📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཨབྷིདྷམྨཔིཊཀེ

ཨཊྛསཱལིནཱི ནཱམ

དྷམྨསངྒཎཱི-ཨཊྛཀཐཱ

གནྠཱརམྦྷཀཐཱ

ཀརུཎཱ ¶ ¶ ¶ ཝིཡ སཏྟེསུ, པཉྙཱ ཡསྶ མཧེསིནོ;

ཉེཡྻདྷམྨེསུ སབྦེསུ, པཝཏྟིཏྠ ཡཐཱརུཙི.

དཡཱཡ ¶ ཏཱཡ སཏྟེསུ, སམུསྶཱཧིཏམཱནསོ;

པཱཊིཧཱིརཱཝསཱནམྷི, ཝསནྟོ ཏིདསཱལཡེ.

པཱརིཙྪཏྟཀམཱུལམྷི, པཎྜུཀམྦལནཱམཀེ;

སིལཱསནེ སནྣིསིནྣོ, ཨཱདིཙྩོཝ ཡུགནྡྷརེ.

ཙཀྐཝཱལ༹སཧསྶེཧི, དསཧཱགམྨ སབྦསོ;

སནྣིསིནྣེན དེཝཱནཾ, གཎེན པརིཝཱརིཏོ.

མཱཏརཾ པམུཁཾ ཀཏྭཱ, ཏསྶཱ པཉྙཱཡ ཏེཛསཱ;

ཨབྷིདྷམྨཀཐཱམགྒཾ, དེཝཱནཾ སམྤཝཏྟཡི.

ཏསྶ པཱདེ ནམསྶིཏྭཱ, སམྦུདྡྷསྶ སིརཱིམཏོ;

སདྡྷམྨཉྩསྶ པཱུཛེཏྭཱ, ཀཏྭཱ སངྒྷསྶ ཙཉྫལིཾ.

ནིཔཙྩཀཱརསྶེཏསྶ, ཀཏསྶ རཏནཏྟཡེ;

ཨཱནུབྷཱཝེན སོསེཏྭཱ, ཨནྟརཱཡེ ཨསེསཏོ.

ཝིསུདྡྷཱཙཱརསཱིལེན, ནིཔུཎཱམལབུདྡྷིནཱ;

བྷིཀྑུནཱ བུདྡྷགྷོསེན, སཀྐཙྩཾ ཨབྷིཡཱཙིཏོ.

ཡཾ ¶ དེཝདེཝོ དེཝཱནཾ, དེསེཏྭཱ ནཡཏོ པུན;

ཐེརསྶ སཱརིཔུཏྟསྶ, སམཱཙིཀྑི ཝིནཱཡཀོ.

ཨནོཏཏྟདཧེ ཀཏྭཱ, ཨུཔཊྛཱནཾ མཧེསིནོ;

ཡཉྩ སུཏྭཱན སོ ཐེརོ, ཨཱཧརིཏྭཱ མཧཱིཏལཾ.

བྷིཀྑཱུནཾ ¶ པཡིརུདཱཧཱསི, ཨིཏི བྷིཀྑཱུཧི དྷཱརིཏོ;

སངྒཱིཏིཀཱལེ སངྒཱིཏོ, ཝེདེཧམུནིནཱ པུན.

ཏསྶ གམྦྷཱིརཉཱཎེཧི, ཨོགཱལ༹ྷསྶ ཨབྷིཎྷསོ;

ནཱནཱནཡཝིཙིཏྟསྶ, ཨབྷིདྷམྨསྶ ཨཱདིཏོ.

ཡཱ མཧཱཀསྶཔཱདཱིཧི, ཝསཱིཧིཊྛཀཐཱ པུརཱ;

སངྒཱིཏཱ ཨནུསངྒཱིཏཱ, པཙྪཱཔི ཙ ཨིསཱིཧི ཡཱ.

ཨཱབྷཏཱ པན ཐེརེན, མཧིནྡེནེཏམུཏྟམཾ;

ཡཱ དཱིཔཾ དཱིཔཝཱསཱིནཾ, བྷཱསཱཡ ཨབྷིསངྑཏཱ.

ཨཔནེཏྭཱ ¶ ཏཏོ བྷཱསཾ, ཏམྦཔཎྞིནིཝཱསིནཾ;

ཨཱརོཔཡིཏྭཱ ནིདྡོསཾ, བྷཱསཾ ཏནྟིནཡཱནུགཾ.

ནིཀཱཡནྟརལདྡྷཱིཧི, ཨསམྨིསྶཾ ཨནཱཀུལཾ;

མཧཱཝིཧཱརཝཱསཱིནཾ, དཱིཔཡནྟོ ཝིནིཙྪཡཾ.

ཨཏྠཾ པཀཱསཡིསྶཱམི, ཨཱགམཊྛཀཐཱསུཔི;

གཧེཏབྦཾ གཧེཏྭཱན, ཏོསཡནྟོ ཝིཙཀྑཎེ.

ཀམྨཊྛཱནཱནི སབྦཱནི, ཙརིཡཱབྷིཉྙཱ ཝིཔསྶནཱ;

ཝིསུདྡྷིམགྒེ པནིདཾ, ཡསྨཱ སབྦཾ པཀཱསིཏཾ.

ཏསྨཱ ཏཾ ཨགྒཧེཏྭཱན, སཀལཱཡཔི ཏནྟིཡཱ;

པདཱནུཀྐམཏོ ཨེཝ, ཀརིསྶཱམཏྠཝཎྞནཾ.

ཨིཏི ¶ མེ བྷཱསམཱནསྶ, ཨབྷིདྷམྨཀཐཾ ཨིམཾ;

ཨཝིཀྑིཏྟཱ ནིསཱམེཐ, དུལླབྷཱ ཧི ཨཡཾ ཀཐཱཏི.

ནིདཱནཀཐཱ

ཏཏྠ ¶ ཀེནཊྛེན ཨབྷིདྷམྨོ? དྷམྨཱཏིརེཀདྷམྨཝིསེསཊྛེན. ཨཏིརེཀཝིསེསཏྠདཱིཔཀོ ཧེཏྠ ‘ཨབྷི’-སདྡོ. ‘‘བཱལ༹ྷཱ མེ དུཀྑཱ ཝེདནཱ ཨབྷིཀྐམནྟི ནོ པཊིཀྐམནྟི’’ (མ. ནི. ༣.༣༨༤; སཾ. ནི. ༥.༡༩༥) ‘‘ཨབྷིཀྐནྟཝཎྞཱ’’ཏིཨཱདཱིསུ (སཾ. ནི. ༡.༡-༢) ཝིཡ. ཏསྨཱ ཡཐཱ སམུསྶིཏེསུ བཧཱུསུ ཚཏྟེསུ ཙེཝ དྷཛེསུ ཙ ཡཾ ཨཏིརེཀཔྤམཱཎཾ ཝིསེསཝཎྞསཎྛཱནཉྩ ཚཏྟཾ, ཏཾ ‘ཨཏིཙྪཏྟ’ནྟི ཝུཙྩཏི, ཡོ ཨཏིརེཀཔྤམཱཎོ ནཱནཱཝིརཱགཝཎྞཝིསེསསམྤནྣོ ཙ དྷཛོ སོ ‘ཨཏིདྷཛོ’ཏི ཝུཙྩཏི, ཡཐཱ ཙ ཨེཀཏོ སནྣིཔཏིཏེསུ བཧཱུསུ རཱཛཀུམཱརེསུ ཙེཝ དེཝེསུ ཙ ཡོ ཛཱཏིབྷོགཡསཨིསྶརིཡཱདིསམྤཏྟཱིཧི ཨཏིརེཀཏརོ ཙེཝ ཝིསེསཝནྟཏརོ ཙ རཱཛཀུམཱརོ སོ ‘ཨཏིརཱཛཀུམཱརོ’ཏི ཝུཙྩཏི, ཡོ ཨཱཡུཝཎྞཨིསྶརིཡཡསསམྤཏྟིཨཱདཱིཧི ཨཏིརེཀཏརོ ཙེཝ ཝིསེསཝནྟཏརོ ཙ དེཝོ སོ ‘ཨཏིདེཝོ’ཏི ཝུཙྩཏི, ཏཐཱརཱུཔོ བྲཧྨཱཔི ‘ཨཏིབྲཧྨཱ’ཏི ཝུཙྩཏི, ཨེཝམེཝ ཨཡམྤི དྷམྨོ དྷམྨཱཏིརེཀདྷམྨཝིསེསཊྛེན ‘ཨབྷིདྷམྨོ’ཏི ཝུཙྩཏི.

སུཏྟནྟཉྷི པཏྭཱ པཉྩཀྑནྡྷཱ ཨེཀདེསེནེཝ ཝིབྷཏྟཱ, ན ནིཔྤདེསེན; ཨབྷིདྷམྨཾ པཏྭཱ པན སུཏྟནྟབྷཱཛནཱིཡཨབྷིདྷམྨབྷཱཛནཱིཡཔཉྷཔུཙྪཀནཡཱནཾ ཝསེན ནིཔྤདེསཏོ ཝིབྷཏྟཱ. ཏཐཱ དྭཱདསཱཡཏནཱནི, ཨཊྛཱརས དྷཱཏུཡོ, ཙཏྟཱརི སཙྩཱནི, བཱཝཱིསཏིནྡྲིཡཱནི, དྭཱདསཔདིཀོ པཙྩཡཱཀཱརོ. ཀེཝལཉྷི ¶ ཨིནྡྲིཡཝིབྷངྒེ སུཏྟནྟབྷཱཛནཱིཡཾ ནཏྠི, པཙྩཡཱཀཱརེ ཙ པཉྷཔུཙྪཀཾ ནཏྠི. སུཏྟནྟཉྩ པཏྭཱ ཙཏྟཱརོ སཏིཔཊྛཱནཱ ཨེཀདེསེནེཝ ཝིབྷཏྟཱ, ན ནིཔྤདེསེན; ཨབྷིདྷམྨཾ པཏྭཱ པན ཏིཎྞམྤི ནཡཱནཾ ཝསེན ནིཔྤདེསཏོཝ ཝིབྷཏྟཱ. ཏཐཱ ཙཏྟཱརི སམྨཔྤདྷཱནཱནི, ཙཏྟཱརོ ཨིདྡྷིཔཱདཱ, སཏྟ བོཛ྄ཛྷངྒཱ, ཨརིཡོ ཨཊྛངྒིཀོ མགྒོ, ཙཏྟཱརི ཛྷཱནཱནི, ཙཏསྶོ ཨཔྤམཉྙཱཡོ, པཉྩ སིཀྑཱཔདཱནི, ཙཏསྶོ པཊིསམྦྷིདཱ. ཀེཝལཉྷེཏྠ སིཀྑཱཔདཝིབྷངྒེ སུཏྟནྟབྷཱཛནཱིཡཾ ནཏྠི. སུཏྟནྟཾ པཏྭཱ ཙ ཉཱཎཾ ཨེཀདེསེནེཝ ཝིབྷཏྟཾ ན ནིཔྤདེསེན; ཏཐཱ ཀིལེསཱ. ཨབྷིདྷམྨཾ པཏྭཱ པན ‘‘ཨེཀཝིདྷེན ཉཱཎཝཏྠཱུ’’ཏིཨཱདིནཱ (ཝིབྷ. ༧༥༡) ནཡེན མཱཏིཀཾ ཋཔེཏྭཱ ནིཔྤདེསཏོཝ ¶ ཝིབྷཏྟཾ. ཏཐཱ ཨེཀཀཏོ པཊྛཱཡ ཨནེཀེཧི ནཡེཧི ཀིལེསཱ. སུཏྟནྟཾ ¶ པཏྭཱ ཙ བྷཱུམནྟརཔརིཙྪེདོ ཨེཀདེསེནེཝ ཝིབྷཏྟོ, ན ནིཔྤདེསེན; ཨབྷིདྷམྨཾ པན པཏྭཱ ཏིཎྞམྤི ནཡཱནཾ ཝསེན བྷཱུམནྟརཔརིཙྪེདོ ནིཔྤདེསཏོཝ ཝིབྷཏྟོ. ཨེཝཾ དྷམྨཱཏིརེཀདྷམྨཝིསེསཊྛེན ཨབྷིདྷམྨོཏི ཝེདིཏབྦོ.

པཀརཎཔརིཙྪེདཏོ པནེས དྷམྨསངྒཎཱིཝིབྷངྒདྷཱཏུཀཐཱཔུགྒལཔཉྙཏྟིཀཐཱཝཏྠུཡམཀཔཊྛཱནཱནཾ སཏྟནྣཾ པཀརཎཱནཾ ཝསེན ཋིཏོ. ཨཡམེཏྠ ཨཱཙརིཡཱནཾ སམཱནཀཐཱ. ཝིཏཎྜཝཱདཱི པནཱཧ – ‘ཀཐཱཝཏྠུ ཀསྨཱ གཧིཏཾ? ནནུ སམྨཱསམྦུདྡྷསྶ པརིནིབྦཱནཏོ ཨཊྛཱརསཝསྶཱདྷིཀཱནི དྭེ ཝསྶསཏཱནི ཨཏིཀྐམིཏྭཱ མོགྒལིཔུཏྟཏིསྶཏྠེརེནེཏཾ ཋཔིཏཾ? ཏསྨཱ སཱཝཀབྷཱསིཏཏྟཱ ཚཌྜེཐ ན’ནྟི. ‘ཀིཾ པན ཚཔྤཀརཎཱནི ཨབྷིདྷམྨོ’ཏི? ‘ཨེཝཾ ན ཝདཱམཱི’ཏི. ‘ཨཐ ཀིཾ ཝདེསཱི’ཏི. ‘སཏྟཔྤཀརཎཱནཱི’ཏི. ‘ཀཏརཾ གཧེཏྭཱ སཏྟ ཀརོསཱི’ཏི? ‘མཧཱདྷམྨཧདཡཾ ནཱམ ཨཏྠི, ཨེཏེན སཧ སཏྟཱ’ཏི. ‘མཧཱདྷམྨཧདཡེ ཨཔུབྦཾ ནཏྠི, ཀཏིཔཡཱཝ པཉྷཱཝཱརཱ ཨཝསེསཱ, ཀཐཱཝཏྠུནཱཝ སདྡྷིཾ སཏྟཱ’ཏི. ‘ནོ ཀཐཱཝཏྠུནཱ, མཧཱདྷཱཏུཀཐཱ ¶ ནཱམ ཨཏྠི, ཏཱཡ སདྡྷིཾ སཏྟཱ’ཏི. ‘མཧཱདྷཱཏུཀཐཱཡཾ ཨཔུབྦཾ ནཏྠི, ཨཔྤམཏྟིཀཱཝ ཏནྟི ཨཝསེསཱ. ཀཐཱཝཏྠུནཱཝ སདྡྷིཾ སཏྟཱ’ཏི.

སམྨཱསམྦུདྡྷོ ཧི སཏྟཔྤཀརཎཱནི དེསེནྟོ ཀཐཱཝཏྠུཾ པཏྭཱ ཡཱ ཨེསཱ པུགྒལཝཱརེ ཏཱཝ ཙཏཱུསུ པཉྷེསུ དྭིནྣཾ པཉྩཀཱནཾ ཝསེན ཨཊྛམུཁཱ ཝཱདཡུཏྟི ཏཾ ཨཱདིཾ ཀཏྭཱ སབྦཀཐཱམགྒེསུ ཨསམྤུཎྞབྷཱཎཝཱརམཏྟཱཡ པཱལི༹ཡཱ མཱཏིཀཾ ཋཔེསི. སཱ པནེསཱ ‘‘པུགྒལོ ཨུཔལབྦྷཏི སཙྩིཀཊྛཔརམཏྠེནཱཏི. ཨཱམནྟཱ. ཡོ སཙྩིཀཊྛོ པརམཏྠོ ཏཏོ སོ པུགྒལོ ཨུཔལབྦྷཏི སཙྩིཀཊྛཔརམཏྠེནཱཏི. ནཧེཝཾ ཝཏྟབྦེ. ཨཱཛཱནཱཧི ནིགྒཧཾ…པེ… པུགྒལོ ནུཔལབྦྷཏི སཙྩིཀཊྛཔརམཏྠེནཱཏི. ཨཱམནྟཱ. ཡོ སཙྩིཀཊྛོ པརམཏྠོ ཏཏོ སོ པུགྒལོ ནུཔལབྦྷཏི སཙྩིཀཊྛཔརམཏྠེནཱཏི. ནཧེཝཾ ཝཏྟབྦེ. ཨཱཛཱནཱཧི ནིགྒཧཾ…པེ…. སབྦཏྠ པུགྒལོ ཨུཔལབྦྷཏི སབྦཏྠ པུགྒལོ ནུཔལབྦྷཏི, སབྦདཱ པུགྒལོ ཨུཔལབྦྷཏི སབྦདཱ པུགྒལོ ནུཔལབྦྷཏི, སབྦེསུ པུགྒལོ ཨུཔལབྦྷཏི སབྦེསུ པུགྒལོ ནུཔལབྦྷཏི སཙྩིཀཊྛཔརམཏྠེནཱ’’ཏི (ཀཐཱ. ༡༥-༡༦) ཨེཝཾ པཋམཾ ཝཱདཾ ནིསྶཱཡ ¶ པཋམཾ ནིགྒཧཾ, དུཏིཡཾ ནིསྶཱཡ དུཏིཡཾ …པེ… ཨཊྛམཾ ནིསྶཱཡ ཨཊྛམཾ ནིགྒཧཾ དསྶེནྟེན སཏྠཱརཱ ཋཔིཏཱ. ཨིམིནཱ ནཡེན སབྦཏྠ མཱཏིཀཱཋཔནཾ ཝེདིཏབྦཾ. ཏཾ པནེཏཾ མཱཏིཀཾ ཋཔེནྟོ ཨིམཾ དིསྭཱ ཋཔེསི – མམ པརིནིབྦཱནཏོ ཨཊྛཱརསཝསྶཱདྷིཀཱནཾ དྭིནྣཾ ཝསྶསཏཱནཾ མཏྠཀེ མོགྒལིཔུཏྟཏིསྶཏྠེརོ ནཱམ བྷིཀྑུ ¶ བྷིཀྑུསཧསྶམཛ྄ཛྷེ ནིསིནྣོ སཀཝཱདེ པཉྩ སུཏྟསཏཱནི པརཝཱདེ པཉྩཱཏི སུཏྟསཧསྶཾ སམོདྷཱནེཏྭཱ དཱིགྷནིཀཱཡཔྤམཱཎཾ ཀཐཱཝཏྠུཔྤཀརཎཾ བྷཱཛེསྶཏཱིཏི.

མོགྒལིཔུཏྟཏིསྶཏྠེརོཔི ཨིདཾ པཀརཎཾ དེསེནྟོ ན ཨཏྟནོ ཉཱཎེན དེསེསི, སཏྠཱརཱ པན དིནྣནཡེན ཋཔིཏམཱཏིཀཱཡ དེསེསི. ཨིཏི སཏྠཱརཱ དིནྣནཡེན ཋཔིཏམཱཏིཀཱཡ དེསིཏཏྟཱ སཀལམྤེཏཾ པཀརཎཾ བུདྡྷབྷཱསིཏམེཝ ནཱམ ཛཱཏཾ. ཡཐཱ ཀིཾ? ཡཐཱ མདྷུཔིཎྜིཀསུཏྟནྟཱདཱིནི ¶ . མདྷུཔིཎྜིཀསུཏྟནྟསྨིཉྷི བྷགཝཱ ‘‘ཡཏོནིདཱནཾ བྷིཀྑུ པུརིསཾ པཔཉྩསཉྙཱསངྑཱ སམུདཱཙརནྟི, ཨེཏྠ ཙེ ནཏྠི ཨབྷིནནྡིཏབྦཾ ཨབྷིཝདིཏབྦཾ ཨཛ྄ཛྷོསིཏབྦཾ, ཨེསེཝནྟོ རཱགཱནུསཡཱན’’ནྟི (མ. ནི. ༡.༢༠༢) མཱཏིཀཾ ཋཔེཏྭཱ ཨུཊྛཱཡཱསནཱ ཝིཧཱརཾ པཱཝིསི.

དྷམྨཔྤཊིགྒཱཧཀཱ བྷིཀྑཱུ མཧཱཀཙྩཱནཏྠེརཾ ཨུཔསངྐམིཏྭཱ དསབལེན ཋཔིཏམཱཏིཀཱཡ ཨཏྠཾ པུཙྪིཾསུ. ཐེརོ པུཙྪིཏམཏྟཀེནེཝ ཨཀཐེཏྭཱ དསབལསྶ ཨཔཙིཏིདསྶནཏྠཾ ‘‘སེཡྻཐཱཔི ཨཱཝུསོ པུརིསོ སཱརཏྠིཀོ སཱརགཝེསཱི’’ཏི (མ. ནི. ༡.༢༠༣) སཱརོཔམཾ ཨཱཧརིཏྭཱ སཱརརུཀྑོ ཝིཡ བྷགཝཱ སཱཁཱཔལཱསསདིསཱ སཱཝཀཱ, ‘‘སོ ཧཱཝུསོ བྷགཝཱ ཛཱནཾ ཛཱནཱཏི, པསྶཾ པསྶཏི ཙཀྑུབྷཱུཏོ ཉཱཎབྷཱུཏོ དྷམྨབྷཱུཏོ བྲཧྨབྷཱུཏོ ཝཏྟཱ པཝཏྟཱ ཨཏྠསྶ ནིནྣེཏཱ ཨམཏསྶ དཱཏཱ དྷམྨསྶཱམཱི ཏཐཱགཏོ’’ཏི སཏྠཱརཾ ཐོམེཏྭཱ པུནཔྤུནཾ ཐེརེཧི ཡཱཙིཏོ སཏྠཱརཱ ཋཔིཏམཱཏིཀཱཡ ཨཏྠཾ ཝིབྷཛིཏྭཱ ‘‘ཨཱཀངྑམཱནཱ ཙ པན ཏུམྷེ ཨཱཡསྨནྟོ བྷགཝནྟཾཡེཝ ཨུཔསངྐམིཏྭཱ ཨེཏམཏྠཾ པཊིཔུཙྪེཡྻཱཐ སཙེ སབྦཉྙུཏཉྙཱཎེན སདྡྷིཾ སཾསནྡིཡམཱནཾ སམེཏི གཎྷེཡྻཱཐ, ནོ ཙེ མཱ གཎྷིཏྠཱ’’ཏི ཨིམིནཱ ཨདྷིཔྤཱཡེན ‘‘ཡཐཱ ཝོ བྷགཝཱ བྱཱཀརོཏི ཏཐཱ ནཾ དྷཱརེཡྻཱཐཱ’’ཏི ཝཏྭཱ ཨུཡྻོཛེསི.

ཏེ ¶ སཏྠཱརཾ ཨུཔསངྐམིཏྭཱ པུཙྪིཾསུ. སཏྠཱ དུཀྐཐིཏཾ ཀཙྩཱནེནཱཏི ཨཝཏྭཱ སུཝཎྞཱལིངྒཾ ཨུསྶཱཔེནྟོ ཝིཡ གཱིཝཾ ཨུནྣཱམེཏྭཱ སུཔུཔྥིཏསཏཔཏྟསསྶིརིཀཾ མཧཱམུཁཾ པཱུརེནྟོ བྲཧྨསྶརཾ ནིཙྪཱརེཏྭཱ སཱདྷུ སཱདྷཱུཏི ཐེརསྶ སཱདྷུཀཱརཾ དཏྭཱ ‘‘པཎྜིཏོ, བྷིཀྑཝེ, མཧཱཀཙྩཱནོ, མཧཱཔཉྙོ བྷིཀྑཝེ མཧཱཀཙྩཱནོ, མཾ ཙེཔི ཏུམྷེ, བྷིཀྑཝེ, ཨེཏམཏྠཾ པཊིཔུཙྪེཡྻཱཐ, ཨཧམྤི ཏཾ ཨེཝམེཝཾ བྱཱཀརེཡྻཾ ཡཐཱ ཏཾ མཧཱཀཙྩཱནེན བྱཱཀཏ’’ནྟི (མ. ནི. ༡.༢༠༥) ཨཱཧ.

ཨེཝཾ སཏྠཱརཱ ཨནུམོདིཏཀཱལཏོ པཊྛཱཡ ཙ པན སཀལཾ སུཏྟཾ བུདྡྷབྷཱསིཏཾ ནཱམ ཛཱཏཾ. ཨཱནནྡཏྠེརཱདཱིཧི ¶ ཝིཏྠཱརིཏསུཏྟེསུཔི ཨེསེཝ ནཡོ. ཨེཝམེཝ སམྨཱསམྦུདྡྷོ སཏྟཔྤཀརཎཱནི དེསེནྟོ ཀཐཱཝཏྠུཾ པཏྭཱ ཝུཏྟནཡེན མཱཏིཀཾ ཋཔེསི. ཋཔེནྟོ ¶ ཙ པན ཨིམཾ ཨདྡས –

མམ པརིནིབྦཱནཏོ ཨཊྛཱརསཝསྶཱདྷིཀཱནཾ དྭིནྣཾ ཝསྶསཏཱནཾ མཏྠཀེ མོགྒལིཔུཏྟཏིསྶཏྠེརོ ནཱམ བྷིཀྑུ བྷིཀྑུསཧསྶམཛ྄ཛྷེ ནིསིནྣོ སཀཝཱདེ པཉྩ སུཏྟསཏཱནི པརཝཱདེ པཉྩཱཏི སུཏྟསཧསྶཾ སམོདྷཱནེཏྭཱ དཱིགྷནིཀཱཡཔྤམཱཎཾ ཀཐཱཝཏྠུཔྤཀརཎཾ བྷཱཛེསྶཏཱིཏི.

མོགྒལིཔུཏྟཏིསྶཏྠེརོཔི ཨིམཾ པཀརཎཾ དེསེནྟོ ན ཨཏྟནོ ཉཱཎེན དེསེསི, སཏྠཱརཱ པན དིནྣནཡེན ཋཔིཏམཱཏིཀཱཡ དེསེསི. ཨིཏི སཏྠཱརཱ དིནྣནཡེན ཋཔིཏམཱཏིཀཱཡ དེསིཏཏྟཱ སཀལམྤེཏཾ པཀརཎཾ བུདྡྷབྷཱསིཏམེཝ ཛཱཏཾ. ཨེཝཾ ཀཐཱཝཏྠུནཱཝ སདྡྷིཾ སཏྟ པཀརཎཱནི ཨབྷིདྷམྨོ ནཱམ.

ཏཏྠ དྷམྨསངྒཎཱིཔཀརཎེ ཙཏསྶོ ཝིབྷཏྟིཡོ – ཙིཏྟཝིབྷཏྟི རཱུཔཝིབྷཏྟི ནིཀྑེཔརཱསི ཨཏྠུདྡྷཱརོཏི. ཏཏྠ ཀཱམཱཝཙརཀུསལཏོ ཨཊྛ, ཨཀུསལཏོ དྭཱདས, ཀུསལཝིཔཱཀཏོ སོལ༹ས, ཨཀུསལཝིཔཱཀཏོ སཏྟ, ཀིརིཡཏོ ཨེཀཱདས; རཱུཔཱཝཙརཀུསལཏོ པཉྩ, ཝིཔཱཀཏོ པཉྩ, ཀིརིཡཏོ པཉྩ; ཨརཱུཔཱཝཙརཀུསལཏོ ཙཏྟཱརི, ཝིཔཱཀཏོ ཙཏྟཱརི, ཀིརིཡཏོ ཙཏྟཱརི; ལོཀུཏྟརཀུསལཏོ ཙཏྟཱརི, ཝིཔཱཀཏོ ཙཏྟཱརཱིཏི ཨེཀཱུནནཝུཏི ཙིཏྟཱནི ཙིཏྟཝིབྷཏྟི ནཱམ. ཙིཏྟུཔྤཱདཀཎྜནྟིཔི ཨེཏསྶེཝ ནཱམཾ. ཏཾ ཝཱཙནཱམགྒཏོ ཨཏིརེཀཚབྷཱཎཝཱརཾ, ཝིཏྠཱརིཡམཱནཾ པན ཨནནྟམཔརིམཱཎཾ ཧོཏི.

ཏདནནྟརཾ ¶ ཨེཀཝིདྷེན དུཝིདྷེནཱཏིཨཱདིནཱ ནཡེན མཱཏིཀཾ ཋཔེཏྭཱ ཝིཏྠཱརེན ཝིབྷཛིཏྭཱ དསྶིཏཱ རཱུཔཝིབྷཏྟི ནཱམ. རཱུཔཀཎྜནྟིཔི ཨེཏསྶེཝ ནཱམཾ. ཏཾ ཝཱཙནཱམགྒཏོ ཨཏིརེཀདྭིབྷཱཎཝཱརཾ. ཝིཏྠཱརིཡམཱནཾ པན ཨནནྟམཔརིམཱཎཾ ཧོཏི.

ཏདནནྟརཾ མཱུལཏོ ཁནྡྷཏོ དྭཱརཏོ བྷཱུམིཏོ ཨཏྠཏོ དྷམྨཏོ ནཱམཏོ ལིངྒཏོཏི ཨེཝཾ མཱུལཱདཱིཧི ནིཀྑིཔིཏྭཱ དེསིཏོ ནིཀྑེཔརཱསི ནཱམ. སོ –

མཱུལཏོ ¶ ཁནྡྷཏོ ཙཱཔི, དྭཱརཏོ ཙཱཔི བྷཱུམིཏོ;

ཨཏྠཏོ དྷམྨཏོ ཙཱཔི, ནཱམཏོ ཙཱཔི ལིངྒཏོ;

ནིཀྑིཔིཏྭཱ དེསིཏཏྟཱ, ནིཀྑེཔོཏི པཝུཙྩཏི.

ནིཀྑེཔཀཎྜནྟིཔི ཏསྶེཝ ནཱམཾ. ཏཾ ཝཱཙནཱམགྒཏོ ཏིམཏྟབྷཱཎཝཱརཾ. ཝིཏྠཱརིཡམཱནཾ པན ཨནནྟམཔརིམཱཎཾ ཧོཏི.

ཏདནནྟརཾ པན ཏེཔིཊཀསྶ བུདྡྷཝཙནསྶ ཨཏྠུདྡྷཱརབྷཱུཏཾ ཡཱཝ སརཎདུཀཱ ནིཀྑིཏྟཾ ཨཊྛཀཐཱཀཎྜཾ ནཱམ. ཡཏོ ¶ མཧཱཔཀརཎིཡཱ བྷིཀྑཱུ མཧཱཔཀརཎེ གཎནཙཱརཾ ཨསལླཀྑེནྟཱ གཎནཙཱརཾ སམཱནེནྟི. ཏཾ ཝཱཙནཱམགྒཏོ དྭིམཏྟབྷཱཎཝཱརཾ. ཝིཏྠཱརིཡམཱནཾ པན ཨནནྟམཔརིམཱཎཾ ཧོཏི.

ཨིཏི སཀལམྤི དྷམྨསངྒཎཱིཔཀརཎཾ ཝཱཙནཱམགྒཏོ ཨཏིརེཀཏེརསམཏྟབྷཱཎཝཱརཾ. ཝིཏྠཱརིཡམཱནཾ པན ཨནནྟམཔརིམཱཎཾ ཧོཏི. ཨེཝམེཏཾ –

ཙིཏྟཝིབྷཏྟི རཱུཔཉྩ, ནིཀྑེཔོ ཨཏྠཛོཏནཱ;

གམྦྷཱིརཾ ནིཔུཎཾ ཋཱནཾ, ཏམྤི བུདྡྷེན དེསིཏཾ.

ཏདནནྟརཾ ཝིབྷངྒཔྤཀརཎཾ ནཱམ. ཏཾ ཁནྡྷཝིབྷངྒོ ཨཱཡཏནཝིབྷངྒོ དྷཱཏུཝིབྷངྒོ སཙྩཝིབྷངྒོ ཨིདྲིཡཝིབྷངྒོ པཙྩཡཱཀཱརཝིབྷངྒོ སཏིཔཊྛཱནཝིབྷངྒོ སམྨཔྤདྷཱནཝིབྷངྒོ ཨིདྡྷིཔཱདཝིབྷངྒོ བོཛ྄ཛྷངྒཝིབྷངྒོ མགྒངྒཝིབྷངྒོ ཛྷཱནཝིབྷངྒོ ཨཔྤམཉྙཱཝིབྷངྒོ སིཀྑཱཔདཝིབྷངྒོ པཊིསམྦྷིདཱཝིབྷངྒོ ཉཱཎཝིབྷངྒོ ཁུདྡཀཝཏྠུཝིབྷངྒོ དྷམྨཧདཡཝིབྷངྒོཏི ཨཊྛཱརསཝིདྷེན ཝིབྷཏྟཾ.

ཏཏྠ ¶ ཁནྡྷཝིབྷངྒོ སུཏྟནྟབྷཱཛནཱིཡཨབྷིདྷམྨབྷཱཛནཱིཡཔཉྷཔུཙྪཀཱནཾ ཝསེན ཏིདྷཱ ཝིབྷཏྟོ. སོ ཝཱཙནཱམགྒཏོ པཉྩམཏྟབྷཱཎཝཱརོ, ཝིཏྠཱརིཡམཱནོ པན ཨནནྟོ ཨཔརིམཱཎོ ཧོཏི. ཏཏོ པརཾ ཨཱཡཏནཝིབྷངྒཱདཡོཔི ཨེཏེཧེཝ ཏཱིཧི ནཡེཧི ཝིབྷཏྟཱ. ཏེསུ ཨཱཡཏནཝིབྷངྒོ ཝཱཙནཱམགྒཏོ ཨཏིརེཀབྷཱཎཝཱརོ, དྷཱཏུཝིབྷངྒོ དྭིམཏྟབྷཱཎཝཱརོ. ཏཐཱ སཙྩཝིབྷངྒོ. ཨིནྡྲིཡཝིབྷངྒེ ¶ སུཏྟནྟབྷཱཛནཱིཡཾ ནཏྠི; ཝཱཙནཱམགྒཏོ པནེས ཨཏིརེཀབྷཱཎཝཱརམཏྟོ. པཙྩཡཱཀཱརཝིབྷངྒོ ཚམཏྟབྷཱཎཝཱརོ, པཉྷཔུཙྪཀཾ པནེཏྠ ནཏྠི. སཏིཔཊྛཱནཝིབྷངྒོ ཨཏིརེཀབྷཱཎཝཱརམཏྟོ; ཏཐཱ སམྨཔྤདྷཱན ཨིདྡྷིཔཱདབོཛ྄ཛྷངྒམགྒངྒཝིབྷངྒཱ. ཛྷཱནཝིབྷངྒོ དྭིབྷཱཎཝཱརམཏྟོ, ཨཔྤམཉྙཱཝིབྷངྒོ ཨཏིརེཀབྷཱཎཝཱརམཏྟོ. སིཀྑཱཔདཝིབྷངྒེཔི སུཏྟནྟབྷཱཛནཱིཡཾ ནཏྠི; ཝཱཙནཱམགྒཏོ པནེས ཨཏིརེཀབྷཱཎཝཱརམཏྟོ; ཏཐཱ ¶ པཊིསམྦྷིདཱཝིབྷངྒོ. ཉཱཎཝིབྷངྒོ དསཝིདྷེན ཝིབྷཏྟོ; ཝཱཙནཱམགྒཏོ པནེས ཏིམཏྟབྷཱཎཝཱརོ. ཁུདྡཀཝཏྠུཝིབྷངྒོཔི དསཝིདྷེན ཝིབྷཏྟོ; ཝཱཙནཱམགྒཏོ པནེས ཏིམཏྟབྷཱཎཝཱརོ. དྷམྨཧདཡཝིབྷངྒོ ཏིཝིདྷེན ཝིབྷཏྟོ; ཝཱཙནཱམགྒཏོ པནེས ཨཏིརེཀདྭིབྷཱཎཝཱརམཏྟོ. སབྦེཔི ཝིཏྠཱརིཡམཱནཱ ཨནནྟཱ ཨཔརིམཱཎཱ ཧོནྟི. ཨེཝམེཏཾ ཝིབྷངྒཔྤཀརཎཾ ཝཱཙནཱམགྒཏོ པཉྩཏིཾསམཏྟབྷཱཎཝཱརཾ; ཝིཏྠཱརཏོ པན ཨནནྟམཔརིམཱཎཾ ཧོཏི.

ཏདནནྟརཾ དྷཱཏུཀཐཱཔཀརཎཾ ནཱམ. ཏཾ སངྒཧོ ཨསངྒཧོ, སངྒཧིཏེན ཨསངྒཧིཏཾ, ཨསངྒཧིཏེན སངྒཧིཏཾ, སངྒཧིཏེན སངྒཧིཏཾ, ཨསངྒཧིཏེན ཨསངྒཧིཏཾ; སམྤཡོགོ ཝིཔྤཡོགོ, སམྤཡུཏྟེན ཝིཔྤཡུཏྟཾ, ཝིཔྤཡུཏྟེན སམྤཡུཏྟཾ, སམྤཡུཏྟེན སམྤཡུཏྟཾ, ཝིཔྤཡུཏྟེན ཝིཔྤཡུཏྟཾ; སངྒཧིཏེན སམྤཡུཏྟཾ ཝིཔྤཡུཏྟཾ; སམྤཡུཏྟེན སངྒཧིཏཾ ཨསངྒཧིཏཾ, ཨསངྒཧིཏེན སམྤཡུཏྟཾ ཝིཔྤཡུཏྟཾ, ཝིཔྤཡུཏྟེན སངྒཧིཏཾ ཨསངྒཧིཏནྟི ཙུདྡསཝིདྷེན ཝིབྷཏྟཾ. ཏཾ ཝཱཙནཱམགྒཏོ ཨཏིརེཀཚབྷཱཎཝཱརམཏྟཾ, ཝིཏྠཱརིཡམཱནཾ པན ཨནནྟམཔརིམཱཎཾ ཧོཏི.

ཏདནནྟརཾ པུགྒལཔཉྙཏྟི ནཱམ. སཱ ‘‘ཁནྡྷཔཉྙཏྟི ཨཱཡཏནཔཉྙཏྟི དྷཱཏུཔཉྙཏྟི སཙྩཔཉྙཏྟི ཨིནྡྲིཡཔཉྙཏྟི པུགྒལཔཉྙཏྟཱི’’ཏི ཚབྦིདྷེན ཝིབྷཏྟཱ. སཱ ཝཱཙནཱམགྒཏོ ཨཏིརེཀཔཉྩབྷཱཎཝཱརཱ; ཝིཏྠཱརིཡམཱནཱ པན ཨནནྟཱ ཨཔརིམཱཎཱཝ ཧོཏི.

ཏདནནྟརཾ ¶ ཀཐཱཝཏྠུཔྤཀརཎཾ ནཱམ. ཏཾ སཀཝཱདེ པཉྩ སུཏྟསཏཱནི པརཝཱདེ པཉྩཱཏི སུཏྟསཧསྶཾ སམོདྷཱནེཏྭཱ ཝིབྷཏྟཾ. ཏཾ ཝཱཙནཱམགྒཏོ ཨིདཱནི པོཏྠཀེ ལིཁིཏཾ ཨགྒཧེཏྭཱ སངྒཱིཏིཨཱརོཔིཏནཡེན དཱིགྷནིཀཱཡཔྤམཱཎཾ, ཝིཏྠཱརིཡམཱནཾ པན ཨནནྟམཔརིམཱཎཾ ཧོཏི.

ཏདནནྟརཾ ཡམཀཾ ནཱམ. ཏཾ མཱུལཡམཀཾ ཁནྡྷཡམཀཾ ཨཱཡཏནཡམཀཾ དྷཱཏུཡམཀཾ སཙྩཡམཀཾ སངྑཱརཡམཀཾ ¶ ཨནུསཡཡམཀཾ ཙིཏྟཡམཀཾ དྷམྨཡམཀཾ ཨིནྡྲིཡཡམཀནྟི དསཝིདྷེན ཝིབྷཏྟཾ. ཏཾ ¶ ཝཱཙནཱམགྒཏོ ཝཱིསབྷཱཎཝཱརསཏཾ, ཝིཏྠཱརཏོ པན ཨནནྟམཔརིམཱཎཾ ཧོཏི.

ཏདནནྟརཾ མཧཱཔཀརཎཾ ནཱམ. པཊྛཱནནྟིཔི ཏསྶེཝ ནཱམཾ. ཏཾ ཧེཏུཔཙྩཡོ ཨཱརམྨཎཔཙྩཡོ ཨདྷིཔཏིཔཙྩཡོ ཨནནྟརཔཙྩཡོ སམནནྟརཔཙྩཡོ སཧཛཱཏཔཙྩཡོ ཨཉྙམཉྙཔཙྩཡོ ནིསྶཡཔཙྩཡོ ཨུཔནིསྶཡཔཙྩཡོ པུརེཛཱཏཔཙྩཡོ པཙྪཱཛཱཏཔཙྩཡོ ཨཱསེཝནཔཙྩཡོ ཀམྨཔཙྩཡོ ཝིཔཱཀཔཙྩཡོ ཨཱཧཱརཔཙྩཡོ ཨིནྡྲིཡཔཙྩཡོ ཛྷཱནཔཙྩཡོ མགྒཔཙྩཡོ སམྤཡུཏྟཔཙྩཡོ ཝིཔྤཡུཏྟཔཙྩཡོ ཨཏྠིཔཙྩཡོ ནཏྠིཔཙྩཡོ ཝིགཏཔཙྩཡོ ཨཝིགཏཔཙྩཡོཏི. པཙྩཡཝསེན ཏཱཝ ཙཏུཝཱིསཏིཝིདྷེན ཝིབྷཏྟཾ.

ཨིམསྨིཾ པན ཋཱནེ པཊྛཱནཾ སམཱནེཏབྦཾ. ཀུསལཏྟིཀཱདཡོ ཧི དྭཱཝཱིསཏི ཏིཀཱ, ནཱམ ཧེཏཱུ དྷམྨཱ ནཧེཏཱུ དྷམྨཱ…པེ… སརཎཱ དྷམྨཱ ཨརཎཱ དྷམྨཱཏི ཨིམེ སཏཾ དུཀཱ. ཨཔརེཔི ཝིཛྫཱབྷཱགིནོ དྷམྨཱ ཨཝིཛྫཱབྷཱགིནོ དྷམྨཱ…པེ… ཁཡེ ཉཱཎཾ, ཨནུཔྤཱདེ ཉཱཎནྟི དྭཱཙཏྟཱལཱིས སུཏྟནྟིཀདུཀཱ ནཱམ. ཏེསུ དྭཱཝཱིསཏི ཏིཀཱ སཏཾ དུཀཱཏི ཨཡཾ ཨཱཧཙྩབྷཱསིཏཱ ཛིནཝཙནབྷཱུཏཱ སབྦཉྙུབུདྡྷེན དེསིཏཱ སཏྟནྣཾ པཀརཎཱནཾ མཱཏིཀཱ ནཱམ.

ཨཐཱཔརེ དྭཱཙཏྟཱལཱིས སུཏྟནྟིཀདུཀཱ ཀུཏོཔབྷཝཱ ཀེན ཋཔིཏཱ ཀེན དེསིཏཱཏི? དྷམྨསེནཱཔཏིསཱརིཔུཏྟཏྠེརཔྤབྷཝཱ, ཏེན ཋཔིཏཱ, ཏེན དེསིཏཱཏི. ཨིམེ ཋཔེནྟོ པན ཐེརོ ན སཱམུཀྐཾསིཀེན ཨཏྟནོ ཉཱཎེན ཋཔེསི. ཨེཀུཏྟརིཡཾ པན ཨེཀནིཔཱཏདུཀནིཔཱཏསངྒཱིཏི དསུཏྟརསུཏྟནྟེཧི སམོདྷཱནེཏྭཱ ཨཱབྷིདྷམྨིཀཏྠེརཱནཾ སུཏྟནྟཾ པཏྭཱ ཨཀིལམཏྠཾ ཋཔིཏཱ. ཏེ པནེཏེ ཨེཀསྨིཾ ནིཀྑེཔཀཎྜེཡེཝ མཏྠཀཾ ¶ པཱཔེཏྭཱ ཝིབྷཏྟཱ. སེསཊྛཱནེསུ ཡཱཝ སརཎདུཀཱ ཨབྷིདྷམྨོ ཝིབྷཏྟོ.

སམྨཱསམྦུདྡྷེན ཧི ཨནུལོམཔཊྛཱནེ དྭཱཝཱིསཏི ཏིཀེ ནིསྶཱཡ ཏིཀཔཊྛཱནཾ ནཱམ ནིདྡིཊྛཾ. སཏཾ དུཀེ ནིསྶཱཡ དུཀཔཊྛཱནཾ ནཱམ ནིདྡིཊྛཾ. ཏཏོ པརཾ དྭཱཝཱིསཏི ཏིཀེ གཧེཏྭཱ དུཀསཏེ པཀྑིཔིཏྭཱ དུཀཏིཀཔཊྛཱནཾ ནཱམ དསྶིཏཾ. ཏཏོ པརཾ དུཀསཏཾ གཧེཏྭཱ དྭཱཝཱིསཏིཡཱ ཏིཀེསུ པཀྑིཔིཏྭཱ ཏིཀདུཀཔཊྛཱནཾ ནཱམ དསྶིཏཾ. ཏིཀེ ¶ པན ཏིཀེསུཡེཝ པཀྑིཔིཏྭཱ ཏིཀཏིཀཔཊྛཱནཾ ¶ ནཱམ དསྶིཏཾ. དུཀེ ཙ དུཀེསུཡེཝ པཀྑིཔིཏྭཱ དུཀདུཀཔཊྛཱནཾ ནཱམ དསྶིཏཾ. ཨེཝཾ –

ཏིཀཉྩ པཊྛཱནཝརཾ དུཀུཏྟམཾ,

དུཀཏིཀཉྩེཝ ཏིཀདུཀཉྩ;

ཏིཀཏིཀཉྩེཝ དུཀདུཀཉྩ,

ཚ ཨནུལོམམྷི ནཡཱ སུགམྦྷཱིརཱཏི. (པཊྛཱ. ༡.༡.༣༩);

པཙྩནཱིཡཔཊྛཱནེཔི དྭཱཝཱིསཏིཏིཀེ ནིསྶཱཡ ཏིཀཔཊྛཱནཾ ནཱམ. དུཀསཏཾ ནིསྶཱཡ དུཀཔཊྛཱནཾ ནཱམ. དྭཱཝཱིསཏིཏིཀེ དུཀསཏེ པཀྑིཔིཏྭཱ དུཀཏིཀཔཊྛཱནཾ ནཱམ. དུཀསཏཾ དྭཱཝཱིསཏིཡཱ ཏིཀེསུ པཀྑིཔིཏྭཱ ཏིཀདུཀཔཊྛཱནཾ ནཱམ. ཏིཀེ ཏིཀེསུཡེཝ པཀྑིཔིཏྭཱ ཏིཀཏིཀཔཊྛཱནཾ ནཱམ. དུཀེ དུཀེསུཡེཝ པཀྑིཔིཏྭཱ དུཀདུཀཔཊྛཱནཾ ནཱམཱཏི པཙྩནཱིཡེཔི ཚཧི ནཡེཧི པཊྛཱནཾ ནིདྡིཊྛཾ. ཏེན ཝུཏྟཾ –

ཏིཀཉྩ པཊྛཱནཝརཾ དུཀུཏྟམཾ,

དུཀཏིཀཉྩེཝ ཏིཀདུཀཉྩ;

ཏིཀཏིཀཉྩེཝ དུཀདུཀཉྩ,

ཚ པཙྩནཱིཡམྷི ནཡཱ སུགམྦྷཱིརཱཏི. (པཊྛཱ. ༡.༡.༤༤);

ཏཏོ པརཾ ཨནུལོམཔཙྩནཱིཡེཔི ཨེཏེནེཝ ཨུཔཱཡེན ཚ ནཡཱ དསྶིཏཱ. ཏེནཱཧ –

ཏིཀཉྩ པཊྛཱནཝརཾ དུཀུཏྟམཾ,

དུཀཏིཀཉྩེཝ ཏིཀདུཀཉྩ;

ཏིཀཏིཀཉྩེཝ དུཀདུཀཉྩ,

ཚ ཨནུལོམཔཙྩནཱིཡམྷི ནཡཱ སུགམྦྷཱིརཱཏི. (པཊྛཱ. ༡.༡.༤༨);

ཏདནནྟརཾ ¶ པཙྩནཱིཡཱནུལོམེཔི ཨེཏེཧེཝ ཚཧི ནཡེཧི ནིདྡིཊྛཾ. ཏེནཱཧ –

ཏིཀཉྩ ¶ པཊྛཱནཝརཾ དུཀུཏྟམཾ,

དུཀཏིཀཉྩེཝ ཏིཀདུཀཉྩ;

ཏིཀཏིཀཉྩེཝ དུཀདུཀཉྩ,

ཚ པཙྩནཱིཡཱནུལོམམྷི ནཡཱ སུགམྦྷཱིརཱཏི. (པཊྛཱ. ༡.༡.༥༢);

ཨེཝཾ ཨནུལོམེ ཚ པཊྛཱནཱནི, པཊིལོམེ ཚ, ཨནུལོམཔཙྩནཱིཡེ ཚ, པཙྩནཱིཡཱནུལོམེ ཚ པཊྛཱནཱནཱིཏི ཨིདཾ ཙཏུཝཱིསཏིསམནྟཔཊྛཱནསམོདྷཱནཾ པཊྛཱནཾ མཧཱཔཀརཎཾ ནཱམ.

ཨིདཱནི ཨིམསྶ ཨབྷིདྷམྨསྶ གམྦྷཱིརབྷཱཝཝིཛཱནནཏྠཾ ཙཏྟཱརོ སཱགརཱ ཝེདིཏབྦཱ – སཾསཱརསཱགརོ, ཛལསཱགརོ, ནཡསཱགརོ, ཉཱཎསཱགརོཏི. ཏཏྠ སཾསཱརསཱགརོ ནཱམ –

ཁནྡྷཱནཉྩ པཊིཔཱཊི, དྷཱཏུཨཱཡཏནཱན ཙ;

ཨབྦོཙྪིནྣཾ ཝཏྟམཱནཱ, སཾསཱརོཏི པཝུཙྩཏཱིཏི.

ཨེཝཾ ཝུཏྟཾ སཾསཱརཝཊྚཾ. སྭཱཡཾ ཡསྨཱ ཨིམེསཾ སཏྟཱནཾ ཨུཔྤཏྟིཡཱ པུརིམཱ ཀོཊི ན པཉྙཱཡཏི ཨེཏྟཀཱནཉྷི ཝསྶསཏཱནཾ ཝཱ ཝསྶསཧསྶཱནཾ ¶ ཝཱ ཝསྶསཏསཧསྶཱནཾ ཝཱ, ཀཔྤསཏཱནཾ ཝཱ ཀཔྤསཧསྶཱནཾ ཝཱ ཀཔྤསཏསཧསྶཱནཾ ཝཱ མཏྠཀེ སཏྟཱ ཨུཔྤནྣཱ, ཏཏོ པུབྦེ ནཱཧེསུནྟི ཝཱ, ཨསུཀསྶ ནཱམ རཉྙོ ཀཱལེ ཨུཔྤནྣཱ, ཨསུཀསྶ བུདྡྷསྶ ཀཱལེ ཨུཔྤནྣཱ ཏཏོ པུབྦེ ནཱཧེསུནྟི ཝཱ, ཨཡཾ པརིཙྪེདོ ནཏྠི; ‘‘པུརིམཱ, བྷིཀྑཝེ, ཀོཊི ན པཉྙཱཡཏི ཨཝིཛྫཱཡ, ཨིཏོ པུབྦེ ཨཝིཛྫཱ ནཱཧོསི ཨཐ པཙྪཱ སམབྷཝཱི’’ཏི (ཨ. ནི. ༡༠.༦༡) ཨིམིནཱ པན ནཡེན སཾསཱརསཱགརོ ཨནམཏགྒོཝ.

མཧཱསམུདྡོ པན ཛལསཱགརོ ནཱམཱཏི ཝེདིཏབྦོ. སོ ཙཏུརཱསཱིཏིཡོཛནསཧསྶགམྦྷཱིརོ. ཏཏྠ ཨུདཀསྶ ཨཱལ༹ྷཀསཏེཧི ཝཱ ཨཱལ༹ྷཀསཧསྶེཧི ཝཱ ཨཱལ༹ྷཀསཏསཧསྶེཧི ཝཱ པམཱཎཾ ནཱམ ནཏྠི ¶ . ཨཐ ཁོ ཨསངྑྱེཡྻོ ཨཔྤམེཡྻོ མཧཱཨུདཀཀྑནྡྷོཏྭེཝ སངྑྱཾ གཙྪཏི. ཨཡཾ ཛལསཱགརོ ནཱམ.

ཀཏམོ ནཡསཱགརོ? ཏེཔིཊཀཾ བུདྡྷཝཙནཾ. དྭེཔི ཧི ཏནྟིཡོ པཙྩཝེཀྑནྟཱནཾ སདྡྷཱསམྤནྣཱནཾ ¶ པསཱདབཧུལཱནཾ ཉཱཎུཏྟརཱནཾ ཀུལཔུཏྟཱནཾ ཨནནྟཾ པཱིཏིསོམནསྶཾ ཨུཔྤཛྫཏི. ཀཏམཱ དྭེ? ཝིནཡཉྩ ཨབྷིདྷམྨཉྩ. ཝིནཡདྷརབྷིཀྑཱུནཉྷི ཝིནཡཏནྟིཾ པཙྩཝེཀྑནྟཱནཾ དོསཱནུརཱུཔཾ སིཀྑཱཔདཔཉྙཱཔནཾ ནཱམ – ཨིམསྨིཾ དོསེ ཨིམསྨིཾ ཝཱིཏིཀྐམེ ཨིདཾ ནཱམ ཧོཏཱིཏི སིཀྑཱཔདཔཉྙཱཔནཾ – ཨཉྙེསཾ ཨཝིསཡོ, བུདྡྷཱནམེཝ ཝིསཡོཏི. ཨུཏྟརིམནུསྶདྷམྨཔེཡྻཱལཾ པཙྩཝེཀྑནྟཱནཾ ནཱིལཔེཡྻཱལཾ པཙྩཝེཀྑནྟཱནཾ སཉྩརིཏྟཔེཡྻཱལཾ པཙྩཝེཀྑནྟཱནཾ ཨནནྟཾ པཱིཏིསོམནསྶཾ ཨུཔྤཛྫཏི. ཨཱབྷིདྷམྨིཀབྷིཀྑཱུནམྤི ཁནྡྷནྟརཾ ཨཱཡཏནནྟརཾ དྷཱཏྭནྟརཾ ཨིནྡྲིཡནྟརཾ བལབོཛ྄ཛྷངྒཀམྨཝིཔཱཀནྟརཾ རཱུཔཱརཱུཔཔརིཙྪེདཾ སཎྷསུཁུམདྷམྨཾ གགནཏལེ ཏཱརཀརཱུཔཱནི གཎྷནྟོ ཝིཡ རཱུཔཱརཱུཔདྷམྨེ པབྦཾ པབྦཾ ཀོཊྛཱསཾ ཀོཊྛཱསཾ ཀཏྭཱ ཝིབྷཛནྟོ དསྶེསི ཝཏ ནོ སཏྠཱཏི ཨབྷིདྷམྨཏནྟིཾ པཙྩཝེཀྑནྟཱནཾ ཨནནྟཾ པཱིཏིསོམནསྶཾ ཨུཔྤཛྫཏི.

ཨེཝཾ ཨུཔྤཏྟིཡཱ པནསྶ ཨིདཾ ཝཏྠུཔི ཝེདིཏབྦཾ – མཧཱགཏིགམིཡཏིསྶདཏྟཏྠེརོ ཀིར ¶ ནཱམ མཧཱབོདྷིཾ ཝནྡིསྶཱམཱིཏི པརཏཱིརཾ གཙྪནྟོ ནཱཝཱཡ ཨུཔརིཏལེ ནིསིནྣོ མཧཱསམུདྡཾ ཨོལོཀེསི. ཨཐསྶ ཏསྨིཾ སམཡེ ནེཝ པརཏཱིརཾ པཉྙཱཡིཏྠ, ན ཨོརིམཏཱིརཾ, ཨཱུམིཝེགཔྤབྷེདསམུགྒཏཛལཙུཎྞཔརིཀིཎྞོ པན པསཱརིཏརཛཏཔཊྚསུམནཔུཔྥསནྠརསདིསོ མཧཱསམུདྡོཝ པཉྙཱཡིཏྠ. སོ ཀིཾ ནུ ཁོ མཧཱསམུདྡསྶ ཨཱུམིཝེགོ བལཝཱ ཨུདཱཧུ ཙཏུཝཱིསཏིཔྤབྷེདེ སམནྟཔཊྛཱནེ ནཡམུཁཾ བལཝནྟི ཙིནྟེསི. ཨཐསྶ མཧཱསམུདྡེ པརིཙྪེདོ པཉྙཱཡཏི – ཨཡཉྷི ཧེཊྛཱ མཧཱཔཐཝིཡཱ པརིཙྪིནྣོ, ཨུཔརི ཨཱཀཱསེན, ཨེཀཏོ ཙཀྐཝཱལ༹པབྦཏེན, ཨེཀཏོ ཝེལནྟེན པརིཙྪིནྣོ; སམནྟཔཊྛཱནསྶ པན པརིཙྪེདོ ན པཉྙཱཡཏཱིཏི སཎྷསུཁུམདྷམྨཾ པཙྩཝེཀྑནྟསྶ བལཝཔཱིཏི ཨུཔྤནྣཱ. སོ པཱིཏིཾ ཝིཀྑམྦྷེཏྭཱ ཝིཔསྶནཾ ཝཌྜྷེཏྭཱ ཡཐཱནིསིནྣོཝ སབྦཀིལེསེ ཁེཔེཏྭཱ ཨགྒཕལེ ཨརཧཏྟེ པཏིཊྛཱཡ ཨུདཱནཾ ཨུདཱནེསི –

ཨཏྠེཝ ¶ གམྦྷཱིརགཏཾ སུདུབྦུདྷཾ,

སཡཾ ཨབྷིཉྙཱཡ སཧེཏུསམྦྷཝཾ;

ཡཐཱནུཔུབྦཾ ནིཁིལེན དེསིཏཾ,

མཧེསིནཱ རཱུཔགཏཾཝ པསྶཏཱིཏི.

ཨཡཾ ནཡསཱགརོ ནཱམ.

ཀཏམོ ¶ ཉཱཎསཱགརོ? སབྦཉྙུཏཉྙཱཎཾ ཉཱཎསཱགརོ ནཱམ. ཨཡཾ སཾསཱརསཱགརོ ནཱམ, ཨཡཾ ཛལསཱགརོ ནཱམ, ཨཡཾ ནཡསཱགརོ ནཱམཱཏི ཧི ཨཉྙེན ན སཀྐཱ ཛཱནིཏུཾ, སབྦཉྙུཏཉྙཱཎེནེཝ སཀྐཱ ཛཱནིཏུནྟི སབྦཉྙུཏཉྙཱཎཾ ཉཱཎསཱགརོ ནཱམ. ཨིམེསུ ཙཏཱུསུ སཱགརེསུ ཨིམསྨིཾ ཋཱནེ ནཡསཱགརོ ཨདྷིཔྤེཏོ. ཨིམཉྷི སབྦཉྙུབུདྡྷཱཝ པཊིཝིཛ྄ཛྷནྟི.

ཨཡམྤི བྷགཝཱ བོདྷིམཱུལེ ནིསིནྣོ ‘ཨིམཾ པཊིཝིཛ྄ཛྷིཏྭཱ ཨིམཾ ཝཏ མེ དྷམྨཾ ཨེསནྟསྶ གཝེསནྟསྶ ཀཔྤསཏསཧསྶཱདྷིཀཱནི ཙཏྟཱརི ཨསངྑྱེཡྻཱནི ཝཱིཏིཝཏྟཱནི, ཨཐ མེ ཨིམསྨིཾ པལླངྐེ ནིསིནྣེན དིཡཌྜྷཀིལེསསཧསྶཾ ཁེཔེཏྭཱ ཨཡཾ དྷམྨོ པཊིཝིདྡྷོ’ཏི པཊིཝིདྡྷདྷམྨཾ པཙྩཝེཀྑནྟོ སཏྟཱཧཾ ཨེཀཔལླངྐེན ནིསཱིདི. ཏཏོ ཏམྷཱ པལླངྐཱ ཝུཊྛཱཡ ‘ཨིམསྨིཾ ཝཏ མེ པལླངྐེ སབྦཉྙུཏཉྙཱཎཾ པཊིཝིདྡྷ’ནྟི ཨནིམིསེཧི ཙཀྑཱུཧི སཏྟཱཧཾ པལླངྐཾ ཨོལོཀེནྟོ ཨཊྛཱསི. ཏཏོ དེཝཏཱནཾ ‘ཨཛྫཱཔི ནཱུན སིདྡྷཏྠསྶ ¶ ཀཏྟབྦཀིཙྩཾ ཨཏྠི, པལླངྐསྨིཉྷི ཨཱལཡཾ ན ཝིཛཧཏཱི’ཏི པརིཝིཏཀྐོ ཨུདཔཱདི.

སཏྠཱ དེཝཏཱནཾ ཝིཏཀྐཾ ཉཏྭཱ ཏཱཝདེཝ ཏཱསཾ ཝིཏཀྐཝཱུཔསམནཏྠཾ ཝེཧཱསཾ ཨབྦྷུགྒནྟྭཱ ཡམཀཔཱཊིཧཱརིཡཾ དསྶེསི. མཧཱབོདྷིཔལླངྐསྨིཉྷི ཀཏཔཱཊིཧཱརིཡཉྩ, ཉཱཏིསམཱགམེ ཀཏཔཱཊིཧཱརིཡཉྩ, པཱཊིཡཔུཏྟསམཱགམེ ཀཏཔཱཊིཧཱརིཡཉྩ, སབྦཾ ཀཎྜམྦརུཀྑམཱུལེ ཀཏཡམཀཔཱཊིཧཱརིཡསདིསམེཝ ཨཧོསི. ཨེཝཾ ཡམཀཔཱཊིཧཱརིཡཾ ཀཏྭཱ པལླངྐསྶ ཋིཏཊྛཱནསྶ ཙ ཨནྟརེ ཨཱཀཱསཏོ ཨོརུཡ྄ཧ སཏྟཱཧཾ ཙངྐམི. ཨིམེསུ ཙ ཨེཀཝཱིསཏིཡཱ དིཝསེསུ ཨེཀདིཝསེཔི སཏྠུ སརཱིརཏོ རསྨིཡོ ན ནིཀྑནྟཱ.

ཙཏུཏྠེ པན སཏྟཱཧེ པཙྪིམུཏྟརཱཡ དིསཱཡ རཏནགྷརེ ནིསཱིདི – རཏནགྷརཾ ནཱམ ནེཝ སཏྟརཏནམཡཾ གེཧཾ. སཏྟནྣཾ པན པཀརཎཱནཾ སམྨསིཏཊྛཱནཾ ¶ རཏནགྷརནྟི ཝེདིཏབྦཾ – ཏཏྠ དྷམྨསངྒཎིཾ སམྨསནྟསྶཱཔི སརཱིརཏོ རསྨིཡོ ན ནིཀྑནྟཱ. ཝིབྷངྒཔྤཀརཎཾ དྷཱཏུཀཐཾ པུགྒལཔཉྙཏྟིཾ ཀཐཱཝཏྠུཔྤཀརཎཾ ཡམཀཔྤཀརཎཾ སམྨསནྟསྶཱཔི སརཱིརཏོ རསྨིཡོ ན ནིཀྑནྟཱ. ཡདཱ པན མཧཱཔཀརཎཾ ཨོརུཡ྄ཧ ‘‘ཧེཏུཔཙྩཡོ ཨཱརམྨཎཔཙྩཡོ…པེ… ཨཝིགཏཔཙྩཡོ’’ཏི སམྨསནཾ ཨཱརབྷི, ཨཐསྶ ཙཏུཝཱིསཏིསམནྟཔཊྛཱནཾ སམྨསནྟསྶ ཨེཀནྟཏོ སབྦཉྙུཏཉྙཱཎཾ མཧཱཔཀརཎེཡེཝ ཨོཀཱསཾ ལབྷི. ཡཐཱ ཧི ཏིམིརཔིངྒལམཧཱམཙྪོ ཙཏུརཱསཱིཏིཡོཛནསཧསྶགམྦྷཱིརེ ¶ མཧཱསམུདྡེཡེཝ ཨོཀཱསཾ ལབྷཏི, ཨེཝམེཝ སབྦཉྙུཏཉྙཱཎཾ ཨེཀནྟཏོ མཧཱཔཀརཎེཡེཝ ཨོཀཱསཾ ལབྷི.

སཏྠུ ཨེཝཾ ལདྡྷོཀཱསེན སབྦཉྙུཏཉྙཱཎེན ཡཐཱསུཁཾ སཎྷསུཁུམདྷམྨཾ སམྨསནྟསྶ སརཱིརཏོ ནཱིལཔཱིཏལོཧིཏོདཱཏམཉྫིཊྛཔབྷསྶརཝསེན ཚབྦཎྞརསྨིཡོ ནིཀྑམིཾསུ. ཀེསམསྶཱུཧི ཙེཝ ཨཀྑཱིནཉྩ ནཱིལཊྛཱནེཧི ནཱིལརསྨིཡོ ནིཀྑམིཾསུ, ཡཱསཾ ཝསེན གགནཏལཾ ཨཉྫནཙུཎྞསམོཀིཎྞཾ ཝིཡ ཨུམཱཔུཔྥནཱིལུཔྤལདལསཉྪནྣཾ ཝིཡ ཝཱིཏིཔཏནྟམཎིཏཱལཝཎྚཾ ཝིཡ སམྤསཱརིཏམེཙཀཔཊཾ ཝིཡ ཙ ཨཧོསི.

ཚཝིཏོ ཙེཝ ཨཀྑཱིནཉྩ པཱིཏཊྛཱནེཧི པཱིཏརསྨིཡོ ¶ ནིཀྑམིཾསུ; ཡཱསཾ ཝསེན དིསཱབྷཱགཱ སུཝཎྞརསདྷཱརཱབྷིསིཉྩམཱནཱ ཝིཡ སུཝཎྞཔཊཔསཱརིཏཱ ཝིཡ ཀུངྐུམཙུཎྞཀཎིཀཱརཔུཔྥསམྤརིཀིཎྞཱ ཝིཡ ཙ ཝིརོཙིཾསུ.

མཾསལོཧིཏེཧི ཙེཝ ཨཀྑཱིནཉྩ རཏྟཊྛཱནེཧི ལོཧིཏརསྨིཡོ ནིཀྑམིཾསུ ཡཱསཾ ཝསེན དིསཱབྷཱགཱ ཙཱིནཔིཊྛཙུཎྞརཉྫིཏཱ ཝིཡ སུཔཀྐལཱཁཱརསསིཉྩམཱནཱ ཝིཡ རཏྟཀམྦལཔརིཀྑིཏྟཱ ཝིཡ ཛཡསུམནཔཱརིབྷདྡཀབནྡྷུཛཱིཝཀཀུསུམསམྤརིཀིཎྞཱ ཝིཡ ཙ ཝིརོཙིཾསུ.

ཨཊྛཱིཧི ཙེཝ དནྟེཧི ཙ ཨཀྑཱིནཉྩ སེཏཊྛཱནེཧི ཨོདཱཏརསྨིཡོ ནིཀྑམིཾསུ; ཡཱསཾ ཝསེན དིསཱབྷཱགཱ རཛཏགྷཊེཧི ཨཱསིཉྩམཱནཁཱིརདྷཱརཱསམྤརིཀིཎྞཱ ཝིཡ སམྤསཱརིཏརཛཏཔཊྚཝིཏཱནཱ ཝིཡ, ཝཱིཏིཔཏནྟརཛཏཏཱལཝཎྚཱ ཝིཡ, ཀུནྡཀུམུདསིནྡུཝཱརསུམནམལླིཀཱདིཀུསུམསཉྪནྣཱ ཝིཡ ཙ ཝིརོཙིཾསུ.

མཉྫིཊྛཔབྷསྶརཱ ¶ པན ཏམྷཱ ཏམྷཱ སརཱིརཔྤདེསཱ ནིཀྑམིཾསུ. ཨིཏི ཏཱ ཚབྦཎྞརསྨིཡོ ནིཀྑམིཏྭཱ གྷནམཧཱཔཐཝིཾ གཎྷིཾསུ.

ཙཏུནཧུཏཱདྷིཀདྭིཡོཛནསཏསཧསྶབཧལཱ མཧཱཔཐཝཱི ནིདྡྷནྟསུཝཎྞཔིཎྜི ཝིཡ ཨཧོསི. ཨཐ མཧཱཔཐཝིཾ བྷིནྡིཏྭཱ ཧེཊྛཱ ཨུདཀཾ གཎྷིཾསུ. པཐཝིསནྡྷཱརཀཾ ཨཊྛནཧུཏཱདྷིཀཙཏུཡོཛནསཏསཧསྶབཧལཾ ཨུདཀཾ སུཝཎྞཀལསེཧི ཨཱསིཉྩམཱནཝིལཱིནསུཝཎྞཾ ཝིཡ ཨཧོསི. ཨུདཀཾ ཝིནིཝིཛ྄ཛྷིཏྭཱ ¶ ཝཱཏཾ ཨགྒཧེསུཾ. ཚནཧུཏཱདྷིཀནཝཡོཛནསཏསཧསྶབཧལོ ཝཱཏོ སམུསྶིཏསུཝཎྞཀྑནྡྷོ ཝིཡ ཨཧོསི. ཝཱཏཾ ཝིནིཝིཛ྄ཛྷིཏྭཱ ཧེཊྛཱ ཨཛཊཱཀཱསཾ པཀྑནྡིཾསུ.

ཨུཔརིབྷཱགེན ཨུགྒནྟྭཱཔི ཙཱཏུམཧཱརཱཛིཀེ གཎྷིཾསུ. ཏེ ཝིནིཝིཛ྄ཛྷིཏྭཱ ཏཱཝཏིཾསེ ཏཏོ ཡཱམེ ཏཏོ ཏུསིཏེ ཏཏོ ནིམྨཱནརཏཱི ཏཏོ པརནིམྨིཏཝསཝཏྟཱི ཏཏོ ནཝ བྲཧྨལོཀེ ཏཏོ ཝེཧཔྥལེ ཏཏོ པཉྩ སུདྡྷཱཝཱསེ ཝིནིཝིཛ྄ཛྷིཏྭཱ ཙཏྟཱརོ ཨཱརུཔྤེ གཎྷིཾསུ. ཙཏྟཱརོ ཙ ཨཱརུཔྤེ ཝིནིཝིཛ྄ཛྷིཏྭཱ ཨཛཊཱཀཱསཾ པཀྑནྡིཾསུ.

ཏིརིཡབྷཱགེཧི ཨནནྟཱ ལོཀདྷཱཏུཡོ པཀྑནྡིཾསུ. ཨེཏྟཀེསུ ཋཱནེསུ ཙནྡམྷི ཙནྡཔྤབྷཱ ནཏྠི, སཱུརིཡེ སཱུརིཡཔྤབྷཱ ནཏྠི, ཏཱརཀརཱུཔེསུ ཏཱརཀརཱུཔཔྤབྷཱ ནཏྠི, དེཝཏཱནཾ ཨུཡྻཱནཝིམཱནཀཔྤརུཀྑེསུ ཙེཝ སརཱིརེསུ ཙ ཨཱབྷརཎེསུ ཙཱཏི སབྦཏྠ པབྷཱ ནཏྠི. ཏིསཧསྶིམཧཱསཧསྶིལོཀདྷཱཏུཡཱ ཨཱལོཀཕརཎསམཏྠོ མཧཱབྲཧྨཱཔི སཱུརིཡུགྒམནེ ¶ ཁཛྫོཔནཀོ ཝིཡ ཨཧོསི. ཙནྡསཱུརིཡཏཱརཀརཱུཔདེཝཏུཡྻཱནཝིམཱནཀཔྤརུཀྑཱནཾ པརིཙྪེདམཏྟཀམེཝ པཉྙཱཡིཏྠ. ཨེཏྟཀཾ ཋཱནཾ བུདྡྷརསྨཱིཧིཡེཝ ཨཛ྄ཛྷོཏྠཊཾ ཨཧོསི. ཨཡཉྩ ནེཝ བུདྡྷཱནཾ ཨདྷིཊྛཱནིདྡྷི, ན བྷཱཝནཱམཡིདྡྷི. སཎྷསུཁུམདྷམྨཾ པན སམྨསཏོ ལོཀནཱཐསྶ ལོཧིཏཾ པསཱིདི, ཝཏྠུརཱུཔཾ པསཱིདི, ཚཝིཝཎྞོ པསཱིདི. ཙིཏྟསམུཊྛཱནཱ ཝཎྞདྷཱཏུ སམནྟཱ ཨསཱིཏིཧཏྠམཏྟེ པདེསེ ནིཙྩལཱཝ ཨཊྛཱསི. ཨིམིནཱ ནཱིཧཱརེན སཏྟཱཧཾ སམྨསི.

སཏྟ རཏྟིནྡིཝཱནི སམྨསིཏདྷམྨོ ཀིཏྟཀོ ཨཧོསཱིཏི? ཨནནྟོ ཨཔརིམཱཎོ ཨཧོསི. ཨཡཾ ཏཱཝ མནསཱདེསནཱ ནཱམ. སཏྠཱ པན ཨེཝཾ སཏྟཱཧཾ མནསཱ ཙིནྟིཏདྷམྨཾ ཝཙཱིབྷེདཾ ཀཏྭཱ དེསེནྟོ ཝསྶསཏེནཔི ¶ ཝསྶསཧསྶེནཔི ཝསྶསཏསཧསྶེནཔི མཏྠཀཾ པཱཔེཏྭཱ དེསེཏུཾ ན སཀྐོཏཱིཏི ན ཝཏྟབྦཾ. ཨཔརབྷཱགེཔི ཧི ཏཐཱགཏོ ཏཱཝཏིཾསབྷཝནེ པཱརིཙྪཏྟཀམཱུལེ པཎྜུཀམྦལསིལཱཡཾ དསསཧསྶཙཀྐཝཱལ༹དེཝཏཱནཾ མཛ྄ཛྷེ ནིསིནྣོ མཱཏརཾ ཀཱཡསཀྑིཾ ཀཏྭཱ ཀུསལཱ དྷམྨཱ, ཨཀུསལཱ དྷམྨཱ, ཨབྱཱཀཏཱ དྷམྨཱཏི དྷམྨཾ དེསེནྟོ སཏབྷཱགེན སཧསྶབྷཱགེན སཏསཧསྶབྷཱགེན དྷམྨནྟརཱ དྷམྨནྟརཾ སངྐམིཏྭཱ སངྐམིཏྭཱཝ དེསེསི. ཏཡོ མཱསེ ནིརནྟརཾ པཝཏྟིཏདེསནཱ ཝེགེན པཝཏྟཱ ཨཱཀཱསགངྒཱ ཝིཡ ཨདྷོམུཁཋཔིཏཨུདཀགྷཊཱ ནིཀྑནྟཨུདཀདྷཱརཱ ཝིཡ ཙ ཧུཏྭཱ ཨནནྟཱ ཨཔརིམཱཎཱ ཨཧོསི.

བུདྡྷཱནཉྷི ¶ བྷཏྟཱནུམོདནཀཱལེཔི ཐོཀཾ ཝཌྜྷེཏྭཱ ཨནུམོདེནྟཱནཾ དེསནཱ དཱིགྷམཛ྄ཛྷིམནིཀཱཡཔྤམཱཎཱ ཧོཏི. པཙྪཱབྷཏྟཾ པན སམྤཏྟཔརིསཱཡ དྷམྨཾ དེསེནྟཱནཾ དེསནཱ སཾཡུཏྟཨངྒུཏྟརིཀདྭེམཧཱནིཀཱཡཔྤམཱཎཱཝ ཧོཏི. ཀསྨཱ? བུདྡྷཱནཉྷི བྷཝངྒཔརིཝཱསོ ལཧུཀོ དནྟཱཝརཎཾ སུཕུསིཏཾ མུཁཱདཱནཾ སིལིཊྛཾ ཛིཝ྄ཧཱ མུདུཀཱ སརོ མདྷུརོ ཝཙནཾ ལཧུཔརིཝཏྟཾ. ཏསྨཱ ཏཾ མུཧུཏྟཾ དེསིཏདྷམྨོཔི ཨེཏྟཀོ ཧོཏི. ཏེམཱསཾ དེསིཏདྷམྨོ པན ཨནནྟོ ཨཔརིམཱཎོཡེཝ.

ཨཱནནྡཏྠེརོ ཧི བཧུསྶུཏོ ཏིཔིཊཀདྷརོ པཉྩདས གཱཐཱསཧསྶཱནི སཊྛི པདསཧསྶཱནི ལཏཱཔུཔྥཱནི ཨཱཀཌྜྷནྟོ ཝིཡ ཋིཏཔདེནེཝ ཋཏྭཱ གཎྷཱཏི ཝཱ ཝཱཙེཏི ཝཱ དེསེཏི ཝཱ. ཨེཏྟཀོ ཐེརསྶ ཨེཀོ ཨུདྡེསམགྒོ ནཱམ ཧོཏི. ཐེརསྶ ཧི ཨནུཔདཾ ཨུདྡེསཾ དདམཱནོ ཨཉྙོ དཱཏུཾ ན སཀྐོཏི, ན སམྤཱཔུཎཱཏི. སམྨཱསམྦུདྡྷོཝ སམྤཱཔུཎེཡྻ. ཨེཝཾ ཨདྷིམཏྟསཏིམཱ ཨདྷིམཏྟགཏིམཱ ཨདྷིམཏྟདྷིཏིམཱ ¶ སཱཝཀོ སཏྠཱརཱ ཏེམཱསཾ ཨིམིནཱ ནཱིཧཱརེན དེསིཏདེསནཾ ཝསྶསཏཾ ཝསྶསཧསྶཾ ཨུགྒཎྷནྟོཔི མཏྠཀཾ པཱཔེཏུཾ ན སཀྐོཏི.

ཨེཝཾ ཏེམཱསཾ ནིརནྟརཾ དེསེནྟསྶ པན ཏཐཱགཏསྶ ཀབལཱི༹ཀཱརཱཧཱརཔྤཊིབདྡྷཾ ཨུཔཱདིནྣཀསརཱིརཾ ཀཐཾ ཡཱཔེསཱིཏི? པཊིཛགྒནེནེཝ. བུདྡྷཱནཉྷི སོ སོ ཀཱལོ སུཝཝཏྠིཏོ སུཔརིཙྪིནྣོ སུཔཙྩཀྑོ. ཏསྨཱ བྷགཝཱ དྷམྨཾ དེསེནྟོཝ མནུསྶལོཀེ ཀཱལཾ ཨོལོཀེཏི. སོ བྷིཀྑཱཙཱརཝེལཾ ¶ སལླཀྑེཏྭཱ ནིམྨིཏབུདྡྷཾ མཱཔེཏྭཱ ‘ཨིམསྶ ཙཱིཝརགྒཧཎཾ པཏྟགྒཧཎཾ སརཀུཏྟི ཨཱཀཔྤོ ཙ ཨེཝརཱུཔོ ནཱམ ཧོཏུ, ཨེཏྟཀཾ ནཱམ དྷམྨཾ དེསེཏཱུ’ཏི ཨདྷིཊྛཱཡ པཏྟཙཱིཝརམཱདཱཡ ཨནོཏཏྟདཧཾ གཙྪཏི. དེཝཏཱ ནཱགལཏཱདནྟཀཊྛཾ དེནྟི. ཏཾ ཁཱདིཏྭཱ ཨནོཏཏྟདཧེ སརཱིརཾ པཊིཛགྒིཏྭཱ མནོསིལཱཏལེ ཋིཏོ སུརཏྟདུཔཊྚཾ ནིཝཱསེཏྭཱ ཙཱིཝརཾ པཱརུཔིཏྭཱ ཙཱཏུམཧཱརཱཛདཏྟིཡཾ སེལམཡཾ པཏྟཾ ཨཱདཱཡ ཨུཏྟརཀུརུཾ གཙྪཏི. ཏཏོ པིཎྜཔཱཏཾ ཨཱཧརིཏྭཱ ཨནོཏཏྟདཧཏཱིརེ ནིསིནྣོ ཏཾ པརིབྷུཉྫིཏྭཱ དིཝཱཝིཧཱརཱཡ ཙནྡནཝནཾ གཙྪཏི.

དྷམྨསེནཱཔཏིསཱརིཔུཏྟཏྠེརོཔི ཏཏྠ གནྟྭཱ སམྨཱསམྦུདྡྷསྶ ཝཏྟཾ ཀཏྭཱ ཨེཀམནྟཾ ནིསཱིདཏི. ཨཐསྶ སཏྠཱ ནཡཾ དེཏི. ‘སཱརིཔུཏྟ, ཨེཏྟཀོ དྷམྨོ མཡཱ དེསིཏོ’ཏི ཨཱཙིཀྑཏི. ཨེཝཾ སམྨཱསམྦུདྡྷེ ནཡཾ དེནྟེ པཊིསམྦྷིདཱཔྤཏྟསྶ ཨགྒསཱཝཀསྶ ཝེལནྟེ ཋཏྭཱ ཧཏྠཾ པསཱརེཏྭཱ དསྶིཏསམུདྡསདིསཾ ནཡདཱནཾ ཧོཏི. ཐེརསྶཱཔི ནཡསཏེན ནཡསཧསྶེན ནཡསཏསཧསྶེན བྷགཝཏཱ དེསིཏདྷམྨོ ཨུཔཊྛཱཏིཡེཝ.

སཏྠཱ ¶ དིཝཱཝིཧཱརཾ ནིསཱིདིཏྭཱ དྷམྨཾ དེསེཏུཾ ཀཱཡ ཝེལཱཡ གཙྪཏཱིཏི? སཱཝཏྠིཝཱསཱིནཾ ཀུལཔུཏྟཱནཾ སམྤཏྟཱནཾ དྷམྨདེསནཝེལཱ ནཱམ ཨཏྠི, ཏཱཡ ཝེལཱཡ གཙྪཏི. དྷམྨཾ དེསེཏྭཱ གཙྪནྟཾ ཝཱ ཨཱགཙྪནྟཾ ཝཱ ཀེ ཛཱནནྟི ཀེ ན ཛཱནནྟཱིཏི? མཧེསཀྑཱ དེཝཏཱ ཛཱནནྟི, ཨཔྤེསཀྑཱ དེཝཏཱ ན ཛཱནནྟི. ཀསྨཱ ན ཛཱནནྟཱིཏི? སམྨཱསམྦུདྡྷསྶ ཝཱ ནིམྨིཏབུདྡྷསྶ ཝཱ རསྨིཨཱདཱིསུ ནཱནཏྟཱབྷཱཝཱ. ཨུབྷིནྣམྤི ཧི ཏེསཾ རསྨཱིསུ ཝཱ སརེསུ ཝཱ ཝཙནེསུ ཝཱ ནཱནཏྟཾ ནཏྠི.

སཱརིཔུཏྟཏྠེརོཔི སཏྠཱརཱ དེསིཏཾ དེསིཏཾ དྷམྨཾ ཨཱཧརིཏྭཱ ཨཏྟནོ སདྡྷིཝིཧཱརིཀཱནཾ པཉྩནྣཾ བྷིཀྑུསཏཱནཾ དེསེསི. ཏེསཾ ཨཡཾ པུབྦཡོགོ – ཏེ ¶ ཀིར ཀསྶཔདསབལསྶ ཀཱལེ ཁུདྡཀཝགྒུལིཡོནིཡཾ ནིབྦཏྟཱ པབྦྷཱརེ ཨོལམྦནྟཱ དྭིནྣཾ ཨཱབྷིདྷམྨིཀབྷིཀྑཱུནཾ ཨབྷིདྷམྨཾ སཛ྄ཛྷཱཡནྟཱནཾ སརེ ནིམིཏྟཾ གཧེཏྭཱ ཀཎྷཔཀྑསུཀྐཔཀྑེ ཨཛཱནིཏྭཱཔི སརེ ནིམིཏྟགྒཱཧམཏྟཀེནེཝ ཀཱལཾ ཀཏྭཱ དེཝལོཀེ ནིབྦཏྟིཾསུ. ཨེཀཾ བུདྡྷནྟརཾ དེཝལོཀེ ཝསིཏྭཱ ཏསྨིཾ ཀཱལེ མནུསྶལོཀེ ནིབྦཏྟཱ ཡམཀཔཱཊིཧཱརིཡེ པསཱིདིཏྭཱ ཐེརསྶ སནྟིཀེ པབྦཛིཾསུ. ཐེརོ སཏྠཱརཱ དེསིཏཾ དེསིཏཾ དྷམྨཾ ཨཱཧརིཏྭཱ ཏེསཾ དེསེསི. སམྨཱསམྦུདྡྷསྶ ཨབྷིདྷམྨདེསནཱཔརིཡོསཱནཉྩ ¶ ཏེསཾ བྷིཀྑཱུནཾ སཏྟཔྤཀརཎཨུགྒཧཎཉྩ ཨེཀཔྤཧཱརེནེཝ ཨཧོསི.

ཨབྷིདྷམྨེ ཝཱཙནཱམགྒོ ནཱམ སཱརིཔུཏྟཏྠེརཔྤབྷཝོ. མཧཱཔཀརཎེ གཎནཙཱརོཔི ཐེརེནེཝ ཋཔིཏོ. ཐེརོ ཧི ཨིམིནཱ ནཱིཧཱརེན དྷམྨནྟརཾ ཨམཀྑེཏྭཱཝ སུཁཾ གཧེཏུཾ དྷཱརེཏུཾ པརིཡཱཔུཎིཏུཾ ཝཱཙེཏུཉྩ པཧོཏཱིཏི གཎནཙཱརཾ ཋཔེསི. ཨེཝཾ སནྟེ ཐེརོཝ པཋམཏརཾ ཨཱབྷིདྷམྨིཀོ ཧོཏཱིཏི? ན ཧོཏི. སམྨཱསམྦུདྡྷོཝ པཋམཏརཾ ཨཱབྷིདྷམྨིཀོ. སོ ཧི ནཾ མཧཱབོདྷིཔལླངྐེ ནིསཱིདིཏྭཱ པཊིཝིཛ྄ཛྷི. བུདྡྷོ ཧུཏྭཱ ཙ པན སཏྟཱཧཾ ཨེཀཔལླངྐེན ནིསིནྣོ ཨུདཱནཾ ཨུདཱནེསི –

‘‘ཡདཱ ཧཝེ པཱཏུབྷཝནྟི དྷམྨཱ,

ཨཱཏཱཔིནོ ཛྷཱཡཏོ བྲཱཧྨཎསྶ;

ཨཐསྶ ཀངྑཱ ཝཔཡནྟི སབྦཱ,

ཡཏོ ¶ པཛཱནཱཏི སཧེཏུདྷམྨཾ.

‘‘ཡདཱ ཧཝེ པཱཏུབྷཝནྟི དྷམྨཱ,

ཨཱཏཱཔིནོ ཛྷཱཡཏོ བྲཱཧྨཎསྶ;

ཨཐསྶ ཀངྑཱ ཝཔཡནྟི སབྦཱ,

ཡཏོ ཁཡཾ པཙྩཡཱནཾ ཨཝེདི.

‘‘ཡདཱ ཧཝེ པཱཏུབྷཝནྟི དྷམྨཱ,

ཨཱཏཱཔིནོ ཛྷཱཡཏོ བྲཱཧྨཎསྶ;

ཝིདྷཱུཔཡཾ ཏིཊྛཏི མཱརསེནཾ,

སཱུརིཡོཝ ཨོབྷཱསཡམནྟལིཀྑ’’ནྟི. (མཧཱཝ. ༡-༣; ཨུདཱ. ༡-༣);

ཨིདཾ པཋམབུདྡྷཝཙནཾ ནཱམ. དྷམྨཔདབྷཱཎཀཱ ¶ པན –

‘‘ཨནེཀཛཱཏིསཾསཱརཾ, སནྡྷཱཝིསྶཾ ཨནིབྦིསཾ;

གཧཀཱརཾ གཝེསནྟོ, དུཀྑཱ ཛཱཏི པུནཔྤུནཾ.

‘‘གཧཀཱརཀ དིཊྛོསི, པུན གེཧཾ ན ཀཱཧསི;

སབྦཱ ཏེ ཕཱསུཀཱ བྷགྒཱ, གཧཀཱུཊཾ ཝིསངྑཏཾ;

ཝིསངྑཱརགཏཾ ཙིཏྟཾ, ཏཎྷཱནཾ ཁཡམཛ྄ཛྷགཱ’’ཏི. (དྷ. པ. ༡༥༣-༡༥༤);

ཨིདཾ པཋམབུདྡྷཝཙནཾ ནཱམཱཏི ཝདནྟི.

ཡམཀསཱལཱནམནྟརེ ¶ ནིཔནྣེན པརིནིབྦཱནསམཡེ ‘‘ཧནྡ དཱནི, བྷིཀྑཝེ, ཨཱམནྟཡཱམི ཝོ, ཝཡདྷམྨཱ སངྑཱརཱ, ཨཔྤམཱདེན སམྤཱདེཐཱ’’ཏི (དཱི. ནི. ༢.༢༡༨) ཝུཏྟཝཙནཾ པཙྪིམབུདྡྷཝཙནཾ ནཱམ.

ཨུབྷིནྣམནྟརེ པཉྩཙཏྟཱལཱིས ཝསྶཱནི པུཔྥདཱམཾ གནྠེནྟེན ཝིཡ, རཏནཱཝལིཾ ཨཱཝུནནྟེན ཝིཡ, ཙ ཀཐིཏོ ཨམཏཔྤཀཱསནོ སདྡྷམྨོ མཛ྄ཛྷིམབུདྡྷཝཙནཾ ནཱམ.

ཏཾ ¶ སབྦམྤི སངྒཡ྄ཧམཱནཾ པིཊཀཏོ ཏཱིཎི པིཊཀཱནི ཧོནྟི, ནིཀཱཡཏོ པཉྩ ནིཀཱཡཱ, ཨངྒཏོ ནཝངྒཱནི, དྷམྨཀྑནྡྷཏོ ཙཏུརཱསཱིཏིདྷམྨཀྑནྡྷསཧསྶཱནི. ཀཐཾ? སབྦམྤི ཧེཏཾ པིཊཀཏོ ཝིནཡཔིཊཀཾ སུཏྟནྟཔིཊཀཾ ཨབྷིདྷམྨཔིཊཀནྟི ཏིཔྤབྷེདམེཝ ཧོཏི. ཏཏྠ ཨུབྷཡཱནི པཱཏིམོཀྑཱནི དྭེ ཝིབྷངྒཱ དྭཱཝཱིསཏི ཁནྡྷཀཱ སོལ༹ས པརིཝཱརཱཏི ཨིདཾ ཝིནཡཔིཊཀཾ ནཱམ. བྲཧྨཛཱལཱདིཙཏུཏྟིཾསསུཏྟསངྒཧོ དཱིགྷནིཀཱཡོ. མཱུལཔརིཡཱཡསུཏྟཱདིདིཡཌྜྷསཏདྭེསུཏྟསངྒཧོ མཛ྄ཛྷིམནིཀཱཡོ. ཨོགྷཏརཎསུཏྟཱདིསཏྟསུཏྟསཧསྶསཏྟསཏདྭཱསཊྛིསུཏྟསངྒཧོ སཾཡུཏྟནིཀཱཡོ. ཙིཏྟཔརིཡཱདཱནསུཏྟཱདིནཝསུཏྟསཧསྶཔཉྩསཏསཏྟཔཉྙཱསསུཏྟསངྒཧོ ཨངྒུཏྟརནིཀཱཡོ. ཁུདྡཀཔཱཋདྷམྨཔདཨུདཱནཨིཏིཝུཏྟཀསུཏྟནིཔཱཏཝིམཱནཝཏྠུཔེཏཝཏྠུཐེརགཱཐཱཐེརཱིགཱཐཱཛཱཏཀནིདྡེསཔཊིསམྦྷིདཱཨཔདཱནབུདྡྷཝཾསཙརིཡཱཔིཊཀཝསེན པནྣརསཔྤབྷེདོ ཁུདྡཀནིཀཱཡོཏི ཨིདཾ སུཏྟནྟཔིཊཀཾ ནཱམ. དྷམྨསངྒཎཱིཨཱདཱིནི སཏྟ པཀརཎཱནི ཨབྷིདྷམྨཔིཊཀཾ ནཱམ. ཏཏྠ ¶ –

ཝིཝིདྷཝིསེསནཡཏྟཱ, ཝིནཡནཏོ ཙེཝ ཀཱཡཝཱཙཱནཾ;

ཝིནཡཏྠཝིདཱུཧི ཨཡཾ, ཝིནཡོ ཝིནཡོཏི ཨཀྑཱཏོ.

ཝིཝིདྷཱ ཧི ཨེཏྠ པཉྩཝིདྷཔཱཏིམོཀྑུདྡེསཔཱརཱཛིཀཱདིསཏྟཨཱཔཏྟིཀྑནྡྷམཱཏིཀཱཝིབྷངྒཱདིཔྤབྷེདཱ ནཡཱ ཝིསེསབྷཱུཏཱ ཙ དལ༹ྷཱིཀམྨསིཐིལཀརཎཔྤཡོཛནཱ ཨནུཔཉྙཏྟིནཡཱ. ཀཱཡིཀཝཱཙསིཀཨཛ྄ཛྷཱཙཱརནིསེདྷནཏོ ཙེས ཀཱཡཾ ཝཱཙཉྩ ཝིནེཏི. ཏསྨཱ ཝིཝིདྷནཡཏྟཱ ཝིསེསནཡཏྟཱ ཀཱཡཝཱཙཱནཉྩ ཝིནཡནཏོ ཨཡཾ ཝིནཡོ ཝིནཡོཏི ཨཀྑཱཏོ. ཏེནེཏམེཏསྶ ཝཙནཏྠཀོསལླཏྠཾ ཝུཏྟཾ –

‘‘ཝིཝིདྷཝིསེསནཡཏྟཱ ¶ , ཝིནཡནཏོ ཙེཝ ཀཱཡཝཱཙཱནཾ;

ཝིནཡཏྠཝིདཱུཧི ཨཡཾ, ཝིནཡོ ཝིནཡོཏི ཨཀྑཱཏོ’’ཏི.

ཨིཏརཾ པན –

ཨཏྠཱནཾ སཱུཙནཏོ, སུཝུཏྟཏོ སཝནཏོཐ སཱུདནཏོ;

སུཏྟཱཎཱ སུཏྟསབྷཱགཏོ ཙ ‘སུཏྟ’ནྟི ཨཀྑཱཏཾ.

ཏཉྷི ¶ ཨཏྟཏྠཔརཏྠཱདིབྷེདེ ཨཏྠེ སཱུཙེཏི. སུཝུཏྟཱ ཙེཏྠ ཨཏྠཱ ཝེནེཡྻཛ྄ཛྷཱསཡཱནུལོམེན ཝུཏྟཏྟཱ. སཝཏི ཙེཏཾ ཨཏྠེ, སསྶམིཝ ཕལཾ, པསཝཏཱིཏི ཝུཏྟཾ ཧོཏི. སཱུདཏི ཙེཏཾ, དྷེནུ ཝིཡ ཁཱིརཾ, པགྒྷརཏཱིཏི ཝུཏྟཾ ཧོཏི. སུཊྛུ ཙ ནེ ཏཱཡཏི རཀྑཏཱིཏི ཝུཏྟཾ ཧོཏི. སུཏྟསབྷཱགཉྩེཏཾ. ཡཐཱ ཧི ཏཙྪཀཱནཾ སུཏྟཾ པམཱཎཾ ཧོཏི ཨེཝམེཏམྤི ཝིཉྙཱུནཾ. ཡཐཱ ཙ སུཏྟེན སངྒཧིཏཱནི པུཔྥཱནི ན ཝིཀིརིཡནྟི ན ཝིདྡྷཾསིཡནྟི ཨེཝམེཏེན སངྒཧིཏཱ ཨཏྠཱ. ཏེནེཏམེཏསྶ ཝཙནཏྠཀོསལླཏྠཾ ཝུཏྟཾ –

‘‘ཨཏྠཱནཾ སཱུཙནཏོ, སུཝུཏྟཏོ སཝནཏོཐ སཱུདནཏོ;

སུཏྟཱཎཱ སུཏྟསབྷཱགཏོ ཙ སུཏྟནྟི ཨཀྑཱཏ’’ནྟི.

ཨབྷིདྷམྨསྶ ཝཙནཏྠོ ཝུཏྟོཡེཝ. ཨཔརོ ནཡོ –

ཡཾ ཨེཏྠ ཝུཌྜྷིམནྟོ, སལཀྑཎཱ པཱུཛིཏཱ པརིཙྪིནྣཱ;

ཝུཏྟཱདྷིཀཱ ཙ དྷམྨཱ, ཨབྷིདྷམྨོ ཏེན ཨཀྑཱཏོ.

ཨཡཉྷི ¶ ཨབྷིསདྡོ ཝུཌྜྷིལཀྑཎཔཱུཛིཏཔརིཙྪིནྣཱདྷིཀེསུ དིསྶཏི. ཏཐཱ ཧེས ‘‘བཱལ༹ྷཱ མེ དུཀྑཱ ཝེདནཱ ཨབྷིཀྐམནྟི, ནོ པཊིཀྐམནྟཱི’’ཏིཨཱདཱིསུ (མ. ནི. ༣.༣༨༤; སཾ. ནི. ༥.༡༩༥) ཝུཌྜྷིཡཾ ཨཱགཏོ. ‘‘ཡཱ ཏཱ རཏྟིཡོ ཨབྷིཉྙཱཏཱ ཨབྷིལཀྑིཏཱ’’ཏིཨཱདཱིསུ (མ. ནི. ༡.༤༩) ལཀྑཎེ. ‘‘རཱཛཱབྷིརཱཛཱ མནུཛིནྡོ’’ཏིཨཱདཱིསུ (མ. ནི. ༢.༣༩༩; སུ. ནི. ༥༥༨) པཱུཛིཏེ. ‘‘པཊིབལོ ཝིནེཏུཾ ཨབྷིདྷམྨེ ཨབྷིཝིནཡེ’’ཏིཨཱདཱིསུ (མཧཱཝ. ༨༥) པརིཙྪིནྣེ; ཨཉྙམཉྙསངྐརཝིརཧིཏེ དྷམྨེ ཙ ཝིནཡེ ཙཱཏི ཝུཏྟཾ ཧོཏི. ‘‘ཨབྷིཀྐནྟེན ཝཎྞེནཱ’’ཏིཨཱདཱིསུ (ཝི. ཝ. ༧༥) ཨདྷིཀེ.

ཨེཏྠ ¶ ཙ ‘‘རཱུཔཱུཔཔཏྟིཡཱ མགྒཾ བྷཱཝེཏི མེཏྟཱསཧགཏེན ཙེཏསཱ ཨེཀཾ དིསཾ ཕརིཏྭཱ ཝིཧརཏཱི’’ཏིཨཱདིནཱ (དྷ. ས. ༡༦༣ ཨཱདཡོ) ནཡེན ཝུཌྜྷིམནྟོཔི དྷམྨཱ ཝུཏྟཱ. ‘‘རཱུཔཱརམྨཎཾ ཝཱ སདྡཱརམྨཎཾ ཝཱ’’ཏིཨཱདིནཱ (དྷ. ས. ༡) ནཡེན ཨཱརམྨཎཱདཱིཧི ལཀྑཎཱིཡཏྟཱ སལཀྑཎཱཔི. ‘‘སེཀྑཱ དྷམྨཱ, ཨསེཀྑཱ དྷམྨཱ, ལོཀུཏྟརཱ དྷམྨཱ’’ཏིཨཱདིནཱ (དྷ. ས. ཏིཀམཱཏིཀཱ ༡༡; དུཀམཱཏིཀཱ ༡༢) ནཡེན པཱུཛིཏཱཔི; པཱུཛཱརཧཱཏི ཨདྷིཔྤཱཡོ. ‘‘ཕསྶོ ¶ ཧོཏི, ཝེདནཱ ཧོཏཱི’’ཏིཨཱདིནཱ (དྷ. ས. ༡) ནཡེན སབྷཱཝཔརིཙྪིནྣཏྟཱ པརིཙྪིནྣཱཔི. ‘‘མཧགྒཏཱ དྷམྨཱ, ཨཔྤམཱཎཱ དྷམྨཱ, ཨནུཏྟརཱ དྷམྨཱ’’ཏིཨཱདིནཱ (དྷ. ས. ཏིཀམཱཏིཀཱ ༡༢; དུཀམཱཏིཀཱ ༩༩) ནཡེན ཨདྷིཀཱཔི དྷམྨཱ ཝུཏྟཱ. ཏེནེཏམེཏསྶ ཝཙནཏྠཀོསལླཏྠཾ ཝུཏྟཾ –

‘‘ཡཾ ཨེཏྠ ཝུཌྜྷིམནྟོ, སལཀྑཎཱ པཱུཛིཏཱ པརིཙྪིནྣཱ;

ཝུཏྟཱདྷིཀཱ ཙ དྷམྨཱ, ཨབྷིདྷམྨོ ཏེན ཨཀྑཱཏོ’’ཏི.

ཡཾ པནེཏྠ ཨཝིསིཊྛཾ, ཏཾ –

པིཊཀཾ པིཊཀཏྠཝིདཱུ, པརིཡཏྟིབྦྷཱཛནཏྠཏོ ཨཱཧུ;

ཏེན སམོདྷཱནེཏྭཱ, ཏཡོཔི ཝིནཡཱདཡོ ཉེཡྻཱ.

པརིཡཏྟིཔི ཧི ‘‘མཱ པིཊཀསམྤདཱནེནཱ’’ཏིཨཱདཱིསུ (ཨ. ནི. ༣.༦༦) པིཊཀནྟི ཝུཙྩཏི. ‘‘ཨཐ པུརིསོ ཨཱགཙྪེཡྻ ཀུདཱལཔིཊཀཾཨཱདཱཡཱ’’ཏིཨཱདཱིསུ (མ. ནི. ༡.༢༢༨; ཨ. ནི. ༣.༧༠) ཡཾཀིཉྩི བྷཱཛནམྤི. ཏསྨཱ པིཊཀཾ པིཊཀཏྠཝིདཱུ པརིཡཏྟིབྷཱཛནཏྠཏོ ཨཱཧུ.

ཨིདཱནི ཏེན སམོདྷཱནེཏྭཱ ཏཡོཔི ཝིནཡཱདཡོ ཉེཡྻཱཏི. ཏེན ཨེཝཾ དུཝིདྷཏྠེན པིཊཀསདྡེན སཧ སམཱསཾ ཀཏྭཱ ཝིནཡོ ཙ སོ པིཊཀཉྩ པརིཡཏྟིབྷཱཝཏོ, ཏསྶ ཏསྶ ཨཏྠསྶ བྷཱཛནཏོ ཙཱཏི ཝིནཡཔིཊཀཾ. ཡཐཱཝུཏྟེནེཝ ནཡེན སུཏྟནྟཉྩ ཏཾ པིཊཀཉྩཱཏི སུཏྟནྟཔིཊཀཾ. ཨབྷིདྷམྨོ ¶ ཙ སོ པིཊཀཉྩཱཏི ཨབྷིདྷམྨཔིཊཀནྟི ཨེཝམེཏེ ཏཡོཔི ཝིནཡཱདཡོ ཉེཡྻཱ.

ཨེཝཾ ཉཏྭཱ ཙ པུནཔི ཏེསྭེཝ པིཊཀེསུ ནཱནཔྤཀཱརཀོསལླཏྠཾ –

དེསནཱསཱསནཀཐཱབྷེདཾ ཏེསུ ཡཐཱརཧཾ;

སིཀྑཱཔཧཱནགམྦྷཱིརབྷཱཝཉྩ པརིདཱིཔཡེ.

པརིཡཏྟིབྷེདཾ ¶ སམྤཏྟིཾ, ཝིཔཏྟིཉྩཱཔི ཡཾ ཡཧིཾ;

པཱཔུཎཱཏི ཡཐཱ བྷིཀྑུ, ཏམྤི སབྦཾ ཝིབྷཱཝཡེ.

ཏཏྲཱཡཾ ¶ པརིདཱིཔནཱ ཝིབྷཱཝནཱ ཙ – ཨེཏཱནི ཧི ཏཱིཎི པིཊཀཱནི ཡཐཱཀྐམཾ ཨཱཎཱཝོཧཱརཔརམཏྠདེསནཱ, ཡཐཱཔརཱདྷཡཐཱནུལོམཡཐཱདྷམྨསཱསནཱནི, སཾཝརཱསཾཝརདིཊྛིཝིནིཝེཋནནཱམརཱུཔཔརིཙྪེདཀཐཱཏི ཙ ཝུཙྩནྟི.

ཨེཏྠ ཧི ཝིནཡཔིཊཀཾ ཨཱཎཱརཧེན བྷགཝཏཱ ཨཱཎཱབཱཧུལླཏོ དེསིཏཏྟཱ ཨཱཎཱདེསནཱ; སུཏྟནྟཔིཊཀཾ ཝོཧཱརཀུསལེན བྷགཝཏཱ ཝོཧཱརབཱཧུལླཏོ དེསིཏཏྟཱ ཝོཧཱརདེསནཱ; ཨབྷིདྷམྨཔིཊཀཾ པརམཏྠཀུསལེན བྷགཝཏཱ པརམཏྠབཱཧུལླཏོ དེསིཏཏྟཱ པརམཏྠདེསནཱཏི ཝུཙྩཏི.

ཏཐཱ པཋམཾ ཡེ ཏེ པཙུརཱཔརཱདྷཱ སཏྟཱ ཏེ ཡཐཱཔརཱདྷཾ ཨེཏྠ སཱསིཏཱཏི ཡཐཱཔརཱདྷསཱསནཾ; དུཏིཡཾ ཨནེཀཛ྄ཛྷཱསཡཱནུསཡཙརིཡཱདྷིམུཏྟིཀཱ སཏྟཱ ཡཐཱནུལོམཾ ཨེཏྠ སཱསིཏཱཏི ཡཐཱནུལོམསཱསནཾ; ཏཏིཡཾ དྷམྨཔུཉྫམཏྟེ ‘ཨཧཾ མམཱ’ཏི སཉྙིནོ སཏྟཱ ཡཐཱདྷམྨཾ ཨེཏྠ སཱསིཏཱཏི ཡཐཱདྷམྨསཱསནནྟི ཝུཙྩཏི.

ཏཐཱ པཋམཾ ཨཛ྄ཛྷཱཙཱརཔཊིཔཀྑབྷཱུཏོ སཾཝརཱསཾཝརོ ཨེཏྠ ཀཐིཏོཏི སཾཝརཱསཾཝརཀཐཱ; སཾཝརཱསཾཝརོཏི ཁུདྡཀོ ཙེཝ མཧནྟོ ཙ སཾཝརཱསཾཝརོ, ཀམྨཱཀམྨཾ ཝིཡ ཙ ཕལཱཕལཾ ཝིཡ ཙ; དུཏིཡཾ དྭཱསཊྛིདིཊྛིཔཊིཔཀྑབྷཱུཏཱ དིཊྛིཝིནིཝེཋནཱ ཨེཏྠ ཀཐིཏཱཏི དིཊྛིཝིནིཝེཋནཀཐཱ; ཏཏིཡཾ རཱགཱདིཔཊིཔཀྑབྷཱུཏོ ནཱམརཱུཔཔརིཙྪེདོ ཨེཏྠ ཀཐིཏོཏི ནཱམརཱུཔཔརིཙྪེདཀཐཱཏི ཝུཙྩཏི.

ཏཱིསུཔི ཙེཏེསུ ཏིསྶོ སིཀྑཱ ཏཱིཎི པཧཱནཱནི ཙཏུབྦིདྷོ ཙ གམྦྷཱིརབྷཱཝོ ཝེདིཏབྦོ. ཏཐཱ ཧི ཝིནཡཔིཊཀེ ཝིསེསེན ཨདྷིསཱིལསིཀྑཱ ཝུཏྟཱ, སུཏྟནྟཔིཊཀེ ཨདྷིཙིཏྟསིཀྑཱ, ཨབྷིདྷམྨཔིཊཀེ ཨདྷིཔཉྙཱསིཀྑཱ.

ཝིནཡཔིཊཀེ ཙ ཝཱིཏིཀྐམཔྤཧཱནཾ ¶ , ཀིལེསཱནཾ ཝཱིཏིཀྐམཔཊིཔཀྑཏྟཱ སཱིལསྶ; སུཏྟནྟཔིཊཀེ པརིཡུཊྛཱནཔྤཧཱནཾ, པརིཡུཊྛཱནཔཊིཔཀྑཏྟཱ སམཱདྷིསྶ; ཨབྷིདྷམྨཔིཊཀེ ཨནུསཡཔྤཧཱནཾ, ཨནུསཡཔཊིཔཀྑཏྟཱ པཉྙཱཡ.

པཋམེ ¶ ¶ ཙ ཏདངྒཔྤཧཱནཾ ཀིལེསཱནཾ, ཨིཏརེསུ ཝིཀྑམྦྷནསམུཙྪེདཔྤཧཱནཱནི. པཋམེ ཙ དུཙྩརིཏསཾཀིལེསསྶ པཧཱནཾ, ཨིཏརེསུ ཏཎྷཱདིཊྛིསཾཀིལེསཱནཾ པཧཱནཾ.

ཨེཀམེཀསྨིཉྩེཏྠ ཙཏུབྦིདྷོཔི དྷམྨཏྠདེསནཱཔཊིཝེདྷགམྦྷཱིརབྷཱཝོ ཝེདིཏབྦོ – ཏཏྠ དྷམྨོཏི ཏནྟི. ཨཏྠོཏི ཏསྶཱཡེཝཏྠོ. དེསནཱཏི ཏསྶཱ མནསཱ ཝཝཏྠཱཔིཏཱཡ ཏནྟིཡཱ དེསནཱ. པཊིཝེདྷོཏི ཏནྟིཡཱ ཏནྟིཨཏྠསྶ ཙ ཡཐཱབྷཱུཏཱཝབོདྷོ. ཏཱིསུཔི ཙེཏེསུ ཨེཏེ དྷམྨཏྠདེསནཱཔཊིཝེདྷཱ. ཡསྨཱ སསཱདཱིཧི ཝིཡ མཧཱསམུདྡོ མནྡབུདྡྷཱིཧི དུཀྑོགཱཧཱ ཨལབྦྷནེཡྻཔཏིཊྛཱ ཙ ཏསྨཱ གམྦྷཱིརཱ. ཨེཝཾ ཨེཀམེཀསྨིཾ ཨེཏྠ ཙཏུབྦིདྷོཔི གམྦྷཱིརབྷཱཝོ ཝེདིཏབྦོ.

ཨཔརོ ནཡོ – དྷམྨོཏི ཧེཏུ. ཝུཏྟཉྷེཏཾ – ‘‘ཧེཏུམྷི ཉཱཎཾ དྷམྨཔཊིསམྦྷིདཱ’’ཏི (ཝིབྷ. ༧༢༠). ཨཏྠོཏི ཧེཏུཕལཾ. ཝུཏྟཉྷེཏཾ – ‘‘ཧེཏུཕལེ ཉཱཎཾ ཨཏྠཔཊིསམྦྷིདཱ’’ཏི (ཝིབྷ. ༧༢༠). དེསནཱཏི པཉྙཏྟི, ཡཐཱདྷམྨཾ དྷམྨཱབྷིལཱཔོཏི ཨདྷིཔྤཱཡོ; ཨནུལོམཔཊིལོམསངྑེཔཝིཏྠཱརཱདིཝསེན ཝཱ ཀཐནཾ. པཊིཝེདྷོཏི ཨབྷིསམཡོ. སོ ཙ ལོཀིཡལོཀུཏྟརོ. ཝིསཡཏོ ཙ ཨསམྨོཧཏོ ཙ; ཨཏྠཱནུརཱུཔཾ དྷམྨེསུ, དྷམྨཱནུརཱུཔཾ ཨཏྠེསུ, པཉྙཏྟིཔཐཱནུརཱུཔཾ པཉྙཏྟཱིསུ ཨཝབོདྷོ. ཏེསཾ ཏེསཾ ཝཱ ཏཏྠ ཏཏྠ ཝུཏྟདྷམྨཱནཾ པཊིཝིཛ྄ཛྷིཏབྦོ སལཀྑཎསངྑཱཏོ ཨཝིཔརཱིཏསབྷཱཝོ.

ཨིདཱནི ཡསྨཱ ཨེཏེསུ པིཊཀེསུ ཡཾ ཡཾ དྷམྨཛཱཏཾ ཝཱ ཨཏྠཛཱཏཾ ཝཱ ཡཱ ཙཱཡཾ ཡཐཱ ཡཐཱ ཉཱཔེཏབྦོ ཨཏྠོ སོཏཱུནཾ ཉཱཎསྶ ཨབྷིམུཁོ ཧོཏི ཏཐཱ ཏཐཱ ཏདཏྠཛོཏིཀཱ དེསནཱ, ཡོ ཙེཏྠ ཨཝིཔརཱིཏཱཝབོདྷསངྑཱཏོ པཊིཝེདྷོ ཏེསཾ ཏེསཾ ཝཱ དྷམྨཱནཾ པཊིཝིཛ྄ཛྷིཏབྦོ སལཀྑཎསངྑཱཏོ ཨཝིཔརཱིཏསབྷཱཝོ – སབྦམྤེཏཾ ཨནུཔཙིཏཀུསལསམྦྷཱརེཧི དུཔྤཉྙེཧི, སསཱདཱིཧི ཝིཡ མཧཱསམུདྡོ, དུཀྑོགཱཧཾ ཨལབྦྷནེཡྻཔཏིཊྛཉྩ, ཏསྨཱ གམྦྷཱིརཾ. ཨེཝམྤི ཨེཀམེཀསྨིཾ ཨེཏྠ ཙཏུབྦིདྷོཔི གམྦྷཱིརབྷཱཝོ ཝེདིཏབྦོ. ཨེཏྟཱཝཏཱ ཙ –

དེསནཱསཱསནཀཐཱབྷེདཾ ¶ ཏེསུ ཡཐཱརཧཾ;

སིཀྑཱཔཧཱནགམྦྷཱིརབྷཱཝཉྩ པརིདཱིཔཡེཏི –

ཨཡཾ གཱཐཱ ཝུཏྟཏྠཱ ཧོཏི.

པརིཡཏྟིབྷེདཾ ¶ ¶ སམྤཏྟིཾ, ཝིཔཏྟིཉྩཱཔི ཡཾ ཡཧིཾ;

པཱཔུཎཱཏི ཡཐཱ བྷིཀྑུ, ཏམྤི སབྦཾ ཝིབྷཱཝཡེཏི.

ཨེཏྠ པན ཏཱིསུ པིཊཀེསུ ཏིཝིདྷོ པརིཡཏྟིབྷེདོ དཊྛབྦོ. ཏིསྶོ ཧི པརིཡཏྟིཡོ – ཨལགདྡཱུཔམཱ ནིསྶརཎཏྠཱ བྷཎྜཱགཱརིཀཔརིཡཏྟཱིཏི.

ཏཏྠ ཡཱ དུགྒཧིཏཱ ཨུཔཱརམྦྷཱདིཧེཏུ པརིཡཱཔུཊཱ ཨཡཾ ཨལགདྡཱུཔམཱ. ཡཾ སནྡྷཱཡ ཝུཏྟཾ – ‘‘སེཡྻཐཱཔི, བྷིཀྑཝེ, པུརིསོ ཨལགདྡཏྠིཀོ ཨལགདྡགཝེསཱི ཨལགདྡཔརིཡེསནཾ ཙརམཱནོ, སོ པསྶེཡྻ མཧནྟཾ ཨལགདྡཾ, ཏམེནཾ བྷོགེ ཝཱ ནངྒུཊྛེ ཝཱ གཎྷེཡྻ, ཏསྶ སོ ཨལགདྡོ པཊིཔརིཝཏྟིཏྭཱ ཧཏྠེ ཝཱ བཱཧཱཡ ཝཱ ཨཉྙཏརསྨིཾ ཝཱ ཨངྒཔཙྩངྒེ ཌཾསེཡྻ, སོ ཏཏོ ནིདཱནཾ མརཎཾ ཝཱ ནིགཙྪེཡྻ མརཎམཏྟཾ ཝཱ དུཀྑཾ. ཏཾ ཀིསྶ ཧེཏུ? དུགྒཧིཏཏྟཱ, བྷིཀྑཝེ, ཨལགདྡསྶ. ཨེཝམེཝ ཁོ, བྷིཀྑཝེ, ཨིདྷེཀཙྩེ མོགྷཔུརིསཱ དྷམྨཾ པརིཡཱཔུཎནྟི སུཏྟཾ…པེ… ཝེདལླཾ, ཏེ ཏཾ དྷམྨཾ པརིཡཱཔུཎིཏྭཱ ཏེསཾ དྷམྨཱནཾ པཉྙཱཡ ཨཏྠཾ ན ཨུཔཔརིཀྑནྟི, ཏེསཾ ཏེ དྷམྨཱ པཉྙཱཡ ཨཏྠཾ ཨནུཔཔརིཀྑཏཾ ན ནིཛ྄ཛྷཱནཾ ཁམནྟི, ཏེ ཨུཔཱརམྦྷཱནིསཾསཱ ཙེཝ དྷམྨཾ པརིཡཱཔུཎནྟི ཨིཏིཝཱདཔྤམོཀྑཱནིསཾསཱ ཙ. ཡསྶ ཙཏྠཱཡ དྷམྨཾ པརིཡཱཔུཎནྟི ཏཉྩསྶ ཨཏྠཾ ནཱནུབྷོནྟི. ཏེསཾ ཏེ དྷམྨཱ དུགྒཧིཏཱ དཱིགྷརཏྟཾ ཨཧིཏཱཡ དུཀྑཱཡ སཾཝཏྟནྟི. ཏཾ ཀིསྶ ཧེཏུ? དུགྒཧིཏཏྟཱ, བྷིཀྑཝེ, དྷམྨཱན’’ནྟི (མ. ནི. ༡.༢༣༨).

ཡཱ པན སུགྒཧིཏཱ སཱིལཀྑནྡྷཱདིཔཱརིཔཱུརིཾཡེཝ ཨཱཀངྑམཱནེན པརིཡཱཔུཊཱ ན ཨུཔཱརམྦྷཱདིཧེཏུ, ཨཡཾ ནིསྶརཎཏྠཱ. ཡཾ སནྡྷཱཡ ཝུཏྟཾ – ‘‘ཏེསཾ ཏེ དྷམྨཱ སུགྒཧིཏཱ དཱིགྷརཏྟཾ ཧིཏཱཡ སུཁཱཡ སཾཝཏྟནྟི. ཏཾ ཀིསྶ ཧེཏུ? སུགྒཧིཏཏྟཱ, བྷིཀྑཝེ, དྷམྨཱན’’ནྟི (མ. ནི. ༡.༢༣༩).

ཡཾ པན པརིཉྙཱཏཀྑནྡྷོ པཧཱིནཀིལེསོ བྷཱཝིཏམགྒོ པཊིཝིདྡྷཱཀུཔྤོ ¶ སཙྪིཀཏནིརོདྷོ ཁཱིཎཱསཝོ ཀེཝལཾ པཝེཎིཔཱལནཏྠཱཡ ཝཾསཱནུརཀྑཎཏྠཱཡ པརིཡཱཔུཎཱཏི, ཨཡཾ བྷཎྜཱགཱརིཀཔརིཡཏྟཱིཏི.

ཝིནཡེ པན སུཔྤཊིཔནྣོ བྷིཀྑུ སཱིལསམྤདཾ ནིསྶཱཡ ཏིསྶོ ཝིཛྫཱ པཱཔུཎཱཏི, ཏཱསཾཡེཝ ¶ ཙ ཏཏྠ པབྷེདཝཙནཏོ. སུཏྟེ སུཔྤཊིཔནྣོ སམཱདྷིསམྤདཾ ནིསྶཱཡ ཚལ༹བྷིཉྙཱ པཱཔུཎཱཏི, ཏཱསཾཡེཝ ཙ ཏཏྠ པབྷེདཝཙནཏོ. ཨབྷིདྷམྨེ སུཔྤཊིཔནྣོ པཉྙཱསམྤདཾ ནིསྶཱཡ ཙཏསྶོ པཊིསམྦྷིདཱ ¶ པཱཔུཎཱཏི ཏཱསཉྩ ཏཏྠེཝ པབྷེདཝཙནཏོ. ཨེཝམེཏེསུ སུཔྤཊིཔནྣོ ཡཐཱཀྐམེན ཨིམཾ ཝིཛྫཱཏྟཡཚལ༹བྷིཉྙཱཙཏུཔཊིསམྦྷིདཱཔྤབྷེདཾ སམྤཏྟིཾ པཱཔུཎཱཏི.

ཝིནཡེ པན དུཔྤཊིཔནྣོ ཨནུཉྙཱཏསུཁསམྥསྶཨཏྠརཎཔཱཝུརཎཱདིཕསྶསཱམཉྙཏོ པཊིཀྑིཏྟེསུ ཨུཔཱདིནྣཀཕསྶཱདཱིསུ ཨནཝཛྫསཉྙཱི ཧོཏི. ཝུཏྟཉྷེཏཾ – ‘‘ཏཐཱཧཾ བྷགཝཏཱ དྷམྨཾ དེསིཏཾ ཨཱཛཱནཱམི, ཡཐཱ ཡེམེ ཨནྟརཱཡིཀཱ དྷམྨཱ ཝུཏྟཱ བྷགཝཏཱ ཏེ པཊིསེཝཏོ ནཱལཾ ཨནྟརཱཡཱཡཱ’’ཏི (པཱཙི. ༤༡༧; མ. ནི. ༡.༢༣༤). ཏཏོ དུསྶཱིལབྷཱཝཾ པཱཔུཎཱཏི. སུཏྟེ དུཔྤཊིཔནྣོ ‘‘ཙཏྟཱརོམེ, བྷིཀྑཝེ, པུགྒལཱ སནྟོ སཾཝིཛྫམཱནཱ ལོཀསྨི’’ནྟིཨཱདཱིསུ (ཨ. ནི. ༤.༥) ཨདྷིཔྤཱཡཾ ཨཛཱནནྟོ དུགྒཧིཏཾ གཎྷཱཏི. ཡཾ སནྡྷཱཡ ཝུཏྟཾ – ‘‘ཨཏྟནཱ དུགྒཧིཏེན ཨམྷེ ཙེཝ ཨབྦྷཱཙིཀྑཏི ཨཏྟཱནཉྩ ཁནཏི བཧུཉྩ ཨཔུཉྙཾ པསཝཏཱི’’ཏི (པཱཙི. ༤༡༧; མ. ནི. ༡.༢༣༦). ཏཏོ མིཙྪཱདིཊྛིཏཾ པཱཔུཎཱཏི. ཨབྷིདྷམྨེ དུཔྤཊིཔནྣོ དྷམྨཙིནྟཾ ཨཏིདྷཱཝནྟོ ཨཙིནྟེཡྻཱནིཔི ཙིནྟེཏི, ཏཏོ ཙིཏྟཀྑེཔཾ པཱཔུཎཱཏི. ཝུཏྟཉྷེཏཾ – ‘‘ཙཏྟཱརིམཱནི, བྷིཀྑཝེ, ཨཙིནྟེཡྻཱནི, ན ཙིནྟེཏབྦཱནི, ཡཱནི ཙིནྟེནྟོ ཨུམྨཱདསྶ ཝིགྷཱཏསྶ བྷཱགཱི ཨསྶཱ’’ཏི (ཨ. ནི. ༤.༧༧). ཨེཝམེཏེསུ དུཔྤཊིཔནྣོ ཡཐཱཀྐམེན ཨིམཾ དུསྶཱིལབྷཱཝམིཙྪཱདིཊྛིཏཱཙིཏྟཀྑེཔཔྤབྷེདཾ ཝིཔཏྟིཾ པཱཔུཎཱཏཱིཏི. ཨེཏྟཱཝཏཱ ཙ –

པརིཡཏྟིབྷེདཾ སམྤཏྟིཾ, ཝིཔཏྟིཉྩཱཔི ཡཾ ཡཧིཾ;

པཱཔུཎཱཏི ཡཐཱ བྷིཀྑུ, ཏམྤི སབྦཾ ཝིབྷཱཝཡེཏི.

ཨཡམྤི གཱཐཱ ཝུཏྟཏྠཱ ཧོཏི. ཨེཝཾ ནཱནཔྤཀཱརཏོ པིཊཀཱནི ཉཏྭཱ ཏེསཾ ཝསེན སབྦམྤེཏཾ སངྒཡ྄ཧམཱནཾ ཏཱིཎི པིཊཀཱནི ཧོནྟི.

ཀཐཾ ¶ ནིཀཱཡཏོ པཉྩ ནིཀཱཡཱཏི? སབྦམེཝ ཧེཏཾ དཱིགྷནིཀཱཡོ མཛ྄ཛྷིམནིཀཱཡོ སཾཡུཏྟནིཀཱཡོ ཨངྒུཏྟརནིཀཱཡོ ཁུདྡཀནིཀཱཡོཏི པཉྩཔྤབྷེདཾ ཧོཏི. ཏཏྠ ཀཏམོ དཱིགྷནིཀཱཡོ? ཏིཝགྒསངྒཧཱནི བྲཧྨཛཱལཱདཱིནི ཙཏུཏྟིཾས སུཏྟཱནི.

ཙཏུཏྟིཾསེཝ ¶ སུཏྟནྟཱ, ཏིཝགྒོ ཡསྶ སངྒཧོ;

ཨེས དཱིགྷནིཀཱཡོཏི, པཋམོ ཨནུལོམིཀོ.

ཀསྨཱ ¶ པནེས དཱིགྷནིཀཱཡོཏི ཝུཙྩཏི? དཱིགྷཔྤམཱཎཱནཾ སུཏྟཱནཾ སམཱུཧཏོ ནིཝཱསཏོ ཙ. སམཱུཧནིཝཱསཱ ཧི ནིཀཱཡོཏི ཝུཙྩནྟི. ‘‘ནཱཧཾ, བྷིཀྑཝེ, ཨཉྙཾ ཨེཀནིཀཱཡམྤི སམནུཔསྶཱམི ཨེཝཾ ཙིཏྟཾ ཡཐཡིདཾ, བྷིཀྑཝེ, ཏིརཙྪཱནགཏཱ པཱཎཱ (སཾ. ནི. ༣.༡༠༠), པོཎིཀནིཀཱཡོ, ཙིཀྑལླིཀནིཀཱཡོ’’ཏི. ཨེཝམཱདཱིནི ཙེཏྠ སཱདྷཀཱནི སཱསནཏོ ལོཀཏོ ཙ. ཨེཝཾ སེསཱནམྤི ནིཀཱཡབྷཱཝེ ཝཙནཏྠོ ཝེདིཏབྦོ.

ཀཏམོ མཛ྄ཛྷིམནིཀཱཡོ? མཛ྄ཛྷིམཔྤམཱཎཱནི པཉྩདསཝགྒསངྒཧཱནི མཱུལཔརིཡཱཡསུཏྟཱདཱིནི དིཡཌྜྷསཏཾ དྭེ ཙ སུཏྟཱནི.

དིཡཌྜྷསཏསུཏྟནྟཱ, དྭེ ཙ སུཏྟཱནི ཡཏྠ སོ;

ནིཀཱཡོ མཛ྄ཛྷིམོ པཉྩ, དསཝགྒཔརིགྒཧོ.

ཀཏམོ སཾཡུཏྟནིཀཱཡོ? དེཝཏཱསཾཡུཏྟཱདིཝསེན ཋིཏཱནི ཨོགྷཏརཎཱདཱིནི སཏྟ སུཏྟསཧསྶཱནི སཏྟ སུཏྟསཏཱནི ཙ དྭཱསཊྛི ཙ སུཏྟཱནི.

སཏྟ སུཏྟསཧསྶཱནི, སཏྟ སུཏྟསཏཱནི ཙ;

དྭཱསཊྛི ཙེཝ སུཏྟནྟཱ, ཨེསོ སཾཡུཏྟསངྒཧོ.

ཀཏམོ ཨངྒུཏྟརནིཀཱཡོ? ཨེཀེཀཨངྒཱཏིརེཀཝསེན ཋིཏཱནི ཙིཏྟཔརིཡཱདཱནཱདཱིནི ནཝ སུཏྟསཧསྶཱནི པཉྩ སུཏྟསཏཱནི སཏྟཔཉྙཱསཉྩ སུཏྟཱནི.

ནཝ སུཏྟསཧསྶཱནི, པཉྩ སུཏྟསཏཱནི ཙ;

སཏྟཔཉྙཱསསུཏྟཱནི, སངྑྱཱ ཨངྒུཏྟརེ ཨཡཾ.

