ᨧ ᨴᩦᨸᩥᨲᩴ. ᩐᨶᨲᩁᩮᨶ ᨶ ᩅᨭ᩠ᨭᨲᩦᨲᩥ ᨴᩦᨸᩥᨲᩴ ᨸᩣᨠᨭᨲᩮᩣ. ᩈᨻ᩠ᨻᨸ᩠ᨸᨠᩣᩁᩮᨶ ᨸᨶ ᩋᨲᩥᩁᩮᨠᩅᩦᩈᨲᩥᩋᨶᨲᩥᩁᩮᨠᩅᩦᩈᨲᩥᩅᨣ᩠ᨣᩮ ᩅᩩᨲ᩠ᨲᩮᨸᩥ ᨴᩦᨸᩥᨲᩴ ᩉᩮᩣᨲᩦᨲᩥ ᩅᨩᩥᩁᨻᩩᨴ᩠ᨵᩥᨲ᩠ᨳᩮᩁᩮᨶ ᩃᩥᨡᩥᨲᩴ. ᩍᨲᩮᩣ ᨸᨭ᩠ᨮᩣᨿ ‘‘ᩃᩥᨡᩥᨲ’’ᨶ᩠ᨲᩥ ᩅᩩᨲ᩠ᨲᩮ ᩅᨩᩥᩁᨻᩩᨴ᩠ᨵᩥᨲ᩠ᨳᩮᩁᩮᨶᩣᨲᩥ ᨣᩉᩮᨲᨻ᩠ᨻᩴ.

ᩈᨧᩮ ᩋᨶᩩᨸᩮᩣᩈᨳᩮᨸᩥ ᩅᨭ᩠ᨭᩮᨿ᩠ᨿ, ‘‘ᩏᨸᩮᩣᩈᨳᩴ ᨠᩁᩮᨿ᩠ᨿᩣ’’ᨲᩥ ᨶ ᩅᨴᩮᨿ᩠ᨿ, ᨿᩈ᩠ᨾᩣ ᩋᨶᩩᨸᩮᩣᩈᨳᩮ ᨠᩣᨲᩩᩴ ᨶ ᩅᨭ᩠ᨭᨲᩥ, ᨲᩈ᩠ᨾᩣ ‘‘ᩋᨩ᩠ᨩᩩᨸᩮᩣᩈᨳᩮᩣ’’ᨲᩥ ᩅᨲ᩠ᩅᩣ ᨸᩩᨶ ‘‘ᩏᨸᩮᩣᩈᨳᩴ ᨠᩁᩮᨿ᩠ᨿᩣ’’ᨲᩥ ᩅᩩᨲ᩠ᨲᩴ. ‘‘ᨸᨧ᩠ᨨᩥᨾᨠᨲ᩠ᨲᩥᨠᨸᩩᨱ᩠ᨱᨾᩣ ᩑᩅᩣ’’ᨲᩥ ᩋᩅᨵᩣᩁᨱᩴ ᨲᨲᩮᩣ ᨸᩁᩴ ᨸᩅᩣᩁᨱᩣᨴᩥᩅᩈᩔ ᨶᨲ᩠ᨳᩥᨲᩣᨿ ᨠᨲᩴ. ᩏᨴ᩠ᨵᩴ ᨸᨠᨲᩥᩏᨸᩮᩣᩈᨳᩮ ᩅᩩᨲ᩠ᨲᩮᨶ ᨸᨠᨲᩥᨧᩣᩁᩥᨲ᩠ᨲᩮᨶ ᩈᨴ᩠ᨵᩥᩴ ᩍᨴᨾ᩠ᨸᩥ.

‘‘ᨶᩥᨾᩥᨲ᩠ᨲᩮᨶ ᨶᩥᨾᩥᨲ᩠ᨲᩴ ᩈᨾ᩠ᨻᨶ᩠ᨵᩥᨲ᩠ᩅᩣ’’ᨲᩥ ᨶ ᩅᨲ᩠ᨲᨻ᩠ᨻᩴ ‘‘ᨲᩥᩅᩥᨵᩈᨾ᩠ᨸᨲ᩠ᨲᩥᨿᩩᨲ᩠ᨲᩣ’’ᨲᩥ ᩅᩩᨲ᩠ᨲᨲ᩠ᨲᩣᨲᩥ ᨧᩮ? ᩅᨲ᩠ᨲᨻ᩠ᨻᨾᩮᩅ. ᨠᩈ᩠ᨾᩣ? ᨲᩥᩅᩥᨵᩈᨾ᩠ᨸᨲ᩠ᨲᩥ ᨶᩣᨾ ᨶᩥᨾᩥᨲ᩠ᨲᩈᨾ᩠ᨸᨲ᩠ᨲᩥ, ᨸᩁᩥᩈᩣᩈᨾ᩠ᨸᨲ᩠ᨲᩥ, ᨠᨾ᩠ᨾᩅᩣᨧᩣᩈᨾ᩠ᨸᨲ᩠ᨲᩦᨲᩥᩌᨴᩥᩴ ᩅᨲ᩠ᩅᩣ ‘‘ᨶᩥᨾᩥᨲ᩠ᨲᩈᨾ᩠ᨸᨲ᩠ᨲᩥ ᨶᩣᨾ ᨸᨻ᩠ᨻᨲᨶᩥᨾᩥᨲ᩠ᨲᩴ, ᨸᩣᩈᩣᨱᨶᩥᨾᩥᨲ᩠ᨲ’’ᨶ᩠ᨲᩥᩌᨴᩥ ᩅᩩᨲ᩠ᨲᩴ, ᨶ ᨶᩥᨾᩥᨲ᩠ᨲᩮᨶ ᨶᩥᨾᩥᨲ᩠ᨲᩈᨾ᩠ᨻᨶ᩠ᨵᨶᩴ ᩅᩩᨲ᩠ᨲᩴ. ᩋᨸᩥᨧ ‘‘ᨲᩥᩅᩥᨵᩈᨾ᩠ᨸᨲ᩠ᨲᩥᨿᩩᨲ᩠ᨲᩣ’’ᨲᩥ ᩈᨾ᩠ᨸᨿᩮᩣᨣᨦ᩠ᨣᩮᩈᩩ ᨴᩔᩮᨲ᩠ᩅᩣ ᨸᩩᨶ ᨲᨾᩮᩅ ᨸᩉᩣᨶᨦ᩠ᨣᩮᩈᩩ ᨴᩔᩮᨲᩩᩴ ‘‘ᨶᩥᨾᩥᨲ᩠ᨲᩮᨶ ᨶᩥᨾᩥᨲ᩠ᨲᩴ ᩈᨾ᩠ᨻᨶ᩠ᨵᩥᨲ᩠ᩅᩣ’’ᨲᩥ ᩅᩩᨲ᩠ᨲᩴ. ᨶᨴᩥᩈᨾᩩᨴ᩠ᨴᨩᩣᨲᩔᩁᩮᩈᩩ ᩈᨾ᩠ᨾᨲᩈᩦᨾᩣᨲᩮᩣ ᨠᨾ᩠ᨾᩣᨶᩥ ᨶ ᩅᩥᨸᨩ᩠ᨩᨶ᩠ᨲᩥ ᩏᨴᨠᩩᨠ᩠ᨡᩮᨸᩈᩦᨾᨲ᩠ᨲᩣᨲᩥ ‘‘ᩅᩥᨸᨲ᩠ᨲᩥᩈᩦᨾᩣᨿᩮᩣ ᨶᩣᨾᩣ’’ᨲᩥ ᨠᩈ᩠ᨾᩣ ᩅᩩᨲ᩠ᨲᩣᨲᩥ ᨧᩮ? ᩈᩮᩈᩃᨠ᩠ᨡᨱᩣᨶᩥ ᩈᨾ᩠ᨸᩣᨴᩮᨲ᩠ᩅᩣ ᨶᨴᩥᨿᩴ ᩈᩦᨾᩣᨿ ᨻᨴ᩠ᨵᩣᨿ ᩏᨴᨠᨸᩁᩥᨿᨶ᩠ᨲᩴ ᨠᨲ᩠ᩅᩣ ᩈᩦᨾᩣᨣᨲᨲ᩠ᨲᩣ ᨸᩩᨶ ᨲᩴ ᨶᨴᩥᩴ ᩋᨶ᩠ᨲᩮᩣ ᨠᨲ᩠ᩅᩣ ᨲᩊᩣᨠᩮ ᨠᨲᩮ ᩈᨧᩮ ᨲᩔᩣ ᩈᩦᨾᩣᨿ ᨠᨾ᩠ᨾᩴ ᨠᩣᨲᩩᩴ ᩅᨭ᩠ᨭᩮᨿ᩠ᨿ, ᩈᩦᨾᩣᨲᩮᩣ ᨠᨾ᩠ᨾᩣᨶᩥ ᨶ ᩅᩥᨸᨩ᩠ᨩᩮᨿ᩠ᨿᩩᩴ. ᨿᩈ᩠ᨾᩣ ᨸᨶ ᩑᩅᩴ ᨠᩣᨲᩩᩴ ᨶ ᩅᨭ᩠ᨭᨲᩥ, ᨲᩈ᩠ᨾᩣ ‘‘ᩏᨴᨠᩩᨠ᩠ᨡᩮᨸᩈᩦᨾᨲ᩠ᨲᩣ’’ᨲᩥ ᩅᩩᨲ᩠ᨲᩴ ᩋᨠᩣᩁᨱᩴ.

ᩅᩦᩈᨲᩥᩅᨣ᩠ᨣᨠᩁᨱᩦᨿᨲ᩠ᨲᩣ ᩈᨦ᩠ᨥᨠᨾ᩠ᨾᩔ ᨠᨾ᩠ᨾᩣᩁᩉᩮᨶ ᩈᨴ᩠ᨵᩥᩴ ᩑᨠᩅᩦᩈᨲᩥ ᨽᩥᨠ᩠ᨡᩪ ᨶᩥᩈᩦᨴᩥᨲᩩᩴ ᨶ ᩈᨠ᩠ᨠᩮᩣᨶ᩠ᨲᩦ’’ᨲᩥ ᩅᩩᨲ᩠ᨲᩴ, ᩈᩩᨡᨶᩥᩈᨩ᩠ᨩᩣᩅᩈᩮᨶ ᨶᩥᩈᩦᨴᩥᨲᩩᨶ᩠ᨲᩥ ᩋᨵᩥᨸ᩠ᨸᩣᨿᩮᩣ. ‘‘ᨸᩁᩥᨾᨱ᩠ᨯᩃᩣᨠᩣᩁᩮᨶ ᨶᩥᩈᩦᨴᩥᨲᩩ’’ᨶ᩠ᨲᩥ ᩋᨭ᩠ᨮᨠᨳᩣᨿᩴ ᩅᩩᨲ᩠ᨲᩴ. ᨲᩥᨿᩮᩣᨩᨶᩴ ᩋᨲᩥᨠ᩠ᨠᨾᩥᨲ᩠ᩅᩣᨲᩥ ᨾᨩ᩠ᨫᩮ ᨮᨲ᩠ᩅᩣ ᨴᩥᨿᨯ᩠ᨰᩴ ᨠᨲ᩠ᩅᩣ ᨲᩥᨿᩮᩣᨩᨶᩴ. ᨠᩮᩣᨱᨲᩮᩣ ᩉᩥ ᨠᩮᩣᨱᩴ ᨲᩥᨿᩮᩣᨩᨶᩴ ᩋᨲᩥᨠ᩠ᨠᩣᨾᩮᨲᩥ, ᩌᨸᨲ᩠ᨲᩥᨬ᩠ᨧ ᩌᨸᨩ᩠ᨩᨲᩥ, ᩈᩦᨾᩣ ᨧ ᩋᩈᩦᨾᩣ ᩉᩮᩣᨲᩥ. ᨠᩥᨲ᩠ᨲᩮᨲ᩠ᩅᩣᨲᩥ ᨶᩥᨾᩥᨲ᩠ᨲᩣᨶᩥ ᩈᨾ᩠ᨸᨶ᩠ᨶᩣᨶᩥᨸᩥ ᩋᨬ᩠ᨬᨾᨬ᩠ᨬᨶᩣᨾᩅᩥᨸᩁᩥᨿᩣᨿᩮᨶ, ᩋᨶᩥᨾᩥᨲ᩠ᨲᩣᨶᩴ ᨶᩣᨾᩮᩉᩥ ᨧ ᨠᩥᨲ᩠ᨲᩮᨲ᩠ᩅᩣᨲᩥ ᩋᨲ᩠ᨳᩮᩣ.

ᩁᩣᩈᩥᨠᨲᩴ ᨸᩴᩈᩩᨸᩥ ᩁᩩᨠ᩠ᨡᩮᩈᩩ ᨩᩣᨲᩮᩈᩩ ᩈᩩᨴ᩠ᨵᨸᩴᩈᩩᨸᨻ᩠ᨻᨲᩮᩣ ᩉᩮᩣᨲᩥ. ᨣᩩᩊᨸᩥᨱ᩠ᨯᨸᩁᩥᨾᩣᨱᩮᩣ ᨳᩪᩃᨲᩣᨿ, ᨶ ᨲᩩᩃᨣᨱᨶᩣᨿ. ᨽᩪᨾᩥᨿᩴ ᨸᨲᩥᨭ᩠ᨮᩥᨲᩮᩣ’’ᨲᩥ ᩍᨾᩥᨶᩣ ᨠᩩᨭᩈᩁᩣᩅᩣᨴᩦᩈᩩ ᩁᩮᩣᨸᩥᨲᩴ ᨸᨭᩥᨠ᩠ᨡᩥᨸᨲᩥ, ᨲᨲᩮᩣ ᩋᨸᨶᩮᨲ᩠ᩅᩣ ᨸᨶ ᨲᨦ᩠ᨡᨱᨾ᩠ᨸᩥ ᨽᩪᨾᩥᨿᩴ ᩁᩮᩣᨸᩥᨲᩮᩣ ᩅᨭ᩠ᨭᨲᩥ. ᨶᩅᨾᩪᩃᩈᩣᨡᩣᨶᩥᨣ᩠ᨣᨾᨶᩴ ᨸᨶ ᩋᨠᩣᩁᨱᩴ. ᨡᨶ᩠ᨵᩴ ᨨᩥᨶ᩠ᨴᩥᨲ᩠ᩅᩣ ᩁᩮᩣᨸᩥᨲᩮ ᨸᨶ ᩑᨲᩴ ᨿᩩᨩ᩠ᨩᨲᩥ. ᩈᩪᨧᩥᨴᨱ᩠ᨯᨠᨸ᩠ᨸᨾᩣᨱᩮᩣ ᨠᨶᩥᨭ᩠ᨮᨦ᩠ᨣᩩᩃᩥᨸᩁᩥᨾᩣᨱᨾᨲ᩠ᨲᩮᩣ. ‘‘ᩋᨭ᩠ᨮᨦ᩠ᨣᩩᩃᩩᨻ᩠ᨻᩮᨵᩮᩣ’’ᨲᩥ ᩍᨾᩥᨶᩣ ᩏᨻ᩠ᨻᩮᨵᩮᩣ ᨸᩁᩥᨧ᩠ᨨᩥᨶ᩠ᨶᩮᩣ ᩉᩮᩣᨲᩥ, ‘‘ᨣᩮᩣᩅᩥᩈᩣᨱᨾᨲ᩠ᨲᩮᩣ’’ᨲᩥ ᩍᨾᩥᨶᩣ ᨸᩁᩥᨱᩣᩉᩮᩣ. ‘‘ᩑᩅᩴ ᩈᨶ᩠ᨲᩮᨸᩥ ᨣᩮᩣᩅᩥᩈᩣᨱᨸᩁᩥᨱᩣᩉᩮ ᨸᩁᩥᨧ᩠ᨨᩮᨴᩮᩣ ᨶᨲ᩠ᨳᩥ, ᨲᩈ᩠ᨾᩣ ᨡᩩᨴ᩠ᨴᨠᩮᩣᨸᩥ ᨾᩉᨶ᩠ᨲᩮᩣᨸᩥ ᩅᨭ᩠ᨭᨲᩥ ᩑᩅᩣᨲᩥ ᩅᨴᨶ᩠ᨲᩥ.

ᨩᩣᨲᩔᩁᩮ ᨸᩁᩥᨸᩩᨱ᩠ᨱᨾᩮᩅ ᩏᨴᨠᩴ ᨶᩥᨾᩥᨲ᩠ᨲᩪᨸᨣᩴ ᨴᩥᩈ᩠ᩅᩣ ᩋᨸᩁᩥᨸᩩᨱ᩠ᨱᩴ ᩋᨶ᩠ᨲᩁᩣ ᨮᩥᨲᩥᨽᩪᨲᩴ ‘‘ᨩᩣᨲᩔᩁᩮ ᩈᨾ᩠ᨾᨲᩣ’’ᨲᩥ ᩅᩩᨲ᩠ᨲᩴ ᩅᩥᨸᨲ᩠ᨲᩥᩴ ᨶ ᩌᨸᨩ᩠ᨩᨲᩦᨲᩥ ‘‘ᨶᨴᩥᨿᩣ ᩈᨾ᩠ᨾᨲᩣ, ᩈᨾᩩᨴ᩠ᨴᩮ ᩈᨾ᩠ᨾᨲᩣ, ᨩᩣᨲᩔᩁᩮ ᩈᨾ᩠ᨾᨲᩣ’’ᨲᩥ ᩑᨲ᩠ᨳᩣᨸᩥ ᩃᩮᩣᨱᩦ ᨶ ᨣᩉᩥᨲᩣ. ᨻᨴ᩠ᨵᩈᩦᨾᩴ ᩅᩣ ᨶᨴᩥᩈᨾᩩᨴ᩠ᨴᨩᩣᨲᩔᩁᩮ ᩅᩣ ᩋᨶᩮᩣᨠ᩠ᨠᨾᩥᨲ᩠ᩅᩣᨲᩥ ᩑᨲ᩠ᨳᩣᨸᩥ ‘‘ᨶᨴᩥᨿᩣ ᩅᩣ, ᨽᩥᨠ᩠ᨡᩅᩮ, ᩈᨾᩩᨴ᩠ᨴᩮ ᩅᩣ ᨩᩣᨲᩔᩁᩮ ᩅᩣ’’ᨲᩥ (ᨾᩉᩣᩅ. ᪑᪔᪗) ᩑᨲ᩠ᨳᩣᨸᩥ ᨶ ᨣᩉᩥᨲᩣ. ᨲᩈ᩠ᨾᩣ ᩃᩮᩣᨱᩦ ᨶ ᩋᨻᨴ᩠ᨵᩈᩦᨾᩣᨲᩥ ᨧᩮ? ᩋᨻᨴ᩠ᨵᩈᩦᨾᩣᩅ. ‘‘ᨿᩮᩣᨸᩥ ᨶᨴᩥᩴ ᩅᩣ ᩈᨾᩩᨴ᩠ᨴᩴ ᩅᩣ ᨽᩥᨶ᩠ᨴᩥᨲ᩠ᩅᩣ ᨶᩥᨠ᩠ᨡᨶ᩠ᨲᩏᨴᨠᩮᨶ ᨠᨲᩮᩣ ᩈᩮᩣᨻ᩠ᨽᩮᩣ ᩑᨲᩴ ᩃᨠ᩠ᨡᨱᩴ ᨸᩣᨸᩩᨱᩣᨲᩥ, ᩋᨿᨾ᩠ᨸᩥ ᨩᩣᨲᩔᩁᩮᩣᨿᩮᩅᩣ’’ᨲᩥ (ᨠᨦ᩠ᨡᩣ. ᩋᨭ᩠ᨮ. ᨶᩥᨴᩣᨶᩅᨱ᩠ᨱᨶᩣ) ᩅᩩᨲ᩠ᨲᨲ᩠ᨲᩣ ᨩᩣᨲᩔᩁᨣ᩠ᨣᩉᨱᩮᨶ ᨣᩉᩥᨲᩣᨲᩥ ᨲᨲ᩠ᨳ ᨲᨲ᩠ᨳ ᩋᩅᩩᨲ᩠ᨲᩣ. ‘‘ᨿᩣᩅᨲᩥᨠᩣ ᨲᩈ᩠ᨾᩥᩴ ᨣᩣᨾᨡᩮᨲ᩠ᨲᩮ’’ᨲᩥ ᩅᩩᨲ᩠ᨲᨲ᩠ᨲᩣ ᩋᨬ᩠ᨬᨾ᩠ᨸᩥ ᨣᩣᨾᩴ ᩋᨶ᩠ᨲᩮᩣ ᨠᨲ᩠ᩅᩣ ᩈᨾᩣᨶᩈᩴᩅᩣᩈᨠᩈᩦᨾᩣᩈᨾ᩠ᨾᨶ᩠ᨶᨶᨠᩣᩃᩮ ᨲᩈ᩠ᨾᩥᩴ ᨣᩣᨾᩮ ᨽᩥᨠ᩠ᨡᩪ ᩌᨣᨧ᩠ᨨᨶ᩠ᨲᩩ ᩅᩣ ᨾᩣ ᩅᩣ, ᩅᨭ᩠ᨭᨲᩥ. ᩋᩅᩥᨸ᩠ᨸᩅᩣᩈᩈᩦᨾᩣᩈᨾ᩠ᨾᨶ᩠ᨶᨶᨠᩣᩃᩮ ᩌᨣᨶ᩠ᨲᨻ᩠ᨻᨾᩮᩅ.

ᩋᨣᨾᨶᨸᨳᩮᩈᩪᨲᩥ ᩑᨲ᩠ᨳ ᩑᨠᨴᩥᩅᩈᩮᨶ ᨣᨶ᩠ᨲ᩠ᩅᩣ ᨸᨧ᩠ᨧᩣᨣᨶ᩠ᨲᩩᩴ ᩋᩈᨠ᩠ᨠᩩᨱᩮᨿ᩠ᨿᨭ᩠ᨮᩣᨶᩮᨲᩥ ᩅᨴᨶ᩠ᨲᩥ, ᨻᨴ᩠ᨵᩈᩦᨾᩣᨽᩣᩅᩴ ᨸᨭᩥᨠ᩠ᨡᩥᨸᩥᨲ᩠ᩅᩣᨲᩥ ᩋᨲ᩠ᨳᩮᩣ.

‘‘ᩈᨾᨶ᩠ᨲᩣ ᩏᨴᨠᩩᨠ᩠ᨡᩮᨸᩣ’’ᨲᩥ ᩅᩩᨲ᩠ᨲᨲ᩠ᨲᩣ ᩈᨻ᩠ᨻᨴᩥᩈᩣᩈᩩ ᨣᩉᩮᨲᨻ᩠ᨻᨾᩮᩅᩣᨲᩥ ᨧᩮ? ᨿᨲᩮᩣ ᩃᨻ᩠ᨽᨲᩥ, ᨲᨲᩮᩣ ᨣᩉᩮᨲᨻ᩠ᨻᩮᩣ ‘‘ᨿᩈ᩠ᨾᩥᩴ ᨸᨴᩮᩈᩮ ᨸᨠᨲᩥᩅᩦᨧᩥᨿᩮᩣ ᩒᨲ᩠ᨳᩁᩥᨲ᩠ᩅᩣ ᩈᨱ᩠ᨮᩉᨶ᩠ᨲᩥ, ᨲᨲᩮᩣ ᨸᨭ᩠ᨮᩣᨿ ᨠᨸ᩠ᨸᩥᨿᨽᩪᨾᩥ, ᨲᨲ᩠ᨳ ᨮᨲ᩠ᩅᩣ ᩏᨸᩮᩣᩈᨳᩣᨴᩥᨠᨾ᩠ᨾᩴ ᨠᩣᨲᩩᩴ ᩅᨭ᩠ᨭᨲᩦ’’ᨲᩥ ᩅᩩᨲ᩠ᨲᨲ᩠ᨲᩣ. ᩋᨶᩩᨻᨶ᩠ᨵᩮᩣ ᩋᨯ᩠ᨰᨾᩣᩈᩮᩣ ᩋᨶ᩠ᩅᨯ᩠ᨰᨾᩣᩈᩮᩣ, ᩋᨯ᩠ᨰᨾᩣᩈᩔ ᩅᩣ ᩋᨶᩩ. ᨿᩮᩣ ᨸᨶ ᨠᩮᨶᨧᩥ ᩋᨶ᩠ᨲᨾᩈᩮᩣ ᨲᩥᩁᨧ᩠ᨨᩣᨶᩮᨶᨸᩥ ᨡᨱᩥᨲ᩠ᩅᩣ ᩋᨠᨲᩮᩣᨲᩥ ᩋᨵᩥᨸ᩠ᨸᩣᨿᩮᩣ.

‘‘ᩋᨬ᩠ᨬᩴ ᨲᨲ᩠ᨲᨠᩴᨿᩮᩅ ᨸᩁᩥᨧ᩠ᨨᩮᨴᩴ ᩋᨶᨲᩥᨠ᩠ᨠᨾᩥᨲ᩠ᩅᩣ ᨮᩥᨲᩮᩣᨸᩥ ᨠᨾ᩠ᨾᩴ ᨠᩮᩣᨸᩮᨲᩦ’’ᨲᩥ ᩅᩩᨲ᩠ᨲᨲ᩠ᨲᩣ ᩋᨲᩥᨠ᩠ᨠᨾᩥᨲ᩠ᩅᩣ ᨮᩥᨲᩮᩣ ᨶ ᨠᩮᩣᨸᩮᨲᩦᨲᩥ ᨴᩦᨸᩥᨲᨾᩮᩅ ᩉᩮᩣᨲᩦᨲᩥ ᩏᨸᨲᩥᩔᨲ᩠ᨳᩮᩁᩮᩣ, ᨲᩴ ᨸᨶ ‘‘ᨴ᩠ᩅᩥᨶ᩠ᨶᩴ ᩏᨴᨠᩩᨠ᩠ᨡᩮᨸᩣᨶᩴ ᩋᨶ᩠ᨲᩁᩮ ᩋᨬ᩠ᨬᩮᩣ ᩑᨠᩮᩣ ᩏᨴᨠᩩᨠ᩠ᨡᩮᨸᩮᩣ ᩏᨸᨧᩣᩁᨲ᩠ᨳᩣᨿ ᨮᨸᩮᨲᨻ᩠ᨻᩮᩣ’’ᨲᩥ ᩅᨧᨶᩮᨶ ᩅᩥᩁᩩᨩ᩠ᨫᨲᩥ. ᩈᨾᨶ᩠ᨲᨸᩣᩈᩣᨴᩥᨠᩣᨿᨬ᩠ᩉᩥ ‘‘ᩋᨬ᩠ᨬᩴ ᨲᨲ᩠ᨲᨠᩴᨿᩮᩅᩣ’’ᨲᩥ ᨸᨴᩴ ᨶᨲ᩠ᨳᩥ. ᨲᩈ᩠ᨾᩣ ᨲᩔᩣᨵᩥᨸ᩠ᨸᩣᨿᩮᩣ ᨸᩁᩥᨿᩮᩈᩥᨲᨻ᩠ᨻᩮᩣ. ᩋᨶ᩠ᨲᩮᩣᩏᨴᨠᩩᨠ᩠ᨡᩮᨸᩈᩦᨾᩣᨿ ᩏᨸᨧᩣᩁᨲ᩠ᨳᩣᨿ ᨮᨸᩥᨲᩴ ᩏᨴᨠᩩᨠ᩠ᨡᩮᨸᨸᩁᩥᨧ᩠ᨨᩮᨴᩴ ᩋᨶᨲᩥᨠ᩠ᨠᨾᩥᨲ᩠ᩅᩣᨲᩥ ᩋᨲ᩠ᨳᩮᩣ ᨣᩉᩮᨲᨻ᩠ᨻᩮᩣ. ᨳᩮᩁᩮᨶ ᩋᨬ᩠ᨬᨳᩣ ᨸᨸᨬ᩠ᨧᩥᨲ᩠ᩅᩣ ᩃᩥᨡᩥᨲᩴ.

‘‘ᩈᨽᩣᨣᩅᨲ᩠ᨳᩩᨶᩣ ᩃᩉᩩᨠᩣᨸᨲ᩠ᨲᩥ’’ᨶ᩠ᨲᩥ ᩅᩩᨲ᩠ᨲᨲ᩠ᨲᩣ ᩈᨽᩣᨣᩈᨦ᩠ᨥᩣᨴᩥᩈᩮᩈᩴ ᩌᩁᩮᩣᨧᩮᨲᩩᩴ ᩅᨭ᩠ᨭᨲᩦᨲᩥ ᨧᩮ? ᨶ ᩅᨭ᩠ᨭᨲᩥ ᨴᩮᩈᨶᩣᨣᩣᨾᩥᨶᩥᩴ ᩈᨶ᩠ᨵᩣᨿ ᩍᨵ ᩅᩩᨲ᩠ᨲᨲ᩠ᨲᩣ. ᨲᩈ᩠ᨾᩣ ᩑᩅ ᩈᨾᩩᨧ᩠ᨧᨿᨠ᩠ᨡᨶ᩠ᨵᨠᩮ ‘‘ᩈᨽᩣᨣᩈᨦ᩠ᨥᩣᨴᩥᩈᩮᩈᩴ ᩌᨸᨶ᩠ᨶᩔ ᨸᨶ ᩈᨶ᩠ᨲᩥᨠᩮ ᩌᩅᩥᨠᩣᨲᩩᩴ ᨶ ᩅᨭ᩠ᨭᨲᩥ. ᩈᨧᩮ ᩌᩅᩥᨠᩁᩮᩣᨲᩥ, ᩌᨸᨲ᩠ᨲᩥ ᩌᩅᩥᨠᨲᩣ ᩉᩮᩣᨲᩥ, ᨴᩩᨠ᩠ᨠᨭᩣ ᨸᨶ ᨶ ᨾᩩᨧ᩠ᨧᨲᩦ’’ᨲᩥ (ᨧᩪᩊᩅ. ᩋᨭ᩠ᨮ. ᪑᪐᪒) ᩅᩩᨲ᩠ᨲᩴ. ᨿᨳᩣ ᩈᨦ᩠ᨥᩮᨶ ‘‘ᩈᩩᨱᩣᨲᩩ ᨾᩮ, ᨽᨶ᩠ᨲᩮ, ᩈᨦ᩠ᨥᩮᩣ…ᨸᩮ… ᨸᨭᩥᨠᩁᩥᩔᨲᩦ’’ᨲᩥ ᩅᨲ᩠ᩅᩣ ᩏᨸᩮᩣᩈᨳᩴ ᨠᩣᨲᩩᩴ ᩃᨽᨲᩥ, ᩑᩅᩴ ᨲᩦᩉᩥ ᨴ᩠ᩅᩦᩉᩥᨸᩥ ᩋᨬ᩠ᨬᩴ ᩈᩩᨴ᩠ᨵᩴ ᨸᩔᩥᨲ᩠ᩅᩣ ‘‘ᨸᨭᩥᨠᩁᩥᩔᩣᨾᩣ’’ᨲᩥ ᩅᨲ᩠ᩅᩣ ᩏᨸᩮᩣᩈᨳᩴ ᨠᩣᨲᩩᩴ ᩅᨭ᩠ᨭᨲᩥ. ᩑᨠᩮᨶᩣᨸᩥ ‘‘ᨸᩁᩥᩈᩩᨴ᩠ᨵᩴ ᩃᨽᩥᨲ᩠ᩅᩣ ᨸᨭᩥᨠᩁᩥᩔᩣᨾᩦ’’ᨲᩥ ᩌᨽᩮᩣᨣᩴ ᨠᨲ᩠ᩅᩣ ᩏᨸᩮᩣᩈᨳᩴ ᨠᩣᨲᩩᩴ ᩅᨭ᩠ᨭᨲᩦᨲᩥ. ᩋᨭ᩠ᨮᨠᨳᩣᨿᨾ᩠ᨸᩥ ‘‘ᩈᩣᨾᨶ᩠ᨲᩮᩣ ᨽᩥᨠ᩠ᨡᩩ ᩑᩅᨾᩔ ᩅᨧᨶᩦᨿᩮᩣᨲᩥ ᩑᨲ᩠ᨳ ᩈᨽᩣᨣᩮᩣ ᩑᩅ ᩅᨲ᩠ᨲᨻ᩠ᨻᩮᩣ. ᩅᩥᩈᨽᩣᨣᩔ ᩉᩥ ᩅᩩᨧ᩠ᨧᨾᩣᨶᩮ ᨽᨱ᩠ᨯᨶᨠᩃᩉᩈᨦ᩠ᨥᨽᩮᨴᩣᨴᩦᨶᩥᨸᩥ ᩉᩮᩣᨶ᩠ᨲᩥ, ᨲᩈ᩠ᨾᩣ ᨲᩔ ᩋᩅᨲ᩠ᩅᩣ ᩍᨲᩮᩣ ᩅᩩᨭ᩠ᨮᩉᩥᨲ᩠ᩅᩣ ᨸᨭᩥᨠᩁᩥᩔᩣᨾᩦ’’ᨲᩥ ᩌᨽᩮᩣᨣᩴ ᨠᨲ᩠ᩅᩣ ᩏᨸᩮᩣᩈᨳᩮᩣ ᨠᩣᨲᨻ᩠ᨻᩮᩣᨲᩥ ᩋᨶ᩠ᨵᨠᨭ᩠ᨮᨠᨳᩣᨿᩴ ᩅᩩᨲ᩠ᨲ’’ᨶ᩠ᨲᩥ ᩅᨲ᩠ᩅᩣ ᨲᩔ ᩋᨸ᩠ᨸᨭᩥᨠ᩠ᨡᩥᨲ᩠ᨲᨲ᩠ᨲᩣ ᩅᨭ᩠ᨭᨲᩦᨲᩥ ᨴᩦᨸᩥᨲᨾᩮᩅ. ‘‘ᨿᨴᩣ ᩋᨬ᩠ᨬᩴ ᩈᩩᨴ᩠ᨵᩴ ᨽᩥᨠ᩠ᨡᩩᩴ ᩋᨶᩣᨸᨲ᩠ᨲᩥᨠᩴ ᨸᩔᩥᩔᨲᩥ, ᨲᨴᩣ ᨲᩔ ᩈᨶ᩠ᨲᩥᨠᩮ’’ᨲᩥ ᩅᩩᨲ᩠ᨲᨲ᩠ᨲᩣ ᩃᩉᩩᨠᩔᩮᩅ ᩋᨶᩩᨬ᩠ᨬᩣᨲᨲ᩠ᨲᩣ ᩈᨾᩩᨧ᩠ᨧᨿᨠ᩠ᨡᨶ᩠ᨵᨠᩮ ᩅᩩᨲ᩠ᨲᨲ᩠ᨲᩣ ᩈᨽᩣᨣᩈᨦ᩠ᨥᩣᨴᩥᩈᩮᩈᩴ ᨸᨶ ᨬᨲ᩠ᨲᩥᨿᩣ ᩌᩁᩮᩣᨧᩮᨲ᩠ᩅᩣ ᩏᨸᩮᩣᩈᨳᩴ ᨠᩣᨲᩩᩴ ᨶ ᩅᨭ᩠ᨭᨲᩥ.

ᨴᩮᩅᨻᩕᩉ᩠ᨾᩣ ᨸᨶ ‘‘ᨲᩥᩁᨧ᩠ᨨᩣᨶᨣᨲᩮᩣ’’ᨲᩥ ᨸᨴᩴ ᨮᨸᩮᨲ᩠ᩅᩣ ᨿᩮᨶ ᨠᩮᨶᨧᩥ ᨸᨴᩮᨶ ᩋᩈᨦ᩠ᨣᩉᩥᨲᩣᨸᩥ ᩍᨾᩥᨶᩣ ᩈᨦ᩠ᨣᩉᩥᨲᩣᨲᩥ ᨴᩔᨶᨲ᩠ᨳᩴ ‘‘ᨿᩔ ᩏᨸᩈᨾ᩠ᨸᨴᩣ ᨸᨭᩥᨠ᩠ᨡᩥᨲ᩠ᨲᩣ’’ᨲᩥ ᩅᩩᨲ᩠ᨲᩴ.

‘‘ᨧᩣᨲᩩᨾᩣᩈᩥᨶᩥᨿᩴ ᨸᨶ ᨸᩅᩣᩁᩥᨲᩣᨶᩴ ᩈᨶ᩠ᨲᩥᨠᩮ ᩋᨶᩩᨸᨣᨲᩮᨶ ᩅᩣ ᨨᩥᨶ᩠ᨶᩅᩔᩮᨶ ᩅᩣ ᩅᩩᨭ᩠ᨮᩅᩔᩮᨶ ᩅᩣ’’ᨲᩥ ᩋᩅᨲ᩠ᩅᩣ ‘‘ᩋᨶᩩᨸᨣᨲᩮᨶ ᩅᩣ ᨨᩥᨶ᩠ᨶᩅᩔᩮᨶ ᩅᩣ’’ᨲᩥ ᩑᨲ᩠ᨲᨠᨾᩮᩅ ᩅᩩᨲ᩠ᨲᩴ. ᩅᩩᨭ᩠ᨮᩅᩔᩮᩣ ᨸᨶ ᨲᩈ᩠ᨾᩥᩴ ᨠᩣᩃᩮ ᩋᨶᩩᨸᨣᨲᨲ᩠ᨲᩣ ‘‘ᩋᨶᩩᨸᨣᨲᩮᩣ’’ᨲᩥ ᩈᨦ᩠ᨡ᩠ᨿᩴ ᨣᨲᩮᩣᨲᩥ. ᩈᨻ᩠ᨻᩣᨿ ᩅᩩᨭ᩠ᨮᩥᨲᩣᨿ ᩈᨻ᩠ᨻᩮ ᩅᩩᨭ᩠ᨮᩉᩥᨲ᩠ᩅᩣ ᨣᨲᩮ ᩈᨶ᩠ᨶᩥᨸᩣᨲᩮᨲᩩᩴ ᨶ ᩈᨠ᩠ᨠᩣ, ᩑᨠᨧ᩠ᨧᩮ ᩈᨶ᩠ᨶᩥᨸᩣᨲᩮᨲ᩠ᩅᩣ ᨸᩣᩁᩥᩈᩩᨴ᩠ᨵᩥᩴ ᩌᩁᩮᩣᨧᩮᨲᩩᩴ ᩅᨭ᩠ᨭᨲᩦᨲᩥ ᩅᨴᨶ᩠ᨲᩥ. ᨠᩈ᩠ᨾᩣ? ᨬᨲ᩠ᨲᩥᩴ ᨮᨸᩮᨲ᩠ᩅᩣ ᨠᨲ᩠ᨲᨻ᩠ᨻᩈᨦ᩠ᨥᨠᨾ᩠ᨾᩣᨽᩣᩅᩣ ᩅᨣ᩠ᨣᩴ ᨶ ᩉᩮᩣᨲᩦᨲᩥ. ᨸᩅᩣᩁᨱᩣᨿᨸᩥ ᩑᩈᩮᩅ ᨶᨿᩮᩣ. ᩋᨿᨬ᩠ᩉᩮᨲ᩠ᨳ ᩅᩥᩈᩮᩈᩮᩣ – ᩈᨧᩮ ᨸᩩᩁᩥᨾᩥᨠᩣᨿ ᩏᨸᨣᨲᩮᩉᩥ ᨸᨧ᩠ᨨᩥᨾᩥᨠᩣᨿ ᩏᨸᨣᨲᩣ ᨳᩮᩣᨠᨲᩁᩣ ᨧᩮᩅ ᩉᩮᩣᨶ᩠ᨲᩥ ᩈᨾᩈᨾᩣ ᨧ, ᩈᨦ᩠ᨥᨸᩅᩣᩁᨱᩣᨿ ᨧ ᨣᨱᩴ ᨸᩪᩁᩮᨶ᩠ᨲᩥ, ᩈᨦ᩠ᨥᨸᩅᩣᩁᨱᩣᩅᩈᩮᨶ ᨬᨲ᩠ᨲᩥ ᨮᨸᩮᨲᨻ᩠ᨻᩣᨲᩥ. ‘‘ᩑᨠᩮᩣᩅ ᨽᩥᨠ᩠ᨡᩩ ᩉᩮᩣᨲᩥ…ᨸᩮ… ᩋᨬ᩠ᨬᩮᩈᩴ ᩋᨶᩣᨣᨲᨽᩣᩅᩴ ᨬᨲ᩠ᩅᩣ’’ᨲᩥ ᩅᩩᨲ᩠ᨲᨲ᩠ᨲᩣ ᩋᨵᩥᨭ᩠ᨮᩣᨶᩩᨸᩮᩣᩈᨳᩴ ᩈᩦᨾᩴ ᨸᩅᩥᩈᩥᨲ᩠ᩅᩣ ᨠᩣᨲᩩᩴ ᨶ ᩈᨠ᩠ᨠᩣᨲᩥ ᩅᨴᨶ᩠ᨲᩥ.

‘‘ᨠᩥᩴ ᩈᨦ᩠ᨥᩔ ᨸᩩᨻ᩠ᨻᨠᩥᨧ᩠ᨧ’’ᨶ᩠ᨲᩥ ᩍᨴᩴ ᨶ ᨬᨲ᩠ᨲᩥᩴ ᨮᨸᩮᨲ᩠ᩅᩣ ᩅᨲ᩠ᨲᨻ᩠ᨻᩴ. ᨲᨬ᩠ᩉᩥ ᨬᨲ᩠ᨲᩥᨲᩮᩣ ᨸᩩᩁᩮᨲᩁᨾᩮᩅ ᨠᩁᩦᨿᨲᩥ. ᨲᩈ᩠ᨾᩣ ‘‘ᩈᩩᨱᩣᨲᩩ ᨾᩮ, ᨽᨶ᩠ᨲᩮ, ᩈᨦ᩠ᨥᩮᩣ, ᨠᩥᩴ ᩈᨦ᩠ᨥᩔ ᨸᩩᨻ᩠ᨻᨠᩥᨧ᩠ᨧᩴ, ᨿᨴᩥ ᩈᨦ᩠ᨥᩔ ᨸᨲ᩠ᨲᨠᩃ᩠ᩃ’’ᨶ᩠ᨲᩥ ᩅᨲ᩠ᨲᨻ᩠ᨻᩴ ᩈᩥᨿᩣᨲᩥ. ᨲᨳᩣᨸᩥ ᨶ ᩅᨲ᩠ᨲᨻ᩠ᨻᩴ. ᨶ ᩉᩥ ᨲᩴ ᨬᨲ᩠ᨲᩥᨿᩣ ᩋᨶ᩠ᨲᩮᩣ ᨠᩁᩦᨿᨲᩦᨲᩥ. ᩑᩅᩴ ᩈᨶ᩠ᨲᩮ ᨶᩮᨲᩴ ᩅᨲ᩠ᨲᨻ᩠ᨻᨶ᩠ᨲᩥ ᩌᨸᨩ᩠ᨩᨲᩥ ᨸᨿᩮᩣᨩᨶᩣᨽᩣᩅᩣᨲᩥ ᨧᩮ? ᨶ, ᨿᨳᩣᨣᨲᨭ᩠ᨮᩣᨶᩮ ᩑᩅ ᩅᨲ᩠ᨲᨻ᩠ᨻᨲᩮᩣ, ᨸᩁᨸᨴᩣᨸᩮᨠ᩠ᨡᨲᩣᨿᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᩍᨴᩴ ᨸᩩᨻ᩠ᨻᨠᩥᨧ᩠ᨧᩴ ᩋᨠᨲ᩠ᩅᩣ ᩏᨸᩮᩣᩈᨳᨠᨾ᩠ᨾᩴ ᨠᩁᩮᩣᨶ᩠ᨲᩮᩣ ᩈᨦ᩠ᨥᩮᩣ, ᨸᩩᨣ᩠ᨣᩃᩮᩣ ᩅᩣ ᨮᨸᨶᨠ᩠ᨡᩮᨲ᩠ᨲᩣᨲᩥᨠ᩠ᨠᨾᩮ ᩌᨸᨩ᩠ᨩᨲᩥ. ᨲᩈ᩠ᨾᩥᨬ᩠ᩉᩥ ᨡᩮᨲ᩠ᨲᩮ ᩋᨲᩥᨠ᩠ᨠᨶ᩠ᨲᩮ ᩈᨾ᩠ᨾᨩ᩠ᨩᨶᩣᨴᩥᨠᩁᨱᩮ ᩌᨸᨲ᩠ᨲᩥᨾᩮᩣᨠ᩠ᨡᩮᩣ ᨶ ᩉᩮᩣᨲᩥ ᩏᨸᩮᩣᩈᨳᨠᨾ᩠ᨾᨲᩮᩣ ᨸᩩᨻ᩠ᨻᩮ ᨠᨲ᩠ᨲᨻ᩠ᨻᨠᨾ᩠ᨾᩣᨠᩁᨱᨸᨧ᩠ᨧᨿᨲ᩠ᨲᩣ ᨲᩔᩣ ᩌᨸᨲ᩠ᨲᩥᨿᩣ. ᨶ ᩈᩣ ᨠᨾ᩠ᨾᨸᩁᩥᨿᩮᩣᩈᩣᨶᩣᨸᩮᨠ᩠ᨡᩣ ᩑᨲ᩠ᨳᩣᨣᨲᩈᨾ᩠ᨸᨩᩣᨶᨾᩩᩈᩣᩅᩣᨴᩣᨸᨲ᩠ᨲᩥ ᩅᩥᨿ, ᨲᩈ᩠ᨾᩣ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᨠᩮᩣ ᨽᩥᨠ᩠ᨡᩩ ‘‘ᨸᩣᩁᩥᩈᩩᨴ᩠ᨵᩥᩴ ᩌᨿᩈ᩠ᨾᨶ᩠ᨲᩮᩣ ᩌᩁᩮᩣᨧᩮᨳᩣ’’ᨲᩥ ᩅᨲ᩠ᨲᩩᨠᩣᨾᩮᩣ ᨸᨮᨾᨾᩮᩅ ᨸᩣᩁᩥᩈᩩᨴ᩠ᨵᩣᨸᩣᩁᩥᩈᩩᨴ᩠ᨵᩥᨸᨧ᩠ᨧᨿᩴ ᨸᩩᨻ᩠ᨻᨠᩥᨧ᩠ᨧᩴ ᩈᩁᩣᨸᩮᨲᩥ. ᨲᨬ᩠ᩉᩥ ᨠᨲᩴ ᨸᩣᩁᩥᩈᩩᨴ᩠ᨵᩥᨸᨧ᩠ᨧᨿᩮᩣ ᩉᩮᩣᨲᩥ, ᩋᨠᨲᩴ ᩋᨸᩣᩁᩥᩈᩩᨴ᩠ᨵᩥᨸᨧ᩠ᨧᨿᩮᩣ. ᨲᩮᨶᩮᩅ ᩏᨽᨿᩣᨸᩮᨠ᩠ᨡᩣᨵᩥᨸ᩠ᨸᩣᨿᩮᨶ ᨠᨲᩴ, ᨶ ᨠᨲᨶ᩠ᨲᩥ ᩋᩅᨲ᩠ᩅᩣ ‘‘ᨠᩥᩴ ᩈᨦ᩠ᨥᩔ ᨸᩩᨻ᩠ᨻᨠᩥᨧ᩠ᨧ’’ᨾᩥᨧ᩠ᨧᩮᩅᩣᩉ. ᨲᨲ᩠ᨳ ᩋᨠᨲᨸᨠ᩠ᨡᩮ ᨲᩣᩅ ᨸᩣᩁᩥᩈᩩᨴ᩠ᨵᩥᩌᩁᩮᩣᨧᨶᨠ᩠ᨠᨾᨶᩥᨴᩔᨶᨲ᩠ᨳᩴ ᨸᩁᨲᩮᩣ ‘‘ᨿᩔ ᩈᩥᨿᩣ ᩌᨸᨲ᩠ᨲᩥ, ᩈᩮᩣ ᩌᩅᩥᨠᩁᩮᨿ᩠ᨿᩣ’’ᨲᩥ ᨧ, ᨠᨲᨸᨠ᩠ᨡᩮ ‘‘ᩋᩈᨶ᩠ᨲᩥᨿᩣ ᩌᨸᨲ᩠ᨲᩥᨿᩣ ᨲᩩᨱ᩠ᩉᩦ ᨽᩅᩥᨲᨻ᩠ᨻ’’ᨶ᩠ᨲᩥ ᨧ ᩅᨠ᩠ᨡᨲᩥ.

‘‘ᩈᨻ᩠ᨻᨶ᩠ᨲᩥᨾᩮᨶ ᨸᩁᩥᨧ᩠ᨨᩮᨴᩮᨶ ᨧᨲᩪᩉᩥ ᨽᩥᨠ᩠ᨡᩪᩉᩥ ᩈᨶ᩠ᨶᩥᨸᨲᩥᨲ᩠ᩅᩣ’’ᨲᩥ ᨧ, ‘‘ᩏᨸᩮᩣᩈᨳᨠᩁᨱᨲ᩠ᨳᩴ ᩈᨶ᩠ᨶᩥᨸᨲᩥᨲᩮ ᩈᨦ᩠ᨥᩮ ᨻᩉᩥ…ᨸᩮ… ᩋᨴᩮᨶ᩠ᨲᩮᨶ ᨨᨶ᩠ᨴᩮᩣ ᨴᩣᨲᨻ᩠ᨻᩮᩣ’’ᨲᩥ ᨧ ᩅᨴᨶ᩠ᨲᩥ. ᩋᩈᨶ᩠ᨶᩥᨸᨲᩥᨲᩮᨸᩥ ᨸᨶ ᩅᨭ᩠ᨭᨲᩥ. ᩍᨴᨬ᩠ᩉᩥ ᨨᨶ᩠ᨴᨴᩣᨶᩈᨾᨿᨴᩔᨶᨲ᩠ᨳᩴ ᩅᩩᨲ᩠ᨲᩴ. ᩏᨸᩮᩣᩈᨳᨠᩁᨱᨲ᩠ᨳᩴ ᩈᨶ᩠ᨶᩥᨸᨲᩥᨲᩮ ᩈᨦ᩠ᨥᩮ ᨻᩉᩥ ᩏᨸᩮᩣᩈᨳᩴ ᨠᨲ᩠ᩅᩣ ᩌᨣᨲᩔ ᨠᨲ᩠ᨲᨻ᩠ᨻᩣᨠᩣᩁᨴᩔᨶᨲ᩠ᨳᨬ᩠ᨧ ᩅᩩᨲ᩠ᨲᩴ. ᨸᨵᩣᨶᨥᩁᩅᩣᩈᩥᨶᩮᩣ ᨸᨵᩣᨶᨥᩁᩴ ᨸᩅᩥᩈᩥᨲᩩᨠᩣᨾᩣ ᩋᨲ᩠ᨲᨶᩮᩣ ᩈᨽᩣᨣᨽᩥᨠ᩠ᨡᩪᨶᩴ ᨨᨶ᩠ᨴᩴ ᨴᨲ᩠ᩅᩣ ᩈᨧᩮ ᩈᨦ᩠ᨥᩮᩣ ᩈᨶ᩠ᨶᩥᨸᨲᨲᩥ, ‘‘ᨾᨿ᩠ᩉᩴ ᨨᨶ᩠ᨴᩮᩣ ᩌᩁᩮᩣᨧᩮᨲᨻ᩠ᨻᩮᩣ’’ᨲᩥ ᩅᨲ᩠ᩅᩣ ᨸᨵᩣᨶᨥᩁᩴ ᨸᩅᩥᩈᨶ᩠ᨲᩥ. ᩋᨿᩴ ᩈᩦᩉᩊᨴᩦᨸᩮ ᨸᨿᩮᩣᨣᩮᩣ. ᩌᩁᩮᩣᨧᩮᨶ᩠ᨲᩮᨶ ᨸᨶ ᩈᨶ᩠ᨶᩥᨸᨲᩥᨲᩮ ᩌᩁᩮᩣᨧᩮᨲᨻ᩠ᨻᩴ. ᨸᨬ᩠ᨧᩈᩩ ᨽᩥᨠ᩠ᨡᩪᩈᩩ ᩑᨠᩈ᩠ᨾᩥᩴ ᩅᩥᩉᩣᩁᩮ ᩅᩈᨶ᩠ᨲᩮᩈᩩ ᩑᨠᩔ ᨨᨶ᩠ᨴᨸᩣᩁᩥᩈᩩᨴ᩠ᨵᩥᩴ ᩌᩉᩁᩥᨲ᩠ᩅᩣ ᨧᨲᩩᨶ᩠ᨶᩴ ᨸᩣᨲᩥᨾᩮᩣᨠ᩠ᨡᩴ ᩏᨴ᩠ᨴᩥᩈᩥᨲᩩᩴ ᩋᨶᩩᨬ᩠ᨬᩣᨲᨲ᩠ᨲᩣ ᩈᨶ᩠ᨶᩥᨸᨲᩥᨲᩮ ᨨᨶ᩠ᨴᩮᩣ ᨣᩉᩮᨲᨻ᩠ᨻᩮᩣ ᩌᩁᩮᩣᨧᩮᨲᨻ᩠ᨻᩮᩣᨲᩥ ᩅᨧᨶᩴ ᨶᩥᩁᨲ᩠ᨳᨠᩴ ᩅᩥᨿ. ‘‘ᨳᩮᨿ᩠ᨿᩈᩴᩅᩣᩈᨠᩮᩣ ᨸᨭᩥᨩᩣᨶᩣᨲᩦᨲᩥ (ᨾᩉᩣᩅ. ᪑᪖᪕) ᩅᨧᨶᨲᩮᩣ ᩈᩣᨾᨱᩮᩁᩮᨶ ᩌᩉᨭᩣᨸᩥ ᩅᨭ᩠ᨭᨲᩥ. ᨠᨾ᩠ᨾᩴ ᨶ ᨠᩮᩣᨸᩮᨲᩦ’’ᨲᩥ ᨧ, ‘‘ᩈᨧᩮ ᨸᩩᨻ᩠ᨻᩮ ᨨᨶ᩠ᨴᩴ ᨴᨲ᩠ᩅᩣ ᨻᩉᩥᩈᩦᨾᩣᨣᨲᩮᩣ ᨸᩩᨶ ᨸᩅᩥᩈᨲᩥ, ᨸᨧ᩠ᨨᩣ ᨨᨶ᩠ᨴᨣ᩠ᨣᩉᨱᨠᩥᨧ᩠ᨧᩴ ᨶᨲ᩠ᨳᩥ, ᨲᩔ ᨸᨿᩮᩣᨣᩮᩣ ᩈᩦᨾᩣᩈᨾ᩠ᨾᩩᨲᩥᩅᩈᩮᨶ ᩅᩮᨴᩥᨲᨻ᩠ᨻᩮᩣ’’ᨲᩥ ᨧ ‘‘ᨨᨶ᩠ᨴᨴᩣᨶᩮ ᨲᩥᨠ᩠ᨡᨲ᩠ᨲᩩᩴ ᩅᨧᨶᩮ ᩍᨴᩴ ᨸᨿᩮᩣᨩᨶᩴ – ᨸᨮᨾᩴ ᩈᨾᨣ᩠ᨣᨽᩣᩅᩴ, ᨴᩩᨲᩥᨿᩴ ᨸᨧ᩠ᨨᩣ ᩅᩥᨵᩣᨲᨻ᩠ᨻᨽᩣᩅᩴ, ᨲᨲᩥᨿᩴ ᨨᨶ᩠ᨴᩉᩣᩁᨠᩔ ᨴᩩᨠ᩠ᨠᨭᨾᩮᩣᨧᨶᩴ ᨴᩦᨸᩮᨲᩦ’’ᨲᩥ (ᩅᨩᩥᩁ. ᨭᩦ. ᨾᩉᩣᩅᨣ᩠ᨣ ᪑᪖᪔) ᨧ ᩃᩥᨡᩥᨲᩴ. ᨻᩥᩊᩣᩃᩈᨦ᩠ᨡᩃᩥᨠᩣᨻᨴ᩠ᨵᩣᩅ ᩉᩮᩣᨲᩥ ᩋᨶ᩠ᨲᩮᩣᨣᩮᩉᩮ ᩑᩅ ᩈᨾ᩠ᨸᨿᩮᩣᨩᨶᨲ᩠ᨲᩣ, ᨿᨳᩣ ᩈᩣ ᨶ ᨠᨲ᩠ᨳᨧᩥ ᨣᨧ᩠ᨨᨲᩥ, ᨲᨳᩣ ᩈᩣᨸᩥ ᨶ ᨠᨲ᩠ᨳᨧᩥ ᨣᨧ᩠ᨨᨲᩦᨲᩥ ᩋᨵᩥᨸ᩠ᨸᩣᨿᩮᩣ. ᩍᨲᩁᨳᩣ ᩅᩥᩈᩮᩈᨶᩴ ᨶᩥᩁᨲ᩠ᨳᨠᩴ ᩉᩮᩣᨲᩦᨲᩥ ᩌᨧᩁᩥᨿᩮᨶ ᨣᩉᩥᨲᩴ.

‘‘ᨶ ᩉᩥ ᨲᩴ ᩋᨠᨲ᩠ᩅᩣ ᩏᨸᩮᩣᩈᨳᩴ ᨠᩣᨲᩩᩴ ᩅᨭ᩠ᨭᨲᩦ’’ᨲᩥ ᨸᩩᨻ᩠ᨻᩮ ᨴᩔᩥᨲᨲ᩠ᨲᩣ ‘‘ᩍᨴᨾ᩠ᨸᩥ ᩉᩥ ᩏᨽᨿ’’ᨶ᩠ᨲᩥ ᨠᩈ᩠ᨾᩣ ᩅᩩᨲ᩠ᨲᨶ᩠ᨲᩥ ᨧᩮ? ᩈᩮᩈᩣᨶᩥ ᨳᩮᩁᩮᨶ ᩌᨱᨲ᩠ᨲᩮᨶ ᨠᩣᨲᨻ᩠ᨻᩣᨶᩥ ᨴᩔᩥᨲᩣᨶᩥ, ᩍᨾᩮ ᨸᨶ ᨴ᩠ᩅᩮ ᨳᩮᩁᩮᨶ ᩅᩣ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᨠᩮᨶ ᩅᩣ ᨬᨲ᩠ᨲᩥᨭ᩠ᨮᨸᨶᨠᩮᨶ ᩅᩣ ᨿᩮᨶ ᩅᩣ ᨲᩮᨶ ᩅᩣ ᨠᩣᨲᨻ᩠ᨻᩣᨶᩦᨲᩥ ᨧ, ᩈᨾ᩠ᨾᨩ᩠ᨩᨶᩣᨴᩦᨶᩥ ᨲᨲ᩠ᨳ ᨲᨲ᩠ᨳ ᨲᩣᨴᩥᩈᩣᨶᩥ ᨸᨿᩮᩣᨩᨶᩣᨶᩥ ᨶᩥᨸ᩠ᨹᩣᨴᩮᨶ᩠ᨲᩥ, ᩍᨾᩮ ᨸᨶ ᨴ᩠ᩅᩮ ᨲᨲ᩠ᨳ ᨲᨲ᩠ᨳ ᨶ ᨠᩥᨬ᩠ᨧᩥ ᨠᨾ᩠ᨾᩴ ᩈᩣᨵᩮᨶ᩠ᨲᩥ, ᨲᩈ᩠ᨾᩣ ‘‘ᨠᩥᩴ ᩍᨾᩥᨶᩣ’’ᨲᩥ ᩋᩅᨲ᩠ᩅᩣ ᨠᩣᨲᨻ᩠ᨻᨾᩮᩅᩣᨲᩥ ᨴᩔᩮᨲᩩᨬ᩠ᨧ ‘‘ᩍᨴᨾ᩠ᨸᩥ ᩉᩥ ᩏᨽᨿ’’ᨶ᩠ᨲᩥᩌᨴᩥ ᩅᩩᨲ᩠ᨲᩴ. ‘‘ᩌᨿᩈ᩠ᨾᨶ᩠ᨲᩣᨶᩴ ᨸᩣᨴᩮ ᩅᨶ᩠ᨴᨲᩦ’’ᨲᩥ ᨣᨱᩅᩈᩮᨶ ᩅᨲ᩠ᩅᩣ ᨸᩩᨣ᩠ᨣᩃᩅᩈᩮᨶ ᨶ ᩅᩩᨲ᩠ᨲᩴ ᨲᩮᨶ ᩌᩁᩮᩣᨧᩮᨲᨻ᩠ᨻᩔ ᩋᨬ᩠ᨬᩔ ᩋᨽᩣᩅᩣ.

ᩈᨦ᩠ᨥᩔ ᩏᨴ᩠ᨴᩥᨭ᩠ᨮᩴ ᩉᩮᩣᨲᩦᨲᩥ ᩈᨦ᩠ᨥᩮᨶ ᩏᨴ᩠ᨴᩥᨭ᩠ᨮᩴ ᩉᩮᩣᨲᩦᨲᩥ ᩋᨲ᩠ᨳᩮᩣ. ᩈᨾᨣ᩠ᨣᩔ ᩉᩥ ᩈᨦ᩠ᨥᩔᩣᨲᩥ ᩑᨲ᩠ᨳ ᩈᨾᨣ᩠ᨣᨽᩣᩅᩔ ᨠᩣᨿᩈᩣᨾᨣ᩠ᨣᩥᨠᩣᩁᨱᨲ᩠ᨲᩣ ᨶᨲ᩠ᨳᩥ ᨴᩮᩣᩈᩮᩣᨲᩥ ᨧᩮ? ᨲᩴ ᨶ, ᩏᨴ᩠ᨴᩮᩈᩮᨸᩥ ᩈᩅᨶᩮᨸᩥ ᩈᨾᨣ᩠ᨣᨽᩣᩅᩔ ᩍᨧ᩠ᨨᩥᨲᨻ᩠ᨻᨲ᩠ᨲᩣ. ‘‘ᩈᩩᨱᩣᨲᩩ ᨾᩮ, ᨽᨶ᩠ᨲᩮ’’ᨲᩥ ᩉᩥ ᩍᨾᩥᨶᩣ ᨧᩥᨲ᩠ᨲᩈᩣᨾᨣ᩠ᨣᩥᩴ ᨴᩦᨸᩮᨲᩥ ᩈᩅᨶᩮ ᩈᨻ᩠ᨻᩮᩉᩥ ᩑᨠᩦᨽᩪᨲᨽᩣᩅᨲᩮᩣ.

ᩈᨬ᩠ᨧᩥᨧ᩠ᨧ ᩌᨸᨲ᩠ᨲᩥᩴ ᩌᨸᨩ᩠ᨩᨲᩦᨲᩥ ᩑᨲ᩠ᨳ ᩋᨶᩣᨴᩁᩥᨿᩅᩈᩮᨶ ᩌᨸᨩ᩠ᨩᨶ᩠ᨲᩮᩣ ᩑᩅ ᩋᩃᨩ᩠ᨩᩦ ᩉᩮᩣᨲᩥ, ᨶ ᩍᨲᩁᩮᩣᨲᩥ. ᩌᨸᨲ᩠ᨲᩥᩴ ᨸᩁᩥᨣᩪᩉᨲᩦᨲᩥ ᩑᨲ᩠ᨳ ᩃᨩ᩠ᨩᩣᨿ ᨸᩁᩥᨣᩪᩉᨶ᩠ᨲᩮᩣ ᩋᩃᨩ᩠ᨩᩦ ᨶ ᩉᩮᩣᨲᩥ, ‘ᨠᩥᩴ ᩍᨾᩥᨶᩣ’ᨲᩥ ᩋᨶᩣᨴᩁᩥᨿᩅᩈᩮᨶ ᨸᩁᩥᨣᩪᩉᨶ᩠ᨲᩮᩣ ᩉᩮᩣᨲᩦ’’ᨲᩥ ᨧ ᩃᩥᨡᩥᨲᩴ.

‘‘ᩈᨲ᩠ᨲᨶ᩠ᨶᩴ ᩌᨸᨲ᩠ᨲᩥᨠ᩠ᨡᨶ᩠ᨵᩣᨶ’’ᨶ᩠ᨲᩥ ᨶ ᩅᨲ᩠ᨲᨻ᩠ᨻᩴ, ‘‘ᨨᨶ᩠ᨶ’’ᨶ᩠ᨲᩥ ᩅᨲ᩠ᨲᨻ᩠ᨻᨶ᩠ᨲᩥ ᨧᩮ? ᩈᨲ᩠ᨲᨶ᩠ᨶᨾᩮᩅᩣᨲᩥ ᩅᨲ᩠ᨲᨻ᩠ᨻᩴ. ᨸᩣᩁᩣᨩᩥᨠᩣᨸᨲ᩠ᨲᩥᩴ ᩌᨸᨶ᩠ᨶᩮᩣ ᩉᩥ ᩈᨧᩮ ᩋᨲ᩠ᨲᨶᩮᩣ ᩈᩣᨸᨲ᩠ᨲᩥᨠᨽᩣᩅᩴ ᨸᨠᩣᩈᩮᨲᩥ, ᩈᨦ᩠ᨥᩔ ᨧ ᩏᨸᩮᩣᩈᨳᩮᩣ ᩈᨾ᩠ᨸᨩ᩠ᨩᨲᩥ, ᨲᩔ ᨧ ᨣᩥᩉᩥᨽᩣᩅᩮᨶ ᩅᩣ ᩈᩣᨾᨱᩮᩁᨽᩣᩅᩮᨶ ᩅᩣ ᩈᩩᨴ᩠ᨵᩥ ᩉᩮᩣᨲᩦᨲᩥ.

ᩑᨠᨧ᩠ᨧᩮ ᩌᨧᩁᩥᨿᩣ ᨶᩣᨾ ᨵᨾ᩠ᨾᨽᩣᩁᩥᨠᩮᩣ ᨠᩥᩁ ᩌᨧᩁᩥᨿᩮᩣ. ᨠᩈ᩠ᨾᩣ ᩑᩅᩴ ᩅᩩᨲ᩠ᨲᨶ᩠ᨲᩥ ᨧᩮ? ᨿᩣᩅᨲᨲᩥᨿᩣᨶᩩᩈᩣᩅᨶᩣ ᨶᩣᨾ ᨲᩥᨠ᩠ᨡᨲ᩠ᨲᩩᩴ ᩅᨧᨶᩴ. ᨲᨳᩣ ᨸᩣᨮᩮ ᩋᨶᩣᨣᨲᨲ᩠ᨲᩣ ᨠᩮᩅᩃᩴ ‘‘ᨿᩣᩅᨲᨲᩥᨿᩴ ᩋᨶᩩᩈᩣᩅᩥᨲ’’ᨶ᩠ᨲᩥ ᨸᨴᨾᩮᩅ ᨴᩥᩈ᩠ᩅᩣ ‘‘ᨿᩔ ᩈᩥᨿᩣ ᩌᨸᨲ᩠ᨲᩥ, ᩈᩮᩣ ᩌᩅᩥᨠᩁᩮᨿ᩠ᨿᩣ’’ᨲᩥ ᩍᨴᩴ ‘‘ᩈᨧᩮ ᩌᨸᨲ᩠ᨲᩥᩴ ᩌᨸᨶ᩠ᨶᩣ, ᩌᩅᩥᨠᩁᩮᩣᨳᩣ’’ᨲᩥ ᩍᨾᨾᨲ᩠ᨳᩴ ᨴᩦᨸᩮᨲᩥ. ‘‘ᩋᩈᨶ᩠ᨲᩥᨿᩣ ᩌᨸᨲ᩠ᨲᩥᨿᩣ ᨲᩩᨱ᩠ᩉᩦ ᨽᩅᩥᨲᨻ᩠ᨻ’’ᨶ᩠ᨲᩥ ᩍᨴᨾ᩠ᨸᩥ ᨲᨾᩮᩅᨲ᩠ᨳᩴ ᨴᩦᨸᩮᨲᩥ. ‘‘ᨲᩩᨱ᩠ᩉᩦᨽᩣᩅᩮᨶ ᨡᩮᩣ ᨸᨶᩣᨿᩈ᩠ᨾᨶ᩠ᨲᩮ ᨸᩁᩥᩈᩩᨴ᩠ᨵᩣᨲᩥ ᩅᩮᨴᩥᩔᩣᨾᩦ’’ᨲᩥ ᩍᨴᨾ᩠ᨸᩥ ᨲᨾᩮᩅᩣᨲᩥ ᩑᩅᨾᨲ᩠ᨳᩴ ᨣᩉᩮᨲ᩠ᩅᩣ ᩅᩩᨲ᩠ᨲᩴ ᨠᩥᩁ.

ᩋᨸᩁᩮᨲᩥ ᩋᨲ᩠ᨳᨴᩔᩥᨲ᩠ᨳᩮᩁᩮᩣ ᨠᩥᩁ. ᩑᨲᩴ ᩈᨶ᩠ᨵᩣᨿᩣᨲᩥ ᩑᨲ᩠ᨳ ‘‘ᩈᨠᩥᨾ᩠ᨸᩥ ᩋᨶᩩᩈᩣᩅᩥᨲ’’ᨶ᩠ᨲᩥ ᨸᨴᩔ ᩅᨧᨶᩮᨶ ᨲᩥᨠ᩠ᨡᨲ᩠ᨲᩩᩴ ᩋᨶᩩᩈᩣᩅᨶᩣ ᨠᩣᨲᨻ᩠ᨻᩣᨲᩥ ᩑᨲ᩠ᨲᨠᨾᩮᩅ ᨴᩦᨸᩥᨲᩴ ᩅᩥᨿ ᨴᩥᩔᨲᩥ.

ᩍᨾᨾᨲ᩠ᨳᩴ ᩈᨶ᩠ᨵᩣᨿ ᩅᩩᨲ᩠ᨲᨶ᩠ᨲᩥ ᨠᨳᩴ ᩅᩥᨬ᩠ᨬᩣᨿᨲᩦᨲᩥ ᨧᩮ? ‘‘ᩋᨿᨾᩮᨲ᩠ᨳ ᩌᨧᩁᩥᨿᨸᩁᨾ᩠ᨸᩁᩣᨽᨲᩮᩣ ᩅᩥᨶᩥᨧ᩠ᨨᨿᩮᩣ’’ᨲᩥ ᩅᩩᨲ᩠ᨲᩴ.

‘‘ᩈᩁᨾᩣᨶᩮᨶᩣ’’ᨲᩥ ᩍᨾᩥᨶᩣ ᩈᨾ᩠ᨸᨩᩣᨶᨾᩩᩈᩣᩅᩣᨴᩔ ᩈᨧᩥᨲ᩠ᨲᨠᨲ᩠ᨲᩴ ᨴᩔᩮᨲᩥ. ᩈᨦ᩠ᨥᨾᨩ᩠ᨫᩮ ᩅᩣᨲᩥᩌᨴᩥ ᩃᨠ᩠ᨡᨱᩅᨧᨶᩴ ᨠᩥᩁ. ᩈᨦ᩠ᨥᩩᨸᩮᩣᩈᨳᨠᩁᨱᨲ᩠ᨳᩴ ᩈᨦ᩠ᨥᨾᨩ᩠ᨫᩮ ᨧᩮ ᨶᩥᩈᩥᨶ᩠ᨶᩮᩣ, ᨲᩈ᩠ᨾᩥᩴ ᩈᨦ᩠ᨥᨾᨩ᩠ᨫᩮ ᩌᩅᩥᨠᩣᨲᨻ᩠ᨻᩣ. ᨣᨱᩩᨸᩮᩣᩈᨳᨠᩁᨱᨲ᩠ᨳᨬ᩠ᨧᩮ ᨣᨱᨾᨩ᩠ᨫᩮ ᨶᩥᩈᩥᨶ᩠ᨶᩮᩣ, ᨲᩈ᩠ᨾᩥᩴ ᨣᨱᨾᨩ᩠ᨫᩮ. ᩑᨠᩔᩮᩅ ᩈᨶ᩠ᨲᩥᨠᩮ ᨧᩮ ᨸᩣᩁᩥᩈᩩᨴ᩠ᨵᩥᩏᨸᩮᩣᩈᨳᩴ ᨠᨲ᩠ᨲᩩᨠᩣᨾᩮᩣ, ᨲᩈ᩠ᨾᩥᩴ ᩑᨠᨸᩩᨣ᩠ᨣᩃᩮ ᩌᩅᩥᨠᩣᨲᨻ᩠ᨻᩣᨲᩥ, ᩑᨲᩮᨶ ᨶ ᨠᩮᩅᩃᩴ ᩈᨦ᩠ᨥᨾᨩ᩠ᨫᩮ ᩑᩅᩣᨿᩴ ᨾᩩᩈᩣᩅᩣᨴᩮᩣ ᩈᨾ᩠ᨽᩅᨲᩥ, ᩋᨳ ᨡᩮᩣ ᩑᨲ᩠ᨳ ᩅᩩᨲ᩠ᨲᩃᨠ᩠ᨡᨱᩮᨶ ᩋᩈᨲᩥᨸᩥ ‘‘ᨸᩣᩁᩥᩈᩩᨴ᩠ᨵᩥᩴ ᩌᨿᩈ᩠ᨾᨶ᩠ᨲᩮᩣ ᩌᩁᩮᩣᨧᩮᨳᩣ’’ᨲᩥᩌᨴᩥᩅᩥᨵᩣᨶᩮ ᨣᨱᩩᨸᩮᩣᩈᨳᩮᨸᩥ ᩈᩣᨸᨲ᩠ᨲᩥᨠᩮᩣ ᩉᩩᨲ᩠ᩅᩣ ᩏᨸᩮᩣᩈᨳᩴ ᨠᨲ᩠ᨲᩩᨠᩣᨾᩮᩣ ᩋᨶᩣᩁᩮᩣᨧᩮᨲ᩠ᩅᩣ ᨲᩩᨱ᩠ᩉᩦᨽᩪᨲᩮᩣᩅ ᨧᩮ ᨠᩁᩮᩣᨲᩥ, ᩋᨿᩴ ᩈᨾ᩠ᨸᨩᩣᨶᨾᩩᩈᩣᩅᩣᨴᩣᨸᨲ᩠ᨲᩥᩴ ᩌᨸᨩ᩠ᨩᨲᩦᨲᩥ ᩍᨾᩔᨲ᩠ᨳᩔ ᩌᩅᩥᨠᩁᨱᨲᩮᩣ ᩃᨠ᩠ᨡᨱᩅᨧᨶᩴ ᨠᩥᩁᩮᨲᨶ᩠ᨲᩥ ᩅᩩᨲ᩠ᨲᨶ᩠ᨲᩥ ᨲᨠ᩠ᨠᩥᨠᩣ. ᩋᨬ᩠ᨬᨳᩣ ‘‘ᨣᨱᨾᨩ᩠ᨫᩮ ᩅᩣ’’ᨲᩥ ᨶ ᩅᨲ᩠ᨲᨻ᩠ᨻᨶ᩠ᨲᩥ ᨲᩮᩈᩴ ᩋᨵᩥᨸ᩠ᨸᩣᨿᩮᩣ. ᩌᩁᩮᩣᨧᨶᩣᨵᩥᨸ᩠ᨸᩣᨿᩅᩈᩮᨶ ᩅᩩᨲ᩠ᨲᨶ᩠ᨲᩥ ᩌᨧᩁᩥᨿᩔ ᨲᨠ᩠ᨠᩮᩣ. ᩌᩁᩮᩣᨧᩮᨶ᩠ᨲᩮᩣ ᩉᩥ ‘‘ᩈᨦ᩠ᨥᩔ ᩌᩁᩮᩣᨧᩮᨾᩦ’’ᨲᩥ ᩋᨵᩥᨸ᩠ᨸᩣᨿᩮᨶ ᩌᩅᩥᨠᩁᩮᩣᨶ᩠ᨲᩮᩣ ᩈᨦ᩠ᨥᨾᨩ᩠ᨫᩮ ᩌᩅᩥᨠᩁᩮᩣᨲᩥ ᨶᩣᨾ, ᩏᨽᨲᩮᩣᨸᩔᩮ ᨶᩥᩈᩥᨶ᩠ᨶᩣᨶᩴ ᩌᩁᩮᩣᨧᩮᨶ᩠ᨲᩮᩣ ᨣᨱᨾᨩ᩠ᨫᩮ ᩌᩅᩥᨠᩁᩮᩣᨲᩥ ᨶᩣᨾ, ‘‘ᩑᨠᩔᩮᩅ ᩌᩁᩮᩣᨧᩮᩔᩣᨾᩦ’’ᨲᩥ ᩋᨵᩥᨸ᩠ᨸᩣᨿᩮᨶ ᩌᩅᩥᨠᩁᩮᩣᨶ᩠ᨲᩮᩣ ᩑᨠᨸᩩᨣ᩠ᨣᩃᩮ ᩌᩅᩥᨠᩁᩮᩣᨲᩥ ᨶᩣᨾ. ᩈᨧᩮᨸᩥ ᩅᩮᨾᨲᩥᨠᩮᩣ ᩉᩮᩣᨲᩥ…ᨸᩮ… ᨸᨭᩥᨠᩁᩥᩔᩣᨾᩦᨲᩥ ᩑᩅᩴ ᨠᨲᩮ ᨿᩣᩅ ᩅᩮᨾᨲᩥᨠᩮᩣ ᩉᩮᩣᨲᩥ, ᨲᩣᩅ ᩈᨽᩣᨣᩣᨸᨲ᩠ᨲᩥᩴ ᨸᨭᩥᨣ᩠ᨣᩉᩮᨲᩩᩴ ᩃᨽᨲᩥ, ᩋᨬ᩠ᨬᩮᩈᨬ᩠ᨧ ᨠᨾ᩠ᨾᩣᨶᩴ ᨸᩁᩥᩈᩩᨴ᩠ᨵᩮᩣ ᨶᩣᨾ ᩉᩮᩣᨲᩥ. ᨸᩩᨶ ᨶᩥᨻ᩠ᨻᩮᨾᨲᩥᨠᩮᩣ ᩉᩩᨲ᩠ᩅᩣ ᨴᩮᩈᩮᨲᨻ᩠ᨻᩴ ᩅᩣ ᨶ ᩅᩣᨲᩥ ᨶᩮᩅ ᨸᩣᩊᩥᨿᩴ, ᨶ ᩋᨭ᩠ᨮᨠᨳᩣᨿᩴ ᩋᨲ᩠ᨳᩥ, ᨴᩮᩈᩥᨲᩮ ᨸᨶ ᨴᩮᩣᩈᩮᩣ ᨶᨲ᩠ᨳᩥ. ᨲᨳᩣ ᩍᨲᩮᩣ ᩅᩩᨭ᩠ᨮᩉᩥᨲ᩠ᩅᩣ ᨲᩴ ᩌᨸᨲ᩠ᨲᩥᩴ ᨸᨭᩥᨠᩁᩥᩔᩣᨾᩦᨲᩥ ᩑᨲ᩠ᨳ ᨧ ᩈᨠᩃᩈᨦ᩠ᨥᩮ ᩈᨽᩣᨣᩣᨸᨲ᩠ᨲᩥᩴ ᩌᨸᨶ᩠ᨶᩮ, ᩅᩮᨾᨲᩥᨠᩮ ᨧᩣᨲᩥ ᩃᩥᨡᩥᨲᩴ (ᩅᨩᩥᩁ. ᨭᩦ. ᨾᩉᩣᩅᨣ᩠ᨣ ᪑᪖᪙-᪑᪗᪐).

ᨶᩥᨴᩣᨶᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨸᩣᩁᩣᨩᩥᨠᨠᨱ᩠ᨯᩴ

᪑. ᨸᨮᨾᨸᩣᩁᩣᨩᩥᨠᩅᨱ᩠ᨱᨶᩣ

ᩍᨵ ᨸᨶ ᨮᨲ᩠ᩅᩣ ᩈᩥᨠ᩠ᨡᩣᨸᨴᩣᨶᩴ ᨠᨾᨽᩮᨴᩮᩣ ᨸᨠᩣᩈᩮᨲᨻ᩠ᨻᩮᩣ. ᨠᨳᩴ – ᩈᨻ᩠ᨻᩈᩥᨠ᩠ᨡᩣᨸᨴᩣᨶᩴ ᨿᨳᩣᩈᨾ᩠ᨽᩅᩴ ᨴᩮᩈᨶᩣᨠ᩠ᨠᨾᩮᩣ, ᨸᩉᩣᨶᨠ᩠ᨠᨾᩮᩣ, ᨸᨭᩥᨸᨲ᩠ᨲᩥᨠ᩠ᨠᨾᩮᩣ, ᩏᨸ᩠ᨸᨲ᩠ᨲᩥᨠ᩠ᨠᨾᩮᩣᨲᩥ ᨧᨲᩩᨻ᩠ᨻᩥᨵᩮᩣ ᨠᨾᩮᩣ ᩃᨻ᩠ᨽᨲᩥ. ᨲᨲ᩠ᨳ ᨽᨣᩅᨲᩣ ᩁᩣᨩᨣᩉᩮ ᨽᩥᨠ᩠ᨡᩪᨶᩴ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩴ ᩋᨶᩩᨩᩣᨶᨶ᩠ᨲᩮᨶ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩔ ᨿᩮᩣ ᨴᩮᩈᨶᩣᨠ᩠ᨠᨾᩮᩣ ᩋᨶᩩᨬ᩠ᨬᩣᨲᩮᩣ, ᨲᩴ ᨴᩮᩈᨶᩣᨠ᩠ᨠᨾᩴ ᩋᨶᩩᨠ᩠ᨠᨾᨶ᩠ᨲᩮᩣᩅ ᨾᩉᩣᨠᩔᨸᩮᩣ ᨸᨮᨾᩴ ᨸᩣᩁᩣᨩᩥᨠᩩᨴ᩠ᨴᩮᩈᩴ ᨸᩩᨧ᩠ᨨᩥ, ᨲᨴᨶᨶ᩠ᨲᩁᩴ ᩈᨦ᩠ᨥᩣᨴᩥᩈᩮᩈᩩᨴ᩠ᨴᩮᩈᩴ, ᨲᨴᨶᨶ᩠ᨲᩁᩴ ᩋᨶᩥᨿᨲᩩᨴ᩠ᨴᩮᩈᩴ, ᨲᨴᨶᨶ᩠ᨲᩁᩴ ᩅᩥᨲ᩠ᨳᩣᩁᩩᨴ᩠ᨴᩮᩈᩴ. ᨲᨴᨶᨶ᩠ᨲᩁᩴ ᨽᩥᨠ᩠ᨡᩩᨶᩥᩅᩥᨽᨦ᩠ᨣᨬ᩠ᨧ ᨲᩮᨶᩮᩅ ᩋᨶᩩᨠ᩠ᨠᨾᩮᨶ ᨸᩩᨧ᩠ᨨᩥ. ᨲᨲᩮᩣ ᨸᩁᩴ ᨲᨿᩮᩣ ᩌᨸᨲ᩠ᨲᩥᨠ᩠ᨡᨶ᩠ᨵᩮ ᩈᨦ᩠ᨣᩉᩮᨲᩩᩴ ᩅᩥᨶᩣ ᨣᨱᨶᨸᩁᩥᨧ᩠ᨨᩮᨴᩮᨶ ᩈᩮᨡᩥᨿᨵᨾ᩠ᨾᩮ ᨸᩩᨧ᩠ᨨᩥ. ᩌᨸᨲ᩠ᨲᩥᨠ᩠ᨡᨶ᩠ᨵᩮ ᩈᨽᩣᨣᨲᩮᩣ ᨸᨭ᩠ᨮᩣᨿ ᨸᩩᨧ᩠ᨨᨶ᩠ᨲᩮᩣ ᩅᩦᩈᨲᩥᨡᨶ᩠ᨵᨠᩮ ᨸᩩᨧ᩠ᨨᩥ. ᨶᩥᨴᩣᨶᩩᨴ᩠ᨴᩮᩈᨶ᩠ᨲᩮᩣᨣᨵᩣᨶᩴ ᩅᩣ ᩈᩁᩪᨸᩮᨶ ᩋᨶᩩᨴ᩠ᨴᩥᨭ᩠ᨮᩣᨶᩴ ᨸᩩᨧ᩠ᨨᨶᨲ᩠ᨳᩴ ᨡᨶ᩠ᨵᨠᩮ ᨸᩩᨧ᩠ᨨᩥ. ᩑᨲᩮᨶ ᨡᨶ᩠ᨵᨠᩮ ᨸᨬ᩠ᨬᨲ᩠ᨲᩣ ᨳᩩᩃ᩠ᩃᨧ᩠ᨧᨿᩣᨸᩥ ᩈᨦ᩠ᨣᩉᩥᨲᩣ ᩉᩮᩣᨶ᩠ᨲᩥ. ᨸᩩᨧ᩠ᨨᩥᨲᩣᨶᩩᨠ᩠ᨠᨾᩮᨶᩮᩅ ᩌᨿᩈ᩠ᨾᩣ ᩏᨸᩣᩃᩥᨲ᩠ᨳᩮᩁᩮᩣ ᨻ᩠ᨿᩣᨠᩣᩈᩥ. ᩋᨿᨾᩮᨲ᩠ᨳ ᨴᩮᩈᨶᩣᨠ᩠ᨠᨾᩮᩣ. ᩏᨽᨲᩮᩣᩅᩥᨽᨦ᩠ᨣᨡᨶ᩠ᨵᨠᨲᩮᩣ ᨸᨶ ᩏᨧ᩠ᨧᩥᨶᩥᨲ᩠ᩅᩣ ᨲᨴᩣ ᨸᩁᩥᩅᩣᩁᩮᩣ ᩅᩥᩈᩩᩴ ᨸᩣᩊᩥ ᨠᨲᩮᩣ, ᩍᨾᨾᩮᩅ ᩅᨧᨶᩴ ᩈᨶ᩠ᨵᩣᨿ ᩋᨭ᩠ᨮᨠᨳᩣᨿᩴ ᩅᩩᨲ᩠ᨲᩴ ‘‘ᩑᨲᩮᨶᩮᩅ ᩏᨸᩣᨿᩮᨶ ᨡᨶ᩠ᨵᨠᩴ ᨸᩁᩥᩅᩣᩁᩮᨸᩥ ᩌᩁᩮᩣᨸᨿᩥᩴᩈᩪ’’ᨲᩥᩌᨴᩥ (ᨸᩣᩁᩣ. ᩋᨭ᩠ᨮ. ᪑.ᨸᨮᨾᨾᩉᩣᩈᨦ᩠ᨣᩎᨲᩥᨠᨳᩣ). ᩋᨸᩥᨧ ᨸᩣᩊᩥᨿᩴ ‘‘ᩑᨲᩮᨶᩮᩅ ᩏᨸᩣᨿᩮᨶ ᩏᨽᨲᩮᩣᩅᩥᨽᨦ᩠ᨣᩮ ᨸᩩᨧ᩠ᨨᩥ. ᨸᩩᨭ᩠ᨮᩮᩣ ᨸᩩᨭ᩠ᨮᩮᩣ ᩌᨿᩈ᩠ᨾᩣ ᩏᨸᩣᩃᩥ ᩅᩥᩔᨩ᩠ᨩᩮᩈᩦ’’ᨲᩥ (ᨧᩪᩊᩅ. ᪔᪓᪙) ᩑᨲ᩠ᨲᨠᨾᩮᩅ ᩅᩩᨲ᩠ᨲᩴ. ᨲᩈ᩠ᨾᩣ ᨳᩮᩁᩮᩣ ᩏᨽᨲᩮᩣᩅᩥᨽᨦ᩠ᨣᩮ ᩑᩅ ᨸᩩᨧ᩠ᨨᩥ. ᩅᩥᩔᨩ᩠ᨩᨶ᩠ᨲᩮᩣ ᨸᨶ ᩌᨿᩈ᩠ᨾᩣ ᩏᨸᩣᩃᩥ ᨶᩥᩁᩅᩈᩮᩈᩴ ᨴᩔᩮᨶ᩠ᨲᩮᩣ ᨡᨶ᩠ᨵᨠᨸᩁᩥᩅᩣᩁᩮ ᩋᨶ᩠ᨲᩮᩣ ᨠᨲ᩠ᩅᩣ ᨴᩮᩈᩮᩈᩥ. ᨣᨱᩈᨩ᩠ᨫᩣᨿᨠᩣᩃᩮ ᨸᨶ ᨲᨴᩣ ᨡᨶ᩠ᨵᨠᨸᩁᩥᩅᩣᩁᩣ ᩅᩥᩈᩩᩴ ᨸᩣᩊᩥ ᨠᨲᩣᨲᩥ ᩋᨿᨾᩮᨲ᩠ᨳ ᨴᩮᩈᨶᩣᨠ᩠ᨠᨾᩮᩣ.

ᨿᨴᩥ ᩑᩅᩴ ᨶᩥᨴᩣᨶᩩᨴ᩠ᨴᩮᩈᩮᩣ ᨸᨮᨾᨴᩮᩈᨶᩣᨲᩥ ᨧᩮ? ᨶ, ᩏᨸᩮᩣᩈᨳᨠ᩠ᨡᨶ᩠ᨵᨠᩮ (ᨾᩉᩣᩅ. ᪑᪓᪓) ‘‘ᨿᩣᨶᩥ ᨾᨿᩣ ᨽᩥᨠ᩠ᨡᩪᨶᩴ ᩈᩥᨠ᩠ᨡᩣᨸᨴᩣᨶᩥ ᨸᨬ᩠ᨬᨲ᩠ᨲᩣᨶᩥ, ᨲᩣᨶᩥ ᨶᩮᩈᩴ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩴ ᩋᨶᩩᨩᩣᨶᩮᨿ᩠ᨿ’’ᨶ᩠ᨲᩥ ᩅᨧᨶᨲᩮᩣ, ‘‘ᨿᩔ ᩈᩥᨿᩣ ᩌᨸᨲ᩠ᨲᩦ’’ᨲᩥ (ᨾᩉᩣᩅ. ᪑᪓᪔) ᩅᨧᨶᨲᩮᩣ ᨧ. ᩋᨠᩩᩈᩃᩣᨻ᩠ᨿᩣᨠᨲᩣᨶᩴ ᩌᨸᨲ᩠ᨲᩦᨶᩴ ᨴᩥᨭ᩠ᨮᨵᨾ᩠ᨾᩈᨾ᩠ᨸᩁᩣᨿᩥᨠᩣᩈᩅᨭ᩠ᨮᩣᨶᩥᨿᨲ᩠ᨲᩣ ᨿᨳᩣᨽᩪᨲᩴ ᩈᩦᩃᩈᩴᩅᩁᨠᩮᨶ ᨸᩁᩥᩅᨩ᩠ᨩᨶᩮᨶ ᨸᩉᩣᨲᨻ᩠ᨻᨲ᩠ᨲᩣ ᨸᩉᩣᨶᨠ᩠ᨠᨾᩮᩣᨸᩮᨲ᩠ᨳ ᩈᨾ᩠ᨽᩅᨲᩥ ‘‘ᨲᩣᩅᨴᩮᩅ ᨧᨲ᩠ᨲᩣᩁᩥ ᩋᨠᩁᨱᩦᨿᩣᨶᩥ ᩌᨧᩥᨠ᩠ᨡᩥᨲᨻ᩠ᨻᩣᨶᩦ’’ᨲᩥ ᩅᨧᨶᨲᩮᩣ. ᨲᨳᩣ ‘‘ᩈᨾᩣᨴᩣᨿ ᩈᩥᨠ᩠ᨡᨲᩥ ᩈᩥᨠ᩠ᨡᩣᨸᨴᩮᩈᩪ’’ᨲᩥ (ᨾ. ᨶᩥ. ᪓.᪗᪕; ᩅᩥᨽ. ᪕᪐᪘) ᩅᨧᨶᨲᩮᩣ ᨿᨳᩣᨽᩪᨲᩴ ᩌᨧᩥᨠ᩠ᨡᨶᩈᩥᨠ᩠ᨡᨶᩮᨶ ᨸᨭᩥᨸᨲ᩠ᨲᩥᨠ᩠ᨠᨾᩮᩣᨸᩥ ᩈᨾ᩠ᨽᩅᨲᩥ. ᨿᨳᩩᨴ᩠ᨴᩮᩈᨠ᩠ᨠᨾᩴ ᨸᩁᩥᨿᩣᨸᩩᨱᩥᨲᨻ᩠ᨻᨸᩁᩥᨿᨲ᩠ᨲᩥᩋᨲ᩠ᨳᩮᨶᩣᨸᩥ ᨸᨭᩥᨸᨲ᩠ᨲᩥᨠ᩠ᨠᨾᩮᩣ, ᩑᩅᨾᩥᨾᩮᩉᩥ ᨲᩦᩉᩥ ᨠᨾᩮᩉᩥ ᨴᩮᩈᩮᨲᨻ᩠ᨻᩣᨶᨾᩮᨲᩮᩈᩴ ᩈᩥᨠ᩠ᨡᩣᨸᨴᩣᨶᩴ ᨿᨳᩣᩈᨾ᩠ᨽᩅᩴ ᩏᨸ᩠ᨸᨲ᩠ᨲᩥᨠ᩠ᨠᨾᩮᩣ ᩈᨾ᩠ᨽᩅᨲᩥ. ᨲᨳᩣ ᩉᩥ ᨿᩴ ᨿᩴ ᩈᩣᨵᩣᩁᨱᩴ, ᨲᩴ ᨲᩴ ᨽᩥᨠ᩠ᨡᩩᩴ ᩌᩁᨻ᩠ᨽ ᩏᨸ᩠ᨸᨶ᩠ᨶᩮ ᩑᩅ ᩅᨲ᩠ᨳᩩᩈ᩠ᨾᩥᩴ ‘‘ᨿᩣ ᨸᨶ ᨽᩥᨠ᩠ᨡᩩᨶᩦ ᨨᨶ᩠ᨴᩈᩮᩣ ᨾᩮᨳᩩᨶᩴ ᨵᨾ᩠ᨾ’’ᨶ᩠ᨲᩥᩌᨴᩥᨶᩣ ᨶᨿᩮᨶ ᨽᩥᨠ᩠ᨡᩩᨶᩦᨶᨾ᩠ᨸᩥ ᨸᨬ᩠ᨬᨲ᩠ᨲᩴ. ᨿᨲᩮᩣ ᨽᩥᨠ᩠ᨡᩩᨶᩦᨶᩴ ᨲᩴ ᩋᨶᩩᨸ᩠ᨸᨶ᩠ᨶᨸᨬ᩠ᨬᨲ᩠ᨲᩥ ᨶ ᩈᩥᨿᩣ, ᨲᨲᩮᩣ ᩋᨶᩩᨸ᩠ᨸᨶ᩠ᨶᨸᨬ᩠ᨬᨲ᩠ᨲᩥ ᨲᩈ᩠ᨾᩥᩴ ᨶᨲ᩠ᨳᩦᨲᩥ (ᨸᩁᩥ. ᪒᪐᪑-᪒᪐᪒) ᨸᩁᩥᩅᩣᩁᩅᨧᨶᩴ ᨶ ᩅᩥᩁᩩᨩ᩠ᨫᨲᩥ. ᩑᨲ᩠ᨲᩣᩅᨲᩣ ᨸᩩᩁᩥᨾᩮᨶ ᨠᨾᨲ᩠ᨲᨿᩮᨶ ᨿᩴ ᨸᨮᨾᩴ ᨴᩮᩈᩮᨲᨻ᩠ᨻᩴ, ᨲᩴ ᨸᩣᩁᩣᨩᩥᨠᩩᨴ᩠ᨴᩮᩈᩮ ᨸᨮᨾᩩᨸ᩠ᨸᨶ᩠ᨶᨲ᩠ᨲᩣ ᨾᩮᨳᩩᨶᨵᨾ᩠ᨾᨸᩣᩁᩣᨩᩥᨠᩴ ᩈᨻ᩠ᨻᨸᨮᨾᩴ ᨴᩮᩈᩮᨲᩩᨠᩣᨾᩮᩣ ᩌᨿᩈ᩠ᨾᩣ ᩏᨸᩣᩃᩥᨲ᩠ᨳᩮᩁᩮᩣ ‘‘ᨲᨲᩕ ᩈᩩᨴᩴ ᨽᨣᩅᩣ ᩅᩮᩈᩣᩃᩥᨿᩴ ᩅᩥᩉᩁᨲᩦ’’ᨲᩥ (ᨸᩣᩁᩣ. ᪒᪓) ᩅᩮᩈᩣᩃᩥᨿᨾᩮᩅ ᨸᩣᨸᩮᨲ᩠ᩅᩣ ᨮᨸᩮᩈᩥ.

ᩍᨴᩣᨶᩥ ᩈᨻ᩠ᨻᩮᩈᩴ ᩈᩥᨠ᩠ᨡᩣᨸᨴᩣᨶᩴ ᨸᨬ᩠ᨬᩣᨸᨶᩅᩥᨵᩣᨶᩴ ᩅᩮᨴᩥᨲᨻ᩠ᨻᩴ. ᨠᨳᩴ? ‘‘ᩑᩅᨬ᩠ᨧ ᨸᨶ, ᨽᩥᨠ᩠ᨡᩅᩮ, ᩍᨾᩴ ᩈᩥᨠ᩠ᨡᩣᨸᨴᩴ ᩏᨴ᩠ᨴᩥᩈᩮᨿ᩠ᨿᩣᨳᩣ’’ᨲᩥ (ᨸᩣᩁᩣ. ᪓᪙, ᪔᪓) ᩑᩅᩴ ᩈᩏᨴ᩠ᨴᩮᩈᩋᨶᩩᨴ᩠ᨴᩮᩈᨽᩮᨴᨲᩮᩣ ᨴᩩᩅᩥᨵᩴ. ᨲᨲ᩠ᨳ ᨸᩣᨲᩥᨾᩮᩣᨠ᩠ᨡᩮ ᩈᩁᩪᨸᨲᩮᩣ ᩌᨣᨲᩣ ᨸᨬ᩠ᨧ ᩌᨸᨲ᩠ᨲᩥᨠ᩠ᨡᨶ᩠ᨵᩣ ᩈᩏᨴ᩠ᨴᩮᩈᨸᨬ᩠ᨬᨲ᩠ᨲᩥ ᨶᩣᨾ. ᩈᩣᨸᩥ ᨴ᩠ᩅᩥᨵᩣ ᩈᨸᩩᨣ᩠ᨣᩃᩣᨸᩩᨣ᩠ᨣᩃᨶᩥᨴ᩠ᨴᩮᩈᨽᩮᨴᨲᩮᩣ. ᨲᨲ᩠ᨳ ᨿᩔᩣ ᨸᨬ᩠ᨬᨲ᩠ᨲᩥᨿᩣ ᩋᨶ᩠ᨲᩮᩣ ᩌᨸᨲ᩠ᨲᩥᨿᩣ ᩈᩉ, ᩅᩥᨶᩣ ᩅᩣ ᨸᩩᨣ᩠ᨣᩃᩮᩣ ᨴᩔᩥᨲᩮᩣ, ᩈᩣ ᩈᨸᩩᨣ᩠ᨣᩃᨶᩥᨴ᩠ᨴᩮᩈᩣ. ᩍᨲᩁᩣ ᩋᨸᩩᨣ᩠ᨣᩃᨶᩥᨴ᩠ᨴᩮᩈᩣ.

ᨲᨲ᩠ᨳ ᩈᨸᩩᨣ᩠ᨣᩃᨶᩥᨴ᩠ᨴᩮᩈᩣ ᨴ᩠ᩅᩥᨵᩣ ᩋᨴᩔᩥᨲᨴᩔᩥᨲᩣᨸᨲ᩠ᨲᩥᨽᩮᨴᨲᩮᩣ. ᨲᨲ᩠ᨳ ᩋᨴᩔᩥᨲᩣᨸᨲ᩠ᨲᩥᨠᩣ ᨶᩣᨾ ᩋᨭ᩠ᨮ ᨸᩣᩁᩣᨩᩥᨠᩣ ᨵᨾ᩠ᨾᩣ ᩅᩮᨴᩥᨲᨻ᩠ᨻᩣ. ‘‘ᨸᩣᩁᩣᨩᩥᨠᩮᩣ ᩉᩮᩣᨲᩥ ᩋᩈᩴᩅᩣᩈᩮᩣ’’ᨲᩥ (ᨸᩣᩁᩣ. ᪓᪙, ᪔᪔, ᪘᪙, ᪙᪑, ᪑᪖᪗, ᪑᪗᪑, ᪑᪙᪕, ᪑᪙᪗) ᩉᩥ ᨸᩩᨣ᩠ᨣᩃᩮᩣᩅ ᨲᨲ᩠ᨳ ᨴᩔᩥᨲᩮᩣ, ᨶᩣᨸᨲ᩠ᨲᩥ. ᨴᩔᩥᨲᩣᨸᨲ᩠ᨲᩥᨠᩣ ᨶᩣᨾ ᨽᩥᨠ᩠ᨡᩩᨶᩥᨸᩣᨲᩥᨾᩮᩣᨠ᩠ᨡᩮ ᩌᨣᨲᩣ ᩈᨲ᩠ᨲᩁᩈ ᩈᨦ᩠ᨥᩣᨴᩥᩈᩮᩈᩣ ᨵᨾ᩠ᨾᩣ. ‘‘ᩋᨿᨾ᩠ᨸᩥ ᨽᩥᨠ᩠ᨡᩩᨶᩦ ᨸᨮᨾᩣᨸᨲ᩠ᨲᩥᨠᩴ ᨵᨾ᩠ᨾᩴ ᩌᨸᨶ᩠ᨶᩣ ᨶᩥᩔᩣᩁᨱᩦᨿᩴ ᩈᨦ᩠ᨥᩣᨴᩥᩈᩮᩈ’’ᨶ᩠ᨲᩥ (ᨸᩣᨧᩥ. ᪖᪘᪓, ᪖᪘᪗) ᩉᩥ ᨲᨲ᩠ᨳ ᩌᨸᨲ᩠ᨲᩥ ᨴᩔᩥᨲᩣ ᩈᨴ᩠ᨵᩥᩴ ᨸᩩᨣ᩠ᨣᩃᩮᨶ.

ᨲᨳᩣ ᩋᨸᩩᨣ᩠ᨣᩃᨶᩥᨴ᩠ᨴᩮᩈᩣᨸᩥ ᩋᨴᩔᩥᨲᨴᩔᩥᨲᩣᨸᨲ᩠ᨲᩥᨽᩮᨴᨲᩮᩣ ᨴ᩠ᩅᩥᨵᩣ. ᨲᨲ᩠ᨳ ᩋᨴᩔᩥᨲᩣᨸᨲ᩠ᨲᩥᨠᩣ ᨶᩣᨾ ᩈᩮᨡᩥᨿᩣ ᨵᨾ᩠ᨾᩣ. ᩅᩩᨲ᩠ᨲᩣᩅᩈᩮᩈᩣ ᨴᩔᩥᨲᩣᨸᨲ᩠ᨲᩥᨠᩣᨲᩥ ᩅᩮᨴᩥᨲᨻ᩠ᨻᩣ.

ᩈᩣᨸᩥ ᨴ᩠ᩅᩥᨵᩣ ᩋᨶᩥᨴ᩠ᨴᩥᨭ᩠ᨮᨠᩣᩁᨠᨶᩥᨴ᩠ᨴᩥᨭ᩠ᨮᨠᩣᩁᨠᨽᩮᨴᨲᩮᩣ. ᨲᨲ᩠ᨳ ᩋᨶᩥᨴ᩠ᨴᩥᨭ᩠ᨮᨠᩣᩁᨠᩣ ᨶᩣᨾ ᩈᩩᨠ᩠ᨠᩅᩥᩈᨭ᩠ᨮᩥᨾᩩᩈᩣᩅᩣᨴᩮᩣᨾᩈᩅᩣᨴᨸᩮᩈᩩᨬ᩠ᨬᨽᩪᨲᨣᩣᨾᩋᨬ᩠ᨬᩅᩣᨴᨠᩏᨩ᩠ᨫᩣᨸᨶᨠᨣᨱᨽᩮᩣᨩᨶᨸᩁᨾ᩠ᨸᩁᨽᩮᩣᨩᨶᩈᩩᩁᩣᨾᩮᩁᨿᩋᨦ᩠ᨣᩩᩃᩥᨸᨲᩮᩣᨴᨠᩉᩈᨵᨾ᩠ᨾᩋᨶᩣᨴᩁᩥᨿᨲᩃᨥᩣᨲᨠᨩᨲᩩᨾᨭ᩠ᨮᨠᩈᩥᨠ᩠ᨡᩣᨸᨴᩣᨶᩴ ᩅᩈᩮᨶ ᨸᨬ᩠ᨧᨴᩈᩅᩥᨵᩣ ᩉᩮᩣᨶ᩠ᨲᩥ. ᨲᨲ᩠ᨳ ᨶᩥᨴ᩠ᨴᩥᨭ᩠ᨮᨠᩣᩁᨠᩮ ᨾᩥᩔᩣᨾᩥᩔᨽᩮᨴᩮᩣ ᩅᩮᨴᩥᨲᨻ᩠ᨻᩮᩣ – ᨲᨲ᩠ᨳ ᩏᨸᨿᩮᩣᨣᨽᩩᨾ᩠ᨾᩅᩥᨽᨲ᩠ᨲᩥᨿᩮᩣ ᩑᨠᩴᩈᩮᨶ ᨾᩥᩔᩣ. ᩋᩅᩈᩮᩈᩣ ᨾᩥᩔᩣ ᨧ ᩋᨾᩥᩔᩣ ᨧ. ᩈᩮᨿ᩠ᨿᨳᩥᨴᩴ – ᨸᨧ᩠ᨧᨲ᩠ᨲᩴ ᨲᩣᩅ ᨴ᩠ᩅᩦᩈᩩ ᩋᨶᩥᨿᨲᩮᩈᩩ ᩏᨸᨿᩮᩣᨣᩮᨶ ᨾᩥᩔᩴ, ᨴ᩠ᩅᩣᨴᩈᩈᩩ ᨸᩣᨭᩥᨴᩮᩈᨶᩦᨿᩮᩈᩩ ᨠᩁᨱᩮᨶ ᨾᩥᩔᩴ, ᩐᨶᨸᨬ᩠ᨧᨻᨶ᩠ᨵᨶᨸᨲ᩠ᨲᩈᩥᨠ᩠ᨡᩣᨸᨴᩮᩈᩩ ᩈᩣᨾᩥᨠᩁᨱᩮᩉᩥ, ᩐᨶᩅᩦᩈᨲᩥᩅᩔᩮ ᨽᩩᨾ᩠ᨾᩮᨶ, ᨾᩮᩣᩉᨶᨠᩮ ᩏᨸᨿᩮᩣᨣᩈᩣᨾᩥᨽᩩᨾ᩠ᨾᩮᩉᩥ. ᨿᩈ᩠ᨾᩣ ‘‘ᩅᩥᩅᨱ᩠ᨱᨠ’’ᨶ᩠ᨲᩥ ᨽᩣᩅᩮᩣ ᩋᨵᩥᨸ᩠ᨸᩮᨲᩮᩣ, ᨶ ᨠᨲ᩠ᨲᩣ, ᨲᩈ᩠ᨾᩣ ᩅᩥᩅᨱ᩠ᨱᨠᩈᩥᨠ᩠ᨡᩣᨸᨴᩴ ᨿᨴᩣ ᨶ ᩈᨾ᩠ᨽᩅᨲᩥ, ᩑᩅᩴ ᨸᨧ᩠ᨧᨲ᩠ᨲᩴ ᨸᨬ᩠ᨧᩅᩥᨵᩴ ᨾᩥᩔᩴ ᩉᩮᩣᨲᩥ. ᩈᩮᩈᩮᩈᩩ ᨸᨮᨾᩣᨶᩥᨿᨲᩴ ᨮᨸᩮᨲ᩠ᩅᩣ ᩌᨴᩥᨾ᩠ᩉᩥ ‘‘ᨿᩮᩣ ᨸᨶ ᨽᩥᨠ᩠ᨡᩪ’’ᨲᩥ ᩑᩅᨾᩣᨣᨲᩴ ᨸᨧ᩠ᨧᨲ᩠ᨲᩴ ᩅᩣ, ᨴᩩᨲᩥᨿᩣᨶᩥᨿᨲᩴ ᨮᨸᩮᨲ᩠ᩅᩣ ᨸᨱᩦᨲᨽᩮᩣᨩᨶᩈᨾᨱᩩᨴ᩠ᨴᩮᩈᨲᨲᩥᨿᨧᨲᩩᨲ᩠ᨳᨸᩣᨭᩥᨴᩮᩈᨶᩦᨿᩈᩥᨠ᩠ᨡᩣᨸᨴᩮᩈᩩ ᨾᨩ᩠ᨫᩮ ‘‘ᨿᩮᩣ ᨸᨶ ᨽᩥᨠ᩠ᨡᩪ’’ᨲᩥ ᩑᩅᨾᩣᨣᨲᩴ ᨸᨧ᩠ᨧᨲ᩠ᨲᩴ ᩅᩣ, ᨴᩩᨻ᩠ᨻᨧᨠᩩᩃᨴᩪᩈᨠᩈᩴᩈᨭ᩠ᨮᩈᩥᨠ᩠ᨡᩣᨸᨴᩮᩈᩩ ᩌᨴᩥᨾ᩠ᩉᩥ ᨠᩮᩅᩃᩴ ‘‘ᨽᩥᨠ᩠ᨡᩪ’’ᨲᩥ ᩌᨣᨲᩴ ᨸᨧ᩠ᨧᨲ᩠ᨲᩴ ᩅᩣ, ᨽᩮᨴᩣᨶᩩᩅᨲ᩠ᨲᨠᩈᩥᨠ᩠ᨡᩣᨸᨴᩮ ᨾᨩ᩠ᨫᩮ ᩌᨣᨲᩴ ᨸᨧ᩠ᨧᨲ᩠ᨲᩴ ᩅᩣ ᩋᨬ᩠ᨬᩣᨿ ᩅᩥᨽᨲ᩠ᨲᩥᨿᩣ ᩋᨾᩥᩔᨾᩮᩅ ᩉᩮᩣᨲᩥ. ᨲᨲ᩠ᨳ ᨽᩮᨴᩣᨶᩩᩅᨲ᩠ᨲᨠᨲᩩᩅᨭ᩠ᨭᨶᨴ᩠ᩅᨿᩈᩴᩈᨭ᩠ᨮᨴᩩᨲᩥᨿᨸᩣᨭᩥᨴᩮᩈᨶᩦᨿᩈᩥᨠ᩠ᨡᩣᨸᨴᩮᩈᩩ ᨻᩉᩩᩅᨧᨶᩴ, ᩍᨲᩁᨲ᩠ᨳ ᩈᨻ᩠ᨻᨲ᩠ᨳ ᩑᨠᩅᨧᨶᨾᩮᩅᩣᨲᩥ ᩅᩮᨴᩥᨲᨻ᩠ᨻᩴ.

ᨲᨳᩣ ᩏᨸᨿᩮᩣᨣᩮᩣ ᨴ᩠ᩅᩦᩈᩩ ᩅᩥᨠᨸ᩠ᨸᨶᩈᩥᨠ᩠ᨡᩣᨸᨴᩮᩈᩩ, ᨲᨶ᩠ᨲᩅᩣᨿᩈᩥᨠ᩠ᨡᩣᨸᨴᩮ ᨧ ᨸᨧ᩠ᨧᨲ᩠ᨲᩮᨶ ᨾᩥᩔᩮᩣ, ᩋᨽᩥᩉᨭᩈᩥᨠ᩠ᨡᩣᨸᨴᩮ ᨠᩁᨱᩮᨶ, ᩁᩣᨩᩈᩥᨠ᩠ᨡᩣᨸᨴᩮ ᨠᩁᨱᩈᩣᨾᩥᨸᨧ᩠ᨧᨲ᩠ᨲᩮᩉᩦᨲᩥ ᩏᨸᨿᩮᩣᨣᩮᩣ ᨲᩥᨵᩣ ᨾᩥᩔᩮᩣ ᩉᩮᩣᨲᩥ. ᨠᩁᨱᨬ᩠ᨧ ᨠᩩᨭᩥᨠᩣᩁᨾᩉᩃ᩠ᩃᨠᨴᩩᨲᩥᨿᨠᨳᩥᨶᨴ᩠ᩅᩮᨽᩣᨣᨶᩥᩈᩦᨴᨶᩈᨶ᩠ᨳᨲᨴᩩᨻ᩠ᨻᨱ᩠ᨱᨠᩁᨱᩈᩥᨠ᩠ᨡᩣᨸᨴᩮᩈᩩ ᨨᩈᩩ ᨸᨧ᩠ᨧᨲ᩠ᨲᩮᨶ ᨾᩥᩔᩴ, ᨸᨮᨾᨲᨲᩥᨿᨠᨳᩥᨶᩋᨭ᩠ᨮᨦ᩠ᨣᩩᩃᨸᩣᨴᨠᨶᩥᩈᩦᨴᨶᨠᨱ᩠ᨯᩩᨸ᩠ᨸᨭᩥᨧ᩠ᨨᩣᨴᩥᨠᩅᩔᩥᨠᩈᩣᨭᩥᨠᩏᨴᨠᩈᩣᨭᩥᨠᨴ᩠ᩅᩮᨵᨾ᩠ᨾᨸᨧ᩠ᨧᩣᩈᩦᩈᨶᩈᩥᨠ᩠ᨡᩣᨸᨴᩮᩈᩩ ᩋᨭ᩠ᨮᩈᩩ ᩈᩣᨾᩥᨶᩣ ᨾᩥᩔᨶ᩠ᨲᩥ ᨠᩁᨱᩴ ᨴ᩠ᩅᩥᨵᩣ ᨾᩥᩔᩴ ᩉᩮᩣᨲᩥ. ᩋᩅᩈᩮᩈᩮᩈᩩ ᨨᨻ᩠ᨻᩔᩅᩔᩥᨠᩈᩣᨭᩥᨠᨴ᩠ᩅᨲ᩠ᨲᩥᨧ᩠ᨨᨴᨶᩣᩅᩈᨳᨸᩥᨱ᩠ᨯᨾᩉᩣᨶᩣᨾᨣᩁᩩᩃᩉᩩᨸᩣᩅᩩᩁᨱᩈᩥᨠ᩠ᨡᩣᨸᨴᩮᩈᩩ ᩈᨲ᩠ᨲᩈᩩ ᨠᩁᨱᩅᩥᨽᨲ᩠ᨲᩥ ᩋᨬ᩠ᨬᩅᩥᨽᨲ᩠ᨲᩥᨿᩣ ᩋᨾᩥᩔᩣ, ᩋᨧ᩠ᨧᩮᨠᩑᩊᨠᩃᩮᩣᨾᩈᩥᨠ᩠ᨡᩣᨸᨴᩮᩈᩩ ᩈᩣᨾᩥᩅᩥᨽᨲ᩠ᨲᩥ ᨠᩁᨱᩅᩥᨽᨲ᩠ᨲᩥᨿᩣ ᨾᩥᩔᩣ. ᩋᨲᩥᩁᩮᨠᨸᨲ᩠ᨲᨽᩮᩈᨩ᩠ᨩᩈᩥᨠ᩠ᨡᩣᨸᨴᩮᩈᩩ ᩋᨣ᩠ᨣᩉᩥᨲᨣ᩠ᨣᩉᨱᩮᨶ ᩈᩣᨾᩥᩅᩥᨽᨲ᩠ᨲᩥ ᩋᨾᩥᩔᩣᩅ ᩉᩮᩣᨲᩦᨲᩥ ᩅᩮᨴᩥᨲᨻ᩠ᨻᩣ. ᩑᩅᩴ ᨲᩣᩅ ᨶᩥᨴ᩠ᨴᩥᨭ᩠ᨮᨠᩣᩁᨠᩮᩈᩩ ᩈᩥᨠ᩠ᨡᩣᨸᨴᩮᩈᩩ –

ᨸᨬ᩠ᨧᨵᩣ ᨧ ᨲᩥᨵᩣ ᨧᩮᩅ, ᨴ᩠ᩅᩥᨵᩣ ᨧᩮᨸᩥ ᨲᨳᩮᨠᨵᩣ;

ᨽᩥᨶ᩠ᨶᩣ ᩅᩥᨽᨲ᩠ᨲᩥᨿᩮᩣ ᨸᨬ᩠ᨧ, ᩈᨻ᩠ᨻᩮᨠᩣᨴᩈᨵᩣ ᩈᩥᨿᩩᩴ.

ᩑᩅᩴ ᨲᩣᩅ ᨿᨳᩣᩅᩩᨲ᩠ᨲᩮᩈᩩ ᩈᩏᨴ᩠ᨴᩮᩈᨸᨬ᩠ᨬᨲ᩠ᨲᩥᩈᨦ᩠ᨡᩣᨲᩮᩈᩩ ᩈᩥᨠ᩠ᨡᩣᨸᨴᩮᩈᩩ ᩋᨣ᩠ᨣᩉᩥᨲᨣ᩠ᨣᩉᨱᩮᨶ ᨸᨬ᩠ᨬᩣᩈᩩᨲ᩠ᨲᩁᩮᩈᩩ ᨲᩥᩈᨲᩮᩈᩩ ᨶᩅᩩᨲᩥᩋᨶᩥᨴ᩠ᨴᩥᨭ᩠ᨮᨠᩣᩁᨠᩮ ᩅᨩ᩠ᨩᩮᨲ᩠ᩅᩣ ᨶᩥᨴ᩠ᨴᩥᨭ᩠ᨮᨠᩣᩁᨠᩣᨶᩥ ᩋᨲᩥᩁᩮᨠᩈᨭ᩠ᨮᩥᨴ᩠ᩅᩥᩈᨲᩣᨶᩥ ᩉᩮᩣᨶ᩠ᨲᩥ. ᨲᩮᩈᩩ ᨸᨧ᩠ᨧᨲ᩠ᨲᨠᩁᨱᩣᨶᩥ ᨲᩥᩴᩈᩩᨲ᩠ᨲᩁᩣᨶᩥ ᨴ᩠ᩅᩥᩈᨲᩣᨶᩥ ᩉᩮᩣᨶ᩠ᨲᩥ. ᨲᩮᩈᩩ ᩋᨾᩥᩔᨸᨧ᩠ᨧᨲ᩠ᨲᨠᩁᨱᩣᨶᩥ ᨴ᩠ᩅᩣᨴᩈᩩᨲ᩠ᨲᩁᩣᨶᩥ ᨴ᩠ᩅᩥᩈᨲᩣᨶᩥ, ᨾᩥᩔᨸᨧ᩠ᨧᨲ᩠ᨲᨠᩁᨱᩣᨶᩥ ᩋᨭ᩠ᨮᩣᩁᩈ ᩉᩮᩣᨶ᩠ᨲᩥ. ᩋᩅᩈᩮᩈᩮᩈᩩ ᨲᩥᩴᩈᨲᩥᨿᩣ ᩈᩥᨠ᩠ᨡᩣᨸᨴᩮᩈᩩ ᨾᩥᩔᩮᩣᨸᨿᩮᩣᨣᨠᩁᨱᩣᨶᩥ ᨸᨬ᩠ᨧ ᩉᩮᩣᨶ᩠ᨲᩥ, ᨾᩥᩔᨠᩁᨱᩣᨶᩥ ᨧᩩᨴ᩠ᨴᩈ, ᩋᨾᩥᩔᩣᨶᩥ ᩈᨲ᩠ᨲ, ᨾᩥᩔᩣᨾᩥᩔᨠᩁᨱᩣᨶᩥ ᨴ᩠ᩅᩮ, ᩋᨾᩥᩔᩣᨶᩥ ᨴ᩠ᩅᩮᨲᩥ ᩈᨻ᩠ᨻᩮᩈᩩᨸᩥ ᨶᩥᨴ᩠ᨴᩥᨭ᩠ᨮᨠᩣᩁᨠᩮᩈᩩ ᨽᩮᨴᩣᨶᩩᩅᨲ᩠ᨲᨠᨴᩩᨻ᩠ᨻᨧᨠᩩᩃᨴᩪᩈᨠᨸᨮᨾᨴᩩᨲᩥᨿᨲᨲᩥᨿᨠᨳᩥᨶᩋᨽᩥᩉᨭᨠᩩᨭᩥᨠᩣᩁᨾᩉᩃ᩠ᩃᨠᩅᩥᨠᨸ᩠ᨸᨶᨴ᩠ᩅᨿᨴ᩠ᩅᩮᨽᩣᨣᨨᨻ᩠ᨻᩔᨶᩥᩈᩦᨴᨶᩈᨶ᩠ᨳᨲᩑᩊᨠᩃᩮᩣᨾᩣᨲᩥᩁᩮᨠᨸᨲ᩠ᨲᨽᩮᩈᨩ᩠ᨩᩅᩔᩥᨠᩈᩣᨭᩥᨠᨲᨶ᩠ᨲᩅᩣᨿᩋᨧ᩠ᨧᩮᨠᨨᩣᩁᨲ᩠ᨲᨴ᩠ᩅ ᨸᨬ᩠ᨧᨲ᩠ᨲᩥᩴᩈᩮᩈᩩ ‘‘ᨿᩮᩣ ᨸᨶ ᨽᩥᨠ᩠ᨡᩪ’’ᨲᩥ ᨶᨲ᩠ᨳᩥ. ᨴᩩᨲᩥᨿᩣᨶᩥᨿᨲᨸᨱᩦᨲᨽᩮᩣᨩᨶᩈᨾᨱᩩᨴ᩠ᨴᩮᩈᨲᨲᩥᨿᨧᨲᩩᨲ᩠ᨳᨸᩣᨭᩥᨴᩮᩈᨶᩦᨿᩮᩈᩩ ᨾᨩ᩠ᨫᩮ ᩋᨲ᩠ᨳᩥ.

ᩑᨲ᩠ᨲᩣᩅᨲᩣ ᩈᩏᨴ᩠ᨴᩮᩈᩣᨶᩩᨴ᩠ᨴᩮᩈᨴᩩᨠᩴ, ᩈᨸᩩᨣ᩠ᨣᩃᩣᨸᩩᨣ᩠ᨣᩃᨶᩥᨴ᩠ᨴᩮᩈᨴᩩᨠᩴ, ᨸᨧ᩠ᨧᩮᨠᨴᩔᩥᨲᩣᨸᨲ᩠ᨲᩥᨴᩩᨠᨴ᩠ᩅᨿᩴ, ᩋᨶᩥᨴ᩠ᨴᩥᨭ᩠ᨮᨠᩣᩁᨠᨴᩩᨠᩴ, ᨲᨲ᩠ᨳ ᨶᩥᨴ᩠ᨴᩥᨭ᩠ᨮᨠᩣᩁᨠᩮᩈᩩ ᨸᨧ᩠ᨧᨲ᩠ᨲᨽᩩᨾ᩠ᨾᨴᩩᨠᩴ, ᩈᨿᩮᩣᨸᨶᩣᨿᩮᩣᨸᨶᨴᩩᨠᩴ, ᩋᨿᩮᩣᨸᨶᨾᨩ᩠ᨫᩮᨿᩮᩣᨸᨶᨴᩩᨠᩴ, ᩑᨠᩣᨶᩮᨠᩅᨧᨶᨴᩩᨠᨶ᩠ᨲᩥ ᨶᩅ ᨴᩩᨠᩣᨶᩥ ᨴᩔᩥᨲᩣᨶᩥ ᩉᩮᩣᨶ᩠ᨲᩥ. ᩅᩥᩈᩮᩈᨠᩣᩁᨱᩴ ᨲᩈ᩠ᨾᩥᩴ ᨲᩈ᩠ᨾᩥᩴ ᩈᩥᨠ᩠ᨡᩣᨸᨴᩮ ᩈᨾ᩠ᨸᨲ᩠ᨲᩮ ᩌᩅᩥᨽᩅᩥᩔᨲᩥ. ᩑᩅᩴ ᨲᩣᩅ ᩈᩏᨴ᩠ᨴᩮᩈᨸᨬ᩠ᨬᨲ᩠ᨲᩥᩴ ᨬᨲ᩠ᩅᩣ ᩈᩮᩈᩅᩥᨶᨿᨸᩥᨭᨠᩮ ᨿᩣ ᨠᩣᨧᩥ ᨸᨬ᩠ᨬᨲ᩠ᨲᩥ ᩋᨶᩩᨴ᩠ᨴᩮᩈᨸᨬ᩠ᨬᨲ᩠ᨲᩦᨲᩥ ᩅᩮᨴᩥᨲᨻ᩠ᨻᩣ. ᩈᩣ ᨸᨴᨽᩣᨩᨶᨶ᩠ᨲᩁᩣᨸᨲ᩠ᨲᩥᩅᩥᨶᩦᨲᩅᨲ᩠ᨳᩩᨸᨭᩥᨠ᩠ᨡᩮᨸᨸᨬ᩠ᨬᨲ᩠ᨲᩥᩋᩅᩩᨲ᩠ᨲᩈᩥᨴ᩠ᨵᩥᩈᩥᨠ᩠ᨡᩣᨸᨴᩅᩈᩮᨶ ᨨᨻ᩠ᨻᩥᨵᩣ ᩉᩮᩣᨲᩥ.

ᨲᨲ᩠ᨳ ‘‘ᨿᩮᨽᩩᨿ᩠ᨿᩮᨶ ᨡᨿᩥᨲᩮ ᩌᨸᨲ᩠ᨲᩥ ᨳᩩᩃ᩠ᩃᨧ᩠ᨧᨿᩔ (ᨸᩁᩥ. ᪑᪕᪗-᪑᪕᪘), ᩅᨭ᩠ᨭᨠᨲᩮ ᨾᩩᨡᩮ ᩋᨧ᩠ᨨᩩᨸᨶ᩠ᨲᩔ ᩌᨸᨲ᩠ᨲᩥ ᨴᩩᨠ᩠ᨠᨭᩔᩣ’’ᨲᩥ (ᨸᩣᩁᩣ. ᪗᪓) ᩑᩅᨾᩣᨴᩥᨠᩣ ᨸᨴᨽᩣᨩᨶᩮ ᩈᨶ᩠ᨴᩥᩔᨾᩣᨶᩣᨸᨲ᩠ᨲᩥ ᨸᨴᨽᩣᨩᨶᩈᩥᨠ᩠ᨡᩣᨸᨴᩴ ᨶᩣᨾ. ‘‘ᨶ ᨧ, ᨽᩥᨠ᩠ᨡᩅᩮ, ᩈᨻ᩠ᨻᨾᨲ᩠ᨲᩥᨠᩣᨾᨿᩣ ᨠᩩᨭᩥ ᨠᩣᨲᨻ᩠ᨻᩣ, ᨿᩮᩣ ᨠᩁᩮᨿ᩠ᨿ, ᩌᨸᨲ᩠ᨲᩥ ᨴᩩᨠ᩠ᨠᨭᩔᩣ’’ᨲᩥᩌᨴᩥ (ᨸᩣᩁᩣ. ᪘᪕) ᩋᨶ᩠ᨲᩁᩣᨸᨲ᩠ᨲᩥᩈᩥᨠ᩠ᨡᩣᨸᨴᩴ ᨶᩣᨾ. ‘‘ᩋᨶᩩᨩᩣᨶᩣᨾᩥ, ᨽᩥᨠ᩠ᨡᩅᩮ, ᨴᩥᩅᩣᨸᨭᩥᩈᩃ᩠ᩃᩦᨿᨶ᩠ᨲᩮᨶ ᨴ᩠ᩅᩣᩁᩴ ᩈᩴᩅᩁᩥᨲ᩠ᩅᩣ ᨸᨭᩥᩈᩃ᩠ᩃᩦᨿᩥᨲᩩ’’ᨶ᩠ᨲᩥ (ᨸᩣᩁᩣ. ᪗᪗) ᩑᩅᨾᩣᨴᩥ ᩅᩥᨶᩦᨲᩅᨲ᩠ᨳᩩᩈᩥᨠ᩠ᨡᩣᨸᨴᩴ ᨶᩣᨾ. ‘‘ᩈᨦ᩠ᨥᨽᩮᨴᨠᩮᩣ, ᨽᩥᨠ᩠ᨡᩅᩮ, ᩋᨶᩩᨸᩈᨾ᩠ᨸᨶ᩠ᨶᩮᩣ ᨶ ᩏᨸᩈᨾ᩠ᨸᩣᨴᩮᨲᨻ᩠ᨻᩮᩣ’’ᨲᩥ (ᨾᩉᩣᩅ. ᪑᪑᪕) ᩑᩅᨾᩣᨴᩥ ᨸᨭᩥᨠ᩠ᨡᩮᨸᩈᩥᨠ᩠ᨡᩣᨸᨴᩴ ᨶᩣᨾ.

ᨿᩈ᩠ᨾᩣ ᨸᨶ ᨲᩮᨶ ᨲᩮᨶ ᨸᨭᩥᨠ᩠ᨡᩮᨸᩮᨶ ‘‘ᨿᩮᩣ ᨸᨶ ᨽᩥᨠ᩠ᨡᩩ ᩈᨾᨣ᩠ᨣᩴ ᩈᨦ᩠ᨥᩴ ᩋᨵᨾ᩠ᨾᩈᨬ᩠ᨬᩦ ᨽᩥᨶ᩠ᨴᩮᨿ᩠ᨿ, ᨸᩣᩁᩣᨩᩥᨠᩮᩣ ᩉᩮᩣᨲᩥ ᩋᩈᩴᩅᩣᩈᩮᩣ. ᨿᩮᩣ ᨸᨶ ᨽᩥᨠ᩠ᨡᩩ ᨴᩩᨭ᩠ᨮᨧᩥᨲ᩠ᨲᩮᩣ ᨽᨣᩅᨲᩮᩣ ᨩᩦᩅᨾᩣᨶᨠᩈᩁᩦᩁᩮ ᩃᩮᩣᩉᩥᨲᩴ ᩏᨸ᩠ᨸᩣᨴᩮᨿ᩠ᨿ, ᨸᩣᩁᩣᨩᩥᨠᩮᩣ ᩉᩮᩣᨲᩥ ᩋᩈᩴᩅᩣᩈᩮᩣ’’ᨲᩥ ᩈᩥᨠ᩠ᨡᩣᨸᨴᩣᨶᩥ ᨸᨬ᩠ᨬᨲ᩠ᨲᩣᨶᩥ ᩉᩮᩣᨶ᩠ᨲᩥ. ᨿᩣᨶᩥ ᩈᨶ᩠ᨵᩣᨿ ‘‘ᩑᨠᩔ ᨨᩮᨩ᩠ᨩᨠᩣ ᩉᩮᩣᨲᩥ, ᨧᨲᩩᨶ᩠ᨶᩴ ᨳᩩᩃ᩠ᩃᨧ᩠ᨧᨿᩴ, ᨧᨲᩩᨶ᩠ᨶᨬ᩠ᨧᩮᩅ ᩋᨶᩣᨸᨲ᩠ᨲᩥ, ᩈᨻ᩠ᨻᩮᩈᩴ ᩑᨠᩅᨲ᩠ᨳᩩᨠᩣ’’ᨲᩥ ᩅᩩᨲ᩠ᨲᩴ. ‘‘ᩋᨲ᩠ᨳᩣᨸᨲ᩠ᨲᩥ ᨲᩥᨭ᩠ᨮᨶ᩠ᨲᩮ ᨽᨣᩅᨲᩥ ᩌᨸᨩ᩠ᨩᨲᩥ, ᨶᩮᩣ ᨸᩁᩥᨶᩥᨻ᩠ᨻᩩᨲᩮ’’ᨲᩥ (ᨸᩁᩥ. ᪓᪒᪓) ᨧ ᩅᩩᨲ᩠ᨲᩴ. ᨲᩮᨶ ᨶ ᨠᩮᩅᩃᩴ ‘‘ᨶ, ᨽᩥᨠ᩠ᨡᩅᩮ, ᨩᩣᨶᩴ ᩈᨦ᩠ᨥᨽᩮᨴᨠᩮᩣ ᩋᨶᩩᨸᩈᨾ᩠ᨸᨶ᩠ᨶᩮᩣ ᩏᨸᩈᨾ᩠ᨸᩣᨴᩮᨲᨻ᩠ᨻᩮᩣ…ᨸᩮ… ᩌᨸᨲ᩠ᨲᩥ ᨴᩩᨠ᩠ᨠᨭᩔᩣ’’ᨲᩥ ᩍᨴᨾᩮᩅ ᩈᩥᨠ᩠ᨡᩣᨸᨴᩴ ᨸᨬ᩠ᨬᨲ᩠ᨲᩴ ᩉᩮᩣᨲᩥ ᩈᩣᨵᨠᩴ ᩉᩮᩣᨲᩥ. ‘‘ᨸᨱ᩠ᨯᨠᩮᩣ, ᨽᩥᨠ᩠ᨡᩅᩮ, ᩋᨶᩩᨸᩈᨾ᩠ᨸᨶ᩠ᨶᩮᩣ ᨶ ᩏᨸᩈᨾ᩠ᨸᩣᨴᩮᨲᨻ᩠ᨻᩮᩣ, ᩏᨸᩈᨾ᩠ᨸᨶ᩠ᨶᩮᩣ ᨶᩣᩈᩮᨲᨻ᩠ᨻᩮᩣ’’ᨲᩥ (ᨾᩉᩣᩅ. ᪑᪐᪙) ᩑᩅᨾᩣᨴᩦᩈᩩ ᨸᨶ ᩏᨸᨩ᩠ᨫᩣᨿᩣᨴᩦᨶᩴ ᨴᩩᨠ᩠ᨠᨭᨾᩮᩅ ᨸᨬ᩠ᨬᨲ᩠ᨲᩴ, ᨶ ᨸᨱ᩠ᨯᨠᩣᨴᩦᨶᩴ ᨸᩣᩁᩣᨩᩥᨠᩣᨸᨲ᩠ᨲᩥ. ᨶ ᩉᩥ ᨲᩮᩈᩴ ᨽᩥᨠ᩠ᨡᩩᨽᩣᩅᩮᩣ ᩋᨲ᩠ᨳᩥ. ᨿᨲᩮᩣ ᩈᩥᨿᩣ ᨸᩣᩁᩣᨩᩥᨠᩣᨸᨲ᩠ᨲᩥ. ᨲᨳᩣ ‘‘ᨶ ᩋᨧ᩠ᨨᩥᨶ᩠ᨶᩮ ᨳᩮᩅᩮ ᨸᨠ᩠ᨠᨾᩥᨲᨻ᩠ᨻ’’ᨶ᩠ᨲᩥ (ᨾᩉᩣᩅ. ᪖᪖, ᪖᪗, ᪗᪘, ᪗᪙) ᩑᩅᨾᩣᨴᩥᨠᨬ᩠ᨧ ᨸᨭᩥᨠ᩠ᨡᩮᨸᩈᩥᨠ᩠ᨡᩣᨸᨴᨾᩮᩅ ᨶᩣᨾ.

ᨡᨶ᩠ᨵᨠᩮᩈᩩ ᨸᨬ᩠ᨬᨲ᩠ᨲᨴᩩᨠ᩠ᨠᨭᨳᩩᩃ᩠ᩃᨧ᩠ᨧᨿᩣᨶᩥ ᨸᨬ᩠ᨬᨲ᩠ᨲᩥᩈᩥᨠ᩠ᨡᩣᨸᨴᩴ ᨶᩣᨾ. ‘‘ᨲᩮᨶ ᩉᩥ, ᩈᩣᩁᩥᨸᩩᨲ᩠ᨲ, ᨽᩮᨴᩣᨶᩩᩅᨲ᩠ᨲᨠᩮ ᨳᩩᩃ᩠ᩃᨧ᩠ᨧᨿᩴ ᨴᩮᩈᩣᨸᩮᩉᩦ’’ᨲᩥ (ᨧᩪᩊᩅ. ᪓᪔᪕) ᩅᩩᨲ᩠ᨲᩴ, ᨳᩩᩃ᩠ᩃᨧ᩠ᨧᨿᨾ᩠ᨸᩥ ᨲᨲ᩠ᨳᩮᩅ ᩈᨾᩮᩣᨵᩣᨶᩴ ᨣᨧ᩠ᨨᨲᩥ. ᩍᨴᩴ ᨲᩮᩈᩴ ᩅᩥᨽᨲ᩠ᨲᩥᨠᨾ᩠ᨾᨠ᩠ᨡᨱᩮ ᩋᨸᨬ᩠ᨬᨲ᩠ᨲᨲ᩠ᨲᩣ ᩋᩅᩥᨩ᩠ᨩᨾᩣᨶᨾ᩠ᨸᩥ ᨽᨣᩅᨲᩮᩣ ᩅᨧᨶᩮᨶ ᩅᩥᩈᩩᨴ᩠ᨵᨠ᩠ᨡᨱᩮᨸᩥ ᩅᩥᨩ᩠ᨩᨾᩣᨶᩴ ᨩᩣᨲᨶ᩠ᨲᩥ ᩑᨠᩮ. ‘‘ᨽᩮᨴᩣᨶᩩᩅᨲ᩠ᨲᨠᩮ ᨴᩮᩈᩣᨸᩮᩉᩦ’’ᨲᩥ ᩅᨧᨶᨲᩮᩣ ᩈᩮᩈᨽᩮᨴᩣᨶᩩᩅᨲ᩠ᨲᨠᩣᨶᩴ ‘‘ᨿᩮᩣ ᨸᨶ ᨽᩥᨠ᩠ᨡᩩ ᨩᩣᨶᩴ ᩈᨦ᩠ᨥᨽᩮᨴᨠᩣᨶᩴ ᩋᨶᩩᩅᨲ᩠ᨲᩮᨿ᩠ᨿ, ᩌᨸᨲ᩠ᨲᩥ ᨳᩩᩃ᩠ᩃᨧ᩠ᨧᨿᩔᩣ’’ᨲᩥ ᩈᩥᨠ᩠ᨡᩣᨸᨴᩴ ᨸᨬ᩠ᨬᨲ᩠ᨲᩴ ᩉᩮᩣᨲᩦᨲᩥ ᩅᩮᨴᩥᨲᨻ᩠ᨻᩴ. ᨲᨳᩣ ᩈᨻ᩠ᨻᩣᨶᩥ ᨡᨶ᩠ᨵᨠᩅᨲ᩠ᨲᩣᨶᩥ, ᩅᩥᨶᨿᨠᨾ᩠ᨾᩣᨶᩥ ᨧ ᨲᨲ᩠ᨳᩮᩅ ᩈᨾᩮᩣᨵᩣᨶᩴ ᨣᨧ᩠ᨨᨶ᩠ᨲᩥ. ᨿᨳᩣᩉ ‘‘ᨸᨬ᩠ᨬᨲ᩠ᨲᩮ ᨲᩴ ᩏᨸᩣᩃᩥ ᨾᨿᩣ ᩌᨣᨶ᩠ᨲᩩᨠᩣᨶᩴ ᨽᩥᨠ᩠ᨡᩪᨶᩴ ᩌᨣᨶ᩠ᨲᩩᨠᩅᨲ᩠ᨲᩴ…ᨸᩮ… ᩑᩅᩴ ᩈᩩᨸᨬ᩠ᨬᨲ᩠ᨲᩮ ᨡᩮᩣ ᨾᨿᩣ ᩏᨸᩣᩃᩥ ᩈᩥᨠ᩠ᨡᩣᨸᨴᩮ’’ᨲᩥᩌᨴᩥ. ‘‘ᨿᩣ ᨸᨶ ᨽᩥᨠ᩠ᨡᩩᨶᩦ ᨶᨧ᩠ᨧᩴ ᩅᩣ ᨣᩦᨲᩴ ᩅᩣ ᩅᩣᨴᩥᨲᩴ ᩅᩣ ᨴᩔᨶᩣᨿ ᨣᨧ᩠ᨨᩮᨿ᩠ᨿ, ᨸᩣᨧᩥᨲ᩠ᨲᩥᨿ’’ᨶ᩠ᨲᩥ (ᨸᩣᨧᩥ. ᪘᪓᪔) ᩍᨾᩥᨶᩣ ᩈᩩᨲ᩠ᨲᩮᨶ ᨽᩥᨠ᩠ᨡᩩᨶᩦ ᨶᨧ᩠ᨧᩮᨿ᩠ᨿ ᩅᩣ ᨣᩣᨿᩮᨿ᩠ᨿ ᩅᩣ ᩅᩣᨴᩮᨿ᩠ᨿ ᩅᩣ, ᨸᩣᨧᩥᨲ᩠ᨲᩥᨿᨶ᩠ᨲᩥ ᩑᩅᨾᩣᨴᩥᨠᩴ ᨿᩴ ᨠᩥᨬ᩠ᨧᩥ ᩋᨭ᩠ᨮᨠᨳᩣᨿ ᨴᩥᩔᨾᩣᨶᩴ ᩌᨸᨲ᩠ᨲᩥᨩᩣᨲᩴ ᩅᩥᨶᨿᨠᨾ᩠ᨾᩴ ᩅᩣ ᩋᩅᩩᨲ᩠ᨲᩈᩥᨴ᩠ᨵᩥᩈᩥᨠ᩠ᨡᩣᨸᨴᩴ ᨶᩣᨾ. ᨨᨻ᩠ᨻᩥᨵᨾ᩠ᨸᩮᨲᩴ ᨨᩉᩥ ᩌᨠᩣᩁᩮᩉᩥ ᩏᨴ᩠ᨴᩮᩈᩣᩁᩉᩴ ᨶ ᩉᩮᩣᨲᩦᨲᩥ ᩋᨶᩩᨴ᩠ᨴᩮᩈᩈᩥᨠ᩠ᨡᩣᨸᨴᩴ ᨶᩣᨾᩣᨲᩥ ᩅᩮᨴᩥᨲᨻ᩠ᨻᩴ. ᩈᩮᨿ᩠ᨿᨳᩥᨴᩴ – ᨸᨬ᩠ᨧᩉᩥ ᩏᨴ᩠ᨴᩮᩈᩮᩉᩥ ᨿᨳᩣᩈᨾ᩠ᨽᩅᩴ ᩅᩥᩈᨽᩣᨣᨲ᩠ᨲᩣ ᨳᩩᩃ᩠ᩃᨧ᩠ᨧᨿᨴᩩᨻ᩠ᨽᩣᩈᩥᨲᩣᨶᩴ ᩈᨽᩣᨣᩅᨲ᩠ᨳᩩᨠᨾ᩠ᨸᩥ ᨴᩩᨠ᩠ᨠᨭᨳᩩᩃ᩠ᩃᨧ᩠ᨧᨿᨴ᩠ᩅᨿᩴ ᩋᩈᨽᩣᨣᩣᨸᨲ᩠ᨲᩥᨠᨲ᩠ᨲᩣ ᩋᨶ᩠ᨲᩁᩣᨸᨲ᩠ᨲᩥᨸᨬ᩠ᨬᨲ᩠ᨲᩥᩈᩥᨠ᩠ᨡᩣᨸᨴᩣᨶᩴ, ᨶᩣᨶᩣᩅᨲ᩠ᨳᩩᨠᩣᨸᨲ᩠ᨲᩥᨠᨲ᩠ᨲᩣ ᨸᨭᩥᨠ᩠ᨡᩮᨸᩈᩥᨠ᩠ᨡᩣᨸᨴᩣᨶᩴ, ᨠᩮᩈᨬ᩠ᨧᩥ ᩅᩥᨶᩦᨲᩅᨲ᩠ᨳᩩᨸᨬ᩠ᨬᨲ᩠ᨲᩥᩈᩥᨠ᩠ᨡᩣᨸᨴᩣᨶᨬ᩠ᨧ ᩋᨴᩔᩥᨲᩣᨸᨲ᩠ᨲᩥᨠᨲ᩠ᨲᩣ, ᩋᨴᩔᩥᨲᩅᨲ᩠ᨳᩩᨠᨲ᩠ᨲᩣ ᨽᩮᨴᩣᨶᩩᩅᨲ᩠ᨲᨠᨳᩩᩃ᩠ᩃᨧ᩠ᨧᨿᩔ, ᩋᨴᩔᩥᨲᩣᨸᨲ᩠ᨲᩥᩅᨲ᩠ᨳᩩᨠᨲ᩠ᨲᩣ ᩋᩅᩩᨲ᩠ᨲᩈᩥᨴ᩠ᨵᩥᩈᩥᨠ᩠ᨡᩣᨸᨴᩣᨶᨶ᩠ᨲᩥ. ᩑᨲ᩠ᨲᩣᩅᨲᩣ ‘‘ᨴᩩᩅᩥᨵᩴ ᩈᩥᨠ᩠ᨡᩣᨸᨴᨸᨬ᩠ᨬᩣᨸᨶᩴ ᩈᩏᨴ᩠ᨴᩮᩈᩣᨶᩩᨴ᩠ᨴᩮᩈᨽᩮᨴᨲᩮᩣ’’ᨲᩥ ᨿᩴ ᩅᩩᨲ᩠ᨲᩴ, ᨲᩴ ᩈᨾᩣᩈᨲᩮᩣ ᨸᨠᩣᩈᩥᨲᩴ ᩉᩮᩣᨲᩥ.

ᨸᨬ᩠ᨬᨲ᩠ᨲᩥᨿᩴ ᨲᩣᩅ –

‘‘ᨠᩣᩁᨠᩮᩣ ᩍᨵ ᨶᩥᨴ᩠ᨴᩥᨭ᩠ᨮᩮᩣ, ᩋᨸᩮᨠ᩠ᨡᩣᨿ ᩋᨽᩣᩅᨲᩮᩣ;

ᨸᩩᨻ᩠ᨻᩮ ᩅᨲ᩠ᨲᨻ᩠ᨻᩅᩥᨵᩣᨶᩣ-ᨽᩣᩅᨲᩮᩣ ᨧ ᩌᨴᩥᨲᩮᩣ ᨿᩮᩣᨸᨶᩮᨶ ᩈᩉᩣ’’ᨲᩥ. –

ᩋᨿᩴ ᨶᨿᩮᩣ ᩅᩮᨴᩥᨲᨻ᩠ᨻᩮᩣ. ᨲᩔᨲ᩠ᨳᩮᩣ – ᨿᩮ ᨲᩮ ᩋᨶᩥᨴ᩠ᨴᩥᨭ᩠ᨮᨠᩣᩁᨠᩣ ᨸᩩᨻ᩠ᨻᩮ ᩅᩩᨲ᩠ᨲᨸ᩠ᨸᨽᩮᨴᩣ ᩈᩩᨠ᩠ᨠᩅᩥᩈᨭ᩠ᨮᩥᩌᨴᨿᩮᩣ ᩈᩥᨠ᩠ᨡᩣᨸᨴᩅᩥᩈᩮᩈᩣ, ᨲᩮᩈᩩ ᩋᨵᩥᨸ᩠ᨸᩣᨿᨠᨾ᩠ᨾᩅᨲ᩠ᨳᩩᨸᩩᨣ᩠ᨣᩃᨸᨿᩮᩣᨣᩮ ᩋᨸᩮᨠ᩠ᨡᩣᨿ ᨽᩣᩅᨲᩮᩣ ᨠᩣᩁᨠᩮᩣ ᨶ ᨶᩥᨴ᩠ᨴᩥᨭ᩠ᨮᩮᩣ ᨲᩮᩈᩴ ᩈᩣᨸᩮᨠ᩠ᨡᨽᩣᩅᨴᩔᨶᨲ᩠ᨳᩴ. ᨲᩴ ᩈᨻ᩠ᨻᩴ ᨲᩈ᩠ᨾᩥᩴ ᨲᩈ᩠ᨾᩥᩴ ᩈᩥᨠ᩠ᨡᩣᨸᨴᩮ ᩌᩅᩥᨽᩅᩥᩔᨲᩥ, ᩍᨵ ᨸᨶ ᨸᩣᩁᩣᨩᩥᨠᨸᨬ᩠ᨬᨲ᩠ᨲᩥᨿᩴ ᩋᨸᩮᨠ᩠ᨡᩣᨿ ᩋᨽᩣᩅᨲᩮᩣ ᨠᩣᩁᨠᩮᩣ ᨶᩥᨴ᩠ᨴᩥᨭ᩠ᨮᩮᩣ. ᨿᩮᩣ ᨸᨶ ᨠᩣᩁᨠᩮᩣ ‘‘ᨶᩥᨭ᩠ᨮᩥᨲᨧᩦᩅᩁᩈ᩠ᨾᩥᩴ ᨽᩥᨠ᩠ᨡᩩᨶᩣ ᩏᨻ᩠ᨽᨲᩈ᩠ᨾᩥ’’ᨶ᩠ᨲᩥᩌᨴᩦᩈᩩ (ᨸᩣᩁᩣ. ᪔᪖᪒, ᪔᪗᪒, ᪔᪗᪕) ᩅᩥᨿ ᨸᩩᨻ᩠ᨻᩮ ᩅᨲ᩠ᨲᨻ᩠ᨻᩅᩥᨵᩣᨶᩣᨽᩣᩅᨲᩮᩣ ᨠᩁᨱᩣᨴᩥᩅᩈᩮᨶ ᩋᨶᩥᨴ᩠ᨴᩥᩈᩥᨲ᩠ᩅᩣ ᨸᨧ᩠ᨧᨲ᩠ᨲᩅᩈᩮᨶ ᨶᩥᨴ᩠ᨴᩥᨭ᩠ᨮᩮᩣ ᩋᨸᩮᨠ᩠ᨡᩣᨿ ᩋᨽᩣᩅᨲᩮᩣ. ᨲᨲ᩠ᨳ ᨶᩥᨴ᩠ᨴᩥᩈᩥᨿᨾᩣᨶᩮᩣ ᩈᩮᩈᨴᩩᨲᩥᨿᩣᨶᩥᨿᨲᨸᨱᩦᨲᨽᩮᩣᨩᨶᩴ ᩈᨾᨱᩩᨴ᩠ᨴᩮᩈᨲᨲᩥᨿᨧᨲᩏᨲ᩠ᨳᨸᩣᨭᩥᨴᩮᩈᨶᩦᨿᩮᩈᩩ ᩅᩥᨿ ᨾᨩ᩠ᨫᩮ ᩋᨶᩥᨴ᩠ᨴᩥᩈᩥᨲ᩠ᩅᩣ ‘‘ᨶ ᩉᩮᩅ ᨡᩮᩣ ᨸᨶ…ᨸᩮ… ᩒᨽᩣᩈᩥᨲᩩ’’ᨶ᩠ᨲᩥᩌᨴᩥ (ᨸᩣᩁᩣ. ᪔᪕᪓) ᩅᩥᨿ ᨸᩩᨻ᩠ᨻᩮ ᩅᨲ᩠ᨲᨻ᩠ᨻᩅᩥᨵᩣᨶᩣᨽᩣᩅᨲᩮᩣ ᩑᩅ ᩌᨴᩥᨾ᩠ᩉᩥ ᨶᩥᨴ᩠ᨴᩥᨭ᩠ᨮᩮᩣ. ᩌᨴᩥᨾ᩠ᩉᩥ ᨶᩥᨴ᩠ᨴᩥᩈᩥᨿᨾᩣᨶᩮᩣᨸᩥ ᨸᩩᨻ᩠ᨻᩮ ᩅᩩᨲ᩠ᨲᨸ᩠ᨸᨽᩮᨴᩮᩈᩩ ᨽᩮᨴᩣᨶᩩᩅᨲ᩠ᨲᨠᩣᨴᩦᩈᩩ ᨸᨬ᩠ᨧᨲ᩠ᨲᩥᩴᩈᩮᩈᩩ ᩈᩥᨠ᩠ᨡᩣᨸᨴᩮᩈᩩ ᩅᩥᨿ ᩋᨶᩥᨴ᩠ᨴᩥᩈᩥᨲ᩠ᩅᩣ ᨸᩩᨻ᩠ᨻᩮ ᩅᨲ᩠ᨲᨻ᩠ᨻᩅᩥᨵᩣᨶᩣᨽᩣᩅᨲᩮᩣ ᩑᩅ ‘‘ᨿᩮᩣ ᨸᨶ ᨽᩥᨠ᩠ᨡᩪ’’ᨲᩥᩌᨴᩥᨲᩮᩣᩅ ᨿᩮᩣᨸᨶ-ᩈᨴ᩠ᨴᩮᨶ ᩈᩉ ᨶᩥᨴ᩠ᨴᩥᨭ᩠ᨮᩮᩣ. ᩑᩅᩴ ᨶᩥᨴ᩠ᨴᩥᩈᩥᨿᨾᩣᨶᩮᩣᨸᩥ ᩈᩮᩣ ᨿᩈ᩠ᨾᩣ ‘‘ᨿᩣ ᨸᨶ ᨽᩥᨠ᩠ᨡᩩᨶᩥᨿᩮᩣ ᨴ᩠ᩅᩮ ᩑᨠᨾᨬ᩠ᨧᩮ ᨲᩩᩅᨭ᩠ᨭᩮᨿ᩠ᨿᩩ’’ᨶ᩠ᨲᩥᩌᨴᩥ (ᨸᩣᨧᩥ. ᪙᪓᪓) ᩌᨸᨲ᩠ᨲᩥ ᩅᩥᨿ ᨸᩁᨸ᩠ᨸᨽᩅᩴ ᩌᨸᨲ᩠ᨲᩥᩴ ᨶ ᩌᨸᨩ᩠ᨩᨲᩥ, ᨲᩈ᩠ᨾᩣ ‘‘ᨿᩮᩣ ᨸᨶ ᨽᩥᨠ᩠ᨡᩪ’’ᨲᩥ ᩑᨠᩅᨧᨶᩮᨶ ᨶᩥᨴ᩠ᨴᩥᨭ᩠ᨮᩮᩣ. ᨾᩮᨳᩩᨶᨵᨾ᩠ᨾᩣᨸᨲ᩠ᨲᩥᨸᩥ ᨸᩁᨸ᩠ᨸᨽᩅᩣ ‘‘ᨴ᩠ᩅᨿᩴᨴ᩠ᩅᨿᩈᨾᩣᨸᨲ᩠ᨲᩦ’’ᨲᩥ (ᨸᩣᩁᩣ. ᪓᪙) ᩅᨧᨶᨲᩮᩣᨲᩥ ᨧᩮ? ᨲᩴ ᨶ, ᩋᨵᩥᨸ᩠ᨸᩣᨿᨩᩣᨶᨶᨲᩮᩣ. ᩋᨶᩮᨠᩥᩔᩣ ᩑᩅ ᨽᩥᨠ᩠ᨡᩩᨶᩥᨿᩣ ᩌᨸᨲ᩠ᨲᩥ, ᨶ ᩑᨠᩥᩔᩣᨲᩥ ᨶᩥᨿᨾᩮᩣ ᨲᨲ᩠ᨳ ᩋᨲ᩠ᨳᩥ, ᨶ ᩑᩅᩴ ᩍᨵ ᨶᩥᨿᨾᩮᩣᨲᩥ ᩋᨶᩥᨿᨾᩥᨲᩣᨵᩥᨸ᩠ᨸᩣᨿᩮᩣ. ᩃᨾ᩠ᨻᩦᨾᩩᨴᩩᨸᩥᨭ᩠ᨮᩦᨶᩴ ᨠᩩᨲᩮᩣ ‘‘ᨴ᩠ᩅᨿᩴᨴ᩠ᩅᨿᩈᨾᩣᨸᨲ᩠ᨲᩦ’’ᨲᩥ (ᨸᩣᩁᩣ. ᪕᪕) ᩅᨧᨶᨲᩮᩣ ᨲᩮᩈᩴ ᨾᩮᨳᩩᨶᨵᨾ᩠ᨾᩣᨸᨲ᩠ᨲᩥ. ᩋᨿᨾᨲ᩠ᨳᩮᩣ ᨧᨲᩔᩮᩣ ᨾᩮᨳᩩᨶᨵᨾ᩠ᨾᨸᨧ᩠ᨧᨿᩣᨲᩥ ᩋᨭ᩠ᨮᩅᨲ᩠ᨳᩩᨠᩴ ᩈᨶ᩠ᨵᩣᨿ ‘‘ᨨᩮᨩ᩠ᨩᩴ ᩈᩥᨿᩣ ᨾᩮᨳᩩᨶᨵᨾ᩠ᨾᨸᨧ᩠ᨧᨿᩣ’’ᨲᩥ (ᨸᩁᩥ. ᪔᪘᪑) ᨧ ᨸᩁᩥᩅᩣᩁᩮ ᩅᩩᨲ᩠ᨲᩅᨧᨶᩮᨶ ᩈᩣᨵᩮᨲᨻ᩠ᨻᩮᩣ.

ᨽᩮᨴᩣᨶᩩᩅᨲ᩠ᨲᨠᩈᩥᨠ᩠ᨡᩣᨸᨴᩮ ᨲᩥᨱ᩠ᨱᩴ ᩏᨴ᩠ᨵᩴ ᨶ ᩈᨾᨶᩩᨽᩣᩈᩥᨲᨻ᩠ᨻᩣ, ᨶ ᩈᨦ᩠ᨥᩮᨶ ᩈᨦ᩠ᨥᩴ ᩑᨠᨲᩮᩣ ᨠᩣᨲᨻ᩠ᨻᨶ᩠ᨲᩥ. ᨶᨿᨴᩔᨶᨲ᩠ᨳᩴ ᩌᨴᩥᨲᩮᩣᩅ ‘‘ᨽᩥᨠ᩠ᨡᩪ ᩉᩮᩣᨶ᩠ᨲᩦ’’ᨲᩥ ᨻᩉᩩᩅᨧᨶᨶᩥᨴ᩠ᨴᩮᩈᩴ ᨠᨲ᩠ᩅᩣ ᨸᩩᨶ ‘‘ᩑᨠᩮᩣ ᩅᩣ ᨴ᩠ᩅᩮ ᩅᩣ ᨲᨿᩮᩣ ᩅᩣ’’ᨲᩥ (ᨸᩣᩁᩣ. ᪔᪑᪘) ᩅᩩᨲ᩠ᨲᩴ, ᩋᨬ᩠ᨬᨳᩣ ᨶ ᨲᨲᩮᩣ ᩏᨴ᩠ᨵᩴ ‘‘ᩋᨶᩩᩅᨲ᩠ᨲᨠᩣ ᩉᩮᩣᨶ᩠ᨲᩦ’’ᨲᩥ ᩌᨸᨩ᩠ᨩᨲᩥ. ᨲᨲᩮᩣ ᨶᩥᨴᩣᨶᩅᩥᩁᩮᩣᨵᩮᩣ. ᨸᨬ᩠ᨧᩈᨲᨾᨲ᩠ᨲᩣ ᩉᩥ ᨲᨴᨶᩩᩅᨲ᩠ᨲᨠᩣ ᩋᩉᩮᩈᩩᩴ. ᨿᩴ ᨸᨶ ᩈᨲ᩠ᨲᩈᨲᩥᨠᨠ᩠ᨡᨶ᩠ᨵᨠᩮ ‘‘ᩈᨦ᩠ᨥᩮᩣ ᨧᨲ᩠ᨲᩣᩁᩮᩣ ᨸᩣᨧᩦᨶᨠᩮ ᨽᩥᨠ᩠ᨡᩪ, ᨧᨲ᩠ᨲᩣᩁᩮᩣ ᨸᩣᩅᩮᨿ᩠ᨿᨠᩮ ᨽᩥᨠ᩠ᨡᩪ ᩈᨾ᩠ᨾᨶ᩠ᨶᩮᨿ᩠ᨿ …ᨸᩮ… ᩈᨾ᩠ᨾᨲᩣ’’ᨲᩥᩌᨴᩥ (ᨧᩪᩊᩅ. ᪔᪕᪖) ᨬᨲ᩠ᨲᩥᨴᩩᨲᩥᨿᨠᨾ᩠ᨾᩴ ᩅᩩᨲ᩠ᨲᩴ, ᨲᩴ ‘‘ᩏᨻ᩠ᨻᩣᩉᩥᨠᩣᨿ ᩍᨾᩴ ᩋᨵᩥᨠᩁᨱᩴ ᩅᩪᨸᩈᨾᩮᨲᩩ’’ᨶ᩠ᨲᩥ ᩅᩩᨲ᩠ᨲᨲ᩠ᨲᩣ ᨲᩮᩉᩥ ᨠᨲ᩠ᨲᨻ᩠ᨻᩅᩥᨵᩣᨶᩴ. ᩈᨾ᩠ᨾᩩᨲᩥᨠᩁᨱᨾᩮᩅ ᩅᩣ ᨲᨲᩥᨿᩴ ᨠᨲ᩠ᩅᩣ ᨠᨸ᩠ᨸᨲᩥ. ᨶ ᩉᩥ ᨲᩮ ᨲᩮᨶ ᨠᨾ᩠ᨾᩮᨶ ᨠᨾ᩠ᨾᩣᩁᩉᩣ ᨠᨾ᩠ᨾᨠᨲᩣ ᩉᩮᩣᨶ᩠ᨲᩥ. ᨿᩔ ᩈᨦ᩠ᨥᩮᩣ ᨠᨾ᩠ᨾᩴ ᨠᩁᩮᩣᨲᩥ, ᩈᩮᩣ ᨠᨾ᩠ᨾᩣᩁᩉᩮᩣᨲᩥ ᩃᨠ᩠ᨡᨱᩴ. ᨶ ᨧ ᨲᨴᩣ ᩈᨦ᩠ᨥᩮᩣ ᨲᩮᩈᩴ ᩋᨭ᩠ᨮᨶ᩠ᨶᨾ᩠ᨸᩥ ᨽᩥᨠ᩠ᨡᩪᨶᩴ ᨠᨾ᩠ᨾᩴ ᩋᨠᩣᩈᩥ. ᨽᨩᩣᨸᩥᨿᨾᩣᨶᩣ ᨲᩮ ᨠᨾ᩠ᨾᨸᨲ᩠ᨲᨽᩣᩅᩴ ᨽᨩᨶ᩠ᨲᩥ. ᩋᨵᩥᨠᩁᨱᩅᩪᨸᩈᨾᨠᨾ᩠ᨾᩔ ᨸᨲ᩠ᨲᩣ ᨿᩩᨲ᩠ᨲᩣ ᩈᨦ᩠ᨥᩮᨶ ᨠᨲᩣᨲᩥ ᨠᨲ᩠ᩅᩣ ᨠᨾ᩠ᨾᨸᨲ᩠ᨲᩣ ᩑᩅ ᩉᩥ ᨲᩮ ᩉᩮᩣᨶ᩠ᨲᩥ. ‘‘ᨲᩮ ᨽᩥᨠ᩠ᨡᩪ ᨽᩥᨠ᩠ᨡᩪᩉᩥ ᨿᩣᩅᨲᨲᩥᨿᩴ ᩈᨾᨶᩩᨽᩣᩈᩥᨲᨻ᩠ᨻᩣ ᨲᩔ ᨸᨭᩥᨶᩥᩔᨣ᩠ᨣᩣᨿᩣ’’ᨲᩥ (ᨸᩣᩁᩣ. ᪔᪑᪘) ᩅᨧᨶᨲᩮᩣ ᨲᩮᩉᩥ ᨠᨲ᩠ᨲᨻ᩠ᨻᩅᩥᨵᩣᨶᩴ. ᩈᨾ᩠ᨾᩩᨲᩥᨠᩁᨱᨾᩮᩅ ᨠᨾ᩠ᨾᩴ ᩉᩮᩣᨲᩦᨲᩥ ᨧᩮ? ᨲᩴ ᨶ, ᩋᨵᩥᨸ᩠ᨸᩣᨿᨩᩣᨶᨶᨲᩮᩣ, ᨲᩔ ᨸᨭᩥᨶᩥᩔᨣ᩠ᨣᩣᨿ ᩑᩅ ᨲᩮ ᨽᩥᨠ᩠ᨡᩪ ᨠᨾ᩠ᨾᩣᩁᩉᩣ ᨠᩣᨲᨻ᩠ᨻᩣ, ᨶ ᨴᩮᩣᩈᩣᨣᨲᩥᩅᩈᩮᨶᩣᨲᩥ ᩋᨿᨾᩮᨲ᩠ᨳ ᩋᨵᩥᨸ᩠ᨸᩣᨿᩮᩣ. ᨶ ᩉᩥ ᨸᩣᨧᩦᨶᨠᩣᨴᩦᨶᩴ ᩈᨾ᩠ᨾᩩᨲᩥᨿᩣ ᩋᨵᩥᨠᩁᨱᩅᩪᨸᩈᨾᩈᩥᨴ᩠ᨵᩥ ᩅᩥᨿ ᨲᩮᩈᩴ ᩈᨾᨶᩩᨽᩣᩈᨶᨠᨾ᩠ᨾᩮᨶ ᨲᩔ ᨸᨭᩥᨶᩥᩔᨣ᩠ᨣᩈᩥᨴ᩠ᨵᩥ ᩉᩮᩣᨲᩥ, ᩈᨾ᩠ᨾᩩᨲᩥ ᨶᩣᨾᩮᩈᩣ ᨸᨮᨾᩴ ᩋᨶᩩᨾᨲᩥᩴ ᨣᩉᩮᨲ᩠ᩅᩣ ᨿᩣᨧᩥᨲ᩠ᩅᩣᩅ ᨠᩁᩦᨿᨲᩥ, ᨶ ᨲᨳᩣ ᨠᨾ᩠ᨾᨶ᩠ᨲᩥ. ᨠᨾ᩠ᨾᨠᩁᨱᩮ ᨸᨶ ᨲᨴᨲ᩠ᨳᩈᩥᨴ᩠ᨵᩥ ᩉᩮᩣᨲᩥᨿᩮᩅ. ᨸᩁᩈᨾ᩠ᨾᩩᨲᩥᨿᩣ ᨻᩉᩩᨲᩁᩣᩅ ᩈᨾ᩠ᨾᨶ᩠ᨶᩥᨲᨻ᩠ᨻᩣᨲᩥ ᩅᩮᨴᩥᨲᨻ᩠ᨻᩴ.

‘‘ᨾᩮᨳᩩᨶᨵᨾ᩠ᨾ’’ᨶ᩠ᨲᩥ ᩑᩅᩴ ᨻᩣᩉᩩᩃ᩠ᩃᨶᨿᩮᨶ ᩃᨴ᩠ᨵᨶᩣᨾᨠᩴ ᩈᨠᨸᨿᩮᩣᨣᩮᨶ ᩅᩣ ᨸᩁᨸᨿᩮᩣᨣᩮᨶ ᩅᩣ ᩋᨲ᩠ᨲᨶᩮᩣ ᨶᩥᨾᩥᨲ᩠ᨲᩔ ᩈᨠᨾᨣ᩠ᨣᩮ ᩅᩣ ᨸᩁᨾᨣ᩠ᨣᩮ ᩅᩣ ᨸᩁᨶᩥᨾᩥᨲ᩠ᨲᩔ ᩅᩣ ᩈᨠᨾᨣ᩠ᨣᩮ ᩑᩅ ᨸᩅᩮᩈᨶᨸᩅᩥᨭ᩠ᨮᨭ᩠ᨮᩥᨲᩏᨴ᩠ᨵᩁᨱᩮᩈᩩ ᨿᩴ ᨠᩥᨬ᩠ᨧᩥ ᩑᨠᩴ ᨸᨭᩥᩈᩣᨴᩥᨿᨶᩅᩈᩮᨶ ᩈᩮᩅᩮᨿ᩠ᨿ, ᨸᩣᩁᩣᨩᩥᨠᩮᩣ ᩉᩮᩣᨲᩥ ᩋᩈᩴᩅᩣᩈᩮᩣᨲᩥ. ᨠᩮᨧᩥ ᨸᨶ ‘‘ᨸᩅᩮᩈᨶᩣᨴᩦᨶᩥ ᨧᨲ᩠ᨲᩣᩁᩥ ᩅᩣ ᨲᩦᨱᩥ ᩅᩣ ᨴ᩠ᩅᩮ ᩅᩣ ᩑᨠᩴ ᩅᩣ ᨸᨭᩥᩈᩮᩅᩮᨿ᩠ᨿ, ᨸᩣᩁᩣᨩᩥᨠᩮᩣ ᩉᩮᩣᨲᩥ. ᩅᩩᨲ᩠ᨲᨬ᩠ᩉᩮᨲᩴ ‘ᩈᩮᩣ ᨧᩮ ᨸᩅᩮᩈᨶᩴ ᩈᩣᨴᩥᨿᨲᩥ, ᨸᩅᩥᨭ᩠ᨮᩴ ᩈᩣᨴᩥᨿᨲᩥ, ᨮᩥᨲᩴ ᩈᩣᨴᩥᨿᨲᩥ, ᩏᨴ᩠ᨵᩁᨱᩴ ᩈᩣᨴᩥᨿᨲᩥ, ᩌᨸᨲ᩠ᨲᩥ ᨸᩣᩁᩣᨩᩥᨠᩔᩣ’ᨲᩥᩌᨴᩦ’’ᨲᩥ (ᨸᩣᩁᩣ. ᪕᪘) ᩅᨴᨶ᩠ᨲᩥ. ᨲᩮᩈᩴ ᨾᨲᩮᨶ ᨧᨲᩪᩈᩩᨸᩥ ᨧᨲᩔᩮᩣ ᨸᩣᩁᩣᨩᩥᨠᩣᨸᨲ᩠ᨲᩥᨿᩮᩣ ᩌᨸᨩ᩠ᨩᨲᩥ. ᨲᩮᨿᩮᩅ ᩑᩅᩴ ᩅᨴᨶ᩠ᨲᩥ – ᩌᨸᨩ᩠ᨩᨲᩩ ᨾᩮᨳᩩᨶᨵᨾ᩠ᨾᨸᩣᩁᩣᨩᩥᨠᩣᨸᨲ᩠ᨲᩥ, ᨾᩮᨳᩩᨶᨵᨾ᩠ᨾᨸᩣᩁᩣᨩᩥᨠᩣᨸᨲ᩠ᨲᩥᨿᩣ ᨲᩴᨽᩣᨣᩥᨿᩣᨲᩥ ᩋᨲ᩠ᨲᨶᩮᩣ ᩅᩦᨲᩥᨠ᩠ᨠᨾᩮ ᨸᩣᩁᩣᨩᩥᨠᩣᨸᨲ᩠ᨲᩥᨿᩮᩣ, ᩈᨦ᩠ᨥᩣᨴᩥᩈᩮᩈᩣᨸᨲ᩠ᨲᩥᨬ᩠ᨧ ᩌᨸᨩ᩠ᨩᩥᨲ᩠ᩅᩣ ᩈᩥᨠ᩠ᨡᩴ ᨸᨧ᩠ᨧᨠ᩠ᨡᩣᨿ ᨣᩉᨭ᩠ᨮᨠᩣᩃᩮ ᨾᩮᨳᩩᨶᩣᨴᩥᨠᩴ ᨸᩣᩁᩣᨩᩥᨠᩴ ᩌᨸᨩ᩠ᨩᩥᨲ᩠ᩅᩣ ᨸᩩᨶ ᨸᨻ᩠ᨻᨩᩥᨲ᩠ᩅᩣ ᩏᨸᩈᨾ᩠ᨸᨩ᩠ᨩᩥᨲ᩠ᩅᩣ ᩑᨠᩴ ᩈᨦ᩠ᨥᩣᨴᩥᩈᩮᩈᩣᨸᨲ᩠ᨲᩥᩴ ᩑᨠᨾᨶᩮᨠᩴ ᩅᩣ ᨸᨭᩥᨠᩁᩥᨲ᩠ᩅᩣᩅ ᩈᩮᩣ ᨸᩩᨣ᩠ᨣᩃᩮᩣ ᨿᩈ᩠ᨾᩣ ᨶᩥᩁᩣᨸᨲ᩠ᨲᩥᨠᩮᩣ ᩉᩮᩣᨲᩥ, ᨲᩈ᩠ᨾᩣ ᩈᩮᩣ ᨣᩉᨭ᩠ᨮᨠᩣᩃᩮ ᩈᩣᨸᨲ᩠ᨲᩥᨠᩮᩣᩅᩣᨲᩥ. ᩋᨶ᩠ᨲᩥᨾᩅᨲ᩠ᨳᩩᩋᨩ᩠ᨫᩣᨸᨶ᩠ᨶᩔᩣᨸᩥ ᩋᨲ᩠ᨳᩮᩅ ᩌᨸᨲ᩠ᨲᩥ. ᩅᩩᨭ᩠ᨮᩣᨶᨴᩮᩈᨶᩣᩉᩥ ᨸᨶ ᩋᩈᩩᨩ᩠ᨫᨶᨲᩮᩣ ‘‘ᨸᨿᩮᩣᨣᩮ ᨸᨿᩮᩣᨣᩮ ᩌᨸᨲ᩠ᨲᩥ ᨸᩣᩁᩣᨩᩥᨠᩔᩣ’’ᨲᩥ ᨶ ᩅᩩᨲ᩠ᨲᩴ. ᨣᨱᨶᨸᨿᩮᩣᨩᨶᩣᨽᩣᩅᨲᩮᩣ ᨠᩥᨬ᩠ᨧᩣᨸᩥ ᨶ ᩅᩩᨲ᩠ᨲᩴ, ᩋᨳ ᨡᩮᩣ ᨸᨴᨽᩣᨩᨶᩮ (ᨸᩣᩁᩣ. ᪕᪘) ‘‘ᩌᨸᨲ᩠ᨲᩥ ᨸᩣᩁᩣᨩᩥᨠᩔᩣ’’ᨲᩥ ᩅᨧᨶᩮᨶᩣᨿᨾᨲ᩠ᨳᩮᩣ ᩈᩥᨴ᩠ᨵᩮᩣᨲᩥ ᨿᩩᨲ᩠ᨲᩥᨬ᩠ᨧ ᩅᨴᨶ᩠ᨲᩥ.

ᨿᨴᩥ ᩑᩅᩴ ᨾᩣᨲᩥᨠᩣᨿᨾ᩠ᨸᩥ ‘‘ᨿᩮᩣ ᨸᨶ ᨽᩥᨠ᩠ᨡᩩ ᨾᩮᨳᩩᨶᩴ ᨵᨾ᩠ᨾᩴ ᨸᨭᩥᩈᩮᩅᩮᨿ᩠ᨿ, ᨸᩣᩁᩣᨩᩥᨠ’’ᨶ᩠ᨲᩥ ᩅᨲ᩠ᨲᨻ᩠ᨻᩴ ᨽᩅᩮᨿ᩠ᨿ, ᨸᩣᩁᩣᨩᩥᨠᩔ ᩋᨶᩅᩈᩮᩈᩅᨧᨶᨾ᩠ᨸᩥ ᨶ ᨿᩩᨩ᩠ᨩᩮᨿ᩠ᨿ. ᩈᨻ᩠ᨻᩮᨸᩥ ᩉᩥ ᩌᨸᨲ᩠ᨲᩥᨠ᩠ᨡᨶ᩠ᨵᩮ, ᨽᩥᨠ᩠ᨡᩩᨣᨱᨶᨬ᩠ᨧ ᩋᨶᩅᩈᩮᩈᩮᨲ᩠ᩅᩣ ᨲᩥᨭ᩠ᨮᨲᩦᨲᩥ ᩋᨶᩅᩈᩮᩈᩅᨧᨶᨶ᩠ᨲᩥ ᨠᨲ᩠ᩅᩣ ᨸᩅᩮᩈᩮᩅ ᩌᨸᨲ᩠ᨲᩥ, ᨶ ᨸᩅᩥᨭ᩠ᨮᩣᨴᩦᩈᩩ. ᨲᨾᩮᩅᩮᨠᩴ ᩈᨶ᩠ᨵᩣᨿ ‘‘ᨿᩔ ᩈᩥᨿᩣ ᩌᨸᨲ᩠ᨲᩦ’’ᨲᩥ (ᨾᩉᩣᩅ. ᪑᪓᪔) ᨸᩣᩁᩣᨩᩥᨠᩣᨸᨲ᩠ᨲᩥᨾ᩠ᨸᩥ ᩋᨶ᩠ᨲᩮᩣ ᨠᨲ᩠ᩅᩣ ᨶᩥᨴᩣᨶᩩᨴ᩠ᨴᩮᩈᩅᨧᨶᩴ ᩅᩮᨴᩥᨲᨻ᩠ᨻᩴ. ᨲᩈ᩠ᨾᩣ ᨾᩣᨲᩥᨠᩣᨿᩴ ‘‘ᨸᩣᩁᩣᨩᩥᨠ’’ᨶ᩠ᨲᩥ ᩋᩅᨲ᩠ᩅᩣ ‘‘ᨸᩣᩁᩣᨩᩥᨠᩮᩣ ᩉᩮᩣᨲᩦ’’ᨲᩥ (ᨸᩣᩁᩣ. ᪔᪒, ᪔᪔) ᨸᩩᨣ᩠ᨣᩃᨶᩥᨴ᩠ᨴᩮᩈᩅᨧᨶᩴ ᨲᩮᨶ ᩈᩁᩦᩁᨻᨶ᩠ᨵᨶᩮᨶ ᩏᨸᩈᨾ᩠ᨸᨴᩣᨿ ᩋᨽᨻ᩠ᨻᨽᩣᩅᨴᩦᨸᨶᨲ᩠ᨳᩴ. ‘‘ᩌᨸᨲ᩠ᨲᩥ ᨸᩣᩁᩣᨩᩥᨠᩔᩣ’’ᨲᩥ ᨸᨴᨽᩣᨩᨶᩮ ᩅᨧᨶᩴ ᩋᨶ᩠ᨲᩥᨾᩅᨲ᩠ᨳᩩᩴ ᩋᨩ᩠ᨫᩣᨸᨶ᩠ᨶᩔᩣᨸᩥ ᨸᩣᩁᩣᨩᩥᨠᩔ ᩋᩈᩴᩅᩣᩈᩔ ᩈᨲᩮᩣ ᨸᩩᨣ᩠ᨣᩃᩔ ᩋᨳᩮᨿ᩠ᨿᩈᩴᩅᩣᩈᨠᨽᩣᩅᨴᩦᨸᨶᨲ᩠ᨳᩴ. ᨶ ᩉᩥ ᩈᩮᩣ ᩈᩴᩅᩣᩈᩴ ᩈᩣᨴᩥᨿᨶ᩠ᨲᩮᩣᨸᩥ ᨳᩮᨿ᩠ᨿᩈᩴᩅᩣᩈᨠᩮᩣ ᩉᩮᩣᨲᩥ, ᨲᩈ᩠ᨾᩣ ᩏᨸᩈᨾ᩠ᨸᨶ᩠ᨶᩮᩣ ‘‘ᨽᩥᨠ᩠ᨡᩪ’’ᨲ᩠ᩅᩮᩅ ᩅᩩᨧ᩠ᨧᨲᩥ. ᨲᩮᨶᩮᩅᩣᩉ ‘‘ᩋᩈᩩᨴ᩠ᨵᩮᩣ ᩉᩮᩣᨲᩥ ᨸᩩᨣ᩠ᨣᩃᩮᩣ ᩋᨬ᩠ᨬᨲᩁᩴ ᨸᩣᩁᩣᨩᩥᨠᩴ ᨵᨾ᩠ᨾᩴ ᩋᨩ᩠ᨫᩣᨸᨶ᩠ᨶᩮᩣ, ᨲᨬ᩠ᨧᩮ ᩈᩩᨴ᩠ᨵᨴᩥᨭ᩠ᨮᩥ ᩈᨾᩣᨶᩮᩣ ᩋᨶᩮᩣᨠᩣᩈᩴ ᨠᩣᩁᩣᨸᩮᨲ᩠ᩅᩣ ᩋᨠ᩠ᨠᩮᩣᩈᩣᨵᩥᨸ᩠ᨸᩣᨿᩮᩣ ᩅᨴᨲᩥ, ᩌᨸᨲ᩠ᨲᩥ ᩒᨾᩈᩅᩣᨴᩮᨶ ᨴᩩᨠ᩠ᨠᨭᩔᩣ’’ᨲᩥ (ᨸᩣᩁᩣ. ᪓᪘᪙) ᩋᨶᩩᨸᩈᨾ᩠ᨸᨶ᩠ᨶᩔ ᨲᨴᨽᩣᩅᨲᩮᩣ ᩈᩥᨴ᩠ᨵᩮᩣ ᩈᩮᩣ ᩏᨸᩈᨾ᩠ᨸᨶ᩠ᨶᩮᩣ ‘‘ᨽᩥᨠ᩠ᨡᩪ’’ᨲ᩠ᩅᩮᩅ ᩅᩩᨧ᩠ᨧᨲᩦᨲᩥ, ᨲᩮᨶ ᨸᨴᩈᩮᩣᨵᨾ᩠ᨾᩴ, ᩈᩉᩈᩮᨿ᩠ᨿᨬ᩠ᨧ ᨩᨶᩮᨲᩥ, ᨽᩥᨠ᩠ᨡᩩᨸᩮᩈᩩᨬ᩠ᨬᩣᨴᩥᨬ᩠ᨧ ᨩᨶᩮᨲᩦᨲᩥ ᩅᩮᨴᩥᨲᨻ᩠ᨻᩴ (ᩅᨩᩥᩁ. ᨭᩦ. ᨸᩣᩁᩣᨩᩥᨠ ᪓᪙).

ᨶᩥᨴᩣᨶᩣ ᨾᩣᨲᩥᨠᩣᨽᩮᨴᩮᩣ, ᩅᩥᨽᨦ᩠ᨣᩮᩣ ᨲᨶ᩠ᨶᩥᨿᩣᨾᨠᩮᩣ;

ᨲᨲᩮᩣ ᩌᨸᨲ᩠ᨲᩥᨿᩣ ᨽᩮᨴᩮᩣ, ᩋᨶᩣᨸᨲ᩠ᨲᩥ ᨲᨴᨬ᩠ᨬᨳᩣᨲᩥ. (ᩅᨩᩥᩁ. ᨭᩦ. ᨸᩣᩁᩣᨩᩥᨠ ᪔᪓-᪔᪔) –

ᩋᨿᩴ ᨶᨿᩮᩣ ᩅᩮᨴᩥᨲᨻ᩠ᨻᩮᩣ. ᨲᨲ᩠ᨳ ᩈᩩᨴᩥᨶ᩠ᨶᩅᨲ᩠ᨳᩩ (ᨸᩣᩁᩣ. ᪒᪔ ᩌᨴᨿᩮᩣ)-ᨾᨠ᩠ᨠᨭᩥᩅᨲ᩠ᨳᩩ (ᨸᩣᩁᩣ. ᪔᪐ ᩌᨴᨿᩮᩣ)-ᩅᨩ᩠ᨩᩥᨸᩩᨲ᩠ᨲᨠᩅᨲ᩠ᨳᩩ (ᨸᩣᩁᩣ. ᪔᪓) ᨧᩣᨲᩥ ᨲᩥᨸ᩠ᨸᨽᩮᨴᩅᨲ᩠ᨳᩩ ᩍᨾᩔ ᩈᩥᨠ᩠ᨡᩣᨸᨴᩔ ᨶᩥᨴᩣᨶᩴ ᨶᩣᨾ. ᨲᨲᩮᩣ ᨶᩥᨴᩣᨶᩣ ‘‘ᨿᩮᩣ ᨸᨶ ᨽᩥᨠ᩠ᨡᩩ ᨽᩥᨠ᩠ᨡᩪᨶᩴ…ᨸᩮ… ᩋᩈᩴᩅᩣᩈᩮᩣ’’ᨲᩥ (ᨸᩣᩁᩣ. ᪔᪔) ᩍᨾᩥᩔᩣ ᨾᩣᨲᩥᨠᩣᨿ ᨽᩮᨴᩮᩣ ᨩᩣᨲᩮᩣ. ᨲᨲ᩠ᨳ ᩉᩥ ‘‘ᩋᨶ᩠ᨲᨾᩈᩮᩣ ᨲᩥᩁᨧ᩠ᨨᩣᨶᨣᨲᩣᨿᩣ’’ᨲᩥ (ᨸᩣᩁᩣ. ᪔᪔) ᩍᨲ᩠ᨳᩥᩃᩥᨦ᩠ᨣᩅᩈᩮᨶ ‘‘ᩈᨧ᩠ᨧᩴ, ᩌᩅᩩᩈᩮᩣ, ᨽᨣᩅᨲᩣ ᩈᩥᨠ᩠ᨡᩣᨸᨴᩴ ᨸᨬ᩠ᨬᨲ᩠ᨲᩴ, ᨲᨬ᩠ᨧ ᨡᩮᩣ ᩍᨲ᩠ᨳᩥᨿᩣ, ᨶᩮᩣ ᨸᩩᩁᩥᩈᩮ, ᨶᩮᩣ ᨸᨱ᩠ᨯᨠᩮ, ᨶᩮᩣ ᩏᨽᨲᩮᩣᨻ᩠ᨿᨬ᩠ᨩᨶᨠᩮ ᨧᩣ’’ᨲᩥ ᨾᨠ᩠ᨠᨭᩥᨸᩣᩁᩣᨩᩥᨠᩮᩣ ᩅᩥᨿ ᩋᨬ᩠ᨬᩮᩣᨸᩥ ᩃᩮᩈᩴ ᩒᨯ᩠ᨯᩮᨲᩩᩴ ᩈᨠ᩠ᨠᩮᩣᨲᩥ, ᨲᩈ᩠ᨾᩣ ᨲᩣᨴᩥᩈᩔ ᩋᩃᩮᩈᩮᩣᨠᩣᩈᩔ ᨴᩔᨶᨲ᩠ᨳᩴ ᩍᨴᩴ ᩅᩩᨧ᩠ᨧᨲᩥ, ᨾᨠ᩠ᨠᨭᩥᩈᨦ᩠ᨡᩣᨲᩣ ᨶᩥᨴᩣᨶᩣ ‘‘ᩋᨶ᩠ᨲᨾᩈᩮᩣ ᨲᩥᩁᨧ᩠ᨨᩣᨶᨣᨲᩣᨿᨸᩦ’’ᨲᩥ ᨾᩣᨲᩥᨠᩣᨿ ᩅᨧᨶᨽᩮᨴᩮᩣ, ᨶ ᩍᨲ᩠ᨳᩥᨿᩣ ᩑᩅ ᨾᩮᨳᩩᨶᩈᩥᨴ᩠ᨵᩥᨴᩔᨶᨲᩮᩣ. ᨲᩈ᩠ᨾᩣ ᩅᩥᨽᨦ᩠ᨣᩮᩣ ᨲᨶ᩠ᨶᩥᨿᩣᨾᨠᩮᩣ ᨲᩔᩣ ᨾᩣᨲᩥᨠᩣᨿ ᩋᨵᩥᨸ᩠ᨸᩮᨲᨲ᩠ᨳᨶᩥᨿᩣᨾᨠᩮᩣ ᩅᩥᨽᨦ᩠ᨣᩮᩣᨲᩥ. ᩅᩥᨽᨦ᩠ᨣᩮ ᩉᩥ ‘‘ᨲᩥᩔᩮᩣ ᩍᨲ᩠ᨳᩥᨿᩮᩣ, ᨲᨿᩮᩣ ᩏᨽᨲᩮᩣᨻ᩠ᨿᨬ᩠ᨩᨶᨠᩣ, ᨲᨿᩮᩣ ᨸᨱ᩠ᨯᨠᩣ, ᨲᨿᩮᩣ ᨸᩩᩁᩥᩈᩣ. ᨾᨶᩩᩔᩥᨲ᩠ᨳᩥᨿᩣ ᨲᨿᩮᩣ ᨾᨣ᩠ᨣᩮ, ᨲᩥᩁᨧ᩠ᨨᩣᨶᨣᨲᨸᩩᩁᩥᩈᩔ ᨴ᩠ᩅᩮ ᨾᨣ᩠ᨣᩮ’’ᨲᩥᩌᨴᩥᨶᩣ (ᨸᩣᩁᩣ. ᪕᪖) ᨶᨿᩮᨶ ᩈᨻ᩠ᨻᩃᩮᩈᩮᩣᨠᩣᩈᩴ ᨸᩥᨴᩉᩥᨲ᩠ᩅᩣ ᨶᩥᨿᨾᩮᩣ ᨠᨲᩮᩣ. ᩑᨲ᩠ᨳᩣᩉ – ᨿᨴᩥ ᩑᩅᩴ ᩈᩣᨵᩣᩁᨱᩈᩥᨠ᩠ᨡᩣᨸᨴᩅᩈᩮᨶ ᩅᩣ ᩃᩥᨦ᩠ᨣᨸᩁᩥᩅᨲ᩠ᨲᨶᩅᩈᩮᨶ ᩅᩣ ᨶ ᨠᩮᩅᩃᩴ ᨽᩥᨠ᩠ᨡᩪᨶᩴ, ᨽᩥᨠ᩠ᨡᩩᨶᩦᨶᨾ᩠ᨸᩥ ‘‘ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ’’ᨲᩥ ᩅᩥᨽᨦ᩠ᨣᩮ ᩅᨲ᩠ᨲᨻ᩠ᨻᩴ ᩈᩥᨿᩣ. ᨲᨴᩅᨧᨶᩮᨶ ᩉᩥ ᨽᩥᨠ᩠ᨡᩩᨶᩦ ᨸᩩᩁᩥᩈᩃᩥᨦ᩠ᨣᨸᩣᨲᩩᨽᩣᩅᩮᨶ ᨽᩥᨠ᩠ᨡᩩᨽᩣᩅᩮ ᨮᩥᨲᩣ ᩑᩅᩴ ᩅᨴᩮᨿ᩠ᨿ ‘‘ᨶᩣᩉᩴ ᩏᨸᩈᨾ᩠ᨸᨴᩣᨠᩁᨱᨠᩣᩃᩮ ᨽᩥᨠ᩠ᨡᩪᨶᩴ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩣ, ᨲᩈ᩠ᨾᩣ ᨶ ᩋᨸᨧ᩠ᨧᨠ᩠ᨡᩣᨲᩈᩥᨠ᩠ᨡᩣᨸᩥ ᨾᩮᨳᩩᨶᨵᨾ᩠ᨾᩮᨶ ᨸᩣᩁᩣᨩᩥᨠᩣ ᩉᩮᩣᨾᩦ’’ᨲᩥ. ᩅᩩᨧ᩠ᨧᨲᩮ – ᨿᨳᩣ ᩅᩩᨲ᩠ᨲᩴ, ᨲᨳᩣ ᨶ ᩅᨲ᩠ᨲᨻ᩠ᨻᩴ ᩋᨶᩥᨭ᩠ᨮᨸ᩠ᨸᩈᨦ᩠ᨣᨲᩮᩣ. ᨲᨳᩣ ᩅᩩᨲ᩠ᨲᩮ ᨽᩥᨠ᩠ᨡᩩᨶᩦᨶᨾ᩠ᨸᩥ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩴ ᩋᨲ᩠ᨳᩦᨲᩥ ᩌᨸᨩ᩠ᨩᨲᩥ. ᨲᨬ᩠ᨧᩣᨶᩥᨭ᩠ᨮᩴ. ᩍᨴᨾᨸᩁᨾᨶᩥᨭ᩠ᨮᩴ ‘‘ᩈᨻ᩠ᨻᩈᩥᨠ᩠ᨡᩣᨸᨴᩣᨶᩥ ᩈᩣᨵᩣᩁᨱᩣᨶᩮᩅ ᨶᩣᩈᩣᨵᩣᩁᨱᩣᨶᩦ’’ᨲᩥ. ᩋᨸᩥᨧᩣᨿᩴ ᨽᩥᨠ᩠ᨡᩪᨶᩴ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩣᩅ ᩉᩮᩣᨲᩦᨲᩥ ᨴᩔᨶᨲ᩠ᨳᩴ ‘‘ᩋᨶᩩᨩᩣᨶᩣᨾᩥ, ᨽᩥᨠ᩠ᨡᩅᩮ, ᨲᩴᨿᩮᩅ ᩏᨸᨩ᩠ᨫᩴ ᨲᨾᩮᩅ ᩏᨸᩈᨾ᩠ᨸᨴᩴ ᨲᩣᨶᩥ ᩅᩔᩣᨶᩥ ᨽᩥᨠ᩠ᨡᩪᩉᩥ ᩈᨦ᩠ᨣᨾᩥᨲᩩ’’ᨶ᩠ᨲᩥᩌᨴᩥ (ᨸᩣᩁᩣ. ᪖᪙) ᩅᩩᨲ᩠ᨲᩴ. ᨲᨲᩮᩣ ᩌᨸᨲ᩠ᨲᩥᨿᩣ ᨽᩮᨴᩮᩣᨲᩥ ᨲᨲᩮᩣ ᩅᩥᨽᨦ᩠ᨣᨲᩮᩣ ‘‘ᩋᨠ᩠ᨡᨿᩥᨲᩮ ᩈᩁᩦᩁᩮ ᨸᩣᩁᩣᨩᩥᨠᩴ, ᨿᩮᨽᩩᨿ᩠ᨿᩮᨶ ᨡᨿᩥᨲᩮ ᨳᩩᩃ᩠ᩃᨧ᩠ᨧᨿ’’ᨶ᩠ᨲᩥᩌᨴᩥ (ᨸᩣᩁᩣ. ᪗᪓, ᨸᩁᩥ. ᪑᪕᪗) ᩌᨸᨲ᩠ᨲᩥᨿᩣ ᨽᩮᨴᩮᩣ ᩉᩮᩣᨲᩥ. ᩋᨶᩣᨸᨲ᩠ᨲᩥ ᨲᨴᨬ᩠ᨬᨳᩣᨲᩥ ᨲᨲᩮᩣ ᩑᩅ ᩅᩥᨽᨦ᩠ᨣᨲᩮᩣ ᨿᩮᨶ ᩌᨠᩣᩁᩮᨶ ᩌᨸᨲ᩠ᨲᩥ ᩅᩩᨲ᩠ᨲᩣ, ᨲᨲᩮᩣ ᩋᨬ᩠ᨬᩮᨶᩣᨠᩣᩁᩮᨶ ᩋᨶᩣᨸᨲ᩠ᨲᩥᨽᩮᨴᩮᩣᩅ ᩉᩮᩣᨲᩥ. ‘‘ᩈᩣᨴᩥᨿᨲᩥ, ᩌᨸᨲ᩠ᨲᩥ ᨸᩣᩁᩣᨩᩥᨠᩔ, ᨶ ᩈᩣᨴᩥᨿᨲᩥ, ᩋᨶᩣᨸᨲ᩠ᨲᩦ’’ᨲᩥ ᩉᩥ ᩅᩥᨽᨦ᩠ᨣᩮ ᩋᩈᨲᩥ ᨶ ᨸᨬ᩠ᨬᩣᨿᨲᩥ. ᩑᨲ᩠ᨲᩣᩅᨲᩣ ‘‘ᨶᩥᨴᩣᨶᩣ ᨾᩣᨲᩥᨠᩣᨽᩮᨴᩮᩣ’’ᨲᩥ ᩋᨿᩴ ᨣᩣᨳᩣ ᩈᨾᩣᩈᨲᩮᩣ ᩅᩩᨲ᩠ᨲᨲ᩠ᨳᩣ ᩉᩮᩣᨲᩥ. ᩅᩥᩈᩮᩈᨠᩣᩁᨱᩴ ᨸᨶ ᨲᩈ᩠ᨾᩥᩴ ᨲᩈ᩠ᨾᩥᩴ ᩈᩥᨠ᩠ᨡᩣᨸᨴᩮ ᩌᩅᩥᨽᩅᩥᩔᨲᩥ.

ᨸᨮᨾᨸᨬ᩠ᨬᨲ᩠ᨲᩥ ᨲᩣᩅ ᨸᨮᨾᨻᩮᩣᨵᩥᩴ ᩋᨲᩥᨠ᩠ᨠᨾᩥᨲ᩠ᩅᩣ ᨸᨬ᩠ᨬᨲ᩠ᨲᨲ᩠ᨲᩣ, ᩌᨿᩈ᩠ᨾᨲᩮᩣ ᩈᩩᨴᩥᨶ᩠ᨶᩔ ᩋᨭ᩠ᨮᩅᩔᩥᨠᨠᩣᩃᩮ ᨸᨬ᩠ᨬᨲ᩠ᨲᨲ᩠ᨲᩣ ᨧ ᩁᨲ᩠ᨲᨬ᩠ᨬᩩᨾᩉᨲ᩠ᨲᩴ ᨸᨲ᩠ᨲᨠᩣᩃᩮ ᨸᨬ᩠ᨬᨲ᩠ᨲᩣ, ᨴᩩᨲᩥᨿᨸᨬ᩠ᨬᨲ᩠ᨲᩥ ᨻᩣᩉᩩᩈᨧ᩠ᨧᨾᩉᨲ᩠ᨲᩴ ᨸᨲ᩠ᨲᨠᩣᩃᩮ. ᩈᩮᩣ ᩉᩥ ᩌᨿᩈ᩠ᨾᩣ ᨾᨠ᩠ᨠᨭᩥᨸᩣᩁᩣᨩᩥᨠᩮᩣ ᨿᨳᩣ ᨾᩣᨲᩩᨣᩣᨾᨸ᩠ᨸᨭᩥᩈᩴᨿᩩᨲ᩠ᨲᩮᩈᩩ ᩈᩥᨠ᩠ᨡᩣᨸᨴᩮᩈᩩ ᨲᩥᩁᨧ᩠ᨨᩣᨶᨣᨲᩥᨲ᩠ᨳᩦ ᨶ ᩋᨵᩥᨸ᩠ᨸᩮᨲᩣ, ᨲᨳᩣ ᩍᨵᩣᨸᩦᨲᩥ ᩈᨬ᩠ᨬᩣᨿ ‘‘ᩈᨧ᩠ᨧᩴ, ᩌᩅᩩᩈᩮᩣ…ᨸᩮ… ᨲᨬ᩠ᨧ ᨡᩮᩣ ᨾᨶᩩᩔᩥᨲ᩠ᨳᩥᨿᩣ, ᨶᩮᩣ ᨲᩥᩁᨧ᩠ᨨᩣᨶᨣᨲᩣᨿᩣ’’ᨲᩥ (ᨸᩣᩁᩣ. ᪔᪑) ᩌᩉ. ᨲᨲᩥᨿᨸᨬ᩠ᨬᨲ᩠ᨲᩥ ᩃᩣᨽᨣ᩠ᨣᨾᩉᨲ᩠ᨲᩴ ᨸᨲ᩠ᨲᨠᩣᩃᩮ ᩏᨸ᩠ᨸᨶ᩠ᨶᩣ ‘‘ᨿᩣᩅᨴᨲ᩠ᨳᩴ ᨽᩩᨬ᩠ᨩᩥᨲ᩠ᩅᩣ’’ᨲᩥᩌᨴᩥ (ᨸᩣᩁᩣ. ᪔᪓) ᩅᨧᨶᨲᩮᩣ, ᩅᩮᨸᩩᩃ᩠ᩃᨾᩉᨲ᩠ᨲᨾ᩠ᨸᩥ ᩑᨲ᩠ᨳᩮᩅ ᩃᨻ᩠ᨽᨲᩦᨲᩥ ᩍᨾᩴ ᨸᨮᨾᨸᩣᩁᩣᨩᩥᨠᩈᩥᨠ᩠ᨡᩣᨸᨴᩴ ᨲᩥᩅᩥᨵᨾ᩠ᨸᩥ ᩅᨲ᩠ᨳᩩᩴ ᩏᨸᩣᨴᩣᨿ ᨧᨲᩩᨻ᩠ᨻᩥᨵᨾ᩠ᨸᩥ ᨲᩴ ᨠᩣᩃᩴ ᨸᨲ᩠ᩅᩣ ᨸᨬ᩠ᨬᨲ᩠ᨲᨶ᩠ᨲᩥ ᩅᩮᨴᩥᨲᨻ᩠ᨻᩴ.

ᨲᨲ᩠ᨳ ᨿᩮᩣ ᨸᨶᩣᨲᩥ ᩋᨶᩅᩈᩮᩈᨸᩁᩥᨿᩣᨴᩣᨶᨸᨴᩴ. ᨽᩥᨠ᩠ᨡᩪᨲᩥ ᨲᩔ ᩋᨲᩥᨸ᩠ᨸᩈᨦ᩠ᨣᨶᩥᨿᨾᨸᨴᩴ. ᨽᩥᨠ᩠ᨡᩪᨶᩴ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣᨲᩥ ᨲᩔ ᩅᩥᩈᩮᩈᨶᩅᨧᨶᩴ. ᨶ ᩉᩥ ᩈᨻ᩠ᨻᩮᩣᨸᩥ ᨽᩥᨠ᩠ᨡᩩᨶᩣᨾᨠᩮᩣ, ᨿᩣ ᨽᨣᩅᨲᩣ ᨿᩣᨿ ᨠᩣᨿᨧᩥ ᩏᨸᩈᨾ᩠ᨸᨴᩣᨿ ᩏᨸᩈᨾ᩠ᨸᨶ᩠ᨶᨽᩥᨠ᩠ᨡᩪᨶᩴ ᩉᩮᨭ᩠ᨮᩥᨾᨸᩁᩥᨧ᩠ᨨᩮᨴᩮᨶ ᩈᩥᨠ᩠ᨡᩥᨲᨻ᩠ᨻᩣ ᩈᩥᨠ᩠ᨡᩣ ᩅᩥᩉᩥᨲᩣ, ‘‘ᩑᨲ᩠ᨳ ᩈᩉ ᨩᩦᩅᨶ᩠ᨲᩦ’’ᨲᩥ ᨿᩮᩣ ᨧ ᩈᩣᨩᩦᩅᩮᩣ ᩅᩩᨲ᩠ᨲᩮᩣ, ᨲᩴ ᩏᨽᨿᩴ ᩈᨾᩣᨸᨶ᩠ᨶᩮᩣᩅ ᩉᩮᩣᨲᩥ. ᨠᨴᩣ ᨸᨶ ᩈᨾᩣᨸᨶ᩠ᨶᩮᩣ ᩉᩮᩣᨲᩥ? ᨿᩣᨿ ᨠᩣᨿᨧᩥ ᩏᨸᩈᨾ᩠ᨸᨴᩣᨿ ᩏᨸᩈᨾ᩠ᨸᨶ᩠ᨶᩈᨾᨶᨶ᩠ᨲᩁᨾᩮᩅ ᨲᨴᩩᨽᨿᩴ ᨩᩣᨶᨶ᩠ᨲᩮᩣᨸᩥ ᩋᨩᩣᨶᨶ᩠ᨲᩮᩣᨸᩥ ᨲᨴᨩ᩠ᨫᩩᨸᨣᨲᨲ᩠ᨲᩣ ᩈᨾᩣᨸᨶ᩠ᨶᩮᩣᩅ ᨶᩣᨾ ᩉᩮᩣᨲᩥ. ᩈᩉ ᨩᩦᩅᨶ᩠ᨲᩦᨲᩥ ᨿᩣᩅ ᩈᩥᨠ᩠ᨡᩴ ᨶ ᨸᨧ᩠ᨧᨠ᩠ᨡᩣᨲᩥ, ᨸᩣᩁᩣᨩᩥᨠᨽᩣᩅᩴ ᩅᩣ ᨶ ᨸᩣᨸᩩᨱᩣᨲᩥ. ᨿᩴ ᨸᨶ ᩅᩩᨲ᩠ᨲᩴ ᩋᨶ᩠ᨵᨠᨭ᩠ᨮᨠᨳᩣᨿᩴ ‘‘ᩈᩥᨠ᩠ᨡᩴ ᨸᩁᩥᨸᩪᩁᩮᨶ᩠ᨲᩮᩣ ᩈᩥᨠ᩠ᨡᩣᩈᨾᩣᨸᨶ᩠ᨶᩮᩣ ᩈᩣᨩᩦᩅᩴ ᩋᩅᩦᨲᩥᨠ᩠ᨠᨾᨶ᩠ᨲᩮᩣ ᩈᩣᨩᩦᩅᩈᨾᩣᨸᨶ᩠ᨶᩮᩣ’’ᨲᩥ, ᨲᩴ ᩏᨠ᩠ᨠᨭ᩠ᨮᨸᩁᩥᨧ᩠ᨨᩮᨴᩅᩈᩮᨶ ᩅᩩᨲ᩠ᨲᩴ. ᨶ ᩉᩥ ᩈᩥᨠ᩠ᨡᩴ ᩋᨸᩁᩥᨸᩪᩁᩮᨶ᩠ᨲᩮᩣ, ᨠᩣᨾᩅᩥᨲᨠ᩠ᨠᩣᨴᩥᨻᩉᩩᩃᩮᩣ ᩅᩣ ᩑᨠᨧ᩠ᨧᩴ ᩈᩣᩅᩈᩮᩈᩴ ᩈᩣᨩᩦᩅᩴ ᩅᩦᨲᩥᨠ᩠ᨠᨾᨶ᩠ᨲᩮᩣ ᩅᩣ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ ᨶᩣᨾ ᨶ ᩉᩮᩣᨲᩥ.

ᩏᨠ᩠ᨠᨭ᩠ᨮᨸᩁᩥᨧ᩠ᨨᩮᨴᩮᨶ ᨸᨶ ᨧᨲᩩᨠ᩠ᨠᩴ ᩃᨻ᩠ᨽᨲᩥ – ‘‘ᩋᨲ᩠ᨳᩥ ᨽᩥᨠ᩠ᨡᩩ ᩈᩥᨠ᩠ᨡᩣᩈᨾᩣᨸᨶ᩠ᨶᩮᩣ ᩈᩦᩃᩣᨶᩥ ᨸᨧ᩠ᨧᩅᩮᨠ᩠ᨡᨶ᩠ᨲᩮᩣ ᨶ ᩈᩣᨩᩦᩅᩈᨾᩣᨸᨶ᩠ᨶᩮᩣ ᩋᨧᩥᨲ᩠ᨲᨠᩴ ᩈᩥᨠ᩠ᨡᩣᨸᨴᩴ ᩅᩦᨲᩥᨠ᩠ᨠᨾᨶ᩠ᨲᩮᩣ, ᩋᨲ᩠ᨳᩥ ᨶ ᩈᩥᨠ᩠ᨡᩣᩈᨾᩣᨸᨶ᩠ᨶᩮᩣ ᨠᩣᨾᩅᩥᨲᨠ᩠ᨠᩣᨴᩥᨻᩉᩩᩃᩮᩣ ᩈᩣᨩᩦᩅᩈᨾᩣᨸᨶ᩠ᨶᩮᩣ ᨶᩥᩁᩣᨸᨲ᩠ᨲᩥᨠᩮᩣ, ᩋᨲ᩠ᨳᩥ ᨶ ᩈᩥᨠ᩠ᨡᩣᩈᨾᩣᨸᨶ᩠ᨶᩮᩣ ᨶ ᨧ ᩈᩣᨩᩦᩅᩈᨾᩣᨸᨶ᩠ᨶᩮᩣ ᩋᨶᩅᩈᩮᩈᩴ ᩌᨸᨲ᩠ᨲᩥᩴ ᩌᨸᨶ᩠ᨶᩮᩣ, ᩋᨲ᩠ᨳᩥ ᩏᨽᨿᩈᨾᩣᨸᨶ᩠ᨶᩮᩣ ᩈᩥᨠ᩠ᨡᩴ ᨸᩁᩥᨸᩪᩁᩮᨶ᩠ᨲᩮᩣ ᩈᩣᨩᩦᩅᨬ᩠ᨧ ᩋᩅᩦᨲᩥᨠ᩠ᨠᨾᨶ᩠ᨲᩮᩣ’’ᨲᩥ. ᩋᨿᨾᩮᨲ᩠ᨳ ᨧᨲᩩᨲ᩠ᨳᩮᩣ ᨽᩥᨠ᩠ᨡᩩ ᩏᨠ᩠ᨠᨭ᩠ᨮᩮᩣ ᩍᨵ ᩋᨵᩥᨸ᩠ᨸᩮᨲᩮᩣ ᩈᩥᨿᩣ. ᨶ ᩉᩥ ᨽᨣᩅᩣ ᩋᨶᩩᨠ᩠ᨠᨭ᩠ᨮᩴ ᩅᨲ᩠ᨲᩩᩴ ᨿᩩᨲ᩠ᨲᩮᩣᨲᩥ ᨧᩮ? ᨶ, ‘‘ᨲᨲᩕ ᨿᩣᨿᩴ ᩋᨵᩥᩈᩦᩃᩈᩥᨠ᩠ᨡᩣ, ᩋᨿᩴ ᩍᨾᩈ᩠ᨾᩥᩴ ᩋᨲ᩠ᨳᩮ ᩋᨵᩥᨸ᩠ᨸᩮᨲᩣ ᩈᩥᨠ᩠ᨡᩣ’’ᨲᩥ ᩅᨧᨶᩅᩥᩁᩮᩣᨵᨲᩮᩣ, ᩏᨠ᩠ᨠᨭ᩠ᨮᨣ᩠ᨣᩉᨱᩣᨵᩥᨸ᩠ᨸᩣᨿᩮ ᩈᨲᩥ ‘‘ᩈᩥᨠ᩠ᨡᩣᨲᩥ ᨲᩥᩔᩮᩣ ᩈᩥᨠ᩠ᨡᩣ’’ᨲᩥ ᩑᨲ᩠ᨲᨠᨾᩮᩅ ᩅᨲ᩠ᨲᨻ᩠ᨻᨶ᩠ᨲᩥ ᩋᨵᩥᨸ᩠ᨸᩣᨿᩮᩣ. ᩈᩥᨠ᩠ᨡᨲ᩠ᨲᨿᩈᨾᩣᨸᨶ᩠ᨶᩮᩣ ᩉᩥ ᩈᨻ᩠ᨻᩩᨠ᩠ᨠᨭ᩠ᨮᩮᩣ. ‘‘ᨾᩮᨳᩩᨶᩴ ᨵᨾ᩠ᨾᩴ ᨸᨭᩥᩈᩮᩅᩮᨿ᩠ᨿᩣ’’ᨲᩥ ᨸᩁᨲᩮᩣ ᩅᨧᨶᩴ ᩋᨸᩮᨠ᩠ᨡᩥᨲ᩠ᩅᩣ ᩋᨵᩥᩈᩦᩃᩈᩥᨠ᩠ᨡᩣᩅ ᩅᩩᨲ᩠ᨲᩣᨲᩥ ᨧᩮ? ᨶ, ᨲᩔᩣᨸᩥ ᩋᨽᨻ᩠ᨻᨲ᩠ᨲᩣ. ᨶ ᩉᩥ ᩋᨵᩥᩈᩦᩃᩈᩥᨠ᩠ᨡᩴ ᨸᩁᩥᨸᩪᩁᩮᨶ᩠ᨲᩮᩣ, ᩈᩣᨩᩦᩅᨬ᩠ᨧ ᩋᩅᩦᨲᩥᨠ᩠ᨠᨾᨶ᩠ᨲᩮᩣ ᨾᩮᨳᩩᨶᨵᨾ᩠ᨾᩴ ᨸᨭᩥᩈᩮᩅᩥᨲᩩᩴ ᨽᨻ᩠ᨻᩮᩣ, ᨲᩴ ᩈᩥᨠ᩠ᨡᩴ ᩋᨸᩁᩥᨸᩪᩁᩮᨶ᩠ᨲᩮᩣ, ᩈᩣᨩᩦᩅᨬ᩠ᨧ ᩅᩦᨲᩥᨠ᩠ᨠᨾᨶ᩠ᨲᩮᩣᨿᩮᩅ ᩉᩥ ᨸᨭᩥᩈᩮᩅᩮᨿ᩠ᨿᩣᨲᩥ ᩋᨵᩥᨸ᩠ᨸᩣᨿᩣ. ᨲᩈ᩠ᨾᩣ ᩑᩅᨾᩮᨲ᩠ᨳ ᩋᨲ᩠ᨳᩮᩣ ᨣᩉᩮᨲᨻ᩠ᨻᩮᩣ. ᨿᩈ᩠ᨾᩣ ᩈᩥᨠ᩠ᨡᩣᨸᨴᩈᨦ᩠ᨡᩣᨲᩮᩣ ᩈᩣᨩᩦᩅᩮᩣ ᩋᨵᩥᩈᩦᩃᩈᩥᨠ᩠ᨡᨾᩮᩅ ᩈᨦ᩠ᨣᨱ᩠ᩉᩣᨲᩥ, ᨶ ᩍᨲᩁᩈᩥᨠ᩠ᨡᩣᨴ᩠ᩅᨿᩴ, ᨲᩈ᩠ᨾᩣ ‘‘ᨲᨲᩕ ᨿᩣᨿᩴ ᩋᨵᩥᩈᩦᩃᩈᩥᨠ᩠ᨡᩣ, ᩋᨿᩴ ᩍᨾᩈ᩠ᨾᩥᩴ ᩋᨲ᩠ᨳᩮ ᩋᨵᩥᨸ᩠ᨸᩮᨲᩣ ᩈᩥᨠ᩠ᨡᩣ’’ᨲᩥ ᩅᩩᨲ᩠ᨲᩴ. ᨲᩈ᩠ᨾᩣ ᩋᨵᩥᩈᩦᩃᩈᩥᨠ᩠ᨡᩣᨿ ᩈᨦ᩠ᨣᩣᩉᨠᩮᩣ ᩈᩣᨩᩦᩅᩮᩣ ᩈᩥᨠ᩠ᨡᩣᩈᩣᨩᩦᩅᩮᩣᨲᩥ ᩅᩩᨲ᩠ᨲᩮᩣ. ᩍᨲᩥ ᩈᩣᨩᩦᩅᩅᩥᩈᩮᩈᨶᨲ᩠ᨳᩴ ᩈᩥᨠ᩠ᨡᩣᨣ᩠ᨣᩉᨱᩴ ᨠᨲᩴ. ᨲᨴᨲ᩠ᨳᨴᩦᨸᨶᨲ᩠ᨳᨾᩮᩅ ᩅᩥᨽᨦ᩠ᨣᩮ ᩈᩥᨠ᩠ᨡᩴ ᩋᨸᩁᩣᨾᩈᩥᨲ᩠ᩅᩣ ‘‘ᨲᩈ᩠ᨾᩥᩴ ᩈᩥᨠ᩠ᨡᨲᩥ, ᨲᩮᨶ ᩅᩩᨧ᩠ᨧᨲᩥ ᩈᩣᨩᩦᩅᩈᨾᩣᨸᨶ᩠ᨶᩮᩣ’’ᨲᩥ (ᨸᩣᩁᩣ. ᪔᪕) ᩅᩩᨲ᩠ᨲᩴ. ᨲᩮᨶ ᩑᨠᨾᩮᩅᩥᨴᩴ ᩋᨲ᩠ᨳᨸᨴᨶ᩠ᨲᩥ ᨴᩦᨸᩥᨲᩴ ᩉᩮᩣᨲᩥ. ᨲᨬ᩠ᨧ ᩏᨸᩈᨾ᩠ᨸᨴᩪᨸᨣᨾᨶᨶ᩠ᨲᩁᨲᩮᩣ ᨸᨭ᩠ᨮᩣᨿ ᩈᩥᨠ᩠ᨡᨶᩣᨵᩥᨠᩣᩁᨲ᩠ᨲᩣ ‘‘ᩈᩥᨠ᩠ᨡᨲᩦ’’ᨲᩥ ᨧ ‘‘ᩈᨾᩣᨸᨶ᩠ᨶᩮᩣ’’ᨲᩥ ᨧ ᩅᩩᨧ᩠ᨧᨲᩥ. ᨿᩮᩣ ᩑᩅᩴ ‘‘ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ’’ᨲᩥ ᩈᨦ᩠ᨡᩴ ᨣᨲᩮᩣ, ᨲᩣᨴᩥᩈᩴ ᨸᨧ᩠ᨧᨿᩴ ᨸᨭᩥᨧ᩠ᨧ ᩋᨸᩁᨽᩣᨣᩮ ᩈᩣᨩᩦᩅᩈᨦ᩠ᨡᩣᨲᨾᩮᩅ ᩈᩥᨠ᩠ᨡᩴ ᩋᨸᨧ᩠ᨧᨠ᩠ᨡᩣᨿ ᨲᩈ᩠ᨾᩥᩴᨿᩮᩅ ᨴᩩᨻ᩠ᨻᩃ᩠ᨿᩴ ᩋᨶᩣᩅᩥᨠᨲ᩠ᩅᩣ ᨾᩮᨳᩩᨶᩴ ᨵᨾ᩠ᨾᩴ ᨸᨭᩥᩈᩮᩅᩮᨿ᩠ᨿᩣᨲᩥ ᩋᨿᨾᨲ᩠ᨳᩮᩣ ᨿᩩᨩ᩠ᨩᨲᩥ.

ᨠᩥᨶ᩠ᨲᩩ ᩋᨭ᩠ᨮᨠᨳᩣᨶᨿᩮᩣ ᨸᨭᩥᨠ᩠ᨡᩥᨲ᩠ᨲᩮᩣ ᩉᩮᩣᨲᩥ, ᩈᩮᩣ ᨧ ᨶ ᨸᨭᩥᨠ᩠ᨡᩮᨸᩣᩁᩉᩮᩣ ᩉᩮᩣᨲᩥ, ᩋᨵᩥᨸ᩠ᨸᩣᨿᩮᩣ ᨸᨶᩮᨲ᩠ᨳ ᨸᩁᩥᨿᩮᩈᩥᨲᨻ᩠ᨻᩮᩣ. ᩈᨻ᩠ᨻᩮᩈᩩ ᩈᩥᨠ᩠ᨡᩣᨸᨴᩮᩈᩩ ᩍᨴᨾᩮᩅ ᨽᩥᨠ᩠ᨡᩩᩃᨠ᩠ᨡᨱᩴ ᩈᩣᨵᩣᩁᨱᩴ ᨿᨴᩥᨴᩴ ‘‘ᨽᩥᨠ᩠ᨡᩪᨶᩴ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ’’ᨲᩥ. ᨡᩦᨱᩣᩈᩅᩮᩣᨸᩥ ᩈᩣᩅᨠᩮᩣ ᩌᨸᨲ᩠ᨲᩥᩴ ᩌᨸᨩ᩠ᨩᨲᩥ ᩋᨧᩥᨲ᩠ᨲᨠᩴ, ᨲᨳᩣ ᩈᩮᨠ᩠ᨡᩮᩣ, ᨸᩩᨳᩩᨩ᩠ᨩᨶᩮᩣ ᨸᨶ ᩈᨧᩥᨲ᩠ᨲᨠᨾ᩠ᨸᩥ, ᨲᩈ᩠ᨾᩣ ᩈᩮᨠ᩠ᨡᩣᩈᩮᨠ᩠ᨡᨸᩩᨳᩩᨩ᩠ᨩᨶᩣᨶᩴ ᩈᩣᨾᨬ᩠ᨬᨾᩥᨴᩴ ᨽᩥᨠ᩠ᨡᩩᩃᨠ᩠ᨡᨱᨶ᩠ᨲᩥ ᨠᨲ᩠ᩅᩣ ᨠᩮᩅᩃᩴ ᩈᩥᨠ᩠ᨡᩣᩈᨾᩣᨸᨶ᩠ᨶᩮᩣ, ᨠᩮᩅᩃᩴ ᩈᩣᨩᩦᩅᩈᨾᩣᨸᨶ᩠ᨶᩮᩣ, ᩏᨽᨿᩈᨾᩣᨸᨶ᩠ᨶᩮᩣ ᨧᩣᨲᩥ ᩈᩁᩪᨸᩮᨠᨴᩮᩈᩑᨠᩈᩮᩈᨶᨿᩮᨶ ‘‘ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ’’ᨲ᩠ᩅᩮᩅ ᩈᨾ᩠ᨸᩥᨱ᩠ᨯᩮᨲ᩠ᩅᩣ ᩏᨠ᩠ᨠᨭ᩠ᨮᨣ᩠ᨣᩉᨱᩮᨶ ᩋᨶᩩᨠ᩠ᨠᨭ᩠ᨮᩣᨶᩴ ᨣᩉᨱᩈᩥᨴ᩠ᨵᩥᨲᩮᩣ ᩋᨭ᩠ᨮᨠᨳᩣᨿᩴ ᩏᨠ᩠ᨠᨭ᩠ᨮᩮᩣᩅ ᩅᩩᨲ᩠ᨲᩮᩣ. ᨲᨾᩮᩅ ᩈᨾ᩠ᨸᩣᨴᩮᨲᩩᩴ ‘‘ᨲᩈ᩠ᨾᩥᩴ ᩈᩥᨠ᩠ᨡᨲᩥ, ᨲᩮᨶ ᩅᩩᨧ᩠ᨧᨲᩥ ᩈᩣᨩᩦᩅᩈᨾᩣᨸᨶ᩠ᨶᩮᩣ’’ᨲᩥ ᩑᨲ᩠ᨳ ᩈᩥᨠ᩠ᨡᩣᩈᨴ᩠ᨴᩔ ᩋᩅᨧᨶᩮ ᨸᩁᩥᩉᩣᩁᩴ ᩅᨲ᩠ᩅᩣ ᨿᩈ᩠ᨾᩣ ᨸᨶ ᩈᩮᩣ ᩈᩥᨠ᩠ᨡᨾ᩠ᨸᩥ ᩈᨾᩣᨸᨶ᩠ᨶᩮᩣ, ᨲᩈ᩠ᨾᩣ ᩈᩥᨠ᩠ᨡᩣᩈᨾᩣᨸᨶ᩠ᨶᩮᩣᨲᩥᨸᩥ ᩋᨲ᩠ᨳᨲᩮᩣ ᩅᩮᨴᩥᨲᨻ᩠ᨻᩮᩣᨲᩥ ᨧ ᩅᨲ᩠ᩅᩣ ‘‘ᨿᩴ ᩈᩥᨠ᩠ᨡᩴ ᩈᨾᩣᨸᨶ᩠ᨶᩮᩣ, ᨲᩴ ᩋᨸᨧ᩠ᨧᨠ᩠ᨡᩣᨿ, ᨿᨬ᩠ᨧ ᩈᩣᨩᩦᩅᩴ ᩈᨾᩣᨸᨶ᩠ᨶᩮᩣ, ᨲᨲ᩠ᨳ ᨴᩩᨻ᩠ᨻᩃ᩠ᨿᩴ ᩋᨶᩣᩅᩥᨠᨲ᩠ᩅᩣ’’ᨲᩥ ᩅᩩᨲ᩠ᨲᨶ᩠ᨲᩥ ᩋᨿᨾᨭ᩠ᨮᨠᨳᩣᨿ ᩋᨵᩥᨸ᩠ᨸᩣᨿᩮᩣ ᩅᩮᨴᩥᨲᨻ᩠ᨻᩮᩣ. ᩑᨲᩈ᩠ᨾᩥᩴ ᨸᨶ ᩋᨵᩥᨸ᩠ᨸᩣᨿᩮ ᩋᨵᩥᩈᩦᩃᩈᩥᨠ᩠ᨡᩣᨿ ᩑᩅ ᨣᩉᨱᩴ ᩈᨻ᩠ᨻᨲ᩠ᨳᩥᨠᨲ᩠ᨲᩣ, ᩈᩦᩃᩣᨵᩥᨠᩣᩁᨲᩮᩣ ᨧ ᩅᩥᨶᨿᩔᩣᨲᩥ ᩅᩮᨴᩥᨲᨻ᩠ᨻᩴ. ᨿᨳᩣ ᨧ ᩈᩥᨠ᩠ᨡᩣᨸᨴᩴ ᩈᨾᩣᨴᩥᨿᨶ᩠ᨲᩮᩣ ᩈᩦᩃᩴ ᩈᨾᩣᨴᩥᨿᨲᩦᨲᩥ ᩅᩩᨧ᩠ᨧᨲᩥ, ᩑᩅᩴ ᩈᩥᨠ᩠ᨡᩣᨸᨴᩴ ᨸᨧ᩠ᨧᨠ᩠ᨡᨶ᩠ᨲᩮᩣ ᩈᩦᩃᩴ ᨸᨧ᩠ᨧᨠ᩠ᨡᩣᨲᩦᨲᩥ ᩅᨲ᩠ᨲᩩᩴ ᨿᩩᨩ᩠ᨩᨲᩥ, ᨲᩈ᩠ᨾᩣ ᨲᨲ᩠ᨳ ᩅᩩᨲ᩠ᨲᩴ ‘‘ᨿᩴ ᩈᩥᨠ᩠ᨡᩴ ᩈᨾᩣᨸᨶ᩠ᨶᩮᩣ, ᨲᩴ ᩋᨸᨧ᩠ᨧᨠ᩠ᨡᩣᨿᩣ’’ᨲᩥ (ᨸᩣᩁᩣ. ᩋᨭ᩠ᨮ. ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩅᩥᨽᨦ᩠ᨣᩅᨱ᩠ᨱᨶᩣ). ᩑᨲ᩠ᨲᩣᩅᨲᩣ ᩈᨾᩣᩈᨲᩮᩣ ‘‘ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ’’ᨲᩥ ᩑᨲ᩠ᨳ ᩅᨲ᩠ᨲᨻ᩠ᨻᩅᩥᨶᩥᨧ᩠ᨨᨿᩮᩣ ᨶᩥᨭ᩠ᨮᩥᨲᩮᩣ ᩉᩮᩣᨲᩥ.

ᨠᩥᩴ ᩍᨾᩥᨶᩣ ᩅᩥᩈᩮᩈᩅᨧᨶᩮᨶ ᨸᨿᩮᩣᨩᨶᩴ, ᨶᨶᩩ ‘‘ᨿᩮᩣ ᨸᨶ ᨽᩥᨠ᩠ᨡᩩ ᩈᩥᨠ᩠ᨡᩴ ᩋᨸᨧ᩠ᨧᨠ᩠ᨡᩣᨿ ᨴᩩᨻ᩠ᨻᩃ᩠ᨿᩴ ᩋᨶᩣᩅᩥᨠᨲ᩠ᩅᩣ…ᨸᩮ… ᩋᩈᩴᩅᩣᩈᩮᩣ’’ᨲᩥ ᩑᨲ᩠ᨲᨠᨾᩮᩅ ᩅᨲ᩠ᨲᨻ᩠ᨻᨶ᩠ᨲᩥ ᨧᩮ? ᨶ ᩅᨲ᩠ᨲᨻ᩠ᨻᩴ ᩋᨶᩥᨭ᩠ᨮᨸ᩠ᨸᩈᨦ᩠ᨣᨲᩮᩣ. ‘‘ᨿᩮᩣ ᨸᨶ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ ᨳᩮᨿ᩠ᨿᩈᩴᩅᩣᩈᩣᨴᩥᨠᩮᩣ ᨠᩮᩅᩃᩮᨶ ᩈᨾᨬ᩠ᨬᩣᨾᨲ᩠ᨲᩮᨶ, ᨸᨭᩥᨬ᩠ᨬᩣᨾᨲ᩠ᨲᩮᨶ ᩅᩣ ᨽᩥᨠ᩠ᨡᩩ, ᨲᩔᩣᨸᩥ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩴ ᩋᨲ᩠ᨳᩥ, ᩈᩥᨠ᩠ᨡᩴ ᩋᨸᨧ᩠ᨧᨠ᩠ᨡᩣᨿ ᨧ ᨾᩮᨳᩩᨶᩴ ᨵᨾ᩠ᨾᩴ ᨸᨭᩥᩈᩮᩅᨶ᩠ᨲᩔ ᨸᩣᩁᩣᨩᩥᨠᩣᨸᨲ᩠ᨲᩥ. ᨿᩮᩣ ᩅᩣ ᨸᨧ᩠ᨨᩣ ᨸᩣᩁᩣᨩᩥᨠᩴ ᩌᨸᨲ᩠ᨲᩥᩴ ᩌᨸᨩ᩠ᨩᩥᨲ᩠ᩅᩣ ᨶ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ, ᨲᩔ ᨧ, ᨿᩮᩣ ᩅᩣ ᨸᨠ᩠ᨡᨸᨱ᩠ᨯᨠᨲ᩠ᨲᩣ ᨸᨱ᩠ᨯᨠᨽᩣᩅᩪᨸᨣᨾᨶᩮᨶ ᨶ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ, ᨲᩔ ᨧ ᨲᨴᩩᨽᨿᩴ ᩋᨲ᩠ᨳᩦᨲᩥ ᩌᨸᨩ᩠ᨩᨲᩥ. ᨸᨱ᩠ᨯᨠᨽᩣᩅᨸᨠ᩠ᨡᩮ ᨧ ᨸᨱ᩠ᨯᨠᩮᩣ ᩏᨸᩈᨾ᩠ᨸᨴᩣᨿ ᨶ ᩅᨲ᩠ᨳᩪ’’ᨲᩥ ᩅᩩᨲ᩠ᨲᩴ. ᨲᩈ᩠ᨾᩣ ᩍᨲᩁᩈ᩠ᨾᩥᩴ ᨸᨠ᩠ᨡᩮ ᩅᨲ᩠ᨳᩪᨲᩥ ᩈᩥᨴ᩠ᨵᩴ. ᨲᩈ᩠ᨾᩥᩴ ᨸᨠ᩠ᨡᩮ ᩏᨸᩈᨾ᩠ᨸᨶ᩠ᨶᩮᩣ ᨸᨱ᩠ᨯᨠᨽᩣᩅᨸᨠ᩠ᨡᩮ ᨸᨱ᩠ᨯᨠᨲ᩠ᨲᩣ ᨶ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ, ᩈᩮᩣ ᨸᩁᩥᨧ᩠ᨧᨩᩥᨲᨻ᩠ᨻᩣᨿ ᩈᩥᨠ᩠ᨡᩣᨿ ᩋᨽᩣᩅᩮᨶ ᩈᩥᨠ᩠ᨡᩴ ᩋᨸᨧ᩠ᨧᨠ᩠ᨡᩣᨿ ᨾᩩᨡᩮᨶ ᨸᩁᩔ ᩋᨦ᩠ᨣᨩᩣᨲᨣ᩠ᨣᩉᨱᨶᨿᩮᨶ ᨾᩮᨳᩩᨶᩴ ᨵᨾ᩠ᨾᩴ ᨸᨭᩥᩈᩮᩅᩮᨿ᩠ᨿ, ᨲᩔ ᨠᩩᨲᩮᩣ ᨸᩣᩁᩣᨩᩥᨠᩣᨸᨲ᩠ᨲᩦᨲᩥ ᩋᨵᩥᨸ᩠ᨸᩣᨿᩮᩣ. ᩋᨿᩴ ᨶᨿᩮᩣ ᩋᨸᨱ᩠ᨯᨠᨸᨠ᩠ᨡᩴ ᩋᩃᨽᨾᩣᨶᩔᩮᩅ ᨸᩁᨲᩮᩣ ᨿᩩᨩ᩠ᨩᨲᩥ, ᩃᨽᨶ᩠ᨲᩔ ᨸᨶ ᩋᩁᩪᨸᩈᨲ᩠ᨲᩣᨶᩴ ᨠᩩᩈᩃᩣᨴᩥᩈᨾᩣᨸᨲ᩠ᨲᩥᨠ᩠ᨡᨱᩮ ᨽᩅᨦ᩠ᨣᩅᩥᨧ᩠ᨨᩮᨴᩮ ᩈᨲᩥᨸᩥ ᩋᨾᩁᨱᩴ ᩅᩥᨿ ᨸᨱ᩠ᨯᨠᨽᩣᩅᨸᨠ᩠ᨡᩮᨸᩥ ᨽᩥᨠ᩠ᨡᩩᨽᩣᩅᩮᩣ ᩋᨲ᩠ᨳᩥ. ᩈᩴᩅᩣᩈᩴ ᩅᩣ ᩈᩣᨴᩥᨿᨶ᩠ᨲᩔ ᨶ ᨳᩮᨿ᩠ᨿᩈᩴᩅᩣᩈᨠᨽᩣᩅᩮᩣ ᩋᨲ᩠ᨳᩥ ᩋᨶ᩠ᨲᩥᨾᩅᨲ᩠ᨳᩩᩋᨩ᩠ᨫᩣᨸᨶ᩠ᨶᩔ ᩅᩥᨿ. ᨶ ᨧ ᩈᩉᩈᩮᨿ᩠ᨿᩣᨴᩥᩴ ᨩᨶᩮᨲᩥ. ᨣᨱᨸᩪᩁᨠᩮᩣ ᨸᨶ ᨶ ᩉᩮᩣᨲᩥ ᩋᨶ᩠ᨲᩥᨾᩅᨲ᩠ᨳᩩᩴ ᩋᨩ᩠ᨫᩣᨸᨶ᩠ᨶᩮᩣ ᩅᩥᨿ. ᨶ ᩈᩮᩣ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ. ᩍᨲᩁᩈ᩠ᨾᩥᩴ ᨸᨶ ᨸᨠ᩠ᨡᩮ ᩉᩮᩣᨲᩥ, ᩋᨿᩴ ᩍᨾᩔ ᨲᨲᩮᩣ ᩅᩥᩈᩮᩈᩮᩣ. ᨠᩥᨾᨿᩴ ᩈᩉᩮᨲᩩᨠᩮᩣ, ᩏᨴᩣᩉᩩ ᩋᩉᩮᨲᩩᨠᩮᩣᨲᩥ? ᨶ ᩋᩉᩮᨲᩩᨠᩮᩣ. ᨿᨲᩮᩣ ᩏᨸᩈᨾ᩠ᨸᨴᩣ ᨲᩔ ᩋᨸᨱ᩠ᨯᨠᨸᨠ᩠ᨡᩮ ᩋᨶᩩᨬ᩠ᨬᩣᨲᩣ ᩈᩉᩮᨲᩩᨠᨸ᩠ᨸᨭᩥᩈᨶ᩠ᨵᩥᨠᨲ᩠ᨲᩣ. ᨸᨱ᩠ᨯᨠᨽᩣᩅᨸᨠ᩠ᨡᩮᨸᩥ ᨠᩥᩔ ᨶᩣᨶᩩᨬ᩠ᨬᩣᨲᩣᨲᩥ ᨧᩮ? ᨸᨱ᩠ᨯᨠᨽᩪᨲᨲ᩠ᨲᩣ ᩒᨸᨠ᩠ᨠᨾᩥᨠᨸᨱ᩠ᨯᨠᩔ ᩅᩥᨿ.

ᩋᨸᩥᨧ ‘‘ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ’’ᨲᩥ ᩍᨾᩥᨶᩣ ᨲᩔ ᩈᩥᨠ᩠ᨡᩣᩈᨾᩣᨴᩣᨶᩴ ᨴᩦᨸᩮᨲ᩠ᩅᩣ ᨲᩴ ᩈᨾᩣᨴᩥᨶ᩠ᨶᩴ ᩈᩥᨠ᩠ᨡᩴ ᩋᨸᨧ᩠ᨧᨠ᩠ᨡᩣᨿ, ᨲᨲ᩠ᨳ ᨧ ᨴᩩᨻ᩠ᨻᩃ᩠ᨿᩴ ᩋᨶᩣᩅᩥᨠᨲ᩠ᩅᩣᨲᩥ ᩅᨲ᩠ᨲᩩᩴ ᨿᩩᨩ᩠ᨩᨲᩥ, ᨶ ᩋᨬ᩠ᨬᨳᩣᨲᩥ ᩍᨾᩥᨶᩣ ᨠᩣᩁᨱᩮᨶ ᨿᨳᩣᩅᩩᨲ᩠ᨲᩣᨶᩥᨭ᩠ᨮᨸ᩠ᨸᩈᨦ᩠ᨣᨲᩮᩣ ‘‘ᨿᩮᩣ ᨸᨶ ᨽᩥᨠ᩠ᨡᩩ ᨽᩥᨠ᩠ᨡᩪᨶᩴ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ ᩈᩥᨠ᩠ᨡᩴ ᩋᨸᨧ᩠ᨧᨠ᩠ᨡᩣᨿᩣ’’ᨲᩥᩌᨴᩥ ᩅᩩᨲ᩠ᨲᩴ. ᨿᨳᩣ ᨧᩮᨲ᩠ᨳ, ᩑᩅᩴ ‘‘ᨿᩮᩣ ᨸᨶ ᨽᩥᨠ᩠ᨡᩩ ᨽᩥᨠ᩠ᨡᩪᨶᩴ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ ᩈᩥᨠ᩠ᨡᩴ ᩋᨸᨧ᩠ᨧᨠ᩠ᨡᩣᨿ ᨴᩩᨻ᩠ᨻᩃ᩠ᨿᩴ ᩋᨶᩣᩅᩥᨠᨲ᩠ᩅᩣ ᨣᩣᨾᩣ ᩅᩣ ᩋᩁᨬ᩠ᨬᩣ ᩅᩣ ᩋᨴᩥᨶ᩠ᨶᩴ…ᨸᩮ… ᨿᩮᩣ ᨸᨶ ᨽᩥᨠ᩠ᨡᩩ ᨽᩥᨠ᩠ᨡᩪᨶᩴ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ ᩈᩥᨠ᩠ᨡᩴ ᩋᨸᨧ᩠ᨧᨠ᩠ᨡᩣᨿ ᨴᩩᨻ᩠ᨻᩃ᩠ᨿᩴ ᩋᨶᩣᩅᩥᨠᨲ᩠ᩅᩣ ᩈᩩᨣᨲᨧᩦᩅᩁᨸ᩠ᨸᨾᩣᨱᩴ ᨧᩦᩅᩁᩴ ᨠᩣᩁᩣᨸᩮᨿ᩠ᨿᩣ’’ᨲᩥ ᩈᨻ᩠ᨻᨲ᩠ᨳ ᨿᩮᩣᨩᩮᨲᨻ᩠ᨻᩴ.

‘‘ᩋᨶ᩠ᨲᨾᩈᩮᩣ ᨲᩥᩁᨧ᩠ᨨᩣᨶᨣᨲᩣᨿᨸᩦ’’ᨲᩥ ᨾᨶᩩᩔᩥᨲ᩠ᨳᩥᩴ ᩏᨸᩣᨴᩣᨿ ᩅᩩᨲ᩠ᨲᩴ. ᨶ ᩉᩥ ᨸᨣᩮᩅ ᨸᨱ᩠ᨯᨠᩮ, ᨸᩩᩁᩥᩈᩮ ᩅᩣᨲᩥ ᩅᨲ᩠ᨲᩩᩴ ᨿᩩᨩ᩠ᨩᨲᩥ. ᩈᩮᩈᩴ ᨲᨲ᩠ᨳ ᨲᨲ᩠ᨳ ᩅᩩᨲ᩠ᨲᨶᨿᨾᩮᩅ. ᩋᨿᩴ ᨲᩣᩅ ᨾᩣᨲᩥᨠᩣᨿ ᩅᩥᨶᩥᨧ᩠ᨨᨿᩮᩣ ᩋᨬ᩠ᨬᨲ᩠ᨳᩣᨸᩥ ᨿᨳᩣᩈᨾ᩠ᨽᩅᩴ ᨿᩮᩣᨩᩮᨲ᩠ᩅᩣ ᨴᩦᨸᩮᨲᨻ᩠ᨻᩮᩣ.

ᩈᩣᩁᩥᨸᩩᨲ᩠ᨲᨻᩮᩃᨭ᩠ᨮᩈᩦᩈᩣᨶᨶ᩠ᨴᩣᨴᨿᩮᩣᨸᩥ ᩈᩥᨠ᩠ᨡᩣᨸᨴᨸᨬ᩠ᨬᨲ᩠ᨲᩥᨠᩣᩁᨱᨲ᩠ᨲᩣ ᨧ ᩌᨸᨲ᩠ᨲᩥᩌᨸᨩ᩠ᨩᨶᨲᩮᩣ ᨧ ᨠᩈ᩠ᨾᩣ ᨾᩉᩣᩅᩥᨽᨦ᩠ᨣᩮ ᨬᨲ᩠ᨲᩥᨧᨲᩩᨲ᩠ᨳᩏᨸᩈᨾ᩠ᨸᨴᩣᨿᩮᩅ ᩌᨣᨲᩣᨲᩥ? ᨸᨭᩥᨠ᩠ᨡᩥᨲ᩠ᨲᩣᨿ ᩈᩁᨱᨣᨾᨶᩪᨸᩈᨾ᩠ᨸᨴᩣᨿ ᩋᨶᩩᨬ᩠ᨬᩣᨲᨸ᩠ᨸᩈᨦ᩠ᨣᨽᨿᩣᨲᩥ ᩏᨸᨲᩥᩔᨲ᩠ᨳᩮᩁᩮᩣ. ᩌᨸᨲ᩠ᨲᩥᨿᩣ ᨽᨻ᩠ᨻᨲᩴ ᩈᨶ᩠ᨵᩣᨿ ᨲᩈ᩠ᨾᩥᨾ᩠ᨸᩥ ᩅᩩᨲ᩠ᨲᩮ ᨸᩩᨻ᩠ᨻᩮ ᨸᨭᩥᨠ᩠ᨡᩥᨲ᩠ᨲᩣᨸᩥ ᨽᨣᩅᨲᩣ ᨸᩩᨶ ᩋᨶᩩᨬ᩠ᨬᩣᨲᩣᨲᩥ ᨽᩥᨠ᩠ᨡᩪᨶᩴ ᨾᩥᨧ᩠ᨨᩣᨣᩣᩉᩮᩣ ᩅᩣ ᩅᩥᨾᨲᩥ ᩅᩣ ᩏᨸ᩠ᨸᨩ᩠ᨩᨲᩥ, ᨲᩈ᩠ᨾᩣ ᨶ ᩅᩩᨲ᩠ᨲᩣᨲᩥ ᩅᩩᨲ᩠ᨲᩴ ᩉᩮᩣᨲᩥ.

‘‘ᩋᨵᨾ᩠ᨾᨠᨾ᩠ᨾᩴ ᩅᨣ᩠ᨣᨠᨾ᩠ᨾ’’ᨲᩥ (ᨾᩉᩣᩅ. ᪓᪘᪗) ᩅᨧᨶᨲᩮᩣ ᨠᩩᨸ᩠ᨸᨠᨾ᩠ᨾᨾ᩠ᨸᩥ ᨠᨲ᩠ᨳᨧᩥ ‘‘ᨠᨾ᩠ᨾ’’ᨶ᩠ᨲᩥ ᩅᩩᨧ᩠ᨧᨲᩥ, ᨲᩈ᩠ᨾᩣ ‘‘ᩋᨠᩩᨸ᩠ᨸᩮᨶᩣ’’ᨲᩥ ᩅᩩᨲ᩠ᨲᩴ. ᨿᩈ᩠ᨾᩣ ᩋᨠᩩᨸ᩠ᨸᨠᨾ᩠ᨾᨾ᩠ᨸᩥ ᩑᨠᨧ᩠ᨧᩴ ᨶ ᨮᩣᨶᩣᩁᩉᩴ, ᨿᩮᨶ ᩋᨸᨲ᩠ᨲᩮᩣ ᩒᩈᩣᩁᨱᩴ ᩈᩩᩒᩈᩣᩁᩥᨲᩮᩣᨲᩥ ᩅᩩᨧ᩠ᨧᨲᩥ, ᨲᩈ᩠ᨾᩣ ‘‘ᨮᩣᨶᩣᩁᩉᩮᨶᩣ’’ᨲᩥ ᩅᩩᨲ᩠ᨲᩴ. ᨿᨴᩥ ᩑᩅᩴ ‘‘ᨮᩣᨶᩣᩁᩉᩮᨶᩣ’’ᨲᩥ ᩍᨴᨾᩮᩅ ᩅᨲ᩠ᨲᨻ᩠ᨻᩴ ᩍᨾᩥᨶᩣ ᩋᨠᩩᨸ᩠ᨸᩈᩥᨴ᩠ᨵᩥᨲᩮᩣᨲᩥ ᨧᩮ? ᨶ, ᩋᨭ᩠ᨮᩣᨶᩣᩁᩉᩮᨶ ᩋᨠᩩᨸ᩠ᨸᩮᨶ ᩏᨸᩈᨾ᩠ᨸᨶ᩠ᨶᩮᩣ ᩍᨾᩈ᩠ᨾᩥᩴ ᩋᨲ᩠ᨳᩮ ᨶ ᩋᨵᩥᨸ᩠ᨸᩮᨲᩮᩣ ᩋᨶᩥᨭ᩠ᨮᨸ᩠ᨸᩈᨦ᩠ᨣᨲᩮᩣ. ᨴ᩠ᩅᩦᩉᩥ ᨸᨶᩮᨲᩮᩉᩥ ᩑᨠᨲᩮᩣ ᩅᩩᨲ᩠ᨲᩮᩉᩥ ᩋᨿᨾᨲ᩠ᨳᩮᩣ ᨸᨬ᩠ᨬᩣᨿᨲᩥ – ᨠᩮᩅᩃᩴ ᨲᩮᨶ ᩋᨠᩩᨸ᩠ᨸᩮᨶ ᩏᨸᩈᨾ᩠ᨸᨶ᩠ᨶᩮᩣ ᩋᨿᨾ᩠ᨸᩥ ᩍᨾᩈ᩠ᨾᩥᩴ ᩋᨲ᩠ᨳᩮ ᩋᨵᩥᨸ᩠ᨸᩮᨲᩮᩣ ᨽᩥᨠ᩠ᨡᩪᨲᩥ, ᨮᩣᨶᩣᩁᩉᩮᨶ ᨧ ᩋᨠᩩᨸ᩠ᨸᩮᨶ ᨧ ᩏᨸᩈᨾ᩠ᨸᨶ᩠ᨶᩮᩣ ᩋᨿᨾ᩠ᨸᩥ ᩍᨾᩈ᩠ᨾᩥᩴ ᩋᨲ᩠ᨳᩮ ᩋᨵᩥᨸ᩠ᨸᩮᨲᩮᩣ ᨽᩥᨠ᩠ᨡᩪᨲᩥ, ᨠᩩᨸ᩠ᨸᩮᨶ ᩏᨸᩈᨾ᩠ᨸᨶ᩠ᨶᩮᩣ ᨶᩣᨵᩥᨸ᩠ᨸᩮᨲᩮᩣᨲᩥ.

‘‘ᨸᨭᩥᩈᨶ᩠ᨵᩥᨣ᩠ᨣᩉᨱᨲᩮᩣ ᨸᨭ᩠ᨮᩣᨿ ᩋᨸᩁᩥᨸᩩᨱ᩠ᨱᩅᩦᩈᨲᩥᩅᩔᩮᩣ’’ᨲᩥ ᩅᩩᨲ᩠ᨲᨲ᩠ᨲᩣ ᩒᨸᨸᩣᨲᩥᨠᨬ᩠ᨧᩣᨲᩥ ᩈᩮᩣᩊᩈᩅᩔᩩᨴ᩠ᨴᩮᩈᩥᨠᩣ ᩒᨸᨸᩣᨲᩥᨠᩣ ᨸᨭᩥᩈᨶ᩠ᨵᩥᨲᩮᩣ ᨸᨭ᩠ᨮᩣᨿ ᩋᨸᩁᩥᨸᩩᨱ᩠ᨱᩅᩦᩈᨲᩥᩅᩔᩣᨲᩥ ᩅᨴᨶ᩠ᨲᩥ. ‘ᩈᩮᩣᩊᩈᩅᩔᩩᨴ᩠ᨴᩮᩈᩥᨠᩣ ᩉᩮᩣᨶ᩠ᨲᩦ’ᨲᩥ ᩅᩩᨲ᩠ᨲᨲ᩠ᨲᩣ ᨸᩩᨶ ᨧᨲ᩠ᨲᩣᩁᩥ ᩅᩔᩣᨶᩥ ᩍᨧ᩠ᨨᩥᨲᨻ᩠ᨻᩣᨶᩥ, ‘ᨸᨭᩥᩈᨶ᩠ᨵᩥᨣ᩠ᨣᩉᨱᨲᩮᩣ ᨸᨭ᩠ᨮᩣᨿᩣ’ᨲᩥ ᩍᨴᩴ ᨣᨻ᩠ᨽᩈᩮᨿ᩠ᨿᨠᩣᨶᩴ ᩅᩈᩮᨶ ᩅᩩᨲ᩠ᨲ’’ᨶ᩠ᨲᩥ ᩑᨠᩮ. ‘‘ᨠᩮᨧᩥ ᩅᨴᨶ᩠ᨲᩦ’’ᨲᩥ ᨿᨲ᩠ᨳ ᨿᨲ᩠ᨳ ᩃᩥᨡᩦᨿᨲᩥ, ᨲᨲ᩠ᨳ ᨲᨲ᩠ᨳ ᩅᩥᨧᩣᩁᩮᨲ᩠ᩅᩣ ᩋᨲ᩠ᨳᩴ ᩈᩩᨭ᩠ᨮᩩ ᩏᨸᩃᨠ᩠ᨡᨿᩮ. ᩒᨸᨠ᩠ᨠᨾᩥᨠᩮ ᨸᨱ᩠ᨯᨠᨽᩣᩅᩮᩣ ᩌᩁᩩᩊ᩠ᩉᨶᨿᩮᨶ ᩅᩮᨴᩥᨲᨻ᩠ᨻᩮᩣ. ‘‘ᨸᨠ᩠ᨡᨸᨱ᩠ᨯᨠᩮᩣ ᩋᨸᨱ᩠ᨯᨠᨸᨠ᩠ᨡᩮ ᨸᨻ᩠ᨻᩣᨩᩮᨲ᩠ᩅᩣ ᨸᨱ᩠ᨯᨠᨸᨠ᩠ᨡᩮ ᨶᩣᩈᩮᨲᨻ᩠ᨻᩮᩣ’’ᨲᩥ (ᩅᨩᩥᩁ. ᨭᩦ. ᨾᩉᩣᩅᨣ᩠ᨣ ᪑᪐᪙) ᩃᩥᨡᩥᨲᩴ.

‘‘ᨻᩥᨶ᩠ᨴᩩᩴ ᩋᨴᨲ᩠ᩅᩣ ᨧᩮ ᨶᩥᩅᩣᩈᩮᨲᩥ, ᨳᩮᨿ᩠ᨿᩈᩴᩅᩣᩈᨠᩮᩣ ᨶ ᩉᩮᩣᨲᩦ’’ᨲᩥ ᩅᨴᨶ᩠ᨲᩥ, ᩅᩦᨾᩴᩈᩥᨲᨻ᩠ᨻᩴ. ᩃᩥᨦ᩠ᨣᩣᨶᩩᩁᩪᨸᩔᩣᨲᩥ ᩈᩣᨾᨱᩮᩁᩣᩁᩉᩔ ᩈᩴᩅᩣᩈᩔ ᩈᩣᨴᩥᨲᨲ᩠ᨲᩣᨲᩥ ᩋᨵᩥᨸ᩠ᨸᩣᨿᩮᩣ.

ᩁᩣᨩᨽᨿᩣᨴᩦᩉᩥ ᨣᩉᩥᨲᩃᩥᨦ᩠ᨣᩣᨶᩴ ‘‘ᨣᩥᩉᩦ ᨾᩴ ‘ᩈᨾᨱᩮᩣ’ᨲᩥ ᨩᩣᨶᨶ᩠ᨲᩪ’’ᨲᩥ ᩅᨬ᩠ᨧᨶᨧᩥᨲ᩠ᨲᩮ ᩈᨲᩥᨸᩥ ᨽᩥᨠ᩠ᨡᩪᨶᩴ ᩅᨬ᩠ᨧᩮᨲᩩᨠᩣᨾᨲᩣᨿ ᨧ ᨲᩮᩉᩥ ᩈᩴᩅᩈᩥᨲᩩᨠᩣᨾᨲᩣᨿ ᨧ ᩋᨽᩣᩅᩣ ᨴᩮᩣᩈᩮᩣ ᨶ ᨩᩣᨲᩮᩣᨲᩥ. ‘‘ᨿᩮᩣ ᩑᩅᩴ ᨸᨻ᩠ᨻᨩᨲᩥ, ᩈᩮᩣ ᨳᩮᨿ᩠ᨿᩈᩴᩅᩣᩈᨠᩮᩣ ᨶᩣᨾ ᩉᩮᩣᨲᩦ’’ᨲᩥ ᩅᩣ ‘‘ᩑᩅᩴ ᨠᩣᨲᩩᩴ ᨶ ᩃᨻ᩠ᨽᨲᩦ’’ᨲᩥ ᩅᩣ ‘‘ᩑᩅᩴ ᨸᨻ᩠ᨻᨩᩥᨲᩮᩣ ᩈᩣᨾᨱᩮᩁᩮᩣ ᨶ ᩉᩮᩣᨲᩦ’’ᨲᩥ ᩅᩣ ᨶ ᨩᩣᨶᩣᨲᩥ, ᩅᨭ᩠ᨭᨲᩥ. ‘‘ᨩᩣᨶᩣᨲᩥ, ᨶ ᩅᨭ᩠ᨭᨲᩦ’’ᨲᩥ ᨧ ᩃᩥᨡᩥᨲᩴ. ‘‘ᩁᩣᨩᨴᩩᨻ᩠ᨽᩥᨠ᩠ᨡᩣᨴᩥᩋᨲ᩠ᨳᩣᨿ ᨧᩦᩅᩁᩴ ᨸᩣᩁᩩᨸᩥᨲ᩠ᩅᩣ ᩈᩴᩅᩣᩈᩴ ᩈᩣᨴᩥᨿᨶ᩠ᨲᩮᩣ ᨳᩮᨿ᩠ᨿᩈᩴᩅᩣᩈᨠᩮᩣ ᩉᩮᩣᨲᩥ. ᨠᩈ᩠ᨾᩣ? ᩋᩈᩩᨴ᩠ᨵᨧᩥᨲ᩠ᨲᨲ᩠ᨲᩣ. ᨸᩩᨶ ᩈᩮᩣ ‘ᩈᩩᨴ᩠ᨵᩴ ᨻᩕᩉ᩠ᨾᨧᩁᩥᨿᩴ ᨠᩁᩥᩔᩣᨾᩥ, ᨠᩥᩴ ᩑᨲᩮᨶᩣᨲᩥ ᩅᩥᨸ᩠ᨸᨭᩥᩈᩣᩁᩮᨶ ᩅᩣ ᨸᨧ᩠ᨧᨿᩣᨴᩥᩈᩩᩃᨽᨲᩣᨿ ᩅᩣ ᨠᩁᩥᩔᩣᨾᩦ’ᨲᩥ ᩈᩩᨴ᩠ᨵᨾᩣᨶᩈᩮᩣ ᩉᩩᨲ᩠ᩅᩣ ᨿᩣᩅ ᩈᩮᩣ ᩈᩴᩅᩣᩈᩴ ᨶᩣᨵᩥᩅᩣᩈᩮᨲᩥ, ᨲᩣᩅ ᨳᩮᨿ᩠ᨿᩈᩴᩅᩣᩈᨠᩮᩣ ᨶ ᩉᩮᩣᨲᩥ. ᩑᩅᩴ ᩈᩩᨴ᩠ᨵᨧᩥᨲ᩠ᨲᩩᨸ᩠ᨸᨲ᩠ᨲᩥᨲᩮᩣ ᨸᨭ᩠ᨮᩣᨿ ᩈᩴᩅᩣᩈᩴ ᩈᩣᨴᩥᨿᨲᩥ ᨧᩮ, ᨳᩮᨿ᩠ᨿᩈᩴᩅᩣᩈᨠᩮᩣ ᩉᩮᩣᨲᩦᨲᩥ ᩋᨵᩥᨸ᩠ᨸᩮᨲᩮᩣ. ᩍᨲᩁᨳᩣ ᩈᨻ᩠ᨻᩴ ᩅᩥᩁᩩᨩ᩠ᨫᨲᩦ’’ᨲᩥ ᩑᨠᩮ.

‘‘ᨶᩣᨽᩥᨸᩁᩣᨾᩣᩈᩣᨴᩥᨶᩣ ᨩᩣᨲᩮᩣ ᨲᨳᩣᩁᩪᨸᩴ ᨸᩥᨲᩁᩴ ᨥᩣᨲᩮᨲᩥ ᨧᩮ, ᨸᩥᨲᩩᨥᩣᨲᨠᩮᩣ ᩉᩮᩣᨲᩦ’’ᨲᩥ ᩅᨴᨶ᩠ᨲᩥ.

ᨿᩮᩣ ᨸᨶ ᨠᩣᨿᩈᩴᩈᨣ᩠ᨣᩮᨶ ᩈᩦᩃᩅᩥᨶᩣᩈᩴ ᨸᩣᨸᩮᨲᩥ, ᨶ ᩈᩮᩣ ᨽᩥᨠ᩠ᨡᩩᨶᩥᨴᩪᩈᨠᩮᩣ ‘‘ᨲᩥᨱ᩠ᨱᩴ ᨾᨣ᩠ᨣᩣᨶ’’ᨶ᩠ᨲᩥ ᩅᨧᨶᨲᩮᩣ. ᨽᩥᨠ᩠ᨡᩩᨶᩥᩴ ᨸᨶ ᩑᨠᨲᩮᩣᩏᨸᩈᨾ᩠ᨸᨶ᩠ᨶᩴ ᨴᩪᩈᩮᨲ᩠ᩅᩣᨸᩥ ᨽᩥᨠ᩠ᨡᩩᨶᩥᨴᩪᩈᨠᩮᩣ ᩉᩮᩣᨲᩥ, ᩈᩮᩣᨸᩥ ᨸᩣᩁᩣᨩᩥᨠᩮᩣ ᩉᩮᩣᨲᩦᨲᩥ ᩅᩥᨶᩥᨧ᩠ᨨᨿᩮᩣ. ᨽᩥᨠ᩠ᨡᩩᨶᩦ ᨸᨶ ᨳᩮᨿ᩠ᨿᩈᩴᩅᩣᩈᩥᨠᩣ, ᨾᩣᨲᩩᨸᩥᨲᩩᩋᩁᩉᨶ᩠ᨲᨥᩣᨲᩥᨠᩣ, ᩃᩮᩣᩉᩥᨲᩩᨸ᩠ᨸᩣᨴᩥᨠᩣ, ᨲᩥᨲ᩠ᨳᩥᨿᨸᨠ᩠ᨠᨶ᩠ᨲᩥᨠᩣ ᨧ ᩉᩮᩣᨲᩥ, ᩋᨭ᩠ᨮᨠᨳᩣᩈᩩ ᩋᨶᩣᨣᨲᩴ ᩅᩥᨶᨿᨵᩁᩣ ᩈᨾ᩠ᨸᨭᩥᨧ᩠ᨨᨶ᩠ᨲᩥ.

‘‘ᩈᨾ᩠ᨸᨩᩣᨶᨾᩩᩈᩣᩅᩣᨴᩮ ᨸᩣᨧᩥᨲ᩠ᨲᩥᨿ’’ᨶ᩠ᨲᩥ (ᨸᩣᨧᩥ. ᪒) ᩅᩩᨲ᩠ᨲᩴ ᨾᩁᩥᨿᩣᨴᩴ ᩋᩅᩦᨲᩥᨠ᩠ᨠᨾᨶ᩠ᨲᩮᩣ ᨲᩈ᩠ᨾᩥᨬ᩠ᨧ ᩈᩥᨠ᩠ᨡᩣᨸᨴᩮ ᩈᩥᨠ᩠ᨡᨲᩦᨲᩥ ᩅᩩᨧ᩠ᨧᨲᩥ. ᩈᩥᨠ᩠ᨡᩣᨸᨴᨶ᩠ᨲᩥ ᩋᩈᨽᩣᩅᨵᨾ᩠ᨾᩮᩣ ᩈᨦ᩠ᨠᩮᨲᩮᩣᩅ, ᩍᨵ ᨸᨬ᩠ᨬᨲ᩠ᨲᩥ ᩋᨵᩥᨸ᩠ᨸᩮᨲᩣ. ‘‘ᨾᩮᨳᩩᨶᩈᩴᩅᩁᩔᩮᨲᩴ ᩋᨵᩥᩅᨧᨶ’’ᨶ᩠ᨲᩥ ᩈᨾᨶ᩠ᨲᨸᩣᩈᩣᨴᩥᨠᩣᨿᩴ ᩅᩩᨲ᩠ᨲᩴ, ᨲᩴ ᨸᨶᨲ᩠ᨳᩴ ᩈᨶ᩠ᨵᩣᨿᩣᨲᩥ ᩃᩥᨡᩥᨲᩴ. ᩈᩥᨠ᩠ᨡᩣᨲᩥ ᨲᩴ ᨲᩴ ᩈᩥᨠ᩠ᨡᩣᨸᨴᩴ, ᩈᩥᨠ᩠ᨡᨶᨽᩣᩅᩮᨶ ᨸᩅᨲ᩠ᨲᨧᩥᨲ᩠ᨲᩩᨸ᩠ᨸᩣᨴᩮᩣ. ᩈᩣᨩᩦᩅᨶ᩠ᨲᩥ ᨸᨬ᩠ᨬᨲ᩠ᨲᩥ. ᨲᨴᨲ᩠ᨳᨴᩔᨶᨲ᩠ᨳᩴ ᨸᩩᨻ᩠ᨻᩮ ‘‘ᨾᩮᨳᩩᨶᩈᩴᩅᩁᩔᩮᨲᩴ ᩋᨵᩥᩅᨧᨶ’’ᨶ᩠ᨲᩥ ᩅᩩᨲ᩠ᨲᩴ. ᨿᩈ᩠ᨾᩣ ᩈᩥᨠ᩠ᨡᩣᨿ ᨣᩩᨱᩈᨾ᩠ᨾᨲᩣᨿ ᨸᩩᨬ᩠ᨬᩈᨾ᩠ᨾᨲᩣᨿ ᨲᨶ᩠ᨲᩥᨿᩣ ᩋᨽᩣᩅᨲᩮᩣ ᩃᩮᩣᨠᩔ ᨴᩩᨻ᩠ᨻᩃ᩠ᨿᩣᩅᩥᨠᨾ᩠ᨾᩴ ᨲᨲ᩠ᨳ ᨶ ᩈᨾ᩠ᨽᩅᨲᩥ. ᨸᨲ᩠ᨳᨶᩦᨿᩣ ᩉᩥ ᩈᩣ, ᨲᩈ᩠ᨾᩣ ‘‘ᨿᨬ᩠ᨧ ᩈᩣᨩᩦᩅᩴ ᩈᨾᩣᨸᨶ᩠ᨶᩮᩣ, ᨲᩈ᩠ᨾᩥᩴ ᨴᩩᨻ᩠ᨻᩃᨽᩣᩅᩴ ᩋᨸ᩠ᨸᨠᩣᩈᩮᨲ᩠ᩅᩣ’’ᨲᩥ ᩅᩩᨲ᩠ᨲᩴ. ᩌᨱᩣᨿ ᩉᩥ ᨴᩩᨻ᩠ᨻᩃ᩠ᨿᩴ ᩈᨾ᩠ᨽᩅᨲᩦᨲᩥ ᩏᨸᨲᩥᩔᩮᩣ. ᨴᩩᨻ᩠ᨻᩃ᩠ᨿᩣᩅᩥᨠᨾ᩠ᨾᨸᨴᩴ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᨸᨴᩔ ᨻ᩠ᨿᨬ᩠ᨩᨶᩈᩥᩃᩥᨭ᩠ᨮᨲᩣᨿ ᩅᩣ ᨸᩁᩥᩅᩣᩁᨠᨽᩣᩅᩮᨶ ᩅᩣ ᩅᩮᨴᩥᨲᨻ᩠ᨻᩴ. ᩋᨳ ᩅᩣ ᨿᩈ᩠ᨾᩣ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩔ ᩑᨠᨧ᩠ᨧᩴ ᨴᩩᨻ᩠ᨻᩃ᩠ᨿᩣᩅᩥᨠᨾ᩠ᨾᩴ ᩋᨠᨲᩴ ᩉᩮᩣᨲᩥ, ᨲᩈ᩠ᨾᩣ ᨲᩴ ᩈᨶ᩠ᨵᩣᨿ ‘‘ᩈᩥᨠ᩠ᨡᩴ ᩋᨸᨧ᩠ᨧᨠ᩠ᨡᩣᨿᩣ’’ᨲᩥ ᨸᨴᩔ ᩋᨲ᩠ᨳᩴ ᩅᩥᩅᩁᨶ᩠ᨲᩮᩣ ‘‘ᨴᩩᨻ᩠ᨻᩃ᩠ᨿᩴ ᩋᨶᩣᩅᩥᨠᨲ᩠ᩅᩣ’’ᨲᩥ ᩌᩉ. ᨲᨲ᩠ᨳ ᩈᩥᨿᩣ ᨿᩈ᩠ᨾᩣ ᨶ ᩈᨻ᩠ᨻᩴ ᨴᩩᨻ᩠ᨻᩃ᩠ᨿᩣᩅᩥᨠᨾ᩠ᨾᩴ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩴ, ᨲᩈ᩠ᨾᩣ ‘‘ᨴᩩᨻ᩠ᨻᩃ᩠ᨿᩴ ᩋᨶᩣᩅᩥᨠᨲ᩠ᩅᩣ’’ᨲᩥ ᨸᨮᨾᩴ ᩅᨲ᩠ᩅᩣ ᨲᩔ ᩋᨲ᩠ᨳᨶᩥᨿᨾᨲ᩠ᨳᩴ ‘‘ᩈᩥᨠ᩠ᨡᩴ ᩋᨸᨧ᩠ᨧᨠ᩠ᨡᩣᨿᩣ’’ᨲᩥ ᩅᨲ᩠ᨲᨻ᩠ᨻᨶ᩠ᨲᩥ? ᨲᩴ ᨶ, ᨠᩈ᩠ᨾᩣ? ᩋᨲ᩠ᨳᩣᨶᩩᨠ᩠ᨠᨾᩣᨽᩣᩅᨲᩮᩣ. ‘‘ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ’’ᨲᩥ ᩉᩥ ᩅᩩᨲ᩠ᨲᨲ᩠ᨲᩣ ‘‘ᨿᩴ ᩈᩥᨠ᩠ᨡᩴ ᩈᨾᩣᨸᨶ᩠ᨶᩮᩣ, ᨲᩴ ᩋᨸᨧ᩠ᨧᨠ᩠ᨡᩣᨿ, ᨿᨬ᩠ᨧ ᩈᩣᨩᩦᩅᩴ ᩈᨾᩣᨸᨶ᩠ᨶᩮᩣ, ᨲᨲ᩠ᨳ ᨴᩩᨻ᩠ᨻᩃ᩠ᨿᩴ ᩋᨶᩣᩅᩥᨠᨲ᩠ᩅᩣ’’ᨲᩥ ᩅᩩᨧ᩠ᨧᨾᩣᨶᩮ ᩋᨶᩩᨠ᩠ᨠᨾᩮᨶᩮᩅ ᩋᨲ᩠ᨳᩮᩣ ᩅᩩᨲ᩠ᨲᩮᩣ ᩉᩮᩣᨲᩥ, ᨶ ᩋᨬ᩠ᨬᨳᩣ, ᨲᩈ᩠ᨾᩣ ᩍᨴᨾᩮᩅ ᨸᨮᨾᩴ ᩅᩩᨲ᩠ᨲᨶ᩠ᨲᩥ. ᨲᩮᩈᩴᨿᩮᩅᩣᨲᩥ ᨧᩩᨴ᩠ᨴᩈᨶ᩠ᨶᩴ.

‘‘ᩈᩥᨠ᩠ᨡᩴ ᩋᨸᨧ᩠ᨧᨠ᩠ᨡᩣᨿᩣ’’ᨲᩥ ᩈᨻ᩠ᨻᩈᩥᨠ᩠ᨡᩣᨸᨴᩣᨶᩴ ᩈᩣᨵᩣᩁᨱᨲ᩠ᨳᩴ ‘‘ᩋᨿᨾᩮᨲ᩠ᨳ ᩋᨶᩩᨸᨬ᩠ᨬᨲ᩠ᨲᩦ’’ᨲᩥ ᩅᩩᨲ᩠ᨲᩴ.

ᨸᩅᩮᩈᨶᩴ ᨶᩣᨾ ᩋᨦ᩠ᨣᨩᩣᨲᩴ ᨸᩅᩮᩈᩮᨶ᩠ᨲᩔ ᩋᨦ᩠ᨣᨩᩣᨲᩮᨶ ᩈᨾ᩠ᨹᩩᩈᨶᩴ. ᨸᩅᩥᨭ᩠ᨮᩴ ᨶᩣᨾ ᨿᩣᩅ ᨾᩪᩃᩴ ᨸᩅᩮᩈᩮᨶ᩠ᨲᩔ ᩅᩥᨸ᩠ᨸᨠᨲᨠᩣᩃᩮᩣ ᩅᩣᨿᩣᨾᨠᩣᩃᩮᩣ. ᩈᩩᨠ᩠ᨠᩅᩥᩈᨭ᩠ᨮᩥᩈᨾᨿᩮ ᩋᨦ᩠ᨣᨩᩣᨲᩴ ᨮᩥᨲᩴ ᨶᩣᨾ. ᩏᨴ᩠ᨵᩁᨱᩴ ᨶᩣᨾ ᨶᩦᩉᩁᨱᨠᩣᩃᩮᩣ. ᩅᩥᨶᨿᨣᨱ᩠ᨮᩥᨸᨴᩮ ᨸᨶ ‘‘ᩅᩣᨿᩣᨾᨲᩮᩣ ᩒᩁᨾᩥᨲ᩠ᩅᩣ ᨮᩣᨶᩴ ᨮᩥᨲᩴ ᨶᩣᨾᩣ’’ᨲᩥ ᩅᩩᨲ᩠ᨲᩴ, ᨲᩴ ᩋᩈᨦ᩠ᨠᩁᨲᩮᩣ ᨴᩔᨶᨲ᩠ᨳᩴ ᩅᩩᨲ᩠ᨲᩴ. ᨸᩅᩮᩈᨶᨸᩅᩥᨭ᩠ᨮᩏᨴ᩠ᨵᩁᨱᨠᩣᩃᩮᩈᩩᨸᩥ ᩈᩩᨠ᩠ᨠᩅᩥᩈᨭ᩠ᨮᩥ ᩉᩮᩣᨲᩥᨿᩮᩅ. ᩈᩣᨴᩥᨿᨶᩴ ᨶᩣᨾ ᩈᩮᩅᨶᨧᩥᨲ᩠ᨲᩔ ᩋᨵᩥᩅᩣᩈᨶᨧᩥᨲ᩠ᨲᩔ ᩏᨸ᩠ᨸᩣᨴᨶᩴ.

ᩏᨽᨲᩮᩣᩅᩥᨽᨦ᩠ᨣᩮ ᩑᩅ ᨸᨬ᩠ᨬᨲ᩠ᨲᩣᨶᩥ ᩈᨶ᩠ᨵᩣᨿ ‘‘ᩍᨴᨬ᩠ᩉᩥ ᩈᨻ᩠ᨻᩈᩥᨠ᩠ᨡᩣᨸᨴᩣᨶᩴ ᨶᩥᨴᩣᨶ’’ᨶ᩠ᨲᩥ ᩅᩩᨲ᩠ᨲᩴ. ‘‘ᩅᩥᨶᨿᨵᩁᨸᨬ᩠ᨧᨾᩮᨶ ᨣᨱᩮᨶ ᩏᨸᩈᨾ᩠ᨸᨴᩣ’’ᨲᩥ (ᨾᩉᩣᩅ. ᪒᪕᪙) ᩅᩩᨲ᩠ᨲᨲ᩠ᨲᩣ ᩍᨵ ᨲᨲᩥᨿᩣ ᩈᩉᨿᩮᩣᨣᩮᨶ ᩅᩩᨲ᩠ᨲᩣ. ᨲᩈ᩠ᨾᩣ ᩅᩦᩈᨲᩥᨸᩥ ᨽᩥᨠ᩠ᨡᩪ ᨧᩮ ᨶᩥᩈᩥᨶ᩠ᨶᩣ, ᨸᨬ᩠ᨧᨾᩮᩣ ᩅᩥᨶᨿᨵᩁᩮᩣᩅ ᩍᨧ᩠ᨨᩥᨲᨻ᩠ᨻᩮᩣ, ᩑᩅᩴ ᩈᨲᩥ ᨸᩣᩁᩣᨩᩥᨠᩮᩣ ᨧᩮ ᩅᩥᨶᨿᨵᩁᩮᩣ, ᩏᨸᩈᨾ᩠ᨸᨴᩣᨠᨾ᩠ᨾᩴ ᨠᩮᩣᨸᩮᨲᩦᨲᩥ ᨧᩮ? ᨶ, ᨸᩁᩥᩅᩣᩁᩣᩅᩈᩣᨶᩮ ᨠᨾ᩠ᨾᩅᨣ᩠ᨣᩮ (ᨸᩁᩥ. ᪔᪘᪒ ᩌᨴᨿᩮᩣ) ᨿᩴ ᨠᨾ᩠ᨾᩅᩥᨸᨲ᩠ᨲᩥᩃᨠ᩠ᨡᨱᩴ ᩅᩩᨲ᩠ᨲᩴ, ᨲᩔ ᨲᩈ᩠ᨾᩥᩴ ᨶᨲ᩠ᨳᩥᨲᩣᨿ. ‘‘ᨠᨳᩴ ᩅᨲ᩠ᨳᩩᨲᩮᩣ ᩅᩣ ᨬᨲ᩠ᨲᩥᨲᩮᩣ ᩅᩣ ᩋᨶᩩᩔᩣᩅᨶᨲᩮᩣ ᩅᩣ ᩈᩦᨾᨲᩮᩣ ᩅᩣ ᨸᩁᩥᩈᨲᩮᩣ ᩅᩣ’’ᨲᩥ ᩑᨲ᩠ᨲᨠᩴ ᩅᩩᨲ᩠ᨲᩴ, ᨶᨶᩩ ᩋᨿᩴ ‘‘ᨸᩁᩥᩈᨲᩮᩣ ᩅᩣ’’ᨲᩥ ᩅᨧᨶᩮᨶ ᩈᨦ᩠ᨣᩉᩥᨲᩮᩣᨲᩥ ᨧᩮ? ᨶ, ‘‘ᨴ᩠ᩅᩣᨴᩈᩉᩥ ᩌᨠᩣᩁᩮᩉᩥ ᨸᩁᩥᩈᨲᩮᩣ ᨠᨾ᩠ᨾᩣᨶᩥ ᩅᩥᨸᨩ᩠ᨩᨶ᩠ᨲᩦ’’ᨲᩥ (ᨸᩁᩥ. ᪔᪘᪗) ᩈᩩᨲ᩠ᨲᩔ ᩉᩥ ᩅᩥᨽᨦ᩠ᨣᩮ ᨲᩔ ᩋᨶᩣᨾᨭ᩠ᨮᨲ᩠ᨲᩣᨲᩥ ᩋᨿᨾᨲ᩠ᨳᩮᩣ ᨿᩈ᩠ᨾᩣ ᨲᨲ᩠ᨳ ᨲᨲ᩠ᨳ ᩈᩁᩪᨸᩮᨶ ᩅᩩᨲ᩠ᨲᨸᩣᩊᩥᩅᩈᩮᨶᩮᩅ ᩈᨠ᩠ᨠᩣ ᨩᩣᨶᩥᨲᩩᩴ, ᨲᩈ᩠ᨾᩣ ᨶᨿᨾᩩᨡᩴ ᨴᩔᩮᨲ᩠ᩅᩣ ᩈᩴᨡᩥᨲ᩠ᨲᩮᩣᨲᩥ ᩃᩥᨡᩥᨲᩴ. ‘‘ᩋᨦ᩠ᨣ’’ᨶ᩠ᨲᩥ ᨸᨴᩴ ᩏᨴ᩠ᨵᩁᩥᨲ᩠ᩅᩣ ‘‘ᩈᨻ᩠ᨻᩈᩥᨠ᩠ᨡᩣᨸᨴᩮᩈᩩ ᩌᨸᨲ᩠ᨲᩦᨶᩴ ᩋᨦ᩠ᨣᩣᨶᨦ᩠ᨣᩴ ᩅᩮᨴᩥᨲᨻ᩠ᨻ’’ᨶ᩠ᨲᩥ ᩅᩩᨲ᩠ᨲᩴ, ᩍᨵ ᨸᨶ ‘‘ᩋᨦ᩠ᨣ’’ᨶ᩠ᨲᩥ ᩅᩩᨲ᩠ᨲᩴ, ᨠᩈ᩠ᨾᩣ? ᩈᨾᩩᨭ᩠ᨮᨶᩣᨴᩦᨶᩴ ᨸᩁᩥᩅᩣᩁᩣᨴᩦᩈᩩ ᩈᨦ᩠ᨡᩮᨸᩮᨶ ᩌᨣᨲᨲ᩠ᨲᩣ ᨲᨲ᩠ᨳ ᨣᩉᩮᨲ᩠ᩅᩣ ᩍᨵᩣᨸᩥ ᨶᩥᨴ᩠ᨴᩥᨭ᩠ᨮᩣᨶᩴ ᩋᨶᨦ᩠ᨣᩣᨶᩴ ᩅᩅᨲ᩠ᨳᩣᨶᩣᨽᩣᩅᨲᩮᩣ, ᩈᨻ᩠ᨻᨲ᩠ᨳ ᩈᨦ᩠ᨡᩮᨸᨲᩮᩣ ᨧ ᩅᩥᨲ᩠ᨳᩣᩁᨲᩮᩣ ᨧ ᩋᨶᨦ᩠ᨣᨲ᩠ᨲᩮ ᩅᩩᨧ᩠ᨧᨾᩣᨶᩮ ᩋᨲᩥᩅᩥᨲ᩠ᨳᩣᩁᨲᩣᨿ ᨲᩈ᩠ᨾᩥᩴ ᨲᩈ᩠ᨾᩥᩴ ᩈᩥᨠ᩠ᨡᩣᨸᨴᩮ ᩋᨶᩪᨶᩴ ᩅᨲ᩠ᨲᨻ᩠ᨻᨲᩮᩣ ᨧᩣᨲᩥ ᩅᩮᨴᩥᨲᨻ᩠ᨻᩮᩣ, ᩈᨻ᩠ᨻᩣᨸᨲ᩠ᨲᩦᨶᩴ ᩈᨦ᩠ᨣᩣᩉᨠᩅᩈᩮᨶᩣᨲᩥ ᩋᨲ᩠ᨳᩮᩣ.