ཀཏམོ ¶ ཁུདྡཀནིཀཱཡོ? སཀལཾ ཝིནཡཔིཊཀཾ, ཨབྷིདྷམྨཔིཊཀཾ, ཁུདྡཀཔཱཋ, དྷམྨཔདཱདཡོ ¶ ཙ པུབྦེ དསྶིཏཱ པཉྩདསཔྤབྷེདཱ; ཋཔེཏྭཱ ཙཏྟཱརོ ནིཀཱཡེ ཨཝསེསཾ བུདྡྷཝཙནནྟི.

ཋཔེཏྭཱ ཙཏུརོཔེཏེ, ནིཀཱཡེ དཱིགྷཨཱདིཀེ;

ཏདཉྙཾ བུདྡྷཝཙནཾ, ནིཀཱཡོ ཁུདྡཀོ མཏོཏི.

ཨེཝཾ ནིཀཱཡཏོ པཉྩ ནིཀཱཡཱ ཧོནྟི.

ཀཐཾ ¶ ¶ ཨངྒཝསེན ནཝངྒཱནཱིཏི? སབྦམེཝ ཧིདཾ ‘སུཏྟཾ གེཡྻཾ ཝེཡྻཱཀརཎཾ གཱཐཱ ཨུདཱནཾ ཨིཏིཝུཏྟཀཾ ཛཱཏཀཾ ཨབྦྷུཏདྷམྨཾ ཝེདལླ’ནྟི ནཝཔྤབྷེདཾ ཧོཏི. ཏཏྠ ཨུབྷཏོཝིབྷངྒནིདྡེསཁནྡྷཀཔརིཝཱརཱ སུཏྟནིཔཱཏེ མངྒལསུཏྟརཏནསུཏྟནཱལཀསུཏྟཏུཝཊྚཀསུཏྟཱནི ཨཉྙམྤི ཙ སུཏྟནཱམཀཾ ཏཐཱགཏཝཙནཾ སུཏྟནྟི ཝེདིཏབྦཾ. སབྦམྤི སགཱཐཀཾ སུཏྟཾ གེཡྻནྟི ཝེདིཏབྦཾ. ཝིསེསེན སཾཡུཏྟནིཀཱཡེ སཀལོཔི སགཱཐཱཝགྒོ. སཀལམྤི ཨབྷིདྷམྨཔིཊཀཾ, ནིགྒཱཐཀཾ སུཏྟཾ, ཡཉྩ ཨཉྙམྤི ཨཊྛཧི ཨངྒེཧི ཨསངྒཧིཏཾ བུདྡྷཝཙནཾ, ཏཾ ཝེཡྻཱཀརཎནྟི ཝེདིཏབྦཾ. དྷམྨཔདཾ ཐེརགཱཐཱ ཐེརཱིགཱཐཱ སུཏྟནིཔཱཏེ ནོསུཏྟནཱམིཀཱ སུདྡྷིཀགཱཐཱ ཙ གཱཐཱཏི ཝེདིཏབྦཱ. སོམནསྶཉཱཎམཡིཀགཱཐཱཔྤཊིསཾཡུཏྟཱ དྭཱསཱིཏི སུཏྟནྟཱ ཨུདཱནནྟི ཝེདིཏབྦཾ. ‘ཝུཏྟཉྷེཏཾ བྷགཝཏཱ’ཏིཨཱདིནཡཔྤཝཏྟཱ (ཨིཏིཝུ. ༡) དསུཏྟརསཏསུཏྟནྟཱ ཨིཏིཝུཏྟཀནྟི ཝེདིཏབྦཾ. ཨཔཎྞཀཛཱཏཀཱདཱིནི པཉྙཱསཱདྷིཀཱནི པཉྩ ཛཱཏཀསཏཱནི ཛཱཏཀནྟི ཝེདིཏབྦཾ. ‘‘ཙཏྟཱརོམེ, བྷིཀྑཝེ, ཨཙྪརིཡཱ ཨབྦྷུཏཱ དྷམྨཱ ཨཱནནྡེ’’ཏིཨཱདིནཡཔཝཏྟཱ (དཱི. ནི. ༢.༢༠༩; ཨ. ནི. ༤.༡༢༩) སབྦེཔི ཨཙྪརིཡཨབྦྷུཏདྷམྨཔྤཊིསཾཡུཏྟཱ སུཏྟནྟཱ ཨབྦྷུཏདྷམྨནྟི ཝེདིཏབྦཾ.

ཙཱུལ༹ཝེདལླམཧཱཝེདལླསམྨཱདིཊྛིསཀྐཔཉྷསངྑཱརབྷཱཛནཱིཡམཧཱཔུཎྞམསུཏྟཱདཡོ སབྦེཔི ཝེདཉྩ ཏུཊྛིཉྩ ལདྡྷཱ ལདྡྷཱ པུཙྪིཏསུཏྟནྟཱ ཝེདལླནྟི ཝེདིཏབྦཾ. ཨེཝམེཏཾ ཨངྒཏོ ནཝངྒཱནི.

ཀཐཾ དྷམྨཀྑནྡྷཏོ ཙཏུརཱསཱིཏི དྷམྨཀྑནྡྷསཧསྶཱནཱིཏི? སབྦམེཝ ཧིདཾ བུདྡྷཝཙནཾ.

‘‘དྭཱསཱིཏི ¶ བུདྡྷཏོ གཎྷིཾ, དྭེ སཧསྶཱནི བྷིཀྑུཏོ;

ཙཏུརཱསཱིཏི སཧསྶཱནི, ཡེ མེ དྷམྨཱ པཝཏྟིནོ’’ཏི. (ཐེརགཱ. ༡༠༢༧);

ཨེཝཾ པརིདཱིཔིཏདྷམྨཀྑནྡྷཝསེན ཙཏུརཱསཱིཏིསཧསྶཔྤབྷེདཾ ཧོཏི. ཏཏྠ ཨེཀཱནུསནྡྷིཀཾ སུཏྟཾ ཨེཀོ དྷམྨཀྑནྡྷོ. ཡཾ ཨནེཀཱནུསནྡྷིཀཾ ཏཏྠ ཨནུསནྡྷིཝསེན དྷམྨཀྑནྡྷགཎནཱ. གཱཐཱབནྡྷེསུ པཉྷཱཔུཙྪནཾ ཨེཀོ དྷམྨཀྑནྡྷོ, ཝིསྶཛྫནཾ ཨེཀོ. ཨབྷིདྷམྨེ ཨེཀམེཀཾ ཏིཀདུཀབྷཱཛནཾ ཨེཀམེཀཉྩ ཙིཏྟཝཱརབྷཱཛནཾ ཨེཀོ དྷམྨཀྑནྡྷོ. ཝིནཡེ ཨཏྠི ཝཏྠུ, ཨཏྠི མཱཏིཀཱ, ཨཏྠི པདབྷཱཛནཱིཡཾ, ཨཏྠི ཨཱཔཏྟི, ཨཏྠི ཨནཱཔཏྟི, ཨཏྠི ¶ ཨནྟརཱཔཏྟི, ཨཏྠི ཏིཀཙྪེདོ. ཏཏྠ ཨེཀམེཀོ ཀོཊྛཱསོ ཨེཀམེཀོ དྷམྨཀྑནྡྷོཏི ཝེདིཏབྦོ. ཨེཝཾ དྷམྨཀྑནྡྷཏོ ཙཏུརཱསཱིཏི དྷམྨཀྑནྡྷསཧསྶཱནི.

ཨེཝམེཏཾ སབྦམྤི བུདྡྷཝཙནཾ པཉྩསཏིཀསངྒཱིཏིཀཱལེ སངྒཱཡནྟེན མཧཱཀསྶཔཔྤམུཁེན ཝསཱིགཎེན ཨཡཾ དྷམྨོ ཨཡཾ ཝིནཡོ, ཨིདཾ པཋམབུདྡྷཝཙནཾ, ཨིདཾ མཛ྄ཛྷིམབུདྡྷཝཙནཾ, ཨིདཾ པཙྪིམབུདྡྷཝཙནཾ, ཨིདཾ ཝིནཡཔིཊཀཾ, ཨིདཾ སུཏྟནྟཔིཊཀཾ, ཨིདཾ ཨབྷིདྷམྨཔིཊཀཾ, ཨཡཾ དཱིགྷནིཀཱཡོ…པེ… ཨཡཾ ཁུདྡཀནིཀཱཡོ, ཨིམཱནི སུཏྟཱདཱིནི ནཝངྒཱནི, ཨིམཱནི ཙཏུརཱསཱིཏི དྷམྨཀྑནྡྷསཧསྶཱནཱིཏི ཨིམཾ པབྷེདཾ ཝཝཏྠཔེཏྭཱཝ སངྒཱིཏཾ. ན ཀེཝལཉྩ ཨིམམེཝ ཨཉྙམྤི ཨུདྡཱནསངྒཧཝགྒསངྒཧཔེཡྻཱལསངྒཧཨེཀནིཔཱཏདུཀནིཔཱཏཱདིནིཔཱཏསངྒཧསཾཡུཏྟསངྒཧ པཎྞཱསསངྒཧཱདིཨནེཀཝིདྷཾ, ཏཱིསུ པིཊཀེསུ སནྡིསྶམཱནཾ སངྒཧཔྤབྷེདཾ ཝཝཏྠཔེཏྭཱཝ སཏྟཧི མཱསེཧི སངྒཱིཏཾ.

སངྒཱིཏིཔརིཡོསཱནེ ཙསྶ ཨིདཾ མཧཱཀསྶཔཏྠེརེན དསབལསྶ སཱསནཾ པཉྩཝསྶསཧསྶཔརིམཱཎཀཱལཾ པཝཏྟནསམཏྠཾ ཀཏནྟི སཉྫཱཏཔྤམོདཱ སཱདྷུཀཱརཾ ཝིཡ དདམཱནཱ ཨཡཾ མཧཱཔཐཝཱི ཨུདཀཔརིཡནྟཾ ཀཏྭཱ ཨནེཀཔྤཀཱརཾ ཀམྤི སངྐམྤི སམྤཀམྤི སམྤཝེདྷི. ཨནེཀཱནི ཙ ཨཙྪརིཡཱནི པཱཏུརཧེསུཾ.

ཨེཝཾ སངྒཱིཏེ པནེཏྠ ཨཡཾ ཨབྷིདྷམྨོ པིཊཀཏོ ཨབྷིདྷམྨཔིཊཀཾ, ནིཀཱཡཏོ ཁུདྡཀནིཀཱཡོ, ཨངྒཏོ ¶ ཝེཡྻཱཀརཎཾ, དྷམྨཀྑནྡྷཏོ ཀཏིཔཡཱནི དྷམྨཀྑནྡྷསཧསྶཱནི ཧོནྟི.

ཏཾ ¶ དྷཱརཡནྟེསུ བྷིཀྑཱུསུ པུབྦེ ཨེཀོ བྷིཀྑུ སབྦསཱམཡིཀཔརིསཱཡ ནིསཱིདིཏྭཱ ཨབྷིདྷམྨཏོ སུཏྟཾ ཨཱཧརིཏྭཱ དྷམྨཾ ཀཐེནྟོ ‘‘རཱུཔཀྑནྡྷོ ཨབྱཱཀཏོ, ཙཏྟཱརོ ཁནྡྷཱ སིཡཱ ཀུསལཱ སིཡཱ ཨཀུསལཱ སིཡཱ ཨབྱཱཀཏཱ; དསཱཡཏནཱ ཨབྱཱཀཏཱ, དྭེ ཨཱཡཏནཱ སིཡཱ ཀུསལཱ སིཡཱ ཨཀུསལཱ སིཡཱ ཨབྱཱཀཏཱ; སོལ༹ས དྷཱཏུཡོ ཨབྱཱཀཏཱ, དྭེ དྷཱཏུཡོ སིཡཱ ཀུསལཱ སིཡཱ ཨཀུསལཱ སིཡཱ ཨབྱཱཀཏཱ; སམུདཡསཙྩཾ ཨཀུསལཾ, མགྒསཙྩཾ ཀུསལཾ, ནིརོདྷསཙྩཾ ཨབྱཱཀཏཾ, དུཀྑསཙྩཾ སིཡཱ ཀུསལཾ སིཡཱ ཨཀུསལཾ སིཡཱ ཨབྱཱཀཏཾ; དསིནྡྲིཡཱ ཨབྱཱཀཏཱ, དོམནསྶིནྡྲིཡཾ ཨཀུསལཾ, ཨནཉྙཱཏཉྙསྶཱམཱིཏིནྡྲིཡཾ ཀུསལཾ, ཙཏྟཱརི ཨིནྡྲིཡཱནི སིཡཱ ཀུསལཱ སིཡཱ ཨབྱཱཀཏཱ, ཚ ¶ ཨིནྡྲིཡཱནི སིཡཱ ཀུསལཱ སིཡཱ ཨཀུསལཱ སིཡཱ ཨབྱཱཀཏཱ’’ཏི དྷམྨཀཐཾ ཀཐེསི.

ཏསྨིཾ ཋཱནེ ཨེཀོ བྷིཀྑུ ནིསིནྣོ ‘དྷམྨཀཐིཀ ཏྭཾ སིནེརུཾ པརིཀྑིཔནྟོ ཝིཡ དཱིགྷསུཏྟཾ ཨཱཧརསི, ཀིཾ སུཏྟཾ ནཱམེཏ’ནྟི ཨཱཧ. ‘ཨབྷིདྷམྨསུཏྟཾ ནཱམ, ཨཱཝུསོ’ཏི. ‘ཨབྷིདྷམྨསུཏྟཾ ཀསྨཱ ཨཱཧརསི? ཀིཾ ཨཉྙཾ བུདྡྷབྷཱསིཏཾ སུཏྟཾ ཨཱཧརིཏུཾ ན ཝཊྚཏཱི’ཏི? ‘ཨབྷིདྷམྨོ ཀེན བྷཱསིཏོ’ཏི? ‘ན ཨེསོ བུདྡྷབྷཱསིཏོ’ཏི. ‘ཀིཾ པན ཏེ, ཨཱཝུསོ, ཝིནཡཔིཊཀཾ ཨུགྒཧིཏ’ནྟི? ‘ན ཨུགྒཧིཏཾ, ཨཱཝུསོ’ཏི. ‘ཨཝིནཡདྷཱརིཏཱཡ མཉྙེ ཏྭཾ ཨཛཱནནྟོ ཨེཝཾ ཝདེསཱི’ཏི. ‘ཝིནཡམཏྟམེཝ, ཨཱཝུསོ, ཨུགྒཧིཏ’ནྟི. ‘ཏམྤི ཏེ དུགྒཧིཏཾ, པརིསཔརིཡནྟེ ནིསཱིདིཏྭཱ ནིདྡཱཡནྟེན ཨུགྒཧིཏཾ བྷཝིསྶཏི; ཏུམྷཱདིསེ ཧི པབྦཱཛེནྟོ ཝཱ ཨུཔསམྤཱདེནྟོ ཝཱ སཱཏིསཱརོ ཧོཏི’. ‘ཀིཾ ཀཱརཎཱ’? ཝིནཡམཏྟསྶཔི དུགྒཧིཏཏྟཱ; ཝུཏྟཉྷེཏཾ – ‘‘ཏཏྠ ཨནཱཔཏྟི, ན ཝིཝཎྞེཏུཀཱམོ ཨིངྒྷ ཏཱཝ, ཨཱཝུསོ, སུཏྟནྟཾ ཝཱ གཱཐཱཡོ ཝཱ ཨབྷིདྷམྨཾ ཝཱ པརིཡཱཔུཎསྶུ, པཙྪཱཔི ཝིནཡཾ པརིཡཱཔུཎིསྶསཱི’’ཏི (པཱཙི. ༤༤༢) བྷཎཏི. ‘‘སུཏྟནྟེ ཨོཀཱསཾ ཀཱརཱཔེཏྭཱ ཨབྷིདྷམྨཾ ཝཱ ཝིནཡཾ ཝཱ པུཙྪཏི, ཨབྷིདྷམྨེ ཨོཀཱསཾ ཀཱརཱཔེཏྭཱ སུཏྟནྟཾ ཝཱ ཝིནཡཾ ཝཱ པུཙྪཏི, ཝིནཡེ ཨོཀཱསཾ ཀཱརཱཔེཏྭཱ སུཏྟནྟཾ ཝཱ ཨབྷིདྷམྨཾ ཝཱ པུཙྪཏཱི’’ཏི (པཱཙི. ༡༢༢༡). ‘ཏྭཾ པན ཨེཏྟཀམྤི ན ཛཱནཱསཱི’ཏི ཨེཏྟཀེནཔི པརཝཱདཱི ནིགྒཧིཏོ ཧོཏི.

མཧཱགོསིངྒསུཏྟཾ པན ཨིཏོཔི བལཝཏརཾ. ཏཏྲ ཧི དྷམྨསེནཱཔཏི སཱརིཔུཏྟཏྠེརོ ཨཉྙམཉྙཾ པུཙྪིཏཔཉྷཉྩ ཝིསྶཛྫནཉྩ ཨཱརོཙེཏུཾ སཏྠུ སནྟིཀཾ གནྟྭཱ མཧཱམོགྒལླཱནཏྠེརསྶ ཝིསྶཛྫནཾ ཨཱརོཙེནྟོ ‘‘ཨིདྷཱཝུསོ ¶ སཱརིཔུཏྟ, དྭེ བྷིཀྑཱུ ཨབྷིདྷམྨཀཐཾ ཀཐེནྟི ¶ , ཏེ ཨཉྙམཉྙཾ པཉྷཾ པུཙྪནྟི, ཨཉྙམཉྙསྶ པཉྷཾ པུཊྛཱ ཝིསྶཛྫེནྟི, ནོ ཙ སཾསཱདེནྟི, དྷམྨཱི ཙ ནེསཾ ཀཐཱཔཝཏྟིནཱི ཧོཏི, ཨེཝརཱུཔེན ཁོ, ཨཱཝུསོ, སཱརིཔུཏྟ, བྷིཀྑུནཱ གོསིངྒསཱལཝནཾ སོབྷེཡྻཱ’’ཏི (མ. ནི. ༡.༣༤༣) ཨཱཧ. སཏྠཱ ཨཱབྷིདྷམྨིཀཱ ནཱམ མམ སཱསནེ པརིབཱཧིརཱཏི ཨཝཏྭཱ སུཝཎྞཱལིངྒསདིསཾ གཱིཝཾ ཨུནྣཱམེཏྭཱ པུཎྞཙནྡསསྶིརཱིཀཾ མཧཱམུཁཾ པཱུརེཏྭཱ བྲཧྨགྷོསཾ ནིཙྪཱརེནྟོ ‘‘སཱདྷུ སཱདྷུ ¶ སཱརིཔུཏྟཱ’’ཏི མཧཱམོགྒལླཱནཏྠེརསྶ སཱདྷུཀཱརཾ དཏྭཱ ‘‘ཡཐཱ ཏཾ མོགྒལླཱནོ ཙ སམྨཱ བྱཱཀརམཱནོ བྱཱཀརེཡྻ, མོགྒལླཱནོ ཧི སཱརིཔུཏྟ དྷམྨཀཐིཀོ’’ཏི (མ. ནི. ༡.༣༤༣) ཨཱཧ. ཨཱབྷིདྷམྨིཀབྷིཀྑཱུཡེཝ ཀིར དྷམྨཀཐིཀཱ ནཱམ, ཨཝསེསཱ དྷམྨཀཐཾ ཀཐེནྟཱཔི ན དྷམྨཀཐིཀཱ. ཀསྨཱ? ཏེ ཧི དྷམྨཀཐཾ ཀཐེནྟཱ ཀམྨནྟརཾ ཝིཔཱཀནྟརཾ རཱུཔཱརཱུཔཔརིཙྪེདཾ དྷམྨནྟརཾ ཨཱལོལེ༹ཏྭཱ ཀཐེནྟི. ཨཱབྷིདྷམྨིཀཱ པན དྷམྨནྟརཾ ན ཨཱལོལེ༹ནྟི. ཏསྨཱ ཨཱབྷིདྷམྨིཀོ བྷིཀྑུ དྷམྨཾ ཀཐེཏུ ཝཱ མཱ ཝཱ, པུཙྪིཏཀཱལེ པན པཉྷཾ ཀཐེསྶཏཱིཏི. ཨཡམེཝ ཨེཀནྟདྷམྨཀཐིཀོ ནཱམ ཧོཏི. ཨིདཾ སནྡྷཱཡ སཏྠཱ སཱདྷུཀཱརཾ དཏྭཱ ‘སུཀཐིཏཾ མོགྒལླཱནེནཱ’ཏི ཨཱཧ.

ཨབྷིདྷམྨཾ པཊིབཱཧེནྟོ ཨིམསྨིཾ ཛིནཙཀྐེ པཧཱརཾ དེཏི, སབྦཉྙུཏཉྙཱཎཾ པཊིབཱཧཏི, སཏྠུ ཝེསཱརཛྫཉྙཱཎཾ པཊིནིཝཏྟེཏི, སོཏུཀཱམཾ པརིསཾ ཝིསཾཝཱདེཏི, ཨརིཡམགྒེ ཨཱཝརཎཾ བནྡྷཏི, ཨཊྛཱརསསུ བྷེདཀརཝཏྠཱུསུ ཨེཀསྨིཾ སནྡིསྶཏི ཨུཀྑེཔནཱིཡཀམྨཏཛྫནཱིཡཀམྨཱརཧོ ཧོཏི. ཏཾ ཏཾ ཀམྨཾ ཀཏྭཱ ཨུཡྻོཛེཏབྦོ ‘གཙྪ ཝིགྷཱསཱདོ ཧུཏྭཱ ཛཱིཝིསྶསཱི’ཏི.

ཨཐཱཔི ཨེཝཾ ཝདེཡྻ – ‘‘སཙེ ཨབྷིདྷམྨོ བུདྡྷབྷཱསིཏོ, ཡཐཱ ཨནེཀེསུ སུཏྟསཧསྶེསུ ‘ཨེཀཾ སམཡཾ བྷགཝཱ རཱཛགཧེ ཝིཧརཏཱི’ཏིཨཱདིནཱ ནཡེན ནིདཱནཾ སཛྫིཏཾ, ཨེཝམསྶཱཔི ནིདཱནཾ སཛྫིཏཾ བྷཝེཡྻཱ’’ཏི. སོ ‘ཛཱཏཀསུཏྟནིཔཱཏདྷམྨཔདཱདཱིནཾ ཨེཝརཱུཔཾ ནིདཱནཾ ནཏྠི, ན ཙེཏཱནི ན བུདྡྷབྷཱསིཏཱནཱི’ཏི པཊིཀྑིཔིཏྭཱ ཨུཏྟརིཔི ཨེཝཾ ཝཏྟབྦོ – ‘པཎྜིཏ, ཨབྷིདྷམྨོ ནཱམེས སབྦཉྙུབུདྡྷཱནཾཡེཝ ཝིསཡོ, ན ཨཉྙེསཾ ཝིསཡོ. བུདྡྷཱནཉྷི ཨོཀྐནྟི པཱཀཊཱ, ཨབྷིཛཱཏི པཱཀཊཱ, ཨབྷིསམྦོདྷི པཱཀཊཱ, དྷམྨཙཀྐཔྤཝཏྟནཾ པཱཀཊཾ. ཡམཀཔཱཊིཧཱརིཡཾ ¶ པཱཀཊཾ, ཏིདིཝཀྐམོ པཱཀཊོ, དེཝལོཀེ དེསིཏབྷཱཝོ པཱཀཊོ, དེཝོརོཧནཾ པཱཀཊཾ. ཡཐཱ ནཱམ ཙཀྐཝཏྟིརཉྙོ ཧཏྠིརཏནཾ ཝཱ ཨསྶརཏནཾ ཝཱ ཐེནེཏྭཱ ཡཱནཀེ ཡོཛེཏྭཱ ཝིཙརཎཾ ནཱམ ཨཊྛཱནཾ ཨཀཱརཎཾ; ཙཀྐརཏནཾ ཝཱ པན ཐེནེཏྭཱ པལཱལསཀཊེ ཨོལམྦིཏྭཱ ཝིཙརཎཾ ནཱམ ཨཊྛཱནཾ ཨཀཱརཎཾ; ཡོཛནཔྤམཱཎཾ ཨོབྷཱསནསམཏྠཾ མཎིརཏནཾ ཝཱ པན ཀཔྤཱསཔཙྪིཡཾ པཀྑིཔིཏྭཱ ཝལ༹ཉྫནཾ ¶ ¶ ནཱམ ཨཊྛཱནཾ ཨཀཱརཎཾ. ཀསྨཱ? རཱཛཱརཧབྷཎྜཏཱཡ; ཨེཝམེཝ ཨབྷིདྷམྨོ ནཱམ ན ཨཉྙེསཾ ཝིསཡོ, སབྦཉྙུབུདྡྷཱནཾཡེཝ ཝིསཡོ. ཏེསཾ ཝསེན དེསེཏབྦདེསནཱ. བུདྡྷཱནཉྷི ཨོཀྐནྟི པཱཀཊཱ…པེ… དེཝོརོཧནཾ པཱཀཊཾ. ཨབྷིདྷམྨསྶ ནིདཱནཀིཙྩཾ ནཱམ ནཏྠི པཎྜིཏཱ’ཏི. ན ཧི སཀྐཱ ཨེཝཾ ཝུཏྟེ པརཝཱདིནཱ སཧདྷམྨིཀཾ ཨུདཱཧརཎཾ ཨུདཱཧརིཏུཾ.

མཎྜལཱརཱམཝཱསཱི ཏིསྶབྷཱུཏིཏྠེརོ པན མཧཱབོདྷིནིདཱནོ ཨེས ཨབྷིདྷམྨོ ནཱམཱཏི དསྶེཏུཾ ‘‘ཡེན སྭཱཧཾ, བྷིཀྑཝེ, ཝིཧཱརེན པཋམཱབྷིསམྦུདྡྷོ ཝིཧརཱམི ཏསྶ པདེསེན ཝིཧཱསི’’ནྟི (སཾ. ནི. ༥.༡༡) ཨིམཾ པདེསཝིཧཱརསུཏྟནྟཾ ཨཱཧརིཏྭཱ ཀཐེསི. དསཝིདྷོ ཧི པདེསོ ནཱམ – ཁནྡྷཔདེསོ, ཨཱཡཏནཔདེསོ, དྷཱཏུཔདེསོ, སཙྩཔདེསོ, ཨིནྡྲིཡཔདེསོ, པཙྩཡཱཀཱརཔདེསོ, སཏིཔཊྛཱནཔདེསོ, ཛྷཱནཔདེསོ, ནཱམཔདེསོ, དྷམྨཔདེསོཏི. ཏེསུ སཏྠཱ མཧཱབོདྷིམཎྜེ པཉྩཀྑནྡྷེ ནིཔྤདེསེན པཊིཝིཛ྄ཛྷི, ཨིམཾ ཏེམཱསཾ ཝེདནཱཀྑནྡྷཝསེནེཝ ཝིཧཱསི. དྭཱདསཱཡཏནཱནི ཨཊྛཱརས དྷཱཏུཡོ ནིཔྤདེསེན པཊིཝིཛ྄ཛྷི. ཨིམཾ ཏེམཱསཾ དྷམྨཱཡཏནེ ཝེདནཱཝསེན དྷམྨདྷཱཏུཡཉྩ ཝེདནཱཝསེནེཝ ཝིཧཱསི. ཙཏྟཱརི སཙྩཱནི ནིཔྤདེསེན པཊིཝིཛ྄ཛྷི, ཨིམཾ ཏེམཱསཾ དུཀྑསཙྩེ ཝེདནཱཝསེནེཝ ཝིཧཱསི. བཱཝཱིསཏིནྡྲིཡཱནི ནིཔྤདེསེན པཊིཝིཛ྄ཛྷི, ཨིམཾ ཏེམཱསཾ ཝེདནཱཔཉྩཀཨིནྡྲིཡཝསེན ཝིཧཱསི. དྭཱདསཔདིཀཾ པཙྩཡཱཀཱརཝཊྚཾ ནིཔྤདེསེན པཊིཝིཛ྄ཛྷི, ཨིམཾ ཏེམཱསཾ ཕསྶཔཙྩཡཱ ཝེདནཱཝསེནེཝ ཝིཧཱསི. ཙཏྟཱརོ སཏིཔཊྛཱནེ ནིཔྤདེསེན པཊིཝིཛ྄ཛྷི, ཨིམཾ ཏེམཱསཾ ཝེདནཱསཏིཔཊྛཱནཝསེནེཝ ཝིཧཱསི. ཙཏྟཱརི ¶ ཛྷཱནཱནི ནིཔྤདེསེན པཊིཝིཛ྄ཛྷི, ཨིམཾ ཏེམཱསཾ ཛྷཱནངྒེསུ ཝེདནཱཝསེནེཝ ཝིཧཱསི. ནཱམཾ ནིཔྤདེསེན པཊིཝིཛ྄ཛྷི, ཨིམཾ ཏེམཱསཾ ཏཏྠ ཝེདནཱཝསེནེཝ ཝིཧཱསི. དྷམྨེ ནིཔྤདེསེན པཊིཝིཛ྄ཛྷི, ཨིམཾ ཏེམཱསཾ ཝེདནཱཏྟིཀཝསེནེཝ ཝིཧཱསཱིཏི. ཨེཝཾ ཐེརོ པདེསཝིཧཱརསུཏྟནྟཝསེན ཨབྷིདྷམྨསྶ ནིདཱནཾ ཀཐེསི.

གཱམཝཱསཱི སུམནདེཝཏྠེརོ པན ཧེཊྛཱལོཧཔཱསཱདེ དྷམྨཾ པརིཝཏྟེནྟོ ‘ཨཡཾ པརཝཱདཱི བཱཧཱ པགྒཡ྄ཧ ཨརཉྙེ ཀནྡནྟོ ཝིཡ, ཨསཀྑིཀཾ ཨཌྜཾ ཀརོནྟོ ཝིཡ ཙ, ཨབྷིདྷམྨེ ནིདཱནསྶ ཨཏྠིབྷཱཝམྤི ན ཛཱནཱཏཱི’ཏི ཝཏྭཱ ནིདཱནཾ ཀཐེནྟོ ཨེཝམཱཧ – ཨེཀཾ སམཡཾ བྷགཝཱ དེཝེསུ ཝིཧརཏི ཏཱཝཏིཾསེསུ པཱརིཙྪཏྟཀམཱུལེ པཎྜུཀམྦལསིལཱཡཾ. ཏཏྲ ཁོ བྷགཝཱ དེཝཱནཾ ¶ ཏཱཝཏིཾསཱནཾ ཨབྷིདྷམྨཀཐཾ ཀཐེསི – ‘‘ཀུསལཱ དྷམྨཱ, ཨཀུསལཱ དྷམྨཱ, ཨབྱཱཀཏཱ དྷམྨཱ’’ཏི.

ཨཉྙེསུ པན སུཏྟེསུ ཨེཀམེཝ ནིདཱནཾ. ཨབྷིདྷམྨེ དྭེ ནིདཱནཱནི – ཨདྷིགམནིདཱནཉྩ དེསནཱནིདཱནཉྩ ¶ . ཏཏྠ ཨདྷིགམནིདཱནཾ དཱིཔངྐརདསབལཏོ པཊྛཱཡ ཡཱཝ མཧཱབོདྷིཔལླངྐཱ ཝེདིཏབྦཾ. དེསནཱནིདཱནཾ ཡཱཝ དྷམྨཙཀྐཔྤཝཏྟནཱ. ཨེཝཾ ཨུབྷཡནིདཱནསམྤནྣསྶ པནསྶ ཨབྷིདྷམྨསྶ ནིདཱནཀོསལླཏྠཾ ཨིདཾ ཏཱཝ པཉྷཱཀམྨཾ ཝེདིཏབྦཾ – ཨཡཾ ཨབྷིདྷམྨོ ནཱམ ཀེན པབྷཱཝིཏོ? ཀཏྠ པརིཔཱཙིཏོ? ཀཏྠ ཨདྷིགཏོ? ཀདཱ ཨདྷིགཏོ? ཀེན ཨདྷིགཏོ? ཀཏྠ ཝིཙིཏོ? ཀདཱ ཝིཙིཏོ? ཀེན ཝིཙིཏོ? ཀཏྠ དེསིཏོ? ཀསྶཏྠཱཡ དེསིཏོ? ཀིམཏྠཾ དེསིཏོ? ཀེཧི པཊིགྒཧིཏོ? ཀེ སིཀྑནྟི? ཀེ སིཀྑིཏསིཀྑཱ? ཀེ དྷཱརེནྟི? ཀསྶ ཝཙནཾ? ཀེནཱབྷཏོཏི?

ཏཏྲིདཾ ཝིསྶཛྫནཾ – ཀེན པབྷཱཝིཏོཏི བོདྷིཨབྷིནཱིཧཱརསདྡྷཱཡ པབྷཱཝིཏོ. ཀཏྠ པརིཔཱཙིཏོཏི ཨཌྜྷཚཀྐེསུ ཛཱཏཀསཏེསུ. ཀཏྠ ཨདྷིགཏོཏི བོདྷིམཱུལེ. ཀདཱ ཨདྷིགཏོཏི ཝིསཱཁཱཔུཎྞམཱསིཡཾ. ཀེནཱདྷིགཏོཏི སབྦཉྙུབུདྡྷེན. ཀཏྠ ཝིཙིཏོཏི བོདྷིམཎྜེ. ཀདཱ ¶ ཝིཙིཏོཏི རཏནགྷརསཏྟཱཧེ. ཀེན ཝིཙིཏོཏི སབྦཉྙུབུདྡྷེན. ཀཏྠ དེསིཏོཏི དེཝེསུ ཏཱཝཏིཾསེསུ. ཀསྶཏྠཱཡ དེསིཏོཏི དེཝཏཱནཾ. ཀིམཏྠཾ དེསིཏོཏི ཙཏུརོགྷནིདྡྷརཎཏྠཾ. ཀེཧི པཊིགྒཧིཏོཏི དེཝེཧི. ཀེ སིཀྑནྟཱིཏི སེཀྑཱ ཙ པུཐུཛྫནཀལྱཱཎཱ ཙ. ཀེ སིཀྑིཏསིཀྑཱཏི ཨརཧནྟོ ཁཱིཎཱསཝཱ. ཀེ དྷཱརེནྟཱིཏི ཡེསཾ ཝཏྟཏི ཏེ དྷཱརེནྟི. ཀསྶ ཝཙནནྟི བྷགཝཏོ ཝཙནཾ, ཨརཧཏོ སམྨཱསམྦུདྡྷསྶ. ཀེནཱབྷཏོཏི ཨཱཙརིཡཔརམྤརཱཡ.

ཨཡཉྷི སཱརིཔུཏྟཏྠེརོ བྷདྡཛི སོབྷིཏོ པིཡཛཱལཱི པིཡཔཱལོ པིཡདསྶཱི ཀོསིཡཔུཏྟོ སིགྒཝོ སནྡེཧོ མོགྒལིཔུཏྟོ སུདཏྟོ དྷམྨིཡོ དཱསཀོ སོཎཀོ རེཝཏོཏི ཨེཝམཱདཱིཧི ཡཱཝ ཏཏིཡསངྒཱིཏིཀཱལཱ ཨཱབྷཏོ. ཏཏོ ཨུདྡྷཾ ཏེསཾཡེཝ སིསྶཱནུསིསྶེཧཱིཏི ཨེཝཾ ཏཱཝ ཛམྦུདཱིཔཏལེ ཨཱཙརིཡཔརམྤརཱཡ ཨཱབྷཏོ. ཨིམཾ པན དཱིཔཾ –

ཏཏོ ¶ མཧིནྡོ ཨིཊྚིཡོ, ཨུཏྟིཡོ སམྦལོ ཏཐཱ;

པཎྜིཏོ བྷདྡནཱམོ ཙ, ཨེཏེ ནཱགཱ མཧཱཔཉྙཱ.

ཛམྦུདཱིཔཱ ཨིདྷཱགཏཱཏི (པརི. ༣, ༨).

ཨིམེཧི ¶ མཧཱནཱགེཧི ཨཱབྷཏོ. ཏཏོ ཨུདྡྷཾ ཏེསཾཡེཝ སིསྶཱནུསིསྶསངྑཱཏཱཡ ཨཱཙརིཡཔརམྤརཱཡ ཡཱཝཛྫཏནཀཱལཱ ཨཱབྷཏོ.

སུམེདྷཀཐཱ

ཨེཝཾ ཨཱབྷཏསྶ པནསྶ ཡཾ ཏཾ དཱིཔངྐརདསབལཏོ པཊྛཱཡ ཡཱཝ མཧཱབོདྷིཔལླངྐཱ ཨདྷིགམནིདཱནཾ, ཡཱཝ དྷམྨཙཀྐཔྤཝཏྟནཱ དེསནཱནིདཱནཉྩ ཝུཏྟཾ, ཏསྶ ཨཱཝིབྷཱཝཏྠཾ ཨཡཾ ཨནུཔུབྦིཀཐཱ ཝེདིཏབྦཱ –

ཨིཏོ ཀིར ཀཔྤསཏསཧསྶཱདྷིཀཱནཾ ཙཏུནྣཾ ཨསངྑྱེཡྻཱནཾ མཏྠཀེ ཨམརཝཏཱི ནཱམ ནགརཾ ཨཧོསི. ཏཏྠ སུམེདྷོ ནཱམ བྲཱཧྨཎོ པཊིཝསཏི ཨུབྷཏོ སུཛཱཏོ, མཱཏིཏོ ཙ པིཏིཏོ ཙ, སཾསུདྡྷགཧཎིཀོ, ཡཱཝ སཏྟམཱ ཀུལཔརིཝཊྚཱ ཨཀྑིཏྟོ ཨནུཔཀུཊྛོ ཛཱཏིཝཱདེན, ཨབྷིརཱུཔོ དསྶནཱིཡོ པཱསཱདིཀོ པརམཱཡ ཝཎྞཔོཀྑརཏཱཡ སམནྣཱགཏོ. སོ ཨཉྙཾ ཀམྨཾ ཨཀཏྭཱ བྲཱཧྨཎསིཔྤམེཝ ཨུགྒཎྷི. ཏསྶ དཧརཀཱལེཡེཝ མཱཏཱཔིཏརོ ཀཱལམཀཾསུ. ཨཐསྶ རཱསིཝཌྜྷཀོ ཨམཙྩོ ཨཱཡཔོཏྠཀཾ ཨཱཧརིཏྭཱ སུཝཎྞརཛཏམཎིམུཏྟཱདིཔཱུརིཏེ གབྦྷེ ཝིཝརིཏྭཱ ‘ཨེཏྟཀཾ ཏེ ཀུམཱར མཱཏུ སནྟཀཾ, ཨེཏྟཀཾ པིཏུ སནྟཀཾ, ཨེཏྟཀཱ ཨཡྻཀཔཡྻཀཱནཾ སནྟཀཱཏི ཡཱཝ སཏྟམཱ ཀུལཔརིཝཊྚཱ དྷནཾ ཨཱཙིཀྑིཏྭཱ ཨེཏཾ པཊིཔཛྫཱཧཱི’ཏི ཨཱཧ. སུམེདྷཔཎྜིཏོ ཙིནྟེསི – ‘ཨིམཾ དྷནཾ སཾཧརིཏྭཱ མཡ྄ཧཾ པིཏུཔིཏཱམཧཱདཡོ པརལོཀཾ གཙྪནྟཱ ཨེཀཀཧཱཔཎམྤི གཧེཏྭཱ ན གཏཱ, མཡཱ པན གཧེཏྭཱ གམནཀཱརཎཾ ཀཱཏུཾ ཝཊྚཏཱི’ཏི སོ རཉྙོ ཨཱརོཙེཏྭཱ ནགརེ བྷེརིཾ ཙརཱཔེཏྭཱ མཧཱཛནསྶ དཱནཾ དཏྭཱ ཏཱཔསཔབྦཛྫཾ པབྦཛི. ཨིམསྨིཾ པན ཋཱནེ སུམེདྷཀཐཱ ཀཐེཏབྦཱ. ཝུཏྟཉྷེཏཾ བུདྡྷཝཾསེ (བུ. ཝཾ. ༢.༡-༣༣) –

ཀཔྤེ ཙ སཏསཧསྶེ, ཙཏུརོ ཙ ཨསངྑིཡེ;

ཨམརཾ ནཱམ ནགརཾ, དསྶནེཡྻཾ མནོརམཾ.

དསཧི ¶ སདྡེཧི ཨཝིཝིཏྟཾ, ཨནྣཔཱནསམཱཡུཏཾ;

ཧཏྠིསདྡཾ ཨསྶསདྡཾ, བྷེརིསངྑརཐཱནི ཙ;

ཁཱདཐ པིཝཐ ཙེཝ, ཨནྣཔཱནེན གྷོསིཏཾ.

ནགརཾ ¶ སབྦངྒསམྤནྣཾ, སབྦཀམྨམུཔཱགཏཾ;

སཏྟརཏནསམྤནྣཾ, ནཱནཱཛནསམཱཀུལཾ;

སམིདྡྷཾ དེཝནགརཾཝ, ཨཱཝཱསཾ པུཉྙཀམྨིནཾ.

ནགརེ ཨམརཝཏིཡཱ, སུམེདྷོ ནཱམ བྲཱཧྨཎོ;

ཨནེཀཀོཊིསནྣིཙཡོ, པཧཱུཏདྷནདྷཉྙཝཱ.

ཨཛ྄ཛྷཱཡཀོ མནྟདྷརོ, ཏིཎྞཾ ཝེདཱན པཱརགཱུ;

ལཀྑཎེ ཨིཏིཧཱསེ ཙ, སདྷམྨེ པཱརམིཾ གཏོ.

རཧོགཏོ ནིསཱིདིཏྭཱ, ཨེཝཾ ཙིནྟེསཧཾ ཏདཱ;

དུཀྑོ པུནབྦྷཝོ ནཱམ, སརཱིརསྶ ཙ བྷེདནཾ.

ཛཱཏིདྷམྨོ ཛརཱདྷམྨོ, བྱཱདྷིདྷམྨོ སཧཾ ཏདཱ;

ཨཛརཾ ཨམཏཾ ཁེམཾ, པརིཡེསིསྶཱམི ནིབྦུཏིཾ.

ཡཾནཱུནིམཾ པཱུཏིཀཱཡཾ, ནཱནཱཀུཎཔཔཱུརིཏཾ;

ཚཌྜཡིཏྭཱན གཙྪེཡྻཾ, ཨནཔེཀྑོ ཨནཏྠིཀོ.

ཨཏྠི ཧེཧིཏི སོ མགྒོ, ན སོ སཀྐཱ ན ཧེཏུཡེ;

པརིཡེསིསྶཱམི ཏཾ མགྒཾ, བྷཝཏོ པརིམུཏྟིཡཱ.

ཡཐཱཔི དུཀྑེ ཝིཛྫནྟེ, སུཁཾ ནཱམཔི ཝིཛྫཏི;

ཨེཝཾ བྷཝེ ཝིཛྫམཱནེ, ཝིབྷཝོཔི ཨིཙྪིཏབྦཀོ.

ཡཐཱཔི ཨུཎྷེ ཝིཛྫནྟེ, ཨཔརཾ ཝིཛྫཏི སཱིཏལཾ;

ཨེཝཾ ཏིཝིདྷགྒི ཝིཛྫནྟེ, ནིབྦཱནཾ ཨིཙྪིཏབྦཀཾ.

ཡཐཱཔི པཱཔེ ཝིཛྫནྟེ, ཀལྱཱཎམཔི ཝིཛྫཏི;

ཨེཝམེཝ ཛཱཏི ཝིཛྫནྟེ, ཨཛཱཏིཔིཙྪིཏབྦཀཾ.

ཡཐཱ ¶ ¶ གཱུཐགཏོ པུརིསོ, ཏལཱ༹ཀཾ དིསྭཱན པཱུརིཏཾ;

ན གཝེསཏི ཏཾ ཏལཱ༹ཀཾ, ན དོསོ ཏལཱ༹ཀསྶ སོ.

ཨེཝཾ ཀིལེསམལདྷོཝེ, ཝིཛྫནྟེ ཨམཏནྟལེ༹;

ན གཝེསཏི ཏཾ ཏལཱ༹ཀཾ, ན དོསོ ཨམཏནྟལེ༹.

ཡཐཱ ཨརཱིཧི པརིརུདྡྷོ, ཝིཛྫནྟེ གམནམྤཐེ;

ན པལཱཡཏི སོ པུརིསོ, ན དོསོ ཨཉྫསསྶ སོ.

ཨེཝཾ ཀིལེསཔརིརུདྡྷོ, ཝིཛྫམཱནེ སིཝེ པཐེ;

ན གཝེསཏི ཏཾ མགྒཾ, ན དོསོ སིཝམཉྫསེ.

ཡཐཱཔི བྱཱདྷིཏོ པུརིསོ, ཝིཛྫམཱནེ ཏིཀིཙྪཀེ;

ན ཏིཀིཙྪཱཔེཏི ཏཾ བྱཱདྷིཾ, ན དོསོ སོ ཏིཀིཙྪཀེ.

ཨེཝཾ ཀིལེསབྱཱདྷཱིཧི, དུཀྑིཏོ པརིཔཱིལི༹ཏོ;

ན གཝེསཏི ཏཾ ཨཱཙརིཡཾ, ན དོསོ སོ ཝིནཱཡཀེ.

ཡཐཱཔི ཀུཎཔཾ པུརིསོ, ཀཎྛེ བདྡྷཾ ཛིགུཙྪིཡ;

མོཙཡིཏྭཱན གཙྪེཡྻ, སུཁཱི སེརཱི སཡཾཝསཱི.

ཏཐེཝིམཾ པཱུཏིཀཱཡཾ, ནཱནཱཀུཎཔསཉྩཡཾ;

ཚཌྜཡིཏྭཱན གཙྪེཡྻཾ, ཨནཔེཀྑོ ཨནཏྠིཀོ.

ཡཐཱ ཨུཙྩཱརཊྛཱནམྷི, ཀརཱིསཾ ནརནཱརིཡོ;

ཚཌྜཡིཏྭཱན གཙྪནྟི, ཨནཔེཀྑཱ ཨནཏྠིཀཱ.

ཨེཝམེཝཱཧཾ ¶ ཨིམཾ ཀཱཡཾ, ནཱནཱཀུཎཔཔཱུརིཏཾ;

ཚཌྜཡིཏྭཱན གཙྪིསྶཾ, ཝཙྩཾ ཀཏྭཱ ཡཐཱ ཀུཊིཾ.

ཡཐཱཔི ཛཛྫརཾ ནཱཝཾ, པལུགྒཾ ཨུདགཱཧིནིཾ;

སཱམཱི ཚཌྜེཏྭཱ གཙྪནྟི, ཨནཔེཀྑཱ ཨནཏྠིཀཱ.

ཨེཝམེཝཱཧཾ ཨིམཾ ཀཱཡཾ, ནཝཙྪིདྡཾ དྷུཝསྶཝཾ;

ཚཌྜཡིཏྭཱན གཙྪིསྶཾ, ཛིཎྞནཱཝཾཝ སཱམིཀཱ.

ཡཐཱཔི པུརིསོ ཙོརེཧི, གཙྪནྟོ བྷཎྜམཱདིཡ;

བྷཎྜཙྪེདབྷཡཾ དིསྭཱ, ཚཌྜཡིཏྭཱན གཙྪཏི.

ཨེཝམེཝ ¶ ཨཡཾ ཀཱཡོ, མཧཱཙོརསམོ ཝིཡ;

པཧཱཡིམཾ གམིསྶཱམི, ཀུསལཙྪེདནཱབྷཡཱ.

ཨེཝཱཧཾ ཙིནྟཡིཏྭཱན, ནེཀཀོཊིསཏཾ དྷནཾ;

ནཱཐཱནཱཐཱནཾ དཏྭཱན, ཧིམཝནྟམུཔཱགམིཾ.

ཧིམཝནྟསྶཱཝིདཱུརེ, དྷམྨིཀོ ནཱམ པབྦཏོ;

ཨསྶམོ སུཀཏོ མཡ྄ཧཾ, པཎྞསཱལཱ སུམཱཔིཏཱ.

ཙངྐམཾ ཏཏྠ མཱཔེསིཾ, པཉྩདོསཝིཝཛྫིཏཾ;

ཨཊྛགུཎསམུཔེཏཾ, ཨབྷིཉྙཱབལམཱཧརིཾ.

སཱཊཀཾ པཛཧིཾ ཏཏྠ, ནཝདོསམུཔཱགཏཾ;

ཝཱཀཙཱིརཾ ནིཝཱསེསིཾ, དྭཱདསགུཎམུཔཱགཏཾ.

ཨཊྛདོསསམཱཀིཎྞཾ ¶ , པཛཧིཾ པཎྞསཱལཀཾ;

ཨུཔཱགམིཾ རུཀྑམཱུལཾ, གུཎེ དསཧུཔཱགཏཾ.

ཝཱཔིཏཾ རོཔིཏཾ དྷཉྙཾ, པཛཧིཾ ནིརཝསེསཏོ;

ཨནེཀགུཎསམྤནྣཾ, པཝཏྟཕལམཱདིཡིཾ.

ཏཏྠཔྤདྷཱནཾ པདཧིཾ, ནིསཛྫཊྛཱནཙངྐམེ;

ཨབྦྷནྟརམྷི སཏྟཱཧེ, ཨབྷིཉྙཱབལ པཱཔུཎིནྟི. (བུ. ཝཾ. ༢.༡-༣༣);

ཏཏྠ ཨསྶམོ སུཀཏོ མཡ྄ཧཾ, པཎྞསཱལཱ སུམཱཔིཏཱཏི ཨིམིསྶཱ པཱལི༹ཡཱ སུམེདྷཔཎྜིཏེན ཨསྶམཔཎྞསཱལཱཙངྐམཱ སཧཏྠཱ མཱཔིཏཱ ཝིཡ ཝུཏྟཱ. ཨཡཾ པནེཏྠ ཨཏྠོ – མཧཱསཏྟཉྷི ‘‘ཧིམཝནྟཾ ཨཛ྄ཛྷོགཱཧེཏྭཱ ཨཛྫ དྷམྨིཀཔབྦཏཾ པཝིསིསྶཱམཱི’’ཏི ནིཀྑནྟཾ དིསྭཱ སཀྐོ དེཝཱནམིནྡོ ཝིསྶཀམྨདེཝཔུཏྟཾ ཨཱམནྟེསི – ‘‘གཙྪ, ཏཱཏ, ཨཡཾ སུམེདྷཔཎྜིཏོ ‘པབྦཛིསྶཱམཱི’ཏི ནིཀྑནྟོ ཨེཏསྶ ཝསནཊྛཱནཾ མཱཔེཧཱི’’ཏི. སོ ཏསྶ ཝཙནཾ སམྤཊིཙྪིཏྭཱ རམཎཱིཡཾ ཨསྶམཾ སུགུཏྟཾ པཎྞསཱལཾ, མནོརམཾ ཙངྐམཉྩ མཱཔེསི. བྷགཝཱ པན ཏདཱ ཨཏྟནོ པུཉྙཱནུབྷཱཝེན ནིཔྥནྣཾ ཏཾ ཨསྶམཔདཾ སནྡྷཱཡ ‘‘སཱརིཔུཏྟ ཏསྨིཾ དྷམྨིཀཔབྦཏེ –

ཨསྶམོ ¶ སུཀཏོ མཡ྄ཧཾ, པཎྞསཱལཱ སུམཱཔིཏཱ;

ཙངྐམཾ ཏཏྠ མཱཔེསིཾ, པཉྩདོསཝིཝཛྫིཏ’’ནྟི. –

ཨཱཧ. ཏཏྠ ཨསྶམོ སུཀཏོ མཡ྄ཧནྟི སུཀཏོ མཡཱ. པཎྞསཱལཱ སུམཱཔིཏཱཏི པཎྞཙྪནྣཱ སཱལཱཔི མེ སུམཱཔིཏཱ ཨཧོསི.

པཉྩདོསཝིཝཛྫིཏནྟི པཉྩིམེ ཙངྐམདོསཱ ནཱམ ཐདྡྷཝིསམཏཱ, ཨནྟོརུཀྑཏཱ, གཧནཙྪནྣཏཱ, ཨཏིསམྦཱདྷཏཱ, ཨཏིཝིསཱལཏཱཏི. ཐདྡྷཝིསམབྷཱུམིབྷཱགསྨིཉྷི ཙངྐམེ ཙངྐམནྟསྶ པཱདཱ རུཛྫནྟི, ཕོཊཱ ཨུཊྛཧནྟི, ཙིཏྟཾ ཨེཀགྒཏཾ ན ལབྷཏི, ཀམྨཊྛཱནཾ ཝིཔཛྫཏི. མུདུསམཏལེ པན ཕཱསུཝིཧཱརཾ ཨཱགམྨ ཀམྨཊྛཱནཾ སམྤཛྫཏི. ཏསྨཱ ཐདྡྷཝིསམབྷཱུམིབྷཱགཏཱ ཨེཀོ དོསོཏི ཝེདིཏབྦོ. ཙངྐམནསྶ ཨནྟོ ཝཱ མཛ྄ཛྷེ ཝཱ ཀོཊིཡཾ ཝཱ ¶ རུཀྑེ སཏི པམཱདམཱགམྨ ཙངྐམནྟསྶ ནལཱཊཾ ཝཱ སཱིསཾ ཝཱ པཊིཧཉྙཏཱིཏི ཨནྟོརུཀྑཏཱ དུཏིཡོ དོསོ. ཏིཎལཏཱདིགཧནཙྪནྣེ ཙངྐམེ ཙངྐམནྟོ ཨནྡྷཀཱརཝེལཱཡཾ ཨུརགཱདིཀེ པཱཎེ ཨཀྐམིཏྭཱ ཝཱ མཱརེཏི, ཏེཧི ཝཱ དཊྛོ དུཀྑཾ ཨཱཔཛྫཏཱིཏི གཧནཙྪནྣཏཱ ཏཏིཡོ དོསོ. ཨཏིསམྦཱདྷེ ཙངྐམེ ཝིཏྠཱརཏོ རཏནིཀེ ཝཱ ཨཌྜྷརཏནིཀེ ཝཱ ཙངྐམནྟསྶ པརིཙྪེདེ པཀྑལིཏྭཱ ནཁཱཔི ཨངྒུལིཡོཔི བྷིཛྫནྟཱིཏི ཨཏིསམྦཱདྷཏཱ ཙཏུཏྠོ དོསོ. ཨཏིཝིསཱལེ ཙངྐམེ ཙངྐམནྟསྶ ཙིཏྟཾ ཝིདྷཱཝཏི, ཨེཀགྒཏཾ ན ལབྷཏཱིཏི ཨཏིཝིསཱལཏཱ པཉྩམོ དོསོ. པུཐུལཏོ པན དིཡཌྜྷརཏནཾ དྭཱིསུ པསྶེསུ རཏནམཏྟཨནུཙངྐམཾ དཱིགྷཏོ སཊྛིཧཏྠཾ མུདུཏལཾ སམཝིཔྤཀིཎྞཝཱལུཀཾ ཙངྐམཾ ཝཊྚཏི, ཙེཏིཡགིརིམྷི དཱིཔཔྤསཱདཀམཧཱམཧིནྡཏྠེརསྶ ཙངྐམནཾ ཝིཡ, ཏཱདིསཾ ཏཾ ཨཧོསི. ཏེནཱཧ ‘‘ཙངྐམཾ ཏཏྠ མཱཔེསིཾ, པཉྩདོསཝིཝཛྫིཏ’’ནྟི.

ཨཊྛགུཎསམུཔེཏནྟི ཨཊྛཧི སམཎསུཁེཧི ཨུཔེཏཾ. ཨཊྛིམཱནི སམཎསུཁཱནི ནཱམ དྷནདྷཉྙཔརིགྒཧཱབྷཱཝོ ཨནཝཛྫཔིཎྜཔརིཡེསནབྷཱཝོ, ནིབྦུཏཔིཎྜབྷུཉྫནབྷཱཝོ, རཊྛཾ པཱིལེ༹ཏྭཱ དྷནསཱརཾ ཝཱ སཱིསཀཧཱཔཎཱདཱིནི ཝཱ གཎྷནྟེསུ རཱཛཀུལེསུ རཊྛཔཱིལ༹ནཀིལེསཱབྷཱཝོ, ཨུཔཀརཎེསུ ནིཙྪནྡརཱགབྷཱཝོ, ཙོརཝིལོཔེ ནིབྦྷཡབྷཱཝོ, རཱཛརཱཛམཧཱམཙྩེཧི ཨསཾསཊྛབྷཱཝོ ཙཏཱུསུ དིསཱསུ ཨཔྤཊིཧཏབྷཱཝོཏི. ཨིདཾ ཝུཏྟཾ ཧོཏི ¶ ‘‘ཡཐཱ ཏསྨིཾ ཨསྶམེ ཝསནྟེན སཀྐཱ ཧོནྟི ཨིམཱནི ཨཊྛ སམཎསུཁཱནི ཝིནྡིཏུཾ, ཨེཝཾ ཨཊྛགུཎསམུཔེཏཾ ཏཾ ཨསྶམཾ མཱཔེསི’’ ནྟི.

ཨབྷིཉྙཱབལམཱཧརིནྟི པཙྪཱ ཏསྨིཾ ཨསྶམེ ཝསནྟོ ཀསིཎཔརིཀམྨཾ ཀཏྭཱ ཨབྷིཉྙཱནཉྩ སམཱཔཏྟཱིནཉྩ ཨུཔྤཱདནཏྠཱཡ ཨནིཙྩཏོ དུཀྑཏོ ཝིཔསྶནཾ ཨཱརབྷིཏྭཱ ཐཱམཔྤཏྟཾ ཝིཔསྶནཱབལཾ ཨཱཧརིཾ. ཡཐཱ ཏསྨིཾ ཝསནྟོ ཏཾ བལཾ ཨཱཧརིཏུཾ སཀྐོམི, ཨེཝཾ ཏཾ ཨསྶམཾ ཏསྶ ཨབྷིཉྙཏྠཱཡ ཝིཔསྶནཱབལསྶ ཨནུཙྪཝིཀཾ ཀཏྭཱ མཱཔེསིནྟི ཨཏྠོ.

སཱཊཀཾ པཛཧིཾ ཏཏྠ, ནཝདོསམུཔཱགཏནྟི ཨེཏྠཱཡཾ ཨནུཔུབྦིཀཐཱ, ཏདཱ ཀིར ཀུཊིལེཎཙངྐམཱདིཔཊིམཎྜིཏཾ པུཔྥཱུཔགཕལཱུཔགརུཀྑསཉྪནྣཾ རམཎཱིཡཾ མདྷུརསལིལཱསཡཾ ཨཔགཏཝཱལ༹མིགབྷིཾསནཀསཀུཎཾ པཝིཝེཀཀྑམཾ ཨསྶམཾ མཱཔེཏྭཱ ཨལངྐཏཙངྐམསྶ ཨུབྷོསུ ཨནྟེསུ ཨཱལམྦནཕལཀཾ སཾཝིདྷཱཡ ནིསཱིདནཏྠཱཡ ཙངྐམཝེམཛ྄ཛྷེ སམཏལཾ མུགྒཝཎྞསིལཾ མཱཔེཏྭཱ ཨནྟོཔཎྞསཱལཱཡཾ ཛཊཱམཎྜལཝཱཀཙཱིརཏིདཎྜཀུཎྜིཀཱདིཀེ ཏཱཔསཔརིཀྑཱརེ མཎྜཔེ པཱནཱིཡགྷཊཔཱནཱིཡསངྑཔཱནཱིཡསརཱཝཱནི ཨགྒིསཱལཱཡཾ ཨངྒཱརཀཔལླདཱརུཨཱདཱིནཱིཏི ཨེཝཾ ཡཾ ཡཾ པབྦཛིཏཱནཾ ¶ ཨུཔཀཱརཱཡ སཾཝཏྟཏི, ཏཾ ཏཾ སབྦཾ མཱཔེཏྭཱ པཎྞསཱལཱཡ བྷིཏྟིཡཾ ‘‘ཡེ ཀེཙི པབྦཛིཏུཀཱམཱ ཨིམེ པརིཀྑཱརེ གཧེཏྭཱ པབྦཛནྟཱུ’’ཏི ཨཀྑརཱནི ཚིནྡིཏྭཱ དེཝལོཀམེཝ གཏེ ཝིསྶཀམྨདེཝཔུཏྟེ སུམེདྷཔཎྜིཏོ ཧིམཝནྟཔཱདེ གིརིཀནྡརཱནུསཱརེན ཨཏྟནོ ནིཝཱསནཱནུརཱུཔཾ ཕཱསུཀཊྛཱནཾ ཨོལོཀེནྟོ ནདཱིནིཝཏྟནེ ཝིསྶཀམྨནིམྨིཏཾ སཀྐདཏྟིཡཾ རམཎཱིཡཾ ཨསྶམཾ དིསྭཱ ཙངྐམཀོཊིཾ གནྟྭཱ པདཝལཉྫཾ ཨཔསྶནྟོ ‘‘དྷུཝཾ པབྦཛིཏཱ དྷུརགཱམེ བྷིཀྑཾ པརིཡེསིཏྭཱ ཀིལནྟརཱུཔཱ ཨཱགནྟྭཱ པཎྞསཱལཾ པཝིསིཏྭཱ ནིསིནྣཱ བྷཝིསྶནྟཱི’’ཏི ཙིནྟེཏྭཱ ཐོཀཾ ཨཱགམེཏྭཱ ‘‘ཨཏིཝིཡ ཙིརཱཡནྟི, ཛཱནིསྶཱམཱི’’ཏི པཎྞསཱལཀུཊིདྭཱརཾ ཝིཝརིཏྭཱ ཨནྟོ པཝིསིཏྭཱ ཨིཏོ ཙིཏོ ཙ ཨོལོཀེནྟོ མཧཱབྷིཏྟིཡཾ ཨཀྑརཱནི ཝཱཙེཏྭཱ ‘‘མཡ྄ཧཾ ཀཔྤིཡཔརིཀྑཱརཱ ཨེཏེ, ཨིམེ གཧེཏྭཱ པབྦཛིསྶཱམཱི’’ཏི ཨཏྟནཱ ནིཝཏྠཔཱརུཏཾ སཱཊཀཡུགཾ པཛཧི. ཏེནཱཧ ‘‘སཱཊཀཾ པཛཧིཾ ཏཏྠཱ’’ཏི. ཨེཝཾ པཝིཊྛོ ཨཧཾ སཱརིཔུཏྟ ཏསྶཾ པཎྞསཱལཱཡཾ སཱཊཀཾ པཛཧིཾ.

ནཝདོསམུཔཱགཏནྟི ¶ སཱཊཀཾ པཛཧནྟོ ནཝ དོསེ དིསྭཱ པཛཧིནྟི དཱིཔེཏི. ཏཱཔསཔབྦཛྫཾ པབྦཛིཏཱནཉྷི སཱཊཀསྨིཾ ནཝ དོསཱ ཨུཔཊྛཧནྟི. ཏེསུ ཏསྶ མཧགྒྷབྷཱཝོ ཨེཀོ དོསོ, པརཔཊིབདྡྷཏཱཡ ཨུཔྤཛྫནབྷཱཝོ ཨེཀོ, པརིབྷོགེན ལཧུཾ ཀིལིསྶནབྷཱཝོ ཨེཀོ, ཀིལིཊྛོ ཧི དྷོཝིཏབྦོ ཙ རཛིཏབྦོ ཙ ཧོཏི, པརིབྷོགེན ལཧུཀཾ ཛཱིརཎབྷཱཝོ ཨེཀོ ཛིཎྞསྶ ཧི ཏུནྣཾ ཝཱ ཨགྒལ༹དཱནཾ ཝཱ ཀཱཏབྦཾ ཧོཏི. པུནཔརིཡེསནཱཡ དུརབྷིསམྦྷཝབྷཱཝོ ཨེཀོ, ཏཱཔསཔབྦཛྫཱཡ ཨསཱརུཔྤབྷཱཝོ ཨེཀོ, པཙྩཏྠིཀཱནཾ སཱདྷཱརཎབྷཱཝོ ཨེཀོ, ཡཐཱ ཧི ནཾ པཙྩཏྠིཀཱ ན གཎྷནྟི, ཨེཝཾ གོཔེཏབྦོ ཧོཏི. པརིབྷུཉྫནྟསྶ ཝིབྷཱུསནཊྛཱནབྷཱཝོ ཨེཀོ, གཧེཏྭཱ ཙརནྟསྶ ཁནྡྷབྷཱརམཧིཙྪབྷཱཝོ ཨེཀོཏི.

ཝཱཀཙཱིརཾ ནིཝཱསེསིནྟི ཏདཱ ཨཧཾ སཱརིཔུཏྟ ཨིམེ ནཝ དོསེ དིསྭཱ སཱཊཀཾ པཧཱཡ ཝཱཀཙཱིརཾ ནིཝཱསེསིཾ མུཉྫཏིཎཾ ཧཱིརཾ ཧཱིརཾ ཀཏྭཱ གནྠེཏྭཱ ཀཏཾ ཝཱཀཙཱིརཾ ནིཝཱསནཔཱརུཔནཏྠཱཡ ཨཱདིཡིནྟི ཨཏྠོ.

དྭཱདསགུཎམུཔཱགཏནྟི དྭཱདསཧི ཨཱནིསཾསེཧི སམནྣཱགཏཾ, ཝཱཀཙཱིརསྨིཉྷི དྭཱདསཱནིསཾསཱ – ཨཔྤགྒྷཾ སུནྡརཾ ཀཔྤིཡནྟི ཨཡཾ ཏཱཝ ཨེཀོ ཨཱནིསཾསོ, སཧཏྠཱ ཀཱཏུཾ སཀྐཱཏི ཨཡཾ དུཏིཡོ, པརིབྷོགེན སཎིཀཾ ཀིལིསྶཏི དྷོཝིཡམཱནེཔི པཔཉྩོ ནཏྠཱིཏི ཨཡཾ ཏཏིཡོ, པརིབྷོགེན ཛིཎྞེཔི སིབྦིཏབྦཱབྷཱཝོ ཙཏུཏྠོ, པུན པརིཡེསནྟསྶ སུཁེན ཀརཎབྷཱཝོ ¶ པཉྩམོ, ཏཱཔསཔབྦཛྫཱཡ སཱརུཔྤབྷཱཝོ ཚཊྛོ, པཙྩཏྠིཀཱནཾ ནིརུཔབྷོགབྷཱཝོ སཏྟམོ, པརིབྷུཉྫནྟསྶ ཝིབྷཱུསནཊྛཱནཱབྷཱཝོ ཨཊྛམོ, དྷཱརཎེ སལླཧུཀབྷཱཝོ ནཝམོ, ཙཱིཝརཔཙྩཡེ ཨཔྤིཙྪབྷཱཝོ དསམོ, ཝཱཀུཔྤཏྟིཡཱ དྷམྨིཀཨནཝཛྫབྷཱཝོ ཨེཀཱདསམོ ཝཱཀཙཱིརེ ནཊྛེཔི ཨནཔེཀྑབྷཱཝོ དྭཱདསམོཏི.

ཨཊྛདོསསམཱཀིཎྞཾ, པཛཧིཾ པཎྞསཱལཀནྟི ཀཐཾ པཛཧིཾ? སོ ཀིར ཝརསཱཊཀཡུགཾ ཨོམུཉྩནྟོ ཙཱིཝརཝཾསེ ལགྒིཏཾ ཨནོཛཔུཔྥདཱམསདིསཾ རཏྟཝཱཀཙཱིརཾ གཧེཏྭཱ ནིཝཱསེཏྭཱ ཏསྶུཔརི ཨཔརཾ སུཝཎྞཝཎྞཾ ཝཱཀཙཱིརཾ པརིདཧིཏྭཱ པུནྣཱགཔུཔྥསནྠརསདིསཾ སཁུརཾ ཨཛིནཙམྨཾ ཨེཀཾསཾ ཀཏྭཱ ཛཊཱམཎྜལཾ ¶ པཊིམུཉྩིཏྭཱ ཙཱུལཱ༹ཡ སདྡྷིཾ ནིཙྩལབྷཱཝཀརཎཏྠཾ སཱརསཱུཙིཾ པཝེསེཏྭཱ མུཏྟཱཛཱལསདིསཱཡ སིཀྐཱཡ པཝཱལ༹ཝཎྞཾ ཀུཎྜིཀཾ ཨོདཧིཏྭཱ ཏཱིསུ ཋཱནེསུ ཝངྐཀཱཛཾ ཨཱདཱཡ ཨེཀིསྶཱ ཀཱཛཀོཊིཡཱ ཀུཎྜིཀཾ, ཨེཀིསྶཱ ཨངྐུསཀཔཙྪིཏིདཎྜཀཱདཱིནི ཨོལགྒེཏྭཱ ཁཱརིཀཱཛཾ ཨཾསེ ཀཏྭཱ དཀྑིཎེན ཧཏྠེན ཀཏྟརདཎྜཾ གཧེཏྭཱ པཎྞསཱལཏོ ནིཀྑམིཏྭཱ སཊྛིཧཏྠེ མཧཱཙངྐམེ ཨཔརཱཔརཾ ཙངྐམནྟོ ཨཏྟནོ ཝེསཾ ཨོལོཀེཏྭཱ ‘‘མཡ྄ཧཾ མནོརཐོ མཏྠཀཾ པཏྟོ, སོབྷཏི ཝཏ མེ པབྦཛྫཱ, བུདྡྷཔཙྩེཀབུདྡྷཱདཱིཧི སབྦེཧིཔི དྷཱིརཔུརིསེཧི ཝཎྞིཏཱ ཐོམིཏཱ ཨཡཾ པབྦཛྫཱ ནཱམ, པཧཱིནཾ མེ གིཧིབནྡྷནཾ, ནིཀྑནྟོསྨི ནེཀྑམྨཾ, ལདྡྷཱ མེ ཨུཏྟམཔབྦཛྫཱ, ཀརིསྶཱམི སམཎདྷམྨཾ, ལབྷིསྶཱམི ཨགྒཕལསུཁ’’ནྟི ཨུསྶཱཧཛཱཏོ ཁཱརིཀཱཛཾ ཨོཏཱརེཏྭཱ ཙངྐམཝེམཛ྄ཛྷེ མུགྒཝཎྞསིལཱཔཊྚེ སུཝཎྞཔཊིམཱ ཝིཡ ནིསིནྣོ དིཝསབྷཱགཾ ཝཱིཏིནཱམེཏྭཱ སཱཡནྷསམཡཾ པཎྞསཱལཾ པཝིསིཏྭཱ བིདལམཉྩཀཔསྶེ ཀཊྛཏྠརིཀཱཡ ནིཔནྣོ སརཱིརཾ ཨུཏུཾ གཱཧཱཔེཏྭཱ བལཝཔཙྩཱུསེ པབུཛ྄ཛྷིཏྭཱ ཨཏྟནོ ཨཱགམནཾ ཨཱཝཛྫེསི ‘‘ཨཧཾ གྷརཱཝཱསེ ཨཱདཱིནཝཾ དིསྭཱ ཨམིཏབྷོགཾ ཨནནྟཡསཾ པཧཱཡ ཨརཉྙཾ པཝིསིཏྭཱ ནེཀྑམགཝེསཀོ ཧུཏྭཱ པབྦཛིཏོ, ཨིཏོ དཱནི པཊྛཱཡ པམཱདཙཱརཾ ཙརིཏུཾ ན ཝཊྚཏི, པཝིཝེཀཉྷི པཧཱཡ ཝིཙརནྟཾ མིཙྪཱཝིཏཀྐམཀྑིཀཱ ཁཱདནྟི, ཨིདཱནི མཡཱ པཝིཝེཀམནུབྲཱུཧེཏུཾ ཝཊྚཏི, ཨཧཉྷི གྷརཱཝཱསཾ པལིབོདྷཏོ དིསྭཱ ནིཀྑནྟོ, ཨཡཉྩ མནཱཔཱ པཎྞསཱལཱ, བེལུཝཔཀྐཝཎྞཱ པརིབྷཎྜཀཏཱ བྷཱུམི, རཛཏཝཎྞཱ སེཏབྷིཏྟིཡོ, ཀཔོཏཔཱདཝཎྞཾ པཎྞཙྪདནཾ, ཝིཙིཏྟཏྠརཎཝཎྞོ བིདལམཉྩཀོ, ནིཝཱསཕཱསུཀཾ ཝསནཊྛཱནཾ, ན ཨེཏྟོ ཨཏིརེཀཏརཱ ཝིཡ མེ གེཧསམྤདཱ པཉྙཱཡཏཱི’’ཏི པཎྞསཱལཱཡ དོསེ ཝིཙིནནྟོ ཨཊྛ དོསེ པསྶི.

པཎྞསཱལཱཔརིབྷོགསྨིཉྷི ཨཊྛ ཨཱདཱིནཝཱ – མཧཱསམཱརམྦྷེན? དབྦསམྦྷཱརེ སམོདྷཱནེཏྭཱ ཀརཎཔརིཡེསནབྷཱཝོ ¶ ཨེཀོ ཨཱདཱིནཝོ. ཏིཎཔཎྞམཏྟིཀཱསུ པཏིཏཱསུ ཏཱསཾ པུནཔྤུནཾ ཋཔེཏབྦཏཱཡ ནིབདྡྷཛགྒནབྷཱཝོ ¶ དུཏིཡོ, སེནཱསནཾ ནཱམ མཧལླཀསྶ པཱཔུཎཱཏི, ཨཝེལཱཡ ཝུཊྛཱཔིཡམཱནསྶ ཙིཏྟེཀགྒཏཱ ན ཧོཏཱིཏི ཨུཊྛཱཔནཱིཡབྷཱཝོ ཏཏིཡོ, སཱིཏུཎྷཔཊིགྷཱཏེན ཀཱཡསྶ སུཁུམཱལཀརཎབྷཱཝོ ཙཏུཏྠོ, གེཧཾ པཝིཊྛེན ཡཾཀིཉྩི པཱཔཾ སཀྐཱ ཀཱཏུནྟི གརཧཔཊིཙྪཱདནབྷཱཝོ པཉྩམོ, ‘‘མཡ྄ཧ’’ནྟི པརིགྒཧཀརཎབྷཱཝོ ཚཊྛོ, གེཧསྶ ཨཏྠིབྷཱཝོ ནཱམེས དུཏིཡཀཝཱསོ ཝིཡཱཏི སཏྟམོ ཨཱུཀཱམངྒུལགྷརགོལི༹ཀཱདཱིནཾ སཱདྷཱརཎཏཱཡ བཧུསཱདྷཱརཎབྷཱཝོ ཨཊྛམོཏི ཨིམེ ཨཊྛ ཨཱདཱིནཝེ དིསྭཱ མཧཱསཏྟོ པཎྞསཱལཾ པཛཧི. ཏེནཱཧ ‘‘ཨཊྛདོསསམཱཀིཎྞཾ, པཛཧིཾ པཎྞསཱལཀ’’ནྟི.

ཨུཔཱགམིཾ རུཀྑམཱུལཾ གུཎེ དསཧུཔཱགཏནྟི ཚནྣཾ པཊིཀྑིཔིཏྭཱ དསཧི གུཎེཧི ཨུཔེཏཾ རུཀྑམཱུལཾ ཨུཔཱགཏོསྨཱིཏི ཝདཏི.

ཏཏྲིམེ དས གུཎཱ – ཨཔྤསམཱརམྦྷཏཱ ཨེཀོ གུཎོ ཨུཔགམནམཏྟམེཝ ཧི ཏཏྠ ཧོཏཱིཏི. ཨཔྤཊིཛགྒནཏཱ དུཏིཡོ ཏཉྷི སམྨཊྛམྤི ཨསམྨཊྛམྤི པརིབྷོགཕཱསུཀཾ ཧོཏིཡེཝ. ཨནུཊྛཱཔནཱིཡབྷཱཝོ ཏཏིཡོ, གརཧཾ ནཔྤཊིཙྪཱདེཏི, ཏཏྠ ཧི པཱཔཾ ཀརོནྟོ ལཛྫཏཱིཏི གརཧཱཡ ཨཔྤཊིཙྪཱདནབྷཱཝོ ཙཏུཏྠོ, ཨབྦྷོཀཱསཱཝཱསོ ཝིཡ ཀཱཡཾ ན སནྠམྦྷེཏཱིཏི ཀཱཡསྶ ཨསནྠམྦྷནབྷཱཝོ པཉྩམོ. པརིགྒཧཀརཎཱབྷཱཝོ ཚཊྛོ, གེཧཱལཡཔཊིཀྑེཔོ སཏྟམོ, བཧུསཱདྷཱརཎགེཧེ ཝིཡ ‘‘པཊིཛགྒིསྶཱམི ནཾ, ནིཀྑམཐཱ’’ཏི ནཱིཧརཎཱབྷཱཝོ ཨཊྛམོ, ཝསནྟསྶ སཔྤཱིཏིཀབྷཱཝོ ནཝམོ, རུཀྑམཱུལསེནཱསནསྶ གཏགཏཊྛཱནེ སུལབྷཏཱཡ ཨནཔེཀྑབྷཱཝོ དསམོཏི, ཨིམེ དས གུཎེ དིསྭཱ རུཀྑམཱུལཾ ཨུཔཱགཏོསྨཱིཏི ཝདཏི.

ཨིམཱནི ཨེཏྟཀཱནི ཀཱརཎཱནི སལླཀྑེཏྭཱ མཧཱསཏྟོ པུནདིཝསེ བྷིཀྑཱཡ གཱམཾ པཱཝིསི. ཨཐསྶ སམྤཏྟགཱམེ མནུསྶཱ མཧནྟེན ཨུསྶཱཧེན བྷིཀྑཾ ཨདཾསུ. སོ བྷཏྟཀིཙྩཾ ནིཊྛཱཔེཏྭཱ ཨསྶམཾ ཨཱགམྨ ནིསཱིདིཏྭཱ ཙིནྟེསི ‘‘ནཱཧཾ ‘ཨཱཧཱརཾ ན ལབྷཱམཱི’ཏི པབྦཛིཏོ སིནིདྡྷཱཧཱརོ ནཱམེས མཱནམདཔུརིསམདེ ཝཌྜྷེཏི. ཨཱཧཱརམཱུལཀསྶ དུཀྑསྶ ཨནྟོ ནཏྠི ཡཾནཱུནཱཧཾ ཝཱཔིཏཾ རོཔིཏཾ དྷཉྙནིབྦཏྟཀཾ ཨཱཧཱརཾ པཛཧིཏྭཱ པཝཏྟཕལབྷོཛནོ བྷཝེཡྻ’’ནྟི. སོ ཏཏོ པཊྛཱཡ ཏཐཱ ¶ ཀཏྭཱ གྷཊེནྟོ ཝཱཡམནྟོ སཏྟཱཧབྦྷནྟརེཡེཝ ཨཊྛ སམཱཔཏྟིཡོ པཉྩ ཙ ཨབྷིཉྙཱཡོ ནིབྦཏྟེསི. ཏེན ཝུཏྟཾ –

‘‘ཝཱཔིཏཾ ¶ རོཔིཏཾ དྷཉྙཾ, པཛཧིཾ ནིརཝསེསཏོ;

ཨནེཀགུཎསམྤནྣཾ, པཝཏྟཕལམཱདིཡིཾ.

‘‘ཏཏྠཔྤདྷཱནཾ པདཧིཾ, ནིསཛྫཊྛཱནཙངྐམེ;

ཨབྦྷནྟརམྷི སཏྟཱཧེ, ཨབྷིཉྙཱབལ པཱཔུཎི’’ནྟི.

ཨེཝཾ མེ སིདྡྷིཔྤཏྟསྶ, ཝསཱིབྷཱུཏསྶ སཱསནེ;

དཱིཔངྐརོ ནཱམ ཛིནོ, ཨུཔྤཛྫི ལོཀནཱཡཀོ.

ཨུཔྤཛྫནྟེ ཙ ཛཱཡནྟེ, བུཛ྄ཛྷནྟེ དྷམྨདེསནེ;

ཙཏུརོ ནིམིཏྟེ ནཱདྡསཾ, ཛྷཱནརཏིསམཔྤིཏོ.

པཙྩནྟདེསཝིསཡེ, ནིམནྟེཏྭཱ ཏཐཱགཏཾ;

ཏསྶ ཨཱགམནཾ མགྒཾ, སོདྷེནྟི ཏུཊྛམཱནསཱ.

ཨཧཾ ཏེན སམཡེན, ནིཀྑམིཏྭཱ སཀསྶམཱ;

དྷུནནྟོ ཝཱཀཙཱིརཱནི, གཙྪཱམི ཨམྦརེ ཏདཱ.

ཝེདཛཱཏཾ ཛནཾ དིསྭཱ, ཏུཊྛཧཊྛཾ པམོདིཏཾ;

ཨོརོཧིཏྭཱན གགནཱ, མནུསྶེ པུཙྪི ཏཱཝདེ.

‘‘ཏུཊྛཧཊྛོ པམུདིཏོ, ཝེདཛཱཏོ མཧཱཛནོ;

ཀསྶ སོདྷཱིཡཏི མགྒོ, ཨཉྫསཾ ཝཊུམཱཡནཾ’’.

ཏེ མེ པུཊྛཱ ཝིཡཱཀཾསུ ‘‘བུདྡྷོ ལོཀེ ཨནུཏྟརོ;

དཱིཔངྐརོ ནཱམ ཛིནོ, ཨུཔྤཛྫི ལོཀནཱཡཀོ;

ཏསྶ སོདྷཱིཡཏི མགྒོ, ཨཉྫསཾ ཝཊུམཱཡནཾ’’.

‘‘བུདྡྷོ’’ཏི ཝཙནཾ སུཏྭཱན, པཱིཏི ཨུཔྤཛྫི ཏཱཝདེ;

‘‘བུདྡྷོ བུདྡྷོ’’ཏི ཀཐཡནྟོ, སོམནསྶཾ པཝེདཡིཾ.

ཏཏྠ ¶ ཋཏྭཱ ཝིཙིནྟེསིཾ, ཏུཊྛོ སཾཝིགྒམཱནསོ;

‘‘ཨིདྷ བཱིཛཱནི རོཔིསྶཾ, ཁཎོ ཝེ མཱ ཨུཔཙྩགཱ’’.

ཡདི བུདྡྷསྶ སོདྷེཐ, ཨེཀོཀཱསཾ དདཱཐ མེ;

ཨཧམྤི སོདྷཡིསྶཱམི, ཨཉྫསཾ ཝཊུམཱཡནཾ.

ཨདཾསུ ¶ ཏེ མམོཀཱསཾ, སོདྷེཏུཾ ཨཉྫསཾ ཏདཱ;

‘‘བུདྡྷོ བུདྡྷོ’’ཏི ཙིནྟེནྟོ, མགྒཾ སོདྷེམཧཾ ཏདཱ.

ཨནིཊྛིཏེ པམོཀཱསེ, དཱིཔངྐརོ མཧཱམུནི;

ཙཏཱུཧི སཏསཧསྶེཧི, ཚལ༹བྷིཉྙེཧི ཏཱདིཧི;

ཁཱིཎཱསཝེཧི ཝིམལེཧི, པཊིཔཛྫི ཨཉྫསཾ ཛིནོ.

པཙྩུགྒམནཱ ཝཏྟནྟི, ཝཛྫནྟི བྷེརིཡོ བཧཱུ;

ཨཱམོདིཏཱ ནརམརཱུ, སཱདྷུཀཱརཾ པཝཏྟཡུཾ.

དེཝཱ མནུསྶེ པསྶནྟི, མནུསྶཱཔི ཙ དེཝཏཱ;

ཨུབྷོཔི ཏེ པཉྫལིཀཱ, ཨནུཡནྟི ཏཐཱགཏཾ.

དེཝཱ དིབྦེཧི ཏུརིཡེཧི, མནུསྶཱ མཱནུསེཧི ཙ;

ཨུབྷོཔི ཏེ ཝཛྫཡནྟཱ, ཨནུཡནྟི ཏཐཱགཏཾ.

དིབྦཾ མནྡཱརཝཾ པུཔྥཾ, པདུམཾ པཱརིཚཏྟཀཾ;

དིསོདིསཾ ཨོཀིརནྟི, ཨཱཀཱསནབྷགཏཱ མརཱུ.

དིབྦཾ ཙནྡནཙུཎྞཉྩ, ཝརགནྡྷཉྩ ཀེཝལཾ;

དིསོདིསཾ ཨོཀིརནྟི, ཨཱཀཱསནབྷགཏཱ མརཱུ.

ཙམྤཀཾ ¶ སལལཾ ནཱིཔཾ, ནཱགཔུནྣཱགཀེཏཀཾ;

དིསོདིསཾ ཨུཀྑིཔནྟི, བྷཱུམིཏལགཏཱ ནརཱ.

ཀེསེ མུཉྩིཏྭཱཧཾ ཏཏྠ, ཝཱཀཙཱིརཉྩ ཙམྨཀཾ;

ཀལལེ པཏྠརིཏྭཱན, ཨཝཀུཛྫོ ནིཔཛྫཧཾ.

ཨཀྐམིཏྭཱན མཾ བུདྡྷོ, སཧ སིསྶེཧི གཙྪཏུ;

མཱ ནཾ ཀལལེ ཨཀྐམིཏྠ, ཧིཏཱཡ མེ བྷཝིསྶཏི.

པཐཝིཡཾ ནིཔནྣསྶ, ཨེཝཾ མེ ཨཱསི ཙེཏསོ;

‘‘ཨིཙྪམཱནོ ཨཧཾ ཨཛྫ, ཀིལེསེ ཛྷཱཔཡེ མམ.

‘‘ཀིཾ མེ ཨཉྙཱཏཝེསེན, དྷམྨཾ སཙྪིཀཏེནིདྷ;

སབྦཉྙུཏཾ པཱཔུཎིཏྭཱ, བུདྡྷོ ཧེསྶཾ སདེཝཀེ.

‘‘ཀིཾ ¶ མེ ཨེཀེན ཏིཎྞེན, པུརིསེན ཐཱམདསྶིནཱ;

སབྦཉྙུཏཾ པཱཔུཎིཏྭཱ, སནྟཱརེསྶཾ སདེཝཀཾ.

‘‘ཨིམིནཱ མེ ཨདྷིཀཱརེན, ཀཏེན པུརིསུཏྟམེ;

སབྦཉྙུཏཾ པཱཔུཎིཏྭཱ, ཏཱརེམི ཛནཏཾ བཧུཾ.

‘‘སཾསཱརསོཏཾ ཚིནྡིཏྭཱ, ཝིདྡྷཾསེཏྭཱ ཏཡོ བྷཝེ;

དྷམྨནཱཝཾ སམཱརུཡ྄ཧ, སནྟཱརེསྶཾ སདེཝཀཾ’’.

དཱིཔངྐརོ ལོཀཝིདཱུ, ཨཱཧུཏཱིནཾ པཊིགྒཧོ;

ཨུསྶཱིསཀེ མཾ ཋཏྭཱན, ཨིདཾ ཝཙནམབྲཝི.

‘‘པསྶཐ ¶ ཨིམཾ ཏཱཔསཾ, ཛཊིལཾ ཨུགྒཏཱཔནཾ;

ཨཔརིམེཡྻེ ཨིཏོ ཀཔྤེ, བུདྡྷོ ལོཀེ བྷཝིསྶཏི.

‘‘ཨཧུ ཀཔིལཝ྄ཧཡཱ རམྨཱ, ནིཀྑམིཏྭཱ ཏཐཱགཏོ;

པདྷཱནཾ པདཧིཏྭཱན, ཀཏྭཱ དུཀྐརཀཱརིཀཾ.

‘‘ཨཛཔཱལརུཀྑམཱུལེ, ནིསཱིདིཏྭཱ ཏཐཱགཏོ;

ཏཏྠ པཱཡཱསཾ པགྒཡ྄ཧ, ནེརཉྫརམུཔེཧིཏི.

‘‘ནེརཉྫརཱཡ ཏཱིརམྷི, པཱཡཱསཾ ཨད སོ ཛིནོ;

པཊིཡཏྟཝརམགྒེན, བོདྷིམཱུལམུཔེཧིཏི.

‘‘ཏཏོ པདཀྑིཎཾ ཀཏྭཱ, བོདྷིམཎྜཾ ཨནུཏྟརོ;

ཨསྶཏྠརུཀྑམཱུལམྷི, བུཛ྄ཛྷིསྶཏི མཧཱཡསོ.

‘‘ཨིམསྶ ཛནིཀཱ མཱཏཱ, མཱཡཱ ནཱམ བྷཝིསྶཏི;

པིཏཱ སུདྡྷོདནོ ནཱམ, ཨཡཾ ཧེསྶཏི གོཏམོ.

‘‘ཨནཱསཝཱ ཝཱིཏརཱགཱ, སནྟཙིཏྟཱ སམཱཧིཏཱ;

ཀོལིཏོ ཨུཔཏིསྶོ ཙ, ཨགྒཱ ཧེསྶནྟི སཱཝཀཱ;

ཨཱནནྡོ ནཱམུཔཊྛཱཀོ, ཨུཔཊྛིསྶཏིམཾ ཛིནཾ.

‘‘ཁེམཱ ཨུཔྤལཝཎྞཱ ཙ, ཨགྒཱ ཧེསྶནྟི སཱཝིཀཱ;

ཨནཱསཝཱ ཝཱིཏརཱགཱ, སནྟཙིཏྟཱ སམཱཧིཏཱ.

‘‘བོདྷི ¶ ཏསྶ བྷགཝཏོ, ཨསྶཏྠོཏི པཝུཙྩཏི;

ཙིཏྟོ ཙ ཧཏྠཱལ༹ཝཀོ, ཨགྒཱ ཧེསྶནྟུཔཊྛཀཱ;

ཨུཏྟརཱ ནནྡམཱཏཱ ཙ, ཨགྒཱ ཧེསྶནྟུཔཊྛིཀཱ’’.

ཨིདཾ ¶ སུཏྭཱན ཝཙནཾ, ཨསམསྶ མཧེསིནོ;

ཨཱམོདིཏཱ ནརམརཱུ, བུདྡྷབཱིཛཾ ཀིར ཨཡཾ.

ཨུཀྐུཊྛིསདྡཱ ཝཏྟནྟི, ཨཔྥོཊེནྟི ཧསནྟི ཙ;

ཀཏཉྫལཱི ནམསྶནྟི, དསསཧསྶཱི སདེཝཀཱ.

ཡདིམསྶ ལོཀནཱཐསྶ, ཝིརཛ྄ཛྷིསྶཱམ སཱསནཾ;

ཨནཱགཏམྷི ཨདྡྷཱནེ, ཧེསྶཱམ སམྨུཁཱ ཨིམཾ.

ཡཐཱ མནུསྶཱ ནདིཾ ཏརནྟཱ, པཊིཏིཏྠཾ ཝིརཛ྄ཛྷིཡ;

ཧེཊྛཱ ཏིཏྠེ གཧེཏྭཱན, ཨུཏྟརནྟི མཧཱནདིཾ.

ཨེཝམེཝ མཡཾ སབྦེ, ཡདི མུཉྩཱམིམཾ ཛིནཾ;

ཨནཱགཏམྷི ཨདྡྷཱནེ, ཧེསྶཱམ སམྨུཁཱ ཨིམཾ.

དཱིཔངྐརོ ལོཀཝིདཱུ, ཨཱཧུཏཱིནཾ པཊིགྒཧོ;

མམ ཀམྨཾ པཀིཏྟེཏྭཱ, དཀྑིཎཾ པཱདམུདྡྷརི.

ཡེ ཏཏྠཱསུཾ ཛིནཔུཏྟཱ, སབྦེ པདཀྑིཎམཀཾསུ མཾ;

ནརཱ ནཱགཱ ཙ གནྡྷབྦཱ, ཨབྷིཝཱདེཏྭཱན པཀྐམུཾ.

དསྶནཾ མེ ཨཏིཀྐནྟེ, སསངྒྷེ ལོཀནཱཡཀེ;

ཧཊྛཏུཊྛེན ཙིཏྟེན, ཨཱསནཱ ཝུཊྛཧིཾ ཏདཱ.

སུཁེན སུཁིཏོ ཧོམི, པཱམོཛྫེན པམོདིཏོ;

པཱིཏིཡཱ ཙ ཨབྷིསྶནྣོ, པལླངྐཾ ཨཱབྷུཛིཾ ཏདཱ.

པལླངྐེན ¶ ནིསཱིདིཏྭཱ, ཨེཝཾ ཙིནྟེསཧཾ ཏདཱ;

‘‘ཝསཱིབྷཱུཏོ ཨཧཾ ཛྷཱནེ, ཨབྷིཉྙཱཔཱརམིཾ གཏོ.

‘‘དསསཧསྶིལོཀམྷི ¶ , ཨིསཡོ ནཏྠི མེ སམཱ;

ཨསམོ ཨིདྡྷིདྷམྨེསུ, ཨལབྷིཾ ཨཱིདིསཾ སུཁཾ’’.

པལླངྐཱབྷུཛནེ མཡ྄ཧཾ, དསསཧསྶཱདྷིཝཱསིནོ;

མཧཱནཱདཾ པཝཏྟེསུཾ, དྷུཝཾ བུདྡྷོ བྷཝིསྶསི.

ཡཱ པུབྦེ བོདྷིསཏྟཱནཾ, པལླངྐཝརམཱབྷུཛེ;

ནིམིཏྟཱནི པདིསྶནྟི, ཏཱནི ཨཛྫ པདིསྶརེ.

སཱིཏཾ བྱཔགཏཾ ཧོཏི, ཨུཎྷཉྩ ཨུཔསམྨཏི;

ཏཱནི ཨཛྫ པདིསྶནྟི, དྷུཝཾ བུདྡྷོ བྷཝིསྶསི.

དསསཧསྶཱི ལོཀདྷཱཏཱུ, ནིསྶདྡཱ ཧོནྟི ནིརཱཀུལཱ;

ཏཱནི ཨཛྫ པདིསྶནྟི, དྷུཝཾ བུདྡྷོ བྷཝིསྶསི.

མཧཱཝཱཏཱ ན ཝཱཡནྟི, ན སནྡནྟི སཝནྟིཡོ;

ཏཱནི ཨཛྫ པདིསྶནྟི, དྷུཝཾ བུདྡྷོ བྷཝིསྶསི.

ཐལཛཱ དཀཛཱ པུཔྥཱ, སབྦེ པུཔྥནྟི ཏཱཝདེ;

ཏེཔཛྫ པུཔྥིཏཱ སབྦེ, དྷུཝཾ བུདྡྷོ བྷཝིསྶསི.

ལཏཱ ཝཱ ཡདི ཝཱ རུཀྑཱ, ཕལབྷཱརཱ ཧོནྟི ཏཱཝདེ;

ཏེཔཛྫ ཕལིཏཱ སབྦེ, དྷུཝཾ བུདྡྷོ བྷཝིསྶསི.

ཨཱཀཱསཊྛཱ ¶ ཙ བྷཱུམཊྛཱ, རཏནཱ ཛོཏནྟི ཏཱཝདེ;

ཏེཔཛྫ རཏནཱ ཛོཏནྟི, དྷུཝཾ བུདྡྷོ བྷཝིསྶསི.

མཱནུསྶཀཱ ཙ དིབྦཱ ཙ, ཏུརིཡཱ ཝཛྫནྟི ཏཱཝདེ;

ཏེཔཛྫུབྷོ ཨབྷིརཝནྟི, དྷུཝཾ བུདྡྷོ བྷཝིསྶསི.

ཝིཙིཏྟཔུཔྥཱ གགནཱ, ཨབྷིཝསྶནྟི ཏཱཝདེ;

ཏེཔི ཨཛྫ པཝསྶནྟི, དྷུཝཾ བུདྡྷོ བྷཝིསྶསི.

མཧཱསམུདྡོ ཨཱབྷུཛཏི, དསསཧསྶཱི པཀམྤཏི;

ཏེཔཛྫུབྷོ ཨབྷིརཝནྟི, དྷུཝཾ བུདྡྷོ བྷཝིསྶསི.

ནིརཡེཔི ¶ དསསཧསྶེ, ཨགྒཱི ནིབྦནྟི ཏཱཝདེ;

ཏེཔཛྫ ནིབྦུཏཱ ཨགྒཱི, དྷུཝཾ བུདྡྷོ བྷཝིསྶསི.

ཝིམལོ ཧོཏི སཱུརིཡོ, སབྦཱ དིསྶནྟི ཏཱརཀཱ;

ཏེཔི ཨཛྫ པདིསྶནྟི, དྷུཝཾ བུདྡྷོ བྷཝིསྶསི.

ཨནོཝཊྛེན ཨུདཀཾ, མཧིཡཱ ཨུབྦྷིཛྫི ཏཱཝདེ;

ཏམྤཛྫུབྦྷིཛྫཏེ མཧིཡཱ, དྷུཝཾ བུདྡྷོ བྷཝིསྶསི.

ཏཱརཱགཎཱ ཝིརོཙནྟི, ནཀྑཏྟཱ གགནམཎྜལེ;

ཝིསཱཁཱ ཙནྡིམཱཡུཏྟཱ, དྷུཝཾ བུདྡྷོ བྷཝིསྶསི.

བིལཱསཡཱ དརཱིསཡཱ, ནིཀྑམནྟི སཀཱསཡཱ;

ཏེཔཛྫ ཨཱསཡཱ ཚུདྡྷཱ, དྷུཝཾ བུདྡྷོ བྷཝིསྶསི.

ན ¶ ཧོཏི ཨརཏི སཏྟཱནཾ, སནྟུཊྛཱ ཧོནྟི ཏཱཝདེ;

ཏེཔཛྫ སབྦེ སནྟུཊྛཱ, དྷུཝཾ བུདྡྷོ བྷཝིསྶསི.

རོགཱ ཏདུཔསམྨནྟི, ཛིགྷཙྪཱ ཙ ཝིནསྶཏི;

ཏཱནིཔཛྫ པདིསྶནྟི, དྷུཝཾ བུདྡྷོ བྷཝིསྶསི.

རོགོ ཏདཱ ཏནུ ཧོཏི, དོསོ མོཧོ ཝིནསྶཏི;

ཏེཔཛྫ ཝིགཏཱ སབྦེ, དྷུཝཾ བུདྡྷོ བྷཝིསྶསི.

བྷཡཾ ཏདཱ ན བྷཝཏི, ཨཛྫཔེཏཾ པདིསྶཏི;

ཏེན ལིངྒེན ཛཱནཱམ, དྷུཝཾ བུདྡྷོ བྷཝིསྶསི.

རཛོ ནུདྡྷཾསཏི ཨུདྡྷཾ, ཨཛྫཔེཏཾ པདིསྶཏི;

ཏེན ལིངྒེན ཛཱནཱམ, དྷུཝཾ བུདྡྷོ བྷཝིསྶསི.

ཨནིཊྛགནྡྷོ པཀྐམཏི, དིབྦགནྡྷོ པཝཱཡཏི;

སོཔཛྫ ཝཱཡཏི གནྡྷོ, དྷུཝཾ བུདྡྷོ བྷཝིསྶསི.

སབྦེ དེཝཱ པདིསྶནྟི, ཋཔཡིཏྭཱ ཨརཱུཔིནོ;

ཏེཔཛྫ སབྦེ དིསྶནྟི, དྷུཝཾ བུདྡྷོ བྷཝིསྶསི.

ཡཱཝཏཱ ནིརཡཱ ནཱམ, སབྦེ དིསྶནྟི ཏཱཝདེ;

ཏེཔཛྫ སབྦེ དིསྶནྟི, དྷུཝཾ བུདྡྷོ བྷཝིསྶསི.

ཀུཊྚཱ ¶ ཀཝཱཊཱ སེལཱ ཙ, ན ཧོནྟཱཝརཎཱ ཏདཱ;

ཨཀཱསབྷཱུཏཱ ཏེཔཛྫ, དྷུཝཾ བུདྡྷོ བྷཝིསྶསི.

ཙུཏཱི ¶ ཙ ཨུཔཔཏྟི ཙ, ཁཎེ ཏསྨིཾ ན ཝིཛྫཏི;

ཏཱནིཔཛྫ པདིསྶནྟི, དྷུཝཾ བུདྡྷོ བྷཝིསྶསི.

དལ༹ྷཾ པགྒཎྷ ཝཱིརིཡཾ, མཱ ནིཝཏྟ ཨབྷིཀྐམ;

མཡམྤེཏཾ ཝིཛཱནཱམ, དྷུཝཾ བུདྡྷོ བྷཝིསྶསི.

བུདྡྷསྶ ཝཙནཾ སུཏྭཱ, དསསཧསྶཱིནཙཱུབྷཡཾ;

ཏུཊྛཧཊྛོ པམོདིཏོ, ཨེཝཾ ཙིནྟེསཧཾ ཏདཱ.

ཨདྭེཛ྄ཛྷཝཙནཱ བུདྡྷཱ, ཨམོགྷཝཙནཱ ཛིནཱ;

ཝིཏཐཾ ནཏྠི བུདྡྷཱནཾ, དྷུཝཾ བུདྡྷོ བྷཝཱམཧཾ.

ཡཐཱ ཁིཏྟཾ ནབྷེ ལེཌྜུ, དྷུཝཾ པཏཏི བྷཱུམིཡཾ;

ཏཐེཝ བུདྡྷསེཊྛཱནཾ, ཝཙནཾ དྷུཝསསྶཏཾ.

ཡཐཱཔི སབྦསཏྟཱནཾ, མརཎཾ དྷུཝསསྶཏཾ;

ཏཐེཝ བུདྡྷསེཊྛཱནཾ, ཝཙནཾ དྷུཝསསྶཏཾ.

ཡཐཱ རཏྟིཀྑཡེ པཏྟེ, སཱུརིཡུགྒམནཾ དྷུཝཾ;

ཏཐེཝ བུདྡྷསེཊྛཱནཾ, ཝཙནཾ དྷུཝསསྶཏཾ.

ཡཐཱ ནིཀྑནྟསཡནསྶ, སཱིཧསྶ ནདནཾ དྷུཝཾ;

ཏཐེཝ བུདྡྷསེཊྛཱནཾ, ཝཙནཾ དྷུཝསསྶཏཾ.

ཡཐཱ ཨཱཔནྣསཏྟཱནཾ, བྷཱརམོརོཔནཾ དྷུཝཾ;

ཏཐེཝ བུདྡྷསེཊྛཱནཾ, ཝཙནཾ དྷུཝསསྶཏཾ.

ཧནྡ བུདྡྷཀརེ དྷམྨེ, ཝིཙིནཱམི ཨིཏོ ཙིཏོ;

ཨུདྡྷཾ ཨདྷོ དས དིསཱ, ཡཱཝཏཱ དྷམྨདྷཱཏུཡཱ.

ཝིཙིནནྟོ ཏདཱདཀྑིཾ, པཋམཾ དཱནཔཱརམིཾ;

པུབྦཀེཧི མཧེསཱིཧི, ཨནུཙིཎྞཾ མཧཱཔཐཾ.

ཨིམཾ ¶ ཏྭཾ པཋམཾ ཏཱཝ, དལ༹ྷཾ ཀཏྭཱ སམཱདིཡ;

དཱནཔཱརམིཏཾ གཙྪ, ཡདི བོདྷིཾ པཏྟུམིཙྪསི.

ཡཐཱཔི ¶ ཀུམྦྷོ སམྤུཎྞོ, ཡསྶ ཀསྶཙི ཨདྷོཀཏོ;

ཝམཏེ ཝུདཀཾ ནིསྶེསཾ, ན ཏཏྠ པརིརཀྑཏི.

ཏཐེཝ ཡཱཙཀེ དིསྭཱ, ཧཱིནམུཀྐཊྛམཛ྄ཛྷིམེ;

དདཱཧི དཱནཾ ནིསྶེསཾ, ཀུམྦྷོ ཝིཡ ཨདྷོཀཏོ.

ན ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

ཝིཙིནནྟོ ཏདཱདཀྑིཾ, དུཏིཡཾ སཱིལཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

ཨིམཾ ཏྭཾ དུཏིཡཾ ཏཱཝ, དལ༹ྷཾ ཀཏྭཱ སམཱདིཡ;

སཱིལཔཱརམིཏཾ གཙྪ, ཡདི བོདྷིཾ པཏྟུམིཙྪསི.

ཡཐཱཔི ཙམརཱི ཝཱལཾ, ཀིསྨིཉྩི པཊིལགྒིཏཾ;

ཨུཔེཏི མརཎཾ ཏཏྠ, ན ཝིཀོཔེཏི ཝཱལདྷིཾ.

ཏཐེཝ ཙཏཱུསུ བྷཱུམཱིསུ, སཱིལཱནི པརིཔཱུརཡ;

པརིརཀྑ སདཱ སཱིལཾ, ཙམརཱི ཝིཡ ཝཱལདྷིཾ.

ན ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

ཝིཙིནནྟོ ¶ ཏདཱདཀྑིཾ, ཏཏིཡཾ ནེཀྑམྨཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

ཨིམཾ ཏྭཾ ཏཏིཡཾ ཏཱཝ, དལ༹ྷཾ ཀཏྭཱ སམཱདིཡ;

ནེཀྑམྨཔཱརམིཏཾ གཙྪ, ཡདི བོདྷིཾ པཏྟུམིཙྪསི.

ཡཐཱ ཨནྡུགྷརེ པུརིསོ, ཙིརཝུཏྠོ དུཁཊྚིཏོ;

ན ཏཏྠ རཱགཾ ཛནེཏི, མུཏྟིམེཝ གཝེསཏི.

ཏཐེཝ ཏྭཾ སབྦབྷཝེ, པསྶ ཨནྡུགྷརཾ ཝིཡ;

ནེཀྑམྨཱབྷིམུཁོ ཧོཏི, བྷཝཏོ པརིམུཏྟིཡཱ.

ན ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

ཝིཙིནནྟོ ¶ ཏདཱདཀྑིཾ, ཙཏུཏྠཾ པཉྙཱཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

ཨིམཾ ཏྭཾ ཙཏུཏྠཾ ཏཱཝ, དལ༹ྷཾ ཀཏྭཱ སམཱདིཡ;

པཉྙཱཔཱརམིཏཾ གཙྪ, ཡདི བོདྷིཾ པཏྟུམིཙྪསི.

ཡཐཱཔི བྷིཀྑུ བྷིཀྑནྟོ, ཧཱིནམུཀྐཊྛམཛ྄ཛྷིམེ;

ཀུལཱནི ན ཝིཝཛྫེནྟོ, ཨེཝཾ ལབྷཏི ཡཱཔནཾ.

ཏཐེཝ ཏྭཾ སབྦཀཱལཾ, པརིཔུཙྪཾ བུདྷཾ ཛནཾ;

པཉྙཱཔཱརམིཏཾ གནྟྭཱ, སམྦོདྷིཾ པཱཔུཎིསྶསི.

ན ¶ ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

ཝིཙིནནྟོ ཏདཱདཀྑིཾ, པཉྩམཾ ཝཱིརིཡཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

ཨིམཾ ཏྭཾ པཉྩམཾ ཏཱཝ, དལ༹ྷཾ ཀཏྭཱ སམཱདིཡ;

ཝཱིརིཡཔཱརམིཏཾ གཙྪ, ཡདི བོདྷིཾ པཏྟུམིཙྪསི.

ཡཐཱཔི སཱིཧོ མིགརཱཛཱ, ནིསཛྫཊྛཱནཙངྐམེ;

ཨལཱིནཝཱིརིཡོ ཧོཏི, པགྒཧིཏམནོ སདཱ.

ཏཐེཝ ཏྭཾ སབྦབྷཝེ, པགྒཎྷ ཝཱིརིཡཾ དལ༹ྷཾ;

ཝཱིརིཡཔཱརམིཏཾ གནྟྭཱ, སམྦོདྷིཾ པཱཔུཎིསྶསི.

ན ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

ཝིཙིནནྟོ ཏདཱདཀྑིཾ, ཚཊྛམཾ ཁནྟིཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

ཨིམཾ ཏྭཾ ཚཊྛམཾ ཏཱཝ, དལ༹ྷཾ ཀཏྭཱ སམཱདིཡ;

ཏཏྠ ཨདྭེཛ྄ཛྷམཱནསོ, སམྦོདྷིཾ པཱཔུཎིསྶསི.

ཡཐཱཔི པཐཝཱི ནཱམ, སུཙིམྤི ཨསུཙིམྤི ཙ;

སབྦཾ སཧཏི ནིཀྑེཔཾ, ན ཀརོཏི པཊིགྷཾ ཏཡཱ.

ཏཐེཝ ¶ ¶ ཏྭམྤི སབྦེསཾ, སམྨཱནཱཝམཱནཀྑམོ;

ཁནྟིཔཱརམིཏཾ གནྟྭཱ, སམྦོདྷིཾ པཱཔུཎིསྶསི.

ན ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

ཝིཙིནནྟོ ཏདཱདཀྑིཾ, སཏྟམཾ སཙྩཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

ཨིམཾ ཏྭཾ སཏྟམཾ ཏཱཝ, དལ༹ྷཾ ཀཏྭཱ སམཱདིཡ;

ཏཏྠ ཨདྭེཛ྄ཛྷཝཙནོ, སམྦོདྷིཾ པཱཔུཎིསྶསི.

ཡཐཱཔི ཨོསམཱི ནཱམ, ཏུལཱབྷཱུཏཱ སདེཝཀེ;

སམཡེ ཨུཏུཝསྶེ ཝཱ, ན ཝོཀྐམཏི, ཝཱིཐིཏོ.

ཏཐེཝ ཏྭམྤི སཙྩེསུ, མཱ ཝོཀྐམསི ཝཱིཐིཏོ;

སཙྩཔཱརམིཏཾ གནྟྭཱ, སམྦོདྷིཾ པཱཔུཎིསྶསི.

ན ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

ཝིཙིནནྟོ ཏདཱདཀྑིཾ, ཨཊྛམཾ ཨདྷིཊྛཱནཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

ཨིམཾ ཏྭཾ ཨཊྛམཾ ཏཱཝ, དལ༹ྷཾ ཀཏྭཱ སམཱདིཡ;

ཏཏྠ ཏྭཾ ཨཙལོ ཧུཏྭཱ, སམྦོདྷིཾ པཱཔུཎིསྶསི.

ཡཐཱཔི ¶ པབྦཏོ སེལོ, ཨཙལོ སུཔྤཏིཊྛིཏོ;

ན ཀམྤཏི བྷུསཝཱཏེཧི, སཀཊྛཱནེཝ ཏིཊྛཏི.

ཏཐེཝ ཏྭམྤི ཨདྷིཊྛཱནེ, སབྦདཱ ཨཙལོ བྷཝ;

ཨདྷིཊྛཱནཔཱརམིཏཾ གནྟྭཱ, སམྦོདྷིཾ པཱཔུཎིསྶསི.

ན ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

ཝིཙིནནྟོ ཏདཱདཀྑིཾ, ནཝམཾ མེཏྟཱཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

ཨིམཾ ¶ ཏྭཾ ནཝམཾ ཏཱཝ, དལ༹ྷཾ ཀཏྭཱ སམཱདིཡ;

མེཏྟཱཡ ཨསམོ ཧོཧི, ཡདི བོདྷིཾ པཏྟུམིཙྪསི.

ཡཐཱཔི ཨུདཀཾ ནཱམ, ཀལྱཱཎེ པཱཔཀེ ཛནེ;

སམཾ ཕརཏི སཱིཏེན, པཝཱཧེཏི རཛོམལཾ.

ཏཐེཝ ཏྭམྤི ཧིཏཱཧིཏེ, སམཾ མེཏྟཱཡ བྷཱཝཡ;

མེཏྟཱཔཱརམིཏཾ གནྟྭཱ, སམྦོདྷིཾ པཱཔུཎིསྶསི.

ན ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

ཝིཙིནནྟོ ཏདཱདཀྑིཾ, དསམཾ ཨུཔེཀྑཱཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

ཨིམཾ ¶ ཏྭཾ དསམཾ ཏཱཝ, དལ༹ྷཾ ཀཏྭཱ སམཱདིཡ;

ཏུལཱབྷཱུཏོ དལ༹ྷོ ཧུཏྭཱ, སམྦོདྷིཾ པཱཔུཎིསྶསི.

ཡཐཱཔི པཐཝཱི ནཱམ, ནིཀྑིཏྟཾ ཨསུཙིཾ སུཙིཾ;

ཨུཔེཀྑཏི ཨུབྷོཔེཏེ, ཀོཔཱནུནཡཝཛྫིཏཱ.

ཏཐེཝ ཏྭམྤི སུཁདུཀྑེ, ཏུལཱབྷཱུཏོ སདཱ བྷཝ;

ཨུཔེཀྑཱཔཱརམིཏཾ གནྟྭཱ, སམྦོདྷིཾ པཱཔུཎིསྶསི.

ཨེཏྟཀཱཡེཝ ཏེ ལོཀེ, ཡེ དྷམྨཱ བོདྷིཔཱཙནཱ;

ཏཏུདྡྷཾ ནཏྠི ཨཉྙཏྲ, དལ༹ྷཾ ཏཏྠ པཏིཊྛཧ.

ཨིམེ དྷམྨེ སམྨསཏོ, སབྷཱཝརསལཀྑཎེ;

དྷམྨཏེཛེན ཝསུདྷཱ, དསསཧསྶཱི པཀམྤཐ.

ཙལཏཱ རཝཏི པཐཝཱི, ཨུཙྪུཡནྟཾཝ པཱིལི༹ཏཾ;

ཏེལཡནྟེ ཡཐཱ ཙཀྐཾ, ཨེཝཾ ཀམྤཏི མེདིནཱི.

ཡཱཝཏཱ པརིསཱ ཨཱསི, བུདྡྷསྶ པརིཝེསནེ;

པཝེདྷམཱནཱ སཱ ཏཏྠ, མུཙྪིཏཱ སེསི བྷཱུམིཡཱ.

གྷཊཱནེཀསཧསྶཱནི ¶ , ཀུམྦྷཱིནཉྩ སཏཱ བཧཱུ;

སཉྩུཎྞམཐིཏཱ ཏཏྠ, ཨཉྙམཉྙཾ པགྷཊྚིཏཱ.

ཨུབྦིགྒཱ ཏསིཏཱ བྷཱིཏཱ, བྷནྟཱ བྱཱཐིཏམཱནསཱ;

མཧཱཛནཱ སམཱགམྨ, དཱིཔངྐརམུཔཱགམུཾ.

ཀིཾ ¶ བྷཝིསྶཏི ལོཀསྶ, ཀལྱཱཎམཐ པཱཔཀཾ;

སབྦོ ཨུཔདྡུཏོ ལོཀོ, ཏཾ ཝིནོདེཧི ཙཀྑུམ.

ཏེསཾ ཏདཱ སཉྙཱཔེསི, དཱིཔངྐརོ མཧཱམུནི;

ཝིསྶཏྠཱ ཧོཐ མཱ བྷཱཐ, ཨིམསྨིཾ པཐཝིཀམྤནེ.

ཡམཧཾ ཨཛྫ བྱཱཀཱསིཾ, བུདྡྷོ ལོཀེ བྷཝིསྶཏི;

ཨེསོ སམྨསཏི དྷམྨཾ, པུབྦཀཾ ཛིནསེཝིཏཾ.

ཏསྶ སམྨསཏོ དྷམྨཾ, བུདྡྷབྷཱུམིཾ ཨསེསཏོ;

ཏེནཱཡཾ ཀམྤིཏཱ པཐཝཱི, དསསཧསྶཱི སདེཝཀེ.

བུདྡྷསྶ ཝཙནཾ སུཏྭཱ, མནོ ནིབྦཱཡི ཏཱཝདེ;

སབྦེ མཾ ཨུཔསངྐམྨ, པུནཱཔི ཨབྷིཝནྡིསུཾ.

སམཱདཡིཏྭཱ བུདྡྷགུཎཾ, དལ༹ྷཾ ཀཏྭཱན མཱནསཾ;

དཱིཔངྐརཾ ནམསྶིཏྭཱ, ཨཱསནཱ ཝུཊྛཧིཾ ཏདཱ.

དིབྦཾ མཱནུསཀཾ པུཔྥཾ, དེཝཱ མཱནུསཀཱ ཨུབྷོ;

སམོཀིརནྟི པུཔྥེཧི, ཝུཊྛཧནྟསྶ ཨཱསནཱ.

ཝེདཡནྟི ཙ ཏེ སོཏྠིཾ, དེཝཱ མཱནུསཀཱ ཨུབྷོ;

མཧནྟཾ པཏྠིཏཾ ཏུཡ྄ཧཾ, ཏཾ ལབྷསྶུ ཡཐིཙྪིཏཾ.

སབྦཱིཏིཡོ ཝིཝཛྫནྟུ, སོཀོ རོགོ ཝིནསྶཏུ;

མཱ ཏེ བྷཝནྟྭནྟརཱཡཱ, ཕུས ཁིཔྤཾ བོདྷིམུཏྟམཾ.

ཡཐཱཔི ¶ སམཡེ པཏྟེ, པུཔྥནྟི པུཔྥིནོ དུམཱ;

ཏཐེཝ ཏྭཾ མཧཱཝཱིར, བུདྡྷཉཱཎེན པུཔྥསུ.

ཡཐཱ ¶ ཡེ ཀེཙི སམྦུདྡྷཱ, པཱུརཡུཾ དསཔཱརམཱི;

ཏཐེཝ ཏྭཾ མཧཱཝཱིར, པཱུརེཧི དསཔཱརམཱི.

ཡཐཱ ཡེ ཀེཙི སམྦུདྡྷཱ, བོདྷིམཎྜམྷི བུཛ྄ཛྷརེ;

ཏཐེཝ ཏྭཾ མཧཱཝཱིར, བུཛ྄ཛྷསྶུ ཛིནབོདྷིཡཾ.

ཡཐཱ ཡེ ཀེཙི སམྦུདྡྷཱ, དྷམྨཙཀྐཾ པཝཏྟཡུཾ;

ཏཐེཝ ཏྭཾ མཧཱཝཱིར, དྷམྨཙཀྐཾ པཝཏྟཡ.

པུཎྞམཱཡེ ཡཐཱ ཙནྡོ, པརིསུདྡྷོ ཝིརོཙཏི;

ཏཐེཝ ཏྭཾ པུཎྞམནོ, ཝིརོཙ དསསཧསྶིཡཾ.

རཱཧུམུཏྟོ ཡཐཱ སཱུརིཡོ, ཏཱཔེན ཨཏིརོཙཏི;

ཏཐེཝ ལོཀཱ མུཉྩིཏྭཱ, ཝིརོཙ སིརིཡཱ ཏུཝཾ.

ཡཐཱ ཡཱ ཀཱཙི ནདིཡོ, ཨོསརནྟི མཧོདདྷིཾ;

ཨེཝཾ སདེཝཀཱ ལོཀཱ, ཨོསརནྟུ ཏཝནྟིཀེ.

ཏེཧི ཐུཏཔྤསཏྠོ སོ, དས དྷམྨེ སམཱདིཡ;

ཏེ དྷམྨེ པརིཔཱུརེནྟོ, པཝནཾ པཱཝིསཱི ཏདཱ.

སུམེདྷཀཐཱ ནིཊྛིཏཱ.

ཏདཱ ཏེ བྷོཛཡིཏྭཱན, སསངྒྷཾ ལོཀནཱཡཀཾ;

ཨུཔགཙྪུཾ སརཎཾ ཏསྶ, དཱིཔངྐརསྶ སཏྠུནོ.

སརཎཱགམནེ ¶ ཀཉྩི, ནིཝེསེསི ཏཐཱགཏོ;

ཀཉྩི པཉྩསུ སཱིལེསུ, སཱིལེ དསཝིདྷེ པརཾ.

ཀསྶཙི དེཏི སཱམཉྙཾ, ཙཏུརོ ཕལམུཏྟམེ;

ཀསྶཙི ཨསམེ དྷམྨེ, དེཏི སོ པཊིསམྦྷིདཱ.

ཀསྶཙི ཝརསམཱཔཏྟིཡོ, ཨཊྛ དེཏི ནརཱསབྷོ;

ཏིསྶོ ཀསྶཙི ཝིཛྫཱཡོ, ཚལ༹བྷིཉྙཱ པཝེཙྪཏི.

ཏེན ¶ ཡོགེན ཛནཀཱཡཾ, ཨོཝདཏི མཧཱམུནི;

ཏེན ཝིཏྠཱརིཀཾ ཨཱསི, ལོཀནཱཐསྶ སཱསནཾ.

མཧཱཧནུསབྷཀྑནྡྷོ, དཱིཔངྐརསནཱམཀོ;

བཧཱུ ཛནེ ཏཱརཡཏི, པརིམོཙེཏི དུགྒཏིཾ.

བོདྷནེཡྻཾ ཛནཾ དིསྭཱ, སཏསཧསྶེཔི ཡོཛནེ;

ཁཎེན ཨུཔགནྟྭཱན, བོདྷེཏི ཏཾ མཧཱམུནི.

པཋམཱབྷིསམཡེ བུདྡྷོ, ཀོཊིསཏམབོདྷཡི;

དུཏིཡཱབྷིསམཡེ ནཱཐོ, ནཝུཏིཀོཊིམབོདྷཡི.

ཡདཱ ཙ དེཝབྷཝནམྷི, བུདྡྷོ དྷམྨདེསཡི;

ནཝུཏིཀོཊིསཧསྶཱནཾ, ཏཏིཡཱབྷིསམཡོ ཨཧུ.

སནྣིཔཱཏཱ ཏཡོ ཨཱསུཾ, དཱིཔངྐརསྶ སཏྠུནོ;

ཀོཊིསཏསཧསྶཱནཾ, པཋམོ ཨཱསི སམཱགམོ.

པུན ¶ ནཱརདཀཱུཊམྷི, པཝིཝེཀགཏེ ཛིནེ;

ཁཱིཎཱསཝཱ ཝཱིཏམལཱ, སམིཾསུ སཏཀོཊིཡོ.

ཡམྷི ཀཱལེ མཧཱཝཱིརོ, སུདསྶནསིལུཙྩཡེ;

ནཝུཏིཀོཊིསཧསྶེཧི, པཝཱརེསི མཧཱམུནི.

ཨཧཾ ཏེན སམཡེན, ཛཊིལོ ཨུགྒཏཱཔནོ;

ཨནྟལིཀྑམྷི ཙརཎོ, པཉྩཱབྷིཉྙཱསུ པཱརགཱུ.

དསཝཱིསསཧསྶཱནཾ, དྷམྨཱབྷིསམཡོ ཨཧུ;

ཨེཀདྭིནྣཾ ཨབྷིསམཡཱ, གཎནཱཏོ ཨསངྑིཡཱ.

ཝིཏྠཱརིཀཾ བཱཧུཛཉྙཾ, ཨིདྡྷཾ ཕཱིཏཾ ཨཧུ ཏདཱ;

དཱིཔངྐརསྶ བྷགཝཏོ, སཱསནཾ སུཝིསོདྷིཏཾ.

ཙཏྟཱརི སཏསཧསྶཱནི, ཚལ༹བྷིཉྙཱ མཧིདྡྷིཀཱ;

དཱིཔངྐརཾ ལོཀཝིདུཾ, པརིཝཱརེནྟི སབྦདཱ.

ཡེ ¶ ཀེཙི ཏེན སམཡེན, ཛཧནྟི མཱནུསཾ བྷཝཾ;

ཨཔྤཏྟམཱནསཱ སེཁཱ, གརཧིཏཱ བྷཝནྟི ཏེ.

སུཔུཔྥིཏཾ པཱཝཙནཾ, ཨརཧནྟེཧི ཏཱདིཧི;

ཁཱིཎཱསཝེཧི ཝིམལེཧི, ཨུཔསོབྷཏི སདེཝཀེ.

ནགརཾ རམྨཝཏཱི ནཱམ, སུདེཝོ ནཱམ ཁཏྟིཡོ;

སུམེདྷཱ ནཱམ ཛནིཀཱ, དཱིཔངྐརསྶ སཏྠུནོ.

སུམངྒལོ ¶ ཙ ཏིསྶོ ཙ, ཨཧེསུཾ ཨགྒསཱཝཀཱ;

སཱགཏོ ནཱམུཔཊྛཱཀོ, དཱིཔངྐརསྶ སཏྠུནོ.

ནནྡཱ ཙེཝ སུནནྡཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, པིཔྥལཱིཏི པཝུཙྩཏི.

ཨསཱིཏིཧཏྠམུབྦེདྷོ, དཱིཔངྐརོ མཧཱམུནི;

སོབྷཏི དཱིཔརུཀྑོཝ, སཱལརཱཛཱཝ པུཔྥིཏོ;

པབྷཱ ཝིདྷཱཝཏི ཏསྶ, སམནྟཱ དྭཱདསཡོཛནེ.

སཏསཧསྶཝསྶཱནི, ཨཱཡུ ཏསྶ མཧེསིནོ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

ཛོཏཡིཏྭཱན སདྡྷམྨཾ, སནྟཱརེཏྭཱ མཧཱཛནཾ;

ཛལིཏྭཱ ཨགྒིཀྑནྡྷོཝ, ནིབྦུཏོ སོ སསཱཝཀོ.

སཱ ཙ ཨིདྡྷི སོ ཙ ཡསོ, ཏཱནི ཙ པཱདེསུ ཙཀྐརཏནཱནི;

སབྦཾ ཏམནྟརཧིཏཾ, ནནུ རིཏྟཱ སབྦསངྑཱརཱཏི.

དཱིཔངྐརསྶ བྷགཝཏོ ཨཔརབྷཱགེ ཨེཀཾ ཨསངྑྱེཡྻཾ ཨཏིཀྐམིཏྭཱ ཀོཎྜཉྙོ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ ཨཧེསུཾ. པཋམསནྣིཔཱཏེ ཀོཊིསཏསཧསྶཾ. དུཏིཡེ ཀོཊིསཧསྶཾ, ཏཏིཡེ ནཝུཏིཀོཊིཡོ.

ཏདཱ བོདྷིསཏྟོ ཝིཛིཏཱཝཱི ནཱམ ཙཀྐཝཏྟཱི ཧུཏྭཱ ཀོཊིསཏསཧསྶསངྑསྶ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ ཨདཱསི. སཏྠཱ བོདྷིསཏྟཾ ‘‘བུདྡྷོ བྷཝིསྶཏཱི’’ཏི བྱཱཀརིཏྭཱ དྷམྨཾ དེསེསི. སོ སཏྠུ ¶ དྷམྨཀཐཾ སུཏྭཱ རཛྫཾ ནིཡྻཱཏེཏྭཱ པབྦཛི. སོ ཏཱིཎི པིཊཀཱནི ཨུགྒཧེཏྭཱ ཨཊྛ སམཱཔཏྟིཡོ, པཉྩ ཙ ཨབྷིཉྙཱཡོ ཨུཔྤཱདེཏྭཱ ཨཔརིཧཱིནཛ྄ཛྷཱནོ བྲཧྨལོཀེ ནིབྦཏྟི. ཀོཎྜཉྙབུདྡྷསྶ པན རམྨཝཏཱི ནཱམ ནགརཾ, སུནནྡོ ནཱམ ཁཏྟིཡོ པིཏཱ, སུཛཱཏཱ ¶ ནཱམ མཱཏཱ, བྷདྡོ ཙ སུབྷདྡོ ཙ དྭེ ཨགྒསཱཝཀཱ, ཨནུརུདྡྷོ ནཱམ ཨུཔཊྛཱཀོ, ཏིསྶཱ ཙ ཨུཔཏིསྶཱ ཙ དྭེ ཨགྒསཱཝིཀཱ, སཱལཀལྱཱཎཱི བོདྷི, ཨཊྛཱསཱིཏིཧཏྠུབྦེདྷཾ སརཱིརཾ, ཝསྶསཏསཧསྶཾ ཨཱཡུཔྤམཱཎཾ ཨཧོསི.