ᨿᩣᨶᩥ ᩈᩥᨠ᩠ᨡᩣᨸᨴᩣᨶᩥ ‘‘ᨠᩥᩁᩥᨿᩣᨶᩦ’’ᨲᩥ ᩅᩩᨧ᩠ᨧᨶ᩠ᨲᩥ, ᨲᩮᩈᩴ ᩅᩈᩮᨶ ᨠᩣᨿᩅᩣᨧᩣ ᩈᩉ ᩅᩥᨬ᩠ᨬᨲ᩠ᨲᩥᨿᩣ ᩅᩮᨴᩥᨲᨻ᩠ᨻᩣ, ᩋᨠᩥᩁᩥᨿᩣᨶᩴ ᩅᩈᩮᨶ ᩅᩥᨶᩣ ᩅᩥᨬ᩠ᨬᨲ᩠ᨲᩥᨿᩣ ᩅᩮᨴᩥᨲᨻ᩠ᨻᩣ. ᨧᩥᨲ᩠ᨲᩴ ᨸᨶᩮᨲ᩠ᨳ ᩋᨸ᩠ᨸᨾᩣᨱᩴ ᨽᩪᨲᩣᩁᩮᩣᨧᨶᩈᨾᩩᨭ᩠ᨮᩣᨶᩔ ᨠᩥᩁᩥᨿᨲ᩠ᨲᩣ, ᩋᨧᩥᨲ᩠ᨲᨠᨲ᩠ᨲᩣ ᨧ. ᨲᨲ᩠ᨳ ᨠᩥᩁᩥᨿᩣ ᩌᨸᨲ᩠ᨲᩥᨿᩣ ᩋᨶᨦ᩠ᨣᨶ᩠ᨲᩁᨧᩥᨲ᩠ᨲᩈᨾᩩᨭ᩠ᨮᩣᨶᩣ ᩅᩮᨴᩥᨲᨻ᩠ᨻᩣ. ᩋᩅᩥᨬ᩠ᨬᨲ᩠ᨲᩥᨩᨶᨠᨾ᩠ᨸᩥ ᩑᨠᨧ᩠ᨧᩴ ᨻᩣᩉᩩᩃ᩠ᩃᨶᨿᩮᨶ ‘‘ᨠᩥᩁᩥᨿ’’ᨶ᩠ᨲᩥ ᩅᩩᨧ᩠ᨧᨲᩥ ᨿᨳᩮᩅ ᨸᨮᨾᨸᩣᩁᩣᨩᩥᨠᩴ. ᩅᩥᨬ᩠ᨬᨲ᩠ᨲᩥᨿᩣ ᩋᨽᩣᩅᩮᨸᩥ ‘‘ᩈᩮᩣ ᨧᩮ ᩈᩣᨴᩥᨿᨲᩥ, ᩌᨸᨲ᩠ᨲᩥ ᨸᩣᩁᩣᨩᩥᨠᩔ, ᨶ ᩈᩣᨴᩥᨿᨲᩥ, ᩋᨶᩣᨸᨲ᩠ᨲᩦ’’ᨲᩥ ᩉᩥ ᩅᩩᨲ᩠ᨲᩴ, ᩅᩥᨬ᩠ᨬᨲ᩠ᨲᩥᩈᨦ᩠ᨡᩣᨲᩣᨸᩥ ᨠᩥᩁᩥᨿᩣ ᩅᩥᨶᩣ ᩈᩮᩅᨶᨧᩥᨲ᩠ᨲᩮᨶ ᨶ ᩉᩮᩣᨲᩥ ᩅᩩᨲ᩠ᨲᨧᩥᨲ᩠ᨲᨩᨲ᩠ᨲᩣ, ᩅᩥᨠᩣᩁᩁᩪᨸᨲ᩠ᨲᩣ, ᨧᩥᨲ᩠ᨲᩣᨶᩩᨸᩁᩥᩅᨲ᩠ᨲᩥᨠᨲ᩠ᨲᩣ ᨧ. ᨲᩈ᩠ᨾᩣ ᨠᩥᩁᩥᨿᩣᩈᨦ᩠ᨡᩣᨲᨾᩥᨴᩴ ᩅᩥᨬ᩠ᨬᨲ᩠ᨲᩥᩁᩪᨸᩴ, ᩍᨲᩁᩴ ᨧᩥᨲ᩠ᨲᨩᩁᩪᨸᩴ ᩅᩥᨿ ᨩᨶᨠᨧᩥᨲ᩠ᨲᩮᨶ ᩅᩥᨶᩣ ᨶ ᨲᩥᨭ᩠ᨮᨲᩥ, ᩍᨲᩁᩴ ᩈᨴ᩠ᨴᩣᨿᨲᨶᩴ ᨲᩥᨭ᩠ᨮᨲᩥ, ᨲᩈ᩠ᨾᩣ ᨠᩥᩁᩥᨿᩣᨿ ᩈᨲᩥ ᩑᨠᨶ᩠ᨲᨲᩮᩣ ᨲᨩ᩠ᨩᨶᨠᩴ ᩈᩮᩅᨶᨧᩥᨲ᩠ᨲᩴ ᩋᨲ᩠ᨳᩥ ᩑᩅᩣᨲᩥ ᨠᨲ᩠ᩅᩣ ᨶ ᩈᩣᨴᩥᨿᨲᩥ, ᩋᨶᩣᨸᨲ᩠ᨲᩦᨲᩥ ᨶ ᨿᩩᨩ᩠ᨩᨲᩦᨲᩥ. ᨿᩈ᩠ᨾᩣ ᩅᩥᨬ᩠ᨬᨲ᩠ᨲᩥᨩᨶᨠᨾ᩠ᨸᩥ ᩈᨾᩣᨶᩴ ᩈᩮᩅᨶᨧᩥᨲ᩠ᨲᩴ ᨶ ᩈᨻ᩠ᨻᨠᩣᩃᩴ ᩅᩥᨬ᩠ᨬᨲ᩠ᨲᩥᩴ ᨩᨶᩮᨲᩥ, ᨲᩈ᩠ᨾᩣ ᩅᩥᨶᩣᨸᩥ ᩅᩥᨬ᩠ᨬᨲ᩠ᨲᩥᨿᩣ ᩈᨿᩴ ᩏᨸ᩠ᨸᨩ᩠ᨩᨲᩦᨲᩥ ᨠᨲ᩠ᩅᩣ ‘‘ᩈᩣᨴᩥᨿᨲᩥ, ᩌᨸᨲ᩠ᨲᩥ ᨸᩣᩁᩣᨩᩥᨠᩔᩣ’’ᨲᩥ ᩅᩩᨲ᩠ᨲᩴ. ᨶᩩᨸ᩠ᨸᨩ᩠ᨩᨲᩥ ᨧᩮ, ᨶ ᩈᩣᨴᩥᨿᨲᩥ ᨶᩣᨾ, ᨲᩔ ᩋᨶᩣᨸᨲ᩠ᨲᩥ. ᨲᩮᨶᩮᩅ ᨽᨣᩅᩣ ‘‘ᨠᩥᩴᨧᩥᨲ᩠ᨲᩮᩣ ᨲ᩠ᩅᩴ ᨽᩥᨠ᩠ᨡᩪ’’ᨲᩥ (ᨸᩣᩁᩣ. ᪑᪓᪕) ᨧᩥᨲ᩠ᨲᩮᨶᩮᩅ ᩌᨸᨲ᩠ᨲᩥᩴ ᨸᩁᩥᨧ᩠ᨨᩥᨶ᩠ᨴᨲᩥ, ᨶ ᨠᩥᩁᩥᨿᩣᨿᩣᨲᩥ ᩅᩮᨴᩥᨲᨻ᩠ᨻᩴ.

ᩑᨲ᩠ᨳ ᩈᨾᩩᨭ᩠ᨮᩣᨶᨣ᩠ᨣᩉᨱᩴ ᨠᨲ᩠ᨲᨻ᩠ᨻᨲᩮᩣ ᩅᩣ ᩋᨠᨲ᩠ᨲᨻ᩠ᨻᨲᩮᩣ ᩅᩣ ᨠᩣᨿᩣᨴᩥᨽᩮᨴᩣᨸᩮᨠ᩠ᨡᨾᩮᩅ ᩌᨸᨲ᩠ᨲᩥᩴ ᩌᨸᨩ᩠ᨩᨲᩥ, ᨶ ᩋᨬ᩠ᨬᨳᩣᨲᩥ ᨴᩔᨶᨸ᩠ᨸᨿᩮᩣᨩᨶᩴ. ᨲᩮᩈᩩ ᨠᩥᩁᩥᨿᩣᨣ᩠ᨣᩉᨱᩴ ᨠᩣᨿᩣᨴᩦᨶᩴ ᩈᩅᩥᨬ᩠ᨬᨲ᩠ᨲᩥᨠᩣᩅᩥᨬ᩠ᨬᨲ᩠ᨲᩥᨠᨽᩮᨴᨴᩔᨶᨸ᩠ᨸᨿᩮᩣᨩᨶᩴ. ᩈᨬ᩠ᨬᩣᨣ᩠ᨣᩉᨱᩴ ᩌᨸᨲ᩠ᨲᩥᨿᩣ ᩋᨦ᩠ᨣᩣᨶᨦ᩠ᨣᨧᩥᨲ᩠ᨲᩅᩥᩈᩮᩈᨴᩔᨶᨸ᩠ᨸᨿᩮᩣᨩᨶᩴ. ᨲᩮᨶ ᨿᩴ ᨧᩥᨲ᩠ᨲᩴ ᨠᩥᩁᩥᨿᩃᨠ᩠ᨡᨱᩮ ᩅᩣ ᩋᨠᩥᩁᩥᨿᩃᨠ᩠ᨡᨱᩮ ᩅᩣ ᩈᨶ᩠ᨶᩥᩉᩥᨲᩴ, ᨿᨲᩮᩣ ᩅᩣ ᨠᩥᩁᩥᨿᩣ ᩅᩣ ᩋᨠᩥᩁᩥᨿᩣ ᩅᩣ ᩉᩮᩣᨲᩥ, ᨶ ᨲᩴ ᩋᩅᩥᩈᩮᩈᩮᨶ ᩌᨸᨲ᩠ᨲᩥᨿᩣ ᩋᨦ᩠ᨣᩴ ᩅᩣ ᩋᨶᨦ᩠ᨣᩴ ᩅᩣ ᩉᩮᩣᨲᩥ. ᨠᩥᨶ᩠ᨲᩩ ᨿᩣᨿ ᩈᨬ᩠ᨬᩣᨿ ‘‘ᩈᨬ᩠ᨬᩣᩅᩥᨾᩮᩣᨠ᩠ᨡ’’ᨶ᩠ᨲᩥ ᩅᩩᨧ᩠ᨧᨲᩥ, ᨲᩣᨿ ᩈᨾ᩠ᨸᨿᩩᨲ᩠ᨲᩴ ᨧᩥᨲ᩠ᨲᩴ ᩋᨦ᩠ᨣᩴ, ᩍᨲᩁᩴ ᩋᨶᨦ᩠ᨣᨶ᩠ᨲᩥ ᨴᩔᩥᨲᩴ ᩉᩮᩣᨲᩥ. ᩍᨴᩣᨶᩥ ᨿᩮᨶ ᨧᩥᨲ᩠ᨲᩮᨶ ᩈᩥᨠ᩠ᨡᩣᨸᨴᩴ ᩈᨧᩥᨲ᩠ᨲᨠᩴ ᩉᩮᩣᨲᩥ, ᨲᨴᨽᩣᩅᩣ ᩋᨧᩥᨲ᩠ᨲᨠᩴ, ᨲᩮᨶ ᨲᩔ ᩋᩅᩥᩈᩮᩈᩮᨶ ᩈᩣᩅᨩ᩠ᨩᨲᩣᨿ ‘‘ᩃᩮᩣᨠᩅᨩ᩠ᨩᨾᩮᩅᩣ’’ᨲᩥ ᩅᩩᨲ᩠ᨲᩴ. ᨠᩥᨶ᩠ᨲᩩ ᩈᩣᩅᨩ᩠ᨩᩴᨿᩮᩅ ᩈᨾᩣᨶᩴ ᩑᨠᨧ᩠ᨧᩴ ᩃᩮᩣᨠᩅᨩ᩠ᨩᩴ, ᩑᨠᨧ᩠ᨧᩴ ᨸᨱ᩠ᨱᨲ᩠ᨲᩥᩅᨩ᩠ᨩᨶ᩠ᨲᩥ ᨴᩔᨶᨸ᩠ᨸᨿᩮᩣᨩᨶᩴ ᨧᩥᨲ᩠ᨲᩃᩮᩣᨠᩅᨩ᩠ᨩᨣ᩠ᨣᩉᨱᩴ. ᨧᩥᨲ᩠ᨲᨾᩮᩅ ᨿᩈ᩠ᨾᩣ ‘‘ᩃᩮᩣᨠᩅᨩ᩠ᨩ’’ᨶ᩠ᨲᩥ ᩅᩩᨧ᩠ᨧᨲᩥ, ᨲᩈ᩠ᨾᩣ ᨾᨶᩮᩣᨠᨾ᩠ᨾᨾ᩠ᨸᩥ ᩈᩥᨿᩣ ᩌᨸᨲ᩠ᨲᩦᨲᩥ ᩋᨶᩥᨭ᩠ᨮᨸ᩠ᨸᩈᨦ᩠ᨣᨶᩥᩅᩣᩁᨱᨸ᩠ᨸᨿᩮᩣᨩᨶᩴ ᨠᨾ᩠ᨾᨣ᩠ᨣᩉᨱᩴ.

ᨿᩴ ᨸᨶᩮᨲ᩠ᨳ ᩋᨠᩥᩁᩥᨿᩃᨠ᩠ᨡᨱᩴ ᨠᨾ᩠ᨾᩴ, ᨲᩴ ᨠᩩᩈᩃᨲ᩠ᨲᩥᨠᩅᩥᨶᩥᨾᩩᨲ᩠ᨲᩴ ᩈᩥᨿᩣᨲᩥ ᩋᨶᩥᨭ᩠ᨮᨸ᩠ᨸᩈᨦ᩠ᨣᨶᩥᩅᩣᩁᨱᨸ᩠ᨸᨿᩮᩣᨩᨶᩴ ᨠᩩᩈᩃᨲ᩠ᨲᩥᨠᨣ᩠ᨣᩉᨱᩴ. ᨿᩣ ᨸᨶᩮᨲ᩠ᨳ ᩋᨻ᩠ᨿᩣᨠᨲᩣᨸᨲ᩠ᨲᩥ, ᨲᩴ ᩑᨠᨧ᩠ᨧᩴ ᩋᩅᩮᨴᨶᨾ᩠ᨸᩥ ᨶᩥᩁᩮᩣᨵᩴ ᩈᨾᩣᨸᨶ᩠ᨶᩮᩣ ᩌᨸᨩ᩠ᨩᨲᩦᨲᩥ ᩅᩮᨴᨶᩣᨲ᩠ᨲᩥᨠᩴ ᩑᨲ᩠ᨳ ᨶ ᩃᨻ᩠ᨽᨲᩦᨲᩥ ᩋᨶᩥᨭ᩠ᨮᨸ᩠ᨸᩈᨦ᩠ᨣᨶᩥᩅᩣᩁᨱᨲ᩠ᨳᩴ ᩅᩮᨴᨶᩣᨲ᩠ᨲᩥᨠᨣ᩠ᨣᩉᨱᩴ. ᩈᩥᨠ᩠ᨡᩣᨸᨴᨬ᩠ᩉᩥ ᩈᨧᩥᨲ᩠ᨲᨠᨸᩩᨣ᩠ᨣᩃᩅᩈᩮᨶ ‘‘ᨲᩥᨧᩥᨲ᩠ᨲᩴ ᨲᩥᩅᩮᨴᨶ’’ᨶ᩠ᨲᩥ ᩃᨴ᩠ᨵᩅᩮᩣᩉᩣᩁᩴ ᩋᨧᩥᨲ᩠ᨲᨠᩮᨶᩣᨸᨶ᩠ᨶᨾ᩠ᨸᩥ ‘‘ᨲᩥᨧᩥᨲ᩠ᨲᩴ ᨲᩥᩅᩮᨴᨶ’’ᨾᩥᨧᩮᩅ ᩅᩩᨧ᩠ᨧᨲᩥ. ᨲᨲᩕᩥᨴᩴ ᩈᩣᨵᨠᩈᩩᨲ᩠ᨲᩴ – ‘‘ᩋᨲ᩠ᨳᩣᨸᨲ᩠ᨲᩥ ᩋᨧᩥᨲ᩠ᨲᨠᩮᩣ ᩌᨸᨩ᩠ᨩᨲᩥ ᩋᨧᩥᨲ᩠ᨲᨠᩮᩣ ᩅᩩᨭ᩠ᨮᩣᨲᩥ (ᨸᩁᩥ. ᪓᪒᪔), ᩋᨲ᩠ᨳᩣᨸᨲ᩠ᨲᩥ ᨠᩩᩈᩃᨧᩥᨲ᩠ᨲᩮᩣ ᩌᨸᨩ᩠ᨩᨲᩥ ᨠᩩᩈᩃᨧᩥᨲ᩠ᨲᩮᩣ ᩅᩩᨭ᩠ᨮᩣᨲᩦ’’ᨲᩥᩌᨴᩥ (ᨸᩁᩥ. ᪔᪗᪐). ‘‘ᩈᨧᩥᨲ᩠ᨲᨠᩴ ᩌᨸᨲ᩠ᨲᩥᨴᩦᨸᨶᩴ, ᩈᨬ᩠ᨬᩣᩅᩥᨾᩮᩣᨠ᩠ᨡᩴ ᩋᨶᩣᨸᨲ᩠ᨲᩥᨴᩦᨸᨶᩴ, ᩋᨧᩥᨲ᩠ᨲᨠᩴ ᩅᨲ᩠ᨳᩩᩋᨩᩣᨶᨶᩴ, ᨶᩮᩣᩈᨬ᩠ᨬᩣᩅᩥᨾᩮᩣᨠ᩠ᨡᩴ ᩅᩦᨲᩥᨠ᩠ᨠᨾᨶᩣᨩᩣᨶᨶᩴ. ᩍᨴᨾᩮᩅ ᨲᩮᩈᩴ ᨶᩣᨶᩣᨲ᩠ᨲ’’ᨶ᩠ᨲᩥ (ᩅᨩᩥᩁ. ᨭᩦ. ᨸᩣᩁᩣᨩᩥᨠ ᪖᪑-᪖᪖ ᨸᨠᩥᨱ᩠ᨱᨠᨠᨳᩣᩅᨱ᩠ᨱᨶᩣ) ᩃᩥᨡᩥᨲᩴ.

ᩈᨧᩥᨲ᩠ᨲᨠᨸᨠ᩠ᨡᩮᨲᩥ ᩑᨲ᩠ᨳ ᩋᨿᩴ ᨲᩣᩅ ᨣᨱ᩠ᨮᩥᨸᨴᨶᨿᩮᩣ – ᩈᨧᩥᨲ᩠ᨲᨠᨸᨠ᩠ᨡᩮᨲᩥ ᩈᩩᩁᩣᨸᩣᨶᩣᨴᩥᩋᨧᩥᨲ᩠ᨲᨠᩮ ᩈᨶ᩠ᨵᩣᨿ ᩅᩩᨲ᩠ᨲᩴ. ᩈᨧᩥᨲ᩠ᨲᨠᩮᩈᩩ ᨸᨶ ᨿᩴ ᩑᨠᨶ᩠ᨲᨾᨠᩩᩈᩃᩮᨶᩮᩅ ᩈᨾᩩᨭ᩠ᨮᩣᨲᩥ, ᨲᨬ᩠ᨧ ᩏᨽᨿᩴ ᩃᩮᩣᨠᩅᨩ᩠ᨩᩴ ᨶᩣᨾ. ᩈᩩᩁᩣᨸᩣᨶᩈ᩠ᨾᩥᨬ᩠ᩉᩥ ‘‘ᩈᩩᩁᩣ’’ᨲᩥ ᩅᩣ ‘‘ᨸᩣᨲᩩᩴ ᨶ ᩅᨭ᩠ᨭᨲᩦ’’ᨲᩥ ᩅᩣ ᨩᩣᨶᩥᨲ᩠ᩅᩣ ᨸᩥᩅᨶᩮ ᩋᨠᩩᩈᩃᨾᩮᩅᩣᨲᩥ. ᨲᨲ᩠ᨳ ‘‘ᨶ ᩅᨭ᩠ᨭᨲᩦᨲᩥ ᨩᩣᨶᩥᨲ᩠ᩅᩣ’’ᨲᩥ ᩅᩩᨲ᩠ᨲᩅᨧᨶᩴ ᨶ ᨿᩩᨩ᩠ᨩᨲᩥ ᨸᨱ᩠ᨱᨲ᩠ᨲᩥᩅᨩ᩠ᨩᩔᨸᩥ ᩃᩮᩣᨠᩅᨩ᩠ᨩᨲᩣᨸᩈᨦ᩠ᨣᨲᩮᩣ. ᩍᨾᩴ ᩋᨶᩥᨭ᩠ᨮᨸ᩠ᨸᩈᨦ᩠ᨣᩴ ᨸᩁᩥᩉᩁᩥᨲᩩᨠᩣᨾᨲᩣᨿ ᨧ ᩅᨩᩥᩁᨻᩩᨴ᩠ᨵᩥᨲ᩠ᨳᩮᩁᩮᨶ ᩃᩥᨡᩥᨲᩴ – ‘‘ᩍᨵ ‘ᩈᨧᩥᨲ᩠ᨲᨠ’ᨶ᩠ᨲᩥ ᨧ ‘ᩋᨧᩥᨲ᩠ᨲᨠ’ᨶ᩠ᨲᩥ ᨧ ᩅᩥᨧᩣᩁᨱᩣ ᩅᨲ᩠ᨳᩩᩅᩥᨩᩣᨶᨶᩮ ᩑᩅ ᩉᩮᩣᨲᩥ, ᨶ ᨸᨬ᩠ᨬᨲ᩠ᨲᩥᩅᩥᨩᩣᨶᨶᩮ. ᨿᨴᩥ ᨸᨬ᩠ᨬᨲ᩠ᨲᩥᩅᩥᨩᩣᨶᨶᩮ ᩉᩮᩣᨲᩥ, ᩈᨻ᩠ᨻᩈᩥᨠ᩠ᨡᩣᨸᨴᩣᨶᩥ ᩃᩮᩣᨠᩅᨩ᩠ᨩᩣᨶᩮᩅ ᩈᩥᨿᩩᩴ, ᨶ ᨧ ᩈᨻ᩠ᨻᩈᩥᨠ᩠ᨡᩣᨸᨴᩣᨶᩥ ᩃᩮᩣᨠᩅᨩ᩠ᨩᩣᨶᩥ. ᨲᩈ᩠ᨾᩣ ᩅᨲ᩠ᨳᩩᩅᩥᨩᩣᨶᨶᩮ ᩑᩅ ᩉᩮᩣᨲᩦᨲᩥ ᩍᨴᩴ ᨿᩩᨩ᩠ᨩᨲᩥ. ᨠᩈ᩠ᨾᩣ? ᨿᩈ᩠ᨾᩣ ᩈᩮᨡᩥᨿᩮᩈᩩ ᨸᨬ᩠ᨬᨲ᩠ᨲᩥᩅᩥᨩᩣᨶᨶᨾᩮᩅ ᨸᨾᩣᨱᩴ, ᨶ ᩅᨲ᩠ᨳᩩᨾᨲ᩠ᨲᩅᩥᨩᩣᨶᨶ’’ᨶ᩠ᨲᩥ. ᩋᨿᩴ ᨸᨶᩮᨲ᩠ᨳ ᩋᨲ᩠ᨳᩮᩣ ᩈᩥᨠ᩠ᨡᩣᨸᨴᩈᩦᩈᩮᨶ ᩌᨸᨲ᩠ᨲᩥᩴ ᨣᩉᩮᨲ᩠ᩅᩣ ᨿᩔ ᩈᩥᨠ᩠ᨡᩣᨸᨴᩔ ᩈᨧᩥᨲ᩠ᨲᨠᩔ ᨧᩥᨲ᩠ᨲᩴ ᩋᨠᩩᩈᩃᨾᩮᩅ ᩉᩮᩣᨲᩥ, ᨲᩴ ᩃᩮᩣᨠᩅᨩ᩠ᨩᩴ, ᩈᨧᩥᨲ᩠ᨲᨠᩣᨧᩥᨲ᩠ᨲᨠᩈᨦ᩠ᨡᩣᨲᩔ ᩋᨧᩥᨲ᩠ᨲᨠᩔ ᨧ ᩈᨧᩥᨲ᩠ᨲᨠᨸᨠ᩠ᨡᩮ ᨧᩥᨲ᩠ᨲᩴ ᩋᨠᩩᩈᩃᨾᩮᩅ ᩉᩮᩣᨲᩥ, ᨲᨾ᩠ᨸᩥ ᩈᩩᩁᩣᨸᩣᨶᩣᨴᩥᩃᩮᩣᨠᩅᨩ᩠ᨩᨶ᩠ᨲᩥ ᩍᨾᨾᨲ᩠ᨳᩴ ᩈᨶ᩠ᨵᩣᨿ ‘‘ᨿᩔᩣ ᩈᨧᩥᨲ᩠ᨲᨠᨸᨠ᩠ᨡᩮ ᨧᩥᨲ᩠ᨲᩴ ᩋᨠᩩᩈᩃᨾᩮᩅ ᩉᩮᩣᨲᩥ, ᩋᨿᩴ ᩃᩮᩣᨠᩅᨩ᩠ᨩᩣ ᨶᩣᨾᩣ’’ᨲᩥ ᩅᩩᨲ᩠ᨲᩴ. ‘‘ᩈᨧᩥᨲ᩠ᨲᨠᨸᨠ᩠ᨡᩮ’’ᨲᩥ ᩉᩥ ᩍᨴᩴ ᩅᨧᨶᩴ ᩋᨧᩥᨲ᩠ᨲᨠᩴ ᩈᨶ᩠ᨵᩣᨿᩣᩉ. ᨶ ᩉᩥ ᩑᨠᩴᩈᨲᩮᩣ ᩈᨧᩥᨲ᩠ᨲᨠᩣᨿ ‘‘ᩈᨧᩥᨲ᩠ᨲᨠᨸᨠ᩠ᨡᩮ’’ᨲᩥ ᩅᩥᩈᩮᩈᨶᩮ ᨸᨿᩮᩣᨩᨶᩴ ᩋᨲ᩠ᨳᩦᨲᩥ, ᩑᩅᩴ ᩈᨶ᩠ᨲᩮᨸᩥ ᩋᨶᩥᨿᨾᩮᨶ ᩅᩩᨲ᩠ᨲᨬ᩠ᨧ ᨶᩥᨿᨾᩅᩈᩮᨶ ᩑᩅ ᨣᩉᩮᨲᨻ᩠ᨻᨶ᩠ᨲᩥ ᩋᨲ᩠ᨳᩮᩣ.

ᨲᩥᩁᨧ᩠ᨨᩣᨶᩣᨶᩴ ᨸᨶᩣᨲᩥ ᨸᨶ-ᩈᨴ᩠ᨴᩮᨶ ᨳᩩᩃ᩠ᩃᨧ᩠ᨧᨿᩣᨴᩥᨠᩣᩁᩴ ᨶᩥᩅᨲ᩠ᨲᩮᨲᩥ. ᨠᩥᩁᩥᨿᩣᨲᩥ ᩑᨲ᩠ᨳ ‘‘ᨮᩥᨲᩴ ᩈᩣᨴᩥᨿᨲᩦ’’ᨲᩥ (ᨸᩣᩁᩣ. ᪕᪘) ᩅᩩᨲ᩠ᨲᨲ᩠ᨲᩣ ᨲᩴ ᨠᨳᨶ᩠ᨲᩥ ᨧᩮ? ‘‘ᩈᩣᨴᩥᨿᨲᩦ’’ᨲᩥ ᩅᩩᨲ᩠ᨲᨲ᩠ᨲᩣ ᨠᩥᩁᩥᨿᩣ ᩑᩅ. ᩑᩅᩴ ᩈᨶ᩠ᨲᩮ ‘‘ᨠᩣᨿᨠᨾ᩠ᨾᩴ ᨾᨶᩮᩣᨠᨾ᩠ᨾ’’ᨶ᩠ᨲᩥ ᩅᨲ᩠ᨲᨻ᩠ᨻᨶ᩠ᨲᩥ ᨧᩮ? ᨶ, ᨸᨧᩩᩁᩅᩮᩣᩉᩣᩁᩅᩈᩮᨶ ‘‘ᨠᩣᨿᨠᨾ᩠ᨾ’’ᨶ᩠ᨲᩥ ᩅᩩᨲ᩠ᨲᨲ᩠ᨲᩣ. ᩏᨻ᩠ᨽᨩᩣᨱᩩᨾᨱ᩠ᨯᩃᩥᨠᩣᨿ ᩃᨻ᩠ᨽᨲᩥ ᩑᩅᩣᨲᩥ ᩃᩥᨡᩥᨲᩴ. ᨸᩩᨻ᩠ᨻᩮ ᩅᩩᨲ᩠ᨲᨶᨿᩮᨶ ᩈᩴᩈᨶ᩠ᨴᩮᨲ᩠ᩅᩣ ᨣᩉᩮᨲᨻ᩠ᨻᩴ. ‘‘ᨴᩩᨶ᩠ᨶᩥᨠ᩠ᨡᩥᨲ᩠ᨲᩔ, ᨽᩥᨠ᩠ᨡᩅᩮ, ᨸᨴᨻ᩠ᨿᨬ᩠ᨩᨶᩔ ᩋᨲ᩠ᨳᩮᩣᨸᩥ ᨴᩩᨶ᩠ᨶᨿᩮᩣ ᩉᩮᩣᨲᩦ’’ᨲᩥ (ᩋ. ᨶᩥ. ᪒.᪒᪐) ᩅᨴᨶ᩠ᨲᩮᨶᩣᨸᩥ ᩋᨲ᩠ᨳᩔ ᩈᩩᨡᨣ᩠ᨣᩉᨱᨲ᩠ᨳᨾᩮᩅ ᨸᨴᨻ᩠ᨿᨬ᩠ᨩᨶᩔ ᩈᩩᨶᩥᨠ᩠ᨡᩥᨲ᩠ᨲᨽᩣᩅᩮᩣ ᩍᨧ᩠ᨨᩥᨲᩮᩣ, ᨶ ᩋᨠ᩠ᨡᩁᩅᨧᨶᩣᨿ, ᨲᩈ᩠ᨾᩣ ᩌᩉ ‘‘ᩋᨲ᩠ᨳᨬ᩠ᩉᩥ ᨶᩣᨳᩮᩣ ᩈᩁᨱᩴ ᩋᩅᩮᩣᨧᩣ’’ᨲᩥᩌᨴᩥ.

ᨸᨮᨾᨸᩣᩁᩣᨩᩥᨠᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪒. ᨴᩩᨲᩥᨿᨸᩣᩁᩣᨩᩥᨠᩅᨱ᩠ᨱᨶᩣ

ᨣᩣᨾᩣ ᩅᩣ ᩋᩁᨬ᩠ᨬᩣ ᩅᩣᨲᩥ ᩃᨠ᩠ᨡᨱᩣᨶᩩᨸᨬ᩠ᨬᨲ᩠ᨲᩥᨠᨲ᩠ᨲᩣ ᩌᨴᩥᨾ᩠ᩉᩥ ᩅᩩᨲ᩠ᨲᩣ. ᩈᨻ᩠ᨻᩈ᩠ᨾᩥᨬ᩠ᩉᩥ ᩅᩥᨶᨿᨸᩥᨭᨠᩮ ᨣᩣᨾᩮᩣ, ᨣᩣᨾᩪᨸᨧᩣᩁᩮᩣ, ᨣᩣᨾᨠ᩠ᨡᩮᨲ᩠ᨲᩴ, ᨣᩣᨾᩈᩦᨾᩣ, ᨣᩣᨾᩈᩦᨾᩪᨸᨧᩣᩁᩮᩣᨲᩥ ᨸᨬ᩠ᨧᩅᩥᨵᩮᩣ ᨣᩣᨾᨽᩮᨴᩮᩣ ᩅᩮᨴᩥᨲᨻ᩠ᨻᩮᩣ. ᨲᨳᩣ ᩌᩁᨬ᩠ᨬᨠᩈᩦᨾᩣᨿ ᩑᨠᩴ ᩋᨣᩣᨾᨠᩴ ᩋᩁᨬ᩠ᨬᩴ, ᩈᩴᩅᩥᨵᩣᨶᩈᩥᨠ᩠ᨡᩣᨸᨴᩣᨶᩴ (ᨸᩣᨧᩥ. ᪑᪘᪐ ᩌᨴᨿᩮᩣ) ᩑᨠᩴ, ᩈᨣᩣᨾᨠᩴ ᩑᨠᩴ, ᩋᩅᩥᨸ᩠ᨸᩅᩣᩈᩈᩦᨾᩣᨿ ᩑᨠᩴ, ᨣᨱᨾ᩠ᩉᩣᩒᩉᩦᨿᨶᨠᩔ (ᨸᩣᨧᩥ. ᪖᪙᪑) ᩑᨠᨶ᩠ᨲᩥ ᨸᨬ᩠ᨧᩅᩥᨵᩮᩣ ᩋᩁᨬ᩠ᨬᨽᩮᨴᩮᩣ ᩅᩮᨴᩥᨲᨻ᩠ᨻᩮᩣ. ᨲᨲ᩠ᨳ ᩋᨲ᩠ᨳᩥ ᨣᩣᨾᩮᩣ ᨶ ᨣᩣᨾᨸᩁᩥᩉᩣᩁᩴ ᨠᨲ᩠ᨳᨧᩥ ᩃᨽᨲᩥ, ᩋᨲ᩠ᨳᩥ ᨣᩣᨾᩮᩣ ᨶ ᨣᩣᨾᨠᩥᨧ᩠ᨧᩴ ᨠᩁᩮᩣᨲᩥ, ᨲᨳᩣ ᩋᨲ᩠ᨳᩥ ᩋᩁᨬ᩠ᨬᩴ ᨶ ᩋᩁᨬ᩠ᨬᨸᩁᩥᩉᩣᩁᩴ ᨠᨲ᩠ᨳᨧᩥ ᩃᨽᨲᩥ, ᩋᨲ᩠ᨳᩥ ᩋᩁᨬ᩠ᨬᩴ ᨶ ᩋᩁᨬ᩠ᨬᨠᩥᨧ᩠ᨧᩴ ᨠᩁᩮᩣᨲᩦᨲᩥ ᩋᨿᨾ᩠ᨸᩥ ᨽᩮᨴᩮᩣ ᩅᩮᨴᩥᨲᨻ᩠ᨻᩮᩣ.

ᨲᨲ᩠ᨳ ᩋᩅᩥᨸ᩠ᨸᩅᩣᩈᩈᩦᨾᩣᩈᨾ᩠ᨾᨶ᩠ᨶᨶᨠᨾ᩠ᨾᩅᩣᨧᩣᨿ ᨮᨸᩮᨲ᩠ᩅᩣ ‘‘ᨣᩣᨾᨬ᩠ᨧ ᨣᩣᨾᩪᨸᨧᩣᩁᨬ᩠ᨧᩣ’’ᨲᩥ (ᨾᩉᩣᩅ. ᪑᪔᪔) ᩑᨲ᩠ᨳ ᨣᩣᨾᩮᩣ ᨶᩣᨾ ᨸᩁᩥᨠ᩠ᨡᩥᨲ᩠ᨲᩮᩣ ᨧᩮ, ᨸᩁᩥᨠ᩠ᨡᩮᨸᩔ ᩋᨶ᩠ᨲᩮᩣ, ᩋᨸᩁᩥᨠ᩠ᨡᩥᨲ᩠ᨲᩮᩣ ᨧᩮ, ᨸᩁᩥᨠ᩠ᨡᩮᨸᩮᩣᨠᩣᩈᨲᩮᩣ ᩋᨶ᩠ᨲᩮᩣ ᩅᩮᨴᩥᨲᨻ᩠ᨻᩮᩣ. ᩋᨿᩴ ᩏᨴᩮᩣᩈᩥᨲᩈᩥᨠ᩠ᨡᩣᨸᨴᩮ ‘‘ᩋᨶ᩠ᨲᩮᩣᨣᩣᨾᩮᩣ’’ᨲᩥ (ᨸᩣᩁᩣ. ᪔᪗᪘) ᩌᨣᨲᩮᩣ. ᩈᩣᩈᨦ᩠ᨠᩈᩥᨠ᩠ᨡᩣᨸᨴᩮ ‘‘ᩋᨶ᩠ᨲᩁᨥᩁ’’ᨶ᩠ᨲᩥ (ᨸᩣᩁᩣ. ᪖᪕᪔) ᩌᨣᨲᩮᩣ ᩋᨶᩣᩈᨦ᩠ᨠᨲᩮᩣ. ᨿᨳᩣᩉ ‘‘ᩋᨶ᩠ᨲᩁᨥᩁᩮ ᨶᩥᨠ᩠ᨡᩥᨸᩮᨿ᩠ᨿᩣᨲᩥ ᩈᨾᨶ᩠ᨲᩣ ᨣᩮᩣᨧᩁᨣᩣᨾᩮ ᨶᩥᨠ᩠ᨡᩥᨸᩮᨿ᩠ᨿᩣ’’ᨲᩥ (ᨸᩣᩁᩣ. ᪖᪕᪔). ᨲᨳᩣ ᩋᨶ᩠ᨲᩁᨥᩁᨸ᩠ᨸᨭᩥᩈᩴᨿᩩᨲ᩠ᨲᩣᨶᩴ ᩈᩮᨡᩥᨿᩣᨶᩴ ᩋᨿᨾᩮᩅ ᨸᩁᩥᨧ᩠ᨨᩮᨴᩮᩣ ᩅᩮᨴᩥᨲᨻ᩠ᨻᩮᩣ. ‘‘ᨿᩣ ᨸᨶ ᨽᩥᨠ᩠ᨡᩩᨶᩦ ᩑᨠᩣ ᨣᩣᨾᨶ᩠ᨲᩁᩴ ᨣᨧ᩠ᨨᩮᨿ᩠ᨿᩣ’’ᨲᩥ (ᨸᩣᨧᩥ. ᪖᪘᪗) ᩑᨲ᩠ᨳᩣᨸᩥ ᩋᨿᨾᩮᩅ ᨸᩁᩥᨧ᩠ᨨᩮᨴᩮᩣ ᩋᨵᩥᨸ᩠ᨸᩮᨲᩮᩣ ‘‘ᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᨸᩁᩥᨠ᩠ᨡᩮᨸᩴ ᩋᨲᩥᨠ᩠ᨠᨾᨶ᩠ᨲᩥᨿᩣ, ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩏᨸᨧᩣᩁᩴ ᩋᨲᩥᨠ᩠ᨠᨾᨶ᩠ᨲᩥᨿᩣ’’ᨲᩥ ᩅᩩᨲ᩠ᨲᨲ᩠ᨲᩣ.

ᨿᩮᩈᩩ ᨸᩩᩁᩣᨱᨸᩮᩣᨲ᩠ᨳᨠᩮᩈᩩ ‘‘ᩏᨸᨧᩣᩁᩴ ᩒᨠ᩠ᨠᨾᨶ᩠ᨲᩥᨿᩣ’’ᨲᩥ ᩃᩥᨡᩥᨲᩴ, ᨲᩴ ᩅᩥᨠᩣᩃᩮ ᨣᩣᨾᨸ᩠ᨸᩅᩮᩈᨶᩈᩥᨠ᩠ᨡᩣᨸᨴᩮᩈᩩ ᩌᨧᩥᨱ᩠ᨱᩴ ᨶᨿᩴ ᨣᩉᩮᨲ᩠ᩅᩣ ᨸᨾᩣᨴᩮᨶ ᩃᩥᨡᩦᨿᨲᩥ, ᨶ ᨸᨾᩣᨱᩴ. ᨿᩮᩈᩩ ᨧ ᨸᩮᩣᨲ᩠ᨳᨠᩮᩈᩩ ᩅᩥᨠᩣᩃᩮ ᨣᩣᨾᨸ᩠ᨸᩅᩮᩈᨶᩈᩥᨠ᩠ᨡᩣᨸᨴᩔ ᩅᩥᨽᨦ᩠ᨣᩮ (ᨸᩣᨧᩥ. ᪕᪑᪓) ‘‘ᨣᩣᨾᩴ ᨸᩅᩥᩈᩮᨿ᩠ᨿᩣᨲᩥ ᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᨸᩁᩥᨠ᩠ᨡᩮᨸᩴ ᩋᨲᩥᨠ᩠ᨠᨾᨶ᩠ᨲᩔ, ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩏᨸᨧᩣᩁᩴ ᩋᨲᩥᨠ᩠ᨠᨾᨶ᩠ᨲᩔᩣ’’ᨲᩥ ᩃᩥᨡᩦᨿᨲᩥ, ᩈᩣ ᨸᨾᩣᨴᩃᩮᨡᩣ. ᩏᨸᨧᩣᩁᩴ ᩒᨠ᩠ᨠᨾᨶ᩠ᨲᩔᩣᨲᩥ ᨲᨲ᩠ᨳ ᨸᩣᨮᩮᩣ. ᩅᩩᨲ᩠ᨲᨬ᩠ᩉᩥ ᩈᨾᨶ᩠ᨲᨸᩣᩈᩣᨴᩥᨠᩣᨿᩴ ‘‘ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩏᨸᨧᩣᩁᩮᩣ ᩋᨴᩥᨶ᩠ᨶᩣᨴᩣᨶᩮ ᩅᩩᨲ᩠ᨲᨶᨿᩮᨶᩮᩅ ᩅᩮᨴᩥᨲᨻ᩠ᨻᩮᩣ’’ᨲᩥ (ᨸᩣᨧᩥ. ᩋᨭ᩠ᨮ. ᪕᪑᪒). ᩍᨵ ᨠᨦ᩠ᨡᩣᩅᩥᨲᩁᨱᩥᨿᨾ᩠ᨸᩥ ᩅᩩᨲ᩠ᨲᩴ ‘‘ᩈᨶ᩠ᨲᩴ ᨽᩥᨠ᩠ᨡᩩᩴ ᩋᨶᩣᨸᩩᨧ᩠ᨨᩥᨲ᩠ᩅᩣᨲᩥ…ᨸᩮ… ᩏᨸᨧᩣᩁᩴ ᩒᨠ᩠ᨠᨾᨶ᩠ᨲᩔᩣ’’ᨲᩥᩌᨴᩥ (ᨠᨦ᩠ᨡᩣ. ᩋᨭ᩠ᨮ. ᩅᩥᨠᩣᩃᨣᩣᨾᨸ᩠ᨸᩅᩮᩈᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ).

ᨿᩴ ᨸᨶ ᨠᨲ᩠ᨳᨧᩥ ᨸᩮᩣᨲ᩠ᨳᨠᩮ ‘‘ᨽᩥᨠ᩠ᨡᩩᨶᩥᨿᩣ ᨣᩣᨾᨶ᩠ᨲᩁᩣᨵᩥᨠᩣᩁᩮ ᩑᨠᩮᨶ ᨸᩣᨴᩮᨶ ᩍᨲᩁᩔ ᨣᩣᨾᩔ ᨸᩁᩥᨠ᩠ᨡᩮᨸᩴ ᩅᩣ ᩋᨲᩥᨠ᩠ᨠᨾᨶ᩠ᨲᩮ, ᩏᨸᨧᩣᩁᩴ ᩅᩣ ᩒᨠ᩠ᨠᨶ᩠ᨲᩮ ᨳᩩᩃ᩠ᩃᨧ᩠ᨧᨿᩴ, ᨴᩩᨲᩥᨿᩮᨶ ᩋᨲᩥᨠ᩠ᨠᨶ᩠ᨲᨾᨲ᩠ᨲᩮ, ᩒᨠ᩠ᨠᨶ᩠ᨲᨾᨲ᩠ᨲᩮ ᨧ ᩈᨦ᩠ᨥᩣᨴᩥᩈᩮᩈᩮᩣ’’ᨲᩥ ᨸᩣᨮᩮᩣ ᨴᩥᩔᨲᩥ. ᨲᨲ᩠ᨳ ‘‘ᩒᨠ᩠ᨠᨶ᩠ᨲᩮ, ᩒᨠ᩠ᨠᨶ᩠ᨲᨾᨲ᩠ᨲᩮ’’ᨲᩥ ᩑᨲᩣᨶᩥ ᨸᨴᩣᨶᩥ ᩋᨵᩥᨠᩣᨶᩥ, ᨠᩮᩅᩃᩴ ᩃᩥᨡᩥᨲᨠᩮᩉᩥ ᩋᨬ᩠ᨬᩮᩉᩥ ᩃᩥᨡᩥᨲᩣᨶᩥ. ᨠᨲ᩠ᨳᨧᩥ ᨸᩮᩣᨲ᩠ᨳᨠᩮ ‘‘ᩒᨠ᩠ᨠᨶ᩠ᨲᨾᨲ᩠ᨲᩮ ᨧᩣ’’ᨲᩥ ᨸᨴᩴ ᨶ ᨴᩥᩔᨲᩥ, ᩍᨲᩁᩴ ᨴᩥᩔᨲᩥ. ᨲᩣᨶᩥ ᨴ᩠ᩅᩮ ᨸᨴᩣᨶᩥ ᨸᩣᩊᩥᨿᩣ ᩅᩥᩁᩩᨩ᩠ᨫᨶ᩠ᨲᩥ. ‘‘ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩏᨸᨧᩣᩁᩴ ᩋᨲᩥᨠ᩠ᨠᩣᨾᩮᨶ᩠ᨲᩥᨿᩣ’’ᨲᩥ (ᨸᩣᨧᩥ. ᪖᪙᪒) ᩉᩥ ᨸᩣᩊᩥ. ᨲᨳᩣ ᩈᨾᨶ᩠ᨲᨸᩣᩈᩣᨴᩥᨠᩣᨿ (ᨸᩣᨧᩥ. ᩋᨭ᩠ᨮ. ᪖᪙᪒) ᩅᩥᩁᩩᨩ᩠ᨫᨶ᩠ᨲᩥ. ‘‘ᨸᩁᩥᨠ᩠ᨡᩮᨸᩣᩁᩉᨭ᩠ᨮᩣᨶᩴ ᩑᨠᩮᨶ ᨸᩣᨴᩮᨶ ᩋᨲᩥᨠ᩠ᨠᨾᨲᩥ, ᨳᩩᩃ᩠ᩃᨧ᩠ᨧᨿᩴ, ᨴᩩᨲᩥᨿᩮᨶ ᩋᨲᩥᨠ᩠ᨠᨾᨲᩥ, ᩈᨦ᩠ᨥᩣᨴᩥᩈᩮᩈᩮᩣ. ᩋᨸᩥᨧᩮᨲ᩠ᨳ ᩈᨠᨣᩣᨾᨲᩮᩣ…ᨸᩮ… ᩑᨠᩮᨶ ᨸᩣᨴᩮᨶ ᩍᨲᩁᩔ ᨣᩣᨾᩔ ᨸᩁᩥᨠ᩠ᨡᩮᨸᩮ ᩅᩣ ᩏᨸᨧᩣᩁᩮ ᩅᩣ ᩋᨲᩥᨠ᩠ᨠᨶ᩠ᨲᩮ ᨳᩩᩃ᩠ᩃᨧ᩠ᨧᨿᩴ, ᨴᩩᨲᩥᨿᩮᨶ ᩋᨲᩥᨠ᩠ᨠᨶ᩠ᨲᨾᨲ᩠ᨲᩮ ᩈᨦ᩠ᨥᩣᨴᩥᩈᩮᩈᩮᩣ’’ᨲᩥ (ᨸᩣᨧᩥ. ᩋᨭ᩠ᨮ. ᪖᪙᪒) ᩉᩥ ᩅᩩᨲ᩠ᨲᩴ.

ᨣᨱ᩠ᨮᩥᨸᨴᩮ ᨧᩔ ‘‘ᨸᩁᩥᨠ᩠ᨡᩮᨸᩴ ᩋᨲᩥᨠ᩠ᨠᩣᨾᩮᨶ᩠ᨲᩥᨿᩣ’’ᨲᩥ ᩅᨲ᩠ᩅᩣ ‘‘ᩏᨸᨧᩣᩁᩮᨸᩥ ᩑᩈᩮᩅ ᨶᨿᩮᩣ’’ᨲᩥ ᩅᩩᨲ᩠ᨲᩴ. ᩋᨶᩩᨣᨱ᩠ᨮᩥᨸᨴᩮ ᨧ ‘‘ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩏᨸᨧᩣᩁᩴ ‘ᩒᨠ᩠ᨠᨾᨶ᩠ᨲᩥᨿᩣ’ᨲᩥᨸᩥ ᨸᩮᩣᨲ᩠ᨳᨠᩮᩈᩩ ᩑᨠᨧ᩠ᨧᩮᩈᩩ ᨴᩥᩔᨲᩥ, ᨲᩴ ᨶ ᨣᩉᩮᨲᨻ᩠ᨻ’’ᨶ᩠ᨲᩥ ᩅᩩᨲ᩠ᨲᩴ. ᩋᨸᩁᨾ᩠ᨸᩥ ᩅᩩᨲ᩠ᨲᩴ ‘‘ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩏᨸᨧᩣᩁᩴ ‘ᩋᨲᩥᨠ᩠ᨠᩣᨾᩮᨶ᩠ᨲᩥᨿᩣ’ᨲᩥ ᩅᨧᨶᩮᨶᩣᨸᩥ ᩑᩅᩴ ᩅᩮᨴᩥᨲᨻ᩠ᨻᩴ – ᩅᩥᨠᩣᩃᩮ ᨣᩣᨾᨸ᩠ᨸᩅᩮᩈᨶᩮ ᨴ᩠ᩅᩥᨶ᩠ᨶᩴ ᩃᩮᨯ᩠ᨯᩩᨸᩣᨲᩣᨶᩴ ᩑᩅ ᩅᩈᩮᨶ ᩏᨸᨧᩣᩁᩮᩣ ᨸᩁᩥᨧ᩠ᨨᩥᨶ᩠ᨴᩥᨲᨻ᩠ᨻᩮᩣ, ᩍᨲᩁᨳᩣ ᨿᨳᩣ ᩑᨲ᩠ᨳ ᨸᩁᩥᨠ᩠ᨡᩮᨸᩣᩁᩉᨭ᩠ᨮᩣᨶᩴ ᨸᩁᩥᨠ᩠ᨡᩮᨸᩴ ᩅᩥᨿ ᨠᨲ᩠ᩅᩣ ‘ᩋᨲᩥᨠ᩠ᨠᩣᨾᩮᨶ᩠ᨲᩥᨿᩣ’ᨲᩥ ᩅᩩᨲ᩠ᨲᩴ, ᩑᩅᩴ ᨲᨲ᩠ᨳᩣᨸᩥ ‘ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩏᨸᨧᩣᩁᩴ ᩋᨲᩥᨠ᩠ᨠᩣᨾᩮᨶ᩠ᨲᩔᩣ’ᨲᩥ ᩅᨴᩮᨿ᩠ᨿ. ᨿᩈ᩠ᨾᩣ ᨸᨶ ᨲᨲ᩠ᨳ ᨸᩁᩥᨠ᩠ᨡᩮᨸᩣᩁᩉᨭ᩠ᨮᩣᨶᨲᩮᩣ ᩏᨲ᩠ᨲᩁᩥᨾᩮᨠᩮᩣ ᩃᩮᨯ᩠ᨯᩩᨸᩣᨲᩮᩣ ᩏᨸᨧᩣᩁᩮᩣᨲᩥ ᩋᨵᩥᨸ᩠ᨸᩮᨲᩮᩣ. ᨲᩈ᩠ᨾᩣ ᨲᨴᨲ᩠ᨳᨴᩦᨸᨶᨲ᩠ᨳᩴ ‘ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩏᨸᨧᩣᩁᩴ ᩒᨠ᩠ᨠᨾᨶ᩠ᨲᩔᩣ’ᨲᩥ ᩅᩩᨲ᩠ᨲ’’ᨶ᩠ᨲᩥ.

ᨿᩴ ᨸᨶ ᩋᨶ᩠ᨵᨠᨭ᩠ᨮᨠᨳᩣᨿᩴ ᨸᩁᩥᨠ᩠ᨡᩮᨸᩣᩁᩉᨭ᩠ᨮᩣᨶᩴᨿᩮᩅ ᩏᨸᨧᩣᩁᨶ᩠ᨲᩥ ᩈᩃ᩠ᩃᨠ᩠ᨡᩮᨲ᩠ᩅᩣ ‘‘ᨸᩁᩥᨠ᩠ᨡᩮᨸᨸᩋᨠ᩠ᨡᩮᨸᩣᩁᩉᨭ᩠ᨮᩣᨶᩣᨶᩴ ᨶᩥᨶ᩠ᨶᩣᨶᩣᨠᩁᨱᨴᩦᨸᨶᨲ᩠ᨳᩴ ᩏᨸᨧᩣᩁᩴ ᩒᨠ᩠ᨠᨾᨶ᩠ᨲᩔᩣ’’ᨲᩥ ᩅᩩᨲ᩠ᨲᩴ, ᨸᩣᩊᩥᩅᩥᩈᩮᩈᨾᩈᩃ᩠ᩃᨠ᩠ᨡᩮᨲ᩠ᩅᩣ ‘‘ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩏᨸᨧᩣᩁᩴ ᩋᨲᩥᨠ᩠ᨠᨾᨶ᩠ᨲᩔ ᩍᨵ ᩏᨸᨧᩣᩁᩮᩣ ᨸᩁᩥᨠ᩠ᨡᩮᨸᩮᩣ ᨿᨳᩣ ᨽᩅᩮᨿ᩠ᨿ, ᨲᩴ ᩏᨸᨧᩣᩁᩴ ᨸᨮᨾᩴ ᨸᩣᨴᩴ ᩋᨲᩥᨠ᩠ᨠᩣᨾᩮᨶ᩠ᨲᩔ ᩌᨸᨲ᩠ᨲᩥ ᨴᩩᨠ᩠ᨠᨭᩔ, ᨴᩩᨲᩥᨿᩴ ᨸᩣᨴᩴ ᩋᨲᩥᨠ᩠ᨠᩣᨾᩮᨶ᩠ᨲᩔ ᩌᨸᨲ᩠ᨲᩥ ᨸᩣᨧᩥᨲ᩠ᨲᩥᨿᩔᩣ’’ᨲᩥ ᩅᩩᨲ᩠ᨲᩴ, ᨲᩴ ᨶ ᨣᩉᩮᨲᨻ᩠ᨻᨾᩮᩅ ᨸᩣᩊᩥᨿᩣ ᩅᩥᩈᩮᩈᩈᨾ᩠ᨽᩅᨲᩮᩣᨲᩥ. ᨸᩮᩣᩁᩣᨱᨣᨱ᩠ᨮᩥᨸᨴᩮ ‘‘ᩏᨸᨧᩣᩁᩴ ᩋᨲᩥᨠ᩠ᨠᩣᨾᩮᨶ᩠ᨲᩥᨿᩣ ᨽᩥᨠ᩠ᨡᩩᨶᩥᨿᩣ ᨣᩣᨾᨶ᩠ᨲᩁᩣᨸᨲ᩠ᨲᩦ’’ᨲᩥ ᩅᩩᨲ᩠ᨲᩴ. ᨲᩈ᩠ᨾᩣ ᩍᨵ ᨠᨦ᩠ᨡᩣᩅᩥᨲᩁᨱᩥᨿᩣ ‘‘ᩑᨠᩮᨶ ᨸᩣᨴᩮᨶ ᩍᨲᩁᩔ…ᨸᩮ… ᩋᨲᩥᨠ᩠ᨠᨶ᩠ᨲᨾᨲ᩠ᨲᩮ ᩈᨦ᩠ᨥᩣᨴᩥᩈᩮᩈᩮᩣ’’ᨲᩥ ᩋᨿᨾᩮᩅ ᨸᩣᨮᩮᩣ ᩅᩮᨴᩥᨲᨻ᩠ᨻᩮᩣ. ᩑᨲ᩠ᨲᩣᩅᨲᩣ ᩍᨾᩮᩈᩩ ᨿᨳᩣᩅᩩᨲ᩠ᨲᩮᩈᩩ ᨮᩣᨶᩮᩈᩩ ᨿᨳᩣᩅᩩᨲ᩠ᨲᨸᩁᩥᨧ᩠ᨨᩮᨴᩮᩣᩅ ᨣᩣᨾᩮᩣᨲᩥ ᩅᩮᨴᩥᨲᨻ᩠ᨻᩮᩣ. ᩍᨾᩔ ᩋᨲ᩠ᨳᩔ ᨴᩦᨸᨶᨲ᩠ᨳᩴ ‘‘ᨣᩣᨾᩮᩣ ᨶᩣᨾ ᩑᨠᨠᩩᨭᩥᨠᩮᩣᨸᩦ’’ᨲᩥᩌᨴᩥ (ᨸᩣᩁᩣ. ᪙᪒) ᩅᩩᨲ᩠ᨲᩴ. ᩍᨾᩔ ᩅᩈᩮᨶ ᩋᩈᨲᩥᨸᩥ ᨸᩁᩥᨠ᩠ᨡᩮᨸᩣᨲᩥᨠ᩠ᨠᨾᩮ, ᩏᨸᨧᩣᩁᩮᩣᨠ᩠ᨠᨾᨶᩮ ᩅᩣ ᩋᨶ᩠ᨲᩁᩣᩁᩣᨾᨲᩮᩣ ᩅᩣ ᨽᩥᨠ᩠ᨡᩩᨶᩩᨸᩔᨿᨲᩮᩣ ᩅᩣ ᨲᩥᨲ᩠ᨳᩥᨿᩈᩮᨿ᩠ᨿᨲᩮᩣ ᩅᩣ ᨸᨭᩥᨠ᩠ᨠᨾᨶᨲᩮᩣ ᩅᩣ ᨲᩴ ᨣᩣᨾᩴ ᨸᩅᩥᩈᨶ᩠ᨲᩔ ᩋᨶ᩠ᨲᩁᩣᩁᩣᨾᨸᩁᩥᨠ᩠ᨡᩮᨸᩔ, ᩏᨸᨧᩣᩁᩔ ᩅᩣ ᩋᨲᩥᨠ᩠ᨠᨾᨶᩅᩈᩮᨶ ᨣᩣᨾᨸᨧ᩠ᨧᨿᩣ ᩌᨸᨲ᩠ᨲᩥᨿᩮᩣ ᩅᩮᨴᩥᨲᨻ᩠ᨻᩣ.

ᨣᩣᨾᩪᨸᨧᩣᩁᩮᩣ ᨸᨶ ‘‘ᨮᨸᩮᨲ᩠ᩅᩣ ᨣᩣᨾᨬ᩠ᨧ ᨣᩣᨾᩪᨸᨧᩣᩁᨬ᩠ᨧᩣ’’ᨲᩥ (ᨾᩉᩣᩅ. ᪑᪔᪔) ᩑᨲ᩠ᨳ ᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᨸᩁᩥᨠ᩠ᨡᩮᨸᩮᩣᩅ, ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᨸᩁᩥᨠ᩠ᨡᩮᨸᩮᩣᨠᩣᩈᩮᩣᩅ. ᩅᩩᨲ᩠ᨲᨬ᩠ᩉᩮᨲᩴ ᩋᨭ᩠ᨮᨠᨳᩣᨿᩴ ‘‘ᨣᩣᨾᩪᨸᨧᩣᩁᩮᩣᨲᩥ ᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᨸᩁᩥᨠ᩠ᨡᩮᨸᩮᩣ, ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᨸᩁᩥᨠ᩠ᨡᩮᨸᩮᩣᨠᩣᩈᩮᩣ. ᨲᩮᩈᩩ ᩋᨵᩥᨭ᩠ᨮᩥᨲᨲᩮᨧᩦᩅᩁᩥᨠᩮᩣ ᨽᩥᨠ᩠ᨡᩩ ᨸᩁᩥᩉᩣᩁᩴ ᨶ ᩃᨽᨲᩦ’’ᨲᩥ (ᨾᩉᩣᩅ. ᩋᨭ᩠ᨮ. ᪑᪔᪔). ᨠᩥᩴ ᨸᨶᩮᨲ᩠ᨳ ᨠᩣᩁᨱᩴ, ᨿᩮᨶ ᩋᨿᩴ ᨣᩣᨾᩮᩣ, ᨣᩣᨾᩪᨸᨧᩣᩁᩮᩣ ᨧ ᩍᨵ ᩋᨬ᩠ᨬᨳᩣ, ᩋᨬ᩠ᨬᨲ᩠ᨳ ᨲᨳᩣᨲᩥ? ᩋᨭ᩠ᨮᩩᨸ᩠ᨸᨲ᩠ᨲᩥᨲᩮᩣ ‘‘ᨲᩮᨶ ᨡᩮᩣ ᨸᨶ ᩈᨾᨿᩮᨶ ᨽᩥᨠ᩠ᨡᩪ ‘ᨽᨣᩅᨲᩣ ᨲᩥᨧᩦᩅᩁᩮᨶ ᩋᩅᩥᨸ᩠ᨸᩅᩣᩈᩈᨾ᩠ᨾᩩᨲᩥ ᩋᨶᩩᨬ᩠ᨬᩣᨲᩣ’ᨲᩥ ᩋᨶ᩠ᨲᩁᨥᩁᩮ ᨧᩦᩅᩁᩣᨶᩥ ᨶᩥᨠ᩠ᨡᩥᨸᨶ᩠ᨲᩦ’’ᨲᩥ (ᨾᩉᩣᩅ. ᪑᪔᪓) ᩍᨾᩥᩔᩣ ᩉᩥ ᩋᨭ᩠ᨮᩩᨸ᩠ᨸᨲ᩠ᨲᩥᨿᩣ ‘‘ᨮᨸᩮᨲ᩠ᩅᩣ ᨣᩣᨾᨬ᩠ᨧ ᨣᩣᨾᩪᨸᨧᩣᩁᨬ᩠ᨧᩣ’’ᨲᩥ (ᨾᩉᩣᩅ. ᪑᪔᪔) ᩅᩩᨲ᩠ᨲᩴ. ᨲᩈ᩠ᨾᩣ ᨿᨲ᩠ᨳ ᩋᨶ᩠ᨲᩁᨥᩁᩈᨬ᩠ᨬᩣ, ᨲᨲ᩠ᨳ ᩋᩅᩥᨸ᩠ᨸᩅᩣᩈᩈᩦᨾᩣ ᨶ ᨣᨧ᩠ᨨᨲᩦᨲᩥ ᩅᩮᨴᩥᨲᨻ᩠ᨻᩣ. ᨲᩮᨶ ᨧ ᩏᨴᩮᩣᩈᩥᨲᩈᩥᨠ᩠ᨡᩣᨸᨴᩮ ‘‘ᩋᨶ᩠ᨲᩮᩣᨣᩣᨾᩮ ᨧᩦᩅᩁᩴ ᨶᩥᨠ᩠ᨡᩥᨸᩥᨲ᩠ᩅᩣ ᩋᨶ᩠ᨲᩮᩣᨣᩣᨾᩮ ᩅᨲ᩠ᨳᨻ᩠ᨻ’’ᨶ᩠ᨲᩥ (ᨸᩣᩁᩣ. ᪔᪗᪘) ᨧ ‘‘ᩈᨽᩣᨿᩮ ᩅᩣ ᨴ᩠ᩅᩣᩁᨾᩪᩃᩮ ᩅᩣ, ᩉᨲ᩠ᨳᨸᩣᩈᩣ ᩅᩣ ᨶ ᩅᩥᨩᩉᩥᨲᨻ᩠ᨻ’’ᨶ᩠ᨲᩥ ᨧ ᩅᩩᨲ᩠ᨲᩴ. ᨠᨸ᩠ᨸᩥᨿᨽᩪᨾᩥᨿᩴ ᩅᩈᨶ᩠ᨲᩮᩣᨿᩮᩅ ᩉᩥ ᨠᨸ᩠ᨸᩥᨿᨽᩪᨾᩥᨿᩴ ᨶᩥᨠ᩠ᨡᩥᨲ᩠ᨲᨧᩦᩅᩁᩴ ᩁᨠ᩠ᨡᨲᩥ. ᩈᩣᩈᨦ᩠ᨠᩈᩥᨠ᩠ᨡᩣᨸᨴᩮ ᨸᨶ ‘‘ᨿᩈ᩠ᨾᩣ ᨿᨲ᩠ᨳ ᨣᩣᨾᩮ ᨧᩦᩅᩁᩴ ᨶᩥᨠ᩠ᨡᩥᨲ᩠ᨲᩴ, ᨲᩮᨶ ᨣᩣᨾᩮᨶ ᩅᩥᨸ᩠ᨸᩅᩈᨶ᩠ᨲᩮᩣ ᨧᩦᩅᩁᩮᨶ ᩅᩥᨸ᩠ᨸᩅᩈᨲᩦᨲᩥ ᩅᩩᨧ᩠ᨧᨲᩥ, ᨲᩈ᩠ᨾᩣ ᨸᩩᨶ ᨣᩣᨾᩈᩦᨾᩴ ᩒᨠ᩠ᨠᨾᩥᨲ᩠ᩅᩣ ᩅᩈᩥᨲ᩠ᩅᩣ ᨸᨠ᩠ᨠᨾᨲᩦ’’ᨲᩥ ᩅᩩᨲ᩠ᨲᩴ. ᨲᩈ᩠ᨾᩥᨬ᩠ᩉᩥ ᩈᩥᨠ᩠ᨡᩣᨸᨴᩮ ᨣᩣᨾᩈᩦᨾᩣ ᨣᩣᨾᩮᩣ ᨶᩣᨾᩣᨲᩥ ᩋᨵᩥᨸ᩠ᨸᩮᨲᩮᩣ. ᨲᨲ᩠ᨳ ᩅᩥᨠᩣᩃᩮ ᨣᩣᨾᨸ᩠ᨸᩅᩮᩈᨶᩈᩥᨠ᩠ᨡᩣᨸᨴᩅᩥᨽᨦ᩠ᨣᩮ ‘‘ᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᨸᩁᩥᨠ᩠ᨡᩮᨸᩴ ᩋᨲᩥᨠ᩠ᨠᨾᨶ᩠ᨲᩔ ᩌᨸᨲ᩠ᨲᩥ ᨸᩣᨧᩥᨲ᩠ᨲᩥᨿᩔᩣ’’ᨲᩥ (ᨸᩣᨧᩥ. ᪕᪑᪓) ᩅᨧᨶᨲᩮᩣ ᨸᩁᩥᨠ᩠ᨡᩮᨸᩮᩣ ᨶ ᨣᩣᨾᩮᩣ. ᨠᩥᨶ᩠ᨲᩩ ᨣᩣᨾᩪᨸᨧᩣᩁᩮᩣᨲᩥ ᩃᩮᩈᩮᨶ ᨴᩔᩥᨲᩴ ᩉᩮᩣᨲᩥ. ᩍᨾᩈ᩠ᨾᩥᩴ ᨸᨶ ᩈᩥᨠ᩠ᨡᩣᨸᨴᩅᩥᨽᨦ᩠ᨣᩮ ‘‘ᨣᩣᨾᩪᨸᨧᩣᩁᩮᩣ ᨶᩣᨾᩣ’’ᨲᩥ ᩌᩁᨽᩥᨲ᩠ᩅᩣ ‘‘ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᨥᩁᩪᨸᨧᩣᩁᩮ ᨮᩥᨲᩔ ᨾᨩ᩠ᨫᩥᨾᩔ ᨸᩩᩁᩥᩈᩔ ᩃᩮᨯ᩠ᨯᩩᨸᩣᨲᩮᩣ’’ᨲᩥ ᩍᨾᩥᨶᩣ ᩋᨸᩁᩥᨠ᩠ᨡᩥᨲ᩠ᨲᩔ ᨸᩁᩥᨠ᩠ᨡᩮᨸᩮᩣᨠᩣᩈᩮᩣ ᨣᩣᨾᩪᨸᨧᩣᩁᩮᩣᨲᩥ ᩈᩥᨴ᩠ᨵᩴ. ᨲᨴᨲ᩠ᨳᩈᨾ᩠ᨽᩅᨲᩮᩣ ᨲᩈ᩠ᨾᩥᩴ ᨥᩁᩪᨸᨧᩣᩁᩮ ᨮᩥᨲᩔ ᩃᩮᨯ᩠ᨯᩩᨸᩣᨲᩮᩣ ᨣᩣᨾᩪᨸᨧᩣᩁᩮᩣᨲᩥ ᨠᩩᩁᩩᨶ᩠ᨴᨭ᩠ᨮᨠᨳᩣᨿᩴ, ᨾᩉᩣᨸᨧ᩠ᨧᩁᩥᨿᨾ᩠ᨸᩥ ᩅᩩᨲ᩠ᨲᩴ. ᩏᨸᨧᩣᩁᩮᩣ ᩉᩥ ‘‘ᨣᩣᨾᩮᩣ ᩑᨠᩪᨸᨧᩣᩁᩮᩣ ᨶᩣᨶᩪᨸᨧᩣᩁᩮᩣ’’ᨲᩥᩌᨴᩦᩈᩩ ᨴ᩠ᩅᩣᩁᩴ, ‘‘ᩋᨩ᩠ᨫᩮᩣᨠᩣᩈᩮᩣ ᩑᨠᩪᨸᨧᩣᩁᩮᩣ’’ᨲᩥ ᩑᨲ᩠ᨳ ᩈᨾᨶ᩠ᨲᩣ ᩈᨲ᩠ᨲᨻ᩠ᨽᨶ᩠ᨲᩁᩈᨦ᩠ᨡᩣᨲᩴ ᨸᨾᩣᨱᩴ, ᨲᩈ᩠ᨾᩣ ‘‘ᨣᩣᨾᩪᨸᨧᩣᩁᩮᩣᨲᩥ ᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᨸᩁᩥᨠ᩠ᨡᩮᨸᩮᩣ, ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᨸᩁᩥᨠ᩠ᨡᩮᨸᩮᩣᨠᩣᩈᩮᩣ’’ᨲᩥ ᩋᨶ᩠ᨵᨠᨭ᩠ᨮᨠᨳᩣᨿᩴ ᩅᩩᨲ᩠ᨲᨶ᩠ᨲᩥ ᩅᩮᨴᩥᨲᨻ᩠ᨻᩴ. ᨲᨳᩣ ᨠᩩᩁᩩᨶ᩠ᨴᩥᨿᩴ, ᨾᩉᩣᨸᨧ᩠ᨧᩁᩥᨿᨬ᩠ᨧ. ᨲᨳᩣ ᨸᩣᩊᩥᨿᨾ᩠ᨸᩥ ‘‘ᩋᨩ᩠ᨫᩣᩁᩣᨾᩮᩣ ᨶᩣᨾ ᨸᩁᩥᨠ᩠ᨡᩥᨲ᩠ᨲᩔ ᩌᩁᩣᨾᩔ ᩋᨶ᩠ᨲᩮᩣ ᩌᩁᩣᨾᩮᩣ, ᩋᨸᩁᩥᨠ᩠ᨡᩥᨲ᩠ᨲᩔ ᩏᨸᨧᩣᩁᩮᩣ. ᩋᨩ᩠ᨫᩣᩅᩈᨳᩮᩣ ᨶᩣᨾ ᨸᩁᩥᨠ᩠ᨡᩥᨲ᩠ᨲᩔ ᩌᩅᩈᨳᩔ ᩋᨶ᩠ᨲᩮᩣ ᩌᩅᩈᨳᩮᩣ, ᩋᨸᩁᩥᨠ᩠ᨡᩥᨲ᩠ᨲᩔ ᩏᨸᨧᩣᩁᩮᩣ’’ᨲᩥᩌᨴᩦᩈᩩ ᨴᩥᩔᨲᩥ. ᨾᩉᩣᩋᨭ᩠ᨮᨠᨳᩣᨿᩴ ᨸᨶ ‘‘ᨣᩣᨾᩪᨸᨧᩣᩁᩮᩣ’’ᨲᩥᩌᨴᩦᩈᩩ ᨴᩥᩔᨲᩥ. ᨲᩈ᩠ᨾᩣ ᨴᩩᨲᩥᨿᩮᩣ ᩃᩮᨯ᩠ᨯᩩᨸᩣᨲᩮᩣ ᩏᨸᨧᩣᩁᩮᩣᨲᩥ ᩋᨵᩥᨸ᩠ᨸᩮᨲᩮᩣ.

‘‘ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩏᨸᨧᩣᩁᩴ ᩒᨠ᩠ᨠᨾᨶ᩠ᨲᩔ ᩌᨸᨲ᩠ᨲᩥ ᨸᩣᨧᩥᨲ᩠ᨲᩥᨿᩔᩣ’’ᨲᩥ ᨸᩣᩊᩥᩅᩥᩈᩮᩈᩈᨾ᩠ᨽᩅᨲᩮᩣ ᨧ ᨸᨮᨾᩮᩣ ᩃᩮᨯ᩠ᨯᩩᨸᩣᨲᩮᩣ ᨣᩣᨾᩮᩣ ᩑᩅ, ᨴᩩᨲᩥᨿᩮᩣ ᨣᩣᨾᩪᨸᨧᩣᩁᩮᩣᨲᩥ ᩅᩩᨲ᩠ᨲᩴ. ᨸᩁᩥᨠ᩠ᨡᩥᨲ᩠ᨲᩔ ᨸᨶ ᨣᩣᨾᩔ ᩍᨶ᩠ᨴᨡᩦᩃᩮ ᨮᩥᨲᩔ ᨾᨩ᩠ᨫᩥᨾᩔ ᨸᩩᩁᩥᩈᩔ ᩃᩮᨯ᩠ᨯᩩᨸᩣᨲᩮᩣ ᨣᩣᨾᩪᨸᨧᩣᩁᩮᩣᨲᩥ ᩅᩩᨲ᩠ᨲᨶ᩠ᨲᩥ ᩑᨲ᩠ᨳ ᨽᩮᨴᩮᩣ ᨶᨲ᩠ᨳᩥ. ᩑᨲ᩠ᨲᩣᩅᨲᩣ ᨸᩁᩥᨠ᩠ᨡᩥᨲ᩠ᨲᩔ ᨴᩩᩅᩥᨵᩮᩣ ᩏᨸᨧᩣᩁᩮᩣ, ᩋᨸᩁᩥᨠ᩠ᨡᩥᨲ᩠ᨲᩔ ᨧᨲᩩᨻ᩠ᨻᩥᨵᩮᩣ ᩏᨸᨧᩣᩁᩮᩣ ᨿᨲ᩠ᨳ ᩈᨾ᩠ᨽᩅᨲᩥ, ᨿᨲ᩠ᨳ ᨧ ᨶ ᩈᨾ᩠ᨽᩅᨲᩥ, ᨲᩴ ᩈᨻ᩠ᨻᩴ ᨴᩔᩥᨲᩴ ᩉᩮᩣᨲᩥ.

ᨣᩣᨾᨡᩮᨲ᩠ᨲᩔ ᨧ ᨣᩣᨾᩈᩦᨾᩣᨿ ᨧ ᩃᨠ᩠ᨡᨱᩴ ᩋᨭ᩠ᨮᨠᨳᩣᨿᨾᩮᩅ ᩅᩩᨲ᩠ᨲᩴ. ᩏᨽᨿᨬ᩠ᩉᩥ ᩋᨲ᩠ᨳᨲᩮᩣ ᩑᨠᩴ. ᨲᨲ᩠ᨳ ᨣᩣᨾᩈᩦᨾᩣᨿ ᨣᩣᨾᨽᩣᩅᩮᩣ ᩈᩣᩈᨦ᩠ᨠᩈᩥᨠ᩠ᨡᩣᨸᨴᩅᩈᩮᨶ ᩅᩮᨴᩥᨲᨻ᩠ᨻᩮᩣ.

ᨣᩣᨾᩈᩦᨾᩪᨸᨧᩣᩁᩮᩣ ᨶᩣᨾ ᨾᨶᩩᩔᩣᨶᩴ ᨠᨭ᩠ᨮᨲᩥᨱᨸᩩᨸ᩠ᨹᨹᩃᩣᨴᩥᩋᨲ᩠ᨳᩥᨠᩣᨶᩴ ᩅᨶᨧᩁᨠᩣᨶᩴ ᩅᩃᨬ᩠ᨩᨶᨭ᩠ᨮᩣᨶᩴ. ᩍᨾᩔ ᨣᩣᨾᩈᩦᨾᩪᨸᨧᩣᩁᨽᩣᩅᩮᩣ ᩏᨴᩮᩣᩈᩥᨲᩈᩥᨠ᩠ᨡᩣᨸᨴᩮ, ‘‘ᩋᨣᩣᨾᨠᩮ ᩋᩁᨬ᩠ᨬᩮ ᩈᨾᨶ᩠ᨲᩣ ᩈᨲ᩠ᨲᨻ᩠ᨽᨶ᩠ᨲᩁᩣ’’ᨲᩥ (ᨸᩣᩁᩣ. ᪔᪙᪔) ᩌᨣᨲᨭ᩠ᨮᩣᨶᩮ ᨡᨶ᩠ᨵᨠᩮ (ᨾᩉᩣᩅ. ᪑᪔᪗) ᨧ ᩅᩮᨴᩥᨲᨻ᩠ᨻᩮᩣ. ᩑᨲ᩠ᨳ ᩉᩥ ᨽᨣᩅᩣ ᨣᩣᨾᨶ᩠ᨲᩅᩣᩈᩦᨶᩴ ᨽᩥᨠ᩠ᨡᩪᨶᩴ ᩈᩦᨾᩴ ᨴᩔᩮᨶ᩠ᨲᩮᩣ ‘‘ᨿᩴ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᩏᨸᨶᩥᩔᩣᨿ ᩅᩥᩉᩁᨲᩦ’’ᨲᩥ (ᨾᩉᩣᩅ. ᪑᪔᪗) ᩅᨲ᩠ᩅᩣ ᨴᩔᩮᨲᩥ. ᨲᨴᨶᨶ᩠ᨲᩁᨾᩮᩅ ‘‘ᩋᨣᩣᨾᨠᩮ’’ᨲᩥᩌᨴᩥᨶᩣ ᩈᨲ᩠ᨲᨻ᩠ᨽᨶ᩠ᨲᩁᩈᩦᨾᩴ ᨴᩔᩮᨲᩥ. ᨲᩈ᩠ᨾᩣ ᨿᩮᩣ ᨽᩥᨠ᩠ᨡᩩ ᨣᩣᨾᩴ ᩅᩣ ᨶᩥᨣᨾᩴ ᩅᩣ ᩏᨸᨶᩥᩔᩣᨿ ᨶ ᩅᩥᩉᩁᨲᩥ, ᨠᩮᩅᩃᩴ ᨶᩣᩅᩣᨿᩴ ᩅᩣ ᨳᩃᨾᨣ᩠ᨣᩮᨶ ᩅᩣ ᩋᨴ᩠ᨵᩣᨶᨾᨣ᩠ᨣᨸ᩠ᨸᨭᩥᨸᨶ᩠ᨶᩮᩣ ᩉᩮᩣᨲᩥ, ᨲᩔ ᨲᨲ᩠ᨳ ᨲᨲ᩠ᨳ ᩈᨲ᩠ᨲᨻ᩠ᨽᨶ᩠ᨲᩁᩈᩦᨾᩣ ᩃᨻ᩠ᨽᨲᩦᨲᩥ ᩅᩮᨴᩥᨲᨻ᩠ᨻᩮᩣ. ᩅᩩᨲ᩠ᨲᨬ᩠ᩉᩥ ‘‘ᩑᨠᨠᩩᩃᩔ ᩈᨲ᩠ᨳᩮᩣ ᩉᩮᩣᨲᩥ, ᩈᨲ᩠ᨳᩮ ᨧᩦᩅᩁᩴ ᨶᩥᨠ᩠ᨡᩥᨸᩥᨲ᩠ᩅᩣ ᨸᩩᩁᨲᩮᩣ ᩅᩣ ᨸᨧ᩠ᨨᨲᩮᩣ ᩅᩣ ᩈᨲ᩠ᨲᨻ᩠ᨽᨶ᩠ᨲᩁᩣ ᨶ ᩅᩥᨩᩉᩥᨲᨻ᩠ᨻ’’ᨶ᩠ᨲᩥᩌᨴᩥ (ᨸᩣᩁᩣ. ᪔᪘᪙). ᩍᨴᨾᩮᩅ ᩋᩁᨬ᩠ᨬᩴ ᩈᨶ᩠ᨵᩣᨿ ‘‘ᩌᩁᨬ᩠ᨬᨠᩈᩦᨾᩣᨿ ᩑᨠᩴ ᩋᨣᩣᨾᨠᩴ ᩋᩁᨬ᩠ᨬ’’ᨶ᩠ᨲᩥ ᩅᩩᨲ᩠ᨲᩴ.

ᨿᩴ ᩈᨶ᩠ᨵᩣᨿ ‘‘ᩋᨣᩣᨾᨠᩮ ᩋᩁᨬ᩠ᨬᩮ ᩋᨴ᩠ᨵᨿᩮᩣᨩᨶᩮ ᩋᨴ᩠ᨵᨿᩮᩣᨩᨶᩮ ᩌᨸᨲ᩠ᨲᩥ ᨸᩣᨧᩥᨲ᩠ᨲᩥᨿᩔᩣ’’ᨲᩥ (ᨸᩣᨧᩥ. ᪔᪑᪔) ᨸᩣᩊᩥᨿᩴ ᩅᩩᨲ᩠ᨲᩴ. ᩍᨴᩴ ᩈᩴᩅᩥᨵᩣᨶᩈᩥᨠ᩠ᨡᩣᨸᨴᩣᨶᩴ ᩑᨠᩴ ᩋᨣᩣᨾᨠᩴ ᩋᩁᨬ᩠ᨬᩴ ᨶᩣᨾ.

ᨸᩩᩁᩥᨾᩮᨶ ᨸᨶ ᩈᨥᩁᩴ ᩈᨦ᩠ᨣᩉᩥᨲᩴ, ᩍᨾᩥᨶᩣ ᨲᨾᩈᨦ᩠ᨣᩉᩥᨲᨶ᩠ᨲᩥ. ᨿᩴ ᩈᨶ᩠ᨵᩣᨿ ᨣᨱᨾ᩠ᩉᩣ ᩒᩉᩦᨿᨶᩣᨵᩥᨠᩣᩁᩮ ᩋᨭ᩠ᨮᨠᨳᩣᨿᩴ (ᨸᩣᨧᩥ. ᩋᨭ᩠ᨮ. ᪖᪙᪒) ‘‘ᩋᨣᩣᨾᨠᩮ ᩋᩁᨬ᩠ᨬᩮᨲᩥ ᩑᨲ᩠ᨳ ‘ᨶᩥᨠ᩠ᨡᨾᩥᨲ᩠ᩅᩣ ᨻᩉᩥ ᩍᨶ᩠ᨴᨡᩦᩃᩣ ᩈᨻ᩠ᨻᨾᩮᨲᩴ ᩋᩁᨬ᩠ᨬ’ᨶ᩠ᨲᩥ ᩑᩅᩴ ᩅᩩᨲ᩠ᨲᩴ ᩃᨠ᩠ᨡᨱᩴ ᩋᩁᨬ᩠ᨬᩴ. ᨲᩴ ᨸᨶᩮᨲ ᨠᩮᩅᩃᩴ ᨣᩣᨾᩣᨽᩣᩅᩮᨶ ‘ᩋᨣᩣᨾᨠ’ᨶ᩠ᨲᩥ ᩅᩩᨲ᩠ᨲᩴ, ᨶ ᩅᩥᨬ᩠ᨫᩣᨭᩅᩥᩈᨴᩥᩈᨲᩣᨿᩣ’’ᨲᩥ ᩅᩩᨲ᩠ᨲᩴ. ᨿᩴ ᩈᨶ᩠ᨵᩣᨿ ‘‘ᩌᩁᨬ᩠ᨬᨠᩴ ᨶᩣᨾ ᩈᩮᨶᩣᩈᨶᩴ ᨸᨬ᩠ᨧᨵᨶᩩᩈᨲᩥᨠᩴ ᨸᨧ᩠ᨨᩥᨾ’’ᨶ᩠ᨲᩥ (ᨸᩣᩁᩣ. ᪖᪕᪔; ᨸᩣᨧᩥ. ᪕᪗᪓) ᩅᩩᨲ᩠ᨲᩴ. ᩍᨴᩴ ᩌᩁᨬ᩠ᨬᨠᩈᩮᨶᩣᩈᨶᩴ ᨶᩣᨾ ᨸᩁᩥᨠ᩠ᨡᩥᨲ᩠ᨲᩔ ᨸᩁᩥᨠ᩠ᨡᩮᨸᨲᩮᩣ ᨻᩉᩥ, ᩋᨸᩁᩥᨠ᩠ᨡᩥᨲ᩠ᨲᩔ ᨸᨶ ᨸᩁᩥᨠ᩠ᨡᩮᨸᩮᩣᨠᩣᩈᨲᩮᩣ ᨻᩉᩥ ᩈᩁᩩᨠ᩠ᨡᩴ ᩅᩣ ᩋᩁᩩᨠ᩠ᨡᩴ ᩅᩣ ᩅᩥᩉᩣᩁᩮ ᨠᩩᨶ᩠ᨶᨴᩥᩈᨾᩣᨠᩥᨱ᩠ᨱᨾ᩠ᨸᩥ ᩋᩁᨬ᩠ᨬᩴ ᨶᩣᨾ. ᨲᨳᩣ ‘‘ᨣᨱᨾ᩠ᩉᩣ ᩒᩉᩦᨿᨶᨠᩔ ᩑᨠ’’ᨶ᩠ᨲᩥ ᩅᩩᨲ᩠ᨲᩴ. ᩍᨴᩴ ᩋᩁᨬ᩠ᨬᩴᩅ. ᩍᨴᩴ ᨸᨶ ᨸᩩᨻ᩠ᨻᩮ ᩋᨣᩣᨾᨠᨽᩣᩅᩮᨶ ᩌᨣᨲᨭ᩠ᨮᩣᨶᩮ ᩅᩩᨲ᩠ᨲᩃᨠ᩠ᨡᨱᨾᩮᩅ ᩉᩩᨲ᩠ᩅᩣ ᨶᩥᨠ᩠ᨡᨾᩥᨲ᩠ᩅᩣ ᨻᩉᩥ ᩍᨶ᩠ᨴᨡᩦᩃᩣ ᨴᩔᨶᩪᨸᨧᩣᩁᩅᩥᨩᩉᨶᩮ ᩑᨠᨾᩮᩅ ᩌᨸᨲ᩠ᨲᩥᩴ ᨠᩁᩮᩣᨲᩥ, ᨲᨲᩮᩣ ᩏᨴ᩠ᨵᩴ ᩋᨶᩣᨸᨲ᩠ᨲᩥ. ‘‘ᩈᩴᩅᩥᨵᩣᨶᩈᩥᨠ᩠ᨡᩣᨸᨴᩣᨶᩴ ᩑᨠ’’ᨶ᩠ᨲᩥ ᩅᩩᨲ᩠ᨲᩴ ᨸᨶ ᩋᨴ᩠ᨵᨿᩮᩣᨩᨶᩮ ᩋᨴ᩠ᨵᨿᩮᩣᨩᨶᩮ ᩑᨠᩮᨠᩴ ᩌᨸᨲ᩠ᨲᩥᩴ ᨠᩁᩮᩣᨲᩥ, ᨶ ᨲᨲᩮᩣ ᩒᩁᩴ. ᩍᨲᩁᩣᨶᩥ ᨲᩦᨱᩥ ᨿᨳᩣᩅᩩᨲ᩠ᨲᨸᩁᩥᨧ᩠ᨨᩮᨴᨲᩮᩣ ᩒᩁᨾᩮᩅ ᨲᨲ᩠ᨳ ᩅᩩᨲ᩠ᨲᩅᩥᨵᩥᩴ ᨶ ᩈᨾ᩠ᨸᩣᨴᩮᨶ᩠ᨲᩥ, ᨸᩁᩴ ᩈᨾ᩠ᨸᩣᨴᩮᨶ᩠ᨲᩥ. ᩑᩅᨾᩮᨲᩮᩈᩴ ᩋᨬ᩠ᨬᨾᨬ᩠ᨬᨶᩣᨶᨲ᩠ᨲᩴ ᩅᩮᨴᩥᨲᨻ᩠ᨻᩴ.

ᨲᨲ᩠ᨳ ᨸᨬ᩠ᨧᩅᩥᨵᩮ ᨣᩣᨾᩮ ᨿᩮᩣ ‘‘ᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩍᨶ᩠ᨴᨡᩦᩃᩮ ᨮᩥᨲᩔ ᩃᩮᨯ᩠ᨯᩩᨸᩣᨲᩮᩣ’’ᨲᩥ (ᨸᩣᩁᩣ. ᪙᪒) ᩅᩩᨲ᩠ᨲᩮᩣ, ᩈᩮᩣ ᨶ ᨠᨲ᩠ᨳᨧᩥ ᩅᩥᨶᨿᨸᩥᨭᨠᩮ ᩏᨸᨿᩮᩣᨣᩴ ᨣᨲᩮᩣ, ᨠᩮᩅᩃᩴ ᩋᨸᩁᩥᨠ᩠ᨡᩥᨲ᩠ᨲᩔ ᨸᩁᩥᨠ᩠ᨡᩮᨸᩮᩣᨠᩣᩈᨲᩮᩣ ᩋᨸᩁᩮᩣ ᩑᨠᩮᩣ ᩃᩮᨯ᩠ᨯᩩᨸᩣᨲᩮᩣ ᨣᩣᨾᩪᨸᨧᩣᩁᩮᩣ ᨶᩣᨾᩣᨲᩥ ᨴᩦᨸᨶᨲ᩠ᨳᩴ ᩅᩩᨲ᩠ᨲᩮᩣ. ᨸᩁᩥᨠ᩠ᨡᩥᨲ᩠ᨲᩔᨸᩥ ᨧᩮ ᨣᩣᨾᩔ ᩑᨠᩮᩣ ᩃᩮᨯ᩠ᨯᩩᨸᩣᨲᩮᩣ ᨠᨸ᩠ᨸᩥᨿᨽᩪᨾᩥᩈᨾᩣᨶᩮᩣ ᩏᨸᨧᩣᩁᩮᩣᨲᩥ ᩅᩩᨲ᩠ᨲᩮᩣ, ᨸᨣᩮᩅ ᩋᨸᩁᩥᨠ᩠ᨡᩥᨲ᩠ᨲᩔ ᨸᩁᩥᨠ᩠ᨡᩮᨸᩮᩣᨠᩣᩈᨲᩮᩣ ᩑᨠᩮᩣ. ᩈᩮᩣ ᨸᨶ ᨸᩣᨠᨭᨲ᩠ᨲᩣ ᨧ ᩋᨩ᩠ᨫᩮᩣᨠᩣᩈᨲ᩠ᨲᩣ ᨧ ᩒᨠ᩠ᨠᨾᨶ᩠ᨲᩔ ᩌᨸᨲ᩠ᨲᩥᩴ ᨠᩁᩮᩣᨲᩥ ᨮᨸᩮᨲ᩠ᩅᩣ ᨽᩥᨠ᩠ᨡᩩᨶᩥᨿᩣ ᨣᩣᨾᨶ᩠ᨲᩁᩣᨸᨲ᩠ᨲᩥᩴ. ᨽᩥᨠ᩠ᨡᩩᨶᩥᨿᩮᩣ ᩉᩥ ᨲᩈ᩠ᨾᩥᩴ ᨴᩩᨲᩥᨿᩃᩮᨯ᩠ᨯᩩᨸᩣᨲᩈᨦ᩠ᨡᩣᨲᩮ ᨣᩣᨾᩪᨸᨧᩣᩁᩮ ᩅᩈᨶ᩠ᨲᩦ ᩌᨸᨲ᩠ᨲᩥᨬ᩠ᨧ ᩌᨸᨩ᩠ᨩᨶ᩠ᨲᩥ, ᨣᩣᨾᩴ ᨸᩅᩥᩈᨶ᩠ᨲᩦ ᨣᩣᨾᨶ᩠ᨲᩁᩣᨸᨲ᩠ᨲᩥᨬ᩠ᨧ. ᨲᩣᩈᨬ᩠ᩉᩥ ᨮᩥᨲᨭ᩠ᨮᩣᨶᩴ ᩋᩁᨬ᩠ᨬᩈᨦ᩠ᨡ᩠ᨿᩴ ᨣᨧ᩠ᨨᨲᩥ ‘‘ᨲᩣᩅᨴᩮᩅ ᨨᩣᨿᩣ ᨾᩮᨲᨻ᩠ᨻᩣ…ᨸᩮ… ᨲᩔᩣ ᨲᨿᩮᩣ ᨧ ᨶᩥᩔᨿᩮ, ᩋᨭ᩠ᨮ ᨧ ᩋᨠᩁᨱᩦᨿᩣᨶᩥ ᩌᨧᩥᨠ᩠ᨡᩮᨿ᩠ᨿᩣᨳᩣ’’ᨲᩥ (ᨧᩪᩊᩅ. ᪔᪓᪐) ᩅᨧᨶᨲᩮᩣ. ᩋᩁᨬ᩠ᨬᨸ᩠ᨸᨭᩥᩈᩴᨿᩩᨲ᩠ᨲᩣᨶᩴ ᩈᩥᨠ᩠ᨡᩣᨸᨴᩣᨶᩴ, ᩅᩥᨠᩣᩃᩮᨣᩣᨾᨸ᩠ᨸᩅᩮᩈᨶᩈᩥᨠ᩠ᨡᩣᨸᨴᩔ (ᨸᩣᨧᩥ. ᪕᪐᪘) ᨧ ᨽᩥᨠ᩠ᨡᩩᨶᩦᨶᩴ ᩋᩈᩣᨵᩣᩁᨱᨲ᩠ᨲᩣ ᨧ ᩋᨶ᩠ᨲᩁᩣᩁᩣᨾᨽᩥᨠ᩠ᨡᩩᨶᩩᨸᩔᨿᨸ᩠ᨸᨭᩥᨠ᩠ᨠᨾᨶᩣᨴᩦᨶᩴ ᨠᨸ᩠ᨸᩥᨿᨽᩪᨾᩥᨽᩣᩅᩅᨧᨶᨲᩮᩣ ᨧ ‘‘ᩑᨠᩣ ᨣᨱᨾ᩠ᩉᩣ ᩒᩉᩦᨿᩮᨿ᩠ᨿᩣᨲᩥ ᩋᨣᩣᨾᨠᩮ ᩋᩁᨬ᩠ᨬᩮ ᨴᩩᨲᩥᨿᩥᨠᩣᨿ ᨽᩥᨠ᩠ᨡᩩᨶᩥᨿᩣ ᨴᩔᨶᩪᨸᨧᩣᩁᩴ ᩅᩣ ᩈᩅᨶᩪᨸᨧᩣᩁᩴ ᩅᩣ ᩅᩥᨩᩉᨶ᩠ᨲᩥᨿᩣ ᩌᨸᨲ᩠ᨲᩥ ᨳᩩᩃ᩠ᩃᨧ᩠ᨧᨿᩔᩣ’’ᨲᩥᩌᨴᩥᩈᩥᨠ᩠ᨡᩣᨸᨴᨸᨬ᩠ᨬᨲ᩠ᨲᩥᨲᩮᩣ (ᨸᩣᨧᩥ. ᪖᪙᪒) ᨧ ᨽᩥᨠ᩠ᨡᩩᨶᩥᨠ᩠ᨡᨶ᩠ᨵᨠᨶᨿᩑᨶ ᩅᩣ ᨿᩈ᩠ᨾᩣ ᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩍᨶ᩠ᨴᨡᩦᩃᨲᩮᩣ ᨸᨭ᩠ᨮᩣᨿ ᩋᨸᩁᩥᨠ᩠ᨡᩥᨲ᩠ᨲᩔ ᩏᨸᨧᩣᩁᨲᩮᩣ ᨸᨭ᩠ᨮᩣᨿ ᨶᩦᨿᨲᩥ, ᨲᨲ᩠ᨳ ᩋᨶ᩠ᨲᩁᨥᩁᩮ ᨶᩥᨠ᩠ᨡᩥᨲ᩠ᨲᨧᩦᩅᩁᩮ ᩈᨲᩥ ᨧᨲᩩᩁᨦ᩠ᨣᩈᨾᩮᩣᨵᩣᨶᩮᨶ ᨽᩥᨠ᩠ᨡᩪ ᩅᩈᨶ᩠ᨲᩥ, ᨲᩈ᩠ᨾᩣ ᩈᨣᩣᨾᨠᩴ ᨶᩣᨾ ᩉᩮᩣᨲᩥ.

ᩋᩅᩥᨸ᩠ᨸᩅᩣᩈᩈᩦᨾᩣᨿ ᩑᨠᩴ ᨶᩣᨾ ‘‘ᨶ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩥᨿᩣ ᩋᩁᨬ᩠ᨬᩮ ᩅᨲ᩠ᨳᨻ᩠ᨻᩴ, ᨿᩣ ᩅᩈᩮᨿ᩠ᨿ, ᩌᨸᨲ᩠ᨲᩥ ᨴᩩᨠ᩠ᨠᨭᩔᩣ’’ᨲᩥ (ᨧᩪᩊᩅ. ᪔᪓᪑) ᩅᨧᨶᨲᩮᩣ ᨽᩥᨠ᩠ᨡᩩᨶᩦᨶᩴ ᩋᩁᨬ᩠ᨬᩅᩣᩈᩮᩣ ᨶᩣᨾ ᨶᨲ᩠ᨳᩦᨲᩥ ᩈᩥᨴ᩠ᨵᩴ. ᨲᩣᨿ ᩉᩥ ᩋᩁᨬ᩠ᨬᩮ ᨽᩥᨠ᩠ᨡᩩᨶᩩᨸᩔᨿᩮ ᩈᨲᩥ ᩋᨶ᩠ᨲᩮᩣᩌᩅᩣᩈᩮᨸᩥ ᨴᩩᨲᩥᨿᩥᨠᩣᨿ ᨴᩔᨶᩈᩅᨶᩪᨸᨧᩣᩁᩴ ᩅᩥᨩᩉᨶ᩠ᨲᩥᨿᩣ ᩌᨸᨲ᩠ᨲᩥ. ᨲᩈ᩠ᨾᩣ ᩋᩅᩥᨸ᩠ᨸᩅᩣᩈᩈᩦᨾᩣᨵᩥᨠᩣᩁᩮ ‘‘ᨮᨸᩮᨲ᩠ᩅᩣ ᨣᩣᨾᨬ᩠ᨧ ᨣᩣᨾᩪᨸᨧᩣᩁᨬ᩠ᨧᩣ’’ᨲᩥ (ᨾᩉᩣᩅ. ᪑᪔᪔) ᩑᨲ᩠ᨳ ᨿᩴ ᨮᩣᨶᩴ ᨮᨸᩥᨲᩴ, ᨲᨲ᩠ᨳᩮᩅ ᨽᩥᨠ᩠ᨡᩩᨶᩩᨸᩔᨿᩮᩣᨸᩥ ᨠᨸ᩠ᨸᨲᩥ, ᨶ ᨲᨲᩮᩣ ᨸᩁᩴ.

ᨲᩣᩈᨬ᩠ᨧ ᩋᩅᩥᨸ᩠ᨸᩅᩣᩈᩈᩦᨾᩣᨠᨾ᩠ᨾᩅᩣᨧᩣᨿᩴ ‘‘ᨮᨸᩮᨲ᩠ᩅᩣ ᨣᩣᨾᨬ᩠ᨧ ᨣᩣᨾᩪᨸᨧᩣᩁᨬ᩠ᨧᩣ’’ᨲᩥ ᩅᨧᨶᩴ ᨶᨲ᩠ᨳᩦᨲᩥ ᨠᨲ᩠ᩅᩣ ᨲᩮᩈ᩠ᩅᩮᩅ ᨣᩣᨾᨣᩣᨾᩪᨸᨧᩣᩁᩮᩈᩩ ᨹᩁᨲᩥ. ᨲᨲᩮᩣ ᨸᩁᩴ ᨴᩩᨲᩥᨿᩮᩈᩩ ᩃᩮᨯ᩠ᨯᩩᨸᩣᨲᩣᨴᩦᩈᩩ ᨲᩣᩈᩴ ᩋᨠᨸ᩠ᨸᩥᨿᨽᩪᨾᩥᨠᨲ᩠ᨲᩣ ᨶ ᩈᨾᩣᨶᩈᩴᩅᩣᩈᨠᩈᩦᨾᩣ ᩋᩁᨬ᩠ᨬᩮ ᨹᩁᨲᩥ ᨽᩥᨠ᩠ᨡᩪᨶᩴ ᨣᩣᨾᨣᩣᨾᩪᨸᨧᩣᩁᩴ ᩅᩥᨿ. ᨲᩈ᩠ᨾᩣ ᩅᩩᨲ᩠ᨲᩴ ‘‘ᨽᩥᨠ᩠ᨡᩩᨶᩥᨿᩣ ᨮᨸᩮᨲ᩠ᩅᩣ ᨣᩣᨾᨶ᩠ᨲᩁᩣᨸᨲ᩠ᨲᩥ’’ᨶ᩠ᨲᩥ.

ᩑᩅᩴ ᨲᩣᩅ ᨸᨬ᩠ᨧᩅᩥᨵᩴ ᨣᩣᨾᨽᩮᨴᩴ, ᩋᩁᨬ᩠ᨬᨽᩮᨴᨬ᩠ᨧ ᨬᨲ᩠ᩅᩣ ᩍᨴᩣᨶᩥ ‘‘ᩋᨲ᩠ᨳᩥ ᨣᩣᨾᩮᩣ ᨶ ᨣᩣᨾᨸᩁᩥᩉᩣᩁᩴ ᨠᨲ᩠ᨳᨧᩥ ᩃᨽᨲᩦ’’ᨲᩥᩌᨴᩥᨽᩮᨴᩮᩣ ᩅᩮᨴᩥᨲᨻ᩠ᨻᩮᩣ. ᨲᨲ᩠ᨳ ᨿᩮᩣ ᩋᨭ᩠ᨮᨠᨳᩣᨿᩴ ‘‘ᩋᨾᨶᩩᩔᩮᩣ ᨶᩣᨾ ᨿᩮᩣ ᩈᨻ᩠ᨻᩈᩮᩣ ᩅᩣ ᨾᨶᩩᩔᩣᨶᩴ ᩋᨽᩣᩅᩮᨶ ᨿᨠ᩠ᨡᨸᩁᩥᨣ᩠ᨣᩉᨽᩪᨲᩮᩣ’’ᨲᩥ ᩅᩩᨲ᩠ᨲᩮᩣ, ᩈᩮᩣ ᨣᩣᨾᩮᩣ ᨶ ᨣᩣᨾᨸᩁᩥᩉᩣᩁᩴ ᨠᨲ᩠ᨳᨧᩥ ᩈᩥᨠ᩠ᨡᩣᨸᨴᩮ ᩃᨽᨲᩥ. ᨿᨬ᩠ᩉᩥ ᩈᨶ᩠ᨵᩣᨿ ᩋᨭ᩠ᨮᨠᨳᩣᨿᩴ ‘‘ᨲᩴ ᨸᨶᩮᨲᩴ ᨻᩩᨴ᩠ᨵᨠᩣᩃᩮ, ᨧᨠ᩠ᨠᩅᨲ᩠ᨲᩥᨠᩣᩃᩮ ᨧ ᨶᨣᩁᩴ ᩉᩮᩣᨲᩥ, ᩈᩮᩈᨠᩣᩃᩮ ᩈᩩᨬ᩠ᨬᩴ ᩉᩮᩣᨲᩥ ᨿᨠ᩠ᨡᨸᩁᩥᨣ᩠ᨣᩉᩥᨲ’’ᨶ᩠ᨲᩥ (ᨸᩣᩁᩣ. ᩋᨭ᩠ᨮ. ᪑.᪘᪔; ᨴᩦ. ᨶᩥ. ᩋᨭ᩠ᨮ. ᪑.᪑᪕᪐) ᩅᩩᨲ᩠ᨲᩴ. ᨿᩮᩣ ᨸᨶ ᨸᨭᩥᩁᩣᨩᨧᩮᩣᩁᩣᨴᩦᩉᩥ ᩅᩥᩃᩩᨲ᩠ᨲᨲ᩠ᨲᩣ, ᨠᩮᩅᩃᩴ ᨽᨿᩮᨶ ᩅᩣ ᨨᨯ᩠ᨯᩥᨲᩮᩣ ᩈᨥᩁᩮᩣᩅ ᩋᨶ᩠ᨲᩁᩉᩥᨲᨣᩣᨾᨽᩪᨲᩮᩣ, ᩈᩮᩣ ‘‘ᨣᩣᨾᨶ᩠ᨲᩁᩮ ᨣᩣᨾᨶ᩠ᨲᩁᩮ ᩌᨸᨲ᩠ᨲᩥ ᨸᩣᨧᩥᨲ᩠ᨲᩥᨿᩔᩣ’’ᨲᩥ (ᨸᩣᨧᩥ. ᪑᪘᪓) ᩅᩩᨲ᩠ᨲᨸᩣᨧᩥᨲ᩠ᨲᩥᨿᩴ ᨩᨶᩮᨲᩥ, ᩅᩥᨠᩣᩃᩮ ᨣᩣᨾᨸ᩠ᨸᩅᩮᩈᨶᩴ, ᩈᩮᨡᩥᨿᩮ ᨧᨲ᩠ᨲᩣᩁᩥ ᨩᨶᩮᨲᩦᨲᩥ ᩅᩮᨴᩥᨲᨻ᩠ᨻᩣ. ᨿᩮᩣ ᨸᨶ ᨣᩣᨾᩮᩣ ᨿᨲᩮᩣ ᩅᩣ ᨾᨶᩩᩔᩣ ᨠᩮᨶᨧᩥᨴᩮᩅ ᨠᩁᨱᩦᨿᩮᨶ ᨸᩩᨶᨸᩥ ᩌᨣᨶ᩠ᨲᩩᨠᩣᨾᩣ ᩑᩅ ᩋᨸᨠ᩠ᨠᨶ᩠ᨲᩣᨲᩥ ᩅᩩᨲ᩠ᨲᩮᩣ, ᩋᨾᨶᩩᩔᩮᩣ ᩈᩮᩣ ᨸᨠᨲᩥᨣᩣᨾᩈᨴᩥᩈᩮᩣᩅ.

ᩋᨲ᩠ᨳᩥ ᩋᩁᨬ᩠ᨬᩴ ᨶ ᩋᩁᨬ᩠ᨬᨸᩁᩥᩉᩣᩁᩴ ᨠᨲ᩠ᨳᨧᩥ ᩃᨽᨲᩦᨲᩥ ᩑᨲ᩠ᨳ ‘‘ᩋᨩ᩠ᨫᩮᩣᨠᩣᩈᩮᩣ ᩑᨠᩪᨸᨧᩣᩁᩮᩣ ᨶᩣᨾ ᩋᨣᩣᨾᨠᩮ ᩋᩁᨬ᩠ᨬᩮ ᩈᨾᨶ᩠ᨲᩣ ᩈᨲ᩠ᨲᨻ᩠ᨽᨶ᩠ᨲᩁᩣ ᩑᨠᩪᨸᨧᩣᩁᩮᩣ, ᨲᨲᩮᩣ ᨸᩁᩴ ᨶᩣᨶᩪᨸᨧᩣᩁᩮᩣ’’ᨲᩥ (ᨸᩣᩁᩣ. ᪔᪙᪔) ᩑᨲ᩠ᨳ ᨿ᩠ᩅᩣᨿᩴ ᨶᩣᨶᩪᨸᨧᩣᩁᩮᩣᨲᩥ ᩅᩩᨲ᩠ᨲᩮᩣ, ᨲᩴ ᩅᩮᨴᩥᨲᨻ᩠ᨻᩴ. ᨿᩮᩣ ᨸᨶ ᨸᩁᩥᨠ᩠ᨡᩥᨲ᩠ᨲᩔ ᩑᨠᩃᩮᨯ᩠ᨯᩩᨸᩣᨲᩈᨦ᩠ᨡᩣᨲᩮᩣ ᨣᩣᨾᩪᨸᨧᩣᩁᨶᩣᨾᨠᩮᩣ ᨣᩣᨾᩮᩣ, ᨿᩮᩣ ᩅᩣ ᩈᨲ᩠ᨳᩮᩣ ᨶᩣᨲᩥᩁᩮᨠᨧᩣᨲᩩᨾᩣᩈᨶᩥᩅᩥᨭ᩠ᨮᩮᩣ, ᩈᩮᩣ ᩋᨲ᩠ᨳᩥ ᨣᩣᨾᩮᩣ ᨶ ᨣᩣᨾᨠᩥᨧ᩠ᨧᩴ ᨠᩁᩮᩣᨲᩥ. ᨶ ᩉᩥ ᨲᩴ ᨮᩣᨶᩴ ᩒᨠ᩠ᨠᨾᨶ᩠ᨲᩮᩣ ᨣᩣᨾᨸ᩠ᨸᩅᩮᩈᨶᩣᨸᨲ᩠ᨲᩥᩴ ᩌᨸᨩ᩠ᨩᨲᩥ. ᨿᩴ ᨸᨶ ᨣᩣᨾᩈᩦᨾᩣᨿ ᨸᩁᩥᨿᩣᨸᨶ᩠ᨶᩴ ᨾᨶᩩᩔᩣᨶᩴ ᩅᩃᨬ᩠ᨩᨶᨭ᩠ᨮᩣᨶᨽᩪᨲᩴ ᩋᩁᨬ᩠ᨬᩴ, ᨲᩴ ᩋᨲ᩠ᨳᩥ ᩋᩁᨬ᩠ᨬᩴ ᨶ ᩋᩁᨬ᩠ᨬᨠᩥᨧ᩠ᨧᩴ ᨠᩁᩮᩣᨲᩥ ᨶᩣᨾ. ᨶ ᩉᩥ ᨲᨲ᩠ᨳ ᩌᩁᨬ᩠ᨬᨠᩈᩦᨾᩣ ᩃᨻ᩠ᨽᨲᩦᨲᩥ. ᩑᨲ᩠ᨲᩣᩅᨲᩣ ‘‘ᨣᩣᨾᩣ ᩅᩣ ᩋᩁᨬ᩠ᨬᩣ ᩅᩣ’’ᨲᩥ ᩍᨾᩥᩔᩣ ᩋᨶᩩᨸᨬ᩠ᨬᨲ᩠ᨲᩥᨿᩣ ᩃᨠ᩠ᨡᨱᩣᨶᩩᨸᨬ᩠ᨬᨲ᩠ᨲᩥᨽᩣᩅᩮᩣ ᨴᩔᩥᨲᩮᩣ ᩉᩮᩣᨲᩥ.

‘‘ᨣᩮᩣᨶᩥᩈᩣᨴᩥᨶᩥᩅᩥᨭ᩠ᨮᩮᩣᨸᩥ ᨣᩣᨾᩮᩣ’’ᨲᩥ ᩑᨲ᩠ᨳ ᩈᨧᩮ ᨲᩔ ᨣᩣᨾᩔ ᨣᩣᨾᨡᩮᨲ᩠ᨲᨸᩁᩥᨧ᩠ᨨᩮᨴᩮᩣ ᩋᨲ᩠ᨳᩥ, ᩈᨻ᩠ᨻᩮᩣᨸᩥ ᩑᨠᩮᩣ ᨣᩣᨾᩮᩣ. ᨶᩮᩣ ᨧᩮ, ᩏᨸᨧᩣᩁᩮᨶ ᩅᩣ ᨸᩁᩥᨠ᩠ᨡᩮᨸᩮᨶ ᩅᩣ ᨸᩁᩥᨧ᩠ᨨᩥᨶ᩠ᨴᩥᨲᨻ᩠ᨻᩮᩣ. ᩈᨧᩮ ᨣᩣᨾᨡᩮᨲ᩠ᨲᩮ ᩈᨲᩥ ᨠᩣᨶᩥᨧᩥ ᨲᩣᨶᩥ ᨥᩁᩣᨶᩥ ᩋᨬ᩠ᨬᨾᨬ᩠ᨬᩏᨸᨧᩣᩁᨸ᩠ᨸᩉᩮᩣᨶᨠᩴ ᨮᩣᨶᩴ ᩋᨲᩥᨠ᩠ᨠᨾᩥᨲ᩠ᩅᩣ ᨴᩪᩁᩮ ᨴᩪᩁᩮ ᨠᨲᩣᨶᩥ ᩉᩮᩣᨶ᩠ᨲᩥ, ᩅᩥᨠᩣᩃᩮ ᨣᩣᨾᨸ᩠ᨸᩅᩮᩈᩮ ᩏᨸᨧᩣᩁᩮᩣᩅ ᨸᨾᩣᨱᩴ. ᩋᨶ᩠ᨲᩁᨥᩁᨸ᩠ᨸᨭᩥᩈᩴᨿᩩᨲ᩠ᨲᩮᩈᩩ ᩈᩮᨡᩥᨿᩮᩈᩩ, ᨽᩥᨠ᩠ᨡᩩᨶᩥᨿᩣ ᨣᩣᨾᨶ᩠ᨲᩁᩣᨸᨲ᩠ᨲᩦᩈᩩ ᨧ ᨥᩁᩣᨶᩴ ᨸᩁᩥᨠ᩠ᨡᩮᨸᩣᩁᩉᨭ᩠ᨮᩣᨶᩴ ᨸᨾᩣᨱᩴ, ᩏᨸᩮᩣᩈᨳᩣᨴᩥᨠᨾ᩠ᨾᩣᨶᩴ ᨣᩣᨾᨡᩮᨲ᩠ᨲᩴ ᨸᨾᩣᨱᩴ, ᩌᩁᨬ᩠ᨬᨠᩈᩮᨶᩣᩈᨶᩔ ᩌᩈᨶ᩠ᨶᨥᩁᩔ ᨴᩩᨲᩥᨿᩃᩮᨯ᩠ᨯᩩᨸᩣᨲᨲᩮᩣ ᨸᨭ᩠ᨮᩣᨿ ᨸᨬ᩠ᨧᨵᨶᩩᩈᨲᨶ᩠ᨲᩁᨲᩣ ᨸᨾᩣᨱᨶ᩠ᨲᩥ ᩑᩅᩴ ᨶᩮᩣ ᨸᨭᩥᨽᩣᨶᨶ᩠ᨲᩥ ᩌᨧᩁᩥᨿᩣ.

‘‘ᨿᨾ᩠ᨸᩥ ᩑᨠᩈ᩠ᨾᩥᩴᨿᩮᩅ ᨣᩣᨾᨡᩮᨲ᩠ᨲᩮ ᩑᨠᩴ ᨸᨴᩮᩈᩴ ‘ᩋᨿᨾ᩠ᨸᩥ ᩅᩥᩈᩩᩴᨣᩣᨾᩮᩣ ᩉᩮᩣᨲᩪ’ᨲᩥ ᨸᩁᩥᨧ᩠ᨨᩥᨶ᩠ᨴᩥᨲ᩠ᩅᩣ ᩁᩣᨩᩣ ᨠᩔᨧᩥ ᨴᩮᨲᩥ, ᩈᩮᩣᨸᩥ ᩅᩥᩈᩩᩴᨣᩣᨾᩈᩦᨾᩣ ᩉᩮᩣᨲᩥᨿᩮᩅᩣ’’ᨲᩥ (ᨾᩉᩣᩅ. ᩋᨭ᩠ᨮ. ᪑᪔᪗) ᩋᨭ᩠ᨮᨠᨳᩣᩅᨧᨶᨲᩮᩣ ᨲᩴ ᨸᩅᩥᩈᨶ᩠ᨲᩥᨿᩣ ᨽᩥᨠ᩠ᨡᩩᨶᩥᨿᩣ ᨣᩣᨾᨶ᩠ᨲᩁᩣᨸᨲ᩠ᨲᩥ ᩉᩮᩣᨲᩥ ᩑᩅ. ᩈᨧᩮ ᨲᨲ᩠ᨳ ᩅᩥᩉᩣᩁᩮᩣ ᩅᩣ ᨴᩮᩅᨠᩩᩃᩴ ᩅᩣ ᩈᨽᩣ ᩅᩣ ᨣᩮᩉᩴ ᩅᩣ ᨶᨲ᩠ᨳᩥ, ᨠᩮᩅᩃᩴ ᩅᨲ᩠ᨳᩩᨾᨲ᩠ᨲᨠᨾᩮᩅ ᩉᩮᩣᨲᩥ, ᨣᩣᨾᩮᩣᨲᩥ ᩅᩥᨶᨿᨠᨾ᩠ᨾᩴ ᩈᨻ᩠ᨻᩴ ᨲᨲ᩠ᨳ ᨠᨸ᩠ᨸᨲᩥ. ‘‘ᩋᨾᨶᩩᩔᩮᩣ ᨣᩣᨾᩮᩣ’’ᨲᩥ ᩉᩥ ᩅᩩᨲ᩠ᨲᩴ. ᨲᨬ᩠ᨧ ᨮᩣᨶᩴ ᩍᨲᩁᩔ ᨣᩣᨾᩔ ᨸᩁᩥᨠ᩠ᨡᩮᨸᨻ᩠ᨽᨶ᩠ᨲᩁᩮ ᩅᩣ ᩏᨸᨧᩣᩁᨻ᩠ᨽᨶ᩠ᨲᩁᩮ ᩅᩣ ᩉᩮᩣᨲᩥ, ᩅᩥᨠᩣᩃᩮ ᨣᩣᨾᨸ᩠ᨸᩅᩮᩈᨶᩴ ᩌᨸᩩᨧ᩠ᨨᩥᨲ᩠ᩅᩣᩅ ᨣᨶ᩠ᨲᨻ᩠ᨻᩴ. ᨶᩮᩣ ᨧᩮ, ᩋᩁᨬ᩠ᨬᩴ ᩅᩥᨿ ᨿᨳᩣᩈᩩᨡᩴ ᨣᨶ᩠ᨲᨻ᩠ᨻᩴ. ᨲᨲ᩠ᨳ ᨧᩮ ᩌᩁᩣᨾᩮᩣ ᩅᩣ ᨲᩥᨲ᩠ᨳᩥᨿᩈᩮᨿ᩠ᨿᩣᨴᩦᩈᩩ ᩋᨬ᩠ᨬᨲᩁᩮᩣᩅᩣ ᩉᩮᩣᨲᩥ, ᩃᨴ᩠ᨵᨠᨸ᩠ᨸᨾᩮᩅ. ᨽᩥᨠ᩠ᨡᩩᨶᩩᨸᩔᨿᩮᩣ ᨧᩮ ᩉᩮᩣᨲᩥ, ᨣᩣᨾᩴ ᨸᩥᨱ᩠ᨯᩣᨿ ᨸᩅᩥᩈᨶ᩠ᨲᩥᨿᩣ ᨽᩥᨠ᩠ᨡᩩᨶᩥᨿᩣ ᨣᩣᨾᨶ᩠ᨲᩁᩣᨸᨲ᩠ᨲᩥ ᨸᩁᩥᩉᩁᩥᨲᨻ᩠ᨻᩣ. ‘‘ᩋᩁᨬ᩠ᨬᩴ ᨶᩣᨾ ᨮᨸᩮᨲ᩠ᩅᩣ ᨣᩣᨾᨬ᩠ᨧ ᨣᩣᨾᩪᨸᨧᩣᩁᨬ᩠ᨧ ᩋᩅᩈᩮᩈᩴ ᩋᩁᨬ᩠ᨬᩴ ᨶᩣᨾᩣ’’ᨲᩥ (ᨸᩣᩁᩣ. ᪙᪒) ᩑᨲ᩠ᨳ ᨸᩁᩥᨠ᩠ᨡᩮᨸᩮ ᩈᨲᩥ ᨿᨳᩣᩅᩩᨲ᩠ᨲᨸᩁᩥᨧ᩠ᨨᩮᨴᩴ ᨣᩣᨾᨾᩮᩅ ᨮᨸᩮᨲ᩠ᩅᩣ ᩋᩅᩈᩮᩈᩴ ᨲᩔ ᩏᨸᨧᩣᩁᩴ, ᨲᨲᩮᩣ ᨸᩁᨬ᩠ᨧ ᩋᩁᨬ᩠ᨬᩴ ᨶᩣᨾ, ᨸᩁᩥᨠ᩠ᨡᩮᨸᩮ ᩋᩈᨲᩥ ᨿᨳᩣᩅᩩᨲ᩠ᨲᨸᩁᩥᨧ᩠ᨨᩮᨴᩴ ᨣᩣᨾᩪᨸᨧᩣᩁᨾᩮᩅ ᨮᨸᩮᨲ᩠ᩅᩣ ᨲᨲᩮᩣ ᨸᩁᩴ ᩋᩅᩈᩮᩈᩴ ᩋᩁᨬ᩠ᨬᩴ ᨶᩣᨾᩣᨲᩥ ᩋᨵᩥᨸ᩠ᨸᩣᨿᩮᩣ. ᩑᩅᩴ ᩈᨲᩥ ‘‘ᨶᩥᨠ᩠ᨡᨾᩥᨲ᩠ᩅᩣ ᨻᩉᩥ ᩍᨶ᩠ᨴᨡᩦᩃᩣ ᩈᨻ᩠ᨻᨾᩮᨲᩴ ᩋᩁᨬ᩠ᨬ’’ᨶ᩠ᨲᩥ (ᩅᩥᨽ. ᪕᪒᪙) ᩅᩩᨲ᩠ᨲᩃᨠ᩠ᨡᨱᩮ ᩋᨣᩣᨾᨠᩮ ᩋᩁᨬ᩠ᨬᩮ ᨣᨱᨾ᩠ᩉᩣᩒᩉᩦᨿᨶᩣᨸᨲ᩠ᨲᩥ, ᨲᨲ᩠ᨳ ᩋᩅᩥᨸ᩠ᨸᩅᩣᩈᩈᩦᨾᩣᨿ ᨹᩁᨱᩴ ᩅᩥᨠᩣᩃᩮ ᨣᩣᨾᨸ᩠ᨸᩅᩮᩈᨶᩣᨸᨲ᩠ᨲᩥᨿᩣ ᩋᨶᩣᨸᨲ᩠ᨲᩦᨲᩥ ᩑᩅᨾᩣᨴᩥᩅᩥᨶᨿᩅᩥᨵᩥ ᩈᨾᩮᨲᩥ, ᩋᨬ᩠ᨬᨳᩣ ᨶ ᩈᨾᩮᨲᩥ.

‘‘ᨮᨸᩮᨲ᩠ᩅᩣ ᨣᩣᨾᩪᨸᨧᩣᩁᩴ ᩋᩅᩈᩮᩈᩴ ᩋᩁᨬ᩠ᨬᩴ ᨶᩣᨾᩣ’’ᨲᩥ (ᨾᩉᩣᩅ. ᪑᪔᪔) ᩅᩩᨲ᩠ᨲᩮ ᨣᩣᨾᩪᨸᨧᩣᩁᨲᩮᩣ ᨸᩁᩮᩣ ᩋᩁᨬ᩠ᨬᨶ᩠ᨲᩥ ᩈᩥᨴ᩠ᨵᩮ ‘‘ᨮᨸᩮᨲ᩠ᩅᩣ ᨣᩣᨾ’’ᨶ᩠ᨲᩥ ᩅᩥᩈᩮᩈᨲ᩠ᨳᩮᩣ ᨶ ᨴᩥᩔᨲᩥ, ᨣᩣᨾᩔ ᨸᨶ ᩋᩁᨬ᩠ᨬᨽᩣᩅᨸ᩠ᨸᩈᨦ᩠ᨣᨽᨿᩣ ᩅᩩᨲ᩠ᨲᨶ᩠ᨲᩥ ᨧᩮ? ᨶ, ᨣᩣᨾᩪᨸᨧᩣᩁᩔ ᩋᨽᩣᩅᨸ᩠ᨸᩈᨦ᩠ᨣᨲᩮᩣ. ᩈᨲᩥ ᩉᩥ ᨣᩣᨾᩮ ᨣᩣᨾᩪᨸᨧᩣᩁᩮᩣ ᩉᩮᩣᨲᩥ, ᩈᩮᩣ ᨧ ᨲᩅ ᨾᨲᩮᨶ ᩋᩁᨬ᩠ᨬᨽᩪᨲᩮᩣ. ᨠᩩᨲᩮᩣ ᨴᩣᨶᩥ ᨣᩣᨾᩪᨸᨧᩣᩁᩮᩣ. ᨣᩣᨾᩪᨸᨧᩣᩁᩮᩣᨸᩥ ᨧᩮ ᩋᩁᨬ᩠ᨬᩈᨦ᩠ᨡ᩠ᨿᩴ ᨣᨧ᩠ᨨᨲᩥ, ᨸᩁᩮᩣᩅ ᨣᩣᨾᩮᩣᨲᩥ ᨠᨲ᩠ᩅᩣ ᨶ ᨿᩩᨲ᩠ᨲᩴ ᨣᩣᨾᩔ ᩋᩁᨬ᩠ᨬᨽᩣᩅᨸ᩠ᨸᩈᨦ᩠ᨣᨲᩮᩣ ᨧ. ᨲᩈ᩠ᨾᩣ ‘‘ᨣᩣᨾᩣ ᩅᩣ ᩋᩁᨬ᩠ᨬᩣ ᩅᩣ’’ᨲᩥ ᩑᨲ᩠ᨳ ᨣᩣᨾᩪᨸᨧᩣᩁᩮᩣᨸᩥ ‘‘ᨣᩣᨾᩮᩣ’’ ᨲ᩠ᩅᩮᩅ ᩈᨦ᩠ᨣᩉᩥᨲᩮᩣ. ᨲᩈ᩠ᨾᩣ ᨣᩣᨾᩔ ᩋᩁᨬ᩠ᨬᨽᩣᩅᨸ᩠ᨸᩈᨦ᩠ᨣᩮᩣ ᨶ ᨿᩩᨩ᩠ᨩᨲᩥ. ᨿᨴᩥ ᩑᩅᩴ ‘‘ᨮᨸᩮᨲ᩠ᩅᩣ ᨣᩣᨾᩴ ᩋᩅᩈᩮᩈᩴ ᩋᩁᨬ᩠ᨬᩴ ᨶᩣᨾᩣ’’ᨲᩥ ᩑᨲ᩠ᨲᨠᩴ ᩅᨲ᩠ᨲᨻ᩠ᨻᨶ᩠ᨲᩥ ᨧᩮ? ᨶ, ᩋᩁᨬ᩠ᨬᩔ ᨸᩁᩥᨧ᩠ᨨᩮᨴᨩᩣᨶᨶᨸ᩠ᨸᩈᨦ᩠ᨣᨲᩮᩣ. ᨲᨳᩣ ᩉᩥ ᩅᩩᨲ᩠ᨲᩮᩣ ‘‘ᩋᩁᨬ᩠ᨬᨸᩁᩥᨧ᩠ᨨᩮᨴᩮᩣ ᨶ ᨸᨬ᩠ᨬᩣᨿᨲᩦ’’ᨲᩥ ᨶᩮᩣ ᩃᨴ᩠ᨵᩥ. ᨣᩣᨾᩪᨸᨧᩣᩁᨸᩁᩥᨿᨶ᩠ᨲᩮᩣ ᩉᩥ ᩍᨵ ᨣᩣᨾᩮᩣ ᨶᩣᨾ. ᨿᨴᩥ ᩑᩅᩴ ‘‘ᨣᩣᨾᩔ ᨧ ᩋᩁᨬ᩠ᨬᩔ ᨧ ᨸᩁᩥᨧ᩠ᨨᩮᨴᨴᩔᨶᨲ᩠ᨳᩴ ᩅᩩᨲ᩠ᨲ’’ᨶ᩠ᨲᩥ ᩋᨭ᩠ᨮᨠᨳᩣᨿᩴ ᩅᨲ᩠ᨲᨻ᩠ᨻᩴ, ‘‘ᩋᩁᨬ᩠ᨬᩔ ᨸᩁᩥᨧ᩠ᨨᩮᨴᨴᩔᨶᨲ᩠ᨳᩴ ᩅᩩᨲ᩠ᨲ’’ᨶ᩠ᨲᩥ ᨠᩥᨾᨲ᩠ᨳᩴ ᩅᩩᨲ᩠ᨲᨶ᩠ᨲᩥ ᨧᩮ? ᩅᩩᨧ᩠ᨧᨲᩮ – ᩋᨭ᩠ᨮᨠᨳᩣᨧᩁᩥᨿᩮᨶ ᨸᨮᨾᨣᩣᨾᩪᨸᨧᩣᩁᩴᨿᩮᩅ ᩈᨶ᩠ᨵᩣᨿ ᩅᩩᨲ᩠ᨲᩴ ‘‘ᩋᩁᨬ᩠ᨬᨸᩁᩥᨧ᩠ᨨᩮᨴᨴᩔᨶᨲ᩠ᨳ’’ᨶ᩠ᨲᩥ ᩈᨻ᩠ᨻᩈᩥᨠ᩠ᨡᩣᨸᨴᩮ ᩉᩥ ᨻᩣᩉᩥᩁᩍᨶ᩠ᨴᨡᩦᩃᨲᩮᩣ ᨸᨭ᩠ᨮᩣᨿ ᨣᩣᨾᩪᨸᨧᩣᩁᩴ ᩋᩁᨬ᩠ᨬᩴ ᨶᩣᨾ. ᨣᩣᨾᨸᩁᩥᨧ᩠ᨨᩮᨴᩅᨧᨶᩮ ᨸᨿᩮᩣᨩᨶᩴ ᨸᨶᩮᨲ᩠ᨳ ᨶᨲ᩠ᨳᩥ ᨸᩁᩥᨠ᩠ᨡᩮᨸᩮᨶᩮᩅ ᨸᩣᨠᨭᨽᩪᨲᨲ᩠ᨲᩣ. ᨴᩩᨲᩥᨿᨣᩣᨾᩪᨸᨧᩣᩁᩮᩣᩅ ᨣᩣᨾᩔ ᨸᩁᩥᨧ᩠ᨨᩮᨴᨴᩔᨶᨲ᩠ᨳᩴ ᩅᩩᨲ᩠ᨲᩮᩣ ᨸᩁᩥᨠ᩠ᨡᩮᨸᨽᩣᩅᩮᨶ ᩋᨸᩣᨠᨭᨲ᩠ᨲᩣ. ᨲᨲ᩠ᨳ ᨸᨮᨾᨣᩣᨾᩪᨸᨧᩣᩁᩮᩣ ᨧᩮ ᩋᩁᨬ᩠ᨬᨸᩁᩥᨧ᩠ᨨᩮᨴᨴᩔᨶᨲ᩠ᨳᩴ ᩅᩩᨲ᩠ᨲᩮᩣ, ᨲᨲ᩠ᨳ ᨶ ᩅᨲ᩠ᨲᨻ᩠ᨻᩮᩣ. ‘‘ᨶᩥᨠ᩠ᨡᨾᩥᨲ᩠ᩅᩣ ᩍᨶ᩠ᨴᨡᩦᩃᩣ ᩈᨻ᩠ᨻᨾᩮᨲᩴ ᩋᩁᨬ᩠ᨬ’’ᨶ᩠ᨲᩥ ᩅᨲ᩠ᨲᨻ᩠ᨻᩴ. ᩑᩅᩴ ᩈᨶ᩠ᨲᩮ ᩈᩩᨻ᩠ᨿᨲ᩠ᨲᨲᩁᩴ ᩋᩁᨬ᩠ᨬᨸᩁᩥᨧ᩠ᨨᩮᨴᩮᩣ ᨴᩔᩥᨲᩮᩣ ᩉᩮᩣᨲᩥ, ᨾᩥᨧ᩠ᨨᩣᨣᩣᩉᩮᩣ ᨧ ᨶ ᩉᩮᩣᨲᩥ.

‘‘ᨾᨩ᩠ᨫᩥᨾᩔ ᨸᩩᩁᩥᩈᩔ ᩃᩮᨯ᩠ᨯᩩᨸᩣᨲᩮᩣ’’ᨲᩥ ᩉᩥ ᩅᩩᨲ᩠ᨲᩮ ᩋᨿᩴ ᨣᩣᨾᩪᨸᨧᩣᩁᩮᩣᩅ ᩋᩁᨬ᩠ᨬᩴ ᨣᩣᨾᩪᨸᨧᩣᩁᩔ ᩅᩥᨽᨦ᩠ᨣᨲ᩠ᨲᩣ. ᨿᨴᩥ ᩋᩁᨬ᩠ᨬᨸᩁᩥᨧ᩠ᨨᩮᨴᨴᩔᨶᨲ᩠ᨳᩴ ᩅᩩᨲ᩠ᨲᩴ, ᩋᩅᩩᨲ᩠ᨲᨠᨾᩮᩅ, ᩋᩁᨬ᩠ᨬᨲᩮᩣ ᨸᩁᨶ᩠ᨲᩥ ᨧ ᨾᩥᨧ᩠ᨨᩣᨣᩣᩉᩮᩣ ᩉᩮᩣᨲᩦᨲᩥ ᨧᩮ, ᨶᨶᩩ ᩅᩩᨲ᩠ᨲᩴ ‘‘ᨸᨮᨾᨾᩮᩅ ᩍᨴᩴ ᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩏᨸᨧᩣᩁᨶᩥᨿᨾᨶᨲ᩠ᨳᩴ ᩅᩩᨲ᩠ᨲ’’ᨶ᩠ᨲᩥ? ᩋᩁᨬ᩠ᨬᨸᩁᩥᨧ᩠ᨨᩮᨴᨴᩔᨶᨲ᩠ᨳᩴ ᨠᩥᨬ᩠ᨧᩣᨸᩥ ‘‘ᨣᩣᨾᩪᨸᨧᩣᩁᩮᩣ’’ᨲᩥᩌᨴᩥ ᩌᩁᨴ᩠ᨵᩴ, ᩍᨶ᩠ᨴᨡᩦᩃᩮ ᨮᩥᨲᩔ ᨾᨩ᩠ᨫᩥᨾᩔ ᨸᩩᩁᩥᩈᩔ ᩃᩮᨯ᩠ᨯᩩᨸᩣᨲᩮᩣᨲᩥ ᨸᨶ ᩑᩅᩴ ᩅᨧᨶᨸ᩠ᨸᨿᩮᩣᨩᨶᩴ. ᩋᨸᩁᩥᨠ᩠ᨡᩥᨲ᩠ᨲᩔ ᨧ ᨣᩣᨾᩔ ᨿ᩠ᩅᩣᨿᩴ ᩃᩮᨯ᩠ᨯᩩᨸᩣᨲᩮᩣ ᩏᨸᨧᩣᩁᩮᩣ’’ᨲᩥ ᨾᩉᩣᩋᨭ᩠ᨮᨠᨳᩣᨿᩴ ᩅᩩᨲ᩠ᨲᩮᩣ, ᨲᩔ ᨶᩥᨿᨾᨶᨶ᩠ᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨠᨳᩴ ᨸᨬ᩠ᨬᩣᨿᨲᩦᨲᩥ ᨧᩮ? ‘‘ᩋᩁᨬ᩠ᨬᩴ ᨶᩣᨾᩣ’’ᨲᩥ ᨸᨴᩴ ᩋᨶᩩᨴ᩠ᨵᩁᩥᨲ᩠ᩅᩣ ‘‘ᨣᩣᨾᩪᨸᨧᩣᩁᩮᩣ ᨶᩣᨾᩣ’’ᨲᩥ ᩏᨴ᩠ᨵᩁᨱᩔ ᨠᨲᨲ᩠ᨲᩣ. ᨲᨲ᩠ᨳ ‘‘ᨣᩣᨾᩪᨸᨧᩣᩁᩮᩣ ᨶᩣᨾᩣ’’ᨲᩥ ᨾᩣᨲᩥᨠᩣᨿᩴ ᩋᩅᩥᨩ᩠ᨩᨾᩣᨶᩴ ᨸᨴᩴ ᩏᨴ᩠ᨵᩁᨶ᩠ᨲᩮᩣ ᨲᨿᩮᩣ ᩋᨲ᩠ᨳᩅᩈᩮ ᨴᩔᩮᨲᩥ. ᩈᩮᨿ᩠ᨿᨳᩥᨴᩴ – ᩋᩁᨬ᩠ᨬᨸᩁᩥᨧ᩠ᨨᩮᨴᨴᩔᨶᨾᩮᨠᩮᩣ ᩋᨲ᩠ᨳᩮᩣ, ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩏᨸᨧᩣᩁᩮᨶ ᩈᨴ᩠ᨵᩥᩴ ᨸᩁᩥᨧ᩠ᨨᩮᨴᨴᩔᨶᨾᩮᨠᩮᩣ, ᨶ ᨠᩮᩅᩃᩴ ᩋᨸᩁᩥᨠ᩠ᨡᩥᨲ᩠ᨲᩔᨿᩮᩅ ᩏᨸᨧᩣᩁᩮᩣ ᩅᩥᨶᨿᩣᨵᩥᨠᩣᩁᩮ ᩈᨸ᩠ᨸᨿᩮᩣᨩᨶᩮᩣ ᨴᩔᩥᨲᨻ᩠ᨻᩮᩣ, ᨶᩥᨸ᩠ᨸᨿᩮᩣᨩᨶᩮᩣᨸᩥ ᨸᩁᩥᨠ᩠ᨡᩥᨲ᩠ᨲᩔ ᩏᨸᨧᩣᩁᩮᩣ ᩍᨾᩥᨶᩣ ᨸᩁᩥᨿᩣᨿᩮᨶ ᩃᨻ᩠ᨽᨲᩦᨲᩥ ᩋᨶᩩᩈᨦ᩠ᨣᨸ᩠ᨸᨿᩮᩣᨩᨶᨾᩮᨠᩮᩣ ᩋᨲ᩠ᨳᩮᩣᨸᩥ ᩅᩮᨴᩥᨲᨻ᩠ᨻᩮᩣ.

‘‘ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᨥᩁᩪᨸᨧᩣᩁᩮ ᨮᩥᨲᩔ ᨾᨩ᩠ᨫᩥᨾᩔ ᨸᩩᩁᩥᩈᩔ ᩃᩮᨯ᩠ᨯᩩᨸᩣᨲᩮᩣ’’ᨲᩥ ᩍᨴᩴ ᨽᨣᩅᩣ ᨲᨿᩮᩣ ᩋᨲ᩠ᨳᩅᩈᩮ ᨸᨭᩥᨧ᩠ᨧ ᩋᨽᩣᩈᩥ. ᩈᩮᨿ᩠ᨿᨳᩥᨴᩴ – ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᨸᩁᩥᨧ᩠ᨨᩮᨴᨴᩔᨶᨾᩮᨠᩮᩣ, ᩋᩅᩥᨸ᩠ᨸᩅᩣᩈᩈᩦᨾᩣᨵᩥᨠᩣᩁᩮ ᩋᨿᨾᩮᩅ ᨣᩣᨾᩪᨸᨧᩣᩁᩮᩣᨲᩥ ᨴᩔᨶᨾᩮᨠᩮᩣ, ᨲᨲ᩠ᨳ ᨮᩥᨲᩔ ᨴᩩᨲᩥᨿᩮᩣ ᩃᩮᨯ᩠ᨯᩩᨸᩣᨲᩮᩣ ᩈᨻ᩠ᨻᨲ᩠ᨳ ᨣᩣᨾᨸ᩠ᨸᨭᩥᩈᩴᨿᩩᨲ᩠ᨲᩮᩈᩩ ᩈᩥᨠ᩠ᨡᩣᨸᨴᩮᩈᩩ ᩈᨠᩥᨧ᩠ᨧᨠᩮᩣ ᩏᨸᨧᩣᩁᩮᩣᨲᩥ ᨴᩔᨶᨾᩮᨠᩮᩣᨲᩥ ᩑᩅᩴ ᨽᨣᩅᩣ ᩋᨲ᩠ᨲᨶᩮᩣ ᨴᩮᩈᨶᩣᩅᩥᩃᩣᩈᨸ᩠ᨸᨲ᩠ᨲᩥᨿᩣ ᩑᨠᩮᨠᨸᨴᩩᨴ᩠ᨵᩣᩁᨱᩮᨶ ᨲᨿᩮᩣ ᩋᨲ᩠ᨳᩅᩈᩮ ᨴᩔᩮᨲᩦᨲᩥ ᩅᩮᨴᩥᨲᨻ᩠ᨻᩴ.

ᨲᨳᩣ ᩋᩅᩥᨸ᩠ᨸᩅᩣᩈᩈᩦᨾᩣᨠᨾ᩠ᨾᩅᩣᨧᩣᨿ ‘‘ᨮᨸᩮᨲ᩠ᩅᩣ ᨣᩣᨾᨬ᩠ᨧ ᨣᩣᨾᩪᨸᨧᩣᩁᨬ᩠ᨧᩣ’’ᨲᩥ (ᨾᩉᩣᩅ. ᪑᪔᪔) ᩑᨲ᩠ᨳᩣᨸᩥ ᨸᩁᩥᨠ᩠ᨡᩮᨸᩮ ᩈᨲᩥ ᨣᩣᨾᩴ ᨮᨸᩮᨲ᩠ᩅᩣ, ᩋᩈᨲᩥ ᨣᩣᨾᩪᨸᨧᩣᩁᩴ ᨮᨸᩮᨲ᩠ᩅᩣᨲᩥ ᩋᨲ᩠ᨳᩮᩣ. ᨸᩁᩥᨠ᩠ᨡᩥᨲ᩠ᨲᩔ, ᩋᨸᩁᩥᨠ᩠ᨡᩥᨲ᩠ᨲᩔ ᨧ ᨾᨩ᩠ᨫᩮ ᩌᩁᩣᨾᩮ ᩋᩅᩥᨸ᩠ᨸᩅᩣᩈᩈᩦᨾᩣᩈᨾ᩠ᨾᨶ᩠ᨶᨶᨠᩣᩃᩮ ᩋᨿᩴ ᨶᨿᩮᩣ ᩋᨲᩥᩅᩥᨿ ᨿᩩᨩ᩠ᨩᨲᩥ. ᩏᨽᨿᨸᩁᩥᩅᨩ᩠ᨩᨶᨲᩮᩣ ᨸᩩᨻ᩠ᨻᩮ ᩅᩩᨲ᩠ᨲᨶᨿᩮᨶ ᩅᩣ ᩏᨽᨿᨲ᩠ᨳ ᩏᨽᨿᩴ ᩃᨻ᩠ᨽᨲᩮᩅ. ‘‘ᩋᨶ᩠ᨲᩁᩣᩁᩣᨾᩮᩈᩩ ᨸᨶ ᩌᨧᩥᨱ᩠ᨱᨠᨸ᩠ᨸᩣ ᨽᩥᨠ᩠ᨡᩪ ᩋᩅᩥᨸ᩠ᨸᩅᩣᩈᩈᩦᨾᩴ ᩈᨾ᩠ᨾᨶ᩠ᨶᨶ᩠ᨲᩦ’’ᨲᩥ ᨣᨱ᩠ᨮᩥᨸᨴᩮ ᩅᩩᨲ᩠ᨲᩴ. ‘‘ᩋᨶ᩠ᨲᩁᨥᩁᨸ᩠ᨸᨭᩥᩈᩴᨿᩩᨲ᩠ᨲᩣᨶᩴ ᩈᩮᨡᩥᨿᩣᨶᩴ ᩋᨶ᩠ᨲᩁᩣᩁᩣᨾᩮᩈᩩ ᩋᩈᨾ᩠ᨽᩅᨲᩮᩣ ᩋᨶ᩠ᨲᩁᩣᩁᩣᨾᩮᩣ ᨶ ᨣᩣᨾᩈᨦ᩠ᨡᩴ ᨣᨧ᩠ᨨᨲᩥ, ᨲᩈ᩠ᨾᩣ ᨲᨲ᩠ᨳᨸᩥ ᩋᩅᩥᨸ᩠ᨸᩅᩣᩈᩈᩦᨾᩣ ᩁᩩᩉᨲᩮᩅᩣ’’ᨲᩥ ᩑᨠᩮ. ᨲᩮ ᨽᩥᨠ᩠ᨡᩪ ᨴᩩᨲᩥᨿᩔ ᨣᩣᨾᩪᨸᨧᩣᩁᩔ ᨣᩣᨾᩈᨦ᩠ᨡᩣᩈᨽᩣᩅᨲᩮᩣ ᨲᩣᩈᩴ ᩍᨾᩣᨿ ᨴᩩᨲᩥᨿᩣᨿ ᩋᩅᩥᨸ᩠ᨸᩅᩣᩈᨠᨾ᩠ᨾᩅᩣᨧᩣᨿ ᩋᨽᩣᩅᩴ ᨴᩔᩮᨲ᩠ᩅᩣ ᨸᨭᩥᨠ᩠ᨡᩥᨸᩥᨲᨻ᩠ᨻᩣ. ᩋᨩ᩠ᨫᩣᩁᩣᨾᩮᩣ ᨸᨶ ᨣᩣᨾᩮᩣᨸᩥ ᩈᨾᩣᨶᩮᩣ ᨲᩥᨲ᩠ᨳᩥᨿᩈᩮᨿ᩠ᨿᩣᨴᩥ ᩅᩥᨿ ᨠᨸ᩠ᨸᩥᨿᨽᩪᨾᩦᨲᩥ ᩅᩮᨴᩥᨲᨻ᩠ᨻᩮᩣ.

ᩌᨸᨲ᩠ᨲᩥᨿᩣ ᨸᩁᩥᨧ᩠ᨨᩮᨴᩴ, ᨲᨳᩣᨶᩣᨸᨲ᩠ᨲᩥᨿᩣᨸᩥ ᨧ;

ᨴᩔᩮᨲᩩᩴ ᨣᩣᨾᩈᨾ᩠ᨻᨶ᩠ᨵ-ᩈᩥᨠ᩠ᨡᩣᨸᨴᩅᩥᨽᩣᩅᨶᩮ.

ᨣᩣᨾᨣᩣᨾᩪᨸᨧᩣᩁᩣ ᨴ᩠ᩅᩮ, ᨴᩔᩥᨲᩣ ᩍᨵ ᨲᩣᨴᩥᨶᩣ;

ᩈᩦᨾᩣ ᩈᩦᨾᩪᨸᨧᩣᩁᩣ ᨲᩩ, ᩋᨶᩮᨠᨶ᩠ᨲᩣᨲᩥ ᨶᩩᨴ᩠ᨵᨭᩣ.

ᩏᨸᨧᩣᩁᩣ ᨧ ᨴ᩠ᩅᩮ ᩉᩮᩣᨶ᩠ᨲᩥ, ᨻᩣᩉᩥᩁᨻ᩠ᨽᨶ᩠ᨲᩁᨻ᩠ᨻᩈᩣ;

ᨸᩁᩥᨠ᩠ᨡᩥᨲ᩠ᨲᩣᨸᩁᩥᨠ᩠ᨡᩥᨲ᩠ᨲ-ᨽᩮᨴᩣ ᨧᩮ ᨧᨲᩩᩁᩮᩣ ᩈᩥᨿᩩᩴ.

ᩋᨿᨬ᩠ᩉᩥ ᩏᨸᨧᩣᩁᩈᨴ᩠ᨴᩮᩣ ᩅᩥᨶᨿᨸᩥᨭᨠᩮ ‘‘ᩋᨶᩩᨩᩣᨶᩣᨾᩥ, ᨽᩥᨠ᩠ᨡᩅᩮ, ᩋᨣᩥᩃᩣᨶᩮᨶᨸᩥ ᩌᩁᩣᨾᩮ ᩌᩁᩣᨾᩪᨸᨧᩣᩁᩮ ᨨᨲ᩠ᨲᩴ ᨵᩣᩁᩮᨲᩩ’’ᨶ᩠ᨲᩥ (ᨧᩪᩊᩅ. ᪒᪗᪐) ᩑᩅᨾᩣᨴᩦᩈᩩ ᨻᩣᩉᩥᩁᩮ ᩏᨸᨧᩣᩁᩮ ᨴᩥᩔᨲᩥ. ᨻᩣᩉᩥᩁᩮᩣ ᩏᨸᨧᩣᩁᩮᩣ ᨶᩣᨾ ᨸᩁᩥᨠ᩠ᨡᩮᨸᨲᩮᩣ, ᨸᩁᩥᨠ᩠ᨡᩮᨸᩣᩁᩉᨭ᩠ᨮᩣᨶᨲᩮᩣ ᩅᩣ ᩑᨠᩮᩣ ᩃᩮᨯ᩠ᨯᩩᨸᩣᨲᩮᩣ. ‘‘ᩋᨩ᩠ᨫᩣᩁᩣᨾᩮᩣ ᨶᩣᨾ ᨸᩁᩥᨠ᩠ᨡᩥᨲ᩠ᨲᩔ ᩌᩁᩣᨾᩔ ᩋᨶ᩠ᨲᩮᩣᩌᩁᩣᨾᩮᩣ, ᩋᨸᩁᩥᨠ᩠ᨡᩥᨲ᩠ᨲᩔ ᩏᨸᨧᩣᩁᩮᩣ. ᩋᨩ᩠ᨫᩣᩅᩈᨳᩮᩣ ᨶᩣᨾ ᨸᩁᩥᨠ᩠ᨡᩥᨲ᩠ᨲᩔ ᩌᩅᩈᨳᩔ ᩋᨶ᩠ᨲᩮᩣᩌᩅᩈᨳᩮᩣ, ᩋᨸᩁᩥᨠ᩠ᨡᩥᨲ᩠ᨲᩔ ᩏᨸᨧᩣᩁᩮᩣ’’ᨲᩥᩌᨴᩦᩈᩩ (ᨸᩣᨧᩥ. ᪕᪐᪖) ᨸᨶ ᩏᨸᨧᩣᩁᩈᨴ᩠ᨴᩮᩣ ᩋᨻ᩠ᨽᨶ᩠ᨲᩁᩮ ᩏᨸᨧᩣᩁᩮ ᨴᩥᩔᨲᩥ. ᩋᨻ᩠ᨽᨶ᩠ᨲᩁᩮᩣ ᩏᨸᨧᩣᩁᩮᩣ ᨧ ᨶᩣᨾ ᨸᩁᩥᨠ᩠ᨡᩮᨸᩮᩣ, ᨸᩁᩥᨠ᩠ᨡᩮᨸᩣᩁᩉᨭ᩠ᨮᩣᨶᨬ᩠ᨧ ᩉᩮᩣᨲᩥ. ᩍᨵ ᨸᨶ ᨸᩁᩥᨠ᩠ᨡᩮᨸᩮᩣ ‘‘ᩋᨩ᩠ᨫᩣᩁᩣᨾᩮᩣ, ᩋᨩ᩠ᨫᩣᩅᩈᨳᩮᩣ’’ᨲᩥ ᩅᩣ ᨶ ᩅᩩᨧ᩠ᨧᨲᩥ, ᩋᨶ᩠ᨲᩮᩣ ᩑᩅ ᩌᩁᩣᨾᩮᩣ, ᩌᩅᩈᨳᩮᩣᨲᩥ ᩅᩣ. ᨲᩮᩈᩩ ᨻᩣᩉᩥᩁᨻ᩠ᨽᨶ᩠ᨲᩁᨽᩮᨴᨽᩥᨶ᩠ᨶᩮᩈᩩ ᨴ᩠ᩅᩦᩈᩩ ᩏᨸᨧᩣᩁᩮᩈᩩ ᩋᩅᩥᨸ᩠ᨸᩅᩣᩈᩈᩦᨾᩣᨵᩥᨠᩣᩁᩮ ‘‘ᨮᨸᩮᨲ᩠ᩅᩣ ᨣᩣᨾᨬ᩠ᨧ ᨣᩣᨾᩪᨸᨧᩣᩁᨬ᩠ᨧᩣ’’ᨲᩥ (ᨾᩉᩣᩅ. ᪑᪔᪔) ᩑᨲ᩠ᨳ ᨣᩣᨾᩪᨸᨧᩣᩁᩮᩣ ᨶᩣᨾ ᩋᨻ᩠ᨽᨶ᩠ᨲᩁᩪᨸᨧᩣᩁᩮᩣ ᩋᨵᩥᨸ᩠ᨸᩮᨲᩮᩣ, ᨶ ᨻᩣᩉᩥᩁᩮᩣ. ᨽᩥᨠ᩠ᨡᩩᨶᩥᨿᩣ ᩋᩁᨬ᩠ᨬᩈᨬ᩠ᨬᩥᨲᨲᩣᨿ ᨲᩔ ᨻᩣᩉᩥᩁᩔ, ᨲᩔᩣ ᨣᩣᨾᨶ᩠ᨲᩁᩣᨸᨲ᩠ᨲᩥᨿᩣ ᨮᩣᨶᨽᩪᨲᨲ᩠ᨲᩣ ᨧ ᩋᨻ᩠ᨽᨶ᩠ᨲᩁᩏᨸᨧᩣᩁᩔᩣᨲᩥ ᩍᨴᨾᩮᨲ᩠ᨳ ᨠᩣᩁᨱᨴ᩠ᩅᨿᩴ ᩅᩮᨴᩥᨲᨻ᩠ᨻᩴ. ᨲᨲ᩠ᨳ ᩍᨵ ᩋᨴᩥᨶ᩠ᨶᩣᨴᩣᨶᨸᩣᩁᩣᨩᩥᨠᩅᩥᨽᨦ᩠ᨣᩮᨿᩮᩅ ᨸᨮᨾᩮᩣ ᨣᩣᨾᩪᨸᨧᩣᩁᩮᩣ ᨴᩔᩥᨲᩮᩣ, ᩈᩮᩣ ᨻᩣᩉᩥᩁᩮᩣ, ᨴᩩᨲᩥᨿᩮᩣ ᩋᨻ᩠ᨽᨶ᩠ᨲᩁᩮᩣᨲᩥ ᩅᩮᨴᩥᨲᨻ᩠ᨻᩮᩣ. ᨸᨮᨾᩮᨶ ᨧ ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᨴᩩᨲᩥᨿᩃᩮᨯ᩠ᨯᩩᨸᩣᨲᩈᨦ᩠ᨡᩣᨲᩮᩣ ᨻᩣᩉᩥᩁᩮᩣ ᩏᨸᨧᩣᩁᩮᩣ, ᨴᩩᨲᩥᨿᩮᨶ ᨧ ᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᨸᩁᩥᨠ᩠ᨡᩮᨸᨲᩮᩣ ᨻᩣᩉᩥᩁᩈᨦ᩠ᨡᩣᨲᩮᩣ ᩋᨻ᩠ᨽᨶ᩠ᨲᩁᩮᩣ ᩏᨸᨧᩣᩁᩮᩣ ᩃᩮᩈᩮᨶ ᨴᩔᩥᨲᩮᩣᨲᩥ ᩅᩮᨴᩥᨲᨻ᩠ᨻᩮᩣ. ᩑᩅᩴ ᨧᨲ᩠ᨲᩣᩁᩮᩣᨸᩥ ᩏᨸᨧᩣᩁᩣ ᩍᨵ ᨽᨣᩅᨲᩣ ᨴᩮᩈᨶᩣᩅᩥᩃᩣᩈᨸ᩠ᨸᨲ᩠ᨲᩮᨶ ᨴᩮᩈᨶᩣᩃᩦᩃᩣᨿ ᨴᩔᩥᨲᩣ ᩉᩮᩣᨶ᩠ᨲᩦᨲᩥ ᩋᨿᩴ ᨶᨿᩮᩣ ᩈᩩᨭ᩠ᨮᩩ ᩃᨠ᩠ᨡᩮᨲ᩠ᩅᩣ ᩌᨧᩁᩥᨿᩮᩉᩥ ᩈᨾ᩠ᨾᨶ᩠ᨲᨿᩥᨲ᩠ᩅᩣ ᨿᨳᩣᨶᩩᩁᩪᨸᩴ ᨲᨲ᩠ᨳ ᨿᩮᩣᨩᩮᨲᨻ᩠ᨻᩮᩣ. ᩍᨲᩁᨳᩣ –

ᩋᩈᨾ᩠ᨻᩩᨵᩴ ᨻᩩᨴ᩠ᨵᨾᩉᩣᨶᩩᨽᩣᩅᩴ;

ᨵᨾ᩠ᨾᩔ ᨣᨾ᩠ᨽᩦᩁᨶᨿᨲ᩠ᨲᨲᨬ᩠ᨧ;

ᨿᩮᩣ ᩅᨱ᩠ᨱᨿᩮ ᨶᩴ ᩅᩥᨶᨿᩴ ᩋᩅᩥᨬ᩠ᨬᩪ;

ᩈᩮᩣ ᨴᩩᨴ᩠ᨴᩈᩮᩣ ᩈᩣᩈᨶᨶᩣᩈᩉᩮᨲᩩ.

ᨸᩣᩊᩥᩴ ᨲᨴᨲ᩠ᨳᨬ᩠ᨧ ᩋᩈᨾ᩠ᨻᩩᨵᨬ᩠ᩉᩥ;

ᨶᩣᩈᩮᨲᩥ ᨿᩮᩣ ᩋᨭ᩠ᨮᨠᨳᩣᨶᨿᨬ᩠ᨧ;

ᩋᨶᩥᨧ᩠ᨨᨿᩴ ᨶᩥᨧ᩠ᨨᨿᨲᩮᩣ ᨸᩁᩮᩉᩥ;

ᨣᩣᨾᩮᩣᨲᩥ ᨲᩮᨿᩮᩅ ᨸᩩᩁᨠ᩠ᨡᨲᩮᩣ ᩈᩮᩣ.

ᩋᨶᩩᨠ᩠ᨠᨾᩮᨶᩮᩅ ᨾᩉᩣᨩᨶᩮᨶ;

ᨸᩩᩁᨠ᩠ᨡᨲᩮᩣ ᨸᨱ᩠ᨯᩥᨲᨾᩣᨶᩥ ᨽᩥᨠ᩠ᨡᩩ;

ᩋᨸᨱ᩠ᨯᩥᨲᩣᨶᩴ ᩅᩥᨾᨲᩥᩴ ᩋᨠᨲ᩠ᩅᩣ;

ᩌᨧᩁᩥᨿᩃᩦᩃᩴ ᨸᩩᩁᨲᩮᩣ ᨠᩁᩮᩣᨲᩥ.

ᨲᨲ᩠ᨳ ᩉᩥ ᨸᩣᩊᩥᨿᩴ ‘‘ᨣᩣᨾᩔ ᩏᨸᨧᩣᩁᩮᩣ ᨣᩣᨾᩪᨸᨧᩣᩁᩮᩣ, ᨣᩣᨾᩈᨦ᩠ᨡᩣᨲᩮᩣ ᩏᨸᨧᩣᩁᩮᩣ ᨣᩣᨾᩪᨸᨧᩣᩁᩮᩣ ᨶᩣᨾᩣ’’ᨲᩥ ᩏᨴ᩠ᨵᩁᩥᨲ᩠ᩅᩣ ᨣᩣᨾᩔ ᩏᨸᨧᩣᩁᩴ ᨴᩔᩮᨶ᩠ᨲᩮᩣ ‘‘ᩍᨶ᩠ᨴᨡᩦᩃᩮ ᨮᩥᨲᩔ ᨾᨩ᩠ᨫᩥᨾᩔ ᨸᩩᩁᩥᩈᩔ ᩃᩮᨯ᩠ᨯᩩᨸᩣᨲᩮᩣ’’ᨲᩥ (ᨸᩣᩁᩣ. ᪙᪒) ᩅᨲ᩠ᩅᩣ ᨸᩩᨶ ᨣᩣᨾᩈᨦ᩠ᨡᩣᨲᩴ ᩏᨸᨧᩣᩁᩴ ᨴᩔᩮᨶ᩠ᨲᩮᩣ ‘‘ᨥᩁᩪᨸᨧᩣᩁᩮ ᨮᩥᨲᩔ ᨾᨩ᩠ᨫᩥᨾᩔ ᨸᩩᩁᩥᩈᩔ ᩃᩮᨯ᩠ᨯᩩᨸᩣᨲᩮᩣ’’ᨲᩥ ᩅᩩᨲ᩠ᨲᩴ. ᩍᨾᨾᨲ᩠ᨳᩴ ᩈᨶ᩠ᨵᩣᨿ ᩅᩥᨠᩣᩃᩮ ᨣᩣᨾᨸ᩠ᨸᩅᩮᩈᨶᨣᩣᨾᨶ᩠ᨲᩁᩋᩋᨸ᩠ᨸᩅᩣᩈᩈᨾ᩠ᨾᩩᨲᩥᩌᨴᩦᩈᩩ ᨸᩁᩥᨠ᩠ᨡᩮᨸᩣᩁᩉᨭ᩠ᨮᩣᨶᨾᩮᩅ ᨣᩣᨾᩪᨸᨧᩣᩁᨶ᩠ᨲᩥ ᩅᩩᨲ᩠ᨲᨶ᩠ᨲᩥ ᩃᩥᨡᩥᨲᩴ.

ᩋᨲ᩠ᨳᨲᩮᩣ ᩑᨠᨶ᩠ᨲᩥ ᩑᨲ᩠ᨳ ᩈᨦ᩠ᨡᩣᩈᨴ᩠ᨴᩴ ᩈᨦ᩠ᨡᩣᨲᩈᨴ᩠ᨴᩮᨶ ᩈᨾᩣᨶᨿᨲᩥ. ‘‘ᩌᨴᩥᨿᩮᨿ᩠ᨿᩣ’’ᨲᩥ ᩍᨴᩴ ᨸᨬ᩠ᨧᩅᩦᩈᨲᩥᨿᩣ ᩋᩅᩉᩣᩁᩣᨶᩴ ᩈᩣᨵᩣᩁᨱᨸᨴᩴ. ᨮᩣᨶᩣᨧᩣᩅᨶᩅᩈᩮᨶ ᨧ ᨡᩦᩃᩣᨴᩦᨶᩥ ᩈᨦ᩠ᨠᩣᨾᩮᨲ᩠ᩅᩣ ᨡᩮᨲ᩠ᨲᩣᨴᩥᨣ᩠ᨣᩉᨱᩅᩈᩮᨶ ᨧᩣᨲᩥ ᩋᨲ᩠ᨳᩮᩣ. ᨮᩣᨶᩣᨧᩣᩅᨶᩮ ᨿᨳᩣ ᩈᩣᨾᩥᨠᩔ ᨵᩩᩁᨶᩥᨠ᩠ᨡᩮᨸᩣᨴᩥᩴ ᩋᨶᩮᩣᩃᩮᩣᨠᩮᨲ᩠ᩅᩣᩅ ᩌᨸᨲ᩠ᨲᩥ, ᨲᨳᩣ ᩍᩉᩣᨸᩦᨲᩥ ᨣᩉᩮᨲᨻ᩠ᨻᩣ.

‘‘ᩋᩈᩩᨠᩴ ᨶᩣᨾ ᨽᨱ᩠ᨯᩴ ᩋᩅᩉᩁᩥᩔᩣᨾᩦ’’ᨲᩥ ᩈᨻ᩠ᨻᩮᩈᩴ ᩑᨠᩣᩈᨿᨲ᩠ᨲᩣ ‘‘ᩑᨠᩮᨶᩣᨸᩦ’’ᨲᩥ ᩅᩩᨲ᩠ᨲᩴ. ᨿᨴᩥ ᩌᨱᨲ᩠ᨲᩥ ᩍᨧ᩠ᨨᩥᨲᨻ᩠ᨻᩣ, ᩈᩴᩅᩥᨵᩣᩅᩉᩣᩁᩮᩣ ᨶᩣᨾ ᩑᨠᩮᩣ ᩋᩅᩉᩣᩁᩮᩣ ᨸᩁᩥᩉᩣᨿᩥᨲᨻ᩠ᨻᩮᩣ.

ᩒᨠᩣᩈᨸᩁᩥᨠᨸ᩠ᨸᩮ ᨮᩣᨶᩣᨧᩣᩅᨶᩣᨿ ᨣᩉᩥᨲᨾ᩠ᨸᩥ ᩒᨠᩣᩈᨸᩁᩥᨠᨸ᩠ᨸᩥᨲᨲ᩠ᨲᩣ ᩁᨠ᩠ᨡᨲᩥ. ᩒᨠᩣᩈᩣᨲᩥᨠ᩠ᨠᨾᩮᩣᩅ ᨸᨾᩣᨱᩴ ᨸᩩᨻ᩠ᨻᩮ ᩋᩈᩩᨴ᩠ᨵᨧᩥᨲ᩠ᨲᩮᨶ ᨣᩉᩥᨲᨲ᩠ᨲᩣ. ᩍᨴᩣᨶᩥ ᩈᩩᨴ᩠ᨵᨧᩥᨲ᩠ᨲᩮᨶ ᨣᩉᩥᨲᩮᨸᩥ ᩉᩮᩣᨲᩥ ᩑᩅᩣᨲᩥ ᩅᨴᨶ᩠ᨲᩥ, ᨲᩴ ᨶ ᩈᩩᨶ᩠ᨴᩁᩴ. ᩑᨲ᩠ᨳ ᨸᨶ ᩅᩥᨶᩥᨧ᩠ᨨᨿᩮᩣ ᩈᨾᨶ᩠ᨲᨸᩣᩈᩣᨴᩥᨠᩴ ᩒᩃᩮᩣᨠᩮᨲ᩠ᩅᩣ ᨣᩉᩮᨲᨻ᩠ᨻᩮᩣ.

ᩏᨴ᩠ᨵᩣᩁᩮᩣ ᨶᨲ᩠ᨳᩦᨲᩥ ᨮᩣᨶᩣᨧᩣᩅᨶᩴ ᨶᨲ᩠ᨳᩦᨲᩥ ᩋᨲ᩠ᨳᩮᩣ.

ᩏᨴ᩠ᨵᨲᨾᨲ᩠ᨲᩮ ᩋᩅᩉᩣᩁᩮᩣ ᩈᨠᩃᩔ ᨸᨿᩮᩣᨣᩔ ᨶᩥᨭ᩠ᨮᩣᨸᩥᨲᨲ᩠ᨲᩣ, ᨶ ᩋᨲ᩠ᨳᩈᩣᨵᨠᩅᩈᩮᨶ. ᩏᨴ᩠ᨵᩣᩁᩮᨿᩮᩅ ᩁᨠ᩠ᨡᨲᩦᨲᩥ ᩑᨲ᩠ᨳ ᩑᩅ-ᩈᨴ᩠ᨴᩮᨶ ᨸᩣᨲᨶᩮ ᨶ ᩁᨠ᩠ᨡᨲᩦᨲᩥ ᩋᨲ᩠ᨳᩮ ᩈᩥᨴ᩠ᨵᩮᨸᩥ ᩋᨲ᩠ᨳᩈᩣᨵᨠᩅᩈᩮᨶ ᩋᨲ᩠ᨳᩴ ᨴᩔᩮᨲᩩᩴ ‘‘ᨲᩴ ᩏᨴ᩠ᨵᩁᩥᨲ᩠ᩅᩣ’’ᨲᩥᩌᨴᩥ ᩅᩩᨲ᩠ᨲᩴ.

‘‘ᨸᨳᨻ᩠ᨿᩣᩁᩣᨩᨸᨴᩮᩈᩁᩣᨩᩣᨴᨿᩮᩣ ᨻᩉᩪ, ᨲᩮᩈᩴ ᩈᨦ᩠ᨣᨱ᩠ᩉᨶᨲ᩠ᨳᩴ ‘ᩁᩣᨩᩣᨶᩮᩣ’ᨲᩥ ᨻᩉᩩᩅᨧᨶᩴ ᩅᩩᨲ᩠ᨲ’’ᨶ᩠ᨲᩥ ᩃᩥᨡᩥᨲᩴ. ᨠᩥᨬ᩠ᨧᩣᨸᩥ ᨻᩉᩩᩅᨧᨶᩴ ᨠᨲᩴ, ᩍᨴᩴ ᨸᨶ ᩑᨠᩴ ᨻᩥᨾ᩠ᨻᩥᩈᩣᩁᨾᩮᩅᩣᨲᩥ ᨴᨭ᩠ᨮᨻ᩠ᨻᩴ. ᩁᩣᨩᩣᨶᩮᩣᨲᩥ ᨠᩥᨬ᩠ᨧᩥ ᩋᨶᩥᨴ᩠ᨴᩥᩈᩥᨲ᩠ᩅᩣ ᩈᩣᨵᩣᩁᨱᩅᩈᩮᨶ ᨠᩥᨬ᩠ᨧᩣᨸᩥ ᩅᩩᨲ᩠ᨲᩴ, ᩍᨴᩴ ᨸᨶ ᨻᩥᨾ᩠ᨻᩥᩈᩣᩁᨾᩮᩅᩣᨲᩥ.

ᨸᩩᨻ᩠ᨻᨸ᩠ᨸᨿᩮᩣᨣᩮᨲᩥ ᩑᨲ᩠ᨳ ᨣᨾᨶᨠᩣᩃᩮ ᨾᨣ᩠ᨣᩈᩮᩣᨵᨶᩣᨵᩥᨠᩁᨱᩮ ᩋᨸᩣᨧᩥᨲ᩠ᨲᩥᨿᨡᩮᨲ᩠ᨲᩮ ᨴᩩᨠ᩠ᨠᨭᩴ, ᩃᨲᩣᨧ᩠ᨨᩮᨴᨶᩣᨴᩦᩈᩩ ᨸᩣᨧᩥᨲ᩠ᨲᩥᨿᨾᩮᩅ. ᨣᨶ᩠ᨲ᩠ᩅᩣ ᨸᨶ ᨠᩩᨾ᩠ᨽᩥᨾᨲ᩠ᨳᨠᩮ ᨩᩣᨲᩃᨲᩣᨴᩥᨧ᩠ᨨᩮᨴᨶᩮ ᩈᩉᨸᨿᩮᩣᨣᨲ᩠ᨲᩣ ᨴᩩᨠ᩠ᨠᨭᩴ. ‘‘ᩑᨠᨽᨱ᩠ᨯᩮ ᩑᩅᩴ ᨽᩣᩁᩥᨿᨾᩥᨴᩴ, ‘ᨲ᩠ᩅᨾ᩠ᨸᩥ ᩑᨠᨸᩔᩴ ᨣᨱ᩠ᩉ, ᩋᩉᨾ᩠ᨸᩥ ᩑᨠᨸᩔᩴ ᨣᨱ᩠ᩉᩣᨾᩦ’ᨲᩥ ᩈᩴᩅᩥᨴᩉᩥᨲ᩠ᩅᩣ ᩏᨽᨿᩮᩈᩴ ᨸᨿᩮᩣᨣᩮᨶ ᨮᩣᨶᩣᨧᩣᩅᨶᩮ ᨠᨲᩮ ᨠᩣᨿᩅᩣᨧᩣᨧᩥᨲ᩠ᨲᩮᩉᩥ ᩈᨾᩩᨭ᩠ᨮᩣᨲᩥ. ᩋᨬ᩠ᨬᨳᩣ ᩈᩣᩉᨲ᩠ᨳᩥᨠᩴ ᩅᩣ ᩌᨱᨲ᩠ᨲᩥᨠᩔ ᩋᨦ᩠ᨣᩴ ᨶ ᩉᩮᩣᨲᩥ, ᩌᨱᨲ᩠ᨲᩥᨠᩴ ᩅᩣ ᩈᩣᩉᨲ᩠ᨳᩥᨠᩔᩣᨲᩥ ᩅᩩᨲ᩠ᨲᩃᨠ᩠ᨡᨱᩮᨶ ᩅᩥᩁᩩᨩ᩠ᨫᨲᩦ’’ᨲᩥ ᩅᩥᨶᨿᨣᨱ᩠ᨮᩥᨸᨴᩮ ᩃᩥᨡᩥᨲᩴ. ᨸᩥ-ᩈᨴ᩠ᨴᩮᩣ ᨸᨶᩮᨲ᩠ᨳ ᨲᨲ᩠ᨳᩮᩅ ᩃᩥᨡᩥᨲᩮᩣ.

ᨠᩣᨿᩅᩣᨧᩣᩈᨾᩩᨭ᩠ᨮᩣᨶᩴ, ᨿᩔᩣ ᩌᨸᨲ᩠ᨲᩥᨿᩣ ᩈᩥᨿᩣ;

ᨲᨲᩕ ᩅᩣᨧᨦ᩠ᨣᩴ ᨧᩥᨲ᩠ᨲᩴᩅ, ᨠᨾ᩠ᨾᩴ ᨶᩔᩣ ᩅᩥᨵᩦᨿᨲᩥ.

ᨠᩥᩁᩥᨿᩣᨠᩥᩁᩥᨿᩣᨴᩥᨠᩴ ᨿᨬ᩠ᨧᩮ, ᨿᨾ᩠ᨸᩥ ᨠᨾ᩠ᨾᨲ᩠ᨲᨿᩴ ᨽᩅᩮ;

ᨶ ᨿᩩᨲ᩠ᨲᩴ ᨲᩴ ᩅᩥᩁᩩᨴ᩠ᨵᨲ᩠ᨲᩣ, ᨠᨾ᩠ᨾᨾᩮᨠᩴᩅ ᨿᩩᨩ᩠ᨩᨲᩦᨲᩥ. (ᩅᨩᩥᩁ. ᨭᩦ. ᨸᩣᩁᩣᨩᩥᨠ ᪑᪓᪑ ᨸᨠᩥᨱ᩠ᨱᨠᨠᨳᩣᩅᨱ᩠ᨱᨶᩣ);

ᨴᩩᨲᩥᨿᨸᩣᩁᩣᨩᩥᨠᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪓. ᨲᨲᩥᨿᨸᩣᩁᩣᨩᩥᨠᩅᨱ᩠ᨱᨶᩣ

ᨿᨳᩣ ᨬᩣᨲᨸᩁᩥᨬ᩠ᨬᩣ ᨵᨾ᩠ᨾᩣᨶᩴ ᩈᨽᩣᩅᨩᩣᨶᨶᨾᩮᩅ ‘‘ᩍᨴᩴ ᩁᩪᨸᩴ, ᩋᨿᩴ ᩅᩮᨴᨶᩣ’’ᨲᩥ, ᨲᩦᩁᨱᨸᩁᩥᨬ᩠ᨬᩣ ᨸᨶ ᨵᨾ᩠ᨾᩈᨽᩣᩅᩮᨶ ᩈᨴ᩠ᨵᩥᩴ ᩋᨶᩥᨧ᩠ᨧᩣᨴᩥᩅᩈᩮᨶ ᨸᩅᨲ᩠ᨲᨾᩣᨶᩴ ‘‘ᩁᩪᨸᩴ ᩋᨶᩥᨧ᩠ᨧᨶ᩠ᨲᩥ ᩅᩣ’’ᨲᩥᩌᨴᩥ, ᩑᩅᨾᩥᨵ ᩈᨴ᩠ᨵᩥᩴ ᨧᩮᨲᩮᨲ᩠ᩅᩣ ᩑᨠᨲ᩠ᨲᩮᨶᩣᨸᩥ ᨸᩣᨱᩣᨲᩥᨸᩣᨲᩣᨽᩣᩅᩣ ‘‘ᨩᩦᩅᩥᨲᩣ ᩅᩮᩣᩁᩮᩣᨸᩮᨿ᩠ᨿᩣ’’ᨲᩥ ᩅᩩᨲ᩠ᨲᩴ. ‘‘ᨾᨶᩩᩔᩅᩥᨣ᩠ᨣᩉ’’ᨶ᩠ᨲᩥ ᩅᩩᨲ᩠ᨲᨲ᩠ᨲᩣ ᨣᨻ᩠ᨽᩈᩮᨿ᩠ᨿᨠᩣᨶᩴ ᩅᩈᩮᨶ ᩈᨻ᩠ᨻᩈᩩᨡᩩᨾᩋᨲ᩠ᨲᨽᩣᩅᨲᩮᩣ ᨸᨭ᩠ᨮᩣᨿ ᨴᩔᩮᨲᩩᩴ ‘‘ᨠᩃᩃᨲᩮᩣ ᨸᨭ᩠ᨮᩣᨿᩣ’’ᨲᩥ ᩌᩉ. ᩑᨲ᩠ᨳ ᨩᩦᩅᩥᨲᩣ ᩅᩮᩣᩁᩮᩣᨸᩮᨶ᩠ᨲᩮᩣ ᨸᨧ᩠ᨧᩩᨸ᩠ᨸᨶ᩠ᨶᨲᩮᩣ ᩅᩥᨿᩮᩣᨩᩮᨲᩥ. ᨲᨲ᩠ᨳ ᨡᨱᨸᨧ᩠ᨧᩩᨸ᩠ᨸᨶ᩠ᨶᩴ ᨶ ᩈᨠ᩠ᨠᩣ ᩅᩮᩣᩁᩮᩣᨸᩮᨲᩩᩴ, ᩈᨶ᩠ᨲᨲᩥᨸᨧ᩠ᨧᩩᨸ᩠ᨸᨶ᩠ᨶᩴ ᩅᩣ ᩋᨴ᩠ᨵᩣᨸᨧ᩠ᨧᩩᨸ᩠ᨸᨶ᩠ᨶᩴ ᩅᩣ ᩈᨠ᩠ᨠᩣ. ᨠᨳᩴ? ᨲᩈ᩠ᨾᩥᨬ᩠ᩉᩥ ᩏᨸᨠ᩠ᨠᨾᩮ ᨠᨲᩮ ᩃᨴ᩠ᨵᩪᨸᨠ᩠ᨠᨾᩴ ᨩᩦᩅᩥᨲᨴᩈᨠᩴ ᨶᩥᩁᩩᨩ᩠ᨫᨾᩣᨶᩴ ᨴᩩᨻ᩠ᨻᩃᩔ ᨸᩁᩥᩉᩦᨶᩅᩮᨣᩔ ᨸᨧ᩠ᨧᨿᩮᩣ ᩉᩮᩣᨲᩥ. ᩈᨶ᩠ᨲᨲᩥᨸᨧ᩠ᨧᩩᨸ᩠ᨸᨶ᩠ᨶᩴ ᨿᨳᩣ ᨴ᩠ᩅᩮ ᨲᨿᩮᩣ ᨩᩅᨶᩅᩣᩁᩮ ᨩᩅᩥᨲ᩠ᩅᩣ ᨶᩥᩁᩩᨩ᩠ᨫᨲᩥ, ᩋᨴ᩠ᨵᩣᨸᨧ᩠ᨧᩩᨸ᩠ᨸᨶ᩠ᨶᨬ᩠ᨧ ᨲᨴᨶᩩᩁᩪᨸᩴ ᨠᨲ᩠ᩅᩣ ᨶᩥᩁᩩᨩ᩠ᨫᨲᩥ, ᨲᨳᩣ ᨸᨧ᩠ᨧᨿᩮᩣ ᩉᩮᩣᨲᩥ. ᨲᨲᩮᩣ ᩈᨶ᩠ᨲᨲᩥᨸᨧ᩠ᨧᩩᨸ᩠ᨸᨶ᩠ᨶᩴ ᩅᩣ ᩋᨴ᩠ᨵᩣᨸᨧ᩠ᨧᩩᨸ᩠ᨸᨶ᩠ᨶᩴ ᩅᩣ ᨿᨳᩣᨸᩁᩥᨧ᩠ᨨᩥᨶ᩠ᨶᨠᩣᩃᩴ ᩋᨸᨲ᩠ᩅᩣ ᩋᨶ᩠ᨲᩁᩣᩅ ᨶᩥᩁᩩᨩ᩠ᨫᨲᩥ. ᩑᩅᩴ ᨲᨴᩩᨽᨿᨾ᩠ᨸᩥ ᩅᩮᩣᩁᩮᩣᨸᩮᨲᩩᩴ ᩈᨠ᩠ᨠᩣ. ᨲᩈ᩠ᨾᩣ ᨸᨧ᩠ᨧᩩᨸ᩠ᨸᨶ᩠ᨶᩴ ᩅᩥᨿᩮᩣᨩᩮᨲᩥ.

‘‘ᩍᨾᩔ ᨸᨶᨲ᩠ᨳᩔᩣ’’ᨲᩥ ᩅᩮᩣᩉᩣᩁᩅᩈᩮᨶ ᩅᩩᨲ᩠ᨲᨾᨲ᩠ᨳᩴ ᨸᩁᨾᨲ᩠ᨳᩅᩈᩮᨶ ᩌᩅᩥᨽᩣᩅᨲ᩠ᨳᩴ ‘‘ᨸᩣᨱᩮᩣ ᩅᩮᨴᩥᨲᨻ᩠ᨻᩮᩣ’’ᨲᩥᩌᨴᩥ ᩅᩩᨲ᩠ᨲᩴ. ᨠᩣᨿᩅᩥᨬ᩠ᨬᨲ᩠ᨲᩥᩈᩉᩥᨲᩣᨿ ᨧᩮᨲᨶᩣᨿ ᨸᨿᩩᨩ᩠ᨩᨲᩦᨲᩥ ᨸᨿᩮᩣᨣᩮᩣ, ᨠᩮᩣ ᩈᩮᩣ? ᩈᩁᩦᩁᩮ ᩈᨲ᩠ᨳᩣᨴᩦᨶᩴ ᨣᨾᨶᩴ ᨸᩉᩁᨱᨶ᩠ᨲᩥ ᨠᩣᨿᩅᨧᩦᩅᩥᨬ᩠ᨬᨲ᩠ᨲᩥᩈᩉᩥᨲᩣᨿ ᨧᩮᨲᨶᩣᨿ ᨸᩁᩈᩁᩦᩁᩮ ᩈᨲ᩠ᨳᨸᩣᨲᨶᩴ. ᨴᩪᩁᩮ ᨮᩥᨲᨶ᩠ᨲᩥ ᨴᩪᩁᩮ ᩅᩣ ᨲᩥᨭ᩠ᨮᨲᩩ, ᩈᨾᩦᨸᩮ ᩅᩣ. ᩉᨲ᩠ᨳᨲᩮᩣ ᨾᩩᨲ᩠ᨲᩮᨶ ᨸᩉᩣᩁᩮᩣ ᨶᩥᩔᨣ᩠ᨣᩥᨿᩮᩣ. ᨲᨲ᩠ᨳᩣᨲᩥ ᨶᩥᩔᨣ᩠ᨣᩥᨿᨸ᩠ᨸᨿᩮᩣᨣᩮ. ᨿᩮᩣ ᨠᩮᩣᨧᩥ ᨾᩁᨲᩪᨲᩥ ᩑᨲ᩠ᨳ ᨾᩉᩣᨩᨶᩈᨾᩪᩉᩮ ᨶ ᩈᨠ᩠ᨠᩣ. ᨿᩔᩪᨸᩁᩥ ᩈᩁᩮᩣ ᨸᨲᨲᩥ, ᨲᩔᩮᩅ ᨩᩦᩅᩥᨲᨾᩁᨱᩴ ᨠᩣᨲᩩᩴ, ᨶ ᨿᩔ ᨠᩔᨧᩥ ᨩᩦᩅᩥᨲᨾᩁᨱᩴ. ᩌᨱᩣᨸᨶᨶ᩠ᨲᩥ ᩅᨧᩦᩅᩥᨬ᩠ᨬᨲ᩠ᨲᩥᩈᩉᩥᨲᩣᨿ ᨧᩮᨲᨶᩣᨿ ᩋᨵᩥᨸ᩠ᨸᩮᨲᨲ᩠ᨳᩈᩣᨵᨶᩴ. ᨲᩮᨶᩮᩅ ‘‘ᩈᩣᩅᩮᨲᩩᨠᩣᨾᩮᩣ ᨶ ᩈᩣᩅᩮᨲᩦ’’ᨲᩥ (ᨸᩣᩁᩣ. ᪕᪔) ᩅᩩᨲ᩠ᨲᩴ. ᩌᨱᨲ᩠ᨲᩥᨶᩥᨿᩣᨾᨠᩣᨲᩥ ᩌᨱᨲ᩠ᨲᩥᨠᨸ᩠ᨸᨿᩮᩣᨣᩈᩣᨵᩥᨠᩣ. ᩑᨲᩮᩈᩩ ᩉᩥ ᩋᩅᩥᩁᨩ᩠ᨫᩥᨲᩮᩈᩩ ᩑᩅ ᩌᨱᨲ᩠ᨲᩥᨸᨿᩮᩣᨣᩮᩣ ᩉᩮᩣᨲᩥ, ᨶ ᩋᨬ᩠ᨬᨳᩣ.

ᩁᩪᨸᩪᨸᩉᩣᩁᩮᩣᨲᩥ ᩑᨲ᩠ᨳ –

‘‘ᨾᨾᩣᩃᩣᨽᩮᨶ ᩑᩈᩥᨲ᩠ᨳᩦ, ᨾᩁᨲᩪ’’ᨲᩥ ᩈᨾᩦᨸᨣᩮᩣ;

ᨴᩩᨭ᩠ᨮᨧᩥᨲ᩠ᨲᩮᩣ ᩈᨧᩮ ᨿᩣᨲᩥ, ᩉᩮᩣᨲᩥ ᩈᩮᩣ ᩍᨲ᩠ᨳᩥᨾᩣᩁᨠᩮᩣ.

ᨽᩥᨠ᩠ᨡᨲ᩠ᨳᩣᨿ ᩈᨧᩮ ᨿᩣᨲᩥ, ᨩᩣᨶᨶ᩠ᨲᩮᩣᨸᩥ ᨶ ᨾᩣᩁᨠᩮᩣ;

ᩋᨶᨲ᩠ᨳᩥᨠᩮᩣ ᩉᩥ ᩈᩮᩣ ᨲᩔᩣ, ᨾᩁᨱᩮᨶ ᩏᨸᩮᨠ᩠ᨡᨠᩮᩣ.

ᩅᩥᨿᩮᩣᨣᩮᨶ ᨧ ᨾᩮ ᨩᩣᨿᩣ, ᨩᨶᨶᩦ ᨧ ᨶ ᨩᩦᩅᨲᩥ;

ᩍᨲᩥ ᨩᩣᨶᩴ ᩅᩥᨿᩩᨬ᩠ᨩᨶ᩠ᨲᩮᩣ, ᨲᨴᨲ᩠ᨳᩥᨠᩮᩣ ᩉᩮᩣᨲᩥ ᨾᩣᩁᨠᩮᩣ.

ᨸᨻ᩠ᨻᨩ᩠ᨩᩣᨴᩥᨶᩥᨾᩥᨲ᩠ᨲᨬ᩠ᨧᩮ, ᨿᩣᨲᩥ ᨩᩣᨶᩴ ᨶ ᨾᩣᩁᨠᩮᩣ;

ᩋᨶᨲ᩠ᨳᩥᨠᩮᩣ ᩉᩥ ᩈᩮᩣ ᨲᩔᩣ, ᨾᩁᨱᩮᨶ ᩏᨸᩮᨠ᩠ᨡᨠᩮᩣ.

ᩉᩣᩁᨠᩈᨴ᩠ᨴᩔ ᨽᩮᨴᨲᩮᩣ ᩋᨲ᩠ᨳᩴ ᩅᩥᨲ᩠ᨳᩣᩁᩮᨲ᩠ᩅᩣ ᩏᨽᨿᨾ᩠ᨸᩥ ᩑᨠᨾᩮᩅᩣᨲᩥ ᨴᩔᩮᨲᩩᩴ ‘‘ᩈᨲ᩠ᨳᨬ᩠ᨧ ᨲᩴ ᩉᩣᩁᨠᨬ᩠ᨧᩣ’’ᨲᩥᩌᨴᩥ ᩅᩩᨲ᩠ᨲᩴ. ᩑᨲᩮᨶ ᨳᩣᩅᩁᨸ᩠ᨸᨿᩮᩣᨣᩴ ᨴᩔᩮᨲᩥ ᩈᩣᩉᨲ᩠ᨳᩥᨠᩣᨴᩦᩈᩩ ᨸᨿᩮᩣᨣᩮᩈᩩ. ‘‘ᩍᨲᩥ ᨧᩥᨲ᩠ᨲᨾᨶᩮᩣ’’ᨲᩥ ᩏᨴ᩠ᨵᩁᩥᨲ᩠ᩅᩣᨸᩥ ᩍᨲᩥᩈᨴ᩠ᨴᩔ ᩋᨲ᩠ᨳᩮᩣ ᨶ ᨲᩣᩅ ᩅᩩᨲ᩠ᨲᩮᩣ. ᨠᩥᨬ᩠ᨧᩣᨸᩥ ᨶ ᩅᩩᨲ᩠ᨲᩮᩣ, ᩋᨵᩥᨠᩣᩁᩅᩈᩮᨶ ᨸᨶ ᩌᨣᨲᩴ ᩍᨲᩥᩈᨴ᩠ᨴᩴ ᨿᩮᩣᨩᩮᨲ᩠ᩅᩣ ᩍᨲᩥ ᨧᩥᨲ᩠ᨲᩈᨦ᩠ᨠᨸ᩠ᨸᩮᩣᨲᩥ ᩑᨲ᩠ᨳ ‘‘ᨾᩁᨱᩈᨬ᩠ᨬᩦ ᨾᩁᨱᨧᩮᨲᨶᩮᩣ ᨾᩁᨱᩣᨵᩥᨸ᩠ᨸᩣᨿᩮᩣ’’ᨲᩥ ᩅᩩᨲ᩠ᨲᨲ᩠ᨲᩣ ᨾᩁᨱᩴᨿᩮᩅ ᩅᨠ᩠ᨡᨲᩦᨲᩥ ᩅᩮᨴᩥᨲᨻ᩠ᨻᩮᩣ. ᩅᩩᨲ᩠ᨲᨶᨿᩮᨶᩣᨲᩥ ᨨᨸ᩠ᨸᨿᩮᩣᨣᩅᩈᩮᨶ. ᩈᩣᩉᨲ᩠ᨳᩥᨠᨶᩥᩔᨣ᩠ᨣᩥᨿᨸ᩠ᨸᨿᩮᩣᨣᩮᩈᩩ ᩈᨶ᩠ᨶᩥᨭ᩠ᨮᩣᨸᨠᨧᩮᨲᨶᩣᨿ ᩈᨲ᩠ᨲᨾᩣᨿ ᩈᩉ ᩏᨸ᩠ᨸᨶ᩠ᨶᨠᩣᨿᩅᩥᨬ᩠ᨬᨲ᩠ᨲᩥᨿᩣ ᩈᩣᩉᨲ᩠ᨳᩥᨠᨲᩣ ᩅᩮᨴᩥᨲᨻ᩠ᨻᩣ. ᩌᨱᨲ᩠ᨲᩥᨠᩮ ᨸᨶ ᩈᨲ᩠ᨲᩉᩥᨸᩥ ᨧᩮᨲᨶᩣᩉᩥ ᩈᩉ ᩅᨧᩦᩅᩥᨬ᩠ᨬᨲ᩠ᨲᩥᩈᨾ᩠ᨽᩅᨲᩮᩣ ᩈᨲ᩠ᨲ ᩈᨲ᩠ᨲ ᩈᨴ᩠ᨴᩣ ᩑᨠᨲᩮᩣ ᩉᩩᨲ᩠ᩅᩣ ᩑᨠᩮᨠᨠ᩠ᨡᩁᨽᩣᩅᩴ ᨣᨶ᩠ᨲ᩠ᩅᩣ ᨿᨲ᩠ᨲᨠᩮᩉᩥ ᩋᨠ᩠ᨡᩁᩮᩉᩥ ᩋᨲ᩠ᨲᨶᩮᩣ ᩋᨵᩥᨸ᩠ᨸᩣᨿᩴ ᩅᩥᨬ᩠ᨬᩣᨸᩮᨶ᩠ᨲᩥ, ᨲᨴᩅᩈᩣᨶᨠ᩠ᨡᩁᩈᨾᩩᨭ᩠ᨮᩣᨸᩥᨠᩣᨿ ᩈᨲ᩠ᨲᨾᨧᩮᨲᨶᩣᨿ ᩈᩉᨩᩣᨲᩅᨧᩦᩅᩥᨬ᩠ᨬᨲ᩠ᨲᩥᨿᩣ ᩌᨱᨲ᩠ᨲᩥᨠᨲᩣ ᩅᩮᨴᩥᨲᨻ᩠ᨻᩣ.

ᨲᨲᩥᨿᨸᩣᩁᩣᨩᩥᨠᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪔. ᨧᨲᩩᨲ᩠ᨳᨸᩣᩁᩣᨩᩥᨠᩅᨱ᩠ᨱᨶᩣ

ᩍᨵᩮᩅ ᩈᨦ᩠ᨣᩉᨶ᩠ᨲᩥ ‘‘ᩍᨲᩥ ᨩᩣᨶᩣᨾᩥ, ᩍᨲᩥ ᨸᩔᩣᨾᩦ’’ᨲᩥ ᨸᨴᩮ ᨠᨳᨶ᩠ᨲᩥ ᨧᩮ, ‘‘ᩍᨲᩥ ᨩᩣᨶᩣᨾᩦ’’ᨲᩥᩌᨴᩥᨾᩣᩉ. ᨠᩮᩅᩃᩴ ‘‘ᨸᩣᨸᩥᨧ᩠ᨨᨲᩣᨿᩣ’’ᨲᩥ (ᨠᨦ᩠ᨡᩣ. ᩋᨭ᩠ᨮ. ᨧᨲᩩᨲ᩠ᨳᨸᩣᩁᩣᨩᩥᨠᩅᨱ᩠ᨱᨶᩣ) ᩅᨧᨶᨲᩮᩣ ᨾᨶ᩠ᨴᨲ᩠ᨲᩣ ᨾᩮᩣᨾᩪᩉᨲ᩠ᨲᩣ ᩈᨾᩩᨴᩣᨧᩁᨶ᩠ᨲᩔ ᩋᨶᩣᨸᨲ᩠ᨲᩦᨲᩥ ᨴᩦᨸᩥᨲᩴ. ‘‘ᩋᨲᩦᨲᨠᩣᩃᩮ ᩈᩮᩣᨲᩣᨸᨶ᩠ᨶᩮᩣᨾ᩠ᩉᩦ’’ᨲᩥ ᩅᨴᨶ᩠ᨲᩮᩣ ᨸᩁᩥᨿᩣᨿᩮᨶ ᩅᨴᨲᩥ, ‘‘ᨿᩮᩣ ᨲᩮ ᩅᩥᩉᩣᩁᩮ ᩅᩈᨲᩥ, ᩈᩮᩣ ᨽᩥᨠ᩠ᨡᩩ ᩋᩁᩉᩣ’’ᨲᩥᩌᨴᩦᩈᩩ (ᨸᩁᩥ. ᪑᪖᪕) ᩅᩥᨿ ᩈᩥᨠ᩠ᨡᩣᨸᨴᩮᨸᩥ ‘‘ᩍᨲᩥ ᨩᩣᨶᩣᨾᩦ’’ᨲᩥ (ᨸᩣᩁᩣ. ᪑᪙᪕, ᪑᪙᪗) ᨸᨧ᩠ᨧᩩᨸ᩠ᨸᨶ᩠ᨶᨾᩮᩅ ᩅᩩᨲ᩠ᨲᩴ.

ᨧᨲᩩᨲ᩠ᨳᨸᩣᩁᩣᨩᩥᨠᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨾᩣᨲᩩᨥᩣᨲᨠᨸᩥᨲᩩᨥᩣᨲᨠᩋᩁᩉᨶ᩠ᨲᨥᩣᨲᨠᩣ ᨲᨲᩥᨿᨸᩣᩁᩣᨩᩥᨠᩴ ᩌᨸᨶ᩠ᨶᩣ, ᨽᩥᨠ᩠ᨡᩩᨶᩥᨴᩪᩈᨠᩮᩣ, ᩃᨾ᩠ᨻᩦᩌᨴᨿᩮᩣ ᨧ ᨧᨲ᩠ᨲᩣᩁᩮᩣ ᨸᨮᨾᨸᩣᩁᩣᨩᩥᨠᩴ ᩌᨸᨶ᩠ᨶᩣ ᩑᩅᩣᨲᩥ ᨠᨲ᩠ᩅᩣ ᨠᩩᨲᩮᩣ ᨧᨲᩩᩅᩦᩈᨲᩦᨲᩥ ᨧᩮ? ᨶ, ᩋᨵᩥᨸ᩠ᨸᩣᨿᩣᨩᩣᨶᨶᨲᩮᩣ. ᨾᩣᨲᩩᨥᩣᨲᨠᩣᨴᨿᩮᩣ ᩉᩥ ᨧᨲ᩠ᨲᩣᩁᩮᩣ ᩍᨵᩣᨶᩩᨸᩈᨾ᩠ᨸᨶ᩠ᨶᩣ ᩑᩅ ᩋᨵᩥᨸ᩠ᨸᩮᨲᩣ, ᩃᨾ᩠ᨻᩦᩌᨴᨿᩮᩣ ᨧᨲ᩠ᨲᩣᩁᩮᩣ ᨠᩥᨬ᩠ᨧᩣᨸᩥ ᨸᨮᨾᨸᩣᩁᩣᨩᩥᨠᩮᨶ ᩈᨦ᩠ᨣᩉᩥᨲᩣ, ᨿᩈ᩠ᨾᩣ ᨸᨶ ᩑᨠᩮᨶ ᨸᩁᩥᨿᩣᨿᩮᨶ ᨾᩮᨳᩩᨶᨵᨾ᩠ᨾᩴ ᨸᨭᩥᩈᩮᩅᩥᨶᩮᩣ ᩉᩮᩣᨶ᩠ᨲᩥ, ᨲᩈ᩠ᨾᩣ ᩅᩥᩈᩩᩴ ᩅᩩᨲ᩠ᨲᩣ. ᨶ ᩃᨽᨲᩥ ᨽᩥᨠ᩠ᨡᩪᩉᩦᨲᩥ ᩑᨲ᩠ᨳ ‘‘ᩏᨸᩮᩣᩈᨳᩣᨴᩥᨽᩮᨴᩴ ᩈᩴᩅᩣᩈ’’ᨶ᩠ᨲᩥ ᩑᨲ᩠ᨲᨠᩴ ᩅᩩᨲ᩠ᨲᩴ. ᩅᩥᨶᨿᨭ᩠ᨮᨠᨳᩣᨿᩴ ‘‘ᩏᨸᩮᩣᩈᨳᨸ᩠ᨸᩅᩣᩁᨱᩣᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩈᨦ᩠ᨥᨠᨾ᩠ᨾᨸ᩠ᨸᨽᩮᨴ’’ᨶ᩠ᨲᩥ ᩅᩩᨲ᩠ᨲᩴ. ᨸᩣᩊᩥᨿᩴ ‘‘ᩈᩴᩅᩣᩈᩮᩣ ᨶᩣᨾ ᩑᨠᨠᨾ᩠ᨾᩴ ᩑᨠᩩᨴ᩠ᨴᩮᩈᩮᩣ ᩈᨾᩈᩥᨠ᩠ᨡᨲᩣ’’ᨲᩥ (ᨸᩣᩁᩣ. ᪕᪕, ᪙᪒, ᪑᪗᪒, ᪑᪙᪘) ᩅᩩᨲ᩠ᨲᩴ. ᨲᩥᩅᩥᨵᩮᨶᩣᨸᩥ ᩈᨦ᩠ᨥᨠᨾ᩠ᨾᩴ ᨠᩣᨲᩩᩴ ᨶ ᩅᨭ᩠ᨭᨲᩦᨲᩥ ᨸᨭᩥᨠ᩠ᨡᩥᨲ᩠ᨲᩴ. ‘‘ᨶ, ᨽᩥᨠ᩠ᨡᩅᩮ, ᨣᩉᨭ᩠ᨮᩮᨶ ᨶᩥᩈᩥᨶ᩠ᨶᨸᩁᩥᩈᩣᨿ ᨸᩣᨲᩥᨾᩮᩣᨠ᩠ᨡᩴ ᩏᨴ᩠ᨴᩥᩈᩥᨲᨻ᩠ᨻ’’ᨶ᩠ᨲᩥᩌᨴᩥ (ᨾᩉᩣᩅ. ᪑᪕᪔) ᨸᩣᨲᩥᨾᩮᩣᨠ᩠ᨡᨸ᩠ᨸᩅᩣᩁᨱᩣᩈᩩ ᩑᩅ ᩌᨣᨲᩴ, ᩋᨬ᩠ᨬᩮᩈᩩ ᨧ ᩑᩅᩁᩪᨸᩮᩈᩩ ᨮᩣᨶᩮᩈᩩ ᩈᩮᩈᩴ ᨠᨾ᩠ᨾᩴ ᨠᩣᨲᩩᩴ ᨶᨲ᩠ᨳᩥ ᨸᨭᩥᨠ᩠ᨡᩮᨸᩮᩣ. ᩌᨧᩁᩥᨿᩣᨸᩥ ‘‘ᩈᩮᩈᩴ ᨠᨾ᩠ᨾᩴ ᨠᩣᨲᩩᩴ ᩅᨭ᩠ᨭᨲᩥ, ᨶᨲ᩠ᨳᩥ ᩌᨸᨲ᩠ᨲᩦ’’ᨲᩥ ᩅᨴᨶ᩠ᨲᩥ. ‘‘ᩋᨶ᩠ᨲᩥᨾᩅᨲ᩠ᨳᩩ ᩋᨩ᩠ᨫᩣᨸᨶ᩠ᨶᩴ ᩋᨾᩪᩃᨠᩮᨶ ᨸᩣᩁᩣᨩᩥᨠᩮᨶ ᨧᩮᩣᨴᩮᨶ᩠ᨲᩔ ᩈᨦ᩠ᨥᩣᨴᩥᩈᩮᩈᩮᩣ, ᩈᨦ᩠ᨥᩣᨴᩥᩈᩮᩈᩮᨶ ᨧᩮᩣᨴᩮᨶ᩠ᨲᩔ ᨸᩣᨧᩥᨲ᩠ᨲᩥᨿᨶ᩠ᨲᩥ ᨽᩥᨠ᩠ᨡᩩᨶᩮᩣ ᩅᩥᨿ ᩅᩩᨲ᩠ᨲᩴ, ᨶ ᩋᨶᩩᨸᩈᨾ᩠ᨸᨶ᩠ᨶᩔ ᩅᩥᨿ ᨴᩩᨠ᩠ᨠᨭᩴ. ᨲᩈ᩠ᨾᩣ ᨲᩮᨶ ᩈᩉᩈᩮᨿ᩠ᨿᩣ, ᨲᩔ ᨸᨭᩥᨣ᩠ᨣᩉᨱᨬ᩠ᨧ ᨽᩥᨠ᩠ᨡᩩᩔ ᩅᨭ᩠ᨭᨲᩦᨲᩥ ᩌᨧᩁᩥᨿᩣ ᩅᨴᨶ᩠ᨲᩦ’’ᨲᩥ ᩃᩥᨡᩥᨲᩴ. ‘‘ᨿᨳᩣ ᨸᩩᩁᩮ ᨲᨳᩣ ᨸᨧ᩠ᨨᩣᨲᩥ ‘ᩑᨠᨠᨾ᩠ᨾᩴ ᩑᨠᩩᨴ᩠ᨴᩮᩈᩮᩣ ᩈᨾᩈᩥᨠ᩠ᨡᨲᩣ’ᨲᩥ ᩑᩅᩴ ᩅᩩᨲ᩠ᨲᩈᩴᩅᩣᩈᩔ ᩋᨽᨻ᩠ᨻᨲᩣᨾᨲ᩠ᨲᩴ ᩈᨶ᩠ᨵᩣᨿ ᩅᩩᨲ᩠ᨲ’’ᨶ᩠ᨲᩥ ᩅᨴᨶ᩠ᨲᩥ, ᩅᩦᨾᩴᩈᩥᨲᨻ᩠ᨻᩴ.

ᩍᨴᩣᨶᩥ ᨧᨲᩩᨶ᩠ᨶᨾ᩠ᨸᩥ ᩈᩣᨵᩣᩁᨱᩴ ᨸᨠᩥᨱ᩠ᨱᨠᩴ – ᨾᩮᨳᩩᨶᨵᨾ᩠ᨾᩴ ᨸᨭᩥᩈᩮᩅᨶ᩠ᨲᩮᩣ ᩋᨲ᩠ᨳᩥ ᨠᩮᩣᨧᩥ ᨸᩣᩁᩣᨩᩥᨠᩮᩣ ᩉᩮᩣᨲᩥ ᩋᩈᩴᩅᩣᩈᩮᩣ, ᩋᨲ᩠ᨳᩥ ᨠᩮᩣᨧᩥ ᨶ ᨸᩣᩁᩣᨩᩥᨠᩮᩣ ᩉᩮᩣᨲᩥ ᩋᩈᩴᩅᩣᩈᩮᩣ, ᩋᨲ᩠ᨳᩥ ᨠᩮᩣᨧᩥ ᨶ ᨸᩣᩁᩣᨩᩥᨠᩮᩣ ᩈᩴᩅᩣᩈᩮᩣ ᨴᩩᨠ᩠ᨠᨭᩅᨲ᩠ᨳᩩᩈ᩠ᨾᩥᩴ ᩅᩣ ᨳᩩᩃ᩠ᩃᨧ᩠ᨧᨿᩅᨲ᩠ᨳᩩᩈ᩠ᨾᩥᩴ ᩅᩣ ᨸᨭᩥᩈᩮᩅᨶ᩠ᨲᩮᩣ, ᩋᨲ᩠ᨳᩥ ᨠᩮᩣᨧᩥ ᨶ ᨸᩣᩁᩣᨩᩥᨠᩮᩣ ᨸᨠ᩠ᨡᨸᨱ᩠ᨯᨠᩮᩣ ᩋᨸᨱ᩠ᨯᨠᨸᨠ᩠ᨡᩮ ᩏᨸᩈᨾ᩠ᨸᨶ᩠ᨶᩮᩣ ᨸᨱ᩠ᨯᨠᨸᨠ᩠ᨡᩮ ᨾᩮᨳᩩᨶᨵᨾ᩠ᨾᩴ ᨸᨭᩥᩈᩮᩅᨶ᩠ᨲᩮᩣ. ᩈᩮᩣ ᩌᨸᨲ᩠ᨲᩥᩴ ᨶᩣᨸᨩ᩠ᨩᨲᩦᨲᩥ ᨶ ᨸᩣᩁᩣᨩᩥᨠᩮᩣ ᨶᩣᨾ. ᨶ ᩉᩥ ᩋᨽᩥᨠ᩠ᨡᩩᩔ ᩌᨸᨲ᩠ᨲᩥ ᨶᩣᨾ ᩋᨲ᩠ᨳᩥ. ᩈᩮᩣ ᩋᨶᩣᨸᨲ᩠ᨲᩥᨠᨲ᩠ᨲᩣ ᩋᨸᨱ᩠ᨯᨠᨸᨠ᩠ᨡᩮ ᩌᨣᨲᩮᩣ ᨠᩥᩴ ᩋᩈᩴᩅᩣᩈᩮᩣ ᩉᩮᩣᨲᩥ, ᨶ ᩉᩮᩣᨲᩦᨲᩥ? ᩉᩮᩣᨲᩥ. ‘‘ᩋᨽᨻ᩠ᨻᩮᩣ ᨲᩮᨶ ᩈᩁᩦᩁᨻᨶ᩠ᨵᨶᩮᨶᩣ’’ᨲᩥ (ᨾᩉᩣᩅ. ᪑᪒᪙) ᩉᩥ ᩅᩩᨲ᩠ᨲᩴ. ‘‘ᨿᩮᩣ ᨸᨶ ᨽᩥᨠ᩠ᨡᩩ ᨽᩥᨠ᩠ᨡᩪᨶᩴ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ…ᨸᩮ… ᩋᩈᩴᩅᩣᩈᩮᩣ’’ᨲᩥ (ᨸᩣᩁᩣ. ᪔᪔) ᩅᩩᨲ᩠ᨲᨲ᩠ᨲᩣ ᨿᩮᩣ ᨽᩥᨠ᩠ᨡᩩᨽᩣᩅᩮᨶ ᨾᩮᨳᩩᨶᩴ ᨵᨾ᩠ᨾᩴ ᨸᨭᩥᩈᩮᩅᨲᩥ, ᩈᩮᩣ ᩑᩅ ᩋᨽᨻ᩠ᨻᩮᩣ. ᨶᩣᨿᩴ ᩋᨸᩣᩁᩣᨩᩥᨠᨲ᩠ᨲᩣᨲᩥ ᨧᩮ? ᨶ, ‘‘ᨻ᩠ᨿᨲ᩠ᨲᩮᨶ ᨽᩥᨠ᩠ᨡᩩᨶᩣ ᨸᨭᩥᨻᩃᩮᨶ ᩈᨦ᩠ᨥᩮᩣ ᨬᩣᨸᩮᨲᨻ᩠ᨻᩮᩣ’’ᨲᩥ (ᨾᩉᩣᩅ. ᪑᪒᪖) ᩅᩩᨲ᩠ᨲᨭ᩠ᨮᩣᨶᩮ ᨿᨳᩣ ᩋᨽᩥᨠ᩠ᨡᩩᨶᩣ ᨠᨾ᩠ᨾᩅᩣᨧᩣᨿ ᩈᩣᩅᩥᨲᩣᨿᨸᩥ ᨠᨾ᩠ᨾᩴ ᩁᩩᩉᨲᩥ ᨠᨾ᩠ᨾᩅᩥᨸᨲ᩠ᨲᩥᨿᩣ ᩋᩈᨾ᩠ᨽᩅᨲᩮᩣ, ᩑᩅᩴᩈᨾ᩠ᨸᨴᨾᩥᨴᩴ ᨴᨭ᩠ᨮᨻ᩠ᨻᩴ. ᨲᨲᩕᩣᨿᩴ ᩅᩥᩈᩮᩈᩮᩣ – ᩏᨸᩈᨾ᩠ᨸᨶ᩠ᨶᨸᩩᨻ᩠ᨻᩮᩣ ᩑᩅᩴ ᨧᩮ ᨠᨾ᩠ᨾᩅᩣᨧᩴ ᩈᩣᩅᩮᨲᩥ, ᩈᨦ᩠ᨥᩮᩣ ᨧ ᨲᩈ᩠ᨾᩥᩴ ᩏᨸᩈᨾ᩠ᨸᨶ᩠ᨶᩈᨬ᩠ᨬᩦ ᩑᩅ ᨧᩮ, ᨠᨾ᩠ᨾᩴ ᩁᩩᩉᨲᩥ, ᨶᩣᨬ᩠ᨬᨳᩣᨲᩥ ᨶᩮᩣ ᨡᨶ᩠ᨲᩦᨲᩥ ᩌᨧᩁᩥᨿᩮᩣ.

ᨣᩉᨭ᩠ᨮᩮᩣ ᩅᩣ ᨲᩥᨲ᩠ᨳᩥᨿᩮᩣ ᩅᩣ ᨸᨱ᩠ᨯᨠᩮᩣ ᩅᩣ ᨠᨾ᩠ᨾᩅᩣᨧᩴ ᩈᩣᩅᩮᨲᩥ, ᩈᨦ᩠ᨥᩮᨶ ᨠᨾ᩠ᨾᩅᩣᨧᩣ ᨶ ᩅᩩᨲ᩠ᨲᩣ ᩉᩮᩣᨲᩥ. ‘‘ᩈᨦ᩠ᨥᩮᩣ ᩏᨸᩈᨾ᩠ᨸᩣᨴᩮᨿ᩠ᨿ ᩈᨦ᩠ᨥᩮᩣ ᩏᨸᩈᨾ᩠ᨸᩣᨴᩮᨲᩥ, ᩏᨸᩈᨾ᩠ᨸᨶ᩠ᨶᩮᩣ ᩈᨦ᩠ᨥᩮᨶᩣ’’ᨲᩥ (ᨾᩉᩣᩅ. ᪑᪒᪗) ᩉᩥ ᩅᨧᨶᨲᩮᩣ ᩈᨦ᩠ᨥᩮᨶ ᨠᨾ᩠ᨾᩅᩣᨧᩣᨿ ᩅᨲ᩠ᨲᨻ᩠ᨻᨲᩣᨿ ᩈᨦ᩠ᨥᨸᩁᩥᨿᩣᨸᨶ᩠ᨶᩮᨶ, ᩈᨦ᩠ᨥᨸᩁᩥᨿᩣᨸᨶ᩠ᨶᩈᨬ᩠ᨬᩥᨲᩮᨶ ᩅᩣ ᩑᨠᩮᨶ ᩅᩩᨲ᩠ᨲᩣᨿ ᩈᨦ᩠ᨥᩮᨶ ᩅᩩᨲ᩠ᨲᩣ ᩉᩮᩣᨲᩦᨲᩥ ᩅᩮᨴᩥᨲᨻ᩠ᨻᩮᩣ, ᨶ ᨣᩉᨭ᩠ᨮᨲᩥᨲ᩠ᨳᩥᨿᨸᨱ᩠ᨯᨠᩣᨴᩦᩈᩩ ᩋᨬ᩠ᨬᨲᩁᩮᨶ. ᩋᨿᨾᩮᩅ ᩈᨻ᩠ᨻᨠᨾ᩠ᨾᩮᩈᩩ ᨿᩩᨲ᩠ᨲᩥ ᨴᨭ᩠ᨮᨻ᩠ᨻᩣ.

ᨲᨳᩣ ᩋᨲ᩠ᨳᩥ ᨾᩮᨳᩩᨶᩴ ᨵᨾ᩠ᨾᩴ ᨸᨭᩥᩈᩮᩅᨶ᩠ᨲᩮᩣ ᨠᩮᩣᨧᩥ ᨶᩣᩈᩮᨲᨻ᩠ᨻᩮᩣ, ‘‘ᨿᩮᩣ ᨽᩥᨠ᩠ᨡᩩᨶᩥᨴᩪᩈᨠᩮᩣ, ᩋᨿᩴ ᨶᩣᩈᩮᨲᨻ᩠ᨻᩮᩣ’’ᨲᩥ (ᨾᩉᩣᩅ. ᪑᪑᪔-᪑᪑᪕ ᩋᨲ᩠ᨳᨲᩮᩣ ᩈᨾᩣᨶᩴ) ᩅᩩᨲ᩠ᨲᨲ᩠ᨲᩣ ᨲᩮᨶ ᩑᩅ ᩈᩮᩣ ᩋᨶᩩᨸᩈᨾ᩠ᨸᨶ᩠ᨶᩮᩣᩅ ᩈᩉᩈᩮᨿ᩠ᨿᩣᨸᨲ᩠ᨲᩥᩴ ᩅᩣ ᩋᨬ᩠ᨬᩴ ᩅᩣ ᨲᩣᨴᩥᩈᩴ ᨩᨶᩮᨲᩥ, ᨲᩔ ᩒᨾᩈᨶᩮ ᨧ ᨴᩩᨠ᩠ᨠᨭᩴ ᩉᩮᩣᨲᩥ. ᩋᨽᩥᨠ᩠ᨡᩩᨶᩥᨿᩣ ᨾᩮᨳᩩᨶᨵᨾ᩠ᨾᩴ ᨸᨭᩥᩈᩮᩅᨶ᩠ᨲᩮᩣ ᨶ ᨶᩣᩈᩮᨲᨻ᩠ᨻᩮᩣ, ‘‘ᩋᨶ᩠ᨲᩥᨾᩅᨲ᩠ᨳᩩᩴ ᩋᨩ᩠ᨫᩣᨸᨶ᩠ᨶᩮᩣ, ᨽᩥᨠ᩠ᨡᩅᩮ, ᩋᨶᩩᨸᩈᨾ᩠ᨸᨶ᩠ᨶᩮᩣ ᨶ ᩏᨸᩈᨾ᩠ᨸᩣᨴᩮᨲᨻ᩠ᨻᩮᩣ’’ᨲᩥ ᨸᩣᩊᩥᨿᩣ ᩋᨽᩣᩅᨲᩮᩣ, ᨲᩮᨶᩮᩅ ᩈᩮᩣ ᩏᨸᩈᨾ᩠ᨸᨶ᩠ᨶᩈᨦ᩠ᨡᩴ ᨣᨧ᩠ᨨᨲᩥ, ᩈᩉᩈᩮᨿ᩠ᨿᩣᨸᨲ᩠ᨲᩥᩌᨴᩥᩴ ᨶ ᨩᨶᩮᨲᩥ, ᨠᩮᩅᩃᩴ ᩋᩈᩴᩅᩣᩈᩮᩣᨲᩥ ᨠᨲ᩠ᩅᩣ ᨣᨱᨸᩪᩁᨠᩮᩣ ᨶ ᩉᩮᩣᨲᩥ. ᩑᨠᨠᨾ᩠ᨾᩑᨠᩩᨴ᩠ᨴᩮᩈᩮᩣ ᩉᩥ ᩈᩴᩅᩣᩈᩮᩣᨲᩥ ᩅᩩᨲ᩠ᨲᩮᩣ, ᩈᨾᩈᩥᨠ᩠ᨡᨲᩣᨸᩥ ᩈᩴᩅᩣᩈᩮᩣᨲᩥ ᨠᨲ᩠ᩅᩣ ᩈᩮᩣ ᨲᩮᨶ ᩈᨴ᩠ᨵᩥᩴ ᨶᨲ᩠ᨳᩦᨲᩥ. ᨸᨴᩈᩮᩣᨵᨾ᩠ᨾᩣᨸᨲ᩠ᨲᩥᩴ ᨸᨶ ᨩᨶᩮᨲᩦᨲᩥ ᨠᩣᩁᨱᨧ᩠ᨨᩣᨿᩣ ᨴᩥᩔᨲᩦᨲᩥ. ᨿᨳᩣ ᨽᩥᨠ᩠ᨡᩩᨶᩥᨿᩣ ᩈᨴ᩠ᨵᩥᩴ ᨽᩥᨠ᩠ᨡᩩᩈᨦ᩠ᨥᩔ ᩑᨠᨠᨾ᩠ᨾᩣᨴᩥᨶᩮᩣ ᩈᩴᩅᩣᩈᩔ ᩋᨽᩣᩅᩣ ᨽᩥᨠ᩠ᨡᩩᨶᩦ ᩋᩈᩴᩅᩣᩈᩣ ᨽᩥᨠ᩠ᨡᩩᩔ, ᨲᨳᩣ ᨽᩥᨠ᩠ᨡᩩ ᨧ ᨽᩥᨠ᩠ᨡᩩᨶᩥᨿᩣ, ᨸᨴᩈᩮᩣᨵᨾ᩠ᨾᩣᨸᨲ᩠ᨲᩥᩴ ᨸᨶ ᨶ ᨩᨶᩮᨲᩥ. ᨲᨳᩣ ᩋᨶ᩠ᨲᩥᨾᩅᨲ᩠ᨳᩩᩴ ᩋᨩ᩠ᨫᩣᨸᨶ᩠ᨶᩮᩣᨸᩥ ᩑᨠᩮᨧ᩠ᨧᩮᩣ ‘‘ᨿᩮᩣ ᨶᩣᩈᩮᨲᨻ᩠ᨻᩮᩣᨲᩥ ᩅᩩᨲ᩠ᨲᩮᩣ’’ᨲᩥ ᩍᨾᩥᨶᩣ ᨶᩥᨴᩔᨶᩮᨶ ᩈᨠᩣᩁᨱᨧ᩠ᨨᩣᨿᩣ ᩋᨩ᩠ᨫᩩᨸᩮᨠ᩠ᨡᩥᨲᩣ ᩉᩮᩣᨲᩦᨲᩥ ᨶ ᨣᩉᨱᩴ ᨣᨧ᩠ᨨᨲᩥ. ᩋᨸᩥᨧ ‘‘ᩏᨽᩮᩣ ᨶᩣᩈᩮᨲᨻ᩠ᨻᩣ, ᨴᩪᩈᨠᩮᩣ ᨶᩣᩈᩮᨲᨻ᩠ᨻᩮᩣ’’ᨲᩥ (ᨸᩣᩁᩣ. ᪖᪖) ᩅᨧᨶᨲᩮᩣ, ‘‘ᨾᩮᨲ᩠ᨲᩥᨿᩴ ᨽᩥᨠ᩠ᨡᩩᨶᩥᩴ ᨶᩣᩈᩮᨳᩣ’’ᨲᩥ (ᨸᩣᩁᩣ. ᪓᪘᪔) ᩅᨧᨶᨲᩮᩣ ᨧ ᨿᩮᩣ ᩈᨦ᩠ᨥᨾᨩ᩠ᨫᩴ ᨸᩅᩥᩈᩥᨲ᩠ᩅᩣ ᩋᨶᩩᩅᩥᨩ᩠ᨩᨠᩮᨶ ᩋᨶᩩᩅᩥᨩ᩠ᨩᩥᨿᨾᩣᨶᩮᩣ ᨸᩁᩣᨩᩥᨲᩮᩣ, ᩈᩮᩣᨸᩥ ᩋᨶᩩᨸᩈᨾ᩠ᨸᨶ᩠ᨶᩮᩣᩅ, ᨶ ᩒᨾᩈᩅᩣᨴᨸᩣᨧᩥᨲ᩠ᨲᩥᨿᩴ ᨩᨶᩮᨲᩦᨲᩥ ᩅᩮᨴᩥᨲᨻ᩠ᨻᩮᩣ.

ᩋᨸᩥᨧᩮᨲ᩠ᨳ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨲᨠᨧᨲᩩᨠ᩠ᨠᩴ ᩅᩮᨴᩥᨲᨻ᩠ᨻᩴ. ᩋᨲ᩠ᨳᩥ ᩉᩥ ᨸᩩᨣ᩠ᨣᩃᩮᩣ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨲᨠᩮᩣ ᨶ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ, ᩋᨲ᩠ᨳᩥ ᨸᩩᨣ᩠ᨣᩃᩮᩣ ᨶ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨲᨠᩮᩣ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ, ᩋᨲ᩠ᨳᩥ ᨸᩩᨣ᩠ᨣᩃᩮᩣ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨲᨠᩮᩣ ᨧᩮᩅ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ ᨧ, ᩋᨲ᩠ᨳᩥ ᨸᩩᨣ᩠ᨣᩃᩮᩣ ᨶᩮᩅ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨲᨠᩮᩣ ᨶ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ. ᨲᨲ᩠ᨳ ᨲᨲᩥᨿᩮᩣ ᨽᩥᨠ᩠ᨡᩩᨶᩦ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨲᨠᩣ ᩅᩮᨴᩥᨲᨻ᩠ᨻᩣ. ᩈᩣ ᩉᩥ ᨿᩣᩅ ᨶ ᩃᩥᨦ᩠ᨣᩴ ᨸᩁᩥᨧ᩠ᨧᨩᨲᩥ, ᨠᩣᩈᩣᩅᩮᩈᩩ ᩈᩏᩔᩣᩉᩣᩅ ᩈᨾᩣᨶᩣ ᩈᩣᨾᨬ᩠ᨬᩣ ᨧᩅᩥᨲᩩᨠᩣᨾᩣ ᩈᩥᨠ᩠ᨡᩴ ᨸᨧ᩠ᨧᨠ᩠ᨡᨶ᩠ᨲᩦᨸᩥ ᨽᩥᨠ᩠ᨡᩩᨶᩦ ᩑᩅ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩣᩅ. ᩅᩩᨲ᩠ᨲᨬ᩠ᩉᩥ ᨽᨣᩅᨲᩣ ‘‘ᨶᨲ᩠ᨳᩥ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩥᨿᩣ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶ’’ᨶ᩠ᨲᩥ. ᨠᨴᩣ ᨸᨶ ᩈᩣ ᩋᨽᩥᨠ᩠ᨡᩩᨶᩦ ᩉᩮᩣᨲᩦᨲᩥ? ᨿᨴᩣ ᩈᩣ ᩅᩥᨻ᩠ᨽᨶ᩠ᨲᩣᨲᩥ ᩈᨦ᩠ᨡᩴ ᨣᨧ᩠ᨨᨲᩥ. ᩅᩩᨲ᩠ᨲᨬ᩠ᩉᩥ ᨽᨣᩅᨲᩣ ‘‘ᨿᨴᩮᩅ ᩈᩣ ᩅᩥᨻ᩠ᨽᨶ᩠ᨲᩣ, ᨲᨴᩮᩅ ᩈᩣ ᩋᨽᩥᨠ᩠ᨡᩩᨶᩦ’’ᨲᩥ (ᨧᩪᩊᩅ. ᪔᪓᪔). ᨠᩥᨲ᩠ᨲᩣᩅᨲᩣ ᨸᨶ ᩅᩥᨻ᩠ᨽᨶ᩠ᨲᩣ ᩉᩮᩣᨲᩦᨲᩥ? ᩈᩣᨾᨬ᩠ᨬᩣ ᨧᩅᩥᨲᩩᨠᩣᨾᩣ ᨠᩣᩈᩣᩅᩮᩈᩩ ᩋᨶᩣᩃᨿᩣ ᨠᩣᩈᩣᩅᩴ ᩅᩣ ᩋᨸᨶᩮᨲᩥ, ᨶᨣ᩠ᨣᩣ ᩅᩣ ᨣᨧ᩠ᨨᨲᩥ, ᨲᩥᨱᨸᨱ᩠ᨱᩣᨴᩥᨶᩣ ᩅᩣ ᨸᨭᩥᨧ᩠ᨨᩣᨴᩮᨲ᩠ᩅᩣ ᨣᨧ᩠ᨨᨲᩥ, ᨠᩣᩈᩣᩅᩴᨿᩮᩅ ᩅᩣ ᨣᩥᩉᩥᨶᩥᩅᩣᩈᨶᩣᨠᩣᩁᩮᨶ ᨶᩥᩅᩣᩈᩮᨲᩥ, ᩒᨴᩣᨲᩴ ᩅᩣ ᩅᨲ᩠ᨳᩴ ᨶᩥᩅᩣᩈᩮᨲᩥ, ᩃᩥᨦ᩠ᨣᩮᨶᩮᩅ ᩅᩣ ᩈᨴ᩠ᨵᩥᩴ ᨲᩥᨲ᩠ᨳᩥᨿᩮᩈᩩ ᨸᩅᩥᩈᩥᨲ᩠ᩅᩣ ᨠᩮᩈᩃᩩᨬ᩠ᨧᨶᩣᨴᩥᩅᨲᩴ ᩈᨾᩣᨴᩥᨿᨲᩥ, ᨲᩥᨲ᩠ᨳᩥᨿᩃᩥᨦ᩠ᨣᩴ ᩅᩣ ᩈᨾᩣᨴᩥᨿᨲᩥ, ᨲᨴᩣ ᩅᩥᨻ᩠ᨽᨶ᩠ᨲᩣ ᨶᩣᨾ ᩉᩮᩣᨲᩥ. ᨲᨲ᩠ᨳ ᨿᩣ ᩈᩃᩥᨦ᩠ᨣᩮ ᨮᩥᨲᩣᩅ ᨲᩥᨲ᩠ᨳᩥᨿᩅᨲᩴ ᩈᨾᩣᨴᩥᨿᨲᩥ, ᩈᩣ ᨲᩥᨲ᩠ᨳᩥᨿᨸᨠ᩠ᨠᨶ᩠ᨲᨽᩥᨠ᩠ᨡᩩ ᩅᩥᨿ ᨸᨧ᩠ᨨᩣ ᨸᨻ᩠ᨻᨩ᩠ᨩᨾ᩠ᨸᩥ ᨶ ᩃᨽᨲᩥ. ᩈᩮᩈᩣ ᨸᨻ᩠ᨻᨩ᩠ᨩᨾᩮᩅ ᩃᨽᨲᩥ, ᨶ ᩏᨸᩈᨾ᩠ᨸᨴᩴ. ᨸᩣᩊᩥᨿᩴ ᨠᩥᨬ᩠ᨧᩣᨸᩥ ‘‘ᨿᩣ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩦ ᩈᨠᩣᩅᩣᩈᩣ ᨲᩥᨲ᩠ᨳᩣᨿᨲᨶᩴ ᩈᨦ᩠ᨠᨶ᩠ᨲᩣ, ᩈᩣ ᩌᨣᨲᩣ ᨶ ᩏᨸᩈᨾ᩠ᨸᩣᨴᩮᨲᨻ᩠ᨻᩣ’’ᨲᩥ (ᨧᩪᩊᩅ. ᪔᪓᪔) ᩅᨧᨶᨲᩮᩣ ᨿᩣ ᨸᨮᨾᩴ ᩅᩥᨻ᩠ᨽᨾᩥᨲ᩠ᩅᩣ ᨸᨧ᩠ᨨᩣ ᨲᩥᨲ᩠ᨳᩣᨿᨲᨶᩴ ᩈᨦ᩠ᨠᨶ᩠ᨲᩣ, ᩈᩣ ᩌᨣᨲᩣ ᩏᨸᩈᨾ᩠ᨸᩣᨴᩮᨲᨻ᩠ᨻᩣᨲᩥ ᩋᨶᩩᨬ᩠ᨬᩣᨲᩴ ᩅᩥᨿ ᨴᩥᩔᨲᩥ. ᩈᨦ᩠ᨣᩦᨲᩥᩌᨧᩁᩥᨿᩮᩉᩥ ᨸᨶ ‘‘ᨧᨲᩩᩅᩦᩈᨲᩥ ᨸᩣᩁᩣᨩᩥᨠᩣᨶᩦ’’ᨲᩥ (ᨸᩣᩁᩣ. ᩋᨭ᩠ᨮ. ᪒.᪒᪓᪓) ᩅᩩᨲ᩠ᨲᨲ᩠ᨲᩣ ᨶ ᨸᩩᨶ ᩈᩣ ᩏᨸᩈᨾ᩠ᨸᩣᨴᩮᨲᨻ᩠ᨻᩣ. ᨲᩈ᩠ᨾᩣ ᩑᩅ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩴ ᨶᩣᨶᩩᨬ᩠ᨬᩣᨲᩴ ᨽᨣᩅᨲᩣ. ᩋᨶ᩠ᨲᩥᨾᩅᨲ᩠ᨳᩩᩴ ᩋᨩ᩠ᨫᩣᨸᨶ᩠ᨶᩣ ᨸᨶ ᨽᩥᨠ᩠ᨡᩩᨶᩦ ᩑᩅ. ᨸᨠ᩠ᨡᨸᨱ᩠ᨯᨠᩦᨸᩥ ᨽᩥᨠ᩠ᨡᩩᨶᩦ ᩑᩅ. ᩍᨾᩴ ᨶᨿᩴ ᨧᨲᩪᩈᩩᨸᩥ ᨿᩮᩣᨩᩮᨲ᩠ᩅᩣ ᨿᨳᩣᩁᩉᩴ ᨠᨳᩮᨲᨻ᩠ᨻᩴ.

ᨸᩣᩁᩣᨩᩥᨠᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᩈᨦ᩠ᨥᩣᨴᩥᩈᩮᩈᨠᨱ᩠ᨯᩴ

᪑. ᩈᩩᨠ᩠ᨠᩅᩥᩔᨭ᩠ᨮᩥᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩋᨬ᩠ᨬᨲᩕ ᩈᩩᨸᩥᨶᨶ᩠ᨲᩣᨲᩥ ᩈ᩠ᩅᩣᨿᩴ ᨴᩩᨻ᩠ᨻᩃᩅᨲ᩠ᨳᩩᨠᨲ᩠ᨲᩣ ᨧᩮᨲᨶᩣᨿ ᨸᨭᩥᩈᨶ᩠ᨵᩥᩴ ᩌᨠᨯ᩠ᨰᩥᨲᩩᩴ ᩋᩈᨾᨲ᩠ᨳᩣ, ᩈᩩᨸᩥᨶᩮ ᩏᨸᨭ᩠ᨮᩥᨲᩴ ᨶᩥᨾᩥᨲ᩠ᨲᨬ᩠ᩉᩥ ᨴᩩᨻ᩠ᨻᩃᩴ. ᨸᩅᨲ᩠ᨲᩮ ᨸᨶ ᩋᨬ᩠ᨬᩮᩉᩥ ᨠᩩᩈᩃᩣᨠᩩᩈᩃᩮᩉᩥ ᩏᨸᨲ᩠ᨳᨾ᩠ᨽᩥᨲᩣ ᩅᩥᨸᩣᨠᩴ ᨴᩮᨲᩥ. ᨠᩥᨬ᩠ᨧᩣᨸᩥ ᩅᩥᨸᩣᨠᩴ ᨴᩮᨲᩥ, ᩋᨳ ᨡᩮᩣ ᩋᩅᩥᩈᨿᩮ ᩏᨸ᩠ᨸᨶ᩠ᨶᨲ᩠ᨲᩣ ᩋᨻ᩠ᨻᩮᩣᩉᩣᩁᩥᨠᩣᩅ ᩈᩩᨸᩥᨶᨶ᩠ᨲᨧᩮᨲᨶᩣᨲᩥ ᩃᩥᨡᩥᨲᩴ. ᨿᩴ ᨸᨶᩮᨲ᩠ᨳ ‘‘ᩈᩩᨸᩥᨶᩮ ᩏᨸᨭ᩠ᨮᩥᨲᩴ ᨶᩥᨾᩥᨲ᩠ᨲᨬ᩠ᩉᩥ ᨴᩩᨻ᩠ᨻᩃ’’ᨶ᩠ᨲᩥ ᩅᩩᨲ᩠ᨲᩴ, ᨲᩴ ᩋᨶᩮᨠᨶ᩠ᨲᩴ, ᨶ ᨧ ᩌᩁᨾ᩠ᨾᨱᨴᩩᨻ᩠ᨻᩃᨲᩣᨿ ᨧᩥᨲ᩠ᨲᨸ᩠ᨸᩅᨲ᩠ᨲᩥ ᨴᩩᨻ᩠ᨻᩃᩣ ᩋᨲᩦᨲᩣᨶᩣᨣᨲᩣᩁᨾ᩠ᨾᨱᩣᨿ, ᨸᨬ᩠ᨬᨲ᩠ᨲᩣᩁᨾ᩠ᨾᨱᩣᨿ ᩅᩣ ᩋᨴᩩᨻ᩠ᨻᩃᨲ᩠ᨲᩣ. ᨲᩈ᩠ᨾᩣ ᨴᩩᨻ᩠ᨻᩃᩅᨲ᩠ᨳᩩᨠᨲ᩠ᨲᩣᨲᩥ ᨴᩩᨻ᩠ᨻᩃᩉᨴᨿᩅᨲ᩠ᨳᩩᨠᨲ᩠ᨲᩣᨲᩥ ᨶᩮᩣ ᨲᨠ᩠ᨠᩮᩣᨲᩥ (ᩅᨩᩥᩁ. ᨭᩦ. ᨸᩣᩁᩣᨩᩥᨠ ᪒᪓᪖-᪒᪓᪗) ᩌᨧᩁᩥᨿᩮᩣ. ᩋᩅᨲ᩠ᨳᩩᨠᨲᩣᨿ ᨴᩩᨻ᩠ᨻᩃᨽᩣᩅᩮᩣ ᨿᩩᨩ᩠ᨩᨲᩦᨲᩥ ᨧᩮ? ᨶ, ᩋᩅᨲ᩠ᨳᩩᨠᩣᨿ ᨽᩣᩅᨶᩣᨸᨽᩅᩣᨿ ᩋᨲᩥᩁᩮᨠᨻᩃᩅᩈᨾ᩠ᨽᩅᨲᩮᩣ. ᨽᩣᩅᨶᩣᨻᩃᩈᨾᨸ᩠ᨸᩥᨲᨬ᩠ᩉᩥ ᨧᩥᨲ᩠ᨲᩴ ᩋᩁᩪᨸᨾ᩠ᨸᩥ ᩈᨾᩣᨶᩴ ᩋᨲᩥᨽᩣᩁᨾ᩠ᨸᩥ ᨠᩁᨩᨠᩣᨿᩴ ᨣᩉᩮᨲ᩠ᩅᩣ ᩑᨠᨧᩥᨲ᩠ᨲᨠ᩠ᨡᨱᩮᨶᩮᩅ ᨻᩕᩉ᩠ᨾᩃᩮᩣᨠᨾ᩠ᨸᩥ ᨸᩣᨸᩮᨲ᩠ᩅᩣ ᨮᨸᩮᨲᩥ, ᨲᨸ᩠ᨸᨭᩥᨽᩣᨣᩴ ᩋᨶᨸ᩠ᨸᩥᨲᨾ᩠ᨸᩥ ᨠᩣᨾᩣᩅᨧᩁᨧᩥᨲ᩠ᨲᩴ ᨠᩁᨩᨠᩣᨿᩴ ᩌᨠᩣᩈᩮ ᩃᨦ᩠ᨥᨶᩈᨾᨲ᩠ᨳᩴ ᨠᩁᩮᩣᨲᩥ. ᨠᩥᩴ ᨸᨶᩮᨲ᩠ᨳ ᨲᩴ ᩋᨶᩩᨾᩣᨶᨠᩁᨱᩴ? ᨿᩮᨶ ᨧᩥᨲ᩠ᨲᩔᩮᩅ ᩌᨶᩩᨽᩣᩅᩮᩣᨲᩥ ᨸᨬ᩠ᨬᩣᨿᩮᨿ᩠ᨿ ᨧᩥᨲ᩠ᨲᩣᨶᩩᨽᩣᩅᩮᨶ ᨮᨸᨶᩃᨦ᩠ᨥᨶᩣᨴᩥᨠᩥᩁᩥᨿᩣᩅᩥᩈᩮᩈᨶᩥᨻ᩠ᨻᨲ᩠ᨲᩥᨴᩔᨶᨲᩮᩣ. ᨸᨠᨲᩥᨧᩥᨲ᩠ᨲᩈᨾᩩᨭ᩠ᨮᩣᨶᩁᩪᨸᩴ ᩅᩥᨿ ᩋᩈᩴᩈᨭ᩠ᨮᨲ᩠ᨲᩣ, ᨶᩥᨠ᩠ᨡᨾᨶᨲ᩠ᨲᩣ ᨧ ᩅᨲ᩠ᨳᩥᩈᩦᩈᩴ, ᨠᨭᩥ, ᨠᩣᨿᩮᩣᨲᩥ ᨲᩥᨵᩣ ᩈᩩᨠ᩠ᨠᩔ ᨮᩣᨶᩴ ᨸᨠᨸ᩠ᨸᩮᨶ᩠ᨲᩥ ᩌᨧᩁᩥᨿᩣ. ᩈᨸ᩠ᨸᩅᩥᩈᩴ ᩅᩥᨿ ᨲᩴ ᨴᨭ᩠ᨮᨻ᩠ᨻᩴ, ᨶ ᨧ ᩅᩥᩈᩮ ᨮᩣᨶᨶᩥᨿᨾᩮᩣ, ᨠᩮᩣᨵᩅᩈᩮᨶ ᨸᩔᨶ᩠ᨲᩔ ᩉᩮᩣᨲᩥ. ᩑᩅᨾᩔ ᨶ ᨮᩣᨶᨶᩥᨿᨾᩮᩣ, ᩁᩣᨣᩅᩈᩮᨶ ᩏᨸᨠ᩠ᨠᨾᨶ᩠ᨲᩔ ᩉᩮᩣᨲᩦᨲᩥ ᨶᩮᩣ ᨲᨠ᩠ᨠᩮᩣᨲᩥ ᩌᨧᩁᩥᨿᩮᩣ.

‘‘ᨴᨠᩈᩮᩣᨲᩴ ᩋᨶᩮᩣᨲᩥᨱ᩠ᨱᩮᨸᩦ’’ᨲᩥ ᩍᨴᩴ ‘‘ᩒᨲᩥᨱ᩠ᨱᨾᨲ᩠ᨲᩮ’’ᨲᩥ ᩍᨾᩥᨶᩣ ᩅᩥᩁᩩᨩ᩠ᨫᨲᩦᨲᩥ ᨧᩮ, ᨲᩴ ᨴᩔᩮᨲᩩᩴ ‘‘ᨮᩣᨶᨲᩮᩣ ᨸᨶ ᨧᩩᨲ’’ᨶ᩠ᨲᩥᩌᨴᩥᨾᩣᩉ. ᨲᩔᨲ᩠ᨳᩮᩣ – ᨶᩥᨾᩥᨲ᩠ᨲᩮ ᩏᨸᨠ᩠ᨠᨾᩴ ᨠᨲ᩠ᩅᩣ ᩈᩩᨠ᩠ᨠᩴ ᨮᩣᨶᩣ ᨧᩣᩅᩮᨲ᩠ᩅᩣ ᨸᩩᨶ ᩅᩥᨸ᩠ᨸᨭᩥᩈᩣᩁᩅᩈᩮᨶ ᨴᨠᩈᩮᩣᨲᩮᩣᩁᩮᩣᩉᨱᩴ ᨶᩥᩅᩣᩁᩮᨲᩩᩴ ᨶ ᩈᨠ᩠ᨠᩣ, ᨲᨳᩣᨸᩥ ᩋᨵᩥᩅᩣᩈᩣᨵᩥᨸ᩠ᨸᩣᨿᩮᨶ ᩋᨵᩥᩅᩣᩈᩮᨲ᩠ᩅᩣ ᩋᨶ᩠ᨲᩁᩣ ᨴᨠᩈᩮᩣᨲᨲᩮᩣ ᩏᨴ᩠ᨵᩴ ᨶᩥᩅᩣᩁᩮᨲᩩᩴ ᩋᩈᨠ᩠ᨠᩩᨱᩮᨿ᩠ᨿᨲᩣᨿ ‘‘ᨻᩉᩥ ᨶᩥᨠ᩠ᨡᨶ᩠ᨲᩮ ᩅᩣ’’ᨲᩥ ᩅᩩᨲ᩠ᨲᩴ, ᨲᩈ᩠ᨾᩣ ᨮᩣᨶᩣ ᨧᩩᨲᨬ᩠ᩉᩥ ᩋᩅᩔᩴ ᨴᨠᩈᩮᩣᨲᩴ ᩒᨲᩁᨲᩦᨲᩥ ᩋᨭ᩠ᨮᨠᨳᩣᨿ ᩋᨵᩥᨸ᩠ᨸᩣᨿᩮᩣ. ᨲᩈ᩠ᨾᩣ ᩏᨽᨿᩴ ᩈᨾᩮᨲᩦᨲᩥ ᨣᩉᩮᨲᨻ᩠ᨻᩮᩣ.

ᩑᨲ᩠ᨳᩣᩉ – ᨠᩈ᩠ᨾᩣ ᩍᨾᩈ᩠ᨾᩥᩴ ᩈᩥᨠ᩠ᨡᩣᨸᨴᩮ ‘‘ᨿᩮᩣ ᨸᨶ ᨽᩥᨠ᩠ᨡᩪ’’ᨲᩥᩌᨴᩥᨶᩣ ᨠᩣᩁᨠᩮᩣ ᨶ ᨶᩥᨴ᩠ᨴᩥᨭ᩠ᨮᩮᩣᨲᩥ? ᩅᩩᨧ᩠ᨧᨲᩮ – ᩋᨵᩥᨸ᩠ᨸᩣᨿᩣᨸᩮᨠ᩠ᨡᩣᨿ ᨽᩣᩅᨲᩮᩣ ᨠᩣᩁᨠᩮᩣ ᨶ ᨶᩥᨴ᩠ᨴᩥᨭ᩠ᨮᩮᩣ ᨲᩔ ᩈᩣᨸᩮᨠ᩠ᨡᨽᩣᩅᨴᩔᨶᨲ᩠ᨳᩴ. ᨠᨳᩴ? ᨠᨱ᩠ᨯᩩᩅᨶᩣᨴᩥᩋᨵᩥᨸ᩠ᨸᩣᨿᨧᩮᨲᨶᩣᩅᩈᩮᨶ ᨧᩮᨲᩮᨶ᩠ᨲᩔ ᨠᨱ᩠ᨯᩩᩅᨶᩣᨴᩥᩏᨸᨠ᩠ᨠᨾᩮᨶ ᩏᨸᨠ᩠ᨠᨾᨶ᩠ᨲᩔ ᨾᩮᨳᩩᨶᩁᩣᨣᩅᩈᩮᨶ ᩐᩁᩩᩌᨴᩦᩈᩩ ᨴᩩᨠ᩠ᨠᨭᩅᨲ᩠ᨳᩪᩈᩩ, ᩅᨱᩣᨴᩦᩈᩩ ᨳᩩᩃ᩠ᩃᨧ᩠ᨧᨿᩅᨲ᩠ᨳᩪᩈᩩ ᨧ ᩏᨸᨠ᩠ᨠᨾᨶ᩠ᨲᩔ ᩈᩩᨠ᩠ᨠᩅᩥᩈᨭ᩠ᨮᩥᨿᩣ ᩈᨲᩥᨸᩥ ᨶ ᩈᨦ᩠ᨥᩣᨴᩥᩈᩮᩈᩮᩣ ‘‘ᩋᨶᩣᨸᨲ᩠ᨲᩥ ᨽᩥᨠ᩠ᨡᩩ ᨶ ᨾᩮᩣᨧᨶᩣᨵᩥᨸ᩠ᨸᩣᨿᩔᩣ’’ᨲᩥ (ᨸᩣᩁᩣ. ᪒᪖᪓) ᩅᨧᨶᨲᩮᩣ. ᨲᩈ᩠ᨾᩣ ᨲᨴᨲ᩠ᨳᨴᩔᨶᨲ᩠ᨳᩴ ᩍᨵ ᨠᩣᩁᨠᩮᩣ ᨶ ᨶᩥᨴ᩠ᨴᩥᨭ᩠ᨮᩮᩣ. ᩋᨬ᩠ᨬᨳᩣ ‘‘ᨿᩮᩣ ᨸᨶ ᨽᩥᨠ᩠ᨡᩩ ᩈᨬ᩠ᨧᩮᨲᨶᩥᨠᩴ ᩈᩩᨠ᩠ᨠᩅᩥᩈᨭ᩠ᨮᩥᩴ ᩌᨸᨩ᩠ᨩᩮᨿ᩠ᨿ, ᩈᨦ᩠ᨥᩣᨴᩥᩈᩮᩈᩮᩣ’’ᨲᩥ ᨶᩥᨴ᩠ᨴᩥᨭ᩠ᨮᩮ ᨠᩣᩁᨠᩮ ‘‘ᨧᩮᨲᩮᨲᩥ ᨶ ᩏᨸᨠ᩠ᨠᨾᨲᩥ ᨾᩩᨧ᩠ᨧᨲᩥ, ᩋᨶᩣᨸᨲ᩠ᨲᩦ’’ᨲᩥ (ᨸᩣᩁᩣ. ᪒᪖᪒) ᩅᩩᨲ᩠ᨲᩅᨧᨶᩅᩥᩁᩮᩣᨵᩮᩣ. ᨲᨳᩣ ‘‘ᩈᨬ᩠ᨧᩮᨲᨶᩥᨠᩣᨿ ᩈᩩᨠ᩠ᨠᩅᩥᩈᨭ᩠ᨮᩥᨿᩣ ᩋᨬ᩠ᨬᨲᩕ ᩈᩩᨸᩥᨶᨶ᩠ᨲᩣ ᩈᨦ᩠ᨥᩣᨴᩥᩈᩮᩈᩮᩣ’’ᨲᩥ ᨽᩩᨾ᩠ᨾᩮ ᨶᩥᨴ᩠ᨴᩥᨭ᩠ᨮᩮᨸᩥ ᩈᩮᩣ ᩑᩅ ᩅᩥᩁᩮᩣᨵᩮᩣ ᩉᩮᨲ᩠ᩅᨲ᩠ᨳᨶᩥᨿᨾᩈᩥᨴ᩠ᨵᩥᨲᩮᩣ. ᨲᩈ᩠ᨾᩣ ᨲᨴᩩᨽᨿᨾ᩠ᨸᩥ ᩅᨧᨶᨠ᩠ᨠᨾᩴ ᩋᩅᨲ᩠ᩅᩣ ‘‘ᩈᨬ᩠ᨧᩮᨲᨶᩥᨠᩣ ᩈᩩᨠ᩠ᨠᩅᩥᩈᨭ᩠ᨮᩥ ᩋᨬ᩠ᨬᨲᩕ ᩈᩩᨸᩥᨶᨶ᩠ᨲᩣ ᩈᨦ᩠ᨥᩣᨴᩥᩈᩮᩈᩮᩣ’’ᨲᩥ ᩅᩩᨲ᩠ᨲᩴ. ᨲᨲ᩠ᨳ ᨶᩥᨾᩥᨲ᩠ᨲᨲ᩠ᨳᩮ ᨽᩩᨾ᩠ᨾᩅᨧᨶᩣᨽᩣᩅᨲᩮᩣ ᩉᩮᨲ᩠ᩅᨲ᩠ᨳᨶᩥᨿᨾᩮᩣ ᨶ ᨠᨲᩮᩣ ᩉᩮᩣᨲᩥ. ᨲᩈ᩠ᨾᩥᩴ ᩋᨠᨲᩮ ᩈᨬ᩠ᨧᩮᨲᨶᩥᨠᩣ ᩈᩩᨠ᩠ᨠᩅᩥᩈᨭ᩠ᨮᩥ ᩋᨬ᩠ᨬᨲᩕ ᩈᩩᨸᩥᨶᨶ᩠ᨲᩣ ᩈᨦ᩠ᨥᩣᨴᩥᩈᩮᩈᩮᩣᨲᩥ, ᩏᨸᨠ᩠ᨠᨾᩮ ᩋᩈᨲᩥ ᩋᨶᩣᨸᨲ᩠ᨲᩦᨲᩥ ᩋᨿᨾᨲ᩠ᨳᩮᩣ ᨴᩦᨸᩥᨲᩮᩣ ᩉᩮᩣᨲᩦᨲᩥ ᩅᩮᨴᩥᨲᨻ᩠ᨻᩴ.

ᩍᨾᩈ᩠ᨾᩥᩴ ᩈᩥᨠ᩠ᨡᩣᨸᨴᩮ ᨴ᩠ᩅᩮ ᩌᨸᨲ᩠ᨲᩥᩈᩉᩔᩣᨶᩥ ᩉᩮᩣᨶ᩠ᨲᩥ. ᨠᨳᩴ? ᩋᨲ᩠ᨲᨶᩮᩣ ᩉᨲ᩠ᨳᩣᨴᩥᨽᩮᨴᩮ ᩋᨩ᩠ᨫᨲ᩠ᨲᩁᩪᨸᩮ ᩁᩣᨣᩪᨸᨲ᩠ᨳᨾ᩠ᨽᨶᩅᩈᩮᨶ ᩋᨦ᩠ᨣᨩᩣᨲᩮ ᨠᨾ᩠ᨾᨶᩥᨿᨸ᩠ᨸᨲ᩠ᨲᩮ ᩌᩁᩮᩣᨣ᩠ᨿᨲ᩠ᨳᩣᨿ ᨶᩦᩃᩴ ᨾᩮᩣᨧᩮᨶ᩠ᨲᩔ ᩑᨠᩣ ᩌᨸᨲ᩠ᨲᩥ, ᩋᨩ᩠ᨫᨲ᩠ᨲᩁᩪᨸᩮ ᩑᩅ ᩁᩣᨣᩪᨸᨲ᩠ᨳᨾ᩠ᨽᩮ ᨸᩦᨲᨠᩣᨴᩦᨶᩴ ᨾᩮᩣᨧᨶᩅᩈᩮᨶ ᨶᩅᩣᨲᩥ ᨴᩈ. ᩑᩅᩴ ‘‘ᩈᩩᨡᨲ᩠ᨳᩣᨿᩣ’’ᨲᩥᩌᨴᩦᨶᩴ ᨶᩅᨶ᩠ᨶᩴ ᩅᩈᩮᨶᩣᨲᩥ ᩁᩣᨣᩪᨸᨲ᩠ᨳᨾ᩠ᨽᩮ ᩋᨩ᩠ᨫᨲ᩠ᨲᩁᩪᨸᩅᩈᩮᨶ ᩈᨲᩴ. ᩑᩅᨾᩮᩅᩴ ᩅᨧ᩠ᨧᨸ᩠ᨸᩔᩣᩅᩅᩣᨲᩏᨧ᩠ᨧᩣᩃᩥᨦ᩠ᨣᨸᩣᨱᨠᨴᨭ᩠ᨮᩪᨸᨲ᩠ᨳᨾ᩠ᨽᩮᩈᩩ ᨧ ᩈᨲᩴ ᩈᨲᩴ ᨠᨲ᩠ᩅᩣ ᩈᨻ᩠ᨻᩴ ᨸᨬ᩠ᨧᩈᨲᩴ. ᨿᨳᩣ ᩋᨩ᩠ᨫᨲ᩠ᨲᩁᩪᨸᩮ ᨸᨬ᩠ᨧᩈᨲᩴ, ᩑᩅᩴ ᨻᩉᩥᨴ᩠ᨵᩣᩁᩪᨸᩮ ᩅᩣ ᩋᨩ᩠ᨫᨲ᩠ᨲᨻᩉᩥᨴ᩠ᨵᩣᩁᩪᨸᩮ ᩅᩣ ᩌᨠᩣᩈᩮ ᩅᩣ ᨠᨭᩥᩴ ᨠᨾ᩠ᨸᩮᨶ᩠ᨲᩮᩣᨲᩥ ᨴ᩠ᩅᩮ ᩈᩉᩔᩣᨶᩥ ᩌᨸᨲ᩠ᨲᩥᨿᩮᩣ ᩉᩮᩣᨶ᩠ᨲᩦᨲᩥ.

ᩈᩩᨠ᩠ᨠᩅᩥᩔᨭ᩠ᨮᩥᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪒. ᨠᩣᨿᩈᩴᩈᨣ᩠ᨣᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᩒᨲᩥᨱ᩠ᨱᩮᩣ’’ᨲᩥ ᩍᨾᩥᨶᩣᩔ ᩈᩮᩅᨶᩣᨵᩥᨸ᩠ᨸᩣᨿᨲᩣ ᨴᩔᩥᨲᩣ. ᨲᩮᨶᩮᩅ ‘‘ᨠᩣᨿᩈᩴᩈᨣ᩠ᨣᩁᩣᨣᩈᨾᨦ᩠ᨣᩥᩔᩮᨲᩴ ᩋᨵᩥᩅᨧᨶ’’ᨶ᩠ᨲᩥ ᩅᩩᨲ᩠ᨲᩴ. ‘‘ᩅᩥᨸᩁᩥᨱᨲᩮᨶ…ᨸᩮ… ᩈᨴ᩠ᨵᩥ’’ᨶ᩠ᨲᩥ ᩍᨾᩥᨶᩣᩔ ᩅᩣᨿᩣᨾᩮᩣ ᨴᩔᩥᨲᩮᩣ. ‘‘ᩈᨴ᩠ᨵᩥ’’ᨶ᩠ᨲᩥ ᩉᩥ ᨸᨴᩴ ᩈᩴᨿᩮᩣᨣᩴ ᨴᩦᨸᩮᨲᩥ, ᩈᩮᩣ ᨧ ᩈᩴᨿᩮᩣᨣᩮᩣ ᩈᨾᩣᨣᨾᩮᩣ. ᨠᩮᨶ ᨧᩥᨲ᩠ᨲᩮᨶ? ᩅᩥᨸᩁᩥᨱᨲᩮᨶ ᨧᩥᨲ᩠ᨲᩮᨶ, ᨶ ᨸᨲ᩠ᨲᨸ᩠ᨸᨭᩥᨣ᩠ᨣᩉᨱᩣᨵᩥᨸ᩠ᨸᩣᨿᩣᨴᩥᨶᩣᨲᩥ ᩋᨵᩥᨸ᩠ᨸᩣᨿᩮᩣ. ‘‘ᨠᩣᨿᩈᩴᩈᨣ᩠ᨣᩴ ᩈᨾᩣᨸᨩ᩠ᨩᩮᨿ᩠ᨿᩣ’’ᨲᩥ ᩍᨾᩥᨶᩣᩔ ᩅᩣᨿᨾᨲᩮᩣ ᨹᩔᨸ᩠ᨸᨭᩥᩅᩥᨩᩣᨶᨶᩣ ᨴᩔᩥᨲᩣ ᩉᩮᩣᨲᩥ. ᩅᩣᨿᨾᩥᨲ᩠ᩅᩣ ᨹᩔᩴ ᨸᨭᩥᩅᩥᨩᩣᨶᨶ᩠ᨲᩮᩣ ᩉᩥ ᩈᨾᩣᨸᨩ᩠ᨩᨲᩥ ᨶᩣᨾ. ᩑᩅᨾᩔ ᨲᩥᩅᨦ᩠ᨣᩈᨾ᩠ᨸᨲ᩠ᨲᩥ ᨴᩔᩥᨲᩣ ᩉᩮᩣᨲᩥ. ᩋᨳ ᩅᩣ ᩒᨲᩥᨱ᩠ᨱᩮᩣ ᩅᩥᨸᩁᩥᨱᨲᩮᨶ ᨧᩥᨲ᩠ᨲᩮᨶ ᨿᨠ᩠ᨡᩣᨴᩥᨶᩣ ᩈᨲ᩠ᨲᩮᩣ ᩅᩥᨿ. ᩏᨸᨿᩮᩣᨣᨲ᩠ᨳᩮ ᩅᩣ ᩑᨲᩴ ᨠᩁᨱᩅᨧᨶᩴ, ᩒᨲᩥᨱ᩠ᨱᩮᩣ ᩅᩥᨸᩁᩥᨱᨲᩴ ᨧᩥᨲ᩠ᨲᩴ ᨠᩪᨸᩣᨴᩥᩴ ᩅᩥᨿ ᩈᨲ᩠ᨲᩮᩣ. ᩋᨳ ᩅᩣ ‘‘ᩁᩣᨣᨲᩮᩣ ᩏᨲ᩠ᨲᩥᨱ᩠ᨱᩮᩣ ᨽᩅᩥᩔᩣᨾᩦ’’ᨲᩥ ᨽᩥᨠ᩠ᨡᩩᨽᩣᩅᩴ ᩏᨸᨣᨲᩮᩣᨸᩥ ᨿᩮᩣ ᨸᨶ ᨽᩥᨠ᩠ᨡᩩ ᨲᨲᩮᩣ ᩏᨲ᩠ᨲᩥᨱ᩠ᨱᩣᨵᩥᨸ᩠ᨸᩣᨿᨲᩮᩣ ᩅᩥᨸᩁᩥᨱᨲᩮᨶ ᨧᩥᨲ᩠ᨲᩮᨶ ᩉᩮᨲᩩᨽᩪᨲᩮᨶ ᨲᨾᩮᩅ ᩁᩣᨣᩴ ᩒᨲᩥᨱ᩠ᨱᩮᩣ. ᨾᩣᨲᩩᨣᩣᨾᩮᨶ ᩋᨲ᩠ᨲᨶᩮᩣ ᩈᨾᩦᨸᩴ ᩅᩣ ᩌᨣᨲᩮᨶ, ᩋᨲ᩠ᨲᨶᩣ ᩏᨸᨣᨲᩮᨶ ᩅᩣ. ᩑᨲᩮᨶ ᨾᩣᨲᩩᨣᩣᨾᩔ ᩈᩣᩁᨲ᩠ᨲᨲᩣ ᩅᩣ ᩉᩮᩣᨲᩩ, ᩅᩥᩁᨲ᩠ᨲᨲᩣ ᩅᩣ, ᩈᩣ ᩍᨵ ᩋᨸ᩠ᨸᨾᩣᨱᩴ.

ᩉᨲ᩠ᨳᨣ᩠ᨣᩣᩉᩴ ᩅᩣᨲᩥ ᩑᨲ᩠ᨳ ᩉᨲ᩠ᨳᩮᨶ ᩈᨻ᩠ᨻᩮᩣᨸᩥ ᩏᨸᩣᨴᩥᨶ᩠ᨶᨠᩮᩣ ᨠᩣᨿᩮᩣ ᩈᨦ᩠ᨣᩉᩥᨲᩮᩣ, ᨶ ᨽᩥᨶ᩠ᨶᩈᨶ᩠ᨲᩣᨶᩮᩣ ᨲᨸ᩠ᨸᨭᩥᨻᨴ᩠ᨵᩮᩣ ᩅᨲ᩠ᨳᩣᩃᨦ᩠ᨠᩣᩁᩣᨴᩥ. ᩅᩮᨱᩥᨣ᩠ᨣᩉᨱᩮᨶ ᩋᨶᩩᨸᩣᨴᩥᨶ᩠ᨶᨠᩮᩣ ᩋᨽᩥᨶ᩠ᨶᩈᨶ᩠ᨲᩣᨶᩮᩣ ᨠᩮᩈᩃᩮᩣᨾᨶᨡᨣ᩠ᨣᨴᨶ᩠ᨲᨣ᩠ᨣᩣᨴᩥᨠᩮᩣ ᨠᨾ᩠ᨾᨸᨧ᩠ᨧᨿᩏᨲᩩᩈᨾᩩᨭ᩠ᨮᩣᨶᩮᩣ ᨣᩉᩥᨲᩮᩣᨲᩥ ᩅᩮᨴᩥᨲᨻ᩠ᨻᩴ. ᨲᩮᨶᩮᩅᩣᩉ ‘‘ᩋᨶ᩠ᨲᨾᩈᩮᩣ ᩃᩮᩣᨾᩮᨶ ᩃᩮᩣᨾᩴ ᨹᩩᩈᨶ᩠ᨲᩔᩣᨸᩦ’’ᨲᩥ. ᨲᩮᨶ ᩋᨬ᩠ᨬᨲᩁᩔ ᩅᩣ…ᨸᩮ… ᨸᩁᩣᨾᩈᨶᨶ᩠ᨲᩥ ᩑᨲ᩠ᨳ ᩋᨶᩩᨸᩣᨴᩥᨶ᩠ᨶᨠᩣᨶᨾ᩠ᨸᩥ ᩈᩮᩈᩃᩮᩣᨾᩣᨴᩦᨶᩴ ᩋᨦ᩠ᨣᨽᩣᩅᩮᩣ ᩅᩮᨴᩥᨲᨻ᩠ᨻᩮᩣ. ᩑᩅᩴ ᩈᨶ᩠ᨲᩮ ‘‘ᨹᩔᩴ ᨸᨭᩥᨩᩣᨶᨶ᩠ᨲᩔ ᩈᨦ᩠ᨥᩣᨴᩥᩈᩮᩈᩮᩣ’’ᨲᩥ ᩍᨾᩥᨶᩣ ᩅᩥᩁᩩᨩ᩠ᨫᨲᩦᨲᩥ ᨧᩮ? ᨶ, ᨲᨴᨲ᩠ᨳᨩᩣᨶᨶᨲᩮᩣ. ᨹᩩᨭ᩠ᨮᨽᩣᩅᩴ ᨸᨭᩥᩅᩥᨩᩣᨶᨶ᩠ᨲᩮᩣᨸᩥ ᨹᩔᩴ ᨸᨭᩥᨩᩣᨶᩣᨲᩥ ᨶᩣᨾ, ᨶ ᨠᩣᨿᩅᩥᨬ᩠ᨬᩣᨱᩩᨸ᩠ᨸᨲ᩠ᨲᩥᨿᩣ ᩑᩅ. ᩋᨶᩮᨠᨶ᩠ᨲᩥᨠᨬ᩠ᩉᩮᨲ᩠ᨳ ᨠᩣᨿᩅᩥᨬ᩠ᨬᩣᨱᩴ. ᨲᩈ᩠ᨾᩣ ᩑᩅ ᩍᨵ ᨹᩔᨸ᩠ᨸᨭᩥᩅᩥᨩᩣᨶᨶᩴ ᩋᨦ᩠ᨣᨶ᩠ᨲ᩠ᩅᩮᩅ ᨶ ᩅᩩᨲ᩠ᨲᩴ. ᨲᩈ᩠ᨾᩥᨬ᩠ᩉᩥ ᩅᩩᨲ᩠ᨲᩮ ᨮᩣᨶᨾᩮᨲᩴ ᩅᩥᨩ᩠ᨩᨲᩥ ‘‘ᨶ ᨧ ᨾᩮ ᩃᩮᩣᨾᨥᨭ᩠ᨭᨶᩮᨶ ᨠᩣᨿᩅᩥᨬ᩠ᨬᩣᨱᩴ ᩏᨸ᩠ᨸᨶ᩠ᨶᩴ, ᨲᩈ᩠ᨾᩥᩴ ‘ᨶ ᨹᩔᩴ ᨸᨭᩥᨩᩣᨶᩣᨾᩦ’ᨲᩥ ᩋᨶᩣᨸᨶ᩠ᨶᩈᨬ᩠ᨬᩦ ᩈᩥᨿᩣ’’ᨲᩥ. ‘‘ᩅᩮᨱᩦ ᨶᩣᨾ ᨠᩉᩣᨸᨱᨾᩣᩃᩣᨴᩥᩈᨾ᩠ᨸᨿᩩᨲ᩠ᨲᩴ, ᨲᨲ᩠ᨳ ‘ᩅᩮᨱᩥᩴ ᨣᨱ᩠ᩉᩥᩔᩣᨾᩦ’ᨲᩥ ᨠᩉᩣᨸᨱᨾᩣᩃᩣᨴᩥᩴ ᩑᩅ ᨣᨱ᩠ᩉᩣᨲᩥ, ᨶ ᩃᩮᩣᨾᩴ, ᨶᨲ᩠ᨳᩥ ᩈᨦ᩠ᨥᩣᨴᩥᩈᩮᩈᩮᩣ’’ᨲᩥ ᩅᨴᨶ᩠ᨲᩥ. ᩅᩦᨾᩴᩈᩥᨲᨻ᩠ᨻᩴ.

ᨠᩣᨿᩈᩴᩈᨣ᩠ᨣᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪓. ᨴᩩᨭ᩠ᨮᩩᩃ᩠ᩃᩅᩣᨧᩣᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᨠᨴᩣ ᨲᩮ ᨾᩣᨲᩣ ᨸᩈᩦᨴᩥᩔᨲᩦ’’ᨲᩥ ᩌᨿᩣᨧᨶᩴ ᨴᩩᨭ᩠ᨮᩩᩃ᩠ᩃᩅᩣᨧᩣᨿ ᩈᩥᨡᩣᨸᨲ᩠ᨲᩃᨠ᩠ᨡᨱᨴᩔᨶᨲ᩠ᨳᩴ ᩅᩩᨲ᩠ᨲᩴ, ᨶ ᨾᩮᨳᩩᨶᩩᨸᩈᩴᩉᩥᨲᩮᨿᩮᩅ ᨴᩩᨭ᩠ᨮᩩᩃ᩠ᩃᩅᩣᨧᩣᨲᩥ ᨴᩔᨶᨲ᩠ᨳᩴ. ‘‘ᩏᨽᨲᩮᩣᨻ᩠ᨿᨬ᩠ᨩᨶᨠᩣᩈᩦ’’ᨲᩥ ᩅᨧᨶᩴ ᨸᨶ ᨸᩩᩁᩥᩈᨶᩥᨾᩥᨲ᩠ᨲᩮᨶ ᩋᩈᨦ᩠ᨥᩣᨴᩥᩈᩮᩈᩅᨲ᩠ᨳᩩᨶᩣ ᨾᩥᩔᩅᨧᨶᩴ, ᨸᩩᩁᩥᩈᩏᨽᨲᩮᩣᨻ᩠ᨿᨬ᩠ᨩᨶᨠᩔ ᨧ ᩍᨲ᩠ᨳᩥᨶᩥᨾᩥᨲ᩠ᨲᩴ ᨸᨭᩥᨧ᩠ᨨᨶ᩠ᨶᩴ, ᩍᨲᩁᩴ ᨸᩣᨠᨭᩴ. ᨿᨴᩥ ᨲᨾ᩠ᨸᩥ ᨩᨶᩮᨲᩥ, ᨠᨳᩴ ‘ᩋᨶᩥᨾᩥᨲ᩠ᨲᩣᩈᩦ’ᨲᩥᩌᨴᩦᨶᩥ ᨸᨴᩣᨶᩥ ᨶ ᩈᨦ᩠ᨥᩣᨴᩥᩈᩮᩈᩴ ᨩᨶᩮᨶ᩠ᨲᩦ’’ᨲᩥ ᩑᨠᩮ, ᨲᩴ ᨶ ᨿᩩᨲ᩠ᨲᩴ ᨸᩩᩁᩥᩈᩔᩣᨸᩥ ᨶᩥᨾᩥᨲ᩠ᨲᩣᨵᩥᩅᨧᨶᨲ᩠ᨲᩣ. ‘‘ᨾᩮᨳᩩᨶᩩᨸᩈᩴᩉᩥᨲᩣᩉᩥ ᩈᨦ᩠ᨥᩣᨴᩥᩈᩮᩈᩮᩣ’’ᨲᩥ (ᨸᩣᩁᩣ. ᪒᪔᪘) ᨾᩣᨲᩥᨠᩣᨿᩴ ᩃᨠ᩠ᨡᨱᩔ ᩅᩩᨲ᩠ᨲᨲ᩠ᨲᩣ ᨧ ᨾᩮᨳᩩᨶᩩᨸᩈᩴᩉᩥᨲᩣᩉᩥ ᩒᨽᩣᩈᨶᩮ ᨸᨭᩥᩅᩥᨩᩣᨶᨶ᩠ᨲᩥᨿᩣ ᩈᨦ᩠ᨥᩣᨴᩥᩈᩮᩈᩮᩣ, ᩋᨸ᩠ᨸᨭᩥᩅᩥᨩᩣᨶᨶ᩠ᨲᩥᨿᩣ ᨳᩩᩃ᩠ᩃᨧ᩠ᨧᨿᩴ, ᩍᨲᩁᩮᩉᩥ ᩒᨽᩣᩈᨶᩮ ᨸᨭᩥᩅᩥᨩᩣᨶᨶ᩠ᨲᩥᨿᩣ ᨳᩩᩃ᩠ᩃᨧ᩠ᨧᨿᩴ, ᩋᨸ᩠ᨸᨭᩥᩅᩥᨩᩣᨶᨶ᩠ᨲᩥᨿᩣ ᨴᩩᨠ᩠ᨠᨭᨶ᩠ᨲᩥ ᩑᨠᩮ, ᩅᩥᨧᩣᩁᩮᨲ᩠ᩅᩣ ᨣᩉᩮᨲᨻ᩠ᨻᩴ. ᩑᨲ᩠ᨳᩣᩉ – ‘‘ᩈᩥᨡᩁᨱᩦ’’ᨲᩥᩌᨴᩦᩉᩥ ᩋᨠ᩠ᨠᩮᩣᩈᨶ᩠ᨲᩔ ᨸᨭᩥᨥᨧᩥᨲ᩠ᨲᩴ ᩏᨸ᩠ᨸᨩ᩠ᨩᨲᩥ, ᨠᩈ᩠ᨾᩣ ‘‘ᨲᩥᩅᩮᨴᨶ’’ᨶ᩠ᨲᩥ ᩋᩅᨲ᩠ᩅᩣ ‘‘ᨴ᩠ᩅᩥᩅᩮᨴᨶ’’ᨶ᩠ᨲᩥ ᩅᩩᨲ᩠ᨲᨶ᩠ᨲᩥ? ᩁᩣᨣᩅᩈᩮᨶ ᩋᨿᩴ ᩌᨸᨲ᩠ᨲᩥ, ᨶ ᨸᨭᩥᨥᩅᩈᩮᨶ. ᨲᩈ᩠ᨾᩣ ᩁᩣᨣᩅᩈᩮᨶᩮᩅ ᨸᩅᨲ᩠ᨲᩮᩣ ᩋᨠ᩠ᨠᩮᩣᩈᩮᩣ ᩍᨵ ᩋᨵᩥᨸ᩠ᨸᩮᨲᩮᩣ. ᨲᩈ᩠ᨾᩣ ‘‘ᨴ᩠ᩅᩥᩅᩮᨴᨶ’’ᨶ᩠ᨲᩥ ᩅᨧᨶᩴ ᩈᩩᩅᩩᨲ᩠ᨲᨾᩮᩅ.

ᨴᩩᨭ᩠ᨮᩩᩃ᩠ᩃᩅᩣᨧᩣᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪔. ᩋᨲ᩠ᨲᨠᩣᨾᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨴᩩᨭ᩠ᨮᩩᩃ᩠ᩃᩮᩣᨽᩣᩈᨶᩮ ᩅᩩᨲ᩠ᨲᨸ᩠ᨸᨠᩣᩁᩣᨿᩣᨲᩥ ᨴᩩᨭ᩠ᨮᩩᩃ᩠ᩃᩣᨴᩩᨭ᩠ᨮᩩᩃ᩠ᩃᨩᩣᨶᨶᩈᨾᨲ᩠ᨳᩣᨿ. ᨸᩁᩔ ᨽᩥᨠ᩠ᨡᩩᨶᩮᩣ ᩋᨲ᩠ᨲᨠᩣᨾᨸᩣᩁᩥᨧᩁᩥᨿᩣᨿ ᩅᨱ᩠ᨱᨽᨱᨶᩮ ᨴᩩᨠ᩠ᨠᨭᩴ, ‘‘ᨿᩮᩣ ᨲᩮ ᩅᩥᩉᩣᩁᩮ ᩅᩈᨲᩥ, ᨲᩔ ᩋᨣ᩠ᨣᨴᩣᨶᩴ ᨾᩮᨳᩩᨶᩴ ᨵᨾ᩠ᨾᩴ ᨴᩮᩉᩦ’’ᨲᩥ ᨸᩁᩥᨿᩣᨿᩅᨧᨶᩮᨸᩥ ᨴᩩᨠ᩠ᨠᨭᩴ, ‘‘ᩋᨲ᩠ᨲᨠᩣᨾᨸᩣᩁᩥᨧᩁᩥᨿᩣᨿ ᩅᨱ᩠ᨱᩴ ᨽᩣᩈᩮᨿ᩠ᨿ, ᨿᩣ ᨾᩣᨴᩥᩈᩴ ᩈᩦᩃᩅᨶ᩠ᨲ’’ᨶ᩠ᨲᩥ ᨧ ᩅᩩᨲ᩠ᨲᨲ᩠ᨲᩣᨲᩥ ᩑᨠᩮ. ᨸᨬ᩠ᨧᩈᩩ ᩋᨦ᩠ᨣᩮᩈᩩ ᩈᨻ᩠ᨽᩣᩅᩣ ᩈᨦ᩠ᨥᩣᨴᩥᩈᩮᩈᩮᩣᩅᩣᨲᩥ ᩑᨠᩮ, ᩅᩥᨧᩣᩁᩮᨲ᩠ᩅᩣ ᨣᩉᩮᨲᨻ᩠ᨻᩴ. ‘‘ᩍᨾᩈ᩠ᨾᩥᩴ ᩈᩥᨠ᩠ᨡᩣᨸᨴᨴ᩠ᩅᨿᩮ ᨠᩣᨿᩈᩴᩈᨣ᩠ᨣᩮ ᩅᩥᨿ ᨿᨠ᩠ᨡᩥᨸᩮᨲᩦᩈᩩᨸᩥ ᨴᩩᨭ᩠ᨮᩩᩃ᩠ᩃᨲ᩠ᨲᨠᩌᨾᩅᨧᨶᩮ ᨳᩩᩃ᩠ᩃᨧ᩠ᨧᨿᨶ᩠ᨲᩥ ᩅᨴᨶ᩠ᨲᩥ. ᩋᨭ᩠ᨮᨠᨳᩣᩈᩩ ᨸᨶ ᨶᩣᨣᨲ’’ᨶ᩠ᨲᩥ (ᩅᨩᩥᩁ. ᨭᩦ. ᨸᩣᩁᩣᨩᩥᨠ ᪒᪙᪕) ᩃᩥᨡᩥᨲᩴ. ᩏᨽᨲᩮᩣᨻ᩠ᨿᨬ᩠ᨩᨶᨠᩮᩣ ᨸᨶ ᨸᨱ᩠ᨯᨠᨣᨲᩥᨠᩮᩣᩅ.

ᩋᨲ᩠ᨲᨠᩣᨾᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪕. ᩈᨬ᩠ᨧᩁᩥᨲ᩠ᨲᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩋᩃᩴᩅᨧᨶᩦᨿᩣᨲᩥ ᨶ ᩅᨧᨶᩦᨿᩣ, ᨶᩥᩅᩣᩁᨱᩮ ᩋᩃᩴ-ᩈᨴ᩠ᨴᩮᩣ, ᨶ ᩋᩃᩴᩅᨧᨶᩦᨿᩣ ᨶᩣᩃᩴᩅᨧᨶᩦᨿᩣ. ‘‘ᨸᨭᩥᨣ᩠ᨣᨱ᩠ᩉᩣᨲᩥ ᩅᩦᨾᩴᩈᨲᩥ ᨸᨧ᩠ᨧᩣᩉᩁᨲᩥ, ᩌᨸᨲ᩠ᨲᩥ ᩈᨦ᩠ᨥᩣᨴᩥᩈᩮᩈᩔᩣ’’ᨲᩥ (ᨸᩣᩁᩣ. ᪓᪐᪕) ᩅᩩᨲ᩠ᨲᨲ᩠ᨲᩣ ᨿᩔ ᩑᨠᨶ᩠ᨲᩮᨶ ᩈᨦ᩠ᨥᩣᨴᩥᩈᩮᩈᩮᩣ ᩉᩮᩣᨲᩥ, ᨲᩔ ᨸᨭᩥᨣ᩠ᨣᨱ᩠ᩉᨶᩅᩦᨾᩴᩈᨶᨸᨿᩮᩣᨣᩣ ᩑᨲᩮ ᨴᩩᨠ᩠ᨠᨭᨳᩩᩃ᩠ᩃᨧ᩠ᨧᨿᩣ ᨶᨲ᩠ᨳᩦᨲᩥ ᩅᨴᨶ᩠ᨲᩦᨲᩥ ᩃᩥᨡᩥᨲᩴ. ᨠᩥᨬ᩠ᨧᩣᨸᩥ ᩑᨲ᩠ᨳ ‘‘ᩍᨲ᩠ᨳᩦ ᨶᩣᨾ ᨾᨶᩩᩔᩥᨲ᩠ᨳᩦ, ᨶ ᨿᨠ᩠ᨡᩦ ᨶ ᨸᩮᨲᩦ ᨶ ᨲᩥᩁᨧ᩠ᨨᩣᨶᨣᨲᩣ. ᨸᩩᩁᩥᩈᩮᩣ ᨶᩣᨾ ᨾᨶᩩᩔᨸᩩᩁᩥᩈᩮᩣ, ᨶ ᨿᨠ᩠ᨡᩮᩣ ᨶ ᨸᩮᨲᩮᩣ ᨶ ᨲᩥᩁᨧ᩠ᨨᩣᨶᨣᨲᩮᩣ’’ᨲᩥ ᨸᩣᩊᩥ ᨶᨲ᩠ᨳᩥ, ᨲᨳᩣᨸᩥ ᨠᩣᨿᩈᩴᩈᨣ᩠ᨣᩣᨴᩦᩈᩩ ‘‘ᨾᩣᨲᩩᨣᩣᨾᩮᩣ ᨶᩣᨾ ᨾᨶᩩᩔᩥᨲ᩠ᨳᩦ’’ᨲᩥ (ᨸᩣᩁᩣ. ᪒᪘᪕) ᩍᨲ᩠ᨳᩥᩅᩅᨲ᩠ᨳᩣᨶᩔ ᨠᨲᨲ᩠ᨲᩣ ᩍᨵᩣᨸᩥ ᨾᨶᩩᩔᩥᨲ᩠ᨳᩦ ᩑᩅᩣᨲᩥ ᨸᨬ᩠ᨬᩣᨿᨲᩥ. ᨾᩮᨳᩩᨶᨸᩩᨻ᩠ᨻᨽᩣᨣᩈᩣᨾᨬ᩠ᨬᨲᩮᩣ ᩍᨲ᩠ᨳᩥᩅᩅᨲ᩠ᨳᩣᨶᩮᨶ ᨸᩩᩁᩥᩈᩅᩅᨲ᩠ᨳᩣᨶᩴ ᨠᨲᨾᩮᩅ ᩉᩮᩣᨲᩥ. ᨲᩮᨶᩮᩅᩣᩉ ‘‘ᨿᩮᩈᩩ ᩈᨬ᩠ᨧᩁᩥᨲ᩠ᨲᩴ ᩈᨾᩣᨸᨩ᩠ᨩᨲᩥ, ᨲᩮᩈᩴ ᨾᨶᩩᩔᨩᩣᨲᩥᨠᨲᩣ’’ᨲᩥ (ᨠᨦ᩠ᨡᩣ. ᩋᨭ᩠ᨮ. ᩈᨬ᩠ᨧᩁᩥᨲ᩠ᨲᩈᩥᨠ᩠ᨡᩣᨸᨴᩅᨱ᩠ᨱᨶᩣ). ᨠᩣᨿᩈᩴᩈᨣ᩠ᨣᩣᨴᩦᩈᩩ ᨧ ᨸᨱ᩠ᨯᨠᨿᨠ᩠ᨡᩥᨸᩮᨲᩥᨿᩮᩣ ᨳᩩᩃ᩠ᩃᨧ᩠ᨧᨿᩅᨲ᩠ᨳᩩᨠᩣᩅ ᩅᩩᨲ᩠ᨲᩣ, ᨲᨳᩣ ᩍᨵᩣᨸᩥ, ᨸᨱ᩠ᨯᨠᩈᨽᩣᩅᨲ᩠ᨲᩣ ᨾᨶᩩᩔᩏᨽᨲᩮᩣᨻ᩠ᨿᨬ᩠ᨩᨶᨠᩮᩣ ᨧ ᨳᩩᩃ᩠ᩃᨧ᩠ᨧᨿᩅᨲ᩠ᨳᩩᨠᩮᩣᩅ ᩉᩮᩣᨲᩥ. ᩈᩮᩈᩣ ᨾᨶᩩᩔᨸᩩᩁᩥᩈᩋᨾᨶᩩᩔᨸᨱ᩠ᨯᨠᩏᨽᨲᩮᩣᨻ᩠ᨿᨬ᩠ᨩᨶᨠᨲᩥᩁᨧ᩠ᨨᩣᨶᨣᨲᨸᩩᩁᩥᩈᩣᨴᨿᩮᩣ ᨴᩩᨠ᩠ᨠᨭᩅᨲ᩠ᨳᩩᨠᩣᩅ ᨾᩥᨧ᩠ᨨᩣᨧᩣᩁᨴᩔᨶᩈᨽᩣᩅᨲᩮᩣᨲᩥ ᩅᩮᨴᩥᨲᨻ᩠ᨻᩴ.