ཏསྶ ཨཔརབྷཱགེ ཨེཀཾ ཨསངྑྱེཡྻཾ ཨཏིཀྐམིཏྭཱ ཨེཀསྨིཾཡེཝ ཀཔྤེ ཙཏྟཱརོ བུདྡྷཱ ནིབྦཏྟིཾསུ མངྒལོ སུམནོ རེཝཏོ སོབྷིཏོཏི. མངྒལསྶ པན བྷགཝཏོ ཏཱིསུ སཱཝཀསནྣིཔཱཏེསུ པཋམསནྣིཔཱཏེ ཀོཊིསཏསཧསྶབྷིཀྑཱུ ཨཧེསུཾ. དུཏིཡེ ཀོཊིསཧསྶཾ. ཏཏིཡེ ནཝུཏིཀོཊིཡོ. ཝེམཱཏིཀབྷཱཏཱ པནསྶ ཨཱནནྡཀུམཱརོ ནཱམ ནཝུཏིཀོཊིསངྑྱཱཡ པརིསཱཡ སདྡྷིཾ དྷམྨསཝནཏྠཱཡ སཏྠུ སནྟིཀཾ ཨགམཱསི, སཏྠཱ ཏསྶ ཨནུཔུབྦིཀཐཾ ཀཐེསི. སོ སདྡྷིཾ པརིསཱཡ སཧ པཊིསམྦྷིདཱཧི ཨརཧཏྟཾ པཱཔུཎི. སཏྠཱ ཏེསཾ ཀུལཔུཏྟཱནཾ པུབྦཙརིཡཀཾ ཨོལོཀེནྟོ ཨིདྡྷིམཡཔཏྟཙཱིཝརསྶ ཨུཔནིསྶཡཾ དིསྭཱ དཀྑིཎཧཏྠཾ པསཱརེཏྭཱ ‘‘ཨེཐ བྷིཀྑཝོ’’ཏི ཨཱཧ. སབྦེ ཏངྑཎཉྙེཝ ཨིདྡྷིམཡཔཏྟཙཱིཝརདྷརཱ སཊྛིཝསྶིཀཏྠེརཱ ཝིཡ ཨཱཀཔྤསམྤནྣཱ ཧུཏྭཱ སཏྠཱརཾ ཝནྡིཏྭཱ པརིཝཱརཡིཾསུ ཨཡམསྶ ཏཏིཡོ སཱཝཀསནྣིཔཱཏོ ཨཧོསི.

ཡཐཱ པན ཨཉྙེསཾ བུདྡྷཱནཾ སམནྟཱ ཨསཱིཏིཧཏྠཔྤམཱཎཱཡེཝ སརཱིརཔྤབྷཱ ཧོཏི, ན, ཨེཝཾ ཏསྶ. ཏསྶ པན བྷགཝཏོ སརཱིརཔྤབྷཱ ནིཙྩཀཱལཾ དསསཧསྶིལོཀདྷཱཏུཾ ཕརིཏྭཱ ཨཊྛཱསི. རུཀྑཔཐཝཱིཔབྦཏསམུདྡཱདཡོ ཨནྟམསོ ཨུཀྑལིཡཱདཱིནི ཨུཔཱདཱཡ སུཝཎྞཔཊ པརིཡོནདྡྷཱ ཝིཡ ཨཧེསུཾ. ཨཱཡུཔྤམཱཎཾ པནསྶ ནཝུཏིཝསྶསཧསྶཱནི ཨཧོསི. ཨེཏྟཀཾ ཀཱལཾ ཙནྡིམསཱུརིཡཱདཡོ ཨཏྟནོ པབྷཱཡ ཝིརོཙིཏུཾ ནཱསཀྑིཾསུ, རཏྟིནྡིཝཔརིཙྪེདོ ན པཉྙཱཡིཏྠ. དིཝཱ སཱུརིཡཱལོཀེན ཝིཡ སཏྟཱ ནིཙྩཾ བུདྡྷཱལོཀེནེཝ ཝིཙརིཾསུ. སཱཡཾ པུཔྥིཏཱནཾ ཀུསུམཱནཾ, པཱཏོ རཝནཀསཀུཎཱནཉྩ ཝསེན ལོཀོ རཏྟིནྡིཝཔརིཙྪེདཾ སལླཀྑེསི ¶ . ཀིཾ པན ཨཉྙེསཾ བུདྡྷཱནཾ ཨཡམཱནུབྷཱཝོ ནཏྠཱིཏི? ནོ ནཏྠི, ཏེཔི ཧི ཨཱཀངྑམཱནཱ དསསཧསྶིཾ ཝཱ ལོཀདྷཱཏུཾ, ཏཏོ ཝཱ བྷིཡྻོ ཨཱབྷཱཡ ཕརེཡྻུཾ. མངྒལསྶ པན བྷགཝཏོ པུབྦཔཏྠནཱཝསེན ཨཉྙེསཾ བྱཱམཔྤབྷཱ ཝིཡ སརཱིརཔྤབྷཱ ནིཙྩམེཝ དསསཧསྶིལོཀདྷཱཏུཾ ཕརིཏྭཱ ཨཊྛཱསི.

སོ ཀིར བོདྷིསཏྟཙརིཡཀཱལེ ཝེསྶནྟརསདིསེ ཨཏྟབྷཱཝེ ཋིཏོ སཔུཏྟདཱརོ ཝངྐཔབྦཏསདིསེ པབྦཏེ ཝསི. ཨཐེཀོ ཁརདཱཋིཀོ ནཱམ ཡཀྑོ མཧཱཔུརིསསྶ དཱནཛ྄ཛྷཱསཡཏཾ སུཏྭཱ བྲཱཧྨཎཝཎྞེན ཨུཔསངྐམིཏྭཱ མཧཱསཏྟཾ དྭེ དཱརཀེ ཡཱཙི. མཧཱསཏྟོ ‘‘དདཱམི ¶ བྲཱཧྨཎསྶ པུཏྟཀེ’’ཏི ཧཊྛཔཧཊྛོ ཨུདཀཔརིཡནྟཾ པཐཝིཾ ཀམྤེནྟོ དྭེཔི དཱརཀེ ཨདཱསི. ཡཀྑོ ཙངྐམནཀོཊིཡཾ ཨཱལམྦནཕལཀཾ ནིསྶཱཡ ཋཏྭཱ པསྶནྟསྶེཝ མཧཱསཏྟསྶ མུལཱ༹ལཀལཱཔཾ ཝིཡ དྭེ དཱརཀེ ཁཱདི. མཧཱཔུརིསསྶ ཡཀྑཾ ཨོལོཀེཏྭཱ ཝིཝཊམཏྟེ ཨགྒིཛཱལཾ ཝིཡ ལོཧིཏདྷཱརཾ ཨུགྒིརམཱནཾ ཏསྶ མུཁཾ དིསྭཱཔི ཀེསགྒམཏྟམྤི དོམནསྶཾ ནུཔྤཛྫི, ‘‘སུདིནྣཾ ཝཏ མེ དཱན’’ནྟི ཙིནྟཡཏོ པནསྶ སརཱིརེ མཧནྟཾ པཱིཏིསོམནསྶཾ ཨུདཔཱདི. སོ ‘‘ཨིམསྶ མེ ནིསྶནྡེན ཨནཱགཏེ ཨིམིནཱཝ ནཱིཧཱརེན སརཱིརཏོ རསྨིཡོ ནིཀྑམནྟཱུ’’ཏི པཏྠནཾ ཨཀཱསི. ཏསྶ ཏཾ པཏྠནཾ ནིསྶཱཡ བུདྡྷབྷཱུཏསྶ སརཱིརཏོ རསྨིཡོ ནིཀྑམིཏྭཱ ཨེཏྟཀཾ ཋཱནཾ ཕརིཾསུ.

ཨཔརམྤིསྶ པུབྦཙརིཏཾ ཨཏྠི. སོ ཀིར བོདྷིསཏྟཀཱལེ ཨེཀསྶ བུདྡྷསྶ ཙེཏིཡཾ དིསྭཱ ‘‘ཨིམསྶ བུདྡྷསྶ མཡཱ ཛཱིཝིཏཾ པརིཙྩཛིཏུཾ ཝཊྚཏཱི’’ཏི དཎྜཀདཱིཔིཀཱཝེཋནནིཡཱམེན སཀལསརཱིརཾ ཝེཋཱཔེཏྭཱ རཏནམཏྟམཀུལཾ སཏསཧསྶགྒྷནིཀཾ སུཝཎྞཔཱཏིཾ སཔྤིསྶ པཱུརཱཔེཏྭཱ ཏཏྠ སཧསྶཝཊྚིཡོ ཛཱལཱཔེཏྭཱ ཏཾ སཱིསེནཱདཱཡ སཀལསརཱིརཾ ཛཱལཱཔེཏྭཱ ཙེཏིཡཾ པདཀྑིཎཾ ཀརོནྟོ སཀལརཏྟིཾ ཝཱིཏིནཱམེསི. ཨེཝཾ ཡཱཝ ཨརུཎུགྒམནཱ ཝཱཡམནྟསྶཱཔིསྶ ལོམཀཱུཔམཏྟམྤི ཨུསུམཾ ན གཎྷི, པདུམགབྦྷཾ པཝིཊྛཀཱལོ ཝིཡ ཨཧོསི. དྷམྨོ ཧི ནཱམེས ཨཏྟཱནཾ རཀྑནྟཾ རཀྑཏི. ཏེནཱཧ བྷགཝཱ –

‘‘དྷམྨོ ¶ ཧཝེ རཀྑཏི དྷམྨཙཱརིཾ,

དྷམྨོ སུཙིཎྞོ སུཁམཱཝཧཱཏི;

ཨེསཱནིསཾསོ དྷམྨེ སུཙིཎྞེ,

ན དུགྒཏིཾ གཙྪཏི དྷམྨཙཱརཱི’’ཏི. (ཐེརགཱ. ༣༠༣; ཛཱ. ༡.༡༠.༡༠༢; ༡.༡༥.༣༨༥);

ཨིམསྶཱཔི ཀམྨསྶ ནིསྶནྡེན ཏསྶ བྷགཝཏོ སརཱིརོབྷཱསོ དསསཧསྶིལོཀདྷཱཏུཾ ཕརིཏྭཱ ཨཊྛཱསི.

ཏདཱ ཨམྷཱཀཾ བོདྷིསཏྟོ སུརུཙི ནཱམ བྲཱཧྨཎོ ཧུཏྭཱ ‘‘སཏྠཱརཾ ནིམནྟེསྶཱམཱི’’ཏི ཨུཔསངྐམིཏྭཱ མདྷུརདྷམྨཀཐཾ སུཏྭཱ ‘‘སྭེ མཡ྄ཧཾ བྷིཀྑཾ གཎྷཐ བྷནྟེ’’ཏི ཨཱཧ. བྲཱཧྨཎ ཀིཏྟཀེཧི ¶ ཏེ བྷིཀྑཱུཧི ཨཏྠོཏི, ཀིཏྟཀཱ པན ཝོ བྷནྟེ པརིཝཱརཱ བྷིཀྑཱུཏི. ཏདཱ སཏྠུ པཋམསནྣིཔཱཏོཡེཝ ཧོཏི. ཏསྨཱ ‘‘ཀོཊིསཏསཧསྶ’’ནྟི ཨཱཧ. ‘‘བྷནྟེ, སབྦེཧིཔི སདྡྷིཾ མཡ྄ཧཾ བྷིཀྑཾ གཎྷཐཱ’’ཏི ཨཱཧ. སཏྠཱ ཨདྷིཝཱསེསི. བྲཱཧྨཎོ སྭཱཏནཱཡ ནིམནྟེཏྭཱ གེཧཾ གཙྪནྟོ ཙིནྟེསི ‘‘ཨཧཾ ཨེཏྟཀཱནཾ བྷིཀྑཱུནཾ ཡཱགུབྷཏྟཝཏྠཱདཱིནི དཱཏུཾ ནོ ན སཀྐོམི, ནིསཱིདནཊྛཱནཾ པན ཀཐཾ བྷཝིསྶཏཱི’’ཏི. ཏསྶ སཱ ཙིནྟཱ ཙཏུརཱསཱིཏིཡོཛནསཧསྶམཏྠཀེ ཋིཏསྶ དེཝརཉྙོ པཎྜུཀམྦལསིལཱསནསྶ ཨུཎྷབྷཱཝཾ ཛནེསི. སཀྐོ ‘‘ཀོ ནུ ཁོ མཾ ཨིམསྨཱ ཋཱནཱ ཙཱཝེཏུཀཱམོ’’ཏི དིབྦཙཀྑུནཱ ཨོལོཀེནྟོ མཧཱཔུརིསཾ དིསྭཱ ‘‘ཨཡཾ སུརུཙི བྲཱཧྨཎོ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ ནིསཱིདནཊྛཱནཏྠཱཡ ཙིནྟེསི, མཡཱཔི ཏཏྠ གནྟྭཱ པུཉྙཀོཊྛཱསཾ གཧེཏུཾ ཝཊྚཏཱི’’ཏི ཝཌྜྷཀིཝཎྞཾ ནིམྨིནིཏྭཱ ཝཱསིཕརསུཧཏྠོ མཧཱཔུརིསསྶ པུརཏོ པཱཏུརཧོསི. ‘‘ཨཏྠི ནུ ཁོ ཀསྶཙི བྷཏིཡཱ ཀཏྟབྦཀིཙྩ’’ནྟི ཨཱཧ. མཧཱཔུརིསོ ཏཾ དིསྭཱ ‘‘ཀིཾ ཀམྨཾ ཀརིསྶསཱི’’ཏི ཨཱཧ. མམ ཨཛཱནནསིཔྤཾ ནཱམ ནཏྠི, གེཧཾ ཝཱ མཎྜཔཾ ཝཱ ཡོ ཡཾ ཀཱརེཏི, ཏསྶ ཏཾ ཀཱཏུཾ ཛཱནཱམཱིཏི. ཏེན ཧི མཡ྄ཧཾ ཀམྨཾ ཨཏྠཱིཏི. ཀིཾ, ཨཡྻཱཏི? སྭཱཏནཱཡ མེ ཀོཊིསཏསཧསྶབྷིཀྑཱུ ནིམནྟིཏཱ, ཏེསཾ ནིསཱིདནམཎྜཔཾ ཀརིསྶསཱིཏི. ཨཧཾ ནཱམ ཀརེཡྻཾ, སཙེ མེ བྷཏིཾ དཱཏུཾ སཀྑིསྶཐཱཏི. སཀྑིསྶཱམི, ཏཱཏཱཏི. ‘‘སཱདྷུ ཀརིསྶཱམཱི’’ཏི གནྟྭཱ ཨེཀཾ པདེསཾ ཨོལོཀེསི.

དྭཱདསཏེརསཡོཛནཔྤམཱཎོ ¶ པདེསོ ཀསིཎམཎྜལཾ ཝིཡ སམཏལོ ཨཧོསི. སོ ‘‘ཨེཏྟཀེ ཋཱནེ སཏྟརཏནམཡོ མཎྜཔོ ཨུཊྛཧཏཱུ’’ཏི ཙིནྟེཏྭཱ ཨོལོཀེསི. ཏཱཝདེཝ པཐཝིཾ བྷིནྡིཏྭཱ མཎྜཔོ ཨུཊྛཧི. ཏསྶ སུཝཎྞམཡེསུ ཐམྦྷེསུ རཛཏམཡཱ གྷཊཀཱ ཨཧེསུཾ, རཛཏམཡེསུ ཐམྦྷེསུ སུཝཎྞམཡཱ, མཎིཏྠམྦྷེསུ པཝཱལ༹མཡཱ, པཝཱལ༹ཏྠམྦྷེསུ མཎིམཡཱ, སཏྟརཏནམཡེསུ ཐམྦྷེསུ སཏྟརཏནམཡཱཝ གྷཊཀཱ ཨཧེསུཾ. ཏཏོ ‘‘མཎྜཔསྶ ཨནྟརནྟེན ཀིངྐིཎིཀཛཱལཾ ཨོལམྦཏཱུ’’ཏི ཨོལོཀེསི. སཧ ཨོལོཀནེནེཝ ཀིངྐིཎིཀཛཱལཾ ཨོལམྦི, ཡསྶ མནྡཝཱཏེརིཏསྶ པཉྩངྒིཀསྶེཝ ཏཱུརིཡསྶ མདྷུརསདྡོ ནིགྒཙྪཏི. དིབྦསངྒཱིཏིཝཏྟནཀཱལོ ཝིཡ ཨཧོསི. ‘‘ཨནྟརནྟརཱ གནྡྷདཱམམཱལཱདཱམཱནི ཨོལམྦནྟཱུ’’ཏི ཙིནྟེསི. ཏཱཝདེཝ དཱམཱནི ཨོལམྦིཾསུ. ‘‘ཀོཊིསཏསཧསྶསངྑྱཱནཾ བྷིཀྑཱུནཾ ཨཱསནཱནི ཙ ཨཱདྷཱརཀཱནི ཙ པཐཝིཾ བྷིནྡིཏྭཱ ཨུཊྛཧནྟཱུ’’ཏི ཙིནྟེསི. ཏཱཝདེཝ ཨུཊྛཧིཾསུ. ‘‘ཀོཎེ ཀོཎེ ཨེཀེཀཱ ཨུདཀཙཱཊིཡོ ཨུཊྛཧནྟཱུ’’ཏི ཙིནྟེསི, ཏཱཝདེཝ ཨུདཀཙཱཊིཡོ ཨུཊྛཧིཾསུ ཨེཏྟཀཾ མཱཔེཏྭཱ བྲཱཧྨཎསྶ སནྟིཀཾ གནྟྭཱ ‘‘ཨེཧི ཨཡྻ ཏཝ མཎྜཔཾ ཨོལོཀེཏྭཱ མཡ྄ཧཾ བྷཏིཾ དེཧཱི’’ཏི ཨཱཧ. མཧཱཔུརིསོ གནྟྭཱ མཎྜཔཾ ཨོལོཀེསི ¶ . ཨོལོཀེནྟསྶེཝསྶ སཀལསརཱིརཾ པཉྩཝཎྞཱཡ པཱིཏིཡཱ ནིརནྟརཾ ཕུཊཾ ཨཧོསི. ཨཐསྶ མཎྜཔཾ ཨོལོཀེཏྭཱ ཨེཏདཧོསི ‘‘ནཱཡཾ མཎྜཔོ མནུསྶབྷཱུཏེན ཀཏོ, མཡ྄ཧཾ པན ཨཛ྄ཛྷཱསཡཾ མཡ྄ཧཾ གུཎཾ ཨཱགམྨ ཨདྡྷཱ སཀྐསྶ བྷཝནཾ ཨུཎྷཾ ཨཧོསི. ཏཏོ སཀྐེན དེཝརཉྙཱ ཨཡཾ མཎྜཔོ ཀཱརིཏོ བྷཝིསྶཏཱི’’ཏི. ‘‘ན ཁོ པན མེ ཡུཏྟཾ ཨེཝརཱུཔེ མཎྜཔེ ཨེཀདིཝསཾཡེཝ དཱནཾ དཱཏུཾ, སཏྟཱཧཾ དསྶཱམཱི’’ཏི ཙིནྟེསི.

བཱཧིརཀདཱནཉྷི ཏཏྟཀམྤི སམཱནཾ བོདྷིསཏྟཱནཾ ཏུཊྛིཾ ཀཱཏུཾ ན སཀྐོཏི. ཨལངྐཏསཱིསཾ པན ཚིནྡིཏྭཱ ཨཉྫིཏཨཀྑཱིནི ཨུཔྤཱཊེཏྭཱ, ཧདཡམཾསཾ ཝཱ ཨུཔྤཱཊེཏྭཱ དིནྣཀཱལེ བོདྷིསཏྟཱནཾ ཙཱགཾ ནིསྶཱཡ ཏུཊྛི ནཱམ ཧོཏི. ཨམྷཱཀམྤི ཧི བོདྷིསཏྟསྶ སིཝིཛཱཏཀེ དེཝསིཀཾ པཉྩསཏསཧསྶཀཧཱཔཎཱནི ཝིསྶཛྫེཏྭཱ ཙཏཱུསུ ནགརདྭཱརེསུ, མཛ྄ཛྷེ ནགརེ ཙ དཱནཾ དདནྟསྶ ཏཾ དཱནཾ ཏུཊྛིཾ ཨུཔྤཱདེཏུཾ ནཱསཀྑི. ཡདཱ པནསྶ བྲཱཧྨཎཝཎྞེན ཨཱགནྟྭཱ སཀྐོ དེཝརཱཛཱ ཨཀྑཱིནི ཡཱཙི, ཏདཱ ཏཱནི ཨུཔྤཱཊེཏྭཱ ¶ དདམཱནསྶེཝ ཧཱསོ ཨུཔྤཛྫི, ཀེསགྒམཏྟམྤི ཙིཏྟསྶ ཨཉྙཐཏྟཾ ནཱཧོསི. ཨེཝཾ དཱནཾ ནིསྶཱཡ བོདྷིསཏྟཱནཾ ཏིཏྟི ནཱམ ནཏྠི. ཏསྨཱ སོཔི མཧཱཔུརིསོ ‘‘སཏྟཱཧཾ མཡཱ ཀོཊིསཏསཧསྶསངྑྱཱནཾ བྷིཀྑཱུནཾ དཱནཾ དཱཏུཾ ཝཊྚཏཱི’’ཏི ཙིནྟེཏྭཱ ཏསྨིཾ མཎྜཔེ བུདྡྷཔྤམུཁཾ བྷིཀྑུསངྒྷཾ ནིསཱིདཱཔེཏྭཱ སཏྟཱཧཾ གཝཔཱནཾ ནཱམ ཨདཱསི. གཝཔཱནནྟི མཧནྟེ མཧནྟེ ཀོལམྦེ ཁཱིརསྶ པཱུརེཏྭཱ ཨུདྡྷནེསུ ཨཱརོཔེཏྭཱ གྷནཔཱཀཔཀྐེ ཁཱིརེ ཐོཀེ ཏཎྜུལེ པཀྑིཔིཏྭཱ པཀྐམདྷུསཀྐརཙུཎྞསཔྤཱིཧི ཨབྷིསངྑཏཾ བྷོཛནཾ ཝུཙྩཏི. མནུསྶཱཡེཝ པན པརིཝིསིཏུཾ ནཱསཀྑིཾསུ, དེཝཱཔི ཨེཀནྟརིཀཱ ཧུཏྭཱ པརིཝིསིཾསུ. དྭཱདསཏེརསཡོཛནཔྤམཱཎཾ ཋཱནམྤི བྷིཀྑཱུ གཎྷིཏུཾ ནཔྤཧོཏིཡེཝ. ཏེ པན བྷིཀྑཱུ ཨཏྟནོ ཨཱནུབྷཱཝེན ནིསཱིདིཾསུ. པརིཡོསཱནདིཝསེ སབྦབྷིཀྑཱུནཾ པཏྟཱནི དྷོཝཱཔེཏྭཱ བྷེསཛྫཏྠཱཡ སཔྤིནཝནཱིཏཏེལམདྷུཕཱཎིཏཱནཾ པཱུརེཏྭཱ ཏིཙཱིཝརེཧི སདྡྷིཾ ཨདཱསི. སངྒྷནཝཀབྷིཀྑུནཱ ལདྡྷཏིཙཱིཝརསཱཊཀཱ སཏསཧསྶགྒྷནིཀཱ ཨཧེསུཾ. སཏྠཱ ཨནུམོདནཾ ཀརོནྟོ ‘‘ཨཡཾ པུརིསོ ཨེཝརཱུཔཾ མཧཱདཱནཾ ཨདཱསི, ཀོ ནུ ཁོ བྷཝིསྶཏཱི’’ཏི ཨུཔདྷཱརེནྟོ ‘‘ཨནཱགཏེ ཀཔྤསཏསཧསྶཱདྷིཀཱནཾ དྭིནྣཾ ཨསངྑྱེཡྻཱནཾ མཏྠཀེ གོཏམོ ནཱམ བུདྡྷོ བྷཝིསྶཏཱི’’ཏི དིསྭཱ མཧཱཔུརིསཾ ཨཱམནྟེཏྭཱ ‘‘ཏྭཾ ཨེཏྟཀཾ ནཱམ ཀཱལཾ ཨཏིཀྐམིཏྭཱ གོཏམོ ནཱམ བུདྡྷོ བྷཝིསྶསཱི’’ཏི བྱཱཀཱསི.

མཧཱཔུརིསོ བྱཱཀརཎཾ སུཏྭཱ ‘‘ཨཧཾ ཀིར བུདྡྷོ བྷཝིསྶཱམི, ཀོ མེ གྷརཱཝཱསེན ཨཏྠོ ¶ , པབྦཛིསྶཱམཱི’’ཏི ཙིནྟེཏྭཱ ཏཐཱརཱུཔཾ སམྤཏྟིཾ ཁེལ༹པིཎྜཾ ཝིཡ པཧཱཡ སཏྠུ སནྟིཀེ པབྦཛི. པབྦཛིཏྭཱ ཙ བུདྡྷཝཙནཾ ཨུགྒཎྷིཏྭཱ ཨབྷིཉྙཱ, སམཱཔཏྟིཡོ ཙ ནིབྦཏྟེཏྭཱ ཨཱཡུཔརིཡོསནེ བྲཧྨལོཀེ ནིབྦཏྟི.

མངྒལསྶ པན བྷགཝཏོ ཨུཏྟརཾ ནཱམ ནགརཾ ཨཧོསི. པིཏཱཔི ཨུཏྟརོ ནཱམ ཁཏྟིཡོ, མཱཏཱཔི ཨུཏྟརཱ ནཱམ, སུདེཝོ ཙ དྷམྨསེནོ ཙ དྭེ ཨགྒསཱཝཀཱ, པཱལིཏོ ནཱམ ཨུཔཊྛཱཀོ, སཱིཝལཱི ཙ ཨསོཀཱ ཙ དྭེ ཨགྒསཱཝིཀཱ, ནཱགརུཀྑོ བོདྷི, ཨཊྛཱསཱིཏིཧཏྠུབྦེདྷཾ སརཱིརཾ ཨཧོསི. ནཝུཏིཝསྶསཧསྶཱནི ཋཏྭཱ པརིནིབྦུཏེ པན ཏསྨིཾ ཨེཀཔྤཧཱརེནེཝ ¶ དསཙཀྐཝཱལ༹སཧསྶཱནི ཨེཀནྡྷཀཱརཱནི ཨཧེསུཾ. སབྦཙཀྐཝཱལེ༹སུ མནུསྶཱནཾ མཧནྟཾ ཨཱརོདནཔརིདེཝནཾ ཨཧོསི.

ཨེཝཾ དསསཧསྶིལོཀདྷཱཏུཾ ཨནྡྷཀཱརཾ ཀཏྭཱ པརིནིབྦུཏསྶ ཏསྶ བྷགཝཏོ ཨཔརབྷཱགེ སུམནོ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ. པཋམསནྣིཔཱཏེ ཀོཊིསཏསཧསྶབྷིཀྑཱུ ཨཧེསུཾ. དུཏིཡེ ཀཉྩནཔབྦཏམྷི ནཝུཏིཀོཊིསཧསྶཱནི, ཏཏིཡེ ཨསཱིཏིཀོཊིསཧསྶཱནི. ཏདཱ མཧཱསཏྟོ ཨཏུལོ ནཱམ ནཱགརཱཛཱ ཨཧོསི མཧིདྡྷིཀོ མཧཱནུབྷཱཝོ, སོ ‘‘བུདྡྷོ ཨུཔྤནྣོ’’ཏི སུཏྭཱ ཉཱཏིསངྒྷཔརིཝུཏོ ནཱགབྷཝནཱ ནིཀྑམིཏྭཱ ཀོཊིསཏསཧསྶབྷིཀྑུཔརིཝཱརསྶ ཏསྶ བྷགཝཏོ དིབྦཏཱུརིཡེཧི ཨུཔཧཱརཾ ཀཱརཱཔེཏྭཱ མཧཱདཱནཾ པཝཏྟེཏྭཱ པཙྩེཀཾ དུསྶཡུགཱནི དཏྭཱ སརཎེསུ པཏིཊྛཱསི. སོཔི ནཾ སཏྠཱ ‘‘ཨནཱགཏེ བུདྡྷོ བྷཝིསྶསཱི’’ཏི བྱཱཀཱསི.

ཏསྶ བྷགཝཏོ ནགརཾ མེཁལཾ ནཱམ ཨཧོསི, སུདཏྟོ ནཱམ རཱཛཱ པིཏཱ, སིརིམཱ ནཱམ མཱཏཱ, སརཎོ ཙ བྷཱཝིཏཏྟོ ཙ དྭེ ཨགྒསཱཝཀཱ, ཨུདེནོ ནཱམ ཨུཔཊྛཱཀོ, སོཎཱ ཙ ཨུཔསོཎཱ ཙ དྭེ ཨགྒསཱཝིཀཱ, ནཱགརུཀྑོཝ བོདྷི, ནཝུཏིཧཏྠུབྦེདྷཾ སརཱིརཾ, ནཝུཏིཡེཝ ཝསྶསཧསྶཱནི ཨཱཡུཔྤམཱཎཾ ཨཧོསཱིཏི.

ཏསྶ ཨཔརབྷཱགེ རེཝཏོ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ ཨཧེསུཾ, པཋམསནྣིཔཱཏེ གཎནཱ ནཱམ ནཏྠི, དུཏིཡེ ཀོཊིསཏསཧསྶབྷིཀྑཱུ ཨཧེསུཾ, ཏཐཱ ཏཏིཡེ. ཏདཱ བོདྷིསཏྟོ ཨཏིདེཝོ ནཱམ བྲཱཧྨཎོ ཧུཏྭཱ སཏྠུ དྷམྨདེསནཾ སུཏྭཱ སརཎེསུ པཏིཊྛཱཡ སིརསྨིཾ ཨཉྫལིཾ ¶ ཋཔེཏྭཱ ཏསྶ སཏྠུནོ ཀིལེསཔྤཧཱནེ ཝཎྞཾ ཝཏྭཱ ཨུཏྟརཱསངྒེན པཱུཛམཀཱསི. སོཔི ནཾ ‘‘བུདྡྷོ བྷཝིསྶསཱི’’ཏི བྱཱཀཱསི.

ཏསྶ པན བྷགཝཏོ ནགརཾ སུདྷཉྙཝཏཱི ནཱམ ཨཧོསི, པིཏཱ ཝིཔུལོ ནཱམ ཁཏྟིཡོ, མཱཏཱཔི ཝིཔུལཱ ནཱམ, ཝརུཎོ ཙ བྲཧྨདེཝོ ཙ དྭེ ཨགྒསཱཝཀཱ, སམྦྷཝོ ནཱམ ཨུཔཊྛཱཀོ, བྷདྡཱ ཙ སུབྷདྡཱ ཙ དྭེ ཨགྒསཱཝིཀཱ, ནཱགརུཀྑོཝ བོདྷི, སརཱིརཾ ཨསཱིཏིཧཏྠུབྦེདྷཾ ཨཧོསི, ཨཱཡུ སཊྛིཝསྶསཧསྶཱནཱིཏི.

ཏསྶ ¶ ཨཔརབྷཱགེ སོབྷིཏོ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ, པཋམསནྣིཔཱཏེ ཀོཊིསཏབྷིཀྑཱུ ཨཧེསུཾ, དུཏིཡེ ནཝུཏིཀོཊིཡོ, ཏཏིཡེ ཨསཱིཏིཀོཊིཡོ. ཏདཱ བོདྷིསཏྟོ ཨཛིཏོ ནཱམ བྲཱཧྨཎོ ཧུཏྭཱ སཏྠུ དྷམྨདེསནཾ སུཏྭཱ སརཎེསུ པཏིཊྛཱཡ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ ཨདཱསི. སོཔི ནཾ ‘‘བུདྡྷོ བྷཝིསྶསཱི’’ཏི བྱཱཀཱསི.

ཏསྶ པན བྷགཝཏོ ནགརཾ སུདྷམྨཾ ནཱམ ཨཧོསི, པིཏཱ སུདྷམྨོ ནཱམ རཱཛཱ, མཱཏཱཔི སུདྷམྨཱ ནཱམ, ཨསམོ ཙ སུནེཏྟོ ཙ དྭེ ཨགྒསཱཝཀཱ, ཨནོམོ ནཱམ ཨུཔཊྛཱཀོ, ནཀུལཱ ཙ སུཛཱཏཱ ཙ དྭེ ཨགྒསཱཝིཀཱ, ནཱགརུཀྑོཝ བོདྷི, ཨཊྛཔཎྞཱསཧཏྠུབྦེདྷཾ སརཱིརཾ ཨཧོསི, ནཝུཏི ཝསྶསཧསྶཱནི ཨཱཡུཔྤམཱཎནྟི.

ཏསྶ ཨཔརབྷཱགེ ཨེཀཾ ཨསངྑྱེཡྻཾ ཨཏིཀྐམིཏྭཱ ཨེཀསྨིཾཡེཝ ཀཔྤེ ཏཡོ བུདྡྷཱ ནིབྦཏྟིཾསུ ཨནོམདསྶཱི, པདུམོ, ནཱརདོཏི. ཨནོམདསྶིསྶ བྷགཝཏོ ཏཡོ སཱཝཀསནྣིཔཱཏཱ, པཋམེ ཨཊྛ བྷིཀྑུསཏསཧསྶཱནི ཨཧེསུཾ, དུཏིཡེ སཏྟ, ཏཏིཡེ ཚ ཏདཱ བོདྷིསཏྟོ ཨེཀོ ཡཀྑསེནཱཔཏི ཨཧོསི མཧིདྡྷིཀོ མཧཱནུབྷཱཝོ ཨནེཀཀོཊིསཏསཧསྶཱནཾ ཡཀྑཱནཾ ཨདྷིཔཏི. སོ ‘‘བུདྡྷོ ཨུཔྤནྣོ’’ཏི སུཏྭཱ ཨཱགནྟྭཱ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ ཨདཱསི. སཏྠཱཔི ནཾ ‘‘ཨནཱགཏེ བུདྡྷོ བྷཝིསྶསཱི’’ཏི བྱཱཀཱསི.

ཨནོམདསྶིསྶ པན བྷགཝཏོ ཙནྡཝཏཱི ནཱམ ནགརཾ ཨཧོསི, ཡསཝཱ ནཱམ རཱཛཱ པིཏཱ, ཡསོདྷརཱ ནཱམ མཱཏཱ, ནིསབྷོ ཙ ཨནོམོ ཙ དྭེ ཨགྒསཱཝཀཱ, ཝརུཎོ ནཱམ ཨུཔཊྛཱཀོ ¶ , སུནྡརཱི ཙ སུམནཱ ཙ དྭེ ཨགྒསཱཝིཀཱ, ཨཛྫུནརུཀྑོ བོདྷི, སརཱིརཾ ཨཊྛཔཎྞཱསཧཏྠུབྦེདྷཾ ཨཧོསི, ཝསྶསཏསཧསྶཾ ཨཱཡཱུཏི.

ཏསྶ ཨཔརབྷཱགེ པདུམོ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ, པཋམསནྣིཔཱཏེ ཀོཊིསཏསཧསྶབྷིཀྑཱུ ཨཧེསུཾ, དུཏིཡེ ཏཱིཎིསཏསཧསྶཱནི, ཏཏིཡེ ཨགཱམཀེ ཨརཉྙེ མཧཱཝནསཎྜཝཱསཱིནཾ བྷིཀྑཱུནཾ དྭེ སཏསཧསྶཱནི. ཏདཱ ཏཐཱགཏེ ཏསྨིཾཡེཝ ཝནསཎྜེ ཝསནྟེ བོདྷིསཏྟོ སཱིཧོ ཧུཏྭཱ སཏྠཱརཾ ནིརོདྷསམཱཔཏྟིསམཱཔནྣཾ དིསྭཱ པསནྣཙིཏྟོ ཝནྡིཏྭཱ པདཀྑིཎཾ ཀཏྭཱ ¶ པཱིཏིསོམནསྶཛཱཏོ ཏིཀྑཏྟུཾ སཱིཧནཱདཾ ནདིཏྭཱ སཏྟཱཧཾ བུདྡྷཱརམྨཎཾ པཱིཏིཾཨཝིཛཧིཏྭཱ པཱིཏིསུཁེནེཝ གོཙརཱཡ ཨཔཀྐམིཏྭཱ ཛཱིཝིཏཔརིཙྩཱགཾ ཀཏྭཱ པཡིརུཔཱསམཱནོ ཨཊྛཱསི. སཏྠཱ སཏྟཱཧཙྩཡེན ནིརོདྷཱ ཝུཊྛིཏོ སཱིཧཾ ཨོལོཀེཏྭཱ ‘‘བྷིཀྑུསངྒྷེཔི ཙིཏྟཾ པསཱདེཏྭཱ སངྒྷཾ ཝནྡིསྶཏཱི’’ཏི ‘‘བྷིཀྑུསངྒྷོ ཨཱགཙྪཏཱུ’’ཏི ཙིནྟེསི. བྷིཀྑཱུ ཏཱཝདེཝ ཨཱགམིཾསུ. སཱིཧོ སངྒྷེ ཙིཏྟཾ པསཱདེཏི. སཏྠཱ ཏསྶ མཱནསཾ ཨོལོཀེཏྭཱ ‘‘ཨནཱགཏེ བུདྡྷོ བྷཝིསྶསཱི’’ཏི བྱཱཀཱསི.

པདུམསྶ པན བྷགཝཏོ ཙམྤཀཾ ནགརཾ ཨཧོསི ཨསམོ ནཱམ རཱཛཱ པིཏཱ, མཱཏཱ ཨསམཱ ནཱམ, སཱལོ ཙ ཨུཔསཱལོ ཙ དྭེ ཨགྒསཱཝཀཱ, ཝརུཎོ ནཱམ ཨུཔཊྛཱཀོ, རཱམཱ ཙ སུརཱམཱ ཙ དྭེ ཨགྒསཱཝིཀཱ, སོཎརུཀྑོ ནཱམ བོདྷི ཨཊྛཔཎྞཱསཧཏྠུབྦེདྷཾ སརཱིརཾ ཨཧོསི, ཨཱཡུ ཝསྶསཏསཧསྶནྟི.

ཏསྶ ཨཔརབྷཱགེ ནཱརདོ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ, པཋམསནྣིཔཱཏེ ཀོཊིསཏསཧསྶབྷིཀྑཱུ ཨཧེསུཾ, དུཏིཡེ ནཝུཏིཀོཊིསཧསྶཱནི, ཏཏིཡེ ཨསཱིཏིཀོཊིསཧསྶཱནི. ཏདཱ བོདྷིསཏྟོ ཨིསིཔབྦཛྫཾ པབྦཛིཏྭཱ པཉྩསུ ཨབྷིཉྙཱསུ, ཨཊྛསུ ཙ སམཱཔཏྟཱིསུ ཙིཎྞཝསཱི ཧུཏྭཱ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ དཏྭཱ ལོཧིཏཙནྡནེན པཱུཛམཀཱསི, སོཔི ནཾ ‘‘ཨནཱགཏེ བུདྡྷོ བྷཝིསྶསཱི’’ཏི བྱཱཀཱསི.

ཏསྶ པན བྷགཝཏོ དྷཉྙཝཏཱི ནཱམ ནགརཾ ཨཧོསི, སུདེཝོ ནཱམ ཁཏྟིཡོ པིཏཱ, ཨནོམཱ ནཱམ མཱཏཱ, བྷདྡསཱལོ ཙ ཛིཏམིཏྟོ ཙ དྭེ ཨགྒསཱཝཀཱ, ཝཱསིཊྛོ ནཱམ ཨུཔཊྛཱཀོ, ཨུཏྟརཱ ¶ ཙ ཕགྒུནཱི ཙ དྭེ ཨགྒསཱཝིཀཱ, མཧཱསོཎརུཀྑོ བོདྷི, སརཱིརཾ ཨཊྛཱསཱིཏིཧཏྠུབྦེདྷཾ ཨཧོསི, ནཝུཏི ཝསྶསཧསྶཱནི ཨཱཡཱུཏི.

ནཱརདབུདྡྷསྶ པན ཨཔརབྷཱགེ ཨེཀཾ ཨསངྑྱེཡྻཾ ཨཏིཀྐམིཏྭཱ ཨིཏོ སཏསཧསྶཀཔྤམཏྠཀེ ཨེཀསྨིཾ ཀཔྤེ ཨེཀོཝ པདུམུཏྟརོ ནཱམ བུདྡྷོ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ, པཋམསནྣིཔཱཏེ ཀོཊིསཏསཧསྶབྷིཀྑཱུ ཨཧེསུཾ, དུཏིཡེ ཝེབྷཱརཔབྦཏེ ནཝུཏིཀོཊིསཧསྶཱནི, ཏཏིཡེ ཨསཱིཏིཀོཊིསཧསྶཱནི. ཏདཱ བོདྷིསཏྟོ ཛཊིལོ ནཱམ མཧཱརཊྛིཡོ ཧུཏྭཱ བུདྡྷཔྤམུཁསྶ བྷིཀྑུསངྒྷསྶ སཙཱིཝརཾ དཱནཾ ¶ ཨདཱསི. སོཔི ནཾ ‘‘ཨནཱགཏེ བུདྡྷོ བྷཝིསྶསཱི’’ཏི བྱཱཀཱསི. པདུམུཏྟརསྶ པན བྷགཝཏོ ཀཱལེ ཏིཏྠིཡཱ ནཱམ ནཱཧེསུཾ སབྦེ དེཝམནུསྶཱ བུདྡྷམེཝ སརཎམཀཾསུ.

ཏསྶ ནགརཾ ཧཾསཝཏཱི ནཱམ ཨཧོསི, པིཏཱ ཨཱནནྡོ ནཱམ ཁཏྟིཡོ, མཱཏཱ སུཛཱཏཱ ནཱམ, དེཝལོ ཙ སུཛཱཏོ ཙ དྭེ ཨགྒསཱཝཀཱ སུམནོ ནཱམ ཨུཔཊྛཱཀོ, ཨམིཏཱ ཙ ཨསམཱ ཙ དྭེ ཨགྒསཱཝིཀཱ, སལལརུཀྑོ བོདྷི, སརཱིརཾ ཨཊྛཱསཱིཏིཧཏྠུབྦེདྷཾ ཨཧོསི, སརཱིརཔྤབྷཱ སམནྟཏོ དྭཱདས ཡོཛནཱནི གཎྷི ཝསྶསཏསཧསྶཾ ཨཱཡཱུཏི.

ཏསྶ ཨཔརབྷཱགེ སཏྟཏིཀཔྤསཧསྶཱནི ཨཏིཀྐམིཏྭཱ ཨིཏོ ཏིཾསཀཔྤསཧསྶམཏྠཀེ སུམེདྷོ ཙ སུཛཱཏོ ཙཱཏི ཨེཀསྨིཾ ཀཔྤེ དྭེ བུདྡྷཱ ནིབྦཏྟིཾསུ. སུམེདྷསྶཱཔི ཏཡོ སཱཝཀསནྣིཔཱཏཱ, པཋམསནྣིཔཱཏེ སུདསྶནནགརེ ཀོཊིསཏཁཱིཎཱསཝཱ ཨཧེསུཾ, དུཏིཡེ ནཝུཏིཀོཊིཡོ, ཏཏིཡེ ཨསཱིཏིཀོཊིཡོ. ཏདཱ བོདྷིསཏྟོ ཨུཏྟརོ ནཱམ བྲཱཧྨཎམཱཎཝོ ཧུཏྭཱ ནིདཧིཏྭཱ ཋཔིཏཾཡེཝ ཨསཱིཏིཀོཊིདྷནཾ ཝིསྶཛྫེཏྭཱ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ དཏྭཱ དྷམྨཾ སུཏྭཱ སརཎེསུ པཏིཊྛཱཡ ནིཀྑམིཏྭཱ པབྦཛི. སོཔི ནཾ ‘‘ཨནཱགཏེ བུདྡྷོ བྷཝིསྶསཱི’’ཏི བྱཱཀཱསི.

སུམེདྷསྶ བྷགཝཏོ སུདསྶནཾ ནཱམ ནགརཾ ཨཧོསི, སུདཏྟོ ནཱམ རཱཛཱ པིཏཱ, མཱཏཱཔི སུདཏྟཱ ནཱམ, སརཎོ ཙ སབྦཀཱམོ ཙ དྭེ ཨགྒསཱཝཀཱ, སཱགརོ ནཱམ ཨུཔཊྛཱཀོ, རཱམཱ ཙ སུརཱམཱ ཙ དྭེ ཨགྒསཱཝིཀཱ, མཧཱནཱིཔརུཀྑོ བོདྷི, སརཱིརཾ ཨཊྛཱསཱིཏིཧཏྠུབྦེདྷཾ ཨཧོསི, ཨཱཡུ ནཝུཏི ཝསྶསཧསྶཱནཱིཏི.

ཏསྶ ¶ ཨཔརབྷཱགེ སུཛཱཏོ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ, པཋམསནྣིཔཱཏེ སཊྛིབྷིཀྑུསཏསཧསྶཱནི ཨཧེསུཾ ¶ , དུཏིཡེ པཉྙཱསཾ, ཏཏིཡེ ཙཏྟཱལཱིསཾ. ཏདཱ བོདྷིསཏྟོ ཙཀྐཝཏྟིརཱཛཱ ཧུཏྭཱ ‘‘བུདྡྷོ ཨུཔྤནྣོ’’ཏི སུཏྭཱ ཨུཔསངྐམིཏྭཱ དྷམྨཾ སུཏྭཱ བུདྡྷཔྤམུཁསྶ བྷིཀྑུསངྒྷསྶ སདྡྷིཾ སཏྟཧི རཏནེཧི ཙཏུམཧཱདཱིཔརཛྫཾ དཏྭཱ སཏྠུ སནྟིཀེ པབྦཛི. སཀལརཊྛཝཱསིནོ རཊྛུཔྤཱདཾ གཧེཏྭཱ ཨཱརཱམིཀཀིཙྩཾ སཱདྷེནྟཱ བུདྡྷཔྤམུཁསྶ བྷིཀྑུསངྒྷསྶ ནིཙྩཾ མཧཱདཱནཾ ཨདཾསུ. སོཔི ནཾ སཏྠཱ བྱཱཀཱསི.

ཏསྶ བྷགཝཏོ ནགརཾ སུམངྒལཾ ནཱམ ཨཧོསི, ཨུགྒཏོ ནཱམ རཱཛཱ པིཏཱ, པབྷཱཝཏཱི ནཱམ མཱཏཱ, སུདསྶནོ ཙ སུདེཝོ ཙ དྭེ ཨགྒསཱཝཀཱ, ནཱརདོ ནཱམ ཨུཔཊྛཱཀོ, ནཱགཱ ཙ ནཱགསམཱལཱ ཙ དྭེ ཨགྒསཱཝིཀཱ, མཧཱཝེལུ༹རུཀྑོ བོདྷི, སོ ཀིར མནྡཙྪིདྡོ གྷནཀྑནྡྷོ ཨུཔརིནིགྒཏཱཧི མཧཱསཱཁཱཧི མོརཔིཉྪཀལཱཔོ ཝིཡ ཝིརོཙིཏྠ. ཏསྶ བྷགཝཏོ སརཱིརཾ པཎྞཱསཧཏྠུབྦེདྷཾ ཨཧོསི, ཨཱཡུ ནཝུཏིཝསྶསཧསྶཱནཱིཏི.

ཏསྶ ཨཔརབྷཱགེ ཨིཏོ ཨཊྛཱརསཀཔྤསཏམཏྠཀེ ཨེཀསྨིཾ ཀཔྤེ པིཡདསྶཱི, ཨཏྠདསྶཱི, དྷམྨདསྶཱིཏི ཏཡོ བུདྡྷཱ ནིབྦཏྟིཾསུ. པིཡདསྶིསྶཱཔི ཏཡོ སཱཝཀསནྣིཔཱཏཱ. པཋམེ ཀོཊིསཏསཧསྶབྷིཀྑཱུ ཨཧེསུཾ, དུཏིཡེ ནཝུཏིཀོཊིཡོ, ཏཏིཡེ ཨསཱིཏིཀོཊིཡོ. ཏདཱ བོདྷིསཏྟོ ཀསྶཔོ ནཱམ མཱཎཝོ ཏིཎྞཾ ཝེདཱནཾ པཱརངྒཏོ ཧུཏྭཱ སཏྠུ དྷམྨདེསནཾ སུཏྭཱ ཀོཊིསཏསཧསྶདྷནཔརིཙྩཱགེན སངྒྷཱརཱམཾ ཀཱརེཏྭཱ སརཎེསུ ཙ སཱིལེསུ ཙ པཏིཊྛཱསི. ཨཐ ནཾ སཏྠཱ ‘‘ཨཊྛཱརསཀཔྤསཏཙྩཡེན བུདྡྷོ བྷཝིསྶསཱི’’ཏི བྱཱཀཱསི.

ཏསྶ བྷགཝཏོ ཨནོམཾ ནཱམ ནགརཾ ཨཧོསི, པིཏཱ སུདིནྣོ ནཱམ རཱཛཱ, མཱཏཱ ཙནྡཱ ནཱམ, པཱལིཏོ ཙ སབྦདསྶཱི ཙ དྭེ ཨགྒསཱཝཀཱ, སོབྷིཏོ ནཱམ ཨུཔཊྛཱཀོ, སུཛཱཏཱ ཙ དྷམྨདིནྣཱ ཙ དྭེ ཨགྒསཱཝིཀཱ, པིཡངྒུརུཀྑོ བོདྷི, སརཱིརཾ ཨསཱིཏིཧཏྠུབྦེདྷཾ ཨཧོསི, ནཝུཏིཝསྶསཧསྶཱནི ཨཱཡཱུཏི.

ཏསྶ ཨཔརབྷཱགེ ཨཏྠདསྶཱི ནཱམ བྷགཝཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ. པཋམེ ཨཊྛནཝུཏིབྷིཀྑུསཏསཧསྶཱནི ཨཧེསུཾ, དུཏིཡེ ཨཊྛཱསཱིཏིསཧསྶཱནི, ཏཐཱ ཏཏིཡེ. ཏདཱ བོདྷིསཏྟོ ¶ སུསཱིམོ ¶ ནཱམ མཧིདྡྷིཀོ ཏཱཔསོ ཧུཏྭཱ དེཝལོཀཏོ མནྡཱརཝཔུཔྥཙྪཏྟཾ ཨཱཧརིཏྭཱ སཏྠཱརཾ པཱུཛེསི. སོཔི ནཾ སཏྠཱ བྱཱཀཱསི.

ཏསྶ བྷགཝཏོ སོབྷཎཾ ནཱམ ནགརཾ ཨཧོསི, སཱགརོ ནཱམ རཱཛཱ པིཏཱ, སུདསྶནཱ ནཱམ མཱཏཱ, སནྟོ ཙ ཨུཔསནྟོ ཙ དྭེ ཨགྒསཱཝཀཱ, ཨབྷཡོ ནཱམ ཨུཔཊྛཱཀོ, དྷམྨཱ ཙ སུདྷམྨཱ ཙ དྭེ ཨགྒསཱཝིཀཱ, ཙམྤཀརུཀྑོ བོདྷི, སརཱིརཾ ཨསཱིཏིཧཏྠུབྦེདྷཾ ཨཧོསི, སརཱིརཔྤབྷཱ སམནྟཏོ སབྦཀཱལཾ ཡོཛནམཏྟཾ ཕརིཏྭཱ ཨཊྛཱསི, ཨཱཡུ ཝསྶསཏསཧསྶནྟི.

ཏསྶ ཨཔརབྷཱགེ དྷམྨདསྶཱི ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ. པཋམསནྣིཔཱཏེ ཀོཊིསཏབྷིཀྑཱུ ཨཧེསུཾ, དུཏིཡེ ནཝུཏིཀོཊིཡོ, ཏཏིཡེ ཨསཱིཏིཀོཊིཡོ. ཏདཱ བོདྷིསཏྟོ སཀྐོ དེཝརཱཛཱ ཧུཏྭཱ དིབྦགནྡྷཔུཔྥེཧི ཙ དིབྦཏཱུརིཡེཧི ཙ པཱུཛམཀཱསི. སོཔི ནཾ སཏྠཱ བྱཱཀཱསི.

ཏསྶ བྷགཝཏོ སརཎཾ ནཱམ ནགརཾ ཨཧོསི, པིཏཱ སརཎོ ནཱམ རཱཛཱ, མཱཏཱ སུནནྡཱ ནཱམ, པདུམོ ཙ ཕུསྶདེཝོ ཙ དྭེ ཨགྒསཱཝཀཱ, སུནེཏྟོ ནཱམ ཨུཔཊྛཱཀོ, ཁེམཱ ཙ སབྦནཱམཱ ཙ དྭེ ཨགྒསཱཝིཀཱ, རཏྟངྐུརརུཀྑོ བོདྷི, ‘‘ཀཀུདྷརུཀྑོ’’ཏིཔི ‘‘བིམྦིཛཱལོ’’ཏིཔི ཝུཙྩཏི སརཱིརཾ པནསྶ ཨསཱིཏིཧཏྠུབྦེདྷཾ ཨཧོསི, ཝསྶསཏསཧསྶཾ ཨཱཡཱུཏི.

ཏསྶ ཨཔརབྷཱགེ ཨིཏོ ཙཏུནཝུཏིཀཔྤམཏྠཀེ ཨེཀསྨིཾ ཀཔྤེ ཨེཀོཝ སིདྡྷཏྠོ ནཱམ བུདྡྷོ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ. པཋམསནྣིཔཱཏེ ཀོཊིསཏསཧསྶབྷིཀྑཱུ ཨཧེསུཾ, དུཏིཡེ ནཝུཏིཀོཊིཡོ ཏཏིཡེ ཨསཱིཏིཀོཊིཡོ. ཏདཱ བོདྷིསཏྟོ ཨུགྒཏེཛོ ཨབྷིཉྙཱབལསམྤནྣོ མངྒལོ ནཱམ ཏཱཔསོ ཧུཏྭཱ མཧཱཛམྦུཕལཾ ཨཱཧརིཏྭཱ ཏཐཱགཏསྶ ཨདཱསི. སཏྠཱ ཏཾ ཕལཾ པརིབྷུཉྫིཏྭཱ ‘‘ཙཏུནཝུཏིཀཔྤམཏྠཀེ བུདྡྷོ བྷཝིསྶསཱི’’ཏི བོདྷིསཏྟཾ བྱཱཀཱསི.

ཏསྶ ¶ བྷགཝཏོ ནགརཾ ཝེབྷཱརཾ ནཱམ ཨཧོསི, པིཏཱ ཛཡསེནོ ནཱམ རཱཛཱ, མཱཏཱ སུཕསྶཱ ནཱམ, སམྦལོ ཙ སུམིཏྟོ ཙ དྭེ ཨགྒསཱཝཀཱ, རེཝཏོ ནཱམ ཨུཔཊྛཱཀོ, སཱིཝལཱ ཙ ¶ སུརཱམཱ ཙ དྭེ ཨགྒསཱཝིཀཱ, ཀཎིཀཱརརུཀྑོ བོདྷི, སརཱིརཾ སཊྛིཧཏྠུབྦེདྷཾ ཨཧོསི, ཝསྶསཏསཧསྶཾ ཨཱཡཱུཏི.

ཏསྶ ཨཔརབྷཱགེ ཨིཏོ དྭེནཝུཏིཀཔྤམཏྠཀེ ཏིསྶོ ཕུསྶོཏི ཨེཀསྨིཾ ཀཔྤེ དྭེ བུདྡྷཱ ནིབྦཏྟིཾསུ. ཏིསྶསྶ པན བྷགཝཏོ ཏཡོ སཱཝཀསནྣིཔཱཏཱ. པཋམསནྣིཔཱཏེ བྷིཀྑཱུནཾ ཀོཊིསཏཾ ཨཧོསི, དུཏིཡེ ནཝུཏིཀོཊིཡོ, ཏཏིཡེ ཨསཱིཏིཀོཊིཡོ. ཏདཱ བོདྷིསཏྟོ མཧཱབྷོགོ མཧཱཡསོ སུཛཱཏོ ནཱམ ཁཏྟིཡོ ཧུཏྭཱ ཨིསིཔབྦཛྫཾ པབྦཛིཏྭཱ མཧིདྡྷིཀབྷཱཝཾ པཏྭཱ ‘‘བུདྡྷོ ཨུཔྤནྣོ’’ཏི སུཏྭཱ དིབྦམནྡཱརཝཔདུམཔཱརིཙྪཏྟཀཔུཔྥཱནི ཨཱདཱཡ ཙཏུཔརིསམཛ྄ཛྷེ གཙྪནྟཾ ཏཐཱགཏཾ པཱུཛེསི, ཨཱཀཱསེ པུཔྥཝིཏཱནཾ ཧུཏྭཱ ཨཊྛཱསི. སོཔི ནཾ སཏྠཱ ‘‘ཨིཏོ དྭེནཝུཏིཀཔྤམཏྠཀེ བུདྡྷོ བྷཝིསྶསཱི’’ཏི བྱཱཀཱསི.

ཏསྶ བྷགཝཏོ ཁེམཾ ནཱམ ནགརཾ ཨཧོསི, པིཏཱ ཛནསནྡྷོ ནཱམ ཁཏྟིཡོ, མཱཏཱ པདུམཱ ནཱམ, བྲཧྨདེཝོ ཙ ཨུདཡོ ཙ དྭེ ཨགྒསཱཝཀཱ སམངྒོ ནཱམ ཨུཔཊྛཱཀོ, ཕུསྶཱ ཙ སུདཏྟཱ ཙ དྭེ ཨགྒསཱཝིཀཱ ཨསནརུཀྑོ བོདྷི, སརཱིརཾ སཊྛིཧཏྠུབྦེདྷཾ ཨཧོསི, ཝསྶསཏསཧསྶཾ ཨཱཡཱུཏི.

ཏསྶ ཨཔརབྷཱགེ ཕུསྶོ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ, པཋམསནྣིཔཱཏེ སཊྛི བྷིཀྑུསཏསཧསྶཱནི ཨཧེསུཾ, དུཏིཡེ པཎྞཱས, ཏཏིཡེ དྭཏྟིཾས. ཏདཱ བོདྷིསཏྟོ ཝིཛིཏཱཝཱི ནཱམ ཁཏྟིཡོ ཧུཏྭཱ མཧཱརཛྫཾ པཧཱཡ སཏྠུ སནྟིཀེ པབྦཛིཏྭཱ ཏཱིཎི པིཊཀཱནི ཨུགྒཧེཏྭཱ མཧཱཛནསྶ དྷམྨཀཐཾ ཀཐེསི. སཱིལཔཱརམིཉྩ པཱུརེསི. སོཔི ནཾ ‘‘བུདྡྷོ བྷཝིསྶསཱི’’ཏི བྱཱཀཱསི.

ཏསྶ བྷགཝཏོ ཀཱསི ནཱམ ནགརཾ ཨཧོསི, ཛཡསེནོ ནཱམ རཱཛཱ པིཏཱ, སིརིམཱ ནཱམ མཱཏཱ, སུརཀྑིཏོ ཙ དྷམྨསེནོ ཙ དྭེ ཨགྒསཱཝཀཱ, སབྷིཡོ ནཱམ ཨུཔཊྛཱཀོ, ཙཱལཱ ཙ ཨུཔཙཱལཱ ཙ དྭེ ཨགྒསཱཝིཀཱ ¶ , ཨཱམལཀརུཀྑོ བོདྷི, སརཱིརཾ ཨཊྛཔཎྞཱསཧཏྠུབྦེདྷཾ ཨཧོསི, ནཝུཏི ཝསྶསཧསྶཱནི ཨཱཡཱུཏི.

ཏསྶ ཨཔརབྷཱགེ ཨིཏོ ཨེཀནཝུཏིཀཔྤེ ཝིཔསྶཱི ནཱམ བྷགཝཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ ¶ , པཋམསནྣིཔཱཏེ ཨཊྛསཊྛིབྷིཀྑུསཏསཧསྶཱནི ཨཧེསུཾ, དུཏིཡེ ཨེཀསཏསཧསྶཾ, ཏཏིཡེ ཨསཱིཏིསཧསྶཱནི. ཏདཱ བོདྷིསཏྟོ མཧིདྡྷིཀོ མཧཱནུབྷཱཝོ ཨཏུལོ ནཱམ ནཱགརཱཛཱ ཧུཏྭཱ སཏྟརཏནཁཙིཏཾ སོཝཎྞམཡཾ མཧཱཔཱིཋཾ བྷགཝཏོ ཨདཱསི. སོཔི ནཾ སཏྠཱ ‘‘ཨིཏོ ཨེཀནཝུཏིཀཔྤེ བུདྡྷོ བྷཝིསྶསཱི’’ཏི བྱཱཀཱསི.

ཏསྶ བྷགཝཏོ བནྡྷུམཏཱི ནཱམ ནགརཾ ཨཧོསི, བནྡྷུམཱ ནཱམ རཱཛཱ པིཏཱ. བནྡྷུམཏཱི ནཱམ མཱཏཱ, ཁཎྜོ ཙ ཏིསྶོ ཙ དྭེ ཨགྒསཱཝཀཱ, ཨསོཀོ ནཱམ ཨུཔཊྛཱཀོ, ཙནྡཱ ཙ ཙནྡམིཏྟཱ ཙ དྭེ ཨགྒསཱཝིཀཱ པཱཊལིརུཀྑོ བོདྷི, སརཱིརཾ ཨསཱིཏིཧཏྠུབྦེདྷཾ ཨཧོསི, སརཱིརཔྤབྷཱ སདཱ སཏྟ ཡོཛནཱནི ཕརིཏྭཱ ཨཊྛཱསི, ཨསཱིཏིཝསྶསཧསྶཱནི ཨཱཡཱུཏི.

ཏསྶ ཨཔརབྷཱགེ ཨིཏོ ཨེཀཏིཾསཀཔྤེ སིཁཱི, ཝེསྶབྷཱུ ཙཱཏི དྭེ བུདྡྷཱ ཨཧེསུཾ. སིཁིསྶཱཔི བྷགཝཏོ ཏཡོ སཱཝཀསནྣིཔཱཏཱ, པཋམསནྣིཔཱཏེ བྷིཀྑུསཏསཧསྶཾ ཨཧོསི, དུཏིཡེ ཨསཱིཏིསཧསྶཱནི, ཏཏིཡེ སཏྟཏི. ཏདཱ བོདྷིསཏྟོ ཨརིནྡམོ ནཱམ རཱཛཱ ཧུཏྭཱ བུདྡྷཔྤམུཁསྶ བྷིཀྑུསངྒྷསྶ སཙཱིཝརཾ མཧཱདཱནཾ པཝཏྟེཏྭཱ སཏྟརཏནཔཊིམཎྜིཏཾ ཧཏྠིརཏནཾ དཏྭཱ ཧཏྠིཔྤམཱཎཾ ཀཏྭཱ ཀཔྤིཡབྷཎྜཾ ཨདཱསི. སོཔི ནཾ ‘‘ཨིཏོ ཨེཀཏིཾསཀཔྤེ བུདྡྷོ བྷཝིསྶསཱི’’ཏི བྱཱཀཱསི.

ཏསྶ པན བྷགཝཏོ ཨརུཎཝཏཱི ནཱམ ནགརཾ ཨཧོསི, ཨརུཎཝཱ ནཱམ ཁཏྟིཡོ པིཏཱ, པབྷཱཝཏཱི ནཱམ མཱཏཱ, ཨབྷིབྷཱུ ཙ སམྦྷཝོ ཙ དྭེ ཨགྒསཱཝཀཱ ཁེམངྐརོ ནཱམ ཨུཔཊྛཱཀོ, སཁིལཱ ཙ པདུམཱ ཙ དྭེ ཨགྒསཱཝིཀཱ, པུཎྜརཱིཀརུཀྑོ བོདྷི, སརཱིརཾ སཏྟཏིཧཏྠུབྦེདྷཾ ཨཧོསི, སརཱིརཔྤབྷཱ ཡོཛནཏྟཡཾ ཕརིཏྭཱ ཨཊྛཱསི, སཏྟཧིཝསྶསཧསྶཱནི ཨཱཡཱུཏི.

ཏསྶ ཨཔརབྷཱགེ ཝེསྶབྷཱུ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ པཋམསནྣིཔཱཏེ ཨསཱིཏིབྷིཀྑུསཧསྶཱནི ཨཧེསུཾ དུཏིཡེ ¶ སཏྟཏི, ཏཏིཡེ སཊྛི. ཏདཱ བོདྷིསཏྟོ སུདསྶནོ ནཱམ རཱཛཱ ཧུཏྭཱ བུདྡྷཔྤམུཁསྶ བྷིཀྑུསངྒྷསྶ སཙཱིཝརཾ མཧཱདཱནཾ དཏྭཱ སཏྠུ སནྟིཀེ པབྦཛིཏྭཱ ཨཱཙཱརགུཎསམྤནྣོ བུདྡྷརཏནེ ཙིཏྟཱིཀཱརཔཱིཏིབཧུལོ ཨཧོསི. སོཔི ནཾ ‘‘ཨིཏོ ཨེཀཏིཾསེ ཀཔྤེ བུདྡྷོ བྷཝིསྶསཱི’’ཏི བྱཱཀཱསི.

ཏསྶ ¶ པན བྷགཝཏོ ཨནོམཾ ནཱམ ནགརཾ ཨཧོསི, སུཔྤཏཱིཏོ ནཱམ རཱཛཱ པིཏཱ, ཡསཝཏཱི ནཱམ མཱཏཱ, སོཎོ ཙ ཨུཏྟརོ ཙ དྭེ ཨགྒསཱཝཀཱ ཨུཔསནྟོ ནཱམ ཨུཔཊྛཱཀོ དཱམཱ ཙ སམཱལཱ ཙ དྭེ ཨགྒསཱཝིཀཱ, སཱལརུཀྑོ བོདྷི, སརཱིརཾ སཊྛིཧཏྠུབྦེདྷཾ ཨཧོསི, སཊྛིཝསྶསཧསྶཱནི ཨཱཡཱུཏི.

ཏསྶ ཨཔརབྷཱགེ ཨིམསྨིཾ ཀཔྤེ ཙཏྟཱརོ བུདྡྷཱ ནིབྦཏྟཱ ཀཀུསནྡྷོ, ཀོཎཱགམནོ, ཀསྶཔོ, ཨམྷཱཀཾ བྷགཝཱཏི. ཀཀུསནྡྷསྶ བྷགཝཏོ ཨེཀོ སཱཝཀསནྣིཔཱཏོ, ཏཏྠ ཙཏྟཱལཱིསབྷིཀྑུསཧསྶཱནི ཨཧེསུཾ. ཏདཱ བོདྷིསཏྟོ ཁེམོ ནཱམ རཱཛཱ ཧུཏྭཱ བུདྡྷཔྤམུཁསྶ བྷིཀྑུསངྒྷསྶ སཔཏྟཙཱིཝརཾ མཧཱདཱནཉྩ ཨཉྫནཱདིབྷེསཛྫཱནི ཙ དཏྭཱ སཏྠུ དྷམྨདེསནཾ སུཏྭཱ པབྦཛི. སོཔི ནཾ སཏྠཱ བྱཱཀཱསི.

ཀཀུསནྡྷསྶ པན བྷགཝཏོ ཁེམཾ ནཱམ ནགརཾ ཨཧོསི, ཨགྒིདཏྟོ ནཱམ བྲཱཧྨཎོ པིཏཱ, ཝིསཱཁཱ ནཱམ བྲཱཧྨཎཱི མཱཏཱ, ཝིདྷུརོ ཙ སཉྫཱིཝོ ཙ དྭེ ཨགྒསཱཝཀཱ, བུདྡྷིཛོ ནཱམ ཨུཔཊྛཱཀོ སཱམཱ ཙ ཙམྤཱ ཙ དྭེ ཨགྒསཱཝིཀཱ མཧཱསིརཱིསརུཀྑོ བོདྷི སརཱིརཾ ཙཏྟཱལཱིསཧཏྠུབྦེདྷཾ ཨཧོསི, ཙཏྟཱལཱིསཝསྶསཧསྶཱནི ཨཱཡཱུཏི.

ཏསྶ ཨཔརབྷཱགེ ཀོཎཱགམནོ ནཱམ སཏྠཱ ཨུདཔཱདི. ཏསྶཱཔི ཨེཀོ སཱཝཀསནྣིཔཱཏོ, ཏཏྠ ཏིཾསབྷིཀྑུསཧསྶཱནི ཨཧེསུཾ. ཏདཱ བོདྷིསཏྟོ པབྦཏོ ནཱམ རཱཛཱ ཧུཏྭཱ ཨམཙྩགཎཔརིཝུཏོ སཏྠུ སནྟིཀཾ གནྟྭཱ དྷམྨདེསནཾ སུཏྭཱ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ མཧཱདཱནཾ པཝཏྟེཏྭཱ པཏྟུཎྞཙཱིནཔཊཀོསེཡྻཀམྦལདུཀུལཱནི ཙེཝ སུཝཎྞཔཱདུཀཉྩ དཏྭཱ སཏྠུ སནྟིཀེ པབྦཛི. སོཔི ནཾ སཏྠཱ བྱཱཀཱསི.

ཏསྶ བྷགཝཏོ སོབྷཝཏཱི ནཱམ ནགརཾ ཨཧོསི, ཡཉྙདཏྟོ ནཱམ བྲཱཧྨཎོ པིཏཱ, ཨུཏྟརཱ ནཱམ བྲཱཧྨཎཱི མཱཏཱ, བྷིཡྻོསོ ཙ ཨུཏྟརོ ¶ ཙ དྭེ ཨགྒསཱཝཀཱ, སོཏྠིཛོ ནཱམ ཨུཔཊྛཱཀོ, སམུདྡཱ ཙ ཨུཏྟརཱ ཙ དྭེ ཨགྒསཱཝིཀཱ, ཨུདུམྦརརུཀྑོ བོདྷི, སརཱིརཾ ཏིཾསཧཏྠུབྦེདྷཾ ཨཧོསི, ཏིཾསཝསྶསཧསྶཱནི ཨཱཡཱུཏི.

ཏསྶ ཨཔརབྷཱགེ ཀསྶཔོ ནཱམ སཏྠཱ ཨུདཔཱདི. ཏསྶཱཔི ཨེཀོཝ སཱཝཀསནྣིཔཱཏོ, ཏཏྠ ¶ ཝཱིསཏིབྷིཀྑུསཧསྶཱནི ཨཧེསུཾ. ཏདཱ བོདྷིསཏྟོ ཛོཏིཔཱལོ ནཱམ མཱཎཝོ ཏིཎྞཾ ཝེདཱནཾ པཱརགཱུ བྷཱུམིཡཉྩེཝ ཨནྟལིཀྑེ ཙ པཱཀཊོ གྷཊིཀཱརསྶ ཀུམྦྷཀཱརསྶ མིཏྟོ ཨཧོསི, སོ ཏེན སདྡྷིཾ སཏྠཱརཾ ཨུཔསངྐམིཏྭཱ དྷམྨཀཐཾ སུཏྭཱ པབྦཛིཏྭཱ ཨཱརདྡྷཝཱིརིཡོ ཏཱིཎི པིཊཀཱནི ཨུགྒཧེཏྭཱ ཝཏྟསམྤཏྟིཡཱ བུདྡྷསཱསནཾ སོབྷེསི. སོཔི ནཾ སཏྠཱ བྱཱཀཱསི.

ཏསྶ བྷགཝཏོ ཛཱཏནགརཾ བཱརཱཎསཱི ནཱམ ཨཧོསི. བྲཧྨདཏྟོ ནཱམ བྲཱཧྨཎོ པིཏཱ, དྷནཝཏཱི ནཱམ བྲཱཧྨཎཱི མཱཏཱ, ཏིསྶོ ཙ བྷཱརདྭཱཛོ ཙ དྭེ ཨགྒསཱཝཀཱ, སབྦམིཏྟོ ནཱམ ཨུཔཊྛཱཀོ ཨནུལཱ༹ ཙ ཨུརུཝེལཱ༹ ཙ དྭེ ཨགྒསཱཝིཀཱ, ནིགྲོདྷརུཀྑོ བོདྷི སརཱིརཾ ཝཱིསཏིཧཏྠུབྦེདྷཾ ཨཧོསི, ཝཱིསཏིཝསྶསཧསྶཱནི ཨཱཡཱུཏི.

ཏསྶ པན བྷགཝཏོ ཨོརབྷཱགེ ཋཔེཏྭཱ ཨིམཾ སམྨཱསམྦུདྡྷཾ ཨཉྙོ བུདྡྷོ ནཱམ ནཏྠི. ཨིཏི དཱིཔངྐརཱདཱིནཾ ཙཏུཝཱིསཏིཡཱ བུདྡྷཱནཾ སནྟིཀེ ལདྡྷབྱཱཀརཎོ པན བོདྷིསཏྟོ ཡེནེན –

‘‘མནུསྶཏྟཾ ལིངྒསམྤཏྟི, ཧེཏུ སཏྠཱརདསྶནཾ;

པབྦཛྫཱ གུཎསམྤཏྟི, ཨདྷིཀཱརོ ཙ ཚནྡཏཱ;

ཨཊྛདྷམྨསམོདྷཱནཱ, ཨབྷིནཱིཧཱརོ སམིཛ྄ཛྷཏཱི’’ཏི. (བུ. ཝཾ. ༢.༥༩);

ཨིམེ ཨཊྛ དྷམྨེ སམོདྷཱནེཏྭཱ དཱིཔངྐརཔཱདམཱུལེ ཀཏཱབྷིནཱིཧཱརེན ‘‘ཧནྡ བུདྡྷཀརེ དྷམྨེ ཝིཙིནཱམི ཨིཏོ ཙིཏོ’’ཏི ཨུསྶཱཧཾ ཀཏྭཱ ‘‘ཝིཙིནནྟོ ཏདཱདཀྑིཾ, པཋམཾ དཱནཔཱརམི’’ནྟི དཱནཔཱརམིཏཱདཡོ བུདྡྷཀརཱ དྷམྨཱ དིཊྛཱ, ཏེ པཱུརེནྟོ ཡཱཝ ཝེསྶནྟརཏྟབྷཱཝཱ ཨཱགམི. ཨཱགཙྪནྟོ ཙ ཡེ ཏེ ཀཏཱབྷིནཱིཧཱརཱནཾ བོདྷིསཏྟཱནཾ ཨཱནིསཾསཱ སཾཝཎྞིཏཱ –

‘‘ཨེཝཾ ¶ སབྦངྒསམྤནྣཱ, བོདྷིཡཱ ནིཡཏཱ ནརཱ;

སཾསརཾ དཱིགྷམདྡྷཱནཾ, ཀཔྤཀོཊིསཏེཧིཔི.

‘‘ཨཝཱིཙིམྷི ནུཔྤཛྫནྟི, ཏཐཱ ལོཀནྟརེསུ ཙ;

ནིཛ྄ཛྷཱམཏཎྷཱ ཁུཔྤིཔཱསཱ, ན ཧོནྟི ཀཱལཀཉྫིཀཱ.

‘‘ན ¶ ཧོནྟི ཁུདྡཀཱ པཱཎཱ, ཨུཔྤཛྫནྟཱཔི དུགྒཏིཾ;

ཛཱཡམཱནཱ མནུསྶེསུ, ཛཙྩནྡྷཱ ན བྷཝནྟི ཏེ.

‘‘སོཏཝེཀལླཏཱ ནཏྠི, ན བྷཝནྟི མཱུགཔཀྑིཀཱ;

ཨིཏྠིབྷཱཝཾ ན གཙྪནྟི, ཨུབྷཏོབྱཉྫནཔཎྜཀཱ.

‘‘ན བྷཝནྟི པརིཡཱཔནྣཱ, བོདྷིཡཱ ནིཡཏཱ ནརཱ;

མུཏྟཱ ཨཱནནྟརིཀེཧི, སབྦཏྠ སུདྡྷགོཙརཱ.

‘‘མིཙྪཱདིཊྛིཾ ན སེཝནྟི, ཀམྨཀིརིཡདསྶནཱ;

ཝསམཱནཱཔི སགྒེསུ, ཨསཉྙཾ ནུཔཔཛྫརེ.

‘‘སུདྡྷཱཝཱསེསུ དེཝེསུ, ཧེཏུ ནཱམ ན ཝིཛྫཏི;

ནེཀྑམྨནིནྣཱ སཔྤུརིསཱ, ཝིསཾཡུཏྟཱ བྷཝཱབྷཝེ;

ཙརནྟི ལོཀཏྠཙརིཡཱཡོ, པཱུརེནྟི སབྦཔཱརམཱི’’ཏི.

ཏེ ཨཱནིསཾསེ ཨདྷིགནྟྭཱཝ ཨཱགཏོ. པཱརམིཡོ པཱུརེནྟསྶ ཙ ཏསྶ ཨཀིཏྟིབྲཱཧྨཎཀཱལེ སངྑབྲཱཧྨཎཀཱལེ དྷནཉྩཡརཱཛཀཱལེ མཧཱསུདསྶནརཱཛཀཱལེ མཧཱགོཝིནྡཀཱལེ ནིམིམཧཱརཱཛཀཱལེ ཙནྡཀུམཱརཀཱལེ ཝིསཡ྄ཧསེཊྛིཀཱལེ སིཝིརཱཛཀཱལེ ཝེསྶནྟརརཱཛཀཱལེཏི དཱནཔཱརམིཏཱཡ པཱུརིཏཏྟབྷཱཝཱནཾ པརིམཱཎཾ ནཱམ ནཏྠི. ཨེཀནྟེན པནསྶ སསཔཎྜིཏཛཱཏཀཱལེ –

‘‘བྷིཀྑཱཡ ཨུཔགཏཾ དིསྭཱ, སཀཏྟཱནཾ པརིཙྩཛིཾ;

དཱནེན མེ སམོ ནཏྠི, ཨེསཱ མེ དཱནཔཱརམཱི’’ཏི. (ཙརིཡཱ. ༡.༡༤༣ ཏསྶུདྡཱན –

ཨེཝཾ ཨཏྟཔརིཙྩཱགཾ ཀརོནྟསྶ དཱནཔཱརམིཏཱ པརམཏྠཔཱརམཱི ནཱམ ཛཱཏཱ.

ཏཐཱ ¶ སཱིལཝནཱགརཱཛཀཱལེ ཙམྤེཡྻནཱགརཱཛཀཱལེ བྷཱུརིདཏྟནཱགརཱཛཀཱལེ ཚདྡནྟནཱགརཱཛཀཱལེ ¶ ཛཡདྡིསརཱཛཔུཏྟཀཱལེ ཨལཱིནསཏྟུཀུམཱརཀཱལེཏི སཱིལཔཱརམིཏཱཡ པཱུརིཏཏྟབྷཱཝཱནཾ པརིམཱཎཾ ནཱམ ནཏྠི. ཨེཀནྟེན པནསྶ སངྑཔཱལཛཱཏཀཱལེ –

‘‘སཱུལེཧིཔི ཝིཛ྄ཛྷིཡནྟོ, ཀོཊྚིཡནྟོཔི སཏྟིཧི;

བྷོཛཔུཏྟེ ན ཀུཔྤཱམི, ཨེསཱ མེ སཱིལཔཱརམཱི’’ཏི. (ཙརིཡཱ. ༢.༩༡) –

ཨེཝཾ ཨཏྟཔརིཙྩཱགཾ ཀརོནྟསྶ སཱིལཔཱརམིཏཱ པརམཏྠཔཱརམཱི ནཱམ ཛཱཏཱ.

ཏཐཱ སོམནསྶཀུམཱརཀཱལེ ཧཏྠིཔཱལཀུམཱརཀཱལེ ཨཡོགྷརཔཎྜིཏཀཱལེཏི མཧཱརཛྫཾ པཧཱཡ ནེཀྑམྨཔཱརམིཏཱཡ པཱུརིཏཏྟབྷཱཝཱནཾ པརིམཱཎཾ ནཱམ ནཏྠི. ཨེཀནྟེན པནསྶ ཙཱུལ༹སུཏསོམཛཱཏཀཱལེ –

‘‘མཧཱརཛྫཾ ཧཏྠགཏཾ, ཁེལ༹པིཎྜཾཝ ཚཌྜཡིཾ;

ཙཛཏོ ན ཧོཏི ལགནཾ, ཨེསཱ མེ ནེཀྑམྨཔཱརམཱི’’ཏི. –

ཨེཝཾ ནིསྶངྒཏཱཡ རཛྫཾ ཚཌྜེཏྭཱ ནིཀྑམནྟསྶ ནེཀྑམྨཔཱརམིཏཱ པརམཏྠཔཱརམཱི ནཱམ ཛཱཏཱ.

ཏཐཱ ཝིདྷུརཔཎྜིཏཀཱལེ མཧཱགོཝིནྡཔཎྜིཏཀཱལེ ཀུདཱལཔཎྜིཏཀཱལེ ཨརཀཔཎྜིཏཀཱལེ བོདྷིཔརིབྦཱཛཀཀཱལེ མཧོསདྷཔཎྜིཏཀཱལེཏི པཉྙཱཔཱརམིཏཱཡ པཱུརིཏཏྟབྷཱཝཱནཾ པརིམཱཎཾ ནཱམ ནཏྠི. ཨེཀནྟེན པནསྶ སཏྟུབྷསྟཛཱཏཀེ སེནཀཔཎྜིཏཀཱལེ –

‘‘པཉྙཱཡ ཝིཙིནནྟོཧཾ, བྲཱཧྨཎཾ མོཙཡིཾ དུཁཱ;

པཉྙཱཡ མེ སམོ ནཏྠི, ཨེསཱ མེ པཉྙཱཔཱརམཱི’’ཏི. –

ཨནྟོབྷསྟགཏཾ སཔྤཾ དསྶེནྟསྶ པཉྙཱཔཱརམིཏཱ པརམཏྠཔཱརམཱི ནཱམ ཛཱཏཱ.

ཏཐཱ ཝཱིརིཡཔཱརམིཏཱདཱིནམྤི པཱུརིཏཏྟབྷཱཝཱནཾ པརིམཱཎཾ ནཱམ ནཏྠི. ཨེཀནྟེན པནསྶ མཧཱཛནཀཛཱཏཀེ –

‘‘ཨཏཱིརདསྶཱི ཛལམཛ྄ཛྷེ, ཧཏཱ སབྦེཝ མཱནུསཱ;

ཙིཏྟསྶ ཨཉྙཐཱ ནཏྠི, ཨེསཱ མེ ཝཱིརིཡཔཱརམཱི’’ཏི. –

ཨེཝཾ ¶ ¶ མཧཱསམུདྡཾ ཏརནྟསྶ ཝཱིརིཡཔཱརམིཏཱ པརམཏྠཔཱརམཱི ནཱམ ཛཱཏཱ.

ཁནྟིཝཱདཱིཛཱཏཀེ –

‘‘ཨཙེཏནཾཝ ཀོཊྚེནྟེ, ཏིཎྷེན ཕརསུནཱ མམཾ;

ཀཱསིརཱཛེ ན ཀུཔྤཱམི, ཨེསཱ མེ ཁནྟིཔཱརམཱི’’ཏི. –

ཨེཝཾ ཨཙེཏནབྷཱཝེན ཝིཡ མཧཱདུཀྑཾ ཨདྷིཝཱསེནྟསྶ ཁནྟིཔཱརམིཏཱ པརམཏྠཔཱརམཱི ནཱམ ཛཱཏཱ.

མཧཱསུཏསོམཛཱཏཀེ –

‘‘སཙྩཝཱཙཾ ཨནུརཀྑནྟོ, ཙཛིཏྭཱ མམ ཛཱིཝིཏཾ;

མོཙེསིཾ ཨེཀསཏཾ ཁཏྟིཡེ, ཨེསཱ མེ སཙྩཔཱརམཱི’’ཏི. –

ཨེཝཾ ཛཱིཝིཏཾ ཙཝིཏྭཱ སཙྩམནུརཀྑནྟསྶ སཙྩཔཱརམིཏཱ པརམཏྠཔཱརམཱི ནཱམ ཛཱཏཱ.

མཱུགཔཀྑཛཱཏཀེ –

‘‘མཱཏཱ པིཏཱ ན མེ དེསྶཱ, ནཔི དེསྶཾ མཧཱཡསཾ;

སབྦཉྙུཏཾ པིཡཾ མཡ྄ཧཾ, ཏསྨཱ ཝཏམདྷིཊྛཧི’’ནྟི. –

ཨེཝཾ ཛཱིཝིཏཾ ཙཛིཏྭཱ ཝཏཾ ཨདྷིཊྛཧནྟསྶ ཨདྷིཊྛཱནཔཱརམིཏཱ པརམཏྠཔཱརམཱི ནཱམ ཛཱཏཱ.

ཨེཀརཱཛཛཱཏཀེ –

‘‘ན མཾ ཀོཙི ཨུཏྟསཏི, ནཔིཧཾ བྷཱཡཱམི ཀསྶཙི;

མེཏྟཱབལེནུཔཏྠདྡྷོ, རམཱམི པཝནེ ཏདཱ’’ཏི. (ཙརིཡཱ. ༣.༡༡༣) –

ཨེཝཾ ¶ ཛཱིཝིཏཾ ཨནཔལོཀེཏྭཱ མེཏྟཱཡནྟསྶ མེཏྟཱཔཱརམིཏཱ པརམཏྠཔཱརམཱི ནཱམ ཛཱཏཱ.

ལོམཧཾསཛཱཏཀེ ¶ –

‘‘སུསཱནེ སེཡྻཾ ཀཔྤེམི, ཚཝཊྛིཀཾ ཨུཔནིདྷཱཡཧཾ;

གཱམཎྜལཱ ཨུཔཱགནྟྭཱ, རཱུཔཾ དསྶེནྟི ནཔྤཀ’’ནྟི. –

ཨེཝཾ གཱམདཱརཀེསུ ནིཊྛུབྷནཱདཱིཧི ཙེཝ མཱལཱགནྡྷཱུཔཧཱརཱདཱིཧི ཙ སུཁདུཀྑཾ ཨུཔྤཱདེནྟེསུཔི ཨུཔེཀྑནཾ ཨནཏིཝཏྟེནྟསྶ ཨུཔེཀྑཱཔཱརམིཏཱ པརམཏྠཔཱརམཱི ནཱམ ཛཱཏཱ. ཨཡམེཏྠ སངྑེཔོ, ཝིཏྠཱརཏོ པནེས ཨཏྠོ ཙརིཡཱཔིཊཀཏོ གཧེཏབྦོ.

ཨེཝཾ པཱརམིཡོ པཱུརེཏྭཱ ཝེསྶནྟརཏྟབྷཱཝེ ཋིཏོ –

‘‘ཨཙེཏནཱཡཾ པཐཝཱི, ཨཝིཉྙཱཡ སུཁཾ དུཁཾ;

སཱཔི དཱནབལཱ མཡ྄ཧཾ, སཏྟཀྑཏྟུཾ པཀམྤཐཱ’’ཏི. (ཙརིཡཱ. ༡.༡༢༤);

ཨེཝཾ མཧཱཔཐཝཱིཀམྤནཱནི མཧཱཔུཉྙཱནི ཀཏྭཱ ཨཱཡུཔརིཡོསཱནེ ཏཏོ ཙུཏོ ཏུསིཏབྷཝནེ ནིབྦཏྟི, ཏཏྠ ཨཉྙེ དེཝེ དསཧི ཋཱནེཧི ཨདྷིགཎྷིཏྭཱ ‘‘ཡཱཝཏཱཡུཀཾ དིབྦསམྤཏྟིཾ ཨནུབྷཝནྟོ མནུསྶགཎནཱཡ ¶ ཨིདཱནི སཏྟཧི དིཝསེཧི ཨཱཡུཀྑཡཾ པཱཔུཎིསྶཏཱི’’ཏི ཝཏྠཱནི ཀིལིསྶནྟི, མཱལཱ མིལཱཡནྟི, ཀཙྪེཧི སེདཱ མུཙྩནྟི, ཀཱཡེ ཝེཝཎྞིཡཾ ཨོཀྐམཏི, དེཝོ དེཝཱསནེ ན སཎྛཧཏཱིཏི ཨིམེསུ པཉྩསུ པུབྦནིམིཏྟེསུ ཨུཔྤནྣེསུ ཏཱནི དིསྭཱ ‘‘སུཉྙཱ ཝཏ བྷོ སགྒཱ བྷཝིསྶནྟཱི’’ཏི སཾཝེགཛཱཏཱཧི དེཝཏཱཧི མཧཱསཏྟསྶ པཱུརིཏཔཱརམིབྷཱཝཾ ཉཏྭཱ ‘‘ཨིམསྨིཾ ཨིདཱནི ཨཉྙཾ དེཝལོཀཾ ཨནུཔགནྟྭཱ མནུསྶལོཀེ ཨུཔྤཛྫིཏྭཱ བུདྡྷབྷཱཝཾ པཏྟེ པུཉྙཱནི ཀཏྭཱ ཙུཏཱ ཙུཏཱ མནུསྶཱ དེཝལོཀཾ པརིཔཱུརེསྶནྟཱི’’ཏི ཙིནྟེཏྭཱ –

‘‘ཡཏོཧཾ ཏུསིཏེ ཀཱཡེ, སནྟུསིཏོ ནཱམཧཾ ཏདཱ;

དསསཧསྶཱི སམཱགནྟྭཱ, ཡཱཙནྟི པཉྫལཱི མམཾ.

‘‘ཀཱལོ ¶ དེཝ མཧཱཝཱིར, ཨུཔྤཛྫ མཱཏུཀུཙྪིཡཾ;

སདེཝཀཾ ཏཱརཡནྟོ, བུཛ྄ཛྷསྶུ ཨམཏཾ པད’’ནྟི. (བུ. ཝཾ. ༡.༦༦-༦༧);

ཨེཝཾ ¶ བུདྡྷབྷཱཝཏྠཱཡ ཨཱཡཱཙིཏོ ཀཱལཾ, དཱིཔཾ, དེསཾ, ཀུལཾ, ཛནེཏྟིཡཱ ཨཱཡུཔྤམཱཎནྟི ཨིམཱནི པཉྩ མཧཱཝིལོཀནཱནི ཝིལོཀེཏྭཱ ཀཏསནྣིཊྛཱནོ ཏཏོ ཙུཏོ སཀྱརཱཛཀུལེ པཊིསནྡྷིཾ གཧེཏྭཱ ཏཏྠ མཧཱསམྤཏྟིཡཱ པརིཧརིཡམཱནོ ཨནུཀྐམེན བྷདྲཡོབྦནཾ ཨནུཔཱཔུཎི. ཨིམསྨིཾ ཨནྟརེ ‘‘སཏོ སམྤཛཱནོ ཨཱནནྡ བོདྷིསཏྟོ ཏུསིཏཱ ཀཱཡཱ ཙཝིཏྭཱ མཱཏུཀུཙྪིཾ ཨོཀྐམཱི’’ཏིཨཱདཱིནཾ (མ. ནི. ༣.༢༠༠) སུཏྟཔདཱནཉྩེཝ ཏེསཾ ཨཊྛཀཐཱཡ ཙ ཝསེན ཝིཏྠཱརོ ཝེདིཏབྦོ.

སོ ཏིཎྞཾ ཨུཏཱུནཾ ཨནུཙྪཝིཀེསུ ཏཱིསུ པཱསཱདེསུ དེཝལོཀསིརིཾ ཝིཡ རཛྫསིརིཾ ཨནུབྷཝམཱནོ ཨུཡྻཱནཀཱིལཱ༹ཡ གམནསམཡེ ཨནུཀྐམེན ཛིཎྞབྱཱདྷིམཏསངྑཱཏེ ཏཡོ དེཝདཱུཏེ དིསྭཱ སཉྫཱཏསཾཝེགོ ནིཝཏྟིཏྭཱ ཙཏུཏྠཝཱརེ པབྦཛིཏཾ དིསྭཱ ‘སཱདྷུ པབྦཛྫཱ’ཏི པབྦཛྫཱཡ རུཙིཾ ཨུཔྤཱདེཏྭཱ ཨུཡྻཱནཾ གནྟྭཱ ཏཏྠ དིཝསབྷཱགཾ ཁེཔེཏྭཱ མངྒལཔོཀྑརཎཱིཏཱིརེ ནིསིནྣོ ཀཔྤཀཝེསཾ གཧེཏྭཱ ཨཱགཏེན ཝིསྶཀམྨེན དེཝཔུཏྟེན ཨལངྐཏཔཊིཡཏྟོ རཱཧུལབྷདྡསྶ ¶ ཛཱཏསཱསནཾ སུཏྭཱ པུཏྟསིནེཧསྶ བལཝབྷཱཝཾ ཉཏྭཱ ‘ཡཱཝ ཨིདཾ བནྡྷནཾ ན ཝཌྜྷཏི ཏཱཝདེཝ ནཾ ཚིནྡིསྶཱམཱི’ཏི ཙིནྟེཏྭཱ སཱཡཾ ནགརཾ པཝིསནྟོ –

‘‘ནིབྦུཏཱ ནཱུན སཱ མཱཏཱ, ནིབྦུཏོ ནཱུན སོ པིཏཱ;

ནིབྦུཏཱ ནཱུན སཱ ནཱརཱི, ཡསྶཱཡཾ ཨཱིདིསོ པཏཱི’’ཏི. (བུ. ཝཾ. ཨཊྛ. ༢༧ ཨཝིདཱུརེནིདཱནཀཐཱ; དྷ. པ. ཨཊྛ. ༡.༡༠ སཱརིཔུཏྟཏྠེརཝཏྠུ; ཨཔ. ཨཊྛ. ༡.ཨཝིདཱུརེནིདཱནཀཐཱ; ཛཱ. ཨཊྛ. ༡.ཨཝིདཱུརེནིདཱནཀཐཱ);

ཀིསཱགོཏམིཡཱ ནཱམ པིཏུཙྪཱདྷཱིཏཱཡ བྷཱསིཏཾ ཨིམཾ གཱཐཾ སུཏྭཱ, ‘ཨཧཾ ཨིམཱཡ ནིབྦུཏཔདཾ སཱཝིཏོ’ཏི གཱིཝཏོ སཏསཧསྶགྒྷནིཀཾ མུཏྟཱཧཱརཾ མུཉྩིཏྭཱ, ཏསྶཱ པེསེཏྭཱ, ཨཏྟནོ བྷཝནཾ པཝིསིཏྭཱ, སིརིསཡནེ ནིསིནྣོ ནིདྡཱཝསེན ནཱཊཀཱནཾ ཝིཔྤཀཱརཾ དིསྭཱ, ནིབྦིནྣཧདཡོ ཚནྣཾ ཨུཊྛཱཔེཏྭཱ, ཀཎྜཀཾ ཨཱཧརཱཔེཏྭཱ, ཀཎྜཀཾ ཨཱརུཡ྄ཧ, ཚནྣསཧཱཡོཝ དསསཧསྶིལོཀདྷཱཏུདེཝཏཱཧི ཀཏཔརིཝཱརོ མཧཱབྷིནིཀྑམནཾ ནིཀྑམིཏྭཱ, ཏེནེཝ རཏྟཱཝསེསེན ཏཱིཎི ¶ མཧཱརཛྫཱནི ཨཏིཀྐམྨ ཨནོམཱནདཱིཏཱིརེ པབྦཛིཏྭཱ, ཨནུཀྐམེན རཱཛགཧཾ གནྟྭཱ, ཏཏྠ པིཎྜཱཡ ཙརིཏྭཱ, པཎྜཝཔབྦཏཔབྦྷཱརེ ནིསིནྣོ མགདྷརཱཛེན རཛྫེན ནིམནྟིཡམཱནོ ཏཾ པཊིཀྑིཔིཏྭཱ, སབྦཉྙུཏཾ པཏྭཱ ཏསྶ ཝིཛིཏཾ ཨཱགམནཏྠཱཡ ཏེན གཧིཏཔཊིཉྙོ ¶ , ཨཱལཱ༹རཉྩ ཨུདཀཉྩ ཨུཔསངྐམིཏྭཱ, ཏེསཾ སནྟིཀེ ཨདྷིགཏཝིསེསེན ཨཔརིཏུཊྛོ ཚབྦསྶཱནི མཧཱཔདྷཱནཾ པདཧིཏྭཱ, ཝིསཱཁཱཔུཎྞམདིཝསེ པཱཏོཝ སེནཱནིགམེ སུཛཱཏཱཡ དིནྣཾ པཱཡཱསཾ པརིབྷུཉྫིཏྭཱ, ནེརཉྫརཱཡ ནདིཡཱ སུཝཎྞཔཱཏིཾ པཝཱཧེཏྭཱ, ནེརཉྫརཱཡ ཏཱིརེ མཧཱཝནསཎྜེ ནཱནཱསམཱཔཏྟཱིཧི དིཝསབྷཱགཾ ཝཱིཏིནཱམེཏྭཱ, སཱཡནྷསམཡེ སོཏྠིཡེན དིནྣཾ ཨཊྛཏིཎམུཊྛིཾ གཧེཏྭཱ, ཀཱལེ༹ན ནཱགརཱཛེན ཨབྷིཏྠུཏགུཎོ བོདྷིམཎྜཾ ཨཱརུཡ྄ཧ ཏིཎཱནི སནྠརིཏྭཱ, ‘ན ཏཱཝིམཾ པལླངྐཾ བྷིནྡིསྶཱམི ཡཱཝ མེ ན ཨནུཔཱདཱཡ ཨཱསཝེཧི ཙིཏྟཾ ཝིམུཙྩིསྶཏཱི’ཏི པཊིཉྙཾ ཀཏྭཱ, པཱཙཱིནདིསཱབྷིམུཁོ ནིསཱིདིཏྭཱ, སཱུརིཡེ ཨནཏྠངྒམིཏེཡེཝ མཱརབལཾ ཝིདྷམིཏྭཱ, པཋམཡཱམེ པུབྦེནིཝཱསཉཱཎཾ, མཛ྄ཛྷིམཡཱམེ ཙུཏཱུཔཔཱཏཉཱཎཾ པཏྭཱ, པཙྪིམཡཱམཱཝསཱནེ དསབལཙཏུཝེསཱརཛྫཱདིསབྦབུདྡྷགུཎཔཊིམཎྜིཏཾ ¶ སབྦཉྙུཏཉྙཱཎཾ པཊིཝིཛ྄ཛྷནྟོཡེཝ ཨིམཾ ཨབྷིདྷམྨནཡསམུདྡཾ ཨདྷིགཉྪི. ཨེཝམསྶ ཨདྷིགམནིདཱནཾ ཝེདིཏབྦཾ.

ཨེཝཾ ཨདྷིགཏཱབྷིདྷམྨོ ཨེཀཔལླངྐེན ནིསིནྣསཏྟཱཧཾ ཨནིམིསསཏྟཱཧཾ ཙངྐམནསཏྟཱཧཉྩ ཨཏིཀྐམིཏྭཱ, ཙཏུཏྠེ སཏྟཱཧེ སཡམྦྷཱུཉཱཎཱདྷིགམེན ཨདྷིགཏཾ ཨབྷིདྷམྨཾ ཝིཙིནིཏྭཱ ཨཔརཱནིཔི ཨཛཔཱལམུཙལིནྡརཱཛཱཡཏནེསུ ཏཱིཎི སཏྟཱཧཱནི ཝཱིཏིནཱམེཏྭཱ, ཨཊྛམེ སཏྟཱཧེ ཨཛཔཱལནིགྲོདྷརུཀྑམཱུལེ ནིསིནྣོ དྷམྨགམྦྷཱིརཏཱཔཙྩཝེཀྑཎེན ཨཔྤོསྶུཀྐཏཾ ཨཱཔཛྫམཱནོ དསསཧསྶིམཧཱབྲཧྨཔརིཝཱརེན སཧམྤཏིབྲཧྨུནཱ ཨཱཡཱཙིཏདྷམྨདེསནོ བུདྡྷཙཀྑུནཱ ལོཀཾ ཨོལོཀེཏྭཱ, བྲཧྨུནོ ཨཛ྄ཛྷེསནཾ ཨཱདཱཡ ‘‘ཀསྶ ནུ ཁོ ཨཧཾ པཋམཾ དྷམྨཾ དེསེཡྻ’ནྟི ཨོལོཀེནྟོ ཨཱལཱ༹རུདཀཱནཾ ཀཱལངྐཏབྷཱཝཾ ཉཏྭཱ, པཉྩཝགྒིཡཱནཾ བྷིཀྑཱུནཾ བཧཱུཔཀཱརཏཾ ཨནུསྶརིཏྭཱ, ཨུཊྛཱཡཱསནཱ ཀཱསིཔུརཾ གཙྪནྟོ ཨནྟརཱམགྒེ ཨུཔཀེན སདྡྷིཾ མནྟེཏྭཱ, ཨཱསཱལ༹ྷཱིཔུཎྞམདིཝསེ ཨིསིཔཏནེ མིགདཱཡེ པཉྩཝགྒིཡཱནཾ བྷིཀྑཱུནཾ ཝསནཊྛཱནཾ པཏྭཱ,ཏེ ཨནནུཙྪཝིཀེན སམུདཱཙཱརེན སམུདཱཙརནྟེ སཉྙཱཔེཏྭཱ, དྷམྨཙཀྐཾ པཝཏྟེནྟོ ཨཉྙཱསིཀོཎྜཉྙཏྠེརཔྤམུཁཱ ཨཊྛཱརས བྲཧྨཀོཊིཡོ ཨམཏཔཱནཾ པཱཡེསི. ཨེཝཾ ཡཱཝ དྷམྨཙཀྐཔྤཝཏྟནཱ དེསནཱནིདཱནཾ ¶ ཝེདིཏབྦཾ. ཨཡམེཏྠ སངྑེཔོ. ཝིཏྠཱརོ པན སཱཊྛཀཐཱནཾ ཨརིཡཔརིཡེསན(མ. ནི. ༡.༢༧༤) པབྦཛྫསུཏྟཱདཱིནཾ (སུ. ནི. ༤༠༧ ཨཱདཡོ) ཝསེན ཝེདིཏབྦོ.

ཨེཝཾ ¶ ཨདྷིགམནིདཱནདེསནཱནིདཱནསམྤནྣསྶ པནསྶ ཨབྷིདྷམྨསྶ ཨཔརཱནིཔི དཱུརེནིདཱནཾ, ཨཝིདཱུརེནིདཱནཾ, སནྟིཀེནིདཱནནྟི ཏཱིཎི ནིདཱནཱནི. ཏཏྠ དཱིཔངྐརཔཱདམཱུལཏོ པཊྛཱཡ ཡཱཝ ཏུསིཏཔུརཱ དཱུརེནིདཱནཾ ཝེདིཏབྦཾ. ཏུསིཏཔུརཏོ པཊྛཱཡ ཡཱཝ བོདྷིམཎྜཱ ཨཝིདཱུརེནིདཱནཾ. ‘ཨེཀཾ སམཡཾ བྷགཝཱ དེཝེསུ ཝིཧརཏི ཏཱཝཏིཾསེསུ པཱརིཙྪཏྟཀམཱུལེ པཎྜུཀམྦལསིལཱཡཾ, ཏཏྠ ཁོ བྷགཝཱ དེཝཱནཾ ཏཱཝཏིཾསཱནཾ ཨབྷིདྷམྨཀཐཾ ཀཐེསཱི’ཏི ཨིདམསྶ སནྟིཀེནིདཱནཾ. ཨཡཾ ཏཱཝ ནིདཱནཀཐཱ.

ནིདཱནཀཐཱ ནིཊྛིཏཱ.

༡. ཙིཏྟུཔྤཱདཀཎྜོ

ཏིཀམཱཏིཀཱཔདཝཎྞནཱ

ཨིདཱནི

ཨིཏི ¶ ¶ ¶ མེ བྷཱསམཱནསྶ, ཨབྷིདྷམྨཀཐཾ ཨིམཾ;

ཨཝིཀྑིཏྟཱ ནིསཱམེཐ, དུལླབྷཱ ཧི ཨཡཾ ཀཐཱཏི.

ཨེཝཾ པཊིཉྙཱཏཱཡ ཨབྷིདྷམྨཀཐཱཡ ཀཐནོཀཱསོ སམྤཏྟོ. ཏཏྠ ཡསྨཱ ཨབྷིདྷམྨོ ནཱམ དྷམྨསངྒཎཱིཨཱདཱིནི སཏྟཔྤཀརཎཱནི; དྷམྨསངྒཎཱིཔི ཙིཏྟུཔྤཱདཀཎྜཱདཱིནཾ ཝསེན ཙཏྟཱརི ཀཎྜཱནི; ཙིཏྟུཔྤཱདཀཎྜམྤི མཱཏིཀཱཔདབྷཱཛནཱིཡཝསེན དུཝིདྷཾ; ཏཏྠ མཱཏིཀཱ ཨཱདི; སཱཔི ཏིཀམཱཏིཀཱ དུཀམཱཏིཀཱཏི དུཝིདྷཱ; ཏཏྠ ཏིཀམཱཏིཀཱ ཨཱདི; ཏིཀམཱཏིཀཱཡཔི ཀུསལཏྟིཀཾ ཀུསལཏྟིཀེཔི ཀུསལཱ དྷམྨཱཏི ཨིདཾ པདཾ; ཏསྨཱ –

ཨིཏོ པཊྛཱཡ གམྦྷཱིརཾ, ཨབྷིདྷམྨཀཐཾ ཨིམཾ;

ཝུཙྩམཱནཾ ནིསཱམེཐ, ཨེཀགྒཱ སཱདྷུ སཱདྷཝོཏི.

༡. ‘‘ཀུསལཱ དྷམྨཱ, ཨཀུསལཱ དྷམྨཱ, ཨབྱཱཀཏཱ དྷམྨཱ’’ཏི ཨཡཾ ཏཱཝ ཨཱདིཔདེན ལདྡྷནཱམོ ཀུསལཏྟིཀོ ནཱམ. ‘‘སུཁཱཡ ཝེདནཱཡ སམྤཡུཏྟཱ དྷམྨཱ, དུཀྑཱཡ ཝེདནཱཡ སམྤཡུཏྟཱ དྷམྨཱ, ཨདུཀྑམསུཁཱཡ ཝེདནཱཡ སམྤཡུཏྟཱ དྷམྨཱ’’ཏི ཨཡཾ སབྦཔདེཧི ལདྡྷནཱམོ ཝེདནཱཏྟིཀོ ནཱམ. ཨེཝཾ ཨཱདིཔདཝསེན ཝཱ སབྦཔདཝསེན ཝཱ སབྦེསམྤི ཏིཀདུཀཱནཾ ནཱམཾ ཝེདིཏབྦཾ ¶ . སབྦེཝ ཙེཏེ པཉྩདསཧི པརིཙྪེདེཧི ཝཝཏྠིཏཱ. ཏིཀཱནཉྷི ཨེཀོ པརིཙྪེདོ, དུཀཱནཾ ཙཏུདྡས. ‘‘ཧེཏཱུ དྷམྨཱ, ནཧེཏཱུ དྷམྨཱ’’ཏིཨཱདཡོ ཧི ཚ དུཀཱ གནྠཏོ ཙ ཨཏྠཏོ ཙ ཨཉྙམཉྙསམྦནྡྷེན ཀཎྞིཀཱ ཝིཡ གྷཊཱ ཝིཡ ཧུཏྭཱ ཋིཏཏྟཱ ‘ཧེཏུགོཙྪཀོ’ཏི ཝུཙྩཏི. ཏཏོ ཨཔརེ ‘‘སཔྤཙྩཡཱ དྷམྨཱ ཨཔྤཙྩཡཱ དྷམྨཱ’’ཏིཨཱདཡོ སཏྟ དུཀཱ, ཨཉྙམཉྙཾ ཨསམྦནྡྷཱ, ཀེཝལཾ ¶ དུཀསཱམཉྙཏོ ཨུཙྩིནིཏྭཱ ཨུཙྩིནིཏྭཱ ཝིསུཾ ཝིསུཾ གོཙྪཀནྟརེ ཋཔིཏཏྟཱ ཨཉྙེཧི ཙ མཧནྟརདུཀེཧི ཙཱུལ༹ཀཏྟཱ ‘ཙཱུལ༹ནྟརདུཀཱ’ཏི ཝེདིཏབྦཱ. ཏཏོ པརཾ ཨཱསཝདུཀཱདཱིནཾ ཚནྣཾ ཝསེན ‘ཨཱསཝགོཙྪཀོ’ ¶ ; ཏཐཱ སཾཡོཛནདུཀཱདཱིནཾ ཝསེན ‘སཾཡོཛནགོཙྪཀོ’; ཏཐཱ གནྠཨོགྷཡོགནཱིཝརཎདུཀཱདཱིནཾ ཝསེན ‘གནྠཨོགྷཡོགནཱིཝརཎགོཙྪཀཱ’; པརཱམཱསདུཀཱདཱིནཾ པཉྩནྣཾ ཝསེན ‘པརཱམཱསགོཙྪཀོ’ཏི. སབྦེཔི སཏྟ གོཙྪཀཱ ཝེདིཏབྦཱ. ཏཏོ པརཾ ‘‘སཱརམྨཎཱ དྷམྨཱ’’ཏིཨཱདཡོ ཙཏུདྡས དུཀཱ ‘མཧནྟརདུཀཱ’ ནཱམ. ཏཏོ ཨུཔཱདཱནདུཀཱདཡོ ཚ དུཀཱ ‘ཨུཔཱདཱནགོཙྪཀོ’ ནཱམ. ཏཏོ ཀིལེསདུཀཱདཡོ ཨཊྛ དུཀཱ ‘ཀིལེསགོཙྪཀོ’ ནཱམ. ཏཏོ པརཾ དསྶནེནཔཧཱཏབྦདུཀཱདཡོ ཨཊྛཱརས དུཀཱ ཨབྷིདྷམྨམཱཏིཀཱཡ པརིཡོསཱནེ ཋཔིཏཏྟཱ ‘པིཊྛིདུཀཱ’ ནཱམ. ‘‘ཝིཛྫཱབྷཱགིནོ དྷམྨཱ ཨཝིཛྫཱབྷཱགིནོ དྷམྨཱ’’ཏིཨཱདཡོ པན དྭཱཙཏྟཱལཱིས དུཀཱ ‘སུཏྟནྟིཀདུཀཱ’ ནཱམ. ཨེཝཾ སབྦེཔེཏེ པཉྩདསཧི པརིཙྪེདེཧི ཝཝཏྠིཏཱཏི ཝེདིཏབྦཱ.

ཨེཝཾ ཝཝཏྠིཏཱ པནེཏེ སཔྤདེསནིཔྤདེསཝསེན དྭེ ཀོཊྛཱསཱ ཧོནྟི. ཏེསུ ཧི ནཝ ཏིཀཱ ཨེཀསཏྟཏི ཙ དུཀཱ སཔྤདེསཱནཾ རཱུཔཱརཱུཔདྷམྨཱནཾ པརིགྒཧིཏཏྟཱ སཔྤདེསཱ ནཱམ. ཨཝསེསཱ ཏེརས ཏིཀཱ ཨེཀསཏྟཏི ཙ དུཀཱ ནིཔྤདེསཱ ནཱམ. ཏཏྠ ཏིཀེསུ ཏཱཝ ཝེདནཱཏྟིཀོ ཝིཏཀྐཏྟིཀོ པཱིཏིཏྟིཀོ ཨུཔྤནྣཏྟིཀོ ཨཏཱིཏཏྟིཀོ ཙཏྟཱརོ ཨཱརམྨཎཏྟིཀཱཏི ཨིམེ ནཝ ཏིཀཱ སཔྤདེསཱ ནཱམ. དུཀེསུ ཧེཏུགོཙྪཀཱདཱིནཾ ཨུཔཱདཱནགོཙྪཀཔརིཡོསཱནཱནཾ ནཝནྣཾ གོཙྪཀཱནཾ པརིཡོསཱནེ ཏཡོ ཏཡོ དུཀཱ, ཀིལེསགོཙྪཀཔརིཡོསཱནེ ¶ ཙཏྟཱརོ དུཀཱ, ‘‘ཙིཏྟསམྤཡུཏྟཱ དྷམྨཱ, ཙིཏྟཝིཔྤཡུཏྟཱ དྷམྨཱ’’‘‘ཙིཏྟསཾསཊྛཱ དྷམྨཱ, ཙིཏྟཝིསཾསཊྛཱ དྷམྨཱ’’ཏི དྭེ མཧནྟརདུཀཱ, སུཏྟནྟིཀདུཀེསུ ཨདྷིཝཙནདུཀཾ ནིརུཏྟིདུཀཾ པཉྙཏྟིདུཀཾ ནཱམརཱུཔདུཀནྟི ཨིམེ ཙཏྟཱརོ དུཀེ ཋཔེཏྭཱ ཨཝསེསཱ ཨཊྛཏིཾས དུཀཱ ཙཱཏི ཨེཏེ སཔྤདེསཱ ནཱམ. ཝུཏྟཱཝསེསཱ ཏིཀདུཀཱ སབྦེཔི ནིཔྤདེསཱཏི ཝེདིཏབྦཱ.

ཨིདཱནི ཀུསལཱ དྷམྨཱཏིཨཱདཱིནཾ མཱཏིཀཱཔདཱནཾ ཨཡམནུཔུབྦཔདཝཎྞནཱ – ‘ཀུསལ’-སདྡོ ཏཱཝ ¶ ཨཱརོགྱཨནཝཛྫཚེཀསུཁཝིཔཱཀེསུ དིསྶཏི. ཨཡཉྷི ‘‘ཀཙྩི ནུ བྷོཏོ ཀུསལཾ, ཀཙྩི བྷོཏོ ཨནཱམཡ’’ནྟིཨཱདཱིསུ (ཛཱ. ༡.༡༥.༡༤༦; ༢.༢༠.༡༢༩) ཨཱརོགྱེ དིསྶཏི. ‘‘ཀཏམོ པན, བྷནྟེ, ཀཱཡསམཱཙཱརོ ཀུསལོ? ཡོ ཁོ, མཧཱརཱཛ, ཀཱཡསམཱཙཱརོ ཨནཝཛྫོ’’ཏི (མ. ནི. ༢.༣༦༡) ཙ, ‘‘ཨཔརཾ པན, བྷནྟེ, ཨེཏདཱནུཏྟརིཡཾ ¶ ཡཐཱ བྷགཝཱ དྷམྨཾ དེསེཏི ཀུསལེསུ དྷམྨེསཱུ’’ཏི (དཱི. ནི. ༣.༡༤༥) ཙ ཨེཝམཱདཱིསུ ཨནཝཛྫེ. ‘‘ཀུསལོ ཏྭཾ རཐསྶ ཨངྒཔཙྩངྒཱནཾ’’ (མ. ནི. ༢.༨༧), ‘‘ཀུསལཱ ནཙྩགཱིཏསྶ སིཀྑིཏཱ ཙཱཏུརིཏྠིཡོ’’ཏིཨཱདཱིསུ (ཛཱ. ༢.༢༢.༩༤) ཚེཀེ. ‘‘ཀུསལཱནཾ, བྷིཀྑཝེ, དྷམྨཱནཾ སམཱདཱནཧེཏུ’’ (དཱི. ནི. ༣.༨༠), ‘‘ཀུསལསྶ ཀམྨསྶ ཀཏཏྟཱ ཨུཔཙིཏཏྟཱ’’ཏིཨཱདཱིསུ (དྷ. ས. ༤༣༡) སུཁཝིཔཱཀེ. སྭཱཡམིདྷ ཨཱརོགྱེཔི ཨནཝཛྫེཔི སུཁཝིཔཱཀེཔི ཝཏྟཏི.

དྷམྨསདྡོ པནཱཡཾ པརིཡཏྟིཧེཏུགུཎནིསྶཏྟནིཛྫཱིཝཏཱདཱིསུ དིསྶཏི. ཨཡཉྷི ‘‘དྷམྨཾ པརིཡཱཔུཎཱཏི སུཏྟཾ གེཡྻ’’ནྟིཨཱདཱིསུ (ཨ. ནི. ༤.༡༠༢) པརིཡཏྟིཡཾ དིསྶཏི. ‘‘ཧེཏུམྷི ཉཱཎཾ དྷམྨཔཊིསམྦྷིདཱ’’ཏིཨཱདཱིསུ (ཝིབྷ. ༧༢༠) ཧེཏུམྷི.

‘‘ན ཧི དྷམྨོ ཨདྷམྨོ ཙ, ཨུབྷོ སམཝིཔཱཀིནོ;

ཨདྷམྨོ ནིརཡཾ ནེཏི, དྷམྨོ པཱཔེཏི སུགྒཏི’’ནྟི. (ཐེརགཱ. ༣༠༤; ཛཱ. ༡.༡༥.༣༨༦) –

ཨཱདཱིསུ གུཎེ. ‘‘ཏསྨིཾ ཁོ པན སམཡེ དྷམྨཱ ཧོནྟི’’ (དྷ. ས. ༡༢༡), ‘‘དྷམྨེསུ དྷམྨཱནུཔསྶཱི ཝིཧརཏཱི’’ཏིཨཱདཱིསུ (དཱི. ནི. ༢.༣༧༣) ནིསྶཏྟནིཛྫཱིཝཏཱཡཾ. སྭཱཡམིདྷཱཔི ནིསྶཏྟནིཛྫཱིཝཏཱཡམེཝ ཝཊྚཏི.

ཝཙནཏྠོ ¶ པནེཏྠ – ཀུཙྪིཏེ པཱཔཀེ དྷམྨེ སལཡནྟི ཙལཡནྟི ཀམྤེནྟི ཝིདྡྷཾསེནྟཱིཏི ཀུསལཱ. ཀུཙྪིཏེན ཝཱ ཨཱཀཱརེན སཡནྟཱིཏི ཀུསཱ. ཏེ ཨཀུསལསངྑཱཏེ ཀུསེ ལུནནྟི ཚིནྡནྟཱིཏི ཀུསལཱ. ཀུཙྪིཏཱནཾ ཝཱ སཱནཏོ ཏནུཀརཎཏོ ཨོསཱནཀརཎཏོ ཉཱཎཾ ཀུསཾ ནཱམ. ཏེན ཀུསེན ལཱཏབྦཱཏི ཀུསལཱ; གཧེཏབྦཱ པཝཏྟེཏབྦཱཏི ཨཏྠོ. ཡཐཱ ཝཱ ཀུསཱ ཨུབྷཡབྷཱགགཏཾ ཧཏྠཔྤདེསཾ ལུནནྟི, ཨེཝམིམེཔི ཨུཔྤནྣཱནུཔྤནྣབྷཱཝེན ཨུབྷཡབྷཱགགཏཾ ཀིལེསཔཀྑཾ ལུནནྟི. ཏསྨཱ ཀུསཱ ཝིཡ ལུནནྟཱིཏིཔི ཀུསལཱ. ཨཏྟནོ པན སབྷཱཝཾ དྷཱརེནྟཱིཏི དྷམྨཱ. དྷཱརིཡནྟི ¶ ཝཱ པཙྩཡེཧི, དྷཱརཱིཡནྟི ཝཱ ཡཐཱསབྷཱཝཏོཏི དྷམྨཱ. ན ཀུསལཱ ཨཀུསལཱ. མིཏྟཔཊིཔཀྑཱ ཨམིཏྟཱ ཝིཡ, ལོབྷཱདིཔཊིཔཀྑཱ ཨལོབྷཱདཡོ ཝིཡ ཙ, ཀུསལཔཊིཔཀྑཱཏི ཨཏྠོ. ན བྱཱཀཏཱཏི ཨབྱཱཀཏཱ, ཀུསལཱཀུསལབྷཱཝེན ཨཀཐིཏཱཏི ཨཏྠོ. ཏེསུ པན ¶ ཨནཝཛྫསུཁཝིཔཱཀལཀྑཎཱ ཀུསལཱ, སཱཝཛྫདུཀྑཝིཔཱཀལཀྑཎཱ ཨཀུསལཱ, ཨཝིཔཱཀལཀྑཎཱ ཨབྱཱཀཏཱ.

ཀིཾ པནེཏཱནི ‘ཀུསལཱ’ཏི ཝཱ ‘དྷམྨཱ’ཏི ཝཱཏིཨཱདཱིནི ཨེཀཏྠཱནི ཨུདཱཧུ ནཱནཏྠཱནཱིཏི? ཀིཉྩེཏྠ? ཡདི ཏཱཝ ཨེཀཏྠཱནི ‘ཀུསལཱ དྷམྨཱ’ཏི ཨིདཾ ‘ཀུསལཱཀུསལཱ’ཏིཝུཏྟསདིསཾ ཧོཏི. ཨཐ ནཱནཏྠཱནི ཏིཀདུཀཱནཾ ཚཀྐཙཏུཀྐབྷཱཝོ ཨཱཔཛྫཏི པདཱནཉྩ ཨསམྦནྡྷོ.

ཡཐཱ ཧི ‘ཀུསལཱ’ ‘རཱུཔཾ’‘ཙཀྑུམཱ’ཏི ཝུཏྟེ ཨཏྠཝསེན ཨཉྙམཉྙཾ ཨནོལོཀེནྟཱནཾ པདཱནཾ ན ཀོཙི སམྦནྡྷོ, ཨེཝམིདྷཱཔི པདཱནཾ ཨསམྦནྡྷོ ཨཱཔཛྫཏི. པུབྦཱཔརསམྦནྡྷརཧིཏཱནི ཙ པདཱནི ནིཔྤཡོཛནཱནི ནཱམ ཧོནྟི. ཡཱཔི ཙེསཱ པརཏོ ‘ཀཏམེ དྷམྨཱ ཀུསལཱ’ཏི པུཙྪཱ, ཏཱཡཔི སདྡྷིཾ ཝིརོདྷོ ཨཱཔཛྫཏི. ནེཝ ཧི དྷམྨཱ ཀུསལཱ; ཨཐ ཙ པནིདཾ ཝུཙྩཏི – ཀཏམེ དྷམྨཱ ‘ཀུསལཱ’ཏི. ཨཔརོ ནཡོ – ཡདི ཨེཏཱནི ཨེཀཏྠཱནི, ཏིཎྞཾ ‘དྷམྨཱནཾ’ ཨེཀཏྟཱ ཀུསལཱདཱིནམྤི ཨེཀཏྟཾ ཨཱཔཛྫཏི. ཀུསལཱདིཔརཱནཉྷི ཏིཎྞམྤི ‘དྷམྨཱནཾ’ དྷམྨབྷཱཝེན ཨེཀཏྟཾ. ཏསྨཱ དྷམྨཏྟཡེན སདྡྷིཾ ཨཏྠཏོ ནིནྣཱནཏྠཱནཾ ཀུསལཱདཱིནམྤི ཨེཀཏྟཾ ཨཱཔཛྫཏི. ‘ཡདེཝ ཀུསལཾ, ཏཾ ཨཀུསལཾ, ཏཾ ཨབྱཱཀཏ’ནྟི. ‘ཨཐཱཔི ཏིཎྞཾ དྷམྨཱནཾ ཨེཀཏྟཾ ན སམྤཊིཙྪཐ, ཨཉྙོཝ ཀུསལཔརོ དྷམྨོ, ཨཉྙོ ¶ ཨཀུསལཔརོ དྷམྨོ, ཨཉྙོ ཨབྱཱཀཏཔརོ དྷམྨོཏི ཝདཐ, ཨེཝཾ སནྟེ དྷམྨོ ནཱམ བྷཱཝོ, བྷཱཝཏོ ཙ ཨཉྙོ ཨབྷཱཝོཏི ཀུསལཔརཱ བྷཱཝསངྑཱཏཱ དྷམྨཱ ཨཉྙོ ཨཀུསལཔརོ དྷམྨོ ཨབྷཱཝོ སིཡཱ, ཏཐཱ ཨབྱཱཀཏཔརོ. ཏེཧི ཙ ཨཉྙོ ཀུསལཔརོཔི. ཨེཝཾ ཨབྷཱཝཏྟཾ ཨཱཔནྣེཧི དྷམྨེཧི ཨནཉྙེ ཀུསལཱདཡོཔི ཨབྷཱཝཱཡེཝ སིཡུ’ནྟི.

སབྦམེཏཾ ཨཀཱརཎཾ. ཀསྨཱ? ཡཐཱནུམཏིཝོཧཱརསིདྡྷིཏོཏི. ཝོཧཱརོ ཧི ཡཐཱ ཡཐཱ ཨཏྠེསུ ཨནུམཏོ སམྤཊིཙྪིཏོ ཏཐཱ ཏཐེཝ སིདྡྷོ. ན ཙཱཡཾ ‘‘ཀུསལཱ དྷམྨཱ’’ཏིཨཱདཱིསུ ཀུསལཔུབྦོ དྷམྨཱབྷིལཱཔོ དྷམྨཔརོ ཙ ཀུསལཱབྷིལཱཔོ, ཡཐཱ ‘ཀུསལཱ ཀུསལཱ’ཏི ཨེཝཾ, ཨཏྟནོ ཨཏྠཝིསེསཱབྷཱཝེན པཎྜིཏེཧི སམྤཊིཙྪིཏོ; ན ཙ ‘ཀུསལཱ’ ‘རཱུཔཾ’ཙཀྑུམཱསདྡཱ ཝིཡ ཨཉྙམཉྙཾ ཨནོལོཀིཏཏྠབྷཱཝེན. ‘ཀུསལ’-སདྡོ པནེཏྠ ཨནཝཛྫསུཁཝིཔཱཀསངྑཱཏསྶ ཨཏྠསྶ ¶ ¶ ཛོཏཀབྷཱཝེན སམྤཊིཙྪིཏོ, ‘ཨཀུསལ’-སདྡོ སཱཝཛྫདུཀྑཝིཔཱཀཏྠཛོཏཀཏྟེན, ‘ཨབྱཱཀཏ’-སདྡོ ཨཝིཔཱཀཏྠཛོཏཀཏྟེན, ‘དྷམྨ’-སདྡོ སབྷཱཝདྷཱརཎཱདིཨཏྠཛོཏཀཏྟེན. སོ ཨེཏེསཾ ཨཉྙཏརཱནནྟརེ ཝུཙྩམཱནོ ཨཏྟནོ ཨཏྠསཱམཉྙཾ དཱིཔེཏི. སབྦེཝ ཧི ཨེཏེ སབྷཱཝདྷཱརཎཱདིནཱ ལཀྑཎེན དྷམྨཱ. ཀུསལཱདིསདྡཱ ཙཱཔི དྷམྨསདྡསྶ པུརཏོ ཝུཙྩམཱནཱ ཨཏྟནོ ཨཏྟནོ ཨཏྠཝིསེསཾ ཏསྶ དཱིཔེནྟི. དྷམྨོ ཧི ཀུསལོ ཝཱ ཧོཏི ཨཀུསལོ ཝཱ ཨབྱཱཀཏོ ཝཱ. ཨེཝམེཏེ ཝིསུཾ ཝིསུཾ ཝུཙྩམཱནཱ ཨཏྟནོ ཨཏྟནོ ཨཏྠམཏྟདཱིཔཀཏྟེན སམྤཊིཙྪིཏཱ. དྷམྨསདྡེན སཧ ཝུཙྩམཱནཱ ཨཏྟནོ ཨཏྟནོ ཨཏྠསཱམཉྙཾ ཨཏྠཝིསེསཾ ཝཱ དཱིཔཀཏྟེན ལོཀེ པཎྜིཏེཧི སམྤཊིཙྪིཏཱ. ཏསྨཱ ཡདེཏམེཏྠ ཨེཀཏྠནཱནཱཏྠཏཾ ཝིཀཔྤེཏྭཱ དོསཱརོཔནཀཱརཎཾ ཝུཏྟཾ སབྦམེཏཾ ཨཀཱརཎཾ. ཨཡཾ ཏཱཝ ཀུསལཏྟིཀསྶ ཨནུཔུབྦཔདཝཎྞནཱ. ཨིམིནཱཝ ནཡེན སེསཏིཀདུཀཱནམྤི ནཡོ ཝེདིཏབྦོ. ཨིཏོ པརཾ པན ཝིསེསམཏྟམེཝ ཝཀྑཱམ.

༢. སུཁཱཡ ཝེདནཱཡཱཏིཨཱདཱིསུ ‘སུཁ’-སདྡོ ཏཱཝ སུཁཝེདནཱསུཁམཱུལསུཁཱརམྨཎསུཁཧེཏུསུཁཔཙྩཡཊྛཱནཨབྱཱབཛ྄ཛྷནིབྦཱནཱདཱིསུ དིསྶཏི. ཨཡཉྷི ‘‘སུཁསྶ ཙ པཧཱནཱ’’ཏིཨཱདཱིསུ (དཱི. ནི. ༡.༢༣༢) སུཁཝེདནཱཡཾ དིསྶཏི. ‘‘སུཁོ བུདྡྷཱནཾ ཨུཔྤཱདོ’’ (དྷ. པ. ༡༩༤), ‘‘སུཁཱ ཝིརཱགཏཱ ལོཀེ’’ཏིཨཱདཱིསུ (ཨུདཱ. ༡༡; མཧཱཝ. ༥) སུཁམཱུལེ ‘‘ཡསྨཱ ¶ ཙ ཁོ, མཧཱལི, རཱུཔཾ སུཁཾ སུཁཱནུཔཏིཏཾ སུཁཱཝཀྐནྟ’’ནྟིཨཱདཱིསུ (སཾ. ནི. ༣.༦༠) སུཁཱརམྨཎེ. ‘‘སུཁསྶེཏཾ, བྷིཀྑཝེ, ཨདྷིཝཙནཾ ཡདིདཾ པུཉྙཱནཱི’’ཏིཨཱདཱིསུ (ཨ. ནི. ༧.༦༢) སུཁཧེཏུམྷི. ‘‘ཡཱཝཉྩིདཾ, བྷིཀྑཝེ, ན སུཀརཾ ཨཀྑཱནེན པཱཔུཎིཏུཾ ཡཱཝ སུཁཱ སགྒཱ’’ (མ. ནི. ༣.༢༥༥), ‘‘ན ཏེ སུཁཾ པཛཱནནྟི ཡེ ན པསྶནྟི ནནྡན’’ནྟིཨཱདཱིསུ (སཾ. ནི. ༡.༡༡) སུཁཔཙྩཡཊྛཱནེ. ‘‘དིཊྛདྷམྨསུཁཝིཧཱརཱ ཨེཏེ དྷམྨཱ’’ཏིཨཱདཱིསུ (མ. ནི. ༡.༨༢) ཨབྱཱབཛ྄ཛྷེ. ‘‘ནིབྦཱནཾ པརམཾ སུཁ’’ནྟིཨཱདིསུ (དྷ. པ. ༢༠༣-༢༠༤) ནིབྦཱནེ. ཨིདྷ པནཱཡཾ སུཁཝེདནཱཡམེཝ དཊྛབྦོ. ‘ཝེདནཱ’-སདྡོ ‘‘ཝིདིཏཱ ཝེདནཱ ཨུཔྤཛྫནྟཱི’’ཏིཨཱདཱིསུ (མ. ནི. ༣.༢༠༨) ཝེདཡིཏསྨིཾཡེཝ ཝཏྟཏི.