ᩈᨬ᩠ᨧᩁᩥᨲ᩠ᨲᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪖. ᨠᩩᨭᩥᨠᩣᩁᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨠᩥᩴ ᨽᨶ᩠ᨲᩮᨲᩥ ᩑᨲ᩠ᨲᨠᩮᨸᩥ ᩅᩩᨲ᩠ᨲᩮ. ᨸᩩᨧ᩠ᨨᩥᨲᩮᩣ ᨿᨴᨲ᩠ᨳᩣᨿ ᨸᩅᩥᨭ᩠ᨮᩮᩣ, ᨲᩴ ᨠᨳᩮᨲᩩᩴ ᩃᨽᨲᩥ ᨸᩩᨧ᩠ᨨᩥᨲᨸᨬ᩠ᨬᨲ᩠ᨲᩣ ᨽᩥᨠ᩠ᨡᩣᨧᩣᩁᩅᨲ᩠ᨲᩮᨲᩥ ᩃᩥᨡᩥᨲᩴ. ᩉᨲ᩠ᨳᨠᨾ᩠ᨾᩴ ᨿᩣᨧᩥᨲᩮᩣ ‘‘ᩏᨸᨠᩁᨱᩴ, ᨾᩪᩃᩴ ᩅᩣ ᨴᩔᨲᩦ’’ᨲᩥ ᨿᩣᨧᨲᩥ, ᩅᨭ᩠ᨭᨲᩥ, ᨶ ᩅᨭ᩠ᨭᨲᩦᨲᩥ? ᩅᨭ᩠ᨭᨲᩥ ᩈᩮᨶᩣᩈᨶᩮ ᩒᨽᩣᩈᨸᩁᩥᨠᨳᩣᨴᩦᨶᩴ ᩃᨴ᩠ᨵᨲ᩠ᨲᩣᨲᩥ ᩑᨠᩮ. ᨲᩥᩉᨲ᩠ᨳᩣ ᩅᩣᨲᩥ ᩑᨲ᩠ᨳ ᩅᨯ᩠ᨰᨠᩥᩉᨲ᩠ᨳᩮᨶ ᨲᩥᩉᨲ᩠ᨳᩣ. ‘‘ᨸᨾᩣᨱᨿᩩᨲ᩠ᨲᩮᩣ ᨾᨬ᩠ᨧᩮᩣᨲᩥ ᨸᨠᨲᩥᩅᩥᨴᨲ᩠ᨳᩥᨿᩣ ᨶᩅᩅᩥᨴᨲ᩠ᨳᩥᨸ᩠ᨸᨾᩣᨱᨾᨬ᩠ᨧᩮᩣ, ᩈᩮᩣ ᨲᨲ᩠ᨳ ᩍᨲᩮᩣ ᨧ ᨶ ᩈᨬ᩠ᨧᩁᨲᩥ, ᨲᩈ᩠ᨾᩣ ᨧᨲᩩᩉᨲ᩠ᨳᩅᩥᨲ᩠ᨳᩣᩁᩣ ᨶ ᩉᩮᩣᨲᩦ’’ᨲᩥᩌᨴᩥ ᩃᩥᨡᩥᨲᩴ. ᩋᨠᩩᨭᩥᨿᩣ ᨸᨶ ᩅᨲ᩠ᨳᩩᨴᩮᩈᨶᩣᨠᩥᨧ᩠ᨧᩴ ᨶᨲ᩠ᨳᩥ ᩏᩃ᩠ᩃᩥᨲ᩠ᨲᩣᩅᩃᩥᨲ᩠ᨲᩴ ᨠᩣᨲᩩᩴ ᩅᩩᨲ᩠ᨲᨲ᩠ᨲᩣ. ‘‘ᩏᩃ᩠ᩃᩥᨲ᩠ᨲᩣᨴᩥᨽᩣᩅᩮᩣ…ᨸᩮ… ‘ᨨᨴᨶᨾᩮᩅ ᩈᨶ᩠ᨵᩣᨿ ᩅᩩᨲ᩠ᨲᩮᩣ’ᨲᩥ ᨿᩩᨲ᩠ᨲᨾᩥᨴᩴ. ᨠᩈ᩠ᨾᩣᨲᩥ ᨧᩮ? ᨿᩈ᩠ᨾᩣ ᨾᨲ᩠ᨲᩥᨠᩣᨾᨿᨽᩥᨲ᩠ᨲᩥᩴ ᩏᨭ᩠ᨮᩣᨸᩮᨲ᩠ᩅᩣ ᩏᨸᩁᩥ ᩏᩃ᩠ᩃᩥᨲ᩠ᨲᩴ ᩅᩣ ᩋᩅᩃᩥᨲ᩠ᨲᩴ ᩅᩣ ᩏᨽᨿᩴ ᩅᩣ ᨽᩥᨲ᩠ᨲᩥᨿᩣ ᨥᨭᩥᨲᩴ ᨠᩁᩮᩣᨶ᩠ᨲᩔ ᩌᨸᨲ᩠ᨲᩥ ᩑᩅ ᩅᩥᨶᩣᨸᩥ ᨽᩥᨲ᩠ᨲᩥᩃᩮᨸᩮᨶᩣ’’ᨲᩥ ᩃᩥᨡᩥᨲᩴ. ᩑᩅᨾᩮᨲ᩠ᨳ ᨳᨾ᩠ᨽᨲᩩᩃᩣᨸᩥᨭ᩠ᨮᩈᨦ᩠ᨥᩣᨭᩣᨴᩥ ᨶᩥᩁᨲ᩠ᨳᨠᩴ ᩈᩥᨿᩣ. ᨲᩈ᩠ᨾᩣ ᩅᩥᨧᩣᩁᩮᨲ᩠ᩅᩣᩅ ᨣᩉᩮᨲᨻ᩠ᨻᩴ. ‘‘ᩏᨸᩮᩣᩈᨳᩣᨣᩣᩁᨾ᩠ᨸᩥ ᨽᩅᩥᩔᨲᩥ, ᩋᩉᨾ᩠ᨸᩥ ᩅᩈᩥᩔᩣᨾᩦ’’ᨲᩥ ᩅᩣ ‘‘ᨽᩥᨠ᩠ᨡᩪᩉᩥ ᩅᩣ ᩈᩣᨾᨱᩮᩁᩮᩉᩥ ᩅᩣ ᩑᨠᨲᩮᩣ ᩅᩈᩥᩔᩣᨾᩦ’’ᨲᩥ ᩅᩣ ᨠᩁᩮᩣᨶ᩠ᨲᩔ ᩅᨭ᩠ᨭᨲᩥ ᩑᩅ. ᨠᩈ᩠ᨾᩣ? ‘‘ᩋᨲ᩠ᨲᩩᨴ᩠ᨴᩮᩈ’’ᨶ᩠ᨲᩥ ᩅᩩᨲ᩠ᨲᨲ᩠ᨲᩣᨲᩥ ᩃᩥᨡᩥᨲᩴ.

ᩍᨴᩴ ᨸᨶ ᩈᩥᨠ᩠ᨡᩣᨸᨴᩴ ᨧᨲᩩᨲ᩠ᨳᨸᩣᩁᩣᨩᩥᨠᩴ ᩅᩥᨿ ᨶᩥᨴᩣᨶᩣᨸᩮᨠ᩠ᨡᩴ. ᨶ ᩉᩥ ᩅᨣ᩠ᨣᩩᨾᩩᨴᩣᨲᩦᩁᩥᨿᩣ ᨽᩥᨠ᩠ᨡᩪ ᩈᨿᨾᩮᩅ ᩋᨲ᩠ᨲᨶᩮᩣ ᩋᩈᨶ᩠ᨲᩴ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩴ ᨾᩩᩈᩣᩅᩣᨴᩃᨠ᩠ᨡᨱᩴ ᨸᩣᨸᩮᨲ᩠ᩅᩣ ᨽᩣᩈᩥᩴᩈᩩ. ᩋᨬ᩠ᨬᨾᨬ᩠ᨬᨬ᩠ᩉᩥ ᨲᩮ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩅᨱ᩠ᨱᩴ ᨽᩣᩈᩥᩴᩈᩩ. ᨶ ᨧ ᨲᩣᩅᨲᩣ ᨸᩣᩁᩣᨩᩥᨠᩅᨲ᩠ᨳᩩ ᩉᩮᩣᨲᩥ, ᨲᨲ᩠ᨲᨠᩮᨶ ᨸᨶ ᩃᩮᩈᩮᨶ ᨽᨣᩅᩣ ᨲᩴ ᩅᨲ᩠ᨳᩩᩴ ᨶᩥᨴᩣᨶᩴ ᨠᨲ᩠ᩅᩣ ᨸᩣᩁᩣᨩᩥᨠᩴ ᨸᨬ᩠ᨬᨸᩮᩈᩥ, ᨲᨳᩣ ᩍᨵᩣᨸᩥ. ᨶ ᩉᩥ ᨶᩥᨴᩣᨶᩮ ‘‘ᩋᨴᩮᩈᩥᨲᩅᨲ᩠ᨳᩩᨠᩣᨿᩮᩣ ᩈᩣᩁᨾ᩠ᨽᩣᨿᩮᩣ ᩋᨸᩁᩥᨠ᩠ᨠᨾᨶᩣᨿᩮᩣ’’ᨲᩥ ᩅᩩᨲ᩠ᨲᩴ. ‘‘ᩋᨸ᩠ᨸᨾᩣᨱᩥᨠᩣᨿᩮᩣ’’ᨲᩥ ᨸᨶ ᩅᩩᨲ᩠ᨲᨲ᩠ᨲᩣ ᨸᨾᩣᨱᨾᨲᩥᨠ᩠ᨠᨾᨶ᩠ᨲᩔ ᩈᨦ᩠ᨥᩣᨴᩥᩈᩮᩈᩮᩣᩅ ᨶᩥᨴᩣᨶᩣᨸᩮᨠ᩠ᨡᩮᩣ. ᨲᨲ᩠ᨳ ᩈᩣᩁᨾ᩠ᨽᩮ ᩋᨸᩁᩥᨠ᩠ᨠᨾᨶᩮ ᩈᨦ᩠ᨥᩣᨴᩥᩈᩮᩈᨸ᩠ᨸᩈᨦ᩠ᨣᩴ ᩅᩥᨿ ᨴᩥᩔᨾᩣᨶᩴ ‘‘ᩅᩥᨽᨦ᩠ᨣᩮᩣ ᨲᩴᨶᩥᨿᨾᨠᩮᩣ’’ᨲᩥ ᩅᩩᨲ᩠ᨲᨲ᩠ᨲᩣ ᩅᩥᨽᨦ᩠ᨣᩮ ᨶ ᨶᩥᩅᩣᩁᩮᨲᩥ. ᨲᨳᩣ ᨾᩉᩃ᩠ᩃᨠᩮ.

ᩑᨲ᩠ᨳᩣᩉ – ᨠᩥᨾᨲ᩠ᨳᩴ ᨾᩣᨲᩥᨠᩣᨿᩴ ᨴᩩᨠ᩠ᨠᨭᩅᨲ᩠ᨳᩩ ᩅᩩᨲ᩠ᨲᩴ, ᨶᨶᩩ ᩅᩥᨽᨦ᩠ᨣᩮ ᩑᩅ ᩅᨲ᩠ᨲᨻ᩠ᨻᩴ ᩈᩥᨿᩣᨲᩥ? ᩑᩅᨾᩮᨲᩴ. ᨠᩥᩴ ᨶᩩ ᨽᩥᨠ᩠ᨡᩪ ᩋᨽᩥᨶᩮᨲᨻ᩠ᨻᩣ ᩅᨲ᩠ᨳᩩᨴᩮᩈᨶᩣᨿ, ᨲᩮᩉᩥ ᨽᩥᨠ᩠ᨡᩪᩉᩥ ᩅᨲ᩠ᨳᩩ ᨴᩮᩈᩮᨲᨻ᩠ᨻᩴ, ᨠᩦᨴᩥᩈᩴ? ᩋᨶᩣᩁᨾ᩠ᨽᩴ ᩈᨸᩁᩥᨠ᩠ᨠᨾᨶᨶ᩠ᨲᩥ. ᩍᨲᩁᨬ᩠ᩉᩥ ‘‘ᩈᩣᩁᨾ᩠ᨽᩮ ᨧᩮ ᨽᩥᨠ᩠ᨡᩩ ᩅᨲ᩠ᨳᩩᩈ᩠ᨾᩥᩴ ᩋᨸᩁᩥᨠ᩠ᨠᨾᨶᩮ’’ᨲᩥ ᩑᩅᩴ ᩋᨶᩩᨸ᩠ᨸᩈᨦ᩠ᨣᩅᩈᩮᨶ ᩌᨣᨲᨲ᩠ᨲᩣ ᩅᩩᨲ᩠ᨲᩴ. ᨿᩈ᩠ᨾᩣ ᩅᨲ᩠ᨳᩩ ᨶᩣᨾ ᩋᨲ᩠ᨳᩥ ᩈᩣᩁᨾ᩠ᨽᩴ ᩋᨸᩁᩥᨠ᩠ᨠᨾᨶᩴ, ᩋᨲ᩠ᨳᩥ ᩋᨶᩣᩁᨾ᩠ᨽᩴ ᩈᨸᩁᩥᨠ᩠ᨠᨾᨶᩴ, ᩋᨲ᩠ᨳᩥ ᩈᩣᩁᨾ᩠ᨽᩴ ᩈᨸᩁᩥᨠ᩠ᨠᨾᨶᩴ, ᩋᨲ᩠ᨳᩥ ᩋᨶᩣᩁᨾ᩠ᨽᩴ ᩋᨸᩁᩥᨠ᩠ᨠᨾᨶᨶ᩠ᨲᩥ ᨻᩉᩩᩅᩥᨵᩴ, ᨲᩈ᩠ᨾᩣ ᨻᩉᩩᩅᩥᨵᨲ᩠ᨲᩣ ᩅᨲ᩠ᨳᩩ ᨴᩮᩈᩮᨲᨻ᩠ᨻᩴ ᩋᨶᩣᩁᨾ᩠ᨽᩴ ᩈᨸᩁᩥᨠ᩠ᨠᨾᨶᩴ, ᨶᩮᨲᩁᨶ᩠ᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨠᩥᨾᨲ᩠ᨳᩥᨠᩣ ᨸᨶᩮᨲ᩠ᨳ ᩅᨲ᩠ᨳᩩᨴᩮᩈᨶᩣᨲᩥ ᨧᩮ? ᨣᩁᩩᨠᩣᨸᨲ᩠ᨲᩥᨸᨬ᩠ᨬᩣᨸᨶᩉᩮᨲᩩᨸᩁᩥᩅᨩ᩠ᨩᨶᩩᨸᩣᨿᨲ᩠ᨲᩣ. ᩅᨲ᩠ᨳᩩᩋᨴᩮᩈᨶᩣ ᩉᩥ ᨣᩁᩩᨠᩣᨸᨲ᩠ᨲᩥᨸᨬ᩠ᨬᩣᨸᨶᩉᩮᨲᩩᨽᩪᨲᩣ. ᨣᩁᩩᨠᩣᨸᨲ᩠ᨲᩥᨸᨬ᩠ᨬᩣᨸᨶᩴ ᩋᨠᨲᩅᩥᨬ᩠ᨬᨲ᩠ᨲᩥᨣᩥᩉᩥᨸᩦᩊᩣᨩᨶᨶᩴ, ᩋᨲ᩠ᨲᨴᩩᨠ᩠ᨡᨸᩁᨴᩩᨠ᩠ᨡᩉᩮᨲᩩᨽᩪᨲᩮᩣ ᨧ ᩈᩣᩁᨾ᩠ᨽᨽᩣᩅᩮᩣᨲᩥ ᩑᨲᩮ ᩅᨲ᩠ᨳᩩᨴᩮᩈᨶᩣᨸᨴᩮᩈᩮᨶ ᩏᨸᩣᨿᩮᨶ ᨸᩁᩥᩅᨩ᩠ᨩᩥᨲᩣ ᩉᩮᩣᨶ᩠ᨲᩥ. ᨶ ᩉᩥ ᨽᩥᨠ᩠ᨡᩪ ᩋᨠᨸ᩠ᨸᩥᨿᨠᩩᨭᩥᨠᩁᨱᨲ᩠ᨳᩴ ᨣᩥᩉᩦᨶᩴ ᩅᩣ ᨸᩦᩊᩣᨶᩥᨾᩥᨲ᩠ᨲᩴ, ᩈᩣᩁᨾ᩠ᨽᩅᨲ᩠ᨳᩩᨠᩩᨭᩥᨠᩁᨱᨲ᩠ᨳᩴ ᩅᩣ ᩅᨲ᩠ᨳᩩᩴ ᨴᩮᩈᩮᨶ᩠ᨲᩦᨲᩥ. ᩉᩮᩣᨶ᩠ᨲᩥ ᨧᩮᨲ᩠ᨳ –

‘‘ᨴᩩᨠ᩠ᨠᨭᩔ ᩉᩥ ᩅᨲ᩠ᨳᩪᨶᩴ, ᨾᩣᨲᩥᨠᩣᨿ ᨸᨠᩣᩈᨶᩣ;

ᨣᩁᩩᨠᩣᨸᨲ᩠ᨲᩥᩉᩮᨲᩪᨶᩴ, ᨲᩮᩈᩴ ᩑᩅᩴ ᨸᨠᩣᩈᩥᨲᩣ.

‘‘ᩅᨲ᩠ᨳᩩᩔ ᨴᩮᩈᨶᩩᨸᩣᨿᩮᨶ, ᨣᩁᩩᨠᩣᨸᨲ᩠ᨲᩥᩉᩮᨲᩩᨿᩮᩣ;

ᩅᨩ᩠ᨩᩥᨲᩣ ᩉᩮᩣᨶ᩠ᨲᩥ ᨿᩴ ᨲᩈ᩠ᨾᩣ, ᩈᩣᩁᨾ᩠ᨽᩣᨴᩥ ᨩᩉᩣᨸᩥᨲ’’ᨶ᩠ᨲᩥ.

ᨠᩩᨭᩥᨠᩣᩁᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪗. ᩅᩥᩉᩣᩁᨠᩣᩁᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨠᩥᩁᩥᨿᩣᨾᨲ᩠ᨲᨲᩮᩣ ᩈᨾᩩᨭ᩠ᨮᩣᨶᨽᩣᩅᨲᩮᩣ ᩋᨠᩥᩁᩥᨿᨾᩮᩅᩮᨲᩴ. ᨲᩴ ᨴᩮᩈᨶᩣᩋᨠᩁᨱᩅᩈᩮᨶ. ᨽᩥᨠ᩠ᨡᩪ ᩅᩣ ᩋᨶᨽᩥᨶᩮᨿ᩠ᨿᩣᨲᩥ ᩑᨲ᩠ᨳ ᩅᩣ-ᩈᨴ᩠ᨴᩮᩣ ᩋᩅᨵᩣᩁᨱᨲ᩠ᨳᩮᩣᨲᩥ ᩅᩮᨴᩥᨲᨻ᩠ᨻᩮᩣ. ‘‘ᩌᨿᩈ᩠ᨾᩣ ᨨᨶ᩠ᨶᩮᩣ ᨧᩮᨲᩥᨿᩁᩩᨠ᩠ᨡᩴ ᨨᩮᨴᩣᨸᩮᩈᩦ’’ᨲᩥ (ᨸᩣᩁᩣ. ᪓᪖᪕) ᩌᨣᨲᨲ᩠ᨲᩣ ᩍᨴᨾ᩠ᨸᩥ ᨶᩥᨴᩣᨶᩣᨸᩮᨠ᩠ᨡᨶ᩠ᨲᩥ ᩅᩮᨴᩥᨲᨻ᩠ᨻᩴ.

ᩅᩥᩉᩣᩁᨠᩣᩁᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪘. ᨴᩩᨭ᩠ᨮᨴᩮᩣᩈᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᨠᩈ᩠ᨾᩣ ᨾᨾ ᩅᨶ᩠ᨴᨶᩣᨴᩦᨶᩥ…ᨸᩮ… ‘ᨥᨭᩥᨲᩮᨿᩮᩅ ᩈᩦᩈᩴ ᩑᨲᩦ’ᨲᩥ ᩅᩩᨲ᩠ᨲᨲ᩠ᨲᩣ ᩋᨶ᩠ᨲᩥᨾᩅᨲ᩠ᨳᩩᩋᨩ᩠ᨫᩣᨸᨶ᩠ᨶᨠᩴ ᩅᨶ᩠ᨴᩥᨲᩩᩴ ᨶ ᩅᨭ᩠ᨭᨲᩦ’’ᨲᩥ ᩅᨴᨶ᩠ᨲᩥ, ᨲᩴ ᨶ ᨣᩉᩮᨲᨻ᩠ᨻᩴ. ᨸᩁᩥᩅᩣᩁᩣᩅᩈᩣᨶᩮ ᩏᨸᩣᩃᩥᨸᨬ᩠ᨧᨠᩮ ‘‘ᨠᨲᩥ ᨶᩩ ᨡᩮᩣ, ᨽᨶ᩠ᨲᩮ, ᩋᩅᨶ᩠ᨴᩥᨿᩣ’’ᨲᩥᩌᨴᩥᨶᩣ (ᨸᩁᩥ. ᪔᪖᪗) ᩅᩩᨲ᩠ᨲᨸᩣᩊᩥᨿᩴ ᩋᩅᩩᨲ᩠ᨲᨲ᩠ᨲᩣ, ‘‘ᨸᨧ᩠ᨨᩣ ᩏᨸᩈᨾ᩠ᨸᨶ᩠ᨶᩮᨶ ᨸᩩᩁᩮ ᩏᨸᩈᨾ᩠ᨸᨶ᩠ᨶᩮᩣ ᩅᨶ᩠ᨴᩥᨿᩮᩣ’’ᨲᩥ (ᨸᩁᩥ. ᪔᪖᪘) ᩅᩩᨲ᩠ᨲᨲ᩠ᨲᩣ ᨧ, ᨲᩈ᩠ᨾᩣ ᩑᩅ ᩍᨾᩥᩔᩴ ᨠᨦ᩠ᨡᩣᩅᩥᨲᩁᨱᩥᨿᩴ ‘‘ᩏᨸᩈᨾ᩠ᨸᨶ᩠ᨶᩮᩣᨲᩥ ᩈᨦ᩠ᨡ᩠ᨿᩩᨸᨣᨾᨶ’’ᨶ᩠ᨲᩥ ᩅᩩᨲ᩠ᨲᩴ. ᩈᩩᨲ᩠ᨲᩣᨵᩥᨸ᩠ᨸᩣᨿᩮᩣ ᨸᨶ ᩑᩅᩴ ᨣᩉᩮᨲᨻ᩠ᨻᩮᩣ – ᩋᩅᨶ᩠ᨴᨶ᩠ᨲᩮᩣ ᩈᩣᨾᩦᨧᩥᨸ᩠ᨸᨭᩥᨠ᩠ᨡᩮᨸᩈᨦ᩠ᨡᩣᨲᩣᨿ ᨧᩮᩣᨴᨶᩣᨿ ᨧᩮᩣᨴᩮᨲᩥ ᨶᩣᨾᩣᨲᩥ ᨴᩔᨶᨲ᩠ᨳᩴ ᩅᩩᨲ᩠ᨲᨶ᩠ᨲᩥ. ᨲᩈ᩠ᨾᩣ ᩑᩅ ‘‘ᩑᨲ᩠ᨲᩣᩅᨲᩣ ᨧ ᨧᩮᩣᨴᨶᩣ ᨶᩣᨾ ᩉᩮᩣᨲᩦ’’ᨲᩥ ᩅᩩᨲ᩠ᨲᩴ. ᩍᨵ ᩋᨵᩥᨸ᩠ᨸᩮᨲᩴ ᩌᨸᨲ᩠ᨲᩥᩌᨸᨩ᩠ᨩᨶᩣᨠᩣᩁᩴ ᨴᩔᩮᨲᩩᩴ ‘‘‘ᨠᩈ᩠ᨾᩣ ᨾᨾ ᩅᨶ᩠ᨴᨶᩣᨴᩦᨶᩥ ᨶ ᨠᩁᩮᩣᩈᩦ’ᨲᩥᩌᨴᩥ ᩅᩩᨲ᩠ᨲ’’ᨶ᩠ᨲᩥ ᩃᩥᨡᩥᨲᩴ.

ᨠᨲᩪᨸᩈᨾ᩠ᨸᨴᨶ᩠ᨲᩥ ᨿᩔ ᩏᨸᩈᨾ᩠ᨸᨴᩣ ᩁᩩᩉᨲᩥ, ᨲᩴ, ᨸᨱ᩠ᨯᨠᩣᨴᨿᩮᩣ. ᨮᨸᨶᨠ᩠ᨡᩮᨲ᩠ᨲᨶ᩠ᨲᩥ ᩑᨲ᩠ᨳ ᩈᨻ᩠ᨻᩈᨦ᩠ᨣᩣᩉᩥᨠᩴ, ᨸᩩᨣ᩠ᨣᩃᩥᨠᨬ᩠ᨧᩣᨲᩥ ᨴᩩᩅᩥᨵᩴ ᨸᩅᩣᩁᨱᩣᨮᨸᨶᩴ. ᨲᨲ᩠ᨳ ᩈᨻ᩠ᨻᩈᨦ᩠ᨣᩣᩉᩥᨠᩮ ‘‘ᩈᩩᨱᩣᨲᩩ ᨾᩮ, ᨽᨶ᩠ᨲᩮ, ᩈᨦ᩠ᨥᩮᩣ…ᨸᩮ… ᨲᩮᩅᩣᨧᩥᨠᩴ ᨸᩅᩣᩁᩮ’’ᨲᩥ ᩈᩩ-ᨠᩣᩁᨲᩮᩣ ᨿᩣᩅ ᩁᩮ-ᨠᩣᩁᩮᩣ. ᨸᩩᨣ᩠ᨣᩃᩥᨠᨮᨸᨶᩮ ᨸᨶ ‘‘ᩈᨦ᩠ᨥᩴ, ᨽᨶ᩠ᨲᩮ, ᨸᩅᩣᩁᩮᨾᩥ…ᨸᩮ… ᨸᩔᨶ᩠ᨲᩮᩣ ᨸᨭᩦ’’ᨲᩥ ᩈᩴ-ᨠᩣᩁᨲᩮᩣ ᨿᩣᩅ ᩋᨿᩴ ᩈᨻ᩠ᨻᨸᨧ᩠ᨨᩥᨾᩮᩣ ᨭᩥ-ᨠᩣᩁᩮᩣ, ᩑᨲ᩠ᨳᨶ᩠ᨲᩁᩮ ᩑᨠᨸᨴᩮᨸᩥ ᨮᨸᩮᨶ᩠ᨲᩮᨶ ᨮᨸᩥᨲᩣ ᩉᩮᩣᨲᩥ. ᩏᨸᩮᩣᩈᨳᩮ ᨸᨶ ᩍᨾᩥᨶᩣᨶᩩᩈᩣᩁᩮᨶ ᩅᩥᩈᩮᩈᩮᩣ ᩅᩮᨴᩥᨲᨻ᩠ᨻᩮᩣ ‘‘ᨠᩁᩮᨿ᩠ᨿᩣ’’ᨲᩥ ᩁᩮ-ᨠᩣᩁᩮ ᩋᨶᨲᩥᨠ᩠ᨠᨾᨶ᩠ᨲᩮ.

ᨴᩩᨭ᩠ᨮᨴᩮᩣᩈᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪙. ᩋᨬ᩠ᨬᨽᩣᨣᩥᨿᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩋᨬ᩠ᨬᨽᩣᨣᩮᩣ ᩅᩣ ᩋᩔ ᩋᨲ᩠ᨳᩦᨲᩥ ᨿᨳᩣ ᩈᩩᩅᨱ᩠ᨱᩔᩮᨴᩴ ᩈᩮᩣᩅᨱ᩠ᨱᨾᩥᨲ᩠ᨿᨲᩕ ᩈᩩᩅᨱ᩠ᨱᩅᩣ ᩋᨶᩮᨶ ᩈᩩᩅᨱ᩠ᨱᩮᩣ ᩍᨲ᩠ᨿᩩᨧ᩠ᨧᨲᩮ. ᨲᩴ ᨸᨭᩥᨾᩣᨿ ᩈᩁᩦᩁᩴ, ᩈᩥᩃᩣᨸᩩᨲ᩠ᨲᨠᩔ ᩈᩁᩦᩁᨶ᩠ᨲᩥ ᨧ ᨶᩥᨴᩔᨶᩴ. ᨨᨣᩃᨠᩔ ‘‘ᨴᨻ᩠ᨻᩮᩣ’’ᨲᩥ ᨴᩥᨶ᩠ᨶᩴ ᨶᩣᨾᩴ ‘‘ᨴᩮᩈᩮᩣ’’ᨲᩥ ᩅᩩᨧ᩠ᨧᨲᩥ. ᨠᩈ᩠ᨾᩣ? ᨳᩮᩁᩴ ᩋᨶᩩᨴ᩠ᨵᩴᩈᩮᨲᩩᩴ ᨳᩮᩁᩔᩣᨸᩥ ᩋᨸᨴᩥᩈᩥᨲᨻ᩠ᨻᨲ᩠ᨲᩣ. ᩋᨬ᩠ᨬᨾ᩠ᨸᩥ ᩅᨲ᩠ᨳᩩᩴ ᨶ ᨳᩮᩁᩴᨿᩮᩅ. ᩃᩥᩔᨲᩥ ᩈᩥᩃᩥᩔᨲᩥ ᩅᩮᩣᩉᩣᩁᨾᨲ᩠ᨲᩮᨶᩮᩅᨶ ᩋᨲ᩠ᨳᨲᩮᩣ. ᩎᩈᨠᩴ ᩋᩃ᩠ᩃᩦᨿᨲᩦᨲᩥ ᩃᩮᩈᩮᩣᨲᩥ ᩋᨵᩥᨸ᩠ᨸᩣᨿᩮᩣ. ᩃᩥᩈᩈᩮᩃᨨᨠᩮᩣᩃᩋᩃ᩠ᩃᩦᨽᩣᩅᩮ. ᨲᩮᨶ ᩅᩩᨲ᩠ᨲᩴ ‘‘ᩎᩈᨠᩴ ᩋᩃ᩠ᩃᩦᨿᨲᩦᨲᩥ ᩃᩮᩈᩮᩣ’’ᨲᩥ. ᨿᩈ᩠ᨾᩣ ᨴᩮᩈᩃᩮᩈᩣ ᩋᨲ᩠ᨳᨲᩮᩣ ᨶᩥᨶ᩠ᨶᩣᨶᩣᨠᩁᨱᩴ, ᨲᩈ᩠ᨾᩣ ‘‘ᨠᩥᨬ᩠ᨧᩥᨴᩮᩈᩴ ᩃᩮᩈᨾᨲ᩠ᨲᩴ ᩏᨸᩣᨴᩣᨿᩣ’’ᨲᩥ ᨸᨴᩴ ᩏᨴ᩠ᨵᩁᩥᨲ᩠ᩅᩣ ‘‘ᨴᩈ ᩃᩮᩈᩣ ᨩᩣᨲᩥᩃᩮᩈᩮᩣ’’ᨲᩥᩌᨴᩥ (ᨸᩣᩁᩣ. ᪓᪙᪔) ᨸᨴᨽᩣᨩᨶᩮ ᩅᩩᨲ᩠ᨲᩴ.

ᩋᨭ᩠ᨮᩩᨸ᩠ᨸᨲ᩠ᨲᩥᩅᩈᩮᨶᩮᩅ ᩌᩅᩥᨽᩪᨲᨶ᩠ᨲᩥ ᩑᨲ᩠ᨳ ᨠᩥᨬ᩠ᨧ ᨽᩥᨿ᩠ᨿᩮᩣ ᩋᨶᩥᨿᨾᨲ᩠ᨲᩣ. ᨶ ᩉᩥ ᨾᩮᨲ᩠ᨲᩥᨿᨽᩪᨾᨩᨠᩣᨶᩴ ᩅᩥᨿ ᩋᨬ᩠ᨬᩮᩈᩴ ᩈᨻ᩠ᨻᩮᩈᨾ᩠ᨸᩥ ‘‘ᨨᨣᩃᨠᨾᩮᩅᩮᨲ᩠ᨳ ᩋᨬ᩠ᨬᨽᩣᨣᩥᨿᩴ ᩋᨵᩥᨠᩁᨱᩴ ᩉᩮᩣᨲᩥ, ᩋᨬ᩠ᨬᩴ ᨣᩮᩣᨾᩉᩥᩴᩈᩣᨴᩥᨠᨾ᩠ᨸᩥ ᩉᩮᩣᨲᩥ, ᨶ ᨧ ᨾᩮᨲ᩠ᨲᩥᨿᨽᩪᨾᨩᨠᩣ ᩅᩥᨿ ᩈᨻ᩠ᨻᩮᨸᩥ ᨶᩣᨾᩃᩮᩈᨾᨲ᩠ᨲᨾᩮᩅ ᩏᨸᩣᨴᩥᨿᨶ᩠ᨲᩥ, ᩋᨬ᩠ᨬᨾ᩠ᨸᩥ ᨩᩣᨲᩥᩃᩮᩈᩣᨴᩥᩴ ᩏᨸᩣᨴᩥᨿᨶ᩠ᨲᩥ, ᨲᩈ᩠ᨾᩣ ᩋᨶᩥᨿᨾᨲ᩠ᨲᩣ ᨶ ᩅᩥᨽᨲ᩠ᨲᩴ. ᨠᩥᨬ᩠ᨧ ᨽᩥᨿ᩠ᨿᩮᩣ ᨲᨳᩣᩅᩩᨲ᩠ᨲᩮ ᨨᨣᩃᨠᩔᩮᩅ ᩋᨬ᩠ᨬᨽᩣᨣᩥᨿᨲᩣ ᩈᨾ᩠ᨽᩅᨲᩥ, ᨶ ᩋᨬ᩠ᨬᩔ, ᨿᩮᨶ ᩈᩮᩣᩅ ᨴᩔᩥᨲᩮᩣ. ᩃᩮᩈᩮᩣ ᨧ ᨶᩣᨾ ᩃᩮᩈᩮᩣᩅ, ᨶ ᨩᩣᨲᩥᩌᨴᩥ, ᨿᩮᨶ ᩈᩮᩣᩅ ᨴᩔᩥᨲᩮᩣᨲᩥ ᩑᩅᩴ ᨾᩥᨧ᩠ᨨᩣᨣᩣᩉᨸ᩠ᨸᩈᨦ᩠ᨣᨲᩮᩣᨲᩥ ᩅᩮᨴᩥᨲᨻ᩠ᨻᩴ. ᩍᨵ ᨧ…ᨸᩮ… ᩈᨬ᩠ᨬᩥᨶᩮᩣᨸᩦᨲᩥ ᩍᨾᩈ᩠ᨾᩥᩴ ᩈᩥᨠ᩠ᨡᩣᨸᨴᩮ ᨧ ᩋᨾᩪᩃᨠᩈᩥᨠ᩠ᨡᩣᨸᨴᩮ ᨧᩣᨲᩥ ᩋᨲ᩠ᨳᩮᩣ.

ᩋᨬ᩠ᨬᨽᩣᨣᩥᨿᩈᩥᨠ᩠ᨡᩴ ᨿᩮᩣ, ᨶᩮᩅ ᩈᩥᨠ᩠ᨡᨲᩥ ᨿᩩᨲ᩠ᨲᩥᨲᩮᩣ;

ᨣᨧ᩠ᨨᩮ ᩅᩥᨶᨿᩅᩥᨬ᩠ᨬᩪᩉᩥ, ᩋᨬ᩠ᨬᨽᩣᨣᩥᨿᨲᩴᩅ ᩈᩮᩣ. (ᩅᨩᩥᩁ. ᨭᩦ. ᨸᩣᩁᩣᨩᩥᨠ ᪔᪐᪘);

ᩋᨬ᩠ᨬᨽᩣᨣᩥᨿᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪑᪑. ᨽᩮᨴᩣᨶᩩᩅᨲ᩠ᨲᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨲᩥᨱ᩠ᨱᩴ ᩏᨴ᩠ᨵᩴ ᨠᨾ᩠ᨾᩣᩁᩉᩣ…ᨸᩮ… ᨠᩁᩮᩣᨲᩦᨲᩥ ᩑᨲ᩠ᨳ ‘‘ᩍᨾᩮ ᨧᨲ᩠ᨲᩣᩁᩮᩣ’’ᨲᩥ ᩅᩣ ‘‘ᩍᨾᨬ᩠ᨧ ᩍᨾᨬ᩠ᨧᩣ’’ᨲᩥ ᩅᩣ ᩅᨲ᩠ᩅᩣ ᨠᩣᨲᩩᩴ ᨶ ᩅᨭ᩠ᨭᨲᩦᨲᩥ ᩃᩥᨡᩥᨲᩴ.

ᨽᩮᨴᩣᨶᩩᩅᨲ᩠ᨲᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪑᪒. ᨴᩩᨻ᩠ᨻᨧᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨴᩩᨠ᩠ᨡᩮᨶ ᩅᨲ᩠ᨲᨻ᩠ᨻᩮᩣ ᨴᩩᨻ᩠ᨻᨧᩮᩣ. ᩅᩩᨧ᩠ᨧᨾᩣᨶᩮᩣ ᨶ ᩈᩉᨲᩥ.

ᨴᩩᨻ᩠ᨻᨧᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨶᩥᨣᨾᨶᩅᨱ᩠ᨱᨶᩣ

‘‘ᨶᩣᨾᨾᨲ᩠ᨲᩅᩈᩮᨶᩣ’’ᨲᩥ ᨸᩣᨮᩮᩣ. ‘‘ᨶᩣᨾᨣᩮᩣᨲ᩠ᨲᩅᩈᩮᨶᩣ’’ᨲᩥ ᩃᩥᨡᩥᨲᩴ. ᩍᨴᩴ ᩅᩩᨲ᩠ᨲᩴ ᩉᩮᩣᨲᩥ – ‘‘ᩋᨿᩴ ᨠᩥᩁᩥᨿᩣ ᨽᩥᨠ᩠ᨡᩪᨶᩴ ᨠᩣᨲᩩᩴ ᨶ ᩅᨭ᩠ᨭᨲᩦ’’ᨲᩥ ᨩᩣᨶᩥᨲ᩠ᩅᩣ ᩈᨧᩮ ᨨᩣᨴᩮᨲᩥ, ᨨᨶ᩠ᨶᩣᩅ ᩉᩮᩣᨲᩦᨲᩥ ᩋᨲ᩠ᨳᩮᩣ. ᩈᨽᩣᨣᨾᨲ᩠ᨲᨾᩮᩅᩣᨲᩥ ᩋᩅᩮᩁᩥᩈᨽᩣᨣᨾᨲ᩠ᨲᨾᩮᩅᩣᨲᩥ ᩋᨵᩥᨸ᩠ᨸᩣᨿᩮᩣ.

ᩅᨲ᩠ᨳᩩ ᨧᩮᩅ ᨣᩮᩣᨲ᩠ᨲᨬ᩠ᨧᩣᨲᩥ ᩑᨲ᩠ᨳ ᩅᨲ᩠ᨳᩪᨲᩥ ᩅᩦᨲᩥᨠ᩠ᨠᨾᨶᩴ ᩋᩈᩩᨧᩥᨾᩩᨧ᩠ᨧᨶᩴ. ᨣᩮᩣᨲ᩠ᨲᨶ᩠ᨲᩥ ᨣᩴ ᨲᩣᨿᨲᩦᨲᩥ ᨣᩮᩣᨲ᩠ᨲᩴ, ᩈᨩᩣᨲᩥᨲᩮᩣ ᩋᨬ᩠ᨬᨲ᩠ᨳ ᨣᨶ᩠ᨲᩩᩴ ᩋᨴᨲ᩠ᩅᩣ ᨣᩴ ᨻᩩᨴ᩠ᨵᩥᩴ, ᩅᨧᨶᨬ᩠ᨧ ᨲᩣᨿᨲᩦᨲᩥ ᩋᨲ᩠ᨳᩮᩣ. ᩅᨲ᩠ᨳᩩ ᨧ ᩈᨩᩣᨲᩥᨾᩮᩅ ᨣᨧ᩠ᨨᨲᩥ. ᩈᨩᩣᨲᩥ ᨶᩣᨾᩮᨲ᩠ᨳ ᩋᨬ᩠ᨬᩮᩉᩥ ᩅᩥᩈᩥᨭ᩠ᨮᩣᩅᩥᩈᩥᨭ᩠ᨮᨽᩪᨲᩣ ᨠᩥᩁᩥᨿᩣ, ᨶ ᨠᩣᨿᩈᩴᩈᨣ᩠ᨣᩣᨴᩥ. ᨶᩣᨾᨬ᩠ᨧᩮᩅ ᩌᨸᨲ᩠ᨲᩥ ᨧᩣᨲᩥ ᩑᨲ᩠ᨳ ᩌᨸᨲ᩠ᨲᩦᨲᩥ ᩅᩦᨲᩥᨠ᩠ᨠᨾᩮᨶᩣᨸᨶ᩠ᨶᩣᨸᨲ᩠ᨲᩥᨿᩣ ᨶᩣᨾᩴ.

ᨸᩩᨶ ᩌᨣᨲᩣᨣᨲᩣᨶᩴ ᨽᩥᨠ᩠ᨡᩪᨶᩴ ᩌᩁᩮᩣᨧᩮᨶ᩠ᨲᩮᨶᩣᨲᩥ ᩑᨲ᩠ᨳ ᨴ᩠ᩅᩥᨶ᩠ᨶᩴ ᩌᩁᩮᩣᨧᩮᨶ᩠ᨲᩮᨶ ‘‘ᩌᨿᩈ᩠ᨾᨶ᩠ᨲᩣ ᨵᩣᩁᩮᨶ᩠ᨲᩩ’’ᨲᩥᨱ᩠ᨱᩴ ᩅᩣ ᩋᨲᩥᩁᩮᨠᩣᨶᩴ ᩅᩣ ᩌᩁᩮᩣᨧᩮᨶ᩠ᨲᩮᨶ ‘‘ᩌᨿᩈ᩠ᨾᨶ᩠ᨲᩮᩣ ᨵᩣᩁᩮᨶ᩠ᨲᩪ’’ᨲᩥ ᩑᩅᩴ ᩌᩁᩮᩣᨧᨶᩅᩥᨵᩣᨶᩴ ᩅᩮᨴᩥᨲᨻ᩠ᨻᩴ. ᩅᨲ᩠ᨲᨽᩮᨴᨬ᩠ᨧ ᩁᨲ᩠ᨲᩥᨧ᩠ᨨᩮᨴᨬ᩠ᨧ ᩋᨠᨲ᩠ᩅᩣᨲᩥ ᩑᨲ᩠ᨳ ᨮᨸᩮᨲ᩠ᩅᩣ ᨶᩅᨠᨲᩁᩴ ᨸᩣᩁᩥᩅᩣᩈᩥᨠᩴ ᩋᩅᩈᩮᩈᩣᨶᩴ ᩋᨶ᩠ᨲᨾᩈᩮᩣ ᨾᩪᩃᩣᨿᨸᨭᩥᨠᩔᨶᩣᩁᩉᩣᨴᩦᨶᨾ᩠ᨸᩥ ᩋᨽᩥᩅᩣᨴᨶᩣᨴᩥᩈᩣᨴᩥᨿᨶᩮ, ᨸᨭᩥᨸᩣᨭᩥᨿᩣ ᨶᩥᩈᩦᨴᨶᩮ, ᩒᩅᨴᨶᩮ, ᨠᨾ᩠ᨾᩥᨠᩣᨶᩴ ᨣᩁᩉᨱᩮ ᨧᩣᨲᩥᩌᨴᩦᩈᩩ ᩅᨲ᩠ᨲᨽᩮᨴᩮᩣ ᩉᩮᩣᨲᩥ. ᨴᩔᨶᩈᩅᨶᩅᩥᩈᨿᩮᩈᩩ ᩋᨶᩣᩁᩮᩣᨧᨶᩮ ᨧ ᨽᩥᨠ᩠ᨡᩪᩉᩥ ᩑᨠᨧ᩠ᨨᨶ᩠ᨶᩮ ᩅᩈᨶᩮ ᨧ ᩋᨩᩣᨶᨶ᩠ᨲᩔᩮᩅ ᩅᩥᩉᩣᩁᩮ ᨽᩥᨠ᩠ᨡᩪᨶᩴ ᩌᨣᨶ᩠ᨲ᩠ᩅᩣ ᨣᨾᨶᩮ ᨧᩣᨲᩥᩌᨴᩦᩈᩩ ᩁᨲ᩠ᨲᩥᨧ᩠ᨨᩮᨴᩮᩣ ᩉᩮᩣᨲᩥ. ᨶᩣᨶᩣᩈᩴᩅᩣᩈᨠᩮᩉᩥ ᩅᩥᨶᨿᨠᨾ᩠ᨾᩣᨽᩣᩅᨲᩮᩣ ᨲᩮᩈᩴ ᩋᨶᩣᩁᩮᩣᨧᨶᩮ ᩁᨲ᩠ᨲᩥᨧ᩠ᨨᩮᨴᩮᩣ ᨶ ᩉᩮᩣᨲᩥ. ‘‘ᨴ᩠ᩅᩮ ᩃᩮᨯ᩠ᨯᩩᨸᩣᨲᩮ ᩋᨲᩥᨠ᩠ᨠᨾᩥᨲ᩠ᩅᩣ’’ᨲᩥ ᩅᨧᨶᨲᩮᩣ ᩋᨶ᩠ᨲᩮᩣ ᨶ ᩅᨭ᩠ᨭᨲᩥ. ᨶᩥᨠ᩠ᨡᩥᨲ᩠ᨲᩅᨲ᩠ᨲᩮᨶᩮᩅ ᩉᩩᨲ᩠ᩅᩣ ᩅᩥᨧᩁᨶ᩠ᨲᩮᨶ ᨿᩔ ᩈᨶ᩠ᨲᩥᨠᩮ ᨸᩩᨻ᩠ᨻᩮ ᩈᨾᩣᨴᩥᨿᩥᨲ᩠ᩅᩣ ᩌᩁᩮᩣᨧᩥᨲᩴ, ᨲᩔᩣᨸᩥ ᩈᨶ᩠ᨲᩥᨠᩮ ᨸᨧ᩠ᨨᩣ ᨶᩥᨠ᩠ᨡᩥᨸᨶᨠᩣᩃᩮ ᩌᩁᩮᩣᨧᩮᨲ᩠ᩅᩣᩅ ᨶᩥᨠ᩠ᨡᩥᨸᩥᨲᨻ᩠ᨻᩴ. ᨲᩈ᩠ᨾᩣ ᨸᩩᨶ ᩈᨾᩣᨴᩣᨶᨠᩣᩃᩮᨸᩥ ᩈᩮᩣ ᨧᩮ ᨲᨲᩮᩣ ᨣᨧ᩠ᨨᨲᩥ, ᨲᩴ ᨴᩥᩅᩈᩴ ᩋᨣᨶ᩠ᨲ᩠ᩅᩣ ᨴᩥᩅᩣ ᩌᩁᩮᩣᨧᩮᨲ᩠ᩅᩣᨸᩥ ᨿᨴᩥ ᩑᩅᩴ ᩋᨲᩦᨲᨴᩥᩅᩈᩴ ᩉᩮᩣᨲᩥ, ‘‘ᩋᩁᩩᨱᩮ ᩏᨭ᩠ᨮᩥᨲᩮ ᨲᩔ ᩈᨶ᩠ᨲᩥᨠᩮ ᩌᩁᩮᩣᨧᩮᨲ᩠ᩅᩣ ᩅᨲ᩠ᨲᩴ ᨶᩥᨠ᩠ᨡᩥᨸᩥᨲ᩠ᩅᩣ ᩅᩥᩉᩣᩁᩴ ᨣᨶ᩠ᨲᨻ᩠ᨻᨶ᩠ᨲᩥ ᨲᩔ ᩈᨶ᩠ᨲᩥᨠᩮ ᩌᩁᩮᩣᨧᩮᨲ᩠ᩅᩣ ᩅᨲ᩠ᨲᩴ ᨶᩥᨠ᩠ᨡᩥᨸᩥᨲᨻ᩠ᨻ’’ᨶ᩠ᨲᩥ ᩅᩩᨲ᩠ᨲᩴ. ᩋᨸᩥᨧ ‘‘ᩅᩥᩉᩣᩁᩴ ᨣᨶ᩠ᨲ᩠ᩅᩣ ᨿᩴ ᩈᨻ᩠ᨻᨸᨮᨾᩴ ᨽᩥᨠ᩠ᨡᩩᩴ ᨸᩔᨲᩥ, ᨲᩔ ᩌᩁᩮᩣᨧᩮᨲ᩠ᩅᩣ ᨶᩥᨠ᩠ᨡᩥᨸᩥᨲᨻ᩠ᨻ’’ᨶ᩠ᨲᩥ ᩅᩩᨲ᩠ᨲᩴ. ᩈᨧᩮ ᩁᨲ᩠ᨲᩥᨧ᩠ᨨᩮᨴᩮᩣ ᩉᩮᩣᨲᩥ, ᩅᩥᩉᩣᩁᩈᩦᨾᩣᨸᩁᩥᨿᩣᨸᨶ᩠ᨶᩣᨶᩴ ᩈᨻ᩠ᨻᩮᩈᩴ ᩌᩁᩮᩣᨧᩮᨲᨻ᩠ᨻᩴ ᩈᩥᨿᩣ. ‘‘ᨲᩔ ᩌᩁᩮᩣᨧᩮᨲ᩠ᩅᩣ’’ᨲᩥ ᩍᨴᩴ ᨸᨶ ᨸᩩᨻ᩠ᨻᩮ ᩋᨶᩣᩁᩮᩣᨧᩥᨲᩴ ᩈᨶ᩠ᨵᩣᨿ ᩅᨲ᩠ᨲᨽᩮᨴᩁᨠ᩠ᨡᨱᨲ᩠ᨳᩴ ᩅᩩᨲ᩠ᨲᩴ. ᨲᩈ᩠ᨾᩣ ᩑᩅ ᩈᨾᨶ᩠ᨲᨸᩣᩈᩣᨴᩥᨠᩣᨿᩴ (ᨧᩪᩊᩅ. ᩋᨭ᩠ᨮ. ᪙᪗) ᩑᩅᩴ ᩅᩩᨲ᩠ᨲᩴ ‘‘ᩋᨬ᩠ᨬᩴ ᩅᩥᩉᩣᩁᨲᩮᩣ ᨶᩥᨠ᩠ᨡᨶ᩠ᨲᩴ ᩅᩣ ᩌᨣᨶ᩠ᨲᩩᨠᩴ ᩅᩣ’’ᨲᩥ.

ᩈᩩᨴ᩠ᨵᨶ᩠ᨲᨸᩁᩥᩅᩣᩈᩮ ᨸᨶ ᩈᨧᩮ ‘‘ᨾᩣᩈᨾᨲ᩠ᨲᩴ ᩋᩈᩩᨴ᩠ᨵᩮᩣᨾ᩠ᩉᩦ’’ᨲᩥ ᩋᨣ᩠ᨣᩉᩮᩈᩥ, ᨸᩁᩥᩅᩈᨶ᩠ᨲᩮᩣ ᨸᩩᨶ ᩐᨶᩴ ᩅᩣ ᩋᨵᩥᨠᩴ ᩅᩣ ᩈᨶ᩠ᨶᩥᨭ᩠ᨮᩣᨶᩴ ᨠᩁᩮᩣᨲᩥ, ᨲᨲ᩠ᨲᨠᨾ᩠ᨸᩥ ᨸᩁᩥᩅᩈᩥᨲᨻ᩠ᨻᨾᩮᩅ, ᨸᩁᩥᩅᩣᩈᨴᩣᨶᨠᩥᨧ᩠ᨧᩴ ᨶᨲ᩠ᨳᩥ. ᩋᨿᨬ᩠ᩉᩥ ᩈᩩᨴ᩠ᨵᨶ᩠ᨲᨸᩁᩥᩅᩣᩈᩮᩣ ᨶᩣᨾ ᩏᨴ᩠ᨵᨾ᩠ᨸᩥ ᩌᩁᩮᩣᩉᨲᩥ, ᩉᩮᨭ᩠ᨮᩣᨸᩥ ᩒᩁᩮᩣᩉᨲᩥ. ᩍᨴᨾᩔ ᩃᨠ᩠ᨡᨱᩴ.

ᩈᨾᩮᩣᨴᩉᩥᨲ᩠ᩅᩣᨲᩥ ᨾᩪᩃᩣᨸᨲ᩠ᨲᩥᨭ᩠ᨮᩣᨶᩮ ᨮᨸᩮᨲ᩠ᩅᩣ, ᨸᨠ᩠ᨡᩥᨸᩥᨲ᩠ᩅᩣᨲᩥ ᩋᨲ᩠ᨳᩮᩣ. ᩋᨸ᩠ᨸᨭᩥᨧ᩠ᨨᨶ᩠ᨶᩣ ᨧᩮ ᩋᨶ᩠ᨲᩁᩣᨸᨲ᩠ᨲᩥ, ᨾᩪᩃᩣᨿ ᨸᨭᩥᨠᩔᨶᩴ ᩋᨠᨲ᩠ᩅᩣ ᨸᩩᨻ᩠ᨻᩮ ᨣᩉᩥᨲᨸᩁᩥᩅᩣᩈᩮᨶᩮᩅ ᨸᩁᩥᩅᩈᩥᨲᨻ᩠ᨻᩴ. ᨿᩮᩣ ᨸᨶ ᩌᨸᨲ᩠ᨲᩥᩴ ᩌᨸᨩ᩠ᨩᩥᨲ᩠ᩅᩣ ᩅᩥᨻ᩠ᨽᨾᩥᨲ᩠ᩅᩣ ᨸᩩᨶ ᩏᨸᩈᨾ᩠ᨸᨶ᩠ᨶᩮᩣ ᩉᩩᨲ᩠ᩅᩣᨸᩥ ᨸᨭᩥᨧ᩠ᨨᩣᨴᩮᨲᩥ, ᨿᩮᩣ ᨧ ᨸᩩᨻ᩠ᨻᩮ ᨸᨭᩥᨧ᩠ᨨᩣᨴᩮᨲ᩠ᩅᩣ ᨸᨧ᩠ᨨᩣ ᨶ ᨸᨭᩥᨧ᩠ᨨᩣᨴᩮᨲᩥ, ᨿᩮᩣ ᨧ ᩏᨽᨿᨲ᩠ᨳ ᨸᨭᩥᨧ᩠ᨨᩣᨴᩮᨲᩥ, ᩈᨻ᩠ᨻᩮᩈᩴ ᨸᨭᩥᨧ᩠ᨨᨶ᩠ᨶᨴᩥᩅᩈᩅᩈᩮᨶ ᨸᩁᩥᩅᩣᩈᩮᩣ ᨴᩣᨲᨻ᩠ᨻᩮᩣ. ‘‘ᨸᩩᩁᩥᨾᩈ᩠ᨾᩥᩴ ᩌᨸᨲ᩠ᨲᩥᨠ᩠ᨡᨶ᩠ᨵᩮ ᩅᩣ’’ᨲᩥ ᨧ ‘‘ᨸᨧ᩠ᨨᩥᨾᩈ᩠ᨾᩥᩴ ᩌᨸᨲ᩠ᨲᩥᨠ᩠ᨡᨶ᩠ᨵᩮ ᩅᩣ’’ᨲᩥ (ᨧᩪᩊᩅ. ᪑᪖᪖ ᩌᨴᨿᩮᩣ) ᨧ ᨸᩣᩊᩥᨿᩴ ᩅᩩᨲ᩠ᨲᨲ᩠ᨲᩣ ᨴ᩠ᩅᩮ ᨽᩥᨠ᩠ᨡᩪ ᩅᩥᩈᩩᨴ᩠ᨵᩥᨠᩴ ᩌᨸᨶ᩠ᨶᩣ ᩉᩮᩣᨶ᩠ᨲᩥ, ᨲᩮ ᩈᩩᨴ᩠ᨵᩥᨠᨴᩥᨭ᩠ᨮᩥᨶᩮᩣ ᩉᩮᩣᨶ᩠ᨲᩥ. ᩑᨠᩮᩣ ᨨᩣᨴᩮᨲᩥ, ᩑᨠᩮᩣ ᨶ ᨨᩣᨴᩮᨲᩥ. ᨿᩮᩣ ᨨᩣᨴᩮᨲᩥ, ᩈᩮᩣ ᨴᩩᨠ᩠ᨠᨭᩴ ᨴᩮᩈᩣᨸᩮᨲᨻ᩠ᨻᩮᩣ. ‘‘ᩏᨽᩮᩣᨸᩥ ᨿᨳᩣᨵᨾ᩠ᨾᩴ ᨠᩣᩁᩣᨸᩮᨲᨻ᩠ᨻᩣ’’ᨲᩥ (ᨧᩪᩊᩅ. ᪑᪘᪑) ᩅᨧᨶᨲᩮᩣ ᨿᩴ ᨠᨬ᩠ᨧᩥ ᩌᨸᨲ᩠ᨲᩥᩴ ᨨᩣᨴᩮᨲ᩠ᩅᩣ ᨴᩩᨠ᩠ᨠᨭᩴ ᩌᨸᨩ᩠ᨩᨲᩦᨲᩥ ᩅᩮᨴᩥᨲᨻ᩠ᨻᩮᩣ.

ᨲᩮᩈᩩ ᨣᨲᩮᩈᩩ ᩅᩣ ᩋᨣᨲᩮᩈᩩ ᩅᩣ ᨸᩩᩁᩥᨾᨶᨿᩮᨶᩮᩅ ᨸᨭᩥᨸᨩ᩠ᨩᩥᨲᨻ᩠ᨻᨶ᩠ᨲᩥ ᩑᨲ᩠ᨳ ᩐᨶᩮ ᨣᨱᩮ ᨧᩁᨱᩴ, ᩋᨶᩩᨭ᩠ᨮᩉᨶᩴ ᩑᨠᩁᨲ᩠ᨲᨾ᩠ᨸᩥ ᨣᨱᩮᨶ ᩅᩥᨸ᩠ᨸᩅᩣᩈᩴ, ᩈᨧᩮ ᩁᨲ᩠ᨲᩥᨿᩣ ᩑᨠᨠ᩠ᨡᨱᩮᨶ ᩈᨦ᩠ᨥᩮᩣ ᩅᩈᨲᩥ, ᩈᨧᩮ ᩈᩮᩣ ᨸᩩᩁᩮ ᩋᩁᩩᨱᨾᩮᩅ ᨠᩮᨶᨧᩥ ᨠᩁᨱᩦᨿᩮᨶ ᨣᨲᩮᩣᨲᩥ ᩑᨲ᩠ᨳᨸᩥ ᨾᩣᨶᨲ᩠ᨲᩮᨸᩥ ᩑᩅᩴ ᨩᩣᨲᩮ. ‘‘ᩋᨿᨬ᩠ᨧ ᨿᩈ᩠ᨾᩣ ᨣᨱᩔ ᩌᩁᩮᩣᨧᩮᨲ᩠ᩅᩣ, ᨽᩥᨠ᩠ᨡᩪᨶᨬ᩠ᨧ ᩋᨲ᩠ᨳᩥᨽᩣᩅᩴ ᩈᩃ᩠ᩃᨠ᩠ᨡᩮᨲ᩠ᩅᩣᩅ ᩅᩈᩥ, ᨲᩮᨶᩔ ᩐᨶᩮ ᨣᨱᩮ ᨧᩁᨱᨴᩮᩣᩈᩮᩣ ᩅᩣ ᩅᩥᨸ᩠ᨸᩅᩣᩈᩮᩣ ᩅᩣ ᨶ ᩉᩮᩣᨲᩦ’’ᨲᩥ (ᨧᩪᩊᩅ. ᩋᨭ᩠ᨮ. ᪙᪗) ᩈᨾᨶ᩠ᨲᨸᩣᩈᩣᨴᩥᨠᩣᨿᩴ ᩅᩩᨲ᩠ᨲᩴ. ᨲᩈ᩠ᨾᩣ ᨲᩮᨶ ᩌᩁᩮᩣᨧᩥᨲᩮ ᨾᩩᩉᩩᨲ᩠ᨲᨾ᩠ᨸᩥ ᨶᩥᩈᩦᨴᩥᨲ᩠ᩅᩣ ᨣᨲᩮᨸᩥ ᩅᩥᨸ᩠ᨸᩅᩣᩈᩮᩣ ᨶᨲ᩠ᨳᩥ. ᨸᩣᩁᩥᩅᩣᩈᩥᨠᩔ, ᩏᨠ᩠ᨡᩥᨲ᩠ᨲᨠᩔ ᨧ ᨸᨠᨲᨲ᩠ᨲᩮᨶ ᨲᩈ᩠ᨾᩥᩴ ᩅᩈᨶᩴ ᩏᨴᨠᨸᩣᨲᩮᨶ ᩅᩣᩁᩥᨲᩴ, ᨲᩈ᩠ᨾᩣ ᨶᩣᨶᩪᨸᨧᩣᩁᩮᨸᩥ ᩑᨠᨧ᩠ᨨᨶ᩠ᨶᩮ ᨶ ᩅᨭ᩠ᨭᨲᩥ.

ᩍᨴᩣᨶᩥ ᨸᩣᨮᩅᩥᨧᩣᩁᨱᩣ ᩅᩮᨴᩥᨲᨻ᩠ᨻᩣ – ‘‘ᨶᩅ ᨸᨮᨾᩣᨸᨲ᩠ᨲᩥᨠᩣ ᨧᨲ᩠ᨲᩣᩁᩮᩣ ᨿᩣᩅᨲᨲᩥᨿᨠᩣ’’ᨲᩥ ᩍᨴᩴ ᩈᨽᩣᩅᨶᩥᨿᨾᩅᨧᨶᩴ. ᨲᩮᨶ ᩅᩩᨭ᩠ᨮᩣᨶᩴ ᩋᨶᩥᨿᨾᨶ᩠ᨲᩥ ᨴᩔᩮᨲᩥ. ᩑᨠᨧ᩠ᨧᩣᨸᨲ᩠ᨲᩥᩅᩩᨭ᩠ᨮᩣᨶᨬ᩠ᩉᩥ ᨠᨾ᩠ᨾᨲᩮᩣᨸᩥ ᩉᩮᩣᨲᩥ ᩋᨠᨾ᩠ᨾᨲᩮᩣᨸᩥ, ᨶ ᩑᩅᩴ ᩌᨸᨩ᩠ᨩᨶᨶ᩠ᨲᩥ ᩅᩩᨲ᩠ᨲᩴ ᩉᩮᩣᨲᩥ. ᩋᨬ᩠ᨬᨲᩁᩴ ᩅᩣ ᩋᨬ᩠ᨬᨲᩁᩴ ᩅᩣᨲᩥ ᨲᩮᩈᩴ ᨴ᩠ᩅᩥᨵᩣ ᨽᩥᨶ᩠ᨶᩣᨶᨾ᩠ᨸᩥ ᩅᩩᨭ᩠ᨮᩣᨶᨠ᩠ᨠᨾᨽᩮᨴᩣᨽᩣᩅᨴᩦᨸᨠᩅᨧᨶᩴ. ᨿᩣᩅᨲᩦᩉᩴ, ᨲᩣᩅᨲᩦᩉᨶ᩠ᨲᩥ ᩑᨲ᩠ᨳ ᩋᩉᨸᩁᩥᨧ᩠ᨨᩮᨴᩮᩣ ᩋᩁᩩᨱᩅᩈᩮᨶ. ‘‘ᨩᩣᨶ’’ᨶ᩠ᨲᩥ ᩍᨾᩥᨶᩣ ᨩᩣᨶᨶᨸ᩠ᨸᨭᩥᨧ᩠ᨨᨶ᩠ᨶᩔ ᩋᨠᩣᨾᩣ ᨸᩁᩥᩅᨲ᩠ᨳᨻ᩠ᨻᨶ᩠ᨲᩥ ᨴᩔᩮᨲᩥ. ᨲᩮᨶ ᨽᩥᨠ᩠ᨡᩩᨶᩣ ᩋᨠᩣᨾᩣ ᨸᩁᩥᩅᨲ᩠ᨳᨻ᩠ᨻᨶ᩠ᨲᩥ ᨲᩮᨶ ᨽᩥᨠ᩠ᨡᩩᨶᩣ ᩅᩈᨲᩣ ᩋᨠᩣᨾᩣ ᨸᩁᩥᩅᨲ᩠ᨳᨻ᩠ᨻᩴ, ᨶ ᨸᩁᩥᩅᨲ᩠ᨲᩥᨲᩃᩥᨦ᩠ᨣᩮᨶᩣᨲᩥ ᨴᩔᨶᨲ᩠ᨳᩴ ᩅᩩᨲ᩠ᨲᩴ. ᨸᩁᩥᩅᩩᨲ᩠ᨳᨸᩁᩥᩅᩣᩈᩮᨶᩣᨲᩥ ᩌᨴᩥᨾ᩠ᩉᩥ ᨸᩁᩥᩅᩩᨲ᩠ᨳᨸᩁᩥᩅᩣᩈᩮᨶᩮᩅ ᨸᩁᩥᩅᩣᩈᨲᩮᩣ ᩏᨲ᩠ᨲᩁᩥ ᩍᨲᩥᩅᩣᩁᩮᨶ ᩌᨴᩥᨲᩮᩣ ᨽᩥᨠ᩠ᨡᩩᨶᩣᩅ ᨨᩣᩁᨲ᩠ᨲᩴ, ᨸᩁᩥᩅᨲ᩠ᨲᩥᨲᩃᩥᨦ᩠ᨣᩮᨶ ᩏᨴ᩠ᨵᨾ᩠ᨸᩥ ᨽᩥᨠ᩠ᨡᩩᨾᩣᨶᨲ᩠ᨲᩣᨿ ᨸᨭᩥᨸᨩ᩠ᨩᩥᨲᨻ᩠ᨻᩴ, ᨶ ᨸᩁᩥᩅᩣᩈᩮ ᩅᩥᨿ ᨲᨸ᩠ᨸᨧ᩠ᨧᨿᩣ ᩋᨧᩥᨱ᩠ᨱᨾᩣᨶᨲ᩠ᨲᩮᩣ. ᨧᩥᨱ᩠ᨱᨾᩣᨶᨲ᩠ᨲᩮᩣᩅ ᩋᨻ᩠ᨽᩮᨲᨻ᩠ᨻᩮᩣ, ᨶ ᩍᨲᩁᩮᩣ, ᨶ ᨸᩁᩥᩅᩣᩈᩮ ᩅᩥᨿ ᨾᩣᨶᨲ᩠ᨲᩣᩁᩉᩮ, ᨸᨠ᩠ᨡᨾᩣᨶᨲ᩠ᨲᨬ᩠ᨧ ᨧᩁᨶ᩠ᨲᩥᨿᩣ ᨽᩥᨠ᩠ᨡᩩᨶᩥᨿᩣ ᩃᩥᨦ᩠ᨣᩴ ᨸᩁᩥᩅᨲ᩠ᨲᩣᨲᩥᨠ᩠ᨠᨾᩮ ᩈᨲᩥ ᨧᩥᨱ᩠ᨱᨾᩣᨶᨲ᩠ᨲᩮᩣ ᨽᩥᨠ᩠ᨡᩩ ᩉᩮᩣᨲᩥ, ᨸᩩᨶ ᨽᩥᨠ᩠ᨡᩩᨾᩣᨶᨲ᩠ᨲᩴ ᨣᩉᩮᨲ᩠ᩅᩣ ᨧᩥᨱ᩠ᨱᨾᩣᨶᨲ᩠ᨲᩮᩣᩅ ᨽᩥᨠ᩠ᨡᩩ ᩋᨻ᩠ᨽᩮᨲᨻ᩠ᨻᩮᩣᨲᩥ ᨴᩔᩮᨲᩥ.

ᨿᨲ᩠ᨳ ᩈᩥᨿᩣᨲᩥ ᨿᩔᩴ ᩈᨾᩣᨶᩈᩴᩅᩣᩈᨠᩈᩦᨾᩣᨿᨾ᩠ᨸᩥ ᩅᩦᩈᨲᩥᨣᨱᩮᩣ ᨽᩥᨠ᩠ᨡᩩᩈᨦ᩠ᨥᩮᩣ ᩋᨲ᩠ᨳᩥ. ᩑᨠᩮᨶᨸᩥ ᨧᩮ ᩐᨶᩮᩣ ᩅᩦᩈᨲᩥᨣᨱᩮᩣᨲᩥ ᨶ ᨿᩩᨩ᩠ᨩᨲᩥ, ᩐᨶᩮᩣ ᨧᩮ. ᨶ ᩉᩥ ᩅᩦᩈᨲᩥᨣᨱᩮᩣ, ᩈᨦ᩠ᨥᩮᩣ ᨧᩮ ᩐᨶᩮᩣ. ᨲᩈ᩠ᨾᩣ ‘‘ᩑᨠᩮᨶᨸᩥ ᨧᩮ ᩐᨶᩮᩣ ᩈᨦ᩠ᨥᩮᩣ’’ᨲᩥ ᩑᨲ᩠ᨲᨠᨾᩮᩅ ᩅᨲ᩠ᨲᨻ᩠ᨻᨶ᩠ᨲᩥ ᨧᩮ? ᨶ, ᨧᨲᩩᩅᨣ᩠ᨣᨸᨬ᩠ᨧᩅᨣ᩠ᨣᨴᩈᩅᨣ᩠ᨣᨸ᩠ᨸᩈᨦ᩠ᨣᨶᩥᩅᩣᩁᨱᨸ᩠ᨸᨿᩮᩣᨩᨶᨲᩮᩣ. ᨲᩈ᩠ᨾᩣ ᩅᩦᩈᨲᩥᩅᨣ᩠ᨣᩮᩣ ᨽᩥᨠ᩠ᨡᩩᩈᨦ᩠ᨥᩮᩣ ᨧᩮ ᨽᩥᨠ᩠ᨡᩩᨶᩣ ᩑᨠᩮᨶᨸᩥ ᩐᨶᩮᩣ, ᨶᨭ᩠ᨮᩮᩣ ᨴᨭ᩠ᨮᨻ᩠ᨻᩮᩣ. ᨠᩮᨧᩥ ᨸᨶ ᩅᩥᨶᨿᩮ ᩋᨸ᩠ᨸᨠᨲᨬ᩠ᨬᩩᨶᩮᩣ ‘‘ᨿᨳᩣ ᩋᨲᩥᩁᩮᨠᨧᨲᩩᩅᨣ᩠ᨣᩮᩣᨸᩥ ᩈᨦ᩠ᨥᩮᩣ ᨧᨲᩩᩅᨣ᩠ᨣᨠᩁᨱᩦᨿᩮ ᨠᨾ᩠ᨾᩮ ‘ᨧᨲᩩᩅᨣ᩠ᨣᩮᩣ’ᨲᩥ ᩅᩩᨧ᩠ᨧᨲᩥ, ᨲᨳᩣ ᨸᨬ᩠ᨧᩅᨣ᩠ᨣᨴᩈᩅᨣ᩠ᨣᨠᩁᨱᩦᨿᩮ ᨠᨾ᩠ᨾᩮ ᩋᨲᩥᩁᩮᨠᨸᨬ᩠ᨧᩅᨣ᩠ᨣᨴᩈᩅᨣ᩠ᨣᩮᩣᨸᩥ ‘ᨸᨬ᩠ᨧᩅᨣ᩠ᨣᨴᩈᩅᨣ᩠ᨣᩮᩣ’ᨲᩥ ᩅᩩᨧ᩠ᨧᨲᩥ. ᨲᩈ᩠ᨾᩣ ᩐᨶᩮᩣᨸᩥ ᨧᨲᩩᩅᨣ᩠ᨣᨸᨬ᩠ᨧᩅᨣ᩠ᨣᨴᩈᩅᨣ᩠ᨣᩅᩦᩈᨲᩥᩅᨣ᩠ᨣᩮᩣᩅᩣ’’ᨲᩥ ᨾᨬ᩠ᨬᩮᨿ᩠ᨿᩩᩴ, ᨲᩮᩈᩴ ᨾᨬ᩠ᨬᨶᩣᨶᩥᩅᩣᩁᨱᨲ᩠ᨳᩴ ‘‘ᩑᨠᩮᨶᨸᩥ ᨧᩮ ᩐᨶᩮᩣ’’ᨲᩥᩌᨴᩥ ᩅᩩᨲ᩠ᨲᩴ. ᩋᨳ ᩅᩣ ᩅᩦᩈᨲᩥ ᨽᩥᨠ᩠ᨡᩩᩈᨦ᩠ᨥᩮᩣ ᨧᩮ, ᨮᨸᩮᨲ᩠ᩅᩣ ᩑᨠᩮᨶᨸᩥ ᨧᩮ ᩐᨶᩮᩣ ᩋᨸ᩠ᨸᨠᨲᨲ᩠ᨲᩮᩣ, ᨲᩴ ᨮᨸᩮᨲ᩠ᩅᩣ ᩑᨠᩮᨶᨸᩥ ᨧᩮᨲᩥ ᩑᩅᨾᩮᨲ᩠ᨳ ᩋᨲ᩠ᨳᩮᩣ ᨴᨭ᩠ᨮᨻ᩠ᨻᩮᩣ. ᩋᨿᩴ ᨲᨲ᩠ᨳ ᩈᩣᨾᩦᨧᩦᨲᩥ ᩅᨧᨶᩴ ᨿᩴ ᩅᩩᨲ᩠ᨲᩴ ᩈᨻ᩠ᨻᨲ᩠ᨳ ‘‘ᨲᩔ ᩌᨸᨲ᩠ᨲᩥᨿᩣ ᨸᩁᩥᩅᩣᩈᩴ ᨴᩮᨲᩥ, ᨾᩪᩃᩣᨿ ᨸᨭᩥᨠᩔᨲᩥ, ᨾᩣᨶᨲ᩠ᨲᩴ ᨴᩮᨲᩥ, ᩋᨻ᩠ᨽᩮᨲᩦ’’ᨲᩥ, ᨲᩔ ᩌᩅᩥᨽᩣᩅᨠᩁᨱᨲ᩠ᨳᩴ ᩅᩩᨲ᩠ᨲᨶ᩠ᨲᩥ ᩅᩮᨴᩥᨲᨻ᩠ᨻᩴ. ᨲᩮᨶ ᨲᩮᩈᩩ ᩋᨿᩴ ᨿᨳᩣᩅᩩᨲ᩠ᨲᩣ ᩈᩣᨾᩦᨧᩥ ᨶᩥᨿᨲᩣ ᩍᨧ᩠ᨨᩥᨲᨻ᩠ᨻᩣ, ᨶ ᩁᩣᨩᩈᩥᨠ᩠ᨡᩣᨸᨴᩣᨴᩦᩈᩩ ᩅᩥᨿ ᩋᨶᩥᨿᨲᩣ. ᨲᨲ᩠ᨳ ᩉᩥ ᨠᩮᨶᨧᩥ ᩋᨶ᩠ᨲᩁᩣᨿᩮᨶ ᨲᩴ ᩈᩣᨾᩦᨧᩥᨾᨠᩁᩮᩣᨶ᩠ᨲᩮᨸᩥ ᩋᨶᩣᨸᨲ᩠ᨲᩦᨲᩥ ᨴᩦᨸᩥᨲᩴ ᩉᩮᩣᨲᩥ.

ᩈᨦ᩠ᨥᩣᨴᩥᩈᩮᩈᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᩋᨶᩥᨿᨲᨠᨱ᩠ᨯᩴ

᪑. ᨸᨮᨾᩣᨶᩥᨿᨲᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩋᨶᩥᨿᨲᩮ ᩌᨴᩥᨲᩮᩣᩅ ᩍᨴᩴ ᨸᨠᩥᨱ᩠ᨱᨠᩴ. ᩈᩮᨿ᩠ᨿᨳᩥᨴᩴ – ᩍᨴᩴ ᩋᨶᩥᨿᨲᨠᨱ᩠ᨯᩴ ᨶᩥᨸ᩠ᨸᨿᩮᩣᨩᨶᩴ ᨲᨲ᩠ᨳ ᩋᨸᩩᨻ᩠ᨻᩣᨽᩣᩅᨲᩮᩣᨲᩥ ᨧᩮ? ᨶ, ᨣᩁᩩᨠᩃᩉᩩᨠᨽᩮᨴᨽᩥᨶ᩠ᨶᩣᨸᨲ᩠ᨲᩥᩁᩮᩣᨸᨶᩣᩁᩮᩣᨸᨶᨠ᩠ᨠᨾᩃᨠ᩠ᨡᨱᨴᩦᨸᨶᨸ᩠ᨸᨿᩮᩣᨩᨶᨲᩮᩣ. ᩑᨲ᩠ᨳ ᩉᩥ ‘‘ᩈᩣ ᨧᩮ ᩑᩅᩴ ᩅᨴᩮᨿ᩠ᨿ ‘ᩋᨿ᩠ᨿᩮᩣ ᨾᨿᩣ…ᨸᩮ… ᩈᩮᩣ ᨧ ᨲᩴ ᨸᨭᩥᨩᩣᨶᩣᨲᩥ, ᩌᨸᨲ᩠ᨲᩥᨿᩣ ᨠᩣᩁᩮᨲᨻ᩠ᨻᩮᩣ’’’ᨲᩥᩌᨴᩥᨶᩣ (ᨸᩣᩁᩣ. ᪔᪔᪖) ᩌᨸᨲ᩠ᨲᩥᨿᩣ ᨣᩁᩩᨠᩣᨿ, ᩃᩉᩩᨠᩣᨿ ᨧ ᩌᩁᩮᩣᨸᨶᨠ᩠ᨠᨾᩃᨠ᩠ᨡᨱᩴ, ‘‘ᨶ ᨠᩣᩁᩮᨲᨻ᩠ᨻᩮᩣ’’ᨲᩥ ᩍᨾᩥᨶᩣ ᩋᨶᩣᩁᩮᩣᨸᨶᨠ᩠ᨠᨾᩃᨠ᩠ᨡᨱᨬ᩠ᨧ ᨴᩔᩥᨲᩴ. ᩃᨠ᩠ᨡᨱᨴᩦᨸᨶᨲᩮᩣ ᩌᨴᩥᨾ᩠ᩉᩥ, ᩋᨶ᩠ᨲᩮ ᩅᩣ ᩏᨴ᩠ᨴᩥᩈᩥᨲᨻ᩠ᨻᨶ᩠ᨲᩥ ᨧᩮ? ᨶ, ᩋᩈᨾ᩠ᨽᩅᨲᩮᩣ. ᨠᨳᩴ ᨶ ᨲᩣᩅ ᩌᨴᩥᨾ᩠ᩉᩥ ᩈᨾ᩠ᨽᩅᨲᩥ, ᨿᩮᩈᨾᩥᨴᩴ ᩃᨠ᩠ᨡᨱᩴ, ᨲᩮᩈᩴ ᩈᩥᨠ᩠ᨡᩣᨸᨴᩣᨶᩴ ᩋᨴᩔᩥᨲᨲ᩠ᨲᩣ. ᨶ ᩋᨶ᩠ᨲᩮ ᨣᩁᩩᨠᨾᩥᩔᨠᨲ᩠ᨲᩣ. ᨲᩈ᩠ᨾᩣ ᨣᩁᩩᨠᩃᩉᩩᨠᩣᨶᩴ ᨾᨩ᩠ᨫᩮ ᩑᩅ ᩏᨴ᩠ᨴᩥᩈᩥᨲᨻ᩠ᨻᨲᩴ ᩋᩁᩉᨲᩥ ᩏᨽᨿᨾᩥᩔᨠᨲ᩠ᨲᩣ. ᨿᩣ ᨲᨲ᩠ᨳ ᨸᩣᨧᩥᨲ᩠ᨲᩥᨿᩈᨦ᩠ᨡᩣᨲᩣ ᩃᩉᩩᨠᩣᨸᨲ᩠ᨲᩥ ᨴᩔᩥᨲᩣ, ᩈᩣᨸᩥ ᨣᩁᩩᨠᩣᨲᩥ ᨠᨳᩥᨲᩣ. ᨲᩮᨶᩮᩅᩣᩉ ‘‘ᨾᩮᨳᩩᨶᨵᨾ᩠ᨾᩈᨶ᩠ᨶᩥᩔᩥᨲᨠᩥᩃᩮᩈᩈᨦ᩠ᨡᩣᨲᩮᨶ ᩁᩉᩔᩣᨴᩮᨶᩣ’’ᨲᩥᩌᨴᩥ. ᨲᩈ᩠ᨾᩣ ᨣᩁᩩᨠᩣᨶᩴ ᩑᩅ ᩋᨶᨶ᩠ᨲᩁᩴ ᩏᨴ᩠ᨴᩥᨭ᩠ᨮᨶ᩠ᨲᩥᨸᩥ ᩑᨠᩮ. ᩑᩅᩴ ᩈᨲᩥ ᨸᨮᨾᩣᨶᩥᨿᨲᨾᩮᩅᩣᩃᩴ ᨲᩣᩅᨲᩣ ᩃᨠ᩠ᨡᨱᨴᩦᨸᨶᩈᩥᨴ᩠ᨵᩥᨲᩮᩣ, ᨠᩥᩴ ᨴᩩᨲᩥᨿᩮᨶᩣᨲᩥ ᨧᩮ? ᨶ, ᩒᨠᩣᩈᨶᩥᨿᨾᨸᨧ᩠ᨧᨿᨾᩥᨧ᩠ᨨᩣᨣᩣᩉᨶᩥᩅᩣᩁᨱᨸ᩠ᨸᨿᩮᩣᨩᨶᨲᩮᩣ. ‘‘ᨸᨭᩥᨧ᩠ᨨᨶ᩠ᨶᩮ ᩌᩈᨶᩮ ᩋᩃᩴᨠᨾ᩠ᨾᨶᩥᨿᩮ’’ᨲᩥ ᩒᨠᩣᩈᨶᩥᨿᨾᨲᩮᩣ ᩉᩥ ᨲᨻ᩠ᨻᩥᨸᩁᩦᨲᩮ ᩒᨠᩣᩈᩮ ᩍᨴᩴ ᩃᨠ᩠ᨡᨱᩴ ᨶ ᩅᩥᨠᨸ᩠ᨸᩥᨲᨶ᩠ᨲᩥ ᨾᩥᨧ᩠ᨨᩣᨣᩣᩉᩮᩣ ᩉᩮᩣᨲᩥ. ᨲᩴᨶᩥᩅᩣᩁᨱᨲᩮᩣ ᨴᩩᨲᩥᨿᩣᨶᩥᨿᨲᨾ᩠ᨸᩥ ᩈᩣᨲ᩠ᨳᨠᨾᩮᩅᩣᨲᩥ ᩋᨵᩥᨸ᩠ᨸᩣᨿᩮᩣ. ᨠᩈ᩠ᨾᩣ? ᩒᨠᩣᩈᨽᩮᨴᨲᩮᩣ, ᩁᩉᩮᩣᨽᩮᨴᨴᩦᨸᨶᨲᩮᩣ, ᩁᩉᩮᩣᨶᩥᩈᨩ᩠ᨩᩔᩣᨴᨽᩮᨴᨴᩦᨸᨶᨲᩮᩣ. ᩒᨠᩣᩈᨶᩥᨿᨾᨽᩣᩅᩮ ᨧ ᩁᩉᩮᩣᨶᩥᩈᨩ᩠ᨩᩔᩣᨴᨽᩮᨴᩮᩣ ᨩᩣᨲᩮᩣ. ᨴ᩠ᩅᩥᨶ᩠ᨶᩴ ᩁᩉᩮᩣᨶᩥᩈᨩ᩠ᨩᩈᩥᨠ᩠ᨡᩣᨸᨴᩣᨶᩴ ᨶᩣᨶᩣᨲ᩠ᨲᨩᩣᨶᨶᨬ᩠ᨧ ᩈᩥᨿᩣ ᨲᨳᩣ ᨠᩣᨿᩈᩴᩈᨣ᩠ᨣᨽᩮᨴᨴᩦᨸᨶᨲᩮᩣ. ᨶᩣᩃᩴ ᨠᨾ᩠ᨾᨶᩥᨿᩮᨸᩥ ᩉᩥ ᩒᨠᩣᩈᩮ ᩋᨸ᩠ᨸᨭᩥᨧ᩠ᨨᨶ᩠ᨶᩮ, ᨸᨭᩥᨧ᩠ᨨᨶ᩠ᨶᩮᨸᩥ ᩅᩣ ᨶᩥᩈᩥᨶ᩠ᨶᩣᨿ ᩅᩣᨲᨸᩣᨶᨠᩅᩣᨭᨧ᩠ᨨᩥᨴ᩠ᨴᩣᨴᩦᩉᩥ ᨶᩥᨠ᩠ᨡᨶ᩠ᨲᨠᩮᩈᩣᨴᩥᨣ᩠ᨣᩉᨱᩮᨶ ᨠᩣᨿᩈᩴᩈᨣ᩠ᨣᩮᩣ ᩃᨻ᩠ᨽᨲᩦᨲᩥ ᩑᩅᨾᩣᨴᨿᩮᩣᨸᩥ ᨶᨿᩣ ᩅᩥᨲ᩠ᨳᩣᩁᨲᩮᩣ ᩅᩮᨴᩥᨲᨻ᩠ᨻᩣ.

ᨲᨲᩕᩥᨴᩴ ᨾᩩᨡᨾᨲ᩠ᨲᨶᩥᨴᩔᨶᩴ – ᩒᨠᩣᩈᨽᩮᨴᨲᩮᩣᨲᩥ ᩋᩃᩴᨠᨾ᩠ᨾᨶᩥᨿᨶᩣᩃᩴᨠᨾ᩠ᨾᨶᩥᨿᨽᩮᨴᨲᩮᩣ. ᨸᨭᩥᨧ᩠ᨨᨶ᩠ᨶᨾ᩠ᨸᩥ ᩉᩥ ᩑᨠᨧ᩠ᨧᩴ ᨶᩣᩃᩴᨠᨾ᩠ᨾᨶᩥᨿᩴ ᩅᩣᨲᨸᩣᨶᩣᨴᩥᨶᩣ ᩋᨶ᩠ᨲᩁᩥᨲᨲ᩠ᨲᩣ, ᩏᨽᨿᨸ᩠ᨸᨭᩥᨧ᩠ᨨᨶ᩠ᨶᨾ᩠ᨸᩥ ᩑᨠᨧ᩠ᨧᩴ ᨶᩣᩃᩴᨠᨾ᩠ᨾᨶᩥᨿᩴ ᩅᩥᨩᩣᨶᨲᩴ ᩋᨩ᩠ᨫᩮᩣᨠᩣᩈᨲ᩠ᨲᩣ. ᩁᩉᩮᩣᨽᩮᨴᨴᩦᨸᨶᨲᩮᩣᨲᩥ ᩑᨲ᩠ᨳ ᩁᩉᨽᩣᩅᩈᩣᨾᨬ᩠ᨬᩮᨸᩥ ᩁᩉᩮᩣ ᨴ᩠ᩅᩥᨵᩣ ᨸᨭᩥᨧ᩠ᨨᨶ᩠ᨶᩣᨸᨭᩥᨧ᩠ᨨᨶ᩠ᨶᨽᩮᨴᨲᩮᩣᨲᩥ ᩋᨵᩥᨸ᩠ᨸᩣᨿᩮᩣ. ᩁᩉᩮᩣᨶᩥᩈᨩ᩠ᨩᩔᩣᨴᨽᩮᨴᨴᩦᨸᨶᨲᩮᩣᨲᩥ ᨾᩮᨳᩩᨶᩔᩣᨴᩅᩈᩮᨶ ᨶᩥᩈᨩ᩠ᨩᩣ, ᨴᩩᨭ᩠ᨮᩩᩃ᩠ᩃᩔᩣᨴᩅᩈᩮᨶ ᨶᩥᩈᨩ᩠ᨩᩣᨲᩥ ᨲᩣᨴᩥᩈᩔ ᨽᩮᨴᩔ ᨴᩦᨸᨶᨲᩮᩣᨲᩥ ᩋᨲ᩠ᨳᩮᩣ. ‘‘ᩍᨵ ᩌᨣᨲᨶᨿᨲ᩠ᨲᩣ ᨽᩥᨠ᩠ᨡᩩᨶᩥᨸᩣᨲᩥᨾᩮᩣᨠ᩠ᨡᩮ ᩍᨴᩴ ᨠᨱ᩠ᨯᩴ ᨸᩁᩥᩉᩦᨶᨶ᩠ᨲᩥ ᩅᩮᨴᩥᨲᨻ᩠ᨻ’’ᨶ᩠ᨲᩥ ᩅᨴᨶ᩠ᨲᩥ. ‘‘ᩋᨭ᩠ᨮᩩᨸ᩠ᨸᨲ᩠ᨲᩥᨿᩣ ᨲᨲ᩠ᨳ ᩋᨶᩩᨸ᩠ᨸᨶ᩠ᨶᨲ᩠ᨲᩣ’’ᨲᩥ ᩑᨠᩮ, ᨲᩴ ᩋᨶᩮᨠᨶ᩠ᨲᨽᩣᩅᨴᩦᨸᨶᨲᩮᩣ ᩋᨿᩩᨲ᩠ᨲᩴ. ᩈᨻ᩠ᨻᨻᩩᨴ᩠ᨵᨠᩣᩃᩮ ᩉᩥ ᨽᩥᨠ᩠ᨡᩪᨶᩴ ᨸᨬ᩠ᨧ, ᨽᩥᨠ᩠ᨡᩩᨶᩦᨶᩴ ᨧᨲ᩠ᨲᩣᩁᩮᩣ ᨧ ᩏᨴ᩠ᨴᩮᩈᩣ ᩈᨶ᩠ᨲᩥ. ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᨸᨬ᩠ᨬᨲ᩠ᨲᩥᨿᩣ ᩋᩈᩣᨵᩣᩁᨱᨲ᩠ᨲᩣ ᨲᨲ᩠ᨳ ᨶᩥᨴ᩠ᨴᩥᨭ᩠ᨮᩈᨦ᩠ᨥᩣᨴᩥᩈᩮᩈᨸᩣᨧᩥᨲ᩠ᨲᩥᨿᩣᨶᨶ᩠ᨲᩥ ᩑᨠᩮ. ᨲᩣᩈᨬ᩠ᩉᩥ ᨽᩥᨠ᩠ᨡᩩᨶᩦᨶᩴ ᩏᨻ᩠ᨽᨩᩣᨱᩩᨾᨱ᩠ᨯᩃᩥᨠ (ᨸᩣᨧᩥ. ᪖᪕᪘) -ᩋᨭ᩠ᨮᩅᨲ᩠ᨳᩩᨠ (ᨸᩣᨧᩥ. ᪖᪗᪕) -ᩅᩈᩮᨶ ᨠᩣᨿᩈᩴᩈᨣ᩠ᨣᩅᩥᩈᩮᩈᩮᩣ ᨸᩣᩁᩣᨩᩥᨠᩅᨲ᩠ᨳᩩ, ‘‘ᩉᨲ᩠ᨳᨣ᩠ᨣᩉᨱᩴ ᩅᩣ ᩈᩣᨴᩥᨿᩮᨿ᩠ᨿ, ᨠᩣᨿᩴ ᩅᩣ ᨲᨴᨲ᩠ᨳᩣᨿ ᩏᨸᩈᩴᩉᩁᩮᨿ᩠ᨿᩣ’’ᨲᩥ (ᨸᩣᨧᩥ. ᪖᪗᪕) ᩅᨧᨶᨲᩮᩣ ᩈᩣᨴᩥᨿᨶᨾ᩠ᨸᩥ, ‘‘ᩈᨶ᩠ᨲᩥᨭ᩠ᨮᩮᨿ᩠ᨿ ᩅᩣ’’ᨲᩥ (ᨸᩣᨧᩥ. ᪖᪗᪕) ᩅᨧᨶᨲᩮᩣ ᨮᩣᨶᨾ᩠ᨸᩥ, ‘‘ᩈᨦ᩠ᨠᩮᨲᩴ ᩅᩣ ᨣᨧ᩠ᨨᩮᨿ᩠ᨿᩣ’’ᨲᩥ (ᨸᩣᨧᩥ. ᪖᪗᪕) ᩅᨧᨶᨲᩮᩣ ᨣᨾᨶᨾ᩠ᨸᩥ, ‘‘ᨨᨶ᩠ᨶᩴ ᩅᩣ ᩋᨶᩩᨸᩅᩥᩈᩮᨿ᩠ᨿᩣ’’ᨲᩥ (ᨸᩣᨧᩥ. ᪖᪗᪕) ᩅᨧᨶᨲᩮᩣ ᨸᨭᩥᨧ᩠ᨨᨶ᩠ᨶᨭ᩠ᨮᩣᨶᨸ᩠ᨸᩅᩮᩈᩮᩣᨸᩥ ᩉᩮᩣᨲᩥ, ᨲᨳᩣ ‘‘ᩁᨲ᩠ᨲᨶ᩠ᨵᨠᩣᩁᩮ ᩋᨸ᩠ᨸᨴᩦᨸᩮ, ᨸᨭᩥᨧ᩠ᨨᨶ᩠ᨶᩮ ᩒᨠᩣᩈᩮ ᩋᨩ᩠ᨫᩮᩣᨠᩣᩈᩮ ᩑᨠᩮᨶᩮᨠᩣ ᩈᨶ᩠ᨲᩥᨭ᩠ᨮᩮᨿ᩠ᨿ ᩅᩣ ᩈᩃ᩠ᩃᨸᩮᨿ᩠ᨿ ᩅᩣ’’ᨲᩥ (ᨸᩣᨧᩥ. ᪘᪓᪙) ᩅᨧᨶᨲᩮᩣ ᨴᩩᨭ᩠ᨮᩩᩃ᩠ᩃᩅᩣᨧᩣᨸᩥ ᨸᩣᨧᩥᨲ᩠ᨲᩥᨿᩅᨲ᩠ᨳᩩᨠᨶ᩠ᨲᩥ ᨠᨲ᩠ᩅᩣ ᨲᩣᩈᩴ ᩋᨬ᩠ᨬᨳᩣ ᩋᨶᩥᨿᨲᨠᨱ᩠ᨯᩔ ᩋᩅᨲ᩠ᨲᨻ᩠ᨻᨲᩣᨸᨲ᩠ᨲᩥᨲᩮᩣ ᨶ ᩅᩩᨲ᩠ᨲᨶ᩠ᨲᩥ ᨲᩮᩈᩴ ᩋᨵᩥᨸ᩠ᨸᩣᨿᩮᩣ. ᨸᨠᩥᨱ᩠ᨱᨠᩴ.

‘‘ᨴᩮᩈᨶᩣᩅᩩᨭ᩠ᨮᩣᨶᨣᩣᨾᩥᨶᩦᨶᩴ ᩌᨸᨲ᩠ᨲᩦᨶᩴ ᩅᩈᩮᨶ ᩋᩃᨩ᩠ᨩᩥᩌᨴᨿᩮᩣ ᩃᨩ᩠ᨩᩦᨶᩴ ᨧᩮᩣᨴᩮᩔᨶ᩠ᨲᩦ’’ᨲᩥ ᩌᨣᨲᨲ᩠ᨲᩣ ᩃᨩ᩠ᨩᩥᨸᨣ᩠ᨣᩉᨲ᩠ᨳᩣᨿ ᨸᨲᩥᩁᩪᨸᩣᨿᨸᩥ ᩏᨸᩣᩈᩥᨠᩣᨿ ᩅᨧᨶᩮᨶ ᩋᨠᨲ᩠ᩅᩣ ᨽᩥᨠ᩠ᨡᩩᩔᩮᩅ ᨸᨭᩥᨬ᩠ᨬᩣᨿ ᨠᩣᨲᨻ᩠ᨻᨶ᩠ᨲᩥ ᩌᨸᨲ᩠ᨲᩥᨿᩮᩣ ᨸᨶ ᩃᨠ᩠ᨡᨱᨴᩔᨶᨲ᩠ᨳᩴ ᨸᨬ᩠ᨬᨲ᩠ᨲᩴ ᩅᩥᨲ᩠ᨳᩣᩁᨶᨿᨾᩮᩅ ᨣᩉᩮᨲ᩠ᩅᩣ ᩅᨲ᩠ᨲᩩᩴ ᨿᩩᨲ᩠ᨲᩴ ‘‘ᩍᨾᩮ ᨡᩮᩣ ᨸᨶᩣᨿᩈ᩠ᨾᨶ᩠ᨲᩮᩣ ᨴ᩠ᩅᩮ ᩋᨶᩥᨿᨲᩣ ᨵᨾ᩠ᨾᩣ’’ᨲᩥ (ᨸᩣᩁᩣ. ᪔᪔᪓) ᩏᨴ᩠ᨴᩮᩈᨴᩔᨶᨲ᩠ᨲᩣᨲᩥ ᩃᩥᨡᩥᨲᩴ. ᩈᩮᩣᨲᩔ ᩁᩉᩮᩣᨲᩥ ᩑᨲ᩠ᨳ ᩁᩉᩮᩣᨲᩥ ᩅᨧᨶᩈᩣᨾᨬ᩠ᨬᨲᩮᩣ ᩅᩩᨲ᩠ᨲᩴ. ᨴᩩᨭ᩠ᨮᩩᩃ᩠ᩃᩈᩣᨾᨬ᩠ᨬᨲᩮᩣ ᨴᩩᨭ᩠ᨮᩩᩃ᩠ᩃᩣᩁᩮᩣᨧᨶᨸ᩠ᨸᨭᩥᨧ᩠ᨨᩣᨴᨶᩈᩥᨠ᩠ᨡᩣᨸᨴᩮᩈᩩ ᨸᩣᩁᩣᨩᩥᨠᩅᨧᨶᩴ ᩅᩥᨿ. ᨲᩈ᩠ᨾᩣ ‘‘ᨧᨠ᩠ᨡᩩᩔᩮᩅ ᨸᨶ ᩁᩉᩮᩣ ‘ᩁᩉᩮᩣ’ᨲᩥ ᩍᨵ ᩋᨵᩥᨸ᩠ᨸᩮᨲᩮᩣ’’ᨲᩥ ᩅᩩᨲ᩠ᨲᩴ. ᨠᨳᩴ ᨸᨬ᩠ᨬᩣᨿᨲᩦᨲᩥ ᨧᩮ? ‘‘ᨾᩣᨲᩩᨣᩣᨾᩮᩣ ᨶᩣᨾ…ᨸᩮ… ᩋᨶ᩠ᨲᨾᩈᩮᩣ ᨲᨴᩉᩩᨩᩣᨲᩣᨸᩥ ᨴᩣᩁᩥᨠᩣ’’ᨲᩥ (ᨸᩣᩁᩣ. ᪔᪔᪕) ᩅᩩᨲ᩠ᨲᨲ᩠ᨲᩣ ᨴᩩᨭ᩠ᨮᩩᩃ᩠ᩃᩮᩣᨽᩣᩈᨶᩴ ᩍᨵ ᨶᩣᨵᩥᨸ᩠ᨸᩮᨲᨶ᩠ᨲᩥ ᨴᩦᨸᩥᨲᨾᩮᩅᩣᨲᩥ. ᩋᨶ᩠ᨲᩮᩣᨴ᩠ᩅᩣᨴᩈᩉᨲ᩠ᨳᩮᨸᩦᨲᩥ ᨸᩥ-ᩈᨴ᩠ᨴᩮᨶ ᩋᨸᩥᩉᩥᨲᨠᩅᩣᨭᩔ ᨣᨻ᩠ᨽᩔ ᨴ᩠ᩅᩣᩁᩮ ᨶᩥᩈᩥᨶ᩠ᨶᩮᩣᨸᩦᨲᩥ ᩋᨲ᩠ᨳᩮᩣ. ᩋᨧᩮᩃᨠᩅᨣ᩠ᨣᩮ ᩁᩉᩮᩣᨸᨭᩥᨧ᩠ᨨᨶ᩠ᨶᩣᩈᨶᩈᩥᨠ᩠ᨡᩣᨸᨴᩮ (ᨸᩣᨧᩥ. ᪒᪘᪘) ‘‘ᨿᩮᩣ ᨠᩮᩣᨧᩥ ᩅᩥᨬ᩠ᨬᩪ ᨸᩩᩁᩥᩈᩮᩣ ᨴᩩᨲᩥᨿᩮᩣ ᩉᩮᩣᨲᩦ’’ᨲᩥ ᩍᨾᩔ ᩋᨶᩩᩁᩪᨸᨲᩮᩣ ‘‘ᩍᨲ᩠ᨳᩦᨶᩴ ᨸᨶ ᩈᨲᨾ᩠ᨸᩥ ᩋᨶᩣᨸᨲ᩠ᨲᩥᩴ ᨶ ᨠᩁᩮᩣᨲᩥᨿᩮᩅᩣ’’ᨲᩥ ᩅᩩᨲ᩠ᨲᩴ. ‘‘ᩋᩃᩴᨠᨾ᩠ᨾᨶᩥᨿᩮᨲᩥ ᩈᨠ᩠ᨠᩣ ᩉᩮᩣᨲᩥ ᨾᩮᨳᩩᨶᩴ ᨵᨾ᩠ᨾᩴ ᨸᨭᩥᩈᩮᩅᩥᨲᩩ’’ᨶ᩠ᨲᩥ (ᨸᩣᩁᩣ. ᪔᪔᪕) ᩅᩥᨽᨦ᩠ᨣᩮ ᩅᨧᨶᨲᩮᩣ ᩁᩉᩮᩣᨶᩥᩈᨩ᩠ᨩᩔᩣᨴᩮᩣ ᨧᩮᨲ᩠ᨳ ᨾᩮᨳᩩᨶᨵᨾ᩠ᨾᩈᨶ᩠ᨶᩥᩔᩥᨲᨠᩥᩃᩮᩈᩮᩣ, ᨶ ᨴᩩᨲᩥᨿᩮ ᩅᩥᨿ ᨴᩩᨭ᩠ᨮᩩᩃ᩠ᩃᩅᩣᨧᩔᩣᨴᨠᩥᩃᩮᩈᩮᩣ. ᨲᩈ᩠ᨾᩣ ᨧ ᨸᨬ᩠ᨬᩣᨿᨲᩥ ᩈᩮᩣᨲᩔ ᩁᩉᩮᩣ ᨶᩣᨵᩥᨸ᩠ᨸᩮᨲᩮᩣᨲᩥ.

ᨲᩥᨱ᩠ᨱᩴ ᨵᨾ᩠ᨾᩣᨶᩴ ᩋᨬ᩠ᨬᨲᩁᩮᨶ ᩅᨴᩮᨿ᩠ᨿᩣᨲᩥ ᩁᩉᩮᩣᨶᩥᩈᨩ᩠ᨩᩈᩥᨠ᩠ᨡᩣᨸᨴᩅᩈᩮᨶ ᨶᩥᩈᩥᨶ᩠ᨶᩔ ᨲᩔᩣᨶᩩᩈᩣᩁᩮᨶ ᨸᩣᨧᩥᨲ᩠ᨲᩥᨿᨾᩮᩅ ᩋᩅᨲ᩠ᩅᩣ ᨸᩣᩁᩣᨩᩥᨠᩈᨦ᩠ᨥᩣᨴᩥᩈᩮᩈᩣᨿᨸᩥ ᩌᨸᨲ᩠ᨲᩥᨿᩣ ᨽᩮᨴᨴᩔᨶᨲ᩠ᨳᩴ ᩅᩩᨲ᩠ᨲᩴ. ᨸᩩᨶ ᩌᨸᨲ᩠ᨲᩥᨸ᩠ᨸᨭᩥᨩᩣᨶᨶᩴ ᩋᩅᨲ᩠ᩅᩣ ᨠᩈ᩠ᨾᩣ ‘‘ᨶᩥᩈᨩ᩠ᨩᩴ ᨽᩥᨠ᩠ᨡᩩ ᨸᨭᩥᨩᩣᨶᨾᩣᨶᩮᩣ’’ᨲᩥ ᩅᨲ᩠ᨳᩩᨸ᩠ᨸᨭᩥᨩᩣᨶᨶᩴ ᩅᩩᨲ᩠ᨲᨶ᩠ᨲᩥ? ᩅᩩᨧ᩠ᨧᨲᩮ – ᩌᨸᨲ᩠ᨲᩥᨿᩣ ᨧᩮᩣᨴᩥᨲᩮ ᩅᩥᨶᨿᨵᩁᩮᨶ ‘‘ᨠᩥᩈ᩠ᨾᩥᩴ ᩅᨲ᩠ᨳᩩᩈ᩠ᨾᩥ’’ᨶ᩠ᨲᩥ ᨸᩩᨧ᩠ᨨᩥᨲᩮ ᨧᩩᨴᩥᨲᨠᩮᨶ ‘‘ᩍᨾᩈ᩠ᨾᩥᩴ ᩅᨲ᩠ᨳᩩᩈ᩠ᨾᩥ’’ᨶ᩠ᨲᩥ ᩅᩩᨲ᩠ᨲᩮ ᩅᩥᨶᨿᨵᩁᩮᨶ ‘‘ᩎᨴᩥᩈᩴ ᨶᩣᨾ ᩋᨠᩣᩈᩦ’’ᨲᩥ ᨸᩩᨧ᩠ᨨᩥᨲᩮ ᩈᩮᩣ ᩅᨲ᩠ᨳᩩᩴ ᨸᨭᩥᨩᩣᨶᨾᩣᨶᩮᩣᩅ ᨠᩣᩁᩮᨲᨻ᩠ᨻᩮᩣᨲᩥ ᨴᩔᨶᨲ᩠ᨳᩴ ‘‘ᨶᩥᩈᨩ᩠ᨩᩴ ᨽᩥᨠ᩠ᨡᩩ ᨸᨭᩥᨩᩣᨶᨾᩣᨶᩮᩣ’’ᨲᩥ ᩅᩩᨲ᩠ᨲᩴ. ᨿᨴᩥ ᩑᩅᩴ ᨶᩥᩈᨩ᩠ᨩᩴ ᨸᨭᩥᨩᩣᨶᨾᩣᨶᩮᩣᨸᩥ ᩌᨸᨲ᩠ᨲᩥᨿᩣᩅ ᨠᩣᩁᩮᨲᨻ᩠ᨻᩮᩣᨲᩥ? ᩋᨶᩩᩁᩪᨸᨾᩮᩅ. ᩑᩅᩴ ᨸᨶ ᨣᩉᩮᨲᨻ᩠ᨻᩴ – ᨲᩥᨱ᩠ᨱᨾ᩠ᨸᩥ ᩌᨸᨲ᩠ᨲᩦᨶᩴ ᩅᨲ᩠ᨳᩪᨶᩥ ᩋᨣ᩠ᨣᩉᩮᨲ᩠ᩅᩣ ᩍᨵ ᩈᩥᨠ᩠ᨡᩣᨸᨴᩅᩈᩮᨶ ᨶᩥᩈᨩ᩠ᨩᨾᩮᩅ ᩅᩩᨲ᩠ᨲᩴ. ᨲᩈ᩠ᨾᩥᩴ ᨣᩉᩥᨲᩮᨸᩥ ᩉᩥ ᩌᨸᨲ᩠ᨲᩥ ᨣᩉᩥᨲᩣᩅ ᩉᩮᩣᨲᩦᨲᩥ. ᨿᩮᨶ ᩅᩣ ᩈᩣᨲᩥ ᩑᨲ᩠ᨳ ᩅᩣ-ᩈᨴ᩠ᨴᩮᩣ ‘‘ᨲᩮᨶ ᩈᩮᩣ ᨽᩥᨠ᩠ᨡᩩ ᨠᩣᩁᩮᨲᨻ᩠ᨻᩮᩣ ᩅᩣ’’ᨲᩥ ᨿᩮᩣᨩᩮᨲᨻ᩠ᨻᩮᩣ. ᩈᩮᩣ ᨧ ᩅᩥᨠᨸ᩠ᨸᨲ᩠ᨳᩮᩣ. ᨲᩈ᩠ᨾᩣ ‘‘ᨠᩣᩁᩮᨲᨻ᩠ᨻᩮᩣ ᩅᩣ ᨸᨭᩥᨩᩣᨶᨾᩣᨶᩮᩣ, ᨶ ᩅᩣ ᨠᩣᩁᩮᨲᨻ᩠ᨻᩮᩣ ᩋᨸ᩠ᨸᨭᩥᨩᩣᨶᨾᩣᨶᩮᩣ’’ᨲᩥ ᩋᨲ᩠ᨳᩮᩣ. ᨲᩮᨶ ᩅᩩᨲ᩠ᨲᩴ ‘‘ᨸᨭᩥᨩᩣᨶᨾᩣᨶᩮᩣ ᩅᩣ’’ᨲᩥᩌᨴᩥ. ᩁᩉᩮᩣᨶᩥᩈᨩ᩠ᨩᩈᩥᨠ᩠ᨡᩣᨸᨴᩅᩈᩮᨶ ᨶᩥᩈᨩ᩠ᨩᨸᨧ᩠ᨧᨿᩣ ᩌᨸᨲ᩠ᨲᩥᨿᩣ ᩅᩩᨲ᩠ᨲᨲ᩠ᨲᩣ ᩈᩮᩈᩮᩈᩩᨸᩥ ᩈᩮᩈᩈᩥᨠ᩠ᨡᩣᨸᨴᩅᩈᩮᨶ ᩌᨸᨲ᩠ᨲᩥ ᨣᩉᩮᨲᨻ᩠ᨻᩣ. ‘‘ᩈᨾᩩᨭ᩠ᨮᩣᨶᩣᨴᩦᨶᩥ ᨸᨮᨾᨸᩣᩁᩣᨩᩥᨠᩈᨴᩥᩈᩣᨶᩮᩅᩣ’’ᨲᩥ ᩅᩩᨲ᩠ᨲᨲ᩠ᨲᩣ ᩍᨵ ᨴᩩᨭ᩠ᨮᩩᩃ᩠ᩃᩮᩣᨽᩣᩈᨶᩔ ᩋᨶᨵᩥᨸ᩠ᨸᩮᨲᨽᩣᩅᩮᩣ ᩅᩮᨴᩥᨲᨻ᩠ᨻᩮᩣ.

ᨸᨮᨾᩣᨶᩥᨿᨲᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪒. ᨴᩩᨲᩥᨿᩣᨶᩥᨿᨲᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩈᨦ᩠ᨥᩣᨴᩥᩈᩮᩈᩮᨶ ᩅᩣᨲᩥ ᨠᩣᨿᩈᩴᩈᨣ᩠ᨣᨴᩩᨭ᩠ᨮᩩᩃ᩠ᩃᩮᩣᨽᩣᩈᨶᩮᨶ. ᨲᩈ᩠ᨾᩣ ᩑᩅᩴ ᨠᩣᨿᩈᩴᩈᨣ᩠ᨣᩅᩣᩁᩮᩣ ᨸᩣᩊᩥᨿᨾ᩠ᨸᩥ ᩅᩩᨲ᩠ᨲᩮᩣ. ᩋᨶᨶ᩠ᨵᩮᩣ ᩋᨻᨵᩥᩁᩮᩣᨲᩥ ᩋᨶᨶ᩠ᨵᩮᩣ ᨠᩣᨿᩈᩴᩈᨣ᩠ᨣᩴ ᨸᩔᨲᩥ, ᩋᨻᨵᩥᩁᩮᩣ ᨴᩩᨭ᩠ᨮᩩᩃ᩠ᩃᩴ ᩈᩩᨱᩣᨲᩥ, ᨲᩈ᩠ᨾᩣ ᩑᩅ ᩋᨴᩥᨶ᩠ᨶᩣᨴᩣᨶᩈᨴᩥᩈᩣᨶᩮᩅᩣᨲᩥ ᩅᩩᨲ᩠ᨲ’’ᨶ᩠ᨲᩥ ᩃᩥᨡᩥᨲᩴ. ᩑᨲ᩠ᨳ ᨧ ᨠᩣᨿᩅᩣᨧᩣᨧᩥᨲ᩠ᨲᨲᩮᩣ ᩈᨾᩩᨭ᩠ᨮᩣᨶᩴ ᨠᨳᨶ᩠ᨲᩥ ᨧᩮ? ᨠᩣᨿᩈᩴᩈᨣ᩠ᨣᨬ᩠ᩉᩥ ᩈᨾᩣᨸᨩ᩠ᨩᨶ᩠ᨲᩮᩣ ᨴᩩᨭ᩠ᨮᩩᩃ᩠ᩃᨾ᩠ᨸᩥ ᨽᨱᨲᩥ, ᨴᩩᨭ᩠ᨮᩩᩃ᩠ᩃᩴ ᨽᨱᨶ᩠ᨲᩮᩣ ᨶᩥᩈᩦᨴᨲᩥ ᨧᩣᨲᩥ ᩈᨾ᩠ᨽᩅᨲᩥ, ᨴᩩᨭ᩠ᨮᩩᩃ᩠ᩃᨾᩮᩅ ᩅᩣ ᩈᨶ᩠ᨵᩣᨿ ᩅᩩᨲ᩠ᨲᩴ. ᨲᨬ᩠ᩉᩥ ᩋᨴᩥᨶ᩠ᨶᩣᨴᩣᨶᩈᨾᩩᨭ᩠ᨮᩣᨶᨶ᩠ᨲᩥ.

ᨿᩮᩣ ᨴᩮᩈᨶᩴ ᩈᨻ᩠ᨻᩅᩥᨴᩪᨸᨾᩮᩣᩅ;

ᨶᩣᨶᩣᨶᨿᩣᨠᩣᩁᩅᩥᨧᩥᨲ᩠ᨲᨽᩮᨴᩴ;

ᨬᩣᨲᩩᩴ ᩏᨸᩣᨿᩣᨶ ᨾᨶᩮᩣ ᩈᨲᩥᨾᩣ;

ᨲᩴ ᩃᩣᨽᩉᩮᨲᩩᩴ ᨶ ᨠᩁᩮᩣᨲᩥ ᨸᩩᨬ᩠ᨬᨶ᩠ᨲᩥ.

ᨴᩩᨲᩥᨿᩣᨶᩥᨿᨲᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᩋᨶᩥᨿᨲᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨶᩥᩔᨣ᩠ᨣᩥᨿᨠᨱ᩠ᨯᩴ

᪑. ᨧᩦᩅᩁᩅᨣ᩠ᨣᩮᩣ

᪑. ᨠᨳᩥᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨶᩥᩔᨣ᩠ᨣᩥᨿᨠᨱ᩠ᨯᩮ ᨲᩥᨱ᩠ᨱᩴ ᨠᨳᩥᨶᩈᩥᨠ᩠ᨡᩣᨸᨴᩣᨶᩴ, ᩅᩔᩥᨠᩈᩣᨭᩥᨠᩋᨧ᩠ᨧᩮᨠᨧᩦᩅᩁᩈᩣᩈᨦ᩠ᨠᩈᩥᨠ᩠ᨡᩣᨸᨴᩣᨶᨬ᩠ᨧ ᩑᨠᨴᩮᩈᨶᩣᨿ ᨲᨳᩣᨠᩥᨱ᩠ᨱᩣᨸᨲ᩠ᨲᩥᨠ᩠ᨡᨶ᩠ᨵᩣᩅ ᩅᩮᨴᩥᨲᨻ᩠ᨻᩣ –

ᨠᨳᩥᨶᩴ ᨿᩔ ᨧᨲ᩠ᨲᩣᩁᩮᩣ, ᩈᩉᨩᩣ ᩈᨾᨿᨴ᩠ᩅᨿᩴ;

ᨨᨶ᩠ᨶᩴ ᩈᩥᨠ᩠ᨡᩣᨸᨴᩣᨶᨬ᩠ᨧ, ᩑᨠᨴᩮᩈᩅᩥᨶᩥᨧ᩠ᨨᨿᩮᩣ.

ᨲᨲ᩠ᨳ ᨠᨳᩥᨶᨶ᩠ᨲᩥ ‘‘ᩈᨦ᩠ᨥᩔ ᩋᨶᩩᨾᩮᩣᨴᨶᩣᨿ, ᨣᨱᩔ ᩋᨶᩩᨾᩮᩣᨴᨶᩣᨿ, ᨸᩩᨣ᩠ᨣᩃᩔ ᩋᨲ᩠ᨳᩣᩁᩣ ᩈᨦ᩠ᨥᩔ ᩋᨲ᩠ᨳᨲᩴ ᩉᩮᩣᨲᩥ ᨠᨳᩥᨶ’’ᨶ᩠ᨲᩥ (ᨸᩁᩥ. ᪔᪑᪔) ᩅᨧᨶᨲᩮᩣ ᨲᩮᩈᩴᨿᩮᩅ ᩋᨶᩩᨾᩮᩣᨴᨶᩣᨴᩥᨵᨾ᩠ᨾᩣᨶᩴ ᩈᨦ᩠ᨣᩉᩮᩣ ᨠᨳᩥᨶᩴ ᨶᩣᨾ. ᨿᨳᩣᩉ ‘‘ᨠᨳᩥᨶᩴ ᨩᩣᨶᩥᨲᨻ᩠ᨻᨶ᩠ᨲᩥ ᨲᩮᩈᨬ᩠ᨬᩮᩅ ᨵᨾ᩠ᨾᩣᨶᩴ ᩈᨦ᩠ᨣᩉᩮᩣ ᩈᨾᩅᩣᨿᩮᩣ ᨶᩣᨾᩴ ᨶᩣᨾᨠᨾ᩠ᨾ’’ᨶ᩠ᨲᩥᩌᨴᩥ (ᨸᩁᩥ. ᪔᪑᪒). ᨲᩈ᩠ᨾᩣ ᨠᨳᩥᨶᨶ᩠ᨲᩥ ᩍᨴᩴ ᨻᩉᩪᩈᩩ ᨵᨾ᩠ᨾᩮᩈᩩ ᨶᩣᨾᨾᨲ᩠ᨲᩴ, ᨶ ᨸᩁᨾᨲ᩠ᨳᨲᩮᩣ ᩑᨠᩮᩣ ᨵᨾ᩠ᨾᩮᩣ. ᨠᩮᩣ ᨸᨶᩔ ᩋᨲ᩠ᨳᩣᩁᩮᩣᨲᩥ? ᨲᨴᩮᨠᨴᩮᩈᩮᩣᩅ ᨡᩦᩁᩔ ᨵᩣᩁᩣ ᩅᩥᨿ. ᨿᨳᩣ ᨧᩣᩉ ‘‘ᩋᨲ᩠ᨳᩣᩁᩮᩣ ᩑᨠᩮᨶ ᨵᨾ᩠ᨾᩮᨶ ᩈᨦ᩠ᨣᩉᩥᨲᩮᩣ ᩅᨧᩦᨽᩮᨴᩮᨶᩣ’’ᨲᩥ. ᩈᩉᨩᩣ ᨶᩣᨾ ᩋᨭ᩠ᨮ ᨾᩣᨲᩥᨠᩣ, ᨴ᩠ᩅᩮ ᨸᩃᩥᨻᩮᩣᨵᩣ, ᨸᨬ᩠ᨧᩣᨶᩥᩈᩴᩈᩣᨲᩥ ᩍᨾᩮ ᨸᨶ᩠ᨶᩁᩈ ᨵᨾ᩠ᨾᩣ. ᩈᨾᨿᨴ᩠ᩅᨿᩴ ᨶᩣᨾ ᨠᨳᩥᨶᨲ᩠ᨳᩣᩁᩈᨾᨿᩮᩣ, ᨧᩦᩅᩁᩈᨾᨿᩮᩣ ᨧᩣᨲᩥ. ᨲᨲ᩠ᨳ ᨠᨳᩥᨶᨲ᩠ᨳᩣᩁᩈᨾᨿᩮᩣ ᩅᩔᩣᨶᩔ ᨸᨧ᩠ᨨᩥᨾᩮᩣ ᨾᩣᩈᩮᩣ. ᨧᩦᩅᩁᩈᨾᨿᩮᩣ ᨶᩣᨾ ᩋᨶᨲ᩠ᨳᨲᩮ ᨠᨳᩥᨶᩮ ᩋᨿᩴ ᨠᨲ᩠ᨲᩥᨠᨾᩣᩈᩮᩣ, ᩋᨲ᩠ᨳᨲᩮ ᨧᨲ᩠ᨲᩣᩁᩮᩣ ᩉᩮᨾᨶ᩠ᨲᩥᨠᩣ ᨧᩣᨲᩥ ᨸᨬ᩠ᨧ ᨾᩣᩈᩣ.

ᨲᨲ᩠ᨳ ᩋᨭ᩠ᨮ ᨾᩣᨲᩥᨠᩣ ᨶᩣᨾ ᨸᨠ᩠ᨠᨾᨶᨶ᩠ᨲᩥᨠᩣᨴᨿᩮᩣ. ᨲᩣ ᩈᨻ᩠ᨻᩣᨸᩥ ᩋᨲ᩠ᨳᩣᩁᩮᨶ ᩑᨠᨲᩮᩣ ᩏᨸ᩠ᨸᨩ᩠ᨩᨶ᩠ᨲᩥ ᨶᩣᨾ. ᨲᨻ᩠ᨽᩣᩅᨽᩣᩅᩥᨲᩣᨿ ᩋᨲ᩠ᨳᩣᩁᩮ ᩈᨲᩥ ᩏᨴ᩠ᨵᩣᩁᩮᩣ ᩈᨾ᩠ᨽᩅᨲᩥ. ᨲᨲ᩠ᨳ ᨠᨳᩥᨶᨲ᩠ᨳᩣᩁᩮᨶ ᩑᨠᩩᨸ᩠ᨸᩣᨴᩣ ᩑᨠᨶᩥᩁᩮᩣᨵᩣ ᩋᨶ᩠ᨲᩁᩩᨻ᩠ᨽᩣᩁᩮᩣ ᩈᩉᩩᨻ᩠ᨽᩣᩁᩮᩣ, ᩋᩅᩈᩮᩈᩣ ᨠᨳᩥᨶᩩᨻ᩠ᨽᩣᩁᩣ ᩑᨠᩩᨸ᩠ᨸᩣᨴᩣ, ᨶᩣᨶᩣᨶᩥᩁᩮᩣᨵᩣ ᨧ. ᨲᨲ᩠ᨳ ᩑᨠᨶᩥᩁᩮᩣᨵᩣᨲᩥ ᩋᨲ᩠ᨳᩣᩁᩮᨶ ᩈᩉ ᨶᩥᩁᩮᩣᨵᩣ, ᩋᨶ᩠ᨲᩁᩩᨻ᩠ᨽᩣᩁᩈᩉᩩᨻ᩠ᨽᩣᩁᩣᨶᩴ ᩏᨴ᩠ᨵᩣᩁᩣᨽᩣᩅᩮᩣ ᩑᨠᨠ᩠ᨡᨱᩮ ᩉᩮᩣᨲᩦᨲᩥ ᩋᨲ᩠ᨳᩮᩣ. ᩈᩮᩈᩣ ᨶᩣᨶᩣ ᨶᩥᩁᩩᨩ᩠ᨫᨶ᩠ᨲᩥ ᨶᩣᨾ. ᨲᩮᩈᩩ ᩉᩥ ᩏᨴ᩠ᨵᩣᩁᨽᩣᩅᩴ ᨸᨲ᩠ᨲᩮᩈᩩᨸᩥ ᩋᨲ᩠ᨳᩣᩁᩮᩣ ᨲᩥᨭ᩠ᨮᨲᩥ ᩑᩅᩣᨲᩥ ᩋᨭ᩠ᨮᨠᨳᩣᨿᩴ ᩋᨲ᩠ᨳᩅᩥᨽᩣᩅᨶᩣ. ᩈᨧᩮ ᩋᨲ᩠ᨳᨲᩮ ᨠᨳᩥᨶᩮ ᨽᩥᨠ᩠ᨡᩩᩈ᩠ᨾᩥᩴ ᩈᩣᨸᩮᨠ᩠ᨡᩮ ᨲᨾ᩠ᩉᩣ ᩌᩅᩣᩈᩣ ᨸᨠ᩠ᨠᨾᨶ᩠ᨲᩮ ᩈᨦ᩠ᨥᩮᩣ ᩋᨶ᩠ᨲᩁᩩᨻ᩠ᨽᩣᩁᩴ ᨠᩁᩮᩣᨲᩥ, ᨲᩔ ᨽᩥᨠ᩠ᨡᩩᨶᩮᩣ ᨸᨮᨾᨾᩮᩅ ᨾᩪᩃᩣᩅᩣᩈᩮ ᨶᩥᨭ᩠ᨮᩥᨲᨧᩦᩅᩁᨸᩃᩥᨻᩮᩣᨵᩣᨽᩣᩅᩮᨸᩥ ᩈᨲᩥ ᩋᨶ᩠ᨲᩁᩩᨻ᩠ᨽᩣᩁᩮ ᨸᩃᩥᨻᩮᩣᨵᩮᩣ ᨨᩥᨩ᩠ᨩᨲᩥ ᩈᨲᩥᨸᩥ ᩈᩣᨸᩮᨠ᩠ᨡᨲᩣᨿ ᩈᩏᩔᩣᩉᨲ᩠ᨲᩣ. ᩍᨾᩥᨶᩣ ᨸᩁᩥᨿᩣᨿᩮᨶ ᨸᨠ᩠ᨠᨾᨶᨶ᩠ᨲᩥᨠᩮᩣ ᨠᨳᩥᨶᩩᨴ᩠ᨵᩣᩁᩮᩣ ᩋᨲ᩠ᨳᩣᩁᩮᨶ ᩑᨠᩩᨸ᩠ᨸᩣᨴᩮᩣ ᨶᩣᨶᩣᨶᩥᩁᩮᩣᨵᩮᩣ ᩉᩮᩣᨲᩥ. ᨲᨳᩣ ᩋᨶ᩠ᨲᩁᩩᨻ᩠ᨽᩣᩁᩮ ᩈᨲᩥ ᩈᩩᨱᨶ᩠ᨲᩔᩣᨸᩥ ᨿᩣᩅ ᨧᩦᩅᩁᨶᩥᨭ᩠ᨮᩣᨶᩴ ᨶ ᨣᨧ᩠ᨨᨲᩥ, ᨲᩣᩅ ᨸᩁᩥᩉᩣᩁᩈᨾ᩠ᨽᩅᨲᩮᩣ ᨶᩥᨭ᩠ᨮᩣᨶᨶ᩠ᨲᩥᨠᩮᩣ. ᨿᩣᩅ ᩈᨶ᩠ᨶᩥᨭ᩠ᨮᩣᨶᩴ ᨶ ᨣᨧ᩠ᨨᨲᩥ, ᨲᩣᩅ ᨸᩁᩥᩉᩣᩁᩈᨾ᩠ᨽᩅᨲᩮᩣ ᩈᨶ᩠ᨶᩥᨭ᩠ᨮᩣᨶᨶ᩠ᨲᩥᨠᩮᩣ. ᨿᩣᩅ ᨶ ᨶᩔᨲᩥ, ᨲᩣᩅ ᨸᩁᩥᩉᩣᩁᩈᨾ᩠ᨽᩅᨲᩮᩣ ᨶᩣᩈᨶᨶ᩠ᨲᩥᨠᩮᩣ. ᨿᩣᩅ ᨶ ᩈᩩᨱᩣᨲᩥ, ᨲᩣᩅ ᨸᩁᩥᩉᩣᩁᩈᨾ᩠ᨽᩅᨲᩮᩣ ᩈᩅᨶᨶ᩠ᨲᩥᨠᩮᩣ. ᨿᩣᩅ ᨧᩦᩅᩁᩣᩈᩣ ᨶ ᨨᩥᨩ᩠ᨩᨲᩥ, ᨲᩣᩅ ᨸᩁᩥᩉᩣᩁᩈᨾ᩠ᨽᩅᨲᩮᩣ ᩌᩈᩣᩅᨧ᩠ᨨᩮᨴᩥᨠᩮᩣ. ᨿᩣᩅ ᩈᩦᨾᩴ ᨶᩣᨲᩥᨠ᩠ᨠᨾᨲᩥ, ᨲᩣᩅ ᨸᩁᩥᩉᩣᩁᩈᨾ᩠ᨽᩅᨲᩮᩣ ᩈᩦᨾᩣᨲᩥᨠ᩠ᨠᨶ᩠ᨲᩥᨠᩮᩣ. ᩋᨲ᩠ᨳᩣᩁᩮᨶ ᩑᨠᩩᨸ᩠ᨸᩣᨴᩮᩣ ᨶᩣᨶᩣᨶᩥᩁᩮᩣᨵᩮᩣ ᩉᩮᩣᨲᩦᨲᩥ ᩅᩮᨴᩥᨲᨻ᩠ᨻᩮᩣ.

ᨲᨲ᩠ᨳ ᩋᨶ᩠ᨲᩁᩩᨻ᩠ᨽᩣᩁᩈᩉᩩᨻ᩠ᨽᩣᩁᩣ ᨴ᩠ᩅᩮ ᩋᨶ᩠ᨲᩮᩣᩈᩦᨾᩣᨿᩴ ᩑᩅ ᩈᨾ᩠ᨽᩅᨶ᩠ᨲᩥ, ᨶ ᨻᩉᩥᩈᩦᨾᩣᨿᩴ. ᨸᨠ᩠ᨠᨾᨶᩈᩅᨶᩈᩦᨾᩣᨲᩥᨠ᩠ᨠᨶ᩠ᨲᩥᨠᩣ ᨻᩉᩥᩈᩦᨾᩣᨿᨾᩮᩅ ᩈᨾ᩠ᨽᩅᨶ᩠ᨲᩥ, ᨶ ᩋᨶ᩠ᨲᩮᩣᩈᩦᨾᩣᨿᩴ. ᨶᩥᨭ᩠ᨮᩣᨶᩈᩋᩌᨭ᩠ᨮᩣᨶᩣᩈᩣᩅᨧ᩠ᨨᩮᨴᩥᨠᩣ ᩋᨶ᩠ᨲᩮᩣᩈᩦᨾᩣᨿᨬ᩠ᨧᩮᩅ ᨻᩉᩥᩈᩦᨾᩣᨿᨬ᩠ᨧ. ᩋᨶ᩠ᨲᩁᩩᨻ᩠ᨽᩣᩁᩮᩣ ᩈᨦ᩠ᨥᩣᨿᨲ᩠ᨲᩮᩣ, ᨸᨠ᩠ᨠᨾᨶᨶᩥᨭ᩠ᨮᩣᨶᩈᨶ᩠ᨶᩥᨭ᩠ᨮᩣᨶᩈᩦᨾᩣᨲᩥᨠ᩠ᨠᨶ᩠ᨲᩥᨠᩣ ᨸᩩᨣ᩠ᨣᩃᩣᨵᩦᨶᩣ, ᩈᩮᩈᩣ ᨲᨴᩩᨽᨿᩅᩥᨸᩁᩦᨲᩣ.

ᨲᨲ᩠ᨳ ‘‘ᨶᩥᨭ᩠ᨮᩥᨲᨧᩦᩅᩁᩈ᩠ᨾᩥ’’ᨶ᩠ᨲᩥ ᩍᨾᩥᨶᩣ ᨧᩦᩅᩁᨸᩃᩥᨻᩮᩣᨵᩣᨽᩣᩅᨾᩮᩅ ᨴᩦᨸᩮᨲᩥ. ᨶ ᩌᩅᩣᩈᨸᩃᩥᨻᩮᩣᨵᩣᨽᩣᩅᩴ. ‘‘ᩏᨻ᩠ᨽᨲᩈ᩠ᨾᩥᩴ ᨠᨳᩥᨶᩮ’’ᨲᩥ ᩍᨾᩥᨶᩣ ᩏᨽᨿᨸᩃᩥᨻᩮᩣᨵᩣᨽᩣᩅᩴ ᨴᩦᨸᩮᨲᩥ, ᨲᩈ᩠ᨾᩣ ᩏᨽᨿᨸᩃᩥᨻᩮᩣᨵᩣᨽᩣᩅᨴᩦᨸᨶᨲ᩠ᨳᩴ ᨲᨴᩮᩅ ᩅᨲ᩠ᨲᨻ᩠ᨻᨶ᩠ᨲᩥ ᨧᩮ? ᨶ, ᩅᩥᩈᩮᩈᨲ᩠ᨲᩣ. ᨠᨳᩴ? ᨠᩣᨾᨬ᩠ᨧᩮᨲᩴ ᨲᩈ᩠ᨾᩣ ‘‘ᩏᨻ᩠ᨽᨲᩈ᩠ᨾᩥᩴ ᨠᨳᩥᨶᩮ’’ᨲᩥ ᨠᩮᩈᨬ᩠ᨧᩥ ᨠᨳᩥᨶᩩᨴ᩠ᨵᩣᩁᩣᨶᩴ ᨶᩣᨶᩣᨶᩥᩁᩮᩣᨵᨲ᩠ᨲᩣ, ᩈᨦ᩠ᨥᨸᩩᨣ᩠ᨣᩃᩣᨵᩦᨶᩣᨶᨵᩦᨶᨲ᩠ᨲᩣ ᨧ ᩋᨶ᩠ᨲᩮᩣᨻᩉᩥᩏᨽᨿᩈᩦᨾᩣᩈᩩ ᨶᩥᨿᨾᩣᨶᩥᨿᨾᨲᩮᩣ ᨧ ᩏᨻ᩠ᨽᨲᩈ᩠ᨾᩥᩴ ᨠᨳᩥᨶᩮ ᩈᨦ᩠ᨥᩔ, ᨶ ᨸᩩᨣ᩠ᨣᩃᩔ ᩏᨻ᩠ᨽᨲᩴ ᩉᩮᩣᨲᩥ, ᨲᨳᩣᨸᩥ ‘‘ᩏᨻ᩠ᨽᨲᩈ᩠ᨾᩥᩴ ᨠᨳᩥᨶᩮ’’ᨲᩥ ᩍᨴᩴ ᩈᩣᨾᨬ᩠ᨬᩅᨧᨶᩴ. ᨲᩈ᩠ᨾᩣ ‘‘ᨶᩥᨭ᩠ᨮᩥᨲᨧᩦᩅᩁᩈ᩠ᨾᩥ’’ᨶ᩠ᨲᩥ ᩍᨾᩥᨶᩣ ᨶᩥᨿᨾᩮᨲᩥ.

ᨠᩥᩴ ᩅᩩᨲ᩠ᨲᩴ ᩉᩮᩣᨲᩥ – ᩈᨦ᩠ᨥᩔ ᩋᨶ᩠ᨲᩁᩩᨻ᩠ᨽᩣᩁᩮᨶ ᩏᨻ᩠ᨽᨲᩈ᩠ᨾᩥᩴ ᨠᨳᩥᨶᩮ ᩋᨧ᩠ᨨᩥᨶ᩠ᨶᨧᩦᩅᩁᨸᩃᩥᨻᩮᩣᨵᩮᩣ ᨻᩉᩥᩈᩦᨾᩣᨣᨲᩮᩣ ᨸᨧ᩠ᨨᩣ ᨣᨶ᩠ᨲ᩠ᩅᩣ ᩋᨲ᩠ᨲᨶᩮᩣ ᩈᩦᨾᩣᨣᨲᩮᩣ ᩋᨶᩥᨭ᩠ᨮᩥᨲᨧᩦᩅᩁᩮᩣ ᩌᨶᩥᩈᩴᩈᩴ ᩃᨽᨲᩥ ᩑᩅᩣᨲᩥ ᨠᨲ᩠ᩅᩣ ‘‘ᨶᩥᨭ᩠ᨮᩥᨲᨧᩦᩅᩁᩈ᩠ᨾᩥ’’ᨶ᩠ᨲᩥ ᩅᩩᨲ᩠ᨲᨶ᩠ᨲᩥ ᩅᩮᨴᩥᨲᨻ᩠ᨻᩴ. ᨲᨲ᩠ᨳ ᩌᩅᩣᩈᨸᩃᩥᨻᩮᩣᨵᩮᩣ ᨶᩣᨾ ᩅᩈᨲᩥ ᩅᩣ ᨲᩈ᩠ᨾᩥᩴ ᩌᩅᩣᩈᩮ, ᩈᩣᨸᩮᨠ᩠ᨡᩮᩣ ᩅᩣ ᨸᨠ᩠ᨠᨾᨲᩥ. ᨧᩦᩅᩁᨸᩃᩥᨻᩮᩣᨵᩮᩣ ᨶᩣᨾ ᨧᩦᩅᩁᩴ ᩋᨠᨲᩴ ᩅᩥᨸ᩠ᨸᨠᨲᩴ, ᨧᩦᩅᩁᩣᩈᩣᨶᩩᨸᨧ᩠ᨨᩥᨶ᩠ᨶᩣ, ᨲᨻ᩠ᨻᩥᨸᩁᩦᨲᩮᨶ ᩋᨸᩃᩥᨻᩮᩣᨵᩮᩣ ᩅᩮᨴᩥᨲᨻ᩠ᨻᩮᩣ. ᨲᨲ᩠ᨳ ᩋᨶᨲ᩠ᨳᨲᨠᨳᩥᨶᩣᨶᩴ ᨧᩦᩅᩁᨠᩣᩃᩈᨾᨿᩮ ᨶᩥᨿᨾᨲᩮᩣ ᨧᨲ᩠ᨲᩣᩁᩮᩣ ᩌᨶᩥᩈᩴᩈᩣ ᩃᨻ᩠ᨽᨶ᩠ᨲᩥ, ᩋᩈᨾᩣᨴᩣᨶᨧᩣᩁᩮᩣ ᩋᨶᩥᨿᨾᨲᩮᩣ. ᨲᩮᨶ ᩈᩣᩈᨦ᩠ᨠᩈᩥᨠ᩠ᨡᩣᨸᨴᩴ ᩅᩩᨲ᩠ᨲᩴ. ᨠᨳᩴ ᨧᨲ᩠ᨲᩣᩁᩮᩣ ᨶᩥᨿᨲᩣᨲᩥ ᨧᩮ? ‘‘ᨧᩦᩅᩁᨠᩣᩃᩈᨾᨿᩮᩣ ᨶᩣᨾ ᩋᨶᨲ᩠ᨳᨲᩮ ᨠᨳᩥᨶᩮ ᩅᩔᩣᨶᩔ ᨸᨧ᩠ᨨᩥᨾᩮᩣ ᨾᩣᩈᩮᩣ’’ᨲᩥ (ᨸᩣᩁᩣ. ᪖᪔᪙) ᩅᨧᨶᨲᩮᩣ ᩋᨶᨲ᩠ᨳᨲᨠᨳᩥᨶᩣᨶᩴ ᨲᩈ᩠ᨾᩥᩴ ᨾᩣᩈᩮ ᨿᩣᩅᨴᨲ᩠ᨳᨧᩦᩅᩁᩴ ᩈᩥᨴ᩠ᨵᩴ, ᨲᨳᩣ ᨲᨲᩥᨿᨠᨳᩥᨶᩈᩥᨠ᩠ᨡᩣᨸᨴᩮ (ᨸᩣᩁᩣ. ᪔᪙᪗ ᩌᨴᨿᩮᩣ) ᩋᨠᩣᩃᨧᩦᩅᩁᩴ ᨶᩣᨾ ᨸᩥᨭ᩠ᨮᩥᩈᨾᨿᨲᩮᩣ ᨸᨭ᩠ᨮᩣᨿ ᨲᩴ ᨸᨭᩥᨣ᩠ᨣᩉᩮᨲ᩠ᩅᩣ ᩈᨦ᩠ᨥᨲᩮᩣ ᩃᨽᩥᨲᨻ᩠ᨻᩴ ᨧᩮ, ᨿᩣᩅ ᨧᩦᩅᩁᨠᩣᩃᩈᨾᨿᩴ ᨶᩥᨠ᩠ᨡᩥᨸᩥᨲ᩠ᩅᩣ ᨽᩣᨩᩮᨲ᩠ᩅᩣ ᨣᩉᩮᨲᨻ᩠ᨻᩴ. ᨸᩩᨣ᩠ᨣᩃᩥᨠᩴ ᨧᩮ, ᩅᩔᩣᨶᩔ ᨨᨭ᩠ᨮᨸᨠ᩠ᨡᩔ ᨸᨬ᩠ᨧᨾᩥᨲᩮᩣ ᨸᨭ᩠ᨮᩣᨿ ᨿᩣᩅ ᨧᩦᩅᩁᨠᩣᩃᩈᨾᨿᩴ ᩋᨶᨵᩥᨭ᩠ᨮᩥᨲᩴ ᩋᩅᩥᨠᨸ᩠ᨸᩥᨲᩴ ᩅᨭ᩠ᨭᨲᩥ ᩋᨧ᩠ᨧᩮᨠᨧᩦᩅᩁᩈᩥᨠ᩠ᨡᩣᨸᨴᩮᨶ ᩋᨶᩩᨬ᩠ᨬᩣᨲᨲ᩠ᨲᩣ, ᨶ ᨲᨲᩮᩣ ᨸᩁᩴ. ᨲᨴᩣ ᩏᨸ᩠ᨸᨶ᩠ᨶᨧᩦᩅᩁᩔ ᨸᨭᩥᩈᩥᨴ᩠ᨵᨲ᩠ᨲᩣ ᨸᨮᨾᨠᨳᩥᨶᩮᨶ. ᨲᨲ᩠ᨳ ᩋᨭ᩠ᨮᨠᨳᩣᨿᩴ ᩅᩩᨲ᩠ᨲᨶᨿᩮᩣ ᩈᨦ᩠ᨥᩥᨠᩴ ᩈᨶ᩠ᨵᩣᨿ, ᨲᨳᩣ ᨸᩮᩣᩁᩣᨱᨣᨱ᩠ᨮᩥᨸᨴᩮ ᨧᩣᨲᩥ ᩅᩮᨴᩥᨲᨻ᩠ᨻᩴ.

ᨸᨮᨾᨠᨳᩥᨶᩮ (ᨸᩣᩁᩣ. ᪔᪕᪙ ᩌᨴᨿᩮᩣ) ᨸᨮᨾᨸᨬ᩠ᨬᨲ᩠ᨲᩥᨿᩣ, ᩋᩅᩥᩈᩮᩈᩮᨶ ᩅᩣ ᩑᨠᩣᨴᩈᨾᩮ ᨴᩥᩅᩈᩮ ᩌᨸᨲ᩠ᨲᩥ. ᩅᩔᩣᨶᩔ ᩉᩥ ᩋᨶ᩠ᨲᩮᩣᨶᩥᩅᩣᩁᨱᨲ᩠ᨳᩴ ᩋᨭ᩠ᨮᨠᨳᩣᨿ ‘‘ᨶᩥᨭ᩠ᨮᩥᨲᨧᩦᩅᩁᩈ᩠ᨾᩥᩴ ᨽᩥᨠ᩠ᨡᩩᨶᩣ ᩏᨻ᩠ᨽᨲᩈ᩠ᨾᩥᩴ ᨠᨳᩥᨶᩮ’’ᨲᩥ (ᨸᩣᩁᩣ. ᪔᪖᪒ ᩌᨴᨿᩮᩣ) ᩅᩩᨲ᩠ᨲᩴ. ᩑᩈᩮᩅ ᨶᨿᩮᩣ ᨴᩩᨲᩥᨿᩮ, ᨲᨲᩥᨿᩮ ᨧ. ᨲᩮᨶ ᨧᩦᩅᩁᨠᩣᩃᨲᩮᩣ ᨸᩩᩁᩮ ᩅᩣ ᩋᨶ᩠ᨲᩮᩣ ᩅᩣ ᩏᨸ᩠ᨸᨶ᩠ᨶᩴ ᨧᩦᩅᩁᨠᩣᩃᨲᩮᩣ ᩏᨴ᩠ᨵᩴ ᩑᨠᨴᩥᩅᩈᨾ᩠ᨸᩥ ᨸᩁᩥᩉᩣᩁᩴ ᨶ ᩃᨽᨲᩥ. ᨿᨴᩥ ᩃᨽᩮᨿ᩠ᨿ, ᩋᨧ᩠ᨧᩮᨠᨧᩦᩅᩁᩈᩥᨠ᩠ᨡᩣᨸᨴᩅᩥᩁᩮᩣᨵᩮᩣ. ‘‘ᨿᩣᩅ ᨧᩦᩅᩁᨠᩣᩃᩈᨾᨿᩴ ᨶᩥᨠ᩠ᨡᩥᨸᩥᨲᨻ᩠ᨻᩴ, ᨲᨲᩮᩣ ᨧᩮ ᩏᨲ᩠ᨲᩁᩥ ᨶᩥᨠ᩠ᨡᩥᨸᩮᨿ᩠ᨿ, ᨶᩥᩔᨣ᩠ᨣᩥᨿ’’ᨶ᩠ᨲᩥ (ᨸᩣᩁᩣ. ᪖᪔᪘) ᩉᩥ ᨲᨲ᩠ᨳ ᩅᩩᨲ᩠ᨲᩴ. ᩅᩔᩣᩅᩣᩈᩥᨠᨽᩣᩅᩮᨶ ᩈᨦ᩠ᨥᨲᩮᩣ ᩃᨴ᩠ᨵᩴ ᩅᩩᨭ᩠ᨮᩅᩔᨲ᩠ᨲᩣ ᩋᨲ᩠ᨲᨶᩮᩣ ᩈᨶ᩠ᨲᨠᨽᩪᨲᩴ ᩋᨧ᩠ᨧᩮᨠᨧᩦᩅᩁᩴ ᨧᩦᩅᩁᨠᩣᩃᩈᨾᨿᩴ ᩋᨲᩥᨠ᩠ᨠᩣᨾᨿᨲᩮᩣ ᩑᩅ ᩌᨸᨲ᩠ᨲᩥ, ᨶ ᩋᨧ᩠ᨧᩮᨠᨧᩦᩅᩁᨠᩣᩃᩴ ᩋᨲᩥᨠ᩠ᨠᩣᨾᨿᨲᩮᩣ ᩌᨸᨲ᩠ᨲᩦᨲᩥ. ‘‘ᩋᨶᨲ᩠ᨳᨲᩮ ᨠᨳᩥᨶᩮ ᩑᨠᩣᨴᩈᨾᩣᩈᩮ ᩏᨸ᩠ᨸᨶ᩠ᨶ’’ᨶ᩠ᨲᩥ (ᨸᩣᩁᩣ. ᪕᪐᪐) ᩅᨧᨶᨲᩮᩣ ᨿᩮᩣ ᨧ ᨲᨲ᩠ᨳ ᨧᩦᩅᩁᩩᨸ᩠ᨸᩣᨴᩮᩣ, ᩈᩮᩣ ᨧ ᨶᩮᩈᩴ ᨽᩅᩥᩔᨲᩦᨲᩥ ᩈᩥᨴ᩠ᨵᩴ, ᩋᨶᩣᨾᨶ᩠ᨲᨧᩣᩁᨣᨱᨽᩮᩣᨩᨶᩈᩥᨠ᩠ᨡᩣᨸᨴᩮ ‘‘ᩋᨬ᩠ᨬᨲᩕ ᩈᨾᨿᩣ’’ᨲᩥ (ᨸᩣᨧᩥ. ᪒᪒᪒ ᩌᨴᨿᩮᩣ) ᩅᩩᨲ᩠ᨲᨲ᩠ᨲᩣ ᩈᩮᩈᨴ᩠ᩅᨿᩴ ᩈᩥᨴ᩠ᨵᨾᩮᩅ. ᨲᩈ᩠ᨾᩣ ‘‘ᨠᩣᩃᩮᨸᩥ ᩌᨴᩥᩔ ᨴᩥᨶ᩠ᨶᩴ, ᩑᨲᩴ ᩋᨠᩣᩃᨧᩦᩅᩁ’’ᨶ᩠ᨲᩥ (ᨸᩣᩁᩣ. ᪕᪐᪐) ᩅᨧᨶᨲᩮᩣ ᩌᨴᩥᩔ ᨴᩥᨶ᩠ᨶᨧᩦᩅᩁᩴ ᨸᩁᩥᩉᩣᩁᩴ ᨶ ᩃᨽᨲᩥ.

ᩋᨸᩁᨠᨲ᩠ᨲᩥᨠᩣᨿᨾᩮᩅ ᩅᩣ ᩏᨻ᩠ᨽᨲᩈ᩠ᨾᩥᩴ ᨠᨳᩥᨶᩮ ᩃᨽᨲᩥ, ᩑᩅᩴ ‘‘ᩏᨻ᩠ᨽᨲᩈ᩠ᨾᩥᩴ ᨠᨳᩥᨶᩮ’’ᨲᩥ ᩅᩩᨲ᩠ᨲᨲ᩠ᨲᩣᨲᩥ ᨧᩮ? ᨶ ᩅᨲ᩠ᨲᨻ᩠ᨻᩴ. ᨨ ᨮᩣᨶᩣᨶᩥ ᩉᩥ ᩈᩣᨸᩮᨠ᩠ᨡᨲᩣᨿ ᩅᩩᨲ᩠ᨲᩣᨶᩥ. ᨴᩩᨭ᩠ᨮᨴᩮᩣᩈᨴ᩠ᩅᨿᩮ ᩋᨵᩥᨠᩁᨱᨧᨲᩩᨲ᩠ᨳᩴ, ᨸᨮᨾᩣᨶᩥᨿᨲᩮ ᩈᩮᩣᨲᩔ ᩁᩉᩮᩣ, ᨲᨲᩥᨿᨠᨳᩥᨶᩮ ᩌᨴᩥᩔ ᨴᩥᨶ᩠ᨶᩴ ᨧᩦᩅᩁᩴ, ᩋᨧ᩠ᨧᩮᨠᨧᩦᩅᩁᩈᩥᨠ᩠ᨡᩣᨸᨴᩮ ‘‘ᩈᨬ᩠ᨬᩣᨱᩴ ᨠᨲ᩠ᩅᩣ ᨶᩥᨠ᩠ᨡᩥᨸᩥᨲᨻ᩠ᨻ’’ᨶ᩠ᨲᩥ ᨸᨴᩴ, ᨴᩩᨭ᩠ᨮᩩᩃ᩠ᩃᩣᩁᩮᩣᨧᨶᨸ᩠ᨸᨭᩥᨧ᩠ᨨᩣᨴᨶᨴ᩠ᩅᨿᩮ ᩋᨵᩥᨠᩁᨱᩴ, ᨸᩣᩁᩣᨩᩥᨠᩅᨧᨶᨬ᩠ᨧ, ᨲᩦᩈᩩ ᨠᨳᩥᨶᩈᩥᨠ᩠ᨡᩣᨸᨴᩮᩈᩩ ‘‘ᩋᨭ᩠ᨮᨶ᩠ᨶᩴ ᨾᩣᨲᩥᨠᩣᨶᩴ ᩋᨬ᩠ᨬᨲᩁᩣᨿᩣ’’ᨲᩥ ᩅᨧᨶᨶ᩠ᨲᩥ. ᨲᨲ᩠ᨳ ᩌᨴᩥᩔ ᨴᩥᨶ᩠ᨶᩴ ᨧᩦᩅᩁᩴ ᩈᨦ᩠ᨥᩥᨠᩴ ᨽᩣᨩᩥᨲᨻ᩠ᨻᨧᩦᩅᩁᩴ ᩈᨶ᩠ᨵᩣᨿ ᩅᩩᨲ᩠ᨲᩴ, ᨶ ᨸᩩᨣ᩠ᨣᩃᩥᨠᩴ. ᩈᨬ᩠ᨬᩣᨱᩴ ᨠᨲ᩠ᩅᩣ ᨶᩥᨠ᩠ᨡᩥᨸᩥᨲᨻ᩠ᨻᨶ᩠ᨲᩥ ᩅᩔᩣᩅᩣᩈᩥᨠᨧᩦᩅᩁᩴ ᩈᨶ᩠ᨵᩣᨿ ᩅᩩᨲ᩠ᨲᩴ. ᩋᩅᩩᨭ᩠ᨮᩅᩔᩮᨶ ᨸᨧ᩠ᨨᩣ ᨴᩣᨲᨻ᩠ᨻᨲ᩠ᨲᩣ ᩈᨬ᩠ᨬᩣᨱᩴ ᨠᩣᨲᨻ᩠ᨻᩴ, ᨶ ᨬᩣᨲᩥᨸ᩠ᨸᩅᩣᩁᩥᨲᨲᩮᩣ ᩃᨴ᩠ᨵᩴ ᨸᩩᨣ᩠ᨣᩃᩥᨠᩴ ᩈᨶ᩠ᨵᩣᨿ. ᨲᩈ᩠ᨾᩣ ᨴᩩᩅᩥᨵᩴ ᩋᨧ᩠ᨧᩮᨠᨧᩦᩅᩁᩴ ᩈᨦ᩠ᨥᩮ ᨶᩥᨶ᩠ᨶᩴ, ᨸᩩᨣ᩠ᨣᩃᩮ ᨶᩥᨶ᩠ᨶᨬ᩠ᨧᩣᨲᩥ ᩈᩥᨴ᩠ᨵᩴ. ᨲᨲ᩠ᨳ ᩈᨦ᩠ᨥᩮ ᨸᩁᩥᨱᨲᩴ ᩋᨧ᩠ᨧᩮᨠᨧᩦᩅᩁᩴ ᩅᩔᩪᨸᨶᩣᨿᩥᨠᨴᩥᩅᩈᨲᩮᩣ ᨸᨭ᩠ᨮᩣᨿ, ᨸᩥᨭ᩠ᨮᩥᩈᨾᨿᨲᩮᩣ ᨸᨭ᩠ᨮᩣᨿ ᩅᩣ ᨿᩣᩅ ᨸᩅᩣᩁᨱᩣ ᨶᩥᨠ᩠ᨡᩥᨸᩥᨲᩩᩴ ᩅᨭ᩠ᨭᨲᩥ ᩑᩅ ᩈᨦ᩠ᨥᩥᨠᨲ᩠ᨲᩣ, ᨸᩩᨣ᩠ᨣᩃᩥᨠᨾ᩠ᨸᩥ ‘‘ᩅᩔᩴᩅᩩᨭ᩠ᨮᨠᩣᩃᩮ ᨣᨱ᩠ᩉᨳᩣ’’ᨲᩥ ᨴᩥᨶ᩠ᨶᨲ᩠ᨲᩣ. ᨲᩣᨴᩥᩈᨬ᩠ᩉᩥ ᨿᩣᩅ ᩅᩔᩴᩅᩩᨭ᩠ᨮᩮᩣ ᨶ ᩉᩮᩣᨲᩥ, ᨲᩣᩅ ᨲᩔᩮᩅ ᨴᩣᨿᨠᩔ ᩈᨶ᩠ᨲᨠᩴ ᩉᩮᩣᨲᩥ. ᩑᨲ᩠ᨲᨠᩮᩣ ᩅᩥᩈᩮᩈᩉᩮᨲᩩ.

‘‘ᩋᨶᨧ᩠ᨧᩮᨠᨧᩦᩅᩁᩮ ᩋᨶᨧ᩠ᨧᩮᨠᨧᩦᩅᩁᩈᨬ᩠ᨬᩦ ᨧᩦᩅᩁᨠᩣᩃᩈᨾᨿᩴ ᩋᨲᩥᨠ᩠ᨠᩣᨾᩮᨲᩥ, ᩋᨶᩣᨸᨲ᩠ᨲᩦ’’ᨲᩥ ᩅᨧᨶᨲᩮᩣ ᩋᨧ᩠ᨧᩮᨠᨧᩦᩅᩁᨠᩔᩮᩅ ᩈᩮᩣ ᩋᨸᩁᩣᨵᩮᩣ. ᨿᩮᨶ ‘‘ᩅᩥᩁᩮᩣᨵᩮᩣ’’ᨲᩥ ᩅᨧᨶᩴ ᨴᩔᩮᨿ᩠ᨿᩣᨲᩥ ᨶ ᩅᩥᨶᨿᩮ ᩅᩥᩈᩮᩈᩉᩮᨲᩩ ᨸᩁᩥᨿᩮᩈᩥᨲᨻ᩠ᨻᩮᩣ. ᨻᩩᨴ᩠ᨵᩅᩥᩈᨿᨲ᩠ᨲᩣ ᨸᨾᩣᨱᨶ᩠ᨲᩥ ᨧᩮ? ᨶ, ᨿᨴᩥ ᩑᩅᩴ ᩑᨲ᩠ᨳ ᩋᨲ᩠ᨲᨶᩮᩣ ᩈᨶ᩠ᨲᨠᨽᩪᨲᨾ᩠ᨸᩥ ᩋᨧ᩠ᨧᩮᨠᨧᩦᩅᩁᩴ ᩈᨬ᩠ᨬᩣᨱᩴ ᨠᨲ᩠ᩅᩣ ᨶᩥᨠ᩠ᨡᩥᨸᩥᨲᨻ᩠ᨻᨾᩮᩅ, ᨶ ᩋᨵᩥᨭ᩠ᨮᩣᨲᨻ᩠ᨻᩴ ᨶ ᩅᩥᨠᨸ᩠ᨸᩮᨲᨻ᩠ᨻᩴ ᨶ ᩅᩥᩔᨩ᩠ᨩᩮᨲᨻ᩠ᨻᩴ. ᨲᨲᩮᩣ ‘‘ᩋᨶᩣᨸᨲ᩠ᨲᩥ, ᩋᨶ᩠ᨲᩮᩣᩈᨾᨿᩮ ᩋᨵᩥᨭ᩠ᨮᩮᨲᩥ ᩅᩥᨠᨸ᩠ᨸᩮᨲᩥ ᩅᩥᩔᨩ᩠ᨩᩮᨲᩦ’’ᨲᩥᩌᨴᩥᩅᨧᨶᩅᩥᩁᩮᩣᨵᩮᩣ (ᨸᩣᩁᩣ. ᪖᪕᪑) ᩋᨵᩥᩅᩣᩈᩮᨲᨻ᩠ᨻᩮᩣ ᩈᩥᨿᩣ. ᨲᨳᩣ ‘‘ᩅᩔᩣᨶᩔ ᨸᨧ᩠ᨨᩥᨾᩮ ᨾᩣᩈᩮ ᨠᨳᩥᨶᩩᨴ᩠ᨵᩣᩁᩮ ᨠᨲᩮ ᨲᩈ᩠ᨾᩥᩴ ᨾᩣᩈᩮ ᩋᨲ᩠ᨳᨲᩮ ᨠᨳᩥᨶᩮ ᨠᨳᩥᨶᩩᨴ᩠ᨵᩣᩁᨴᩥᩅᩈᩴ ᩋᨲᩥᨠ᩠ᨠᩣᨾᩮᨲᩥ, ᨶᩥᩔᨣ᩠ᨣᩥᨿᩴ ᩉᩮᩣᨲᩦ’’ᨲᩥ ᩅᨧᨶᨲᩮᩣ ᨶᩥᩔᨣ᩠ᨣᩥᨿᩴ ᩉᩮᩣᨲᩦᨲᩥ ᩋᨿᨾ᩠ᨸᩥ ᩋᨲ᩠ᨳᩅᩥᩁᩮᩣᨵᩮᩣ ᩋᨵᩥᩅᩣᩈᩮᨲᨻ᩠ᨻᩮᩣ ᩈᩥᨿᩣ. ᨲᩈ᩠ᨾᩥᨬ᩠ᨧ ‘‘ᩋᨶᨧ᩠ᨧᩮᨠᨧᩦᩅᩁᩮ ᩋᨶᩣᨸᨲ᩠ᨲᩦ’’ᨲᩥ ᩅᩩᨲ᩠ᨲᩴ, ᨲᨬ᩠ᨧ ᩋᨶᨵᩥᨭ᩠ᨮᩥᨲᩴ ᩋᩅᩥᨠᨸ᩠ᨸᩥᨲᨾᩮᩅᩣᨲᩥ ᩑᨲ᩠ᨲᨠᩮᩣ ᩅᩥᩈᩮᩈᩉᩮᨲᩩ. ᩋᨲᩥᩁᩮᨠᨧᩦᩅᩁᨬ᩠ᨧᩮᨲᩴ ᨸᨮᨾᩈᩥᨠ᩠ᨡᩣᨸᨴᩮᨶᩣᨸᨲ᩠ᨲᩥ, ᩍᨲᩁᩴ ᨧᩮ ᩋᨶᩣᨸᨲ᩠ᨲᩥᨿᩮᩅᩣᨲᩥ ᩍᨾᩔ ᩋᨲ᩠ᨳᩔ ᩋᨿᩴ ᨽᨣᩅᨲᩮᩣ ᩅᩥᩈᩮᩈᩉᩮᨲᩩ. ᨲᨳᩣ ᩋᨲᩥᩁᩮᨠᨴᩈᩣᩉᩣᨶᩣᨣᨲᩣᨿᩮᩅ ᨠᨲ᩠ᨲᩥᨠᨸᩩᨱ᩠ᨱᨾᩣᨿ ᩈᨦ᩠ᨥᩔ ᩅᩔᩣᩅᩣᩈᩥᨠᨲ᩠ᨳᩴ ᩋᨧ᩠ᨧᩮᨠᨧᩦᩅᩁᩴ ᩅᩥᨿ ᨴᨴᨾᩣᨶᩴ ᨶ ᨣᩉᩮᨲᨻ᩠ᨻᩴ, ᨴᩈᩣᩉᩣᨶᩣᨣᨲᩣᨿ ᩑᩅ ᨣᩉᩮᨲᨻ᩠ᨻᨶ᩠ᨲᩥ ᩑᨲ᩠ᨲᨠᩮᩣ ᩅᩥᩈᩮᩈᩉᩮᨲᩩ. ᨲᨲᩮᩣ ᩋᨭ᩠ᨮᨠᨳᩣᨶᨿᩅᩥᩁᩮᩣᨵᩮᩣ ᨧ ᩋᨵᩥᩅᩣᩈᩮᨲᨻ᩠ᨻᩮᩣ ᩈᩥᨿᩣ. ᨲᨲ᩠ᨳ ‘‘ᩋᨵᩥᨭ᩠ᨮᩥᨲᨲᩮᩣ ᨸᨭ᩠ᨮᩣᨿ ᩏᨸ᩠ᨸᨶ᩠ᨶᩴ ᩋᨧ᩠ᨧᩮᨠᨧᩦᩅᩁᩴ ᨶ ᩉᩮᩣᨲᩦ’’ᨲᩥ ᩅᨲ᩠ᩅᩣ ᩋᨬ᩠ᨬᨳᩣ ᨶᨿᩮᩣ ᨴᩔᩥᨲᩮᩣ. ᨸᩮᩣᩁᩣᨱᨣᨱ᩠ᨮᩥᨸᨴᩮ ᩈᩮᩣ ᨧ ᨶᨿᩮᩣ ᩈᨦ᩠ᨥᩥᨠᩴ ᩏᨸᩣᨴᩣᨿ ᩅᩩᨲ᩠ᨲᨲ᩠ᨲᩣ ᨶ ᩅᩥᩁᩩᨩ᩠ᨫᨲᩦᨲᩥ ᨶᩮᩅ ᩈᩮᩣ ᨧ ᨸᨭᩥᨠ᩠ᨡᩥᨲ᩠ᨲᩮᩣ. ᨿᨳᩣ ᩋᨶᨧ᩠ᨧᩮᨠᨧᩦᩅᩁᩴ ᨨᨭ᩠ᨮᩥᨲᩮᩣ ᨸᨭ᩠ᨮᩣᨿ ᩏᨸ᩠ᨸᨶ᩠ᨶᩴ ᩋᨲᩥᩁᩮᨠᨴᩈᩣᩉᩣᨶᩣᨣᨲᩣᨿᨸᩥ ᨸᨭᩥᨣ᩠ᨣᩉᩮᨲᨻ᩠ᨻᩴ, ᨸᨭᩥᨣ᩠ᨣᩉᩮᨲ᩠ᩅᩣ ᨧᩦᩅᩁᨠᩣᩃᩈᨾᨿᩴ ᩋᨲᩥᨠ᩠ᨠᩣᨾᨿᨲᩮᩣᨸᩥ ᩋᨶᩣᨸᨲ᩠ᨲᩦᨲᩥ ᩋᨿᨾ᩠ᨸᩥ ᨶᨿᩮᩣ ᩋᨵᩥᩅᩣᩈᩮᨲᨻ᩠ᨻᩮᩣ ᩈᩥᨿᩣ. ᨲᨲᩮᩣ ᨸᨮᨾᨠᨳᩥᨶᩅᩥᩁᩮᩣᨵᩮᩣ. ᨴᩈᩣᩉᩣᨶᩣᨣᨲᩣᨿ ᩑᩅ ᨸᨭᩥᨣ᩠ᨣᩉᩮᨲᨻ᩠ᨻᩴ, ᨸᨭᩥᨣ᩠ᨣᩉᩮᨲ᩠ᩅᩣ ᨧᩦᩅᩁᨠᩣᩃᩈᨾᨿᩴ ᩋᨲᩥᨠ᩠ᨠᩣᨾᨿᨲᩮᩣ ᩋᨶᩣᨸᨲ᩠ᨲᩦᨲᩥ ᨧᩮ, ᨲᩴ ᨴ᩠ᩅᩮ ᨴᩈᩣᩉᩮ ᩃᨽᨲᩦᨲᩥ ᩑᨲ᩠ᨲᨠᩮᩣ ᩅᩥᩈᩮᩈᩉᩮᨲᩩ.

ᩋᨶ᩠ᨲᩁᩣ ᩋᨶᩣᨸᨲ᩠ᨲᩥᨠ᩠ᨡᩮᨲ᩠ᨲᨧᩦᩅᩁᨠᩣᩃᨸ᩠ᨸᩅᩥᨭ᩠ᨮᨲ᩠ᨲᩣ ᩋᨵᩥᨭ᩠ᨮᩉᩥᨲ᩠ᩅᩣ ᨸᨧ᩠ᨧᩩᨴ᩠ᨵᨭᩴ ᩅᩥᨿ ᨲᩴ ᨸᩩᨶᨸᩥ ᨴᩈᩣᩉᩮ ᩃᨽᨲᩦᨲᩥ ᨧᩮ? ᨶ, ᨠᩣᩃᨸ᩠ᨸᩅᩮᩈᩮᩣ ᩋᨵᩥᨭ᩠ᨮᩣᨶᩴ ᩅᩥᨿ ᩉᩮᩣᨲᩦᨲᩥ ᨧᩮ? ᨶ, ‘‘ᩅᩔᩥᨠᩈᩣᨭᩥᨠᩴ ᩅᩔᩣᨶᩴ ᨧᩣᨲᩩᨾᩣᩈᩴ ᩋᨵᩥᨭ᩠ᨮᩣᨲᩩᩴ, ᨲᨲᩮᩣ ᨸᩁᩴ ᩅᩥᨠᨸ᩠ᨸᩮᨲᩩ’’ᨶ᩠ᨲᩥ ᩅᨧᨶᩅᩥᩁᩮᩣᨵᩴ ᨠᨲ᩠ᩅᩣ, ᨲᨲᩮᩣ ᨸᩁᩴ ᨴᩈᩣᩉᩴ ᩋᩅᩥᨠᨸ᩠ᨸᩮᨶ᩠ᨲᩔᩣᨸᩥ ᩋᨶᩣᨸᨲ᩠ᨲᩥ ᩈᩥᨿᩣ. ᩋᨸᩥᨧ ᨿᩴ ᩅᩩᨲ᩠ᨲᩴ ᩋᨭ᩠ᨮᨠᨳᩣᨿᩴ ‘‘ᩅᩔᩥᨠᩈᩣᨭᩥᨠᩣ ᩋᨶ᩠ᨲᩮᩣᩅᩔᩮ ᩃᨴ᩠ᨵᩣ ᨧᩮᩅ ᨶᩥᨭ᩠ᨮᩥᨲᩣ ᨧ, ᩋᨶ᩠ᨲᩮᩣᨴᩈᩣᩉᩮ ᩋᨵᩥᨭ᩠ᨮᩣᨲᨻ᩠ᨻᩣ, ᨴᩈᩣᩉᩣᨲᩥᨠ᩠ᨠᨾᩮ ᨶᩥᨭ᩠ᨮᩥᨲᩣ, ᨲᨴᩉᩮᩅ ᩋᨵᩥᨭ᩠ᨮᩣᨲᨻ᩠ᨻᩣ, ᨴᩈᩣᩉᩮ ᩋᨸ᩠ᨸᩉᩮᩣᨶ᩠ᨲᩮ ᨧᩦᩅᩁᨠᩣᩃᩴ ᨶᩣᨲᩥᨠ᩠ᨠᩣᨾᩮᨲᨻ᩠ᨻᩣ’’ᨲᩥ (ᨸᩣᩁᩣ. ᩋᨭ᩠ᨮ. ᪒.᪖᪓᪐). ᨲᩮᨶ ᩌᨸᨲ᩠ᨲᩥᨲᩮᩣ ᨶ ᨾᩩᨧ᩠ᨧᩮᨿ᩠ᨿ. ᨠᩣᩃᨸ᩠ᨸᩅᩮᩈᩮᩣ ᩉᩥ ᩋᨵᩥᨭ᩠ᨮᩣᨶᨸᩁᩥᨿᩣᨿᩮᩣ ᨶ ᨩᩣᨲᩮᩣᨲᩥ. ᩑᨲ᩠ᨲᩣᩅᨲᩣ ᨿᨳᩣᩅᩩᨲ᩠ᨲᩮᩣ ᩋᨲ᩠ᨳᩅᩥᨠᨸ᩠ᨸᩮᩣ ᨸᩣᩊᩥᨶᨿᩮᨶᩮᩅ ᨸᨲᩥᨭ᩠ᨮᩣᨸᩥᨲᩮᩣ ᩉᩮᩣᨲᩥ.

ᩋᨸᩥᨧᩮᨲ᩠ᨳ ᨿᩴ ᩅᩩᨲ᩠ᨲᩴ ᩋᨭ᩠ᨮᨠᨳᩣᨿᩴ ‘‘ᨴᩈᩣᩉᩮ ᩋᨸ᩠ᨸᩉᩮᩣᨶ᩠ᨲᩮ ᨧᩦᩅᩁᨠᩣᩃᩴ ᨶᩣᨲᩥᨠ᩠ᨠᩣᨾᩮᨲᨻ᩠ᨻᩣ’’ᨲᩥ, ᨲᨲ᩠ᨳᨸᩥ ᨧᩦᩅᩁᨠᩣᩃᩮ ᩏᨸ᩠ᨸᨶ᩠ᨶᩴ, ᨴᩈᩣᩉᩮ ᩋᨸ᩠ᨸᩉᩮᩣᨶ᩠ᨲᩮ ᨧᩔ ᨠᩁᨱᩴ ᨶᨲ᩠ᨳᩥ, ᨲᩴ ᩋᨧ᩠ᨧᩮᨠᨧᩦᩅᩁᩴ ᩋᨠᩣᩃᨧᩦᩅᩁᨾᩥᩅ ᨧᩦᩅᩁᨠᩣᩃᩴ ᨶᩣᨲᩥᨠ᩠ᨠᩣᨾᩮᨲᨻ᩠ᨻᨶ᩠ᨲᩥ ᩈᩥᨴ᩠ᨵᨾᩮᨲᩴ. ᨸᩣᩊᩥᨲᩮᩣ ᨧ ᨲᨬ᩠ᨧᩮ ᩋᨶ᩠ᨲᩮᩣᨠᩣᩃᩮ ᩏᨸ᩠ᨸᨩ᩠ᨩᨲᩥ, ᨴᩈᩣᩉᩮ ᩋᨸ᩠ᨸᩉᩮᩣᨶ᩠ᨲᩮᨸᩥ ᩏᨸ᩠ᨸᨩ᩠ᨩᨲᩥ, ᩑᩅᩴ ᩏᨸ᩠ᨸᨶ᩠ᨶᩴ ᩋᨧ᩠ᨧᩮᨠᨧᩦᩅᩁᩴ ᩋᨧ᩠ᨧᩮᨠᨧᩦᩅᩁᨾᩮᩅ ᨶ ᩉᩮᩣᨲᩥ. ᨶ ᩉᩥ ᨲᩴ ᨠᩣᩃᩅᩥᩈᩮᩈᩅᩈᩮᨶ ᩋᨧ᩠ᨧᩮᨠᨧᩦᩅᩁᩈᨦ᩠ᨡᩴ ᨣᨧ᩠ᨨᨲᩥ. ᩅᩩᨲ᩠ᨲᨬ᩠ᩉᩮᨲᩴ ‘‘ᩋᨧ᩠ᨧᩮᨠᨧᩦᩅᩁᩴ ᨶᩣᨾ ᩈᩮᨶᩣᨿ ᩅᩣ ᨣᨶ᩠ᨲᩩᨠᩣᨾᩮᩣ ᩉᩮᩣᨲᩥ, ᨸᩅᩣᩈᩴ ᩅᩣ ᨣᨶ᩠ᨲᩩᨠᩣᨾᩮᩣ ᩉᩮᩣᨲᩥ, ᨣᩥᩃᩣᨶᩮᩣ ᩅᩣ ᩉᩮᩣᨲᩥ, ᨣᨻ᩠ᨽᩥᨶᩦ ᩅᩣ ᩉᩮᩣᨲᩥ, ᩋᩔᨴ᩠ᨵᩔ ᩅᩣ ᩈᨴ᩠ᨵᩣ ᩏᨸ᩠ᨸᨶ᩠ᨶᩣ ᩉᩮᩣᨲᩥ…ᨸᩮ… ‘ᩅᩔᩣᩅᩣᩈᩥᨠᩴ ᨴᩔᩣᨾᩦ’ᨲᩥ ᩑᩅᩴ ᩌᩁᩮᩣᨧᩥᨲᩴ, ᩑᨲᩴ ᩋᨧ᩠ᨧᩮᨠᨧᩦᩅᩁᩴ ᨶᩣᨾᩣ’’ᨲᩥ (ᨸᩣᩁᩣ. ᪖᪔᪙). ᨲᩈ᩠ᨾᩣ ᨿᨳᩣ ᨲᩴ ᨧᩦᩅᩁᩴ ᨶᩣᨲᩥᨠ᩠ᨠᩣᨾᩮᨲᨻ᩠ᨻᩴ, ᨲᨳᩣ ᩋᨶᨧ᩠ᨧᩮᨠᨧᩦᩅᩁᨾ᩠ᨸᩦᨲᩥ ᩈᩥᨴ᩠ᨵᩴ ᩉᩮᩣᨲᩥ. ᨲᩮᨶ ᩅᩩᨲ᩠ᨲᩴ ᩋᨭ᩠ᨮᨠᨳᩣᨿᩴ ‘‘ᨴᩈᩣᩉᩮ ᩋᨸ᩠ᨸᩉᩮᩣᨶ᩠ᨲᩮ ᨧᩦᩅᩁᨠᩣᩃᩴ ᨶᩣᨲᩥᨠ᩠ᨠᩣᨾᩮᨲᨻ᩠ᨻᩣ’’ᨲᩥ. ᩋᨸᩥᨧ ᨿᨴᩥ ᩑᩅᩴ ᨲᩴ ᩋᨧ᩠ᨧᩮᨠᨧᩦᩅᩁᩈᩥᨠ᩠ᨡᩣᨸᨴᨾᩮᩅ ᩋᨧ᩠ᨧᩮᨠᨧᩦᩅᩁᩴ ᨧᩦᩅᩁᨠᩣᩃᩴ ᨶᩣᨲᩥᨠ᩠ᨠᩣᨾᩮᨲᨻ᩠ᨻᨶ᩠ᨲᩥ ᩍᨾᩔ ᨸᨶ ᩋᨲ᩠ᨳᩅᩥᩈᩮᩈᩔ ᨴᩔᨶᨲ᩠ᨳᩴ ᨽᨣᩅᨲᩣ ᨸᨬ᩠ᨬᨲ᩠ᨲᩴ.

ᨾᩉᩣᩋᨭ᩠ᨮᨠᨳᩣᨿᩴ ᨸᨶ ᨲᩴ ᩑᩅᩴ ᩅᩩᨲ᩠ᨲᩴ – ᨠᩣᨾᨬ᩠ᨧᩮᨴᩴ ‘‘ᨴᩈᩣᩉᨸᩁᨾᩴ ᩋᨲᩥᩁᩮᨠᨧᩦᩅᩁᩴ ᨵᩣᩁᩮᨲᨻ᩠ᨻ’’ᨶ᩠ᨲᩥ ᩍᨾᩥᨶᩣ ᩈᩥᨴ᩠ᨵᩴ, ᩋᨭ᩠ᨮᩩᨸ᩠ᨸᨲ᩠ᨲᩥᩅᩈᩮᨶ ᨸᨶ ᩋᨸᩩᨻ᩠ᨻᩴ ᩅᩥᨿ ᩋᨲ᩠ᨳᩴ ᨴᩔᩮᨲ᩠ᩅᩣ ᩈᩥᨠ᩠ᨡᩣᨸᨴᩴ ᨮᨸᩥᨲᨶ᩠ᨲᩥ ᩋᨲ᩠ᨳᩅᩥᩈᩮᩈᨴᩦᨸᨶᨸᨿᩮᩣᨩᨶᨲᩮᩣ. ᨲᩈ᩠ᨾᩣ ᨲᩴ ᨲᩔ ᩋᨲ᩠ᨳᩅᩥᩈᩮᩈᨴᩔᨶᨲ᩠ᨳᩴ ᩅᩩᨲ᩠ᨲᨶ᩠ᨲᩥ ᩈᩥᨴ᩠ᨵᨾᩮᩅ. ᨲᩈ᩠ᨾᩣᨸᩥ ᩅᩮᨴᩥᨲᨻ᩠ᨻᨾᩮᩅ ᨿᩴ ᨠᩥᨬ᩠ᨧᩥ ᨧᩦᩅᩁᩴ ᨧᩦᩅᩁᨠᩣᩃᩈᨾᨿᩴ ᨶᩣᨲᩥᨠ᩠ᨠᩣᨾᩮᨲᨻ᩠ᨻᨶ᩠ᨲᩥ. ᩋᨸᩥᨧ ᨿᩴ ᩅᩩᨲ᩠ᨲᩴ ᩋᨭ᩠ᨮᨠᨳᩣᨿᩴ ‘‘ᨨᨭ᩠ᨮᩥᨲᩮᩣ ᨸᨭ᩠ᨮᩣᨿ ᨸᨶ ᩏᨸ᩠ᨸᨶ᩠ᨶᩴ ᩋᨶᨧ᩠ᨧᩮᨠᨧᩦᩅᩁᨾ᩠ᨸᩥ ᨸᨧ᩠ᨧᩩᨴ᩠ᨵᩣᩁᩮᨲ᩠ᩅᩣ ᨮᨸᩥᨲᨧᩦᩅᩁᨾ᩠ᨸᩥ ᩑᨲᩴ ᨸᩁᩥᩉᩣᩁᩴ ᩃᨽᨲᩦ’’ᨲᩥ (ᨸᩣᩁᩣ. ᩋᨭ᩠ᨮ. ᪒.᪖᪔᪖-᪖᪔᪙). ᨲᩮᨶ ‘‘ᩋᨶᨧ᩠ᨧᩮᨠᨧᩦᩅᩁᩮ ᩋᨶᨧ᩠ᨧᩮᨠᨧᩦᩅᩁᩈᨬ᩠ᨬᩦ ᨧᩦᩅᩁᨠᩣᩃᩈᨾᨿᩴ ᩋᨲᩥᨠ᩠ᨠᩣᨾᩮᨲᩥ, ᩋᨶᩣᨸᨲ᩠ᨲᩦ’’ᨲᩥ (ᨸᩣᩁᩣ. ᪖᪕᪐) ᩍᨾᩥᨶᩣᨸᩥ ᩋᨶᨧ᩠ᨧᩮᨠᨧᩦᩅᩁᩔᩣᨸᩥ ᩋᨧ᩠ᨧᩮᨠᨧᩦᩅᩁᨸᩁᩥᩉᩣᩁᩃᩣᨽᩴ ᨴᩦᨸᩮᨲᩦᨲᩥ.

ᩑᨲ᩠ᨲᩣᩅᨲᩣ ᨿᨳᩣᩅᩩᨲ᩠ᨲᩮᩣ ᨴᩩᨲᩥᨿᩮᩣ ᩋᨲ᩠ᨳᩅᩥᨠᨸ᩠ᨸᩮᩣ ᨸᩣᩊᩥᨶᨿᩮᨶ, ᩋᨭ᩠ᨮᨠᨳᩣᨶᨿᩮᨶ ᨧ ᨸᨲᩥᨭ᩠ᨮᩣᨸᩥᨲᩮᩣ ᩉᩮᩣᨲᩥ. ᩑᩅᩴ ᨲᩣᩅ ᨸᨠᩥᨱ᩠ᨱᨠᩣᨿ ᩋᨵᩥᨠᨳᩣ ᨸᩁᨲᩮᩣ ᨸᩣᨮᨲᩮᩣ ᩅᩥᨲ᩠ᨳᩣᩁᩥᨲᩣ ᩉᩮᩣᨲᩦᨲᩥ ᩋᨸᨠᩥᨱ᩠ᨱᨠᩴ.

ᨧᩦᩅᩁᨸᩃᩥᨻᩮᩣᨵᩮᩣ, ᩌᩅᩣᩈᨸᩃᩥᨻᩮᩣᨵᩮᩣ ᨧᩣᨲᩥ ᨴ᩠ᩅᩮ ᨸᩃᩥᨻᩮᩣᨵᩣ. ᨲᩮᩈᩩ ᩑᨠᨸᩃᩥᨻᩮᩣᨵᩮᨸᩥ ᩈᨲᩥ ᩋᨶᩣᨾᨶ᩠ᨲᨧᩣᩁᩣᨴᩥᩌᨶᩥᩈᩴᩈᩴ ᩃᨽᨲᩥ, ᨲᩴ ᩍᨵ ᨶᨲ᩠ᨳᩦᨲᩥ ᨴᩔᩮᨲᩩᩴ ‘‘ᨶᩥᨭ᩠ᨮᩥᨲᨧᩦᩅᩁᩈ᩠ᨾᩥᩴ ᨽᩥᨠ᩠ᨡᩩᨶᩣ ᩏᨻ᩠ᨽᨲᩈ᩠ᨾᩥᩴ ᨠᨳᩥᨶᩮ’’ᨲᩥ ᩅᩩᨲ᩠ᨲᩴ. ᨲᩈ᩠ᨾᩣ ᩑᩅ ‘‘ᩋᨲ᩠ᨳᨲᨠᨳᩥᨶᩔ ᩉᩥ ᨽᩥᨠ᩠ᨡᩩᨶᩮᩣ’’ᨲᩥᩌᨴᩥ ᩅᩩᨲ᩠ᨲᩴ. ᨠᨳᩥᨶᨲ᩠ᨳᩣᩁᩣᩁᩉᩔᩣᨲᩥ ᩑᨲ᩠ᨳ ‘‘ᩋᨭ᩠ᨮᩉᩥ ᩋᨦ᩠ᨣᩮᩉᩥ ᩈᨾᨶ᩠ᨶᩣᨣᨲᩮᩣ ᨸᩩᨣ᩠ᨣᩃᩮᩣ ᨽᨻ᩠ᨻᩮᩣ ᨠᨳᩥᨶᩴ ᩋᨲ᩠ᨳᩁᩥᨲᩩᩴ – ᨸᩩᨻ᩠ᨻᨠᩁᨱᩴ ᨩᩣᨶᩣᨲᩥ, ᨸᨧ᩠ᨧᩩᨴ᩠ᨵᩣᩁᩴ ᨩᩣᨶᩣᨲᩥ, ᩋᨵᩥᨭ᩠ᨮᩣᨶᩴ ᨩᩣᨶᩣᨲᩥ, ᩋᨲ᩠ᨳᩣᩁᩴ ᨩᩣᨶᩣᨲᩥ, ᨾᩣᨲᩥᨠᩴ ᨩᩣᨶᩣᨲᩥ, ᨸᩃᩥᨻᩮᩣᨵᩴ ᨩᩣᨶᩣᨲᩥ, ᩏᨴ᩠ᨵᩣᩁᩴ ᨩᩣᨶᩣᨲᩥ, ᩌᨶᩥᩈᩴᩈᩴ ᨩᩣᨶᩣᨲᩦ’’ᨲᩥ (ᨸᩁᩥ. ᪔᪐᪙) ᩅᨧᨶᨲᩮᩣ ᩍᨾᩮᩉᩥ ᩋᨭ᩠ᨮᩉᩥ ᩋᨦ᩠ᨣᩮᩉᩥ ᩈᨾᨶ᩠ᨶᩣᨣᨲᩮᩣ ᨸᩩᨣ᩠ᨣᩃᩮᩣ ᨠᨳᩥᨶᨲ᩠ᨳᩣᩁᩣᩁᩉᩮᩣ ᨶᩣᨾ. ᨸᩩᨻ᩠ᨻᨠᩁᨱᩴ ᨶᩣᨾ ᨵᩮᩣᩅᨶᩅᩥᨧᩣᩁᨱᨧ᩠ᨨᩮᨴᨶᩈᩥᨻ᩠ᨻᨶᩁᨩᨶᨠᨸ᩠ᨸᨠᩁᨱᩴ.

‘‘ᨧᩦᩅᩁᩴ ᨶᩣᨾ ᨡᩮᩣᨾ’’ᨶ᩠ᨲᩥᩌᨴᩥᨶᩣ ᨸᩣᩊᩥᩅᩈᩮᨶ ᨩᩣᨲᩥᨬ᩠ᨧ ᨸᨾᩣᨱᨬ᩠ᨧ ᨴᩔᩮᨲ᩠ᩅᩣ ᩍᨴᩣᨶᩥ ᩋᨲᩥᩁᩮᨠᨧᩦᩅᩁᩴ ᨴᩔᩮᨲᩩᩴ ‘‘ᨿᩴ ᨸᨶ ᩅᩩᨲ᩠ᨲᩴ ᩋᨵᩥᨭ᩠ᨮᩥᨲᩅᩥᨠᨸ᩠ᨸᩥᨲᩮᩈᩪ’’ᨲᩥᩌᨴᩥ ᩅᩩᨲ᩠ᨲᩴ. ᨮᨸᩥᨲᨭ᩠ᨮᩣᨶᩴ ᩈᩃ᩠ᩃᨠ᩠ᨡᩮᨲ᩠ᩅᩣ’’ᨲᩥ ᩅᩩᨲ᩠ᨲᩮᨸᩥ ᨿᩈ᩠ᨾᩥᩴ ᨮᩣᨶᩮ ᨿᩴ ᨮᨸᩥᨲᩴ, ᨲᩈ᩠ᨾᩥᩴ ᨲᩴ ᨸᨧ᩠ᨨᩣ ᩉᩮᩣᨲᩩ ᩅᩣ, ᨾᩣ ᩅᩣ, ᩋᨵᩥᨭ᩠ᨮᩣᨶᩴ ᩁᩩᩉᨲᩮᩅ. ᨸᩩᩁᩮ ᨸᨧ᩠ᨨᩣ ᨮᨸᨶᨭ᩠ᨮᩣᨶᩴ ᨶ ᨸᨾᩣᨱᩴ.

ᩋᨶ᩠ᨲᩥᨾᩅᨲ᩠ᨳᩩᩴ ᩋᨩ᩠ᨫᩣᨸᨶ᩠ᨶᩔ ᨽᩥᨠ᩠ᨡᩩᨽᩣᩅᨸᩁᩥᨧ᩠ᨧᩣᨣᩅᩈᩮᨶ ᩈᩮᨲᩅᨲ᩠ᨳᨶᩥᩅᩣᩈᨶᩴ ᩅᩣ ᨠᩣᩈᩣᩅᨧᨩᨶᩴ ᩅᩣ ᩉᩦᨶᩣᨿᩣᩅᨲ᩠ᨲᨶᩴ.

ᩑᨠᩣᨴᩈᨾᩮ ᩋᩁᩩᨱᩩᨣ᩠ᨣᨾᨶᩮᨲᩥ ᩋᨶ᩠ᨲᩥᨾᩴ ᨮᨸᩮᨲ᩠ᩅᩣ ᨲᨲᩮᩣ ᨸᩩᩁᩥᨾᨲᩁᩈ᩠ᨾᩥᨶ᩠ᨲᩥ ᩋᨲ᩠ᨳᩮᩣ ᩅᩮᨴᩥᨲᨻ᩠ᨻᩮᩣ. ᨲᨲ᩠ᨳ ᩋᨶ᩠ᨲᩥᨾᩴ ᨶᩣᨾ ᩋᨸᩁᨠᨲ᩠ᨲᩥᨠᩣᨿ ᨸᨮᨾᩣᩁᩩᨱᩩᨣ᩠ᨣᨾᨶᩴ. ᨲᨬ᩠ᩉᩥ ᨠᩣᩃᨲ᩠ᨲᩣ ᨶᩥᩔᨣ᩠ᨣᩥᨿᩴ ᨶ ᨠᩁᩮᩣᨲᩥ. ᩍᨵ ‘‘ᨶᩥᨭ᩠ᨮᩥᨲᨧᩦᩅᩁᩈ᩠ᨾᩥᩴ ᨽᩥᨠ᩠ᨡᩩᨶᩣ’’ᨲᩥ ᨠᩁᨱᩅᨧᨶᩴ ᨶᩥᨴᩣᨶᩣᨶᨸᩮᨠ᩠ᨡᩴ ᨶᩥᨴᩣᨶᩮ ᨠᩁᨱᩣᨽᩣᩅᨲᩮᩣ. ᨲᩈ᩠ᨾᩣ ᩑᩅ ‘‘ᨴᩈᩣᩉᨸᩁᨾ’’ᨶ᩠ᨲᩥ ᩋᨿᨾᩮᨲ᩠ᨳ ᩋᨶᩩᨸᨬ᩠ᨬᨲ᩠ᨲᩦᨲᩥ ᩅᩩᨲ᩠ᨲᩴ. ‘‘ᩋᨶᩩᨩᩣᨶᩣᨾᩥ, ᨽᩥᨠ᩠ᨡᩅᩮ, ᨲᩥᨧᩦᩅᩁᩴ ᩋᨵᩥᨭ᩠ᨮᩣᨲᩩᩴ ᨶ ᩅᩥᨠᨸ᩠ᨸᩮᨲᩩ’’ᨶ᩠ᨲᩥᩌᨴᩥ (ᨾᩉᩣᩅ. ᪓᪕᪘) ᩅᨧᨶᨲᩮᩣ ᨧ ᩍᨵ ‘‘ᩅᩥᨠᨸ᩠ᨸᩮᨲᩦ’’ᨲᩥ ᩋᩅᩥᩈᩮᩈᩮᨶ ᩅᩩᨲ᩠ᨲᩅᨧᨶᩴ ᩅᩥᩁᩩᨴ᩠ᨵᩴ ᩅᩥᨿ ᨴᩥᩔᨲᩥ, ᨶ ᨧ ᩅᩥᩁᩩᨴ᩠ᨵᩴ ᨲᨳᩣᨣᨲᩣ ᨽᩣᩈᨶ᩠ᨲᩥ, ᨲᩈ᩠ᨾᩣ ᩑᩅᨾᩔ ᩋᨲ᩠ᨳᩮᩣ ᩅᩮᨴᩥᨲᨻ᩠ᨻᩮᩣ – ᨲᩥᨧᩦᩅᩁᩴ ᨲᩥᨧᩦᩅᩁᩈᨦ᩠ᨡᩮᨸᩮᨶ ᨸᩁᩥᩉᩣᩁᨲᩮᩣ ᩋᨵᩥᨭ᩠ᨮᩣᨲᩩᨾᩮᩅ ᩋᨶᩩᨩᩣᨶᩣᨾᩥ, ᨶ ᩅᩥᨠᨸ᩠ᨸᩮᨲᩩᩴ. ᩅᩔᩥᨠᩈᩣᨭᩥᨠᩴ ᨸᨶ ᨧᨲᩩᨾᩣᩈᨲᩮᩣ ᨸᩁᩴ ᩅᩥᨠᨸ᩠ᨸᩮᨲᩩᨾᩮᩅ, ᨶ ᩋᨵᩥᨭ᩠ᨮᩣᨲᩩᨶ᩠ᨲᩥ. ᩑᩅᨬ᩠ᨧ ᨸᨶ ᩈᨲᩥ ᨿᩮᩣ ᨲᩥᨧᩦᩅᩁᩮ ᩑᨠᩮᨶ ᨧᩦᩅᩁᩮᨶ ᩅᩥᨸ᩠ᨸᩅᩈᩥᨲᩩᨠᩣᨾᩮᩣ ᩉᩮᩣᨲᩥ, ᨲᩔ ᨲᩥᨧᩦᩅᩁᩣᨵᩥᨭ᩠ᨮᩣᨶᩴ ᨸᨧ᩠ᨧᩩᨴ᩠ᨵᩁᩥᨲ᩠ᩅᩣ ᩅᩥᨸ᩠ᨸᩅᩣᩈᩈᩩᨡᨲ᩠ᨳᩴ ᩅᩥᨠᨸ᩠ᨸᨶᩣᨿ ᩒᨠᩣᩈᩮᩣ ᨴᩥᨶ᩠ᨶᩮᩣ ᩉᩮᩣᨲᩥ, ᨴᩈᩣᩉᩣᨲᩥᨠ᩠ᨠᨾᩮ ᨧ ᩋᨶᩣᨸᨲ᩠ᨲᩦᨲᩥ. ᩑᨲᩮᨶ ᩏᨸᩣᨿᩮᨶ ᩈᨻ᩠ᨻᨲ᩠ᨳ ᩅᩥᨠᨸ᩠ᨸᨶᩣᨿ ᩋᨸᨭᩥᩈᩥᨴ᩠ᨵᨽᩣᩅᩮᩣ ᩅᩮᨴᩥᨲᨻ᩠ᨻᩮᩣᨲᩥ ᩃᩥᨡᩥᨲᩴ.

ᩍᨾᩔ ᨸᨶ ᩈᩥᨠ᩠ᨡᩣᨸᨴᩔ ᩋᨿᩴ ᩈᨦ᩠ᨡᩮᨸᩅᩥᨶᩥᨧ᩠ᨨᨿᩮᩣ – ᩋᨶᨲ᩠ᨳᨲᩮ ᨠᨳᩥᨶᩮ ᩉᩮᨾᨶ᩠ᨲᩣᨶᩴ ᨸᨮᨾᨴᩥᩅᩈᨲᩮᩣ ᨸᨭ᩠ᨮᩣᨿ, ᩋᨲ᩠ᨳᨲᩮ ᨠᨳᩥᨶᩮ ᨣᩥᨾ᩠ᩉᩣᨶᩴ ᨸᨮᨾᨴᩥᩅᩈᨲᩮᩣ ᨸᨭ᩠ᨮᩣᨿ ᩏᨸ᩠ᨸᨶ᩠ᨶᨧᩦᩅᩁᩴ ᩈᨶ᩠ᨵᩣᨿ ‘‘ᨶᩥᨭ᩠ᨮᩥᨲᨧᩦᩅᩁᩈ᩠ᨾᩥ’’ᨶ᩠ᨲᩥᩌᨴᩥ ᩅᩩᨲ᩠ᨲᩴ. ᩑᨲ᩠ᨳᩣᩉ – ‘‘ᩁᨩᨠᩮᩉᩥ ᨵᩮᩣᩅᩣᨸᩮᨲ᩠ᩅᩣ ᩈᩮᨲᨠᩴ ᨠᩣᩁᩣᨸᩮᨶ᩠ᨲᩔᩣᨸᩥ ᩋᨵᩥᨭ᩠ᨮᩣᨶᩴ ᩋᨵᩥᨭ᩠ᨮᩣᨶᨾᩮᩅᩣ’’ᨲᩥ (ᨸᩣᩁᩣ. ᩋᨭ᩠ᨮ. ᪒.᪔᪖᪕) ᩅᨧᨶᨲᩮᩣ ᩋᩁᨩᩥᨲᩮᨸᩥ ᩋᨵᩥᨭ᩠ᨮᩣᨶᩴ ᩁᩩᩉᨲᩦᨲᩥ. ᨲᩮᨶ ᩈᩪᨧᩥᨠᨾ᩠ᨾᩴ ᨠᨲ᩠ᩅᩣ ᩁᨩᩥᨲ᩠ᩅᩣ ᨠᨸ᩠ᨸᨻᩥᨶ᩠ᨴᩩᩴ ᨴᨲ᩠ᩅᩣ ᩋᨵᩥᨭ᩠ᨮᩣᨲᨻ᩠ᨻᨶ᩠ᨲᩥ ᨶᩥᨿᨾᩮᩣ ᨠᩣᨲᨻ᩠ᨻᩮᩣ, ᨶ ᨠᩣᨲᨻ᩠ᨻᩮᩣᨲᩥ? ᨠᨲ᩠ᨲᨻ᩠ᨻᩮᩣᩅ. ᨸᨲ᩠ᨲᩮᩣ ᩅᩥᨿ ᩋᨵᩥᨭ᩠ᨮᩥᨲᩮᩣ ᨿᨳᩣ ᨸᩩᨶ ᩈᩮᨲᨽᩣᩅᩴ ᩅᩣ ᨲᨾ᩠ᨻᨽᩣᩅᩴ ᩅᩣ ᨸᨲ᩠ᨲᩮᩣ ᩋᨵᩥᨭ᩠ᨮᩣᨶᩴ ᨶ ᩅᩥᨩᩉᨲᩥ, ᨶ ᨧ ᨸᨶ ᨲᩣᨴᩥᩈᩮᩣ ᨿᩴ ᩋᨵᩥᨭ᩠ᨮᩣᨶᩴ ᩏᨸᨣᨧ᩠ᨨᨲᩥ, ᩑᩅᨾᩮᨲᩴ ᨴᨭ᩠ᨮᨻ᩠ᨻᨶ᩠ᨲᩥ. ‘‘ᩈ᩠ᩅᩮ ᨠᨳᩥᨶᩴ ᩏᨴ᩠ᨵᩁᩥᩔᨲᩦ’’ᨲᩥ ᩃᨴ᩠ᨵᨧᩦᩅᩁᩴ ᩈᨧᩮ ᩋᨩ᩠ᨩᩮᩅ ᨶ ᩋᨵᩥᨭ᩠ᨮᩣᨲᩥ, ᩋᩁᩩᨱᩩᨣ᩠ᨣᨾᨶᩮ ᩑᩅ ᨶᩥᩔᨣ᩠ᨣᩥᨿᩴ ᩉᩮᩣᨲᩥ. ᨠᩈ᩠ᨾᩣ? ‘‘ᨶᩥᨭ᩠ᨮᩥᨲᨧᩦᩅᩁᩈ᩠ᨾᩥ’’ᨶ᩠ᨲᩥᩌᨴᩥᨶᩣ (ᨸᩣᩁᩣ. ᪔᪖᪒-᪔᪖᪓;) ᩈᩥᨠ᩠ᨡᩣᨸᨴᩔ ᩅᩩᨲ᩠ᨲᨲ᩠ᨲᩣ. ᨠᨳᩥᨶᨻ᩠ᨽᨶ᩠ᨲᩁᩮ ᨴᩈᩣᩉᨲᩮᩣ ᩏᨲ᩠ᨲᩁᩥᨸᩥ ᨸᩁᩥᩉᩣᩁᩴ ᩃᨽᨲᩥ, ᨠᨳᩥᨶᨲᩮᩣ ᨸᨶ ᨸᨧ᩠ᨨᩣ ᩑᨠᨴᩥᩅᩈᨾ᩠ᨸᩥ ᨶ ᩃᨽᨲᩥ. ᨿᨳᩣ ᨠᩥᩴ – ᨿᨳᩣ ᩋᨲ᩠ᨳᨲᨠᨳᩥᨶᩮᩣ ᩈᨦ᩠ᨥᩮᩣ ᨲᩥᨧᩦᩅᩁᩴ ᩋᨲ᩠ᨳᨲᨴᩥᩅᩈᨲᩮᩣ ᨸᨭ᩠ᨮᩣᨿ ᨿᩣᩅ ᩏᨻ᩠ᨽᩣᩁᩣ ᩌᨶᩥᩈᩴᩈᩴ ᩃᨽᨲᩥ, ᨶ ᨲᨲᩮᩣ ᨸᩁᩴ, ᩑᩅᩴ ᩋᨲ᩠ᨳᨲᨴᩥᩅᩈᨲᩮᩣ ᨸᨭ᩠ᨮᩣᨿ ᨿᩣᩅ ᩏᨻ᩠ᨽᩣᩁᩣ ᩃᨽᨲᩥ, ᩏᨴ᩠ᨵᨲᩮ ᨸᨶ ᨠᨳᩥᨶᩮ ᩑᨠᨴᩥᩅᩈᨾ᩠ᨸᩥ ᨶ ᩃᨽᨲᩥ. ᩑᨲ᩠ᨳᩣᩉ – ᩏᨻ᩠ᨽᨲᨴᩥᩅᩈᨲᩮᩣ ᨸᨭ᩠ᨮᩣᨿ ᨸᩩᨶ ᨴᩈᩣᩉᩴ ᩃᨽᨲᩦᨲᩥ? ᨶ, ᨠᩈ᩠ᨾᩣ? ‘‘ᩋᨶᩩᨩᩣᨶᩣᨾᩥ, ᨽᩥᨠ᩠ᨡᩅᩮ, ᨴᩈᩣᩉᨸᩁᨾᩴ ᩋᨲᩥᩁᩮᨠᨧᩦᩅᩁᩴ ᨵᩣᩁᩮᨲᩩ’’ᨶ᩠ᨲᩥ ᩅᨧᨶᨲᩮᩣ. ᨠᨳᩥᨶᨻ᩠ᨽᨶ᩠ᨲᩁᩮᨸᩥ ᩑᨠᩣᨴᩈᩮ ᩋᩁᩩᨱᩩᨣ᩠ᨣᨾᨶᩮ ᨶᩥᩔᨣ᩠ᨣᩥᨿᨶ᩠ᨲᩥ ᩌᨸᨶ᩠ᨶᩴ. ᨲᩴ ᨸᨶ ᩋᨲᩥᨸ᩠ᨸᩈᨦ᩠ᨣᩴ ᨶᩥᩅᩣᩁᩮᨲᩩᩴ ‘‘ᨶᩥᨭ᩠ᨮᩥᨲᨧᩦᩅᩁᩈ᩠ᨾᩥ’’ᨶ᩠ᨲᩥᩌᨴᩥ ᩅᩩᨲ᩠ᨲᩴ, ᨶ ᨠᨳᩥᨶᨴᩥᩅᩈᩣᨶᩥ ᩋᨴᩥᩅᩈᩣᨶᩦᨲᩥ ᨴᩦᨸᨶᨲ᩠ᨳᩴ. ᩋᨿᨾᨲ᩠ᨳᩮᩣ ᨲᨲ᩠ᨳ ᨲᨲ᩠ᨳ ᩌᩅᩥᨽᩅᩥᩔᨲᩥ. ᩋᨳ ᩅᩣ ᩅᩔᩥᨠᩈᩣᨭᩥᨠᩣ ᩋᨶᨲᩥᩁᩥᨲ᩠ᨲᨸ᩠ᨸᨾᩣᨱᩣ ᨶᩣᨾᩴ ᨣᩉᩮᨲ᩠ᩅᩣ ᩅᩩᨲ᩠ᨲᨶᨿᩮᨶᩮᩅ ᨧᨲ᩠ᨲᩣᩁᩮᩣ ᩅᩔᩥᨠᩮ ᨾᩣᩈᩮ ᩋᨵᩥᨭ᩠ᨮᩣᨲᨻ᩠ᨻᩣ, ᨲᨲᩮᩣ ᨸᩁᩴ ᨸᨧ᩠ᨧᩩᨴ᩠ᨵᩁᩥᨲ᩠ᩅᩣ ᩅᩥᨠᨸ᩠ᨸᩮᨲᨻ᩠ᨻᩣᨲᩥ ᩅᩩᨲ᩠ᨲᩴ. ᩑᨲ᩠ᨳ ‘‘ᨸᨧ᩠ᨧᩩᨴ᩠ᨵᩁᩥᨲ᩠ᩅᩣ’’ᨲᩥ ᩅᨧᨶᩮ ᩏᨸᩮᩣᩈᨳᨴᩥᩅᩈᩮ ᩑᩅ ᨸᨧ᩠ᨧᩩᨴ᩠ᨵᩁᩥᨲ᩠ᩅᩣ ᩅᩥᨠᨸ᩠ᨸᩮᨲ᩠ᩅᩣ ᨮᨸᩥᨲᩴ ᩉᩮᩣᨲᩥ, ᨲᨲᩮᩣ ᨸᩁᩴ ᩉᩮᨾᨶ᩠ᨲᩔ ᨸᨮᨾᨴᩥᩅᩈᨲᩮᩣ ᨸᨭ᩠ᨮᩣᨿ ᨸᨧ᩠ᨧᩩᨴ᩠ᨵᩁᨱᩣᨽᩣᩅᩣ. ᩑᩅᩴ ᨠᨳᩥᨶᨻ᩠ᨽᨶ᩠ᨲᩁᩮ ᩏᨸ᩠ᨸᨶ᩠ᨶᨧᩦᩅᩁᨾ᩠ᨸᩥ ᩅᩮᨴᩥᨲᨻ᩠ᨻᨶ᩠ᨲᩥ ᩃᩥᨡᩥᨲᩴ.

ᨠᨳᩥᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪒. ᩏᨴᩮᩣᩈᩥᨲᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᩋᨲ᩠ᨳᨲᨠᨳᩥᨶᩔ ᨸᨬ᩠ᨧ ᨾᩣᩈᩮ ᨻᨴ᩠ᨵᩈᩦᨾᩣᨿᩴ ᨿᨲ᩠ᨳ ᨠᨲ᩠ᨳᨧᩥ ᨧᩦᩅᩁᩴ ᨶᩥᨠ᩠ᨡᩥᨸᩥᨲ᩠ᩅᩣ ᨸᨠ᩠ᨠᨾᨶ᩠ᨲᩔ ᩋᨶᩣᨸᨲ᩠ᨲᩦ’’ᨲᩥ ᩋᨭ᩠ᨮᨠᨳᩣᨿᩴ ᩅᩩᨲ᩠ᨲᩴ. ‘‘ᩋᨻᨴ᩠ᨵᩈᩦᨾᩣᨿᨸᩥ ᩅᨭ᩠ᨭᨲᩦ’’ᨲᩥ ᩍᨴᩴ ᩋᨻᨴ᩠ᨵᩈᩦᨾᩣᨿᩴ ᨠᨳᩥᨶᨲ᩠ᨳᩣᩁᨬ᩠ᨧ ᩌᩁᨬ᩠ᨬᨠᩈᩥᨠ᩠ᨡᩣᨸᨴᨬ᩠ᨧ ᩈᩣᨵᩮᨲᩦᨲᩥ ᩃᩥᨡᩥᨲᩴ. ᩍᨴᩣᨶᩥ –

‘‘ᨨᩥᨶ᩠ᨶᩴ ᨵᩩᨲᨦ᩠ᨣᩴ ᩈᩣᩈᨦ᩠ᨠ-ᩈᨾ᩠ᨾᨲᩮᩣ ᩈᨶ᩠ᨲᩁᩩᨲ᩠ᨲᩁᩴ;

ᩋᨧᩦᩅᩁᩔᩣᨶᩣᨸᨲ᩠ᨲᩥ, ᨸᨧ᩠ᨧᩩᨴ᩠ᨵᩣᩁᩣᨴᩥᩈᩥᨴ᩠ᨵᩥᨲᩮᩣ’’ᨲᩥ. (ᩅᨩᩥᩁ. ᨭᩦ. ᨸᩣᩁᩣᨩᩥᨠ ᪔᪗᪙) –

ᩍᨴᩴ ᨸᨠᩥᨱ᩠ᨱᨠᩴ ᩅᩮᨴᩥᨲᨻ᩠ᨻᩴ.

ᨲᨲᩕᩣᨿᩴ ᨧᩮᩣᨴᨶᩣᨸᩩᨻ᩠ᨻᨦ᩠ᨣᨾᩅᩥᨶᩥᨧ᩠ᨨᨿᩮᩣ – ᨠᩮᨧᩥ ‘‘ᨴᩥᨣᩩᨱᩴ ᩈᨦ᩠ᨥᩣᨭᩥ’’ᨶ᩠ᨲᩥ (ᨾᩉᩣᩅ. ᪓᪔᪘) ᩅᨧᨶᨲᩮᩣ ‘‘ᩑᨠᨧ᩠ᨧᩥᨠᩣ ᩈᨦ᩠ᨥᩣᨭᩥ ᨶᩣᨵᩥᨭ᩠ᨮᩣᨲᨻ᩠ᨻᩣ. ᩈᨧᩮ ᩋᨵᩥᨭ᩠ᨮᩣᨲᩥ, ᨶ ᩁᩩᩉᨲᩦ’’ᨲᩥ ᩅᨲ᩠ᩅᩣ ᩏᨸᩈᨾ᩠ᨸᨴᩣᨸᩮᨠ᩠ᨡᩣᨶᨾ᩠ᨸᩥ ᨴᩥᨣᩩᨱᩴᨿᩮᩅ ᩈᨦ᩠ᨥᩣᨭᩥᩴ ᨴᨲ᩠ᩅᩣ ᩏᨸᩈᨾ᩠ᨸᩣᨴᩮᨶ᩠ᨲᩥ, ᨲᩮ ᩍᨾᩥᨶᩣ ᩈᩩᨲ᩠ᨲᩃᩮᩈᩮᨶ ᩈᨬ᩠ᨬᩣᨸᩮᨲᨻ᩠ᨻᩣ. ᨽᨣᩅᨲᩣ ᩉᩥ ‘‘ᨨᩥᨶ᩠ᨶᨠᩴ ᩈᨦ᩠ᨥᩣᨭᩥᩴ, ᨨᩥᨶ᩠ᨶᨠᩴ ᩏᨲ᩠ᨲᩁᩣᩈᨦ᩠ᨣᩴ, ᨨᩥᨶ᩠ᨶᨠᩴ ᩋᨶ᩠ᨲᩁᩅᩣᩈᨠ’’ᨶ᩠ᨲᩥ ᨸᨮᨾᩴ ᩋᨶᩩᨬ᩠ᨬᩣᨲᩴ. ᨲᨲᩮᩣ ‘‘ᩋᨬ᩠ᨬᨲᩁᩔ ᨽᩥᨠ᩠ᨡᩩᨶᩮᩣ ᨲᩥᨧᩦᩅᩁᩮ ᨠᩁᩥᨿᨾᩣᨶᩮ ᩈᨻ᩠ᨻᩴ ᨨᩥᨶ᩠ᨶᨠᩴ ᨶᨸ᩠ᨸᩉᩮᩣᨲᩥ. ᨴ᩠ᩅᩮ ᨨᩥᨶ᩠ᨶᨠᩣᨶᩥ ᩑᨠᩴ ᩋᨨᩥᨶ᩠ᨶᨠᩴ ᨶᨸ᩠ᨸᩉᩮᩣᨲᩥ, ᨴ᩠ᩅᩮ ᩋᨨᩥᨶ᩠ᨶᨠᩣᨶᩥ ᩑᨠᩴ ᨨᩥᨶ᩠ᨶᨠᩴ ᨶᨸ᩠ᨸᩉᩮᩣᨲᩦ’’ᨲᩥ ᩍᨾᩈ᩠ᨾᩥᩴ ᩅᨲ᩠ᨳᩩᩈ᩠ᨾᩥᩴ ‘‘ᩋᨶᩩᨩᩣᨶᩣᨾᩥ, ᨽᩥᨠ᩠ᨡᩅᩮ, ᩋᨶ᩠ᩅᩣᨵᩥᨠᨾ᩠ᨸᩥ ᩌᩁᩮᩣᨸᩮᨲᩩ’’ᨶ᩠ᨲᩥ (ᨾᩉᩣᩅ. ᪓᪖᪐) ᩋᨶᩩᨬ᩠ᨬᩣᨲᩴ, ᨲᩈ᩠ᨾᩣ ᩑᨠᨧ᩠ᨧᩥᨠᩣᨸᩥ ᩈᨦ᩠ᨥᩣᨭᩥ ᩅᨭ᩠ᨭᨲᩦᨲᩥ ᩈᩥᨴ᩠ᨵᩴ. ᨿᩣ ᨨᩥᨩ᩠ᨩᨾᩣᨶᩣᨸᩥ ᨶᨸ᩠ᨸᩉᩮᩣᨲᩥ, ᨲᩔᩣ ᨠᩩᨲᩮᩣ ᨴᩥᨣᩩᨱᨲᩣᨲᩥ? ᩋᨭ᩠ᨮᨠᨳᩣᨿᨾ᩠ᨸᩥᩔ ᩅᩩᨲ᩠ᨲᩴ ‘‘ᩋᨶ᩠ᩅᩣᨵᩥᨠᨾ᩠ᨸᩥ ᩌᩁᩮᩣᨸᩮᨲᩩᨶ᩠ᨲᩥ ᩌᨣᨶ᩠ᨲᩩᨠᨸᨲ᩠ᨲᨾ᩠ᨸᩥ ᨴᩣᨲᩩᩴ, ᩍᨴᩴ ᨸᨶ ᩋᨸ᩠ᨸᩉᩮᩣᨶᨠᩮ ᩌᩁᩮᩣᨸᩮᨲᨻ᩠ᨻᩴ. ᩈᨧᩮ ᨸᩉᩮᩣᨲᩥ, ᩌᨣᨶ᩠ᨲᩩᨠᨸᨲ᩠ᨲᩴ ᨶ ᩅᨭ᩠ᨭᨲᩥ, ᨨᩥᨶ᩠ᨴᩥᨲᨻ᩠ᨻᨾᩮᩅᩣ’’ᨲᩥ (ᨾᩉᩣᩅ. ᩋᨭ᩠ᨮ. ᪓᪖᪐). ᨠᨳᩥᨶᩴ ᨸᨶ ᨨᩥᨶ᩠ᨶᨠᨾᩮᩅ ᩅᨭ᩠ᨭᨲᩥ, ᩌᩅᩮᨱᩥᨠᩃᨠ᩠ᨡᨱᨲ᩠ᨲᩣ, ‘‘ᨨᩥᨶ᩠ᨶᨠᩴ ᨴᩥᨣᩩᨱᩴ ᨶᨸ᩠ᨸᩉᩮᩣᨲᩦ’’ᨲᩥ ᩅᨧᨶᩣᨽᩣᩅᨲᩮᩣ ᨧᩣᨲᩥ ᩈᨶ᩠ᨶᩥᨭ᩠ᨮᩣᨶᨾᩮᨲ᩠ᨳ ᨣᨶ᩠ᨲᨻ᩠ᨻᨶ᩠ᨲᩥ.

ᨵᩩᨲᨦ᩠ᨣᨶ᩠ᨲᩥ ᩋᨶᩩᨸᩈᨾ᩠ᨸᨶ᩠ᨶᩣᨶᩴ ᨲᩮᨧᩦᩅᩁᩥᨠᨵᩩᨲᨦ᩠ᨣᩣᨽᩣᩅᨲᩮᩣ ᨲᩥᨧᩦᩅᩁᩮᨶᩮᩅ ᨲᩮᨧᩦᩅᩁᩥᨠᩮᩣᨲᩥ, ᨲᩮᩈᩴ ᩋᨵᩥᨭ᩠ᨮᩣᨶᩣᨽᩣᩅᨲᩮᩣ ‘‘ᩋᨵᩥᨭ᩠ᨮᩥᨲᩮᨶᩮᩅᩣ’’ᨲᩥ ᩅᨲ᩠ᨲᨻ᩠ᨻᩴ ᩉᩮᩣᨲᩪᨲᩥ ᨧᩮ? ᨶ, ᨵᩩᨲᨦ᩠ᨣᨽᩮᨴᩮᨶ ᩅᩥᩁᩮᩣᨵᨸ᩠ᨸᩈᨦ᩠ᨣᨲᩮᩣ. ᨧᨲᩩᨲ᩠ᨳᨧᩦᩅᩁᩈᩣᨴᩥᨿᨶᩮᨶ ᩉᩥ ᨵᩩᨲᨦ᩠ᨣᨽᩮᨴᩮᩣ, ᨶ ᨲᩥᨧᩦᩅᩁᩅᩥᨸ᩠ᨸᩅᩣᩈᩮᨶ, ᨶᩣᨸᩥ ᩋᨲᩥᩁᩮᨠᨧᩦᩅᩁᩈᩣᨴᩥᨿᨶᩮᨶ, ᨶᩣᨸᩥ ᩋᨲᩥᩁᩮᨠᨧᩦᩅᩁᨵᩣᩁᨱᩮᨶ. ᨿᩈ᩠ᨾᩣ ᨸᨶ ᨽᩥᨠ᩠ᨡᩪᨶᩴ ᩑᩅ ᨽᨣᩅᨲᩣ ᩋᨵᩥᨭ᩠ᨮᩣᨶᩅᩈᩮᨶ ᨶᩅ ᨧᩦᩅᩁᩣᨶᩥ ᩋᨶᩩᨬ᩠ᨬᩣᨲᩣᨶᩥ, ᨩᩣᨲᩥᩅᩈᩮᨶ ᨧ ᩅᩩᨲ᩠ᨲᩣᨶᩥ, ᨶ ᩑᩅᩴ ᩋᨶᩩᨸᩈᨾ᩠ᨸᨶ᩠ᨶᩣᨶᩴ, ᨲᩈ᩠ᨾᩣ ᨶᩮᩈᩴ ᨧᩦᩅᩁᨶᩥᨿᨾᩣᨽᩣᩅᩣ ᨶ ᨲᩴ ᨵᩩᨲᨦ᩠ᨣᩴ ᩋᨶᩩᨬ᩠ᨬᩣᨲᩴ ᨣᩉᨭ᩠ᨮᩣᨶᩴ ᩅᩥᨿ. ᨲᩈ᩠ᨾᩣ ᨲᩔ ᩈᨾᩣᨴᩣᨶᩅᩥᨵᩣᨶᩮ ᩋᩅᨧᨶᨲᩮᩣ ᨧ ᩈᨶ᩠ᨶᩥᨭ᩠ᨮᩣᨶᨾᩮᨲ᩠ᨳ ᨣᨶ᩠ᨲᨻ᩠ᨻᨶ᩠ᨲᩥ.

ᩈᩣᩈᨦ᩠ᨠᩈᨾ᩠ᨾᨲᩮᩣᨲᩥ ᨠᨦ᩠ᨡᩣᩅᩥᨲᩁᨱᩥᨿᩴ (ᨠᨦ᩠ᨡᩣ. ᩋᨭ᩠ᨮ. ᩈᩣᩈᨦ᩠ᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ) ᩈᩣᩈᨦ᩠ᨠᩈᩥᨠ᩠ᨡᩣᨸᨴᩮ ᩅᩥᩈᩩᩴ ᩋᨦ᩠ᨣᩣᨶᩥ ᨶ ᩅᩩᨲ᩠ᨲᩣᨶᩥ, ‘‘ᩈᩮᩈᨾᩮᨲ᩠ᨳ ᨧᩦᩅᩁᩅᨣ᩠ᨣᩔ ᨴᩩᨲᩥᨿᩈᩥᨠ᩠ᨡᩣᨸᨴᩮ ᩅᩩᨲ᩠ᨲᨶᨿᩮᨶᩮᩅ ᩅᩮᨴᩥᨲᨻ᩠ᨻ’’ᨶ᩠ᨲᩥ ᩅᩩᨲ᩠ᨲᩴ, ᨶ ᨧ ᨸᨶᩮᨲᩴ ᩅᩩᨲ᩠ᨲᩴ. ᨲᨲ᩠ᨳ ᩁᨲ᩠ᨲᩥᩅᩥᨸ᩠ᨸᩅᩣᩈᩮᩣ ᨧᨲᩩᨲ᩠ᨳᨾᨦ᩠ᨣᩴ, ᩍᨵ ᨨᩣᩁᨲ᩠ᨲᩅᩥᨸ᩠ᨸᩅᩣᩈᩮᩣ, ᩋᨿᨾᩮᨲ᩠ᨳ ᩅᩥᩈᩮᩈᩮᩣᨲᩥ. ᨲᩈ᩠ᨾᩣ ᩋᨦ᩠ᨣᩈᩣᨾᨬ᩠ᨬᨲᩮᩣ ᨧ ᩈᨾ᩠ᨾᩩᨲᩥᩈᩣᨾᨬ᩠ᨬᨲᩮᩣ ᨧ ᩈᩣᩈᨦ᩠ᨠᩈᩥᨠ᩠ᨡᩣᨸᨴᨾᩮᩅᩥᨴᨶ᩠ᨲᩥ ᩍᨴᩴ ᨶᩥᨸ᩠ᨸᨴᩮᩈᩴ, ᨲᩴ ᩈᨸ᩠ᨸᨴᩮᩈᩴ ᨾᩣᩈᨸᩁᨾᨲ᩠ᨲᩣ. ᨲᨲ᩠ᨳ ᨻᩉᩥᨣᩣᨾᩮᨸᩥ ᨣᩣᨾᩈᩦᨾᩴ ᩒᨠ᩠ᨠᨾᩥᨲ᩠ᩅᩣ ᩅᩈᩥᨲ᩠ᩅᩣ ᨸᨠ᩠ᨠᨾᨶ᩠ᨲᩔ ᩋᨶᩣᨸᨲ᩠ᨲᩥ, ᩍᨵ ᨶ ᨲᨳᩣ. ᩍᨵ ᩋᨶᨶ᩠ᨲᩁᩮ ᩋᨶᨶ᩠ᨲᩁᩮ ᩋᩁᩩᨱᩩᨣ᩠ᨣᨾᨶᩮ ᨶᩥᩔᨣ᩠ᨣᩥᨿᩴ, ᨲᨲ᩠ᨳ ᩈᨲ᩠ᨲᨾᩮᨲᩥ ᩋᨿᩴ ᩍᨾᩮᩈᩴ ᨴ᩠ᩅᩥᨶ᩠ᨶᩴ ᩅᩥᩈᩮᩈᩮᩣ. ᩋᨦ᩠ᨣᩣᨶᩥ ᨸᨶ ᨧᩦᩅᩁᨶᩥᨠ᩠ᨡᩮᨸᨶᨦ᩠ᨣᩈᨾ᩠ᨸᨲ᩠ᨲᩥᨲᩮᩣ ᩅᩥᨸᩁᩥᨿᩣᨿᩮᨶ, ᩍᨵ ᩅᩩᨲ᩠ᨲᨶᨿᩮᨶ ᨧ ᩈᩥᨴ᩠ᨵᨲ᩠ᨲᩣ ᨶ ᩅᩩᨲ᩠ᨲᩣᨶᩥ. ᨲᩣᨶᩥ ᨠᩣᨾᩴ ᨶ ᩅᩩᨲ᩠ᨲᩣᨶᩥ, ᨲᨳᩣᨸᩥ ᨧᨲᩩᨲ᩠ᨳᨾᨦ᩠ᨣᩴ ᩅᩥᩈᩮᩈᩥᨲᨻ᩠ᨻᩴ, ᨶ ᨸᨶ ᩅᩥᩈᩮᩈᩥᨲᩴ. ᨠᩥᩴ ᨠᩣᩁᨱᩴ? ᩍᨵ ᩅᩩᨲ᩠ᨲᨶᩥᩔᨩ᩠ᨩᨶᨠ᩠ᨠᨾᩮᨶ ᨶᩥᩔᨩ᩠ᨩᩥᨲ᩠ᩅᩣ ᩌᨸᨲ᩠ᨲᩥᨴᩮᩈᨶᨲᩮᩣ, ᨲᨲ᩠ᨳᩣᨸᨶ᩠ᨶᩣᨸᨲ᩠ᨲᩥᩅᩥᨾᩮᩣᨠ᩠ᨡᨴᩦᨸᨶᨲ᩠ᨳᩴ. ᩈᩴᩅᨧ᩠ᨨᩁᩅᩥᨸ᩠ᨸᩅᩩᨲ᩠ᨳᨾ᩠ᨸᩥ ᩁᨲ᩠ᨲᩥᩅᩥᨸ᩠ᨸᩅᩩᨲ᩠ᨳᨾᩮᩅ, ᨸᨣᩮᩅ ᨨᩣᩁᨲ᩠ᨲᩅᩥᨸ᩠ᨸᩅᩩᨲ᩠ᨳᩴ. ᩑᩅᩴ ᩈᨶ᩠ᨲᩮᨸᩥ ᨲᨲ᩠ᨳ ᨿᨳᩣᩅᩩᨲ᩠ᨲᩋᨦ᩠ᨣᩈᨾ᩠ᨸᨲ᩠ᨲᩥᨿᩣ ᩈᨲᩥ ᨲᨲ᩠ᨳ ᩅᩩᨲ᩠ᨲᨶᨿᩮᨶᩮᩅ ᨶᩥᩔᨩ᩠ᨩᩥᨲᨻ᩠ᨻᩴ. ᩉᩮᨾᨶ᩠ᨲᩮ, ᨣᩥᨾ᩠ᩉᩮ ᩅᩣ ᨶᩥᩔᨩ᩠ᨩᨲᩥ ᨧᩮ? ᩍᨵ ᩅᩩᨲ᩠ᨲᨶᨿᩮᨶᩣᨸᩥ ᨶᩥᩔᨩ᩠ᨩᩥᨲᩩᩴ ᩅᨭ᩠ᨭᨲᩦᨲᩥ ᨬᩣᨸᨶᨲ᩠ᨳᩴ ᨧᨲᩩᨲ᩠ᨳᨾᨦ᩠ᨣᩴ ᨶ ᩅᩥᩈᩮᩈᩥᨲᨶ᩠ᨲᩥ ᨶᩮᩣ ᨲᨠ᩠ᨠᩮᩣᨲᩥ ᩌᨧᩁᩥᨿᩮᩣ. ᨾᩣᩈᩣᨲᩥᨠ᩠ᨠᨶ᩠ᨲᩴ, ᨴᩈᩣᩉᩣᨲᩥᨠ᩠ᨠᨶ᩠ᨲᨾ᩠ᨸᩥ ᨧᩦᩅᩁᩴ ‘‘ᨴᩈᩣᩉᩣᨲᩥᨠ᩠ᨠᨶ᩠ᨲ’’ᨶ᩠ᨲᩥ ᩅᨲ᩠ᩅᩣ ᨶᩥᩔᨭ᩠ᨮᨾᩮᩅ, ᨶ ᩐᨶᨾᩣᩈᩴ ᩉᩩᨲ᩠ᩅᩣ ‘‘ᨴᩈᩣᩉᩣᨲᩥᨠ᩠ᨠᨶ᩠ᨲ’’ᨶ᩠ᨲᩥ ᩅᨲ᩠ᩅᩣ, ᨾᩣᩈᩣᨲᩥᨠ᩠ᨠᨶ᩠ᨲ’’ᨶ᩠ᨲᩥ ᩅᨲ᩠ᩅᩣᨲᩥ ᩑᨠᩮ. ᨲᨳᩣᨸᩥ ᩈᨧᩮ ᨸᨧ᩠ᨧᩣᩈᩣᨧᩦᩅᩁᩴ ᩉᩮᩣᨲᩥ, ᨶᩥᩔᨣ᩠ᨣᩥᨿᩴ. ‘‘ᨴᩈᩣᩉᩣᨲᩥᨠ᩠ᨠᨶ᩠ᨲ’’ᨶ᩠ᨲᩥ ᩅᨲ᩠ᩅᩣ ᨾᩪᩃᨧᩦᩅᩁᩴ ᨸᨶ ‘‘ᨾᩣᩈᩣᨲᩥᨠ᩠ᨠᨶ᩠ᨲ’’ᨶ᩠ᨲᩥ ᩅᨲ᩠ᩅᩣ ᨶᩥᩔᨩ᩠ᨩᩥᨲᨻ᩠ᨻᩴ.

‘‘ᩈᨶ᩠ᨲᩁᩩᨲ᩠ᨲᩁ’’ᨶ᩠ᨲᩥ ᩅᩣ ‘‘ᩈᨦ᩠ᨥᩣᨭᩥ’’ᨶ᩠ᨲᩥ ᩅᩣ ‘‘ᨧᩦᩅᩁ’’ᨶ᩠ᨲᩥ ᩅᩣ ᨠᩥᩴ ᨲᩥᨧᩦᩅᩁᩴ, ᩏᨴᩣᩉᩩ ᩋᨬ᩠ᨬᨾ᩠ᨸᩦᨲᩥ? ᨠᩥᨬ᩠ᨧᩮᨲ᩠ᨳ – ᨿᨴᩥ ᨲᩥᨧᩦᩅᩁᨾᩮᩅ ᨸᨭᩥᩈᩥᨴ᩠ᨵᩴ, ᨸᩁᩥᨿᩣᨸᨶ᩠ᨶᩅᩈᩮᨶ ᩋᨧ᩠ᨨᩥᨶ᩠ᨶᨧᩦᩅᩁᩋᩋᨨᨶ᩠ᨴᨶᨵᩮᩣᩅᩣᨸᨶᩅᩥᨬ᩠ᨬᨲ᩠ᨲᩥᩌᨴᩥᩅᩥᩁᩮᩣᨵᩮᩣ. ᩋᨳ ᩋᨬ᩠ᨬᨾ᩠ᨸᩥ ‘‘ᨶᩥᨭ᩠ᨮᩥᨲᨧᩦᩅᩁᩈ᩠ᨾᩥ’’ᨶ᩠ᨲᩥ ᩑᩅᨾᩣᨴᩥᨶᩣ ᩅᩥᩁᩮᩣᨵᩮᩣᨲᩥ? ᩅᩩᨧ᩠ᨧᨲᩮ – ᨶ ᨶᩥᨿᨾᨲᩮᩣ ᩅᩮᨴᩥᨲᨻ᩠ᨻᩴ ᨿᨳᩣᩈᨾ᩠ᨽᩅᩴ ᨣᩉᩮᨲᨻ᩠ᨻᨲᩮᩣ. ᨲᨳᩣ ᩉᩥ ‘‘ᨧᩦᩅᩁᩴ ᨶᩥᨠ᩠ᨡᩥᨸᩥᨲ᩠ᩅᩣ ᩈᨶ᩠ᨲᩁᩩᨲ᩠ᨲᩁᩮᨶ ᨩᨶᨸᨴᨧᩣᩁᩥᨠᩴ ᨸᨠ᩠ᨠᨾᨶ᩠ᨲᩦ’’ᨲᩥ (ᨸᩣᩁᩣ. ᪔᪗᪑) ᩑᩅᨾᩣᨴᩦᩈᩩ ᨲᩥᨧᩦᩅᩁᨾᩮᩅ, ‘‘ᨶ, ᨽᩥᨠ᩠ᨡᩅᩮ, ᩈᨶ᩠ᨲᩁᩩᨲ᩠ᨲᩁᩮᨶ ᨣᩣᨾᩮᩣ ᨸᩅᩥᩈᩥᨲᨻ᩠ᨻᩮᩣ (ᨾᩉᩣᩅ. ᪓᪖᪒), ᩈᨶ᩠ᨲᩁᩩᨲ᩠ᨲᩁᨸᩁᨾᩴ ᨲᨲᩮᩣ ᨧᩦᩅᩁᩴ ᩈᩣᨴᩥᨲᨻ᩠ᨻ’’ᨶ᩠ᨲᩥ (ᨸᩣᩁᩣ. ᪕᪒᪓-᪕᪒᪔) ᩑᩅᨾᩣᨴᩦᩈᩩ ᨿᩴ ᨠᩥᨬ᩠ᨧᩥ, ᨲᨳᩣ ‘‘ᩈᨣᩩᨱᩴ ᨠᨲ᩠ᩅᩣ ᩈᨦ᩠ᨥᩣᨭᩥᨿᩮᩣ ᨴᩣᨲᨻ᩠ᨻᩣ, ᨶᩥᩅᩣᩈᨶᩴ ᨴᩣᨲᨻ᩠ᨻᩴ, ᩈᨦ᩠ᨥᩣᨭᩥ ᨴᩣᨲᨻ᩠ᨻᩣ, ᩉᨶ᩠ᨴ ᨲᩮ, ᩌᩅᩩᩈᩮᩣ, ᩈᨦ᩠ᨥᩣᨭᩥ, ᨴᩮᩉᩥ ᨾᩮ ᨸᨭ’’ᨶ᩠ᨲᩥ ᩑᩅᨾᩣᨴᩦᩈᩩ. ᩅᩩᨲ᩠ᨲᨬ᩠ᩉᩮᨲᩴ ‘‘ᩈᨻ᩠ᨻᨬ᩠ᩉᩥ ᨧᩦᩅᩁᩴ ᩈᨦ᩠ᨥᨭᩥᨲᨭ᩠ᨮᩮᨶ ‘ᩈᨦ᩠ᨥᩣᨭᩦ’ᨲᩥ ᩅᩩᨧ᩠ᨧᨲᩦ’’ᨲᩥ (ᨸᩣᨧᩥ. ᩋᨭ᩠ᨮ. ᪘᪙᪘). ᨲᨳᩣ ‘‘ᨶᩥᨭ᩠ᨮᩥᨲᨧᩦᩅᩁᩈ᩠ᨾᩥ’’ᨶ᩠ᨲᩥ ᩑᨲ᩠ᨳᩣᨸᩦᨲᩥ ᩑᨠᩮ. ᩋᨶ᩠ᨲᩮᩣᩈᨾᨿᩮ ᨿᩣᩅᨴᨲ᩠ᨳᩴ ᨧᩦᩅᩁᩴ ᩋᨶᩩᨬ᩠ᨬᩣᨲᩴ, ᨲᩴ ᩈᨻ᩠ᨻᩴ ᨠᩁᩥᨿᨾᩣᨶᩴ ᨠᨴᩣ ᨶᩥᨭ᩠ᨮᩣᨶᩴ ᨣᨧ᩠ᨨᩥᩔᨲᩥ, ᨲᩈ᩠ᨾᩣ ᨲᩥᨧᩦᩅᩁᨾᩮᩅᩣᨲᩥ ᩑᨠᩮ.

ᩋᨧᩦᩅᩁᩔᩣᨶᩣᨸᨲ᩠ᨲᩥ ᨸᨧ᩠ᨧᩩᨴ᩠ᨵᩣᩁᩣᨴᩥᩈᩥᨴ᩠ᨵᩥᨲᩮᩣᨲᩥ ᨠᩥᩴ ᩅᩩᨲ᩠ᨲᩴ ᩉᩮᩣᨲᩥ – ᩏᨴᩮᩣᩈᩥᨲᩈᩥᨠ᩠ᨡᩣᨸᨴᩔ ᨶᩥᨸ᩠ᨸᨿᩮᩣᨩᨶᨽᩣᩅᨸ᩠ᨸᩈᨦ᩠ᨣᨲᩮᩣ ᨲᩥᨧᩦᩅᩁᩅᩥᨸ᩠ᨸᩅᩣᩈᩮ ᨲᩮᨧᩦᩅᩁᩔ ᩌᨸᨲ᩠ᨲᩦᨲᩥ ᩑᨠᩮ. ᨲᨲ᩠ᨳᩮᨲᩴ ᩅᩩᨧ᩠ᨧᨲᩥ ᨶ ᩉᩮᩣᨲᩥ ᩌᨸᨲ᩠ᨲᩥ ᨸᨧ᩠ᨧᩩᨴ᩠ᨵᩣᩁᩣᨴᩥᩈᩥᨴ᩠ᨵᩥᨲᩮᩣ. ‘‘ᩋᨶᩣᨸᨲ᩠ᨲᩥ ᩋᨶ᩠ᨲᩮᩣᩋᩁᩩᨱᩮ ᨸᨧ᩠ᨧᩩᨴ᩠ᨵᩁᨲᩥ ᩅᩥᩔᨩ᩠ᨩᩮᨲᩦ’’ᨲᩥ (ᨸᩣᩁᩣ. ᪔᪙᪖) ᩉᩥ ᩅᩩᨲ᩠ᨲᩴ. ᩋᨬ᩠ᨬᨳᩣ ᨸᨧ᩠ᨧᩩᨴ᩠ᨵᩁᨶ᩠ᨲᩔ, ᩋᨶ᩠ᨲᩮᩣᩋᩁᩩᨱᩮ ᩅᩥᩔᨩ᩠ᨩᩮᨶ᩠ᨲᩔ ᨧ ᨿᩣᩅ ᩋᨬ᩠ᨬᩮᩣ ᨶᩣᨵᩥᨭ᩠ᨮᩣᨲᩥ, ᨲᩣᩅ ᩌᨸᨲ᩠ᨲᩥᩴ ᩌᨸᨩ᩠ᨩᨲᩥ ᨿᨳᩣᩅᩩᨲ᩠ᨲᨶᨿᩮᨶᩮᩅ. ᩋᨬ᩠ᨬᨳᩣ ᩈᨲ᩠ᨲᨻ᩠ᨽᨶ᩠ᨲᩁᩮᨶ ᩅᩥᨸ᩠ᨸᩅᩣᩈᩔᩣᨲᩥ ᩅᩥᨸ᩠ᨸᩅᩣᩈᨲᩮᩣ ᨿᨳᩣᩁᩩᨲᩴᨿᩮᩅ ᩈᨲᩥ ᩅᩥᨸ᩠ᨸᩅᩣᩈᩮ ᩅᩥᨸ᩠ᨸᩅᩣᩈᨲᩮᩣ, ᩋᩅᩥᨸ᩠ᨸᩅᩣᩈᩮ ᩈᨲᩥ ᩋᩅᩥᨸ᩠ᨸᩅᩣᩈᨲᩮᩣᨲᩥ.

ᩏᨴᩮᩣᩈᩥᨲᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪓. ᩋᨠᩣᩃᨧᩦᩅᩁᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩋᨸᩁᩥᨠ᩠ᨡᩥᨲ᩠ᨲᩔ ᨸᩁᩥᨠ᩠ᨡᩮᨸᩣᩁᩉᨭ᩠ᨮᩣᨶᩔ ᨴᩩᨻ᩠ᨻᩥᨩᩣᨶᨲ᩠ᨲᩣ ᨲᩴ ᨴᩔᩮᨲᩩᩴ ‘‘ᩋᨸᩥᨧ ᨽᩥᨠ᩠ᨡᩪᨶ’’ᨶ᩠ᨲᩥᩌᨴᩥ ᩅᩩᨲ᩠ᨲᩴ. ᩅᩥᩉᩣᩁᨸᩁᩥᨿᨶ᩠ᨲᩮ ᨶᩥᩅᩥᨭ᩠ᨮᨵᩩᩅᩈᨶ᩠ᨶᩥᨸᩣᨲᨭ᩠ᨮᩣᨶᨲᩮᩣ ᩅᩣ ᨸᩁᩥᨿᨶ᩠ᨲᩮ ᨮᩥᨲᨽᩮᩣᨩᨶᩈᩣᩃᨲᩮᩣ ᩅᩣ ᨶᩥᨻᨴ᩠ᨵᩅᩈᨶᨠᩌᩅᩣᩈᨲᩮᩣ ᩅᩣᨲᩥ ᩑᩅᩴ ᨣᩉᩮᨲᨻ᩠ᨻᩴ. ᩈᨧᩮ ᩅᩥᩉᩣᩁᩮ ᩈᨶ᩠ᨶᩥᨸᨲᩥᨲᨽᩥᨠ᩠ᨡᩪᩉᩥ ᩈᨴ᩠ᨵᩥᩴ ᩑᨠᩣᨻᨴ᩠ᨵᩣ ᩉᩩᨲ᩠ᩅᩣ ᨿᩮᩣᨩᨶᩈᨲᨾ᩠ᨸᩥ ᨸᩪᩁᩮᨲ᩠ᩅᩣ ᨶᩥᩈᩦᨴᨶ᩠ᨲᩥ, ᨿᩮᩣᨩᨶᩈᨲᨾ᩠ᨸᩥ ᩏᨸᨧᩣᩁᩈᩦᨾᩣ ᩉᩮᩣᨲᩦᨲᩥ ᩋᨲ᩠ᨳᩮᩣ. ‘‘ᩈᨾᩣᨶᩈᩴᩅᩣᩈᨠᩈᩦᨾᩣᨿᩣ’’ᨲᩥ ᩅᩩᨲ᩠ᨲᩮ ᨡᨱ᩠ᨯᩈᩦᨾᩣᨴᩦᩈᩩ ᨮᩥᨲᩣᨶᩴ ᨶ ᨸᩣᨸᩩᨱᩣᨲᩥ, ᨲᩣᩈᩴ ᩅᩥᩈᩩᩴ ᩈᨾᩣᨶᩈᩴᩅᩣᩈᨠᩈᩦᨾᨲ᩠ᨲᩣᨲᩥ ᨧ ᩈᨾᩣᨶᩈᩴᩅᩣᩈᨠᩋᩅᩥᨸ᩠ᨸᩅᩣᩈᩈᩦᨾᩣᨶᩴ ᩍᨴᩴ ᨶᩣᨶᨲ᩠ᨲᩴ. ‘‘ᩋᩅᩥᨸ᩠ᨸᩅᩣᩈᩈᩦᨾᩣᨿ ᨴᨾ᩠ᨾᩦ’’ᨲᩥ ᨴᩥᨶ᩠ᨶᩴ ᨸᨶ ᨣᩣᨾᩮ ᨮᩥᨲᩣᨶᩴ ᨶ ᨸᩣᨸᩩᨱᩣᨲᩥ. ᨠᩈ᩠ᨾᩣ? ‘‘ᨮᨸᩮᨲ᩠ᩅᩣ ᨣᩣᨾᨬ᩠ᨧ ᨣᩣᨾᩪᨸᨧᩣᩁᨬ᩠ᨧᩣ’’ᨲᩥ (ᨾᩉᩣᩅ. ᪑᪔᪔) ᩅᨧᨶᨲᩮᩣ. ‘‘ᩈᨾᩣᨶᩈᩴᩅᩣᩈᨠᩈᩦᨾᩣᨿᩣ’’ᨲᩥ ᨴᩥᨶ᩠ᨶᩴ ᨸᨶ ᨿᩈ᩠ᨾᩥᩴ ᨮᩣᨶᩮ ᩋᩅᩥᨸ᩠ᨸᩅᩣᩈᩈᩦᨾᩣ ᩋᨲ᩠ᨳᩥ, ᨲᨲ᩠ᨳ ᨮᩥᨲᩣᨶᨾ᩠ᨸᩥ. ‘‘ᨲᨲᩕ ᨮᩥᨲᩣᨶᨬ᩠ᨧ ᨸᩣᨸᩩᨱᩣᨲᩦ’’ᨲᩥ ᨧ, ‘‘ᨡᨱ᩠ᨯᩈᩦᨾᩣᨿᩴ ᨮᨲ᩠ᩅᩣ ‘ᩈᩦᨾᨭ᩠ᨮᨠᩈᨦ᩠ᨥᩮᩣ ᨣᨱ᩠ᩉᩣᨲᩪ’ᨲᩥ ᩅᩩᨲ᩠ᨲᩮ ᩏᨸᨧᩣᩁᩈᩦᨾᩣᨿ ᩑᩅ ᨸᩁᩥᨧ᩠ᨨᩥᨶ᩠ᨴᩥᨲ᩠ᩅᩣ ᨴᩣᨲᨻ᩠ᨻ’’ᨶ᩠ᨲᩥ ᨧ, ‘‘ᨲᩮᩈᩴ ᨻᩉᩥᩈᩦᨾᨭ᩠ᨮᩣᨶᨾ᩠ᨸᩥ ᨸᩣᨸᩩᨱᩣᨲᩥ ᨿᩣᩅ ᨠᨳᩥᨶᩔᩩᨻ᩠ᨽᩣᩁᩣᨲᩥ ᩋᨲ᩠ᨳᩮᩣ’’ᨲᩥ ᨧ, ‘‘ᩋᨶᨲ᩠ᨳᨲᩮ ᨸᨶ ᨠᨳᩥᨶᩮ ᩋᨶ᩠ᨲᩮᩣᩉᩮᨾᨶ᩠ᨲᩮ ᩈᨧᩮ ᩅᩥᩉᩣᩁᩴ ᨸᩅᩥᩈᩥᨲ᩠ᩅᩣ ‘ᩅᩔᩴᩅᩩᨭ᩠ᨮᩈᨦ᩠ᨥᩔ ᨴᨾ᩠ᨾᩦ’ᨲᩥ ᩅᨴᨲᩥ, ᨿᩮ ᨲᨲ᩠ᨳ ᩅᩔᨧ᩠ᨨᩮᨴᩴ ᩋᨠᨲ᩠ᩅᩣ ᨸᨧ᩠ᨨᩥᨾᩅᩔᩴᩅᩩᨭ᩠ᨮᩣ, ᨲᩮᩈᩴ ᨻᩉᩥᩈᩦᨾᨭ᩠ᨮᩣᨶᨾ᩠ᨸᩥ ᨸᩣᨸᩩᨱᩣᨲᩦ’’ᨲᩥ ᩅᩥᨶᨿᨵᩁᩣ ᨸᩁᩥᨧ᩠ᨨᩥᨶ᩠ᨴᨶ᩠ᨲᩥ, ᩋᨭ᩠ᨮᨠᨳᩣᨿᩴ ᨸᨶ ᩋᨶᩣᨣᨲᩴ. ᨲᩈ᩠ᨾᩣ ᩈᨾᨶ᩠ᨲᨸᩣᩈᩣᨴᩥᨠᩣᨿᩴ ‘‘ᩃᨠ᩠ᨡᨱᨬ᩠ᨬᩪ ᩅᨴᨶ᩠ᨲᩦ’’ᨲᩥ (ᨾᩉᩣᩅ. ᩋᨭ᩠ᨮ. ᪓᪗᪙) ᩅᩩᨲ᩠ᨲᨶ᩠ᨲᩥ ᨧ, ‘‘‘ᨧᩦᩅᩁᨾᩣᩈᨲᩮᩣ ᨸᨭ᩠ᨮᩣᨿ ᨿᩣᩅ ᩉᩮᨾᨶ᩠ᨲᩔ ᨸᨧ᩠ᨨᩥᨾᩮᩣ ᨴᩥᩅᩈᩮᩣ, ᨲᩣᩅ ᩅᩔᩣᩅᩣᩈᩥᨠᩴ ᨴᩮᨾᩣ’ᨲᩥ ᩅᩩᨲ᩠ᨲᩮ ᨠᨳᩥᨶᩴ ᩋᨲ᩠ᨳᨲᩴ ᩅᩣ ᩉᩮᩣᨲᩩ, ᩋᨶᨲ᩠ᨳᨲᩴ ᩅᩣᨲᩥ ᨿᩴ ᩈᨾᨶ᩠ᨲᨸᩣᩈᩣᨴᩥᨠᩣᩅᨧᨶᩴ (ᨾᩉᩣᩅ. ᩋᨭ᩠ᨮ. ᪓᪗᪙), ᩑᨲ᩠ᨳᩣᨸᩥ ᨿᨴᩥ ᩋᨲ᩠ᨳᨲᩴ, ᨸᩩᩁᩥᨾᩅᩔᩴᩅᩩᨭ᩠ᨮᩣ ᨸᨬ᩠ᨧ ᨾᩣᩈᩮ. ᨿᨴᩥ ᩋᨶᨲ᩠ᨳᨲᩴ, ᨸᨧ᩠ᨨᩥᨾᩅᩔᩴᩅᩩᨭ᩠ᨮᩣ ᨧᨲ᩠ᨲᩣᩁᩮᩣ ᨾᩣᩈᩮ ᩃᨽᨶ᩠ᨲᩦᨲᩥ ᩅᩥᨶᩥᨧ᩠ᨨᨿᩮᩣ’’ᨲᩥ ᨧ ᩃᩥᨡᩥᨲᩴ.

‘‘ᨿᩮᩉᩥ ᨾᨿ᩠ᩉᩴ ᨿᩣᨣᩩ ᨸᩦᨲᩣᨲᩥ ᨿᩮᩉᩥ ᨶᩥᨾᨶ᩠ᨲᩥᨲᩮᩉᩥ ᨾᨿ᩠ᩉᩴ ᨿᩣᨣᩩ ᨸᩦᨲᩣᨲᩥ ᩋᨵᩥᨸ᩠ᨸᩣᨿᩮᩣ. ᨲᩈ᩠ᨾᩣ ᨿᩮᩉᩥ ᨶᩥᨾᨶ᩠ᨲᩥᨲᩮᩉᩥ ᨿᩣᨣᩩ ᨸᩦᨲᩣ, ᨲᩮᩈᩴᨿᩮᩅ ᨸᩣᨸᩩᨱᩣᨲᩦᨲᩥ ᩅᩩᨲ᩠ᨲᩴ. ᩋᨬ᩠ᨬᨳᩣ ‘ᨿᩮᩉᩥ ᨾᨿ᩠ᩉᩴ ᨿᩣᨣᩩ ᨸᩦᨲᩣ’ᨲᩥ ᩅᩩᨲ᩠ᨲᩮ ᨶᩥᨾᨶ᩠ᨲᩥᨲᩣ ᩅᩣ ᩉᩮᩣᨶ᩠ᨲᩩ, ᩋᨶᩥᨾᨶ᩠ᨲᩥᨲᩣ ᩅᩣ, ᨿᩮᩉᩥ ᨸᩦᨲᩣ, ᨲᩮᩈᩴ ᨸᩣᨸᩩᨱᩥᨲᨻ᩠ᨻᩣᨶᩦ’’ᨲᩥ ᩅᨴᨶ᩠ᨲᩥ. ᩑᨲ᩠ᨳ ‘‘ᨶᩥᨭ᩠ᨮᩥᨲᨧᩦᩅᩁᩈ᩠ᨾᩥᩴ ᨽᩥᨠ᩠ᨡᩩᨶᩣ ᩏᨻ᩠ᨽᨲᩈ᩠ᨾᩥᩴ ᨠᨳᩥᨶᩮ’’ᨲᩥ ᩅᨴᨶ᩠ᨲᩮᩣ ᨬᩣᨸᩮᨲᩥ ᩑᨲ᩠ᨳᨶ᩠ᨲᩁᩮ ᨲᩥᨱ᩠ᨱᨾ᩠ᨸᩥ ᩋᨠᩣᩃᨧᩦᩅᩁᩣᨶᩴ ᩏᨸ᩠ᨸᨲ᩠ᨲᩥᩋᨽᩣᩅᨶ᩠ᨲᩥ. ᨠᩈ᩠ᨾᩣ ᨸᨶ ᨸᨴᨽᩣᨩᨶᩮ ᩅᩥᨲ᩠ᨳᩣᩁᩥᨲᩣᨶᩦᨲᩥ? ᩅᩩᨧ᩠ᨧᨲᩮ – ᩍᨴᩴ ᨸᨶ ᩈᩥᨠ᩠ᨡᩣᨸᨴᩴ ᩋᨵᩥᨭ᩠ᨮᩣᨶᩴ ᩈᨶ᩠ᨵᩣᨿ ᨶ ᩅᩩᨲ᩠ᨲᩴ ᨠᩥᨶ᩠ᨲᩩ ᨸᨮᨾᩈᩥᨠ᩠ᨡᩣᨸᨴᩮ ᨴᩈᩣᩉᨸᩁᨾᩴ ᩋᨶᩩᨩᩣᨶᩥᨲ᩠ᩅᩣ ᨲᩈ᩠ᨾᩥᩴ ᩋᨸ᩠ᨸᩉᩮᩣᨶ᩠ᨲᩮ ᩈᨧᩮ ᨸᨧ᩠ᨧᩣᩈᩣ ᩋᨲ᩠ᨳᩥ, ᨲᨾᩮᩅ ᩅᨯ᩠ᨰᩮᨲ᩠ᩅᩣ ᨾᩣᩈᨾᨶᩩᨩᩣᨶᨶ᩠ᨲᩮᩣ ᩍᨾᨾ᩠ᨸᩥ ᩋᨲ᩠ᨳᩅᩥᩈᩮᩈᩴ ᨴᩦᨸᩮᨲᩥ. ᩋᨠᩣᩃᨧᩦᩅᩁᩴ ᨶᩣᨾ ᩈᨾ᩠ᨾᩩᨡᩦᨽᩪᨲᩮᨶ ᨽᩣᨩᩮᨲᨻ᩠ᨻᩴ. ᨲᩴ ᨸᨶ ‘‘ᩌᨠᨦ᩠ᨡᨾᩣᨶᩮᨶ ᨽᩥᨠ᩠ᨡᩩᨶᩣ ᨸᨭᩥᨣ᩠ᨣᩉᩮᨲᨻ᩠ᨻ’’ᨶ᩠ᨲᩥ ᩍᨾᩥᨶᩣ ᩈᩥᨠ᩠ᨡᩣᨸᨴᩮᨶ ᩅᨯ᩠ᨰᩮᨲ᩠ᩅᩣ ᩅᩩᨲ᩠ᨲᨶ᩠ᨲᩥ. ᨲᩈ᩠ᨾᩣ ᨲᩦᨱᩥᨸᩥ ᨸᨴᨽᩣᨩᨶᩮ ᩅᩥᨲ᩠ᨳᩣᩁᩥᨲᩣᨶᩦᨲᩥ.

‘‘ᨡᩥᨸ᩠ᨸᨾᩮᩅ ᨠᩣᩁᩮᨲᨻ᩠ᨻᨶ᩠ᨲᩥ ᩈᩦᨥᩴ ᩋᨶ᩠ᨲᩮᩣᨴᩈᩣᩉᩮᨿᩮᩅ ᨠᩣᩁᩮᨲᨻ᩠ᨻ’’ᨶ᩠ᨲᩥ ᩍᨴᩴ ᨸᨶ ᨸᩉᩮᩣᨶᨠᨽᩣᩅᩮ ᨸᩩᩁᩥᨾᩈᩥᨠ᩠ᨡᩣᨸᨴᩃᨠ᩠ᨡᨱᩮᨶᩣᨲᩥ ᨴᩦᨸᩮᨲᩩᩴ ᩅᩩᨲ᩠ᨲᩴ. ᨲᩈ᩠ᨾᩣ ᩑᩅᩴ ‘‘ᩈᩦᨥ’’ᨶ᩠ᨲᩥ ᩅᩣ ‘‘ᩃᩉᩩ’’ᨶ᩠ᨲᩥ ᩅᩣ ᩌᨴᩥᨶᩣ ᩋᩅᨲ᩠ᩅᩣᨸᩥ ‘‘ᨴᩈᩣᩉᩣ’’ᨲᩥ ᩅᩩᨲ᩠ᨲᨶ᩠ᨲᩥ. ᩋᨲ᩠ᨳᨲᨠᨳᩥᨶᩔ ᩑᩅᩴ ᩉᩮᩣᨲᩩ, ᩋᨶᨲ᩠ᨳᨲᩮ ᨸᨶ ᨠᨳᩥᨶᩮ ᨠᨳᨶ᩠ᨲᩥ ᩅᩩᨲ᩠ᨲᩮ ᩋᨶᨲ᩠ᨳᨲᩔ ᨸᨭᩥᨠ᩠ᨡᩮᨸᨲᩴ ᨴᩔᩮᨲᩦᨲᩥ ᩅᩩᨲ᩠ᨲᩮᩣ ᩋᨸᩔᨶ᩠ᨲᩮᩣ ᩅᩥᨥᩣᨲᩴ ᩌᨸᨩ᩠ᨩᨲᩦᨲᩥ (ᩅᨩᩥᩁ. ᨭᩦ. ᨸᩣᩁᩣᨩᩥᨠ ᪔᪙᪙-᪕᪐᪐) ᩃᩥᨡᩥᨲᩴ.

ᩋᨠᩣᩃᨧᩦᩅᩁᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪔. ᨸᩩᩁᩣᨱᨧᩦᩅᩁᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᩈᩣᨠᩥᨿᩣᨶᩥᨿᩮᩣ ᩅᩥᨿ ᩈᩩᨴ᩠ᨵᨽᩥᨠ᩠ᨡᩩᩈᨦ᩠ᨥᩮ ᩅᩣ’’ᨲᩥ ᩍᨴᩴ ‘‘ᨽᩥᨠ᩠ᨡᩩᨶᩦ ᨶᩣᨾ ᩏᨽᨲᩮᩣᩈᨦ᩠ᨥᩮ ᩏᨸᩈᨾ᩠ᨸᨶ᩠ᨶᩣ’’ᨲᩥ (ᨸᩣᩁᩣ. ᪕᪐᪕) ᩍᨾᩥᨶᩣ ᩅᩥᩁᩩᨩ᩠ᨫᨲᩦᨲᩥ ᨧᩮ? ᨶ, ᩋᨵᩥᨸ᩠ᨸᩣᨿᩣᨩᩣᨶᨶᨲᩮᩣ. ᨽᩥᨠ᩠ᨡᩪᨶᩴ ᩈᨶ᩠ᨲᩥᨠᩮ ᩏᨸᩈᨾ᩠ᨸᨴᩣᨿ ᨸᨭᩥᨠ᩠ᨡᩥᨲ᩠ᨲᨲ᩠ᨲᩣ ᨲᨴᨶᩩᨸ᩠ᨸᩈᨦ᩠ᨣᨽᨿᩣ ᩑᩅᩴ ᩅᩩᨲ᩠ᨲᨶ᩠ᨲᩥ ᩅᩮᨴᩥᨲᨻ᩠ᨻᩴ.

ᩑᨠᩮᨶ ᩅᨲ᩠ᨳᩩᨶᩣᨲᩥ ᨿᩮᨶ ᨠᩮᨶᨧᩥ ᨸᨮᨾᩮᨶ. ᩋᩅᩩᨲ᩠ᨲᩣ ᩅᩣ ᨵᩮᩣᩅᨲᩦᨲᩥ ᩋᩅᩩᨲ᩠ᨲᩣ ᨵᩮᩣᩅᨲᩥ, ᩁᨩᨲᩥ ᩌᨠᩮᩣᨭᩮᨲᩦᨲᩥ ᩋᨲ᩠ᨳᩮᩣ. ‘‘‘ᩋᩅᩩᨲ᩠ᨲᩣ’ᨲᩥ ᩅᨧᨶᨲᩮᩣ ᩋᩅᩣᨴᩣᨸᩮᨲ᩠ᩅᩣ ᨵᩮᩣᩅᨶᩣᨴᩦᩈᩩ ᩋᨶᩣᨸᨲ᩠ᨲᩦ’’ᨲᩥ ᩃᩥᨡᩥᨲᩴ. ᩍᨵ ᨧᩦᩅᩁᩴ ᨶᩣᨾ ᨶᩥᩅᩣᩈᨶᨸᩣᩁᩩᨸᨶᩪᨸᨣᨾᩮᩅ. ᨿᨴᩥ ᩑᩅᩴ ‘‘ᨶᩥᩅᩣᩈᨶᨸᩣᩁᩩᨸᨶᩪᨸᨣᨾᩮᩅ ᩅᨲ᩠ᨲᨻ᩠ᨻ’’ᨶ᩠ᨲᩥ ᨧᩮ? ᨲᩴ ᨶ ᩅᨲ᩠ᨲᨻ᩠ᨻᩴ ‘‘ᨸᩩᩁᩣᨱᨧᩦᩅᩁ’’ᨶ᩠ᨲᩥ ᩍᨾᩥᨶᩣᩅ ᩈᩥᨴ᩠ᨵᨲ᩠ᨲᩣ. ᩅᩩᨲ᩠ᨲᨬ᩠ᩉᩮᨲᩴ ‘‘ᨸᩩᩁᩣᨱᨧᩦᩅᩁᩴ ᨶᩣᨾ ᩈᨠᩥᩴ ᨶᩥᩅᨲ᩠ᨳᨾ᩠ᨸᩥ ᩈᨠᩥᩴ ᨸᩣᩁᩩᨲᨾ᩠ᨸᩦ’’ᨲᩥ (ᨸᩣᩁᩣ. ᪕᪐᪕).

ᨸᩩᩁᩣᨱᨧᩦᩅᩁᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪕. ᨧᩦᩅᩁᨸ᩠ᨸᨭᩥᨣ᩠ᨣᩉᨱᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩏᨸᨧᩣᩁᩮᩣ ᨴ᩠ᩅᩣᨴᩈᩉᨲ᩠ᨳᩮᩣ. ᩋᨧᩥᨲ᩠ᨲᨠᨲ᩠ᨲᩣ ᨠᨳᩴ ᨸᩴᩈᩩᨠᩪᩃᩴ ᩅᨭ᩠ᨭᨲᩦᨲᩥ ᨧᩮ? ᨲᩣᨿ ᨲᩔ ᨽᩥᨠ᩠ᨡᩩᨶᩮᩣ ᩋᨴᩥᨶ᩠ᨶᨲ᩠ᨲᩣ, ᨽᩥᨠ᩠ᨡᩩᨶᩣ ᨧ ᨲᨲᩮᩣ ᨽᩥᨠ᩠ᨡᩩᨶᩥᨲᩮᩣ ᩋᨣ᩠ᨣᩉᩥᨲᨲ᩠ᨲᩣ ᨧ.

ᨧᩦᩅᩁᨸ᩠ᨸᨭᩥᨣ᩠ᨣᩉᨱᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪖. ᩋᨬ᩠ᨬᩣᨲᨠᩅᩥᨬ᩠ᨬᨲ᩠ᨲᩥᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨬᩣᨲᨠᨸ᩠ᨸᩅᩣᩁᩥᨲᩮ ᩅᩣ ᩅᩥᨬ᩠ᨬᩣᨸᩮᨶ᩠ᨲᩔᩣᨲᩥ ᩑᨲ᩠ᨳ ᨧ ᩈᨦ᩠ᨥᩅᩈᩮᨶ ᨸᩅᩣᩁᩥᨲᩮᩈᩩ ᨸᨾᩣᨱᨾᩮᩅ ᩅᨭ᩠ᨭᨲᩥ. ᨸᩩᨣ᩠ᨣᩃᩥᨠᨸ᩠ᨸᩅᩣᩁᨱᩣᨿ ᨿᩴ ᨿᩴ ᨸᩅᩣᩁᩮᨲᩥ, ᨲᩴ ᨲᩴᨿᩮᩅ ᩅᩥᨬ᩠ᨬᩣᨸᩮᨲᨻ᩠ᨻᨶ᩠ᨲᩥ ᩃᩥᨡᩥᨲᩴ.

ᩋᨬ᩠ᨬᩣᨲᨠᩅᩥᨬ᩠ᨬᨲ᩠ᨲᩥᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪗. ᨲᨲᩩᨲ᩠ᨲᩁᩥᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨸᨠᨲᩥᨿᩣ ᩈᨶ᩠ᨲᩁᩩᨲ᩠ᨲᩁᩮᨶ ᨧᩁᨲᩥ ᨠᨳᩥᨶᨸᩃᩥᨻᩮᩣᨵᩅᩈᩮᨶ ᩅᩣ ᩈᩣᩈᨦ᩠ᨠᩈᩥᨠ᩠ᨡᩣᨸᨴᩅᩈᩮᨶ ᩅᩣ. ᩑᨲ᩠ᨳ ᩈᩥᨿᩣ – ‘‘ᨶ ᨾᨲ᩠ᨲᩴ ᨩᩣᨶᩥᨲ᩠ᩅᩣ ᨻᩉᩩᩴ ᨧᩦᩅᩁᩴ ᩅᩥᨬ᩠ᨬᩣᨸᩮᩔᨶ᩠ᨲᩥ, ᨴᩩᩔᩅᩣᨱᩥᨩ᩠ᨩᩴ ᩅᩣ’’ᨲᩥᩌᨴᩥᨶᩣ (ᨸᩣᩁᩣ. ᪕᪒᪒) ᩏᨩ᩠ᨫᩣᨿᨶ᩠ᨲᩣᨶᩴ ᩈᩩᨲ᩠ᩅᩣ ᨽᨣᩅᩣᨸᩥ ᨨᨻ᩠ᨻᨣ᩠ᨣᩥᨿᩮ ᨽᩥᨠ᩠ᨡᩪ ‘‘ᨠᨳᨬ᩠ᩉᩥ ᨶᩣᨾ ᨲᩩᨾ᩠ᩉᩮ ᨾᩮᩣᨥᨸᩩᩁᩥᩈᩣ ᨶ ᨾᨲ᩠ᨲᩴ ᨩᩣᨶᩥᨲ᩠ᩅᩣ ᨻᩉᩩᩴ ᨧᩦᩅᩁᩴ ᩅᩥᨬ᩠ᨬᩣᨸᩮᩔᨳᩣ’’ᨲᩥ (ᨸᩣᩁᩣ. ᪕᪒᪒) ᩅᨲ᩠ᩅᩣ ᩈᩥᨠ᩠ᨡᩣᨸᨴᩔ ᨸᨬ᩠ᨬᨲ᩠ᨲᨲ᩠ᨲᩣ ᨧ ᩍᨾᩥᩔᩴ ᨠᨦ᩠ᨡᩣᩅᩥᨲᩁᨱᩥᨿᩴ ‘‘ᨻᩉᩩᨧᩦᩅᩁᩅᩥᨬ᩠ᨬᩣᨸᨶᩅᨲ᩠ᨳᩩᩈ᩠ᨾᩥᩴ ᨸᨬ᩠ᨬᨲ᩠ᨲ’’ᨶ᩠ᨲᩥ ᩅᩩᨲ᩠ᨲᨲ᩠ᨲᩣ, ᩈᨾᨶ᩠ᨲᨸᩣᩈᩣᨴᩥᨠᩣᨿᩴ ‘‘ᨶ ᩉᩥ ᩋᨶᨧ᩠ᨨᩥᨶ᩠ᨶᨧᩦᩅᩁᩣ ᩋᨲ᩠ᨲᨶᩮᩣ ᩋᨲ᩠ᨳᩣᨿ ᩈᩣᨡᩣᨸᩃᩣᩈᩴ ᨽᨬ᩠ᨩᩥᨲᩩᩴ ᩃᨽᨶ᩠ᨲᩥ, ᩋᨧ᩠ᨨᩥᨶ᩠ᨶᨧᩦᩅᩁᩣᨶᩴ ᨸᨶ ᩋᨲ᩠ᨳᩣᨿ ᩃᨽᨶ᩠ᨲᩦ’’ᨲᩥ ᩅᩩᨲ᩠ᨲᨲ᩠ᨲᩣ ᨧ ᩋᨬ᩠ᨬᩔᨲ᩠ᨳᩣᨿ ᨸᨾᩣᨱᩴ ᩅᩥᨬ᩠ᨬᩣᨸᩮᨲᩩᩴ ᩅᨭ᩠ᨭᨲᩦᨲᩥ ᨧᩮ? ᨶ, ᨠᩈ᩠ᨾᩣ? ᩋᨬ᩠ᨬᩣᨲᨠᩅᩥᨬ᩠ᨬᨲ᩠ᨲᩥᩈᩥᨠ᩠ᨡᩣᨸᨴᩔ ᩋᨭ᩠ᨮᩩᨸ᩠ᨸᨲ᩠ᨲᩥᨿᩣ ᩑᩅ ᩋᨬ᩠ᨬᩣᨲᨠᩅᩥᨬ᩠ᨬᨲ᩠ᨲᩥ ᩅᩣᩁᩥᨲᩣ. ᨲᩔ ᩈᩥᨠ᩠ᨡᩣᨸᨴᩔ ᩋᨶᩣᨸᨲ᩠ᨲᩥ. ᨸᩣᩊᩥᨿᩴ (ᨸᩣᩁᩣ. ᪕᪒᪑) ‘‘ᩋᨬ᩠ᨬᩔᨲ᩠ᨳᩣᨿᩣ’’ᨲᩥ ᩍᨾᩥᩔᩣ ᩋᨶᩣᨸᨲ᩠ᨲᩥᨸᩣᩊᩥᨿᩣ ᩋᨬ᩠ᨬᩔᨲ᩠ᨳᩣᨿ ᩅᩥᨬ᩠ᨬᩣᨸᩮᨶ᩠ᨲᩮᩣ ᨲᩔ ᨬᩣᨲᨠᨸ᩠ᨸᩅᩣᩁᩥᨲᩮ ᩑᩅ ᩅᩥᨬ᩠ᨬᩣᨸᩮᨲᩥ, ᨶ ᩋᨬ᩠ᨬᩮᨲᩥ ᩅᨧᨶᨲᩮᩣ ᨧ ᩅᩣᩁᩥᨲᩣ. ᨲᩈ᩠ᨾᩣ ᨽᨣᩅᩣᨸᩥ ‘‘ᨻᩉᩩᩴ ᨧᩦᩅᩁᩴ ᩅᩥᨬ᩠ᨬᩣᨸᩮᩔᨳᩣ’’ᨲᩥ (ᨸᩣᩁᩣ. ᪕᪒᪒) ᩅᩥᨣᩁᩉᩥᨲ᩠ᩅᩣ ᩈᩥᨠ᩠ᨡᩣᨸᨴᩴ ᨸᨬ᩠ᨬᩣᨸᩮᨶ᩠ᨲᩮᩣ ‘‘ᩋᨽᩥᩉᨭ᩠ᨮᩩᩴ ᨸᩅᩣᩁᩮᨿ᩠ᨿᩣ’’ᨲᩥ ᩅᩩᨲ᩠ᨲᨶᨿᩮᨶᩮᩅ ᨸᨾᩣᨱᨲᩮᩣ ᨣᩉᨱᩴ ᩋᨶᩩᨩᩣᨶᩥ, ᨶ ᩋᨬ᩠ᨬᩔᨲ᩠ᨳᩣᨿ ᨸᨾᩣᨱᨲᩮᩣ ᩅᩥᨬ᩠ᨬᩣᨸᨶᩴ. ᨿᩈ᩠ᨾᩣ ᨸᨶᩥᨾᩴ ᩈᩥᨠ᩠ᨡᩣᨸᨴᩴ ᩋᨬ᩠ᨬᩔᨲ᩠ᨳᩣᨿ ᩅᩥᨬ᩠ᨬᩣᨸᨶᩅᨲ᩠ᨳᩩᩈ᩠ᨾᩥᩴᨿᩮᩅ ᨸᨬ᩠ᨬᨲ᩠ᨲᩴ, ᨲᩈ᩠ᨾᩣ ᩍᨵ ‘‘ᩋᨬ᩠ᨬᩔᨲ᩠ᨳᩣᨿᩣ’’ᨲᩥ ᨶ ᩅᩩᨲ᩠ᨲᩴ, ᨶ ᨶ ᩃᨻ᩠ᨽᨲᩦᨲᩥ ᨠᨲ᩠ᩅᩣ.

ᩋᨭ᩠ᨮᨠᨳᩣᩈᩩ ‘‘ᩋᨬ᩠ᨬᩣᨲᨠᨸ᩠ᨸᩅᩣᩁᩥᨲᨭ᩠ᨮᩣᨶᩮ ᨸᨠᨲᩥᨿᩣ ᨻᩉᩩᨾ᩠ᨸᩥ ᩅᨭ᩠ᨭᨲᩥ, ᩋᨧ᩠ᨨᩥᨶ᩠ᨶᨠᩣᩁᨱᩣ ᨸᨾᩣᨱᨾᩮᩅ ᩅᨭ᩠ᨭᨲᩦ’’ᨲᩥ ᩅᩩᨲ᩠ᨲᩴ. ᨲᩴ ‘‘ᩋᨶᩣᨸᨲ᩠ᨲᩥ ᨬᩣᨲᨠᩣᨶᩴ ᨸᩅᩣᩁᩥᨲᩣᨶ’’ᨶ᩠ᨲᩥ (ᨸᩣᩁᩣ. ᪕᪒᪖) ᩅᩩᨲ᩠ᨲᩋᨶᩣᨸᨲ᩠ᨲᩥᨸᩣᩊᩥᨿᩣ ᨶ ᩈᨾᩮᨲᩦᨲᩥ ᩈᨾᨶ᩠ᨲᨸᩣᩈᩣᨴᩥᨠᩣᨿᩴ (ᨸᩣᩁᩣ. ᩋᨭ᩠ᨮ. ᪒.᪕᪒᪖) ᩅᩩᨲ᩠ᨲᨲ᩠ᨲᩣ ᩍᨵᩣᨸᩥ ᩅᩩᨲ᩠ᨲᨶᨿᩮᨶᩮᩅ ᨬᩣᨲᨠᨸ᩠ᨸᩅᩣᩁᩥᨲᩮ ᩅᩥᨬ᩠ᨬᩣᨸᩮᨶ᩠ᨲᩔ ᩋᨲ᩠ᨲᨶᩮᩣ ᨵᨶᩮᨶ ᨣᨱ᩠ᩉᨶ᩠ᨲᩔ ᩋᨶᩣᨸᨲ᩠ᨲᩦᨲᩥ ᩃᩥᨡᩥᨲᩴ. ‘‘ᩋᨬ᩠ᨬᩔᨲ᩠ᨳᩣᨿᩣ’’ᨲᩥ ᨶᩥᨴᩣᨶᩅᩥᩁᩮᩣᨵᨲᩮᩣ ᨶ ᩅᩩᨲ᩠ᨲᩴ, ᨲᨳᩣᨸᩥ ᩋᨶᨶ᩠ᨲᩁᩮ ᩅᩩᨲ᩠ᨲᨶᨿᩮᨶᩮᩅ ᩃᨻ᩠ᨽᨲᩥ ᩑᩅᩣᨲᩥ ᩅᨴᨶ᩠ᨲᩥ.

ᨲᨲᩩᨲ᩠ᨲᩁᩥᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪘. ᩏᨸᨠ᩠ᨡᨭᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨸᨮᨾᩏᨸᨠ᩠ᨡᨭᩮ ‘‘ᨸᩩᨻ᩠ᨻᩮ ᩋᨸ᩠ᨸᩅᩣᩁᩥᨲᩮᩣ’’ᨲᩥ (ᨸᩣᩁᩣ. ᪕᪒᪘) ᩅᨧᨶᨲᩮᩣ ᨲᩈ᩠ᨾᩥᩴ ᨡᨱᩮ ᨸᩅᩣᩁᩥᨲᩮᩣᨸᩥ ᩋᨸ᩠ᨸᩅᩣᩁᩥᨲᩮᩣᩅ ᩉᩮᩣᨲᩦᨲᩥ ᩅᩮᨴᩥᨲᨻ᩠ᨻᩴ.

ᩏᨸᨠ᩠ᨡᨭᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪙. ᨴᩩᨲᩥᨿᩏᨸᨠ᩠ᨡᨭᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨴᩩᨲᩥᨿᩏᨸᨠ᩠ᨡᨭᩮᨶ ᨠᩥᩴ ᨸᨿᩮᩣᨩᨶᨶ᩠ᨲᩥ ᨧᩮ? ᨶᨲ᩠ᨳᩥ ᨸᨿᩮᩣᨩᨶᩴ, ᨠᩮᩅᩃᩴ ᩋᨭ᩠ᨮᩩᨸ᩠ᨸᨲ᩠ᨲᩥᩅᩈᩮᨶ ᨸᨶ ᨸᨬ᩠ᨬᨲ᩠ᨲᩴ ᨽᩥᨠ᩠ᨡᩩᨶᩥᨿᩣ ᩁᩉᩮᩣᨶᩥᩈᨩ᩠ᨩᩈᩥᨠ᩠ᨡᩣᨸᨴᩴ ᩅᩥᨿ. ᩑᩅᩴ ᩈᨶ᩠ᨲᩮ ᩈᨦ᩠ᨣᩦᨲᩥᨠᩣᩁᨠᩮᩉᩥ ᩈᨦ᩠ᨣᩦᨲᩥᩴ ᩋᨶᩣᩁᩮᩣᨸᩮᨲᨻ᩠ᨻᩴ ᨽᩅᩮᨿ᩠ᨿ ᩅᩥᨶᩣᨸᩥ ᨲᩮᨶ ᨲᨴᨲ᩠ᨳᩈᩥᨴ᩠ᨵᩥᨲᩮᩣ, ᩋᨶᩥᩔᩁᨲ᩠ᨲᩣ, ᩋᨶᩣᩁᩮᩣᨸᩮᨲᩩᩴ ᩋᨶᩩᨬ᩠ᨬᩣᨲᨲ᩠ᨲᩣ ᨧ. ᩅᩩᨲ᩠ᨲᨬ᩠ᩉᩮᨲᩴ ‘‘ᩌᨠᨦ᩠ᨡᨾᩣᨶᩮᩣ, ᩌᨶᨶ᩠ᨴ, ᩈᨦ᩠ᨥᩮᩣ…ᨸᩮ… ᩈᨾᩪᩉᨶᩮᨿ᩠ᨿᩣ’’ᨲᩥ (ᨴᩦ. ᨶᩥ. ᪒.᪒᪑᪖; ᨧᩪᩊᩅ. ᪔᪔᪑). ᩍᨴᩴ ᩈᨻ᩠ᨻᨾᨠᩣᩁᨱᩴ. ᨶ ᩉᩥ ᨻᩩᨴ᩠ᨵᩣ ᩋᨸ᩠ᨸᨿᩮᩣᨩᨶᩴ ᩅᨧᨶᩴ ᨶᩥᨧ᩠ᨨᩣᩁᩮᨶ᩠ᨲᩥ, ᨸᨣᩮᩅ ᩈᩥᨠ᩠ᨡᩣᨸᨴᩴ. ᨲᩮᨶᩮᩅᩣᩉ ᩋᨭ᩠ᨮᨠᨳᩣᨿᩴ ‘‘ᩍᨾᩥᨶᩣᩅ ᨶᨿᩮᨶ ᩋᨲ᩠ᨳᩮᩣ ᩅᩮᨴᩥᨲᨻ᩠ᨻᩮᩣ. ᩍᨴᨬ᩠ᩉᩥ ᨸᩩᩁᩥᨾᩔ ᩋᨶᩩᨸᨬ᩠ᨬᨲ᩠ᨲᩥᩈᨴᩥᩈ’’ᨶ᩠ᨲᩥᩌᨴᩥ. ᩋᨶᩩᨸᨬ᩠ᨬᨲ᩠ᨲᩥ ᨧ ᨶᩥᨸ᩠ᨸᨿᩮᩣᨩᨶᩴ ᨶᨲ᩠ᨳᩥ. ᨲᩴᩈᨴᩥᩈᨬ᩠ᨧᩮᨲᩴ, ᨶ ᨶᩥᨸ᩠ᨸᨿᩮᩣᨩᨶᨶ᩠ᨲᩥ ᨴᩔᩥᨲᩴ ᩉᩮᩣᨲᩥ. ᩑᩅᩴ ᩈᨶ᩠ᨲᩮ ᨠᩮᩣ ᨸᨶᩮᨲ᩠ᨳ ᩋᨲ᩠ᨳᩅᩥᩈᩮᩈᩮᩣᨲᩥ? ᨲᨲᩮᩣ ᩌᩉ ‘‘ᨠᩮᩅᩃᩴ ᨲᨲ᩠ᨳ ᩑᨠᩔ ᨸᩦᩊᩣ ᨠᨲᩣ, ᩍᨵ ᨴ᩠ᩅᩥᨶ᩠ᨶᩴ, ᩋᨿᨾᩮᨲ᩠ᨳ ᩅᩥᩈᩮᩈᩮᩣ’’ᨲᩥ. ᩍᨾᩥᨶᩣ ᩋᨲ᩠ᨳᩅᩥᩈᩮᩈᩮᨶ ᨠᩮᩣ ᨸᨶᨬ᩠ᨬᩮᩣ ᩋᨲᩥᩁᩮᨠᨲ᩠ᨳᩮᩣ ᨴᩔᩥᨲᩮᩣᨲᩥ? ᨸᩮᩣᩁᩣᨱᨣᨱ᩠ᨮᩥᨸᨴᩮ ᨲᩣᩅ ᩅᩩᨲ᩠ᨲᩴ ‘‘ᩑᨠᩈ᩠ᨾᩥᨾ᩠ᨸᩥ ᩅᨲ᩠ᨳᩩᩈ᩠ᨾᩥᩴ ᩏᨽᩥᨶ᩠ᨶᨾ᩠ᨸᩥ ᨸᩦᩊᩣ ᨠᩣᨲᩩᩴ ᨶ ᩅᨭ᩠ᨭᨲᩦᨲᩥ ᩋᨿᨾᨲᩥᩁᩮᨠᨲ᩠ᨳᩮᩣ ᨴᩔᩥᨲᩮᩣ’’ᨲᩥ. ᨲᩮᨶᩮᨲᩴ ᨴᩦᨸᩮᨲᩥ ‘‘ᨶ ᨠᩮᩅᩃᩴ ᨸᨭᩥᩃᨴ᩠ᨵᨧᩦᩅᩁᨣᨱᨶᩣᨿ ᩑᩅ ᩌᨸᨲ᩠ᨲᩥᨣᨱᨶᩣ, ᨸᩦᩊᩥᨲᨸᩩᨣ᩠ᨣᩃᩈᨦ᩠ᨡᩣᨲᩅᨲ᩠ᨳᩩᨣᨱᨶᩣᨿᨸᩦ’’ᨲᩥ.

ᩉᩮᩣᨶ᩠ᨲᩥ ᨧᩮᨲ᩠ᨳ –

‘‘ᩅᨲ᩠ᨳᩩᨲᩮᩣ ᨣᨱᨶᩣᨿᨸᩥ, ᩈᩥᨿᩣ ᩌᨸᨲ᩠ᨲᩥ ᨶᩮᨠᨲᩣ;

ᩍᨲᩥ ᩈᨶ᩠ᨴᩔᨶᨲ᩠ᨳᨬ᩠ᨧ, ᨴᩩᨲᩥᨿᩪᨸᨠ᩠ᨡᨭᩴ ᩍᨵ.

‘‘ᨠᩣᨿᩈᩴᩈᨣ᩠ᨣᩈᩥᨠ᩠ᨡᩣᨿ, ᩅᩥᨽᨦ᩠ᨣᩮ ᩅᩥᨿ ᨠᩥᨶ᩠ᨲᩮᨲᩴ;

ᩑᨠᩥᨲ᩠ᨳᩥᨿᩣᨸᩥ ᨶᩮᨠᨲᩣ, ᩌᨸᨲ᩠ᨲᩦᨶᩴ ᨸᨿᩮᩣᨣᨲᩮᩣ’’ᨲᩥ. (ᩅᨩᩥᩁ. ᨭᩦ. ᨸᩣᩁᩣᨩᩥᨠ ᪕᪓᪒);

ᩋᨸᩥᨧᩮᨲᩴ ᩈᩥᨠ᩠ᨡᩣᨸᨴᩴ ᨲᩴᨩᩣᨲᩥᨠᩮᩈᩩ ᩈᩥᨠ᩠ᨡᩣᨸᨴᩮᩈᩩ ᩈᨻ᩠ᨻᩮᩈᩩᨸᩥ ᨣᩉᩮᨲᨻ᩠ᨻᩅᩥᨶᩥᨧ᩠ᨨᨿᩔ ᨴᩔᨶᨸ᩠ᨸᨿᩮᩣᨩᨶᨶ᩠ᨲᩥ ᩅᩮᨴᩥᨲᨻ᩠ᨻᩴ. ᩌᩉ ᨧ –

‘‘ᩋᨬ᩠ᨬᩣᨲᩥᨠᩣᨿ ᨻᩉᩩᨲᩣᨿ ᩅᩥᨾᩥᩔᨲᩣᨿ;

ᩌᨸᨲ᩠ᨲᩥᨿᩣᨸᩥ ᨻᩉᩩᨲᩣ ᨧ ᩅᩥᨾᩥᩔᨲᩣ ᨧ;

ᩍᨧ᩠ᨧᩮᩅᨾᩣᨴᩥᩅᩥᨵᩥᩈᨾ᩠ᨽᩅᨴᩔᨶᨲ᩠ᨳᩴ;

ᩈᨲ᩠ᨳᩣ ᩏᨸᨠ᩠ᨡᨭᨾᩥᨴᩴ ᨴᩩᨲᩥᨿᩴ ᩋᩅᩮᩣᨧᩣ’’ᨲᩥ. (ᩅᨩᩥᩁ. ᨭᩦ. ᨸᩣᩁᩣᨩᩥᨠ ᪕᪓᪒);

ᨲᩔᩣᨿᩴ ᩈᨦ᩠ᨡᩮᨸᨲᩮᩣ ᩋᨵᩥᨸ᩠ᨸᩣᨿᨸᩩᨻ᩠ᨻᨦ᩠ᨣᨾᩣ ᩅᩥᨧᩣᩁᨱᩣ – ᨸᩩᩁᩣᨱᨧᩦᩅᩁᩴ ᩑᨠᨾᩮᩅ ᨽᩥᨠ᩠ᨡᩩ ᨽᩥᨠ᩠ᨡᩩᨶᩦᩉᩥ ᨴ᩠ᩅᩦᩉᩥ, ᨻᩉᩪᩉᩥ ᩅᩣ ᨵᩮᩣᩅᩣᨸᩮᨲᩥ, ᨽᩥᨠ᩠ᨡᩩᨶᩥᨣᨱᨶᩣᨿ ᨸᩣᨧᩥᨲ᩠ᨲᩥᨿᨣᨱᨶᩣ. ᨲᨳᩣ ᨴ᩠ᩅᩥᨶ᩠ᨶᩴ, ᨻᩉᩪᨶᩴ ᩅᩣ ᩈᩣᨵᩣᩁᨱᩴ ᩑᨠᨾᩮᩅ ᨧᩦᩅᩁᩴ ᩋᨬ᩠ᨬᨲᩕ ᨸᩣᩁᩥᩅᨲ᩠ᨲᨠᩣ ᨸᨭᩥᨣ᩠ᨣᨱ᩠ᩉᩣᨲᩥ, ᩍᨵᩣᨸᩥ ᨲᨳᩣ ᨴ᩠ᩅᩥᨶ᩠ᨶᩴ, ᨻᩉᩪᨶᩴ ᩅᩣ ᩈᩣᨵᩣᩁᨱᨾᩮᨠᩴ ᩅᩥᨬ᩠ᨬᩣᨸᩮᨲᩥ, ᩅᩥᨬ᩠ᨬᨲ᩠ᨲᨸᩩᨣ᩠ᨣᩃᨣᨱᨶᩣᨿ ᩌᨸᨲ᩠ᨲᩥᨣᨱᨶᩣ. ᨲᨳᩣ ᩋᨬ᩠ᨬᩮᩈᩩᨸᩥ ᩑᩅᩁᩪᨸᩮᩈᩩ ᩈᩥᨠ᩠ᨡᩣᨸᨴᩮᩈᩩ ᨶᨿᩮᩣ ᨶᩮᨲᨻ᩠ᨻᩮᩣ. ᩋᨿᩴ ᨲᩣᩅ ᨻᩉᩩᨲᩣᨿ ᨶᨿᩮᩣ.

ᩅᩥᨾᩥᩔᨲᩣᨿ ᨸᨶ ᨬᩣᨲᩥᨠᩣᨿ, ᩋᨬ᩠ᨬᩣᨲᩥᨠᩣᨿ ᨧ ᩑᨠᩴ ᨵᩮᩣᩅᩣᨸᩮᨲᩥ, ᩑᨠᨲᩮᩣ ᨶᩥᨭ᩠ᨮᩣᨸᨶᩮ ᩑᨠᩴ ᨸᩣᨧᩥᨲ᩠ᨲᩥᨿᩴ. ᩋᨳ ᨬᩣᨲᩥᨠᩣ ᨸᨮᨾᩴ ᨳᩮᩣᨠᩴ ᨵᩮᩣᩅᩥᨲ᩠ᩅᩣ ᨮᩥᨲᩣ, ᨸᩩᨶ ᩋᨬ᩠ᨬᩣᨲᩥᨠᩣ ᩈᩩᨵᩮᩣᨲᩴ ᨠᩁᩮᩣᨲᩥ, ᨶᩥᩔᨣ᩠ᨣᩥᨿᩴ ᨸᩣᨧᩥᨲ᩠ᨲᩥᨿᩴ. ᩋᨳ ᩋᨬ᩠ᨬᩣᨲᩥᨠᩣ ᨸᨮᨾᩴ ᨵᩮᩣᩅᨲᩥ, ᨸᨧ᩠ᨨᩣ ᨬᩣᨲᩥᨠᩣ ᩈᩩᨵᩮᩣᨲᩴ ᨠᩁᩮᩣᨲᩥ, ᩋᨬ᩠ᨬᩣᨲᩥᨠᩣᨿ ᨸᨿᩮᩣᨣᩅᩈᩮᨶ ᨽᩥᨠ᩠ᨡᩩᨶᩮᩣ ᨴᩩᨠ᩠ᨠᨭᨾᩮᩅ. ᩋᨬ᩠ᨬᩣᨲᩥᨠᩣᨿ, ᨬᩣᨲᩥᨠᩣᨿ ᨧ ᩋᨬ᩠ᨬᩣᨲᩥᨠᩈᨬ᩠ᨬᩦ, ᩅᩮᨾᨲᩥᨠᩮᩣ, ᨬᩣᨲᩥᨠᩈᨬ᩠ᨬᩦ ᩅᩣ ᨵᩮᩣᩅᩣᨸᩮᨲᩥ, ᨿᨳᩣᩅᩩᨲ᩠ᨲᨶᨿᩮᨶ ᨶᩥᩔᨣ᩠ᨣᩥᨿᨴᩩᨠ᩠ᨠᨭᩣᨴᩥᩌᨸᨲ᩠ᨲᩥᨽᩮᨴᨣᨱᨶᩣ ᩅᩮᨴᩥᨲᨻ᩠ᨻᩣ. ᨲᨳᩣ ᩋᨬ᩠ᨬᩣᨲᩥᨠᩣᨿ, ᨬᩣᨲᩥᨠᩣᨿ ᨧ ᩈᨶ᩠ᨲᨠᩴ ᨧᩦᩅᩁᩴ ᩏᨽᩮᩣᩉᩥ ᩑᨠᨲᩮᩣ ᨴᩥᨿ᩠ᨿᨾᩣᨶᩴ ᨸᨭᩥᨣ᩠ᨣᨱ᩠ᩉᩣᨲᩥ, ᨶᩥᩔᨣ᩠ᨣᩥᨿᨾᩮᩅ. ᩋᨳ ᩋᨬ᩠ᨬᩣᨲᩥᨠᩣᨿ ᩑᩅ ᩉᨲ᩠ᨳᨲᩮᩣ ᨸᨭᩥᨣ᩠ᨣᨱ᩠ᩉᩣᨲᩥ, ᨶᩥᩔᨣ᩠ᨣᩥᨿᨾᩮᩅ. ᩋᨳ ᨬᩣᨲᩥᨠᩣᨿ ᩉᨲ᩠ᨳᨲᩮᩣ ᨸᨭᩥᨣ᩠ᨣᨱ᩠ᩉᩣᨲᩥ, ᩋᨶᩣᨸᨲ᩠ᨲᩥ. ᩋᨳ ᩏᨽᩮᩣᩈᩩ ᩋᨬ᩠ᨬᩣᨲᩥᨠᩣᨴᩥᩈᨬ᩠ᨬᩦ, ᩅᩩᨲ᩠ᨲᨶᨿᩮᨶᩮᩅ ᨶᩥᩔᨣ᩠ᨣᩥᨿᨴᩩᨠ᩠ᨠᨭᩣᨴᩥᩌᨸᨲ᩠ᨲᩥᨽᩮᨴᨣᨱᨶᩣ ᩅᩮᨴᩥᨲᨻ᩠ᨻᩣ. ᨲᨳᩣ ᩋᨬ᩠ᨬᩣᨲᩥᨠᩅᩥᨬ᩠ᨬᨲ᩠ᨲᩥᩌᨴᩦᩈᩩᨸᩥ ᨿᨳᩣᩈᨾ᩠ᨽᩅᩴ ᨶᨿᩮᩣ ᨶᩮᨲᨻ᩠ᨻᩮᩣ. ᩋᨿᩴ ᩅᩥᨾᩥᩔᨲᩣᨿ ᨶᨿᩮᩣ.

ᩌᨴᩥᩈᨴ᩠ᨴᩮᨶ ᨸᨶ ᩋᨶᩮᨠᩮ ᩋᨬ᩠ᨬᩣᨲᩥᨠᩣ ᩅᩥᨬ᩠ᨬᨲ᩠ᨲᩣ, ᩅᩥᨬ᩠ᨬᨲ᩠ᨲᨸᩩᨣ᩠ᨣᩃᨣᨱᨶᩣᨿ ᨴᩩᨠ᩠ᨠᨭᩴ. ᩑᨠᩮᩣ ᨴᩮᨲᩥ, ᩑᨠᩮᩣ ᨶ ᨴᩮᨲᩥ, ᨶᩥᩔᨣ᩠ᨣᩥᨿᩴ. ᩋᨳ ᩋᩅᩥᨬ᩠ᨬᨲ᩠ᨲᩮᩣ ᨴᩮᨲᩥ, ᨶ ᨶᩥᩈᨣ᩠ᨣᩥᨿᩴ. ᩋᨳ ᩅᩥᨬ᩠ᨬᨲ᩠ᨲᩣᩅᩥᨬ᩠ᨬᨲ᩠ᨲᩣᨶᩴ ᩈᩣᨵᩣᩁᨱᩴ ᩅᩥᨬ᩠ᨬᨲ᩠ᨲᩮᩣ ᨴᩮᨲᩥ, ᨶᩥᩔᨣ᩠ᨣᩥᨿᩴ. ᩏᨽᩮᩣ ᨴᩮᨶ᩠ᨲᩥ, ᨶᩥᩔᨣ᩠ᨣᩥᨿᨾᩮᩅ. ᩋᩅᩥᨬ᩠ᨬᨲ᩠ᨲᩮᩣ ᨴᩮᨲᩥ, ᨶᩥᩔᨣ᩠ᨣᩥᨿᩮᨶ ᩋᨶᩣᨸᨲ᩠ᨲᩥ. ᩅᩥᨬ᩠ᨬᨲ᩠ᨲᩔ ᩅᨧᨶᩮᨶ ᩋᩅᩥᨬ᩠ᨬᨲ᩠ᨲᩮᩣ ᨴᩮᨲᩥ, ᩋᨶᩣᨸᨲ᩠ᨲᩥ ᩑᩅ. ᨲᨳᩣ ᩏᨸᨠ᩠ᨡᨭᩣᨴᩦᩈᩩᨸᩥ ᨿᨳᩣᩈᨾ᩠ᨽᩅᩴ ᨶᨿᩮᩣ ᨶᩮᨲᨻ᩠ᨻᩮᩣ.

ᩑᨲ᩠ᨲᩣᩅᨲᩣ ᩈᨦ᩠ᨡᩮᨸᨲᩮᩣ ᩋᨬ᩠ᨬᩣᨲᩥᨠᩣᨿᩣᨴᩥᨣᩣᨳᩣ ᩅᩩᨲ᩠ᨲᩣᨵᩥᨸ᩠ᨸᩣᨿᩣ ᩉᩮᩣᨲᩥ. ᨿᩴ ᨸᨶᩮᨲ᩠ᨳ ᨽᩥᨠ᩠ᨡᩩᨶᩥᨿᩣ ᩁᩉᩮᩣᨶᩥᩈᨩ᩠ᨩᩈᩥᨠ᩠ᨡᩣᨸᨴᩴ ᨶᩥᨸ᩠ᨸᨿᩮᩣᨩᨶᨲᩣᨿ ᨶᩥᨴᩔᨶᩴ ᩅᩩᨲ᩠ᨲᩴ, ᨲᩔ ᨸᨿᩮᩣᨩᨶᩅᩥᩈᩮᩈᩮᩣ ᨲᩈ᩠ᨾᩥᩴᨿᩮᩅ ᩌᩅᩥᨽᩅᩥᩔᨲᩦᨲᩥ. ᩑᩅᨾᩮᩅ ᩋᨬ᩠ᨬᨲ᩠ᨳᨸᩥ ᩅᨧᨶᩮᨶ, ᩅᩥᩈᩮᩈᩋᨭ᩠ᨮᩩᨸ᩠ᨸᨲ᩠ᨲᩥᩅᩈᩮᨶ ᨧ ᩈᩥᨠ᩠ᨡᩣᨸᨴᩮᩈᩩ ᨬᩣᨲᨻ᩠ᨻᩴ ᩅᩥᩈᩮᩈᨸ᩠ᨸᨿᩮᩣᨩᨶᨶ᩠ᨲᩥ.

ᨴᩩᨲᩥᨿᩏᨸᨠ᩠ᨡᨭᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪑᪐. ᩁᩣᨩᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᨮᩣᨶᩴ ᨽᨬ᩠ᨩᨲᩥ, ᩌᨣᨲᨠᩣᩁᨱᩴ ᩅᩥᨶᩣᩈᩮᨲᩦ’’ᨲᩥ ᩅᩩᨲ᩠ᨲᨲ᩠ᨲᩣ ᨸᩩᨶ ᨧᩮᩣᨴᨶᩴ ᨶ ᩃᨽᨲᩦᨲᩥ ᩑᨠᩮ. ᩌᨣᨾᨶᩔ ᩈᩣᨲ᩠ᨳᨠᩴ ᨶ ᩉᩮᩣᨲᩥ, ᨧᩦᩅᩁᩴ ᨶ ᩃᨽᩥᩔᨲᩥ ᨸᨭᩥᩈᨶ᩠ᨳᩣᩁᩔ ᨠᨲᨲ᩠ᨲᩣᨲᩥ ᩑᨠᩮ. ᨧᩮᩣᨴᨶᩣᩃᨠ᩠ᨡᨱᩴ ᨶ ᩉᩮᩣᨲᩦᨲᩥ ᨠᨲ᩠ᩅᩣ ᩅᩩᨲ᩠ᨲᨶ᩠ᨲᩥ ᩑᨠᩮ. ‘‘ᨵᨾ᩠ᨾᨴᩮᩈᨶᩣᨵᩥᨸ᩠ᨸᩣᨿᩣᨴᩥᨶᩣ ᨶ ᨸᨭᩥᩈᨶ᩠ᨳᩣᩁᩮᩣ ᨠᩣᨲᨻ᩠ᨻᩮᩣ’’ᨲᩥ ᩏᨸᨲᩥᩔᨲ᩠ᨳᩮᩁᩮᩣ ‘‘‘ᩌᨣᨲᨠᩣᩁᨱᩴ ᩅᩥᨶᩣᩈᩮᨲᩦ’ᨲᩥ ᨧᩮᩣᨴᨶᩣᨮᩣᨶᩣᨶᩥ ᨽᨬ᩠ᨩᨲᩥ, ᨧᩮᩣᨴᩮᨲᩩᨠᩣᨾᩮᩣ ᩋᨠᨲ᩠ᨲᨻ᩠ᨻᨾᨠᩣᩈᩥ, ᨲᨸ᩠ᨸᨧ᩠ᨧᨿᩣ ᩅᨲ᩠ᨲᨽᩮᨴᩮ ᨴᩩᨠ᩠ᨠᨭ’’ᨶ᩠ᨲᩥ ᨧ ᩅᨴᨲᩥ. ᨵᨾ᩠ᨾᩈᩥᩁᩥᨲ᩠ᨳᩮᩁᩮᩣ ᨸᨶ ‘‘ᩌᩈᨶᩮ ᨧᩮ ᨶᩥᩈᩦᨴᨲᩥ, ᩑᨠᩣᨿ ᨶᩥᩈᨩ᩠ᨩᩣᨿ ᨴ᩠ᩅᩮ ᨮᩣᨶᩣᨶᩥ ᨽᨬ᩠ᨩᨲᩥ. ᩌᨾᩥᩈᩴ ᨧᩮ ᨸᨭᩥᨣ᩠ᨣᨱ᩠ᩉᩣᨲᩥ, ᩑᨠᩮᨶ ᨸᨭᩥᨣ᩠ᨣᩉᨱᩮᨶ ᨴ᩠ᩅᩮ ᨮᩣᨶᩣᨶᩥ ᨽᨬ᩠ᨩᨲᩥ. ᨵᨾ᩠ᨾᩴ ᨧᩮ ᨽᩣᩈᨲᩥ, ᨵᨾ᩠ᨾᨴᩮᩈᨶᩣᩈᩥᨠ᩠ᨡᩣᨸᨴᩮ ᩅᩩᨲ᩠ᨲᨸᩁᩥᨧ᩠ᨨᩮᨴᩣᨿ ᩑᨠᩣᨿ ᩅᩣᨧᩣᨿ ᨴ᩠ᩅᩮ ᨮᩣᨶᩣᨶᩥ ᨽᨬ᩠ᨩᨲᩥ. ᨲᩴ ᩈᨶ᩠ᨵᩣᨿ ‘ᩌᨣᨲᨠᩣᩁᨱᩴ ᩅᩥᨶᩣᩈᩮᨲᩦ’ᨲᩥ ᩅᩩᨲ᩠ᨲ’’ᨶ᩠ᨲᩥ ᩅᨴᨲᩥ. ‘‘ᩑᩈᩮᩣ ᨡᩮᩣ’’ᨲᩥ ᩅᩩᨲ᩠ᨲᩮᨶ ᩈᨬ᩠ᨬᨲ᩠ᨲᩮᩣ ᩑᨠᩮᩣ, ‘‘ᩋᨿᩴ ᩅᩮᨿ᩠ᨿᩣᩅᨧ᩠ᨧᨠᩁᩮᩣᨲᩥ…ᨸᩮ… ᩋᩅᩩᨲ᩠ᨲᩮᨸᩥ ᨧᩮᩣᨴᩮᨲᩩᩴ ᩅᨭ᩠ᨭᨲᩦ’’ᨲᩥ ᩅᩩᨲ᩠ᨲᩮᩣ ᨴᩩᨲᩥᨿᩮᩣ, ᩈᨧᩮ ᨸᨶ ᨴᩪᨲᩮᩣ ᨣᨧ᩠ᨨᨶ᩠ᨲᩮᩣᩅ ‘‘ᩋᩉᩴ ᨲᩔ ᩉᨲ᩠ᨳᩮ ᨴᩔᩣᨾᩦ’’ᨲᩥᩌᨴᩥᨶᩣ ᩅᩩᨲ᩠ᨲᩮᩣ ᨲᨲᩥᨿᩮᩣ, ‘‘ᩋᨬ᩠ᨬᩴ ᩅᩣ ᨸᩮᩈᩮᨲ᩠ᩅᩣ ᩌᩁᩮᩣᨧᩣᨸᩮᨲᩦ’’ᨲᩥ ᩅᩩᨲ᩠ᨲᩮᩣ ᨧᨲᩩᨲ᩠ᨳᩮᩣᨲᩥ ᨿᨳᩣ ᨽᩥᨠ᩠ᨡᩩᨶᩣ ᨶᩥᨴ᩠ᨴᩥᨭ᩠ᨮᩣ ᨧᨲ᩠ᨲᩣᩁᩮᩣ, ᨲᨳᩮᩅ ᨴᩪᨲᩮᨶ ᨶᩥᨴ᩠ᨴᩥᨭ᩠ᨮᩣ ᨧᨲ᩠ᨲᩣᩁᩮᩣ. ᨾᩩᨡᩅᩮᩅᨭᩥᨠᨠᨸ᩠ᨸᩥᨿᨠᩣᩁᨠᩮᩣ, ᨸᩁᨾ᩠ᨾᩩᨡᨠᨸ᩠ᨸᩥᨿᨠᩣᩁᨠᩮᩣ ᨧᩮᨲᩥ ᩑᨲᩮᩈᩩ ᩋᨬ᩠ᨬᩣᨲᨠᩋᨸ᩠ᨸᩅᩣᩁᩥᨲᩮᩈᩩ ᩅᩥᨿ ᨸᨭᩥᨸᨩ᩠ᨩᩥᨲᨻ᩠ᨻᨶ᩠ᨲᩥ ᩃᩥᨡᩥᨲᩴ.

ᩁᩣᨩᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨧᩦᩅᩁᩅᨣ᩠ᨣᩮᩣ ᨸᨮᨾᩮᩣ.

᪒. ᩑᩊᨠᩃᩮᩣᨾᩅᨣ᩠ᨣᩮᩣ

᪑. ᨠᩮᩣᩈᩥᨿᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨠᩣᩁᩣᨸᩮᨿ᩠ᨿᩣᨲᩥ ᩋᨲ᩠ᨲᨶᩮᩣ ᨧ ᨸᩁᩔ ᨧ ᩏᨽᩥᨶ᩠ᨶᨬ᩠ᨧ ᨠᩮᩣᩈᩥᨿᩴ ᩑᨠᨲᩮᩣ ᨣᨱ᩠ᩉᩥᨲ᩠ᩅᩣ ᩅᩩᨲ᩠ᨲᩴ, ᩏᨽᩮᩣ ᩅᩣ ᩑᨠᨲᩮᩣ ᨠᩁᩮᩣᨶ᩠ᨲᩦᨲᩥ ᩋᨲ᩠ᨳᨲᩮᩣ ᩅᩮᨴᩥᨲᨻ᩠ᨻᩴ. ᨲᨲ᩠ᨳ ᩋᨲ᩠ᨲᨶᩣ ᨠᨲᩴ ᨧᩮ, ‘‘ᨶᩥᩔᨩ᩠ᨩᨶᨠᩣᩃᩮ ᩈᨿᩴ ᨠᨲᩴ ᨶᩥᩔᨣ᩠ᨣᩥᨿ’’ᨶ᩠ᨲᩥ ᩅᨲ᩠ᨲᨻ᩠ᨻᩴ. ᩏᨽᩮᩣᩉᩥ ᨧᩮ ᨠᨲᩴ, ᨿᨳᩣᨸᩣᩊᩥᨾᩮᩅ.

ᨠᩮᩣᩈᩥᨿᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪒. ᩈᩩᨴ᩠ᨵᨠᩣᩊᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨿᨳᩣ ᨸᨮᨾᩮ ‘‘ᩑᨠᩮᨶᨸᩥ ᨠᩮᩣᩈᩥᨿᩴᩈᩩᨶᩣ’’ᨲᩥ (ᨠᨦ᩠ᨡᩣ. ᩋᨭ᩠ᨮ. ᨠᩮᩣᩈᩥᨿᩈᩥᨠ᩠ᨡᩣᨸᨴᩅᨱ᩠ᨱᨶᩣ) ᩅᩩᨲ᩠ᨲᩴ, ᨲᨳᩣ ᩍᨵ ‘‘ᩑᨠᩮᨶᨸᩥ ᩋᨬ᩠ᨬᩮᨶ ᩋᨾᩥᩔᩥᨲᩣᨶ’’ᨶ᩠ᨲᩥ ᩅᨧᨶᩣᨽᩣᩅᨲᩮᩣ ᩋᨬ᩠ᨬᩮᨶ ᨾᩥᩔᨽᩣᩅᩮ ᩈᨲᩥᨸᩥ ᩋᨸᨬ᩠ᨬᩣᨿᨾᩣᨶᩁᩪᨸᨠᩴ ᨧᩮ, ‘‘ᩈᩩᨴ᩠ᨵᨠᩣᩊᨠ’’ᨾᩥᨧ᩠ᨧᩮᩅ ᩅᩩᨧ᩠ᨧᨲᩦᨲᩥ ᩅᨴᨶ᩠ᨲᩥ.

ᩈᩩᨴ᩠ᨵᨠᩣᩊᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪓. ᨴ᩠ᩅᩮᨽᩣᨣᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᨲᩩᩃᨿᩥᨲ᩠ᩅᩣ’’ᨲᩥ ᩅᨧᨶᨲᩮᩣ ᨿᨳᩣ ᨲᩩᩃᩣᨵᩣᩁᨱᩣᨿ ᨠᩣᩊᨠᩣᨵᩥᨠᩣ ᨶ ᩉᩮᩣᨶ᩠ᨲᩥ, ᨲᨳᩣ ᨠᩣᩊᨠᩣᨶᩴ ᨴ᩠ᩅᩮ ᨽᩣᨣᩣ ᨣᩉᩮᨲᨻ᩠ᨻᩣ ᩏᨠ᩠ᨠᨭ᩠ᨮᨸᩁᩥᨧ᩠ᨨᩮᨴᩮᨶ. ‘‘ᩑᨠᩔᩣᨸᩥ ᨠᩣᩊᨠᩃᩮᩣᨾᩔ ᩋᨲᩥᩁᩮᨠᨽᩣᩅᩮ ᨶᩥᩔᨣ᩠ᨣᩥᨿᨶ᩠ᨲᩥ ᩅᨧᨶᩴ ᨲᩩᩃᩣᨵᩣᩁᨱᩣᨿ ᨠᩥᨬ᩠ᨧᩣᨸᩥ ᨶ ᩈᨾᩮᨲᩥ, ᩋᨧᩥᨲ᩠ᨲᨠᨲ᩠ᨲᩣ ᨸᨶ ᩈᩥᨠ᩠ᨡᩣᨸᨴᩔ ᨸᩩᨻ᩠ᨻᩮ ᨲᩩᩃᩣᨿ ᨵᩣᩁᨿᩥᨲ᩠ᩅᩣ ᨮᨸᩥᨲᩮᩈᩩ ᩑᨠᨾ᩠ᨸᩥ ᩃᩮᩣᨾᩴ ᨲᨲ᩠ᨳ ᨸᨲᩮᨿ᩠ᨿ, ᨶᩥᩔᨣ᩠ᨣᩥᨿᨶ᩠ᨲᩥ ᩋᨿᨾᨵᩥᨸ᩠ᨸᩣᨿᩮᩣᨲᩥ ᨶᩮᩣ ᨲᨠ᩠ᨠᩮᩣ’’ᨲᩥ ᩌᨧᩁᩥᨿᩮᩣ. ᩅᩩᨲ᩠ᨲᨸᩁᩥᨧ᩠ᨨᩮᨴᩮᨶ ᩋᨣ᩠ᨣᩉᨱᩴ ᩋᨠᩥᩁᩥᨿᩣ, ᩈᨶ᩠ᨳᨲᨠᩁᨱᩴ ᨠᩥᩁᩥᨿᩣ.

ᨴ᩠ᩅᩮᨽᩣᨣᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪔. ᨨᨻ᩠ᨻᩔᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᩒᩁᩮᨶ ᨧᩮ ᨨᨶ᩠ᨶᩴ ᩅᩔᩣᨶ’’ᨶ᩠ᨲᩥ ᩅᩩᨲ᩠ᨲᨲ᩠ᨲᩣ ᨨᨻ᩠ᨻᩔᩮ ᨸᩁᩥᨸᩩᨱ᩠ᨱᩮ ᨠᩣᨲᩩᩴ ᩅᨭ᩠ᨭᨲᩦᨲᩥ ᨶᩥᨭ᩠ᨮᩣᨶᨴᩥᩅᩈᨲᩮᩣ ᨸᨭ᩠ᨮᩣᨿ ᨨᨶ᩠ᨶᩴ ᩅᩔᩣᨶᩴ ᨸᩁᩥᨧ᩠ᨨᩮᨴᩮᩣ ᩅᩮᨴᩥᨲᨻ᩠ᨻᩮᩣ. ᨿᩣᨶᩥ ᨸᨶᩮᨲ᩠ᨳ ᩋᨲᩥᩁᩮᨠᨨᨻ᩠ᨻᩔᩅᩈᩮᨶ ᩅᩣ ᩈᨾ᩠ᨾᩩᨲᩥᩅᩈᩮᨶ ᩅᩣ ᨠᨲᩣᨶᩥ, ᩈᨻ᩠ᨻᩣᨶᩥ ᨲᩣᨶᩥ ᩑᨠᨲᩮᩣ ᨸᩁᩥᨽᩩᨬ᩠ᨩᩥᨲᩩᩴ ᩅᨭ᩠ᨭᨶ᩠ᨲᩦᨲᩥ. ᨣᩥᩃᩣᨶᩔ ᨧ ᩑᨠᩴ ᨶᨸ᩠ᨸᩉᩮᩣᨲᩦᨲᩥ ᩋᨶᩮᨠᨾ᩠ᨸᩥ ᩅᨭ᩠ᨭᨲᩥ. ᨿᨲᩮᩣ ᨸᨭ᩠ᨮᩣᨿ ᩁᩮᩣᨣᩔ ᨾᨶ᩠ᨴᨲᩣᨿ ᩈᨶ᩠ᨳᨲᩴ ᩌᨴᩣᨿ ᨣᨶ᩠ᨲᩩᩴ ᩈᨠ᩠ᨠᩮᩣᨲᩥ, ᨲᨲᩮᩣ ᨸᨭ᩠ᨮᩣᨿ ᩈᨾ᩠ᨾᩩᨲᩥ ᩅᩣ ᩁᩮᩣᨣᩮᩣ ᩅᩣ ᨶ ᩁᨠ᩠ᨡᨲᩦᨲᩥ ᩑᨠᩮ. ᩋᨸᩥᨧ ᨨᩅᩔᨻᩩᨴ᩠ᨵᨶᩥᨾ᩠ᨾᩃᩴ ᩈᩥᨠ᩠ᨡᩣᨸᨴᩴ ᩅᩥᨧᩣᩁᩮᨲᩩᩴ ᨣᨾ᩠ᨽᩦᩁᨲ᩠ᨲᩣ. ᨲᩈ᩠ᨾᩣ ᨨᩅᩔᩮ ᨠᨾ᩠ᨾᩴ ᨠᨲᨶ᩠ᨲᩥ.

ᨨᨻ᩠ᨻᩔᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪕. ᨶᩥᩈᩦᨴᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨠᩈ᩠ᨾᩣ ᨸᨶᩮᨲ᩠ᨳ ‘‘ᩈᨶ᩠ᨳᨲᩴ ᨸᨶ ᨽᩥᨠ᩠ᨡᩩᨶᩣ’’ᨲᩥ ᩈᩥᨠ᩠ᨡᩣᨸᨴᩴ ᩋᨸᨬ᩠ᨬᨸᩮᨲ᩠ᩅᩣ ‘‘ᨶᩥᩈᩦᨴᨶᩈᨶ᩠ᨳᨲ’’ᨶ᩠ᨲᩥ ᨸᨬ᩠ᨬᨲ᩠ᨲᩴ, ᨶᨶᩩ ᩑᨲ᩠ᨳ ᨠᩣᩁᨱᩮᨶ ᨽᩅᩥᨲᨻ᩠ᨻᨶ᩠ᨲᩥ? ᩋᨲ᩠ᨳᩥ ᨠᩣᩁᨱᩴ, ᨧᩦᩅᩁᩈᨬ᩠ᨬᩥᨲᩣᨿ ᩈᨶ᩠ᨳᨲᩣᨶᩴ ᩏᨩ᩠ᨫᩥᨲᨲ᩠ᨲᩣ ᨲᩮᩈᩴ ᩋᨧᩦᩅᩁᨽᩣᩅᨴᩔᨶᨲ᩠ᨳᩴ ᨲᨳᩣ ᨸᨬ᩠ᨬᨲ᩠ᨲᩴ ᨽᨣᩅᨲᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨲᩈ᩠ᨾᩣ ᨲᩮ ᨽᩥᨠ᩠ᨡᩪ ᨲᩮᨧᩦᩅᩁᩥᨠᨵᩩᨲᨦ᩠ᨣᨽᩮᨴᨽᨿᩣ ᩈᨶ᩠ᨳᨲᩮ ᨧᨲᩩᨲ᩠ᨳᨧᩦᩅᩁᩈᨬ᩠ᨬᩥᨲᩣᨿ ᩈᨶ᩠ᨳᨲᩣᨶᩥ ᩏᨩ᩠ᨫᩥᨲ᩠ᩅᩣ ᨲᩮᩁᩈ ᨵᩩᨲᨦ᩠ᨣᩣᨶᩥ ᩈᨾᩣᨴᨿᩥᩴᩈᩩ, ᨽᨣᩅᩣ ᨧ ᨲᩮᩈᩴ ᩈᨶ᩠ᨳᨲᩴ ᩋᨶᩩᨩᩣᨶᩥ. ᨲᨲᩮᩣ ᨲᩮᩈᩴ ᨽᩥᨠ᩠ᨡᩪᨶᩴ ᩑᩅᩴ ᩉᩮᩣᨲᩥ ‘‘ᨶᩥᩈᩦᨴᨶᨧᩦᩅᩁᩈᨱ᩠ᨮᩣᨶᨾ᩠ᨸᩮᨲᩴ ᨶᩥᩈᩦᨴᨶᩈᨶ᩠ᨳᨲᩴ ᨶᩮᩣ ᨽᨣᩅᨲᩣ ᩋᨶᩩᨬ᩠ᨬᩣᨲᩴ ᨧᨲᩩᨲ᩠ᨳᨧᩦᩅᩁᨽᩣᩅᩮᨶ, ᨸᨣᩮᩅ ᨠᨲᩈᨶ᩠ᨳᨲᩴ ᩅᩣ’’ᨲᩥ. ᨲᨲᩮᩣ ‘‘ᩈᨶ᩠ᨳᨲᩮ ᨲᩮᩈᩴ ᨧᩦᩅᩁᩈᨬ᩠ᨬᩥᨲᩣ ᨶ ᨽᩅᩥᩔᨲᩦ’’ᨲᩥ ᨲᨴᨲ᩠ᨳᩴ ᨽᨣᩅᨲᩣ ‘‘ᩈᨶ᩠ᨳᨲ’’ᨶ᩠ᨲᩥ ᩋᨸᨬ᩠ᨬᨸᩮᨲ᩠ᩅᩣ ‘‘ᨶᩥᩈᩦᨴᨶᩈᨶ᩠ᨳᨲ’’ᨶ᩠ᨲᩥ ᨸᨬ᩠ᨬᨲ᩠ᨲᨶ᩠ᨲᩥ ᩋᨵᩥᨸ᩠ᨸᩣᨿᩮᩣ. ᩍᨾᩮᩈᩩ ᨸᨶ ᨸᨬ᩠ᨧᩈᩩ ᩈᨶ᩠ᨳᨲᩮᩈᩩ ᨸᩩᩁᩥᨾᩣᨶᩥ ᨲᩦᨱᩥ ᩅᩥᨶᨿᨠᨾ᩠ᨾᩴ ᨠᨲ᩠ᩅᩣ ᨸᨭᩥᩃᨽᩥᨲ᩠ᩅᩣᨸᩥ ᨸᩁᩥᨽᩩᨬ᩠ᨩᩥᨲᩩᩴ ᨶ ᩅᨭ᩠ᨭᨶ᩠ᨲᩥ ᩋᨠᨸ᩠ᨸᩥᨿᨲ᩠ᨲᩣ, ᨸᨧ᩠ᨨᩥᨾᩣᨶᩥ ᨴ᩠ᩅᩮ ᩅᨭ᩠ᨭᨶ᩠ᨲᩦᨲᩥ (ᩅᨩᩥᩁ. ᨭᩦ. ᨸᩣᩁᩣᨩᩥᨠ ᪕᪖᪖-᪕᪖᪗) ᩃᩥᨡᩥᨲᩴ. ᨠᨳᩴ ᨸᨬ᩠ᨬᩣᨿᨲᩦᨲᩥ ᨧᩮ? ‘‘ᩋᨶᩣᨸᨲ᩠ᨲᩥ ᩋᨬ᩠ᨬᩮᨶ ᨠᨲᩴ ᨸᨭᩥᩃᨽᩥᨲ᩠ᩅᩣ ᨸᩁᩥᨽᩩᨬ᩠ᨩᨲᩦ’’ᨲᩥ (ᨸᩣᩁᩣ. ᪕᪗᪐) ᩅᨧᨶᨲᩮᩣᨲᩥ ᩅᩮᨴᩥᨲᨻ᩠ᨻᩴ.

ᨶᩥᩈᩦᨴᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪖. ᩑᩊᨠᩃᩮᩣᨾᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᩋᨴ᩠ᨵᩣᨶᨾᨣ᩠ᨣᨸ᩠ᨸᨭᩥᨸᨶ᩠ᨶᩔᩣ’’ᨲᩥ ᩍᨾᩥᨶᩣ ᨸᨠᨲᩥᨿᩣ ᨴᩦᨥᨾᨣ᩠ᨣᩴ ᨸᨭᩥᨸᨶ᩠ᨶᩔ ᩏᨸ᩠ᨸᨶ᩠ᨶᩣᨶᩥᨸᩥ ᨲᩥᨿᩮᩣᨩᨶᨸᩁᨾᨾᩮᩅ ᩉᩁᩥᨲᨻ᩠ᨻᩣᨶᩥ, ᨸᨣᩮᩅ ᩋᨸ᩠ᨸᨭᩥᨸᨶ᩠ᨶᩔᩣᨲᩥ ᨴᩔᩮᨲᩥ. ᨸᨭᩥᨸᨶ᩠ᨶᩔ ᨧᩮ, ᩋᨴ᩠ᨵᩣᨶᩴ ᨶᩣᨾ ᨸᨭᩥᨸᨶ᩠ᨶᩔ ᩋᨠᩣᨾᩣ ᩅᩔᩴᩅᩩᨭ᩠ᨮᨽᩥᨠ᩠ᨡᩩᨶᩥᨿᩣ ᨾᨣ᩠ᨣᨸ᩠ᨸᨭᩥᨸᨲ᩠ᨲᩥ ᩅᩥᨿᩣᨲᩥ ᨴᩔᩮᨲᩥ. ᩋᨴ᩠ᨵᩣᨶᨾᨣ᩠ᨣᨸ᩠ᨸᨭᩥᨸᨶ᩠ᨶᩔ ᨶᩥᩔᨣ᩠ᨣᩥᨿᨶ᩠ᨲᩥ ᩅᩣ ᩈᨾ᩠ᨻᨶ᩠ᨵᩮᩣ. ᨲᩮᨶᩮᩅ ᩅᩣᩈᩣᨵᩥᨸ᩠ᨸᩣᨿᩔ ᨸᨭᩥᨸ᩠ᨸᩔᨴ᩠ᨵᨣᨾᨶᩩᩔᩣᩉᨲ᩠ᨲᩣ ‘‘ᩋᨸ᩠ᨸᨭᩥᨸᨶ᩠ᨶᩮᩣ’’ᨲᩥ ᩈᨦ᩠ᨡᩴ ᨣᨲᩔ ᩋᨶᩣᨸᨲ᩠ᨲᩦᨲᩥ ᩈᩥᨴ᩠ᨵᩴ. ᩍᨾᩈ᩠ᨾᩥᩴ ᨸᨶ ᩋᨲ᩠ᨳᩅᩥᨠᨸ᩠ᨸᩮ ‘‘ᨽᩥᨠ᩠ᨡᩩᨶᩮᩣ ᨸᨶᩮᩅ ᩑᩊᨠᩃᩮᩣᨾᩣᨶᩥ ᩏᨸ᩠ᨸᨩ᩠ᨩᩮᨿ᩠ᨿᩩᩴ…ᨸᩮ… ᩋᩈᨶ᩠ᨲᩮᨸᩥ ᩉᩣᩁᨠᩮ ᩋᨴ᩠ᨵᩣᨶᨾᨣ᩠ᨣᨸ᩠ᨸᨭᩥᨸᨶ᩠ᨶᩔ ᨶᩥᩔᨣ᩠ᨣᩥᨿᩴ ᨸᩣᨧᩥᨲ᩠ᨲᩥᨿ’’ᨶ᩠ᨲᩥ ᨿᩮᩣᨩᨶᩣ ᩅᩮᨴᩥᨲᨻ᩠ᨻᩣ. ᨿᩈ᩠ᨾᩣ ᩅᩣ ᩑᩊᨠᩃᩮᩣᨾᩣᨶᩴ ᩏᨸ᩠ᨸᨲ᩠ᨲᩥᨭ᩠ᨮᩣᨶᨲᩮᩣ ᨸᨭ᩠ᨮᩣᨿ ᨲᩥᨿᩮᩣᨩᨶᨸᩁᨾᨲᩣ ᩋᨵᩥᨸ᩠ᨸᩮᨲᩣ, ᨾᨣ᩠ᨣᩴ ᩋᨸ᩠ᨸᨭᩥᨸᨶ᩠ᨶᩔ ᨧ ᨲᩥᨿᩮᩣᨩᨶᨸᩁᨾᨲᩣ ᨶᨲ᩠ᨳᩥ, ᨲᩈ᩠ᨾᩣ ‘‘ᩋᨴ᩠ᨵᩣᨶᨾᨣ᩠ᨣᨸ᩠ᨸᨭᩥᨸᨶ᩠ᨶᩔ ᩏᨸ᩠ᨸᨩ᩠ᨩᩮᨿ᩠ᨿᩩ’’ᨶ᩠ᨲᩥ ᩅᩩᨲ᩠ᨲᩴ. ᨲᩮᨶ ᩋᨧ᩠ᨨᩥᨶ᩠ᨶᩴ ᨸᨭᩥᩃᨽᩥᨲ᩠ᩅᩣ ᩉᩁᨲᩮᩣ ᨧ ᩋᨶᩣᨸᨲ᩠ᨲᩦᨲᩥ ᩈᩥᨴ᩠ᨵᩴ. ᨸᨭᩥᩃᩣᨽᩮᩣ ᩉᩥ ᨲᩮᩈᩴ ᩏᨸ᩠ᨸᨲ᩠ᨲᩥ ᨶᩣᨾᩣᨲᩥ.

‘‘ᩌᨠᨦ᩠ᨡᨾᩣᨶᩮᨶ ᨽᩥᨠ᩠ᨡᩩᨶᩣ ᨸᨭᩥᨣ᩠ᨣᩉᩮᨲᨻ᩠ᨻᩣᨶᩦ’’ᨲᩥ ᩍᨾᩥᨶᩣ ᩋᨲ᩠ᨲᨶᩣ ᨸᨭᩥᨣ᩠ᨣᩉᩥᨲᩣᨶᩴᨿᩮᩅ ᨲᩥᨿᩮᩣᨩᨶᩣᨲᩥᨠ᩠ᨠᨾᩮ ᩌᨸᨲ᩠ᨲᩦᨲᩥ ᨴᩔᩮᨲᩥ. ᨲᩮᨶ ᩋᨶᩣᨠᨦ᩠ᨡᨾᩣᨶᩮᨶ ᨸᩁᩈᨶ᩠ᨲᨠᩣᨶᩥ ᨸᨭᩥᨣ᩠ᨣᩉᩥᨲᩣᨶᩥ ᩉᩁᨶ᩠ᨲᩔ ᩋᨶᩣᨸᨲ᩠ᨲᩦᨲᩥ ᩈᩥᨴ᩠ᨵᩴ.

ᩋᨦ᩠ᨣᩮᩈᩩ ‘‘ᩋᨲ᩠ᨲᨶᩮᩣ ᩈᨶ᩠ᨲᨠᨲᩣ’’ᨲᩥ ᨶᨲ᩠ᨳᩥ, ᩋᨿᨾᨲ᩠ᨳᩮᩣ ‘‘ᨽᩥᨠ᩠ᨡᩩᨶᩮᩣ ᩏᨸ᩠ᨸᨩ᩠ᨩᩮᨿ᩠ᨿᩩ’’ᨶ᩠ᨲᩥ ᩍᨾᩥᨶᩣ, ‘‘ᩋᨧ᩠ᨨᩥᨶ᩠ᨶᩴ ᨸᨭᩥᩃᨽᩥᨲ᩠ᩅᩣ’’ᨲᩥ ᩍᨾᩥᨶᩣ ᨧ ᨴᩦᨸᩥᨲᩮᩣ ᩉᩮᩣᨲᩦᨲᩥ ᩅᩮᨴᩥᨲᨻ᩠ᨻᩮᩣ. ᨸᩮᩣᩁᩣᨱᨣᨱ᩠ᨮᩥᨸᨴᩮ ᨧ ‘‘ᩋᨬ᩠ᨬᩴ ᨽᩥᨠ᩠ᨡᩩᩴ ᩉᩁᩣᨸᩮᨶ᩠ᨲᩮᩣ ᨣᨧ᩠ᨨᨲᩥ ᨧᩮ, ᨴ᩠ᩅᩥᨶ᩠ᨶᨾ᩠ᨸᩥ ᩋᨶᩣᨸᨲ᩠ᨲᩦ’’ᨲᩥ ᩅᩩᨲ᩠ᨲᩴ. ᨲᩈ᩠ᨾᩣ ᨴ᩠ᩅᩮ ᨽᩥᨠ᩠ᨡᩪ ᨲᩥᨿᩮᩣᨩᨶᨸᩁᨾᩴ ᨸᨲ᩠ᩅᩣ ᩋᨬ᩠ᨬᨾᨬ᩠ᨬᩔ ᨽᨱ᩠ᨯᩴ ᨸᩁᩥᩅᨲ᩠ᨲᩮᨲ᩠ᩅᩣ ᨧᩮ ᩉᩁᨶ᩠ᨲᩥ, ᩋᨶᩣᨸᨲ᩠ᨲᩦᨲᩥ ᩈᩥᨴ᩠ᨵᩴ.

ᨲᩥᨿᩮᩣᨩᨶᨸᩁᨾᩴ ᩈᩉᨲ᩠ᨳᩣ ᩉᩁᩥᨲᨻ᩠ᨻᩣᨶᩦᨲᩥ ᨲᩥᨿᩮᩣᨩᨶᨸᩁᨾᨾᩮᩅ ᩋᨲ᩠ᨲᨶᩣ ᩉᩁᩥᨲᨻ᩠ᨻᩣᨶᩥ, ᨲᩴ ᨠᩥᨾᨲ᩠ᨳᨶ᩠ᨲᩥ? ᩈᩦᨾᩣᨿ ᩑᨲᨸᩁᨾᨲᩮᩣ. ᩅᩩᨲ᩠ᨲᨬ᩠ᩉᩮᨲᩴ ‘‘ᩋᨶᩩᨩᩣᨶᩣᨾᩥ, ᨽᩥᨠ᩠ᨡᩅᩮ, ᨲᩥᨿᩮᩣᨩᨶᨸᩁᨾᩴ ᩈᩦᨾᩴ ᩈᨾ᩠ᨾᨶ᩠ᨶᩥᨲᩩ’’ᨶ᩠ᨲᩥ (ᨾᩉᩣᩅ. ᪑᪔᪐). ᩅᩣᩈᩣᨵᩥᨸ᩠ᨸᩣᨿᩮᨶ, ᨸᨧ᩠ᨧᩣᨣᨾᨶᩣᨵᩥᨸ᩠ᨸᩣᨿᩮᨶ ᩅᩣ ᨣᨧ᩠ᨨᨲᩮᩣ ᩑᨲᨸᩁᨾᨲᩣ ᨧ. ᩅᩩᨲ᩠ᨲᨬ᩠ᩉᩮᨲᩴ ‘‘ᨨᨻ᩠ᨻᨣ᩠ᨣᩥᨿᩣ ᨽᩥᨠ᩠ᨡᩪ ᩋᨲᩥᨾᩉᨲᩥᨿᩮᩣ ᩈᩦᨾᩣᨿᩮᩣ ᩈᨾ᩠ᨾᨶ᩠ᨶᨶ᩠ᨲᩥ…ᨸᩮ… ᨽᩥᨠ᩠ᨡᩪ ᩏᨸᩮᩣᩈᨳᩴ ᩌᨣᨧ᩠ᨨᨶ᩠ᨲᩣ ᩏᨴ᩠ᨴᩥᩔᨾᩣᨶᩮᨸᩥ ᨸᩣᨲᩥᨾᩮᩣᨠ᩠ᨡᩮ ᩌᨣᨧ᩠ᨨᨶ᩠ᨲᩥ, ᩏᨴ᩠ᨴᩥᨭ᩠ᨮᨾᨲ᩠ᨲᩮᨸᩥ ᩌᨣᨧ᩠ᨨᨶ᩠ᨲᩥ, ᩋᨶ᩠ᨲᩁᩣᨸᩥ ᨸᩁᩥᩅᩈᨶ᩠ᨲᩦ’’ᨲᩥ (ᨾᩉᩣᩅ. ᪑᪔᪐).

ᩋᩈᨶ᩠ᨲᩮ ᩉᩣᩁᨠᩮᨲᩥ ᩌᨱᨲ᩠ᨲᩥᨿᩣ ᩉᩣᩁᨠᩮ ᩋᩈᨲᩥ. ᨠᨾ᩠ᨻᩃᩔ ᩏᨸᩁᩥ ᨶᩥᩈᩦᨴᩥᨲ᩠ᩅᩣ ᨣᨧ᩠ᨨᨶ᩠ᨲᩔ ᩈᨧᩮ ᩑᨠᨾ᩠ᨸᩥ ᩃᩮᩣᨾᩴ ᨧᩦᩅᩁᩮ ᩃᨣ᩠ᨣᩴ ᩉᩮᩣᨲᩥ, ᨲᩥᨿᩮᩣᨩᨶᩣᨲᩥᨠ᩠ᨠᨾᩮ ᩌᨸᨲ᩠ᨲᩥ ᩑᩅ ᨠᨾ᩠ᨻᩃᨲᩮᩣ ᩅᩥᨩᨭᩥᨲᨲ᩠ᨲᩣᨲᩥ ᩃᩥᨡᩥᨲᩴ. ᨲᩴ ᨠᨾ᩠ᨻᩃᩔ ᨸᨭᩥᨣ᩠ᨣᩉᩥᨲᨲ᩠ᨲᩣ ᩋᨲ᩠ᨲᨶᩮᩣ ᩋᨲ᩠ᨳᩣᨿ ᨸᨭᩥᨣ᩠ᨣᩉᩥᨲᨾᩮᩅ ᩉᩮᩣᨲᩦᨲᩥ ᨿᩩᨲ᩠ᨲᩴ.

ᩑᩊᨠᩃᩮᩣᨾᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪘. ᨩᩣᨲᩁᩪᨸᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᨶᩥᨻ᩠ᨻᨲ᩠ᨲᩁᩩᨠ᩠ᨡᨧ᩠ᨨᩣᨿᩣᨸᩥ ᩁᩩᨠ᩠ᨡᨸᩁᩥᨧ᩠ᨨᩮᨴᩴ ᩋᨶᨲᩥᨠ᩠ᨠᨶ᩠ᨲᩣ’’ᨲᩥ ᩃᩥᨡᩥᨲᩴ.

ᨩᩣᨲᩁᩪᨸᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪙. ᩁᩪᨸᩥᨿᩈᩴᩅᩮᩣᩉᩣᩁᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨩᩣᨲᩁᩪᨸᩁᨩᨲᨸᩁᩥᩅᨲ᩠ᨲᨶᨶ᩠ᨲᩥ ᩏᨠ᩠ᨠᨭ᩠ᨮᨸᩁᩥᨧ᩠ᨨᩮᨴᩮᨶ ᩅᩩᨲ᩠ᨲᩴ.

ᩁᩪᨸᩥᨿᩈᩴᩅᩮᩣᩉᩣᩁᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪑᪐. ᨠᨿᩅᩥᨠ᩠ᨠᨿᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩋᩈᨶ᩠ᨲᩮ ᨸᩣᨧᩥᨲ᩠ᨲᩥᨿᩴ ᨴᩮᩈᩮᨲᨻ᩠ᨻᨾᩮᩅᩣᨲᩥ ᩑᨲ᩠ᨳ ᨠᩥᩴ ᩈᩩᨴ᩠ᨵᩥᨠᩴ ᨸᩣᨧᩥᨲ᩠ᨲᩥᨿᩴ, ᩏᨴᩣᩉᩩ ᨶᩥᩔᨣ᩠ᨣᩥᨿᨶ᩠ᨲᩥ? ᨶᩥᩔᨣ᩠ᨣᩥᨿᩴ ᨸᩣᨧᩥᨲ᩠ᨲᩥᨿᨾᩮᩅ.

ᨠᨿᩅᩥᨠ᩠ᨠᨿᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨲᨲᩕᩥᨴᩴ ᨸᨠᩥᨱ᩠ᨱᨠᩴ

ᩋᨭ᩠ᨮᨾᩈᩥᨠ᩠ᨡᩣᨸᨴᩴ ᨸᩁᩮᨶ ᩋᨲ᩠ᨲᨶᩮᩣ ᩋᨲ᩠ᨳᩣᨿ ᨴᩥᨿ᩠ᨿᨾᩣᨶᩔ ᩅᩣ ᨸᩣᩁᩥᩅᨲ᩠ᨲᨠᨽᩣᩅᩮᨶ ᨴᩥᨿ᩠ᨿᨾᩣᨶᩔ ᩅᩣ ᨸᩴᩈᩩᨠᩪᩃᩔ ᩅᩣ ᩁᩪᨸᩥᨿᩔ ᩏᨣ᩠ᨣᨱ᩠ᩉᨶᩏᨣ᩠ᨣᨱ᩠ᩉᩣᨸᨶᩈᩣᨴᩥᨿᨶᩣᨶᩥ ᨸᨭᩥᨠ᩠ᨡᩥᨸᨲᩥ.

ᨶᩅᨾᩴ ᨸᩁᩔ ᩅᩣ ᩋᨲ᩠ᨲᨶᩮᩣ ᩅᩣ ᩁᩪᨸᩥᨿᨸᩁᩥᩅᨲ᩠ᨲᨶᩴ ᨸᨭᩥᨠ᩠ᨡᩥᨸᨲᩥ.

ᨴᩈᨾᩴ ᩋᩁᩪᨸᩥᨿᨸᩁᩥᩅᨲ᩠ᨲᨶᩴ. ‘‘ᩋᩁᩪᨸᩥᨿᩮ ᩋᩁᩪᨸᩥᨿᩈᨬ᩠ᨬᩦ ᨸᨬ᩠ᨧᨶ᩠ᨶᩴ ᩈᩉ ᩋᨶᩣᨸᨲ᩠ᨲᩦ’’ᨲᩥ (ᨸᩣᩁᩣ. ᪕᪙᪑; ᩅᩥ. ᩅᩥ. ᨭᩦ. ᪑.᪕᪙᪑; ᩅᨩᩥᩁ. ᨭᩦ. ᨸᩣᩁᩣᨩᩥᨠ ᪕᪘᪗) ᨧ ᩅᨧᨶᩴ ᩍᨲᩁᩮᩉᩥ ᩈᩉ ᩌᨸᨲ᩠ᨲᩦᨲᩥ ᨴᩦᨸᩮᨲᩥ. ᩋᩁᩪᨸᩥᨿᨬ᩠ᨧ ᨴᩩᨠ᩠ᨠᨭᩅᨲ᩠ᨳᩩ. ᨲᩈ᩠ᨾᩣ ᨲᩔ ᨸᩁᩥᩅᨲ᩠ᨲᨶᩮ ᩈᨲᩥ ᨶᩥᩔᨣ᩠ᨣᩥᨿᨶ᩠ᨲᩥ ᩑᨠᨶ᩠ᨲᩮᨶ ᩅᩩᨲ᩠ᨲᩴ. ᨸᨬ᩠ᨧᨶ᩠ᨶᩴ ᩈᩉ ᨴᩩᨠ᩠ᨠᨭᩅᨲ᩠ᨳᩪᨶᩴ ᨸᩁᩥᩅᨲ᩠ᨲᨶᩮ ᩋᨶᩣᨸᨲ᩠ᨲᩥᨸ᩠ᨸᩈᨦ᩠ᨣᨲᩮᩣ ᩋᨶᩣᨸᨲ᩠ᨲᩥ ᩑᩅᩣᨲᩥ ᨸᩮᩣᩁᩣᨱᩣᨲᩥ ᨧᩮ? ᨶ, ᨠᨸ᩠ᨸᩥᨿᩅᨲ᩠ᨳᩪᨶᩴᨿᩮᩅ ᨲᨲ᩠ᨳ ᩌᨣᨲᨲ᩠ᨲᩣ. ᨿᨴᩥ ᨠᨸ᩠ᨸᩥᨿᩅᨲ᩠ᨳᩩ ᨶᩥᩔᨣ᩠ᨣᩥᨿᩴ, ᨸᨣᩮᩅ ᨴᩩᨠ᩠ᨠᨭᩅᨲ᩠ᨳᩪᨲᩥ ᨧᩮ? ᨶ, ᩌᨸᨲ᩠ᨲᩥᨣᩁᩩᨠᩃᩉᩩᨠᨽᩣᩅᩮᨶ ᩅᨲ᩠ᨳᩩᨣᩁᩩᨠᩃᩉᩩᨠᨶᩥᨿᨾᩣᨽᩣᩅᨲᩮᩣ.

ᨶᩥᩔᨣ᩠ᨣᩥᨿᩅᨲ᩠ᨳᩩᨲᩮᩣ ᩉᩥ ᨾᩩᨲ᩠ᨲᩣᨾᨱᩥᩅᩮᩊᩩᩁᩥᨿᩣᨴᩥ ᨾᩉᨣ᩠ᨥᨸ᩠ᨸᩉᩮᩣᨶᨠᨾ᩠ᨸᩥ ᨴᩩᨠ᩠ᨠᨭᩅᨲ᩠ᨳᩪᨲᩥ ᨠᨲ᩠ᩅᩣ ᨶᩥᩔᨣ᩠ᨣᩥᨿᩅᨲ᩠ᨳᩩᨲᩮᩣ ᨾᩩᨲ᩠ᨲᩣᨴᩥ ᩃᩉᩩᨠᩴ ᩉᩮᩣᨲᩥ. ᩃᩉᩩᨠᩮᨸᩥ ᩅᨲ᩠ᨳᩩᩈ᩠ᨾᩥᩴ ᨿᨳᩮᩅ ᨴᩩᨠ᩠ᨠᨭᩅᨲ᩠ᨳᩩᨶᩮᩣ ᨸᨭᩥᨣ᩠ᨣᩉᨱᩮ ᨴᩩᨠ᩠ᨠᨭᩴ, ᨲᨳᩮᩅ ᨲᩔ ᩅᩣ ᨲᩮᨶ ᩅᩣ ᨧᩮᨲᩣᨸᨶᩮᨸᩥ ᨴᩩᨠ᩠ᨠᨭᩴ ᨿᩩᨲ᩠ᨲᨶ᩠ᨲᩥ (ᨸᩣᩁᩣ. ᩋᨭ᩠ᨮ. ᪒.᪕᪘᪙) ᩋᨭ᩠ᨮᨠᨳᩣᨧᩁᩥᨿᩣ.

ᩋᨳ ᩅᩣ ᨿᩴ ᩅᩩᨲ᩠ᨲᩴ ‘‘ᨠᨸ᩠ᨸᩥᨿᩅᨲ᩠ᨳᩪᨶᩴᨿᩮᩅ ᨲᨲ᩠ᨳ ᩌᨣᨲᨲ᩠ᨲᩣ’’ᨲᩥ, ᨲᨲ᩠ᨳ ᨠᩥᨬ᩠ᨧᩣᨸᩥ ᨴᩩᨠ᩠ᨠᨭᩅᨲ᩠ᨳᩪᨶᩥᨸᩥ ᩋᨵᩥᨸ᩠ᨸᩮᨲᩣᨶᩥ, ᨶ ᨸᨶ ᨸᩣᩊᩥᨿᩴ ᩅᩩᨲ᩠ᨲᩣᨶᩥ ᩋᨶᩣᨸᨲ᩠ᨲᩥᩅᩣᩁᨸ᩠ᨸᩈᨦ᩠ᨣᨽᨿᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨾᩩᨲ᩠ᨲᩣᨴᩦᩈᩩᨸᩥ ᩅᩩᨲ᩠ᨲᩮᩈᩩ ᩋᨶᩣᨸᨲ᩠ᨲᩥᨿᩴ ᨠᨸ᩠ᨸᩥᨿᨠᩣᩁᨠᩔ ᩌᨧᩥᨠ᩠ᨡᨲᩥ, ‘‘ᩍᨴᩴ ᨾᩩᨲ᩠ᨲᩣᨴᩥ ᩋᨾ᩠ᩉᩣᨠᩴ ᩋᨲ᩠ᨳᩥ, ᩋᨾ᩠ᩉᩣᨠᨬ᩠ᨧ ᩍᨾᩥᨶᩣ ᨧ ᩍᨾᩥᨶᩣ ᨧ ᩅᩮᩊᩩᩁᩥᨿᩣᨴᩥᨶᩣ ᩋᨲ᩠ᨳᩮᩣ’’ᨲᩥ ᨽᨱᨲᩥ, ᨴᩈᨾᩮᨶ ᩌᨸᨩ᩠ᨩᨲᩦᨲᩥ ᩋᨵᩥᨸ᩠ᨸᩣᨿᩮᩣ ᩈᩥᨿᩣ. ᨿᩈ᩠ᨾᩣ ᨧ ᩍᨴᩴ ᨠᨸ᩠ᨸᩥᨿᨠᩣᩁᨠᩔ ᩌᨧᩥᨠ᩠ᨡᨶᩣᨴᩥᩈᩴᩅᩮᩣᩉᩣᩁᩮᩣ ᨧ, ᨲᩈ᩠ᨾᩣ ᨲᩴ ᨶᩅᨾᩮᨶ ᩅᩩᨲ᩠ᨲᨶ᩠ᨲᩥ ᩅᩮᨴᩥᨲᨻ᩠ᨻᩴ. ᨠᩥᨬ᩠ᨧᩣᨸᩥ ᨠᨿᩅᩥᨠ᩠ᨠᨿᩮᩅ ᩉᩮᩣᨲᩥ ᨠᨸ᩠ᨸᩥᨿᩅᨲ᩠ᨳᩪᩉᩥ ᩋᨶᩩᨬ᩠ᨬᩣᨲᩴ, ᩍᨾᩥᨶᩣᩅ ᨶᨿᩮᨶ ᨠᩥᨬ᩠ᨧᩣᨸᩥ ᨴᩩᨠ᩠ᨠᨭᩅᨲ᩠ᨳᩩᨸᩥ ᨴᩈᨾᩮ ᩋᨵᩥᨸ᩠ᨸᩮᨲᩴ ᩌᨸᨩ᩠ᨩᨲᩥ, ᩋᨭ᩠ᨮᨠᨳᩣᩅᩥᩁᩮᩣᨵᨲᩮᩣ ᨸᨶ ᨶᩣᨵᩥᨸ᩠ᨸᩮᨲᨾᩥᨧ᩠ᨧᩮᩅ ᨣᩉᩮᨲᨻ᩠ᨻᩮᩣ.

ᨠᩣ ᨸᨶᩮᨲ᩠ᨳ ᨠᩣᩁᨱᨧ᩠ᨨᩣᨿᩣᨲᩥ, ᨸᨬ᩠ᨧᨶ᩠ᨶᩴ ᩈᩉ ᨲᨲ᩠ᨳ ᩋᨶᩣᨸᨲ᩠ᨲᩥᨸ᩠ᨸᩈᨦ᩠ᨣᨲᩮᩣ ᩋᨶᩣᨸᨲ᩠ᨲᩥ ᩑᩅᩣᨲᩥ ᨧᩮ? ᨶ, ᨲᨲ᩠ᨳ ᩋᨶᩣᨣᨲᨲ᩠ᨲᩣ. ᩋᨶᩣᨣᨲᨠᩣᩁᨱᩣ ᩅᩩᨲ᩠ᨲᨶ᩠ᨲᩥ ᨧᩮ? ᨶ, ᨸᨬ᩠ᨧᨶ᩠ᨶᩴ ᩈᩉ ᩌᨸᨲ᩠ᨲᩥᩅᨲ᩠ᨳᩩᨠᩔ ᩋᨶᩣᨸᨲ᩠ᨲᩥᩅᩣᩁᩃᩣᨽᩮ ᩅᩥᩈᩮᩈᨠᩣᩁᨱᩣᨽᩣᩅᩣ, ᩋᨠᨸ᩠ᨸᩥᨿᨲ᩠ᨲᩣ ᨸᨬ᩠ᨧᨶ᩠ᨶᩴ ᩈᩉᩣᨸᩥ ᩌᨸᨲ᩠ᨲᩥᨿᩣ ᨽᩅᩥᨲᨻ᩠ᨻᨶ᩠ᨲᩥ ᩈᩥᨴ᩠ᨵᩮᩣ ᩋᨭ᩠ᨮᨠᨳᩣᩅᩣᨴᩮᩣ.

ᩋᨸᩁᩮᩣ ᨶᨿᩮᩣ – ᨿᨴᩥ ᨴᩩᨠ᩠ᨠᨭᩅᨲ᩠ᨳᩩᨶᩣ ᨠᨿᩅᩥᨠ᩠ᨠᨿᩮ ᨶᩥᩔᨣ᩠ᨣᩥᨿᩴ, ᨠᨸ᩠ᨸᩥᨿᩅᨲ᩠ᨳᩩᨾ᩠ᩉᩥ ᩅᩩᨲ᩠ᨲᨸᩁᩥᨿᩣᨿᩮᩣ ᨲᨲ᩠ᨳ ᩃᨻ᩠ᨽᩮᨿ᩠ᨿ, ᨶ ᨸᨶ ᩃᨻ᩠ᨽᨲᩦᨲᩥ ᨶᩅᨾᩮ ᩑᩅ ᨲᩣᨶᩥ ᩅᨲ᩠ᨲᨻ᩠ᨻᩣᨶᩥ. ᨲᩈ᩠ᨾᩣ ᩈᩴᩅᩮᩣᩉᩣᩁᩮᩣ ᨶᩣᨾ ᨠᨿᩅᩥᨠ᩠ᨠᨿᩮᩣᨸᩥ ᩋᨬ᩠ᨬᨳᩣ ᨸᩁᩥᩅᨲ᩠ᨲᨶᩴ ᨸᩁᩥᨿᩣᨴᩥᨿᩥᨲ᩠ᩅᩣ ᨸᩅᨲ᩠ᨲᩮᩣ, ᨠᨿᩅᩥᨠ᩠ᨠᨿᨬ᩠ᨧ ᨾᩮᩣᨧᩮᨲ᩠ᩅᩣ ‘‘ᩍᨾᩥᨶᩣ ᩍᨾᩴ ᨴᩮᩉᩦ’ᨲᩥ ᨧᩮᨲᩣᨸᩮᨲᩥ, ᩅᨭ᩠ᨭᨲᩦ’’ᨲᩥ ᩋᩅᨲ᩠ᩅᩣ ᨴᩈᨾᩔ ᩋᨶᩣᨸᨲ᩠ᨲᩥᩅᩣᩁᩮ ᩅᩩᨲ᩠ᨲᨶᨿᩮᨶᩮᩅ ᨲᩮᩈᩴ ᨸᩁᩥᩅᨲ᩠ᨲᨶᩮ ᨶᩥᩔᨣ᩠ᨣᩥᨿᩣᨶᩩᨾᨲᩥᩅᩥᩁᩮᩣᨵᨲᩮᩣ ᩋᨭ᩠ᨮᨠᨳᩣᨿᩴ ᩅᩩᨲ᩠ᨲᨶᨿᩮᨶᩮᩅ ᨴᩩᨠ᩠ᨠᨭᩅᨲ᩠ᨳᩩᨶᩣ ᨧᩮᨲᩣᨸᨶᩮ ᨴᩩᨠ᩠ᨠᨭᨾᩮᩅ. ᨶᩮᩈᩴ ᨠᨿᩅᩥᨠ᩠ᨠᨿᩮᨶ ᨶᩥᩔᨣ᩠ᨣᩥᨿᨶ᩠ᨲᩥ ᨧᩮ? ᨶ, ᩈᨻ᩠ᨻᩔᨸᩥ ᨠᨿᩅᩥᨠ᩠ᨠᨿᨲ᩠ᨲᩣ. ᨲᩮᨶᩮᩅ ᩅᩩᨲ᩠ᨲᩴ ‘‘ᩋᨶ᩠ᨵᨠᨭ᩠ᨮᨠᨳᩣᨿᩴ ᨸᨶ ‘ᩈᨧᩮ ᨠᨿᩅᩥᨠ᩠ᨠᨿᩴ ᩈᨾᩣᨸᨩ᩠ᨩᩮᨿ᩠ᨿ, ᨶᩥᩔᨣ᩠ᨣᩥᨿᩴ ᨸᩣᨧᩥᨲ᩠ᨲᩥᨿ’ᨶ᩠ᨲᩥ ᨽᩣᩈᩥᨲᩴ, ᨲᩴ ᨴᩩᨻ᩠ᨽᩣᩈᩥᨲᩴ. ᨠᩈ᩠ᨾᩣ? ᨶ ᩉᩥ ᨴᩣᨶᨣ᩠ᨣᩉᨱᨲᩮᩣ ᩋᨬ᩠ᨬᩮᩣ ᨠᨿᩅᩥᨠ᩠ᨠᨿᩮᩣ ᨶᩣᨾ ᩋᨲ᩠ᨳᩦ’’ᨲᩥ (ᨸᩣᩁᩣ. ᩋᨭ᩠ᨮ. ᪒.᪕᪘᪙), ᩋᨲ᩠ᨲᨶᩮᩣ ᨾᨲᩥᨿᩣ ᨠᨿᩅᩥᨠ᩠ᨠᨿᩃᨠ᩠ᨡᨱᩈᨾ᩠ᨾᨲᩮ ᨴᩈᨾᩔ ᩋᨶᩣᨸᨲ᩠ᨲᩥᩅᩣᩁᩮ ᩅᩩᨲ᩠ᨲᨶᨿᩮᨶᩮᩅ ᨲᩮᩈᩴ ᨸᩁᩥᩅᨲ᩠ᨲᨶᩮ ᨶᩥᩔᨣ᩠ᨣᩥᨿᩣᨶᩩᨾᨲᩥᩅᩥᩁᩮᩣᨵᨲᩮᩣ ᨧ. ᨽᩅᨲᩩ ᩅᩣ ᩋᨲ᩠ᨲᨶᩮᩣ ᨸᨭᩥᩈᩥᨴ᩠ᨵᨾᩥᨴᩴ ᨠᩣᩁᨱᩴ, ᨴᩈᨾᩮ ᩋᩅᩔᨾᩮᩅ ᨩᩣᨶᩥᨲᨻ᩠ᨻᩣᨶᩦᨲᩥ ᨲᩣᨶᩥ ᨠᨿᩅᩥᨠ᩠ᨠᨿᩣᨶᩮᩅᩣᨲᩥ ᨲᩮᩈᩴ ᨶᩥᩔᨣ᩠ᨣᩥᨿᨽᩣᩅᨬ᩠ᨧ ᨣᨲᩣᨶᩦᨲᩥ ᩑᩅᨾ᩠ᨸᩥ ᩈᩥᨴ᩠ᨵᩮᩣ ᩋᨭ᩠ᨮᨠᨳᩣᩅᩣᨴᩮᩣ.

ᩑᨲ᩠ᨳᩣᩉᩩ ᨸᩮᩣᩁᩣᨱᩣ – ‘‘ᩋᨲ᩠ᨲᨶᩮᩣ ᩈᨶ᩠ᨲᨠᩴ ᩁᩪᨸᩥᨿᩴ ᨸᩁᩉᨲ᩠ᨳᨣᨲᩴ ᨠᩁᩮᩣᨲᩥ ᩋᨩ᩠ᨫᩣᨧᩁᨲᩥ, ᨴᩩᨠ᩠ᨠᨭᩴ. ᨸᩁᩔ ᩁᩪᨸᩥᨿᩴ ᩋᨲ᩠ᨲᨶᩮᩣ ᩉᨲ᩠ᨳᨣᨲᩴ ᨠᩁᩮᩣᨲᩥ, ᩋᨭ᩠ᨮᨾᩮᨶ ᨶᩥᩔᨣ᩠ᨣᩥᨿᩴ. ᩏᨣ᩠ᨣᩉᩥᨲᩅᨲ᩠ᨳᩩᨸᩁᩥᩅᨲ᩠ᨲᨶᩮ ᨠᨳᩴ ᨩᩣᨲᩴ? ᩋᨻ᩠ᨻᩮᩣᩉᩣᩁᩥᨠᩴ ᨩᩣᨲᩴ. ᩋᨳ ᨸᩁᩔ ᩁᩪᨸᩥᨿᩴ ᩋᨲ᩠ᨲᨶᩮᩣ ᩉᨲ᩠ᨳᨣᨲᩴ ᨸᨮᨾᩴ ᨠᩁᩮᩣᨲᩥ, ᩁᩪᨸᩥᨿᨸ᩠ᨸᨭᩥᨣ᩠ᨣᩉᨱᩔ ᨠᨲᨲ᩠ᨲᩣ ᩋᨭ᩠ᨮᨾᩮᨶ ᨶᩥᩔᨣ᩠ᨣᩥᨿᩴ. ᩋᨲ᩠ᨲᨶᩮᩣ ᩈᨶ᩠ᨲᨠᩴ ᩁᩪᨸᩥᨿᩴ ᨸᩁᩔ ᩉᨲ᩠ᨳᨣᨲᩴ ᨸᨧ᩠ᨨᩣ ᨠᩁᩮᩣᨲᩥ, ᩈᩴᩅᩮᩣᩉᩣᩁᩮᨶ ᨶᩥᩔᨣ᩠ᨣᩥᨿ’’ᨶ᩠ᨲᩥ. ‘‘ᩁᩪᨸᩥᨿᩔ ᨣᩉᨱᨾᨲ᩠ᨲᩮᨶ ᩋᨭ᩠ᨮᨾᩮᨶ ᩌᨸᨲ᩠ᨲᩥ, ᨸᨧ᩠ᨨᩣ ᨸᩁᩥᩅᨲ᩠ᨲᨶᩮ ᨶᩅᨾᩮᨶᩣ’’ᨲᩥ ᩉᩥ ᨲᨲ᩠ᨳ ᩅᩩᨲ᩠ᨲᩴ, ᨲᩴ ᨸᨶ ᨿᩩᨲ᩠ᨲᩴ. ‘‘ᩋᨩ᩠ᨫᩣᨧᩁᨲᩥ, ᨴᩩᨠ᩠ᨠᨭ’’ᨶ᩠ᨲᩥ ᨴᩩᩅᩩᨲ᩠ᨲᩴ. ᨴᩩᨠ᩠ᨠᨭᩔ ᩋᨶᩥᨿᨾᨸ᩠ᨸᩈᨦ᩠ᨣᨲᩮᩣ ᨶᩥᩔᨩ᩠ᨩᨶᩅᩥᨵᩣᨶᩮᩈᩩ ᨴᩔᩥᨲᩮᩣᩅ. ᨠᩥᩴ ᩅᩩᨲ᩠ᨲᩴ ᩉᩮᩣᨲᩥ – ᨿᨴᩥ ᨴ᩠ᩅᩦᩉᩥ ᨶᩥᩔᨣ᩠ᨣᩥᨿᩮᩉᩥ ᨽᩅᩥᨲᨻ᩠ᨻᩴ, ᨶᩥᩔᨩ᩠ᨩᨶᩅᩥᨵᩣᨶᩮ ‘‘ᩋᩉᩴ, ᨽᨶ᩠ᨲᩮ, ᩁᩪᨸᩥᨿᩴ ᨸᨭᩥᨣ᩠ᨣᩉᩮᩈᩥᩴ, ᨶᩣᨶᩣᨸ᩠ᨸᨠᩣᩁᨠᨬ᩠ᨧ ᩁᩪᨸᩥᨿᩈᩴᩅᩮᩣᩉᩣᩁᩴ ᩈᨾᩣᨸᨩ᩠ᨩᩥ’’ᨶ᩠ᨲᩥ ᩅᨲ᩠ᨲᨻ᩠ᨻᩴ ᨽᩅᩮᨿ᩠ᨿ ‘‘ᩁᩪᨸᩥᨿᩴ ᨧᩮᨲᩣᨸᩮᨲᩦ’’ᨲᩥ ᩈᨻ᩠ᨻᨲ᩠ᨳ ᨸᩣᩊᩥᨿᩴ ᩁᩪᨸᩥᨿᨸ᩠ᨸᨭᩥᨣ᩠ᨣᩉᨱᩔ ᩅᩩᨲ᩠ᨲᨲ᩠ᨲᩣ.

ᩑᨲ᩠ᨲᩣᩅᨲᩣ ᨿᩴ ᨸᩮᩣᩁᩣᨱᨣᨱ᩠ᨮᩥᨸᨴᩮ ᩅᩩᨲ᩠ᨲᩴ ‘‘ᨴᩩᨠ᩠ᨠᨭᩅᨲ᩠ᨳᩩᨶᩣ ᨠᨿᩅᩥᨠ᩠ᨠᨿᩴ ᨸᩁᩥᩉᩁᨶ᩠ᨲᩮᨶ ᨧᨲᩪᩈᩩ ᨶᩥᩔᨣ᩠ᨣᩥᨿᩅᨲ᩠ᨳᩪᩈᩩ ᩑᨠᩮᨠᩈ᩠ᨾᩥᩴ ᨣᩉᩥᨲᩮ ᩋᨭ᩠ᨮᨾᩮᨶ ᨶᩥᩔᨣ᩠ᨣᩥᨿᩴ ᩉᩮᩣᨲᩥ. ᨴᩩᨠ᩠ᨠᨭᩅᨲ᩠ᨳᩩᨶᩣ ᨴᩩᨠ᩠ᨠᨭᩅᨲ᩠ᨳᩩᨶ᩠ᨲᩥ ‘‘ᩍᨾᩥᨶᩣ ᩍᨴᩴ ᨴᩮᩉᩦ’’ᨲᩥ ᨣᩉᩥᨲᩮ ᨲᩮᨶᩮᩅ ᨶᩥᩔᨣ᩠ᨣᩥᨿᩴ ᩉᩮᩣᨲᩥ. ‘‘ᨠᨿᩅᩥᨠ᩠ᨠᨿᨾ᩠ᨸᩥ ᨶᩦᩉᩁᩥᨲ᩠ᩅᩣ ᨣᩉᩥᨲᩮ ᨴᩩᨠ᩠ᨠᨭᩴ, ᨧᩮᨲᩣᨸᩥᨲᩁᩪᨸᩥᨿᨣ᩠ᨣᩉᨱᩮ ᩋᨭ᩠ᨮᨾᩮᨶ, ᨸᩁᩥᩅᨲ᩠ᨲᨶᩮ ᨶᩅᨾᩮᨶᩣᨲᩥᩌᨴᩥᨶᩣ ᩋᨲ᩠ᨲᨶᩣ ᩋᨶᩩᨣ᩠ᨣᩉᩮᨲ᩠ᩅᩣ ᨠᨸ᩠ᨸᩥᨿᩅᩈᩮᨶ ᨶᩦᩉᩁᩥᨲ᩠ᩅᩣ ᨸᨬ᩠ᨧᩉᩥ ᩈᩉᨵᨾ᩠ᨾᩥᨠᩮᩉᩥ ᩈᨴ᩠ᨵᩥᩴ ᨸᩁᩥᩅᨲ᩠ᨲᩮᨲᩩᩴ ᩅᨭ᩠ᨭᨲᩦ’’ᨲᩥ, ᨲᩴ ᩅᩥᩈᩮᩣᨵᩥᨲᩴ ᩉᩮᩣᨲᩥ. ᩋᨸᩁᨾ᩠ᨸᩥ ᨲᨲ᩠ᨳ ᩅᩩᨲ᩠ᨲᩴ ‘‘ᨶᩥᩔᨩ᩠ᨩᩥᨲᨻ᩠ᨻᩮ ᩋᩈᨲᩥ ᨠᨳᩴ ᨸᩣᨧᩥᨲ᩠ᨲᩥᨿᩴ, ᨴᩩᨶ᩠ᨶᩥᩔᨭ᩠ᨮᩁᩪᨸᩥᨿᨾ᩠ᨸᩥ ‘ᨶ ᨨᨯ᩠ᨯᩮᨲᩦ’ᨲᩥ ᩅᨴᨶ᩠ᨲᩔ ᩅᩥᩔᨭ᩠ᨮᩮᩣ ᩏᨸᩣᩈᨠᩮᩣ ᨲᩴ ᨣᩉᩮᨲ᩠ᩅᩣ ᩋᨬ᩠ᨬᩴ ᨧᩮ ᨽᩥᨠ᩠ᨡᩩᨶᩮᩣ ᨴᩮᨲᩥ, ᨠᨸ᩠ᨸᨲᩦ’’ᨲᩥ, ᨲᨬ᩠ᨧ ᨴᩩᩅᩩᨲ᩠ᨲᩴ. ᨶ ᩉᩥ ᨣᩉᩥᨲᨲ᩠ᨲᩣ ᨲᨲᩮᩣ ᩋᨬ᩠ᨬᩴ ᩅᨲ᩠ᨳᩩ ᩉᩮᩣᨲᩥ. ᨸᩩᨶ ᩋᨸᩁᨬ᩠ᨧ ᨲᨲ᩠ᨳ ᩅᩩᨲ᩠ᨲᩴ ‘‘ᩍᨾᩴ ‘ᨣᨱ᩠ᩉᩣᩉᩦ’ᨲᩥ ᩅᨴᨶ᩠ᨲᩔ ᩈᨴ᩠ᨵᩣᨴᩮᨿ᩠ᨿᩅᩥᨶᩥᨸᩣᨲᨴᩩᨠ᩠ᨠᨭᩴ, ‘ᩑᨲᩴ ᨴᩮᩉᩦ’ᨲᩥ ᩅᨴᨶ᩠ᨲᩔ ᩅᩥᨬ᩠ᨬᨲ᩠ᨲᩥᨴᩩᨠ᩠ᨠᨭ’’ᨶ᩠ᨲᩥ, ᨲᨬ᩠ᨧ ᨴᩩᩅᩩᨲ᩠ᨲᩴ. ᨲᨲ᩠ᨳ ᩉᩥ ᨸᨿᩮᩣᨣᨴᩩᨠ᩠ᨠᨭᩴ ᨿᩩᨲ᩠ᨲᩴ ᩅᩥᨿ ᨸᨬ᩠ᨬᩣᨿᨲᩥ.

ᨸᨠᩥᨱ᩠ᨱᨠᩴ ᨶᩥᨭ᩠ᨮᩥᨲᩴ.

ᩑᩊᨠᩃᩮᩣᨾᩅᨣ᩠ᨣᩮᩣ ᨴᩩᨲᩥᨿᩮᩣ.

᪓. ᨸᨲ᩠ᨲᩅᨣ᩠ᨣᩮᩣ

᪑. ᨸᨲ᩠ᨲᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨴ᩠ᩅᩮ ᩋᨸᨲ᩠ᨲᩣ, ᨲᩈ᩠ᨾᩣ ᩑᨲᩮ ᨽᩣᨩᨶᨸᩁᩥᨽᩮᩣᨣᩮᨶ ᨸᩁᩥᨽᩩᨬ᩠ᨩᩥᨲᨻ᩠ᨻᩣ, ᨶᩋᨵᩥᨭ᩠ᨮᩣᨶᩪᨸᨣᩣᨶᩅᩥᨠᨸ᩠ᨸᨶᩪᨸᨣᨲᩣᨲᩥ ᩋᨲ᩠ᨳᩮᩣᨲᩥ ᨧ. ᩈᨾᨱᩈᩣᩁᩩᨸ᩠ᨸᩮᨶ ᨸᨠ᩠ᨠᨶ᩠ᨲᩥ ᩋᨿᩮᩣᨸᨲ᩠ᨲᩮᩣ ᨸᨬ᩠ᨧᩉᩥ ᨸᩣᨠᩮᩉᩥ ᨸᨠ᩠ᨠᩮᩣ ᩉᩮᩣᨲᩥ, ᨾᨲ᩠ᨲᩥᨠᩣᨸᨲ᩠ᨲᩮᩣ ᨴ᩠ᩅᩦᩉᩥ. ‘‘ᨽᩥᨠ᩠ᨡᩩᨶᩥᨿᩣ ᨸᨲ᩠ᨲᩈᨶ᩠ᨶᩥᨧ᩠ᨧᨿᩔ ᩅᩣᩁᩥᨲᨲ᩠ᨲᩣ (ᩅᨩᩥᩁ. ᨭᩦ. ᨸᩣᩁᩣᨩᩥᨠ ᪖᪐᪒) ᨽᩥᨠ᩠ᨡᩩᩔᨸᩥ ᨲᩴ ‘ᩋᨶᨶᩩᩁᩪᨸ’ᨶ᩠ᨲᩥ ᨠᨲ᩠ᩅᩣ ‘ᨸᩩᩁᩣᨱᨸᨲ᩠ᨲᩴ ᨸᨧ᩠ᨧᩩᨴ᩠ᨵᩁᩥᨲ᩠ᩅᩣ’ᨲᩥ ᩅᩩᨲ᩠ᨲ’’ᨶ᩠ᨲᩥ ᨧ ᩃᩥᨡᩥᨲᩴ, ᨲᩴ ᨶ ᨿᩩᨲ᩠ᨲᩴ ᨸᩣᩊᩥᨿᩴ ‘‘ᩈᨶ᩠ᨶᩥᨧ᩠ᨧᨿᩴ ᨠᩁᩮᨿ᩠ᨿᩣᨲᩥ ᩋᨶᨵᩥᨭ᩠ᨮᩥᨲᩮᩣ ᩋᩅᩥᨠᨸ᩠ᨸᩥᨲᩮᩣ’’ᨲᩥ (ᨸᩣᨧᩥ. ᪗᪓᪕) ᩅᩩᨲ᩠ᨲᨲ᩠ᨲᩣ. ᩈᩮᩣ ᩉᩥ ᨠᨳᩥᨶᨠ᩠ᨡᨶ᩠ᨵᨠᩮ (ᨾᩉᩣᩅ. ᪓᪐᪖ ᩌᨴᨿᩮᩣ) ᨶᩥᨧ᩠ᨧᨿᩈᨶ᩠ᨶᩥᨵᩥ ᩅᩥᨿ ᩑᨠᩮᩣᨸᩥ ᨸᩩᨶᨴᩥᩅᩈᩮ ‘‘ᩈᨶ᩠ᨶᩥᨧ᩠ᨧᨿᩮᩣ’’ᨲᩥ ᩅᩩᨧ᩠ᨧᨲᩥ. ᩋᨶᨶ᩠ᨲᩁᩈᩥᨠ᩠ᨡᩣᨸᨴᩮ ᨸᨶ ‘‘ᨴᩩᨲᩥᨿᩮᩣ ᩅᩣᩁᩥᨲᩮᩣ’’ᨲᩥ ᩋᨵᩥᨭ᩠ᨮᩣᨶᩴ ᨶᩥᨿᨲᩴ. ᨲᩈ᩠ᨾᩣ ᨴ᩠ᩅᩮ ᨸᨲ᩠ᨲᩮ ᩋᨵᩥᨭ᩠ᨮᩣᨲᩩᩴ ᨶ ᩃᨽᨲᩥ. ᩈᨧᩮ ᩑᨠᨲᩮᩣ ᩋᨵᩥᨭ᩠ᨮᩣᨲᩥ, ᨴ᩠ᩅᩮᨸᩥ ᩋᨶᨵᩥᨭ᩠ᨮᩥᨲᩣ ᩉᩮᩣᨶ᩠ᨲᩥ. ᩅᩥᩈᩩᩴ ᩅᩥᩈᩩᩴ ᩋᨵᩥᨭ᩠ᨮᩣᨲᩥ, ᨴᩩᨲᩥᨿᩮᩣ ᩋᨶᨵᩥᨭ᩠ᨮᩥᨲᩮᩣ. ᩅᩥᨠᨸ᩠ᨸᩮᨲᩩᩴ ᨸᨶ ᨻᩉᩪᨸᩥ ᩃᨽᨲᩥ. ᨠᩣᨠᨱᩥᨠᨾᨲ᩠ᨲᨾ᩠ᨸᩦᨲᩥ ᩑᨲ᩠ᨳ ᨸᩥ-ᨠᩣᩁᩮᩣ ‘‘ᩑᨠᨸᩣᨠᨾ᩠ᨸᩥ ᨩᨶᩮᨲᩦ’’ᨲᩥ ᨸᩣᨠᩴ ᩈᨾ᩠ᨸᩥᨱ᩠ᨯᩮᨲᩥ. ᩋᨳ ᩅᩣ ᩈᨧᩮ ᩑᨠᨸᩣᨠᩮᨶᩮᩅ ᩈᩣᩁᩩᨸ᩠ᨸᩮᩣ, ᩅᨭ᩠ᨭᨲᩦᨲᩥ ᨸᩣᨠᨸᩁᩥᨾᩣᨱᩴ ᨶ ᩅᩩᨲ᩠ᨲᨶ᩠ᨲᩥ ᨣᩉᩮᨲᨻ᩠ᨻᩴ. ᩋᨸᨲ᩠ᨲᨲ᩠ᨲᩣ ᩋᨵᩥᨭ᩠ᨮᩣᨶᩪᨸᨣᩮᩣ ᨶ ᩉᩮᩣᨲᩥ. ᩋᨸᨧ᩠ᨧᩩᨴ᩠ᨵᩁᨶ᩠ᨲᩮᨶ ᩅᩥᨠᨸ᩠ᨸᩮᨲᨻ᩠ᨻᩮᩣᨲᩥ ᨸᩩᩁᩣᨱᨸᨲ᩠ᨲᩴ ᩋᨸᨧ᩠ᨧᩩᨴ᩠ᨵᩁᨶ᩠ᨲᩮᨶ ᩈᩮᩣ ᨸᨲ᩠ᨲᩮᩣ ᩅᩥᨠᨸ᩠ᨸᩮᨲᨻ᩠ᨻᩮᩣᨲᩥ ᩋᨲ᩠ᨳᩮᩣᨲᩥ ᩃᩥᨡᩥᨲᩴ.

ᨸᨲ᩠ᨲᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪒. ᩐᨶᨸᨬ᩠ᨧᨻᨶ᩠ᨵᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨸᩅᩣᩁᩥᨲᩮᨲᩥ ᩑᨲ᩠ᨳ ᩈᨦ᩠ᨥᩅᩈᩮᨶ ᨸᩅᩣᩁᩥᨲᨭ᩠ᨮᩣᨶᩮ ᨸᨬ᩠ᨧᨻᨶ᩠ᨵᨶᩮᨶᩮᩅ ᩅᨭ᩠ᨭᨲᩥ, ᨸᩩᨣ᩠ᨣᩃᩥᨠᩅᩈᩮᨶ ᨸᩅᩣᩁᩥᨲᨭ᩠ᨮᩣᨶᩮ ᩐᨶᨸᨬ᩠ᨧᨻᨶ᩠ᨵᨶᩮᨶᩣᨸᩥ ᩅᨭ᩠ᨭᨲᩦᨲᩥ ᩃᩥᨡᩥᨲᩴ.

ᨿᩮᩣ ᩐᨶᨸᨬ᩠ᨧᨻᨶ᩠ᨵᨶᨲ᩠ᨳᩴ, ᩅᩩᨲ᩠ᨲᨾ᩠ᨸᩥ ᨧᩮᨲᩴ ᨠᩁᩮᩣ ᩈᩮᩣ;

ᩐᨶᨸᨬ᩠ᨧᨻᨶ᩠ᨵᨶᨲ᩠ᨳᩴ, ᨸᨲ᩠ᩅᩣᨶ ᩈᨶ᩠ᨲᩥᨠᩮ.

ᩐᨶᨸᨬ᩠ᨧᨻᨶ᩠ᨵᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪓. ᨽᩮᩈᨩ᩠ᨩᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᨸᨭᩥᩈᩣᨿᨶᩦᨿᩣᨶᩥ ᨸᨭᩥᨣ᩠ᨣᩉᩮᨲ᩠ᩅᩣ’’ᨲᩥ ᩅᨴᨶ᩠ᨲᩮᨶ ᨸᩣᨴᨾᨠ᩠ᨡᨶᩣᨴᩦᨶᩴ ᩋᨲ᩠ᨳᩣᨿ ᨸᨭᩥᨣ᩠ᨣᩉᩮᨲ᩠ᩅᩣ ᨮᨸᩮᨲᩩᩴ ᩅᨭ᩠ᨭᨲᩦᨲᩥ ᨴᩦᨸᩥᨲᨶ᩠ᨲᩥ ᩃᩥᨡᩥᨲᩴ. ‘‘ᨿᩮᩈᩴ ᨾᩴᩈᩴ ᨠᨸ᩠ᨸᨲᩦ’’ᨲᩥ ᩅᨧᨶᩮᨶ ᨿᩮᩈᩴ ᨾᩴᩈᩴ ᨶ ᨠᨸ᩠ᨸᨲᩥ, ᨲᩮᩈᩴ ᩈᨸ᩠ᨸᩥᩌᨴᩥ ᨶ ᨠᨸ᩠ᨸᨲᩦᨲᩥ ᩅᨴᨶ᩠ᨲᩣ ᩋᨩᩣᨶᩥᨲ᩠ᩅᩣ ᩅᨴᨶ᩠ᨲᩥ. ᨿᩮᩈᨬ᩠ᩉᩥ ᨾᩴᩈᩴ ᨠᨸ᩠ᨸᨲᩥ, ᨲᩮᩈᩴ ᩈᨸ᩠ᨸᩦᨲᩥᩌᨴᩥ ᩈᨲ᩠ᨲᩣᩉᨠᩣᩃᩥᨠᨶᩥᩔᨣ᩠ᨣᩥᨿᩅᨲ᩠ᨳᩩᨸᩁᩥᨧ᩠ᨨᩮᨴᨴᩔᨶᨲ᩠ᨳᩴ ᩅᩩᨲ᩠ᨲᩴ. ᨲᨳᩣ ᨸᨱᩦᨲᨽᩮᩣᨩᨶᩈᩥᨠ᩠ᨡᩣᨸᨴᩮ ᨿᩮᩈᩴ ᨾᩴᩈᩴ ᨠᨸ᩠ᨸᨲᩥ, ᨲᩮᩈᩴᨿᩮᩅ ᨡᩦᩁᩣᨴᩥ ᨸᨱᩦᨲᨽᩮᩣᨩᨶᩴ, ᨶᩮᨲᩁᨶ᩠ᨲᩥ ᨴᩔᩮᨲᩩᩴ ᩅᩩᨲ᩠ᨲᨶ᩠ᨲᩥ. ᨾᨵᩩ ᨶᩣᨾ ᨾᨵᩩᨠᩁᩥᨽᨾᩁᨾᨠ᩠ᨡᩥᨠᩣᨶᩴ ᩌᩈᨿᩮᩈᩩ ᨶᩥᨿ᩠ᨿᩣᩈᩈᨴᩥᩈᩴ ᨾᩉᩣᨾᨵᩩ ᩉᩮᩣᨲᩥ, ᨲᩴ ᨿᩣᩅᨩᩦᩅᩥᨠᨶ᩠ᨲᩥ ᨧ ᩃᩥᨡᩥᨲᩴ.

ᨽᩮᩈᨩ᩠ᨩᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨸᨲ᩠ᨲᩅᨣ᩠ᨣᩮᩣ ᨲᨲᩥᨿᩮᩣ.

ᨶᩥᩔᨣ᩠ᨣᩥᨿᨸᩣᨧᩥᨲ᩠ᨲᩥᨿᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨸᩣᨧᩥᨲ᩠ᨲᩥᨿᨠᨱ᩠ᨯᩴ

᪔. ᨽᩮᩣᨩᨶᩅᨣ᩠ᨣᩮᩣ

᪒. ᨣᨱᨽᩮᩣᨩᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨴᩮᩅᨴᨲ᩠ᨲᩮᩣ ᨠᩣᩃᩮ ᩅᩥᨬ᩠ᨬᩣᨸᩮᨲ᩠ᩅᩣ ᨽᩩᨬ᩠ᨩᨲᩥ, ᨲᨸ᩠ᨸᨧ᩠ᨧᨿᩣ ᨽᨣᩅᨲᩣ ‘‘ᨣᨱᨽᩮᩣᨩᨶᩮ ᨸᩣᨧᩥᨲ᩠ᨲᩥᨿ’’ᨶ᩠ᨲᩥ (ᨸᩣᨧᩥ. ᪒᪐᪙) ᩈᩥᨠ᩠ᨡᩣᨸᨴᩴ ᨸᨬ᩠ᨬᨲ᩠ᨲᩴ. ᨸᨴᨽᩣᨩᨶᩮ ᨸᨶ ‘‘ᨶᩥᨾᨶ᩠ᨲᩥᨲᩣ ᨽᩩᨬ᩠ᨩᨶ᩠ᨲᩦ’’ᨲᩥ (ᨸᩣᨧᩥ. ᪒᪑᪘) ᨶᩥᨾᨶ᩠ᨲᨶᨾᩮᩅ ᨣᩉᩮᨲ᩠ᩅᩣ ᩅᩥᨽᨲ᩠ᨲᩴ. ᩋᨶ᩠ᨵᨠᨭ᩠ᨮᨠᨳᩣᨿᩴ ᨸᨶ ᩅᨲ᩠ᨳᩩᩅᩈᩮᨶ ᩅᩥᨬ᩠ᨬᨲ᩠ᨲᩥᨿᩣ ᨿᩣᨧᨶᨾ᩠ᨸᩥ ᩅᩩᨲ᩠ᨲᨶ᩠ᨲᩥ ᩃᩥᨡᩥᨲᩴ. ᨠᩈ᩠ᨾᩣ? ᨸᩁᩥᩅᩣᩁᩮ ᩑᩅ ‘‘ᨣᨱᨽᩮᩣᨩᨶᩴ ᨴ᩠ᩅᩦᩉᩣᨠᩣᩁᩮᩉᩥ ᨸᩈᩅᨲᩥ ᩅᩥᨬ᩠ᨬᨲ᩠ᨲᩥᨲᩮᩣ ᩅᩣ ᨶᩥᨾᨶ᩠ᨲᨶᨲᩮᩣ ᩅᩣ’’ᨲᩥ (ᨸᩁᩥ. ᪓᪒᪒) ᩅᩩᨲ᩠ᨲᨲ᩠ᨲᩣ. ᨲᩈ᩠ᨾᩣ ᩋᨭ᩠ᨮᩩᨸ᩠ᨸᨲ᩠ᨲᩥᨿᩴᨿᩮᩅ ᨸᩣᨠᨭᨲ᩠ᨲᩣ ᨸᨴᨽᩣᨩᨶᩮ ᨶ ᩅᩩᨲ᩠ᨲᨶ᩠ᨲᩥ ᩅᩮᨴᩥᨲᨻ᩠ᨻᩴ. ‘‘‘ᩑᨠᨲᩮᩣ ᨣᨱ᩠ᩉᨶ᩠ᨲᩦ’ᨲᩥ ᨧ ᨣᩉᩥᨲᨽᨲ᩠ᨲᩣᨸᩥ ᩋᨬ᩠ᨬᩮ ᨿᩣᩅ ᨣᨱ᩠ᩉᨶ᩠ᨲᩥ, ᨲᩣᩅ ᨧᩮ ᨲᩥᨭ᩠ᨮᨶ᩠ᨲᩥ, ᩑᨠᨲᩮᩣ ᨣᨱ᩠ᩉᨶ᩠ᨲᩥ ᩑᩅ ᨶᩣᨾᩣ’’ᨲᩥ ᨧ, ‘‘ᨿᩮᩣ ᨠᩮᩣᨧᩥ ᨸᨻ᩠ᨻᨩᩥᨲᩮᩣᨲᩥ ᩈᩉᨵᨾ᩠ᨾᩥᨠᩮᩈᩩ, ᨲᩥᨲ᩠ᨳᩥᨿᩮᩈᩩ ᩅᩣᨲᩥ ᩋᨲ᩠ᨳᩮᩣ’’ᨲᩥ ᨧ, ‘‘ᩈᨾᨿᩣᨽᩣᩅᩮᩣᨲᩥ ᩈᨲ᩠ᨲᨶ᩠ᨶᩴ ᩋᨶᩣᨸᨲ᩠ᨲᩥᩈᨾᨿᩣᨶᩴ ᩋᨽᩣᩅᩮᩣ’’ᨲᩥ ᨧ, ‘‘ᩈᨾᨿᩃᨴ᩠ᨵᨠᩮᨶ ᩈᩉ ᨧᨲ᩠ᨲᩣᩁᩮᩣ ᩉᩮᩣᨶ᩠ᨲᩦ’’ᨲᩥ ᨧ, ‘‘ᩈᨾᨿᩃᨴ᩠ᨵᨠᩮᩣ ᩈᨿᨾᩮᩅ ᨾᩩᨧ᩠ᨧᨲᩥ, ᩈᩮᩈᩣᨶᩴ ᨣᨱᨸᩪᩁᨠᨲ᩠ᨲᩣ ᩌᨸᨲ᩠ᨲᩥᨠᩁᩮᩣ ᩉᩮᩣᨲᩦ’’ᨲᩥ ᨧ ᩃᩥᨡᩥᨲᩴ.

ᩑᨲ᩠ᨳᩣᩉ – ‘‘ᨸᨭᩥᨣ᩠ᨣᩉᨱᨾᩮᩅ ᩉᩮᨲ᩠ᨳ ᨸᨾᩣᨱ’’ᨶ᩠ᨲᩥ ᩅᩩᨲ᩠ᨲᩴ, ᩋᨳ ᨠᩈ᩠ᨾᩣ ᨸᩣᩊᩥᨿᩴ ‘‘ᨣᨱᨽᩮᩣᨩᨶᩴ ᨶᩣᨾ ᨿᨲ᩠ᨳ ᨧᨲ᩠ᨲᩣᩁᩮᩣ…ᨸᩮ… ᨽᩩᨬ᩠ᨩᨶ᩠ᨲᩦ’’ᨲᩥ (ᨸᩣᨧᩥ. ᪒᪑᪘) ᩅᩩᨲ᩠ᨲᨶ᩠ᨲᩥ? ᩅᩩᨧ᩠ᨧᨲᩮ – ᨲᨲ᩠ᨳ ‘‘ᨽᩩᨬ᩠ᨩᨶ᩠ᨲᩦ’’ᨲᩥ ᨸᨭᩥᨣ᩠ᨣᩉᨱᨶᩥᨿᨾᩅᨧᨶᩴ. ᨶ ᩉᩥ ᩋᨸ᩠ᨸᨭᩥᨣ᩠ᨣᩉᩥᨲᨠᩴ ᨽᩥᨠ᩠ᨡᩪ ᨽᩩᨬ᩠ᨩᨶ᩠ᨲᩦᨲᩥ.

ᨣᨱᨽᩮᩣᨩᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪓. ᨸᩁᨾ᩠ᨸᩁᨽᩮᩣᨩᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩋᨬ᩠ᨬᨲᩕ ᩈᨾᨿᩣᨲᩥ ᨸᨶ ᨶᩥᨾᨶ᩠ᨲᨶᨲᩮᩣ ᨸᩈᩅᨶᨲᩮᩣ ᨽᩮᩣᨩᨶᩣᨸᩮᨠ᩠ᨡᩴ ᨸᩣᨧᩥᨲ᩠ᨲᩥᨿᨶ᩠ᨲᩥ ᩑᨠᩮ. ᩑᨠᩮᩣ ᨽᩥᨠ᩠ᨡᩩ ᨸᩥᨱ᩠ᨯᩣᨿ ᨧᩁᨶ᩠ᨲᩮᩣ ᨽᨲ᩠ᨲᩴ ᩃᨽᨲᩥ, ᨲᨾᨬ᩠ᨬᩮᩣ ᨧᩪᨸᩣᩈᨠᩮᩣ ᨶᩥᨾᨶ᩠ᨲᩮᨲ᩠ᩅᩣ ᨥᩁᩮ ᨶᩥᩈᩦᨴᩣᨸᩮᩈᩥ, ᨶ ᨧ ᨲᩣᩅ ᨽᨲ᩠ᨲᩴ ᩈᨾ᩠ᨸᨩ᩠ᨩᨲᩥ. ᩈᨧᩮ ᩈᩮᩣ ᨽᩥᨠ᩠ᨡᩩ ᨸᩥᨱ᩠ᨯᩣᨿ ᨧᩁᩥᨲ᩠ᩅᩣ ᩃᨴ᩠ᨵᨽᨲ᩠ᨲᩴ ᨽᩩᨬ᩠ᨩᨲᩥ, ᩌᨸᨲ᩠ᨲᩥ. ᨠᩈ᩠ᨾᩣᨲᩥ ᨧᩮ? ‘‘ᨸᩁᨾ᩠ᨸᩁᨽᩮᩣᨩᨶᩴ ᨶᩣᨾ ᨸᨬ᩠ᨧᨶ᩠ᨶᩴ ᨽᩮᩣᨩᨶᩣᨶᩴ ᩋᨬ᩠ᨬᨲᩁᩮᨶ ᨽᩮᩣᨩᨶᩮᨶ ᨶᩥᨾᨶ᩠ᨲᩥᨲᩮᩣ ᨲᩴ ᨮᨸᩮᨲ᩠ᩅᩣ ᩋᨬ᩠ᨬᩴ ᨸᨬ᩠ᨧᨶ᩠ᨶᩴ ᨽᩮᩣᨩᨶᩣᨶᩴ ᩋᨬ᩠ᨬᨲᩁᩴ ᨽᩮᩣᨩᨶᩴ ᨽᩩᨬ᩠ᨩᨲᩥ, ᩑᨲᩴ ᨸᩁᨾ᩠ᨸᩁᨽᩮᩣᨩᨶᩴ ᨶᩣᨾᩣ’’ᨲᩥ (ᨸᩣᨧᩥ. ᪒᪒᪗) ᩅᩩᨲ᩠ᨲᨲ᩠ᨲᩣ. ᨸᨮᨾᨠᨳᩥᨶᩈᨴᩥᩈᩣᨶᩥ, ᩍᨴᩴ ᨸᨶ ᨠᩥᩁᩥᨿᩣᨠᩥᩁᩥᨿ’’ᨶ᩠ᨲᩥ ᨸᩣᨮᩮᩣ.

ᨸᩁᨾ᩠ᨸᩁᨽᩮᩣᨩᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪔. ᨠᩣᨱᨾᩣᨲᩣᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨴ᩠ᩅᨲ᩠ᨲᩥᨸᨲ᩠ᨲᨸᩪᩁᩣ ᨸᨭᩥᨣ᩠ᨣᩉᩮᨲᨻ᩠ᨻᩣᨲᩥ ᨲᨳᩣᨶᩦᨲᨸᩪᩅᩮᩉᩥ ᩋᨲ᩠ᨳᩥᨠᩮᨶ ᩏᨠ᩠ᨠᨭ᩠ᨮᨸᨲ᩠ᨲᨸ᩠ᨸᨾᩣᨱᩅᩈᩮᨶ ᨣᩉᩮᨲᨻ᩠ᨻᩣ. ‘‘ᨾᩣ ᨡᩮᩣ ᨲ᩠ᩅᩴ ᩑᨲ᩠ᨳ ᨸᨭᩥᨣ᩠ᨣᨱ᩠ᩉᩦ’’ᨲᩥ ᩋᨸᩣᨳᩮᨿ᩠ᨿᩣᨴᩥᩋᨲ᩠ᨳᩣᨿ ᩈᨩ᩠ᨩᩥᨲᩈᨬ᩠ᨬᩣᨿ ᩋᨲᩥᩁᩮᨠᨸ᩠ᨸᨭᩥᨣ᩠ᨣᩉᨱᩮᨶ ᩌᩁᩮᩣᨧᨶᩮ, ᩋᩈᩴᩅᩥᨽᩣᨣᩮ ᨧ ᨶ ᨾᩩᨧ᩠ᨧᨲᩥ ᩋᨧᩥᨲ᩠ᨲᨠᨲ᩠ᨲᩣ ᩈᩥᨠ᩠ᨡᩣᨸᨴᩔ. ᩋᨳ ᩏᨣ᩠ᨣᩉᩥᨲᨠᩴ ᨣᨱ᩠ᩉᩣᨲᩥ, ᨶ ᨾᩩᨧ᩠ᨧᨲᩥ ᩑᩅ. ᩋᩈᩴᩅᩥᨽᩣᨣᩮ ᨸᨶ ᩋᨶᩣᨸᨲ᩠ᨲᩥ ᩋᨠᨸ᩠ᨸᩥᨿᨲ᩠ᨲᩣ. ᩋᨧᩥᨲ᩠ᨲᨠᨲᩣ ᨸᨱ᩠ᨱᨲ᩠ᨲᩥᨩᩣᨶᨶᩣᨽᩣᩅᩮᨶᩮᩅ, ᨶ ᩅᨲ᩠ᨳᩩᨩᩣᨶᨶᩣᨽᩣᩅᩮᨶᩣᨲᩥ ᩑᨠᩮ. ‘‘ᨶ ᨸᩣᨳᩮᨿ᩠ᨿᩣᨴᩥᩋᨲ᩠ᨳᩣᨿ ᩈᨩ᩠ᨩᩥᨲᨽᩣᩅᨩᩣᨶᨶ’’ᨶ᩠ᨲᩥ ᩋᨦ᩠ᨣᩮᩈᩩ ᩋᩅᩩᨲ᩠ᨲᨲ᩠ᨲᩣ ᩈᨧᩮ ᩈᨬ᩠ᨧᩥᨧ᩠ᨧ ᨶ ᩅᨴᨲᩥ, ᨸᩣᨧᩥᨲ᩠ᨲᩥᨿᨶ᩠ᨲᩥ ᨸᩮᩣᩁᩣᨱᩣ ᩅᨴᨶ᩠ᨲᩥ. ᩋᨲᩥᩁᩮᨠᨸ᩠ᨸᨭᩥᨣ᩠ᨣᩉᨱᨶ᩠ᨲᩥ ᨲᨲ᩠ᨳ ᨸᨬ᩠ᨧᨾᩴᩅ ᩋᨦ᩠ᨣᩴ ᩅᩩᨲ᩠ᨲᩴ, ᨲᩈ᩠ᨾᩣ ᩋᨸ᩠ᨸᨭᩥᨣ᩠ᨣᩉᩥᨲᨲ᩠ᨲᩣ ᨶ ᨸᩣᨧᩥᨲ᩠ᨲᩥᨿᩴ, ᨠᨲ᩠ᨲᨻ᩠ᨻᩣᨠᩁᨱᨲᩮᩣ ᨸᨶ ᨴᩩᨠ᩠ᨠᨭᩴ. ᩋᨬ᩠ᨬᨳᩣ ᨠᩥᩁᩥᨿᩣᨠᩥᩁᩥᨿᩴ ᩍᨴᩴ ᩌᨸᨩ᩠ᨩᨲᩥ. ᩋᨶᩥᩅᩣᩁᨱᩴ, ᩋᨶᩣᩁᩮᩣᨧᨶᩴ ᩅᩣ ᨨᨭ᩠ᨮᨾᨦ᩠ᨣᩴ ᩅᨲ᩠ᨲᨻ᩠ᨻᩴ ᩈᩥᨿᩣ.

ᨠᩣᨱᨾᩣᨲᩣᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪕. ᨸᨮᨾᨸᩅᩣᩁᨱᩣᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨽᩩᨲ᩠ᨲᩣᩅᩦ ᨸᩅᩣᩁᨱᩴ ᨶᩣᨾ ᨸᨬ᩠ᨧᨦ᩠ᨣᩥᨠᩴ. ᨲᩮᩈᩩ ‘‘ᩋᩈᨶᩴ ᨸᨬ᩠ᨬᩣᨿᨲ᩠ᨲᩦ’’ᨲᩥ ᩑᨲᩮᨶᩮᩅ ‘‘ᨽᩩᨲ᩠ᨲᩣᩅᩦ’’ᨲᩥ ᩑᨲᩔ ᩈᩥᨴ᩠ᨵᨲ᩠ᨲᩣ ᩅᩥᩈᩩᩴ ᩋᨲ᩠ᨳᩈᩥᨴ᩠ᨵᩥ ᨶ ᨴᩥᩔᨲᩥ. ᨴᩥᩔᨲᩥ ᨧᩮ, ᩋᨦ᩠ᨣᩣᨶᩴ ᨨᨠ᩠ᨠᨲ᩠ᨲᨴᩔᨶᨶ᩠ᨲᩥ (ᩅᨩᩥᩁ. ᨭᩦ. ᨸᩣᨧᩥᨲ᩠ᨲᩥᨿ ᪒᪓᪘-᪒᪓᪙) ᩃᩥᨡᩥᨲᩴ. ‘‘ᨽᩮᩣᨩᨶᩴ ᨸᨬ᩠ᨬᩣᨿᨲᩦ’’ᨲᩥ ᩋᨽᩥᩉᨭᩴ ᩈᨶ᩠ᨵᩣᨿ ᩅᩩᨲ᩠ᨲᩴ.

ᨠᩮᩣᨭ᩠ᨭᩮᨲ᩠ᩅᩣ ᨠᨲᨧᩩᨱ᩠ᨱᨾ᩠ᨸᩦᨲᩥ ᨸᩥ-ᨠᩣᩁᩮᨶ ᨠᩩᨱ᩠ᨯᨠᩴ ᩈᨾ᩠ᨸᩥᨱ᩠ᨯᩮᨲᩥ. ᩈᨾᨸᩣᨠᨽᨩ᩠ᨩᩥᨲᩣᨶᩴ ᨸᨶ ᩌᨲᨸᩈᩩᨠ᩠ᨡᩣᨶᩴ ᩅᩣ ᨠᩩᨱ᩠ᨯᨠᩴ ᩅᩣ ᨿᩮ ᨠᩮᨧᩥ ᨲᨱ᩠ᨯᩩᩃᩣ ᩅᩣᨲᩥ ᩑᨲ᩠ᨲᨠᨾᩮᩅ ᩅᩩᨲ᩠ᨲᨲ᩠ᨲᩣ ᩈᨾᨸᩣᨠᨽᨩ᩠ᨩᩥᨲᩣᨶᩴ ᩅᩦᩉᩦᨶᩴ, ᩅᩦᩉᩥᨸᩃᩣᩈᩣᨶᩴ ᩅᩣ ᨲᨱ᩠ᨯᩩᩃᨧᩩᨱ᩠ᨱᩴ ᨸᩅᩣᩁᩮᨲᩥ. ᨲᨳᩣ ᨡᩁᨸᩣᨠᨽᨩ᩠ᨩᩥᨲᩣᨶᩴ ᨠᩩᨱ᩠ᨯᨠᨾ᩠ᨸᩥ ᨸᩅᩣᩁᩮᨲᩥ. ᨽᨩ᩠ᨩᩥᨲᩈᨲ᩠ᨲᩩᨿᩮᩣ ᨸᩥᨱ᩠ᨯᩮᨲ᩠ᩅᩣ ᨠᨲᩮᩣ ᩋᨸᨠ᩠ᨠᩈᨲ᩠ᨲᩩᨾᩮᩣᨴᨠᩮᩣᨸᩥ ᨸᩅᩣᩁᩮᨲᩦᨲᩥ ᩃᩥᨡᩥᨲᩴ. ᩈᨧᩮ ᩋᩅᩈᩥᨭ᩠ᨮᩴ ᨶᨲ᩠ᨳᩥ, ᨶ ᨸᩅᩣᩁᩮᨲᩥ. ᨠᩈ᩠ᨾᩣ? ᩋᩈᨶᩈᨦ᩠ᨡᩣᨲᩔ ᩅᩥᨸ᩠ᨸᨠᨲᨽᩮᩣᨩᨶᩔ ᩋᨽᩣᩅᨲᩮᩣ.

ᩋᨠᨸ᩠ᨸᩥᨿᨾᩴᩈᩴ ᨸᨶ ᨠᩥᨬ᩠ᨧᩣᨸᩥ ᨸᨭᩥᨠ᩠ᨡᩥᨸᩥᨲᨻ᩠ᨻᨭ᩠ᨮᩣᨶᩮ ᨮᩥᨲᩴ, ᨡᩣᨴᩥᨿᨾᩣᨶᩴ ᨸᨶ ᨾᩴᩈᨽᩣᩅᩴ ᨶ ᨩᩉᩣᨲᩥ, ᨲᩈ᩠ᨾᩣ ᨸᩅᩣᩁᩮᨲᩥ. ᨽᩮᩣᨩᨶᩈᩣᩃᩣᨿ ᨽᩩᨬ᩠ᨩᨶ᩠ᨲᩮᩣ ᨧᩮ ᩋᨲ᩠ᨲᨶᩮᩣ ᩋᨸᩣᨸᩩᨱᨶᨠᩮᩣᨭ᩠ᨮᩣᩈᩴ ᩋᨽᩥᩉᨭᩴ ᨸᨭᩥᨠ᩠ᨡᩥᨸᨲᩥ, ᨶ ᨸᩅᩣᩁᩮᨲᩥ. ᨠᩣᨾᩴ ᨸᨭᩥᨠ᩠ᨡᩥᨸᨲᩥ, ᨸᨲ᩠ᨲᩮ ᨸᨶ ᩌᩁᩣᨾᩥᨠᩣ ᩌᨠᩥᩁᨶ᩠ᨲᩥ, ᨲᩴ ᨽᩩᨬ᩠ᨩᩥᨲᩩᩴ ᨶ ᩅᨭ᩠ᨭᨲᩥ. ᩍᨴᨬ᩠ᩉᩥ ᨻᩩᨴ᩠ᨵᨸ᩠ᨸᨭᩥᨠᩩᨭ᩠ᨮᩣᨿ ᩋᨶᩮᩈᨶᩣᨿ ᩏᨸ᩠ᨸᨶ᩠ᨶᩮᨿᩮᩅ ᩈᨦ᩠ᨡᩴ ᨣᨧ᩠ᨨᨲᩥ. ᨿᨳᩣ ᩉᩥ ᩈᨦ᩠ᨥᨲᩮᩣ ᩃᨴ᩠ᨵᩴ ᨸᩥᨱ᩠ᨯᩴ ᨴᩩᩔᩦᩃᩮᩣ ᨴᩮᨲᩥ, ᨲᨬ᩠ᨧᩮ ᨸᨭᩥᨠ᩠ᨡᩥᨸᨲᩥ, ᨶ ᨸᩅᩣᩁᩮᨲᩥ, ᩑᩅᩴᩈᨾ᩠ᨸᨴᨾᩥᨴᨶ᩠ᨲᩥ ᨧ, ᩅᩥᨽᩣᨣᩮᩣ ᩃᨩ᩠ᨩᩦ ᨧᩮ ᨴᩮᨲᩥ, ᨲᩴ ᩈᩮᩣ ᨶ ᩋᨩ᩠ᨫᩮᩣᩉᩁᩥᨲᩩᨠᩣᨾᨲᩣᨿ ᨸᨭᩥᨠ᩠ᨡᩥᨸᨲᩥ, ᨸᩅᩣᩁᩮᨲᩦᨲᩥ ᨧ, ‘‘ᩈᨾᩴᩈᩁᩈᩴ ᩈᨾᨧ᩠ᨨᩁᩈ’’ᨶ᩠ᨲᩥ ᩌᨸᨩ᩠ᨩᨶᨲᩮᩣ ‘‘ᨾᩴᩈᩁᩈ’’ᨶ᩠ᨲᩥ ᩅᩩᨲ᩠ᨲᩮ ᨸᨶ ᨸᨭᩥᨠ᩠ᨡᩥᨸᨲᩮᩣ ᩉᩮᩣᨲᩥ, ‘‘ᨾᩴᩈᩔ ᩁᩈᩴ ᨾᩴᩈᩁᩈ’’ᨶ᩠ᨲᩥ ᩋᨿᩴ ᩅᩥᨣ᩠ᨣᩉᩮᩣ ᨶᩣᨵᩥᨸ᩠ᨸᩮᨲᩮᩣᨲᩥ ᨧ ᩅᩩᨲ᩠ᨲᩴ. ᨽᨲ᩠ᨲᨾᩥᩔᨠᩴ ᨿᩣᨣᩩᩴ ᩌᩉᩁᩥᨲ᩠ᩅᩣ ‘‘ᨿᩣᨣᩩᩴ ᨣᨱ᩠ᩉᨳᩣ’’ᨲᩥ ᩅᨴᨲᩥ, ᨶ ᨸᩅᩣᩁᩮᨲᩥ. ‘‘ᨽᨲ᩠ᨲᩴ ᨣᨱ᩠ᩉᨳᩣ’’ᨲᩥ ᩅᩩᨲ᩠ᨲᩮ ᨸᩅᩣᩁᩮᨲᩥ. ᨠᩈ᩠ᨾᩣ? ᨿᩮᨶᩣᨸᩩᨧ᩠ᨨᩥᨲᩮᩣ, ᨲᩔ ᩋᨲ᩠ᨳᩥᨲᩣᨿ. ᩑᨲ᩠ᨳ ᨸᨶ ‘‘ᨿᩣᨣᩩᨾᩥᩔᨠᩴ ᨣᨱ᩠ᩉᨳᩣ’’ᨲᩥ ᩅᨴᨲᩥ, ᨲᨲᩕ ᨧᩮ ᨿᩣᨣᩩ ᨻᩉᩩᨲᩁᩣ ᩅᩣ ᩉᩮᩣᨲᩥ, ᩈᨾᩈᨾᩣ ᩅᩣ. ᨽᨲ᩠ᨲᩴ ᨾᨶ᩠ᨴᩴ, ᨶ ᨸᩅᩣᩁᩮᨲᩥ. ᨿᩣᨣᩩ ᨧᩮ ᨾᨶ᩠ᨴᩣ, ᨽᨲ᩠ᨲᩴ ᨻᩉᩩᨲᩁᩴ, ᨸᩅᩣᩁᩮᨲᩥ. ᩍᨴᨬ᩠ᨧ ᩈᨻ᩠ᨻᩋᨭ᩠ᨮᨠᨳᩣᩈᩩ ᩅᩩᨲ᩠ᨲᨲ᩠ᨲᩣ ᨶ ᩈᨠ᩠ᨠᩣ ᨸᨭᩥᨠ᩠ᨡᩥᨸᩥᨲᩩᩴ. ᨠᩣᩁᨱᩴ ᨸᨶᩮᨲ᩠ᨳ ᨴᩩᨴ᩠ᨴᩈᩴ. ‘‘ᨽᨲ᩠ᨲᨾᩥᩔᨠᩴ ᨣᨱ᩠ᩉᨳᩣ’’ᨲᩥ ᩅᨴᨲᩥ. ᨲᨲᩕ ᨽᨲ᩠ᨲᩴ ᨻᩉᩩᨲᩁᩴ ᩅᩣ ᩈᨾᨠᩴ ᩅᩣ ᩋᨸ᩠ᨸᨲᩁᩴ ᩅᩣ ᩉᩮᩣᨲᩥ, ᨸᩅᩣᩁᩮᨲᩥ ᩑᩅ. ᨽᨲ᩠ᨲᩴ ᩅᩣ ᨿᩣᨣᩩᩴ ᩅᩣ ᩋᨶᩣᨾᩈᩥᨲ᩠ᩅᩣ ‘‘ᨾᩥᩔᨠᩴ ᨣᨱ᩠ᩉᨳᩣ’’ᨲᩥ ᩅᨴᨲᩥ. ᨲᨲᩕ ᨧᩮ ᨽᨲ᩠ᨲᩴ ᨻᩉᩩᨲᩁᩴ, ᩈᨾᨠᩴ ᩅᩣ ᩉᩮᩣᨲᩥ, ᨸᩅᩣᩁᩮᨲᩥ. ᩋᨸ᩠ᨸᨲᩁᩴ ᨶ ᨸᩅᩣᩁᩮᨲᩥ. ᨲᩴ ᩈᨻ᩠ᨻᩴ ᩅᩦᨾᩴᩈᩥᨲᨻ᩠ᨻᨶ᩠ᨲᩥ.

ᨹᩃᩴ ᩅᩣ ᨠᨶ᩠ᨴᨾᩪᩃᩣᨴᩥ ᩅᩣ ᨸᨬ᩠ᨧᩉᩥ ᩈᨾᨱᨠᨸ᩠ᨸᩮᩉᩥ ᨠᨸ᩠ᨸᩥᨿᩴ ᩋᨠᨲᨶ᩠ᨲᩥ ᩑᨲ᩠ᨳ ᨠᨸ᩠ᨸᩥᨿᩴ ᩋᨠᩣᩁᩣᨸᩥᨲᩮᩉᩥ ᨠᨴᩃᩥᨹᩃᩣᨴᩦᩉᩥ ᩈᨴ᩠ᨵᩥᩴ ᩋᨲᩥᩁᩥᨲ᩠ᨲᩴ ᨠᩣᩁᩣᨸᩮᨲ᩠ᩅᩣᨸᩥ ᨲᩴ ᨠᨴᩃᩥᨹᩃᩣᨴᩥᩴ ᨮᨸᩮᨲ᩠ᩅᩣ ᩋᩅᩈᩮᩈᩴ ᨽᩩᨬ᩠ᨩᩥᨲᩩᩴ ᩅᨭ᩠ᨭᨲᩥ. ᩋᨾᩥᩔᨠᩁᩈᨲ᩠ᨲᩣ ᨸᩩᨶ ᨲᩣᨶᩥ ᨠᨸ᩠ᨸᩥᨿᩴ ᨠᩣᩁᩣᨸᩮᨲ᩠ᩅᩣ ᩋᨬ᩠ᨬᩈ᩠ᨾᩥᩴ ᨽᩣᨩᨶᩮ ᨮᨸᩮᨲ᩠ᩅᩣ ᨠᩣᩁᩮᨲ᩠ᩅᩣ ᨽᩩᨬ᩠ᨩᩥᨲᩩᩴ ᩅᨭ᩠ᨭᨲᩥ. ᨠᩈ᩠ᨾᩣ? ᨸᩩᨻ᩠ᨻᩮ ᨲᩮᩈᩩ ᩅᩥᨶᨿᨠᨾ᩠ᨾᩔ ᩋᨶᩣᩁᩩᩊ᩠ᩉᨲ᩠ᨲᩣᨲᩥ ᩅᨴᨶ᩠ᨲᩥ.

ᨸᨲ᩠ᨲᩮ ᩁᨩᩴ ᨸᨲᩥᨲᩴ ᩋᨸ᩠ᨸᨭᩥᨣ᩠ᨣᩉᩥᨲᨾᩮᩅ ᩉᩮᩣᨲᩥ. ᨲᩈ᩠ᨾᩣ ᨸᨭᩥᨣ᩠ᨣᩉᩮᨲ᩠ᩅᩣᩅ ᨽᩥᨠ᩠ᨡᩣ ᨣᨱ᩠ᩉᩥᨲᨻ᩠ᨻᩣ. ‘‘ᩋᨸᨭᩥᨣ᩠ᨣᩉᩮᨲ᩠ᩅᩣ ᨣᨱ᩠ᩉᨲᩮᩣ ᩅᩥᨶᨿᨴᩩᨠ᩠ᨠᨭ’’ᨶ᩠ᨲᩥ (ᨸᩣᨧᩥ. ᩋᨭ᩠ᨮ. ᪒᪖᪕) ᩅᩩᨲ᩠ᨲᨲ᩠ᨲᩣ ᩑᨲᨾᨬ᩠ᨬᩮᩈᨾ᩠ᨸᩥ ᨶ ᩅᨭ᩠ᨭᨲᩦᨲᩥ ᩅᨴᨶ᩠ᨲᩥ. ‘‘ᨲᩴ ᨸᨶ ᨸᩩᨶ ᨸᨭᩥᨣ᩠ᨣᩉᩮᨲ᩠ᩅᩣ ᨽᩩᨬ᩠ᨩᨶ᩠ᨲᩔ ᩋᨶᩣᨸᨲ᩠ᨲᩦ’’ᨲᩥ ᩑᨲ᩠ᨳᩣᨸᩥ ᩑᩅᨾᩮᩅ. ᩍᨾᩈ᩠ᨾᩥᩴ ᨸᨶ ‘‘ᩋᨲᩥᩁᩥᨲ᩠ᨲᩴ ᨠᨲᩴ ᩋᨶᨲᩥᩁᩥᨲ᩠ᨲᨠᨲᩴ ᩉᩮᩣᨲᩦ’’ᨲᩥ ᩑᨲ᩠ᨳᩣᨸᩥ ᩑᩅᨾᩮᩅ. ᩍᨾᩈ᩠ᨾᩥᩴ ᨸᨶ ‘‘ᩋᨲᩥᩁᩥᨲ᩠ᨲᩴ ᨠᨲᩴ, ᩋᨶᨲᩥᩁᩥᨲ᩠ᨲᩴ ᨠᨲᩴ ᩉᩮᩣᨲᩦ’’ᨲᩥᩌᨴᩦᩉᩥ ᩏᨸᨸᩁᩥᨠ᩠ᨡᩥᨲ᩠ᩅᩣ ᩅᩥᨶᩥᨧ᩠ᨨᨿᩮᩣ ᩅᩮᨴᩥᨲᨻ᩠ᨻᩮᩣᨲᩥ ᨴᩦᨸᩥᨲᩴ. ᩋᩃᨾᩮᨲᩴ ᩈᨻ᩠ᨻᨶ᩠ᨲᩥ ᩍᨴᨾ᩠ᨸᩥ ᨲᩮ ᩋᨵᩥᨠᩴ, ᩍᨲᩮᩣ ᩋᨬ᩠ᨬᩴ ᨶ ᩃᨧ᩠ᨨᩈᩦᨲᩥ ᩋᨲ᩠ᨳᩮᩣ.

ᩌᩉᩣᩁᨲ᩠ᨳᩣᨿᩣᨲᩥ ᩅᩥᨠᩣᩃᩮ ᩑᩅᩣᨲᩥ ᩑᨠᩮ. ‘‘ᨸᨮᨾᨠᨳᩥᨶᩈᨴᩥᩈᩣᨶᩥ. ᩍᨴᩴ ᨸᨶ ᨠᩥᩁᩥᨿᩣᨠᩥᩁᩥᨿ’’ᨶ᩠ᨲᩥ ᨸᩣᨮᩮᩣ. ᨠᩣᨿᨠᨾ᩠ᨾᩴ ᩋᨩ᩠ᨫᩮᩣᩉᩁᨱᨲᩮᩣ. ᩅᨧᩦᨠᨾ᩠ᨾᩴ ᩅᩣᨧᩣᨿ ‘‘ᩋᨲᩥᩁᩥᨲ᩠ᨲᩴ ᨠᩁᩮᩣᨳ, ᨽᨶ᩠ᨲᩮ’’ᨲᩥ ᩋᨠᩣᩁᩣᨸᨶᨲᩮᩣᨲᩥ ᩅᩮᨴᩥᨲᨻ᩠ᨻᩴ.

ᨸᨮᨾᨸᩅᩣᩁᨱᩣᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪖. ᨴᩩᨲᩥᨿᨸᩅᩣᩁᨱᩣᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᨽᩩᨲ᩠ᨲᩈ᩠ᨾᩥᩴ ᨸᩣᨧᩥᨲ᩠ᨲᩥᨿ’’ᨶ᩠ᨲᩥ (ᨸᩣᨧᩥ. ᪒᪔᪓) ᨾᩣᨲᩥᨠᩣᨿᩴ ᩅᩩᨲ᩠ᨲᨲ᩠ᨲᩣ ‘‘ᨽᩮᩣᨩᨶᨸᩁᩥᨿᩮᩣᩈᩣᨶᩮ ᨸᩣᨧᩥᨲ᩠ᨲᩥᨿ’’ᨶ᩠ᨲᩥ ᩅᩩᨲ᩠ᨲᩴ, ᨶ ᩋᨩ᩠ᨫᩮᩣᩉᩣᩁᩮ ᩋᨩ᩠ᨫᩮᩣᩉᩣᩁᩮ.

ᨴᩩᨲᩥᨿᨸᩅᩣᩁᨱᩣᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪗. ᩅᩥᨠᩣᩃᨽᩮᩣᨩᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨩᨾ᩠ᨻᩩᨴᩦᨸᩔ ᨠᩣᩃᩮᨶ ᨸᩁᩥᨧ᩠ᨨᩮᨴᩮᩣᨲᩥ ᩑᩅᩴ ᨠᩥᩁ.

ᩅᩥᨠᩣᩃᨽᩮᩣᨩᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪘. ᩈᨶ᩠ᨶᩥᨵᩥᨠᩣᩁᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᨴᩩᨴ᩠ᨵᩮᩣᨲᩮᩣ ᩉᩮᩣᨲᩦ’’ᨲᩥᩌᨴᩥᨶᩣ ᨶᨿᩮᨶ ᩍᨵ ᩅᩩᨲ᩠ᨲᨲ᩠ᨲᩣ, ‘‘ᨴᩩᨴ᩠ᨵᩮᩣᨲᩴ ᨸᨲ᩠ᨲᩴ ᨵᩮᩣᩅᩥᨲ᩠ᩅᩣ ᨸᩩᨶ

ᨲᨲ᩠ᨳ ᩋᨧ᩠ᨨᩮᩣᨴᨠᩴ ᩅᩣ ᩌᩈᩥᨬ᩠ᨧᩥᨲ᩠ᩅᩣ, ᩋᨦ᩠ᨣᩩᩃᩥᨿᩣ ᩅᩣ ᨥᩴᩈᩥᨲ᩠ᩅᩣ ᨶᩥᩈ᩠ᨶᩮᩉᨽᩣᩅᩮᩣ ᨩᩣᨶᩥᨲᨻ᩠ᨻᩮᩣ’’ᨲᩥ (ᨸᩣᨧᩥ. ᩋᨭ᩠ᨮ. ᪒᪕᪓) ᩈᨾᨶ᩠ᨲᨸᩣᩈᩣᨴᩥᨠᩣᨿᩴ ᩅᩩᨲ᩠ᨲᨲ᩠ᨲᩣ ᨧ ᨾᨲ᩠ᨲᩥᨠᩣᨸᨲ᩠ᨲᩔ ᨠᨸᩣᩃᩮᨶ ᨸᩦᨲᩮᩣ ᩈ᩠ᨶᩮᩉᩮᩣ ᩈᨶ᩠ᨶᩥᨵᩥᩴ ᨠᩁᩮᩣᨲᩦᨲᩥ ᩈᩥᨴ᩠ᨵᨶ᩠ᨲᩥ ᩃᩥᨡᩥᨲᩴ. ᩈᨿᩴ ᨸᨭᩥᨣ᩠ᨣᩉᩮᨲ᩠ᩅᩣ ᩋᨸᩁᩥᨧ᩠ᨧᨲ᩠ᨲᨾᩮᩅᩣᨲᩥ ᩑᨲ᩠ᨳ ᩋᨸᩁᩥᨧ᩠ᨧᨲ᩠ᨲᩴ ᨶᩣᨾ ᩋᨶᩩᨸᩈᨾ᩠ᨸᨶ᩠ᨶᩣᨶᩴ ᨶᩥᩁᨸᩮᨠ᩠ᨡᩋᨸᩁᩥᨧ᩠ᨧᨲ᩠ᨲᩴ ᩋᩅᩥᨩᩉᩥᨲᩴ. ‘‘ᨸᨭᩥᨣ᩠ᨣᩉᨱᨶ᩠ᨲᩥ ᩑᨲ᩠ᨳ ᨸᨭᩥᨣ᩠ᨣᩉᩥᨲᨽᩣᩅᨾᩅᩥᨩᩉᩥᨲᨾᩮᩅ ᩈᨶ᩠ᨶᩥᨵᩥᩴ ᨩᨶᩮᨲᩦ’’ᨲᩥ ᨵᨾ᩠ᨾᩈᩥᩁᩥᨲ᩠ᨳᩮᩁᩮᩣ, ᨲᩴ ‘‘ᨸᨭᩥᨣ᩠ᨣᨱ᩠ᩉᩣᨲᩥ, ᩌᨸᨲ᩠ᨲᩥ ᨴᩩᨠ᩠ᨠᨭᩔᩣ’’ᨲᩥ (ᨸᩣᨧᩥ. ᪒᪕᪕) ᨸᩣᩊᩥᨿᩣ ᩅᩥᩁᩩᨩ᩠ᨫᨲᩥ. ᨲᩔ ᨸᨶ ᨸᩩᨶ ᨸᨭᩥᨣ᩠ᨣᨱ᩠ᩉᨶᨠᩥᨧ᩠ᨧᩣᨽᩣᩅᨲᩮᩣ ᩅᩦᨾᩴᩈᩥᨲᨻ᩠ᨻᩴ.

ᩈᨶ᩠ᨶᩥᨵᩥᨠᩣᩁᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪙. ᨸᨱᩦᨲᨽᩮᩣᨩᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᨲᩮᩈᩴ ᨾᩴᩈᨬ᩠ᨧ ᨡᩦᩁᨴᨵᩦᨶᩥ ᨧ ᩍᨵ ᩋᨵᩥᨸ᩠ᨸᩮᨲᩣᨶᩦ’’ᨲᩥ ᩍᨴᩴ ᨸᩣᨧᩥᨲ᩠ᨲᩥᨿᩅᨲ᩠ᨳᩩᨸᩁᩥᨧ᩠ᨨᩮᨴᩮᩣ, ᨶ ᨸᨶ ᨠᨸ᩠ᨸᩥᨿᨡᩦᩁᩣᨴᩥᨸᩁᩥᨧ᩠ᨨᩮᨴᩮᩣ, ᨲᩈ᩠ᨾᩣ ᨿᩔ ᨠᩔᨧᩥ ᨡᩦᩁᩣᨴᩦᨶᩥ ᩅᨭ᩠ᨭᨶ᩠ᨲᩦᨲᩥ ᨧ, ‘‘ᨾᩉᩣᨶᩣᨾᩈᩥᨠ᩠ᨡᩣᨸᨴᩮᨶ ᨠᩣᩁᩮᨲᨻ᩠ᨻᩮᩣ’’ᨲᩥ ᩈᨦ᩠ᨥᩅᩈᩮᨶ ᨸᩅᩣᩁᩥᨲᩮ ᨽᩮᩈᨩ᩠ᨩᨲ᩠ᨳᩣᨿ ᩈᨸ᩠ᨸᩥᩌᨴᩥᨽᩮᩈᨩ᩠ᨩᨸᨬ᩠ᨧᨠᩴ ᩅᩥᨬ᩠ᨬᩣᨸᩮᨲᩥ ᨧᩮ, ᨲᨲ᩠ᨳ ‘‘ᨶ ᨽᩮᩈᨩ᩠ᨩᨠᩁᨱᩦᨿᩮᨶ ᨽᩮᩈᨩ᩠ᨩᩴ ᩅᩥᨬ᩠ᨬᩣᨸᩮᨲᩦ’’ᨲᩥ ᩑᨲ᩠ᨳ ᩈᨦ᩠ᨣᩉᩴ ᨣᨧ᩠ᨨᨲᩥ, ᨲᩈ᩠ᨾᩣ ‘‘ᨲᩮᨶ ᨸᩣᨧᩥᨲ᩠ᨲᩥᨿ’’ᨶ᩠ᨲᩥ (ᩅᨩᩥᩁ. ᨭᩦ. ᨸᩣᨧᩥᨲ᩠ᨲᩥᨿ ᪒᪖᪑) ᨧ ᩃᩥᨡᩥᨲᩴ.

ᨸᨱᩦᨲᨽᩮᩣᨩᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪑᪐. ᨴᨶ᩠ᨲᨸᩮᩣᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᩈᩁᩦᩁᩣᩅᨿᩅᩮᨶᩣ’’ᨲᩥ ᩅᩩᨲ᩠ᨲᨲ᩠ᨲᩣ ᨾᩩᨡᩮᨶ ᨸᨭᩥᨣ᩠ᨣᩉᨱᩴ ᩋᨶᩩᨬ᩠ᨬᩣᨲᩴ. ‘‘ᨧᩥᨬ᩠ᨧᩣᨴᩥᨸᨲ᩠ᨲᩮᩈᩩ ᨽᩪᨾᩥᨿᩴ ᩋᨲ᩠ᨳᨲᩮᩈᩩ ᨶ ᩅᨭ᩠ᨭᨲᩥ, ᨠᩃ᩠ᩃᨡᩮᨲ᩠ᨲᩮ ᨲᨲ᩠ᨳ ᩅᨭ᩠ᨭᨲᩦ’’ᨲᩥ ᨧ, ‘‘ᩈᩣᨾᩴ ᨣᩉᩮᨲ᩠ᩅᩣ’’ᨲᩥ ᩍᨾᩥᨶᩣ ᨶ ᨠᩮᩅᩃᩴ ᩈᨸ᩠ᨸᨴᨭ᩠ᨮᩴᨿᩮᩅ, ᩋᨬ᩠ᨬᨾ᩠ᨸᩥ ᨴᨭ᩠ᨮᩴ ᩅᩥᩈᩮᩈᩮᨲᩥ. ᩈᩣᨾᩴ ᨣᩉᩮᨲ᩠ᩅᩣ ᨸᩁᩥᨽᩩᨬ᩠ᨩᩥᨲᩩᩴ ᩅᨭ᩠ᨭᨲᩦ’’ᨲᩥ ᨧ ᩃᩥᨡᩥᨲᩴ.

ᨴᨶ᩠ᨲᨸᩮᩣᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨽᩮᩣᨩᨶᩅᨣ᩠ᨣᩮᩣ ᨧᨲᩩᨲ᩠ᨳᩮᩣ.

᪕. ᩋᨧᩮᩃᨠᩅᨣ᩠ᨣᩮᩣ

᪑. ᩋᨧᩮᩃᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩋᨧᩮᩃᨠᩣᨴᨿᩮᩣ ᨿᩈ᩠ᨾᩣ, ᨲᩥᨲ᩠ᨳᩥᨿᩣᩅ ᨾᨲᩣ ᩍᨵ;

ᨲᩈ᩠ᨾᩣ ᨲᩥᨲ᩠ᨳᩥᨿᨶᩣᨾᩮᨶ, ᨲᩥᨠᨧ᩠ᨨᩮᨴᩮᩣ ᨠᨲᩮᩣ ᨲᨲᩮᩣ.

ᩋᨲᩥᨲ᩠ᨳᩥᨿᩔ ᨶᨣ᩠ᨣᩔ, ᨲᨳᩣ ᨲᩥᨲ᩠ᨳᩥᨿᩃᩥᨦ᩠ᨣᩥᨶᩮᩣ;

ᨣᩉᨭ᩠ᨮᩔᩣᨸᩥ ᨽᩥᨠ᩠ᨡᩩᩔ, ᨠᨸ᩠ᨸᨲᩦᨲᩥ ᩅᩥᨶᩥᨧ᩠ᨨᨿᩮᩣ.

ᩋᨲᩥᨲ᩠ᨳᩥᨿᩔ ᨧᩥᨲ᩠ᨲᩮᨶ, ᨲᩥᨲ᩠ᨳᩥᨿᩔ ᨧ ᩃᩥᨦ᩠ᨣᩥᨶᩮᩣ;

ᩈᩮᩣᨲᩣᨸᨶ᩠ᨶᩣᨴᩥᨶᩮᩣ ᨴᩣᨲᩩᩴ, ᨠᨸ᩠ᨸᨲᩦᨲᩦᨵ ᨶᩮᩣ ᨾᨲᩥ.

ᩋᨧᩮᩃᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪓. ᩈᨽᩮᩣᨩᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩋᨶᩩᨸᩅᩥᩈᩥᨲ᩠ᩅᩣ ᨶᩥᩈᩦᨴᨶᨧᩥᨲ᩠ᨲᩮᨶ ᩈᨧᩥᨲ᩠ᨲᨠᨲᩣᨲᩥ ᩅᩮᨴᩥᨲᨻ᩠ᨻᩣ.

ᩈᨽᩮᩣᨩᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪔-᪕. ᩁᩉᩮᩣᨸᨭᩥᨧ᩠ᨨᨶ᩠ᨶᩁᩉᩮᩣᨶᩥᩈᨩ᩠ᨩᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨧᨲᩩᨲ᩠ᨳᩴ ᨸᨮᨾᩣᨶᩥᨿᨲᩮ, ᨸᨬ᩠ᨧᨾᩴ ᨴᩩᨲᩥᨿᩣᨶᩥᨿᨲᩮ ᩅᩩᨲ᩠ᨲᨶᨿᨾᩮᩅ. ᩍᨵ ᨸᨬ᩠ᨧᨾᩴ ᩏᨸᨶᨶ᩠ᨴᩔ ᨧᨲᩩᨲ᩠ᨳᩴ ᩉᩮᩣᨲᩥ.

ᩁᩉᩮᩣᨸᨭᩥᨧ᩠ᨨᨶ᩠ᨶᩁᩉᩮᩣᨶᩥᩈᨩ᩠ᨩᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪖. ᨧᩣᩁᩥᨲ᩠ᨲᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩈᨽᨲ᩠ᨲᩮᩣ ᩈᨾᩣᨶᩮᩣᨲᩥ ᨶᩥᨾᨶ᩠ᨲᨶᨽᨲ᩠ᨲᩮᩣᨲᩥ ᨸᩮᩣᩁᩣᨱᩣ. ᩈᨶ᩠ᨲᩴ ᨽᩥᨠ᩠ᨡᩩᩴ, ᩋᨶᩣᨸᩩᨧ᩠ᨨᩣ, ᨸᩩᩁᩮᨽᨲ᩠ᨲᩴ ᨸᨧ᩠ᨨᩣᨽᨲ᩠ᨲᩴ, ᩋᨬ᩠ᨬᨲᩕ ᩈᨾᨿᩣᨲᩥ ᩋᨿᨾᩮᨲ᩠ᨳ ᨧᨲᩩᨻ᩠ᨻᩥᨵᩣ ᩋᨶᩩᨸᨬ᩠ᨬᨲ᩠ᨲᩥ. ᨲᨲ᩠ᨳ ᩈᨾᨿᩣ ᨴ᩠ᩅᩮ ᩈᨾᨿᩣ. ᨽᨲ᩠ᨲᩥᨿᨥᩁᨶ᩠ᨲᩥ ᨶᩥᨾᨶ᩠ᨲᩥᨲᩔ ᨥᩁᩴ ᩅᩣ ᩈᩃᩣᨠᩣᨽᨲ᩠ᨲᩣᨴᩥᨴᩣᨿᨠᩣᨶᩴ ᩅᩣ ᨥᩁᩴ. ‘‘ᩈᨾᩩᨭ᩠ᨮᩣᨶᩣᨴᩦᨶᩥ ᨸᨮᨾᨠᨳᩥᨶᩈᨴᩥᩈᩣᨶᩥ, ᩍᨴᩴ ᨸᨶ ᨠᩥᩁᩥᨿᩣᨠᩥᩁᩥᨿ’’ᨶ᩠ᨲᩥ ᨸᩣᨮᩮᩣ, ‘‘ᩍᨵ ᨶᩥᨾᨶ᩠ᨲᨶᩣ ᩋᨠᨸ᩠ᨸᩥᨿᨶᩥᨾᨶ᩠ᨲᨶᩣ’’ᨲᩥ ᩑᨠᩮ.

ᨸᩩᩁᩮᨽᨲ᩠ᨲᨬ᩠ᨧ ᨸᩥᨱ᩠ᨯᩣᨿ, ᨧᩁᩥᨲ᩠ᩅᩣ ᨿᨴᩥ ᨽᩩᨬ᩠ᨩᨲᩥ;

ᩈᩥᨿᩣ ᨸᩁᨾ᩠ᨸᩁᩣᨸᨲ᩠ᨲᩥ, ᨸᨧ᩠ᨨᩣᨽᨲ᩠ᨲᩴ ᨶ ᩈᩣ ᩈᩥᨿᩣ.

ᨸᨧ᩠ᨨᩣᨽᨲ᩠ᨲᨬ᩠ᨧ ᨣᨾᩥᨠᩮᩣ, ᨸᩩᨻ᩠ᨻᨣᩮᩉᩴ ᨿᨴᩥ ᨣᨧ᩠ᨨᩮ;

ᩑᨠᩮ ᩌᨸᨲ᩠ᨲᩥᨿᩮᩅᩣᨲᩥ, ᩋᨶᩣᨸᨲ᩠ᨲᩦᨲᩥ ᩑᨠᨧ᩠ᨧᩮ.

ᨠᩩᩃᨶ᩠ᨲᩁᩔᩮᩣᨠ᩠ᨠᨾᨶᩮ, ᩌᨸᨲ᩠ᨲᩥᨾᨲᨿᩮᩣ ᩉᩥ ᨲᩮ;

ᩈᨾᩣᨶᨽᨲ᩠ᨲᨸᨧ᩠ᨧᩣᩈᩣ, ᩍᨲᩥ ᩌᩉᩩ ᩍᨵᩣᨸᩁᩮ.

ᨾᨲᩣ ᨣᨱᩥᨠᨽᨲ᩠ᨲᩮᨶ, ᩈᨾᩮᨶ᩠ᨲᩥ ᨶᩴ ᨶᩥᨾᨶ᩠ᨲᨶᩮ;

ᩅᩥᩔᨩ᩠ᨩᨶᩴ ᩈᨾᩣᨶᨶ᩠ᨲᩥ, ᩑᨠᩮ ᩈᨾ᩠ᨾᩩᨡᨲᩣᨸᩁᩮ.

ᩈᨶ᩠ᨶᩥᨭ᩠ᨮᩣᨶᨲ᩠ᨳᩥᨠᩮᩉᩮᩅ, ᩅᩥᨧᩣᩁᩮᨲᨻ᩠ᨻᨽᩮᨴᨲᩮᩣ;

ᩅᩥᨬ᩠ᨬᩪ ᨧᩣᩁᩥᨲ᩠ᨲᨾᩥᨧ᩠ᨧᩮᩅ, ᩈᩥᨠ᩠ᨡᩣᨸᨴᨾᩥᨴᩴ ᩅᩥᨴᩪ. (ᩅᨩᩥᩁ. ᨭᩦ. ᨸᩣᨧᩥᨲ᩠ᨲᩥᨿ ᪒᪙᪔);

ᨧᩣᩁᩥᨲ᩠ᨲᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪗. ᨾᩉᩣᨶᩣᨾᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨸᨱᩦᨲᨽᩮᩣᨩᨶᩈᩥᨠ᩠ᨡᩣᨸᨴᩮ ‘‘ᨾᩉᩣᨶᩣᨾᩈᩥᨠ᩠ᨡᩣᨸᨴᩮᨶ ᨠᩣᩁᩮᨲᨻ᩠ᨻᩮᩣ’’ᨲᩥ (ᨠᨦ᩠ᨡᩣ. ᩋᨭ᩠ᨮ. ᨸᨱᩦᨲᨽᩮᩣᨩᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ) ᨿᩴ ᩅᩩᨲ᩠ᨲᩴ, ᨲᩔᨲ᩠ᨳᩮᩣ ᩈᨦ᩠ᨥᩅᩈᩮᨶ ᨸᩅᩣᩁᩥᨲᩮ ᨽᩮᩈᨩ᩠ᨩᨲ᩠ᨳᩣᨿ ᩈᨸ᩠ᨸᩥᩌᨴᩥᨽᩮᩈᨩ᩠ᨩᨸᨬ᩠ᨧᨠᩴ ᩅᩥᨬ᩠ᨬᩣᨸᩮᨲᩥ ᨧᩮ, ‘‘ᨶᨽᩮᩈᨩ᩠ᨩᩮᨶ ᨠᩁᨱᩦᨿᩮᨶ ᨽᩮᩈᨩ᩠ᨩᩴ ᩅᩥᨬ᩠ᨬᩣᨸᩮᨲᩦ’’ᨲᩥ (ᨸᩣᨧᩥ. ᪓᪐᪙) ᩅᨧᨶᩮᨶ ᨸᩣᨧᩥᨲ᩠ᨲᩥᨿᨶ᩠ᨲᩥ (ᩅᨩᩥᩁ. ᨭᩦ. ᨸᩣᨧᩥᨲ᩠ᨲᩥᨿ ᪓᪑᪐) ᩃᩥᨡᩥᨲᩴ. ‘‘ᨲᨿᩣ ᩍᨾᩥᨶᩣᩅ ᨸᩅᩣᩁᩥᨲᨾ᩠ᩉᩣ, ᩋᨾ᩠ᩉᩣᨠᨬ᩠ᨧ ᩍᨾᩥᨶᩣ ᨧ ᩍᨾᩥᨶᩣ ᨧ ᩋᨲ᩠ᨳᩮᩣ’’ᨲᩥ ᨿᨳᩣᨽᩪᨲᩴ ᩌᨧᩥᨠ᩠ᨡᩥᨲ᩠ᩅᩣ ᩅᩥᨬ᩠ᨬᩣᨸᩮᨲᩩᩴ ᨣᩥᩃᩣᨶᩮᩣᩅ ᩃᨽᨲᩥ, ᨶ ᩍᨲᩁᩮᩣᨲᩥ ᨧ, ‘‘ᩋᨬ᩠ᨬᩔ ᩋᨲ᩠ᨳᩣᨿᩣ’’ᨲᩥ ᩋᩔ ᨬᩣᨲᨠᨸ᩠ᨸᩅᩣᩁᩥᨲᩮ, ᩋᨲ᩠ᨲᨶᩮᩣ ᩅᩣ ᨬᩣᨲᨠᨸ᩠ᨸᩅᩣᩁᩥᨲᩮᨲᩥ ᩋᨲ᩠ᨳᩮᩣᨲᩥ ᨧ, ‘‘ᩋᨸᩁᩥᨿᨶ᩠ᨲᨸ᩠ᨸᩅᩣᩁᨱᩣᨿ ᨸᩅᩣᩁᩥᨲᩮ’’ᨲᩥ ᩈᨦ᩠ᨥᩅᩈᩮᨶ, ᨸᩩᨣ᩠ᨣᩃᩅᩈᩮᨶ ᨧ ᨸᩅᩣᩁᩮᨲ᩠ᩅᩣ ᨴᩣᨿᨠᩣ. ᨲᩈ᩠ᨾᩣ ‘‘ᩈᨦ᩠ᨥᨸ᩠ᨸᩅᩣᩁᨱᨲᩣ’’ᨲᩥ ᩅᨲ᩠ᩅᩣ ‘‘ᨸᩩᨣ᩠ᨣᩃᨸ᩠ᨸᩅᩣᩁᨱᨲᩣ’’ᨲᩥ ᨶ ᩅᩩᨲ᩠ᨲᨶ᩠ᨲᩥ ᨧ, ‘‘ᨸᩁᩥᨿᨶ᩠ᨲᩣᨲᩥᨠ᩠ᨠᨾᩮᩣ’’ᨲᩥ ᩅᨧᨶᩮᨶ ᨣᩥᩃᩣᨶᩮᩣ ᨣᩉᩥᨲᩮᩣ, ᨲᩈ᩠ᨾᩣ ‘‘ᨣᩥᩃᩣᨶᩣᨣᩥᩃᩣᨶᨲᩣ’’ᨲᩥ ᨶ ᩅᩩᨲ᩠ᨲᩴ. ᩑᩅᩴ ᩈᨶ᩠ᨲᩮᨸᩥ ‘‘ᩈᨦ᩠ᨥᨸ᩠ᨸᩅᩣᩁᨱᩣᨿ ᨸᩅᩣᩁᨱᨲᩣ’’ᨲᩥ ᨸᩣᨮᩮᩣᨲᩥ ᨧ ᩃᩥᨡᩥᨲᩴ, ᩅᩦᨾᩴᩈᩥᨲᨻ᩠ᨻᩴ.

ᨾᩉᩣᨶᩣᨾᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪘. ᩏᨿ᩠ᨿᩩᨲ᩠ᨲᩈᩮᨶᩣᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩉᨲ᩠ᨳᩥᩌᨴᩦᩈᩩ ᩑᨠᨾᩮᨠᨶ᩠ᨲᩥ ᩋᨶ᩠ᨲᨾᩈᩮᩣ ᩑᨠᨸᩩᩁᩥᩈᩣᩁᩩᩊ᩠ᩉᩉᨲ᩠ᨳᩥᨾ᩠ᨸᩥ, ᩑᨠᩴ ᩈᩁᩉᨲ᩠ᨳᩴ ᨸᩩᩁᩥᩈᨾ᩠ᨸᩥ. ᩈᨾᩩᨭ᩠ᨮᩣᨶᩣᨴᩦᨶᩥ ᩑᩊᨠᩃᩮᩣᨾᩈᨴᩥᩈᩣᨶᩥ, ᩍᨴᩴ ᨸᨶ ᩃᩮᩣᨠᩅᨩ᩠ᨩᩴ, ᩋᨠᩩᩈᩃᨧᩥᨲ᩠ᨲᩴ ᨲᩥᩅᩮᨴᨶ’’ᨶ᩠ᨲᩥ ᨸᩣᨮᩮᩣ.

ᩏᨿ᩠ᨿᩩᨲ᩠ᨲᩈᩮᨶᩣᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪙. ᩈᩮᨶᩣᩅᩣᩈᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨠᩮᨶᨧᩥ ᨸᩃᩥᨻᩩᨴ᩠ᨵᩔᩣᨲᩥ ᩅᩮᩁᩥᨠᩮᨶ ᩅᩣ ᩍᩔᩁᩮᨶ ᩅᩣ ᨠᩮᨶᨧᩥ ᩁᩩᨴ᩠ᨵᩔ. ᩈᩮᨶᩣᨸᩁᩥᨠ᩠ᨡᩮᨸᩮᨶ ᩅᩣ ᨸᩁᩥᨠ᩠ᨡᩮᨸᩣᩁᩉᨭ᩠ᨮᩣᨶᩮᨶ ᩅᩣ ᩈᨬ᩠ᨧᩁᨱᨭ᩠ᨮᩣᨶᨸᩁᩥᨿᨶ᩠ᨲᩮᨶ ᩅᩣ ᨸᩁᩥᨧ᩠ᨨᩥᨶ᩠ᨴᩥᨲᨻ᩠ᨻᩣ.

ᩈᩮᨶᩣᩅᩣᩈᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᩋᨧᩮᩃᨠᩅᨣ᩠ᨣᩮᩣ ᨸᨬ᩠ᨧᨾᩮᩣ.

᪖. ᩈᩩᩁᩣᨸᩣᨶᩅᨣ᩠ᨣᩮᩣ

᪑. ᩈᩩᩁᩣᨸᩣᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᩈᩩᩁᩣ’’ᨲᩥ ᩅᩣ ‘‘ᨶ ᩅᨭ᩠ᨭᨲᩦ’’ᨲᩥ ᩅᩣ ᨩᩣᨶᩥᨲ᩠ᩅᩣ ᨸᩥᩅᨶᩮ ᩋᨠᩩᩈᩃᨾᩮᩅᩣᨲᩥ ᩃᩥᨡᩥᨲᩴ. ᩋᨠᩩᩈᩃᨧᩥᨲ᩠ᨲᨶ᩠ᨲᩥ ᨿᩮᨽᩩᨿ᩠ᨿᩮᨶ ᨲᩴ ᩈᨶ᩠ᨵᩣᨿ ᨠᩥᩁ ᩅᩩᨲ᩠ᨲᩴ. ᩋᨳ ᨠᩈ᩠ᨾᩣ ᩅᩥᨶᨿᨭ᩠ᨮᨠᨳᩣᨿᩴ ‘‘ᩋᨠᩩᩈᩃᩮᨶᩮᩅ ᨸᩣᨲᨻ᩠ᨻᨲᩣᨿᩣ’’ᨲᩥ (ᨸᩣᨧᩥ. ᩋᨭ᩠ᨮ. ᪓᪒᪙) ᩅᩩᨲ᩠ᨲᨶ᩠ᨲᩥ ᨧᩮ? ᩈᨧᩥᨲ᩠ᨲᨠᨸᨠ᩠ᨡᩮ ᩋᨠᩩᩈᩃᩮᨶᩮᩅ ᨸᩣᨲᨻ᩠ᨻᨲᩣᨿᩣᨲᩥ.

ᩈᩩᩁᩣᨸᩣᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪒. ᩋᨦ᩠ᨣᩩᩃᩥᨸᨲᩮᩣᨴᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨠᩣᨿᩈᩴᩈᨣ᩠ᨣᩈᨦ᩠ᨥᩣᨴᩥᩈᩮᩈᩣᨸᨲ᩠ᨲᩥᨽᩣᩅᩮ ᩈᨾᩣᨶᩮᨸᩥ ᨽᩥᨠ᩠ᨡᩩᨶᩥᨿᩣᨸᩥ ᩋᨶᩩᨸᩈᨾ᩠ᨸᨶ᩠ᨶᩮᨸᩥ ᨴᩩᨠ᩠ᨠᨭᩴ, ᩏᨸᩈᨾ᩠ᨸᨶ᩠ᨶᩮ ᩑᩅ ᨸᩣᨧᩥᨲ᩠ᨲᩥᨿᨶ᩠ᨲᩥ ᩑᩅᩴ ᨸᩩᨣ᩠ᨣᩃᩣᨸᩮᨠ᩠ᨡᩴ ᨴᩔᩮᨲᩩᩴ ‘‘ᩋᨦ᩠ᨣᩩᩃᩥᨸᨲᩮᩣᨴᨠᩮ ᨸᩣᨧᩥᨲ᩠ᨲᩥᨿ’’ᨶ᩠ᨲᩥ ᩅᩩᨲ᩠ᨲᩴ. ᩈᨲᩥ ᨠᩁᨱᩦᨿᩮᨲᩥ ᩑᨲ᩠ᨳ ᨸᩩᩁᩥᩈᩴ ᩈᨲᩥ ᨠᩁᨱᩦᨿᩮ ᩌᨾᩈᨲᩮᩣᨲᩥ ᩋᨵᩥᨸ᩠ᨸᩣᨿᩮᩣ, ᨶ ᩍᨲ᩠ᨳᩥᩴ.

ᩋᨦ᩠ᨣᩩᩃᩥᨸᨲᩮᩣᨴᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪓. ᩉᩈᨵᨾ᩠ᨾᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᨧᩥᨠ᩠ᨡᩃ᩠ᩃᩴ ᩅᩣ’’ᨲᩥ ᩅᨧᨶᨲᩮᩣ ᩈᨠ᩠ᨡᩁᨾ᩠ᨸᩥ ᨡᩥᨸᨶᨠᩦᩊᩣᨿ ᨠᩦᩊᨲᩮᩣ ᨴᩩᨠ᩠ᨠᨭᨾᩮᩅ. ᩏᨸᩁᩥᨣᩮᩣᨸ᩠ᨹᨠᩮ ᨸᩣᨧᩥᨲ᩠ᨲᩥᨿᩴ, ᩋᨬ᩠ᨬᨲ᩠ᨳ ᨴᩩᨠ᩠ᨠᨭᨶ᩠ᨲᩥ ᨸᩣᨧᩥᨲ᩠ᨲᩥᨿᩅᨲ᩠ᨳᩩᩋᨲ᩠ᨳᩅᩈᩮᨶ ‘‘ᩏᨴᨠᩮ ᩉᩈᨵᨾ᩠ᨾᩮ ᨸᩣᨧᩥᨲ᩠ᨲᩥᨿ’’ᨶ᩠ᨲᩥ ᩅᩩᨲ᩠ᨲᩴ.

ᩍᨴᩴ ᩈᨬ᩠ᨬᩣᩅᩥᨾᩮᩣᨠ᩠ᨡᩴ ᨧᩮ, ᨲᩥᨠᨸᩣᨧᩥᨲ᩠ᨲᩥᨿᩴ ᨠᨳᩴ;

ᨠᩦᩊᩥᨲᩴᩅ ᩋᨠᩦᩊᩣᨲᩥ, ᨾᩥᨧ᩠ᨨᩣᨣᩣᩉᩮᨶ ᨲᩴ ᩈᩥᨿᩣ.

ᩑᨲ᩠ᨲᩣᩅᨲᩣ ᨠᨳᩴ ᨠᩦᩊᩣ, ᩍᨲᩥ ᨠᩦᩊᩣᨿᩴ ᩑᩅᩣᨿᩴ;

ᩋᨠᩦᩊᩣᩈᨬ᩠ᨬᩦ ᩉᩮᩣᨲᩮᨲ᩠ᨳ, ᩅᩥᨶᨿᨲ᩠ᨳᩴ ᩈᨾᩣᨴᨿᩮ.

ᩑᨠᨶ᩠ᨲᩣᨠᩩᩈᩃᩮᩣ ᨿᩈ᩠ᨾᩣ, ᨠᩦᩊᩣᨿᩣᨽᩥᩁᨲᨾᨶᩮᩣ;

ᨲᩈ᩠ᨾᩣ ᩋᨠᩩᩈᩃᩴ ᨧᩥᨲ᩠ᨲᩴ, ᩑᨠᨾᩮᩅᩮᨲ᩠ᨳ ᩃᨻ᩠ᨽᨲᩦᨲᩥ. (ᩅᨩᩥᩁ. ᨭᩦ. ᨸᩣᨧᩥᨲ᩠ᨲᩥᨿ ᪓᪓᪖);

ᩉᩈᨵᨾ᩠ᨾᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪔. ᩋᨶᩣᨴᩁᩥᨿᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨲᩔ ᩅᨧᨶᨶ᩠ᨲᩥ ‘‘ᩋᨿᩴ ᩏᨠ᩠ᨡᩥᨲ᩠ᨲᨠᩮᩣ ᩅᩣ ᩅᨾ᩠ᨽᩥᨲᩮᩣ ᩅᩣ ᨣᩁᩉᩥᨲᩮᩣ ᩅᩣ ᩍᨾᩔ ᩅᨧᨶᩴ ᩋᨠᨲᩴ ᨽᩅᩥᩔᨲᩦ’’ᨲᩥ ᩋᨶᩣᨴᩁᩥᨿᩴ ᨠᩁᩮᩣᨲᩥ. ᨵᨾ᩠ᨾᨶ᩠ᨲᩥ ᨠᨳᩣᨿᩴ ᨵᨾ᩠ᨾᩮᩣ ᨶᩔᩮᨿ᩠ᨿ ᩅᩣ ᩅᩥᨶᩔᩮᨿ᩠ᨿ ᩅᩣ ᩋᨶ᩠ᨲᩁᨵᩣᨿᩮᨿ᩠ᨿ ᩅᩣ, ᨲᩴ ᩅᩣ ᩋᩈᩥᨠ᩠ᨡᩥᨲᩩᨠᩣᨾᩮᩣ ᩋᨶᩣᨴᩁᩥᨿᩴ ᨠᩁᩮᩣᨲᩥ. ‘‘ᩃᩮᩣᨠᩅᨩ᩠ᨩᩴ ᩋᨲᩥᨠ᩠ᨠᨾᩥᨲ᩠ᩅᩣ ‘ᩍᨴᩴ ᩋᨾ᩠ᩉᩣᨠᩴ ᩌᨧᩁᩥᨿᩩᨣ᩠ᨣᩉᩮᩣ’ᨲᩥ ᩅᨴᨶ᩠ᨲᩔ ᨶ ᩅᨭ᩠ᨭᨲᩦ’’ᨲᩥ (ᩅᨩᩥᩁ. ᨭᩦ. ᨸᩣᨧᩥᨲ᩠ᨲᩥᨿ ᪓᪔᪔) ᩃᩥᨡᩥᨲᩴ.

ᩋᨶᩣᨴᩁᩥᨿᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪖. ᨩᩮᩣᨲᩥᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᩅᩥᩈᩥᨻ᩠ᨻᨶᩣᨸᩮᨠ᩠ᨡᩮᩣ’’ᨲᩥ ᩅᩩᨲ᩠ᨲᨲ᩠ᨲᩣ ᩋᨬ᩠ᨬᩔ ᩅᨭ᩠ᨭᨲᩥ, ᩋᨬ᩠ᨬᩮᩈᨬ᩠ᨧ.

ᨩᩮᩣᨲᩥᨶᩮᨠᨾᨶᩮᨠᩮ ᩅᩣ, ᨩᩣᩃᩮᨶ᩠ᨲᩥ ᨾᩩᨶᨿᩮᩣ ᩈᩉ;

ᩑᨠᩮᩣ ᩈᩮᩣᨸᩮᨲᩥ ᨶᩣᨶᩮᨠᩮᩣ, ᩋᨵᩥᨸ᩠ᨸᩣᨿᩅᩥᩈᩮᩈᨲᩮᩣ.

ᨩᩮᩣᨲᩥᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪘. ᨴᩩᨻ᩠ᨻᨱ᩠ᨱᨠᩁᨱᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨾᩮᩣᩁᨠ᩠ᨡᩥᨾᨱ᩠ᨯᩃᨾᨦ᩠ᨣᩩᩃᨸᩥᨭ᩠ᨮᩦᨶᨶ᩠ᨲᩥ ᨶ ᩑᨠᨶ᩠ᨲᨲᩮᩣ, ᩋᨵᩥᨠᩴ, ᩒᩁᨬ᩠ᨧᩣᨲᩥ ᩅᨴᨶ᩠ᨲᩥ. ᩑᨠᨠᩮᩣᨱᩮᨸᩥ ᩅᨭ᩠ᨭᨲᩥ, ᩑᩅᩴ ᨿᨲ᩠ᨳ ᨠᨲ᩠ᨳᨧᩥ ᩑᨠᨻᩥᨶ᩠ᨴᩩᨸᩥ ᩅᨭ᩠ᨭᨲᩦᨲᩥ.

ᨴᩩᨻ᩠ᨻᨱ᩠ᨱᨠᩁᨱᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪙. ᩅᩥᨠᨸ᩠ᨸᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᩈᨾᩩᨭ᩠ᨮᩣᨶᩣᨴᩦᨶᩥ ᨸᨮᨾᨠᨳᩥᨶᩈᨴᩥᩈᩣᨶᩥ, ᩍᨴᩴ ᨸᨶ ᨠᩥᩁᩥᨿᩣᨠᩥᩁᩥᨿ’’ᨶ᩠ᨲᩥ ᨸᩣᨮᩮᩣ. ᩑᨲ᩠ᨳ ᨸᩁᩥᨽᩮᩣᨣᩮᨶ ᨠᩣᨿᨠᨾ᩠ᨾᩴ. ᩋᨸᨧ᩠ᨧᩩᨴ᩠ᨵᩁᨱᩮᨶ ᩅᨧᩦᨠᨾ᩠ᨾᩴ.

ᩅᩥᨠᨸ᩠ᨸᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪑᪐. ᩋᨸᨶᩥᨵᩣᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩈᩈᩪᨧᩥᨠᩮ ᩈᩪᨧᩥᨥᩁᩮ ᩈᩪᨧᩥᨣᨱᨶᩣᨿ ᩌᨸᨲ᩠ᨲᩥᨿᩮᩣᨲᩥ ᨸᩮᩣᩁᩣᨱᩣ.

ᩋᨸᨶᩥᨵᩣᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᩈᩩᩁᩣᨸᩣᨶᩅᨣ᩠ᨣᩮᩣ ᨨᨭ᩠ᨮᩮᩣ.

᪗. ᩈᨸ᩠ᨸᩣᨱᨠᩅᨣ᩠ᨣᩮᩣ

᪑. ᩈᨬ᩠ᨧᩥᨧ᩠ᨧᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩅᨲ᩠ᨳᩩᨣᨱᨶᩣᨿ ᨠᨾ᩠ᨾᨻᨶ᩠ᨵᨣᨱᨶᩣᨧᩮᨲᨶᩣᨾᩣᩁᨱᩣᨶᩴ, ᨶ ᨠᨾ᩠ᨾᨻᨶ᩠ᨵᨣᨱᨶᩣᨿ ᨧᩮᨲᨶᩣᨾᩣᩁᨱᩣ. ᩑᨲ᩠ᨳ ᩑᨠᨧᩮᨲᨶᩣᨿ ᨻᩉᩩᨸᩣᨱᨠᩣ ᨾᩁᨶ᩠ᨲᩦᨲᩥ ᩋᨿᩴ ᩅᩥᨽᩣᨣᩮᩣ ᩅᩮᨴᩥᨲᨻ᩠ᨻᩮᩣ.

ᩈᨬ᩠ᨧᩥᨧ᩠ᨧᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪒. ᩈᨸ᩠ᨸᩣᨱᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩈᨸ᩠ᨸᩣᨱᨠᨶ᩠ᨲᩥ ᨸᩣᨱᨠᩣᨶᩴ ᨾᩁᨱᩅᩈᩮᨶ ᨸᩣᨧᩥᨲ᩠ᨲᩥᨿᩴ, ᨶ ᩈᨸ᩠ᨸᩣᨱᨠᩏᨴᨠᨸᩁᩥᨽᩮᩣᨣᩅᩈᩮᨶ ᨸᩣᨧᩥᨲ᩠ᨲᩥᨿᩴ, ᨲᩈ᩠ᨾᩣ ᩑᩅ ‘‘ᨸᨱ᩠ᨱᨲ᩠ᨲᩥᩅᨩ᩠ᨩ’’ᨶ᩠ᨲᩥ ᩅᩩᨲ᩠ᨲᩴ. ᩋᩈᩩᨴ᩠ᨵᨧᩥᨲ᩠ᨲᨲ᩠ᨲᩣ ᨸᩣᨧᩥᨲ᩠ᨲᩥᨿᩴ, ᩈᩩᨴ᩠ᨵᨧᩥᨲ᩠ᨲᩮ ᩋᨶᩣᨸᨲ᩠ᨲᩥ. ᨸᨴᩦᨸᩩᨩ᩠ᨩᩃᨶᩮ ᩅᩥᨿ ᨸᨱ᩠ᨱᨲ᩠ᨲᩥᩅᨩ᩠ᨩᨲᩣ ᩅᩩᨲ᩠ᨲᩣᨲᩥ ᩃᩥᨡᩥᨲᩴ.

ᨩᩃᩮ ᨸᨠ᩠ᨡᩥᨸᨶᩴ ᨸᩩᨻ᩠ᨻᩴ, ᨩᩃᨸ᩠ᨸᩅᩮᩈᨶᩴ ᩍᨴᩴ;

ᩑᩅᩴ ᩏᨽᩥᨶ᩠ᨶᩴ ᨶᩣᨶᩣᨲ᩠ᨲᩴ, ᨬᩮᨿ᩠ᨿᩴ ᨬᩣᨱᩅᨲᩣ ᩈᨴᩣᨲᩥ. (ᩅᨩᩥᩁ. ᨭᩦ. ᨸᩣᨧᩥᨲ᩠ᨲᩥᨿ ᪓᪘᪗)

ᩈᨸ᩠ᨸᩣᨱᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪕. ᩐᨶᩅᩦᩈᨲᩥᩅᩔᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩋᨬ᩠ᨬᩴ ᩏᨸᩈᨾ᩠ᨸᩣᨴᩮᨲᩦᨲᩥ –

ᩏᨸᨩ᩠ᨫᩣᨿᩮᩣ ᩈᨧᩮ ᩈᩣᨾᩴ, ᨠᨾ᩠ᨾᩅᩣᨧᨬ᩠ᨧ ᩈᩣᩅᩮᨲᩥ;

ᨠᨾ᩠ᨾᩴ ᩁᩩᩉᨲᩥ ᩍᨧ᩠ᨧᩮᨠᩮ, ᨶᩮᨲᩥ ᩅᩥᨶᨿᨠᩮᩣᩅᩥᨴᩮᩣ.

ᨴᩩᨠ᩠ᨠᨭᩴ ᩅᩥᩉᩥᨲᩴ ᨿᩈ᩠ᨾᩣ, ᩌᨧᩁᩥᨿᩔ ᨣᨱᩔ ᨧ;

ᨲᩈ᩠ᨾᩣ ᨽᩥᨶ᩠ᨶᩣᩅ ᩌᨧᩁᩥᨿ-ᩏᨸᨩ᩠ᨫᩣᨿᩣ ᩅᩥᩈᩩᩴ ᩍᨵᩣᨲᩥ.

ᩐᨶᩅᩦᩈᨲᩥᩅᩔᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪗. ᩈᩴᩅᩥᨵᩣᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩍᨵ ᩑᨠᨲᩮᩣᩏᨸᩈᨾ᩠ᨸᨶ᩠ᨶᩣ, ᩈᩥᨠ᩠ᨡᨾᩣᨶᩣ, ᩈᩣᨾᨱᩮᩁᩦᨲᩥ ᩍᨾᩣ ᨲᩥᩔᩮᩣᨸᩥ ᩈᨦ᩠ᨣᩉᩴ ᨣᨧ᩠ᨨᨶ᩠ᨲᩥ, ᩍᨾᩣᩈᩴ ᨸᨶ ᨲᩥᩔᨶ᩠ᨶᩴ ᩈᨾᨿᩮᩣ ᩁᨠ᩠ᨡᨲᩥ, ᩋᨿᨾᩥᨾᩣᩈᩴ, ᨾᩣᨲᩩᨣᩣᨾᩔ ᨧ ᩅᩥᩈᩮᩈᩮᩣᨲᩥ ᩅᩮᨴᩥᨲᨻ᩠ᨻᩴ.

ᩈᩴᩅᩥᨵᩣᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪙. ᩏᨠ᩠ᨡᩥᨲ᩠ᨲᩈᨾ᩠ᨽᩮᩣᨣᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᨲᩴ ᨴᩥᨭ᩠ᨮᩥᩴ ᩋᨸ᩠ᨸᨭᩥᨶᩥᩔᨭ᩠ᨮᩮᨶᩣᨲᩥ ᩃᨴ᩠ᨵᩥᨶᩣᨶᩣᩈᩴᩅᩣᩈᨠᩴ ᩈᨶ᩠ᨵᩣᨿᩣ’’ᨲᩥ ᩃᩥᨡᩥᨲᩴ. ᨲᩥᨧᩥᨲ᩠ᨲᨶ᩠ᨲᩥ ᩑᨲ᩠ᨳ ᩅᩥᨸᩣᨠᩣᨻ᩠ᨿᩣᨠᨲᨧᩥᨲ᩠ᨲᩮᨶ ᩈᩉᩈᩮᨿ᩠ᨿᩴ ᨠᨸ᩠ᨸᩮᨿ᩠ᨿᩣᨲᩥ ᩑᩅᨾᨲ᩠ᨳᩮᩣ ᨴᨭ᩠ᨮᨻ᩠ᨻᩮᩣ. ᩋᨬ᩠ᨬᨳᩣ ᩈᨧᩥᨲ᩠ᨲᨠᨲ᩠ᨲᩣ ᩈᩥᨠ᩠ᨡᩣᨸᨴᩔ ᨠᩥᩁᩥᨿᩣᨻ᩠ᨿᩣᨠᨲᩴ ᩈᨶ᩠ᨵᩣᨿ ᨶ ᨿᩩᨩ᩠ᨩᨲᩥ.

ᩏᨠ᩠ᨡᩥᨲ᩠ᨲᩈᨾ᩠ᨽᩮᩣᨣᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪑᪐. ᨠᨱ᩠ᨭᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᩋᨿᩴ ᩈᨾᨱᩩᨴ᩠ᨴᩮᩈᩮᩣ ᨸᩣᩁᩣᨩᩥᨠᩮᩣ ᩉᩮᩣᨲᩥ. ᩈᨧᩮ ᨲᩴ ᨴᩥᨭ᩠ᨮᩥᩴ ᨸᨭᩥᨶᩥᩔᨩ᩠ᨩᨲᩥ, ᩈᨦ᩠ᨥᩔ ᩌᩁᩮᩣᨧᩮᨲ᩠ᩅᩣ ᩈᨦ᩠ᨥᩣᨶᩩᨾᨲᩥᨿᩣ ᨸᨻ᩠ᨻᩣᨩᩮᨲᨻ᩠ᨻᩮᩣ’’ᨲᩥ ᨸᩮᩣᩁᩣᨱᨣᨱ᩠ᨮᩥᨸᨴᩮ ᩅᩩᨲ᩠ᨲᩴ, ᨲᩴ ᨶ ᨿᩩᨲ᩠ᨲᩴ. ᨴᨱ᩠ᨯᨠᨾ᩠ᨾᨶᩣᩈᨶᩣ ᩉᩥ ᩍᨵᩣᨵᩥᨸ᩠ᨸᩮᨲᩣ. ᨿᨴᩥ ᩈᩮᩣ ᨸᩣᩁᩣᨩᩥᨠᩮᩣ ᩉᩮᩣᨲᩥ, ᩃᩥᨦ᩠ᨣᨶᩣᩈᨶᩣ ᨶᩣᨾ ᩈᩥᨿᩣ. ‘‘ᨲᩮ ᨸᨭᩥᩈᩮᩅᨲᩮᩣ ᨶᩣᩃᩴ ᩋᨶ᩠ᨲᩁᩣᨿᩣᨿᩣ’’ᨲᩥ ᨧ ᨴᩥᨭ᩠ᨮᩥ ᩈᨲ᩠ᨳᩁᩥ ᩋᩈᨲ᩠ᨳᩣᨴᩥᨴᩥᨭ᩠ᨮᩥ ᨶ ᩉᩮᩣᨲᩥ. ᩈᨧᩮ ᩈᩣ ᨿᩔ ᩏᨸ᩠ᨸᨩ᩠ᨩᨲᩥ, ᩈᩮᩣ ᨸᩣᩁᩣᨩᩥᨠᩮᩣ ᩉᩮᩣᨲᩥ, ᨲᩈ᩠ᨾᩥᨾ᩠ᨸᩥ ᩑᩅᨾᩮᩅ ᨸᨭᩥᨸᨩ᩠ᨩᩥᨲᨻ᩠ᨻᩴ, ᩈᩴᩅᩁᩮ ᩋᨲᩥᨭ᩠ᨮᨶ᩠ᨲᩮᩣ ᩃᩥᨦ᩠ᨣᨶᩣᩈᨶᩣᨿ ᨶᩣᩈᩮᨲᨻ᩠ᨻᩮᩣᨲᩥ (ᩅᨩᩥᩁ. ᨭᩦ. ᨸᩣᨧᩥᨲ᩠ᨲᩥᨿ ᪔᪒᪘) ᩌᨧᩁᩥᨿᩔ ᨲᨠ᩠ᨠᩮᩣ.

ᨠᨱ᩠ᨭᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᩈᨸ᩠ᨸᩣᨱᨠᩅᨣ᩠ᨣᩮᩣ ᩈᨲ᩠ᨲᨾᩮᩣ.

᪘. ᩈᩉᨵᨾ᩠ᨾᩥᨠᩅᨣ᩠ᨣᩮᩣ

᪔. ᨸᩉᩣᩁᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩋᨦ᩠ᨣᩮᩈᩩ ᨶ ᨾᩮᩣᨠ᩠ᨡᩣᨵᩥᨸ᩠ᨸᩣᨿᨲᩣ ᩅᩥᨿ ᩋᨾᩁᨱᩣᨵᩥᨸ᩠ᨸᩣᨿᨲᩣ ᩅᨲ᩠ᨲᨻ᩠ᨻᩣᨲᩥ ᨧᩮ? ᨶ ᩅᨲ᩠ᨲᨻ᩠ᨻᩣ. ᨠᩈ᩠ᨾᩣ? ᨿᩮᩣ ᨽᩥᨠ᩠ᨡᩩ ᩈᨿᩴ ᨸᩉᩣᩁᩴ ᨴᩣᨲᩩᨠᩣᨾᩮᩣ, ᩈᩮᩣ ᩋᨵᩥᨸ᩠ᨸᩣᨿᩮᨶ ᨲᩔ ᨾᩁᨱᩮ ᨸᨿᩮᩣᨣᩅᩥᩁᩉᩮᩣᩅᩣᨲᩥ ᨠᨲ᩠ᩅᩣ ᩋᨾᩁᨱᩣᨵᩥᨠᩣᩁᨲ᩠ᨲᩣ ᨠᩮᩅᩃᩴ ᩋᨾᩁᨱᩣᨵᩥᨸ᩠ᨸᩣᨿᩮᩣ ᩑᩅ ᩈᩮᩣᨲᩥ ᨲᩣ ᩅᩥᨿ ᨲᩣ ᨶ ᩅᩩᨲ᩠ᨲᩣ. ᨾᩮᩣᨠ᩠ᨡᩣᨵᩥᨸ᩠ᨸᩣᨿᩔ ᨸᨶ ᨠᩮᩣᨸᩮᩣ ᨶᨲ᩠ᨳᩥ, ᨲᩈ᩠ᨾᩣ ᩋᨶᩣᨸᨲ᩠ᨲᩦᨲᩥ ᩅᩩᨲ᩠ᨲᩴ.

ᨸᩉᩣᩁᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪕. ᨲᩃᩈᨲ᩠ᨲᩥᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨲᩃᨾᩮᩅ ᨲᩃᩈᨲ᩠ᨲᩥᨠᩴ. ‘‘ᨸᩮᩣᨳᨶᩈᨾᨲ᩠ᨳᨭ᩠ᨮᩮᨶ ᩈᨲ᩠ᨲᩥᨠ’’ᨶ᩠ᨲᩥ ᩑᨠᩮ. ᨿᩈ᩠ᨾᩣ ᨸᩉᩁᩥᨲᩩᨠᩣᨾᨲᩣᨿ ᨸᩉᩁᨲᩮᩣ ᨸᩩᩁᩥᨾᩮᨶ ᨸᩣᨧᩥᨲ᩠ᨲᩥᨿᩴ, ᨠᩮᩅᩃᩴ ᩏᨧ᩠ᨧᩣᩁᩮᨲᩩᨠᩣᨾᨲᩣᨿ ᩏᨣ᩠ᨣᩥᩁᨱᨾᨲ᩠ᨲᩮ ᨠᨲᩮ ᩍᨾᩥᨶᩣ ᨸᩣᨧᩥᨲ᩠ᨲᩥᨿᩴ. ᩍᨾᩥᨶᩣ ᨸᨶ ᩅᩥᩁᨩ᩠ᨫᩥᨲ᩠ᩅᩣ ᨸᩉᩣᩁᩮᩣ ᨴᩥᨶ᩠ᨶᩮᩣ, ᨲᩈ᩠ᨾᩣ ᨶᨸᩉᩁᩥᨲᩩᨠᩣᨾᨲᩣᨿ ᨴᩥᨶ᩠ᨶᨲ᩠ᨲᩣ ᨴᩩᨠ᩠ᨠᨭᩴ. ᨠᩥᨾᩥᨴᩴ ᨴᩩᨠ᩠ᨠᨭᩴ ᨸᩉᩣᩁᨸᨧ᩠ᨧᨿᩣ, ᩏᨴᩣᩉᩩ ᩏᨣ᩠ᨣᩥᩁᨱᨸᨧ᩠ᨧᨿᩣᨲᩥ? ᨸᩉᩣᩁᨸᨧ᩠ᨧᨿᩣ ᩑᩅ ᨴᩩᨠ᩠ᨠᨭᩴ, ᨸᩩᩁᩥᨾᩴ ᩏᨣ᩠ᨣᩥᩁᨱᨸᨧ᩠ᨧᨿᩣ ᨸᩣᨧᩥᨲ᩠ᨲᩥᨿᨶ᩠ᨲᩥ ᩈᨴᩩᨠ᩠ᨠᨭᩴ ᨸᩣᨧᩥᨲ᩠ᨲᩥᨿᩴ ᨿᩩᨩ᩠ᨩᨲᩥ. ᨸᩩᩁᩥᨾᨬ᩠ᩉᩥ ᩏᨣ᩠ᨣᩥᩁᨱᩴ, ᨸᨧ᩠ᨨᩣ ᨸᩉᩣᩁᩮᩣ. ᨶ ᨧ ᨸᨧ᩠ᨨᩥᨾᩴ ᨸᩉᩣᩁᩴ ᨶᩥᩔᩣᨿ ᨸᩩᩁᩥᨾᩴ ᩏᨣ᩠ᨣᩥᩁᨱᩴ ᩋᨶᩣᨸᨲ᩠ᨲᩥᩅᨲ᩠ᨳᩩᨠᩴ ᨽᩅᩥᨲᩩᨾᩁᩉᨲᩦᨲᩥ ᨶᩮᩣ ᨲᨠ᩠ᨠᩮᩣᨲᩥ (ᩅᨩᩥᩁ. ᨭᩦ. ᨸᩣᨧᩥᨲ᩠ᨲᩥᨿ ᪔᪕᪖) ᩌᨧᩁᩥᨿᩮᩣ.

ᨲᩃᩈᨲ᩠ᨲᩥᨠᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪗. ᩈᨬ᩠ᨧᩥᨧ᩠ᨧᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨸᩁᩮᩣ ᨠᩩᨠ᩠ᨠᩩᨧ᩠ᨧᩴ ᩏᨸ᩠ᨸᩣᨴᩮᨲᩩ ᩅᩣ, ᨾᩣ ᩅᩣ, ᨲᩴ ᩋᨸ᩠ᨸᨾᩣᨱᩴ. ‘‘ᨠᩩᨠ᩠ᨠᩩᨧ᩠ᨧᩩᨸᩣᨴᨶ’’ᨶ᩠ᨲᩥ ᨲᨲᩥᨿᨾᨦ᩠ᨣᩴ ᨲᩔ ᩋᨵᩥᨸ᩠ᨸᩣᨿᩅᩈᩮᨶ ᩅᩩᨲ᩠ᨲᨶ᩠ᨲᩥ ᩅᩮᨴᩥᨲᨻ᩠ᨻᩴ.

ᩈᨬ᩠ᨧᩥᨧ᩠ᨧᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪘. ᩏᨸᩔᩩᨲᩥᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩏᨸᩔᩩᨲᩥᨶ᩠ᨲᩥ ᨿᨳᩣ ᩏᨸᨠᩩᨩ᩠ᨫᩴ ‘‘ᩈᨾᩦᨸᨠᩩᨩ᩠ᨫ’’ᨶ᩠ᨲᩥ ᩅᩩᨧ᩠ᨧᨲᩥ, ᨲᨳᩣ ᩏᨸᩔᩩᨲᩥ ‘‘ᩈᨾᩦᨸᩔᩩᨲᩦ’’ᨲᩥ ᩅᩮᨴᩥᨲᨻ᩠ᨻᩣ. ᨿᨲ᩠ᨳ ᨮᩥᨲᩮᩣ ᩈᩩᨱᩣᨲᩥ, ᨲᩴ ᨮᩣᨶᨶ᩠ᨲᩥ ᩋᨲ᩠ᨳᩮᩣ. ᩈᩩᨲᩦᨲᩥ ᨸᨶᩮᨲ᩠ᨳ ᨸᩁᩮᩈᩴ ᩅᨧᨶᩈᨴ᩠ᨴᩮᩣ ᨧ. ᩈᩮᩣ ᩉᩥ ᩈᩩᨿ᩠ᨿᨲᩦᨲᩥ ᩈᩩᨲᩥ ᨶᩣᨾ. ᩏᨸᩈᩩᨿ᩠ᨿᨲᩥ ᩅᩣ ᩑᨲ᩠ᨳᩣᨲᩥ ᩏᨸᩔᩩᨲᩥ. ᩒᨠᩣᩈᩮᩣ ᩉᩥ ᩈᩩᨲᩥ ᨶᩣᨾ. ᩍᨾᩮᩈᩴ ᩈᩩᨲ᩠ᩅᩣᨲᩥ ᩑᨲ᩠ᨳ ‘‘ᩅᨧᨶ’’ᨶ᩠ᨲᩥ ᨸᩣᨮᩈᩮᩈᩮᩣ.

ᩈᨾᩩᨭ᩠ᨮᩣᨶᩣᨴᩦᨶᩥ ᩋᨲᩦᨲᨴ᩠ᩅᨿᩈᨴᩥᩈᩣᨶᩦᨲᩥ ᨶ ᨣᩉᩮᨲᨻ᩠ᨻᩣᨶᩥ. ᨳᩮᨿ᩠ᨿᩈᨲ᩠ᨳᩈᨾᩩᨭ᩠ᨮᩣᨶᩴ. ᩈᩥᨿᩣ ᨠᩥᩁᩥᨿᩴ ᨣᨶ᩠ᨲ᩠ᩅᩣ ᩈᩅᨶᩮ. ᩈᩥᨿᩣ ᩋᨠᩥᩁᩥᨿᩴ ᨮᩥᨲᨭ᩠ᨮᩣᨶᩴ ᩌᨣᨶ᩠ᨲ᩠ᩅᩣ ᩅᨴᨶ᩠ᨲᩣᨶᩴ ᩋᨩᩣᨶᩣᨸᨶᩅᩈᩮᨶ ᩈᨾᩩᨭ᩠ᨮᩣᨶᨲᩮᩣ. ‘‘ᩈᨬ᩠ᨬᩣᩅᩥᨾᩮᩣᨠ᩠ᨡᩴ, ᩈᨧᩥᨲ᩠ᨲᨠᩴ, ᩃᩮᩣᨠᩅᨩ᩠ᨩᩴ, ᨠᩣᨿᨠᨾ᩠ᨾᩴ, ᩅᨧᩦᨠᨾ᩠ᨾᩴ, ᩋᨠᩩᩈᩃᨧᩥᨲ᩠ᨲᩴ, ᨴᩩᨠ᩠ᨡᩅᩮᨴᨶ’’ᨶ᩠ᨲᩥ ᩃᩥᨡᩥᨲᩴ.

ᩏᨸᩔᩩᨲᩥᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪙. ᨠᨾ᩠ᨾᨸ᩠ᨸᨭᩥᨻᩣᩉᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩋᨸ᩠ᨸᨾᨲ᩠ᨲᨠᩅᩥᩔᨩ᩠ᨩᨶᨠᩮᨶ ᨸᨶ ᨧᩦᩅᩁᩴ ᨠᩁᩮᩣᨶ᩠ᨲᩔ ᩈᩮᨶᩣᩈᨶᨠ᩠ᨡᨶ᩠ᨵᨠᩅᨱ᩠ᨱᨶᩣᨿᩴ (ᨧᩪᩊᩅ. ᪓᪒᪘) ᩅᩩᨲ᩠ᨲᨸ᩠ᨸᨽᩮᨴᩣᨶᩥ ᩈᩪᨧᩥᩌᨴᩦᨶᩥ ᩋᨶᨸᩃᩮᩣᨠᩮᨲ᩠ᩅᩣᨸᩥ ᨴᩣᨲᨻ᩠ᨻᩣᨶᩥ. ᨲᨲᩮᩣ ᩋᨲᩥᩁᩮᨠᩴ ᨴᩮᨶ᩠ᨲᩮᨶ ᩋᨸᩃᩮᩣᨠᨶᨠᨾ᩠ᨾᩴ ᨠᩣᨲᨻ᩠ᨻᩴ. ᩑᩅᩴ ᨠᨲᩴ ᨸᨶ ᩋᨸᩃᩮᩣᨠᨶᩴ ᨠᨾ᩠ᨾᩃᨠ᩠ᨡᨱᨾᩮᩅᩣᨲᩥ ᩋᨵᩥᨸ᩠ᨸᩣᨿᩮᩣ. ᩑᩅᩴ ᩈᨻ᩠ᨻᨲ᩠ᨳ ᨠᨾ᩠ᨾᩃᨠ᩠ᨡᨱᩴ ᩅᩮᨴᩥᨲᨻ᩠ᨻᩴ. ᨣᩣᨾᩈᩦᨾᩣᩅᩥᩉᩣᩁᩮᩈᩩ ᩒᩈᩣᩁᨱᩣᨴᩦᨶᩥ ᩈᨦ᩠ᨥᨠᨾ᩠ᨾᩣᨶᩥᨿᩮᩅ ᨶ ᩅᨭ᩠ᨭᨶ᩠ᨲᩥ. ᩅᩥᩔᨩ᩠ᨩᩥᨿᩅᩮᨽᨦ᩠ᨣᩥᨿᩣᨶᩥ ᨸᨶ ᩅᨭ᩠ᨭᨶ᩠ᨲᩥ. ‘‘ᩈᨦ᩠ᨥᩔ ᩈᨶ᩠ᨲᨠ’’ᨶ᩠ᨲᩥ ᩈᩣᨾᨬ᩠ᨬᨲᩮᩣ ᩋᩅᨲ᩠ᩅᩣ ‘‘ᩍᨾᩈ᩠ᨾᩥᩴ ᩅᩥᩉᩣᩁᩮ ᩈᨦ᩠ᨥᩔ ᩈᨶ᩠ᨲᨠ’’ᨶ᩠ᨲᩥ ᩋᨸᩃᩮᩣᨠᩮᨲᨻ᩠ᨻᨶ᩠ᨲᩥ ᨧ, ‘‘ᩈᨾᩩᨭ᩠ᨮᩣᨶᩣᨴᩦᨶᩥ ᩋᨴᩥᨶ᩠ᨶᩣᨴᩣᨶᩈᨴᩥᩈᩣᨶᩥ, ᩍᨴᩴ ᨸᨶ ᨴᩩᨠ᩠ᨡᩅᩮᨴᨶ’’ᨶ᩠ᨲᩥ ᨸᩣᨮᩮᩣᨲᩥ ᨧ ᩃᩥᨡᩥᨲᩴ.

ᨠᨾ᩠ᨾᨸ᩠ᨸᨭᩥᨻᩣᩉᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪑᪐. ᨨᨶ᩠ᨴᩴᩋᨴᨲ᩠ᩅᩣᨣᨾᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩈᨶ᩠ᨶᩥᨸᩣᨲᩴ ᩋᨶᩣᨣᨶ᩠ᨲ᩠ᩅᩣ ᨧᩮ ᨨᨶ᩠ᨴᩴ ᨶ ᨴᩮᨲᩥ, ᩋᨶᩣᨸᨲ᩠ᨲᩦᨲᩥ ᩑᨠᩮ. ᨴᩩᨠ᩠ᨠᨭᨶ᩠ᨲᩥ ᩑᨠᩮ ᨵᨾ᩠ᨾᨠᨾ᩠ᨾᨶ᩠ᨲᩁᩣᨿᨠᩁᨱᩣᨵᩥᨸ᩠ᨸᩣᨿᨲ᩠ᨲᩣ.

ᨨᨶ᩠ᨴᩴᩋᨴᨲ᩠ᩅᩣᨣᨾᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪑᪑. ᨴᩩᨻ᩠ᨻᩃᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩋᨠᨸ᩠ᨸᩥᨿᩮᨶ ᩅᩣᨲᩥ ᩈᩩᩅᨱ᩠ᨱᩁᨩᨲᨾᨿᨾᨬ᩠ᨧᩣᨴᩥᨶᩣ. ᨠᨸ᩠ᨸᩥᨿᨾᨬ᩠ᨧᩮᩣ ᩈᨾ᩠ᨸᨭᩥᨧ᩠ᨨᩥᨲᨻ᩠ᨻᩮᩣᨲᩥ ‘‘ᩈᨦ᩠ᨥᩔ ᨴᩮᨾᩣ’’ᨲᩥ ᨴᩥᨶ᩠ᨶᩴ ᩈᨶ᩠ᨵᩣᨿ ᩅᩩᨲ᩠ᨲᩴ, ᨲᩮᩉᩥ ᨸᨶ ‘‘ᩅᩥᩉᩣᩁᩔ ᨴᩮᨾᩣ’’ᨲᩥ ᩅᩩᨲ᩠ᨲᩮ ᩈᩩᩅᨱ᩠ᨱᩁᨩᨲᨾᨿᩣᨴᩥᩋᨠᨸ᩠ᨸᩥᨿᨾᨬ᩠ᨧᩣᨸᩥ ᩈᨾ᩠ᨸᨭᩥᨧ᩠ᨨᩥᨲᨻ᩠ᨻᩣᨲᩥ ᨧ, ‘‘ᩋᩁᨬ᩠ᨩᩁᩮᩣ ᨻᩉᩩᩏᨴᨠᨣᨱ᩠ᩉᨶᨠᩮᩣ’’ᨲᩥ ᨧ, ‘‘ᩈᨦ᩠ᨥᩥᨠᨸᩋᨽᩮᩣᨣᩮᨶ ᩅᩣᨲᩥ ᩈᨧᩮ ᩌᩁᩣᨾᩥᨠᩣᨴᨿᩮᩣ ᨸᨭᩥᩈᩣᨾᩮᨲ᩠ᩅᩣ ᨸᨭᩥᨴᩮᨶ᩠ᨲᩥ, ᨸᩁᩥᨽᩩᨬ᩠ᨩᩥᨲᩩᩴ ᩅᨭ᩠ᨭᨲᩦ’’ᨲᩥ ᨧ, ‘‘ᨠᩴᩈᩃᩮᩣᩉᩣᨴᩥᨽᩣᨩᨶᩴ ᩈᨦ᩠ᨥᩔ ᨴᩥᨶ᩠ᨶᨾ᩠ᨸᩥ ᨸᩣᩁᩥᩉᩣᩁᩥᨿᩴ ᨶ ᩅᨭ᩠ᨭᨲᩦ’’ᨲᩥ (ᨧᩪᩊᩅ. ᩋᨭ᩠ᨮ. ᪓᪒᪑) ᩈᨾᨶ᩠ᨲᨸᩣᩈᩣᨴᩥᨠᩣᨿᩴ ᩅᩩᨲ᩠ᨲᨲ᩠ᨲᩣ ᩋᨲ᩠ᨲᨶᩮᩣ ᩉᨲ᩠ᨳᩮᨶ ᨣᩉᩮᨲ᩠ᩅᩣ ᨸᨭᩥᩈᩣᨾᩥᨲᩩᩴ ᨶ ᩃᨽᨲᩦᨲᩥ ᨧ, ‘‘ᩅᩮᨵᨠᩮᩣ ᨠᩣᨿᨻᨶ᩠ᨵᨶᩔᩣᨲᩥ ᩅᨴᨶ᩠ᨲᩦ’’ᨲᩥ ᨧ, ‘‘ᩉᩥᨦ᩠ᨣᩩ ᩉᩥᨦ᩠ᨣᩩᩃᩥᩉᩁᩥᨲᩣᩃᨾᨶᩮᩣᩈᩥᩃᩣ ᩋᨬ᩠ᨩᨶᩣᨶᩦ’’ᨲᩥ ᨸᩣᨮᩮᩣᨲᩥ ᨧ, ‘‘ᨴᩣᩁᩩᨾᨿᩮᩣ ᩅᩣ…ᨸᩮ… ᩋᨸᩣᨴᨠᩮᩣᨸᩥ ᩈᨾᩩᨣ᩠ᨣᩮᩣ’’ᨲᩥ ᨸᩣᨮᩮᩣᨲᩥ ᨧ, ‘‘ᨴᩣᩁᩩᨾᨿᩮᩣ ᨲᩩᨾ᩠ᨻᩮᩣᨲᩥ ᨴᩣᩁᩩᨾᨿᩮᩣ ᩏᨴᨠᨲᩩᨾ᩠ᨻᩮᩣ’’ᨲᩥ ᨧ, ‘‘ᨳᨾ᩠ᨽᨲᩩᩃᩣᩈᩮᩣᨸᩣᨶᨹᩃᨠᩣᨴᩦᩈᩪ’’ᨲᩥ ᨧ ᩃᩥᨡᩥᨲᩴ.

ᨴᩩᨻ᩠ᨻᩃᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪑᪒. ᨸᩁᩥᨱᩣᨾᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩑᨠᩮᩣ ᨽᩥᨠ᩠ᨡᩩ ᩏᨠ᩠ᨡᩥᨲ᩠ᨲᨠᩔ ᨴᩣᨲᩩᨠᩣᨾᩮᩣ ᩉᩮᩣᨲᩥ, ᨲᩔ ᨴᩣᨶᩴ ᨶᩥᩅᩣᩁᩮᨲ᩠ᩅᩣ ᩋᨬ᩠ᨬᩔ ᨴᩣᨸᩮᨲᩥ, ᩋᨶᩣᨸᨲ᩠ᨲᩥ. ᨲᨳᩣ ᩈᨴ᩠ᨵᩣᨴᩮᨿ᩠ᨿᩅᩥᨶᩥᨸᩣᨲᨶᩴ ᨠᩁᩮᩣᨶ᩠ᨲᩔ ᨴᩣᨸᩮᨲᩥ, ᩋᨲ᩠ᨲᨶᩮᩣ ᨶᩥᩔᩥᨲᨠᩣ ᩍᨲ᩠ᨳᨶ᩠ᨶᩣᨾᩔ ᨸᨲ᩠ᨲᩴ ᨴᩣᨲᩩᨠᩣᨾᩣ ᩌᨸᩩᨧ᩠ᨨᨶ᩠ᨲᩥ, ‘‘ᩅᩥᩈᨽᩣᨣᩮᩣ ᩑᩈᩮᩣ, ᩈᨽᩣᨣᩔ ᨴᩮᩉᩦ’’ᨲᩥ ᩅᨴᨲᩥ. ᩋᨶᩣᨸᨲ᩠ᨲᩥ ᩋᨲ᩠ᨲᨶᩮᩣ ᨽᩣᩁᨽᩪᨲᨲ᩠ᨲᩣ. ᨲᩔ ᨸᨶ ᨴᩣᨲᩩᨠᩣᨾᩴ ᩋᨬ᩠ᨬᩔ ᨴᩣᨸᩮᨲᩥ, ᩌᨸᨲ᩠ᨲᩥ ᩑᩅ. ᩈᨻ᩠ᨻᨲ᩠ᨳ ᩌᨸᩩᨧ᩠ᨨᩥᨲ᩠ᩅᩣ ᨴᩣᨲᩩᨠᩣᨾᩴ ᨿᨳᩣᩈᩩᨡᩴ ᩅᩥᨧᩣᩁᩮᨲᩩᩴ ᩃᨽᨲᩥ.

ᨸᩁᩥᨱᩣᨾᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᩈᩉᨵᨾ᩠ᨾᩥᨠᩅᨣ᩠ᨣᩮᩣ ᩋᨭ᩠ᨮᨾᩮᩣ.

᪙. ᩁᨲᨶᩅᨣ᩠ᨣᩮᩣ

᪑. ᩋᨶ᩠ᨲᩮᨸᩩᩁᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩋᩈᨿᨶᩥᨥᩁᩮᨲᩥ ᨸᩁᩥᨠ᩠ᨡᩥᨲ᩠ᨲᩔ ᨻᩉᩥᨽᩪᨲᩮᩈᩩ ᩁᩩᨠ᩠ᨡᨾᩪᩃᩣᨴᩦᩈᩩ. ‘‘ᩈᨧᩮ ᨡᨲ᩠ᨲᩥᨿᩮᩣᩅ ᩉᩮᩣᨲᩥ, ᨶᩣᨽᩥᩈᩥᨲ᩠ᨲᩮᩣ, ᩋᨽᩥᩈᩥᨲ᩠ᨲᩮᩣᩅ ᩉᩮᩣᨲᩥ, ᨶ ᨡᨲ᩠ᨲᩥᨿᩮᩣ, ᩁᨠ᩠ᨡᨲᩦ’’ᨲᩥ ᩌᨧᩁᩥᨿᩮᩣ ‘‘ᨡᨲ᩠ᨲᩥᨿᨲᩣ, ᩋᨽᩥᩈᩥᨲ᩠ᨲᨲᩣ’’ᨲᩥ ᩌᨸᨲ᩠ᨲᩥᨿᩣ ᩋᨦ᩠ᨣᨽᩣᩅᩮᨶ ᩅᩩᨲ᩠ᨲᨲ᩠ᨲᩣ. ᩈᨾᩩᨭ᩠ᨮᩣᨶᩣᨴᩦᨶᩥ ᨸᨮᨾᨠᨳᩥᨶᩈᨴᩥᩈᩣᨶᩥ, ᩍᨴᩴ ᨸᨶ ᨠᩥᩁᩥᨿᩣᨠᩥᩁᩥᨿ’’ᨶ᩠ᨲᩥ ᨸᩣᨮᩮᩣ.

ᩋᨶ᩠ᨲᩮᨸᩩᩁᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪒. ᩁᨲᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩈᨻ᩠ᨻᩮᩣᨸᩥ ᨠᨳᩣᨾᨣ᩠ᨣᩮᩣ ᨽᨱ᩠ᨯᩣᨣᩣᩁᩥᨠᩈᩦᩈᩮᨶ ᨶᩥᨠ᩠ᨡᩥᨸᨶᩴ, ᨣᩮᩣᨸᨶᨬ᩠ᨧ ᨸᨭᩥᨠ᩠ᨡᩥᨸᩥᨲ᩠ᩅᩣ ᨸᩅᨲ᩠ᨲᩮᩣ.

ᩁᨲᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪓. ᩅᩥᨠᩣᩃᨣᩣᨾᨸ᩠ᨸᩅᩮᩈᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᩈᨶ᩠ᨲᩴ ᨽᩥᨠ᩠ᨡᩩ’’ᨶ᩠ᨲᩥ ᨧ ‘‘ᩋᨶᩣᨸᩩᨧ᩠ᨨᩣ’’ᨲᩥ ᨧ ‘‘ᨲᨳᩣᩁᩪᨸᩣ ᩋᨧ᩠ᨧᩣᨿᩥᨠᩣᨲᩥ ᨧ ᩍᨾᩣᨲᩥ ᩑᨲ᩠ᨳ ᨲᩥᩔᩮᩣ’’ᨲᩥ ᨸᩣᨮᩮᩣ. ‘‘ᩈᨾᩩᨭ᩠ᨮᩣᨶᩣᨴᩦᨶᩥ ᨠᨳᩥᨶᩈᨴᩥᩈᩣᨶᩥ, ᩍᨴᩴ ᨸᨶ ᨠᩥᩁᩥᨿᩣᨠᩥᩁᩥᨿ’’ᨶ᩠ᨲᩥ ᨸᩣᨮᩮᩣ.

ᩅᩥᨠᩣᩃᨣᩣᨾᨸ᩠ᨸᩅᩮᩈᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪔. ᩈᩪᨧᩥᨥᩁᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨲᩴ ᩋᩔᩣᨲᩥ ᨲᩴ ᨽᩮᨴᨶᨠᩴ ᩋᩔ ᨸᩣᨧᩥᨲ᩠ᨲᩥᨿᩔ ᩋᨲ᩠ᨳᩥ ᨸᨮᨾᩴ ᨽᩮᨴᨶᩴ ᨠᨲ᩠ᩅᩣ ᨸᨧ᩠ᨨᩣ ᨴᩮᩈᩮᨲᨻ᩠ᨻᨲ᩠ᨲᩣ. ᩑᩈ ᨶᨿᩮᩣ ᩍᨲᩁᩮᩈᩩᨸᩥ. ᩅᩣᩈᩥᨩᨭᩮᨲᩥ ᩅᩣᩈᩥᨴᨱ᩠ᨯᨠᩮ.

ᩈᩪᨧᩥᨥᩁᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪕. ᨾᨬ᩠ᨧᨸᩦᨮᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩋᨭ᩠ᨮᨦ᩠ᨣᩩᩃᨸᩣᨴᨠᨶ᩠ᨲᩥ ᨽᩣᩅᨶᨸᩩᩴᩈᨠᩴ. ᨲᩩᩃᩣᩈᨦ᩠ᨥᩣᨲᩮ ᨮᨸᨶᨾᩮᩅ ᩋᨭ᩠ᨭᨠᩁᨱᩴ.

ᨾᨬ᩠ᨧᨸᩦᨮᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪖. ᨲᩪᩃᩮᩣᨶᨴ᩠ᨵᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨠᩥᨬ᩠ᨧᩣᨸᩥ ᨸᨭᩥᩃᩣᨽᩮᨿᩮᩅ ᨸᩣᨧᩥᨲ᩠ᨲᩥᨿᩴ ᩅᩥᨿ ᨴᩥᩔᨲᩥ, ᨸᩁᩥᨽᩮᩣᨣᩮ ᩑᩅ ᨸᨶ ᩌᨸᨲ᩠ᨲᩥ ᨴᨭ᩠ᨮᨻ᩠ᨻᩣ. ‘‘ᩋᨬ᩠ᨬᩮᨶ ᨠᨲᩴ ᨸᨭᩥᩃᨽᩥᨲ᩠ᩅᩣ ᨸᩁᩥᨽᩩᨬ᩠ᨩᨲᩥ, ᩌᨸᨲ᩠ᨲᩥ ᨴᩩᨠ᩠ᨠᨭᩔᩣ’’ᨲᩥ (ᨸᩣᨧᩥ. ᪕᪒᪙) ᩅᨧᨶᩴ ᩑᨲ᩠ᨳ ᩈᩣᨵᨠᩴ.

ᨲᩪᩃᩮᩣᨶᨴ᩠ᨵᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪗. ᨶᩥᩈᩦᨴᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨠᩥᨬ᩠ᨧᩣᨸᩥ ᨶᩥᩈᩦᨴᨶᩔ ᨩᩣᨲᩥ ᨶ ᨴᩥᩔᨲᩥ ᩑᨲ᩠ᨳ, ᨲᨳᩣᨸᩥ ᨧᩦᩅᩁᨠ᩠ᨡᨶ᩠ᨵᨠᩮ ᩋᨶᩩᨬ᩠ᨬᩣᨲᨲ᩠ᨲᩣ, ‘‘ᨶᩅ ᨧᩦᩅᩁᩣᨶᩥ ᩋᨵᩥᨭ᩠ᨮᩣᨲᨻ᩠ᨻᩣᨶᩦ’’ᨲᩥ ᩑᨲ᩠ᨳ ᨧ ᨸᩁᩥᨿᩣᨸᨶ᩠ᨶᨲ᩠ᨲᩣ ᨧᩦᩅᩁᨩᩣᨲᩥ ᩑᩅᩔ ᨩᩣᨲᩦᨲᩥ ᩅᩮᨴᩥᨲᨻ᩠ᨻᩴ. ‘‘ᩃᩣᨽᩮ ᩈᨴᩈᩴ, ᩋᩃᩣᨽᩮ ᩋᨴᩈᨾ᩠ᨸᩥ ᩅᨭ᩠ᨭᨲᩦ’’ᨲᩥ ᩑᨠᩮ, ᨲᩴ ᨶ ᨿᩩᨲ᩠ᨲᩴ ‘‘ᨶᩥᩈᩦᨴᨶᩴ ᨶᩣᨾ ᩈᨴᩈᩴ ᩅᩩᨧ᩠ᨧᨲᩦ’’ᨲᩥ (ᨸᩣᨧᩥ. ᪕᪓᪑-᪕᪓᪒) ᨲᩔ ᩈᨱ᩠ᨮᩣᨶᨶᩥᨿᨾᨶᨲᩮᩣ.

ᨶᩥᩈᩦᨴᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᩁᨲᨶᩅᨣ᩠ᨣᩮᩣ ᨶᩅᨾᩮᩣ.

ᩈᩩᨴ᩠ᨵᨸᩣᨧᩥᨲ᩠ᨲᩥᨿᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨸᩣᨭᩥᨴᩮᩈᨶᩦᨿᨠᨱ᩠ᨯᩴ

᪑. ᨸᨮᨾᨸᩣᨭᩥᨴᩮᩈᨶᩦᨿᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨿᩣᨾᨠᩣᩃᩥᨠᩣᨴᩦᩈᩩ ᩌᩉᩣᩁᨲ᩠ᨳᩣᨿ ᩑᩅ ᨴᩩᨠ᩠ᨠᨭᩴ. ᨲᨾ᩠ᨸᩥ ᩌᨾᩥᩈᩮᨶ ᩋᩈᨾ᩠ᨽᩥᨶ᩠ᨶᩁᩈᩮ, ᩈᨾ᩠ᨽᩥᨶ᩠ᨶᩮ ᨸᨶ ᩑᨠᩁᩈᩮ ᨸᩣᨭᩥᨴᩮᩈᨶᩦᨿᨾᩮᩅ.

ᨸᨮᨾᨸᩣᨭᩥᨴᩮᩈᨶᩦᨿᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪒. ᨴᩩᨲᩥᨿᨸᩣᨭᩥᨴᩮᩈᨶᩦᨿᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᩈᨾᩩᨭ᩠ᨮᩣᨶᩣᨴᩦᨶᩥ ᨠᨳᩥᨶᩈᨴᩥᩈᩣᨶᩥ, ᩍᨴᩴ ᨸᨶ ᨠᩥᩁᩥᨿᩣᨠᩥᩁᩥᨿ’’ᨶ᩠ᨲᩥ ᨸᩣᨮᩮᩣ.

ᨴᩩᨲᩥᨿᨸᩣᨭᩥᨴᩮᩈᨶᩦᨿᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪔. ᨧᨲᩩᨲ᩠ᨳᨸᩣᨭᩥᨴᩮᩈᨶᩦᨿᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᩌᩁᩣᨾᩮ ᩅᩣ ᩌᩁᩣᨾᩪᨸᨧᩣᩁᩮ ᩅᩣ ᨸᨭᩥᨣ᩠ᨣᩉᩮᨲ᩠ᩅᩣ ᩋᨩ᩠ᨫᩮᩣᩉᩁᨶ᩠ᨲᩔᩣᨲᩥ ᩌᩁᩣᨾᩮ ᩅᩣ ᩌᩁᩣᨾᩪᨸᨧᩣᩁᩮ ᩅᩣ ᨸᨭᩥᨣ᩠ᨣᩉᩮᨲ᩠ᩅᩣ ᩌᩁᩣᨾᩮ ᩅᩣ ᩌᩁᩣᨾᩪᨸᨧᩣᩁᩮ ᩅᩣ ᩋᨩ᩠ᨫᩮᩣᩉᩁᨶ᩠ᨲᩔᩣᨲᩥ ᩋᨲ᩠ᨳᩮᩣ.

ᨻᩉᩣᩁᩣᨾᩮ ᨸᨭᩥᨣ᩠ᨣᩉᩥᨲᩴ ᩋᨩ᩠ᨫᩣᩁᩣᨾᩮ ᨽᩩᨬ᩠ᨩᨶ᩠ᨲᩔ ᩋᨶᩣᨸᨲ᩠ᨲᩥ. ᩋᨦ᩠ᨣᩮᩈᩩ ᨧ ‘‘ᩋᨩ᩠ᨫᩣᩁᩣᨾᩮ ᩅᩣ ᩌᩁᩣᨾᩪᨸᨧᩣᩁᩮ ᩅᩣ ᨸᨭᩥᨣ᩠ᨣᩉᨱ’’ᨶ᩠ᨲᩥ ᨣᩉᩮᨲᨻ᩠ᨻᩴ. ᩋᨩ᩠ᨫᩣᩁᩣᨾᩮ ᩉᩥ ᨴᩔᩥᨲᩮ ᩌᩁᩣᨾᩪᨸᨧᩣᩁᩴ ᨴᩔᩥᨲᨾᩮᩅᩣᨲᩥ. ‘‘ᩈᨾᩩᨭ᩠ᨮᩣᨶᩣᨴᩦᨶᩥ ᨠᨳᩥᨶᩈᨴᩥᩈᩣᨶᩥ, ᩍᨴᩴ ᨸᨶ ᨠᩥᩁᩥᨿᩣᨠᩥᩁᩥᨿ’’ᨶ᩠ᨲᩥ ᨸᩣᨮᩮᩣ.

ᨧᨲᩩᨲ᩠ᨳᨸᩣᨭᩥᨴᩮᩈᨶᩦᨿᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨸᩣᨭᩥᨴᩮᩈᨶᩦᨿᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᩈᩮᨡᩥᨿᨠᨱ᩠ᨯᩴ

ᩈᩮᨡᩥᨿᩮᩈᩩ ᩈᨲᩥᨸᩥ ᩅᩦᨲᩥᨠ᩠ᨠᨾᩮ ᩋᨶᩣᨴᩁᩥᨿᩣᨸᩮᨠ᩠ᨡᩔᩮᩅ ᩌᨸᨲ᩠ᨲᩦᨲᩥ ᨴᩔᨶᨲ᩠ᨳᩴ ᨠᩣᩁᨠᩮᩣ ᨶ ᩅᩩᨲ᩠ᨲᩮᩣ. ᩋᨿᨬ᩠ᩉᩥ ᩅᩥᨶᨿᨵᨾ᩠ᨾᨲᩣ, ᨿᨴᩥᨴᩴ ᩈᩣᨸᩮᨠ᩠ᨡᩮ ᨠᩣᩁᨠᨶᩥᨴ᩠ᨴᩮᩈᩮᩣ, ᩈᩮᩣ ᩅᩩᨲ᩠ᨲᨶᩥᨿᨾᩮ ᩅᩥᨵᩥ, ᨽᩩᨾ᩠ᨾᨠᩁᨱᨬ᩠ᨧ. ᩋᨭ᩠ᨮᨦ᩠ᨣᩩᩃᩣᨵᩥᨠᨾ᩠ᨸᩥ ᩒᨲᩣᩁᩮᨲ᩠ᩅᩣ ᨶᩥᩅᩣᩈᩮᨲᩩᩴ ᩅᨭ᩠ᨭᨲᩥ. ᨲᨲᩮᩣ ᨸᩁᩴ ᩒᨲᩣᩁᩮᨶ᩠ᨲᩔ ᨴᩩᨠ᩠ᨠᨭᨶ᩠ᨲᩥ ᨾᩉᩣᩋᨭ᩠ᨮᨠᨳᩣᨿᩴ ᩅᩩᨲ᩠ᨲᩴ. ᩌᩁᩣᨾᩮ ᩅᩣᨲᩥ ᨻᩩᨴ᩠ᨵᩩᨸᨭ᩠ᨮᩣᨶᩣᨴᩥᨠᩣᩃᩮ. ᨸᩣᩁᩩᨸᩥᨲᨻ᩠ᨻᨶ᩠ᨲᩥ ᩏᨲ᩠ᨲᩁᩣᩈᨦ᩠ᨣᨠᩥᨧ᩠ᨧᩅᩈᩮᨶ ᩅᩩᨲ᩠ᨲᩴ.

ᨮᨲ᩠ᩅᩣᨲᩥ ᩑᨲ᩠ᨳ ᨣᨧ᩠ᨨᨶ᩠ᨲᩮᩣᨸᩥ ᨸᩁᩥᩔᨿᩣᨽᩣᩅᩴ ᩒᩃᩮᩣᨠᩮᨲᩩᩴ ᩃᨽᨲᩥᨿᩮᩅᩣᨲᩥ (ᩅᨩᩥᩁ. ᨭᩦ. ᨸᩣᨧᩥᨲ᩠ᨲᩥᨿ ᪕᪘᪒) ᩃᩥᨡᩥᨲᩴ. ᨿᨳᩣ ᩅᩣᩈᩪᨸᨣᨲᩔ ᩋᨶ᩠ᨲᩁᨥᩁᩮ ᨠᩣᨿᩴ ᩅᩥᩅᩁᩥᨲ᩠ᩅᩣ ᨶᩥᩈᩦᨴᩥᨲᩩᩴ ᩅᨭ᩠ᨭᨲᩥ, ᨲᨳᩣ ᨲᩔ ᩈᨶ᩠ᨲᩥᨠᩮ ᨣᨶ᩠ᨲᩩᨠᩣᨾᩔᨸᩥ ᨠᩣᨿᨻᨶ᩠ᨵᨶᩴ ᩋᨻᨶ᩠ᨵᩥᨲ᩠ᩅᩣ ᩈᨦ᩠ᨥᩣᨭᩥᩴ ᩋᨸᩣᩁᩩᨸᩥᨲ᩠ᩅᩣ ᨣᩣᨾᨸ᩠ᨸᩅᩮᩈᨶᨾᨶᩣᩁᩮᩣᨧᩮᨲ᩠ᩅᩣ ᨿᨳᩣᨠᩣᨾᩴ ᨣᨶ᩠ᨲᩩᩴ ᩅᨭ᩠ᨭᨲᩥ. ᨲᩈ᩠ᨾᩣ ᩋᨴ᩠ᨵᩣᨶᨾᨣ᩠ᨣᨣᨾᨶᨠᩣᩃᩮ ᩑᨠᩮᩣ ᨽᩥᨠ᩠ᨡᩩ ᨣᩣᨾᨸ᩠ᨸᩅᩮᩈᨶᩅᨲ᩠ᨲᩴ ᨸᩪᩁᩮᨲ᩠ᩅᩣ ᨣᩣᨾᩴ ᨸᩅᩥᩈᩥᨲ᩠ᩅᩣ ᩑᨠᩴ ᩌᩅᩈᨳᩴ ᨸᩩᩁᨲᩮᩣᩅ ᨮᩥᨲᩴ ᨸᨲ᩠ᩅᩣ ᨸᩁᩥᨠ᩠ᨡᩣᩁᩴ ᨮᨸᩮᨲ᩠ᩅᩣ ᩅᩣᩈᩪᨸᨣᨲᩮᩣ ᨧᩮ ᩉᩮᩣᨲᩥ, ᩍᨲᩁᩮᩉᩥ ᨲᩔ ᩈᨶ᩠ᨲᩥᨠᩴ ᨿᨳᩣᩈᩩᨡᩴ ᨣᨶ᩠ᨲᩩᩴ ᩅᨭ᩠ᨭᨲᩥ. ᨠᩮᩣ ᨸᨶ ᩅᩣᨴᩮᩣ ᨧᨲᩪᩉᨸᨬ᩠ᨧᩣᩉᩴ ᩅᩣᩈᨾᨵᩥᨭ᩠ᨮᩣᨿ ᩅᩈᩥᨲᨽᩥᨠ᩠ᨡᩪᨶᩴ ᩈᨶ᩠ᨲᩥᨠᩴ ᨣᨶ᩠ᨲᩩᨬ᩠ᨧ ᩅᩣᩈᩪᨸᨣᨲᩣᨶᩴ ᩈᨶ᩠ᨲᩥᨠᩴ ᨣᨶ᩠ᨲᩩᨬ᩠ᨧ ᩅᨭ᩠ᨭᨲᩦᨲᩥ. ᨻᩩᨴ᩠ᨵᨸᩪᨩᨾ᩠ᨸᩥ ᨿᨳᩣᩈᩩᨡᩴ ᨣᨶ᩠ᨲᩩᩴ ᩅᨭ᩠ᨭᨲᩥ. ᩅᩩᨲ᩠ᨲᨾ᩠ᨸᩥ ᨧᩮᨲᩴ ᩋᨭ᩠ᨮᨠᨳᩣᨿᩴ ‘‘ᩋᨶᩣᨸᨲ᩠ᨲᩥ ᨠᩣᩁᨱᩴ ᨸᨭᩥᨧ᩠ᨧ ᨲᩉᩴ ᨲᩉᩴ ᩒᩃᩮᩣᨠᩮᨲᩦ’’ᨲᩥ. ᨲᨲ᩠ᨳ ᨠᩣᩁᨱᩴ ᨶᩣᨾ ᩌᨾᩥᩈᨸᩪᨩᩣᨲᩥ ᩅᩮᨴᩥᨲᨻ᩠ᨻᩣᨲᩥ ᩃᩥᨡᩥᨲᩴ.

ᨨᨻ᩠ᨻᩦᩈᨲᩥᩈᩣᩁᩩᨸ᩠ᨸᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨿᩈ᩠ᨾᩣ ‘‘ᩈᨾᨲᩥᨲ᩠ᨲᩥᨠᩮᩣ ᨸᩥᨱ᩠ᨯᨸᩣᨲᩮᩣ ᨸᨭᩥᨣ᩠ᨣᩉᩮᨲᨻ᩠ᨻᩮᩣ’’ᨲᩥ (ᨸᩣᨧᩥ. ᪖᪐᪒-᪖᪐᪓) ᩅᨧᨶᩴ ᨸᩥᨱ᩠ᨯᨸᩣᨲᩮᩣ ᩈᨾᨸᩩᨱ᩠ᨱᩮᩣ ᨸᨭᩥᨣ᩠ᨣᩉᩮᨲᨻ᩠ᨻᩮᩣᨲᩥ ᨴᩦᨸᩮᨲᩥ, ᨲᩈ᩠ᨾᩣ ᩋᨲ᩠ᨲᨶᩮᩣ ᩉᨲ᩠ᨳᨣᨲᩮ ᨸᨲ᩠ᨲᩮ ᨸᩥᨱ᩠ᨯᨸᩣᨲᩮᩣ ᨴᩥᨿ᩠ᨿᨾᩣᨶᩮᩣ ᨳᩪᨸᩦᨠᨲᩮᩣᨸᩥ ᨧᩮ ᩉᩮᩣᨲᩥ, ᩅᨭ᩠ᨭᨲᩦᨲᩥ ᨴᩦᨸᩥᨲᩮᩣ ᩉᩮᩣᨲᩥ. ᩈᩪᨸᩮᩣᨴᨶᩅᩥᨬ᩠ᨬᨲ᩠ᨲᩥᨿᩴ ᨾᩩᨡᩮ ᨸᨠ᩠ᨡᩥᨸᩥᨲ᩠ᩅᩣ ᩅᩥᨸ᩠ᨸᨭᩥᩈᩣᩁᩮ ᩏᨸ᩠ᨸᨶ᩠ᨶᩮ ᨸᩩᨶ ᩏᨣ᩠ᨣᩥᩁᩥᨲᩩᨠᩣᨾᩔᩣᨸᩥ ᩈᩉᩈᩣ ᨧᩮ ᨸᩅᩥᩈᨲᩥ, ᩑᨲ᩠ᨳ ᩋᩈᨬ᩠ᨧᩥᨧ᩠ᨧ ᨽᩩᨬ᩠ᨩᨲᩥ ᨶᩣᨾ. ᩅᩥᨬ᩠ᨬᨲ᩠ᨲᩥᨠᨲᨬ᩠ᨧ ᩋᨠᨲᨬ᩠ᨧ ᩑᨠᩈ᩠ᨾᩥᩴ ᨮᩣᨶᩮ ᨮᩥᨲᩴ ᩈᩉᩈᩣ ᩋᨶᩩᨸᨵᩣᩁᩮᨲ᩠ᩅᩣ ᨣᩉᩮᨲ᩠ᩅᩣ ᨽᩩᨬ᩠ᨩᨲᩥ, ᩋᩔᨲᩥᨿᩣ ᨽᩩᨬ᩠ᨩᨲᩥ ᨶᩣᨾ.

ᩈᨿᩴ ᨿᩣᨶᨣᨲᩮᩣ ᩉᩩᨲ᩠ᩅᩣ, ᨿᨳᩣ ᨿᩣᨶᨣᨲᩔ ᨧᩮ;

ᩋᩃᩴ ᩅᨲ᩠ᨳᩩᩴ ᨲᨳᩣ ᨶᩣᩃᩴ, ᩈᨨᨲ᩠ᨲᩮᩣ ᨨᨲ᩠ᨲᨸᩣᨱᩥᨶᩮᩣ.

‘‘ᩈᩪᨸᩮᩣᨴᨶᩅᩥᨬ᩠ᨬᨲ᩠ᨲᩥᩈᩥᨠ᩠ᨡᩣᨸᨴᩴ ᨳᩮᨿ᩠ᨿᩈᨲ᩠ᨳᩈᨾᩩᨭ᩠ᨮᩣᨶᩴ, ᨠᩥᩁᩥᨿᩴ, ᩈᨬ᩠ᨬᩣᩅᩥᨾᩮᩣᨠ᩠ᨡᩴ, ᩈᨧᩥᨲ᩠ᨲᨠᩴ, ᩃᩮᩣᨠᩅᨩ᩠ᨩᩴ, ᨠᩣᨿᨠᨾ᩠ᨾᩴ, ᩅᨧᩦᨠᨾ᩠ᨾᩴ, ᩋᨠᩩᩈᩃᨧᩥᨲ᩠ᨲᩴ, ᨴᩩᨠ᩠ᨡᩅᩮᨴᨶ’’ᨶ᩠ᨲᩥ ᨸᩣᨮᩮᩣ.

ᩈᩮᨡᩥᨿᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨽᩥᨠ᩠ᨡᩩᨸᩣᨲᩥᨾᩮᩣᨠ᩠ᨡᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨶᨾᩮᩣ ᨲᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ

ᨽᩥᨠ᩠ᨡᩩᨶᩦᨸᩣᨲᩥᨾᩮᩣᨠ᩠ᨡᩅᨱ᩠ᨱᨶᩣ

ᨸᩣᩁᩣᨩᩥᨠᨠᨱ᩠ᨯᩴ

ᩋᨽᩥᩃᩣᨸᨾᨲ᩠ᨲᨾᩮᩅᩣᨲᩥ ᩑᨲ᩠ᨳ ᨴᩉᩁᩅᩈᩮᨶ ‘‘ᨽᨶ᩠ᨲᩮ’’ᨲᩥ ᨧ ᩅᩩᨯ᩠ᨰᩅᩈᩮᨶ ‘‘ᩌᩅᩩᩈᩮᩣ’’ᨲᩥ ᨧ ᨲᨲ᩠ᨳ ᨴᩩᩅᩥᨵᩮᩣ ᩋᨽᩥᩃᩣᨸᩮᩣ, ᩍᨵ ᨸᨶ ᩅᩩᨯ᩠ᨰᨴᩉᩁᩣᨶᩴ ‘‘ᩋᨿ᩠ᨿᩣ’’ᨲᩥ ᩑᨠᨾᩮᩅ.

ᨠᩣᨿᩈᩴᩈᨣ᩠ᨣᩮ ᩅᩩᨲ᩠ᨲᨶᨿᩮᨶᩣᨲᩥ ᩑᨲ᩠ᨳ ᨲᨻ᩠ᨻᩉᩩᩃᨶᨿᩮᨶ ᨠᩥᩁᩥᨿᩈᨾᩩᨭ᩠ᨮᩣᨶᨲᩣ ᩅᩩᨲ᩠ᨲᩣ. ‘‘ᨠᩣᨿᩈᩴᩈᨣ᩠ᨣᩴ ᩈᨾᩣᨸᨩ᩠ᨩᩮᨿ᩠ᨿᩣ’’ᨲᩥ ᩋᩅᨲ᩠ᩅᩣ ᨸᨶ ‘‘ᩈᩣᨴᩥᨿᩮᨿ᩠ᨿᩣ’’ᨲᩥ ᩅᩩᨲ᩠ᨲᨲ᩠ᨲᩣ ᩋᨠᩥᩁᩥᨿᨲᩮᩣᨸᩥ ᩈᨾᩩᨭ᩠ᨮᩣᨲᩦᨲᩥ ᩅᩮᨴᩥᨲᨻ᩠ᨻᩴ. ᨿᨳᩣ ᨧᩮᨲ᩠ᨳ, ᩑᩅᩴ ᩉᩮᨭ᩠ᨮᩣ ‘‘ᨾᨶᩩᩔᩥᨲ᩠ᨳᩥᨿᩣ ᨲᨿᩮᩣ ᨾᨣ᩠ᨣᩮ ᨾᩮᨳᩩᨶᩴ ᨵᨾ᩠ᨾᩴ ᨸᨭᩥᩈᩮᩅᨶ᩠ᨲᩔ ᩌᨸᨲ᩠ᨲᩥ ᨸᩣᩁᩣᨩᩥᨠᩔᩣ’’ᨲᩥᩌᨴᩥᨶᩣ (ᨸᩣᩁᩣ. ᪕᪖) ᨶᨿᩮᨶ ᨠᩥᩁᩥᨿᩈᨾᩩᨭ᩠ᨮᩣᨶᨲᩴ ᩅᨲ᩠ᩅᩣ ᨲᨴᨶᨶ᩠ᨲᩁᩴ ‘‘ᨽᩥᨠ᩠ᨡᩩᨸᨧ᩠ᨧᨲ᩠ᨳᩥᨠᩣ ᨾᨶᩩᩔᩥᨲ᩠ᨳᩥᩴ ᨽᩥᨠ᩠ᨡᩩᩔ ᩈᨶ᩠ᨲᩥᨠᩴ ᩌᨶᩮᨲ᩠ᩅᩣ ᩅᨧ᩠ᨧᨾᨣ᩠ᨣᩮᨶ ᩋᨦ᩠ᨣᨩᩣᨲᩴ ᩋᨽᩥᨶᩥᩈᩦᨴᩮᨶ᩠ᨲᩥ, ᩈᩮᩣ ᨧᩮ ᨸᩅᩮᩈᨶᩴ ᩈᩣᨴᩥᨿᨲᩦ’’ᨲᩥᩌᨴᩥᨶᩣ (ᨸᩣᩁᩣ. ᪕᪘) ᨶᨿᩮᨶ ᩋᨠᩥᩁᩥᨿᩈᨾᩩᨭ᩠ᨮᩣᨶᩔᨸᩥ ᩅᩩᨲ᩠ᨲᨲ᩠ᨲᩣ ᨸᨮᨾᨸᩣᩁᩣᨩᩥᨠᩣᨿᨸᩥ ᨲᨻ᩠ᨻᩉᩩᩃᨶᨿᩮᨶᩮᩅ ᨠᩥᩁᩥᨿᩈᨾᩩᨭ᩠ᨮᩣᨶᨲᩣ ᩅᩮᨴᩥᨲᨻ᩠ᨻᩣ. ᨶ ᩉᩥ ᨸᩅᩮᩈᨶᩈᩣᨴᩥᨿᨶᩣᨴᩥᨾ᩠ᩉᩥ ᨠᩥᩁᩥᨿᩈᨾᩩᨭ᩠ᨮᩣᨶᨲᩣ ᨴᩥᩔᨲᩥ.

ᩋᨦ᩠ᨣᨩᩣᨲᨧᩃᨶᨬ᩠ᨧᩮᨲ᩠ᨳ ᨶ ᩈᩣᩁᨲᩮᩣ ᨴᨭ᩠ᨮᨻ᩠ᨻᩴ ‘‘ᩈᩮᩣ ᨧᩮ ᨸᩅᩮᩈᨶᩴ ᨶ ᩈᩣᨴᩥᨿᨲᩥ, ᨸᩅᩥᨭ᩠ᨮᩴ ᨶ ᩈᩣᨴᩥᨿᨲᩥ, ᨮᩥᨲᩴ ᨶ ᩈᩣᨴᩥᨿᨲᩥ, ᩏᨴ᩠ᨵᩁᨱᩴ ᩈᩣᨴᩥᨿᨲᩥ, ᩌᨸᨲ᩠ᨲᩥ ᨸᩣᩁᩣᨩᩥᨠᩔᩣ’’ᨲᩥ (ᨸᩣᩁᩣ. ᪕᪘) ᩑᨲ᩠ᨳ ᨮᩥᨲᨶᩈᩣᨴᩥᨿᨶᩮ ᨸᨠᨲᩥᨿᩣᨸᩥ ᨸᩁᩥᨸᩩᨱ᩠ᨱᨧᩃᨶᨲ᩠ᨲᩣ. ᩈᩣᨴᩥᨿᨶᨸᨧ᩠ᨧᨿᩣ ᨸᨭᩥᩈᩮᩅᨶᨧᩃᨶᨬ᩠ᨧᩮᨲ᩠ᨳ ᨶ ᨴᩥᩔᨲᩮᩅᩣᨲᩥ ᨲᨻ᩠ᨻᩉᩩᩃᨶᨿᩮᨶᩮᩅ ᨠᩥᩁᩥᨿᩈᨾᩩᨭ᩠ᨮᩣᨶᨲᩣ ᨣᩉᩮᨲᨻ᩠ᨻᩣ.

ᩋᨸᩥᨧ ᨽᩥᨠ᩠ᨡᩩᨶᩥᨿᩣᨸᩥ ᨸᨮᨾᨸᩣᩁᩣᨩᩥᨠᩮ ᨲᩔ ᩈᩣᨴᩥᨿᨶᩔ ᩈᩁᩪᨸᩮᨶ ᩅᩩᨲ᩠ᨲᨲ᩠ᨲᩣ ᨲᨴᨶᩩᩁᩪᨸᩅᩈᩮᨶ ᩅᩥᨽᨦ᩠ᨣᨶᨿᨾᨶᩮᩣᩃᩮᩣᨠᩮᨲ᩠ᩅᩣ ‘‘ᨠᩥᩁᩥᨿᩈᨾᩩᨭ᩠ᨮᩣᨶ’’ᨾᩥᨧ᩠ᨧᩮᩅ ᩅᩩᨲ᩠ᨲᩴ. ᨿᨳᩣ ᨧᩮᨲᩮᩈᩩ ᨲᨻ᩠ᨻᩉᩩᩃᨶᨿᩮᨶ ᨠᩥᩁᩥᨿᩈᨾᩩᨭ᩠ᨮᩣᨶᨲᩣ ᩅᩩᨲ᩠ᨲᩣ, ᨲᨳᩣ ᩈᩩᩁᩣᨴᩦᨶᩴ ᩋᨠᩩᩈᩃᩮᨶᩮᩅ ᨸᩣᨲᨻ᩠ᨻᨲᩣ. ᩍᨲᩁᨳᩣ ‘‘ᨿᩴ ᩋᨠᩩᩈᩃᩮᨶᩮᩅ ᩌᨸᨩ᩠ᨩᨲᩥ, ᩋᨿᩴ ᩃᩮᩣᨠᩅᨩ᩠ᨩᩣ, ᩈᩮᩈᩣ ᨸᨱ᩠ᨱᨲ᩠ᨲᩥᩅᨩ᩠ᨩᩣ’’ᨲᩥ ᩅᩩᨲ᩠ᨲᩮ ᩃᩮᩣᨠᩅᨩ᩠ᨩᨸᨱ᩠ᨱᨲ᩠ᨲᩥᩅᨩ᩠ᨩᩣᨶᩴ ᨶᩥᨿᨾᩃᨠ᩠ᨡᨱᩈᩥᨴ᩠ᨵᩥ ᩉᩮᩣᨲᩥ, ᨲᨳᩣ ᨲᩴ ᩋᩅᨲ᩠ᩅᩣ ‘‘ᨿᩔᩣ ᩈᨧᩥᨲ᩠ᨲᨠᨸᨠ᩠ᨡᩮ ᨧᩥᨲ᩠ᨲᩴ ᩋᨠᩩᩈᩃᨾᩮᩅ ᩉᩮᩣᨲᩥ, ᩋᨿᩴ ᩃᩮᩣᨠᩅᨩ᩠ᨩᩣ, ᩈᩮᩈᩣ ᨸᨱ᩠ᨱᨲ᩠ᨲᩥᩅᨩ᩠ᨩᩣ’’ᨲᩥ (ᨠᨦ᩠ᨡᩣ. ᩋᨭ᩠ᨮ. ᨸᨮᨾᨸᩣᩁᩣᨩᩥᨠᩅᨱ᩠ᨱᨶᩣ) ᩅᩩᨲ᩠ᨲᩮ ᩃᩮᩣᨠᩅᨩ᩠ᨩᩅᨧᨶᩴ ᨶᩥᩁᨲ᩠ᨳᨠᩴ ᩈᩥᨿᩣ ᩅᨲ᩠ᨳᩩᩋᨩᩣᨶᨶᨸᨠ᩠ᨡᩮᨸᩥ ᩋᨠᩩᩈᩃᩮᨶᩮᩅ ᨸᩣᨲᨻ᩠ᨻᨲ᩠ᨲᩣ. ᨿᩈ᩠ᨾᩣ ᨲᨲ᩠ᨳ ᩈᩩᩁᩣᨸᩣᨶᩅᩦᨲᩥᨠ᩠ᨠᨾᩔ ᩋᨠᩩᩈᩃᨧᩥᨲ᩠ᨲᩩᨸ᩠ᨸᩣᨴᩮᩣ ᨶᨲ᩠ᨳᩥ, ᨲᩈ᩠ᨾᩣ ᨡᨶ᩠ᨵᨠᨭ᩠ᨮᨠᨳᩣᨿᩴ ‘‘ᨾᨩ᩠ᨩᨸᩣᨶᩮ ᨸᨶ ᨽᩥᨠ᩠ᨡᩩᨶᩮᩣ ᩋᨩᩣᨶᩥᨲ᩠ᩅᩣᨸᩥ ᨻᩦᨩᨲᩮᩣ ᨸᨭ᩠ᨮᩣᨿ ᨾᨩ᩠ᨩᩴ ᨸᩥᩅᨶ᩠ᨲᩔ ᨸᩣᨧᩥᨲ᩠ᨲᩥᨿᩴ. ᩈᩣᨾᨱᩮᩁᩮᩣ ᨩᩣᨶᩥᨲ᩠ᩅᩣᩅ ᨸᩥᩅᨶ᩠ᨲᩮᩣ ᩈᩦᩃᨽᩮᨴᩴ ᩌᨸᨩ᩠ᨩᨲᩥ, ᨶ ᩋᨩᩣᨶᩥᨲ᩠ᩅᩣ’’ᨲᩥ (ᨾᩉᩣᩅ. ᩋᨭ᩠ᨮ. ᪑᪐᪘) ᩅᩩᨲ᩠ᨲᩴ, ᨶ ᩅᩩᨲ᩠ᨲᩴ ‘‘ᩅᨲ᩠ᨳᩩᩋᨩᩣᨶᨶᨸᨠ᩠ᨡᩮ ᨸᩣᨱᩣᨲᩥᨸᩣᨲᩣᨴᩦᨶᩴ ᩈᩥᨴ᩠ᨵᩥᨠᩁᩋᨠᩩᩈᩃᨧᩥᨲ᩠ᨲᩩᨸ᩠ᨸᩣᨴᩈᨴᩥᩈᩮ ᨧᩥᨲ᩠ᨲᩩᨸ᩠ᨸᩣᨴᩮ ᩈᨲᩥᨸᩥ ᩈᩣᨾᨱᩮᩁᩮᩣ ᩈᩦᩃᨽᩮᨴᩴ ᨶᩣᨸᨩ᩠ᨩᨲᩦ’’ᨲᩥ. ᩋᨽᩥᨶᩥᩅᩮᩈᩅᨧᨶᩴ ᨸᩣᨱᩣᨲᩥᨸᩣᨲᩣᨴᩦᩉᩥ ᩈᨾᩣᨶᨣᨲᩥᨠᨲ᩠ᨲᩣ ᩈᩣᨾᨱᩮᩁᩣᨶᩴ ᩈᩩᩁᩣᨸᩣᨶᩔ. ‘‘ᩈᩩᩁᩣᨾᩮᩁᨿᩥᨾᩮ’’ᨲᩥ ᩅᨲ᩠ᨳᩩᩴ ᨩᩣᨶᩥᨲ᩠ᩅᩣ ᨸᩣᨲᨻ᩠ᨻᨲᩣᨴᩥᩅᩈᩮᨶ ᩅᩦᨲᩥᨠ᩠ᨠᨾᨶ᩠ᨲᩔ ᩋᨠᩩᩈᩃᩔ ᩋᩈᨾ᩠ᨽᩅᩮᩣ ᨶᨲ᩠ᨳᩥ. ᨲᩮᨶ ᩅᩩᨲ᩠ᨲᩴ ‘‘ᨿᩔᩣ ᩈᨧᩥᨲ᩠ᨲᨠᨸᨠ᩠ᨡᩮ’’ᨲᩥᩌᨴᩥ.

ᨠᩥᨬ᩠ᨧᩮᨲ᩠ᨳ – ᨿᩩᨲ᩠ᨲᩥᩅᨧᨶᩮᨶ ᩋᩁᩉᨶ᩠ᨲᩣᨶᩴ ᩋᨸ᩠ᨸᩅᩥᩈᨶᨲᩮᩣ ᩈᨧᩥᨲ᩠ᨲᨠᩣᨧᩥᨲ᩠ᨲᨠᨸᨠ᩠ᨡᩮᩈᩩ ᩋᨠᩩᩈᩃᨶᩥᨿᨾᩮᩣᨲᩥ ᨧᩮ? ᨶ, ᨵᨾ᩠ᨾᨲᩣᩅᩈᩮᨶ ᩈᩮᨠ᩠ᨡᩣᨶᨾ᩠ᨸᩥ ᩋᨸ᩠ᨸᩅᩥᩈᨶᨲᩮᩣ. ᩋᨧᩥᨲ᩠ᨲᨠᨸᨠ᩠ᨡᩮ ᩋᨠᩩᩈᩃᨶᩥᨿᨾᩣᨽᩣᩅᨴᩔᨶᨲ᩠ᨳᩴ ᩈᩩᨸᨶ᩠ᨲᩔ ᨾᩩᨡᩮ ᨸᨠ᩠ᨡᩥᨲ᩠ᨲᨩᩃᨻᩥᨶ᩠ᨴᩩᨾᩥᩅ ᩈᩩᩁᩣᨻᩥᨶ᩠ᨴᩩᩌᨴᨿᩮᩣ ᩏᨴᩣᩉᩁᩥᨲᨻ᩠ᨻᩣ. ᨲᨻ᩠ᨻᩉᩩᩃᨶᨿᩮᨶ ᩉᩥ ᩋᨲ᩠ᨳᩮ ᨣᩉᩥᨲᩮ ᨸᩩᨻ᩠ᨻᩮᨶᩣᨸᩁᩴ ᩋᨭ᩠ᨮᨠᨳᩣᨿ ᩈᨾᩮᨲᩥ ᩈᨴ᩠ᨵᩥᩴ ᨸᩣᩊᩥᨿᩣ ᨧᩣᨲᩥ. ᩌᨧᩁᩥᨿᩣᨸᩥ ᩈᩩᩁᩣᨸᩣᨶᩮ ᩋᨠᩩᩈᩃᨶᩥᨿᨾᩣᨽᩣᩅᨾᩮᩅ ᩅᨴᨶ᩠ᨲᩥ. ᩑᨠᨧ᩠ᨧᩮ ᨸᨶ ᨠᩥᩁᩥᨿᩈᨾᩩᨭ᩠ᨮᩣᨶᨲᩣ ᨸᨶᩔ ᨲᨻ᩠ᨻᩉᩩᩃᨶᨿᨾᩮᩅ, ᨶ ᨸᨮᨾᨸᩣᩁᩣᨩᩥᨠᩮ. ᨠᨳᩴ? ᨠᩣᨿᩈᩴᩈᨣ᩠ᨣᩈᩥᨠ᩠ᨡᩣᨸᨴᩴ ᨸᨮᨾᨸᩣᩁᩣᨩᩥᨠᩈᨾᩩᨭ᩠ᨮᩣᨶᩴ. ᩑᨲ᩠ᨳ ᨽᩥᨠ᩠ᨡᩩᩔ ᨧ ᨽᩥᨠ᩠ᨡᩩᨶᩥᨿᩣ ᨧ ᨠᩣᨿᩈᩴᩈᨣ᩠ᨣᨽᩣᩅᩮ ᩈᨲᩥ ᨽᩥᨠ᩠ᨡᩩᨶᩦ ᨠᩣᨿᨦ᩠ᨣᩴ ᩋᨧᩮᩣᨸᨿᨾᩣᨶᩣᨸᩥ ᨧᩥᨲ᩠ᨲᩮᨶᩮᩅ ᩋᨵᩥᩅᩣᩈᩮᨲᩥ, ᩌᨸᨩ᩠ᨩᨲᩥ, ᨶ ᩑᩅᩴ ᨽᩥᨠ᩠ᨡᩩ. ᨽᩥᨠ᩠ᨡᩩ ᨸᨶ ᨧᩮᩣᨸᨿᨾᩣᨶᩮᩣᩅ ᩌᨸᨩ᩠ᨩᨲᩥ, ᩑᩅᨾᩮᩅ ᨸᨮᨾᨸᩣᩁᩣᨩᩥᨠᩮᨸᩥ ᨧᩮᩣᨸᨶᩮ ᩈᨲᩥ ᩑᩅ ᩌᨸᨩ᩠ᨩᨲᩥ, ᨶᩣᩈᨲᩥ. ᨸᩅᩮᩈᨶᩴ ᩈᩣᨴᩥᨿᨲᩦᨲᩥ ᩑᨲ᩠ᨳ ᨸᩅᩮᩈᨶᩈᩣᨴᩥᨿᨶᩴ ᨶᩣᨾ ᩈᩮᩅᨶᨧᩥᨲ᩠ᨲᩩᨸ᩠ᨸᩣᨴᨶᩴ, ᨾᨣ᩠ᨣᩮᨶ ᩅᩣ ᨾᨣ᩠ᨣᨸ᩠ᨸᨭᩥᨸᨶ᩠ᨶᨾ᩠ᨸᩥ ᩍᨧ᩠ᨨᨶ᩠ᨲᩥ. ᨲᩔᩣᨸᩥ ᨠᩣᨿᨧᩃᨶᩴ ᩑᨠᨶ᩠ᨲᩴ ᩋᨲ᩠ᨳᩥ ᩑᩅ. ᩑᩅᩴ ᩈᨶ᩠ᨲᩮᨸᩥ ᩅᩦᨾᩴᩈᩥᨲ᩠ᩅᩣ ᨣᩉᩮᨲᨻ᩠ᨻᨶ᩠ᨲᩥ ᩅᨴᨶ᩠ᨲᩦᨲᩥ ᩃᩥᨡᩥᨲᩴ

ᨸᩣᩁᩣᨩᩥᨠᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᩈᨦ᩠ᨥᩣᨴᩥᩈᩮᩈᨠᨱ᩠ᨯᩴ

᪑. ᩏᩔᨿᩅᩣᨴᩥᨠᩣᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨽᩥᨠ᩠ᨡᩩᨶᩦᨶᩴ ᩈᨦ᩠ᨥᩣᨴᩥᩈᩮᩈᩴ ᨸᨲ᩠ᩅᩣ ᩅᩩᨭ᩠ᨮᩣᨶᩅᩥᨵᨿᩮᩣ ᩈᨶ᩠ᨴᩔᨶᨲ᩠ᨳᩴ ‘‘ᩋᨿᩴ ᨽᩥᨠ᩠ᨡᩩᨶᩦ…ᨸᩮ… ᩌᨸᨶ᩠ᨶᩣ’’ᨲᩥ ᨸᩩᨣ᩠ᨣᩃᨶᩥᨿᨾᩴ ᨠᨲ᩠ᩅᩣ ᨸᩣᩁᩣᨩᩥᨠᨲᩮᩣ ᩋᨵᩥᨸ᩠ᨸᩣᨿᨶ᩠ᨲᩥ ‘‘ᨶᩥᩔᩣᩁᨱᩦᨿᩴ ᩈᨦ᩠ᨥᩣᨴᩥᩈᩮᩈ’’ᨶ᩠ᨲᩥ ᩌᨸᨲ᩠ᨲᩥᨶᩣᨾᨣ᩠ᨣᩉᨱᨬ᩠ᨧ ᨠᨲᩴ. ‘‘ᩈᨾᩩᨭ᩠ᨮᩣᨶᩣᨴᩦᨶᩥ ᨸᨮᨾᨠᨳᩥᨶᩈᨴᩥᩈᩣᨶᩥ, ᩍᨴᩴ ᨸᨶ ᨠᩥᩁᩥᨿᨾᩮᩅᩣ’’ᨲᩥ ᨸᩣᨮᩮᩣ.

ᩏᩔᨿᩅᩣᨴᩥᨠᩣᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪒. ᨧᩮᩣᩁᩥᩅᩩᨭ᩠ᨮᩣᨸᩥᨠᩣᩈᩥᨠ᩠ᨡᩣᨸᨴᩅᨱ᩠ᨱᨶᩣ

ᨠᨲ᩠ᨳᨧᩥ ᩋᨣᨶ᩠ᨲ᩠ᩅᩣ ᨶᩥᩈᩥᨶ᩠ᨶᨭ᩠ᨮᩣᨶᩮ ᩑᩅ ᨶᩥᩈᩦᨴᩥᨲ᩠ᩅᩣ ᨠᩁᩮᩣᨶ᩠ᨲᩥᨿᩣ ᩅᩣᨧᩣᨧᩥᨲ᩠ᨲᨲᩮᩣ, ᨡᨱ᩠ᨯᩈᩦᨾᩣᨴᩥᨣᨲᩣᨿ ᨠᩣᨿᩅᩣᨧᩣᨧᩥᨲ᩠ᨲᨲᩮᩣ.

ᨧᩮᩣᩁᩥᩅᩩᨭ᩠ᨮᩣᨸᩥᨠᩣᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪓. ᩑᨠᨣᩣᨾᨶ᩠ᨲᩁᨣᨾᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ

‘‘ᩌᨽᩮᩣᨣᩴ ᩅᩥᨶᩣ’’ᨲᩥ ᩅᩩᨲ᩠ᨲᨲ᩠ᨲᩣ ᩌᨽᩮᩣᨣᩮ ᩈᨲᩥ ᩋᨶᩣᨸᨲ᩠ᨲᩥ, ᩍᨾᩈ᩠ᨾᩥᩴ ᨸᨶ ᩈᩥᨠ᩠ᨡᩣᨸᨴᩮ ᩈᨾᨶ᩠ᨲᨸᩣᩈᩣᨴᩥᨠᩣᨿᩴ ᩏᨸᨧᩣᩁᩣᨲᩥᨠ᩠ᨠᨾᩮ ᩌᨸᨲ᩠ᨲᩥ ᩅᩩᨲ᩠ᨲᩣ, ᩍᨵ ᩒᨠ᩠ᨠᨾᩮ. ᨴ᩠ᩅᩦᩈᩩᨸᩥ ᩅᩩᨲ᩠ᨲᩴ ᩋᨲ᩠ᨳᨲᩮᩣ ᩑᨠᨾᩮᩅ ᨣᩣᨾᨶ᩠ᨲᩁᨣᨾᨶᩈᨦ᩠ᨥᩣᨴᩥᩈᩮᩈᩴ ᩏᨸᨧᩣᩁᩔ ᩈᨶ᩠ᨵᩣᨿ ᩅᩩᨲ᩠ᨲᨲ᩠ᨲᩣ. ᨣᨱᨾ᩠ᩉᩣ ᩒᩉᩦᨿᨶᩔ ᩅᩥᩁᩮᩣᨵᩮᩣ. ‘‘ᩋᩁᨬ᩠ᨬᩮ’’ᨲᩥ ᩍᨴᩴ ᩋᨲ᩠ᨳᩅᩈᩮᨶ ᩅᩩᨲ᩠ᨲᩴ, ᨣᩣᨾᨶ᩠ᨲᩁᩮᨸᩥ ᩉᩮᩣᨲᩥ ᩑᩅ.

ᩈᩥᨠ᩠ᨡᩣᨸᨴᩣ ᨻᩩᨴ᩠ᨵᩅᩁᩮᨶ ᩅᨱ᩠ᨱᩥᨲᩣᨲᩥ ᨣᩣᨳᩣᨿ ᩅᩈᩮᨶ, ᩋᨭ᩠ᨮᨠᨳᩣᨿᨾ᩠ᨸᩥ ᨣᩣᨾᨶ᩠ᨲᩁᨸᩁᩥᨿᩣᨸᨶ᩠ᨶᩴ ᨶᨴᩥᨸᩣᩁᨶ᩠ᨲᩥ ᩅᩩᨲ᩠ᨲᩴ.

ᩑᨠᨣᩣᨾᨶ᩠ᨲᩁᨣᨾᨶᩈᩥᨠ᩠ᨡᩣᨸᨴᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

‘‘ᨨᩣᨴᨶᨸᨧ᩠ᨧᨿᩣ ᨸᨶ ᨴᩩᨠ᩠ᨠᨭᩴ ᩌᨸᨩ᩠ᨩᨲᩦ’’ᨲᩥ ᩍᨴᩴ –

‘‘ᩌᨸᨩ᩠ᨩᨲᩥ ᨣᩁᩩᨠᩴ ᩈᩣᩅᩈᩮᩈᩴ;

ᨨᩣᨴᩮᨲᩥ ᩋᨶᩣᨴᩁᩥᨿᩴ ᨸᨭᩥᨧ᩠ᨧ;

ᨶ ᨽᩥᨠ᩠ᨡᩩᨶᩦ ᨶᩮᩣ ᨧ ᨹᩩᩈᩮᨿ᩠ᨿ ᩅᨩ᩠ᨩᩴ;

ᨸᨬ᩠ᩉᩣᨾᩮᩈᩣ ᨠᩩᩈᩃᩮᩉᩥ ᨧᩥᨶ᩠ᨲᩥᨲᩣ’’ᨲᩥ. (ᨸᩁᩥ. ᪔᪘᪑) –

ᩍᨾᩣᨿ ᩅᩥᩁᩩᨩ᩠ᨫᨲᩥ. ᨲᩈ᩠ᨾᩣ ᨸᨾᩣᨴᩃᩮᨡᩣ ᩅᩥᨿ ᨴᩥᩔᨲᩦᨲᩥ ᨣᩅᩮᩈᩥᨲᨻ᩠ᨻᩮᩣ ᩑᨲ᩠ᨳ ᩋᨲ᩠ᨳᩮᩣ. ᨽᩥᨠ᩠ᨡᩪᨶᩴ ᨾᩣᨶᨲ᩠ᨲᨠᨳᩣᨿᩴ ‘‘ᨸᩁᩥᨠ᩠ᨡᩥᨲ᩠ᨲᩔ ᩅᩥᩉᩣᩁᩔ ᨸᩁᩥᨠ᩠ᨡᩮᨸᨲᩮᩣ, ᩋᨸᩁᩥᨠ᩠ᨡᩥᨲ᩠ᨲᩔ ᨸᩁᩥᨠ᩠ᨡᩮᨸᩣᩁᩉᨭ᩠ᨮᩣᨶᨲᩮᩣ ᨴ᩠ᩅᩮ ᩃᩮᨯ᩠ᨯᩩᨸᩣᨲᩮ ᩋᨲᩥᨠ᩠ᨠᨾᩥᨲ᩠ᩅᩣ’’ᨲᩥ (ᨠᨦ᩠ᨡᩣ. ᩋᨭ᩠ᨮ. ᨶᩥᨣᨾᨶᩅᨱ᩠ᨱᨶᩣ) ᩅᩩᨲ᩠ᨲᩴ, ᩍᨵ ᨸᨶ ‘‘ᨣᩣᨾᩪᨸᨧᩣᩁᨲᩮᩣ ᨧ ᨽᩥᨠ᩠ᨡᩪᨶᩴ ᩅᩥᩉᩣᩁᩪᨸᨧᩣᩁᨲᩮᩣ ᨧ ᨴ᩠ᩅᩮ ᩃᩮᨯ᩠ᨯᩩᨸᩣᨲᩮ’’ᨲᩥᩌᨴᩥ ᩅᩩᨲ᩠ᨲᩴ. ᨲᨲᩕ ᨽᩥᨠ᩠ᨡᩪᨶᩴ ᩅᩩᨲ᩠ᨲᨸ᩠ᨸᨠᩣᩁᨸ᩠ᨸᨴᩮᩈᩴ ᩋᨲᩥᨠ᩠ᨠᨾᩥᨲ᩠ᩅᩣ ᨣᩣᨾᩮᨸᩥ ᨲᩴ ᨠᨾ᩠ᨾᩴ ᨠᩣᨲᩩᩴ ᩅᨭ᩠ᨭᨲᩥ, ᨽᩥᨠ᩠ᨡᩩᨶᩦᨶᩴ ᨸᨶ ᨣᩣᨾᩮ ᨶ ᩅᨭ᩠ᨭᨲᩥ. ᨲᩈ᩠ᨾᩣ ᩑᩅᩴ ᩅᩩᨲ᩠ᨲᨶ᩠ᨲᩥ ᩑᨠᩮ. ᩋᨸᩁᩮ ᨸᨶ ᨽᩥᨠ᩠ᨡᩪᨶᨾ᩠ᨸᩥ ᨣᩣᨾᩮ ᨶ ᩅᨭ᩠ᨭᨲᩥ. ᨽᩥᨠ᩠ᨡᩩᩅᩥᩉᩣᩁᩮᩣ ᨶᩣᨾ ᨸᩩᨻ᩠ᨻᩮ ᩑᩅ ᨣᩣᨾᩪᨸᨧᩣᩁᩴ ᩋᨲᩥᨠ᩠ᨠᨾᩥᨲ᩠ᩅᩣ ᨮᩥᨲᩮᩣ, ᨲᩈ᩠ᨾᩣ ᨣᩣᨾᩴ ᩋᩅᨲ᩠ᩅᩣ ᩅᩥᩉᩣᩁᩪᨸᨧᩣᩁᨾᩮᩅ ᩉᩮᨭ᩠ᨮᩣ ᩅᩩᨲ᩠ᨲᩴ. ᨽᩥᨠ᩠ᨡᩩᨶᩦᨶᩴ ᩅᩥᩉᩣᩁᩮᩣ ᨣᩣᨾᩮ ᩑᩅ ᩅᨭ᩠ᨭᨲᩥ, ᨶ ᨻᩉᩥ, ᨲᩈ᩠ᨾᩣ ᨣᩣᨾᩪᨸᨧᩣᩁᨬ᩠ᨧ ᩅᩥᩉᩣᩁᩪᨸᨧᩣᩁᨬ᩠ᨧ ᩏᨽᨿᨾᩮᩅᩮᨲ᩠ᨳ ᨴᩔᩥᨲᩴ. ᨲᩈ᩠ᨾᩣ ᩏᨽᨿᨲ᩠ᨳᩣᨸᩥ ᩋᨲ᩠ᨳᨲᩮᩣ ᨶᩣᨶᩣᨲ᩠ᨲᩴ ᨶᨲ᩠ᨳᩦᨲᩥ ᩅᨴᨶ᩠ᨲᩥ. ᨿᩴ ᨿᩩᨩ᩠ᨩᨲᩥ, ᨲᩴ ᨣᩉᩮᨲᨻ᩠ᨻᩴ.

ᩈᨦ᩠ᨥᩣᨴᩥᩈᩮᩈᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨶᩥᩔᨣ᩠ᨣᩥᨿᨠᨱ᩠ᨯᩴ

ᨴᩩᨲᩥᨿᩮ ᩍᨵ ᨽᩣᨩᩣᨸᩥᨲᩣᨿ ᩃᨴ᩠ᨵᨧᩦᩅᩁᩴ ᨶᩥᩔᨣ᩠ᨣᩥᨿᩴ ᩉᩮᩣᨲᩥ, ᨲᩴ ᩅᩥᨶᨿᨠᨾ᩠ᨾᩴ ᨠᨲ᩠ᩅᩣᨸᩥ ᩋᨲ᩠ᨲᨶᩣ ᨶ ᩃᨻ᩠ᨽᨲᩥ.

ᨲᨲᩥᨿᩮ ‘‘ᩈᨾᩩᨭ᩠ᨮᩣᨶᩣᨴᩦᨶᩥ ᩋᨴᩥᨶ᩠ᨶᩣᨴᩣᨶᩈᨴᩥᩈᩣᨶᩥ, ᩍᨴᩴ ᨸᨶ ᨴᩩᨠ᩠ᨡᩅᩮᨴᨶ’’ᨶ᩠ᨲᩥ ᨸᩣᨮᩮᩣ.

ᨧᨲᩩᨲ᩠ᨳᩮ ᨸᨮᨾᩴ ᩅᩥᨬ᩠ᨬᨲ᩠ᨲᩴ ᩋᩃᨽᩥᨲ᩠ᩅᩣ ᩋᨬ᩠ᨬᩴ ᨲᨲᩮᩣ ᩐᨶᨲᩁᨾ᩠ᨸᩥ ᩃᨽᩮᨿ᩠ᨿ, ᨶᩥᩔᨣ᩠ᨣᩥᨿᨾᩮᩅ ᩋᨦ᩠ᨣᩈᨾ᩠ᨸᨲ᩠ᨲᩥᨲᩮᩣ.

ᨶᩥᩔᨣ᩠ᨣᩥᨿᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨸᩣᨧᩥᨲ᩠ᨲᩥᨿᨠᨱ᩠ᨯᩴ

᪑. ᨸᨮᨾᩅᨣ᩠ᨣᩅᨱ᩠ᨱᨶᩣ

ᨸᨮᨾᩮ ᩉᩁᩥᨲᨸᨲ᩠ᨲᩅᨱ᩠ᨱᩮᩣ ᩉᩁᩥᨲᨠᩮᩣ. ᨧᩣᨸᩃᩈᩩᨱᩴ ᩋᨾᩥᨬ᩠ᨩᨠᩮᩣ. ᩋᨦ᩠ᨠᩩᩁᨾᨲ᩠ᨲᨾᩮᩅ ᩉᩥ ᨲᩔ ᩉᩮᩣᨲᩥ. ᨸᩃᨱ᩠ᨯᩩᨠᩣᨴᨿᩮᩣ ᩈᨽᩣᩅᩮᨶᩮᩅ ᩅᨭ᩠ᨭᨶ᩠ᨲᩥ. ᩈᩪᨸᩈᨾ᩠ᨸᩣᨠᩣᨴᩦ ᩅᩥᨶᩣᨸᩥ ᩋᨶ᩠ᨲᨾᩈᩮᩣ ᨿᩣᨣᩩᨽᨲ᩠ᨲᩮᨸᩥ ᨸᨠ᩠ᨡᩥᨸᩥᨲᩩᩴ ᩅᨭ᩠ᨭᨲᩦᨲᩥ ᩃᩥᨡᩥᨲᩴ, ‘‘ᨽᩥᨠ᩠ᨡᩩᨶᩥᨿᩣᨸᩥ ᨣᩥᩃᩣᨶᩣᨿ ᨸᩩᩁᩮᨽᨲ᩠ᨲᨾᩮᩅ ᩃᩈᩩᨱᩴ ᨠᨸ᩠ᨸᨲᩥ, ᨶ ᩋᨣᩥᩃᩣᨶᩣᨿᩣ’’ᨲᩥ ᩋᨽᨿᨣᩥᩁᩦᨶᩴ ᩏᨣ᩠ᨣᩉᩮᩣᨲᩥ.

ᨴᩩᨲᩥᨿᩮ ᩌᨻᩣᨵᨸᨧ᩠ᨧᨿᩣ ᨽᩥᨠ᩠ᨡᩩᨶᩥᩈᨦ᩠ᨥᩴ ᩌᨸᩩᨧ᩠ᨨᩥᨲ᩠ᩅᩣ ᩈᩴᩉᩁᩣᨸᩮᨲᩩᩴ ᩅᨭ᩠ᨭᨲᩥ, ᨽᩥᨠ᩠ᨡᩩᩔ ᩑᨲ᩠ᨳ ᨧ ᩃᩈᩩᨱᩮ ᨧ ᨴᩩᨠ᩠ᨠᨭᩴ.

ᩈᨲ᩠ᨲᨾᩮ ‘‘ᩈᨾᩩᨭ᩠ᨮᩣᨶᩣᨴᩦᨶᩥ ᩋᨴ᩠ᨵᩣᨶᨾᨣ᩠ᨣᩈᩥᨠ᩠ᨡᩣᨸᨴᩈᨴᩥᩈᩣᨶᩦ’’ᨲᩥ ᨸᩣᨮᩮᩣ.

ᨶᩅᨾᩮ ᨠᩩᨭ᩠ᨭᩮᩣ ᨶᩣᨾ ᨥᩁᨠᩩᨭ᩠ᨭᩮᩣ. ᨸᩣᨠᩣᩁᩮᩣ ᨶᩣᨾ ᨸᩁᩥᨠ᩠ᨡᩮᨸᨸᩣᨠᩣᩁᩮᩣ.

ᨨᨯ᩠ᨯᩥᨲᨡᩮᨲ᩠ᨲᩮᨲᩥ ᨸᩩᩁᩣᨱᨡᩮᨲ᩠ᨲᩮ. ᩈᨦ᩠ᨥᩈᨶ᩠ᨲᨠᩮ ᨽᩥᨠ᩠ᨡᩩᩔ ᨨᨯ᩠ᨯᩮᨲᩩᩴ ᩅᨭ᩠ᨭᨲᩥ ᩈᨦ᩠ᨥᨸᩁᩥᨿᩣᨸᨶ᩠ᨶᨲ᩠ᨲᩣ. ᨽᩥᨠ᩠ᨡᩩᨶᩦᨶᨾ᩠ᨸᩥ ᩈᨦ᩠ᨥᩈᨶ᩠ᨲᨠᩮ ᨽᩥᨠ᩠ᨡᩩᩈᨦ᩠ᨥᩈᨶ᩠ᨲᨠᩮ ᩅᩩᨲ᩠ᨲᨶᨿᩮᨶᩮᩅ ᩅᨭ᩠ᨭᨲᩥ. ᩑᩅᩴ ᩈᨶ᩠ᨲᩮᨸᩥ ᩈᩣᩁᩩᨸ᩠ᨸᩅᩈᩮᨶ ᨠᩣᨲᨻ᩠ᨻᨶ᩠ᨲᩥ ᩃᩥᨡᩥᨲᩴ.