‘དུཀྑ’-སདྡོ ¶ དུཀྑཝེདནཱདུཀྑཝཏྠུདུཀྑཱརམྨཎདུཀྑཔཙྩཡདུཀྑཔཙྩཡཊྛཱནཱདཱིསུ དིསྶཏི. ཨཡཉྷི ‘‘དུཀྑསྶ ཙ པཧཱནཱ’’ཏིཨཱདཱིསུ དུཀྑཝེདནཱཡཾ དིསྶཏི. ‘‘ཛཱཏིཔི དུཀྑཱ’’ཏིཨཱདཱིསུ (དཱི. ནི. ༢.༣༨༧; ཝིབྷ. ༡༩༠) དུཀྑཝཏྠུསྨིཾ. ‘‘ཡསྨཱ ཙ ཁོ, མཧཱལི, རཱུཔཾ དུཀྑཾ དུཀྑཱནུཔཏིཏཾ དུཀྑཱཝཀྐནྟ’’ནྟིཨཱདཱིསུ དུཀྑཱརམྨཎེ. ‘‘དུཀྑོ པཱཔསྶ ¶ ཨུཙྩཡོ’’ཏིཨཱདཱིསུ (དྷ. པ. ༡༡༧) དུཀྑཔཙྩཡེ. ‘‘ཡཱཝཉྩིདཾ, བྷིཀྑཝེ, ན སུཀརཾ ཨཀྑཱནེན པཱཔུཎིཏུཾ ཡཱཝ དུཀྑཱ ནིརཡཱ’’ཏིཨཱདཱིསུ (མ. ནི. ༣.༢༥༠) དུཀྑཔཙྩཡཊྛཱནེ. ཨིདྷ པནཱཡཾ དུཀྑཝེདནཱཡམེཝ དཊྛབྦོ.

ཝཙནཏྠོ པནེཏྠ – སུཁཡཏཱིཏི སུཁཱ. དུཀྑཡཏཱིཏི དུཀྑཱ. ན དུཀྑཱ ན སུཁཱཏི ཨདུཀྑམསུཁཱ. ‘མ-ཀཱརོ པདསནྡྷིཝསེན ཝུཏྟོ. སབྦཱཔི ཨཱརམྨཎརསཾ ཝེདཡནྟི ཨནུབྷཝནྟཱིཏི ཝེདནཱ. ཏཱསུ ཨིཊྛཱནུབྷཝནལཀྑཎཱ སུཁཱ, ཨནིཊྛཱནུབྷཝནལཀྑཎཱ དུཀྑཱ, ཨུབྷཡཝིཔརཱིཏཱནུབྷཝནལཀྑཎཱ ཨདུཀྑམསུཁཱ. ཡོཔནཱཡཾ ཏཱིསུཔི པདེསུ ‘སམྤཡུཏྟ’-སདྡོ, ཏསྶཏྠོ – སམཾ པཀཱརེཧི ཡུཏྟཱཏི སམྤཡུཏྟཱ. ཀཏརེཧི པཀཱརེཧཱིཏི? ཨེཀུཔྤཱདཏཱདཱིཧི. ‘‘ནཏྠི ¶ ཀེཙི དྷམྨཱ ཀེཧིཙི དྷམྨེཧི སམྤཡུཏྟཱཏི? ཨཱམནྟཱ’’ཏི ཧི ཨིམསྶ པཉྷསྶ པཊིཀྑེཔེ ‘‘ནནུ ཨཏྠི ཀེཙི དྷམྨཱ ཀེཧིཙི དྷམྨེཧི སཧགཏཱ སཧཛཱཏཱ སཾསཊྛཱ ཨེཀུཔྤཱདཱ ཨེཀནིརོདྷཱ ཨེཀཝཏྠུཀཱ ཨེཀཱརམྨཎཱ’’ཏི (ཀཐཱ. ༤༧༣) ཨེཝཾ ཨེཀུཔྤཱདཏཱདཱིནཾ ཝསེན སམྤཡོགཏྠོ ཝུཏྟོ. ཨིཏི ཨིམེཧི ཨེཀུཔྤཱདཏཱདཱིཧི སམཾ པཀཱརེཧི ཡུཏྟཱཏི སམྤཡུཏྟཱ.

༣. ཝིཔཱཀཏྟིཀེ ཨཉྙམཉྙཝིསིཊྛཱནཾ ཀུསལཱཀུསལཱནཾ པཱཀཱཏི ཝིཔཱཀཱ. ཝིཔཀྐབྷཱཝམཱཔནྣཱནཾ ཨརཱུཔདྷམྨཱནམེཏཾ ཨདྷིཝཙནཾ. ཝིཔཱཀདྷམྨདྷམྨཱཏི ཝིཔཱཀསབྷཱཝདྷམྨཱ. ཡཐཱ ཛཱཏིཛརཱསབྷཱཝཱ ཛཱཏིཛརཱཔཀཏིཀཱ སཏྟཱ ཛཱཏིདྷམྨཱ ཛརཱདྷམྨཱཏི ཝུཙྩནྟི ཨེཝཾ ཝིཔཱཀཛནཀཊྛེན ཝིཔཱཀསབྷཱཝཱ ཝིཔཱཀཔཀཏིཀཱ དྷམྨཱཏི ཨཏྠོ. ཏཏིཡཔདཾ ཨུབྷཡསབྷཱཝཔཊིཀྑེཔཝསེན ཝུཏྟཾ.

༤. ཨུཔཱདིནྣུཔཱདཱནིཡཏྟིཀེ ཨཱརམྨཎཀརཎཝསེན ཏཎྷཱདིཊྛཱིཧི ཨུཔེཏེན ཀམྨུནཱ ཨཱདིནྣཱ, ཕལབྷཱཝེན གཧིཏཱཏི ཨུཔཱདིནྣཱ. ཨཱརམྨཎབྷཱཝཾ ¶ ཨུཔགནྟྭཱ ཨུཔཱདཱནསམྦནྡྷེན ཨུཔཱདཱནཱནཾ ཧིཏཱཏི ཨུཔཱདཱནིཡཱ. ཨུཔཱདཱནསྶ ཨཱརམྨཎཔཙྩཡབྷཱུཏཱནམེཏཾ ཨདྷིཝཙནཾ. ཨུཔཱདིཎྞཱ ཙ ཏེ ཨུཔཱདཱནིཡཱ ཙཱཏི ཨུཔཱདིཎྞུཔཱདཱནིཡཱ; སཱསཝཀམྨནིབྦཏྟཱནཾ རཱུཔཱརཱུཔདྷམྨཱནམེཏཾ ཨདྷིཝཙནཾ. ཨིཏི ཨིམིནཱ ནཡེན སེསཔདདྭཡེཔི པཊིསེདྷསཧིཏོ ཨཏྠོ ཝེདིཏབྦོ.

༥. སཾཀིལིཊྛསཾཀིལེསིཀཏྟིཀེ སཾཀིལེསེཏཱིཏི སཾཀིལེསོ, ཝིབཱདྷཏི, ཨུཔཏཱཔེཏི ཙཱཏི ཨཏྠོ. སཾཀིལེསེན སམནྣཱགཏཱཏི སཾཀིལིཊྛཱ. ཨཏྟཱནཾ ཨཱརམྨཎཾ ཀཏྭཱ པཝཏྟནེན སཾཀིལེསཾ ཨརཧནྟི ¶ , སཾཀིལེསེ ཝཱ ནིཡུཏྟཱ, ཏསྶ ཨཱརམྨཎབྷཱཝཱནཏིཀྐམནཏོཏི སཾཀིལེསིཀཱ. སཾཀིལེསསྶ ཨཱརམྨཎཔཙྩཡབྷཱུཏཱནམེཏཾ ཨདྷིཝཙནཾ. སཾཀིལིཊྛཱ ཙ ཏེ སཾཀིལེསིཀཱ ཙཱཏི སཾཀིལིཊྛསཾཀིལེསིཀཱ. སེསཔདདྭཡམྤི པུརིམཏྟིཀེ ཝུཏྟནཡེནེཝ ཝེདིཏབྦཾ.

༦. ཝིཏཀྐཏྟིཀེ ¶ སམྤཡོགཝསེན ཝཏྟམཱནེན སཧ ཝིཏཀྐེན སཝིཏཀྐཱ. སཧ ཝིཙཱརེན སཝིཙཱརཱ. སཝིཏཀྐཱ ཙ ཏེ སཝིཙཱརཱ ཙཱཏི སཝིཏཀྐསཝིཙཱརཱ. ཨུབྷཡརཧིཏཱ ཨཝིཏཀྐཨཝིཙཱརཱ. ཝིཏཀྐཝིཙཱརེསུ ཝིཙཱརོཝ མཏྟཱ, པམཱཎཾ, ཨེཏེསནྟི ཝིཙཱརམཏྟཱ. ཝིཙཱརཏོ ཨུཏྟརི ཝིཏཀྐེན སདྡྷིཾ སམྤཡོགཾ ན གཙྪནྟཱིཏི ཨཏྠོ. ཨཝིཏཀྐཱ ཙ ཏེ ཝིཙཱརམཏྟཱ ཙཱཏི ཨཝིཏཀྐཝིཙཱརམཏྟཱ.

༧. པཱིཏིཏྟིཀེ པཱིཏིཡཱ སཧ ཨེཀུཔྤཱདཱདིབྷཱཝཾ གཏཱཏི པཱིཏིསཧགཏཱ, པཱིཏིསམྤཡུཏྟཱཏི ཨཏྠོ. སེསཔདདྭཡེཔི ཨེསེཝ ནཡོ. ཨུཔེཀྑཱཏི ཙེཏྠ ཨདུཀྑམསུཁཱ ཝེདནཱ ཝུཏྟཱ. སཱ ཧི སུཁདུཀྑཱཀཱརཔྤཝཏྟིཾ ཨུཔེཀྑཏི, མཛ྄ཛྷཏྟཱཀཱརསཎྛིཏཏྟཱ ཏེནཱཀཱརེན པཝཏྟཏཱིཏི ཨུཔེཀྑཱ. ཨིཏི ཝེདནཱཏྟིཀཏོ པདདྭཡམེཝ གཧེཏྭཱ ནིཔྤཱིཏིཀསྶ སུཁསྶ སཔྤཱིཏིཀསུཁཏོ ཝིསེསདསྶནཝསེན ཨཡཾ ཏིཀོ ཝུཏྟོ.

༨. དསྶནཏྟིཀེ དསྶནེནཱཏི སོཏཱཔཏྟིམགྒེན. སོ ཧི པཋམཾ ནིབྦཱནཾ དསྶནཏོ དསྶནནྟི ཝུཏྟོ. གོཏྲབྷུ པན ཀིཉྩཱཔི པཋམཏརཾ པསྶཏི, ཡཐཱ པན རཉྙོ སནྟིཀཾ ཀེནཙིདེཝ ཀརཎཱིཡེན ཨཱགཏོ པུརིསོ དཱུརཏོཝ རཐིཀཱཡ ཙརནྟཾ ཧཏྠིཀྑནྡྷགཏཾ རཱཛཱནཾ དིསྭཱཔི ‘དིཊྛོ ཏེ ¶ རཱཛཱ’ཏི པུཊྛོ དིསྭཱཔི ཀཏྟབྦཀིཙྩསྶ ཨཀཏཏྟཱ ‘ན པསྶཱམཱི’ཏི ཨཱཧ. ཨེཝམེཝ ནིབྦཱནཾ དིསྭཱཔི ཀཏྟབྦསྶ ཀིལེསཔྤཧཱནསྶཱབྷཱཝཱ ན དསྶནནྟི ཝུཙྩཏི. ཏཉྷི ཉཱཎཾ མགྒསྶ ཨཱཝཛྫནཊྛཱནེ ཏིཊྛཏི. བྷཱཝནཱཡཱཏི སེསམགྒཏྟཡེན. སེསམགྒཏྟཡཉྷི པཋམམགྒེན དིཊྛསྨིཾཡེཝ དྷམྨེ བྷཱཝནཱཝསེན ཨུཔྤཛྫཏི, ཨདིཊྛཔུབྦཾ ཀིཉྩི ན པསྶཏི, ཏསྨཱ བྷཱཝནཱཏི ཝུཙྩཏི. ཏཏིཡཔདཾ ཨུབྷཡཔཊིཀྑེཔཝསེན ཝུཏྟཾ.

༩. ཏདནནྟརཏྟིཀེ དསྶནེན པཧཱཏབྦོ ཧེཏུ ཨེཏེསནྟི དསྶནེན པཧཱཏབྦཧེཏུཀཱ. དུཏིཡཔདེཔི ཨེསེཝ ནཡོ. ཏཏིཡཔདེ ནེཝ དསྶནེན ན བྷཱཝནཱཡ པཧཱཏབྦོ ཧེཏུ ཨེཏེསནྟི ཨེཝམཏྠཾ ཨགྒཧེཏྭཱ ནེཝ དསྶནེན ན བྷཱཝནཱཡ པཧཱཏབྦོ ཧེཏུ ཨེཏེསཾ ཨཏྠཱིཏི ཨེཝམཏྠོ གཧེཏབྦོ ¶ ¶ . ཨིཏརཐཱ ཧི ཨཧེཏུཀཱནཾ ཨགྒཧཎཾ བྷཝེཡྻ; ཧེཏུཡེཝ ཧི ཏེསཾ ནཏྠི ཡོ དསྶནབྷཱཝནཱཧི པཧཱཏབྦོ སིཡཱ. སཧེཏུཀེསུཔི ཧེཏུཝཛྫཱནཾ པཧཱནཾ ཨཱཔཛྫཏི, ན ཧེཏཱུནཾ; ཧེཏུཡེཝ ཧི ཨེཏེསཾ ‘ནེཝ དསྶནེན ན བྷཱཝནཱཡ པཧཱཏབྦོ’ཏི ཝུཏྟོ, ན ཏེ དྷམྨཱ. ཨུབྷཡམྤི ཙེཏཾ ཨནདྷིཔྤེཏཾ. ཏསྨཱ ནེཝ དསྶནེན ན བྷཱཝནཱཡ པཧཱཏབྦོ ཧེཏུ ཨེཏེསཾ ཨཏྠཱིཏི ནེཝདསྶནེན ནབྷཱཝནཱཡ པཧཱཏབྦཧེཏུཀཱཏི ཨཡམཏྠོ གཧེཏབྦོ.

༡༠. ཨཱཙཡགཱམིཏྟིཀེ ཀམྨཀིལེསེཧི ཨཱཙིཡཏཱིཏི ཨཱཙཡོ. པཊིསནྡྷིཙུཏིགཏིཔྤཝཏྟཱནཾ ཨེཏཾ ནཱམཾ. ཏསྶ ཀཱརཎཾ ཧུཏྭཱ ནིཔྥཱདནཀབྷཱཝེན ཏཾ ཨཱཙཡཾ གཙྪནྟི, ཡསྶ ཝཱ པཝཏྟནྟི ཏཾ པུགྒལཾ ཡཐཱཝུཏྟམེཝ ཨཱཙཡཾ གམེནྟཱིཏིཔི ཨཱཙཡགཱམིནོ; སཱསཝཀུསལཱཀུསལཱནཾ ཨེཏཾ ཨདྷིཝཙནཾ. ཏཏོ ཨེཝ ཨཱཙཡསངྑཱཏཱ ཙཡཱ ཨཔེཏཏྟཱ, ནིབྦཱནཾ ཨཔེཏཾ ཙཡཱཏི ཨཔཙཡོ. ཏཾ ཨཱརམྨཎཾ ཀཏྭཱ པཝཏྟནཏོ ཨཔཙཡཾ གཙྪནྟཱིཏི ཨཔཙཡགཱམིནོ; ཨརིཡམགྒཱནམེཏཾ ཨདྷིཝཙནཾ. ཨཔིཙ པཱཀཱརཾ ཨིཊྛཀཝཌྜྷཀཱི ཝིཡ པཝཏྟཾ ཨཱཙིནནྟཱ གཙྪནྟཱིཏི ཨཱཙཡགཱམིནོ. ཏེན ཙིཏཾ ཙིཏཾ ཨིཊྛཀཾ ཝིདྡྷཾསཡམཱནོ པུརིསོ ཝིཡ ཏདེཝ པཝཏྟཾ ཨཔཙིནནྟཱ གཙྪནྟཱིཏི ཨཔཙཡགཱམིནོ. ཏཏིཡཔདཾ ཨུབྷཡཔཊིཀྑེཔེན ཝུཏྟཾ.

༡༡. སེཀྑཏྟིཀེ ཏཱིསུ སིཀྑཱསུ ཛཱཏཱཏི སེཀྑཱ. སཏྟནྣཾ སེཀྑཱནཾ ཨེཏེཏིཔི སེཀྑཱ. ཨཔརིཡོསིཏསིཀྑཏྟཱ སཡམེཝ སིཀྑནྟཱིཏིཔི སེཀྑཱ ¶ . ཨུཔརི སིཀྑིཏབྦཱབྷཱཝཏོ ན སེཀྑཱཏི ཨསེཀྑཱ. ཝུཌྜྷིཔྤཏྟཱ ཝཱ སེཀྑཱཏིཔི ཨསེཀྑཱ. ཨརཧཏྟཕལདྷམྨཱནཾ ཨེཏཾ ཨདྷིཝཙནཾ. ཏཏིཡཔདཾ ཨུབྷཡཔཊིཀྑེཔེན ཝུཏྟཾ.

༡༢. པརིཏྟཏྟིཀེ སམནྟཏོ ཁཎྜིཏཏྟཱ ཨཔྤམཏྟཀཾ པརིཏྟནྟི ཝུཙྩཏི; ‘པརིཏྟཾ གོམཡཔིཎྜ’ནྟིཨཱདཱིསུ (སཾ. ནི. ༣.༩༦) ཝིཡ. ཨིམེཔི ཨཔྤཱནུབྷཱཝཏཱཡ པརིཏྟཱ ཝིཡཱཏི པརིཏྟཱ; ཀཱམཱཝཙརདྷམྨཱནམེཏཾ ཨདྷིཝཙནཾ. ཀིལེསཝིཀྑམྦྷནསམཏྠཏཱཡ ཝིཔུལཕལཏཱཡ དཱིགྷསནྟཱནཏཱཡ ཙ མཧནྟབྷཱཝཾ གཏཱ, མཧནྟེཧི ཝཱ ཨུལཱ༹རཙྪནྡཝཱིརིཡཙིཏྟཔཉྙེཧི གཏཱ པཊིཔནྣཱཏིཔི མཧགྒཏཱ. པམཱཎཀརཱ ¶ དྷམྨཱ རཱགཱདཡོ པམཱཎཾ ནཱམ. ཨཱརམྨཎཏོ ཝཱ སམྤཡོགཏོ ཝཱ ནཏྠི ཨེཏེསཾ པམཱཎཾ, པམཱཎསྶ ཙ པཊིཔཀྑཱཏི ཨཔྤམཱཎཱ.

༡༣. པརིཏྟཱརམྨཎཏྟིཀེ ¶ པརིཏྟཾ ཨཱརམྨཎཾ ཨེཏེསནྟི པརིཏྟཱརམྨཎཱ. སེསཔདདྭཡེཔི ཨེསེཝ ནཡོ.

༡༤. ཧཱིནཏྟིཀེ ཧཱིནཱཏི ལཱམཀཱ ཨཀུསལཱ དྷམྨཱ. ཧཱིནཔྤཎཱིཏཱནཾ མཛ྄ཛྷེ བྷཝཱཏི མཛ྄ཛྷིམཱ. ཨཝསེསཱ ཏེབྷཱུམཀཱ དྷམྨཱ ཨུཏྟམཊྛེན ཨཏཔྤཀཊྛེན ཙ པཎཱིཏཱ; ལོཀུཏྟརཱ དྷམྨཱ.

༡༥. མིཙྪཏྟཏྟིཀེ ‘ཧིཏསུཁཱཝཧཱ མེ བྷཝིསྶནྟཱི’ཏི ཨེཝཾ ཨཱསཱིསིཏཱཔི ཏཐཱ ཨབྷཱཝཏོ, ‘ཨསུབྷཱདཱིསུཡེཝ སུབྷ’ནྟིཨཱདི ཝིཔརཱིཏཔྤཝཏྟིཏོ ཙ མིཙྪཱསབྷཱཝཱཏི མིཙྪཏྟཱ; ཝིཔཱཀདཱནེ སཏི ཁནྡྷབྷེདཱནནྟརམེཝ ཝིཔཱཀདཱནཏོ ནིཡཏཱ; མིཙྪཏྟཱ ཙ ཏེ ནིཡཏཱ ཙཱཏི མིཙྪཏྟནིཡཏཱ. ཝུཏྟཝིཔརཱིཏེན ཨཏྠེན སམྨཱསབྷཱཝཱཏི སམྨཏྟཱ; སམྨཏྟཱ ཙ ཏེ ནིཡཏཱ ཙ ཨནནྟརམེཝ ཕལདཱནེནཱཏི སམྨཏྟནིཡཏཱ. ཨུབྷཡཐཱཔི ན ནིཡཏཱཏི ཨནིཡཏཱ.

༡༦. མགྒཱརམྨཎཏྟིཀེ ནིབྦཱནཾ མགྒཏི, གཝེསཏི, ཀིལེསེ ཝཱ མཱརེནྟོ གཙྪཏཱིཏི མགྒོ. མགྒོ ཨཱརམྨཎཾ ཨེཏེསནྟི མགྒཱརམྨཎཱ. ཨཊྛངྒིཀོཔི མགྒོ པཙྩཡཊྛེན ཨེཏེསཾ ཧེཏཱུཏི མགྒཧེཏུཀཱ. མགྒསམྤཡུཏྟཱ ཝཱ ཧེཏཱུ མགྒེ ཝཱ ཧེཏཱུཏི མགྒཧེཏཱུ. ཏེ ཨེཏེསཾ ཧེཏཱུཏིཔི ¶ མགྒཧེཏུཀཱ. སམྨཱདིཊྛི སཡཾ མགྒོ ཙེཝ ཧེཏུ ཙ. ཨིཏི མགྒོ ཧེཏུ ཨེཏེསནྟིཔི མགྒཧེཏུཀཱ. ཨབྷིབྷཝིཏྭཱ པཝཏྟནཊྛེན མགྒོ ཨདྷིཔཏི ཨེཏེསནྟི མགྒཱདྷིཔཏིནོ.

༡༧. ཨུཔྤནྣཏྟིཀེ ཨུཔྤཱདཏོ པཊྛཱཡ ཡཱཝ བྷངྒཱ ཨུདྡྷཾ པནྣཱ གཏཱ པཝཏྟཱཏི ཨུཔྤནྣཱ. ན ཨུཔྤནྣཱཏི ཨནུཔྤནྣཱ. པརིནིཊྛིཏཀཱརཎེཀདེསཏྟཱ ཨཝསྶཾ ཨུཔྤཛྫིསྶནྟཱིཏི ཨུཔྤཱདིནོ.

༡༨. ཨཏཱིཏཏྟིཀེ ཨཏྟནོ སབྷཱཝཾ ཨུཔྤཱདཱདིཀྑཎཾ ཝཱ པཏྭཱ ཨཏིཀྐནྟཱཏི ཨཏཱིཏཱ. ཏདུབྷཡམྤི ན ཨཱགཏཱཏི ཨནཱགཏཱ. ཏཾ ཏཾ ཀཱརཎཾ པཊིཙྩ ཨུཔྤནྣཱཏི པཙྩུཔྤནྣཱ.

༡༩. ཨནནྟརཏྟིཀེ ཨཏཱིཏཾ ཨཱརམྨཎཾ ཨེཏེསནྟི ཨཏཱིཏཱརམྨཎཱ. སེསཔདདྭཡེཔི ཨེསེཝ ནཡོ.

༢༠. ཨཛ྄ཛྷཏྟཏྟིཀེ ¶ ‘ཨེཝཾ པཝཏྟམཱནཱ མཡཾ ཨཏྟཱ’ཏི གཧཎཾ, ‘གམིསྶཱམཱ’ཏི ཨིམིནཱ ཝིཡ ¶ ཨདྷིཔྤཱཡེན ཨཏྟཱནཾ ཨདྷིཀཱརཾ ཀཏྭཱ པཝཏྟཱཏི ཨཛ྄ཛྷཏྟཱ. ‘ཨཛ྄ཛྷཏྟ’-སདྡོ པནཱཡཾ གོཙརཛ྄ཛྷཏྟེ ནིཡཀཛ྄ཛྷཏྟེ ཨཛ྄ཛྷཏྟཛ྄ཛྷཏྟེ ཝིསཡཛ྄ཛྷཏྟེཏི ཙཏཱུསུ ཨཏྠེསུ དིསྶཏི. ‘‘ཏེནཱནནྡ, བྷིཀྑུནཱ ཏསྨིཾཡེཝ པུརིམསྨིཾ སམཱདྷིནིམིཏྟེ ཨཛ྄ཛྷཏྟམེཝ ཙིཏྟཾ སཎྛཔེཏབྦཾ’’ (མ. ནི. ༣.༡༨༨), ‘‘ཨཛ྄ཛྷཏྟརཏོ སམཱཧིཏོ’’ཏིཨཱདཱིསུ (དྷ. པ. ༣༦༢) ཧི ཨཡཾ གོཙརཛ྄ཛྷཏྟེ དིསྶཏི. ‘‘ཨཛ྄ཛྷཏྟཾ སམྤསཱདནཾ’’ (དཱི. ནི. ༡.༢༢༨; དྷ. ས. ༡༦༡), ‘‘ཨཛ྄ཛྷཏྟཾ ཝཱ དྷམྨེསུ དྷམྨཱནུཔསྶཱི ཝིཧརཏཱི’’ཏིཨཱདཱིསུ (དཱི. ནི. ༢.༣༧༣) ནིཡཀཛ྄ཛྷཏྟེ. ‘‘ཚ ཨཛ྄ཛྷཏྟིཀཱནི ཨཱཡཏནཱནཱི’’ཏིཨཱདཱིསུ (མ. ནི. ༣.༣༠༤) ཨཛ྄ཛྷཏྟཛ྄ཛྷཏྟེ. ‘‘ཨཡཾ ཁོ པནཱནནྡ, ཝིཧཱརོ ཏཐཱགཏེན ཨབྷིསམྦུདྡྷོ ཡདིདཾ སབྦནིམིཏྟཱནཾ ཨམནསིཀཱརཱ ཨཛ྄ཛྷཏྟཾ སུཉྙཏཾ ཨུཔསམྤཛྫ ཝིཧརཏཱི’’ཏིཨཱདཱིསུ (མ. ནི. ༣.༡༨༧) ཝིསཡཛ྄ཛྷཏྟེ; ཨིསྶརིཡཊྛཱནེཏི ཨཏྠོ. ཕལསམཱཔཏྟི ཧི བུདྡྷཱནཾ ཨིསྶརིཡཊྛཱནཾ ནཱམ. ཨིདྷ པན ནིཡཀཛ྄ཛྷཏྟེ ཨདྷིཔྤེཏོ. ཏསྨཱ ཨཏྟནོ སནྟཱནེ པཝཏྟཱ པཱཊིཔུགྒལིཀཱ དྷམྨཱ ཨཛ྄ཛྷཏྟཱཏི ཝེདིཏབྦཱ. ཏཏོ བཱཧིརབྷཱུཏཱ པན ཨིནྡྲིཡབདྡྷཱ ཝཱ ཨནིནྡྲིཡབདྡྷཱ ཝཱ བཧིདྡྷཱ ནཱམ. ཏཏིཡཔདཾ ཏདུབྷཡཝསེན ཝུཏྟཾ.

༢༡. ཨནནྟརཏྟིཀོ ¶ ཏེཡེཝ ཏིཔྤཀཱརེཔི དྷམྨེ ཨཱརམྨཎཾ ཀཏྭཱ པཝཏྟནཝསེན ཝུཏྟོ.

༢༢. སནིདསྶནཏྟིཀེ དཊྛབྦབྷཱཝསངྑཱཏེན སཧ ནིདསྶནེནཱཏི སནིདསྶནཱ. པཊིཧནནབྷཱཝསངྑཱཏེན སཧ པཊིགྷེནཱཏི སཔྤཊིགྷཱ. སནིདསྶནཱ ཙ ཏེ སཔྤཊིགྷཱ ཙཱཏི སནིདསྶནསཔྤཊིགྷཱ. ནཏྠི ཨེཏེསཾ དཊྛབྦབྷཱཝསངྑཱཏཾ ནིདསྶནནྟི ཨནིདསྶནཱ. ཨནིདསྶནཱ ཙ ཏེ ཝུཏྟནཡེནེཝ སཔྤཊིགྷཱ ཙཱཏི ཨནིདསྶནསཔྤཊིགྷཱ. ཏཏིཡཔདཾ ཨུབྷཡཔཊིཀྑེཔེན ཝུཏྟཾ. ཨཡཾ ཏཱཝ ཏིཀམཱཏིཀཱཡ ཨནུཔུབྦཔདཝཎྞནཱ.

ཏིཀམཱཏིཀཱཔདཝཎྞནཱ ནིཊྛིཏཱ.

དུཀམཱཏིཀཱཔདཝཎྞནཱ

༡-༦. དུཀམཱཏིཀཱཡཾ པན ཏིཀེསུ ཨནཱགཏཔདཝཎྞནཾཡེཝ ཀརིསྶཱམ. ཧེཏུགོཙྪཀེ ཏཱཝ ཧེཏུདྷམྨཱཏི ¶ མཱུལཊྛེན ཧེཏུསངྑཱཏཱ དྷམྨཱ. ཧེཏཱུ དྷམྨཱཏིཔི པཱཋོ. ན ¶ ཧེཏཱུཏི ཏེསཾཡེཝ པཊིཀྑེཔཝཙནཾ. སམྤཡོགཏོ པཝཏྟེན སཧ ཧེཏུནཱཏི སཧེཏུཀཱ. ཏཐེཝ པཝཏྟོ ནཏྠི ཨེཏེསཾ ཧེཏཱུཏི ཨཧེཏུཀཱ. ཨེཀུཔྤཱདཱདིཏཱཡ ཧེཏུནཱ སམྤཡུཏྟཱཏི ཧེཏུསམྤཡུཏྟཱ. ཧེཏུནཱ ཝིཔྤཡུཏྟཱཏི ཧེཏུཝིཔྤཡུཏྟཱ. ཨིམེསཾ དྭིནྣམྤི དུཀཱནཾ ཀིཉྩཱཔི ཨཏྠཏོ ནཱནཏྟཾ ནཏྠི, དེསནཱཝིལཱསེན པན ཏཐཱ བུཛ྄ཛྷནྟཱནཾ ཝཱ པུགྒལཱནཾ ཨཛ྄ཛྷཱསཡཝསེན ཝུཏྟཱ. ཏཏོ པརཾ པཋམདུཀཾ དུཏིཡཏཏིཡེཧི སདྡྷིཾ ཡོཛེཏྭཱ ཏེསཾ ‘ཧེཏཱུ ན ཧེཏཱུ’ཏིཨཱདཱིནཾ པདཱནཾ ཝསེན ཡཐཱསམྦྷཝཏོ ཨཔརེཔི ཏཡོ དུཀཱ ཝུཏྟཱ. ཏཏྠ ཡཐེཝ ‘ཧེཏཱུ ཙེཝ དྷམྨཱ སཧེཏུཀཱ ཙཱ’ཏི ཨེཏཾ སམྦྷཝཏི, ཏཐཱ ‘ཧེཏཱུ ཙེཝ དྷམྨཱ ཨཧེཏུཀཱ ཙཱ’ཏི ཨིདམྤི. ཡཐཱ ཙ ‘སཧེཏུཀཱ ཙེཝ དྷམྨཱ ན ཙ ཧེཏཱུ’ཏི ཨེཏཾ སམྦྷཝཏི, ཏཐཱ ‘ཨཧེཏུཀཱ ཙེཝ དྷམྨཱ ན ཙ ཧེཏཱུ’ཏི ཨིདམྤི. ཧེཏུསམྤཡུཏྟདུཀེན སདྡྷིཾ ཡོཛནཱཡཔི ཨེསེཝ ནཡོ.

ཏཏྲ ཡདེཏཾ ‘ན ཧེཏཱུ དྷམྨཱ སཧེཏུཀཱཔི ཨཧེཏུཀཱཔཱི’ཏི སིདྡྷེ, ‘ན ཧེཏཱུ ཁོ པན དྷམྨཱ’ཏི ཨཏིརིཏྟཾ ‘ཁོ པནཱ’ཏི པདཾ ཝུཏྟཾ, ཏསྶ ཝསེན ¶ ཨཡཾ ཨཏིརེཀཏྠོ སངྒཧིཏོཏི ཝེདིཏབྦོ. ཀཐཾ? ན ཀེཝལཾ ‘ན ཧེཏུ དྷམྨཱ ཨཐ ཁོ ཨཉྙེཔི ན ཙ སཧེཏུཀཱཔི ཨཧེཏུཀཱཔི ཨིཙྩེཝ, ཨཐ ཁོ ཨཉྙཐཱཔཱིཏི. ཨིདཾ ཝུཏྟཾ ཧོཏི – ཡཐེཝ ཧི ‘ན ཧེཏཱུ དྷམྨཱ སཧེཏུཀཱཔི ཨཧེཏུཀཱཔི’, ཨེཝཾ ‘ཧེཏཱུ དྷམྨཱ སཧེཏུཀཱཔི ཨཧེཏུཀཱཔི’. ཡཐཱ ཙ ‘ན ཧེཏཱུ དྷམྨཱ སཧེཏུཀཱཔི ཨཧེཏུཀཱཔི’, ཨེཝཾ ‘ན ཧེཏཱུ དྷམྨཱ ཧེཏུསམྤཡུཏྟཱཔི ཧེཏུཝིཔྤཡུཏྟཱཔཱི’ཏི.

༧-༡༣. ཙཱུལ༹ནྟརདུཀེསུ ཨཏྟནོ ནིཔྥཱདཀེན སཧ པཙྩཡེནཱཏི སཔྤཙྩཡཱ. ནཏྠི ཨེཏེསཾ ཨུཔྤཱདེ ཝཱ ཋིཏིཡཾ ཝཱ པཙྩཡོཏི ཨཔྤཙྩཡཱ. པཙྩཡེཧི སམཱགནྟྭཱ ཀཏཱཏི སངྑཏཱ. ན སངྑཏཱཏི ཨསངྑཏཱ. ཨཝིནིབྦྷོགཝསེན རཱུཔཾ ཨེཏེསཾ ཨཏྠཱིཏི རཱུཔིནོ. ཏཐཱཝིདྷཾ ནཏྠི ཨེཏེསཾ རཱུཔནྟི ཨརཱུཔིནོ. རུཔྤནལཀྑཎཾ ཝཱ རཱུཔཾ; ཏཾ ཨེཏེསཾ ཨཏྠཱིཏི རཱུཔིནོ. ན རཱུཔིནོ ཨརཱུཔིནོ. ལོཀིཡཱ དྷམྨཱཏི ལོཀོ ཝུཙྩཏི ལུཛྫནཔལུཛྫནཊྛེན ཝཊྚཾ; ཏསྨིཾ པརིཡཱཔནྣབྷཱཝེན ལོཀེ ནིཡུཏྟཱཏི ལོཀིཡཱ. ཏཏོ ¶ ཨུཏྟིཎྞཱཏི ཨུཏྟརཱ; ལོཀེ ཨཔརིཡཱཔནྣབྷཱཝེན ལོཀཏོ ཨུཏྟརཱཏི ལོཀུཏྟརཱ. ཀེནཙི ཝིཉྙེཡྻཱཏི ཙཀྑུཝིཉྙཱཎཱདཱིསུ ཀེནཙི ཨེཀེན ཙཀྑུཝིཉྙཱཎེན ཝཱ སོཏཝིཉྙཱཎེན ཝཱ ཝིཛཱནིཏབྦཱ. ཀེནཙི ན ཝིཉྙེཡྻཱཏི ཏེནེཝ ཙཀྑུཝིཉྙཱཎེན ཝཱ སོཏཝིཉྙཱཎེན ཝཱ ན ཝིཛཱནིཏབྦཱ. ཨེཝཾ སནྟེ དྭིནྣམྤི པདཱནཾ ཨཏྠནཱནཏྟཏོ དུཀོ ཧོཏི.

༡༤-༡༩. ཨཱསཝགོཙྪཀེ ¶ ཨཱསཝནྟཱིཏི ཨཱསཝཱ. ཙཀྑུཏོཔི…པེ… མནཏོཔི སནྡནྟི པཝཏྟནྟཱིཏི ཝུཏྟཾ ཧོཏི. དྷམྨཏོ ཡཱཝ གོཏྲབྷུཾ, ཨོཀཱསཏོ ཡཱཝ བྷཝགྒཾ སཝནྟཱིཏི ཝཱ ཨཱསཝཱ. ཨེཏེ དྷམྨེ ཨེཏཉྩ ཨོཀཱསཾ ཨནྟོཀརིཏྭཱ པཝཏྟནྟཱིཏི ཨཏྠོ. ཨནྟོཀརཎཏྠོ ཧི ཨཡཾ ‘ཨཱ’ཀཱརོ. ཙིརཔཱརིཝཱསིཡཊྛེན མདིརཱདཡོ ཨཱསཝཱ. ཨཱསཝཱ ཝིཡཱཏིཔི ཨཱསཝཱ. ལོཀསྨིཉྷི ཙིརཔཱརིཝཱསིཀཱ མདིརཱདཡོ ཨཱསཝཱཏི ཝུཙྩནྟི. ཡདི ཙ ཙིརཔཱརིཝཱསིཡཊྛེན ཨཱསཝཱ, ཨེཏེཡེཝ བྷཝིཏུམརཧནྟི. ཝུཏྟཉྷེཏཾ – ‘‘པུརིམཱ, བྷིཀྑཝེ, ཀོཊི ན པཉྙཱཡཏི ཨཝིཛྫཱཡ, ཨིཏོ པུབྦེ ཨཝིཛྫཱ ནཱཧོསཱི’’ཏིཨཱདི (ཨ. ནི. ༡༠.༦༡). ཨཱཡཏཾ ཝཱ སཾསཱརདུཀྑཾ སཝནྟི པསཝནྟཱིཏིཔི ཨཱསཝཱ. ཏཏོ ཨཉྙེ ནོ ཨཱསཝཱ ནཱམ. ཨཏྟཱནཾ ཨཱརམྨཎཾ ཀཏྭཱ པཝཏྟེཧི ¶ སཧ ཨཱསཝེཧཱིཏི སཱསཝཱ. ཨེཝཾ པཝཏྟམཱནཱ ནཏྠི ཨེཏེསཾ ཨཱསཝཱཏི ཨནཱསཝཱ. སེསཾ ཧེཏུགོཙྪཀེ ཝུཏྟནཡེན ཝེདིཏབྦཾ. ཨཡཾ པན ཝིསེསོ – ཡཐཱ ཏཏྠ ‘ན ཧེཏཱུ ཁོ པན དྷམྨཱ སཧེཏུཀཱཔི ཨཧེཏུཀཱཔཱིཏི ཨཡཾ ཨོསཱནདུཀོ པཋམདུཀསྶ དུཏིཡཔདཾ ཨཱདིམྷི ཋཔེཏྭཱ ཝུཏྟོ, ཨེཝཾ ཨིདྷ ‘ནོ ཨཱསཝཱ ཁོ པན དྷམྨཱ སཱསཝཱཔི ཨནཱསཝཱཔཱི’ཏི ན ཝུཏྟོ. ཀིཉྩཱཔི ན ཝུཏྟོ, ཨཐ ཁོ ཨཡཉྩ ཨཉྙོ ཙ བྷེདོ ཏཏྠ ཝུཏྟནཡེནེཝ ཝེདིཏབྦོ.

༢༠-༢༥. སཾཡོཛནགོཙྪཀེ ཡསྶ སཾཝིཛྫནྟི, ཏཾ པུགྒལཾ ཝཊྚསྨིཾ སཾཡོཛེནྟི བནྡྷནྟཱིཏི སཾཡོཛནཱ. ཏཏོ ཨཉྙེ ནོ སཾཡོཛནཱ ནཱམ. ཨཱརམྨཎབྷཱཝཾ ཨུཔགནྟྭཱ སཾཡོཛནསམྦནྡྷནེ སཾཡོཛནཱནཾ ཧིཏཱཏི སཾཡོཛནིཡཱ. སཾཡོཛནསྶ ཨཱརམྨཎཔཙྩཡབྷཱུཏཱནཾ ཨེཏཾ ཨདྷིཝཙནཾ. ན སཾཡོཛནིཡཱ ¶ ཨསཾཡོཛནིཡཱ. སེསཾ ཧེཏུགོཙྪཀེ ཝུཏྟནཡེནེཝ ཡོཛེཏབྦཾ.

༢༦-༣༡. གནྠགོཙྪཀེ ཡསྶ སཾཝིཛྫནྟི ཏཾ ཙུཏིཔཊིསནྡྷིཝསེན ཝཊྚསྨིཾ གནྠེནྟི གྷཊེནྟཱིཏི གནྠཱ. ཏཏོ ཨཉྙེ ནོ གནྠཱ. ཨཱརམྨཎཀརཎཝསེན གནྠེཧི གནྠིཏབྦཱཏི གནྠནིཡཱ. སེསཾ ཧེཏུགོཙྪཀེ ཝུཏྟནཡེནེཝ ཡོཛེཏབྦཾ. ཡཐཱ ཙ ཨིདྷ, ཨེཝཾ ཨིཏོ པརེསུཔི ཝུཏྟཱཝསེསཾ ཏཏྠ ཏཏྠ ཝུཏྟནཡེནེཝ ཝེདིཏབྦཾ.

༣༢-༣༧. ཨོགྷགོཙྪཀེ ཡསྶ སཾཝིཛྫནྟི ཏཾ ཝཊྚསྨིཾཡེཝ ཨོཧནནྟི ཨོསཱིདཱཔེནྟཱིཏི ཨོགྷཱ. ཨཱརམྨཎཾ ཀཏྭཱ ཨཏིཀྐམནཱིཡཏོ ཨོགྷེཧི ཨཏིཀྐམིཏབྦཱཏི ཨོགྷནིཡཱ. ཨོགྷཱནཾ ཨཱརམྨཎདྷམྨཱ ཨེཝ ཝེདིཏབྦཱ.

༣༨-༤༣. ཡོགགོཙྪཀེ ¶ ཝཊྚསྨིཾ ཡོཛེནྟཱིཏི ཡོགཱ. ཡོགནིཡཱ ཨོགྷནིཡཱ ཝིཡ ཝེདིཏབྦཱ.

༤༤-༤༩. ནཱིཝརཎགོཙྪཀེ ཙིཏྟཾ ནཱིཝརནྟི པརིཡོནནྡྷནྟཱིཏི ནཱིཝརཎཱ. ནཱིཝརཎིཡཱ སཾཡོཛནིཡཱ ཝིཡ ཝེདིཏབྦཱ.

༥༠-༥༤. པརཱམཱསགོཙྪཀེ ¶ དྷམྨཱནཾ ཡཐཱབྷཱུཏཾ ཨནིཙྩཱདིཨཱཀཱརཾ ཨཏིཀྐམིཏྭཱ ‘ནིཙྩ’ནྟི ཨཱདིཝསེན པཝཏྟམཱནཱ པརཏོ ཨཱམསནྟཱིཏི པརཱམཱསཱ. པརཱམཱསེཧི ཨཱརམྨཎཀརཎཝསེན པརཱམཊྛཏྟཱ པརཱམཊྛཱ.

༥༥-༦༨. མཧནྟརདུཀེསུ ཨཱརམྨཎཾ ཨགྒཧེཏྭཱ ཨཔྤཝཏྟིཏོ སཧ ཨཱརམྨཎེནཱཏི སཱརམྨཎཱ. ནཏྠི ཨེཏེསཾ ཨཱརམྨཎནྟི ཨནཱརམྨཎཱ. ཙིནྟནཊྛེན ཙིཏྟཱ, ཝིཙིཏྟཊྛེན ཝཱ ཙིཏྟཱ. ཨཝིཔྤཡོགཝསེན ཙེཏསི ནིཡུཏྟཱཏི ཙེཏསིཀཱ. ནིརནྟརབྷཱཝཱུཔགམནཏཱཡ, ཨུཔྤཱདཏོ ཡཱཝ བྷངྒཱ, ཙིཏྟེན སཾསཊྛཱཏི ཙིཏྟསཾསཊྛཱ. ཨེཀཏོ ཝཏྟམཱནཱཔི ནིརནྟརབྷཱཝཾ ཨནུཔགམནཏཱཡ ཙིཏྟེན ཝིསཾསཊྛཱཏི ཙིཏྟཝིསཾསཊྛཱ. སམུཊྛཧནྟི ཨེཏེནཱཏི སམུཊྛཱནཾ. ཙིཏྟཾ སམུཊྛཱནཾ ཨེཏེསནྟི ཙིཏྟསམུཊྛཱནཱ. སཧ བྷཝནྟཱིཏི སཧབྷུནོ. ཙིཏྟེན སཧབྷུནོ ཙིཏྟསཧབྷུནོ. ཨནུཔརིཝཏྟནྟཱིཏི ཨནུཔརིཝཏྟིནོ. ཀིཾ ཨནུཔརིཝཏྟནྟི? ཙིཏྟཾ. ཙིཏྟསྶ ཨནུཔརིཝཏྟིནོ ཙིཏྟཱནུཔརིཝཏྟིནོ. ཙིཏྟསཾསཊྛཱ ཙ ཏེ ཙིཏྟསམུཊྛཱནཱ ཙཱཏི ཙིཏྟསཾསཊྛསམུཊྛཱནཱ. ཙིཏྟསཾསཊྛཱ ¶ ཙ ཏེ ཙིཏྟསམུཊྛཱནཱ ཙ ཙིཏྟསཧབྷུནོ ཨེཝ ཙཱཏི ཙིཏྟསཾསཊྛསམུཊྛཱནསཧབྷུནོ. ཙིཏྟསཾསཊྛཱ ཙ ཏེ ཙིཏྟསམུཊྛཱནཱ ཙ ཙིཏྟཱནུཔརིཝཏྟིནོ ཨེཝ ཙཱཏི ཙིཏྟསཾསཊྛསམུཊྛཱནཱནུཔརིཝཏྟིནོ. སེསཱནི སབྦཔདཱནི ཝུཏྟཔདཱནཾ པཊིཀྑེཔཝསེན ཝེདིཏབྦཱནི. ཨཛ྄ཛྷཏྟཛ྄ཛྷཏྟཾ སནྡྷཱཡ ཨཛ྄ཛྷཏྟཏྟིཀེ ཝུཏྟཝསེན ཨཛ྄ཛྷཏྟཱཝ ཨཛ྄ཛྷཏྟིཀཱ. ཏཏོ བཧིབྷཱུཏཱཏི བཱཧིརཱ. ཨུཔཱདིཡནྟེཝ བྷཱུཏཱནི, ན བྷཱུཏཱནི ཝིཡ ཨུཔཱདིཡནྟཱིཏི ཨུཔཱདཱ. ན ཨུཔཱདིཡནྟེཝཱཏི ནོཨུཔཱདཱ.

༦༩-༧༤. ཨུཔཱདཱནགོཙྪཀེ བྷུསཾ ཨཱདིཡནྟཱིཏི ཨུཔཱདཱནཱ; དལ༹ྷགྒཱཧཾ གཎྷནྟཱིཏི ཨཏྠོ. ཏཏོ ཨཉྙེ ནོཨུཔཱདཱནཱ.

༧༥-༨༢. ཀིལེསགོཙྪཀེ སཾཀིལིཊྛཏྟིཀེ ཝུཏྟནཡེནེཝ ཨཏྠོ ཝེདིཏབྦོ.

༨༣-༡༠༠. པིཊྛིདུཀེསུ ¶ ཀཱམེ ཨཝཙརནྟཱིཏི ཀཱམཱཝཙརཱ རཱུཔེ ཨཝཙརནྟཱིཏི རཱུཔཱཝཙརཱ. ཨརཱུཔེ ཨཝཙརནྟཱིཏི ཨརཱུཔཱཝཙརཱ. ཨཡམེཏྠ སངྑེཔོ. ཝིཏྠཱརོ པན པརཏོ ཨཱཝི བྷཝིསྶཏི. ཏེབྷཱུམཀཝཊྚེ པརིཡཱཔནྣཱ ཨནྟོགདྷཱཏི པརིཡཱཔནྣཱ. ཏསྨིཾ ན པརིཡཱཔནྣཱཏི ཨཔརིཡཱཔནྣཱ. ཝཊྚམཱུལཾ ཚིནྡནྟཱ ནིབྦཱནཾ ཨཱརམྨཎཾ ཀཏྭཱ ཝཊྚཏོ ནིཡྻནྟཱིཏི ནིཡྻཱནིཀཱ. ཨིམིནཱ ¶ ལཀྑཎེན ན ནིཡྻནྟཱིཏི ཨནིཡྻཱནིཀཱ. ཙུཏིཡཱ ཝཱ ཨཏྟནོ ཝཱ པཝཏྟིཡཱ ཨནནྟརཾ ཕལདཱནེ ནིཡཏཏྟཱ ནིཡཏཱ. ཏཐཱ ཨནིཡཏཏྟཱ ཨནིཡཏཱ. ཨཉྙེ དྷམྨེ ཨུཏྟརནྟི པཛཧནྟཱིཏི ཨུཏྟརཱ. ཨཏྟཱནཾ ཨུཏྟརིཏུཾ སམཏྠེཧི སཧ ཨུཏྟརེཧཱིཏི སཨུཏྟརཱ. ནཏྠི ཨེཏེསཾ ཨུཏྟརཱཏི ཨནུཏྟརཱ. རཎནྟི ཨེཏེཧཱིཏི རཎཱ; ཡེཧི ཨབྷིབྷཱུཏཱ སཏྟཱ ནཱནཔྤཀཱརེན ཀནྡནྟི པརིདེཝནྟི, ཏེསཾ རཱགཱདཱིནཾ ཨེཏཾ ཨདྷིཝཙནཾ. སམྤཡོགཝསེན པཧཱནེཀཊྛཏཱཝསེན ཙ སཧ རཎེཧཱིཏི སརཎཱ. ཏེནཱཀཱརེན ནཏྠི ཨེཏེསཾ རཎཱཏི ཨརཎཱ.

སུཏྟནྟིཀདུཀམཱཏིཀཱཔདཝཎྞནཱ

༡༠༡-༡༠༨. སུཏྟནྟིཀདུཀེསུ སམྤཡོགཝསེན ཝིཛྫཾ བྷཛནྟཱིཏི ཝིཛྫཱབྷཱགིནོ; ཝིཛྫཱབྷཱགེ ཝིཛྫཱཀོཊྛཱསེ ཝཏྟནྟཱིཏིཔི ཝིཛྫཱབྷཱགིནོ. ཏཏྠ ཝིཔསྶནཱཉཱཎཾ, མནོམཡིདྡྷི, ཚ ཨབྷིཉྙཱཏི ཨཊྛ ཝིཛྫཱ. པུརིམེན ཨཏྠེན ཏཱཧི སམྤཡུཏྟདྷམྨཱཔི ཝིཛྫཱབྷཱགིནོ. པཙྪིམེན ¶ ཨཏྠེན ཏཱསུ ཡཱ ཀཱཙི ཨེཀཱ ཝིཛྫཱ ཝིཛྫཱ. སེསཱ ཝིཛྫཱབྷཱགིནོཏི. ཨེཝཾ ཝིཛྫཱཔི ཝིཛྫཱཡ སམྤཡུཏྟདྷམྨཱཔི ཝིཛྫཱབྷཱགིནོཏྭེཝ ཝེདིཏབྦཱ. ཨིདྷ པན སམྤཡུཏྟདྷམྨཱཝ ཨདྷིཔྤེཏཱ. སམྤཡོགཝསེནེཝ ཨཝིཛྫཾ བྷཛནྟཱིཏི ཨཝིཛྫཱབྷཱགིནོ. ཨཝིཛྫཱབྷཱགེ ཨཝིཛྫཱཀོཊྛཱསེ ཝཏྟནྟཱིཏིཔི ཨཝིཛྫཱབྷཱགིནོ. ཏཏྠ དུཀྑཔཊིཙྪཱདཀཾ ཏམོ སམུདཡཱདིཔཊིཙྪཱདཀནྟི ཙཏསྶོ ཨཝིཛྫཱ. པུརིམནཡེནེཝ ཏཱཧི སམྤཡུཏྟདྷམྨཱཔི ཨཝིཛྫཱབྷཱགིནོ. ཏཱསུ ཡཱ ཀཱཙི ཨེཀཱ ཨཝིཛྫཱ ཨཝིཛྫཱ. སེསཱ ཨཝིཛྫཱབྷཱགིནོཏི. ཨེཝཾ ཨཝིཛྫཱཔི ཨཝིཛྫཱཡ སམྤཡུཏྟདྷམྨཱཔི ཨཝིཛྫཱབྷཱགིནོཏྭེཝ ཝེདིཏབྦཱ. ཨིདྷ པན སམྤཡུཏྟདྷམྨཱཝ ཨདྷིཔྤེཏཱ.

པུན ཨནཛ྄ཛྷོཏྠརཎབྷཱཝེན ཀིལེསནྡྷཀཱརཾ ཝིདྡྷཾསེཏུཾ ཨསམཏྠཏཱཡ ཝིཛྫུ ཨུཔམཱ ཨེཏེསནྟི ཝིཛྫཱུཔམཱ. ནིསྶེསཾ ཝིདྡྷཾསནསམཏྠཏཱཡ ཝཛིརཾ ཨུཔམཱ ཨེཏེསནྟི ཝཛིརཱུཔམཱ. བཱལེསུ ཋིཏཏྟཱ ཡཏྠ ཋིཏཱ ཏདུཔཙཱརེན བཱལཱ. པཎྜིཏེསུ ཋིཏཏྟཱ པཎྜིཏཱ. བཱལཀརཏྟཱ ཝཱ བཱལཱ, པཎྜིཏཀརཏྟཱ ¶ པཎྜིཏཱ. ཀཎྷཱཏི ཀཱལ༹ཀཱ, ཙིཏྟསྶ ཨཔབྷསྶརབྷཱཝཀརཎཱ. སུཀྐཱཏི ཨོདཱཏཱ ¶ , ཙིཏྟསྶ པབྷསྶརབྷཱཝཀརཎཱ. ཀཎྷཱབྷིཛཱཏིཧེཏུཏོ ཝཱ ཀཎྷཱ; སུཀྐཱབྷིཛཱཏིཧེཏུཏོ སུཀྐཱ. ཨིདྷ ཙེཝ སམྤརཱཡེ ཙ ཏཔེནྟཱིཏི ཏཔནཱིཡཱ. ན ཏཔནཱིཡཱ ཨཏཔནཱིཡཱ.

ཨདྷིཝཙནདུཀཱདཡོ ཏཡོ ཨཏྠཏོ ནིནྣཱནཱཀརཎཱ; བྱཉྫནམེཝེཏྠ ནཱནཾ. སིརིཝཌྜྷཀོ དྷནཝཌྜྷཀོཏི ཨཱདཡོ ཧི ཝཙནམཏྟམེཝ ཨདྷིཀཱརཾ ཀཏྭཱ པཝཏྟཱ ཨདྷིཝཙནཱ ནཱམ. ཨདྷིཝཙནཱནཾ པཐཱ ཨདྷིཝཙནཔཐཱ. ‘‘ཨབྷིསངྑརོནྟཱིཏི ཁོ, བྷིཀྑཝེ, ཏསྨཱ སངྑཱརཱ’’ཏི (སཾ. ནི. ༣.༧༩) ཨེཝཾ ནིདྡྷཱརེཏྭཱ སཧེཏུཀཾ ཀཏྭཱ ཝུཙྩམཱནཱ ཨབྷིལཱཔཱ ནིརུཏྟི ནཱམ. ནིརུཏྟཱིནཾ པཐཱ ནིརུཏྟིཔཐཱ. ཏཀྐོ ཝིཏཀྐོ སངྐཔྤོཏི (དྷ. ས. ༧) ཨེཝཾ ཏེན ཏེན པཀཱརེན ཉཱཔནཏོ པཉྙཏྟི ནཱམ. པཉྙཏྟཱིནཾ པཐཱ པཉྙཏྟིཔཐཱ. ཨེཏྠ ¶ ཙ ཨེཀཾ དུཀཾ ཝཏྭཱཔི ཨིཏརེསཾ ཝཙནེ པཡོཛནཾ ཧེཏུགོཙྪཀེ ཝུཏྟནཡེནེཝ ཝེདིཏབྦཾ.

༡༠༩-༡༡༨. ནཱམརཱུཔདུཀེ ནཱམཀརཎཊྛེན ནམནཊྛེན ནཱམནཊྛེན ཙ ནཱམཾ. རུཔྤནཊྛེན རཱུཔཾ. ཨཡམེཏྠ སངྑེཔོ. ཝིཏྠཱརོ པན ནིཀྑེཔཀཎྜེ ཨཱཝི བྷཝིསྶཏི. ཨཝིཛྫཱཏི དུཀྑཱདཱིསུ ཨཉྙཱཎཾ. བྷཝཏཎྷཱཏི བྷཝཔཏྠནཱ. བྷཝདིཊྛཱིཏི བྷཝོ ཝུཙྩཏི སསྶཏཾ; སསྶཏཝསེན ཨུཔྤཛྫནདིཊྛི. ཝིབྷཝདིཊྛཱིཏི ཝིབྷཝོ ཝུཙྩཏི ཨུཙྪེདཾ; ཨུཙྪེདཝསེན ཨུཔྤཛྫནདིཊྛི. སསྶཏོ ཨཏྟཱ ཙ ལོཀོ ཙཱཏི པཝཏྟཱ དིཊྛི སསྶཏདིཊྛི. ཨུཙྪིཛྫིསྶཏཱིཏི པཝཏྟཱ དིཊྛི ཨུཙྪེདདིཊྛི. ཨནྟཝཱཏི པཝཏྟཱ དིཊྛི ཨནྟཝཱདིཊྛི. ཨནནྟཝཱཏི པཝཏྟཱ དིཊྛི ཨནནྟཝཱདིཊྛི. པུབྦནྟཾ ཨནུགཏཱ དིཊྛི པུབྦནྟཱནུདིཊྛི. ཨཔརནྟཾ ཨནུགཏཱ དིཊྛི ཨཔརནྟཱནུདིཊྛི. ཨཧིརིཀནྟི ཡཾ ན ཧིརིཡཏི ཧིརིཡིཏབྦེནཱཏི (དྷ. ས. ༣༨༧) ཨེཝཾ ཝིཏྠཱརིཏཱ ནིལླཛྫཏཱ. ཨནོཏྟཔྤནྟི ཡཾ ན ཨོཏྟཔྤཏི ཨོཏྟཔྤིཏབྦེནཱཏི ཨེཝཾ ཝིཏྠཱརིཏོ ཨབྷཱཡནཀཨཱཀཱརོ. ཧིརིཡནཱ ཧིརཱི, ཨོཏྟཔྤནཱ ཨོཏྟཔྤཾ. དོཝཙསྶཏཱདཱིསུ དུཀྑཾ ཝཙོ ཨེཏསྨིཾ ཝིཔྤཊིཀཱུལགཱཧིམྷི ཝིཔཙྩནཱིཀསཱཏེ ཨནཱདརེ པུགྒལེཏི དུབྦཙོ. ཏསྶ ཀམྨཾ དོཝཙསྶཾ. ཏསྶ བྷཱཝོ དོཝཙསྶཏཱ. པཱཔཱ ཨསྶདྡྷཱདཡོ པུགྒལཱ ཨེཏསྶ མིཏྟཱཏི པཱཔམིཏྟོ; ཏསྶ བྷཱཝོ པཱཔམིཏྟཏཱ. སོཝཙསྶཏཱ ཙ ཀལྱཱཎམིཏྟཏཱ ཙ ཝུཏྟཔཊིཔཀྑནཡེན ཝེདིཏབྦཱ.

༡༡༩-༡༢༣. ‘པཉྩཔི ¶ ཨཱཔཏྟིཀྑནྡྷཱ ཨཱཔཏྟིཡོ, སཏྟཔི ཨཱཔཏྟིཀྑནྡྷཱ ཨཱཔཏྟིཡོ’ཏི (དྷ. ས. ༡༣༣༦) ཨེཝཾ ཝུཏྟཱསུ ཨཱཔཏྟཱིསུ ཀུསལབྷཱཝོ ཨཱཔཏྟིཀུསལཏཱ. ཏཱཧི ¶ ཨཱཔཏྟཱིཧི ཝུཊྛཱནེ ཀུསལབྷཱཝོ ཨཱཔཏྟིཝུཊྛཱནཀུསལཏཱ. སམཱཔཏྟཱིསུ ཀུསལབྷཱཝོ སམཱཔཏྟིཀུསལཏཱ. སམཱཔཏྟཱིནཾ ཨཔྤནཱཔརིཙྪེདཔཉྙཱཡེཏཾ ཨདྷིཝཙནཾ. སམཱཔཏྟཱིཧི ¶ ཝུཊྛཱནེ ཀུསལབྷཱཝོ སམཱཔཏྟིཝུཊྛཱནཀུསལཏཱ. ཨཊྛཱརསསུ དྷཱཏཱུསུ ཀུསལབྷཱཝོ དྷཱཏུཀུསལཏཱ. ཏཱསཾཡེཝ དྷཱཏཱུནཾ མནསིཀཱརེ ཀུསལབྷཱཝོ མནསིཀཱརཀུསལཏཱ. ཙཀྑཱཡཏནཱདཱིསུ ཀུསལབྷཱཝོ ཨཱཡཏནཀུསལཏཱ. དྭཱདསངྒེ པཊིཙྩསམུཔྤཱདེ ཀུསལབྷཱཝོ པཊིཙྩསམུཔྤཱདཀུསལཏཱ. ཏསྨིཾ ཏསྨིཾ ཋཱནེ ཀུསལབྷཱཝོ ཋཱནཀུསལཏཱ. ཋཱནནྟི ཀཱརཎཾ ཝུཙྩཏི. ཏསྨིཉྷི ཏདཱཡཏྟཝུཏྟིཏཱཡ ཕལཾ ཏིཊྛཏི ནཱམ, ཏསྨཱ ཋཱནནྟི ཝུཏྟཾ. ཨཊྛཱནེ ཀུསལབྷཱཝོ ཨཊྛཱནཀུསལཏཱ.

༡༢༤-༡༣༤. ཨུཛུབྷཱཝོ ཨཛྫཝོ. མུདུབྷཱཝོ མདྡཝོ. ཨདྷིཝཱསནསངྑཱཏོ ཁམནབྷཱཝོ ཁནྟི. སུརཏསྶ བྷཱཝོ སོརཙྩཾ. སམྨོདཀམུདུབྷཱཝསངྑཱཏོ སཁིལབྷཱཝོ སཱཁལྱཾ. ཡཐཱ པརེཧི སདྡྷིཾ ཨཏྟནོ ཚིདྡཾ ན ཧོཏི ཨེཝཾ དྷམྨཱམིསེཧི པཊིསནྠརཎཾ པཊིསནྠཱརོ. ཨིནྡྲིཡསཾཝརབྷེདསངྑཱཏོ མནཙྪཊྛེསུ ཨིནྡྲིཡེསུ ཨགུཏྟདྭཱརབྷཱཝོ ཨིནྡྲིཡེསུ ཨགུཏྟདྭཱརཏཱ. པཊིགྒཧཎཔརིབྷོགཝསེན བྷོཛནེ མཏྟཾ ཨཛཱནནབྷཱཝོ བྷོཛནེ ཨམཏྟཉྙུཏཱ. ཨནནྟརདུཀོ ཝུཏྟཔཊིཔཀྑནཡེན ཝེདིཏབྦོ. སཏིཝིཔྤཝཱསསངྑཱཏོ མུཊྛསྶཏིབྷཱཝོ མུཊྛསྶཙྩཾ. ཨསམྤཛཱནབྷཱཝོ ཨསམྤཛཉྙཾ. སརཏཱིཏི སཏི. སམྤཛཱནཱཏཱིཏི སམྤཛཉྙཾ. ཨཔྤཊིསངྑཱནེ ཨཀམྤནཊྛེན པཊིསངྑཱནསངྑཱཏཾ བལཾ པཊིསངྑཱནབལཾ. ཝཱིརིཡསཱིསེན སཏྟ བོཛ྄ཛྷངྒེ བྷཱཝེནྟསྶ ཨུཔྤནྣཾ བལཾ བྷཱཝནཱབལཾ. པཙྩནཱིཀདྷམྨེ སམེཏཱིཏི སམཐོ. ཨནིཙྩཱདིཝསེན ཝིཝིདྷེན ཨཱཀཱརེན པསྶཏཱིཏི ཝིཔསྶནཱ. སམཐོཝ ཏཾ ཨཱཀཱརཾ གཧེཏྭཱ པུན པཝཏྟེཏབྦསྶ སམཐསྶ ནིམིཏྟཝསེན སམཐནིམིཏྟཾ. པགྒཱཧནིམིཏྟེཔི ཨེསེཝ ནཡོ. སམྤཡུཏྟདྷམྨེ ¶ པགྒཎྷཱཏཱིཏི པགྒཱཧོ. ན ཝིཀྑིཔཏཱིཏི ཨཝིཀྑེཔོ.

༡༣༥-༡༤༢. སཱིལཝིནཱསིཀཱ ཨསཾཝརསངྑཱཏཱ སཱིལསྶ ཝིཔཏྟི སཱིལཝིཔཏྟི. སམྨཱདིཊྛིཝིནཱསིཀཱ མིཙྪཱདིཊྛིསངྑཱཏཱ དིཊྛིཡཱ ཝིཔཏྟི དིཊྛིཝིཔཏྟི. སོརཙྩམེཝ ¶ སཱིལསྶ སམྤཱདནཏོ སཱིལཔརིཔཱུརཎཏོ སཱིལསྶ སམྤདཱཏི སཱིལསམྤདཱ. དིཊྛིཔཱརིཔཱུརིབྷཱུཏཾ ཉཱཎཾ དིཊྛིཡཱ སམྤདཱཏི དིཊྛིསམྤདཱ. ཝིསུདྡྷིབྷཱཝཾ སམྤཏྟཱ སཱིལསངྑཱཏཱ སཱིལསྶ ཝིསུདྡྷི, སཱིལཝིསུདྡྷི. ནིབྦཱནསངྑཱཏཾ ཝིསུདྡྷིཾ པཱཔེཏུཾ སམཏྠཱ, དསྶནསངྑཱཏཱ, དིཊྛིཡཱ ཝིསུདྡྷི དིཊྛིཝིསུདྡྷི. དིཊྛིཝིསུདྡྷི ཁོ པན ཡཐཱདིཊྛིསྶ ཙ པདྷཱནནྟི ཀམྨསྶཀཏཉྙཱཎཱདིསངྑཱཏཱ དིཊྛིཝིསུདྡྷི ཙེཝ ཡཐཱདིཊྛིསྶ ཙ ཨནུརཱུཔདིཊྛིསྶ ཀལྱཱཎདིཊྛིསྶ ཏཾསམྤཡུཏྟམེཝ པདྷཱནཾ. སཾཝེགོཏི ཛཱཏིཨཱདཱིནི ¶ པཊིཙྩ ཨུཔྤནྣབྷཡསངྑཱཏཾ སཾཝིཛྫནཾ. སཾཝེཛནིཡཊྛཱནནྟི སཾཝེགཛནཀཾ ཛཱཏིཨཱདིཀཱརཎཾ. སཾཝིགྒསྶ ཙ ཡོནིསོཔདྷཱནནྟི ཨེཝཾ སཾཝེགཛཱཏསྶ ཨུཔཱཡཔདྷཱནཾ. ཨསནྟུཊྛིཏཱ ཙ ཀུསལེསུ དྷམྨེསཱུཏི ཀུསལདྷམྨཔཱུརཎེ ཨསནྟུཊྛིབྷཱཝོ. ཨཔྤཊིཝཱནིཏཱ ཙ པདྷཱནསྨིནྟི ཨརཧཏྟཾ ཨཔཏྭཱ པདྷཱནསྨིཾ ཨནིཝཏྟནཏཱ ཨནོསཀྐནཏཱ. ཝིཛཱནནཏོ ཝིཛྫཱ. ཝིམུཙྩནཏོ ཝིམུཏྟི. ཁཡེ ཉཱཎནྟི ཀིལེསཀྑཡཀརེ ཨརིཡམགྒེ ཉཱཎཾ. ཨནུཔྤཱདེ ཉཱཎནྟི པཊིསནྡྷིཝསེན ཨནུཔྤཱདབྷཱུཏེ ཏཾཏཾམགྒཝཛ྄ཛྷཀིལེསཱནཾ ཨནུཔྤཱདཔརིཡོསཱནེ ཨུཔྤནྣེ ཨརིཡཕལེ ཉཱཎཾ. ཨཡཾ མཱཏིཀཱཡ ཨནུཔུབྦཔདཝཎྞནཱ.

དུཀམཱཏིཀཱཔདཝཎྞནཱ ནིཊྛིཏཱ.

ཀཱམཱཝཙརཀུསལཔདབྷཱཛནཱིཡཾ

༡. ཨིདཱནི ¶ ¶ ཡཐཱནིཀྑིཏྟཱཡ མཱཏིཀཱཡ སངྒཧིཏེ དྷམྨེ པབྷེདཏོ དསྶེཏུཾ ཀཏམེ དྷམྨཱ ཀུསལཱཏི ཨིདཾ པདབྷཱཛནཱིཡཾ ཨཱརདྡྷཾ. ཏཏྠ ཡདེཏཾ ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏཱིཏི པཋམཾ ཀཱམཱཝཙརཀུསལཾ དསྶིཏཾ, ཏསྶ ཏཱཝ ནིདྡེསེ དྷམྨཝཝཏྠཱནཝཱརོ ¶ སངྒཧཝཱརོ སུཉྙཏཝཱརོཏི ཏཡོ མཧཱཝཱརཱ ཧོནྟི. ཏེསུ དྷམྨཝཝཏྠཱནཝཱརོ ཨུདྡེསནིདྡེསཝསེན དྭིདྷཱ ཋིཏོ. ཏེསུ ཨུདྡེསཝཱརསྶ པུཙྪཱ, སམཡནིདྡེསོ, དྷམྨུདྡེསོ, ཨཔྤནཱཏི ཙཏྟཱརོ པརིཙྪེདཱ. ཏེསུ ‘ཀཏམེ དྷམྨཱ ཀུསལཱ’ཏི ཨཡཾ པུཙྪཱ ནཱམ. ‘ཡསྨིཾ སམཡེ ཀཱམཱཝཙརཾ…པེ… ཏསྨིཾ སམཡེ’ཏི ཨཡཾ སམཡནིདྡེསོ ནཱམ. ‘ཕསྶོ ཧོཏི…པེ… ཨཝིཀྑེཔོ ཧོཏཱི’ཏི ཨཡཾ དྷམྨུདྡེསོ ནཱམ. ‘ཡེ ཝཱ པན ཏསྨིཾ སམཡེ ཨཉྙེཔི ཨཏྠི པཊིཙྩསམུཔྤནྣཱ ཨརཱུཔིནོ དྷམྨཱ ཨིམེ དྷམྨཱ ཀུསལཱ’ཏི ཨཡཾ ཨཔྤནཱ ནཱམ.

ཨེཝཾ ཙཏཱུཧི པརིཙྪེདེཧི ཋིཏསྶ ཨུདྡེསཝཱརསྶ ཡྭཱཡཾ པཋམོ པུཙྪཱཔརིཙྪེདོ, ཏཏྠ ‘ཀཏམེ དྷམྨཱ ཀུསལཱ’ཏི ཨཡཾ ཀཐེཏུཀམྱཏཱཔུཙྪཱ. པཉྩཝིདྷཱཧི པུཙྪཱ – ཨདིཊྛཛོཏནཱཔུཙྪཱ, དིཊྛསཾསནྡནཱཔུཙྪཱ, ཝིམཏིཙྪེདནཱཔུཙྪཱ, ཨནུམཏིཔུཙྪཱ, ཀཐེཏུཀམྱཏཱཔུཙྪཱཏི. ཏཱསཾ ཨིདཾ ནཱནཏྟཾ –

ཀཏམཱ ཨདིཊྛཛོཏནཱཔུཙྪཱ? པཀཏིཡཱ ལཀྑཎཾ ཨཉྙཱཏཾ ཧོཏི, ཨདིཊྛཾ ཨཏུལིཏཾ ཨཏཱིརིཏཾ ཨཝིབྷཱུཏཾ ཨཝིབྷཱཝིཏཾ. ཏསྶ ཉཱཎཱཡ དསྶནཱཡ ཏུལནཱཡ ཏཱིརཎཱཡ ཝིབྷཱུཏཏྠཱཡ ཝིབྷཱཝནཏྠཱཡ པཉྷཾ པུཙྪཏི. ཨཡཾ ཨདིཊྛཛོཏནཱཔུཙྪཱ (མཧཱནི. ༡༥༠; ཙཱུལ༹ནི. པུཎྞཀམཱཎཝཔུཙྪཱནིདྡེས ༡༢).

ཀཏམཱ དིཊྛསཾསནྡནཱཔུཙྪཱ? པཀཏིཡཱ ལཀྑཎཾ ཉཱཏཾ ཧོཏི, དིཊྛཾ ཏུལིཏཾ ཏཱིརིཏཾ ཝིབྷཱུཏཾ ཝིབྷཱཝིཏཾ, སོ ཨཉྙེཧི པཎྜིཏེཧི སདྡྷིཾ སཾསནྡནཏྠཱཡ པཉྷཾ པུཙྪཏི. ཨཡཾ དིཊྛསཾསནྡནཱཔུཙྪཱ (མཧཱནི. ༡༥༠; ཙཱུལ༹ནི. པུཎྞཀམཱཎཝཔུཙྪཱནིདྡེས ༡༢).

ཀཏམཱ ¶ ཝིམཏིཙྪེདནཱཔུཙྪཱ? པཀཏིཡཱ སཾསཡཔཀྑནྡོ ཧོཏི, ཝིམཏིཔཀྑནྡོ དྭེལ༹ྷཀཛཱཏོ – ‘ཨེཝཾ ནུ ཁོ, ནནུ ཁོ, ཀིཾ ནུ ཁོ, ཀཐཾ ནུ ཁོ’ཏི. སོ ཝིམཏིཙྪེདནཏྠཱཡ ¶ པཉྷཾ པུཙྪཏི. ཨཡཾ ཝིམཏིཙྪེདནཱཔུཙྪཱ (མཧཱནི. ༡༥༠; ཙཱུལ༹ནི. པུཎྞཀམཱཎཝཔུཙྪཱནིདྡེས ༡༢).

ཀཏམཱ ཨནུམཏིཔུཙྪཱ? བྷགཝཱ བྷིཀྑཱུནཾ ཨནུམཏིཡཱ པཉྷཾ པུཙྪཏི – ‘ཏཾ ཀིཾ མཉྙཐ, བྷིཀྑཝེ, རཱུཔཾ ནིཙྩཾ ཝཱ ཨནིཙྩཾ ཝཱ’ཏི? ‘ཨནིཙྩཾ, བྷནྟེ’. ‘ཡཾ པནཱནིཙྩཾ དུཀྑཾ ཝཱ ཏཾ སུཁཾ ཝཱ’ཏི? ‘དུཀྑཾ, བྷནྟེ’ ¶ . ‘ཡཾ པནཱནིཙྩཾ དུཀྑཾ ཝིཔརིཎཱམདྷམྨཾ, ཀལླཾ ནུ ཏཾ སམནུཔསྶིཏུཾ ཨེཏཾ མམ, ཨེསོཧམསྨི, ཨེསོ མེ ཨཏྟཱ’ཏི? ‘ནོཧེཏཾ, བྷནྟེ’ཏི (སཾ. ནི. ༣.༧༩; མཧཱཝ. ༢༡). ཨཡཾ ཨནུམཏིཔུཙྪཱ.

ཀཏམཱ ཀཐེཏུཀམྱཏཱཔུཙྪཱ? བྷགཝཱ བྷིཀྑཱུནཾ ཀཐེཏུཀམྱཏཱཡ པཉྷཾ པུཙྪཏི. ‘‘ཙཏྟཱརོམེ, བྷིཀྑཝེ, སཏིཔཊྛཱནཱ. ཀཏམེ ཙཏྟཱརོ’’ཏི (དཱི. ནི. ༢.༣༧༣)? ཨཡཾ ཀཐེཏུཀམྱཏཱཔུཙྪཱཏི.

ཏཏྠ བུདྡྷཱནཾ པུརིམཱ ཏིསྶོ པུཙྪཱ ནཏྠི. ཀསྨཱ? བུདྡྷཱནཉྷི ཏཱིསུ ཨདྡྷཱསུ ཀིཉྩི སངྑཏཾ, ཨདྡྷཱཝིམུཏྟཾ ཝཱ ཨསངྑཏཾ, ཨདིཊྛཾ ཨནཉྙཱཏཾ ཨཛོཏིཏཾ ཨཏུལིཏཾ ཨཏཱིརིཏཾ ཨཝིབྷཱུཏཾ ཨཝིབྷཱཝིཏཾ ནཱམ ནཏྠི. ཏེན ཏེསཾ ཨདིཊྛཛོཏནཱཔུཙྪཱ ནཏྠི. ཡཾ པན བྷགཝཏཱ ཨཏྟནོ ཉཱཎེན པཊིཝིདྡྷཾ, ཏསྶ ཨཉྙེན སམཎེན ཝཱ བྲཱཧྨཎེན ཝཱ དེཝེན ཝཱ མཱརེན ཝཱ བྲཧྨུནཱ ཝཱ སདྡྷིཾ སཾསནྡནཀིཙྩཾ ནཏྠི. ཏེནསྶ དིཊྛསཾསནྡནཱཔུཙྪཱ ནཏྠི. ཡསྨཱ པནེས ཨཀཐཾཀཐཱི ཏིཎྞཝིཙིཀིཙྪོ སབྦདྷམྨེསུ ཝིཧཏསཾསཡོ, ཏེནསྶ ཝིམཏིཙྪེདནཱཔུཙྪཱ ནཏྠི. ཨིཏརཱ དྭེ པན པུཙྪཱ བྷགཝཏོ ཨཏྠི. ཏཱསུ ཨཡཾ ཀཐེཏུཀམྱཏཱཔུཙྪཱཏི ཝེདིཏབྦཱ.

ཏཏྠ ‘ཀཏམེ’ཏིཔདེན ནིདྡིསིཏབྦདྷམྨེ པུཙྪཏི. ‘དྷམྨཱ ཀུསལཱ’ཏི ཧི ཝཙནམཏྟེན ‘ཀིཾ ཀཏཱ ཀིཾ ཝཱ ཀརོནྟཱི’ཏི ན སཀྐཱ ཉཱཏུཾ. ‘ཀཏམེ’ཏི ཝུཏྟེ པན ཏེསཾ པུཊྛབྷཱཝོ པཉྙཱཡཏི. ཏེན ཝུཏྟཾ ‘ཀཏམེཏིཔདེན ནིདྡིསིཏབྦདྷམྨེ པུཙྪཏཱི’ཏི. ‘དྷམྨཱ ཀུསལཱ’ཏིཔདདྭཡེན པུཙྪཱཡ པུཊྛདྷམྨེ དསྶེཏི. ཏེསཾ ཨཏྠོ ཧེཊྛཱ པཀཱསིཏོཝ.

ཀསྨཱ པནེཏྠ མཱཏིཀཱཡཾ ཝིཡ ‘ཀུསལཱ དྷམྨཱ’ཏི ཨཝཏྭཱ ‘དྷམྨཱ ཀུསལཱ’ཏི པདཱནུཀྐམོ ཀཏོཏི? པབྷེདཏོ དྷམྨཱནཾ དེསནཾ དཱིཔེཏྭཱ པབྷེདཝནྟདསྶནཏྠཾ. ཨིམསྨིཉྷི ཨབྷིདྷམྨེ ¶ དྷམྨཱཝ དེསེཏབྦཱ. ཏེ ཙ ཀུསལཱདཱིཧི པབྷེདེཧི ཨནེཀཔྤབྷེདཱ. ཏསྨཱ དྷམྨཱཡེཝ ཨིདྷ དེསེཏབྦཱ ¶ . ནཱཡཾ ཝོཧཱརདེསནཱ. ཏེ ཙ ཨནེཀཔྤབྷེདཏོ དེསེཏབྦཱ, ན དྷམྨམཏྟཏོ. པབྷེདཏོ ཧི དེསནཱ གྷནཝིནིབྦྷོགཔཊིསམྦྷིདཱཉཱཎཱཝཧཱ ཧོཏཱིཏི ‘ཀུསལཱ དྷམྨཱ’ཏི ཨེཝཾ པབྷེདཏོ དྷམྨཱནཾ དེསནཾ དཱིཔེཏྭཱ, ཨིདཱནི ཡེ ཏེན པབྷེདེན དེསེཏབྦཱ དྷམྨཱ ཏེ ¶ དསྶེཏུཾ, ཨཡཾ ‘ཀཏམེ དྷམྨཱ ཀུསལཱ’ཏི པདཱནུཀྐམོ ཀཏོཏི ཝེདིཏབྦོ. པབྷེདཝནྟེསུ ཧི དསྶིཏེསུ པབྷེདོ དསྶིཡམཱནོ ཡུཛྫཏི སུཝིཉྙེཡྻོ ཙ ཧོཏཱིཏི.

ཨིདཱནི ཡསྨིཾ སམཡེ ཀཱམཱཝཙརཾ ཀུསལཾ ཙིཏྟནྟི. ཨེཏྠ –

སམཡེ ནིདྡིསི ཙིཏྟཾ, ཙིཏྟེན སམཡཾ མུནི;

ནིཡམེཏྭཱན དཱིཔེཏུཾ, དྷམྨེ ཏཏྠ པབྷེདཏོ.

‘ཡསྨིཾ སམཡེ ཀཱམཱཝཙརཾ ཀུསལཾ ཙིཏྟ’ནྟི ཧི ནིདྡིསནྟོ བྷགཝཱ སམཡེ ཙིཏྟཾ ནིདྡིསི. ཀིཾཀཱརཎཱ? ཏེན སམཡནིཡམིཏེན ཙིཏྟེན པརིཡོསཱནེ ‘ཏསྨིཾ སམཡེ’ཏི ཨེཝཾ སམཡཾ ནིཡམེཏྭཱན, ཨཐ ཝིཛྫམཱནེཔི སམཡནཱནཏྟེ ཡསྨིཾ སམཡེ ཙིཏྟཾ ཏསྨིཾཡེཝ སམཡེ ཕསྶོ ཧོཏི, ཝེདནཱ ཧོཏཱིཏི ཨེཝཾ ཏསྨིཾ ཙིཏྟནིཡམིཏེ སམཡེ ཨེཏེ སནྟཏིསམཱུཧཀིཙྩཱརམྨཎགྷནཝསེན དུརནུབོདྷཔྤབྷེདེ ཕསྶཝེདནཱདཡོ དྷམྨེ བོདྷེཏུནྟི ཨཏྠོ.

ཨིདཱནི ‘ཡསྨིཾ སམཡེ’ཏིཨཱདཱིསུ ཨཡམནུཔུབྦཔདཝཎྞནཱ. ཡསྨིནྟི ཨནིཡམཏོ བྷུམྨནིདྡེསོ. སམཡེཏི ཨནིཡམནིདྡིཊྛཔརིདཱིཔནཾ. ཨེཏྟཱཝཏཱ ཨནིཡམཏོ སམཡོ ནིདྡིཊྛོ ཧོཏི. ཏཏྠ སམཡསདྡོ –

སམཝཱཡེ ཁཎེ ཀཱལེ, སམཱུཧེ ཧེཏུ དིཊྛིསུ;

པཊིལཱབྷེ པཧཱནེ ཙ, པཊིཝེདྷེ ཙ དིསྶཏི.

ཏཐཱ ཧིསྶ ‘‘ཨཔྤེཝ ནཱམ སྭེཔི ཨུཔསངྐམེཡྻཱམ ཀཱལཉྩ སམཡཉྩ ཨུཔཱདཱཡཱ’’ཏི (དཱི. ནི. ༡.༤༤༧) ཨེཝམཱདཱིསུ སམཝཱཡོ ཨཏྠོ. ‘‘ཨེཀོཝ ཁོ, བྷིཀྑཝེ, ཁཎོ ཙ སམཡོ ཙ བྲཧྨཙརིཡཝཱསཱཡཱ’’ཏིཨཱདཱིསུ (ཨ. ནི. ༨.༢༩) ཁཎོ. ‘‘ཨུཎྷསམཡོ པརིལཱ༹ཧསམཡོ’’ཏིཨཱདཱིསུ ¶ (པཱཙི. ༣༥༨) ཀཱལོ. ‘‘མཧཱསམཡོ པཝནསྨི’’ནྟིཨཱདཱིསུ སམཱུཧོ. ‘‘སམཡོཔི ཁོ ཏེ, བྷདྡཱལི, ཨཔྤཊིཝིདྡྷོ ཨཧོསི ¶ – བྷགཝཱ ཁོ སཱཝཏྠིཡཾ ཝིཧརཏི, བྷགཝཱཔི མཾ ཛཱནིསྶཏི ‘བྷདྡཱལི ནཱམ བྷིཀྑུ སཏྠུསཱསནེ སིཀྑཱཡ ཨཔརིཔཱུརཀཱརཱི’ཏི. ཨཡམྤི ཁོ ཏེ, བྷདྡཱལི, སམཡོ ཨཔྤཊིཝིདྡྷོ ཨཧོསཱི’’ཏིཨཱདཱིསུ (མ. ནི. ༢.༡༣༥) ཧེཏུ. ‘‘ཏེན ཁོ པན སམཡེན ཨུགྒཱཧམཱནོ པརིབྦཱཛཀོ སམཎམུཎྜིཀཱཔུཏྟོ ¶ སམཡཔྤཝཱདཀེ ཏིནྡུཀཱཙཱིརེ ཨེཀསཱལཀེ མལླིཀཱཡ ཨཱརཱམེ པཊིཝསཏཱི’’ཏིཨཱདཱིསུ (མ. ནི. ༢.༢༦༠) དིཊྛི.

‘‘དིཊྛེ དྷམྨེ ཙ ཡོ ཨཏྠོ, ཡོ ཙཏྠོ སམྤརཱཡིཀོ;

ཨཏྠཱབྷིསམཡཱ དྷཱིརོ, པཎྜིཏོཏི པཝུཙྩཏཱི’’ཏི. (སཾ. ནི. ༡.༡༢༩) –

ཨཱདཱིསུ པཊིལཱབྷོ. ‘‘སམྨཱ མཱནཱབྷིསམཡཱ ཨནྟམཀཱསི དུཀྑསྶཱ’’ཏིཨཱདཱིསུ (མ. ནི. ༡.༢༨) པཧཱནཾ. ‘‘དུཀྑསྶ པཱིལ༹ནཊྛོ སངྑཏཊྛོ སནྟཱཔཊྛོ ཝིཔརིཎཱམཊྛོ ཨབྷིསམཡཊྛོ’’ཏིཨཱདཱིསུ (པཊི. མ. ༢.༨) པཊིཝེདྷོ. ཨེཝམནེཀེསུ སམཡེསུ –

སམཝཱཡོ ཁཎོ ཀཱལོ, སམཱུཧོ ཧེཏུཡེཝ ཙ;

ཨེཏེ པཉྩཔི ཝིཉྙེཡྻཱ, སམཡཱ ཨིདྷ ཝིཉྙུནཱ.

‘ཡསྨིཾ སམཡེ ཀཱམཱཝཙརཾ ཀུསལ’ནྟི ཨིམསྨིཉྷི ཀུསལཱདྷིཀཱརེ ཏེསུ ནཝསུ སམཡེསུ ཨེཏེ སམཝཱཡཱདཡོ པཉྩ སམཡཱ པཎྜིཏེན ཝེདིཏབྦཱ.

ཏེསུ པཙྩཡསཱམགྒཱི, སམཝཱཡོ ཁཎོ པན;

ཨེཀོཝ ནཝམོ ཉེཡྻོ, ཙཀྐཱནི ཙཏུརོཔི ཝཱ.

ཡཱ ཧི ཨེསཱ སཱདྷཱརཎཕལནིཔྥཱདཀཏྟེན སཎྛིཏཱ པཙྩཡཱནཾ སཱམགྒཱི, སཱ ཨིདྷ སམཝཱཡོཏི ཉཱཏབྦཱ. ‘‘ཨེཀོཝ ཁོ, བྷིཀྑཝེ, ཁཎོ ཙ སམཡོ ཙ བྲཧྨཙརིཡཝཱསཱཡཱ’’ཏི (ཨ. ནི. ༨.༢༩) ཨེཝཾ ཝུཏྟོ པན ནཝམོཝ ཁཎོ ཨེཀོ ཁཎོཏི ཝེདིཏབྦོ. ཡཱནི ཝཱ ¶ པནེཏཱནི ‘‘ཙཏྟཱརིམཱནི, བྷིཀྑཝེ, ཙཀྐཱནི ཡེཧི སམནྣཱགཏཱནཾ དེཝམནུསྶཱནཾ ཙཏུཙཀྐཾ ཝཏྟཏཱི’’ཏི – ཨེཏྠ ‘པཏིརཱུཔདེསཝཱསོ, སཔྤུརིསཱུཔནིསྶཡོ, ཨཏྟསམྨཱཔཎིདྷི, པུབྦེ ཙ ཀཏཔུཉྙཏཱ’ཏི (ཨ. ནི. ༤.༣༡) ཙཏྟཱརི ཙཀྐཱནི ཝུཏྟཱནི, ཨེཏཱནི ¶ ཝཱ ཨེཀཛ྄ཛྷཾ ཀཏྭཱ ཨོཀཱསཊྛེན ཁཎོཏི ཝེདིཏབྦཱནི. ཏཱནི ཧི ཀུསལུཔྤཏྟིཡཱ ཨོཀཱསབྷཱུཏཱནི.

ཨེཝཾ སམཝཱཡཉྩ ཁཎཉྩ ཉཏྭཱ ཨིཏརེསུ –

ཏཾ ཏཾ ཨུཔཱདཱཡ པཉྙཏྟོ, ཀཱལོ ཝོཧཱརམཏྟཀོ;

པུཉྫོ ཕསྶཱདིདྷམྨཱནཾ, སམཱུཧོཏི ཝིབྷཱཝིཏོ.

‘ཙིཏྟཀཱལོ རཱུཔཀཱལོ’ཏིཨཱདིནཱ ཧི ནཡེན དྷམྨེ ཝཱ, ‘ཨཏཱིཏོ ཨནཱགཏོ’ཏིཨཱདིནཱ ནཡེན དྷམྨཝུཏྟིཾ ཝཱ, ‘བཱིཛཀཱལོ ཨངྐུརཀཱལོ’ཏི ཨཱདིནཱ ནཡེན དྷམྨཔཊིཔཱཊིཾ ཝཱ, ‘ཨུཔྤཱདཀཱལོ ¶ ཛརཱཀཱལོ’ཏིཨཱདིནཱ ནཡེན དྷམྨལཀྑཎཾ ཝཱ, ‘ཝེདིཡནཀཱལོ སཉྫཱནནཀཱལོ’ཏིཨཱདིནཱ ནཡེན དྷམྨཀིཙྩཾ ཝཱ, ‘ནྷཱནཀཱལོ པཱནཀཱལོ’ཏིཨཱདིནཱ ནཡེན སཏྟཀིཙྩཾ ཝཱ, ‘གམནཀཱལོ ཋཱནཀཱལོ’ཏིཨཱདིནཱ ནཡེན ཨིརིཡཱཔཐཾ ཝཱ, ‘པུབྦཎྷོ སཱཡནྷོ དིཝཱ རཏྟཱི’ཏིཨཱདིནཱ ནཡེན ཙནྡིམསཱུརིཡཱདིཔརིཝཏྟནཾ ཝཱ, ‘ཨཌྜྷམཱསོ མཱསོ’ཏིཨཱདིནཱ ནཡེན ཨཧོརཏྟཱདིསངྑཱཏཾ ཀཱལསཉྩཡཾ ཝཱཏི – ཨེཝཾ ཏཾ ཏཾ ཨུཔཱདཱཡ པཉྙཏྟོ ཀཱལོ ནཱམ. སོ པནེས སབྷཱཝཏོ ཨཝིཛྫམཱནཏྟཱ པཉྙཏྟིམཏྟཀོ ཨེཝཱཏི ཝེདིཏབྦོ. ཡོ པནེས ཕསྶཝེདནཱདཱིནཾ དྷམྨཱནཾ པུཉྫོ, སོ ཨིདྷ སམཱུཧོཏི ཝིབྷཱཝིཏོ. ཨེཝཾ ཀཱལསམཱུཧེཔི ཉཏྭཱ ཨིཏརོ པན –

ཧེཏཱུཏི པཙྩཡོཝེཏྠ, ཏསྶ དྭཱརཝསེན ཝཱ;

ཨནེཀབྷཱཝོ ཝིཉྙེཡྻོ, པཙྩཡཱནཾ ཝསེན ཝཱ.

ཨེཏྠ ཧི པཙྩཡོཝ ཧེཏུ ནཱམ, ཏསྶ དྭཱརཱནཾ ཝཱ པཙྩཡཱནཾ ཝཱ ཝསེན ཨནེཀབྷཱཝོ ཝེདིཏབྦོ. ཀཐཾ? ཙཀྑུདྭཱརཱདཱིསུ ཧི ཨུཔྤཛྫམཱནཱནཾ ཙཀྑུཝིཉྙཱཎཱདཱིནཾ ཙཀྑུརཱུཔཨཱལོཀམནསིཀཱརཱདཡོ པཙྩཡཱ, མཧཱཔཀརཎེ ཙ ‘‘ཧེཏུཔཙྩཡོ ཨཱརམྨཎཔཙྩཡོ’’ཏིཨཱདིནཱ ནཡེན ཙཏུཝཱིསཏི པཙྩཡཱ ཝུཏྟཱ. ཏེསུ ཋཔེཏྭཱ ཝིཔཱཀཔཙྩཡཉྩ པཙྪཱཛཱཏཔཙྩཡཉྩ, སེསཱ ཀུསལདྷམྨཱནཾ པཙྩཡཱ ཧོནྟིཡེཝ. ཏེ སབྦེཔི ཨིདྷ ཧེཏཱུཏི ཨདྷིཔྤེཏཱ. ཨེཝམསྶ ཨིམིནཱ དྭཱརཝསེན ¶ ཝཱ པཙྩཡཝསེན ཝཱ ཨནེཀབྷཱཝོ ཝེདིཏབྦོ ¶ . ཨེཝམེཏེ སམཝཱཡཱདཡོ པཉྩ ཨཏྠཱ ཨིདྷ སམཡསདྡེན པརིགྒཧིཏཱཏི ཝེདིཏབྦཱ.

‘ཀསྨཱ པན ཨེཏེསུ ཡཾཀིཉྩི ཨེཀཾ ཨཔརིགྒཧེཏྭཱ སབྦེསཾ པརིགྒཧོ ཀཏོ’ཏི? ‘ཏེན ཏེན ཏསྶ ཏསྶ ཨཏྠཝིསེསསྶ དཱིཔནཏོ. ཨེཏེསུ ཧི སམཝཱཡསངྑཱཏོ སམཡོ ཨནེཀཧེཏུཏོ ཝུཏྟིཾ དཱིཔེཏི. ཏེན ཨེཀཀཱརཎཝཱདོ པཊིསེདྷིཏོ ཧོཏི. སམཝཱཡོ ཙ ནཱམ སཱདྷཱརཎཕལནིཔྥཱདནེ ཨཉྙམཉྙཱཔེཀྑོ ཧོཏི. ཏསྨཱ ‘ཨེཀོ ཀཏྟཱ ནཱམ ནཏྠཱི’ཏི ཨིམམྤི ཨཏྠཾ དཱིཔེཏི. སབྷཱཝེན ཧི ཀཱརཎེ སཏི ཀཱརཎནྟརཱཔེཀྑཱ ཨཡུཏྟཱཏི. ཨེཝཾ ཨེཀསྶ ཀསྶཙི ཀཱརཎསྶ ཨབྷཱཝདཱིཔནེན ‘‘སཡཾཀཏཾ སུཁདུཀྑ’’ནྟིཨཱདི པཊིསེདྷིཏཾ ཧོཏི.

ཏཏྠ སིཡཱ – ‘ཡཾ ཝུཏྟཾ ཨནེཀཧེཏུཏོ ཝུཏྟིཾ དཱིཔེཏཱི’ཏི, ཏཾ ན ཡུཏྟཾ. ‘ཀིཾཀཱརཎཱ’ ¶ ?‘ཨསཱམགྒིཡཾ ཨཧེཏཱུནཾ སཱམགྒིཡམྤི ཨཧེཏུབྷཱཝཱཔཏྟིཏོ’. ‘ན ཧི ཨེཀསྨིཾ ཨནྡྷེ དཊྛུཾ ཨསཀྐོནྟེ ཨནྡྷསཏཾ པསྶཏཱི’ཏི. ‘ནོ ན ཡུཏྟཾ; སཱདྷཱརཎཕལནིཔྥཱདཀཏྟེན ཧི ཋིཏབྷཱཝོ སཱམགྒཱི; ན ཨནེཀེསཾ སམོདྷཱནམཏྟཾ. ན ཙ ཨནྡྷཱནཾ དསྶནཾ ནཱམ སཱདྷཱརཎཕལཾ’. ‘ཀསྨཱ’?‘ཨནྡྷསཏེ སཏིཔི ཏསྶ ཨབྷཱཝཏོ. ཙཀྑཱདཱིནཾ པན ཏཾ སཱདྷཱརཎཕལཾ, ཏེསཾ བྷཱཝེ བྷཱཝཏོ. ཨསཱམགྒིཡཾ ཨཧེཏཱུནམྤི ཙ སཱམགྒིཡཾ ཧེཏུབྷཱཝོ སིདྡྷོ. སྭཱཡཾ ཨསཱམགྒིཡཾ ཕལཱབྷཱཝེན, སཱམགྒིཡཉྩསྶ བྷཱཝེན, ཝེདིཏབྦོ. ཙཀྑཱདཱིནཉྷི ཝེཀལླེ ཙཀྑུཝིཉྙཱཎཱདཱིནཾ ཨབྷཱཝོ, ཨཝེཀལླེ ཙ བྷཱཝོ, པཙྩཀྑསིདྡྷོ ལོཀསྶཱ’ཏི. ཨཡཾ ཏཱཝ སམཝཱཡསངྑཱཏེན སམཡེན ཨཏྠོ དཱིཔིཏོ.

ཡོ པནེས ཨཊྛཧི ཨཀྑཎེཧི པརིཝཛྫིཏོ ནཝམོ ཁཎོ, པཏིརཱུཔདེསཝཱསཱདིཀོ ཙ ཙཏུཙཀྐསངྑཱཏོ ཨོཀཱསཊྛེན ཁཎོ ཝུཏྟོ, སོ མནུསྶཏྟབུདྡྷུཔྤཱདསདྡྷམྨཊྛིཏིཨཱདིཀཾ ཁཎསཱམགྒིཾ ཝིནཱ ནཏྠི. མནུསྶཏྟཱདཱིནཉྩ ཀཱཎཀཙྪཔོཔམཱདཱིཧི (མ. ནི. ༣.༢༥༢) དུལླབྷབྷཱཝོ. ཨིཏི ཁཎསྶ དུལླབྷཏྟཱ སུཊྛུཏརཾ ཁཎཱཡཏྟཾ ལོཀུཏྟརདྷམྨཱནཾ ཨུཔཀཱརབྷཱུཏཾ ཀུསལཾ དུལླབྷམེཝ ¶ . ཨེཝམེཏེསུ ཁཎསངྑཱཏོ སམཡོ ཀུསལུཔྤཏྟིཡཱ དུལླབྷབྷཱཝཾ དཱིཔེཏི. ཨེཝཾ དཱིཔེནྟེན ཨནེན ཨདྷིགཏཁཎཱནཾ ཁཎཱཡཏྟསྶེཝ ཏསྶ ཀུསལསྶ ཨནནུཊྛཱནེན མོགྷཁཎཾ ཀུརུམཱནཱནཾ པམཱདཝིཧཱརོ པཊིསེདྷིཏོ ཧོཏི. ཨཡཾ ཁཎསངྑཱཏེན སམཡེན ཨཏྠོ དཱིཔིཏོ.

ཡོ ¶ པནེཏསྶ ཀུསལཙིཏྟསྶ པཝཏྟིཀཱལོ ནཱམ ཧོཏི, སོ ཨཏིཔརིཏྟོ. སཱ ཙསྶ ཨཏིཔརིཏྟཏཱ ‘‘ཡཐཱ ཙ, བྷིཀྑཝེ, ཏསྶ པུརིསསྶ ཛཝོ, ཡཐཱ ཙ ཙནྡིམསཱུརིཡཱནཾ ཛཝོ, ཡཐཱ ཙ ཡཱ དེཝཏཱ ཙནྡིམསཱུརིཡཱནཾ པུརཏོ དྷཱཝནྟི ཏཱསཾ དེཝཏཱནཾ ཛཝོ, ཏཏོ སཱིགྷཏརཾ ཨཱཡུསངྑཱརཱ ཁཱིཡནྟཱི’’ཏི (སཾ. ནི. ༢.༢༢༨) – ཨིམསྶ སུཏྟསྶ ཨཊྛཀཐཱཝསེན ཝེདིཏབྦཱ. ཏཏྲ ཧི སོ རཱུཔཛཱིཝིཏིནྡྲིཡསྶ ཏཱཝ པརིཏྟཀོ ཀཱལོ ཝུཏྟོ. ཡཱཝ པཊུཔྤནྣཾ རཱུཔཾ ཏིཊྛཏི ཏཱཝ སོལ༹ས ཙིཏྟཱནི ཨུཔྤཛྫིཏྭཱ བྷིཛྫནྟི. ཨིཏི ཏེསཾ ཀཱལཔརིཏྟཏཱཡ ཨུཔམཱཔི ¶ ནཏྠི. ཏེནེཝཱཧ – ‘‘ཡཱཝཉྩིདཾ, བྷིཀྑཝེ, ཨུཔམཱཔི ན སུཀརཱ ཡཱཝ ལཧུཔརིཝཏྟཾ ཙིཏྟ’’ནྟི (ཨ. ནི. ༡.༤༨). ཨེཝམེཏེསུ ཀཱལསངྑཱཏོ སམཡོ ཀུསལཙིཏྟཔྤཝཏྟིཀཱལསྶ ཨཏིཔརིཏྟཏཾ དཱིཔེཏི. ཨེཝཾ དཱིཔེནྟེན ཙཱནེན ཨཏིཔརིཏྟཀཱལཏཱཡ, ཝིཛྫུལཏོབྷཱསེན མུཏྟཱཝུཎནཾ ཝིཡ, དུཔྤཊིཝིཛ྄ཛྷམིདཾ ཙིཏྟཾ, ཏསྨཱ ཨེཏསྶ པཊིཝེདྷེ མཧཱཨུསྶཱཧོ ཙ ཨཱདརོ ཙ ཀཏྟབྦོཏི ཨོཝཱདོ དིནྣོ ཧོཏི. ཨཡཾ ཀཱལསངྑཱཏེན སམཡེན ཨཏྠོ དཱིཔིཏོ.

སམཱུཧསངྑཱཏོ པན སམཡོ ཨནེཀེསཾ སཧུཔྤཏྟིཾ དཱིཔེཏི. ཕསྶཱདཱིནཉྷི དྷམྨཱནཾ པུཉྫོ སམཱུཧོཏི ཝུཏྟོ. ཏསྨིཉྩ ཨུཔྤཛྫམཱནཾ ཙིཏྟཾ སཧ ཏེཧི དྷམྨེཧི ཨུཔྤཛྫཏཱིཏི ཨནེཀེསཾ སཧུཔྤཏྟི དཱིཔིཏཱ. ཨེཝཾ དཱིཔེནྟེན ཙཱནེན ཨེཀསྶེཝ དྷམྨསྶ ཨུཔྤཏྟི པཊིསེདྷིཏཱ ཧོཏི. ཨཡཾ སམཱུཧསངྑཱཏེན སམཡེན ཨཏྠོ དཱིཔིཏོ.

ཧེཏུསངྑཱཏོ པན སམཡོ པརཱཡཏྟཝུཏྟིཏཾ དཱིཔེཏི. ‘ཡསྨིཾ སམཡེ’ཏི ཧི པདསྶ ཡསྨཱ ‘ཡསྨིཾ ཧེཏུམྷི སཏི’ ཨུཔྤནྣཾ ཧོཏཱིཏི ཨཡམཏྠོ, ཏསྨཱ ‘ཧེཏུམྷི སཏི’ པཝཏྟིཏོ པརཱཡཏྟཝུཏྟིཏཱ དཱིཔིཏཱ. ཨེཝཾ ¶ དཱིཔེནྟེན ཙཱནེན དྷམྨཱནཾ སཝསཝཏྟིཏཱབྷིམཱནོ པཊིསེདྷིཏོ ཧོཏི. ཨཡཾ ཧེཏུསངྑཱཏེན སམཡེན ཨཏྠོ དཱིཔིཏོ.

ཏཏྠ ‘ཡསྨིཾ སམཡེ’ཏི ཀཱལསངྑཱཏསྶ སམཡསྶ ཝསེན ‘ཡསྨིཾ ཀཱལེ’ཏི ཨཏྠོ; སམཱུཧསངྑཱཏསྶ ‘ཡསྨིཾ སམཱུཧེ’ཏི. ཁཎསམཝཱཡཧེཏུསངྑཱཏཱནཾ ‘ཡསྨིཾ ཁཎེ སཏི, ཡཱཡ སཱམགྒིཡཱ སཏི, ཡམྷི ཧེཏུམྷི སཏི’ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི, ཏསྨིཾཡེཝ སཏི ‘ཕསྶཱདཡོཔཱི’ཏི ཨཡམཏྠོ ཝེདིཏབྦོ. ཨདྷིཀརཎཉྷི ཀཱལསངྑཱཏོ སམཱུཧསངྑཱཏོ ཙ སམཡོ. ཏཏྠ ཝུཏྟདྷམྨཱནནྟི ཨདྷིཀརཎཝསེནེཏྠ བྷུམྨཾ. ཁཎསམཝཱཡཧེཏུསངྑཱཏསྶ ཙ སམཡསྶ བྷཱཝེན ཏེསཾ བྷཱཝོ ལཀྑཱིཡཏཱིཏི བྷཱཝེནབྷཱཝལཀྑཎཝསེནེཏྠ བྷུམྨཾ.

ཀཱམཱཝཙརནྟི ¶ ‘‘ཀཏམེ དྷམྨཱ ཀཱམཱཝཙརཱ? ཧེཊྛཏོ ཨཝཱིཙིནིརཡཾ ཨུཔརིཏོ པརནིམྨིཏཝསཝཏྟིཾ པརིཡནྟཾ ཀཏྭཱ’’ཏིཨཱདིནཱ (དྷ. ས. ༡༢༨༧) ནཡེན ཝུཏྟེསུ ཀཱམཱཝཙརདྷམྨེསུ པརིཡཱཔནྣཾ. ཏཏྲཱཡཾ ཝཙནཏྠོ – ཨུདྡཱནཏོ ¶ དྭེ ཀཱམཱ, ཝཏྠུཀཱམོ ཙ ཀིལེསཀཱམོ ཙ. ཏཏྠ ཀིལེསཀཱམོ ཨཏྠཏོ ཚནྡརཱགོཝ ཝཏྠུཀཱམོ ཏེབྷཱུམཀཝཊྚཾ. ཀིལེསཀཱམོ ཙེཏྠ ཀཱམེཏཱིཏི ཀཱམོ; ཨིཏརོ པན ཀཱམིཡཏཱིཏི ཀཱམོ. ཡསྨིཾ པན པདེསེ དུཝིདྷོཔེསོ ཀཱམོ པཝཏྟིཝསེན ཨཝཙརཏི, སོ ཙཏུནྣཾ ཨཔཱཡཱནཾ, མནུསྶཱནཾ, ཚནྣཉྩ དེཝལོཀཱནཾ ཝསེན ཨེཀཱདསཝིདྷོ པདེསོ. ཀཱམོ ཨེཏྠ ཨཝཙརཏཱིཏི ཀཱམཱཝཙརོ, སསཏྠཱཝཙརོ ཝིཡ. ཡཐཱ ཧི ཡསྨིཾ པདེསེ སསཏྠཱ པུརིསཱ ཨཝཙརནྟི, སོ ཝིཛྫམཱནེསུཔི ཨཉྙེསུ དྭིཔདཙཏུཔྤདེསུ ཨཝཙརནྟེསུ, ཏེསཾ ཨབྷིལཀྑིཏཏྟཱ ‘སསཏྠཱཝཙརོ’ཏྭེཝ ཝུཙྩཏི, ཨེཝཾ ཝིཛྫམཱནེསུཔི ཨཉྙེསུ རཱུཔཱཝཙརཱདཱིསུ ཏཏྠ ཨཝཙརནྟེསུ, ཏེསཾ ཨབྷིལཀྑིཏཏྟཱ ཨཡཾ པདེསོ ‘ཀཱམཱཝཙརོ’ཏྭེཝ ཝུཙྩཏི. སྭཱཡཾ ཡཐཱ རཱུཔབྷཝོ རཱུཔཾ, ཨེཝཾ ཨུཏྟརཔདལོཔཾ ཀཏྭཱ ‘ཀཱམོ’ཏྭེཝ ཝུཙྩཏི. ཨེཝམིདཾ ཙིཏྟཾ ཨིམསྨིཾ ཨེཀཱདསཔདེསསངྑཱཏེ ཀཱམེ ཨཝཙརཏཱིཏི ཀཱམཱཝཙརཾ.

ཀིཉྩཱཔི ཧི ཨེཏཾ རཱུཔཱརཱུཔབྷཝེསུཔི ཨཝཙརཏི, ཡཐཱ པན སངྒཱམེ ཨཝཙརཎཏོ སངྒཱམཱཝཙརོཏི ལདྡྷནཱམཀོ ནཱགོ ནགརེ ཙརནྟོཔི ‘སངྒཱམཱཝཙརོ’ཏྭེཝ ཝུཙྩཏི, ཐལཛལཙརཱ ཙ པཱཎཱ ཨཐལེ ¶ ཨཛལེ ཙ ཋིཏཱཔི ‘ཐལཙརཱ ཛལཙརཱ’ཏྭེཝ ཝུཙྩནྟི, ཨེཝམིདཾ ཨཉྙཏྠ ཨཝཙརནྟམྤི ཀཱམཱཝཙརམེཝཱཏི ཝེདིཏབྦཾ. ཨཱརམྨཎཀརཎཝསེན ཝཱ ཨེཏྠ ཀཱམོ ཨཝཙརཏཱིཏིཔི ཀཱམཱཝཙརཾ. ཀཱམཉྩེས རཱུཔཱརཱུཔཱཝཙརེསུཔི ཨཝཙརཏི, ཡཐཱ པན ཝདཏཱིཏི ‘ཝཙྪོ’, མཧིཡཾ སེཏཱིཏི ‘མཧིཾསོ’ཏི ཝུཏྟེ, ན སཏྟཱ ཡཏྟཀཱ ཝདནྟི, མཧིཡཾ ཝཱ སེནྟི སབྦེསཾ ཏཾ ནཱམཾ ཧོཏི, ཨེཝཾསམྤདམིདཾ ཝེདིཏབྦཾ. ཨཔིཙ ཀཱམབྷཝསངྑཱཏེ ཀཱམེ པཊིསནྡྷིཾ ཨཝཙཱརེཏཱིཏིཔི ཀཱམཱཝཙརཾ.

ཀུསལནྟི ཀུཙྪིཏཱནཾ སལནཱདཱིཧི ཨཏྠེཧི ཀུསལཾ. ཨཔིཙ ཨཱརོགྱཊྛེན ཨནཝཛྫཊྛེན ཀོསལླསམྦྷཱུཏཊྛེན ཙ ཀུསལཾ. ཡཐེཝ ཧི ‘ཀཙྩི ནུ བྷོཏོ ཀུསལ’ནྟི (ཛཱ. ༡.༡༥.༡༤༦; ༢.༢༠.༡༢༩) རཱུཔཀཱཡེ ཨནཱཏུརཏཱཡ ཨགེལཉྙེན ནིབྱཱདྷིཏཱཡ ཨཱརོགྱཊྛེན ཀུསལཾ ཝུཏྟཾ, ཨེཝཾ ཨརཱུཔདྷམྨེཔི ཀིལེསཱཏུརཏཱཡ ཀིལེསགེལཉྙསྶ ཙ ཀིལེསབྱཱདྷིནོ ¶ ཨབྷཱཝེན ཨཱརོགྱཊྛེན ཀུསལཾ ཝེདིཏབྦཾ. ཀིལེསཝཛྫསྶ པན ཀིལེསདོསསྶ ཀིལེསདརཐསྶ ཙ ཨབྷཱཝཱ ཨནཝཛྫཊྛེན ¶ ཀུསལཾ. ཀོསལླཾ ཝུཙྩཏི པཉྙཱ; ཀོསལླཏོ སམྦྷཱུཏཏྟཱ ཀོསལླསམྦྷཱུཏཊྛེན ཀུསལཾ.

‘ཉཱཎསམྤཡུཏྟཾ’ ཏཱཝ ཨེཝཾ ཧོཏུ; ཉཱཎཝིཔྤཡུཏྟཾ ཀཐནྟི. ཏམྤི རུལ༹ྷཱིསདྡེན ཀུསལམེཝ. ཡཐཱ ཧི ཏཱལཔཎྞེཧི ཨཀཏྭཱ ཀིལཉྫཱདཱིཧི ཀཏམྤི ཏཾསརིཀྑཏྟཱ རུལ༹ྷཱིསདྡེན ཏཱལཝཎྚནྟྭེཝ ཝུཙྩཏི, ཨེཝཾ ‘ཉཱཎཝིཔྤཡུཏྟ’མྤི ཀུསལནྟྭེཝ ཝེདིཏབྦཾ. ནིཔྤརིཡཱཡེན པན ‘ཉཱཎསམྤཡུཏྟཾ’ ཨཱརོགྱཊྛེན ཨནཝཛྫཊྛེན ཀོསལླསམྦྷཱུཏཊྛེནཱཏི ཏིཝིདྷེནཔི ཀུསལནྟི ནཱམཾ ལབྷཏི, ཉཱཎཝིཔྤཡུཏྟཾ དུཝིདྷེནེཝ. ཨིཏི ཡཉྩ ཛཱཏཀཔརིཡཱཡེན ཡཉྩ བཱཧིཏིཀསུཏྟཔརིཡཱཡེན ཡཉྩ ཨབྷིདྷམྨཔརིཡཱཡེན ཀུསལཾ ཀཐིཏཾ སབྦཾ ཏཾ ཏཱིཧིཔི ཨཏྠེཧི ཨིམསྨིཾ ཙིཏྟེ ལབྦྷཏི.

ཏདེཏཾ ལཀྑཎཱདིཝསེན ཨནཝཛྫསུཁཝིཔཱཀལཀྑཎཾ, ཨཀུསལཝིདྡྷཾསནརསཾ, ཝོདཱནཔཙྩུཔཊྛཱནཾ, ཡོནིསོམནསིཀཱརཔདཊྛཱནཾ. ཨཝཛྫཔཊིཔཀྑཏྟཱ ཝཱ ཨནཝཛྫལཀྑཎམེཝ ཀུསལཾ, ཝོདཱནབྷཱཝརསཾ, ཨིཊྛཝིཔཱཀཔཙྩུཔཊྛཱནཾ, ཡཐཱཝུཏྟཔདཊྛཱནམེཝ. ལཀྑཎཱདཱིསུ ཧི ཏེསཾ ཏེསཾ དྷམྨཱནཾ སབྷཱཝོ ཝཱ སཱམཉྙཾ ཝཱ ལཀྑཎཾ ནཱམ. ཀིཙྩཾ ཝཱ སམྤཏྟི ཝཱ རསོ ནཱམ. ཨུཔཊྛཱནཱཀཱརོ ཝཱ ཕལཾ ཝཱ པཙྩུཔཊྛཱནཾ ནཱམ. ཨཱསནྣཀཱརཎཾ པདཊྛཱནཾ ནཱམ. ཨིཏི ཡཏྠ ཡཏྠ ལཀྑཎཱདཱིནི ཝཀྑཱམ ཏཏྠ ཏཏྠ ཨིམིནཱཝ ནཡེན ཏེསཾ ནཱནཏྟཾ ཝེདིཏབྦཾ.

ཙིཏྟནྟི ¶ ཨཱརམྨཎཾ ཙིནྟེཏཱིཏི ཙིཏྟཾ; ཝིཛཱནཱཏཱིཏི ཨཏྠོ. ཡསྨཱ ཝཱ ‘ཙིཏྟ’ནྟི སབྦཙིཏྟསཱདྷཱརཎོ ཨེས སདྡོ, ཏསྨཱ ཡདེཏྠ ལོཀིཡཀུསལཱཀུསལཀིརིཡཙིཏྟཾ, ཏཾ ཛཝནཝཱིཐིཝསེན ཨཏྟནོ སནྟཱནཾ ཙིནོཏཱིཏི ཙིཏྟཾ. ཝིཔཱཀཾ ཀམྨཀིལེསེཧི ཙིཏནྟི ཙིཏྟཾ. ཨཔིཙ སབྦམྤི ཡཐཱནུརཱུཔཏོ ཙིཏྟཏཱཡ ཙིཏྟཾ. ཙིཏྟཀརཎཏཱཡ ཙིཏྟནྟི ཨེཝམྤེཏྠ ཨཏྠོ ཝེདིཏབྦོ. ཏཏྠ ཡསྨཱ ཨཉྙདེཝ སརཱགཾ ཙིཏྟཾ, ཨཉྙཾ སདོསཾ ¶ , ཨཉྙཾ སམོཧཾ; ཨཉྙཾ ཀཱམཱཝཙརཾ, ཨཉྙཾ རཱུཔཱཝཙརཱདིབྷེདཾ; ཨཉྙཾ རཱུཔཱརམྨཎཾ, ཨཉྙཾ སདྡཱདིཨཱརམྨཎཾ; རཱུཔཱརམྨཎེསུ ཙཱཔི ཨཉྙཾ ནཱིལཱརམྨཎཾ, ཨཉྙཾ པཱིཏཱདིཨཱརམྨཎཾ; སདྡཱདིཨཱརམྨཎེསུཔི ཨེསེཝ ནཡོ; སབྦེསུཔི ཙེཏེསུ ཨཉྙཾ ཧཱིནཾ ཨཉྙཾ མཛ྄ཛྷིམཾ ཨཉྙཾ པཎཱིཏཾ; ཧཱིནཱདཱིསུཔི ཨཉྙཾ ཚནྡཱདྷིཔཏེཡྻཾ, ཨཉྙཾ ཝཱིརིཡཱདྷིཔཏེཡྻཾ ཨཉྙཾ ཙིཏྟཱདྷིཔཏེཡྻཾ, ཨཉྙཾ ཝཱིམཾསཱདྷིཔཏེཡྻཾ, ཏསྨཱ ཨསྶ ཨིམེསཾ སམྤཡུཏྟབྷཱུམིཨཱརམྨཎཧཱིནམཛ྄ཛྷིམཔཎཱིཏཱདྷིཔཏཱིནཾ ཝསེན ཙིཏྟཏཱ ཝེདིཏབྦཱ. ཀཱམཉྩེཏྠ ¶ ཨེཀམེཝ ཨེཝཾ ཙིཏྟཾ ན ཧོཏི, ཙིཏྟཱནཾ པན ཨནྟོགདྷཏྟཱ ཨེཏེསུ ཡཾཀིཉྩི ཨེཀམྤི ཙིཏྟཏཱཡ ཙིཏྟནྟི ཝཏྟུཾ ཝཊྚཏི. ཨེཝཾ ཏཱཝ ཙིཏྟཏཱཡ ཙིཏྟཾ.

ཀཐཾ ཙིཏྟཀརཎཏཱཡཱཏི? ལོཀསྨིཉྷི ཙིཏྟཀམྨཏོ ཨུཏྟརི ཨཉྙཾ ཙིཏྟཾ ནཱམ ནཏྠི. ཏསྨིམྤི ཙརཎཾ ནཱམ ཙིཏྟཾ ཨཏིཙིཏྟམེཝ ཧོཏི. ཏཾ ཀརོནྟཱནཾ ཙིཏྟཀཱརཱནཾ ‘ཨེཝཾཝིདྷཱནི ཨེཏྠ རཱུཔཱནི ཀཱཏབྦཱནཱི’ཏི ཙིཏྟསཉྙཱ ཨུཔྤཛྫཏི. ཏཱཡ ཙིཏྟསཉྙཱཡ ལེཁཱགཧནརཉྫནཨུཛྫོཏནཝཏྟནཱདིནིཔྥཱདིཀཱ ཙིཏྟཀིརིཡཱ ཨུཔྤཛྫནྟི, ཏཏོ ཙརཎསངྑཱཏེ ཙིཏྟེ ཨཉྙཏརཾ ཝིཙིཏྟརཱུཔཾ ནིཔྥཛྫཏི. ཏཏོ ‘ཨིམསྶ རཱུཔསྶ ཨུཔརི ཨིདཾ ཧོཏུ, ཧེཊྛཱ ཨིདཾ, ཨུབྷཡཔསྶེ ཨིད’ནྟི ཙིནྟེཏྭཱ ཡཐཱཙིནྟིཏེན ཀམེན སེསཙིཏྟརཱུཔནིཔྥཱདནཾ ཧོཏི, ཨེཝཾ ཡཾཀིཉྩི ལོཀེ ཝིཙིཏྟཾ སིཔྤཛཱཏཾ སབྦཾ ཏཾ ཙིཏྟེནེཝ ཀརིཡཏི, ཨེཝཾ ཨིམཱཡ ཀརཎཝིཙིཏྟཏཱཡ ཏསྶ ཏསྶ ཙིཏྟསྶ ནིཔྥཱདཀཾ ཙིཏྟམྤི ཏཐེཝ ཙིཏྟཾ ཧོཏི. ཡཐཱཙིནྟིཏསྶ ཝཱ ཨནཝསེསསྶ ཨནིཔྥཛྫནཏོ ཏཏོཔི ཙིཏྟམེཝ ཙིཏྟཏརཾ. ཏེནཱཧ བྷགཝཱ –

‘‘དིཊྛཾ ཝོ, བྷིཀྑཝེ, ཙརཎཾ ནཱམ ཙིཏྟནྟི? ‘ཨེཝཾ, བྷནྟེ’. ཏམྤི ཁོ, བྷིཀྑཝེ, ཙརཎཾ ནཱམ ཙིཏྟཾ ཙིཏྟེནེཝ ཙིནྟིཏཾ. ཏེནཔི ཁོ, བྷིཀྑཝེ, ཙརཎེན ཙིཏྟེན ཙིཏྟཾཡེཝ ཙིཏྟཏར’’ནྟི (སཾ. ནི. ༣.༡༠༠).

ཏཐཱ ¶ ཡདེཏཾ དེཝམནུསྶནིརཡཏིརཙྪཱནབྷེདཱསུ གཏཱིསུ ཀམྨལིངྒསཉྙཱཝོཧཱརཱདིབྷེདཾ ཨཛ྄ཛྷཏྟིཀཾ ཙིཏྟཾ ཏམྤི ཙིཏྟཀཏམེཝ. ཀཱཡཀམྨཱདིབྷེདཉྷི དཱནསཱིལཝིཧིཾསཱསཱཋེཡྻཱདིནཡཔྤཝཏྟཾ ཀུསལཱཀུསལཀམྨཾ ཙིཏྟནིཔྥཱདིཏཾ ཀམྨནཱནཏྟཾ. ཀམྨནཱནཏྟེནེཝ ཙ ཏཱསུ ཏཱསུ གཏཱིསུ ¶ ཧཏྠཔཱདཀཎྞཨུདརགཱིཝཱམུཁཱདིསཎྛཱནབྷིནྣཾ ལིངྒནཱནཏྟཾ. ལིངྒནཱནཏྟཏོ ཡཐཱགཧིཏསཎྛཱནཝསེན ‘ཨཡཾ ཨིཏྠཱི ཨཡཾ པུརིསོ’ཏི ཨུཔྤཛྫམཱནཱཡ སཉྙཱཡ སཉྙཱནཱནཏྟཾ. སཉྙཱནཱནཏྟཏོ སཉྙཱནུརཱུཔེན ‘ཨིཏྠཱི’ཏི ཝཱ ‘པུརིསོ’ཏི ཝཱ ཝོཧརནྟཱནཾ ཝོཧཱརནཱནཏྟཾ. ཝོཧཱརནཱནཏྟཝསེན པན ཡསྨཱ ‘ཨིཏྠཱི བྷཝིསྶཱམི པུརིསོ བྷཝིསྶཱམི, ཁཏྟིཡོ བྷཝིསྶཱམི བྲཱཧྨཎོ བྷཝིསྶཱམཱི’ཏི ཨེཝཾ ཏསྶ ཏསྶ ཨཏྟབྷཱཝསྶ ཛནཀཾ ཀམྨཾ ཀརཱིཡཏི, ཏསྨཱ ཝོཧཱརནཱནཏྟཏོ ཀམྨནཱནཏྟཾ. ཏཾ པནེཏཾ ཀམྨནཱནཏྟཾ ཡཐཱཔཏྠིཏཾ བྷཝཾ ནིབྦཏྟེནྟཾ ཡསྨཱ གཏིཝསེན ནིབྦཏྟེཏི ཏསྨཱ ཀམྨནཱནཏྟཏོ གཏིནཱནཏྟཾ. ཀམྨནཱནཏྟེནེཝ ཙ ཏེསཾ ཏེསཾ སཏྟཱནཾ ཏསྶཱ ཏསྶཱ གཏིཡཱ ཨཔཱདཀདྭིཔཱདཀཱདིཏཱ, ཏསྶཱ ཏསྶཱ ཨུཔཔཏྟིཡཱ ཨུཙྩནཱིཙཱདིཏཱ, ཏསྨིཾ ¶ ཏསྨིཾ ཨཏྟབྷཱཝེ སུཝཎྞདུབྦཎྞཱདིཏཱ, ལོཀདྷམྨེསུ ལཱབྷཱལཱབྷཱདིཏཱ ཙ པཉྙཱཡཏི. ཏསྨཱ སབྦམེཏཾ དེཝམནུསྶནིརཡཏིརཙྪཱནབྷེདཱསུ གཏཱིསུ ཀམྨལིངྒསཉྙཱཝོཧཱརཱདིབྷེདཾ ཨཛ྄ཛྷཏྟིཀཾ ཙིཏྟཾ ཙིཏྟེནེཝ ཀཏནྟི ཝེདིཏབྦཾ. སྭཱཡམཏྠོ ཨིམསྶ སངྒཱིཏིཨནཱརུལ༹ྷསྶ སུཏྟསྶ ཝསེན ཝེདིཏབྦོ. ཝུཏྟཉྷེཏཾ –

‘‘ཀམྨནཱནཏྟཔུཐུཏྟཔྤབྷེདཝཝཏྠཱནཝསེན ལིངྒནཱནཏྟཔུཐུཏྟཔྤབྷེདཝཝཏྠཱནཾ བྷཝཏི, ལིངྒནཱནཏྟཔུཐུཏྟཔྤབྷེདཝཝཏྠཱནཝསེན སཉྙཱནཱནཏྟཔུཐུཏྟཔྤབྷེདཝཝཏྠཱནཾ བྷཝཏི, སཉྙཱནཱནཏྟཔུཐུཏྟཔྤབྷེདཝཝཏྠཱནཝསེན ཝོཧཱརནཱནཏྟཔུཐུཏྟཔྤབྷེདཝཝཏྠཱནཾ བྷཝཏི, ཝོཧཱརནཱནཏྟཔུཐུཏྟཔྤབྷེདཝཝཏྠཱནཝསེན ཀམྨནཱནཏྟཔུཐུཏྟཔྤབྷེདཝཝཏྠཱནཾ བྷཝཏི. ཀམྨནཱནཱཀརཎཾ པཊིཙྩ སཏྟཱནཾ གཏིཡཱ ནཱནཱཀརཎཾ པཉྙཱཡཏི – ཨཔདཱ དྭིཔདཱ ཙཏུཔྤདཱ བཧུཔྤདཱ, རཱུཔིནོ ཨརཱུཔིནོ, སཉྙིནོ ཨསཉྙིནོ ནེཝསཉྙཱིནཱསཉྙིནོ. ཀམྨནཱནཱཀརཎཾ པཊིཙྩ སཏྟཱནཾ ཨུཔཔཏྟིཡཱ ནཱནཱཀརཎཾ པཉྙཱཡཏི – ཨུཙྩནཱིཙཏཱ ཧཱིནཔཎཱིཏཏཱ སུགཏདུགྒཏཏཱ. ཀམྨནཱནཱཀརཎཾ ¶ པཊིཙྩ སཏྟཱནཾ ཨཏྟབྷཱཝེ ནཱནཱཀརཎཾ པཉྙཱཡཏི – སུཝཎྞདུབྦཎྞཏཱ སུཛཱཏདུཛྫཱཏཏཱ སུསཎྛིཏདུསྶཎྛིཏཏཱ. ཀམྨནཱནཱཀརཎཾ པཊིཙྩ སཏྟཱནཾ ལོཀདྷམྨེ ནཱནཱཀརཎཾ པཉྙཱཡཏི – ལཱབྷཱལཱབྷེ ཡསཱཡསེ ནིནྡཱཔསཾསཱཡཾ སུཁདུཀྑེ’’ཏི.