ᨴᩈᨾᩮ ‘‘ᩈᨿᩴ ᨲᩣᨶᩥ ᩅᨲ᩠ᨳᩪᨶᩥ ᨠᩁᩮᩣᨶ᩠ᨲᩥᨿᩣ’’ᨲᩥᩌᨴᩥ ᩍᨵ ᩈᩥᨠ᩠ᨡᩣᨸᨴᩮ ᨶᨲ᩠ᨳᩥ. ᨠᩈ᩠ᨾᩣ? ᩑᩊᨠᩃᩮᩣᨾᩈᨾᩩᨭ᩠ᨮᩣᨶᨲ᩠ᨲᩣ. ᨿᨴᩥ ᩑᩅᩴ ᨠᩈ᩠ᨾᩣ ᩅᩩᨲ᩠ᨲᨶ᩠ᨲᩥ ᨧᩮ? ᩈᩩᨲ᩠ᨲᩣᨶᩩᩃᩮᩣᨾᨾᩉᩣᨸᨴᩮᩈᨲᩮᩣ. ᨿᨴᩥ ᨶᨧ᩠ᨧᩣᨴᩦᨶᩥ ᨸᩔᩥᨲᩩᩴ ᩅᩣ ᩈᩩᨱᩥᨲᩩᩴ ᩅᩣ ᨶ ᩃᨽᨲᩥ, ᨸᨣᩮᩅ ᩋᨲ᩠ᨲᨶᩣ ᨠᩣᨲᩩᨶ᩠ᨲᩥ ᨶᨿᨲᩮᩣ ᩃᨻ᩠ᨽᨾᩣᨶᨲ᩠ᨲᩣ ᩅᩩᨲ᩠ᨲᩴ. ᩍᨲᩁᨳᩣ ᨾᩉᩣᨸᨴᩮᩈᩣ ᨶᩥᩁᨲ᩠ᨳᨠᩣ ᩈᩥᨿᩩᩴ. ‘‘ᩑᩅᩴ ᩋᨬ᩠ᨬᨲ᩠ᨳᨸᩥ ᨶᨿᩮᩣ ᨶᩮᨲᨻ᩠ᨻᩮᩣ. ᩈᨾᩩᨭ᩠ᨮᩣᨶᨾ᩠ᨸᩥ ᩍᨵ ᩅᩩᨲ᩠ᨲᨾᩮᩅ ᩋᨣ᩠ᨣᩉᩮᨲ᩠ᩅᩣ ᨨᩈᨾᩩᨭ᩠ᨮᩣᨶᩅᩈᩮᨶ ᨣᩉᩮᨲᨻ᩠ᨻ’’ᨶ᩠ᨲᩥ ᩌᨧᩁᩥᨿᩣ. ᩍᨵ ᩅᩩᨲ᩠ᨲᩴ ᩈᨾᩩᨭ᩠ᨮᩣᨶᩴ ᨶᩣᨾ ᨾᩪᩃᨽᩪᨲᩔ ᩋᨶ᩠ᨲᩁᩣ ᩅᩩᨲ᩠ᨲᩣᨸᨲ᩠ᨲᩥᨿᩣ, ᨲᩈ᩠ᨾᩣ ᩑᩊᨠᩃᩮᩣᨾᩈᨾᩩᨭ᩠ᨮᩣᨶᨾᩮᩅᩣᨲᩥ ᩋᨸᩁᩮ. ᩌᩁᩣᨾᩮ ᨮᨲ᩠ᩅᩣᨲᩥ ᨶ ᨠᩮᩅᩃᩴ ᨮᨲ᩠ᩅᩣ, ᨲᨲᩮᩣ ᨣᨶ᩠ᨲ᩠ᩅᩣ ᨸᨶ ᩈᨻ᩠ᨻᩥᩁᩥᨿᩣᨸᨳᩮᩉᩥᨸᩥ ᩃᨽᨲᩥ. ᩌᩁᩣᨾᩮ ᨮᩥᨲᩣᨲᩥ ᨸᨶ ᩌᩁᩣᨾᨸᩁᩥᨿᩣᨸᨶ᩠ᨶᩣᨲᩥ ᩋᨲ᩠ᨳᩮᩣ. ᩍᨲᩁᨳᩣ ᨶᩥᩈᩥᨶ᩠ᨶᩣᨸᩥ ᨶ ᩃᨽᩮᨿ᩠ᨿᩣᨲᩥ.

ᨸᨮᨾᩅᨣ᩠ᨣᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪒. ᨴᩩᨲᩥᨿᩅᨣ᩠ᨣᩅᨱ᩠ᨱᨶᩣ

ᨸᨬ᩠ᨧᨾᩮ ᩏᨸᨧᩣᩁᩮᩣ ᨴ᩠ᩅᩣᨴᩈᩉᨲ᩠ᨳᩮᩣ. ‘‘ᩈᨾᩩᨭ᩠ᨮᩣᨶᩣᨴᩦᨶᩥ ᨠᨳᩥᨶᩈᨴᩥᩈᩣᨶᩥ, ᩍᨴᩴ ᨸᨶ ᨠᩥᩁᩥᨿᩣᨠᩥᩁᩥᨿ’’ᨶ᩠ᨲᩥ ᨸᩣᨮᩮᩣ.

ᩈᨲ᩠ᨲᨾᩮ ᨵᩩᩅᨸᨬ᩠ᨬᨲ᩠ᨲᩮᨲᩥ ᨽᩥᨠ᩠ᨡᩩᨶᩦᨶᩴ ᩋᨲ᩠ᨳᩣᨿ. ᨠᩩᩃᩣᨶᩦᨲᩥ ᨠᩩᩃᨥᩁᩣᨶᩥ.

ᨴᩩᨲᩥᨿᩅᨣ᩠ᨣᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪓. ᨲᨲᩥᨿᩅᨣ᩠ᨣᩅᨱ᩠ᨱᨶᩣ

ᨧᨲᩩᨲ᩠ᨳᩮ ᩈᨦ᩠ᨥᩣᨭᩥᩌᨴᩥᩅᩈᩮᨶ ᩋᨵᩥᨭ᩠ᨮᩥᨲᩣᨶᩴ ᩈᨦ᩠ᨥᩣᨭᩥᨧᩣᩁᩴ.

ᨸᨬ᩠ᨧᨾᩮ ‘‘ᩍᨴᩴ ᨸᨶ ᨠᩥᩁᩥᨿᩣᨠᩥᩁᩥᨿ’’ᨶ᩠ᨲᩥ ᨸᩣᨮᩮᩣ.

ᨨᨭ᩠ᨮᩮ ᩋᨬ᩠ᨬᩈ᩠ᨾᩥᩴ ᨸᩁᩥᨠ᩠ᨡᩣᩁᩮ ᨴᩩᨠ᩠ᨠᨭᨶ᩠ᨲᩥ ᨳᩣᩃᨠᩣᨴᩦᨶᩴ ᩅᩣ ᩈᨸ᩠ᨸᩥᨲᩮᩃᩣᨴᩦᨶᩴ ᩅᩣ ᩋᨬ᩠ᨬᨲᩁᩈ᩠ᨾᩥᩴ.

ᨲᨲᩥᨿᩅᨣ᩠ᨣᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪔. ᨧᨲᩩᨲ᩠ᨳᩅᨣ᩠ᨣᩅᨱ᩠ᨱᨶᩣ

ᨨᨭ᩠ᨮᩮ ᩈᩴᩈᨭ᩠ᨮᩅᩥᩉᩣᩁᩈᩥᨠ᩠ᨡᩣᨸᨴᩮ ‘‘ᩈᩮᩈᨾᩮᨲ᩠ᨳ ᨸᨮᨾᩋᩁᩥᨭ᩠ᨮᩈᩥᨠ᩠ᨡᩣᨸᨴᩮ ᩅᩩᨲ᩠ᨲᩅᩥᨶᩥᨧ᩠ᨨᨿᩈᨴᩥᩈᨾᩮᩅᩣ’’ᨲᩥ ᨸᩣᨮᩮᩣ.

ᨧᨲᩩᨲ᩠ᨳᩅᨣ᩠ᨣᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪕. ᨸᨬ᩠ᨧᨾᩅᨣ᩠ᨣᩅᨱ᩠ᨱᨶᩣ

‘‘ᨧᩥᨲ᩠ᨲᩣᨣᩣᩁᩴ ᨶᩣᨾ ᨿᨲ᩠ᨳ ᨠᨲ᩠ᨳᨧᩥ ᨾᨶᩩᩔᩣᨶᩴ ᨠᩦᩊᩥᨲᩩᩴ ᩁᨾᩥᨲᩩᩴ ᨠᨲᩴ ᩉᩮᩣᨲᩦ’’ᨲᩥᩌᨴᩥᨶᩣ (ᨸᩣᨧᩥ. ᪙᪗᪙) ᨸᩣᩊᩥᨿᩴ ᩅᩩᨲ᩠ᨲᨲ᩠ᨲᩣ ᨧᩥᨲ᩠ᨲᩣᨣᩣᩁᩣᨴᩦᨶᩥ ᩈᨻ᩠ᨻᩮᩈᩴ ᩋᨲ᩠ᨳᩣᨿ ᨠᨲᩣᨶᩥ, ᨶ ᩁᨬ᩠ᨬᩮᩣ ᩑᩅ.

ᩈᨲ᩠ᨲᨾᩮ ᩑᨲᩮᨶ ᨶᩥᩔᨩ᩠ᨩᩥᨲᩩᩴ ᨠᨸ᩠ᨸᩥᨿᩴ ᩅᩩᨲ᩠ᨲᩴ. ‘‘ᨶᩥᩔᨩ᩠ᨩᩥᨲ᩠ᩅᩣ ᨸᩁᩥᨽᩩᨬ᩠ᨩᨲᩦ’’ᨲᩥ (ᨸᩣᨧᩥ. ᪑᪐᪐᪗) ᨸᩣᩊᩥ ᨧ ᩋᨲ᩠ᨳᩥ. ‘‘ᩈᨾᩩᨭ᩠ᨮᩣᨶᩣᨴᩦᨶᩥ ᨠᨳᩥᨶᩈᨴᩥᩈᩣᨶᩥ, ᩍᨴᩴ ᨸᨶ ᨠᩥᩁᩥᨿᩣᨠᩥᩁᩥᨿ’’ᨶ᩠ᨲᩥ ᨸᩣᨮᩮᩣ. ᩋᨭ᩠ᨮᨾᩮᨸᩥ ᩑᩈᩮᩣᩅ ᨸᩣᨮᩮᩣ.

ᨸᨬ᩠ᨧᨾᩅᨣ᩠ᨣᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪖. ᨨᨭ᩠ᨮᩅᨣ᩠ᨣᩅᨱ᩠ᨱᨶᩣ

ᨴᩈᨾᩮ ‘‘ᩈᨾᩩᨭ᩠ᨮᩣᨶᩣᨴᩦᨶᩥ ᨠᨳᩥᨶᩈᨴᩥᩈᩣᨶᩥ, ᩍᨴᩴ ᨸᨶ ᨠᩥᩁᩥᨿᩣᨠᩥᩁᩥᨿ’’ᨶ᩠ᨲᩥ ᨸᩣᨮᩮᩣ.

ᨨᨭ᩠ᨮᩅᨣ᩠ᨣᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪘. ᩋᨭ᩠ᨮᨾᩅᨣ᩠ᨣᩅᨱ᩠ᨱᨶᩣ

ᨸᨮᨾᨴᩩᨲᩥᨿᨲᨲᩥᨿᩮᩈᩩ ‘‘ᨣᩥᩉᩥᨣᨲᩣ’’ᨲᩥ ᩅᩣ ‘‘ᨠᩩᨾᩣᩁᩥᨽᩪᨲᩣ’’ᨲᩥ ᩅᩣ ᨶ ᩅᨲ᩠ᨲᨻ᩠ᨻᩣ. ᩅᨴᨶ᩠ᨲᩥ ᨧᩮ, ᨠᨾ᩠ᨾᩴ ᨠᩩᨸ᩠ᨸᨲᩥ.

ᩑᨠᩣᨴᩈᨾᩮ ᨨᨶ᩠ᨴᩴ ᩋᩅᩥᩔᨩ᩠ᨩᩮᨲ᩠ᩅᩣᨲᩥ ‘‘ᨿᨳᩣᩈᩩᨡ’’ᨶ᩠ᨲᩥ ᩋᩅᨲ᩠ᩅᩣ. ᩑᨲ᩠ᨳ ᨸᨶ ᩋᨿᩴ ᩅᩥᨶᩥᨧ᩠ᨨᨿᩮᩣ – ‘‘ᨸᩣᩁᩥᩅᩣᩈᩥᨠᨨᨶ᩠ᨴᨴᩣᨶᩮᨶᩣ’’ᨲᩥ ᩍᨴᩴ ᩏᨴ᩠ᨵᩁᩥᨲ᩠ᩅᩣ ‘‘ᩅᩩᨭ᩠ᨮᩥᨲᩣᨿ ᨸᩁᩥᩈᩣᨿᩣ’’ᨲᩥ (ᨸᩣᨧᩥ. ᪑᪑᪖᪘) ᨸᨴᨽᩣᨩᨶᩴ ᩅᩩᨲ᩠ᨲᩴ. ᩑᨲᩔ ᨸᨶ ᩈᨾᨶ᩠ᨲᨸᩣᩈᩣᨴᩥᨠᩣᨿᩴ ‘‘ᩅᩩᨭ᩠ᨮᩥᨲᩣᨿ ᨸᩁᩥᩈᩣᨿᩣᨲᩥ ᨨᨶ᩠ᨴᩴ ᩅᩥᩔᨩ᩠ᨩᩮᨲ᩠ᩅᩣ ᨠᩣᨿᩮᨶ ᩅᩣ ᩅᩣᨧᩣᨿ ᩅᩣ ᨨᨶ᩠ᨴᩅᩥᩔᨩ᩠ᨩᨶᨾᨲ᩠ᨲᩮᨶ ᩅᩣ ᩅᩩᨭ᩠ᨮᩥᨲᩣᨿᩣ’’ᨲᩥ (ᨸᩣᨧᩥ. ᩋᨭ᩠ᨮ. ᪑᪑᪖᪗) ᩅᩩᨲ᩠ᨲᩴ. ᩍᨵ ᨨᨶ᩠ᨴᩔ ᨸᨶ ᩋᩅᩥᩔᨭ᩠ᨮᨲ᩠ᨲᩣ ᨠᨾ᩠ᨾᩴ ᨠᩣᨲᩩᩴ ᩅᨭ᩠ᨭᨲᩦᨲᩥ ᩅᩩᨲ᩠ᨲᩴ. ᨲᩈ᩠ᨾᩣ ᨨᨶ᩠ᨴᩴ ᩋᩅᩥᩔᨩ᩠ᨩᩮᨲ᩠ᩅᩣᩅ ᨴ᩠ᩅᩣᨴᩈᩉᨲ᩠ᨳᨸᩣᩈᩮ ᩅᩥᩉᩁᩥᨲ᩠ᩅᩣ ᨸᩩᨶ ᩈᨶ᩠ᨶᩥᨸᩣᨲᨠᩁᨱᨬ᩠ᨧ ᩅᨭ᩠ᨭᨲᩦᨲᩥ ᩃᩥᨡᩥᨲᩴ.

ᩋᨭ᩠ᨮᨾᩅᨣ᩠ᨣᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪙. ᨶᩅᨾᩅᨣ᩠ᨣᩅᨱ᩠ᨱᨶᩣ

ᨲᨲᩥᨿᩮ ‘‘ᩈᩮᩈᩴ ᩅᩩᨲ᩠ᨲᨶᨿᩮᨶ ᩅᩮᨴᩥᨲᨻ᩠ᨻᩴ, ᩍᨴᩴ ᨸᨶ ᩋᨠᩩᩈᩃᨧᩥᨲ᩠ᨲ’’ᨶ᩠ᨲᩥ ᨸᩣᨮᩮᩣ.

ᨧᨲᩩᨲ᩠ᨳᩮ ᩅᩩᨲ᩠ᨲᨶᨿᩮᨶᩣᨲᩥ ᨲᨲᩥᨿᩮ ᩅᩩᨲ᩠ᨲᨶᨿᩮᨶ.

ᩑᨠᩣᨴᩈᨾᩮ ‘‘ᩈᨾᩩᨭ᩠ᨮᩣᨶᩣᨴᩦᨶᩥ ᨠᨳᩥᨶᩈᨴᩥᩈᩣᨶᩥ, ᩍᨴᩴ ᨸᨶ ᨠᩥᩁᩥᨿᩣᨠᩥᩁᩥᨿ’’ᨶ᩠ᨲᩥ ᨸᩣᨮᩮᩣ.

ᨴ᩠ᩅᩣᨴᩈᨾᩮ ‘‘ᩈᨾᩩᨭ᩠ᨮᩣᨶᩣᨴᩦᨶᩥ ᨸᨴᩈᩮᩣᨵᨾ᩠ᨾᩈᨴᩥᩈᩣᨶᩥ, ᩍᨴᩴ ᨸᨶ ᨠᩥᩁᩥᨿᩣᨠᩥᩁᩥᨿ’’ᨶ᩠ᨲᩥ ᨸᩣᨮᩮᩣ.

ᨲᩮᩁᩈᨾᩮ ‘‘ᩈᩴᨠᨧ᩠ᨧᩥᨠᩴ ᨶᩣᨾ ᩋᨵᨠ᩠ᨡᨠᩴ ᩏᨻ᩠ᨽᨶᩣᨽᩥ, ᨲᩔᩣ ᨸᨭᩥᨧ᩠ᨨᩣᨴᨶᨲ᩠ᨳᩣᨿᩣ’’ᨲᩥ (ᨸᩣᨧᩥ. ᪑᪒᪒᪖) ᨸᩣᩊᩥᨿᩴ ᩅᩩᨲ᩠ᨲᨲ᩠ᨲᩣ ᩍᨵᩣᨸᩥ ‘‘ᩋᨵᨠ᩠ᨡᨠᩏᨻ᩠ᨽᨶᩣᨽᩥᩈᨦ᩠ᨡᩣᨲᩔ ᩈᩁᩦᩁᩔ ᨸᨭᩥᨧ᩠ᨨᩣᨴᨶᨲ᩠ᨳ’’ᨶ᩠ᨲᩥ ᨸᩣᨮᩮᩣ. ᩋᨸᩁᩥᨠ᩠ᨡᩮᨸᩮ ᩌᨸᨲ᩠ᨲᩥᨸᩁᩥᨧ᩠ᨨᩮᨴᩴ ᩈᨾᨶ᩠ᨲᨸᩣᩈᩣᨴᩥᨠᩅᩈᩮᨶ ᩋᨣ᩠ᨣᩉᩮᨲ᩠ᩅᩣ ᩍᨵ ᩅᩩᨲ᩠ᨲᨶᨿᩮᨶ ᨣᩉᩮᨲᨻ᩠ᨻᨶ᩠ᨲᩥ ᩃᩥᨡᩥᨲᩴ.

ᨶᩅᨾᩅᨣ᩠ᨣᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᩈᩩᨴ᩠ᨵᨸᩣᨧᩥᨲ᩠ᨲᩥᨿᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᩈᨾᩩᨭ᩠ᨮᩣᨶᩅᩥᨶᩥᨧ᩠ᨨᨿᩅᨱ᩠ᨱᨶᩣ

ᩈᨾᩩᨭ᩠ᨮᩣᨶᩣᨶᩴ ᩅᩥᨶᩥᨧ᩠ᨨᨿᩮ ᨸᨶ ᨣᩥᩁᨣ᩠ᨣᩈᨾᨩ᩠ᨩᩣᨴᩦᨶᩥ ‘‘ᩋᨧᩥᨲ᩠ᨲᨠᩣᨶᩥ ᩃᩮᩣᨠᩅᨩ᩠ᨩᩣᨶᩦ’’ᨲᩥ ᩅᩩᨲ᩠ᨲᨲ᩠ᨲᩣ ‘‘ᨶᨧ᩠ᨧ’’ᨶ᩠ᨲᩥ ᩅᩣ ‘‘ᨣᨶ᩠ᨵ’’ᨶ᩠ᨲᩥ ᩅᩣ ᩋᨩᩣᨶᩥᨲ᩠ᩅᩣᨸᩥ ᨴᩔᨶᩮᨶ, ᩅᩥᩃᩥᨾ᩠ᨸᨶᩮᨶ ᩅᩣ ᩌᨸᨩ᩠ᨩᨶᨲᩮᩣ ᩅᨲ᩠ᨳᩩᩋᨩᩣᨶᨶᨧᩥᨲ᩠ᨲᩮᨶ ᩋᨧᩥᨲ᩠ᨲᨠᩣᨶᩥ. ‘‘ᨶᨧ᩠ᨧ’’ᨶ᩠ᨲᩥ ᩅᩣ ‘‘ᨣᨶ᩠ᨵ’’ᨶ᩠ᨲᩥ ᩅᩣ ᨩᩣᨶᩥᨲ᩠ᩅᩣ ᨸᩔᨶ᩠ᨲᩥᨿᩣ, ᩅᩥᩃᩥᨾ᩠ᨸᨶ᩠ᨲᩥᨿᩣ ᩅᩣ ᩋᨠᩩᩈᩃᨲ᩠ᨲᩣ ᩑᩅ ᩃᩮᩣᨠᩅᨩ᩠ᨩᩣᨶᩥ. ᨧᩮᩣᩁᩥᩅᩩᨭ᩠ᨮᩣᨸᨶᩣᨴᩦᨶᩥ ‘‘ᨧᩮᩣᩁᩦ’’ᨲᩥᩌᨴᩥᨶᩣ ᩅᨲ᩠ᨳᩩᩴ ᨩᩣᨶᩥᨲ᩠ᩅᩣ ᨠᩁᨱᩮᨿᩮᩅ ᩌᨸᨩ᩠ᨩᨶᨲ᩠ᨲᩣ ᩈᨧᩥᨲ᩠ᨲᨠᩣᨶᩥ. ᩏᨸᩈᨾ᩠ᨸᨴᩣᨴᩦᨶᩴ ᩑᨠᨶ᩠ᨲᩣᨠᩩᩈᩃᨧᩥᨲ᩠ᨲᩮᨶᩮᩅ ᩋᨠᨲ᩠ᨲᨻ᩠ᨻᨲ᩠ᨲᩣ ᨸᨱ᩠ᨱᨲ᩠ᨲᩥᩅᨩ᩠ᨩᩣᨶᩥ. ‘‘ᩍᨵ ᩈᨧᩥᨲ᩠ᨲᨠᩣᨧᩥᨲ᩠ᨲᨠᨲᩣ ᨸᨱ᩠ᨱᨲ᩠ᨲᩥᨩᩣᨶᨶᩣᨩᩣᨶᨶᨲᩣᨿ ᩋᨣ᩠ᨣᩉᩮᨲ᩠ᩅᩣ ᩅᨲ᩠ᨳᩩᨩᩣᨶᨶᩣᨩᩣᨶᨶᨲᩣᨿ ᨣᩉᩮᨲᨻ᩠ᨻ’’ᨶ᩠ᨲᩥ ᩃᩥᨡᩥᨲᩴ. ᩋᨵᩥᨸ᩠ᨸᩮᨲᨲ᩠ᨲᩣ ᩈᨦ᩠ᨡᩮᨸᨲᩮᩣ ᨴᩔᨶᩣᨽᩣᩅᩣ –

ᩋᨧᩥᨲ᩠ᨲᨠᨲ᩠ᨲᩴ ᨴ᩠ᩅᩥᨵᩣ ᨾᨲᩴ, ᩅᨲ᩠ᨳᩩᨸᨱ᩠ᨱᨲ᩠ᨲᩥᩋᨬ᩠ᨬᩣᨱᩣ;

ᩅᩩᨲ᩠ᨲᩴ ᨬᩣᨱᩴ ᨴ᩠ᩅᩥᨵᩣ ᩍᨵ, ᩈᨠᨶᩣᨾᩮᨶ ᩋᨬ᩠ᨬᩣᨲᩴ.

ᨸᩁᨶᩣᨾᨬ᩠ᨧ ᨩᩣᨶᨶᩴ, ᩅᨲ᩠ᨳᩩᩔᩮᨠᩴ ᨻᩃᨠ᩠ᨠᩣᩁᩮ;

ᩑᨠᨵᩣ ᩈᨾᨧᩣᩁᩥᨠᩮ, ᨲᩈ᩠ᨾᩥᩴ ᨲᨸ᩠ᨸᨭᩥᨻᨶ᩠ᨵᩮᩣᨲᩥ.

ᨸᩁᨶᩣᨾᩮᨶ ᨩᩣᨶᨶᩴ, ᨴ᩠ᩅᩥᨵᩣ ᨾᩩᨲ᩠ᨲᩣᨴᩥᨠᩮ ᩑᨠᩴ;

ᩑᨠᩴ ᩃᩮᩣᨾᩣᨴᩥᨠᩮ ᨾᨲᨶ᩠ᨲᩥ, ᩋᨿᩴ ᨽᩮᨴᩮᩣ ᩅᩮᨴᩥᨲᨻ᩠ᨻᩮᩣ.

ᩈᩮᩈᨾᩮᨲ᩠ᨳ ᩏᨲ᩠ᨲᩣᨶᩴ, ᩋᨶᩩᨲ᩠ᨲᩣᨶᨲ᩠ᨳᩮ ᩅᩩᨲ᩠ᨲᩅᩥᨶᩥᨧ᩠ᨨᨿᨲ᩠ᨲᩣ ᨶ ᩏᨴ᩠ᨵᨭᨶ᩠ᨲᩥ;

ᩈᨾᩩᨭ᩠ᨮᩣᨶᩅᩥᨶᩥᨧ᩠ᨨᨿᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨽᩥᨠ᩠ᨡᩩᨶᩦᨸᩣᨲᩥᨾᩮᩣᨠ᩠ᨡᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨠᨦ᩠ᨡᩣᩅᩥᨲᩁᨱᩦᨸᩩᩁᩣᨱᨭᩦᨠᩣ ᨶᩥᨭ᩠ᨮᩥᨲᩣ.

ᨶᨾᩮᩣ ᨲᩔ ᨽᨣᩅᨲᩮᩣ ᩋᩁᩉᨲᩮᩣ ᩈᨾ᩠ᨾᩣᩈᨾ᩠ᨻᩩᨴ᩠ᨵᩔ

ᨠᨦ᩠ᨡᩣᩅᩥᨲᩁᨱᩦ-ᩋᨽᩥᨶᩅᨭᩦᨠᩣ

ᨣᨶ᩠ᨳᩣᩁᨾ᩠ᨽᨠᨳᩣ

ᨲᩥᩃᩮᩣᨠᨲᩥᩃᨠᩴ ᨻᩩᨴ᩠ᨵᩴ, ᩅᨶ᩠ᨴᩮ ᩈᩩᨴ᩠ᨵᨣᩩᨱᩣᨠᩁᩴ;

ᨠᩁᩩᨱᩣᩈᩦᨲᩃᩦᨽᩪᨲ-ᩉᨴᨿᩴ ᨾᩉᩥᨲᩮᩣᨴᨿᩴ.

ᨲᩮᨶᩣᨸᩥ ᨵᨾ᩠ᨾᩁᩣᨩᩮᨶ, ᩃᩮᩣᨠᩮᨠᩣᨧᩁᩥᨿᩮᨶ ᨿᩮᩣ;

ᨸᩪᨩᩥᨲᩮᩣ ᨲᨬ᩠ᨧ ᩈᨴ᩠ᨵᨾ᩠ᨾᩴ, ᩅᨶ᩠ᨴᩮ ᨣᨾ᩠ᨽᩦᩁᨾᩩᨲ᩠ᨲᨾᩴ.

ᨾᩩᨶᩥᨶ᩠ᨴᨧᨶ᩠ᨴᩈᨴ᩠ᨵᨾ᩠ᨾ-ᩁᩴᩈᩦᩉᩥ ᩅᩥᨾᩃᩮᩉᩥ ᨿᩮᩣ;

ᨻᩮᩣᨵᩥᨲᩮᩣᩉᩴ ᩈᨴᩣ ᩅᨶ᩠ᨴᩮ, ᨲᩴ ᩈᨦ᩠ᨥᩴ ᨠᩩᨾᩩᨴᩣᨠᩁᩴ.

ᩅᩥᨶᨿᩮ ᨶᨿᨣᨾ᩠ᨽᩦᩁᩮ, ᩈᨻ᩠ᨻᨳᩣ ᨸᩣᩁᨴᩔᩥᨶᩣ;

ᩅᩣᨴᩥᨶᩣ ᨴᩩᨲ᩠ᨲᩁᩣᨣᩣᨵ-ᩈᨻ᩠ᨻᩈᨲ᩠ᨳᨾᩉᨱ᩠ᨱᩅᩮ.

ᨿᩣ ᨠᨲᩣ ᨻᩩᨴ᩠ᨵᨥᩮᩣᩈᩮᨶ, ᨳᩮᩁᩮᨶ ᨳᩥᩁᨧᩮᨲᩈᩣ;

ᨠᨦ᩠ᨡᩣᩅᩥᨲᩁᨱᩦ ᨶᩣᨾ, ᨾᩣᨲᩥᨠᨭ᩠ᨮᨠᨳᩣ ᩈᩩᨽᩣ.

ᨳᩥᩁᩣᨶᩮᨠᨣᩩᨱᩮᩣᨥᩮᨶ, ᨳᩮᩁᩮᨶ ᩅᩥᨶᨿᨬ᩠ᨬᩩᨶᩣ;

ᨠᩃ᩠ᨿᩣᨱᩣᨧᩣᩁᨿᩩᨲ᩠ᨲᩮᨶ, ᨵᩦᨾᨲᩣ ᨾᩩᨶᩥᩈᩪᨶᩩᨶᩣ;

ᩅᩥᨶᨿᨭ᩠ᨮᩥᨲᩥᨠᩣᨾᩮᨶ, ᩈᩩᨾᩮᨵᩮᨶᩣᨽᩥᨿᩣᨧᩥᨲᩮᩣ.

ᨲᨾᩉᩴ ᩅᨱ᩠ᨱᨿᩥᩔᩣᨾᩥ, ᩈᩩᩅᩥᩈᩩᨴ᩠ᨵᨾᨶᩣᨠᩩᩃᩴ;

ᩈᩣᨵᩅᩮᩣ ᨲᩴ ᨶᩥᩈᩣᨾᩮᨳ, ᩈᨠ᩠ᨠᨧ᩠ᨧᩴ ᨾᨾ ᨽᩣᩈᨲᩮᩣᨲᩥ.

ᨣᨶ᩠ᨳᩣᩁᨾ᩠ᨽᨠᨳᩣᩅᨱ᩠ᨱᨶᩣ

ᩈᨻ᩠ᨻᨠᩩᩈᩃᨵᨾ᩠ᨾᨸ᩠ᨸᨾᩩᨡᩔ ᩅᩥᨸᩩᩃᩮᩣᩊᩣᩁᨣᩩᨱᩅᩥᩈᩮᩈᩣᩅᩉᩔ ᨸᩁᨾᨣᨾ᩠ᨽᩦᩁᩔ ᨸᩣᨲᩥᨾᩮᩣᨠ᩠ᨡᩔ ᩋᨲ᩠ᨳᩈᩴᩅᨱ᩠ᨱᨶᩴ ᨠᨲ᩠ᨲᩩᨠᩣᨾᩮᩣᨿᨾᩣᨧᩁᩥᨿᩮᩣ ᨸᨮᨾᩴ ᨲᩣᩅ ‘‘ᨻᩩᨴ᩠ᨵᩴ ᨵᨾ᩠ᨾ’’ᨶ᩠ᨲᩥᩌᨴᩥᨶᩣ ᩁᨲᨶᨲ᩠ᨲᨿᨸ᩠ᨸᨱᩣᨾᨠᩁᨱᩮᨶ ᩋᨲ᩠ᨲᨶᩮᩣ ᨧᩥᨲ᩠ᨲᩈᨶ᩠ᨲᩣᨶᩴ ᨸᩩᨶᩣᨲᩥ. ᩅᩥᩈᩩᨴ᩠ᨵᨧᩥᨲ᩠ᨲᩈᨶ᩠ᨲᩣᨶᨶᩥᩔᨿᩣ ᩉᩥ ᨸᨬ᩠ᨬᩣ ᨲᩥᨠ᩠ᨡᩅᩥᩈᨴᨽᩣᩅᨸ᩠ᨸᨲ᩠ᨲᩥᨿᩣ ᨿᨳᩣᨵᩥᨸ᩠ᨸᩮᨲᩈᩴᩅᨱ᩠ᨱᨶᩣᨿ ᨸᩁᩥᨿᩮᩣᩈᩣᨶᨣᨾᨶᩈᨾᨲ᩠ᨳᩣ ᩉᩮᩣᨲᩦᨲᩥ. ᩋᨸᩥᨧ ᩁᨲᨶᨲ᩠ᨲᨿᨸ᩠ᨸᨱᩣᨾᩮᨶ ᩅᩥᨵᩩᨲᩈᨻ᩠ᨻᨠᩥᨻ᩠ᨻᩥᩈᩮ ᨧᩥᨲ᩠ᨲᩈᨶ᩠ᨲᩣᨶᩮ ᨽᩅᨶ᩠ᨲᩁᩪᨸᨧᩥᨲᩣᨶᩥᨸᩥ ᩋᨶ᩠ᨲᩁᩣᨿᩥᨠᨠᨾ᩠ᨾᩣᨶᩥ ᨸᨧ᩠ᨧᨿᩅᩮᨠᩃ᩠ᩃᨲᩮᩣ ᨿᨳᩣᨵᩥᨸ᩠ᨸᩮᨲᩣᨿ ᩋᨲ᩠ᨳᩈᩴᩅᨱ᩠ᨱᨶᩣᨿ ᨶᩣᩃᨾᨶ᩠ᨲᩁᩣᨿᨠᩁᨱᩣᨿᩣᨲᩥᨸᩥ ᩌᨧᩁᩥᨿᩔ ᩁᨲᨶᨲ᩠ᨲᨿᩅᨶ᩠ᨴᨶᩣ.

ᨲᨲ᩠ᨳ ᨻᩩᨴ᩠ᨵᩈᨴ᩠ᨴᩔ ᨲᩣᩅ ‘‘ᨻᩩᨩ᩠ᨫᩥᨲᩣ ᩈᨧ᩠ᨧᩣᨶᩦᨲᩥ ᨻᩩᨴ᩠ᨵᩮᩣ, ᨻᩮᩣᨵᩮᨲᩣ ᨸᨩᩣᨿᩣᨲᩥ ᨻᩩᨴ᩠ᨵᩮᩣ’’ᨲᩥᩌᨴᩥᨶᩣ (ᨾᩉᩣᨶᩥ. ᪑᪙᪒; ᨧᩪᩊᨶᩥ. ᨸᩣᩁᩣᨿᨶᨲ᩠ᨳᩩᨲᩥᨣᩣᨳᩣᨶᩥᨴ᩠ᨴᩮᩈ ᪙᪗; ᨸᨭᩥ. ᨾ. ᪑.᪑᪖᪒) ᨶᩥᨴ᩠ᨴᩮᩈᨶᨿᩮᨶ ᩋᨲ᩠ᨳᩮᩣ ᩅᩮᨴᩥᨲᨻ᩠ᨻᩮᩣ. ᩋᨳ ᩅᩣ ᩈᩅᩣᩈᨶᩣᨿ ᩋᨬ᩠ᨬᩣᨱᨶᩥᨴ᩠ᨴᩣᨿ ᩋᨧ᩠ᨧᨶ᩠ᨲᩅᩥᨣᨾᨲᩮᩣ, ᨻᩩᨴ᩠ᨵᩥᨿᩣ ᩅᩣ ᩅᩥᨠᩈᩥᨲᨽᩣᩅᨲᩮᩣ ᨻᩩᨴ᩠ᨵᩅᩣᨲᩥ ᨻᩩᨴ᩠ᨵᩮᩣ ᨩᩣᨣᩁᨱᩅᩥᨠᩈᨶᨲ᩠ᨳᩅᩈᩮᨶ. ᩋᨳ ᩅᩣ ᨠᩔᨧᩥᨸᩥ ᨬᩮᨿ᩠ᨿᨵᨾ᩠ᨾᩔ ᩋᨶᩅᨻᩩᨴ᩠ᨵᩔ ᩋᨽᩣᩅᩮᨶ, ᨬᩮᨿ᩠ᨿᩅᩥᩈᩮᩈᩔ ᨧ ᨠᨾ᩠ᨾᨽᩣᩅᩮᨶ ᩋᨣ᩠ᨣᩉᨱᨲᩮᩣ ᨠᨾ᩠ᨾᩅᨧᨶᩥᨧ᩠ᨨᩣᨿ ᩋᨽᩣᩅᩮᨶ ᩋᩅᨣᨾᨶᨲ᩠ᨳᩅᩈᩮᨶᩮᩅ ᨠᨲ᩠ᨲᩩᨶᩥᨴ᩠ᨴᩮᩈᩮᩣ ᩃᨻ᩠ᨽᨲᩦᨲᩥ ᨻᩩᨴ᩠ᨵᩅᩣᨲᩥ ᨻᩩᨴ᩠ᨵᩮᩣ ᨿᨳᩣ ‘‘ᨴᩥᨠ᩠ᨡᩥᨲᩮᩣ ᨶ ᨴᨴᩣᨲᩦ’’ᨲᩥ. ᩋᨲ᩠ᨳᨲᩮᩣ ᨸᨶ ᨸᩣᩁᨾᩥᨲᩣᨸᩁᩥᨽᩣᩅᩥᨲᩮᨶ ᩈᨿᨾ᩠ᨽᩩᨬᩣᨱᩮᨶ ᩈᩉᩅᩣᩈᨶᩣᨿ ᩅᩥᨣᨲᩅᩥᨴ᩠ᨵᩈ᩠ᨲᨶᩥᩁᩅᩈᩮᩈᩩᨸᨠ᩠ᨠᩥᩃᩮᩈᩮᩣ ᨾᩉᩣᨠᩁᩩᨱᩣᩈᨻ᩠ᨻᨬ᩠ᨬᩩᨲᨬ᩠ᨬᩣᨱᩣᨴᩥᩋᨸᩁᩥᨾᩮᨿ᩠ᨿᨣᩩᨱᨣᨱᩣᨵᩣᩁᩮᩣᩅ ᨡᨶ᩠ᨵᩈᨶ᩠ᨲᩣᨶᩮᩣ ᨻᩩᨴ᩠ᨵᩮᩣ. ᨿᨳᩣᩉ –

‘‘ᨻᩩᨴ᩠ᨵᩮᩣᨲᩥ ᨿᩮᩣ ᩈᩮᩣ ᨽᨣᩅᩣ ᩈᨿᨾ᩠ᨽᩪ ᩋᨶᩣᨧᩁᩥᨿᨠᩮᩣ ᨸᩩᨻ᩠ᨻᩮ ᩋᨶᨶᩩᩔᩩᨲᩮᩈᩩ ᨵᨾ᩠ᨾᩮᩈᩩ ᩈᩣᨾᩴ ᩈᨧ᩠ᨧᩣᨶᩥ ᩋᨽᩥᩈᨾ᩠ᨻᩩᨩ᩠ᨫᩥ, ᨲᨲ᩠ᨳ ᨧ ᩈᨻ᩠ᨻᨬ᩠ᨬᩩᨲᩴ ᨸᨲ᩠ᨲᩮᩣ, ᨻᩃᩮᩈᩩ ᨧ ᩅᩈᩦᨽᩣᩅ’’ᨶ᩠ᨲᩥ (ᨾᩉᩣᨶᩥ. ᪑᪙᪒; ᨧᩪᩊᨶᩥ. ᨸᩣᩁᩣᨿᨶᨲ᩠ᨳᩩᨲᩥᨣᩣᨳᩣᨶᩥᨴ᩠ᨴᩮᩈ ᪙᪗; ᨸᨭᩥ. ᨾ. ᪑.᪑᪖᪑),

ᨲᩴ ᨻᩩᨴ᩠ᨵᩴ.

ᨵᩣᩁᩮᨲᩦᨲᩥ ᨵᨾ᩠ᨾᩮᩣ. ᩋᨿᨬ᩠ᩉᩥ ᨿᨳᩣᨶᩩᩈᩥᨭ᩠ᨮᩴ ᨸᨭᩥᨸᨩ᩠ᨩᨾᩣᨶᩮ ᩋᨸᩣᨿᨴᩩᨠ᩠ᨡᩮ, ᩈᩴᩈᩣᩁᨴᩩᨠ᩠ᨡᩮ ᨧ ᩋᨸᨲᨾᩣᨶᩮ ᨵᩣᩁᩮᨲᩦᨲᩥ, ᨲᨶ᩠ᨶᩥᨻ᩠ᨻᨲ᩠ᨲᨠᨠᩥᩃᩮᩈᩅᩥᨴ᩠ᨵᩴᩈᨶᨬ᩠ᨧᩮᨲ᩠ᨳ ᨵᩣᩁᨱᩴ. ᩑᩅᨬ᩠ᨧ ᨠᨲ᩠ᩅᩣ ᩋᩁᩥᨿᨾᨣ᩠ᨣᩮᩣ, ᨲᩔ ᨲᨴᨲ᩠ᨳᩈᩥᨴ᩠ᨵᩥᩉᩮᨲᩩᨲᩣᨿ ᨶᩥᨻ᩠ᨻᩣᨶᨬ᩠ᨧᩣᨲᩥ ᩏᨽᨿᨾᩮᩅ ᨶᩥᨸ᩠ᨸᩁᩥᨿᩣᨿᨲᩮᩣ ᨵᩣᩁᩮᨲᩥ. ᩋᩁᩥᨿᨹᩃᨬ᩠ᨧ ᨸᨶ ᨲᩴᩈᨾᩩᨧ᩠ᨨᩥᨶ᩠ᨶᨠᩥᩃᩮᩈᨸᨭᩥᨸ᩠ᨸᩔᨾ᩠ᨽᨶᩮᨶ ᨲᨴᨶᩩᨠᩪᩃᨲᩣᨿ, ᨸᩁᩥᨿᨲ᩠ᨲᩥᨵᨾ᩠ᨾᩮᩣ ᨧ ᨲᨴᨵᩥᨣᨾᩉᩮᨲᩩᨲᩣᨿᩣᨲᩥ ᩏᨽᨿᨾ᩠ᨸᩥ ᨸᩁᩥᨿᩣᨿᨲᩮᩣ ᨵᩣᩁᩮᨲᩦᨲᩥ ᩅᩮᨴᩥᨲᨻ᩠ᨻᩴ, ᨲᩴ ᨵᨾ᩠ᨾᩴ. ᨧ-ᩈᨴ᩠ᨴᩮᩣ ᩈᨾᩩᨧ᩠ᨧᨿᨲ᩠ᨳᩮᩣ. ᨲᩮᨶ ᨿᨳᩣᩅᩩᨲ᩠ᨲᩴ ᨻᩩᨴ᩠ᨵᩴ, ᩍᨾᨬ᩠ᨧ ᨵᨾ᩠ᨾᩴ ᩅᨶ᩠ᨴᩥᨲ᩠ᩅᩣᨲᩥ ᨻᩩᨴ᩠ᨵᩁᨲᨶᩮᨶ ᩈᩉ ᩅᨶ᩠ᨴᨶᨠᩥᩁᩥᨿᩣᨿ ᨵᨾ᩠ᨾᩁᨲᨶᩴ ᩈᨾᩩᨧ᩠ᨧᩥᨶᩮᩣᨲᩥ.

ᨶ ᨠᩮᩅᩃᩴ ᩍᨴᩴ ᨴ᩠ᩅᨿᨾᩮᩅᩣᨲᩥ ᩌᩉ ‘‘ᩈᨦ᩠ᨥᨬ᩠ᨧᩣ’’ᨲᩥ. ᩋᩁᩥᨿᩮᨶ ᨴᩥᨭ᩠ᨮᩥᩈᩦᩃᩈᩣᨾᨬ᩠ᨬᩮᨶ ᩈᩴᩉᨲᩮᩣ ᨥᨭᩥᨲᩮᩣᨲᩥ ᩈᨦ᩠ᨥᩮᩣ, ᩋᨭ᩠ᨮᩋᩁᩥᨿᨸᩩᨣ᩠ᨣᩃᩈᨾᩪᩉᩮᩣ. ᨲᩮᩉᩥ ᨲᩮᩉᩥ ᩅᩣ ᨾᨣ᩠ᨣᨹᩃᩮᩉᩥ ᨠᩥᩃᩮᩈᨴᩁᨳᩣᨶᩴ ᩈᨾᩩᨧ᩠ᨨᩮᨴᨸᨭᩥᨸ᩠ᨸᩔᨾ᩠ᨽᨶᩅᩈᩮᨶ ᩈᨾ᩠ᨾᨴᩮᩅ ᨥᩣᨲᩥᨲᨲ᩠ᨲᩣ ᩈᨦ᩠ᨥᩮᩣ, ᨸᩮᩣᨳᩩᨩ᩠ᨩᨶᩥᨠᩈᨦ᩠ᨥᩔᩣᨸᩥ ᨸᩩᨻ᩠ᨻᨽᩣᨣᨸ᩠ᨸᨭᩥᨸᨴᩣᨿ ᨮᩥᨲᨲ᩠ᨲᩣ ᨸᩩᩁᩥᨾᨧᩮᨲᨶᩣᨿ ᩅᩥᨿ ᨴᩣᨶᩮ ᩑᨲ᩠ᨳᩮᩅ ᩈᨦ᩠ᨣᩉᩮᩣ ᨴᨭ᩠ᨮᨻ᩠ᨻᩮᩣ. ᩈᩮᩣᨸᩥ ᩉᩥ ᨠᩥᨬ᩠ᨧᩣᨸᩥ ᩋᩁᩥᨿᩮᨶ ᨴᩥᨭ᩠ᨮᩥᩈᩦᩃᩈᩣᨾᨬ᩠ᨬᩮᨶ ᩋᩈᩴᩉᨲᩮᩣ, ᨶᩥᨿ᩠ᨿᩣᨶᩥᨠᨸᨠ᩠ᨡᩥᨿᩮᨶ ᨸᨶ ᨸᩮᩣᨳᩩᨩ᩠ᨩᨶᩥᨠᩮᨶ ᩈᩴᩉᨲᨲ᩠ᨲᩣ ᨴᨠ᩠ᨡᩥᨱᩮᨿ᩠ᨿᨸᨱᩥᨸᩣᨲᩣᩁᩉᩮᩣ ᩈᨦ᩠ᨥᩮᩣᨿᩮᩅᩣᨲᩥ, ᨲᩴ ᩈᨦ᩠ᨥᩴ. ᨧ-ᩈᨴ᩠ᨴᩔᨲ᩠ᨳᩮᩣ ᩑᨲ᩠ᨳᩣᨸᩥ ᩅᩩᨲ᩠ᨲᨶᨿᩮᨶᩮᩅ ᩅᩮᨴᩥᨲᨻ᩠ᨻᩮᩣ.

ᨠᩥᩴᩅᩥᩈᩥᨭ᩠ᨮᩴ ᨻᩩᨴ᩠ᨵᩴ, ᨵᨾ᩠ᨾᩴ, ᩈᨦ᩠ᨥᨬ᩠ᨧᩣᨲᩥ ᩌᩉ ‘‘ᩅᨶ᩠ᨴᨶᩣᨾᩣᨶᨸᩪᨩᩣᩈᨠ᩠ᨠᩣᩁᨽᩣᨩᨶ’’ᨶ᩠ᨲᩥ. ᩍᨴᨬ᩠ᨧ ᩅᩥᩈᩮᩈᨶᩴ ᨸᨧ᩠ᨧᩮᨠᩴ ᨿᩮᩣᨩᩮᨲᨻ᩠ᨻᩴ ‘‘ᩅᨶ᩠ᨴᨶᩣᨾᩣᨶᨸᩪᨩᩣᩈᨠ᩠ᨠᩣᩁᨽᩣᨩᨶᩴ. ᨻᩩᨴ᩠ᨵᩴ…ᨸᩮ… ᩅᨶ᩠ᨴᨶᩣᨾᩣᨶᨸᩪᨩᩣᩈᨠ᩠ᨠᩣᩁᨽᩣᨩᨶᩴ ᩈᨦ᩠ᨥᨬ᩠ᨧᩣ’’ᨲᩥ. ᨲᨲ᩠ᨳ ᩈᨴᩮᩅᨠᩮᨶ ᩃᩮᩣᨠᩮᨶ ᩋᩁᩉᨲᩣᨴᩦᩉᩥ ᨣᩩᨱᩮᩉᩥ ᩈᩮᨭ᩠ᨮᨽᩣᩅᩮᨶ ᨠᩁᩥᨿᨾᩣᨶᩮᩣ ᨸᨱᩣᨾᩮᩣ ᩅᨶ᩠ᨴᨶᩣ, ᩈᨾ᩠ᨾᩣᨶᩮᩣ ᨾᩣᨶᩮᩣ, ᨣᨶ᩠ᨵᨸᩩᨸ᩠ᨹᩣᨴᩦᩉᩥ ᩏᨸᩉᩣᩁᩮᩣ ᨸᩪᨩᩣ, ᩋᨽᩥᩈᨦ᩠ᨡᨲᨸᨧ᩠ᨧᨿᨴᩣᨶᩴ ᩈᨠ᩠ᨠᩣᩁᩮᩣ, ᩅᨶ᩠ᨴᨶᩣ ᨧ ᨾᩣᨶᩮᩣ ᨧ ᨸᩪᨩᩣ ᨧ ᩈᨠ᩠ᨠᩣᩁᩮᩣ ᨧ ᩅᨶ᩠ᨴᨶᩣᨾᩣᨶᨸᩪᨩᩣᩈᨠ᩠ᨠᩣᩁᩣ, ᨲᩮᩈᩴ ᨾᩉᨸ᩠ᨹᩃᨽᩣᩅᨠᩁᨱᩮᨶ ᨽᩣᨩᨶᨲ᩠ᨲᩣ ᩌᨵᩣᩁᨲ᩠ᨲᩣ ᩅᨶ᩠ᨴᨶᩣᨾᩣᨶᨸᩪᨩᩣᩈᨠ᩠ᨠᩣᩁᨽᩣᨩᨶᩴ. ᩍᨾᩥᨶᩣ ᩁᨲᨶᨲ᩠ᨲᨿᩔ ᩋᩁᩉᨲᩣᨴᩦᩉᩥ ᨣᩩᨱᩮᩉᩥ ᩋᩈᨾᨽᩣᩅᩴ ᨴᩔᩮᨲᩥ. ᨲᨶ᩠ᨴᩔᨶᨾ᩠ᨸᩥ ᨲᨠ᩠ᨠᨲᩔ ᨶᩥᨸᨧ᩠ᨧᨠᩣᩁᩔ ᩈᩈᨶ᩠ᨲᩣᨶᨸᩅᨶᩣᨴᩥᩅᩈᩮᨶ ᨿᨳᩣᨵᩥᨸ᩠ᨸᩮᨲᩣᨿ ᩋᨲ᩠ᨳᩈᩴᩅᨱ᩠ᨱᨶᩣᨿ ᨶᩥᨸ᩠ᨹᩣᨴᨶᩈᨾᨲ᩠ᨳᨽᩣᩅᨴᩦᨸᨶᨲ᩠ᨳᨶ᩠ᨲᩥ ᩅᩮᨴᩥᨲᨻ᩠ᨻᩴ.

ᩅᩥᨸ᩠ᨸᩈᨶ᩠ᨶᩮᨶ ᨧᩮᨲᩈᩣ ᩅᨶ᩠ᨴᩥᨲ᩠ᩅᩣᨲᩥ ᩋᩁᩉᨲᩣᨴᩥᩋᨶᩮᨠᨸ᩠ᨸᨠᩣᩁᨣᩩᨱᩅᩥᩈᩮᩈᩣᨶᩩᩔᩁᨱᩅᩈᩮᨶ ᩅᩥᩅᩥᨵᩮᨶ, ᩅᩥᩈᩮᩈᩮᨶ ᩅᩣ ᨸᩈᨶ᩠ᨶᩮᨶ ᨾᨶᩈᩣ ᩈᨴ᩠ᨵᩥᩴ ᨠᩣᨿᩅᩣᨧᩣᩉᩥ ᨠᩁᨱᨽᩪᨲᩣᩉᩥ ᩋᨽᩥᩅᨶ᩠ᨴᩥᨿᩣᨲᩥ ᩋᨲ᩠ᨳᩮᩣ, ᨲᩦᩉᩥ ᨴ᩠ᩅᩣᩁᩮᩉᩥ ᨶᨾᩔᩥᨲ᩠ᩅᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨲᩥᩅᩥᨵᩣ ᨧᩣᨿᩴ ᩅᨶ᩠ᨴᨶᩣ ᨠᩣᨿᩅᨧᩦᨾᨶᩮᩣᩅᨶ᩠ᨴᨶᩣᨶᩴ ᩅᩈᩮᨶ. ᨲᨲ᩠ᨳ ᨻᩩᨴ᩠ᨵᩣᨴᩥᨣᩩᨱᩣᩁᨾ᩠ᨾᨱᩣ ᨠᩣᨾᩣᩅᨧᩁᨠᩩᩈᩃᨠᩥᩁᩥᨿᩣᨶᩴ ᩋᨬ᩠ᨬᨲᩁᨧᩮᨲᨶᩣ ᨠᩣᨿᩅᨧᩦᩅᩥᨬ᩠ᨬᨲ᩠ᨲᩥᨿᩮᩣ ᩈᨾᩩᨭ᩠ᨮᩣᨸᩮᨲ᩠ᩅᩣ ᨠᩣᨿᩅᨧᩦᨴ᩠ᩅᩣᩁᩅᩈᩮᨶ ᩏᨸ᩠ᨸᨶ᩠ᨶᩣ ᨠᩣᨿᩅᨧᩦᩅᨶ᩠ᨴᨶᩣᨲᩥ ᩅᩩᨧ᩠ᨧᨲᩥ, ᩏᨽᨿᩅᩥᨬ᩠ᨬᨲ᩠ᨲᩥᨿᩮᩣ ᨸᨶ ᩋᩈᨾᩩᨭ᩠ᨮᩣᨸᩮᨲ᩠ᩅᩣ ᨾᨶᩮᩣᨴ᩠ᩅᩣᩁᩅᩈᩮᨶ ᩏᨸ᩠ᨸᨶ᩠ᨶᩣ ᨾᨶᩮᩣᩅᨶ᩠ᨴᨶᩣᨲᩥ. ᩍᨾᩔ ᨸᨴᩔ ‘‘ᩅᨱ᩠ᨱᨶᩴ ᩅᨱ᩠ᨱᨿᩥᩔᩣᨾᩦ’’ᨲᩥ ᩍᨾᩥᨶᩣ ᩈᨾ᩠ᨻᨶ᩠ᨵᩮᩣ.

ᩑᩅᩴ ᩁᨲᨶᨲ᩠ᨲᨿᩔ ᨸᨱᩣᨾᩴ ᨴᩔᩮᨲ᩠ᩅᩣ ᩍᨴᩣᨶᩥ ᩋᨲ᩠ᨲᨶᩮᩣ ᨶᩥᩔᨿᨽᩪᨲᩣᨶᩴ ᩋᨭ᩠ᨮᨠᨳᩣᨧᩁᩥᨿᩣᨶᨬ᩠ᨧ ᨸᨱᩣᨾᩴ ᨴᩔᩮᨶ᩠ᨲᩮᩣ ‘‘ᨳᩮᩁᩅᩴᩈᨸ᩠ᨸᨴᩦᨸᩣᨶ’’ᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨠᨲᨬ᩠ᨩᩃᩦ ᨸᩩᨻ᩠ᨻᩣᨧᩁᩥᨿᩈᩦᩉᩣᨶᩴ ᨶᨾᩮᩣ ᨠᨲ᩠ᩅᩣᨲᩥ ᩈᨾ᩠ᨻᨶ᩠ᨵᩮᩣ. ᨠᨲᩮᩣ ᩋᨬ᩠ᨩᩃᩥ ᨠᩁᨸᩩᨭᩮᩣ ᩑᨲᩮᨶᩣᨲᩥ ᨠᨲᨬ᩠ᨩᩃᩦ. ᨨᨶ᩠ᨴᩣᨶᩩᩁᨠ᩠ᨡᨱᨲ᩠ᨳᨬ᩠ᩉᩮᨲ᩠ᨳ ᨴᩦᨥᩮᩣ, ᨠᨲᨬ᩠ᨩᩃᩦ ᩉᩩᨲ᩠ᩅᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨸᩩᨻ᩠ᨻᩣᨧᩁᩥᨿᩣ ᨸᩮᩣᩁᩣᨱᨭ᩠ᨮᨠᨳᩣᨠᩣᩁᩣ ᨲᨾ᩠ᨻᨸᨱ᩠ᨱᩥᨿᩣ ᨾᩉᩣᨳᩮᩁᩣ, ᨲᩮ ᩑᩅ ᨸᩁᩥᩔᨿᩈᩉᨶᨲᩮᩣ, ᨸᨭᩥᨸᨠ᩠ᨡᨽᩪᨲᨠᩥᩃᩮᩈᩉᨶᨶᨲᩮᩣ, ᨸᩁᩅᩣᨴᩥᨾᩥᨣᩮᩉᩥ ᩋᨸᨵᩴᩈᨶᩦᨿᨲᩮᩣ ᨧ ᩈᩦᩉᩈᨴᩥᩈᨲ᩠ᨲᩣ ᩈᩦᩉᩣᨲᩥ ᨸᩩᨻ᩠ᨻᩣᨧᩁᩥᨿᩈᩦᩉᩣ, ᨲᩮᩈᩴ ᨸᩩᨻ᩠ᨻᩣᨧᩁᩥᨿᩈᩦᩉᩣᨶᩴ. ᨠᩦᨴᩥᩈᩣ ᨲᩮ ᨸᩩᨻ᩠ᨻᩣᨧᩁᩥᨿᩈᩦᩉᩣ, ᨿᩮᩈᩴ ᨲᨿᩣ ᨶᨾᩮᩣ ᨠᩁᩦᨿᨲᩦᨲᩥ ᩌᩉ ‘‘ᨳᩮᩁᩅᩴᩈᨸ᩠ᨸᨴᩦᨸᩣᨶ’’ᨶ᩠ᨲᩥᩌᨴᩥ. ᨲᨲ᩠ᨳ ᨳᩮᩁᩅᩴᩈᨸ᩠ᨸᨴᩦᨸᩣᨶᨶ᩠ᨲᩥ ᨳᩥᩁᩮᩉᩥ ᩈᩦᩃᨠ᩠ᨡᨶ᩠ᨵᩣᨴᩦᩉᩥ ᩈᨾᨶ᩠ᨶᩣᨣᨲᩣᨲᩥ ᨳᩮᩁᩣ, ᨾᩉᩣᨠᩔᨸᩣᨴᨿᩮᩣ, ᨲᩮᩈᩴ ᩅᩴᩈᩮᩣ ᩋᨶ᩠ᩅᨿᩮᩣᨲᩥ ᨳᩮᩁᩅᩴᩈᩮᩣ. ᩑᨲᩮᨶ ᨽᩥᨶ᩠ᨶᩃᨴ᩠ᨵᩥᨠᩣᨶᩴ ᩈᨲ᩠ᨲᩁᩈᨽᩮᨴᩣᨶᩴ ᨾᩉᩣᩈᨦ᩠ᨥᩥᨠᩣᨴᩦᨶᩴ ᩅᩴᩈᩴ ᨸᨭᩥᨠ᩠ᨡᩥᨸᨲᩥ, ᨳᩮᩁᩅᩴᩈᨸᩁᩥᨿᩣᨸᨶ᩠ᨶᩣ ᩉᩩᨲ᩠ᩅᩣ ᨸᨶ ᩌᨣᨾᩣᨵᩥᨣᨾᩈᨾ᩠ᨸᨶ᩠ᨶᨲ᩠ᨲᩣ ᨸᨬ᩠ᨬᩣᨸᨩ᩠ᨩᩮᩣᨲᩮᨶ ᨲᩔ ᨳᩮᩁᩅᩴᩈᩔ ᨴᩦᨸᨶᨲᩮᩣ ᨳᩮᩁᩅᩴᩈᨸ᩠ᨸᨴᩦᨸᩣ, ᨸᩩᨻ᩠ᨻᩣᨧᩁᩥᨿᩈᩦᩉᩣ, ᨲᩮᩈᩴ ᨳᩮᩁᩅᩴᩈᨸ᩠ᨸᨴᩦᨸᩣᨶᩴ. ᩋᩈᩴᩉᩦᩁᨲ᩠ᨲᩣ ᨳᩥᩁᩣᨶᩴ. ᩅᩥᨶᨿᨠ᩠ᨠᨾᩮᨲᩥ ᩌᩁᨾ᩠ᨽᩣᨶᩩᩁᩪᨸᩅᨧᨶᨾᩮᨲᩴ, ᨲᩮ ᨸᨶ ᩈᩩᨲ᩠ᨲᩣᨽᩥᨵᨾ᩠ᨾᩮᩈᩩᨸᩥ ᨳᩥᩁᩣ ᩑᩅ.

ᩑᩅᩴ ᩋᨭ᩠ᨮᨠᨳᩣᨧᩁᩥᨿᩣᨶᨾ᩠ᨸᩥ ᨸᨱᩣᨾᩴ ᨴᩔᩮᨲ᩠ᩅᩣ ᩍᨴᩣᨶᩥ ᩈᩴᩅᨱ᩠ᨱᩮᨲᨻ᩠ᨻᨵᨾ᩠ᨾᩅᩥᩈᩮᩈᩔ ᩋᨽᩥᨵᩣᨶᩣᨶᩥᩈᩴᩈᩴ, ᨴᩮᩈᨠᩈᨾ᩠ᨸᨲ᩠ᨲᩥᨿᩮᩣ ᨧ ᨴᩔᩮᨶ᩠ᨲᩮᩣ ‘‘ᨸᩣᨾᩮᩣᨠ᩠ᨡ’’ᨶ᩠ᨲᩥᩌᨴᩥᨾᩣᩉ. ᨲᨲ᩠ᨳ ᨾᩉᩮᩈᩥᨶᩣ ᨿᩴ ᨸᩣᨲᩥᨾᩮᩣᨠ᩠ᨡᩴ ᨸᨠᩣᩈᩥᨲᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨲᨲ᩠ᨳ ᨾᩉᩮᩈᩥᨶᩣᨲᩥ ᨾᩉᨶ᩠ᨲᩮ ᩈᩦᩃᩣᨴᩥᨠᩮ ᨸᨬ᩠ᨧ ᨵᨾ᩠ᨾᨠ᩠ᨡᨶ᩠ᨵᩮ ᩑᩈᩦ ᨣᩅᩮᩈᩦᨲᩥ ᨾᩉᩮᩈᩥ. ᨾᩉᨶ᩠ᨲᩮᩉᩥ ᩑᩈᩥᨲᩮᩣᨲᩥ ᩅᩣ ᨸᩩᨳᩩᨩ᩠ᨩᨶᩈᩮᨡᩣᩈᩮᨡᩍᩈᩦᩉᩥ ᩅᩥᩈᩥᨭ᩠ᨮᨲ᩠ᨲᩣ ᨾᩉᨶ᩠ᨲᩮᩣ ᩍᩈᩦᨲᩥ ᩅᩣ ᨾᩉᩮᩈᩥ, ᩈᨾ᩠ᨾᩣᩈᨾ᩠ᨻᩩᨴ᩠ᨵᩮᩣ, ᨲᩮᨶ ᨾᩉᩮᩈᩥᨶᩣ. ᨸᩣᨲᩥᨾᩮᩣᨠ᩠ᨡᨶ᩠ᨲᩥ ᩈᨲ᩠ᨲᩣᨸᨲ᩠ᨲᩥᨠ᩠ᨡᨶ᩠ᨵᩈᩴᩅᩁᨽᩪᨲᩴ ᩈᩥᨠ᩠ᨡᩣᨸᨴᩈᩦᩃᩴ, ᨲᨴ᩠ᨴᩦᨸᨶᨲᩮᩣ ᩏᨽᨲᩮᩣᩅᩥᨽᨦ᩠ᨣᩈᩩᨲ᩠ᨲᩈᨦ᩠ᨡᩣᨲᩴ ᨣᨶ᩠ᨳᨸᩣᨲᩥᨾᩮᩣᨠ᩠ᨡᨾᩮᩅ ᩅᩣ. ᨠᩥᨾ᩠ᨽᩪᨲᨶ᩠ᨲᩥ ᩌᩉ ‘‘ᨸᩣᨾᩮᩣᨠ᩠ᨡ’’ᨶ᩠ᨲᩥᩌᨴᩥ. ᨸᨾᩩᨡᩮ ᩈᩣᨵᩪᨲᩥ ᨸᨾᩮᩣᨠ᩠ᨡᩴ, ᨸᨾᩮᩣᨠ᩠ᨡᨾᩮᩅ ᨸᩣᨾᩮᩣᨠ᩠ᨡᩴ, ᩅᨩ᩠ᨩᨸᨭᩥᨸᨠ᩠ᨡᨲ᩠ᨲᩣ ᩋᨶᩅᨩ᩠ᨩᩣᨶᩴ ᩈᨾᩣᨵᩥᨸᨬ᩠ᨬᩣᩈᨦ᩠ᨡᩣᨲᩣᨶᩴ ᨸᩁᩥᨲ᩠ᨲᨾᩉᨣ᩠ᨣᨲᩃᩮᩣᨠᩩᨲ᩠ᨲᩁᩣᨶᩴ ᨠᩩᩈᩃᩣᨶᩴ ᨵᨾ᩠ᨾᩣᨶᩴ ᩌᨴᩥ ᨸᨲᩥᨭ᩠ᨮᩣᨽᩪᨲᨶ᩠ᨲᩥ ᩋᨲ᩠ᨳᩮᩣ. ‘‘ᩈᩦᩃᩮ ᨸᨲᩥᨭ᩠ᨮᩣᨿ ᨶᩁᩮᩣ ᩈᨸᨬ᩠ᨬᩮᩣ, ᨧᩥᨲ᩠ᨲᩴ ᨸᨬ᩠ᨬᨬ᩠ᨧ ᨽᩣᩅᨿ’’ᨶ᩠ᨲᩥ (ᩈᩴ. ᨶᩥ. ᪑.᪒᪓, ᪑᪙᪒; ᨸᩮᨭᨠᩮᩣ. ᪒᪒; ᨾᩥ. ᨸ. ᪒.᪑.᪙) ᩉᩥ ᩅᩩᨲ᩠ᨲᩴ. ᨾᩩᨡᨾᩥᩅᩣᨲᩥ ᨾᩩᨡᩴ, ᨴ᩠ᩅᩣᩁᩴ. ᨿᨳᩣ ᩉᩥ ᩈᨲ᩠ᨲᩣᨶᩴ ᨡᨩ᩠ᨩᨽᩮᩣᨩ᩠ᨩᩃᩮᨿ᩠ᨿᨸᩮᨿ᩠ᨿᩅᩈᩮᨶ ᨧᨲᩩᨻ᩠ᨻᩥᨵᩮᩣᨸᩥ ᩌᩉᩣᩁᩮᩣ ᨾᩩᨡᩮᨶ ᨸᩅᩥᩈᩥᨲ᩠ᩅᩣ ᩋᨦ᩠ᨣᨸᨧ᩠ᨧᨦ᩠ᨣᩣᨶᩥ ᨹᩁᨲᩥ, ᩑᩅᩴ ᨿᩮᩣᨣᩥᨶᩮᩣᨸᩥ ᨧᩣᨲᩩᨽᩪᨾᨠᨠᩩᩈᩃᩴ ᩈᩦᩃᨾᩩᨡᩮᨶ ᨸᩅᩥᩈᩥᨲ᩠ᩅᩣ ᩋᨲ᩠ᨳᩈᩥᨴ᩠ᨵᩥᩴ ᩈᨾ᩠ᨸᩣᨴᩮᨲᩥ. ᨲᩮᨶ ᩅᩩᨲ᩠ᨲᩴ ‘‘ᨾᩩᨡᨾᩥᩅᩣᨲᩥ ᨾᩩᨡ’’ᨶ᩠ᨲᩥ. ᩋᨳ ᩅᩣ ᨾᩩᨡᩴ ᨴ᩠ᩅᩣᩁᩴ ᨾᩮᩣᨠ᩠ᨡᨸ᩠ᨸᩅᩮᩈᩣᨿ ᨶᩥᨻ᩠ᨻᩣᨶᩈᨧ᩠ᨨᩥᨠᩥᩁᩥᨿᩣᨿᩣᨲᩥ ᩋᨲ᩠ᨳᩮᩣ. ᩅᩩᨲ᩠ᨲᨬ᩠ᩉᩥ –

‘‘ᩋᩅᩥᨸ᩠ᨸᨭᩥᩈᩣᩁᨲ᩠ᨳᩣᨶᩥ ᨡᩮᩣ, ᩌᨶᨶ᩠ᨴ, ᨠᩩᩈᩃᩣᨶᩥ ᩈᩦᩃᩣᨶᩦ’’ᨲᩥ (ᩋ. ᨶᩥ. ᪑᪑.᪑).

ᨲᨳᩣ –

‘‘ᩋᩅᩥᨸ᩠ᨸᨭᩥᩈᩣᩁᩮᩣ ᨸᩣᨾᩮᩣᨩ᩠ᨩᨲ᩠ᨳᩣᨿ, ᨸᩣᨾᩮᩣᨩ᩠ᨩᩴ ᨸᩦᨲᨲ᩠ᨳᩣᨿ, ᨸᩦᨲᩥ ᨸᩔᨴ᩠ᨵᨲ᩠ᨳᩣᨿ, ᨸᩔᨴ᩠ᨵᩥ ᩈᩩᨡᨲ᩠ᨳᩣᨿ, ᩈᩩᨡᩴ ᩈᨾᩣᨵᨲ᩠ᨳᩣᨿ, ᩈᨾᩣᨵᩥ ᨿᨳᩣᨽᩪᨲᨬᩣᨱᨴᩔᨶᨲ᩠ᨳᩣᨿ, ᨿᨳᩣᨽᩪᨲᨬᩣᨱᨴᩔᨶᩴ ᨶᩥᨻ᩠ᨻᩥᨴᨲ᩠ᨳᩣᨿ, ᨶᩥᨻ᩠ᨻᩥᨴᩣ ᩅᩥᩁᩣᨣᨲ᩠ᨳᩣᨿ, ᩅᩥᩁᩣᨣᩮᩣ ᩅᩥᨾᩩᨲ᩠ᨲᨲ᩠ᨳᩣᨿ, ᩅᩥᨾᩩᨲ᩠ᨲᩥ ᩅᩥᨾᩩᨲ᩠ᨲᩥᨬᩣᨱᨴᩔᨶᨲ᩠ᨳᩣᨿ, ᩅᩥᨾᩩᨲ᩠ᨲᩥᨬᩣᨱᨴᩔᨶᩴ ᩋᨶᩩᨸᩣᨴᩣᨸᩁᩥᨶᩥᨻ᩠ᨻᩣᨶᨲ᩠ᨳᩣᨿᩣ’’ᨲᩥ (ᨸᩁᩥ. ᪓᪖᪖) ᨧ.

ᩑᩅᩴ ᩈᩴᩅᨱ᩠ᨱᩮᨲᨻ᩠ᨻᨵᨾ᩠ᨾᩔ ᩋᨽᩥᨵᩣᨶᩣᨴᩥᩴ ᨴᩔᩮᨲ᩠ᩅᩣ ᩍᨴᩣᨶᩥ ᩈᩴᩅᨱ᩠ᨱᨶᩣᨿ ᨶᩥᨾᩥᨲ᩠ᨲᩴ ᨴᩔᩮᨲᩩᩴ ‘‘ᩈᩪᩁᨲᩮᨶᩣ’’ᨲᩥᩌᨴᩥᨶᩣ ᨧᨲᩩᨲ᩠ᨳᨣᩣᨳᨾᩣᩉ. ᨲᨲ᩠ᨳ ᩈᩪᩁᨲᩮᨶᩣᨲᩥ ᩈᩮᩣᨽᨶᩮ ᩁᨲᩮᩣᨲᩥ ᩈᩪᩁᨲᩮᩣ ᩏ-ᨠᩣᩁᩔ ᨴᩦᨥᩴ ᨠᨲ᩠ᩅᩣ, ᨲᩮᨶ ᩈᩪᩁᨲᩮᨶ, ᩈᩮᩣᨽᨶᩮ ᨠᩣᨿᩥᨠᩅᩣᨧᩈᩥᨠᨠᨾ᩠ᨾᩮ ᩁᨲᩮᨶᩣᨲᩥ ᩋᨲ᩠ᨳᩮᩣ, ᩅᩥᨶᩦᨲᩮᨶᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨶᩥᩅᩣᨲᩮᨶᩣᨲᩥ ᨶᩦᨧᩅᩩᨲ᩠ᨲᩥᨶᩣ. ᩈᩩᨧᩥᩈᩃ᩠ᩃᩮᨡᩅᩩᨲ᩠ᨲᩥᨶᩣᨲᩥ ᩈᩩᨧᩥᨽᩪᨲᩣ ᨠᩥᩃᩮᩈᩈᩃ᩠ᩃᩥᨡᨶᩈᨾᨲ᩠ᨳᩣ ᩅᩩᨲ᩠ᨲᩥ ᨸᨭᩥᨸᨲ᩠ᨲᩥ ᩑᨲᩔᩣᨲᩥ ᩈᩩᨧᩥᩈᩃ᩠ᩃᩮᨡᩅᩩᨲ᩠ᨲᩥ, ᨲᩮᨶ ᩈᩩᨧᩥᩈᩃ᩠ᩃᩮᨡᩅᩩᨲ᩠ᨲᩥᨶᩣ, ᨸᩁᩥᩈᩩᨴ᩠ᨵᩣᨿ ᩋᨸ᩠ᨸᩥᨧ᩠ᨨᩅᩩᨲ᩠ᨲᩥᨿᩣ ᩈᨾᨶ᩠ᨶᩣᨣᨲᩮᨶᩣᨲᩥ ᩋᨲ᩠ᨳᩮᩣ. ᩅᩥᨶᨿᩣᨧᩣᩁᨿᩩᨲ᩠ᨲᩮᨶᩣᨲᩥ ᩅᩣᩁᩥᨲ᩠ᨲᨧᩣᩁᩥᨲ᩠ᨲᩈᩦᩃᩈᨾ᩠ᨸᨶ᩠ᨶᩮᨶ. ᩋᨳ ᩅᩣ ᩅᩥᨶᨿᩮᩣᨲᩥ ᨧᩮᨲ᩠ᨳ ᨸᩣᨲᩥᨾᩮᩣᨠ᩠ᨡᩈᩴᩅᩁᩣᨴᩥᨽᩮᨴᩮᩣ ᩈᩴᩅᩁᩅᩥᨶᨿᩮᩣ. ᩌᨧᩣᩁᩮᩣᨲᩥ ᩌᨧᩣᩁᨣᩮᩣᨧᩁᨶᩥᨴ᩠ᨴᩮᩈᩮ ᩌᨣᨲᩈᨾᨱᩈᩣᩁᩩᨸ᩠ᨸᩣᨧᩣᩁᩮᩣ. ᩈᩮᩣᨱᨲ᩠ᨳᩮᩁᩮᨶᩣᨲᩥ ᩑᨲ᩠ᨳ ᩈᩮᩣᨱᩮᩣᨲᩥ ᨲᩔ ᨶᩣᨾᩴ. ᨳᩥᩁᩮᩉᩥ ᩈᩦᩃᨠ᩠ᨡᨶ᩠ᨵᩣᨴᩦᩉᩥ ᩈᨾᨶ᩠ᨶᩣᨣᨲᨲ᩠ᨲᩣ ᨳᩮᩁᩮᩣ. ᨿᩣᨧᩥᨲᩮᩣᨲᩥ ᩋᨽᩥᨿᩣᨧᩥᨲᩮᩣ. ᨳᩮᩁᩮᩣ ᩉᩥ ᨸᩣᨲᩥᨾᩮᩣᨠ᩠ᨡᩔ ᨣᨾ᩠ᨽᩦᩁᨲᩣᨿ ᨴᩩᩁᩅᨣᩣᩉᨲᩴ, ᩌᨧᩁᩥᨿᩔ ᨧ ᨲᩴᩈᩴᩅᨱ᩠ᨱᨶᩣᨿ ᩈᩣᨾᨲ᩠ᨳᩥᨿᩴ ᨬᨲ᩠ᩅᩣ ‘‘ᨸᩣᨲᩥᨾᩮᩣᨠ᩠ᨡᩔ ᨲᨿᩣ ᩋᨲ᩠ᨳᩈᩴᩅᨱ᩠ᨱᨶᩣ ᨠᩣᨲᨻ᩠ᨻᩣ. ᩑᩅᨬ᩠ᩉᩥ ᩈᩣᩈᨶᩔ ᩈᩩᨧᩥᩁᨭ᩠ᨮᩥᨲᩥᨠᨲᩣ ᩉᩮᩣᨲᩦ’’ᨲᩥ ᩈᩣᨶᩥᩈᩴᩈᨣᩣᩁᩅᩮᨶ ᨿᩣᨧᨶᩴ ᩋᨠᩣᩈᩥ. ᨲᨴᩔ ᨿᩣᨧᨶᩴ ᩋᨲ᩠ᨲᨶᩮᩣ ᩈᩴᩅᨱ᩠ᨱᨶᩣᨿ ᨶᩥᨴᩣᨶᨽᩪᨲᩴ ᨴᩔᩮᨶ᩠ᨲᩮᩣ ‘‘ᨿᩣᨧᩥᨲᩮᩣ’’ᨲᩥ ᩌᩉ.

ᩑᨲ᩠ᨳ ᨧ ‘‘ᩈᩪᩁᨲᩮᨶᩣ’’ᨲᩥ ᩍᨾᩥᨶᩣᩔ ᩈᩮᩣᩁᨧ᩠ᨧᩴ ᩅᩩᨧ᩠ᨧᨲᩥ. ‘‘ᨶᩥᩅᩣᨲᩮᨶᩣ’’ᨲᩥ ᩍᨾᩥᨶᩣ ᨶᩦᨧᨾᨶᨲᩣ ᨶᩥᩅᩣᨲᩅᩩᨲ᩠ᨲᩥᨲᩣ, ᨿᩣᨿ ᨶᩥᩅᩣᨲᩅᩩᨲ᩠ᨲᩥᨲᩣᨿ ᩈᨾᨶ᩠ᨶᩣᨣᨲᩮᩣ ᨸᩩᨣ᩠ᨣᩃᩮᩣ ᨶᩥᩉᨲᨾᩣᨶᩮᩣ, ᨶᩥᩉᨲᨴᨸ᩠ᨸᩮᩣ, ᨸᩣᨴᨸᩩᨬ᩠ᨨᨶᨧᩮᩣᩊᨠᩈᨾᩮᩣ, ᨽᩥᨶ᩠ᨶᩅᩥᩈᩣᨱᩪᩈᨽᩈᨾᩮᩣ, ᩏᨴ᩠ᨵᨭᨴᩣᨮᩈᨸ᩠ᨸᩈᨾᩮᩣ ᨧ ᩉᩩᨲ᩠ᩅᩣ ᩈᨱ᩠ᩉᩮᩣ ᩈᨡᩥᩃᩮᩣ ᩈᩩᨡᩈᨾ᩠ᨽᩣᩈᩮᩣ ᩉᩮᩣᨲᩥ. ‘‘ᩈᩩᨧᩥᩈᩃ᩠ᩃᩮᨡᩅᩩᨲ᩠ᨲᩥᨶᩣ’’ᨲᩥ ᩍᨾᩥᨶᩣ ᩍᨶ᩠ᨴᩕᩥᨿᩈᩴᩅᩁᨸᨧ᩠ᨧᨿᩈᨶ᩠ᨶᩥᩔᩥᨲᩌᨩᩦᩅᨸᩣᩁᩥᩈᩩᨴ᩠ᨵᩥᩈᩦᩃᩴ. ‘‘ᩅᩥᨶᨿᩣᨧᩣᩁᨿᩩᨲ᩠ᨲᩮᨶᩣ’’ᨲᩥ ᩍᨾᩥᨶᩣ ᨸᩣᨲᩥᨾᩮᩣᨠ᩠ᨡᩈᩴᩅᩁᩈᩦᩃᩴ ᩅᩩᨲ᩠ᨲᨶ᩠ᨲᩥ ᩅᩮᨴᩥᨲᨻ᩠ᨻᩴ. ᩑᩅᨾᨶᩮᨠᨣᩩᨱᩮᩉᩥ ᨲᩔ ᩋᨽᩥᨲ᩠ᨳᩅᨶᩴ ᨿᨳᩣᩅᩩᨲ᩠ᨲᨣᩩᨱᩈᨾᨶ᩠ᨶᩣᨣᨲᩔ ᩈᨻᩕᩉ᩠ᨾᨧᩣᩁᩥᨶᩮᩣ ᩋᨩ᩠ᨫᩮᩈᨶᩴ ᨶ ᩈᨠ᩠ᨠᩣ ᨸᨭᩥᨻᩣᩉᩥᨲᩩᨶ᩠ᨲᩥ ᨸᩁᨾᨣᨾ᩠ᨽᩦᩁᩔᩣᨸᩥ ᨸᩣᨲᩥᨾᩮᩣᨠ᩠ᨡᩔ ᩋᨲ᩠ᨳᩈᩴᩅᨱ᩠ᨱᨶᩣᨿᩴ ᨸᩅᨲ᩠ᨲᩣᨲᩥ ᨴᩔᨶᨲ᩠ᨳᩴ. ᨠᩥᨬ᩠ᨧ – ᨲᩣᨴᩥᩈᩔ ᩋᨩ᩠ᨫᩮᩈᨶᩴ ᨶᩥᩔᩣᨿ ᨠᩁᩥᨿᨾᩣᨶᩣ ᩋᨲ᩠ᨳᩈᩴᩅᨱ᩠ᨱᨶᩣ ᨲᩔ ᩋᨩ᩠ᨫᩮᩈᨶᩣᨵᩥᨸᨧ᩠ᨧᩮᨶ, ᨾᨾᨬ᩠ᨧ ᩏᩔᩣᩉᩈᨾ᩠ᨸᨲ᩠ᨲᩥᨿᩣ ᨶ ᨧᩥᩁᩮᨶ ᨸᩁᩥᨿᩮᩣᩈᩣᨶᩴ ᨣᨧ᩠ᨨᨲᩦᨲᩥ ᨠᨲᨶ᩠ᨲᩥ ᩅᩮᨴᩥᨲᨻ᩠ᨻᩴ.

ᩑᩅᩴ ᩈᩴᩅᨱ᩠ᨱᨶᩣᨿ ᨶᩥᨾᩥᨲ᩠ᨲᩴ ᨴᩔᩮᨲ᩠ᩅᩣ ᩍᨴᩣᨶᩥ ᨲᩔᩅᨶᩮ ᩈᩮᩣᨲᩩᨩᨶᩔᩣᨴᩁᩴ ᨩᨶᩮᨲᩩᩴ ᨲᨸ᩠ᨸᨿᩮᩣᨩᨶᨠᩁᨱᨸ᩠ᨸᨠᩣᩁᨶᩥᩔᨿᩣᨽᩥᨵᩣᨶᩣᨴᩥᩴ ᨴᩔᩮᨶ᩠ᨲᩮᩣ ‘‘ᨲᨲ᩠ᨳᩣ’’ᨲᩥᩌᨴᩥᨣᩣᨳᩣᨴ᩠ᩅᨿᨾᩣᩉ. ᨲᨲ᩠ᨳ ᨲᨲ᩠ᨳᩣᨲᩥ ‘‘ᨿᩴ ᨾᩉᩮᩈᩥᨶᩣ ᨸᩣᨲᩥᨾᩮᩣᨠ᩠ᨡᩴ ᨸᨠᩣᩈᩥᨲ’’ᨶ᩠ᨲᩥ ᩅᩩᨲ᩠ᨲᩴ, ᨲᩈ᩠ᨾᩥᩴ ᨸᩣᨲᩥᨾᩮᩣᨠ᩠ᨡᩮ. ᩈᨬ᩠ᨩᩣᨲᨠᨦ᩠ᨡᩣᨶᨶ᩠ᨲᩥ ᨸᨴᨸᨴᨲ᩠ᨳᩅᩥᨶᩥᨧ᩠ᨨᨿᩅᩈᩮᨶ ᩈᨬ᩠ᨩᩣᨲᨠᨦ᩠ᨡᩣᨶᩴ, ᩈᨾᩩᨸ᩠ᨸᨶ᩠ᨶᩈᩴᩈᨿᩣᨶᨶ᩠ᨲᩥ ᩋᨲ᩠ᨳᩮᩣ. ᨠᨦ᩠ᨡᩣᩅᩥᨲᩁᨱᨲ᩠ᨳᩣᨿᩣᨲᩥ ᨿᨳᩣᩅᩩᨲ᩠ᨲᩈᩴᩈᨿᩔ ᩋᨲᩥᨠ᩠ᨠᨾᨶᨲ᩠ᨳᩣᨿ. ᨲᩔᩣᨲᩥ ᨸᩣᨲᩥᨾᩮᩣᨠ᩠ᨡᩔ. ᩅᨱ᩠ᨱᩦᨿᨲᩥ ᩋᨲ᩠ᨳᩮᩣ ᨠᨳᩦᨿᨲᩥ ᩑᨲᩣᨿᩣᨲᩥ ᩅᨱ᩠ᨱᨶᩣ, ᩋᨭ᩠ᨮᨠᨳᩣ, ᨲᩴ ᩅᨱ᩠ᨱᨶᩴ. ᩍᨾᩔ ᨧ ‘‘ᩅᨱ᩠ᨱᨿᩥᩔᩣᨾᩦ’’ᨲᩥ ᩍᨾᩥᨶᩣ ᩈᨾ᩠ᨻᨶ᩠ᨵᩮᩣ. ᨠᩥᩴᨽᩪᨲᨶ᩠ᨲᩥ ᩌᩉ ‘‘ᨸᩁᩥᨸᩩᨱ᩠ᨱᩅᩥᨶᩥᨧ᩠ᨨᨿ’’ᨶ᩠ᨲᩥᩌᨴᩥ. ᨸᩁᩥᨸᩩᨱ᩠ᨱᩅᩥᨶᩥᨧ᩠ᨨᨿᨶ᩠ᨲᩥ ᨡᨶ᩠ᨵᨠᨸᩁᩥᩅᩣᩁᨸᨴᨽᩣᨩᨶᩣᨴᩥᩅᩈᩮᨶ ᩋᩈᩣᨵᩣᩁᨱᩅᩥᨶᩥᨧ᩠ᨨᨿᩔ ᨧ ᨶᩥᨴᩣᨶᩣᨴᩥᩅᩈᩮᨶ ᩈᨲ᩠ᨲᩁᩈᨸ᩠ᨸᨽᩮᨴᩔ ᨧ ᩈᨻ᩠ᨻᩈᩥᨠ᩠ᨡᩣᨸᨴᩈᩣᨵᩣᩁᨱᩅᩥᨶᩥᨧ᩠ᨨᨿᩔ ᨸᨠᩣᩈᨶᨲᩮᩣ ᩈᨾ᩠ᨸᩩᨱ᩠ᨱᩅᩥᨶᩥᨧ᩠ᨨᨿᩴ.

ᨾᩉᩣᩅᩥᩉᩣᩁᩅᩣᩈᩦᨶᨶ᩠ᨲᩥ ᨾᩉᩣᨾᩮᨥᩅᨶᩩᨿ᩠ᨿᩣᨶᨽᩪᨾᩥᨽᩣᨣᩮ ᨸᨲᩥᨭ᩠ᨮᩥᨲᩮᩣ ᩅᩥᩉᩣᩁᩮᩣ ᨾᩉᩣᩅᩥᩉᩣᩁᩮᩣ, ᨿᩮᩣ ᩈᨲ᩠ᨳᩩᨶᩮᩣ ᨾᩉᩣᨻᩮᩣᨵᩥᨶᩣ ᩅᩥᨽᩪᩈᩥᨲᩮᩣ, ᨲᨲ᩠ᨳ ᩅᩈᨶ᩠ᨲᩥ ᩈᩦᩃᩮᨶᩣᨲᩥ ᨾᩉᩣᩅᩥᩉᩣᩁᩅᩣᩈᩥᨶᩮᩣ, ᨲᩮᩈᩴ ᨾᩉᩣᩅᩥᩉᩣᩁᩅᩣᩈᩦᨶᩴ. ᩅᩣᨧᨶᩣᨾᨣ᩠ᨣᨶᩥᩔᩥᨲᨶ᩠ᨲᩥ ᨠᨳᩣᨾᨣ᩠ᨣᨶᩥᩔᩥᨲᩴ, ᩋᨭ᩠ᨮᨠᨳᩣᨶᩥᩔᩥᨲᨶ᩠ᨲᩥ ᩋᨲ᩠ᨳᩮᩣ, ᨾᩉᩣᩅᩥᩉᩣᩁᩅᩣᩈᩦᨶᩴ ᩈᩦᩉᩊᨭ᩠ᨮᨠᨳᩣᨶᨿᩴ ᩍᨵ ᨶᩥᩔᩣᨿᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᩅᨱ᩠ᨱᨿᩥᩔᩣᨾᩦᨲᩥ ᨸᩅᨲ᩠ᨲᨿᩥᩔᩣᨾᩥ. ᨶᩣᨾᩮᨶᩣᨲᩥ ᩋᨲ᩠ᨲᨶᩮᩣ ᨣᩩᨱᨶᩣᨾᩮᨶ. ᨠᨦ᩠ᨡᩣᩅᩥᨲᩁᨶ᩠ᨲᩥ ᩑᨲᩣᨿᩣᨲᩥ ᨠᨦ᩠ᨡᩣᩅᩥᨲᩁᨱᩦ, ᨲᩴ ᨠᨦ᩠ᨡᩣᩅᩥᨲᩁᨱᩥᩴ. ᩈᩩᨽᨶ᩠ᨲᩥ ᩋᨲ᩠ᨳᨻ᩠ᨿᨬ᩠ᨩᨶᩈᨾ᩠ᨸᨶ᩠ᨶᨲ᩠ᨲᩣ ᩈᩩᨶ᩠ᨴᩁᩴ, ᩈᨴ᩠ᨴᩃᨠ᩠ᨡᨱᩈᩩᨽᨲᩮᩣ, ᩅᩥᨶᩥᨧ᩠ᨨᨿᩈᩩᨽᨲᩮᩣ, ᩅᩥᨬ᩠ᨬᩮᨿ᩠ᨿᩈᩩᨽᨲᩮᩣ ᨧ ᩈᩩᨽᩴ ᨸᩁᩥᩈᩩᨴ᩠ᨵᩴ. ᩑᨲ᩠ᨳ ᨧ ‘‘ᨠᨦ᩠ᨡᩣᩅᩥᨲᩁᨱᨲ᩠ᨳᩣᨿᩣ’’ᨲᩥ ᩍᨾᩥᨶᩣ ᨸᨿᩮᩣᨩᨶᩴ ᨴᩔᩮᨲᩥ, ᨸᩩᩁᩥᨸᩩᨱ᩠ᨱᩅᩥᨶᩥᨧ᩠ᨨᨿ’’ᨶ᩠ᨲᩥ ᩍᨾᩥᨶᩣ ᩈᩴᩅᨱ᩠ᨱᨶᩣᨸ᩠ᨸᨠᩣᩁᩴ, ‘‘ᨾᩉᩣᩅᩥᩉᩣᩁᩅᩣᩈᩦᨶᩴ ᩅᩣᨧᨶᩣᨾᨣ᩠ᨣᨶᩥᩔᩥᨲ’’ᨶ᩠ᨲᩥ ᩍᨾᩥᨶᩣ ᩈᩴᩅᨱ᩠ᨱᨶᩣᨿ ᨶᩥᩔᨿᩅᩥᩈᩩᨴ᩠ᨵᩥᩴ ᨶᩥᨠᩣᨿᨶ᩠ᨲᩁᩃᨴ᩠ᨵᩥᩈᨦ᩠ᨠᩁᨴᩮᩣᩈᩅᩥᩅᨩ᩠ᨩᨶᨲᩮᩣ, ‘‘ᩅᨱ᩠ᨱᨿᩥᩔᩣᨾᩦ’’ᨲᩥ ᩍᨾᩥᨶᩣ ᩋᨲ᩠ᨲᨶᩮᩣ ᩋᨩ᩠ᨫᩣᩈᨿᩴ ᨴᩔᩮᨲᩦᨲᩥ ᨴᨭ᩠ᨮᨻ᩠ᨻᩴ. ‘‘ᩅᨲ᩠ᨲᨿᩥᩔᩣᨾᩦ’’ᨲᩥᨸᩥ ᨸᩣᨮᩮᩣ.

ᨣᨶ᩠ᨳᩣᩁᨾ᩠ᨽᨠᨳᩣᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨶᩥᨴᩣᨶᩅᨱ᩠ᨱᨶᩣ

ᩑᩅᩴ ᩁᨲᨶᨲ᩠ᨲᨿᨸᨱᩣᨾᩣᨴᩥᩈᩉᩥᨲᩴ ᩈᨬ᩠ᨬᩣᨴᩥᨠᩴ ᨴᩔᩮᨲ᩠ᩅᩣ ᩍᨴᩣᨶᩥ ‘‘ᨸᩣᨲᩥᨾᩮᩣᨠ᩠ᨡᩔ ᩅᨱ᩠ᨱᨶᩴ ᩅᨱ᩠ᨱᨿᩥᩔᩣᨾᩦ’’ᨲᩥ ᩅᩩᨲ᩠ᨲᨲ᩠ᨲᩣ ᨸᩣᨲᩥᨾᩮᩣᨠ᩠ᨡᩴ ᨲᩣᩅ ᩅᨧᨶᨲ᩠ᨳᨲᩮᩣ, ᩈᩁᩪᨸᨽᩮᨴᨲᩮᩣ, ᨣᨶ᩠ᨳᨽᩮᨴᨲᩮᩣ, ᩏᨴ᩠ᨴᩮᩈᩅᩥᨽᩣᨣᨲᩮᩣ, ᩏᨴ᩠ᨴᩮᩈᨸᩁᩥᨧ᩠ᨨᩮᨴᨲᩮᩣ ᨧ ᩅᩅᨲ᩠ᨳᨸᩮᨲ᩠ᩅᩣ ᨲᨴᩩᨴ᩠ᨴᩮᩈᨠ᩠ᨠᨾᩮᨶᩣᨿᩴ ᩅᨱ᩠ᨱᨶᩣ ᨽᩅᩥᩔᨲᩦᨲᩥ ᨴᩔᩮᨲᩩᩴ ‘‘ᨲᨲ᩠ᨳ ᨸᩣᨲᩥᨾᩮᩣᨠ᩠ᨡ’’ᨶ᩠ᨲᩥᩌᨴᩥ ᩌᩁᨴ᩠ᨵᩴ.

ᨲᨲ᩠ᨳ ᨲᨲ᩠ᨳᩣᨲᩥ ᨲᩈ᩠ᨾᩥᩴ ᨣᩣᨳᩣᨸᨴᩮ. ᨸᩋᨲᩥᨾᩮᩣᨠ᩠ᨡᨶ᩠ᨲᩥ ᨸᨠᩣᩁᨲᩮᩣ ᩋᨲᩥᩅᩥᨿ ᩈᩦᩃᩮᩈᩩ ᨾᩩᨡᨽᩪᨲᩴ. ᩋᨲᩥᨸᨾᩮᩣᨠ᩠ᨡᨶ᩠ᨲᩥ ᨲᨾᩮᩅ ᨸᨴᩴ ᩏᨸᩈᨣ᩠ᨣᨻ᩠ᨿᨲ᩠ᨲᨿᩮᨶ ᩅᨴᨲᩥ. ᩋᨳ ᩅᩣ ᨸ ᩋᨲᩥ ᨾᩮᩣᨠ᩠ᨡᨶ᩠ᨲᩥ ᨸᨴᨧ᩠ᨨᩮᨴᩮᩣ, ᨲᩔ ᩏᨸᩈᨣ᩠ᨣᨻ᩠ᨿᨲ᩠ᨲᨿᩮᨶᨲ᩠ᨳᨾᩣᩉ ‘‘ᩋᨲᩥᨸᨾᩮᩣᨠ᩠ᨡ’’ᨶ᩠ᨲᩥ. ᩑᩅᩴ ᨸᨽᩮᨴᨲᩮᩣ ᨸᨴᩅᨱ᩠ᨱᨶᩴ ᨠᨲ᩠ᩅᩣ ᩈᨴ᩠ᨴᨲ᩠ᨳᨲᩮᩣ ᩅᨴᨲᩥ ‘‘ᩋᨲᩥᩈᩮᨭ᩠ᨮᩴ ᩋᨲᩥᩏᨲ᩠ᨲᨾᨶ᩠ᨲᩥ ᩋᨲ᩠ᨳᩮᩣ’’ᨲᩥ. ᩑᨲ᩠ᨳ ᨧ ᩈᩦᩃᨸᩣᨲᩥᨾᩮᩣᨠ᩠ᨡᩴ ᩈᨻ᩠ᨻᨣᩩᨱᩣᨶᩴ ᨾᩪᩃᨽᩣᩅᨲᩮᩣ ᩈᩮᨭ᩠ᨮᩴ, ᨣᨶ᩠ᨳᨸᩣᨲᩥᨾᩮᩣᨠ᩠ᨡᩴ ᨸᨶ ᩈᩮᨭ᩠ᨮᨣᩩᨱᩈᩉᨧᩁᨱᨲᩮᩣ ᩈᩮᨭ᩠ᨮᨶ᩠ᨲᩥ ᩅᩮᨴᩥᨲᨻ᩠ᨻᩴ. ᩏᨲ᩠ᨲᨾᨶ᩠ᨲᩥ ᩑᨲ᩠ᨳᩣᨸᩥ ᩑᩈᩮᩅ ᨶᨿᩮᩣ. ᩍᨲᩦᨲᩥ ᩑᩅᩴ. ᩍᨾᩥᨶᩣ ᨿᨳᩣᩅᩩᨲ᩠ᨲᩅᨧᨶᨲ᩠ᨳᩴ ᨶᩥᨴᩔᩮᨲᩥ. ᨶᩥᨴᩔᨶᨲ᩠ᨳᩮᩣ ᩉᩥ ᩋᨿᩴ ᩍᨲᩥ-ᩈᨴ᩠ᨴᩮᩣ ‘‘ᩈᨻ᩠ᨻᨾᨲ᩠ᨳᩦᨲᩥ ᨡᩮᩣ, ᨠᨧ᩠ᨧᩣᨶ, ᩋᨿᨾᩮᨠᩮᩣ ᩋᨶ᩠ᨲᩮᩣ, ᩈᨻ᩠ᨻᩴ ᨶᨲ᩠ᨳᩦᨲᩥ ᨡᩮᩣ, ᨠᨧ᩠ᨧᩣᨶ, ᩋᨿᩴ ᨴᩩᨲᩥᨿᩮᩣ ᩋᨶ᩠ᨲᩮᩣ’’ᨲᩥᩌᨴᩦᩈᩩ (ᩈᩴ. ᨶᩥ. ᪒.᪑᪕; ᪓.᪙᪐) ᩅᩥᨿ. ᩍᨾᩥᨶᩣᨲᩥ ᩌᩈᨶ᩠ᨶᨸᨧ᩠ᨧᨠ᩠ᨡᩅᨧᨶᩴ ᩍᨲᩥ-ᩈᨴ᩠ᨴᩮᨶ ᩋᨶᨶ᩠ᨲᩁᨶᩥᨴᩔᩥᨲᩔ, ᨸᨭᩥᨣ᩠ᨣᩣᩉᨠᩮᩉᩥ ᨧ ᩈᩮᩣᨲᩅᩥᨬ᩠ᨬᩣᨱᩣᨴᩥᩅᩦᨳᩥᨿᩣ ᨸᨭᩥᨸᨶ᩠ᨶᩔ ᩅᨧᨶᨲ᩠ᨳᩔ ᩅᨧᨶᨲᩮᩣ. ᩋᨳ ᩅᩣ ᩍᨾᩥᨶᩣᨲᩥ ᩌᩈᨶ᩠ᨶᨸᨧ᩠ᨧᨠ᩠ᨡᨽᩣᩅᨠᩁᨱᩅᨧᨶᩴ ᨿᨳᩣᩅᩩᨲ᩠ᨲᩔ ᩅᨧᨶᨲ᩠ᨳᩔ ᩋᨽᩥᨾᩩᨡᩦᨠᩁᨱᨲᩮᩣ. ᩅᨧᨶᨲ᩠ᨳᩮᨶᩣᨲᩥ ‘‘ᩋᨲᩥᩈᩮᨭ᩠ᨮ’’ᨶ᩠ᨲᩥ ᩈᨴ᩠ᨴᨲ᩠ᨳᩮᨶ. ᩑᨠᩅᩥᨵᨾ᩠ᨸᩦᨲᩥ ᩑᨠᨠᩮᩣᨭ᩠ᨮᩣᩈᨾ᩠ᨸᩥ. ᩈᩦᩃᨣᨶ᩠ᨳᨽᩮᨴᨲᩮᩣ ᨴᩩᩅᩥᨵᩴ ᩉᩮᩣᨲᩦᨲᩥ ᨸᩩᨶ ᩈᩦᩃᨣᨶ᩠ᨳᩈᨦ᩠ᨡᩣᨲᩮᨶ ᨸᨽᩮᨴᩮᨶ ᨴᩩᩅᩥᨵᩴ ᩉᩮᩣᨲᩥ, ᩈᩦᩃᨸᩣᨲᩥᨾᩮᩣᨠ᩠ᨡᩴ, ᨣᨶ᩠ᨳᨸᩣᨲᩥᨾᩮᩣᨠ᩠ᨡᨬ᩠ᨧᩣᨲᩥ ᨴᩩᩅᩥᨵᩴ ᩉᩮᩣᨲᩦᨲᩥ ᩋᨲ᩠ᨳᩮᩣ.

ᩍᨴᩣᨶᩥ ᨲᨴᩩᨽᨿᩔᩣᨸᩥ ᩈᩩᨲ᩠ᨲᩮ ᩌᨣᨲᨽᩣᩅᩴ ᨴᩔᩮᨲᩩᩴ ‘‘ᨲᨳᩣ ᩉᩦ’’ᨲᩥᩌᨴᩥ ᩅᩩᨲ᩠ᨲᩴ. ᨲᨲ᩠ᨳ ᨸᩣᨲᩥ ᩁᨠ᩠ᨡᨲᩦᨲᩥ ᨸᩣᨲᩥ, ᨲᩴ ᨾᩮᩣᨠ᩠ᨡᩮᨲᩥ ᨾᩮᩣᨧᩮᨲᩥ ᩌᨸᩣᨿᩥᨠᩣᨴᩦᩉᩥ ᨴᩩᨠ᩠ᨡᩮᩉᩦᨲᩥ ᨸᩣᨲᩥᨾᩮᩣᨠ᩠ᨡᩴ, ᩈᩴᩅᩁᨱᩴ ᩈᩴᩅᩁᩮᩣ, ᨠᩣᨿᩅᩣᨧᩣᩉᩥ ᩋᩅᩦᨲᩥᨠ᩠ᨠᨾᩮᩣ, ᨸᩣᨲᩥᨾᩮᩣᨠ᩠ᨡᨾᩮᩅ ᩈᩴᩅᩁᩮᩣ ᨸᩣᨲᩥᨾᩮᩣᨠ᩠ᨡᩈᩴᩅᩁᩮᩣ, ᨸᩣᨲᩥᨾᩮᩣᨠ᩠ᨡᩈᩴᩅᩁᩮᨶ ᩈᩴᩅᩩᨲᩮᩣ ᩈᨾᨶ᩠ᨶᩣᨣᨲᩮᩣ ᨸᩣᨲᩥᨾᩮᩣᨠ᩠ᨡᩈᩴᩅᩁᩈᩴᩅᩩᨲᩮᩣ. ᩅᩥᩉᩁᨲᩦᨲᩥ ᩅᨲ᩠ᨲᨲᩥ.

ᩌᨴᩥᨾᩮᨲᨶ᩠ᨲᩥ ᩑᨲᩴ ᩈᩥᨠ᩠ᨡᩣᨸᨴᩈᩦᩃᩴ ᨸᩩᨻ᩠ᨻᩩᨸ᩠ᨸᨲ᩠ᨲᩥᩋᨲ᩠ᨳᩮᨶ ᩌᨴᩥ. ᩅᩩᨲ᩠ᨲᨾ᩠ᨸᩥ ᨧᩮᨲᩴ –

‘‘ᨲᩈ᩠ᨾᩣᨲᩥᩉ ᨲ᩠ᩅᩴ, ᩏᨲ᩠ᨲᩥᨿ, ᩌᨴᩥᨾᩮᩅ ᩅᩥᩈᩮᩣᨵᩮᩉᩥ ᨠᩩᩈᩃᩮᩈᩩ ᨵᨾ᩠ᨾᩮᩈᩩ. ᨠᩮᩣ ᨧᩣᨴᩥ ᨠᩩᩈᩃᩣᨶᩴ ᨵᨾ᩠ᨾᩣᨶᩴ? ᩈᩦᩃᨬ᩠ᨧ ᩈᩩᩅᩥᩈᩩᨴ᩠ᨵᩴ, ᨴᩥᨭ᩠ᨮᩥ ᨧ ᩏᨩᩩᨠᩣ’’ᨲᩥ (ᩈᩴ. ᨶᩥ. ᪕.᪓᪘᪒).

ᨿᨳᩣ ᩉᩥ ᨶᨣᩁᩅᨯ᩠ᨰᨠᩦ ᨶᨣᩁᩴ ᨾᩣᨸᩮᨲᩩᨠᩣᨾᩮᩣ ᨸᨮᨾᩴ ᨶᨣᩁᨭ᩠ᨮᩣᨶᩴ ᩈᩮᩣᨵᩮᨲᩥ, ᨲᨲᩮᩣ ᩋᨸᩁᨽᩣᨣᩮ ᩅᩦᨳᩥᨧᨲᩩᨠ᩠ᨠᩈᩥᨦ᩠ᨥᩣᨭᨠᩣᨴᩥᨸᩁᩥᨧ᩠ᨨᩮᨴᩮᨶ ᩅᩥᨽᨩᩥᨲ᩠ᩅᩣ ᨶᨣᩁᩴ ᨾᩣᨸᩮᨲᩥ, ᨿᨳᩣ ᩅᩣ ᨸᨶ ᩁᨩᨠᩮᩣ ᨸᨮᨾᩴ ᨲᩦᩉᩥ ᨡᩣᩁᩮᩉᩥ ᩅᨲ᩠ᨳᩴ ᨵᩮᩣᩅᩥᨲ᩠ᩅᩣ ᨸᩁᩥᩈᩩᨴ᩠ᨵᩮ ᩅᨲ᩠ᨳᩮ ᨿᨴᩥᨧ᩠ᨨᨠᩴ ᩁᨦ᩠ᨣᨩᩣᨲᩴ ᩏᨸᨶᩮᨲᩥ, ᨿᨳᩣ ᩅᩣ ᨸᨶ ᨨᩮᨠᩮᩣ ᨧᩥᨲ᩠ᨲᨠᩣᩁᩮᩣ ᩁᩪᨸᩴ ᩃᩥᨡᩥᨲᩩᨠᩣᨾᩮᩣ ᩌᨴᩥᨲᩮᩣᩅ ᨽᩥᨲ᩠ᨲᩥᨸᩁᩥᨠᨾ᩠ᨾᩴ ᨠᩁᩮᩣᨲᩥ, ᨲᨲᩮᩣ ᩋᨸᩁᨽᩣᨣᩮ ᩁᩪᨸᩴ ᩈᨾᩩᨭ᩠ᨮᩣᨸᩮᨲᩥ, ᩑᩅᨾᩮᩅ ᨿᩮᩣᨣᩣᩅᨧᩁᩮᩣ ᩌᨴᩥᨲᩮᩣᩅ ᩈᩦᩃᩴ ᩅᩥᩈᩮᩣᨵᩮᨲ᩠ᩅᩣ ᩋᨸᩁᨽᩣᨣᩮ ᩈᨾᨳᩅᩥᨸᩔᨶᩣᨴᨿᩮᩣ ᨵᨾ᩠ᨾᩮ ᩈᨧ᩠ᨨᩥᨠᩁᩮᩣᨲᩥ. ᨲᩈ᩠ᨾᩣ ᩈᩦᩃᩴ ‘‘ᩌᨴᩦ’’ᨲᩥ ᩅᩩᨲ᩠ᨲᩴ. ‘‘ᨾᩩᨡᨾᩮᨲ’’ᨶ᩠ᨲᩥᩌᨴᩦᨶᩥ ᩅᩩᨲ᩠ᨲᨲ᩠ᨳᩣᨶᩮᩅ. ᩌᨴᩥᩈᨴ᩠ᨴᩮᨶ ‘‘ᨸᩣᨲᩥᨾᩮᩣᨠ᩠ᨡᩮ ᨧ ᩈᩴᩅᩁᩮᩣ’’ᨲᩥᩌᨴᩥᨸᩣᩊᩥᩴ (ᨴᩦ. ᨶᩥ. ᪒.᪙᪐; ᨵ. ᨸ. ᪑᪘᪕) ᩈᨦ᩠ᨣᨱ᩠ᩉᩣᨲᩥ.

ᩈᩦᩃᨶ᩠ᨲᩥ ᨧᩣᩁᩥᨲ᩠ᨲᩅᩣᩁᩥᨲ᩠ᨲᩅᩈᩮᨶ ᨴᩩᩅᩥᨵᩴ ᩅᩥᨶᨿᨸᩥᨭᨠᨸᩁᩥᨿᩣᨸᨶ᩠ᨶᩴ ᩈᩥᨠ᩠ᨡᩣᨸᨴᩈᩦᩃᩴ, ᨵᨾ᩠ᨾᨲᩮᩣ ᨸᨶ ᩈᩦᩃᩴ ᨶᩣᨾ ᨸᩣᨱᩣᨲᩥᨸᩣᨲᩣᨴᩦᩉᩥ ᩅᩣ ᩅᩥᩁᨾᨶ᩠ᨲᩔ, ᩅᨲ᩠ᨲᨸᨭᩥᨸᨲ᩠ᨲᩥᩴ ᩅᩣ ᨸᩪᩁᩮᨶ᩠ᨲᩔ ᨧᩮᨲᨶᩣᨴᨿᩮᩣ ᨵᨾ᩠ᨾᩣ ᩅᩮᨴᩥᨲᨻ᩠ᨻᩣ. ᩅᩩᨲ᩠ᨲᨬ᩠ᩉᩮᨲᩴ ᨸᨭᩥᩈᨾ᩠ᨽᩥᨴᩣᨿᩴ ‘‘ᨠᩥᩴ ᩈᩦᩃᨶ᩠ᨲᩥ ᨧᩮᨲᨶᩣ ᩈᩦᩃᩴ ᨧᩮᨲᩈᩥᨠᩴ ᩈᩦᩃᩴ ᩈᩴᩅᩁᩮᩣ ᩈᩦᩃᩴ ᩋᩅᩦᨲᩥᨠ᩠ᨠᨾᩮᩣ ᩈᩦᩃ’’ᨶ᩠ᨲᩥ (ᨸᨭᩥ. ᨾ. ᪑.᪓᪙) ‘‘ᩏᨽᨿᩣᨶᩥ ᨡᩮᩣ ᨸᨶᩔ ᨸᩣᨲᩥᨾᩮᩣᨠ᩠ᨡᩣᨶᩦ’’ᨲᩥ ᨽᩥᨠ᩠ᨡᩩᨽᩥᨠ᩠ᨡᩩᨶᩦᨸᩣᨲᩥᨾᩮᩣᨠ᩠ᨡᩅᩈᩮᨶ ᩏᨽᨿᩣᨶᩥ ᨸᩣᨲᩥᨾᩮᩣᨠ᩠ᨡᩣᨶᩥ, ᨴ᩠ᩅᩮ ᨾᩣᨲᩥᨠᩣᨲᩥ ᩋᨲ᩠ᨳᩮᩣ. ᩋᩔᩣᨲᩥ ᨽᩥᨠ᩠ᨡᩩᨶᩮᩣᩅᩣᨴᨠᩔ. ᩅᩥᨲ᩠ᨳᩣᩁᩮᨶᩣᨲᩥ ᩏᨽᨲᩮᩣᩅᩥᨽᨦ᩠ᨣᩮᨶ ᩈᨴ᩠ᨵᩥᩴ. ᩈ᩠ᩅᩣᨣᨲᩣᨶᩦᨲᩥ ᩈᩩᨭ᩠ᨮᩩ ᩌᨣᨲᩣᨶᩥ. ᩌᨴᩥᩈᨴ᩠ᨴᩮᨶ ‘‘ᨸᩣᨲᩥᨾᩮᩣᨠ᩠ᨡᩴ ᩏᨴ᩠ᨴᩥᩈᩮᨿ᩠ᨿᩣ’’ᨲᩥᩌᨴᩥᨸᩣᩊᩥᩴ (ᨾᩉᩣᩅ. ᪑᪓᪔) ᩈᨦ᩠ᨣᨱ᩠ᩉᩣᨲᩥ. ᨲᨲ᩠ᨳᩣᨲᩥ ᨲᩮᩈᩩ ᩈᩦᩃᨣᨶ᩠ᨳᨸᩣᨲᩥᨾᩮᩣᨠ᩠ᨡᩮᩈᩩ. ᨿᩮᩣᨲᩥ ᩋᨶᩥᨿᨾᨶᩥᨴ᩠ᨴᩮᩈᩮᩣ, ᨿᩮᩣ ᨠᩮᩣᨧᩥ ᨸᩩᨣ᩠ᨣᩃᩮᩣ. ᨶᨶ᩠ᨲᩥ ᩅᩥᨶᨿᨸᩁᩥᨿᩣᨸᨶ᩠ᨶᩈᩦᩃᩴ. ᩁᨠ᩠ᨡᨲᩦᨲᩥ ᩈᨾᩣᨴᩥᨿᩥᨲ᩠ᩅᩣ ᩋᩅᩥᨠᩮᩣᨸᩮᨶ᩠ᨲᩮᩣ ᨸᩣᩃᩮᨲᩥ. ᨲᩴ ‘‘ᨸᩣᨲᩦ’’ᨲᩥ ᩃᨴ᩠ᨵᨶᩣᨾᩴ ᨸᩣᨲᩥᨾᩮᩣᨠ᩠ᨡᩈᩦᩃᩮ ᨮᩥᨲᩴ. ᨾᩮᩣᨧᩮᨲᩦᨲᩥ ᩈᩉᨠᩣᩁᩥᨠᩣᩁᨱᨽᩣᩅᨲᩮᩣ ᨾᩮᩣᨠ᩠ᨡᩮᨲᩥ. ᩋᨸᩣᨿᩮ ᨩᩣᨲᩴ ᩌᨸᩣᨿᩥᨠᩴ, ᨴᩩᨠ᩠ᨡᩴ, ᨲᩴ ᩌᨴᩥ ᨿᩮᩈᩴ ᨲᩣᨶᩥ ᩌᨸᩣᨿᩥᨠᩣᨴᩦᨶᩥ. ᩌᨴᩥᩈᨴ᩠ᨴᩮᨶ ᨲᨴᨬ᩠ᨬᩴ ᩈᨻ᩠ᨻᩴ ᩈᩴᩈᩣᩁᨴᩩᨠ᩠ᨡᩴ ᩈᨦ᩠ᨣᨱ᩠ᩉᩣᨲᩥ. ᩋᨲ᩠ᨲᩣᨶᩩᩅᩣᨴᩣᨴᩦᩉᩦᨲᩥ ᩋᨲ᩠ᨲᩣᨶᩴ ᩋᨶᩩᩅᩣᨴᩮᩣ ᩋᨲ᩠ᨲᩣᨶᩩᩅᩣᨴᩮᩣ, ᩈᩮᩣ ᩌᨴᩥ ᨿᩮᩈᩴ ᨲᩣᨶᩥ ᩋᨲ᩠ᨲᩣᨶᩩᩅᩣᨴᩣᨴᩦᨶᩥ, ᨲᩮᩉᩥ ᩋᨲ᩠ᨲᩣᨶᩩᩅᩣᨴᩣᨴᩦᩉᩥ. ᩌᨴᩥᩈᨴ᩠ᨴᩮᨶ ᨸᩁᩣᨶᩩᩅᩣᨴᨴᨱ᩠ᨯᨴᩩᨣ᩠ᨣᨲᩥᨽᨿᩣᨶᩥ ᩈᨦ᩠ᨣᨱ᩠ᩉᩣᨲᩥ. ᨲᩔ ᨸᩣᨲᩥᨾᩮᩣᨠ᩠ᨡᩔ ᨩᩮᩣᨲᨠᨲ᩠ᨲᩣᨲᩥ ᨲᩔ ᩈᩦᩃᨸᩣᨲᩥᨾᩮᩣᨠ᩠ᨡᩔ ᨴᩦᨸᨶᨲ᩠ᨲᩣ. ᩌᨴᩥᨾ᩠ᩉᩥ ᨸᨶ ᩅᩩᨲ᩠ᨲᩮᩣ ᩅᨧᨶᨲ᩠ᨳᩮᩣᨲᩥ ‘‘ᩋᨲᩥᩈᩮᨭ᩠ᨮ’’ᨶ᩠ᨲᩥᩌᨴᩥᨶᩣ ᩌᨴᩥᨾ᩠ᩉᩥ ᩅᩩᨲ᩠ᨲᩮᩣ ᩅᨧᨶᨲ᩠ᨳᩮᩣ. ᩏᨽᩥᨶ᩠ᨶᨾ᩠ᨸᩥ ᩈᩣᨵᩣᩁᨱᩮᩣ ᩉᩮᩣᨲᩥ ᩈᩦᩃᨸᩣᨲᩥᨾᩮᩣᨠ᩠ᨡᩴ ᩈᨻ᩠ᨻᨣᩩᨱᩣᨶᩴ ᨾᩪᩃᨽᩣᩅᨲᩮᩣ ᩈᩮᨭ᩠ᨮᩴ, ᨣᨶ᩠ᨳᨸᩣᨲᩥᨾᩮᩣᨠ᩠ᨡᩴ ᩈᩮᨭ᩠ᨮᨣᩩᨱᩈᩉᨧᩁᨱᨲᩮᩣ ᩈᩮᨭ᩠ᨮᨶ᩠ᨲᩥ.

ᨲᨲ᩠ᨳᩣᨲᩥ ᨲᩮᩈᩩ ᩈᩦᩃᨸᩣᨲᩥᨾᩮᩣᨠ᩠ᨡᨣᨶ᩠ᨳᨸᩣᨲᩥᨾᩮᩣᨠ᩠ᨡᩮᩈᩩ. ‘‘ᩋᨿᩴ ᩅᨱ᩠ᨱᨶᩣ’’ᨲᩥ ᩅᨠ᩠ᨡᨾᩣᨶᩅᨱ᩠ᨱᨶᨾᩣᩉ. ᨣᨶ᩠ᨳᨸᩣᨲᩥᨾᩮᩣᨠ᩠ᨡᩔ ᨲᩣᩅ ᨿᩩᨩ᩠ᨩᨲᩩ, ᨠᨳᩴ ᩈᩦᩃᨸᩣᨲᩥᨾᩮᩣᨠ᩠ᨡᩔ ᨿᩩᨩ᩠ᨩᨲᩦᨲᩥ ᩌᩉ ‘‘ᨣᨶ᩠ᨳᩮ ᩉᩦ’’ᨲᩥᩌᨴᩥ. ᩉᩦᨲᩥ ᨠᩣᩁᨱᨲ᩠ᨳᩮ ᨶᩥᨸᩣᨲᩮᩣ. ᨲᩔᩣᨲᩥ ᨣᨶ᩠ᨳᩔ. ᩋᨲ᩠ᨳᩮᩣᨲᩥ ᩈᩦᩃᩴ. ᩅᨱ᩠ᨱᩥᨲᩮᩣᩅ ᩉᩮᩣᨲᩦᨲᩥ ᨣᨶ᩠ᨳᩅᨱ᩠ᨱᨶᩣᨾᩩᨡᩮᨶ ᩋᨲ᩠ᨳᩔᩮᩅ ᩅᨱ᩠ᨱᨶᨲᩮᩣ. ᩍᨴᩴ ᩅᩩᨲ᩠ᨲᩴ ᩉᩮᩣᨲᩥ – ᨿᩈ᩠ᨾᩣ ᨣᨶ᩠ᨳᩮ ᩅᨱ᩠ᨱᩥᨲᩮ ᨲᨴᩅᩥᨶᩣᨽᩣᩅᨲᩮᩣ ᨲᩔᨲ᩠ᨳᩮᩣ ᩅᨱ᩠ᨱᩥᨲᩮᩣ ᩉᩮᩣᨲᩥ, ᨲᩈ᩠ᨾᩣ ᩈᩦᩃᨸᩣᨲᩥᨾᩮᩣᨠ᩠ᨡᩔᨸᩥ ᨿᩩᨩ᩠ᨩᨲᩦᨲᩥ.

ᩑᩅᩴ ᩈᩁᩪᨸᨽᩮᨴᨲᩮᩣ ᩅᩅᨲ᩠ᨳᨸᩮᨲ᩠ᩅᩣ ᩍᨴᩣᨶᩥ ᨣᨶ᩠ᨳᨽᩮᨴᨲᩮᩣ ᩅᩅᨲ᩠ᨳᨸᩮᨲᩩᩴ ‘‘ᨲᩴ ᨸᨶᩮᨲ’’ᨶ᩠ᨲᩥᩌᨴᩥᨾᩣᩉ. ᨲᨲ᩠ᨳᩣᨲᩥ ᨲᩮᩈᩩ ᨽᩥᨠ᩠ᨡᩩᨸᩣᨲᩥᨾᩮᩣᨠ᩠ᨡᨽᩥᨠ᩠ᨡᩩᨶᩦᨸᩣᨲᩥᨾᩮᩣᨠ᩠ᨡᩮᩈᩩ ᨴ᩠ᩅᩦᩈᩩ. ᩏᨴ᩠ᨴᩮᩈᩣ ᨸᩁᩥᨧ᩠ᨨᩥᨩ᩠ᨩᨶ᩠ᨲᩥ ᨿᩮᩉᩥ ᩅᨠ᩠ᨡᨾᩣᨶᩅᨧᨶᨸ᩠ᨸᨻᨶ᩠ᨵᩮᩉᩥ, ᨲᩮ ᩏᨴ᩠ᨴᩮᩈᨸᩁᩥᨧ᩠ᨨᩮᨴᩣ, ᨲᩮᩉᩥ. ᩅᩅᨲ᩠ᨳᩥᨲᨶ᩠ᨲᩥ ᩋᩈᨦ᩠ᨠᩁᨲᩮᩣ ᨮᩥᨲᩴ.

ᩑᩅᩴ ᨣᨶ᩠ᨳᨽᩮᨴᨲᩮᩣ ᩅᩅᨲ᩠ᨳᨸᩮᨲ᩠ᩅᩣ ᩍᨴᩣᨶᩥ ᩏᨴ᩠ᨴᩮᩈᩅᩥᨽᩣᨣᨲᩮᩣ ᩅᩅᨲ᩠ᨳᨸᩮᨲᩩᩴ ‘‘ᨲᨲ᩠ᨳᩣ’’ᨲᩥᩌᨴᩥᨾᩣᩉ. ᩏᨴ᩠ᨴᩥᩈᩦᨿᨲᩥ ᩈᩁᩪᨸᩮᨶ ᨠᨳᩦᨿᨲᩥ ᩑᨲ᩠ᨳ, ᩑᨲᩮᨶᩣᨲᩥ ᩅᩣ ᩏᨴ᩠ᨴᩮᩈᩮᩣ, ᨶᩥᨴᩣᨶᩔ ᩏᨴ᩠ᨴᩮᩈᩮᩣᨲᩥ ᨶᩥᨴᩣᨶᩩᨴ᩠ᨴᩮᩈᩮᩣ. ᩑᩅᩴ ᩈᩮᩈᩮᩈᩩᨸᩥ. ᩅᩥᨲ᩠ᨳᩣᩁᩮᩣᩅ ᩏᨴ᩠ᨴᩮᩈᩮᩣ ᩅᩥᨲ᩠ᨳᩣᩁᩩᨴ᩠ᨴᩮᩈᩮᩣ.

ᩍᨴᩣᨶᩥ ᨶᩥᨴᩣᨶᩩᨴ᩠ᨴᩮᩈᩣᨴᩦᨶᩴ ᨸᩁᩥᨧ᩠ᨨᩮᨴᨴᩔᨶᨲ᩠ᨳᩴ ‘‘ᨲᨲ᩠ᨳ ᨶᩥᨴᩣᨶᩩᨴ᩠ᨴᩮᩈᩮᩣ’’ᨲᩥᩌᨴᩥ ᩌᩁᨴ᩠ᨵᩴ. ᨲᨲ᩠ᨳ ᨲᨲ᩠ᨳᩣᨲᩥ ᨲᩮᩈᩩ ᨸᨬ᩠ᨧᩈᩩ ᩏᨴ᩠ᨴᩮᩈᩮᩈᩩ. ᨶᩥᨴᩣᨶᩩᨴ᩠ᨴᩮᩈᩮᩣ ᩏᨴ᩠ᨴᩥᨭ᩠ᨮᩮᩣ ᩉᩮᩣᨲᩦᨲᩥ ᩈᨾ᩠ᨻᨶ᩠ᨵᩮᩣ. ᨿᩴ ᨸᨶᩮᨲ᩠ᨳ ᨶᩥᨴᩣᨶᩩᨴ᩠ᨴᩮᩈᨸᩁᩥᨧ᩠ᨨᩮᨴᩴ ᨴᩔᩮᨶ᩠ᨲᩮᨶ ‘‘ᩈᩩᨱᩣᨲᩩ ᨾᩮ, ᨽᨶ᩠ᨲᩮ, ᩈᨦ᩠ᨥᩮᩣ…ᨸᩮ… ᩌᩅᩥᨠᨲᩣ ᩉᩥᩔ ᨹᩣᩈᩩ ᩉᩮᩣᨲᩦ’’ᨲᩥ ᩍᨵᩣᨣᨲᨶᩥᨴᩣᨶᨸᩣᩊᩥᩴ ᨴᩔᩮᨲ᩠ᩅᩣ ᨲᨴᨶᨶ᩠ᨲᩁᩴ ᩏᨴ᩠ᨴᩮᩈᨠᩣᩃᩮ ᩅᨲ᩠ᨲᨻ᩠ᨻᩔᩣᨸᩥ ‘‘ᩏᨴ᩠ᨴᩥᨭ᩠ᨮᩴ ᨡᩮᩣ ᩌᨿᩈ᩠ᨾᨶ᩠ᨲᩮᩣ ᨶᩥᨴᩣᨶ’’ᨶ᩠ᨲᩥ ᩍᨾᩔ ᨸᩣᨮᩔ ᨿᩮᩣᨩᨶᩴ ᩋᨠᨲ᩠ᩅᩣ ‘‘ᨲᨲ᩠ᨳᩣᨿᩈ᩠ᨾᨶ᩠ᨲᩮ ᨸᩩᨧ᩠ᨨᩣᨾᩦ’’ᨲᩥᩌᨴᩥᨶᩣ ᩋᨶᩩᩈᩣᩅᨶᩣᨴᩥᨠᨾᩮᩅ ᨿᩮᩣᨩᩮᨲ᩠ᩅᩣ ᨴᩔᩥᨲᩴ, ᨲᩴ ᨸᨶ ᩋᨸᩁᩥᨸᩩᨱ᩠ᨱᨶᩥᨴᩣᨶᨸᩣᩊᩥᨴᩔᨶᨸᩩᨻ᩠ᨻᨠᨶᩥᨴᩣᨶᩩᨴ᩠ᨴᩮᩈᨸᩁᩥᨧ᩠ᨨᩮᨴᨴᩔᨶᨲ᩠ᨳᩴ, ᨡᩩᨴ᩠ᨴᨠᨸᩮᨿ᩠ᨿᩣᩃᩅᩈᩮᨶ ᩅᩣ ᨸᩣᨠᨭᨲ᩠ᨲᩣ ᨲᩔ ᩋᨿᩮᩣᨩᨶᩴ ᨠᨲᨶ᩠ᨲᩥ ᩅᩮᨴᩥᨲᨻ᩠ᨻᩴ, ᩏᨴ᩠ᨴᩮᩈᨠᩣᩃᩮ ᨸᨶ ᨿᩮᩣᨩᩮᨲ᩠ᩅᩣᩅ ᩅᨲ᩠ᨲᨻ᩠ᨻᩴ. ᩅᨠ᩠ᨡᨲᩥ ᩉᩥ ‘‘ᨲᩴ ᨸᨶᩮᨲᩴ ᨸᩣᩁᩣᨩᩥᨠᩣᨴᩦᨶᩴ ᩋᩅᩈᩣᨶᩮ ᨴᩥᩔᨲᩥ, ᨶ ᨶᩥᨴᩣᨶᩣᩅᩈᩣᨶᩮ. ᨠᩥᨬ᩠ᨧᩣᨸᩥ ᨶ ᨴᩥᩔᨲᩥ, ᩋᨳ ᨡᩮᩣ ᩏᨴ᩠ᨴᩮᩈᨠᩣᩃᩮ ‘ᩌᩅᩥᨠᨲᩣ ᩉᩥᩔ ᨹᩣᩈᩩ ᩉᩮᩣᨲᩦ’ᨲᩥ ᩅᨲ᩠ᩅᩣ ‘ᩏᨴ᩠ᨴᩥᨭ᩠ᨮᩴ ᨡᩮᩣ ᩌᨿᩈ᩠ᨾᨶ᩠ᨲᩮᩣ ᨶᩥᨴᩣᨶᩴ, ᨲᨲ᩠ᨳᩣᨿᩈ᩠ᨾᨶ᩠ᨲᩮ ᨸᩩᨧ᩠ᨨᩣᨾᩦ’ᨲᩥᩌᨴᩥᨶᩣ ᨶᨿᩮᨶ ᩅᨲ᩠ᨲᨻ᩠ᨻᨾᩮᩅᩣ’’ᨲᩥᩌᨴᩥ. ᩋᩅᩈᩮᩈᩮ ᩈᩩᨲᩮᨶ ᩈᩣᩅᩥᨲᩮᨲᩥ ᩋᩅᩈᩥᨭ᩠ᨮᩴ ᨸᩣᩁᩣᨩᩥᨠᩩᨴ᩠ᨴᩮᩈᩣᨴᩥᨧᨲᩩᨠ᩠ᨠᩴ ‘‘ᩈᩩᨲᩣ ᨡᩮᩣ ᨸᨶᩣᨿᩈ᩠ᨾᨶ᩠ᨲᩮᩉᩥ ᨧᨲ᩠ᨲᩣᩁᩮᩣ ᨸᩣᩁᩣᨩᩥᨠᩣ ᨵᨾ᩠ᨾᩣ…ᨸᩮ… ᩋᩅᩥᩅᨴᨾᩣᨶᩮᩉᩥ ᩈᩥᨠ᩠ᨡᩥᨲᨻ᩠ᨻ’’ᨶ᩠ᨲᩥ ᩑᩅᩴ ᩈᩩᨲᩅᩈᩮᨶ ᩈᩣᩅᩥᨲᩮ.

ᩑᨲᩮᨶᩮᩅ ᨶᨿᩮᨶ ᩈᩮᩈᩣ ᨲᨿᩮᩣ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᨸᩁᩥᨧ᩠ᨨᩮᨴᩣ ᩅᩮᨴᩥᨲᨻ᩠ᨻᩣᨲᩥ ᨴᩔᩮᨲᩩᩴ ‘‘ᨸᩣᩁᩣᨩᩥᨠᩩᨴ᩠ᨴᩮᩈᩣᨴᩦᨶ’’ᨶ᩠ᨲᩥᩌᨴᩥᨾᩣᩉ. ᨸᩣᩁᩣᨩᩥᨠᩩᨴ᩠ᨴᩮᩈᩣᨴᩦᨶᩴ ᨸᩁᩥᨧ᩠ᨨᩮᨴᩣ ᨿᩮᩣᨩᩮᨲᨻ᩠ᨻᩣᨲᩥ ᩈᨾ᩠ᨻᨶ᩠ᨵᩮᩣ. ᨶᩥᨴᩣᨶᩔ ᩌᨴᩥᨲᩮᩣ ᨸᨭ᩠ᨮᩣᨿ ᨸᩣᩁᩣᨩᩥᨠᩣᨴᩦᨶᩥ ᩒᩈᩣᨸᩮᨲ᩠ᩅᩣᨲᩥ ᨶᩥᨴᩣᨶᩴ, ᨸᩣᩁᩣᨩᩥᨠᨬ᩠ᨧ, ᨲᨴᩩᨽᨿᩴ ᩈᨦ᩠ᨥᩣᨴᩥᩈᩮᩈᨬ᩠ᨧ, ᨲᩴᨲᩥᨠᩴ ᩋᨶᩥᨿᨲᨬ᩠ᨧᩣᨲᩥ ᩑᩅᩴ ᨿᨳᩣᨠ᩠ᨠᨾᩴ ᩏᨴ᩠ᨴᩥᩈᩥᨲ᩠ᩅᩣ ᨸᩣᩁᩣᨩᩥᨠᩣᨴᩦᨶᩥ ᨸᩁᩥᨿᩮᩣᩈᩣᨸᩮᨲ᩠ᩅᩣ. ᨿᩮᩣᨩᩮᨲᨻ᩠ᨻᩣᨲᩥ ‘‘ᩋᩅᩈᩮᩈᩮ ᩈᩩᨲᩮᨶ ᩈᩣᩅᩥᨲᩮ ᩏᨴ᩠ᨴᩥᨭ᩠ᨮᩮᩣ ᩉᩮᩣᨲᩥ ᨸᩣᩁᩣᨩᩥᨠᩩᨴ᩠ᨴᩮᩈᩮᩣ’’ᨲᩥᩌᨴᩥᨶᩣ ᨿᩮᩣᨩᩮᨲᨻ᩠ᨻᩣ. ᩋᩅᩈᩮᩈᩴ ᩈᩩᨲᩮᨶ ᩈᩣᩅᩮᨲᨻ᩠ᨻᨶ᩠ᨲᩥ ᩅᨧᨶᨲᩮᩣᨲᩥ ᩏᨸᩮᩣᩈᨳᨠ᩠ᨡᨶ᩠ᨵᨠᩮ –

‘‘ᨸᨬ᩠ᨧᩥᨾᩮ, ᨽᩥᨠ᩠ᨡᩅᩮ, ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩣ ᨶᩥᨴᩣᨶᩴ ᩏᨴ᩠ᨴᩥᩈᩥᨲ᩠ᩅᩣ ᩋᩅᩈᩮᩈᩴ ᩈᩩᨲᩮᨶ ᩈᩣᩅᩮᨲᨻ᩠ᨻᩴ, ᩋᨿᩴ ᨸᨮᨾᩮᩣ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩮᩣ. ᨶᩥᨴᩣᨶᩴ ᩏᨴ᩠ᨴᩥᩈᩥᨲ᩠ᩅᩣ ᨧᨲ᩠ᨲᩣᩁᩥ ᨸᩣᩁᩣᨩᩥᨠᩣᨶᩥ ᩏᨴ᩠ᨴᩥᩈᩥᨲ᩠ᩅᩣ ᩋᩅᩈᩮᩈᩴ ᩈᩩᨲᩮᨶ ᩈᩣᩅᩮᨲᨻ᩠ᨻᩴ, ᩋᨿᩴ ᨴᩩᨲᩥᨿᩮᩣ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩮᩣ’’ᨲᩥᩌᨴᩦᩈᩩ (ᨾᩉᩣᩅ. ᪑᪕᪐) –

ᩑᩅᩴ ᩅᩩᨲ᩠ᨲᨲ᩠ᨲᩣ. ᨿᩈ᩠ᨾᩥᩴ ᩅᩥᨸ᩠ᨸᨠᨲᩮᨲᩥ ᨿᩈ᩠ᨾᩥᩴ ᩏᨴ᩠ᨴᩮᩈᩮ ᩋᨸᩁᩥᨿᩮᩣᩈᩥᨲᩮ. ᩋᨶ᩠ᨲᩁᩣᨿᩮᩣ ᩏᨸ᩠ᨸᨩ᩠ᨩᨲᩦᨲᩥ ᨴᩈᩈᩩ ᩋᨶ᩠ᨲᩁᩣᨿᩮᩈᩩ ᨿᩮᩣ ᨠᩮᩣᨧᩥ ᩋᨶ᩠ᨲᩁᩣᨿᩮᩣ ᩏᨸ᩠ᨸᨩ᩠ᨩᨲᩥ. ᨴᩈ ᩋᨶ᩠ᨲᩁᩣᨿᩣ ᨶᩣᨾ – ᩁᩣᨩᨶ᩠ᨲᩁᩣᨿᩮᩣ, ᨧᩮᩣᩁᨶ᩠ᨲᩁᩣᨿᩮᩣ, ᩋᨣ᩠ᨿᨶ᩠ᨲᩁᩣᨿᩮᩣ, ᩏᨴᨠᨶ᩠ᨲᩁᩣᨿᩮᩣ, ᨾᨶᩩᩔᨶ᩠ᨲᩁᩣᨿᩮᩣ, ᩋᨾᨶᩩᩔᨶ᩠ᨲᩁᩣᨿᩮᩣ, ᩅᩣᩊᨶ᩠ᨲᩁᩣᨿᩮᩣ, ᩈᩁᩦᩈᨸᨶ᩠ᨲᩁᩣᨿᩮᩣ, ᨩᩦᩅᩥᨲᨶ᩠ᨲᩁᩣᨿᩮᩣ, ᨻᩕᩉ᩠ᨾᨧᩁᩥᨿᨶ᩠ᨲᩁᩣᨿᩮᩣᨲᩥ. ᨲᨲ᩠ᨳ ᩈᨧᩮ ᨽᩥᨠ᩠ᨡᩪᩈᩩ ‘‘ᩏᨸᩮᩣᩈᨳᩴ ᨠᩁᩥᩔᩣᨾᩣ’’ᨲᩥ (ᨾᩉᩣᩅ. ᩋᨭ᩠ᨮ. ᪑᪕᪐) ᨶᩥᩈᩥᨶ᩠ᨶᩮᩈᩩ ᩁᩣᨩᩣ ᩌᨣᨧ᩠ᨨᨲᩥ, ᩋᨿᩴ ᩁᩣᨩᨶ᩠ᨲᩁᩣᨿᩮᩣ. ᨧᩮᩣᩁᩣ ᩌᨣᨧ᩠ᨨᨶ᩠ᨲᩥ, ᩋᨿᩴ ᨧᩮᩣᩁᨶ᩠ᨲᩁᩣᨿᩮᩣ. ᨴᩅᨴᩣᩉᩮᩣ ᩅᩣ ᩌᨣᨧ᩠ᨨᨲᩥ, ᩌᩅᩣᩈᩮ ᩅᩣ ᩋᨣ᩠ᨣᩥ ᩏᨭ᩠ᨮᩉᨲᩥ, ᩋᨿᩴ ᩋᨣ᩠ᨿᨶ᩠ᨲᩁᩣᨿᩮᩣ. ᨾᩮᨥᩮᩣ ᩅᩣ ᩏᨭ᩠ᨮᩉᨲᩥ, ᩒᨥᩮᩣ ᩅᩣ ᩌᨣᨧ᩠ᨨᨲᩥ, ᩋᨿᩴ ᩏᨴᨠᨶ᩠ᨲᩁᩣᨿᩮᩣ. ᨻᩉᩪ ᨾᨶᩩᩔᩣ ᩌᨣᨧ᩠ᨨᨶ᩠ᨲᩥ, ᩋᨿᩴ ᨾᨶᩩᩔᨶ᩠ᨲᩁᩣᨿᩮᩣ. ᨽᩥᨠ᩠ᨡᩩᩴ ᨿᨠ᩠ᨡᩮᩣ ᨣᨱ᩠ᩉᩣᨲᩥ, ᩋᨿᩴ ᩋᨾᨶᩩᩔᨶ᩠ᨲᩁᩣᨿᩮᩣ. ᨻ᩠ᨿᨣ᩠ᨥᩣᨴᨿᩮᩣ ᨧᨱ᩠ᨯᨾᩥᨣᩣ ᩌᨣᨧ᩠ᨨᨶ᩠ᨲᩥ, ᩋᨿᩴ ᩅᩣᩊᨶ᩠ᨲᩁᩣᨿᩮᩣ. ᨽᩥᨠ᩠ᨡᩩᩴ ᩈᨸ᩠ᨸᩣᨴᨿᩮᩣ ᨯᩴᩈᨶ᩠ᨲᩥ, ᩋᨿᩴ ᩈᩁᩦᩈᨸᨶ᩠ᨲᩁᩣᨿᩮᩣ. ᨽᩥᨠ᩠ᨡᩩ ᨣᩥᩃᩣᨶᩮᩣ ᩅᩣ ᩉᩮᩣᨲᩥ, ᨠᩣᩃᩴ ᩅᩣ ᨠᩁᩮᩣᨲᩥ, ᩅᩮᩁᩥᨶᩮᩣ ᩅᩣ ᨲᩴ ᨾᩣᩁᩮᨲᩩᨠᩣᨾᩣ ᨣᨱ᩠ᩉᨶ᩠ᨲᩥ, ᩋᨿᩴ ᨩᩦᩅᩥᨲᨶ᩠ᨲᩁᩣᨿᩮᩣ. ᨾᨶᩩᩔᩣ ᩑᨠᩴ ᩅᩣ ᨻᩉᩪ ᩅᩣ ᨽᩥᨠ᩠ᨡᩪ ᨻᩕᩉ᩠ᨾᨧᩁᩥᨿᩣ ᨧᩣᩅᩮᨲᩩᨠᩣᨾᩣ ᨣᨱ᩠ᩉᨶ᩠ᨲᩥ, ᩋᨿᩴ ᨻᩕᩉ᩠ᨾᨧᩁᩥᨿᨶ᩠ᨲᩁᩣᨿᩮᩣ. ᩍᨲᩥ ᨿᩴ ᩅᩩᨲ᩠ᨲᩴ ‘‘ᩋᨶ᩠ᨲᩁᩣᨿᩮᩣ ᩏᨸ᩠ᨸᨩ᩠ᨩᨲᩦᨲᩥ ᨴᩈᩈᩩ ᩋᨶ᩠ᨲᩁᩣᨿᩮᩈᩩ ᨿᩮᩣ ᨠᩮᩣᨧᩥ ᩋᨶ᩠ᨲᩁᩣᨿᩮᩣ ᩏᨸ᩠ᨸᨩ᩠ᨩᨲᩦ’’ᨲᩥ, ᨲᩔᨲ᩠ᨳᩮᩣ ᨸᨠᩣᩈᩥᨲᩮᩣ ᩉᩮᩣᨲᩦᨲᩥ.

ᨲᩮᨶ ᩈᨴ᩠ᨵᩥᨶ᩠ᨲᩥ ᩅᩥᨸ᩠ᨸᨠᨲᩩᨴ᩠ᨴᩮᩈᩮᨶ ᩈᨴ᩠ᨵᩥᩴ. ᩋᩅᩈᩮᩈᩴ ᩈᩩᨲᩮᨶ ᩈᩣᩅᩮᨲᨻ᩠ᨻᩴ ᩏᨴ᩠ᨴᩥᨭ᩠ᨮᩏᨴ᩠ᨴᩮᩈᩣᨸᩮᨠ᩠ᨡᨲ᩠ᨲᩣ ᩋᩅᩈᩮᩈᩅᨧᨶᩔ. ᨿᨳᩣᩉ ‘‘ᨶᩥᨴᩣᨶᩴ ᩏᨴ᩠ᨴᩥᩈᩥᨲ᩠ᩅᩣ’’ᨲᩥᩌᨴᩥ (ᨾᩉᩣᩅ. ᪑᪕᪐). ᨲᩮᨶᩣᩉ ‘‘ᨶᩥᨴᩣᨶᩩᨴ᩠ᨴᩮᩈᩮ ᨸᨶᩣ’’ᨲᩥᩌᨴᩥ. ᩈᩩᨲᩮᨶ ᩈᩣᩅᩮᨲᨻ᩠ᨻᩴ ᨶᩣᨾ ᨶᨲ᩠ᨳᩥ ᩏᨸᩮᩣᩈᨳᩔ ᩋᨶ᩠ᨲᩁᩣᨿᩮᩣᩅ ᩉᩮᩣᨲᩦᨲᩥ ᩋᨵᩥᨸ᩠ᨸᩣᨿᩮᩣ. ᩋᨶᩥᨿᨲᩩᨴ᩠ᨴᩮᩈᩮᩣ ᨸᩁᩥᩉᩣᨿᨲᩦᨲᩥ ᨽᩥᨠ᩠ᨡᩩᨶᩦᨶᩴ ᩋᨶᩥᨿᨲᩈᩥᨠ᩠ᨡᩣᨸᨴᨸᨬ᩠ᨬᨲ᩠ᨲᩥᨿᩣ ᩋᨽᩣᩅᨲᩮᩣ. ᨲᨴᨽᩣᩅᩮᩣ ᨧ ‘‘ᩍᨴᨾᩮᩅ ᩃᨠ᩠ᨡᨱᩴ ᨲᨲ᩠ᨳᩣᨸᩥ ᩋᨶᩩᨣᨲ’’ᨶ᩠ᨲᩥ ᨠᨲ᩠ᩅᩣᨲᩥ ᩅᩮᨴᩥᨲᨻ᩠ᨻᩴ. ᩈᩮᩈᨶ᩠ᨲᩥ ᩋᩅᩈᩮᩈᩩᨴ᩠ᨴᩮᩈᨸᩁᩥᨧ᩠ᨨᩮᨴᨴᩔᨶᩴ. ᩑᨲᩮᩈᩴ ᨴ᩠ᩅᩥᨶ᩠ᨶᩴ ᨸᩣᨲᩥᨾᩮᩣᨠ᩠ᨡᩣᨶᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨲᩣᩅᩣᨲᩥ ᨸᨮᨾᩴ. ᩍᨴᨶ᩠ᨲᩥ ᩍᨴᩣᨶᩥ ᩅᨲ᩠ᨲᨻ᩠ᨻᩴ ᨻᩩᨴ᩠ᨵᩥᨿᩴ ᩅᩥᨸᩁᩥᩅᨲ᩠ᨲᨾᩣᨶᩴ ᩈᩣᨾᨬ᩠ᨬᩮᨶ ᨴᩔᩮᨲᩥ, ᩍᨴᩴ ᩋᨠ᩠ᨡᩁᨸᨴᨶᩥᨿᨾᩥᨲᨣᨶ᩠ᨳᩥᨲᩴ ᩅᨧᨶᩴ ᩅᩩᨧ᩠ᨧᨲᩥ ᨠᨳᩦᨿᨲᩦᨲᩥ ᩋᨲ᩠ᨳᩮᩣ. ᨠᩥᩴ ᨲᨶ᩠ᨲᩥ ᩌᩉ, ‘‘ᩈᩩᨱᩣᨲᩩ ᨾᩮᨲᩥᩌᨴᩦᨶ’’ᨶ᩠ᨲᩥᩌᨴᩥ.

ᨲᨲ᩠ᨳ ᩈᩩᨱᩣᨲᩩ ᨾᩮᨲᩥᩌᨴᩦᨶᨶ᩠ᨲᩥ ‘‘ᩈᩩᨱᩣᨲᩩ ᨾᩮ, ᨽᨶ᩠ᨲᩮ, ᩈᨦ᩠ᨥᩮᩣ ᩋᨩ᩠ᨩᩩᨸᩮᩣᩈᨳᩮᩣ’’ᨲᩥᩌᨴᩦᨶᩴ ᨽᩥᨠ᩠ᨡᩩᨸᩣᨲᩥᨾᩮᩣᨠ᩠ᨡᩮ ᩌᨣᨲᩣᨶᩴ ᩈᩩᨲ᩠ᨲᨸᨴᩣᨶᩴ. ᩋᨲ᩠ᨳᨶᩥᨧ᩠ᨨᨿᨶ᩠ᨲᩥ ᩋᨽᩥᨵᩮᨿ᩠ᨿᨲ᩠ᨳᩔ ᨧᩮᩅ ᩋᨵᩥᨸ᩠ᨸᩣᨿᨲ᩠ᨳᩔ ᨧ ᨶᩥᨧ᩠ᨨᨿᨶᩴ, ᩅᩅᨲ᩠ᨳᩣᨸᨶᨶ᩠ᨲᩥ ᩋᨲ᩠ᨳᩮᩣ. ᩍᨾᩣᨿ ᩉᩥ ᩋᨭ᩠ᨮᨠᨳᩣᨿ ᨲᩮᩈᩴ ᩋᨽᩥᨵᩮᨿ᩠ᨿᨲ᩠ᨳᩮᩣ ᨧᩮᩅ ᩋᨵᩥᨸ᩠ᨸᩣᨿᨲ᩠ᨳᩮᩣ ᨧ ᩋᨶᩮᨠᨵᩣ ᩅᩅᨲ᩠ᨳᩣᨸᩦᨿᨲᩥ. ᩋᨳ ᩅᩣ ᨶᩥᨧ᩠ᨨᩥᨶ᩠ᨶᩮᩣᨲᩥ ᨶᩥᨧ᩠ᨨᨿᩮᩣ. ᨣᨱ᩠ᨮᩥᨭ᩠ᨮᩣᨶᩮᩈᩩ ᨡᩦᩃᨾᨴ᩠ᨴᨶᩣᨠᩣᩁᩮᨶ ᨸᩅᨲ᩠ᨲᩣ ᩅᩥᨾᨲᩥᨧ᩠ᨨᩮᨴᨠᨳᩣ, ᩋᨲ᩠ᨳᩮᩣ ᨧ ᨶᩥᨧ᩠ᨨᨿᩮᩣ ᨧ ᩋᨲ᩠ᨳᨶᩥᨧ᩠ᨨᨿᩮᩣ, ᨲᩴ ᩋᨲ᩠ᨳᨶᩥᨧ᩠ᨨᨿᩴ, ᨾᨿᩣ ᩅᩩᨧ᩠ᨧᨾᩣᨶᩴ ᩋᨲ᩠ᨳᨬ᩠ᨧ ᩅᩥᨶᩥᨧ᩠ᨨᨿᨬ᩠ᨧᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᩈᩦᩃᩈᨾ᩠ᨸᨶ᩠ᨶᩣᨲᩥ ᩈᨾᨶ᩠ᨲᨲᩮᩣ ᨸᨶ᩠ᨶᩴ ᨸᨲ᩠ᨲᩴ ᨸᩩᨱ᩠ᨱᨶ᩠ᨲᩥ ᩈᨾ᩠ᨸᨶ᩠ᨶᩴ, ᩈᩦᩃᩴ ᩈᨾ᩠ᨸᨶ᩠ᨶᨾᩮᨲᩮᩈᨶ᩠ᨲᩥ ᩈᩦᩃᩈᨾ᩠ᨸᨶ᩠ᨶᩣ, ᨸᩁᩥᨸᩩᨱ᩠ᨱᩈᩦᩃᩣᨲᩥ ᩋᨲ᩠ᨳᩮᩣ. ᩋᨳ ᩅᩣ ᩈᨾ᩠ᨾᨴᩮᩅ ᨸᨶ᩠ᨶᩣ ᨣᨲᩣ ᩏᨸᩣᨣᨲᩣᨲᩥ ᩈᨾ᩠ᨸᨶ᩠ᨶᩣ, ᩈᩦᩃᩮᨶ ᩈᨾ᩠ᨸᨶ᩠ᨶᩣ ᩈᩦᩃᩈᨾ᩠ᨸᨶ᩠ᨶᩣ, ᨸᩣᨲᩥᨾᩮᩣᨠ᩠ᨡᩈᩴᩅᩁᩮᨶ ᩏᨸᩮᨲᩣᨲᩥ ᩋᨲ᩠ᨳᩮᩣ. ᩋᨵᩥᩈᩦᩃᩋᨵᩥᨧᩥᨲ᩠ᨲᩋᨵᩥᨸᨬ᩠ᨬᩣᩈᨦ᩠ᨡᩣᨲᩣ ᨲᩥᩔᩮᩣᨸᩥ ᩈᩥᨠ᩠ᨡᩥᨲᨻ᩠ᨻᨭ᩠ᨮᩮᨶ ᩈᩥᨠ᩠ᨡᩣ, ᨲᩴ ᨠᩣᨾᩮᨶ᩠ᨲᩦᨲᩥ ᩈᩥᨠ᩠ᨡᩣᨠᩣᨾᩣ. ᩈᩩᨱᨶ᩠ᨲᩩ ᨾᩮᨲᩥ ᨲᩮ ᩈᨻ᩠ᨻᩮᨸᩥ ᨽᩥᨠ᩠ᨡᩅᩮᩣ ᨾᨾ ᩈᨶ᩠ᨲᩥᨠᩣ ᨶᩥᩈᩣᨾᩮᨶ᩠ᨲᩩ. ᩍᨾᩥᨶᩣ ᩋᨲ᩠ᨲᨶᩮᩣ ᩈᩴᩅᨱ᩠ᨱᨶᩣᨿ ᩈᨠ᩠ᨠᨧ᩠ᨧᩴ ᩈᩅᨶᩮ ᨶᩥᨿᩮᩣᨩᩮᨲᩥ. ᩈᨠ᩠ᨠᨧ᩠ᨧᩈᩅᨶᨸᨭᩥᨻᨴ᩠ᨵᩣ ᩉᩥ ᩈᨻ᩠ᨻᩣᨸᩥ ᩈᩣᩈᨶᩈᨾ᩠ᨸᨲ᩠ᨲᩦᨲᩥ. ᩑᨲ᩠ᨳ ᨧ ᩈᩦᩃᩈᨾ᩠ᨸᨶ᩠ᨶᩣᨶᩴ ᩈᩥᨠ᩠ᨡᩣᨠᩣᨾᩣᨶᩴᨿᩮᩅ ᨽᩥᨠ᩠ᨡᩪᨶᩴ ᨣᩉᨱᩴ ᨲᨴᨬ᩠ᨬᩮᩈᩴ ᩍᨾᩥᩔᩣ ᩈᩴᩅᨱ᩠ᨱᨶᩣᨿ ᩋᨽᩣᨩᨶᨽᩣᩅᨲᩮᩣ. ᨶ ᩉᩥ ᨲᩮ ᩅᩥᨶᨿᩴ ᩈᩮᩣᨲᨻ᩠ᨻᩴ, ᨸᨭᩥᨸᨩ᩠ᨩᩥᨲᨻ᩠ᨻᨬ᩠ᨧ ᨾᨬ᩠ᨬᩥᩔᨶ᩠ᨲᩥ.

ᩑᨲ᩠ᨳᩣᨲᩥ ᩑᨲᩈ᩠ᨾᩥᩴ ᨣᩣᨳᩣᨸᨴᩮ, ᩑᨲᩮᩈᩴ ᩅᩣ ᨣᩣᨳᩣᨿ ᩈᨦ᩠ᨣᩉᩥᨲᩣᨶᩴ ‘‘ᩈᩩᨱᩣᨲᩩ ᨾᩮ’’ᨲᩥᩌᨴᩦᨶᩴ ᨸᨴᩣᨶᨾᨶ᩠ᨲᩁᩮ. ᩈᩅᨶᩮ ᩌᨱᨲ᩠ᨲᩥᩅᨧᨶᩴ ᩈᩅᨶᩣᨱᨲ᩠ᨲᩥᩅᨧᨶᩴ. ᨠᩥᨬ᩠ᨧᩣᨸᩥ ᩈᩅᨶᩣᨱᨲ᩠ᨲᩥᩅᨧᨶᩴ, ᨲᨳᩣᨸᩥ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᨠᩮᨶ ᩑᩅᩴ ᩅᨲ᩠ᨲᨻ᩠ᨻᨶ᩠ᨲᩥ ᨽᨣᩅᨲᩣ ᩅᩩᨲ᩠ᨲᨲ᩠ᨲᩣ ᨽᨣᩅᨲᩮᩣ ᩌᨱᨲ᩠ᨲᩥ, ᨶ ᩏᨴ᩠ᨴᩮᩈᨠᩔᩣᨲᩥ ᨶᩅᨠᨲᩁᩮᨶᩣᨸᩥ ᩍᨴᩴ ᩅᨲ᩠ᨲᩩᩴ ᩅᨭ᩠ᨭᨲᩥ ᩈᨦ᩠ᨥᨣᩣᩁᩅᩮᨶ, ᩈᨦ᩠ᨥᨻᩉᩩᨾᩣᨶᩮᨶ ᨧ ᩈᩉᩥᨲᨲ᩠ᨲᩣ ᩈᨣᩣᩁᩅᩈᨸ᩠ᨸᨲᩥᩔᩅᨧᨶᩴ. ᩈᨦ᩠ᨥᩮᩣ ᩉᩥ ᩈᩩᨸ᩠ᨸᨭᩥᨸᨶ᩠ᨶᨲᩣᨴᩥᨣᩩᨱᩅᩥᩈᩮᩈᨿᩩᨲ᩠ᨲᨲ᩠ᨲᩣ ᩏᨲ᩠ᨲᨾᩴ ᨣᩣᩁᩅᨸ᩠ᨸᨲᩥᩔᩅᨭ᩠ᨮᩣᨶᩴ. ᩍᨴᨬ᩠ᨧ ᩈᨻ᩠ᨻᩴ ᨠᩮᨶ ᨠᨲ᩠ᨳ ᨠᨴᩣ ᩅᩩᨲ᩠ᨲᨶ᩠ᨲᩥ ᩌᩉ ‘‘ᩈᨻ᩠ᨻᨾᩮᩅ ᨧᩮᨲ’’ᨶ᩠ᨲᩥᩌᨴᩥ. ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩴ ᩋᨶᩩᨩᩣᨶᨶ᩠ᨲᩮᨶᩣᨲᩥ –

‘‘ᩋᨶᩩᨩᩣᨶᩣᨾᩥ, ᨽᩥᨠ᩠ᨡᩅᩮ, ᨸᩣᨲᩥᨾᩮᩣᨠ᩠ᨡᩴ ᩏᨴ᩠ᨴᩥᩈᩥᨲᩩᩴ, ᩑᩅᨬ᩠ᨧ ᨸᨶ, ᨽᩥᨠ᩠ᨡᩅᩮ, ᩏᨴ᩠ᨴᩥᩈᩥᨲᨻ᩠ᨻᩴ, ᨻ᩠ᨿᨲ᩠ᨲᩮᨶ ᨽᩥᨠ᩠ᨡᩩᨶᩣ ᨸᨭᩥᨻᩃᩮᨶ ᩈᨦ᩠ᨥᩮᩣ ᨬᩣᨸᩮᨲᨻ᩠ᨻᩮᩣ ‘ᩈᩩᨱᩣᨲᩩ ᨾᩮ, ᨽᨶ᩠ᨲᩮ, ᩈᨦ᩠ᨥᩮᩣ’’’ᨲᩥ (ᨾᩉᩣᩅ. ᪑᪓᪓-᪑᪓᪔) –

ᩑᩅᨾᩣᨴᩥᨶᩣ ᩋᨶᩩᨩᩣᨶᨶ᩠ᨲᩮᨶ. ᩁᩣᨩᨣᩉᩮᨲᩥ ᩑᩅᩴᨶᩣᨾᨠᩮ ᨶᨣᩁᩮ. ᨲᨬ᩠ᩉᩥ ᨾᨶ᩠ᨵᩣᨲᩩᨾᩉᩣᨣᩮᩣᩅᩥᨶ᩠ᨴᩣᨴᩦᩉᩥ ᨸᩁᩥᨣ᩠ᨣᩉᩥᨲᨲ᩠ᨲᩣ ‘‘ᩁᩣᨩᨣᩉ’’ᨶ᩠ᨲᩥ ᩅᩩᨧ᩠ᨧᨲᩥ. ᨲᩴ ᨸᨶᩮᨲᩴ ᨻᩩᨴ᩠ᨵᨠᩣᩃᩮ, ᨧᨠ᩠ᨠᩅᨲ᩠ᨲᩥᨠᩣᩃᩮ ᨧ ᨶᨣᩁᩴ ᩉᩮᩣᨲᩥ, ᩈᩮᩈᨠᩣᩃᩮ ᩈᩩᨬ᩠ᨬᩴ ᩉᩮᩣᨲᩥ ᨿᨠ᩠ᨡᨸᩁᩥᨣ᩠ᨣᩉᩥᨲᩴ, ᨲᩮᩈᩴ ᩅᩈᨶᨭ᩠ᨮᩣᨶᩴ ᩉᩩᨲ᩠ᩅᩣ ᨲᩥᨭ᩠ᨮᨲᩥ. ᨲᩈ᩠ᨾᩣᨲᩥ ᨿᩈ᩠ᨾᩣ ᩍᨴᩴ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᨠᩮᨶ ᩅᨲ᩠ᨲᨻ᩠ᨻᩅᨧᨶᩴ, ᨲᩈ᩠ᨾᩣ. ᨠᩥᩴ ᨲᩮ ᩏᨽᩮᩣᨸᩥ ᨸᩣᨲᩥᨾᩮᩣᨠ᩠ᨡᩴ ᩏᨴ᩠ᨴᩥᩈᨶ᩠ᨲᩥ, ᨿᩮᨶᩮᩅᩴ ᩅᨲ᩠ᨲᨻ᩠ᨻᨶ᩠ᨲᩥ ᩌᩉ ‘‘ᩈᨦ᩠ᨥᨲ᩠ᨳᩮᩁᩮᩣ ᩅᩣ ᩉᩦ’’ᨲᩥᩌᨴᩥ. ᨳᩮᩁᩣᨵᩥᨠᨶ᩠ᨲᩥ ᨳᩮᩁᩣᨵᩦᨶᩴ, ᨳᩮᩁᩣᨿᨲ᩠ᨲᩴ ᨽᩅᩥᨲᩩᨶ᩠ᨲᩥ ᩋᨲ᩠ᨳᩮᩣ. ‘‘ᨳᩮᩁᩣᨵᩮᨿ᩠ᨿ’’ᨶ᩠ᨲᩥ ᩅᩣ ᨸᩣᨮᩮᩣ, ᩈᩮᩣᨿᩮᩅᨲ᩠ᨳᩮᩣ. ᨲᨲ᩠ᨳᩣᨲᩥ ᨲᩥᩔᩴ ᨸᩁᩥᩈᩣᨿᩴ. ᨻ᩠ᨿᨲ᩠ᨲᩮᩣᨲᩥ ᨸᨬ᩠ᨬᩣᩅᩮᨿ᩠ᨿᨲ᩠ᨲᩥᨿᩮᨶ ᩈᨾᨶ᩠ᨶᩣᨣᨲᩮᩣ, ᨸᨣᩩᨱᨾᩣᨲᩥᨠᩮᩣᨲᩥ ᩋᨲ᩠ᨳᩮᩣ. ᨸᨭᩥᨻᩃᩮᩣᨲᩥ ᩅᨲ᩠ᨲᩩᩴ ᩈᨾᨲ᩠ᨳᩮᩣ, ᩋᨽᩦᨲᩮᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᩑᨲ᩠ᨳ ᨧ ᨠᩥᨬ᩠ᨧᩣᨸᩥ ᨴᩉᩁᩔᩣᨸᩥ ᨻ᩠ᨿᨲ᩠ᨲᩔ ᨸᩣᨲᩥᨾᩮᩣᨠ᩠ᨡᩮᩣ ᩋᨶᩩᨬ᩠ᨬᩣᨲᩮᩣ, ᩋᨳ ᨡᩮᩣ ᩑᨲ᩠ᨳᩣᨿᩴ ᩋᨵᩥᨸ᩠ᨸᩣᨿᩮᩣ – ᩈᨧᩮ ᨳᩮᩁᩔ ᨸᨬ᩠ᨧ ᩅᩣ ᨧᨲ᩠ᨲᩣᩁᩮᩣ ᩅᩣ ᨲᨿᩮᩣ ᩅᩣ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩣ ᨶᩣᨣᨧ᩠ᨨᨶ᩠ᨲᩥ, ᨴ᩠ᩅᩮ ᨸᨶ ᩋᨠ᩠ᨡᨱ᩠ᨯᩣ ᩈᩩᩅᩥᩈᨴᩣ ᩅᩣᨧᩩᨣ᩠ᨣᨲᩣ ᩉᩮᩣᨶ᩠ᨲᩥ, ᨳᩮᩁᩣᨿᨲ᩠ᨲᩮᩣᩅ ᨸᩣᨲᩥᨾᩮᩣᨠ᩠ᨡᩮᩣ. ᩈᨧᩮ ᨸᨶ ᩑᨲ᩠ᨲᨠᨾ᩠ᨸᩥ ᩅᩥᩈᨴᩴ ᨠᩣᨲᩩᩴ ᨶ ᩈᨠ᩠ᨠᩮᩣᨲᩥ, ᨻ᩠ᨿᨲ᩠ᨲᩔ ᨽᩥᨠ᩠ᨡᩩᨶᩮᩣ ᩌᨿᨲ᩠ᨲᩮᩣᨲᩥ.

ᩍᨴᩣᨶᩥ ‘‘ᩈᨦ᩠ᨥᩮᩣ’’ᨲᩥ ᩋᩅᩥᩈᩮᩈᩮᨶ ᩅᩩᨲ᩠ᨲᨲ᩠ᨲᩣ ᩍᨵᩣᨵᩥᨸ᩠ᨸᩮᨲᩈᨦ᩠ᨥᩴ ᩅᩥᩈᩮᩈᩮᨲ᩠ᩅᩣ ᨴᩔᩮᨲᩩᩴ ‘‘ᩈᨦ᩠ᨥᩮᩣᨲᩥ ᩍᨾᩥᨶᩣ ᨸᨶ ᨸᨴᩮᨶᩣ’’ᨲᩥᩌᨴᩥᨾᩣᩉ ᨠᩥᨬ᩠ᨧᩣᨸᩦᨲᩥ ᩋᨶᩩᨣ᩠ᨣᩉᨲ᩠ᨳᩮ ᨶᩥᨸᩣᨲᩮᩣ, ᨲᩔ ᨿᨴᩥ ᨶᩣᨾᩣᨲᩥ ᩋᨲ᩠ᨳᩮᩣ ᩅᩮᨴᩥᨲᨻ᩠ᨻᩮᩣ. ᨴᨠ᩠ᨡᨶ᩠ᨲᩥ ᩑᨲᩣᨿ ᩈᨲ᩠ᨲᩣ ᨿᨳᩣᨵᩥᨸ᩠ᨸᩮᨲᩣᩉᩥ ᩈᨾ᩠ᨸᨲ᩠ᨲᩦᩉᩥ ᩅᨯ᩠ᨰᨶ᩠ᨲᩦᨲᩥ ᨴᨠ᩠ᨡᩥᨱᩣ, ᨸᩁᩃᩮᩣᨠᩴ ᩈᨴ᩠ᨴᩉᩥᨲ᩠ᩅᩣ ᨴᩣᨲᨻ᩠ᨻᩴ ᨴᩣᨶᩴ, ᨲᩴ ᨴᨠ᩠ᨡᩥᨱᩴ ᩋᩁᩉᨲᩥ, ᨴᨠ᩠ᨡᩥᨱᩣᨿ ᩅᩣ ᩉᩥᨲᩮᩣ, ᨿᩈ᩠ᨾᩣ ᨶᩴ ᨾᩉᨸ᩠ᨹᩃᨠᩣᩁᩥᨲᩣᨿ ᩅᩥᩈᩮᩣᨵᩮᨲᩦᨲᩥ ᨴᨠ᩠ᨡᩥᨱᩮᨿ᩠ᨿᩮᩣ, ᨴᩥᨭ᩠ᨮᩥᩈᩦᩃᩈᨦ᩠ᨥᩣᨲᩮᨶ ᩈᩴᩉᨲᩮᩣᨲᩥ ᩈᨦ᩠ᨥᩮᩣ, ᨴᨠ᩠ᨡᩥᨱᩮᨿ᩠ᨿᩮᩣ ᨧ ᩈᩮᩣ ᩈᨦ᩠ᨥᩮᩣ ᨧᩣᨲᩥ ᨴᨠ᩠ᨡᩥᨱᩮᨿ᩠ᨿᩈᨦ᩠ᨥᩮᩣ. ᩈᨾ᩠ᨾᩩᨲᩥᨿᩣ ᨧᨲᩩᩅᨣ᩠ᨣᩣᨴᩥᩅᩥᨶᨿᨸᨬ᩠ᨬᨲ᩠ᨲᩥᨿᩣ ᩈᩥᨴ᩠ᨵᩮᩣ ᩈᨦ᩠ᨥᩮᩣ ᩈᨾ᩠ᨾᩩᨲᩥᩈᨦ᩠ᨥᩮᩣ. ᩋᩅᩥᩈᩮᩈᩮᨶᩣᨲᩥ ‘‘ᩋᩁᩥᨿᩣ’’ᨲᩥ ᩅᩣ ‘‘ᨸᩩᨳᩩᨩ᩠ᨩᨶᩣ’’ᨲᩥ ᩅᩣ ᩋᩅᩥᩈᩮᩈᩮᨲ᩠ᩅᩣ ᩈᩣᨾᨬ᩠ᨬᩮᨶ. ᩈᩮᩣᨲᩥ ᩈᨾ᩠ᨾᩩᨲᩥᩈᨦ᩠ᨥᩮᩣ. ᩍᨵᩣᨲᩥ ᩍᨾᩥᩔᩴ ᩏᨸᩮᩣᩈᨳᨬᨲ᩠ᨲᩥᨿᩴ. ᩋᨵᩥᨸ᩠ᨸᩮᨲᩮᩣ ᩏᨸᩮᩣᩈᨳᨬᨲ᩠ᨲᩥᨿᩣ ᩋᩅᩥᩈᩮᩈᨲ᩠ᨲᩣ. ᨶᨶᩩ ᨧ ᩈᩮᩣᨸᩥ ᨸᨬ᩠ᨧᩅᩥᨵᩮᩣ ᩉᩮᩣᨲᩥ, ᨲᨲ᩠ᨳ ᨠᨲᨾᩮᩣ ᩍᨵᩣᨵᩥᨸ᩠ᨸᩮᨲᩮᩣᨲᩥ ᩋᨶᩩᨿᩮᩣᨣᩴ ᩈᨶ᩠ᨵᩣᨿᩣᩉ ‘‘ᩈᩮᩣ ᨸᨶᩮᩈᩣ’’ᨲᩥᩌᨴᩥ. ᨠᨾ᩠ᨾᩅᩈᩮᨶᩣᨲᩥ ᩅᩥᨶᨿᨠᨾ᩠ᨾᩅᩈᩮᨶ. ᨸᨬ᩠ᨧ ᩅᩥᨵᩣ ᨸᨠᩣᩁᩣ ᩋᩔ ᩈᨾ᩠ᨾᩩᨲᩥᩈᨦ᩠ᨥᩔᩣᨲᩥ ᨸᨬ᩠ᨧᩅᩥᨵᩮᩣ. ᨲᨳᩣ ᩉᩥ ᩅᩥᨵᨿᩩᨲ᩠ᨲᨣᨲᨸ᩠ᨸᨠᩣᩁᩈᨴ᩠ᨴᩮ ᩈᨾᩣᨶᨲ᩠ᨳᩮ ᩅᨱ᩠ᨱᨿᨶ᩠ᨲᩥ. ᨧᨲᩩᨶ᩠ᨶᩴ ᩅᨣ᩠ᨣᩮᩣ ᩈᨾᩪᩉᩮᩣᨲᩥ ᨧᨲᩩᩅᨣ᩠ᨣᩮᩣ, ᨧᨲᩩᨸᩁᩥᨾᩣᨱᨿᩩᨲ᩠ᨲᩮᩣ ᩅᩣ ᩅᨣ᩠ᨣᩮᩣ ᨧᨲᩩᩅᨣ᩠ᨣᩮᩣ. ᩑᩅᩴ ᨸᨬ᩠ᨧᩅᨣ᩠ᨣᩣᨴᩥ.

ᩍᨴᩣᨶᩥ ᨿᩮᩈᩴ ᨠᨾ᩠ᨾᩣᨶᩴ ᩅᩈᩮᨶᩣᨿᩴ ᨸᨬ᩠ᨧᩅᩥᨵᩮᩣ ᩉᩮᩣᨲᩥ, ᨲᩴ ᩅᩥᩈᩮᩈᩮᨲ᩠ᩅᩣ ᨴᩔᩮᨲᩩᩴ ‘‘ᨲᨲ᩠ᨳᩣ’’ᨲᩥᩌᨴᩥᨾᩣᩉ. ᨲᨲ᩠ᨳ ᨲᨲ᩠ᨳᩣᨲᩥ ᨸᨬ᩠ᨧᩅᩥᨵᩮ ᩈᨦ᩠ᨥᩮ. ᨾᨩ᩠ᨫᩥᨾᩮᩈᩩ ᨩᨶᨸᨴᩮᩈᩩ ᩏᨸᩈᨾ᩠ᨸᨴᨠᨾ᩠ᨾᩔ ᨴᩈᩅᨣ᩠ᨣᨠᩁᨱᩦᨿᨲ᩠ᨲᩣ ᩅᩩᨲ᩠ᨲᩴ ‘‘ᨮᨸᩮᨲ᩠ᩅᩣ…ᨸᩮ… ᩏᨸᩈᨾ᩠ᨸᨴᨬ᩠ᨧᩣ’’ᨲᩥ. ‘‘ᨲᨳᩣ’’ᨲᩥ ᩍᨾᩥᨶᩣ ‘‘ᨶ ᨠᩥᨬ᩠ᨧᩥ ᩈᨦ᩠ᨥᨠᨾ᩠ᨾᩴ ᨠᩣᨲᩩᩴ ᨶ ᩅᨭ᩠ᨭᨲᩦ’’ᨲᩥ ᩍᨾᨾᨲ᩠ᨳᩴ ᩋᨲᩥᨴᩥᩈᨲᩥ. ᨿᨴᩥ ᩑᩅᩴ ᨠᩥᨾᨲ᩠ᨳᩴ ᩋᨲᩥᩁᩮᨠᩅᩦᩈᨲᩥᩅᨣ᩠ᨣᩮᩣ ᩅᩩᨲ᩠ᨲᩮᩣᨲᩥ ᩌᩉ ‘‘ᩈᩮᩣ ᨸᨶᩣ’’ᨲᩥᩌᨴᩥ. ᩋᨲᩥᩁᩮᨠᨲᩁᩮᨶᩣᨲᩥ ᨧᨲᩩᩅᨣ᩠ᨣᩣᨴᩥᨠᩁᨱᩦᨿᩴ ᨸᨬ᩠ᨧᩅᨣ᩠ᨣᩣᨴᩥᨶᩣ ᩋᨲᩥᩁᩮᨠᨲᩁᩮᨶ, ᨴᩈᩅᨣ᩠ᨣᨠᩁᨱᩦᨿᨬ᩠ᨧ ᩑᨠᩣᨴᩈᩅᨣ᩠ᨣᩣᨴᩥᨶᩣ ᩋᨲᩥᩁᩮᨠᨲᩁᩮᨶ. ᨴᩔᨶᨲ᩠ᨳᨶ᩠ᨲᩥ ᨬᩣᨸᨶᨲ᩠ᨳᩴ. ᩍᨴᨾᩮᩅ ᨧᩣᨶᩮᨶ ᨠᨲ᩠ᨲᨻ᩠ᨻᩴ ᨠᨾ᩠ᨾᨶ᩠ᨲᩥ ‘‘ᨠᨾ᩠ᨾᩅᩈᩮᨶ ᨸᨬ᩠ᨧᩅᩥᨵᩮᩣ’’ᨲᩥ ᩅᩩᨲ᩠ᨲᩴ. ᨠᨾ᩠ᨾᩔᩣᨶᩥᨿᨾᩮ ᨠᨳᨾᩮᨲᩴ ᨿᩩᨩ᩠ᨩᩮᨿ᩠ᨿᩣᨲᩥ ᩎᨴᩥᩈᩦ ᨧᩮᩣᨴᨶᩣ ᩋᨶᩅᨠᩣᩈᩣᨲᩥ ᨴᨭ᩠ᨮᨻ᩠ᨻᩴ. ᩍᨾᩈ᩠ᨾᩥᩴ ᨸᨶᨲ᩠ᨳᩮᨲᩥ ᩏᨸᩮᩣᩈᨳᩮ.

ᩏᨸᩮᩣᩈᨳᩈᨴ᩠ᨴᩮᩣ ᨸᨶᩣᨿᩴ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩈᩦᩃᩏᨸᩅᩣᩈᨸᨬ᩠ᨬᨲ᩠ᨲᩥᨴᩥᩅᩈᩮᩈᩩ ᩅᨲ᩠ᨲᨲᩥ. ᨲᨳᩣ ᩉᩮᩈ ‘‘ᩌᨿᩣᨾᩣᩅᩩᩈᩮᩣ ᨠᨸ᩠ᨸᩥᨶ, ᩏᨸᩮᩣᩈᨳᩴ ᨣᨾᩥᩔᩣᨾᩣ’’ᨲᩥᩌᨴᩦᩈᩩ (ᨴᩦ. ᨶᩥ. ᩋᨭ᩠ᨮ. ᪑.᪑᪕᪐; ᨾ. ᨶᩥ. ᩋᨭ᩠ᨮ. ᪓.᪘᪕) ᨲᩥᨾᩮᩣᨠ᩠ᨡᩩᨴ᩠ᨴᩮᩈᩮ ᩌᨣᨲᩮᩣ, ‘‘ᩑᩅᩴ ᩋᨭ᩠ᨮᨦ᩠ᨣᩈᨾᨶ᩠ᨶᩣᨣᨲᩮᩣ ᨡᩮᩣ, ᩅᩥᩈᩣᨡᩮ, ᩏᨸᩮᩣᩈᨳᩮᩣ ᩏᨸᩅᩩᨲ᩠ᨳᩮᩣ’’ᨲᩥᩌᨴᩦᩈᩩ (ᩋ. ᨶᩥ. ᪘.᪔᪓) ᩈᩦᩃᩮ, ‘‘ᩈᩩᨴ᩠ᨵᩔ ᩅᩮ ᩈᨴᩣ ᨹᨣ᩠ᨣᩩ, ᩈᩩᨴ᩠ᨵᩔᩩᨸᩮᩣᩈᨳᩮᩣ ᩈᨴᩣ’’ᨲᩥᩌᨴᩦᩈᩩ (ᨾ. ᨶᩥ. ᪑.᪗᪙) ᩏᨸᩅᩣᩈᩮ, ‘‘ᩏᨸᩮᩣᩈᨳᩮᩣ ᨶᩣᨾ ᨶᩣᨣᩁᩣᨩᩣ’’ᨲᩥᩌᨴᩦᩈᩩ (ᨴᩦ. ᨶᩥ. ᪒.᪒᪔᪖) ᨸᨬ᩠ᨬᨲ᩠ᨲᩥᨿᩴ, ‘‘ᨶ, ᨽᩥᨠ᩠ᨡᩅᩮ, ᨲᨴᩉᩩᨸᩮᩣᩈᨳᩮ ᩈᨽᩥᨠ᩠ᨡᩩᨠᩣ ᩌᩅᩣᩈᩣ’’ᨲᩥᩌᨴᩦᩈᩩ (ᨾᩉᩣᩅ. ᪑᪘᪑) ᨴᩥᩅᩈᩮ, ᩍᨵᩣᨸᩥ ᨴᩥᩅᩈᩮᨿᩮᩅ ᩅᨲ᩠ᨲᨾᩣᨶᩮᩣ ᩋᨵᩥᨸ᩠ᨸᩮᨲᩮᩣᨲᩥ ᩌᩉ ‘‘ᩋᨩ᩠ᨩ ᩏᨸᩮᩣᩈᨳᨴᩥᩅᩈᩮᩣ’’ᨲᩥᩌᨴᩥ. ᩏᨸᩅᩈᨶ᩠ᨲᩥ ᩑᨲ᩠ᨳᩣᨲᩥ ᩏᨸᩮᩣᩈᨳᩮᩣ. ᩏᨸᩅᩈᨶ᩠ᨲᩦᨲᩥ ᩈᩦᩃᩮᨶ ᩅᩣ ᩈᨻ᩠ᨻᩈᩮᩣ ᩌᩉᩣᩁᩔ ᩋᨽᩩᨬ᩠ᨩᨶᩈᨦ᩠ᨡᩣᨲᩮᨶ ᩋᨶᩈᨶᩮᨶ ᩅᩣ ᨡᩦᩁᨸᩣᨶᨾᨵᩩᨸᩣᨶᩣᨴᩥᨾᨲ᩠ᨲᩮᨶ ᩅᩣ ᩏᨸᩮᨲᩣ ᩉᩩᨲ᩠ᩅᩣ ᩅᩈᨶ᩠ᨲᩦᨲᩥ ᩋᨲ᩠ᨳᩮᩣ.

ᩈᨻ᩠ᨻᩮᩈᨾ᩠ᨸᩥ ᩅᩣᨠ᩠ᨿᩣᨶᩴ ᩑᩅ-ᨠᩣᩁᨲ᩠ᨳᩈᩉᩥᨲᨲ᩠ᨲᩣ ‘‘ᩏᨸᩮᩣᩈᨳᩮᩣ’’ᨲᩥ ᩑᨲᩔ ‘‘ᩏᨸᩮᩣᩈᨳᩮᩣ ᩑᩅᩣ’’ᨲᩥ ᩋᨿᨾᨲ᩠ᨳᩮᩣ ᩃᨻ᩠ᨽᨲᩦᨲᩥ ᩌᩉ ‘‘ᩑᨲᩮᨶ ᩋᨶᩩᨸᩮᩣᩈᨳᨴᩥᩅᩈᩴ ᨸᨭᩥᨠ᩠ᨡᩥᨸᨲᩦ’’ᨲᩥ. ᩍᨾᩥᨶᩣ ᩋᩅᨵᩣᩁᨱᩮᨶ ᨶᩥᩁᩣᨠᨲᩴ ᨴᩔᩮᨲᩥ, ᩋᨳ ᩅᩣ ᩈᨴ᩠ᨴᨶ᩠ᨲᩁᨲ᩠ᨳᩣᨸᩮᩣᩉᨶᩅᩈᩮᨶ ᩈᨴ᩠ᨴᩮᩣ ᩋᨲ᩠ᨳᩴ ᩅᨴᨲᩦᨲᩥ ‘‘ᩏᨸᩮᩣᩈᨳᩮᩣ’’ᨲᩥ ᩑᨲᩔ ‘‘ᩋᨶᩩᨸᩮᩣᩈᨳᩮᩣ ᨶ ᩉᩮᩣᨲᩦ’’ᨲᩥ ᩋᨿᨾᨲ᩠ᨳᩮᩣᨲᩥ ᩅᩩᨲ᩠ᨲᩴ ‘‘ᩑᨲᩮᨶ ᩋᨶᩩᨸᩮᩣᩈᨳᨴᩥᩅᩈᩴ ᨸᨭᩥᨠ᩠ᨡᩥᨸᨲᩦ’’ᨲᩥ. ‘‘ᩑᩈ ᨶᨿᩮᩣ ᨸᨶ᩠ᨶᩁᩈᩮᩣ’’ᨲᩥ ᩍᨾᩥᨶᩣ ᩋᨬ᩠ᨬᩴ ᩏᨸᩮᩣᩈᨳᨴᩥᩅᩈᩴ ᨸᨭᩥᨠ᩠ᨡᩥᨸᨲᩦᨲᩥ ᩑᨲ᩠ᨳᩣᨸᩥ. ᩑᨲᩮᨶᩣᨲᩥ ‘‘ᩏᨸᩮᩣᩈᨳᩮᩣ’’ᨲᩥ ᩑᨲᩮᨶ ᩈᨴ᩠ᨴᩮᨶ. ᨸᨬ᩠ᨧᨴᩈᨶ᩠ᨶᩴ ᨲᩥᨳᩦᨶᩴ ᨸᩪᩁᨱᩅᩈᩮᨶ ᨸᨶ᩠ᨶᩁᩈᩮᩣ. ᨸᨶ᩠ᨶᩁᩈᩮᩣᨲᩥ ᩍᨾᩥᨶᩣ ᩋᨬ᩠ᨬᩴ ᩏᨸᩮᩣᩈᨳᨴᩥᩅᩈᩴ ᨸᨭᩥᨠ᩠ᨡᩥᨸᨲᩦ’’ᨲᩥ ᩈᩴᨡᩥᨲ᩠ᨲᩮᨶ ᩅᩩᨲ᩠ᨲᨾᨲ᩠ᨳᩴ ᩅᩥᨲ᩠ᨳᩣᩁᨲᩮᩣ ᨴᩔᩮᨲᩩᩴ ‘‘ᨴᩥᩅᩈᩅᩈᩮᨶ ᩉᩦ’’ᨲᩥᩌᨴᩥᨾᩣᩉ. ᨧᨲᩩᨴ᩠ᨴᩈᩥᨿᩴ ᨶᩥᨿᩩᨲ᩠ᨲᩮᩣ ᨧᩣᨲᩩᨴ᩠ᨴᩈᩥᨠᩮᩣ. ᩑᩅᩴ ᨸᨶ᩠ᨶᩁᩈᩥᨠᩮᩣ. ᩈᩣᨾᨣ᩠ᨣᩥᩏᨸᩮᩣᩈᨳᩮᩣ ᨶᩣᨾ ᩈᨦ᩠ᨥᩈᩣᨾᨣ᩠ᨣᩥᨠᨲᨴᩥᩅᩈᩮ ᨠᩣᨲᨻ᩠ᨻᩏᨸᩮᩣᩈᨳᩮᩣ. ᩉᩮᨾᨶ᩠ᨲᨣᩥᨾ᩠ᩉᩅᩔᩣᨶᩣᨶᩴ ᨲᩥᨱ᩠ᨱᩴ ᩏᨲᩪᨶᨶ᩠ᨲᩥ ᩑᨲ᩠ᨳ ᩉᩮᨾᨶ᩠ᨲᩏᨲᩩ ᨶᩣᨾ ᩋᨸᩁᨠᨲ᩠ᨲᩥᨠᩔ ᨠᩣᩊᨸᨠ᩠ᨡᨸᩣᨭᩥᨸᨴᨲᩮᩣ ᨸᨭ᩠ᨮᩣᨿ ᨹᨣ᩠ᨣᩩᨶᨸᩩᨱ᩠ᨱᨾᨸᩁᩥᨿᩮᩣᩈᩣᨶᩣ ᨧᨲ᩠ᨲᩣᩁᩮᩣ ᨾᩣᩈᩣ, ᨣᩥᨾ᩠ᩉᩏᨲᩩ ᨶᩣᨾ ᨹᨣ᩠ᨣᩩᨶᩔ ᨠᩣᩃᨸᨠ᩠ᨡᨸᩣᨭᩥᨸᨴᨲᩮᩣ ᨸᨭ᩠ᨮᩣᨿ ᩌᩈᩣᩊ᩠ᩉᨸᩩᨱ᩠ᨱᨾᨸᩁᩥᨿᩮᩣᩈᩣᨶᩣ ᨧᨲ᩠ᨲᩣᩁᩮᩣ ᨾᩣᩈᩣ, ᩅᩔᩣᨶᩏᨲᩩ ᨶᩣᨾ ᩌᩈᩣᩊ᩠ᩉᩔ ᨠᩣᩊᨸᨠ᩠ᨡᨸᩣᨭᩥᨸᨴᨲᩮᩣ ᨸᨭ᩠ᨮᩣᨿ ᩋᨸᩁᨠᨲ᩠ᨲᩥᨠᨸᩩᨱ᩠ᨱᨾᨸᩁᩥᨿᩮᩣᩈᩣᨶᩣ ᨧᨲ᩠ᨲᩣᩁᩮᩣ ᨾᩣᩈᩣ. ᨲᨲᩥᨿᩈᨲ᩠ᨲᨾᨸᨠ᩠ᨡᩮᩈᩩ ᨴ᩠ᩅᩮ ᨴ᩠ᩅᩮ ᨠᨲ᩠ᩅᩣ ᨨ ᨧᩣᨲᩩᨴ᩠ᨴᩈᩥᨠᩣᨲᩥ ᩉᩮᨾᨶ᩠ᨲᩔ ᩏᨲᩩᨶᩮᩣ ᨲᨲᩥᨿᩮ ᨧ ᩈᨲ᩠ᨲᨾᩮ ᨧ ᨸᨠ᩠ᨡᩮ ᨴ᩠ᩅᩮ ᨧᩣᨲᩩᨴ᩠ᨴᩈᩥᨠᩣ, ᩑᩅᨾᩥᨲᩁᩮᩈᩴ ᩏᨲᩪᨶᨶ᩠ᨲᩥ ᨨ ᨧᩣᨲᩩᨴ᩠ᨴᩈᩥᨠᩣ. ᩈᩮᩈᩣ ᨸᨶ᩠ᨶᩁᩈᩥᨠᩣᨲᩥ ᩈᩮᩈᩣ ᩋᨭ᩠ᨮᩣᩁᩈ ᨸᨶ᩠ᨶᩁᩈᩥᨠᩣ. ᩉᩮᩣᨶ᩠ᨲᩥ ᨧᩮᨲ᩠ᨳ –

‘‘ᨠᨲ᩠ᨲᩥᨠᩔ ᨧ ᨠᩣᩊᨾ᩠ᩉᩣ, ᨿᩣᩅ ᨹᨣ᩠ᨣᩩᨶᨸᩩᨱ᩠ᨱᨾᩣ;

‘ᩉᩮᨾᨶ᩠ᨲᨠᩣᩃᩮᩣ’ᨲᩥ ᩅᩥᨬ᩠ᨬᩮᨿ᩠ᨿᩮᩣ, ᩋᨭ᩠ᨮ ᩉᩮᩣᨶ᩠ᨲᩥ ᩏᨸᩮᩣᩈᨳᩣ.

‘‘ᨹᨣ᩠ᨣᩩᨶᩔ ᨧ ᨠᩣᩊᨾ᩠ᩉᩣ, ᨿᩣᩅ ᩌᩈᩣᩊ᩠ᩉᨸᩩᨱ᩠ᨱᨾᩣ;

‘ᨣᩥᨾ᩠ᩉᨠᩣᩃᩮᩣ’ᨲᩥ ᩅᩥᨬ᩠ᨬᩮᨿ᩠ᨿᩮᩣ, ᩋᨭ᩠ᨮ ᩉᩮᩣᨶ᩠ᨲᩥ ᩏᨸᩮᩣᩈᨳᩣ.

‘‘ᩌᩈᩣᩊ᩠ᩉᩔ ᨧ ᨠᩣᩊᨾ᩠ᩉᩣ, ᨿᩣᩅ ᨠᨲ᩠ᨲᩥᨠᨸᩩᨱ᩠ᨱᨾᩣ;

‘ᩅᩔᨠᩣᩃᩮᩣ’ᨲᩥ ᩅᩥᨬ᩠ᨬᩮᨿ᩠ᨿᩮᩣ, ᩋᨭ᩠ᨮ ᩉᩮᩣᨶ᩠ᨲᩥ ᩏᨸᩮᩣᩈᨳᩣ.

‘‘ᩏᨲᩪᨶᩴ ᨸᨶ ᨲᩥᨱ᩠ᨱᨶ᩠ᨶᩴ, ᨸᨠ᩠ᨡᩮ ᨲᨲᩥᨿᩈᨲ᩠ᨲᨾᩮ;

‘ᨧᩣᨲᩩᨴ᩠ᨴᩈᩮᩣ’ᨲᩥ ᨸᩣᨲᩥᨾᩮᩣᨠ᩠ᨡᩴ, ᩏᨴ᩠ᨴᩥᩈᨶ᩠ᨲᩥ ᨶᨿᨬ᩠ᨬᩩᨶᩮᩣ’’ᨲᩥ.

ᨸᨠᨲᩥᨿᩣ ᨶᨻᩉᩩᨲᩁᩣᩅᩣᩈᩥᨠᩣᨴᩥᨸᨧ᩠ᨧᨿᩮᨶ ᨠᩣᨲᨻ᩠ᨻᩴ ᨸᨠᨲᩥᨧᩣᩁᩥᨲ᩠ᨲᩴ. ᨻᩉᩩᨲᩁᩣᩅᩣᩈᩥᨠᩣᨴᩥᨸᨧ᩠ᨧᨿᩮ ᨸᨶ ᩈᨲᩥ ᩋᨬ᩠ᨬᩈ᩠ᨾᩥᩴ ᨧᩣᨲᩩᨴ᩠ᨴᩈᩮᨸᩥ ᨠᩣᨲᩩᩴ ᩅᨭ᩠ᨭᨲᩥ. ᨲᩮᨶᩣᩉ ‘‘ᩈᨠᩥ’’ᨶ᩠ᨲᩥᩌᨴᩥ. ᩈᨠᩥᨶ᩠ᨲᩥ ᩑᨠᩈ᩠ᨾᩥᩴ ᩅᩣᩁᩮ. ᩌᩅᩣᩈᩥᨠᩣᨶᩴ ᩋᨶᩩᩅᨲ᩠ᨲᩥᨲᨻ᩠ᨻᨶ᩠ᨲᩥ ᩌᩅᩣᩈᩥᨠᩮᩉᩥ ‘‘ᩋᨩ᩠ᨩᩩᨸᩮᩣᩈᨳᩮᩣ ᨧᩣᨲᩩᨴ᩠ᨴᩈᩮᩣ’’ᨲᩥ ᨸᩩᨻ᩠ᨻᨠᩥᨧ᩠ᨧᩮ ᨠᩁᩥᨿᨾᩣᨶᩮ ᩋᨶᩩᩅᨲ᩠ᨲᩥᨲᨻ᩠ᨻᩴ, ᨶ ᨸᨭᩥᨠ᩠ᨠᩮᩣᩈᩥᨲᨻ᩠ᨻᩴ. ᩌᨴᩥᩈᨴ᩠ᨴᩮᨶ ‘‘ᩌᩅᩣᩈᩥᨠᩮᩉᩥ ᩌᨣᨶ᩠ᨲᩩᨠᩣᨶᩴ ᩋᨶᩩᩅᨲ᩠ᨲᩥᨲᨻ᩠ᨻ’’ᨶ᩠ᨲᩥ (ᨾᩉᩣᩅ. ᪑᪗᪘) ᩅᨧᨶᩴ, ‘‘ᩋᨶᩩᨩᩣᨶᩣᨾᩥ, ᨽᩥᨠ᩠ᨡᩅᩮ, ᨲᩮᩉᩥ ᨽᩥᨠ᩠ᨡᩪᩉᩥ ᨴ᩠ᩅᩮ ᨲᨿᩮᩣ ᩏᨸᩮᩣᩈᨳᩮ ᨧᩣᨲᩩᨴ᩠ᨴᩈᩥᨠᩮ ᨠᩣᨲᩩᩴ, ᨠᨳᩴ ᨾᨿᩴ ᨲᩮᩉᩥ ᨽᩥᨠ᩠ᨡᩪᩉᩥ ᨸᨮᨾᨲᩁᩴ ᨸᩅᩣᩁᩮᨿ᩠ᨿᩣᨾᩣ’’ᨲᩥ (ᨾᩉᩣᩅ. ᪒᪔᪐) ᩅᨧᨶᨬ᩠ᨧ ᩈᨦ᩠ᨣᨱ᩠ᩉᩣᨲᩥ. ᩑᨲ᩠ᨳ ᨧ ᨸᨮᨾᩈᩩᨲ᩠ᨲᩔ ᩑᨠᩮᨠᩔ ᩏᨲᩩᨶᩮᩣ ᨲᨲᩥᨿᩈᨲ᩠ᨲᨾᨸᨠ᩠ᨡᩔ ᨧᩣᨲᩩᨴ᩠ᨴᩈᩮ ᩅᩣ ᩋᩅᩈᩮᩈᩔ ᨸᨶ᩠ᨶᩁᩈᩮ ᩅᩣ ᩈᨠᩥᩴ ᨸᩣᨲᩥᨾᩮᩣᨠ᩠ᨡᩴ ᩏᨴ᩠ᨴᩥᩈᩥᨲᨻ᩠ᨻᨶ᩠ᨲᩥ ᨸᨠᨲᩥᨧᩣᩁᩥᨲ᩠ᨲᩅᩈᩮᨶᨸᩥ ᩋᨲ᩠ᨳᩈᨾ᩠ᨽᩅᨲᩮᩣ ‘‘ᩌᨣᨶ᩠ᨲᩩᨠᩮᩉᩦ’’ᨲᩥᩌᨴᩦᨶᩥ ᩈᩩᨲ᩠ᨲᩣᨶᩥ ᨴᩔᩥᨲᩣᨶᩦᨲᩥ ᩅᩮᨴᩥᨲᨻ᩠ᨻᩴ. ᨲᨳᩣᩁᩪᨸᨸᨧ᩠ᨧᨿᩮ ᩈᨲᩦᨲᩥ ᩋᨬ᩠ᨬᩈ᩠ᨾᩥᨾ᩠ᨸᩥ ᨧᩣᨲᩩᨴ᩠ᨴᩈᩥᨠᩮ ᩏᨸᩮᩣᩈᨳᩴ ᨠᩣᨲᩩᩴ ᩋᨶᩩᩁᩪᨸᩮ ‘‘ᩌᩅᩣᩈᩥᨠᩣ ᨻᩉᩩᨲᩁᩣ ᩉᩮᩣᨶ᩠ᨲᩦ’’ᨲᩥ ᩑᩅᨾᩣᨴᩥᨠᩮ ᨸᨧ᩠ᨧᨿᩮ ᩈᨲᩥ. ᩋᨬ᩠ᨬᩈ᩠ᨾᩥᨾ᩠ᨸᩥ ᨧᩣᨲᩩᨴ᩠ᨴᩈᩮᨲᩥ ᨲᩥᨱ᩠ᨱᩴ ᩏᨲᩪᨶᩴ ᨲᨲᩥᨿᩈᨲ᩠ᨲᨾᨸᨠ᩠ᨡᨧᩣᨲᩩᨴ᩠ᨴᩈᨲᩮᩣ ᩋᨬ᩠ᨬᩈ᩠ᨾᩥᩴ ᨧᩣᨲᩩᨴ᩠ᨴᩈᩮ.

ᨶ ᨠᩮᩅᩃᩴ ᩏᨸᩮᩣᩈᨳᨴᩥᩅᩈᩣᩅ ᩉᩮᩣᨶ᩠ᨲᩦᨲᩥ ᩌᩉ ‘‘ᨸᩩᩁᩥᨾᩅᩔᩴᩅᩩᨭ᩠ᨮᩣᨶᩴ ᨸᨶᩣ’’ᨲᩥᩌᨴᩥ. ᨾᩣ ᩍᨲᩥ ᨧᨶ᩠ᨴᩮᩣ ᩅᩩᨧ᩠ᨧᨲᩥ ᨲᩔ ᨣᨲᩥᨿᩣ ᨴᩥᩅᩈᩔ ᨾᩥᨶᩥᨲᨻ᩠ᨻᨲᩮᩣ, ᩈᩮᩣ ᩑᨲ᩠ᨳ ᩈᨻ᩠ᨻᨠᩃᩣᨸᩣᩁᩥᨸᩪᩁᩥᨿᩣ ᨸᩩᨱ᩠ᨱᩮᩣᨲᩥ ᨸᩩᨱ᩠ᨱᨾᩣ, ᨸᩩᨻ᩠ᨻᨠᨲ᩠ᨲᩥᨠᩣᨿ ᨸᩩᨱ᩠ᨱᨾᩣ ᨸᩩᨻ᩠ᨻᨠᨲ᩠ᨲᩥᨠᨸᩩᨱ᩠ᨱᨾᩣ, ᩋᩔᨿᩩᨩᨸᩩᨱ᩠ᨱᨾᩣ. ᩈᩣ ᩉᩥ ᨸᨧ᩠ᨨᩥᨾᨠᨲ᩠ᨲᩥᨠᩴ ᨶᩥᩅᨲ᩠ᨲᩮᨲᩩᩴ ᩑᩅᩴ ᩅᩩᨲ᩠ᨲᩣ. ᨲᩮᩈᩴᨿᩮᩅᩣᨲᩥ ᨸᩩᩁᩥᨾᩅᩔᩴᩅᩩᨭ᩠ᨮᩣᨶᩴᨿᩮᩅ. ᨽᨱ᩠ᨯᨶᨠᩣᩁᨠᩮᩉᩦᨲᩥ ᨠᩃᩉᨠᩣᩁᨠᩮᩉᩥ. ᨸᨧ᩠ᨧᩩᨠ᩠ᨠᨯ᩠ᨰᨶ᩠ᨲᩦᨲᩥ ᩏᨠ᩠ᨠᨯ᩠ᨰᨶ᩠ᨲᩥ. ᨽᨱ᩠ᨯᨶᨠᩣᩁᨠᩮᩉᩥ ᩋᨶᩩᩅᩣᨴᩅᩈᩮᨶ ᩋᩔᨿᩩᨩᨸᩩᨱ᩠ᨱᨾᩣᨴᩥᩴ ᨸᩁᩥᨧ᩠ᨧᨩᨶ᩠ᨲᩣ ᨸᩅᩣᩁᨱᩴ ᨠᩣᩊᨸᨠ᩠ᨡᩴ, ᨩᩩᨱ᩠ᩉᨸᨠ᩠ᨡᨶ᩠ᨲᩥ ᩏᨴ᩠ᨵᩴ ᨠᨯ᩠ᨰᨶ᩠ᨲᩦᨲᩥ ᩋᨲ᩠ᨳᩮᩣ. ‘‘ᩈᩩᨱᨶ᩠ᨲᩩ ᨾᩮ ᩌᨿᩈ᩠ᨾᨶ᩠ᨲᩮᩣ ᩌᩅᩣᩈᩥᨠᩣ, ᨿᨴᩣᨿᩈ᩠ᨾᨶ᩠ᨲᩣᨶᩴ ᨸᨲ᩠ᨲᨠᩃ᩠ᩃᩴ, ᩍᨴᩣᨶᩥ ᩏᨸᩮᩣᩈᨳᩴ ᨠᩁᩮᨿ᩠ᨿᩣᨾ, ᨸᩣᨲᩥᨾᩮᩣᨠ᩠ᨡᩴ ᩏᨴ᩠ᨴᩥᩈᩮᨿ᩠ᨿᩣᨾ, ᩌᨣᨾᩮ ᨠᩣᩊᩮ ᨸᩅᩣᩁᩮᨿ᩠ᨿᩣᨾᩣ’’ᨲᩥ (ᨾᩉᩣᩅ. ᪒᪔᪐) ‘‘ᩈᩩᨱᨶ᩠ᨲᩩ ᨾᩮ ᩌᨿᩈ᩠ᨾᨶ᩠ᨲᩮᩣ ᩌᩅᩣᩈᩥᨠᩣ, ᨿᨴᩣᨿᩈ᩠ᨾᨶ᩠ᨲᩣᨶᩴ ᨸᨲ᩠ᨲᨠᩃ᩠ᩃᩴ, ᩍᨴᩣᨶᩥ ᩏᨸᩮᩣᩈᨳᩴ ᨠᩁᩮᨿ᩠ᨿᩣᨾ, ᨸᩣᨲᩥᨾᩮᩣᨠ᩠ᨡᩴ ᩏᨴ᩠ᨴᩥᩈᩮᨿ᩠ᨿᩣᨾ, ᩌᨣᨾᩮ ᨩᩩᨱ᩠ᩉᩮ ᨸᩅᩣᩁᩮᨿ᩠ᨿᩣᨾᩣ’’ᨲᩥ ᨧ ᩑᩅᩴ ᨬᨲ᩠ᨲᩥᨿᩣ ᨸᩅᩣᩁᨱᩴ ᩏᨠ᩠ᨠᨯ᩠ᨰᨶ᩠ᨲᩦᨲᩥ ᩅᩩᨲ᩠ᨲᩴ ᩉᩮᩣᨲᩥ.

ᩋᨳᩣᨲᩥ ᩋᨶᨶ᩠ᨲᩁᨲ᩠ᨳᩮ ᨶᩥᨸᩣᨲᩮᩣ. ᨧᨲᩩᨴ᩠ᨴᩈᨶ᩠ᨶᩴ ᨸᩪᩁᨱᩮᩣ ᨧᩣᨲᩩᨴ᩠ᨴᩈᩮᩣ, ᨴᩥᩅᩈᩮᩣ. ᨿᩴ ᩈᨶ᩠ᨵᩣᨿ ‘‘ᩌᨣᨾᩮ ᨩᩩᨱ᩠ᩉᩮ ᨸᩅᩣᩁᩮᨿ᩠ᨿᩣᨾᩣ’’ᨲᩥ ᨬᨲ᩠ᨲᩥᩴ ᨮᨸᨿᩥᩴᩈᩩ, ᨲᩈ᩠ᨾᩥᩴ ᨸᨶ ᩌᨣᨾᩮ ᨩᩩᨱ᩠ᩉᩮ ᨠᩮᩣᨾᩩᨴᩥᨿᩣ ᨧᩣᨲᩩᨾᩣᩈᩥᨶᩥᨿᩣ ᩋᩅᩔᩴ ᨸᩅᩣᩁᩮᨲᨻ᩠ᨻᩴ. ᨶ ᩉᩥ ᨲᩴ ᩋᨲᩥᨠ᩠ᨠᨾᩥᨲ᩠ᩅᩣ ᨸᩅᩣᩁᩮᨲᩩᩴ ᩃᨻ᩠ᨽᨲᩥ. ᩅᩩᨲ᩠ᨲᨬ᩠ᩉᩮᨲᩴ –

‘‘ᨲᩮ ᨧᩮ, ᨽᩥᨠ᩠ᨡᩅᩮ, ᨽᩥᨠ᩠ᨡᩪ ᨽᨱ᩠ᨯᨶᨠᩣᩁᨠᩣ ᨠᩃᩉᨠᩣᩁᨠᩣ ᩅᩥᩅᩣᨴᨠᩣᩁᨠᩣ ᨽᩔᨠᩣᩁᨠᩣ ᩈᨦ᩠ᨥᩮ ᩋᨵᩥᨠᩁᨱᨠᩣᩁᨠᩣ ᨲᨾ᩠ᨸᩥ ᨩᩩᨱ᩠ᩉᩴ ᩋᨶᩩᩅᩈᩮᨿ᩠ᨿᩩᩴ, ᨲᩮᩉᩥ, ᨽᩥᨠ᩠ᨡᩅᩮ, ᨽᩥᨠ᩠ᨡᩪᩉᩥ ᩈᨻ᩠ᨻᩮᩉᩮᩅ ᩌᨣᨾᩮ ᨩᩩᨱ᩠ᩉᩮ ᨠᩮᩣᨾᩩᨴᩥᨿᩣ ᨧᩣᨲᩩᨾᩣᩈᩥᨶᩥᨿᩣ ᩋᨠᩣᨾᩣ ᨸᩅᩣᩁᩮᨲᨻ᩠ᨻ’’ᨶ᩠ᨲᩥ (ᨾᩉᩣᩅ. ᪒᪔᪐).

ᨲᩮᨶᩮᩅᩣᩉ ‘‘ᨸᨧ᩠ᨨᩥᨾᩅᩔᩴᩅᩩᨭ᩠ᨮᩣᨶᨬ᩠ᨧ ᨸᨧ᩠ᨨᩥᨾᨠᨲ᩠ᨲᩥᨠᨸᩩᨱ᩠ᨱᨾᩣ ᩑᩅᩣ’’ᨲᩥ. ᨿᨴᩥ ᩉᩥ ᨲᩴ ᩋᨲᩥᨠ᩠ᨠᨾᩥᨲ᩠ᩅᩣ ᨸᩅᩣᩁᩮᨿ᩠ᨿ, ᨴᩩᨠ᩠ᨠᨭᩣᨸᨲ᩠ᨲᩥᩴ ᩌᨸᨩ᩠ᨩᩮᨿ᩠ᨿ. ᩅᩩᨲ᩠ᨲᨬ᩠ᩉᩮᨲᩴ ‘‘ᨶ ᨧ, ᨽᩥᨠ᩠ᨡᩅᩮ, ᩋᨸᩅᩣᩁᨱᩣᨿ ᨸᩅᩣᩁᩮᨲᨻ᩠ᨻᩴ ᩋᨬ᩠ᨬᨲᩕ ᩈᨦ᩠ᨥᩈᩣᨾᨣ᩠ᨣᩥᨿᩣ’’ᨲᩥ (ᨾᩉᩣᩅ. ᪒᪓᪓). ᩅᩥᩈᩩᨴ᩠ᨵᩥᨸᩅᩣᩁᨱᩣᨿᩮᩣᨣᨲᩮᩣ ᨸᩅᩣᩁᨱᩣᨴᩥᩅᩈᩣ. ᨸᩥᩈᨴ᩠ᨴᩮᨶ ᨶ ᨠᩮᩅᩃᩴ ᨸᩅᩣᩁᨱᩣᨴᩥᩅᩈᩣᨿᩮᩅ, ᩋᨳ ᨡᩮᩣ ᩏᨸᩮᩣᩈᨳᨴᩥᩅᩈᩣᨸᩥ ᩉᩮᩣᨶ᩠ᨲᩦᨲᩥ ᨴᩔᩮᨲᩥ. ᩍᨴᩣᨶᩥ ᨿᩮᩣ ᩈᩮᩣ ᩈᩣᨾᨣ᩠ᨣᩥᩏᨸᩮᩣᩈᨳᨴᩥᩅᩈᩮᩣ ᩅᩩᨲ᩠ᨲᩮᩣ, ᨲᨬ᩠ᨧ ᨲᨸ᩠ᨸᩈᨦ᩠ᨣᩮᨶ ᩈᩣᨾᨣ᩠ᨣᩥᨸᩅᩣᩁᨱᩣᨴᩥᩅᩈᨬ᩠ᨧ ᨴᩔᩮᨶ᩠ᨲᩮᩣ ‘‘ᨿᨴᩣ ᨸᨶᩣ’’ᨲᩥᩌᨴᩥᨾᩣᩉ. ᩒᩈᩣᩁᩥᨲᩮ ᨲᩈ᩠ᨾᩥᩴ ᨽᩥᨠ᩠ᨡᩩᩈ᩠ᨾᩥᨶ᩠ᨲᩥ ᩏᨠ᩠ᨡᩥᨲ᩠ᨲᨠᩮ ᨽᩥᨠ᩠ᨡᩩᩈ᩠ᨾᩥᩴ ᩒᩈᩣᩁᩥᨲᩮ, ᨲᩴ ᨣᩉᩮᨲ᩠ᩅᩣ ᩈᩦᨾᩴ ᨣᨶ᩠ᨲ᩠ᩅᩣ ᩌᨸᨲ᩠ᨲᩥᩴ ᨴᩮᩈᩣᨸᩮᨲ᩠ᩅᩣ ᨠᨾ᩠ᨾᩅᩣᨧᩣᨿ ᨠᨾ᩠ᨾᨸ᩠ᨸᨭᩥᨸ᩠ᨸᩔᨴ᩠ᨵᩥᩅᩈᩮᨶ ᨸᩅᩮᩈᩥᨲᩮᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨲᩔ ᩅᨲ᩠ᨳᩩᩔᩣᨲᩥ ᨲᩔ ᩋᨵᩥᨠᩁᨱᩔ. ᨲᨴᩣ ᨮᨸᩮᨲ᩠ᩅᩣ…ᨸᩮ… ᩏᨸᩮᩣᩈᨳᨴᩥᩅᩈᩮᩣ ᨶᩣᨾ ᩉᩮᩣᨲᩦᨲᩥ ᩈᨾ᩠ᨻᨶ᩠ᨵᩮᩣ. ᨠᩥᩴ ᨠᩣᩁᨱᨶ᩠ᨲᩥ ᩌᩉ ‘‘ᨲᩣᩅᨴᩮᩅᩣ’’ᨲᩥᩌᨴᩥ. ᨲᨲ᩠ᨳ ᨲᩣᩅᨴᩮᩅᩣᨲᩥ ᨲᩴ ᨴᩥᩅᩈᨾᩮᩅ. ᩅᨧᨶᨲᩮᩣᨲᩥ ᨠᩮᩣᩈᨾ᩠ᨻᨠᨠ᩠ᨡᨶ᩠ᨵᨠᩮ (ᨾᩉᩣᩅ. ᪔᪗᪕) ᩅᩩᨲ᩠ᨲᨲ᩠ᨲᩣ. ᨿᨲ᩠ᨳ ᨸᨶ ᨸᨲ᩠ᨲᨧᩦᩅᩁᩣᨴᩦᨶᩴ ᩋᨲ᩠ᨳᩣᨿ ᩋᨸ᩠ᨸᨾᨲ᩠ᨲᨠᩮᨶ ᨠᩣᩁᨱᩮᨶ ᩅᩥᩅᨴᨶ᩠ᨲᩣ ᩏᨸᩮᩣᩈᨳᩴ ᩅᩣ ᨸᩅᩣᩁᨱᩴ ᩅᩣ ᨮᨸᩮᨶ᩠ᨲᩥ, ᨲᨲ᩠ᨳ ᨲᩈ᩠ᨾᩥᩴ ᩋᨵᩥᨠᩁᨱᩮ ᩅᩥᨶᩥᨧ᩠ᨨᩥᨲᩮ ‘‘ᩈᨾᨣ᩠ᨣᩣ ᨩᩣᨲᨾ᩠ᩉᩣ’’ᨲᩥ ᩋᨶ᩠ᨲᩁᩣ ᩈᩣᨾᨣ᩠ᨣᩥᩏᨸᩮᩣᩈᨳᩴ ᨠᩣᨲᩩᩴ ᨶ ᩃᨽᨶ᩠ᨲᩥ. ᨠᩁᩮᩣᨶ᩠ᨲᩮᩉᩥ ᩋᨶᩩᨸᩮᩣᩈᨳᩮ ᩏᨸᩮᩣᩈᨳᩮᩣ ᨠᨲᩮᩣ ᨶᩣᨾ ᩉᩮᩣᨲᩥ. ᨠᨲ᩠ᨲᩥᨠᨾᩣᩈᨻ᩠ᨽᨶ᩠ᨲᩁᩮᨲᩥ ᩑᨲ᩠ᨳ ᨠᨲ᩠ᨲᩥᨠᨾᩣᩈᩮᩣ ᨶᩣᨾ ᨸᩩᨻ᩠ᨻᨠᨲ᩠ᨲᩥᨠᨾᩣᩈᩔ ᨠᩣᩊᨸᨠ᩠ᨡᨸᩣᨭᩥᨸᨴᨲᩮᩣ ᨸᨭ᩠ᨮᩣᨿ ᨿᩣᩅ ᩋᨸᩁᨠᨲ᩠ᨲᩥᨠᨸᩩᨱ᩠ᨱᨾᩣ, ᨲᩣᩅ ᩑᨠᩪᨶᨲᩥᩴᩈᩁᨲ᩠ᨲᩥᨴᩥᩅᩮᩣ, ᨲᩔᨻ᩠ᨽᨶ᩠ᨲᩁᩮ, ᨲᨲᩮᩣ ᨸᨧ᩠ᨨᩣ ᩅᩣ ᨸᨶ ᨸᩩᩁᩮ ᩅᩣ ᨶ ᩅᨭ᩠ᨭᨲᩥ. ᩋᨿᨾᩮᩅ ᨿᩮᩣ ᨠᩮᩣᨧᩥ ᨴᩥᩅᩈᩮᩣᨿᩮᩅ. ᩍᨵᩣᨸᩥ ᨠᩮᩣᩈᨾ᩠ᨻᨠᨠ᩠ᨡᨶ᩠ᨵᨠᩮ ᩈᩣᨾᨣ᩠ᨣᩥᨿᩣ ᩈᨴᩥᩈᩣᩅ ᩈᩣᨾᨣ᩠ᨣᩦ ᩅᩮᨴᩥᨲᨻ᩠ᨻᩣ. ᨿᩮ ᨸᨶ ᨠᩥᩈ᩠ᨾᩥᨬ᩠ᨧᩥᨴᩮᩅ ᩋᨸ᩠ᨸᨾᨲ᩠ᨲᨠᩮ ᨸᩅᩣᩁᨱᩴ ᨮᨸᩮᨲ᩠ᩅᩣ ᩈᨾᨣ᩠ᨣᩣ ᩉᩮᩣᨶ᩠ᨲᩥ, ᨲᩮᩉᩥ ᨸᩅᩣᩁᨱᩣᨿᨾᩮᩅ ᨸᩅᩣᩁᨱᩣ ᨠᩣᨲᨻ᩠ᨻᩣ, ᨲᩣᩅᨴᩮᩅ ᨶ ᨠᩣᨲᨻ᩠ᨻᩣ. ᨠᩁᩮᩣᨶ᩠ᨲᩮᩉᩥ ᩋᨸ᩠ᨸᩅᩣᩁᨱᩣᨿ ᨸᩅᩣᩁᨱᩣ ᨠᨲᩣ ᩉᩮᩣᨲᩥ. ᨶ ᨠᩣᨲᨻ᩠ᨻᩮᩣᨿᩮᩅᩣᨲᩥ ᨶᩥᨿᨾᩮᨶ ᨿᨴᩥ ᨠᩁᩮᩣᨲᩥ, ᨴᩩᨠ᩠ᨠᨭᨶ᩠ᨲᩥ ᨴᩔᩮᨲᩥ. ᨲᨲ᩠ᨳ ᩉᩥ ᩏᨸᩮᩣᩈᨳᨠᩁᨱᩮ ᨴᩩᨠ᩠ᨠᨭᩴ. ᩅᩩᨲ᩠ᨲᨬ᩠ᩉᩮᨲᩴ ‘‘ᨶ, ᨽᩥᨠ᩠ᨡᩅᩮ, ᩋᨶᩩᨸᩮᩣᩈᨳᩮ ᩏᨸᩮᩣᩈᨳᩮᩣ ᨠᩣᨲᨻ᩠ᨻᩮᩣ ᩋᨬ᩠ᨬᨲᩕ ᩈᨦ᩠ᨥᩈᩣᨾᨣ᩠ᨣᩥᨿᩣ’’ᨲᩥ (ᨾᩉᩣᩅ. ᪑᪘᪓).

‘‘ᨸᨲ᩠ᨲᨠᩣᩃᨾᩮᩅ ᨸᨲ᩠ᨲᨠᩃ᩠ᩃ’’ᨶ᩠ᨲᩥ ᩍᨾᩥᨶᩣ ᩈᨠᨲ᩠ᨳᩮ ᨽᩣᩅᨸ᩠ᨸᨧ᩠ᨧᨿᩮᩣᨲᩥ ᨴᩔᩮᨲᩥ. ᨶᩣᩈᨲᩦᨲᩥ ᩋᨶ᩠ᩅᨿᨲᩮᩣ ᩅᩩᨲ᩠ᨲᨾᩮᩅ ᨻ᩠ᨿᨲᩥᩁᩮᨠᨲᩮᩣ ᨴᩊ᩠ᩉᩴ ᨠᩁᩮᩣᨲᩥ.

ᩋᨶᩩᩁᩪᨸᩣᨲᩥ ᩋᩁᩉᩣ ᩋᨶᩩᨧ᩠ᨨᩅᩥᨠᩣ, ᩈᩣᨾᩥᨶᩮᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᩈᨻ᩠ᨻᨶ᩠ᨲᩥᨾᩮᨶᩣᨲᩥ ᩈᨻ᩠ᨻᩉᩮᨭ᩠ᨮᩥᨾᩮᨶ ᨧᨲ᩠ᨲᩣᩁᩮᩣ, ᨶ ᨲᩮᩉᩥ ᩅᩥᨶᩣ ᨲᩴ ᩏᨸᩮᩣᩈᨳᨠᨾ᩠ᨾᩴ ᨠᩁᩦᨿᨲᩥ, ᨶ ᨲᩮᩈᩴ ᨨᨶ᩠ᨴᩮᩣ ᩅᩣ ᨸᩣᩁᩥᩈᩩᨴ᩠ᨵᩥ ᩅᩣ ᩑᨲᩥ. ᩋᩅᩈᩮᩈᩣ ᨸᨶ ᩈᨧᩮᨸᩥ ᩈᩉᩔᨾᨲ᩠ᨲᩣ ᩉᩮᩣᨶ᩠ᨲᩥ, ᩈᨧᩮ ᩈᨾᩣᨶᩈᩴᩅᩣᩈᨠᩣ, ᩈᨻ᩠ᨻᩮ ᨨᨶ᩠ᨴᩣᩁᩉᩣᩅ ᩉᩮᩣᨶ᩠ᨲᩥ, ᨨᨶ᩠ᨴᨸᩣᩁᩥᩈᩩᨴ᩠ᨵᩥᩴ ᨴᨲ᩠ᩅᩣ ᩌᨣᨧ᩠ᨨᨶ᩠ᨲᩩ ᩅᩣ, ᨾᩣ ᩅᩣ, ᨠᨾ᩠ᨾᩴ ᨶ ᨠᩩᨸ᩠ᨸᨲᩥ. ᨸᨠᨲᨲ᩠ᨲᩣᨲᩥ ᩋᨶᩩᨠ᩠ᨡᩥᨲ᩠ᨲᩣ, ᨸᩣᩁᩣᨩᩥᨠᩴ ᩋᨶᨩ᩠ᨫᩣᨸᨶ᩠ᨶᩣ ᨧ. ᩉᨲ᩠ᨳᨸᩣᩈᩮᩣ ᨶᩣᨾ ᨴᩥᨿᨯ᩠ᨰᩉᨲ᩠ᨳᨸ᩠ᨸᨾᩣᨱᩮᩣ.

ᩈᩦᨾᩣ ᨧ ᨶᩣᨾᩮᩈᩣ ᨠᨲᨾᩣ, ᨿᨲ᩠ᨳ ᩉᨲ᩠ᨳᨸᩣᩈᩴ ᩋᩅᩥᨩᩉᩥᨲ᩠ᩅᩣ ᨮᩥᨲᩣ ᨠᨾ᩠ᨾᨸ᩠ᨸᨲ᩠ᨲᩣ ᨶᩣᨾ ᩉᩮᩣᨶ᩠ᨲᩦᨲᩥ ᩋᨶᩩᨿᩮᩣᨣᩴ ᩈᨶ᩠ᨵᩣᨿ ᩈᩦᨾᩴ ᨴᩔᩮᨶ᩠ᨲᩮᩣ ᩅᩥᨽᩣᨣᩅᨶ᩠ᨲᩣᨶᩴ ᩈᨽᩣᩅᩅᩥᨽᩣᩅᨶᩴ ᩅᩥᨽᩣᨣᨴᩔᨶᨾᩩᨡᩮᨶᩮᩅ ᩉᩮᩣᨲᩦᨲᩥ ‘‘ᩈᩦᨾᩣ ᨧ ᨶᩣᨾᩮᩈᩣ’’ᨲᩥᩌᨴᩥᨾᩣᩉ. ᩈᨾ᩠ᨽᩥᨶ᩠ᨴᨶ᩠ᨲᩮᨶᩣᨲᩥ ᨾᩥᩔᩦᨠᩁᩮᩣᨶ᩠ᨲᩮᨶ. ᩋᨩ᩠ᨫᩮᩣᨲ᩠ᨳᩁᨶ᩠ᨲᩮᨶᩣᨲᩥ ᨾᨴ᩠ᨴᨶ᩠ᨲᩮᨶ, ᩋᨶ᩠ᨲᩮᩣ ᨠᩁᩮᩣᨶ᩠ᨲᩮᨶᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᩍᨾᩣ ᩅᩥᨸᨲ᩠ᨲᩥᩈᩦᨾᩣᨿᩮᩣ ᨶᩣᨾᩣᨲᩥ ᩈᨾ᩠ᨻᨶ᩠ᨵᩮᩣ. ᨠᩈ᩠ᨾᩣ ᩅᩥᨸᨲ᩠ᨲᩥᩈᩦᨾᩣᨿᩮᩣ ᨶᩣᨾᩣᨲᩥ ᩌᩉ ‘‘ᩑᨠᩣᨴᩈᩉᩦ’’ᨲᩥᩌᨴᩥ. ᩌᨠᩣᩁᩮᩉᩦᨲᩥ ᨠᩣᩁᨱᩮᩉᩥ. ᩅᨧᨶᨲᩮᩣᨲᩥ ᨠᨾ᩠ᨾᩅᨣ᩠ᨣᩮ (ᨸᩁᩥ. ᪔᪘᪒ ᩌᨴᨿᩮᩣ) ᨠᨳᩥᨲᨲ᩠ᨲᩣ. ᩈᨦ᩠ᨥᨠᨾ᩠ᨾᩴ ᨶᩣᨾᩮᨲᩴ ᩅᩦᩈᨲᩥᩅᨣ᩠ᨣᨠᩁᨱᩦᨿᨸᩁᨾᨶ᩠ᨲᩥ ᩌᩉ ‘‘ᨿᨲ᩠ᨳ ᩑᨠᩅᩦᩈᨲᩥ ᨽᩥᨠ᩠ᨡᩪ ᨶᩥᩈᩦᨴᩥᨲᩩᩴ ᨶ ᩈᨠ᩠ᨠᩮᩣᨶ᩠ᨲᩦ’’ᨲᩥ. ᨿᩔᩴ ᩈᩦᨾᩣᨿᩴ ᩉᩮᨭ᩠ᨮᩥᨾᨸᩁᩥᨧ᩠ᨨᩮᨴᩮᨶ ᨠᨾ᩠ᨾᩣᩁᩉᩮᨶ ᩈᨴ᩠ᨵᩥᩴ ᩑᨠᩅᩦᩈᨲᩥ ᨽᩥᨠ᩠ᨡᩪ ᨸᩁᩥᨾᨱ᩠ᨯᩃᩣᨠᩣᩁᩮᨶ ᨶᩥᩈᩦᨴᩥᨲᩩᩴ ᨶ ᩈᨠ᩠ᨠᩮᩣᨶ᩠ᨲᩥ, ᩋᨿᩴ ᩋᨲᩥᨡᩩᨴ᩠ᨴᨠᩣ ᨶᩣᨾᩣᨲᩥ ᩋᨲ᩠ᨳᩮᩣ. ᩑᩅᩁᩪᨸᩣ ᨧ ᩈᩦᨾᩣ ᩈᨾ᩠ᨾᨲᩣᨸᩥ ᩋᩈᨾ᩠ᨾᨲᩣ, ᨣᩣᨾᨡᩮᨲ᩠ᨲᩈᨴᩥᩈᩣᩅ ᩉᩮᩣᨲᩥ, ᨲᨲ᩠ᨳ ᨠᨲᩴ ᨠᨾ᩠ᨾᩴ ᨠᩩᨸ᩠ᨸᨲᩥ. ᩑᩈ ᨶᨿᩮᩣ ᩈᩮᩈᩈᩦᨾᩣᩈᩩᨸᩥ.

ᩈᨾ᩠ᨾᨲᩣᨲᩥ ᨻᨴ᩠ᨵᩣ, ᩅᩣᨧᩥᨲᨠᨾ᩠ᨾᩅᩣᨧᩣᨲᩥ ᩋᨲ᩠ᨳᩮᩣ. ᨠᨾ᩠ᨾᩅᩣᨧᩣᨿ ᩅᩣᨧᨶᨾᩮᩅ ᩉᩥ ᨻᨶ᩠ᨵᨶᩴ ᨶᩣᨾ. ᨶᩥᨾᩥᨲ᩠ᨲᩴ ᨶ ᩏᨸᨣᨧ᩠ᨨᨲᩦᨲᩥ ᩋᨶᩥᨾᩥᨲ᩠ᨲᩩᨸᨣᩮᩣ, ᨲᩴ ᩋᨶᩥᨾᩥᨲ᩠ᨲᩩᨸᨣᩴ, ᩋᨶᩥᨾᩥᨲ᩠ᨲᩣᩁᩉᨶ᩠ᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨲᨧᩈᩣᩁᩁᩩᨠ᩠ᨡᩮᩣ ᨶᩣᨾ ᨲᩣᩃᨶᩣᩊᩥᨠᩮᩁᩣᨴᩥᨠᩣ. ᨸᩴᩈᩩᨸᩩᨬ᩠ᨩᩅᩣᩃᩩᨠᩣᨸᩩᨬ᩠ᨩᩣᨶᨶ᩠ᨲᩥ ᨸᩴᩈᩩᩁᩣᩈᩥᩅᩣᩃᩩᨠᩣᩁᩣᩈᩦᨶᩴ ᨾᨩ᩠ᨫᩮ. ᨶᩥᨴ᩠ᨵᩣᩁᨱᩮ ᨧᩮᨲᩴ ᩈᩣᨾᩥᩅᨧᨶᩴ. ᨸᩮᩣᨲ᩠ᨳᨠᩮᩈᩩ ᨸᨶ ᨠᨲ᩠ᨳᨧᩥ ‘‘ᨸᩴᩈᩩᨸᩩᨬ᩠ᨩᩴ ᩅᩣ ᩅᩣᩃᩩᨠᩣᨸᩩᨬ᩠ᨩᩴ ᩅᩣ ᩋᨬ᩠ᨬᨲᩁ’’ᨶ᩠ᨲᩥ ᨸᩣᨮᩮᩣ ᨴᩥᩔᨲᩥ, ᩈᩮᩣ ᨸᨶ ᩋᨸᩣᨮᩮᩣ. ᨶ ᩉᩥ ᩈᩮᩣ ‘‘ᩋᨬ᩠ᨬᨲᩁ’’ᨶ᩠ᨲᩥ ᩍᨾᩥᨶᩣ ᨿᩩᨩ᩠ᨩᨲᩦᨲᩥ. ᩋᨶ᩠ᨲᩁᩣᨲᩥ ᨶᩥᨾᩥᨲ᩠ᨲᩩᨸᨣᨶᩥᨾᩥᨲ᩠ᨲᩣᨶᨾᨶ᩠ᨲᩁᩣ. ᩑᨲ᩠ᨳ ᨧ ᨿᩣ ᨲᩦᩉᩥ ᨶᩥᨾᩥᨲ᩠ᨲᩮᩉᩥ ᨻᨩ᩠ᨫᨾᩣᨶᩣ ᩋᨶᩥᨾᩥᨲ᩠ᨲᩩᨸᨣᩮᩈᩩ ᨲᨧᩈᩣᩁᩁᩩᨠ᩠ᨡᩣᨴᩦᩈᩩ ᩋᨬ᩠ᨬᨲᩁᩴ ᩋᨶ᩠ᨲᩁᩣ ᩑᨠᩴ ᨶᩥᨾᩥᨲ᩠ᨲᩴ ᨠᨲ᩠ᩅᩣ ᩈᨾ᩠ᨾᨲᩣ, ᩈᩣ ᨡᨱ᩠ᨯᨶᩥᨾᩥᨲ᩠ᨲᩣ ᨶᩣᨾ ᩉᩮᩣᨲᩥ. ᨿᩣ ᨸᨶ ᨧᨲᩩᨸᨬ᩠ᨧᨶᩥᨾᩥᨲ᩠ᨲᩣᨴᩦᩉᩥ ᨻᨩ᩠ᨫᨾᩣᨶᩣ ᩍᨾᩮᩈᩩ ᨲᨧᩈᩣᩁᩁᩩᨠ᩠ᨡᩣᨴᩦᩈᩩ ᩋᨬ᩠ᨬᨲᩁᩴ ᩋᨶ᩠ᨲᩁᩣ ᩑᨠᩴ ᨶᩥᨾᩥᨲ᩠ᨲᩴ ᨠᨲ᩠ᩅᩣ ᩈᨾ᩠ᨾᨲᩣ, ᩈᩣ ᨡᨱ᩠ᨯᨶᩥᨾᩥᨲ᩠ᨲᩣ ᨶᩣᨾ ᨶ ᩉᩮᩣᨲᩦᨲᩥ ᩅᩥᨬ᩠ᨬᩣᨿᨲᩥ ᨶᩥᨾᩥᨲ᩠ᨲᩩᨸᨣᩣᨶᩴ ᨶᩥᨾᩥᨲ᩠ᨲᩣᨶᩴ ᨲᩥᨱ᩠ᨱᩴ ᩈᨻ᩠ᨽᩣᩅᨲᩮᩣ. ᩋᨭ᩠ᨮᨠᨳᩣᩈᩩ ᨸᨶ ᩋᩅᩥᩈᩮᩈᩮᨶ ᩅᩩᨲ᩠ᨲᩴ, ᨲᩈ᩠ᨾᩣ ᩏᨸᨸᩁᩥᨠ᩠ᨡᩥᨲ᩠ᩅᩣ ᨣᩉᩮᨲᨻ᩠ᨻᩴ. ᩈᨻ᩠ᨻᩮᨶ ᩈᨻ᩠ᨻᨶ᩠ᨲᩥ ᩈᨻ᩠ᨻᨸ᩠ᨸᨠᩣᩁᩮᨶ. ᨶᩥᨾᩥᨲ᩠ᨲᩣᨶᩴ ᨻᩉᩥ ᨮᩥᨲᩮᨶ ᩈᨾ᩠ᨾᨲᩣᨲᩥ ᨲᩮᩈᩴ ᨻᩉᩥ ᨮᩥᨲᩮᨶ ᩅᩣᨧᩥᨲᨠᨾ᩠ᨾᩅᩣᨧᩣ. ᨶᩥᨾᩥᨲ᩠ᨲᩣᨶᩥ ᨸᨶ ᩋᨶ᩠ᨲᩮᩣ ᨧ ᨻᩉᩥ ᨧ ᨮᨲ᩠ᩅᩣ ᨠᩥᨲ᩠ᨲᩮᨲᩩᩴ ᩅᨭ᩠ᨭᨶ᩠ᨲᩥ.

ᩑᩅᩴ ᩈᨾ᩠ᨾᨲᩣᨸᩦᨲᩥ ᨶᩥᨾᩥᨲ᩠ᨲᩣᨶᩥ ᨠᩥᨲ᩠ᨲᩮᨲ᩠ᩅᩣ ᨠᨾ᩠ᨾᩅᩣᨧᩣᨿ ᩈᨾ᩠ᨾᨲᩣᨸᩥ. ᩍᨾᩔ ‘‘ᩋᩈᨾ᩠ᨾᨲᩣᩅ ᩉᩮᩣᨲᩦ’’ᨲᩥ ᩍᨾᩥᨶᩣ ᩈᨾ᩠ᨻᨶ᩠ᨵᩮᩣ. ᩈᨻ᩠ᨻᩣ, ᨽᩥᨠ᩠ᨡᩅᩮ, ᨶᨴᩦ ᩋᩈᩦᨾᩣᨲᩥ ᨿᩣ ᨠᩣᨧᩥ ᨶᨴᩦᩃᨠ᩠ᨡᨱᨸ᩠ᨸᨲ᩠ᨲᩣ ᨶᨴᩦ ᨶᩥᨾᩥᨲ᩠ᨲᩣᨶᩥ ᨠᩥᨲ᩠ᨲᩮᨲ᩠ᩅᩣ ‘‘ᩑᨲᩴ ᨻᨴ᩠ᨵᩈᩦᨾᩴ ᨠᩁᩮᩣᨾᩣ’’ᨲᩥ ᨠᨲᩣᨸᩥ ᩋᩈᩦᨾᩣ, ᨻᨴ᩠ᨵᩈᩦᨾᩣ ᨶ ᩉᩮᩣᨲᩦᨲᩥ ᩋᨲ᩠ᨳᩮᩣ. ᩋᨲ᩠ᨲᨶᩮᩣ ᩈᨽᩣᩅᩮᨶ ᨸᨶ ᩈᩣ ᨻᨴ᩠ᨵᩈᩦᨾᩣᩈᨴᩥᩈᩣ. ᩈᨻ᩠ᨻᨲ᩠ᨳ ᩈᨦ᩠ᨥᨠᨾ᩠ᨾᩴ ᨠᩣᨲᩩᩴ ᩅᨭ᩠ᨭᨲᩥ. ᩈᨾᩩᨴ᩠ᨴᨩᩣᨲᩔᩁᩮᩈᩩᨸᩥ ᩑᩈᩮᩅ ᨶᨿᩮᩣ. ‘‘ᩈᩴᩈᨭ᩠ᨮᩅᩥᨭᨸᩣ’’ᨲᩥ ᩍᨾᩥᨶᩣ ᩋᨬ᩠ᨬᨾᨬ᩠ᨬᩔ ᩌᩈᨶ᩠ᨶᨲᩴ ᨴᩦᨸᩮᨲᩥ. ᨻᨴ᩠ᨵᩣ ᩉᩮᩣᨲᩦᨲᩥ ᨸᨧ᩠ᨨᩥᨾᨴᩥᩈᩣᨽᩣᨣᩮ ᩈᩦᨾᩴ ᩈᨶ᩠ᨵᩣᨿ ᩅᩩᨲ᩠ᨲᩴ. ᨲᩔᩣ ᨸᨴᩮᩈᨶ᩠ᨲᩥ ᨲᩔᩣ ᩑᨠᨴᩮᩈᩴ. ᨿᨲ᩠ᨳ ᨮᨲ᩠ᩅᩣ ᨽᩥᨠ᩠ᨡᩪᩉᩥ ᨠᨾ᩠ᨾᩴ ᨠᩣᨲᩩᩴ ᩈᨠ᩠ᨠᩣ ᩉᩮᩣᨲᩥ, ᨲᩣᨴᩥᩈᩴ ᩑᨠᨴᩮᩈᨶ᩠ᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨿᨲ᩠ᨳ ᨸᨶ ᨮᩥᨲᩮᩉᩥ ᨠᨾ᩠ᨾᩴ ᨠᩣᨲᩩᩴ ᨶ ᩈᨠ᩠ᨠᩣ, ᨲᩣᨴᩥᩈᩴ ᨸᨴᩮᩈᩴ ᩋᨶ᩠ᨲᩮᩣ ᨠᩁᩥᨲ᩠ᩅᩣ ᨻᨶ᩠ᨵᨶ᩠ᨲᩣ ᩈᩦᨾᩣᨿ ᩈᩦᨾᩴ ᩈᨾ᩠ᨽᩥᨶ᩠ᨴᨶ᩠ᨲᩥ ᨶᩣᨾ, ᨶ ᨲᩩ ᩋᨩ᩠ᨫᩮᩣᨲ᩠ᨳᩁᨶ᩠ᨲᩥ ᨶᩣᨾᩣᨲᩥ ᨣᩉᩮᨲᨻ᩠ᨻᩴ. ᨣᨱ᩠ᨮᩥᨸᨴᩮᩈᩩ ᨸᨶ ‘‘ᩈᨾ᩠ᨽᩥᨶ᩠ᨴᨶᩴ ᨸᩁᩮᩈᩴ ᩈᩦᨾᩣᨿ ᩑᨠᩴ ᩅᩣ ᨴ᩠ᩅᩮ ᩅᩣ ᨶᩥᨾᩥᨲ᩠ᨲᩮ ᨠᩥᨲ᩠ᨲᩮᨲ᩠ᩅᩣ ᩃᩮᨡᩣᨾᨲ᩠ᨲᩴ ᨣᩉᩮᨲ᩠ᩅᩣ ᨻᨶ᩠ᨵᨶᩴ. ᩋᨩ᩠ᨫᩮᩣᨲ᩠ᨳᩁᨱᩴ ᨶᩣᨾ ᨸᩁᩮᩈᩴ ᩈᩦᨾᩣᨿ ᨶᩥᨾᩥᨲ᩠ᨲᩮ ᨠᩥᨲ᩠ᨲᩮᨲ᩠ᩅᩣ ᨲᩴ ᩈᨠᩃᩴ ᩅᩣ ᨲᩔᩮᨠᨴᩮᩈᩴ ᩅᩣ ᩋᨶ᩠ᨲᩮᩣ ᨠᩁᩮᩣᨶ᩠ᨲᩮᨶ ᨲᩔᩣ ᨻᩉᩥ ᩑᨠᩥᩔᩴ ᨴ᩠ᩅᩦᩈᩩ ᩅᩣ ᨴᩥᩈᩣᩈᩩ ᨶᩥᨾᩥᨲ᩠ᨲᩮ ᨠᩥᨲ᩠ᨲᩮᨲ᩠ᩅᩣ ᨻᨶ᩠ᨵᨶ’’ᨶ᩠ᨲᩥ ᩅᩩᨲ᩠ᨲᩴ.

ᨸᨻ᩠ᨻᨲᩣᨴᩦᨶᩴ ᨶᩥᨾᩥᨲ᩠ᨲᩣᨶᩴ ᩈᨾ᩠ᨸᨴᩣ ᨶᩥᨾᩥᨲ᩠ᨲᩈᨾ᩠ᨸᨲ᩠ᨲᩥ. ᨸᨻ᩠ᨻᨲᩮᩣᩅ ᨶᩥᨾᩥᨲ᩠ᨲᩴ ᨸᨻ᩠ᨻᨲᨶᩥᨾᩥᨲ᩠ᨲᩴ. ᩑᩅᩴ ᩈᩮᩈᩮᩈᩩᨸᩥ. ᩑᩅᩴ ᩅᩩᨲ᩠ᨲᩮᩈᩪᨲᩥ ᩏᨸᩮᩣᩈᨳᨠ᩠ᨡᨶ᩠ᨵᨠᩮ (ᨾᩉᩣᩅ. ᪑᪓᪘ ᩌᨴᨿᩮᩣ) ᩈᩦᨾᩣᩈᨾ᩠ᨾᩩᨲᩥᨿᩴ ᩅᩩᨲ᩠ᨲᩮᩈᩩ. ᩍᨾᩮᩉᩥ ᨧ ᨸᨶ ᩋᨭ᩠ᨮᩉᩥ ᨶᩥᨾᩥᨲ᩠ᨲᩮᩉᩥ ᩋᩈᨾ᩠ᨾᩥᩔᩮᩉᩥᨸᩥ ᩋᨬ᩠ᨬᨾᨬ᩠ᨬᨾᩥᩔᩮᩉᩥᨸᩥ ᩈᩦᨾᩴ ᩈᨾ᩠ᨾᨶ᩠ᨶᩥᨲᩩᩴ ᩅᨭ᩠ᨭᨲᩥ. ᨲᩮᨶᩣᩉ ‘‘ᨲᩈ᩠ᨾᩥᩴ ᨲᩈ᩠ᨾᩥᩴ ᨴᩥᩈᩣᨽᩣᨣᩮ ᨿᨳᩣᩃᨴ᩠ᨵᩣᨶᩥ ᨶᩥᨾᩥᨲ᩠ᨲᩩᨸᨣᩣᨶᩥ ᨶᩥᨾᩥᨲ᩠ᨲᩣᨶᩦ’’ᨲᩥ. ᩑᨠᩮᨶ, ᨸᨶ ᨴ᩠ᩅᩦᩉᩥ ᩅᩣ ᨶᩥᨾᩥᨲ᩠ᨲᩮᩉᩥ ᩈᨾ᩠ᨾᨶ᩠ᨶᩥᨲᩩᩴ ᨶ ᩅᨭ᩠ᨭᨲᩥ, ᨲᩦᨱᩥ ᨸᨶ ᩌᨴᩥᩴ ᨠᨲ᩠ᩅᩣ ᩅᩩᨲ᩠ᨲᨸ᩠ᨸᨠᩣᩁᩣᨶᩴ ᨶᩥᨾᩥᨲ᩠ᨲᩣᨶᩴ ᩈᨲᩮᨶᩣᨸᩥ ᩅᨭ᩠ᨭᨲᩥ. ‘‘ᨸᩩᩁᨲ᩠ᨳᩥᨾᩣᨿ ᨴᩥᩈᩣᨿ ᨠᩥᩴ ᨶᩥᨾᩥᨲ᩠ᨲ’’ᨶ᩠ᨲᩥ ᩅᩥᨶᨿᨵᩁᩮᨶ ᨸᩩᨧ᩠ᨨᩥᨲᨻ᩠ᨻᩴ, ‘‘ᨸᨻ᩠ᨻᨲᩮᩣ, ᨽᨶ᩠ᨲᩮ’’ᨲᩥ ᩅᩩᨲ᩠ᨲᩮ ᨸᩩᨶ ᩅᩥᨶᨿᨵᩁᩮᨶᩮᩅ ‘‘ᩑᩈᩮᩣ ᨸᨻ᩠ᨻᨲᩮᩣ ᨶᩥᨾᩥᨲ᩠ᨲ’’ᨶ᩠ᨲᩥ ᩑᩅᩴ ᨶᩥᨾᩥᨲ᩠ᨲᩴ ᨠᩥᨲ᩠ᨲᩮᨲᨻ᩠ᨻᩴ. ‘‘ᩑᨲᩴ ᨸᨻ᩠ᨻᨲᩴ ᨶᩥᨾᩥᨲ᩠ᨲᩴ ᨠᩁᩮᩣᨾ, ᨶᩥᨾᩥᨲ᩠ᨲᩴ ᨠᩁᩥᩔᩣᨾ, ᨶᩥᨾᩥᨲ᩠ᨲᩴ ᨠᨲᩮᩣ, ᨶᩥᨾᩥᨲ᩠ᨲᩴ ᩉᩮᩣᨲᩩ, ᩉᩮᩣᨲᩥ ᨽᩅᩥᩔᨲᩦ’’ᨲᩥ ᩑᩅᩴ ᨸᨶ ᨠᩥᨲ᩠ᨲᩮᨲᩩᩴ ᨶ ᩅᨭ᩠ᨭᨲᩥ. ᨸᩣᩈᩣᨱᩣᨴᩦᩈᩩᨸᩥ ᩑᩈᩮᩅ ᨶᨿᩮᩣ. ᨲᩮᨶᩣᩉ ‘‘ᨸᩩᩁᨲ᩠ᨳᩥᨾᩣᨿ ᨴᩥᩈᩣᨿ ᨠᩥᩴ ᨶᩥᨾᩥᨲ᩠ᨲ’’ᨶ᩠ᨲᩥᩌᨴᩥ. ‘‘ᨸᨻ᩠ᨻᨲᩮᩣ, ᨽᨶ᩠ᨲᩮ, ᩏᨴᨠᩴ, ᨽᨶ᩠ᨲᩮ’’ᨲᩥ ᩑᩅᩴ ᨸᨶ ᩏᨸᩈᨾ᩠ᨸᨶ᩠ᨶᩮᩣ ᩅᩣ ᩌᨧᩥᨠ᩠ᨡᨲᩩ, ᩋᨶᩩᨸᩈᨾ᩠ᨸᨶ᩠ᨶᩮᩣ ᩅᩣ, ᩅᨭ᩠ᨭᨲᩥᨿᩮᩅ. ᩌᨴᩥᩈᨴ᩠ᨴᩮᨶ ‘‘ᨸᩩᩁᨲ᩠ᨳᩥᨾᩣᨿ ᩋᨶᩩᨴᩥᩈᩣᨿ ᨠᩥᩴ ᨶᩥᨾᩥᨲ᩠ᨲᩴ? ᨸᩣᩈᩣᨱᩮᩣ, ᨽᨶ᩠ᨲᩮ, ᩑᩈᩮᩣ ᨸᩣᩈᩣᨱᩮᩣ ᨶᩥᨾᩥᨲ᩠ᨲᩴ. ᨴᨠ᩠ᨡᩥᨱᩣᨿ ᨴᩥᩈᩣᨿ, ᨴᨠ᩠ᨡᩥᨱᩣᨿ ᩋᨶᩩᨴᩥᩈᩣᨿ, ᨸᨧ᩠ᨨᩥᨾᩣᨿ ᨴᩥᩈᩣᨿ, ᨸᨧ᩠ᨨᩥᨾᩣᨿ ᩋᨶᩩᨴᩥᩈᩣᨿ, ᩏᨲ᩠ᨲᩁᩣᨿ ᨴᩥᩈᩣᨿ, ᩏᨲ᩠ᨲᩁᩣᨿ ᩋᨶᩩᨴᩥᩈᩣᨿ ᨠᩥᩴ ᨶᩥᨾᩥᨲ᩠ᨲᩴ? ᩏᨴᨠᩴ, ᨽᨶ᩠ᨲᩮ, ᩑᨲᩴ ᩏᨴᨠᩴ ᨶᩥᨾᩥᨲ᩠ᨲ’’ᨶ᩠ᨲᩥ ᩍᨴᩴ ᩈᨦ᩠ᨣᨱ᩠ᩉᩣᨲᩥ. ᩑᨲ᩠ᨳ ᨸᨶ ᩋᨭ᩠ᨮᨲ᩠ᩅᩣ ᨸᩩᨶ ‘‘ᨸᩩᩁᨲ᩠ᨳᩥᨾᩣᨿ ᨴᩥᩈᩣᨿ ᨠᩥᩴ ᨶᩥᨾᩥᨲ᩠ᨲᩴ? ᨸᨻ᩠ᨻᨲᩮᩣ, ᨽᨶ᩠ᨲᩮ, ᩑᩈᩮᩣ ᨸᨻ᩠ᨻᨲᩮᩣ ᨶᩥᨾᩥᨲ᩠ᨲ’’ᨶ᩠ᨲᩥ ᩑᩅᩴ ᨸᨮᨾᩴ ᨠᩥᨲ᩠ᨲᩥᨲᨶᩥᨾᩥᨲ᩠ᨲᩴ ᨠᩥᨲ᩠ᨲᩮᨲ᩠ᩅᩣᩅ ᨮᨸᩮᨲᨻ᩠ᨻᩴ. ᩑᩅᨬ᩠ᩉᩥ ᨶᩥᨾᩥᨲ᩠ᨲᩮᨶ ᨶᩥᨾᩥᨲ᩠ᨲᩴ ᨥᨭᩥᨲᩴ ᩉᩮᩣᨲᩥ. ᩈᨾ᩠ᨾᩣ ᨠᩥᨲ᩠ᨲᩮᨲ᩠ᩅᩣᨲᩥ ᩋᨬ᩠ᨬᨾᨬ᩠ᨬᨶᩣᨾᩅᩥᨸᩁᩥᨿᩣᨿᩮᨶ, ᩋᨶᩥᨾᩥᨲ᩠ᨲᩣᨶᩴ ᨶᩣᨾᩮᨶ ᨧ ᩋᨠᩥᨲ᩠ᨲᩮᨲ᩠ᩅᩣ ᨿᨳᩣᩅᩩᨲ᩠ᨲᩮᨶᩮᩅ ᨶᨿᩮᨶ ᨠᩥᨲ᩠ᨲᩮᨲ᩠ᩅᩣ. ᩈᨾ᩠ᨾᨲᩣᨲᩥ ‘‘ᩈᩩᨱᩣᨲᩩ ᨾᩮ, ᨽᨶ᩠ᨲᩮ’’ᨲᩥᩌᨴᩥᨶᩣ ᨶᨿᩮᨶ ᩏᨸᩮᩣᩈᨳᨠ᩠ᨡᨶ᩠ᨵᨠᩮ (ᨾᩉᩣᩅ. ᪑᪓᪙ ᩌᨴᨿᩮᩣ) ᩅᩩᨲ᩠ᨲᩣᨿ ᨸᩁᩥᩈᩩᨴ᩠ᨵᩣᨿ ᨬᨲ᩠ᨲᩥᨴᩩᨲᩥᨿᨠᨾ᩠ᨾᩅᩣᨧᩣᨿ ᨻᨴ᩠ᨵᩣ. ᨲᨲ᩠ᨳ ᨶᩥᨾᩥᨲ᩠ᨲᩣᨶᩥ ᩈᨠᩥᩴ ᨠᩥᨲ᩠ᨲᩥᨲᩣᨶᩥᨸᩥ ᨠᩥᨲ᩠ᨲᩥᨲᩣᨶᩮᩅ ᩉᩮᩣᨶ᩠ᨲᩥ. ᩋᨶ᩠ᨵᨠᨭ᩠ᨮᨠᨳᩣᨿᩴ ᨸᨶ ᨲᩥᨠ᩠ᨡᨲ᩠ᨲᩩᩴ ᩈᩦᨾᨾᨱ᩠ᨯᩃᩴ ᩈᨾ᩠ᨻᨶ᩠ᨵᨶ᩠ᨲᩮᨶ ᨶᩥᨾᩥᨲ᩠ᨲᩴ ᨠᩥᨲ᩠ᨲᩮᨲᨻ᩠ᨻ’’ᨶ᩠ᨲᩥ (ᨾᩉᩣᩅ. ᩋᨭ᩠ᨮ. ᪑᪓᪘) ᩅᩩᨲ᩠ᨲᩴ.

ᨲᨲᩕᩣᨲᩥ ᨲᩮᩈᩩ ᩋᨭ᩠ᨮᩈᩩ ᨶᩥᨾᩥᨲ᩠ᨲᩮᩈᩩ. ᨶᩥᨾᩥᨲ᩠ᨲᩩᨸᨣᨲᩣᨲᩥ ᨶᩥᨾᩥᨲ᩠ᨲᨿᩮᩣᨣ᩠ᨿᨲᩣ. ‘‘ᩉᨲ᩠ᨳᩥᨸ᩠ᨸᨾᩣᨱᨲᩮᩣ ᨸᨭ᩠ᨮᩣᨿᩣ’’ᨲᩥ ᩅᨧᨶᨲᩮᩣ ᩉᨲ᩠ᨳᩥᨸ᩠ᨸᨾᩣᨱᩮᩣᨸᩥ ᨶᩥᨾᩥᨲ᩠ᨲᩩᨸᨣᩮᩣᨿᩮᩅ. ᩉᨲ᩠ᨳᩦ ᨸᨶ ᩈᨲ᩠ᨲᩁᨲᨶᩮᩣ ᩅᩣ ᩋᨯ᩠ᨰᨭ᩠ᨮᩁᨲᨶᩮᩣ (ᩈᩣᩁᨲ᩠ᨳ. ᨭᩦ. ᨾᩉᩣᩅᨣ᩠ᨣ ᪓.᪑᪓᪘) ᩅᩣ. ᨲᨲᩮᩣ ᩒᨾᨠᨲᩁᩮᩣᨲᩥ ᨲᨲᩮᩣ ᩉᨲ᩠ᨳᩥᨸ᩠ᨸᨾᩣᨱᨲᩮᩣ ᨡᩩᨴ᩠ᨴᨠᨲᩁᩮᩣ. ᩈᨧᩮ ᨧᨲᩪᩈᩩ ᨴᩥᩈᩣᩈᩩ ᨧᨲ᩠ᨲᩣᩁᩮᩣ ᩅᩣ ᨲᩦᩈᩩ ᩅᩣ ᨲᨿᩮᩣ ᨸᨻ᩠ᨻᨲᩣ ᩉᩮᩣᨶ᩠ᨲᩥ, ᨧᨲᩪᩉᩥ, ᨲᩦᩉᩥ ᩅᩣ ᨸᨻ᩠ᨻᨲᨶᩥᨾᩥᨲ᩠ᨲᩮᩉᩮᩅ ᩈᨾ᩠ᨾᨶ᩠ᨶᩥᨲᩩᨾ᩠ᨸᩥ ᩅᨭ᩠ᨭᨲᩥ, ᨴ᩠ᩅᩦᩉᩥ ᨸᨶ ᨶᩥᨾᩥᨲ᩠ᨲᩮᩉᩥ, ᩑᨠᩮᨶ ᩅᩣ ᩈᨾ᩠ᨾᨶ᩠ᨶᩥᨲᩩᩴ ᨶ ᩅᨭ᩠ᨭᨲᩥ. ᩍᨲᩮᩣ ᨸᩁᩮᩈᩩ ᨸᩣᩈᩣᨱᨶᩥᨾᩥᨲ᩠ᨲᩣᨴᩦᩈᩩᨸᩥ ᩑᩈᩮᩅ ᨶᨿᩮᩣ. ᨲᩈ᩠ᨾᩣ ᨸᨻ᩠ᨻᨲᨶᩥᨾᩥᨲ᩠ᨲᩴ ᨠᩁᩮᩣᨶ᩠ᨲᩮᨶ ᨸᩩᨧ᩠ᨨᩥᨲᨻ᩠ᨻᩴ ‘‘ᩑᨠᩣᨻᨴ᩠ᨵᩮᩣ, ᨶ ᩑᨠᩣᨻᨴ᩠ᨵᩮᩣ’’ᨲᩥ. ᩈᨧᩮ ᩑᨠᩣᨻᨴ᩠ᨵᩮᩣ ᩉᩮᩣᨲᩥ, ᨶ ᨠᩣᨲᨻ᩠ᨻᩮᩣ. ᨲᨬ᩠ᩉᩥ ᨧᨲᩪᩈᩩ ᩅᩣ ᩋᨭ᩠ᨮᩈᩩ ᩅᩣ ᨴᩥᩈᩣᩈᩩ ᨠᩥᨲ᩠ᨲᩮᨶ᩠ᨲᩮᨶᩣᨸᩥ ᩑᨠᨾᩮᩅ ᨶᩥᨾᩥᨲ᩠ᨲᩴ ᨠᩥᨲ᩠ᨲᩥᨲᩴ ᩉᩮᩣᨲᩥ. ᨲᩈ᩠ᨾᩣ ᨿᩮᩣ ᩑᩅᩴ ᨧᨠ᩠ᨠᩈᨱ᩠ᨮᩣᨶᩮᨶ ᩅᩥᩉᩣᩁᩴ ᨸᩁᩥᨠ᩠ᨡᩥᨸᩥᨲ᩠ᩅᩣ ᨮᩥᨲᩮᩣ ᨸᨻ᩠ᨻᨲᩮᩣ, ᨲᩴ ᩑᨠᨴᩥᩈᩣᨿ ᨠᩥᨲ᩠ᨲᩮᨲ᩠ᩅᩣ ᩋᨬ᩠ᨬᩣᩈᩩ ᨴᩥᩈᩣᩈᩩ ᨲᩴ ᨻᩉᩥᨴ᩠ᨵᩣ ᨠᨲ᩠ᩅᩣ ᩋᨶ᩠ᨲᩮᩣ ᩋᨬ᩠ᨬᩣᨶᩥ ᨶᩥᨾᩥᨲ᩠ᨲᩣᨶᩥ ᨠᩥᨲ᩠ᨲᩮᨲᨻ᩠ᨻᩣᨶᩥ. ᩈᨧᩮ ᨸᨻ᩠ᨻᨲᩔ ᨲᨲᩥᨿᨽᩣᨣᩴ ᩅᩣ ᩏᨸᨯ᩠ᨰᩴ ᩅᩣ ᩋᨶ᩠ᨲᩮᩣᩈᩦᨾᩣᨿ ᨠᨲ᩠ᨲᩩᨠᩣᨾᩣ ᩉᩮᩣᨶ᩠ᨲᩥ, ᨸᨻ᩠ᨻᨲᩴ ᩋᨠᩥᨲ᩠ᨲᩮᨲ᩠ᩅᩣ ᨿᨲ᩠ᨲᨠᩴ ᨸᨴᩮᩈᩴ ᩋᨶ᩠ᨲᩮᩣ ᨠᨲ᩠ᨲᩩᨠᩣᨾᩣ, ᨲᩔ ᨸᩁᨲᩮᩣ ᨲᩈ᩠ᨾᩥᩴᨿᩮᩅ ᨸᨻ᩠ᨻᨲᩮ ᨩᩣᨲᩁᩩᨠ᩠ᨡᩅᨾ᩠ᨾᩥᨠᩣᨴᩦᩈᩩ ᩋᨬ᩠ᨬᨲᩁᩴ ᨶᩥᨾᩥᨲ᩠ᨲᩴ ᨠᩥᨲ᩠ᨲᩮᨲᨻ᩠ᨻᩴ. ᩈᨧᩮ ᨿᩮᩣᨩᨶᨴ᩠ᩅᩥᨿᩮᩣᨩᨶᨸ᩠ᨸᨾᩣᨱᩴ ᩈᨻ᩠ᨻᩴ ᨸᨻ᩠ᨻᨲᩴ ᩋᨶ᩠ᨲᩮᩣ ᨠᨲ᩠ᨲᩩᨠᩣᨾᩣ ᩉᩮᩣᨶ᩠ᨲᩥ, ᨸᨻ᩠ᨻᨲᩔ ᨸᩁᨲᩮᩣ ᨽᩪᨾᩥᨿᩴ ᨩᩣᨲᩁᩩᨠ᩠ᨡᩅᨾ᩠ᨾᩥᨠᩣᨴᩦᨶᩥ ᨶᩥᨾᩥᨲ᩠ᨲᩣᨶᩥ ᨠᩥᨲ᩠ᨲᩮᨲᨻ᩠ᨻᩣᨶᩥ (ᨾᩉᩣᩅ. ᩋᨭ᩠ᨮ. ᪑᪓᪘; ᩅᩥ. ᩈᨦ᩠ᨣ. ᩋᨭ᩠ᨮ. ᪑᪕᪘).

ᩈᨦ᩠ᨡᩴ ᨣᨧ᩠ᨨᨲᩦᨲᩥ ᨣᨱᨶᩴ ᩅᩮᩣᩉᩣᩁᩴ ᨣᨧ᩠ᨨᨲᩦᨲᩥ ᩋᨲ᩠ᨳᩮᩣ. ᨴ᩠ᩅᨲ᩠ᨲᩥᩴᩈᨸᩃᨣᩩᩊᨸᩥᨱ᩠ᨯᨸᩁᩥᨾᩣᨱᩮᩣᨲᩥ ᨳᩪᩃᨲᩣᨿ, ᨶ ᨲᩩᩃᨣᨱᨶᩣᨿ. ᨲᨲ᩠ᨳ ‘‘ᩑᨠᨸᩃᩴ ᨶᩣᨾ ᨴᩈᨠᩃᨬ᩠ᨩ’’ᨶ᩠ᨲᩥ ᩅᨴᨶ᩠ᨲᩥ. ᩍᨭ᩠ᨮᨠᩣ ᨾᩉᨶ᩠ᨲᩣᨸᩥ ᨶ ᩅᨭ᩠ᨭᨲᩥ. ᨲᨳᩣ ᩋᨶᩥᨾᩥᨲ᩠ᨲᩩᨸᨣᨸᩣᩈᩣᨱᩣᨶᩴ ᩁᩣᩈᩥ, ᨸᨣᩮᩅ ᨸᩴᩈᩩᩅᩣᩃᩩᨠᩣᩁᩣᩈᩥ. ᨽᩪᨾᩥᩈᨾᩮᩣ ᨡᩃᨾᨱ᩠ᨯᩃᩈᨴᩥᩈᩮᩣ ᨸᩥᨭ᩠ᨮᩥᨸᩣᩈᩣᨱᩮᩣ ᩅᩣ ᨽᩪᨾᩥᨲᩮᩣ ᨡᩣᨱᩩᨠᩮᩣ ᩅᩥᨿ ᩏᨭ᩠ᨮᩥᨲᨸᩣᩈᩣᨱᩮᩣ ᩅᩣ ᩉᩮᩣᨲᩥ, ᩈᩮᩣᨸᩥ ᨸᨾᩣᨱᩪᨸᨣᩮᩣ ᨧᩮ, ᩅᨭ᩠ᨭᨲᩥ. ‘‘ᨸᩥᨭ᩠ᨮᩥᨸᩣᩈᩣᨱᩮᩣ ᨸᨶ ᩋᨲᩥᨾᩉᨶ᩠ᨲᩮᩣᨸᩥ ᨸᩣᩈᩣᨱᩈᨦ᩠ᨡᨾᩮᩅ ᨣᨧ᩠ᨨᨲᩦᨲᩥ ᩌᩉ ‘‘ᨸᩥᨭ᩠ᨮᩥᨸᩣᩈᩣᨱᩮᩣ ᨸᨶᩣ’’ᨲᩥᩌᨴᩥ. ᨲᩈ᩠ᨾᩣ ᩈᨧᩮ ᨾᩉᨲᩮᩣ ᨸᩥᨭ᩠ᨮᩥᨸᩣᩈᩣᨱᩔ ᩑᨠᩴ ᨸᨴᩮᩈᩴ ᩋᨶ᩠ᨲᩮᩣᩈᩦᨾᩣᨿᩴ ᨠᨲ᩠ᨲᩩᨠᩣᨾᩣ ᩉᩮᩣᨶ᩠ᨲᩥ, ᨲᩴ ᩋᨠᩥᨲ᩠ᨲᩮᨲ᩠ᩅᩣ ᨲᩔᩩᨸᩁᩥ ᩋᨬ᩠ᨬᩮᩣ ᨸᩣᩈᩣᨱᩮᩣ ᨠᩥᨲ᩠ᨲᩮᨲᨻ᩠ᨻᩮᩣ. ᩈᨧᩮ ᨸᩥᨭ᩠ᨮᩥᨸᩣᩈᩣᨱᩩᨸᩁᩥ ᩅᩥᩉᩣᩁᩴ ᨠᩁᩮᩣᨶ᩠ᨲᩥ, ᩅᩥᩉᩣᩁᨾᨩ᩠ᨫᩮᨶ ᨧ ᨸᩥᨭ᩠ᨮᩥᨸᩣᩈᩣᨱᩮᩣ ᩅᩥᨶᩥᩅᩥᨩ᩠ᨫᩥᨲ᩠ᩅᩣ ᨣᨧ᩠ᨨᨲᩥ, ᩑᩅᩁᩪᨸᩮᩣ ᨸᩥᨭ᩠ᨮᩥᨸᩣᩈᩣᨱᩮᩣ ᨶ ᩅᨭ᩠ᨭᨲᩥ. ᩈᨧᩮ ᩉᩥ ᨲᩴ ᨠᩥᨲ᩠ᨲᩮᨶ᩠ᨲᩥ, ᨶᩥᨾᩥᨲ᩠ᨲᩔᩩᨸᩁᩥ ᩅᩥᩉᩣᩁᩮᩣ ᩉᩮᩣᨲᩥ, ᨶᩥᨾᩥᨲ᩠ᨲᨬ᩠ᨧ ᨶᩣᨾ ᨻᩉᩥᩈᩦᨾᩣᨿᩴ ᩉᩮᩣᨲᩥ, ᩅᩥᩉᩣᩁᩮᩣᨸᩥ ᨻᩉᩥᩈᩦᨾᩣᨿᩴ ᩌᨸᨩ᩠ᨩᨲᩥ. ᩅᩥᩉᩣᩁᩴ ᨸᩁᩥᨠ᩠ᨡᩥᨸᩥᨲ᩠ᩅᩣ ᨮᩥᨲᨸᩥᨭ᩠ᨮᩥᨸᩣᩈᩣᨱᩮᩣ ᨸᨶ ᩑᨠᨲ᩠ᨳ ᨠᩥᨲ᩠ᨲᩮᨲ᩠ᩅᩣ ᩋᨬ᩠ᨬᨲ᩠ᨳ ᨶ ᨠᩥᨲ᩠ᨲᩮᨲᨻ᩠ᨻᩮᩣ.

ᩅᨶᨶᩥᨾᩥᨲ᩠ᨲᩮ ᨲᩥᨱᩅᨶᩴ ᩅᩣ ᨲᨧᩈᩣᩁᩁᩩᨠ᩠ᨡᩅᨶᩴ ᩅᩣ ᨶ ᩅᨭ᩠ᨭᨲᩦᨲᩥ ᩌᩉ ‘‘ᩋᨶ᩠ᨲᩮᩣᩈᩣᩁᩮᩉᩦ’’ᨲᩥᩌᨴᩥ. ᩋᨶ᩠ᨲᩮᩣᩈᩣᩁᩣ ᨶᩣᨾ ᩋᨾ᩠ᨻᨩᨾ᩠ᨻᩩᨸᨶᩈᩣᨴᨿᩮᩣ. ᩋᨶ᩠ᨲᩮᩣᩈᩣᩁᨾᩥᩔᨠᩮᩉᩦᨲᩥ ᩋᨶ᩠ᨲᩮᩣ ᩈᩣᩁᩮᩣ ᨿᩮᩈᩴ ᨲᩮ ᩋᨶ᩠ᨲᩮᩣᩈᩣᩁᩣ, ᨲᩮᩉᩥ ᨾᩥᩔᨠᩣ ᩋᨶ᩠ᨲᩮᩣᩈᩣᩁᨾᩥᩔᨠᩣ, ᨲᩮᩉᩥ. ᨧᨲᩩᨸᨬ᩠ᨧᩁᩩᨠ᩠ᨡᨾᨲ᩠ᨲᨾ᩠ᨸᩦᨲᩥ ᩉᩮᨭ᩠ᨮᩥᨾᨸᩁᩥᨧ᩠ᨨᩮᨴᨶᩣᩉ. ᩏᨠ᩠ᨠᩴᩈᨲᩮᩣ ᨸᨶ ᨿᩮᩣᨩᨶᩈᨲᩥᨠᨾ᩠ᨸᩥ ᩅᨶᩴ ᩅᨭ᩠ᨭᨲᩥ. ᩑᨲ᩠ᨳ ᨸᨶ ᨧᨲᩩᩁᩩᨠ᩠ᨡᨾᨲ᩠ᨲᨬ᩠ᨧᩮ, ᨲᨿᩮᩣ ᩈᩣᩁᨲᩮᩣ, ᩑᨠᩮᩣ ᩋᩈᩣᩁᨲᩮᩣ. ᨸᨬ᩠ᨧᩁᩩᨠ᩠ᨡᨾᨲ᩠ᨲᨬ᩠ᨧᩮ, ᨲᨿᩮᩣ ᩈᩣᩁᨲᩮᩣ, ᨴ᩠ᩅᩮ ᩋᩈᩣᩁᨲᩮᩣᨲᩥ ᨣᩉᩮᨲᨻ᩠ᨻᩴ. ᩈᨧᩮ ᨸᨶ ᩅᨶᨾᨩ᩠ᨫᩮ ᩅᩥᩉᩣᩁᩴ ᨠᩁᩮᩣᨶ᩠ᨲᩥ, ᨲᩴ ᩅᨶᩴ ᨶ ᨠᩥᨲ᩠ᨲᩮᨲᨻ᩠ᨻᩴ. ᩑᨠᨴᩮᩈᩴ ᩋᨶ᩠ᨲᩮᩣᩈᩦᨾᩣᨿᩴ ᨠᨲ᩠ᨲᩩᨠᩣᨾᩮᩉᩥᨸᩥ ᩅᨶᩴ ᩋᨠᩥᨲ᩠ᨲᩮᨲ᩠ᩅᩣ ᨲᨲ᩠ᨳ ᩁᩩᨠ᩠ᨡᨸᩣᩈᩣᨱᩣᨴᨿᩮᩣ ᨠᩥᨲ᩠ᨲᩮᨲᨻ᩠ᨻᩣ, ᩅᩥᩉᩣᩁᩴ ᨸᩁᩥᨠ᩠ᨡᩥᨸᩥᨲ᩠ᩅᩣ ᨮᩥᨲᩅᨶᩴ ᩑᨠᨲ᩠ᨳ ᨠᩥᨲ᩠ᨲᩮᨲ᩠ᩅᩣ ᩋᨬ᩠ᨬᨲ᩠ᨳ ᨶ ᨠᩥᨲ᩠ᨲᩮᨲᨻ᩠ᨻᩴ (ᨾᩉᩣᩅ. ᩋᨭ᩠ᨮ. ᪑᪓᪘).

ᩁᩩᨠ᩠ᨡᨶᩥᨾᩥᨲ᩠ᨲᩮᨸᩥ ᨲᨧᩈᩣᩁᩁᩩᨠ᩠ᨡᩮᩣ ᨶ ᩅᨭ᩠ᨭᨲᩦᨲᩥ ᩌᩉ ‘‘ᩋᨶ᩠ᨲᩮᩣᩈᩣᩁᩮᩣ’’ᨲᩥ. ‘‘ᨽᩪᨾᩥᨿᩴ ᨸᨲᩥᨭ᩠ᨮᩥᨲᩮᩣ’’ᨲᩥ ᩍᨾᩥᨶᩣ ᨠᩩᨭᩈᩁᩣᩅᩣᨴᩦᩈᩩ ᨮᩥᨲᩴ ᨸᨭᩥᨠ᩠ᨡᩥᨸᨲᩥ. ᨲᨲᩮᩣ ᩋᨸᨶᩮᨲ᩠ᩅᩣ ᨸᨶ ᨲᨦ᩠ᨡᨱᨾ᩠ᨸᩥ ᨽᩪᨾᩥᨿᩴ ᩁᩮᩣᨸᩮᨲ᩠ᩅᩣ ᨠᩮᩣᨭ᩠ᨮᨠᩴ ᨠᨲ᩠ᩅᩣ ᩏᨴᨠᩴ ᩌᩈᩥᨬ᩠ᨧᩥᨲ᩠ᩅᩣ ᨠᩥᨲ᩠ᨲᩮᨲᩩᩴ ᩅᨭ᩠ᨭᨲᩥ, ᨶᩅᨾᩪᩃᩈᩣᨡᩣᨶᩥᨣ᩠ᨣᨾᨶᩴ ᩋᨠᩣᩁᨱᩴ. ᨡᨶ᩠ᨵᩴ ᨨᩥᨶ᩠ᨴᩥᨲ᩠ᩅᩣ ᩁᩮᩣᨸᩥᨲᩮ ᨸᨶ ᩑᨲᩴ ᨿᩩᨩ᩠ᨩᨲᩥ. ᩈᩪᨧᩥᨴᨱ᩠ᨯᨠᨸ᩠ᨸᨾᩣᨱᩮᩣᨲᩥ ‘‘ᩈᩦᩉᩊᨴᩦᨸᩮ ᩃᩮᨡᨶᨴᨱ᩠ᨯᨸ᩠ᨸᨾᩣᨱᩮᩣ’’ᨲᩥ ᩅᨴᨶ᩠ᨲᩥ (ᩈᩣᩁᨲ᩠ᨳ. ᨭᩦ. ᨾᩉᩣᩅᨣ᩠ᨣ ᪓.᪑᪓᪘), ᩈᩮᩣ ᨧ ᨠᨶᩥᨭ᩠ᨮᨦ᩠ᨣᩩᩃᩥᨸᩁᩥᨾᩣᨱᩮᩣᨲᩥ ᨴᨭ᩠ᨮᨻ᩠ᨻᩮᩣ. ᩍᨴᩴ ᨸᨶ ᩁᩩᨠ᩠ᨡᨶᩥᨾᩥᨲ᩠ᨲᩴ ᨠᩥᨲ᩠ᨲᩮᨶ᩠ᨲᩮᨶ ‘‘ᩁᩩᨠ᩠ᨡᩮᩣ’’ᨲᩥᨸᩥ, ‘‘ᩈᩣᨠᩁᩩᨠ᩠ᨡᩮᩣ, ᩈᩣᩃᩁᩩᨠ᩠ᨡᩮᩣ’’ᨲᩥᨸᩥ ᩅᨲ᩠ᨲᩩᩴ ᩅᨭ᩠ᨭᨲᩥ. ᩑᨠᩣᨻᨴ᩠ᨵᩴ ᨸᨶ ᩈᩩᨸ᩠ᨸᨲᩥᨭ᩠ᨮᩥᨲᨶᩥᨣᩕᩮᩣᨵᩈᨴᩥᩈᩴ ᩁᩩᨠ᩠ᨡᩴ ᩑᨠᨲ᩠ᨳ ᨠᩥᨲ᩠ᨲᩮᨲ᩠ᩅᩣ ᩋᨬ᩠ᨬᨲ᩠ᨳ ᨠᩥᨲ᩠ᨲᩮᨲᩩᩴ ᨶ ᩅᨭ᩠ᨭᨲᩥ.

ᨾᨣ᩠ᨣᨶᩥᨾᩥᨲ᩠ᨲᩮ ᩋᩁᨬ᩠ᨬᨡᩮᨲ᩠ᨲᨶᨴᩦᨲᩊᩣᨠᨾᨣ᩠ᨣᩣᨴᨿᩮᩣ ᨶ ᩅᨭ᩠ᨭᨶ᩠ᨲᩦᨲᩥ ᩌᩉ ‘‘ᨩᨦ᩠ᨥᨾᨣ᩠ᨣᩮᩣ ᩅᩣ ᩉᩮᩣᨲᩪ’’ᨲᩥᩌᨴᩥ. ᨿᩮᩣ ᨸᨶ ᨩᨦ᩠ᨥᨾᨣ᩠ᨣᩮᩣ ᩈᨠᨭᨾᨣ᩠ᨣᨲᩮᩣ ᩒᨠ᩠ᨠᨾᩥᨲ᩠ᩅᩣ ᨸᩩᨶ ᩈᨠᨭᨾᨣ᩠ᨣᨾᩮᩅ ᩒᨲᩁᨲᩥ, ᨿᩮ ᩅᩣ ᨩᨦ᩠ᨥᨾᨣ᩠ᨣᩈᨠᨭᨾᨣ᩠ᨣᩣ ᩋᩅᩃᨬ᩠ᨩᩥᨲᩣ, ᨲᩮ ᨶ ᩅᨭ᩠ᨭᨶ᩠ᨲᩥ. ᨲᩮᨶᩣᩉ ‘‘ᨩᨦ᩠ᨥᩈᨲ᩠ᨳᩈᨠᨭᩈᨲ᩠ᨳᩮᩉᩦ’’ᨲᩥᩌᨴᩥ. ᩑᨲ᩠ᨳ ᨧ ᩈᨧᩮ ᩈᨠᨭᨾᨣ᩠ᨣᩔ ᩋᨶ᩠ᨲᩥᨾᨧᨠ᩠ᨠᨾᨣ᩠ᨣᩴ ᨶᩥᨾᩥᨲ᩠ᨲᩴ ᨠᩁᩮᩣᨶ᩠ᨲᩥ, ᨾᨣ᩠ᨣᩮᩣ ᨻᩉᩥᩈᩦᨾᩣᨿ ᩉᩮᩣᨲᩥ. ᩈᨧᩮ ᨻᩣᩉᩥᩁᨧᨠ᩠ᨠᨾᨣ᩠ᨣᩴ ᨶᩥᨾᩥᨲ᩠ᨲᩴ ᨠᩁᩮᩣᨶ᩠ᨲᩥ, ᨻᩣᩉᩥᩁᨧᨠ᩠ᨠᨾᨣ᩠ᨣᩮᩣᩅ ᨻᩉᩥᩈᩦᨾᩣᨿ ᩉᩮᩣᨲᩥ, ᩈᩮᩈᩴ ᩋᨶ᩠ᨲᩮᩣᩈᩦᨾᩴ ᨽᨩᨲᩦᨲᩥ ᩅᩮᨴᩥᨲᨻ᩠ᨻᩴ. ᩈᨧᩮᨸᩥ ᨴ᩠ᩅᩮ ᨾᨣ᩠ᨣᩣ ᨶᩥᨠ᩠ᨡᨾᩥᨲ᩠ᩅᩣ ᨸᨧ᩠ᨨᩣ ᩈᨠᨭᨵᩩᩁᨾᩥᩅ ᩑᨠᩦᨽᩅᨶ᩠ᨲᩥ, ᨴ᩠ᩅᩥᨵᩣ ᨽᩥᨶ᩠ᨶᨭ᩠ᨮᩣᨶᩮ ᩅᩣ ᩈᨾ᩠ᨻᨶ᩠ᨵᨭ᩠ᨮᩣᨶᩮ ᩅᩣ ᩈᨠᩥᩴ ᨠᩥᨲ᩠ᨲᩮᨲ᩠ᩅᩣ ᨸᩩᨶ ᨶ ᨠᩥᨲ᩠ᨲᩮᨲᨻ᩠ᨻᩣ. ᩑᨠᩣᨻᨴ᩠ᨵᨶᩥᨾᩥᨲ᩠ᨲᨬ᩠ᩉᩮᨲᩴ ᩉᩮᩣᨲᩥ.