ཨཔརམྤི ཝུཏྟཾ –

ཀམྨཏོ ¶ ལིངྒཏོ ཙེཝ, ལིངྒསཉྙཱ པཝཏྟརེ;

སཉྙཱཏོ བྷེདཾ གཙྪནྟི, ཨིཏྠཱཡཾ པུརིསོཏི ཝཱ.

‘‘ཀམྨུནཱ ཝཏྟཏེ ལོཀོ, ཀམྨུནཱ ཝཏྟཏེ པཛཱ;

ཀམྨནིབནྡྷནཱ སཏྟཱ, རཐསྶཱཎཱིཝ ཡཱཡཏོ’’. (མ. ནི. ༢.༤༦༠; སུ. ནི. ༦༥༩);

ཀམྨེན ཀིཏྟིཾ ལབྷཏེ པསཾསཾ,

ཀམྨེན ཛཱནིཉྩ ཝདྷཉྩ བནྡྷཾ;

ཏཾ ¶ ཀམྨནཱནཱཀརཎཾ ཝིདིཏྭཱ,

ཀསྨཱ ཝདེ ནཏྠི ཀམྨནྟི ལོཀེ. (ཀཐཱ. ༧༨༥);

‘‘ཀམྨསྶཀཱ མཱཎཝ སཏྟཱ ཀམྨདཱཡཱདཱ ཀམྨཡོནཱི ཀམྨབནྡྷཱུ ཀམྨཔཊིསརཎཱ; ཀམྨཾ སཏྟེ ཝིབྷཛཏི ཡདིདཾ ཧཱིནཔྤཎཱིཏཏཱཡཱ’’ཏི (མ. ནི. ༣.༢༨༩).

ཨེཝཾ ཨིམཱཡ ཀརཎཙིཏྟཏཱཡཔི ཙིཏྟསྶ ཙིཏྟཏཱ ཝེདིཏབྦཱ. སབྦཱནིཔི ཧི ཨེཏཱནི ཝིཙིཏྲཱནི ཙིཏྟེནེཝ ཀཏཱནི. ཨལདྡྷོཀཱསསྶ པན ཙིཏྟསྶ ཡཾ ཝཱ པན ཨཝསེསཔཙྩཡཝིཀལཾ ཏསྶ ཨེཀཙྩཙིཏྟཀརཎཱབྷཱཝཏོ ཡདེཏཾ ཙིཏྟེན ཀཏཾ ཨཛ྄ཛྷཏྟིཀཾ ཙིཏྟཾ ཝུཏྟཾ, ཏཏོཔི ཙིཏྟམེཝ ཙིཏྟཏརཾ. ཏེནཱཧ བྷགཝཱ –

‘‘ནཱཧཾ, བྷིཀྑཝེ, ཨཉྙཾ ཨེཀནིཀཱཡམྤི སམནུཔསྶཱམི ཨེཝཾ ཙིཏྟཾ ཡཐཡིདཾ, བྷིཀྑཝེ, ཏིརཙྪཱནགཏཱ པཱཎཱ… ཏེཧིཔི ཁོ, བྷིཀྑཝེ, ཏིརཙྪཱནགཏེཧི པཱཎེཧི ཙིཏྟཾཡེཝ ཙིཏྟཏར’’ནྟི (སཾ. ནི. ༣.༡༠༠).

ཨུཔྤནྣཾ ཧོཏཱིཏི ཨེཏྠ ཝཏྟམཱནབྷཱུཏཱཔགཏོཀཱསཀཏབྷཱུམིལདྡྷཝསེན ཨུཔྤནྣཾ ནཱམ ཨནེཀཔྤབྷེདཾ. ཏཏྠ སབྦམྤི ཨུཔྤཱདཛརཱབྷངྒསམངྒཱིསངྑཱཏཾ ཝཏྟམཱནུཔྤནྣཾ ནཱམ. ཨཱརམྨཎརསཾ ཨནུབྷཝིཏྭཱ ནིརུདྡྷཾ, ཨནུབྷཱུཏཱཔགཏསངྑཱཏཾ ཀུསལཱཀུསལཾ ¶ , ཨུཔྤཱདཱདིཏྟཡཾ ཨནུཔྤཏྭཱ ནིརུདྡྷཾ, བྷཱུཏཱཔགཏསངྑཱཏཾ, སེསསངྑཏཉྩ བྷཱུཏཱཔགཏུཔྤནྣཾ ནཱམ. ‘‘ཡཱནིསྶ ཏཱནི པུབྦེ ཀཏཱནི ཀམྨཱནཱི’’ཏི (མ. ནི. ༣.༢༤༨) ཨེཝམཱདིནཱ ནཡེན ཝུཏྟཾ ཀམྨཾ ཨཏཱིཏམྤི སམཱནཾ, ཨཉྙཾ ཝིཔཱཀཾ པཊིབཱཧིཏྭཱ ཨཏྟནོ ཝིཔཱཀསྶོཀཱསཾ ཀཏྭཱ ཋིཏཏྟཱ, ཏཐཱ ཀཏོཀཱསཉྩ ཝིཔཱཀཾ ཨནུཔྤནྣམྤི སམཱནཾ ཨེཝཾ ཀཏེ ཨོཀཱསེ ཨེཀནྟེན ཨུཔྤཛྫནཏོ ཨོཀཱསཀཏུཔྤནྣཾ ནཱམ. ཏཱསུ ¶ ཏཱསུ བྷཱུམཱིསུ ཨསམཱུཧཏཾ ཨཀུསལཾ བྷཱུམིལདྡྷུཔྤནྣཾ ནཱམ. ཨེཏྠ ཙ བྷཱུམིཡཱ བྷཱུམིལདྡྷསྶ ཙ ནཱནཏྟཾ ཝེདིཏབྦཾ. བྷཱུམཱིཏི ཝིཔསྶནཱཡ ཨཱརམྨཎབྷཱུཏཱ ཏེབྷཱུམཀཱ པཉྩཀྑནྡྷཱ. བྷཱུམིལདྡྷཾ ནཱམ ཏེསུ ཁནྡྷེསུ ཨུཔྤཏྟཱརཧཾ ཀིལེསཛཱཏཾ. ཏེན ཧེསཱ བྷཱུམི ལདྡྷཱ ནཱམ ཧོཏི, ཏསྨཱ བྷཱུམིལདྡྷནྟི ཝུཙྩཏི. ཨེཝམེཏེསུ ཙཏཱུསུ ཨུཔྤནྣེསུ ཨིདྷ ‘ཝཏྟམཱནུཔྤནྣཾ’ ཨདྷིཔྤེཏཾ.

ཏཏྲཱཡཾ ཝཙནཏྠོ – པུབྦནྟཏོ ཨུདྡྷཾ ཨུཔྤཱདཱདིཨབྷིམུཁཾ པནྣནྟི ཨུཔྤནྣཾ. ‘ཨུཔྤནྣ’-སདྡོ པནེས ¶ ཨཏཱིཏེ པཊིལདྡྷེ སམུཊྛིཏེ ཨཝིཀྑམྦྷིཏེ ཨསམུཙྪིནྣེ ཁཎཏྟཡགཏེཏི ཨནེཀེསུ ཨཏྠེསུ དིསྶཏི. ཨཡཉྷི ‘‘ཏེན ཁོ པན, བྷིཀྑཝེ, སམཡེན ཀཀུསནྡྷོ བྷགཝཱ ཨརཧཾ སམྨཱསམྦུདྡྷོ ལོཀེ ཨུཔྤནྣོ’’ཏི (སཾ. ནི. ༢.༡༤༣) ཨེཏྠ ཨཏཱིཏེ ཨཱགཏོ. ‘‘ཨཱཡསྨཏོ ཨཱནནྡསྶ ཨཏིརེཀཙཱིཝརཾ ཨུཔྤནྣཾ ཧོཏཱི’’ཏི (པཱརཱ. ༤༦༡) ཨེཏྠ པཊིལདྡྷེ. ‘‘སེཡྻཐཱཔི, བྷིཀྑཝེ, ཨུཔྤནྣཾ མཧཱམེགྷཾ ཏམེནཾ མཧཱཝཱཏོ ཨནྟརཱཡེཝ ཨནྟརདྷཱཔེཏཱི’’ཏི (སཾ. ནི. ༥.༡༥༧) ཨེཏྠ སམུཊྛིཏེ. ‘‘ཨུཔྤནྣཾ གམིཡཙིཏྟཾ དུཔྤཊིཝིནོདནཱིཡཾ (ཨ. ནི. ༥.༡༦༠; པརི. ༣༢༥); ཨུཔྤནྣུཔྤནྣེ པཱཔཀེ ཨཀུསལེ དྷམྨེ ཋཱནསོ ཨནྟརདྷཱཔེཏཱི’’ཏི (པཱརཱ. ༡༦༥) ཨེཏྠ ཨཝིཀྑམྦྷིཏེ. ‘‘ཨརིཡཾ ཨཊྛངྒིཀཾ མགྒཾ བྷཱཝེནྟོ བཧུལཱིཀརོནྟོ ཨུཔྤནྣུཔྤནྣེ པཱཔཀེ ཨཀུསལེ དྷམྨེ ཋཱནསོ ཨནྟརཱཡེཝ ཨནྟརདྷཱཔེཏཱི’’ཏི (སཾ. ནི. ༥.༡༥༦-༡༥༧) ཨེཏྠ ཨསམུཙྪིནྣེ. ‘‘ཨུཔྤཛྫམཱནཾ ཨུཔྤནྣནྟི? ཨཱམནྟཱ’’ཏི (ཡམ. ༢.ཙིཏྟཡམཀ.༨༡) ཨེཏྠ ཁཎཏྟཡགཏེ. སྭཱཡམིདྷཱཔི ཁཎཏྟཡགཏེཝ དཊྛབྦོ. ཏསྨཱ ‘ཨུཔྤནྣཾ ཧོཏཱི’ཏི ཨེཏྠ ཁཎཏྟཡགཏཾ ཧོཏི, ཝཏྟམཱནཾ ཧོཏི, པཙྩུཔྤནྣཾ ཧོཏཱིཏི. ཨཡཾ སངྑེཔཏྠོ.

ཙིཏྟཾ ཨུཔྤནྣཾ ཧོཏཱིཏི ཙེཏཾ དེསནཱསཱིསམེཝ. ན པན ཙིཏྟཾ ཨེཀཀམེཝ ཨུཔྤཛྫཏི. ཏསྨཱ ཡཐཱ རཱཛཱ ཨཱགཏོཏི ཝུཏྟེ ན པརིསཾ པཧཱཡ ཨེཀཀོཝ ཨཱགཏོ, རཱཛཔརིསཱཡ པན སདྡྷིཾཡེཝ ཨཱགཏོཏི པཉྙཱཡཏི ¶ , ཨེཝམིདམྤི པརོཔཎྞཱསཀུསལདྷམྨེཧི སདྡྷིཾཡེཝ ཨུཔྤནྣནྟི ཝེདིཏབྦཾ. པུབྦངྒམཊྛེན པན ‘‘ཙིཏྟཾ ཨུཔྤནྣཾ ཧོཏི’’ཙྩེཝ ཝུཏྟཾ.

ལོཀིཡདྷམྨཉྷི པཏྭཱ ཙིཏྟཾ ཛེཊྛཀཾ ཙིཏྟཾ དྷུརཾ ཙིཏྟཾ པུབྦངྒམཾ ཧོཏི. ལོཀུཏྟརདྷམྨཾ ¶ པཏྭཱ པཉྙཱ ཛེཊྛིཀཱ པཉྙཱ དྷུརཱ པཉྙཱ པུབྦངྒམཱ. ཏེནེཝ བྷགཝཱ ཝིནཡཔརིཡཱཡཾ པཏྭཱ པཉྷཾ པུཙྪནྟོ ‘ཀིཾཕསྶོསི, ཀིཾཝེདནོསི, ཀིཾསཉྙོསི, ཀིཾཙེཏནོསཱི’ཏི ཨཔུཙྪིཏྭཱ ‘‘ཀིཾཙིཏྟོ ཏྭཾ བྷིཀྑཱུ’’ཏི ཙིཏྟམེཝ དྷུརཾ ཀཏྭཱ པུཙྪཏི. ‘‘ཨཐེཡྻཙིཏྟོ ཨཧཾ བྷགཝཱ’’ཏི ཙ ཝུཏྟེ ‘ཨནཱཔཏྟི ཨཐེཡྻཕསྶསྶཱ’ཏིཨཱདཱིནི ཨཝཏྭཱ ‘‘ཨནཱཔཏྟི བྷིཀྑུ ཨཐེཡྻཙིཏྟསྶཱ’’ཏི ཝདཏི.

ན ཀེཝལཉྩ ཝིནཡཔརིཡཱཡཾ, ཨཉྙམྤི ལོཀིཡདེསནཾ དེསེནྟོ ཙིཏྟམེཝ དྷུརཾ ཀཏྭཱ དེསེཏི. ཡཐཱཧ – ‘‘ཡེ ཀེཙི, བྷིཀྑཝེ, དྷམྨཱ ཨཀུསལཱ ཨཀུསལབྷཱགིཡཱ ཨཀུསལཔཀྑིཀཱ སབྦེཏེ མནོཔུབྦངྒམཱ. མནོ ཏེསཾ དྷམྨཱནཾ པཋམཾ ཨུཔྤཛྫཏི’’ (ཨ. ནི. ༡.༥༦).

‘‘མནོཔུབྦངྒམཱ ¶ དྷམྨཱ, མནོསེཊྛཱ མནོམཡཱ;

མནསཱ ཙེ པདུཊྛེན, བྷཱསཏི ཝཱ ཀརོཏི ཝཱ;

ཏཏོ ནཾ དུཀྑམནྭེཏི, ཙཀྐཾཝ ཝཧཏོ པདཾ.

‘‘མནོཔུབྦངྒམཱ དྷམྨཱ, མནོསེཊྛཱ མནོམཡཱ;

མནསཱ ཙེ པསནྣེན, བྷཱསཏི ཝཱ ཀརོཏི ཝཱ;

ཏཏོ ནཾ སུཁམནྭེཏི, ཚཱཡཱཝ ཨནཔཱཡིནཱི’’. (དྷ. པ. ༡,༢);

‘‘ཙིཏྟེན ནཱིཡཏི ལོཀོ, ཙིཏྟེན པརིཀསྶཏི;

ཙིཏྟསྶ ཨེཀདྷམྨསྶ, སབྦེཝ ཝསམནྭགཱུ’’. (སཾ. ནི. ༡.༦༢);

‘‘ཙིཏྟསཾཀིལེསཱ, བྷིཀྑཝེ, སཏྟཱ སཾཀིལིསྶནྟི ཙིཏྟཝོདཱནཱ ཝིསུཛ྄ཛྷནྟི’’ (སཾ. ནི. ༣.༡༠༠);

‘‘པབྷསྶརམིདཾ, བྷིཀྑཝེ, ཙིཏྟཾ, ཏཉྩ ཁོ ཨཱགནྟུཀེཧི ཨུཔཀྐིལེསེཧི ཨུཔཀྐིལིཊྛཾ’’ (ཨ. ནི. ༡.༤༩);

‘‘ཙིཏྟེ ¶ , གཧཔཏི, ཨརཀྑིཏེ ཀཱཡཀམྨམྤི ཨརཀྑིཏཾ ཧོཏི, ཝཙཱིཀམྨམྤི ཨརཀྑིཏཾ ཧོཏི, མནོཀམྨམྤི ཨརཀྑིཏཾ ཧོཏི; ཙིཏྟེ, གཧཔཏི, རཀྑིཏེ…པེ… ཙིཏྟེ, གཧཔཏི, བྱཱཔནྣེ…པེ… ཙིཏྟེ, གཧཔཏི, ཨབྱཱཔནྣེ…པེ… ཙིཏྟེ, གཧཔཏི, ཨཝསྶུཏེ…པེ… ཙིཏྟེ, གཧཔཏི, ཨནཝསྶུཏེ ཀཱཡཀམྨམྤི ཨནཝསྶུཏཾ ཧོཏི, ཝཙཱིཀམྨམྤི ཨནཝསྶུཏཾ ཧོཏི, མནོཀམྨམྤི ཨནཝསྶུཏཾ ཧོཏཱི’’ཏི (ཨ. ནི. ༣.༡༡༠).

ཨེཝཾ ལོཀིཡདྷམྨཾ པཏྭཱ ཙིཏྟཾ ཛེཊྛཀཾ ཧོཏི, ཙིཏྟཾ དྷུརཾ ཧོཏི, ཙིཏྟཾ པུབྦངྒམཾ ཧོཏཱིཏི ཝེདིཏབྦཾ. ཨིམེསུ ¶ པན སུཏྟེསུ ཨེཀཾ ཝཱ དྭེ ཝཱ ཨགྒཧེཏྭཱ སུཏྟཱནུརཀྑཎཏྠཱཡ སབྦཱནིཔི གཧིཏཱནཱིཏི ཝེདིཏབྦཱནི.

ལོཀུཏྟརདྷམྨཾ པུཙྪནྟོ པན ‘ཀཏརཕསྶཾ ཨདྷིགཏོསི, ཀཏརཝེདནཾ ཀཏརསཉྙཾ ཀཏརཙེཏནཾ ¶ ཀཏརཙིཏྟ’ནྟི ཨཔུཙྪིཏྭཱ, ‘ཀཏརཔཉྙཾ ཏྭཾ བྷིཀྑུ ཨདྷིགཏོ’སི, ‘ཀིཾ པཋམཾ མགྒཔཉྙཾ, ཨུདཱཧུ དུཏིཡཾ…པེ… ཏཏིཡཾ…པེ… ཙཏུཏྠཾ མགྒཔཉྙཾ ཨདྷིགཏོ’ཏི པཉྙཾ ཛེཊྛིཀཾ པཉྙཾ དྷུརཾ ཀཏྭཱ པུཙྪཏི. པཉྙུཏྟརཱ སབྦེ ཀུསལཱ དྷམྨཱ ན པརིཧཱཡནྟི. པཉྙཱ པན ཀིམཏྠིཡཱ (མ. ནི. ༡.༤༥༡)? ‘‘པཉྙཝཏོ, བྷིཀྑཝེ, ཨརིཡསཱཝཀསྶ ཏདནྭཡཱ སདྡྷཱ སཎྛཱཏི, ཏདནྭཡཾ ཝཱིརིཡཾ སཎྛཱཏི, ཏདནྭཡཱ སཏི སཎྛཱཏི, ཏདནྭཡོ སམཱདྷི སཎྛཱཏཱི’’ཏི (སཾ. ནི. ༥.༥༡༥) ཨེཝམཱདཱིནི པནེཏྠ སུཏྟཱནི དཊྛབྦཱནི. ཨིཏི ལོཀུཏྟརདྷམྨཾ པཏྭཱ པཉྙཱ ཛེཊྛིཀཱ ཧོཏི པཉྙཱ དྷུརཱ པཉྙཱ པུབྦངྒམཱཏི ཝེདིཏབྦཱ. ཨཡཾ པན ལོཀིཡདེསནཱ. ཏསྨཱ ཙིཏྟཾ དྷུརཾ ཀཏྭཱ དེསེནྟོ ‘‘ཙིཏྟཾ ཨུཔྤནྣཾ ཧོཏཱི’’ཏི ཨཱཧ.

སོམནསྶསཧགཏནྟི སཱཏམདྷུརཝེདཡིཏསངྑཱཏེན སོམནསྶེན སཧ ཨེཀུཔྤཱདཱདིབྷཱཝཾ གཏཾ. ཨཡཾ པན ‘སཧགཏ’-སདྡོ ཏབྦྷཱཝེ ཝོཀིཎྞེ ནིསྶཡེ ཨཱརམྨཎེ སཾསཊྛེཏི ཨིམེསུ ཨཏྠེསུ དིསྶཏི. ཏཏྠ ‘‘ཡཱཡཾ ཏཎྷཱ པོནོབྦྷཝིཀཱ ནནྡིརཱགསཧགཏཱ’’ཏི (ཝིབྷ. ༢༠༣) ཏབྦྷཱཝེ ཝེདིཏབྦོ; ནནྡིརཱགབྷཱུཏཱཏི ཨཏྠོ. ‘‘ཡཱ, བྷིཀྑཝེ, ཝཱིམཾསཱ ཀོསཛྫསཧགཏཱ ཀོསཛྫསམྤཡུཏྟཱ’’ཏི (སཾ. ནི. ༥.༨༣༢) ཝོཀིཎྞེ ཝེདིཏབྦོ; ཨནྟརནྟརཱ ཨུཔྤཛྫམཱནེན ཀོསཛྫེན ཝོཀིཎྞཱཏི ཨཡམེཏྠ ཨཏྠོ. ‘‘ཨཊྛིཀསཉྙཱསཧགཏཾ ¶ སཏིསམྦོཛ྄ཛྷངྒཾ བྷཱཝེཏཱི’’ཏི (སཾ. ནི. ༥.༢༣༨) ནིསྶཡེ ཝེདིཏབྦོ; ཨཊྛིཀསཉྙཾ ནིསྶཱཡ ཨཊྛིཀསཉྙཾ བྷཱཝེཏྭཱ པཊིལདྡྷནྟི ཨཏྠོ. ‘‘ལཱབྷཱི ཧོཏི རཱུཔསཧགཏཱནཾ ཝཱ སམཱཔཏྟཱིནཾ ཨརཱུཔསཧགཏཱནཾ ཝཱ’’ཏི (པུ. པ. ༣-༥) ཨཱརམྨཎེ; ཝེདིཏབྦོ རཱུཔཱརཱུཔཱརམྨཎཱནནྟི ཨཏྠོ. ‘‘ཨིདཾ སུཁཾ ཨིམཱཡ པཱིཏིཡཱ སཧགཏཾ ཧོཏི སཧཛཱཏཾ ¶ སཾསཊྛཾ སམྤཡུཏྟ’’ནྟི (ཝིབྷ. ༥༧༨) སཾསཊྛེ. ཨིམསྨིམྤི པདེ ཨཡམེཝཏྠོ ཨདྷིཔྤེཏོ. སོམནསྶསཾསཊྛཉྷི ཨིདྷ སོམནསྶསཧགཏནྟི ཝུཏྟཾ.

‘སཾསཊྛ’-སདྡོཔི ཙེས སདིསེ ཨཝསྶུཏེ མིཏྟསནྠཝེ སཧཛཱཏེཏི བཧཱུསུ ཨཏྠེསུ དིསྶཏི. ཨཡཉྷི ‘‘ཀིསེ ཐཱུལེ ཝིཝཛྫེཏྭཱ སཾསཊྛཱ ཡོཛིཏཱ ཧཡཱ’’ཏི (ཛཱ. ༢.༢༢.༧༠) ཨེཏྠ སདིསེ ཨཱགཏོ. ‘‘སཾསཊྛཱཝ ཏུམྷེ ཨཡྻེ ཝིཧརཐཱ’’ཏི (པཱཙི. ༧༢༧) ཨཝསྶུཏེ. ‘‘གིཧི སཾསཊྛོ ཝིཧརཏཱི’’ཏི (སཾ. ནི. ༣.༣) མིཏྟསནྠཝེ. ‘‘ཨིདཾ སུཁཾ ཨིམཱཡ པཱིཏིཡཱ སཧགཏཾ ཧོཏི སཧཛཱཏཾ སཾསཊྛཾ སམྤཡུཏྟ’’ནྟི སཧཛཱཏེ. ཨིདྷཱཔི སཧཛཱཏེ ཨདྷིཔྤེཏོ. ཏཏྠ ‘སཧགཏཾ’ ཨསཧཛཱཏཾ ཨསཾསཊྛཾ ཨསམྤཡུཏྟཾ ནཱམ ནཏྠི. སཧཛཱཏཾ པན སཾསཊྛཾ སམྤཡུཏྟཾ ཧོཏིཔི, ན ཧོཏིཔི ¶ . རཱུཔཱརཱུཔདྷམྨེསུ ཧི ཨེཀཏོ ཛཱཏེསུ རཱུཔཾ ཨརཱུཔེན སཧཛཱཏཾ ཧོཏི, ན སཾསཊྛཾ, ན སམྤཡུཏྟཾ; ཏཐཱ ཨརཱུཔཾ རཱུཔེན; རཱུཔཉྩ རཱུཔེན; ཨརཱུཔཾ པན ཨརཱུཔེན སདྡྷིཾ ནིཡམཏོཝ སཧགཏཾ སཧཛཱཏཾ སཾསཊྛཾ སམྤཡུཏྟམེཝ ཧོཏཱིཏི. ཏཾ སནྡྷཱཡ ཝུཏྟཾ ‘སོམནསྶསཧགཏ’ནྟི.

ཉཱཎསམྤཡུཏྟནྟི ཉཱཎེན སམྤཡུཏྟཾ, སམཾ ཨེཀུཔྤཱདཱདིཔྤཀཱརེཧི ཡུཏྟནྟི ཨཏྠོ. ཡཾ པནེཏྠ ཝཏྟབྦཾ སིཡཱ ཏཾ མཱཏིཀཱཝཎྞནཱཡ ཝེདནཱཏྟིཀེ ཝུཏྟནཡམེཝ. ཏསྨཱ ཨེཀུཔྤཱདཱ ཨེཀནིརོདྷཱ ཨེཀཝཏྠུཀཱ ཨེཀཱརམྨཎཱཏི ཨིམིནཱ ལཀྑཎེནེཏཾ སམྤཡུཏྟནྟི ཝེདིཏབྦཾ. ཨུཀྐཊྛནིདྡེསོ ཙེས. ཨརཱུཔེ པན ཝིནཱཔི ཨེཀཝཏྠུཀབྷཱཝཾ སམྤཡོགོ ལབྦྷཏི.

ཨེཏྟཱཝཏཱ ཀིཾ ཀཐིཏཾ? ཀཱམཱཝཙརཀུསལེསུ སོམནསྶསཧགཏཾ ཏིཧེཏུཀཾ ཉཱཎསམྤཡུཏྟཾ ཨསངྑཱརིཀཾ མཧཱཙིཏྟཾ ཀཐིཏཾ. ‘‘ཀཏམེ དྷམྨཱ ཀུསལཱ’’ཏི ཧི ཨནིཡམིཏཔུཙྪཱཡ ཙཏུབྷཱུམཀཀུསལཾ གཧིཏཾ. ‘ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏཱི’ཏི ཝཙནེན པན ཏེབྷཱུམཀཾ ཀུསལཾ ¶ པརིཙྩཛིཏྭཱ, ཨཊྛཝིདྷཾ ཀཱམཱཝཙརཀུསལམེཝ གཧིཏཾ. ‘སོམནསྶསཧགཏ’ནྟི ཝཙནེན ཏཏོ ཙཏུབྦིདྷཾ ཨུཔེཀྑཱསཧགཏཾ པརིཙྩཛིཏྭཱ ཙཏུབྦིདྷཾ སོམནསྶསཧགཏམེཝ གཧིཏཾ. ‘ཉཱཎསམྤཡུཏྟ’ནྟི ཝཙནེན ཏཏོ དུཝིདྷཾ ཉཱཎཝིཔྤཡུཏྟཾ པརིཙྩཛིཏྭཱ དྭེ ¶ ཉཱཎསམྤཡུཏྟཱནེཝ གཧིཏཱནི. ཨསངྑཱརིཀབྷཱཝོ པན ཨནཱབྷཊྛཏཱཡེཝ ན གཧིཏོ. ཀིཉྩཱཔི ན གཧིཏོ, པརཏོ པན ‘སསངྑཱརེནཱ’ཏི ཝཙནཏོ ཨིདྷ ‘ཨསངྑཱརེནཱ’ཏི ཨཝུཏྟེཔི ཨསངྑཱརིཀབྷཱཝོ ཝེདིཏབྦོ. སམྨཱསམྦུདྡྷོ ཧི ཨཱདིཏོཝ ཨིདཾ མཧཱཙིཏྟཾ བྷཱཛེཏྭཱ དསྶེཏུཾ ནིཡམེཏྭཱཝ ཨིམཾ དེསནཾ ཨཱརབྷཱིཏི ཨེཝམེཏྠ སནྣིཊྛཱནཾ ཀཏནྟི ཝེདིཏབྦཾ.

ཨིདཱནི ཏམེཝ ཙིཏྟཾ ཨཱརམྨཎཏོ དསྶེཏུཾ རཱུཔཱརམྨཎཾ ཝཱཏིཨཱདིམཱཧ. བྷགཝཱ ཧི ཨརཱུཔདྷམྨཾ དསྶེནྟོ ཝཏྠུནཱ ཝཱ དསྶེཏི, ཨཱརམྨཎེན ཝཱ, ཝཏྠཱརམྨཎེཧི ཝཱ, སརསབྷཱཝེན ཝཱ. ‘‘ཙཀྑུསམྥསྶོ…པེ… མནོསམྥསྶོ; ཙཀྑུསམྥསྶཛཱ ཝེདནཱ…པེ… མནོསམྥསྶཛཱ ཝེདནཱ; ཙཀྑུཝིཉྙཱཎཾ…པེ… མནོཝིཉྙཱཎ’’ནྟིཨཱདཱིསུ ཧི ཝཏྠུནཱ ཨརཱུཔདྷམྨཱ དསྶིཏཱ. ‘‘རཱུཔསཉྙཱ…པེ… དྷམྨསཉྙཱ, རཱུཔསཉྩེཏནཱ…པེ… དྷམྨསཉྩེཏནཱ’’ཏིཨཱདཱིསུ ཨཱརམྨཎེན. ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎཾ, ཏིཎྞཾ སངྒཏི ཕསྶོ…པེ… མནཉྩ པཊིཙྩ དྷམྨེ ཙ ཨུཔྤཛྫཏི མནོཝིཉྙཱཎཾ, ཏིཎྞཾ སངྒཏི ཕསྶོ’’ཏིཨཱདཱིསུ (སཾ. ནི. ༤.༦༠) ཝཏྠཱརམྨཎེཧི. ‘‘ཨཝིཛྫཱཔཙྩཡཱ ¶ , བྷིཀྑཝེ, སངྑཱརཱ, སངྑཱརཔཙྩཡཱ ཝིཉྙཱཎ’’ནྟིཨཱདཱིསུ (སཾ. ནི. ༢.༡) སརསབྷཱཝེན ཨརཱུཔདྷམྨཱ དསྶིཏཱ. ཨིམསྨིཾ པན ཋཱནེ ཨཱརམྨཎེན དསྶེནྟོ ‘རཱུཔཱརམྨཎཾ’ ཝཱཏིཨཱདིམཱཧ.

ཏཏྠ ཙཏུསམུཊྛཱནཾ ཨཏཱིཏཱནཱགཏཔཙྩུཔྤནྣཾ རཱུཔམེཝ རཱུཔཱརམྨཎཾ. དྭིསམུཊྛཱནོ ཨཏཱིཏཱནཱགཏཔཙྩུཔྤནྣོ སདྡོཝ སདྡཱརམྨཎཾ. ཙཏུསམུཊྛཱནོ ཨཏཱིཏཱནཱགཏཔཙྩུཔྤནྣོ གནྡྷོཝ གནྡྷཱརམྨཎཾ. ཙཏུསམུཊྛཱནོ ཨཏཱིཏཱནཱགཏཔཙྩུཔྤནྣོ རསོཝ རསཱརམྨཎཾ. ཙཏུསམུཊྛཱནཾ ཨཏཱིཏཱནཱགཏཔཙྩུཔྤནྣཾ ཕོཊྛབྦམེཝ ཕོཊྛབྦཱརམྨཎཾ. ཨེཀསམུཊྛཱནཱ དྭིསམུཊྛཱནཱ ཏིསམུཊྛཱནཱ ཙཏུསམུཊྛཱནཱ ནཀུཏོཙིསམུཊྛཱནཱ ཨཏཱིཏཱནཱགཏཔཙྩུཔྤནྣཱ ཙིཏྟཙེཏསིཀཱ, ཏཐཱ ནཝཏྟབྦཱ ཙ, ཝུཏྟཱཝསེསཱ ཙིཏྟགོཙརསངྑཱཏཱ དྷམྨཱཡེཝ དྷམྨཱརམྨཎཾ. ཡེ ¶ པན ཨནཱཔཱཐགཏཱ རཱུཔཱདཡོཔི དྷམྨཱརམྨཎམིཙྩེཝ ཝདནྟི ཏེ ཨིམིནཱ སུཏྟེན པཊིཀྑིཔིཏབྦཱ. ཝུཏྟཉྷེཏཾ –

‘‘ཨིམེསཾ ¶ ཁོ, ཨཱཝུསོ, པཉྩནྣཾ ཨིནྡྲིཡཱནཾ ནཱནཱཝིསཡཱནཾ ནཱནཱགོཙརཱནཾ ན ཨཉྙམཉྙསྶ གོཙརཝིསཡཾ པཙྩནུབྷོནྟཱནཾ མནོ པཊིསརཎཾ མནོ ནེསཾ གོཙརཝིསཡཾ པཙྩནུབྷོཏཱི’’ཏི (མ. ནི. ༡.༤༥༥).

ཨེཏེསཉྷི རཱུཔཱརམྨཎཱདཱིནི གོཙརཝིསཡོ ནཱམ. ཏཱནི མནེན པཙྩནུབྷཝིཡམཱནཱནིཔི རཱུཔཱརམྨཎཱདཱིནིཡེཝཱཏི ཨཡམཏྠོ སིདྡྷོ ཧོཏི. དིབྦཙཀྑུཉཱཎཱདཱིནཉྩ རཱུཔཱདིཨཱརམྨཎཏྟཱཔི ཨཡམཏྠོ སིདྡྷོཡེཝ ཧོཏི. ཨནཱཔཱཐགཏཱནེཝ ཧི རཱུཔཱརམྨཎཱདཱིནི དིབྦཙཀྑུཨཱདཱིནཾ ཨཱརམྨཎཱནི, ན ཙ ཏཱནི དྷམྨཱརམྨཎཱནི བྷཝནྟཱིཏི ཝུཏྟནཡེནེཝ ཨཱརམྨཎཝཝཏྠཱནཾ ཝེདིཏབྦཾ.

ཏཏྠ ཨེཀེཀཾ ཨཱརམྨཎཾ དྭཱིསུ དྭཱིསུ དྭཱརེསུ ཨཱཔཱཐམཱགཙྪཏི. རཱུཔཱརམྨཎཉྷི ཙཀྑུཔསཱདཾ གྷཊྚེཏྭཱ ཏངྑཎཉྙེཝ མནོདྭཱརེ ཨཱཔཱཐམཱགཙྪཏི; བྷཝངྒཙལནསྶ པཙྩཡོ ཧོཏཱིཏི ཨཏྠོ. སདྡགནྡྷརསཕོཊྛབྦཱརམྨཎེསུཔི ཨེསེཝ ནཡོ. ཡཐཱ ཧི སཀུཎོ ཨཱཀཱསེནཱགནྟྭཱ རུཀྑགྒེ ནིལཱིཡམཱནོཝ རུཀྑསཱཁཉྩ གྷཊྚེཏི, ཚཱཡཱ ཙསྶ པཐཝིཡཾ པཊིཧཉྙཏི སཱཁཱགྷཊྚནཚཱཡཱཕརཎཱནི ཨཔུབྦཾ ཨཙརིམཾ ཨེཀཀྑཎེཡེཝ བྷཝནྟི, ཨེཝཾ པཙྩུཔྤནྣརཱུཔཱདཱིནཾ ཙཀྑུཔསཱདཱདིགྷཊྚནཉྩ བྷཝངྒཙལནསམཏྠཏཱཡ མནོདྭཱརེ ཨཱཔཱཐགམནཉྩ ཨཔུབྦཾ ཨཙརིམཾ ཨེཀཀྑཎེཡེཝ ¶ ཧོཏི. ཏཏོ བྷཝངྒཾ ཝིཙྪིནྡིཏྭཱ ཙཀྑུདྭཱརཱདཱིསུ ཨུཔྤནྣཱནཾ ཨཱཝཛྫནཱདཱིནཾ ཝོཊྛབྦནཔརིཡོསཱནཱནཾ ཨནནྟརཱ ཏེསཾ ཨཱརམྨཎཱནཾ ཨཉྙཏརསྨིཾ ཨིདཾ མཧཱཙིཏྟཾ ཨུཔྤཛྫཏི.

སུདྡྷམནོདྭཱརེ པན པསཱདགྷཊྚནཀིཙྩཾ ནཏྠི. པཀཏིཡཱ དིཊྛསུཏགྷཱཡིཏསཱཡིཏཕུཊྛཝསེནེཝ ཨེཏཱནི ཨཱརམྨཎཱནི ཨཱཔཱཐམཱགཙྪནྟི. ཀཐཾ? ཨིདྷེཀཙྩོ ཀཏསུདྷཱཀམྨཾ ཧརིཏཱལམནོསིལཱདིཝཎྞཝིཙིཏྟཾ པགྒཧིཏནཱནཔྤཀཱརདྷཛཔཊཱཀཾ མཱལཱདཱམཝིནདྡྷཾ དཱིཔམཱལཱཔརིཀྑིཏྟཾ ཨཏིམནོརམཱཡ སིརིཡཱ ཝིརོཙམཱནཾ ཨལངྐཏཔཊིཡཏྟཾ མཧཱཙེཏིཡཾ པདཀྑིཎཾ ཀཏྭཱ སོལ༹སསུ པཱདཔིཊྛིཀཱསུ པཉྩཔཏིཊྛིཏེན ཝནྡིཏྭཱ ཨཉྫལིཾ པགྒཡ྄ཧ ཨུལློཀེནྟོ བུདྡྷཱརམྨཎཾ ¶ པཱིཏིཾ གཧེཏྭཱ ཏིཊྛཏི. ཏསྶ ཨེཝཾ ཙེཏིཡཾ པསྶིཏྭཱ བུདྡྷཱརམྨཎཾ པཱིཏིཾ ནིབྦཏྟེཏྭཱ ཨཔརབྷཱགེ ཡཏྠ ཀཏྠཙི གཏསྶ རཏྟིཊྛཱནདིཝཱཊྛཱནེསུ ¶ ནིསིནྣསྶ ཨཱཝཛྫམཱནསྶ ཨལངྐཏཔཊིཡཏྟཾ མཧཱཙེཏིཡཾ ཙཀྑུདྭཱརེ ཨཱཔཱཐམཱགཏསདིསམེཝ ཧོཏི, པདཀྑིཎཾ ཀཏྭཱ ཙེཏིཡཝནྡནཀཱལོ ཝིཡ ཧོཏི. ཨེཝཾ ཏཱཝ དིཊྛཝསེན རཱུཔཱརམྨཎཾ ཨཱཔཱཐམཱགཙྪཏི.

མདྷུརེན པན སརེན དྷམྨཀཐིཀསྶ ཝཱ དྷམྨཾ ཀཐེནྟསྶ, སརབྷཱཎཀསྶ ཝཱ སརེན བྷཎནྟསྶ སདྡཾ སུཏྭཱ ཨཔརབྷཱགེ ཡཏྠ ཀཏྠཙི ནིསཱིདིཏྭཱ ཨཱཝཛྫམཱནསྶ དྷམྨཀཐཱ ཝཱ སརབྷཉྙཾ ཝཱ སོཏདྭཱརེ ཨཱཔཱཐམཱགཏཾ ཝིཡ ཧོཏི, སཱདྷུཀཱརཾ དཏྭཱ སུཎནཀཱལོ ཝིཡ ཧོཏི. ཨེཝཾ སུཏཝསེན སདྡཱརམྨཎཾ ཨཱཔཱཐམཱགཙྪཏི.

སུགནྡྷཾ པན གནྡྷཾ ཝཱ མཱལཾ ཝཱ ལབྷིཏྭཱ ཨཱསནེ ཝཱ ཙེཏིཡེ ཝཱ གནྡྷཱརམྨཎེན ཙིཏྟེན པཱུཛཾ ཀཏྭཱ ཨཔརབྷཱགེ ཡཏྠ ཀཏྠཙི ནིསཱིདིཏྭཱ ཨཱཝཛྫམཱནསྶ ཏཾ གནྡྷཱརམྨཎཾ གྷཱནདྭཱརེ ཨཱཔཱཐམཱགཏཾ ཝིཡ ཧོཏི, པཱུཛཱཀརཎཀཱལོ ཝིཡ ཧོཏི. ཨེཝཾ གྷཱཡིཏཝསེན གནྡྷཱརམྨཎཾ ཨཱཔཱཐམཱགཙྪཏི.

པཎཱིཏཾ པན ཁཱདནཱིཡཾ ཝཱ བྷོཛནཱིཡཾ ཝཱ སབྲཧྨཙཱརཱིཧི སདྡྷིཾ སཾཝིབྷཛིཏྭཱ པརིབྷུཉྫིཏྭཱ ཨཔརབྷཱགེ ཡཏྠ ཀཏྠཙི ཀུདྲཱུསཀཱདིབྷོཛནཾ ལབྷིཏྭཱ ‘ཨསུཀཀཱལེ པཎཱིཏཾ བྷོཛནཾ སབྲཧྨཙཱརཱིཧི སདྡྷིཾ སཾཝིབྷཛིཏྭཱ པརིབྷུཏྟ’ནྟི ཨཱཝཛྫམཱནསྶ ཏཾ རསཱརམྨཎཾ ཛིཝ྄ཧཱདྭཱརེ ཨཱཔཱཐམཱགཏཾ ཝིཡ ཧོཏི, པརིབྷུཉྫནཀཱལོ ཝིཡ ཧོཏི. ཨེཝཾ སཱཡིཏཝསེན རསཱརམྨཎཾ ཨཱཔཱཐམཱགཙྪཏི.

མུདུཀཾ ¶ པན སུཁསམྥསྶཾ མཉྩཾ ཝཱ པཱིཋཾ ཝཱ ཨཏྠརཎཔཱཔུརཎཾ ཝཱ པརིབྷུཉྫིཏྭཱ ཨཔརབྷཱགེ ཡཏྠ ཀཏྠཙི དུཀྑསེཡྻཾ ཀཔྤེཏྭཱ ‘ཨསུཀཀཱལེ མེ མུདུཀཾ མཉྩཔཱིཋཾ ཨཏྠརཎཔཱཝུརཎཾ པརིབྷུཏྟ’ནྟི ཨཱཝཛྫམཱནསྶ ཏཾ ཕོཊྛབྦཱརམྨཎཾ ཀཱཡདྭཱརེ ཨཱཔཱཐམཱགཏཾ ཝིཡ ཧོཏི. སུཁསམྥསྶཾ ཝེདཡིཏཀཱལོ ཝིཡ ཧོཏི. ཨེཝཾ ཕུཊྛཝསེན ཕོཊྛབྦཱརམྨཎཾ ཨཱཔཱཐམཱགཙྪཏི. ཨེཝཾ སུདྡྷམནོདྭཱརེ པསཱདགྷཊྚནཀིཙྩཾ ནཏྠི. པཀཏིཡཱ དིཊྛསུཏགྷཱཡིཏསཱཡིཏཕུཊྛཝསེནེཝ ཨེཏཱནི ཨཱརམྨཎཱནི ཨཱཔཱཐམཱགཙྪནྟཱིཏི ཝེདིཏབྦཱནི.

ཨིདཱནི ¶ པཀཏིཡཱ དིཊྛཱདཱིནཾ ཝསེན ཨཱཔཱཐགམནེ ཨཡམཔརོཔི ¶ ཨཊྛཀཐཱམུཏྟཀོ ནཡོ ཧོཏི. དིཊྛཾ སུཏཾ ཨུབྷཡསམྦནྡྷནྟི ཨིམེ ཏཱཝ དིཊྛཱདཡོ ཝེདིཏབྦཱ. ཏཏྠ ‘དིཊྛཾ’ ནཱམ པཉྩདྭཱརཝསེན གཧིཏཔུབྦཾ. ‘སུཏ’ནྟི པཙྩཀྑཏོ ཨདིསྭཱ ཨནུསྶཝཝསེན གཧིཏཱ རཱུཔཱདཡོཝ. ཏེཧི དྭཱིཧིཔི སམྦནྡྷཾ ‘ཨུབྷཡསམྦནྡྷཾ’ ནཱམ. ཨིཏི ཨིམེསམྤི དིཊྛཱདཱིནཾ ཝསེན ཨེཏཱནི མནོདྭཱརེ ཨཱཔཱཐམཱགཙྪནྟཱིཏི ཝེདིཏབྦཱནི. ཏཏྠ དིཊྛཝསེན ཏཱཝ ཨཱཔཱཐགམནཾ ཧེཊྛཱ པཉྩཧི ནཡེཧི ཝུཏྟམེཝ.

ཨེཀཙྩོ པན སུཎཱཏི – ‘བྷགཝཏོ པུཉྙཱཏིསཡནིབྦཏྟཾ ཨེཝརཱུཔཾ ནཱམ རཱུཔཾ, ཨཏིམདྷུརོ སདྡོ, ཀིསྨིཉྩི པདེསེ ཀེསཉྩི པུཔྥཱནཾ ཨཏིམནུཉྙོ གནྡྷོ, ཀེསཉྩི ཕལཱནཾ ཨཏིམདྷུརོ རསོ, ཀེསཉྩི པཱཝུརཎཱདཱིནཾ ཨཏིསུཁོ སམྥསྶོ’ཏི. ཏསྶ, ཙཀྑུཔསཱདཱདིགྷཊྚནཾ ཝིནཱ, སུཏམཏྟཱནེཝ ཏཱནི མནོདྭཱརེ ཨཱཔཱཐམཱགཙྪནྟི. ཨཐསྶ ཏཾ ཙིཏྟཾ ཏསྨིཾ རཱུཔེ ཝཱ སདྡེ ཝཱ པསཱདཝསེན གནྡྷཱདཱིསུ ཨརིཡཱནཾ དཱཏུཀཱམཏཱཝསེན ཨཉྙེཧི དིནྣེསུ ཨནུམོདནཱཝསེན ཝཱ པཝཏྟཏི. ཨེཝཾ སུཏཝསེན ཨེཏཱནི མནོདྭཱརེ ཨཱཔཱཐམཱགཙྪནྟི.

ཨཔརེན པན ཡཐཱཝུཏྟཱནི རཱུཔཱདཱིནི དིཊྛཱནི ཝཱ སུཏཱནི ཝཱ ཧོནྟི. ཏསྶ ‘ཨཱིདིསཾ རཱུཔཾ ཨཱཡཏིཾ ཨུཔྤཛྫནཀབུདྡྷསྶཱཔི བྷཝིསྶཏཱི’ཏིཨཱདིནཱ ནཡེན ཙཀྑུཔསཱདཱདིགྷཊྚནཾ ཝིནཱ དིཊྛསུཏསམྦནྡྷེནེཝ ཏཱནི མནོདྭཱརེ ཨཱཔཱཐམཱགཙྪནྟི. ཨཐསྶ ཧེཊྛཱ ཝུཏྟནཡེནེཝ ཏེསུ ཨཉྙཏརཱརམྨཎཾ ཨིདཾ མཧཱཙིཏྟཾ པཝཏྟཏི. ཨེཝཾ ཨུབྷཡསམྦནྡྷཝསེན ཨེཏཱནི མནོདྭཱརེ ཨཱཔཱཐམཱགཙྪནྟི.

ཨིདམྤི ཙ མུཁམཏྟམེཝ. སདྡྷཱརུཙིཨཱཀཱརཔརིཝིཏཀྐདིཊྛིནིཛ྄ཛྷཱནཀྑནྟིཨཱདཱིནཾ པན ཝསེན ¶ ཝིཏྠཱརཏོ ཨེཏེསཾ མནོདྭཱརེ ཨཱཔཱཐགམནཾ ཝེདིཏབྦམེཝ. ཡསྨཱ པན ཨེཝཾ ཨཱཔཱཐཾ ཨཱགཙྪནྟཱནི བྷཱུཏཱནིཔི ཧོནྟི ཨབྷཱུཏཱནིཔི, ཏསྨཱ ཨཡཾ ནཡོ ཨཊྛཀཐཱཡཾ ན གཧིཏོ. ཨེཝཾ ཨེཀེཀཱརམྨཎཾ ཛཝནཾ དྭཱིསུ དྭཱིསུ དྭཱརེསུ ཨུཔྤཛྫཏཱིཏི ཝེདིཏབྦཾ. རཱུཔཱརམྨཎཉྷི ཛཝནཾ ཙཀྑུདྭཱརེཔི ཨུཔྤཛྫཏི མནོདྭཱརེཔི. སདྡཱདིཨཱརམྨཎེསུཔི ཨེསེཝ ནཡོ.

ཏཏྠ མནོདྭཱརེ ཨུཔྤཛྫམཱནཾ རཱུཔཱརམྨཎཾ ཛཝནཾ དཱནམཡཾ སཱིལམཡཾ བྷཱཝནཱམཡནྟི ཏིཝིདྷཾ ཧོཏི ¶ . ཏེསུ ཨེཀེཀཾ ཀཱཡཀམྨཾ ཝཙཱིཀམྨཾ མནོཀམྨནྟི ¶ ཏིཝིདྷམེཝ ཧོཏི. སདྡགནྡྷརསཕོཊྛབྦདྷམྨཱརམྨཎེསུཔི ཨེསེཝ ནཡོ.

ཏཏྠ རཱུཔཾ ཏཱཝ ཨཱརམྨཎཾ ཀཏྭཱ ཨུཔྤཛྫམཱནཾ ཨེཏཾ མཧཱཀུསལཙིཏྟཾ ནཱིལཔཱིཏལོཧིཏོདཱཏཝཎྞེསུ པུཔྥཝཏྠདྷཱཏཱུསུ ཨཉྙཏརཾ སུབྷནིམིཏྟསངྑཱཏཾ ཨིཊྛཾ ཀནྟཾ མནཱཔཾ རཛནཱིཡཾ ཝཎྞཾ ཨཱརམྨཎཾ ཀཏྭཱ ཨུཔྤཛྫཏི. ནནུ ཙེཏཾ ཨིཊྛཱརམྨཎཾ ལོབྷསྶ ཝཏྠུ? ཀཐཾ ཨེཏཾ ཙིཏྟཾ ཀུསལཾ ནཱམ ཛཱཏནྟི? ནིཡམིཏཝསེན པརིཎཱམིཏཝསེན སམུདཱཙཱརཝསེན ཨཱབྷུཛིཏཝསེནཱཏི. ཡསྶ ཧི ‘ཀུསལམེཝ མཡཱ ཀཏྟབྦ’ནྟི ཀུསལཀརཎེ ཙིཏྟཾ ནིཡམིཏཾ ཧོཏི, ཨཀུསལཔྤཝཏྟིཏོ ནིཝཏྟེཏྭཱ ཀུསལཀརཎེཡེཝ པརིཎཱམིཏཾ, ཨབྷིཎྷཀརཎེན ཀུསལསམུདཱཙཱརེནེཝ སམུདཱཙརིཏཾ, པཏིརཱུཔདེསཝཱསསཔྤུརིསཱུཔནིསྶཡསདྡྷམྨསཝནཔུབྦེཀཏཔུཉྙཏཱདཱིཧི ཙ ཨུཔནིསྶཡེཧི ཡོནིསོ ཙ ཨཱབྷོགོ པཝཏྟཏི, ཏསྶ ཨིམིནཱ ནིཡམིཏཝསེན པརིཎཱམིཏཝསེན སམུདཱཙཱརཝསེན ཨཱབྷུཛིཏཝསེན ཙ ཀུསལཾ ནཱམ ཛཱཏཾ ཧོཏི.

ཨཱརམྨཎཝསེན པནེཏྠ སོམནསྶསཧགཏབྷཱཝོ ཝེདིཏབྦོ. ཨིཊྛཱརམྨཎསྨིཉྷི ཨུཔྤནྣཏྟཱ ཨེཏཾ སོམནསྶསཧགཏཾ ཛཱཏཾ. སདྡྷཱབཧུལཏཱདཱིནིཔེཏྠ ཀཱརཎཱནིཡེཝ. ཨསྶདྡྷཱནཉྷི མིཙྪཱདིཊྛཱིནཉྩ ཨེཀནྟཨིཊྛཱརམྨཎབྷཱུཏཾ ཏཐཱགཏརཱུཔམྤི དིསྭཱ སོམནསྶཾ ནུཔྤཛྫཏི. ཡེ ཙ ཀུསལཔྤཝཏྟིཡཾ ཨཱནིསཾསཾ ན པསྶནྟི ཏེསཾ པརེཧི ཨུསྶཱཧིཏཱནཾ ཀུསལཾ ཀརོནྟཱནམྤི སོམནསྶཾ ནུཔྤཛྫཏི. ཏསྨཱ སདྡྷཱབཧུལཏཱ ཝིསུདྡྷདིཊྛིཏཱ ཨཱནིསཾསདསྶཱཝིཏཱཏི. ཨེཝམྤེཏྠ སོམནསྶསཧགཏབྷཱཝོ ཝེདིཏབྦོ. ཨཔིཙ ཨེཀཱདསདྷམྨཱ པཱིཏིསམྦོཛ྄ཛྷངྒསྶ ཨུཔྤཱདཱཡ སཾཝཏྟནྟི – བུདྡྷཱནུསྶཏི དྷམྨཱནུསྶཏི སངྒྷཱནུསྶཏི སཱིལཱནུསྶཏི ཙཱགཱནུསྶཏི དེཝཏཱནུསྶཏི ཨུཔསམཱནུསྶཏི ལཱུཁཔུགྒལཔརིཝཛྫནཏཱ སིནིདྡྷཔུགྒལསེཝནཏཱ པསཱདནཱིཡསུཏྟནྟཔཙྩཝེཀྑཎཏཱ ཏདདྷིམུཏྟཏཱཏི ¶ . ཨིམེཧིཔི ¶ ཀཱརཎེཧེཏྠ སོམནསྶསཧགཏབྷཱཝོ ཝེདིཏབྦོ. ཨིམེསཾ པན ཝིཏྠཱརོ བོཛ྄ཛྷངྒཝིབྷངྒེ (ཝིབྷ. ཨཊྛ. ༣༦༧ བོཛ྄ཛྷངྒཔབྦཝཎྞནཱ, ༤༦༨-༤༦༩) ཨཱཝི བྷཝིསྶཏི.

ཀམྨཏོ, ཨུཔཔཏྟིཏོ, ཨིནྡྲིཡཔརིཔཱཀཏོ, ཀིལེསདཱུརཱིབྷཱཝཏོཏི ཨིམེཧི པནེཏྠ ཀཱརཎེཧི ཉཱཎསམྤཡུཏྟཏཱ ཝེདིཏབྦཱ. ཡོ ཧི པརེསཾ ¶ དྷམྨཾ དེསེཏི ཨནཝཛྫཱནི སིཔྤཱཡཏནཀམྨཱཡཏནཝིཛྫཱཊྛཱནཱནི སིཀྑཱཔེཏི དྷམྨཀཐིཀཾ སཀྐཱརཾ ཀཏྭཱ དྷམྨཾ ཀཐཱཔེཏི, ‘ཨཱཡཏིཾ པཉྙཝཱ བྷཝིསྶཱམཱི’ཏི པཏྠནཾ པཊྛཔེཏྭཱ ནཱནཔྤཀཱརཾ དཱནཾ དེཏི, ཏསྶ ཨེཝརཱུཔཾ ཀམྨཾ ཨུཔནིསྶཱཡ ཀུསལཾ ཨུཔྤཛྫམཱནཾ ཉཱཎསམྤཡུཏྟཾ ཨུཔྤཛྫཏི. ཨབྱཱཔཛྫེ ལོཀེ ཨུཔྤནྣསྶ ཝཱཔི ‘‘ཏསྶ ཏཏྠ སུཁིནོ དྷམྨཔདཱ པིལཝནྟི… དནྡྷོ, བྷིཀྑཝེ, སཏུཔྤཱདོ, ཨཐ སོ སཏྟོ ཁིཔྤཾཡེཝ ཝིསེསགཱམཱི ཧོཏཱི’’ཏི (ཨ. ནི. ༤.༡༩༡) ཨིམིནཱ ནཡེན ཨུཔཔཏྟིཾ ནིསྶཱཡཔི ཨུཔྤཛྫམཱནཾ ཀུསལཾ ཉཱཎསམྤཡུཏྟཾ ཨུཔྤཛྫཏི. ཏཐཱ ཨིནྡྲིཡཔརིཔཱཀཾ ཨུཔགཏཱནཾ པཉྙཱདསཀཔྤཏྟཱནཾ ཨིནྡྲིཡཔརིཔཱཀཾ ནིསྶཱཡཔི ཀུསལཾ ཨུཔྤཛྫམཱནཾ ཉཱཎསམྤཡུཏྟཾ ཨུཔྤཛྫཏི. ཡེཧི པན ཀིལེསཱ ཝིཀྑམྦྷིཏཱ ཏེསཾ ཀིལེསདཱུརཱིབྷཱཝཾ ནིསྶཱཡཔི ཨུཔྤཛྫམཱནཾ ཀུསལཾ ཉཱཎསམྤཡུཏྟཾ ཨུཔྤཛྫཏི. ཝུཏྟམྤི ཙེཏཾ –

‘‘ཡོགཱ ཝེ ཛཱཡཏཱི བྷཱུརི, ཨཡོགཱ བྷཱུརིསངྑཡོ’’ཏི (དྷ. པ. ༢༨༢).

ཨེཝཾ ཀམྨཏོ ཨུཔཔཏྟིཏོ ཨིནྡྲིཡཔརིཔཱཀཏོ ཀིལེསདཱུརཱིབྷཱཝཏོཏི ཨིམེཧི ཀཱརཎེཧི ཉཱཎསམྤཡུཏྟཏཱ ཝེདིཏབྦཱ.

ཨཔིཙ སཏྟ དྷམྨཱ དྷམྨཝིཙཡསམྦོཛ྄ཛྷངྒསྶ ཨུཔྤཱདཱཡ སཾཝཏྟནྟི – པརིཔུཙྪཀཏཱ, ཝཏྠུཝིསདཀིརིཡཱ, ཨིནྡྲིཡསམཏྟཔཊིཔཱདནཱ, དུཔྤཉྙཔུགྒལཔརིཝཛྫནཱ, པཉྙཝནྟཔུགྒལསེཝནཱ, གམྦྷཱིརཉཱཎཙརིཡཔཙྩཝེཀྑཎཱ, ཏདདྷིམུཏྟཏཱཏི. ཨིམེཧིཔི ཀཱརཎེཧི ཉཱཎསམྤཡུཏྟཏཱ ཝེདིཏབྦཱ. ཨིམེསཾ པན ཝིཏྠཱརོ བོཛ྄ཛྷངྒཝིབྷངྒེ (ཝིབྷ. ཨཊྛ. ༣༦༧ བོཛ྄ཛྷངྒཔབྦཝཎྞནཱ) ཨཱཝི བྷཝིསྶཏི.

ཨེཝཾ ཉཱཎསམྤཡུཏྟཾ ཧུཏྭཱ ཨུཔྤནྣཉྩེཏཾ ཨསངྑཱརེན ¶ ཨཔྤཡོགེན ཨནུཔཱཡཙིནྟནཱཡ ཨུཔྤནྣཏྟཱ ¶ ཨསངྑཱརཾ ནཱམ ཛཱཏཾ. ཏཡིདཾ རཛནཱིཡཝཎྞཱརམྨཎཾ ཧུཏྭཱ ཨུཔྤཛྫམཱནམེཝ ཏིཝིདྷེན ནིཡམེན ཨུཔྤཛྫཏི – དཱནམཡཾ ཝཱ ཧོཏི, སཱིལམཡཾ ཝཱ, བྷཱཝནཱམཡཾ ཝཱ.

ཀཐཾ? ཡདཱ ཧི ནཱིལཔཱིཏལོཧིཏོདཱཏེསུ པུཔྥཱདཱིསུ ཨཉྙཏརཾ ལབྷིཏྭཱ ཝཎྞཝསེན ཨཱབྷུཛིཏྭཱ ‘ཝཎྞདཱནཾ མཡ྄ཧ’ནྟི བུདྡྷརཏནཱདཱིནི པཱུཛེཏི, ཏདཱ དཱནམཡཾ ཧོཏི. ཏཏྲིདཾ ཝཏྠུ – བྷཎྜཱགཱརིཀསངྒྷམིཏྟོ ཀིར ཨེཀཾ སུཝཎྞཁཙིཏཾ ཝཏྠཾ ལབྷིཏྭཱ ཨིདམྤི ཝཏྠཾ སུཝཎྞཝཎྞཾ, སམྨཱསམྦུདྡྷོཔི སུཝཎྞཝཎྞོ, སུཝཎྞཝཎྞཾ ཝཏྠཾ སུཝཎྞཝཎྞསྶེཝ ཨནུཙྪཝིཀཾ, ཨམྷཱཀཉྩ ཝཎྞདཱནཾ བྷཝིསྶཏཱིཏི མཧཱཙེཏིཡེ ཨཱརོཔེསི. ཨེཝརཱུཔེ ¶ ཀཱལེ དཱནམཡཾ ཧོཏཱིཏི ཝེདིཏབྦཾ. ཡདཱ པན ཏཐཱརཱུཔམེཝ དེཡྻདྷམྨཾ ལབྷིཏྭཱ ‘མཡ྄ཧཾ ཀུལཝཾསོ, ཀུལཏནྟི ཀུལཔྤཝེཎཱི ཨེསཱ, ཀུལཝཏྟཾ ཨེཏ’ནྟི བུདྡྷརཏནཱདཱིནི པཱུཛེཏི ཏདཱ སཱིལམཡཾ ཧོཏི. ཡདཱ པན ཏཱདིསེནེཝ ཝཏྠུནཱ རཏནཏྟཡསྶ པཱུཛཾ ཀཏྭཱ ‘ཨཡཾ ཝཎྞོ ཁཡཾ གཙྪིསྶཏི, ཝཡཾ གཙྪིསྶཏཱི’ཏི ཁཡཝཡཾ པཊྛཔེཏི, ཏདཱ བྷཱཝནཱམཡཾ ཧོཏི.

དཱནམཡཾ པན ཧུཏྭཱ ཝཏྟམཱནམྤི ཡདཱ ཏཱིཎི རཏནཱནི སཧཏྠེན པཱུཛེནྟསྶ པཝཏྟཏྟི, ཏདཱ ཀཱཡཀམྨཾ ཧོཏི. ཡདཱ ཏཱིཎི རཏནཱནི པཱུཛེནྟོ པུཏྟདཱརདཱསཀམྨཀརཔོརིསཱདཡོཔི ཨཱཎཱཔེཏྭཱ པཱུཛཱཔེཏི ཏདཱ ཝཙཱིཀམྨཾ ཧོཏི. ཡདཱ ཏདེཝ ཝུཏྟཔྤཀཱརཾ ཝིཛྫམཱནཀཝཏྠུཾ ཨཱརབྦྷ ཝཎྞདཱནཾ དསྶཱམཱིཏི ཙིནྟེཏི ཏདཱ མནོཀམྨཾ ཧོཏི. ཝིནཡཔརིཡཱཡཾ པཏྭཱ ཧི ‘དསྶཱམི ཀརིསྶཱམཱི’ཏི ཝཱཙཱ བྷིནྣཱ ཧོཏཱིཏི (པཱརཱ. ༦༥༩) ཨིམིནཱ ལཀྑཎེན དཱནཾ ནཱམ ཧོཏི. ཨབྷིདྷམྨཔརིཡཱཡཾ པཏྭཱ པན ཝིཛྫམཱནཀཝཏྠུཾ ཨཱརབྦྷ ‘དསྶཱམཱི’ཏི མནསཱ ཙིནྟིཏཀཱལཏོ པཊྛཱཡ ཀུསལཾ ཧོཏི. ཨཔརབྷཱགེ ཀཱཡེན ཝཱ ཝཱཙཱཡ ཝཱ ཀཏྟབྦཾ ཀརིསྶཏཱིཏི ཝུཏྟཾ. ཨེཝཾ དཱནམཡཾ ཀཱཡཝཙཱིམནོཀམྨཝསེནེཝ ཏིཝིདྷཾ ཧོཏི.

ཡདཱ པན ཏཾ ཝུཏྟཔྤཀཱརཾ ཝཏྠུཾ ལབྷིཏྭཱ ཀུལཝཾསཱདིཝསེན སཧཏྠཱ རཏནཏྟཡཾ པཱུཛེཏི ཏདཱ སཱིལམཡཾ ཀཱཡཀམྨཾ ཧོཏི. ཡདཱ ཀུལཝཾསཱདིཝསེནེཝ པུཏྟདཱརཱདཡོ ཨཱཎཱཔེཏྭཱ པཱུཛཱཔེཏི ཏདཱ ཝཙཱིཀམྨཾ ཧོཏི. ཡདཱ ¶ ‘མཡ྄ཧཾ ཀུལཝཾསོ, ཀུལཏནྟི ཀུལཔྤཝེཎཱི ཨེསཱ, ཀུལཝཏྟམེཏ’ནྟི ཝིཛྫམཱནཀཝཏྠུཾ ཨཱརབྦྷ ‘ཝཎྞདཱནཾ དསྶཱམཱི’ཏི ཙིནྟེཏི ཏདཱ མནོཀམྨཾ ཧོཏི. ཨེཝཾ སཱིལམཡཾ ཀཱཡཝཙཱིམནོཀམྨཝསེན ཏིཝིདྷཾ ཧོཏི.

ཡདཱ ¶ པན ཏཾ ཝུཏྟཔྤཀཱརཾ ཝཏྠུཾ ལབྷིཏྭཱ ཏཱིཎི རཏནཱནི པཱུཛེཏྭཱ ཙངྐམནྟོ ཁཡཝཡཾ པཊྛཔེཏི ཏདཱ བྷཱཝནཱམཡཾ ཀཱཡཀམྨཾ ཧོཏི. ཝཱཙཱཡ སམྨསནཾ པཊྛཔེནྟསྶ ཝཙཱིཀམྨཾ ཧོཏི, ཀཱཡངྒཝཱཙངྒཱནི ཨཙོཔེཏྭཱ མནསཱཝ སམྨསནཾ པཊྛཔེནྟསྶ མནོཀམྨཾ ཧོཏི. ཨེཝཾ བྷཱཝནཱམཡཾ ཀཱཡཝཙཱིམནོཀམྨཝསེན ཏིཝིདྷཾ ཧོཏི. ཨེཝམེཏཾ རཱུཔཱརམྨཎཾ ཀུསལཾ ཏིཝིདྷཔུཉྙཀིརིཡཝཏྠུཝསེན ནཝཧི ཀམྨདྭཱརེཧི བྷཱཛེཏྭཱ དསྶེསི དྷམྨརཱཛཱ. སདྡཱརམྨཎཱདཱིསུཔི ཨེསེཝ ནཡོ.

བྷེརིསདྡཱདཱིསུ ¶ ཧི རཛནཱིཡསདྡཾ ཨཱརམྨཎཾ ཀཏྭཱ ཧེཊྛཱ ཝུཏྟནཡེནེཝ ཏཱིཧི ནིཡམེཧེཏཾ ཀུསལཾ ཨུཔྤཛྫཏི. ཏཏྠ སདྡཾ ཀནྡམཱུལཾ ཝིཡ ཨུཔྤཱཊེཏྭཱ ནཱིལུཔྤལཧཏྠཀཾ ཝིཡ ཙ ཧཏྠེ ཋཔེཏྭཱ དཱཏུཾ ནཱམ ན སཀྐཱ, སཝཏྠུཀཾ པན ཀཏྭཱ དེནྟོ སདྡདཱནཾ དེཏི ནཱམ. ཏསྨཱ ཡདཱ ‘སདྡདཱནཾ དསྶཱམཱི’ཏི བྷེརིམུདིངྒཱདཱིསུ ཨཉྙཏརཏཱུརིཡེན ཏིཎྞཾ རཏནཱནཾ ཨུཔཧཱརཾ ཀརོཏི, ‘སདྡདཱནཾ མེ’ཏི བྷེརིཨཱདཱིནི ཋཔཱཔེཏི, དྷམྨཀཐིཀབྷིཀྑཱུནཾ སརབྷེསཛྫཏེལཕཱཎིཏཱདཱིནི དེཏི, དྷམྨསཝནཾ གྷོསེཏི, སརབྷཉྙཾ བྷཎཏི, དྷམྨཀཐཾ ཀཐེཏི, ཨུཔནིསིནྣཀཀཐཾ ཨནུམོདནཀཐཾ ཀརོཏི, ཏདཱ དཱནམཡཾཡེཝ ཧོཏི. ཡདཱ ཨེཏདེཝ ཝིདྷཱནཾ ཀུལཝཾསཱདིཝསེན ཝཏྟཝསེན ཀརོཏི ཏདཱ སཱིལམཡཾ ཧོཏི. ཡདཱ སབྦམྤེཏཾ ཀཏྭཱ ཨཡཾ ཨེཏྟཀོ སདྡོ བྲཧྨལོཀཔྤམཱཎོཔི ཧུཏྭཱ ‘ཁཡཾ གམིསྶཏི, ཝཡཾ གམིསྶཏཱི’ཏི སམྨསནཾ པཊྛཔེཏི ཏདཱ བྷཱཝནཱམཡཾ ཧོཏི.

ཏཏྠ དཱནམཡཾ ཏཱཝ ཡདཱ བྷེརིཨཱདཱིནི གཧེཏྭཱ སཧཏྠཱ ཨུཔཧཱརཾ ཀརོཏི, ནིཙྩུཔཧཱརཏྠཱཡ ཋཔེནྟོཔི སཧཏྠཱ ཋཔེཏི, ‘སདྡདཱནཾ མེ’ཏི དྷམྨསཝནཾ གྷོསེཏུཾ གཙྪཏི, དྷམྨཀཐཾ སརབྷཉྙཾ ཀཱཏུཾ ཝཱ གཙྪཏི, ཏདཱ ཀཱཡཀམྨཾ ཧོཏི. ཡདཱ ‘གཙྪཐ, ཏཱཏཱ, ཨམྷཱཀཾ སདྡདཱནཾ ཏིཎྞཾ རཏནཱནཾ ¶ ཨུཔཧཱརཾ ཀརོཐཱ’ཏི ཨཱཎཱཔེཏི, ‘སདྡདཱནཾ མེ’ཏི ཙེཏིཡངྒཎེསུ ‘ཨིམཾ བྷེརིཾ, ཨིམཾ མུདིངྒཾ ཋཔེཐཱ’ཏི ཨཱཎཱཔེཏི, སཡམེཝ དྷམྨསཝནཾ གྷོསེཏི, དྷམྨཀཐཾ ཀཐེཏི, སརབྷཉྙཾ བྷཎཏི, ཏདཱ ཝཙཱིཀམྨཾ ཧོཏི. ཡདཱ ཀཱཡངྒཝཱཙངྒཱནི ཨཙོཔེཏྭཱ ‘སདྡདཱནཾ དསྶཱམཱི’ཏི ཝིཛྫམཱནཀཝཏྠུཾ མནསཱ པརིཙྩཛཏི, ཏདཱ མནོཀམྨཾ ཧོཏི.

སཱིལམཡམྤི ‘སདྡདཱནཾ ནཱམ མཡ྄ཧཾ ཀུལཝཾསོ ཀུལཏནྟི ཀུལཔྤཝེཎཱི’ཏི བྷེརིཨཱདཱིཧི སཧཏྠཱ ཨུཔཧཱརཾ ཀརོནྟསྶ, བྷེརིཨཱདཱིནི སཧཏྠཱ ཙེཏིཡངྒཎཱདཱིསུ ཋཔེནྟསྶ, དྷམྨཀཐིཀཱནཾ སརབྷེསཛྫཾ སཧཏྠཱ དདནྟསྶ, ཝཏྟསཱིསེན དྷམྨསཝནགྷོསནདྷམྨཀཐཱཀཐནསརབྷཉྙབྷཎནཏྠཱཡ ཙ གཙྪནྟསྶ ཀཱཡཀམྨཾ ཧོཏི. ‘སདྡདཱནཾ ནཱམ ཨམྷཱཀཾ ཀུལཝཾསོ ཀུལཏནྟི ཀུལཔྤཝེཎཱི, གཙྪཐ ¶ , ཏཱཏཱ, བུདྡྷརཏནཱདཱིནཾ ཨུཔཧཱརཾ ཀརོཐཱ’ཏི ཨཱཎཱཔེནྟསྶ ཀུལཝཾསཝསེནེཝ ཨཏྟནཱ དྷམྨཀཐཾ ཝཱ སརབྷཉྙཾ ཝཱ ཀརོནྟསྶ ཙ ཝཙཱིཀམྨཾ ཧོཏི. ‘སདྡདཱནཾ ནཱམ མཡ྄ཧཾ ཀུལཝཾསོ ¶ སདྡདཱནཾ དསྶཱམཱི’ཏི ཀཱཡངྒཝཱཙངྒཱནི ཨཙོཔེཏྭཱ མནསཱཝ ཝིཛྫམཱནཀཝཏྠུཾ པརིཙྩཛནྟསྶ མནོཀམྨཾ ཧོཏི.

བྷཱཝནཱམཡམྤི ཡདཱ ཙངྐམནྟོ སདྡེ ཁཡཝཡཾ པཊྛཔེཏི ཏདཱ ཀཱཡཀམྨཾ ཧོཏི. ཀཱཡངྒཾ པན ཨཙོཔེཏྭཱ ཝཱཙཱཡ སམྨསནྟསྶ ཝཙཱིཀམྨཾ ཧོཏི. ཀཱཡངྒཝཱཙངྒཾ ཨཙོཔེཏྭཱ མནསཱཝ སདྡཱཡཏནཾ སམྨསནྟསྶ མནོཀམྨཾ ཧོཏི. ཨེཝཾ སདྡཱརམྨཎམྤི ཀུསལཾ ཏིཝིདྷཔུཉྙཀིརིཡཝཏྠུཝསེན ནཝཧི ཀམྨདྭཱརེཧི བྷཱཛེཏྭཱ དསྶེསི དྷམྨརཱཛཱ.

མཱུལགནྡྷཱདཱིསུཔི རཛནཱིཡགནྡྷཾ ཨཱརམྨཎཾ ཀཏྭཱ ཧེཊྛཱ ཝུཏྟནཡེནེཝ ཏཱིཧི ནིཡམེཧེཏཾ ཀུསལཾ ཨུཔྤཛྫཏི. ཏཏྠ ཡདཱ མཱུལགནྡྷཱདཱིསུ ཡཾཀིཉྩི གནྡྷཾ ལབྷིཏྭཱ གནྡྷཝསེན ཨཱབྷུཛིཏྭཱ ‘གནྡྷདཱནཾ མཡ྄ཧ’ནྟི བུདྡྷརཏནཱདཱིནི པཱུཛེཏི, ཏདཱ དཱནམཡཾ ཧོཏཱིཏི སབྦཾ ཝཎྞདཱནེ ཝུཏྟནཡེནེཝ ཝིཏྠཱརཏོ ཝེདིཏབྦཾ. ཨེཝཾ གནྡྷཱརམྨཎམྤི ཀུསལཾ ཏིཝིདྷཔུཉྙཀིརིཡཝཏྠུཝསེན ནཝཧི ཀམྨདྭཱརེཧི བྷཱཛེཏྭཱ དསྶེསི དྷམྨརཱཛཱ.

མཱུལརསཱདཱིསུ པན རཛནཱིཡརསཾ ཨཱརམྨཎཾ ཀཏྭཱ ཧེཊྛཱ ཝུཏྟནཡེནེཝ ཏཱིཧི ནིཡམེཧེཏཾ ཀུསལཾ ཨུཔྤཛྫཏི. ཏཏྠ ཡདཱ མཱུལརསཱདཱིསུ ཡཾཀིཉྩི རཛནཱིཡཾ རསཝཏྠུཾ ལབྷིཏྭཱ ¶ རསཝསེན ཨཱབྷུཛིཏྭཱ ‘རསདཱནཾ མཡ྄ཧ’ནྟི དེཏི པརིཙྩཛཏི, ཏདཱ དཱནམཡཾ ཧོཏཱིཏི སབྦཾ ཝཎྞདཱནེ ཝུཏྟནཡེནེཝ ཝིཏྠཱརཏོ ཝེདིཏབྦཾ. སཱིལམཡེ པནེཏྠ ‘སངྒྷསྶ ཨདཏྭཱ པརིབྷུཉྫནཾ ནཱམ ཨམྷཱཀཾ ན ཨཱཙིཎྞ’ནྟི དྭཱདསནྣཾ བྷིཀྑུསཧསྶཱནཾ དཱཔེཏྭཱ སཱདུརསཾ པརིབྷུཏྟསྶ དུཊྛགཱམཎིཨབྷཡརཉྙོ ཝཏྠུཾ ཨཱདིཾ ཀཏྭཱ མཧཱཨཊྛཀཐཱཡཾ ཝཏྠཱུནི ཨཱགཏཱནི. ཨཡམེཝ ཝིསེསོ. ཨེཝཾ རསཱརམྨཎམྤི ཀུསལཾ ཏིཝིདྷཔུཉྙཀིརིཡཝཏྠུཝསེན ནཝཧི ཀམྨདྭཱརེཧི བྷཱཛེཏྭཱ དསྶེསི དྷམྨརཱཛཱ.

ཕོཊྛབྦཱརམྨཎེཔི པཐཝཱིདྷཱཏུ ཏེཛོདྷཱཏུ ཝཱཡོདྷཱཏཱུཏི ཏཱིཎི མཧཱབྷཱུཏཱནི ཕོཊྛབྦཱརམྨཎཾ ནཱམ. ཨིམསྨིཾ ཋཱནེ ཨེཏེསཾ ཝསེན ཡོཛནཾ ཨཀཏྭཱ མཉྩཔཱིཋཱདིཝསེན ཀཱཏབྦཱ. ཡདཱ ཧི མཉྩཔཱིཋཱདཱིསུ ཡཾཀིཉྩི རཛནཱིཡཾ ཕོཊྛབྦཝཏྠུཾ ལབྷིཏྭཱ ཕོཊྛབྦཝསེན ཨཱབྷུཛིཏྭཱ ‘ཕོཊྛབྦདཱནཾ ¶ མཡ྄ཧ’ནྟི དེཏི པརིཙྩཛཏི, ཏདཱ དཱནམཡཾ ཧོཏཱིཏི སབྦཾ ཝཎྞདཱནེ ཝུཏྟནཡེནེཝ ཝིཏྠཱརཏོ ཝེདིཏབྦཾ. ཨེཝཾ ཕོཊྛབྦཱརམྨཎམྤི ཀུསལཾ ཏིཝིདྷཔུཉྙཀིརིཡཝཏྠུཝསེན ནཝཧི ཀམྨདྭཱརེཧི བྷཱཛེཏྭཱ དསྶེསི དྷམྨརཱཛཱ.

དྷམྨཱརམྨཎེ ¶ ཚ ཨཛ྄ཛྷཏྟིཀཱནི ཨཱཡཏནཱནི, ཏཱིཎི ལཀྑཎཱནི, ཏཡོ ཨརཱུཔིནོ ཁནྡྷཱ, པནྣརས སུཁུམརཱུཔཱནི, ནིབྦཱནཔཉྙཏྟཱིཏི ཨིམེ དྷམྨཱཡཏནེ པརིཡཱཔནྣཱ ཙ, ཨཔརིཡཱཔནྣཱ ཙ, དྷམྨཱ དྷམྨཱརམྨཎཾ ནཱམ. ཨིམསྨིཾ པན ཋཱནེ ཨེཏེསཾ ཝསེན ཡོཛནཾ ཨཀཏྭཱ ཨོཛདཱནཔཱནདཱནཛཱིཝིཏདཱནཝསེན ཀཱཏབྦཱ. ཨོཛཱདཱིསུ ཧི རཛནཱིཡཾ དྷམྨཱརམྨཎཾ ཨཱརམྨཎཾ ཀཏྭཱ ཧེཊྛཱ ཝུཏྟནཡེནེཝ ཏཱིཧི ནིཡམེཧེཏཾ ཀུསལཾ ཨུཔྤཛྫཏི.

ཏཏྠ ཡདཱ ‘ཨོཛདཱནཾ མཡ྄ཧ’ནྟི སཔྤིནཝནཱིཏཱདཱིནི དེཏི, པཱནདཱནནྟི ཨཊྛ པཱནཱནི དེཏི, ཛཱིཝིཏདཱནནྟི སལཱཀབྷཏྟསངྒྷབྷཏྟཱདཱིནི དེཏི, ཨཕཱསུཀཱནཾ བྷིཀྑཱུནཾ བྷེསཛྫཾ དེཏི, ཝེཛྫཾ པཙྩུཔཊྛཱཔེཏི, ཛཱལཾ ཕཱལཱཔེཏི, ཀུམཱིནཾ ཝིདྡྷཾསཱཔེཏི, སཀུཎཔཉྫརཾ ཝིདྡྷཾསཱཔེཏི, བནྡྷནམོཀྑཾ ཀཱརཱཔེཏི, མཱགྷཱཏབྷེརིཾ ཙརཱཔེཏི, ཨཉྙཱནིཔི ཛཱིཝིཏཔརིཏྟཱཎཏྠཾ ཨེཝརཱུཔཱནི ཀམྨཱནི ཀརོཏི ཏདཱ དཱནམཡཾ ཧོཏི. ཡདཱ པན ‘ཨོཛདཱནཔཱནདཱནཛཱིཝིཏདཱནཱནི མཡ྄ཧཾ ཀུལཝཾསོ ཀུལཏནྟི ཀུལཔྤཝེཎཱི’ཏི ཝཏྟསཱིསེན ཨོཛདཱནཱདཱིནི པཝཏྟེཏི ཏདཱ སཱིལམཡཾ ཧོཏི. ཡདཱ དྷམྨཱརམྨཎསྨིཾ ཁཡཝཡཾ པཊྛཔེཏི ཏདཱ ¶ བྷཱཝནཱམཡཾ ཧོཏི.

དཱནམཡཾ པན ཧུཏྭཱ པཝཏྟམཱནམྤི ཡདཱ ཨོཛདཱནཔཱནདཱནཛཱིཝིཏདཱནཱནི སཧཏྠཱ དེཏི, ཏདཱ ཀཱཡཀམྨཾ ཧོཏི. ཡདཱ པུཏྟདཱརཱདཡོ ཨཱཎཱཔེཏྭཱ དཱཔེཏི, ཏདཱ ཝཙཱིཀམྨཾ ཧོཏི. ཡདཱ ཀཱཡངྒཝཱཙངྒཱནི ཨཙོཔེཏྭཱ ཨོཛདཱནཔཱནདཱནཛཱིཝིཏདཱནཝསེན ཝིཛྫམཱནཀཝཏྠུཾ ‘དསྶཱམཱི’ཏི མནསཱ ཙིནྟེཏི, ཏདཱ མནོཀམྨཾ ཧོཏི.

ཡདཱ པན ཝུཏྟཔྤཀཱརཾ ཝིཛྫམཱནཀཝཏྠུཾ ཀུལཝཾསཱདིཝསེན སཧཏྠཱ དེཏི, ཏདཱ སཱིལམཡཾ ཀཱཡཀམྨཾ ཧོཏི. ཡདཱ ཀུལཝཾསཱདིཝསེནེཝ པུཏྟདཱརཱདཡོ ཨཱཎཱཔེཏྭཱ དཱཔེཏི, ཏདཱ ཝཙཱིཀམྨཾ ཧོཏི. ཡདཱ ཀུལཝཾསཱདིཝསེནེཝ ཝུཏྟཔྤཀཱརཾ ཝིཛྫམཱནཀཝཏྠུཾ ‘དསྶཱམཱི’ཏི མནསཱཝ ཙིནྟེཏི, ཏདཱ མནོཀམྨཾ ཧོཏི.

ཙངྐམིཏྭཱ ¶ དྷམྨཱརམྨཎེ ཁཡཝཡཾ པཊྛཔེནྟསྶ པན བྷཱཝནཱམཡཾ ཀཱཡཀམྨཾ ཧོཏི. ཀཱཡངྒཾ ཨཙོཔེཏྭཱ ཝཱཙཱཡ ཁཡཝཡཾ པཊྛཔེནྟསྶ ཝཙཱིཀམྨཾ ཧོཏི. ཀཱཡངྒཝཱཙངྒཱནི ཨཙོཔེཏྭཱ མནསཱཝ དྷམྨཱརམྨཎེ ཁཡཝཡཾ ¶ པཊྛཔེནྟསྶ མནོཀམྨཾ ཧོཏི. ཨེཝཾ བྷཱཝནཱམཡཾ ཀཱཡཝཙཱིམནོཀམྨཝསེན ཏིཝིདྷཾ ཧོཏི. ཨེཝམེཏཾ དྷམྨཱརམྨཎམྤི ཀུསལཾ ཏིཝིདྷཔུཉྙཀིརིཡཝཏྠུཝསེན ནཝཧི ཀམྨདྭཱརེཧི བྷཱཛེཏྭཱ དསྶེསི དྷམྨརཱཛཱ.

ཨེཝམིདཾ ཙིཏྟཾ ནཱནཱཝཏྠཱུསུ ནཱནཱརམྨཎཝསེན དཱིཔིཏཾ. ཨིདཾ པན ཨེཀཝཏྠུསྨིམྤི ནཱནཱརམྨཎཝསེན ལབྦྷཏིཡེཝ. ཀཐཾ? ཙཏཱུསུ ཧི པཙྩཡེསུ ཙཱིཝརེ ཚ ཨཱརམྨཎཱནི ལབྦྷནྟི – ནཝརཏྟསྶ ཧི ཙཱིཝརསྶ ཝཎྞོ མནཱཔོ ཧོཏི དསྶནཱིཡོ, ཨིདཾ ཝཎྞཱརམྨཎཾ. པརིབྷོགཀཱལེ པཊཔཊསདྡཾ ཀརོཏི, ཨིདཾ སདྡཱརམྨཎཾ. ཡོ ཏཏྠ ཀཱལ༹ཀཙྪཀཱདིགནྡྷོ, ཨིདཾ གནྡྷཱརམྨཎཾ. རསཱརམྨཎཾ པན པརིབྷོགརསཝསེན ཀཐིཏཾ. ཡཱ ཏཏྠ སུཁསམྥསྶཏཱ, ཨིདཾ ཕོཊྛབྦཱརམྨཎཾ. ཙཱིཝརཾ པཊིཙྩ ཨུཔྤནྣཱ སུཁཱ ཝེདནཱ, དྷམྨཱརམྨཎཾ. པིཎྜཔཱཏེ རསཱརམྨཎཾ ནིཔྤརིཡཱཡེནེཝ ལབྦྷཏི. ཨེཝཾ ཙཏཱུསུ པཙྩཡེསུ ནཱནཱརམྨཎཝསེན ཡོཛནཾ ཀཏྭཱ དཱནམཡཱདིབྷེདོ ཝེདིཏབྦོ.

ཨིམསྶ པན ཙིཏྟསྶ ཨཱརམྨཎམེཝ ནིབདྡྷཾ, ཝིནཱ ཨཱརམྨཎེན ཨནུཔྤཛྫནཏོ. དྭཱརཾ པན ཨནིབདྡྷཾ. ཀསྨཱ? ཀམྨསྶ ཨནིབདྡྷཏྟཱ. ཀམྨསྨིཉྷི ཨནིབདྡྷེ དྭཱརམྤི ཨནིབདྡྷམེཝ ཧོཏི.

ཀཱམཱཝཙརཀུསལཾ དྭཱརཀཐཱ

ཀཱཡཀམྨདྭཱརཀཐཱ

ཨིམསྶ པནཏྠསྶ ¶ པཀཱསནཏྠཾ ཨིམསྨིཾ ཋཱནེ མཧཱཨཊྛཀཐཱཡཾ དྭཱརཀཐཱ ཀཐིཏཱ. ཏཏྠ ཏཱིཎི ཀམྨཱནི, ཏཱིཎི ཀམྨདྭཱརཱནི, པཉྩ ཝིཉྙཱཎཱནི, པཉྩ ཝིཉྙཱཎདྭཱརཱནི, ཚ ཕསྶཱ, ཚ ཕསྶདྭཱརཱནི, ཨཊྛ ཨསཾཝརཱ, ཨཊྛ ཨསཾཝརདྭཱརཱནི, ཨཊྛ སཾཝརཱ, ཨཊྛ སཾཝརདྭཱརཱནི, དས ཀུསལཀམྨཔཐཱ, དས ཨཀུསལཀམྨཔཐཱཏི, ཨིདཾ ཨེཏྟཀཾ དྭཱརཀཐཱཡ མཱཏིཀཱཋཔནཾ ནཱམ.

ཏཏྠ ¶ ཀིཉྩཱཔི ཏཱིཎི ཀམྨཱནི པཋམཾ ཝུཏྟཱནི, ཏཱནི པན ཋཔེཏྭཱ ཨཱདིཏོ ཏཱཝ ཏཱིཎི ཀམྨདྭཱརཱནི བྷཱཛེཏྭཱ དསྶིཏཱནི. ཀཏམཱནི ཏཱིཎི? ཀཱཡཀམྨདྭཱརཾ, ཝཙཱིཀམྨདྭཱརཾ, མནོཀམྨདྭཱརནྟི.

ཏཏྠ ¶ ཙཏུབྦིདྷོ ཀཱཡོ – ཨུཔཱདིནྣཀོ, ཨཱཧཱརསམུཊྛཱནོ, ཨུཏུསམུཊྛཱནོ, ཙིཏྟསམུཊྛཱནོཏི. ཏཏྠ ཙཀྑཱཡཏནཱདཱིནི ཛཱིཝིཏིནྡྲིཡཔརིཡནྟཱནི ཨཊྛ ཀམྨསམུཊྛཱནརཱུཔཱནིཔི, ཀམྨསམུཊྛཱནཱནེཝ ཙཏསྶོ དྷཱཏུཡོ ཝཎྞོ གནྡྷོ རསོ ཨོཛཱཏི ཨཊྛ ཨུཔཱདིནྣཀཀཱཡོ ནཱམ. ཏཱནེཝ ཨཊྛ ཨཱཧཱརཛཱནི ཨཱཧཱརསམུཊྛཱནིཀཀཱཡོ ནཱམ. ཨཊྛ ཨུཏུཛཱནི ཨུཏུསམུཊྛཱནིཀཀཱཡོ ནཱམ. ཨཊྛ ཙིཏྟཛཱནི ཙིཏྟསམུཊྛཱནིཀཀཱཡོ ནཱམ.

ཏེསུ ཀཱཡཀམྨདྭཱརནྟི ནེཝ ཨུཔཱདིནྣཀཀཱཡསྶ ནཱམཾ ན ཨིཏརེསཾ. ཙིཏྟསམུཊྛཱནེསུ པན ཨཊྛསུ རཱུཔེསུ ཨེཀཱ ཝིཉྙཏྟི ཨཏྠི, ཨིདཾ ཀཱཡཀམྨདྭཱརཾ ནཱམ. ཡཾ སནྡྷཱཡ ཝུཏྟཾ – ‘‘ཀཏམཾ ཏཾ རཱུཔཾ ཀཱཡཝིཉྙཏྟི? ཡཱ ཀུསལཙིཏྟསྶ ཝཱ, ཨཀུསལཙིཏྟསྶ ཝཱ, ཨབྱཱཀཏཙིཏྟསྶ ཝཱ, ཨབྷིཀྐམནྟསྶ ཝཱ པཊིཀྐམནྟསྶ ཝཱ, ཨཱལོཀེནྟསྶ ཝཱ ཝིལོཀེནྟསྶ ཝཱ, སམིཉྫེནྟསྶ ཝཱ པསཱརེནྟསྶ ཝཱ, ཀཱཡསྶ ཐམྦྷནཱ སནྠམྦྷནཱ སནྠམྦྷིཏཏྟཾ, ཝིཉྙཏྟི ཝིཉྙཱཔནཱ ཝིཉྙཱཔིཏཏྟཾ, ཨིདཾ ཏཾ རཱུཔཾ ཀཱཡཝིཉྙཏྟཱི’’ཏི (དྷ. ས. ༧༢༠). ‘ཨབྷིཀྐམིསྶཱམི པཊིཀྐམིསྶཱམཱི’ཏི ཧི ཙིཏྟཾ ཨུཔྤཛྫམཱནཾ རཱུཔཾ སམུཊྛཱཔེཏི. ཏཏྠ ཡཱ པཐཝཱིདྷཱཏུ ཨཱཔོདྷཱཏུ ཏེཛོདྷཱཏུ ཝཱཡོདྷཱཏུ ཏནྣིསྶིཏོ ཝཎྞོ གནྡྷོ རསོ ཨོཛཱཏི ཨིམེསཾ ཨཊྛནྣཾ རཱུཔཀལཱཔཱནཾ ཨབྦྷནྟརེ ཙིཏྟསམུཊྛཱནཱ ཝཱཡོདྷཱཏུ, སཱ ཨཏྟནཱ སཧཛཱཏཾ རཱུཔཀཱཡཾ སནྠམྦྷེཏི སནྡྷཱརེཏི ཙཱལེཏི ཨབྷིཀྐམཱཔེཏི པཊིཀྐམཱཔེཏི.

ཏཏྠ ཨེཀཱཝཛྫནཝཱིཐིཡཾ སཏྟསུ ཛཝནེསུ པཋམཙིཏྟསམུཊྛིཏཱ ཝཱཡོདྷཱཏུ ¶ ཨཏྟནཱ སཧཛཱཏཾ རཱུཔཀཱཡཾ སནྠམྦྷེཏུཾ སནྡྷཱརེཏུཾ སཀྐོཏི, ཨཔརཱཔརཾ པན ཙཱལེཏུཾ ན སཀྐོཏི. དུཏིཡཱདཱིསུཔི ཨེསེཝ ནཡོ. སཏྟམཙིཏྟེན པན སམུཊྛིཏཱ ཝཱཡོདྷཱཏུ ཧེཊྛཱ ཚཧི ཙིཏྟེཧི སམུཊྛིཏཾ ཝཱཡོདྷཱཏུཾ ཨུཔཏྠམྦྷནཔཙྩཡཾ ལབྷིཏྭཱ ཨཏྟནཱ སཧཛཱཏཾ རཱུཔཀཱཡཾ སནྠམྦྷེཏུཾ སནྡྷཱརེཏུཾ ཙཱལེཏུཾ ཨབྷིཀྐམཱཔེཏུཾ པཊིཀྐམཱཔེཏུཾ ཨཱལོཀཱཔེཏུཾ ཝིལོཀཱཔེཏུཾ སམྨིཉྫཱཔེཏུཾ པསཱརཱཔེཏུཾ སཀྐོཏི. ཏེན གམནཾ ནཱམ ཛཱཡཏི, ཨཱགམནཾ ནཱམ ཛཱཡཏི, གམནཱགམནཾ ནཱམ ཛཱཡཏི. ‘ཡོཛནཾ གཏོ དསཡོཛནཾ གཏོ’ཏི ཝཏྟབྦཏཾ ཨཱཔཛྫཱཔེཏི.

ཡཐཱ ¶ ¶ ཧི སཏྟཧི ཡུགེཧི ཨཱཀཌྜྷིཏབྦེ སཀཊེ པཋམཡུགེ ཡུཏྟགོཎཱ ཡུགཾ ཏཱཝ སནྠམྦྷེཏུཾ སནྡྷཱརེཏུཾ སཀྐོནྟི, ཙཀྐཾ པན ནཔཝཊྚེནྟི; དུཏིཡཱདཱིསུཔི ཨེསེཝ ནཡོ; སཏྟམཡུགེ པན གོཎེ ཡོཛེཏྭཱ ཡདཱ ཚེཀོ སཱརཐི དྷུརེ ནིསཱིདིཏྭཱ ཡོཏྟཱནི ཨཱདཱཡ སབྦཔུརིམཏོ པཊྛཱཡ པཏོདལཊྛིཡཱ གོཎེ ཨཱཀོཊེཏི, ཏདཱ སབྦེཝ ཨེཀབལཱ ཧུཏྭཱ དྷུརཉྩ སནྡྷཱརེནྟི ཙཀྐཱནི ཙ པཝཊྚེནྟི. ‘སཀཊཾ གཧེཏྭཱ དསཡོཛནཾ ཝཱིསཏིཡོཛནཾ གཏཱ’ཏི ཝཏྟབྦཏཾ ཨཱཔཱདེནྟི – ཨེཝཾསམྤདམིདཾ ཝེདིཏབྦཾ.

ཏཏྠ ཡོ ཙིཏྟསམུཊྛཱནིཀཀཱཡོ ན སོ ཝིཉྙཏྟི, ཙིཏྟསམུཊྛཱནཱཡ པན ཝཱཡོདྷཱཏུཡཱ སཧཛཱཏཾ རཱུཔཀཱཡཾ སནྠམྦྷེཏུཾ སནྡྷཱརེཏུཾ ཙཱལེཏུཾ པཙྩཡོ བྷཝིཏུཾ སམཏྠོ ཨེཀོ ཨཱཀཱརཝིཀཱརོ ཨཏྠི, ཨཡཾ ཝིཉྙཏྟི ནཱམ. སཱ ཨཊྛ རཱུཔཱནི ཝིཡ ན ཙིཏྟསམུཊྛཱནཱ. ཡཐཱ པན ཨནིཙྩཱདིབྷེདཱནཾ དྷམྨཱནཾ ཛརཱམརཎཏྟཱ, ‘‘ཛརཱམརཎཾ, བྷིཀྑཝེ, ཨནིཙྩཾ སངྑཏ’’ནྟིཨཱདི (སཾ. ནི. ༢.༢༠) ཝུཏྟཾ, ཨེཝཾ ཙིཏྟསམུཊྛཱནཱནཾ རཱུཔཱནཾ ཝིཉྙཏྟིཏཱཡ སཱཔི ཙིཏྟསམུཊྛཱནཱ ནཱམ ཧོཏི.

ཝིཉྙཱཔནཏྟཱ པནེསཱ ཝིཉྙཏྟཱིཏི ཝུཙྩཏི. ཀིཾ ཝིཉྙཱཔེཏཱིཏི? ཨེཀཾ ཀཱཡིཀཀརཎཾ. ཙཀྑུཔཐསྨིཉྷི ཋིཏོ ཧཏྠཾ ཝཱ པཱདཾ ཝཱ ཨུཀྑིཔཏི, སཱིསཾ ཝཱ བྷམུཀཾ ཝཱ ཙཱལེཏི, ཨཡཾ ཧཏྠཱདཱིནཾ ཨཱཀཱརོ ཙཀྑུཝིཉྙེཡྻོ ཧོཏི. ཝིཉྙཏྟི པན ན ཙཀྑུཝིཉྙེཡྻཱ མནོཝིཉྙེཡྻཱ ཨེཝ. ཙཀྑུནཱ ཧི ཧཏྠཝིཀཱརཱདིཝསེན ཝིཔྥནྡམཱནཾ ཝཎྞཱརམྨཎམེཝ པསྶཏི. ཝིཉྙཏྟིཾ པན མནོདྭཱརིཀཙིཏྟེན ཙིནྟེཏྭཱ ‘ཨིདཉྩིདཉྩ ཨེས ཀཱརེཏི མཉྙེ’ཏི ཛཱནཱཏི.

ཡཐཱ ཧི ཨརཉྙེ ནིདཱགྷསམཡེ ཨུདཀཊྛཱནེ མནུསྶཱ ‘ཨིམཱཡ སཉྙཱཡ ཨིདྷ ཨུདཀསྶ ཨཏྠིབྷཱཝཾ ཛཱནིསྶནྟཱི’ཏི རུཀྑགྒེ ཏཱལཔཎྞཱདཱིནི བནྡྷཱཔེནྟི, སུརཱཔཱནདྭཱརེ དྷཛཾ ཨུསྶཱཔེནྟི, ཨུཙྩཾ ཝཱ ¶ པན རུཀྑཾ ཝཱཏོ པཧརིཏྭཱ ཙཱལེཏི, ཨནྟོཨུདཀེ མཙྪེ ཙལནྟེ ཨུཔརི བུབྦུལ༹ཀཱནི ཨུཊྛཧནྟི, མཧོགྷསྶ གཏམགྒཔརིཡནྟེ ཏིཎཔཎྞཀསཊཾ ཨུསྶཱརིཏཾ ཧོཏི. ཏཏྠ ཏཱལཔཎྞདྷཛསཱཁཱཙལནབུབྦུལ༹ཀཏིཎཔཎྞཀསཊེ དིསྭཱ ཡཐཱ ཙཀྑུནཱ ཨདིཊྛམྤི ‘ཨེཏྠ ཨུདཀཾ བྷཝིསྶཏི, སུརཱ བྷཝིསྶཏི, ཨཡཾ རུཀྑོ ཝཱཏེན པཧཏོ བྷཝིསྶཏི, ཨནྟོཨུདཀེ མཙྪོ བྷཝིསྶཏི, ཨེཏྟཀཾ ¶ ཋཱནཾ ཨཛ྄ཛྷོཏྠརིཏྭཱ ཨོགྷོ གཏོ བྷཝིསྶཏཱི’ཏི མནོཝིཉྙཱཎེན ཛཱནཱཏི, ཨེཝམེཝ ཝིཉྙཏྟིཔི ན ཙཀྑུཝིཉྙེཡྻཱ མནོཝིཉྙེཡྻཱཝ. ཙཀྑུནཱ ཧི ཧཏྠཝིཀཱརཱདིཝསེན ¶ ཝིཔྥནྡམཱནཾ ཝཎྞཱརམྨཎམེཝ པསྶཏི. ཝིཉྙཏྟིཾ པན མནོདྭཱརིཀཙིཏྟེན ཙིནྟེཏྭཱ ‘ཨིདཉྩིདཉྩ ཨེས ཀཱརེཏི མཉྙེ’ཏི ཛཱནཱཏི.

ན ཀེཝལཉྩེསཱ ཝིཉྙཱཔནཏོཝ ཝིཉྙཏྟི ནཱམ. ཝིཉྙེཡྻཏོཔི པན ཝིཉྙཏྟིཡེཝ ནཱམ. ཨཡཉྷི པརེསཾ ཨནྟམསོ ཏིརཙྪཱནགཏཱནམྤི པཱཀཊཱ ཧོཏི. ཏཏྠ ཏཏྠ སནྣིཔཏིཏཱ ཧི སོཎསིངྒཱལཀཱཀགོཎཱདཡོ དཎྜཾ ཝཱ ལེཌྜུཾ ཝཱ གཧེཏྭཱ པཧརཎཱཀཱརེ དསྶིཏེ ‘ཨཡཾ ནོ པཧརིཏུཀཱམོ’ཏི ཉཏྭཱ ཡེན ཝཱ ཏེན ཝཱ པལཱཡནྟི. པཱཀཱརཀུཊྚཱདིཨནྟརིཀསྶ པན པརསྶ ཨཔཱཀཊཀཱལོཔི ཨཏྠི. ཀིཉྩཱཔི ཏསྨིཾ ཁཎེ ཨཔཱཀཊཱ སམྨུཁཱིབྷཱུཏཱནཾ པན པཱཀཊཏྟཱ ཝིཉྙཏྟིཡེཝ ནཱམ ཧོཏི.

ཙིཏྟསམུཊྛཱནིཀེ པན ཀཱཡེ ཙལནྟེ ཏིསམུཊྛཱནིཀོ ཙལཏི ན ཙལཏཱིཏི? སོཔི ཏཐེཝ ཙལཏི. ཏཾགཏིཀོ ཏདནུཝཏྟཀོཝ ཧོཏི. ཡཐཱ ཧི ཨུདཀེ གཙྪནྟེ ཨུདཀེ པཏིཏཱནི སུཀྑདཎྜཀཏིཎཔཎྞཱདཱིནིཔི ཨུདཀགཏིཀཱནེཝ བྷཝནྟི, ཏསྨིཾ གཙྪནྟེ གཙྪནྟི, ཏིཊྛནྟེ ཏིཊྛནྟི – ཨེཝཾསམྤདམིདཾ ཝེདིཏབྦཾ. ཨེཝམེསཱ ཙིཏྟསམུཊྛཱནེསུ རཱུཔེསུ ཝིཉྙཏྟི ཀཱཡཀམྨདྭཱརཾ ནཱམཱཏི ཝེདིཏབྦཱ.

ཡཱ པན ཏསྨིཾ དྭཱརེ སིདྡྷཱ ཙེཏནཱ ཡཱཡ པཱཎཾ ཧནཏི, ཨདིནྣཾ ཨཱདིཡཏི, མིཙྪཱཙཱརཾ ཙརཏི, པཱཎཱཏིཔཱཏཱདཱིཧི ཝིརམཏི, ཨིདཾ ཀཱཡཀམྨཾ ནཱམ. ཨེཝཾ པརཝཱདིམྷི སཏི ཀཱཡོ དྭཱརཾ, ཏམྷི དྭཱརེ སིདྡྷཱ ཙེཏནཱ ཀཱཡཀམྨཾ ‘ཀུསལཾ ཝཱ ཨཀུསལཾ ཝཱ’ཏི ཋཔེཏབྦཾ. པརཝཱདིམྷི པན ཨསཏི ‘ཨབྱཱཀཏཾ ཝཱ’ཏི ཏིཀཾ པཱུརེཏྭཱཝ ཋཔེཏབྦཾ. ཏཏྠ ཡཐཱ ནགརདྭཱརཾ ཀཏཊྛཱནེཡེཝ ཏིཊྛཏི, ཨངྒུལམཏྟམྤི ཨཔརཱཔརཾ ན སངྐམཏི, ཏེན ཏེན པན དྭཱརེན མཧཱཛནོ སཉྩརཏི, ཨེཝམེཝ དྭཱརེ དྭཱརཾ ན སཉྩརཏི, ཀམྨཾ པན ཏསྨིཾ ཏསྨིཾ དྭཱརེ ཨུཔྤཛྫནཏོ ཙརཏི. ཏེནཱཧུ པོརཱཎཱ –

དྭཱརེ ཙརནྟི ཀམྨཱནི, ན དྭཱརཱ དྭཱརཙཱརིནོ;

ཏསྨཱ དྭཱརེཧི ཀམྨཱནི, ཨཉྙམཉྙཾ ཝཝཏྠིཏཱཏི.

ཏཏྠ ¶ ¶ ཀམྨེནཱཔི དྭཱརཾ ནཱམཾ ལབྷཏི, དྭཱརེནཱཔི ཀམྨཾ. ཡཐཱ ཧི ཝིཉྙཱཎཱདཱིནཾ ཨུཔྤཛྫནཊྛཱནཱནི ¶ ཝིཉྙཱཎདྭཱརཾ ཕསྶདྭཱརཾ ཨསཾཝརདྭཱརཾ སཾཝརདྭཱརནྟི ནཱམཾ ལབྷནྟི, ཨེཝཾ ཀཱཡཀམྨསྶ ཨུཔྤཛྫནཊྛཱནཾ ཀཱཡཀམྨདྭཱརནྟི ནཱམཾ ལབྷཏི. ཝཙཱིམནོཀམྨདྭཱརེསུཔི ཨེསེཝ ནཡོ. ཡཐཱ པན ཏསྨིཾ ཏསྨིཾ རུཀྑེ ཨདྷིཝཏྠཱ དེཝཏཱ སིམྦལིདེཝཏཱ པལཱསདེཝཏཱ པུཙིམནྡདེཝཏཱ ཕནྡནདེཝཏཱཏི ཏེན ཏེན རུཀྑེན ནཱམཾ ལབྷཏི, ཨེཝམེཝ ཀཱཡདྭཱརེན ཀཏཾ ཀམྨམྤི ཀཱཡཀམྨནྟི དྭཱརེན ནཱམཾ ལབྷཏི. ཝཙཱིཀམྨམནོཀམྨེསུཔི ཨེསེཝ ནཡོ. ཏཏྠ ཨཉྙོ ཀཱཡོ, ཨཉྙཾ ཀམྨཾ, ཀཱཡེན པན ཀཏཏྟཱ ཏཾ ཀཱཡཀམྨནྟི ཝུཙྩཏི. ཏེནཱཧུ ཨཊྛཀཐཱཙརིཡཱ –

ཀཱཡེན ཙེ ཀཏཾ ཀམྨཾ, ཀཱཡཀམྨནྟི ཝུཙྩཏི;

ཀཱཡོ ཙ ཀཱཡཀམྨཉྩ, ཨཉྙམཉྙཾ ཝཝཏྠིཏཱ.

སཱུཙིཡཱ ཙེ ཀཏཾ ཀམྨཾ, སཱུཙིཀམྨནྟི ཝུཙྩཏི;

སཱུཙི ཙ སཱུཙིཀམྨཉྩ, ཨཉྙམཉྙཾ ཝཝཏྠིཏཱ.

ཝཱསིཡཱ ཙེ ཀཏཾ ཀམྨཾ, ཝཱསིཀམྨནྟི ཝུཙྩཏི;

ཝཱསི ཙ ཝཱསིཀམྨཉྩ, ཨཉྙམཉྙཾ ཝཝཏྠིཏཱ.

པུརིསེན ཙེ ཀཏཾ ཀམྨཾ, པུརིསཀམྨནྟི ཝུཙྩཏི;

པུརིསོ ཙ པུརིསཀམྨཉྩ, ཨཉྙམཉྙཾ ཝཝཏྠིཏཱ.

ཨེཝམེཝཾ.

ཀཱཡེན ཙེ ཀཏཾ ཀམྨཾ, ཀཱཡཀམྨནྟི ཝུཙྩཏི;

ཀཱཡོ ཙ ཀཱཡཀམྨཉྩ, ཨཉྙམཉྙཾ ཝཝཏྠིཏཱཏི.

ཨེཝཾ སནྟེ ནེཝ དྭཱརཝཝཏྠཱནཾ ཡུཛྫཏི, ན ཀམྨཝཝཏྠཱནཾ. ཀཐཾ? ཀཱཡཝིཉྙཏྟིཡཉྷི ‘‘དྭཱརེ ཙརནྟི ཀམྨཱནཱི’’ཏི ཝཙནཏོ ཝཙཱིཀམྨམྤི པཝཏྟཏི, ཏེནསྶཱ ཀཱཡཀམྨདྭཱརནྟི ཝཝཏྠཱནཾ ན ཡུཏྟཾ. ཀཱཡཀམྨཉྩ ཝཙཱིཝིཉྙཏྟིཡམྤི པཝཏྟཏི, ཏེནསྶ ཀཱཡཀམྨནྟི ཝཝཏྠཱནཾ ན ཡུཛྫཏཱི’ཏི. ‘ནོ ན ཡུཛྫཏི. ཀསྨཱ? ཡེབྷུཡྻཝུཏྟིཏཱཡ ཙེཝ ཏབྦཧུལཝུཏྟིཏཱཡ ཙ. ཀཱཡཀམྨམེཝ ཧི ཡེབྷུཡྻེན ཀཱཡཝིཉྙཏྟིཡཾ པཝཏྟཏི ན ཨིཏརཱནི, ཏསྨཱ ཀཱཡཀམྨསྶ ཡེབྷུཡྻེན པཝཏྟིཏོ ཏསྶཱ ཀཱཡཀམྨདྭཱརབྷཱཝོ སིདྡྷོ. བྲཱཧྨཎགཱམཨམྦཝནནཱགཝནཱདཱིནཾ བྲཱཧྨཎགཱམཱདིབྷཱཝོ ཝིཡཱཏི དྭཱརཝཝཏྠཱནཾ ཡུཛྫཏི. ཀཱཡཀམྨཾ པན ཀཱཡདྭཱརམྷིཡེཝ བཧུལཾ པཝཏྟཏི ¶ ཨཔྤཾ ཝཙཱིདྭཱརེ ¶ . ཏསྨཱ ཀཱཡདྭཱརེ བཧུལཾ པཝཏྟིཏོ ཨེཏསྶ ¶ ཀཱཡཀམྨབྷཱཝོ སིདྡྷོ, ཝནཙརཀཐུལླཀུམཱརིཀཱདིགོཙརཱནཾ ཝནཙརཀཱདིབྷཱཝོ ཝིཡཱཏི. ཨེཝཾ ཀམྨཝཝཏྠཱནམྤི ཡུཛྫཏཱི’ཏི.

ཀཱཡཀམྨདྭཱརཀཐཱ ནིཊྛིཏཱ.

ཝཙཱིཀམྨདྭཱརཀཐཱ

ཝཙཱིཀམྨདྭཱརཀཐཱཡཾ པན ཙེཏནཱཝིརཏིསདྡཝསེན ཏིཝིདྷཱ ཝཱཙཱ ནཱམ. ཏཏྠ ‘‘ཙཏཱུཧི, བྷིཀྑཝེ, ཨངྒེཧི སམནྣཱགཏཱ ཝཱཙཱ སུབྷཱསིཏཱ ཧོཏི ནོ དུབྦྷཱསིཏཱ, ཨནཝཛྫཱ ཙ ཨནནུཝཛྫཱ ཙ ཝིཉྙཱུན’’ནྟི (སཾ. ནི. ༡.༢༡༣); ཨཡཾ ཙེཏནཱཝཱཙཱ ནཱམ. ཡཱ ‘‘ཙཏཱུཧི ཝཙཱིདུཙྩརིཏེཧི ཨཱརཏི ཝིརཏི…པེ… ཨཡཾ ཝུཙྩཏི སམྨཱཝཱཙཱ’’ཏི (ཝིབྷ. ༢༠༦), ཨཡཾ ཝིརཏིཝཱཙཱ ནཱམ. ‘‘ཝཱཙཱ གིརཱ བྱཔྤཐོ ཨུདཱིརཎཾ གྷོསོ གྷོསཀམྨཾ ཝཱཙཱ ཝཙཱིབྷེདོ’’ཏི (དྷ. ས. ༨༥༠), ཨཡཾ སདྡཝཱཙཱ ནཱམ. ཏཱསུ ཝཙཱིཀམྨདྭཱརནྟི ནེཝ ཙེཏནཱཡ ནཱམཾ ན ཝིརཏིཡཱ. སཧསདྡཱ པན ཨེཀཱ ཝིཉྙཏྟི ཨཏྠི, ཨིདཾ ཝཙཱིཀམྨདྭཱརཾ ནཱམ. ཡཾ སནྡྷཱཡ ཝུཏྟཾ – ‘‘ཀཏམཾ ཏཾ རཱུཔཾ ཝཙཱིཝིཉྙཏྟི? ཡཱ ཀུསལཙིཏྟསྶ ཝཱ ཨཀུསལཙིཏྟསྶ ཝཱ ཨབྱཱཀཏཙིཏྟསྶ ཝཱ ཝཱཙཱ གིརཱ བྱཔྤཐོ ཨུདཱིརཎཾ གྷོསོ གྷོསཀམྨཾ ཝཱཙཱ ཝཙཱིབྷེདོ, ཨཡཾ ཝུཙྩཏི ཝཱཙཱ. ཡཱ ཏཱཡ ཝཱཙཱཡ ཝིཉྙཏྟི ཝིཉྙཱཔནཱ ཝིཉྙཱཔིཏཏྟཾ, ཨིདཾ ཏཾ རཱུཔཾ ཝཙཱིཝིཉྙཏྟཱི’’ཏི (དྷ. ས. ༦༣༦).

‘ཨིདཾ ཝཀྑཱམི ཨེཏཾ ཝཀྑཱམཱི’ཏི ཧི ཝིཏཀྐཡཏོ ཝིཏཀྐཝིཔྥཱརསདྡོ ནཱམ ཨུཔྤཛྫཏི. ཨཡཾ ན སོཏཝིཉྙེཡྻོ མནོཝིཉྙེཡྻོཏི མཧཱཨཊྛཀཐཱཡཾ ཨཱགཏོ. ཨཱགམཊྛཀཐཱསུ པན ‘ཝིཏཀྐཝིཔྥཱརསདྡ’ནྟི ཝིཏཀྐཝིཔྥཱརཝསེན ཨུཔྤནྣཾ ཝིཔྤལཔནྟཱནཾ སུཏྟཔྤམཏྟཱདཱིནཾ སདྡཾ; ‘སུཏྭཱ’ཏི ཏཾ སུཏྭཱ, ཡཾ ཝིཏཀྐཡཏོ ཏསྶ སོ སདྡོ ཨུཔྤནྣོ; ཏསྶ ཝསེན ‘ཨེཝམྤི ཏེ མནོ, ཨིཏྠམྤི ཏེ མནོ’ཏི ཨཱདིསཏཱིཏི ཝཏྭཱ ཝཏྠཱུནིཔི ཀཐིཏཱནི. པཊྛཱནེཔི ‘‘ཙིཏྟསམུཊྛཱནཾ སདྡཱཡཏནཾ སོཏཝིཉྙཱཎསྶ ཨཱརམྨཎཔཙྩཡེན པཙྩཡོ’’ཏི ཨཱགཏཾ. ཏསྨཱ ཝིནཱ ཝིཉྙཏྟིགྷཊྚནཱཡ ¶ ཨུཔྤཛྫམཱནོ ཨསོཏཝིཉྙེཡྻོ ཝིཏཀྐཝིཔྥཱརསདྡོ ནཱམ ནཏྠི. ‘ཨིདཾ ཝཀྑཱམི ¶ ཨེཏཾ ཝཀྑཱམཱི’ཏི ཨུཔྤཛྫམཱནཾ པན ཙིཏྟཾ པཐཝཱིདྷཱཏུ ཨཱཔོདྷཱཏུ ¶ ཏེཛོདྷཱཏུ ཝཱཡོདྷཱཏུ ཝཎྞོ གནྡྷོ རསོ ཨོཛཱཏི ཨཊྛ རཱུཔཱནི སམུཊྛཱཔེཏི. ཏེསཾ ཨབྦྷནྟརེ ཙིཏྟསམུཊྛཱནཱ པཐཝཱིདྷཱཏུ ཨུཔཱདིནྣཀཾ གྷཊྚཡམཱནཱཝ ཨུཔྤཛྫཏི. ཏེན དྷཱཏུསངྒྷཊྚནེན སཧེཝ སདྡོ ཨུཔྤཛྫཏཱིཏི. ཨཡཾ ཙིཏྟསམུཊྛཱནསདྡོ ནཱམ. ཨཡཾ ན ཝིཉྙཏྟི. ཏསྶཱ པན ཙིཏྟསམུཊྛཱནཱཡ པཐཝཱིདྷཱཏུཡཱ ཨུཔཱདིནྣཀགྷཊྚནསྶ པཙྩཡབྷཱུཏོ ཨེཀོ ཨཱཀཱརཝིཀཱརོ ཨཏྠི, ཨཡཾ ཝཙཱིཝིཉྙཏྟི ནཱམ. ཨིཏོ པརཾ སཱ ཨཊྛ རཱུཔཱནི ཝིཡ ན ཙིཏྟསམུཊྛཱནཱཏིཨཱདི སབྦཾ ཧེཊྛཱ ཝུཏྟནཡེནེཝ ཝེདིཏབྦཾ.

ཨིདྷཱཔི ཧི ‘ཏིསྶ, དཏྟ, མིཏྟཱ’ཏི པཀྐོསནྟསྶ སདྡཾ སུཏྭཱ ཝིཉྙཏྟིཾ མནོདྭཱརིཀཙིཏྟེན ཙིནྟེཏྭཱ ‘ཨིདཉྩིདཉྩ ཨེས ཀཱརེཏི མཉྙེ’ཏི ཛཱནཱཏི. ཀཱཡཝིཉྙཏྟི ཝིཡ ཙ ཨཡམྤི ཏིརཙྪཱནགཏཱནམྤི པཱཀཊཱ ཧོཏི. ‘ཨེཧི, ཡཱཧཱི’ཏི ཧི སདྡཾ སུཏྭཱ ཏིརཙྪཱནགཏཱཔི ‘ཨིདཾ ནཱམེས ཀཱརེཏི མཉྙེ’ཏི ཉཏྭཱ ཨཱགཙྪནྟི ཙེཝ གཙྪནྟི ཙ. ཏིསམུཊྛཱནིཀཀཱཡཾ ཙཱལེཏི ན ཙཱལེཏཱིཏི, ཨཡཾ པན ཝཱརོ ཨིདྷ ན ལབྦྷཏི. པུརིམཙིཏྟསམུཊྛཱནཱཡ ཨུཔཏྠམྦྷནཀིཙྩམྤི ནཏྠི. ཡཱ པན ཏསྨིཾ ཝཙཱིདྭཱརེ སིདྡྷཱ ཙེཏནཱ, ཡཱཡ མུསཱ ཀཐེཏི, པེསུཉྙཾ ཀཐེཏི, ཕརུསཾ ཀཐེཏི, སམྥཾ པལཔཏི, མུསཱཝཱདཱདཱིཧི ཝིརམཏི, ཨིདཾ ཝཙཱིཀམྨཾ ནཱམ. ཨིཏོ པརཾ སབྦཾ ཀམྨཝཝཏྠཱནཉྩ དྭཱརཝཝཏྠཱནཉྩ ཧེཊྛཱ ཝུཏྟནཡེནེཝ ཝེདིཏབྦནྟི.

ཝཙཱིཀམྨདྭཱརཀཐཱ ནིཊྛིཏཱ.

མནོཀམྨདྭཱརཀཐཱ

མནོཀམྨདྭཱརཀཐཱཡཾ པན ཀཱམཱཝཙརཱདིཝསེན ཙཏུབྦིདྷོ མནོ མནོ ནཱམ. ཏཏྠ ཀཱམཱཝཙརོ ཙཏུཔཉྙཱསཝིདྷོ ཧོཏི, རཱུཔཱཝཙརོ པནྣརསཝིདྷོ, ཨརཱུཔཱཝཙརོ དྭཱདསཝིདྷོ, ལོཀུཏྟརོ ཨཊྛཝིདྷོཏི སབྦོཔི ཨེཀཱུནནཝུཏིཝིདྷོ ཧོཏི. ཏཏྠ ཨཡཾ ནཱམ མནོ མནོདྭཱརཾ ན ཧོཏཱིཏི ན ཝཏྟབྦོ. ཡཐཱ ཧི ཨཡཾ ནཱམ ཙེཏནཱ ཀམྨཾ ན ཧོཏཱིཏི ན ཝཏྟབྦཱ, ཨནྟམསོ པཉྩཝིཉྙཱཎསམྤཡུཏྟཱཔི ¶ ཧི ཙེཏནཱ མཧཱཔཀརཎེ ཀམྨནྟྭེཝ ནིདྡིཊྛཱ, ཨེཝམེཝ ཨཡཾ ནཱམ མནོ མནོདྭཱརཾ ན ཧོཏཱིཏི ན ཝཏྟབྦོ.

ཨེཏྠཱཧ ¶ – ཀམྨཾ ནཱམེཏཾ ཀིཾ ཀརོཏཱིཏི? ཨཱཡཱུཧཏི, ཨབྷིསངྑརོཏི, པིཎྜཾ ཀརོཏི, ཙེཏེཏི, ཀཔྤེཏི, པཀཔྤེཏཱིཏི. ཨེཝཾ སནྟེ པཉྩཝིཉྙཱཎཙེཏནཱ ཀིཾ ཨཱཡཱུཧཏི, ཨབྷིསངྑརོཏི, པིཎྜཾ ¶ ཀརོཏི, ཙེཏེཏི, ཀཔྤེཏི, པཀཔྤེཏཱིཏི?. སཧཛཱཏདྷམྨེ. སཱཔི ཧི སཧཛཱཏེ སམྤཡུཏྟཀྑནྡྷེ ཨཱཡཱུཧཏི ཨབྷིསངྑརོཏི པིཎྜཾ ཀརོཏི ཙེཏེཏི ཀཔྤེཏི པཀཔྤེཏཱིཏི. ཀིཾ ཝཱ ཨིམིནཱ ཝཱདེན? སབྦསངྒཱཧིཀཝསེན ཧེཏཾ ཝུཏྟཾ. ཨིདཾ པནེཏྠ སནྣིཊྛཱནཾ – ཏེབྷཱུམཀཀུསལཱཀུསལོ ཨེཀཱུནཏིཾསཝིདྷོ མནོ མནོཀམྨདྭཱརཾ ནཱམ. ཡཱ པན ཏསྨིཾ མནོདྭཱརེ སིདྡྷཱ ཙེཏནཱ ཡཱཡ ཨབྷིཛ྄ཛྷཱབྱཱཔཱདམིཙྪཱདསྶནཱནི ཙེཝ ཨནབྷིཛ྄ཛྷཱཨབྱཱཔཱདསམྨཱདསྶནཱནི ཙ གཎྷཱཏི, ཨིདཾ མནོཀམྨཾ ནཱམ. ཨིཏོ པརཾ སབྦཾ ཀམྨཝཝཏྠཱནཉྩ དྭཱརཝཝཏྠཱནཉྩ ཧེཊྛཱ ཝུཏྟནཡེནེཝ ཝེདིཏབྦནྟི. ཨིམཱནི ཏཱིཎི ཀམྨདྭཱརཱནི ནཱམ.

མནོཀམྨདྭཱརཀཐཱ ནིཊྛིཏཱ.

ཀམྨཀཐཱ

ཨིདཱནི ཡཱནི ཏཱིཎི ཀམྨཱནི ཋཔེཏྭཱ ཨིམཱནི ཀམྨདྭཱརཱནི དསྶིཏཱནི, ཏཱནི ཨཱདིཾ ཀཏྭཱ ཨཝསེསསྶ དྭཱརཀཐཱཡ མཱཏིཀཱཋཔནསྶ ཝིཏྠཱརཀཐཱ ཧོཏི. ཏཱིཎི ཧི ཀམྨཱནི – ཀཱཡཀམྨཾ ཝཙཱིཀམྨཾ མནོཀམྨནྟི. ཀིཾ པནེཏཾ ཀམྨཾ ནཱམཱཏི? ཙེཏནཱ ཙེཝ, ཨེཀཙྩེ ཙ ཙེཏནཱསམྤཡུཏྟཀཱ དྷམྨཱ. ཏཏྠ ཙེཏནཱཡ ཀམྨབྷཱཝེ ཨིམཱནི སུཏྟཱནི –

‘‘ཙེཏནཱཧཾ, བྷིཀྑཝེ, ཀམྨཾ ཝདཱམི, ཙེཏཡིཏྭཱ ཀམྨཾ ཀརོཏི ཀཱཡེན ཝཱཙཱཡ མནསཱ’’ (ཨ. ནི. ༦.༦༣; ཀཐཱ. ༥༣༩). ‘‘ཀཱཡེ ཝཱ ཧི, ཨཱནནྡ, སཏི ཀཱཡསཉྩེཏནཱཧེཏུ ཨུཔྤཛྫཏི ཨཛ྄ཛྷཏྟཾ སུཁདུཀྑཾ, ཝཱཙཱཡ ཝཱ, ཨཱནནྡ, སཏི ཝཙཱིསཉྩེཏནཱཧེཏུ ཨུཔྤཛྫཏི ཨཛ྄ཛྷཏྟཾ སུཁདུཀྑཾ; མནེ ཝཱ, ཨཱནནྡ, སཏི མནོསཉྩེཏནཱཧེཏུ ¶ ཨུཔྤཛྫཏི ཨཛ྄ཛྷཏྟཾ སུཁདུཀྑཾ’’ (སཾ. ནི. ༢.༢༥; ཨ. ནི. ༤.༡༧༡). ‘‘ཏིཝིདྷཱ, བྷིཀྑཝེ, ཀཱཡསཉྩེཏནཱ ཨཀུསལཾ ཀཱཡཀམྨཾ དུཀྑུདྲཡཾ, དུཀྑཝིཔཱཀཾ; ཙཏུབྦིདྷཱ, བྷིཀྑཝེ, ཝཙཱིསཉྩེཏནཱ…པེ… ཏིཝིདྷཱ, བྷིཀྑཝེ, མནོསཉྩེཏནཱ ཨཀུསལཾ མནོཀམྨཾ དུཀྑུདྲཡཾ དུཀྑཝིཔཱཀཾ ཏིཝིདྷཱ ¶ , བྷིཀྑཝེ, ཀཱཡསཉྩེཏནཱ ཀུསལཾ ཀཱཡཀམྨཾ སུཁུདྲཡཾ སུཁཝིཔཱཀཾ ཙཏུབྦིདྷཱ, བྷིཀྑཝེ, ཝཙཱིསཉྩེཏནཱ…པེ… ཏིཝིདྷཱ, བྷིཀྑཝེ, མནོསཉྩེཏནཱ, ཀུསལཾ མནོཀམྨཾ སུཁུདྲཡཾ སུཁཝིཔཱཀཾ’’ (ཀཐཱ. ༥༣༩; ཨ. ནི. ༡༠.༢༡༧ ཐོཀཾ ཝིསདིསཾ). ‘‘སཙཱཡཾ, ཨཱནནྡ, སམིདྡྷི མོགྷཔུརིསོ པཱཊལིཔུཏྟསྶ པརིབྦཱཛཀསྶ ཨེཝཾ པུཊྛོ ཨེཝཾ བྱཱཀརེཡྻ – སཉྩེཏནིཡཾ, ཨཱཝུསོ པཱཊལིཔུཏྟ, ཀམྨཾ ཀཏྭཱ ཀཱཡེན ཝཱཙཱཡ མནསཱ, སུཁཝེདནཱིཡཾ སུཁཾ སོ ཝེདཡཏི…པེ… ཨདུཀྑམསུཁཝེདནཱིཡཾ ཨདུཀྑམསུཁཾ སོ ཝེདཡཏཱིཏི; ཨེཝཾ བྱཱཀརམཱནོ ཁོ, ཨཱནནྡ, སམིདྡྷི མོགྷཔུརིསོ པཱཊལིཔུཏྟསྶ པརིབྦཱཛཀསྶ སམྨཱ བྱཱཀརམཱནོ བྱཱཀརེཡྻཱ’’ཏི (མ. ནི. ༣.༣༠༠; ཀཐཱ. ༥༣༩).