ᩈᨧᩮ ᩅᩥᩉᩣᩁᩴ ᨸᩁᩥᨠ᩠ᨡᩥᨸᩥᨲ᩠ᩅᩣ ᨧᨲ᩠ᨲᩣᩁᩮᩣ ᨾᨣ᩠ᨣᩣ ᨧᨲᩪᩈᩩ ᨴᩥᩈᩣᩈᩩ ᨣᨧ᩠ᨨᨶ᩠ᨲᩥ, ᨾᨩ᩠ᨫᩮ ᩑᨠᩴ ᨠᩥᨲ᩠ᨲᩮᨲ᩠ᩅᩣ ᩋᨸᩁᩴ ᨠᩥᨲ᩠ᨲᩮᨲᩩᩴ ᨶ ᩅᨭ᩠ᨭᨲᩥ. ᩑᨠᩣᨻᨴ᩠ᨵᨶᩥᨾᩥᨲ᩠ᨲᨬ᩠ᩉᩮᨲᩴ. ᨠᩮᩣᨱᩴ ᩅᩥᨶᩥᩅᩥᨩ᩠ᨫᩥᨲ᩠ᩅᩣ ᨣᨲᩴ ᨸᨶ ᨸᩁᨽᩣᨣᩮ ᨠᩥᨲ᩠ᨲᩮᨲᩩᩴ ᩅᨭ᩠ᨭᨲᩥ. ᩅᩥᩉᩣᩁᨾᨩ᩠ᨫᩮᨶ ᩅᩥᨶᩥᩅᩥᨩ᩠ᨫᩥᨲ᩠ᩅᩣ ᨣᨲᨾᨣ᩠ᨣᩮᩣ ᨸᨶ ᨶ ᨠᩥᨲ᩠ᨲᩮᨲᨻ᩠ᨻᩮᩣ. ᨠᩥᨲ᩠ᨲᩥᨲᩮ ᨸᨶ ᨶᩥᨾᩥᨲ᩠ᨲᩔ ᩏᨸᩁᩥ ᩅᩥᩉᩣᩁᩮᩣ ᩉᩮᩣᨲᩥ. ᩍᨾᨬ᩠ᨧ ᨾᨣ᩠ᨣᩴ ᨠᩥᨲ᩠ᨲᩮᨶ᩠ᨲᩮᨶ ‘‘ᨾᨣ᩠ᨣᩮᩣ ᨸᨩ᩠ᨩᩮᩣ ᨸᨳᩮᩣ’’ᨲᩥᩌᨴᩥᨶᩣ (ᨧᩪᩊᨶᩥ. ᨸᩣᩁᩣᨿᨶᨲ᩠ᨳᩩᨲᩥᨣᩣᨳᩣᨶᩥᨴ᩠ᨴᩮᩈ ᪑᪐᪑) ᩅᩩᨲ᩠ᨲᩮᩈᩩ ᨴᩈᩈᩩ ᨶᩣᨾᩮᩈᩩ ᨿᩮᨶ ᨠᩮᨶᨧᩥ ᨶᩣᨾᩮᨶ ᨠᩥᨲ᩠ᨲᩮᨲᩩᩴ ᩅᨭ᩠ᨭᨲᩥ. ᨸᩁᩥᨡᩣᩈᨱ᩠ᨮᩣᨶᩮᨶ ᩅᩥᩉᩣᩁᩴ ᨸᩁᩥᨠ᩠ᨡᩥᨸᩥᨲ᩠ᩅᩣ ᨣᨲᨾᨣ᩠ᨣᩮᩣ ᩑᨠᨲ᩠ᨳ ᨠᩥᨲ᩠ᨲᩮᨲ᩠ᩅᩣ ᩋᨬ᩠ᨬᨲ᩠ᨳ ᨠᩥᨲ᩠ᨲᩮᨲᩩᩴ ᨶ ᩅᨭ᩠ᨭᨲᩥ.

ᨿᩴ ᨸᨶ ᩋᨻᨴ᩠ᨵᩈᩦᨾᩣᩃᨠ᩠ᨡᨱᩮ ᨶᨴᩥᩴ ᩅᨠ᩠ᨡᩣᨾᩣᨲᩥ ‘‘ᨿᩔᩣ ᨵᨾ᩠ᨾᩥᨠᩣᨶᩴ ᩁᩣᨩᩪᨶᩴ ᨠᩣᩃᩮ’’ᨲᩥᩌᨴᩥᨶᩣ (ᨠᨦ᩠ᨡᩣ. ᩋᨭ᩠ᨮ. ᨶᩥᨴᩣᨶᩅᨱ᩠ᨱᨶᩣ) ᩏᨴᨠᩩᨠ᩠ᨡᩮᨸᩈᩦᨾᩣᨿᩴ ᨶᨴᩥᨿᩣ ᩅᨠ᩠ᨡᨾᩣᨶᨲ᩠ᨲᩣ ᩅᩩᨲ᩠ᨲᩴ. ᨿᩣ ᨸᨶ ᨶᨴᩦ ᨾᨣ᩠ᨣᩮᩣ ᩅᩥᨿ ᩈᨠᨭᨵᩩᩁᩈᨱ᩠ᨮᩣᨶᩮᨶ ᩅᩣ ᨸᩁᩥᨡᩣᩈᨱ᩠ᨮᩣᨶᩮᨶ ᩅᩣ ᩅᩥᩉᩣᩁᩴ ᨸᩁᩥᨠ᩠ᨡᩥᨸᩥᨲ᩠ᩅᩣ ᨣᨲᩣ, ᨶᩴ ᩑᨠᨲ᩠ᨳ ᨠᩥᨲ᩠ᨲᩮᨲ᩠ᩅᩣ ᩋᨬ᩠ᨬᨲ᩠ᨳ ᨠᩥᨲ᩠ᨲᩮᨲᩩᩴ ᨶ ᩅᨭ᩠ᨭᨲᩥ. ᩅᩥᩉᩣᩁᩔ ᨧᨲᩪᩈᩩ ᨴᩥᩈᩣᩈᩩ ᩋᨬ᩠ᨬᨾᨬ᩠ᨬᩴ ᩅᩥᨶᩥᩅᩥᨩ᩠ᨫᩥᨲ᩠ᩅᩣ ᨣᨲᩮ ᨶᨴᩦᨧᨲᩩᨠ᩠ᨠᩮᨸᩥ ᩑᩈᩮᩅ ᨶᨿᩮᩣ. ᩋᩈᨾ᩠ᨾᩥᩔᨶᨴᩥᨿᩮᩣ ᨸᨶ ᨧᨲᩔᩮᩣᨸᩥ ᨠᩥᨲ᩠ᨲᩮᨲᩩᩴ ᩅᨭ᩠ᨭᨲᩥ. ᩈᨧᩮ ᩅᨲᩥᩴ ᨠᩁᩮᩣᨶ᩠ᨲᩮᩣ ᩅᩥᨿ ᩁᩩᨠ᩠ᨡᨸᩣᨴᩮ ᨶᩥᨡᨱᩥᨲ᩠ᩅᩣ ᩅᩃ᩠ᩃᩥᨸᩃᩣᩃᩣᨴᩦᩉᩥ ᨶᨴᩦᩈᩮᩣᨲᩴ ᩁᩩᨾ᩠ᨽᨶ᩠ᨲᩥ, ᩏᨴᨠᨾ᩠ᨸᩥ ᩋᨩ᩠ᨫᩮᩣᨲ᩠ᨳᩁᩥᨲ᩠ᩅᩣ ᩌᩅᩁᨱᩴ ᨸᩅᨲ᩠ᨲᨲᩥᨿᩮᩅ, ᨶᩥᨾᩥᨲ᩠ᨲᩴ ᨠᩣᨲᩩᩴ ᩅᨭ᩠ᨭᨲᩥ. ᨿᨳᩣ ᨸᨶ ᩏᨴᨠᩴ ᨶᨸ᩠ᨸᩅᨲ᩠ᨲᨲᩥ, ᩑᩅᩴ ᩈᩮᨲᩩᨾ᩠ᩉᩥ ᨠᨲᩮ ᩋᨸ᩠ᨸᩅᨲ᩠ᨲᨾᩣᨶᩣ ᨶᨴᩦ ᨶᩥᨾᩥᨲ᩠ᨲᩴ ᨠᩣᨲᩩᩴ ᨶ ᩅᨭ᩠ᨭᨲᩥ. ᨸᩅᨲ᩠ᨲᨶᨭ᩠ᨮᩣᨶᩮ ᨶᨴᩦᨶᩥᨾᩥᨲ᩠ᨲᩴ, ᩋᨸ᩠ᨸᩅᨲ᩠ᨲᨶᨭ᩠ᨮᩣᨶᩮ ᩏᨴᨠᨶᩥᨾᩥᨲ᩠ᨲᩴ ᨠᩣᨲᩩᩴ ᩅᨭ᩠ᨭᨲᩥ.

ᨿᩣ ᨸᨶ ᨴᩩᨻ᩠ᨻᩩᨭ᩠ᨮᩥᨠᩣᩃᩮ ᩅᩣ ᨣᩥᨾ᩠ᩉᩮ ᩅᩣ ᨶᩥᩁᩩᨴᨠᨽᩣᩅᩮᨶ ᨶᨸ᩠ᨸᩅᨲ᩠ᨲᨲᩥ, ᩈᩣ ᩅᨭ᩠ᨭᨲᩥ. ᨾᩉᩣᨶᨴᩥᨲᩮᩣ ᩏᨴᨠᨾᩣᨲᩥᨠᩴ ᨶᩦᩉᩁᨶ᩠ᨲᩥ, ᩈᩣ ᨠᩩᨶ᩠ᨶᨴᩦᩈᨴᩥᩈᩣ ᩉᩩᨲ᩠ᩅᩣ ᨲᩦᨱᩥ ᩈᩔᩣᨶᩥ ᩈᨾ᩠ᨸᩣᨴᩮᨶ᩠ᨲᩦ ᨶᩥᨧ᩠ᨧᩴ ᨸᩅᨲ᩠ᨲᨲᩥ. ᨠᩥᨬ᩠ᨧᩣᨸᩥ ᨸᩅᨲ᩠ᨲᨲᩥ, ᨶᩥᨾᩥᨲ᩠ᨲᩴ ᨠᩣᨲᩩᩴ ᨶ ᩅᨭ᩠ᨭᨲᩥ. ᨿᩣ ᨸᨶ ᨾᩪᩃᩮ ᨾᩉᩣᨶᨴᩥᨲᩮᩣ ᨶᩥᨣ᩠ᨣᨲᩣᨸᩥ ᨠᩣᩃᨶ᩠ᨲᩁᩮᨶ ᨲᩮᨶᩮᩅ ᨶᩥᨣ᩠ᨣᨲᨾᨣ᩠ᨣᩮᨶ ᨶᨴᩥᩴ ᨽᩥᨶ᩠ᨴᩥᨲ᩠ᩅᩣ ᩈᨿᨾᩮᩅ ᨣᨧ᩠ᨨᨲᩥ, ᨣᨧ᩠ᨨᨶ᩠ᨲᩦ ᨧ ᨸᩁᨲᩮᩣ ᩈᩩᩈᩩᨾᩣᩁᩣᨴᩥᩈᨾᩣᨠᩥᨱ᩠ᨱᩣ ᨶᩣᩅᩣᨴᩦᩉᩥ ᩈᨬ᩠ᨧᩁᩥᨲᨻ᩠ᨻᩣ ᨶᨴᩦ ᩉᩮᩣᨲᩥ, ᨲᩴ ᨶᩥᨾᩥᨲ᩠ᨲᩴ ᨠᩣᨲᩩᩴ ᩅᨭ᩠ᨭᨲᩥ.

ᩋᩈᨶ᩠ᨴᨾᩣᨶᨶ᩠ᨲᩥ ᩋᨸ᩠ᨸᩅᨲ᩠ᨲᨾᩣᨶᩴ. ᩈᨶ᩠ᨴᨾᩣᨶᩴ ᨶᩣᨾ ᩒᨥᨶᨴᩦᩏᨴᨠᩅᩣᩉᨠᨾᩣᨲᩥᨠᩣᩈᩩ ᩏᨴᨠᩴ. ᩅᩩᨲ᩠ᨲᨸᩁᩥᨧ᩠ᨨᩮᨴᨠᩣᩃᩴ ᩋᨲᩥᨭ᩠ᨮᨶ᩠ᨲᨶ᩠ᨲᩥ ‘‘ᨿᩣᩅ ᨠᨾ᩠ᨾᩅᩣᨧᩣᨸᩁᩥᨿᩮᩣᩈᩣᨶᩣ ᩈᨱ᩠ᨮᨾᩣᨶᨠ’’ᨶ᩠ᨲᩥ ᩅᩩᨲ᩠ᨲᨸᩁᩥᨧ᩠ᨨᩮᨴᨠᩣᩃᩴ ᩋᨲᩥᨭ᩠ᨮᨶ᩠ᨲᩴ. ᨽᩣᨩᨶᨣᨲᨶ᩠ᨲᩥ ᨶᩣᩅᩣᨧᩣᨭᩥᩌᨴᩦᩈᩩ ᨽᩣᨩᨶᩮᩈᩩ ᨣᨲᩴ. ᨿᩴ ᨸᨶ ᩋᨶ᩠ᨵᨠᨭ᩠ᨮᨠᨳᩣᨿᩴ ‘‘ᨣᨾ᩠ᨽᩦᩁᩮᩈᩩ ᩌᩅᩣᨭᩣᨴᩦᩈᩩ ᩏᨠ᩠ᨡᩮᨸᩥᨾᩴ ᩏᨴᨠᩴ ᨶᩥᨾᩥᨲ᩠ᨲᩴ ᨶ ᨠᩣᨲᨻ᩠ᨻ’’ᨶ᩠ᨲᩥ (ᨾᩉᩣᩅ. ᩋᨭ᩠ᨮ. ᪑᪓᪘; ᩅᩥ. ᩈᨦ᩠ᨣ. ᩋᨭ᩠ᨮ. ᪑᪕᪘) ᩅᩩᨲ᩠ᨲᩴ, ᨲᩴ ᨴᩩᩅᩩᨲ᩠ᨲᩴ, ᩋᨲ᩠ᨲᨶᩮᩣ ᨾᨲᩥᨾᨲ᩠ᨲᨾᩮᩅ. ᨮᩥᨲᩴ ᨸᨶ ᩋᨶ᩠ᨲᨾᩈᩮᩣ ᩈᩪᨠᩁᨡᨲᩣᨿᨸᩥ ᨣᩣᨾᨴᩣᩁᨠᩣᨶᩴ ᨠᩦᩊᨶᩅᩣᨸᩥᨿᨾ᩠ᨸᩥ ᩈᨧᩮ ᨿᩣᩅ ᨠᨾ᩠ᨾᩅᩣᨧᩣᨸᩁᩥᨿᩮᩣᩈᩣᨶᩴ ᨲᩥᨭ᩠ᨮᨲᩥ, ᩋᨸ᩠ᨸᩴ ᩅᩣ ᩉᩮᩣᨲᩩ, ᨻᩉᩩ ᩅᩣ, ᩅᨭ᩠ᨭᨲᩥᨿᩮᩅ. ᨲᩈ᩠ᨾᩥᩴ ᨸᨶ ᨮᩣᨶᩮ ᨶᩥᨾᩥᨲ᩠ᨲᩈᨬ᩠ᨬᩣᨠᩁᨱᨲ᩠ᨳᩴ ᨸᩣᩈᩣᨱᩅᩣᩃᩥᨠᩣᨸᩴᩈᩩᩌᨴᩥᩁᩣᩈᩥ ᩅᩣ ᨸᩣᩈᩣᨱᨲ᩠ᨳᨾ᩠ᨽᩮᩣ ᩅᩣ ᨴᩣᩁᩩᨲ᩠ᨳᨾ᩠ᨽᩮᩣ ᩅᩣ ᨠᩣᨲᨻ᩠ᨻᩮᩣ.

ᩑᩅᩴ ᨶᩥᨾᩥᨲ᩠ᨲᩈᨾ᩠ᨸᨲ᩠ᨲᩥᨿᩩᨲ᩠ᨲᨲᩴ ᨴᩔᩮᨲ᩠ᩅᩣ ᩍᨴᩣᨶᩥ ᨿᩮᩉᩥ ᩌᨠᩣᩁᩮᩉᩥ ᨻᨴ᩠ᨵᩣ ᨸᩁᩥᩈᩣᩈᨾ᩠ᨸᨲ᩠ᨲᩥᨿᩩᨲ᩠ᨲᩣ ᨶᩣᨾ ᩉᩮᩣᨲᩥ, ᨲᩴ ᨴᩔᩮᨲᩩᩴ ‘‘ᨸᩁᩥᩈᩣᩈᨾ᩠ᨸᨲ᩠ᨲᩥᨿᩣ ᨿᩩᨲ᩠ᨲᩣ ᨶᩣᨾᩣ’’ᨲᩥᩌᨴᩥᨾᩣᩉ. ᩍᨾᩔ ᨸᨶ ᨠᨾ᩠ᨾᩔ ᨧᨲᩩᩅᨣ᩠ᨣᨠᩁᨱᩦᨿᨲ᩠ᨲᩣ ‘‘ᨧᨲᩪᩉᩥ ᨽᩥᨠ᩠ᨡᩪᩉᩦ’’ᨲᩥ ᩅᩩᨲ᩠ᨲᩴ. ᩍᨾᨬ᩠ᨧ ᩈᩦᨾᩴ ᨻᨶ᩠ᨵᩥᨲᩩᨠᩣᨾᩮᩉᩥ ᩈᩣᨾᨶ᩠ᨲᩅᩥᩉᩣᩁᩮᩈᩩ ᨽᩥᨠ᩠ᨡᩪ ᨲᩔ ᨲᩔ ᩅᩥᩉᩣᩁᩔ ᩈᩦᨾᩣᨸᩁᩥᨧ᩠ᨨᩮᨴᩴ ᨸᩩᨧ᩠ᨨᩥᨲ᩠ᩅᩣ ᨻᨴ᩠ᨵᩈᩦᨾᩅᩥᩉᩣᩁᩣᨶᩴ ᩈᩦᨾᩣᨿ ᩈᩦᨾᨶ᩠ᨲᩁᩥᨠᩴ, ᩋᨻᨴ᩠ᨵᩈᩦᨾᩅᩥᩉᩣᩁᩣᨶᩴ ᩈᩦᨾᩣᨿ ᩏᨸᨧᩣᩁᩴ ᨮᨸᩮᨲ᩠ᩅᩣ ᨴᩥᩈᩣᨧᩣᩁᩥᨠᨽᩥᨠ᩠ᨡᩪᨶᩴ ᨶᩥᩔᨬ᩠ᨧᩣᩁᩈᨾᨿᩮ ᩈᨧᩮ ᩑᨠᩈ᩠ᨾᩥᩴ ᨣᩣᨾᨡᩮᨲ᩠ᨲᩮ ᩈᩦᨾᩴ ᨻᨶ᩠ᨵᩥᨲᩩᨠᩣᨾᩣ, ᨿᩮ ᨲᨲ᩠ᨳ ᨻᨴ᩠ᨵᩈᩦᨾᩅᩥᩉᩣᩁᩣ, ᨲᩮᩈᩩ ᨽᩥᨠ᩠ᨡᩪᨶᩴ ‘‘ᨾᨿᩴ ᩋᨩ᩠ᨩ ᩈᩦᨾᩴ ᨻᨶ᩠ᨵᩥᩔᩣᨾ, ᨲᩩᨾ᩠ᩉᩮ ᩈᨠᩈᨠᩈᩦᨾᩣᨸᩁᩥᨧ᩠ᨨᩮᨴᨲᩮᩣ ᨾᩣ ᨶᩥᨠ᩠ᨡᨾᩥᨲ᩠ᨳᩣ’’ᨲᩥ ᨸᩮᩈᩮᨲᨻ᩠ᨻᩴ. ᨿᩮ ᩋᨻᨴ᩠ᨵᩈᩦᨾᩅᩥᩉᩣᩁᩣ, ᨲᩮᩈᩩ ᨽᩥᨠ᩠ᨡᩪ ᩑᨠᨩ᩠ᨫᩴ ᩈᨶ᩠ᨶᩥᨸᩣᨲᩣᨸᩮᨲᨻ᩠ᨻᩣ, ᨨᨶ᩠ᨴᩣᩁᩉᩣᨶᩴ ᨨᨶ᩠ᨴᩮᩣ ᩌᩉᩁᩣᨸᩮᨲᨻ᩠ᨻᩮᩣ. ᨲᩮᨶ ᩅᩩᨲ᩠ᨲᩴ ‘‘ᨿᩣᩅᨲᩥᨠᩣ ᨲᩈ᩠ᨾᩥᩴ ᨣᩣᨾᨡᩮᨲ᩠ᨲᩮ’’ᨲᩥᩌᨴᩥ. ᨲᩈ᩠ᨾᩥᩴ ᨣᩣᨾᨡᩮᨲ᩠ᨲᩮᨲᩥ ᨿᩈ᩠ᨾᩥᩴ ᨣᩣᨾᨡᩮᨲ᩠ᨲᩮ ᨮᨲ᩠ᩅᩣ ᨠᨾ᩠ᨾᩅᩣᨧᩴ ᩅᩣᨧᩮᨶ᩠ᨲᩥ, ᨲᩈ᩠ᨾᩥᩴ ᨣᩣᨾᨡᩮᨲ᩠ᨲᩮ. ‘‘ᩈᨧᩮ ᩋᨬ᩠ᨬᩣᨶᩥᨸᩥ ᨣᩣᨾᨡᩮᨲ᩠ᨲᩣᨶᩥ ᩋᨶ᩠ᨲᩮᩣ ᨠᨲ᩠ᨲᩩᨠᩣᨾᩣ, ᨲᩮᩈᩩ ᨣᩣᨾᩮᩈᩩ ᨿᩮ ᨽᩥᨠ᩠ᨡᩪ ᩅᩈᨶ᩠ᨲᩥ, ᨲᩮᩉᩥᨸᩥ ᩌᨣᨶ᩠ᨲᨻ᩠ᨻᩴ, ᩋᨶᩣᨣᨧ᩠ᨨᨶ᩠ᨲᩣᨶᩴ ᨨᨶ᩠ᨴᩮᩣ ᩌᩉᩁᩥᨲᨻ᩠ᨻᩮᩣ’’ᨲᩥ ᨾᩉᩣᩈᩩᨾᨲ᩠ᨳᩮᩁᩮᩣ ᩌᩉ. ᨾᩉᩣᨸᨴᩩᨾᨲ᩠ᨳᩮᩁᩮᩣ ᨸᨶᩣᩉ ‘‘ᨶᩣᨶᩣᨣᩣᨾᨡᩮᨲ᩠ᨲᩣᨶᩥ ᨶᩣᨾ ᨸᩣᨭᩥᨿᩮᨠ᩠ᨠᩴ ᨻᨴ᩠ᨵᩈᩦᨾᩣᩈᨴᩥᩈᩣᨶᩥ, ᨶ ᨲᨲᩮᩣ ᨨᨶ᩠ᨴᨸᩣᩁᩥᩈᩩᨴ᩠ᨵᩥ ᩌᨣᨧ᩠ᨨᨲᩥ. ᩋᨶ᩠ᨲᩮᩣᨶᩥᨾᩥᨲ᩠ᨲᨣᨲᩮᩉᩥ ᨸᨶ ᨽᩥᨠ᩠ᨡᩪᩉᩥ ᩌᨣᨶ᩠ᨲᨻ᩠ᨻ’’ᨶ᩠ᨲᩥ ᩅᨲ᩠ᩅᩣ ᨸᩩᨶ ᩌᩉ ‘‘ᩈᨾᩣᨶᩈᩴᩅᩣᩈᨠᩈᩦᨾᩣᩈᨾ᩠ᨾᨶ᩠ᨶᨶᨠᩣᩃᩮ ᩌᨣᨾᨶᨾ᩠ᨸᩥ ᩋᨶᩣᨣᨾᨶᨾ᩠ᨸᩥ ᩅᨭ᩠ᨭᨲᩥ, ᩋᩅᩥᨸ᩠ᨸᩅᩣᩈᩈᩦᨾᩣᩈᨾ᩠ᨾᨶ᩠ᨶᨶᨠᩣᩃᩮ ᨸᨶ ᩋᨶ᩠ᨲᩮᩣᨶᩥᨾᩥᨲ᩠ᨲᨣᨲᩮᩉᩥ ᩌᨣᨶ᩠ᨲᨻ᩠ᨻᩴ. ᩋᨶᩣᨣᨧ᩠ᨨᨶ᩠ᨲᩣᨶᩴ ᨨᨶ᩠ᨴᩮᩣ ᩌᩉᩁᩥᨲᨻ᩠ᨻᩮᩣ’’ᨲᩥ (ᨾᩉᩣᩅ. ᩋᨭ᩠ᨮ. ᪑᪓᪘).

ᩍᨴᩣᨶᩥ ᨿᩮᩉᩥ ᩌᨠᩣᩁᩮᩉᩥ ᩈᨾ᩠ᨾᨲᩣ ᨠᨾ᩠ᨾᩅᩣᨧᩣᩈᨾ᩠ᨸᨲ᩠ᨲᩥᨿᩩᨲ᩠ᨲᩣ ᨶᩣᨾ ᩉᩮᩣᨲᩥ, ᨲᩴ ᨴᩔᩮᨲᩩᩴ ‘‘ᨠᨾ᩠ᨾᩅᩣᨧᩣᩈᨾ᩠ᨸᨲ᩠ᨲᩥᨿᩣ ᨿᩩᨲ᩠ᨲᩣ ᨶᩣᨾᩣ’’ᨲᩥᩌᨴᩥᨾᩣᩉ. ᩌᨴᩥᩈᨴ᩠ᨴᩮᨶ. ‘‘ᨿᨴᩥ ᩈᨦ᩠ᨥᩔ ᨸᨲ᩠ᨲᨠᩃ᩠ᩃᩴ, ᩈᨦ᩠ᨥᩮᩣ ᩑᨲᩮᩉᩥ ᨶᩥᨾᩥᨲ᩠ᨲᩮᩉᩥ ᩈᩦᨾᩴ ᩈᨾ᩠ᨾᨶ᩠ᨶᩮᨿ᩠ᨿ ᩈᨾᩣᨶᩈᩴᩅᩣᩈᩴ ᩑᨠᩪᨸᩮᩣᩈᨳᩴ, ᩑᩈᩣ ᨬᨲ᩠ᨲᩥ. ᩈᩩᨱᩣᨲᩩ ᨾᩮ, ᨽᨶ᩠ᨲᩮ, ᩈᨦ᩠ᨥᩮᩣ, ᨿᩣᩅᨲᩣ ᩈᨾᨶ᩠ᨲᩣ ᨶᩥᨾᩥᨲ᩠ᨲᩣ ᨠᩥᨲ᩠ᨲᩥᨲᩣ, ᩈᨦ᩠ᨥᩮᩣ ᩑᨲᩮᩉᩥ ᨶᩥᨾᩥᨲ᩠ᨲᩮᩉᩥ ᩈᩦᨾᩴ ᩈᨾ᩠ᨾᨶ᩠ᨶᨲᩥ ᩈᨾᩣᨶᩈᩴᩅᩣᩈᩴ ᩑᨠᩪᨸᩮᩣᩈᨳᩴ, ᨿᩔᩣᨿᩈ᩠ᨾᨲᩮᩣ ᨡᨾᨲᩥ ᩑᨲᩮᩉᩥ ᨶᩥᨾᩥᨲ᩠ᨲᩮᩉᩥ ᩈᩦᨾᩣᨿ ᩈᨾ᩠ᨾᩩᨲᩥ ᩈᨾᩣᨶᩈᩴᩅᩣᩈᩣᨿ ᩑᨠᩪᨸᩮᩣᩈᨳᩣᨿ, ᩈᩮᩣ ᨲᩩᨱ᩠ᩉᩔ. ᨿᩔ ᨶᨠ᩠ᨡᨾᨲᩥ, ᩈᩮᩣ ᨽᩣᩈᩮᨿ᩠ᨿ. ᩈᨾ᩠ᨾᨲᩣ ᩈᩦᨾᩣ ᩈᨦ᩠ᨥᩮᨶ ᩑᨲᩮᩉᩥ ᨶᩥᨾᩥᨲ᩠ᨲᩮᩉᩥ ᩈᨾᩣᨶᩈᩴᩅᩣᩈᩣ ᩑᨠᩪᨸᩮᩣᩈᨳᩣ, ᨡᨾᨲᩥ ᩈᨦ᩠ᨥᩔ, ᨲᩈ᩠ᨾᩣ ᨲᩩᨱ᩠ᩉᩦ, ᩑᩅᨾᩮᨲᩴ ᨵᩣᩁᨿᩣᨾᩦ’’ᨲᩥ (ᨾᩉᩣᩅ. ᪑᪓᪙) ᩍᨾᩴ ᨸᩣᩊᩥᩈᩮᩈᩴ ᩈᨦ᩠ᨣᨱ᩠ᩉᩣᨲᩥ. ᩅᩩᨲ᩠ᨲᩣᨿᩣᨲᩥ ᩏᨸᩮᩣᩈᨳᨠ᩠ᨡᨶ᩠ᨵᨠᩮ ᩅᩩᨲ᩠ᨲᩣᨿ. ᨬᨲ᩠ᨲᩥᨴᩮᩣᩈᩋᨶᩩᩔᩣᩅᨶᨴᩮᩣᩈᩮᩉᩥ ᩅᩥᩁᩉᩥᨲᨲ᩠ᨲᩣ ᨸᩁᩥᩈᩩᨴ᩠ᨵᩣᨿ.

ᨡᨱ᩠ᨯᩈᩦᨾᩣ (ᨾᩉᩣᩅ. ᩋᨭ᩠ᨮ. ᪑᪓᪘; ᩈᩣᩁᨲ᩠ᨳ. ᨭᩦ. ᨾᩉᩣᩅᨣ᩠ᨣ ᪓.᪑᪓᪘; ᩅᨩᩥᩁ. ᨭᩦ. ᨾᩉᩣᩅᨣ᩠ᨣ ᪑᪓᪘) ᨶᩣᨾ ᨡᩩᨴ᩠ᨴᨠᩈᩦᨾᩣ. ᩈᨾᩣᨶᩈᩴᩅᩣᩈᨠᨲ᩠ᨳᩴ ᩈᨾ᩠ᨾᨲᩣ ᩈᩦᨾᩣ ᩈᨾᩣᨶᩈᩴᩅᩣᩈᨠᩈᩦᨾᩣ. ᩋᩅᩥᨸ᩠ᨸᩅᩣᩈᨲ᩠ᨳᩴ ᩈᨾ᩠ᨾᨲᩣ ᩈᩦᨾᩣ ᩋᩅᩥᨸ᩠ᨸᩅᩣᩈᩈᩦᨾᩣ. ᩍᨾᩣᩈᩩ ᨸᨶ ᨲᩦᩈᩩ ᩈᩦᨾᩴ ᩈᨾ᩠ᨾᨶ᩠ᨶᨶ᩠ᨲᩮᩉᩥ ᨸᨻ᩠ᨻᨩ᩠ᨩᩩᨸᩈᨾ᩠ᨸᨴᩣᨴᩦᨶᩴ ᩈᨦ᩠ᨥᨠᨾ᩠ᨾᩣᨶᩴ ᩈᩩᨡᨠᩁᨱᨲ᩠ᨳᩴ ᨸᨮᨾᩴ ᨡᨱ᩠ᨯᩈᩦᨾᩣ ᨻᨶ᩠ᨵᩥᨲᨻ᩠ᨻᩣ. ᨲᩴ ᨸᨶ ᨻᨶ᩠ᨵᨶ᩠ᨲᩮᩉᩥ ᩅᨲ᩠ᨲᩴ ᨩᩣᨶᩥᨲᨻ᩠ᨻᩴ. ᩈᨧᩮ ᩉᩥ ᨻᩮᩣᨵᩥᨧᩮᨲᩥᨿᨽᨲ᩠ᨲᩈᩣᩃᩣᨴᩦᨶᩥ ᩈᨻ᩠ᨻᩅᨲ᩠ᨳᩪᨶᩥ ᨸᨲᩥᨭ᩠ᨮᩣᨸᩮᨲ᩠ᩅᩣ ᨠᨲᩅᩥᩉᩣᩁᩮ ᨻᨶ᩠ᨵᨶ᩠ᨲᩥ, ᩅᩥᩉᩣᩁᨾᨩ᩠ᨫᩮ ᨻᩉᩪᨶᩴ ᩈᨾᩮᩣᩈᩁᨱᨭ᩠ᨮᩣᨶᩮ ᩋᨻᨶ᩠ᨵᩥᨲ᩠ᩅᩣ ᩅᩥᩉᩣᩁᨸᨧ᩠ᨧᨶ᩠ᨲᩮ ᩅᩥᩅᩥᨲ᩠ᨲᩮᩣᨠᩣᩈᩮ ᨻᨶ᩠ᨵᩥᨲᨻ᩠ᨻᩣ. ᩋᨠᨲᩅᩥᩉᩣᩁᩮ ᨻᨶ᩠ᨵᨶ᩠ᨲᩮᩉᩥ ᨻᩮᩣᨵᩥᨧᩮᨲᩥᨿᩣᨴᩦᨶᩴ ᩈᨻ᩠ᨻᩅᨲ᩠ᨳᩪᨶᩴ ᨮᩣᨶᩴ ᩈᩃ᩠ᩃᨠ᩠ᨡᩮᨲ᩠ᩅᩣ ᨿᨳᩣ ᨸᨲᩥᨭ᩠ᨮᩥᨲᩮᩈᩩ ᩅᨲ᩠ᨳᩪᩈᩩ ᩅᩥᩉᩣᩁᨸᨧ᩠ᨧᨶ᩠ᨲᩮ ᩅᩥᩅᩥᨲ᩠ᨲᩮᩣᨠᩣᩈᩮ ᩉᩮᩣᨲᩥ, ᩑᩅᩴ ᨻᨶ᩠ᨵᩥᨲᨻ᩠ᨻᩣ. ᩈᩣ ᩉᩮᨭ᩠ᨮᩥᨾᨸᩁᩥᨧ᩠ᨨᩮᨴᩮᨶ ᩈᨧᩮ ᩑᨠᩅᩦᩈᨲᩥᨽᩥᨠ᩠ᨡᩪ ᨣᨱ᩠ᩉᩣᨲᩥ, ᩅᨭ᩠ᨭᨲᩥ. ᨲᨲᩮᩣ ᩒᩁᩴ ᨶ ᩅᨭ᩠ᨭᨲᩥ. ᨸᩁᩴ ᨽᩥᨠ᩠ᨡᩩᩈᩉᩔᩴ ᨣᨱ᩠ᩉᨶ᩠ᨲᩦᨸᩥ ᩅᨭ᩠ᨭᨲᩥ. ᨲᩴ ᨻᨶ᩠ᨵᨶ᩠ᨲᩮᩉᩥ ᩈᩦᨾᩣᨾᩣᩊᨠᩔ ᩈᨾᨶ᩠ᨲᩣ ᨶᩥᨾᩥᨲ᩠ᨲᩩᨸᨣᩣ ᨸᩣᩈᩣᨱᩣ ᨮᨸᩮᨲᨻ᩠ᨻᩣ, ᨶ ᨡᨱ᩠ᨯᩈᩦᨾᩣᨿ ᨮᩥᨲᩮᩉᩥ ᨾᩉᩣᩈᩦᨾᩣ ᨻᨶ᩠ᨵᩥᨲᨻ᩠ᨻᩣ, ᨶ ᨾᩉᩣᩈᩦᨾᩣᨿ ᨮᩥᨲᩮᩉᩥ ᨡᨱ᩠ᨯᩈᩦᨾᩣ. ᨡᨱ᩠ᨯᩈᩦᨾᩣᨿᨾᩮᩅ ᨸᨶ ᨮᨲ᩠ᩅᩣ ᨡᨱ᩠ᨯᩈᩦᨾᩣ ᨻᨶ᩠ᨵᩥᨲᨻ᩠ᨻᩣ, ᨾᩉᩣᩈᩦᨾᩣᨿᨾᩮᩅ ᨮᨲ᩠ᩅᩣ ᨾᩉᩣᩈᩦᨾᩣ.

ᨲᨲᩕᩣᨿᩴ ᨻᨶ᩠ᨵᨶᩅᩥᨵᩥ – ᩈᨾᨶ᩠ᨲᩣ ‘‘ᩑᩈᩮᩣ ᨸᩣᩈᩣᨱᩮᩣ ᨶᩥᨾᩥᨲ᩠ᨲ’’ᨶ᩠ᨲᩥ ᩑᩅᩴ ᨶᩥᨾᩥᨲ᩠ᨲᩣᨶᩥ ᨠᩥᨲ᩠ᨲᩮᨲ᩠ᩅᩣ ᨠᨾ᩠ᨾᩅᩣᨧᩣᨿ ᩈᩦᨾᩣ ᩈᨾ᩠ᨾᨶ᩠ᨶᩥᨲᨻ᩠ᨻᩣ. ᩋᨳ ᨲᩔᩣ ᩑᩅ ᨴᩊ᩠ᩉᩦᨠᨾ᩠ᨾᨲ᩠ᨳᩴ ᩋᩅᩥᨸ᩠ᨸᩅᩣᩈᨠᨾ᩠ᨾᩅᩣᨧᩣ ᨠᩣᨲᨻ᩠ᨻᩣ. ᩑᩅᨬ᩠ᩉᩥ ‘‘ᩈᩦᨾᩴ ᩈᨾᩪᩉᨶᩥᩔᩣᨾᩣ’’ᨲᩥ ᩌᨣᨲᩣ ᩈᨾᩪᩉᨶᩥᨲᩩᩴ ᨶ ᩈᨠ᩠ᨡᩥᩔᨶ᩠ᨲᩥ. ᩈᩦᨾᩴ ᩈᨾ᩠ᨾᨶ᩠ᨶᩥᨲ᩠ᩅᩣ ᨻᩉᩥ ᩈᩦᨾᨶ᩠ᨲᩁᩥᨠᨸᩣᩈᩣᨱᩣ ᨮᨸᩮᨲᨻ᩠ᨻᩣ, ᩈᩦᨾᨶ᩠ᨲᩁᩥᨠᩣ ᨸᨧ᩠ᨨᩥᨾᨠᩮᩣᨭᩥᨿᩣ ᨧᨲᩩᩁᨦ᩠ᨣᩩᩃᨸ᩠ᨸᨾᩣᨱᩣᨸᩥ (ᨾᩉᩣᩅ. ᩋᨭ᩠ᨮ. ᪑᪓᪘; ᩅᩥ. ᩈᨦ᩠ᨣ. ᩋᨭ᩠ᨮ. ᪑᪖᪓) ᩅᨭ᩠ᨭᨲᩥ. ᩈᨧᩮ ᨸᨶ ᩅᩥᩉᩣᩁᩮᩣ ᨾᩉᩣ ᩉᩮᩣᨲᩥ, ᨴ᩠ᩅᩮᨸᩥ ᨲᩥᩔᩮᩣᨸᩥ ᨲᨲᩩᨲ᩠ᨲᩁᩥᨸᩥ ᨡᨱ᩠ᨯᩈᩦᨾᩣᨿᩮᩣ ᨻᨶ᩠ᨵᩥᨲᨻ᩠ᨻᩣ.

ᩑᩅᩴ ᨡᨱ᩠ᨯᩈᩦᨾᩴ ᩈᨾ᩠ᨾᨶ᩠ᨶᩥᨲ᩠ᩅᩣ ᨾᩉᩣᩈᩦᨾᩣᩈᨾ᩠ᨾᩩᨲᩥᨠᩣᩃᩮ ᨡᨱ᩠ᨯᩈᩦᨾᨲᩮᩣ ᨶᩥᨠ᩠ᨡᨾᩥᨲ᩠ᩅᩣ ᨾᩉᩣᩈᩦᨾᩣᨿᩴ ᨮᨲ᩠ᩅᩣ ᩈᨾᨶ᩠ᨲᩣ ᩋᨶᩩᨸᩁᩥᨿᩣᨿᨶ᩠ᨲᩮᩉᩥ ᩈᩦᨾᨶ᩠ᨲᩁᩥᨠᨸᩣᩈᩣᨱᩣ ᨠᩥᨲ᩠ᨲᩮᨲᨻ᩠ᨻᩣ. ᨲᨲᩮᩣ ᩋᩅᩈᩮᩈᨶᩥᨾᩥᨲ᩠ᨲᩮ ᨠᩥᨲ᩠ᨲᩮᨲ᩠ᩅᩣ ᩉᨲ᩠ᨳᨸᩣᩈᩴ ᩋᩅᩥᨩᩉᨶ᩠ᨲᩮᩉᩥ ᨠᨾ᩠ᨾᩅᩣᨧᩣᨿ ᩈᨾᩣᨶᩈᩴᩅᩣᩈᨠᩈᩦᨾᩴ ᩈᨾ᩠ᨾᨶ᩠ᨶᩥᨲ᩠ᩅᩣ ᨲᩔᩣ ᨴᩊ᩠ᩉᩦᨠᨾ᩠ᨾᨲ᩠ᨳᩴ ᩋᩅᩥᨸ᩠ᨸᩅᩣᩈᨠᨾ᩠ᨾᩅᩣᨧᩣᨸᩥ ᨠᩣᨲᨻ᩠ᨻᩣ. ᩑᩅᨬ᩠ᩉᩥ ‘‘ᩈᩦᨾᩴ ᩈᨾᩪᩉᨶᩥᩔᩣᨾᩣ’’ᨲᩥ ᩌᨣᨲᩣ ᩈᨾᩪᩉᨶᩥᨲᩩᩴ ᨶ ᩈᨠ᩠ᨡᩥᩔᨶ᩠ᨲᩥ. ᩈᨧᩮ ᨸᨶ ᨡᨱ᩠ᨯᩈᩦᨾᩣᨿ ᨶᩥᨾᩥᨲ᩠ᨲᩣᨶᩥ ᨠᩥᨲ᩠ᨲᩮᨲ᩠ᩅᩣ ᨲᨲᩮᩣ ᩈᩦᨾᨶ᩠ᨲᩁᩥᨠᩣᨿ ᨶᩥᨾᩥᨲ᩠ᨲᩣᨶᩥ ᨠᩥᨲ᩠ᨲᩮᨲ᩠ᩅᩣ ᨾᩉᩣᩈᩦᨾᩣᨿ ᨶᩥᨾᩥᨲ᩠ᨲᩣᨶᩥ ᨠᩥᨲ᩠ᨲᩮᨶ᩠ᨲᩥ, ᩑᩅᩴ ᨲᩦᩈᩩ ᨮᩣᨶᩮᩈᩩ ᨶᩥᨾᩥᨲ᩠ᨲᩣᨶᩥ ᨠᩥᨲ᩠ᨲᩮᨲ᩠ᩅᩣ ᨿᩴ ᩈᩦᨾᩴ ᩍᨧ᩠ᨨᨶ᩠ᨲᩥ, ᨲᩴ ᨸᨮᨾᩴ ᨻᨶ᩠ᨵᩥᨲᩩᩴ ᩅᨭ᩠ᨭᨲᩥ. ᩑᩅᩴ ᩈᨶ᩠ᨲᩮᨸᩥ ᨿᨳᩣᩅᩩᨲ᩠ᨲᨶᨿᩮᨶ ᨡᨱ᩠ᨯᩈᩦᨾᨲᩮᩣᩅ ᨸᨭ᩠ᨮᩣᨿ ᨻᨶ᩠ᨵᩥᨲᨻ᩠ᨻᩣ. ᩑᩅᩴ ᨻᨴ᩠ᨵᩣᩈᩩ ᨸᨶ ᩈᩦᨾᩣᩈᩩ ᨡᨱ᩠ᨯᩈᩦᨾᩣᨿᩴ ᨮᩥᨲᩣ ᨽᩥᨠ᩠ᨡᩪ ᨾᩉᩣᩈᩦᨾᩣᨿᩴ ᨠᨾ᩠ᨾᩴ ᨠᩁᩮᩣᨶ᩠ᨲᩣᨶᩴ ᨶ ᨠᩮᩣᨸᩮᨶ᩠ᨲᩥ, ᨾᩉᩣᩈᩦᨾᩣᨿᩴ ᩅᩣ ᨮᩥᨲᩣ ᨡᨱ᩠ᨯᩈᩦᨾᩣᨿᩴ ᨠᩁᩮᩣᨶ᩠ᨲᩣᨶᩴ. ᩈᩦᨾᨶ᩠ᨲᩁᩥᨠᩣᨿ ᨸᨶ ᨮᩥᨲᩣ ᩏᨽᩥᨶ᩠ᨶᨾ᩠ᨸᩥ ᨶ ᨠᩮᩣᨸᨶ᩠ᨲᩥ. ᨣᩣᨾᨡᩮᨲ᩠ᨲᩮ ᨮᨲ᩠ᩅᩣ ᨠᨾ᩠ᨾᩴ ᨠᩁᩮᩣᨶ᩠ᨲᩣᨶᩴ ᨸᨶ ᩈᩦᨾᨶ᩠ᨲᩁᩥᨠᩣᨿ ᨮᩥᨲᩣ ᨠᩮᩣᨸᩮᨶ᩠ᨲᩥ. ᩈᩦᨾᨶ᩠ᨲᩁᩥᨠᩣ ᩉᩥ ᨣᩣᨾᨡᩮᨲ᩠ᨲᩴ ᨽᨩᨲᩥ. ᩋᩅᩥᨸ᩠ᨸᩅᩣᩈᩈᩦᨾᩣᩈᨾ᩠ᨾᨶ᩠ᨶᨶᩮ ᨠᨲᩮ ᩈᨲᩥ ᩈᩣ ᨧ ᩋᩅᩥᨸ᩠ᨸᩅᩣᩈᩈᩦᨾᩣ ᨶᩣᨾ ᩉᩮᩣᨲᩥ. ᨲᩮᨶᩣᩉ ‘‘ᨲᩔᩣᨿᩮᩅ ᨸᨽᩮᨴᩮᩣ’’ᨲᩥ. ᨲᩔᩣᨿᩮᩅᩣᨲᩥ ᨻᨴ᩠ᨵᩈᩦᨾᩣᨿ ᩑᩅ.

ᩋᨿᩴ ᨸᨶ ᩅᩥᩈᩮᩈᩮᩣ – ‘‘ᨮᨸᩮᨲ᩠ᩅᩣ ᨣᩣᨾᨬ᩠ᨧ ᨣᩣᨾᩪᨸᨧᩣᩁᨬ᩠ᨧᩣ’’ᨲᩥ (ᨾᩉᩣᩅ. ᪑᪔᪔) ᩅᨧᨶᨲᩮᩣ ᩋᩅᩥᨸ᩠ᨸᩅᩣᩈᩈᩦᨾᩣ ᨣᩣᨾᨬ᩠ᨧ ᨣᩣᨾᩪᨸᨧᩣᩁᨬ᩠ᨧ ᨶ ᩒᨲᩁᨲᩥ, ᩈᨾᩣᨶᩈᩴᩅᩣᩈᨠᩈᩦᨾᩣ ᨸᨶ ᨲᨲ᩠ᨳᩣᨸᩥ ᩒᨲᩁᨲᩥ. ᩈᨾᩣᨶᩈᩴᩅᩣᩈᨠᩈᩦᨾᩣ ᨧᩮᨲ᩠ᨳ ᩋᨲ᩠ᨲᨶᩮᩣ ᨵᨾ᩠ᨾᨲᩣᨿ ᨣᨧ᩠ᨨᨲᩥ, ᩋᩅᩥᨸ᩠ᨸᩅᩣᩈᩈᩦᨾᩣ ᨸᨶ ᨿᨲ᩠ᨳ ᩈᨾᩣᨶᩈᩴᩅᩣᩈᨠᩈᩦᨾᩣ, ᨲᨲ᩠ᨳᩮᩅ ᨣᨧ᩠ᨨᨲᩥ. ᨶ ᩉᩥ ᨲᩔᩣ ᩅᩥᩈᩩᩴ ᨶᩥᨾᩥᨲ᩠ᨲᨠᩥᨲ᩠ᨲᨶᩴ ᩋᨲ᩠ᨳᩥ. ᨲᨲ᩠ᨳ ᩈᨧᩮ ᩋᩅᩥᨸ᩠ᨸᩅᩣᩈᩣᨿ ᩈᨾ᩠ᨾᩩᨲᩥᨠᩣᩃᩮ ᨣᩣᨾᩮᩣ ᩋᨲ᩠ᨳᩥ, ᨲᩴ ᩈᩣ ᨶ ᩒᨲᩁᨲᩥ. ᩈᨧᩮ ᨸᨶ ᩈᨾ᩠ᨾᨲᩣᨿ ᩈᩦᨾᩣᨿ ᨸᨧ᩠ᨨᩣ ᨣᩣᨾᩮᩣ ᨶᩥᩅᩥᩈᨲᩥ, ᩈᩮᩣᨸᩥ ᩈᩦᨾᩣᩈᨦ᩠ᨡᨾᩮᩅ ᨣᨧ᩠ᨨᨲᩥ. ᨿᨳᩣ ᨧ ᨸᨧ᩠ᨨᩣ ᨶᩥᩅᩥᨭ᩠ᨮᩮᩣ, ᩑᩅᩴ ᨸᨮᨾᩴ ᨶᩥᩅᩥᨭ᩠ᨮᩔ ᨸᨧ᩠ᨨᩣ ᩅᨯ᩠ᨰᩥᨲᨸ᩠ᨸᨴᩮᩈᩮᩣᨸᩥ ᩈᩦᨾᩣᩈᨦ᩠ᨡᨾᩮᩅ ᨣᨧ᩠ᨨᨲᩥ. ᩈᨧᩮᨸᩥ ᩈᩦᨾᩣᩈᨾ᩠ᨾᩩᨲᩥᨠᩣᩃᩮ ᨣᩮᩉᩣᨶᩥ ᨠᨲᩣᨶᩥ, ‘‘ᨸᩅᩥᩈᩥᩔᩣᨾᩣ’’ᨲᩥ ᩌᩃᨿᩮᩣᨸᩥ ᩋᨲ᩠ᨳᩥ, ᨾᨶᩩᩔᩣ ᨸᨶ ᩋᨸ᩠ᨸᩅᩥᨭ᩠ᨮᩣ, ᨸᩮᩣᩁᩣᨱᨣᩣᨾᩴ ᩅᩣ ᩈᨣᩮᩉᨾᩮᩅ ᨨᨯ᩠ᨯᩮᨲ᩠ᩅᩣ ᩋᨬ᩠ᨬᨲ᩠ᨳ ᨣᨲᩣ, ᩋᨣᩣᨾᩮᩣᨿᩮᩅ ᩑᩈ, ᩈᩦᨾᩣ ᩒᨲᩁᨲᩥ. ᩈᨧᩮ ᨸᨶ ᩑᨠᨾ᩠ᨸᩥ ᨠᩩᩃᩴ ᨸᩅᩥᨭ᩠ᨮᩴ ᩅᩣ ᩋᨣᨲᩴ ᩅᩣ ᩋᨲ᩠ᨳᩥ, ᨣᩣᨾᩮᩣᨿᩮᩅ, ᩈᩦᨾᩣ ᨶ ᩒᨲᩁᨲᩥ.

ᩑᩅᩴ ᨻᨴ᩠ᨵᩈᩦᨾᩴ ᨴᩔᩮᨲ᩠ᩅᩣ ᩍᨴᩣᨶᩥ ᩋᨻᨴ᩠ᨵᩈᩦᨾᩴ ᨴᩔᩮᨶ᩠ᨲᩮᩣ ‘‘ᩋᨻᨴ᩠ᨵᩈᩦᨾᩣ ᨸᨶᩣ’’ᨲᩥᩌᨴᩥᨾᩣᩉ. ᨣᩣᨾᩮᩣ ᩑᩅ ᩈᩦᨾᩣ ᨣᩣᨾᩈᩦᨾᩣ. ᨣᩣᨾᨣ᩠ᨣᩉᨱᩮᨶ ᨧᩮᨲ᩠ᨳ ᨶᩥᨣᨾᨶᨣᩁᩣᨶᨾ᩠ᨸᩥ ᩈᨦ᩠ᨣᩉᩮᩣ ᩅᩮᨴᩥᨲᨻ᩠ᨻᩮᩣ. ᨿᨲ᩠ᨲᨠᩮ ᨸᨴᩮᩈᩮ ᨲᩔ ᨣᩣᨾᩔ ᨣᩣᨾᨽᩮᩣᨩᨠᩣ ᨻᩃᩥᩴ ᩃᨽᨶ᩠ᨲᩥ, ᩈᩮᩣ ᨸᨴᩮᩈᩮᩣ ᩋᨸ᩠ᨸᩮᩣ ᩅᩣ ᩉᩮᩣᨲᩩ, ᨾᩉᨶ᩠ᨲᩮᩣ ᩅᩣ, ᩑᨠᩴ ᨣᩣᨾᨡᩮᨲ᩠ᨲᩴ ᨶᩣᨾ. ᨿᨾ᩠ᨸᩥ ᩑᨠᩈ᩠ᨾᩥᩴᨿᩮᩅ ᨣᩣᨾᨡᩮᨲ᩠ᨲᩮ ᩑᨠᩴ ᨸᨴᩮᩈᩴ ‘‘ᩋᨿᩴ ᩅᩥᩈᩩᩴ ᨣᩣᨾᩮᩣ ᩉᩮᩣᨲᩪ’’ᨲᩥ ᨸᩁᩥᨧ᩠ᨨᩥᨶ᩠ᨴᩥᨲ᩠ᩅᩣ ᩁᩣᨩᩣ ᨠᩔᨧᩥ ᨴᩮᨲᩥ, ᩈᩮᩣᨸᩥ ᩅᩥᩈᩩᩴᨣᩣᨾᩈᩦᨾᩣ ᩉᩮᩣᨲᩥᨿᩮᩅ. ᨲᩈ᩠ᨾᩣ ᩈᩣ ᨧ ᩍᨲᩁᩣ ᨧ ᨸᨠᨲᩥᨣᩣᨾᩈᩦᨾᩣ ᨻᨴ᩠ᨵᩈᩦᨾᩣᩈᨴᩥᩈᩣᩅ ᩉᩮᩣᨲᩥ. ᨠᩮᩅᩃᩴ ᨸᨶ ᨲᩥᨧᩦᩅᩁᩅᩥᨸ᩠ᨸᩅᩣᩈᨸᩁᩥᩉᩣᩁᩴ ᨶ ᩃᨽᨲᩦᨲᩥ (ᨾᩉᩣᩅ. ᩋᨭ᩠ᨮ. ᪑᪔᪗).

ᩋᨣᩣᨾᨠᩮ ᩋᩁᨬ᩠ᨬᩮᨲᩥ ᩅᩥᨬ᩠ᨫᩣᨭᩅᩥᩈᨴᩥᩈᩮ ᩋᩁᨬ᩠ᨬᩮ. ᨲᩮᨶᩣᩉ ‘‘ᩋᨣᩣᨾᨠᩴ ᨶᩣᨾᩣ’’ᨲᩥᩌᨴᩥ. ᩋᨿᩴ ᨸᨶ ᩈᩦᨾᩣ ᨲᩥᨧᩦᩅᩁᩅᩥᨸ᩠ᨸᩅᩣᩈᨸᩁᩥᩉᩣᩁᨾ᩠ᨸᩥ ᩃᨽᨲᩥ. ᨾᨧ᩠ᨨᨻᨶ᩠ᨵᩣᨶᨶ᩠ᨲᩥ ᨠᩮᩅᨭ᩠ᨭᩣᨶᩴ. ᩋᨣᨾᨶᨸᨳᩮᩈᩪᨲᩥ ᨣᨶ᩠ᨲᩩᩴ ᩋᩈᨠ᩠ᨠᩩᨱᩮᨿ᩠ᨿᨸᨳᩮᩈᩩ. ᨿᨲ᩠ᨳ ᨲᨴᩉᩮᩅ ᨣᨶ᩠ᨲ᩠ᩅᩣ ᨲᨴᩉᩮᩅ ᨸᨧ᩠ᨧᩣᨣᨶ᩠ᨲᩩᩴ ᨶ ᩈᨠ᩠ᨠᩣ ᩉᩮᩣᨲᩥ, ᨲᩣᨴᩥᩈᩮᩈᩪᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨲᩮᩈᩴ ᨣᨾᨶᨸᩁᩥᨿᨶ᩠ᨲᩔ ᩒᩁᨲᩮᩣ ᨸᨶ ᨣᩣᨾᩈᩦᨾᩣᩈᨦ᩠ᨡᩴ ᨣᨧ᩠ᨨᨲᩥ. ᨲᨲ᩠ᨳ ᨣᩣᨾᩈᩦᨾᩴ ᩋᩈᩮᩣᨵᩮᨲ᩠ᩅᩣ ᨠᨾ᩠ᨾᩴ ᨠᩣᨲᩩᩴ ᨶ ᩅᨭ᩠ᨭᨲᩥ. ᨾᨩ᩠ᨫᩮ ᨮᩥᨲᩣᨶᩴ ᩈᨻ᩠ᨻᨴᩥᩈᩣᩈᩩ ᩈᨲ᩠ᨲᨻ᩠ᨽᨶ᩠ᨲᩁᩣᨲᩥ ᨾᨩ᩠ᨫᩮ ᨮᩥᨲᩣᨶᩴ ᨽᩥᨠ᩠ᨡᩪᨶᩴ ᨮᩥᨲᩮᩣᨠᩣᩈᨲᩮᩣ ᩈᨻ᩠ᨻᨴᩥᩈᩣᩈᩩ ᩈᨲ᩠ᨲᨻ᩠ᨽᨶ᩠ᨲᩁᩣ. ᨲᨲ᩠ᨳᩣᨲᩥ ᨲᩮᩈᩩ ᩋᨻ᩠ᨽᨶ᩠ᨲᩁᩮᩈᩩ. ᨲᩈ᩠ᨾᩣᨲᩥ ᨿᩈ᩠ᨾᩣ ᨸᩁᩥᩈᩅᩈᩮᨶ ᩅᨯ᩠ᨰᨲᩥ, ᨲᩈ᩠ᨾᩣ. ᩏᨸᨧᩣᩁᨲ᩠ᨳᩣᨿᩣᨲᩥ ᩈᩦᨾᩮᩣᨸᨧᩣᩁᨲ᩠ᨳᩣᨿ. ᩈᩦᨾᩣᨽᩣᩅᩴ ᨸᨭᩥᨠ᩠ᨡᩥᨸᩥᨲ᩠ᩅᩣᨲᩥ ᨻᨴ᩠ᨵᩈᩦᨾᩣᨽᩣᩅᩴ ᨸᨭᩥᨠ᩠ᨡᩥᨸᩥᨲ᩠ᩅᩣ. ᩈᨾᩣᨶᩮᩣ ᩈᩴᩅᩣᩈᩮᩣ ᩑᨲ᩠ᨳᩣᨲᩥ ᩈᨾᩣᨶᩈᩴᩅᩣᩈᩣ. ᩑᨠᩮᩣ ᩏᨸᩮᩣᩈᨳᩮᩣ ᩑᨲ᩠ᨳᩣᨲᩥ ᩑᨠᩪᨸᩮᩣᩈᨳᩣ. ᩑᨲ᩠ᨳ ᨧ ᩏᨸᩮᩣᩈᨳᩔ ᩅᩥᩈᩩᩴ ᨣᩉᩥᨲᨲ᩠ᨲᩣ ᩋᩅᩈᩮᩈᨠᨾ᩠ᨾᩅᩈᩮᨶ ᩈᨾᩣᨶᩈᩴᩅᩣᩈᨲᩣ ᩅᩮᨴᩥᨲᨻ᩠ᨻᩣ. ᩅᩩᨲ᩠ᨲᩣᨲᩥ ᩋᨻᨴ᩠ᨵᩈᩦᨾᩣᨸᩁᩥᨧ᩠ᨨᩮᨴᩴ ᨴᩔᩮᨲᩩᩴ ᩏᨸᩮᩣᩈᨳᨠ᩠ᨡᨶ᩠ᨵᨠᩮ (ᨾᩉᩣᩅ. ᪑᪔᪙) ᩅᩩᨲ᩠ᨲᩣ. ᩋᨶᩩ ᩋᨶᩩ ᩋᨯ᩠ᨰᨾᩣᩈᩴ ᩋᨶ᩠ᩅᨯ᩠ᨰᨾᩣᩈᩴ, ᩋᨯ᩠ᨰᨾᩣᩈᩮ ᩋᨯ᩠ᨰᨾᩣᩈᩮᨲᩥ ᩋᨲ᩠ᨳᩮᩣ. ᩑᩅᩴ ‘‘ᩋᨶᩩᨴᩈᩣᩉ’’ᨶ᩠ᨲᩥᩌᨴᩦᩈᩩᨸᩥ. ᨴᩮᩅᩮᨲᩥ ᨾᩮᨥᩮ. ᩅᩃᩣᩉᨠᩮᩈᩩ ᩅᩥᨣᨲᨾᨲ᩠ᨲᩮᩈᩪᨲᩥ ᨽᩣᩅᩮᨶᨽᩣᩅᩃᨠ᩠ᨡᨱᩮ ᨽᩩᨾ᩠ᨾᩴ. ᩈᩮᩣᨲᨶ᩠ᨲᩥ ᩏᨴᨠᨸ᩠ᨸᩅᩣᩉᩮᩣ ᩅᩩᨧ᩠ᨧᨲᩥ. ᨲᩥᨲ᩠ᨳᩮᨶ ᩅᩣ ᩋᨲᩥᨲ᩠ᨳᩮᨶ ᩅᩣ ᩒᨲᩁᩥᨲ᩠ᩅᩣᨲᩥ ᨸᩣᨮᩈᩮᩈᩮᩣ. ᨲᩥᨾᨱ᩠ᨯᩃᩴ ᨸᨭᩥᨧ᩠ᨨᩣᨴᩮᨲ᩠ᩅᩣᨲᩥ ᨿᨳᩣ ᨲᩥᨾᨱ᩠ᨯᩃᨸᨭᩥᨧ᩠ᨨᩣᨴᨶᩴ ᩉᩮᩣᨲᩥ, ᩑᩅᩴ ᨶᩥᩅᩣᩈᩮᨲ᩠ᩅᩣ. ᩏᨲ᩠ᨲᩁᨶ᩠ᨲᩥᨿᩣᨲᩥ ᨿᨲ᩠ᨳ ᨠᨲ᩠ᨳᨧᩥ ᩏᨲ᩠ᨲᩁᨶ᩠ᨲᩥᨿᩣ. ᨽᩥᨠ᩠ᨡᩩᨶᩦᩅᩥᨽᨦ᩠ᨣᩮ (ᨸᩣᨧᩥ. ᪖᪙᪒) ᨽᩥᨠ᩠ᨡᩩᨶᩥᨿᩣ ᩅᩈᩮᨶ ᨶᨴᩦᩃᨠ᩠ᨡᨱᩔ ᨸᩣᩊᩥᨿᩴ ᩌᨣᨲᨲ᩠ᨲᩣ ‘‘ᨽᩥᨠ᩠ᨡᩩᨶᩥᨿᩣ’’ᨲᩥ ᩅᩩᨲ᩠ᨲᩴ, ᨶ ᨸᨶ ᩅᩥᩈᩮᩈᩈᨻ᩠ᨽᩣᩅᨲᩮᩣ.

ᨠᩮᨶᨧᩥ ᨡᨱᩥᨲ᩠ᩅᩣ ᩋᨠᨲᩮᩣᨲᩥ ᩋᨶ᩠ᨲᨾᩈᩮᩣ ᨲᩥᩁᨧ᩠ᨨᩣᨶᩮᨶᨸᩥ ᨡᨱᩥᨲ᩠ᩅᩣ ᩋᨠᨲᩮᩣ. ᨶᨴᩥᩴ ᩅᩣ ᩈᨾᩩᨴ᩠ᨴᩴ ᩅᩣ ᨽᩥᨶ᩠ᨴᩥᨲ᩠ᩅᩣᨲᩥ ᨶᨴᩦᨠᩪᩃᩴ ᩅᩣ ᩈᨾᩩᨴ᩠ᨴᩅᩮᩃᩴ ᩅᩣ ᨽᩥᨶ᩠ᨴᩥᨲ᩠ᩅᩣ. ᩑᨲᩴ ᩃᨠ᩠ᨡᨱᨶ᩠ᨲᩥ ‘‘ᨿᨲ᩠ᨳ ᨶᨴᩥᨿᩴ ᩅᩩᨲ᩠ᨲᨸ᩠ᨸᨠᩣᩁᩮ ᩅᩔᨠᩣᩃᩮ ᩏᨴᨠᩴ ᩈᨶ᩠ᨲᩥᨭ᩠ᨮᨲᩦ’’ᨲᩥ (ᨠᨦ᩠ᨡᩣ. ᩋᨭ᩠ᨮ. ᨶᩥᨴᩣᨶᩅᨱ᩠ᨱᨶᩣ) ᩅᩩᨲ᩠ᨲᨸ᩠ᨸᨠᩣᩁᩃᨠ᩠ᨡᨱᩴ. ᩃᩮᩣᨱᩦᨸᩥ ᨩᩣᨲᩔᩁᩈᨦ᩠ᨡᨾᩮᩅ ᨣᨧ᩠ᨨᨲᩥ. ᨿᨲ᩠ᨳ ᨸᨶ ᩅᩩᨲ᩠ᨲᨸ᩠ᨸᨠᩣᩁᩮ ᩅᩔᨠᩣᩃᩮ ᩅᩔᩮ ᨸᨧ᩠ᨨᩥᨶ᩠ᨶᨾᨲ᩠ᨲᩮ ᨸᩥᩅᩥᨲᩩᩴ ᩅᩣ ᩉᨲ᩠ᨳᨸᩣᨴᩮ ᨵᩮᩣᩅᩥᨲᩩᩴ ᩅᩣ ᩏᨴᨠᩴ ᨶ ᩉᩮᩣᨲᩥ ᩈᩩᨠ᩠ᨡᨲᩥ, ᩋᨿᩴ ᨩᩣᨲᩔᩁᩮᩣ ᨣᩣᨾᨡᩮᨲ᩠ᨲᩈᨦ᩠ᨡᨾᩮᩅ ᨣᨧ᩠ᨨᨲᩥ.

ᩏᨴᨠᩩᨠ᩠ᨡᩮᨸᩣᨲᩥ ᨠᩁᨱᨲ᩠ᨳᩮ ᨶᩥᩔᨠ᩠ᨠᩅᨧᨶᨶ᩠ᨲᩥ ᩌᩉ ‘‘ᩏᨴᨠᩩᨠ᩠ᨡᩮᨸᩮᨶᩣ’’ᨲᩥ. ᨠᨳᩴ ᨸᨶ ᩏᨴᨠᩴ ᨡᩥᨸᩥᨲᨻ᩠ᨻᨶ᩠ᨲᩥ ᩌᩉ ‘‘ᨲᨲ᩠ᨳᩣ’’ᨲᩥᩌᨴᩥ. ᨾᨩ᩠ᨫᩥᨾᩮᨶ ᨸᩩᩁᩥᩈᩮᨶᩣᨲᩥ ᨳᩣᨾᨾᨩ᩠ᨫᩥᨾᩮᨶ ᨸᩩᩁᩥᩈᩮᨶ. ᩋᨿᩴ ᩏᨴᨠᩩᨠ᩠ᨡᩮᨸᩮᩣ ᨶᩣᨾᩣᨲᩥ ᩋᨿᩴ ᩏᨴᨠᩩᨠ᩠ᨡᩮᨸᩮᨶ ᨸᩁᩥᨧ᩠ᨨᩥᨶ᩠ᨶᩣ ᩈᩦᨾᩣ ᨶᩣᨾᩣᨲᩥ ᩋᨲ᩠ᨳᩮᩣ. ᨿᩣᩅ ᨸᩁᩥᩈᩣ ᩅᨯ᩠ᨰᨲᩥ, ᨲᩣᩅ ᩋᨿᩴ ᩈᩦᨾᩣᨸᩥ ᩅᨯ᩠ᨰᨲᩥ, ᨸᩁᩥᩈᨸᩁᩥᨿᨶ᩠ᨲᨲᩮᩣ ᩏᨴᨠᩩᨠ᩠ᨡᩮᨸᩮᩣᨿᩮᩅ ᨸᨾᩣᨱᩴ. ᩈᨧᩮ ᨸᨶ ᨶᨴᩦ ᨶᩣᨲᩥᨴᩦᨥᩣ ᩉᩮᩣᨲᩥ, ᨸᨽᩅᨲᩮᩣ ᨸᨭ᩠ᨮᩣᨿ ᨿᩣᩅ ᨾᩩᨡᨴ᩠ᩅᩣᩁᩴ ᩈᨻ᩠ᨻᨲ᩠ᨳ ᩈᨦ᩠ᨥᩮᩣ ᨶᩥᩈᩦᨴᨲᩥ, ᩏᨴᨠᩩᨠ᩠ᨡᩮᨸᩈᩦᨾᩣᨠᨾ᩠ᨾᩴ ᨶᨲ᩠ᨳᩥ. ᩈᨠᩃᩣᨸᩥ ᨶᨴᩦ ᩑᨲᩮᩈᩴᨿᩮᩅ ᨽᩥᨠ᩠ᨡᩪᨶᩴ ᨸᩉᩮᩣᨲᩥ.

ᨸᨠᨲᩥᩅᩔᨠᩣᩃᩮᨲᩥ ᨸᩩᨻ᩠ᨻᩮ ᩅᩩᨲ᩠ᨲᨸ᩠ᨸᨠᩣᩁᩮ ᨸᨠᨲᩥᩅᩔᨠᩣᩃᩮ. ᨧᨲᩪᩈᩩ ᨾᩣᩈᩮᩈᩪᨲᩥ ᩅᩔᩣᨶᩔ ᨧᨲᩪᩈᩩ ᨾᩣᩈᩮᩈᩩ. ᩋᨲᩥᩅᩩᨭ᩠ᨮᩥᨠᩣᩃᩮ ᩒᨥᩮᨶ ᩒᨲ᩠ᨳᨲᩮᩣᨠᩣᩈᩮᩣ ᨶ ᨣᩉᩮᨲᨻ᩠ᨻᩮᩣ. ᩈᩮᩣ ᩉᩥ ᨣᩣᨾᩈᩦᨾᩣᩈᨦ᩠ᨡᨾᩮᩅ ᨣᨧ᩠ᨨᨲᩥ. ᩋᨶ᩠ᨲᩮᩣᨶᨴᩥᨿᩴ ᨩᩣᨲᩔᩁᩮ ᨩᩣᨲᨸᩥᨭ᩠ᨮᩥᨸᩣᩈᩣᨱᨴᩦᨸᨠᩮᩈᩩᨸᩥ ᩋᨿᨾᩮᩅ ᩅᩥᨶᩥᨧ᩠ᨨᨿᩮᩣ ᩅᩮᨴᩥᨲᨻ᩠ᨻᩮᩣ. ᩈᨧᩮ ᨸᨶ ᨶᨴᩦ ᨸᩁᩥᨸᩩᨱ᩠ᨱᩣ ᩉᩮᩣᨲᩥ ᩈᨾᨲᩥᨲ᩠ᨳᩥᨠᩣ, ᩏᨴᨠᩈᩣᨭᩥᨠᩴ ᨶᩥᩅᩣᩈᩮᨲ᩠ᩅᩣᨸᩥ ᩋᨶ᩠ᨲᩮᩣᨶᨴᩥᨿᩴᨿᩮᩅ ᨠᨾ᩠ᨾᩴ ᨠᩣᨲᨻ᩠ᨻᩴ. ᩈᨧᩮ ᨶ ᩈᨠ᩠ᨠᩮᩣᨶ᩠ᨲᩥ, ᨶᩣᩅᩣᨿᨸᩥ ᨮᨲ᩠ᩅᩣ ᨠᩣᨲᨻ᩠ᨻᩴ. ᨣᨧ᩠ᨨᨶ᩠ᨲᩥᨿᩣ ᨸᨶ ᨶᩣᩅᩣᨿ ᨠᩣᨲᩩᩴ ᨶ ᩅᨭ᩠ᨭᨲᩥ. ᨠᩈ᩠ᨾᩣ? ᩏᨴᨠᩩᨠ᩠ᨡᩮᨸᨾᨲ᩠ᨲᨾᩮᩅ ᩉᩥ ᩈᩦᨾᩣ, ᨲᩴ ᨶᩣᩅᩣ ᩈᩦᨥᨾᩮᩅ ᩋᨲᩥᨠ᩠ᨠᩣᨾᩮᨲᩥ. ᩑᩅᩴ ᩈᨲᩥ ᩋᨬ᩠ᨬᩥᩔᩣ ᩈᩦᨾᩣᨿ ᨬᨲ᩠ᨲᩥ, ᩋᨬ᩠ᨬᩥᩔᩣ ᩋᨶᩩᩔᩣᩅᨶᩣ ᩉᩮᩣᨲᩥ, ᨲᩈ᩠ᨾᩣ ᨶᩣᩅᩴ ᩋᩁᩥᨲ᩠ᨲᩮᨶ ᩅᩣ ᨮᨸᩮᨲ᩠ᩅᩣ, ᨸᩣᩈᩣᨱᩮ ᩅᩣ ᩃᨾ᩠ᨻᩥᨲ᩠ᩅᩣ, ᩋᨶ᩠ᨲᩮᩣᨶᨴᩥᨿᩴ ᨩᩣᨲᩁᩩᨠ᩠ᨡᩮ ᩅᩣ ᨻᨶ᩠ᨵᩥᨲ᩠ᩅᩣ ᨠᨾ᩠ᨾᩴ ᨠᩣᨲᨻ᩠ᨻᩴ. ᩋᨶ᩠ᨲᩮᩣᨶᨴᩥᨿᩴ ᨻᨴ᩠ᨵᩋᨭ᩠ᨭᨠᩮᨸᩥ ᩋᨶ᩠ᨲᩮᩣᨶᨴᩥᨿᩴ ᨩᩣᨲᩁᩩᨠ᩠ᨡᩮᨸᩥ ᨮᩥᨲᩮᩉᩥ ᨠᨾ᩠ᨾᩴ ᨠᩣᨲᩩᩴ ᩅᨭ᩠ᨭᨲᩥ.

ᩈᨧᩮ ᨸᨶ ᩁᩩᨠ᩠ᨡᩔ ᩈᩣᨡᩣ ᩅᩣ ᨲᨲᩮᩣ ᨶᩥᨠ᩠ᨡᨶ᩠ᨲᨸᩣᩁᩮᩣᩉᩮᩣ ᩅᩣ ᨻᩉᩥᨶᨴᩦᨲᩦᩁᩮ ᩅᩥᩉᩣᩁᩈᩦᨾᩣᨿ ᩅᩣ ᨣᩣᨾᩈᩦᨾᩣᨿ ᩅᩣ ᨸᨲᩥᨭ᩠ᨮᩥᨲᩮᩣ, ᩈᩦᨾᩴ ᩅᩣ ᩈᩮᩣᨵᩮᨲ᩠ᩅᩣ, ᩈᩣᨡᩴ ᩅᩣ ᨨᩥᨶ᩠ᨴᩥᨲ᩠ᩅᩣ ᨠᨾ᩠ᨾᩴ ᨠᩣᨲᨻ᩠ᨻᩴ. ᨻᩉᩥᨶᨴᩦᨲᩦᩁᩮ ᨩᩣᨲᩁᩩᨠ᩠ᨡᩔ ᩋᨶ᩠ᨲᩮᩣᨶᨴᩥᨿᩴ ᨸᩅᩥᨭ᩠ᨮᩈᩣᨡᩣᨿ ᩅᩣ ᨸᩣᩁᩮᩣᩉᩮ ᩅᩣ ᨶᩣᩅᩴ ᨻᨶ᩠ᨵᩥᨲ᩠ᩅᩣ ᨠᨾ᩠ᨾᩴ ᨠᩣᨲᩩᩴ ᨶ ᩅᨭ᩠ᨭᨲᩥ. ᨠᩁᩮᩣᨶ᩠ᨲᩮᩉᩥ ᩈᩦᨾᩣ ᩅᩣ ᩈᩮᩣᨵᩮᨲᨻ᩠ᨻᩣ, ᩈᩣᨡᩴ ᨨᩥᨶ᩠ᨴᩥᨲ᩠ᩅᩣ ᩅᩣ ᨲᩔ ᨻᩉᩥᨸᨲᩥᨭ᩠ᨮᩥᨲᨽᩣᨣᩮᩣ ᨶᩣᩈᩮᨲᨻ᩠ᨻᩮᩣ. ᨶᨴᩦᨲᩦᩁᩮ ᨸᨶ ᨡᩣᨱᩩᨠᩴ ᨠᩮᩣᨭ᩠ᨭᩮᨲ᩠ᩅᩣ ᨲᨲ᩠ᨳ ᨻᨶ᩠ᨵᨶᩣᩅᩣᨿ ᨶ ᩅᨭ᩠ᨭᨲᩥᨿᩮᩅ.

ᨶᨴᩥᨿᩴ ᩈᩮᨲᩩᩴ ᨠᩁᩮᩣᨶ᩠ᨲᩥ, ᩈᨧᩮ ᩋᨶ᩠ᨲᩮᩣᨶᨴᩥᨿᩴᨿᩮᩅ ᩈᩮᨲᩩ ᩅᩣ ᩈᩮᨲᩩᨸᩣᨴᩣ ᩅᩣ, ᩈᩮᨲᩩᨾ᩠ᩉᩥ ᨮᩥᨲᩮᩉᩥ ᨠᨾ᩠ᨾᩴ ᨠᩣᨲᩩᩴ ᩅᨭ᩠ᨭᨲᩥ. ᩈᨧᩮ ᨸᨶ ᩈᩮᨲᩩ ᩅᩣ ᩈᩮᨲᩩᨸᩣᨴᩣ ᩅᩣ ᨻᩉᩥᨲᩦᩁᩮ ᨸᨲᩥᨭ᩠ᨮᩥᨲᩣ, ᨠᨾ᩠ᨾᩴ ᨠᩣᨲᩩᩴ ᨶ ᩅᨭ᩠ᨭᨲᩥ, ᩈᩦᨾᩴ ᩈᩮᩣᨵᩮᨲ᩠ᩅᩣ ᨠᨾ᩠ᨾᩴ ᨠᩣᨲᨻ᩠ᨻᩴ. ᩋᨳ ᩈᩮᨲᩩᨸᩣᨴᩣ ᩋᨶ᩠ᨲᩮᩣ, ᩈᩮᨲᩩ ᨸᨶ ᩏᨽᩥᨶ᩠ᨶᨾ᩠ᨸᩥ ᨲᩦᩁᩣᨶᩴ ᩏᨸᩁᩥᩌᨠᩣᩈᩮ ᨮᩥᨲᩮᩣ, ᩅᨭ᩠ᨭᨲᩥ. ᨩᩣᨲᩔᩁᩮᨸᩥ ᩑᩈᩮᩅ ᨶᨿᩮᩣ.

‘‘ᨿᩈ᩠ᨾᩥᩴ ᨸᨴᩮᩈᩮ ᨸᨠᨲᩥᩅᩦᨧᩥᨿᩮᩣ ᩒᨲ᩠ᨳᩁᩥᨲ᩠ᩅᩣ ᩈᨱ᩠ᨮᩉᨶ᩠ᨲᩦ’’ᨲᩥ ᩑᨲᩮᨶ ᨿᩴ ᨸᨴᩮᩈᩴ ᩏᨴ᩠ᨵᩴ ᩅᨯ᩠ᨰᨶᨠᩏᨴᨠᩴ ᩅᩣ ᨸᨠᨲᩥᩅᩦᨧᩥᨿᩮᩣ ᩅᩣ ᩅᩮᨣᩮᨶ ᩌᨣᨶ᩠ᨲ᩠ᩅᩣ ᩒᨲ᩠ᨳᩁᨶ᩠ᨲᩥ, ᨲᨲ᩠ᨳ ᨠᨾ᩠ᨾᩴ ᨠᩣᨲᩩᩴ ᨶ ᩅᨭ᩠ᨭᨲᩦᨲᩥ (ᨾᩉᩣᩅ. ᩋᨭ᩠ᨮ. ᪑᪔᪗) ᨴᩔᩮᨲᩥ. ᩈᨧᩮ ᩐᨾᩥᩅᩮᨣᩮᩣ ᨻᩣᨵᨲᩥ, ᨶᩣᩅᩣᨿ ᩅᩣ ᩋᨭ᩠ᨭᨠᩮ ᩅᩣ ᨮᨲ᩠ᩅᩣ ᨠᩣᨲᨻ᩠ᨻᩴ. ᨲᩮᩈᩩ ᩅᩥᨶᩥᨧ᩠ᨨᨿᩮᩣ ᨶᨴᩥᨿᩴ ᩅᩩᨲ᩠ᨲᨶᨿᩮᨶᩮᩅ ᩅᩮᨴᩥᨲᨻ᩠ᨻᩮᩣ. ᩈᨧᩮ ᨸᨶ ᩈᨾᩩᨴ᩠ᨴᩮᩣ ᨣᩣᨾᩈᩦᨾᩴ ᩅᩣ ᨶᩥᨣᨾᩈᩦᨾᩴ ᩅᩣ ᩒᨲ᩠ᨳᩁᩥᨲ᩠ᩅᩣ ᨲᩥᨭ᩠ᨮᨲᩥ, ᩈᨾᩩᨴ᩠ᨴᩮᩣᩅ ᩉᩮᩣᨲᩥ. ᨲᨲ᩠ᨳ ᨠᨾ᩠ᨾᩴ ᨠᩣᨲᩩᩴ ᩅᨭ᩠ᨭᨲᩥ. ᨲᨲᩮᩣ ᨸᨭ᩠ᨮᩣᨿ ᨠᨸ᩠ᨸᩥᨿᨽᩪᨾᩦᨲᩥ ᩒᨲ᩠ᨳᩁᩥᨲ᩠ᩅᩣ ᩈᨱ᩠ᨮᩥᨲᩏᨴᨠᨶ᩠ᨲᨲᩮᩣ ᨸᨭ᩠ᨮᩣᨿ ᩋᨶ᩠ᨲᩮᩣ ᨶᨴᩦᨩᩣᨲᩔᩁᩈᨾᩩᨴ᩠ᨴᩮᩣ ᨶᩣᨾᩣᨲᩥ ᩋᨲ᩠ᨳᩮᩣ. ᨴᩩᨻ᩠ᨻᩩᨭ᩠ᨮᩥᨠᩣᩃᩮᨲᩥ ᩅᩔᩣᨶᩉᩮᨾᨶ᩠ᨲᩮ ᩈᨶ᩠ᨵᩣᨿ ᩅᩩᨲ᩠ᨲᩴ. ᩈᩩᨠ᩠ᨡᩮᩈᩩᨸᩦᨲᩥ ᨶᩥᩁᩩᨴᨠᩮᩈᩩᨸᩥ. ᨿᨳᩣ ᨧ ᩅᩣᨸᩥᨡᨱᨶᩮ, ᩑᩅᩴ ᩌᩅᩣᨭᨸᩮᩣᨠ᩠ᨡᩁᨱᩦᩌᨴᩦᨶᩴ ᨡᨱᨶᩮᨸᩥ ᨣᩣᨾᨡᩮᨲ᩠ᨲᩴ ᩉᩮᩣᨲᩥᨿᩮᩅᩣᨲᩥ ᨴᨭ᩠ᨮᨻ᩠ᨻᩴ. ᩅᨸ᩠ᨸᩴ ᩅᩣ ᨠᩁᩮᩣᨶ᩠ᨲᩦᨲᩥ ᩃᩣᨻᩩᨲᩥᨸᩩᩈᨠᩣᨴᩥᩅᨸ᩠ᨸᩴ ᩅᩣ ᨠᩁᩮᩣᨶ᩠ᨲᩥ. ᨲᩴ ᨮᩣᨶᨶ᩠ᨲᩥ ᨿᨲ᩠ᨳ ᩅᩣᨸᩥᩌᨴᩥᨠᩴ ᨠᨲᩴ, ᨲᩴ ᨮᩣᨶᩴ. ᩋᨬ᩠ᨬᩴ ᨸᨶ ᨠᨸ᩠ᨸᩥᨿᨽᩪᨾᩥ. ᩈᨧᩮ ᨸᨶ ᨩᩣᨲᩔᩁᩴ ᨸᩪᩁᩮᨲ᩠ᩅᩣ ᨳᩃᩴ ᨠᩁᩮᩣᨶ᩠ᨲᩥ, ᩑᨠᩈ᩠ᨾᩥᩴ ᨴᩥᩈᩣᨽᩣᨣᩮ ᨸᩣᩊᩥᩴ ᨻᨶ᩠ᨵᩥᨲ᩠ᩅᩣ ᩈᨻ᩠ᨻᨾᩮᩅ ᨶᩴ ᨾᩉᩣᨲᩊᩣᨠᩴ ᩅᩣ ᨠᩁᩮᩣᨶ᩠ᨲᩥ, ᩈᨻ᩠ᨻᩮᩣᨸᩥ ᩋᨩᩣᨲᩔᩁᩮᩣ ᩉᩮᩣᨲᩥ. ᨣᩣᨾᩈᩦᨾᩣᩈᨦ᩠ᨡᨾᩮᩅ ᨣᨧ᩠ᨨᨲᩥ.

ᩈᨧᩮ ᨶᨴᩥᨾ᩠ᨸᩥ ᩅᩥᨶᩣᩈᩮᨲ᩠ᩅᩣ ᨲᩊᩣᨠᩴ ᨠᩁᩮᩣᨶ᩠ᨲᩥ, ᩉᩮᨭ᩠ᨮᩣ ᨸᩣᩊᩥ ᨻᨴ᩠ᨵᩣ, ᩏᨴᨠᩴ ᩌᨣᨶ᩠ᨲ᩠ᩅᩣ ᨲᩊᩣᨠᩴ ᨸᩪᩁᩮᨲ᩠ᩅᩣ ᨲᩥᨭ᩠ᨮᨲᩥ, ᩑᨲ᩠ᨳ ᨠᨾ᩠ᨾᩴ ᨠᩣᨲᩩᩴ ᨶ ᩅᨭ᩠ᨭᨲᩥ. ᩏᨸᩁᩥ ᨸᩅᨲ᩠ᨲᨶᨭ᩠ᨮᩣᨶᩮ ᨨᨯ᩠ᨯᩥᨲᩴ ᩏᨴᨠᩴ ᨶᨴᩥᩴ ᩒᨲ᩠ᨳᩁᩥᨲ᩠ᩅᩣ ᩈᨶ᩠ᨴᨶᨭ᩠ᨮᩣᨶᨲᩮᩣ ᨸᨭ᩠ᨮᩣᨿ ᩅᨭ᩠ᨭᨲᩥ. ᨠᩣᨧᩥ ᨶᨴᩦ ᨠᩣᩃᨶ᩠ᨲᩁᩮᨶ ᩏᨸ᩠ᨸᨲᩥᨲ᩠ᩅᩣ ᨣᩣᨾᨶᩥᨣᨾᩈᩦᨾᩴ ᩒᨲ᩠ᨳᩁᩥᨲ᩠ᩅᩣ ᨸᩅᨲ᩠ᨲᨲᩥ, ᨶᨴᩦᨿᩮᩅ ᩉᩮᩣᨲᩥ, ᨠᨾ᩠ᨾᩴ ᨠᩣᨲᩩᩴ ᩅᨭ᩠ᨭᨲᩥ. ᩈᨧᩮ ᩅᩥᩉᩣᩁᩈᩦᨾᩴ ᩒᨲ᩠ᨳᩁᨲᩥ ‘‘ᩅᩥᩉᩣᩁᩈᩦᨾᩣ’’ᨲ᩠ᩅᩮᩅ ᩈᨦ᩠ᨡᩴ ᨣᨧ᩠ᨨᨲᩥ. ᨲᩈ᩠ᨾᩣᨲᩥ ᨿᩈ᩠ᨾᩣ ᩋᨶ᩠ᨲᩮᩣ ᨣᨧ᩠ᨨᨲᩥ, ᨲᩈ᩠ᨾᩣ. ᩈᨾᨶ᩠ᨲᩣ ᩏᨴᨠᩩᨠ᩠ᨡᩮᨸᨸᩁᩥᨧ᩠ᨨᩮᨴᩮᩣ ᨠᩣᨲᨻ᩠ᨻᩮᩣᨲᩥ ᨸᩉᩮᩣᨶᨠᨭ᩠ᨮᩣᨶᩴ ᩈᨶ᩠ᨵᩣᨿ ᩅᩩᨲ᩠ᨲᩴ. ᨿᨲ᩠ᨳ ᨸᨶ ᨠᩩᨶ᩠ᨶᨴᩦᩌᨴᩦᩈᩩ ᨶᨸ᩠ᨸᩉᩮᩣᨲᩥ, ᨲᨲ᩠ᨳ ᨸᩉᩮᩣᨶᨠᨭ᩠ᨮᩣᨶᨲᩮᩣ ᩏᨴᨠᩩᨠ᩠ᨡᩮᨸᨸᩁᩥᨧ᩠ᨨᩮᨴᩮᩣ ᨠᩣᨲᨻ᩠ᨻᩮᩣ. ᩏᨸᨧᩣᩁᨲ᩠ᨳᩣᨿᩣᨲᩥ ᩈᩦᨾᩮᩣᨸᨧᩣᩁᨲ᩠ᨳᩣᨿ.

ᨠᩈ᩠ᨾᩣ ᨸᨶ ᩋᨬ᩠ᨬᨾᩮᨠᩴ ᩈᨲ᩠ᨲᨻ᩠ᨽᨶ᩠ᨲᩁᩴ, ᩋᨬ᩠ᨬᩮᩣ ᩑᨠᩮᩣ ᩏᨴᨠᩩᨠ᩠ᨡᩮᨸᩮᩣ ᨧ ᩏᨸᨧᩣᩁᨲ᩠ᨳᩣᨿ ᨮᨸᩮᨲᨻ᩠ᨻᩮᩣᨲᩥ ᩌᩉ ‘‘ᩋᨿᩴ ᩉᩦ’’ᨲᩥᩌᨴᩥ. ᩍᨴᩴ ᩅᩩᨲ᩠ᨲᩴ ᩉᩮᩣᨲᩥ (ᩈᩣᩁᨲ᩠ᨳ. ᨭᩦ. ᨾᩉᩣᩅᨣ᩠ᨣ ᪓.᪑᪔᪗; ᩅᩥ. ᩅᩥ. ᨭᩦ. ᨾᩉᩣᩅᨣ᩠ᨣ ᪒.᪑᪔᪗) – ᨿᩈ᩠ᨾᩣ ᩋᨿᩴ ᩈᨲ᩠ᨲᨻ᩠ᨽᨶ᩠ᨲᩁᩈᩦᨾᩣ ᨧ ᩏᨴᨠᩩᨠ᩠ᨡᩮᨸᩈᩦᨾᩣ ᨧ ᨽᩥᨠ᩠ᨡᩪᨶᩴ ᨮᩥᨲᩮᩣᨠᩣᩈᨲᩮᩣ ᨸᨭ᩠ᨮᩣᨿ ᩃᨻ᩠ᨽᨲᩥ, ᨲᩮ ᨧ ᨽᩥᨠ᩠ᨡᩪ ᨶ ᩈᨻ᩠ᨻᨴᩣ ᩑᨠᩈᨴᩥᩈᩣ, ᨠᨴᩣᨧᩥ ᩅᨯ᩠ᨰᨶ᩠ᨲᩥ, ᨠᨴᩣᨧᩥ ᨸᩁᩥᩉᩣᨿᨶ᩠ᨲᩥ. ᨿᨴᩣ ᨧ ᩅᨯ᩠ᨰᨶ᩠ᨲᩥ, ᨲᨴᩣ ᩈᩦᨾᩣᩈᨦ᩠ᨠᩁᩮᩣ ᩉᩮᩣᨲᩥ. ᨲᩈ᩠ᨾᩣ ᩋᨬ᩠ᨬᨾᩮᨠᩴ ᩈᨲ᩠ᨲᨻ᩠ᨽᨶ᩠ᨲᩁᩴ, ᩋᨬ᩠ᨬᩮᩣ ᩑᨠᩮᩣ ᩏᨴᨠᩩᨠ᩠ᨡᩮᨸᩮᩣ ᨧ ᩏᨸᨧᩣᩁᨲ᩠ᨳᩣᨿ ᨮᨸᩮᨲᨻ᩠ᨻᩮᩣᨲᩥ. ᨿᩴ ᨸᨶ ᨾᩉᩣᩋᨭ᩠ᨮᨠᨳᩣᨿᩴ ‘‘ᨲᨲᩮᩣ ᩋᨵᩥᨠᩴ ᩅᨭ᩠ᨭᨲᩥᨿᩮᩅ, ᩐᨶᨠᩴ ᨸᨶ ᨶ ᩅᨭ᩠ᨭᨲᩦ’’ᨲᩥ (ᨾᩉᩣᩅ. ᩋᨭ᩠ᨮ. ᪑᪔᪗) ᩅᩩᨲ᩠ᨲᩴ, ᨲᨾ᩠ᨸᩥ ᩑᨲᨴᨲ᩠ᨳᨾᩮᩅ, ᨶ ᨸᨶ ᨲᨲ᩠ᨳ ᨠᨲᩔ ᨠᨾ᩠ᨾᩔ ᨠᩩᨸ᩠ᨸᨲ᩠ᨲᩣᨲᩥ ᨣᩉᩮᨲᨻ᩠ᨻᩴ. ᨸᩁᩥᨧ᩠ᨨᩮᨴᨲᩮᩣ ᨻᩉᩥ ᩋᨬ᩠ᨬᩴ ᨲᨲ᩠ᨲᨠᩴᨿᩮᩅ ᨸᩁᩥᨧ᩠ᨨᩮᨴᩴ ᩋᨶᨲᩥᨠ᩠ᨠᨾᩥᨲ᩠ᩅᩣ ᨮᩥᨲᩮᩣᨸᩦᨲᩥ ᩋᨲ᩠ᨲᨶᩮᩣ ᩈᨲ᩠ᨲᨻ᩠ᨽᨶ᩠ᨲᩁᩮᨶ, ᩏᨴᨠᩩᨠ᩠ᨡᩮᨸᩮᨶ ᩅᩣ ᨿᩮᩣ ᨲᩮᩈᩴ ᩈᨲ᩠ᨲᨻ᩠ᨽᨶ᩠ᨲᩁᩔ, ᩏᨴᨠᩩᨠ᩠ᨡᩮᨸᩔ ᩅᩣ ᨸᩁᩥᨧ᩠ᨨᩮᨴᩮᩣ, ᨲᨲᩮᩣ ᨻᩉᩥ ᩋᨬ᩠ᨬᩴ ᨲᨲ᩠ᨲᨠᩴᨿᩮᩅ ᨸᩁᩥᨧ᩠ᨨᩮᨴᩴ ᩋᨶᨲᩥᨠ᩠ᨠᨾᩥᨲ᩠ᩅᩣ ᨮᩥᨲᩮᩣᨸᩦᨲᩥ ᩋᨲ᩠ᨳᩮᩣ. ᨠᨳᨾᩮᨲᩴ ᩅᩥᨬ᩠ᨬᩣᨿᨲᩦᨲᩥ ᩌᩉ ‘‘ᩍᨴᩴ ᩈᨻ᩠ᨻᩋᨭ᩠ᨮᨠᨳᩣᩈᩩ ᩈᨶ᩠ᨶᩥᨭ᩠ᨮᩣᨶ’’ᨶ᩠ᨲᩥ, ᩍᨴᩴ ‘‘ᨠᨾ᩠ᨾᩴ ᨠᩮᩣᨸᩮᨲᩦ’’ᨲᩥ ᨾᩉᩣᩋᨭ᩠ᨮᨠᨳᩣᨴᩦᩈᩩ ᩅᩅᨲ᩠ᨳᩣᨶᨶ᩠ᨲᩥ ᩋᨲ᩠ᨳᩮᩣ. ‘‘ᩍᨲᩥ ᩍᨾ’’ᨶ᩠ᨲᩥᩌᨴᩥ ᨿᨳᩣᩅᩩᨲ᩠ᨲᩔ ᨶᩥᨣᨾᨶᩴ. ᩉᩮᩣᨲᩥ ᨧᩮᨲ᩠ᨳ –

‘‘ᨻᨴ᩠ᨵᩣᨻᨴ᩠ᨵᩅᩈᩮᨶᩮᨵ, ᩈᩦᨾᩣ ᨶᩣᨾ ᨴ᩠ᩅᩥᨵᩣ ᨲᩉᩥᩴ;

ᨲᩥᩈᨾ᩠ᨸᨲ᩠ᨲᩥᨿᩩᨲ᩠ᨲᩣ ᩅᨩ᩠ᨩᩥ-ᨲᩮᨠᩣᨴᩈ ᩅᩥᨸᨲ᩠ᨲᩥᨠᩣ;

ᨻᨴ᩠ᨵᩈᩦᨾᩣ ᨲᩥᨵᩣ ᨡᨱ᩠ᨯᩣ-ᨴᩥᨲᩮᩣ ᨣᩣᨾᩣᨴᩥᨲᩮᩣ ᨸᩁᩣ’’ᨲᩥ.

ᩈᨽᩣᨣᩣᨸᨲ᩠ᨲᩥ ᨧ ᨶᩣᨾᩮᩈᩣ ᨴᩩᩅᩥᨵᩣ ᩅᨲ᩠ᨳᩩᩈᨽᩣᨣᩣ, ᩌᨸᨲ᩠ᨲᩥᩈᨽᩣᨣᩣᨲᩥ. ᨲᨲ᩠ᨳ ᩍᨵ ᩅᨲ᩠ᨳᩩᩈᨽᩣᨣᩣ ᩋᨵᩥᨸ᩠ᨸᩮᨲᩣ, ᨶᩮᨲᩁᩣᨲᩥ ᨴᩔᩮᨲᩩᩴ ‘‘ᨿᩴ ᩈᨻ᩠ᨻᩮᩣ ᩈᨦ᩠ᨥᩮᩣ ᩅᩥᨠᩣᩃᨽᩮᩣᨩᨶᩣᨴᩥᨶᩣ’’ᨲᩥᩌᨴᩥᨾᩣᩉ. ᩃᩉᩩᨠᩣᨸᨲ᩠ᨲᩥᨶ᩠ᨲᩥ ᩃᩉᩩᨠᩮᨶ ᩅᩥᨶᨿᨠᨾ᩠ᨾᩮᨶ ᩅᩥᩈᩩᨩ᩠ᨫᨶᨲᩮᩣ ᩃᩉᩩᨠᩣ ᨳᩩᩃ᩠ᩃᨧ᩠ᨧᨿᨸᩣᨧᩥᨲ᩠ᨲᩥᨿᨸᩣᨭᩥᨴᩮᩈᨶᩦᨿᨴᩩᨠ᩠ᨠᨭᨴᩩᨻ᩠ᨽᩣᩈᩥᨲᩈᨦ᩠ᨡᩣᨲᩣ ᨸᨬ᩠ᨧᩣᨸᨲ᩠ᨲᩥᨿᩮᩣ. ᩅᨲ᩠ᨳᩩᩈᨽᩣᨣᩣᨿ ᩈᨦ᩠ᨥᩣᨴᩥᩈᩮᩈᩣᨸᨲ᩠ᨲᩥᨿᩣᨸᩥ ᩈᨲᩥ ᩏᨸᩮᩣᩈᨳᨠᨾ᩠ᨾᩴ ᨸᨲ᩠ᨲᨠᩃ᩠ᩃᩴ ᨶ ᩉᩮᩣᨲᩥᨿᩮᩅ. ᨿᨳᩣᩉ ‘‘ᩈᨽᩣᨣᩈᨦ᩠ᨥᩣᨴᩥᩈᩮᩈᩴ ᩌᨸᨶ᩠ᨶᩔ ᨸᨶ ᩈᨶ᩠ᨲᩥᨠᩮ ᩌᩅᩥ ᨠᩣᨲᩩᩴ ᨶ ᩅᨭ᩠ᨭᨲᩥ. ᩈᨧᩮ ᩌᩅᩥ ᨠᩁᩮᩣᨲᩥ, ᩌᨸᨲ᩠ᨲᩥ ᩌᩅᩥᨠᨲᩣ ᩉᩮᩣᨲᩥ, ᨴᩩᨠ᩠ᨠᨭᩣ ᨸᨶ ᨶ ᨾᩩᨧ᩠ᨧᨲᩦ’’ᨲᩥ (ᨧᩪᩊᩅ. ᩋᨭ᩠ᨮ. ᪑᪐᪒). ᨲᩔᩣ ᨸᨶ ᩋᨴᩮᩈᨶᩣᨣᩣᨾᩥᨶᩥᨲᩮᩣ ᩑᩅᩴ ᩅᩩᨲ᩠ᨲᩴ. ᩅᨲ᩠ᨳᩩᩈᨽᩣᨣᩣᨲᩥ ᩅᨲ᩠ᨳᩩᩅᩈᩮᨶ ᩈᨾᩣᨶᨽᩣᨣᩣ, ᩑᨠᨠᩮᩣᨭ᩠ᨮᩣᩈᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᩍᨾᨾᩮᩅ ᩅᨲ᩠ᨳᩩᩈᨽᩣᨣᩴ ᨴᩮᩈᩮᨲᩩᩴ ᨶ ᩅᨭ᩠ᨭᨲᩥ ‘‘ᨶ, ᨽᩥᨠ᩠ᨡᩅᩮ, ᩈᨽᩣᨣᩣ ᩌᨸᨲ᩠ᨲᩥ ᨴᩮᩈᩮᨲᨻ᩠ᨻᩣ, ᨿᩮᩣ ᨴᩮᩈᩮᨿ᩠ᨿ, ᩌᨸᨲ᩠ᨲᩥ ᨴᩩᨠ᩠ᨠᨭᩔᩣ’’ᨲᩥ (ᨾᩉᩣᩅ. ᪑᪖᪙) ᩅᩩᨲ᩠ᨲᨲ᩠ᨲᩣ, ᨶ ᨸᨶ ᩌᨸᨲ᩠ᨲᩥᩈᨽᩣᨣᩴ. ᨲᩮᨶᩣᩉ ‘‘ᩅᩥᨠᩣᩃᨽᩮᩣᨩᨶᨸᨧ᩠ᨧᨿᩣ ᩌᨸᨶ᩠ᨶᩴ ᨸᨶᩣ’’ᨲᩥᩌᨴᩥ. ᩌᨸᨲ᩠ᨲᩥᩈᨽᩣᨣᨶ᩠ᨲᩥ ᩌᨸᨲ᩠ᨲᩥᨿᩣ ᩈᨾᩣᨶᨽᩣᨣᩴ.

ᩈᩣᨾᨶ᩠ᨲᩣ ᩌᩅᩣᩈᩣᨲᩥ ᩈᩣᨾᨶ᩠ᨲᩌᩅᩣᩈᩴ, ᩈᨾᩦᨸᩅᩥᩉᩣᩁᨶ᩠ᨲᩥ ᩋᨲ᩠ᨳᩮᩣ. ᩈᨩ᩠ᨩᩩᨠᨶ᩠ᨲᩥ ᨲᨴᩉᩮᩅᩣᨣᨾᨶᨲ᩠ᨳᩣᨿ. ᨸᩣᩉᩮᨲᨻ᩠ᨻᩮᩣᨲᩥ ᨸᩮᩈᩮᨲᨻ᩠ᨻᩮᩣ. ᩍᨧ᩠ᨧᩮᨲᩴ ᨠᩩᩈᩃᨶ᩠ᨲᩥ ᩍᨲᩥ ᩑᨲᩴ ᩈᩩᨶ᩠ᨴᩁᩴ ᨽᨴ᩠ᨴᨠᩴ, ᩃᨴ᩠ᨵᨠᨸ᩠ᨸᨶ᩠ᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨶᩮᩣ ᨧᩮ ᩃᨽᩮᨳᩣᨲᩥ ᩅᩥᩉᩣᩁᩣᨶᩴ ᨴᩪᩁᨲᩣᨿ ᩅᩣ ᨾᨣ᩠ᨣᩮ ᨸᩁᩥᨸᨶ᩠ᨳᩣᨴᩥᨶᩣ ᩅᩣ ᨿᨴᩥ ᨶ ᩃᨽᩮᨳ. ‘‘ᨲᩔ ᩈᨶ᩠ᨲᩥᨠᩮ ᨸᨭᩥᨠᩁᩥᩔᨲᩦ’’ᨲᩥ ᩍᨾᩥᨶᩣ ᩅᨧᨶᩮᨶ ᩈᨽᩣᨣᩣᨸᨲ᩠ᨲᩥ ᩌᩅᩥ ᨠᩣᨲᩩᨾ᩠ᨸᩥ ᨶ ᩃᨻ᩠ᨽᨲᩦᨲᩥ ᨴᩦᨸᩥᨲᩴ ᩉᩮᩣᨲᩥ. ᨿᨴᩥ ᩃᨽᩮᨿ᩠ᨿ, ᩌᩅᩥ ᨠᨲ᩠ᩅᩣᨸᩥ ᩏᨸᩮᩣᩈᨳᩴ ᨠᩁᩮᨿ᩠ᨿ. ᨿᨴᩥ ᨸᨶ ᩈᨻ᩠ᨻᩮᩣ ᩈᨦ᩠ᨥᩮᩣ ᩈᨽᩣᨣᩴ ᩈᨦ᩠ᨥᩣᨴᩥᩈᩮᩈᩴ ᩌᨸᨶ᩠ᨶᩮᩣ ᩉᩮᩣᨲᩥ, ᨬᨲ᩠ᨲᩥᩴ ᨮᨸᩮᨲ᩠ᩅᩣ ᩏᨸᩮᩣᩈᨳᩴ ᨠᩣᨲᩩᩴ ᨶ ᩅᨭ᩠ᨭᨲᩥ, ᩏᨸᩮᩣᩈᨳᩔ ᩋᨶ᩠ᨲᩁᩣᨿᩮᩣᩅ ᩉᩮᩣᨲᩥ. ᩏᨽᩮᩣᨸᩥ ᨴᩩᨠ᩠ᨠᨭᩴ ᩌᨸᨩ᩠ᨩᨶ᩠ᨲᩥ ‘‘ᨶ, ᨽᩥᨠ᩠ᨡᩅᩮ, ᩈᨽᩣᨣᩣ ᩌᨸᨲ᩠ᨲᩥ ᨴᩮᩈᩮᨲᨻ᩠ᨻᩣ, ᨿᩮᩣ ᨴᩮᩈᩮᨿ᩠ᨿ, ᩌᨸᨲ᩠ᨲᩥ ᨴᩩᨠ᩠ᨠᨭᩔ. ᨶ, ᨽᩥᨠ᩠ᨡᩅᩮ, ᩈᨽᩣᨣᩣ ᩌᨸᨲ᩠ᨲᩥ ᨸᨭᩥᨣ᩠ᨣᩉᩮᨲᨻ᩠ᨻᩣ, ᨿᩮᩣ ᨸᨭᩥᨣ᩠ᨣᨱ᩠ᩉᩮᨿ᩠ᨿ, ᩌᨸᨲ᩠ᨲᩥ ᨴᩩᨠ᩠ᨠᨭᩔᩣ’’ᨲᩥ (ᨾᩉᩣᩅ. ᪑᪖᪙) ᩅᩩᨲ᩠ᨲᨲ᩠ᨲᩣ. ᩅᩥᨾᨲᩥ ᩈᩴᩈᨿᩮᩣ, ᨲᨲ᩠ᨳ ᨶᩥᨿᩩᨲ᩠ᨲᩮᩣ ᩅᩮᨾᨲᩥᨠᩮᩣ. ‘‘ᨸᩩᨶ ᨶᩥᨻ᩠ᨻᩮᨾᨲᩥᨠᩮᩣ ᩉᩩᨲ᩠ᩅᩣ ᨴᩮᩈᩮᨲᨻ᩠ᨻᨾᩮᩅᩣ’’ᨲᩥ ᨶᩮᩅ ᨸᩣᩊᩥᨿᩴ, ᨶ ᨧ ᩋᨭ᩠ᨮᨠᨳᩣᨿᩴ ᩋᨲ᩠ᨳᩥ, ᨴᩮᩈᩥᨲᩮ ᨸᨶ ᨴᩮᩣᩈᩮᩣ ᨶᨲ᩠ᨳᩥ. ᩅᩩᨲ᩠ᨲᨶᨿᩮᨶᩮᩅᩣᨲᩥ ‘‘ᨸᩣᩁᩥᩈᩩᨴ᩠ᨵᩥᩴ ᩌᨿᩈ᩠ᨾᨶ᩠ᨲᩮᩣ ᩌᩁᩮᩣᨧᩮᨳᩣ’’ᨲᩥᩌᨴᩥᨶᩣ ᨶᨿᩮᨶ ᩈᩣᨸᨲ᩠ᨲᩥᨠᩔ ᩏᨸᩮᩣᩈᨳᨠᩁᨱᩮ ᨸᨬ᩠ᨬᨲ᩠ᨲᩴ ᨴᩩᨠ᩠ᨠᨭᩴ ᩌᨸᨩ᩠ᨩᨶ᩠ᨲᩦᨲᩥ ᩅᩩᨲ᩠ᨲᨶᨿᩮᨶᩮᩅ. ᨠᩈ᩠ᨾᩣ ᩈᨽᩣᨣᩣᨸᨲ᩠ᨲᩥᨿᩮᩅ ᩅᩩᨲ᩠ᨲᩣᨲᩥ ᩌᩉ ‘‘ᩑᨲᩣᩈᩩ ᩉᩦ’’ᨲᩥᩌᨴᩥ. ᩅᩥᩈᨽᩣᨣᩣᨸᨲ᩠ᨲᩦᩈᩩ ᩅᩥᨩ᩠ᨩᨾᩣᨶᩣᩈᩩᨸᩥ ᨸᨲ᩠ᨲᨠᩃ᩠ᩃᩴ ᩉᩮᩣᨲᩥᨿᩮᩅᩣᨲᩥ ᩅᩥᩈᨽᩣᨣᩣᩈᩩ ᨸᨶ ᩅᩥᨩ᩠ᨩᨾᩣᨶᩣᩈᩩ ᨲᩮᩈᩴᨿᩮᩅ ᨸᩩᨣ᩠ᨣᩃᩣᨶᩴ ᩌᨸᨲ᩠ᨲᩥ, ᨶ ᩈᨦ᩠ᨥᩔᩣᨲᩥ ᩈᨦ᩠ᨥᩔ ᨸᨲ᩠ᨲᨠᩃ᩠ᩃᩴ ᩉᩮᩣᨲᩥᨿᩮᩅ.

ᩋᨶ᩠ᨲᩥᨾᩅᨲ᩠ᨳᩩᩋᨩ᩠ᨫᩣᨸᨶ᩠ᨶᨠᩮᩣ ᨶᩣᨾ ᨧᨲᩩᨶ᩠ᨶᩴ ᨸᩣᩁᩣᨩᩥᨠᩣᨶᩴ ᩋᨬ᩠ᨬᨲᩁᩴ ᩋᨩ᩠ᨫᩣᨸᨶ᩠ᨶᨠᩮᩣ. ᨸᨱ᩠ᨯᨠᩣᨴᩦᨶᩴ ᩅᩥᨶᩥᨧ᩠ᨨᨿᩮᩣ ᨸᩁᨲᩮᩣ ᨸᩣᩁᩣᨩᩥᨠᩩᨴ᩠ᨴᩮᩈᩮ ᩌᩅᩥ ᨽᩅᩥᩔᨲᩥ. ᨲᩥᩁᨧ᩠ᨨᩣᨶᨣᨲᩮᩣᨲᩥ ᩋᨶ᩠ᨲᨾᩈᩮᩣ ᩈᨠ᩠ᨠᩴ ᨴᩮᩅᩁᩣᨩᩣᨶᩴ ᩏᨸᩣᨴᩣᨿ ᨿᩮᩣ ᨠᩮᩣᨧᩥ ᨶᩣᨣᨾᩣᨱᩅᨠᩣᨴᩥᨠᩮᩣ ᩋᨾᨶᩩᩔᨩᩣᨲᩥᨠᩮᩣ ᩅᩮᨴᩥᨲᨻ᩠ᨻᩮᩣ, ᨶ ᩋᩔᨣᩮᩣᨱᩣᨴᨿᩮᩣ. ᨲᩮᨶᩣᩉ ‘‘ᩑᨲ᩠ᨳ ᨧᩣ’’ᨲᩥᩌᨴᩥ. ᨲᨲ᩠ᨳ ᩑᨲ᩠ᨳᩣᨲᩥ ᩑᨲᩥᩔᩴ ᩅᨩ᩠ᨩᨶᩦᨿᨸᩩᨣ᩠ᨣᩃᨠᨳᩣᨿᩴ. ᨿᩔ ᩏᨸᩈᨾ᩠ᨸᨴᩣ ᨸᨭᩥᨠ᩠ᨡᩥᨲ᩠ᨲᩣᨲᩥ ‘‘ᨲᩥᩁᨧ᩠ᨨᩣᨶᨣᨲᩮᩣ, ᨽᩥᨠ᩠ᨡᩅᩮ, ᩋᨶᩩᨸᩈᨾ᩠ᨸᨶ᩠ᨶᩮᩣ, ᨶ ᩏᨸᩈᨾ᩠ᨸᩣᨴᩮᨲᨻ᩠ᨻᩮᩣ’’ᨲᩥ (ᨾᩉᩣᩅ. ᪑᪑᪑) ᨿᩔ ᨶᩣᨣᩈᩩᨸᨱ᩠ᨱᩣᨴᩥᨶᩮᩣ ᨲᩥᩁᨧ᩠ᨨᩣᨶᨣᨲᩔ ᩏᨸᩈᨾ᩠ᨸᨴᩣ ᨸᨭᩥᨠ᩠ᨡᩥᨲ᩠ᨲᩣ, ᩈᩮᩣ ᩍᨵᩣᨸᩥ ᨲᩥᩁᨧ᩠ᨨᩣᨶᨣᨲᩮᩣ ᨶᩣᨾᩣᨲᩥ ᩋᨲ᩠ᨳᩮᩣ. ᨲᨲ᩠ᨳ ᩉᩥ ᩋᨶ᩠ᨲᨾᩈᩮᩣ ᨴᩮᩅᩮ ᩏᨸᩣᨴᩣᨿ ᨶᩣᨣᨾᩣᨱᩅᨠᩣᨴᩥᨠᩮᩣ ᨿᩮᩣ ᨠᩮᩣᨧᩥ ᩋᨾᨶᩩᩔᨩᩣᨲᩥᨠᩮᩣ ‘‘ᨲᩥᩁᨧ᩠ᨨᩣᨶᨣᨲᩮᩣ’’ᨲᩥ ᩋᨵᩥᨸ᩠ᨸᩮᨲᩮᩣ. ᩅᩩᨲ᩠ᨲᨬ᩠ᩉᩥ ᩈᨾᨶ᩠ᨲᨸᩣᩈᩣᨴᩥᨠᩣᨿᩴ ‘‘ᨲᩥᩁᨧ᩠ᨨᩣᨶᨣᨲᩮᩣ, ᨽᩥᨠ᩠ᨡᩅᩮᨲᩥ ᩑᨲ᩠ᨳ ᨶᩣᨣᩮᩣ ᩅᩣ ᩉᩮᩣᨲᩩ ᩈᩩᨸᨱ᩠ᨱᨾᩣᨱᩅᨠᩣᨴᩦᨶᩴ ᩅᩣ ᩋᨬ᩠ᨬᨲᩁᩮᩣ, ᩋᨶ᩠ᨲᨾᩈᩮᩣ ᩈᨠ᩠ᨠᩴ ᨴᩮᩅᩁᩣᨩᩣᨶᩴ ᩏᨸᩣᨴᩣᨿ ᨿᩮᩣ ᨠᩮᩣᨧᩥ ᩋᨾᨶᩩᩔᨩᩣᨲᩥᨿᩮᩣ, ᩈᩮᩣ ᩈᨻ᩠ᨻᩮᩣᩅ ᩍᨾᩈ᩠ᨾᩥᩴ ᩋᨲ᩠ᨳᩮ ‘ᨲᩥᩁᨧ᩠ᨨᩣᨶᨣᨲᩮᩣ’ᨲᩥ ᩅᩮᨴᩥᨲᨻ᩠ᨻᩮᩣ’’ᨲᩥ (ᨾᩉᩣᩅ. ᩋᨭ᩠ᨮ. ᪑᪑᪑). ᨲᩥᨲ᩠ᨳᩴ ᩅᩩᨧ᩠ᨧᨲᩥ ᩃᨴ᩠ᨵᩥ, ᨲᩴ ᩑᨲᩮᩈᩴ ᩋᨲ᩠ᨳᩦᨲᩥ ᨲᩥᨲ᩠ᨳᩥᨠᩣ, ᨲᩥᨲ᩠ᨳᩥᨠᩣ ᩑᩅ ᨲᩥᨲ᩠ᨳᩥᨿᩣ, ᩍᨲᩮᩣ ᩋᨬ᩠ᨬᩃᨴ᩠ᨵᩥᨠᩣᨲᩥ ᩋᨲ᩠ᨳᩮᩣ.

ᩈᩩᨲ᩠ᨲᩔ ᩏᨴ᩠ᨴᩮᩈᩮᩣ ᩈᩩᨲ᩠ᨲᩩᨴ᩠ᨴᩮᩈᩮᩣ. ᨸᩣᩁᩥᩈᩩᨴ᩠ᨵᩥ ᩑᩅ ᩏᨸᩮᩣᩈᨳᩮᩣ ᨸᩣᩁᩥᩈᩩᨴ᩠ᨵᩥᩏᨸᩮᩣᩈᨳᩮᩣ. ᩑᩈᩮᩅ ᨶᨿᩮᩣ ᩋᨵᩥᨭ᩠ᨮᩣᨶᩩᨸᩮᩣᩈᨳᩮᩣᨲᩥ ᩑᨲ᩠ᨳᩣᨸᩥ. ᩈᩮᩣᨲᩥ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩮᩣ. ᩒᩅᩣᨴᩮᩣᩅ ᨸᩣᨲᩥᨾᩮᩣᨠ᩠ᨡᩴ, ᨲᩔ ᩏᨴ᩠ᨴᩮᩈᩮᩣ ᩈᩁᩪᨸᩮᨶ ᨠᨳᨶᩴ ᩒᩅᩣᨴᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩮᩣ. ‘‘ᩍᨾᩈ᩠ᨾᩥᩴ ᩅᩦᨲᩥᨠ᩠ᨠᨾᩮ ᩋᨿᩴ ᨶᩣᨾ ᩌᨸᨲ᩠ᨲᩦ’’ᨲᩥ ᩑᩅᩴ ᩌᨸᨲ᩠ᨲᩥᩅᩈᩮᨶ ᩌᨱᩣᨸᨶᩴ ᨸᨬ᩠ᨬᩣᨸᨶᩴ ᩌᨱᩣ, ᩈᩮᩈᩴ ᩋᨶᨶ᩠ᨲᩁᩈᨴᩥᩈᨾᩮᩅ.

ᨡᨶ᩠ᨲᩦ ᨸᩁᨾᩴ ᨲᨸᩮᩣ ᨲᩥᨲᩥᨠ᩠ᨡᩣ…ᨸᩮ… ᩅᩩᨲ᩠ᨲᩣ ᨲᩥᩔᩮᩣ ᨣᩣᨳᩣᨿᩮᩣ ᨶᩣᨾ –

‘‘ᨡᨶ᩠ᨲᩦ ᨸᩁᨾᩴ ᨲᨸᩮᩣ ᨲᩥᨲᩥᨠ᩠ᨡᩣ;

ᨶᩥᨻ᩠ᨻᩣᨶᩴ ᨸᩁᨾᩴ ᩅᨴᨶ᩠ᨲᩥ ᨻᩩᨴ᩠ᨵᩣ;

ᨶ ᩉᩥ ᨸᨻ᩠ᨻᨩᩥᨲᩮᩣ ᨸᩁᩪᨸᨥᩣᨲᩦ;

ᨶ ᩈᨾᨱᩮᩣ ᩉᩮᩣᨲᩥ ᨸᩁᩴ ᩅᩥᩉᩮᨮᨿᨶ᩠ᨲᩮᩣ.

‘‘ᩈᨻ᩠ᨻᨸᩣᨸᩔ ᩋᨠᩁᨱᩴ, ᨠᩩᩈᩃᩔ ᩏᨸᩈᨾ᩠ᨸᨴᩣ;

ᩈᨧᩥᨲ᩠ᨲᨸᩁᩥᨿᩮᩣᨴᨸᨶᩴ, ᩑᨲᩴ ᨻᩩᨴ᩠ᨵᩣᨶ ᩈᩣᩈᨶᩴ.

‘‘ᩋᨶᩪᨸᩅᩣᨴᩮᩣ ᩋᨶᩪᨸᨥᩣᨲᩮᩣ, ᨸᩣᨲᩥᨾᩮᩣᨠ᩠ᨡᩮ ᨧ ᩈᩴᩅᩁᩮᩣ;

ᨾᨲ᩠ᨲᨬ᩠ᨬᩩᨲᩣ ᨧ ᨽᨲ᩠ᨲᩈ᩠ᨾᩥᩴ, ᨸᨶ᩠ᨲᨬ᩠ᨧ ᩈᨿᨶᩣᩈᨶᩴ;

ᩋᨵᩥᨧᩥᨲ᩠ᨲᩮ ᨧ ᩌᨿᩮᩣᨣᩮᩣ, ᩑᨲᩴ ᨻᩩᨴ᩠ᨵᩣᨶ ᩈᩣᩈᨶ’’ᨶ᩠ᨲᩥ.(ᨴᩦ. ᨶᩥ. ᪒.᪙᪐; ᨵ. ᨸ. ᪑᪘᪓-᪑᪘᪕) –

ᩍᨾᩣ ᨲᩥᩔᩮᩣ ᨣᩣᨳᩣᨿᩮᩣ.

ᨲᨲ᩠ᨳ ᨡᨶ᩠ᨲᩦ ᨸᩁᨾᩴ ᨲᨸᩮᩣᨲᩥ (ᨴᩦ. ᨶᩥ. ᩋᨭ᩠ᨮ. ᪒.᪙᪐; ᨵ. ᨸ. ᩋᨭ᩠ᨮ. ᪒.᪑᪘᪕) ᩋᨵᩥᩅᩣᩈᨶᨡᨶ᩠ᨲᩥ ᨶᩣᨾ ᨸᩁᨾᩴ ᨲᨸᩮᩣ. ᨲᩥᨲᩥᨠ᩠ᨡᩣᨲᩥ ᨡᨶ᩠ᨲᩥᨿᩣ ᩑᩅ ᩅᩮᩅᨧᨶᩴ, ᨲᩥᨲᩥᨠ᩠ᨡᩣᩈᨦ᩠ᨡᩣᨲᩣ ᩋᨵᩥᩅᩣᩈᨶᨡᨶ᩠ᨲᩥ ᩏᨲ᩠ᨲᨾᩴ ᨲᨸᩮᩣᨲᩥ ᩋᨲ᩠ᨳᩮᩣ. ᨶᩥᨻ᩠ᨻᩣᨶᩴ ᨸᩁᨾᩴ ᩅᨴᨶ᩠ᨲᩦᨲᩥ ᩈᨻ᩠ᨻᩣᨠᩣᩁᩮᨶ ᨸᨶ ᨶᩥᨻ᩠ᨻᩣᨶᩴ ‘‘ᨸᩁᨾ’’ᨶ᩠ᨲᩥ ᩅᨴᨶ᩠ᨲᩥ ᨻᩩᨴ᩠ᨵᩣ. ᨶ ᩉᩥ ᨸᨻ᩠ᨻᨩᩥᨲᩮᩣ ᨸᩁᩪᨸᨥᩣᨲᩦᨲᩥ ᨿᩮᩣ ᩋᨵᩥᩅᩣᩈᨶᨡᨶ᩠ᨲᩥᩅᩥᩁᩉᩥᨲᨲ᩠ᨲᩣ ᨸᩁᩴ ᩏᨸᨥᩣᨲᩮᨲᩥ ᨻᩣᨵᨲᩥ ᩅᩥᩉᩥᩴᩈᨲᩥ, ᩈᩮᩣ ᨸᨻ᩠ᨻᨩᩥᨲᩮᩣ ᨶᩣᨾ ᨶ ᩉᩮᩣᨲᩥ. ᨧᨲᩩᨲ᩠ᨳᨸᩣᨴᩮᩣ ᨸᨶ ᨲᩔᩮᩅ ᩅᩮᩅᨧᨶᩴ. ‘‘ᨶ ᩉᩥ ᨸᨻ᩠ᨻᨩᩥᨲᩮᩣ’’ᨲᩥ ᩑᨲᩔ ᩉᩥ ‘‘ᨶᩈᨾᨱᩮᩣ ᩉᩮᩣᨲᩦ’’ᨲᩥ ᩅᩮᩅᨧᨶᩴ. ‘‘ᨸᩁᩪᨸᨥᩣᨲᩦ’’ᨲᩥ ᩑᨲᩔ ‘‘ᨸᩁᩴ ᩅᩥᩉᩮᨮᨿᨶ᩠ᨲᩮᩣ’’ᨲᩥ ᩅᩮᩅᨧᨶᩴ. ᩋᨳ ᩅᩣ ᨸᩁᩪᨸᨥᩣᨲᩦᨲᩥ ᩈᩦᩃᩪᨸᨥᩣᨲᩦ. ᩈᩦᩃᨬ᩠ᩉᩥ ᩏᨲ᩠ᨲᨾᨭ᩠ᨮᩮᨶ ‘‘ᨸᩁ’’ᨶ᩠ᨲᩥ ᩅᩩᨧ᩠ᨧᨲᩥ. ᨿᩮᩣ ᨧ ᩈᨾᨱᩮᩣ ᨸᩁᩴ ᨿᩴ ᨠᨬ᩠ᨧᩥ ᩈᨲ᩠ᨲᩴ ᩅᩥᩉᩮᨮᨿᨶ᩠ᨲᩮᩣ ᨸᩁᩪᨸᨥᩣᨲᩦ ᩉᩮᩣᨲᩥ, ᩋᨲ᩠ᨲᨶᩮᩣ ᩈᩦᩃᩅᩥᨶᩣᩈᨠᩮᩣ, ᩈᩮᩣ ᨸᨻ᩠ᨻᨩᩥᨲᩮᩣ ᨶᩣᨾ ᨶ ᩉᩮᩣᨲᩦᨲᩥ ᩋᨲ᩠ᨳᩮᩣ. ᩋᨳ ᩅᩣ ᨿᩮᩣ ᩋᨵᩥᩅᩣᩈᨶᨡᨶ᩠ᨲᩥᨿᩣ ᩋᨽᩣᩅᩣ ᨸᩁᩪᨸᨥᩣᨲᩦ ᩉᩮᩣᨲᩥ, ᨸᩁᩴ ᩋᨶ᩠ᨲᨾᩈᩮᩣ ᨯᩴᩈᨾᨠᩈᨾ᩠ᨸᩥ ᩈᨬ᩠ᨧᩥᨧ᩠ᨧ ᨩᩦᩅᩥᨲᩣ ᩅᩮᩣᩁᩮᩣᨸᩮᨲᩥ, ᩈᩮᩣ ᨶ ᩉᩥ ᨸᨻ᩠ᨻᨩᩥᨲᩮᩣ. ᨠᩥᩴ ᨠᩣᩁᨱᩣ? ᨾᩃᩔ ᩋᨸᨻ᩠ᨻᩣᨩᩥᨲᨲ᩠ᨲᩣ. ‘‘ᨸᨻ᩠ᨻᩣᨩᨿᨾᨲ᩠ᨲᨶᩮᩣ ᨾᩃᩴ, ᨲᩈ᩠ᨾᩣ ‘ᨸᨻ᩠ᨻᨩᩥᨲᩮᩣ’ᨲᩥ ᩅᩩᨧ᩠ᨧᨲᩦ’’ᨲᩥ (ᨵ. ᨸ. ᪓᪘᪘) ᩍᨴᨬ᩠ᩉᩥ ᨸᨻ᩠ᨻᨩᩥᨲᩃᨠ᩠ᨡᨱᩴ. ᨿᩮᩣᨸᩥ ᨶ ᩉᩮᩅ ᨡᩮᩣ ᩏᨸᨥᩣᨲᩮᨲᩥ ᨶ ᨾᩣᩁᩮᨲᩥ, ᩋᨸᩥᨧ ᨴᨱ᩠ᨯᩣᨴᩦᩉᩥ ᩅᩥᩉᩮᨮᩮᨲᩥ, ᩈᩮᩣ ᨸᩁᩴ ᩅᩥᩉᩮᨮᨿᨶ᩠ᨲᩮᩣ ᩈᨾᨱᩮᩣ ᨶ ᩉᩮᩣᨲᩥ. ᨠᩥᩴ ᨠᩣᩁᨱᩣ? ᩅᩥᩉᩮᩈᩣᨿ ᩋᩈᨾᩥᨲᨲ᩠ᨲᩣ. ‘‘ᩈᨾᩥᨲᨲ᩠ᨲᩣ ᩉᩥ ᨸᩣᨸᩣᨶᩴ, ‘ᩈᨾᨱᩮᩣ’ᨲᩥ ᨸᩅᩩᨧ᩠ᨧᨲᩦ’’ᨲᩥ (ᨵ. ᨸ. ᪒᪖᪕) ᩍᨴᨬ᩠ᩉᩥ ᩈᨾᨱᩃᨠ᩠ᨡᨱᩴ.

ᨴᩩᨲᩥᨿᨣᩣᨳᩣᨿ ᩈᨻ᩠ᨻᨸᩣᨸᩔᩣᨲᩥ ᩈᨻ᩠ᨻᩣᨠᩩᩈᩃᩔ. ᩋᨠᩁᨱᨶ᩠ᨲᩥ ᩋᨶᩩᨸ᩠ᨸᩣᨴᨶᩴ. ᨠᩩᩈᩃᩔᩣᨲᩥ ᨧᨲᩩᨽᩪᨾᨠᨠᩩᩈᩃᩔ. ᩏᨸᩈᨾ᩠ᨸᨴᩣᨲᩥ ᩏᨸᩈᨾ᩠ᨸᩣᨴᨶᩴ ᨸᨭᩥᩃᩣᨽᩮᩣ. ᩈᨧᩥᨲ᩠ᨲᨸᩁᩥᨿᩮᩣᨴᨸᨶᨶ᩠ᨲᩥ ᩋᨲ᩠ᨲᨶᩮᩣ ᨧᩥᨲ᩠ᨲᩔ ᩅᩮᩣᨴᩣᨸᨶᩴ ᨸᨽᩔᩁᨽᩣᩅᨠᩁᨱᩴ ᩈᨻ᩠ᨻᩈᩮᩣ ᨸᩁᩥᩈᩮᩣᨵᨶᩴ, ᨲᩴ ᨸᨶ ᩋᩁᩉᨲ᩠ᨲᩮᨶ ᩉᩮᩣᨲᩥ. ᩍᨲᩥ ᩈᩦᩃᩈᩴᩅᩁᩮᨶ ᩈᨻ᩠ᨻᨸᩣᨸᩴ ᨸᩉᩣᨿ ᩃᩮᩣᨠᩥᨿᩃᩮᩣᨠᩩᨲ᩠ᨲᩁᩣᩉᩥ ᩈᨾᨳᩅᩥᨸᩔᨶᩣᩉᩥ ᨠᩩᩈᩃᩴ ᩈᨾ᩠ᨸᩣᨴᩮᨲ᩠ᩅᩣ ᩋᩁᩉᨲ᩠ᨲᨹᩃᩮᨶ ᨧᩥᨲ᩠ᨲᩴ ᨸᩁᩥᨿᩮᩣᨴᩣᨸᩮᨲᨻ᩠ᨻᨶ᩠ᨲᩥ ᩑᨲᩴ ᨻᩩᨴ᩠ᨵᩣᨶᩴ ᩈᩣᩈᨶᩴ ᩒᩅᩣᨴᩮᩣ ᩋᨶᩩᩈᩥᨭ᩠ᨮᩥ.

ᨲᨲᩥᨿᨣᩣᨳᩣᨿ ᩋᨶᩪᨸᩅᩣᨴᩮᩣᨲᩥ ᩅᩣᨧᩣᨿ ᨠᩔᨧᩥ ᩋᨶᩩᨸᩅᨴᨶᩴ. ᩋᨶᩪᨸᨥᩣᨲᩮᩣᨲᩥ ᨠᩣᨿᩮᨶ ᨠᩔᨧᩥ ᩏᨸᨥᩣᨲᩔ ᩋᨠᩁᨱᩴ. ᨸᩣᨲᩥᨾᩮᩣᨠ᩠ᨡᩮᨲᩥ ᨿᩴ ᨲᩴ ᨸᩣᨲᩥᨾᩮᩣᨠ᩠ᨡᩴ ᨸᩋᨲᩥᨾᩮᩣᨠ᩠ᨡᩴ ᩋᨲᩥᨸᨾᩮᩣᨠ᩠ᨡᩴ ᩏᨲ᩠ᨲᨾᩴ ᩈᩦᩃᩴ, ᨸᩣᨲᩥ ᩅᩣ ᩋᨣᨲᩥᩅᩥᩈᩮᩈᩮᩉᩥ, ᨾᩮᩣᨠ᩠ᨡᩮᨲᩥ ᨴᩩᨣ᩠ᨣᨲᩥᨽᨿᩮᩉᩥ. ᨿᩮᩣ ᩅᩣ ᨶᩴ ᨸᩣᨲᩥ, ᨲᩴ ᨾᩮᩣᨠ᩠ᨡᩮᨲᩦᨲᩥ ‘‘ᨸᩣᨲᩥᨾᩮᩣᨠ᩠ᨡ’’ᨶ᩠ᨲᩥ ᩅᩩᨧ᩠ᨧᨲᩥ, ᨲᩈ᩠ᨾᩥᩴ ᨸᩣᨲᩥᨾᩮᩣᨠ᩠ᨡᩮ ᨧ. ᩈᩴᩅᩁᩮᩣᨲᩥ ᩈᨲ᩠ᨲᨶ᩠ᨶᩴ ᩌᨸᨲ᩠ᨲᩥᨠ᩠ᨡᨶ᩠ᨵᩣᨶᩴ ᩋᩅᩦᨲᩥᨠ᩠ᨠᨾᩃᨠ᩠ᨡᨱᩮᩣ ᩈᩴᩅᩁᩮᩣ. ᨾᨲ᩠ᨲᨬ᩠ᨬᩩᨲᩣᨲᩥ ᨸᨭᩥᨣ᩠ᨣᩉᨱᨸᩁᩥᨽᩮᩣᨣᩅᩈᩮᨶ ᨸᨾᩣᨱᨬ᩠ᨬᩩᨲᩣ. ᨸᨶ᩠ᨲᨬ᩠ᨧ ᩈᨿᨶᩣᩈᨶᨶ᩠ᨲᩥ ᨩᨶᩈᨦ᩠ᨥᨭ᩠ᨭᨶᩅᩥᩁᩉᩥᨲᩴ ᨶᩥᨩ᩠ᨩᨶᩈᨾ᩠ᨻᩣᨵᩴ ᩅᩥᩅᩥᨲ᩠ᨲᩴ, ᩈᩮᨶᩣᩈᨶᨬ᩠ᨧ. ᩑᨲ᩠ᨳ ᨧ ᨴ᩠ᩅᩥᩉᩥᨿᩮᩅ ᨸᨧ᩠ᨧᨿᩮᩉᩥ ᨧᨲᩩᨸᨧ᩠ᨧᨿᩈᨶ᩠ᨲᩮᩣᩈᩮᩣ ᨴᩦᨸᩥᨲᩮᩣᨲᩥ ᩅᩮᨴᩥᨲᨻ᩠ᨻᩮᩣ ᨸᨧ᩠ᨧᨿᩈᨶ᩠ᨲᩮᩣᩈᩈᩣᨾᨬ᩠ᨬᩮᨶ ᩍᨲᩁᨴ᩠ᩅᨿᩔᩣᨸᩥ ᩃᨠ᩠ᨡᨱᩉᩣᩁᨶᨿᩮᨶ ᨩᩮᩣᨲᩥᨲᨲ᩠ᨲᩣ. ᩋᨵᩥᨧᩥᨲ᩠ᨲᩮ ᨧ ᩌᨿᩮᩣᨣᩮᩣᨲᩥ ᩅᩥᨸᩔᨶᩣᨸᩣᨴᨠᩴ ᩋᨭ᩠ᨮᩈᨾᩣᨸᨲ᩠ᨲᩥᨧᩥᨲ᩠ᨲᩴ, ᨲᨲᩮᩣᨸᩥ ᨾᨣ᩠ᨣᨹᩃᨧᩥᨲ᩠ᨲᨾᩮᩅ ᩋᨵᩥᨧᩥᨲ᩠ᨲᩴ, ᨲᩈ᩠ᨾᩥᩴ ᨿᨳᩣᩅᩩᨲ᩠ᨲᩮ ᩋᨵᩥᨧᩥᨲ᩠ᨲᩮ ᩌᨿᩮᩣᨣᩮᩣ ᨧ ᩋᨶᩩᨿᩮᩣᨣᩮᩣ ᨧᩣᨲᩥ ᩋᨲ᩠ᨳᩮᩣ. ᩑᨲᩴ ᨻᩩᨴ᩠ᨵᩣᨶ ᩈᩣᩈᨶᨶ᩠ᨲᩥ ᩑᨲᩴ ᨸᩁᩔ ᩋᨶᩩᨸᩅᨴᨶᩴ, ᩋᨶᩩᨸᨥᩣᨲᨶᩴ, ᨸᩣᨲᩥᨾᩮᩣᨠ᩠ᨡᩮ ᩈᩴᩅᩁᩮᩣ, ᨸᨭᩥᨣ᩠ᨣᩉᨱᨸᩁᩥᨽᩮᩣᨣᩮᩈᩩ ᨾᨲ᩠ᨲᨬ᩠ᨬᩩᨲᩣ, ᩋᨭ᩠ᨮᩈᨾᩣᨸᨲ᩠ᨲᩥᩅᩈᩥᨽᩣᩅᩣᨿ ᩅᩥᩅᩥᨲ᩠ᨲᩈᩮᨶᩣᩈᨶᩈᩮᩅᨶᨬ᩠ᨧ ᨻᩩᨴ᩠ᨵᩣᨶᩴ ᩈᩣᩈᨶᩴ ᩒᩅᩣᨴᩮᩣ ᩋᨶᩩᩈᩥᨭ᩠ᨮᩦᨲᩥ. ᩍᨾᩣ ᨸᨶ ᨲᩥᩔᩮᩣ ᨣᩣᨳᩣ ᩈᨻ᩠ᨻᨻᩩᨴ᩠ᨵᩣᨶᩴ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᨣᩣᨳᩣᨿᩮᩣ ᩉᩮᩣᨶ᩠ᨲᩦᨲᩥ ᩅᩮᨴᩥᨲᨻ᩠ᨻᩣ. ᨲᩴ ᨻᩩᨴ᩠ᨵᩣ ᩑᩅ ᩏᨴ᩠ᨴᩥᩈᨶ᩠ᨲᩥ, ᨶ ᩈᩣᩅᨠᩣ.

‘‘ᩈᩩᨱᩣᨲᩩ ᨾᩮ, ᨽᨶ᩠ᨲᩮ, ᩈᨦ᩠ᨥᩮᩣ’’ᨲᩥᩌᨴᩥᨶᩣ (ᨾᩉᩣᩅ. ᪑᪓᪔) ᨶᨿᩮᨶ ᩅᩩᨲ᩠ᨲᩴ ᩌᨱᩣᨸᩣᨲᩥᨾᩮᩣᨠ᩠ᨡᩴ ᨶᩣᨾ. ᨲᩴ ᩈᩣᩅᨠᩣ ᩑᩅ ᩏᨴ᩠ᨴᩥᩈᨶ᩠ᨲᩥ, ᨶ ᨻᩩᨴ᩠ᨵᩣ ᩈᨦ᩠ᨥᨠᨾ᩠ᨾᩴ ᨠᩁᩮᩣᨶ᩠ᨲᩥ, ᨶ ᨧ ᨲᨲ᩠ᨳ ᨸᩁᩥᨿᩣᨸᨶ᩠ᨶᩣᨲᩥ ᩌᩉ ‘‘ᨲᩴ ᩈᩣᩅᨠᩣ ᩑᩅ ᩏᨴ᩠ᨴᩥᩈᨶ᩠ᨲᩥ, ᨶ ᨻᩩᨴ᩠ᨵᩣ’’ᨲᩥ. ᩍᨾᩈ᩠ᨾᩥᩴ ᩋᨲ᩠ᨳᩮᨲᩥ ‘‘ᨸᩣᨲᩥᨾᩮᩣᨠ᩠ᨡᩴ ᩏᨴ᩠ᨴᩥᩈᩮᨿ᩠ᨿᩣ’’ᨲᩥ ᩑᨲᩈ᩠ᨾᩥᩴ ᩋᨲ᩠ᨳᩮ.

ᩋᨶᩩᨸᨣᨲᩮᩣ ᨶᩣᨾ ᨲᨲ᩠ᨳᩮᩅ ᩏᨸᩈᨾ᩠ᨸᨶ᩠ᨶᩮᩣ, ᩋᩈᨲᩥᨿᩣ ᨸᩩᩁᩥᨾᩥᨠᩣᨿ ᩋᨶᩩᨸᨣᨲᩮᩣ ᩅᩣ. ᨧᩣᨲᩩᨾᩣᩈᩥᨶᩥᨿᨶ᩠ᨲᩥ ᨧᩣᨲᩩᨾᩣᩈᩥᨿᩴ. ᩈᩣ ᩉᩥ ᨧᨲᩩᨶ᩠ᨶᩴ ᨾᩣᩈᩣᨶᩴ ᨸᩣᩁᩥᨸᩪᩁᩥᨽᩪᨲᩣᨲᩥ ᨧᩣᨲᩩᨾᩣᩈᩦ, ᩈᩣ ᩑᩅ ‘‘ᨧᩣᨲᩩᨾᩣᩈᩥᨶᩦ’’ᨲᩥ ᩅᩩᨧ᩠ᨧᨲᩥ, ᨲᩔᩴ ᨧᩣᨲᩩᨾᩣᩈᩥᨶᩥᨿᩴ. ᨸᨧ᩠ᨨᩥᨾᨠᨲ᩠ᨲᩥᨠᨸᩩᨱ᩠ᨱᨾᩣᩈᩥᨶᩥᨿᨶ᩠ᨲᩥ ᩋᨲ᩠ᨳᩮᩣ. ᨠᩣᨿᩈᩣᨾᨣ᩠ᨣᩥᨶ᩠ᨲᩥ ᨠᩣᨿᩮᨶ ᩈᨾᨣ᩠ᨣᨽᩣᩅᩴ, ᩉᨲ᩠ᨳᨸᩣᩈᩪᨸᨣᨾᨶᨶ᩠ᨲᩥ ᩅᩩᨲ᩠ᨲᩴ ᩉᩮᩣᨲᩥ.

ᩋᨿᩴ ᨸᨶᩮᨲ᩠ᨳ ᩅᩥᨶᩥᨧ᩠ᨨᨿᩮᩣ – ᩈᨧᩮ ᨸᩩᩁᩥᨾᩥᨠᩣᨿ ᨸᨬ᩠ᨧ ᨽᩥᨠ᩠ᨡᩪ ᩅᩔᩴ ᩏᨸᨣᨲᩣ, ᨸᨧ᩠ᨨᩥᨾᩥᨠᩣᨿᨸᩥ ᨸᨬ᩠ᨧ, ᨸᩩᩁᩥᨾᩮᩉᩥ ᨬᨲ᩠ᨲᩥᩴ ᨮᨸᩮᨲ᩠ᩅᩣ ᨸᩅᩣᩁᩥᨲᩮ ᨸᨧ᩠ᨨᩥᨾᩮᩉᩥ ᨲᩮᩈᩴ ᩈᨶ᩠ᨲᩥᨠᩮ ᨸᩣᩁᩥᩈᩩᨴ᩠ᨵᩥᩏᨸᩮᩣᩈᨳᩮᩣ ᨠᩣᨲᨻ᩠ᨻᩮᩣ, ᨶ ᩑᨠᩈ᩠ᨾᩥᩴ ᩏᨸᩮᩣᩈᨳᨣ᩠ᨣᩮ ᨴ᩠ᩅᩮ ᨬᨲ᩠ᨲᩥᨿᩮᩣ ᨮᨸᩮᨲᨻ᩠ᨻᩣ. ᩈᨧᩮᨸᩥ ᨸᨧ᩠ᨨᩥᨾᩥᨠᩣᨿ ᩏᨸᨣᨲᩣ ᨧᨲ᩠ᨲᩣᩁᩮᩣ, ᨲᨿᩮᩣ, ᨴ᩠ᩅᩮ, ᩑᨠᩮᩣ ᩅᩣ ᩉᩮᩣᨲᩥ, ᩑᩈᩮᩅ ᨶᨿᩮᩣ. ᩋᨳ ᨸᩩᩁᩥᨾᩥᨠᩣᨿ ᨧᨲ᩠ᨲᩣᩁᩮᩣ, ᨸᨧ᩠ᨨᩥᨾᩥᨠᩣᨿᨸᩥ ᨧᨲ᩠ᨲᩣᩁᩮᩣ, ᨲᨿᩮᩣ, ᨴ᩠ᩅᩮ, ᩑᨠᩮᩣ ᩅᩣ, ᩑᩈᩮᩅ ᨶᨿᩮᩣ. ᩋᨳ ᨸᩩᩁᩥᨾᩥᨠᩣᨿ ᨲᨿᩮᩣ, ᨸᨧ᩠ᨨᩥᨾᩥᨠᩣᨿ ᨲᨿᩮᩣ, ᨴ᩠ᩅᩮ ᩅᩣ, ᩑᩈᩮᩅ ᨶᨿᩮᩣ. ᩍᨴᨬ᩠ᩉᩮᨲ᩠ᨳ ᩃᨠ᩠ᨡᨱᩴ – ᩈᨧᩮ ᨸᩩᩁᩥᨾᩥᨠᩣᨿ ᩏᨸᨣᨲᩮᩉᩥ ᨸᨧ᩠ᨨᩥᨾᩥᨠᩣᨿ ᩏᨸᨣᨲᩣ ᨳᩮᩣᨠᨲᩁᩣ ᨧᩮᩅ ᩉᩮᩣᨶ᩠ᨲᩥ ᩈᨾᩈᨾᩣ ᨧ, ᩈᨦ᩠ᨥᨸ᩠ᨸᩅᩣᩁᨱᩣᨿ ᨧ ᨣᨱᩴ ᨸᩪᩁᩮᨶ᩠ᨲᩥ, ᩈᨦ᩠ᨥᨸ᩠ᨸᩅᩣᩁᨱᩣᩅᩈᩮᨶ ᨬᨲ᩠ᨲᩥᩴ ᨮᨸᩮᨲ᩠ᩅᩣ ᨸᩩᩁᩥᨾᩮᩉᩥ ᨸᩅᩣᩁᩮᨲᨻ᩠ᨻᩣ. ᩈᨧᩮ ᨸᨶ ᨸᩩᩁᩥᨾᩥᨠᩣᨿ ᨲᨿᩮᩣ, ᨸᨧ᩠ᨨᩥᨾᩥᨠᩣᨿ ᩑᨠᩮᩣ ᩉᩮᩣᨲᩥ, ᨲᩮᨶ ᩈᨴ᩠ᨵᩥᩴ ᨲᩮ ᨧᨲ᩠ᨲᩣᩁᩮᩣ ᩉᩮᩣᨶ᩠ᨲᩥ, ᨧᨲᩩᨶ᩠ᨶᩴ ᩈᨦ᩠ᨥᨬᨲ᩠ᨲᩥᩴ ᨮᨸᩮᨲ᩠ᩅᩣ ᨸᩅᩣᩁᩮᨲᩩᩴ ᨶ ᩅᨭ᩠ᨭᨲᩥ. ᨣᨱᨬᨲ᩠ᨲᩥᨿᩣ ᨸᨶ ᩈᩮᩣ ᨣᨱᨸᩪᩁᨠᩮᩣ ᩉᩮᩣᨲᩥ, ᨲᩈ᩠ᨾᩣ ᨣᨱᩅᩈᩮᨶ ᨬᨲ᩠ᨲᩥᩴ ᨮᨸᩮᨲ᩠ᩅᩣ ᨸᩩᩁᩥᨾᩮᩉᩥ ᨸᩅᩣᩁᩮᨲᨻ᩠ᨻᩴ, ᩍᨲᩁᩮᨶ ᨲᩮᩈᩴ ᩈᨶ᩠ᨲᩥᨠᩮ ᨸᩣᩁᩥᩈᩩᨴ᩠ᨵᩥᩏᨸᩮᩣᩈᨳᩮᩣ ᨠᩣᨲᨻ᩠ᨻᩮᩣ. ᩈᨧᩮ ᨸᩩᩁᩥᨾᩥᨠᩣᨿ ᨴ᩠ᩅᩮ, ᨸᨧ᩠ᨨᩥᨾᩥᨠᩣᨿ ᨴ᩠ᩅᩮ ᩅᩣ ᩑᨠᩮᩣ ᩅᩣ, ᩑᨲ᩠ᨳᩣᨸᩥ ᩑᩈᩮᩅ ᨶᨿᩮᩣ. ᩈᨧᩮ ᨸᩩᩁᩥᨾᩥᨠᩣᨿ ᩑᨠᩮᩣ, ᨸᨧ᩠ᨨᩥᨾᩥᨠᩣᨿᨸᩥ ᩑᨠᩮᩣ, ᩑᨠᩮᨶ ᩑᨠᩔ ᩈᨶ᩠ᨲᩥᨠᩮ ᨸᩅᩣᩁᩮᨲᨻ᩠ᨻᩴ, ᩑᨠᩮᨶ ᨸᩣᩁᩥᩈᩩᨴ᩠ᨵᩥᩏᨸᩮᩣᩈᨳᩮᩣ ᨠᩣᨲᨻ᩠ᨻᩮᩣ. ᩈᨧᩮ ᨸᩩᩁᩥᨾᩅᩔᩪᨸᨣᨲᩮᩉᩥ ᨸᨧ᩠ᨨᩥᨾᩅᩔᩪᨸᨣᨲᩣ ᩑᨠᩮᨶᨸᩥ ᩋᨵᩥᨠᨲᩁᩣ ᩉᩮᩣᨶ᩠ᨲᩥ, ᨸᨮᨾᩴ ᨸᩣᨲᩥᨾᩮᩣᨠ᩠ᨡᩴ ᩏᨴ᩠ᨴᩥᩈᩥᨲ᩠ᩅᩣ ᨸᨧ᩠ᨨᩣ ᨳᩮᩣᨠᨲᩁᩮᩉᩥ ᨲᩮᩈᩴ ᩈᨶ᩠ᨲᩥᨠᩮ ᨸᩅᩣᩁᩮᨲᨻ᩠ᨻᩴ. ᨠᨲ᩠ᨲᩥᨠᨧᩣᨲᩩᨾᩣᩈᩥᨶᩥᨸᩅᩣᩁᨱᩣᨿ ᨸᨶ ᩈᨧᩮ ᨸᨮᨾᩴ ᩅᩔᩪᨸᨣᨲᩮᩉᩥ ᨾᩉᩣᨸᩅᩣᩁᨱᩣᨿ ᨸᩅᩣᩁᩥᨲᩮᩉᩥ ᨸᨧ᩠ᨨᩣ ᩏᨸᨣᨲᩣ ᩋᨵᩥᨠᨲᩁᩣ ᩅᩣ ᩈᨾᩈᨾᩣ ᩅᩣ ᩉᩮᩣᨶ᩠ᨲᩥ, ᨸᩅᩣᩁᨱᩣᨬᨲ᩠ᨲᩥᩴ ᨮᨸᩮᨲ᩠ᩅᩣ ᨸᩅᩣᩁᩮᨲᨻ᩠ᨻᩴ. ᨲᩮᩉᩥ ᨸᩅᩣᩁᩥᨲᩮ ᨸᨧ᩠ᨨᩣ ᩍᨲᩁᩮᩉᩥ ᨸᩣᩁᩥᩈᩩᨴ᩠ᨵᩥᩏᨸᩮᩣᩈᨳᩮᩣ ᨠᩣᨲᨻ᩠ᨻᩮᩣ. ᩋᨳ ᨾᩉᩣᨸᩅᩣᩁᨱᩣᨿ ᨸᩅᩣᩁᩥᨲᩣ ᨻᩉᩪ ᩉᩮᩣᨶ᩠ᨲᩥ, ᨸᨧ᩠ᨨᩣ ᩅᩔᩪᨸᨣᨲᩣ ᨳᩮᩣᨠᩣ ᩅᩣ ᩑᨠᩮᩣ ᩅᩣ, ᨸᩣᨲᩥᨾᩮᩣᨠ᩠ᨡᩮ ᩏᨴ᩠ᨴᩥᨭ᩠ᨮᩮ ᨸᨧ᩠ᨨᩣ ᨲᩮᩈᩴ ᩈᨶ᩠ᨲᩥᨠᩮ ᨲᩮᨶ ᨸᩅᩣᩁᩮᨲᨻ᩠ᨻᨶ᩠ᨲᩥ.

ᩑᨠᩴᩈᩴ ᩏᨲ᩠ᨲᩁᩣᩈᨦ᩠ᨣᩴ ᨠᩁᩥᨲ᩠ᩅᩣᨲᩥ ᩑᨠᩈ᩠ᨾᩥᩴ ᩋᩴᩈᩮ ᩈᩣᨵᩩᨠᩴ ᩏᨲ᩠ᨲᩁᩣᩈᨦ᩠ᨣᩴ ᨠᩁᩥᨲ᩠ᩅᩣᨲᩥ ᩋᨲ᩠ᨳᩮᩣ. ᩋᨬ᩠ᨩᩃᩥᩴ ᨸᨣ᩠ᨣᩉᩮᨲ᩠ᩅᩣᨲᩥ ᨴᩈᨶᨡᩈᨾᩮᩣᨵᩣᨶᩈᨾᩩᨩ᩠ᨩᩃᩴ ᩋᨬ᩠ᨩᩃᩥᩴ ᩏᨠ᩠ᨡᩥᨸᩥᨲ᩠ᩅᩣ. ᩈᨧᩮ ᨸᨶ ᨲᨲ᩠ᨳ ᨸᩣᩁᩥᩅᩣᩈᩥᨠᩮᩣᨸᩥ ᩋᨲ᩠ᨳᩥ, ᩈᨦ᩠ᨥᨶᩅᨠᨭ᩠ᨮᩣᨶᩮ ᨶᩥᩈᩦᨴᩥᨲ᩠ᩅᩣ ᨲᨲ᩠ᨳᩮᩅ ᨶᩥᩈᩥᨶ᩠ᨶᩮᨶ ᩋᨲ᩠ᨲᨶᩮᩣ ᨸᩣᩊᩥᨿᩣ ᨸᩣᩁᩥᩈᩩᨴ᩠ᨵᩥᩏᨸᩮᩣᩈᨳᩮᩣ ᨠᩣᨲᨻ᩠ᨻᩮᩣ. ᨸᩣᨲᩥᨾᩮᩣᨠ᩠ᨡᩮ ᩏᨴ᩠ᨴᩥᩈᩥᨿᨾᩣᨶᩮ ᨸᨶ ᨸᩣᩊᩥᨿᩣ ᩋᨶᩥᩈᩦᨴᩥᨲ᩠ᩅᩣ ᨸᩣᩊᩥᩴ ᩅᩥᩉᩣᨿ ᩉᨲ᩠ᨳᨸᩣᩈᩴ ᩋᨾᩩᨬ᩠ᨧᨶ᩠ᨲᩮᨶ ᨶᩥᩈᩦᨴᩥᨲᨻ᩠ᨻᩴ. ᨸᩅᩣᩁᨱᩣᨿᨸᩥ ᩑᩈᩮᩅ ᨶᨿᩮᩣ.

ᩈᨻ᩠ᨻᩴ ᨸᩩᨻ᩠ᨻᨠᩁᨱᩦᨿᨶ᩠ᨲᩥ ᩈᨾ᩠ᨾᨩ᩠ᨩᨶᩣᨴᩥᩴ ᨶᩅᩅᩥᨵᩴ ᨸᩩᨻ᩠ᨻᨠᩥᨧ᩠ᨧᩴ. ᨿᨳᩣ ᨧ ᩈᨻ᩠ᨻᩮᩣ ᩈᨦ᩠ᨥᩮᩣ ᩈᨽᩣᨣᩣᨸᨲ᩠ᨲᩥᩴ ᩌᨸᨩ᩠ᨩᩥᨲ᩠ᩅᩣ ‘‘ᩈᩩᨱᩣᨲᩩ ᨾᩮ, ᨽᨶ᩠ᨲᩮ, ᩈᨦ᩠ᨥᩮᩣ…ᨸᩮ… ᨸᨭᩥᨠᩁᩥᩔᨲᩦ’’ᨲᩥ (ᨾᩉᩣᩅ. ᪑᪗᪑) ᨬᨲ᩠ᨲᩥᩴ ᨮᨸᩮᨲ᩠ᩅᩣ ᩏᨸᩮᩣᩈᨳᩴ ᨠᩣᨲᩩᩴ ᩃᨽᨲᩥ, ᩑᩅᨾᩮᨲ᩠ᨳᩣᨸᩥ ᨲᩦᩉᩥ ‘‘ᩈᩩᨱᨶ᩠ᨲᩩ ᨾᩮ ᩌᨿᩈ᩠ᨾᨶ᩠ᨲᩣ ᩍᨾᩮ ᨽᩥᨠ᩠ᨡᩪ ᩈᨽᩣᨣᩴ ᩌᨸᨲ᩠ᨲᩥᩴ ᩌᨸᨶ᩠ᨶᩣ, ᨿᨴᩣ ᩋᨬ᩠ᨬᩴ ᨽᩥᨠ᩠ᨡᩩᩴ ᩈᩩᨴ᩠ᨵᩴ ᩋᨶᩣᨸᨲ᩠ᨲᩥᨠᩴ ᨸᩔᩥᩔᨶ᩠ᨲᩥ, ᨲᨴᩣ ᨲᩔ ᩈᨶ᩠ᨲᩥᨠᩮ ᨲᩴ ᩌᨸᨲ᩠ᨲᩥᩴ ᨸᨭᩥᨠᩁᩥᩔᨶ᩠ᨲᩦ’’ᨲᩥ ᨣᨱᨬᨲ᩠ᨲᩥᩴ ᨮᨸᩮᨲ᩠ᩅᩣ, ᨴ᩠ᩅᩦᩉᩥᨸᩥ ‘‘ᩋᨬ᩠ᨬᩴ ᩈᩩᨴ᩠ᨵᩴ ᨸᩔᩥᨲ᩠ᩅᩣ ᨸᨭᩥᨠᩁᩥᩔᩣᨾᩣ’’ᨲᩥ ᩅᨲ᩠ᩅᩣ ᩏᨸᩮᩣᩈᨳᩴ ᨠᩣᨲᩩᩴ ᩅᨭ᩠ᨭᨲᩥ. ᩑᨠᩮᨶᩣᨸᩥ ‘‘ᨸᩁᩥᩈᩩᨴ᩠ᨵᩴ ᩃᨽᩥᨲ᩠ᩅᩣ ᨸᨭᩥᨠᩁᩥᩔᩣᨾᩦ’’ᨲᩥ ᩌᨽᩮᩣᨣᩴ ᨠᨲ᩠ᩅᩣ ᨠᩣᨲᩩᩴ ᩅᨭ᩠ᨭᨲᩥ. ᨲᨴᩉᩪᨲᩥ ᨲᩈ᩠ᨾᩥᩴ ᩋᩉᩩ, ᨲᩈ᩠ᨾᩥᩴ ᨴᩥᩅᩈᩮᨲᩥ ᩋᨲ᩠ᨳᩮᩣ. ᨶᩣᨶᩣᩈᩴᩅᩣᩈᨠᩮᩉᩦᨲᩥ ᩃᨴ᩠ᨵᩥᨶᩣᨶᩣᩈᩴᩅᩣᩈᨠᩮᩉᩥ. ᩋᨶᩣᩅᩣᩈᩮᩣ ᨶᩣᨾ ᨶᩅᨠᨾ᩠ᨾᩈᩣᩃᩣᨴᩥᨠᩮᩣ ᨿᩮᩣ ᨠᩮᩣᨧᩥ ᨸᨴᩮᩈᩮᩣ. ᩋᨬ᩠ᨬᨲᩕ ᩈᨦ᩠ᨥᩮᨶᩣᨲᩥ ᩈᨦ᩠ᨥᨸ᩠ᨸᩉᩮᩣᨶᨠᩮᩉᩥ ᨽᩥᨠ᩠ᨡᩪᩉᩥ ᩅᩥᨶᩣ. ᩋᨬ᩠ᨬᨲᩕ ᩋᨶ᩠ᨲᩁᩣᨿᩣᨲᩥ ᨸᩩᨻ᩠ᨻᩮ ᩅᩩᨲ᩠ᨲᩴ ᨴᩈᩅᩥᨵᨾᨶ᩠ᨲᩁᩣᨿᩴ ᩅᩥᨶᩣ. ᩈᨻ᩠ᨻᨶ᩠ᨲᩥᨾᩮᨶ ᨸᨶ ᨸᩁᩥᨧ᩠ᨨᩮᨴᩮᨶ ᩋᨲ᩠ᨲᨧᨲᩩᨲ᩠ᨳᩮᨶ ᩋᨶ᩠ᨲᩁᩣᨿᩮ ᩅᩣ ᩈᨲᩥ ᨣᨶ᩠ᨲᩩᩴ ᩅᨭ᩠ᨭᨲᩥ. ᨿᨳᩣ ᨧ ᩌᩅᩣᩈᩣᨴᨿᩮᩣ ᨶ ᨣᨶ᩠ᨲᨻ᩠ᨻᩣ, ᩑᩅᩴ ᩈᨧᩮ ᩅᩥᩉᩣᩁᩮ ᩏᨸᩮᩣᩈᨳᩴ ᨠᩁᩮᩣᨶ᩠ᨲᩥ, ᩏᨸᩮᩣᩈᨳᩣᨵᩥᨭ᩠ᨮᩣᨶᨲ᩠ᨳᩴ ᩈᩦᨾᩣᨸᩥ ᨶᨴᩦᨸᩥ ᨶ ᨣᨶ᩠ᨲᨻ᩠ᨻᩣ. ᩈᨧᩮ ᨸᨶᩮᨲ᩠ᨳ ᨠᩮᩣᨧᩥ ᨽᩥᨠ᩠ᨡᩩ ᩉᩮᩣᨲᩥ, ᨲᩔ ᩈᨶ᩠ᨲᩥᨠᩴ ᨣᨶ᩠ᨲᩩᩴ ᩅᨭ᩠ᨭᨲᩥ. ᩅᩥᩔᨭ᩠ᨮᩏᨸᩮᩣᩈᨳᩣᨸᩥ ᩌᩅᩣᩈᩣ ᨣᨶ᩠ᨲᩩᩴ ᩅᨭ᩠ᨭᨲᩥ. ᩑᩅᩴ ᨣᨲᩮᩣ ᩋᨵᩥᨭ᩠ᨮᩣᨲᩩᨾ᩠ᨸᩥ ᩃᨽᨲᩥ. ᩌᩁᨬ᩠ᨬᨠᩮᨶᩣᨸᩥ ᨽᩥᨠ᩠ᨡᩩᨶᩣ ᩏᨸᩮᩣᩈᨳᨴᩥᩅᩈᩮ ᨣᩣᨾᩮ ᨸᩥᨱ᩠ᨯᩣᨿ ᨧᩁᩥᨲ᩠ᩅᩣ ᩋᨲ᩠ᨲᨶᩮᩣ ᩅᩥᩉᩣᩁᨾᩮᩅ ᩌᨣᨶ᩠ᨲᨻ᩠ᨻᩴ. ᩈᨧᩮ ᩋᨬ᩠ᨬᩴ ᩅᩥᩉᩣᩁᩴ ᩒᨠ᩠ᨠᨾᨲᩥ, ᨲᨲ᩠ᨳ ᩏᨸᩮᩣᩈᨳᩴ ᨠᨲ᩠ᩅᩣᩅ ᩌᨣᨶ᩠ᨲᨻ᩠ᨻᩴ, ᩋᨠᨲ᩠ᩅᩣ ᩌᨣᨶ᩠ᨲᩩᩴ ᨶ ᩅᨭ᩠ᨭᨲᩥ. ᨿᩴ ᨩᨬ᩠ᨬᩣ ‘‘ᩋᨩ᩠ᨩᩮᩅ ᨲᨲ᩠ᨳ ᨣᨶ᩠ᨲᩩᩴ ᩈᨠ᩠ᨠᩮᩣᨾᩦ’’ᨲᩥ (ᨾᩉᩣᩅ. ᩋᨭ᩠ᨮ. ᪑᪘᪑) ᩑᩅᩁᩪᨸᩮᩣ ᨸᨶ ᩌᩅᩣᩈᩮᩣ ᨣᨶ᩠ᨲᨻ᩠ᨻᩮᩣ. ᨲᨲ᩠ᨳ ᨽᩥᨠ᩠ᨡᩪᩉᩥ ᩈᨴ᩠ᨵᩥᩴ ᩏᨸᩮᩣᩈᨳᩴ ᨠᩁᩮᩣᨶ᩠ᨲᩮᨶᩣᨸᩥ ᩉᩥ ᩍᨾᩥᨶᩣ ᨶᩮᩅ ᩏᨸᩮᩣᩈᨳᨶ᩠ᨲᩁᩣᨿᩮᩣ ᨠᨲᩮᩣ ᨽᩅᩥᩔᨲᩦᨲᩥ.

ᩏᨴᨠᩴ ᩌᩈᨶᩮᨶ ᨧᩣᨲᩥ ᩌᩈᨶᩮᨶ ᩈᩉ ᨸᩣᨶᩦᨿᨸᩁᩥᨽᩮᩣᨩᨶᩦᨿᩴ ᩏᨴᨠᨬ᩠ᨧᩣᨲᩥ ᩋᨲ᩠ᨳᩮᩣ. ᩈᨦ᩠ᨥᩈᨶ᩠ᨶᩥᨸᩣᨲᨲᩮᩣ ᨸᨮᨾᩴ ᨠᨲ᩠ᨲᨻ᩠ᨻᩴ ᨸᩩᨻ᩠ᨻᨠᩁᨱᩴ. ᨸᩩᨻ᩠ᨻᨠᩁᨱᨲᩮᩣ ᨸᨧ᩠ᨨᩣ ᨠᨲ᩠ᨲᨻ᩠ᨻᨾ᩠ᨸᩥ ᩏᨸᩮᩣᩈᨳᨠᨾ᩠ᨾᨲᩮᩣ ᨸᨮᨾᩴ ᨠᨲ᩠ᨲᨻ᩠ᨻᨲ᩠ᨲᩣ ᨸᩩᨻ᩠ᨻᨠᩥᨧ᩠ᨧᩴ. ᩏᨽᨿᨾ᩠ᨸᩥ ᨧᩮᨲᩴ ᩏᨸᩮᩣᩈᨳᨠᨾ᩠ᨾᨲᩮᩣ ᨸᨮᨾᩴ ᨠᨲ᩠ᨲᨻ᩠ᨻᨲ᩠ᨲᩣ ‘‘ᨸᩩᨻ᩠ᨻᨠᩥᨧ᩠ᨧ’’ᨾᩥᨧ᩠ᨧᩮᩅ ᩑᨲ᩠ᨳ ᩅᩩᨲ᩠ᨲᨶ᩠ᨲᩥ ᩌᩉ ‘‘ᩑᩅᩴ ᨴ᩠ᩅᩦᩉᩥ ᨶᩣᨾᩮᩉᩥ ᨶᩅᩅᩥᨵᩴ ᨸᩩᨻ᩠ᨻᨠᩥᨧ᩠ᨧᩴ ᨴᩔᩥᨲ’’ᨶ᩠ᨲᩥ. ᨠᩥᩴ ᨲᩴ ᨠᨲᨶ᩠ᨲᩥ ᨸᩩᨧ᩠ᨨᨲᩦᨲᩥ ᩌᩉ ‘‘ᨶ ᩉᩦ’’ᨲᩥᩌᨴᩥ. ᨲᩴ ᩋᨠᨲ᩠ᩅᩣ ᩏᨸᩮᩣᩈᨳᩴ ᨠᩣᨲᩩᩴ ᨶ ᩅᨭ᩠ᨭᨲᩥ ‘‘ᨶ, ᨽᩥᨠ᩠ᨡᩅᩮ, ᨳᩮᩁᩮᨶ ᩌᨱᨲ᩠ᨲᩮᨶ ᩋᨣᩥᩃᩣᨶᩮᨶ ᨶ ᩈᨾ᩠ᨾᨩ᩠ᨩᩥᨲᨻ᩠ᨻᩴ, ᨿᩮᩣ ᨶ ᩈᨾ᩠ᨾᨩ᩠ᨩᩮᨿ᩠ᨿ, ᩌᨸᨲ᩠ᨲᩥ ᨴᩩᨠ᩠ᨠᨭᩔᩣ’’ᨲᩥᩌᨴᩥ (ᨾᩉᩣᩅ. ᪑᪕᪙) ᩅᨧᨶᨲᩮᩣ. ᨲᩮᨶᩮᩅᩣᩉ ‘‘ᨲᩈ᩠ᨾᩣ ᨳᩮᩁᩮᨶ ᩌᨱᨲ᩠ᨲᩮᨶᩣ’’ᨲᩥᩌᨴᩥ.

ᩈᨧᩮ ᨸᨶ ᩌᨱᨲ᩠ᨲᩮᩣ ᩈᨾ᩠ᨾᨩ᩠ᨩᨶᩥᩴ ᨲᩣᩅᨠᩣᩃᩥᨠᨾ᩠ᨸᩥ ᨶ ᩃᨽᨲᩥ, ᩈᩣᨡᩣᨽᨦ᩠ᨣᩴ ᨠᨸ᩠ᨸᩥᨿᩴ ᨠᩣᩁᩮᨲ᩠ᩅᩣ ᩈᨾ᩠ᨾᨩ᩠ᨩᩥᨲᨻ᩠ᨻᩴ. ᨲᨾ᩠ᨸᩥ ᩋᩃᨽᨶ᩠ᨲᩔ ᩃᨴ᩠ᨵᨠᨸ᩠ᨸᩥᨿᩴ ᩉᩮᩣᨲᩥ. ᨸᩣᨶᩦᨿᩴ ᨸᩁᩥᨽᩮᩣᨩᨶᩦᨿᩴ ᩏᨸᨭ᩠ᨮᩣᨸᩮᨲᨻ᩠ᨻᨶ᩠ᨲᩥ ᩌᨣᨶ᩠ᨲᩩᨠᩣᨶᩴ ᩋᨲ᩠ᨳᩣᨿ ᨸᩣᨶᩦᨿᨸᩁᩥᨽᩮᩣᨩᨶᩦᨿᩴ ᩏᨸᨭ᩠ᨮᩣᨸᩮᨲᨻ᩠ᨻᩴ. ᩌᩈᨶᩴ ᨸᨬ᩠ᨬᩣᨸᩮᨲᨻ᩠ᨻᨶ᩠ᨲᩥ ᨸᩦᨮᨹᩃᨠᩣᨴᩥᩌᩈᨶᩴ ᨸᨬ᩠ᨬᩣᨸᩮᨲᨻ᩠ᨻᩴ. ᩈᨧᩮ ᩏᨸᩮᩣᩈᨳᩣᨣᩣᩁᩮ ᩌᩈᨶᩣᨶᩥ ᨶᨲ᩠ᨳᩥ, ᩈᩴᨥᩥᨠᩣᩅᩣᩈᨲᩮᩣᨸᩥ ᩌᩉᩁᩥᨲ᩠ᩅᩣ ᨸᨬ᩠ᨬᩣᨸᩮᨲ᩠ᩅᩣ ᨸᩩᨶ ᩉᩁᩥᨲᨻ᩠ᨻᩣᨶᩥ. ᩌᩈᨶᩮᩈᩩ ᩋᩈᨲᩥ ᨠᨭᩈᩣᩁᨠᩮᨸᩥ ᨲᨭ᩠ᨭᩥᨠᩣᨿᩮᩣᨸᩥ ᨸᨬ᩠ᨬᩣᨸᩮᨲᩩᩴ ᩅᨭ᩠ᨭᨲᩥ. ᨲᨭ᩠ᨭᩥᨠᩣᩈᩩᨸᩥ ᩋᩈᨲᩥ ᩈᩣᨡᩣᨽᨦ᩠ᨣᩣᨶᩥ ᨠᨸ᩠ᨸᩥᨿᩴ ᨠᩣᩁᩮᨲ᩠ᩅᩣ ᨸᨬ᩠ᨬᩣᨸᩮᨲᨻ᩠ᨻᩣᨶᩥ. ᨠᨸ᩠ᨸᩥᨿᨠᩣᩁᨠᩴ ᩋᩃᨽᨶ᩠ᨲᩔ ᩃᨴ᩠ᨵᨠᨸ᩠ᨸᩥᨿᩴ ᩉᩮᩣᨲᩥ. ᨸᨴᩦᨸᩮᩣ ᨠᩣᨲᨻ᩠ᨻᩮᩣᨲᩥ ᨸᨴᩦᨸᩮᨲᨻ᩠ᨻᩮᩣ, ᨸᨴᩦᨸᩩᨩ᩠ᨩᩃᨶᩴ ᨠᩣᨲᨻ᩠ᨻᨶ᩠ᨲᩥ ᩅᩩᨲ᩠ᨲᩴ ᩉᩮᩣᨲᩥ. ᩌᨱᩣᨸᩮᨶ᩠ᨲᩮᨶ ᨸᨶ ‘‘ᩋᩈᩩᨠᩈ᩠ᨾᩥᩴ ᨶᩣᨾ ᩒᨠᩣᩈᩮ ᨲᩮᩃᩴ ᩅᩣ ᩅᨭ᩠ᨭᩥ ᩅᩣ ᨠᨸᩃ᩠ᩃᩥᨠᩣ ᩅᩣ ᩋᨲ᩠ᨳᩥ, ᨲᩴ ᨣᩉᩮᨲ᩠ᩅᩣ ᨠᩁᩮᩣᩉᩦ’’ᨲᩥ ᩅᨲ᩠ᨲᨻ᩠ᨻᩮᩣ. ᩈᨧᩮ ᨲᩮᩃᩣᨴᩦᨶᩥ ᨶᨲ᩠ᨳᩥ, ᨸᩁᩥᨿᩮᩈᩥᨲᨻ᩠ᨻᩣᨶᩥ. ᨸᩁᩥᨿᩮᩈᩥᨲ᩠ᩅᩣ ᩋᩃᨽᨶ᩠ᨲᩔ ᩃᨴ᩠ᨵᨠᨸ᩠ᨸᩥᨿᩴ ᩉᩮᩣᨲᩥ. ᩋᨸᩥᨧ ᨠᨸᩣᩃᩮ ᩋᨣ᩠ᨣᩥᨸᩥ ᨩᩣᩃᩮᨲᨻ᩠ᨻᩮᩣ. ᩌᨱᩣᨸᩮᨶ᩠ᨲᩮᨶ ᨧ ᨠᩥᨬ᩠ᨧᩥ ᨠᨾ᩠ᨾᩴ ᨠᩁᩮᩣᨶ᩠ᨲᩮᩣ ᩅᩣ ᩈᨴᩣᨠᩣᩃᨾᩮᩅ ᩑᨠᩮᩣ ᩅᩣ ᨽᩣᩁᨶᩥᨲ᩠ᨳᩁᨱᨠᩮᩣ ᩅᩣ ᩈᩁᨽᩣᨱᨠᨵᨾ᩠ᨾᨠᨳᩥᨠᩣᨴᩦᩈᩩ ᩋᨬ᩠ᨬᨲᩁᩮᩣ ᩅᩣ ᨶ ᩌᨱᩣᨸᩮᨲᨻ᩠ᨻᩮᩣ, ᩋᩅᩈᩮᩈᩣ ᨸᨶ ᩅᩣᩁᩮᨶ ᩌᨱᩣᨸᩮᨲᨻ᩠ᨻᩣ. ᨲᩮᨶᩣᩉ ‘‘ᨳᩮᩁᩮᨶᩣᨸᩥ ᨸᨲᩥᩁᩪᨸᩴ ᨬᨲ᩠ᩅᩣ ᩌᨱᩣᨸᩮᨲᨻ᩠ᨻ’’ᨶ᩠ᨲᩥ.

ᨻᩉᩥ ᩏᨸᩮᩣᩈᨳᩴ ᨠᨲ᩠ᩅᩣ ᩌᨣᨲᩮᨶᩣᨲᩥ ᨶᨴᩥᨿᩣ ᩅᩣ ᩈᩦᨾᩣᨿ ᩅᩣ ᨿᨲ᩠ᨳ ᨠᨲ᩠ᨳᨧᩥ ᩏᨸᩮᩣᩈᨳᩴ ᨠᨲ᩠ᩅᩣ ᩌᨣᨲᩮᨶ ᨨᨶ᩠ᨴᩮᩣ ᨴᩣᨲᨻ᩠ᨻᩮᩣ, ‘‘ᨠᨲᩮᩣ ᨾᨿᩣ ᩏᨸᩮᩣᩈᨳᩮᩣ’’ᨲᩥ ᩋᨧ᩠ᨨᩥᨲᩩᩴ ᨶ ᩃᨽᨲᩦᨲᩥ ᩋᨵᩥᨸ᩠ᨸᩣᨿᩮᩣ. ᨠᩥᨧ᩠ᨧᨸ᩠ᨸᩈᩩᨲᩮᩣ ᩅᩣᨲᩥ ᨣᩥᩃᩣᨶᩩᨸᨭ᩠ᨮᩣᨠᩣᨴᩥᨠᩥᨧ᩠ᨧᨸ᩠ᨸᩈᩩᨲᩮᩣ ᩅᩣ. ᩈᨧᩮ ᨣᩥᩃᩣᨶᩮᩣ ᨨᨶ᩠ᨴᨸᩣᩁᩥᩈᩩᨴ᩠ᨵᩥᩴ ᨴᩣᨲᩩᩴ ᨶ ᩈᨠ᩠ᨠᩮᩣᨲᩥ, ᨾᨬ᩠ᨧᩮᨶ ᩅᩣ ᨸᩦᨮᩮᨶ ᩅᩣ ᩈᨦ᩠ᨥᨾᨩ᩠ᨫᩴ ᩌᨶᩮᨲ᩠ᩅᩣ ᩏᨸᩮᩣᩈᨳᩮᩣ ᨠᩣᨲᨻ᩠ᨻᩮᩣ. ᩈᨧᩮ ᨣᩥᩃᩣᨶᩩᨸᨭ᩠ᨮᩣᨠᩣᨶᩴ ᨽᩥᨠ᩠ᨡᩪᨶᩴ ᩑᩅᩴ ᩉᩮᩣᨲᩥ ‘‘ᩈᨧᩮ ᨡᩮᩣ ᨾᨿᩴ ᩍᨾᩴ ᨣᩥᩃᩣᨶᩴ ᨮᩣᨶᩣ ᨧᩣᩅᩮᩔᩣᨾ, ᩌᨻᩣᨵᩮᩣ ᩅᩣ ᩋᨽᩥᩅᨯ᩠ᨰᩥᩔᨲᩥ, ᨠᩣᩃᨠᩥᩁᩥᨿᩣ ᩅᩣ ᨽᩅᩥᩔᨲᩦ’’ᨲᩥ, ᨶ ᨲ᩠ᩅᩮᩅ ᩈᩮᩣ ᨣᩥᩃᩣᨶᩮᩣ ᨮᩣᨶᩣ ᨧᩣᩅᩮᨲᨻ᩠ᨻᩮᩣ, ᩈᨦ᩠ᨥᩮᨶ ᨲᨲ᩠ᨳ ᨣᨶ᩠ᨲ᩠ᩅᩣ ᩏᨸᩮᩣᩈᨳᩮᩣ ᨠᩣᨲᨻ᩠ᨻᩮᩣ, ᨶ ᨲ᩠ᩅᩮᩅ ᩅᨣ᩠ᨣᩮᨶ ᩈᨦ᩠ᨥᩮᨶ ᩏᨸᩮᩣᩈᨳᩮᩣ ᨠᩣᨲᨻ᩠ᨻᩮᩣ. ᨠᩁᩮᨿ᩠ᨿ ᨧᩮ, ᩌᨸᨲ᩠ᨲᩥ ᨴᩩᨠ᩠ᨠᨭᩔ. ᩈᨧᩮ ᨻᩉᩪ ᨲᩣᨴᩥᩈᩣ ᨣᩥᩃᩣᨶᩣ ᩉᩮᩣᨶ᩠ᨲᩥ, ᩈᨦ᩠ᨥᩮᨶ ᨸᨭᩥᨸᩣᨭᩥᨿᩣ ᨮᨲ᩠ᩅᩣ ᩈᨻ᩠ᨻᩮ ᩉᨲ᩠ᨳᨸᩣᩈᩮ ᨠᩣᨲᨻ᩠ᨻᩣ. ᩈᨧᩮ ᨴᩪᩁᩮ ᨴᩪᩁᩮ ᩉᩮᩣᨶ᩠ᨲᩥ, ᩈᨦ᩠ᨥᩮᩣ ᨶᨸ᩠ᨸᩉᩮᩣᨲᩥ, ᨲᩴ ᨴᩥᩅᩈᩴ ᩏᨸᩮᩣᩈᨳᩮᩣ ᨶ ᨠᩣᨲᨻ᩠ᨻᩮᩣ, ᨶ ᨲ᩠ᩅᩮᩅ ᩅᨣ᩠ᨣᩮᨶ ᩈᨦ᩠ᨥᩮᨶ ᩏᨸᩮᩣᩈᨳᩮᩣ ᨠᩣᨲᨻ᩠ᨻᩮᩣ. ‘‘ᩋᨶᩩᨩᩣᨶᩣᨾᩥ, ᨽᩥᨠ᩠ᨡᩅᩮ, ᨲᨴᩉᩩᨸᩮᩣᩈᨳᩮ ᨸᩣᩁᩥᩈᩩᨴ᩠ᨵᩥᩴ ᨴᩮᨶ᩠ᨲᩮᨶ ᨨᨶ᩠ᨴᨾ᩠ᨸᩥ ᨴᩣᨲᩩᩴ, ᩈᨶ᩠ᨲᩥ ᩈᨦ᩠ᨥᩔ ᨠᩁᨱᩦᨿ’’ᨶ᩠ᨲᩥ (ᨾᩉᩣᩅ. ᪑᪖᪕) ᩅᩩᨲ᩠ᨲᨲ᩠ᨲᩣ ᨽᨣᩅᨲᩮᩣ ᩌᨱᩴ ᨠᩁᩮᩣᨶ᩠ᨲᩮᨶ ‘‘ᨨᨶ᩠ᨴᩴ ᨴᨾ᩠ᨾᩦ’’ᨲᩥ ᩅᩩᨲ᩠ᨲᩴ. ‘‘ᨨᨶ᩠ᨴᩉᩣᩁᨠᩮᩣ ᨧᩮ, ᨽᩥᨠ᩠ᨡᩅᩮ, ᨴᩥᨶ᩠ᨶᩮ ᨨᨶ᩠ᨴᩮ ᨲᨲ᩠ᨳᩮᩅ ᨸᨠ᩠ᨠᨾᨲᩥ, ᩋᨬ᩠ᨬᩔ ᨴᩣᨲᨻ᩠ᨻᩮᩣ ᨨᨶ᩠ᨴᩮᩣ’’ᨲᩥᩌᨴᩥᩅᨧᨶᨲᩮᩣ (ᨾᩉᩣᩅ. ᪑᪖᪕) ᨸᩩᨶ ᩋᨲ᩠ᨲᨶᩮᩣ ᨨᨶ᩠ᨴᨴᩣᨶᨸᩁᩥᩔᨾᩅᩥᨶᩮᩣᨴᨶᨲ᩠ᨳᩴ ‘‘ᨨᨶ᩠ᨴᩴ ᨾᩮ ᩉᩁᩣ’’ᨲᩥ ᩅᩩᨲ᩠ᨲᩴ. ‘‘ᨨᨶ᩠ᨴᩉᩣᩁᨠᩮᩣ ᨧᩮ, ᨽᩥᨠ᩠ᨡᩅᩮ, ᨴᩥᨶ᩠ᨶᩮ ᨨᨶ᩠ᨴᩮ ᩈᨦ᩠ᨥᨸ᩠ᨸᨲ᩠ᨲᩮᩣ ᩈᨬ᩠ᨧᩥᨧ᩠ᨧ ᨶ ᩌᩁᩮᩣᨧᩮᨲᩥ, ᩌᩉᨭᩮᩣ ᩉᩮᩣᨲᩥ ᨨᨶ᩠ᨴᩮᩣ, ᨨᨶ᩠ᨴᩉᩣᩁᨠᩔ ᩌᨸᨲ᩠ᨲᩥ ᨴᩩᨠ᩠ᨠᨭᩔᩣ’’ᨲᩥ (ᨾᩉᩣᩅ. ᪑᪖᪕) ᩅᩩᨲ᩠ᨲᨲ᩠ᨲᩣ ᨴᩩᨠ᩠ᨠᨭᨲᩮᩣ ᨲᩴ ᨾᩮᩣᨧᩮᨲᩩᩴ ‘‘ᨨᨶ᩠ᨴᩴ ᨾᩮ ᩌᩁᩮᩣᨧᩮᩉᩦ’’ᨲᩥ ᩅᩩᨲ᩠ᨲᩴ.

ᨠᩣᨿᩮᨶ ᩅᩣ ᩅᩣᨧᩣᨿ ᩅᩣ ᩏᨽᨿᩮᨶ ᩅᩣ ᩅᩥᨬ᩠ᨬᩣᨸᩮᨲᨻ᩠ᨻᩮᩣᨲᩥ ᨾᨶᩈᩣ ᨧᩥᨶ᩠ᨲᩮᨲ᩠ᩅᩣ ᨠᩣᨿᨸ᩠ᨸᨿᩮᩣᨣᩴ ᨠᩁᩮᩣᨶ᩠ᨲᩮᨶ ᨿᩮᨶ ᨠᩮᨶᨧᩥ ᩋᨦ᩠ᨣᨸᨧ᩠ᨧᨦ᩠ᨣᩮᨶ ᩅᩣ, ᩅᩣᨧᩴ ᨸᨶ ᨶᩥᨧ᩠ᨨᩣᩁᩮᨲᩩᩴ ᩈᨠ᩠ᨠᩮᩣᨶ᩠ᨲᩮᨶ ᨲᨳᩮᩅ ᩅᩣᨧᩣᨿ ᩅᩣ, ᩏᨽᨿᨳᩣᨸᩥ ᩈᨠ᩠ᨠᩮᩣᨶ᩠ᨲᩮᨶ ᨠᩣᨿᩅᩣᨧᩣᩉᩥ ᩅᩣ ᩅᩥᨬ᩠ᨬᩣᨸᩮᨲᨻ᩠ᨻᩮᩣ, ᨩᩣᨶᩣᨸᩮᨲᨻ᩠ᨻᩮᩣᨲᩥ ᩋᨲ᩠ᨳᩮᩣ. ‘‘ᩋᨿᩴ ᩋᨲ᩠ᨳᩮᩣ’’ᨲᩥ ᩅᨧᨶᨲᩮᩣ ᨸᨶ ᨿᩣᨿ ᨠᩣᨿᨧᩥᨸᩥ ᨽᩣᩈᩣᨿ ᩅᩥᨬ᩠ᨬᩣᨸᩮᨲᩩᩴ ᩅᨭ᩠ᨭᨲᩥ, ᨸᩣᩁᩥᩈᩩᨴ᩠ᨵᩥᨴᩣᨶᩮᨸᩥ ᨨᨶ᩠ᨴᨴᩣᨶᩮ ᩅᩩᨲ᩠ᨲᩈᨴᩥᩈᩮᩣᩅ ᩅᩥᨶᩥᨧ᩠ᨨᨿᩮᩣ. ᨲᩴ ᨸᨶ ᨴᩮᨶ᩠ᨲᩮᨶ ᨸᨮᨾᩴ ᩈᨶ᩠ᨲᩦ ᩌᨸᨲ᩠ᨲᩥ ᨴᩮᩈᩮᨲᨻ᩠ᨻᩣ. ᨶ ᩉᩥ ᩈᩣᨸᨲ᩠ᨲᩥᨠᩮᩣ ᩈᨾᩣᨶᩮᩣ ‘‘ᨸᩣᩁᩥᩈᩩᨴ᩠ᨵᩥᩴ ᨴᨾ᩠ᨾᩥ, ᨸᩣᩁᩥᩈᩩᨴ᩠ᨵᩥᩴ ᨾᩮ ᩉᩁ, ᨸᩣᩁᩥᩈᩩᨴ᩠ᨵᩥᩴ ᨾᩮ ᩌᩁᩮᩣᨧᩮᩉᩦ’’ᨲᩥ (ᨾᩉᩣᩅ. ᪑᪖᪔) ᩅᨲ᩠ᨲᩩᩴ ᩃᨽᨲᩥ. ‘‘ᩈᨶ᩠ᨲᩥ ᩈᨦ᩠ᨥᩔ ᨠᩁᨱᩦᨿᩣᨶᩦ’’ᨲᩥ ᩅᨲ᩠ᨲᨻ᩠ᨻᩮ ᩅᨧᨶᩅᩥᨸᩃ᩠ᩃᩣᩈᩮᨶ ‘‘ᩈᨶ᩠ᨲᩥ ᩈᨦ᩠ᨥᩔ ᨠᩁᨱᩦᨿ’’ᨶ᩠ᨲᩥ ᩅᩩᨲ᩠ᨲᩴ. ᨲᩮᩈᨬ᩠ᨧ ᩋᨲ᩠ᨲᨶᩮᩣ ᨧ ᨨᨶ᩠ᨴᨸᩣᩁᩥᩈᩩᨴ᩠ᨵᩥᩴ ᨴᩮᨲᩦᨲᩥ ᩑᨲ᩠ᨳ ᨨᨶ᩠ᨴᩮᩣ ᨧ ᨨᨶ᩠ᨴᨸᩣᩁᩥᩈᩩᨴ᩠ᨵᩥ ᨧ ᨨᨶ᩠ᨴᨸᩣᩁᩥᩈᩩᨴ᩠ᨵᩥ, ᨲᩴ ᨴᩮᨲᩦᨲᩥ ᩈᩁᩪᨸᩮᨠᩈᩮᩈᨶᨿᩮᨶ ᩋᨲ᩠ᨳᩮᩣ ᨴᨭ᩠ᨮᨻ᩠ᨻᩮᩣ. ᩍᨲᩁᩣᨲᩥ ᩋᨬ᩠ᨬᩮᩈᩴ ᨨᨶ᩠ᨴᨸᩣᩁᩥᩈᩩᨴ᩠ᨵᩥ. ᨻᩥᩊᩣᩃᩈᨦ᩠ᨡᩃᩥᨠᩣ ᨨᨶ᩠ᨴᨸᩣᩁᩥᩈᩩᨴ᩠ᨵᩦᨲᩥ ᩑᨲ᩠ᨳ ᨻᩥᩊᩣᩃᩈᨦ᩠ᨡᩃᩥᨠᩣ ᨶᩣᨾ ᨻᩥᩊᩣᩃᨻᨶ᩠ᨵᨶᩴ. ᨲᨲ᩠ᨳ ᩉᩥ ᩈᨦ᩠ᨡᩃᩥᨠᩣᨿ ᨸᨮᨾᩅᩃᨿᩴ ᨴᩩᨲᩥᨿᩅᩃᨿᩴᨿᩮᩅ ᨸᩣᨸᩩᨱᩣᨲᩥ, ᨶ ᨲᨲᩥᨿᩴ, ᩑᩅᨾᨿᨾ᩠ᨸᩥ ᨨᨶ᩠ᨴᨸᩣᩁᩥᩈᩩᨴ᩠ᨵᩥ ᨴᩣᨿᨠᩮᨶ ᨿᩔ ᨴᩥᨶ᩠ᨶᩣ, ᨲᨲᩮᩣ ᩋᨬ᩠ᨬᨲ᩠ᨳ ᨶ ᨣᨧ᩠ᨨᨲᩦᨲᩥ (ᩈᩣᩁᨲ᩠ᨳ. ᨭᩦ. ᨾᩉᩣᩅᨣ᩠ᨣ ᪓.᪑᪖᪔; ᩅᩥ. ᩅᩥ. ᨭᩦ. ᨾᩉᩣᩅᨣ᩠ᨣ ᪒.᪑᪖᪔). ᨲᩈ᩠ᨾᩣ ᩈᩣ ᨻᩥᩊᩣᩃᩈᨦ᩠ᨡᩃᩥᨠᩈᨴᩥᩈᨲ᩠ᨲᩣ ‘‘ᨻᩥᩊᩣᩃᩈᨦ᩠ᨡᩃᩥᨠᩣ’’ᨲᩥ ᩅᩩᨲ᩠ᨲᩣ. ᨻᩥᩊᩣᩃᩈᨦ᩠ᨡᩃᩥᨠᨣ᩠ᨣᩉᨱᨬ᩠ᨧᩮᨲ᩠ᨳ ᨿᩣᩈᩴ ᨠᩣᩈᨬ᩠ᨧᩥ ᩈᨦ᩠ᨡᩃᩥᨠᩣᨶᩴ ᩏᨸᩃᨠ᩠ᨡᨱᨾᨲ᩠ᨲᨶ᩠ᨲᩥ ᨴᨭ᩠ᨮᨻ᩠ᨻᩴ.

ᩏᨲᩩᨠ᩠ᨡᩣᨶᨶ᩠ᨲᩥ ᨲᩴ ᨲᩴ ᨠᩥᩁᩥᨿᩴ ᩋᩁᨲᩥ ᩅᨲ᩠ᨲᩮᨲᩦᨲᩥ ᩏᨲᩩ, ᨲᩔ ᩋᨠ᩠ᨡᩣᨶᩴ ᩏᨲᩩᨠ᩠ᨡᩣᨶᩴ, ᩏᨲᩩᩌᨧᩥᨠ᩠ᨡᨶᨶ᩠ᨲᩥ ᩋᨲ᩠ᨳᩮᩣ. ᨿᨳᩣ ᨧ ᨲᩔ ᩌᨧᩥᨠ᩠ᨡᨶᩴ, ᨲᩴ ᩈᩁᩪᨸᨲᩮᩣ ᨴᩔᩮᨲᩩᩴ ‘‘ᩉᩮᨾᨶ᩠ᨲᩣᨴᩦᨶ’’ᨶ᩠ᨲᩥᩌᨴᩥ ᩅᩩᨲ᩠ᨲᩴ. ᨣᨱᨶᩣᨲᩥ ᨠᩃᨶᩣ. ᨽᩥᨠ᩠ᨡᩩᨶᩦᨶᩴ ᩋᨭ᩠ᨮᨣᩁᩩᨵᨾ᩠ᨾᩮᩉᩥ ᩒᩅᨴᨶᩴ ᨽᩥᨠ᩠ᨡᩩᨶᩮᩣᩅᩣᨴᩮᩣ. ᩈ᩠ᩅᩮ ᩏᨸᩮᩣᩈᨳᩮᩣᨲᩥ ᩌᨣᨶ᩠ᨲ᩠ᩅᩣᨲᩥ ‘‘ᩈ᩠ᩅᩮ ᩏᨸᩮᩣᩈᨳᩮᩣ ᩉᩮᩣᨲᩦ’’ᨲᩥ ᩅᩩᨲ᩠ᨲᩮ ᩋᨩ᩠ᨩᩮᩅ ᩌᨣᨶ᩠ᨲ᩠ᩅᩣ ᨸᨶ᩠ᨶᩁᩈᩥᨠᩮ ᩏᨸᩮᩣᩈᨳᩮ ᨸᨠ᩠ᨡᩔ ᨧᩣᨲᩩᨴ᩠ᨴᩈᩥᨿᩴ, ᨧᩣᨲᩩᨴ᩠ᨴᩈᩥᨠᩮ ᨲᩮᩁᩈᩥᨿᩴ ᩌᨣᨶ᩠ᨲ᩠ᩅᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨾᩉᩣᨸᨧ᩠ᨧᩁᩥᨿᩴ ᨸᨶ ‘‘ᨸᨠ᩠ᨡᩔ ᨲᩮᩁᩈᩥᨿᩴᨿᩮᩅ ᩌᨣᨶ᩠ᨲ᩠ᩅᩣ ‘ᩋᨿᩴ ᩏᨸᩮᩣᩈᨳᩮᩣ ᨧᩣᨲᩩᨴ᩠ᨴᩈᩥᨠᩮᩣ ᩅᩣ ᨸᨶ᩠ᨶᩁᩈᩥᨠᩮᩣ ᩅᩣ’ᨲᩥ ᨸᩩᨧ᩠ᨨᩥᨲᨻ᩠ᨻ’’ᨶ᩠ᨲᩥ (ᨸᩣᨧᩥ. ᩋᨭ᩠ᨮ. ᪑᪔᪙) ᩅᩩᨲ᩠ᨲᩴ. ᩑᩅᩴ ᨸᩩᨧ᩠ᨨᩥᨲᩮᨶ ᨧ ᨽᩥᨠ᩠ᨡᩩᨶᩣ ᩈᨧᩮ ᨧᩣᨲᩩᨴ᩠ᨴᩈᩥᨿᩴ ᩏᨸᩮᩣᩈᨳᩴ ᨠᩁᩮᩣᨶ᩠ᨲᩥ, ‘‘ᨧᩣᨲᩩᨴ᩠ᨴᩈᩥᨠᩮᩣ ᨽᨣᩥᨶᩦ’’ᨲᩥ ᩅᨲ᩠ᨲᨻ᩠ᨻᩴ. ᩈᨧᩮ ᨸᨶ᩠ᨶᩁᩈᩥᨿᩴ ᨠᩁᩮᩣᨶ᩠ᨲᩥ, ‘‘ᨸᨶ᩠ᨶᩁᩈᩥᨠᩮᩣ ᨽᨣᩥᨶᩦ’’ᨲᩥ ᩅᨲ᩠ᨲᨻ᩠ᨻᩴ. ‘‘ᩋᨶᩩᨩᩣᨶᩣᨾᩥ, ᨽᩥᨠ᩠ᨡᩅᩮ, ᨮᨸᩮᨲ᩠ᩅᩣ ᨻᩣᩃᩴ, ᨮᨸᩮᨲ᩠ᩅᩣ ᨣᩥᩃᩣᨶᩴ, ᨮᨸᩮᨲ᩠ᩅᩣ ᨣᨾᩥᨠᩴ ᩋᩅᩈᩮᩈᩮᩉᩥ ᩒᩅᩣᨴᩴ ᨣᩉᩮᨲᩩ’’ᨶ᩠ᨲᩥ (ᨧᩪᩊᩅ. ᪔᪑᪔) ᩅᩩᨲ᩠ᨲᨲ᩠ᨲᩣ ‘‘ᨲᩴ ᨮᨸᩮᨲ᩠ᩅᩣ’’ᨲᩥᩌᨴᩥᨾᩣᩉ. ᨲᨲ᩠ᨳ ᩌᩁᩮᩣᨧᨶᩅᩥᨵᩣᨶᩴ ᩋᨩᩣᨶᨶ᩠ᨲᩮᩣ ᨻᩣᩃᩮᩣ. ᨧᩣᨲᩩᨴ᩠ᨴᩈᩥᨠᨸᨶ᩠ᨶᩁᩈᩥᨠᩮᩈᩩ ᩏᨸᩮᩣᩈᨳᩮᩈᩩ ᩅᩣ ᨸᩣᨭᩥᨸᨴᩮ ᩅᩣ ᨣᨶ᩠ᨲᩩᨠᩣᨾᩮᩣ ᨣᨾᩥᨿᩮᩣ, ᨴᩩᨲᩥᨿᨸᨠ᩠ᨡᨴᩥᩅᩈᨲᩮᩣ ᨸᨶ ᨸᨭ᩠ᨮᩣᨿ ᨲᨲᩮᩣ ᩏᨴ᩠ᨵᩴ ᨣᨧ᩠ᨨᨶ᩠ᨲᩮᩣ ᩍᨵ ᨣᨾᩥᨿᩮᩣ ᨶᩣᨾ ᨶ ᩉᩮᩣᨲᩥ. ᩋᩁᨬ᩠ᨬᩮ ᨶᩥᩅᩣᩈᩮᩣ ᩋᩔᩣᨲᩥ ᩌᩁᨬ᩠ᨬᩥᨠᩮᩣ. ᩈᩮᩣᨸᩥ ‘‘ᩋᩉᩴ ᩋᩁᨬ᩠ᨬᩅᩣᩈᩦ, ᩈ᩠ᩅᩮ ᩏᨸᩮᩣᩈᨳᩮᩣ, ᩅᩥᩉᩣᩁᩮ ᨶ ᩅᩈᩣᨾᩦ’’ᨲᩥ ᩋᨸ᩠ᨸᨭᩥᨣ᩠ᨣᩉᩥᨲᩩᩴ ᨶ ᩃᨽᨲᩥ. ᨿᨴᩥ ᨶ ᨣᨱ᩠ᩉᩮᨿ᩠ᨿ, ᨴᩩᨠ᩠ᨠᨭᩴ ᩌᨸᨩ᩠ᨩᩮᨿ᩠ᨿ. ᩅᩩᨲ᩠ᨲᨬ᩠ᩉᩮᨲᩴ ‘‘ᨶ, ᨽᩥᨠ᩠ᨡᩅᩮ, ᩒᩅᩣᨴᩮᩣ ᨶ ᨣᩉᩮᨲᨻ᩠ᨻᩮᩣ, ᨿᩮᩣ ᨶ ᨣᨱ᩠ᩉᩮᨿ᩠ᨿ, ᩌᨸᨲ᩠ᨲᩥ ᨴᩩᨠ᩠ᨠᨭᩔᩣ’’ᨲᩥ (ᨧᩪᩊᩅ. ᪔᪑᪔). ᨲᩮᨶ ᨸᨶ ᨸᨧ᩠ᨧᩣᩉᩁᨱᨲ᩠ᨳᩣᨿ ᩈᨦ᩠ᨠᩮᨲᩮᩣ ᨠᩣᨲᨻ᩠ᨻᩮᩣ. ᩅᩩᨲ᩠ᨲᨬ᩠ᩉᩮᨲᩴ ‘‘ᩋᨶᩩᨩᩣᨶᩣᨾᩥ, ᨽᩥᨠ᩠ᨡᩅᩮ, ᩌᩁᨬ᩠ᨬᩥᨠᩮᨶ ᨽᩥᨠ᩠ᨡᩩᨶᩣ ᩒᩅᩣᨴᩴ ᨣᩉᩮᨲᩩᩴ, ᩈᨦ᩠ᨠᩮᨲᨬ᩠ᨧ ᨠᩣᨲᩩᩴ ᩋᨲᩕ ᨸᨲᩥᩉᩁᩥᩔᩣᨾᩦ’’ᨲᩥ (ᨧᩪᩊᩅ. ᪔᪑᪕). ᨲᩈ᩠ᨾᩣ ᩌᩁᨬ᩠ᨬᩥᨠᩮᨶ ᨽᩥᨠ᩠ᨡᩩᨶᩣ ᩈᨧᩮ ᨽᩥᨠ᩠ᨡᩩᨶᩦᨶᩴ ᩅᩈᨶᨣᩣᨾᩮ ᨽᩥᨠ᩠ᨡᩣ ᩃᨻ᩠ᨽᨲᩥ, ᨲᨲ᩠ᨳᩮᩅ ᨧᩁᩥᨲ᩠ᩅᩣ ᨽᩥᨠ᩠ᨡᩩᨶᩥᨿᩮᩣ ᨴᩥᩈ᩠ᩅᩣ ᩌᩁᩮᩣᨧᩮᨲ᩠ᩅᩣ ᨣᨶ᩠ᨲᨻ᩠ᨻᩴ. ᨶᩮᩣ ᨧᩔ ᨲᨲ᩠ᨳ ᨽᩥᨠ᩠ᨡᩣ ᩈᩩᩃᨽᩣ ᩉᩮᩣᨲᩥ, ᩈᩣᨾᨶ᩠ᨲᨣᩣᨾᩮ ᨧᩁᩥᨲ᩠ᩅᩣ ᨽᩥᨠ᩠ᨡᩩᨶᩦᨶᩴ ᨣᩣᨾᩴ ᩌᨣᨾ᩠ᨾ ᨲᨳᩮᩅ ᨠᩣᨲᨻ᩠ᨻᩴ. ᩈᨧᩮ ᨴᩪᩁᩴ ᨣᨶ᩠ᨲᨻ᩠ᨻᩴ ᩉᩮᩣᨲᩥ, ᩈᨦ᩠ᨠᩮᨲᩮᩣ ᨠᩣᨲᨻ᩠ᨻᩮᩣ ‘‘ᩋᩉᩴ ᩋᩈᩩᨠᩴ ᨶᩣᨾ ᨲᩩᨾ᩠ᩉᩣᨠᩴ ᨣᩣᨾᨴ᩠ᩅᩣᩁᩮ ᩈᨽᩴ ᩅᩣ ᨾᨱ᩠ᨯᨸᩴ ᩅᩣ ᩁᩩᨠ᩠ᨡᨾᩪᩃᩴ ᩅᩣ ᩏᨸᩈᨦ᩠ᨠᨾᩥᩔᩣᨾᩥ, ᨲᨲᩕ ᩌᨣᨧ᩠ᨨᩮᨿ᩠ᨿᩣᨳᩣ’’ᨲᩥ. ᨽᩥᨠ᩠ᨡᩩᨶᩦᩉᩥ ᨲᨲᩕ ᨣᨶ᩠ᨲᨻ᩠ᨻᩴ, ᩋᨣᨶ᩠ᨲᩩᩴ ᨶ ᩃᨻ᩠ᨽᨲᩥ. ᩅᩩᨲ᩠ᨲᨬ᩠ᩉᩮᨲᩴ ‘‘ᨶ, ᨽᩥᨠ᩠ᨡᩅᩮ, ᨽᩥᨠ᩠ᨡᩩᨶᩥᨿᩣ ᩈᨦ᩠ᨠᩮᨲᩴ ᨶ ᨣᨶ᩠ᨲᨻ᩠ᨻᩴ, ᨿᩣ ᨶ ᨣᨧ᩠ᨨᩮᨿ᩠ᨿ, ᩌᨸᨲ᩠ᨲᩥ ᨴᩩᨠ᩠ᨠᨭᩔᩣ’’ᨲᩥ (ᨧᩪᩊᩅ. ᪔᪑᪕). ᩏᨸᩮᩣᩈᨳᨣ᩠ᨣᩮᨲᩥ ᩏᨸᩮᩣᩈᨳᨠᩁᨱᨭ᩠ᨮᩣᨶᩮ. ᩋᨭ᩠ᨮᩉᩥ ᩋᨦ᩠ᨣᩮᩉᩦᨲᩥ –

‘‘ᩈᩦᩃᩅᩣ ᩉᩮᩣᨲᩥ, ᨸᩣᨲᩥᨾᩮᩣᨠ᩠ᨡᩈᩴᩅᩁᩈᩴᩅᩩᨲᩮᩣ ᩅᩥᩉᩁᨲᩥ ᩌᨧᩣᩁᨣᩮᩣᨧᩁᩈᨾ᩠ᨸᨶ᩠ᨶᩮᩣ, ᩋᨱᩩᨾᨲ᩠ᨲᩮᩈᩩ ᩅᨩ᩠ᨩᩮᩈᩩ ᨽᨿᨴᩔᩣᩅᩦ ᩈᨾᩣᨴᩣᨿ ᩈᩥᨠ᩠ᨡᨲᩥ ᩈᩥᨠ᩠ᨡᩣᨸᨴᩮᩈᩩ. ᨻᩉᩩᩔᩩᨲᩮᩣ ᩉᩮᩣᨲᩥ ᩈᩩᨲᨵᩁᩮᩣ ᩈᩩᨲᩈᨶ᩠ᨶᩥᨧᨿᩮᩣ, ᨿᩮ ᨲᩮ ᨵᨾ᩠ᨾᩣ ᩌᨴᩥᨠᩃ᩠ᨿᩣᨱᩣ ᨾᨩ᩠ᨫᩮᨠᩃ᩠ᨿᩣᨱᩣ ᨸᩁᩥᨿᩮᩣᩈᩣᨶᨠᩃ᩠ᨿᩣᨱᩣ ᩈᩣᨲ᩠ᨳᩴ ᩈᨻ᩠ᨿᨬ᩠ᨩᨶᩴ ᨠᩮᩅᩃᨸᩁᩥᨸᩩᨱ᩠ᨱᩴ ᨸᩁᩥᩈᩩᨴ᩠ᨵᩴ ᨻᩕᩉ᩠ᨾᨧᩁᩥᨿᩴ ᩋᨽᩥᩅᨴᨶ᩠ᨲᩥ, ᨲᨳᩣᩁᩪᨸᩣᩔ ᨵᨾ᩠ᨾᩣ ᨻᩉᩩᩔᩩᨲᩣ ᩉᩮᩣᨶ᩠ᨲᩥ, ᨵᩣᨲᩣ ᩅᨧᩈᩣ ᨸᩁᩥᨧᩥᨲᩣ, ᨾᨶᩈᩣ ᩋᨶᩩᨸᩮᨠ᩠ᨡᩥᨲᩣ, ᨴᩥᨭ᩠ᨮᩥᨿᩣ ᩈᩩᨸ᩠ᨸᨭᩥᩅᩥᨴ᩠ᨵᩣ. ᩏᨽᨿᩣᨶᩥ ᨡᩮᩣ ᨸᨶᩔ ᨸᩣᨲᩥᨾᩮᩣᨠ᩠ᨡᩣᨶᩥ ᩅᩥᨲ᩠ᨳᩣᩁᩮᨶ ᩈ᩠ᩅᩣᨣᨲᩣᨶᩥ ᩉᩮᩣᨶ᩠ᨲᩥ ᩈᩩᩅᩥᨽᨲ᩠ᨲᩣᨶᩥ ᩈᩩᨸ᩠ᨸᩅᨲ᩠ᨲᩦᨶᩥ ᩈᩩᩅᩥᨶᩥᨧ᩠ᨨᩥᨲᩣᨶᩥ ᩈᩩᨲ᩠ᨲᩈᩮᩣ ᩋᨶᩩᨻ᩠ᨿᨬ᩠ᨩᨶᩈᩮᩣ. ᨠᩃ᩠ᨿᩣᨱᩅᩣᨧᩮᩣ ᩉᩮᩣᨲᩥ ᨠᩃ᩠ᨿᩣᨱᩅᩣᨠ᩠ᨠᩁᨱᩮᩣ. ᨿᩮᨽᩩᨿ᩠ᨿᩮᨶ ᨽᩥᨠ᩠ᨡᩩᨶᩦᨶᩴ ᨸᩥᨿᩮᩣ ᩉᩮᩣᨲᩥ ᨾᨶᩣᨸᩮᩣ. ᨸᨭᩥᨻᩃᩮᩣ ᩉᩮᩣᨲᩥ ᨽᩥᨠ᩠ᨡᩩᨶᩥᨿᩮᩣ ᩒᩅᨴᩥᨲᩩᩴ. ᨶ ᨡᩮᩣ ᨸᨶᩮᨲᩴ ᨽᨣᩅᨶ᩠ᨲᩴ ᩏᨴ᩠ᨴᩥᩔ ᨸᨻ᩠ᨻᨩᩥᨲᩣᨿ ᨠᩣᩈᩣᨿᩅᨲ᩠ᨳᩅᩈᨶᩣᨿ ᨣᩁᩩᨵᨾ᩠ᨾᩴ ᩋᨩ᩠ᨫᩣᨸᨶ᩠ᨶᨸᩩᨻ᩠ᨻᩮᩣ ᩉᩮᩣᨲᩥ. ᩅᩦᩈᨲᩥᩅᩔᩮᩣ ᩅᩣ ᩉᩮᩣᨲᩥ ᩋᨲᩥᩁᩮᨠᩅᩦᩈᨲᩥᩅᩔᩮᩣ ᩅᩣ’’ᨲᩥ (ᨸᩣᨧᩥ. ᪑᪔᪗) –

ᩍᨾᩮᩉᩥ ᩋᨭ᩠ᨮᩉᩥ ᩋᨦ᩠ᨣᩮᩉᩥ. ᨸᩣᩈᩣᨴᩥᨠᩮᨶᩣᨲᩥ ᨸᩈᩣᨴᩣᩅᩉᩮᨶ ᨶᩥᨴ᩠ᨴᩮᩣᩈᩮᨶ ᨠᩣᨿᩅᨧᩦᨾᨶᩮᩣᨠᨾ᩠ᨾᩮᨶ. ᩈᨾ᩠ᨸᩣᨴᩮᨲᩪᨲᩥ ᨲᩥᩅᩥᨵᩴ ᩈᩥᨠ᩠ᨡᩴ ᩈᨾ᩠ᨸᩣᨴᩮᨲᩩ. ᨿᨴᩣ ᨸᨶ ᨲᩣᩉᩥ ᨽᩥᨠ᩠ᨡᩩᨶᩦᩉᩥ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᨠᩴᨿᩮᩅ ᨴᩥᩈ᩠ᩅᩣ ᩒᩅᩣᨴᩮᩣ ᨿᩣᨧᩥᨲᩮᩣ, ᨲᨴᩣ ᩏᨸᩮᩣᩈᨳᨣ᩠ᨣᩮ ᩈᨶ᩠ᨶᩥᨸᨲᩥᨲᩮᩉᩥ ᨽᩥᨠ᩠ᨡᩩᩈᨦ᩠ᨥᩮᩉᩥ ᨸᩩᨻ᩠ᨻᨠᩥᨧ᩠ᨧᩅᩈᩮᨶ ‘‘ᩋᨲ᩠ᨳᩥ ᨠᩣᨧᩥ ᨽᩥᨠ᩠ᨡᩩᨶᩥᨿᩮᩣ ᩒᩅᩣᨴᩴ ᨿᩣᨧᨾᩣᨶᩣ’’ᨲᩥ ᨸᩩᨧ᩠ᨨᩥᨲᩮ ‘‘ᩑᩅᩴ ᩅᨴᩮᩉᩦ’’ᨲᩥ ᩋᨲ᩠ᨲᨶᩣ ᩅᨲ᩠ᨲᨻ᩠ᨻᩅᨧᨶᩴ ᩋᨬ᩠ᨬᩮᨶ ᨠᨳᩣᨸᩮᨲ᩠ᩅᩣ ‘‘ᩋᨲ᩠ᨳᩥ ᨠᩮᩣᨧᩥ ᨽᩥᨠ᩠ᨡᩩ ᨽᩥᨠ᩠ᨡᩩᨶᩮᩣᩅᩣᨴᨠᩮᩣ ᩈᨾ᩠ᨾᨲᩮᩣ’’ᨲᩥᩌᨴᩥᩴ ᩈᨿᩴ ᩅᨲ᩠ᩅᩣ ᨸᩩᨶ ᩈᨿᨾᩮᩅ ᨣᨶ᩠ᨲ᩠ᩅᩣ ᨽᩥᨠ᩠ᨡᩩᨶᩦᨶᩴ ᩌᩁᩮᩣᨧᩮᨲᨻ᩠ᨻᩴ. ᩋᨬ᩠ᨬᩮᨶ ᩅᩣ ᨽᩥᨠ᩠ᨡᩩᨶᩣ ᨲᩈ᩠ᨾᩥᩴ ᨴᩥᩅᩈᩮ ᨸᩣᨲᩥᨾᩮᩣᨠ᩠ᨡᩴ ᩏᨴ᩠ᨴᩥᩈᩣᨸᩮᨲᨻ᩠ᨻᩴ. ᩍᨴᨶ᩠ᨲᩥ ‘‘ᨲᩣᩉᩦ’’ᨲᩥ ᨻᩉᩩᩅᨧᨶᩴ. ᩑᨠᨲᩮᩣ ᩈᩉᩮᩅ.

ᨬᨲ᩠ᨲᩥᨭ᩠ᨮᨸᨠᩮᨶ ᩅᩣᨲᩥ ᨿᨲ᩠ᨳ ᨲᩥᨱ᩠ᨱᩴ ᩅᩈᨶᨭ᩠ᨮᩣᨶᩮ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩮᩣ ᨶᨲ᩠ᨳᩥ, ᨲᨲ᩠ᨳ ᨬᨲ᩠ᨲᩥᨭ᩠ᨮᨸᨶᨠᩮᨶ ᩅᩣ. ᩍᨲᩁᩮᨶ ᩅᩣᨲᩥ ᨿᨲ᩠ᨳ ᨴ᩠ᩅᩮ ᨽᩥᨠ᩠ᨡᩪ ᩅᩈᨶ᩠ᨲᩥ, ᩑᨠᩮᩣ ᩅᩣ, ᨲᨲ᩠ᨳ ᩍᨲᩁᩮᨶ ᩅᩣ ᨽᩥᨠ᩠ᨡᩩᨶᩣ ᩈᨧᩮ ᩈᨿᨾᩮᩅ ᩈᨾ᩠ᨾᨲᩮᩣ, ‘‘ᩋᩉ’’ᨶ᩠ᨲᩥ ᩅᨲ᩠ᨲᨻ᩠ᨻᩴ. ᨲᨳᩮᩅᩣᨲᩥ ᩏᨸᩮᩣᩈᨳᨣ᩠ᨣᩮ ᩅᩩᨲ᩠ᨲᩈᨴᩥᩈᨾᩮᩅ. ‘‘ᩌᩁᩮᩣᨧᩮᨲ᩠ᩅᩣᩅᩣ’’ᨲᩥ ᩍᨾᩥᨶᩣ ᩋᨶᩣᩁᩮᩣᨧᨶᩴ ᨸᨭᩥᨠ᩠ᨡᩥᨸᨲᩥ. ‘‘ᨶ, ᨽᩥᨠ᩠ᨡᩅᩮ, ᩒᩅᩣᨴᩮᩣ ᨶ ᩌᩁᩮᩣᨧᩮᨲᨻ᩠ᨻᩮᩣ, ᨿᩮᩣ ᨶ ᩌᩁᩮᩣᨧᩮᨿ᩠ᨿ, ᩌᨸᨲ᩠ᨲᩥ ᨴᩩᨠ᩠ᨠᨭᩔᩣ’’ᨲᩥ (ᨧᩪᩊᩅ. ᪔᪑᪕) ᩅᨧᨶᨲᩮᩣ ᩒᩅᩣᨴᩴ ᨣᩉᩮᨲ᩠ᩅᩣ ᩏᨸᩮᩣᩈᨳᨣ᩠ᨣᩮ ᩋᨶᩣᩁᩮᩣᨧᩮᨲᩩᩴ ᨶ ᩅᨭ᩠ᨭᨲᩥ.

ᨸᩁᩥᩈᩩᨴ᩠ᨵᨽᩣᩅᨶ᩠ᨲᩥ ᩌᨸᨲ᩠ᨲᩥᨿᩣ ᨸᩁᩥᩈᩩᨴ᩠ᨵᨲᩴ. ᩌᩁᩮᩣᨧᩮᨳᩣᨲᩥ ᩌᩅᩥ ᨠᩁᩮᩣᨳ. ᩑᨲ᩠ᨳ ᩈᩥᨿᩣᨲᩥ ‘‘ᨸᩣᨲᩥᨾᩮᩣᨠ᩠ᨡᩴ ᩏᨴ᩠ᨴᩥᩈᩥᩔᩣᨾᩦ’’ᨲᩥ ᩑᨲᩈ᩠ᨾᩥᩴ ᨸᨴᩮ ᩋᨿᨾᨶᩩᨿᩮᩣᨣᩮᩣ ᨽᩅᩮᨿ᩠ᨿ. ᨠᩥᩴ ᨲᩴ, ᨿᩴ ᩈᩥᨿᩣᨲᩥ ᩌᩉ ‘‘ᩈᨦ᩠ᨥᩮᩣ ᩏᨸᩮᩣᩈᨳᩴ ᨠᩁᩮᨿ᩠ᨿᩣ’’ᨲᩥᩌᨴᩥ. ᨸᩩᨻ᩠ᨻᩮᨶᩣᨸᩁᩴ ᩈᨶ᩠ᨵᩥᨿᨲᩦᨲᩥ ᨸᩩᨻ᩠ᨻᩅᨧᨶᩮᨶ ᩋᨸᩁᩴ ᩅᨧᨶᩴ ᩈᨶ᩠ᨵᩣᨶᩴ ᨣᨧ᩠ᨨᨲᩥ. ᩈᩣᨾᨣ᩠ᨣᩥᨿᩣᨲᩥ ᨠᩣᨿᨧᩥᨲ᩠ᨲᩮᩉᩥ ᩈᩉᩥᨲᨲᩣᨿ. ᨣᨱᩔᩣᨲᩥ ᩏᨴ᩠ᨴᩮᩈᨠᩴ ᨮᨸᩮᨲ᩠ᩅᩣ ᨧᨲᩩᩅᨣ᩠ᨣᩮ ᩈᩮᩈᨽᩥᨠ᩠ᨡᩪᨶᩴ. ᩈᨦ᩠ᨥᩔ ᩏᨴ᩠ᨴᩥᨭ᩠ᨮᩴ ᩉᩮᩣᨲᩦᨲᩥ ᩈᨦ᩠ᨥᩮᨶ ᩏᨴ᩠ᨴᩥᨭ᩠ᨮᩴ ᩉᩮᩣᨲᩥ. ᨠᩁᨱᨲ᩠ᨳᩮ ᨧᩮᨲᩴ ᩈᩣᨾᩥᩅᨧᨶᩴ. ᩑᨲ᩠ᨳᩣᨲᩥ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩮ. ᩃᨠ᩠ᨡᨱᨶ᩠ᨲᩥ ᩈᨽᩣᩅᩮᩣ.

ᨳᩮᩁᩣ ᨧ ᨶᩅᩣ ᨧ ᨾᨩ᩠ᨫᩥᨾᩣ ᨧᩣᨲᩥ ᩑᨲ᩠ᨳ ᨴᩈᩅᩔᩣ, ᩋᨲᩥᩁᩮᨠᨴᩈᩅᩔᩣ ᨧ ᨳᩮᩁᩣ. ᩐᨶᨸᨬ᩠ᨧᩅᩔᩣ ᨶᩅᩣ. ᨸᨬ᩠ᨧᩅᩔᩣ, ᩋᨲᩥᩁᩮᨠᨸᨬ᩠ᨧᩅᩔᩣ ᨧ ᨾᨩ᩠ᨫᩥᨾᩣ. ᩋᨭ᩠ᨮᩥᩴ ᨠᨲ᩠ᩅᩣᨲᩥ ᩋᨲ᩠ᨲᩣᨶᩴ ᨲᩮᨶ ᨸᩣᨲᩥᨾᩮᩣᨠ᩠ᨡᩮᨶ ᩋᨲ᩠ᨳᩥᨠᩴ ᨠᨲ᩠ᩅᩣ, ᨲᩴ ᩅᩣ ᨸᩣᨲᩥᨾᩮᩣᨠ᩠ᨡᩴ ‘‘ᩍᨴᩴ ᨾᨿ᩠ᩉᩴ ᨸᩣᨲᩥᨾᩮᩣᨠ᩠ᨡ’’ᨶ᩠ᨲᩥ ᩋᨲ᩠ᨳᩥᩴ ᨠᨲ᩠ᩅᩣ. ᨾᨶᩈᩥ ᨠᩁᩥᨲ᩠ᩅᩣᨲᩥ ᨧᩥᨲ᩠ᨲᩮ ᨮᨸᩮᨲ᩠ᩅᩣ. ᩈᩮᩣᨲᨴ᩠ᩅᩣᩁᩅᩈᩮᨶᩣᨲᩥ ᩈᩮᩣᨲᨴ᩠ᩅᩣᩁᩥᨠᨩᩅᨶᩅᩥᨬ᩠ᨬᩣᨱᩅᩈᩮᨶ. ᩈᨻ᩠ᨻᨧᩮᨲᩈᩣ ᩈᨾᨶ᩠ᨶᩣᩉᩁᩣᨾᩣᨲᩥ ᨧᩥᨲ᩠ᨲᩔ ᨳᩮᩣᨠᨾ᩠ᨸᩥ ᨻᩉᩥ ᨣᨶ᩠ᨲᩩᩴ ᩋᨴᩮᨶ᩠ᨲᩣ ᩈᨻ᩠ᨻᩮᨶ ᨧᩥᨲ᩠ᨲᩮᨶ ᩌᩅᨩ᩠ᨩᩮᨾ, ᩈᩃ᩠ᩃᨠ᩠ᨡᩮᨾᩣᨲᩥ ᩋᨲ᩠ᨳᩮᩣ. ᨾᨶᩈᩥ ᨠᩁᩮᩣᨾᩣᨲᩥ ᩌᩅᨩ᩠ᨩᩮᨾ, ᩈᨾᨶ᩠ᨶᩣᩉᩁᩣᨾᩣᨲᩥ ᩋᨲ᩠ᨳᩮᩣ. ᩈᩮᩣ ᨧ ᨡᩮᩣ ᨾᨶᩈᩥᨠᩣᩁᩮᩣ ᨶ ᩑᨲ᩠ᨳ ᩌᩁᨾ᩠ᨾᨱᨸ᩠ᨸᨭᩥᨸᩣᨴᨶᩃᨠ᩠ᨡᨱᩮᩣ, ᩋᨳ ᨡᩮᩣ ᩅᩦᨳᩥᨸ᩠ᨸᨭᩥᨸᩣᨴᨶᨩᩅᨶᨸ᩠ᨸᨭᩥᨸᩣᨴᨶᨾᨶᩈᩥᨠᩣᩁᨸᩩᨻ᩠ᨻᨠᨧᩥᨲ᩠ᨲᩮ ᨮᨸᨶᩃᨠ᩠ᨡᨱᩮᩣᨲᩥ ᩌᩉ ‘‘ᩑᨠᨣ᩠ᨣᨧᩥᨲ᩠ᨲᩣ ᩉᩩᨲ᩠ᩅᩣ ᨧᩥᨲ᩠ᨲᩮ ᨮᨸᩮᨿ᩠ᨿᩣᨾᩣ’’ᨲᩥ. ᨶ ᩈᨾᩮᨲᩦᨲᩥ ᨶ ᩈᩴᨣᨧ᩠ᨨᨲᩥ. ᨠᩈ᩠ᨾᩣ ᨶ ᩈᩴᨣᨧ᩠ᨨᨲᩦᨲᩥ ᩌᩉ ‘‘ᩈᨾᨣ᩠ᨣᩔ ᩉᩦ’’ᨲᩥᩌᨴᩥ. ᨠᩥᨬ᩠ᨧ ᨽᩥᨿ᩠ᨿᩮᩣᨲᩥ ᩌᩉ ‘‘ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᨠᩮᩣ ᨧᩣ’’ᨲᩥᩌᨴᩥ. ᩈᨦ᩠ᨥᨸᩁᩥᨿᩣᨸᨶ᩠ᨶᩮᩣᨲᩥ ᩈᨦ᩠ᨥᩮ ᨸᩁᩥᨿᩣᨸᨶ᩠ᨶᩮᩣ ᩋᨶ᩠ᨲᩮᩣᨣᨵᩮᩣ.

ᩍᨴᩣᨶᩥ ᨲᩴ ᨴᩔᩮᨲᩩᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᩌᨿᩈ᩠ᨾᨶ᩠ᨲᩮᩣᨲᩥ ᩈᨶ᩠ᨶᩥᨸᨲᩥᨲᩣᨶᩴ ᨸᩥᨿᩅᨧᨶᩮᨶ ᩌᩃᨸᨶᩴ.

ᩋᩃᨩ᩠ᨩᩥᨲᩣᨲᩥ ᩋᩃᨩ᩠ᨩᩥᨲᩣᨿ, ᩋᩃᨩ᩠ᨩᨶᨽᩣᩅᩮᨶᩣᨲᩥ ᩋᨲ᩠ᨳᩮᩣ. ᨲᨲᩥᨿᨲ᩠ᨳᩮ ᩉᩥ ᩍᨴᩴ ᨸᨧ᩠ᨧᨲ᩠ᨲᩅᨧᨶᩴ. ‘‘ᩋᨬ᩠ᨬᩣᨱᨲᩣ’’ᨲᩥᩌᨴᩦᩈᩩᨸᩥ ᩑᩈᩮᩅ ᨶᨿᩮᩣ. ᨠᩩᨠ᩠ᨠᩩᨧ᩠ᨧᨸ᩠ᨸᨠᨲᨲᩣᨲᩥ ᨠᩩᨠ᩠ᨠᩩᨧ᩠ᨧᩮᨶ ᩋᨽᩥᨽᩪᨲᨲᩣᨿ. ᩈᨲᩥᩈᨾ᩠ᨾᩮᩣᩈᩣᨲᩥ ᩈᨲᩥᩅᩥᨸ᩠ᨸᩅᩣᩈᨲᩮᩣ. ᩅᩦᨲᩥᨠ᩠ᨠᨾᨶ᩠ᨲᩥ ᩈᩥᨠ᩠ᨡᩣᨸᨴᩅᩦᨲᩥᨠ᩠ᨠᨾᨶᩴ.

ᩈᨬ᩠ᨧᩥᨧ᩠ᨧᩣᨲᩥ ᩈᨬ᩠ᨧᩮᨲᩮᨲ᩠ᩅᩣ, ᩋᨠᨸ᩠ᨸᩥᨿᨽᩣᩅᩴ ᨩᩣᨶᨶ᩠ᨲᩮᩣᨿᩮᩅ ᩅᩦᨲᩥᨠ᩠ᨠᨾᨧᩥᨲ᩠ᨲᩴ ᨸᩮᩈᩮᨲ᩠ᩅᩣᨲᩥ ᩋᨲ᩠ᨳᩮᩣ. ᨸᩁᩥᨣᩪᩉᨲᩦᨲᩥ ᨶᩥᨣᩪᩉᨲᩥ ᨶ ᨴᩮᩈᩮᨲᩥ ᨶ ᩅᩩᨭ᩠ᨮᩣᨲᩥ. ᩃᨩ᩠ᨩᩣᨿ ᨸᩁᩥᨣᩪᩉᨶ᩠ᨲᩮᩣ ᩋᩃᨩ᩠ᨩᩦ ᨶ ᩉᩮᩣᨲᩥ, ‘‘ᨠᩥᩴ ᩍᨾᩥᨶᩣ’’ᨲᩥ ᩋᨶᩣᨴᩁᩥᨿᩮᨶ ᨸᩁᩥᨣᩪᩉᨶ᩠ᨲᩮᩣ ᩋᩃᨩ᩠ᨩᩦ ᩉᩮᩣᨲᩦᨲᩥ ᨴᩔᩮᨲᩥ. ᩋᨣᨲᩥᨣᨾᨶᨬ᩠ᨧ ᨣᨧ᩠ᨨᨲᩦᨲᩥ ᨽᨱ᩠ᨯᨽᩣᨩᨶᩦᨿᨭ᩠ᨮᩣᨶᩣᨴᩦᩈᩩ ᨨᨶ᩠ᨴᩣᨣᨲᩥᩌᨴᩥᨽᩮᨴᩴ ᩋᨣᨲᩥᨣᨾᨶᨬ᩠ᨧ ᨣᨧ᩠ᨨᨲᩥ. ᩋᩃᨩ᩠ᨩᩥᨸᩩᨣ᩠ᨣᩃᩮᩣᨲᩥ ᩋᨩ᩠ᨫᨲ᩠ᨲᩥᨠᩈᨾᩩᨭ᩠ᨮᩣᨶᩃᨩ᩠ᨩᩣᩅᩥᩁᩉᩥᨲᩮᩣ ᨸᩩᨣ᩠ᨣᩃᩮᩣ. ᩑᨲ᩠ᨳ ᨧ ‘‘ᩈᨬ᩠ᨧᩥᨧ᩠ᨧᩣ’’ᨲᩥ ᩍᨾᩥᨶᩣ ᩋᨶᩣᨴᩁᩥᨿᩅᩈᩮᨶᩮᩅ ᩌᨸᨲ᩠ᨲᩥᩴ ᩌᨸᨩ᩠ᨩᨶ᩠ᨲᩮᩣ, ᩌᨸᨶ᩠ᨶᨬ᩠ᨧ ᩌᨸᨲ᩠ᨲᩥᩴ ᨸᩁᩥᨣᩪᩉᨶ᩠ᨲᩮᩣ, ᨽᨱ᩠ᨯᨽᩣᨩᨶᩦᨿᨭ᩠ᨮᩣᨶᩣᨴᩦᩈᩩ ᩋᨣᨲᩥᨣᨾᨶᩴ ᨣᨧ᩠ᨨᨶ᩠ᨲᩮᩣ ᨧ ᩋᩃᨩ᩠ᨩᩦ ᩉᩮᩣᨲᩥ, ᨶ ᩍᨲᩁᩮᩣᨲᩥ ᨴᩔᩮᨲᩥ.

ᨾᨶ᩠ᨴᩮᩣᨲᩥ ᨾᨶ᩠ᨴᨸᨬ᩠ᨬᩮᩣ, ᩋᨸᨬ᩠ᨬᩔᩮᩅᩮᨲᩴ ᨶᩣᨾᩴ. ᨾᩮᩣᨾᩪᩉᩮᩣᨲᩥ ᩋᨲᩥᩈᩴᨾᩪᩊ᩠ᩉᩮᩣ. ᩅᩥᩁᩣᨵᩮᨲᩦᨲᩥ ᨶ ᩁᩣᨵᩮᨲᩥ ᨶ ᩈᩣᨵᩮᨲᩥ. ᨠᩩᨠ᩠ᨠᩩᨧ᩠ᨧᩮᨲᩥ ᩅᩥᨶᨿᩈᩴᩈᨿᩮ. ᨠᨸ᩠ᨸᩥᨿᩴ ᨧᩮ ᨠᨲ᩠ᨲᨻ᩠ᨻᩴ ᩈᩥᨿᩣᨲᩥ ᩅᩥᨶᨿᨵᩁᩴ ᨸᩩᨧ᩠ᨨᩥᨲ᩠ᩅᩣ ᨲᩮᨶ ᩅᨲ᩠ᨳᩩᩴ ᩒᩃᩮᩣᨠᩮᨲ᩠ᩅᩣ ᨾᩣᨲᩥᨠᩴ, ᨸᨴᨽᩣᨩᨶᩴ, ᩋᨶ᩠ᨲᩁᩣᨸᨲ᩠ᨲᩥᩴ, ᩋᨶᩣᨸᨲ᩠ᨲᩥᨬ᩠ᨧ ᩒᩃᩮᩣᨠᩮᨲ᩠ᩅᩣ ‘‘ᨠᨸ᩠ᨸᨲᩥ, ᩌᩅᩩᩈᩮᩣ, ᨾᩣ ᩑᨲ᩠ᨳ ᨠᨦ᩠ᨡᩦ’’ᨲᩥ ᩅᩩᨲ᩠ᨲᩮ ᨠᨲ᩠ᨲᨻ᩠ᨻᩴ ᨽᩅᩮᨿ᩠ᨿ.

ᩈᩉᩈᩮᨿ᩠ᨿᨧᩦᩅᩁᩅᩥᨸ᩠ᨸᩅᩣᩈᩣᨴᩦᨶᩦᨲᩥ ᩑᨲ᩠ᨳ ᩈᩉᩈᩮᨿ᩠ᨿᩣ ᨶᩣᨾ ᩋᨶᩩᨸᩈᨾ᩠ᨸᨶ᩠ᨶᩮᨶ ᩏᨲ᩠ᨲᩁᩥᨴᩥᩁᨲ᩠ᨲᨲᩥᩁᨲ᩠ᨲᩴ ᩈᩉᩈᩮᨿ᩠ᨿᩣᨸᨲ᩠ᨲᩥ, ᩅᩥᨸ᩠ᨸᩅᩣᩈᩮᩣ ᨶᩣᨾ ᩑᨠᩁᨲ᩠ᨲᨨᩣᩁᨲ᩠ᨲᩅᩈᩮᨶ ᩅᩥᨸ᩠ᨸᩅᩣᩈᩮᩣ. ᩌᨴᩥᩈᨴ᩠ᨴᩮᨶ ᩈᨲ᩠ᨲᩣᩉᩣᨲᩥᨠ᩠ᨠᨾᩣᨴᩦᩈᩩ ᩌᨸᨲ᩠ᨲᩥᩴ ᩈᨦ᩠ᨣᨱ᩠ᩉᩣᨲᩥ. ᩈᨲ᩠ᨲᨶ᩠ᨶᩴ ᩌᨸᨲ᩠ᨲᩥᨠ᩠ᨡᨶ᩠ᨵᩣᨶᨶ᩠ᨲᩥ ᨸᩣᩁᩣᨩᩥᨠᩈᨦ᩠ᨥᩣᨴᩥᩈᩮᩈᨳᩩᩃ᩠ᩃᨧ᩠ᨧᨿᨸᩣᨧᩥᨲ᩠ᨲᩥᨿᨸᩣᨭᩥᨴᩮᩈᨶᩦᨿᨴᩩᨠ᩠ᨠᨭᨴᩩᨻ᩠ᨽᩣᩈᩥᨲᩈᨦ᩠ᨡᩣᨲᩣᨶᩴ ᩈᨲ᩠ᨲᨶ᩠ᨶᩴ ᩌᨸᨲ᩠ᨲᩥᨠ᩠ᨡᨶ᩠ᨵᩣᨶᩴ.

ᨴᩮᩈᩮᨲᩩ ᩅᩣ ᨸᨠᩣᩈᩮᨲᩩ ᩅᩣᨲᩥ ᩈᨦ᩠ᨥᨾᨩ᩠ᨫᩮ ᩅᩣ ᨣᨱᨾᨩ᩠ᨫᩮ ᩅᩣ ᩑᨠᨸᩩᨣ᩠ᨣᩃᩮ ᩅᩣ ᨴᩮᩈᩮᨲᩩ ᩅᩣ ᨸᨠᩣᩈᩮᨲᩩ ᩅᩣ. ᩑᨲ᩠ᨳ ᨧ ᨸᩣᩁᩣᨩᩥᨠᩣᨸᨲ᩠ᨲᩥᨴᩮᩈᨶᩣ ᨶᩣᨾ ᨽᩥᨠ᩠ᨡᩩᨽᩣᩅᩔ ᨸᩁᩥᨧ᩠ᨧᩣᨣᩮᩣ. ᩅᩩᨭ᩠ᨮᩣᨶᩴ ᨸᨶ ᨴᩮᩈᨶᩣᩅᩥᩈᩮᩈᨲ᩠ᨲᩣ ‘‘ᨴᩮᩈᨶᩣ’’ᨲᩥ ᨴᨭ᩠ᨮᨻ᩠ᨻᩴ. ᨸᨠᩣᩈᩮᨲᩩ ᩅᩣᨲᩥ ᩌᩁᩮᩣᨧᩮᨲᩩ ᩅᩣ.

ᩑᩅᩴ ᩋᨶᩣᨸᨶ᩠ᨶᩣ ᩅᩣᨲᩥ ᩑᩅᩴ ᨨᨶ᩠ᨶᩴ ᩌᨠᩣᩁᩣᨶᩴ ᩋᨬ᩠ᨬᨲᩁᩮᨶ ᩋᨶᩣᨸᨶ᩠ᨶᩣ ᩅᩣ. ᩅᩩᨭ᩠ᨮᩥᨲᩣ ᩅᩣᨲᩥ ᨸᩁᩥᩅᩣᩈᩣᨴᩥᨶᩣ ᩅᩩᨭ᩠ᨮᩥᨲᩣ ᩅᩣ. ᩌᩁᩮᩣᨧᩥᨲᩣ ᩅᩣᨲᩥ ᩌᩅᩥᨠᨲᩣ ᩅᩣ. ᩌᩁᩮᩣᨧᩮᨶ᩠ᨲᩮᩣ ᨧ ‘‘ᨲᩩᨿ᩠ᩉᩴ ᩈᨶ᩠ᨲᩥᨠᩮ ᩑᨠᩴ ᩌᨸᨲ᩠ᨲᩥᩴ ᩌᩅᩥᨠᩁᩮᩣᨾᩦ’’ᨲᩥ ᩅᩣ ‘‘ᩌᨧᩥᨠ᩠ᨡᩣᨾᩦ’’ᨲᩥ ᩅᩣ ‘‘ᩌᩁᩮᩣᨧᩮᨾᩦ’’ᨲᩥ ᩅᩣ ‘‘ᨾᨾ ᩑᨠᩴ ᩌᨸᨲ᩠ᨲᩥᩴ ᩌᨸᨶ᩠ᨶᨽᩣᩅᩴ ᨩᩣᨶᩣᩉᩦ’’ᨲᩥ ᩅᩣ ᩅᨴᨲᩩ, ‘‘ᩑᨠᩴ ᨣᩁᩩᨠᩴ ᩌᨸᨲ᩠ᨲᩥᩴ ᩌᩅᩥᨠᩁᩮᩣᨾᩦ’’ᨲᩥ ᩅᩣ ᩌᨴᩥᨶᩣ ᨶᨿᩮᨶ ᩅᨴᨲᩩ, ᩈᨻ᩠ᨻᩮᩉᩥᨸᩥ ᩌᨠᩣᩁᩮᩉᩥ ᩌᩁᩮᩣᨧᩥᨲᩣᩅ ᩉᩮᩣᨲᩥ. ᩈᨧᩮ ᨸᨶ ᨣᩁᩩᨠᩣᨸᨲ᩠ᨲᩥᩴ ᩌᩅᩥᨠᩁᩮᩣᨶ᩠ᨲᩮᩣ ‘‘ᩃᩉᩩᨠᩣᨸᨲ᩠ᨲᩥᩴ ᩌᩅᩥᨠᩁᩮᩣᨾᩦ’’ᨲᩥᩌᨴᩥᨶᩣ ᨶᨿᩮᨶ ᩅᨴᨲᩥ, ᩋᨶᩣᩅᩥᨠᨲᩣ ᩉᩮᩣᨲᩥ ᩌᨸᨲ᩠ᨲᩥ. ᩅᨲ᩠ᨳᩩᩴ ᩌᩁᩮᩣᨧᩮᨲᩥ, ᩌᨸᨲ᩠ᨲᩥᩴ ᩌᩁᩮᩣᨧᩮᨲᩥ, ᩏᨽᨿᩴ ᩌᩁᩮᩣᨧᩮᨲᩥ, ᨲᩥᩅᩥᨵᩮᨶᩣᨸᩥ ᩌᩁᩮᩣᨧᩥᨲᩣᩅ ᩉᩮᩣᨲᩥ. ᩋᩈᨶ᩠ᨲᩥᨿᩣ ᩌᨸᨲ᩠ᨲᩥᨿᩣᨲᩥ ᨽᩣᩅᩮᨶᨽᩣᩅᩃᨠ᩠ᨡᨱᩮ ᨽᩩᨾ᩠ᨾᩴ. ᨲᩩᨱ᩠ᩉᩦᨽᩣᩅᩮᨶᩣᨸᩥ ᩉᩦᨲᩥ ᩑᨲ᩠ᨳ ᨶ ᨠᩮᩅᩃᩴ ‘‘ᩌᨾ, ᨾᨿᩴ ᨸᩁᩥᩈᩩᨴ᩠ᨵᩣ’’ᨲᩥ ᩅᩩᨲ᩠ᨲᩮᨿᩮᩅ, ᩋᨳ ᨡᩮᩣ ᨲᩩᨱ᩠ᩉᩦᨽᩣᩅᩮᨶᩣᨸᩦᨲᩥ ᩋᨸᩥᩈᨴ᩠ᨴᩔ ᩋᨲ᩠ᨳᩮᩣ ᩅᩮᨴᩥᨲᨻ᩠ᨻᩮᩣ.

ᨠᩥᩴ ᨲᩴ ᨿᩣᩅᨲᨲᩥᨿᩣᨶᩩᩈᩣᩅᩥᨲᩴ ᨶᩣᨾ, ᨠᨳᨬ᩠ᨧᩮᨲᩴ ᨿᩣᩅᨲᨲᩥᨿᩣᨶᩩᩈᩣᩅᩥᨲᩴ ᩉᩮᩣᨲᩦᨲᩥ ᩅᩥᨧᩣᩁᨱᩣᨿᩴ ᩌᨧᩁᩥᨿᩣᨶᩴ ᨾᨲᩥᨽᩮᨴᨾᩩᨡᩮᨶ ᨲᨾᨲ᩠ᨳᩴ ᨴᩔᩮᨲᩩᩴ ‘‘ᨿᩣᩅᨲᨲᩥᨿᩴ ᩋᨶᩩᩈᩣᩅᩥᨲᩴ ᩉᩮᩣᨲᩦᨲᩥ ᩑᨲ᩠ᨳᩣ’’ᨲᩥᩌᨴᩥ ᩅᩩᨲ᩠ᨲᩴ. ᨲᨲ᩠ᨳ ᨿᨴᩮᨲᩴ ᨲᩥᨠ᩠ᨡᨲ᩠ᨲᩩᩴ ᩋᨶᩩᩈᩣᩅᩥᨲᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᩋᨲ᩠ᨳᨻ᩠ᨿᨬ᩠ᨩᨶᨽᩮᨴᨲᩮᩣᨲᩥ ᩋᩁᩦᨿᨲᩥ ᨬᩣᨿᨲᩦᨲᩥ ᩋᨲ᩠ᨳᩮᩣ, ᩋᨽᩥᨵᩮᨿ᩠ᨿᩴ, ᨻ᩠ᨿᨬ᩠ᨩᩦᨿᨲᩥ ᩋᨲ᩠ᨳᩮᩣ ᩋᨶᩮᨶᩣᨲᩥ ᨻ᩠ᨿᨬ᩠ᨩᨶᩴ, ᩋᨠ᩠ᨡᩁᩴ, ᩋᨲ᩠ᨳᩮᩣ ᨧ ᨻ᩠ᨿᨬ᩠ᨩᨶᨬ᩠ᨧ ᩋᨲ᩠ᨳᨻ᩠ᨿᨬ᩠ᨩᨶᩣᨶᩥ, ᨲᩮᩈᩴ ᨽᩮᨴᩮᩣ ᩋᨲ᩠ᨳᨻ᩠ᨿᨬ᩠ᨩᨶᨽᩮᨴᩮᩣ, ᨲᨲᩮᩣ, ᩋᨲ᩠ᨳᩔ ᨧ ᨻ᩠ᨿᨬ᩠ᨩᨶᩔ ᨧ ᩅᩥᩈᨴᩥᩈᨲ᩠ᨲᩣᨲᩥ ᩋᨲ᩠ᨳᩮᩣ.

ᩍᨴᩣᨶᩥ ᨲᨾᩮᩅᨲ᩠ᨳᩴ ᩅᩥᨽᩣᩅᩮᨲᩩᩴ ‘‘ᩋᨶᩩᩈᩣᩅᨶᨬ᩠ᩉᩥ ᨶᩣᨾᩣ’’ᨲᩥᩌᨴᩥᨾᩣᩉ. ᩉᩦᨲᩥ ᨠᩣᩁᨱᨲ᩠ᨳᩮ ᨶᩥᨸᩣᨲᩮᩣ. ᨲᩔ ᨸᨶ ‘‘ᩋᨽᩥᨶ᩠ᨶ’’ᨶ᩠ᨲᩥ ᩍᨾᩥᨶᩣ ᩈᨾ᩠ᨻᨶ᩠ᨵᩮᩣ ᩅᩮᨴᩥᨲᨻ᩠ᨻᩮᩣ. ᨲᩮᨶᩣᨲᩥ ᨽᩥᨶ᩠ᨶᨲ᩠ᨲᩣ. ᩋᩔᩣᨲᩥ ‘‘ᨿᩔ ᩈᩥᨿᩣ’’ᨲᩥᩌᨴᩥᩅᨧᨶᨲ᩠ᨲᨿᩔ. ᩋᩅᩔᨬ᩠ᨧᩮᨲᨾᩮᩅᩴ ᩈᨾ᩠ᨸᨭᩥᨧ᩠ᨨᩥᨲᨻ᩠ᨻᩴ, ᩋᨬ᩠ᨬᨳᩣ ᩋᨲᩥᨸ᩠ᨸᩈᨦ᩠ᨣᩮᩣᨸᩥ ᩈᩥᨿᩣᨲᩥ ᨴᩔᩮᨲᩩᩴ ‘‘ᨿᨴᩥ ᨧᩮᨲ’’ᨶ᩠ᨲᩥᩌᨴᩥᨾᩣᩉ. ᩑᨲᨶ᩠ᨲᩥ ‘‘ᨿᩔ ᩈᩥᨿᩣ’’ᨲᩥᩌᨴᩥᩅᨧᨶᨲ᩠ᨲᨿᩴ. ᩋᨸᩁᩮ ‘‘ᩋᨶᩩᩈᩣᩅᩥᨲ’’ᨶ᩠ᨲᩥ ᨸᨴᩴ ᨶ ᩋᨲᩦᨲᨲ᩠ᨳᩴ ᨴᩦᨸᩮᨲᩥ, ᩋᨳ ᨡᩮᩣ ᩋᨶᩣᨣᨲᨲ᩠ᨳᩴ. ᨵᩣᨲ᩠ᩅᨲ᩠ᨳᩈᨾ᩠ᨻᨶ᩠ᨵᩮᩣ ᨠᩣᩃᨶ᩠ᨲᩁᩅᩥᩉᩥᨲᩮᩣᨸᩥ ᨸᨧ᩠ᨧᨿᩮᩣ ᨠᩣᩃᨶ᩠ᨲᩁᩮ ᩈᩣᨵᩩ ᩉᩮᩣᨲᩦᨲᩥ ᩅᩥᨠᨸ᩠ᨸᩮᩈᩩᩴ. ᨲᩮᨶᩣᩉ ‘‘ᩋᨸᩁᩮ ‘ᩋᨶᩩᩈᩣᩅᩥᨲ’ᨶ᩠ᨲᩥ ᨸᨴᩔᩣ’’ᨲᩥᩌᨴᩥ. ᩏᨸᩁᩥ ᩏᨴ᩠ᨴᩮᩈᩣᩅᩈᩣᨶᩮᨲᩥ ᨸᩣᩁᩣᨩᩥᨠᩩᨴ᩠ᨴᩮᩈᩣᩅᩈᩣᨶᩮ. ᩋᨲ᩠ᨳᨿᩩᨲ᩠ᨲᩦᨶᩴ ᩋᨽᩣᩅᨲᩮᩣᨲᩥ ᩋᨶᩣᨣᨲᨲ᩠ᨳᩔ ᨧ ᨠᩣᩁᨱᩔ ᨧ ᩋᨽᩣᩅᨲᩮᩣ. ᩍᨴᩣᨶᩥ ᨲᨾᩮᩅ ᩅᩥᨽᩣᩅᩮᨲᩩᩴ ‘‘ᩍᨴᩴ ᩉᩦ’’ᨲᩥᩌᨴᩥᨾᩣᩉ. ᨠᨳᨾᩮᨲᩴ ᩅᩥᨬ᩠ᨬᩣᨿᨲᩦᨲᩥ ᩌᩉ ‘‘ᨿᨴᩥ ᨧᩔᩣ’’ᨲᩥᩌᨴᩥ. ᩋᨿᨶ᩠ᨲᩥ ᩋᨶᩣᨣᨲᨠᩣᩃᩮᩣ. ᩋᨶᩩᩈᩣᩅᩥᨲᩴ ᩉᩮᩔᨲᩦᨲᩥ ᩅᨴᩮᨿ᩠ᨿᩣᨲᩥ ᩋᨶᩩᨸ᩠ᨸᨿᩮᩣᨣᩴ ᩋᨶᩣᨣᨲᨠᩣᩃᩴ ᨠᨲ᩠ᩅᩣ ‘‘ᩋᨶᩩᩈᩣᩅᩥᨲᩴ ᩉᩮᩔᨲᩦ’’ᨲᩥ ᨻᩩᨴ᩠ᨵᩮᩣ ᩅᨴᩮᨿ᩠ᨿ. ᩋᨿᩴ ᩉᩮᨲ᩠ᨳᩣᨵᩥᨸ᩠ᨸᩣᨿᩮᩣ – ᨿᨴᩥ ᨧᩮᨲ᩠ᨳ ᨵᩣᨲ᩠ᩅᨲ᩠ᨳᩈᨾ᩠ᨻᨶ᩠ᨵᩮᩣ ᨲ-ᨸᨧ᩠ᨧᨿᩮᩣ ᩈᩥᨿᩣ, ᨲᨳᩣ ᩈᨲᩥ ᨵᩣᨲ᩠ᩅᨲ᩠ᨳᩈᨾ᩠ᨻᨶ᩠ᨵᩮᩣ ᨶᩣᨾ ᩅᩥᩈᩮᩈᨶᩅᩥᩈᩮᩈ᩠ᨿᨽᩣᩅᩮᩣ, ᩈᩮᩣ ᨧ ᩋᨶᩩᨸ᩠ᨸᨿᩮᩣᨣᩔ ᩈᨾᩣᨶᨲ᩠ᨳᨽᩣᩅᩮ ᩈᨲᩥ ᩏᨸ᩠ᨸᨩ᩠ᨩᨲᩥ, ᨶᩣᩈᨲᩦᨲᩥ ‘‘ᩉᩮᩔᨲᩦ’’ᨲᩥ ᩋᨶᩩᨸ᩠ᨸᨿᩮᩣᨣᩴ ᩅᨴᩮᨿ᩠ᨿ, ᨶ ᨧ ᩅᩩᨲ᩠ᨲᩴ. ᨲᩈ᩠ᨾᩣ ᩋᨶᩣᨣᨲᩴ ᨶ ᨴᩦᨸᩮᨲᩥ, ᩋᨲᩦᨲᨠᩣᩃᨾᩮᩅ ᨴᩦᨸᩮᨲᩦᨲᩥ. ᩋᨶᩩᩈᩣᩅᩥᨿᨾᩣᨶᩮᨲᩥ ᩅᨧᨶᨲᩮᩣᨲᩥ ‘‘ᩋᨶᩩᩈᩣᩅᩥᨿᨾᩣᨶᩮ’’ᨲᩥ ᩅᨲ᩠ᨲᨾᩣᨶᨠᩣᩃᩅᨧᨶᨲᩮᩣ. ᨿᨴᩥ ᩑᩅᩴ ‘‘ᨿᩣᩅᨲᨲᩥᨿᩴ ᩋᨶᩩᩈᩣᩅᩥᨲᩴ ᩉᩮᩣᨲᩦ’’ᨲᩥ ᨠᩥᨾᩥᨴᨶ᩠ᨲᩥ ᩌᩉ ‘‘ᨿᩣᩅᨲᨲᩥᨿ’’ᨶ᩠ᨲᩥᩌᨴᩥ. ᨠᩥᩴ ᨲᩮᨶ ᩃᨠ᩠ᨡᩦᨿᨲᩥ, ᨿᩮᨶᩮᨲᩴ ᩃᨠ᩠ᨡᨱᩅᨧᨶᨾᨲ᩠ᨲᩴ ᩈᩥᨿᩣᨲᩥ ᩌᩉ ‘‘ᨲᩮᨶᩣ’’ᨲᩥᩌᨴᩥ. ᨲᩮᨶᩣᨲᩥ ᩃᨠ᩠ᨡᨱᩅᨧᨶᨾᨲ᩠ᨲᩮᨶ ᩉᩮᨲᩩᨶᩣ.

ᨲᨴᩮᨲᨶ᩠ᨲᩥ ᨸᩣᨲᩥᨾᩮᩣᨠ᩠ᨡᩴ. ᨲᩴ ᨸᨶᩮᨲᨶ᩠ᨲᩥ ‘‘ᨲᨲ᩠ᨳᩣᨿᩈ᩠ᨾᨶ᩠ᨲᩮ ᨸᩩᨧ᩠ᨨᩣᨾᩦ’’ᨲᩥᩌᨴᩥᨠᩴ ᨿᩣᩅᨲᨲᩥᨿᩣᨶᩩᩈᩣᩅᨶᩴ. ᨶ ᨴᩥᩔᨲᩦᨲᩥ ᨶᩮᩣᨸᩃᨻ᩠ᨽᨲᩥ. ᩍᨾᨾᩮᩅ ᨧ ᩋᨲ᩠ᨳᨶ᩠ᨲᩥ ᩍᨾᩴ ᩋᨾ᩠ᩉᩮᩉᩥ ᩅᩩᨲ᩠ᨲᨾᩮᩅᨲ᩠ᨳᩴ. ᨿᨴᩥ ᩉᩥ ‘‘ᨿᩔ ᩈᩥᨿᩣ ᩌᨸᨲ᩠ᨲᩦ’’ᨲᩥᩌᨴᩥᩅᨧᨶᨲ᩠ᨲᨿᩴ ᨿᩣᩅᨲᨲᩥᨿᩣᨶᩩᩈᩣᩅᨶᩴ ᩈᩥᨿᩣ, ᨲᨴᩮᩅ ᩏᨸᩮᩣᩈᨳᨠ᩠ᨡᨶ᩠ᨵᨠᩮ (ᨾᩉᩣᩅ. ᪑᪓᪒ ᩌᨴᨿᩮᩣ) ᩅᨴᩮᨿ᩠ᨿ, ᨶ ᨸᨶ ‘‘ᩈᨠᩥᨾ᩠ᨸᩥ ᩋᨶᩩᩈᩣᩅᩥᨲᩴ ᩉᩮᩣᨲᩦ’’ᨲᩥᩌᨴᩥᨠᨶ᩠ᨲᩥ ᩋᨵᩥᨸ᩠ᨸᩣᨿᩮᩣ. ᨶᨶᩩ ᨧᩣᨿᩴ ᩅᩥᨶᩥᨧ᩠ᨨᨿᩮᩣ ᩋᨭ᩠ᨮᨠᨳᩣᩈᩩ ᨶ ᩌᨣᨲᩮᩣ, ᩋᨳ ᨠᩩᨲᩮᩣ ᩃᨴ᩠ᨵᩮᩣᨲᩥ ᩌᩉ ‘‘ᩋᨿᨾᩮᨲ᩠ᨳᩣ’’ᨲᩥᩌᨴᩥ. ᩅᩥᨶᨿᨭ᩠ᨮᩣᨶᩮᩈᩩ ᨠᨲᨸᩁᩥᨧᨿᩣᨶᩴ ᩌᨧᩁᩥᨿᩣᨶᩴ ᨲᩴ ᨲᩴ ᩋᨲ᩠ᨳᩴ ᨬᩣᨸᩮᨶ᩠ᨲᩦ ᨸᩅᩮᨱᩥ ᩌᨧᩁᩥᨿᨸᩁᨾ᩠ᨸᩁᩣ, ᨲᩣᨿ ᩌᨽᨲᩮᩣ ᩌᨶᩦᨲᩮᩣ ᩌᨧᩁᩥᨿᨸᩁᨾ᩠ᨸᩁᩣᨽᨲᩮᩣ.

ᨶᨶᩩ ᩈᨾ᩠ᨸᨩᩣᨶᨾᩩᩈᩣᩅᩣᨴᩮ ᨸᩣᨧᩥᨲ᩠ᨲᩥᨿᩮᨶ ᨽᩅᩥᨲᨻ᩠ᨻᩴ, ᩋᨳ ᨠᨳᩴ ᨴᩩᨠ᩠ᨠᨭᩣᨸᨲ᩠ᨲᩥ ᩉᩮᩣᨲᩦᨲᩥ ᩌᩉ ‘‘ᩈᩣ ᨧ ᨡᩮᩣ ᨶ ᨾᩩᩈᩣᩅᩣᨴᩃᨠ᩠ᨡᨱᩮᨶᩣ’’ᨲᩥᩌᨴᩥ. ᩈᨾ᩠ᨸᨩᩣᨶᨾᩩᩈᩣᩅᩣᨴᩮ ᨠᩥᩴ ᩉᩮᩣᨲᩦᨲᩥ ᨿ᩠ᩅᩣᨿᩴ ‘‘ᩈᨾ᩠ᨸᨩᩣᨶᨾᩩᩈᩣᩅᩣᨴᩮᩣ ᩋᩔ ᩉᩮᩣᨲᩦ’’ᨲᩥ ᩅᩩᨲ᩠ᨲᩮᩣ, ᩈᩮᩣ ᩌᨸᨲ᩠ᨲᩥᨲᩮᩣ ᨠᩥᩴ ᩉᩮᩣᨲᩥ, ᨠᨲᩁᩣ ᩌᨸᨲ᩠ᨲᩥ ᩉᩮᩣᨲᩦᨲᩥ ᩋᨲ᩠ᨳᩮᩣ. ᨴᩩᨠ᩠ᨠᨭᩴ ᩉᩮᩣᨲᩦᨲᩥ ᨴᩩᨠ᩠ᨠᨭᩣᨸᨲ᩠ᨲᩥ ᩉᩮᩣᨲᩥ. ᩅᨧᩦᨴ᩠ᩅᩣᩁᩮ ᩋᨠᩥᩁᩥᨿᩈᨾᩩᨭ᩠ᨮᩣᨶᩣᨸᨲ᩠ᨲᩥ ᩉᩮᩣᨲᩦᨲᩥ ᩋᩔ ᩉᩥ ᨽᩥᨠ᩠ᨡᩩᨶᩮᩣ ᩋᨵᨾ᩠ᨾᩥᨠᩣᨿ ᨸᨭᩥᨬ᩠ᨬᩣᨿ ᨲᩩᨱ᩠ᩉᩦᨽᩪᨲᩔ ᨶᩥᩈᩥᨶ᩠ᨶᩔ ᨾᨶᩮᩣᨴ᩠ᩅᩣᩁᩮ ᩌᨸᨲ᩠ᨲᩥ ᨶᩣᨾ ᨶᨲ᩠ᨳᩥ. ᨿᩈ᩠ᨾᩣ ᨸᨶ ᩌᩅᩥᨠᩣᨲᨻ᩠ᨻᩴ ᨶᩣᩅᩥᨠᩣᩈᩥ, ᨲᩮᨶᩔ ᩅᨧᩦᨴ᩠ᩅᩣᩁᩮ ᩋᨠᩥᩁᩥᨿᨲᩮᩣ ᩋᨿᩴ ᩌᨸᨲ᩠ᨲᩥ ᩈᨾᩩᨭ᩠ᨮᩣᨲᩦᨲᩥ ᩅᩮᨴᩥᨲᨻ᩠ᨻᩣ. ᩍᨴᩣᨶᩥ ᩅᩩᨲ᩠ᨲᨾᩮᩅᨲ᩠ᨳᩴ ᨸᩣᩊᩥᨿᩣ ᩈᩣᨵᩮᨲᩩᩴ ‘‘ᩅᩩᨲ᩠ᨲᨾ᩠ᨸᩥ ᨧᩮᨲ’’ᨶ᩠ᨲᩥᩌᨴᩥᨾᩣᩉ. ᩑᨲᩴ ᩏᨸᩣᩃᩥᨲ᩠ᨳᩮᩁᩮᨶ ᨸᩁᩥᩅᩣᩁᩮ ᩈᩮᨴᨾᩮᩣᨧᨶᨣᩣᨳᩣᩈᩩ (ᨸᩁᩥ. ᪔᪗᪙) ᩅᩩᨲ᩠ᨲᨾ᩠ᨸᩥ ᨧᩣᨲᩥ ᩋᨲ᩠ᨳᩮᩣ.

ᩋᨶᩣᩃᨸᨶ᩠ᨲᩮᩣ ᨾᨶᩩᨩᩮᨶ ᨠᩮᨶᨧᩥ ᩅᩣᨧᩣᨲᩥ ᨠᩮᨶᨧᩥ ᨾᨶᩩᨩᩮᨶ ᩅᩣᨧᩣᨿ ᩋᨶᩣᩃᨸᨶ᩠ᨲᩮᩣ. ᨣᩥᩁᩴ ᨶᩮᩣ ᨧ ᨸᩁᩮ ᨽᨱᩮᨿ᩠ᨿᩣᨲᩥ ‘‘ᩍᨲᩥ ᩍᨾᩮ ᩈᩮᩣᩔᨶ᩠ᨲᩦ’’ᨲᩥ ᨸᩁᨸᩩᨣ᩠ᨣᩃᩮ ᩈᨶ᩠ᨵᩣᨿ ᩈᨴ᩠ᨴᨾ᩠ᨸᩥ ᨶ ᨶᩥᨧ᩠ᨨᩣᩁᩮᨿ᩠ᨿ. ᩌᨸᨩ᩠ᨩᩮᨿ᩠ᨿ ᩅᩣᨧᩈᩥᨠᨶ᩠ᨲᩥ ᩅᩣᨧᨲᩮᩣ ᩈᨾᩩᨭ᩠ᨮᩥᨲᩴ ᩌᨸᨲ᩠ᨲᩥᩴ ᩌᨸᨩ᩠ᨩᩮᨿ᩠ᨿ. ᨸᨬ᩠ᩉᩣᨾᩮᩈᩣ ᨠᩩᩈᩃᩮᩉᩥ ᨧᩥᨶ᩠ᨲᩥᨲᩣᨲᩥ ᩑᨲ᩠ᨳ ᨸᨬ᩠ᩉᩣᨾᩮᩈᩣᨲᩥ ᩃᩥᨦ᩠ᨣᨻ᩠ᨿᨲ᩠ᨲᨿᩮᨶ ᩅᩩᨲ᩠ᨲᩴ, ᩑᩈᩮᩣ ᨸᨬ᩠ᩉᩮᩣ ᨠᩩᩈᩃᩮᩉᩥ ᨧᩥᨶ᩠ᨲᩥᨲᩮᩣᨲᩥ ᩋᨲ᩠ᨳᩮᩣ. ᩋᨿᩴ ᨸᨬ᩠ᩉᩮᩣ ᩍᨾᨾᩮᩅ ᨾᩩᩈᩣᩅᩣᨴᩴ ᩈᨶ᩠ᨵᩣᨿ ᩅᩩᨲ᩠ᨲᩮᩣ.

ᨲᩴᨲᩴᩈᨾ᩠ᨸᨲ᩠ᨲᩥᨿᩣ ᩅᩥᨻᨶ᩠ᨵᨶᩅᩈᩮᨶ ᩈᨲ᩠ᨲᩈᨶ᩠ᨲᩣᨶᩔ ᩋᨶ᩠ᨲᩁᩮ ᩅᩮᨾᨩ᩠ᨫᩮ ᩑᨲᩥ ᩌᨣᨧ᩠ᨨᨲᩦᨲᩥ ᩋᨶ᩠ᨲᩁᩣᨿᩮᩣ, ᨴᩥᨭ᩠ᨮᨵᨾ᩠ᨾᩥᨠᩣᨴᩥᩋᨶᨲ᩠ᨳᩮᩣ, ᩋᨲᩥᨠ᩠ᨠᨾᨶᨭ᩠ᨮᩮᨶ ᨲᩈ᩠ᨾᩥᩴ ᩋᨶ᩠ᨲᩁᩣᨿᩮ ᨶᩥᨿᩩᨲ᩠ᨲᩮᩣ, ᩋᨶ᩠ᨲᩁᩣᨿᩴ ᩅᩣ ᨹᩃᩴ ᩋᩁᩉᨲᩥ, ᩋᨶ᩠ᨲᩁᩣᨿᩔ ᩅᩣ ᨠᩁᨱᩈᩦᩃᩮᩣᨲᩥ ᩋᨶ᩠ᨲᩁᩣᨿᩥᨠᩮᩣ. ᨲᩮᨶᩣᩉ ‘‘ᩅᩥᨸ᩠ᨸᨭᩥᩈᩣᩁᩅᨲ᩠ᨳᩩᨲᩣᨿᩣ’’ᨲᩥᩌᨴᩥ. ᨲᨲ᩠ᨳ ᩅᩥᨸ᩠ᨸᨭᩥᩈᩣᩁᩅᨲ᩠ᨳᩩᨲᩣᨿᩣᨲᩥ ᩅᩥᨸ᩠ᨸᨭᩥᩈᩣᩁᩮᩣ ᨶᩣᨾ ᨸᨧ᩠ᨨᩣᨶᩩᨲᩣᨸᩅᩈᩮᨶ ᨧᩥᨲ᩠ᨲᩅᩥᨸ᩠ᨸᨭᩥᩈᩣᩁᩮᩣ, ᨲᩔ ᨠᩣᩁᨱᨲᩣᨿᩣᨲᩥ ᩋᨲ᩠ᨳᩮᩣ. ᨸᨮᨾᨩ᩠ᨫᩣᨶᩣᨴᩥᨸᨧ᩠ᨧᨿᨽᩪᨲᩋᩋᨸ᩠ᨸᨭᩥᩈᩣᩁᩅᩥᩁᩩᨴ᩠ᨵᩔ ᩅᩥᨸ᩠ᨸᨭᩥᩈᩣᩁᩔ ᨸᨧ᩠ᨧᨿᨲ᩠ᨲᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨸᩣᨾᩮᩣᨩ᩠ᨩᩣᨴᩥᩈᨾ᩠ᨽᩅᨶ᩠ᨲᩥ ᨴᩩᨻ᩠ᨻᩃᨲᩁᩩᨱᩣ ᨸᩦᨲᩥ ᨸᩣᨾᩮᩣᨩ᩠ᨩᩴ, ᨲᩴ ᩌᨴᩥ ᨿᩮᩈᩴ ᨲᩮ ᨸᩣᨾᩮᩣᨩ᩠ᨩᩣᨴᨿᩮᩣ, ᨲᩮᩈᩴ ᩈᨾ᩠ᨽᩅᩮᩣ ᨸᨭᩥᩃᩣᨽᩮᩣ ᨸᩣᨾᩮᩣᨩ᩠ᨩᩣᨴᩥᩈᨾ᩠ᨽᩅᩮᩣ, ᨲᩴ. ᩌᨴᩥᩈᨴ᩠ᨴᩮᨶ ᨸᩦᨲᩥᨸ᩠ᨸᩔᨴ᩠ᨵᩣᨴᩦᨶᩴ ᨣᩉᨱᩴ. ᨸᨮᨾᨩ᩠ᨫᩣᨶᩣᨴᩦᨶᨶ᩠ᨲᩥ ᩑᨲ᩠ᨳᩣᨴᩥᩈᨴ᩠ᨴᩮᨶ ᨸᨶ ‘‘ᨴᩩᨲᩥᨿᩔ ᨫᩣᨶᩔ ᩋᨵᩥᨣᨾᩣᨿ ᩋᨶ᩠ᨲᩁᩣᨿᩥᨠᩮᩣ, ᨲᨲᩥᨿᩔ ᨫᩣᨶᩔ ᩋᨵᩥᨣᨾᩣᨿ ᩋᨶ᩠ᨲᩁᩣᨿᩥᨠᩮᩣ, ᨧᨲᩩᨲ᩠ᨳᩔ ᨫᩣᨶᩔ ᩋᨵᩥᨣᨾᩣᨿ ᩋᨶ᩠ᨲᩁᩣᨿᩥᨠᩮᩣ, ᨫᩣᨶᩣᨶᩴ, ᩅᩥᨾᩮᩣᨠ᩠ᨡᩣᨶᩴ, ᩈᨾᩣᨵᩦᨶᩴ, ᩈᨾᩣᨸᨲ᩠ᨲᩦᨶᩴ, ᨶᩮᨠ᩠ᨡᨾ᩠ᨾᩣᨶᩴ, ᨶᩥᩔᩁᨱᩣᨶᩴ, ᨸᩅᩥᩅᩮᨠᩣᨶᩴ, ᨠᩩᩈᩃᩣᨶᩴ ᨵᨾ᩠ᨾᩣᨶᩴ ᩋᨵᩥᨣᨾᩣᨿ ᩋᨶ᩠ᨲᩁᩣᨿᩥᨠᩮᩣ’’ᨲᩥ (ᨾᩉᩣᩅ. ᪑᪓᪕) ᩅᩩᨲ᩠ᨲᨴᩩᨲᩥᨿᨩ᩠ᨫᩣᨶᩣᨴᩦᨶᩴ ᩈᨦ᩠ᨣᩉᩮᩣ ᨴᨭ᩠ᨮᨻ᩠ᨻᩮᩣ. ‘‘ᨲᩈ᩠ᨾᩣ’’ᨲᩥ ᩅᩩᨲ᩠ᨲᩮ ᨿᩴᨲᩴᩈᨴ᩠ᨴᩣᨶᩴ ᩋᨻ᩠ᨿᨽᩥᨧᩣᩁᩥᨲᩈᨾ᩠ᨻᨶ᩠ᨵᨲᩣᨿ ‘‘ᨿᩈ᩠ᨾᩣ’’ᨲᩥ ᩋᨿᨾᨲ᩠ᨳᩮᩣ ᩏᨸᨭ᩠ᨮᩥᨲᩮᩣᨿᩮᩅ ᩉᩮᩣᨲᩦᨲᩥ ᩌᩉ ‘‘ᨲᩈ᩠ᨾᩣᨲᩥ ᨿᩈ᩠ᨾᩣ’’ᨲᩥᩌᨴᩥ. ᨩᩣᨶᨶ᩠ᨲᩮᨶᩣᨲᩥ ᨩᩣᨶᨾᩣᨶᩮᨶ. ᩍᨾᩥᨶᩣᩔ ᩈᨾ᩠ᨸᨩᩣᨶᨾᩩᩈᩣᩅᩣᨴᩔ ᩈᨧᩥᨲ᩠ᨲᨠᨲᩴ ᨴᩔᩮᨲᩥ. ᩅᩥᩈᩩᨴ᩠ᨵᩥᩴ ᩋᨸᩮᨠ᩠ᨡᨲᩦᨲᩥ ᩅᩥᩈᩩᨴ᩠ᨵᩣᨸᩮᨠ᩠ᨡᩮᩣ, ᨲᩮᨶ ᩅᩥᩈᩩᨴ᩠ᨵᩣᨸᩮᨠ᩠ᨡᩮᨶ. ᩈᩣ ᨧ ᩅᩥᩈᩩᨴ᩠ᨵᩥ ᩍᨵ ᩅᩩᨭ᩠ᨮᩣᨶᩣᨴᩦᨲᩥ ᩌᩉ ‘‘ᩅᩩᨭ᩠ᨮᩣᨲᩩᨠᩣᨾᩮᨶ ᩅᩥᩈᩩᨩ᩠ᨫᩥᨲᩩᨠᩣᨾᩮᨶᩣ’’ᨲᩥ. ᩅᩩᨭ᩠ᨮᩣᨶᨣᩣᨾᩥᨶᩥᨲᩮᩣ ᩈᨦ᩠ᨥᩣᨴᩥᩈᩮᩈᨲᩮᩣ ᩅᩩᨭ᩠ᨮᩣᨲᩩᨠᩣᨾᩮᨶ, ᨴᩮᩈᨶᩣᨣᩣᨾᩥᨶᩥᨲᩮᩣ ᩅᩥᩈᩩᨩ᩠ᨫᩥᨲᩩᨠᩣᨾᩮᨶᩣᨲᩥ ᩋᨲ᩠ᨳᩮᩣ. ᩈᨦ᩠ᨥᨾᨩ᩠ᨫᩮ ᩅᩣ ᨣᨱᨾᨩ᩠ᨫᩮ ᩅᩣ ᩑᨠᨸᩩᨣ᩠ᨣᩃᩮ ᩅᩣᨲᩥ ᩏᨸᩮᩣᩈᨳᨣ᩠ᨣᩮ ᩈᨦ᩠ᨥᩔ ᩌᩁᩮᩣᨧᨶᩅᩈᩮᨶ ᩈᨦ᩠ᨥᨾᨩ᩠ᨫᩮ ᩅᩣ ᨲᨲ᩠ᨳᩮᩅ ᩏᨽᨲᩮᩣ ᨶᩥᩈᩥᨶ᩠ᨶᩣᨶᩴ ᩌᩁᩮᩣᨧᨶᩅᩈᩮᨶ ᨣᨱᨾᨩ᩠ᨫᩮ ᩅᩣ ᩋᨶᨶ᩠ᨲᩁᩔ ᩌᩁᩮᩣᨧᨶᩅᩈᩮᨶ ᩑᨠᨸᩩᨣ᩠ᨣᩃᩮ ᩅᩣ ᨸᨠᩣᩈᩮᨲᨻ᩠ᨻᩣ. ᩍᨲᩮᩣ ᩅᩩᨭ᩠ᨮᩉᩥᨲ᩠ᩅᩣᨲᩥ ᩍᨲᩮᩣ ᩏᨸᩮᩣᩈᨳᨣ᩠ᨣᨲᩮᩣ ᩅᩩᨭ᩠ᨮᩣᨿ. ᩑᨲ᩠ᨳ ᨸᨶ ᩈᨽᩣᨣᩮᩣᨿᩮᩅ ᩅᨲ᩠ᨲᨻ᩠ᨻᩮᩣ. ᩅᩥᩈᨽᩣᨣᩔ ᩉᩥ ᩅᩩᨧ᩠ᨧᨾᩣᨶᩮ ᨽᨱ᩠ᨯᨶᨠᩃᩉᩈᨦ᩠ᨥᨽᩮᨴᩣᨴᩦᨶᩥᨸᩥ ᩉᩮᩣᨶ᩠ᨲᩥ. ᨲᩈ᩠ᨾᩣ ᨲᩔ ᩋᩅᨲ᩠ᩅᩣ ‘‘ᩍᨲᩮᩣ ᩅᩩᨭ᩠ᨮᩉᩥᨲ᩠ᩅᩣ ᨸᨭᩥᨠᩁᩥᩔᩣᨾᩦ’’ᨲᩥ ᩌᨽᩮᩣᨣᩴ ᨠᨲ᩠ᩅᩣ ᩏᨸᩮᩣᩈᨳᩮᩣ ᨠᩣᨲᨻ᩠ᨻᩮᩣᨲᩥ ᩋᨶ᩠ᨵᨠᨭ᩠ᨮᨠᨳᩣᨿᩴ (ᨾᩉᩣᩅ. ᩋᨭ᩠ᨮ. ᪑᪗᪐) ᩅᩩᨲ᩠ᨲᩴ.