ཨིམཱནི ཏཱཝ ཙེཏནཱཡ ཀམྨབྷཱཝེ སུཏྟཱནི. ཙེཏནཱསམྤཡུཏྟདྷམྨཱནཾ པན ཀམྨབྷཱཝོ ཀམྨཙཏུཀྐེན དཱིཔིཏོ. ཝུཏྟཉྷེཏཾ –

‘‘ཙཏྟཱརིམཱནི ¶ , བྷིཀྑཝེ, ཀམྨཱནི མཡཱ སཡཾ ཨབྷིཉྙཱ སཙྪིཀཏྭཱ པཝེདིཏཱནི. ཀཏམཱནི ཙཏྟཱརི? ཨཏྠི, བྷིཀྑཝེ, ཀམྨཾ ཀཎྷཾ ཀཎྷཝིཔཱཀཾ, ཨཏྠི, བྷིཀྑཝེ, ཀམྨཾ སུཀྐཾ སུཀྐཝིཔཱཀཾ, ཨཏྠི, བྷིཀྑཝེ, ཀམྨཾ ཀཎྷསུཀྐཾ ཀཎྷསུཀྐཝིཔཱཀཾ, ཨཏྠི, བྷིཀྑཝེ, ཀམྨཾ ཨཀཎྷཾ ཨསུཀྐཾ ཨཀཎྷཨསུཀྐཝིཔཱཀཾ ཀམྨཀྑཡཱཡ སཾཝཏྟཏི (ཨ. ནི. ༤.༢༣༢-༢༣༣).… ཀཏམཉྩ, བྷིཀྑཝེ, ཀམྨཾ ཨཀཎྷཾ ཨསུཀྐཾ ཨཀཎྷཨསུཀྐཝིཔཱཀཾ ཀམྨཀྑཡཱཡ སཾཝཏྟཏི? ཡདིདཾ སཏྟ བོཛ྄ཛྷངྒཱ – སཏིསམྦོཛ྄ཛྷངྒོ…པེ… ཨུཔེཀྑཱསམྦོཛ྄ཛྷངྒོ, ཨིདཾ ཝུཙྩཏི, བྷིཀྑཝེ, ཀམྨཾ ཨཀཎྷཾ ཨསུཀྐཾ ཨཀཎྷཨསུཀྐཝིཔཱཀཾ ཀམྨཀྑཡཱཡ སཾཝཏྟཏི (ཨ. ནི. ༤.༢༣༨).… ཀཏམཉྩ, བྷིཀྑཝེ, ཀམྨཾ ཨཀཎྷཾ ཨསུཀྐཾ ཨཀཎྷཨསུཀྐཝིཔཱཀཾ ཀམྨཀྑཡཱཡ སཾཝཏྟཏི? ཨཡམེཝ ཨརིཡོ ཨཊྛངྒིཀོ མགྒོ – སེཡྻཐིདཾ, སམྨཱདིཊྛི ¶ …པེ… སམྨཱསམཱདྷི. ཨིདཾ ཝུཙྩཏི, བྷིཀྑཝེ, ཀམྨཾ ཨཀཎྷཾ ཨསུཀྐཾ ཨཀཎྷཨསུཀྐཝིཔཱཀཾ ཀམྨཀྑཡཱཡ སཾཝཏྟཏཱི’’ཏི (ཨ. ནི. ༤.༢༣༧).

ཨེཝཾ ཨིམེ བོཛ྄ཛྷངྒམགྒངྒཔྤབྷེདཏོ པནྣརས དྷམྨཱ ཀམྨཙཏུཀྐེན དཱིཔིཏཱ. ཨབྷིཛ྄ཛྷཱ, བྱཱཔཱདོ, མིཙྪཱདིཊྛི, ཨནབྷིཛ྄ཛྷཱ, ཨབྱཱཔཱདོ, སམྨཱདིཊྛཱིཏི ཨིམེཧི པན ཚཧི སདྡྷིཾ ཨེཀཝཱིསཏི ཙེཏནཱསམྤཡུཏྟཀཱ དྷམྨཱ ཝེདིཏབྦཱ.

ཏཏྠ ¶ ལོཀུཏྟརམགྒོ བྷཛཱཔིཡམཱནོ ཀཱཡཀམྨཱདཱིནི ཏཱིཎི ཀམྨཱནི བྷཛཏི. ཡཉྷི ཀཱཡེན དུསྶཱིལྱཾ ཨཛ྄ཛྷཱཙརཏི, ཏམྷཱ སཾཝརོ ཀཱཡིཀོཏི ཝེདིཏབྦོ. ཡཾ ཝཱཙཱཡ དུསྶཱིལྱཾ ཨཛ྄ཛྷཱཙརཏི, ཏམྷཱ སཾཝརོ ཝཱཙསིཀོཏི ཝེདིཏབྦོ. ཨིཏི སམྨཱཀམྨནྟོ ཀཱཡཀམྨཾ, སམྨཱཝཱཙཱ ཝཙཱིཀམྨཾ. ཨེཏསྨིཾ དྭཡེ གཧིཏེ སམྨཱཨཱཛཱིཝོ ཏཔྤཀྑིཀཏྟཱ གཧིཏོཝ ཧོཏི. ཡཾ པན མནེན དུསྶཱིལྱཾ ཨཛ྄ཛྷཱཙརཏི, ཏམྷཱ སཾཝརོ མཱནསིཀོཏི ཝེདིཏབྦོ. སོ དིཊྛིསངྐཔྤཝཱཡཱམསཏིསམཱདྷིཝསེན པཉྩཝིདྷོ ཧོཏི. ཨཡཾ པཉྩཝིདྷོཔི མནོཀམྨཾ ནཱམ. ཨེཝཾ ལོཀུཏྟརམགྒོ བྷཛཱཔིཡམཱནོ ཏཱིཎི ཀམྨཱནི བྷཛཏི.

ཨིམསྨིཾ ཋཱནེ དྭཱརསཾསནྡནཾ ནཱམ ཧོཏི. ཀཱཡཝཙཱིདྭཱརེསུ ཧི ཙོཔནཾ པཏྭཱ ཀམྨཔཐཾ ཨཔྤཏྟམྤི ཨཏྠི, མནོདྭཱརེ ཙ སམུདཱཙཱརཾ པཏྭཱ ཀམྨཔཐཾ ཨཔྤཏྟམྤི ¶ ཨཏྠི; ཏཾ གཧེཏྭཱ ཏཾཏཾདྭཱརཔཀྑིཀམེཝ ཨཀཾསུ.

ཏཏྲཱཡཾ ནཡོ – ཡོ ‘མིགཝཾ གམིསྶཱམཱི’ཏི དྷནུཾ སཛྫེཏི, ཛིཡཾ ཝཊྚེཏི, སཏྟིཾ ནིསེཏི, བྷཏྟཾ བྷུཉྫཏི, ཝཏྠཾ པརིདཧཏི, ཨེཏྟཱཝཏཱ ཀཱཡདྭཱརེ ཙོཔནཾ པཏྟཾ ཧོཏི. སོ ཨརཉྙེ དིཝསཾ ཙརིཏྭཱ ཨནྟམསོ སསབིལཱ༹རམཏྟམྤི ན ལབྷཏི, ཨིདཾ ཨཀུསལཾ ཀཱཡཀམྨཾ ནཱམ ཧོཏི ན ཧོཏཱིཏི? ན ཧོཏི. ཀསྨཱ? ཀམྨཔཐཾ ཨཔྤཏྟཏཱཡ. ཀེཝལཾ པན ཀཱཡདུཙྩརིཏཾ ནཱམ ཧོཏཱིཏི ཝེདིཏབྦཾ. མཙྪགྒཧཎཱདཱི སུཔཡོགེསུཔི ཨེསེཝ ནཡོ.

ཝཙཱིདྭཱརེཔི ‘མིགཝཾ གམིསྶཱམི’ ‘ཝེགེན དྷནུཨཱདཱིནི སཛྫེཐཱ’ཏི ཨཱཎཱཔེཏྭཱ པུརིམནཡེནེཝ ཨརཉྙེ ཀིཉྩི ཨལབྷནྟསྶ ཀིཉྩཱཔི ཝཙཱིདྭཱརེ ཙོཔནཾ པཏྟཾ, ཀམྨཔཐཾ ཨཔྤཏྟཏཱཡ པན ཀཱཡཀམྨཾ ན ཧོཏི. ཀེཝལཾ ཝཙཱིདུཙྩརིཏཾ ནཱམ ཧོཏཱིཏི ཝེདིཏབྦཾ.

མནོདྭཱརེ ¶ པན ཝདྷཀཙེཏནཱཡ ཨུཔྤནྣམཏྟཱཡ ཨེཝ ཀམྨཔཐབྷེདོཝ ཧོཏི. སོ ཙ ཁོ བྱཱཔཱདཝསེན ན པཱཎཱཏིཔཱཏཝསེན. ཨཀུསལཉྷི ཀཱཡཀམྨཾ ཀཱཡཝཙཱིདྭཱརེསུ སམུཊྛཱཏི, ན མནོདྭཱརེ; ཏཐཱ ཨཀུསལཾ ཝཙཱིཀམྨཾ. ཨཀུསལཾ མནོཀམྨཾ པན ཏཱིསུཔི དྭཱརེསུ སམུཊྛཱཏི; ཏཐཱ ཀུསལཱནི ཀཱཡཝཙཱིམནོཀམྨཱནི.

ཀཐཾ ¶ ? སཧཏྠཱ ཧི པཱཎཾ ཧནནྟསྶ ཨདིནྣཾ ཨཱདིཡནྟསྶ མིཙྪཱཙཱརཾ ཙརནྟསྶ ཀམྨཾ ཀཱཡཀམྨམེཝ ཧོཏི. དྭཱརམྤི ཀཱཡདྭཱརམེཝ ཧོཏི. ཨེཝཾ ཏཱཝ ཨཀུསལཾ ཀཱཡཀམྨཾ ཀཱཡདྭཱརེ སམུཊྛཱཏི. ཏེཧི པན ཙིཏྟེཧི སཧཛཱཏཱ ཨབྷིཛ྄ཛྷཱབྱཱཔཱདམིཙྪཱདིཊྛིཡོ ཙེཏནཱཔཀྑིཀཱ ཝཱ བྷཝནྟི, ཨབྦོཧཱརིཀཱ ཝཱ. ‘གཙྪ ཨིཏྠནྣཱམཾ ཛཱིཝིཏཱ ཝོརོཔེཧི, ཨིཏྠནྣཱམཾ བྷཎྜཾ ཨཝཧརཱ’ཏི ཨཱཎཱཔེནྟསྶ པན ཀམྨཾ ཀཱཡཀམྨཾ ཧོཏི, དྭཱརཾ པན ཝཙཱིདྭཱརཾ. ཨེཝཾ ཨཀུསལཾ ཀཱཡཀམྨཾ ཝཙཱིདྭཱརེ སམུཊྛཱཏི. ཏེཧི པན ཙིཏྟེཧི སཧཛཱཏཱ ཨབྷིཛ྄ཛྷཱབྱཱཔཱདམིཙྪཱདིཊྛིཡོ ཙེཏནཱཔཀྑིཀཱ ཝཱ བྷཝནྟི ཨབྦོཧཱརིཀཱ ཝཱ. ཨེཏྟཀཱ ཨཱཙརིཡཱནཾ སམཱནཏྠཀཐཱ ནཱམ.

ཝིཏཎྜཝཱདཱི པནཱཧ – ‘ཨཀུསལཾ ཀཱཡཀམྨཾ མནོདྭཱརེཔི སམུཊྛཱཏཱི’ཏི. སོ ‘ཏཡོ སངྒཧེ ཨཱརུལ༹ྷཾ སུཏྟཾ ཨཱཧརཱཧཱི’ཏི ཝུཏྟོ ཨིདཾ ཀུལུམྦསུཏྟཾ ནཱམ ཨཱཧརི –

‘‘པུན ཙཔརཾ ¶ , བྷིཀྑཝེ, ཨིདྷེཀཙྩོ སམཎོ ཝཱ བྲཱཧྨཎོ ཝཱ ཨིདྡྷིམཱ ཙེཏོཝསིཔྤཏྟོ ཨཉྙིསྶཱ ཀུཙྪིགཏཾ གབྦྷཾ པཱཔཀེན མནསཱ ཨནུཔེཀྑཀོ ཧོཏི – ‘ཨཧོ ཝཏཱཡཾ ཀུཙྪིགཏོ གབྦྷོ ན སོཏྠིནཱ ཨབྷིནིཀྑམེཡྻཱ’ཏི. ཨེཝཾ, བྷིཀྑཝེ, ཀུལུམྦསྶ ཨུཔགྷཱཏོ ཧོཏཱི’’ཏི.

ཨིདཾ སུཏྟཾ ཨཱཧརིཏྭཱ ཨཱཧ – ‘ཨེཝཾ ཙིནྟིཏམཏྟེཡེཝ མནསཱ ཀུཙྪིགཏོ གབྦྷོ ཕེཎཔིཎྜོ ཝིཡ ཝིལཱིཡཏི. ཨེཏྠ ཀུཏོ ཀཱཡངྒཙོཔནཾ ཝཱ ཝཱཙངྒཙོཔནཾ ཝཱ? མནོདྭཱརསྨིཾཡེཝ པན ཨིདཾ ཨཀུསལཾ ཀཱཡཀམྨཾ སམུཊྛཱཏཱི’ཏི.

ཏམེནཾ ‘ཏཝ སུཏྟསྶ ཨཏྠཾ ཏུལཡིསྶཱམཱ’ཏི ཝཏྭཱ ཨེཝཾ ཏུལཡིཾསུ – ‘ཏྭཾ ཨིདྡྷིཡཱ པརཱུཔགྷཱཏཾ ཝདེསི. ཨིདྡྷི ནཱམ ཙེསཱ – ཨདྷིཊྛཱནིདྡྷི, ཝིཀུབྦནིདྡྷི, མནོམཡིདྡྷི, ཉཱཎཝིཔྥཱརིདྡྷི, སམཱདྷིཝིཔྥཱརིདྡྷི, ཨརིཡིདྡྷི, ཀམྨཝིཔཱཀཛིདྡྷི, པུཉྙཝཏོ ཨིདྡྷི, ཝིཛྫཱམཡིདྡྷི ¶ , ཏཏྠ ཏཏྠ སམྨཱཔཡོགཔཙྩཡཱ ཨིཛ྄ཛྷནཊྛེན ¶ ཨིདྡྷཱིཏི དསཝིདྷཱ (པཊི. མ. ༣.༡༠). ཏཏྠ ཀཏརཾ ཨིདྡྷིཾ ཝདེསཱི’ཏི? ‘བྷཱཝནཱམཡ’ནྟི. ‘ཀིཾ པན བྷཱཝནཱམཡིདྡྷིཡཱ པརཱུཔགྷཱཏཀམྨཾ ཧོཏཱི’ཏི? ‘ཨཱམ, ཨེཀཙྩེ ཨཱཙརིཡཱ ཨེཀཝཱརཾ ཧོཏཱི’ཏི; ཝདནྟི ཡཐཱ ཧི པརཾ པཧརིཏུཀཱམེན ཨུདཀབྷརིཏེ གྷཊེ ཁིཏྟེ གྷཊོཔི བྷིཛྫཏི, ཨུདཀམྤི ནསྶཏི, ཨེཝམེཝ བྷཱཝནཱམཡིདྡྷིཡཱ ཨེཀཝཱརཾ པརཱུཔགྷཱཏཀམྨཾ ཧོཏི. ཏཏོ པཊྛཱཡ པན སཱ ནསྶཏཱིཏི. ཨཐ ནཾ ‘བྷཱཝནཱམཡིདྡྷིཡཱ ནེཝ ཨེཀཝཱརཾ ན དྭེ ཝཱརེ པརཱུཔགྷཱཏཀམྨཾ ཧོཏཱི’ཏི ཝཏྭཱ ཏཾ སཉྙཏྟིཾ ཨཱགཙྪནྟཾ པུཙྪིཾསུ – ‘བྷཱཝནཱམཡིདྡྷི ཀིཾ ཀུསལཱ, ཨཀུསལཱ, ཨབྱཱཀཏཱ? སུཁཱཡ ཝེདནཱཡ སམྤཡུཏྟཱ, དུཀྑཱཡ ཝེདནཱཡ སམྤཡུཏྟཱ, ཨདུཀྑམསུཁཱཡ ཝེདནཱཡ སམྤཡུཏྟཱ? སཝིཏཀྐསཝིཙཱརཱ, ཨཝིཏཀྐཝིཙཱརམཏྟཱ, ཨཝིཏཀྐཨཝིཙཱརཱ? ཀཱམཱཝཙརཱ, རཱུཔཱཝཙརཱ, ཨརཱུཔཱཝཙརཱ’ཏི?

ཨིམཾ པན པཉྷཾ ཡོ ཛཱནཱཏི སོ ཨེཝཾ ཝཀྑཏི – ‘བྷཱཝནཱམཡིདྡྷི ཀུསལཱ ཝཱ ཧོཏི, ཨབྱཱཀཏཱ ཝཱ; ཨདུཀྑམསུཁཝེདནཱིཡཱ ཨེཝ, ཨཝིཏཀྐཨཝིཙཱརཱ ཨེཝ, རཱུཔཱཝཙརཱ ཨེཝཱ’ཏི. སོ ཝཏྟབྦོ – ‘པཱཎཱཏིཔཱཏཙེཏནཱ ཀུསལཱདཱིསུ ཀཏརཾ ཀོཊྛཱསཾ བྷཛཏཱི’ཏི? ཛཱནནྟོ ཝཀྑཏི – ‘པཱཎཱཏིཔཱཏཙེཏནཱ ཨཀུསལཱ ཨེཝ, དུཀྑཝེདནཱིཡཱ ཨེཝ, སཝིཏཀྐསཝིཙཱརཱ ཨེཝ ཀཱམཱཝཙརཱ ཨེཝཱ’ཏི. ‘ཨེཝཾ སནྟེ ཏཝ པཉྷོ ནེཝ ཀུསལཏྟིཀེན སམེཏི, ན ཝེདནཱཏྟིཀེན ¶ , ན ཝིཏཀྐཏྟིཀེན, ན བྷཱུམནྟརེནཱ’ཏི.

‘ཀིཾ པན ཨེཝཾ མཧནྟཾ སུཏྟཾ ནིརཏྠཀ’ནྟི? ‘ནོ ནིརཏྠཀཾ; ཏྭཾ པནསྶ ཨཏྠཾ ན ཛཱནཱསི. ‘‘ཨིདྡྷིམཱ ཙེཏོཝསིཔྤཏྟོ’’ཏི ཨེཏྠ ཧི ནེཝ བྷཱཝནཱམཡིདྡྷི ཨདྷིཔྤེཏཱ, ཨཱཐབྦཎིདྡྷི པན ཨདྷིཔྤེཏཱ. སཱ ཧི ཨེཏྠ ལབྦྷམཱནཱ ལབྦྷཏི. སཱ པན ཀཱཡཝཙཱིདྭཱརཱནི མུཉྩིཏྭཱ ཀཱཏུཾ ན སཀྐཱ. ཨཱཐབྦཎིདྡྷིཀཱ ཧི སཏྟཱཧཾ ཨལོཎཀཾ བྷུཉྫིཏྭཱ དབྦེ ཨཏྠརིཏྭཱ པཐཝིཡཾ སཡམཱནཱ ཏཔཾ ཙརིཏྭཱ སཏྟམེ དིཝསེ སུསཱནབྷཱུམིཾ སཛྫེཏྭཱ སཏྟམེ པདེ ཋཏྭཱ ཧཏྠཾ ཝཊྚེཏྭཱ ཝཊྚེཏྭཱ མུཁེན ཝིཛྫཾ པརིཛཔྤནྟི. ཨཐ ནེསཾ ཀམྨཾ སམིཛ྄ཛྷཏི. ཨེཝཾ ཨཡམྤི ཨིདྡྷི ཀཱཡཝཙཱིདྭཱརཱནི མུཉྩིཏྭཱ ཀཱཏུཾ ན སཀྐཱཏི. ‘ན ཀཱཡཀམྨཾ མནོདྭཱརེ སམུཊྛཱཏཱི’ཏི ནིཊྛམེཏྠ གནྟབྦཾ.

ཧཏྠམུདྡཱཡ ¶ པན མུསཱཝཱདཱདཱིནི ཀཐེནྟསྶ ཀམྨཾ ཝཙཱིཀམྨཾ, དྭཱརཾ པན ཀཱཡདྭཱརཾ ཧོཏི ¶ . ཨེཝཾ ཨཀུསལཾ ཝཙཱིཀམྨམྤི ཀཱཡདྭཱརེ སམུཊྛཱཏི. ཏེཧི པན ཙིཏྟེཧི སཧཛཱཏཱ ཨབྷིཛ྄ཛྷཱབྱཱཔཱདམིཙྪཱདིཊྛིཡོ ཙེཏནཱཔཀྑིཀཱ ཝཱ བྷཝནྟི, ཨབྦོཧཱརིཀཱ ཝཱ. ཝཙཱིབྷེདཾ པན ཀཏྭཱ མུསཱཝཱདཱདཱིནི ཀཐེནྟསྶ ཀམྨམྤི ཝཙཱིཀམྨཾ དྭཱརམྤི ཝཙཱིདྭཱརམེཝ. ཨེཝཾ ཨཀུསལཾ ཝཙཱིཀམྨཾ ཝཙཱིདྭཱརེ སམུཊྛཱཏི. ཏེཧི པན ཙིཏྟེཧི སཧཛཱཏཱ ཨབྷིཛ྄ཛྷཱབྱཱཔཱདམིཙྪཱདིཊྛིཡོ ཙེཏནཱཔཀྑིཀཱ ཝཱ བྷཝནྟི ཨབྦོཧཱརིཀཱ ཝཱ. ཨེཏྟཀཱ ཨཱཙརིཡཱནཾ སམཱནཏྠཀཐཱ ནཱམ.

ཝིཏཎྜཝཱདཱི པནཱཧ – ‘ཨཀུསལཾ ཝཙཱིཀམྨཾ མནོདྭཱརེཔི སམུཊྛཱཏཱི’ཏི. སོ ‘ཏཡོ སངྒཧེ ཨཱརུལ༹ྷཾ སུཏྟཾ ཨཱཧརཱཧཱི’ཏི ཝུཏྟོ ཨིདཾ ཨུཔོསཐཀྑནྡྷཀཏོ སུཏྟཾ ཨཱཧརི –

‘‘ཡོ པན བྷིཀྑུ ཡཱཝཏཏིཡཾ ཨནུསྶཱཝིཡམཱནེ སརམཱནོ སནྟིཾ ཨཱཔཏྟིཾ ནཱཝིཀརེཡྻ སམྤཛཱནམུསཱཝཱདསྶ ཧོཏཱི’’ཏི (མཧཱཝ. ༡༣༤).

ཨིདཾ སུཏྟཾ ཨཱཧརིཏྭཱ ཨཱཧ – ‘ཨེཝཾ ཨཱཔཏྟིཾ ཨནཱཝིཀརོནྟོ ཏུཎྷཱིབྷཱུཏོཝ ཨཉྙཾ ཨཱཔཏྟིཾ ཨཱཔཛྫཏི, ཨེཏྠ ཀུཏོ ཀཱཡངྒཙོཔནཾ ཝཱ ཝཱཙངྒཙོཔནཾ ཝཱ? མནོདྭཱརསྨིཾཡེཝ པན ཨིདཾ ཨཀུསལཾ ཝཙཱིཀམྨཾ སམུཊྛཱཏཱི’ཏི.

སོ ཝཏྟབྦོ – ‘ཀིཾ པནེཏཾ སུཏྟཾ ནེཡྻཏྠཾ ཨུདཱཧུ ནཱིཏཏྠ’ནྟི? ‘ནཱིཏཏྠམེཝ མཡ྄ཧཾ སུཏྟ’ནྟི. སོ ‘མཱ ཨེཝཾ ཨཝཙ, ཏུལཡིསྶཱམསྶ ཨཏྠ’ནྟི ཝཏྭཱ ཨེཝཾ པུཙྪིཏབྦོ – ‘སམྤཛཱནམུསཱཝཱདེ ཀིཾ ཧོཏཱི’ཏི? ཛཱནནྟོ ‘སམྤཛཱནམུསཱཝཱདེ དུཀྐཊཾ ཧོཏཱི’ཏི ཝཀྑཏི. ཏཏོ ཝཏྟབྦོ ‘ཝིནཡསྶ དྭེ ¶ མཱུལཱནི – ཀཱཡོ ཙ ཝཱཙཱ ཙ; སམྨཱསམྦུདྡྷེན ཧི སབྦཱཔཏྟིཡོ ཨིམེསུཡེཝ དྭཱིསུ དྭཱརེསུ པཉྙཏྟཱ, མནོདྭཱརེ ཨཱཔཏྟིཔཉྙཔནཾ ནཱམ ནཏྠི. ཏྭཾ ཨཏིཝིཡ ཝིནཡེ པཀཏཉྙཱུ, ཡོ སཏྠཱརཱ ཨཔཉྙཏྟེ ཋཱནེ ཨཱཔཏྟིཾ པཉྙཔེསི, སམྨཱསམྦུདྡྷཾ ཨབྦྷཱཙིཀྑསི, ཛིནཙཀྐཾ པཧརསཱི’ཏིཨཱདིཝཙནེཧི ནིགྒཎྷིཏྭཱ ཨུཏྟརི པཉྷཾ པུཙྪིཏབྦོ – ‘སམྤཛཱནམུསཱཝཱདོ ཀིརིཡཏོ སམུཊྛཱཏི ཨུདཱཧུ ཨཀིརིཡཏོ’ཏི? ཛཱནནྟོ ‘ཀིརིཡཏོ’ཏི ཝཀྑཏི. ཏཏོ ཝཏྟབྦོ – ‘ཨནཱཝིཀརོནྟོ ཀཏརཾ ཀིརིཡཾ ཀརོཏཱི’ཏི? ཨདྡྷཱ ཧི ཀིརིཡཾ ཨཔསྶནྟོ ཝིགྷཱཏཾ ཨཱཔཛྫིསྶཏི. ཏཏོ ཨིམསྶ སུཏྟསྶ ¶ ཨཏྠེན སཉྙཱཔེཏབྦོ. ཨཡཉྷེཏྠ ཨཏྠོ – ཡྭཱཡཾ ‘སམྤཛཱནམུསཱཝཱདོ ཧོཏཱི’ཏི ཝུཏྟོ, སོ ཨཱཔཏྟིཏོ ཀིཾ ཧོཏི? ‘ཀཏརཱཔཏྟི ཧོཏཱི’ཏི ¶ ཨཏྠོ. ‘དུཀྐཊཱཔཏྟི ཧོཏི’. སཱ ཙ ཁོ ན མུསཱཝཱདལཀྑཎེན, བྷགཝཏོ པན ཝཙནེན ཝཙཱིདྭཱརེ ཨཀིརིཡསམུཊྛཱནཱ ཨཱཔཏྟི ཧོཏཱིཏི ཝེདིཏབྦཱ. ཝུཏྟམྤི ཙེཏཾ –

‘‘ཨནཱལཔནྟོ མནུཛེན ཀེནཙི,

ཝཱཙཱགིརཾ ནོ ཙ པརེ བྷཎེཡྻ;

ཨཱཔཛྫེཡྻ ཝཱཙསིཀཾ ན ཀཱཡིཀཾ,

པཉྷཱ མེསཱ ཀུསལེཧི ཙིནྟིཏཱ’’ཏི. (པཊི. ༤༧༩);

ཨེཝཾ ཨཀུསལཾ ཝཙཱིཀམྨཾ ན མནོདྭཱརེ སམུཊྛཱཏཱིཏི ནིཊྛམེཏྠ གནྟབྦཾ.

ཡདཱ པན ཨབྷིཛ྄ཛྷཱསཧགཏེན ཙེཏསཱ ཀཱཡངྒཾ ཙོཔེནྟོ ཧཏྠགྒཱཧཱདཱིནི ཀརོཏི, བྱཱཔཱདསཧགཏེན ཙེཏསཱ དཎྜཔརཱམཱསཱདཱིནི, མིཙྪཱདིཊྛིསཧགཏེན ཙེཏསཱ ‘ཁནྡསིཝཱདཡོ སེཊྛཱ’ཏི ཏེསཾ ཨབྷིཝཱདནཨཉྫལིཀམྨབྷཱུཏཔཱིཋཀཔརིབྷཎྜཱདཱིནི ཀརོཏི, ཏདཱ ཀམྨཾ མནོཀམྨཾ ཧོཏི, དྭཱརཾ པན ཀཱཡདྭཱརཾ. ཨེཝཾ ཨཀུསལཾ མནོཀམྨཾ ཀཱཡདྭཱརེ སམུཊྛཱཏི. ཙེཏནཱ པནེཏྠ ཨབྦོཧཱརིཀཱ.

ཡདཱ པན ཨབྷིཛ྄ཛྷཱསཧགཏེན ཙེཏསཱ ཝཱཙངྒཾ ཙོཔེནྟོ ‘ཨཧོ ཝཏ ཡཾ པརསྶ, ཏཾ མམསྶཱ’ཏི པརཝིཏྟཱུཔཀརཎཾ ཨབྷིཛ྄ཛྷཱཡཏི, བྱཱཔཱདསཧགཏེན ཙེཏསཱ ‘ཨིམེ སཏྟཱ ཧཉྙནྟུ ཝཱ, བཛ྄ཛྷནྟུ ཝཱ, ཨུཙྪིཛྫནྟུ ཝཱ, མཱ ཝཱ ཨཧེསུ’ནྟི ཝདཏི, མིཙྪཱདིཊྛིསཧགཏེན ཙེཏསཱ ‘ནཏྠི དིནྣཾ, ནཏྠི ཡིཊྛ’ནྟིཨཱདཱིནི ཝདཏི, ཏདཱ ཀམྨཾ མནོཀམྨཾ ཧོཏི, དྭཱརཾ པན ཝཙཱིདྭཱརཾ. ཨེཝཾ ཨཀུསལཾ མནོཀམྨཾ ཝཙཱིདྭཱརེ སམུཊྛཱཏི. ཙེཏནཱ པནེཏྠ ཨབྦོཧཱརིཀཱ.

ཡདཱ པན ཀཱཡངྒཝཱཙངྒཱནི ཨཙོཔེཏྭཱ རཧོ ནིསིནྣོ ཨབྷིཛ྄ཛྷཱབྱཱཔཱདམིཙྪཱདིཊྛིསཧགཏཱནི ¶ ཙིཏྟཱནི ཨུཔྤཱདེཏི, ཏདཱ ཀམྨཾ མནོཀམྨཾ, དྭཱརམྤི མནོདྭཱརམེཝ. ཨེཝཾ ཨཀུསལཾ མནོཀམྨཾ མནོདྭཱརེ སམུཊྛཱཏི. ཨིམསྨིཾ པན ཋཱནེ ཙེཏནཱཔི ཙེཏནཱསམྤཡུཏྟཀཱ དྷམྨཱཔི མནོདྭཱརེཡེཝ སམུཊྛཧནྟི. ཨེཝཾ ཨཀུསལཾ མནོཀམྨཾ ཏཱིསུཔི དྭཱརེསུ སམུཊྛཱཏཱིཏི ཝེདིཏབྦཾ.

ཡཾ ¶ པན ཝུཏྟཾ ‘ཏཐཱ ཀུསལཱནི ཀཱཡཝཙཱིམནོཀམྨཱནཱི’ཏི, ཏཏྲཱཡཾ ནཡོ – ཡདཱ ཧི ཀེནཙི ¶ ཀཱརཎེན ཝཏྟུཾ ཨསཀྐོནྟོ ‘པཱཎཱཏིཔཱཏཱ ཨདིནྣཱདཱནཱ ཀཱམེསུམིཙྪཱཙཱརཱ པཊིཝིརམཱམཱི’ཏི ཨིམཱནི སིཀྑཱཔདཱནི ཧཏྠམུདྡཱཡ གཎྷཱཏི, ཏདཱ ཀམྨཾ ཀཱཡཀམྨཾ དྭཱརམྤི ཀཱཡདྭཱརམེཝ. ཨེཝཾ ཀུསལཾ ཀཱཡཀམྨཾ ཀཱཡདྭཱརེ སམུཊྛཱཏི. ཏེཧི ཙིཏྟེཧི སཧགཏཱ ཨནབྷིཛ྄ཛྷཱདཡོ ཙེཏནཱཔཀྑིཀཱ ཝཱ ཧོནྟི, ཨབྦོཧཱརིཀཱ ཝཱ.

ཡདཱ པན ཏཱནེཝ སིཀྑཱཔདཱནི ཝཙཱིབྷེདཾ ཀཏྭཱ གཎྷཱཏི, ཏདཱ ཀམྨཾ ཀཱཡཀམྨཾ, དྭཱརཾ པན ཝཙཱིདྭཱརཾ ཧོཏི. ཨེཝཾ ཀུསལཾ ཀཱཡཀམྨཾ ཝཙཱིདྭཱརེ སམུཊྛཱཏི. ཏེཧི ཙིཏྟེཧི སཧགཏཱ ཨནབྷིཛ྄ཛྷཱདཡོ ཙེཏནཱཔཀྑིཀཱ ཝཱ ཧོནྟི, ཨབྦོཧཱརིཀཱ ཝཱ.

ཡདཱ པན ཏེསུ སིཀྑཱཔདེསུ དིཡྻམཱནེསུ ཀཱཡངྒཝཱཙངྒཱནི ཨཙོཔེཏྭཱ མནསཱཝ ‘པཱཎཱཏིཔཱཏཱ ཨདིནྣཱདཱནཱ ཀཱམེསུམིཙྪཱཙཱརཱ པཊིཝིརམཱམཱི’ཏི གཎྷཱཏི, ཏདཱ ཀམྨཾ ཀཱཡཀམྨཾ, དྭཱརཾ པན མནོདྭཱརཾ ཧོཏི. ཨེཝཾ ཀུསལཾ ཀཱཡཀམྨཾ མནོདྭཱརེ སམུཊྛཱཏི. ཏེཧི ཙིཏྟེཧི སཧགཏཱ ཨནབྷིཛ྄ཛྷཱདཡོ ཙེཏནཱཔཀྑིཀཱ ཝཱ ཧོནྟི, ཨབྦོཧཱརིཀཱ ཝཱ.

‘མུསཱཝཱདཱ ཝེརམཎཱི’ཨཱདཱིནི པན ཙཏྟཱརི སིཀྑཱཔདཱནི ཝུཏྟནཡེནེཝ ཀཱཡཱདཱིཧི གཎྷནྟསྶ ཀུསལཾ ཝཙཱིཀམྨཾ ཏཱིསུ དྭཱརེསུ སམུཊྛཱཏཱིཏི ཝེདིཏབྦཾ. ཨིདྷཱཔི ཨནབྷིཛ྄ཛྷཱདཡོ ཙེཏནཱཔཀྑིཀཱ ཝཱ ཧོནྟི, ཨབྦོཧཱརིཀཱ ཝཱ.

ཨནབྷིཛ྄ཛྷཱདིསཧགཏེཧི པན ཙིཏྟེཧི ཀཱཡངྒཾ ཙོཔེཏྭཱ ཙེཏིཡངྒཎསམྨཛྫནགནྡྷམཱལཱདིཔཱུཛནཙེཏིཡཝནྡནཱདཱིནི ཀརོནྟསྶ ཀམྨཾ མནོཀམྨཾ ཧོཏི, དྭཱརཾ པན ཀཱཡདྭཱརཾ. ཨེཝཾ ཀུསལཾ མནོཀམྨཾ ཀཱཡདྭཱརེ སམུཊྛཱཏི. ཙེཏནཱ པནེཏྠ ཨབྦོཧཱརིཀཱ. ཨནབྷིཛ྄ཛྷཱསཧགཏེན ཙིཏྟེན ཝཱཙངྒཾ ཙོཔེཏྭཱ ‘ཨཧོ ཝཏ ཡཾ པརསྶ ཝིཏྟཱུཔཀརཎཾ ན ཏཾ མམསྶཱ’ཏི ཨནབྷིཛ྄ཛྷཱཡཏོ ཨབྱཱཔཱདསཧགཏེན ཙིཏྟེན ‘སབྦེ སཏྟཱ ¶ ཨཝེརཱ ཨབྱཱབཛ྄ཛྷཱ ཨནཱིགྷཱ སུཁཱི ཨཏྟཱནཾ པརིཧརནྟཱུ’ཏི ཝདནྟསྶ སམྨཱདིཊྛིསཧགཏེན ཙིཏྟེན ‘ཨཏྠི དིནྣ’ནྟིཨཱདཱིནི ཨུདཱཧརནྟསྶ ཀམྨཾ མནོཀམྨཾ ཧོཏི, དྭཱརཾ པན ཝཙཱིདྭཱརཾ. ཨེཝཾ ཀུསལཾ མནོཀམྨཾ ཝཙཱིདྭཱརེ སམུཊྛཱཏི. ཙེཏནཱ ¶ པནེཏྠ ཨབྦོཧཱརིཀཱ. ཀཱཡངྒཝཱཙངྒཱནི པན ཨཙོཔེཏྭཱ རཧོ ནིསིནྣསྶ མནསཱཝ ཨནབྷིཛ྄ཛྷཱདིསཧགཏཱནི ཙིཏྟཱནི ཨུཔྤཱདེནྟསྶ ཀམྨཾ མནོཀམྨཾ, དྭཱརམྤི མནོདྭཱརམེཝ. ཨེཝཾ ཀུསལཾ ¶ མནོཀམྨཾ མནོདྭཱརེ སམུཊྛཱཏི. ཨིམསྨིཾ པན ཋཱནེ ཙེཏནཱཔི ཙེཏནཱསམྤཡུཏྟཀཱ དྷམྨཱཔི མནོདྭཱརེཡེཝ སམུཊྛཧནྟི.

ཏཏྠ ཨཱཎཏྟིསམུཊྛིཏེསུ པཱཎཱཏིཔཱཏཨདིནྣཱདཱནེསུ ཀམྨམྤི ཀཱཡཀམྨཾ དྭཱརམྤི ཀམྨཝསེནེཝ ཀཱཡདྭཱརནྟི ཝདནྟོ ཀམྨཾ རཀྑཏི, དྭཱརཾ བྷིནྡཏི ནཱམ. ཧཏྠམུདྡཱཡ སམུཊྛིཏེསུ མུསཱཝཱདཱདཱིསུ དྭཱརམྤི ཀཱཡདྭཱརཾ, ཀམྨམྤི དྭཱརཝསེནེཝ ཀཱཡཀམྨནྟི ཝདནྟོ དྭཱརཾ རཀྑཏི ཀམྨཾ བྷིནྡཏི ནཱམ. ཏསྨཱ ‘ཀམྨཾ རཀྑཱམཱི’ཏི དྭཱརཾ ན བྷིནྡིཏབྦཾ, ‘དྭཱརཾ རཀྑཱམཱི’ཏི ཀམྨཾ ན བྷིནྡིཏབྦཾ. ཡཐཱཝུཏྟེནེཝ པན ནཡེན ཀམྨཉྩ དྭཱརཉྩ ཝེདིཏབྦཾ. ཨེཝཾ ཀཐེནྟོ ཧི ནེཝ ཀམྨཾ ན དྭཱརཾ བྷིནྡཏཱིཏི.

ཀམྨཀཐཱ ནིཊྛིཏཱ.

ཨིདཱནི ‘པཉྩ ཝིཉྙཱཎཱནི པཉྩཝིཉྙཱཎདྭཱརཱནཱི’ཏིཨཱདཱིསུ ཙཀྑུཝིཉྙཱཎཾ སོཏཝིཉྙཱཎཾ གྷཱནཝིཉྙཱཎཾ ཛིཝ྄ཧཱཝིཉྙཱཎཾ ཀཱཡཝིཉྙཱཎནྟི ཨིམཱནི པཉྩ ཝིཉྙཱཎཱནི ནཱམ. ཙཀྑུཝིཉྙཱཎདྭཱརཾ སོཏ… གྷཱན… ཛིཝ྄ཧཱ… ཀཱཡཝིཉྙཱཎདྭཱརནྟི ཨིམཱནི པཉྩ ཝིཉྙཱཎདྭཱརཱནི ནཱམ. ཨིམེསཾ པཉྩནྣཾ དྭཱརཱནཾ ཝསེན ཨུཔྤནྣཱ ཙེཏནཱ ནེཝ ཀཱཡཀམྨཾ ཧོཏི, ན ཝཙཱིཀམྨཾ, མནོཀམྨམེཝ ཧོཏཱིཏི ཝེདིཏབྦཱ. ཙཀྑུསམྥསྶོ སོཏ… གྷཱན… ཛིཝ྄ཧཱ… ཀཱཡ… མནོསམྥསྶོཏི ཨིམེ པན ཚ སམྥསྶཱ ནཱམ. ཙཀྑུསམྥསྶདྭཱརཾ སོཏ… གྷཱན… ཛིཝ྄ཧཱ… ཀཱཡ… མནོསམྥསྶདྭཱརནྟི ཨིམཱནི ཚ སམྥསྶདྭཱརཱནི ནཱམ.

ཙཀྑུཨསཾཝརོ སོཏ… གྷཱན… ཛིཝ྄ཧཱ… པསཱདཀཱཡ… ཙོཔནཀཱཡཨསཾཝརོ ཝཱཙཱཨསཾཝརོ མནོཨསཾཝརོཏི – ཨིམེ ཨཊྛ ཨསཾཝརཱ ནཱམ. ཏེ ཨཏྠཏོ ‘དུསྶཱིལྱཾ མུཊྛསྶཙྩཾ ཨཉྙཱཎཾ ཨཀྑནྟི ཀོསཛྫ’ནྟི ཨིམེ པཉྩ དྷམྨཱ ཧོནྟི. ཏེསུ ཨེཀདྷམྨོཔི པཉྩདྭཱརེ ¶ ཝོཊྛབྦནཔརིཡོསཱནེསུ ཙིཏྟེསུ ནུཔྤཛྫཏི, ཛཝནཀྑཎེཡེཝ ཨུཔྤཛྫཏི. ཛཝནེ ཨུཔྤནྣོཔི པཉྩདྭཱརེ ཨསཾཝརོཏི ཝུཙྩཏི.

ཙཀྑུཝིཉྙཱཎསཧཛཱཏོ ཧི ཕསྶོ ཙཀྑུསམྥསྶོ ནཱམ, ཙེཏནཱ མནོཀམྨཾ ནཱམ, ཏཾ ཙིཏྟཾ མནོཀམྨདྭཱརཾ ནཱམ. ཨེཏྠ པཉྩཝིདྷོ ཨསཾཝརོ ནཏྠི ¶ . སམྤཊིཙྪནསཧཛཱཏོ ཕསྶོ མནོསམྥསྶོ ¶ ནཱམ, ཙེཏནཱ མནོཀམྨཾ ནཱམ, ཏཾ ཙིཏྟཾ མནོཀམྨདྭཱརཾ ནཱམ. ཨེཏྠཱཔི ཨསཾཝརོ ནཏྠི. སནྟཱིརཎཝོཊྛབྦནེསུཔི ཨེསེཝ ནཡོ. ཛཝནསཧཛཱཏོ པན ཕསྶོ མནོསམྥསྶོ ནཱམ, ཙེཏནཱ མནོཀམྨཾ ནཱམ, ཏཾ ཙིཏྟཾ མནོཀམྨདྭཱརཾ ནཱམ. ཨེཏྠ ཨསཾཝརོ ཙཀྑུཨསཾཝརོ ནཱམ ཧོཏི. སོཏགྷཱནཛིཝ྄ཧཱཔསཱདཀཱཡདྭཱརེསུཔི ཨེསེཝ ནཡོ. ཡདཱ པན རཱུཔཱདཱིསུ ཨཉྙཏརཱརམྨཎཾ མནོདྭཱརིཀཛཝནཾ ཝིནཱ ཝཙཱིདྭཱརེན སུདྡྷཾ ཀཱཡདྭཱརསངྑཱཏཾ ཙོཔནཾ པཱཔཡམཱནཾ ཨུཔྤཛྫཏི, ཏདཱ ཏེན ཙིཏྟེན སཧཛཱཏོ ཕསྶོ མནོསམྥསྶོ ནཱམ, ཙེཏནཱ ཀཱཡཀམྨཾ ནཱམ, ཏཾ པན ཙིཏྟཾ ཨབྦོཧཱརིཀཾ, ཙོཔནསྶ ཨུཔྤནྣཏྟཱ མནོདྭཱརནྟི སངྑྱཾ ན གཙྪཏི. ཨེཏྠ ཨསཾཝརོ ཙོཔནཀཱཡཨསཾཝརོ ནཱམ. ཡདཱ ཏཱདིསཾཡེཝ ཛཝནཾ ཝིནཱ ཀཱཡདྭཱརེན སུདྡྷཾ ཝཙཱིདྭཱརསངྑཱཏཾ ཙོཔནཾ པཱཔཡམཱནཾ ཨུཔྤཛྫཏི, ཏདཱ ཏེན ཙིཏྟེན སཧཛཱཏོ ཕསྶོ མནོསམྥསྶོ ནཱམ, ཙེཏནཱ ཝཙཱིཀམྨཾ ནཱམ, ཏཾ པན ཙིཏྟཾ ཨབྦོཧཱརིཀཾ, ཙོཔནསྶ ཨུཔྤནྣཏྟཱ མནོདྭཱརནྟི སངྑྱཾ ན གཙྪཏི. ཨེཏྠ ཨསཾཝརོ ཝཱཙཱཨསཾཝརོ ནཱམ. ཡདཱ པན ཏཱདིསཾ ཛཝནཙིཏྟཾ ཝིནཱ ཀཱཡཝཙཱིདྭཱརེཧི སུདྡྷཾ མནོདྭཱརམེཝ ཧུཏྭཱ ཨུཔྤཛྫཏི, ཏདཱ ཏེན ཙིཏྟེན སཧཛཱཏོ ཕསྶོ མནོསམྥསྶོ ནཱམ, ཙེཏནཱ མནོཀམྨཾ ནཱམ, ཏཾ པན ཙིཏྟཾ མནོཀམྨདྭཱརཾ ནཱམ. ཨེཏྠ ཨསཾཝརོ མནོཨསཾཝརོ ནཱམ. ཨིཏི ཨིམེསཾ ཨཊྛནྣཾ ཨསཾཝརཱནཾ ཝསེན ཙཀྑུཨསཾཝརདྭཱརཾ, སོཏ… གྷཱན… ཛིཝ྄ཧཱ… པསཱདཀཱཡ… ཙོཔནཀཱཡ… ཝཱཙཱ… མནོཨསཾཝརདྭཱརནྟི ཨིམཱནི ཨཊྛ ཨསཾཝརདྭཱརཱནི ཝེདིཏབྦཱནི.

ཙཀྑུསཾཝརོ སོཏ… གྷཱན… ཛིཝ྄ཧཱ… པསཱདཀཱཡ… ཙོཔནཀཱཡ… ཝཱཙཱ… མནོསཾཝརོཏི ཨིམེ པན ཨཊྛ སཾཝརཱ ནཱམ. ཏེ ཨཏྠཏོ ‘སཱིལཾ སཏི ཉཱཎཾ ཁནྟི ཝཱིརིཡ’ནྟི ཨིམེ པཉྩ ¶ དྷམྨཱ ཧོནྟི. ཏེསུཔི ཨེཀདྷམྨོཔི པཉྩདྭཱརེ ཝོཊྛབྦནཔརིཡོསཱནེསུ ཙིཏྟེསུ ནུཔྤཛྫཏི. ཛཝནཀྑཎེཡེཝ ཨུཔྤཛྫཏི. ཛཝནེ ཨུཔྤནྣོཔི པཉྩདྭཱརེ སཾཝརོཏི ཝུཙྩཏི. ཏསྶ སབྦསྶཱཔི ཙཀྑུཝིཉྙཱཎསཧཛཱཏོ ཧི ཕསྶོ ཙཀྑུསམྥསྶོཏིཨཱདིནཱ ཨསཾཝརེ ཝུཏྟནཡེནེཝ ཨུཔྤཏྟི ཝེདིཏབྦཱ. ཨིཏི ཨིམེསཾ ཨཊྛནྣཾ སཾཝརཱནཾ ཝསེན ཙཀྑུསཾཝརདྭཱརཾ…པེ… མནོསཾཝརདྭཱརནྟི ཨིམཱནི ཨཊྛ སཾཝརདྭཱརཱནི ཝེདིཏབྦཱནི.

ཨཀུསལཀམྨཔཐཀཐཱ

པཱཎཱཏིཔཱཏོ ¶ ¶ , ཨདིནྣཱདཱནཾ, ཀཱམེསུམིཙྪཱཙཱརོ, མུསཱཝཱདོ, པིསུཎཝཱཙཱ, ཕརུསཝཱཙཱ, སམྥཔྤལཱཔོ, ཨབྷིཛ྄ཛྷཱ, བྱཱཔཱདོ, མིཙྪཱདིཊྛཱིཏི ཨིམེ པན དས ཨཀུསལཀམྨཔཐཱ ནཱམ.

ཏཏྠ པཱཎསྶ ཨཏིཔཱཏོ པཱཎཱཏིཔཱཏོ ནཱམ; པཱཎཝདྷོ, པཱཎགྷཱཏོཏི ཝུཏྟཾ ཧོཏི. པཱཎོཏི ཙེཏྠ ཝོཧཱརཏོ སཏྟོ, པརམཏྠཏོ ཛཱིཝིཏིནྡྲིཡཾ. ཏསྨིཾ པན པཱཎེ པཱཎསཉྙིནོ ཛཱིཝིཏིནྡྲིཡུཔཙྪེདཀཨུཔཀྐམསམུཊྛཱཔིཀཱ ཀཱཡཝཙཱིདྭཱརཱནཾ ཨཉྙཏརདྭཱརཔྤཝཏྟཱ ཝདྷཀཙེཏནཱ པཱཎཱཏིཔཱཏོ. སོ གུཎཝིརཧིཏེསུ ཏིརཙྪཱནགཏཱདཱིསུ པཱཎེསུ ཁུདྡཀེ པཱཎེ ཨཔྤསཱཝཛྫོ, མཧཱསརཱིརེ མཧཱསཱཝཛྫོ. ཀསྨཱ? པཡོགམཧནྟཏཱཡ. པཡོགསམཏྟེཔི ཝཏྠུམཧནྟཏཱཡ. གུཎཝནྟེསུ མནུསྶཱདཱིསུ ཨཔྤགུཎེ ཨཔྤསཱཝཛྫོ, མཧཱགུཎེ མཧཱསཱཝཛྫོ. སརཱིརགུཎཱནཾ པན སམབྷཱཝེ སཏི ཀིལེསཱནཾ ཨུཔཀྐམཱནཉྩ མུདུཏཱཡ ཨཔྤསཱཝཛྫོ, ཏིབྦཏཱཡ མཧཱསཱཝཛྫོཏི ཝེདིཏབྦོ.

ཏསྶ པཉྩ སམྦྷཱརཱ ཧོནྟི – པཱཎོ, པཱཎསཉྙིཏཱ, ཝདྷཀཙིཏྟཾ, ཨུཔཀྐམོ, ཏེན མརཎནྟི. ཚ པཡོགཱ – སཱཧཏྠིཀོ, ཨཱཎཏྟིཀོ, ནིསྶགྒིཡོ, ཐཱཝརོ, ཝིཛྫཱམཡོ, ཨིདྡྷིམཡོཏི. ཨིམསྨིཾ པནཏྠེ ཝིཏྠཱརིཡམཱནེ ཨཏིཔཔཉྩོ ཧོཏི. ཏསྨཱ ཏཾ ན ཝིཏྠཱརཡཱམ. ཨཉྙཉྩ ཨེཝརཱུཔཾ ཨཏྠིཀེཧི པན སམནྟཔཱསཱདིཀཾ ཝིནཡཊྛཀཐཾ (པཱརཱ. ཨཊྛ. ༢.༡༧༢) ཨོལོཀེཏྭཱ གཧེཏབྦཾ.

ཨདིནྣསྶ ཨཱདཱནཾ ‘ཨདིནྣཱདཱནཾ’; པརསྶཧརཎཾ, ཐེཡྻཾ, ཙོརིཀཱཏི ཝུཏྟཾ ཧོཏི. ཏཏྠ ཨདིནྣནྟི པརཔརིགྒཧིཏཾ, ཡཏྠ པརོ ཡཐཱཀཱམཀཱརིཏཾ ཨཱཔཛྫནྟོ ཨདཎྜཱརཧོ ཨནུཔཝཛྫོ ཙ ཧོཏི. ཏསྨིཾ པརཔརིགྒཧིཏེ པརཔརིགྒཧིཏསཉྙིནོ ¶ ཏདཱདཱཡཀཨུཔཀྐམསམུཊྛཱཔིཀཱ ཐེཡྻཙེཏནཱ ཨདིནྣཱདཱནཾ. ཏཾ ཧཱིནེ པརསནྟཀེ ཨཔྤསཱཝཛྫཾ, པཎཱིཏེ མཧཱསཱཝཛྫཾ. ཀསྨཱ? ཝཏྠུཔཎཱིཏཏཱཡ. ཝཏྠུསམཏྟེ སཏི གུཎཱདྷིཀཱནཾ སནྟཀེ ཝཏྠུསྨིཾ མཧཱསཱཝཛྫཾ. ཏཾཏཾགུཎཱདྷིཀཾ ཨུཔཱདཱཡ ཏཏོ ཏཏོ ཧཱིནགུཎསྶ སནྟཀེ ཝཏྠུསྨིཾ ཨཔྤསཱཝཛྫཾ.

ཏསྶ ¶ པཉྩ སམྦྷཱརཱ ཧོནྟི – པརཔརིགྒཧིཏཾ, པརཔརིགྒཧིཏསཉྙིཏཱ, ཐེཡྻཙིཏྟཾ, ཨུཔཀྐམོ ¶ , ཏེན ཧརཎནྟི. ཚ པཡོགཱ – སཱཧཏྠིཀཱདཡོཝ. ཏེ ཙ ཁོ ཡཐཱནུརཱུཔཾ ཐེཡྻཱཝཧཱརོ, པསཡ྄ཧཱཝཧཱརོ, པཊིཙྪནྣཱཝཧཱརོ, པརིཀཔྤཱཝཧཱརོ, ཀུསཱཝཧཱརོཏི ཨིམེསཾ པཉྩནྣཾ ཨཝཧཱརཱནཾ ཝསེན པཝཏྟནྟི. ཨཡམེཏྠ སངྑེཔོ. ཝིཏྠཱརོ པན སམནྟཔཱསཱདིཀཱཡཾ (པཱརཱ. ཨཊྛ. ༡.༡༣༨) ཝུཏྟོ.

‘ཀཱམེསུ མིཙྪཱཙཱརོ’ཏི ཨེཏྠ པན ‘ཀཱམེསཱུ’ཏི མེཐུནསམཱཙཱརེསུ; ‘མིཙྪཱཙཱརོ’ཏི ཨེཀནྟནིནྡིཏོ ལཱམཀཱཙཱརོ. ལཀྑཎཏོ པན ཨསདྡྷམྨཱདྷིཔྤཱཡེན ཀཱཡདྭཱརཔྤཝཏྟཱ ཨགམནཱིཡཊྛཱནཝཱིཏིཀྐམཙེཏནཱ ཀཱམེསུམིཙྪཱཙཱརོ.

ཏཏྠ ཨགམནཱིཡཊྛཱནཾ ནཱམ – པུརིསཱནཾ ཏཱཝ མཱཏུརཀྑིཏཱ, པིཏུརཀྑིཏཱ, མཱཏཱཔིཏུརཀྑིཏཱ, བྷཱཏུརཀྑིཏཱ, བྷགིནིརཀྑིཏཱ, ཉཱཏིརཀྑིཏཱ, གོཏྟརཀྑིཏཱ, དྷམྨརཀྑིཏཱ, སཱརཀྑཱ, སཔརིདཎྜཱཏི མཱཏུརཀྑིཏཱདཡོ དས; དྷནཀྐཱིཏཱ, ཚནྡཝཱསིནཱི, བྷོགཝཱསིནཱི, པཊཝཱསིནཱི, ཨོདཔཏྟཀིནཱི, ཨོབྷཊཙུམྦཊཱ, དཱསཱི ཙ བྷརིཡཱ, ཀམྨཀཱརཱི ཙ བྷརིཡཱ, དྷཛཱཧཊཱ, མུཧུཏྟིཀཱཏི ཨེཏཱ དྷནཀྐཱིཏཱདཡོ དསཱཏི ཝཱིསཏི ཨིཏྠིཡོ. ཨིཏྠཱིསུ པན དྭིནྣཾ སཱརཀྑསཔརིདཎྜཱནཾ, དསནྣཉྩ དྷནཀྐཱིཏཱདཱིནནྟི དྭཱདསནྣཾ ཨིཏྠཱིནཾ ཨཉྙེ པུརིསཱ ཨིདཾ ཨགམནཱིཡཊྛཱནཾ ནཱམ.

སོ པནེས མིཙྪཱཙཱརོ སཱིལཱདིགུཎརཧིཏེ ཨགམནཱིཡཊྛཱནེ ཨཔྤསཱཝཛྫོ, སཱིལཱདིགུཎསམྤནྣེ མཧཱསཱཝཛྫོ. ཏསྶ ཙཏྟཱརོ སམྦྷཱརཱ – ཨགམནཱིཡཝཏྠུ, ཏསྨིཾ སེཝནཙིཏྟཾ, སེཝནཔྤཡོགོ, མགྒེནམགྒཔྤཊིཔཏྟིཨདྷིཝཱསནནྟི. ཨེཀོ པཡོགོ སཱཧཏྠིཀོ ཨེཝ.

‘མུསཱ’ཏི ཝིསཾཝཱདནཔུརེཀྑཱརསྶ ཨཏྠབྷཉྫཀོ ཝཙཱིཔཡོགོ, ཀཱཡཔཡོགོ ཝཱ. ཝིསཾཝཱདནཱདྷིཔྤཱཡེན པནསྶ པརཝིསཾཝཱདཀཀཱཡཝཙཱིཔཡོགསམུཊྛཱཔིཀཱ ཙེཏནཱ ¶ མུསཱཝཱདོ. ཨཔརོ ནཡོ – ‘མུསཱ’ཏི ཨབྷཱུཏཾ ཨཏཙྪཾ ཝཏྠུ. ‘ཝཱདོ’ཏི ཏསྶ བྷཱུཏཏོ ཏཙྪཏོ ཝིཉྙཱཔནཾ. ལཀྑཎཏོ པན ཨཏཐཾ ཝཏྠུཾ ཏཐཏོ པརཾ ཝིཉྙཱཔེཏུཀཱམསྶ ཏཐཱཝིཉྙཏྟིསམུཊྛཱཔིཀཱ ཙེཏནཱ མུསཱཝཱདོ. སོ ཡམཏྠཾ བྷཉྫཏི ཏསྶ ཨཔྤཏཱཡ ཨཔྤསཱཝཛྫོ, མཧནྟཏཱཡ མཧཱསཱཝཛྫོ. ཨཔིཙ གཧཊྛཱནཾ ¶ ཨཏྟནོ སནྟཀཾ ཨདཱཏུཀཱམཏཱཡ ‘ནཏྠཱི’ཏིཨཱདིནཡཔྤཝཏྟོ ཨཔྤསཱཝཛྫོ. སཀྑིནཱ ཧུཏྭཱ ཨཏྠབྷཉྫནཏྠཾ ཝུཏྟོ མཧཱསཱཝཛྫོ. པབྦཛིཏཱནཾ ཨཔྤཀམྤི ཏེལཾ ཝཱ སཔྤིཾ ཝཱ ¶ ལབྷིཏྭཱ ཧསཱདྷིཔྤཱཡེན ‘ཨཛྫ གཱམེ ཏེལཾ ནདཱི མཉྙེ སནྡཏཱི’ཏི པཱུརཎཀཐཱནཡེན པཝཏྟོ ཨཔྤསཱཝཛྫོ. ཨདིཊྛཾཡེཝ པན དིཊྛནྟིཨཱདིནཱ ནཡེན ཝདནྟཱནཾ མཧཱསཱཝཛྫོ.

ཏསྶ ཙཏྟཱརོ སམྦྷཱརཱ ཧོནྟི – ཨཏཐཾ ཝཏྠུ, ཝིསཾཝཱདནཙིཏྟཾ, ཏཛྫོ ཝཱཡཱམོ, པརསྶ ཏདཏྠཝིཛཱནནནྟི. ཨེཀོ པཡོགོ – སཱཧཏྠིཀོཝ. སོ ཙ ཀཱཡེན ཝཱ ཀཱཡཔྤཊིབདྡྷེན ཝཱ ཝཱཙཱཡ ཝཱ པརཝིསཾཝཱདཀཀིརིཡཱཀརཎེ དཊྛབྦོ. ཏཱཡ ཙེ ཀིརིཡཱཡ པརོ ཏམཏྠཾ ཛཱནཱཏི, ཨཡཾ ཀིརིཡསམུཊྛཱཔིཀཙེཏནཱཀྑཎེཡེཝ མུསཱཝཱདཀམྨུནཱ བཛ྄ཛྷཏི. ཡསྨཱ པན ཡཐཱ ཀཱཡཀཱཡཔྤཊིབདྡྷཝཱཙཱཧི པརཾ ཝིསཾཝཱདེཏི, ཏཐཱ ཨིམསྶ ‘ཨིམཾ བྷཎཱཧཱི’ཏི ཨཱཎཱཔེནྟོཔི, པཎྞཾ ལིཁིཏྭཱ པུརཏོ ནིསྶཛྫནྟོཔི, ‘ཨཡམཏྠོ ཨེཝཾ དཊྛབྦོ’ཏི ཀུཊྚཱདཱིསུ ལིཁིཏྭཱ ཋཔེནྟོཔི; ཏསྨཱ ཨེཏྠ ཨཱཎཏྟིཀནིསྶགྒིཡཐཱཝརཱཔི པཡོགཱ ཡུཛྫནྟི. ཨཊྛཀཐཱསུ པན ཨནཱགཏཏྟཱ ཝཱིམཾསིཏྭཱ གཧེཏབྦཱ.

‘པིསུཎཝཱཙཱ’ཏིཨཱདཱིསུ ཡཱཡ ཝཱཙཱཡ ཡསྶ ཏཾ ཝཱཙཾ བྷཱསཏི ཏསྶ ཧདཡེ ཨཏྟནོ པིཡབྷཱཝཾ པརསྶ ཙ སུཉྙབྷཱཝཾ ཀརོཏི, སཱ པིསུཎཝཱཙཱ. ཡཱཡ པན ཨཏྟཱནམྤི པརམྤི ཕརུསཾ ཀརོཏི, ཡཱ ཝཱཙཱ སཡམྤི ཕརུསཱ ནེཝ ཀཎྞསུཁཱ, ན ཧདཡངྒམཱ, ཨཡཾ ‘ཕརུསཝཱཙཱ’. ཡེན སམྥཾ པལཔཏི, ནིརཏྠཀཾ, སོ ‘སམྥཔྤལཱཔོ’. ཏེསཾ མཱུལབྷཱུཏཱ ཙེཏནཱཔི པིསུཎཝཱཙཱདིནཱམམེཝ ལབྷཏི. སཱ ཨེཝ ཙ ཨིདྷ ཨདྷིཔྤེཏཱཏི.

ཏཏྠ སཾཀིལིཊྛཙིཏྟསྶ པརེསཾ ཝཱ བྷེདཱཡ ཨཏྟནོ པིཡཀམྱཏཱཡ ཝཱ ཀཱཡཝཙཱིཔཡོགསམུཊྛཱཔིཀཱ ཙེཏནཱ པིསུཎཝཱཙཱ ནཱམ. སཱ ཡསྶ ¶ བྷེདཾ ཀརོཏི ཏསྶ ཨཔྤགུཎཏཱཡ ཨཔྤསཱཝཛྫཱ, མཧཱགུཎཏཱཡ མཧཱསཱཝཛྫཱ.

ཏསྶཱ ཙཏྟཱརོ སམྦྷཱརཱ – ‘བྷིནྡིཏབྦོ པརོ’ ཨིཏི ‘ཨིམེ ནཱནཱ བྷཝིསྶ’ནྟི ཝིནཱ བྷཝིསྶནྟཱིཏི བྷེདཔུརེཀྑཱརཏཱ ཝཱ, ‘ཨིཏི ཨཧཾ པིཡོ བྷཝིསྶཱམི ཝིསྶཱསིཀོ’ཏི པིཡཀམྱཏཱ ཝཱ, ཏཛྫོ ཝཱཡཱམོ, ཏསྶ ཏདཏྠཝིཛཱནནནྟི ¶ . པརེ པན ཨབྷིནྣེ ཀམྨཔཐབྷེདོ ནཏྠི, བྷིནྣེ ཨེཝ ཧོཏི.

པརསྶ མམྨཙྪེདཀཀཱཡཝཙཱིཔཡོགསམུཊྛཱཔིཀཱ ཨེཀནྟཕརུསཙེཏནཱ ‘ཕརུསཝཱཙཱ’. ཏསྶཱ ཨཱཝིབྷཱཝཏྠམིདཾ ¶ ཝཏྠུ – ཨེཀོ ཀིར དཱརཀོ མཱཏུ ཝཙནཾ ཨནཱདིཡིཏྭཱ ཨརཉྙཾ གཙྪཏི. ཏཾ མཱཏཱ ནིཝཏྟེཏུཾ ཨསཀྐོནྟཱི ‘ཙཎྜཱ ཏཾ མཧིཾསཱི ཨནུབནྡྷཏཱུ’ཏི ཨཀྐོསི. ཨཐསྶ ཏཐེཝ ཨརཉྙེ མཧིཾསཱི ཨུཊྛཱསི. དཱརཀོ ‘ཡཾ མམ མཱཏཱ མུཁེན ཀཐེསི ཏཾ མཱ ཧོཏུ, ཡཾ ཙིཏྟེན ཙིནྟེསི ཏཾ ཧོཏཱུ’ཏི སཙྩཀིརིཡཾ ཨཀཱསི. མཧིཾསཱི ཏཏྠེཝ བདྡྷཱ ཝིཡ ཨཊྛཱསི. ཨེཝཾ མམྨཙྪེདཀོཔི པཡོགོ ཙིཏྟསཎྷཏཱཡ ཕརུསཝཱཙཱ ན ཧོཏི. མཱཏཱཔིཏརོ ཧི ཀདཱཙི པུཏྟཀེ ཨེཝམྤི ཝདནྟི – ‘ཙོརཱ ཝོ ཁཎྜཱཁཎྜིཀཾ ཀརོནྟཱུ’ཏི, ཨུཔྤལཔཏྟམྤི ཙ ནེསཾ ཨུཔརི པཏནྟཾ ན ཨིཙྪནྟི. ཨཱཙརིཡུཔཛ྄ཛྷཱཡཱ ཙ ཀདཱཙི ནིསྶིཏཀེ ཨེཝཾ ཝདནྟི – ‘ཀིཾ ཨིམེ ཨཧིརིཀཱ ཨནོཏྟཔྤིནོ ཙརནྟི, ནིདྡྷམཐ ནེ’ཏི; ཨཐ ཙ ནེསཾ ཨཱགམཱདྷིགམསམྤཏྟིཾ ཨིཙྪནྟི. ཡཐཱ ཙ ཙིཏྟསཎྷཏཱཡ ཕརུསཝཱཙཱ ན ཧོཏི, ཨེཝཾ ཝཙནསཎྷཏཱཡ ཨཕརུསཝཱཙཱཔི ན ཧོཏི. ན ཧི མཱརཱཔེཏུཀཱམསྶ ‘ཨིམཾ སུཁཾ སཡཱཔེཐཱ’ཏི ཝཙནཾ ཨཕརུསཝཱཙཱ ཧོཏི. ཙིཏྟཕརུསཏཱཡ པནེསཱ ཕརུསཝཱཙཱཝ. སཱ ཡཾ སནྡྷཱཡ པཝཏྟིཏཱ ཏསྶ ཨཔྤགུཎཏཱཡ ཨཔྤསཱཝཛྫཱ, མཧཱགུཎཏཱཡ མཧཱསཱཝཛྫཱ. ཏསྶཱ ཏཡོ སམྦྷཱརཱ – ཨཀྐོསིཏབྦོ པརོ, ཀུཔིཏཙིཏྟཾ, ཨཀྐོསནནྟི.

ཨནཏྠཝིཉྙཱཔིཀཱ ཀཱཡཝཙཱིཔཡོགསམུཊྛཱཔིཀཱ ཨཀུསལཙེཏནཱ ‘སམྥཔྤལཱཔོ’. སོ ཨཱསེཝནམནྡཏཱཡ ཨཔྤསཱཝཛྫོ. ཨཱསེཝནམཧནྟཏཱཡ མཧཱསཱཝཛྫོ. ཏསྶ དྭེ སམྦྷཱརཱ – བྷཱརཏཡུདྡྷསཱིཏཱཧརཎཱདིནིརཏྠཀཀཐཱཔུརེཀྑཱརཏཱ, ཏཐཱརཱུཔཱིཀཐཱཀཐནཉྩཱཏི. པརེ པན ཏཾ ¶ ཀཐཾ ཨགཎྷནྟེ ཀམྨཔཐབྷེདོ ནཏྠི, པརེན སམྥཔྤལཱཔེ གཧིཏེཡེཝ ཧོཏི.

ཨབྷིཛ྄ཛྷཱཡཏཱིཏི ‘ཨབྷིཛ྄ཛྷཱ’. པརབྷཎྜཱབྷིམུཁཱི ཧུཏྭཱ ཏནྣིནྣཏཱཡ པཝཏྟཏཱིཏི ཨཏྠོ. སཱ ‘ཨཧོ ཏཝ ཨིདཾ མམསྶཱ’ཏི ཨེཝཾ པརབྷཎྜཱབྷིཛ྄ཛྷཱཡནལཀྑཎཱ. ཨདིནྣཱདཱནཾ ཝིཡ ཨཔྤསཱཝཛྫཱ མཧཱསཱཝཛྫཱ ཙ. ཏསྶཱ ¶ དྭེ སམྦྷཱརཱ – པརབྷཎྜཾ, ཨཏྟནོ པརིཎཱམནཉྩཱཏི. པརབྷཎྜཝཏྠུཀེ ཧི ལོབྷེ ཨུཔྤནྣེཔི ན ཏཱཝ ཀམྨཔཐབྷེདོ ཧོཏི ཡཱཝ ན ‘ཨཧོ ཝཏ ཨིདཾ མམསྶཱ’ཏི ཨཏྟནོ པརིཎཱམེཏི.

ཧིཏསུཁཾ བྱཱཔཱདཡཏཱིཏི ‘བྱཱཔཱདོ’. སོ པརཝིནཱསཱཡ མནོཔདོསལཀྑཎོ. ཕརུསཝཱཙཱ ཝིཡ ཨཔྤསཱཝཛྫོ མཧཱསཱཝཛྫོ ཙ. ཏསྶ དྭེ སམྦྷཱརཱ – པརསཏྟོ ཙ, ཏསྶ ཙ ¶ ཝིནཱསཙིནྟཱཏི. པརསཏྟཝཏྠུཀེ ཧི ཀོདྷེ ཨུཔྤནྣེཔི ན ཏཱཝ ཀམྨཔཐབྷེདོ ཧོཏི ཡཱཝ ‘ཨཧོ ཝཏཱཡཾ ཨུཙྪིཛྫེཡྻ ཝིནསྶེཡྻཱ’ཏི ཏསྶ ཝིནཱསནཾ ན ཙིནྟེསི.

ཡཐཱབྷུཙྩགཧཎཱབྷཱཝེན མིཙྪཱ པསྶཏཱིཏི ‘མིཙྪཱདིཊྛི’. སཱ ‘ནཏྠི དིནྣ’ནྟིཨཱདིནཱ ནཡེན ཝིཔརཱིཏདསྶནལཀྑཎཱ. སམྥཔྤལཱཔོ ཝིཡ ཨཔྤསཱཝཛྫཱ མཧཱསཱཝཛྫཱ ཙ. ཨཔིཙ ཨནིཡཏཱ ཨཔྤསཱཝཛྫཱ, ནིཡཏཱ མཧཱསཱཝཛྫཱ. ཏསྶཱ དྭེ སམྦྷཱརཱ – ཝཏྠུནོ ཙ གཧིཏཱཀཱརཝིཔརཱིཏཏཱ, ཡཐཱ ཙ ཏཾ གཎྷཱཏི ཏཐཱབྷཱཝེན ཏསྶུཔཊྛཱནནྟི. ཏཏྠ ནཏྠིཀཱཧེཏུཀཨཀིརིཡདིཊྛཱིཧི ཨེཝ ཀམྨཔཐབྷེདོ ཧོཏི, ན ཨཉྙདིཊྛཱིཧི.

ཨིམེསཾ པན དསནྣཾ ཨཀུསལཀམྨཔཐཱནཾ དྷམྨཏོ ཀོཊྛཱསཏོ ཨཱརམྨཎཏོ ཝེདནཱཏོ མཱུལཏོ ཙཱཏི པཉྩཧཱཀཱརེཧི ཝིནིཙྪཡོ ཝེདིཏབྦོ –

ཏཏྠ ‘དྷམྨཏོ’ཏི ཨེཏེསུ ཧི པཊིཔཱཊིཡཱ སཏྟ ཙེཏནཱདྷམྨཱཝ ཧོནྟི, ཨབྷིཛ྄ཛྷཱདཡོ ཏཡོ ཙེཏནཱསམྤཡུཏྟཱ.

‘ཀོཊྛཱསཏོ’ཏི པཊིཔཱཊིཡཱ སཏྟ, མིཙྪཱདིཊྛི ཙཱཏི ཨིམེ ཨཊྛ ཀམྨཔཐཱ ཨེཝ ཧོནྟི; ནོ མཱུལཱནི. ཨབྷིཛ྄ཛྷཱབྱཱཔཱདཱ ཀམྨཔཐཱ ཙེཝ མཱུལཱནི ཙ. ཨབྷིཛ྄ཛྷཱ ཧི མཱུལཾ པཏྭཱ ‘ལོབྷོ ཨཀུསལམཱུལཾ’ ཧོཏི, བྱཱཔཱདོ ‘དོསོ ཨཀུསལམཱུལཾ’.

‘ཨཱརམྨཎཏོ’ཏི པཱཎཱཏིཔཱཏོ ཛཱིཝིཏིནྡྲིཡཱརམྨཎཏོ སངྑཱརཱརམྨཎོ ཧོཏི. ཨདིནྣཱདཱནཾ སཏྟཱརམྨཎཾ ཝཱ ཧོཏི སངྑཱརཱརམྨཎཾ ཝཱ. མིཙྪཱཙཱརོ ཕོཊྛབྦཝསེན སངྑཱརཱརམྨཎོ ཧོཏི; སཏྟཱརམྨཎོཏིཔི ཨེཀེ. མུསཱཝཱདོ སཏྟཱརམྨཎོ ཝཱ, སངྑཱརཱརམྨཎོ ཝཱ. ཏཐཱ པིསུཎཝཱཙཱ. ཕརུསཝཱཙཱ ¶ སཏྟཱརམྨཎཱཝ. སམྥཔྤལཱཔོ དིཊྛསུཏམུཏཝིཉྙཱཏཝསེན སཏྟཱརམྨཎོ ཝཱ སངྑཱརཱརམྨཎོ ཝཱ. ཏཐཱ ཨབྷིཛ྄ཛྷཱ. བྱཱཔཱདོ སཏྟཱརམྨཎོཝ. མིཙྪཱདིཊྛི ཏེབྷཱུམཀདྷམྨཝསེན སངྑཱརཱརམྨཎཱཝ.

‘ཝེདནཱཏོ’ཏི ¶ པཱཎཱཏིཔཱཏོ དུཀྑཝེདནོ ཧོཏི. ཀིཉྩཱཔི ཧི རཱཛཱནོ ཙོརཾ དིསྭཱ ཧསམཱནཱཔི ‘གཙྪཐ ནཾ གྷཱཏེཐཱ’ཏི ཝདནྟི, སནྣིཊྛཱཔཀཙེཏནཱ པན ནེསཾ དུཀྑསམྤཡུཏྟཱཝ ཧོཏི ¶ . ཨདིནྣཱདཱནཾ ཏིཝེདནཾ. ཏཉྷི པརབྷཎྜཾ དིསྭཱ ཧཊྛཏུཊྛསྶ གཎྷཏོ སུཁཝེདནཾ ཧོཏི, བྷཱིཏཏསིཏསྶ གཎྷཏོ དུཀྑཝེདནཾ. ཏཐཱ ཝིཔཱཀནིསྶནྡཕལཱནི པཙྩཝེཀྑནྟསྶ. གཧཎཀཱལེ མཛ྄ཛྷཏྟབྷཱཝེ ཋིཏསྶ པན གཎྷཏོ ཨདུཀྑམསུཁཝེདནཾ ཧོཏཱིཏི. མིཙྪཱཙཱརོ སུཁམཛ྄ཛྷཏྟཝསེན དྭིཝེདནོ. སནྣིཊྛཱཔཀཙིཏྟེ པན མཛ྄ཛྷཏྟཝེདནོ ན ཧོཏི. མུསཱཝཱདོ ཨདིནྣཱདཱནེ ཝུཏྟནཡེནེཝ ཏིཝེདནོ; ཏཐཱ པིསུཎཝཱཙཱ. ཕརུསཝཱཙཱ དུཀྑཝེདནཱ. སམྥཔྤལཱཔོ ཏིཝེདནོ. པརེསུ ཧི སཱདྷུཀཱརཾ དེནྟེསུ ཙེལུཀྑེཔཱདཱིནི ཁིཔནྟེསུ ཧཊྛཏུཊྛསྶ སཱིཏཱཧརཎབྷཱརཏཡུདྡྷཱདཱིནི ཀཐནཀཱལེ སོ སུཁཝེདནོ ཧོཏི. པཋམཾ དིནྣཝེཏནེན ཨེཀེན པཙྪཱ ཨཱགནྟྭཱ ‘ཨཱདིཏོ པཊྛཱཡ ཀཐེཧཱི’ཏི ཝུཏྟེ ‘ཨནནུསནྡྷིཀཾ པཀིཎྞཀཀཐཾ ཀཐེསྶཱམི ནུ ཁོ ནོ’ཏི དོམནསྶིཏསྶ ཀཐནཀཱལེ དུཀྑཝེདནོ ཧོཏི, མཛ྄ཛྷཏྟསྶ ཀཐཡཏོ ཨདུཀྑམསུཁཝེདནོ ཧོཏི. ཨབྷིཛ྄ཛྷཱ སུཁམཛ྄ཛྷཏྟཝསེན དྭིཝེདནཱ; ཏཐཱ མིཙྪཱདིཊྛི. བྱཱཔཱདོ དུཀྑཝེདནོ.

‘མཱུལཏོ’ཏི པཱཎཱཏིཔཱཏོ དོསམོཧཝསེན དྭིམཱུལཀོ ཧོཏི. ཨདིནྣཱདཱནཾ དོསམོཧཝསེན ཝཱ ལོབྷམོཧཝསེན ཝཱ. མིཙྪཱཙཱརོ ལོབྷམོཧཝསེན. མུསཱཝཱདོ དོསམོཧཝསེན ཝཱ ལོབྷམོཧཝསེན ཝཱ; ཏཐཱ པིསུཎཝཱཙཱ སམྥཔྤལཱཔོ ཙ. ཕརུསཝཱཙཱ དོསམོཧཝསེན. ཨབྷིཛ྄ཛྷཱ མོཧཝསེན ཨེཀམཱུལཱ; ཏཐཱ བྱཱཔཱདོ. མིཙྪཱདིཊྛི ལོབྷམོཧཝསེན དྭིམཱུལཱཏི.

ཨཀུསལཀམྨཔཐཀཐཱ ནིཊྛིཏཱ.

ཀུསལཀམྨཔཐཀཐཱ

པཱཎཱཏིཔཱཏཱདཱིཧི པན ཝིརཏིཡོ ཨནབྷིཛ྄ཛྷཱཨབྱཱཔཱདསམྨཱདིཊྛིཡོ ཙཱཏི ཨིམེ དས ཀུསལཀམྨཔཐཱ ནཱམ. ཏཏྠ པཱཎཱཏིཔཱཏཱདཡོ ཝུཏྟཏྠཱ ཨེཝ. པཱཎཱཏིཔཱཏཱདཱིཧི ཨེཏཱཡ ཝིརམནྟི, སཡཾ ཝཱ ཝིརམཏི, ཝིརམཎམཏྟམེཝ ¶ ཝཱ ཨེཏནྟི ཝིརཏི. ཡཱ པཱཎཱཏིཔཱཏཱ ཝིརམནྟསྶ ‘‘ཡཱ ཏསྨིཾ སམཡེ པཱཎཱཏིཔཱཏཱ ཨཱརཏི ཝིརཏཱི’’ཏི (དྷ. ས. ༢༩༩-༣༠༡) ཨེཝཾ ཝུཏྟཱ ཀུསལཙིཏྟསམྤཡུཏྟཱ ཝིརཏི, སཱ པབྷེདཏོ ¶ ཏིཝིདྷཱ ཧོཏི – སམྤཏྟཝིརཏི, སམཱདཱནཝིརཏི, སམུཙྪེདཝིརཏཱིཏི.

ཏཏྠ ¶ ཨསམཱདིནྣསིཀྑཱཔདཱནཾ ཨཏྟནོ ཛཱཏིཝཡབཱཧུསཙྩཱདཱིནི པཙྩཝེཀྑིཏྭཱ ‘ཨཡུཏྟཾ ཨམྷཱཀཾ ཨེཝརཱུཔཾ པཱཔཾ ཀཱཏུ’ནྟི སམྤཏྟཾ ཝཏྠུཾ ཨཝཱིཏིཀྐམནྟཱནཾ ཨུཔྤཛྫམཱནཱ ཝིརཏི ‘སམྤཏྟཝིརཏཱི’ཏི ཝེདིཏབྦཱ – སཱིཧལ༹དཱིཔེ ཙཀྐནཨུཔཱསཀསྶ ཝིཡ. ཏསྶ ཀིར དཧརཀཱལེཡེཝ མཱཏུཡཱ རོགོ ཨུཔྤཛྫི. ཝེཛྫེན ཙ ‘ཨལླསསམཾསཾ ལདྡྷུཾ ཝཊྚཏཱི’ཏི ཝུཏྟཾ. ཏཏོ ཙཀྐནསྶ བྷཱཏཱ ‘གཙྪ, ཏཱཏ, ཁེཏྟཾ ཨཱཧིཎྜཱཧཱི’ཏི ཙཀྐནཾ པེསེསི. སོ ཏཏྠ གཏོ. ཏསྨིཉྩ སམཡེ ཨེཀོ སསོ ཏརུཎསསྶཾ ཁཱདིཏུཾ ཨཱགཏོ ཧོཏི. སོ ཏཾ དིསྭཱཝ ཝེགེན དྷཱཝནྟོ ཝལླིཡཱ བདྡྷོ ‘ཀིརི ཀིརཱི’ཏི སདྡམཀཱསི. ཙཀྐནོ ཏེན སདྡེན གནྟྭཱ ཏཾ གཧེཏྭཱ ཙིནྟེསི – ‘མཱཏུ བྷེསཛྫཾ ཀརོམཱི’ཏི. པུན ཙིནྟེསི – ‘ན མེཏཾ པཏིརཱུཔཾ ཡྭཱཧཾ མཱཏུ ཛཱིཝིཏཀཱརཎཱ པརཾ ཛཱིཝིཏཱ ཝོརོཔེཡྻ’ནྟི. ཨཐ ནཾ ‘གཙྪ, ཨརཉྙེ སསེཧི སདྡྷིཾ ཏིཎོདཀཾ པརིབྷུཉྫཱ’ཏི མུཉྩི. བྷཱཏརཱ ཙ ‘ཀིཾ ཏཱཏ སསོ ལདྡྷོ’ཏི པུཙྪིཏོ ཏཾ པཝཏྟིཾ ཨཱཙིཀྑི. ཏཏོ ནཾ བྷཱཏཱ པརིབྷཱསི. སོ མཱཏུསནྟིཀཾ གནྟྭཱ ‘ཡཏོ ཨཧཾ ཛཱཏོ ནཱབྷིཛཱནཱམི སཉྩིཙྩ པཱཎཾ ཛཱིཝིཏཱ ཝོརོཔེཏཱ’ཏི སཙྩཾ ཝཏྭཱ ཨཊྛཱསི. ཏཱཝདེཝསྶ མཱཏཱ ཨརོགཱ ཨཧོསི.

སམཱདིནྣསིཀྑཱཔདཱནཾ པན སིཀྑཱཔདསམཱདཱནེ ཙ ཏཏུཏྟརིཉྩ ཨཏྟནོ ཛཱིཝིཏམྤི པརིཙྩཛིཏྭཱ ཝཏྠུཾ ཨཝཱིཏིཀྐམནྟཱནཾ ཨུཔྤཛྫམཱནཱ ཝིརཏི ‘སམཱདཱནཝིརཏཱི’ཏི ཝེདིཏབྦཱ. ཨུཏྟརཝཌྜྷམཱནཔབྦཏཝཱསཱིཨུཔཱསཀསྶ ཝིཡ. སོ ཀིར ཨམྦརིཡཝིཧཱརཝཱསིནོ པིངྒལབུདྡྷརཀྑིཏཏྠེརསྶ སནྟིཀེ སིཀྑཱཔདཱནི གཧེཏྭཱ ཁེཏྟཾ ཀསཏི. ཨཐསྶ གོཎོ ནཊྛོ. སོ ཏཾ གཝེསནྟོ ཨུཏྟརཝཌྜྷམཱནཔབྦཏཾ ཨཱརུཧི. ཏཏྲ ནཾ མཧཱསཔྤོ ཨགྒཧེསི. སོ ཙིནྟེསི – ‘ཨིམཱཡསྶ ཏིཁིཎཝཱསིཡཱ སཱིསཾ ཚིནྡཱམཱི’ཏི. པུན ཙིནྟེསི – ‘ན མེཏཾ པཏིརཱུཔཾ ཡྭཱཧཾ བྷཱཝནཱིཡསྶ གརུནོ སནྟིཀེ སིཀྑཱཔདཱནི གཧེཏྭཱ བྷིནྡེཡྻ’ནྟི ཨེཝཾ ཡཱཝཏཏིཡཾ ཙིནྟེཏྭཱ ¶ ‘ཛཱིཝིཏཾ པརིཙྩཛཱམི, ན སིཀྑཱཔད’ནྟི ཨཾསེ ཋཔིཏཾ ཏིཁིཎདཎྜཝཱསིཾ ཨརཉྙེ ཚཌྜེསི. ཏཱཝདེཝ ནཾ མཧཱཝཱལོ༹ མུཉྩིཏྭཱ ཨགམཱསཱིཏི.

ཨརིཡམགྒསམྤཡུཏྟཱ ¶ པན ཝིརཏི ‘སམུཙྪེདཝིརཏཱི’ཏི ཝེདིཏབྦཱ, ཡསྶཱ ཨུཔྤཏྟིཏོ པབྷུཏི ‘པཱཎཾ གྷཱཏེསྶཱམཱི’ཏི ཨརིཡཔུགྒལཱནཾ ཙིཏྟམྤི ནུཔྤཛྫཏཱིཏི.

ཨིདཱནི ¶ ཡཐཱ ཨཀུསལཱནཾ ཨེཝཾ ཨིམེསམྤི ཀུསལཀམྨཔཐཱནཾ དྷམྨཏོ ཀོཊྛཱསཏོ ཨཱརམྨཎཏོ ཝེདནཱཏོ མཱུལཏོཏི པཉྩཧཱཀཱརེཧི ཝིནིཙྪཡོ ཝེདིཏབྦོ –

ཏཏྠ ‘དྷམྨཏོ’ཏི ཨེཏེསུ ཧི པཊིཔཱཊིཡཱ སཏྟ ཙེཏནཱཔི ཝཊྚནྟི, ཝིརཏིཡོཔི; ཨནྟེ ཏཡོ ཙེཏནཱསམྤཡུཏྟཱཝ.

‘ཀོཊྛཱསཏོ’ཏི པཊིཔཱཊིཡཱ སཏྟ ཀམྨཔཐཱ ཨེཝ, ནོ མཱུལཱནི. ཨནྟེ ཏཡོ ཀམྨཔཐཱ ཙེཝ མཱུལཱནི ཙ. ཨནབྷིཛ྄ཛྷཱ ཧི མཱུལཾ པཏྭཱ ‘ཨལོབྷོ ཀུསལམཱུལཾ’ ཧོཏི. ཨབྱཱཔཱདོ ‘ཨདོསོ ཀུསལམཱུལཾ’, སམྨཱདིཊྛི ‘ཨམོཧོ ཀུསལམཱུལཾ’.

‘ཨཱརམྨཎཏོ’ཏི པཱཎཱཏིཔཱཏཱདཱིནཾ ཨཱརམྨཎཱནེཝ ཨེཏེསཾ ཨཱརམྨཎཱནི. ཝཱིཏིཀྐམིཏབྦཏོཡེཝ ཧི ཝེརམཎཱི ནཱམ ཧོཏི. ཡཐཱ པན ནིབྦཱནཱརམྨཎོ ཨརིཡམགྒོ ཀིལེསེ པཛཧཏི, ཨེཝཾ ཛཱིཝིཏིནྡྲིཡཱདིཨཱརམྨཎཱཔེཏེ ཀམྨཔཐཱ པཱཎཱཏིཔཱཏཱདཱིནི དུསྶཱིལྱཱནི པཛཧནྟཱིཏི ཝེདིཏབྦཱ.

‘ཝེདནཱཏོ’ཏི སབྦེ སུཁཝེདནཱ ཝཱ ཧོནྟི མཛ྄ཛྷཏྟཝེདནཱ ཝཱ. ཀུསལཾ པཏྭཱ ཧི དུཀྑཝེདནཱ ནཱམ ནཏྠི.

‘མཱུལཏོ’ཏི པཊིཔཱཊིཡཱ སཏྟ ཀམྨཔཐཱ ཉཱཎསམྤཡུཏྟཙིཏྟེན ཝིརམནྟསྶ ཨལོབྷཨདོསཨམོཧཝསེན ཏིམཱུལཱ ཧོནྟི; ཉཱཎཝིཔྤཡུཏྟཙིཏྟེན ཝིརམནྟསྶ དྭིམཱུལཱ. ཨནབྷིཛ྄ཛྷཱ ཉཱཎསམྤཡུཏྟཙིཏྟེན ཝིརམནྟསྶ དྭིམཱུལཱ ཧོཏི; ཉཱཎཝིཔྤཡུཏྟཙིཏྟེན ཨེཀམཱུལཱ. ཨལོབྷོ པན ཨཏྟནཱཝ ཨཏྟནོ མཱུལཾ ན ཧོཏི. ཨབྱཱཔཱདེཔི ཨེསེཝ ནཡོ. སམྨཱདིཊྛི ཨལོབྷཱདོསཝསེན དྭིམཱུལཱཝ ཧོཏི. ཨིམེ དས ཀུསལཀམྨཔཐཱ ནཱམ.

ཀམྨཔཐསཾསནྡནཀཐཱ

ཨིདཱནི ¶ ཨིམསྨིཾ ཋཱནེ ཀམྨཔཐསཾསནྡནཾ ནཱམ ཝེདིཏབྦཾ. པཉྩཕསྶདྭཱརཝསེན ཧི ཨུཔྤནྣོ ཨསཾཝརོ ཨཀུསལཾ མནོཀམྨམེཝ ཧོཏི. མནོཕསྶདྭཱརཝསེན ཨུཔྤནྣོ ཏཱིཎིཔི ཀམྨཱནི ¶ ཧོནྟི – སོ ཧི ཀཱཡདྭཱརེ ཙོཔནཔྤཏྟོ ཨཀུསལཾ ཀཱཡཀམྨཾ ཧོཏི, ཝཙཱིདྭཱརེ ཨཀུསལཾ ཝཙཱིཀམྨཾ, ཨུབྷཡཏྠ ཙོཔནཾ ཨཔྤཏྟོ ཨཀུསལཾ མནོཀམྨཾ. པཉྩཨསཾཝརདྭཱརཝསེན ཨུཔྤནྣོཔི ཨཀུསལཾ མནོཀམྨམེཝ ཧོཏི. ཙོཔནཀཱཡཨསཾཝརདྭཱརཝསེན ཨུཔྤནྣོ ཨཀུསལཾ ཀཱཡཀམྨམེཝ ཧོཏི, ཝཱཙཱཨསཾཝརདྭཱརཝསེན ཨུཔྤནྣོ ཨཀུསལཾ ཝཙཱིཀམྨམེཝ ཧོཏི, མནོཨསཾཝརདྭཱརཝསེན ཨུཔྤནྣོ ¶ ཨཀུསལཾ མནོཀམྨམེཝ ཧོཏི. ཏིཝིདྷཾ ཀཱཡདུཙྩརིཏཾ ཨཀུསལཾ ཀཱཡཀམྨམེཝ ཧོཏི, ཙཏུབྦིདྷཾ ཝཙཱིདུཙྩརིཏཾ ཨཀུསལཾ ཝཙཱིཀམྨམེཝ ཧོཏི, ཏིཝིདྷཾ མནོདུཙྩརིཏཾ ཨཀུསལཾ མནོཀམྨམེཝ ཧོཏི.

པཉྩཕསྶདྭཱརཝསེན ཨུཔྤནྣོ སཾཝརོཔི ཀུསལཾ མནོཀམྨམེཝ ཧོཏི. མནོཕསྶདྭཱརཝསེན ཨུཔྤནྣོ པན ཨཡམྤི, ཨསཾཝརོ ཝིཡ, ཏཱིཎིཔི ཀམྨཱནི ཧོནྟི. པཉྩསཾཝརདྭཱརཝསེན ཨུཔྤནྣོཔི ཀུསལཾ མནོཀམྨམེཝ ཧོཏི, ཙོཔནཀཱཡསཾཝརདྭཱརཝསེན ཨུཔྤནྣོ ཀུསལཾ ཀཱཡཀམྨམེཝ ཧོཏི, ཝཱཙཱསཾཝརདྭཱརཝསེན ཨུཔྤནྣོ ཀུསལཾ ཝཙཱིཀམྨམེཝ ཧོཏི, མནོསཾཝརདྭཱརཝསེན ཨུཔྤནྣོ ཀུསལཾ མནོཀམྨམེཝ ཧོཏི. ཏིཝིདྷཾ ཀཱཡསུཙརིཏཾ ཀུསལཾ ཀཱཡཀམྨམེཝ ཧོཏི, ཙཏུབྦིདྷཾ ཝཙཱིསུཙརིཏཾ ཀུསལཾ ཝཙཱིཀམྨམེཝ ཧོཏི, ཏིཝིདྷཾ མནོསུཙརིཏཾ ཀུསལཾ མནོཀམྨམེཝ ཧོཏི.

ཨཀུསལཾ ཀཱཡཀམྨཾ པཉྩཕསྶདྭཱརཝསེན ནུཔྤཛྫཏི; མནོཕསྶདྭཱརཝསེནེཝ ཨུཔྤཛྫཏི. ཏཐཱ ཨཀུསལཾ ཝཙཱིཀམྨཾ. ཨཀུསལཾ མནོཀམྨཾ པན ཚཕསྶདྭཱརཝསེན ཨུཔྤཛྫཏི; ཏཾ ཀཱཡཝཙཱིདྭཱརེསུ ཙོཔནཾ པཏྟཾ ཨཀུསལཾ ཀཱཡཝཙཱིཀམྨཾ ཧོཏི, ཙོཔནཾ ཨཔྤཏྟཾ ཨཀུསལཾ མནོཀམྨམེཝ. ཡཐཱ ཙ པཉྩཕསྶདྭཱརཝསེན, ཨེཝཾ པཉྩཨསཾཝརདྭཱརཝསེནཔི ཨཀུསལཾ ཀཱཡཀམྨཾ ནུཔྤཛྫཏི, ཙོཔནཀཱཡཨསཾཝརདྭཱརཝསེན པན ཝཱཙཱཨསཾཝརདྭཱརཝསེན ཙ ཨུཔྤཛྫཏི; མནོཨསཾཝརདྭཱརཝསེན ནུཔྤཛྫཏི. ཨཀུསལཾ ཝཙཱིཀམྨམྤི པཉྩཨསཾཝརདྭཱརཝསེན ནུཔྤཛྫཏི, ཙོཔནཀཱཡཝཱཙཱཨསཾཝརདྭཱརཝསེན ཨུཔྤཛྫཏི; མནོཨསཾཝརདྭཱརཝསེན ནུཔྤཛྫཏི. ཨཀུསལཾ མནོཀམྨཾ ཨཊྛཨསཾཝརདྭཱརཝསེནཔི ཨུཔྤཛྫཏེཝ. ཀུསལཀཱཡཀམྨཱདཱིསུཔི ཨེསེཝ ནཡོ.

ཨཡཾ ¶ པན ཝིསེསོ – ཡཐཱ ཨཀུསལཀཱཡཀམྨཝཙཱིཀམྨཱནི མནོཨསཾཝརདྭཱརཝསེན ནུཔྤཛྫནྟི, ན ཏཐཱ ཨེཏཱནི. ཨེཏཱནི པན ཀཱཡངྒཝཱཙངྒཾ ཨཙོཔེཏྭཱ སིཀྑཱཔདཱནི གཎྷནྟསྶ མནོསཾཝརདྭཱརེཔི ཨུཔྤཛྫནྟི ཨེཝ. ཏཏྠ ཀཱམཱཝཙརཾ ཀུསལཾ ཙིཏྟཾ ཏིཝིདྷཀམྨདྭཱརཝསེན ཨུཔྤཛྫཏི, པཉྩཝིཉྙཱཎདྭཱརཝསེན ནུཔྤཛྫཏི; ‘ཡམིདཾ ཙཀྑུསམྥསྶཔཙྩཡཱ ¶ ཨུཔྤཛྫཏི ཝེདཡིཏཾ, སུཁཾ ཝཱ དུཀྑཾ ཝཱ ཨདུཀྑམསུཁཾ ཝཱ’ཏི ཨིམིནཱ པན ནཡེན ཚཕསྶདྭཱརཝསེན ཨུཔྤཛྫཏི; ཨཊྛཨསཾཝརདྭཱརཝསེན ནུཔྤཛྫཏི, ཨཊྛསཾཝརདྭཱརཝསེན ཨུཔྤཛྫཏི; དསཨཀུསལཀམྨཔཐཝསེན ¶ ནུཔྤཛྫཏི, དསཀུསལཀམྨཔཐཝསེན ཨུཔྤཛྫཏི; ཏསྨཱ ཨིདམྤི ཙིཏྟཾ ཏིཝིདྷཀམྨདྭཱརཝསེན ཝཱ ཨུཔྤནྣཾ ཧོཏུ, ཚཕསྶདྭཱརཝསེན ཝཱ, ཨཊྛསཾཝརདྭཱརཝསེན ཝཱ དསཀུསལཀམྨཔཐཝསེན ཝཱ. ‘‘ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི…པེ… རཱུཔཱརམྨཎཾ ཝཱ…པེ… དྷམྨཱརམྨཎཾ ཝཱ’’ཏི ཝུཏྟེ སབྦཾ ཝུཏྟམེཝ ཧོཏཱིཏི.

དྭཱརཀཐཱ ནིཊྛིཏཱ.

ཡཾ ཡཾ ཝཱ པནཱརབྦྷཱཏི ཨེཏྠ ཨཡཾ ཡོཛནཱ – ཧེཊྛཱ ཝུཏྟེསུ རཱུཔཱརམྨཎཱདཱིསུ རཱུཔཱརམྨཎཾ ཝཱ ཨཱརབྦྷ, ཨཱརམྨཎཾ ཀཏྭཱཏི ཨཏྠོ. སདྡཱརམྨཎཾ ཝཱ…པེ… དྷམྨཱརམྨཎཾ ཝཱ ཨཱརབྦྷ ཨུཔྤནྣཾ ཧོཏི. ཨེཏྟཱཝཏཱ ཨེཏསྶ ཙིཏྟསྶ ཨེཏེསུ ཨཱརམྨཎེསུ ཡཾཀིཉྩི ཨེཀམེཝ ཨཱརམྨཎཾ ཨནུཉྙཱཏསདིསཾ ཧོཏི. ཨིདཉྩ ཨེཀསྨིཾ སམཡེ ཨེཀསྶ ཝཱ པུགྒལསྶ རཱུཔཱརམྨཎཾ ཨཱརབྦྷ ཨུཔྤནྣཾ པུན ཨཉྙསྨིཾ སམཡེ ཨཉྙསྶ ཝཱ པུགྒལསྶ སདྡཱདཱིསུཔི ཨཉྙཏརཾ ཨཱརམྨཎཾ ཨཱརབྦྷ ཨུཔྤཛྫཏི ཨེཝ. ཨེཝཾ ཨུཔྤཛྫམཱནསྶ ཙསྶ ཨེཀསྨིཾ བྷཝེ པཋམཾ རཱུཔཱརམྨཎཾ ཨཱརབྦྷ པཝཏྟི ཧོཏི, པཙྪཱ སདྡཱརམྨཎནྟི ཨཡམྤི ཀམོ ནཏྠི. རཱུཔཱདཱིསུ ཙཱཔི པཋམཾ ནཱིལཱརམྨཎཾ པཙྪཱ པཱིཏཱརམྨཎནྟི ཨཡམྤི ནིཡམོ ནཏྠི. ཨིཏི ཨིམཾ སབྦཱརམྨཎཏཉྩེཝ, ཀམཱབྷཱཝཉྩ, ཀམཱབྷཱཝེཔི ཙ ནཱིལཔཱིཏཱདཱིསུ ནིཡམཱབྷཱཝཾ དསྶེཏུཾ ‘ཡཾ ཡཾ ཝཱ པནཱརབྦྷཱ’ཏི ཨཱཧ. ཨིདཾ ཝུཏྟཾ ཧོཏི – ཨིམེསུ རཱུཔཱདཱིསུ ན ཡཾཀིཉྩི ཨེཀམེཝ, ཨཐ ཁོ ཡཾ ཡཾ ཝཱ པནཱརབྦྷ ཨུཔྤནྣཾ ཧོཏི. ཨེཝཾ ཨུཔྤཛྫམཱནམྤི ཙ ‘པཋམཾ རཱུཔཱརམྨཎཾ པཙྪཱ སདྡཱརམྨཎཾ ཨཱརབྦྷཱ’ཏི ཨེཝམྤི ཨནུཔྤཛྫིཏྭཱ ཡཾ ཡཾ ཝཱ པནཱརབྦྷ ཨུཔྤནྣཾ ཧོཏི; ‘པཊིལོམཏོ ཝཱ ཨནུལོམཏོ ཝཱ, ཨེཀནྟརིཀདྭནྟརིཀཱདིནཡེན ཝཱ, རཱུཔཱརམྨཎཱདཱིསུ ཡཾ ཝཱ ཏཾ ཝཱ ཨཱརམྨཎཾ ཀཏྭཱ ཨུཔྤནྣཾ ཧོཏཱི’ཏི ཨཏྠོ. རཱུཔཱརམྨཎེསུཔི ཙ ‘པཋམཾ ¶ ནཱིལཱརམྨཎཾ པཙྪཱ པཱིཏཱརམྨཎ’ནྟི ཨིམིནཱཔི ནིཡམེན ཨནུཔྤཛྫིཏྭཱ, ཡཾ ཡཾ ཝཱ པནཱརབྦྷ ‘ནཱིལཔཱིཏཀཱདཱིསུ རཱུཔཱརམྨཎེསུ ཡཾ ཝཱ ཏཾ ཝཱ རཱུཔཱརམྨཎཾ ཨཱརབྦྷ ཨུཔྤནྣཾ ཧོཏཱི’ཏི ཨཏྠོ. སདྡཱརམྨཎཱདཱིསུཔི ཨེསེཝ ནཡོ. ཨཡཾ ཏཱཝ ཨེཀཱ ཡོཛནཱ.

ཨཡཾ པན ཨཔརཱ – རཱུཔཾ ཨཱརམྨཎཾ ཨེཏསྶཱཏི རཱུཔཱརམྨཎཾ…པེ… དྷམྨོ ཨཱརམྨཎཾ ཨེཏསྶཱཏི ¶ དྷམྨཱརམྨཎཾ ¶ . ཨིཏི རཱུཔཱརམྨཎཾ ཝཱ…པེ… དྷམྨཱརམྨཎཾ ཝཱ ཙིཏྟཾ ཨུཔྤནྣཾ ཧོཏཱིཏི ཝཏྭཱ པུན ‘ཡཾ ཡཾ ཝཱ པནཱརབྦྷཱ’ཏི ཨཱཧ. ཏསྶཏྠོ – ཨེཏེསུ རཱུཔཱདཱིསུ ཧེཊྛཱ ཝུཏྟནཡེནེཝ ཡཾ ཝཱ ཏཾ ཝཱ པན ཨཱརབྦྷ ཨུཔྤནྣཾ ཧོཏཱིཏི. མཧཱཨཊྛཀཐཱཡཾ པན ཡེཝཱཔནཀེ ཨབྷིནཝཾ ནཏྠི, ཧེཊྛཱ གཧིཏམེཝ གཧིཏ’ནྟི ཝཏྭཱ ‘རཱུཔཾ ཝཱ ཨཱརབྦྷ…པེ… དྷམྨཾ ཝཱ ཨཱརབྦྷ, ཨིདཾ ཝཱ ཨིདཾ ཝཱ ཨཱརབྦྷཱཏི ཀཐེཏུཾ ཨིདཾ ཝུཏྟ’ནྟི ཨེཏྟཀམེཝ ཨཱགཏཾ.

དྷམྨུདྡེསཝཱརོ

ཕསྶཔཉྩམཀརཱསིཝཎྞནཱ

ཏསྨིཾ སམཡེཏི ཨིདཾ ཨནིཡམནིདྡིཊྛསྶ སམཡསྶ ནིཡམཏོ པཊིནིདྡེསཝཙནཾ. ཏསྨཱ ‘ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི, ཏསྨིཾཡེཝ སམཡེ ཕསྶོ ཧོཏི…པེ… ཨཝིཀྑེཔོ ཧོཏཱི’ཏི ཨཡམཏྠོ ཝེདིཏབྦོ. ཏཏྠ ཡཐེཝ ཙིཏྟཾ ཨེཝཾ ཕསྶཱདཱིསུཔི ཕསྶོ ཧོཏི. ཀིཾ ཧོཏི? ‘ཀཱམཱཝཙརོ ཧོཏི, ཀུསལོ ཧོཏི, ཨུཔྤནྣོ ཧོཏི, སོམནསྶསཧགཏོ ཧོཏཱི’ཏིཨཱདིནཱ ནཡེན ལབྦྷམཱནཔདཝསེན ཡོཛནཱ ཀཱཏབྦཱ. ཝེདནཱཡཉྷི ‘སོམནསྶསཧགཏཱ’ཏི པཉྙིནྡྲིཡེ ཙ ‘ཉཱཎསམྤཡུཏྟ’ནྟི ན ལབྦྷཏི, ཏསྨཱ ‘ལབྦྷམཱནཔདཝསེནཱ’ཏི ཝུཏྟཾ. ཨིདཾ ཨཊྛཀཐཱམུཏྟཀཾ ཨཱཙརིཡཱནཾ མཏཾ; ན པནེཏཾ སཱརཏོ དཊྛབྦཾ.

ཀསྨཱ པནེཏྠ ཕསྶོཝ པཋམཾ ཝུཏྟོཏི? ཙིཏྟསྶ པཋམཱབྷིནིཔཱཏཏྟཱ. ཨཱརམྨཎསྨིཉྷི ཙིཏྟསྶ པཋམཱབྷིནིཔཱཏོ ཧུཏྭཱ ཕསྶོ ཨཱརམྨཎཾ ཕུསམཱནོ ཨུཔྤཛྫཏི, ཏསྨཱ པཋམཾ ཝུཏྟོ. ཕསྶེན པན ཕུསིཏྭཱ ཝེདནཱཡ ཝེདཡཏི, སཉྙཱཡ སཉྫཱནཱཏི, ཙེཏནཱཡ ཙེཏེཏི. ཏེན ཝུཏྟཾ – ‘‘ཕུཊྛོ, བྷིཀྑཝེ, ཝེདེཏི, ཕུཊྛོ སཉྫཱནཱཏི ཕུཊྛོ ཙེཏེཏཱི’’ཏི.

ཨཔིཙ ¶ , ཨཡཾ ཕསྶོ ནཱམ ཡཐཱ པཱསཱདཾ པཏྭཱ ཐམྦྷོ ནཱམ སེསདབྦསམྦྷཱརཱནཾ བལཝཔཙྩཡོ, ཏུལཱསངྒྷཱཊབྷིཏྟིཔཱདཀཱུཊགོཔཱནསཱིཔཀྑཔཱསཀམུཁཝཊྚིཡོ ཐམྦྷཱབདྡྷཱ ཐམྦྷེ པཏིཊྛིཏཱ, ཨེཝམེཝ སཧཛཱཏསམྤཡུཏྟདྷམྨཱནཾ བལཝཔཙྩཡོ ཧོཏི. ཐམྦྷསདིསོ ཧི ཨེས. ཨཝསེསཱ དབྦསམྦྷཱརསདིསཱཏི. ཏསྨཱཔི པཋམཾ ཝུཏྟོ. ཨིདཾ པན ཨཀཱརཎཾ. ཨེཀཙིཏྟསྨིཉྷི ཨུཔྤནྣདྷམྨཱནཾ ‘ཨཡཾ པཋམཾ ཨུཔྤནྣོ ཨཡཾ པཙྪཱ’ཏི ཨིདཾ ཝཏྟུཾ ན ལབྦྷཱ. བལཝཔཙྩཡབྷཱཝེཔི ཕསྶསྶ ཀཱརཎཾ ན ¶ དིསྶཏི. དེསནཱཝཱརེནེཝ པན ¶ ཕསྶོ པཋམཾ ཝུཏྟོ. ཝེདནཱ ཧོཏི ཕསྶོ ཧོཏི, སཉྙཱ ཧོཏི ཕསྶོ ཧོཏི, ཙེཏནཱ ཧོཏི ཕསྶོ ཧོཏི, ཙིཏྟཾ ཧོཏི ཕསྶོ ཧོཏི, ཝེདནཱ ཧོཏི སཉྙཱ ཧོཏི, ཙེཏནཱ ཧོཏི ཝིཏཀྐོ ཧོཏཱིཏི ཨཱཧརིཏུམྤི ཧི ཝཊྚེཡྻ. དེསནཱཝཱརེན པན ཕསྶོཝ པཋམཾ ཝུཏྟོཏི ཝེདིཏབྦོ. ཡཐཱ ཙེཏྠ ཨེཝཾ སེསདྷམྨེསུཔི པུབྦཱཔརཀྐམོ ནཱམ ན པརིཡེསིཏབྦོ. ཝཙནཏྠལཀྑཎརསཱདཱིཧི པན དྷམྨཱ ཨེཝ པརིཡེསིཏབྦཱ.

སེཡྻཐིདཾ – ཕུསཏཱིཏི ཕསྶོ. སྭཱཡཾ ཕུསནལཀྑཎོ, སངྒྷཊྚནརསོ, སནྣིཔཱཏཔཙྩུཔཊྛཱནོ, ཨཱཔཱཐགཏཝིསཡཔདཊྛཱནོ.

ཨཡཉྷི ཨརཱུཔདྷམྨོཔི སམཱནོ ཨཱརམྨཎེ ཕུསནཱཀཱརེནེཝ པཝཏྟཏཱིཏི ཕུསནལཀྑཎོ. ཨེཀདེསེན ཙ ཨནལླཱིཡམཱནོཔི རཱུཔཾ ཝིཡ ཙཀྑུཾ, སདྡོ ཝིཡ ཙ སོཏཾ, ཙིཏྟཾ ཨཱརམྨཎཉྩ སངྒྷཊྚེཏཱིཏི སངྒྷཊྚནརསོ. ཝཏྠཱརམྨཎསངྒྷཊྚནཏོ ཝཱ ཨུཔྤནྣཏྟཱ སམྤཏྟིཨཏྠེནཔི རསེན སངྒྷཊྚནརསོཏི ཝེདིཏབྦོ. ཝུཏྟཉྷེཏཾ ཨཊྛཀཐཱཡཾ – ‘‘ཙཏུབྷཱུམཀཕསྶོ ཧི ནོཕུསནལཀྑཎོ ནཱམ ནཏྠི. སངྒྷཊྚནརསོ པན པཉྩདྭཱརིཀོཝ ཧོཏི. པཉྩདྭཱརིཀསྶ ཧི ཕུསནལཀྑཎོཏིཔི སངྒྷཊྚནརསོཏིཔི ནཱམཾ; མནོདྭཱརིཀསྶ ཕུསནལཀྑཎོཏྭེཝ ནཱམཾ, ན སངྒྷཊྚནརསོ’’ཏི.

ཨིདཉྩ ཝཏྭཱ ཨིདཾ སུཏྟཾ ཨཱབྷཏཾ – ‘‘ཡཐཱ, མཧཱརཱཛ, དྭེ མེཎྜཱ ཡུཛ྄ཛྷེཡྻུཾ, ཏེསུ ཡཐཱ ཨེཀོ མེཎྜོ ཨེཝཾ ཙཀྑུ དཊྛབྦཾ, ཡཐཱ དུཏིཡོ མེཎྜོ ཨེཝཾ རཱུཔཾ དཊྛབྦཾ; ཡཐཱ ཏེསཾ སནྣིཔཱཏོ ཨེཝཾ ཕསྶོ དཊྛབྦོ’’. ཨེཝཾ ཕུསནལཀྑཎོ ཙ ཕསྶོ, སངྒྷཊྚནརསོ ཙ. ‘‘ཡཐཱ, མཧཱརཱཛ, དྭེ ¶ སམྨཱ ཝཛྫེཡྻུཾ…པེ… དྭེ པཱཎཱི ཝཛྫེཡྻུཾ, ཡཐཱ ཨེཀོ པཱཎི ཨེཝཾ ཙཀྑུ དཊྛབྦཾ, ཡཐཱ དུཏིཡོ པཱཎི ཨེཝཾ རཱུཔཾ དཊྛབྦཾ, ཡཐཱ ཏེསཾ སནྣིཔཱཏོ ཨེཝཾ ཕསྶོ དཊྛབྦོ. ཨེཝཾ ཕུསནལཀྑཎོ ཙ ཕསྶོ སངྒྷཊྚནརསོ ཙཱ’’ཏི (མི. པ. ༢.༣.༨) ཝིཏྠཱརོ.

ཡཐཱ ཝཱ ‘‘ཙཀྑུནཱ རཱུཔཾ དིསྭཱ’’ཏིཨཱདཱིསུ (དྷ. ས. ༡༣༥༢, ༡༣༥༤) ཙཀྑུཝིཉྙཱཎཱདཱིནི ཙཀྑུཨཱདིནཱམེན ཝུཏྟཱནི, ཨེཝམིདྷཱཔི ཏཱནི ཙཀྑུཨཱདིནཱམེན ཝུཏྟཱནཱིཏི ཝེདིཏབྦཱནི. ཏསྨཱ ‘ཨེཝཾ ཙཀྑུ དཊྛབྦ’ནྟིཨཱདཱིསུ ཨེཝཾ ཙཀྑུཝིཉྙཱཎཾ དཊྛབྦནྟི ཨིམིནཱ ནཡེན ཨཏྠོ ཝེདིཏབྦོ. ཨེཝཾ སནྟེ ཙིཏྟཱརམྨཎསངྒྷཊྚནཏོ ¶ ཨིམསྨིམྤི སུཏྟེ ཀིཙྩཊྛེནེཝ རསེན སངྒྷཊྚནརསོཏི སིདྡྷོ ཧོཏི.

ཏིཀསནྣིཔཱཏསངྑཱཏསྶ ¶ པན ཨཏྟནོ ཀཱརཎསྶ ཝསེན པཝེདིཏཏྟཱ སནྣིཔཱཏཔཙྩུཔཊྛཱནོ. ཨཡཉྷི ཏཏྠ ཏཏྠ ‘‘ཏིཎྞཾ སངྒཏི ཕསྶོ’’ཏི ཨེཝཾ ཀཱརཎསྶ ཝསེན པཝེདིཏོཏི. ཨིམསྶ ཙ སུཏྟཔདསྶ ཏིཎྞཾ སངྒཏིཡཱ ཕསྶོཏི ཨཡམཏྠོ; ན སངྒཏིམཏྟམེཝ ཕསྶོཏི.

ཨེཝཾ པཝེདིཏཏྟཱ པན ཏེནེཝཱཀཱརེན པཙྩུཔཊྛཱཏཱིཏི སནྣིཔཱཏཔཙྩུཔཊྛཱནོཏི ཝུཏྟོ. ཕལཊྛེན པན པཙྩུཔཊྛཱནེནེས ཝེདནཱཔཙྩུཔཊྛཱནོ ནཱམ ཧོཏི. ཝེདནཉྷེས པཙྩུཔཊྛཱཔེཏི ཨུཔྤཱདེཏཱིཏི ཨཏྠོ. ཨུཔྤཱདཡམཱནོ ཙ ཡཐཱ བཧིདྡྷཱ ཨུཎྷཔཙྩཡཱཔི ལཱཁཱསངྑཱཏདྷཱཏུནིསྶིཏཱ ཨུསྨཱ ཨཏྟནོ ནིསྶཡེ མུདུབྷཱཝཀཱརཱི ཧོཏི, ན ཨཏྟནོ པཙྩཡབྷཱུཏེཔི བཧིདྡྷཱ ཝཱིཏཙྩིཏངྒཱརསངྑཱཏེ ཨུཎྷབྷཱཝེ, ཨེཝཾ ཝཏྠཱརམྨཎསངྑཱཏཨཉྙཔཙྩཡོཔི སམཱནོ, ཙིཏྟནིསྶིཏཏྟཱ ཨཏྟནོ ནིསྶཡབྷཱུཏེ ཙིཏྟེ ཨེཝ ཨེས ཝེདནུཔྤཱདཀོ ཧོཏི, ན ཨཏྟནོ པཙྩཡབྷཱུཏེཔི ཝཏྠུམྷི ཨཱརམྨཎེ ཝཱཏི ཝེདིཏབྦོ. ཏཛྫཱསམནྣཱཧཱརེན པན ཨིནྡྲིཡེན ཙ པརིཀྑཏེ ཝིསཡེ ཨནནྟརཱཡེན ཨུཔྤཛྫནཏོ ཨེས ཨཱཔཱཐགཏཝིསཡཔདཊྛཱནོཏི ཝུཙྩཏི.

ཝེདཡཏཱིཏི ཝེདནཱ. སཱ ཝེདཡིཏལཀྑཎཱ, ཨནུབྷཝནརསཱ ཨིཊྛཱཀཱརསམྦྷོགརསཱ ཝཱ, ཙེཏསིཀཨསྶཱདཔཙྩུཔཊྛཱནཱ, པསྶདྡྷིཔདཊྛཱནཱ.

‘ཙཏུབྷཱུམིཀཝེདནཱ ¶ ཧི ནོཝེདཡིཏལཀྑཎཱ ནཱམ ནཏྠི. ཨནུབྷཝནརསཏཱ པན སུཁཝེདནཱཡམེཝ ལབྦྷཏཱི’ཏི ཝཏྭཱ པུན ཏཾ ཝཱདཾ པཊིཀྑིཔིཏྭཱ ‘སུཁཝེདནཱ ཝཱ ཧོཏུ, དུཀྑཝེདནཱ ཝཱ, ཨདུཀྑམསུཁཝེདནཱ ཝཱ, སབྦཱ ཨནུབྷཝནརསཱ’ཏི ཝཏྭཱ ཨཡམཏྠོ དཱིཔིཏོ – ཨཱརམྨཎརསཱནུབྷཝནཊྛཱནཾ པཏྭཱ སེསསམྤཡུཏྟདྷམྨཱ ཨེཀདེསམཏྟཀམེཝ ཨནུབྷཝནྟི. ཕསྶསྶ ཧི ཕུསནམཏྟཀམེཝ ཧོཏི, སཉྙཱཡ སཉྫཱནནམཏྟཀམེཝ, ཙེཏནཱཡ ཙེཏནཱམཏྟཀམེཝ, ཝིཉྙཱཎསྶ ཝིཛཱནནམཏྟཀམེཝ. ཨེཀཾསཏོ པན ཨིསྶརཝཏཱཡ ཝིསྶཝིཏཱཡ སཱམིབྷཱཝེན ཝེདནཱཝ ཨཱརམྨཎརསཾ ཨནུབྷཝཏི.

རཱཛཱ ཝིཡ ཧི ཝེདནཱ, སཱུདོ ཝིཡ སེསདྷམྨཱ. ཡཐཱ སཱུདོ ནཱནཱརསབྷོཛནཾ སམྤཱདེཏྭཱ པེལཱ༹ཡ པཀྑིཔིཏྭཱ ལཉྪནཾ དཏྭཱ རཉྙོ སནྟིཀེ ཨོཏཱརེཏྭཱ ལཉྪནཾ བྷིནྡིཏྭཱ པེལ༹ཾ ཝིཝརིཏྭཱ སབྦསཱུཔབྱཉྫནེཧི ཨགྒགྒཾ ¶ ཨཱདཱཡ བྷཱཛནེ པཀྑིཔིཏྭཱ སདོསནིདྡོསབྷཱཝཝཱིམཾསནཏྠཾ ཨཛ྄ཛྷོཧརཏི, ཏཏོ རཉྙོ ནཱནགྒརསབྷོཛནཾ ཨུཔནཱམེཏི. རཱཛཱ ཨིསྶརཝཏཱཡ ཝིསྶཝིཏཱཡ ¶ སཱམཱི ཧུཏྭཱ ཨིཙྪིཏིཙྪིཏཾ བྷུཉྫཏི. ཏཏྠ ཧི སཱུདསྶ བྷཏྟཝཱིམཾསནམཏྟམིཝ ཨཝསེསདྷམྨཱནཾ ཨཱརམྨཎརསསྶ ཨེཀདེསཱནུབྷཝནཾ. ཡཐཱ ཧི སཱུདོ བྷཏྟེཀདེསམཏྟམེཝ ཝཱིམཾསཏི ཨེཝཾ སེསདྷམྨཱཔི ཨཱརམྨཎརསེཀདེསམེཝ ཨནུབྷཝནྟི. ཡཐཱ པན རཱཛཱ ཨིསྶརཝཏཱཡ ཝིསྶཝིཏཱཡ སཱམཱི ཧུཏྭཱ ཡདིཙྪཀཾ བྷུཉྫཏི, ཨེཝཾ ཝེདནཱཔི ཨིསྶརཝཏཱཡ ཝིསྶཝིཏཱཡ སཱམིབྷཱཝེན ཨཱརམྨཎརསཾ ཨནུབྷཝཏི. ཏསྨཱ ཨནུབྷཝནརསཱཏི ཝུཙྩཏི.

དུཏིཡེ ཨཏྠཝིཀཔྤེ ཨཡཾ ཨིདྷ ཨདྷིཔྤེཏཱ ཝེདནཱ ཡཐཱ ཝཱ ཏཐཱ ཝཱ ཨཱརམྨཎསྶ ཨིཊྛཱཀཱརམེཝ སམྦྷུཉྫཏཱིཏི ཨིཊྛཱཀཱརསམྦྷོགརསཱཏི ཝུཏྟཱ. ཙེཏསིཀཨསྶཱདཏོ པནེསཱ ཨཏྟནོ སབྷཱཝེནེཝ ཨུཔཊྛཱནཾ སནྡྷཱཡ ཙེཏསིཀཨསྶཱདཔཙྩུཔཊྛཱནཱཏི ཝུཏྟཱ. ཡསྨཱ པན ‘‘པསྶདྡྷིཀཱཡོ སུཁཾ ཝེདེཏི’’ ཏསྨཱ པསྶདྡྷིཔདཊྛཱནཱཏི ཝེདིཏབྦཱ.

ནཱིལཱདིབྷེདཾ ཨཱརམྨཎཾ སཉྫཱནཱཏཱིཏི སཉྙཱ. སཱ སཉྫཱནནལཀྑཎཱ པཙྩཱབྷིཉྙཱཎརསཱ. ཙཏུབྷཱུམིཀསཉྙཱ ཧི ནོསཉྫཱནནལཀྑཎཱ ནཱམ ནཏྠི ¶ . སབྦཱ སཉྫཱནནལཀྑཎཱཝ. ཡཱ པནེཏྠ ཨབྷིཉྙཱཎེན སཉྫཱནཱཏི སཱ པཙྩཱབྷིཉྙཱཎརསཱ ནཱམ ཧོཏི.

ཏསྶཱ, ཝཌྜྷཀིསྶ དཱརུམྷི ཨབྷིཉྙཱཎཾ ཀཏྭཱ པུན ཏེན ཨབྷིཉྙཱཎེན ཏཾ པཙྩཱབྷིཛཱནནཀཱལེ, པུརིསསྶ ཀཱལ༹ཏིལཀཱདིཨབྷིཉྙཱཎཾ སལླཀྑེཏྭཱ པུན ཏེན ཨབྷིཉྙཱཎེན ཨསུཀོ ནཱམ ཨེསོཏི ཏསྶ པཙྩཱབྷིཛཱནནཀཱལེ, རཉྙོ པིལ༹ནྡྷནགོཔཀབྷཎྜཱགཱརིཀསྶ ཏསྨིཾ ཏསྨིཾ པིལ༹ནྡྷནེ ནཱམཔཎྞཀཾ བནྡྷིཏྭཱ ‘ཨསུཀཾ པིལ༹ནྡྷནཾ ནཱམ ཨཱཧརཱ’ཏི ཝུཏྟེ དཱིཔཾ ཛཱལེཏྭཱ རཏནགབྦྷཾ པཝིསིཏྭཱ པཎྞཾ ཝཱཙེཏྭཱ ཏསྶ ཏསྶེཝ པིལ༹ནྡྷནསྶ ཨཱཧརཎཀཱལེ ཙ པཝཏྟི ཝེདིཏབྦཱ.