ᨠᩁᨱᨲ᩠ᨳᩮᨲᩥ ᨲᨲᩥᨿᩣᩅᩥᨽᨲ᩠ᨲᩥᩋᨲ᩠ᨳᩮ. ᨠᨲ᩠ᨲᩁᩥ ᩉᩮᨲᩴ ᨸᨧ᩠ᨧᨲ᩠ᨲᩅᨧᨶᩴ ᩉᩮᩣᨲᩥ ᨹᩣᩈᩩᩈᨴ᩠ᨴᩣᨸᩮᨠ᩠ᨡᩣᨿ. ᨸᨧ᩠ᨧᨲ᩠ᨲᩅᨧᨶᨶ᩠ᨲᩥ ᨸᨮᨾᩣᩅᨧᨶᩴ. ᨸᨮᨾᨩ᩠ᨫᩣᨶᩣᨴᩦᨶᩴ ᩋᨵᩥᨣᨾᩣᨿ ᨹᩣᩈᩩ ᩉᩮᩣᨲᩦᨲᩥ ᩋᨵᩥᨣᨾᨲ᩠ᨳᩴ ᨲᩔ ᨽᩥᨠ᩠ᨡᩩᨶᩮᩣ ᨹᩣᩈᩩ ᩉᩮᩣᨲᩥ ᩈᩩᨡᩴ ᩉᩮᩣᨲᩥ ᩈᩴᩅᩁᩔ ᩋᩅᩥᨸ᩠ᨸᨭᩥᩈᩣᩁᩉᩮᨲᩩᨲ᩠ᨲᩣ. ᨲᩮᨶᩣᩉ ‘‘ᩋᩅᩥᨸ᩠ᨸᨭᩥᩈᩣᩁᨾᩪᩃᨠᩣᨶ’’ᨶ᩠ᨲᩥᩌᨴᩥ. ᨸᩣᨸᨸᩩᨬ᩠ᨬᩣᨶᩴ ᨠᨲᩣᨠᨲᩅᩈᩮᨶ ᨧᩥᨲ᩠ᨲᩅᩥᨸ᩠ᨸᨭᩥᩈᩣᩁᩣᨽᩣᩅᩮᩣ ᩋᩅᩥᨸ᩠ᨸᨭᩥᩈᩣᩁᩮᩣ, ᩈᩮᩣ ᨾᩪᩃᩴ ᨠᩣᩁᨱᩴ ᨿᩮᩈᩴ ᨲᩮ ᩋᩅᩥᨸ᩠ᨸᨭᩥᩈᩣᩁᨾᩪᩃᩣ, ᩋᩅᩥᨸ᩠ᨸᨭᩥᩈᩣᩁᨾᩪᩃᩣᨿᩮᩅ ᩋᩅᩥᨸ᩠ᨸᨭᩥᩈᩣᩁᨾᩪᩃᨠᩣ, ᨲᩮᩈᩴ ᩋᩅᩥᨸ᩠ᨸᨭᩥᩈᩣᩁᨾᩪᩃᨠᩣᨶᩴ. ᩈᩩᨡᨸ᩠ᨸᨭᩥᨸᨴᩣ ᩈᨾ᩠ᨸᨩ᩠ᨩᨲᩦᨲᩥ ᩈᩩᨡᩣ ᨸᨭᩥᨸᨴᩣ ᩈᨾᩥᨩ᩠ᨫᨲᩥ, ᨸᨮᨾᨩ᩠ᨫᩣᨶᩣᨴᩦᨶᩴ ᩈᩩᨡᩮᨶ ᩋᨵᩥᨣᨾᩮᩣ ᩉᩮᩣᨲᩦᨲᩥ ᩋᨵᩥᨸ᩠ᨸᩣᨿᩮᩣ. ᩉᩮᩣᨲᩥ ᨧᩮᨲ᩠ᨳ –

‘‘ᨶᩥᨴᩣᨶᩮ ᨬᨲ᩠ᨲᩥᨭ᩠ᨮᨸᨶᩴ, ᨸᩩᨻ᩠ᨻᨠᩥᨧ᩠ᨧᩔ ᨸᩩᨧ᩠ᨨᨶᩴ;

ᨶᩥᨴᩣᨶᩩᨴ᩠ᨴᩮᩈᩈᩅᨶᩮ, ᩅᩥᩈᩩᨴ᩠ᨵᩣᩁᩮᩣᨧᨶᩮ ᩅᩥᨵᩥ;

ᩋᨶᩣᩁᩮᩣᨧᨶᩮ ᨧᩣᨸᨲ᩠ᨲᩥ, ᨬᩮᨿ᩠ᨿᩴ ᨸᩥᨱ᩠ᨯᨲ᩠ᨳᨸᨬ᩠ᨧᨠ’’ᨶ᩠ᨲᩥ.

ᩍᨲᩥ ᨠᨦ᩠ᨡᩣᩅᩥᨲᩁᨱᩥᨿᩣ ᨸᩣᨲᩥᨾᩮᩣᨠ᩠ᨡᩅᨱ᩠ᨱᨶᩣᨿ

ᩅᩥᨶᨿᨲ᩠ᨳᨾᨬ᩠ᨩᩪᩈᩣᨿᩴ ᩃᩦᨶᨲ᩠ᨳᨸ᩠ᨸᨠᩣᩈᨶᩥᨿᩴ

ᨶᩥᨴᩣᨶᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

ᨸᩣᩁᩣᨩᩥᨠᨠᨱ᩠ᨯᩴ

ᩍᨴᩣᨶᩥ ᨶᩥᨴᩣᨶᩩᨴ᩠ᨴᩮᩈᩣᨶᨶ᩠ᨲᩁᩴ ᩅᩩᨲ᩠ᨲᩔ ᨸᩣᩁᩣᨩᩥᨠᩩᨴ᩠ᨴᩮᩈᩔ ᩋᨲ᩠ᨳᩴ ᩈᩴᩅᨱ᩠ᨱᩮᨲᩩᩴ ‘‘ᩍᨴᩣᨶᩦ’’ᨲᩥᩌᨴᩥ ᩌᩁᨴ᩠ᨵᩴ. ᨶᩥᨴᩣᨶᩣᨶᨶ᩠ᨲᩁᨶ᩠ᨲᩥ ᨽᩣᩅᨶᨸᩩᩴᩈᨠᨶᩥᨴ᩠ᨴᩮᩈᩮᩣ, ᨶᩥᨴᩣᨶᩴ ᩋᨶᨶ᩠ᨲᩁᩴ ᨠᨲ᩠ᩅᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨲᨲ᩠ᨳᩣᨲᩥ ᨸᩣᩁᩣᨩᩥᨠᨠᨱ᩠ᨯᩮ. ᨸᩣᨲᩥᨾᩮᩣᨠ᩠ᨡᩮᨲᩥ ᨽᩥᨠ᩠ᨡᩩᨸᩣᨲᩥᨾᩮᩣᨠ᩠ᨡᩮ. ᨧᨲ᩠ᨲᩣᩁᩮᩣᨲᩥ ᨣᨱᨶᨸᩁᩥᨧ᩠ᨨᩮᨴᩮᩣ ᩐᨶᩣᨲᩥᩁᩮᨠᨽᩣᩅᨶᩥᩅᨲ᩠ᨲᨶᨲᩮᩣ. ᨸᩣᩁᩣᨩᩥᨠᩣᨲᩥ ᩈᨩᩣᨲᩥᨶᩣᨾᩴ. ᩌᨸᨲ᩠ᨲᩥᨿᩮᩣᨲᩥ ᩈᨻ᩠ᨻᩈᩣᨵᩣᩁᨱᨶᩣᨾᩴ. ᩏᨴ᩠ᨴᩥᩈᩦᨿᨲᩦᨲᩥ ᩏᨴ᩠ᨴᩮᩈᩮᩣ. ᨽᩣᩅᨸ᩠ᨸᨵᩣᨶᩮᩣᨿᩴ ᨶᩥᨴ᩠ᨴᩮᩈᩮᩣ. ᨲᩮᨶᩣᩉ ‘‘ᩏᨴ᩠ᨴᩥᩈᩥᨲᨻ᩠ᨻᨲ’’ᨶ᩠ᨲᩥ.

᪑. ᨸᨮᨾᨸᩣᩁᩣᨩᩥᨠᩅᨱ᩠ᨱᨶᩣ

ᨿᩮᩣ ᨸᨶᩣᨲᩥ (ᨸᩣᩁᩣ. ᩋᨭ᩠ᨮ. ᪑.᪔᪕ ᨽᩥᨠ᩠ᨡᩩᨸᨴᨽᩣᨩᨶᩦᨿᩅᨱ᩠ᨱᨶᩣ) ᩑᨲ᩠ᨳ ᨿᩈ᩠ᨾᩣ ᨸᨶᩣᨲᩥ ᨶᩥᨸᩣᨲᨾᨲ᩠ᨲᩴ, ᨿᩮᩣᨲᩥ ᩋᨲ᩠ᨳᨸᨴᩴ, ᨲᨬ᩠ᨧ ᩋᨶᩥᨿᨾᩮᨶ ᨸᩩᨣ᩠ᨣᩃᩴ ᨴᩦᨸᩮᨲᩥ. ᨲᩈ᩠ᨾᩣ ᨲᩔ ᩋᨲ᩠ᨳᩴ ᨴᩔᩮᨶ᩠ᨲᩮᩣ ‘‘ᨿᩮᩣ ᨠᩮᩣᨧᩦ’’ᨲᩥ ᩌᩉ. ᨿᩈ᩠ᨾᩣ ᨸᨶ ᨿᩮᩣ ᨿᩮᩣᨠᩮᩣᨧᩥ ᨶᩣᨾ, ᩈᩮᩣ ᩋᩅᩔᩴ ᩃᩥᨦ᩠ᨣᨿᩩᨲ᩠ᨲᨩᩣᨲᩥᨶᩣᨾᨣᩮᩣᨲ᩠ᨲᩈᩦᩃᩅᩥᩉᩣᩁᨣᩮᩣᨧᩁᩅᨿᩮᩈᩩ ᩑᨠᩮᨶᩣᨠᩣᩁᩮᨶ ᨸᨬ᩠ᨬᩣᨿᨲᩥ, ᨲᩈ᩠ᨾᩣ ᨲᩴ ᨲᨳᩣ ᨬᩣᨸᩮᨲᩩᩴ ‘‘ᩁᩔᨴᩦᨥᩣᨴᩥᨶᩣ’’ᨲᩥᩌᨴᩥᨾᩣᩉ. ᩌᨴᩥᩈᨴ᩠ᨴᩮᨶ ᨶᩅᨠᨾ᩠ᨾᩣᨴᩦᨶᩴ ᨣᩉᨱᩴ. ᩃᩥᨦ᩠ᨣᩣᨴᩥᨽᩮᨴᩮᨶᩣᨲᩥ ᩃᩥᨦ᩠ᨣᩦᨿᨲᩥᨬᩣᨿᨲᩥ ᩑᨲᩮᨶᩣᨲᩥ ᩃᩥᨦ᩠ᨣᩴ, ᨲᩴ ᩌᨴᩥ ᨿᩮᩈᩴ ᨲᩮᨲᩥ ᩃᩥᨦ᩠ᨣᩣᨴᨿᩮᩣ, ᨲᩮᩈᩴ ᨽᩮᨴᩮᩣ ᩃᩥᨦ᩠ᨣᩣᨴᩥᨽᩮᨴᩮᩣ, ᨲᩮᨶ ᩃᩥᨦ᩠ᨣᩣᨴᩥᨽᩮᨴᩮᨶ. ᩑᨲ᩠ᨳᩣᨴᩥᩈᨴ᩠ᨴᩮᨶ ᨸᨶ ᨿᩩᨲ᩠ᨲᩣᨴᩦᨶᩴ ᨣᩉᨱᩴ. ᩍᨴᩴ ᩅᩩᨲ᩠ᨲᩴ ᩉᩮᩣᨲᩥ – ᩃᩥᨦ᩠ᨣᩅᩈᩮᨶ ᨿᩣᨴᩥᩈᩮᩣ ᩅᩣ ᨲᩣᨴᩥᩈᩮᩣ ᩅᩣ ᩉᩮᩣᨲᩩ, ᨴᩦᨥᩮᩣ ᩅᩣ ᩁᩔᩮᩣ ᩅᩣ ᨠᩣᩊᩮᩣ ᩅᩣ ᩒᨴᩣᨲᩮᩣ ᩅᩣ ᨾᨦ᩠ᨣᩩᩁᨧ᩠ᨨᩅᩥ ᩅᩣ ᨠᩥᩈᩮᩣ ᩅᩣ ᨳᩪᩃᩮᩣ ᩅᩣ. ᨿᩮᩣᨣᩅᩈᩮᨶ ᨿᩮᨶ ᩅᩣ ᨲᩮᨶ ᩅᩣ ᨿᩩᨲ᩠ᨲᩮᩣ ᩉᩮᩣᨲᩩ, ᨶᩅᨠᨾ᩠ᨾᨿᩩᨲ᩠ᨲᩮᩣ ᩅᩣ ᩏᨴ᩠ᨴᩮᩈᨿᩩᨲ᩠ᨲᩮᩣ ᩅᩣ ᩅᩣᩈᨵᩩᩁᨿᩩᨲ᩠ᨲᩮᩣ ᩅᩣ. ᨩᩣᨲᩥᩅᩈᩮᨶ ᨿᩴᨩᨧ᩠ᨧᩮᩣ ᩅᩣ ᨲᩴᨩᨧ᩠ᨧᩮᩣ ᩅᩣ ᩉᩮᩣᨲᩩ, ᨡᨲ᩠ᨲᩥᨿᩮᩣ ᩅᩣ ᨻᩕᩣᩉ᩠ᨾᨱᩮᩣ ᩅᩣ ᩅᩮᩔᩮᩣ ᩅᩣ ᩈᩩᨴ᩠ᨵᩮᩣ ᩅᩣ. ᨶᩣᨾᩅᩈᩮᨶ ᨿᨳᩣᨶᩣᨾᩮᩣ ᩅᩣ ᨲᨳᩣᨶᩣᨾᩮᩣ ᩅᩣ ᩉᩮᩣᨲᩩ, ᨻᩩᨴ᩠ᨵᩁᨠ᩠ᨡᩥᨲᩮᩣ ᩅᩣ ᨵᨾ᩠ᨾᩁᨠ᩠ᨡᩥᨲᩮᩣ ᩅᩣ ᩈᨦ᩠ᨥᩁᨠ᩠ᨡᩥᨲᩮᩣ ᩅᩣ. ᨣᩮᩣᨲ᩠ᨲᩅᩈᩮᨶ ᨿᨳᩣᨣᩮᩣᨲ᩠ᨲᩮᩣ ᩅᩣ ᨲᨳᩣᨣᩮᩣᨲ᩠ᨲᩮᩣ ᩅᩣ ᩉᩮᩣᨲᩩ, ᨠᨧ᩠ᨧᩣᨿᨶᩮᩣ ᩅᩣ ᩅᩣᩈᩥᨭ᩠ᨮᩮᩣ ᩅᩣ ᨠᩮᩣᩈᩥᨿᩮᩣ ᩅᩣ. ᩈᩦᩃᩮᩈᩩ ᨿᨳᩣᩈᩦᩃᩮᩣ ᩅᩣ ᨲᨳᩣᩈᩦᩃᩮᩣ ᩅᩣ ᩉᩮᩣᨲᩩ, ᨶᩅᨠᨾ᩠ᨾᩈᩦᩃᩮᩣ ᩅᩣ ᩏᨴ᩠ᨴᩮᩈᩈᩦᩃᩮᩣ ᩅᩣ ᩅᩣᩈᨵᩩᩁᩈᩦᩃᩮᩣ ᩅᩣ. ᩅᩥᩉᩣᩁᩮᩈᩩᨸᩥ ᨿᨳᩣᩅᩥᩉᩣᩁᩦ ᩅᩣ ᨲᨳᩣᩅᩥᩉᩣᩁᩦ ᩅᩣ ᩉᩮᩣᨲᩩ, ᨶᩅᨠᨾ᩠ᨾᩅᩥᩉᩣᩁᩦ ᩅᩣ ᩏᨴ᩠ᨴᩮᩈᩅᩥᩉᩣᩁᩦ ᩅᩣ ᩅᩣᩈᨵᩩᩁᩅᩥᩉᩣᩁᩦ ᩅᩣ. ᨣᩮᩣᨧᩁᩮᩈᩩᨸᩥ ᨿᨳᩣᨣᩮᩣᨧᩁᩮᩣ ᩅᩣ ᨲᨳᩣᨣᩮᩣᨧᩁᩮᩣ ᩅᩣ ᩉᩮᩣᨲᩩ, ᨶᩅᨠᨾ᩠ᨾᨣᩮᩣᨧᩁᩮᩣ ᩅᩣ ᩏᨴ᩠ᨴᩮᩈᨣᩮᩣᨧᩁᩮᩣ ᩅᩣ ᩅᩣᩈᨵᩩᩁᨣᩮᩣᨧᩁᩮᩣ ᩅᩣ. ᩅᨿᩮᩈᩩᨸᩥ ᨿᩮᩣ ᩅᩣ ᩈᩮᩣ ᩅᩣ ᩉᩮᩣᨲᩩ ᨳᩮᩁᩮᩣ ᩅᩣ ᨶᩅᩮᩣ ᩅᩣ ᨾᨩ᩠ᨫᩥᨾᩮᩣ ᩅᩣ, ᩋᨳ ᨡᩮᩣ ᩈᨻ᩠ᨻᩮᩣᩅ ᩍᨾᩈ᩠ᨾᩥᩴ ᩋᨲ᩠ᨳᩮ ‘‘ᨿᩮᩣ’’ᨲᩥ ᩅᩩᨧ᩠ᨧᨲᩦᨲᩥ.

ᩍᨴᩣᨶᩥ ‘‘ᨽᩥᨠ᩠ᨡᩪ’’ᨲᩥ ᨸᨴᩴ ᩈᩴᩅᨱ᩠ᨱᩮᨲᩩᩴ ‘‘ᩑᩉᩥᨽᩥᨠ᩠ᨡᩪᨸᩈᨾ᩠ᨸᨴᩣ’’ᨲᩥᩌᨴᩥᨾᩣᩉ. ᨲᨲ᩠ᨳ ‘‘ᩑᩉᩥ ᨽᩥᨠ᩠ᨡᩪ’’ᨲᩥ ᨽᨣᩅᨲᩮᩣ ᩅᨧᨶᨾᨲ᩠ᨲᩮᨶ ᨽᩥᨠ᩠ᨡᩩᨽᩣᩅᩮᩣ ᩑᩉᩥᨽᩥᨠ᩠ᨡᩪᨸᩈᨾ᩠ᨸᨴᩣ. ‘‘ᨻᩩᨴ᩠ᨵᩴ ᩈᩁᨱᩴ ᨣᨧ᩠ᨨᩣᨾᩦ’’ᨲᩥᩌᨴᩥᨶᩣ (ᨾᩉᩣᩅ. ᪑᪐᪕) ᨶᨿᩮᨶ ᨲᩥᨠ᩠ᨡᨲ᩠ᨲᩩᩴ ᩅᩣᨧᩴ ᨽᩥᨶ᩠ᨴᩥᨲ᩠ᩅᩣ ᩅᩩᨲ᩠ᨲᩮᩉᩥ ᨲᩦᩉᩥ ᩈᩁᨱᨣᨾᨶᩮᩉᩥ ᩏᨸᩈᨾ᩠ᨸᨴᩣ ᩈᩁᨱᨣᨾᨶᩪᨸᩈᨾ᩠ᨸᨴᩣ. ᩒᩅᩣᨴᨸ᩠ᨸᨭᩥᨣ᩠ᨣᩉᨱᩪᨸᩈᨾ᩠ᨸᨴᩣ (ᨸᩣᩁᩣ. ᩋᨭ᩠ᨮ. ᪑.᪔᪕) ᨶᩣᨾ –

‘‘ᨲᩈ᩠ᨾᩣᨲᩥᩉ ᨲᩮ, ᨠᩔᨸ, ᩑᩅᩴ ᩈᩥᨠ᩠ᨡᩥᨲᨻ᩠ᨻᩴ ‘ᨲᩥᨻ᩠ᨻᩴ ᨾᩮ ᩉᩥᩁᩮᩣᨲ᩠ᨲᨸ᩠ᨸᩴ ᨸᨧ᩠ᨧᩩᨸᨭ᩠ᨮᩥᨲᩴ ᨽᩅᩥᩔᨲᩥ ᨳᩮᩁᩮᩈᩩ ᨶᩅᩮᩈᩩ ᨾᨩ᩠ᨫᩥᨾᩮᩈᩪ’ᨲᩥ, ᩑᩅᨬ᩠ᩉᩥ ᨲᩮ ᨠᩔᨸ ᩈᩥᨠ᩠ᨡᩥᨲᨻ᩠ᨻᩴ. ᨲᩈ᩠ᨾᩣᨲᩥᩉ ᨲᩮ, ᨠᩔᨸ, ᩑᩅᩴ ᩈᩥᨠ᩠ᨡᩥᨲᨻ᩠ᨻᩴ ‘ᨿᩴ ᨠᩥᨬ᩠ᨧᩥ ᨵᨾ᩠ᨾᩴ ᩈᩩᨱᩥᩔᩣᨾᩥ ᨠᩩᩈᩃᩪᨸᩈᩴᩉᩥᨲᩴ, ᩈᨻ᩠ᨻᩴ ᨲᩴ ᩋᨭ᩠ᨮᩥᩴ ᨠᨲ᩠ᩅᩣ ᨾᨶᩈᩥ ᨠᩁᩥᨲ᩠ᩅᩣ ᩈᨻ᩠ᨻᨧᩮᨲᩈᩣ ᩈᨾᨶ᩠ᨶᩣᩉᩁᩥᨲ᩠ᩅᩣ ᩒᩉᩥᨲᩈᩮᩣᨲᩮᩣ ᨵᨾ᩠ᨾᩴ ᩈᩩᨱᩥᩔᩣᨾᩦ’ᨲᩥ, ᩑᩅᨬ᩠ᩉᩥ ᨲᩮ, ᨠᩔᨸ, ᩈᩥᨠ᩠ᨡᩥᨲᨻ᩠ᨻᩴ. ᨲᩈ᩠ᨾᩣᨲᩥᩉ ᨲᩮ, ᨠᩔᨸ, ᩑᩅᩴ ᩈᩥᨠ᩠ᨡᩥᨲᨻ᩠ᨻᩴ ‘ᩈᩣᨲᩈᩉᨣᨲᩣ ᨧ ᨾᩮ ᨠᩣᨿᨣᨲᩣᩈᨲᩥ ᨶ ᩅᩥᨩᩉᩥᩔᨲᩦ’ᨲᩥ, ᩑᩅᨬ᩠ᩉᩥ ᨲᩮ, ᨠᩔᨸ, ᩈᩥᨠ᩠ᨡᩥᨲᨻ᩠ᨻ’’ᨶ᩠ᨲᩥ (ᩈᩴ. ᨶᩥ. ᪒.᪑᪕᪔) –

ᩍᨾᩥᨶᩣ ᩒᩅᩣᨴᨸ᩠ᨸᨭᩥᨣ᩠ᨣᩉᨱᩮᨶ ᨾᩉᩣᨠᩔᨸᨲ᩠ᨳᩮᩁᩔ ᩋᨶᩩᨬ᩠ᨬᩣᨲᩏᨸᩈᨾ᩠ᨸᨴᩣ.

ᨸᨬ᩠ᩉᩣᨻ᩠ᨿᩣᨠᩁᨱᩪᨸᩈᨾ᩠ᨸᨴᩣ ᨶᩣᨾ ᩈᩮᩣᨸᩣᨠᩔ ᩋᨶᩩᨬ᩠ᨬᩣᨲᩏᨸᩈᨾ᩠ᨸᨴᩣ. ᨽᨣᩅᩣ ᨠᩥᩁ ᨸᩩᨻ᩠ᨻᩣᩁᩣᨾᩮ ᩋᨶᩩᨧᨦ᩠ᨠᨾᨶ᩠ᨲᩴ ᩈᩮᩣᨸᩣᨠᩈᩣᨾᨱᩮᩁᩴ ‘‘‘ᩏᨴ᩠ᨵᩩᨾᩣᨲᨠᩈᨬ᩠ᨬᩣ’ᨲᩥ ᩅᩣ ᩈᩮᩣᨸᩣᨠ ‘ᩁᩪᨸᩈᨬ᩠ᨬᩣ’ᨲᩥ ᩅᩣ ᩍᨾᩮ ᨵᨾ᩠ᨾᩣ ᨶᩣᨶᨲ᩠ᨳᩣ ᨶᩣᨶᩣᨻ᩠ᨿᨬ᩠ᨩᨶᩣ, ᩏᨴᩣᩉᩩ ᩑᨠᨲ᩠ᨳᩣ ᨻ᩠ᨿᨬ᩠ᨩᨶᨾᩮᩅ ᨶᩣᨶ’’ᨶ᩠ᨲᩥ (ᨸᩣᩁᩣ. ᩋᨭ᩠ᨮ. ᪑.᪔᪕) ᨴᩈ ᩋᩈᩩᨽᨶᩥᩔᩥᨲᩮ ᨸᨬ᩠ᩉᩮ ᨸᩩᨧ᩠ᨨᩥ. ᩈᩮᩣ ᨲᩮ ᨻ᩠ᨿᩣᨠᩣᩈᩥ. ᨽᨣᩅᩣ ᨲᩔ ᩈᩣᨵᩩᨠᩣᩁᩴ ᨴᨲ᩠ᩅᩣ ‘‘ᨠᨲᩥᩅᩔᩮᩣ ᨲ᩠ᩅᩴ, ᩈᩮᩣᨸᩣᨠᩣ’’ᨲᩥ ᨸᩩᨧ᩠ᨨᩥ. ᩈᨲ᩠ᨲᩅᩔᩮᩣᩉᩴ ᨽᨣᩅᩣᨲᩥ. ‘‘ᩈᩮᩣᨸᩣᨠ, ᨲ᩠ᩅᩴ ᨾᨾ ᩈᨻ᩠ᨻᨬ᩠ᨬᩩᨲᨬ᩠ᨬᩣᨱᩮᨶ ᩈᨴ᩠ᨵᩥᩴ ᩈᩴᩈᨶ᩠ᨴᩥᨲ᩠ᩅᩣ ᨸᨬ᩠ᩉᩮ ᨻ᩠ᨿᩣᨠᩣᩈᩦ’’ᨲᩥ ᩌᩁᨴ᩠ᨵᨧᩥᨲ᩠ᨲᩮᩣ ᩏᨸᩈᨾ᩠ᨸᨴᩴ ᩋᨶᩩᨩᩣᨶᩥ, ᩋᨿᩴ ᨸᨬ᩠ᩉᩣᨻ᩠ᨿᩣᨠᩁᨱᩪᨸᩈᨾ᩠ᨸᨴᩣ.

ᩋᨭ᩠ᨮᨣᩁᩩᨵᨾ᩠ᨾᨸᨭᩥᨣ᩠ᨣᩉᨱᩪᨸᩈᨾ᩠ᨸᨴᩣ ᨶᩣᨾ ᨾᩉᩣᨸᨩᩣᨸᨲᩥᨿᩣ ᩋᨭ᩠ᨮᨣᩁᩩᨵᨾ᩠ᨾᨸ᩠ᨸᨭᩥᨣ᩠ᨣᩉᨱᩮᨶ ᩋᨶᩩᨬ᩠ᨬᩣᨲᩏᨸᩈᨾ᩠ᨸᨴᩣ.

ᨴᩪᨲᩮᨶᩪᨸᩈᨾ᩠ᨸᨴᩣ ᨶᩣᨾ ᩋᨯ᩠ᨰᨠᩣᩈᩥᨿᩣ ᨣᨱᩥᨠᩣᨿ ᩋᨶᩩᨬ᩠ᨬᩣᨲᩏᨸᩈᨾ᩠ᨸᨴᩣ.

ᩋᨭ᩠ᨮᩅᩣᨧᩥᨠᩪᨸᩈᨾ᩠ᨸᨴᩣ ᨶᩣᨾ ᨽᩥᨠ᩠ᨡᩩᨶᩥᨿᩣ ᨽᩥᨠ᩠ᨡᩩᨶᩥᩈᨦ᩠ᨥᨲᩮᩣ ᨬᨲ᩠ᨲᩥᨧᨲᩩᨲ᩠ᨳᩮᨶ, ᨽᩥᨠ᩠ᨡᩩᩈᨦ᩠ᨥᨲᩮᩣ ᨬᨲ᩠ᨲᩥᨧᨲᩩᨲ᩠ᨳᩮᨶᩣᨲᩥ ᩍᨾᩮᩉᩥ ᨴ᩠ᩅᩦᩉᩥ ᨠᨾ᩠ᨾᩮᩉᩥ ᩏᨸᩈᨾ᩠ᨸᨴᩣ.

ᨬᨲ᩠ᨲᩥᨧᨲᩩᨲ᩠ᨳᨠᨾ᩠ᨾᩪᨸᩈᨾ᩠ᨸᨴᩣ ᨶᩣᨾ ᨽᩥᨠ᩠ᨡᩪᨶᩴ ᩑᨲᩁᩉᩥ ᩏᨸᩈᨾ᩠ᨸᨴᩣ. ᨬᨲ᩠ᨲᩥᨧᨲᩩᨲ᩠ᨳᩮᨶᩣᨲᩥ ᨲᩦᩉᩥ ᩋᨶᩩᩔᩣᩅᨶᩣᩉᩥ, ᩑᨠᩣᨿ ᨧ ᨬᨲ᩠ᨲᩥᨿᩣᨲᩥ ᩑᩅᩴ ᨬᨲ᩠ᨲᩥᨧᨲᩩᨲ᩠ᨳᩮᨶ. ᨠᩥᨬ᩠ᨧᩣᨸᩥ ᩉᩥ ᨬᨲ᩠ᨲᩥ ᩈᨻ᩠ᨻᨸᨮᨾᩴ ᩅᩩᨧ᩠ᨧᨲᩥ, ᨲᩥᩔᨶ᩠ᨶᩴ ᨸᨶ ᩋᨶᩩᩔᩣᩅᨶᩣᨶᩴ ᩋᨲ᩠ᨳᨻ᩠ᨿᨬ᩠ᨩᨶᨽᩮᨴᩣᨽᩣᩅᨲᩮᩣ ᩋᨲ᩠ᨳᨻ᩠ᨿᨬ᩠ᨩᨶᨽᩥᨶ᩠ᨶᩴ ᨬᨲ᩠ᨲᩥᩴ ᨲᩣᩈᩴ ᨧᨲᩩᨲ᩠ᨳᨶ᩠ᨲᩥ ᨠᨲ᩠ᩅᩣ ‘‘ᨬᨲ᩠ᨲᩥᨧᨲᩩᨲ᩠ᨳ’’ᨶ᩠ᨲᩥ ᩅᩩᨧ᩠ᨧᨲᩥ. ᩋᨠᩩᨸ᩠ᨸᩮᨶᩣᨲᩥ ᩋᨠᩮᩣᨸᩮᨲᨻ᩠ᨻᨲᩴ, ᩋᨸ᩠ᨸᨭᩥᨠ᩠ᨠᩮᩣᩈᩥᨲᨻ᩠ᨻᨲᨬ᩠ᨧ ᩏᨸᨣᨲᩮᨶ. ᨮᩣᨶᩣᩁᩉᩮᨶᩣᨲᩥ ᨠᩣᩁᨱᩣᩁᩉᩮᨶ ᩈᨲ᩠ᨳᩩ ᩈᩣᩈᨶᩣᩁᩉᩮᨶ. ᩏᨸᩈᨾ᩠ᨸᨶ᩠ᨶᩮᩣ ᨶᩣᨾ ᩏᨸᩁᩥᨽᩣᩅᩴ ᩈᨾᩣᨸᨶ᩠ᨶᩮᩣ, ᨸᨲ᩠ᨲᩮᩣᨲᩥ ᩋᨲ᩠ᨳᩮᩣ. ᨽᩥᨠ᩠ᨡᩩᨽᩣᩅᩮᩣ ᩉᩥ ᩏᨸᩁᩥᨽᩣᩅᩮᩣ, ᨲᨬ᩠ᨧᩮᩈ ᨿᨳᩣᩅᩩᨲ᩠ᨲᩮᨶ ᨠᨾ᩠ᨾᩮᨶ ᩈᨾᩣᨸᨶ᩠ᨶᨲ᩠ᨲᩣ ‘‘ᩏᨸᩈᨾ᩠ᨸᨶ᩠ᨶᩮᩣ’’ᨲᩥ ᩅᩩᨧ᩠ᨧᨲᩥ. ᨠᩈ᩠ᨾᩣ ᨸᨶᩮᨲ᩠ᨳ ᩍᨾᩥᨶᩣᩅ ᩏᨸᩈᨾ᩠ᨸᨶ᩠ᨶᩮᩣ ᩍᨵ ᨣᩉᩥᨲᩮᩣ, ᨶᩣᨬ᩠ᨬᩮᩉᩦᨲᩥ? ᩅᩩᨧ᩠ᨧᨲᩮ – ᩑᩉᩥᨽᩥᨠ᩠ᨡᩪᨸᩈᨾ᩠ᨸᨴᩣ ᩋᨶ᩠ᨲᩥᨾᨽᩅᩥᨠᩣᨶᨾᩮᩅ, ᩈᩁᨱᨣᨾᨶᩪᨸᩈᨾ᩠ᨸᨴᩣ ᨸᩁᩥᩈᩩᨴ᩠ᨵᩣᨶᩴ, ᩒᩅᩣᨴᨸ᩠ᨸᨭᩥᨣ᩠ᨣᩉᨱᨸᨬ᩠ᩉᩣᨻ᩠ᨿᩣᨠᩁᨱᩪᨸᩈᨾ᩠ᨸᨴᩣ ᨾᩉᩣᨠᩔᨸᩈᩮᩣᨸᩣᨠᩣᨶᩴ, ᨶ ᨧ ᨲᩮ ᨽᨻ᩠ᨻᩣ ᨸᩣᩁᩣᨩᩥᨠᩣᨴᩥᩃᩮᩣᨠᩅᨩ᩠ᨩᩴ ᩌᨸᨩ᩠ᨩᩥᨲᩩᩴ, ᩋᨭ᩠ᨮᨣᩁᩩᨵᨾ᩠ᨾᨸ᩠ᨸᨭᩥᨣ᩠ᨣᩉᨱᩣᨴᨿᩮᩣ ᨧ ᨽᩥᨠ᩠ᨡᩩᨶᩦᨶᩴᨿᩮᩅ ᩋᨶᩩᨬ᩠ᨬᩣᨲᩣ. ᩋᨿᨬ᩠ᨧ ᨽᩥᨠ᩠ᨡᩩ, ᨲᩈ᩠ᨾᩣ ᨬᨲ᩠ᨲᩥᨧᨲᩩᨲ᩠ᨳᩮᨶᩮᩅ ᩏᨸᩈᨾ᩠ᨸᨴᩣᨠᨾ᩠ᨾᩮᨶ ᩏᨸᩈᨾ᩠ᨸᨶ᩠ᨶᩮᩣ ᩍᨵ ᨣᩉᩥᨲᩮᩣ, ᨶᩣᨬ᩠ᨬᩮᩉᩦᨲᩥ ᩅᩮᨴᩥᨲᨻ᩠ᨻᩮᩣ. ᨸᨱ᩠ᨱᨲ᩠ᨲᩥᩅᨩ᩠ᨩᩮᩈᩩ ᨸᨶ ᩈᩥᨠ᩠ᨡᩣᨸᨴᩮᩈᩩ ᩋᨬ᩠ᨬᩮᨸᩥ ᩑᩉᩥᨽᩥᨠ᩠ᨡᩪᨸᩈᨾ᩠ᨸᨴᩣᨿ ᩏᨸᩈᨾ᩠ᨸᨶ᩠ᨶᩣᨴᨿᩮᩣ ᩈᨦ᩠ᨣᨿ᩠ᩉᨶ᩠ᨲᩥ (ᩈᩣᩁᨲ᩠ᨳ. ᨭᩦ. ᪒.᪔᪕ ᨽᩥᨠ᩠ᨡᩩᨸᨴᨽᩣᨩᨶᩦᨿᩅᨱ᩠ᨱᨶᩣ). ᩅᨠ᩠ᨡᨲᩥ ᩉᩥ ‘‘ᨸᨱ᩠ᨱᨲ᩠ᨲᩥᩅᨩ᩠ᨩᩮᩈᩩ ᨸᨶ ᩋᨬ᩠ᨬᩮᨸᩥ ᩈᨦ᩠ᨣᩉᩴ ᨣᨧ᩠ᨨᨶ᩠ᨲᩦ’’ᨲᩥ. ᩍᨴᩣᨶᩥ ‘‘ᩋᨠᩩᨸ᩠ᨸᩮᨶ ᨮᩣᨶᩣᩁᩉᩮᨶ ᩏᨸᩈᨾ᩠ᨸᨶ᩠ᨶᩮᩣ’’ᨲᩥ ᩈᩴᨡᩥᨲ᩠ᨲᩮᨶ ᩅᩩᨲ᩠ᨲᨾᨲ᩠ᨳᩴ ᩅᩥᨲ᩠ᨳᩣᩁᩮᨲ᩠ᩅᩣ ᨴᩔᩮᨲᩩᩴ ‘‘ᨲᩔ ᨸᨶᩣ’’ᨲᩥᩌᨴᩥᨾᩣᩉ.

ᨲᨲ᩠ᨳᩣᨲᩥ ᨲᩮᩈᩩ ᨸᨬ᩠ᨧᩈᩩ. ᩅᩈᨲᩥ ᩑᨲ᩠ᨳᩣᨲᩥ ᩅᨲ᩠ᨳᩩ, ᩌᨵᩣᩁᩮᩣ ᨸᨲᩥᨭ᩠ᨮᩣ. ᨲᩮᨶᩣᩉ ‘‘ᩏᨸᩈᨾ᩠ᨸᨴᩣᨸᩮᨠ᩠ᨡᩮᩣ ᨸᩩᨣ᩠ᨣᩃᩮᩣ’’ᨲᩥ. ᩐᨶᩣᨶᩥ ᩋᨸᩁᩥᨸᩩᨱ᩠ᨱᩣᨶᩥ ᩅᩦᩈᨲᩥ ᩅᩔᩣᨶᩥ ᩋᩔᩣᨲᩥ ᩐᨶᩅᩦᩈᨲᩥᩅᩔᩮᩣ. ᩑᨲ᩠ᨳ ᨿᩴ ᩅᨲ᩠ᨲᨻ᩠ᨻᩴ, ᨲᩴ ᩏᨸᩁᩥ ᩈᨸ᩠ᨸᩣᨱᨠᩅᨣ᩠ᨣᩮ ᩐᨶᩅᩦᩈᨲᩥᩈᩥᨠ᩠ᨡᩣᨸᨴᩮ (ᨠᨦ᩠ᨡᩣ. ᩋᨭ᩠ᨮ. ᩐᨶᩅᩦᩈᨲᩥᩅᩔᩈᩥᨠ᩠ᨡᩣᨸᨴᩅᨱ᩠ᨱᨶᩣ) ᩅᨱ᩠ᨱᨿᩥᩔᩣᨾ. ᨲᩮᩈᩪᨲᩥ ᨸᨱ᩠ᨯᨠᩣᨴᩦᩈᩩ ᩑᨠᩣᨴᩈᩈᩩ ᩋᨽᨻ᩠ᨻᨸᩩᨣ᩠ᨣᩃᩮᩈᩩ. ᨸᨱ᩠ᨯᨠᩮᩣ (ᨾᩉᩣᩅ. ᩋᨭ᩠ᨮ. ᪑᪐᪙) ᨸᨶᩮᨲ᩠ᨳ ᨸᨬ᩠ᨧᩅᩥᨵᩮᩣ ᩉᩮᩣᨲᩥ ᩌᩈᩥᨲ᩠ᨲᨸᨱ᩠ᨯᨠᩮᩣ, ᩏᩈᩪᨿᨸᨱ᩠ᨯᨠᩮᩣ, ᩒᨸᨠ᩠ᨠᨾᩥᨠᨸᨱ᩠ᨯᨠᩮᩣ, ᨶᨸᩩᩴᩈᨠᨸᨱ᩠ᨯᨠᩮᩣ, ᨸᨠ᩠ᨡᨸᨱ᩠ᨯᨠᩮᩣᨲᩥ. ᨲᩮᩈᩩ ᩌᩈᩥᨲ᩠ᨲᨸᨱ᩠ᨯᨠᩔ ᨧ ᩏᩈᩪᨿᨸᨱ᩠ᨯᨠᩔ ᨧ ᨸᨻ᩠ᨻᨩ᩠ᨩᩣ ᨶ ᩅᩣᩁᩥᨲᩣ, ᩍᨲᩁᩮᩈᩴ ᨲᩥᨱ᩠ᨱᩴ ᩅᩣᩁᩥᨲᩣ. ᨲᩮᩈᩩᨸᩥ ᨸᨠ᩠ᨡᨸᨱ᩠ᨯᨠᩔ ᨿᩈ᩠ᨾᩥᩴ ᨸᨠ᩠ᨡᩮ ᨸᨱ᩠ᨯᨠᩮᩣ ᩉᩮᩣᨲᩥ, ᨲᩈ᩠ᨾᩥᩴᨿᩮᩅᩔ ᨸᨠ᩠ᨡᩮ ᨸᨻ᩠ᨻᨩ᩠ᨩᩣ ᩅᩣᩁᩥᨲᩣᨲᩥ. ᨲᨿᩮᩣ ᨧᩮᨲ᩠ᨳ ᨸᨻ᩠ᨻᨩ᩠ᨩᩪᨸᩈᨾ᩠ᨸᨴᩣᨶᩴ ᩋᨽᨻ᩠ᨻᨲᩣᨿ ᩋᩅᨲ᩠ᨳᩪ. ᨲᩮᨶᩣᩉ ‘‘ᩌᩈᩥᨲ᩠ᨲᨸᨱ᩠ᨯᨠᨬ᩠ᨧᩣ’’ᨲᩥᩌᨴᩥ. ᨲᨲ᩠ᨳ ᨿᩔ ᨸᩁᩮᩈᩴ ᩋᨦ᩠ᨣᨩᩣᨲᩴ ᨾᩩᨡᩮᨶ ᨣᩉᩮᨲ᩠ᩅᩣ ᩋᩈᩩᨧᩥᨶᩣ ᩌᩈᩥᨲ᩠ᨲᩔ ᨸᩁᩥᩊᩣᩉᩮᩣ ᩅᩪᨸᩈᨾ᩠ᨾᨲᩥ, ᩋᨿᩴ ᩌᩈᩥᨲ᩠ᨲᨸᨱ᩠ᨯᨠᩮᩣ. ᨿᩔ ᨸᩁᩮᩈᩴ ᩋᨩ᩠ᨫᩣᨧᩣᩁᩴ ᨸᩔᨲᩮᩣ ᩏᩈᩪᨿᩣᨿ ᩏᨸ᩠ᨸᨶ᩠ᨶᩣᨿ ᨸᩁᩥᩊᩣᩉᩮᩣ ᩅᩪᨸᩈᨾ᩠ᨾᨲᩥ, ᩋᨿᩴ ᩏᩈᩪᨿᨸᨱ᩠ᨯᨠᩮᩣ. ᨿᩔ ᩏᨸᨠ᩠ᨠᨾᩮᨶ ᨻᩦᨩᩣᨶᩥ ᩋᨸᨶᩦᨲᩣᨶᩥ, ᩋᨿᩴ ᩒᨸᨠ᩠ᨠᨾᩥᨠᨸᨱ᩠ᨯᨠᩮᩣ (ᩅᩥ. ᩈᨦ᩠ᨣ. ᩋᨭ᩠ᨮ. ᪑᪓᪕; ᩅᩥ. ᩅᩥ. ᨭᩦ. ᨾᩉᩣᩅᨣ᩠ᨣ ᪒.᪑᪐᪙). ᨿᩮᩣ ᨸᨶ ᨸᨭᩥᩈᨶ᩠ᨵᩥᨿᩴᨿᩮᩅ ᩋᨽᩣᩅᨠᩮᩣ ᩏᨸ᩠ᨸᨶ᩠ᨶᩮᩣ, ᩋᨿᩴ ᨶᨸᩩᩴᩈᨠᨸᨱ᩠ᨯᨠᩮᩣ. ᩑᨠᨧ᩠ᨧᩮᩣ ᨸᨶ ᩋᨠᩩᩈᩃᩅᩥᨸᩣᨠᩣᨶᩩᨽᩣᩅᩮᨶ ᨠᩣᩊᨸᨠ᩠ᨡᩮ ᨸᨱ᩠ᨯᨠᩮᩣ ᩉᩮᩣᨲᩥ, ᨩᩩᨱ᩠ᩉᨸᨠ᩠ᨡᩮ ᨸᨶᩔ ᨸᩁᩥᩊᩣᩉᩮᩣ ᩅᩪᨸᩈᨾ᩠ᨾᨲᩥ, ᩋᨿᩴ ᨸᨠ᩠ᨡᨸᨱ᩠ᨯᨠᩮᩣᨲᩥ ᩅᩮᨴᩥᨲᨻ᩠ᨻᩮᩣ.

ᨳᩮᨿ᩠ᨿᩮᨶ ᩈᩴᩅᩣᩈᩮᩣ ᩑᨲᩔᩣᨲᩥ ᨳᩮᨿ᩠ᨿᩈᩴᩅᩣᩈᨠᩮᩣ. ᩈᩮᩣ ᨧ ᨶ ᩈᩴᩅᩣᩈᨾᨲ᩠ᨲᩔᩮᩅ ᨳᩮᨶᨠᩮᩣ ᩍᨵᩣᨵᩥᨸ᩠ᨸᩮᨲᩮᩣ, ᩋᨳ ᨡᩮᩣ ᩃᩥᨦ᩠ᨣᩔ, ᨲᨴᩩᨽᨿᩔ ᨧ ᨳᩮᨶᨠᩮᩣᨸᩦᨲᩥ ᩌᩉ ‘‘ᨳᩮᨿ᩠ᨿᩈᩴᩅᩣᩈᨠᩮᩣ ᨸᨶ ᨲᩥᩅᩥᨵᩮᩣ’’ᨲᩥᩌᨴᩥ. ᨶ ᨽᩥᨠ᩠ᨡᩩᩅᩔᩣᨶᩥ ᨣᨱᩮᨲᩦᨲᩥ (ᨾᩉᩣᩅ. ᩋᨭ᩠ᨮ. ᪑᪑᪐) ‘‘ᩋᩉᩴ ᨴᩈᩅᩔᩮᩣ ᩅᩣ ᩅᩦᩈᨲᩥᩅᩔᩮᩣ ᩅᩣ’’ᨲᩥ ᨾᩩᩈᩣ ᩅᨲ᩠ᩅᩣ ᨽᩥᨠ᩠ᨡᩩᩅᩔᩣᨶᩥ ᨶ ᨣᨱᩮᨲᩥ. ᨶ ᨿᨳᩣᩅᩩᨯ᩠ᨰᩴ ᨽᩥᨠ᩠ᨡᩪᨶᩴ ᩅᩣ ᩈᩣᨾᨱᩮᩁᩣᨶᩴ ᩅᩣ ᩅᨶ᩠ᨴᨶᩴ ᩈᩣᨴᩥᨿᨲᩦᨲᩥ ᩋᨲ᩠ᨲᨶᩣ ᨾᩩᩈᩣᩅᩣᨴᩴ ᨠᨲ᩠ᩅᩣ ᨴᩔᩥᨲᩅᩔᩣᨶᩩᩁᩪᨸᩮᨶ ᨿᨳᩣᩅᩩᨯ᩠ᨰᩴ ᩅᨶ᩠ᨴᨶᩴ ᨶᩣᨵᩥᩅᩣᩈᩮᨲᩥ. ᨶ ᩌᩈᨶᩮᨶ ᨸᨭᩥᨻᩣᩉᨲᩦᨲᩥ ‘‘ᩋᨸᩮᩉᩥ, ᨾᩮ ᩑᨲᩴ ᨸᩣᨸᩩᨱᩣᨲᩦ’’ᨲᩥ ᩌᩈᨶᩮᨶ ᨶᨸ᩠ᨸᨭᩥᨻᩣᩉᨲᩥ. ᨶ ᩏᨸᩮᩣᩈᨳᩣᨴᩦᩈᩩ ᩈᨶ᩠ᨴᩥᩔᨲᩦᨲᩥ ᩏᨸᩮᩣᩈᨳᨸ᩠ᨸᩅᩣᩁᨱᩣᨴᩦᩈᩩ ᨶ ᩈᨶ᩠ᨴᩥᩔᨲᩥ. ᩃᩥᨦ᩠ᨣᨾᨲ᩠ᨲᩔᩮᩅᩣᨲᩥ ᩑᩅᩈᨴ᩠ᨴᩮᨶ ᩈᩴᩅᩣᩈᩴ ᨶᩥᩅᨲ᩠ᨲᩮᨲᩥ. ᩈᨾᩣᨶᩮᩣᨲᩥ ᩈᨶ᩠ᨲᩮᩣ. ᩃᩥᨦ᩠ᨣᩣᨶᩩᩁᩪᨸᩔ ᩈᩴᩅᩣᩈᩔᩣᨲᩥ ᩈᩣᨾᨱᩮᩁᩃᩥᨦ᩠ᨣᩣᨶᩩᩁᩪᨸᩔ ᩈᩣᨾᨱᩮᩁᩈᩴᩅᩣᩈᩔ. ᩈᨧᩮ ᨸᨶ ᨠᩣᩈᩣᨿᩮ ᨵᩩᩁᩴ ᨶᩥᨠ᩠ᨡᩥᨸᩥᨲ᩠ᩅᩣ ᨶᨣ᩠ᨣᩮᩣ ᩅᩣ ᩒᨴᩣᨲᩅᨲ᩠ᨳᨶᩥᩅᨲ᩠ᨳᩮᩣ ᩅᩣ ᨾᩮᨳᩩᨶᩈᩮᩅᨶᩣᨴᩦᩉᩥ ᩋᩔᨾᨱᩮᩣ ᩉᩩᨲ᩠ᩅᩣ ᨠᩣᩈᩣᨿᩣᨶᩥ ᨶᩥᩅᩣᩈᩮᨲᩥ, ᩃᩥᨦ᩠ᨣᨲ᩠ᨳᩮᨶᨠᩮᩣ ᩉᩮᩣᨲᩥ. ᩈᨧᩮ ᨣᩥᩉᩥᨽᩣᩅᩴ ᨸᨲ᩠ᨳᨿᨾᩣᨶᩮᩣ ᨠᩣᩈᩣᨿᩴ ᩒᩅᨭ᩠ᨭᩥᨠᩴ ᨠᨲ᩠ᩅᩣ, ᩋᨬ᩠ᨬᩮᨶ ᩅᩣ ᩌᨠᩣᩁᩮᨶ ᨣᩥᩉᩥᨶᩥᩅᩣᩈᨶᩮᨶ ᨶᩥᩅᩣᩈᩮᨲᩥ ‘‘ᩈᩮᩣᨽᨲᩥ ᨶᩩ ᨡᩮᩣ ᨾᩮ ᨣᩥᩉᩥᩃᩥᨦ᩠ᨣᩴ, ᨶ ᩈᩮᩣᨽᨲᩦ’’ᨲᩥ ᩅᩦᨾᩴᩈᨶᨲ᩠ᨳᩴ, ᩁᨠ᩠ᨡᨲᩥ ᨲᩣᩅ, ‘‘ᩈᩮᩣᨽᨲᩦ’’ᨲᩥ ᩈᨾ᩠ᨸᨭᩥᨧ᩠ᨨᩥᨲ᩠ᩅᩣ ᨸᩩᨶ ᩃᩥᨦ᩠ᨣᩴ ᩈᩣᨴᩥᨿᨲᩥ, ᩃᩥᨦ᩠ᨣᨲ᩠ᨳᩮᨶᨠᩮᩣ ᩉᩮᩣᨲᩥ. ᩒᨴᩣᨲᩴ ᨶᩥᩅᩣᩈᩮᨲ᩠ᩅᩣ ᩅᩦᨾᩴᩈᨶᩈᨾ᩠ᨸᨭᩥᨧ᩠ᨨᨶᩮᩈᩩᨸᩥ ᩑᩈᩮᩅ ᨶᨿᩮᩣ. ᩈᨧᩮᨸᩥ ᨶᩥᩅᨲ᩠ᨳᨠᩣᩈᩣᩅᩔ ᩏᨸᩁᩥ ᩒᨴᩣᨲᩴ ᨶᩥᩅᩣᩈᩮᨲ᩠ᩅᩣ ᩅᩦᨾᩴᩈᨲᩥ ᩅᩣ ᩈᨾ᩠ᨸᨭᩥᨧ᩠ᨨᨲᩥ ᩅᩣ, ᩁᨠ᩠ᨡᨲᩥ ᩑᩅ.

ᩋᨶ᩠ᨲᩥᨾᩅᨲ᩠ᨳᩩᩋᨩ᩠ᨫᩣᨸᨶ᩠ᨶᨠᩮᨸᩥ ᩑᩈᩮᩅ ᨶᨿᩮᩣᨲᩥ ᨸᩣᩁᩣᨩᩥᨠᩴ ᩌᨸᨶ᩠ᨶᨠᩮ ᨽᩥᨠ᩠ᨡᩩᨾ᩠ᩉᩥᨸᩥ ᩑᩈᩮᩅ ᨶᨿᩮᩣᨲᩥ ᩋᨲ᩠ᨳᩮᩣ. ᩍᨴᩴ ᩅᩩᨲ᩠ᨲᩴ ᩉᩮᩣᨲᩥ – ᩈᨧᩮ ᨠᩮᩣᨧᩥ ᨽᩥᨠ᩠ᨡᩩ ᨠᩣᩈᩣᨿᩮ ᩈᩏᩔᩣᩉᩮᩣᩅ ᩒᨴᩣᨲᩴ ᨶᩥᩅᩣᩈᩮᨲ᩠ᩅᩣ ᨾᩮᨳᩩᨶᩴ ᨸᨭᩥᩈᩮᩅᩥᨲ᩠ᩅᩣ ᨸᩩᨶ ᨠᩣᩈᩣᨿᩣᨶᩥ ᨶᩥᩅᩣᩈᩮᨲ᩠ᩅᩣ ᩅᩔᨣᨱᨶᩣᨴᩥᨽᩮᨴᩴ ᩈᨻ᩠ᨻᩴ ᩅᩥᨵᩥᩴ ᩌᨸᨩ᩠ᨩᨲᩥ, ᩋᨿᩴ ᨽᩥᨠ᩠ᨡᩪᩉᩥ ᨴᩥᨶ᩠ᨶᩃᩥᨦ᩠ᨣᩔ ᩋᨸᩁᩥᨧ᩠ᨧᨲ᩠ᨲᨲ᩠ᨲᩣ ᨶ ᩃᩥᨦ᩠ᨣᨲ᩠ᨳᩮᨶᨠᩮᩣ, ᩃᩥᨦ᩠ᨣᩣᨶᩩᩁᩪᨸᩔ ᩈᩴᩅᩣᩈᩔ ᩈᩣᨴᩥᨲᨲ᩠ᨲᩣ ᨶᩣᨸᩥ ᩈᩴᩅᩣᩈᨲ᩠ᨳᩮᨶᨠᩮᩣᨲᩥ. ᩅᩥᨴᩮᩈᨶ᩠ᨲᩥ ᨸᩁᨴᩮᩈᩴ. ᩍᨴᨬ᩠ᨧ ᩅᨬ᩠ᨧᩮᨲᩩᩴ ᩈᨠ᩠ᨠᩩᨱᩮᨿ᩠ᨿᨭ᩠ᨮᩣᨶᩴ ᨴᩔᩮᨲᩩᩴ ᩅᩩᨲ᩠ᨲᩴ. ᨿᩮᩣ ᨸᨶ ᩈᨴᩮᩈᩮᨸᩥ ᩑᩅᩴ ᨠᩁᩮᩣᨲᩥ, ᩈᩮᩣᨸᩥ ᩈᩴᩅᩣᩈᨲ᩠ᨳᩮᨶᨠᩮᩣᩅ. ‘‘ᩈᩴᩅᩣᩈᨾᨲ᩠ᨲᩔᩮᩅᩣ’’ᨲᩥ ᩍᨾᩥᨶᩣ ᩃᩥᨦ᩠ᨣᩴ ᨸᨭᩥᨠ᩠ᨡᩥᨸᨲᩥ. ᩈᨧᩮ ᨠᩮᩣᨧᩥ ᩅᩩᨯ᩠ᨰᨸᨻ᩠ᨻᨩᩥᨲᩮᩣ (ᨾᩉᩣᩅ. ᩋᨭ᩠ᨮ. ᪑᪑᪐) ᨽᩥᨠ᩠ᨡᩩᩅᩔᩣᨶᩥ ᨣᨱᩮᨲ᩠ᩅᩣ ᨾᩉᩣᨸᩮᩊᩣᨴᩦᩈᩩ ᨴᩥᨿ᩠ᨿᨾᩣᨶᨽᨲ᩠ᨲᩴ ᨣᨱ᩠ᩉᩣᨲᩥ, ᩈᩮᩣᨸᩥ ᨳᩮᨿ᩠ᨿᩈᩴᩅᩣᩈᨠᩮᩣ ᩉᩮᩣᨲᩥ. ᩈᨿᩴ ᩈᩣᨾᨱᩮᩁᩮᩣᩅ ᩈᩣᨾᨱᩮᩁᨸ᩠ᨸᨭᩥᨸᩣᨭᩥᨿᩣ ᨠᩪᨭᩅᩔᩣᨶᩥ ᨣᨱᩮᨲ᩠ᩅᩣ ᨣᨱ᩠ᩉᨶ᩠ᨲᩮᩣ ᨳᩮᨿ᩠ᨿᩈᩴᩅᩣᩈᨠᩮᩣ ᨶ ᩉᩮᩣᨲᩥ. ᨽᩥᨠ᩠ᨡᩩ ᨸᨶ ᨽᩥᨠ᩠ᨡᩩᨸᨭᩥᨸᩣᨭᩥᨿᩣ ᨠᩪᨭᩅᩔᩣᨶᩥ ᨣᨱᩮᨲ᩠ᩅᩣ ᨣᨱ᩠ᩉᨶ᩠ᨲᩮᩣ ᨽᨱ᩠ᨯᨣ᩠ᨥᩮᨶ ᨠᩣᩁᩮᨲᨻ᩠ᨻᩮᩣ.

ᨶᨶᩩ ᩈᩴᩅᩣᩈᩮᩣ ᨶᩣᨾ ᩑᨠᨠᨾ᩠ᨾᩴ ᩑᨠᩩᨴ᩠ᨴᩮᩈᩮᩣ ᩈᨾᩈᩥᨠ᩠ᨡᨲᩣᨲᩥ ᩌᩉ ‘‘ᨽᩥᨠ᩠ᨡᩩᩅᩔᨣᨱᨶᩣᨴᩥᨠᩮᩣ ᩉᩦ’’ᨲᩥᩌᨴᩥ. ᩍᨾᩥᨶᩣ ᨶ ᨠᩮᩅᩃᩴ ᩑᨠᨠᨾ᩠ᨾᩣᨴᩥᨠᩮᩣᩅ ᨠᩥᩁᩥᨿᨽᩮᨴᩮᩣ ᩈᩴᩅᩣᩈᩮᩣᨲᩥ ᩍᨵᩣᨵᩥᨸ᩠ᨸᩮᨲᩮᩣ, ᩋᨳ ᨡᩮᩣ ᨲᨴᨬ᩠ᨬᩮᩣ ᨽᩥᨠ᩠ᨡᩩᩅᩔᨣᨱᨶᩣᨴᩥᨠᩮᩣᨸᩦᨲᩥ ᨴᩔᩮᨲᩥ. ᩍᨾᩈ᩠ᨾᩥᩴ ᩋᨲ᩠ᨳᩮᨲᩥ ᨳᩮᨿ᩠ᨿᩈᩴᩅᩣᩈᨠᩣᨵᩥᨠᩣᩁᩮ. ᩈᩥᨠ᩠ᨡᩴ ᨸᨧ᩠ᨧᨠ᩠ᨡᩣᨿᩣᨲᩥ ᩈᩥᨠ᩠ᨡᩴ ᨸᩁᩥᨧ᩠ᨧᨩᩥᨲ᩠ᩅᩣ. ᩍᨴᩴ ᩅᩩᨲ᩠ᨲᩴ ᩉᩮᩣᨲᩥ – ᩈᨧᩮ ᨠᩮᩣᨧᩥ ᨽᩥᨠ᩠ᨡᩩ ᩈᩥᨠ᩠ᨡᩴ ᨸᨧ᩠ᨧᨠ᩠ᨡᩣᨿ ᩃᩥᨦ᩠ᨣᩴ ᩋᨶᨸᨶᩮᨲ᩠ᩅᩣ ᨴᩩᩔᩦᩃᨠᨾ᩠ᨾᩴ ᨠᨲ᩠ᩅᩣ ᩅᩣ ᩋᨠᨲ᩠ᩅᩣ ᩅᩣ ‘‘ᨶ ᨾᩴ ᨠᩮᩣᨧᩥ ᨩᩣᨶᩣᨲᩦ’’ᨲᩥ ᨸᩩᨶ ᩈᨻ᩠ᨻᩴ ᨸᩩᨻ᩠ᨻᩮ ᩅᩩᨲ᩠ᨲᩴ ᩅᩔᨣᨱᨶᩣᨴᩥᨽᩮᨴᩴ ᩅᩥᨵᩥᩴ ᨸᨭᩥᨸᨩ᩠ᨩᨲᩥ, ᩈᩮᩣ ᨳᩮᨿ᩠ᨿᩈᩴᩅᩣᩈᨠᩮᩣ ᩉᩮᩣᨲᩦᨲᩥ.

ᩈᨧᩮ ᨸᨶ ᨠᩔᨧᩥ ᩁᩣᨩᩣ ᨠᩩᨴ᩠ᨵᩮᩣ ᩉᩮᩣᨲᩥ, ᩈᩮᩣ ‘‘ᩑᩅᩴ ᨾᩮ ᩈᩮᩣᨲ᩠ᨳᩥ ᨽᩅᩥᩔᨲᩦ’’ᨲᩥ ᩈᨿᨾᩮᩅ ᩃᩥᨦ᩠ᨣᩴ ᨣᩉᩮᨲ᩠ᩅᩣ ᨸᩃᩣᨿᨲᩥ. ᨲᩴ ᨴᩥᩈ᩠ᩅᩣ ᩁᨬ᩠ᨬᩮᩣ ᩌᩁᩮᩣᨧᩮᨶ᩠ᨲᩥ. ᩁᩣᨩᩣ ‘‘ᩈᨧᩮ ᨸᨻ᩠ᨻᨩᩥᨲᩮᩣ, ᨶ ᨲᩴ ᩃᨻ᩠ᨽᩣ ᨠᩥᨬ᩠ᨧᩥ ᨠᩣᨲᩩ’’ᨶ᩠ᨲᩥ ᨲᩈ᩠ᨾᩥᩴ ᨠᩮᩣᨵᩴ ᨸᨭᩥᩅᩥᨶᩮᨲᩥ. ᩈᩮᩣ ‘‘ᩅᩪᨸᩈᨶ᩠ᨲᩴ ᨾᩮ ᩁᩣᨩᨽᨿ’’ᨶ᩠ᨲᩥ ᩈᨦ᩠ᨥᨾᨩ᩠ᨫᩴ ᩋᨶᩮᩣᩈᩁᩥᨲ᩠ᩅᩣᩅ ᨣᩥᩉᩥᩃᩥᨦ᩠ᨣᩴ ᨣᩉᩮᨲ᩠ᩅᩣ ᩌᨣᨲᩮᩣ ᨸᨻ᩠ᨻᩣᨩᩮᨲᨻ᩠ᨻᩮᩣ. ᩋᨳᩣᨸᩥ ‘‘ᩈᩣᩈᨶᩴ ᨶᩥᩔᩣᨿ ᨾᨿᩣ ᨩᩦᩅᩥᨲᩴ ᩃᨴ᩠ᨵᩴ, ᩉᨶ᩠ᨴ ᨴᩣᨶᩥ ᩋᩉᩴ ᨸᨻ᩠ᨻᨩᩣᨾᩦ’’ᨲᩥ ᩏᨸ᩠ᨸᨶ᩠ᨶᩈᩴᩅᩮᨣᩮᩣ ᨲᩮᨶᩮᩅ ᩃᩥᨦ᩠ᨣᩮᨶ ᩌᨣᨶ᩠ᨲ᩠ᩅᩣ ᩌᨣᨶ᩠ᨲᩩᨠᩅᨲ᩠ᨲᩴ ᨶ ᩈᩣᨴᩥᨿᨲᩥ, ᨽᩥᨠ᩠ᨡᩪᩉᩥ ᨸᩩᨭ᩠ᨮᩮᩣ ᩅᩣ ᩋᨸᩩᨭ᩠ᨮᩮᩣ ᩅᩣ ᨿᨳᩣᨽᩪᨲᨾᨲ᩠ᨲᩣᨶᩴ ᩌᩅᩥᨠᨲ᩠ᩅᩣᩅ ᨸᨻ᩠ᨻᨩ᩠ᨩᩴ ᨿᩣᨧᨲᩥ, ᩃᩥᨦ᩠ᨣᩴ ᩋᨸᨶᩮᨲ᩠ᩅᩣ ᨸᨻ᩠ᨻᩣᨩᩮᨲᨻ᩠ᨻᩮᩣ. ᩈᨧᩮ ᨸᨶ ᩅᨲ᩠ᨲᩴ ᩈᩣᨴᩥᨿᨲᩥ, ᨸᨻ᩠ᨻᨩᩥᨲᩣᩃᨿᩴ ᨴᩔᩮᨲᩥ, ᩈᨻ᩠ᨻᩴ ᨸᩩᨻ᩠ᨻᩮ ᩅᩩᨲ᩠ᨲᩴ ᩅᩔᨣᨱᨶᩣᨴᩥᨽᩮᨴᩴ ᨸᨭᩥᨸᨩ᩠ᨩᨲᩥ, ᩋᨿᩴ ᨸᨶ ᨶ ᨸᨻ᩠ᨻᩣᨩᩮᨲᨻ᩠ᨻᩮᩣ.

ᩍᨵ ᨸᨶᩮᨠᨧ᩠ᨧᩮᩣ ᨴᩩᨻ᩠ᨽᩥᨠ᩠ᨡᩮ ᨩᩦᩅᩥᨲᩩᩴ ᩋᩈᨠ᩠ᨠᩮᩣᨶ᩠ᨲᩮᩣ ᩈᨿᨾᩮᩅ ᩃᩥᨦ᩠ᨣᩴ ᨣᩉᩮᨲ᩠ᩅᩣ ᩈᨻ᩠ᨻᨸᩣᩈᨱ᩠ᨯᩥᨿᨽᨲ᩠ᨲᩣᨶᩥ ᨽᩩᨬ᩠ᨩᨶ᩠ᨲᩮᩣ ᨴᩩᨻ᩠ᨽᩥᨠ᩠ᨡᩮ ᩅᩦᨲᩥᩅᨲ᩠ᨲᩮ ᩈᨦ᩠ᨥᨾᨩ᩠ᨫᩴ ᩋᨶᩮᩣᩈᩁᩥᨲ᩠ᩅᩣᩅ ᨣᩥᩉᩥᩃᩥᨦ᩠ᨣᩴ ᨣᩉᩮᨲ᩠ᩅᩣ ᩌᨣᨲᩮᩣᨲᩥ ᩈᨻ᩠ᨻᩴ ᨸᩩᩁᩥᨾᩈᨴᩥᩈᨾᩮᩅ.

ᩋᨸᩁᩮᩣ ᨾᩉᩣᨠᨶ᩠ᨲᩣᩁᩴ ᨶᩥᨲ᩠ᨳᩁᩥᨲᩩᨠᩣᨾᩮᩣ ᩉᩮᩣᨲᩥ, ᩈᨲ᩠ᨳᩅᩣᩉᩮᩣ ᨧ ᨸᨻ᩠ᨻᨩᩥᨲᩮ ᨣᩉᩮᨲ᩠ᩅᩣ ᨣᨧ᩠ᨨᨲᩥ. ᩈᩮᩣ ‘‘ᩑᩅᩴ ᨾᩴ ᩈᨲ᩠ᨳᩅᩣᩉᩮᩣ ᨣᩉᩮᨲ᩠ᩅᩣ ᨣᨾᩥᩔᨲᩦ’’ᨲᩥ ᩈᨿᨾᩮᩅ ᩃᩥᨦ᩠ᨣᩴ ᨣᩉᩮᨲ᩠ᩅᩣ ᩈᨲ᩠ᨳᩅᩣᩉᩮᨶ ᩈᨴ᩠ᨵᩥᩴ ᨠᨶ᩠ᨲᩣᩁᩴ ᨶᩥᨲ᩠ᨳᩁᩥᨲ᩠ᩅᩣ ᨡᩮᨾᨶ᩠ᨲᩴ ᨸᨲ᩠ᩅᩣ ᩈᨦ᩠ᨥᨾᨩ᩠ᨫᩴ ᩋᨶᩮᩣᩈᩁᩥᨲ᩠ᩅᩣᩅ ᨣᩥᩉᩥᩃᩥᨦ᩠ᨣᩴ ᨣᩉᩮᨲ᩠ᩅᩣ ᩌᨣᨲᩮᩣᨲᩥ ᩈᨻ᩠ᨻᩴ ᨸᩩᩁᩥᨾᩈᨴᩥᩈᨾᩮᩅ.

ᩋᨸᩁᩮᩣ ᩁᩮᩣᨣᨽᨿᩮ (ᨾᩉᩣᩅ. ᩋᨭ᩠ᨮ. ᪑᪑᪐; ᩅᩥ. ᩈᨦ᩠ᨣ. ᩋᨭ᩠ᨮ. ᪑᪓᪘) ᩏᨸ᩠ᨸᨶ᩠ᨶᩮ ᨩᩦᩅᩥᨲᩩᩴ ᩋᩈᨠ᩠ᨠᩮᩣᨶ᩠ᨲᩮᩣ ᩈᨿᨾᩮᩅ ᩃᩥᨦ᩠ᨣᩴ ᨣᩉᩮᨲ᩠ᩅᩣ ᩈᨻ᩠ᨻᨸᩣᩈᨱ᩠ᨯᩥᨿᨽᨲ᩠ᨲᩣᨶᩥ ᨽᩩᨬ᩠ᨩᨶ᩠ᨲᩮᩣ ᩁᩮᩣᨣᨽᨿᩮ ᩅᩪᨸᩈᨶ᩠ᨲᩮ ᩈᨦ᩠ᨥᨾᨩ᩠ᨫᩴ ᩋᨶᩮᩣᩈᩁᩥᨲ᩠ᩅᩣᩅ ᨣᩥᩉᩥᩃᩥᨦ᩠ᨣᩴ ᨣᩉᩮᨲ᩠ᩅᩣ ᩌᨣᨲᩮᩣᨲᩥ ᩈᨻ᩠ᨻᩴ ᨸᩩᩁᩥᨾᩈᨴᩥᩈᨾᩮᩅ.

ᩋᨸᩁᩔ ᩑᨠᩮᩣ ᩅᩮᩁᩥᨠᩮᩣ ᨠᩩᨴ᩠ᨵᩮᩣ ᩉᩮᩣᨲᩥ, ᨥᩣᨲᩮᨲᩩᨠᩣᨾᩮᩣ ᨶᩴ ᩅᩥᨧᩁᨲᩥ. ᩈᩮᩣ ‘‘ᩑᩅᩴ ᨾᩮ ᩈᩮᩣᨲ᩠ᨳᩥ ᨽᩅᩥᩔᨲᩦ’’ᨲᩥ ᩈᨿᨾᩮᩅ ᩃᩥᨦ᩠ᨣᩴ ᨣᩉᩮᨲ᩠ᩅᩣ ᨸᩃᩣᨿᨲᩥ. ᩅᩮᩁᩥᨠᩮᩣ ‘‘ᨠᩩᩉᩥᩴ ᩈᩮᩣ’’ᨲᩥ ᨸᩁᩥᨿᩮᩈᨶ᩠ᨲᩮᩣ ‘‘ᨸᨻ᩠ᨻᨩᩥᨲ᩠ᩅᩣ ᨸᩃᩣᨲᩮᩣ’’ᨲᩥ ᩈᩩᨲ᩠ᩅᩣ ‘‘ᩈᨧᩮ ᨸᨻ᩠ᨻᨩᩥᨲᩮᩣ, ᨶ ᨲᩴ ᩃᨻ᩠ᨽᩣ ᨠᩥᨬ᩠ᨧᩥ ᨠᩣᨲᩩ’’ᨶ᩠ᨲᩥ ᨲᩈ᩠ᨾᩥᩴ ᨠᩮᩣᨵᩴ ᨸᨭᩥᩅᩥᨶᩮᨲᩥ. ᩈᩮᩣ ‘‘ᩅᩪᨸᩈᨶ᩠ᨲᩴ ᨾᩮ ᩅᩮᩁᩥᨽᨿ’’ᨶ᩠ᨲᩥ ᩈᨦ᩠ᨥᨾᨩ᩠ᨫᩴ ᩋᨶᩮᩣᩈᩁᩥᨲ᩠ᩅᩣᩅ ᨣᩥᩉᩥᩃᩥᨦ᩠ᨣᩴ ᨣᩉᩮᨲ᩠ᩅᩣ ᩌᨣᨲᩮᩣᨲᩥ ᩈᨻ᩠ᨻᩴ ᨸᩩᩁᩥᨾᩈᨴᩥᩈᨾᩮᩅ.

ᩋᨸᩁᩮᩣ ᨬᩣᨲᩥᨠᩩᩃᩴ ᨣᨶ᩠ᨲ᩠ᩅᩣ ᩈᩥᨠ᩠ᨡᩴ ᨸᨧ᩠ᨧᨠ᩠ᨡᩣᨿ ᨣᩥᩉᩦ ᩉᩩᨲ᩠ᩅᩣ ‘‘ᩍᨾᩣᨶᩥ ᨧᩦᩅᩁᩣᨶᩥ ᩍᨵ ᩅᩥᨶᩔᩥᩔᨶ᩠ᨲᩥ, ᩈᨧᩮᨸᩥ ᩍᨾᩣᨶᩥ ᨣᩉᩮᨲ᩠ᩅᩣ ᩅᩥᩉᩣᩁᩴ ᨣᨾᩥᩔᩣᨾᩥ, ᩋᨶ᩠ᨲᩁᩣᨾᨣ᩠ᨣᩮ ᨾᩴ ‘ᨧᩮᩣᩁᩮᩣ’ᨲᩥ ᨣᩉᩮᩔᨶ᩠ᨲᩥ, ᨿᩴᨶᩪᨶᩣᩉᩴ ᨠᩣᨿᨸᩁᩥᩉᩣᩁᩥᨿᩣᨶᩥ ᨠᨲ᩠ᩅᩣ ᨣᨧ᩠ᨨᩮᨿ᩠ᨿ’’ᨶ᩠ᨲᩥ ᨧᩦᩅᩁᩣᩉᩁᨱᨲ᩠ᨳᩴ ᨶᩥᩅᩣᩈᩮᨲ᩠ᩅᩣ ᨧ ᨸᩣᩁᩩᨸᩥᨲ᩠ᩅᩣ ᨧ ᩅᩥᩉᩣᩁᩴ ᨣᨧ᩠ᨨᨲᩥ. ᨲᩴ ᨴᩪᩁᨲᩮᩣᩅ ᩌᨣᨧ᩠ᨨᨶ᩠ᨲᩴ ᨴᩥᩈ᩠ᩅᩣ ᩈᩣᨾᨱᩮᩁᩣ ᨧ ᨴᩉᩁᩣ ᨧ ᩋᨻ᩠ᨽᩩᨣ᩠ᨣᨧ᩠ᨨᨶ᩠ᨲᩥ, ᩅᨲ᩠ᨲᩴ ᨴᩔᩮᨶ᩠ᨲᩥ. ᩈᩮᩣ ᨶ ᩈᩣᨴᩥᨿᨲᩥ, ᨿᨳᩣᨽᩪᨲᨾᨲ᩠ᨲᩣᨶᩴ ᩌᩅᩥᨠᩁᩮᩣᨲᩥ. ᩈᨧᩮ ᨽᩥᨠ᩠ᨡᩪ ‘‘ᨶ ᨴᩣᨶᩥ ᨾᨿᩴ ᨲᩴ ᨾᩩᨬ᩠ᨧᩥᩔᩣᨾᩣ’’ᨲᩥ ᨻᩃᨠ᩠ᨠᩣᩁᩮᨶ ᨸᨻ᩠ᨻᩣᨩᩮᨲᩩᨠᩣᨾᩣ ᩉᩮᩣᨶ᩠ᨲᩥ, ᨠᩣᩈᩣᨿᩣᨶᩥ ᩋᨸᨶᩮᨲ᩠ᩅᩣ ᨸᩩᨶ ᨸᨻ᩠ᨻᩣᨩᩮᨲᨻ᩠ᨻᩮᩣ. ᩈᨧᩮ ᨸᨶ ‘‘ᨶ ᩍᨾᩮ ᨾᨾ ᩉᩦᨶᩣᨿᩣᩅᨲ᩠ᨲᨽᩣᩅᩴ ᨩᩣᨶᨶ᩠ᨲᩦ’’ᨲᩥ ᨲᩴᨿᩮᩅ ᨽᩥᨠ᩠ᨡᩩᨽᩣᩅᩴ ᨸᨭᩥᨩᩣᨶᩥᨲ᩠ᩅᩣ ᩈᨻ᩠ᨻᩴ ᨸᩩᨻ᩠ᨻᩮ ᩅᩩᨲ᩠ᨲᩅᩔᨣᨱᨶᩣᨴᩥᨽᩮᨴᩴ ᩅᩥᨵᩥᩴ ᨸᨭᩥᨸᨩ᩠ᨩᨲᩥ, ᩋᨿᩴ ᨶ ᨸᨻ᩠ᨻᩣᨩᩮᨲᨻ᩠ᨻᩮᩣ. ᨲᩮᨶᩣᩉ ‘‘ᩁᩣᨩᨴᩩᨻ᩠ᨽᩥᨠ᩠ᨡᨠᨶ᩠ᨲᩣᩁ-ᩁᩮᩣᨣᩅᩮᩁᩦᨽᨿᩮᨶ ᩅᩣ’’ᨲᩥᩌᨴᩥ. ᨽᨿᩈᨴ᩠ᨴᩮᩣ ᨧᩮᨲ᩠ᨳ ᨸᨧ᩠ᨧᩮᨠᩴ ᨿᩮᩣᨩᩮᨲᨻ᩠ᨻᩮᩣ ‘‘ᩁᩣᨩᨽᨿᩮᨶ, ᨴᩩᨻ᩠ᨽᩥᨠ᩠ᨡᨽᨿᩮᨶᩣ’’ᨲᩥᩌᨴᩥᨶᩣ. ᩃᩥᨦ᩠ᨣᩴ ᩌᨴᩥᨿᨲᩦᨲᩥ ᩅᩮᩈᩴ ᨣᨱ᩠ᩉᩣᨲᩥ. ᩍᨵᩣᨲᩥ ᩍᨾᩈ᩠ᨾᩥᩴ ᩈᩣᩈᨶᩮ. ᩈᩴᩅᩣᩈᩴ ᨶᩣᨵᩥᩅᩣᩈᩮᨲᩥ, ᨿᩣᩅ ᩈᩮᩣ ᩈᩩᨴ᩠ᨵᨾᩣᨶᩈᩮᩣᨲᩥ ᨽᩥᨠ᩠ᨡᩪᨶᩴ ᩅᨬ᩠ᨧᩮᨲᩩᨠᩣᨾᨲᩣᨿ ᩋᨽᩣᩅᨲᩮᩣ ᨿᩮᩣ ᩈᩩᨴ᩠ᨵᨾᩣᨶᩈᩮᩣ ᨿᩣᩅ ᩈᩴᩅᩣᩈᩴ ᨶᩣᨵᩥᩅᩣᩈᩮᨲᩥ, ᨲᩣᩅ ᩑᩈ ‘‘ᨣᩥᩉᩦ ᨾᩴ ‘ᩈᨾᨱᩮᩣ’ᨲᩥ ᨩᩣᨶᨶ᩠ᨲᩪ’’ᨲᩥ ᩅᨬ᩠ᨧᨶᨧᩥᨲ᩠ᨲᩮ ᩈᨲᩥᨸᩥ ᨽᩥᨠ᩠ᨡᩪᨶᩴ ᩅᨬ᩠ᨧᩮᨲᩩᨠᩣᨾᨲᩣᨿ ᩋᨽᩣᩅᨲᩮᩣ ᨴᩮᩣᩈᩮᩣ ᨶᨲ᩠ᨳᩦᨲᩥ ᨳᩮᨿ᩠ᨿᩈᩴᩅᩣᩈᨠᩮᩣ ᨶᩣᨾᩣᨲᩥ ᨶ ᩅᩩᨧ᩠ᨧᨲᩦᨲᩥ ᩋᨲ᩠ᨳᩮᩣ.

ᨲᩥᨲ᩠ᨳᩥᨿᩮᩈᩩ ᨸᨠ᩠ᨠᨶ᩠ᨲᨠᩮᩣ ᨸᩅᩥᨭ᩠ᨮᩮᩣᨲᩥ ᨲᩥᨲ᩠ᨳᩥᨿᨸᨠ᩠ᨠᨶ᩠ᨲᨠᩮᩣ. ᩈᩮᩣ ᨧ ᨶ ᨠᩮᩅᩃᩴ ᨲᨲ᩠ᨳ ᨸᩅᩥᨭ᩠ᨮᨾᨲ᩠ᨲᩮᨶᩮᩅ ᨲᩥᨲ᩠ᨳᩥᨿᨸᨠ᩠ᨠᨶ᩠ᨲᨠᩮᩣ ᩉᩮᩣᨲᩥ, ᩋᨳ ᨡᩮᩣ ᨲᩮᩈᩴ ᩃᨴ᩠ᨵᩥᨣ᩠ᨣᩉᨱᩮᨶ. ᨲᩮᨶᩣᩉ ‘‘ᨿᩮᩣ ᨸᨶᩣ’’ᨲᩥᩌᨴᩥ. ‘‘ᩏᨸᩈᨾ᩠ᨸᨶ᩠ᨶᩮᩣ’’ᨲᩥ ᩍᨾᩥᨶᩣ ᩋᨶᩩᨸᩈᨾ᩠ᨸᨶ᩠ᨶᩮᩣ ᨲᩥᨲ᩠ᨳᩥᨿᨸᨠ᩠ᨠᨶ᩠ᨲᨠᩮᩣ ᨶ ᩉᩮᩣᨲᩦᨲᩥ ᨴᩔᩮᨲᩥ. ᩅᩩᨲ᩠ᨲᨬ᩠ᩉᩮᨲᩴ ᨠᩩᩁᩩᨶ᩠ᨴᩥᩋᨭ᩠ᨮᨠᨳᩣᨿᩴ ‘‘ᩋᨿᨬ᩠ᨧ ᨲᩥᨲ᩠ᨳᩥᨿᨸᨠ᩠ᨠᨶ᩠ᨲᨠᩮᩣ ᨶᩣᨾ ᩏᨸᩈᨾ᩠ᨸᨶ᩠ᨶᨽᩥᨠ᩠ᨡᩩᨶᩣ ᨠᨳᩥᨲᩮᩣ, ᨲᩈ᩠ᨾᩣ ᩈᩣᨾᨱᩮᩁᩮᩣ ᩈᩃᩥᨦ᩠ᨣᩮᨶ ᨲᩥᨲ᩠ᨳᩣᨿᨲᨶᩴ ᨣᨲᩮᩣᨸᩥ ᨸᩩᨶ ᨸᨻ᩠ᨻᨩ᩠ᨩᨬ᩠ᨧ ᩏᨸᩈᨾ᩠ᨸᨴᨬ᩠ᨧ ᩃᨽᨲᩦ’’ᨲᩥ (ᨾᩉᩣᩅ. ᩋᨭ᩠ᨮ. ᪑᪑᪐). ᨠᩩᩈᨧᩦᩁᩣᨴᩥᨠᨶ᩠ᨲᩥ ᩑᨲ᩠ᨳᩣᨴᩥᩈᨴ᩠ᨴᩮᨶ ᨹᩃᨠᨠ᩠ᨡᨱ᩠ᨯᨩᨭᩣᨴᩦᨶᩴ ᨣᩉᨱᩴ. ᩈᨧᩮᨸᩥ ‘‘ᩋᨿᩴ ᨸᨻ᩠ᨻᨩ᩠ᨩᩣ ᩈᩮᨭ᩠ᨮᩣ’’ᨲᩥ ᩈᩮᨭ᩠ᨮᨽᩣᩅᩴ ᩅᩣ ᩏᨸᨣᨧ᩠ᨨᨲᩥ, ᨶ ᨾᩩᨧ᩠ᨧᨲᩥ, ᨲᩥᨲ᩠ᨳᩥᨿᨸᨠ᩠ᨠᨶ᩠ᨲᨠᩮᩣᩅ ᩉᩮᩣᨲᩥ. ᩅᨲᩣᨶᩦᨲᩥ ᩏᨠ᩠ᨠᩩᨭᩥᨠᨸ᩠ᨸᨵᩣᨶᩣᨴᩦᨶᩥ ᩅᨲᩣᨶᩥ. ᩈᨧᩮ ᨸᨶ ‘‘ᩈᩮᩣᨽᨲᩥ ᨶᩩ ᨡᩮᩣ ᨾᩮ ᨲᩥᨲ᩠ᨳᩥᨿᨸᨻ᩠ᨻᨩ᩠ᨩᩣ, ᨶᨶᩩ ᨡᩮᩣ ᩈᩮᩣᨽᨲᩦ’’ᨲᩥ ᩅᩦᨾᩴᩈᨶᨲ᩠ᨳᩴ ᨠᩩᩈᨧᩦᩁᩣᨴᩦᨶᩥ ᨶᩥᩅᩣᩈᩮᨲᩥ, ᨩᨭᩴ ᩅᩣ ᨻᨶ᩠ᨵᨲᩥ, ᨡᩣᩁᩥᨠᩣᨩᩴ ᩅᩣ ᩌᨴᩥᨿᨲᩥ, ᨿᩣᩅ ᨶ ᩈᨾ᩠ᨸᨭᩥᨧ᩠ᨨᨲᩥ ᨲᩴ ᩃᨴ᩠ᨵᩥᩴ, ᨲᩣᩅ ᩁᨠ᩠ᨡᨲᩥ, ᩈᨾ᩠ᨸᨭᩥᨧ᩠ᨨᩥᨲᨾᨲ᩠ᨲᩮ ᨲᩥᨲ᩠ᨳᩥᨿᨸᨠ᩠ᨠᨶ᩠ᨲᨠᩮᩣ ᩉᩮᩣᨲᩥ. ᩋᨧ᩠ᨨᩥᨶ᩠ᨶᨧᩦᩅᩁᩮᩣ ᨸᨶ ᨠᩩᩈᨧᩦᩁᩣᨴᩦᨶᩥ ᨶᩥᩅᩣᩈᩮᨶ᩠ᨲᩮᩣ, ᩁᩣᨩᨽᨿᩣᨴᩦᩉᩥ ᩅᩣ ᨲᩥᨲ᩠ᨳᩥᨿᩃᩥᨦ᩠ᨣᩴ ᨣᨱ᩠ᩉᨶ᩠ᨲᩮᩣ ᩃᨴ᩠ᨵᩥᨿᩣ ᩋᨽᩣᩅᩮᨶ ᨶᩮᩅ ᨲᩥᨲ᩠ᨳᩥᨿᨸᨠ᩠ᨠᨶ᩠ᨲᨠᩮᩣ ᩉᩮᩣᨲᩥ.

ᩋᩅᩈᩮᩈᩮᩣ ᩈᨻ᩠ᨻᩮᩣᨸᩦᨲᩥ ᨶᩣᨣᩈᩩᨸᨱ᩠ᨱᨿᨠ᩠ᨡᨣᨶ᩠ᨵᨻ᩠ᨻᩣᨴᩥᨠᩮᩣ. ᨿᨬ᩠ᩉᩮᨲ᩠ᨳ ᩅᨲ᩠ᨲᨻ᩠ᨻᩴ, ᨲᩴ ᩉᩮᨭ᩠ᨮᩣ ᩅᩩᨲ᩠ᨲᨾᩮᩅ.

ᨿᨳᩣ ᩈᨾᩣᨶᨩᩣᨲᩥᨠᩔ (ᩈᩣᩁᨲ᩠ᨳ. ᨭᩦ. ᨾᩉᩣᩅᨣ᩠ᨣ ᪓.᪑᪑᪒) ᩅᩥᨠᩮᩣᨸᨶᩮ ᨠᨾ᩠ᨾᩴ ᨣᩁᩩᨲᩁᩴ, ᨶ ᨲᨳᩣ ᩅᩥᨩᩣᨲᩥᨠᩔᩣᨲᩥ ᩌᩉ ‘‘ᨾᨶᩩᩔᨩᩣᨲᩥᨠᩣ’’ᨲᩥ. ᨸᩩᨲ᩠ᨲᩈᨾ᩠ᨻᨶ᩠ᨵᩮᨶ ᨾᩣᨲᩣᨸᩥᨲᩩᩈᨾᨬ᩠ᨬᩣ, ᨴᨲ᩠ᨲᨠᩥᨲ᩠ᨲᩥᨾᩣᨴᩥᩅᩈᩮᨶᨸᩥ ᨸᩩᨲ᩠ᨲᩅᩮᩣᩉᩣᩁᩮᩣ ᩃᩮᩣᨠᩮ ᨴᩥᩔᨲᩥ, ᩈᩮᩣ ᨧ ᨡᩮᩣ ᨸᩁᩥᨿᩣᨿᨲᩮᩣᨲᩥ ᨶᩥᨸ᩠ᨸᩁᩥᨿᩣᨿᩈᩥᨴ᩠ᨵᨲᩴ ᨴᩔᩮᨲᩩᩴ ‘‘ᨩᨶᩮᨲ᩠ᨲᩦ’’ᨲᩥ ᩅᩩᨲ᩠ᨲᩴ. ᨩᨶᩮᨲ᩠ᨲᩦᨲᩥ ᨩᨶᩥᨠᩣ, ᨾᩣᨲᩣᨲᩥ ᩋᨲ᩠ᨳᩮᩣ. ᨿᨳᩣ ᨾᨶᩩᩔᨲ᩠ᨲᨽᩣᩅᩮ ᨮᩥᨲᩔᩮᩅ ᨠᩩᩈᩃᨵᨾ᩠ᨾᩣᨶᩴ ᨲᩥᨠ᩠ᨡᩅᩥᩈᨴᩈᩪᩁᨽᩣᩅᩣᨸᨲ᩠ᨲᩥ, ᨿᨳᩣ ᨲᩴ ᨲᩥᨱ᩠ᨱᨾ᩠ᨸᩥ ᨻᩮᩣᨵᩥᩈᨲ᩠ᨲᩣᨶᩴ ᨻᩮᩣᨵᩥᨲ᩠ᨲᨿᨶᩥᨸ᩠ᨹᨲ᩠ᨲᩥᨿᩴ, ᩑᩅᩴ ᨾᨶᩩᩔᨲ᩠ᨲᨽᩣᩅᩮ ᨮᩥᨲᩔᩮᩅ ᩋᨠᩩᩈᩃᨵᨾ᩠ᨾᩣᨶᨾ᩠ᨸᩥ ᨲᩥᨠ᩠ᨡᩅᩥᩈᨴᩈᩪᩁᨽᩣᩅᩣᨸᨲ᩠ᨲᩦᨲᩥ ᩌᩉ ‘‘ᨾᨶᩩᩔᨽᩪᨲᩮᨶᩮᩅᩣ’’ᨲᩥ. ᩈᨬ᩠ᨧᩥᨧ᩠ᨧᩣᨲᩥ ‘‘ᨸᩣᨱᩮᩣ’’ᨲᩥ ᩈᨬ᩠ᨬᩣᨿ ᩈᨴ᩠ᨵᩥᩴ ᩅᨵᨠᨧᩮᨲᨶᩣᨿ ᨧᩮᨲᩮᨲ᩠ᩅᩣ. ᩋᨿᩴ ᨾᩣᨲᩩᨥᩣᨲᨠᩮᩣ ᨶᩣᨾᩣᨲᩥ ᩋᨿᩴ ᩌᨶᨶ᩠ᨲᩁᩥᨿᩮᨶ ᨾᩣᨲᩩᨥᩣᨲᨠᨠᨾ᩠ᨾᩮᨶ ᨾᩣᨲᩩᨥᩣᨲᨠᩮᩣ ᨶᩣᨾ. ᨿᩮᨶ ᨸᨶ ᨾᨶᩩᩔᩥᨲ᩠ᨳᩥᨽᩪᨲᩣᨸᩥ ᩋᨩᨶᩥᨠᩣ ᨸᩮᩣᩈᩣᩅᨶᩥᨠᨾᩣᨲᩣ ᩅᩣ ᨾᩉᩣᨾᩣᨲᩣ ᩅᩣ ᨧᩪᩊᨾᩣᨲᩣ ᩅᩣ ᨩᨶᩥᨠᩣᨸᩥ ᩅᩣ ᩋᨾᨶᩩᩔᩥᨲ᩠ᨳᩥᨽᩪᨲᩣ ᨾᩣᨲᩣ ᨥᩣᨲᩥᨲᩣ, ᨲᩔ ᨸᨻ᩠ᨻᨩ᩠ᨩᩣ ᨶ ᩅᩣᩁᩥᨲᩣ, ᨶ ᨧ ᩌᨶᨶ᩠ᨲᩁᩥᨠᩮᩣ ᩉᩮᩣᨲᩥ. ᨿᩮᨶ ᩈᨿᩴ ᨲᩥᩁᨧ᩠ᨨᩣᨶᨽᩪᨲᩮᨶ ᨾᨶᩩᩔᩥᨲ᩠ᨳᩥᨽᩪᨲᩣ ᨾᩣᨲᩣ ᨥᩣᨲᩥᨲᩣ, ᩈᩮᩣᨸᩥ ᩌᨶᨶ᩠ᨲᩁᩥᨠᩮᩣ ᨶ ᩉᩮᩣᨲᩥ. ᨲᩥᩁᨧ᩠ᨨᩣᨶᨣᨲᨲ᩠ᨲᩣ ᨸᨶᩔ ᨸᨻ᩠ᨻᨩ᩠ᨩᩣ ᨸᨭᩥᨠ᩠ᨡᩥᨲ᩠ᨲᩣ, ᨠᨾ᩠ᨾᩴ ᨸᨶᩔ ᨽᩣᩁᩥᨿᩴ ᩉᩮᩣᨲᩥ, ᩌᨶᨶ᩠ᨲᩁᩥᨿᩴ ᩌᩉᨧ᩠ᨧᩮᩅ ᨲᩥᨭ᩠ᨮᨲᩥ.

ᨿᩮᨶ ᨾᨶᩩᩔᨽᩪᨲᩮᩣ ᨩᨶᨠᩮᩣ ᨸᩥᨲᩣ ᩈᨿᨾ᩠ᨸᩥ ᨾᨶᩩᩔᨩᩣᨲᩥᨠᩮᨶᩮᩅ ᩈᨲᩣ ᩈᨬ᩠ᨧᩥᨧ᩠ᨧ ᨩᩦᩅᩥᨲᩣ ᩅᩮᩣᩁᩮᩣᨸᩥᨲᩮᩣ, ᩋᨿᩴ ᩌᨶᨶ᩠ᨲᩁᩥᨿᩮᨶ ᨸᩥᨲᩩᨥᩣᨲᨠᨠᨾ᩠ᨾᩮᨶ ᨸᩥᨲᩩᨥᩣᨲᨠᩮᩣ ᨶᩣᨾᩣᨲᩥ ᩍᨾᨾᨲ᩠ᨳᩴ ᩋᨲᩥᨴᩥᩈᨶ᩠ᨲᩮᩣ ‘‘ᨸᩥᨲᩩᨥᩣᨲᨠᩮᨸᩥ ᩑᩈᩮᩅ ᨶᨿᩮᩣ’’ᨲᩥ ᩌᩉ. ᩈᨧᩮᨸᩥ ᩉᩥ ᩅᩮᩈᩥᨿᩣ ᨸᩩᨲ᩠ᨲᩮᩣ ᩉᩮᩣᨲᩥ, ‘‘ᩋᨿᩴ ᨾᩮ ᨸᩥᨲᩣ’’ᨲᩥ ᨶ ᨩᩣᨶᩣᨲᩥ, ᨿᩔ ᩈᨾ᩠ᨽᩅᩮᨶ ᨶᩥᨻ᩠ᨻᨲ᩠ᨲᩮᩣ, ᩈᩮᩣ ᨧ ᨲᩮᨶ ᨥᩣᨲᩥᨲᩮᩣ, ‘‘ᨸᩥᨲᩩᨥᩣᨲᨠᩮᩣ’’ᨲ᩠ᩅᩮᩅ ᩈᨦ᩠ᨡᩴ ᨣᨧ᩠ᨨᨲᩥ, ᩌᨶᨶ᩠ᨲᩁᩥᨿᨬ᩠ᨧ ᨹᩩᩈᨲᩥ (ᨾᩉᩣᩅ. ᩋᨭ᩠ᨮ. ᪑᪑᪔).

ᩑᩊᨠᨧᨲᩩᨠ᩠ᨠᩴ (ᨾ. ᨶᩥ. ᩋᨭ᩠ᨮ. ᪓.᪑᪒᪘; ᩋ. ᨶᩥ. ᩋᨭ᩠ᨮ. ᪑.᪑.᪒᪗᪕; ᩅᩥᨽ. ᩋᨭ᩠ᨮ. ᪘᪐᪙; ᩈᩣᩁᨲ᩠ᨳ. ᨭᩦ. ᨾᩉᩣᩅᨣ᩠ᨣ ᪓.᪑᪑᪒), ᩈᨦ᩠ᨣᩣᨾᨧᨲᩩᨠ᩠ᨠᩴ, ᨧᩮᩣᩁᨧᨲᩩᨠ᩠ᨠᨬ᩠ᨧᩮᨲ᩠ᨳ ᨠᨳᩮᨲᨻ᩠ᨻᩴ. ‘‘ᩑᩊᨠᩴ ᨾᩣᩁᩮᨾᩦ’’ᨲᩥ ᩋᨽᩥᩈᨶ᩠ᨵᩥᨶᩣᨸᩥ ᩉᩥ ᩑᩊᨠᨭ᩠ᨮᩣᨶᩮ ᨮᩥᨲᩴ ᨾᨶᩩᩔᨽᩪᨲᩴ ᨾᩣᨲᩁᩴ ᩅᩣ ᨸᩥᨲᩁᩴ ᩅᩣ ᨾᩣᩁᩮᨶ᩠ᨲᩮᩣ ᩌᨶᨶ᩠ᨲᩁᩥᨿᩴ ᨹᩩᩈᨲᩥ ᨾᩣᩁᨱᩣᨵᩥᨸ᩠ᨸᩣᨿᩮᨶᩮᩅ ᩌᨶᨶ᩠ᨲᩁᩥᨿᩅᨲ᩠ᨳᩩᨶᩮᩣ ᩅᩥᨠᩮᩣᨸᩥᨲᨲ᩠ᨲᩣ. ᩑᩊᨠᩣᨽᩥᩈᨶ᩠ᨵᩥᨶᩣ, ᨸᨶ ᨾᩣᨲᩣᨸᩥᨲᩥᩋᨽᩥᩈᨶ᩠ᨵᩥᨶᩣ ᩅᩣ ᩑᩊᨠᩴ ᨾᩣᩁᩮᨶ᩠ᨲᩮᩣ ᩌᨶᨶ᩠ᨲᩁᩥᨿᩴ ᨶ ᨹᩩᩈᨲᩥ ᩌᨶᨶ᩠ᨲᩁᩥᨿᩅᨲ᩠ᨳᩩᩋᨽᩣᩅᨲᩮᩣ. ᨾᩣᨲᩣᨸᩥᨲᩥᩋᨽᩥᩈᨶ᩠ᨵᩥᨶᩣ ᨾᩣᨲᩣᨸᩥᨲᩁᩮᩣ ᨾᩣᩁᩮᨶ᩠ᨲᩮᩣ ᨹᩩᩈᨲᩮᩅ. ᩑᩈᩮᩅ ᨶᨿᩮᩣ ᩍᨲᩁᩈ᩠ᨾᩥᨾ᩠ᨸᩥ ᨧᨲᩩᨠ᩠ᨠᨴ᩠ᩅᨿᩮ. ᩈᨻ᩠ᨻᨲ᩠ᨳ ᩉᩥ ᨸᩩᩁᩥᨾᩴ ᩋᨽᩥᩈᨶ᩠ᨵᩥᨧᩥᨲ᩠ᨲᩴ ᩋᨸ᩠ᨸᨾᩣᨱᩴ, ᩅᨵᨠᨧᩥᨲ᩠ᨲᩴ, ᨸᨶ ᨲᨴᩣᩁᨾ᩠ᨾᨱᨩᩦᩅᩥᨲᩥᨶ᩠ᨴᩕᩥᨿᨬ᩠ᨧ ᩌᨶᨶ᩠ᨲᩁᩥᨿᩣᨶᩣᨶᨶ᩠ᨲᩁᩥᨿᨽᩣᩅᩮ ᨸᨾᩣᨱᩴ.

ᩋᩁᩉᨶ᩠ᨲᨥᩣᨲᨠᩮᩣᨸᩥ ᨾᨶᩩᩔᩋᩁᩉᨶ᩠ᨲᩅᩈᩮᨶᩮᩅ ᩅᩮᨴᩥᨲᨻ᩠ᨻᩮᩣᨲᩥ ᩌᩉ ‘‘ᨿᩮᨶ ᩋᨶ᩠ᨲᨾᩈᩮᩣ ᨣᩥᩉᩥᩃᩥᨦ᩠ᨣᩮ ᨮᩥᨲᩮᩣᨸᩦ’’ᨲᩥᩌᨴᩥ. ᩋᨾᨶᩩᩔᨩᩣᨲᩥᨠᩴ ᨸᨶ ᩋᩁᩉᨶ᩠ᨲᩴ, ᨾᨶᩩᩔᨩᩣᨲᩥᨠᩴ ᩅᩣ ᩋᩅᩈᩮᩈᩴ ᩋᩁᩥᨿᨸᩩᨣ᩠ᨣᩃᩴ ᨥᩣᨲᩮᨲ᩠ᩅᩣ ᩌᨶᨶ᩠ᨲᩁᩥᨠᩮᩣ ᨶ ᩉᩮᩣᨲᩥ, ᨸᨻ᩠ᨻᨩ᩠ᨩᩣᨸᩥᩔ ᨶ ᩅᩣᩁᩥᨲᩣ, ᨠᨾ᩠ᨾᩴ ᨸᨶ ᨻᩃᩅᩴ ᩉᩮᩣᨲᩥ. ᨲᩥᩁᨧ᩠ᨨᩣᨶᩮᩣ ᨾᨶᩩᩔᩋᩁᩉᨶ᩠ᨲᨾ᩠ᨸᩥ ᨥᩣᨲᩮᨲ᩠ᩅᩣ ᩌᨶᨶ᩠ᨲᩁᩥᨠᩮᩣ ᨶ ᩉᩮᩣᨲᩥ, ᨠᨾ᩠ᨾᩴ ᨸᨶ ᨽᩣᩁᩥᨿᨶ᩠ᨲᩥ ᩋᨿᨾᩮᨲ᩠ᨳ ᩅᩥᨶᩥᨧ᩠ᨨᨿᩮᩣ. ᨿᨳᩣ ᨾᩣᨲᩣᨸᩥᨲᩪᩈᩩ, ᩑᩅᩴ ᩋᩁᩉᨶ᩠ᨲᩮᨸᩥ ᩑᩊᨠᨧᨲᩩᨠ᩠ᨠᩣᨴᩦᨶᩥ ᩅᩮᨴᩥᨲᨻ᩠ᨻᩣᨶᩥ.

ᨸᨠᨲᨲ᩠ᨲᩴ ᨽᩥᨠ᩠ᨡᩩᨶᩥᨶ᩠ᨲᩥ ᨸᩁᩥᩈᩩᨴ᩠ᨵᩈᩦᩃᩴ ᩏᨽᨲᩮᩣᩈᨦ᩠ᨥᩮ ᩏᨸᩈᨾ᩠ᨸᨶ᩠ᨶᩴ ᨽᩥᨠ᩠ᨡᩩᨶᩥᩴ. ᨿᩮᩣ (ᨾᩉᩣᩅ. ᩋᨭ᩠ᨮ. ᪑᪑᪕) ᨸᨶ ᨠᩣᨿᩈᩴᩈᨣ᩠ᨣᩮᨶ ᩈᩦᩃᩅᩥᨶᩣᩈᩴ ᨸᩣᨸᩮᨲᩥ, ᨲᩔ ᨸᨻ᩠ᨻᨩ᩠ᨩᩣ ᨧ ᩏᨸᩈᨾ᩠ᨸᨴᩣ ᨧ ᨶ ᩅᩣᩁᩥᨲᩣ. ᨻᩃᨠ᩠ᨠᩣᩁᩮᨶ ᩒᨴᩣᨲᩅᨲ᩠ᨳᩅᩈᨶᩴ ᨠᨲ᩠ᩅᩣ ᩋᨶᩥᨧ᩠ᨨᨾᩣᨶᩴᨿᩮᩅ ᨴᩪᩈᩮᨶ᩠ᨲᩮᩣᨸᩥ ᨽᩥᨠ᩠ᨡᩩᨶᩥᨴᩪᩈᨠᩮᩣᨿᩮᩅ, ᨻᩃᨠ᩠ᨠᩣᩁᩮᨶ ᨸᨶ ᩒᨴᩣᨲᩅᨲ᩠ᨳᩅᩈᨶᩴ ᨠᨲ᩠ᩅᩣ ᩍᨧ᩠ᨨᨾᩣᨶᩴ ᨴᩪᩈᩮᨶ᩠ᨲᩮᩣ ᨽᩥᨠ᩠ᨡᩩᨶᩥᨴᩪᩈᨠᩮᩣ ᨶ ᩉᩮᩣᨲᩥ. ᨠᩈ᩠ᨾᩣ? ᨿᩈ᩠ᨾᩣ ᨣᩥᩉᩥᨽᩣᩅᩮ ᩈᨾ᩠ᨸᨭᩥᨧ᩠ᨨᩥᨲᨾᨲ᩠ᨲᩮᨿᩮᩅ ᩈᩣ ᩋᨽᩥᨠ᩠ᨡᩩᨶᩦ ᩉᩮᩣᨲᩥ. ᩈᨠᩥᩴ ᩈᩦᩃᩅᩥᨸᨶ᩠ᨶᩴ ᨸᨶ ᨸᨧ᩠ᨨᩣ ᨴᩪᩈᩮᨶ᩠ᨲᩮᩣ ᩈᩥᨠ᩠ᨡᨾᩣᨶᩈᩣᨾᨱᩮᩁᩦᩈᩩ ᨧ ᩅᩥᨸ᩠ᨸᨭᩥᨸᨩ᩠ᨩᨶ᩠ᨲᩮᩣ ᨶᩮᩅ ᨽᩥᨠ᩠ᨡᩩᨶᩥᨴᩪᩈᨠᩮᩣ ᩉᩮᩣᨲᩥ, ᨸᨻ᩠ᨻᨩ᩠ᨩᩴ, ᩏᨸᩈᨾ᩠ᨸᨴᨬ᩠ᨧ ᩃᨽᨲᩦᨲᩥ.

ᨵᨾ᩠ᨾᨲᩮᩣ ᩏᨣ᩠ᨣᨲᩴ ᩋᨸᨣᨲᩴ ᩏᨴ᩠ᨵᨾ᩠ᨾᩴ. ᩏᨻ᩠ᨻᩥᨶᨿᨶ᩠ᨲᩥ ᩑᨲ᩠ᨳᩣᨸᩥ ᩑᩈᩮᩅ ᨶᨿᩮᩣ. ᨧᨲᩩᨶ᩠ᨶᩴ ᨠᨾ᩠ᨾᩣᨶᨶ᩠ᨲᩥ ᩋᨸᩃᩮᩣᨠᨶᨬᨲ᩠ᨲᩥᨬᨲ᩠ᨲᩥᨴᩩᨲᩥᨿᨬᨲ᩠ᨲᩥᨧᨲᩩᨲ᩠ᨳᩈᨦ᩠ᨡᩣᨲᩣᨶᩴ ᨧᨲᩩᨶ᩠ᨶᩴ ᨠᨾ᩠ᨾᩣᨶᩴ. ᩍᨾᩮᩈᨬ᩠ᩉᩥ ᩋᨬ᩠ᨬᨲᩁᩴ ᩈᨦ᩠ᨥᨠᨾ᩠ᨾᩴ ᩑᨠᩈᩦᨾᩣᨿᩴ ᩅᩥᩈᩩᩴ ᩅᩥᩈᩩᩴ ᨠᩁᩮᩣᨶ᩠ᨲᩮᨶ ᩈᨦ᩠ᨥᩮᩣ ᨽᩥᨶ᩠ᨶᩮᩣ ᨶᩣᨾ ᩉᩮᩣᨲᩥ. ᨲᩮᨶ ᩅᩩᨲ᩠ᨲᩴ ‘‘ᨧᨲᩩᨶ᩠ᨶᩴ ᨠᨾ᩠ᨾᩣᨶᩴ ᩋᨬ᩠ᨬᨲᩁᩅᩈᩮᨶ ᩈᨦ᩠ᨥᩴ ᨽᩥᨶ᩠ᨴᨲᩦ’’ᨲᩥ.

‘‘ᨴᩩᨭ᩠ᨮᨧᩥᨲ᩠ᨲᩮᨶᩣ’’ᨲᩥ ᩅᩩᨲ᩠ᨲᨾᩮᩅᨲ᩠ᨳᩴ ᩅᩥᨽᩣᩅᩮᨲᩩᩴ ‘‘ᩅᨵᨠᨧᩥᨲ᩠ᨲᩮᨶᩣ’’ᨲᩥ ᩅᩩᨲ᩠ᨲᩴ. ᩅᨵᨠᨧᩮᨲᨶᩣᨿ ᩉᩥ ᨴᩪᩈᩥᨲᩴ ᨧᩥᨲ᩠ᨲᩴ ᩍᨵ ᨴᩩᨭ᩠ᨮᨧᩥᨲ᩠ᨲᩴ ᨶᩣᨾ. ᩃᩮᩣᩉᩥᨲᩴ ᩏᨸ᩠ᨸᩣᨴᩮᨲᩦᨲᩥ ᩋᨶ᩠ᨲᩮᩣᩈᩁᩦᩁᩮᨿᩮᩅ ᩃᩮᩣᩉᩥᨲᩴ ᩏᨸ᩠ᨸᩣᨴᩮᨲᩥ, ᩈᨬ᩠ᨧᩥᨲᩴ ᨠᩁᩮᩣᨲᩦᨲᩥ ᩋᨵᩥᨸ᩠ᨸᩣᨿᩮᩣ. ᨶ ᩉᩥ ᨲᨳᩣᨣᨲᩔ ᩋᨽᩮᨩ᩠ᨩᨠᩣᨿᨲᩣᨿ ᨸᩁᩪᨸᨠ᩠ᨠᨾᩮᨶ ᨵᨾ᩠ᨾᩴ ᨽᩥᨶ᩠ᨴᩥᨲ᩠ᩅᩣ ᩃᩮᩣᩉᩥᨲᩴ ᨸᨣ᩠ᨥᩁᨲᩥ, ᩈᩁᩦᩁᩔ ᨸᨶ ᩋᨶ᩠ᨲᩮᩣᨿᩮᩅ ᩑᨠᩈ᩠ᨾᩥᩴ ᨮᩣᨶᩮ ᩃᩮᩣᩉᩥᨲᩴ ᩈᨾᩮᩣᩈᩁᨲᩥ, ᩌᨥᩣᨲᩮᨶ ᨸᨠᩩᨸ᩠ᨸᨾᩣᨶᩴ ᩈᨬ᩠ᨧᩥᨲᩴ ᩉᩮᩣᨲᩥ, ᨲᩴ ᩈᨶ᩠ᨵᩣᨿᩮᨲᩴ ᩅᩩᨲ᩠ᨲᩴ. ᨿᩮᩣ ᨸᨶ ᩁᩮᩣᨣᩅᩪᨸᩈᨾᨶᨲ᩠ᨳᩴ ᨩᩦᩅᨠᩮᩣ ᩅᩥᨿ ᩈᨲ᩠ᨳᩮᨶ ᨹᩣᩃᩮᨲ᩠ᩅᩣ ᨸᩪᨲᩥᨾᩴᩈᨬ᩠ᨧ ᩃᩮᩣᩉᩥᨲᨬ᩠ᨧ ᨶᩦᩉᩁᩥᨲ᩠ᩅᩣ ᨹᩣᩈᩩᨠᩴ ᨠᩁᩮᩣᨲᩥ, ᩋᨿᩴ ᩃᩮᩣᩉᩥᨲᩩᨸ᩠ᨸᩣᨴᨠᩮᩣ ᨶ ᩉᩮᩣᨲᩥ, ᨻᩉᩩᩴ ᨸᨶ ᩈᩮᩣ ᨸᩩᨬ᩠ᨬᩴ ᨸᩈᩅᨲᩥ (ᨾᩉᩣᩅ. ᩋᨭ᩠ᨮ. ᪑᪑᪕).

ᨴᩩᩅᩥᨵᨾ᩠ᨸᩥ ᨻ᩠ᨿᨬ᩠ᨩᨶᨶ᩠ᨲᩥ ᨿᨳᩣᩅᩩᨲ᩠ᨲᨠᨾ᩠ᨾᨴ᩠ᩅᨿᨲᩮᩣ ᩈᨾᩩᨭ᩠ᨮᩥᨲᩴ ᩍᨲ᩠ᨳᩥᨶᩥᨾᩥᨲ᩠ᨲᩴ, ᨸᩩᩁᩥᩈᨶᩥᨾᩥᨲ᩠ᨲᨬ᩠ᨧᩣᨲᩥ ᨴᩩᩅᩥᨵᨾ᩠ᨸᩥ ᨻ᩠ᨿᨬ᩠ᨩᨶᩴ. ᩍᨾᩥᨶᩣ ᨧ ᩅᩥᨣ᩠ᨣᩉᩮᨶ ‘‘ᩏᨽᨲᩮᩣᨻ᩠ᨿᨬ᩠ᨩᨶᨠᩮᩣ’’ᨲᩥ ᩋᩈᨾᩣᨶᩣᨵᩥᨠᩁᨱᩅᩥᩈᨿᩮᩣ ᨻᩣᩉᩥᩁᨲ᩠ᨳᩈᨾᩣᩈᩮᩣᨿᩴ, ᨸᩩᩁᩥᨾᨸᨴᩮ ᨧ ᩅᩥᨽᨲ᩠ᨲᩥᩋᩃᩮᩣᨸᩮᩣᨲᩥ ᨴᩔᩮᨲᩥ. ᩈᩮᩣ ᨴᩩᩅᩥᨵᩮᩣ ᩉᩮᩣᨲᩥ ᩍᨲ᩠ᨳᩥᩏᨽᨲᩮᩣᨻ᩠ᨿᨬ᩠ᨩᨶᨠᩮᩣ, ᨸᩩᩁᩥᩈᩏᨽᨲᩮᩣᨻ᩠ᨿᨬ᩠ᨩᨶᨠᩮᩣ ᨧᩣᨲᩥ. ᨲᨲ᩠ᨳ ᩍᨲ᩠ᨳᩥᩏᨽᨲᩮᩣᨻ᩠ᨿᨬ᩠ᨩᨶᨠᩔ ᩍᨲ᩠ᨳᩥᨶᩥᨾᩥᨲ᩠ᨲᩴ ᨸᩣᨠᨭᩴ ᩉᩮᩣᨲᩥ, ᨸᩩᩁᩥᩈᨶᩥᨾᩥᨲ᩠ᨲᩴ ᨸᨭᩥᨧ᩠ᨨᨶ᩠ᨶᩴ. ᨸᩩᩁᩥᩈᩏᨽᨲᩮᩣᨻ᩠ᨿᨬ᩠ᨩᨶᨠᩔ ᨸᩩᩁᩥᩈᨶᩥᨾᩥᨲ᩠ᨲᩴ ᨸᩣᨠᨭᩴ, ᩍᨲ᩠ᨳᩥᨶᩥᨾᩥᨲ᩠ᨲᩴ ᨸᨭᩥᨧ᩠ᨨᨶ᩠ᨶᩴ. ᩍᨲ᩠ᨳᩥᩏᨽᨲᩮᩣᨻ᩠ᨿᨬ᩠ᨩᨶᨠᩔ ᩍᨲ᩠ᨳᩦᩈᩩ ᨸᩩᩁᩥᩈᨲ᩠ᨲᩴ ᨠᩁᩮᩣᨶ᩠ᨲᩔ ᩍᨲ᩠ᨳᩥᨶᩥᨾᩥᨲ᩠ᨲᩴ ᨸᨭᩥᨧ᩠ᨨᨶ᩠ᨶᩴ ᩉᩮᩣᨲᩥ, ᨸᩩᩁᩥᩈᨶᩥᨾᩥᨲ᩠ᨲᩴ ᨸᩣᨠᨭᩴ ᩉᩮᩣᨲᩥ. ᨸᩩᩁᩥᩈᩏᨽᨲᩮᩣᨻ᩠ᨿᨬ᩠ᨩᨶᨠᩔ ᨸᩩᩁᩥᩈᩣᨶᩴ ᩍᨲ᩠ᨳᩥᨽᩣᩅᩴ ᩏᨸᨣᨧ᩠ᨨᨶ᩠ᨲᩔ ᨸᩩᩁᩥᩈᨶᩥᨾᩥᨲ᩠ᨲᩴ ᨸᨭᩥᨧ᩠ᨨᨶ᩠ᨶᩴ ᩉᩮᩣᨲᩥ, ᩍᨲ᩠ᨳᩥᨶᩥᨾᩥᨲ᩠ᨲᩴ ᨸᩣᨠᨭᩴ ᩉᩮᩣᨲᩥ. ᩍᨲ᩠ᨳᩥᩏᨽᨲᩮᩣᨻ᩠ᨿᨬ᩠ᨩᨶᨠᩮᩣ ᩈᨿᨬ᩠ᨧ ᨣᨻ᩠ᨽᩴ ᨣᨱ᩠ᩉᩣᨲᩥ, ᨸᩁᨬ᩠ᨧ ᨣᨱ᩠ᩉᩣᨸᩮᨲᩥ. ᨸᩩᩁᩥᩈᩏᨽᨲᩮᩣᨻ᩠ᨿᨬ᩠ᨩᨶᨠᩮᩣ ᨸᨶ ᩈᨿᩴ ᨶ ᨣᨱ᩠ᩉᩣᨲᩥ, ᨸᩁᩴ ᨣᨱ᩠ᩉᩣᨸᩮᨲᩦᨲᩥ ᩍᨴᨾᩮᨲᩮᩈᩴ ᨶᩣᨶᩣᨠᩁᨱᩴ.

ᩋᨸᩁᩣᨾᩈᨶᩣᨶᩦᨲᩥ ᩋᨣ᩠ᨣᩉᨱᩣᨶᩥ ᩋᩅᨧᨶᩣᨶᩥ. ‘‘ᩋᨿᩴ ᩍᨲ᩠ᨳᨶ᩠ᨶᩣᨾᩮᩣ’’ᨲᩥ ᩏᨸᩈᨾ᩠ᨸᨴᩣᨸᩮᨠ᩠ᨡᩔ ᩋᨠᩥᨲ᩠ᨲᨶᨶ᩠ᨲᩥ ᨿᩔ ᩏᨸᩈᨾ᩠ᨸᨴᩣ ᨠᩁᩦᨿᨲᩥ, ᨲᩔ ᩋᨠᩥᨲ᩠ᨲᨶᩴ, ‘‘ᩈᩩᨱᩣᨲᩩ ᨾᩮ, ᨽᨶ᩠ᨲᩮ, ᩈᨦ᩠ᨥᩮᩣ, ᩋᨿᩴ ᨵᨾ᩠ᨾᩁᨠ᩠ᨡᩥᨲᩮᩣ ᩌᨿᩈ᩠ᨾᨲᩮᩣ ᨻᩩᨴ᩠ᨵᩁᨠ᩠ᨡᩥᨲᩔ ᩏᨸᩈᨾ᩠ᨸᨴᩣᨸᩮᨠ᩠ᨡᩮᩣ’’ᨲᩥ ᩅᨲ᩠ᨲᨻ᩠ᨻᩮ ‘‘ᩋᨿᩴ ᨵᨾ᩠ᨾᩁᨠ᩠ᨡᩥᨲᩮᩣ’’ᨲᩥ (ᨸᩁᩥ. ᩋᨭ᩠ᨮ. ᪔᪘᪔) ᩋᩅᨧᨶᨶ᩠ᨲᩥ ᩅᩩᨲ᩠ᨲᩴ ᩉᩮᩣᨲᩥ. ‘‘ᩍᨲ᩠ᨳᨶ᩠ᨶᩣᨾᩔ ᩏᨸᩈᨾ᩠ᨸᨴᩣᨸᩮᨠ᩠ᨡᩮᩣ’’ᨲᩥ ᩏᨸᨩ᩠ᨫᩣᨿᩔ ᩋᨠᩥᨲ᩠ᨲᨶᨶ᩠ᨲᩥ ‘‘ᩈᩩᨱᩣᨲᩩ ᨾᩮ, ᨽᨶ᩠ᨲᩮ, ᩈᨦ᩠ᨥᩮᩣ, ᩋᨿᩴ ᨵᨾ᩠ᨾᩁᨠ᩠ᨡᩥᨲᩮᩣ ᩌᨿᩈ᩠ᨾᨲᩮᩣ ᨻᩩᨴ᩠ᨵᩁᨠ᩠ᨡᩥᨲᩔ ᩏᨸᩈᨾ᩠ᨸᨴᩣᨸᩮᨠ᩠ᨡᩮᩣ’’ᨲᩥ ᩅᨲ᩠ᨲᨻ᩠ᨻᩮ ‘‘ᩈᩩᨱᩣᨲᩩ ᨾᩮ, ᨽᨶ᩠ᨲᩮ, ᩈᨦ᩠ᨥᩮᩣ, ᩋᨿᩴ ᨵᨾ᩠ᨾᩁᨠ᩠ᨡᩥᨲᩮᩣ ᩏᨸᩈᨾ᩠ᨸᨴᩣᨸᩮᨠ᩠ᨡᩮᩣ’’ᨲᩥ ᩅᨲ᩠ᩅᩣ ‘‘ᩌᨿᩈ᩠ᨾᨲᩮᩣ ᨻᩩᨴ᩠ᨵᩁᨠ᩠ᨡᩥᨲᩔᩣ’’ᨲᩥ ᩋᩅᨧᨶᩴ. ᩈᨻ᩠ᨻᩮᨶ ᩈᨻ᩠ᨻᩴ ᨬᨲ᩠ᨲᩥᨿᩣ ᩋᨶᩩᨧ᩠ᨧᩣᩁᨱᨶ᩠ᨲᩥ ᨬᨲ᩠ᨲᩥᩴ ᩋᨭ᩠ᨮᨸᩮᨲ᩠ᩅᩣ ᨧᨲᩩᨠ᩠ᨡᨲ᩠ᨲᩩᩴ ᨠᨾ᩠ᨾᩅᩣᨧᩣᨿ ᩑᩅ ᩋᨶᩩᩔᩣᩅᨶᨠᨾ᩠ᨾᩔ ᨠᩁᨱᩴ. ᩈᨾ᩠ᨸᨶ᩠ᨶᨶ᩠ᨲᩥ ᩏᨸᩮᨲᩴ.

ᩉᩣᨸᨶᩴ ᨸᩁᩥᨧ᩠ᨧᨩᨶᩴ. ᨿᩮᩣᨸᩥ ᩑᨠᩴ ᨬᨲ᩠ᨲᩥᩴ ᨮᨸᩮᨲ᩠ᩅᩣ ᩈᨠᩥᩴᨿᩮᩅ ᩅᩣ ᨴ᩠ᩅᩥᨠ᩠ᨡᨲ᩠ᨲᩩᩴ ᩅᩣ ᩋᨶᩩᩔᩣᩅᨶᩴ ᨠᩁᩮᩣᨲᩥ, ᩋᨿᨾ᩠ᨸᩥ ᩈᩣᩅᨶᩴ ᩉᩣᨸᩮᨲᩥᨿᩮᩅ. ᨴᩩᩁᩩᨧ᩠ᨧᩣᩁᨱᩴ ᨶᩣᨾ ᩋᨬ᩠ᨬᩈ᩠ᨾᩥᩴ ᩋᨠ᩠ᨡᩁᩮ ᩅᨲ᩠ᨲᨻ᩠ᨻᩮ ᩋᨬ᩠ᨬᩔ ᩅᨧᨶᩴ. ᨲᩈ᩠ᨾᩣ ᨠᨾ᩠ᨾᩅᩣᨧᩴ ᨠᩁᩮᩣᨶ᩠ᨲᩮᨶ ᨽᩥᨠ᩠ᨡᩩᨶᩣ ᨿ᩠ᩅᩣᨿᩴ –

‘‘ᩈᩥᨳᩥᩃᩴ ᨵᨶᩥᨲᨬ᩠ᨧ ᨴᩦᨥᩁᩔᩴ;

ᨣᩁᩩᨠᩴ ᩃᩉᩩᨠᨬ᩠ᨧᩮᩅ ᨶᩥᨣ᩠ᨣᩉᩦᨲᩴ;

ᩈᨾ᩠ᨻᨶ᩠ᨵᩅᩅᨲ᩠ᨳᩥᨲᩴ ᩅᩥᨾᩩᨲ᩠ᨲᩴ;

ᨴᩈᨵᩣ ᨻ᩠ᨿᨬ᩠ᨩᨶᨻᩩᨴ᩠ᨵᩥᨿᩣ ᨸᨽᩮᨴᩮᩣ’’ᨲᩥ. (ᨴᩦ. ᨶᩥ. ᩋᨭ᩠ᨮ. ᪑.᪑᪙᪐; ᨾ. ᨶᩥ. ᩋᨭ᩠ᨮ. ᪑.᪒᪙᪑; ᩋ. ᨶᩥ. ᩋᨭ᩠ᨮ. ᪒.᪓.᪖᪔, ᨸᩁᩥ. ᩋᨭ᩠ᨮ. ᪔᪘᪕; ᩅᩥ. ᩈᨦ᩠ᨣ. ᩋᨭ᩠ᨮ. ᪒᪕᪒) –

ᩅᩩᨲ᩠ᨲᩮᩣ, ᩋᨿᩴ ᩈᩩᨭ᩠ᨮᩩ ᩏᨸᩃᨠ᩠ᨡᩮᨲᨻ᩠ᨻᩮᩣ. ᩑᨲ᩠ᨳ ᩉᩥ ᩈᩥᨳᩥᩃᩴ ᨶᩣᨾ ᨸᨬ᩠ᨧᩈᩩ ᩅᨣ᩠ᨣᩮᩈᩩ ᨸᨮᨾᨲᨲᩥᨿᩴ. ᨵᨶᩥᨲᩴ ᨶᩣᨾ ᨲᩮᩈ᩠ᩅᩮᩅ ᨴᩩᨲᩥᨿᨧᨲᩩᨲ᩠ᨳᩴ. ᨴᩦᨥᨶ᩠ᨲᩥ ᨴᩦᨥᩮᨶ ᨠᩣᩃᩮᨶ ᩅᨲ᩠ᨲᨻ᩠ᨻᩴ ᩌ-ᨠᩣᩁᩣᨴᩥ. ᩁᩔᨶ᩠ᨲᩥ ᨲᨲᩮᩣ ᩏᨸᨯ᩠ᨰᨠᩣᩃᩮᨶ ᩅᨲ᩠ᨲᨻ᩠ᨻᩴ ᩋ-ᨠᩣᩁᩣᨴᩥ. ᨣᩁᩩᨠᨶ᩠ᨲᩥ ᨴᩦᨥᨾᩮᩅ, ᨿᩴ ᩅᩣ ‘‘ᩌᨿᩈ᩠ᨾᨲᩮᩣ ᨻᩩᨴ᩠ᨵᩁᨠ᩠ᨡᩥᨲᨲ᩠ᨳᩮᩁᩔ ᨿᩔ ᨶᨠ᩠ᨡᨾᨲᩦ’’ᨲᩥ ᩑᩅᩴ ᩈᩴᨿᩮᩣᨣᨸᩁᩴ ᨠᨲ᩠ᩅᩣ ᩅᩩᨧ᩠ᨧᨲᩥ. ᩃᩉᩩᨠᨶ᩠ᨲᩥ ᩁᩔᨾᩮᩅ, ᨿᩴ ᩅᩣ ‘‘ᩌᨿᩈ᩠ᨾᨲᩮᩣ ᨻᩩᨴ᩠ᨵᩁᨠ᩠ᨡᩥᨲᨲ᩠ᨳᩮᩁᩔ ᨿᩔ ᨶ ᨡᨾᨲᩦ’’ᨲᩥ ᩑᩅᩴ ᩋᩈᩴᨿᩮᩣᨣᨸᩁᩴ ᨠᨲ᩠ᩅᩣ ᩅᩩᨧ᩠ᨧᨲᩥ. ᨶᩥᨣ᩠ᨣᩉᩦᨲᨶ᩠ᨲᩥ ᨿᩴ ᨠᩁᨱᩣᨶᩥ ᨶᩥᨣ᩠ᨣᩉᩮᨲ᩠ᩅᩣ ᩋᩅᩥᩔᨩ᩠ᨩᩮᨲ᩠ᩅᩣ ᩋᩅᩥᩅᨭᩮᨶ ᨾᩩᨡᩮᨶ ᩈᩣᨶᩩᨶᩣᩈᩥᨠᩴ ᨠᨲ᩠ᩅᩣ ᩅᨲ᩠ᨲᨻ᩠ᨻᩴ. ᩈᨾ᩠ᨻᨶ᩠ᨵᨶ᩠ᨲᩥ ᨿᩴ ᨸᩁᨸᨴᩮᨶ ᩈᨾ᩠ᨻᨶ᩠ᨵᩥᨲ᩠ᩅᩣ ‘‘ᨲᩩᨱ᩠ᩉᩥᩔᩣ’’ᨲᩥ ᩅᩣ ‘‘ᨲᩩᨱ᩠ᩉᩔᩣ’’ᨲᩥ ᩅᩣ ᩅᩩᨧ᩠ᨧᨲᩥ. ᩅᩅᨲ᩠ᨳᩥᨲᨶ᩠ᨲᩥ ᨿᩴ ᨸᩁᨸᨴᩮᨶ ᩈᨾ᩠ᨻᨶ᩠ᨵᩴ ᩋᨠᨲ᩠ᩅᩣ ᩅᩥᨧ᩠ᨨᩥᨶ᩠ᨴᩥᨲ᩠ᩅᩣ ‘‘ᨲᩩᨱ᩠ᩉᩦ ᩋᩔᩣ’’ᨲᩥ ᩅᩣ ‘‘ᨲᩩᨱ᩠ᩉ ᩋᩔᩣ’’ᨲᩥ ᩅᩣ ᩅᩩᨧ᩠ᨧᨲᩥ. ᩅᩥᨾᩩᨲ᩠ᨲᨶ᩠ᨲᩥ ᨿᩴ ᨠᩁᨱᩣᨶᩥ ᩋᨶᩥᨣ᩠ᨣᩉᩮᨲ᩠ᩅᩣ ᩅᩥᩔᨩ᩠ᨩᩮᨲ᩠ᩅᩣ ᩅᩥᩅᨭᩮᨶ ᨾᩩᨡᩮᨶ ᩋᨶᩩᨶᩣᩈᩥᨠᩴ ᩋᨠᨲ᩠ᩅᩣ ᩅᩩᨧ᩠ᨧᨲᩥ.

ᨲᨲ᩠ᨳ ‘‘ᩈᩩᨱᩣᨲᩩ ᨾᩮ’’ᨲᩥ ᩅᨲ᩠ᨲᨻ᩠ᨻᩮ ᨲ-ᨠᩣᩁᩔ ᨳ-ᨠᩣᩁᩴ ᨠᨲ᩠ᩅᩣ ‘‘ᩈᩩᨱᩣᨳᩩ ᨾᩮ’’ᨲᩥ ᩅᨧᨶᩴ ᩈᩥᨳᩥᩃᩔ ᨵᨶᩥᨲᨠᩁᨱᩴ ᨶᩣᨾ, ᨲᨳᩣ ‘‘ᨸᨲ᩠ᨲᨠᩃ᩠ᩃᩴ ᩑᩈᩣ ᨬᨲ᩠ᨲᩦ’’ᨲᩥ ᩅᨲ᩠ᨲᨻ᩠ᨻᩮ ‘‘ᨸᨲ᩠ᨳᨠᩃ᩠ᩃᩴ ᩑᩈᩣ ᨬᨲ᩠ᨲᩦ’’ᨲᩥᩌᨴᩥᩅᨧᨶᨬ᩠ᨧ. ‘‘ᨽᨶ᩠ᨲᩮ, ᩈᨦ᩠ᨥᩮᩣ’’ᨲᩥ ᩅᨲ᩠ᨲᨻ᩠ᨻᩮ ᨽ-ᨠᩣᩁ ᨥ-ᨠᩣᩁᩣᨶᩴ ᨻ-ᨠᩣᩁ ᨣ-ᨠᩣᩁᩮ ᨠᨲ᩠ᩅᩣ ‘‘ᨻᨶ᩠ᨲᩮ ᩈᩴᨣᩮᩣ’’ᨲᩥ ᩅᨧᨶᩴ ᨵᨶᩥᨲᩔ ᩈᩥᨳᩥᩃᨠᩁᨱᩴ ᨶᩣᨾ. ‘‘ᩈᩩᨱᩣᨲᩩ ᨾᩮ’’ᨲᩥ ᩅᩥᩅᨭᩮᨶ ᨾᩩᨡᩮᨶ ᩅᨲ᩠ᨲᨻ᩠ᨻᩮ ‘‘ᩈᩩᨱᩴᨲᩩ ᨾᩮ’’ᨲᩥ ᩅᩣ ‘‘ᩑᩈᩣ ᨬᨲ᩠ᨲᩦ’’ᨲᩥ ᩅᨲ᩠ᨲᨻ᩠ᨻᩮ ‘‘ᩑᩈᩴ ᨬᨲ᩠ᨲᩦ’’ᨲᩥ ᩅᩣ ᩋᩅᩥᩅᨭᩮᨶ ᨾᩩᨡᩮᨶ ᩋᨶᩩᨶᩣᩈᩥᨠᩴ ᨠᨲ᩠ᩅᩣ ᩅᨧᨶᩴ ᩅᩥᨾᩩᨲ᩠ᨲᩔ ᨶᩥᨣ᩠ᨣᩉᩥᨲᩅᨧᨶᩴ ᨶᩣᨾ. ‘‘ᨸᨲ᩠ᨲᨠᩃ᩠ᩃ’’ᨶ᩠ᨲᩥ ᩋᩅᩥᩅᨭᩮᨶ ᨾᩩᨡᩮᨶ ᩋᨶᩩᨶᩣᩈᩥᨠᩴ ᨠᨲ᩠ᩅᩣ ᩅᨲ᩠ᨲᨻ᩠ᨻᩮ ‘‘ᨸᨲ᩠ᨲᨠᩃ᩠ᩃᩣ’’ᨲᩥ ᩅᩥᩅᨭᩮᨶ ᨾᩩᨡᩮᨶ ᩋᨶᩩᨶᩣᩈᩥᨠᩴ ᩋᨠᨲ᩠ᩅᩣ ᩅᨧᨶᩴ ᨶᩥᨣ᩠ᨣᩉᩥᨲᩔ ᩅᩥᨾᩩᨲ᩠ᨲᩅᨧᨶᩴ ᨶᩣᨾ. ᩍᨲᩥ ᩈᩥᨳᩥᩃᩮ ᨠᨲ᩠ᨲᨻ᩠ᨻᩮ ᨵᨶᩥᨲᩴ, ᨵᨶᩥᨲᩮ ᨠᨲ᩠ᨲᨻ᩠ᨻᩮ ᩈᩥᨳᩥᩃᩴ, ᩅᩥᨾᩩᨲ᩠ᨲᩮ ᨠᨲ᩠ᨲᨻ᩠ᨻᩮ ᨶᩥᨣ᩠ᨣᩉᩥᨲᩴ, ᨶᩥᨣ᩠ᨣᩉᩥᨲᩮ ᨠᨲ᩠ᨲᨻ᩠ᨻᩮ ᩅᩥᨾᩩᨲ᩠ᨲᨶ᩠ᨲᩥ ᩍᨾᩣᨶᩥ ᨧᨲ᩠ᨲᩣᩁᩥ ᨻ᩠ᨿᨬ᩠ᨩᨶᩣᨶᩥ ᩋᨶ᩠ᨲᩮᩣᨠᨾ᩠ᨾᩅᩣᨧᩣᨿ ᨠᨾ᩠ᨾᩴ ᨴᩪᩈᩮᨶ᩠ᨲᩥ. ᩑᩅᩴ ᩅᨴᨶ᩠ᨲᩮᩣ ᩉᩥ ᩋᨬ᩠ᨬᩈ᩠ᨾᩥᩴ ᩋᨠ᩠ᨡᩁᩮ ᩅᨲ᩠ᨲᨻ᩠ᨻᩮ ᩋᨬ᩠ᨬᩴ ᩅᨴᨲᩥ, ᨴᩩᩁᩩᨲ᩠ᨲᩴ ᨠᩁᩮᩣᨲᩦᨲᩥ ᩅᩩᨧ᩠ᨧᨲᩥ.

ᩍᨲᩁᩮᩈᩩ ᨸᨶ ᨴᩦᨥᩁᩔᩣᨴᩦᩈᩩ ᨨᩈᩩ ᨻ᩠ᨿᨬ᩠ᨩᨶᩮᩈᩩ ᨴᩦᨥᨭ᩠ᨮᩣᨶᩮ ᨴᩦᨥᨾᩮᩅ. ᩁᩔᨭ᩠ᨮᩣᨶᩮ ᨧ ᩁᩔᨾᩮᩅᩣᨲᩥ ᩑᩅᩴ ᨿᨳᩣᨮᩣᨶᩮ ᨲᩴ ᨲᨴᩮᩅ ᩋᨠ᩠ᨡᩁᩴ ᨽᩣᩈᨶ᩠ᨲᩮᨶ ᩋᨶᩩᨠ᩠ᨠᨾᩣᨣᨲᩴ ᨸᩅᩮᨱᩥᩴ ᩋᩅᩥᨶᩣᩈᩮᨶ᩠ᨲᩮᨶ ᨠᨾ᩠ᨾᩅᩣᨧᩣ ᨠᩣᨲᨻ᩠ᨻᩣ. ᩈᨧᩮ ᨸᨶ ᩑᩅᩴ ᩋᨠᨲ᩠ᩅᩣ ᨴᩦᨥᩮ ᩅᨲ᩠ᨲᨻ᩠ᨻᩮ ᩁᩔᩴ, ᩁᩔᩮ ᩅᩣ ᩅᨲ᩠ᨲᨻ᩠ᨻᩮ ᨴᩦᨥᩴ ᩅᨴᨲᩥ, ᨲᨳᩣ ᨣᩁᩩᨠᩮ ᩅᨲ᩠ᨲᨻ᩠ᨻᩮ ᩃᩉᩩᨠᩴ, ᩃᩉᩩᨠᩮ ᩅᩣ ᩅᨲ᩠ᨲᨻ᩠ᨻᩮ ᨣᩁᩩᨠᩴ ᩅᨴᨲᩥ, ᩈᨾ᩠ᨻᨶ᩠ᨵᩮ ᩅᩣ ᨸᨶ ᩅᨲ᩠ᨲᨻ᩠ᨻᩮ ᩅᩅᨲ᩠ᨳᩥᨲᩴ, ᩅᩅᨲ᩠ᨳᩥᨲᩮ ᩅᩣ ᩅᨲ᩠ᨲᨻ᩠ᨻᩮ ᩈᨾ᩠ᨻᨶ᩠ᨵᩴ ᩅᨴᨲᩥ, ᩑᩅᩴ ᩅᩩᨲ᩠ᨲᩮᨸᩥ ᨠᨾ᩠ᨾᩅᩣᨧᩣ ᨶ ᨠᩩᨸ᩠ᨸᨲᩥ. ᩍᨾᩣᨶᩥ ᩉᩥ ᨨ ᨻ᩠ᨿᨬ᩠ᨩᨶᩣᨶᩥ ᨠᨾ᩠ᨾᩴ ᨶ ᨠᩮᩣᨸᩮᨶ᩠ᨲᩥ.

ᨿᩴ ᨸᨶ ᩈᩩᨲ᩠ᨲᨶ᩠ᨲᩥᨠᨲ᩠ᨳᩮᩁᩣ ‘‘ᨴ-ᨠᩣᩁᩮᩣ ᨲ-ᨠᩣᩁᨾᩣᨸᨩ᩠ᨩᨲᩥ, ᨲ-ᨠᩣᩁᩮᩣ ᨴ-ᨠᩣᩁᨾᩣᨸᨩ᩠ᨩᨲᩥ, ᨧ-ᨠᩣᩁᩮᩣ ᨩ-ᨠᩣᩁᨾᩣᨸᨩ᩠ᨩᨲᩥ, ᨩ-ᨠᩣᩁᩮᩣ ᨧ-ᨠᩣᩁᨾᩣᨸᨩ᩠ᨩᨲᩥ, ᨿ-ᨠᩣᩁᩮᩣ ᨠ-ᨠᩣᩁᨾᩣᨸᨩ᩠ᨩᨲᩥ, ᨠ-ᨠᩣᩁᩮᩣ ᨿ-ᨠᩣᩁᨾᩣᨸᨩ᩠ᨩᨲᩥ, ᨲᩈ᩠ᨾᩣ ᨴ-ᨠᩣᩁᩣᨴᩦᩈᩩ ᩅᨲ᩠ᨲᨻ᩠ᨻᩮᩈᩩ ᨲ-ᨠᩣᩁᩣᨴᩦᨶᩴ ᩅᨧᨶᩴ ᨶ ᩅᩥᩁᩩᨩ᩠ᨫᨲᩦ’’ᨲᩥ ᩅᨴᨶ᩠ᨲᩥ, ᨲᩴ ᨠᨾ᩠ᨾᩅᩣᨧᩴ ᨸᨲ᩠ᩅᩣ ᨶ ᩅᨭ᩠ᨭᨲᩥ. ᨲᩈ᩠ᨾᩣ ᩅᩥᨶᨿᨵᩁᩮᨶ ᨶᩮᩅ ᨴ-ᨠᩣᩁᩮᩣ ᨲ-ᨠᩣᩁᩮᩣ ᨠᩣᨲᨻ᩠ᨻᩮᩣ…ᨸᩮ… ᨶ ᨠ-ᨠᩣᩁᩮᩣ ᨿ-ᨠᩣᩁᩮᩣ. ᨿᨳᩣᨸᩣᩊᩥᨿᩣ ᨶᩥᩁᩩᨲ᩠ᨲᩥᩴ ᩈᩮᩣᨵᩮᨲ᩠ᩅᩣ ᨴᩈᩅᩥᨵᩣᨿ ᨻ᩠ᨿᨬ᩠ᨩᨶᨶᩥᩁᩩᨲ᩠ᨲᩥᨿᩣ ᩅᩩᨲ᩠ᨲᨴᩮᩣᩈᩮ ᨸᩁᩥᩉᩁᨶ᩠ᨲᩮᨶ ᨠᨾ᩠ᨾᩅᩣᨧᩣ ᨠᩣᨲᨻ᩠ᨻᩣ. ᩍᨲᩁᨳᩣ ᩉᩥ ᩈᩣᩅᨶᩴ ᩉᩣᨸᩮᨲᩥ ᨶᩣᨾ. ᨬᨲ᩠ᨲᩥᩴ ᩋᨭ᩠ᨮᨸᩮᨲ᩠ᩅᩣ ᨸᨮᨾᩴ ᩋᨶᩩᩔᩣᩅᨶᨠᩁᨱᨶ᩠ᨲᩥ ᩈᨾ᩠ᨻᨶ᩠ᨵᩮᩣ.

ᨿᩣᩅᨲᩥᨠᩣ ᨽᩥᨠ᩠ᨡᩪ ᨠᨾ᩠ᨾᨸ᩠ᨸᨲ᩠ᨲᩣᨲᩥ ᨿᨲ᩠ᨲᨠᩣ ᨽᩥᨠ᩠ᨡᩪ ᨲᩔ ᩏᨸᩈᨾ᩠ᨸᨴᩣᨠᨾ᩠ᨾᩔ ᨸᨲ᩠ᨲᩣ ᨿᩩᨲ᩠ᨲᩣ ᩋᨶᩩᩁᩪᨸᩣ. ᨲᩮ ᨧ ᨡᩮᩣ ᩈᨻ᩠ᨻᨶ᩠ᨲᩥᨾᩮᨶ ᨸᩁᩥᨿᩣᨿᩮᨶ ᩉᨲ᩠ᨳᨸᩣᩈᩴ ᩋᩅᩥᨩᩉᩥᨲ᩠ᩅᩣ ᩑᨠᩈᩦᨾᨭ᩠ᨮᩣ ᨸᨬ᩠ᨧ ᨸᨠᨲᨲ᩠ᨲᩣ ᨽᩥᨠ᩠ᨡᩪ. ᨶ ᩉᩥ ᨲᩮᩉᩥ ᩅᩥᨶᩣ ᨲᩴ ᨠᨾ᩠ᨾᩴ ᨠᩁᩦᨿᨲᩥ, ᨶ ᨲᩮᩈᩴ ᨨᨶ᩠ᨴᩮᩣ ᩑᨲᩥ. ᩋᩅᩈᩮᩈᩣ ᨸᨶ ᩈᨧᩮᨸᩥ ᩈᩉᩔᨾᨲ᩠ᨲᩣ ᩉᩮᩣᨶ᩠ᨲᩥ, ᩈᨧᩮ ᩑᨠᩈᩦᨾᨭ᩠ᨮᩣ ᩑᨠᩈ᩠ᨾᩥᩴ ᨮᩣᨶᩮ ᩈᨾᩣᨶᩈᩴᩅᩣᩈᨠᩣ, ᩈᨻ᩠ᨻᩮ ᨨᨶ᩠ᨴᩣᩁᩉᩣᩅ ᩉᩮᩣᨶ᩠ᨲᩥ, ᨨᨶ᩠ᨴᩴ ᨴᨲ᩠ᩅᩣ ᩌᨣᨧ᩠ᨨᨶ᩠ᨲᩩ ᩅᩣ, ᨾᩣ ᩅᩣ, ᨠᨾ᩠ᨾᩴ ᨶ ᨠᩩᨸ᩠ᨸᨲᩥ. ᨸᨭᩥᨠ᩠ᨠᩮᩣᩈᨶᨶ᩠ᨲᩥ ᨶᩥᩅᩣᩁᨱᩴ. ᨲᩥᨭ᩠ᨮᨲᩥ ᩑᨲ᩠ᨳ ᨹᩃᩴ ᨲᨴᩣᨿᨲ᩠ᨲᩅᩩᨲ᩠ᨲᩥᨲᩣᨿᩣᨲᩥ ᨮᩣᨶᩴ, ᨠᩣᩁᨱᩴ. ᩍᨵ ᨸᨶ ᩏᨸᩈᨾ᩠ᨸᨴᩣᨠᨾ᩠ᨾᨠᩁᨱᩔ ᨠᩣᩁᨱᨲ᩠ᨲᩣ ᩏᨸᩈᨾ᩠ᨸᨴᩣᨠᨾ᩠ᨾᩅᩣᨧᩣᩈᨦ᩠ᨡᩣᨲᩴ ᨽᨣᩅᨲᩮᩣ ᩅᨧᨶᩴ ᩅᩩᨧ᩠ᨧᨲᩥ. ᨲᩮᨶᩣᩉ ‘‘ᨠᩣᩁᨱᩣᩁᩉᨲ᩠ᨲᩣ ᨸᨶ ᩈᨲ᩠ᨳᩩ ᩈᩣᩈᨶᩣᩁᩉᨲ᩠ᨲᩣ’’ᨲᩥ. ᨿᨳᩣ ᨧ ‘‘ᨲᩴ ᨠᨲ᩠ᨲᨻ᩠ᨻ’’ᨶ᩠ᨲᩥ ᨽᨣᩅᨲᩣ ᩋᨶᩩᩈᩥᨭ᩠ᨮᩴ, ᨲᨳᩣᨠᩁᨱᩴ ᩏᨸᩈᨾ᩠ᨸᨴᩣᨠᨾ᩠ᨾᩔ ᨠᩣᩁᨱᩴ ᩉᩮᩣᨲᩦᨲᩥ ᨮᩣᨶᩣᩁᩉᩴ ᨶᩣᨾ. ᨠᩮᨧᩥ (ᩈᩣᩁᨲ᩠ᨳ. ᨭᩦ. ᪒.᪔᪕) ᨸᨶ ‘‘ᨮᩣᨶᩣᩁᩉᩮᨶᩣᨲᩥ ᩑᨲ᩠ᨳ ‘ᨶ, ᨽᩥᨠ᩠ᨡᩅᩮ, ᩉᨲ᩠ᨳᨧ᩠ᨨᩥᨶ᩠ᨶᩮᩣ ᨸᨻ᩠ᨻᩣᨩᩮᨲᨻ᩠ᨻᩮᩣ’ᨲᩥᩌᨴᩥ (ᨾᩉᩣᩅ. ᪑᪑᪙) ᩈᨲ᩠ᨳᩩᩈᩣᩈᨶᩴ ᨮᩣᨶ’’ᨶ᩠ᨲᩥ ᩅᨴᨶ᩠ᨲᩥ. ᩍᨵᩣᨲᩥ ᩍᨾᩈ᩠ᨾᩥᩴ ᨸᩣᩁᩣᨩᩥᨠᩮ. ᨿᨳᩣ ᨧ ᩍᨵ, ᩑᩅᩴ ᩈᨻ᩠ᨻᨲ᩠ᨳᩣᨸᩥ ᩃᩮᩣᨠᩅᨩ᩠ᨩᩈᩥᨠ᩠ᨡᩣᨸᨴᩮᩈᩩ ᩋᨿᨾᩮᩅ ᩋᨵᩥᨸ᩠ᨸᩮᨲᩮᩣᨲᩥ ᩅᩮᨴᩥᨲᨻ᩠ᨻᩴ. ᨲᩮᨶᩣᩉ ‘‘ᨸᨱ᩠ᨱᨲ᩠ᨲᩥᩅᨩ᩠ᨩᩮᩈᩩ ᨸᨶᩣ’’ᨲᩥᩌᨴᩥ. ᩋᨬ᩠ᨬᩮᨸᩦᨲᩥ ᩑᩉᩥᨽᩥᨠ᩠ᨡᩪᨸᩈᨾ᩠ᨸᨶ᩠ᨶᩣᨴᨿᩮᩣᨸᩥ. ᨠᨳᨾᩮᨲᩴ ᩅᩥᨬ᩠ᨬᩣᨿᨲᩥ ᨸᨱ᩠ᨱᨲ᩠ᨲᩥᩅᨩ᩠ᨩᩮᩈᩩ ᩈᩥᨠ᩠ᨡᩣᨸᨴᩮᩈᩩ ᩋᨬ᩠ᨬᩮᨸᩥ ᩈᨦ᩠ᨣᩉᩴ ᨣᨧ᩠ᨨᨶ᩠ᨲᩦᨲᩥ? ᩋᨲ᩠ᨳᨲᩮᩣ ᩌᨸᨶ᩠ᨶᨲ᩠ᨲᩣ. ᨲᨳᩣ ᩉᩥ ‘‘ᨴ᩠ᩅᩮ ᨸᩩᨣ᩠ᨣᩃᩣ ᩋᨽᨻ᩠ᨻᩣ ᩌᨸᨲ᩠ᨲᩥᩴ ᩌᨸᨩ᩠ᨩᩥᨲᩩᩴ ᨻᩩᨴ᩠ᨵᩣ ᨧ ᨸᨧ᩠ᨧᩮᨠᨻᩩᨴ᩠ᨵᩣ ᨧ, ᨴ᩠ᩅᩮ ᨸᩩᨣ᩠ᨣᩃᩣ ᨽᨻ᩠ᨻᩣ ᩌᨸᨲ᩠ᨲᩥᩴ ᩌᨸᨩ᩠ᨩᩥᨲᩩᩴ ᨽᩥᨠ᩠ᨡᩪ ᨧ ᨽᩥᨠ᩠ᨡᩩᨶᩥᨿᩮᩣ ᨧᩣ’’ᨲᩥ (ᨸᩁᩥ. ᪓᪒᪒) ᩈᩣᨾᨬ᩠ᨬᨲᩮᩣ ᩅᩩᨲ᩠ᨲᨲ᩠ᨲᩣ. ᩑᩉᩥᨽᩥᨠ᩠ᨡᩪᨸᩈᨾ᩠ᨸᨶ᩠ᨶᩣᨴᨿᩮᩣᨸᩥ ᩋᩈᨬ᩠ᨧᩥᨧ᩠ᨧ ᩋᩔᨲᩥᨿᩣ ᩋᨧᩥᨲ᩠ᨲᨠᩴ ᩈᩉᩈᩮᨿ᩠ᨿᩣᨸᨲ᩠ᨲᩥᩌᨴᩥᨽᩮᨴᩴ ᨸᨱ᩠ᨱᨲ᩠ᨲᩥᩅᨩ᩠ᨩᩴ ᩌᨸᨩ᩠ᨩᨶ᩠ᨲᩦᨲᩥ (ᩈᩣᩁᨲ᩠ᨳ. ᨭᩦ. ᪒.᪔᪕) ᩋᨲ᩠ᨳᨲᩮᩣ ᩌᨸᨶ᩠ᨶᩴ.

ᩍᨴᩣᨶᩥ ‘‘ᨽᩥᨠ᩠ᨡᩪᨶ’’ᨶ᩠ᨲᩥ ᩍᨾᩴ ᨸᨴᩴ ᩅᩥᩈᩮᩈᨲ᩠ᨳᩣᨽᩣᩅᨲᩮᩣ ᩅᩥᩈᩩᩴ ᩋᩅᨱ᩠ᨱᩮᨲ᩠ᩅᩣᩅ ᨿᩴ ᩈᩥᨠ᩠ᨡᨬ᩠ᨧ ᩈᩣᨩᩦᩅᨬ᩠ᨧ ᩈᨾᩣᨸᨶ᩠ᨶᨲ᩠ᨲᩣ ᨽᩥᨠ᩠ᨡᩪᨶᩴ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ ᩉᩮᩣᨲᩥ, ᨲᩴ ᨴᩔᩮᨶ᩠ᨲᩮᩣ ‘‘ᨽᩥᨠ᩠ᨡᩪᨶᩴ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ’’ᨲᩥᩌᨴᩥᨾᩣᩉ. ᩈᩥᨠ᩠ᨡᩥᨲᨻ᩠ᨻᩣᨲᩥ ᩈᩥᨠ᩠ᨡᩣ, ᨸᩣᨲᩥᨾᩮᩣᨠ᩠ᨡᩈᩴᩅᩁᩈᩦᩃᩴ, ᩈᩉ ᨩᩦᩅᨶ᩠ᨲᩥ ᩑᨲ᩠ᨳᩣᨲᩥ ᩈᩣᨩᩦᩅᩴ, ᨾᩣᨲᩥᨠᩣᨴᩥᨽᩮᨴᩣ ᨸᨱ᩠ᨱᨲ᩠ᨲᩥ, ᩈᩥᨠ᩠ᨡᩣ ᨧ ᩈᩣᨩᩦᩅᨬ᩠ᨧ ᩈᩥᨠ᩠ᨡᩣᩈᩣᨩᩦᩅᩴ, ᨲᨴᩩᨽᨿᩴ ᩈᨾᩣᨸᨶ᩠ᨶᩮᩣ ᩏᨸᨣᨲᩮᩣᨲᩥ ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ. ᨲᩮᨶᩣᩉ ‘‘ᨿᩣ ᨽᩥᨠ᩠ᨡᩪᨶ’’ᨶ᩠ᨲᩥᩌᨴᩥ. ᩑᨲ᩠ᨳ ᨧ ‘‘ᩈᩥᨠ᩠ᨡᩣ’’ᨲᩥ ᩈᩣᨩᩦᩅᩈᩉᨧᩁᩥᨿᨲᩮᩣ ᩋᨵᩥᩈᩦᩃᩈᩥᨠ᩠ᨡᩣᩅ ᩋᨵᩥᨸ᩠ᨸᩮᨲᩣᨲᩥ ᩌᩉ ‘‘ᩋᨵᩥᩈᩦᩃᩈᨦ᩠ᨡᩣᨲᩣ’’ᨲᩥ. ᩋᨵᩥᨠᩴ ᩏᨲ᩠ᨲᨾᩴ ᩈᩦᩃᨶ᩠ᨲᩥ ᩋᨵᩥᩈᩦᩃᩴ, ‘‘ᩋᨵᩥᩈᩦᩃ’’ᨶ᩠ᨲᩥ ᩈᨦ᩠ᨡᩣᨲᩣ ᩋᨵᩥᩈᩦᩃᩈᨦ᩠ᨡᩣᨲᩣ.

ᨠᨲᨾᩴ ᨸᨶᩮᨲ᩠ᨳ ᩈᩦᩃᩴ, ᨠᨲᨾᩴ ᩋᨵᩥᩈᩦᩃᨶ᩠ᨲᩥ? ᩅᩩᨧ᩠ᨧᨲᩮ – ᨸᨬ᩠ᨧᨦ᩠ᨣᨴᩈᨦ᩠ᨣᩈᩦᩃᩴ ᨲᩣᩅ ᩈᩦᩃᨾᩮᩅ, ᨶ ᨲᩴ ᩋᨵᩥᩈᩦᩃᩴ. ᨸᩣᨲᩥᨾᩮᩣᨠ᩠ᨡᩈᩴᩅᩁᩈᩦᩃᩴ ᨸᨶ ᩋᨵᩥᩈᩦᩃ’’ᨶ᩠ᨲᩥ ᩅᩩᨧ᩠ᨧᨲᩥ. ᨲᨬ᩠ᩉᩥ ᩈᩪᩁᩥᨿᩮᩣ ᩅᩥᨿ ᨸᨩ᩠ᨩᩮᩣᨲᩣᨶᩴ, ᩈᩥᨶᩮᩁᩩ ᩅᩥᨿ ᨧ ᨸᨻ᩠ᨻᨲᩣᨶᩴ ᩈᨻ᩠ᨻᩃᩮᩣᨠᩥᨿᩈᩦᩃᩣᨶᩴ ᩋᨵᩥᨠᨬ᩠ᨧᩮᩅ ᩏᨲ᩠ᨲᨾᨬ᩠ᨧ, ᨻᩩᨴ᩠ᨵᩩᨸ᩠ᨸᩣᨴᩮᨿᩮᩅ ᨧ ᨸᩅᨲ᩠ᨲᨲᩥ, ᨶ ᩅᩥᨶᩣ ᨻᩩᨴ᩠ᨵᩩᨸ᩠ᨸᩣᨴᩣ. ᨶ ᩉᩥ ᨲᩴ ᨸᨬ᩠ᨬᨲ᩠ᨲᩥᩴ ᩏᨴ᩠ᨵᩁᩥᨲ᩠ᩅᩣ ᩋᨬ᩠ᨬᩮᩣ ᩈᨲ᩠ᨲᩮᩣ ᨸᨬ᩠ᨬᩣᨸᩮᨲᩩᩴ ᩈᨠ᩠ᨠᩮᩣᨲᩥ, ᨻᩩᨴ᩠ᨵᩣᨿᩮᩅ ᨸᨶᩔ ᩈᨻ᩠ᨻᩈᩮᩣ ᨠᩣᨿᩅᨧᩦᨴ᩠ᩅᩣᩁᨩ᩠ᨫᩣᨧᩣᩁᩈᩮᩣᨲᩴ ᨨᩥᨶ᩠ᨴᩥᨲ᩠ᩅᩣ ᨲᩔ ᨲᩔ ᩅᩦᨲᩥᨠ᩠ᨠᨾᩔ ᩋᨶᩩᨧ᩠ᨨᩅᩥᨠᩴ ᨲᩴ ᨲᩴ ᩈᩦᩃᩈᩴᩅᩁᩴ ᨸᨬ᩠ᨬᩣᨸᩮᨶ᩠ᨲᩥ. ᨸᩣᨲᩥᨾᩮᩣᨠ᩠ᨡᩈᩴᩅᩁᩈᩦᩃᨲᩮᩣᨸᩥ ᨧ ᨾᨣ᩠ᨣᨹᩃᩈᨾ᩠ᨸᨿᩩᨲ᩠ᨲᨾᩮᩅ ᩈᩦᩃᩴ ᩋᨵᩥᩈᩦᩃᩴ, ᨲᩴ ᨸᨶ ᩍᨵ ᨶ ᩋᨵᩥᨸ᩠ᨸᩮᨲᩴ. ᨶ ᩉᩥ ᨲᩴ ᩈᨾᩣᨸᨶ᩠ᨶᩮᩣ ᨾᩮᨳᩩᨶᨵᨾ᩠ᨾᩴ ᨸᨭᩥᩈᩮᩅᨲᩥ.

ᩑᨲᩮᨲᩥ ᨶᩣᨶᩣᨴᩮᩈᨩᩣᨲᩥᨣᩮᩣᨲ᩠ᨲᩣᨴᩥᨽᩮᨴᨽᩥᨶ᩠ᨶᩣ ᨽᩥᨠ᩠ᨡᩪ. ᩈᩉ ᨩᩦᩅᨶ᩠ᨲᩦᨲᩥ ᩑᨠᩩᨴ᩠ᨴᩮᩈᩣᨴᩥᩅᩈᩮᨶ ᩈᩉ ᨸᩅᨲ᩠ᨲᨶ᩠ᨲᩥ. ᨲᩮᨶᩣᩉ ‘‘ᩑᨠᨩᩦᩅᩥᨠᩣ ᩈᨽᩣᨣᩅᩩᨲ᩠ᨲᩥᨶᩮᩣ’’ᨲᩥ. ᩈᩥᨠ᩠ᨡᩣᨸᨴᩈᨦ᩠ᨡᩣᨲᨶ᩠ᨲᩥ ᨸᨱ᩠ᨱᨲ᩠ᨲᩥᩈᨦ᩠ᨡᩣᨲᩴ. ᩈᩣᨸᩥ ᩉᩥ ᩅᩥᩁᨲᩥᩌᨴᩦᨶᩴ ᨴᩦᨸᨶᨲᩮᩣ ‘‘ᩈᩥᨠ᩠ᨡᩣᨸᨴ’’ᨶ᩠ᨲᩥ ᩅᩩᨧ᩠ᨧᨲᩥ. ᩅᩩᨲ᩠ᨲᨾ᩠ᨸᩥ ᨧᩮᨲᩴ ‘‘ᩈᩥᨠ᩠ᨡᩣᨸᨴᨶ᩠ᨲᩥ ᨿᩮᩣ ᨲᨲ᩠ᨳ ᨶᩣᨾᨠᩣᨿᩮᩣ ᨸᨴᨠᩣᨿᩮᩣ ᨶᩥᩁᩩᨲ᩠ᨲᩥᨠᩣᨿᩮᩣ ᨻ᩠ᨿᨬ᩠ᨩᨶᨠᩣᨿᩮᩣ’’ᨲᩥ. ᨲᨲ᩠ᨳᩣᨲᩥ ᨲᩮᩈᩩ. ᩈᩥᨠ᩠ᨡᩴ ᨸᩁᩥᨸᩪᩁᩮᨶ᩠ᨲᩮᩣᨲᩥ ᩋᨠᨲ᩠ᨲᨻ᩠ᨻᨸᩁᩥᩅᨩ᩠ᨩᨶᨠᨲ᩠ᨲᨻ᩠ᨻᨠᩁᨱᩅᩈᩮᨶ ᩅᩣᩁᩥᨲ᩠ᨲᨧᩣᩁᩥᨲ᩠ᨲᩈᨦ᩠ᨡᩣᨲᩴ ᨴᩩᩅᩥᨵᩴ ᩈᩦᩃᩴ ᨸᩁᩥᨸᩪᩁᩮᨶ᩠ᨲᩮᩣᨲᩥ ᩋᨲ᩠ᨳᩮᩣ, ᩅᩣᩁᩥᨲ᩠ᨲᩈᩦᩃᩅᩈᩮᨶ ᩅᩥᩁᨲᩥᩈᨾ᩠ᨸᨿᩩᨲ᩠ᨲᨧᩮᨲᨶᩴ, ᨧᩣᩁᩥᨲ᩠ᨲᩈᩦᩃᩅᩈᩮᨶ ᩅᩥᩁᨲᩥᩅᩥᨸ᩠ᨸᨿᩩᨲ᩠ᨲᨧᩮᨲᨶᨬ᩠ᨧ ᩋᨲ᩠ᨲᨶᩥ ᨸᩅᨲ᩠ᨲᩮᨶ᩠ᨲᩮᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᩈᩣᨩᩦᩅᨬ᩠ᨧ ᩋᩅᩦᨲᩥᨠ᩠ᨠᨾᨶ᩠ᨲᩮᩣᨲᩥ ᩈᩥᨠ᩠ᨡᩣᨸᨴᨬ᩠ᨧ ᩋᨾᨴ᩠ᨴᨶ᩠ᨲᩮᩣ, ᩈᩦᩃᩈᩴᩅᩁᨱᩴ, ᩈᩣᨩᩦᩅᩣᨶᨲᩥᨠ᩠ᨠᨾᨶᨬ᩠ᨧᩣᨲᩥ ᩍᨴᨾᩮᩅ ᨴ᩠ᩅᨿᩴ ᩍᨵ ᩈᨾᩣᨸᨩ᩠ᨩᨶᩴ ᨶᩣᨾᩣᨲᩥ ᩋᨵᩥᨸ᩠ᨸᩣᨿᩮᩣ. ᨲᨲ᩠ᨳ ᩈᩣᨩᩦᩅᩣᨶᨲᩥᨠ᩠ᨠᨾᩮᩣ ᩈᩥᨠ᩠ᨡᩣᨸᩣᩁᩥᨸᩪᩁᩥᨿᩣ ᨸᨧ᩠ᨧᨿᩮᩣ. ᨲᩔᩣᨶᨲᩥᨠ᩠ᨠᨾᨶᨲᩮᩣ ᩉᩥ ᨿᩣᩅ ᨾᨣ᩠ᨣᩣ ᩈᩥᨠ᩠ᨡᩣ ᨸᩁᩥᨸᩪᩁᨲᩥ. ᩋᨸᩥᨧᩮᨲ᩠ᨳ ‘‘ᩈᩥᨠ᩠ᨡᩴ ᨸᩁᩥᨸᩪᩁᩮᨶ᩠ᨲᩮᩣ’’ᨲᩥ ᩍᨾᩥᨶᩣ ᩅᩥᩁᨲᩥᨧᩮᨲᨶᩣᩈᨦ᩠ᨡᩣᨲᩔ ᩈᩦᩃᩈᩴᩅᩁᩔ ᩅᩥᩈᩮᩈᨲᩮᩣ ᩈᨶ᩠ᨲᩣᨶᩮ ᨸᩅᨲ᩠ᨲᨶᨠᩣᩃᩮᩣᩅ ᨣᩉᩥᨲᩮᩣ, ‘‘ᩋᩅᩦᨲᩥᨠ᩠ᨠᨾᨶ᩠ᨲᩮᩣ’’ᨲᩥ ᩍᨾᩥᨶᩣ ᨸᨶ ᩋᨸ᩠ᨸᩅᨲ᩠ᨲᨶᨠᩣᩃᩮᩣᨸᩥ. ᩈᩥᨠ᩠ᨡᨬ᩠ᩉᩥ ᨸᩁᩥᨸᩪᩁᨱᩅᩈᩮᨶ ᩋᨲ᩠ᨲᨶᩥ ᨸᩅᨲ᩠ᨲᩮᨶ᩠ᨲᩮᩣᨸᩥ ᨶᩥᨴ᩠ᨴᩣᨴᩥᩅᩈᩮᨶ ᩋᨸ᩠ᨸᩅᨲ᩠ᨲᩮᨶ᩠ᨲᩮᩣᨸᩥ ᩅᩦᨲᩥᨠ᩠ᨠᨾᩣᨽᩣᩅᩣ ᩈᩥᨠ᩠ᨡᨶᩅᩈᩮᨶ ᩈᨾᩣᨸᨶ᩠ᨶᩮᩣᨲᩥ ᩅᩩᨧ᩠ᨧᨲᩥ.

ᨿᩈ᩠ᨾᩣ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩔ ᩑᨠᨧ᩠ᨧᩴ ᨴᩩᨻ᩠ᨻᩃ᩠ᨿᩣᩅᩥᨠᨾ᩠ᨾᩴ ᩋᨲ᩠ᨳᩮᩣ ᩉᩮᩣᨲᩥ, ᨲᩈ᩠ᨾᩣ ᨲᩴ ᩈᨶ᩠ᨵᩣᨿ ‘‘ᩈᩥᨠ᩠ᨡᩴ ᩋᨸᨧ᩠ᨧᨠ᩠ᨡᩣᨿᩣ’’ᨲᩥ ᨸᨴᩔ ᩋᨲ᩠ᨳᩴ ᩅᩥᩅᩁᨶ᩠ᨲᩮᩣ ‘‘ᨴᩩᨻ᩠ᨻᩃ᩠ᨿᩴ ᩋᨶᩣᩅᩥᨠᨲ᩠ᩅᩣ’’ᨲᩥ ᩌᩉᩣᨲᩥ ᨴᩔᩮᨲᩩᩴ ‘‘ᩈᩥᨠ᩠ᨡᩴ ᩋᨸᨧ᩠ᨧᨠ᩠ᨡᩣᨿ ᨴᩩᨻ᩠ᨻᩃ᩠ᨿᩴ ᩋᨶᩣᩅᩥᨠᨲ᩠ᩅᩣ’’ᨲᩥᩌᨴᩥᨾᩣᩉ. ᨲᨲ᩠ᨳ ᩈᩥᨿᩣ (ᨸᩣᩁᩣ. ᩋᨭ᩠ᨮ. ᪑.᪔᪕ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩅᩥᨽᨦ᩠ᨣᩅᨱ᩠ᨱᨶᩣ), ᨿᩈ᩠ᨾᩣ ᨶ ᩈᨻ᩠ᨻᩴ ᨴᩩᨻ᩠ᨻᩃ᩠ᨿᩣᩅᩥᨠᨾ᩠ᨾᩴ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩴ, ᨲᩈ᩠ᨾᩣ ‘‘ᨴᩩᨻ᩠ᨻᩃ᩠ᨿᩴ ᩋᨶᩣᩅᩥᨠᨲ᩠ᩅᩣ’’ᨲᩥ ᨸᨮᨾᩴ ᩅᨲ᩠ᩅᩣ ᨲᩔ ᩋᨲ᩠ᨳᨶᩥᨿᨾᨶᨲ᩠ᨳᩴ ‘‘ᩈᩥᨠ᩠ᨡᩴ ᩋᨸᨧ᩠ᨧᨠ᩠ᨡᩣᨿᩣ’’ᨲᩥ ᩅᨲ᩠ᨲᨻ᩠ᨻᨶ᩠ᨲᩥ? ᨲᩴ ᨶ, ᨠᩈ᩠ᨾᩣ? ᩋᨲ᩠ᨳᩣᨶᩩᨠ᩠ᨠᨾᩣᨽᩣᩅᨲᩮᩣ. ‘‘ᩈᩥᨠ᩠ᨡᩣᩈᩣᨩᩦᩅᩈᨾᩣᨸᨶ᩠ᨶᩮᩣ’’ᨲᩥ ᩉᩥ ᩅᩩᨲ᩠ᨲᨲ᩠ᨲᩣ ᨿᩴ ᩈᩥᨠ᩠ᨡᩴ ᩈᨾᩣᨸᨶ᩠ᨶᩮᩣ, ᨲᩴ ᩋᨸᨧ᩠ᨧᨠ᩠ᨡᩣᨿ, ᨿᨬ᩠ᨧ ᩈᩣᨩᩦᩅᩴ ᩈᨾᩣᨸᨶ᩠ᨶᩮᩣ, ᨲᨲ᩠ᨳ ᨴᩩᨻ᩠ᨻᩃ᩠ᨿᩴ ᩋᨶᩣᩅᩥᨠᨲ᩠ᩅᩣᨲᩥ ᩅᩩᨧ᩠ᨧᨾᩣᨶᩮ ᩋᨶᩩᨠ᩠ᨠᨾᩮᨶᩮᩅ ᩋᨲ᩠ᨳᩮᩣ ᩅᩩᨲ᩠ᨲᩮᩣ ᩉᩮᩣᨲᩥ, ᨶ ᩋᨬ᩠ᨬᨳᩣ. ᨲᩈ᩠ᨾᩣ ᩍᨴᨾᩮᩅ ᨸᨮᨾᩴ ᩅᩩᨲ᩠ᨲᨶ᩠ᨲᩥ.

ᩍᨴᩣᨶᩥ ᨲᨴᩩᨽᨿᨾᩮᩅ ᨸᩣᨠᨭᩴ ᨠᨲ᩠ᩅᩣ ᨴᩔᩮᨲᩩᩴ ‘‘ᨲᨲ᩠ᨳᩣ’’ᨲᩥᩌᨴᩥᨾᩣᩉ. ᨲᨴᨽᩣᩅᩮᨶᩣᨲᩥ ᨲᩮᩈᩴ ᨧᩥᨲ᩠ᨲᩣᨴᩦᨶᩴ ᩋᨽᩣᩅᩮᨶ. ᨧᩅᩥᨲᩩᨠᩣᨾᨲᩣᨧᩥᨲ᩠ᨲᩮᨶᩣᨲᩥ ᩋᨸᨣᨶ᩠ᨲᩩᨠᩣᨾᨲᩣᨧᩥᨲ᩠ᨲᩮᨶ. ᨴᩅᩣᨲᩥ ᩈᩉᩈᩣ. ᨿᩮᩣ ᩉᩥ ᩋᨬ᩠ᨬᩴ ᨽᨱᩥᨲᩩᨠᩣᨾᩮᩣ ᩈᩉᩈᩣ ‘‘ᨻᩩᨴ᩠ᨵᩴ ᨸᨧ᩠ᨧᨠ᩠ᨡᩣᨾᩦ’’ᨲᩥ ᨽᨱᨲᩥ, ᩋᨿᩴ ᨴᩅᩣ ᩅᨴᨲᩥ ᨶᩣᨾ. ᩁᩅᩣᨲᩥ ᩅᩥᩁᨩ᩠ᨫᩥᨲ᩠ᩅᩣ. ᨿᩮᩣ ᩉᩥ ᩋᨬ᩠ᨬᩴ ᨽᨱᩥᨲᩩᨠᩣᨾᩮᩣ ᩅᩥᩁᩩᨩ᩠ᨫᩥᨲ᩠ᩅᩣ ‘‘ᨻᩩᨴ᩠ᨵᩴ ᨸᨧ᩠ᨧᨠ᩠ᨡᩣᨾᩦ’’ᨲᩥ ᨽᨱᨲᩥ, ᩋᨿᩴ ᩁᩅᩣ ᨽᨱᨲᩥ ᨶᩣᨾ. ᨸᩩᩁᩥᨾᩮᨶ ᨠᩮᩣ ᩅᩥᩈᩮᩈᩮᩣᨲᩥ ᨧᩮ? ᨸᩩᩁᩥᨾᩴ ᨸᨱ᩠ᨯᩥᨲᩔᩣᨸᩥ ᩈᩉᩈᩣᩅᩈᩮᨶ ᩋᨬ᩠ᨬᨽᨱᨶᩴ, ᩍᨴᩴ ᨸᨶ ᨾᨶ᩠ᨴᨲ᩠ᨲᩣ ᨾᩮᩣᨾᩪᩉᨲ᩠ᨲᩣ ᨸᨠ᩠ᨡᩃᨶ᩠ᨲᩔ ‘‘ᩋᨬ᩠ᨬᩴ ᨽᨱᩥᩔᩣᨾᩦ’’ᨲᩥ ᩋᨬ᩠ᨬᨽᨱᨶᩴ. ‘‘ᩋᨠ᩠ᨡᩁᩈᨾᨿᩣᨶᨽᩥᨬ᩠ᨬᩣᨲᨲᩣᨿ ᩅᩣ ᨠᩁᨱᩈᨾ᩠ᨸᨲ᩠ᨲᩥᨿᩣ ᩋᨽᩣᩅᨲᩮᩣ ᩅᩣ ᨠᨳᩮᨲᨻ᩠ᨻᩴ ᨠᨳᩮᨲᩩᨾᩈᨠ᩠ᨠᩮᩣᨶ᩠ᨲᩮᩣ ᩉᩩᨲ᩠ᩅᩣ ᩋᨬ᩠ᨬᩴ ᨠᨳᩮᨶ᩠ᨲᩮᩣ ᩁᩅᩣ ᨽᨱᨲᩥ ᨶᩣᨾᩣ’’ᨲᩥ (ᩈᩣᩁᨲ᩠ᨳ. ᨭᩦ. ᪒.᪕᪔) ᩑᨠᩮ.

ᩅᨩ᩠ᨩᩣᩅᨩ᩠ᨩᩴ ᩏᨸᨶᩥᨩ᩠ᨫᩣᨿᨲᩦᨲᩥ ᩏᨸᨩ᩠ᨫᩣᨿᩮᩣ, ᨲᩴ ᩏᨸᨩ᩠ᨫᩣᨿᩴ. ‘‘ᩑᩅᩴ ᩈᨩ᩠ᨫᩣᨿᩥᨲᨻ᩠ᨻᩴ, ᩑᩅᩴ ᩋᨽᩥᨠ᩠ᨠᨾᩥᨲᨻ᩠ᨻ’’ᨶ᩠ᨲᩥᩌᨴᩥᨶᩣ ᩌᨧᩣᩁᩈᩥᨠ᩠ᨡᩣᨸᨶᨠᩮᩣ ᩌᨧᩁᩥᨿᩮᩣ. ᩋᨶ᩠ᨲᩮ ᩈᨾᩦᨸᩮ ᩅᩈᨲᩥ ᩈᩦᩃᩮᨶᩣᨲᩥ ᩋᨶ᩠ᨲᩮᩅᩣᩈᩦ, ᩅᩥᨽᨲ᩠ᨲᩥᩋᩃᩮᩣᨸᩮᨶ ᨿᨳᩣ ‘‘ᩅᨶᩮᨠᩈᩮᩁᩩᨠᩣ’’ᨲᩥ. ᩈᨾᩣᨶᩮᩣ ᩏᨸᨩ᩠ᨫᩣᨿᩮᩣ ᩋᩔᩣᨲᩥ ᩈᨾᩣᨶᩩᨸᨩ᩠ᨫᩣᨿᨠᩮᩣ. ᩑᩅᩴ ᩈᨾᩣᨶᩣᨧᩁᩥᨿᨠᩮᩣ. ᩈᨻᩕᩉ᩠ᨾᨧᩣᩁᩥᨶ᩠ᨲᩥ ᨽᩥᨠ᩠ᨡᩩᩴ. ᩈᩮᩣ ᩉᩥ ‘‘ᩑᨠᨠᨾ᩠ᨾᩴ, ᩑᨠᩩᨴ᩠ᨴᩮᩈᩮᩣ, ᩈᨾᩈᩥᨠ᩠ᨡᨲᩣ’’ᨲᩥ ᩍᨾᩴ ᨻᩕᩉ᩠ᨾᩴ ᩈᨾᩣᨶᩴ ᨧᩁᨲᩥ, ᨲᩈ᩠ᨾᩣ ‘‘ᩈᨻᩕᩉ᩠ᨾᨧᩣᩁᩦ’’ᨲᩥ ᩅᩩᨧ᩠ᨧᨲᩥ. ᩑᩅᩴ ᩅᩩᨲ᩠ᨲᩣᨶᨶ᩠ᨲᩥ ᩑᩅᩴ ᨸᨴᨽᩣᨩᨶᩦᨿᩮ ᩅᩩᨲ᩠ᨲᩣᨶᩴ. ᨿᨳᩣ ᩉᩥ ᩃᩮᩣᨠᩮ ᩈᩔᩣᨶᩴ ᩅᩥᩁᩩᩉᨶᨭ᩠ᨮᩣᨶᩴ ‘‘ᨡᩮᨲ᩠ᨲ’’ᨶ᩠ᨲᩥ ᩅᩩᨧ᩠ᨧᨲᩥ, ᩑᩅᨾᩥᨾᩣᨶᩥᨸᩥ ᨻᩩᨴ᩠ᨵᩣᨴᩦᨶᩥ ᨸᨴᩣᨶᩥ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩔ ᩅᩥᩁᩩᩉᨶᨭ᩠ᨮᩣᨶᨲ᩠ᨳᩣ ‘‘ᨡᩮᨲ᩠ᨲ’’ᨶ᩠ᨲᩥ ᩅᩩᨧ᩠ᨧᨶ᩠ᨲᩦᨲᩥ ᩌᩉ ‘‘ᩍᨾᩮᩈᩴ ᨴ᩠ᩅᩣᩅᩦᩈᨲᩥᨿᩣ ᨡᩮᨲ᩠ᨲᨸᨴᩣᨶ’’ᨶ᩠ᨲᩥ. ᨿᩈ᩠ᨾᩣ ᨸᨶᩮᨲᩮᩈᩴ ᩅᩮᩅᨧᨶᩮᩉᩥᨸᩥ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩴ ᩉᩮᩣᨲᩥ, ᨲᩈ᩠ᨾᩣ ‘‘ᩈᩅᩮᩅᨧᨶᩔᩣ’’ᨲᩥ ᩅᩩᨲ᩠ᨲᩴ. ᩅᩥᩅᩥᨵᩴ ᩑᨠᩈ᩠ᨾᩥᩴᨿᩮᩅ ᩋᨲ᩠ᨳᩮ ᩅᨧᨶᩴ ᩅᩥᩅᨧᨶᩴ, ᩅᩥᩅᨧᨶᨾᩮᩅ ᩅᩮᩅᨧᨶᩴ, ᨸᩁᩥᨿᩣᨿᨶᩣᨾᩴ, ᩈᩉ ᩅᩮᩅᨧᨶᩮᩉᩦᨲᩥ ᩈᩅᩮᩅᨧᨶᩴ, ᨲᩔ ᩈᩅᩮᩅᨧᨶᩔ. ᩑᨲ᩠ᨳ ᨧ ᩅᨱ᩠ᨱᨸᨭ᩠ᨮᩣᨶᩮ (ᩈᩣᩁᨲ᩠ᨳ. ᨭᩦ. ᪒.᪕᪒; ᩅᩥ. ᩅᩥ. ᨭᩦ. ᪑.᪕᪓; ᩅᨩᩥᩁ. ᨭᩦ. ᪕᪓) ᩌᨣᨲᩴ ᨶᩣᨾᩈᩉᩔᩴ, ᩏᨸᩣᩃᩥᨣᩣᨳᩣᩈᩩ (ᨾ. ᨶᩥ. ᪒.᪗᪖) ᨶᩣᨾᩈᨲᩴ, ᩋᨬ᩠ᨬᩣᨶᩥ ᨧ ᨣᩩᨱᨲᩮᩣ ᩃᨻ᩠ᨽᨾᩣᨶᩣᨶᩥ ᨶᩣᨾᩣᨶᩥ ‘‘ᨻᩩᨴ᩠ᨵᩅᩮᩅᨧᨶᩣᨶᩦ’’ᨲᩥ ᩅᩮᨴᩥᨲᨻ᩠ᨻᩣᨶᩥ. ᩈᨻ᩠ᨻᩣᨶᩥᨸᩥ ᨵᨾ᩠ᨾᩔ ᨶᩣᨾᩣᨶᩥ ‘‘ᨵᨾ᩠ᨾᩅᩮᩅᨧᨶᩣᨶᩦ’’ᨲᩥ ᩅᩮᨴᩥᨲᨻ᩠ᨻᩣᨶᩥ. ᩑᩈ ᨶᨿᩮᩣ ᩈᨻ᩠ᨻᨲ᩠ᨳ.

ᨲᩮᩈᩩ ᨿᩴ ᨠᩥᨬ᩠ᨧᩥ ᩅᨲ᩠ᨲᩩᨠᩣᨾᩔ ᨿᩴ ᨠᩥᨬ᩠ᨧᩥ ᩅᨴᨲᩮᩣ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩴ ᩉᩮᩣᨲᩦᨲᩥ ᨲᩮᩈᩩ ᨴ᩠ᩅᩣᩅᩦᩈᨲᩥᨿᩣ ᨡᩮᨲ᩠ᨲᨸᨴᩮᩈᩩ ᨿᩴ ᨠᩥᨬ᩠ᨧᩥ ᩑᨠᩴ ᨸᨴᩴ ᩅᨲ᩠ᨲᩩᨠᩣᨾᩔ ᨲᨲᩮᩣ ᩋᨬ᩠ᨬᩴ ᨿᩴ ᨠᩥᨬ᩠ᨧᩥ ᨸᨴᨾ᩠ᨸᩥ ᩅᨧᩦᨽᩮᨴᩴ ᨠᨲ᩠ᩅᩣ ᩅᨴᨲᩮᩣ ᨡᩮᨲ᩠ᨲᨸᨴᨶ᩠ᨲᩮᩣᨣᨵᨲ᩠ᨲᩣ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩴ ᩉᩮᩣᨲᩦᨲᩥ ᩋᨲ᩠ᨳᩮᩣ. ᩍᨴᩴ ᩅᩩᨲ᩠ᨲᩴ ᩉᩮᩣᨲᩥ – ᩈᨧᩮ ᨸᨶᩣᨿᩴ ‘‘ᨻᩩᨴ᩠ᨵᩴ ᨸᨧ᩠ᨧᨠ᩠ᨡᩣᨾᩦ’’ᨲᩥ ᩅᨲ᩠ᨲᩩᨠᩣᨾᩮᩣ ᨸᨴᨸᨧ᩠ᨧᩣᨽᨭ᩠ᨮᩴ ᨠᨲ᩠ᩅᩣ ‘‘ᨸᨧ᩠ᨧᨠ᩠ᨡᩣᨾᩥ ᨻᩩᨴ᩠ᨵ’’ᨶ᩠ᨲᩥ ᩅᩣ ᩅᨴᩮᨿ᩠ᨿ, ᨾᩥᩃᨠ᩠ᨡᨽᩣᩈᩣᨴᩦᩈᩩ ᩅᩣ ᩋᨬ᩠ᨬᨲᩁᨽᩣᩈᩣᨿ ᨲᨾᨲ᩠ᨳᩴ ᩅᨴᩮᨿ᩠ᨿ, ‘‘ᨻᩩᨴ᩠ᨵᩴ ᨸᨧ᩠ᨧᨠ᩠ᨡᩣᨾᩦ’’ᨲᩥ ᩅᨲ᩠ᨲᩩᨠᩣᨾᩮᩣ ᩏᨸ᩠ᨸᨭᩥᨸᩣᨭᩥᨿᩣ ‘‘ᨵᨾ᩠ᨾᩴ ᨸᨧ᩠ᨧᨠ᩠ᨡᩣᨾᩦ’’ᨲᩥ ᩅᩣ ‘‘ᩈᨻᩕᩉ᩠ᨾᨧᩣᩁᩥᩴ ᨸᨧ᩠ᨧᨠ᩠ᨡᩣᨾᩦ’’ᨲᩥ ᩅᩣ ᩅᨴᩮᨿ᩠ᨿ, ᩈᩮᨿ᩠ᨿᨳᩣᨸᩥ ᩏᨲ᩠ᨲᩁᩥᨾᨶᩩᩔᨵᨾ᩠ᨾᩅᩥᨽᨦ᩠ᨣᩮ ‘‘ᨸᨮᨾᩴ ᨫᩣᨶᩴ ᩈᨾᩣᨸᨩ᩠ᨩᩣᨾᩦ’’ᨲᩥ ᩅᨲ᩠ᨲᩩᨠᩣᨾᩮᩣ ‘‘ᨴᩩᨲᩥᨿᩴ ᨫᩣᨶ’’ᨶ᩠ᨲᩥ ᩅᨴᨲᩥ. ᩈᨧᩮ ‘‘ᨿᩔ ᩅᨴᨲᩥ, ᩈᩮᩣ ᩋᨿᩴ ᨽᩥᨠ᩠ᨡᩩᨽᩣᩅᩴ ᨧᨩᩥᨲᩩᨠᩣᨾᩮᩣ ᩑᨲᨾᨲ᩠ᨳᩴ ᩅᨴᨲᩦ’’ᨲᩥ ᩑᨲ᩠ᨲᨠᨾᨲ᩠ᨲᨾ᩠ᨸᩥ ᨩᩣᨶᩣᨲᩥ, ᩅᩥᩁᨴ᩠ᨵᩴ ᨶᩣᨾ ᨶᨲ᩠ᨳᩥ, ᨡᩮᨲ᩠ᨲᨾᩮᩅ ᩒᨲᩥᨱ᩠ᨱᩴ, ᨸᨧ᩠ᨧᨠ᩠ᨡᩣᨲᩣᩅ ᩉᩮᩣᨲᩥ ᩈᩥᨠ᩠ᨡᩣ. ᩈᨠ᩠ᨠᨲ᩠ᨲᩣ ᩅᩣ ᨻᩕᩉ᩠ᨾᨲ᩠ᨲᩣ ᩅᩣ ᨧᩩᨲᩈᨲ᩠ᨲᩮᩣ ᩅᩥᨿ ᨧᩩᨲᩮᩣᩅ ᩉᩮᩣᨲᩥ ᩈᩣᩈᨶᩣᨲᩥ.

ᩋᩃᨶ᩠ᨲᩥ (ᨸᩣᩁᩣ. ᩋᨭ᩠ᨮ. ᪑.᪕᪒) ᩉᩮᩣᨲᩩ, ᨸᩁᩥᨿᨲ᩠ᨲᨶ᩠ᨲᩥ ᩋᨲ᩠ᨳᩮᩣ. ᨠᩥᩴ ᨶᩩ ᨾᩮᨲᩥ ᨠᩥᩴ ᨾᨿ᩠ᩉᩴ ᨠᩥᨧ᩠ᨧᩴ, ᨠᩥᩴ ᨠᩁᨱᩦᨿᩴ, ᨠᩥᩴ ᩈᩣᨵᩮᨲᨻ᩠ᨻᨶ᩠ᨲᩥ ᩋᨲ᩠ᨳᩮᩣ. ᨶ ᨾᨾᨲ᩠ᨳᩮᩣᨲᩥ ᨶᨲ᩠ᨳᩥ ᨾᨾ ᩋᨲ᩠ᨳᩮᩣ. ᩈᩩᨾᩩᨲ᩠ᨲᩣᩉᨶ᩠ᨲᩥ ᩈᩩᨭ᩠ᨮᩩ ᨾᩩᨲ᩠ᨲᩮᩣ ᩋᩉᩴ. ᨸᩩᩁᩥᨾᩮᩉᩥ ᨧᩩᨴ᩠ᨴᩈᩉᩥ ᨸᨴᩮᩉᩦᨲᩥ ᨻᩩᨴ᩠ᨵᩣᨴᩦᩉᩥ ᩈᨻᩕᩉ᩠ᨾᨧᩣᩁᩥᨸᩁᩥᨿᨶ᩠ᨲᩮᩉᩥ ᨸᩩᩁᩥᨾᩮᩉᩥ ᨧᩩᨴ᩠ᨴᩈᩉᩥ ᨸᨴᩮᩉᩥ. ᨿᨶ᩠ᨶᩪᨶᩣᩉᩴ ᨸᨧ᩠ᨧᨠ᩠ᨡᩮᨿ᩠ᨿᨶ᩠ᨲᩥ ᩑᨲ᩠ᨳ ‘‘ᨿᨶ᩠ᨶᩪᨶᩣ’’ᨲᩥ ᨸᩁᩥᩅᩥᨲᨠ᩠ᨠᨴᩔᨶᩮ ᨶᩥᨸᩣᨲᩮᩣ. ᩍᨴᩴ ᩅᩩᨲ᩠ᨲᩴ ᩉᩮᩣᨲᩥ – ‘‘ᩈᨧᩣᩉᩴ ᨻᩩᨴ᩠ᨵᩴ ᨸᨧ᩠ᨧᨠ᩠ᨡᩮᨿ᩠ᨿᩴ, ᩈᩣᨵᩩ ᩅᨲ ᨾᩮ ᩈᩥᨿᩣ’’ᨲᩥ. ᩌᨴᩥᩈᨴ᩠ᨴᩮᨶ ‘‘ᨸᨧ᩠ᨧᨠ᩠ᨡᩥ’’ᨶ᩠ᨲᩥ ᩅᩣ ‘‘ᨸᨧ᩠ᨧᨠ᩠ᨡᩥᩔᩣᨾᩦ’’ᨲᩥ ᩅᩣ ‘‘ᨽᩅᩥᩔᩣᨾᩦ’’ᨲᩥ ᩅᩣ ‘‘ᩉᩮᩣᨾᩦ’’ᨲᩥ ᩅᩣ ‘‘ᨩᩣᨲᩮᩣᨾ᩠ᩉᩦ’’ᨲᩥ ᩅᩣ ‘‘ᩋᨾ᩠ᩉᩦ’’ᨲᩥ ᩅᩣ ᩑᩅᩴᨽᩪᨲᩣᨶᩴ ᨣᩉᨱᩴ. ᩈᨧᩮ ᨸᨶ ‘‘ᩋᨩ᩠ᨩ ᨸᨭ᩠ᨮᩣᨿ ‘ᨣᩥᩉᩦ’ᨲᩥ ᨾᩴ ᨵᩣᩁᩮᩉᩦ’’ᨲᩥ ᩅᩣ ‘‘ᨩᩣᨶᩣᩉᩦ’’ᨲᩥ ᩅᩣ ‘‘ᩈᨬ᩠ᨩᩣᨶᩣᩉᩦ’’ᨲᩥ ᩅᩣ ‘‘ᨾᨶᩈᩥ ᨠᩁᩮᩣᩉᩦ’’ᨲᩥ ᩅᩣ ᩅᨴᨲᩥ, ᩋᩁᩥᨿᨠᩮᨶ ᩅᩣ ᩅᨴᨲᩥ, ᨾᩥᩃᨠ᩠ᨡᨠᩮᨶ ᩅᩣ. ᩑᩅᨾᩮᨲᩈ᩠ᨾᩥᩴ ᩋᨲ᩠ᨳᩮ ᩅᩩᨲ᩠ᨲᩮ ᨿᩔ ᩅᨴᨲᩥ, ᩈᨧᩮ ᩈᩮᩣ ᨩᩣᨶᩣᨲᩥ, ᨸᨧ᩠ᨧᨠ᩠ᨡᩣᨲᩣ ᩉᩮᩣᨲᩥ ᩈᩥᨠ᩠ᨡᩣ. ᩑᩈ ᨶᨿᩮᩣ ᩈᩮᩈᩮᩈᩩᨸᩥ ‘‘ᩏᨸᩣᩈᨠᩮᩣ’’ᨲᩥᩌᨴᩦᩈᩩ ᩈᨲ᩠ᨲᩈᩩ ᨸᨴᩮᩈᩩ. ᩑᨲ᩠ᨳ ᨧ ᩋᩁᩥᨿᨠᩴ ᨶᩣᨾ ᨾᩣᨣᨵᩅᩮᩣᩉᩣᩁᩮᩣ. ᨾᩥᩃᨠ᩠ᨡᨠᩴ ᨶᩣᨾ ᩋᨶᩁᩥᨿᨠᩮᩣ ᩋᨶ᩠ᨵᨴᨾᩥᩊᩣᨴᩥ.

ᩋᨠ᩠ᨡᩁᩃᩥᨡᨶᨶ᩠ᨲᩥ ‘‘ᨻᩩᨴ᩠ᨵᩴ ᨸᨧ᩠ᨧᨠ᩠ᨡᩣᨾᩦ’’ᨲᩥᩌᨴᩥᨶᩣ ᩋᨬ᩠ᨬᩮᩈᩴ ᨴᩔᨶᨲ᩠ᨳᩴ ᩋᨠ᩠ᨡᩁᩃᩥᨡᨶᩴ. ᩋᨵᩥᨸ᩠ᨸᩣᨿᩅᩥᨬ᩠ᨬᩣᨸᨠᩮᩣ ᩋᨦ᩠ᨣᩩᩃᩥᩈᨦ᩠ᨠᩮᩣᨧᨶᩣᨴᩥᨠᩮᩣ ᩉᨲ᩠ᨳᩅᩥᨠᩣᩁᩮᩣ ᩉᨲ᩠ᨳᨾᩩᨴ᩠ᨴᩣ, ᩉᨲ᩠ᨳᩈᨴ᩠ᨴᩮᩣ ᨧᩮᨲ᩠ᨳ ᨲᨴᩮᨠᨴᩮᩈᩮᩈᩩ ᩋᨦ᩠ᨣᩩᩃᩦᩈᩩ ᨴᨭ᩠ᨮᨻ᩠ᨻᩮᩣ ‘‘ᨶ ᨽᩩᨬ᩠ᨩᨾᩣᨶᩮᩣ ᩈᨻ᩠ᨻᩴ ᩉᨲ᩠ᨳᩴ ᨾᩩᨡᩮ ᨸᨠ᩠ᨡᩥᨸᩥᩔᩣᨾᩦ’’ᨲᩥᩌᨴᩦᩈᩩ (ᨸᩣᨧᩥ. ᪖᪑᪘) ᩅᩥᨿ. ᨲᩈ᩠ᨾᩣ ᩋᨵᩥᨸ᩠ᨸᩣᨿᩅᩥᨬ᩠ᨬᩣᨸᨠᩔ ᩋᨦ᩠ᨣᩩᩃᩥᩈᨦ᩠ᨠᩮᩣᨧᨶᩣᨴᩥᨶᩮᩣ ᩉᨲ᩠ᨳᩅᩥᨠᩣᩁᩔ ᨴᩔᨶᩴ ᩉᨲ᩠ᨳᨾᩩᨴ᩠ᨴᩣᨴᩥᨴᩔᨶᨶ᩠ᨲᩥ (ᩈᩣᩁᨲ᩠ᨳ. ᨭᩦ. ᪒.᪕᪑) ᩑᩅᨾᩮᨲ᩠ᨳ ᩋᨲ᩠ᨳᩮᩣ ᨴᨭ᩠ᨮᨻ᩠ᨻᩮᩣ. ᩌᨴᩥᩈᨴ᩠ᨴᩮᨶ ᩈᩦᩈᨠᨾ᩠ᨸᨶᨴᩔᨶᩣᨴᩥᩴ ᩈᨦ᩠ᨣᨱ᩠ᩉᩣᨲᩥ.

ᩏᨾ᩠ᨾᨲ᩠ᨲᨠᨡᩥᨲ᩠ᨲᨧᩥᨲ᩠ᨲᩅᩮᨴᨶᩣᨭ᩠ᨭᩣᨶᨶ᩠ᨲᩥ ᩑᨲ᩠ᨳ ᩏᨾ᩠ᨾᨲ᩠ᨲᨠᩮᩣᨲᩥ ᨸᩥᨲ᩠ᨲᩩᨾ᩠ᨾᨲ᩠ᨲᨠᩮᩣ. ᨡᩥᨲ᩠ᨲᨧᩥᨲ᩠ᨲᩮᩣᨲᩥ ᨿᨠ᩠ᨡᩮᩉᩥ ᨠᨲᨧᩥᨲ᩠ᨲᩅᩥᨠ᩠ᨡᩮᨸᩮᩣ, ᨿᨠ᩠ᨡᩩᨾ᩠ᨾᨲ᩠ᨲᨠᩮᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᩏᨽᩥᨶ᩠ᨶᩴ ᨸᨶ ᩅᩥᩈᩮᩈᩮᩣ ᩋᨶᩣᨸᨲ᩠ᨲᩥᩅᩣᩁᩮ ᩌᩅᩥᨽᩅᩥᩔᨲᩥ. ᩅᩮᨴᨶᩣᨭ᩠ᨭᩮᩣᨲᩥ ᨻᩃᩅᨲᩥᨿᩣ ᨴᩩᨠ᩠ᨡᩅᩮᨴᨶᩣᨿ ᨹᩩᨭ᩠ᨮᩮᩣ ᨾᩩᨧ᩠ᨨᩣᨸᩁᩮᨲᩮᩣ, ᨲᩮᨶ ᩅᩥᨸ᩠ᨸᩃᨸᨶ᩠ᨲᩮᨶ ᨸᨧ᩠ᨧᨠ᩠ᨡᩣᨲᩣᨸᩥ ᩋᨸᨧ᩠ᨧᨠ᩠ᨡᩣᨲᩣᩅ ᩉᩮᩣᨲᩥ. ᨾᨶᩩᩔᨩᩣᨲᩥᨠᩮᩣ ᩉᩮᩣᨲᩦᨲᩥ ᩈᨽᩣᨣᩮᩣ ᩅᩣ ᩅᩥᩈᨽᩣᨣᩮᩣ ᩅᩣ ᨣᩉᨭ᩠ᨮᩮᩣ ᩅᩣ ᨸᨻ᩠ᨻᨩᩥᨲᩮᩣ ᩅᩣ ᩅᩥᨬ᩠ᨬᩪ ᨿᩮᩣᨠᩮᩣᨧᩥ ᨾᨶᩩᩔᩮᩣ ᩉᩮᩣᨲᩥ. ᩏᨾ᩠ᨾᨲ᩠ᨲᨠᩣᨴᩦᨶᨶ᩠ᨲᩥ ᩑᨲ᩠ᨳᩣᨴᩥᩈᨴ᩠ᨴᩮᨶ ᨡᩥᨲ᩠ᨲᨧᩥᨲ᩠ᨲᩅᩮᨴᨶᩣᨭ᩠ᨭᨴᩮᩅᨲᩣᨲᩥᩁᨧ᩠ᨨᩣᨶᨣᨲᩣᨶᩴ ᨣᩉᨱᩴ. ᨲᨲᩕ ᩏᨾ᩠ᨾᨲ᩠ᨲᨠᨡᩥᨲ᩠ᨲᨧᩥᨲ᩠ᨲᩅᩮᨴᨶᩣᨭ᩠ᨭᨲᩥᩁᨧ᩠ᨨᩣᨶᨣᨲᩣᨶᩴ ᩈᨶ᩠ᨲᩥᨠᩮ ᨸᨧ᩠ᨧᨠ᩠ᨡᩣᨲᩣᨸᩥ ᩋᨩᩣᨶᨶᨽᩣᩅᩮᨶ ᩋᨸᨧ᩠ᨧᨠ᩠ᨡᩣᨲᩣᩅ ᩉᩮᩣᨲᩥ. ᨴᩮᩅᨲᩣᨿ ᨸᨶ ᩈᨶ᩠ᨲᩥᨠᩮ ᩋᨲᩥᨡᩥᨸ᩠ᨸᩴ ᨩᩣᨶᨶᨽᩣᩅᩮᨶ. ᨴᩮᩅᨲᩣ ᨶᩣᨾ ᨾᩉᩣᨸᨬ᩠ᨬᩣ ᨲᩥᩉᩮᨲᩩᨠᨸ᩠ᨸᨭᩥᩈᨶ᩠ᨵᩥᨠᩣ ᩋᨲᩥᨡᩥᨸ᩠ᨸᩴ ᨩᩣᨶᨶ᩠ᨲᩥ, ᨧᩥᨲ᩠ᨲᨬ᩠ᨧ ᨶᩣᨾᩮᨲᩴ ᩃᩉᩩᨸᩁᩥᩅᨲ᩠ᨲᩴ, ᨲᩈ᩠ᨾᩣ ‘‘ᨧᩥᨲ᩠ᨲᩃᩉᩩᨠᩔ ᨸᩩᨣ᩠ᨣᩃᩔ ᨧᩥᨲ᩠ᨲᩅᩈᩮᨶᩮᩅ ᨾᩣ ᩋᨲᩥᨡᩥᨸ᩠ᨸᩴ ᩅᩥᨶᩣᩈᩮᩣ ᩋᩉᩮᩣᩈᩦ’’ᨲᩥ ᨴᩮᩅᨲᩣᨿ ᩈᨶ᩠ᨲᩥᨠᩮ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩴ ᨸᨭᩥᨠ᩠ᨡᩥᨸᩥ. ᨲᩮᨶ ᩅᩩᨲ᩠ᨲᩴ ‘‘ᨶ ᨧ ᩏᨾ᩠ᨾᨲ᩠ᨲᨠᩣᨴᩦᨶᩴ ᩋᨬ᩠ᨬᨲᩁᩮᩣ’’ᨲᩥ. ᨴᩪᨲᩮᨶ ᩅᩣᨲᩥ ‘‘ᨾᨾ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᨽᩣᩅᩴ ᨠᨳᩮᩉᩦ’’ᨲᩥ ᨾᩩᨡᩈᩣᩈᨶᩅᩈᩮᨶ ᨴᩪᨲᩮᨶ ᩅᩣ. ᨸᨱ᩠ᨱᩮᨶ ᩅᩣᨲᩥ ᨸᨱ᩠ᨱᩮ ᩃᩥᨡᩥᨲ᩠ᩅᩣ ᨸᩉᩥᨱᩅᩈᩮᨶ ᨸᨱ᩠ᨱᩮᨶ ᩅᩣ.

ᩈᨧᩮ ᨲᩮ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᨽᩣᩅᩴ ᨩᩣᨶᨶ᩠ᨲᩦᨲᩥ ᩈᨾ᩠ᨻᨶ᩠ᨵᩮᩣ. ᩌᩅᨩ᩠ᨩᨶᩈᨾᨿᩮᨲᩥ ᩋᨲ᩠ᨳᩣᨽᩮᩣᨣᩈᨾᨿᩮ. ᩍᨾᩥᨶᩣ ᨲᩴ ᨡᨱᩴᨿᩮᩅ ᨸᨶ ᩋᨸᩩᨻ᩠ᨻᩴ ᩋᨧᩁᩥᨾᩴ ᨴᩩᨩ᩠ᨩᩣᨶᨶ᩠ᨲᩥ ᨴᩔᩮᨲᩥ. ᩅᨧᨶᩣᨶᨶ᩠ᨲᩁᨾᩮᩅᩣᨲᩥ ᩅᨧᨶᩔ ᩋᨶᨶ᩠ᨲᩁᨾᩮᩅ, ᩌᩅᨩ᩠ᨩᨶᩈᨾᨿᩮᩅᩣᨲᩥ ᩋᨲ᩠ᨳᩮᩣ. ᩑᩅ-ᩈᨴ᩠ᨴᩮᨶ ᨸᨶ ᨧᩥᩁᩮᨶ ᨩᩣᨶᨶᩴ ᨸᨭᩥᨠ᩠ᨡᩥᨸᨲᩥ. ᩏᨠ᩠ᨠᨱ᩠ᨮᩥᨲᩮᩣᨲᩥ ᩋᨶᨽᩥᩁᨲᩥᨿᩣ ᩍᨾᩈ᩠ᨾᩥᩴ ᩈᩣᩈᨶᩮ ᨠᩥᨧ᩠ᨨᨩᩦᩅᩥᨠᩴ ᨸᨲ᩠ᨲᩮᩣ. ᩋᨳ ᩅᩣ ‘‘ᩋᨩ᩠ᨩ ᨿᩣᨾᩥ, ᩈ᩠ᩅᩮ ᨿᩣᨾᩥ, ᩍᨲᩮᩣ ᨿᩣᨾᩥ, ᩑᨲ᩠ᨳ ᨿᩣᨾᩦ’’ᨲᩥ ᩏᨴ᩠ᨵᩴ ᨠᨱ᩠ᨮᩴ ᨠᨲ᩠ᩅᩣ ᩅᩥᩉᩁᨾᩣᨶᩮᩣ ᩅᩥᨠ᩠ᨡᩥᨲ᩠ᨲᩮᩣ, ᩋᨶᩮᨠᨣ᩠ᨣᩮᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᩍᨴᨬ᩠ᨧ ‘‘ᩋᨶᨽᩥᩁᨲᩮᩣ ᩈᩣᨾᨬ᩠ᨬᩣ ᨧᩅᩥᨲᩩᨠᩣᨾᩮᩣ’’ᨲᩥᩌᨴᩦᨶᩴ (ᨸᩣᩁᩣ. ᪔᪕) ᩏᨸᩃᨠ᩠ᨡᨱᩴ. ᨿᩮᨶ ᨠᩮᨶᨧᩥ…ᨸᩮ… ᨩᩣᨶᨶ᩠ᨲᩦᨲᩥ ᩈᨧᩮ ᨲᩮ‘‘ᩏᨠ᩠ᨠᨱ᩠ᨮᩥᨲᩮᩣ’’ᨲᩥ ᩅᩣ ‘‘ᨣᩥᩉᩥᨽᩣᩅᩴ ᨸᨲ᩠ᨳᩮᨲᩦ’’ᨲᩥ ᩅᩣ ‘‘ᩋᨶᨽᩥᩁᨲᩮᩣ’’ᨲᩥ ᩅᩣ ‘‘ᩈᩣᨾᨬ᩠ᨬᩣ ᨧᩅᩥᨲᩩᨠᩣᨾᩮᩣ’’ᨲᩥ ᩅᩣ ᨿᩮᨶ ᨠᩮᨶᨧᩥ ᩌᨠᩣᩁᩮᨶ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᨽᩣᩅᩴ ᨩᩣᨶᨶ᩠ᨲᩥ. ᩍᨴᨬ᩠ᩉᩥ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᨬ᩠ᨧ ᩏᨸᩁᩥ ᩋᨽᩪᨲᩣᩁᩮᩣᨧᨶᨴᩩᨭ᩠ᨮᩩᩃ᩠ᩃᩅᩣᨧᩣᩋᨲ᩠ᨲᨠᩣᨾᨴᩩᨭ᩠ᨮᨴᩮᩣᩈᨽᩪᨲᩣᩁᩮᩣᨧᨶᩈᩥᨠ᩠ᨡᩣᨸᨴᩣᨶᩥ ᨧ ᩑᨠᨸᩁᩥᨧ᩠ᨨᩮᨴᩣᨶᩥ, ᩌᩅᨩ᩠ᨩᨶᩈᨾᨿᩮ ᨬᩣᨲᩮ ᩑᩅ ᩈᩦᩈᩴ ᩑᨶ᩠ᨲᩥ. ‘‘ᨠᩥᩴ ᩋᨿᩴ ᨽᨱᨲᩦ’’ᨲᩥ ᨠᨦ᩠ᨡᨲᩣ ᨧᩥᩁᩮᨶ ᨬᩣᨲᩮ ᩈᩦᩈᩴ ᨶ ᩑᨶ᩠ᨲᩥ. ᨲᩮᨶᩣᩉ ‘‘ᩋᨳ ᩋᨸᩁᨽᩣᨣᩮ’’ᨲᩥᩌᨴᩥ. ᩋᨳ ᨴ᩠ᩅᩥᨶ᩠ᨶᩴ ᨮᩥᨲᨭ᩠ᨮᩣᨶᩮ ᨴ᩠ᩅᩥᨶ᩠ᨶᨾ᩠ᨸᩥ ᨶᩥᨿᨾᩮᨲ᩠ᩅᩣ ‘‘ᩑᨲᩮᩈᩴ ᩌᩁᩮᩣᨧᩮᨾᩦ’’ᨲᩥ ᩅᨴᨲᩥ, ᨲᩮᩈᩩ ᩑᨠᩈ᩠ᨾᩥᩴ ᨩᩣᨶᨶ᩠ᨲᩮᨸᩥ ᨴ᩠ᩅᩦᩈᩩ ᨩᩣᨶᨶ᩠ᨲᩮᩈᩩᨸᩥ ᨸᨧ᩠ᨧᨠ᩠ᨡᩣᨲᩣᩅ ᩉᩮᩣᨲᩥ ᩈᩥᨠ᩠ᨡᩣ. ᩑᩅᩴ ᩈᨾ᩠ᨻᩉᩩᩃᩮᩈᩩᨸᩥ ᩅᩮᨴᩥᨲᨻ᩠ᨻᩴ. ᩅᩩᨲ᩠ᨲᨶᨿᩮᨶᩣᨲᩥ ‘‘ᨲᩔ ᩅᨧᨶᩣᨶᨶ᩠ᨲᩁ’’ᨶ᩠ᨲᩥᩌᨴᩥᨶᩣ ᩅᩩᨲ᩠ᨲᩮᨶ ᨶᨿᩮᨶ. ᨿᩮᩣ ᨠᩮᩣᨧᩥ ᨾᨶᩩᩔᨩᩣᨲᩥᨠᩮᩣᨲᩥ ᩋᨶ᩠ᨲᨾᩈᩮᩣ ᨶᩅᨠᨾ᩠ᨾᩥᨠᩴ ᩏᨸᩣᨴᩣᨿ ᨿᩮᩣ ᨠᩮᩣᨧᩥ ᨾᨶᩩᩔᩮᩣ. ᩅᩩᨲ᩠ᨲᨬ᩠ᩉᩮᨲᩴ ᩈᨾᨶ᩠ᨲᨸᩣᩈᩣᨴᩥᨠᩣᨿᩴ –

‘‘ᩈᨧᩮ ᨸᨶ ᩋᨶᨽᩥᩁᨲᩥᨿᩣ ᨸᩦᩊᩥᨲᩮᩣ ᩈᨽᩣᨣᩮ ᨽᩥᨠ᩠ᨡᩪ ᨸᩁᩥᩈᨦ᩠ᨠᨾᩣᨶᩮᩣ ‘ᨿᩮᩣ ᨠᩮᩣᨧᩥ ᨩᩣᨶᩣᨲᩪ’ᨲᩥ ᩏᨧ᩠ᨧᩣᩈᨴ᩠ᨴᩴ ᨠᩁᩮᩣᨶ᩠ᨲᩮᩣ ‘ᨻᩩᨴ᩠ᨵᩴ ᨸᨧ᩠ᨧᨠ᩠ᨡᩣᨾᩦ’ᨲᩥ ᩅᨴᨲᩥ, ᨲᨬ᩠ᨧ ᩋᩅᩥᨴᩪᩁᩮ ᨮᩥᨲᩮᩣ ᨶᩅᨠᨾ᩠ᨾᩥᨠᩮᩣ ᩅᩣ ᩋᨬ᩠ᨬᩮᩣ ᩅᩣ ᩈᨾᨿᨬ᩠ᨬᩪ ᨸᩩᩁᩥᩈᩮᩣ ᩈᩩᨲ᩠ᩅᩣ ‘ᩏᨠ᩠ᨠᨱ᩠ᨮᩥᨲᩮᩣ ᩋᨿᩴ ᩈᨾᨱᩮᩣ ᨣᩥᩉᩥᨽᩣᩅᩴ ᨸᨲ᩠ᨳᩮᨲᩥ, ᩈᩣᩈᨶᨲᩮᩣ ᨧᩩᨲᩮᩣ’ᨲᩥ ᨩᩣᨶᩣᨲᩥ, ᨸᨧ᩠ᨧᨠ᩠ᨡᩣᨲᩣᩅ ᩉᩮᩣᨲᩥ ᩈᩥᨠ᩠ᨡᩣ’’ᨲᩥ (ᨸᩣᩁᩣ. ᩋᨭ᩠ᨮ. ᪑.᪕᪑).

ᩈᨧᩮ ᩅᨧᨶᨲ᩠ᨳᩴ ᨬᨲ᩠ᩅᩣᨸᩥ ‘‘ᩋᨿᩴ ᩏᨠ᩠ᨠᨱ᩠ᨮᩥᨲᩮᩣ’’ᨲᩥ ᩅᩣ ‘‘ᨣᩥᩉᩥᨽᩣᩅᩴ ᨸᨲ᩠ᨳᩮᨲᩦ’’ᨲᩥ ᩅᩣ ᨶ ᨩᩣᨶᩣᨲᩥ, ᩋᨸᨧ᩠ᨧᨠ᩠ᨡᩣᨲᩣᩅ ᩉᩮᩣᨲᩥ ᩈᩥᨠ᩠ᨡᩣ. ᩈᨧᩮ ᨸᨶ ᩅᨧᨶᨲ᩠ᨳᩴ ᩋᨩᩣᨶᩥᨲ᩠ᩅᩣᨸᩥ ‘‘ᩏᨠ᩠ᨠᨱ᩠ᨮᩥᨲᩮᩣ’’ᨲᩥ ᩅᩣ ‘‘ᨣᩥᩉᩥᨽᩣᩅᩴ ᨸᨲ᩠ᨳᩮᨲᩦ’’ᨲᩥ ᩅᩣ ᨩᩣᨶᩣᨲᩥ, ᨸᨧ᩠ᨧᨠ᩠ᨡᩣᨲᩣᩅ ᩉᩮᩣᨲᩥ ᩈᩥᨠ᩠ᨡᩣ. ᨴᩅᩣᨿᨸᩦᨲᩥ ᨠᩦᩊᩣᨵᩥᨸ᩠ᨸᩣᨿᩮᨶᨸᩥ. ᨧᩥᨲ᩠ᨲᩣᨴᩦᨶᩴ ᩅᩣ ᩅᩈᩮᨶᩣᨲᩥ ᨧᩥᨲ᩠ᨲᩣᨴᩦᨶᩴ ᩅᩣ ᨨᩊᨦ᩠ᨣᩣᨶᩴ ᩅᩈᩮᨶ. ᩉᩮᩣᨲᩥ ᨧᩮᨲ᩠ᨳ –

‘‘ᨧᩥᨲ᩠ᨲᩴ ᨡᩮᨲ᩠ᨲᨬ᩠ᨧ ᨠᩣᩃᩮᩣ ᨧ, ᨸᨿᩮᩣᨣᩮᩣ ᨸᩩᨣ᩠ᨣᩃᩮᩣ ᨲᨳᩣ;

ᩅᩥᨩᩣᨶᨶᨶ᩠ᨲᩥ ᩈᩥᨠ᩠ᨡᩣᨿ, ᨸᨧ᩠ᨧᨠ᩠ᨡᩣᨶᩴ ᨨᩊᨦ᩠ᨣᩥᨠ’’ᨶ᩠ᨲᩥ.

ᩈᨻ᩠ᨻᩈᩮᩣ ᩅᩣ ᨸᨶ ᩋᨸᨧ᩠ᨧᨠ᩠ᨡᩣᨶᩮᨶᩣᨲᩥ ‘‘ᨻᩩᨴ᩠ᨵᩴ ᨸᨧ᩠ᨧᨠ᩠ᨡᩣᨾᩦ’’ᨲᩥᩌᨴᩦᩈᩩ ᨿᩮᨶ ᨿᩮᨶ ᨸᩁᩥᨿᩣᨿᩮᨶ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩴ ᩉᩮᩣᨲᩥ, ᨲᨲᩮᩣ ᩑᨠᩔᨸᩥ ᨸᨧ᩠ᨧᨠ᩠ᨡᩣᨶᩔ ᩋᨽᩣᩅᩮᨶ. ᩍᨾᩥᨶᩣ ᨸᨶ ‘‘ᩍᨴᩴ ᨸᨴᩴ ᩈᩣᩅᩮᩔᩣᨾᩥ, ᩈᩥᨠ᩠ᨡᩴ ᨸᨧ᩠ᨧᨠ᩠ᨡᩣᨾᩦ’’ᨲᩥ ᩑᩅᩴ ᨸᩅᨲ᩠ᨲᨧᩥᨲ᩠ᨲᩩᨸ᩠ᨸᩣᨴᩔ ᩋᨽᩣᩅᩴ ᨴᩔᩮᨲᩥ. ᨿᩔ ᩉᩥ ᩑᩅᩁᩪᨸᩮᩣ ᨧᩥᨲ᩠ᨲᩩᨸ᩠ᨸᩣᨴᩮᩣ ᨶᨲ᩠ᨳᩥ, ᩈᩮᩣ ᩈᨻ᩠ᨻᩈᩮᩣ ᨶ ᨸᨧ᩠ᨧᨠ᩠ᨡᩣᨲᩥ ᨶᩣᨾᩣᨲᩥ. ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩔᩣᨲᩥ ‘‘ᨻᩩᨴ᩠ᨵᩴ ᨸᨧ᩠ᨧᨠ᩠ᨡᩣᨾᩦ’’ᨲᩥᩌᨴᩥᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩔ. ᩋᨲ᩠ᨳᨽᩪᨲᩴ ᩑᨠᨧ᩠ᨧᩴ ᨴᩩᨻ᩠ᨻᩃ᩠ᨿᨶ᩠ᨲᩥ ‘‘ᨻᩩᨴ᩠ᨵᩴ ᨸᨧ᩠ᨧᨠ᩠ᨡᩣᨾᩦ’’ᨲᩥ ᩅᨴᨲᩥ ᩅᩥᨬ᩠ᨬᩣᨸᩮᨲᩥ, ᩑᩅᨾ᩠ᨸᩥ, ᨽᩥᨠ᩠ᨡᩅᩮ, ᨴᩩᨻ᩠ᨻᩃ᩠ᨿᩣᩅᩥᨠᨾ᩠ᨾᨬ᩠ᨧᩮᩅ ᩉᩮᩣᨲᩥ, ᩈᩥᨠ᩠ᨡᩣ ᨧ ᨸᨧ᩠ᨧᨠ᩠ᨡᩣᨲᩣ’’ᨲᩥᩌᨴᩥᨶᩣ (ᨸᩣᩁᩣ. ᪕᪓) ᩅᩩᨲ᩠ᨲᩮᩉᩥ ᨿᩮᩉᩥ ᩅᨧᨶᩮᩉᩥ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᨬ᩠ᨧᩮᩅ ᩉᩮᩣᨲᩥ ᨴᩩᨻ᩠ᨻᩃ᩠ᨿᩣᩅᩥᨠᨾ᩠ᨾᨬ᩠ᨧ, ᨲᩴ ‘‘ᨻᩩᨴ᩠ᨵᩴ ᨸᨧ᩠ᨧᨠ᩠ᨡᩣᨾᩦ’’ᨲᩥᩌᨴᩥᨠᩴ ᩋᨲ᩠ᨳᨽᩪᨲᩴ ᨴᩩᨻ᩠ᨻᩃ᩠ᨿᩴ ᩋᨶᩣᩅᩥᨠᨲ᩠ᩅᩣ. ‘‘ᨻᩩᨴ᩠ᨵᩴ ᨸᨧ᩠ᨧᨠ᩠ᨡᩣᨾᩦ’’ᨲᩥᩌᨴᩥᨾ᩠ᩉᩥ ᨸᨶ ᩅᩩᨲ᩠ᨲᩮ ᩈᩥᨠ᩠ᨡᩣᨸᩁᩥᨸᩪᩁᨱᩮ ᨴᩩᨻ᩠ᨻᩃᨽᩣᩅᩔᩣᨸᩥ ᨣᨾ᩠ᨿᨾᩣᨶᨲ᩠ᨲᩣ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩔ ᩍᨴᩴ ᨴᩩᨻ᩠ᨻᩃ᩠ᨿᩣᩅᩥᨠᨾ᩠ᨾᩴ ᩋᨲ᩠ᨳᩮᩣᨲᩥ ᨴᨭ᩠ᨮᨻ᩠ᨻᩴ. ᩑᨲ᩠ᨳ ᨧ ‘‘ᩋᨲ᩠ᨳᨽᩪᨲ’’ᨶ᩠ᨲᩥ ᩍᨾᩥᨶᩣ ‘‘ᨿᨶ᩠ᨶᩪᨶᩣᩉᩴ ᨻᩩᨴ᩠ᨵᩴ ᨸᨧ᩠ᨧᨠ᩠ᨡᩮᨿ᩠ᨿ’’ᨶ᩠ᨲᩥᩌᨴᩥᨠᩴ ᨴᩩᨻ᩠ᨻᩃ᩠ᨿᩣᩅᩥᨠᨾ᩠ᨾᩴ ᨸᨭᩥᨠ᩠ᨡᩥᨸᨲᩥ. ᨿᩮᨶ ᩉᩥ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᨬ᩠ᨧᩮᩅ ᩉᩮᩣᨲᩥ ᨴᩩᨻ᩠ᨻᩃ᩠ᨿᩣᩅᩥᨠᨾ᩠ᨾᨬ᩠ᨧ, ᨲᨴᩮᩅ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩔ ᩋᨲ᩠ᨳᨽᩪᨲᩴ. ᨿᩮᨶ ᨸᨶ ᨴᩩᨻ᩠ᨻᩃ᩠ᨿᩣᩅᩥᨠᨾ᩠ᨾᨾᩮᩅ ᩉᩮᩣᨲᩥ, ᨶ ᩈᩥᨠ᩠ᨡᩣᨸᨧ᩠ᨧᨠ᩠ᨡᩣᨶᩴ, ᨶ ᨲᩴ ᨲᩔ ᩋᨲ᩠ᨳᨽᩪᨲᨶ᩠ᨲᩥ.

ᩁᩣᨣᨸᩁᩥᨿᩩᨭ᩠ᨮᩣᨶᩮᨶ ᩈᨴᩥᩈᨽᩣᩅᩣᨸᨲ᩠ᨲᩥᨿᩣ ᨾᩥᨳᩩᨶᩣᨶᩴ ᩋᨿᨶ᩠ᨲᩥ ‘‘ᨾᩮᨳᩩᨶᩮᩣ’’ᨲᩥ ᨵᨾ᩠ᨾᩮᩣᩅ ᩅᩩᨧ᩠ᨧᨲᩦᨲᩥ ᩌᩉ ‘‘ᩁᩣᨣᨸᩁᩥᨿᩩᨭ᩠ᨮᩣᨶᩮᨶᩣ’’ᨲᩥᩌᨴᩥ. ᨲᨲ᩠ᨳ ᩁᩣᨣᨸᩁᩥᨿᩩᨭ᩠ᨮᩣᨶᩮᨶᩣᨲᩥ ᩁᩣᨣᩔ ᨸᩁᩥᨿᩩᨭ᩠ᨮᩣᨶᩮᨶ, ᨾᩮᨳᩩᨶᩁᩣᨣᩔ ᨸᩅᨲ᩠ᨲᩥᨿᩣ ᨸᩁᩥᨿᩮᩣᨶᨴ᩠ᨵᨧᩥᨲ᩠ᨲᨲᩣᨿᩣᨲᩥ ᩋᨲ᩠ᨳᩮᩣ. ᨵᨾ᩠ᨾᩮᩣᨲᩥ ᩋᨩ᩠ᨫᩣᨧᩣᩁᩮᩣ. ‘‘ᨸᩃᨾ᩠ᨻᨲᩮ ᩅᩥᩃᨾ᩠ᨻᨲᩮ’’ᨲᩥᩌᨴᩦᩈᩩ ᩅᩥᨿ ᩏᨸᩈᨣ᩠ᨣᩔ ᨠᩮᩣᨧᩥ ᩋᨲ᩠ᨳᩅᩥᩈᩮᩈᩮᩣ ᨶᨲ᩠ᨳᩦᨲᩥ ᩌᩉ ‘‘ᩈᩮᩅᩮᨿ᩠ᨿᩣ’’ᨲᩥ. ᩋᨩ᩠ᨫᩣᨸᨩ᩠ᨩᩮᨿ᩠ᨿᩣᨲᩥ ᩋᨽᩥᨽᩩᨿ᩠ᨿ ᨸᨩ᩠ᨩᩮᨿ᩠ᨿ. ᩈᨻ᩠ᨻᨶ᩠ᨲᩥᨾᩮᨶᩣᨲᩥ ᨸᩁᨶᩥᨾ᩠ᨾᩥᨲᩅᩈᩅᨲ᩠ᨲᩥ…ᨸᩮ… ᨧᩣᨲᩩᨾᩉᩣᩁᩣᨩᩥᨠᨾᨶᩩᩔᩥᨲ᩠ᨳᩥᨶᩣᨣᨣᩁᩩᩊᨾᩣᨱᩅᩥᨠᩣᨴᩦᨶᩴ ᩈᨻ᩠ᨻᩣᩈᩴ ᩋᨶ᩠ᨲᩥᨾᩮᨶ. ᨲᩥᩁᨧ᩠ᨨᩣᨶᨣᨲᩣᨿᩣᨲᩥ ᨲᩥᩁᨧ᩠ᨨᩣᨶᩮᩈᩩ ᩏᨸ᩠ᨸᨶ᩠ᨶᩣᨿ. ᨲᩮᨶᩣᩉ ‘‘ᨸᨭᩥᩈᨶ᩠ᨵᩥᩅᩈᩮᨶᩣ’’ᨲᩥ. ᨸᩣᩁᩣᨩᩥᨠᩣᨿ ᩅᨲ᩠ᨳᩩᨽᩪᨲᩣ ᩑᩅ ᨧᩮᨲ᩠ᨳ ᨲᩥᩁᨧ᩠ᨨᩣᨶᨣᨲᩥᨲ᩠ᨳᩦ ‘‘ᨲᩥᩁᨧ᩠ᨨᩣᨶᨣᨲᩣ’’ᨲᩥ ᨣᩉᩮᨲᨻ᩠ᨻᩣ, ᨶ ᩈᨻ᩠ᨻᩣ. ᨲᨲᩕᩣᨿᩴ ᨸᩁᩥᨧ᩠ᨨᩮᨴᩮᩣ –

‘‘ᩋᨸᨴᩣᨶᩴ ᩋᩉᩥᨾᨧ᩠ᨨᩣ, ᨴ᩠ᩅᩥᨸᨴᩣᨶᨬ᩠ᨧ ᨠᩩᨠ᩠ᨠᩩᨭᩦ;

ᨧᨲᩩᨸ᩠ᨸᨴᩣᨶᩴ ᨾᨩ᩠ᨩᩣᩁᩦ, ᩅᨲ᩠ᨳᩩ ᨸᩣᩁᩣᨩᩥᨠᩔᩥᨾᩣ’’ᨲᩥ. (ᨸᩣᩁᩣ. ᩋᨭ᩠ᨮ. ᪑.᪕᪕)

ᨲᨲ᩠ᨳ ᩋᩉᩥᨣ᩠ᨣᩉᨱᩮᨶ ᩈᨻ᩠ᨻᩣᨸᩥ ᩋᨩᨣᩁᨣᩮᩣᨶᩈᩣᨴᩥᨽᩮᨴᩣ ᨴᩦᨥᨩᩣᨲᩥ ᩈᨦ᩠ᨣᩉᩥᨲᩣ. ᨲᩈ᩠ᨾᩣ ᨴᩦᨥᨩᩣᨲᩦᩈᩩ ᨿᨲ᩠ᨳ ᨲᩥᨱ᩠ᨱᩴ ᨾᨣ᩠ᨣᩣᨶᩴ ᩋᨬ᩠ᨬᨲᩁᩈ᩠ᨾᩥᩴ ᩈᨠ᩠ᨠᩣ ᨲᩥᩃᨹᩃᨾᨲ᩠ᨲᨾ᩠ᨸᩥ ᨸᩅᩮᩈᩮᨲᩩᩴ, ᩈᩣ ᨸᩣᩁᩣᨩᩥᨠᩅᨲ᩠ᨳᩩ, ᩋᩅᩈᩮᩈᩣ ᨴᩩᨠ᩠ᨠᨭᩅᨲ᩠ᨳᩪᨲᩥ ᩅᩮᨴᩥᨲᨻ᩠ᨻᩣ. ᨾᨧ᩠ᨨᨣ᩠ᨣᩉᨱᩮᨶ ᩈᨻ᩠ᨻᩣᨸᩥ ᨾᨧ᩠ᨨᨠᨧ᩠ᨨᨸᨾᨱ᩠ᨯᩪᨠᩣᨴᩥᨽᩮᨴᩣ ᩒᨴᨠᨩᩣᨲᩥ ᩈᨦ᩠ᨣᩉᩥᨲᩣ. ᨲᨲᩕᩣᨸᩥ ᨴᩦᨥᨩᩣᨲᩥᨿᩴ ᩅᩩᨲ᩠ᨲᨶᨿᩮᨶᩮᩅ ᨸᩣᩁᩣᨩᩥᨠᩅᨲ᩠ᨳᩩ ᨧ ᨴᩩᨠ᩠ᨠᨭᩅᨲ᩠ᨳᩩ ᨧ ᩅᩮᨴᩥᨲᨻ᩠ᨻᩴ. ᩋᨿᩴ ᨸᨶ ᩅᩥᩈᩮᩈᩮᩣ – ᨸᨲᨦ᩠ᨣᨾᩩᨡᨾᨱ᩠ᨯᩪᨠᩣ ᨶᩣᨾ ᩉᩮᩣᨶ᩠ᨲᩥ, ᨲᩮᩈᩴ ᨾᩩᨡᩈᨱ᩠ᨮᩣᨶᩴ ᨾᩉᨶ᩠ᨲᩴ, ᨨᩥᨴ᩠ᨴᩴ ᩋᨸ᩠ᨸᨠᩴ, ᨲᨲ᩠ᨳ ᨸᩅᩮᩈᨶᩴ ᨶᨸ᩠ᨸᩉᩮᩣᨲᩥ, ᨾᩩᨡᩈᨱ᩠ᨮᩣᨶᩴ ᨸᨶ ᩅᨱᩈᨦ᩠ᨡᩮᨸᩴ ᨣᨧ᩠ᨨᨲᩥ, ᨲᩈ᩠ᨾᩣ ᨲᩴ ᨳᩩᩃ᩠ᩃᨧ᩠ᨧᨿᩅᨲ᩠ᨳᩪᨲᩥ ᩅᩮᨴᩥᨲᨻ᩠ᨻᩴ. ᨠᩩᨠ᩠ᨠᩩᨭᩥᨣ᩠ᨣᩉᨱᩮᨶ ᩈᨻ᩠ᨻᩣᨸᩥ ᨠᩣᨠᨠᨸᩮᩣᨲᩣᨴᩥᨽᩮᨴᩣ ᨸᨠ᩠ᨡᩥᨩᩣᨲᩥ ᩈᨦ᩠ᨣᩉᩥᨲᩣ. ᨲᨲᩕᩣᨸᩥ ᩅᩩᨲ᩠ᨲᨶᨿᩮᨶᩮᩅ ᨸᩣᩁᩣᨩᩥᨠᩅᨲ᩠ᨳᩩ ᨧ ᨴᩩᨠ᩠ᨠᨭᩅᨲ᩠ᨳᩩ ᨧ ᩅᩮᨴᩥᨲᨻ᩠ᨻᩴ. ᨾᨩ᩠ᨩᩣᩁᩥᨣ᩠ᨣᩉᨱᩮᨶ ᩈᨻ᩠ᨻᩣᨸᩥ ᩁᩩᨠ᩠ᨡᩈᩩᨶᨡᨾᨦ᩠ᨣᩩᩈᨣᩮᩣᨵᩣᨴᩥᨽᩮᨴᩣ ᨧᨲᩩᨸ᩠ᨸᨴᨩᩣᨲᩥ ᩈᨦ᩠ᨣᩉᩥᨲᩣ. ᨲᨲᩕᩣᨸᩥ ᩅᩩᨲ᩠ᨲᨶᨿᩮᨶᩮᩅ ᨸᩣᩁᩣᨩᩥᨠᩅᨲ᩠ᨳᩩ ᨧ ᨴᩩᨠ᩠ᨠᨭᩅᨲ᩠ᨳᩩ ᨧ ᩅᩮᨴᩥᨲᨻ᩠ᨻᩴ.

ᨸᩣᩁᩣᨩᩥᨠᩮᩣ ᩉᩮᩣᨲᩦᨲᩥ (ᨸᩣᩁᩣ. ᩋᨭ᩠ᨮ. ᪑.᪕᪕) ᨸᩁᩣᨩᩥᨲᩮᩣ ᩉᩮᩣᨲᩥ ᨸᩁᩣᨩᨿᩴ ᩋᨸᨶ᩠ᨶᩮᩣ. ᩋᨿᨬ᩠ᩉᩥ ᨸᩣᩁᩣᨩᩥᨠᩈᨴ᩠ᨴᩮᩣ ᩈᩥᨠ᩠ᨡᩣᨸᨴᩣᨸᨲ᩠ᨲᩥᨸᩩᨣ᩠ᨣᩃᩮᩈᩩ ᩅᨲ᩠ᨲᨲᩥ. ᨲᨲ᩠ᨳ ‘‘ᩋᨭ᩠ᨮᩣᨶᨾᩮᨲᩴ, ᩌᨶᨶ᩠ᨴ, ᩋᨶᩅᨠᩣᩈᩮᩣ, ᨿᩴ ᨲᨳᩣᨣᨲᩮᩣ ᩅᨩ᩠ᨩᩦᨶᩴ ᩅᩣ ᩅᨩ᩠ᨩᩥᨸᩩᨲ᩠ᨲᨠᩣᨶᩴ ᩅᩣ ᨠᩣᩁᨱᩣ ᩈᩣᩅᨠᩣᨶᩴ ᨸᩣᩁᩣᨩᩥᨠᩴ ᩈᩥᨠ᩠ᨡᩣᨸᨴᩴ ᨸᨬ᩠ᨬᨲ᩠ᨲᩴ ᩈᨾᩪᩉᨶᩮᨿ᩠ᨿᩣ’’ᨲᩥ (ᨸᩣᩁᩣ. ᪔᪓) ᩑᩅᩴ ᩈᩥᨠ᩠ᨡᩣᨸᨴᩮ ᩅᨲ᩠ᨲᨾᩣᨶᩮᩣ ᩅᩮᨴᩥᨲᨻ᩠ᨻᩮᩣ. ‘‘ᩌᨸᨲ᩠ᨲᩥᩴ ᨲ᩠ᩅᩴ ᨽᩥᨠ᩠ᨡᩩ ᩌᨸᨶ᩠ᨶᩮᩣ ᨸᩣᩁᩣᨩᩥᨠ’’ᨶ᩠ᨲᩥ (ᨸᩣᩁᩣ. ᪖᪗) ᩑᩅᩴ ᩌᨸᨲ᩠ᨲᩥᨿᩴ. ‘‘ᨶ ᨾᨿᩴ ᨸᩣᩁᩣᨩᩥᨠᩣ, ᨿᩮᩣ ᩋᩅᩉᨭᩮᩣ, ᩈᩮᩣ ᨸᩣᩁᩣᨩᩥᨠᩮᩣ’’ᨲᩥ (ᨸᩣᩁᩣ. ᪑᪕᪕) ᩑᩅᩴ ᨸᩩᨣ᩠ᨣᩃᩮ ᩅᨲ᩠ᨲᨾᩣᨶᩮᩣ ᩅᩮᨴᩥᨲᨻ᩠ᨻᩮᩣ. ‘‘ᨸᩣᩁᩣᨩᩥᨠᩮᨶ ᨵᨾ᩠ᨾᩮᨶ ᩋᨶᩩᨴ᩠ᨵᩴᩈᩮᨿ᩠ᨿᩣ’’ᨲᩥᩌᨴᩦᩈᩩ (ᨸᩣᩁᩣ. ᪓᪘᪔) ᨸᨶ ᨵᨾ᩠ᨾᩮ ᩅᨲ᩠ᨲᨲᩦᨲᩥ ᩅᨴᨶ᩠ᨲᩥ. ᨿᩈ᩠ᨾᩣ ᨸᨶ ᨲᨲ᩠ᨳ ‘‘ᨵᨾ᩠ᨾᩮᩣ’’ᨲᩥ ᨠᨲ᩠ᨳᨧᩥ ᩌᨸᨲ᩠ᨲᩥ, ᨠᨲ᩠ᨳᨧᩥ ᩈᩥᨠ᩠ᨡᩣᨸᨴᨾᩮᩅ ᩋᨵᩥᨸ᩠ᨸᩮᨲᩴ, ᨲᩈ᩠ᨾᩣ ᩈᩮᩣ ᩅᩥᩈᩩᩴ ᨶ ᩅᨲ᩠ᨲᨻ᩠ᨻᩮᩣ. ᨲᨲ᩠ᨳ ᩈᩥᨠ᩠ᨡᩣᨸᨴᩴ ᨿᩮᩣ ᨲᩴ ᩋᨲᩥᨠ᩠ᨠᨾᨲᩥ, ᨲᩴ ᨸᩁᩣᨩᩮᨲᩥ, ᨲᩈ᩠ᨾᩣ ‘‘ᨸᩣᩁᩣᨩᩥᨠ’’ᨶ᩠ᨲᩥ ᩅᩩᨧ᩠ᨧᨲᩥ. ᩌᨸᨲ᩠ᨲᩥ ᨸᨶ ᨿᩮᩣ ᨶᩴ ᩋᨩ᩠ᨫᩣᨸᨩ᩠ᨩᨲᩥ, ᨲᩴ ᨸᩁᩣᨩᩮᨲᩥ, ᨲᩈ᩠ᨾᩣ ‘‘ᨸᩣᩁᩣᨩᩥᨠᩣ’’ᨲᩥ ᩅᩩᨧ᩠ᨧᨲᩥ. ᨸᩩᨣ᩠ᨣᩃᩮᩣ ᨿᩈ᩠ᨾᩣ ᨸᩁᩣᨩᩥᨲᩮᩣ ᨸᩁᩣᨩᨿᨾᩣᨸᨶ᩠ᨶᩮᩣ, ᨲᩈ᩠ᨾᩣ ‘‘ᨸᩣᩁᩣᨩᩥᨠᩮᩣ’’ᨲᩥ ᩅᩩᨧ᩠ᨧᨲᩥ. ᩍᨵ ᨸᨶ ᨸᩩᨣ᩠ᨣᩃᩮᩣ ᩅᩮᨴᩥᨲᨻ᩠ᨻᩮᩣᨲᩥ ᩌᩉ ‘‘ᨸᩣᩁᩣᨩᩥᨠᩮᩣ ᩉᩮᩣᨲᩦ’’ᨲᩥᩌᨴᩥ. ᩍᨾᩥᨶᩣᨸᩥ ᩍᨴᩴ ᨴᩔᩮᨲᩥ – ‘‘ᨸᩁᩣᨩᩥᨲᩈᨴ᩠ᨴᩮ ᩏᨸᩈᨣ᩠ᨣᩔ ᩅᩩᨴ᩠ᨵᩥᩴ ᨠᨲ᩠ᩅᩣ, ᨲ-ᨠᩣᩁᩔ ᨧ ᨠ-ᨠᩣᩁᩴ ᨠᨲ᩠ᩅᩣ ᨸᩣᩁᩣᨩᩥᨠᩮᩣ ᩉᩮᩣᨲᩦᨲᩥ ᨶᩥᨴ᩠ᨴᩥᨭ᩠ᨮᩮᩣ’’ᨲᩥ.

ᩋᨸᩃᩮᩣᨠᨶᩣᨴᩥ ᨧᨲᩩᨻ᩠ᨻᩥᨵᨾ᩠ᨸᩥ ᩈᨦ᩠ᨥᨠᨾ᩠ᨾᩴ ᩈᩦᨾᩣᨸᩁᩥᨧ᩠ᨨᩥᨶ᩠ᨶᩮᩉᩥ ᨸᨠᨲᨲ᩠ᨲᩮᩉᩥ ᨽᩥᨠ᩠ᨡᩪᩉᩥ ᩑᨠᨲᩮᩣ ᨠᨲ᩠ᨲᨻ᩠ᨻᨲ᩠ᨲᩣ ᩑᨠᨠᨾ᩠ᨾᩴ ᨶᩣᨾ. ᩌᨴᩥᩈᨴ᩠ᨴᩮᨶ ᩑᨠᩩᨴ᩠ᨴᩮᩈᩈᨾᩈᩥᨠ᩠ᨡᨲᩣᨶᩴ ᨣᩉᨱᩴ. ᨲᨲ᩠ᨳ ᨸᨬ᩠ᨧᩅᩥᨵᩮᩣᨸᩥ ᨸᩣᨲᩥᨾᩮᩣᨠ᩠ᨡᩩᨴ᩠ᨴᩮᩈᩮᩣ ᩑᨠᨲᩮᩣ ᩏᨴ᩠ᨴᩥᩈᩥᨲᨻ᩠ᨻᨲ᩠ᨲᩣ ᩑᨠᩩᨴ᩠ᨴᩮᩈᩮᩣ ᨶᩣᨾ. ᨶᩉᩣᨸᩥᨲᨸᩩᨻ᩠ᨻᨠᩣᨴᩦᨶᩴ ᩅᩥᨿ ᩒᨴᩥᩔ ᩋᨶᩩᨬ᩠ᨬᩣᨲᩴ ᨮᨸᩮᨲ᩠ᩅᩣ ᩋᩅᩈᩮᩈᩴ ᩈᨻ᩠ᨻᨾ᩠ᨸᩥ ᩈᩥᨠ᩠ᨡᩣᨸᨴᩴ ᩈᨻ᩠ᨻᩮᩉᩥᨸᩥ ᩃᨩ᩠ᨩᩥᨸᩩᨣ᩠ᨣᩃᩮᩉᩥ ᩈᨾᩴ ᩈᩥᨠ᩠ᨡᩥᨲᨻ᩠ᨻᨽᩣᩅᨲᩮᩣ ᩈᨾᩈᩥᨠ᩠ᨡᨲᩣ ᨶᩣᨾ. ᨿᩈ᩠ᨾᩣ ᩈᨻ᩠ᨻᩮᨸᩥ ᩃᨩ᩠ᨩᩥᨶᩮᩣ ᩑᨲᩮᩈᩩ ᩑᨠᨠᨾ᩠ᨾᩣᨴᩦᩈᩩ ᩈᩉ ᩅᩈᨶ᩠ᨲᩥ, ᨶ ᩑᨠᩮᩣᨸᩥ ᨲᨲᩮᩣ ᨻᩉᩥᨴ᩠ᨵᩣ ᩈᨶ᩠ᨴᩥᩔᨲᩥ, ᨲᩈ᩠ᨾᩣ ᨲᩣᨶᩥ ᩈᨻ᩠ᨻᩣᨶᩥᨸᩥ ᨣᩉᩮᨲ᩠ᩅᩣ ᩑᨠᨠᨾ᩠ᨾᩣᨴᩥᨠᩮᩣ ᨲᩥᩅᩥᨵᩮᩣᨸᩥ ᩈᩴᩅᩣᩈᩮᩣ ᨶᩣᨾᩣᨲᩥ ᩌᩉ ‘‘ᩈᩮᩣ ᨧ ᩅᩩᨲ᩠ᨲᨸ᩠ᨸᨠᩣᩁᩮᩣ ᩈᩴᩅᩣᩈᩮᩣ ᨲᩮᨶ ᨸᩩᨣ᩠ᨣᩃᩮᨶ ᩈᨴ᩠ᨵᩥᩴ ᨶᨲ᩠ᨳᩥ, ᨲᩮᨶ ᨠᩣᩁᨱᩮᨶ ᩈᩮᩣ ᨸᩣᩁᩣᨩᩥᨠᩮᩣ ᨸᩩᨣ᩠ᨣᩃᩮᩣ ‘ᩋᩈᩴᩅᩣᩈᩮᩣ’ᨲᩥ ᩅᩩᨧ᩠ᨧᨲᩦ’’ᨲᩥ (ᨸᩣᩁᩣ. ᩋᨭ᩠ᨮ. ᪑.᪕᪕).

ᩍᨴᩣᨶᩥ ᨿᩈ᩠ᨾᩣ ᨶ ᨠᩮᩅᩃᩴ ᨾᨶᩩᩔᩥᨲ᩠ᨳᩥᨿᩣ ᩑᩅ ᨶᩥᨾᩥᨲ᩠ᨲᩴ ᨸᩣᩁᩣᨩᩥᨠᩅᨲ᩠ᨳᩩ, ᩋᨳ ᨡᩮᩣ ᩋᨾᨶᩩᩔᩥᨲ᩠ᨳᩥᨲᩥᩁᨧ᩠ᨨᩣᨶᨣᨲᩥᨲ᩠ᨳᩦᨶᨾ᩠ᨸᩥ. ᨶ ᨧ ᩍᨲ᩠ᨳᩥᨿᩣ ᩑᩅ. ᩋᨳ ᨡᩮᩣ ᩏᨽᨲᩮᩣᨻ᩠ᨿᨬ᩠ᨩᨶᨠᨸᨱ᩠ᨯᨠᨸᩩᩁᩥᩈᩣᨶᨾ᩠ᨸᩥ, ᨲᩈ᩠ᨾᩣ ᨲᩮ ᩈᨲ᩠ᨲᩮ, ᨲᩮᩈᨬ᩠ᨧ ᨿᩴ ᨿᩴ ᨶᩥᨾᩥᨲ᩠ᨲᩴ ᩅᨲ᩠ᨳᩩ ᩉᩮᩣᨲᩥ, ᨲᩴ ᨲᩴ ᨶᩥᨾᩥᨲ᩠ᨲᩴ, ᨲᨲ᩠ᨳ ᨧ ᨿᨳᩣ ᨸᨭᩥᩈᩮᩅᨶ᩠ᨲᩮᩣ ᨸᩣᩁᩣᨩᩥᨠᩮᩣ ᩉᩮᩣᨲᩥ, ᨲᨬ᩠ᨧ ᩈᨻ᩠ᨻᩴ ᩅᩥᨲ᩠ᨳᩣᩁᩮᨲ᩠ᩅᩣ ᨴᩔᩮᨲᩩᩴ ‘‘ᩋᨿᩴ ᨸᨶᩮᨲ᩠ᨳ ᩅᩥᨶᩥᨧ᩠ᨨᨿᩮᩣ’’ᨲᩥᩌᨴᩥᨾᩣᩉ. ᩑᨲ᩠ᨳᩣᨲᩥ ᩍᨾᩈ᩠ᨾᩥᩴ ᩈᩥᨠ᩠ᨡᩣᨸᨴᩮ. ᨲᩮᩈᩪᨲᩥ ᨿᩮ ᨲᩥᩴᩈᨾᨣ᩠ᨣᩣ ᩅᩩᨲ᩠ᨲᩣ, ᨲᩮᩈᩩ. ᩋᨲ᩠ᨲᨶᩮᩣ ᩅᩣᨲᩥ ᩃᨾ᩠ᨻᩥᨾᩩᨴᩩᨸᩥᨭ᩠ᨮᩥᨠᩮ ᩈᨶ᩠ᨵᩣᨿ ᩅᩩᨲ᩠ᨲᩴ. ᩈᨶ᩠ᨳᨲᩔ ᩅᩣᨲᩥ ᨿᩮᨶ ᨠᩮᨶᨧᩥ ᩅᨲ᩠ᨳᩮᨶ ᩅᩣ ᨸᨱ᩠ᨱᩮᨶ ᩅᩣ ᩅᩣᨠᨸᨭ᩠ᨭᩮᨶ ᩅᩣ ᨧᨾ᩠ᨾᩮᨶ ᩅᩣ ᨲᩥᨸᩩᩈᩦᩈᩣᨴᩦᨶᩴ ᨸᨭ᩠ᨭᩮᨶ ᩅᩣ ᨸᩃᩥᩅᩮᨮᩮᨲ᩠ᩅᩣ, ᩋᨶ᩠ᨲᩮᩣ ᩅᩣ ᨸᩅᩮᩈᩮᨲ᩠ᩅᩣ ᨸᨭᩥᨧ᩠ᨨᨶ᩠ᨶᩔ. ᩋᨠ᩠ᨡᩣᨿᩥᨲᩔ ᩅᩣᨲᩥ ᩈᩮᩣᨱᩈᩥᨦ᩠ᨣᩣᩃᩣᨴᩦᩉᩥ ᩋᨠ᩠ᨡᩣᨴᩥᨲᩔ. ᨿᩮᨽᩩᨿ᩠ᨿᩮᨶ ᩋᨠ᩠ᨡᩣᨿᩥᨲᩔᩣᨲᩥ ᨿᩣᩅ ᩏᨸᨯ᩠ᨰᨠ᩠ᨡᩣᨿᩥᨲᩮᩣ ᨶᩣᨾ ᨶ ᩉᩮᩣᨲᩥ, ᩑᩅᩴ ᩋᨠ᩠ᨡᩣᨿᩥᨲᩔ. ᩋᩃ᩠ᩃᩮᩣᨠᩣᩈᩮᨲᩥ ᨲᩥᨶ᩠ᨲᩮᩣᨠᩣᩈᩮ. ᩈᨶ᩠ᨳᨲᨶ᩠ᨲᩥ ᨲᩮᩈᩴᨿᩮᩅ ᩅᨲ᩠ᨳᩣᨴᩦᨶᩴ ᨿᩮᨶ ᨠᩮᨶᨧᩥ ᨸᨭᩥᨧ᩠ᨨᨶ᩠ᨶᩴ. ᩋᨿᨬ᩠ᩉᩮᨲ᩠ᨳ ᩈᨦ᩠ᨡᩮᨸᨲ᩠ᨳᩮᩣ – ᨶ ᩉᩮᨲ᩠ᨳ ᩋᨶᩩᨸᩣᨴᩥᨶ᩠ᨶᨠᩴ ᩋᨶᩩᨸᩣᨴᩥᨶ᩠ᨶᨠᩮᨶ ᨨᩩᨸᨲᩥ, ᨾᩩᨲ᩠ᨲᩥ ᩋᨲ᩠ᨳᩥ, ᩋᨳ ᨡᩮᩣ ᩏᨸᩣᨴᩥᨶ᩠ᨶᨠᩮᨶ ᩅᩣ ᩋᨶᩩᨸᩣᨴᩥᨶ᩠ᨶᨠᩴ ᨥᨭ᩠ᨭᩥᨿᨲᩩ, ᩋᨶᩩᨸᩣᨴᩥᨶ᩠ᨶᨠᩮᨶ ᩅᩣ ᩏᨸᩣᨴᩥᨶ᩠ᨶᨠᩴ, ᩋᨶᩩᨸᩣᨴᩥᨶ᩠ᨶᨠᩮᨶ ᩅᩣ ᩋᨶᩩᨸᩣᨴᩥᨶ᩠ᨶᨠᩴ, ᩏᨸᩣᨴᩥᨶ᩠ᨶᨠᩮᨶ ᩅᩣ ᩏᨸᩣᨴᩥᨶ᩠ᨶᨠᩴ. ᩈᨧᩮ ᨿᨲ᩠ᨲᨠᩮ ᨸᩅᩥᨭ᩠ᨮᩮ ᨸᩣᩁᩣᨩᩥᨠᩴ ᩉᩮᩣᨲᩦᨲᩥ ᩅᩩᨲ᩠ᨲᩴ, ᨲᨲ᩠ᨲᨠᩴ ᩈᩮᩅᨶᨧᩥᨲ᩠ᨲᩮᨶ ᨸᩅᩮᩈᩮᨲᩥ, ᩈᨻ᩠ᨻᨲ᩠ᨳᩣᨿᩴ ᨸᩣᩁᩣᨩᩥᨠᩣᨸᨲ᩠ᨲᩥᩴ ᩌᨸᨶ᩠ᨶᩮᩣ ᨶᩣᨾ ᩉᩮᩣᨲᩦᨲᩥ.

ᩑᩅᩴ ᩈᩮᩅᨶᨧᩥᨲ᩠ᨲᩮᨶᩮᩅ ᨸᩅᩮᩈᩮᨶ᩠ᨲᩔ ᩌᨸᨲ᩠ᨲᩥᩴ ᨴᩔᩮᨲ᩠ᩅᩣ ᩍᨴᩣᨶᩥ ᨿᩈ᩠ᨾᩣ ᨲᩴ ᨸᩅᩮᩈᨶᩴ ᨶᩣᨾ ᨶ ᨠᩮᩅᩃᩴ ᩋᨲ᩠ᨲᩪᨸᨠ᩠ᨠᨾᩮᨶᩮᩅ, ᨸᩁᩪᨸᨠ᩠ᨠᨾᩮᨶᩣᨸᩥ ᩉᩮᩣᨲᩥ. ᨲᨲᩕᩣᨸᩥ ᩈᩣᨴᩥᨿᨶ᩠ᨲᩔᩮᩅ ᩌᨸᨲ᩠ᨲᩥ ᨸᨭᩥᩈᩮᩅᨶᨧᩥᨲ᩠ᨲᩈᨾᨦ᩠ᨣᩥᩔ, ᨶ ᩍᨲᩁᩔᩣᨲᩥ ᨴᩔᩮᨲᩩᩴ ‘‘ᨸᩁᩮᨶ ᩅᩣ’’ᨲᩥᩌᨴᩥᨾᩣᩉ. ᨲᨲ᩠ᨳ ᨸᩁᩮᨶᩣᨲᩥ ᨽᩥᨠ᩠ᨡᩩᨸᨧ᩠ᨧᨲ᩠ᨳᩥᨠᩣᨴᩥᨶᩣ ᨿᩮᨶ ᨠᩮᨶᨧᩥ ᩋᨬ᩠ᨬᩮᨶ. ᨸᩅᩮᩈᨶᨸᩅᩥᨭ᩠ᨮᨭ᩠ᨮᩥᨲᩏᨴ᩠ᨵᩁᨱᩮᩈᩪᨲᩥ ᩑᨲ᩠ᨳ ᩋᨣ᩠ᨣᨲᩮᩣ (ᩈᩣᩁᨲ᩠ᨳ. ᨭᩦ. ᪒.᪕᪘) ᨿᩣᩅ ᨾᩪᩃᩣ ᨸᩅᩮᩈᨶᩴ ᨸᩅᩮᩈᨶᩴ ᨶᩣᨾ. ᩋᨦ᩠ᨣᨩᩣᨲᩔ ᨿᨲ᩠ᨲᨠᩴ ᨮᩣᨶᩴ ᨸᩅᩮᩈᨶᩣᩁᩉᩴ, ᨲᨲ᩠ᨲᨠᩴ ᩋᨶᩅᩈᩮᩈᨲᩮᩣ ᨸᩅᩥᨭ᩠ᨮᩴ ᨸᩅᩥᨭ᩠ᨮᩴ ᨶᩣᨾ. ᩑᩅᩴ ᨸᩅᩥᨭ᩠ᨮᩔ ᩏᨴ᩠ᨵᩁᨱᩣᩁᨾ᩠ᨽᨲᩮᩣ ᩋᨶ᩠ᨲᩁᩣ ᨮᩥᨲᨠᩣᩃᩮᩣ ᨮᩥᨲᩴ ᨶᩣᨾ. ᩈᨾᨶ᩠ᨲᨸᩣᩈᩣᨴᩥᨠᩣᨿᩴ ᨸᨶ ᨾᩣᨲᩩᨣᩣᨾᩔ ᩈᩩᨠ᩠ᨠᩅᩥᩈᨭ᩠ᨮᩥᩴ ᨸᨲ᩠ᩅᩣ ᩈᨻ᩠ᨻᨳᩣ ᩅᩣᨿᩣᨾᨲᩮᩣ ᩒᩁᨾᩥᨲ᩠ᩅᩣ ᨮᩥᨲᨠᩣᩃᩴ ᩈᨶ᩠ᨵᩣᨿ ‘‘ᩈᩩᨠ᩠ᨠᩅᩥᩈᨭ᩠ᨮᩥᩈᨾᨿᩮ’’ᨲᩥ ᩅᩩᨲ᩠ᨲᩴ. ᩏᨴ᩠ᨵᩁᨱᩴ ᨶᩣᨾ ᨿᩣᩅ ᩋᨣ᩠ᨣᩣ ᨶᩦᩉᩁᨱᨠᩣᩃᩮᩣ. ᩈᩣᨴᩥᨿᨲᩦᨲᩥ ᩈᩮᩅᨶᨧᩥᨲ᩠ᨲᩴ ᩏᨸᨭ᩠ᨮᨸᩮᨲᩥ. ᩋᩈᩣᨵᩣᩁᨱᩅᩥᨶᩥᨧ᩠ᨨᨿᩮᩣᨲᩥ ᩋᨴᩥᨶ᩠ᨶᩣᨴᩣᨶᩣᨴᩦᩉᩥ ᩈᨻ᩠ᨻᩮᩉᩥ ᩈᩥᨠ᩠ᨡᩣᨸᨴᩮᩉᩥ ᩋᩈᩣᨵᩣᩁᨱᩮᩣ ᩅᩥᨶᩥᨧ᩠ᨨᨿᩮᩣ.

ᩈᩣᨵᩣᩁᨱᩅᩥᨶᩥᨧ᩠ᨨᨿᨲ᩠ᨳᨶ᩠ᨲᩥ ᨸᩁᩥᩅᩣᩁᩅᩈᩮᨶ ᩈᩣᨵᩣᩁᨱᩅᩥᨶᩥᨧ᩠ᨨᨿᨲ᩠ᨳᩴ. ᨾᩣᨲᩥᨠᩣᨲᩥ ᨾᩣᨲᩣ, ᨩᨶᩮᨲ᩠ᨲᩦᨲᩥ ᩋᨲ᩠ᨳᩮᩣ. ᨶᩥᨴᨴᩣᨲᩥ ᨴᩮᩈᨶᩴ ᨴᩮᩈᩅᩈᩮᨶ ᩋᩅᩥᨴᩥᨲᩴ ᩅᩥᨴᩥᨲᩴ ᨠᨲ᩠ᩅᩣ ᨶᩥᨴᩔᩮᨲᩦᨲᩥ ᨶᩥᨴᩣᨶᩴ. ᨸᨬ᩠ᨬᩣᨸᩦᨿᨲᩦᨲᩥ ᨸᨬ᩠ᨬᨲ᩠ᨲᩥ, ᨲᩔᩣ ᨸᨠᩣᩁᩮᩣ ᨸᨬ᩠ᨬᨲ᩠ᨲᩥᩅᩥᨵᩥ ᩋᨦ᩠ᨣᩮᨲᩥ ᨣᨾᩮᨲᩥ ᨬᩣᨸᩮᨲᩦᨲᩥ ᩋᨦ᩠ᨣᩴ, ᨠᩣᩁᨱᩴ. ᩈᨾᩩᨭ᩠ᨮᩉᨶ᩠ᨲᩥ ᩌᨸᨲ᩠ᨲᩥᨿᩮᩣ ᩑᨲᩮᨶᩣᨲᩥ ᩈᨾᩩᨭ᩠ᨮᩣᨶᩴ, ᩏᨸ᩠ᨸᨲ᩠ᨲᩥᨠᩣᩁᨱᩴ, ᨲᩔ ᩅᩥᨵᩥ ᩈᨾᩩᨭ᩠ᨮᩣᨶᩅᩥᨵᩥ. ᩅᨩ᩠ᨩᨠᨾ᩠ᨾᨸ᩠ᨸᨽᩮᨴᨬ᩠ᨧᩣᨲᩥ ᩑᨲ᩠ᨳ ᨸᨽᩮᨴᩈᨴ᩠ᨴᩮᩣ ᨸᨧ᩠ᨧᩮᨠᩴ ᨿᩮᩣᨩᩮᨲᨻ᩠ᨻᩮᩣ ‘‘ᩅᨩ᩠ᨩᨸ᩠ᨸᨽᩮᨴᩴ, ᨠᨾ᩠ᨾᨸ᩠ᨸᨽᩮᨴᨬ᩠ᨧᩣ’’ᨲᩥ. ᨲᨲ᩠ᨳ ᨲᨲ᩠ᨳᩣᨲᩥ ᨲᩈ᩠ᨾᩥᩴ ᨲᩈ᩠ᨾᩥᩴ ᩈᩥᨠ᩠ᨡᩣᨸᨴᩮ.

ᨸᨬ᩠ᨬᨲ᩠ᨲᩥᨭ᩠ᨮᩣᨶᨶ᩠ᨲᩥ ᨸᨬ᩠ᨬᨲ᩠ᨲᩥᨭ᩠ᨮᨸᨶᩔ ᨮᩣᨶᩴ, ᩈᩥᨠ᩠ᨡᩣᨸᨴᩣᨶᩴ ᨸᨬ᩠ᨬᨲ᩠ᨲᩥᨴᩮᩈᩮᩣᨲᩥ ᩋᨲ᩠ᨳᩮᩣ. ᨸᩩᨣ᩠ᨣᩃᩮᩣᨲᩥ ᩑᨲ᩠ᨳ ᩌᨴᩥᨠᨾ᩠ᨾᩥᨠᩮᩣᨿᩮᩅ ᩋᨵᩥᨸ᩠ᨸᩮᨲᩮᩣᨲᩥ ᩌᩉ ‘‘ᨸᩩᨣ᩠ᨣᩃᩮᩣ ᨶᩣᨾ ᨿᩴ ᨿᩴ ᩌᩁᨻ᩠ᨽ ᨲᩴ ᨲᩴ ᩈᩥᨠ᩠ᨡᩣᨸᨴᩴ ᨸᨬ᩠ᨬᨲ᩠ᨲ’’ᨶ᩠ᨲᩥ, ᩈᩮᩣ ᩈᩮᩣ ᨸᩩᨣ᩠ᨣᩃᩮᩣᨲᩥ ᩋᨵᩥᨸ᩠ᨸᩣᨿᩮᩣ. ᩉᩮᩣᨶ᩠ᨲᩥ ᨧᩮᨲ᩠ᨳ –

‘‘ᩈᩩᨴᩥᨶ᩠ᨶᩮᩣ ᨵᨶᩥᨿᩮᩣ ᩈᨾ᩠ᨻᩉᩩᩃᩣ ᩅᨣ᩠ᨣᩩᨾᩩᨴᨶ᩠ᨲᩥᨠᩣ;

ᩈᩮᨿ᩠ᨿᩈᨠᩮᩣ ᩏᨴᩣᨿᩥ ᨧᩣ-ᩊᩅᨠᩣ ᨨᨶ᩠ᨶᨾᩮᨲ᩠ᨲᩥᨿᩣ.

‘‘ᨴᩮᩅᨴᨲ᩠ᨲᩔᨩᩥᨸᩩᨶᨻ᩠ᨻᩈᩩ-ᨨᨻ᩠ᨻᨣ᩠ᨣᩥᨿᩮᩣᨸᨶᨶ᩠ᨴᨬ᩠ᨬᨲᩁᩮᩣᨸᩥ ᨧ;

ᩉᨲ᩠ᨳᨠᩮᩣ ᨧᩣᨶᩩᩁᩩᨴ᩠ᨵᩮᩣ ᨧ, ᩈᨲ᩠ᨲᩁᩈ ᨧᩪᩊᨸᨶ᩠ᨳᨠᩮᩣ.

‘‘ᨻᩮᩃᨭ᩠ᨮᩈᩦᩈᩮᩣ ᨧᩣᨶᨶ᩠ᨴᩮᩣ, ᩈᩣᨣᨲᩮᩣᩁᩥᨭ᩠ᨮᨶᩣᨾᨠᩮᩣ;

ᨶᨶ᩠ᨴᨲ᩠ᨳᩮᩁᩮᨶ ᨲᩮᩅᩦᩈ, ᨽᩥᨠ᩠ᨡᩪᨶᩴ ᩌᨴᩥᨠᨾ᩠ᨾᩥᨠᩣ.

‘‘ᩈᩩᨶ᩠ᨴᩁᩦᨶᨶ᩠ᨴᩣ ᨳᩩᩃ᩠ᩃᨶᨶ᩠ᨴᩣ, ᨨᨻ᩠ᨻᨣ᩠ᨣᩥᨿᨬ᩠ᨬᨲᩁᩣᨸᩥ ᨧ;

ᨧᨱ᩠ᨯᨠᩣᩊᩦ ᩈᨾ᩠ᨻᩉᩩᩃᩣ, ᨴ᩠ᩅᩮ ᨧ ᨽᩥᨠ᩠ᨡᩩᨶᩥᨿᩮᩣ ᨸᩁᩣ;

ᨽᩥᨠ᩠ᨡᩩᨶᩦᨶᩴ ᨲᩩ ᩈᨲ᩠ᨲᩮᩅ, ᩉᩮᩣᨶ᩠ᨲᩥ ᨲᩣ ᩌᨴᩥᨠᨾ᩠ᨾᩥᨠᩣ’’ᨲᩥ.

ᨲᩔ ᨲᩔ ᨸᩩᨣ᩠ᨣᩃᩔᩣᨲᩥ ᨿᩴ ᨿᩴ ᩈᩩᨴᩥᨶ᩠ᨶᩣᨴᩥᨠᩴ ᨸᩩᨣ᩠ᨣᩃᩴ ᩌᩁᨻ᩠ᨽ ᩈᩥᨠ᩠ᨡᩣᨸᨴᩴ ᨸᨬ᩠ᨬᨲ᩠ᨲᩴ, ᨲᩔ ᨲᩔ ᨸᩩᨣ᩠ᨣᩃᩔ. ᨸᨬ᩠ᨬᨲ᩠ᨲᩦᨲᩥ ᨸᨮᨾᨸᨬ᩠ᨬᨲ᩠ᨲᩥ. ᨸᨮᨾᨸᨬ᩠ᨬᨲ᩠ᨲᩥᨿᩣ ᨸᨧ᩠ᨨᩣ ᨮᨸᩥᨲᩣ ᨸᨬ᩠ᨬᨲ᩠ᨲᩥ ᩋᨶᩩᨸᨬ᩠ᨬᨲ᩠ᨲᩥ. ᩋᨶᩩᨸ᩠ᨸᨶ᩠ᨶᩮ ᨴᩮᩣᩈᩮ ᨮᨸᩥᨲᩣ ᨸᨬ᩠ᨬᨲ᩠ᨲᩥ ᩋᨶᩩᨸ᩠ᨸᨶ᩠ᨶᨸᨬ᩠ᨬᨲ᩠ᨲᩥ. ᩈᨻ᩠ᨻᨲ᩠ᨳ ᨾᨩ᩠ᨫᩥᨾᨴᩮᩈᩮ ᨧᩮᩅ ᨸᨧ᩠ᨧᨶ᩠ᨲᩥᨾᩮᩈᩩ ᨩᨶᨸᨴᩮᩈᩩ ᨧᩣᨲᩥ ᩈᨻ᩠ᨻᩮᩈᩩ ᨸᨴᩮᩈᩮᩈᩩ ᨮᨸᩥᨲᩣ ᨸᨬ᩠ᨬᨲ᩠ᨲᩥ ᩈᨻ᩠ᨻᨲ᩠ᨳᨸᨬ᩠ᨬᨲ᩠ᨲᩥ. ᨾᨩ᩠ᨫᩥᨾᨴᩮᩈᩮᨿᩮᩅ ᨮᨸᩥᨲᩣ ᨸᨬ᩠ᨬᨲ᩠ᨲᩥ ᨸᨴᩮᩈᨸᨬ᩠ᨬᨲ᩠ᨲᩥ. ᨽᩥᨠ᩠ᨡᩪᨶᨬ᩠ᨧᩮᩅ ᨽᩥᨠ᩠ᨡᩩᨶᩦᨶᨬ᩠ᨧ ᩈᩣᨵᩣᩁᨱᨽᩪᨲᩣ ᨸᨬ᩠ᨬᨲ᩠ᨲᩥ ᩈᩣᨵᩣᩁᨱᨸᨬ᩠ᨬᨲ᩠ᨲᩥ. ᩈᩩᨴ᩠ᨵᨽᩥᨠ᩠ᨡᩪᨶᨾᩮᩅ, ᩈᩩᨴ᩠ᨵᨽᩥᨠ᩠ᨡᩩᨶᩦᨶᩴ ᩅᩣ ᨸᨬ᩠ᨬᨲ᩠ᨲᩴ ᩈᩥᨠ᩠ᨡᩣᨸᨴᩴ ᩋᩈᩣᨵᩣᩁᨱᨸᨬ᩠ᨬᨲ᩠ᨲᩥ. ᩏᨽᩥᨶ᩠ᨶᨾ᩠ᨸᩥ ᨸᨬ᩠ᨬᨲ᩠ᨲᩥ ᩏᨽᨲᩮᩣᨸᨬ᩠ᨬᨲ᩠ᨲᩥ. ᩅᩥᨶᨿᨵᩁᨸᨬ᩠ᨧᨾᩮᨶᩣᨲᩥ ᩋᨶᩩᩔᩣᩅᨶᨠᩣᨧᩁᩥᨿᨸᨬ᩠ᨧᨾᩮᨶ. ᨣᩩᨱᨦ᩠ᨣᩩᨱᩪᨸᩣᩉᨶᩣᨲᩥ ᨧᨲᩩᨸ᩠ᨸᨭᩃᨲᩮᩣ ᨸᨭ᩠ᨮᩣᨿ ᨠᨲᩣ ᩏᨸᩣᩉᨶᩣ, ᨶ ᩑᨠᨴ᩠ᩅᩥᨲᩥᨸᨭᩃᩣ. ᨧᨾ᩠ᨾᨲ᩠ᨳᩁᨱᨶ᩠ᨲᩥ ᩋᨲ᩠ᨳᩁᩥᨲᨻ᩠ᨻᩴ ᨧᨾ᩠ᨾᩴ. ᩑᨲᩮᩈᩴ ᩅᩈᩮᨶ ᨧᨲᩩᨻ᩠ᨻᩥᨵᩣ ᨸᨴᩮᩈᨸᨬ᩠ᨬᨲ᩠ᨲᩥ ᨶᩣᨾᩣᨲᩥ ᩑᨲᩮᩈᩴ ᩅᩈᩮᨶ ᨧᨲᩩᨻ᩠ᨻᩥᨵᩣ ᨸᨬ᩠ᨬᨲ᩠ᨲᩥ ᨾᨩ᩠ᨫᩥᨾᨴᩮᩈᩮᨿᩮᩅ ᨸᨬ᩠ᨬᨲ᩠ᨲᩣᨲᩥ ᨸᨴᩮᩈᨸᨬ᩠ᨬᨲ᩠ᨲᩥ ᨶᩣᨾ. ᨲᩮᨶᩮᩅᩣᩉ ‘‘ᨾᨩ᩠ᨫᩥᨾᨴᩮᩈᩮᨿᩮᩅ ᩉᩦ’’ᨲᩥᩌᨴᩥ. ᨿᩈ᩠ᨾᩣ ᨾᨩ᩠ᨫᩥᨾᨴᩮᩈᩮᨿᩮᩅ ᨿᨳᩣᩅᩩᨲ᩠ᨲᩅᨲ᩠ᨳᩩᩅᩦᨲᩥᨠ᩠ᨠᨾᩮ ᩌᨸᨲ᩠ᨲᩥ ᩉᩮᩣᨲᩥ, ᨶ ᨸᨧ᩠ᨧᨶ᩠ᨲᩥᨾᨩᨶᨸᨴᩮ, ᨲᩈ᩠ᨾᩣ ᨸᨴᩮᩈᨸᨬ᩠ᨬᨲ᩠ᨲᩦᨲᩥ ᩋᨲ᩠ᨳᩮᩣ. ᨵᩩᩅᨶ᩠ᩉᩣᨶᩴ ᨸᨭᩥᨠ᩠ᨡᩮᨸᨾᨲ᩠ᨲᨶ᩠ᨲᩥ ᨶᩥᨧ᩠ᨧᨶᩉᩣᨶᨸ᩠ᨸᨭᩥᩈᩮᨵᨶᨾᩮᩅ. ᩑᨲ᩠ᨳ ᨧ ᨾᨲ᩠ᨲᩈᨴ᩠ᨴᩮᨶ ᩋᨬ᩠ᨬᩣᨶᩥ ᨲᩦᨱᩥ ᩈᩥᨠ᩠ᨡᩣᨸᨴᩣᨶᩥ ᨸᨭᩥᨠ᩠ᨡᩥᨸᨲᩥ. ᨲᩣᨶᩥ ᩉᩥ ‘‘ᩋᨶᩩᨩᩣᨶᩣᨾᩥ, ᨽᩥᨠ᩠ᨡᩅᩮ, ᩈᨻ᩠ᨻᨸᨧ᩠ᨧᨶ᩠ᨲᩥᨾᩮᩈᩩ ᨩᨶᨸᨴᩮᩈᩩ ᩅᩥᨶᨿᨵᩁᨸᨬ᩠ᨧᨾᩮᨶ ᨣᨱᩮᨶ ᩏᨸᩈᨾ᩠ᨸᨴ’’ᨶ᩠ᨲᩥᩌᨴᩥᨶᩣ (ᨾᩉᩣᩅ. ᪒᪕᪙) ᨧᨾ᩠ᨾᨠ᩠ᨡᨶ᩠ᨵᨠᩮ ᩌᨣᨲᩣᨶᩥ. ᨲᩮᨶᩮᩅᩣᩉ ‘‘ᨲᨲᩮᩣ ᩋᨬ᩠ᨬᩣ ᨸᨴᩮᩈᨸᨬ᩠ᨬᨲ᩠ᨲᩥ ᨶᩣᨾ ᨶᨲ᩠ᨳᩦ’’ᨲᩥ. ᩈᨻ᩠ᨻᩣᨶᩦᨲᩥ ᨲᨲᩮᩣ ᩋᩅᩈᩮᩈᩣᨶᩥ ᩈᨻ᩠ᨻᩣᨶᩥ ᩈᩥᨠ᩠ᨡᩣᨸᨴᩣᨶᩥ. ᨲᩈ᩠ᨾᩣᨲᩥ ᨿᩈ᩠ᨾᩣ ᩋᨶᩩᨸ᩠ᨸᨶ᩠ᨶᨸᨬ᩠ᨬᨲ᩠ᨲᩥ ᩋᨭ᩠ᨮᨣᩁᩩᨵᨾ᩠ᨾᩅᩈᩮᨶ ᨽᩥᨠ᩠ᨡᩩᨶᩦᨶᩴᨿᩮᩅ ᩌᨣᨲᩣ, ᨿᩈ᩠ᨾᩣ ᨧ ᨵᩩᩅᨶ᩠ᩉᩣᨶᩴ ᨸᨭᩥᨠ᩠ᨡᩮᨸᨾᨲ᩠ᨲᩴ ᨮᨸᩮᨲ᩠ᩅᩣ ᨸᩣᨲᩥᨾᩮᩣᨠ᩠ᨡᩮ ᩈᨻ᩠ᨻᩣᨶᩥ ᩈᩥᨠ᩠ᨡᩣᨸᨴᩣᨶᩥ ᩈᨻ᩠ᨻᨲ᩠ᨳᨸᨬ᩠ᨬᨲ᩠ᨲᩥᨿᩮᩅ ᩉᩮᩣᨶ᩠ᨲᩥ, ᨿᩈ᩠ᨾᩣ ᨧ ᩈᩣᨵᩣᩁᨱᨸᨬ᩠ᨬᨲ᩠ᨲᩥᨴᩩᨠᨬ᩠ᨧ ᩑᨠᨲᩮᩣᨸᨬ᩠ᨬᨲ᩠ᨲᩥᨴᩩᨠᨬ᩠ᨧ ᨻ᩠ᨿᨬ᩠ᨩᨶᨾᨲ᩠ᨲᩴ ᨶᩣᨶᩴ, ᩋᨲ᩠ᨳᨲᩮᩣ ᩑᨠᩴ, ᨲᩈ᩠ᨾᩣ. ᩈᨻ᩠ᨻᨲ᩠ᨳᩣᨲᩥ ᩈᨻ᩠ᨻᩮᩈᩩ ᩈᩥᨠ᩠ᨡᩣᨸᨴᩮᩈᩩ. ᩌᨸᨲ᩠ᨲᩥᨽᩮᨴᩮᩣ ᩉᩮᨲ᩠ᨳ ᩏᨲ᩠ᨲᩁᨸᨴᩃᩮᩣᨸᩮᨶ ‘‘ᩌᨸᨲ᩠ᨲᩦ’’ᨲᩥ ᩅᩩᨲ᩠ᨲᩮᩣᨲᩥ ᩌᩉ ‘‘ᩌᨸᨲ᩠ᨲᩦᨲᩥ ᨸᩩᨻ᩠ᨻᨸ᩠ᨸᨿᩮᩣᨣᩣᨴᩥᩅᩈᩮᨶ ᩌᨸᨲ᩠ᨲᩥᨽᩮᨴᩮᩣ’’ᨲᩥ. ᩈᩦᩃᩌᨧᩣᩁᨴᩥᨭ᩠ᨮᩥᩌᨩᩦᩅᩅᩥᨸᨲ᩠ᨲᩦᨶᨶ᩠ᨲᩥ ᩑᨲ᩠ᨳ ᨸᨮᨾᩣ ᨴ᩠ᩅᩮ ᩌᨸᨲ᩠ᨲᩥᨠ᩠ᨡᨶ᩠ᨵᩣ ᩈᩦᩃᩅᩥᨸᨲ᩠ᨲᩥ ᨶᩣᨾ, ᩋᩅᩈᩮᩈᩣ ᨸᨬ᩠ᨧ ᩌᨧᩣᩁᩅᩥᨸᨲ᩠ᨲᩥ ᨶᩣᨾ, ᨾᩥᨧ᩠ᨨᩣᨴᩥᨭ᩠ᨮᩥ ᨧ ᩋᨶ᩠ᨲᨣ᩠ᨣᩣᩉᩥᨠᩣᨴᩥᨭ᩠ᨮᩥ ᨧ ᨴᩥᨭ᩠ᨮᩥᩅᩥᨸᨲ᩠ᨲᩥ ᨶᩣᨾ, ᩌᨩᩦᩅᩉᩮᨲᩩ ᨸᨬ᩠ᨬᨲ᩠ᨲᩣᨶᩥ ᨨ ᩈᩥᨠ᩠ᨡᩣᨸᨴᩣᨶᩥ ᩌᨩᩦᩅᩅᩥᨸᨲ᩠ᨲᩥ ᨶᩣᨾ, ᩍᨲᩥ ᩍᨾᩣᩈᩴ ᩈᩦᩃᩌᨧᩣᩁᨴᩥᨭ᩠ᨮᩥᩌᨩᩦᩅᩅᩥᨸᨲ᩠ᨲᩦᨶᩴ ᩋᨬ᩠ᨬᨲᩁᩣᨲᩥ ᩋᨲ᩠ᨳᩮᩣ.

ᨶ ᨠᩮᩅᩃᩴ ᨿᨳᩣᩅᩩᨲ᩠ᨲᨶᨿᩮᨶᩮᩅ ᩅᩩᨧ᩠ᨧᨶ᩠ᨲᩦᨲᩥ ᩌᩉ ‘‘ᨿᩣᨶᩥ ᩈᩥᨠ᩠ᨡᩣᨸᨴᩈᨾᩩᨭ᩠ᨮᩣᨶᩣᨶᩦᨲᩥᨸᩥ ᩅᩩᨧ᩠ᨧᨶ᩠ᨲᩦ’’ᨲᩥ. ᩑᨲᩣᨶᩥ ᩉᩥ ᨠᩥᨬ᩠ᨧᩣᨸᩥ ᩌᨸᨲ᩠ᨲᩥᨿᩣ ᩈᨾᩩᨭ᩠ᨮᩣᨶᩣᨶᩥ, ᨶ ᩈᩥᨠ᩠ᨡᩣᨸᨴᩔ, ᩅᩮᩣᩉᩣᩁᩈᩩᨡᨲ᩠ᨳᩴ ᨸᨶᩮᩅᩴ ᩅᩩᨧ᩠ᨧᨶ᩠ᨲᩦᨲᩥ. ᨲᨲ᩠ᨳᩣᨲᩥ ᨲᩮᩈᩩ ᨨᩈᩩ ᩈᨾᩩᨭ᩠ᨮᩣᨶᩮᩈᩩ. ᨲᩮᩈᩪᨲᩥ ᩈᨧᩥᨲ᩠ᨲᨠᩣᨧᩥᨲ᩠ᨲᨠᩮᩈᩩ. ᩑᨠᩴ ᩈᨾᩩᨭ᩠ᨮᩣᨶᩴ ᩏᨸ᩠ᨸᨲ᩠ᨲᩥᨠᩣᩁᨱᩴ ᩑᨲᩥᩔᩣᨲᩥ ᩑᨠᩈᨾᩩᨭ᩠ᨮᩣᨶᩣ, ᩑᨠᩮᨶ ᩅᩣ ᩈᨾᩩᨭ᩠ᨮᩣᨶᩴ ᩑᨲᩥᩔᩣᨲᩥ ᩑᨠᩈᨾᩩᨭ᩠ᨮᩣᨶᩣ. ‘‘ᨴ᩠ᩅᩥᩈᨾᩩᨭ᩠ᨮᩣᨶᩣ’’ᨲᩥᩌᨴᩦᩈᩩᨸᩥ ᩑᩈᩮᩅ ᨶᨿᩮᩣ.

ᩈᨾᩩᨭ᩠ᨮᩣᨶᩅᩈᩮᨶᩣᨲᩥ ᩈᨾᩩᨭ᩠ᨮᩣᨶᩈᩦᩈᩅᩈᩮᨶ. ᨸᨮᨾᨸᩣᩁᩣᨩᩥᨠᩴ ᩈᨾᩩᨭ᩠ᨮᩣᨶᩴ ᩑᨲᩥᩔᩣᨲᩥ ᨸᨮᨾᨸᩣᩁᩣᨩᩥᨠᩈᨾᩩᨭ᩠ᨮᩣᨶᩣ. ᨲᨳᩣ ᩋᨴᩥᨶ᩠ᨶᩣᨴᩣᨶᩈᨾᩩᨭ᩠ᨮᩣᨶᩣ’’ᨲᩥᩌᨴᩦᩈᩩᨸᩥ.

ᩈᨿᩴ ᨸᨳᩅᩥᨡᨱᨶᩮ ᨠᩣᨿᩮᨶ, ᨸᩁᩮ ᩌᨱᩣᨸᩮᨲ᩠ᩅᩣ ᨡᨱᩣᨸᨶᩮ ᩅᩣᨧᩣᨿ ᨧ ᩌᨸᨲ᩠ᨲᩥᩈᨾ᩠ᨽᩅᨲᩮᩣ ‘‘ᨸᨳᩅᩥᨡᨱᨶᩣᨴᩦᩈᩩ ᩅᩥᨿᩣ’’ᨲᩥ ᩅᩩᨲ᩠ᨲᩴ. ᩌᨴᩥᩈᨴ᩠ᨴᩮᨶ ᩋᨴᩥᨶ᩠ᨶᩣᨴᩣᨶᩣᨴᩦᨶᩴ ᨸᩁᩥᨣ᩠ᨣᩉᩮᩣ. ᨸᨮᨾᨠᨳᩥᨶᩣᨸᨲ᩠ᨲᩥ ᨠᩣᨿᩅᩣᨧᨲᩮᩣ ᨠᨲ᩠ᨲᨻ᩠ᨻᩴ ᩋᨵᩥᨭ᩠ᨮᩣᨶᩴ ᩅᩣ ᩅᩥᨠᨸ᩠ᨸᨶᩴ ᩅᩣ ᩋᨠᩁᩮᩣᨶ᩠ᨲᩔ ᩉᩮᩣᨲᩥ, ᨶᩮᩣ ᨠᩁᩮᩣᨶ᩠ᨲᩔᩣᨲᩥ ᩌᩉ ‘‘ᨸᨮᨾᨠᨳᩥᨶᩣᨸᨲ᩠ᨲᩥ ᩅᩥᨿᩣ’’ᨲᩥ. ᩋᨬ᩠ᨬᩣᨲᩥᨠᩣᨿ ᨽᩥᨠ᩠ᨡᩩᨶᩥᨿᩣ ᩉᨲ᩠ᨳᨲᩮᩣ ᨧᩦᩅᩁᨸ᩠ᨸᨭᩥᨣ᩠ᨣᩉᨱᩣᨸᨲ᩠ᨲᩥ ᨲᩔᩣ ᩉᨲ᩠ᨳᨲᩮᩣ ᨧᩦᩅᩁᩴ ᨸᨭᩥᨣ᩠ᨣᨱ᩠ᩉᨶ᩠ᨲᩔ, ᨸᩁᩥᩅᨲ᩠ᨲᨠᩴ ᩋᨴᩮᨶ᩠ᨲᩔ ᨧ ᩉᩮᩣᨲᩦᨲᩥ ᨠᩥᩁᩥᨿᩣᨠᩥᩁᩥᨿᨲᩮᩣ ᩈᨾᩩᨭ᩠ᨮᩣᨲᩥ. ‘‘ᩈᩥᨿᩣ ᨠᩁᩮᩣᨶ᩠ᨲᩔᩣ’’ᨲᩥᩌᨴᩦᩈᩩ ᩈᩥᨿᩣᨲᩥ ‘‘ᩈᩥᨿᩣ ᨡᩮᩣ ᨸᨶ ᨲᩮ ᨻᩕᩣᩉ᩠ᨾᨱ ᩑᩅᨾᩔᩣ’’ᨲᩥᩌᨴᩦᩈᩩ ᩅᩥᨿ ‘‘ᨠᨴᩣᨧᩦ’’ᨲᩥ ᩍᨾᩥᨶᩣ ᩈᨾᩣᨶᨲ᩠ᨳᩮᩣ ᨶᩥᨸᩣᨲᩮᩣ. ᩁᩪᨸᩥᨿᨸ᩠ᨸᨭᩥᨣ᩠ᨣᩉᨱᩣᨸᨲ᩠ᨲᩥ ᩈᩥᨿᩣ ᨠᩥᩁᩥᨿᩣ ᨣᩉᨱᩮᨶ ᩌᨸᨩ᩠ᨩᨶᨲᩮᩣ, ᩈᩥᨿᩣ ᩋᨠᩥᩁᩥᨿᩣ ᨸᨭᩥᨠ᩠ᨡᩮᨸᩔ ᩋᨠᩁᨱᨲᩮᩣᨲᩥ ᩌᩉ ‘‘ᩁᩪᨸᩥᨿᨸ᩠ᨸᨭᩥᨣ᩠ᨣᩉᨱᩣᨸᨲ᩠ᨲᩥ ᩅᩥᨿᩣ’’ᨲᩥ. ᨠᩩᨭᩥᨠᩣᩁᩣᨸᨲ᩠ᨲᩥ ᩅᨲ᩠ᨳᩩᩴ ᨴᩮᩈᩣᨸᩮᨲ᩠ᩅᩣ ᨸᨾᩣᨱᩣᨲᩥᨠ᩠ᨠᨶ᩠ᨲᨠᩁᨱᩮ ᨠᩁᩮᩣᨶ᩠ᨲᩔ ᩈᩥᨿᩣ, ᩋᨴᩮᩈᩣᨸᩮᨲ᩠ᩅᩣ ᨸᨶ ᨸᨾᩣᨱᩣᨲᩥᨠ᩠ᨠᨶ᩠ᨲᨠᩁᨱᩮ ᨸᨾᩣᨱᨿᩩᨲ᩠ᨲᩴ ᩅᩣ ᨠᩁᩮᩣᨶ᩠ᨲᩔ ᨧ ᩋᨠᩁᩮᩣᨶ᩠ᨲᩔ ᨧ ᩈᩥᨿᩣᨲᩥ ᩌᩉ ‘‘ᨠᩩᨭᩥᨠᩣᩁᩣᨸᨲ᩠ᨲᩥ ᩅᩥᨿᩣ’’ᨲᩥ.

ᩈᨬ᩠ᨬᩣᨿ ᩋᨽᩣᩅᩮᨶ ᩅᩥᨾᩮᩣᨠ᩠ᨡᩮᩣ ᩋᩔᩣᨲᩥ ᩈᨬ᩠ᨬᩣᩅᩥᨾᩮᩣᨠ᩠ᨡᩮᩣᨲᩥ ᨾᨩ᩠ᨫᩮᨸᨴᩃᩮᩣᨸᩈᨾᩣᩈᩮᩣ ᨴᨭ᩠ᨮᨻ᩠ᨻᩮᩣᨲᩥ ᩌᩉ ‘‘ᨿᨲᩮᩣ ᩅᩦᨲᩥᨠ᩠ᨠᨾᩈᨬ᩠ᨬᩣᨿᩣ’’ᨲᩥᩌᨴᩥ. ᩍᨲᩁᩣ ᨶᩣᨾ ᨿᨲᩮᩣ ᩅᩦᨲᩥᨠ᩠ᨠᨾᩈᨬ᩠ᨬᩣᨿ ᩋᨽᩣᩅᩮᨶ ᨶ ᨾᩩᨧ᩠ᨧᨲᩥ, ᩈᩣ ᩍᨲᩁᩈᨴ᩠ᨴᩔ ᩅᩩᨲ᩠ᨲᨸ᩠ᨸᨭᩥᨿᩮᩣᨣᩥᩅᩥᩈᨿᨲ᩠ᨲᩣ. ᨿᩣ ᩋᨧᩥᨲ᩠ᨲᨠᩮᨶ ᩅᩣ ᩈᨧᩥᨲ᩠ᨲᨠᨾᩥᩔᨠᩮᨶ ᩅᩣ ᩈᨾᩩᨭ᩠ᨮᩣᨲᩦᨲᩥ ᨿᩣ ᩌᨸᨲ᩠ᨲᩥ ᨠᨴᩣᨧᩥ ᩋᨧᩥᨲ᩠ᨲᨠᩮᨶ ᩅᩣ ᨠᨴᩣᨧᩥ ᩈᨧᩥᨲ᩠ᨲᨠᨾᩥᩔᨠᩮᨶ ᩅᩣ ᩈᨾᩩᨭ᩠ᨮᩣᨶᩮᨶ ᩈᨾᩩᨭ᩠ᨮᩣᨲᩥ. ᩑᨲ᩠ᨳ ᨧ ᩈᨬ᩠ᨬᩣᨴᩩᨠᩴ ᩋᨶᩣᨸᨲ᩠ᨲᩥᨾᩩᨡᩮᨶ ᩅᩩᨲ᩠ᨲᩴ, ᩈᨧᩥᨲ᩠ᨲᨠᨴᩩᨠᩴ ᩌᨸᨲ᩠ᨲᩥᨾᩩᨡᩮᨶᩣᨲᩥ ᨴᨭ᩠ᨮᨻ᩠ᨻᩴ.

ᨿᩔᩣ ᩈᨧᩥᨲ᩠ᨲᨠᨸᨠ᩠ᨡᩮ ᨧᩥᨲ᩠ᨲᩴ ᩋᨠᩩᩈᩃᨾᩮᩅ ᩉᩮᩣᨲᩦᨲᩥ ᨿᩔᩣ ᩈᨧᩥᨲ᩠ᨲᨠᩣᨿ ᩌᨸᨲ᩠ᨲᩥᨿᩣ ᨧᩥᨲ᩠ᨲᩴ ᩋᨠᩩᩈᩃᨾᩮᩅ ᩉᩮᩣᨲᩥ, ᨿᩔᩣ ᨧ ᩈᨧᩥᨲ᩠ᨲᨠᩣᨧᩥᨲ᩠ᨲᨠᩈᨦ᩠ᨡᩣᨲᩣᨿ ᩈᩩᩁᩣᨸᩣᨶᩣᨴᩥᩋᨧᩥᨲ᩠ᨲᨠᩣᨿ ᩌᨸᨲ᩠ᨲᩥᨿᩣ ᩅᨲ᩠ᨳᩩᩅᩥᨩᩣᨶᨶᨧᩥᨲ᩠ᨲᩮᨶ ᩈᨧᩥᨲ᩠ᨲᨠᨸᨠ᩠ᨡᩮ ᨧᩥᨲ᩠ᨲᩴ ᩋᨠᩩᩈᩃᨾᩮᩅ ᩉᩮᩣᨲᩥ, ᩋᨿᩴ ᩃᩮᩣᨠᩅᨩ᩠ᨩᩣ. ‘‘ᩈᨧᩥᨲ᩠ᨲᨠᨸᨠ᩠ᨡᩮ’’ᨲᩥ ᩉᩥ ᩍᨴᩴ ᩅᨧᨶᩴ ᩈᨧᩥᨲ᩠ᨲᨠᩣᨧᩥᨲ᩠ᨲᨠᩴ ᩈᨶ᩠ᨵᩣᨿ ᩅᩩᨲ᩠ᨲᩴ. ᨶ ᩉᩥ ᩑᨠᩴᩈᨲᩮᩣ ᩈᨧᩥᨲ᩠ᨲᨠᩔ ‘‘ᩈᨧᩥᨲ᩠ᨲᨠᨸᨠ᩠ᨡᩮ’’ᨲᩥ ᩅᩥᩈᩮᩈᨶᩮ ᨸᨿᩮᩣᨩᨶᩴ ᩋᨲ᩠ᨳᩦᨲᩥ. ᨿᩴ ᨸᨶᩮᨲ᩠ᨳ ᨣᨱ᩠ᨮᩥᨸᨴᩮ ‘‘ᩈᩩᩁᩣᨸᩣᨶᩈ᩠ᨾᩥᨬ᩠ᩉᩥ ‘ᩈᩩᩁᩣ’ᨲᩥ ᩅᩣ ‘ᨶ ᩅᨭ᩠ᨭᨲᩦ’ᨲᩥ ᩅᩣ ᨩᩣᨶᩥᨲ᩠ᩅᩣ ᨸᩥᩅᨶᩮ ᩋᨠᩩᩈᩃᨾᩮᩅᩣ’’ᨲᩥ ᩅᩩᨲ᩠ᨲᩴ. ᨲᨲ᩠ᨳ ‘‘ᨶ ᩅᨭ᩠ᨭᨲᩦᨲᩥ ᩅᩣ ᨩᩣᨶᩥᨲ᩠ᩅᩣ’’ᨲᩥ ᩅᩩᨲ᩠ᨲᩅᨧᨶᩴ ᨶ ᨿᩩᨩ᩠ᨩᨲᩥ ᨸᨱ᩠ᨱᨲ᩠ᨲᩥᩅᨩ᩠ᨩᩔᩣᨸᩥ ᩃᩮᩣᨠᩅᨩ᩠ᨩᨽᩣᩅᨸ᩠ᨸᩈᨦ᩠ᨣᨲᩮᩣ. ᨿᩔᩣ ᨸᨶ ‘‘ᩈᨧᩥᨲ᩠ᨲᨠᨸᨠ᩠ᨡᩮ ᨧᩥᨲ᩠ᨲᩴ ᩋᨠᩩᩈᩃᨾᩮᩅᩣ’’ᨲᩥ ᨶᩥᨿᨾᩮᩣ ᨶᨲ᩠ᨳᩥ, ᩈᩣ ᨸᨱ᩠ᨱᨲ᩠ᨲᩥᩅᨩ᩠ᨩᩣᨲᩥ ᩍᨾᨾᨲ᩠ᨳᩴ ᨴᩔᩮᨶ᩠ᨲᩮᩣ ᩌᩉ ‘‘ᩈᩮᩈᩣ ᨸᨱ᩠ᨱᨲ᩠ᨲᩥᩅᨩ᩠ᨩᩣ’’ᨲᩥ. ᨲᨳᩣ ᩉᩥ ᨲᩔᩣ ᩅᨲ᩠ᨳᩩᩅᩥᨩᩣᨶᨶᨧᩥᨲ᩠ᨲᩮᨶ ᩈᨧᩥᨲ᩠ᨲᨠᨸᨠ᩠ᨡᩮ ᨧᩥᨲ᩠ᨲᩴ ᩈᩥᨿᩣ ᨠᩩᩈᩃᩴ, ᩈᩥᨿᩣ ᩋᨠᩩᩈᩃᩴ, ᩈᩥᨿᩣ ᩋᨻ᩠ᨿᩣᨠᨲᨶ᩠ᨲᩥ ‘‘ᩋᨠᩩᩈᩃᨾᩮᩅᩣ’’ᨲᩥ ᨶᩥᨿᨾᩮᩣ ᨶᨲ᩠ᨳᩥ. ᩏᨽᨿᨲ᩠ᨳ ᩌᨸᨩ᩠ᨩᩥᨲᨻ᩠ᨻᩣᨲᩥ ᨠᩣᨿᨴ᩠ᩅᩣᩁᩮ, ᩅᨧᩦᨴ᩠ᩅᩣᩁᩮ ᨧᩣᨲᩥ ᩏᨽᨿᨲ᩠ᨳ ᩌᨸᨩ᩠ᨩᩥᨲᨻ᩠ᨻᩣ ᩌᨸᨲ᩠ᨲᩥ, ᨲᩣ ᨸᨶ ᩋᨴᩥᨶ᩠ᨶᩣᨴᩣᨶᩣᨴᨿᩮᩣ. ‘‘ᨾᨶᩮᩣᨴ᩠ᩅᩣᩁᩮ ᩌᨸᨲ᩠ᨲᩥ ᨶᩣᨾ ᨶᨲ᩠ᨳᩦ’’ᨲᩥ ᩍᨴᩴ ᨿᩮᨽᩩᨿ᩠ᨿᩅᩈᩮᨶ ᩅᩩᨲ᩠ᨲᩴ ᩏᨸᨶᩥᨠ᩠ᨡᩥᨲ᩠ᨲᩈᩣᨴᩥᨿᨶᩣᨴᩦᩈᩩ ᩌᨸᨲ᩠ᨲᩥᩈᨾ᩠ᨽᩅᨲᩮᩣᨲᩥ ᨴᨭ᩠ᨮᨻ᩠ᨻᩴ.

ᩋᨠᩩᩈᩃᨧᩥᨲ᩠ᨲᩮᩣ ᩅᩣ ᩌᨸᨩ᩠ᨩᨲᩦᨲᩥ ᨸᩣᩁᩣᨩᩥᨠᩈᩩᨠ᩠ᨠᩅᩥᩈᨭ᩠ᨮᩥᨠᩣᨿᩈᩴᩈᨣ᩠ᨣᨴᩩᨭ᩠ᨮᩩᩃ᩠ᩃᩋᨲ᩠ᨲᨠᩣᨾᨸᩣᩁᩥᨧᩁᩥᨿᨴᩩᨭ᩠ᨮᨴᩮᩣᩈᩈᨦ᩠ᨥᨽᩮᨴᨸ᩠ᨸᩉᩣᩁᨴᩣᨶᨲᩃᩈᨲ᩠ᨲᩥᨠᩣᨴᩥᨽᩮᨴᩴ ᩌᨸᨲ᩠ᨲᩥᩴ ᩋᨠᩩᩈᩃᨧᩥᨲ᩠ᨲᩮᩣ ᩌᨸᨩ᩠ᨩᨲᩥ. ᩋᨶᩩᨸᩈᨾ᩠ᨸᨶ᩠ᨶᩴ ᨸᨴᩈᩮᩣᨵᨾ᩠ᨾᩴ ᩅᩣᨧᩮᨶ᩠ᨲᩮᩣ, ᨾᩣᨲᩩᨣᩣᨾᩔ ᨵᨾ᩠ᨾᩴ ᨴᩮᩈᩮᨶ᩠ᨲᩮᩣᨲᩥ ᩑᩅᩁᩪᨸᩴ ᩌᨸᨲ᩠ᨲᩥᩴ ᨠᩩᩈᩃᨧᩥᨲ᩠ᨲᩮᩣ ᩌᨸᨩ᩠ᨩᨲᩥ. ᩋᩈᨬ᩠ᨧᩥᨧ᩠ᨧᩈᩉᩈᩮᨿ᩠ᨿᩣᨴᩥᩴ ᩋᨻ᩠ᨿᩣᨠᨲᨧᩥᨲ᩠ᨲᩮᩣ ᩌᨸᨩ᩠ᨩᨲᩥ. ᨿᩴ ᩋᩁᩉᩣ ᩌᨸᨩ᩠ᨩᨲᩥ, ᩈᨻ᩠ᨻᩴ ᩋᨻ᩠ᨿᩣᨠᨲᨧᩥᨲ᩠ᨲᩮᩣᩅ ᩌᨸᨩ᩠ᨩᨲᩥ. ᨲᩮᨶᩣᩉ ‘‘ᨠᩩᩈᩃᩣᨻ᩠ᨿᩣᨠᨲᨧᩥᨲ᩠ᨲᩮᩣ ᩅᩣ’’ᨲᩥ.

ᨴᩩᨠ᩠ᨡᩅᩮᨴᨶᩣᩈᨾᨦ᩠ᨣᩦ ᩅᩣᨲᩥ ᨴᩩᨭ᩠ᨮᨴᩮᩣᩈᩣᨴᩥᨽᩮᨴᩴ ᩌᨸᨲ᩠ᨲᩥᩴ ᩌᨸᨩ᩠ᨩᨶ᩠ᨲᩮᩣ ᨴᩩᨠ᩠ᨡᩅᩮᨴᨶᩣᩈᨾᨦ᩠ᨣᩦ ᩌᨸᨩ᩠ᨩᨲᩥ. ᨾᩮᨳᩩᨶᨵᨾ᩠ᨾᩣᨴᩥᨽᩮᨴᩴ ᨸᨶ ᩈᩩᨡᩅᩮᨴᨶᩣᩈᨾᨦ᩠ᨣᩦ ᩌᨸᨩ᩠ᨩᨲᩥ. ᨿᩴ ᩈᩩᨡᩅᩮᨴᨶᩣᩈᨾᨦ᩠ᨣᩦ ᩌᨸᨩ᩠ᨩᨲᩥ, ᨲᩴᨿᩮᩅ ᨾᨩ᩠ᨫᨲ᩠ᨲᩮᩣ ᩉᩩᨲ᩠ᩅᩣ ᩌᨸᨩ᩠ᨩᨶ᩠ᨲᩮᩣ ᩋᨴᩩᨠ᩠ᨡᨾᩈᩩᨡᩅᩮᨴᨶᩣᩈᨾᨦ᩠ᨣᩦ ᩌᨸᨩ᩠ᨩᨲᩥ. ᨲᩮᨶᩣᩉ ‘‘ᩍᨲᩁᩅᩮᨴᨶᩣᨴ᩠ᩅᨿᩈᨾᨦ᩠ᨣᩦ ᩅᩣ’’ᨲᩥ. ᩍᨴᨾ᩠ᨸᩥ ᨧ ᨲᩥᨠᨴ᩠ᩅᨿᩴ ᨿᩮᨽᩩᨿ᩠ᨿᩅᩈᩮᨶᩮᩅ ᩅᩩᨲ᩠ᨲᩴ. ᨶᩥᨸᨩ᩠ᨩᩥᨲ᩠ᩅᩣ ᨶᩥᩁᩮᩣᨵᩈᨾᩣᨸᨶ᩠ᨶᩮᩣ ᩉᩥ ᩋᨧᩥᨲ᩠ᨲᨠᩮᩣ ᩋᩅᩮᨴᨶᩮᩣ ᩈᩉᩈᩮᨿ᩠ᨿᩣᨸᨲ᩠ᨲᩥᩴ ᩌᨸᨩ᩠ᨩᨲᩦᨲᩥ. ᨠᩥᨬ᩠ᨧᩣᨸᩥ ᩑᩅᩴ ᩋᨶᩥᨿᨾᩮᨶ ᩅᩩᨲ᩠ᨲᩴ, ᩅᩥᩈᩮᩈᩮᩣ ᨸᨶᩮᨲ᩠ᨳ ᩋᨲ᩠ᨳᩦᨲᩥ ᨴᩔᩮᨲᩩᩴ ‘‘ᩑᩅᩴ ᩈᨶ᩠ᨲᩮᨸᩦ’’ᨲᩥᩌᨴᩥ ᩅᩩᨲ᩠ᨲᩴ. ᩑᩅᩴ ᩈᨶ᩠ᨲᩮᨸᩦᨲᩥ ᩉᩥ ᩅᩥᩈᩮᩈᩣᨽᩥᨵᩣᨶᨶᩥᨾᩥᨲ᩠ᨲᩣᨽ᩠ᨿᩪᨸᨣᨾᩮᩅ ᨿᩩᨩ᩠ᨩᨲᩥ. ᩈᨻ᩠ᨻᩮᩈᩴ ᩅᩈᩮᨶ ᨲᩦᨱᩥ ᨧᩥᨲ᩠ᨲᩣᨶᩦᨲᩥ ᨠᩩᩈᩃᩣᨠᩩᩈᩃᩣᨻ᩠ᨿᩣᨠᨲᩣᨶᩴ ᩅᩈᩮᨶ ᨸᨴᩈᩮᩣᨵᨾ᩠ᨾᩣᨴᩦᩈᩩ ᨲᩦᨱᩥ ᨧᩥᨲ᩠ᨲᩣᨶᩥ.

ᩍᨴᩣᨶᩥ ᨲᩴ ᨿᨳᩣᩅᩩᨲ᩠ᨲᨶᩥᨴᩣᨶᩣᨴᩥᩅᩮᨴᨶᩣᨲ᩠ᨲᩥᨠᨸᩁᩥᨿᩮᩣᩈᩣᨶᩴ ᩈᨲ᩠ᨲᩁᩈᨸ᩠ᨸᨠᩣᩁᩴ ᩍᨾᩈ᩠ᨾᩥᩴ ᩈᩥᨠ᩠ᨡᩣᨸᨴᩮ ᨿᩮᩣᨩᩮᨲᩩᩴ ‘‘ᩍᨵ ᨸᨶᩣ’’ᨲᩥᩌᨴᩥᨾᩣᩉ. ᩍᨵᩣᨲᩥ ᩍᨾᩈ᩠ᨾᩥᩴ ᨸᨮᨾᨸᩣᩁᩣᨩᩥᨠᩈᩥᨠ᩠ᨡᩣᨸᨴᩮ. ᩅᩮᩈᩣᩃᩥᨿᨶ᩠ᨲᩥ ᩑᩅᩴᨶᩣᨾᨠᩮ ᩍᨲ᩠ᨳᩥᩃᩥᨦ᩠ᨣᩅᩈᩮᨶ ᨸᩅᨲ᩠ᨲᩅᩮᩣᩉᩣᩁᩮ ᨶᨣᩁᩮ. ᨲᨬ᩠ᩉᩥ ᨶᨣᩁᩴ ᨲᩥᨠ᩠ᨡᨲ᩠ᨲᩩᩴ ᨸᩣᨠᩣᩁᨸᩁᩥᨠ᩠ᨡᩮᨸᩅᨯ᩠ᨰᨶᩮᨶ ᩅᩥᩈᩣᩃᩦᨽᩪᨲᨲ᩠ᨲᩣ ‘‘ᩅᩮᩈᩣᩃᩦ’’ᨲᩥ ᩅᩩᨧ᩠ᨧᨲᩥ. ᩍᨴᨾ᩠ᨸᩥ ᨧ ᨶᨣᩁᩴ ᩈᨻ᩠ᨻᨬ᩠ᨬᩩᨲᩴ ᩈᨾ᩠ᨸᨲ᩠ᨲᩮᨿᩮᩅ ᩈᨾ᩠ᨾᩣᩈᨾ᩠ᨻᩩᨴ᩠ᨵᩮ ᩈᨻ᩠ᨻᩣᨠᩣᩁᩅᩮᨸᩩᩃ᩠ᩃᨲ᩠ᨲᩴ ᨸᨲ᩠ᨲᨶ᩠ᨲᩥ ᩅᩮᨴᩥᨲᨻ᩠ᨻᩴ. ‘‘ᩈᩥᨠ᩠ᨡᩴ ᩋᨸᨧ᩠ᨧᨠ᩠ᨡᩣᨿᩣ’’ᨲᩥ ᨧ ‘‘ᩋᨶ᩠ᨲᨾᩈᩮᩣ ᨲᩥᩁᨧ᩠ᨨᩣᨶᨣᨲᩣᨿᨸᩦ’’ᨲᩥ ᨧ ᨴ᩠ᩅᩮ ᩋᨶᩩᨸᨬ᩠ᨬᨲ᩠ᨲᩥᨿᩮᩣᨲᩥ ᨾᨠ᩠ᨠᨭᩥᩅᨩ᩠ᨩᩥᨸᩩᨲ᩠ᨲᨠᩅᨲ᩠ᨳᩪᨶᩴ ᩅᩈᩮᨶ ᩅᩩᨲ᩠ᨲᩣ. ‘‘ᩋᨶ᩠ᨲᨾᩈᩮᩣ ᨲᩥᩁᨧ᩠ᨨᩣᨶᨣᨲᩣᨿᩣ’’ᨲᩥ ᨧ ‘‘ᩈᩥᨠ᩠ᨡᩴ ᩋᨸᨧ᩠ᨧᨠ᩠ᨡᩣᨿᩣ’’ᨲᩥ ᨧ ᩍᨾᩣ ᨴ᩠ᩅᩮ ᩋᨶᩩᨸᨬ᩠ᨬᨲ᩠ᨲᩥᨿᩮᩣ. ᩌᨸᨲ᩠ᨲᩥᨠᩁᩣ ᨧ ᩉᩮᩣᨲᩦᨲᩥ ᨸᨮᨾᨸᨬ᩠ᨬᨲ᩠ᨲᩥᨲᩮᩣ ᩅᩥᩈᩩᩴᨿᩮᩅᩣᨸᨲ᩠ᨲᩥᨠᩁᩣ ᨧ ᩉᩮᩣᨲᩥ. ᩋᨬ᩠ᨬᩅᩣᨴᨠᩈᩥᨠ᩠ᨡᩣᨸᨴᩣᨴᩦᩈᩩ ᩅᩥᨿᩣᨲᩥ ᩋᨬ᩠ᨬᩅᩣᨴᨠᩈᩥᨠ᩠ᨡᩣᨸᨴᩣᨴᩦᩈᩩ ‘‘ᩅᩥᩉᩮᩈᨠᩮ’’ᨲᩥᩌᨴᩥᨠᩣ (ᨸᩣᨧᩥ. ᪙᪘) ᩅᩥᨿᩣᨲᩥ ᩋᨲ᩠ᨳᩮᩣ. ᩌᨴᩥᩈᨴ᩠ᨴᩮᨶ ᩏᨩ᩠ᨫᩣᨸᨶᨠᩔ ᨸᩁᩥᨣ᩠ᨣᩉᩮᩣ. ᩑᨲ᩠ᨳ ᩉᩥ ᩋᨬ᩠ᨬᩅᩣᨴᨠᩣᨴᩥᨲᩮᩣ ᩅᩥᩈᩩᩴᨿᩮᩅ ᩅᩥᩉᩮᩈᨠᩣᨴᩦᩈᩩᨸᩥ ᨸᩣᨧᩥᨲ᩠ᨲᩥᨿᩴ ᩉᩮᩣᨲᩥ. ᨿᨳᩣᩉ ‘‘ᩁᩮᩣᨸᩥᨲᩮ ᩅᩥᩉᩮᩈᨠᩮ ᩈᨦ᩠ᨥᨾᨩ᩠ᨫᩮ ᩅᨲ᩠ᨳᩩᩈ᩠ᨾᩥᩴ ᩅᩣ ᩌᨸᨲ᩠ᨲᩥᨿᩣ ᩅᩣ ᩋᨶᨿᩩᨬ᩠ᨩᩥᨿᨾᩣᨶᩮᩣ ᨲᩴ ᨶᨠᨳᩮᨲᩩᨠᩣᨾᩮᩣ ᨲᩴ ᨶᩏᨣ᩠ᨥᩣᨭᩮᨲᩩᨠᩣᨾᩮᩣ ᨲᩩᨱ᩠ᩉᩦᨽᩪᨲᩮᩣ ᩈᨦ᩠ᨥᩴ ᩅᩥᩉᩮᩈᩮᨲᩥ, ᩌᨸᨲ᩠ᨲᩥ ᨸᩣᨧᩥᨲ᩠ᨲᩥᨿᩔᩣ’’ᨲᩥᩌᨴᩥ (ᨸᩣᩁᩣ. ᪑᪐᪐). ᩈᩩᨸᩥᨶᨶ᩠ᨲᩮ ᩅᩥᨩ᩠ᨩᨾᩣᨶᩣᨸᩥ ᨾᩮᩣᨧᨶᩔᩣᨴᨧᩮᨲᨶᩣ ᩋᨻ᩠ᨻᩮᩣᩉᩣᩁᩥᨠᨲ᩠ᨲᩣ ᩋᨶᩣᨸᨲ᩠ᨲᩥᨠᩁᩣᨲᩥ ᩌᩉ ‘‘ᩋᨬ᩠ᨬᨲᩕ ᩈᩩᨸᩥᨶᨶ᩠ᨲᩣᨲᩥᩌᨴᩥᨠᩣ ᩅᩥᨿᩣ’’ᨲᩥ. ᨲᨳᩣ ᩉᩥ ᨳᩥᨶᨾᩥᨴ᩠ᨵᩮᨶ ᩋᨽᩥᨽᩪᨲᨲ᩠ᨲᩣ ᩈᩩᨸᩥᨶᩮ ᨧᩥᨲ᩠ᨲᩴ ᩋᨻ᩠ᨻᩮᩣᩉᩣᩁᩥᨠᩴ, ᨧᩥᨲ᩠ᨲᩔ ᩋᨻ᩠ᨻᩮᩣᩉᩣᩁᩥᨠᨲ᩠ᨲᩣ ᩒᨸᨠ᩠ᨠᨾᨶᨠᩥᩁᩥᨿᩣᨸᩅᨲ᩠ᨲᨶᩥᨠᩣᨸᩥ ᨧᩮᨲᨶᩣ ᩋᨻ᩠ᨻᩮᩣᩉᩣᩁᩥᨠᩣ. ᩅᩩᨲ᩠ᨲᨬ᩠ᩉᩮᨲᩴ ‘‘ᩋᨲ᩠ᨳᩮᩈᩣ, ᨽᩥᨠ᩠ᨡᩅᩮ, ᨧᩮᨲᨶᩣ, ᩈᩣ ᨧ ᨡᩮᩣ ᩋᨻ᩠ᨻᩮᩣᩉᩣᩁᩥᨠᩣ’’ᨲᩥ (ᨸᩣᩁᩣ. ᪒᪓᪕), ᨲᩈ᩠ᨾᩣ ‘‘ᩋᨬ᩠ᨬᨲᩕ ᩈᩩᨸᩥᨶᨶ᩠ᨲᩣ’’ᨲᩥ ᩋᨿᩴ ᩋᨶᩩᨸᨬ᩠ᨬᨲ᩠ᨲᩥ ᩋᨶᩣᨸᨲ᩠ᨲᩥᨠᩁᩣ ᨩᩣᨲᩣ. ᩌᨴᩥᩈᨴ᩠ᨴᩮᨶ ‘‘ᩋᨬ᩠ᨬᨲᩕ ᩋᨵᩥᨾᩣᨶᩣ’’ᨲᩥᩌᨴᩥᨠᩴ (ᨸᩣᩁᩣ. ᪑᪙᪗) ᩈᨦ᩠ᨣᨱ᩠ᩉᩣᨲᩥ. ᩋᨴᩥᨶ᩠ᨶᩣᨴᩣᨶᩣᨴᩦᩈᩩ ᩅᩥᨿᩣᨲᩥ ᩋᨴᩥᨶ᩠ᨶᩣᨴᩣᨶᩣᨴᩦᩈᩩ ‘‘ᩋᩁᨬ᩠ᨬᩣ ᩅᩣ’’ᨲᩥᩌᨴᩥᨠᩣ (ᨸᩣᩁᩣ. ᪙᪑) ᩅᩥᨿᩣᨲᩥ ᩋᨲ᩠ᨳᩮᩣ. ᩑᨲ᩠ᨳ ᨸᨶ ᩌᨴᩥᩈᨴ᩠ᨴᩮᨶ ᨸᨮᨾᨸᩣᩁᩣᨩᩥᨠᩣᨴᩦᨶᩴ ᩈᨦ᩠ᨣᩉᩮᩣ. ᩑᨲ᩠ᨳ ᩉᩥ ‘‘ᨲᨬ᩠ᨧ ᨡᩮᩣ ᨣᩣᨾᩮ, ᨶᩮᩣ ᩋᩁᨬ᩠ᨬᩮ’’ᨲᩥᩌᨴᩥᨶᩣ (ᨸᩣᩁᩣ. ᪙᪐) ᨶᨿᩮᨶ ᩃᩮᩈᩴ ᩒᨯ᩠ᨯᩮᨶ᩠ᨲᩣᨶᩴ ᩃᩮᩈᨸᩥᨴᩉᨶᨲ᩠ᨳᩴ ‘‘ᩋᩁᨬ᩠ᨬᩣ ᩅᩣ’’ᨲᩥᩌᨴᩥᨠᩣ ᩋᨶᩩᨸᨬ᩠ᨬᨲ᩠ᨲᩥ ᩅᩩᨲ᩠ᨲᩣᨲᩥ ᩏᨸᨲ᩠ᨳᨾ᩠ᨽᨠᩁᩣᩅ ᩉᩮᩣᨲᩥ. ᨲᩮᨶᩮᩅ ᩉᩥ ‘‘ᨶᨶᩩ, ᩌᩅᩩᩈᩮᩣ, ᨲᨳᩮᩅᩮᨲᩴ ᩉᩮᩣᨲᩦ’’ᨲᩥ (ᨸᩣᩁᩣ. ᪙᪐) ᨽᩥᨠ᩠ᨡᩪᩉᩥ ᩅᩩᨲ᩠ᨲᩴ.

ᩅᩩᨲ᩠ᨲᨸ᩠ᨸᨠᩣᩁᩮ ᨾᨣ᩠ᨣᩮᨲᩥ ‘‘ᨾᨶᩩᩔᩣᨾᨶᩩᩔᨲᩥᩁᨧ᩠ᨨᩣᨶᨣᨲᩅᩈᩮᨶᩣ’’ᨲᩥᩌᨴᩥᨶᩣ (ᨠᨦ᩠ᨡᩣ. ᩋᨭ᩠ᨮ. ᨸᨮᨾᨸᩣᩁᩣᨩᩥᨠᩅᨱ᩠ᨱᨶᩣ) ᩅᩩᨲ᩠ᨲᨸ᩠ᨸᨠᩣᩁᩮ ᨲᩥᩴᩈᨾᨣ᩠ᨣᩮ. ᩍᨾᩔ ᨸᨶ ‘‘ᨨᩥᨶ᩠ᨶᩮ’’ᨲᩥ ᩍᨾᩥᨶᩣ ᩈᨾ᩠ᨻᨶ᩠ᨵᩮᩣ. ᨲᨧᩣᨴᩦᨶᩥ ᩋᨶᩅᩈᩮᩈᩮᨲ᩠ᩅᩣᨲᩥ ᨶᩥᨾᩥᨲ᩠ᨲᨸ᩠ᨸᨴᩮᩈᩮ ᨻᩉᩥ ᨮᩥᨲᩣᨶᩥ ᨨᩅᩥᨧᨾ᩠ᨾᩣᨶᩥ ᩋᨶᩅᩈᩮᩈᩮᨲ᩠ᩅᩣ. ᨶᩥᨾᩥᨲ᩠ᨲᩈᨱ᩠ᨮᩣᨶᨾᨲ᩠ᨲᩴ ᨸᨬ᩠ᨬᩣᨿᨲᩦᨲᩥ ᨶᩥᨾᩥᨲ᩠ᨲᨾᩴᩈᩔ ᨸᨶ ᩋᨻ᩠ᨽᨶ᩠ᨲᩁᩮ ᨨᩅᩥᨧᨾ᩠ᨾᩔ ᨧ ᩅᩥᨩ᩠ᨩᨾᩣᨶᨲ᩠ᨲᩣ ᩅᩩᨲ᩠ᨲᩴ. ᨧᨾ᩠ᨾᨡᩥᩃᨶ᩠ᨲᩥ ᨧᨾ᩠ᨾᨠ᩠ᨡᨱ᩠ᨯᩴ. ‘‘ᩏᨱ᩠ᨱᩥᨣᨱ᩠ᨯᩮᩣ’’ᨲᩥᨸᩥ (ᩈᩣᩁᨲ᩠ᨳ. ᨭᩦ. ᪒.᪕᪕; ᩅᩥ. ᩅᩥ. ᨭᩦ. ᪑.᪕᪕) ᩅᨴᨶ᩠ᨲᩥ. ᨲᨬ᩠ᩉᩥ ᨶᩥᨾᩥᨲ᩠ᨲᩮ ᨩᩣᨲᨲ᩠ᨲᩣ ᨶᩥᨾᩥᨲ᩠ᨲᨾᩮᩅ. ᨲᩮᨶᩣᩉ ‘‘ᩈᩮᩅᨶᨧᩥᨲ᩠ᨲᩮ ᩈᨲᩥ ᨸᩣᩁᩣᨩᩥᨠ’’ᨶ᩠ᨲᩥ. ᩈᩮᩅᨶᨧᩥᨲ᩠ᨲᩮᨲᩥ ᨾᩮᨳᩩᨶᩈᩮᩅᨶᨧᩥᨲ᩠ᨲᩮ. ᨠᩣᨿᩈᩴᩈᨣ᩠ᨣᩈᩮᩅᨶᨧᩥᨲ᩠ᨲᩮ ᨸᨶ ᩈᨲᩥ ᩈᨦ᩠ᨥᩣᨴᩥᩈᩮᩈᩮᩣᩅ. ᨶᨭ᩠ᨮᩮᩣ ᨠᩣᨿᨸ᩠ᨸᩈᩣᨴᩮᩣ ᩑᨲ᩠ᨳᩣᨲᩥ ᨶᨭ᩠ᨮᨠᩣᨿᨸ᩠ᨸᩈᩣᨴᩴ, ᩈᩩᨠ᩠ᨡᨸᩦᩊᨠᩴ ᩅᩣ ᨾᨲᨧᨾ᩠ᨾᩴ ᩅᩣᨲᩥ ᩋᨲ᩠ᨳᩮᩣ. ᨾᨲᩮ ᩋᨠ᩠ᨡᩣᨿᩥᨲᩮ, ᨿᩮᨽᩩᨿ᩠ᨿᩮᨶ ᩋᨠ᩠ᨡᩣᨿᩥᨲᩮ ᨧ ᨸᩣᩁᩣᨩᩥᨠᩣᨸᨲ᩠ᨲᩥᩅᨧᨶᨲᩮᩣ (ᨸᩣᩁᩣ. ᪖᪑) ᨸᨶ ᨶᨭ᩠ᨮᨠᩣᨿᨸ᩠ᨸᩈᩣᨴᩮᨸᩥ ᩍᨲ᩠ᨳᩥᨶᩥᨾᩥᨲ᩠ᨲᩮ ᨸᩅᩮᩈᩮᨶ᩠ᨲᩔ ᨸᩣᩁᩣᨩᩥᨠᩣᨸᨲ᩠ᨲᩥᨿᩮᩅ. ᨶᩥᨾᩥᨲ᩠ᨲᩈᨱ᩠ᨮᩣᨶᨾᨲ᩠ᨲᨾ᩠ᨸᩥ ᩋᨶᩅᩈᩮᩈᩮᨲ᩠ᩅᩣᨲᩥ ᨶᩥᨾᩥᨲ᩠ᨲᩣᨠᩣᩁᩮᨶ ᨮᩥᨲᩴ ᨿᨳᩣᩅᩩᨲ᩠ᨲᨶᩥᨾᩥᨲ᩠ᨲᨾᩴᩈᩣᨴᩥᨾ᩠ᨸᩥ ᩋᨶᩅᩈᩮᩈᩮᨲ᩠ᩅᩣ. ᩅᨱᩈᨦ᩠ᨡᩮᨸᩅᩈᩮᨶᩣᨲᩥ ᩅᨱᩈᨦ᩠ᨣᩉᩅᩈᩮᨶ. ᩅᨱᩮ ᨳᩩᩃ᩠ᩃᨧ᩠ᨧᨿᨬ᩠ᨧ ‘‘ᩋᨾᨣ᩠ᨣᩮᨶ ᩋᨾᨣ᩠ᨣᩴ ᨸᩅᩮᩈᩮᨲᩥ, ᩌᨸᨲ᩠ᨲᩥ ᨳᩩᩃ᩠ᩃᨧ᩠ᨧᨿᩔᩣ’’ᨲᩥ (ᨸᩣᩁᩣ. ᪖᪖) ᩍᨾᩔ ᩈᩩᨲ᩠ᨲᩔ ᩅᩈᩮᨶ ᩅᩮᨴᩥᨲᨻ᩠ᨻᩴ. ᨲᩈ᩠ᨾᩥᨬ᩠ᩉᩥ ᩈᩩᨲ᩠ᨲᩮ ᨴ᩠ᩅᩦᩈᩩ ᩈᨾ᩠ᨽᩥᨶ᩠ᨶᩅᨱᩮᩈᩩ ᩑᨠᩮᨶ ᩅᨱᩮᨶ ᨸᩅᩮᩈᩮᨲ᩠ᩅᩣ ᨴᩩᨲᩥᨿᩮᨶ ᨶᩦᩉᩁᨶ᩠ᨲᩔ ᨳᩩᩃ᩠ᩃᨧ᩠ᨧᨿᩴ ᩅᩩᨲ᩠ᨲᩴ. ᩅᩩᨲ᩠ᨲᨬ᩠ᩉᩥ ᩈᨾᨶ᩠ᨲᨸᩣᩈᩣᨴᩥᨠᩣᨿᩴ ‘‘ᩍᨾᩔ ᩈᨲ᩠ᨲᩔ ᩋᨶᩩᩃᩮᩣᨾᩅᩈᩮᨶ ᩈᨻ᩠ᨻᨲ᩠ᨳ ᩅᨱᩈᨦ᩠ᨡᩮᨸᩮ ᨳᩩᩃ᩠ᩃᨧ᩠ᨧᨿᩴ ᩅᩮᨴᩥᨲᨻ᩠ᨻ’’ᨶ᩠ᨲᩥ (ᨸᩣᩁᩣ. ᩋᨭ᩠ᨮ. ᪑.᪖᪖). ᨾᨶᩩᩔᩣᨶᩴ ᨸᨶ ᩋᨠ᩠ᨡᩥᩌᨴᨿᩮᩣᨸᩥ ᩅᨱᩈᨦ᩠ᨣᩉᩴ ᨣᨧ᩠ᨨᨶ᩠ᨲᩦᨲᩥ ᩅᨱᩮᨶ ᩑᨠᨸᩁᩥᨧ᩠ᨨᩮᨴᩴ ᨠᨲ᩠ᩅᩣ ᨴᩔᩮᨶ᩠ᨲᩮᩣ ‘‘ᨲᨳᩣ’’ᨲᩥᩌᨴᩥᨾᩣᩉ. ᨲᩮᩈᩴ ᩅᨱᩈᨦ᩠ᨣᩉᩮᩣ ‘‘ᨶᩅᨴ᩠ᩅᩣᩁᩮᩣ ᨾᩉᩣᩅᨱᩮᩣ’’ᨲᩥ (ᨾᩥ. ᨸ. ᪒.᪖.᪑) ᩑᩅᨾᩣᨴᩥᩈᩩᨲ᩠ᨲᩣᨶᩩᩈᩣᩁᩮᨶ ᩅᩮᨴᩥᨲᨻ᩠ᨻᩮᩣ. ᨲᨲ᩠ᨳ ᨾᨶᩩᩔᩣᨶᨶ᩠ᨲᩥ ᩍᨲ᩠ᨳᩥᨸᩩᩁᩥᩈᨸᨱ᩠ᨯᨠᩏᨽᨲᩮᩣᨻ᩠ᨿᨬ᩠ᨩᨶᨠᩅᩈᩮᨶ ᨧᨲᩩᨻ᩠ᨻᩥᨵᩣᨶᩴ ᨾᨶᩩᩔᩣᨶᩴ. ᩅᨲ᩠ᨳᩥᨠᩮᩣᩈᩮᩈᩪᨲᩥ ᩅᨲ᩠ᨳᩥᨸᩩᨭᩮᩈᩩ ᨸᩩᩁᩥᩈᩣᨶᩴ ᩋᨦ᩠ᨣᨩᩣᨲᨠᩮᩣᩈᩮᩈᩩ. ᩉᨲ᩠ᨳᩥᩋᩔᩣᨴᩦᨶᨬ᩠ᨧ ᨲᩥᩁᨧ᩠ᨨᩣᨶᩣᨶᨶ᩠ᨲᩥ ᩉᨲ᩠ᨳᩥᩋᩔᨣᩮᩣᨱᨣᨴᩕᨽᩒᨭ᩠ᨮᨾᩉᩥᩴᩈᩣᨴᩦᨶᩴ ᨲᩥᩁᨧ᩠ᨨᩣᨶᨣᨲᩣᨶᩴ. ᨲᩥᩁᨧ᩠ᨨᩣᨶᩣᨶᩴ ᨸᨶᩣᨲᩥ ᩈᨻ᩠ᨻᩮᩈᨾ᩠ᨸᩥ ᨲᩥᩁᨧ᩠ᨨᩣᨶᨣᨲᩣᨶᩴ. ᩈᨻ᩠ᨻᩮᩈᨶ᩠ᨲᩥ ᨿᨳᩣᩅᩩᨲ᩠ᨲᨾᨶᩩᩔᩣᨴᩦᨶᩴ ᩈᨻ᩠ᨻᩮᩈᩴ.

ᩑᩅᩴ ᨩᩦᩅᨾᩣᨶᨠᩈᩁᩦᩁᩮ ᩃᨻ᩠ᨽᨾᩣᨶᩴ ᩌᨸᨲ᩠ᨲᩥᩅᩥᩈᩮᩈᩴ ᨴᩔᩮᨲ᩠ᩅᩣ ᩍᨴᩣᨶᩥ ᨾᨲᩈᩁᩦᩁᩮ ᩃᨻ᩠ᨽᨾᩣᨶᩴ ᩌᨸᨲ᩠ᨲᩥᩅᩥᩈᩮᩈᩴ ᨴᩔᩮᨲᩩᩴ ‘‘ᨾᨲᩈᩁᩦᩁᩮ’’ᨲᩥᩌᨴᩥᨾᩣᩉ. ᩅᨧ᩠ᨧᨾᨣ᩠ᨣᨸᩔᩣᩅᨾᨣ᩠ᨣᨾᩩᨡᨾᨣ᩠ᨣᩣᨶᩴ ᨧᨲᩪᩈᩩ ᨠᩮᩣᨭ᩠ᨮᩣᩈᩮᩈᩩ ᨴ᩠ᩅᩮ ᨠᩮᩣᨭ᩠ᨮᩣᩈᩮ ᨮᨸᩮᨲ᩠ᩅᩣ ᨿᨴᩣ ᩋᨸᩁᩮ ᨴ᩠ᩅᩮ ᨠᩮᩣᨭ᩠ᨮᩣᩈᩣ ᨡᩣᨴᩥᨲᩣ, ᨲᨴᩣ ᩏᨸᨯ᩠ᨰᨠ᩠ᨡᩣᨿᩥᨲᩴ ᨶᩣᨾ ᩉᩮᩣᨲᩥ. ᨶ ᨠᩩᨳᩥᨲᩴ ᩉᩮᩣᨲᩦᨲᩥ ᩏᨴ᩠ᨵᩩᨾᩣᨲᨠᩣᨴᩥᨽᩣᩅᩮᨶ ᨠᩩᨳᩥᨲᩴ ᨶ ᩉᩮᩣᨲᩥ, ᩋᩃ᩠ᩃᨶ᩠ᨲᩥ ᩋᨲ᩠ᨳᩮᩣ. ᨿᨴᩣ ᨸᨶ ᩈᩁᩦᩁᩴ ᩏᨴ᩠ᨵᩩᨾᩣᨲᨠᩴ ᩉᩮᩣᨲᩥ ᨠᩩᨳᩥᨲᩴ ᨶᩦᩃᨾᨠ᩠ᨡᩥᨠᩈᨾᩣᨠᩥᨱ᩠ᨱᩴ ᨠᩥᨾᩥᨠᩩᩃᩈᨾᩣᨠᩩᩃᩴ ᨶᩅᩉᩥ ᩅᨱᨾᩩᨡᩮᩉᩥ ᨸᨣ᩠ᨣᩊᩥᨲᨸᩩᨻ᩠ᨻᨠᩩᨱᨸᨽᩣᩅᩮᨶ ᩏᨸᨣᨶ᩠ᨲᩩᨾ᩠ᨸᩥ ᩋᩈᨠ᩠ᨠᩩᨱᩮᨿ᩠ᨿᩴ (ᨸᩣᩁᩣ. ᩋᨭ᩠ᨮ. ᪑.᪕᪙-᪖᪐), ᨲᨴᩣ ᨸᩣᩁᩣᨩᩥᨠᩅᨲ᩠ᨳᩩᨬ᩠ᨧ ᨳᩩᩃ᩠ᩃᨧ᩠ᨧᨿᩅᨲ᩠ᨳᩩᨬ᩠ᨧ ᩅᩥᨩᩉᨲᩥ, ᨴᩩᨠ᩠ᨠᨭᩅᨲ᩠ᨳᩩᨾᩮᩅ ᩉᩮᩣᨲᩦᨲᩥ ᩌᩉ ‘‘ᨠᩩᨳᩥᨲᩮ ᨴᩩᨠ᩠ᨠᨭ’’ᨶ᩠ᨲᩥ. ᨠᩩᨳᩥᨲᩮᨲᩥ ᩏᨴ᩠ᨵᩩᨾᩣᨲᨠᨽᩣᩅᨸ᩠ᨸᨲ᩠ᨲᩮ. ᩎᨴᩥᩈᩮ ᩉᩥ ᩈᩁᩦᩁᩮ ᨿᨲ᩠ᨳ ᨠᨲ᩠ᨳᨧᩥ ᩏᨸᨠ᩠ᨠᨾᨲᩮᩣ ᨴᩩᨠ᩠ᨠᨭᩴ. ᨲᨳᩣ ᩅᨭ᩠ᨭᨠᨲᩮ ᨾᩩᨡᩮ ᩋᨧ᩠ᨨᩩᨸᨶ᩠ᨲᩴ ᩋᨦ᩠ᨣᨩᩣᨲᩴ ᨸᩅᩮᩈᩮᨶ᩠ᨲᩔᩣᨲᩥ (ᨸᩣᩁᩣ. ᩋᨭ᩠ᨮ. ᪑.᪗᪓) ᩅᩥᩅᨭ᩠ᨭᩮ ᨾᩩᨡᩮ ᨧᨲ᩠ᨲᩣᩁᩥ ᨸᩔᩣᨶᩥ, ᨲᩣᩃᩩᨠᨬ᩠ᨧ ᩋᨸ᩠ᨹᩩᩈᨶ᩠ᨲᩴ ᩋᨦ᩠ᨣᨩᩣᨲᩴ ᨸᩅᩮᩈᩮᨶ᩠ᨲᩔ ᨴᩩᨠ᩠ᨠᨭᨶ᩠ᨲᩥ ᩋᨲ᩠ᨳᩮᩣ. ᩈᨧᩮ ᨸᨶ ᩉᩮᨭ᩠ᨮᩣ ᩅᩣ ᩏᨸᩁᩥ ᩅᩣ ᩏᨽᨿᨸᩔᩮᩉᩥ ᩅᩣ ᨨᩩᨸᨶ᩠ᨲᩴ ᨸᩅᩮᩈᩮᨲᩥ, ᨸᩣᩁᩣᨩᩥᨠᩴ. ᨧᨲᩪᩉᩥ ᨸᩔᩮᩉᩥ ᩋᨧ᩠ᨨᩩᨸᨶ᩠ᨲᩴ ᨸᩅᩮᩈᩮᨲ᩠ᩅᩣ ᩋᨻ᩠ᨽᨶ᩠ᨲᩁᩮ ᨲᩣᩃᩩᨠᩴ ᨨᩩᨸᨲᩥ, ᨸᩣᩁᩣᨩᩥᨠᨾᩮᩅ. ᨻᩉᩥ ᨶᩥᨠ᩠ᨡᨶ᩠ᨲᨩᩥᩅ᩠ᩉᩣᨿ ᩅᩣ ᨴᨶ᩠ᨲᩮᩈᩩ ᩅᩣ ᩋᨦ᩠ᨣᨩᩣᨲᩴ ᨸᩅᩮᩈᩮᨶ᩠ᨲᩔ ᨳᩩᩃ᩠ᩃᨧ᩠ᨧᨿᨶ᩠ᨲᩥ ᩈᨾ᩠ᨻᨶ᩠ᨵᩮᩣ. ᨩᩦᩅᨾᩣᨶᨠᩈᩁᩦᩁᩮᨸᩥ ᨻᩉᩥ ᨶᩥᨠ᩠ᨡᨶ᩠ᨲᨩᩥᩅ᩠ᩉᩣᨿ ᨳᩩᩃ᩠ᩃᨧ᩠ᨧᨿᨾᩮᩅ. ᨿᨴᩥ ᨸᨶ ᨻᩉᩥ ᨩᩥᩅ᩠ᩉᩣᨿ ᨸᩃᩥᩅᩮᨮᩮᨲ᩠ᩅᩣ ᩋᨶ᩠ᨲᩮᩣᨾᩩᨡᩴ ᨸᩅᩮᩈᩮᨲᩥ, ᨸᩣᩁᩣᨩᩥᨠᨾᩮᩅ. ᨿᨴᩥ ᨸᨶ ᨴᨶ᩠ᨲᩣ ᩈᩩᨹᩩᩈᩥᨲᩣ, ᩋᨶ᩠ᨲᩮᩣᨾᩩᨡᩮ ᩒᨠᩣᩈᩮᩣ ᨶᨲ᩠ᨳᩥ, ᨴᨶ᩠ᨲᩣ ᨧ ᨻᩉᩥ ᩒᨭ᩠ᨮᨾᩴᩈᩮᨶ ᨸᨭᩥᨧ᩠ᨨᨶ᩠ᨶᩣ, ᨲᨲ᩠ᨳ ᩅᩣᨲᩮᨶ ᩋᩈᨾ᩠ᨹᩩᨭ᩠ᨮᩴ ᩋᩃ᩠ᩃᩮᩣᨠᩣᩈᩴ ᨲᩥᩃᨹᩃᨾᨲ᩠ᨲᨾ᩠ᨸᩥ ᨸᩅᩮᩈᩮᨶ᩠ᨲᩔ ᨸᩣᩁᩣᨩᩥᨠᨾᩮᩅ. ᩏᨸ᩠ᨸᩣᨭᩥᨲᩮ ᨸᨶ ᩒᨭ᩠ᨮᨾᩴᩈᩮ ᨴᨶ᩠ᨲᩮᩈᩩᨿᩮᩅ ᩏᨸᨠ᩠ᨠᨾᨶ᩠ᨲᩔ ᨳᩩᩃ᩠ᩃᨧ᩠ᨧᨿᩴ. ᨿᩮᩣᨸᩥ ᨴᨶ᩠ᨲᩮᩣ ᨻᩉᩥ ᨶᩥᨠ᩠ᨡᨾᨶ᩠ᨲᩮᩣ ᨲᩥᨭ᩠ᨮᨲᩥ, ᨶ ᩈᨠ᩠ᨠᩣ ᩒᨭ᩠ᨮᩮᩉᩥ ᨸᩥᨴᩉᩥᨲᩩᩴ, ᨲᨲ᩠ᨳᩣᨸᩥ ᩑᩈᩮᩅ ᨶᨿᩮᩣ.

ᩅᩮᨴᨶᩣᨿ ᩋᨭ᩠ᨭᩮᩣ ᨸᩦᩊᩥᨲᩮᩣ ᩅᩮᨴᨶᩣᨭ᩠ᨭᩮᩣ. ᩏᨾ᩠ᨾᨲ᩠ᨲᨠᩮᩣᨲᩥ ᨧᩮᨲ᩠ᨳ ᨸᩥᨲ᩠ᨲᩩᨾ᩠ᨾᨲ᩠ᨲᨠᩮᩣ ᩋᨵᩥᨸ᩠ᨸᩮᨲᩮᩣᨲᩥ ᩌᩉ ‘‘ᨿᩮᩣ ᨸᩥᨲ᩠ᨲᩅᩈᩮᨶᩣ’’ᨲᩥᩌᨴᩥ. ᨸᩥᨲ᩠ᨲᩅᩈᩮᨶᩣᨲᩥ ᨻᨴ᩠ᨵᨸᩥᨲ᩠ᨲᩅᩈᩮᨶ. ᨲᩈ᩠ᨾᩥᨬ᩠ᩉᩥ ᨻᨴ᩠ᨵᨸᩥᨲ᩠ᨲᩮ ᨸᩥᨲ᩠ᨲᨠᩮᩣᩈᨲᩮᩣ ᨧᩃᩥᨲ᩠ᩅᩣ ᨻᩉᩥ ᨶᩥᨠ᩠ᨡᨾᨶ᩠ᨲᩮ ᩈᨲ᩠ᨲᩣ ᩏᨾ᩠ᨾᨲ᩠ᨲᨠᩣ ᩉᩮᩣᨶ᩠ᨲᩥ, ᩅᩥᨸᩃ᩠ᩃᨲ᩠ᨳᩈᨬ᩠ᨬᩣ ᩉᩥᩁᩮᩣᨲ᩠ᨲᨸ᩠ᨸᩴ ᨨᨯ᩠ᨯᩮᨲ᩠ᩅᩣ ᩋᩈᩣᩁᩩᨸ᩠ᨸᨧᩁᩥᨿᩴ ᨧᩁᨶ᩠ᨲᩥ, ᩃᩉᩩᨠᨣᩁᩩᨠᩣᨶᩥ ᩈᩥᨠ᩠ᨡᩣᨸᨴᩣᨶᩥ ᨾᨴ᩠ᨴᨶ᩠ᨲᩣᨸᩥ ᨶ ᨩᩣᨶᨶ᩠ᨲᩥ, ᨽᩮᩈᨩ᩠ᨩᨠᩥᩁᩥᨿᩣᨿᨸᩥ ᩋᨲᩮᨠᩥᨧ᩠ᨨᩣ ᩉᩮᩣᨶ᩠ᨲᩥ, ᩑᩅᩁᩪᨸᩔ ᩏᨾ᩠ᨾᨲ᩠ᨲᨠᩔ ᩋᨶᩣᨸᨲ᩠ᨲᩥ. ᩋᨻᨴ᩠ᨵᨸᩥᨲ᩠ᨲᩴ ᨸᨶ ᩃᩮᩣᩉᩥᨲᩴ ᩅᩥᨿ ᩈᨻ᩠ᨻᨦ᩠ᨣᨣᨲᩴ, ᨲᨾ᩠ᩉᩥ ᨠᩩᨸᩥᨲᩮ ᩈᨲ᩠ᨲᩣᨶᩴ ᨠᨱ᩠ᨯᩩᨠᨧ᩠ᨨᩩᩈᩁᩦᩁᨠᨾ᩠ᨸᩣᨴᩦᨶᩥ ᩉᩮᩣᨶ᩠ᨲᩥ, ᨲᩣᨶᩥ ᨽᩮᩈᨩ᩠ᨩᨠᩥᩁᩥᨿᩣᨿ ᩅᩪᨸᩈᨾᨶ᩠ᨲᩥ. ᨲᩮᨶ ᩅᩩᨲ᩠ᨲᩴ ‘‘ᨻᨴ᩠ᨵᨸᩥᨲ᩠ᨲᩅᩈᩮᨶᩣ’’ᨲᩥ. ᨡᩥᨲ᩠ᨲᨧᩥᨲ᩠ᨲᩮᩣ ᨶᩣᨾ ᩅᩥᩔᨭ᩠ᨮᨧᩥᨲ᩠ᨲᩮᩣ ᨿᨠ᩠ᨡᩩᨾ᩠ᨾᨲ᩠ᨲᨠᩮᩣ ᩅᩩᨧ᩠ᨧᨲᩦᨲᩥ ᩌᩉ ‘‘ᨿᨠ᩠ᨡᩮᩉᩥ ᨠᨲᨧᩥᨲ᩠ᨲᩅᩥᨠ᩠ᨡᩮᨸᩮᩣ ᨡᩥᨲ᩠ᨲᨧᩥᨲ᩠ᨲᩮᩣ’’ᨲᩥ. ᨿᨠ᩠ᨡᩣ ᨠᩥᩁ ᨽᩮᩁᩅᩣᨶᩥ ᩌᩁᨾ᩠ᨾᨱᩣᨶᩥ ᨴᩔᩮᨲ᩠ᩅᩣ ᨾᩩᨡᩮᨶ ᩉᨲ᩠ᨳᩴ ᨸᩅᩮᩈᩮᨲ᩠ᩅᩣ, ᩉᨴᨿᩁᩪᨸᩴ ᩅᩣ ᨾᨴ᩠ᨴᨶ᩠ᨲᩣ ᩈᨲ᩠ᨲᩮ ᩅᩥᨠ᩠ᨡᩥᨲ᩠ᨲᨧᩥᨲ᩠ᨲᩮ ᩅᩥᨸᩃ᩠ᩃᨲ᩠ᨳᩈᨬ᩠ᨬᩮ ᨠᩁᩮᩣᨶ᩠ᨲᩥ, ᩑᩅᩁᩪᨸᩔ ᨡᩥᨲ᩠ᨲᨧᩥᨲ᩠ᨲᩔ ᩋᨶᩣᨸᨲ᩠ᨲᩥ. ᨲᩮᩈᩴ ᨸᨶ ᩏᨽᩥᨶ᩠ᨶᩴ ᩋᨿᩴ ᩅᩥᩈᩮᩈᩮᩣ – ᨸᩥᨲ᩠ᨲᩩᨾ᩠ᨾᨲ᩠ᨲᨠᩮᩣ ᨶᩥᨧ᩠ᨧᨾᩮᩅ ᩏᨾ᩠ᨾᨲ᩠ᨲᨠᩮᩣ ᩉᩮᩣᨲᩥ, ᨸᨠᨲᩥᩈᨬ᩠ᨬᩴ ᨶ ᩃᨽᨲᩥ. ᨿᨠ᩠ᨡᩩᨾ᩠ᨾᨲ᩠ᨲᨠᩮᩣ ᩋᨶ᩠ᨲᩁᨶ᩠ᨲᩁᩣ ᨸᨠᨲᩥᩈᨬ᩠ᨬᩴ ᨸᨭᩥᩃᨽᨲᩥ. ᩍᨵ ᨸᨶ ᨸᩥᨲ᩠ᨲᩩᨾ᩠ᨾᨲ᩠ᨲᨠᩮᩣ ᩅᩣ ᩉᩮᩣᨲᩩ, ᨿᨠ᩠ᨡᩩᨾ᩠ᨾᨲ᩠ᨲᨠᩮᩣ ᩅᩣ, ᨿᩮᩣ ᩈᨻ᩠ᨻᩈᩮᩣ ᨾᩩᨭ᩠ᨮᩔᨲᩥ ᨠᩥᨬ᩠ᨧᩥ ᨶ ᨩᩣᨶᩣᨲᩥ, ᩋᨣ᩠ᨣᩥᨾ᩠ᨸᩥ ᩈᩩᩅᨱ᩠ᨱᨾ᩠ᨸᩥ ᨣᩪᨳᨾ᩠ᨸᩥ ᨧᨶ᩠ᨴᨶᨾ᩠ᨸᩥ ᩑᨠᩈᨴᩥᩈᩴ ᨾᨴ᩠ᨴᨶ᩠ᨲᩮᩣᩅ ᩅᩥᨧᩁᨲᩥ, ᩑᩅᩁᩪᨸᩔ ᩋᨶᩣᨸᨲ᩠ᨲᩥ. ᩋᨶ᩠ᨲᩁᨶ᩠ᨲᩁᩣ ᨸᨠᨲᩥᩈᨬ᩠ᨬᩴ ᨸᨭᩥᩃᨽᩥᨲ᩠ᩅᩣ ᨬᨲ᩠ᩅᩣ ᨠᩁᩮᩣᨶ᩠ᨲᩔ ᨸᨶ ᩌᨸᨲ᩠ᨲᩥᨿᩮᩅ. ᨲᩮᨶᩣᩉ ‘‘ᨴ᩠ᩅᩥᨶ᩠ᨶᨾ᩠ᨸᩥ ᨧ ᩑᨲᩮᩈ’’ᨶ᩠ᨲᩥᩌᨴᩥ.

ᩋᨵᩥᨾᨲ᩠ᨲᩅᩮᨴᨶᩣᨿᩣᨲᩥ ᩋᨵᩥᨠᨸ᩠ᨸᨾᩣᨱᩣᨿ ᨴᩩᨠ᩠ᨡᩅᩮᨴᨶᩣᨿ. ᩌᨴᩥᨠᨾ᩠ᨾᩮ ᨶᩥᨿᩩᨲ᩠ᨲᩮᩣ ᩌᨴᩥᨠᨾ᩠ᨾᩥᨠᩮᩣ, ᨿᩮᩣ ᨧ ᩌᨴᩥᨠᨾ᩠ᨾᩮ ᨶᩥᨿᩩᨲ᩠ᨲᩮᩣ, ᩈᩮᩣ ᨲᩈ᩠ᨾᩥᩴ ᨠᨾ᩠ᨾᩮ ᩌᨴᩥᨽᩪᨲᩮᩣ ᩉᩮᩣᨲᩦᨲᩥ ᩌᩉ ‘‘ᨿᩮᩣ’’ᨲᩥᩌᨴᩥ. ᩍᨵ ᨸᨶ ᩈᩩᨴᩥᨶ᩠ᨶᨲ᩠ᨳᩮᩁᩮᩣ ᩌᨴᩥᨠᨾ᩠ᨾᩥᨠᩮᩣ, ᨲᩔ ᩋᨶᩣᨸᨲ᩠ᨲᩥ. ᩋᩅᩈᩮᩈᩣᨶᩴ ᨾᨠ᩠ᨠᨭᩥᩈᨾᨱᩅᨩ᩠ᨩᩥᨸᩩᨲ᩠ᨲᨠᩣᨴᩦᨶᩴ ᩌᨸᨲ᩠ᨲᩥᨿᩮᩅ. ᨸᨭᩥᨸᩣᨴᨶᩴ ᩈᨾ᩠ᨸᩣᨴᨶᩴ. ᨠᩁᩮᩣᨶ᩠ᨲᩮᩣᨿᩮᩅ ᩉᩥ ᨲᩴ ᩌᨸᨩ᩠ᨩᨲᩦᨲᩥ ᨠᩥᩁᩥᨿᩴ. ᩍᨴᩴ (ᩈᩣᩁᨲ᩠ᨳ. ᨭᩦ. ᪒.᪖᪖) ᨸᨶ ᨿᩮᨽᩩᨿ᩠ᨿᩅᩈᩮᨶ ᩅᩩᨲ᩠ᨲᩴ ᨾᩮᨳᩩᨶᨵᨾ᩠ᨾᩮ ᨸᩁᩪᨸᨠ᩠ᨠᨾᩮ ᩈᨲᩥ ᩈᩣᨴᩥᨿᨶ᩠ᨲᩔ ᩋᨠᩥᩁᩥᨿᩈᨾᩩᨭ᩠ᨮᩣᨶᨽᩣᩅᨲᩮᩣ. ᨾᩮᨳᩩᨶᨸ᩠ᨸᨭᩥᩈᩴᨿᩩᨲ᩠ᨲᩣᨿ ᩉᩥ ᨠᩣᨾᩈᨬ᩠ᨬᩣᨿ ᩋᨽᩣᩅᩮᨶ ᨾᩩᨧ᩠ᨧᨶᨲᩮᩣ ᩈᨬ᩠ᨬᩣᩅᩥᨾᩮᩣᨠ᩠ᨡᩴ. ‘‘ᩋᨶᩣᨸᨲ᩠ᨲᩥ ᩋᨩᩣᨶᨶ᩠ᨲᩔ, ᩋᩈᩣᨴᩥᨿᨶ᩠ᨲᩔᩣ’’ᨲᩥ (ᨸᩣᩁᩣ. ᪖᪖) ᩉᩥ ᩅᩩᨲ᩠ᨲᩴ. ᨾᩮᨳᩩᨶᨧᩥᨲ᩠ᨲᩮᨶᩮᩅ ᨶᩴ ᩌᨸᨩ᩠ᨩᨲᩥ, ᨶ ᩅᩥᨶᩣ ᨧᩥᨲ᩠ᨲᩮᨶᩣᨲᩥ ᩈᨧᩥᨲ᩠ᨲᨠᩴ. ᩁᩣᨣᩅᩈᩮᨶᩮᩅ ᩌᨸᨩ᩠ᨩᩥᨲᨻ᩠ᨻᨲᩮᩣ ᩃᩮᩣᨠᩅᨩ᩠ᨩᩴ. ᨠᩣᨿᨴ᩠ᩅᩣᩁᩮᨶᩮᩅ ᩈᨾᩩᨭ᩠ᨮᩣᨶᨲᩮᩣ ᨠᩣᨿᨠᨾ᩠ᨾᩴ. ᨧᩥᨲ᩠ᨲᩴ ᨸᨶᩮᨲ᩠ᨳ ᩋᨦ᩠ᨣᨾᨲ᩠ᨲᩴ ᩉᩮᩣᨲᩥ, ᨶ ᨲᩔ ᩅᩈᩮᨶ ᨠᨾ᩠ᨾᨽᩣᩅᩮᩣ ᩃᨻ᩠ᨽᨲᩥ. ᩃᩮᩣᨽᨧᩥᨲ᩠ᨲᩮᨶᩮᩅ ᩌᨸᨩ᩠ᨩᩥᨲᨻ᩠ᨻᨲᩮᩣ ᩋᨠᩩᩈᩃᨧᩥᨲ᩠ᨲᩴ. ᩈᩩᨡᩈᨾᨦ᩠ᨣᩦ ᩅᩣ ᩏᨸᩮᨠ᩠ᨡᩣᩈᨾᨦ᩠ᨣᩦ ᩅᩣ ᩌᨸᨩ᩠ᨩᨲᩦᨲᩥ ᨴ᩠ᩅᩥᩅᩮᨴᨶᩴ. ᨶᨶᩩ ᩈᨾᩩᨭ᩠ᨮᩣᨶᩣᨴᩦᨶᩥ ᩌᨸᨲ᩠ᨲᩥᨿᩣ ᩉᩮᩣᨶ᩠ᨲᩥ, ᨶ ᩈᩥᨠ᩠ᨡᩣᨸᨴᩔ, ᩋᨳ ᨠᩈ᩠ᨾᩣ ᩈᩥᨠ᩠ᨡᩣᨸᨴᩔ ᩈᨾᩩᨭ᩠ᨮᩣᨶᩣᨴᩦᨶᩥ ᩅᩩᨲ᩠ᨲᩣᨶᩦᨲᩥ ᩌᩉ ‘‘ᩍᨾᩣᨶᩥ ᨧ ᩈᨾᩩᨭ᩠ᨮᩣᨶᩣᨴᩦᨶᩥ ᨶᩣᨾᩣ’’ᨲᩥᩌᨴᩥ. ᩌᨸᨲ᩠ᨲᩥᨿᩣ ᩉᩮᩣᨶ᩠ᨲᩦᨲᩥ ᩋᨩ᩠ᨫᩣᨧᩣᩁᩔ ᩉᩮᩣᨶ᩠ᨲᩥ.

ᨾᩩᨶᨶᨲᩮᩣ ᩋᨶᩩᨾᩩᨶᨶᨲᩮᩣ ᨾᩩᨲᩥ, ᨬᩣᨱᩴ, ᨲᩴ ᩑᨲᩔ ᩋᨲ᩠ᨳᩦᨲᩥ ᨾᩩᨲᩥᨾᩣ, ᨬᩣᨱᩅᩣᨲᩥ ᩋᨲ᩠ᨳᩮᩣ.

ᨸᨮᨾᨸᩣᩁᩣᨩᩥᨠᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪒. ᨴᩩᨲᩥᨿᨸᩣᩁᩣᨩᩥᨠᩅᨱ᩠ᨱᨶᩣ

ᩑᨲ᩠ᨳᩣᨲᩥ ᩑᨲᩮᩈᩩ ᨴ᩠ᩅᩦᩈᩩ. ᩑᨠᨠᩩᨭᩥᨠᩣᨴᩥᨽᩮᨴᩮᩣ ᩈᨻ᩠ᨻᩮᩣᨸᩥ ᨣᩣᨾᩮᩣᨲᩥ ᩅᩮᨴᩥᨲᨻ᩠ᨻᩮᩣᨲᩥ ᩈᨾ᩠ᨻᨶ᩠ᨵᩮᩣ. ᨲᨲ᩠ᨳ ᩑᨠᨠᩩᨭᩥᨠᩣᨴᩥᨽᩮᨴᩮᩣᨲᩥ ᨿᩈ᩠ᨾᩥᩴ ᨣᩣᨾᩮ ᩑᨠᩣ ᩑᩅ ᨠᩩᨭᩥ ᩑᨠᩴ ᨣᩮᩉᩴ ᩈᩮᨿ᩠ᨿᨳᩣᨸᩥ ᨾᩃᨿᨩᨶᨸᨴᩮ, ᩋᨿᩴ ᩑᨠᨠᩩᨭᩥᨠᩮᩣ ᨣᩣᨾᩮᩣ ᨶᩣᨾ. ᩌᨴᩥᩈᨴ᩠ᨴᩮᨶ ‘‘ᨴ᩠ᩅᩥᨠᩩᨭᩥᨠᩮᩣᨸᩥ ᨣᩣᨾᩮᩣ, ᨲᩥᨠᩩᨭᩥᨠᩮᩣᨸᩥ ᨣᩣᨾᩮᩣ, ᨧᨲᩩᨠ᩠ᨠᩩᨭᩥᨠᩮᩣᨸᩥ ᨣᩣᨾᩮᩣ’’ᨲᩥ (ᨸᩣᩁᩣ. ᪙᪒) ᩅᩩᨲ᩠ᨲᨸ᩠ᨸᨽᩮᨴᩴ ᩈᨦ᩠ᨣᨱ᩠ᩉᩣᨲᩥ. ᩋᨽᩥᨶᩅᨶᩥᩅᩥᨭ᩠ᨮᩮᩣ ᩑᨠᨠᩩᨭᩥᨠᩣᨴᩥᨣᩣᨾᩮᩣ ᨸᨶ ᨿᩣᩅ ᨾᨶᩩᩔᩣ ᨸᩅᩥᩈᩥᨲ᩠ᩅᩣ ᩅᩣᩈᩴ ᨶ ᨠᨸ᩠ᨸᩮᨶ᩠ᨲᩥ, ᨲᩣᩅ ᨣᩣᨾᩈᨦ᩠ᨡᩴ ᨶ ᨣᨧ᩠ᨨᨲᩥ. ᨠᩥᩴᨽᩪᨲᩮᩣᨲᩥ ᩌᩉ ‘‘ᨸᩁᩥᨠ᩠ᨡᩥᨲ᩠ᨲᩮᩣ ᩅᩣ’’ᨲᩥᩌᨴᩥ. ᨲᨲ᩠ᨳ ᨸᩁᩥᨠ᩠ᨡᩥᨲ᩠ᨲᩮᩣ ᨶᩣᨾ ᩍᨭ᩠ᨮᨠᨸᩣᨠᩣᩁᩴ ᩌᨴᩥᩴ ᨠᨲ᩠ᩅᩣ ᩋᨶ᩠ᨲᨾᩈᩮᩣ ᨠᨱ᩠ᨭᨠᩈᩣᨡᩣᩉᩥᨸᩥ ᨸᩁᩥᨠ᩠ᨡᩥᨲ᩠ᨲᩮᩣ. ᨲᨻ᩠ᨻᩥᨸᩁᩦᨲᩮᩣ ᩋᨸᩁᩥᨠ᩠ᨡᩥᨲ᩠ᨲᩮᩣ. ᩋᨾᨶᩩᩔᩮᩣ ᨶᩣᨾ ᨿᩮᩣ ᩈᨻ᩠ᨻᩈᩮᩣ ᩅᩣ ᨾᨶᩩᩔᩣᨶᩴ ᩋᨽᩣᩅᩮᨶ ᨿᨠ᩠ᨡᨸᩁᩥᨣ᩠ᨣᩉᨽᩪᨲᩮᩣ, ᨿᨲᩮᩣ ᩅᩣ ᨾᨶᩩᩔᩣ ᨠᩮᨶᨧᩥ ᨠᩁᨱᩦᨿᩮᨶ ᨸᩩᨶᨸᩥ ᩌᨣᨶ᩠ᨲᩩᨠᩣᨾᩣ ᩑᩅ ᩋᨸᨠ᩠ᨠᨶ᩠ᨲᩣ, ᨿᨲᩮᩣ ᨸᨶ ᨶᩥᩁᨸᩮᨠ᩠ᨡᩣ ᩉᩩᨲ᩠ᩅᩣ ᨸᨠ᩠ᨠᨾᨶ᩠ᨲᩥ, ᩈᩮᩣ ᨣᩣᨾᩈᨦ᩠ᨡᩴ ᨶ ᨣᨧ᩠ᨨᨲᩥ. ᨶ ᨠᩮᩅᩃᩴ ᩑᨠᨠᩩᨭᩥᨠᩣᨴᩥᨽᩮᨴᩮᩣᩅᩣᨲᩥ ᩌᩉ ‘‘ᩋᨶ᩠ᨲᨾᩈᩮᩣ’’ᨲᩥᩌᨴᩥ. ᨿᩮᩣ ᨠᩮᩣᨧᩥ ᩈᨲ᩠ᨳᩮᩣᨸᩦᨲᩥ ᨩᨦ᩠ᨥᩈᨲ᩠ᨳᩈᨠᨭᩈᨲ᩠ᨳᩣᨴᩦᩈᩩ ᨿᩮᩣ ᨠᩮᩣᨧᩥ ᩈᨲ᩠ᨳᩮᩣᨸᩥ. ᩍᨾᩈ᩠ᨾᩥᩴ ᩈᩥᨠ᩠ᨡᩣᨸᨴᩮ ᨶᩥᨣᨾᨶᨣᩁᩣᨶᩥ ᩅᩥᨿ ᨣᩣᨾᨣ᩠ᨣᩉᨱᩮᨶᩮᩅ ᨣᩣᨾᩪᨸᨧᩣᩁᩮᩣᨸᩥ ᩈᨦ᩠ᨣᩉᩥᨲᩮᩣᨲᩥ ᩌᩉ ‘‘ᨮᨸᩮᨲ᩠ᩅᩣ ᨣᩣᨾᨬ᩠ᨧ ᨣᩣᨾᩪᨸᨧᩣᩁᨬ᩠ᨧᩣ’’ᨲᩥ. ᩋᨬ᩠ᨬᨳᩣ ᨸᨶ ᨾᩣᨲᩥᨠᩣᨿ ᩋᨶᩅᩈᩮᩈᨲᩮᩣ ᩋᩅᩉᩣᩁᨭ᩠ᨮᩣᨶᨸᩁᩥᨣ᩠ᨣᩉᩮᩣ ᨠᨲᩮᩣ ᨶᩣᨾ ᨶ ᩉᩮᩣᨲᩥ, ᨶ ᨧ ᨻᩩᨴ᩠ᨵᩣ ᩈᩣᩅᩈᩮᩈᩴ ᨸᩣᩁᩣᨩᩥᨠᩴ ᨸᨬ᩠ᨬᩣᨸᩮᨶ᩠ᨲᩥ.

ᨲᨲ᩠ᨳᩣᨲᩥ ᨲᩮᩈᩩ ᨣᩣᨾᨣᩣᨾᩪᨸᨧᩣᩁᩮᩈᩩ. ᨴ᩠ᩅᩣᩁᩮᨲᩥ ᨶᩥᨻ᩠ᨻᨠᩮᩣᩈᩔ ᩏᨴᨠᨸᨲᨶᨭ᩠ᨮᩣᨶᨲᩮᩣ ᩋᨻ᩠ᨽᨶ᩠ᨲᩁᩮ. ᩋᨶ᩠ᨲᩮᩣᨣᩮᩉᩮᨲᩥ ᨸᨾᩩᨡᩔ ᩋᨻ᩠ᨽᨶ᩠ᨲᩁᩮ. ᨠᨲᨸᩁᩥᨠ᩠ᨡᩮᨸᩮᩣᨲᩥ ᨸᩣᨠᩣᩁᩅᨲᩥᩌᨴᩦᩉᩥ ᨠᨲᨸᩁᩥᨠ᩠ᨡᩮᨸᩮᩣ. ᩈᩩᨸ᩠ᨸᨸᨲᨶᩣᨴᩥᨸᩁᩥᨧ᩠ᨨᩮᨴᩮᩣ ᨸᨶᩮᨲ᩠ᨳ ᩋᨸᩁᩥᨠ᩠ᨡᩥᨲ᩠ᨲᨥᩁᩴ ᩈᨶ᩠ᨵᩣᨿ ᩅᩩᨲ᩠ᨲᩮᩣ. ᨶ ᨠᩮᩅᩃᩴ ᨥᩁᩔ ᨸᩩᩁᨲᩮᩣ, ᩋᨳ ᨡᩮᩣ ᩈᨾᨶ᩠ᨲᨲᩮᩣ ᨲᨲ᩠ᨲᨠᩮᩣᩅ ᨸᩁᩥᨧ᩠ᨨᩮᨴᩮᩣ ᨥᩁᩪᨸᨧᩣᩁᩮᩣ ᨶᩣᨾᩣᨲᩥ ᨣᩉᩮᨲᨻ᩠ᨻᩴ. ‘‘ᨸᩩᩁᨲᩮᩣ’’ᨲᩥᩌᨴᩥᨠᩴ ᨸᨶ ᩃᩮᩣᨠᩥᨿᩮᩉᩥ ᨲᨳᩣᨠᩁᨱᨲᩮᩣ ᩅᩩᨲ᩠ᨲᩴ. ᨳᩣᨾᨾᨩ᩠ᨫᩥᨾᩔᩣᨲᩥ ᨾᨩ᩠ᨫᩥᨾᨳᩣᨾᩔ, ᨶᩮᩅ ᩋᨸ᩠ᨸᨳᩣᨾᩔ, ᨶ ᨾᩉᩣᨳᩣᨾᩔᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ‘‘ᨿᨳᩣ ᨲᩁᩩᨱᨾᨶᩩᩔᩣ’’ᨲᩥᩌᨴᩥᨶᩣ ᨿᨳᩣ ᨾᩣᨲᩩᨣᩣᨾᩮᩣ ᨠᩣᨠᩮ ᩏᨯ᩠ᨯᩣᨸᩮᨶ᩠ᨲᩮᩣ ᩏᨩᩩᨠᨾᩮᩅ ᩉᨲ᩠ᨳᩴ ᩏᨠ᩠ᨡᩥᨸᩥᨲ᩠ᩅᩣ ᩃᩮᨯ᩠ᨯᩩᩴ ᨡᩥᨸᨲᩥ, ᨿᨳᩣ ᨧ ᩏᨴᨠᩩᨠ᩠ᨡᩮᨸᩮ ᩏᨴᨠᩴ ᨡᩥᨸᨶ᩠ᨲᩥ, ᩑᩅᩴ ᨡᩥᨲ᩠ᨲᩔ ᩃᩮᨯ᩠ᨯᩩᩔ ᨸᨲᩥᨲᨭ᩠ᨮᩣᨶᩴ ᨸᨭᩥᨠ᩠ᨡᩥᨸᨲᩥ. ᨸᩅᨲ᩠ᨲᩥᨲ᩠ᩅᩣᨲᩥ ᩃᩩᨮᩥᨲ᩠ᩅᩣ, ᨸᩁᩥᩅᨲ᩠ᨲᩥᨲ᩠ᩅᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨲᩔ ᩈᨧᩮ ᨴ᩠ᩅᩮ ᩍᨶ᩠ᨴᨡᩦᩃᩣ ᩉᩮᩣᨶ᩠ᨲᩦᨲᩥ (ᨸᩣᩁᩣ. ᩋᨭ᩠ᨮ. ᪑.᪙᪒) ᨲᩔ ᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩈᨧᩮ ᩋᨶᩩᩁᩣᨵᨸᩩᩁᩔᩮᩅ ᨴ᩠ᩅᩮ ᩏᨾ᩠ᨾᩣᩁᩣ ᩉᩮᩣᨶ᩠ᨲᩥ. ᨿᩔ ᨸᨶ ᩑᨠᩮᩣ, ᨲᩔ ᨣᩣᨾᨴ᩠ᩅᩣᩁᨻᩣᩉᩣᨶᩴ ᩅᩮᨾᨩ᩠ᨫᩮ ᨮᩥᨲᩔ ᩃᩮᨯ᩠ᨯᩩᨸᩣᨲᨻ᩠ᨽᨶ᩠ᨲᩁᩴ ᨣᩣᨾᩪᨸᨧᩣᩁᩮᩣ ᨶᩣᨾ. ᨿᨲᩕ ᨸᨶ ᩍᨶ᩠ᨴᨡᩦᩃᩮᩣ ᨶᨲ᩠ᨳᩥ, ᨲᨲᩕ ᨣᩣᨾᨴ᩠ᩅᩣᩁᨻᩣᩉᩣᨶᩴ ᩅᩮᨾᨩ᩠ᨫᩴ. ᨿᨲᩕ ᨴ᩠ᩅᩣᩁᨻᩣᩉᩣᨸᩥ ᨶᨲ᩠ᨳᩥ, ᨲᨲ᩠ᨳ ᩏᨽᩮᩣᩈᩩ ᨸᩔᩮᩈᩩ ᩅᨲᩥᨿᩣ ᩅᩣ ᨸᩣᨠᩣᩁᩔ ᩅᩣ ᨠᩮᩣᨭᩥᩅᩮᨾᨩ᩠ᨫᩴᩅ ᩍᨶ᩠ᨴᨡᩦᩃᨭ᩠ᨮᩣᨶᩥᨿᨲ᩠ᨲᩣ ᩍᨶ᩠ᨴᨡᩦᩃᩮᩣᨲᩥ ᨣᩉᩮᨲᨻ᩠ᨻᩴ. ᨿᩮᩣ ᨸᨶ ᨣᩣᨾᩮᩣ ᨸᩩᨻ᩠ᨻᩮ ᨾᩉᩣ ᩉᩩᨲ᩠ᩅᩣ ᨸᨧ᩠ᨨᩣ ᨠᩩᩃᩮᩈᩩ ᨶᨭ᩠ᨮᩮᩈᩩ ᩋᨸ᩠ᨸᨠᩮᩣ ᩉᩮᩣᨲᩥ, ᩈᩮᩣ ᨥᩁᩪᨸᨧᩣᩁᨲᩮᩣ ᩃᩮᨯ᩠ᨯᩩᨸᩣᨲᩮᨶᩮᩅ ᨸᩁᩥᨧ᩠ᨨᩥᨶ᩠ᨴᩥᨲᨻ᩠ᨻᩮᩣ. ᨸᩩᩁᩥᨾᨸᩁᩥᨧ᩠ᨨᩮᨴᩮᩣ ᨸᨶᩔ ᨸᩁᩥᨠ᩠ᨡᩥᨲ᩠ᨲᩔᩣᨸᩥ ᩋᨸᩁᩥᨠ᩠ᨡᩥᨲ᩠ᨲᩔᩣᨸᩥ ᩋᨸ᩠ᨸᨾᩣᨱᨾᩮᩅᩣᨲᩥ. ᨶᨶᩩ ᨧᩮᨲᩴ ᩋᨸᩁᩥᨠ᩠ᨡᩥᨲ᩠ᨲᩔ ᩏᨸᨧᩣᩁᨴᩔᨶᩴ ᨸᨴᨽᩣᨩᨶᩮᨶ ᩅᩥᩁᩩᨴ᩠ᨵᨾᩥᩅ ᨴᩥᩔᨲᩥ. ᨲᨲ᩠ᨳ ᩉᩥ ‘‘ᨣᩣᨾᩪᨸᨧᩣᩁᩮᩣ ᨶᩣᨾ ᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩍᨶ᩠ᨴᨡᩦᩃᩮ ᨮᩥᨲᩔ ᨾᨩ᩠ᨫᩥᨾᩔ ᨸᩩᩁᩥᩈᩔ ᩃᩮᨯ᩠ᨯᩩᨸᩣᨲᩮᩣ’’ᨲᩥ (ᨸᩣᩁᩣ. ᪙᪒) ᩅᨲ᩠ᩅᩣ ‘‘ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᨥᩁᩪᨸᨧᩣᩁᩮ ᨮᩥᨲᩔ ᨾᨩ᩠ᨫᩥᨾᩔ ᨸᩩᩁᩥᩈᩔ ᩃᩮᨯ᩠ᨯᩩᨸᩣᨲᩮᩣ’’ᨲᩥ (ᨸᩣᩁᩣ. ᪙᪒) ᩑᨲ᩠ᨲᨠᨾᩮᩅ ᩅᩩᨲ᩠ᨲᩴ, ᨶ ᨸᨶ ᨲᩴ ᩃᩮᨯ᩠ᨯᩩᨸᩣᨲᩴ ᨣᩣᨾᩈᨦ᩠ᨡᩮᨸᩴ ᨠᨲ᩠ᩅᩣ ᨲᨲᩮᩣ ᨸᩁᩴ ᨣᩣᨾᩪᨸᨧᩣᩁᩮᩣᨲᩥ ᩅᩩᨲ᩠ᨲᩮᩣᨲᩥ ᩌᩉ ‘‘ᨸᨴᨽᩣᨩᨶᩮᨸᩥ ᩉᩥ ᩍᨾᩥᨶᩣᩅ ᨶᨿᩮᨶ ᩋᨲ᩠ᨳᩮᩣ ᩅᩮᨴᩥᨲᨻ᩠ᨻᩮᩣ’’ᨲᩥ.

ᩋᨿᨾᩮᨲ᩠ᨳ ᩋᨵᩥᨸ᩠ᨸᩣᨿᩮᩣ – ᩍᨵ ᨣᩣᨾᩮᩣ ᨶᩣᨾ ᨴᩩᩅᩥᨵᩮᩣ ᩉᩮᩣᨲᩥ ᨸᩁᩥᨠ᩠ᨡᩥᨲ᩠ᨲᩮᩣ ᨧ ᩋᨸᩁᩥᨠ᩠ᨡᩥᨲ᩠ᨲᩮᩣ ᨧ (ᨸᩣᩁᩣ. ᩋᨭ᩠ᨮ. ᪑.᪙᪒). ᨲᨲᩕ ᨸᩁᩥᨠ᩠ᨡᩥᨲ᩠ᨲᩔ ᨸᩁᩥᨠ᩠ᨡᩮᨸᩮᩣᨿᩮᩅ ᨸᩁᩥᨧ᩠ᨨᩮᨴᩮᩣ. ᨲᩈ᩠ᨾᩣ ᨲᩔ ᩅᩥᩈᩩᩴ ᨸᩁᩥᨧ᩠ᨨᩮᨴᩴ ᩋᩅᨲ᩠ᩅᩣ ‘‘ᨣᩣᨾᩪᨸᨧᩣᩁᩮᩣ ᨶᩣᨾ ᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩍᨶ᩠ᨴᨡᩦᩃᩮ ᨮᩥᨲᩔ ᨾᨩ᩠ᨫᩥᨾᩔ ᨸᩩᩁᩥᩈᩔ ᩃᩮᨯ᩠ᨯᩩᨸᩣᨲᩮᩣ’’ᨲᩥ ᨸᩣᩊᩥᨿᩴ ᩅᩩᨲ᩠ᨲᩴ. ᩋᨸᩁᩥᨠ᩠ᨡᩥᨲ᩠ᨲᩔ ᨸᨶ ᨣᩣᨾᩔ ᨣᩣᨾᨸᩁᩥᨧ᩠ᨨᩮᨴᩮᩣ ᩅᨲ᩠ᨲᨻ᩠ᨻᩮᩣ. ᨲᩈ᩠ᨾᩣ ᨲᩔ ᨣᩣᨾᩔ ᨣᩣᨾᨸᩁᩥᨧ᩠ᨨᩮᨴᨴᩔᨶᨲ᩠ᨳᩴ ‘‘ᩋᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᨥᩁᩪᨸᨧᩣᩁᩮ ᨮᩥᨲᩔ ᨾᨩ᩠ᨫᩥᨾᩔ ᨸᩩᩁᩥᩈᩔ ᩃᩮᨯ᩠ᨯᩩᨸᩣᨲᩮᩣ’’ᨲᩥ (ᨸᩣᩁᩣ. ᪙᪒) ᩅᩩᨲ᩠ᨲᩴ. ᨣᩣᨾᨸᩁᩥᨧ᩠ᨨᩮᨴᩮ ᨧ ᨴᩔᩥᨲᩮ ᨣᩣᨾᩪᨸᨧᩣᩁᩃᨠ᩠ᨡᨱᩴ ᨸᩩᨻ᩠ᨻᩮ ᩅᩩᨲ᩠ᨲᨶᨿᩮᨶᩮᩅ ᩈᨠ᩠ᨠᩣ ᨬᩣᨲᩩᨶ᩠ᨲᩥ ᨸᩩᨶ ‘‘ᨲᨲ᩠ᨳ ᨮᩥᨲᩔ ᨾᨩ᩠ᨫᩥᨾᩔ ᨸᩩᩁᩥᩈᩔ ᩃᩮᨯ᩠ᨯᩩᨸᩣᨲᩮᩣ’’ᨲᩥ ᨶ ᩅᩩᨲ᩠ᨲᩴ, ᩋᨲ᩠ᨳᩮᩣ ᨸᨶ ᨲᨲ᩠ᨳᩣᨸᩥ ᩋᨿᨾᩮᩅ ᨿᨳᩣᩅᩩᨲ᩠ᨲᩮᩣᨲᩥ. ᨿᩮᩣ ᨸᨶ ᨥᩁᩪᨸᨧᩣᩁᩮ ᨮᩥᨲᩔ ᩃᩮᨯ᩠ᨯᩩᨸᩣᨲᩴᨿᩮᩅ ‘‘ᨣᩣᨾᩪᨸᨧᩣᩁᩮᩣ’’ᨲᩥ ᩅᨴᨲᩥ, ᨲᩔ ᨥᩁᩪᨸᨧᩣᩁᩮᩣ ‘‘ᨣᩣᨾᩮᩣ’’ᨲᩥ ᩌᨸᨩ᩠ᨩᨲᩥ. ᨲᨲᩮᩣ ᨥᩁᩴ ᨥᩁᩪᨸᨧᩣᩁᩮᩣ, ᨣᩣᨾᩮᩣ ᨣᩣᨾᩪᨸᨧᩣᩁᩮᩣᨲᩥ ᩑᩈ ᩅᩥᨽᩣᨣᩮᩣ ᩈᨦ᩠ᨠᩁᩦᨿᨲᩥ. ᩋᩈᩴᨠᩁᨲᩮᩣ ᨧᩮᨲ᩠ᨳ ᩅᩥᨶᩥᨧ᩠ᨨᨿᩮᩣ ᩅᩮᨴᩥᨲᨻ᩠ᨻᩮᩣ. ᨲᩈ᩠ᨾᩣ ᨸᩣᩊᩥᨬ᩠ᨧ ᩋᨭ᩠ᨮᨠᨳᨬ᩠ᨧ ᩈᩴᩈᨶ᩠ᨴᩥᨲ᩠ᩅᩣ ᩅᩩᨲ᩠ᨲᨶᨿᩮᨶᩮᩅᩮᨲ᩠ᨳ ᨣᩣᨾᩮᩣ, ᨣᩣᨾᩪᨸᨧᩣᩁᩮᩣ ᨧ ᩅᩮᨴᩥᨲᨻ᩠ᨻᩮᩣᨲᩥ.

ᨲᨲ᩠ᨳᩣᨲᩥ ᨲᩮᩈᩩ ᨴ᩠ᩅᩦᩈᩩ ᩏᨸᨧᩣᩁᩮᩈᩩ. ᨿ᩠ᩅᩣᨿᩴ ᩏᨸᨧᩣᩁᩮᩣ ᨴᩔᩥᨲᩮᩣᨲᩥ ᩈᨾ᩠ᨻᨶ᩠ᨵᩮᩣ. ᩅᩥᨠᩣᩃᩮ ᨣᩣᨾᨸ᩠ᨸᩅᩮᩈᨶᩣᨴᩦᩈᩪᨲᩥ ᩑᨲ᩠ᨳ ᩌᨴᩥᩈᨴ᩠ᨴᩮᨶ ᩋᩈᩴᨠᨧ᩠ᨧᩥᨠᩣᨣᩣᨾᨸ᩠ᨸᩅᩮᩈᨶᩴ (ᨸᩣᨧᩥ. ᪑᪒᪒᪕) ᩈᨦ᩠ᨣᨱ᩠ᩉᩣᨲᩥ. ᨿᩮᩣ ᨸᨶ ᨸᩁᩥᨠ᩠ᨡᩥᨲ᩠ᨲᩔ ᨣᩣᨾᩔ ᩏᨸᨧᩣᩁᩮᩣ ᩅᩩᨲ᩠ᨲᩮᩣ, ᩈᩮᩣ ᨶ ᨠᨲ᩠ᨳᨧᩥ ᩅᩥᨶᨿᨸᩥᨭᨠᩮ ᩏᨸᨿᩮᩣᨣᩴ ᨣᨲᩮᩣ. ᨠᩮᩅᩃᩴ ᩋᨸᩁᩥᨠ᩠ᨡᩥᨲ᩠ᨲᩔ ᨸᩁᩥᨠ᩠ᨡᩮᨸᩮᩣᨠᩣᩈᨲᩮᩣ ᩋᨸᩁᩮᩣ ᩑᨠᩮᩣ ᩃᩮᨯ᩠ᨯᩩᨸᩣᨲᩮᩣ ᨣᩣᨾᩪᨸᨧᩣᩁᩮᩣ ᨶᩣᨾᩣᨲᩥ ᨬᩣᨸᨶᨲ᩠ᨳᩴ ᩅᩩᨲ᩠ᨲᩮᩣ. ᩑᩅᩴ ᩅᩩᨲ᩠ᨲᩮ ᩉᩥ ᨬᩣᨿᨲᩥ ‘‘ᨸᩁᩥᨠ᩠ᨡᩥᨲ᩠ᨲᩔᩣᨸᩥ ᨧᩮ ᨣᩣᨾᩔ ᩑᨠᩮᩣ ᩃᩮᨯ᩠ᨯᩩᨸᩣᨲᩮᩣ ᨠᨸ᩠ᨸᩥᨿᨽᩪᨾᩥ ᩈᨾᩣᨶᩮᩣ ᩏᨸᨧᩣᩁᩮᩣᨲᩥ ᩅᩩᨲ᩠ᨲᩮᩣ, ᨸᨣᩮᩅ ᩋᨸᩁᩥᨠ᩠ᨡᩥᨲ᩠ᨲᩔ ᨸᩁᩥᨠ᩠ᨡᩮᨸᩮᩣᨠᩣᩈᨲᩮᩣ ᩑᨠᩮᩣ’’ᨲᩥ. ᩍᨾᩮᩈᩴ ᨸᩁᩥᨧ᩠ᨨᩮᨴᨴᩔᨶᨲ᩠ᨳᨶ᩠ᨲᩥ ᩍᨾᩮᩈᩴ ᨣᩣᨾᩣᩁᨬ᩠ᨬᩣᨶᩴ ᨸᩁᩥᨧ᩠ᨨᩮᨴᨴᩔᨶᨲ᩠ᨳᩴ ᩅᩩᨲ᩠ᨲᩣ ᩋᨭ᩠ᨮᨠᨳᩣᨿᩴ. ᨸᩣᩁᩣᨩᩥᨠᩅᨲ᩠ᨳᩩᨶ᩠ᨲᩥ ᨸᩣᨴᨣ᩠ᨥᨶᨠᩴ. ᩋᩅᩉᩁᨶ᩠ᨲᩔᩣᨲᩥ ᨣᨱ᩠ᩉᨶ᩠ᨲᩔ.

ᩋᨴᩥᨶ᩠ᨶᨶ᩠ᨲᩥ (ᨸᩣᩁᩣ. ᩋᨭ᩠ᨮ. ᪙᪒) ᨴᨶ᩠ᨲᨸᩮᩣᨶᩈᩥᨠ᩠ᨡᩣᨸᨴᩮ ᩋᨲ᩠ᨲᨶᩮᩣ ᩈᨶ᩠ᨲᨠᨾ᩠ᨸᩥ ᩋᨸ᩠ᨸᨭᩥᨣ᩠ᨣᩉᩥᨲᨠᩴ ᨠᨸ᩠ᨸᩥᨿᩴ ᩋᨩ᩠ᨫᩮᩣᩉᩁᨱᩦᨿᩴ ᩅᩩᨧ᩠ᨧᨲᩥ, ᩍᨵ ᨸᨶ ᨿᩴ ᨠᩥᨬ᩠ᨧᩥ ᨸᩁᨸᩁᩥᨣ᩠ᨣᩉᩥᨲᩴ ᩈᩈᩣᨾᩥᨠᩴ ᨽᨱ᩠ᨯᩴ, ᨲᨴᩮᨲᩴ ᨲᩮᩉᩥ ᩈᩣᨾᩥᨠᩮᩉᩥ ᨠᩣᨿᩮᨶ ᩅᩣ ᩅᩣᨧᩣᨿ ᩅᩣ ᨶ ᨴᩥᨶ᩠ᨶᨶ᩠ᨲᩥ ᩋᨴᩥᨶ᩠ᨶᩴ. ᩋᩅᩉᩣᩁᨸ᩠ᨸᩉᩮᩣᨶᨠᨾᩮᩅ ᨸᨶ ᨴᩔᩮᨲᩩᩴ ‘‘ᩋᨬ᩠ᨬᩔ ᨾᨶᩩᩔᨩᩣᨲᩥᨠᩔ ᩈᨶ᩠ᨲᨠ’’ᨶ᩠ᨲᩥ ᩅᩩᨲ᩠ᨲᩴ. ᩈᨦ᩠ᨡᩣᩈᨴ᩠ᨴᩔᩮᩅ ᨲ-ᨠᩣᩁᩮᨶ ᩅᨯ᩠ᨰᩮᨲ᩠ᩅᩣ ᩅᩩᨲ᩠ᨲᨲ᩠ᨲᩣ ‘‘ᩈᨦ᩠ᨡᩣ ᩈᨦ᩠ᨡᩣᨲᨶ᩠ᨲᩥ ᩋᨲ᩠ᨳᨲᩮᩣ ᩑᨠ’’ᨶ᩠ᨲᩥ ᩅᩩᨲ᩠ᨲᩴ. ᨲᨲ᩠ᨳ ᩋᨲ᩠ᨳᨲᩮᩣ ᩑᨠᨶ᩠ᨲᩥ ᨸᨴᨲ᩠ᨳᨲᩮᩣ ᩑᨠᩴ, ᩋᨶᨲ᩠ᨳᨶ᩠ᨲᩁᨶ᩠ᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨠᩮᩣᨭ᩠ᨮᩣᩈᩔᩮᨲᩴ ᨶᩣᨾᩴ ᨽᩣᨣᨲᩮᩣ ᩈᨦ᩠ᨡᩣᨿᨲᩥ ᩏᨸᨭ᩠ᨮᩣᨲᩦᨲᩥ ᨠᨲ᩠ᩅᩣ. ᨸᨸᨬ᩠ᨧᩈᨦ᩠ᨡᩣᨲᩥ ᩈᨲ᩠ᨲᩣᨶᩴ ᩈᩴᩈᩣᩁᩮ ᨸᨸᨬ᩠ᨧᩮᨶ᩠ᨲᩥ ᨧᩥᩁᩣᨿᨶ᩠ᨲᩦᨲᩥ ᨸᨸᨬ᩠ᨧᩣ, ᨲᨱ᩠ᩉᩣᨾᩣᨶᨴᩥᨭ᩠ᨮᩥᨿᩮᩣ, ᨿᩔ ᩅᩣ ᩏᨸ᩠ᨸᨶ᩠ᨶᩣ, ᨲᩴ ‘‘ᩁᨲ᩠ᨲᩮᩣ’’ᨲᩥ ᩅᩣ ‘‘ᨾᨲ᩠ᨲᩮᩣ’’ᨲᩥ ᩅᩣ ‘‘ᨾᩥᨧ᩠ᨨᩣᨴᩥᨭ᩠ᨮᩥᨶᩥᩅᩥᨭ᩠ᨮᩮᩣ’’ᨲᩥ ᩅᩣ ᨸᨸᨬ᩠ᨧᩮᨶ᩠ᨲᩥ ᨻ᩠ᨿᨬ᩠ᨩᩮᨶ᩠ᨲᩦᨲᩥ ᨸᨸᨬ᩠ᨧᩣ, ᩈᨦ᩠ᨡᩣ ᩅᩩᨧ᩠ᨧᨲᩥ ᨠᩮᩣᨭ᩠ᨮᩣᩈᩮᩣ, ᨸᨸᨬ᩠ᨧᩣᩅ ᩈᨦ᩠ᨡᩣ ᨸᨸᨬ᩠ᨧᩈᨦ᩠ᨡᩣ, ᨸᨸᨬ᩠ᨧᨠᩮᩣᨭ᩠ᨮᩣᩈᩣᨲᩥ ᩋᨲ᩠ᨳᩮᩣ, ᨲᨱ᩠ᩉᩣᨾᩣᨶᨴᩥᨭ᩠ᨮᩥᨿᩮᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨳᩮᨿ᩠ᨿᨧᩥᨲ᩠ᨲᩈᨦ᩠ᨡᩣᨲᩮᩣᨲᩥ ‘‘ᨳᩮᨿ᩠ᨿᨧᩥᨲ᩠ᨲᩮᩣ’’ᨲᩥ ᨠᨳᩥᨲᩮᩣ. ᩑᨠᩮᩣ ᨧᩥᨲ᩠ᨲᨠᩮᩣᨭ᩠ᨮᩣᩈᩮᩣᨲᩥ ᩅᩥᩔᩣᩈᨲᩣᩅᨠᩣᩃᩥᨠᩣᨴᩥᨣ᩠ᨣᩣᩉᩅᩈᨸ᩠ᨸᩅᨲ᩠ᨲᩋᨳᩮᨿ᩠ᨿᨧᩥᨲ᩠ᨲᨠᩮᩣᨭ᩠ᨮᩣᩈᨲᩮᩣ ᩋᨬ᩠ᨬᩮᩣ ᨧᩥᨲ᩠ᨲᨠᩮᩣᨭ᩠ᨮᩣᩈᩮᩣ. ᨳᩮᨿ᩠ᨿᩈᨦ᩠ᨡᩣᨲᩮᨶᩣᨲᩥ ᨳᩮᨿ᩠ᨿᨽᩪᨲᨧᩥᨲ᩠ᨲᨠᩮᩣᨭ᩠ᨮᩣᩈᩮᨶ. ᨿᨴᩥ ᩑᩅᩴ ᩋᨳ ᨠᩈ᩠ᨾᩣ ᩑᨲᩔ ᩅᩥᨽᨦ᩠ᨣᩮ ‘‘ᨳᩮᨿ᩠ᨿᨧᩥᨲ᩠ᨲᩮᩣ ᩋᩅᩉᩁᨱᨧᩥᨲ᩠ᨲᩮᩣ’’ᨲᩥ (ᨸᩣᩁᩣ. ᪙᪒) ᩅᩩᨲ᩠ᨲᨶ᩠ᨲᩥ ᩌᩉ ‘‘ᨿᩮᩣ ᨧᩣ’’ᨲᩥᩌᨴᩥ. ᨻ᩠ᨿᨬ᩠ᨩᨶᩴ ᩋᨶᩣᨴᩥᨿᩥᨲ᩠ᩅᩣᨲᩥ ᨻ᩠ᨿᨬ᩠ᨩᨶᩮ ᩌᨴᩁᩴ ᩋᨠᨲ᩠ᩅᩣᨲᩥ ᩋᨲ᩠ᨳᩮᩣ, ᩈᨴ᩠ᨴᨲ᩠ᨳᨾᨶᨸᩮᨠ᩠ᨡᩥᨲ᩠ᩅᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᩋᨲ᩠ᨳᨾᩮᩅᩣᨲᩥ ᨽᩣᩅᨲ᩠ᨳᨾᩮᩅ.

ᨲᩮ ᨸᨶ ᩋᩅᩉᩣᩁᩣᨲᩥ ᨲᩮ ᨸᨬ᩠ᨧᩅᩦᩈᨲᩥ ᩋᩅᩉᩣᩁᩣ. ᩈᩅᩥᨬ᩠ᨬᩣᨱᨠᩣᩅᩥᨬ᩠ᨬᩣᨱᨠᩅᩈᩮᨶ ᨶᩣᨶᩣᩅᩥᨵᩮᩣ ᨽᨱ᩠ᨯᩮᩣ ᩑᨲᩔ ᨸᨬ᩠ᨧᨠᩔᩣᨲᩥ ᨶᩣᨶᩣᨽᨱ᩠ᨯᩴ, ᨸᨬ᩠ᨧᨶ᩠ᨶᩴ ᩋᩅᩉᩣᩁᩣᨶᩴ ᩈᨾᩪᩉᩮᩣ ᨸᨬ᩠ᨧᨠᩴ, ᨸᨬ᩠ᨧᨸᩁᩥᨾᩣᨱᨾᩔᩣᨲᩥ ᩅᩣ ᨸᨬ᩠ᨧᨠᩴ, ᨶᩣᨶᩣᨽᨱ᩠ᨯᨾᩮᩅ ᨸᨬ᩠ᨧᨠᩴ ᨶᩣᨶᩣᨽᨱ᩠ᨯᨸᨬ᩠ᨧᨠᩴ. ᩈᩅᩥᨬ᩠ᨬᩣᨱᨠᩅᩈᩮᨶ ᩑᨠᩮᩣ ᨽᨱ᩠ᨯᩮᩣ ᩑᨲᩔᩣᨲᩥ ᩑᨠᨽᨱ᩠ᨯᩴ. ᩈᩮᩈᩴ ᩅᩩᨲ᩠ᨲᨶᨿᨾᩮᩅ. ᩈᩣᩉᨲ᩠ᨳᩥᨠᩮᩣᩅ ᨸᨬ᩠ᨧᨠᩴ ᩈᩣᩉᨲ᩠ᨳᩥᨠᨸᨬ᩠ᨧᨠᩴ. ᩌᨴᩥᨸᨴᩅᩈᩮᨶ ᨧᩮᨲᩴ ᨶᩣᨾᩴ ᨠᩩᩈᩃᩣᨴᩥᨲ᩠ᨲᩥᨠᩔ ᨠᩩᩈᩃᨲ᩠ᨲᩥᨠᩅᩮᩣᩉᩣᩁᩮᩣ ᩅᩥᨿ. ᨲᩈ᩠ᨾᩣ ᩈᩣᩉᨲ᩠ᨳᩥᨠᩣᨴᩥᨸᨬ᩠ᨧᨠᨶ᩠ᨲᩥ ᩋᨲ᩠ᨳᨲᩮᩣ ᨴᨭ᩠ᨮᨻ᩠ᨻᩴ. ᩑᩈ ᨶᨿᩮᩣ ᩈᩮᩈᩮᩈᩩ ᨸᨬ᩠ᨧᨠᨴ᩠ᩅᨿᩮᩈᩩ. ᩑᨲᩔᩮᩅᩣᨲᩥ ‘‘ᩌᨴᩥᨿᩮᨿ᩠ᨿᩣ’’ᨲᩥ ᩑᨲᩔᩮᩅ ᨾᩣᨲᩥᨠᩣᨸᨴᩔ. ᩍᨾᩮᩈᩴ ᨸᨴᩣᨶᩴ ᩅᩈᩮᨶᩣᨲᩥ ᩍᨾᩮᩈᩴ ᨸᨬ᩠ᨧᨶ᩠ᨶᩴ ᨸᨴᩣᨶᩴ ᩅᩈᩮᨶ. ᩑᨲ᩠ᨳ ᨧ ᨸᨮᨾᨸᨴᩴ ᩋᨽᩥᨿᩮᩣᨣᩅᩈᩮᨶ ᩅᩩᨲ᩠ᨲᩴ, ᨴᩩᨲᩥᨿᨸᨴᩴ ᩋᨬ᩠ᨬᩮᩈᩴ ᨽᨱ᩠ᨯᩴ ᩉᩁᨶ᩠ᨲᩔ ᨣᨧ᩠ᨨᨲᩮᩣ ᩅᩈᩮᨶ, ᨲᨲᩥᨿᨸᨴᩴ ᩏᨸᨶᩥᨠ᩠ᨡᩥᨲ᩠ᨲᨽᨱ᩠ᨯᩅᩈᩮᨶ, ᨧᨲᩩᨲ᩠ᨳᩴ ᩈᩅᩥᨬ᩠ᨬᩣᨱᨠᩅᩈᩮᨶ, ᨸᨬ᩠ᨧᨾᩴ ᨳᩃᩮ ᨶᩥᨠ᩠ᨡᩥᨲ᩠ᨲᩣᨴᩥᩅᩈᩮᨶ ᩅᩩᨲ᩠ᨲᨶ᩠ᨲᩥ ᩅᩮᨴᩥᨲᨻ᩠ᨻᩴ.

ᩍᨴᩣᨶᩥ ᨶᩮᩈᩴ ᩋᨲ᩠ᨳᨿᩮᩣᨩᨶᩴ ᨴᩔᩮᨲᩩᩴ ‘‘ᨲᨲ᩠ᨳᩣ’’ᨲᩥᩌᨴᩥᨾᩣᩉ. ᨲᨲ᩠ᨳ ᨲᨲ᩠ᨳᩣᨲᩥ ᨲᩮᩈᩩ ᨴ᩠ᩅᩦᩈᩩ ᨸᨬ᩠ᨧᨠᩮᩈᩩ. ᩍᨲᩁᨶ᩠ᨲᩥ ᩑᨠᨽᨱ᩠ᨯᨸᨬ᩠ᨧᨠᩴ. ᩌᩁᩣᨾᨶ᩠ᨲᩥ ᨸᩩᨸ᩠ᨹᩣᩁᩣᨾᨹᩃᩣᩁᩣᨾᩴ. ᩋᨽᩥᨿᩩᨬ᩠ᨩᨲᩦᨲᩥ (ᨸᩣᩁᩣ. ᩋᨭ᩠ᨮ. ᪑.᪑᪐᪒) ᨸᩁᩈᨶ᩠ᨲᨠᩴ ‘‘ᨾᨾ ᩈᨶ᩠ᨲᨠᩮᩣᩅ ᩋᨿ’’ᨶ᩠ᨲᩥ ᨾᩩᩈᩣ ᨽᨱᩥᨲ᩠ᩅᩣ ᩋᨽᩥᨿᩩᨬ᩠ᨩᨲᩥ ᨧᩮᩣᨴᩮᨲᩥ, ᩋᨭ᩠ᨭᩴ ᨠᩁᩮᩣᨲᩦᨲᩥ ᩋᨲ᩠ᨳᩮᩣ. ᩈᨾ᩠ᨸᨩᩣᨶᨾᩩᩈᩣᩅᩣᨴᩮᨸᩥ ᩋᨴᩥᨶ᩠ᨶᩣᨴᩣᨶᩔ ᨸᩩᨻ᩠ᨻᨸᨿᩮᩣᨣᨲ᩠ᨲᩣ ᨴᩩᨠ᩠ᨠᨭᨶ᩠ᨲᩥ ᩌᩉ ‘‘ᩌᨸᨲ᩠ᨲᩥ ᨴᩩᨠ᩠ᨠᨭᩔᩣ’’ᨲᩥ, ᨴᩩᨠ᩠ᨠᨭᩈᨦ᩠ᨡᩣᨲᩣ ᩌᨸᨲ᩠ᨲᩥ ᨽᩅᩮᨿ᩠ᨿᩣᨲᩥ ᩋᨲ᩠ᨳᩮᩣ. ᩋᨳ ᩅᩣ ᨴᩩᨠ᩠ᨠᨭᩈᨬ᩠ᨬᩥᨲᩔ ᩅᩦᨲᩥᨠ᩠ᨠᨾᩔ ᩌᨸᨩ᩠ᨩᨶᨶ᩠ᨲᩥ ᩋᨲ᩠ᨳᩮᩣ. ᩑᩈ ᨶᨿᩮᩣ ‘‘ᩌᨸᨲ᩠ᨲᩥ ᨳᩩᩃ᩠ᩃᨧ᩠ᨧᨿᩔᩣ’’ᨲᩥᩌᨴᩦᩈᩩ. ᩈᩣᨾᩥᨠᩔ ᩅᩥᨾᨲᩥᩴ ᩏᨸ᩠ᨸᩣᨴᩮᨲᩦᨲᩥ ᩅᩥᨶᩥᨧ᩠ᨨᨿᨠᩩᩈᩃᨲᩣᨿ, ᨻᩃᩅᨶᩥᩔᩥᨲᩣᨴᩥᨽᩣᩅᩮᨶ ᩅᩣ ᩌᩁᩣᨾᩈᩣᨾᩥᨠᩔ ᩈᩴᩈᨿᩴ ᨩᨶᩮᨲᩥ. ᨠᨳᩴ? ᨲᨬ᩠ᩉᩥ ᨲᨳᩣ ᩅᩥᨶᩥᨧ᩠ᨨᨿᨸ᩠ᨸᩈᩩᨲᩴ ᨴᩥᩈ᩠ᩅᩣ ᩈᩣᨾᩥᨠᩮᩣ ᨧᩥᨶ᩠ᨲᩮᨲᩥ ‘‘ᩈᨠ᩠ᨡᩥᩔᩣᨾᩥ ᨶᩩ ᨡᩮᩣ ᩋᩉᩴ ᩍᨾᩴ ᩌᩁᩣᨾᩴ ᩋᨲ᩠ᨲᨶᩮᩣ ᨠᩣᨲᩩᩴ, ᨶ ᩈᨠ᩠ᨡᩥᩔᩣᨾᩥ ᨶᩩ ᨡᩮᩣ’’ᨲᩥ. ᩑᩅᩴ ᨲᩔ ᩅᩥᨾᨲᩥ ᩏᨸ᩠ᨸᨩ᩠ᨩᨾᩣᨶᩣ ᨲᩮᨶ ᩏᨸ᩠ᨸᩣᨴᩥᨲᩣ ᩉᩮᩣᨲᩥ. ᨵᩩᩁᩴ ᨶᩥᨠ᩠ᨡᩥᨸᨲᩦᨲᩥ ᨿᨴᩣ ᨸᨶ ᩈᩣᨾᩥᨠᩮᩣ ‘‘ᩋᨿᩴ ᨳᨴ᩠ᨵᩮᩣ ᨠᨠ᩠ᨡᩊᩮᩣ ᨩᩦᩅᩥᨲᨻᩕᩉ᩠ᨾᨧᩁᩥᨿᨶ᩠ᨲᩁᩣᨿᨾ᩠ᨸᩥ ᨾᩮ ᨠᩁᩮᨿ᩠ᨿ, ᩋᩃᩴ ᨴᩣᨶᩥ ᨾᨿ᩠ᩉᩴ ᩍᨾᩥᨶᩣ ᩌᩁᩣᨾᩮᨶᩣ’’ᨲᩥ ᨵᩩᩁᩴ ᨶᩥᨠ᩠ᨡᩥᨸᨲᩥ, ᩏᩔᩣᩉᩴ ᨮᨸᩮᨲᩥ, ᩋᨲ᩠ᨲᨶᩮᩣ ᩈᨶ᩠ᨲᨠᨠᩁᨱᩮ ᨶᩥᩁᩩᩔᩣᩉᩮᩣ ᩉᩮᩣᨲᩦᨲᩥ ᩋᨲ᩠ᨳᩮᩣ. ᩌᨸᨲ᩠ᨲᩥ ᨸᩣᩁᩣᨩᩥᨠᩔ ᩈᨧᩮ ᩈᨿᨾ᩠ᨸᩥ ᨠᨲᨵᩩᩁᨶᩥᨠ᩠ᨡᩮᨸᩮᩣ ᨧᩣᨲᩥ ᩋᨵᩥᨸ᩠ᨸᩣᨿᩮᩣ. ᩋᨳ ᨸᨶ ᩈᩣᨾᩥᨠᩮᨶ ᨵᩩᩁᩮ ᨶᩥᨠ᩠ᨡᩥᨲ᩠ᨲᩮᨸᩥ ᩋᨽᩥᨿᩩᨬ᩠ᨩᨠᩮᩣ ᨵᩩᩁᩴ ᩋᨶᩥᨠ᩠ᨡᩥᨸᩥᨲ᩠ᩅᩣᩅ ‘‘ᩍᨾᩴ ᩈᩩᨭ᩠ᨮᩩ ᨸᩦᩊᩮᨲ᩠ᩅᩣ ᨾᨾ ᩌᨱᩣᨸᩅᨲ᩠ᨲᩥᩴ ᨴᩔᩮᨲ᩠ᩅᩣ ᨠᩥᨦ᩠ᨠᩣᩁᨸ᩠ᨸᨭᩥᩔᩣᩅᩥᨽᩣᩅᩮ ᨮᨸᩮᨲ᩠ᩅᩣ ᨴᩔᩣᨾᩦ’’ᨲᩥ ᨴᩣᨲᨻ᩠ᨻᨽᩣᩅᩮ ᩈᩏᩔᩣᩉᩮᩣ, ᩁᨠ᩠ᨡᨲᩥ ᨲᩣᩅ. ᩋᨳᩣᨸᩥ ᩋᨽᩥᨿᩩᨬ᩠ᨩᨠᩮᩣ ᩋᨧ᩠ᨨᩥᨶ᩠ᨴᩥᨲ᩠ᩅᩣ ‘‘ᨶ ᨴᩣᨶᩥ ᩍᨾᩴ ᩍᨾᩔ ᨴᩔᩣᨾᩦ’’ᨲᩥ ᨵᩩᩁᩴ ᨶᩥᨠ᩠ᨡᩥᨸᨲᩥ, ᩈᩣᨾᩥᨠᩮᩣ ᨸᨶ ᨵᩩᩁᩴ ᨶ ᨶᩥᨠ᩠ᨡᩥᨸᨲᩥ, ᨸᨠ᩠ᨡᩴ ᨸᩁᩥᨿᩮᩈᨲᩥ, ᨠᩣᩃᩴ ᩌᨣᨾᩮᨲᩥ, ‘‘ᩃᨩ᩠ᨩᩥᨸᩁᩥᩈᩴ ᨲᩣᩅ ᩃᨽᩣᨾᩥ, ᨸᨧ᩠ᨨᩣ ᨩᩣᨶᩥᩔᩣᨾᩦ’’ᨲᩥ ᨣᩉᨱᩮᨿᩮᩅ ᩈᩏᩔᩣᩉᩮᩣ ᩉᩮᩣᨲᩥ, ᩁᨠ᩠ᨡᨲᩥᨿᩮᩅ. ᨿᨴᩣ ᨸᨶ ‘‘ᩈᩮᩣᨸᩥ ᨶ ᨴᩔᩣᨾᩦ’’ᨲᩥ, ‘‘ᩈᩣᨾᩥᨠᩮᩣᨸᩥ ᨶ ᩃᨧ᩠ᨨᩣᨾᩦ’’ᨲᩥ ᩑᩅᩴ ᩏᨽᩮᩣ ᨵᩩᩁᩴ ᨶᩥᨠ᩠ᨡᩥᨸᨶ᩠ᨲᩥ, ᨲᨴᩣ ᩋᨽᩥᨿᩩᨬ᩠ᨩᨠᩔ ᨸᩣᩁᩣᨩᩥᨠᩴ.

ᩋᨬ᩠ᨬᩔ ᨽᨱ᩠ᨯᩴ ᩉᩁᨶ᩠ᨲᩮᩣᨲᩥ ᩅᩮᨲᨶᩮᨶ ᩅᩣ ᨾᩥᨲ᩠ᨲᨽᩣᩅᩮᨶ ᩅᩣ ᩋᨬ᩠ᨬᩔ ᨽᨱ᩠ᨯᩴ ᩉᩁᨶ᩠ᨲᩮᩣ. ᩈᩦᩈᩮ ᨽᩣᩁᨶ᩠ᨲᩥ ᩈᩦᩈᩮ ᨮᩥᨲᨽᩣᩁᩴ. ᩈᩦᩈᩔ ᨲᩣᩅ ᨸᩩᩁᩥᨾᨣᩃᩮ ᨣᩃᩅᩣᨭᨠᩮᩣ, ᨸᩥᨭ᩠ᨮᩥᨣᩃᩮ ᨠᩮᩈᨬ᩠ᨧᩥ ᨠᩮᩈᨶ᩠ᨲᩮ ᩌᩅᨭ᩠ᨭᩮᩣ ᩉᩮᩣᨲᩥ, ᨣᩃᩔᩮᩅ ᩏᨽᩮᩣᩈᩩ ᨸᩔᩮᩈᩩ ᨠᩮᩈᨬ᩠ᨧᩥ ᨠᩮᩈᩣ ᩒᩁᩩᨿ᩠ᩉ ᨩᩣᨿᨶ᩠ᨲᩥ, ᨿᩮ ‘‘ᨠᨱ᩠ᨱᨧᩪᩊᩥᨠᩣ’’ᨲᩥ ᩅᩩᨧ᩠ᨧᨶ᩠ᨲᩥ, ᨲᩮᩈᩴ ᩋᨵᩮᩣᨽᩣᨣᩮᩣ ᨧᩣᨲᩥ ᩋᨿᩴ ᩉᩮᨭ᩠ᨮᩥᨾᨠᩮᩣ ᨸᩁᩥᨧ᩠ᨨᩮᨴᩮᩣ, ᨲᨲᩮᩣ ᩏᨸᩁᩥ ᩈᩦᩈᩴ, ᩑᨲ᩠ᨳᨶ᩠ᨲᩁᩮ ᨮᩥᨲᨽᩣᩁᨶ᩠ᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨡᨶ᩠ᨵᩴ ᩒᩁᩮᩣᨸᩮᨲᩦᨲᩥ ᩏᨽᩮᩣᩈᩩ ᨸᩔᩮᩈᩩ ᨠᨱ᩠ᨱᨧᩪᩊᩥᨠᩣᩉᩥ ᨸᨭ᩠ᨮᩣᨿ ᩉᩮᨭ᩠ᨮᩣ, ᨠᨸ᩠ᨸᩁᩮᩉᩥ ᨸᨭ᩠ᨮᩣᨿ ᩏᨸᩁᩥ, ᨸᩥᨭ᩠ᨮᩥᨣᩃᩣᩅᨭ᩠ᨭᨲᩮᩣ ᨧ ᨣᩃᩅᩣᨭᨠᨲᩮᩣ ᨧ ᨸᨭ᩠ᨮᩣᨿ ᩉᩮᨭ᩠ᨮᩣ, ᨸᩥᨭ᩠ᨮᩥᩅᩮᨾᨩ᩠ᨫᩣᩅᨭ᩠ᨭᨲᩮᩣ ᨧ ᩏᩁᨸᩁᩥᨧ᩠ᨨᩮᨴᨾᨩ᩠ᨫᩮ, ᩉᨴᨿᩣᩅᩣᨭᨠᨲᩮᩣ ᨧ ᨸᨭ᩠ᨮᩣᨿ ᩏᨸᩁᩥ ᨡᨶ᩠ᨵᩮᩣ, ᨲᩴ ᩒᩁᩮᩣᨸᩮᨲᩥ.

ᩋᨿᩴ ᨸᨶᩮᨲ᩠ᨳ ᩅᩥᨶᩥᨧ᩠ᨨᨿᩮᩣ – ᨿᩮᩣ ᨽᩥᨠ᩠ᨡᩩ ‘‘ᩍᨴᩴ ᨣᩉᩮᨲ᩠ᩅᩣ ᩑᨲ᩠ᨳ ᨿᩣᩉᩦ’’ᨲᩥ (ᨸᩣᩁᩣ. ᩋᨭ᩠ᨮ. ᪑.᪑᪐᪑) ᩈᩣᨾᩥᨠᩮᩉᩥ ᩋᨶᩣᨱᨲ᩠ᨲᩮᩣ ᩈᨿᨾᩮᩅ ‘‘ᨾᨿ᩠ᩉᩴ ᩍᨴᩴ ᨶᩣᨾ ᨴᩮᨳ, ᩋᩉᩴ ᩅᩮᩣ ᨽᨱ᩠ᨯᩴ ᩅᩉᩣᨾᩦ’’ᨲᩥ ᨲᩮᩈᩴ ᨽᨱ᩠ᨯᩴ ᩈᩦᩈᩮᨶ ᩌᨴᩣᨿ ᨣᨧ᩠ᨨᨶ᩠ᨲᩮᩣ ᨳᩮᨿ᩠ᨿᨧᩥᨲ᩠ᨲᩮᨶ ᨲᩴ ᨽᨱ᩠ᨯᩴ ᩌᨾᩈᨲᩥ, ᨴᩩᨠ᩠ᨠᨭᩴ. ᨿᨳᩣᩅᩩᨲ᩠ᨲᩈᩦᩈᨸᩁᩥᨧ᩠ᨨᩮᨴᩴ ᩋᨶᨲᩥᨠ᩠ᨠᨾᨶ᩠ᨲᩮᩣᩅ ᩍᨲᩮᩣ ᨧᩥᨲᩮᩣ ᨧ ᨥᩴᩈᨶ᩠ᨲᩮᩣ ᩈᩣᩁᩮᨲᩥᨸᩥ ᨸᨧ᩠ᨧᩣᩈᩣᩁᩮᨲᩥᨸᩥ, ᨳᩩᩃ᩠ᩃᨧ᩠ᨧᨿᩴ. ᨡᨶ᩠ᨵᩴ ᩒᩁᩮᩣᨸᩥᨲᨾᨲ᩠ᨲᩮ ᨠᩥᨬ᩠ᨧᩣᨸᩥ ᩈᩣᨾᩥᨠᩣᨶᩴ ‘‘ᩅᩉᨲᩪ’’ᨲᩥ ᨧᩥᨲ᩠ᨲᩴ ᩋᨲ᩠ᨳᩥ, ᨲᩮᩉᩥ ᨸᨶ ᩋᨶᩣᨱᨲ᩠ᨲᨲ᩠ᨲᩣ ᨸᩣᩁᩣᨩᩥᨠᩴ. ᨡᨶ᩠ᨵᩴ ᨸᨶ ᩋᨶᩮᩣᩁᩮᩣᨸᩮᨲ᩠ᩅᩣᨸᩥ ᩈᩦᩈᨲᩮᩣ ᨠᩮᩈᨣ᩠ᨣᨾᨲ᩠ᨲᨾ᩠ᨸᩥ ᨧᩣᩅᩮᨶ᩠ᨲᩔ ᨸᩣᩁᩣᨩᩥᨠᩴ. ᨿᨾᨠᨽᩣᩁᩔ ᨸᨶ ᩑᨠᩮᩣ ᨽᩣᨣᩮᩣ ᩈᩦᩈᩮ ᨸᨲᩥᨭ᩠ᨮᩣᨲᩥ, ᩑᨠᩮᩣ ᨸᩥᨭ᩠ᨮᩥᨿᩴ, ᨲᨲ᩠ᨳ ᨴ᩠ᩅᩥᨶ᩠ᨶᩴ ᨮᩣᨶᩣᨶᩴ ᩅᩈᩮᨶ ᩅᩥᨶᩥᨧ᩠ᨨᨿᩮᩣ ᩅᩮᨴᩥᨲᨻ᩠ᨻᩮᩣ. ᩋᨿᩴ ᨸᨶ ᩈᩩᨴ᩠ᨵᩈᩦᩈᨽᩣᩁᩔᩮᩅ ᩅᩈᩮᨶ ᩅᩩᨲ᩠ᨲᩮᩣ. ᨿᩮᩣ ᨧᩣᨿᩴ ᩈᩦᩈᨽᩣᩁᩮ ᩅᩩᨲ᩠ᨲᩮᩣ, ᨡᨶ᩠ᨵᨽᩣᩁᩣᨴᩦᩈᩩᨸᩥ ᩋᨿᨾᩮᩅ ᩅᩥᨶᩥᨧ᩠ᨨᨿᩮᩣ ᩅᩮᨴᩥᨲᨻ᩠ᨻᩮᩣ.

ᩏᨸᨶᩥᨠ᩠ᨡᩥᨲ᩠ᨲᩴ ᨽᨱ᩠ᨯᨶ᩠ᨲᩥ ᩈᨦ᩠ᨣᩮᩣᨸᨶᨲ᩠ᨳᩣᨿ ᩋᨲ᩠ᨲᨶᩮᩣ ᩉᨲ᩠ᨳᩮ ᨸᩁᩮᩉᩥ ᨮᨸᩥᨲᨽᨱ᩠ᨯᩴ. ᩋᩉᩴ ᨶ ᨣᨱ᩠ᩉᩣᨾᩦᨲᩥ ᩈᨾ᩠ᨻᨶ᩠ᨵᩮᩣ. ᩋᨲᩦᨲᨲ᩠ᨳᩮ ᨧᩮᨲᩴ ᩅᨲ᩠ᨲᨾᩣᨶᩅᨧᨶᩴ, ᨶᩣᩉᩴ ᨣᩉᩮᩈᩥᨶ᩠ᨲᩥ ᩋᨲ᩠ᨳᩮᩣ. ᨴᩩᨠ᩠ᨠᨭᩴ (ᨸᩣᩁᩣ. ᩋᨭ᩠ᨮ. ᪑.᪑᪑᪑) ᩈᨾ᩠ᨸᨩᩣᨶᨾᩩᩈᩣᩅᩣᨴᩮᨸᩥ ᩋᨴᩥᨶ᩠ᨶᩣᨴᩣᨶᩔ ᨸᩩᨻ᩠ᨻᨸᨿᩮᩣᨣᨲ᩠ᨲᩣ. ‘‘ᨠᩥᩴ ᨲᩩᨾ᩠ᩉᩮ ᨽᨱᨳ, ᨶᩮᩅᩥᨴᩴ ᨾᨿ᩠ᩉᩴ ᩋᨶᩩᩁᩪᨸᩴ, ᨶ ᨲᩩᨾ᩠ᩉᩣᨠ’’ᨶ᩠ᨲᩥᩌᨴᩦᨶᩥ ᩅᨴᨶ᩠ᨲᩔᩣᨸᩥ ᨴᩩᨠ᩠ᨠᨭᨾᩮᩅ. ᩈᩣᨾᩥᨠᩔ ᩅᩥᨾᨲᩥᩴ ᩏᨸ᩠ᨸᩣᨴᩮᨲᩦᨲᩥ ‘‘ᩁᩉᩮᩣ ᨾᨿᩣ ᩑᨲᩔ ᩉᨲ᩠ᨳᩮ ᨮᨸᩥᨲᩴ, ᨶ ᩋᨬ᩠ᨬᩮᩣ ᨠᩮᩣᨧᩥ ᨩᩣᨶᩣᨲᩥ, ᨴᩔᨲᩥ ᨶᩩ ᨡᩮᩣ ᨾᩮ, ᨶᩮᩣ’’ᨲᩥ ᩈᩣᨾᩥᨠᩔ ᩅᩥᨾᨲᩥᩴ ᩏᨸ᩠ᨸᩣᨴᩮᨲᩥ. ᨵᩩᩁᩴ ᨶᩥᨠ᩠ᨡᩥᨸᨲᩦᨲᩥ ᨲᩔ ᨹᩁᩩᩈᩣᨴᩥᨽᩣᩅᩴ ᨴᩥᩈ᩠ᩅᩣ ᩏᩔᩣᩉᩴ ᨮᨸᩮᨲᩥ. ᨲᨲᩕ ᩈᨧᩣᨿᩴ ᨽᩥᨠ᩠ᨡᩩ ‘‘ᨠᩥᩃᨾᩮᨲ᩠ᩅᩣ ᨶᩴ ᨴᩔᩣᨾᩦ’’ᨲᩥ ᨴᩣᨶᩮ ᩈᩏᩔᩣᩉᩮᩣ, ᩁᨠ᩠ᨡᨲᩥ ᨲᩣᩅ. ᩈᨧᩮ ᩈᩮᩣ ᨴᩣᨶᩮ ᨶᩥᩁᩩᩔᩣᩉᩮᩣ, ᨽᨱ᩠ᨯᩈᩣᨾᩥᨠᩮᩣ ᨸᨶ ᨣᩉᨱᩮ ᩈᩏᩔᩣᩉᩮᩣ, ᩁᨠ᩠ᨡᨲᩮᩅ. ᨿᨴᩥ ᨸᨶ ᩈᩮᩣ ᨲᩈ᩠ᨾᩥᩴ ᨴᩣᨶᩮ ᨶᩥᩁᩩᩔᩣᩉᩮᩣ, ᨽᨱ᩠ᨯᩈᩣᨾᩥᨠᩮᩣᨸᩥ ‘‘ᨶ ᨾᨿ᩠ᩉᩴ ᨴᩔᨲᩦ’’ᨲᩥ ᨵᩩᩁᩴ ᨶᩥᨠ᩠ᨡᩥᨸᨲᩥ, ᩑᩅᩴ ᩏᨽᩥᨶ᩠ᨶᩴ ᨵᩩᩁᨶᩥᨠ᩠ᨡᩮᨸᩮᨶ ᨽᩥᨠ᩠ᨡᩩᨶᩮᩣ ᨸᩣᩁᩣᨩᩥᨠᩴ. ᨿᨴᩥᨸᩥ ᨾᩩᨡᩮᨶ ‘‘ᨴᩔᩣᨾᩦ’’ᨲᩥ ᩅᨴᨲᩥ, ᨧᩥᨲ᩠ᨲᩮᨶ ᨸᨶ ᩋᨴᩣᨲᩩᨠᩣᨾᩮᩣ, ᩑᩅᨾ᩠ᨸᩥ ᩈᩣᨾᩥᨠᩔ ᨵᩩᩁᨶᩥᨠ᩠ᨡᩮᨸᩮᨶ ᨽᩥᨠ᩠ᨡᩩᨶᩮᩣ ᨸᩣᩁᩣᨩᩥᨠᩴ.

ᩈᩉᨽᨱ᩠ᨯᩉᩣᩁᨠᩴ ᨶᩮᩔᩣᨾᩦᨲᩥ ‘‘ᩈᩉᨽᨱ᩠ᨯᩉᩣᩁᨠᩴ ᨽᨱ᩠ᨯᩴ ᨶᩮᩔᩣᨾᩦ’’ᨲᩥ ᨧᩥᨶ᩠ᨲᩮᨲ᩠ᩅᩣ. ᨸᨮᨾᩴ ᨸᩣᨴᩴ ᩋᨲᩥᨠ᩠ᨠᩣᨾᩮᨲᩦᨲᩥ ᨽᨱ᩠ᨯᩉᩣᩁᨠᩴ ᨲᨩ᩠ᨩᩮᨲ᩠ᩅᩣ ᨲᩔ ᨣᨾᨶᨸᨳᩴ ᩅᩣᩁᩮᨲ᩠ᩅᩣ ᩋᨲ᩠ᨲᨶᩣ ᩁᩩᨧᩥᨲᨾᨣ᩠ᨣᩴ ᩑᨠᨸᩣᨴᩴ ᩋᨲᩥᨠ᩠ᨠᩣᨾᩮᨲᩥ. ᨳᩃᨭ᩠ᨮᨶ᩠ᨲᩥ (ᨸᩣᩁᩣ. ᩋᨭ᩠ᨮ. ᪑.᪙᪕) ᨳᩃᩮ ᨶᩥᨠ᩠ᨡᩥᨲ᩠ᨲᩴ, ᨽᩪᨾᩥᨲᩃᩮ ᩅᩣ ᨸᩣᩈᩣᨱᨸᨻ᩠ᨻᨲᨲᩃᩣᨴᩦᩈᩩ ᩅᩣ ᨿᨲ᩠ᨳ ᨠᨲ᩠ᨳᨧᩥ ᨸᨭᩥᨧ᩠ᨨᨶ᩠ᨶᩮ ᩅᩣ ᩋᨸ᩠ᨸᨭᩥᨧ᩠ᨨᨶ᩠ᨶᩮ ᩅᩣ ᨮᨸᩥᨲᨶ᩠ᨲᩥ ᩋᨲ᩠ᨳᩮᩣ. ᨹᨶ᩠ᨴᩣᨸᩮᨲᩥ, ᨳᩩᩃ᩠ᩃᨧ᩠ᨧᨿᨶ᩠ᨲᩥ ᨿᩮᩣ ᨹᨶ᩠ᨴᩣᨸᩮᨲᩥ, ᨲᩔ ᨸᨿᩮᩣᨣᩮ ᨸᨿᩮᩣᨣᩮ ᨳᩩᩃ᩠ᩃᨧ᩠ᨧᨿᩴ, ᩌᨾᩈᨶᩮ ᨴᩩᨠ᩠ᨠᨭᩴ, ᨹᨶ᩠ᨴᩣᨸᨶᩮ ᨳᩩᩃ᩠ᩃᨧ᩠ᨧᨿᨬ᩠ᨧ ᩅᩥᩈᩩᩴ ᩅᩥᩈᩩᩴ ᨳᩮᨿ᩠ᨿᨧᩥᨲ᩠ᨲᩮᨶ ᩌᨾᩈᨶᨹᨶ᩠ᨴᩣᨸᨶᨸᨿᩮᩣᨣᩮ ᨠᩁᩮᩣᨶ᩠ᨲᩔᩮᩅ ᩉᩮᩣᨲᩥ. ‘‘ᩑᨠᨸᨿᩮᩣᨣᩮᨶ ᨣᨱ᩠ᩉᨶ᩠ᨲᩔ ᨸᨶ ᩏᨴ᩠ᨵᩣᩁᩮ ᨸᩣᩁᩣᨩᩥᨠᨾᩮᩅ, ᨶ ᨴᩩᨠ᩠ᨠᨭᨳᩩᩃ᩠ᩃᨧ᩠ᨧᨿᩣᨶᩦ’’ᨲᩥ ᩅᨴᨶ᩠ᨲᩥ. ᨮᩣᨶᩣᨲᩥ ᨮᩥᨲᨭ᩠ᨮᩣᨶᨲᩮᩣ. ᩈᨧᩮ ᨲᩴ ᨳᩃᨭ᩠ᨮᩴ ᩁᩣᩈᩥᨠᨲᩴ ᩉᩮᩣᨲᩥ, ᩋᨶ᩠ᨲᩮᩣᨠᩩᨾ᩠ᨽᩥᨿᩴ ᨽᩣᨩᨶᨣᨲᨠᩁᨱᨾᩩᨭ᩠ᨮᩥᨧ᩠ᨨᩮᨴᨶᩅᩥᨶᩥᨧ᩠ᨨᨿᩮᨶ ᩅᩥᨶᩥᨧ᩠ᨨᩥᨶᩥᨲᨻ᩠ᨻᩴ. ᩈᨧᩮ ᩑᨠᩣᨻᨴ᩠ᨵᩴ ᩈᩥᩃᩮᩈᨶᩥᨿ᩠ᨿᩣᩈᩣᨴᩥ, ᨸᨠ᩠ᨠᨾᨵᩩᨹᩣᨱᩥᨲᩅᩥᨶᩥᨧ᩠ᨨᨿᩮᨶ ᩅᩥᨶᩥᨧ᩠ᨨᩥᨶᩥᨲᨻ᩠ᨻᩴ. ᩈᨧᩮ ᨣᩁᩩᨠᩴ ᩉᩮᩣᨲᩥ ᨽᩣᩁᨻᨴ᩠ᨵᩴ ᩃᩮᩣᩉᨸᩥᨱ᩠ᨯᩥᨲᩮᩃᨾᨵᩩᨥᨭᩣᨴᩥ ᩅᩣ, ᨠᩩᨾ᩠ᨽᩥᨿᩴ ᨮᩣᨶᩣᨧᩣᩅᨶᩅᩥᨶᩥᨧ᩠ᨨᨿᩮᨶ ᩅᩥᨶᩥᨧ᩠ᨨᩥᨶᩥᨲᨻ᩠ᨻᩴ. ᩈᨦ᩠ᨡᩃᩥᨠᩣᨻᨴ᩠ᨵᩔ ᨧ ᨮᩣᨶᨽᩮᨴᩮᩣ ᩈᩃ᩠ᩃᨠ᩠ᨡᩮᨲᨻ᩠ᨻᩮᩣ. ᨸᨲ᩠ᨳᩁᩥᨲ᩠ᩅᩣ ᨮᨸᩥᨲᩴ ᨸᨶ ᨸᩣᩅᩣᩁᨲ᩠ᨳᩁᨱᨠᨭᩈᩣᩁᨠᩣᨴᩥᩴ ᩏᨩᩩᨠᩴ ᨣᩉᩮᨲ᩠ᩅᩣ ᩌᨠᨯ᩠ᨰᨲᩥ, ᨸᩣᩁᩥᨾᨶ᩠ᨲᩮ ᩒᩁᩥᨾᨶ᩠ᨲᩮᨶ ᨹᩩᨭ᩠ᨮᩮᩣᨠᩣᩈᩴ ᩋᨲᩥᨠ᩠ᨠᨶ᩠ᨲᩮ ᨸᩣᩁᩣᨩᩥᨠᩴ. ᨲᨳᩮᩅ ᨣᩉᩮᨲ᩠ᩅᩣ ᨸᩁᨲᩮᩣ ᨸᩮᩃ᩠ᩃᨲᩥ, ᨸᩣᩁᩥᨾᨶ᩠ᨲᩮ ᨹᩩᨭ᩠ᨮᩮᩣᨠᩣᩈᩴ ᩒᩁᩥᨾᨶ᩠ᨲᩮ ᩋᨲᩥᨠ᩠ᨠᨶ᩠ᨲᩮ ᨸᩣᩁᩣᨩᩥᨠᩴ. ᩅᩣᨾᨲᩮᩣ ᩅᩣ ᨴᨠ᩠ᨡᩥᨱᨲᩮᩣ ᩅᩣ ᩋᨸᨶᩣᨾᩮᨶ᩠ᨲᩔ ᩅᩣᨾᨶ᩠ᨲᩮᨶ ᩅᩣ ᨴᨠ᩠ᨡᩥᨱᨶ᩠ᨲᩮᨶ ᩅᩣ ᨹᩩᨭ᩠ᨮᩮᩣᨠᩣᩈᩴ ᨴᨠ᩠ᨡᩥᨱᨶ᩠ᨲᩮ ᩅᩣ ᩅᩣᨾᨶ᩠ᨲᩮ ᩅᩣ ᩋᨲᩥᨠ᩠ᨠᨶ᩠ᨲᩮ ᨸᩣᩁᩣᨩᩥᨠᩴ. ᩅᩮᨮᩮᨲ᩠ᩅᩣ ᩏᨴ᩠ᨵᩁᨲᩥ, ᨠᩮᩈᨣ᩠ᨣᨾᨲ᩠ᨲᩴ ᩌᨠᩣᩈᨣᨲᩴ ᨠᩁᩮᩣᨶ᩠ᨲᩔ ᨸᩣᩁᩣᨩᩥᨠᩴ.

ᩈᨠᩮᩣ ᩉᨲ᩠ᨳᩮᩣ ᩈᩉᨲ᩠ᨳᩮᩣ, ᨲᩮᨶ ᨶᩥᨻ᩠ᨻᨲ᩠ᨲᩮᩣ, ᨲᩔ ᩅᩣ ᩈᨾ᩠ᨻᨶ᩠ᨵᩦᨲᩥ ᩈᩣᩉᨲ᩠ᨳᩥᨠᩮᩣ, ᩋᩅᩉᩣᩁᩮᩣ. ᩌᨱᩣᨸᨶᩴ ᩌᨱᨲ᩠ᨲᩥ, ᨲᩣᨿ ᩌᨱᨲ᩠ᨲᩥᨿᩣ ᨶᩥᨻ᩠ᨻᨲ᩠ᨲᩮᩣ ᩋᩅᩉᩣᩁᩮᩣ ᩌᨱᨲ᩠ᨲᩥᨠᩮᩣ. ᨶᩥᩔᨩ᩠ᨩᨶᩴ ᨶᩥᩔᨣ᩠ᨣᩮᩣ, ᩈᩩᨦ᩠ᨠᨥᩣᨲᨭ᩠ᨮᩣᨶᩮ, ᨸᩁᩥᨠᨸ᩠ᨸᩥᨲᩮᩣᨠᩣᩈᩮ ᨧ ᨮᨲ᩠ᩅᩣ ᨽᨱ᩠ᨯᩔ ᨻᩉᩥ ᨶᩥᨸᩣᨲᨶᩴ, ᨶᩥᩔᨣ᩠ᨣᩮᩣᩅ ᨶᩥᩔᨣ᩠ᨣᩥᨿᩮᩣ. ᨠᩥᩁᩥᨿᩣᩈᩥᨴ᩠ᨵᩥᨲᩮᩣ ᨸᩩᩁᩮᨲᩁᨾᩮᩅ ᨸᩣᩁᩣᨩᩥᨠᩣᨸᨲ᩠ᨲᩥᩈᨦ᩠ᨡᩣᨲᩴ ᩋᨲ᩠ᨳᩴ ᩈᩣᨵᩮᨲᩦᨲᩥ ᩋᨲ᩠ᨳᩈᩣᨵᨠᩮᩣ. ᨵᩩᩁᩔ ᩌᩃᨿᩈᨦ᩠ᨡᩣᨲᩔ ᨽᩣᩁᩔ ᨶᩥᨠ᩠ᨡᩥᨸᨶᩴ ᨸᩁᩥᨧ᩠ᨧᨩᨶᩴ ᨶᩥᩁᩩᩔᩣᩉᨽᩣᩅᩣᨸᨩ᩠ᨩᨶᩴ ᨵᩩᩁᨶᩥᨠ᩠ᨡᩮᨸᩮᩣ. ᩍᨴᩣᨶᩥ ᨻ᩠ᨿᨬ᩠ᨩᨶᩮ ᩌᨴᩁᩴ ᩋᨠᨲ᩠ᩅᩣ ᨲᩮᩈᩴ ᩋᨲ᩠ᨳᨾᨲ᩠ᨲᨾᩮᩅ ᨴᩔᩮᨶ᩠ᨲᩮᩣ ‘‘ᨲᨲ᩠ᨳ ᩈᩣᩉᨲ᩠ᨳᩥᨠᩮᩣ ᨶᩣᨾᩣ’’ᨲᩥᩌᨴᩥᨾᩣᩉ. ᩈᩉᨲ᩠ᨳᩣᨲᩥ ᩈᩉᨲ᩠ᨳᩮᨶ. ᨠᩁᨱᨲ᩠ᨳᩮ ᩉᩥ ᩍᨴᩴ ᨶᩥᩔᨠ᩠ᨠᩅᨧᨶᩴ. ‘‘ᩋᩈᩩᨠᩔ ᨽᨱ᩠ᨯᩴ ᩋᩅᩉᩁᩣ’’ᨲᩥ ᩋᨬ᩠ᨬᩴ ᩌᨱᩣᨸᩮᨲᩦᨲᩥ ᩑᨲ᩠ᨳᩣᨸᩥ ᩌᨱᨲ᩠ᨲᩥᨠ᩠ᨡᨱᩮ ᩑᩅ ᩌᨸᨲ᩠ᨲᩥ ᨴᨭ᩠ᨮᨻ᩠ᨻᩣ. ᨿᨴᩥ ᩑᩅᩴ ᩍᨾᩔ, ᩋᨲ᩠ᨳᩈᩣᨵᨠᩔ ᨧ ᨠᩮᩣ ᩅᩥᩈᩮᩈᩮᩣᨲᩥ? ᨲᩴ ᨡᨱᩴ ᩑᩅ ᨣᩉᨱᩮ ᨶᩥᨿᩩᨬ᩠ᨩᨶᩴ ᩌᨱᨲ᩠ᨲᩥᨠᨸᨿᩮᩣᨣᩮᩣ, ᨠᩣᩃᨶ᩠ᨲᩁᩮᨶ ᨣᩉᨱᨲ᩠ᨳᩴ ᨶᩥᨿᩮᩣᨣᩮᩣ ᩋᨲ᩠ᨳᩈᩣᨵᨠᩮᩣᨲᩥ (ᩈᩣᩁᨲ᩠ᨳ. ᨭᩦ. ᪒.᪙᪒; ᩅᩥ. ᩅᩥ. ᨭᩦ. ᪑.᪙᪒) ᩋᨿᨾᩮᨲᩮᩈᩴ ᩅᩥᩈᩮᩈᩮᩣᨲᩥ. ᨲᩮᨶᩮᩅᩣᩉ ‘‘ᩋᩈᩩᨠᩔ ᨽᨱ᩠ᨯᩴ ᨿᨴᩣ ᩈᨠ᩠ᨠᩮᩣᩈᩥ, ᨲᨴᩣ ᨲᩴ ᩋᩅᩉᩁᩣᨲᩥ ᩌᨱᩣᨸᩮᨲᩦ’’ᨲᩥ.

ᩈᩩᨦ᩠ᨠᨥᩣᨲᨸᩁᩥᨠᨸ᩠ᨸᩥᨲᩮᩣᨠᩣᩈᩣᨶᨶ᩠ᨲᩥ ᩈᩩᨦ᩠ᨠᨥᩣᨲᨬ᩠ᨧ ᨸᩁᩥᨠᨸ᩠ᨸᩥᨲᩮᩣᨠᩣᩈᩮᩣ ᨧ ᩈᩩᨦ᩠ᨠᨥᩣᨲᨸᩁᩥᨠᨸ᩠ᨸᩥᨲᩮᩣᨠᩣᩈᩣ, ᨲᩮᩈᩴ. ᨲᨲ᩠ᨳ ᩈᩩᨦ᩠ᨠᨥᩣᨲᨶ᩠ᨲᩥ (ᨸᩣᩁᩣ. ᩋᨭ᩠ᨮ. ᪑.᪑᪑᪓) ᩁᩩᨠ᩠ᨡᨸᨻ᩠ᨻᨲᩣᨴᩥᩈᨬ᩠ᨬᩣᨱᩮᨶ ᨶᩥᨿᨾᩥᨲᩔ ᩈᩩᨦ᩠ᨠᨭ᩠ᨮᩣᨶᩔᩮᨲᩴ ᩋᨵᩥᩅᨧᨶᩴ. ᨲᨬ᩠ᩉᩥ ᨿᩈ᩠ᨾᩣ ᨲᨲᩮᩣ ᩁᩣᨩᨴᩮᨿ᩠ᨿᨽᩣᨣᩴ ᩈᩩᨦ᩠ᨠᩴ ᩋᨴᨲ᩠ᩅᩣ ᨶᩦᩉᩁᨶ᩠ᨲᩣ ᩁᨬ᩠ᨬᩮᩣ ᩈᩩᨦ᩠ᨠᩴ ᩉᨶᨶ᩠ᨲᩥ ᩅᩥᨶᩣᩈᩮᨶ᩠ᨲᩥ, ᨲᩈ᩠ᨾᩣ ‘‘ᩈᩩᨦ᩠ᨠᨥᩣᨲ’’ᨶ᩠ᨲᩥ ᩅᩩᨲ᩠ᨲᩴ.

ᨠᩮᩣᨧᩥ ᨸᩁᨸᩁᩥᩅᩮᨱᩣᨴᩦᨶᩥ ᨸᩅᩥᨭ᩠ᨮᩮᩣ ᨠᩥᨬ᩠ᨧᩥ ᩃᩮᩣᨽᨶᩮᨿ᩠ᨿᨽᨱ᩠ᨯᩴ ᨴᩥᩈ᩠ᩅᩣ ᨴ᩠ᩅᩣᩁᨸ᩠ᨸᨾᩩᨡᩣᨴᩥᩅᩈᩮᨶ ᨿᩴ ᨮᩣᨶᩴ ‘‘ᩈᨧᩮ ᨾᩴ ᩑᨲ᩠ᨳᨶ᩠ᨲᩁᩮ ᨸᩔᩥᩔᨶ᩠ᨲᩥ, ᨴᨭ᩠ᨮᩩᨠᩣᨾᨲᩣᨿ ᨣᩉᩮᨲ᩠ᩅᩣ ᩅᩥᨧᩁᨶ᩠ᨲᩮᩣ ᩅᩥᨿ ᨴᩔᩣᨾᩥ, ᨶᩮᩣ ᨧᩮ ᨸᩔᩥᩔᨶ᩠ᨲᩥ, ᩉᩁᩥᩔᩣᨾᩦ’’ᨲᩥ ᨸᩁᩥᨠᨸ᩠ᨸᩮᨲᩥ, ᩋᨿᩴ ᨸᩁᩥᨠᨸ᩠ᨸᩥᨲᩮᩣᨠᩣᩈᩮᩣ. ᩌᨱᨲ᩠ᨲᩥᨠ᩠ᨡᨱᩮᨿᩮᩅ ᨸᩣᩁᩣᨩᩥᨠᨶ᩠ᨲᩥ (ᨸᩣᩁᩣ. ᩋᨭ᩠ᨮ. ᪑.᪑᪒᪑) ᩋᨲ᩠ᨳᩈᩣᨵᨠᨧᩮᨲᨶᩣᨠ᩠ᨡᨱᩮᨿᩮᩅ ᨸᩣᩁᩣᨩᩥᨠᩴ. ᩈᨧᩮᨸᩥ ᩋᩅᩉᩣᩁᨠᩮᩣ ᩈᨭ᩠ᨮᩥᩅᩔᩣᨲᩥᨠ᩠ᨠᨾᩮᨶᨸᩥ ᨲᩴ ᨽᨱ᩠ᨯᩴ ᩋᩅᩉᩁᨲᩥ, ᩌᨱᩣᨸᨠᩮᩣ ᨧ ᩋᨶ᩠ᨲᩁᩣᨿᩮᩅ ᨠᩣᩃᩴ ᨠᩁᩮᩣᨲᩥ, ᩉᩦᨶᩣᨿ ᩅᩣ ᩌᩅᨲ᩠ᨲᨲᩥ, ᩋᩔᨾᨱᩮᩣᩅ ᩉᩩᨲ᩠ᩅᩣ ᨠᩣᩃᩴ ᩅᩣ ᨠᩁᩥᩔᨲᩥ, ᩉᩦᨶᩣᨿ ᩅᩣ ᩌᩅᨲ᩠ᨲᩥᩔᨲᩥ, ᩋᩅᩉᩣᩁᨠᩔ ᨸᨶ ᩋᩅᩉᩣᩁᨠ᩠ᨡᨱᩮᨿᩮᩅ ᨸᩣᩁᩣᨩᩥᨠᩴ. ᨸᩣᨴᨣ᩠ᨥᨶᨠᨲᩮᩃᨶ᩠ᨲᩥ (ᨸᩣᩁᩣ. ᩋᨭ᩠ᨮ. ᪑.᪙᪔) ᩑᨲ᩠ᨳ ᨸᩣᨴᩮᩣ ᨶᩣᨾ ᨠᩉᩣᨸᨱᩔ ᨧᨲᩩᨲ᩠ᨳᩮᩣ ᨽᩣᨣᩮᩣ, ᨲᩴ ᩋᨣ᩠ᨥᨲᩦᨲᩥ ᨸᩣᨴᨣ᩠ᨥᨶᨠᩴ, ᨸᩣᨴᨣ᩠ᨥᨶᨠᨬ᩠ᨧ ᨲᩴ ᨲᩮᩃᨬ᩠ᨧᩣᨲᩥ ᨸᩣᨴᨣ᩠ᨥᨶᨠᨲᩮᩃᩴ. ᩏᨸᩣᩉᨶᩣ ᩌᨴᩥ ᨿᩮᩈᩴ ᩅᨲ᩠ᨳᩪᨶᩴ ᨲᩣᨶᩥ ᩏᨸᩣᩉᨶᩣᨴᩦᨶᩥ. ᩌᨴᩥᩈᨴ᩠ᨴᩮᨶ ᨴᩩᨠᩪᩃᩈᩣᨭᨠᨧᨾ᩠ᨾᨠ᩠ᨡᨱ᩠ᨯᩣᨴᩦᨶᩴ ᨣᩉᨱᩴ. ᨸᨠ᩠ᨡᩥᨸᨲᩦᨲᩥ ᨳᩮᨿ᩠ᨿᨧᩥᨲ᩠ᨲᩮᨶ ᨸᨠ᩠ᨡᩥᨸᨲᩥ. ᨲᩮᨶᩣᩉ ‘‘ᩉᨲ᩠ᨳᨲᩮᩣ ᨾᩩᨲ᩠ᨲᨾᨲ᩠ᨲᩮᨿᩮᩅ ᨸᩣᩁᩣᨩᩥᨠ’’ᨶ᩠ᨲᩥ ᩈᨧᩮ ᨸᨶ ᩋᨲ᩠ᨲᨶᩮᩣᨸᩥ ᨠᩩᨾ᩠ᨽᩥᨿᩴ ᩋᨬ᩠ᨬᩮᩣ ᩈᨸ᩠ᨸᩥᩴ ᩅᩣ ᨲᩮᩃᩴ ᩅᩣ ᩌᨠᩥᩁᨲᩥ, ᨲᨲᩕ ᨧᩣᨿᩴ ᨳᩮᨿ᩠ᨿᨧᩥᨲ᩠ᨲᩮᨶ ᨲᩮᩃᨸᩥᩅᨶᨠᩴ ᨽᨱ᩠ᨯᩴ ᨸᨠ᩠ᨡᩥᨸᨲᩥ, ᩅᩩᨲ᩠ᨲᨶᨿᩮᨶᩮᩅ ᨸᩣᩁᩣᨩᩥᨠᩴ.

ᨠᩣᨿᩮᨶ ᩅᩣ ᩅᩣᨧᩣᨿ ᩅᩣ ᨸᨿᩩᨬ᩠ᨩᨶᩴ ᩌᨱᩣᨸᨶᩴ ᨸᨿᩮᩣᨣᩮᩣ, ᩌᨱᨲ᩠ᨲᩔ ᨽᨱ᩠ᨯᨣ᩠ᨣᩉᨱᨲᩮᩣ ᨸᩩᨻ᩠ᨻᨲ᩠ᨲᩣ ᨸᩩᨻ᩠ᨻᩮᩣ, ᩍᨲᩥ ᨸᩩᨻ᩠ᨻᩮᩣ ᨧ ᩈᩮᩣ ᨸᨿᩮᩣᨣᩮᩣ ᨧᩣᨲᩥ ᨸᩩᨻ᩠ᨻᨸᨿᩮᩣᨣᩮᩣ. ᨸᨿᩮᩣᨣᩮᨶ ᩈᩉ ᩅᨲ᩠ᨲᨾᩣᨶᩮᩣ ᩋᩅᩉᩣᩁᩮᩣ ᩈᩉᨸᨿᩮᩣᨣᩮᩣ. ᩈᨾᩴ ᩑᨠᩦ ᩉᩩᨲ᩠ᩅᩣ ᩅᩥᨴᩉᩥᨲ᩠ᩅᩣ ᨾᨶ᩠ᨲᩮᨲ᩠ᩅᩣ ᩋᩅᩉᩁᨱᩴ ᩈᩴᩅᩥᨵᩣᩅᩉᩣᩁᩮᩣ, ᩋᨬ᩠ᨬᨾᨬ᩠ᨬᩴ ᩈᨬ᩠ᨬᩩᨸ᩠ᨸᨲ᩠ᨲᩥᨿᩣ ᨠᨲᩣᩅᩉᩣᩁᩮᩣᨲᩥ ᩅᩩᨲ᩠ᨲᩴ ᩉᩮᩣᨲᩥ. ᨸᩩᨻ᩠ᨻᨱ᩠ᩉᩣᨴᩥᨠᩣᩃᨸᩁᩥᨧ᩠ᨨᩮᨴᩮᨶ ᩈᨬ᩠ᨩᩣᨶᨶᩴ ᩈᨦ᩠ᨠᩮᨲᩮᩣ, ᨲᩔ ᨠᨾ᩠ᨾᩴ ᩈᨦ᩠ᨠᩮᨲᨠᨾ᩠ᨾᩴ. ᨶᩥᨾᩥᨲ᩠ᨲᩔ ᨠᨾ᩠ᨾᩴ ᨶᩥᨾᩥᨲ᩠ᨲᨠᨾ᩠ᨾᩴ, ᩈᨬ᩠ᨬᩩᨸ᩠ᨸᩣᨴᨶᨲ᩠ᨳᩴ ᨠᩔᨧᩥ ᨶᩥᨾᩥᨲ᩠ᨲᩔ ᨠᩁᨱᨶ᩠ᨲᩥ ᩋᨲ᩠ᨳᩮᩣ. ᨲᨲ᩠ᨳᩣᨲᩥ ᨿᨳᩣᩅᩩᨲ᩠ᨲᩮᩈᩩ ᨸᩩᨻ᩠ᨻᨸᨿᩮᩣᨣᩣᨴᩦᩈᩩ ᨸᨬ᩠ᨧᩈᩩ. ᨡᩥᩃᩣᨴᩦᨶᩥ ᩈᨦ᩠ᨠᩣᨾᩮᨲ᩠ᩅᩣ ᨡᩮᨲ᩠ᨲᩣᨴᩥᨣ᩠ᨣᩉᨱᩅᩈᩮᨶᩣᨲᩥ ᨡᩥᩃᩴ, ᩁᨩ᩠ᨩᩩᩴ, ᩅᨲᩥᩴ, ᨾᩁᩥᨿᩣᨴᩴ ᩅᩣ ᨸᩣᨠᩣᩁᩴ ᩅᩣ ᩈᨦ᩠ᨠᩣᨾᩮᨲ᩠ᩅᩣ ᨡᩮᨲ᩠ᨲᨣ᩠ᨣᩉᨱᩅᩈᩮᨶ, ᨡᩥᩃᩴ, ᩁᨩ᩠ᨩᩩᩴ, ᩅᨲᩥᩴ, ᨾᩁᩥᨿᩣᨴᩴ ᩅᩣ ᨸᩣᨠᩣᩁᩴ ᩅᩣ ᩈᨦ᩠ᨠᩣᨾᩮᨲ᩠ᩅᩣ ᩅᨲ᩠ᨳᩩᨣ᩠ᨣᩉᨱᩅᩈᩮᨶ. ᩈᨧᩮ ᨸᨶ ᨴ᩠ᩅᩦᩉᩥ ᨡᩥᩃᩮᩉᩥ ᨣᩉᩮᨲᨻ᩠ᨻᩴ ᩉᩮᩣᨲᩥ, ᨸᨮᨾᩮ ᨡᩥᩃᩮ ᨳᩩᩃ᩠ᩃᨧ᩠ᨧᨿᩴ, ᨴᩩᨲᩥᨿᩮ ᨸᩣᩁᩣᨩᩥᨠᩴ (ᨸᩣᩁᩣ. ᩋᨭ᩠ᨮ. ᪑.᪑᪐᪔). ᩈᨧᩮ ᨲᩦᩉᩥ ᨣᩉᩮᨲᨻ᩠ᨻᩴ ᩉᩮᩣᨲᩥ, ᨸᨮᨾᩮ ᨴᩩᨠ᩠ᨠᨭᩴ, ᨴᩩᨲᩥᨿᩮ ᨳᩩᩃ᩠ᩃᨧ᩠ᨧᨿᩴ, ᨲᨲᩥᨿᩮ ᨸᩣᩁᩣᨩᩥᨠᩴ. ᩑᩅᩴ ᨻᩉᩩᨠᩮᩈᩩᨸᩥ ᩋᩅᩈᩣᨶᩮ ᨴ᩠ᩅᩮ ᨮᨸᩮᨲ᩠ᩅᩣ ᨸᩩᩁᩥᨾᩮᩉᩥ ᨴᩩᨠ᩠ᨠᨭᩴ, ᩋᩅᩈᩣᨶᩮ ᨴ᩠ᩅᩥᨶ᩠ᨶᩴ ᩑᨠᩮᨶ ᨳᩩᩃ᩠ᩃᨧ᩠ᨧᨿᩴ, ᩍᨲᩁᩮᨶ ᨸᩣᩁᩣᨩᩥᨠᩴ. ᩁᨩ᩠ᨩᩩᨸᩈᩣᩁᨱᩣᨴᩦᩈᩩᨸᩥ ᩑᩈᩮᩅ ᨶᨿᩮᩣ. ᨿᩴ ᨸᨶ ᩈᨾᨶ᩠ᨲᨸᩣᩈᩣᨴᩥᨠᩣᨿᩴ ‘‘ᨲᨬ᩠ᨧ ᨡᩮᩣ ᩈᩣᨾᩥᨠᩣᨶᩴ ᨵᩩᩁᨶᩥᨠ᩠ᨡᩮᨸᩮᨶᩣ’’ᨲᩥ (ᨸᩣᩁᩣ. ᩋᨭ᩠ᨮ. ᪑.᪑᪐᪔) ᩅᩩᨲ᩠ᨲᩴ, ᨲᩴ ‘‘ᨡᩮᨲ᩠ᨲᩴ ᩋᨽᩥᨿᩩᨬ᩠ᨩᨲᩥ, ᩌᨸᨲ᩠ᨲᩥ ᨴᩩᨠ᩠ᨠᨭᩔᩣ’’ᨲᩥᩌᨴᩥ (ᨸᩣᩁᩣ. ᪑᪐᪔) -ᩋᨵᩥᨠᩣᩁᩮ ᩅᩩᨲ᩠ᨲᨲ᩠ᨲᩣ ᩋᨽᩥᨿᩮᩣᨣᩅᩈᩮᨶ ᨣᩉᨱᩴ ᩈᨶ᩠ᨵᩣᨿᩣᨲᩥ ᨴᨭ᩠ᨮᨻ᩠ᨻᩴ. ᩈᩴᩅᩥᨴᩉᩥᨲ᩠ᩅᩣᨲᩥ ᩑᨲᩔᩮᩅ ᩅᩮᩅᨧᨶᩴ. ᩈᩴᨾᨶ᩠ᨲᨿᩥᨲ᩠ᩅᩣᨲᩥ ᩑᨠᨧ᩠ᨨᨶ᩠ᨴᨲᩣᨿ ᩑᨠᨩ᩠ᨫᩣᩈᨿᨲᩣᨿ ᨽᨱᩥᨲ᩠ᩅᩣᨲᩥ ᩋᨲ᩠ᨳᩮᩣ. ᩍᨾᩈ᩠ᨾᩥᩴ ᩋᩅᩉᩣᩁᩮ ᩋᩈᨾ᩠ᨾᩮᩣᩉᨲ᩠ᨳᩴ ‘‘ᩑᩅᩴ ᩈᩴᩅᩥᨴᩉᩥᨲ᩠ᩅᩣ ᨣᨲᩮᩈᩩ ᩉᩦ’’ᨲᩥᩌᨴᩥᨾᩣᩉ. ᩈᨬ᩠ᨩᩣᨶᨶᨠᨾ᩠ᨾᨶ᩠ᨲᩥ ᨸᩩᨻ᩠ᨻᨱ᩠ᩉᩣᨴᩥᨠᩣᩃᨸᩁᩥᨧ᩠ᨨᩮᨴᩅᩈᩮᨶ ᩈᨬ᩠ᨬᩣᨱᨠᩁᨱᩴ. ᨲᩮᨶᩣᩉ ‘‘ᩈᨧᩮ ᩉᩦ’’ᨲᩥᩌᨴᩥ.

ᩑᨲ᩠ᨳ ᨧ ‘‘ᨸᩩᩁᩮᨽᨲ᩠ᨲᩴ ᩋᩅᩉᩁᩣ’’ᨲᩥ ᩅᩩᨲ᩠ᨲᩮ (ᨸᩣᩁᩣ. ᩋᨭ᩠ᨮ. ᪑.᪑᪑᪙) ᩋᨩ᩠ᨩ ᩅᩣ ᨸᩩᩁᩮᨽᨲ᩠ᨲᩴ ᩋᩅᩉᩁᨲᩩ, ᩈ᩠ᩅᩮ ᩅᩣ, ᩋᨶᩣᨣᨲᩮ ᩅᩣ ᩈᩴᩅᨧ᩠ᨨᩁᩮ, ᨶᨲ᩠ᨳᩥ ᩅᩥᩈᨦ᩠ᨠᩮᨲᩮᩣ, ᩏᨽᩥᨶ᩠ᨶᨾ᩠ᨸᩥ ᨸᩣᩁᩣᨩᩥᨠᩴ. ᩈᨧᩮ ᨸᨶ ‘‘ᩋᨩ᩠ᨩ ᨸᩩᩁᩮᨽᨲ᩠ᨲᩴ ᩋᩅᩉᩁᩣ’’ᨲᩥ ᩅᩩᨲ᩠ᨲᩮ ᩈ᩠ᩅᩮ ᩋᩅᩉᩁᨲᩥ. ‘‘ᩋᨩ᩠ᨩᩣ’’ᨲᩥ ᨶᩥᨿᨾᩥᨲᩴ ᩈᨦ᩠ᨠᩮᨲᩴ ᩋᨲᩥᨠ᩠ᨠᨾ᩠ᨾ ᨸᨧ᩠ᨨᩣ ᩋᩅᩉᨭᩴ ᩉᩮᩣᨲᩥ. ᩈᨧᩮ ‘‘ᩈ᩠ᩅᩮ ᨸᩩᩁᩮᨽᨲ᩠ᨲᩴ ᩋᩅᩉᩁᩣ’’ᨲᩥ ᩅᩩᨲ᩠ᨲᩮ ᩋᨩ᩠ᨩ ᨸᩩᩁᩮᨽᨲ᩠ᨲᩴ ᩋᩅᩉᩁᨲᩥ, ‘‘ᩈ᩠ᩅᩮ’’ᨲᩥ ᨶᩥᨿᨾᩥᨲᩴ ᨲᩴ ᩈᨦ᩠ᨠᩮᨲᩴ ᩋᨸᨲ᩠ᩅᩣ ᨸᩩᩁᩮ ᩋᩅᩉᨭᩴ ᩉᩮᩣᨲᩥ, ᩑᩅᩴ ᩋᩅᩉᩁᨶ᩠ᨲᩔ ᩋᩅᩉᩣᩁᨠᩔᩮᩅ ᨸᩣᩁᩣᨩᩥᨠᩴ, ᨾᩪᩃᨭ᩠ᨮᩔ ᩋᨶᩣᨸᨲ᩠ᨲᩥ. ‘‘ᩈ᩠ᩅᩮᩅ ᨸᩩᩁᩮᨽᨲ᩠ᨲ’’ᨶ᩠ᨲᩥ ᩅᩩᨲ᩠ᨲᩮ ᨲᨴᩉᩮᩅ ᩅᩣ, ᩈ᩠ᩅᩮ ᨸᨧ᩠ᨨᩣᨽᨲ᩠ᨲᩴ ᩅᩣ ᩋᩅᩉᩁᨶ᩠ᨲᩮᩣᨸᩥ ᨲᩴᩈᨦ᩠ᨠᩮᨲᨲᩮᩣ ᨸᩩᩁᩮ ᨧ ᨸᨧ᩠ᨨᩣ ᨧ ᩋᩅᩉᩁᨲᩥ. ᨿᩮᩣ ᨸᨶ ᩑᩅᩴᩋᨠᨲ᩠ᩅᩣ ᨿᨳᩣᨸᩁᩥᨧ᩠ᨨᩥᨶ᩠ᨶᨠᩣᩃᨾᩮᩅ ᩋᩅᩉᩁᨲᩥ, ᩋᨿᩴ ᩈᨦ᩠ᨠᩮᨲᨲᩮᩣ ᩋᨸᩩᩁᩮ ᩋᨸᨧ᩠ᨨᩣ ᨲᩴ ᩋᩅᩉᩁᨲᩦᨲᩥ ᩅᩮᨴᩥᨲᨻ᩠ᨻᩮᩣ. ᩑᩈ ᨶᨿᩮᩣ ᨸᨧ᩠ᨨᩣᨽᨲ᩠ᨲᩁᨲ᩠ᨲᩥᨶ᩠ᨴᩥᩅᩮᩈᩩᨸᩥ, ᨸᩩᩁᩥᨾᨿᩣᨾᨾᨩ᩠ᨫᩥᨾᨿᩣᨾᨸᨧ᩠ᨨᩥᨾᨿᩣᨾᨠᩣᩊᨩᩩᨱ᩠ᩉᨾᩣᩈᩏᨲᩩᩈᩴᩅᨧ᩠ᨨᩁᩣᨴᩥᩅᩈᩮᨶᩣᨸᩥ ᩑᨲ᩠ᨳ ᩈᨦ᩠ᨠᩮᨲᩅᩥᩈᨦ᩠ᨠᩮᨲᨲᩣ ᩅᩮᨴᩥᨲᨻ᩠ᨻᩣ. ᨸᩁᨽᨱ᩠ᨯᩣᩅᩉᩣᩁᩈᨬ᩠ᨬᩩᨸ᩠ᨸᩣᨴᩔ ᩉᩮᨲᩩᨲ᩠ᨲᩣ ᩋᨠ᩠ᨡᩥᨶᩥᨡᨱᩣᨴᩦᨶᩮᩅ ᨶᩥᨾᩥᨲ᩠ᨲᨶ᩠ᨲᩥ ᩋᨠ᩠ᨡᩥᨶᩥᨡᨱᩣᨴᩥᨶᩥᨾᩥᨲ᩠ᨲᩴ, ᨲᩔ ᨠᩁᨱᩴ ᩋᨠ᩠ᨡᩥᨶᩥᨡᨱᩣᨴᩥᨶᩥᨾᩥᨲ᩠ᨲᨠᩁᨱᩴ. ᩌᨴᩥᩈᨴ᩠ᨴᩮᨶ ᨽᨾᩩᨠᩩᨠ᩠ᨡᩮᨸᩈᩦᩈᨠᨾ᩠ᨸᨶᩉᨲ᩠ᨳᩃᨦ᩠ᨥᨶᨸᩣᨱᩥᨸ᩠ᨸᩉᩣᩁᩋᨦ᩠ᨣᩩᩃᩥᨹᩮᩣᨭᨶᨣᩦᩅᩩᨶ᩠ᨶᩣᨾᨶᩏᨠ᩠ᨠᩣᩈᨶᩣᨴᩥᩋᨶᩮᨠᨸ᩠ᨸᨠᩣᩁᩴ ᩈᨦ᩠ᨣᨱ᩠ᩉᩣᨲᩥ. ᩈᩮᩈᨾᩮᨲ᩠ᨳ ᩈᨦ᩠ᨠᩮᨲᨠᨾ᩠ᨾᩮ ᩅᩩᨲ᩠ᨲᨶᨿᨾᩮᩅ.

ᨳᩮᨶᩮᩣ ᩅᩩᨧ᩠ᨧᨲᩥ ᨧᩮᩣᩁᩮᩣ, ᨲᩔ ᨽᩣᩅᩮᩣ ᨳᩮᨿ᩠ᨿᩴ, ᨲᩮᨶ ᩋᩅᩉᩁᨱᩴ ᨳᩮᨿ᩠ᨿᩣᩅᩉᩣᩁᩮᩣ. ᨸᩈᨿ᩠ᩉ ᩋᨽᩥᨽᩅᩥᨲ᩠ᩅᩣ ᩋᩅᩉᩁᨱᩴ ᨸᩈᨿ᩠ᩉᩣᩅᩉᩣᩁᩮᩣ. ᩅᨲ᩠ᨳᩈᩩᨲ᩠ᨲᩣᨴᩥᨠᩴ ᨸᩁᩥᨧ᩠ᨨᩥᨩ᩠ᨩ ᨠᨸ᩠ᨸᨶᩴ ᨸᩁᩥᨠᨸ᩠ᨸᩮᩣ, ᨲᩮᨶ ᩋᩅᩉᩁᨱᩴ ᨸᩁᩥᨠᨸ᩠ᨸᩣᩅᩉᩣᩁᩮᩣ. ᨲᩥᨱᨸᨱ᩠ᨱᩣᨴᩦᩉᩥ ᨸᨭᩥᨧ᩠ᨨᨶ᩠ᨶᩔ ᩋᩅᩉᩣᩁᩮᩣ ᨸᨭᩥᨧ᩠ᨨᨶ᩠ᨶᩣᩅᩉᩣᩁᩮᩣ. ᨠᩩᩈᩮᨶ ᩋᩅᩉᩣᩁᩮᩣ ᨠᩩᩈᩣᩅᩉᩣᩁᩮᩣ. ᨠᩪᨭᨾᩣᨶᨠᩪᨭᨠᩉᩣᨸᨱᩣᨴᩦᩉᩦᨲᩥ ᩑᨲ᩠ᨳ ᨠᩪᨭᨾᩣᨶᩴ (ᨴᩦ. ᨶᩥ. ᩋᨭ᩠ᨮ. ᪑.᪑᪐; ᨾ. ᨶᩥ. ᩋᨭ᩠ᨮ. ᪑.᪒᪙᪓; ᨸᩩ. ᨸ. ᩋᨭ᩠ᨮ. ᪑᪗᪙) ᨶᩣᨾ ᩉᨴᨿᨽᩮᨴᩈᩥᨡᩣᨽᩮᨴᩁᨩ᩠ᨩᩩᨽᩮᨴᩅᩈᩮᨶ ᨲᩥᩅᩥᨵᩴ ᨾᩣᨶᨠᩪᨭᩴ. ᨲᨲ᩠ᨳ ᩉᨴᨿᨶ᩠ᨲᩥ ᨶᩣᩊᩥᩌᨴᩥᨾᩣᨶᨽᩣᨩᨶᩣᨶᩴ ᩋᨻ᩠ᨽᨶ᩠ᨲᩁᩴ, ᨲᩔ ᨽᩮᨴᩮᩣ ᨨᩥᨴ᩠ᨴᨠᩁᨱᩴ ᩉᨴᨿᨽᩮᨴᩮᩣ, ᩈᩮᩣ ᩈᨸ᩠ᨸᩥᨲᩮᩃᩣᨴᩥᨾᩥᨶᨶᨠᩣᩃᩮ ᩃᨻ᩠ᨽᨲᩥ. ᨲᩣᨶᩥ ᩉᩥ ᨣᨱ᩠ᩉᨶ᩠ᨲᩮᩣ ᩉᩮᨭ᩠ᨮᩣᨨᩥᨴ᩠ᨴᩮᨶ ᨾᩣᨶᩮᨶ ‘‘ᩈᨱᩥᨠᩴ ᩌᩈᩥᨬ᩠ᨧᩣ’’ᨲᩥ ᩅᨲ᩠ᩅᩣ ᩋᨶ᩠ᨲᩮᩣᨽᩣᨩᨶᩮ ᨻᩉᩩᩴ ᨸᨣ᩠ᨥᩁᩣᨸᩮᨲ᩠ᩅᩣ ᨣᨱ᩠ᩉᩣᨲᩥ, ᨴᨴᨶ᩠ᨲᩮᩣ ᨧ ᨨᩥᨴ᩠ᨴᩴ ᨸᩥᨵᩣᨿ ᩈᩦᨥᩴ ᨸᩪᩁᩮᨲ᩠ᩅᩣ ᨴᩮᨲᩥ.

ᩈᩥᨡᩣᨽᩮᨴᩮᩣ ᨸᨶ ᨲᩥᩃᨲᨱ᩠ᨯᩩᩃᩣᨴᩥᨾᩥᨶᨶᨠᩣᩃᩮ ᩃᨻ᩠ᨽᨲᩥ. ᨲᩣᨶᩥ ᩉᩥ ᨣᨱ᩠ᩉᨶ᩠ᨲᩮᩣ ᩈᨱᩥᨠᩴ ᩈᩥᨡᩴ ᩏᩔᩣᨸᩮᨲ᩠ᩅᩣ ᨣᨱ᩠ᩉᩣᨲᩥ, ᨴᨴᨶ᩠ᨲᩮᩣ ᩅᩮᨣᩮᨶ ᨸᩪᩁᩮᨲ᩠ᩅᩣ ᩈᩥᨡᩴ ᨨᩥᨶ᩠ᨴᨶ᩠ᨲᩮᩣ ᨴᩮᨲᩥ.

ᩁᨩ᩠ᨩᩩᨽᩮᨴᩮᩣ ᨡᩮᨲ᩠ᨲᩅᨲ᩠ᨳᩩᨾᩥᨶᨶᨠᩣᩃᩮ ᩃᨻ᩠ᨽᨲᩥ. ᨡᩮᨲ᩠ᨲᩣᨴᩥᩴ ᨾᩥᨶᨶ᩠ᨲᩣ ᩉᩥ ᩋᨾᩉᨶ᩠ᨲᨾ᩠ᨸᩥ ᨾᩉᨶ᩠ᨲᩴ ᨠᨲ᩠ᩅᩣ ᨾᩥᨶᨶ᩠ᨲᩥ, ᨾᩉᨶ᩠ᨲᨾ᩠ᨸᩥ ᩋᨾᩉᨶ᩠ᨲᩴ.

ᨲᨾ᩠ᨻᨠᩴᩈᩣᨴᩥᨾᨿᩮᩣ ᨠᩪᨭᩮᩣ ᨠᩉᩣᨸᨱᩮᩣ ᨠᩪᨭᨠᩉᩣᨸᨱᩮᩣ. ᩌᨴᩥᩈᨴ᩠ᨴᩮᨶ ᨲᩩᩃᩣᨠᩪᨭᨠᩴᩈᨠᩪᨭᩅᨬ᩠ᨧᨶᩣᨴᩥᩴ ᩈᨦ᩠ᨣᨱ᩠ᩉᩣᨲᩥ. ᨲᨲ᩠ᨳ ᨲᩩᩃᩣᨠᩪᨭᩴ ᩁᩪᨸᨠᩪᨭᩴ, ᩋᨦ᩠ᨣᨠᩪᨭᩴ, ᨣᩉᨱᨠᩪᨭᩴ, ᨸᨭᩥᨧ᩠ᨨᨶ᩠ᨶᨠᩪᨭᨶ᩠ᨲᩥ ᨧᨲᩩᨻ᩠ᨻᩥᨵᩴ ᩉᩮᩣᨲᩥ. ᨲᨲ᩠ᨳ ᩁᩪᨸᨠᩪᨭᩴ ᨶᩣᨾ ᨴ᩠ᩅᩮ ᨲᩩᩃᩣ ᩈᨾᩁᩪᨸᩣ ᨠᨲ᩠ᩅᩣ ᨣᨱ᩠ᩉᨶ᩠ᨲᩮᩣ ᨾᩉᨲᩥᨿᩣ ᨣᨱ᩠ᩉᩣᨲᩥ, ᨴᨴᨶ᩠ᨲᩮᩣ ᨡᩩᨴ᩠ᨴᩥᨠᩣᨿ ᨴᩮᨲᩥ. ᩋᨦ᩠ᨣᨠᩪᨭᩴ ᨶᩣᨾ ᨣᨱ᩠ᩉᨶ᩠ᨲᩮᩣ ᨸᨧ᩠ᨨᩣᨽᩣᨣᩮ ᩉᨲ᩠ᨳᩮᨶ ᨲᩩᩃᩴ ᩋᨠ᩠ᨠᨾᨲᩥ, ᨴᨴᨶ᩠ᨲᩮᩣ ᨸᩩᨻ᩠ᨻᨽᩣᨣᩮ ᩋᨠ᩠ᨠᨾᨲᩥ. ᨣᩉᨱᨠᩪᨭᩴ ᨶᩣᨾ ᨣᨱ᩠ᩉᨶ᩠ᨲᩮᩣ ᨾᩪᩃᩮ ᩁᨩ᩠ᨩᩩᩴ ᨣᨱ᩠ᩉᩣᨲᩥ, ᨴᨴᨶ᩠ᨲᩮᩣ ᩋᨣ᩠ᨣᩮ. ᨸᨭᩥᨧ᩠ᨨᨶ᩠ᨶᨠᩪᨭᩴ ᨶᩣᨾ ᨲᩩᩃᩴ ᩈᩩᩈᩥᩁᩴ ᨠᨲ᩠ᩅᩣ ᩋᨶ᩠ᨲᩮᩣ ᩋᨿᨧᩩᨱ᩠ᨱᩴ ᨸᨠ᩠ᨡᩥᨸᩥᨲ᩠ᩅᩣ ᨣᨱ᩠ᩉᨶ᩠ᨲᩮᩣ ᨲᩴ ᨸᨧ᩠ᨨᩣᨽᩣᨣᩮ ᨠᩁᩮᩣᨲᩥ, ᨴᨴᨶ᩠ᨲᩮᩣ ᩋᨣ᩠ᨣᨽᩣᨣᩮ.

ᨠᩴᩈᩮᩣ ᩅᩩᨧ᩠ᨧᨲᩥ ᩈᩩᩅᨱ᩠ᨱᨸᩣᨲᩥ, ᨲᩣᨿ ᩅᨬ᩠ᨧᨶᩴ ᨠᩴᩈᨠᩪᨭᩴ. ᨠᨳᩴ? ᩑᨠᩴ ᩈᩩᩅᨱ᩠ᨱᨸᩣᨲᩥᩴ ᨠᨲ᩠ᩅᩣ ᩋᨬ᩠ᨬᩣ ᨴ᩠ᩅᩮ ᨲᩥᩔᩮᩣ ᩃᩮᩣᩉᨸᩣᨲᩥᨿᩮᩣ ᩈᩩᩅᨱ᩠ᨱᩅᨱ᩠ᨱᩣ ᨠᩁᩮᩣᨶ᩠ᨲᩥ. ᨲᨲᩮᩣ ᨩᨶᨸᨴᩴ ᨣᨶ᩠ᨲ᩠ᩅᩣ ᨠᩥᨬ᩠ᨧᩥᨴᩮᩅ ᩋᨯ᩠ᨰᩴ ᨠᩩᩃᩴ ᨸᩅᩥᩈᩥᨲ᩠ᩅᩣ ‘‘ᩈᩩᩅᨱ᩠ᨱᨽᩣᨩᨶᩣᨶᩥ ᨠᩥᨱᩣᨳᩣ’’ᨲᩥ ᩅᨲ᩠ᩅᩣ ᩋᨣ᩠ᨥᩮ ᨸᩩᨧ᩠ᨨᩥᨲᩮ ᩈᨾᨣ᩠ᨥᨲᩁᩴ ᨴᩣᨲᩩᨠᩣᨾᩣ ᩉᩮᩣᨶ᩠ᨲᩥ. ᨲᨲᩮᩣ ᨲᩮᩉᩥ ‘‘ᨠᨳᩴ ᩍᨾᩮᩈᩴ ᩈᩩᩅᨱ᩠ᨱᨽᩣᩅᩮᩣ ᨩᩣᨶᩥᨲᨻ᩠ᨻᩮᩣ’’ᨲᩥ ᩅᩩᨲ᩠ᨲᩮ ‘‘ᩅᩦᨾᩴᩈᩥᨲ᩠ᩅᩣ ᨣᨱ᩠ᩉᨳᩣ’’ᨲᩥ ᩈᩩᩅᨱ᩠ᨱᨸᩣᨲᩥᩴ ᨸᩣᩈᩣᨱᩮ ᨥᩴᩈᩥᨲ᩠ᩅᩣ ᩈᨻ᩠ᨻᩣ ᨸᩣᨲᩥᨿᩮᩣ ᨴᨲ᩠ᩅᩣ ᨣᨧ᩠ᨨᨲᩥ.

ᩅᨬ᩠ᨧᨶᩴ ᨶᩣᨾ ᨲᩮᩉᩥ ᨲᩮᩉᩥ ᩏᨸᩣᨿᩮᩉᩥ ᨸᩁᩮᩈᩴ ᩅᨬ᩠ᨧᨶᩴ. ᨲᨲᩕᩥᨴᨾᩮᨠᩴ ᩅᨲ᩠ᨳᩩ – ᩑᨠᩮᩣ ᨠᩥᩁ ᩃᩩᨴ᩠ᨴᨠᩮᩣ ᨾᩥᨣᨬ᩠ᨧ ᨾᩥᨣᨸᩮᩣᨲᨠᨬ᩠ᨧ ᨣᩉᩮᨲ᩠ᩅᩣ ᩌᨣᨧ᩠ᨨᨲᩥ, ᨲᨾᩮᨠᩮᩣ ᨵᩩᨲ᩠ᨲᩮᩣ ‘‘ᨠᩥᩴ ᨽᩮᩣ ᨾᩥᨣᩮᩣ ᩋᨣ᩠ᨥᨲᩥ, ᨠᩥᩴ ᨾᩥᨣᨸᩮᩣᨲᨠᩮᩣ’’ᨲᩥ ᩌᩉ. ‘‘ᨾᩥᨣᩮᩣ ᨴ᩠ᩅᩮ ᨠᩉᩣᨸᨱᩮ, ᨾᩥᨣᨸᩮᩣᨲᨠᩮᩣ ᩑᨠ’’ᨶ᩠ᨲᩥ ᩅᩩᨲ᩠ᨲᩮ ᩑᨠᩴ ᨠᩉᩣᨸᨱᩴ ᨴᨲ᩠ᩅᩣ ᨾᩥᨣᨸᩮᩣᨲᨠᩴ ᨣᩉᩮᨲ᩠ᩅᩣ ᨳᩮᩣᨠᩴ ᨣᨶ᩠ᨲ᩠ᩅᩣ ᨶᩥᩅᨲ᩠ᨲᩮᨶ᩠ᨲᩮᩣ ‘‘ᨶ ᨾᩮ ᨽᩮᩣ ᨾᩥᨣᨸᩮᩣᨲᨠᩮᨶ ᩋᨲ᩠ᨳᩮᩣ, ᨾᩥᨣᩴ ᨾᩮ ᨴᩮᩉᩦ’’ᨲᩥ ᩌᩉ. ‘‘ᨲᩮᨶ ᩉᩥ ᨴ᩠ᩅᩮ ᨠᩉᩣᨸᨱᩮ ᨴᩮᩉᩦ’’ᨲᩥ ᩌᩉ. ᩈᩮᩣ ᩌᩉ ‘‘ᨶᨶᩩ ᨽᩮᩣ ᨾᨿᩣ ᨸᨮᨾᩴ ᩑᨠᩮᩣ ᨠᩉᩣᨸᨱᩮᩣ ᨴᩥᨶ᩠ᨶᩮᩣ’’ᨲᩥ. ᩌᨾ ᨴᩥᨶ᩠ᨶᩮᩣ, ᩍᨾᩴ ᨾᩥᨣᨸᩮᩣᨲᨠᩴ ᨣᨱ᩠ᩉ, ᩑᩅᩴ ᩈᩮᩣ ᨧ ᨠᩉᩣᨸᨱᩮᩣ, ᩋᨿᨬ᩠ᨧ ᨠᩉᩣᨸᨱᨣ᩠ᨥᨶᨠᩮᩣ ᨾᩥᨣᨸᩮᩣᨲᨠᩮᩣᨲᩥ ᨴ᩠ᩅᩮ ᨠᩉᩣᨸᨱᩣ ᨽᩅᩥᩔᨶ᩠ᨲᩦᨲᩥ. ᩈᩮᩣ ‘‘ᨠᩣᩁᨱᩴ ᩅᨴᨲᩦ’’ᨲᩥ ᩈᩃ᩠ᩃᨠ᩠ᨡᩮᨲ᩠ᩅᩣ ᨾᩥᨣᨸᩮᩣᨲᨠᩴ ᨣᩉᩮᨲ᩠ᩅᩣ ᨾᩥᨣᩴ ᩋᨴᩣᩈᩦᨲᩥ.

ᨸᩈᨿ᩠ᩉᩣᨲᩥ (ᨸᩣᩁᩣ. ᩋᨭ᩠ᨮ. ᪑.᪑᪓᪘) ᨸᩁᩮ ᩋᨽᩥᨽᩩᨿ᩠ᨿ. ᨣᩣᨾᩴ ᨥᩣᨲᩮᨶ᩠ᨲᩦᨲᩥ ᨣᩣᨾᨥᩣᨲᨠᩣ, ᨣᩣᨾᩴ ᨸᩉᩁᨶ᩠ᨲᩣ ᨧᩮᩣᩁᩣ, ᨲᩮ ᩌᨴᩥ ᨿᩮᩈᩴ ᨲᩮ ᨣᩣᨾᨥᩣᨲᨠᩣᨴᨿᩮᩣ. ᩌᨴᩥᩈᨴ᩠ᨴᩮᨶ ᨧᩮᨲ᩠ᨳ ᨸᨶ᩠ᨳᨥᩣᨲᨠᩣᨴᩦᨶᩴ ᨣᩉᨱᩴ. ᩏᨴ᩠ᨵᩣᩁᩮᨿᩮᩅ ᨸᩣᩁᩣᨩᩥᨠᨶ᩠ᨲᩥ ‘‘ᩈᨧᩮ ᩈᩣᨭᨠᩮᩣ ᨽᩅᩥᩔᨲᩥ, ᨣᨱ᩠ᩉᩥᩔᩣᨾᩦ’’ᨲᩥ ᨸᩁᩥᨠᨸ᩠ᨸᩔ ᨸᩅᨲ᩠ᨲᨲ᩠ᨲᩣ, ᩈᩣᨭᨠᩔ ᨧ ᨲᨲ᩠ᨳ ᩈᨻ᩠ᨽᩣᩅᨲᩮᩣ. ᨸᨴᩅᩣᩁᩮᨶ ᨠᩣᩁᩮᨲᨻ᩠ᨻᩮᩣᨲᩥ ᨽᩪᨾᩥᨿᩴ ᩋᨶᩥᨠ᩠ᨡᩥᨸᩥᨲ᩠ᩅᩣᩅ ᩅᩦᨾᩴᩈᩥᨲᨲ᩠ᨲᩣ ᩅᩩᨲ᩠ᨲᩴ. ᨽᨱ᩠ᨯᨴᩮᨿ᩠ᨿᨶ᩠ᨲᩥ ᨿᩴ ᨸᩁᩔ ᨶᨭ᩠ᨮᩴ, ᨲᩔ ᨾᩪᩃᩴ ᩅᩣ ᨲᨴᩮᩅ ᩅᩣ ᨽᨱ᩠ᨯᩴ ᨴᩣᨲᨻ᩠ᨻᨶ᩠ᨲᩥ ᩋᨲ᩠ᨳᩮᩣ.

ᨲᩔᩣᨲᩥ ᨿᩮᩣ ᩑᩅᩴ ᨸᩁᩥᨠᨸ᩠ᨸᩮᨲᩥ, ᨲᩔ. ᩍᨾᩔ ‘‘ᩋᩅᩉᩣᩁᩮᩣ ᩉᩮᩣᨲᩦ’’ᨲᩥ ᩍᨾᩥᨶᩣ ᩈᨾ᩠ᨻᨶ᩠ᨵᩮᩣ.

ᨸᩁᩮᩈᨶ᩠ᨲᩥ ᨠᩦᩊᨶ᩠ᨲᩣᨶᩴ, ᨸᩅᩥᩈᨶ᩠ᨲᩣᨶᩴ ᩅᩣ ᨸᩁᩮᩈᩴ ᨾᨶᩩᩔᩣᨶᩴ. ‘‘ᨸᨧ᩠ᨨᩣ ᨣᨱ᩠ᩉᩥᩔᩣᨾᩦ’’ᨲᩥ ᨸᩴᩈᩩᨶᩣ ᩅᩣ ᨸᨱ᩠ᨱᩮᨶ ᩅᩣ ᨸᨭᩥᨧ᩠ᨨᩣᨴᩮᨲᩦᨲᩥ ‘‘ᩈᨧᩮ ᩍᨴᩣᨶᩮᩅ ᩒᨶᨾᩥᨲ᩠ᩅᩣ ᨣᨱ᩠ᩉᩥᩔᩣᨾᩥ, ‘ᨠᩥᩴ ᩈᨾᨱᩮᩣ ᨣᨱ᩠ᩉᩣᨲᩦ’ᨲᩥ ᨾᩴ ᨩᩣᨶᩥᨲ᩠ᩅᩣ ᩅᩥᩉᩮᨮᩮᨿ᩠ᨿᩩᩴ ᨸᨧ᩠ᨨᩣ ᨣᨱ᩠ᩉᩥᩔᩣᨾᩦ’’ᨲᩥ ᨸᩴᩈᩩᨶᩣ ᩅᩣ ᨸᨱ᩠ᨱᩮᨶ ᩅᩣ ᨸᨭᩥᨧ᩠ᨨᩣᨴᩮᨲᩥ. ᩏᨴ᩠ᨵᩣᩁᩮᩣ ᨶᨲ᩠ᨳᩦᨲᩥ ᨮᩣᨶᩣᨧᩣᩅᨶᩴ ᨶᨲ᩠ᨳᩦᨲᩥ ᩋᨲ᩠ᨳᩮᩣ. ᩈᩣᨾᩥᨠᩣᨲᩥ ᩋᨶ᩠ᨲᩣᨣᩣᨾᩴ ᨸᩅᩥᩈᩥᨲᩩᨠᩣᨾᩣ ᨽᨱ᩠ᨯᩈᩣᨾᩥᨠᩣ ᨾᨶᩩᩔᩣ. ᩏᨴ᩠ᨵᩣᩁᩮᨲᩥ ᩏᨴ᩠ᨵᩁᨱᩮ, ᨮᩣᨶᩣᨧᩣᩅᨶᩮᨲᩥ ᩋᨲ᩠ᨳᩮᩣ. ᨮᩣᨶᩣᨧᩣᩅᨶᨬ᩠ᨧᩮᨲ᩠ᨳ ᩉᩮᨭ᩠ᨮᩣ ᩅᩩᨲ᩠ᨲᨶᨿᩣᨶᩩᩈᩣᩁᩮᨶ ᩅᩮᨴᩥᨲᨻ᩠ᨻᩴ. ᨸᩅᩮᩈᩮᨲᩦᨲᩥ ᨮᩣᨶᩣᨧᩣᩅᨶᩅᩈᩮᨶ ᨸᩅᩮᩈᩮᨲᩥ, ᩉᩮᨭ᩠ᨮᩥᨾᨶ᩠ᨲᩮᨶ ᨹᩩᨭ᩠ᨮᩮᩣᨠᩣᩈᩴ ᨠᩮᩈᨣ᩠ᨣᨾᨲ᩠ᨲᨾ᩠ᨸᩥ ᩏᨸᩁᩥᨾᨶ᩠ᨲᩮᨶ ᩋᨲᩥᨠ᩠ᨠᩣᨾᩮᨶ᩠ᨲᩮᩣ ᨸᩅᩮᩈᩮᨲᩦᨲᩥ ᩋᨲ᩠ᨳᩮᩣ.

ᩈᨾᨣ᩠ᨥᨲᩁᨶ᩠ᨲᩥ ᩋᨸ᩠ᨸᨣ᩠ᨥᨲᩁᩴ. ᩏᨴ᩠ᨵᨭᨾᨲ᩠ᨲᩮ ᩋᩅᩉᩣᩁᩮᩣᨲᩥ ᩈᨠᨽᩣᩅᨸ᩠ᨸᨿᩮᩣᨣᩔ ᨶᩥᨭ᩠ᨮᩣᨸᩥᨲᨲ᩠ᨲᩣ, ᨶ ᩋᨲ᩠ᨳᩈᩣᨵᨠᩅᩈᩮᨶ. ᩏᨴ᩠ᨵᩣᩁᩮ ᩁᨠ᩠ᨡᨲᩥ ᩋᨲ᩠ᨲᨶᩮᩣ ᨠᩮᩣᨭ᩠ᨮᩣᩈᩮ ᨸᩣᨲᩮᨲᩩᨠᩣᨾᨲᩣᨿ ᩏᨴ᩠ᨵᨭᨲ᩠ᨲᩣ. ᩑᩈᩮᩅ ᨶᨿᩮᩣ ᨸᩣᨲᨶᩮᨸᩥ ᩁᨠ᩠ᨡᨲᩦᨲᩥ ᩑᨲ᩠ᨳᩣᨸᩥ. ‘‘ᩏᨴ᩠ᨵᩣᩁᩮᨿᩮᩅ ᩁᨠ᩠ᨡᨲᩦ’’ᨲᩥ ᩍᨾᩥᨶᩣᩅ ᨸᩣᨲᨶᩮ ᨶ ᩁᨠ᩠ᨡᨲᩦᨲᩥ ᩋᨲ᩠ᨳᩮ ᩈᩥᨴ᩠ᨵᩮᨸᩥ ᩋᨲ᩠ᨳᩈᩣᨵᨠᩅᩈᩮᨶ ᩋᨲ᩠ᨳᩴ ᨴᩔᩮᨲᩩᩴ ‘‘ᨲᩴ ᩏᨴ᩠ᨵᩁᩥᨲ᩠ᩅᩣ’’ᨲᩥᩌᨴᩥ ᩅᩩᨲ᩠ᨲᩴ. ᩈᨧᩮ ᨸᨶ ᨴ᩠ᩅᩦᩈᩩᨸᩥ ᨠᩮᩣᨭ᩠ᨮᩣᩈᩮᩈᩩ ᨸᨲᩥᨲᨴᨱ᩠ᨯᨠᩮ ᩋᨴᩔᨶᩴ ᨣᨾᩮᨲᩥ (ᨸᩣᩁᩣ. ᩋᨭ᩠ᨮ. ᪑.᪑᪓᪘), ᨲᨲᩮᩣ ᩋᩅᩈᩮᩈᨽᩥᨠ᩠ᨡᩪᩈᩩ ᨣᨲᩮᩈᩩ ᩍᨲᩁᩮᩣ ‘‘ᨾᨿ᩠ᩉᩴ, ᨽᨶ᩠ᨲᩮ, ᨴᨱ᩠ᨯᨠᩮᩣ ᨶ ᨸᨬ᩠ᨬᩣᨿᨲᩦ’’ᨲᩥ, ‘‘ᨾᨿ᩠ᩉᨾ᩠ᨸᩥ, ᩌᩅᩩᩈᩮᩣ, ᨶ ᨸᨬ᩠ᨬᩣᨿᨲᩦ’’ᨲᩥ, ‘‘ᨠᨲᨾᩮᩣ ᨸᨶ, ᨽᨶ᩠ᨲᩮ, ᨾᨿ᩠ᩉᩴ ᨽᩣᨣᩮᩣ’’ᨲᩥ. ‘‘ᩋᨿᩴ ᨲᩩᨿ᩠ᩉᩴ ᨽᩣᨣᩮᩣ’’ᨲᩥ ᩋᨲ᩠ᨲᨶᩮᩣ ᨽᩣᨣᩴ ᨴᩔᩮᨲᩥ. ᨲᩈ᩠ᨾᩥᩴ ᩅᩥᩅᨴᩥᨲ᩠ᩅᩣ ᩅᩣ ᩋᩅᩥᩅᨴᩥᨲ᩠ᩅᩣ ᩅᩣ ᨲᩴ ᨣᨱ᩠ᩉᩥᨲ᩠ᩅᩣ ᨣᨲᩮ ᩍᨲᩁᩮᩣ ᨲᩔ ᨽᩣᨣᩴ ᩏᨴ᩠ᨵᩁᨲᩥ, ᩏᨴ᩠ᨵᩣᩁᩮ ᨸᩣᩁᩣᨩᩥᨠᩴ. ᩈᨧᩮᨸᩥ ᨲᩮᨶ ‘‘ᩋᩉᩴ ᨾᨾ ᨽᩣᨣᩴ ᨲᩩᨿ᩠ᩉᩴ ᨶ ᨴᩮᨾᩥ, ᨲ᩠ᩅᩴ ᨸᨶ ᩋᨲ᩠ᨲᨶᩮᩣ ᨽᩣᨣᩴ ᨬᨲ᩠ᩅᩣ ᨣᨱ᩠ᩉᩣ’’ᨲᩥ ᩅᩩᨲ᩠ᨲᩮᨸᩥ ‘‘ᨶᩣᨿᩴ ᨾᨾᩣ’’ᨲᩥ ᨩᩣᨶᨶ᩠ᨲᩮᩣᨸᩥ ᨲᩔᩮᩅ ᨽᩣᨣᩴ ᨣᨱ᩠ᩉᩣᨲᩥ, ᩏᨴ᩠ᨵᩣᩁᩮ ᨸᩣᩁᩣᨩᩥᨠᩴ. ᩈᨧᩮ ᨸᨶ ᩍᨲᩁᩮᩣ ‘‘ᩋᨿᩴ ᨲᩩᨿ᩠ᩉᩴ ᨽᩣᨣᩮᩣ, ᩋᨿᩴ ᨾᨿ᩠ᩉᩴ ᨽᩣᨣᩮᩣᨲᩥ ᨠᩥᩴ ᩍᨾᩥᨶᩣ ᩅᩥᩅᩣᨴᩮᨶᩣ’’ᨲᩥ ᨧᩥᨶ᩠ᨲᩮᨲ᩠ᩅᩣ ‘‘ᨾᨿ᩠ᩉᩴ ᩅᩣ ᨸᨲ᩠ᨲᩮᩣ ᩉᩮᩣᨲᩩ, ᨲᩩᨾ᩠ᩉᩣᨠᩴ ᩅᩣ, ᨿᩮᩣ ᩅᩁᨽᩣᨣᩮᩣ, ᨲᩴ ᨲᩩᨾ᩠ᩉᩮ ᨣᨱ᩠ᩉᨳᩣ’’ᨲᩥ ᩅᨴᨲᩥ, ᨴᩥᨶ᩠ᨶᨠᩴ ᨶᩣᨾ ᨣᩉᩥᨲᩴ ᩉᩮᩣᨲᩥ, ᨶᨲ᩠ᨳᩮᨲ᩠ᨳ ᩋᩅᩉᩣᩁᩮᩣ. ᩈᨧᩮ ᩈᩮᩣ ᩅᩥᩅᩣᨴᨽᩦᩁᩩᨠᩮᩣ ᨽᩥᨠ᩠ᨡᩩ ‘‘ᨿᩴ ᨲᩩᨿ᩠ᩉᩴ ᩁᩩᨧ᩠ᨧᨲᩥ, ᨲᩴ ᨣᨱ᩠ᩉᩣ’’ᨲᩥ ᩅᩩᨲ᩠ᨲᩮᩣ ᩋᨲ᩠ᨲᨶᩮᩣ ᨸᨲ᩠ᨲᩴ ᩅᩁᨽᩣᨣᩴ ᨮᨸᩮᨲ᩠ᩅᩣ ᩃᩣᨾᨠᩴᨿᩮᩅ ᨣᩉᩮᨲ᩠ᩅᩣ ᨣᨧ᩠ᨨᨲᩥ, ᨲᨲᩮᩣ ᩍᨲᩁᩔ ᩅᩥᨧᩥᨶᩥᨲᩣᩅᩈᩮᩈᩴ ᨣᨱ᩠ᩉᨶ᩠ᨲᩔᩣᨸᩥ ᩋᩅᩉᩣᩁᩮᩣ ᨶᨲ᩠ᨳᩮᩅ. ᩑᩅᨾᩥᨾᩣᨶᩥ ᨸᨬ᩠ᨧ ᨸᨬ᩠ᨧᨠᩣᨶᩥ ᩈᨾᩮᩣᨵᩣᨶᩮᨲ᩠ᩅᩣ ᩍᨾᩮ ᨸᨬ᩠ᨧᩅᩦᩈᨲᩥ ᩋᩅᩉᩣᩁᩣ ᩅᩮᨴᩥᨲᨻ᩠ᨻᩣ. ᨶᩥᨭ᩠ᨮᩥᨲᩮᩣ ‘‘ᩌᨴᩥᨿᩮᨿ᩠ᨿᩣ’’ᨲᩥ ᩍᨾᩔ ᨸᨴᩔ ᩅᩥᨶᩥᨧ᩠ᨨᨿᩮᩣ. ᨲᩮᨶᩣᩉ ‘‘ᩍᨲᩥ ᨿᩴ ᩅᩩᨲ᩠ᨲᩴ…ᨸᩮ… ᨿᩔᨲ᩠ᨳᩮᩣ ᨸᨠᩣᩈᩥᨲᩮᩣ ᩉᩮᩣᨲᩦ’’ᨲᩥ.

ᩁᩣᨩᩣᨶᩮᩣᨲᩥ ᨠᩥᨬ᩠ᨧᩣᨸᩥ ᩋᩅᩥᩈᩮᩈᩮᨶ ᩅᩩᨲ᩠ᨲᩴ, ᩋᨸᩁᩣᨵᩣᨶᩩᩁᩪᨸᩴ ᨸᨶ ᨨᩮᨩ᩠ᨩᨽᩮᨩ᩠ᨩᩣᨶᩩᩈᩣᩈᨠᩮᩣ ᨸᨾᩣᨱᨽᩪᨲᩮᩣᩅ ᩍᨵᩣᨵᩥᨸ᩠ᨸᩮᨲᩮᩣᨲᩥ ᩌᩉ ‘‘ᩁᩣᨩᩣᨶᩮᩣᨲᩥ ᩍᨴᩴ ᨻᩥᨾ᩠ᨻᩥᩈᩣᩁᩴᨿᩮᩅ ᩈᨶ᩠ᨵᩣᨿ ᩅᩩᨲ᩠ᨲ’’ᨶ᩠ᨲᩥ. ᩈᩮᩣ ᩉᩥ ᨵᨾ᩠ᨾᩥᨠᩁᩣᨩᨲ᩠ᨲᩣ ᨿᨳᩣᨸᩅᩮᨱᩥᨿᩣᩅ ᨠᩁᩮᩣᨲᩥ. ᩋᨬ᩠ᨬᩮ ᨸᨶ ᨠᩣᨠᨱᩥᨠᨾᨲ᩠ᨲᩔᨸᩥ ᩈᩦᩈᩴ ᨨᩥᨶ᩠ᨴᩮᨿ᩠ᨿᩩᩴ, ᨻᩉᩩᨠᩔᩣᨸᩥ ᨶ ᩅᩣ ᨠᩥᨬ᩠ᨧᩥ ᨠᩁᩮᨿ᩠ᨿᩩᩴ. ᨲᩮᨶᩣᩉ ‘‘ᩋᨬ᩠ᨬᩮ ᨸᨶᩣ’’ᨲᩥᩌᨴᩥ. ᩉᨶᨶᩴ ᨶᩣᨾ ᨸᩮᩣᨳᨶᨬ᩠ᨧᩮᩅ ᨨᩮᨴᨶᨬ᩠ᨧᩣᨲᩥ ᩌᩉ ‘‘ᩉᨲ᩠ᨳᩣᨴᩦᩉᩥ ᩅᩣ’’ᨲᩥᩌᨴᩥ. ᩌᨴᩥᩈᨴ᩠ᨴᩮᨶ ᨸᩣᨴᨠᩈᩣᩅᩮᨲ᩠ᨲᩋᨯ᩠ᨰᨴᨱ᩠ᨯᨠᩣᨶᩴ ᨣᩉᨱᩴ. ᩁᨩ᩠ᨩᩩᨻᨶ᩠ᨵᨶᩣᨴᩦᩉᩦᨲᩥ ᩌᨴᩥᩈᨴ᩠ᨴᩮᨶ ᩋᨶ᩠ᨴᩩᨻᨶ᩠ᨵᨶᩈᨦ᩠ᨡᩃᩥᨠᩣᨻᨶ᩠ᨵᨶᨥᩁᨻᨶ᩠ᨵᨶᨶᨣᩁᨻᨶ᩠ᨵᨶᨸᩩᩁᩥᩈᨣᩩᨲ᩠ᨲᩦᨶᩴ ᨣᩉᨱᩴ. ᨶᩦᩉᩁᩮᨿ᩠ᨿᩩᨶ᩠ᨲᩥ ᩁᨭ᩠ᨮᨲᩮᩣ ᨶᩥᨠ᩠ᨡᩣᨾᩮᨿ᩠ᨿᩩᩴ. ᨧᩮᩣᩁᩮᩣᩈᩥ…ᨸᩮ… ᨳᩮᨶᩮᩣᩈᩦᨲᩥ ᩑᨲ᩠ᨳ ‘‘ᨸᩁᩥᨽᩣᩈᩮᨿ᩠ᨿᩩ’’ᨶ᩠ᨲᩥ ᨸᨴᩴ ᩋᨩ᩠ᨫᩣᩉᩁᩥᨲᨻ᩠ᨻᩴ ᩐᨶᨲ᩠ᨲᩣ ᨸᨴᨸ᩠ᨸᨿᩮᩣᨣᩔ. ᨲᩮᨶᩣᩉ ‘‘ᩍᨾᩮᩉᩥ ᩅᨧᨶᩮᩉᩥ ᨸᩁᩥᨽᩣᩈᩮᨿ᩠ᨿᩩ’’ᨶ᩠ᨲᩥ. ᨿᨳᩣᩁᩪᨸᩴ ᨸᨶ ᨿᩈ᩠ᨾᩣ ᨸᩣᨴᨲᩮᩣ ᨸᨭ᩠ᨮᩣᨿ ᩉᩮᩣᨲᩥ, ᨲᩈ᩠ᨾᩣ ‘‘ᨸᩣᨴᩔ ᩅᩣ ᨸᩣᨴᩣᩁᩉᩔ ᩅᩣ’’ᨲᩥ ᩌᩉ. ᨸᩮᩣᩁᩣᨱᨠᩔ ᨠᩉᩣᨸᨱᩔ ᨧᨲᩩᨲ᩠ᨳᩮᩣ ᨽᩣᨣᩮᩣ ᨸᩣᨴᩮᩣ, ᨸᩣᨴᩴ ᩋᩁᩉᨲᩦᨲᩥ ᨸᩣᨴᩣᩁᩉᩮᩣ, ᨲᩔ ᨸᩣᨴᩔ ᩅᩣ ᨸᩣᨴᩣᩁᩉᩔ ᩅᩣ. ᩑᨲ᩠ᨳ ᨧ ᨸᩣᨴᩮᨶ ᨠᩉᩣᨸᨱᩔ ᨧᨲᩩᨲ᩠ᨳᨽᩣᨣᩴ ᩋᨠᨸ᩠ᨸᩥᨿᨽᨱ᩠ᨯᨾᩮᩅ ᨴᩔᩮᨲᩥ, ᨸᩣᨴᩣᩁᩉᩮᨶ ᨸᩣᨴᨣ᩠ᨥᨶᨠᩴ ᨠᨸ᩠ᨸᩥᨿᨽᨱ᩠ᨯᩴ. ᩑᨲ᩠ᨲᩣᩅᨲᩣ ᩉᩮᨭ᩠ᨮᩥᨾᨶ᩠ᨲᨴᩔᨶᩮᨶ ᩈᨻ᩠ᨻᩣᨠᩣᩁᩮᨶ ᨴᩩᨲᩥᨿᨸᩣᩁᩣᨩᩥᨠᨸ᩠ᨸᩉᩮᩣᨶᨠᩅᨲ᩠ᨳᩩ ᨴᩔᩥᨲᩴ ᩉᩮᩣᨲᩦᨲᩥ ᨴᨭ᩠ᨮᨻ᩠ᨻᩴ. ᨸᩮᩣᩁᩣᨱᨠᩔᩣᨲᩥ (ᩈᩣᩁᨲ᩠ᨳ. ᨭᩦ. ᪒.᪘᪘; ᩅᩥ. ᩅᩥ. ᨭᩦ. ᪑.᪘᪘) ᨸᩮᩣᩁᩣᨱᩈᨲ᩠ᨳᩣᨶᩩᩁᩪᨸᩴ ᩏᨸ᩠ᨸᩣᨴᩥᨲᩔ ᩃᨠ᩠ᨡᨱᩈᨾ᩠ᨸᨶ᩠ᨶᩔ ᨶᩦᩃᨠᩉᩣᨸᨱᩈᨴᩥᩈᩔ ᨠᩉᩣᨸᨱᩔ. ᩑᨲᩮᨶ ᩁᩩᨴᩕᨴᩣᨾᨠᩣᨴᩦᨶᩥ ᨸᨭᩥᨠ᩠ᨡᩥᨸᨲᩥ.

ᩑᩅᩴ ᩋᩈᩣᨵᩣᩁᨱᩅᩥᨶᩥᨧ᩠ᨨᨿᩴ ᨴᩔᩮᨲ᩠ᩅᩣ ᩍᨴᩣᨶᩥ ᩈᩣᨵᩣᩁᨱᩅᩥᨶᩥᨧ᩠ᨨᨿᩴ ᨴᩔᩮᨲᩩᩴ ‘‘ᩁᩣᨩᨣᩉᩮ’’ᨲᩥᩌᨴᩥᨾᩣᩉ. ᩁᨬ᩠ᨬᩮᩣᨲᩥ ᨻᩥᨾ᩠ᨻᩥᩈᩣᩁᩁᨬ᩠ᨬᩮᩣ. ᨾᩣᩈᨠᩮᩣ ᨶᩣᨾ ᨸᩮᩣᩁᩣᨱᨠᩔ ᨠᩉᩣᨸᨱᩔ ᩅᩦᩈᨲᩥᨾᩮᩣ ᨽᩣᨣᩮᩣ. ᨿᩮᩣ ᩃᩮᩣᨠᩮ ‘‘ᨾᨬ᩠ᨩᩮᨭ᩠ᨮᩦ’’ᨲᩥᨸᩥ ᩅᩩᨧ᩠ᨧᨲᩥ. ᩍᨴᩣᨶᩥ ᩍᨾᩈ᩠ᨾᩥᩴ ᩋᨴᩥᨶ᩠ᨶᩣᨴᩣᨶᩮ ᩅᩥᨶᩥᨧ᩠ᨨᨿᩴ ᨴᩔᩮᨲᩩᩴ ‘‘ᩈᨻ᩠ᨻᨲ᩠ᨳᩣ’’ᨲᩥᩌᨴᩥ ᩅᩩᨲ᩠ᨲᩴ. ᩈᨻ᩠ᨻᨲ᩠ᨳᩣᨲᩥ ᩐᨶᨾᩣᩈᨠᩣᨲᩥᩁᩮᨠᨾᩣᩈᨠᨸᨬ᩠ᨧᨾᩣᩈᨠᩮᩈᩩ. ᨸᩁᩥᩉᩦᨶᩣᨸᩁᩥᩉᩦᨶᩅᩈᩮᨶᩣᨲᩥ ᩋᨣ᩠ᨥᩔ ᨸᩁᩥᩉᩦᨶᩣᨸᩁᩥᩉᩦᨶᩅᩈᩮᨶ. ᩋᨿᨾᩮᨲ᩠ᨳ ᩈᨦ᩠ᨡᩮᨸᩮᩣ, ᩅᩥᨲ᩠ᨳᩣᩁᩮᩣ ᨸᨶ ᩑᩅᩴ ᩅᩮᨴᩥᨲᨻ᩠ᨻᩮᩣ – ᩍᨴᨬ᩠ᩉᩥ ᩋᨴᩥᨶ᩠ᨶᩣᨴᩣᨶᩴ ᩅᩥᨶᩥᨧ᩠ᨨᩥᨶᨶ᩠ᨲᩮᨶ ᩒᨲᩥᨱ᩠ᨱᩮ ᩅᨲ᩠ᨳᩩᩈ᩠ᨾᩥᩴ ᩈᩉᩈᩣ ᩋᩅᩥᨶᩥᨧ᩠ᨨᩥᨶᩥᨲ᩠ᩅᩣ ᨸᨬ᩠ᨧ ᨮᩣᨶᩣᨶᩥ ᩒᩃᩮᩣᨠᩮᨲᨻ᩠ᨻᩣᨶᩥ. ᨿᩣᨶᩥ ᩈᨶ᩠ᨵᩣᨿ ᨸᩮᩣᩁᩣᨱᩣ ᩌᩉᩩ –

‘‘ᩅᨲ᩠ᨳᩩᩴ ᨠᩣᩃᨬ᩠ᨧ ᨴᩮᩈᨬ᩠ᨧ, ᩋᨣ᩠ᨥᩴ ᨸᩁᩥᨽᩮᩣᨣᨸᨬ᩠ᨧᨾᩴ;

ᨲᩩᩃᨿᩥᨲ᩠ᩅᩣ ᨸᨬ᩠ᨧᨮᩣᨶᩣᨶᩥ, ᨵᩣᩁᩮᨿ᩠ᨿᨲ᩠ᨳᩴ ᩅᩥᨧᨠ᩠ᨡᨱᩮᩣ’’ᨲᩥ. (ᨸᩣᩁᩣ. ᩋᨭ᩠ᨮ. ᪑.᪙᪒);

ᨲᨲ᩠ᨳ ᨧ ᩅᨲ᩠ᨳᩪᨲᩥ ᨽᨱ᩠ᨯᩴ. ᩋᩅᩉᩣᩁᨠᩮᨶ ᩉᩥ ‘‘ᨾᨿᩣ ᩍᨴᩴ ᨶᩣᨾ ᩋᩅᩉᨭ’’ᨶ᩠ᨲᩥ ᩅᩩᨲ᩠ᨲᩮᨸᩥ ᩌᨸᨲ᩠ᨲᩥᩴ ᩋᨶᩣᩁᩮᩣᨸᩮᨲ᩠ᩅᩣᩅ ᨲᩴ ᨽᨱ᩠ᨯᩴ ᩈᩈᩣᨾᩥᨠᩴ ᩅᩣ ᩋᩈᩣᨾᩥᨠᩴ ᩅᩣᨲᩥ ᩏᨸᨸᩁᩥᨠ᩠ᨡᩥᨲᨻ᩠ᨻᩴ. ᩈᩈᩣᨾᩥᨠᩮᨸᩥ ᩈᩣᨾᩥᨠᩣᨶᩴ ᩈᩣᩃᨿᨽᩣᩅᩮᩣ ᩅᩣ ᨶᩥᩁᩣᩃᨿᨽᩣᩅᩮᩣ ᩅᩣ ᩏᨸᨸᩁᩥᨠ᩠ᨡᩥᨲᨻ᩠ᨻᩮᩣ. ᩈᨧᩮ ᨲᩮᩈᩴ ᩈᩣᩃᨿᨠᩣᩃᩮ ᩋᩅᩉᨭᩴ, ᨽᨱ᩠ᨯᩴ ᩋᨣ᩠ᨥᩣᨸᩮᨲ᩠ᩅᩣ ᩌᨸᨲ᩠ᨲᩥ ᨠᩣᩁᩮᨲᨻ᩠ᨻᩣ. ᩈᨧᩮ ᨶᩥᩁᩣᩃᨿᨠᩣᩃᩮ, ᨶ ᨸᩣᩁᩣᨩᩥᨠᩮᨶ ᨠᩣᩁᩮᨲᨻ᩠ᨻᩮᩣ. ᨽᨱ᩠ᨯᩈᩣᨾᩥᨠᩮᩈᩩ ᨸᨶ ᨽᨱ᩠ᨯᩴ ᩌᩉᩁᩣᨸᩮᨶ᩠ᨲᩮᩈᩩ ᨽᨱ᩠ᨯᩴ ᨴᩣᨲᨻ᩠ᨻᩴ. ᩋᨿᨾᩮᨲ᩠ᨳ ᩈᩣᨾᩦᨧᩥ. ᩑᩅᩴ ᩅᨲ᩠ᨳᩩ ᩒᩃᩮᩣᨠᩮᨲᨻ᩠ᨻᩴ.

ᨠᩣᩃᩮᩣᨲᩥ ᩋᩅᩉᩣᩁᨠᩣᩃᩮᩣ. ᨲᨴᩮᩅ ᩉᩥ ᨽᨱ᩠ᨯᩴ ᨠᨴᩣᨧᩥ ᩈᨾᨣ᩠ᨥᩴ ᩉᩮᩣᨲᩥ, ᨠᨴᩣᨧᩥ ᨾᩉᨣ᩠ᨥᩴ. ᨲᩈ᩠ᨾᩣ ᨲᩴ ᨽᨱ᩠ᨯᩴ ᨿᩈ᩠ᨾᩥᩴ ᨠᩣᩃᩮ ᩋᩅᩉᨭᩴ, ᨲᩈ᩠ᨾᩥᩴᨿᩮᩅ ᨠᩣᩃᩮ ᨿᩮᩣ ᨲᩔ ᩋᨣ᩠ᨥᩮᩣ, ᨲᩮᨶ ᩋᨣ᩠ᨥᩮᨶ ᩌᨸᨲ᩠ᨲᩥ ᨠᩣᩁᩮᨲᨻ᩠ᨻᩣ. ᩑᩅᩴ ᨠᩣᩃᩮᩣ ᩒᩃᩮᩣᨠᩮᨲᨻ᩠ᨻᩮᩣ.

ᨴᩮᩈᩮᩣᨲᩥ ᩋᩅᩉᩣᩁᨴᩮᩈᩮᩣ. ᨲᨬ᩠ᩉᩥ ᨽᨱ᩠ᨯᩴ ᨿᩈ᩠ᨾᩥᩴ ᨴᩮᩈᩮ ᩋᩅᩉᨭᩴ, ᨲᩈ᩠ᨾᩥᩴᨿᩮᩅ ᨴᩮᩈᩮ ᨿᩮᩣ ᨲᩔ ᩋᨣ᩠ᨥᩮᩣ, ᨲᩮᨶ ᩋᨣ᩠ᨥᩮᨶ ᩌᨸᨲ᩠ᨲᩥ ᨠᩣᩁᩮᨲᨻ᩠ᨻᩣ. ᨽᨱ᩠ᨯᩩᨭ᩠ᨮᩣᨶᨴᩮᩈᩮ ᩉᩥ ᨽᨱ᩠ᨯᩴ ᩈᨾᨣ᩠ᨥᩴ ᩉᩮᩣᨲᩥ, ᩋᨬ᩠ᨬᨲ᩠ᨳ ᨾᩉᨣ᩠ᨥᩴ. ᩑᩅᩴ ᨴᩮᩈᩮᩣ ᩒᩃᩮᩣᨠᩮᨲᨻ᩠ᨻᩮᩣ.

ᩋᨣ᩠ᨥᩮᩣᨲᩥ (ᨸᩣᩁᩣ. ᩋᨭ᩠ᨮ. ᪑.᪙᪒) ᨽᨱ᩠ᨯᨣ᩠ᨥᩮᩣ. ᨶᩅᨽᨱ᩠ᨯᩔ ᩉᩥ ᨿᩮᩣ ᩋᨣ᩠ᨥᩮᩣ, ᩈᩮᩣ ᨸᨧ᩠ᨨᩣ ᨸᩁᩥᩉᩣᨿᨲᩥ. ᨿᨳᩣ ᨶᩅᨵᩮᩣᨲᩮᩣ ᨸᨲ᩠ᨲᩮᩣ ᩋᨭ᩠ᨮ ᩅᩣ ᨴᩈ ᩅᩣ ᩋᨣ᩠ᨥᨲᩥ, ᩈᩮᩣ ᨸᨧ᩠ᨨᩣ ᨽᩥᨶ᩠ᨶᩮᩣ ᩅᩣ ᨨᩥᨴ᩠ᨴᩮᩣ ᩅᩣ ᩌᨱᩥᨣᨱ᩠ᨮᩥᨠᩣᩉᨲᩮᩣ ᩅᩣ ᩋᨸ᩠ᨸᨣ᩠ᨥᩮᩣ ᩉᩮᩣᨲᩥ, ᨲᩈ᩠ᨾᩣ ᨶ ᩈᨻ᩠ᨻᨴᩣ ᨽᨱ᩠ᨯᩴ ᨸᨠᨲᩥᩋᨣ᩠ᨥᩮᨶᩮᩅ ᨠᩣᨲᨻ᩠ᨻᨶ᩠ᨲᩥ. ᩑᩅᩴ ᩋᨣ᩠ᨥᩮᩣ ᩒᩃᩮᩣᨠᩮᨲᨻ᩠ᨻᩮᩣ.

ᨸᩁᩥᨽᩮᩣᨣᩮᩣᨲᩥ ᨽᨱ᩠ᨯᩔ ᨸᩁᩥᨽᩮᩣᨣᩮᩣ. ᨸᩁᩥᨽᩮᩣᨣᩮᨶᩣᨸᩥ ᩉᩥ ᩅᩣᩈᩥᩌᨴᩥᨽᨱ᩠ᨯᩔ ᩋᨣ᩠ᨥᩮᩣ ᨸᩁᩥᩉᩣᨿᨲᩥ, ᨲᩈ᩠ᨾᩣ ᩑᩅᩴ ᩏᨸᨸᩁᩥᨠ᩠ᨡᩥᨲᨻ᩠ᨻᩴ – ᩈᨧᩮ ᨠᩮᩣᨧᩥ ᨠᩔᨧᩥ ᨸᩣᨴᨣ᩠ᨥᨶᨠᩴ ᩅᩣᩈᩥᩴ ᩉᩁᨲᩥ, ᨲᨲᩕ ᩅᩣᩈᩥᩈᩣᨾᩥᨠᩮᩣ ᨸᩩᨧ᩠ᨨᩥᨲᨻ᩠ᨻᩮᩣ ‘‘ᨲᨿᩣ ᩋᨿᩴ ᩅᩣᩈᩥ ᨠᩥᨲ᩠ᨲᨠᩮᨶ ᨠᩦᨲᩣ’’ᨲᩥ. ‘‘ᨸᩣᨴᩮᨶ, ᨽᨶ᩠ᨲᩮ’’ᨲᩥ. ‘‘ᨠᩥᩴ ᨸᨶ ᨲᩮ ᨠᩥᨱᩥᨲ᩠ᩅᩣᩅ ᨮᨸᩥᨲᩣ, ᩏᨴᩣᩉᩩ ᨲᩴ ᩅᩃᨬ᩠ᨩᩮᩈᩦ’’ᨲᩥ? ᩈᨧᩮ ᩅᨴᨲᩥ ‘‘ᩑᨠᨴᩥᩅᩈᩴ ᨾᩮ ᨴᨶ᩠ᨲᨠᨭ᩠ᨮᩴ ᩅᩣ ᩁᨩᨶᨨᩃ᩠ᩃᩥ ᩅᩣ ᨸᨲ᩠ᨲᨸᨧᨶᨴᩣᩁᩩ ᩅᩣ ᨨᩥᨶ᩠ᨶᩴ, ᨥᩴᩈᩥᨲ᩠ᩅᩣ ᩅᩣ ᨶᩥᩈᩥᨲᩣ’’ᨲᩥ. ᩋᨳᩔ ᨸᩮᩣᩁᩣᨱᩮᩣ ᩋᨣ᩠ᨥᩮᩣ ᨽᨭ᩠ᨮᩮᩣᨲᩥ ᩅᩮᨴᩥᨲᨻ᩠ᨻᩮᩣ. ᨿᨳᩣ ᨧ ᩅᩣᩈᩥᨿᩣ, ᩑᩅᩴ ᩋᨬ᩠ᨩᨶᩥᨿᩣ ᩅᩣ ᩋᨬ᩠ᨩᨶᩥᩈᩃᩣᨠᩣᨿ ᩅᩣ ᨠᩩᨬ᩠ᨧᩥᨠᩣᨿ ᩅᩣ ᨸᩃᩣᩃᩮᨶ ᩅᩣ ᨳᩩᩈᩮᩉᩥ ᩅᩣ ᩍᨭ᩠ᨮᨠᨧᩩᨱ᩠ᨱᩮᨶ ᩅᩣ ᩑᨠᩅᩣᩁᩴ ᨥᩴᩈᩥᨲ᩠ᩅᩣ ᨵᩮᩣᩅᨶᨾᨲ᩠ᨲᩮᨶᩣᨸᩥ ᩋᨣ᩠ᨥᩮᩣ ᨽᩔᨲᩥ. ᨲᩥᨸᩩᨾᨱ᩠ᨯᩃᩔ ᨾᨠᩁᨴᨶ᩠ᨲᨧ᩠ᨨᩮᨴᨶᩮᨶᩣᨸᩥ ᨸᩁᩥᨾᨴ᩠ᨴᨶᨾᨲ᩠ᨲᩮᨶᩣᨸᩥ, ᩏᨴᨠᩈᩣᨭᩥᨠᩣᨿ ᩈᨠᩥᩴ ᨶᩥᩅᩣᩈᨶᨸᩣᩁᩩᨸᨶᩮᨶᩣᨸᩥ, ᨸᩁᩥᨽᩮᩣᨣᩈᩦᩈᩮᨶ ᩋᩴᩈᩮ ᩅᩣ ᩈᩦᩈᩮ ᩅᩣ ᨮᨸᨶᨾᨲ᩠ᨲᩮᨶᩣᨸᩥ, ᨲᨱ᩠ᨯᩩᩃᩣᨴᩦᨶᩴ ᨸᨸ᩠ᨹᩮᩣᨭᨶᩮᨶᩣᨸᩥ ᨲᨲᩮᩣ ᩑᨠᩴ ᩅᩣ ᨴ᩠ᩅᩮ ᩅᩣ ᩋᨸᨶᨿᨶᩮᨶᨸᩥ, ᩋᨶ᩠ᨲᨾᩈᩮᩣ ᩑᨠᩴ ᨸᩣᩈᩣᨱᩈᨠ᩠ᨡᩁᩴ ᩏᨴ᩠ᨵᩁᩥᨲ᩠ᩅᩣ ᨨᨯ᩠ᨯᩥᨲᨾᨲ᩠ᨲᩮᨶᩣᨸᩥ, ᩈᨸ᩠ᨸᩥᨲᩮᩃᩣᨴᩦᨶᩴ ᨽᩣᨩᨶᨶ᩠ᨲᩁᨸᩁᩥᩅᨲ᩠ᨲᨶᩮᨶᨸᩥ, ᩋᨶ᩠ᨲᨾᩈᩮᩣ ᨲᨲᩮᩣ ᨾᨠ᩠ᨡᩥᨠᩴ ᩅᩣ ᨠᩥᨸᩥᩃ᩠ᩃᩥᨠᩴ ᩅᩣ ᩏᨴ᩠ᨵᩁᩥᨲ᩠ᩅᩣ ᨨᨯ᩠ᨯᩥᨲᨾᨲ᩠ᨲᩮᨶᨸᩥ, ᨣᩩᩊᨸᩥᨱ᩠ᨯᨠᩔ ᨾᨵᩩᩁᨽᩣᩅᨩᩣᨶᨶᨲ᩠ᨳᩴ ᨶᨡᩮᨶ ᩅᩥᨩ᩠ᨫᩥᨲ᩠ᩅᩣ ᩋᨱᩩᨾᨲ᩠ᨲᩴ ᨣᩉᩥᨲᨾᨲ᩠ᨲᩮᨶᨸᩥ ᩋᨣ᩠ᨥᩮᩣ ᨽᩔᨲᩥ. ᨲᩈ᩠ᨾᩣ ᨿᩴ ᨠᩥᨬ᩠ᨧᩥ ᨸᩣᨴᨣ᩠ᨥᨶᨠᩴ ᩅᩩᨲ᩠ᨲᨶᨿᩮᨶᩮᩅ ᩈᩣᨾᩥᨠᩮᨶ ᨸᩁᩥᨽᩮᩣᨣᩮᨶ ᩐᨶᩴ ᨠᨲᩴ ᩉᩮᩣᨲᩥ, ᨶ ᨲᩴ ᩋᩅᩉᩣᩁᨠᩮᩣ ᨽᩥᨠ᩠ᨡᩩ ᨸᩣᩁᩣᨩᩥᨠᩮᨶ ᨠᩣᩁᩮᨲᨻ᩠ᨻᩮᩣᨲᩥ. ᩑᩅᩴ ᨸᩁᩥᨽᩮᩣᨣᩮᩣ ᩒᩃᩮᩣᨠᩮᨲᨻ᩠ᨻᩮᩣ.

ᩑᩅᩴ ᩍᨾᩣᨶᩥ ᨲᩩᩃᨿᩥᨲ᩠ᩅᩣ ᨸᨬ᩠ᨧ ᨮᩣᨶᩣᨶᩥ ᨵᩣᩁᩮᨿ᩠ᨿ ᩋᨲ᩠ᨳᩴ ᩅᩥᨧᨠ᩠ᨡᨱᩮᩣ ᩌᨸᨲ᩠ᨲᩥᩴ ᩅᩣ ᩋᨶᩣᨸᨲ᩠ᨲᩥᩴ ᩅᩣ ᨣᩁᩩᨠᩴ ᩅᩣ ᩃᩉᩩᨠᩴ ᩅᩣ ᩌᨸᨲ᩠ᨲᩥᩴ ᨿᨳᩣᨮᩣᨶᩮ ᨮᨸᩮᨿ᩠ᨿᩣᨲᩥ.

ᩑᩅᩴ ᨲᨲ᩠ᨳ ᩅᩥᨶᩥᨧ᩠ᨨᨿᩴ ᨴᩔᩮᨲ᩠ᩅᩣ ᩍᨴᩣᨶᩥ ᩋᨶᩣᨸᨲ᩠ᨲᩥᩴ ᨴᩔᩮᨶ᩠ᨲᩮᩣ ‘‘ᩈᨠᩈᨬ᩠ᨬᩥᩔᩣ’’ᨲᩥᩌᨴᩥᨾᩣᩉ. ᨲᨲ᩠ᨳ ᩈᨠᩈᨬ᩠ᨬᩥᩔᩣᨲᩥ ‘‘ᨾᨿ᩠ᩉᩴ ᩈᨶ᩠ᨲᨠᩴ ᩍᨴᩴ ᨽᨱ᩠ᨯ’’ᨶ᩠ᨲᩥ ᩑᩅᩴ ᩈᨠᩈᨬ᩠ᨬᩥᩔ ᨸᩁᨽᨱ᩠ᨯᨾ᩠ᨸᩥ ᨣᨱ᩠ᩉᨲᩮᩣ ᨣᩉᨱᩮ ᩋᨶᩣᨸᨲ᩠ᨲᩥ, ᨣᩉᩥᨲᩴ ᨸᨶ ᨸᩩᨶ ᨴᩣᨲᨻ᩠ᨻᩴ. ᩈᨧᩮ ᩈᩣᨾᩥᨠᩮᩉᩥ ‘‘ᨴᩮᩉᩦ’’ᨲᩥ ᩅᩩᨲ᩠ᨲᩮᩣ ᨶ ᨴᩮᨲᩥ, ᨲᩮᩈᩴ ᨵᩩᩁᨶᩥᨠ᩠ᨡᩮᨸᩮ ᨸᩣᩁᩣᨩᩥᨠᩴ. ᩅᩥᩔᩣᩈᨣ᩠ᨣᩣᩉᩮᨲᩥ (ᨸᩣᩁᩣ. ᩋᨭ᩠ᨮ. ᪑.᪑᪓᪑) ᩅᩥᩔᩣᩈᨣ᩠ᨣᩉᨱᩮᨸᩥ ᩋᨶᩣᨸᨲ᩠ᨲᩥ. ᩅᩥᩔᩣᩈᨣ᩠ᨣᩣᩉᩃᨠ᩠ᨡᨱᩴ ᨸᨶ ᩍᨾᩥᨶᩣ ᩈᩩᨲ᩠ᨲᩮᨶ ᨩᩣᨶᩥᨲᨻ᩠ᨻᩴ –

‘‘ᩋᨶᩩᨩᩣᨶᩣᨾᩥ, ᨽᩥᨠ᩠ᨡᩅᩮ, ᨸᨬ᩠ᨧᩉᨦ᩠ᨣᩮᩉᩥ ᩈᨾᨶ᩠ᨶᩣᨣᨲᩔ ᩅᩥᩔᩣᩈᩴ ᨣᩉᩮᨲᩩᩴ, ᩈᨶ᩠ᨴᩥᨭ᩠ᨮᩮᩣ ᨧ ᩉᩮᩣᨲᩥ, ᩈᨾ᩠ᨽᨲ᩠ᨲᩮᩣ ᨧ ᩌᩃᨸᩥᨲᩮᩣ ᨧ ᨩᩦᩅᨲᩥ ᨧ ᨩᩣᨶᩣᨲᩥ ᨧ ‘ᨣᩉᩥᨲᩮ ᨾᩮ ᩋᨲ᩠ᨲᨾᨶᩮᩣ’’’ᨲᩥ (ᨾᩉᩣᩅ. ᪓᪕᪖).

ᨲᨲ᩠ᨳ ᩈᨶ᩠ᨴᩥᨭ᩠ᨮᩮᩣᨲᩥ ᨴᩥᨭ᩠ᨮᨾᨲ᩠ᨲᨠᨾᩥᨲ᩠ᨲᩮᩣ. ᩈᨾ᩠ᨽᨲ᩠ᨲᩮᩣᨲᩥ ᨴᩊ᩠ᩉᨾᩥᨲ᩠ᨲᩮᩣ. ᩌᩃᨸᩥᨲᩮᩣᨲᩥ ‘‘ᨾᨾ ᩈᨶ᩠ᨲᨠᩴ ᨿᩴ ᩍᨧ᩠ᨨᩈᩥ, ᨲᩴ ᨣᨱ᩠ᩉᩮᨿ᩠ᨿᩣᩈᩥ, ᩌᨸᩩᨧ᩠ᨨᩥᨲ᩠ᩅᩣ ᨣᩉᨱᩮ ᨠᩣᩁᨱᩴ ᨶᨲ᩠ᨳᩦ’’ᨲᩥ ᩅᩩᨲ᩠ᨲᩮᩣ. ᨩᩦᩅᨲᩦᨲᩥ ᩋᨶᩩᨭ᩠ᨮᩣᨶᩈᩮᨿ᩠ᨿᩣᨿ ᩈᨿᩥᨲᩮᩣᨸᩥ ᨿᩣᩅ ᨩᩦᩅᩥᨲᩥᨶ᩠ᨴᩕᩥᨿᩩᨸᨧ᩠ᨨᩮᨴᩴ ᨶ ᨸᩣᨸᩩᨱᩣᨲᩥ. ᨣᩉᩥᨲᩮ ᨧ ᩋᨲ᩠ᨲᨾᨶᩮᩣᨲᩥ ᨣᩉᩥᨲᩮ ᨲᩩᨭ᩠ᨮᨧᩥᨲ᩠ᨲᩮᩣ. ᩑᩅᩁᩪᨸᩔ ᩈᨶ᩠ᨲᨠᩴ ‘‘ᨣᩉᩥᨲᩮ ᨾᩮ ᩋᨲ᩠ᨲᨾᨶᩮᩣ ᨽᩅᩥᩔᨲᩦ’’ᨲᩥ ᨩᩣᨶᨶ᩠ᨲᩮᨶ ᨣᩉᩮᨲᩩᩴ ᩅᨭ᩠ᨭᨲᩥ. ᩋᨶᩅᩈᩮᩈᨸᩁᩥᨿᩣᨴᩣᨶᩅᩈᩮᨶ ᨧᩮᨲᩣᨶᩥ ᨸᨬ᩠ᨧᨦ᩠ᨣᩣᨶᩥ ᩅᩩᨲ᩠ᨲᩣᨶᩥ. ᩅᩥᩔᩣᩈᨣ᩠ᨣᩣᩉᩮᩣ ᨸᨶ ᨲᩦᩉᩥ ᩋᨦ᩠ᨣᩮᩉᩥ ᩁᩩᩉᨲᩥ. ᨠᨳᩴ? ᩈᨶ᩠ᨴᩥᨭ᩠ᨮᩮᩣ, ᨩᩦᩅᨲᩥ, ᨣᩉᩥᨲᩮ ᩋᨲ᩠ᨲᨾᨶᩮᩣ, ᩈᨾ᩠ᨽᨲ᩠ᨲᩮᩣ, ᨩᩦᩅᨲᩥ, ᨣᩉᩥᨲᩮ ᩋᨲ᩠ᨲᨾᨶᩮᩣ, ᩌᩃᨸᩥᨲᩮᩣ, ᨩᩦᩅᨲᩥ, ᨣᩉᩥᨲᩮ ᩋᨲ᩠ᨲᨾᨶᩮᩣᨲᩥ ᩑᩅᩴ.

ᨿᩮᩣ ᨸᨶ ᨩᩦᩅᨲᩥ, ᨶ ᨧ ᨣᩉᩥᨲᩮ ᩋᨲ᩠ᨲᨾᨶᩮᩣ ᩉᩮᩣᨲᩥ, ᨲᩔ ᩈᨶ᩠ᨲᨠᩴ ᩅᩥᩔᩣᩈᨽᩣᩅᩮᨶ ᨣᩉᩥᨲᨾ᩠ᨸᩥ ᨸᩩᨶ ᨴᩣᨲᨻ᩠ᨻᩴ. ᨴᨴᨶ᩠ᨲᩮᨶ ᨧ ᨾᨲᨠᨵᨶᩴ ᨲᩣᩅ ᨿᩮ ᨲᩔ ᨵᨶᩮ ᩍᩔᩁᩣ ᨣᩉᨭ᩠ᨮᩣ ᩅᩣ ᨸᨻ᩠ᨻᨩᩥᨲᩣ ᩅᩣ, ᨲᩮᩈᩴ ᨴᩣᨲᨻ᩠ᨻᩴ. ᩋᨶᨲ᩠ᨲᨾᨶᩔ ᩈᨶ᩠ᨲᨠᩴ ᨲᩔᩮᩅ ᨴᩣᨲᨻ᩠ᨻᩴ. ᨿᩮᩣ ᨸᨶ ᨸᨮᨾᩴᨿᩮᩅ ‘‘ᩈᩩᨭ᩠ᨮᩩ ᨠᨲᩴ ᨲᨿᩣ ᨾᨾ ᩈᨶ᩠ᨲᨠᩴ ᨣᨱ᩠ᩉᨶ᩠ᨲᩮᨶᩣ’’ᨲᩥ ᩅᨧᩦᨽᩮᨴᩮᨶ ᩅᩣ ᨧᩥᨲ᩠ᨲᩩᨸ᩠ᨸᩣᨴᨾᨲ᩠ᨲᩮᨶ ᩅᩣ ᩋᨶᩩᨾᩮᩣᨴᩥᨲ᩠ᩅᩣ ᨸᨧ᩠ᨨᩣ ᨠᩮᨶᨧᩥ ᨠᩣᩁᨱᩮᨶ ᨠᩩᨸᩥᨲᩮᩣ, ᩈᩮᩣ ᨸᨧ᩠ᨧᩣᩉᩁᩣᨸᩮᨲᩩᩴ ᨶ ᩃᨽᨲᩥ. ᨿᩮᩣ ᨧ ᩋᨴᩣᨲᩩᨠᩣᨾᩮᩣ, ᨧᩥᨲ᩠ᨲᩮᨶ ᨸᨶ ᩋᨵᩥᩅᩣᩈᩮᨲᩥ, ᨶ ᨠᩥᨬ᩠ᨧᩥ ᩅᨴᨲᩥ, ᩈᩮᩣᨸᩥ ᨸᩩᨶ ᨸᨧ᩠ᨧᩣᩉᩁᩣᨸᩮᨲᩩᩴ ᨶ ᩃᨽᨲᩥ. ᨿᩮᩣ ᨸᨶ ‘‘ᨾᨿᩣ ᨲᩩᨾ᩠ᩉᩣᨠᩴ ᩈᨶ᩠ᨲᨠᩴ ᨣᩉᩥᨲ’’ᨶ᩠ᨲᩥ ᩅᩣ ‘‘ᨸᩁᩥᨽᩩᨲ᩠ᨲ’’ᨶ᩠ᨲᩥ ᩅᩣ ᩅᩩᨲ᩠ᨲᩮᩣ ᨣᩉᩥᨲᩴ ᩅᩣ ᩉᩮᩣᨲᩩ, ᨸᩁᩥᨽᩩᨲ᩠ᨲᩴ ᩅᩣ, ‘‘ᨾᨿᩣ ᨸᨶ ᨲᩴ ᨠᩮᨶᨧᩥᨴᩮᩅ ᨠᩁᨱᩦᨿᩮᨶ ᨮᨸᩥᨲᩴ, ᨸᩣᨠᨲᩥᨠᩴ ᨠᩣᨲᩩᩴ ᩅᨭ᩠ᨭᨲᩦ’’ᨲᩥ ᩅᨴᨲᩥ, ᩋᨿᩴ ᨸᨧ᩠ᨧᩣᩉᩁᩣᨸᩮᨲᩩᩴ ᩃᨽᨲᩥ.

ᨲᩣᩅᨠᩣᩃᩥᨠᩮᨲᩥ ‘‘ᨸᨭᩥᨴᩔᩣᨾᩥ ᨸᨭᩥᨠᩁᩥᩔᩣᨾᩦ’’ᨲᩥ ᩑᩅᩴ ᨣᨱ᩠ᩉᨶ᩠ᨲᩔ ᨲᩣᩅᨠᩣᩃᩥᨠᩮᨸᩥ ᨣᩉᨱᩮ ᩋᨶᩣᨸᨲ᩠ᨲᩥ. ᨣᩉᩥᨲᩴ ᨸᨶ ᩈᨧᩮ ᨽᨱ᩠ᨯᩈᩣᨾᩥᨠᩮᩣ ᨸᩩᨣ᩠ᨣᩃᩮᩣ ᩅᩣ ᨣᨱᩮᩣ ᩅᩣ ‘‘ᨲᩩᨿ᩠ᩉᩮᩅᩮᨲᩴ ᩉᩮᩣᨲᩪ’’ᨲᩥ ᩋᨶᩩᨩᩣᨶᩣᨲᩥ, ᩍᨧ᩠ᨧᩮᨲᩴ ᨠᩩᩈᩃᩴ. ᨶᩮᩣ ᨧᩮ ᩋᨶᩩᨩᩣᨶᩣᨲᩥ, ᩌᩉᩁᩣᨸᩮᨶ᩠ᨲᩮ ᨴᩣᨲᨻ᩠ᨻᩴ. ᩈᨦ᩠ᨥᩈᨶ᩠ᨲᨠᩴ ᨸᨶ ᨸᨭᩥᨴᩣᨲᩩᨾᩮᩅ ᩅᨭ᩠ᨭᨲᩥ.

ᨸᩮᨲᨸᩁᩥᨣ᩠ᨣᩉᩮᨲᩥ ᩑᨲ᩠ᨳ ᨸᨶ ᨸᩮᨲ᩠ᨲᩥᩅᩥᩈᨿᩮ ᩏᨸᨸᨶ᩠ᨶᩣᨸᩥ, ᨠᩣᩃᩴ ᨠᨲ᩠ᩅᩣ ᨲᩈ᩠ᨾᩥᩴᨿᩮᩅ ᩋᨲ᩠ᨲᨽᩣᩅᩮ ᨶᩥᨻ᩠ᨻᨲ᩠ᨲᩣᨸᩥ, ᨧᩣᨲᩩᨾᩉᩣᩁᩣᨩᩥᨠᩣᨴᨿᩮᩣ ᨴᩮᩅᩣᨸᩥ ᩈᨻ᩠ᨻᩮ ‘‘ᨸᩮᨲᩣ’’ᨲ᩠ᩅᩮᩅ ᩈᨦ᩠ᨡ᩠ᨿᩴ ᨣᨲᩣ, ᨲᩮᩈᩴ ᨸᩁᩥᨣ᩠ᨣᩉᩮ ᩋᨶᩣᨸᨲ᩠ᨲᩥ. ᨴᩮᩅᨲᩣᨿ ᨸᨶ ᩏᨴ᩠ᨴᩥᩔ ᨻᩃᩥᨠᨾ᩠ᨾᩴ ᨠᩁᩮᩣᨶ᩠ᨲᩮᩉᩥ ᩁᩩᨠ᩠ᨡᩣᨴᩦᩈᩩ ᩃᨣ᩠ᨣᩥᨲᩈᩣᨭᨠᩮ ᩅᨲ᩠ᨲᨻ᩠ᨻᨾᩮᩅ ᨶᨲ᩠ᨳᩥ. ᨲᨬ᩠ᨧ ᨡᩮᩣ ᩌᩁᨠ᩠ᨡᨠᩮᩉᩥ ᩋᨸᩁᩥᨣ᩠ᨣᩉᩥᨲᩮ, ᨸᩁᩥᨣ᩠ᨣᩉᩥᨲᩴ ᨸᨶ ᨣᩉᩮᨲᩩᩴ ᨶ ᩅᨭ᩠ᨭᨲᩥ (ᩈᩣᩁᨲ᩠ᨳ. ᨭᩦ. ᪒.᪑᪓᪑).

ᨲᩥᩁᨧ᩠ᨨᩣᨶᨣᨲᨸᩁᩥᨣ᩠ᨣᩉᩮᨲᩥ ᨶᩣᨣᩈᩩᨸᨱ᩠ᨱᩣᨴᩦᨶᩴ ᨲᩥᩁᨧ᩠ᨨᩣᨶᨣᨲᩣᨶᩴ ᨸᩁᩥᨣ᩠ᨣᩉᩮ. ᩈᨧᩮᨸᩥ ᩉᩥ ᨴᩮᩅᩮᩣ ᩅᩣ ᨶᩣᨣᩈᩩᨸᨱ᩠ᨱᩮᩣ ᩅᩣ ᨾᨶᩩᩔᩁᩪᨸᩮᨶ ᩌᨸᨱᩴ ᨸᩈᩣᩁᩮᨲᩥ, ᨲᨲᩮᩣ ᨧᩔ ᩈᨶ᩠ᨲᨠᩴ ᨠᩮᩣᨧᩥ ᨴᩥᨻ᩠ᨻᨧᨠ᩠ᨡᩩᨠᩮᩣ ᨽᩥᨠ᩠ᨡᩩ ᨲᩴ ᨬᨲ᩠ᩅᩣ ᨣᩉᩮᨲ᩠ᩅᩣ ᨣᨧ᩠ᨨᨲᩥ, ᩅᨭ᩠ᨭᨲᩥ.

ᨸᩴᩈᩩᨠᩪᩃᩈᨬ᩠ᨬᩥᩔᩣᨲᩥ ‘‘ᩋᩈᩣᨾᩥᨠᩴ ᩍᨴᩴ ᨸᩴᩈᩩᨠᩪᩃ’’ᨶ᩠ᨲᩥ ᩑᩅᩈᨬ᩠ᨬᩥᩔᩣᨸᩥ ᨣᩉᨱᩮ ᩋᨶᩣᨸᨲ᩠ᨲᩥ. ᩈᨧᩮ ᨸᨶ ᨲᩴ ᩈᩈᩣᨾᩥᨠᩴ ᩉᩮᩣᨲᩥ, ᩌᩉᩁᩣᨸᩮᨶ᩠ᨲᩮ ᨴᩣᨲᨻ᩠ᨻᩴ. ᩏᨾ᩠ᨾᨲ᩠ᨲᨠᩣᨴᩦᨶᩥ ᨸᩩᨻ᩠ᨻᩮ ᩅᩩᨲ᩠ᨲᨸ᩠ᨸᨠᩣᩁᩣᨶᩮᩅ. ᩌᨴᩥᨠᨾ᩠ᨾᩥᨠᩮᩣ ᨸᨶᩮᨲ᩠ᨳ ᨵᨶᩥᨿᩮᩣ. ᩋᩅᩈᩮᩈᩣᨶᩴ ᨸᨶ ᩁᨩᨠᨽᨱ᩠ᨯᩥᨠᩣᨴᩥᨧᩮᩣᩁᩣᨶᩴ ᨨᨻ᩠ᨻᨣ᩠ᨣᩥᨿᩣᨴᩦᨶᩴ ᩌᨸᨲ᩠ᨲᩥᨿᩮᩅ.

ᩈᨧᩥᨲ᩠ᨲᨠᩮᩉᩥ ᨲᩦᩉᩥ ᩈᨾᩩᨭ᩠ᨮᩣᨶᩮᩉᩥ ᩍᨴᩴ ᩈᨾᩩᨭ᩠ᨮᩣᨲᩦᨲᩥ ᩌᩉ ‘‘ᩋᨴᩥᨶ᩠ᨶᩣᨴᩣᨶᩈᨾᩩᨭ᩠ᨮᩣᨶ’’ᨶ᩠ᨲᩥ. ᨲᨳᩣ ᩉᩥ ᩈᩣᩉᨲ᩠ᨳᩥᨠᩴ ᨠᩣᨿᨧᩥᨲ᩠ᨲᨲᩮᩣ ᩈᨾᩩᨭ᩠ᨮᩣᨲᩥ. ᩌᨱᨲ᩠ᨲᩥᨠᩴ ᩅᩣᨧᩣᨧᩥᨲ᩠ᨲᨲᩮᩣ ᩈᨾᩩᨭ᩠ᨮᩣᨲᩥ. ᩈᩣᩉᨲ᩠ᨲᩥᨠᩣᨱᨲ᩠ᨲᩥᨠᩴ ᨠᩣᨿᩅᩣᨧᩣᨧᩥᨲ᩠ᨲᨲᩮᩣ ᩈᨾᩩᨭ᩠ᨮᩣᨲᩥ, ᨲᨬ᩠ᨧ ᨡᩮᩣ ‘‘ᨽᩣᩁᩥᨿᨾᩥᨴᩴ, ᨲ᩠ᩅᩴ ᩑᨠᨸᩔᩴ ᨣᨱ᩠ᩉ, ᩋᩉᩴ ᩑᨠᨸᩔ’’ᨶ᩠ᨲᩥ ᩈᩴᩅᩥᨵᩣᨿ ᩏᨽᨿᩮᩈᩴ ᨸᨿᩮᩣᨣᩮᨶ ᩑᨠᩔ ᩅᨲ᩠ᨳᩩᨶᩮᩣ ᨮᩣᨶᩣᨧᩣᩅᨶᩮ ᩃᨻ᩠ᨽᨲᩥ. ‘‘ᨠᩣᨿᩅᨧᩦᨠᨾ᩠ᨾ’’ᨶ᩠ᨲᩥ ᩋᩅᨧᨶᩴ ᨸᨶ ᨠᩣᨿᩅᩣᨧᩣᨶᩴ ᩎᨴᩥᩈᩮ ᨮᩣᨶᩮ ᩋᨦ᩠ᨣᨾᨲ᩠ᨲᨲ᩠ᨲᩣ. ᨿᩣᨿ ᨸᨶ ᨧᩮᨲᨶᩣᨿ ᩈᨾᩩᨭ᩠ᨮᩣᨸᩥᨲᩮᩣ ᨸᨿᩮᩣᨣᩮᩣ ᩈᩣᩉᨲ᩠ᨳᩥᨠᩮᩣ ᩅᩣ ᩌᨱᨲ᩠ᨲᩥᨠᩮᩣ ᩅᩣ ᨸᨵᩣᨶᨽᩣᩅᩮᨶ ᨮᩣᨶᩣᨧᩣᩅᨶᩴ ᩈᩣᨵᩮᨲᩥ, ᨲᩔᩣ ᩅᩈᩮᨶ ᩌᨸᨲ᩠ᨲᩥ ᨠᩣᩁᩮᨲᨻ᩠ᨻᩣ. ᩋᨬ᩠ᨬᨳᩣ ᩈᩣᩉᨲ᩠ᨳᩥᨠᩴ ᩅᩣ ᩌᨱᨲ᩠ᨲᩥᨠᩔ ᩋᨦ᩠ᨣᩴ ᨶ ᩉᩮᩣᨲᩥ, ᩌᨱᨲ᩠ᨲᩥᨠᩴ ᩅᩣ ᩈᩣᩉᨲ᩠ᨳᩥᨠᩔᩣᨲᩥ ᩍᨴᩴ ᩅᩥᩁᩩᨩ᩠ᨫᨲᩥ. ‘‘ᩋᨴᩥᨶ᩠ᨶᩴ ᩌᨴᩥᨿᩣᨾᩦ’’ᨲᩥ ᩈᨬ᩠ᨬᩣᨿ ᩋᨽᩣᩅᩮᨶ ᨾᩩᨧ᩠ᨧᨶᨲᩮᩣ ᩈᨬ᩠ᨬᩣᩅᩥᨾᩮᩣᨠ᩠ᨡᩴ. ᨠᩣᨿᩮᨶ ᨠᨲᩴ ᨠᨾ᩠ᨾᩴ ᨠᩣᨿᨠᨾ᩠ᨾᩴ, ᨠᩣᨿᨴ᩠ᩅᩣᩁᩮᨶ ᨠᨲᨶ᩠ᨲᩥ ᩋᨲ᩠ᨳᩮᩣ. ᩅᨧᩦᨠᨾ᩠ᨾᨶ᩠ᨲᩥ ᩑᨲ᩠ᨳᩣᨸᩥ ᩑᩈᩮᩅ ᨶᨿᩮᩣ. ᨲᩩᨭ᩠ᨮᩮᩣ ᩅᩣ ᨽᩦᨲᩮᩣ ᩅᩣ ᨾᨩ᩠ᨫᨲ᩠ᨲᩮᩣ ᩅᩣ ᨶᩴ ᩌᨸᨩ᩠ᨩᨲᩦᨲᩥ ᨲᩥᩅᩮᨴᨶᩴ. ᩈᩮᩈᩴ ᨸᨮᨾᩈᩥᨠ᩠ᨡᩣᨸᨴᩮ ᩅᩩᨲ᩠ᨲᨶᨿᩮᨶᩮᩅ ᩅᩮᨴᩥᨲᨻ᩠ᨻᩴ.

ᨴᩩᨲᩥᨿᨸᩣᩁᩣᨩᩥᨠᩅᨱ᩠ᨱᨶᩣ ᨶᩥᨭ᩠ᨮᩥᨲᩣ.

᪓. ᨲᨲᩥᨿᨸᩣᩁᩣᨩᩥᨠᩅᨱ᩠ᨱᨶᩣ

ᩈᨶ᩠ᨲᩥ ᩈᩉᨲ᩠ᨳᩮ ᩏᨸᩈᨣ᩠ᨣᩮᩣ. ᨲᩮᨶ ᩈᨴ᩠ᨵᩥᩴ ᩏᩔᩩᨠ᩠ᨠᩅᨧᨶᨾᩮᨲᩴ ‘‘ᩈᨬ᩠ᨧᩥᨧ᩠ᨧᩣ’’ᨲᩥ ᩌᩉ ‘‘ᩈᨬ᩠ᨧᩮᨲᩮᨲ᩠ᩅᩣ’’ᨲᩥᩌᨴᩥ. ᩏᩔᩩᨠ᩠ᨠᩅᨧᨶᨶ᩠ᨲᩥ ᩑᨲ᩠ᨳ ᩏᩔᩩᨠ᩠ᨠᩅᨧᨶᩴ (ᩈᩣᩁᨲ᩠ᨳ. ᨭᩦ. ᪒.᪑᪗᪒) ᨶᩣᨾ ᨸᩩᨻ᩠ᨻᨠᩣᩃᨠᩥᩁᩥᨿᩣᩅᨧᨶᩴ. ᩋᨿᨬ᩠ᩉᩥ ᩈᨾᩣᨶᨠᨲ᩠ᨲᩩᨠᩮᩈᩩ ᨸᩩᨻ᩠ᨻᩣᨸᩁᨠᩣᩃᨠᩥᩁᩥᨿᩣᩅᨧᨶᩮᩈᩩ ᨸᩩᨻ᩠ᨻᨠᩣᩃᨠᩥᩁᩥᨿᩣᩅᨧᨶᩔ ᨶᩥᩁᩩᨲ᩠ᨲᩥᩅᩮᩣᩉᩣᩁᩮᩣ. ᩍᨴᩣᨶᩥ ‘‘ᩈᨴ᩠ᨵᩥᩴ ᨧᩮᨲᩮᨲ᩠ᩅᩣ’’ᨲᩥ ᩍᨾᩥᨶᩣ ᩈᨦ᩠ᨡᩮᨸᩮᨶ ᩅᩩᨲ᩠ᨲᨾᩮᩅᨲ᩠ᨳᩴ ᨸᩣᨠᨭᩴ ᨠᨲ᩠ᩅᩣ ᨴᩔᩮᨲᩩᩴ