ཨཔརོ ནཡོ – སབྦསངྒཱཧིཀཝསེན ཧི སཉྫཱནནལཀྑཎཱ སཉྙཱ. པུནསཉྫཱནནཔཙྩཡནིམིཏྟཀརཎརསཱ, དཱརུཨཱདཱིསུ ཏཙྪཀཱདཡོ ཝིཡ. ཡཐཱགཧིཏནིམིཏྟཝསེན ཨབྷིནིཝེསཀརཎཔཙྩུཔཊྛཱནཱ, ཧཏྠིདསྶཀཨནྡྷཱ ཝིཡ. ཨཱརམྨཎེ ཨནོགཱལ༹ྷཝུཏྟིཏཱཡ ¶ ཨཙིརཊྛཱནཔཙྩུཔཊྛཱནཱ ཝཱ, ཝིཛྫུ ཝིཡ. ཡཐཱཨུཔཊྛིཏཝིསཡཔདཊྛཱནཱ, ཏིཎཔུརིསཀེསུ མིགཔོཏཀཱནཾ ‘པུརིསཱ’ཏི ཨུཔྤནྣསཉྙཱ ཝིཡ. ཡཱ པནེཏྠ ཉཱཎསམྤཡུཏྟཱ ཧོཏི སཱ སཉྙཱ ཉཱཎམེཝ ཨནུཝཏྟཏི. སསམྦྷཱརཔཐཝཱིཨཱདཱིསུ སེསདྷམྨཱ པཐཝཱིཨཱདཱིནི ཝིཡཱཏི ཝེདིཏབྦཱ.

ཙེཏཡཏཱིཏི ¶ ཙེཏནཱ སདྡྷིཾ ཨཏྟནཱ སམྤཡུཏྟདྷམྨེ ཨཱརམྨཎེ ཨབྷིསནྡཧཏཱིཏི ཨཏྠོ. སཱ ཙེཏཡིཏལཀྑཎཱ, ཙེཏནཱབྷཱཝལཀྑཎཱཏི ཨཏྠོ. ཨཱཡཱུཧནརསཱ. ཙཏུབྷཱུམིཀཙེཏནཱ ཧི ནོཙེཏཡིཏལཀྑཎཱ ནཱམ ནཏྠི. སབྦཱ ཙེཏཡིཏལཀྑཎཱཝ. ཨཱཡཱུཧནརསཏཱ པན ཀུསལཱཀུསལེསུ ཨེཝ ཧོཏི. ཀུསལཱཀུསལཀམྨཱཡཱུཧནཊྛཱནཉྷི པཏྭཱ སེསསམྤཡུཏྟདྷམྨཱནཾ ཨེཀདེསམཏྟཀམེཝ ཀིཙྩཾ ཧོཏི. ཙེཏནཱ པན ཨཏིརེཀཨུསྶཱཧཱ ཨཏིརེཀཝཱཡཱམཱ, དིགུཎུསྶཱཧཱ དིགུཎཝཱཡཱམཱ. ཏེནཱཧུ པོརཱཎཱ – ‘‘ཐཱཝརིཡསབྷཱཝསཎྛིཏཱ ཙ པནེསཱ ཙེཏནཱ’’ཏི. ཐཱཝརིཡོཏི ཁེཏྟསཱམཱི ཝུཙྩཏི. ཡཐཱ ཁེཏྟསཱམཱི པུརིསོ པཉྩཔཎྞཱས བལིཔུརིསེ གཧེཏྭཱ ‘ལཱཡིསྶཱམཱི’ཏི ཨེཀཏོ ཁེཏྟཾ ཨོཏརཏི. ཏསྶ ཨཏིརེཀོ ཨུསྶཱཧོ ཨཏིརེཀོ ཝཱཡཱམོ, དིགུཎོ ཨུསྶཱཧོ དིགུཎོ ཝཱཡཱམོ ཧོཏི, ‘ནིརནྟརཾ གཎྷཐཱ’ཏིཨཱདཱིནི ཝདཏི, སཱིམཾ ཨཱཙིཀྑཏི, ཏེསཾ སུརཱབྷཏྟགནྡྷམཱལཱདཱིནི ཛཱནཱཏི, མགྒཾ སམཀཾ ཧརཏི. ཨེཝཾསམྤདམིདཾ ཝེདིཏབྦཾ ¶ . ཁེཏྟསཱམིཔུརིསོ ཝིཡ ཧི ཙེཏནཱ. པཉྩཔཎྞཱས བལིཔུརིསཱ ཝིཡ ཙིཏྟངྒཝསེན ཨུཔྤནྣཱ པཉྩཔཎྞཱས ཀུསལཱ དྷམྨཱ. ཁེཏྟསཱམིཔུརིསསྶ དིགུཎུསྶཱཧདིགུཎཝཱཡཱམཀརཎཀཱལོ ཝིཡ ཀུསལཱཀུསལཀམྨཱཡཱུཧནཊྛཱནཾ པཏྭཱ ཙེཏནཱཡ དིགུཎུསྶཱཧོ དིགུཎཝཱཡཱམོ ཧོཏི. ཨེཝམསྶཱ ཨཱཡཱུཧནརསཏཱ ཝེདིཏབྦཱ.

སཱ པནེསཱ སཾཝིདཧནཔཙྩུཔཊྛཱནཱ. སཾཝིདཧམཱནཱ ཧི ཨཡཾ ཨུཔཊྛཱཏི, སཀིཙྩཔརཀིཙྩསཱདྷཀཱ, ཛེཊྛསིསྶམཧཱཝཌྜྷཀཱིཨཱདཡོ ཝིཡ. ཡཐཱ ཧི ཛེཊྛསིསྶོ ཨུཔཛ྄ཛྷཱཡཾ དཱུརཏོཝ ཨཱགཙྪནྟཾ དིསྭཱ སཡཾ ཨདྷཱིཡམཱནོ ཨིཏརེཔི དཱརཀེ ཨཏྟནོ ཨཏྟནོ ཨཛ྄ཛྷཡནཀམྨེ པཝཏྟཡཏི, ཏསྨིཉྷི ཨདྷཱིཡིཏུཾ ཨཱརདྡྷེ ཏེཔི ཨདྷཱིཡནྟི, ཏདནུཝཏྟིཏཱཡ. ཡཐཱ ཙ མཧཱཝཌྜྷཀཱི སཡཾ ཏཙྪནྟོ ཨིཏརེཔི ཏཙྪཀེ ཨཏྟནོ ཨཏྟནོ ¶ ཏཙྪནཀམྨེ པཝཏྟཡཏི, ཏསྨིཉྷི ཏཙྪིཏུཾ ཨཱརདྡྷེ ཏེཔི ཏཙྪནྟི, ཏདནུཝཏྟིཏཱཡ. ཡཐཱ ཙ ཡོདྷནཱཡཀོ སཡཾ ཡུཛ྄ཛྷམཱནོ ཨིཏརེཔི ཡོདྷེ སམྤཧཱརཝུཏྟིཡཾ པཝཏྟཡཏི, ཏསྨིཉྷི ཡུཛ྄ཛྷིཏུཾ ཨཱརདྡྷེ ཏེཔི ཨནིཝཏྟམཱནཱ ཡུཛ྄ཛྷནྟི, ཏདནུཝཏྟིཏཱཡ. ཨེཝམེསཱཔི ཨཏྟནོ ཀིཙྩེན ཨཱརམྨཎེ པཝཏྟམཱནཱ ཨཉྙེཔི སམྤཡུཏྟདྷམྨེ ཨཏྟནོ ཨཏྟནོ ཀིརིཡཱཡ པཝཏྟེཏི. ཏསྶཱ ཧི ཨཏྟནོ ཀིཙྩཾ ཨཱརདྡྷཱཡ, ཏཾསམྤཡུཏྟཱཔི ཨཱརབྷནྟི. ཏེན ཝུཏྟཾ – ‘སཀིཙྩཔརཀིཙྩསཱདྷཀཱ, ཛེཊྛསིསྶམཧཱཝཌྜྷཀཱིཨཱདཡོ ཝིཡཱ’ཏི. ཨཙྩཱཡིཀཀམྨཱནུསྶརཎཱདཱིསུ ཙ པནཱཡཾ སམྤཡུཏྟཱནཾ ཨུསྶཱཧནབྷཱཝེན པཝཏྟམཱནཱ པཱཀཊཱ ཧོཏཱིཏི ཝེདིཏབྦཱ.

‘ཨཱརམྨཎཾ ¶ ཙིནྟེཏཱི’ཏི ཙིཏྟནྟི ནཡེན ཙིཏྟསྶ ཝཙནཏྠོ ཝུཏྟོ ཨེཝ. ལཀྑཎཱདིཏོ པན ཝིཛཱནནལཀྑཎཾ ཙིཏྟཾ, པུབྦངྒམརསཾ, སནྡཧནཔཙྩུཔཊྛཱནཾ, ནཱམརཱུཔཔདཊྛཱནཾ. ཙཏུབྷཱུམཀཙིཏྟཉྷི ནོཝིཛཱནནལཀྑཎཾ ནཱམ ནཏྠི. སབྦཾ ཝིཛཱནནལཀྑཎམེཝ. དྭཱརཾ པན པཏྭཱ ཨཱརམྨཎཝིབྷཱཝནཊྛཱནེ ཙིཏྟཾ པུབྦངྒམཾ པུརེཙཱརིཀཾ ཧོཏི. ཙཀྑུནཱ ཧི དིཊྛཾ རཱུཔཱརམྨཎཾ ཙིཏྟེནེཝ ཝིཛཱནཱཏི…པེ… མནེན ཝིཉྙཱཏཾ དྷམྨཱརམྨཎཾ ཙིཏྟེནེཝ ཝིཛཱནཱཏི. ཡཐཱ ཧི ནགརགུཏྟིཀོ ནཱམ ནགརམཛ྄ཛྷེ སིངྒྷཱཊཀེ ནིསཱིདིཏྭཱ ‘ཨཡཾ ནེཝཱསིཀོ ཨཡཾ ཨཱགནྟུཀོ’ཏི ཨཱགཏཱགཏཾ ཛནཾ ཨུཔདྷཱརེཏི ཝཝཏྠཔེཏི – ཨེཝཾསམྤདམིདཾ དཊྛབྦཾ. ཝུཏྟམྤི ཙེཏཾ མཧཱཐེརེན – ‘‘ཡཐཱ, མཧཱརཱཛ ¶ , ནགརགུཏྟིཀོ ནཱམ མཛ྄ཛྷེ ནགརསྶ སིངྒྷཱཊཀེ ནིསིནྣོ པུརཏྠིམཏོ དིསཏོ པུརིསཾ ཨཱགཙྪནྟཾ པསྶེཡྻ… པཙྪིམཏོ… དཀྑིཎཏོ… ཨུཏྟརཏོ དིསཏོ པུརིསཾ ཨཱགཙྪནྟཾ པསྶེཡྻ, ཨེཝམེཝ ཁོ, མཧཱརཱཛ, ཡཾ ཙཀྑུནཱ རཱུཔཾ པསྶཏི ཏཾ ཝིཉྙཱཎེན ཝིཛཱནཱཏི, ཡཾ སོཏེན སདྡཾ སུཎཱཏི, གྷཱནེན གནྡྷཾ གྷཱཡཏི, ཛིཝ྄ཧཱཡ རསཾ སཱཡཏི, ཀཱཡེན ཕོཊྛབྦཾ ཕུསཏི, མནསཱ དྷམྨཾ ཝིཛཱནཱཏི, ཏཾ ཝིཉྙཱཎེན ཝིཛཱནཱཏཱི’’ཏི (མི. པ. ༢.༣.༡༢). ཨེཝཾ དྭཱརཾ པཏྭཱ ཨཱརམྨཎཝིབྷཱཝནཊྛཱནེ ཙིཏྟམེཝ པུབྦངྒམཾ པུརེཙཱརིཀཾ. ཏསྨཱ པུབྦངྒམརསནྟི ¶ ཝུཙྩཏི.

ཏདེཏཾ པཙྪིམཾ པཙྪིམཾ ཨུཔྤཛྫམཱནཾ པུརིམཾ པུརིམཾ ནིརནྟརཾ ཀཏྭཱ སནྡཧནམེཝ ཨུཔཊྛཱཏཱིཏི སནྡཧནཔཙྩུཔཊྛཱནཾ. པཉྩཝོཀཱརབྷཝེ པནསྶ ནིཡམཏོ ནཱམརཱུཔཾ, ཙཏུཝོཀཱརབྷཝེ ནཱམམེཝ པདཊྛཱནཾ. ཏསྨཱ ནཱམརཱུཔཔདཊྛཱནནྟི ཝུཏྟཾ.

ཀིཾ པནེཏཾ ཙིཏྟཾ པུརིམནིདྡིཊྛཙིཏྟེན སདྡྷིཾ ཨེཀམེཝ ཨུདཱཧུ ཨཉྙནྟི? ཨེཀམེཝ. ཨཐ ཀསྨཱ པུརིམནིདྡིཊྛཾ པུན ཝུཏྟནྟི? ཨཝིཙཱརིཏཾ ཨེཏཾ ཨཊྛཀཐཱཡཾ. ཨཡཾ པནེཏྠ ཡུཏྟི – ཡཐཱ ཧི རཱུཔཱདཱིནི ཨུཔཱདཱཡ པཉྙཏྟཱ སཱུརིཡཱདཡོ ན ཨཏྠཏོ རཱུཔཱདཱིཧི ཨཉྙེ ཧོནྟི, ཏེནེཝ ཡསྨིཾ སམཡེ སཱུརིཡོ ཨུདེཏི ཏསྨིཾ སམཡེ ཏསྶ ཏེཛསངྑཱཏཾ རཱུཔམྤཱིཏི. ཨེཝཾ ཝུཙྩམཱནེཔི ན རཱུཔཱདཱིཧི ཨཉྙོ སཱུརིཡོ ནཱམ ཨཏྠི. ན ཏཐཱ ཙིཏྟཾ; ཕསྶཱདཡོ དྷམྨེ ཨུཔཱདཱཡ པཉྙཱཔིཡཏི; ཨཏྠཏོ པནེཏཾ ཏེཧི ཨཉྙམེཝ. ཏེན ‘ཡསྨིཾ སམཡེ ཙིཏྟཾ ཨུཔྤནྣཾ ཧོཏི ཨེཀཾསེནེཝ ཏསྨིཾ སམཡེ ཕསྶཱདཱིཧི ཨཏྠཏོ ཨཉྙམེཝ ཏཾ ཧོཏཱི’ཏི ཨིམསྶཏྠསྶ དཱིཔནཏྠཱཡ ཨེཏཾ པུན ཝུཏྟནྟི ཝེདིཏབྦཾ.

ཡཐཱ ཙ ‘‘ཡསྨིཾ སམཡེ རཱུཔཱུཔཔཏྟིཡཱ མགྒཾ བྷཱཝེཏི…པེ… པཐཝཱིཀསིཎཾ, ཏསྨིཾ སམཡེ ¶ ཕསྶོ ཧོཏི ཝེདནཱ ཧོཏཱི’’ཏིཨཱདཱིསུ (དྷ. ས. ༡༦༠) པན བྷཱཝེནྟེན ཝཝཏྠཱཔིཏེ སམཡེ ཡོ བྷཱཝེཏི ན སོ ཨཏྠཏོ ཨུཔྤཛྫཏི ནཱམ, ཏེནེཝ ཏཏྠ ཡཐཱ ‘‘ཕསྶོ ཧོཏི ཝེདནཱ ཧོཏཱི’’ཏི ཝུཏྟཾ, ན ཨེཝཾ ‘‘ཡོ བྷཱཝེཏི སོ ཧོཏཱི’’ཏི ཝུཏྟཾ. ‘‘ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏཱི’’ཏིཨཱདཱིསུ པན ཙིཏྟེན ཝཝཏྠཱཔིཏེ སམཡེ སམཡཝཝཏྠཱཔིཏཾ ཙིཏྟཾ ན ཏཐཱ ཨཏྠཏོ ནུཔྤཛྫཏི ¶ . ཡཐེཝ པན ཏདཱ ‘ཕསྶོ ཧོཏི ཝེདནཱ ཧོཏི’, ཏཐཱ ‘ཙིཏྟམྤི ཧོཏཱི’ཏི ཨིམསྶཔི ཨཏྠསྶ དཱིཔནཏྠམིདཾ པུན ཝུཏྟནྟི ཝེདིཏབྦཾ. ཨིདཾ པནེཏྠ སནྣིཊྛཱནཾ – ཨུདྡེསཝཱརེ སངྒཎྷནཏྠཾ ནིདྡེསཝཱརེ ཙ ཝིབྷཛནཏྠཾ པུརིམེན ཧི ‘ཙིཏྟ’-སདྡེན ཀེཝལཾ སམཡོ ཝཝཏྠཱཔིཏོ. ཏསྨིཾ པན ཙིཏྟེན ཝཝཏྠཱཔིཏསམཡེ ཡེ དྷམྨཱ ཧོནྟི ཏེསཾ དསྶནཏྠཾ ‘‘ཕསྶོ ཧོཏཱི’’ཏིཨཱདི ཨཱརདྡྷཾ. ཙིཏྟཉྩཱཔི ཏསྨིཾ སམཡེ ཧོཏིཡེཝ. ཏསྨཱ ཏསྶཱཔི སངྒཎྷནཏྠམེཏཾ ¶ པུན ཝུཏྟཾ. ཨིམསྨིཉྩ ཋཱནེ ཨེཏསྨིཾ ཨཝུཙྩམཱནེ ‘‘ཀཏམཾ ཏསྨིཾ སམཡེ ཙིཏྟ’’ནྟི ན སཀྐཱ བྷཝེཡྻ ནིདྡེསཝཱརེ ཝིབྷཛིཏུཾ. ཨེཝམསྶ ཝིབྷཛནཾཡེཝ པརིཧཱཡེཐ. ཏསྨཱ ཏསྶ ནིདྡེསཝཱརེ ཝིབྷཛནཏྠམྤི ཨེཏཉྩ ཝུཏྟནྟི ཝེདིཏབྦཾ.

ཡསྨཱ ཝཱ ‘‘ཨུཔྤནྣཾ ཧོཏཱི’’ཏི ཨེཏྠ ཙིཏྟཾ ཨུཔྤནྣནྟི ཨེཏཾ དེསནཱསཱིསམེཝ, ‘ན པན ཙིཏྟཾ ཨེཀམེཝ ཨུཔྤཛྫཏཱི’ཏི ཨཊྛཀཐཱཡཾ ཝིཙཱརིཏཾ, ཏསྨཱ ཙིཏྟཾ ‘‘ཨུཔྤནྣ’’ནྟི ཨེཏྠཱཔི ཙིཏྟམཏྟམེཝ ཨགྒཧེཏྭཱ པརོཔཎྞཱསཀུསལདྷམྨེཧི སདྡྷིཾཡེཝ ཙིཏྟཾ གཧིཏཾ. ཨེཝཾ ཏཏྠ སངྑེཔཏོ སབྦེཔི ཙིཏྟཙེཏསིཀདྷམྨེ གཧེཏྭཱ ཨིདྷ སརཱུཔེན པབྷེདཏོ དསྶེཏུཾ ‘‘ཕསྶོ ཧོཏཱི’’ཏིཨཱདི ཨཱརདྡྷཾ. ཨིཏི ཕསྶཱདཡོ ཝིཡ ཙིཏྟམྤི ཝུཏྟམེཝཱཏི ཝེདིཏབྦཾ.

དྷམྨུདྡེསཝཱརོ

ཛྷཱནངྒརཱསིཝཎྞནཱ

ཝིཏཀྐེཏཱིཏི ཝིཏཀྐོ; ཝིཏཀྐནཾ ཝཱ ཝིཏཀྐོ; ཨཱུཧནནྟི ཝུཏྟཾ ཧོཏི. སྭཱཡཾ ཨཱརམྨཎེ ཙིཏྟསྶ ཨབྷིནིརོཔནལཀྑཎོ. སོ ཧི ཨཱརམྨཎེ ཙིཏྟཾ ཨཱརོཔེཏི. ཡཐཱ ཧི ཀོཙི རཱཛཝལླབྷཾ ཉཱཏིཾ ཝཱ མིཏྟཾ ཝཱ ནིསྶཱཡ རཱཛགེཧཾ ཨཱརོཧཏི, ཨེཝཾ ཝིཏཀྐཾ ནིསྶཱཡ ཙིཏྟཾ ཨཱརམྨཎཾ ཨཱརོཧཏི. ཏསྨཱ སོ ཨཱརམྨཎེ ཙིཏྟསྶ ཨབྷིནིརོཔནལཀྑཎོཏི ཝུཏྟོ. ནཱགསེནཏྠེརོ པནཱཧ – ཨཱཀོཊནལཀྑཎོ ཝིཏཀྐོ. ‘‘ཡཐཱ, མཧཱརཱཛ, བྷེརཱི ཨཱཀོཊིཏཱ ཨཐ པཙྪཱ ¶ ཨནུརཝཏི ཨནུསདྡཱཡཏི, ཨེཝམེཝ ཁོ, མཧཱརཱཛ, ཡཐཱ ཨཱཀོཊནཱ ཨེཝཾ ཝིཏཀྐོ དཊྛབྦོ. ཡཐཱ པཙྪཱ ཨནུརཝནཱ ཨནུསདྡཱཡནཱ ཨེཝཾ ཝིཙཱརོ དཊྛབྦོ’’ཏི (མི. པ. ༢.༣.༡༤ ཐོཀཾ ཝིསདིསཾ). སྭཱཡཾ ཨཱཧནནཔརིཡཱཧནནརསོ. ཏཐཱ ཧི ཏེན ཡོགཱཝཙརོ ཨཱརམྨཎཾ ཝིཏཀྐཱཧཏཾ ཝིཏཀྐཔརིཡཱཧཏཾ ཀརོཏཱིཏི ཝུཙྩཏི. ཨཱརམྨཎེ ཙིཏྟསྶ ཨཱནཡནཔཙྩུཔཊྛཱནོ.

ཨཱརམྨཎེ ¶ ཏེན ཙིཏྟཾ ཝིཙརཏཱིཏི ཝིཙཱརོ; ཝིཙརཎཾ ཝཱ ཝིཙཱརོ. ཨནུསཉྩརཎནྟི ཝུཏྟཾ ཧོཏི. སྭཱཡཾ ཨཱརམྨཎཱནུམཛྫནལཀྑཎོ. ཏཏྠ སཧཛཱཏཱནུཡོཛནརསོ. ཙིཏྟསྶ ཨནུཔྤབནྡྷཔཙྩུཔཊྛཱནོ. སནྟེཔི ཙ ནེསཾ ཀཏྠཙི ཨཝིཡོགེ ཨོལཱ༹རིཀཊྛེན པུབྦངྒམཊྛེན ཙ གྷཎྚཱབྷིགྷཱཏོ ཝིཡ ཨབྷིནིརོཔནཊྛེན ཙ ཙེཏསོ པཋམཱབྷིནིཔཱཏོ ཝིཏཀྐོ ¶ . སུཁུམཊྛེན ཨནུམཛྫནསབྷཱཝཊྛེན ཙ གྷཎྚཱནུརཝོ ཝིཡ ཨནུཔྤབནྡྷོ ཝིཙཱརོ. ཝིཔྥཱརཝཱ ཙེཏྠ ཝིཏཀྐོ, པཋམུཔྤཏྟིཀཱལེ པརིཔྥནྡབྷཱུཏོ ཙིཏྟསྶ. ཨཱཀཱསེ ཨུཔྤཏིཏུཀཱམསྶ པཀྑིནོ པཀྑཝིཀྑེཔོ ཝིཡ. པདུམཱབྷིམུཁཔཱཏོ ཝིཡ ཙ གནྡྷཱནུབདྡྷཙེཏསོ བྷམརསྶ. སནྟཝུཏྟི ཝིཙཱརོ ནཱཏིཔརིཔྥནྡནབྷཱཝོ ཙིཏྟསྶ, ཨཱཀཱསེ ཨུཔྤཏིཏསྶ པཀྑིནོ པཀྑཔྤསཱརཎཾ ཝིཡ, པརིབྦྷམནཾ ཝིཡ ཙ པདུམཱབྷིམུཁཔཏིཏསྶ བྷམརསྶ པདུམསྶ ཨུཔརིབྷཱགེ.

ཨཊྛཀཐཱཡཾ པན ‘‘ཨཱཀཱསེ གཙྪཏོ མཧཱསཀུཎསྶ ཨུབྷོཧི པཀྑེཧི ཝཱཏཾ གཧེཏྭཱ པཀྑེ སནྣིསཱིདཱཔེཏྭཱ གམནཾ ཝིཡ ཨཱརམྨཎེ ཙེཏསོ ཨབྷིནིརོཔནབྷཱཝེན པཝཏྟོ ཝིཏཀྐོ. སོ ཧི ཨེཀགྒོ ཧུཏྭཱ ཨཔྤེཏི ཝཱཏགྒཧཎཏྠཾ པཀྑེ ཕནྡཱཔཡམཱནསྶ གམནཾ ཝིཡ. ཨནུམཛྫབྷཱཝེན པཝཏྟོ ཝིཙཱརོ. སོ ཧི ཨཱརམྨཎཾ ཨནུམཛྫཏཱིཏི ཝུཏྟཾ, ཏཾ ཨནུཔྤབནྡྷནེན པཝཏྟིཡཾ ཨཏིཝིཡ ཡུཛྫཏི. སོ པན ནེསཾ ཝིསེསོ པཋམདུཏིཡཛ྄ཛྷཱནེསུ པཱཀཊོ ཧོཏི. ཨཔིཙ མལགྒཧིཏཾ ཀཾསབྷཱཛནཾ ཨེཀེན ཧཏྠེན དལ༹ྷཾ གཧེཏྭཱ ཨིཏརེན ཧཏྠེན ཙུཎྞཏེལཝཱལཎྜུཔཀེན པརིམཛྫནྟསྶ དལ༹ྷགྒཧཎཧཏྠོ ཝིཡ ཝིཏཀྐོ, པརིམཛྫནཧཏྠོ ཝིཡ ཝིཙཱརོ. ཏཐཱ ཀུམྦྷཀཱརསྶ དཎྜཔྤཧཱརེན ཙཀྐཾ བྷམཡིཏྭཱ བྷཱཛནཾ ཀརོནྟསྶ ཨུཔྤཱིལ༹ནཧཏྠོ ཝིཡ ཝིཏཀྐོ, ཨིཏོ ཙིཏོ ཙ སཉྩརཎཧཏྠོ ཝིཡ ཝིཙཱརོ. ཏཐཱ མཎྜལཾ ཀརོནྟསྶ མཛ྄ཛྷེ སནྣིརུམྦྷིཏྭཱ ཋིཏཀཎྚཀོ ཝིཡ ཨབྷིནིརོཔནོ ཝིཏཀྐོ, བཧིཔརིབྦྷམནཀཎྚཀོ ཝིཡ ཨནུམཛྫམཱནོ ཝིཙཱརོ.

པིཎཡཏཱིཏི ¶ པཱིཏི. སཱ སམྤིཡཱཡནལཀྑཎཱ. ཀཱཡཙིཏྟཔཱིཎནརསཱ, ཕརཎརསཱ ཝཱ. ཨོདགྱཔཙྩུཔཊྛཱནཱ. སཱ པནེསཱ ཁུདྡིཀཱཔཱིཏི, ཁཎིཀཱཔཱིཏི, ཨོཀྐནྟིཀཱཔཱིཏི, ཨུབྦེགཱཔཱིཏི, ཕརཎཱཔཱིཏཱིཏི པཉྩཝིདྷཱ ཧོཏི.

ཏཏྠ ¶ ཁུདྡིཀཱཔཱིཏི སརཱིརེ ལོམཧཾསམཏྟམེཝ ཀཱཏུཾ སཀྐོཏི. ཁཎིཀཱཔཱིཏི ཁཎེ ཁཎེ ཝིཛྫུཔྤཱདསདིསཱ ཧོཏི. ཨོཀྐནྟིཀཱཔཱིཏི ¶ , སམུདྡཏཱིརཾ ཝཱིཙི ཝིཡ, ཀཱཡཾ ཨོཀྐམིཏྭཱ ཨོཀྐམིཏྭཱ བྷིཛྫཏི. ཨུབྦེགཱཔཱིཏི བལཝཏཱི ཧོཏི, ཀཱཡཾ ཨུདྡྷགྒཾ ཀཏྭཱ ཨཱཀཱསེ ལངྒྷཱཔནཔྤམཱཎཔྤཏྟཱ. ཏཐཱ ཧི པུཎྞཝལླིཀཝཱསཱི མཧཱཏིསྶཏྠེརོ པུཎྞམདིཝསེ སཱཡཾ ཙེཏིཡངྒཎཾ གནྟྭཱ ཙནྡཱལོཀཾ དིསྭཱ མཧཱཙེཏིཡཱབྷིམུཁོ ཧུཏྭཱ ‘ཨིམཱཡ ཝཏ ཝེལཱཡ ཙཏསྶོ པརིསཱ མཧཱཙེཏིཡཾ ཝནྡནྟཱི’ཏི པཀཏིཡཱ དིཊྛཱརམྨཎཝསེན བུདྡྷཱརམྨཎཾ ཨུབྦེགཾ པཱིཏིཾ ཨུཔྤཱདེཏྭཱ སུདྷཱཏལེ པཧཊཙིཏྲགེཎྜུཀོ ཝིཡ ཨཱཀཱསེ ཨུཔྤཏིཏྭཱ མཧཱཙེཏིཡངྒཎེཡེཝ ཨཊྛཱསི.

ཏཐཱ གིརིཀཎྜཀཝིཧཱརསྶ ཨུཔནིསྶཡེ ཝཏྟཀཱལཀགཱམེ ཨེཀཱ ཀུལདྷཱིཏཱཔི བལཝབུདྡྷཱརམྨཎཱཡ ཨུབྦེགཱཡ པཱིཏིཡཱ ཨཱཀཱསེ ལངྒྷེསི. ཏསྶཱ ཀིར མཱཏཱཔིཏརོ སཱཡཾ དྷམྨསཝནཏྠཱཡ ཝིཧཱརཾ གཙྪནྟཱ ‘ཨམྨ, ཏྭཾ གརུབྷཱརཱ, ཨཀཱལེ ཝིཙརིཏུཾ ན སཀྐོསི, མཡཾ ཏུཡ྄ཧཾ པཏྟིཾ ཀཏྭཱ དྷམྨཾ སོསྶཱམཱ’ཏི ཨགམཾསུ. སཱ གནྟུཀཱམཱཔི ཏེསཾ ཝཙནཾ པཊིབཱཧིཏུཾ ཨསཀྐོནྟཱི གྷརེ ཨོཧཱིཡིཏྭཱ གྷརདྭཱརེ ཋཏྭཱ ཙནྡཱལོཀེན གིརིཀཎྜཀེ ཨཱཀཱསཙེཏིཡངྒཎཾ ཨོལོཀེནྟཱི ཙེཏིཡསྶ དཱིཔཔཱུཛཾ ཨདྡས. ཙཏསྶོ ཙ པརིསཱ མཱལཱགནྡྷཱདཱིཧི ཙེཏིཡཔཱུཛཾ ཀཏྭཱ པདཀྑིཎཾ ཀརོནྟིཡོ བྷིཀྑུསངྒྷསྶ ཙ གཎསཛ྄ཛྷཱཡསདྡཾ ཨསྶོསི. ཨཐསྶཱ ‘དྷཉྙཱ ཝཏིམེ མནུསྶཱ ཡེ ཝིཧཱརཾ གནྟྭཱ ཨེཝརཱུཔེ ཙེཏིཡངྒཎེ ཨནུསཉྩརིཏུཾ ཨེཝརཱུཔཉྩ མདྷུརཾ དྷམྨཀཐཾ སོཏུཾ ལབྷནྟཱི’ཏི མུཏྟརཱསིསདིསཾ ཙེཏིཡཾ པསྶནྟིཡཱ ཨེཝ ཨུབྦེགཱཔཱིཏི ཨུདཔཱདི. སཱ ཨཱཀཱསེ ལངྒྷིཏྭཱ མཱཏཱཔིཏཱུནཾ པུརིམཏརཾཡེཝ ཨཱཀཱསཏོ ཙེཏིཡངྒཎེ ཨོརུཡ྄ཧ ཙེཏིཡཾ ཝནྡིཏྭཱ དྷམྨཾ སུཎམཱནཱ ཨཊྛཱསི. ཨཐ ནཾ མཱཏཱཔིཏརོ ཨཱགནྟྭཱ ‘ཨམྨ, ཏྭཾ ཀཏརེན མགྒེན ཨཱགཏཱསཱི’ཏི པུཙྪིཾསུ. སཱ ‘ཨཱཀཱསེན ཨཱགཏཱམྷི, ན མགྒེནཱ’ཏི ཝཏྭཱ ‘ཨམྨ, ཨཱཀཱསེན ནཱམ ཁཱིཎཱསཝཱ སཉྩརནྟི, ཏྭཾ ཀཐཾ ཨཱགཏཱ’ཏི པུཊྛཱ ཨཱཧ – ‘མཡ྄ཧཾ ཙནྡཱལོཀེན ཙེཏིཡཾ ཨོལོཀེནྟིཡཱ ཋིཏཱཡ བུདྡྷཱརམྨཎཱ བལཝཔཱིཏི ཨུཔྤཛྫཏི, ཨཐཱཧཾ ནེཝ ཨཏྟནོ ཋིཏབྷཱཝཾ ན ནིསིནྣབྷཱཝཾ ཨཉྙཱསིཾ, གཧིཏནིམིཏྟེནེཝ པན ཨཱཀཱསཾ ¶ ལངྒྷིཏྭཱ ཙེཏིཡངྒཎེ པཏིཊྛིཏཱམྷཱི’ཏི. ཨེཝཾ ཨུབྦེགཱཔཱིཏི ཨཱཀཱསེ ལངྒྷཱཔནཔྤམཱཎཱ ཧོཏི.

ཕརཎཔཱིཏིཡཱ ¶ ¶ པན ཨུཔྤནྣཱཡ སཀལསརཱིརཾ དྷམིཏྭཱ པཱུརིཏཝཏྠི ཝིཡ, མཧཏཱ ཨུདཀོགྷེན པཀྑནྡཔབྦཏཀུཙྪི ཝིཡ ཙ ཨནུཔརིཔྥུཊཾ ཧོཏི. སཱ པནེསཱ པཉྩཝིདྷཱ པཱིཏི གབྦྷཾ གཎྷནྟཱི པརིཔཱཀཾ གཙྪནྟཱི དུཝིདྷཾ པསྶདྡྷིཾ པརིཔཱུརེཏི – ཀཱཡཔསྶདྡྷིཉྩ ཙིཏྟཔསྶདྡྷིཉྩ. པསྶདྡྷི གབྦྷཾ གཎྷནྟཱི པརིཔཱཀཾ གཙྪནྟཱི དུཝིདྷཾ སུཁཾ པརིཔཱུརེཏི – ཀཱཡིཀཾ ཙེཏསིཀཉྩ. སུཁཾ གབྦྷཾ གཎྷནྟཾ པརིཔཱཀཾ གཙྪནྟཾ ཏིཝིདྷཾ སམཱདྷིཾ པརིཔཱུརེཏི – ཁཎིཀསམཱདྷིཾ ཨུཔཙཱརསམཱདྷིཾ ཨཔྤནཱསམཱདྷིནྟི. ཏཱསུ ཋཔེཏྭཱ ཨཔྤནཱསམཱདྷིཔཱུརིཀཾ ཨིཏརཱ དྭེཔི ཨིདྷ ཡུཛྫནྟི.

སུཁཡཏཱིཏི སུཁཾ; ཡསྶ ཨུཔྤཛྫཏི ཏཾ སུཁིཏཾ ཀརོཏཱིཏི ཨཏྠོ. སུཊྛུ ཝཱ ཁཱདཏི, ཁནཏི ཙ ཀཱཡཙིཏྟཱབཱདྷནྟི སུཁཾ. སོམནསྶཝེདནཱཡེཏཾ ནཱམཾ. ཏསྶ ལཀྑཎཱདཱིནི ཝེདནཱཔདེ ཝུཏྟནཡེནེཝ ཝེདིཏབྦཱནི.

ཨཔརོ ནཡོ – སཱཏལཀྑཎཾ སུཁཾ, སམྤཡུཏྟཱནཾ ཨུཔབྲཱུཧནརསཾ, ཨནུགྒཧཎཔཙྩུཔཊྛཱནཾ. སཏིཔི ཙ ནེསཾ པཱིཏིསུཁཱནཾ ཀཏྠཙི ཨཝིཔྤཡོགེ, ཨིཊྛཱརམྨཎཔཊིལཱབྷཏུཊྛི པཱིཏི; པཊིལདྡྷརསཱནུབྷཝནཾ སུཁཾ. ཡཏྠ པཱིཏི ཏཏྠ སུཁཾ. ཡཏྠ སུཁཾ ཏཏྠ ན ནིཡམཏོ པཱིཏི. སངྑཱརཀྑནྡྷསངྒཧིཏཱ པཱིཏི, ཝེདནཱཀྑནྡྷསངྒཧིཏཾ སུཁཾ. ཀནྟཱརཁིནྣསྶ ཝནནྟོདཀདསྶནསཝནེསུ ཝིཡ པཱིཏི. ཝནཙྪཱཡཱཔཝེསནཨུདཀཔརིབྷོགེསུ ཝིཡ སུཁཾ.

ཡཐཱ ཧི པུརིསོ མཧཱཀནྟཱརམགྒཾ པཊིཔནྣོ གྷམྨཔརེཏོ ཏསིཏོ པིཔཱསིཏོ པཊིཔཐེ པུརིསཾ དིསྭཱ ‘ཀཏྠ པཱནཱིཡཾ ཨཏྠཱི’ཏི པུཙྪེཡྻ. སོ ‘ཨཊཝིཾ ཨུཏྟརིཏྭཱ ཛཱཏསྶརཝནསཎྜོ ཨཏྠི, ཏཏྠ གནྟྭཱ ལབྷིསྶསཱི’ཏི ཝདེཡྻ. སོ ཏསྶ ཀཐཾ སུཏྭཱ ཧཊྛཔཧཊྛོ བྷཝེཡྻ. ཏཏོ གཙྪནྟོ བྷཱུམིཡཾ པཏིཏཱནི ཨུཔྤལདལནཱལཔཏྟཱདཱིནི དིསྭཱ སུཊྛུཏརཾ ཧཊྛཔཧཊྛོ ཧུཏྭཱ གཙྪནྟོ ཨལླཝཏྠེ ཨལླཀེསེ པུརིསེ པསྶེཡྻ, ཝནཀུཀྐུཊམོརཱདཱིནཾ སདྡཾ སུཎེཡྻ, ཛཱཏསྶརཔརིཡནྟེ ཛཱཏཾ མཎིཛཱལསདིསཾ ནཱིལཝནསཎྜཾ པསྶེཡྻ, སརེ ཛཱཏཱནི ཨུཔྤལཔདུམཀུམུདཱདཱིནི པསྶེཡྻ, ཨཙྪཾ ཝིཔྤསནྣཾ ཨུདཀཾ པསྶེཡྻ. སོ བྷིཡྻོ ¶ བྷིཡྻོ ཧཊྛཔཧཊྛོ ཧུཏྭཱ ཛཱཏསྶརཾ ¶ ཨོཏརིཏྭཱ ཡཐཱརུཙི ནྷཏྭཱ ཙ པིཝིཏྭཱ ཙ པཊིཔྤསྶདྡྷདརཐོ བྷིསམུལཱ༹ལཔོཀྑརཱདཱིནི ཁཱདིཏྭཱ ནཱིལུཔྤལཱདཱིནི པིལ༹ནྡྷིཏྭཱ མནྡཱལཀམཱུལཱནི ཁནྡྷེ ཀརིཏྭཱ ཨུཏྟརིཏྭཱ སཱཊཀཾ ནིཝཱསེཏྭཱ, ཨུདཀསཱཊཀཾ ཨཱཏཔེ ཀཏྭཱ, སཱིཏཙྪཱཡཱཡ མནྡམནྡེ ཝཱཏེ པཧརནྟེ ནིཔནྣོ ‘ཨཧོ སུཁཾ, ཨཧོ སུཁ’ནྟི ཝདེཡྻ. ཨེཝཾསམྤདམིདཾ དཊྛབྦཾ.

ཏསྶ ¶ ཧི པུརིསསྶ ཛཱཏསྶརཝནསཎྜསཝནཏོ པཊྛཱཡ ཡཱཝ ཨུདཀདསྶནཱ ཧཊྛཔཧཊྛཀཱལོ ཝིཡ པུབྦབྷཱགཱརམྨཎེ ཧཊྛཔཧཊྛཱཀཱརཱ པཱིཏི. ནྷཏྭཱ ཙ པིཝིཏྭཱ ཙ སཱིཏཙྪཱཡཱཡ མནྡམནྡེ ཝཱཏེ པཧརནྟེ ‘ཨཧོ སུཁཾ, ཨཧོ སུཁ’ནྟི ཝདཏོ ནིཔནྣཀཱལོ ཝིཡ བལཝཔྤཏྟཾ ཨཱརམྨཎརསཱནུབྷཝནཱཀཱརསཎྛིཏཾ སུཁཾ. ཏསྨིཾ ཏསྨིཾ སམཡེ པཱཀཊབྷཱཝཏོ ཙེཏཾ ཝུཏྟནྟི ཝེདིཏབྦཾ. ཡཏྠ པན པཱིཏི སུཁམྤི ཏཏྠ ཨཏྠཱིཏི ཝུཏྟམེཝེཏཾ.

ཙིཏྟསྶེཀགྒཏཱཏི ཙིཏྟསྶ ཨེཀགྒབྷཱཝོ; སམཱདྷིསྶེཏཾ ནཱམཾ. ལཀྑཎཱདཱིསུ པནསྶ ཨཊྛཀཐཱཡཾ ཏཱཝ ཝུཏྟཾ – ‘‘པཱམོཀྑལཀྑཎོ ཙ སམཱདྷི ཨཝིཀྑེཔལཀྑཎོ ཙ’’. ཡཐཱ ཧི ཀཱུཊཱགཱརཀཎྞིཀཱ སེསདབྦསམྦྷཱརཱནཾ ཨཱབནྡྷནཏོ པམུཁཱ ཧོཏི ཨེཝམེཝ སབྦཀུསལདྷམྨཱནཾ སམཱདྷིཙིཏྟེན ཨིཛ྄ཛྷནཏོ སབྦེསམྤི ཏེསཾ དྷམྨཱནཾ སམཱདྷི པཱམོཀྑོ ཧོཏི. ཏེན ཝུཏྟཾ –

‘‘ཡཐཱ, མཧཱརཱཛ, ཀཱུཊཱགཱརསྶ ཡཱ ཀཱཙི གོཔཱནསིཡོ སབྦཱ ཏཱ ཀཱུཊངྒམཱ ཧོནྟི, ཀཱུཊནིནྣཱ ཀཱུཊསམོསརཎཱ, ཀཱུཊཾ ཏཱསཾ ཨགྒམཀྑཱཡཏི, ཨེཝམེཝ ཁོ, མཧཱརཱཛ, ཡེ ཀེཙི ཀུསལཱ དྷམྨཱ སབྦེ ཏེ སམཱདྷིནིནྣཱ ཧོནྟི, སམཱདྷིཔོཎཱ, སམཱདྷིཔབྦྷཱརཱ, སམཱདྷི ཏེསཾ ཨགྒམཀྑཱཡཏཱི’’ཏི (མི. པ. ༢.༡.༡༤).

ཡཐཱ ཙ སེནངྒཾ པཏྭཱ རཱཛཱ ནཱམ ཡཏྠ ཡཏྠ སེནཱ ཨོསཱིདཏི ཏཾ ཏཾ ཋཱནཾ གཙྪཏི, ཏསྶ གཏགཏཊྛཱནེ སེནཱ པརིཔཱུརཏི, པརསེནཱ བྷིཛྫིཏྭཱ རཱཛཱནམེཝ ཨནུཝཏྟཏི, ཨེཝམེཝ སཧཛཱཏདྷམྨཱནཾ ཝིཀྑིཔིཏུཾ ཝིཔྤཀིརིཏུཾ ཨཔྤདཱནཏོ སམཱདྷི ཨཝིཀྑེཔལཀྑཎོ ནཱམ ཧོཏཱིཏི.

ཨཔརོ ¶ པན ནཡོ – ཨཡཾ ཙིཏྟསྶེཀགྒཏཱསངྑཱཏོ སམཱདྷི ནཱམ ཨཝིསཱརལཀྑཎོ ཝཱ ཨཝིཀྑེཔལཀྑཎོ ཝཱ, སཧཛཱཏདྷམྨཱནཾ, སམྤིཎྜནརསོ ནྷཱནིཡཙུཎྞཱནཾ ཨུདཀཾ ཝིཡ, ཨུཔསམཔཙྩུཔཊྛཱནོ ཉཱཎཔཙྩུཔཊྛཱནོ ¶ ཝཱ. ‘‘སམཱཧིཏོ ཡཐཱབྷཱུཏཾ ཛཱནཱཏི པསྶཏཱི’’ཏི ཧི ཝུཏྟཾ. ཝིསེསཏོ སུཁཔདཊྛཱནོ, ནིཝཱཏེ དཱིཔཙྩཱིནཾ ཋིཏི ཝིཡ ཙེཏསོ ཋིཏཱིཏི དཊྛབྦོ.

ཨིནྡྲིཡརཱསིཝཎྞནཱ

སདྡཧནྟི ཨེཏཱཡ, སཡཾ ཝཱ སདྡཧཏི, སདྡཧནམཏྟམེཝ ཝཱ ཨེསཱཏི སདྡྷཱ. སཱཝ ཨསྶདྡྷིཡསྶ ¶ ཨབྷིབྷཝནཏོ ཨདྷིཔཏིཡཊྛེན ཨིནྡྲིཡཾ. ཨདྷིམོཀྑལཀྑཎེ ཝཱ ཨིནྡཊྛཾ ཀཱརེཏཱིཏི ཨིནྡྲིཡཾ. སདྡྷཱཝ ཨིནྡྲིཡཾ སདྡྷིནྡྲིཡཾ. སཱ པནེསཱ སམྤསཱདནལཀྑཎཱ ཙ སདྡྷཱ སམྤཀྑནྡནལཀྑཎཱ ཙ.

ཡཐཱ ཧི རཉྙོ ཙཀྐཝཏྟིསྶ ཨུདཀཔྤསཱདཀོ མཎི ཨུདཀེ པཀྑིཏྟོ པངྐསེཝཱལཔཎཀཀདྡམཾ སནྣིསཱིདཱཔེཏི, ཨུདཀཾ ཨཙྪཾ ཀརོཏི ཝིཔྤསནྣཾ ཨནཱཝིལཾ, ཨེཝམེཝ སདྡྷཱ ཨུཔྤཛྫམཱནཱ ནཱིཝརཎེ ཝིཀྑམྦྷེཏི, ཀིལེསེ སནྣིསཱིདཱཔེཏི, ཙིཏྟཾ པསཱདེཏི, ཨནཱཝིལཾ ཀརོཏི. པསནྣེན ཙིཏྟེན ཡོགཱཝཙརོ ཀུལཔུཏྟོ དཱནཾ དེཏི, སཱིལཾ སམཱདིཡཏི, ཨུཔོསཐཀམྨཾ ཀརོཏི, བྷཱཝནཾ ཨཱརབྷཏི. ཨེཝཾ ཏཱཝ སདྡྷཱ སམྤསཱདནལཀྑཎཱཏི ཝེདིཏབྦཱ. ཏེནཱཧ ཨཱཡསྨཱ ནཱགསེནོ –

‘‘ཡཐཱ, མཧཱརཱཛ, རཱཛཱ ཙཀྐཝཏྟི ཙཏུརངྒིནིཡཱ སེནཱཡ སདྡྷིཾ ཨདྡྷཱནམགྒཔྤཊིཔནྣོ པརིཏྟཾ ཨུདཀཾ ཏརེཡྻ, ཏཾ ཨུདཀཾ ཧཏྠཱིཧི ཙ ཨསྶེཧི ཙ རཐེཧི ཙ པཏྟཱིཧི ཙ སངྑུབྷིཏཾ བྷཝེཡྻ ཨཱཝིལཾ ལུལིཏཾ ཀལལཱིབྷཱུཏཾ, ཨུཏྟིཎྞོ ཙ རཱཛཱ ཙཀྐཝཏྟི མནུསྶེ ཨཱཎཱཔེཡྻ ‘པཱནཱིཡཾ བྷཎེ ཨཱཧརཐ, ཏཾ པིཝིསྶཱམཱི’ཏི. རཉྙོ ཙ ཨུདཀཔྤསཱདཀོ མཎི བྷཝེཡྻ. ‘ཨེཝཾ དེཝཱ’ཏི ཁོ ཏེ མནུསྶཱ རཉྙོ ཙཀྐཝཏྟིསྶ པཊིསྶུཏྭཱ ཏཾ ཨུདཀཔྤསཱདཀཾ མཎིཾ ཨུདཀེ པཀྑིཔེཡྻུཾ. ཏསྨིཾ ཨུདཀེ པཀྑིཏྟམཏྟེ པངྐསེཝཱལཔཎཀཾ ཝིགཙྪེཡྻ, ཀདྡམོ ཙ སནྣིསཱིདེཡྻ, ཨཙྪཾ བྷཝེཡྻ ཨུདཀཾ ཝིཔྤསནྣཾ ཨནཱཝིལཾ, ཏཏོ རཉྙོ ཙཀྐཝཏྟིསྶ པཱནཱིཡཾ ཨུཔནཱམེཡྻུཾ – ‘པིཝཏུ དེཝོ པཱནཱིཡ’ནྟི.

‘‘ཡཐཱ ¶ , མཧཱརཱཛ, ཨུདཀཾ ཨེཝཾ ཙིཏྟཾ དཊྛབྦཾ. ཡཐཱ ཏེ མནུསྶཱ ཨེཝཾ ཡོགཱཝཙརོ དཊྛབྦོ. ཡཐཱ པངྐསེཝཱལཔཎཀཾ ཀདྡམོ ཙ ཨེཝཾ ཀིལེསཱ དཊྛབྦཱ. ཡཐཱ ཨུདཀཔྤསཱདཀོ མཎི ཨེཝཾ སདྡྷཱ དཊྛབྦཱ. ཡཐཱ ཨུདཀཔྤསཱདཀེ མཎིམྷི པཀྑིཏྟམཏྟེ པངྐསེཝཱལཔཎཀཾ ཝིགཙྪཏི ཀདྡམོ ཙ སནྣིསཱིདཏི, ཨཙྪཾ བྷཝཏི ཨུདཀཾ ཝིཔྤསནྣཾ ཨནཱཝིལཾ, ཨེཝམེཝ ཁོ, མཧཱརཱཛ, སདྡྷཱ ཨུཔྤཛྫམཱནཱ ནཱིཝརཎེ ཝིཀྑམྦྷེཏི, ཝིནཱིཝརཎཾ ¶ ཙིཏྟཾ ཧོཏི ཨཙྪཾ ཝིཔྤསནྣཾ ཨནཱཝིལ’’ནྟི (མི. པ. ༢.༡.༡༠).

ཡཐཱ པན ཀུམྦྷིལམཀརགཱཧརཀྑསཱདིཀིཎྞཾ པཱུརཾ མཧཱནདིཾ ཨཱགམྨ བྷཱིརུཀཛནོ ཨུབྷོསུ ཏཱིརེསུ ¶ ཏིཊྛཏི. སངྒཱམསཱུརོ པན མཧཱཡོདྷོ ཨཱགནྟྭཱ ‘ཀསྨཱ ཋིཏཏྠཱ’ཏི པུཙྪིཏྭཱ ‘སཔྤཊིབྷཡབྷཱཝེན ཨོཏརིཏུཾ ན ཝིསཧཱམཱ’ཏི ཝུཏྟེ སུནིསིཏཾ ཨསིཾ གཧེཏྭཱ ‘མམ པཙྪཏོ ཨེཐ, མཱ བྷཱཡིཏྠཱ’ཏི ཝཏྭཱ ནདིཾ ཨོཏརིཏྭཱ ཨཱགཏཱགཏེ ཀུམྦྷིལཱདཡོ པཊིབཱཧིཏྭཱ ཨོརིམཏཱིརཏོ མནུསྶཱནཾ སོཏྠིབྷཱཝཾ ཀརོནྟོ པཱརིམཏཱིརཾ ནེཏི. པཱརིམཏཱིརཏོཔི སོཏྠིནཱ ཨོརིམཏཱིརཾ ཨཱནེཏི. ཨེཝམེཝ དཱནཾ དདཏོ སཱིལཾ རཀྑཏོ ཨུཔོསཐཀམྨཾ ཀརོཏོ བྷཱཝནཾ ཨཱརབྷཏོ སདྡྷཱ པུབྦངྒམཱ པུརེཙཱརིཀཱ ཧོཏི. ཏེན ཝུཏྟཾ ‘སམྤཀྑནྡནལཀྑཎཱ ཙ སདྡྷཱ’ཏི.

ཨཔརོ ནཡོ – སདྡཧནལཀྑཎཱ སདྡྷཱ, ཨོཀཔྤནལཀྑཎཱ ཝཱ. པསཱདནརསཱ ཨུདཀཔྤསཱདཀམཎི ཝིཡ, པཀྑནྡནརསཱ ཝཱ ཨོགྷུཏྟརཎོ ཝིཡ. ཨཀཱལུསིཡཔཙྩུཔཊྛཱནཱ, ཨདྷིམུཏྟིཔཙྩུཔཊྛཱནཱ ཝཱ. སདྡྷེཡྻཝཏྠུཔདཊྛཱནཱ སོཏཱཔཏྟིཡངྒཔདཊྛཱནཱ ཝཱ, སཱ ཧཏྠཝིཏྟབཱིཛཱནི ཝིཡ དཊྛབྦཱ.

ཝཱིརསྶ བྷཱཝོ ཝཱིརིཡཾ, ཝཱིརཱནཾ ཝཱ ཀམྨཾ ཝཱིརིཡཾ. ཝིདྷིནཱ ཝཱ ནཡེན ཨུཔཱཡེན ཨཱིརཡིཏབྦཾ པཝཏྟཡིཏབྦནྟི ཝཱིརིཡཾ. ཏདེཝ ཀོསཛྫསྶ ཨབྷིབྷཝནཏོ ཨདྷིཔཏིཡཊྛེན ཨིནྡྲིཡཾ. པགྒཧཎལཀྑཎེ ཝཱ ཨིནྡཊྛཾ ཀཱརེཏཱིཏི ཨིནྡྲིཡཾ. ཝཱིརིཡམེཝ ཨིནྡྲིཡཾ ཝཱིརིཡིནྡྲིཡཾ. ཏཾ པནེཏཾ ཨུཔཏྠམྦྷནལཀྑཎཉྩ ཝཱིརིཡཾ པགྒཧཎལཀྑཎཉྩ. ཡཐཱ ཧི ཛིཎྞགྷརཾ ཨཱགནྟུཀེན ཐཱུཎུཔཏྠམྦྷེན ཏིཊྛཏི, ཨེཝམེཝ ཡོགཱཝཙརོ ཝཱིརིཡུཔཏྠམྦྷེན ཨུཔཏྠམྦྷིཏོ ཧུཏྭཱ སབྦཀུསལདྷམྨེཧི ན ཧཱཡཏི, ན པརིཧཱཡཏི. ཨེཝཾ ཏཱཝསྶ ཨུཔཏྠམྦྷནལཀྑཎཏཱ ཝེདིཏབྦཱ. ཏེནཱཧ ཐེརོ ནཱགསེནོ –

‘‘ཡཐཱ ¶ , མཧཱརཱཛ, པུརིསོ གེཧེ པཏནྟེ ཏམཉྙེན དཱརུནཱ ཨུཔཏྠམྦྷེཡྻ, ཨུཔཏྠམྦྷིཏཾ སནྟཾ ཨེཝཾ ཏཾ གེཧཾ ན པཏེཡྻ, ཨེཝམེཝ ཁོ མཧཱརཱཛ ཨུཔཏྠམྦྷནལཀྑཎཾ ¶ ཝཱིརིཡཾ, ཝཱིརིཡུཔཏྠམྦྷིཏཱ སབྦེ ཀུསལཱ དྷམྨཱ ན ཧཱཡནྟི ན པརིཧཱཡནྟཱི’’ཏི (མི. པ. ༢.༡.༡༢).

ཡཐཱ ཝཱ པན ཁུདྡིཀཱཡ ཙ མཧཏིཀཱཡ ཙ སེནཱཡ སངྒཱམེ པཝཏྟེ ཁུདྡིཀཱ སེནཱ ཨོལཱིཡེཡྻ, ཏཏོ རཉྙོ ཨཱརོཙེཡྻ, རཱཛཱ བལཝཱཧནཾ པེསེཡྻ, ཏེན པགྒཧིཏཱ སཀསེནཱ པརསེནཾ པརཱཛེཡྻ, ཨེཝམེཝ ཝཱིརིཡཾ སཧཛཱཏསམྤཡུཏྟདྷམྨཱནཾ ཨོལཱིཡིཏུཾ ཨོསཀྐིཏུཾ ན དེཏི, ཨུཀྑིཔཏི, པགྒཎྷཱཏི. ཏེན ཝུཏྟཾ ‘པགྒཧཎལཀྑཎཉྩ ཝཱིརིཡ’ནྟི.

ཨཔརོ ¶ ནཡོ – ཨུསྶཱཧལཀྑཎཾ ཝཱིརིཡཾ, སཧཛཱཏཱནཾ ཨུཔཏྠམྦྷནརསཾ, ཨསཾསཱིདནབྷཱཝཔཙྩུཔཊྛཱནཾ, ‘‘སཾཝིགྒོ ཡོནིསོ པདཧཏཱི’’ཏི (ཨ. ནི. ༤.༡༡༣) ཝཙནཏོ སཾཝེགཔདཊྛཱནཾ, ཝཱིརིཡཱརམྦྷཝཏྠུཔདཊྛཱནཾ ཝཱ. སམྨཱ ཨཱརདྡྷཾ སབྦཱསཾ སམྤཏྟཱིནཾ མཱུལཾ ཧོཏཱིཏི དཊྛབྦཾ.

སརནྟི ཨེཏཱཡ, སཡཾ ཝཱ སརཏི, སརཎམཏྟམེཝ ཝཱ ཨེསཱཏི སཏི. སཱཝ མུཊྛསྶཙྩསྶ ཨབྷིབྷཝནཏོ ཨདྷིཔཏིཡཊྛེན ཨིནྡྲིཡཾ, ཨུཔཊྛཱནལཀྑཎེ ཝཱ ཨིནྡཊྛཾ ཀཱརེཏཱིཏི ཨིནྡྲིཡཾ. སཏི ཨེཝ ཨིནྡྲིཡཾ སཏིནྡྲིཡཾ. སཱ པནེསཱ ཨཔིལཱཔནལཀྑཎཱ ཙ སཏི ཨུཔགྒཎྷནལཀྑཎཱ ཙ. ཡཐཱ ཧི རཉྙོ བྷཎྜཱགཱརིཀོ དསཝིདྷཾ རཏནཾ གོཔཡནྟོ སཱཡཾཔཱཏཾ རཱཛཱནཾ ཨིསྶརིཡསམྤཏྟིཾ སལླཀྑཱཔེཏི སཱརེཏི, ཨེཝམེཝ སཏི ཀུསལཾ དྷམྨཾ སལླཀྑཱཔེཏི སརཱཔེཏི. ཏེནཱཧ ཐེརོ –

‘‘ཡཐཱ, མཧཱརཱཛ, རཉྙོ ཙཀྐཝཏྟིསྶ བྷཎྜཱགཱརིཀོ རཱཛཱནཾ ཙཀྐཝཏྟིཾ སཱཡཾཔཱཏཾ ཡསཾ སརཱཔེཏི – ‘ཨེཏྟཀཱ, དེཝ, ཧཏྠཱི, ཨེཏྟཀཱ ཨསྶཱ, ཨེཏྟཀཱ རཐཱ, ཨེཏྟཀཱ པཏྟཱི, ཨེཏྟཀཾ ཧིརཉྙཾ, ཨེཏྟཀཾ སུཝཎྞཾ, ཨེཏྟཀཾ སབྦཾ སཱཔཏེཡྻཾ, ཏཾ དེཝོ སརཏཱུ’ཏི, ཨེཝམེཝ ཁོ, མཧཱརཱཛ, སཏི ཀུསལེ དྷམྨེ ཨཔིལཱཔེཏི – ཨིམེ ཙཏྟཱརོ སཏིཔཊྛཱནཱ, ཨིམེ ཙཏྟཱརོ སམྨཔྤདྷཱནཱ, ཨིམེ ཙཏྟཱརོ ཨིདྡྷིཔཱདཱ, ཨིམཱནི པཉྩིནྡྲིཡཱནི, ཨིམཱནི པཉྩ བལཱནི, ཨིམེ སཏྟ བོཛ྄ཛྷངྒཱ, ཨཡཾ ཨརིཡོ ཨཊྛངྒིཀོ མགྒོ, ཨཡཾ སམཐོ, ཨཡཾ ཝིཔསྶནཱ, ཨཡཾ ཝིཛྫཱ, ཨཡཾ ཝིམུཏྟི, ཨིམེ ལོཀུཏྟརཱ དྷམྨཱཏི. ཨེཝཾ ཁོ, མཧཱརཱཛ, ཨཔིལཱཔནལཀྑཎཱ སཏཱི’’ཏི (མི. པ. ༢.༡.༡༣).

ཡཐཱ ¶ པན རཉྙོ ཙཀྐཝཏྟིསྶ པརིཎཱཡཀརཏནཾ རཉྙོ ཨཧིཏེ ཙ ཧིཏེ ཙ ཉཏྭཱ ཨཧིཏེ ཨཔཡཱཔེཏི, ཧིཏེ ཨུཔཡཱཔེཏི, ཨེཝམེཝ སཏི ཧིཏཱཧིཏཱནཾ དྷམྨཱནཾ གཏིཡོ སམནྭེསིཏྭཱ ‘ཨིམེ ཀཱཡདུཙྩརིཏཱདཡོ དྷམྨཱ ཨཧིཏཱ’ཏི ཨཧིཏེ དྷམྨེ ཨཔནུདེཏི ¶ , ‘ཨིམེ ཀཱཡསུཙརིཏཱདཡོ དྷམྨཱ ཧིཏཱ’ཏི ཧིཏེ དྷམྨེ ཨུཔགྒཎྷཱཏི. ཏེནཱཧ ཐེརོ –

‘‘ཡཐཱ, མཧཱརཱཛ, རཉྙོ ཙཀྐཝཏྟིསྶ པརིཎཱཡཀརཏནཾ རཉྙོ ཧིཏཱཧིཏེ ཛཱནཱཏི ‘ཨིམེ རཉྙོ ཧིཏཱ ཨིམེ ཨཧིཏཱ, ཨིམེ ཨུཔཀཱརཱ ཨིམེ ཨནུཔཀཱརཱ’ཏི, ཏཏོ ཨཧིཏེ ཨཔནུདེཏི ཧིཏེ ཨུཔགྒཎྷཱཏི, ཨེཝམེཝ ཁོ, མཧཱརཱཛ, སཏི ཨུཔྤཛྫམཱནཱ ཧིཏཱཧིཏཱནཾ དྷམྨཱནཾ གཏིཡོ སམནྭེསཏི ‘ཨིམེ དྷམྨཱ ཧིཏཱ ཨིམེ དྷམྨཱ ཨཧིཏཱ, ཨིམེ དྷམྨཱ ཨུཔཀཱརཱ ཨིམེ དྷམྨཱ ཨནུཔཀཱརཱ’ཏི ¶ , ཏཏོ ཨཧིཏེ དྷམྨེ ཨཔནུདེཏི ཧིཏེ དྷམྨེ ཨུཔགྒཎྷཱཏི. ཨེཝཾ ཁོ, མཧཱརཱཛ, ཨུཔགྒཎྷནལཀྑཎཱ སཏཱི’’ཏི (མི. པ. ༢.༡.༡༣).

ཨཔརོ ནཡོ – ཨཔིལཱཔནལཀྑཎཱ སཏི, ཨསམྨོསནརསཱ, ཨཱརཀྑཔཙྩུཔཊྛཱནཱ ཝིསཡཱབྷིམུཁཱིབྷཱཝཔཙྩུཔཊྛཱནཱ ཝཱ, ཐིརསཉྙཱཔདཊྛཱནཱ, ཀཱཡཱདིསཏིཔཊྛཱནཔདཊྛཱནཱ ཝཱ, ཨཱརམྨཎེ དལ༹ྷཾ པཏིཊྛིཏཏྟཱ པན ཨེསིཀཱ ཝིཡ, ཙཀྑུདྭཱརཱདིརཀྑཎཏོ དོཝཱརིཀོ ཝིཡ ཙ དཊྛབྦཱ.

ཨཱརམྨཎེ ཙིཏྟཾ སམྨཱ ཨདྷིཡཏི ཋཔེཏཱིཏི སམཱདྷི. སོཝ ཝིཀྑེཔསྶ ཨབྷིབྷཝནཏོ ཨདྷིཔཏིཡཊྛེན ཨིནྡྲིཡཾ. ཨཝིཀྑེཔལཀྑཎེ ཝཱ ཨིནྡཊྛཾ ཀཱརེཏཱིཏི ཨིནྡྲིཡཾ. སམཱདྷིཡེཝ ཨིནྡྲིཡཾ སམཱདྷིནྡྲིཡཾ. ལཀྑཎཱདཱིནི པནསྶ ཧེཊྛཱ ཝུཏྟནཡེནེཝ ཝེདིཏབྦཱནི.

པཛཱནཱཏཱིཏི པཉྙཱ. ཀིཾ པཛཱནཱཏི? ‘ཨིདཾ དུཀྑ’ནྟིཨཱདིནཱ ནཡེན ཨརིཡསཙྩཱནི. ཨཊྛཀཐཱཡཾ པན ‘པཉྙཱཔེཏཱིཏི པཉྙཱ’ཏི ཝུཏྟཾ. ཀིནྟི པཉྙཱཔེཏཱིཏི? ཨནིཙྩཾ དུཀྑཾ ཨནཏྟཱཏི པཉྙཱཔེཏི. སཱཝ ཨཝིཛྫཱཡ ཨབྷིབྷཝནཏོ ཨདྷིཔཏིཡཊྛེན ཨིནྡྲིཡཾ. དསྶནལཀྑཎེ ཝཱ ཨིནྡཊྛཾ ཀཱརེཏཱིཏི ཨིནྡྲིཡཾ. པཉྙཱཝ ཨིནྡྲིཡཾ པཉྙིནྡྲིཡཾ. སཱ པནེསཱ ཨོབྷཱསནལཀྑཎཱ ཙ པཉྙཱ པཛཱནནལཀྑཎཱ ཙ. ཡཐཱ ཧི ཙཏུབྷིཏྟིཀེ གེཧེ རཏྟིབྷཱགེ དཱིཔེ ཛལིཏེ ཨནྡྷཀཱརོ ནིརུཛ྄ཛྷཏི ཨཱལོཀོ པཱཏུབྷཝཏི, ཨེཝམེཝ ཨོབྷཱསནལཀྑཎཱ ¶ པཉྙཱ. པཉྙོབྷཱསསམོ ཨོབྷཱསོ ནཱམ ནཏྠི. པཉྙཝཏོ ཧི ཨེཀཔལླངྐེན ནིསིནྣསྶ དསསཧསྶིལོཀདྷཱཏུ ཨེཀཱལོཀཱ ཧོཏི. ཏེནཱཧ ཐེརོ –

‘‘ཡཐཱ, མཧཱརཱཛ, པུརིསོ ཨནྡྷཀཱརེ གེཧེ པདཱིཔཾ པཝེསེཡྻ, པཝིཊྛོ པདཱིཔོ ཨནྡྷཀཱརཾ ཝིདྡྷཾསེཏི, ཨོབྷཱསཾ ཛནེཏི, ཨཱལོཀཾ ¶ ཝིདཾསེཏི, པཱཀཊཱནི ཙ རཱུཔཱནི ཀརོཏི, ཨེཝམེཝ ཁོ, མཧཱརཱཛ, པཉྙཱ ཨུཔྤཛྫམཱནཱ ཨཝིཛྫནྡྷཀཱརཾ ཝིདྡྷཾསེཏི, ཝིཛྫོབྷཱསཾ ཛནེཏི, ཉཱཎཱལོཀཾ ཝིདཾསེཏི, པཱཀཊཱནི ཙ ཨརིཡསཙྩཱནི ཀརོཏི. ཨེཝཾ ཁོ, མཧཱརཱཛ, ཨོབྷཱསནལཀྑཎཱ པཉྙཱ’’ཏི (མི. པ. ༢.༡.༡༥).

ཡཐཱ པན ཚེཀོ བྷིསཀྐོ ཨཱཏུརཱནཾ སཔྤཱཡཱསཔྤཱཡཱནི བྷོཛནཱནི ཛཱནཱཏི, ཨེཝཾ པཉྙཱ ཨུཔྤཛྫམཱནཱ ཀུསལཱཀུསལེ སེཝིཏབྦཱསེཝིཏབྦེ ཧཱིནཔྤཎཱིཏཀཎྷསུཀྐསཔྤཊིབྷཱགཨཔྤཊིབྷཱགེ ¶ དྷམྨེ པཛཱནཱཏི. ཝུཏྟམྤི ཙེཏཾ དྷམྨསེནཱཔཏིནཱ – ‘‘པཛཱནཱཏི པཛཱནཱཏཱིཏི ཁོ, ཨཱཝུསོ, ཏསྨཱ པཉྙཝཱཏི ཝུཙྩཏི. ཀིཉྩ པཛཱནཱཏི? ཨིདཾ དུཀྑནྟི པཛཱནཱཏཱི’’ཏི (མ. ནི. ༡.༤༤༩) ཝིཏྠཱརེཏབྦཾ. ཨེཝམསྶཱ པཛཱནནལཀྑཎཏཱ ཝེདིཏབྦཱ.

ཨཔརོ ནཡོ – ཡཐཱསབྷཱཝཔཊིཝེདྷལཀྑཎཱ པཉྙཱ; ཨཀྑལིཏཔཊིཝེདྷལཀྑཎཱ ཝཱ ཀུསལིསྶཱསཁིཏྟཨུསུཔཊིཝེདྷོ ཝིཡ. ཝིསཡོབྷཱསརསཱ པདཱིཔོ ཝིཡ. ཨསམྨོཧཔཙྩུཔཊྛཱནཱ ཨརཉྙགཏསུདེསཀོ ཝིཡ.

མནཏཱིཏི མནོ; ཝིཛཱནཱཏཱིཏི ཨཏྠོ. ཨཊྛཀཐཱཙརིཡཱ པནཱཧུ – ནཱལི༹ཡཱ མིནམཱནོ ཝིཡ, མཧཱཏུལཱཡ དྷཱརཡམཱནོ ཝིཡ ཙ, ཨཱརམྨཎཾ མིནཏི པཛཱནཱཏཱིཏི མནོཏི. ཏདེཝ མནནལཀྑཎེ ཨིནྡཊྛཾ ཀཱརེཏཱིཏི ཨིནྡྲིཡཾ. མནོཝ ཨིནྡྲིཡཾ མནིནྡྲིཡཾ. ཧེཊྛཱ ཝུཏྟཙིཏྟསྶེཝེཏཾ ཝེཝཙནཾ.

པཱིཏིསོམནསྶསམྤཡོགཏོ སོབྷནཾ མནོ ཨསྶཱཏི སུམནོ. སུམནསྶ བྷཱཝོ སོམནསྶཾ. སཱཏལཀྑཎེ ཨིནྡཊྛཾ ཀཱརེཏཱིཏི ཨིནྡྲིཡཾ. སོམནསྶམེཝ ཨིནྡྲིཡཾ སོམནསྶིནྡྲིཡཾ. ཧེཊྛཱ ཝུཏྟཝེདནཱཡེཝེཏཾ ཝེཝཙནཾ.

ཛཱིཝནྟི ¶ ཏེན ཏཾསམྤཡུཏྟཀཱ དྷམྨཱཏི ཛཱིཝིཏཾ. ཨནུཔཱལནལཀྑཎེ ཨིནྡཊྛཾ ཀཱརེཏཱིཏི ཨིནྡྲིཡཾ. ཛཱིཝིཏམེཝ ཨིནྡྲིཡཾ ཛཱིཝིཏིནྡྲིཡཾ. ཏཾ པཝཏྟསནྟཏཱདྷིཔཏེཡྻཾ ཧོཏི. ལཀྑཎཱདཱིཧི པན ཨཏྟནཱ ཨཝིནིབྷུཏྟཱནཾ དྷམྨཱནཾ ཨནུཔཱལནལཀྑཎཾ ཛཱིཝིཏིནྡྲིཡཾ, ཏེསཾ པཝཏྟནརསཾ, ཏེསཾཡེཝ ཋཔནཔཙྩུཔཊྛཱནཾ, ཡཱཔཡིཏབྦདྷམྨཔདཊྛཱནཾ. སནྟེཔི ཙ ཨནུཔཱལནལཀྑཎཱདིམྷི ཝིདྷཱནེ ཨཏྠིཀྑཎེཡེཝ ¶ ཏཾ ཏེ དྷམྨེ ཨནུཔཱལེཏི ཨུདཀཾ ཝིཡ ཨུཔྤལཱདཱིནི, ཡཐཱསཀཾཔཙྩཡུཔྤནྣེཔི ཙ དྷམྨེ པཱལེཏི དྷཱཏཱི ཝིཡ ཀུམཱརཾ, སཡཾཔཝཏྟིཏདྷམྨསམྦནྡྷེནེཝ ཙ པཝཏྟཏི ནིཡཱམཀོ ཝིཡ, ན བྷངྒཏོ ཨུདྡྷཾ པཝཏྟཡཏི ཨཏྟནོ ཙ པཝཏྟཡིཏབྦཱནཉྩ ཨབྷཱཝཱ, ན བྷངྒཀྑཎེ ཋཔེཏི སཡཾ བྷིཛྫམཱནཏྟཱ ཁཱིཡམཱནོ ཝིཡ ཝཊྚིསིནེཧོ དཱིཔསིཁཾ. ན ཙ ཨནུཔཱལནཔཝཏྟནཊྛཔནཱནུབྷཱཝཝིརཧིཏཾ ཡཐཱཝུཏྟཀྑཎེ ཏསྶ ཏསྶ སཱདྷནཏོཏི དཊྛབྦཾ.

མགྒངྒརཱསིཝཎྞནཱ

སམྨཱདིཊྛིཨཱདཱིསུ ¶ དསྶནཊྛེན སམྨཱདིཊྛི. ཨབྷིནིརོཔནཊྛེན སམྨཱསངྐཔྤོ, པགྒཧནཊྛེན སམྨཱཝཱཡཱམོ, ཨུཔཊྛཱནཊྛེན སམྨཱསཏི, ཨཝིཀྑེཔནཊྛེན སམྨཱསམཱདྷཱིཏི ཝེདིཏབྦོ. ཝཙནཏྠཏོ པན སམྨཱ པསྶཏི, སམྨཱ ཝཱ ཏཱཡ པསྶནྟཱིཏི སམྨཱདིཊྛི. སམྨཱ སངྐཔྤེཏི, སམྨཱ ཝཱ ཏེན སངྐཔྤེནྟཱིཏི སམྨཱསངྐཔྤོ. སམྨཱ ཝཱཡཱམེཏི, སམྨཱ ཝཱ ཏེན ཝཱཡམནྟཱིཏི སམྨཱཝཱཡཱམོ. སམྨཱ སརཏི, སམྨཱ ཝཱ ཏཱཡ སརནྟཱིཏི སམྨཱསཏི. སམྨཱ སམཱདྷིཡཏི, སམྨཱ ཝཱ ཏེན སམཱདྷིཡནྟཱིཏི སམྨཱསམཱདྷི. ཨཔིཙ, པསཏྠཱ སུནྡརཱ ཝཱ དིཊྛི སམྨཱདིཊྛཱིཏི. ཨིམིནཱཔི ནཡེན ཏེསཾ ཝཙནཏྠོ ཝེདིཏབྦོ. ལཀྑཎཱདཱིནི པན ཧེཊྛཱ ཝུཏྟཱནེཝ.

བལརཱསིཝཎྞནཱ

སདྡྷཱབལཱདཱིསུཔི སདྡྷཱདཱིནི ཝུཏྟཏྠཱནེཝ. ཨཀམྤིཡཊྛེན པན བལནྟི ཝེདིཏབྦཾ. ཨེཝམེཏེསུ ཨསྶདྡྷིཡེ ན ཀམྤཏཱིཏི སདྡྷཱབལཾ. ཀོསཛྫེ ན ཀམྤཏཱིཏི ཝཱིརིཡབལཾ. མུཊྛསྶཙྩེ ན ཀམྤཏཱིཏི སཏིབལཾ. ཨུདྡྷཙྩེ ན ཀམྤཏཱིཏི སམཱདྷིབལཾ. ཨཝིཛྫཱཡ ན ཀམྤཏཱིཏི པཉྙཱབལཾ. ཨཧིརིཀེ ན ཀམྤཏཱིཏི ཧིརིབལཾ ¶ . ཨནོཏྟཔྤེ ན ཀམྤཏཱིཏི ཨོཏྟཔྤབལནྟི. ཨཡཾ ཨུབྷཡཔདཝསེན ཨཏྠཝཎྞནཱ ཧོཏི.

ཏཏྠ པུརིམཱནི པཉྩ ཧེཊྛཱ ལཀྑཎཱདཱིཧི པཀཱསིཏཱནེཝ. པཙྪིམདྭཡེ ཀཱཡདུཙྩརིཏཱདཱིཧི ཧིརིཡཏཱིཏི ཧིརཱི; ལཛྫཱཡེཏཾ ཨདྷིཝཙནཾ. ཏེཧི ཨེཝ ཨོཏྟཔྤཏཱིཏི ཨོཏྟཔྤཾ; པཱཔཏོ ཨུབྦེགསྶེཏཾ ཨདྷིཝཙནཾ. ཏེསཾ ནཱནཱཀརཎདཱིཔནཏྠཾ ‘སམུཊྛཱནཾ ཨདྷིཔཏི ལཛྫཱ བྷཡལཀྑཎེན ཙཱ’ཏི ཨིམཾ མཱཏིཀཾ ཋཔེཏྭཱ ཨཡཾ ¶ ཝིཏྠཱརཀཐཱ ཝུཏྟཱ.

ཨཛ྄ཛྷཏྟསམུཊྛཱནཱ ཧིརཱི ནཱམ; བཧིདྡྷཱསམུཊྛཱནཾ ཨོཏྟཔྤཾ ནཱམ. ཨཏྟཱདྷིཔཏི ཧིརཱི ནཱམ; ལོཀཱདྷིཔཏི ཨོཏྟཔྤཾ ནཱམ. ལཛྫཱསབྷཱཝསཎྛིཏཱ ཧིརཱི ནཱམ; བྷཡསབྷཱཝསཎྛིཏཾ ཨོཏྟཔྤཾ ནཱམ. སཔྤཏིསྶཝལཀྑཎཱ ཧིརཱི ནཱམ; ཝཛྫབྷཱིརུཀབྷཡདསྶཱཝིལཀྑཎཾ ཨོཏྟཔྤཾ ནཱམ.

ཏཏྠ ཨཛ྄ཛྷཏྟསམུཊྛཱནཾ ཧིརིཾ ཙཏཱུཧི ཀཱརཎེཧི སམུཊྛཱཔེཏི – ཛཱཏིཾ པཙྩཝེཀྑིཏྭཱ, ཝཡཾ པཙྩཝེཀྑིཏྭཱ, སཱུརབྷཱཝཾ པཙྩཝེཀྑིཏྭཱ, བཱཧུསཙྩཾ པཙྩཝེཀྑིཏྭཱ. ཀཐཾ? ‘པཱཔཀརཎཾ ནཱམེཏཾ ན ¶ ཛཱཏིསམྤནྣཱནཾ ཀམྨཾ, ཧཱིནཛཙྩཱནཾ ཀེཝཊྚཱདཱིནཾ ཨིདཾ ཀམྨཾ. མཱདིསསྶ ཛཱཏིསམྤནྣསྶ ཨིདཾ ཀམྨཾ ཀཱཏུཾ ན ཡུཏྟ’ནྟི, ཨེཝཾ ཏཱཝ ཛཱཏིཾ པཙྩཝེཀྑིཏྭཱ པཱཎཱཏིཔཱཏཱདིཔཱཔཾ ཨཀརོནྟོ ཧིརིཾ སམུཊྛཱཔེཏི. ཏཐཱ ‘པཱཔཀརཎཾ ནཱམེཏཾ དཧརེཧི ཀཏྟབྦཾ ཀམྨཾ, མཱདིསསྶ ཝཡེ ཋིཏསྶ ཨིདཾ ཀམྨཾ ཀཱཏུཾ ན ཡུཏྟ’ནྟི, ཨེཝཾ ཝཡཾ པཙྩཝེཀྑིཏྭཱ པཱཎཱཏིཔཱཏཱདིཔཱཔཾ ཨཀརོནྟོ ཧིརིཾ སམུཊྛཱཔེཏི. ཏཐཱ ‘པཱཔཀམྨཾ ནཱམེཏཾ དུབྦལཛཱཏིཀཱནཾ ཀམྨཾ, ན སཱུརབྷཱཝཱནཾ. མཱདིསསྶ སཱུརབྷཱཝསམྤནྣསྶ ཨིདཾ ཀམྨཾ ཀཱཏུཾ ན ཡུཏྟ’ནྟི, ཨེཝཾ སཱུརབྷཱཝཾ པཙྩཝེཀྑིཏྭཱ པཱཎཱཏིཔཱཏཱདིཔཱཔཾ ཨཀརོནྟོ ཧིརིཾ སམུཊྛཱཔེཏི. ཏཐཱ ‘པཱཔཀམྨཾ ནཱམེཏཾ ཨནྡྷབཱལཱནཾ ཀམྨཾ, ན པཎྜིཏཱནཾ. མཱདིསསྶ པཎྜིཏསྶ བཧུསྶུཏསྶ ཨིདཾ ཀམྨཾ ཀཱཏུཾ ན ཡུཏྟ’ནྟི, ཨེཝཾ བཱཧུསཙྩཾ པཙྩཝེཀྑིཏྭཱ པཱཎཱཏིཔཱཏཱདིཔཱཔཾ ཨཀརོནྟོ ཧིརིཾ སམུཊྛཱཔེཏི. ཨེཝཾ ཨཛ྄ཛྷཏྟསམུཊྛཱནཧིརིཾ ཙཏཱུཧི ཀཱརཎེཧི སམུཊྛཱཔེཏི. སམུཊྛཱཔེཏྭཱ ཙ པན ཨཏྟནོ ཙིཏྟེ ཧིརིཾ པཝེསེཏྭཱ པཱཔཀམྨཾ ན ཀརོཏི. ཨེཝཾ ཨཛ྄ཛྷཏྟསམུཊྛཱནཱ ཧིརཱི ནཱམ ཧོཏི.

ཀཐཾ ¶ བཧིདྡྷཱསམུཊྛཱནཾ ཨོཏྟཔྤཾ ནཱམ? སཙེ ཏྭཾ པཱཔཀམྨཾ ཀརིསྶསི ཙཏཱུསུ པརིསཱསུ གརཧཔྤཏྟོ བྷཝིསྶསི.

གརཧིསྶནྟི ཏཾ ཝིཉྙཱུ, ཨསུཙིཾ ནཱགརིཀོ ཡཐཱ;

ཝཛྫིཏོ སཱིལཝནྟེཧི, ཀཐཾ བྷིཀྑུ ཀརིསྶསཱིཏི.

ཨེཝཾ པཙྩཝེཀྑནྟོ ཧི བཧིདྡྷཱསམུཊྛིཏེན ཨོཏྟཔྤེན པཱཔཀམྨཾ ན ཀརོཏི. ཨེཝཾ བཧིདྡྷཱསམུཊྛཱནཾ ཨོཏྟཔྤཾ ནཱམ ཧོཏི.

ཀཐཾ ཨཏྟཱདྷིཔཏི ཧིརཱི ནཱམ? ཨིདྷེཀཙྩོ ཀུལཔུཏྟོ ཨཏྟཱནཾ ¶ ཨདྷིཔཏིཾ ཛེཊྛཀཾ ཀཏྭཱ ‘མཱདིསསྶ སདྡྷཱཔབྦཛིཏསྶ བཧུསྶུཏསྶ དྷུཏངྒདྷརསྶ ན ཡུཏྟཾ པཱཔཀམྨཾ ཀཱཏུ’ནྟི པཱཔཾ ན ཀརོཏི. ཨེཝཾ ཨཏྟཱདྷིཔཏི ཧིརཱི ནཱམ ཧོཏི. ཏེནཱཧ བྷགཝཱ – ‘‘སོ ཨཏྟཱནཾཡེཝ ཨདྷིཔཏིཾ ཛེཊྛཀཾ ཀརིཏྭཱ ཨཀུསལཾ པཛཧཏི ཀུསལཾ བྷཱཝེཏི, སཱཝཛྫཾ པཛཧཏི ཨནཝཛྫཾ བྷཱཝེཏི, སུདྡྷམཏྟཱནཾ པརིཧརཏཱི’’ཏི (ཨ. ནི. ༣.༤༠).

ཀཐཾ ལོཀཱདྷིཔཏི ཨོཏྟཔྤཾ ནཱམ? ཨིདྷེཀཙྩོ ཀུལཔུཏྟོ ལོཀཾ ཨདྷིཔཏིཾ ཛེཊྛཀཾ ཀཏྭཱ པཱཔཀམྨཾ ¶ ན ཀརོཏི. ཡཐཱཧ – ‘‘མཧཱ ཁོ པནཱཡཾ ལོཀསནྣིཝཱསོ. མཧནྟསྨིཾ ཁོ པན ལོཀསནྣིཝཱསེ སནྟི སམཎབྲཱཧྨཎཱ ཨིདྡྷིམནྟོ དིབྦཙཀྑུཀཱ པརཙིཏྟཝིདུནོ, ཏེ དཱུརཏོཔི པསྶནྟི, ཨཱསནྣཱཔི ན དིསྶནྟི, ཙེཏསཱཔི ཙིཏྟཾ པཛཱནནྟི, ཏེཔིམཾ ཨེཝཾ ཛཱནིསྶནྟི ‘པསྶཐ བྷོ ཨིམཾ ཀུལཔུཏྟཾ, སདྡྷཱ ཨགཱརསྨཱ ཨནགཱརིཡཾ པབྦཛིཏོ སམཱནོ ཝོཀིཎྞོ ཝིཧརཏི པཱཔཀེཧི ཨཀུསལེཧི དྷམྨེཧཱི’ཏི. སནྟི དེཝཏཱ ཨིདྡྷིམནྟིནིཡོ དིབྦཙཀྑུཀཱ པརཙིཏྟཝིདུནིཡོ. ཏཱ དཱུརཏོཔི པསྶནྟི, ཨཱསནྣཱཔི ན དིསྶནྟི, ཙེཏསཱཔི ཙིཏྟཾ པཛཱནནྟི, ཏཱཔི མཾ ཛཱནིསྶནྟི ‘པསྶཐ བྷོ ཨིམཾ ཀུལཔུཏྟཾ, སདྡྷཱ ཨགཱརསྨཱ ཨནགཱརིཡཾ པབྦཛིཏོ སམཱནོ ཝོཀིཎྞོ ཝིཧརཏི པཱཔཀེཧི ཨཀུསལེཧི དྷམྨེཧཱི’ཏི… སོ ལོཀཾཡེཝ ཨདྷིཔཏིཾ ཛེཊྛཀཾ ཀཏྭཱ ཨཀུསལཾ པཛཧཏི ཀུསལཾ བྷཱཝེཏི, སཱཝཛྫཾ པཛཧཏི ཨནཝཛྫཾ བྷཱཝེཏི, སུདྡྷམཏྟཱནཾ པརིཧརཏཱི’’ཏི (ཨ. ནི. ༣.༡༤༦). ཨེཝཾ ལོཀཱདྷིཔཏི ཨོཏྟཔྤཾ ནཱམ ཧོཏི.

ལཛྫཱསབྷཱཝསཎྛིཏཱ ¶ ཧིརཱི, བྷཡསབྷཱཝསཎྛིཏཾ ཨོཏྟཔྤནྟི. ཨེཏྠ པན ལཛྫཱཏི ལཛྫནཱཀཱརོ; ཏེན སབྷཱཝེན སཎྛིཏཱ ཧིརཱི. བྷཡནྟི ཨཔཱཡབྷཡཾ; ཏེན སབྷཱཝེན སཎྛིཏཾ ཨོཏྟཔྤཾ. ཏདུབྷཡམྤི པཱཔཔརིཝཛྫནེ པཱཀཊཾ ཧོཏི. ཨེཀཙྩོ ཧི, ཡཐཱ ནཱམ ཨེཀོ ཀུལཔུཏྟོ ཨུཙྩཱརཔསྶཱཝཱདཱིནི ཀརོནྟོ ལཛྫིཏབྦཡུཏྟཀཾ ཨེཀཾ དིསྭཱ ལཛྫནཱཀཱརཔྤཏྟོ བྷཝེཡྻ ཧཱིལི༹ཏོ, ཨེཝམེཝ ཨཛ྄ཛྷཏྟཾ ལཛྫིདྷམྨཾ ཨོཀྐམིཏྭཱ པཱཔཀམྨཾ ན ཀརོཏི. ཨེཀཙྩོ ཨཔཱཡབྷཡབྷཱིཏོ ཧུཏྭཱ པཱཔཀམྨཾ ན ཀརོཏི.

ཏཏྲིདཾ ཨོཔམྨཾ – ཡཐཱ ཧི དྭཱིསུ ཨཡོགུལེ༹སུ ཨེཀོ སཱིཏལོ བྷཝེཡྻ གཱུཐམཀྑིཏོ, ཨེཀོ ཨུཎྷོ ཨཱདིཏྟོ. ཏཏྠ པཎྜིཏོ སཱིཏལཾ གཱུཐམཀྑིཏཏྟཱ ཛིགུཙྪནྟོ ན གཎྷཱཏི, ཨིཏརཾ ཌཱཧབྷཡེན. ཏཏྠ སཱིཏལསྶ གཱུཐམཀྑནཛིགུཙྪཱཡ ཨགཎྷནཾ ཝིཡ ཨཛ྄ཛྷཏྟཾ ལཛྫིདྷམྨཾ ཨོཀྐམིཏྭཱ ¶ པཱཔསྶ ཨཀརཎཾ. ཨུཎྷསྶ ཌཱཧབྷཡེན ཨགཎྷནཾ ཝིཡ ཨཔཱཡབྷཡེན པཱཔསྶ ཨཀརཎཾ ཝེདིཏབྦཾ.

སཔྤཏིསྶཝལཀྑཎཱ ཧིརཱི, ཝཛྫབྷཱིརུཀབྷཡདསྶཱཝིལཀྑཎཾ ཨོཏྟཔྤནྟི. ཨིདམྤི དྭཡཾ པཱཔཔརིཝཛྫནེ ཨེཝ པཱཀཊཾ ཧོཏི. ཨེཀཙྩོ ཧི ཛཱཏིམཧཏྟཔཙྩཝེཀྑཎཱ སཏྠུམཧཏྟཔཙྩཝེཀྑཎཱ དཱཡཛྫམཧཏྟཔཙྩཝེཀྑཎཱ སབྲཧྨཙཱརཱིམཧཏྟཔཙྩཝེཀྑཎཱཏི ཙཏཱུཧི ཀཱརཎེཧི ¶ སཔྤཏིསྶཝལཀྑཎཾ ཧིརིཾ སམུཊྛཱཔེཏྭཱ པཱཔཾ ན ཀརོཏི. ཨེཀཙྩོ ཨཏྟཱནུཝཱདབྷཡཾ པརཱནུཝཱདབྷཡཾ དཎྜབྷཡཾ དུགྒཏིབྷཡནྟི ཙཏཱུཧི ཀཱརཎེཧི ཝཛྫབྷཱིརུཀབྷཡདསྶཱཝིལཀྑཎཾ ཨོཏྟཔྤཾ སམུཊྛཱཔེཏྭཱ པཱཔཾ ན ཀརོཏི. ཏཏྠ ཛཱཏིམཧཏྟཔཙྩཝེཀྑཎཱདཱིནི ཙེཝ ཨཏྟཱནུཝཱདབྷཡཱདཱིནི ཙ ཝིཏྠཱརེཏྭཱ ཀཐེཏབྦཱནི.

མཱུལརཱསིཝཎྞནཱ

ན ལུབྦྷནྟི ཨེཏེན, སཡཾ ཝཱ ན ལུབྦྷཏི, ཨལུབྦྷནམཏྟམེཝ ཝཱ ཏནྟི ཨལོབྷོ. ཨདོསཱམོཧེསུཔི ཨེསེཝ ནཡོ. ཏེསུ ཨལོབྷོ ཨཱརམྨཎེ ཙིཏྟསྶ ཨགེདྷལཀྑཎོ, ཨལགྒབྷཱཝལཀྑཎོ ཝཱ ཀམལདལེ ཛལབིནྡུ ཝིཡ. ཨཔརིགྒཧཎརསོ མུཏྟབྷིཀྑུ ཝིཡ ¶ . ཨནལླཱིནབྷཱཝཔཙྩུཔཊྛཱནོ ཨསུཙིམྷི པཏིཏཔུརིསོ ཝིཡ. ཨདོསོ ཨཙཎྜིཀྐལཀྑཎོ, ཨཝིརོདྷལཀྑཎོ ཝཱ ཨནུཀཱུལམིཏྟོ ཝིཡ. ཨཱགྷཱཏཝིནཡརསོ པརིལཱ༹ཧཝིནཡརསོ ཝཱ ཙནྡནཾ ཝིཡ. སོམྨབྷཱཝཔཙྩུཔཊྛཱནོ པུཎྞཙནྡོ ཝིཡ. ཨམོཧོ ལཀྑཎཱདཱིཧི ཧེཊྛཱ པཉྙིནྡྲིཡཔདེ ཝིབྷཱཝིཏོ ཨེཝ.

ཨིམེསུ པན ཏཱིསུ ཨལོབྷོ མཙྪེརམལསྶ པཊིཔཀྑོ, ཨདོསོ དུསྶཱིལྱམལསྶ, ཨམོཧོ ཀུསལེསུ དྷམྨེསུ ཨབྷཱཝནཱཡ པཊིཔཀྑོ. ཨལོབྷོ ཙེཏྠ དཱནཧེཏུ, ཨདོསོ སཱིལཧེཏུ, ཨམོཧོ བྷཱཝནཱཧེཏུ. ཏེསུ ཙ ཨལོབྷེན ཨནདྷིཀཾ གཎྷཱཏི, ལུདྡྷསྶ ཨདྷིཀགྒཧཎཏོ. ཨདོསེན ཨནཱུནཾ, དུཊྛསྶ ཨཱུནགྒཧཎཏོ. ཨམོཧེན ཨཝིཔརཱིཏཾ, མཱུལ༹ྷསྶ ཝིཔརཱིཏགྒཧཎཏོ.

ཨལོབྷེན ཙེཏྠ ཝིཛྫམཱནཾ དོསཾ དོསཏོ དྷཱརེནྟོ དོསེ པཝཏྟཏི; ལུདྡྷོ ཧི དོསཾ པཊིཙྪཱདེཏི. ཨདོསེན ཝིཛྫམཱནཾ གུཎཾ གུཎཏོ དྷཱརེནྟོ གུཎེ པཝཏྟཏི; དུཊྛོ ཧི གུཎཾ ¶ མཀྑེཏི. ཨམོཧེན ཡཱཐཱཝསབྷཱཝཾ ཡཱཐཱཝསབྷཱཝཏོ དྷཱརེནྟོ ཡཱཐཱཝསབྷཱཝེ པཝཏྟཏི. མཱུལ༹ྷོ ཧི ‘ཏཙྪཾ ཨཏཙྪནྟི ཨཏཙྪཾ ཙ ཏཙྪ’ནྟི གཎྷཱཏི. ཨལོབྷེན ཙ པིཡཝིཔྤཡོགདུཀྑཾ ན ཧོཏི, ལུདྡྷསྶ པིཡསབྷཱཝཏོ པིཡཝིཔྤཡོགཱསཧནཏོ ཙ. ཨདོསེན ཨཔྤིཡསམྤཡོགདུཀྑཾ ན ཧོཏི, དུཊྛསྶ ཧི ཨཔྤིཡསབྷཱཝཏོ ཨཔྤིཡསམྤཡོགཱསཧནཏོ ཙ. ཨམོཧེན ཨིཙྪིཏཱལཱབྷདུཀྑཾ ན ཧོཏི, ཨམཱུལ༹ྷསྶ ཧི ‘ཏཾ ཀུཏེཏྠ ལབྦྷཱ’ཏིཨེཝམཱདིཔཙྩཝེཀྑཎསམྦྷཝཏོ (དཱི. ནི. ༣.༣༤; ཨ. ནི. ༩.༣༠).

ཨལོབྷེན ¶ ཙེཏྠ ཛཱཏིདུཀྑཾ ན ཧོཏི, ཨལོབྷསྶ ཏཎྷཱཔཊིཔཀྑཏོ ཏཎྷཱམཱུལཀཏྟཱ ཙ ཛཱཏིདུཀྑསྶ. ཨདོསེན ཛརཱདུཀྑཾ ན ཧོཏི, ཏིཀྑདོསསྶ ཁིཔྤཾ ཛརཱསམྦྷཝཏོ. ཨམོཧེན མརཎདུཀྑཾ ན ཧོཏི, སམྨོཧམརཎཉྷི དུཀྑཾ, ན ཙེཏཾ ཨམཱུལ༹ྷསྶ ཧོཏི. ཨལོབྷེན ཙ གཧཊྛཱནཾ, ཨམོཧེན པབྦཛིཏཱནཾ, ཨདོསེན པན སབྦེསམྤི སུཁསཾཝཱསཏཱ ཧོཏི.

ཝིསེསཏོ ¶ ཙེཏྠ ཨལོབྷེན པེཏྟིཝིསཡེ ཨུཔཔཏྟི ན ཧོཏི. ཡེབྷུཡྻེན ཧི སཏྟཱ ཏཎྷཱཡ པེཏྟིཝིསཡཾ ཨུཔཔཛྫནྟི, ཏཎྷཱཡ ཙ པཊིཔཀྑོ ཨལོབྷོ. ཨདོསེན ནིརཡེ ཨུཔཔཏྟི ན ཧོཏི. དོསེན ཧི ཙཎྜཛཱཏིཏཱཡ དོསསདིསཾ ནིརཡཾ ཨུཔཔཛྫནྟི. དོསསྶ ཙ པཊིཔཀྑོ ཨདོསོ. ཨམོཧེན ཏིརཙྪཱནཡོནིཡཾ ནིབྦཏྟི ན ཧོཏི. མོཧེན ཧི ནིཙྩསམྨཱུལ༹ྷཾ ཏིརཙྪཱནཡོནིཾ ཨུཔཔཛྫནྟི. མོཧསྶ པཊིཔཀྑོ ཙ ཨམོཧོ. ཨེཏེསུ ཙ ཨལོབྷོ རཱགཝསེན ཨུཔགམནསྶ ཨབྷཱཝཀརོ, ཨདོསོ དོསཝསེན ཨཔགམནསྶ, ཨམོཧོ མོཧཝསེན ཨམཛ྄ཛྷཏྟབྷཱཝསྶ.

ཏཱིཧིཔི ཙེཏེཧི ཡཐཱཔཊིཔཱཊིཡཱ ནེཀྑམྨསཉྙཱ ཨབྱཱཔཱདསཉྙཱ ཨཝིཧིཾསཱསཉྙཱཏི ཨིམཱ ཏིསྶོ. ཨསུབྷསཉྙཱ ཨཔྤམཱཎསཉྙཱ དྷཱཏུསཉྙཱཏི ཨིམཱ ཙ ཏིསྶོ སཉྙཱཡོ ཧོནྟི. ཨལོབྷེན པན ཀཱམསུཁལླིཀཱནུཡོགཨནྟསྶ, ཨདོསེན ཨཏྟཀིལམཐཱནུཡོགཨནྟསྶ པརིཝཛྫནཾ ཧོཏི; ཨམོཧེན མཛ྄ཛྷིམཱཡ པཊིཔཏྟིཡཱ པཊིཔཛྫནཾ. ཏཐཱ ཨལོབྷེན ཨབྷིཛ྄ཛྷཱཀཱཡགནྠསྶ པབྷེདནཾ ཧོཏི, ཨདོསེན བྱཱཔཱདཀཱཡགནྠསྶ, ཨམོཧེན སེསགནྠདྭཡསྶ. པུརིམཱནི ཙ དྭེ སཏིཔཊྛཱནཱནི པུརིམཱནཾ དྭིནྣཾ ཨཱནུབྷཱཝེན, པཙྪིམཱནི པཙྪིམསྶེཝ ཨཱནུབྷཱཝེན ཨིཛ྄ཛྷནྟི.

ཨལོབྷོ ཙེཏྠ ཨཱརོགྱསྶ པཙྩཡོ ཧོཏི; ཨལུདྡྷོ ཧི ལོབྷནཱིཡམྤི ཨསཔྤཱཡཾ ན སེཝཏི, ཏེན ཁོ ཨརོགོ ཧོཏི. ཨདོསོ ¶ ཡོབྦནསྶ; ཨདུཊྛོ ཧི ཝལིཔལིཏཱཝཧེན དོསགྒིནཱ ཨཌཡ྄ཧམཱནོ དཱིགྷརཏྟཾ ཡུཝཱ ཧོཏི. ཨམོཧོ དཱིགྷཱཡུཀཏཱཡ; ཨམཱུལ༹ྷོ ཧི ཧིཏཱཧིཏཾ ཉཏྭཱ ཨཧིཏཾ པརིཝཛྫནྟོ ཧིཏཉྩ པཊིསེཝམཱནོ དཱིགྷཱཡུཀོ ཧོཏི.

ཨལོབྷོ ཙེཏྠ བྷོགསམྤཏྟིཡཱ པཙྩཡོ ཧོཏི, ཨལུདྡྷསྶ ཧི ཙཱགེན བྷོགཔཊིལཱབྷོ. ཨདོསོ མིཏྟསམྤཏྟིཡཱ, མེཏྟཱཡ མིཏྟཱནཾ པཊིལཱབྷཏོ ཙེཝ ཨཔརིཧཱནཏོ ཙ. ཨམོཧོ ཨཏྟསམྤཏྟིཡཱ ¶ , ཨམཱུལ༹ྷོ ཧི ཨཏྟནོ ཧིཏམེཝ ཀརོནྟོ ཨཏྟཱནཾ སམྤཱདེཏི ¶ . ཨལོབྷོ ཙ དིབྦཝིཧཱརསྶ པཙྩཡོ ཧོཏི, ཨདོསོ བྲཧྨཝིཧཱརསྶ, ཨམོཧོ ཨརིཡཝིཧཱརསྶ.

ཨལོབྷེན ཙེཏྠ སཀཔཀྑེསུ སཏྟསངྑཱརེསུ ནིབྦུཏོ ཧོཏི, ཏེསཾ ཝིནཱསེན ཨབྷིསངྒཧེཏུཀསྶ དུཀྑསྶ ཨབྷཱཝཱ; ཨདོསེན པརཔཀྑེསུ, ཨདུཊྛསྶ ཧི ཝེརཱིསུཔི ཝེརིསཉྙཱཡ ཨབྷཱཝཏོ; ཨམོཧེན ཨུདཱསཱིནཔཀྑེསུ, ཨམཱུལ༹ྷསྶ སབྦཱབྷིསངྒཏཱཡ ཨབྷཱཝཏོ.

ཨལོབྷེན ཙ ཨནིཙྩདསྶནཾ ཧོཏི; ལུདྡྷོ ཧི ཨུཔབྷོགཱསཱཡ ཨནིཙྩེཔི སངྑཱརེ ཨནིཙྩཏོ ན པསྶཏི. ཨདོསེན དུཀྑདསྶནཾ; ཨདོསཛ྄ཛྷཱསཡོ ཧི པརིཙྩཏྟཨཱགྷཱཏཝཏྠུཔརིགྒཧོ སངྑཱརེཡེཝ དུཀྑཏོ པསྶཏི. ཨམོཧེན ཨནཏྟདསྶནཾ; ཨམཱུལ༹ྷོ ཧི ཡཱཐཱཝགཧཎཀུསལོ ཨཔརིཎཱཡཀཾ ཁནྡྷཔཉྩཀཾ ཨཔརིཎཱཡཀཏོ བུཛ྄ཛྷཏི. ཡཐཱ ཙ ཨེཏེཧི ཨནིཙྩདསྶནཱདཱིནི ཨེཝམེཏེཔི ཨནིཙྩདསྶནཱདཱིཧི ཧོནྟི. ཨནིཙྩདསྶནེན ཧི ཨལོབྷོ ཧོཏི, དུཀྑདསྶནེན ཨདོསོ, ཨནཏྟདསྶནེན ཨམོཧོ ཧོཏི. ཀོ ཧི ནཱམ ‘ཨནིཙྩམིད’ནྟི སམྨཱ ཉཏྭཱ ཏསྶཏྠཱཡ པིཧཾ ཨུཔྤཱདེཡྻ, སངྑཱརེ ཝཱ ‘དུཀྑ’ནྟི ཛཱནནྟོ ཨཔརམྤི ཨཙྩནྟཏིཁིཎཾ ཀོདྷདུཀྑཾ ཨུཔྤཱདེཡྻ, ཨཏྟསུཉྙཏཉྩ བུཛ྄ཛྷིཏྭཱ པུན སམྨོཧམཱཔཛྫེཡྻཱཏི?

ཀམྨཔཐརཱསིཝཎྞནཱ

ནཱབྷིཛ྄ཛྷཱཡཏཱིཏི ཨནབྷིཛ྄ཛྷཱ. ཀཱཡིཀཙེཏསིཀསུཁཾ ཨིདྷལོཀཔརལོཀཧིཏཾ གུཎཱནུབྷཱཝཔཊིལདྡྷཾ ཀིཏྟིསདྡཉྩ ན བྱཱཔཱདེཏཱིཏི ཨབྱཱཔཱདོ. སམྨཱ པསྶཏི, སོབྷནཱ ཝཱ དིཊྛཱིཏི སམྨཱདིཊྛི. ཨལོབྷཱདཱིནཾཡེཝ ཏཱནི ནཱམཱནི. ཧེཊྛཱ པནེཏེ དྷམྨཱ མཱུལཝསེན གཧིཏཱ, ཨིདྷ ཀམྨཔཐཝསེནཱཏི ཝེདིཏབྦཱ.

ལོཀཔཱལདུཀཝཎྞནཱ

ཧིརོཏྟཔྤཱནིཔི ཧེཊྛཱ བལཝསེན གཧིཏཱནི, ཨིདྷ ལོཀཔཱལཝསེན. ལོཀཉྷི ཨིམེ དྭེ དྷམྨཱ པཱལཡནྟི. ཡཐཱཧ –

‘‘དྭེམེ, བྷིཀྑཝེ, སུཀྐཱ དྷམྨཱ ལོཀཾ པཱལེནྟི. ཀཏམེ དྭེ? ཧིརཱི ཙ ཨོཏྟཔྤཉྩ ¶ . ཨིམེ ཁོ, བྷིཀྑཝེ, དྭེ ¶ སུཀྐཱ དྷམྨཱ ལོཀཾ པཱལེནྟི ¶ . སཙེ, བྷིཀྑཝེ, དྭེ སུཀྐཱ དྷམྨཱ ལོཀཾ ན པཱལེཡྻུཾ, ནཡིདྷ པཉྙཱཡེཐ མཱཏཱཏི ཝཱ, མཱཏུཙྪཱཏི ཝཱ, མཱཏུལཱནཱིཏི ཝཱ, ཨཱཙརིཡབྷརིཡཱཏི ཝཱ, གརཱུནཾ དཱརཱཏི ཝཱ. སམྦྷེདཾ ལོཀོ ཨགམིསྶ ཡཐཱ ཨཛེལ༹ཀཱ ཀུཀྐུཊསཱུཀརཱ སོཎསིངྒཱལཱ. ཡསྨཱ ཙ ཁོ, བྷིཀྑཝེ, ཨིམེ དྭེ སུཀྐཱ དྷམྨཱ ལོཀཾ པཱལེནྟི, ཏསྨཱ པཉྙཱཡཏི མཱཏཱཏི ཝཱ མཱཏུཙྪཱཏི ཝཱ མཱཏུལཱནཱིཏི ཝཱ ཨཱཙརིཡབྷརིཡཱཏི ཝཱ གརཱུནཾ དཱརཱཏི ཝཱ’’ཏི (ཨ. ནི. ༢.༩).

པསྶདྡྷཱདིཡུགལཝཎྞནཱ

ཀཱཡསྶ པསྶམྦྷནཾ ཀཱཡཔསྶདྡྷི. ཙིཏྟསྶ པསྶམྦྷནཾ ཙིཏྟཔསྶདྡྷི. ཀཱཡོཏི ཙེཏྠ ཝེདནཱདཡོ ཏཡོ ཁནྡྷཱ. ཨུབྷོཔི པནེཏཱ ཨེཀཏོ ཀཏྭཱ ཀཱཡཙིཏྟདརཐཝཱུཔསམལཀྑཎཱ ཀཱཡཙིཏྟཔསྶདྡྷིཡོ, ཀཱཡཙིཏྟདརཐནིམྨདྡནརསཱ, ཀཱཡཙིཏྟཱནཾ ཨཔརིཔྥནྡསཱིཏིབྷཱཝཔཙྩུཔཊྛཱནཱ, ཀཱཡཙིཏྟཔདཊྛཱནཱ. ཀཱཡཙིཏྟཱནཾ ཨཝཱུཔསམཀརཨུདྡྷཙྩཱདིཀིལེསཔཊིཔཀྑབྷཱུཏཱཏི དཊྛབྦཱ.

ཀཱཡསྶ ལཧུབྷཱཝོ ཀཱཡལཧུཏཱ. ཙིཏྟསྶ ལཧུབྷཱཝོ ཙིཏྟལཧུཏཱ. ཏཱ ཀཱཡཙིཏྟགརུབྷཱཝཝཱུཔསམལཀྑཎཱ, ཀཱཡཙིཏྟགརུབྷཱཝནིམྨདྡནརསཱ, ཀཱཡཙིཏྟཱནཾ ཨདནྡྷཏཱཔཙྩུཔཊྛཱནཱ, ཀཱཡཙིཏྟཔདཊྛཱནཱ. ཀཱཡཙིཏྟཱནཾ གརུབྷཱཝཀརཐིནམིདྡྷཱདིཀིལེསཔཊིཔཀྑབྷཱུཏཱཏི དཊྛབྦཱ.

ཀཱཡསྶ མུདུབྷཱཝོ ཀཱཡམུདུཏཱ. ཙིཏྟསྶ མུདུབྷཱཝོ ཙིཏྟམུདུཏཱ. ཏཱ ཀཱཡཙིཏྟཐདྡྷབྷཱཝཝཱུཔསམལཀྑཎཱ, ཀཱཡཙིཏྟཐདྡྷབྷཱཝནིམྨདྡནརསཱ, ཨཔྤཊིགྷཱཏཔཙྩུཔཊྛཱནཱ, ཀཱཡཙིཏྟཔདཊྛཱནཱ. ཀཱཡཙིཏྟཱནཾ ཐདྡྷབྷཱཝཀརདིཊྛིམཱནཱདིཀིལེསཔཊིཔཀྑབྷཱུཏཱཏི དཊྛབྦཱ.

ཀཱཡསྶ ཀམྨཉྙབྷཱཝོ ཀཱཡཀམྨཉྙཏཱ. ཙིཏྟསྶ ཀམྨཉྙབྷཱཝོ ཙིཏྟཀམྨཉྙཏཱ. ཏཱ ཀཱཡཙིཏྟཨཀམྨཉྙབྷཱཝཝཱུཔསམལཀྑཎཱ, ཀཱཡཙིཏྟཱནཾ ཨཀམྨཉྙབྷཱཝནིམྨདྡནརསཱ, ཀཱཡཙིཏྟཱནཾ ཨཱརམྨཎཀརཎསམྤཏྟིཔཙྩུཔཊྛཱནཱ, ཀཱཡཙིཏྟཔདཊྛཱནཱ. ཀཱཡཙིཏྟཱནཾ ཨཀམྨཉྙབྷཱཝཀརཱཝསེསནཱིཝརཎཔཊིཔཀྑབྷཱུཏཱཏི དཊྛབྦཱ. ཏཱ པསཱདནཱིཡཝཏྠཱུསུ པསཱདཱཝཧཱ, ཧིཏཀིརིཡཱསུ ¶ ཝིནིཡོགཀྑེམབྷཱཝཱཝཧཱ སུཝཎྞཝིསུདྡྷི ཝིཡཱཏི དཊྛབྦཱ.

ཀཱཡསྶ ¶ ¶ པཱགུཉྙབྷཱཝོ ཀཱཡཔཱགུཉྙཏཱ. ཙིཏྟསྶ པཱགུཉྙབྷཱཝོ ཙིཏྟཔཱགུཉྙཏཱ. ཏཱ ཀཱཡཙིཏྟཱནཾ ཨགེལཉྙབྷཱཝལཀྑཎཱ, ཀཱཡཙིཏྟགེལཉྙནིམྨདྡནརསཱ, ནིརཱདཱིནཝཔཙྩུཔཊྛཱནཱ, ཀཱཡཙིཏྟཔདཊྛཱནཱ. ཀཱཡཙིཏྟགེལཉྙཀརཨསྶདྡྷིཡཱདིཀིལེསཔཊིཔཀྑབྷཱུཏཱཏི དཊྛབྦཱ.

ཀཱཡསྶ ཨུཛུཀབྷཱཝོ ཀཱཡུཛུཀཏཱ. ཙིཏྟསྶ ཨུཛུཀབྷཱཝོ ཙིཏྟུཛུཀཏཱ. ཏཱ ཀཱཡཙིཏྟཱནཾ ཨཛྫཝལཀྑཎཱ, ཀཱཡཙིཏྟཀུཊིལབྷཱཝནིམྨདྡནརསཱ, ཨཛིམྷཏཱཔཙྩུཔཊྛཱནཱ, ཀཱཡཙིཏྟཔདཊྛཱནཱ. ཀཱཡཙིཏྟཱནཾ ཀུཊིལབྷཱཝཀརམཱཡཱསཱཋེཡྻཱདིཀིལེསཔཊིཔཀྑབྷཱུཏཱཏི དཊྛབྦཱ.

སརཏཱིཏི སཏི. སམྤཛཱནཱཏཱིཏི སམྤཛཉྙཾ; སམནྟཏོ པཀཱརེཧི ཛཱནཱཏཱིཏི ཨཏྠོ. སཱཏྠཀསམྤཛཉྙཾ སཔྤཱཡསམྤཛཉྙཾ གོཙརསམྤཛཉྙཾ ཨསམྨོཧསམྤཛཉྙནྟི ཨིམེསཾ ཙཏུནྣཾ པནསྶ ཝསེན བྷེདོ ཝེདིཏབྦོ. ལཀྑཎཱདཱིནི ཙ ཏེསཾ སཏིནྡྲིཡཔཉྙིནྡྲིཡེསུ ཝུཏྟནཡེནེཝ ཝེདིཏབྦཱནི. ཨིཏི ཧེཊྛཱ ཝུཏྟམེཝེཏཾ དྷམྨདྭཡཾ པུན ཨིམསྨིཾ ཋཱནེ ཨུཔཀཱརཝསེན གཧིཏཾ.

ཀཱམཙྪནྡཱདཡོ པཙྩནཱིཀདྷམྨེ སམེཏཱིཏི སམཐོ. ཨནིཙྩཱདིཝསེན ཝིཝིདྷེཧི ཨཱཀཱརེཧི དྷམྨེ པསྶཏཱིཏི ཝིཔསྶནཱ. པཉྙཱཝེསཱ ཨཏྠཏོ. ཨིམེསམྤི དྭིནྣཾ ལཀྑཎཱདཱིནི ཧེཊྛཱ ཝུཏྟཱནེཝ. ཨིདྷ པནེཏེ ཡུགནདྡྷཝསེན གཧིཏཱ.

སཧཛཱཏདྷམྨེ པགྒཎྷཱཏཱིཏི པགྒཱཧོ. ཨུདྡྷཙྩསངྑཱཏསྶ ཝིཀྑེཔསྶ པཊིཔཀྑབྷཱཝཏོ ན ཝིཀྑེཔོཏི ཨཝིཀྑེཔོ. ཨེཏེསམྤི ལཀྑཎཱདཱིནི ཧེཊྛཱ ཝུཏྟཱནེཝ. ཨིདྷ པནེཏཾ དྭཡཾ ཝཱིརིཡསམཱདྷིཡོཛནཏྠཱཡ གཧིཏནྟི ཝེདིཏབྦཾ.

ཡེཝཱཔནཀཝཎྞནཱ

ཡེ ཝཱ པན ཏསྨིཾ སམཡེ ཨཉྙེཔི ཨཏྠི པཊིཙྩསམུཔྤནྣཱ ཨརཱུཔིནོ དྷམྨཱ, ཨིམེ དྷམྨཱ ཀུསལཱཏི ‘ཕསྶོ ཧོཏི…པེ… ཨཝིཀྑེཔོ ཧོཏཱི’ཏི ན ཀེཝལཾ པདཔཊིཔཱཊིཡཱ ཨུདྡིཊྛཱ ཨིམེ པརོཔཎྞཱསདྷམྨཱ ཨེཝ, ཨཐ ཁོ ཡསྨིཾ ¶ སམཡེ ཀཱམཱཝཙརཾ ཏིཧེཏུཀཾ སོམནསྶསཧགཏཾ པཋམཾ ཨསངྑཱརིཀཾ མཧཱཙིཏྟཾ ཨུཔྤནྣཾ ཧོཏི, ཏསྨིཾ སམཡེ ཡེ ཝཱ པན ཨཉྙེཔི ཏེཧིཡེཝ ཕསྶཱདཱིཧི སམྤཡུཏྟཱ ¶ ཧུཏྭཱ པཝཏྟམཱནཱ ཨཏྠི, ཨཏྟནོ ¶ ཨཏྟནོ ཨནུརཱུཔཾ པཙྩཡཾ པཊིཙྩ སམུཔྤནྣཱ རཱུཔཱབྷཱཝེན ཨརཱུཔིནོ, སབྷཱཝཏོ ཨུཔལབྦྷམཱནཱ དྷམྨཱ སབྦེཔི ཨིམེ དྷམྨཱ ཀུསལཱ.

ཨེཏྟཱཝཏཱ ཙིཏྟངྒཝསེན པཱལི༹ཡཾ ཨཱརུལ༹ྷེ པརོཔཎྞཱསདྷམྨེ དཱིཔེཏྭཱ ཡེཝཱཔནཀཝསེན ཨཔརེཔི ནཝ དྷམྨེ དྷམྨརཱཛཱ དཱིཔེཏི. ཏེསུ ཏེསུ ཧི སུཏྟཔདེསུ ‘ཚནྡོ ཨདྷིམོཀྑོ མནསིཀཱརོ ཏཏྲམཛ྄ཛྷཏྟཏཱ ཀརུཎཱ མུདིཏཱ ཀཱཡདུཙྩརིཏཝིརཏི ཝཙཱིདུཙྩརིཏཝིརཏི མིཙྪཱཛཱིཝཝིརཏཱི’ཏི ཨིམེ ནཝ དྷམྨཱ པཉྙཱཡནྟི. ཨིམསྨིཉྩཱཔི མཧཱཙིཏྟེ ཀཏྟུཀམྱཏཱཀུསལདྷམྨཙྪནྡོ ཨཏྠི, ཙིཏྟངྒཝསེན པན པཱལི༹ཡཾ ན ཨཱརུལ༹ྷོ. སོ ཨིདྷ ཡེཝཱཔནཀཝསེན གཧིཏོ.

ཨདྷིམོཀྑོ ཨཏྠི, མནསིཀཱརོ ཨཏྠི, ཏཏྲམཛ྄ཛྷཏྟཏཱ ཨཏྠི. མེཏྟཱཔུབྦབྷཱགོ ཨཏྠི; སོ ཨདོསེ གཧིཏེ གཧིཏོ ཨེཝ ཧོཏི. ཀརུཎཱཔུབྦབྷཱགོ ཨཏྠི, མུདིཏཱཔུབྦབྷཱགོ ཨཏྠི. ཨུཔེཀྑཱཔུབྦབྷཱགོ ཨཏྠི; སོ པན ཏཏྲམཛ྄ཛྷཏྟཏཱཡ གཧིཏཱཡ གཧིཏོཝ ཧོཏི. སམྨཱཝཱཙཱ ཨཏྠི, སམྨཱཀམྨནྟོ ཨཏྠི. སམྨཱཨཱཛཱིཝོ ཨཏྠི; ཙིཏྟངྒཝསེན པན པཱལི༹ཡཾ ན ཨཱརུལ༹ྷོ. སོཔི ཨིདྷ ཡེཝཱཔནཀཝསེན གཧིཏོ.

ཨིམེསུ པན ནཝསུ ཚནྡོ ཨདྷིམོཀྑོ མནསིཀཱརོ ཏཏྲམཛ྄ཛྷཏྟཏཱཏི ཨིམེ ཙཏྟཱརོཝ ཨེཀཀྑཎེ ལབྦྷནྟི, སེསཱ ནཱནཱཀྑཎེ. ཡདཱ ཧི ཨིམིནཱ ཙིཏྟེན མིཙྪཱཝཱཙཾ པཛཧཏི, ཝིརཏིཝསེན སམྨཱཝཱཙཾ པཱུརེཏི, ཏདཱ ཚནྡཱདཡོ ཙཏྟཱརོ, སམྨཱཝཱཙཱ ཙཱཏི ཨིམེ པཉྩ ཨེཀཀྑཎེ ལབྦྷནྟི. ཡདཱ མིཙྪཱཀམྨནྟཾ པཛཧཏི, ཝིརཏིཝསེན སམྨཱཀམྨནྟཾ པཱུརེཏི…པེ… མིཙྪཱཨཱཛཱིཝཾ པཛཧཏི, ཝིརཏིཝསེན སམྨཱཨཱཛཱིཝཾ པཱུརེཏི…པེ… ཡདཱ ཀརུཎཱཡ པརིཀམྨཾ ཀརོཏི…པེ… ཡདཱ མུདིཏཱཡ པརིཀམྨཾ ཀརོཏི, ཏདཱ ཚནྡཱདཡོ ཙཏྟཱརོ, མུདིཏཱཔུབྦབྷཱགོ ཙཱཏི ཨིམེ པཉྩ ཨེཀཀྑཎེ ལབྦྷནྟི. ཨིཏོ པན མུཉྩིཏྭཱ, དཱནཾ དེནྟསྶ སཱིལཾ པཱུརེནྟསྶ ཡོགེ ཀམྨཾ ཀརོནྟསྶ ཙཏྟཱརི ཨཔཎྞཀངྒཱནེཝ ལབྦྷནྟི.

ཨེཝམེཏེསུ ནཝསུ ཡེཝཱཔནཀདྷམྨེསུ ‘ཚནྡོ’ཏི ཀཏྟུཀམྱཏཱཡེཏཾ ཨདྷིཝཙནཾ. ཏསྨཱ སོ ཀཏྟུཀམྱཏཱལཀྑཎོ ཚནྡོ, ཨཱརམྨཎཔརིཡེསནརསོ, ཨཱརམྨཎེན ཨཏྠིཀཏཱཔཙྩུཔཊྛཱནོ ¶ . ཏདེཝསྶ པདཊྛཱནཾ ¶ . ཨཱརམྨཎསྶ གཧཎེ ཙཱཡཾ ཙེཏསོ ཧཏྠཔྤསཱརཎཾ ཝིཡ དཊྛབྦོ.

ཨདྷིམུཙྩནཾ ¶ ‘ཨདྷིམོཀྑོ’. སོ སནྣིཊྛཱནལཀྑཎོ, ཨསཾསཔྤནརསོ, ནིཙྪཡཔཙྩུཔཊྛཱནོ སནྣིཊྛཱཏབྦདྷམྨཔདཊྛཱནོ. ཨཱརམྨཎེ ནིཙྩལབྷཱཝེན ཨིནྡཁཱིལོ ཝིཡ དཊྛབྦོ.

ཀིརིཡཱ ཀཱརོ, མནསྨིཾ ཀཱརོ ‘མནསིཀཱརོ’. པུརིམམནཏོ ཝིསདིསཾ མནཾ ཀརོཏཱིཏིཔི མནསིཀཱརོ. སྭཱཡཾ ཨཱརམྨཎཔཊིཔཱདཀོ ཝཱིཐིཔཊིཔཱདཀོ ཛཝནཔཊིཔཱདཀོཏི ཏིཔྤཀཱརོ. ཏཏྠ ཨཱརམྨཎཔཊིཔཱདཀོ མནསྨིཾ ཀཱརོཏི མནསིཀཱརོ. སོ སཱརཎལཀྑཎོ, སམྤཡུཏྟཱནཾ ཨཱརམྨཎེ སམྤཡོཛནརསོ, ཨཱརམྨཎཱབྷིམུཁབྷཱཝཔཙྩུཔཊྛཱནོ, སངྑཱརཀྑནྡྷཔརིཡཱཔནྣོ. ཨཱརམྨཎཔཊིཔཱདཀཏྟེན སམྤཡུཏྟཱནཾ སཱརཐི ཝིཡ དཊྛབྦོ. ཝཱིཐིཔཊིཔཱདཀོཏི པན པཉྩདྭཱརཱཝཛྫནསྶེཏཾ ཨདྷིཝཙནཾ. ཛཝནཔཊིཔཱདཀོཏི མནོདྭཱརཱཝཛྫནསྶ. ན ཏེ ཨིདྷ ཨདྷིཔྤེཏཱ.

ཏེསུ དྷམྨེསུ མཛ྄ཛྷཏྟཏཱ ‘ཏཏྲམཛ྄ཛྷཏྟཏཱ’. སཱ ཙིཏྟཙེཏསིཀཱནཾ སམཝཱཧིཏལཀྑཎཱ, ཨཱུནཱདྷིཀནིཝཱརཎརསཱ, པཀྑཔཱཏུཔཙྪེདནརསཱ ཝཱ; མཛ྄ཛྷཏྟབྷཱཝཔཙྩུཔཊྛཱནཱ. ཙིཏྟཙེཏསིཀཱནཾ ཨཛ྄ཛྷུཔེཀྑནཝསེན སམཔྤཝཏྟཱནཾ ཨཱཛཱནེཡྻཱནཾ ཨཛ྄ཛྷུཔེཀྑནསཱརཐི ཝིཡ དཊྛབྦཱ.

‘ཀརུཎཱམུདིཏཱ’ བྲཧྨཝིཧཱརནིདྡེསེ ཨཱཝི བྷཝིསྶནྟི. ཀེཝལཉྷི ཏཱ ཨཔྤནཔྤཏྟཱ རཱུཔཱཝཙརཱ, ཨིདྷ ཀཱམཱཝཙརཱཏི ཨཡམེཝ ཝིསེསོ.

ཀཱཡདུཙྩརིཏཏོ ཝིརཏི ‘ཀཱཡདུཙྩརིཏཝིརཏི’. སེསཔདདྭཡེཔི ཨེསེཝ ནཡོ. ལཀྑཎཱདིཏོ པནེཏཱ ཏིསྶོཔི ཀཱཡདུཙྩརིཏཱདིཝཏྠཱུནཾ ཨཝཱིཏིཀྐམལཀྑཎཱ; ཨམདྡནལཀྑཎཱཏི ཝུཏྟཾ ཧོཏི. ཀཱཡདུཙྩརིཏཱདིཝཏྠུཏོ སངྐོཙནརསཱ, ཨཀིརིཡཔཙྩུཔཊྛཱནཱ, སདྡྷཱཧིརོཏྟཔྤཨཔྤིཙྪཏཱདིགུཎཔདཊྛཱནཱ. པཱཔཀིརིཡཏོ ཙིཏྟསྶ ཝིམུཁཱིབྷཱཝབྷཱུཏཱཏི དཊྛབྦཱ.

ཨིཏི ཕསྶཱདཱིནི ཚཔྤཉྙཱས ཡེཝཱཔནཀཝསེན ཝུཏྟཱནི ནཝཱཏི སབྦཱནིཔི ཨིམསྨིཾ དྷམྨུདྡེསཝཱརེ པཉྩསཊྛི དྷམྨཔདཱནི བྷཝནྟི. ཏེསུ ཨེཀཀྑཎེ ཀདཱཙི ཨེཀསཊྛི བྷཝནྟི, ཀདཱཙི སམསཊྛི. ཏཱནི ཧི སམྨཱཝཱཙཱཔཱུརཎཱདིཝསེན. ཨུཔྤཏྟིཡཾ ¶ པཉྩསུ ཋཱནེསུ ཨེཀསཊྛི བྷཝནྟི. ཏེཧི མུཏྟེ ཨེཀསྨིཾ ཋཱནེ སམསཊྛི བྷཝནྟི. ཋཔེཏྭཱ ¶ པན ཡེཝཱཔནཀེ པཱལི༹ཡཾ ཡཐཱརུཏཝསེན གཡ྄ཧམཱནཱནི ཚཔྤཉྙཱསཱཝ ཧོནྟི. ཨགྒཧིཏགྒཧཎེན པནེཏྠ ཕསྶཔཉྩཀཾ, ཝིཏཀྐོ ཝིཙཱརོ པཱིཏི ཙིཏྟེཀགྒཏཱ, པཉྩིནྡྲིཡཱནི, ཧིརིབལཾ ཨོཏྟཔྤབལནྟི དྭེ བལཱནི, ཨལོབྷོ ¶ ཨདོསོཏི དྭེ མཱུལཱནི, ཀཱཡཔསྶདྡྷིཙིཏྟཔསྶདྡྷིཨཱདཡོ དྭཱདས དྷམྨཱཏི སམཏིཾས དྷམྨཱ ཧོནྟི.

ཏེསུ སམཏིཾསཱཡ དྷམྨེསུ ཨཊྛཱརས དྷམྨཱ ཨཝིབྷཏྟིཀཱ ཧོནྟི, དྭཱདས སཝིབྷཏྟིཀཱ. ཀཏམེ ཨཊྛཱརས? ཕསྶོ སཉྙཱ ཙེཏནཱ ཝིཙཱརོ པཱིཏི ཛཱིཝིཏིནྡྲིཡཾ, ཀཱཡཔསྶདྡྷིཨཱདཡོ དྭཱདས དྷམྨཱཏི ཨིམེ ཨཊྛཱརས ཨཝིབྷཏྟིཀཱ. ཝེདནཱ ཙིཏྟཾ ཝིཏཀྐོ ཙིཏྟེཀགྒཏཱ, སདྡྷིནྡྲིཡཾ ཝཱིརིཡིནྡྲིཡཾ སཏིནྡྲིཡཾ པཉྙིནྡྲིཡཾ, ཧིརིབལཾ ཨོཏྟཔྤབལཾ, ཨལོབྷོ ཨདོསོཏི ཨིམེ དྭཱདས དྷམྨཱ སཝིབྷཏྟིཀཱ. ཏེསུ སཏྟ དྷམྨཱ དྭཱིསུ ཋཱནེསུ ཝིབྷཏྟཱ, ཨེཀོ ཏཱིསུ, དྭེ ཙཏཱུསུ, ཨེཀོ ཚསུ, ཨེཀོ སཏྟསུ ཋཱནེསུ ཝིབྷཏྟོ.

ཀཐཾ? ཙིཏྟཾ ཝིཏཀྐོ སདྡྷཱ ཧིརཱི ཨོཏྟཔྤཾ ཨལོབྷོ ཨདོསོཏི ཨིམེ སཏྟ དྭཱིསུ ཋཱནེསུ ཝིབྷཏྟཱ.

ཨེཏེསུ ཧི ཙིཏྟཾ ཏཱཝ ཕསྶཔཉྩཀཾ པཏྭཱ ཙིཏྟཾ ཧོཏཱིཏི ཝུཏྟཾ, ཨིནྡྲིཡཱནི པཏྭཱ མནིནྡྲིཡནྟི. ཝིཏཀྐོ ཛྷཱནངྒཱནི པཏྭཱ ཝིཏཀྐོ ཧོཏཱིཏི ཝུཏྟོ, མགྒངྒཱནི པཏྭཱ སམྨཱསངྐཔྤོཏི. སདྡྷཱ ཨིནྡྲིཡཱནི པཏྭཱ སདྡྷིནྡྲིཡཾ ཧོཏཱིཏི ཝུཏྟཱ, བལཱནི པཏྭཱ སདྡྷཱབལནྟི. ཧིརཱི བལཱནི པཏྭཱ ཧིརིབལཾ ཧོཏཱིཏི ཝུཏྟཱ, ལོཀཔཱལདུཀཾ པཏྭཱ ཧིརཱིཏི. ཨོཏྟཔྤེཔི ཨེསེཝ ནཡོ. ཨལོབྷོ མཱུལཾ པཏྭཱ ཨལོབྷོ ཧོཏཱིཏི ཝུཏྟོ, ཀམྨཔཐཾ པཏྭཱ ཨནབྷིཛ྄ཛྷཱཏི. ཨདོསོ མཱུལཾ པཏྭཱ ཨདོསོ ཧོཏཱིཏི ཝུཏྟོ, ཀམྨཔཐཾ པཏྭཱ ཨབྱཱཔཱདོཏི. ཨིམེ སཏྟ དྭཱིསུ ཋཱནེསུ ཝིབྷཏྟཱ.

ཝེདནཱ པན ཕསྶཔཉྩཀཾ པཏྭཱ ཝེདནཱ ཧོཏཱིཏི ཝུཏྟཱ, ཛྷཱནངྒཱནི པཏྭཱ སུཁནྟི, ཨིནྡྲིཡཱནི པཏྭཱ སོམནསྶིནྡྲིཡནྟི. ཨེཝཾ ཨེཀོ དྷམྨོ ཏཱིསུ ཋཱནེསུ ཝིབྷཏྟོ.

ཝཱིརིཡཾ པན ཨིནྡྲིཡཱནི པཏྭཱ ཝཱིརིཡིནྡྲིཡཾ ཧོཏཱིཏི ཝུཏྟཾ, མགྒངྒཱནི པཏྭཱ སམྨཱཝཱཡཱམོཏི, བལཱནི པཏྭཱ ཝཱིརིཡབལནྟི, པིཊྛིདུཀཾ པཏྭཱ པགྒཱཧོཏི. སཏིཔི ¶ ཨིནྡྲིཡཱནི པཏྭཱ སཏིནྡྲིཡཾ ཧོཏཱིཏི ཝུཏྟཱ, མགྒངྒཱནི པཏྭཱ སམྨཱསཏཱིཏི, བལཱནི པཏྭཱ སཏིབལནྟི, པིཊྛིདུཀཾ ¶ པཏྭཱ སཏི ཧོཏཱིཏི ཝུཏྟཱ. ཨེཝཾ ཨིམེ དྭེ དྷམྨཱ ཙཏཱུསུ ཋཱནེསུ ཝིབྷཏྟཱ.

སམཱདྷི ¶ པན ཛྷཱནངྒཱནི པཏྭཱ ཙིཏྟསྶེཀགྒཏཱ ཧོཏཱིཏི ཝུཏྟོ, ཨིནྡྲིཡཱནི པཏྭཱ སམཱདྷིནྡྲིཡནྟི, མགྒངྒཱནི པཏྭཱ སམྨཱསམཱདྷཱིཏི. བལཱནི པཏྭཱ སམཱདྷིབལནྟི, པིཊྛིདུཀཾ པཏྭཱ སམཐོ ཨཝིཀྑེཔོཏི. ཨེཝམཡཾ ཨེཀོ དྷམྨོ ཚསུ ཋཱནེསུ ཝིབྷཏྟོ.

པཉྙཱ པན ཨིནྡྲིཡཱནི པཏྭཱ པཉྙིནྡྲིཡཾ ཧོཏཱིཏི ཝུཏྟཱ, མགྒངྒཱནི པཏྭཱ སམྨཱདིཊྛཱིཏི, བལཱནི པཏྭཱ པཉྙཱབལནྟི, མཱུལཱནི པཏྭཱ ཨམོཧོཏི, ཀམྨཔཐཾ པཏྭཱ སམྨཱདིཊྛཱིཏི, པིཊྛིདུཀཾ པཏྭཱ སམྤཛཉྙཾ ཝིཔསྶནཱཏི. ཨེཝཾ ཨེཀོ དྷམྨོ སཏྟསུ ཋཱནེསུ ཝིབྷཏྟོ.

སཙེ པན ཀོཙི ཝདེཡྻ – ‘ཨེཏྠ ཨཔུབྦཾ ནཱམ ནཏྠི, ཧེཊྛཱ གཧིཏམེཝ གཎྷིཏྭཱ ཏསྨིཾ ཏསྨིཾ ཋཱནེ པདཾ པཱུརིཏཾ, ཨནནུསནྡྷིཀཱ ཀཐཱ ཨུཔྤཊིཔཱཊིཡཱ ཙོརེཧི ཨཱབྷཏབྷཎྜསདིསཱ, གོཡཱུཐེན གཏམགྒེ ཨཱལུལིཏཏིཎསདིསཱ ཨཛཱནིཏྭཱ ཀཐིཏཱ’ཏི, སོ ‘མཱཧེཝ’ནྟི པཊིསེདྷེཏྭཱ ཝཏྟབྦོ – ‘བུདྡྷཱནཾ དེསནཱ ཨནནུསནྡྷིཀཱ ནཱམ ནཏྠི, སཱནུསནྡྷིཀཱ ཝ ཧོཏི. ཨཛཱནིཏྭཱ ཀཐིཏཱཔི ནཏྠི, སབྦཱ ཛཱནིཏྭཱ ཀཐིཏཱཡེཝ. སམྨཱསམྦུདྡྷོ ཧི ཏེསཾ ཏེསཾ དྷམྨཱནཾ ཀིཙྩཾ ཛཱནཱཏི, ཏཾ ཉཏྭཱ ཀིཙྩཝསེན ཝིབྷཏྟིཾ ཨཱརོཔེནྟོ ཨཊྛཱརས དྷམྨཱ ཨེཀེཀཀིཙྩཱཏི ཉཏྭཱ ཨེཀེཀསྨིཾ ཋཱནེ ཝིབྷཏྟིཾ ཨཱརོཔེསི. སཏྟ དྷམྨཱ དྭེདྭེཀིཙྩཱཏི ཉཏྭཱ དྭཱིསུ དྭཱིསུ ཋཱནེསུ ཝིབྷཏྟིཾ ཨཱརོཔེསི. ཝེདནཱ ཏིཀིཙྩཱཏི ཉཏྭཱ ཏཱིསུ ཋཱནེསུ ཝིབྷཏྟིཾ ཨཱརོཔེསི. ཝཱིརིཡསཏཱིནཾ ཙཏྟཱརི ཙཏྟཱརི ཀིཙྩཱནཱིཏི ཉཏྭཱ ཙཏཱུསུ ཙཏཱུསུ ཋཱནེསུ ཝིབྷཏྟིཾ ཨཱརོཔེསི. སམཱདྷི ཚཀིཙྩོཏི ཉཏྭཱ ཚསུ ཋཱནེསུ ཝིབྷཏྟིཾ ཨཱརོཔེསི. པཉྙཱ སཏྟཀིཙྩཱཏི ཉཏྭཱ སཏྟསུ ཋཱནེསུ ཝིབྷཏྟིཾ ཨཱརོཔེསི’.

ཏཏྲིདཾ ཨོཔམྨཾ – ཨེཀོ ཀིར པཎྜིཏོ རཱཛཱ རཧོགཏོ ཙིནྟེསི – ‘ཨིམཾ རཱཛཀུལསནྟཀཾ ན ཡཐཱ ཝཱ ཏཐཱ ཝཱ ཁཱདིཏབྦཾ, སིཔྤཱནུཙྪཝིཀཾ ཝེཏནཾ ¶ ཝཌྜྷེསྶཱམཱི’ཏི. སོ སབྦེ སིཔྤིཀེ སནྣིཔཱཏཱཔེཏྭཱ ‘ཨེཀེཀསིཔྤཛཱནནཀེ པཀྐོསཐཱ’ཏི ཨཱཧ. ཨེཝཾ པཀྐོསིཡམཱནཱ ཨཊྛཱརས ཛནཱ ཨུཊྛཧིཾསུ. ཏེསཾ ཨེཀེཀཾ པཊིཝཱིསཾ དཱཔེཏྭཱ ཝིསྶཛྫེསི. ‘དྭེ དྭེ སིཔྤཱནི ཛཱནནྟཱ ཨཱགཙྪནྟཱུ’ཏི ཝུཏྟེ པན སཏྟ ཛནཱ ཨཱགམཾསུ. ཏེསཾ དྭེ དྭེ པཊིཝཱིསེ དཱཔེསི. ‘ཏཱིཎི སིཔྤཱནི ཛཱནནྟཱ ཨཱགཙྪནྟཱུ’ཏི ཝུཏྟེ ཨེཀོཝ ཨཱགཙྪི. ཏསྶ ཏཡོ པཊིཝཱིསེ དཱཔེསི. ‘ཙཏྟཱརི སིཔྤཱནི ཛཱནནྟཱ ཨཱགཙྪནྟཱུ’ཏི ཝུཏྟེ དྭེ ཛནཱ ཨཱགམཾསུ. ཏེསཾ ཙཏྟཱརི ཙཏྟཱརི པཊིཝཱིསེ དཱཔེསི. ‘པཉྩ སིཔྤཱནི ཛཱནནྟཱ ཨཱགཙྪནྟཱུ’ཏི ཝུཏྟེ ཨེཀོཔི ནཱགཙྪི ¶ . ‘ཚ སིཔྤཱནི ཛཱནནྟཱ ཨཱགཙྪནྟཱུ’ཏི ཝུཏྟེ ཨེཀོཝ ཨཱགཙྪི. ཏསྶ ཚ པཊིཝཱིསེ དཱཔེསི. ‘སཏྟ སིཔྤཱནི ཛཱནནྟཱ ¶ ཨཱགཙྪནྟཱུ’ཏི ཝུཏྟེ ཨེཀོཝ ཨཱགཙྪི. ཏསྶ སཏྟ པཊིཝཱིསེ དཱཔེསི.

ཏཏྠ པཎྜིཏོ རཱཛཱ ཝིཡ ཨནུཏྟརོ དྷམྨརཱཛཱ. སིཔྤཛཱནནཀཱ ཝིཡ ཙིཏྟཙིཏྟངྒཝསེན ཨུཔྤནྣཱ དྷམྨཱ. སིཔྤཱནུཙྪཝིཀཝེཏནཝཌྜྷནཾ ཝིཡ ཀིཙྩཝསེན ཏེསཾ ཏེསཾ དྷམྨཱནཾ ཝིབྷཏྟིཨཱརོཔནཾ.

སབྦེཔི པནེཏེ དྷམྨཱ ཕསྶཔཉྩཀཝསེན ཛྷཱནངྒཝསེན ཨིནྡྲིཡཝསེན མགྒཝསེན བལཝསེན མཱུལཝསེན ཀམྨཔཐཝསེན ལོཀཔཱལཝསེན པསྶདྡྷིཝསེན ལཧུཏཱཝསེན མུདུཏཱཝསེན ཀམྨཉྙཏཱཝསེན པཱགུཉྙཏཱཝསེན ཨུཛུཀཏཱཝསེན སཏིསམྤཛཉྙཝསེན སམཐཝིཔསྶནཱཝསེན པགྒཱཧཱཝིཀྑེཔཝསེནཱཏི སཏྟརས རཱསཡོ ཧོནྟཱིཏི.

དྷམྨུདྡེསཝཱརཀཐཱ ནིཊྛིཏཱ.

ཀཱམཱཝཙརཀུསལཾ ནིདྡེསཝཱརཀཐཱ

༢. ཨིདཱནི ཏཱནེཝ དྷམྨུདྡེསཝཱརེ པཱལི༹ཨཱརུལ༹ྷཱནི ཚཔྤཉྙཱས པདཱནི ཝིབྷཛིཏྭཱ དསྶེཏུཾ ‘ཀཏམོ ཏསྨིཾ སམཡེ ཕསྶོ ཧོཏཱི’ཏིཨཱདིནཱ ནཡེན ནིདྡེསཝཱརོ ཨཱརདྡྷོ.

ཏཏྠ པུཙྪཱཡ ཏཱཝ ཨཡམཏྠོ – ཡསྨིཾ སམཡེ ཀཱམཱཝཙརཾ ཀུསལཾ སོམནསྶསཧགཏཾ ཏིཧེཏུཀཾ ཨསངྑཱརིཀཾ མཧཱཙིཏྟཾ ཨུཔྤཛྫཏི, ཏསྨིཾ ¶ སམཡེ ཕསྶོ ཧོཏཱིཏི ཝུཏྟོ, ཀཏམོ སོ ཕསྶོཏི ཨིམིནཱ ནཡེན སབྦཔུཙྪཱསུ ཨཏྠོ ཝེདིཏབྦོ.

ཡོ ཏསྨིཾ སམཡེ ཕསྶོཏི ཏསྨིཾ སམཡེ ཡོ ཕུསནཀཝསེན ཨུཔྤནྣོ ཕསྶོ, སོ ཕསྶོཏི. ཨིདཾ ཕསྶསྶ སབྷཱཝདཱིཔནཏོ སབྷཱཝཔདཾ ནཱམ. ཕུསནཱཏི ཕུསནཱཀཱརོ. སམྥུསནཱཏི ཕུསནཱཀཱརོཝ ཨུཔསགྒེན པདཾ ཝཌྜྷེཏྭཱ ཝུཏྟོ. སམྥུསིཏཏྟནྟི སམྥུསིཏབྷཱཝོ. ཨཡཾ པནེཏྠ ཡོཛནཱ ¶ – ཡོ ཏསྨིཾ སམཡེ ཕུསནཀཝསེན ཕསྶོ, ཡཱ ཏསྨིཾ སམཡེ ཕུསནཱ, ཡཱ ཏསྨིཾ སམཡེ སམྥུསནཱ, ཡཾ ཏསྨིཾ སམཡེ སམྥུསིཏཏྟཾ; ཨཐ ཝཱ, ཡོ ཏསྨིཾ སམཡེ ཕུསནཝསེན ཕསྶོ, ཨཉྙེནཱཔི པརིཡཱཡེན ཕུསནཱ སམྥུསནཱ སམྥུསིཏཏྟནྟི ཝུཙྩཏི, ཨཡཾ ཏསྨིཾ སམཡེ ཕསྶོ ཧོཏཱིཏི. ཝེདནཱདཱིནམྤི ནིདྡེསེསུ ཨིམིནཱཝ ནཡེན པདཡོཛནཱ ཝེདིཏབྦཱ.

ཨཡཾ པནེཏྠ སབྦསཱདྷཱརཎོ ཝིབྷཏྟིཝིནིཙྪཡོ. ཡཱནིམཱནི བྷགཝཏཱ པཋམཾ ཀཱམཱཝཙརཾ ཀུསལཾ ¶ མཧཱཙིཏྟཾ བྷཱཛེཏྭཱ དསྶེནྟེན ཨཏིརེཀཔཎྞཱསཔདཱནི མཱཏིཀཱཝསེན ཋཔེཏྭཱ པུན ཨེཀེཀཔདཾ གཧེཏྭཱ ཝིབྷཏྟིཾ ཨཱརོཔིཏཱནི, ཏཱནི ཝིབྷཏྟིཾ གཙྪནྟཱནི ཏཱིཧི ཀཱརཎེཧི ཝིབྷཏྟིཾ གཙྪནྟི; ནཱནཱ ཧོནྟཱནི ཙཏཱུཧི ཀཱརཎེཧི ནཱནཱ བྷཝནྟི. ཨཔརདཱིཔནཱ པནེཏྠ དྭེ ཋཱནཱནི གཙྪཏི. ཀཐཾ? ཨེཏཱནིཧི བྱཉྫནཝསེན ཨུཔསགྒཝསེན ཨཏྠཝསེནཱཏི ཨིམེཧི ཏཱིཧི ཀཱརཎེཧི ཝིབྷཏྟིཾ གཙྪནྟི. ཏཏྠ ཀོདྷོ ཀུཛ྄ཛྷནཱ ཀུཛ྄ཛྷིཏཏྟཾ, དོསོ དུསྶནཱ དུསྶིཏཏྟནྟི ཨེཝཾ བྱཉྫནཝསེན ཝིབྷཏྟིགམནཾ ཝེདིཏབྦཾ. ཨེཏྠ ཧི ཨེཀོཝ ཀོདྷོ བྱཉྫནཝསེན ཨེཝཾ ཝིབྷཏྟིཾ གཏོ. ཙཱརོ ཝིཙཱརོ ཨནུཝིཙཱརོ ཨུཔཝིཙཱརོཏི ཨེཝཾ པན ཨུཔསགྒཝསེན ཝིབྷཏྟིགམནཾ ཝེདིཏབྦཾ. པཎྜིཙྩཾ ཀོསལླཾ ནེཔུཉྙཾ ཝེབྷབྱཱ ཙིནྟཱ ཨུཔཔརིཀྑཱཏི ཨེཝཾ ཨཏྠཝསེན ཝིབྷཏྟིགམནཾ ཝེདིཏབྦཾ. ཏེསུ ཕསྶཔདནིདྡེསེ ཏཱཝ ཨིམཱ ཏིསྶོཔི ཝིབྷཏྟིཡོ ལབྦྷནྟི. ‘ཕསྶོ ཕུསནཱ’ཏི ཧི བྱཉྫནཝསེན ཝིབྷཏྟིགམནཾ ཧོཏི. ‘སམྥུསནཱ’ཏི ཨུཔསགྒཝསེན. ‘སམྥུསིཏཏྟ’ནྟི ཨཏྠཝསེན. ཨིམིནཱ ནཡེན སབྦཔདནིདྡེསེསུ ཝིབྷཏྟིགམནཾ ཝེདིཏབྦཾ.

ནཱནཱ ཧོནྟཱནིཔི པན ནཱམནཱནཏྟེན ལཀྑཎནཱནཏྟེན ཀིཙྩནཱནཏྟེན པཊིཀྑེཔནཱནཏྟེནཱཏི ཨིམེཧི ཙཏཱུཧི ཀཱརཎེཧི ནཱནཱ ཧོནྟི. ཏཏྠ ཀཏམོ ཏསྨིཾ སམཡེ བྱཱཔཱདོ ཧོཏི? ཡོ ཏསྨིཾ ¶ སམཡེ དོསོ དུསྶནཱཏི (དྷ. ས. ༤༡༩) ཨེཏྠ བྱཱཔཱདོཏི ཝཱ, དོསོཏི ཝཱ, དྭེཔི ཨེཏེ ཀོདྷོ ཨེཝ, ནཱམེན ནཱནཏྟཾ གཏཱཏི. ཨེཝཾ ‘ནཱམནཱནཏྟེན’ ནཱནཏྟཾ ཝེདིཏབྦཾ.

རཱསཊྛེན ཙ པཉྩཔི ཁནྡྷཱ ཨེཀོཝ ཁནྡྷོ ཧོཏི. ཨེཏྠ པན རཱུཔཾ རུཔྤནལཀྑཎཾ, ཝེདནཱ ཝེདཡིཏལཀྑཎཱ, སཉྙཱ སཉྫཱནནལཀྑཎཱ, ཙེཏནཱ ཙེཏཡིཏལཀྑཎཱ, ཝིཉྙཱཎཾ ཝིཛཱནནལཀྑཎནྟི ཨིམིནཱ ལཀྑཎནཱནཏྟེན པཉྩཀྑནྡྷཱ ཧོནྟི. ཨེཝཾ ‘ལཀྑཎནཱནཏྟེན’ ནཱནཏྟཾ ཝེདིཏབྦཾ.

ཙཏྟཱརོ ¶ སམྨཔྤདྷཱནཱ – ‘‘ཨིདྷ བྷིཀྑུ ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ…པེ… ¶ ཙིཏྟཾ པགྒཎྷཱཏི པདཧཏཱི’’ཏི (ཝིབྷ. ༣༩༠; དཱི. ནི. ༢.༤༠༢) ཨེཀམེཝ ཝཱིརིཡཾ ཀིཙྩནཱནཏྟེན ཙཏཱུསུ ཋཱནེསུ ཨཱགཏཾ. ཨེཝཾ ‘ཀིཙྩནཱནཏྟེན’ ནཱནཏྟཾ ཝེདིཏབྦཾ.

ཙཏྟཱརོ ཨསདྡྷམྨཱ – ཀོདྷགརུཏཱ ན སདྡྷམྨགརུཏཱ, མཀྑགརུཏཱ ན སདྡྷམྨགརུཏཱ, ལཱབྷགརུཏཱ ན སདྡྷམྨགརུཏཱ, སཀྐཱརགརུཏཱ ན སདྡྷམྨགརུཏཱཏི, ཨེཝམཱདཱིསུ (ཨ. ནི. ༤.༤༤) པན ‘པཊིཀྑེཔནཱནཏྟེན’ ནཱནཏྟཾ ཝེདིཏབྦཾ.

ཨིམཱནི པན ཙཏྟཱརི ནཱནཏྟཱནི ན ཕསྶེཡེཝ ལབྦྷནྟི, སབྦེསུཔི ཕསྶཔཉྩཀཱདཱིསུ ལབྦྷནྟི. ཕསྶསྶ ཧི ཕསྶོཏི ནཱམཾ…པེ… ཙིཏྟསྶ ཙིཏྟནྟི. ཕསྶོ ཙ ཕུསནལཀྑཎོ, ཝེདནཱ ཝེདཡིཏལཀྑཎཱ, སཉྙཱ སཉྫཱནནལཀྑཎཱ, ཙེཏནཱ ཙེཏཡིཏལཀྑཎཱ, ཝིཉྙཱཎཾ ཝིཛཱནནལཀྑཎཾ. ཏཐཱ ཕསྶོ ཕུསནཀིཙྩོ, ཝེདནཱ ཨནུབྷཝནཀིཙྩཱ, སཉྙཱ སཉྫཱནནཀིཙྩཱ, ཙེཏནཱ ཙེཏཡིཏཀིཙྩཱ, ཝིཉྙཱཎཾ ཝིཛཱནནཀིཙྩནྟི. ཨེཝཾ ཀིཙྩནཱནཏྟེན ནཱནཏྟཾ ཝེདིཏབྦཾ.

པཊིཀྑེཔནཱནཏྟཾ ཕསྶཔཉྩམཀེ ནཏྠི. ཨལོབྷཱདིནིདྡེསེ པན ཨལོབྷོ ཨལུབྦྷནཱ ཨལུབྦྷིཏཏྟནྟིཨཱདིནཱ ནཡེན ལབྦྷཏཱིཏི ཨེཝཾ པཊིཀྑེཔནཱནཏྟེན ནཱནཏྟཾ ཝེདིཏབྦཾ. ཨེཝཾ སབྦཔདནིདྡེསེསུ ལབྦྷམཱནཝསེན ཙཏུབྦིདྷམྤི ནཱནཏྟཾ ཝེདིཏབྦཾ.

ཨཔརདཱིཔནཱ པན པདཏྠུཏི ཝཱ ཧོཏི དལ༹ྷཱིཀམྨཾ ཝཱཏི ཨེཝཾ དྭེ ཋཱནཱནི གཙྪཏི. ཡཊྛིཀོཊིཡཱ ཨུཔྤཱིལེ༹ནྟེན ཝིཡ ཧི སཀིམེཝ ཕསྶོཏི ཝུཏྟེ ཨེཏཾ པདཾ ཕུལླིཏམཎྜིཏཝིབྷཱུསིཏཾ ནཱམ ན ཧོཏི. པུནཔྤུནཾ བྱཉྫནཝསེན ཨུཔསགྒཝསེན ¶ ཨཏྠཝསེན ‘ཕསྶོ ཕུསནཱ སམྥུསནཱ སམྥུསིཏཏྟ’ནྟི ཝུཏྟེ ཕུལླིཏམཎྜིཏཝིབྷཱུསིཏཾ ནཱམ ཧོཏི. ཡཐཱ ཧི དཧརཀུམཱརཾ ནྷཱཔེཏྭཱ, མནོརམཾ ཝཏྠཾ པརིདཧཱཔེཏྭཱ པུཔྥཱནི པིལ༹ནྡྷཱཔེཏྭཱ ཨཀྑཱིནི ཨཉྫེཏྭཱ ཨཐསྶ ནལཱཊེ ཨེཀམེཝ མནོསིལཱབིནྡུཾ ཀརེཡྻུཾ, ཏསྶ ན ཨེཏྟཱཝཏཱ ཙིཏྟཏིལཀོ ནཱམ ཧོཏི. ནཱནཱཝཎྞེཧི པན པརིཝཱརེཏྭཱ བིནྡཱུསུ ཀཏེསུ ཙིཏྟཏིལཀོ ནཱམ ཧོཏི. ཨེཝཾསམྤདམིདཾ ཝེདིཏབྦཾ. ཨཡཾ ‘པདཏྠུཏི’ ནཱམ.

བྱཉྫནཝསེན ¶ ཨུཔསགྒཝསེན ཨཏྠཝསེན ཙ པུནཔྤུནཾ བྷཎནམེཝ དལ༹ྷཱིཀམྨཾ ནཱམ. ཡཐཱ ཧི ‘ཨཱཝུསོ’ཏི ཝཱ ‘བྷནྟེ’ཏི ཝཱ ‘ཡཀྑོ’ཏི ཝཱ ‘སཔྤོ’ཏི ¶ ཝཱ ཝུཏྟེ དལ༹ྷཱིཀམྨཾ ནཱམ ན ཧོཏི. ‘ཨཱཝུསོ ཨཱཝུསོ’‘བྷནྟེ བྷནྟེ’‘ཡཀྑོ ཡཀྑོ’‘སཔྤོ སཔྤོ’ཏི ཝུཏྟེ པན དལ༹ྷཱིཀམྨཾ ནཱམ ཧོཏི. ཨེཝམེཝ སཀིདེཝ ཡཊྛིཀོཊིཡཱ ཨུཔྤཱིལེ༹ནྟེན ཝིཡ ‘ཕསྶོ’ཏི ཝུཏྟེ པདཾ དལ༹ྷཱིཀམྨཾ ནཱམ ན ཧོཏི. པུནཔྤུནཾ བྱཉྫནཝསེན ཨུཔསགྒཝསེན ཨཏྠཝསེན ‘ཕསྶོ ཕུསནཱ སམྥུསནཱ སམྥུསིཏཏྟ’ནྟི ཝུཏྟེཡེཝ ‘དལ༹ྷཱིཀམྨཾ’ ནཱམ ཧོཏཱིཏི. ཨེཝཾ ཨཔརདཱིཔནཱ དྭེ ཋཱནཱནི གཙྪཏི. ཨེཏསྶཱཔི ཝསེན ལབྦྷམཱནཀཔདནིདྡེསེསུ སབྦཏྠ ཨཏྠོ ཝེདིཏབྦོ.

ཨཡཾ ཏསྨིཾ སམཡེ ཕསྶོ ཧོཏཱིཏི ཡསྨིཾ སམཡེ པཋམཾ ཀཱམཱཝཙརཾ མཧཱཀུསལཙིཏྟཾ ཨུཔྤཛྫཏི, ཏསྨིཾ སམཡེ ཨཡཾ ཕསྶོ ནཱམ ཧོཏཱིཏི ཨཏྠོ. ཨཡཾ ཏཱཝ ཕསྶཔདནིདྡེསསྶ ཝཎྞནཱ. ཨིཏོ པརེསུ པན ཝེདནཱདཱིནཾ པདཱནཾ ནིདྡེསེསུ ཝིསེསམཏྟམེཝ ཝཎྞཡིསྶཱམ. སེསཾ ཨིདྷ ཝུཏྟནཡེནེཝ ཝེདིཏབྦཾ.

༣. ཡཾ ཏསྨིཾ སམཡེཏི ཨེཏྠ ཀིཉྩཱཔི ཀཏམཱ ཏསྨིཾ སམཡེ ཝེདནཱ ཧོཏཱིཏི ཨཱརདྡྷཾ, ‘སཱཏཔདཝསེན པན ‘ཡ’ནྟི ཝུཏྟཾ. ཏཛྫཱམནོཝིཉྙཱཎདྷཱཏུསམྥསྶཛནྟི ཨེཏྠ ‘ཏཛྫཱ’ ཝུཙྩཏི ཏསྶ སཱཏསུཁསྶ ཨནུཙྪཝིཀཱ སཱརུཔྤཱ. ཨནུཙྪཝིཀཏྠོཔི ཧི ཨཡཾ ‘ཏཛྫཱ’-སདྡོ ཧོཏི. ཡཐཱཧ – ‘‘ཏཛྫཾ ཏསྶཱརུཔྤཾ ཀཐཾ མནྟེཏཱི’’ཏི (མ. ནི. ༣.༢༤༦). ཏེཧི ཝཱ རཱུཔཱདཱིཧི ཨཱརམྨཎེཧི ཨིམསྶ ཙ སུཁསྶ པཙྩཡེཧི ཛཱཏཱཏིཔི ཏཛྫཱ. མནོཝིཉྙཱཎམེཝ ནིསྶཏྟཊྛེན དྷཱཏཱུཏི མནོཝིཉྙཱཎདྷཱཏུ. སམྥསྶཏོ ཛཱཏཾ, སམྥསྶེ ཝཱ ཛཱཏནྟི སམྥསྶཛཾ. ཙིཏྟནིསྶིཏཏྟཱ ཙེཏསིཀཾ. མདྷུརཊྛེན ¶ སཱཏཾ. ཨིདཾ ཝུཏྟཾ ཧོཏི – ཡཾ ཏསྨིཾ སམཡེ ཡཐཱཝུཏྟེན ཨཏྠེན ཏཛྫཱཡ མནོཝིཉྙཱཎདྷཱཏུཡཱ སམྥསྶཛཾ ཙེཏསིཀཾ སཱཏཾ, ཨཡཾ ཏསྨིཾ སམཡེ ཝེདནཱ ཧོཏཱིཏི. ཨེཝཾ སབྦཔདེཧི སདྡྷིཾ ཡོཛནཱ ཝེདིཏབྦཱ.

ཨིདཱནི ཙེཏསིཀཾ སུཁནྟིཨཱདཱིསུ ཙེཏསིཀཔདེན ཀཱཡིཀསུཁཾ པཊིཀྑིཔཏི, སུཁཔདེན ཙེཏསིཀཾ དུཀྑཾ. ཙེཏོསམྥསྶཛནྟི ཙིཏྟསམྥསྶེ ཛཱཏཾ. སཱཏཾ སུཁཾ ཝེདཡིཏནྟི ¶ སཱཏཾ ཝེདཡིཏཾ, ན ཨསཱཏཾ ཝེདཡིཏཾ; སུཁཾ ཝེདཡིཏཾ, ན དུཀྑཾ ཝེདཡིཏཾ. པརཏོ ཏཱིཎི པདཱནི ཨིཏྠིལིངྒཝསེན ཝུཏྟཱནི. སཱཏཱ ཝེདནཱ, ན ཨསཱཏཱ; སུཁཱ ཝེདནཱ, ན དུཀྑཱཏི. ཨཡམེཝ པནེཏྠ ཨཏྠོ.

༤. སཉྙཱནིདྡེསེ ¶ ཏཛྫཱམནོཝིཉྙཱཎདྷཱཏུསམྥསྶཛཱཏི ཏསྶཱཀུསལསཉྙཱཡ ཨནུཙྪཝིཀཱཡ མནོཝིཉྙཱཎདྷཱཏུཡཱ སམྥསྶམྷི ཛཱཏཱ. སཉྙཱཏི སབྷཱཝནཱམཾ. སཉྫཱནནཱཏི སཉྫཱནནཱཀཱརོ. སཉྫཱནིཏཏྟནྟི སཉྫཱནིཏབྷཱཝོ.

༥. ཙེཏནཱནིདྡེསེཔི ཨིམིནཱཝ ནཡེན ཝེདིཏབྦོ.

ཙིཏྟནིདྡེསེ ཙིཏྟཝིཙིཏྟཏཱཡ ཙིཏྟཾ. ཨཱརམྨཎཾ མིནམཱནཾ ཛཱནཱཏཱིཏི མནོ. མཱནསནྟི མནོ ཨེཝ. ‘‘ཨནྟལིཀྑཙརོ པཱསོ ཡྭཱཡཾ ཙརཏི མཱནསོ’’ཏི (སཾ. ནི. ༡.༡༥༡; མཧཱཝ. ༣༣) ཧི ཨེཏྠ པན སམྤཡུཏྟཀདྷམྨོ ‘མཱནསོ’ཏི ཝུཏྟོ.

‘‘ཀཐཉྷི བྷགཝཱ ཏུཡ྄ཧཾ, སཱཝཀོ སཱསནེ རཏོ;

ཨཔྤཏྟམཱནསོ སེཀྑོ, ཀཱལཾ ཀཡིརཱ ཛནེ སུཏཱ’’ཏི. (སཾ. ནི. ༡.༡༥༩);

ཨེཏྠ ཨརཧཏྟཾ ‘མཱནས’ནྟི ཝུཏྟཾ. ཨིདྷ པན ‘མནོཝ’ མཱནསཾ. བྱཉྫནཝསེན ཧེཏཾ པདཾ ཝཌྜྷིཏཾ.

ཧདཡནྟི ཙིཏྟཾ. ‘‘ཙིཏྟཾ ཝཱ ཏེ ཁིཔིསྶཱམི, ཧདཡཾ ཝཱ ཏེ ཕཱལེསྶཱམཱི’’ཏི (སཾ. ནི. ༡.༢༣༧; སུ. ནི. ཨཱལ༹ཝཀསུཏྟ) ཨེཏྠ ཨུརོ ཧདཡནྟི ཝུཏྟཾ. ‘‘ཧདཡཱ ཧདཡཾ མཉྙེ ཨཉྙཱཡ ཏཙྪཏཱི’’ཏི (མ. ནི. ༡.༦༣) ཨེཏྠ ཙིཏྟཾ. ‘‘ཝཀྐཾ ཧདཡ’’ནྟི (དཱི. ནི. ༢.༣༧༧; མ. ནི. ༡.༡༡༠) ཨེཏྠ ཧདཡཝཏྠུ. ཨིདྷ ¶ པན ཙིཏྟམེཝ ཨབྦྷནྟརཊྛེན ‘ཧདཡ’ནྟི ཝུཏྟཾ. ཏམེཝ པརིསུདྡྷཊྛེན པཎྜརཾ. བྷཝངྒཾ སནྡྷཱཡེཏཾ ཝུཏྟཾ. ཡཐཱཧ – ‘‘པབྷསྶརམིདཾ, བྷིཀྑཝེ, ཙིཏྟཾ, ཏཉྩ ཁོ ཨཱགནྟུཀེཧི ཨུཔཀྐིལེསེཧི ཨུཔཀྐིལིཊྛ’’ནྟི (ཨ. ནི. ༡.༤༩). ཏཏོ ནིཀྑནྟཏྟཱ པན ཨཀུསལམྤི, གངྒཱཡ ནིཀྑནྟཱ ནདཱི གངྒཱ ཝིཡ, གོདྷཱཝརིཏོ ནིཀྑནྟཱ གོདྷཱཝརཱི ཝིཡ ཙ, པཎྜརནྟྭེཝ ཝུཏྟཾ.

མནོ མནཱཡཏནནྟི ཨིདྷ པན མནོགྒཧཎཾ མནསྶེཝ ཨཱཡཏནབྷཱཝདཱིཔནཏྠཾ. ཏེནེཏཾ དཱིཔེཏི – ‘ནཡིདཾ དེཝཱཡཏནཾ ཝིཡ མནསྶ ཨཱཡཏནཏྟཱ མནཱཡཏནཾ, ཨཐ ཁོ མནོ ཨེཝ ཨཱཡཏནཾ ¶ མནཱཡཏན’ནྟི. ཏཏྠ ནིཝཱསཋཱནཊྛེན ཨཱཀརཊྛེན སམོསརཎཋཱནཊྛེན ¶ སཉྫཱཏིདེསཊྛེན ཀཱརཎཊྛེན ཙ ཨཱཡཏནཾ ཝེདིཏབྦཾ. ཏཐཱ ཧི ལོཀེ ‘ཨིསྶརཱཡཏནཾ ཝཱསུདེཝཱཡཏན’ནྟིཨཱདཱིསུ ནིཝཱསཊྛཱནཾ ཨཱཡཏནནྟི ཝུཙྩཏི. ‘སུཝཎྞཱཡཏནཾ རཛཏཱཡཏན’ནྟིཨཱདཱིསུ ཨཱཀརོ. སཱསནེ པན ‘‘མནོརམེ ཨཱཡཏནེ སེཝནྟི ནཾ ཝིཧངྒམཱ’’ཏིཨཱདཱིསུ (ཨ. ནི. ༥.༣༨) སམོསརཎཊྛཱནཾ. ‘‘དཀྑིཎཱཔཐོ གུནྣཾ ཨཱཡཏན’’ནྟིཨཱདཱིསུ སཉྫཱཏིདེསོ. ‘‘ཏཏྲ ཏཏྲེཝ སཀྑིབྷབྦཏཾ པཱཔུཎཱཏི སཏི སཏིཨཱཡཏནེ’’ཏིཨཱདཱིསུ (མ. ནི. ༣.༡༥༨) ཀཱརཎཾ. ཨིདྷ པན སཉྫཱཏིདེསཊྛེན སམོསརཎཋཱནཊྛེན ཀཱརཎཊྛེནཱཏི ཏིདྷཱཔི ཝཊྚཏི.

ཕསྶཱདཡོ ཧི དྷམྨཱ ཨེཏྠ སཉྫཱཡནྟཱིཏི སཉྫཱཏིདེསཊྛེནཔི ཨེཏཾ ཨཱཡཏནཾ. བཧིདྡྷཱ རཱུཔསདྡགནྡྷརསཕོཊྛབྦཱ ཨཱརམྨཎབྷཱཝེནེཏྠ ཨོསརནྟཱིཏི སམོསརཎཋཱནཊྛེནཔི ཨཱཡཏནཾ. ཕསྶཱདཱིནཾ པན སཧཛཱཏཱདིཔཙྩཡཊྛེན ཀཱརཎཏྟཱ ཀཱརཎཊྛེནཔི ཨཱཡཏནནྟི ཝེདིཏབྦཾ. མནིནྡྲིཡཾ ཝུཏྟཏྠམེཝ.

ཝིཛཱནཱཏཱིཏི ཝིཉྙཱཎཾ ཝིཉྙཱཎམེཝ ཁནྡྷོ ཝིཉྙཱཎཀྑནྡྷོ. ཏསྶ རཱསིཨཱདིཝསེན ཨཏྠོ ཝེདིཏབྦོ. མཧཱཨུདཀཀྑནྡྷོཏྭེཝ སངྑྱཾ གཙྪཏཱིཏི (ཨ. ནི. ༤.༥༡). ཨེཏྠ ཧི རཱསཊྛེན ཁནྡྷོ ཝུཏྟོ. ‘‘སཱིལཀྑནྡྷོ སམཱདྷིཀྑནྡྷོ’’ཏིཨཱདཱིསུ (དཱི. ནི. ༣.༣༥༥) གུཎཊྛེན. ‘‘ཨདྡསཱ ཁོ བྷགཝཱ མཧནྟཾ དཱརུཀྑནྡྷ’’ནྟི (སཾ. ནི. ༤.༢༤༡) ཨེཏྠ པཎྞཏྟིམཏྟཊྛེན. ཨིདྷ པན རུལ༹ྷིཏོ ཁནྡྷོ ཝུཏྟོ. རཱསཊྛེན ཧི ཝིཉྙཱཎཀྑནྡྷསྶ ¶ ཨེཀདེསོ ཨེཀཾ ཝིཉྙཱཎཾ. ཏསྨཱ ཡཐཱ རུཀྑསྶ ཨེཀདེསཾ ཚིནྡནྟོ རུཀྑཾ ཚིནྡཏཱིཏི ཝུཙྩཏི, ཨེཝམེཝ ཝིཉྙཱཎཀྑནྡྷསྶ ཨེཀདེསབྷཱུཏཾ ཨེཀམྤི ཝིཉྙཱཎཾ རུལ༹ྷིཏོ ཝིཉྙཱཎཀྑནྡྷོཏི ཝུཏྟཾ.

ཏཛྫཱམནོཝིཉྙཱཎདྷཱཏཱུཏི ཏེསཾ ཕསྶཱདཱིནཾ དྷམྨཱནཾ ཨནུཙྪཝིཀཱ མནོཝིཉྙཱཎདྷཱཏུ. ཨིམསྨིཉྷི པདེ ཨེཀམེཝ ཙིཏྟཾ མིནནཊྛེན མནོ, ཝིཛཱནནཊྛེན ཝིཉྙཱཎཾ, སབྷཱཝཊྛེན ནིསྶཏྟཊྛེན ཝཱ དྷཱཏཱུཏི ཏཱིཧི ནཱམེཧི ཝུཏྟཾ. ཨིཏི ཨིམསྨིཾ ཕསྶཔཉྩམཀེ ཕསྶོ ཏཱཝ ཡསྨཱ ཕསྶོ ཨེཝ, ན ཏཛྫཱམནོཝིཉྙཱཎདྷཱཏུསམྥསྶཛོ, ཙིཏྟཉྩ ཡསྨཱ ཏཛྫཱམནོཝིཉྙཱཎདྷཱཏུ ཨེཝ, ཏསྨཱ ཨིམསྨིཾ པདདྭཡེ ¶ ‘ཏཛྫཱམནོཝིཉྙཱཎདྷཱཏུསམྥསྶཛཱ’ཏི པཉྙཏྟི ན ཨཱརོཔིཏཱ. ཝིཏཀྐཔདཱདཱིསུ པན ལབྦྷམཱནཱཔི ཨིདྷ པཙྪིནྣཏྟཱ ན ཨུདྡྷཊཱ.

ཨིམེསཉྩ ¶ པན ཕསྶཔཉྩམཀཱནཾ དྷམྨཱནཾ པཱཊིཡེཀྐཾ པཱཊིཡེཀྐཾ ཝིནིབྦྷོགཾ ཀཏྭཱ པཉྙཏྟིཾ ཨུདྡྷརམཱནེན བྷགཝཏཱ དུཀྐརཾ ཀཏཾ. ནཱནཱཨུདཀཱནཉྷི ནཱནཱཏེལཱནཾ ཝཱ ཨེཀབྷཱཛནེ པཀྑིཔིཏྭཱ དིཝསཾ ནིམྨཐིཏཱནཾ ཝཎྞ གནྡྷརསཱནཾ ནཱནཏཱཡ དིསྭཱ ཝཱ གྷཱཡིཏྭཱ ཝཱ སཱཡིཏྭཱ ཝཱ ནཱནཱཀརཎཾ སཀྐཱ བྷཝེཡྻ ཉཱཏུཾ. ཨེཝཾ སནྟེཔི ཏཾ དུཀྐརནྟི ཝུཏྟཾ. སམྨཱསམྦུདྡྷེན པན ཨིམེསཾ ཨརཱུཔཱིནཾ ཙིཏྟཙེཏསིཀཱནཾ དྷམྨཱནཾ ཨེཀཱརམྨཎེ པཝཏྟམཱནཱནཾ པཱཊིཡེཀྐཾ པཱཊིཡེཀྐཾ ཝིནིབྦྷོགཾ ཀཏྭཱ པཉྙཏྟིཾ ཨུདྡྷརམཱནེན ཨཏིདུཀྐརཾ ཀཏཾ. ཏེནཱཧ ཨཱཡསྨཱ ནཱགསེནཏྠེརོ –

‘‘དུཀྐརཾ, མཧཱརཱཛ, བྷགཝཏཱ ཀཏནྟི. ‘ཀིཾ, བྷནྟེ ནཱགསེན, བྷགཝཏཱ དུཀྐརཾ ཀཏ’ནྟི. ‘དུཀྐརཾ, མཧཱརཱཛ, བྷགཝཏཱ ཀཏཾ, ཡཾ ཨིམེསཾ ཨརཱུཔཱིནཾ ཙིཏྟཙེཏསིཀཱནཾ དྷམྨཱནཾ ཨེཀཱརམྨཎེ པཝཏྟམཱནཱནཾ ཝཝཏྠཱནཾ ཨཀྑཱཏཾ – ཨཡཾ ཕསྶོ, ཨཡཾ ཝེདནཱ, ཨཡཾ སཉྙཱ, ཨཡཾ ཙེཏནཱ, ཨིདཾ ཙིཏྟ’ནྟི. ‘ཨོཔམྨཾ, བྷནྟེ, ཀརོཧཱི’ཏི. ‘ཡཐཱ, མཧཱརཱཛ, ཀོཙིདེཝ པུརིསོ ནཱཝཱཡ སམུདྡཾ ཨཛ྄ཛྷོགཱཧེཏྭཱ ཧཏྠཔུཊེན ཨུདཀཾ གཧེཏྭཱ ཛིཝ྄ཧཱཡ སཱཡིཏྭཱ ཛཱནེཡྻ ནུ ཁོ, མཧཱརཱཛ, སོ པུརིསོ – ཨིདཾ གངྒཱཡ ཨུདཀཾ, ཨིདཾ ཡམུནཱཡ ཨུདཀཾ, ཨིདཾ ཨཙིརཝཏིཡཱ ཨུདཀཾ, ཨིདཾ སརབྷུཡཱ ཨུདཀཾ, ཨིདཾ མཧིཡཱ ཨུདཀ’ནྟི? ‘དུཀྐརཾ, བྷནྟེ, ཛཱནིཏུ’ནྟི. ‘ཏཏོ དུཀྐརཏརཾ ¶ ཁོ, མཧཱརཱཛ, བྷགཝཏཱ ཀཏཾ ཡཾ ཨིམེསཾ ཨརཱུཔཱིནཾ ཙིཏྟཙེཏསིཀཱནཾ དྷམྨཱནཾ…པེ… ཨིདཾ ཙིཏྟ’’’ནྟི (མི. པ. ༢.༧.༡༦).

༧. ཝིཏཀྐནིདྡེསེ ཏཀྐནཝསེན ཏཀྐོ. ཏསྶ ཏིཏྟཀཾ ཏཀྐེསི ཀུམྦྷཾ ཏཀྐེསི སཀཊཾ ཏཀྐེསི ཡོཛནཾ ཏཀྐེསི ཨདྡྷཡོཛནཾ ཏཀྐེསཱིཏི ཨེཝཾ ཏཀྐནཝསེན པཝཏྟི ཝེདིཏབྦཱ. ཨིདཾ ཏཀྐསྶ སབྷཱཝཔདཾ. ཝིཏཀྐནཝསེན ཝིཏཀྐོ. བལཝཏརཏཀྐསྶེཏཾ ནཱམཾ. སུཊྛུ ཀཔྤནཝསེན སངྐཔྤོ. ཨེཀགྒཾ ཙིཏྟཾ ཨཱརམྨཎེ ཨཔྤེཏཱིཏི ཨཔྤནཱ. དུཏིཡཔདཾ ཨུཔསགྒཝསེན ཝཌྜྷིཏཾ ¶ . བལཝཏརཱ ཝཱ ཨཔྤནཱ བྱཔྤནཱ. ཨཱརམྨཎེ ཙིཏྟཾ ཨབྷིནིརོཔེཏི པཏིཊྛཱཔེཏཱིཏི ཙེཏསོ ཨབྷིནིརོཔནཱ. ཡཱཐཱཝཏཱཡ ནིཡྻཱནིཀཏཱཡ ཙ ཀུསལབྷཱཝཔྤཏྟོ པསཏྠོ སངྐཔྤོཏི སམྨཱསངྐཔྤོ.

༨. ཝིཙཱརནིདྡེསེ ཨཱརམྨཎེ ཙརཎཀཝསེན ཙཱརོ. ཨིདམསྶ སབྷཱཝཔདཾ. ཝིཙརཎཝསེན ཝིཙཱརོ ¶ . ཨནུགནྟྭཱ ཝིཙརཎཝསེན ཨནུཝིཙཱརོ. ཨུཔགནྟྭཱ ཝིཙརཎཝསེན ཨུཔཝིཙཱརོཏི. ཨུཔསགྒཝསེན ཝཱ པདཱནི ཝཌྜྷིཏཱནི. ཨཱརམྨཎེ ཙིཏྟཾ, སརཾ ཝིཡ ཛིཡཱཡ, ཨནུསནྡཧིཏྭཱ ཋཔནཏོ ཙིཏྟསྶ ཨནུསནྡྷཱནཏཱ. ཨཱརམྨཎཾ ཨནུཔེཀྑམཱནོ ཝིཡ ཏིཊྛཏཱིཏི ཨནུཔེཀྑནཏཱ. ཝིཙརཎཝསེན ཝཱ ཨུཔེཀྑནཏཱ ཨནུཔེཀྑནཏཱ.

༩. པཱིཏིནིདྡེསེ པཱིཏཱིཏི སབྷཱཝཔདཾ. པམུདིཏསྶ བྷཱཝོ པཱམོཛྫཾ. ཨཱམོདནཱཀཱརོ ཨཱམོདནཱ. པམོདནཱཀཱརོ པམོདནཱ. ཡཐཱ ཝཱ བྷེསཛྫཱནཾ ཝཱ ཏེལཱནཾ ཝཱ ཨུཎྷོདཀསཱིཏོདཀཱནཾ ཝཱ ཨེཀཏོཀརཎཾ མོདནཱཏི ཝུཙྩཏི, ཨེཝམཡམྤི པཱིཏི དྷམྨཱནཾ ཨེཀཏོཀརཎེན མོདནཱ. ཨུཔསགྒཝསེན པན མཎྜེཏྭཱ ཨཱམོདནཱ པམོདནཱཏི ཝུཏྟཱ. ཧཱསེཏཱིཏི ཧཱསོ. པཧཱསེཏཱིཏི པཧཱསོ. ཧཊྛཔཧཊྛཱཀཱརཱནམེཏཾ ཨདྷིཝཙནཾ. ཝིཏྟཱིཏི ཝིཏྟཾ; དྷནསྶེཏཾ ནཱམཾ. ཨཡཾ པན སོམནསྶཔཙྩཡཏྟཱ ཝིཏྟིསརིཀྑཏཱཡ ཝིཏྟི. ཡཐཱ ཧི དྷནིནོ དྷནཾ པཊིཙྩ སོམནསྶཾ ཨུཔྤཛྫཏི, ཨེཝཾ པཱིཏིམཏོཔི པཱིཏིཾ པཊིཙྩ སོམནསྶཾ ཨུཔྤཛྫཏི, ཏསྨཱ ཝིཏྟཱིཏི ཝུཏྟཱ. ཏུཊྛིསབྷཱཝསཎྛིཏཱཡ པཱིཏིཡཱ ཨེཏཾ ནཱམཾ. པཱིཏིམཱ པན པུགྒལོ ཀཱཡཙིཏྟཱནཾ ཨུགྒཏཏྟཱ ཨབྦྷུགྒཏཏྟཱ ཨུདགྒོཏི ཝུཙྩཏི ¶ . ཨུདགྒསྶ བྷཱཝོ ཨོདགྱཾ. ཨཏྟནོ མནཏཱ ཨཏྟམནཏཱ. ཨནབྷིརདྡྷསྶ ཧི མནོ དུཀྑཔདཊྛཱནཏྟཱ ཨཏྟནོ མནོ ནཱམ ན ཧོཏི, ཨབྷིརདྡྷསྶ པན སུཁཔདཊྛཱནཏྟཱ ཨཏྟནོ མནོ ནཱམ ཧོཏི. ཨིཏི ཨཏྟནོ མནཏཱ ཨཏྟམནཏཱ, སཀམནཏཱ. སཀམནསྶ བྷཱཝོཏི ཨཏྠོ. སཱ པན ཡསྨཱ ན ཨཉྙསྶ ཀསྶཙི ཨཏྟནོ མནཏཱ, ཙིཏྟསྶེཝ པནེསོ བྷཱཝོ, ཙེཏསིཀོ དྷམྨོ, ཏསྨཱ ཨཏྟམནཏཱ ཙིཏྟསྶཱཏི ཝུཏྟཱ.

༡༡. ཨེཀགྒཏཱནིདྡེསེ ཨཙལབྷཱཝེན ཨཱརམྨཎེ ཏིཊྛཏཱིཏི ཋིཏི. པརཏོ པདདྭཡཾ ཨུཔསགྒཝསེན ཝཌྜྷིཏཾ. ཨཔིཙ སམྤཡུཏྟདྷམྨེ ཨཱརམྨཎམྷི སམྤིཎྜེཏྭཱ ཏིཊྛཏཱིཏི ¶ སཎྛིཏི. ཨཱརམྨཎཾ ཨོགཱཧེཏྭཱ ཨནུཔཝིསིཏྭཱ ཏིཊྛཏཱིཏི ཨཝཊྛིཏི. ཀུསལཔཀྑསྨིཉྷི ཙཏྟཱརོ དྷམྨཱ ཨཱརམྨཎཾ ཨོགཱཧནྟི – སདྡྷཱ སཏི སམཱདྷི པཉྙཱཏི. ཏེནེཝ སདྡྷཱ ཨོཀཔྤནཱཏི ཝུཏྟཱ, སཏི ཨཔིལཱཔནཏཱཏི, སམཱདྷི ཨཝཊྛིཏཱིཏི, པཉྙཱ པརིཡོགཱཧནཱཏི. ཨཀུསལཔཀྑེ པན ཏཡོ དྷམྨཱ ཨཱརམྨཎཾ ཨོགཱཧནྟི – ཏཎྷཱ དིཊྛི ཨཝིཛྫཱཏི. ཏེནེཝ ཏེ ཨོགྷཱཏི ཝུཏྟཱ. ཙིཏྟེཀགྒཏཱ པནེཏྠ ན བལཝཏཱི ཧོཏི. ཡཐཱ ཧི རཛུཊྛཱནཊྛཱནེ ཨུདཀེན སིཉྩིཏྭཱ སམྨཊྛེ ཐོཀམེཝ ཀཱལཾ རཛོ སནྣིསཱིདཏི, སུཀྑནྟེ སུཀྑནྟེ པུན པཀཏིབྷཱཝེན ཝུཊྛཱཏི, ཨེཝམེཝ ཨཀུསལཔཀྑེ ཙིཏྟེཀགྒཏཱ ན བལཝཏཱི ཧོཏི. ཡཐཱ པན ཏསྨིཾ ཋཱནེ གྷཊེཧི ཨུདཀཾ ཨཱསིཉྩིཏྭཱ ¶ ཀུདཱལེན ཁནིཏྭཱ ཨཱཀོཊནམདྡནགྷཊྚནཱནི ཀཏྭཱ ཨུཔལིཏྟེ ཨཱདཱསེ ཝིཡ ཚཱཡཱ པཉྙཱཡཏི, ཝསྶསཏཱཏིཀྐམེཔི ཏཾམུཧུཏྟཀཏཾ ཝིཡ ཧོཏི, ཨེཝམེཝ ཀུསལཔཀྑེ ཙིཏྟེཀགྒཏཱ བལཝཏཱི ཧོཏི.

ཨུདྡྷཙྩཝིཙིཀིཙྪཱཝསེན པཝཏྟསྶ ཝིསཱཧཱརསྶ པཊིཔཀྑཏོ ཨཝིསཱཧཱརོ. ཨུདྡྷཙྩཝིཙིཀིཙྪཱཝསེནེཝ གཙྪནྟཾ ཙིཏྟཾ ཝིཀྑིཔཏི ནཱམ. ཨཡཾ པན ཏཐཱཝིདྷོ ཝིཀྑེཔོ ན ཧོཏཱིཏི ཨཝིཀྑེཔོ. ཨུདྡྷཙྩཝིཙིཀིཙྪཱཝསེནེཝ ཙ ཙིཏྟཾ ཝིསཱཧཊཾ ནཱམ ཧོཏི, ཨིཏོ ཙིཏོ ཙ ཧརཱིཡཏི. ཨཡཾ པན ཨེཝཾ ཨཝིསཱཧཊསྶ མཱནསསྶ བྷཱཝོཏི ཨཝིསཱཧཊམཱནསཏཱ.

སམཐོཏི ཏིཝིདྷོ སམཐོ – ཙིཏྟསམཐོ, ཨདྷིཀརཎསམཐོ, སབྦསངྑཱརསམཐོཏི. ཏཏྠ ཨཊྛསུ སམཱཔཏྟཱིསུ ཙིཏྟེཀགྒཏཱ ཙིཏྟསམཐོ ¶ ནཱམ. ཏཉྷི ཨཱགམྨ ཙིཏྟཙལནཾ ཙིཏྟཝིཔྥནྡིཏཾ སམྨཏི ཝཱུཔསམྨཏི, ཏསྨཱ སོ ཙིཏྟསམཐོཏི ཝུཙྩཏི. སམྨུཁཱཝིནཡཱདིསཏྟཝིདྷོ སམཐོ ཨདྷིཀརཎསམཐོ ནཱམ. ཏཉྷི ཨཱགམྨ ཏཱནི ཏཱནི ཨདྷིཀརཎཱནི སམྨནྟི ཝཱུཔསམྨནྟི, ཏསྨཱ སོ ཨདྷིཀརཎསམཐོཏི ཝུཙྩཏི. ཡསྨཱ པན སབྦེ སངྑཱརཱ ནིབྦཱནཾ ཨཱགམྨ སམྨནྟི ཝཱུཔསམྨནྟི, ཏསྨཱ ཏཾ སབྦསངྑཱརསམཐོཏི ཝུཙྩཏི. ཨིམསྨིཾ ཨཏྠེ ཙིཏྟསམཐོ ཨདྷིཔྤེཏོ. སམཱདྷིལཀྑཎེ ཨིནྡཊྛཾ ཀཱརེཏཱིཏི སམཱདྷིནྡྲིཡཾ. ཨུདྡྷཙྩེ ན ཀམྤཏཱིཏི སམཱདྷིབལཾ. སམྨཱསམཱདྷཱིཏི ཡཱཐཱཝསམཱདྷི ནིཡྻཱནིཀསམཱདྷི ཀུསལསམཱདྷི.

༡༢. སདྡྷིནྡྲིཡནིདྡེསེ ¶ བུདྡྷཱདིགུཎཱནཾ སདྡཧནཝསེན སདྡྷཱ. བུདྡྷཱདཱིནི ཝཱ རཏནཱནི སདྡཧཏི པཏྟིཡཱཡཏཱིཏི སདྡྷཱ. སདྡཧནཱཏི སདྡཧནཱཀཱརོ. བུདྡྷཱདཱིནཾ གུཎེ ཨོགཱཧཏི, བྷིནྡིཏྭཱ ཝིཡ ཨནུཔཝིསཏཱིཏི ཨོཀཔྤནཱ. བུདྡྷཱདཱིནཾ གུཎེསུ ཨེཏཱཡ སཏྟཱ ཨཏིཝིཡ པསཱིདནྟི, སཡཾ ཝཱ ཨབྷིཔྤསཱིདཏཱིཏི ཨབྷིཔྤསཱདོ. ཨིདཱནི ཡསྨཱ སདྡྷིནྡྲིཡཱདཱིནཾ སམཱསཔདཱནཾ ཝསེན ཨཉྙསྨིཾ པརིཡཱཡེ ཨཱརདྡྷེ ཨཱདིཔདཾ གཧེཏྭཱཝ པདབྷཱཛནཾ ཀརཱིཡཏི – ཨཡཾ ཨབྷིདྷམྨེ དྷམྨཏཱ – ཏསྨཱ པུན སདྡྷཱཏི ཝུཏྟཾ. ཡཐཱ ཝཱ ཨིཏྠིཡཱ ཨིནྡྲིཡཾ ཨིཏྠིནྡྲིཡཾ, ན ཏཐཱ ཨིདཾ. ཨིདཾ པན སདྡྷཱཝ ཨིནྡྲིཡཾ སདྡྷིནྡྲིཡནྟི. ཨེཝཾ སམཱནཱདྷིཀརཎབྷཱཝཉཱཔནཏྠམྤི པུན སདྡྷཱཏི ཝུཏྟཾ. ཨེཝཾ སབྦཔདནིདྡེསེསུ ཨཱདིཔདསྶ པུན ཝཙནེ པཡོཛནཾ ཝེདིཏབྦཾ. ཨདྷིམོཀྑལཀྑཎེ ཨིནྡཊྛཾ ཀཱརེཏཱིཏི སདྡྷིནྡྲིཡཾ. ཨསདྡྷིཡེ ན ཀམྤཏཱིཏི སདྡྷཱབལཾ.

༡༣. ཝཱིརིཡིནྡྲིཡནིདྡེསེ ¶ ཙེཏསིཀོཏི ཨིདཾ ཝཱིརིཡསྶ ནིཡམཏོ ཙེཏསིཀབྷཱཝདཱིཔནཏྠཾ ཝུཏྟཾ. ཨིདཉྷི ཝཱིརིཡཾ ‘‘ཡདཔི, བྷིཀྑཝེ, ཀཱཡིཀཾ ཝཱིརིཡཾ ཏདཔི ཝཱིརིཡསམྦོཛ྄ཛྷངྒོ, ཡདཔི ཙེཏསིཀཾ ཝཱིརིཡཾ ཏདཔི ཝཱིརིཡསམྦོཛ྄ཛྷངྒོཏི. ཨིཏིཧིདཾ ཨུདྡེསཾ གཙྪཏཱི’’ཏི (སཾ. ནི. ༥.༢༣༣) ཨེཝམཱདཱིསུ སུཏྟེསུ ཙངྐམཱདཱིནི ཀརོནྟསྶ ཨུཔྤནྣཏྟཱ ‘ཀཱཡིཀ’ནྟི ཝུཙྩམཱནམྤི ཀཱཡཝིཉྙཱཎཾ ཝིཡ ཀཱཡིཀཾ ནཱམ ནཏྠི, ཙེཏསིཀམེཝ པནེཏནྟི དསྶེཏུཾ ‘ཙེཏསིཀོ’ཏི ཝུཏྟཾ. ཝཱིརིཡཱརམྦྷོཏི ཝཱིརིཡསངྑཱཏོ ཨཱརམྦྷོ. ཨིམིནཱ སེསཱརམྦྷེ པཊིཀྑིཔཏི. ཨཡཉྷི ‘ཨཱརམྦྷ’-སདྡོ ཀམྨེ ཨཱཔཏྟིཡཾ ཀིརིཡཱཡཾ ཝཱིརིཡེ ཧིཾསཱཡ ཝིཀོཔནེཏི ཨནེཀེསུ ཨཏྠེསུ ཨཱགཏོ.

‘‘ཡཾཀིཉྩི ¶ དུཀྑཾ སམྦྷོཏི, སབྦཾ ཨཱརམྦྷཔཙྩཡཱ;

ཨཱརམྦྷཱནཾ ནིརོདྷེན, ནཏྠི དུཀྑསྶ སམྦྷཝོ’’ཏི. (སུ. ནི. ༧༤༩);

ཨེཏྠ ཧི ཀམྨཾ ‘ཨཱརམྦྷོ’ཏི ཨཱགཏཾ. ‘‘ཨཱརམྦྷཏི ཙ ཝིཔྤཊིསཱརཱི ཙ ཧོཏཱི’’ཏི (ཨ. ནི. ༥.༡༤༢; པུ. པ. ༡༩༡) ཨེཏྠ ཨཱཔཏྟི. ‘‘མཧཱཡཉྙཱ མཧཱརམྦྷཱ ན ཏེ ཧོནྟི མཧཔྥལཱ’’ཏི (ཨ. ནི. ༤.༣༩; སཾ. ནི. ༡.༡༢༠) ཨེཏྠ ཡཱུཔུསྶཱཔནཱདིཀིརིཡཱ. ‘‘ཨཱརམྦྷཐ ¶ ནིཀྐམཐ ཡུཉྫཐ བུདྡྷསཱསནེ’’ཏི (སཾ. ནི. ༡.༡༨༥) ཨེཏྠ ཝཱིརིཡཾ. ‘‘སམཎཾ གོཏམཾ ཨུདྡིསྶ པཱཎཾ ཨཱརབྷནྟཱི’’ཏི (མ. ནི. ༢.༥༡-༥༢) ཨེཏྠ ཧིཾསཱ. ‘‘བཱིཛགཱམབྷཱུཏགཱམསམཱརམྦྷཱ པཊིཝིརཏོ ཧོཏཱི’’ཏི (དཱི. ནི. ༡.༡༠; མ. ནི. ༡.༢༩༣) ཨེཏྠ ཚེདནབྷཉྫནཱདིཀཾ ཝིཀོཔནཾ. ཨིདྷ པན ཝཱིརིཡམེཝ ཨདྷིཔྤེཏཾ. ཏེནཱཧ – ‘ཝཱིརིཡཱརམྦྷོཏི ཝཱིརིཡསངྑཱཏོ ཨཱརམྦྷོ’ཏི. ཝཱིརིཡཉྷི ཨཱརམྦྷནཀཝསེན ཨཱརམྦྷོཏི ཝུཙྩཏི. ཨིདམསྶ སབྷཱཝཔདཾ. ཀོསཛྫཏོ ནིཀྑམནཝསེན ནིཀྐམོ. པརཾ པརཾ ཋཱནཾ ཨཀྐམནཝསེན པརཀྐམོ. ཨུགྒནྟྭཱ ཡམནཝསེན ཨུཡྻཱམོ. བྱཱཡམནཝསེན ཝཱཡཱམོ. ཨུསྶཱཧནཝསེན ཨུསྶཱཧོ. ཨདྷིམཏྟུསྶཱཧནཝསེན ཨུསྶོལ༹ྷཱི. ཐིརབྷཱཝཊྛེན ཐཱམོ. ཙིཏྟཙེཏསིཀཱནཾ དྷཱརཎཝསེན ཨཝིཙྪེདཏོ ཝཱ པཝཏྟནཝསེན ཀུསལསནྟཱནཾ དྷཱརེཏཱིཏི དྷིཏི.

ཨཔརོ ནཡོ – ནིཀྐམོ ཙེསོ ཀཱམཱནཾ པནུདནཱཡ, པརཀྐམོ ཙེསོ བནྡྷནཙྪེདཱཡ, ཨུཡྻཱམོ ཙེསོ ཨོགྷནིཏྠརཎཱཡ, ཝཱཡཱམོ ཙེསོ པཱརངྒམནཊྛེན, ཨུསྶཱཧོ ཙེསོ པུབྦངྒམཊྛེན, ཨུསྶོལ༹ྷཱི ¶ ཙེསོ ཨདྷིམཏྟཊྛེན, ཐཱམོ ཙེསོ པལིགྷུགྒྷཱཊནཏཱཡ, དྷིཏི ཙེསོ ཨཝཊྛིཏིཀཱརིཏཱཡཱཏི.

‘‘ཀཱམཾ ཏཙོ ཙ ནྷཱརུ ཙ ཨཊྛི ཙ ཨཝསིསྶཏཱུ’’ཏི (མ. ནི. ༢.༡༨༤; སཾ. ནི. ༢.༢༢, ༢༣༧; ཨ. ནི. ༢.༥; མཧཱནི. ༡༩༦; ཙཱུལ༹ནི. ཁགྒཝིསཱཎསུཏྟནིདྡེས ༡༥༤) ཨེཝཾ པཝཏྟིཀཱལེ ཨསིཐིལཔརཀྐམཝསེན ཨསིཐིལཔརཀྐམཏཱ; ཐིརཔརཀྐམོ, དལ༹ྷཔརཀྐམོཏི ཨཏྠོ. ཡསྨཱ པནེཏཾ ཝཱིརིཡཾ ཀུསལཀམྨཀརཎཊྛཱནེ ཚནྡཾ ན ནིཀྑིཔཏི, དྷུརཾ ན ནིཀྑིཔཏི, ན ཨོཏཱརེཏི, ན ཝིསྶཛྫེཏི, ཨནོསཀྐིཏམཱནསཏཾ ཨཱཝཧཏི, ཏསྨཱ ཨནིཀྑིཏྟཚནྡཏཱ ཨནིཀྑིཏྟདྷུརཏཱཏི ཝུཏྟཾ. ཡཐཱ པན ཏཛྫཱཏིཀེ ཨུདཀསམྦྷིནྣཊྛཱནེ དྷུརཝཱཧགོཎཾ གཎྷཐཱཏི ཝདནྟི ¶ , སོ ཛཎྞུནཱ བྷཱུམིཾ ཨུཔྤཱིལེ༹ཏྭཱཔི དྷུརཾ ཝཧཏི, བྷཱུམིཡཾ པཏིཏུཾ ན དེཏི, ཨེཝམེཝ ཝཱིརིཡཾ ཀུསལཀམྨཀརཎཊྛཱནེ དྷུརཾ ཨུཀྑིཔཏི པགྒཎྷཱཏི, ཏསྨཱ དྷུརསམྤགྒཱཧོཏི ཝུཏྟཾ. པགྒཧལཀྑཎེ ཨིནྡཊྛཾ ཀཱརེཏཱིཏི ཝཱིརིཡིནྡྲིཡཾ. ཀོསཛྫེ ¶ ན ཀམྤཏཱིཏི ཝཱིརིཡབལཾ. ཡཱཐཱཝནིཡྻཱནིཀཀུསལཝཱཡཱམཏཱཡ སམྨཱཝཱཡཱམོ.

༡༤. སཏིནྡྲིཡནིདྡེསེ སརཎཀཝསེན སཏི. ཨིདཾ སཏིཡཱ སབྷཱཝཔདཾ. པུནཔྤུནཾ སརཎཏོ ཨནུསྶརཎཝསེན ཨནུསྶཏི. ཨབྷིམུཁཾ གནྟྭཱ ཝིཡ སརཎཏོ པཊིསརཎཝསེན པཊིསྶཏི. ཨུཔསགྒཝསེན ཝཱ ཝཌྜྷིཏམཏྟམེཏཾ. སརཎཱཀཱརོ སརཎཏཱ. ཡསྨཱ པན སརཎཏཱཏི ཏིཎྞཾ སརཎཱནམྤི ནཱམཾ, ཏསྨཱ ཏཾ པཊིསེདྷེཏུཾ པུན སཏིགྒཧཎཾ ཀཏཾ. སཏིསངྑཱཏཱ སརཎཏཱཏི ཨཡཉྷེཏྠ ཨཏྠོ. སུཏཔརིཡཏྟསྶ དྷཱརཎབྷཱཝཏོ དྷཱརཎཏཱ. ཨནུཔཝིསནསངྑཱཏེན ཨོགཱཧནཊྛེན ཨཔིལཱཔནབྷཱཝོ ཨཔིལཱཔནཏཱ. ཡཐཱ ཧི ལཱབུཀཊཱཧཱདཱིནི ཨུདཀེ པླཝནྟི, ན ཨནུཔཝིསནྟི, ན ཏཐཱ ཨཱརམྨཎེ སཏི. ཨཱརམྨཎཉྷེསཱ ཨནུཔཝིསཏི, ཏསྨཱ ཨཔིལཱཔནཏཱཏི ཝུཏྟཱ. ཙིརཀཏཙིརབྷཱསིཏཱནཾ ཨསམྨུསྶནབྷཱཝཏོ ཨསམྨུསྶནཏཱ. ཨུཔཊྛཱནལཀྑཎེ ཛོཏནལཀྑཎེ ཙ ཨིནྡཊྛཾ ཀཱརེཏཱིཏི ཨིནྡྲིཡཾ. སཏིསངྑཱཏཾ ཨིནྡྲིཡཾ སཏིནྡྲིཡཾ. པམཱདེ ན ཀམྤཏཱིཏི སཏིབལཾ. ཡཱཐཱཝསཏི ནིཡྻཱནིཀསཏི ཀུསལསཏཱིཏི སམྨཱསཏི.

༡༦. པཉྙིནྡྲིཡནིདྡེསེ ཏསྶ ཏསྶ ཨཏྠསྶ པཱཀཊཀརཎསངྑཱཏེན པཉྙཱཔནཊྛེན པཉྙཱ. ཏེན ཏེན ཝཱ ཨནིཙྩཱདིནཱ པཀཱརེན དྷམྨེ ཛཱནཱཏཱིཏིཔི པཉྙཱ. ཨིདམསྶཱ སབྷཱཝཔདཾ. པཛཱནནཱཀཱརོ པཛཱནནཱ. ཨནིཙྩཱདཱིནི ཝིཙིནཱཏཱིཏི ཝིཙཡོ. པཝིཙཡོཏི ཨུཔསགྒེན པདཾ ཝཌྜྷིཏཾ ¶ . ཙཏུསཙྩདྷམྨེ ཝིཙིནཱཏཱིཏི དྷམྨཝིཙཡོ. ཨནིཙྩཱདཱིནཾ སལླཀྑཎཝསེན སལླཀྑཎཱ. སཱཡེཝ པུན ཨུཔསགྒནཱནཏྟེན ཨུཔལཀྑཎཱ པཙྩུཔལཀྑཎཱཏི ཝུཏྟཱ. པཎྜིཏསྶ བྷཱཝོ པཎྜིཙྩཾ. ཀུསལསྶ བྷཱཝོ ཀོསལླཾ. ནིཔུཎསྶ བྷཱཝོ ནེཔུཉྙཾ. ཨནིཙྩཱདཱིནཾ ཝིབྷཱཝནཝསེན ཝེབྷབྱཱ. ཨནིཙྩཱདཱིནཾ ཙིནྟནཀཝསེན ཙིནྟཱ. ཡསྶ ཝཱ ཨུཔྤཛྫཏི ཏཾ ཨནིཙྩཱདཱིནི ཙིནྟཱཔེཏཱིཏིཔི ཙིནྟཱ. ཨནིཙྩཱདཱིནི ཨུཔཔརིཀྑཏཱིཏི ཨུཔཔརིཀྑཱ. བྷཱུརཱིཏི པཐཝིཡཱ ¶ ནཱམཾ. ཨཡམྤི སཎྷཊྛེན ཝིཏྠཊཊྛེན ཙ བྷཱུརཱི ཝིཡཱཏི བྷཱུརཱི. ཏེན ཝུཏྟཾ – ‘‘བྷཱུརཱི ཝུཙྩཏི པཐཝཱི ¶ . ཏཱཡ པཐཝཱིསམཱཡ ཝིཏྠཊཱཡ ཝིཔུལཱཡ པཉྙཱཡ སམནྣཱགཏོཏི བྷཱུརིཔཉྙོཏི (མཧཱནི. ༢༧). ཨཔིཙ པཉྙཱཡ ཨེཏཾ ཨདྷིཝཙནཾ བྷཱུརཱི’’ཏི. བྷཱུཏེ ཨཏྠེ རམཏཱིཏིཔི བྷཱུརཱི. ཨསནི ཝིཡ སིལུཙྩཡེ ཀིལེསེ མེདྷཏི ཧིཾསཏཱིཏི མེདྷཱ. ཁིཔྤཾ གཧཎདྷཱརཎཊྛེན ཝཱ མེདྷཱ. ཡསྶ ཨུཔྤཛྫཏི ཏཾ ཨཏྟཧིཏཔཊིཔཏྟིཡཾ སམྤཡུཏྟདྷམྨེ ཙ ཡཱཐཱཝལཀྑཎཔཊིཝེདྷེ པརིནེཏཱིཏི པརིཎཱཡིཀཱ. ཨནིཙྩཱདིཝསེན དྷམྨེ ཝིཔསྶཏཱིཏི ཝིཔསྶནཱ. སམྨཱ པཀཱརེཧི ཨནིཙྩཱདཱིནི ཛཱནཱཏཱིཏི སམྤཛཉྙཾ. ཨུཔྤཐཔཊིཔནྣེ སིནྡྷཝེ ཝཱིཐིཨཱརོཔནཏྠཾ པཏོདོ ཝིཡ ཨུཔྤཐེ དྷཱཝནཀཾ ཀཱུཊཙིཏྟཾ ཝཱིཐིཨཱརོཔནཏྠཾ ཝིཛ྄ཛྷཏཱིཏི པཏོདོ ཝིཡ པཏོདོ. དསྶནལཀྑཎེ ཨིནྡཊྛཾ ཀཱརེཏཱིཏི ཨིནྡྲིཡཾ. པཉྙཱསངྑཱཏཾ ཨིནྡྲིཡཾ པཉྙིནྡྲིཡཾ. ཨཝིཛྫཱཡ ན ཀམྤཏཱིཏི པཉྙཱབལཾ. ཀིལེསཙྪེདནཊྛེན པཉྙཱཝ སཏྠཾ པཉྙཱསཏྠཾ. ཨཙྩུགྒཏཊྛེན པཉྙཱཝ པཱསཱདོ པཉྙཱཔཱསཱདོ.

ཨཱལོཀནཊྛེན པཉྙཱཝ ཨཱལོཀོ པཉྙཱཨཱལོཀོ. ཨོབྷཱསནཊྛེན པཉྙཱཝ ཨོབྷཱསོ པཉྙཱཨོབྷཱསོ. པཛྫོཏནཊྛེན པཉྙཱཝ པཛྫོཏོ པཉྙཱཔཛྫོཏོ. པཉྙཝཏོ ཧི ཨེཀཔལླངྐེན ནིསིནྣསྶ དསསཧསྶིལོཀདྷཱཏུ ཨེཀཱལོཀཱ ཨེཀོབྷཱསཱ ཨེཀཔཛྫོཏཱ ཧོཏི, ཏེནེཏཾ ཝུཏྟཾ. ཨིམེསུ པན ཏཱིསུ པདེསུ ཨེཀཔདེནཔི ཨེཏསྨིཾ ཨཏྠེ སིདྡྷེ, ཡཱནི པནེཏཱནི ‘‘ཙཏྟཱརོམེ, བྷིཀྑཝེ, ཨཱལོཀཱ. ཀཏམེ ཙཏྟཱརོ? ཙནྡཱལོཀོ སཱུརིཡཱལོཀོ ཨགྱཱལོཀོ པཉྙཱལོཀོ. ཨིམེ ཁོ, བྷིཀྑཝེ, ཙཏྟཱརོ ཨཱལོཀཱ. ཨེཏདགྒཾ, བྷིཀྑཝེ, ཨིམེསཾ ཙཏུནྣཾ ཨཱལོཀཱནཾ ཡདིདཾ པཉྙཱལོཀོ’’. ཏཐཱ ‘‘ཙཏྟཱརོམེ, བྷིཀྑཝེ, ཨོབྷཱསཱ…པེ… ཙཏྟཱརོམེ, བྷིཀྑཝེ, པཛྫོཏཱ’’ཏི (ཨ. ནི. ༤.༡༤༤) སཏྟཱནཾ ཨཛ྄ཛྷཱསཡཝསེན སུཏྟཱནི དེསིཏཱནི, ཏདནུརཱུཔེནེཝ ཨིདྷཱཔི དེསནཱ ཀཏཱ. ཨཏྠོ ཧི ཨནེཀེཧི ཨཱཀཱརེཧི ཝིབྷཛྫམཱནོ སུཝིབྷཏྟོ ཧོཏི. ཨཉྙཐཱ ཙ ཨཉྙོ བུཛ྄ཛྷཏི, ཨཉྙཐཱ ཙ ཨཉྙོཏི.

རཏིཀརཎཊྛེན པན རཏིདཱཡཀཊྛེན རཏིཛནཀཊྛེན ཙིཏྟཱིཀཏཊྛེན དུལླབྷཔཱཏུབྷཱཝཊྛེན ཨཏུལཊྛེན ¶ ཨནོམསཏྟཔརིབྷོགཊྛེན ཙ པཉྙཱཝ རཏནཾ པཉྙཱརཏནཾ. ན ཏེན སཏྟཱ མུཡ྄ཧནྟི, སཡཾ ཝཱ ཨཱརམྨཎེ ན མུཡ྄ཧཏཱིཏི ¶ ཨམོཧོ. དྷམྨཝིཙཡཔདཾ ཝུཏྟཏྠམེཝ. ཀསྨཱ པནེཏཾ པུན ཝུཏྟནྟི? ཨམོཧསྶ མོཧཔཊིཔཀྑབྷཱཝདཱིཔནཏྠཾ ¶ . ཏེནེཏཾ དཱིཔེཏི – ཡྭཱཡཾ ཨམོཧོ སོ ན ཀེཝལཾ མོཧཏོ ཨཉྙོ དྷམྨོ, མོཧསྶ པན པཊིཔཀྑོ, དྷམྨཝིཙཡསངྑཱཏོ ཨམོཧོ ནཱམ ཨིདྷ ཨདྷིཔྤེཏོཏི. སམྨཱདིཊྛཱིཏི ཡཱཐཱཝནིཡྻཱནིཀཀུསལདིཊྛི.

༡༩. ཛཱིཝིཏིནྡྲིཡནིདྡེསེ ཡོ ཏེསཾ ཨརཱུཔཱིནཾ དྷམྨཱནཾ ཨཱཡཱུཏི ཏེསཾ སམྤཡུཏྟཀཱནཾ ཨརཱུཔདྷམྨཱནཾ ཡོ ཨཱཡཱཔནཊྛེན ཨཱཡུ, ཏསྨིཉྷི སཏི ཨརཱུཔདྷམྨཱ ཨཡནྟི གཙྪནྟི པཝཏྟནྟི, ཏསྨཱ ཨཱཡཱུཏི ཝུཙྩཏི. ཨིདམསྶ སབྷཱཝཔདཾ. ཡསྨཱ པནེཏེ དྷམྨཱ ཨཱཡུསྨིཾཡེཝ སཏི ཏིཊྛནྟི ཡཔེནྟི ཡཱཔེནྟི ཨིརིཡནྟི ཝཏྟནྟི པཱལཡནྟི, ཏསྨཱ ཋིཏཱིཏིཨཱདཱིནི ཝུཏྟཱནི. ཝཙནཏྠོ པནེཏྠ – ཨེཏཱཡ ཏིཊྛནྟཱིཏི ཋིཏི. ཡཔེནྟཱིཏི ཡཔནཱ. ཏཐཱ ཡཱཔནཱ. ཨེཝཾ བུཛ྄ཛྷནྟཱནཾ པན ཝསེན པུརིམཔདེ རསྶཏྟཾ ཀཏཾ. ཨེཏཱཡ ཨིརིཡནྟཱིཏི ཨིརིཡནཱ. ཝཏྟནྟཱིཏི ཝཏྟནཱ. པཱལཡནྟཱིཏི པཱལནཱ. ཛཱིཝནྟི ཨེཏེནཱཏི ཛཱིཝིཏཾ. ཨནུཔཱལནལཀྑཎེ ཨིནྡཊྛཾ ཀཱརེཏཱིཏི ཛཱིཝིཏིནྡྲིཡཾ.

༣༠. ཧིརིབལནིདྡེསེ ཡཾ ཏསྨིཾ སམཡེཏི ཡེན དྷམྨེན ཏསྨིཾ སམཡེ. ལིངྒཝིཔལླཱསཾ ཝཱ ཀཏྭཱ ཡོ དྷམྨོ ཏསྨིཾ སམཡེཏིཔི ཨཏྠོ ཝེདིཏབྦོ. ཧིརིཡིཏབྦེནཱཏི ཨུཔཡོགཏྠེ ཀརཎཝཙནཾ. ཧིརིཡིཏབྦཡུཏྟཀཾ ཀཱཡདུཙྩརིཏཱདིདྷམྨཾ ཧིརིཡཏི ཛིགུཙྪཏཱིཏི ཨཏྠོ. པཱཔཀཱནནྟི ལཱམཀཱནཾ. ཨཀུསལཱནཾ དྷམྨཱནནྟི ཨཀོསལླསམྦྷཱུཏཱནཾ དྷམྨཱནཾ. སམཱཔཏྟིཡཱཏི ཨིདམྤི ཨུཔཡོགཏྠེ ཀརཎཝཙནཾ. ཏེསཾ དྷམྨཱནཾ སམཱཔཏྟིཾ པཊིལཱབྷཾ སམངྒཱིབྷཱཝཾ ཧིརིཡཏི ཛིགུཙྪཏཱིཏི ཨཏྠོ.

༣༡. ཨོཏྟཔྤབལནིདྡེསེ ཨོཏྟཔྤིཏབྦེནཱཏི ཧེཏྭཏྠེ ཀརཎཝཙནཾ. ཨོཏྟཔྤིཏབྦཡུཏྟཀེན ཨོཏྟཔྤསྶ ཧེཏུབྷཱུཏེན ཀཱཡདུཙྩརིཏཱདིནཱ ཝུཏྟཔྤཀཱརཱཡ ཙ སམཱཔཏྟིཡཱ ཨོཏྟཔྤསྶ ཧེཏུབྷཱུཏཱཡ ཨོཏྟཔྤཏི, བྷཱཡཏཱིཏི ཨཏྠོ.

༣༢. ཨལོབྷནིདྡེསེ ཨལུབྦྷནཀཝསེན ཨལོབྷོ. ན ལུབྦྷཏཱིཏིཔི ཨལོབྷོ. ཨིདམསྶ སབྷཱཝཔདཾ. ཨལུབྦྷནཱཏི ཨལུབྦྷནཱཀཱརོ. ལོབྷསམངྒཱི པུགྒལོ ལུབྦྷིཏོ ནཱམ. ན ལུབྦྷིཏོ ཨལུབྦྷིཏོ ¶ ¶ . ཨལུབྦྷིཏསྶ ¶ བྷཱཝོ ཨལུབྦྷིཏཏྟཾ. སཱརཱགཔཊིཔཀྑཏོ ན སཱརཱགོཏི ཨསཱརཱགོ. ཨསཱརཛྫནཱཏི ཨསཱརཛྫནཱཀཱརོ. ཨསཱརཛྫིཏསྶ བྷཱཝོ ཨསཱརཛྫིཏཏྟཾ. ན ཨབྷིཛ྄ཛྷཱཡཏཱིཏི ཨནབྷིཛ྄ཛྷཱ. ཨལོབྷོ ཀུསལམཱུལནྟི ཨལོབྷསངྑཱཏཾ ཀུསལམཱུལཾ. ཨལོབྷོ ཧི ཀུསལཱནཾ དྷམྨཱནཾ མཱུལཾ པཙྩཡཊྛེནཱཏི ཀུསལམཱུལཾ. ཀུསལཉྩ ཏཾ པཙྩཡཊྛེན མཱུལཉྩཱཏིཔི ཀུསལམཱུལཾ.

༣༣. ཨདོསནིདྡེསེ ཨདུསྶནཀཝསེན ཨདོསོ. ན དུསྶཏཱིཏིཔི ཨདོསོ. ཨིདམསྶ སབྷཱཝཔདཾ. ཨདུསྶནཱཏི ཨདུསྶནཱཀཱརོ. ཨདུསྶིཏསྶ བྷཱཝོ ཨདུསྶིཏཏྟཾ. བྱཱཔཱདཔཊིཔཀྑཏོ ན བྱཱཔཱདོཏི ཨབྱཱཔཱདོ. ཀོདྷདུཀྑཔཊིཔཀྑཏོ ན བྱཱཔཛྫོཏི ཨབྱཱཔཛྫོ. ཨདོསསངྑཱཏཾ ཀུསལམཱུལཾ ཨདོསོ ཀུསལམཱུལཾ. ཏཾ ཝུཏྟཏྠམེཝ.

༤༠-༤༡. ཀཱཡཔསྶདྡྷིནིདྡེསཱདཱིསུ ཡསྨཱ ཀཱཡོཏི ཏཡོ ཁནྡྷཱ ཨདྷིཔྤེཏཱ, ཏསྨཱ ཝེདནཱཀྑནྡྷསྶཱཏིཨཱདི ཝུཏྟཾ. པསྶམྦྷནྟི ཨེཏཱཡ ཏེ དྷམྨཱ, ཝིགཏདརཐཱ བྷཝནྟི, སམསྶཱསཔྤཏྟཱཏི པསྶདྡྷི. དུཏིཡཔདཾ ཨུཔསགྒཝསེན ཝཌྜྷིཏཾ. པསྶམྦྷནཱཏི པསྶམྦྷནཱཀཱརོ. དུཏིཡཔདཾ ཨུཔསགྒཝསེན ཝཌྜྷིཏཾ. པསྶདྡྷིསམངྒིཏཱཡ པཊིཔྤསྶམྦྷིཏསྶ ཁནྡྷཏྟཡསྶ བྷཱཝོ པཊིཔྤསྶམྦྷིཏཏྟཾ. སབྦཔདེཧིཔི ཏིཎྞཾ ཁནྡྷཱནཾ ཀིལེསདརཐཔཊིཔྤསྶདྡྷི ཨེཝ ཀཐིཏཱ. དུཏིཡནཡེན ཝིཉྙཱཎཀྑནྡྷསྶ དརཐཔཊིཔྤསྶདྡྷི ཀཐིཏཱ.

༤༢-༤༣. ལཧུཏཱཏི ལཧུཏཱཀཱརོ. ལཧུཔརིཎཱམཏཱཏི ལཧུཔརིཎཱམོ ཨེཏེསཾ དྷམྨཱནནྟི ལཧུཔརིཎཱམཱ; ཏེསཾ བྷཱཝོ ལཧུཔརིཎཱམཏཱ; སཱིགྷཾ སཱིགྷཾ པརིཝཏྟནསམཏྠཏཱཏི ཝུཏྟཾ ཧོཏི. ཨདནྡྷནཏཱཏི གརུབྷཱཝཔཊིཀྑེཔཝཙནམེཏཾ; ཨབྷཱརིཡཏཱཏི ཨཏྠོ. ཨཝིཏྠནཏཱཏི མཱནཱདིཀིལེསབྷཱརསྶ ཨབྷཱཝེན ཨཐདྡྷཏཱ. ཨེཝཾ པཋམེན ཏིཎྞཾ ཁནྡྷཱནཾ ལཧུཏཱཀཱརོ ཀཐིཏོ. དུཏིཡེན ཝིཉྙཱཎཀྑནྡྷསྶ ལཧུཏཱཀཱརོ ཀཐིཏོ.

༤༤-༤༥. མུདུཏཱཏི ¶ མུདུབྷཱཝོ. མདྡཝཏཱཏི མདྡཝཾ ཝུཙྩཏི སིནིདྡྷཾ, མཊྛཾ; མདྡཝསྶ བྷཱཝོ མདྡཝཏཱ. ཨཀཀྑལ༹ཏཱཏི ཨཀཀྑལ༹བྷཱཝོ. ཨཀཐིནཏཱཏི ཨཀཐིནབྷཱཝོ. ཨིདྷཱཔི པུརིམནཡེན ཏིཎྞཾ ཁནྡྷཱནཾ, པཙྪིམནཡེན ཝིཉྙཱཎཀྑནྡྷསྶ མུདུཏཱཀཱརོཝ ཀཐིཏོ.

༤༦-༤༧. ཀམྨཉྙཏཱཏི ¶ ¶ ཀམྨནི སཱདྷུཏཱ; ཀུསལཀིརིཡཱཡ ཝིནིཡོགཀྑམཏཱཏི ཨཏྠོ. སེསཔདདྭཡཾ བྱཉྫནཝསེན ཝཌྜྷིཏཾ. པདདྭཡེནཱཔི ཧི པུརིམནཡེན ཏིཎྞཾ ཁནྡྷཱནཾ, པཙྪིམནཡེན ཝིཉྙཱཎཀྑནྡྷསྶ ཀམྨནིཡཱཀཱརོཝ ཀཐིཏོ.

༤༨-༤༩. པགུཎཏཱཏི པགུཎབྷཱཝོ, ཨནཱཏུརཏཱ ནིགྒིལཱནཏཱཏི ཨཏྠོ. སེསཔདདྭཡཾ བྱཉྫནཝསེན ཝཌྜྷིཏཾ. ཨིདྷཱཔི པུརིམནཡེན ཏིཎྞཾ ཁནྡྷཱནཾ, པཙྪིམནཡེན ཝིཉྙཱཎཀྑནྡྷསྶ ནིགྒིལཱནཱཀཱརོཝ ཀཐིཏོ.

༥༠-༥༡. ཨུཛུཀཏཱཏི ཨུཛུཀབྷཱཝོ, ཨུཛུཀེནཱཀཱརེན པཝཏྟནཏཱཏི ཨཏྠོ. ཨུཛུཀསྶ ཁནྡྷཏྟཡསྶ ཝིཉྙཱཎཀྑནྡྷསྶ ཙ བྷཱཝོ ཨུཛུཀཏཱ. ཨཛིམྷཏཱཏི གོམུཏྟཝངྐབྷཱཝཔཊིཀྑེཔོ. ཨཝངྐཏཱཏི ཙནྡལེཁཱཝངྐབྷཱཝཔཊིཀྑེཔོ. ཨཀུཊིལཏཱཏི ནངྒལཀོཊིཝངྐབྷཱཝཔཊིཀྑེཔོ.

ཡོ ཧི པཱཔཾ ཀཏྭཱཝ ‘ན ཀརོམཱི’ཏི བྷཱསཏི, སོ གནྟྭཱ པཙྩོསཀྐནཏཱཡ ‘གོམུཏྟཝངྐོ’ ནཱམ ཧོཏི. ཡོ པཱཔཾ ཀརོནྟོཝ ‘བྷཱཡཱམཧཾ པཱཔསྶཱ’ཏི བྷཱསཏི, སོ ཡེབྷུཡྻེན ཀུཊིལཏཱཡ ‘ཙནྡལེཁཱཝངྐོ’ ནཱམ ཧོཏི. ཡོ པཱཔཾ ཀརོནྟོཝ ‘ཀོ པཱཔསྶ ན བྷཱཡེཡྻཱ’ཏི བྷཱསཏི, སོ ནཱཏིཀུཊིལཏཱཡ ‘ནངྒལཀོཊིཝངྐོ’ ནཱམ ཧོཏི. ཡསྶ ཝཱ ཏཱིཎིཔི ཀམྨདྭཱརཱནི ཨསུདྡྷཱནི, སོ ‘གོམུཏྟཝངྐོ’ ནཱམ ཧོཏི. ཡསྶ ཡཱནི ཀཱནིཙི དྭེ, སོ ‘ཙནྡལེཁཱཝངྐོ’ ནཱམ. ཡསྶ ཡཾཀིཉྩི ཨེཀཾ, སོ ‘ནངྒལཀོཊིཝངྐོ ནཱམ.

དཱིགྷབྷཱཎཀཱ པནཱཧུ – ཨེཀཙྩོ བྷིཀྑུ སབྦཝཡེ ཨེཀཝཱིསཏིཡཱ ཨནེསནཱསུ, ཚསུ ཙ ཨགོཙརེསུ ཙརཏི, ཨཡཾ ‘གོམུཏྟཝངྐོ’ ནཱམ. ཨེཀོ པཋམཝཡེ ཙཏུཔཱརིསུདྡྷིསཱིལཾ པརིཔཱུརེཏི, ལཛྫཱི ཀུཀྐུཙྩཀོ སིཀྑཱཀཱམོ ཧོཏི, མཛ྄ཛྷིམཝཡཔཙྪིམཝཡེསུ པུརིམསདིསོ, ཨཡཾ ¶ ‘ཙནྡལེཁཱཝངྐོ’ ནཱམ. ཨེཀོ པཋམཝཡེ མཛ྄ཛྷིམཝཡེཔི ཙཏུཔཱརིསུདྡྷིསཱིལཾ པཱུརེཏི, ལཛྫཱི ཀུཀྐུཙྩཀོ སིཀྑཱཀཱམོ ཧོཏི, པཙྪིམཝཡེ པུརིམསདིསོ. ཨཡཾ ‘ནངྒལཀོཊིཝངྐོ’ ནཱམ.

ཏསྶ ཀིལེསཝསེན ཨེཝཾ ཝངྐསྶ པུགྒལསྶ བྷཱཝོ ཛིམྷཏཱ ཝངྐཏཱ ཀུཊིལཏཱཏི ཝུཙྩཏི. ཏཱསཾ པཊིཀྑེཔཝསེན ཨཛིམྷཏཱདིཀཱ ཝུཏྟཱ. ཁནྡྷཱདྷིཊྛཱནཱཝ ¶ དེསནཱ ཀཏཱ. ཁནྡྷཱནཉྷི ཨེཏཱ ཨཛིམྷཏཱདིཀཱ, ནོ པུགྒལསྶཱཏི. ཨེཝཾ སབྦེཧིཔི ཨིམེཧི པདེཧི པུརིམནཡེན ¶ ཏིཎྞཾ ཁནྡྷཱནཾ, པཙྪིམནཡེན ཝིཉྙཱཎཀྑནྡྷསྶཱཏི ཨརཱུཔཱིནཾ དྷམྨཱནཾ ནིཀྐིལེསཏཱཡ ཨུཛུཏཱཀཱརོཝ ཀཐིཏོཏི ཝེདིཏབྦོ.

ཨིདཱནི ཡྭཱཡཾ ཡེཝཱཔནཱཏི ཨཔྤནཱཝཱརོ ཝུཏྟོ, ཏེན དྷམྨུདྡེསཝཱརེ དསྶིཏཱནཾ ‘ཡེཝཱཔནཀཱནཾ’ཡེཝ སངྑེཔཏོ ནིདྡེསོ ཀཐིཏོ ཧོཏཱིཏི.

ནིདྡེསཝཱརཀཐཱ ནིཊྛིཏཱ.

ཨེཏྟཱཝཏཱ པུཙྪཱ སམཡནིདྡེསོ དྷམྨུདྡེསོ ཨཔྤནཱཏི ཨུདྡེསཝཱརེ ཙཏཱུཧི པརིཙྪེདེཧི, པུཙྪཱ སམཡནིདྡེསོ དྷམྨུདྡེསོ ཨཔྤནཱཏི ནིདྡེསཝཱརེ ཙཏཱུཧི པརིཙྪེདེཧཱིཏི ཨཊྛཔརིཙྪེདཔཊིམཎྜིཏོ དྷམྨཝཝཏྠཱནཝཱརོ ནིཊྛིཏོཝ ཧོཏི.

ཀོཊྛཱསཝཱརོ

༥༨-༡༢༠. ཨིདཱནི ཏསྨིཾ ཁོ པན སམཡེ ཙཏྟཱརོ ཁནྡྷཱ ཧོནྟཱིཏི སངྒཧཝཱརོ ཨཱརདྡྷོ. སོ ཨུདྡེསནིདྡེསཔཊིནིདྡེསཱནཾ ཝསེན ཏིཝིདྷོ ཧོཏི. ཏཏྠ ‘ཏསྨིཾ ཁོ པན སམཡེ ཙཏྟཱརོ ཁནྡྷཱ’ཏི ཨེཝམཱདིཀོ ཨུདྡེསོ. ཀཏམེ ཏསྨིཾ སམཡེ ཙཏྟཱརོ ཁནྡྷཱ’ཏིཨཱདིཀོ ནིདྡེསོ. ཀཏམོ ཏསྨིཾ སམཡེ ཝེདནཱཀྑནྡྷོཏིཨཱདིཀོ པཊིནིདྡེསོཏི ཝེདིཏབྦོ.

ཏཏྠ ཨུདྡེསཝཱརེ ཙཏྟཱརོ ཁནྡྷཱཏིཨཱདཡོ ཏེཝཱིསཏི ཀོཊྛཱསཱ ཧོནྟི. ཏེསཾ ཨེཝམཏྠོ ཝེདིཏབྦོ – ཡསྨིཾ སམཡེ ཀཱམཱཝཙརཾ པཋམཾ མཧཱཀུསལཙིཏྟཾ ཨུཔྤཛྫཏི, ཡེ ཏསྨིཾ སམཡེ ཙིཏྟངྒཝསེན ཨུཔྤནྣཱ, ཋཔེཏྭཱ ཡེཝཱཔནཀེ, པཱལི༹ཨཱརུལ༹ྷཱ ཨཏིརེཀཔཎྞཱསདྷམྨཱ, ཏེ སབྦེཔི སངྒཡ྄ཧམཱནཱ རཱསཊྛེན ཙཏྟཱརོཝ ཁནྡྷཱ ཧོནྟི ¶ . ཧེཊྛཱ ཝུཏྟེན ཨཱཡཏནཊྛེན དྭེ ཨཱཡཏནཱནི ཧོནྟི. སབྷཱཝཊྛེན སུཉྙཏཊྛེན ནིསྶཏྟཊྛེན དྭེཝ དྷཱཏུཡོ ཧོནྟི. པཙྩཡསངྑཱཏེན ཨཱཧཱརཊྛེན ཏཡོཝེཏྠ དྷམྨཱ ཨཱཧཱརཱ ཧོནྟི. ཨཝསེསཱ ནོ ཨཱཧཱརཱ.

‘ཀིཾ ¶ པནེཏེ ཨཉྙམཉྙཾ ཝཱ ཏཾསམུཊྛཱནརཱུཔསྶ ཝཱ པཙྩཡཱ ན ཧོནྟཱི’ཏི? ‘ནོ ན ཧོནྟི. ཨིམེ པན ཏཐཱ ཙ ཧོནྟི, ཨཉྙཐཱ ཙཱཏི སམཱནེཔི པཙྩཡཏྟེ ཨཏིརེཀཔཙྩཡཱ ཧོནྟི, ཏསྨཱ ¶ ཨཱཧཱརཱཏི ཝུཏྟཱ. ཀཐཾ? ཨེཏེསུ ཧི ཕསྶཱཧཱརོ, ཡེསཾ དྷམྨཱནཾ ཨཝསེསཱ ཙིཏྟཙེཏསིཀཱ པཙྩཡཱ ཧོནྟི, ཏེསཉྩ པཙྩཡོ ཧོཏི, ཏིསྶོ ཙ ཝེདནཱ ཨཱཧརཏི. མནོསཉྩེཏནཱཧཱརོ ཏེསཉྩ པཙྩཡོ ཧོཏི ཏཡོ ཙ བྷཝེ ཨཱཧརཏི. ཝིཉྙཱཎཱཧཱརོ ཏེསཉྩ པཙྩཡོ ཧོཏི པཊིསནྡྷིནཱམརཱུཔཉྩ ཨཱཧརཏཱི’ཏི. ‘ནནུ ཙ སོ ཝིཔཱཀོཝ ཨིདཾ པན ཀུསལཝིཉྙཱཎ’ནྟི? ‘ཀིཉྩཱཔི ཀུསལཝིཉྙཱཎཾ, ཏཾསརིཀྑཏཱཡ པན ཝིཉྙཱཎཱཧཱརོ’ཏྭེཝ ཝུཏྟཾ. ཨུཔཏྠམྦྷཀཊྛེན ཝཱ ཨིམེ ཏཡོ ཨཱཧཱརཱཏི ཝུཏྟཱ. ཨིམེ ཧི སམྤཡུཏྟདྷམྨཱནཾ, ཀབལཱི༹ཀཱརཱཧཱརོ ཝིཡ རཱུཔཀཱཡསྶ, ཨུཔཏྠམྦྷཀཔཙྩཡཱ ཧོནྟི. ཏེནེཝ ཝུཏྟཾ – ‘‘ཨརཱུཔིནོ ཨཱཧཱརཱ སམྤཡུཏྟཀཱནཾ དྷམྨཱནཾ ཏཾསམུཊྛཱནཱནཉྩ རཱུཔཱནཾ ཨཱཧཱརཔཙྩཡེན པཙྩཡོ’’ཏི (པཊྛཱ. ༡.༡.༡༥).

ཨཔརོ ནཡོ – ཨཛ྄ཛྷཏྟིཀསནྟཏིཡཱ ཝིསེསཔཙྩཡཏྟཱ ཀབལཱི༹ཀཱརཱཧཱརོ ཙ ཨིམེ ཙ ཏཡོ དྷམྨཱ ཨཱཧཱརཱཏི ཝུཏྟཱ. ཝིསེསཔཙྩཡོ ཧི ཀབལཱི༹ཀཱརཱཧཱརབྷཀྑཱནཾ སཏྟཱནཾ རཱུཔཀཱཡསྶ ཀབལཱི༹ཀཱརོ ཨཱཧཱརོ; ནཱམཀཱཡེ ཝེདནཱཡ ཕསྶོ, ཝིཉྙཱཎསྶ མནོསཉྩེཏནཱ, ནཱམརཱུཔསྶ ཝིཉྙཱཎཾ. ཡཐཱཧ –

‘‘སེཡྻཐཱཔི, བྷིཀྑཝེ, ཨཡཾ ཀཱཡོ ཨཱཧཱརཊྛིཏིཀོ, ཨཱཧཱརཾ པཊིཙྩ ཏིཊྛཏི, ཨནཱཧཱརོ ནོ ཏིཊྛཏི’’ (སཾ. ནི. ༥.༡༨༣). ཏཐཱ ཕསྶཔཙྩཡཱ ཝེདནཱ, སངྑཱརཔཙྩཡཱ ཝིཉྙཱཎཾ, ཝིཉྙཱཎཔཙྩཡཱ ནཱམརཱུཔནྟི (སཾ. ནི. ༢.༡).

ཨདྷིཔཏིཡཊྛེན པན ཨཊྛེཝ དྷམྨཱ ཨིནྡྲིཡཱནི ཧོནྟི, ན ཨཝསེསཱ. ཏེན ཝུཏྟཾ – ཨཊྛིནྡྲིཡཱནི ཧོནྟཱིཏི. ཨུཔནིཛ྄ཛྷཱཡནཊྛེན པཉྩེཝ དྷམྨཱ ཛྷཱནངྒཱནི ཧོནྟི. ཏེན ཝུཏྟཾ – པཉྩངྒིཀཾ ཛྷཱནཾ ཧོཏཱིཏི.

ནིཡྻཱནཊྛེན ¶ ཙ ཧེཏྭཊྛེན ཙ པཉྩེཝ དྷམྨཱ མགྒངྒཱནི ཧོནྟི. ཏེན ཝུཏྟཾ – པཉྩངྒིཀོ མགྒོ ཧོཏཱིཏི. ཀིཉྩཱཔི ཧི ཨཊྛངྒིཀོ ཨརིཡམགྒོ, ལོཀིཡཙིཏྟེ ¶ པན ཨེཀཀྑཎེ ཏིསྶོ ཝིརཏིཡོ ན ལབྦྷནྟི, ཏསྨཱ པཉྩངྒིཀོཏི ཝུཏྟོ. ‘ནནུ ཙ ‘‘ཡཐཱགཏམགྒོཏི ཁོ, བྷིཀྑུ, ཨརིཡསྶེཏཾ ཨཊྛངྒིཀསྶ མགྒསྶ ཨདྷིཝཙན’’ནྟི (སཾ. ནི. ༤.༢༤༥) ཨིམསྨིཾ སུཏྟེ ‘ཡཐེཝ ལོཀུཏྟརམགྒོ ཨཊྛངྒིཀོ, པུབྦབྷཱགཝིཔསྶནཱམགྒོཔི ཏཐེཝ ཨཊྛངྒིཀོ’ཏི ཡཐཱགཏཝཙནེན ཨིམསྶཏྠསྶ དཱིཔིཏཏྟཱ, ལོཀིཡམགྒེནཱཔི ཨཊྛངྒིཀེན བྷཝིཏབྦནྟི? ན བྷཝིཏབྦཾ ¶ . ཨཡཉྷི སུཏྟནྟིཀདེསནཱ ནཱམ པརིཡཱཡདེསནཱ. ཏེནཱཧ – ‘‘པུབྦེཝ ཁོ པནསྶ ཀཱཡཀམྨཾ ཝཙཱིཀམྨཾ ཨཱཛཱིཝོ སུཔརིསུདྡྷོ ཧོཏཱི’’ཏི (མ. ནི. ༣.༤༣༡). ཨཡཾ པན ནིཔྤརིཡཱཡདེསནཱ. ལོཀིཡཙིཏྟསྨིཉྷི ཏིསྶོ ཝིརཏིཡོ ཨེཀཀྑཎེ ན ལབྦྷནྟི, ཏསྨཱ ‘པཉྩངྒིཀོ’ཝ ཝུཏྟོཏི.

ཨཀམྤིཡཊྛེན པན སཏྟེཝ དྷམྨཱ བལཱནི ཧོནྟི. མཱུལཊྛེན ཏཡོཝ དྷམྨཱ ཧེཏཱུ. ཕུསནཊྛེན ཨེཀོཝ དྷམྨོ ཕསྶོ. ཝེདཡིཏཊྛེན ཨེཀོཝ དྷམྨོ ཝེདནཱ. སཉྫཱནནཊྛེན ཨེཀོཝ དྷམྨོ སཉྙཱ. ཙེཏཡནཊྛེན ཨེཀོཝ དྷམྨོ ཙེཏནཱ. ཙིཏྟཝིཙིཏྟཊྛེན ཨེཀོཝ དྷམྨོ ཙིཏྟཾ. རཱསཊྛེན ཙེཝ ཝེདཡིཏཊྛེན ཙ ཨེཀོཝ དྷམྨོ ཝེདནཱཀྑནྡྷོ. རཱསཊྛེན ཙ སཉྫཱནནཊྛེན ཙ ཨེཀོཝ དྷམྨོ སཉྙཱཀྑནྡྷོ. རཱསཊྛེན ཙ ཨབྷིསངྑརཎཊྛེན ཙ ཨེཀོཝ དྷམྨོ སངྑཱརཀྑནྡྷོ. རཱསཊྛེན ཙ ཙིཏྟཝིཙིཏྟཊྛེན ཙ ཨེཀོཝ དྷམྨོ ཝིཉྙཱཎཀྑནྡྷོ. ཝིཛཱནནཊྛེན ཙེཝ ཧེཊྛཱ ཝུཏྟཨཱཡཏནཊྛེན ཙ ཨེཀམེཝ མནཱཡཏནཾ. ཝིཛཱནནཊྛེན ཙ ཨདྷིཔཏིཡཊྛེན ཙ ཨེཀམེཝ མནིནྡྲིཡཾ. ཝིཛཱནནཊྛེན ཙ སབྷཱཝསུཉྙཏནིསྶཏྟཊྛེན ཙ ཨེཀོཝ དྷམྨོ མནོཝིཉྙཱཎདྷཱཏུ ནཱམ ཧོཏི, ན ཨཝསེསཱ. ཋཔེཏྭཱ པན ཙིཏྟཾ, ཡཐཱཝུཏྟེན ཨཏྠེན ཨཝསེསཱ སབྦེཔི དྷམྨཱ ཨེཀཾ དྷམྨཱཡཏནམེཝ, ཨེཀཱ ཙ དྷམྨདྷཱཏུཡེཝ ཧོཏཱིཏི.

ཡེ ཝཱ པན ཏསྨིཾ སམཡེཏི ཨིམིནཱ པན ཨཔྤནཱཝཱརེན ཨིདྷཱཔི ཧེཊྛཱ ཝུཏྟཱ ཡེཝཱཔནཀཱཝ སངྒཧིཏཱ. ཡཐཱ ཙ ཨིདྷ ཨེཝཾ སབྦཏྠ ¶ . ཨིཏོ པརཉྷི ཨེཏྟཀམྤི ན ཝིཙཱརཡིསྶཱམ. ནིདྡེསཔཊིནིདྡེསཝཱརེསུ ཧེཊྛཱ ཝུཏྟནཡེནེཝ ཨཏྠོ ཝེདིཏབྦོཏི.

སངྒཧཝཱརོ ནིཊྛིཏོ.

ཀོཊྛཱསཝཱརོཏིཔི ཨེཏསྶེཝ ནཱམཾ.

སུཉྙཏཝཱརོ

༡༢༡-༡༤༥. ཨིདཱནི ¶ ཏསྨིཾ ཁོ པན སམཡེ དྷམྨཱ ཧོནྟཱིཏི སུཉྙཏཝཱརོ ཨཱརདྡྷོ. སོ ¶ ཨུདྡེསནིདྡེསཝསེན དྭིདྷཱ ཝཝཏྠིཏོ. ཏཏྠ ཨུདྡེསཝཱརེ ‘དྷམྨཱ ཧོནྟཱི’ཏི ཨིམིནཱ སདྡྷིཾ ཙཏུཝཱིསཏི ཀོཊྛཱསཱ ཧོནྟི. སབྦཀོཊྛཱསེསུ ཙ ‘ཙཏྟཱརོ དྭེ ཏཡོ’ཏི གཎནཔརིཙྪེདོ ན ཝུཏྟོ. ཀསྨཱ? སངྒཧཝཱརེ པརིཙྪིནྣཏྟཱ. ཏཏྠ པརིཙྪིནྣདྷམྨཱཡེཝ ཧི ཨིདྷཱཔི ཝུཏྟཱ. ན ཧེཏྠ སཏྟོ ཝཱ བྷཱཝོ ཝཱ ཨཏྟཱ ཝཱ ཨུཔལབྦྷཏི. དྷམྨཱཝ ཨེཏེ དྷམྨམཏྟཱ ཨསཱརཱ ཨཔརིཎཱཡཀཱཏི ཨིམིསྶཱ སུཉྙཏཱཡ དཱིཔནཏྠཾ ཝུཏྟཱ. ཏསྨཱ ཨེཝམེཏྠ ཨཏྠོ ཝེདིཏབྦོ – ཡསྨིཾ སམཡེ ཀཱམཱཝཙརཾ པཋམཾ མཧཱཀུསལཙིཏྟཾ ཨུཔྤཛྫཏི, ཏསྨིཾ སམཡེ ཙིཏྟངྒཝསེན ཨུཔྤནྣཱ ཨཏིརེཀཔཎྞཱསདྷམྨཱ སབྷཱཝཊྛེན དྷམྨཱ ཨེཝ ཧོནྟི. ན ཨཉྙོ ཀོཙི སཏྟོ ཝཱ བྷཱཝོ ཝཱ པོསོ ཝཱ པུགྒལོ ཝཱ ཧོཏཱིཏི. ཏཐཱ རཱསཊྛེན ཁནྡྷཱཝ ཧོནྟཱིཏི. ཨེཝཾ པུརིམནཡེནེཝ སབྦཔདེསུ ཨཏྠཡོཛནཱ ཝེདིཏབྦཱ. ཡསྨཱ པན ཛྷཱནཏོ ཨཉྙཾ ཛྷཱནངྒཾ, མགྒཏོ ཝཱ ཨཉྙཾ མགྒངྒཾ ནཏྠི, ཏསྨཱ ཨིདྷ ‘ཛྷཱནཾ ཧོཏི, མགྒོ ཧོཏི’ ཨིཙྩེཝ ཝུཏྟཾ. ཨུཔནིཛ྄ཛྷཱཡནཊྛེན ཧི ཛྷཱནམེཝ ཧེཏྭཊྛེན མགྒོཝ ཧོཏི. ན ཨཉྙོ ཀོཙི སཏྟོ ཝཱ བྷཱཝོ ཝཱཏི. ཨེཝཾ སབྦཔདེསུ ཨཏྠཡོཛནཱ ཀཱཏབྦཱ. ནིདྡེསཝཱརོ ཨུཏྟཱནཏྠོཡེཝཱཏི.

སུཉྙཏཝཱརོ ནིཊྛིཏོ.

ནིཊྛིཏཱ ཙ ཏཱིཧི མཧཱཝཱརེཧི མཎྜེཏྭཱ ནིདྡིཊྛསྶ

པཋམཙིཏྟསྶ ཨཏྠཝཎྞནཱ.

དུཏིཡཙིཏྟཾ

༡༤༦. ཨིདཱནི དུཏིཡཙིཏྟཱདཱིནི དསྶེཏུཾ པུན ‘‘ཀཏམེ དྷམྨཱ’’ཏིཨཱདི ཨཱརདྡྷཾ. ཏེསུ སབྦེསུཔི པཋམཙིཏྟེ ཝུཏྟནཡེནེཝ ¶ ཏཡོ ཏཡོ མཧཱཝཱརཱ ཝེདིཏབྦཱ. ན ཀེཝལཉྩ མཧཱཝཱརཱ ཨེཝ, པཋམཙིཏྟེ ཝུཏྟསདིསཱནཾ སབྦཔདཱནཾ ཨཏྠོཔི ཝུཏྟནཡེནེཝ ཝེདིཏབྦོ. ཨིཏོ པརམྤི ཨཔུབྦཔདཝཎྞནཾཡེཝ ཀརིསྶཱམ. ཨིམསྨིཾ ཏཱཝ དུཏིཡཙིཏྟནིདྡེསེ སསངྑཱརེནཱཏི ཨིདམེཝ ཨཔུབྦཾ. ཏསྶཏྠོ – སཧ སངྑཱརེནཱཏི སསངྑཱརོ. ཏེན སསངྑཱརེན ¶ སཔྤཡོགེན སཨུཔཱཡེན པཙྩཡགཎེནཱཏི ཨཏྠོ. ཡེན ཧི ཨཱརམྨཎཱདིནཱ པཙྩཡགཎེན པཋམཾ མཧཱཙིཏྟཾ ཨུཔྤཛྫཏི, ཏེནེཝ སཔྤཡོགེན སཨུཔཱཡེན ཨིདཾ ཨུཔྤཛྫཏི.

ཏསྶེཝཾ ¶ ཨུཔྤཏྟི ཝེདིཏབྦཱ – ཨིདྷེཀཙྩོ བྷིཀྑུ ཝིཧཱརཔཙྩནྟེ ཝསམཱནོ ཙེཏིཡངྒཎསམྨཛྫནཝེལཱཡ ཝཱ ཐེརུཔཊྛཱནཝེལཱཡ ཝཱ སམྤཏྟཱཡ, དྷམྨསཝནདིཝསེ ཝཱ སམྤཏྟེ ‘མཡ྄ཧཾ གནྟྭཱ པཙྩཱགཙྪཏོ ཨཏིདཱུརཾ བྷཝིསྶཏི, ན གམིསྶཱམཱི’ཏི ཙིནྟེཏྭཱ པུན ཙིནྟེཏི – ‘བྷིཀྑུསྶ ནཱམ ཙེཏིཡངྒཎཾ ཝཱ ཐེརུཔཊྛཱནཾ ཝཱ དྷམྨསཝནཾ ཝཱ ཨགནྟུཾ ཨསཱརུཔྤཾ, གམིསྶཱམཱི’ཏི གཙྪཏི. ཏསྶེཝཾ ཨཏྟནོ པཡོགེན ཝཱ, པརེན ཝཱ ཝཏྟཱདཱིནཾ ཨཀརཎེ ཙ ཨཱདཱིནཝཾ ཀརཎེ ཙ ཨཱནིསཾསཾ དསྶེཏྭཱ ཨོཝདིཡམཱནསྶ, ནིགྒཧཝསེནེཝ ཝཱ ‘ཨེཧི, ཨིདཾ ཀརོཧཱི’ཏི ཀཱརིཡམཱནསྶ ཨུཔྤནྣཾ ཀུསལཙིཏྟཾ སསངྑཱརེན པཙྩཡགཎེན ཨུཔྤནྣཾ ནཱམ ཧོཏཱིཏི.

དུཏིཡཙིཏྟཾ.

ཏཏིཡཙིཏྟཾ

༡༤༧-༡༤༨. ཏཏིཡེ ཉཱཎེན ཝིཔྤཡུཏྟནྟི ཉཱཎཝིཔྤཡུཏྟཾ. ཨིདམྤི ཧི ཨཱརམྨཎེ ཧཊྛཔཧཊྛཾ ཧོཏི པརིཙྪིནྡཀཉཱཎཾ པནེཏྠ ན ཧོཏི. ཏསྨཱ ཨིདཾ དཧརཀུམཱརཀཱནཾ བྷིཀྑུཾ དིསྭཱ ‘ཨཡཾ ཐེརོ མཡ྄ཧ’ནྟི ཝནྡནཀཱལེ, ཏེནེཝ ནཡེན ཙེཏིཡཝནྡནདྷམྨསཝནཀཱལཱདཱིསུ ཙ ཨུཔྤཛྫཏཱིཏི ཝེདིཏབྦཾ. པཱལི༹ཡཾ པནེཏྠ སཏྟསུ ཋཱནེསུ པཉྙཱ པརིཧཱཡཏི. སེསཾ པཱཀཏིཀམེཝཱཏི.

ཏཏིཡཙིཏྟཾ.

ཙཏུཏྠཙིཏྟཾ

༡༤༩. ཙཏུཏྠཙིཏྟེཔི ཨེསེཝ ནཡོ. ཨིདཾ པན སསངྑཱརེནཱཏི ཝཙནཏོ ཡདཱ མཱཏཱཔིཏརོ དཧརཀུམཱརཀེ སཱིསེ གཧེཏྭཱ ཙེཏིཡཱདཱིནི ཝནྡཱཔེནྟི ཏེ ཙ ཨནཏྠིཀཱ སམཱནཱཔི ཧཊྛཔཧཊྛཱཝ ཝནྡནྟི. ཨེཝརཱུཔེ ཀཱལེ ལབྦྷཏཱིཏི ཝེདིཏབྦཾ.

ཙཏུཏྠཙིཏྟཾ.

པཉྩམཙིཏྟཾ

༡༥༠. པཉྩམེ ¶ ¶ ཨུཔེཀྑཱསཧགཏནྟི ཨུཔེཀྑཱཝེདནཱཡ སམྤཡུཏྟཾ ¶ . ཨིདཉྷི ཨཱརམྨཎེ མཛ྄ཛྷཏྟཾ ཧོཏི. པརིཙྪིནྡཀཉཱཎཾ པནེཏྠ ཧོཏིཡེཝ. པཱལི༹ཡཾ པནེཏྠ ཛྷཱནཙཏུཀྐེ ཨུཔེཀྑཱ ཧོཏཱིཏི ཨིནྡྲིཡཊྛཀེ ཨུཔེཀྑིནྡྲིཡཾ ཧོཏཱིཏི ཝཏྭཱ སབྦེསམྤི ཝེདནཱདིཔདཱནཾ ནིདྡེསེ སཱཏཱསཱཏསུཁདུཀྑཔཊིཀྑེཔཝསེན དེསནཾ ཀཏྭཱ ཨདུཀྑམསུཁཝེདནཱ ཀཐིཏཱ. ཏསྶཱ མཛ྄ཛྷཏྟལཀྑཎེ ཨིནྡཏྟཀརཎཝསེན ཨུཔེཀྑིནྡྲིཡབྷཱཝོ ཝེདིཏབྦོ. པདཔཊིཔཱཊིཡཱ ཙ ཨེཀསྨིཾ ཋཱནེ པཱིཏི པརིཧཱིནཱ. ཏསྨཱ ཙིཏྟངྒཝསེན པཱལི༹ཨཱརུལ༹ྷཱ པཉྩཔཎྞཱསེཝ དྷམྨཱ ཧོནྟི. ཏེསཾ ཝསེན སབྦཀོཊྛཱསེསུ སབྦཝཱརེསུ ཙ ཝིནིཙྪཡོ ཝེདིཏབྦོ.

པཉྩམཙིཏྟཾ.

ཚཊྛཙིཏྟཱདི

༡༥༦-༩. ཚཊྛསཏྟམཨཊྛམཱནི དུཏིཡཏཏིཡཙཏུཏྠེསུ ཝུཏྟནཡེནེཝ ཝེདིཏབྦཱནི. ཀེཝལཉྷི ཨིམེསུ ཝེདནཱཔརིཝཏྟནཉྩེཝ པཱིཏིཔརིཧཱནཉྩ ཧོཏི. སེསཾ སདྡྷིཾ ཨུཔྤཏྟིནཡེན ཏཱདིསམེཝ. ཀརུཎཱམུདིཏཱ པརིཀམྨཀཱལེཔི ཧི ཨིམེསཾ ཨུཔྤཏྟི མཧཱཨཊྛཀཐཱཡཾ ཨནུཉྙཱཏཱ ཨེཝ. ཨིམཱནི ཨཊྛ ཀཱམཱཝཙརཀུསལཙིཏྟཱནི ནཱམ.

པུཉྙཀིརིཡཝཏྠཱདིཀཐཱ

ཏཱནི སབྦཱནིཔི དསཧི པུཉྙཀིརིཡཝཏྠཱུཧི དཱིཔེཏབྦཱནི. ཀཐཾ? དཱནམཡཾ པུཉྙཀིརིཡཝཏྠུ, སཱིལམཡཾ… བྷཱཝནཱམཡཾ… ཨཔཙིཏིསཧགཏཾ… ཝེཡྻཱཝཙྩསཧགཏཾ… པཏྟཱནུཔྤདཱནཾ… ཨབྦྷནུམོདནཾ… དེསནཱམཡཾ… སཝནམཡཾ… དིཊྛིཛུཀམྨཾ པུཉྙཀིརིཡཝཏྠཱུཏི ཨིམཱནི དས པུཉྙཀིརིཡཝཏྠཱུནི ནཱམ. ཏཏྠ དཱནམེཝ དཱནམཡཾ. པུཉྙཀིརིཡཱ ཙ སཱ ཏེསཾ ཏེསཾ ཨཱནིསཾསཱནཾ ཝཏྠུ ཙཱཏི པུཉྙཀིརིཡཝཏྠུ. སེསེསུཔི ཨེསེཝ ནཡོ.

ཏཏྠ ¶ ཙཱིཝརཱདཱིསུ ཙཏཱུསུ པཙྩཡེསུ, རཱུཔཱདཱིསུ ཝཱ ཚསུ ཨཱརམྨཎེསུ, ཨནྣཱདཱིསུ ཝཱ དསསུ དཱནཝཏྠཱུསུ, ཏཾ ཏཾ དེནྟསྶ ཏེསཾ ཏེསཾ ཨུཔྤཱདནཏོ པཊྛཱཡ ¶ པུབྦབྷཱགེ, པརིཙྩཱགཀཱལེ, པཙྪཱ སོམནསྶཙིཏྟེན ཨནུསྶརཎཀཱལེ ཙཱཏི ཏཱིསུ ཀཱལེསུ པཝཏྟཱ ཙེཏནཱ ‘དཱནམཡཾ པུཉྙཀིརིཡཝཏྠུ’ ནཱམ.

པཉྩསཱིལཾ ཨཊྛསཱིལཾ དསསཱིལཾ སམཱདིཡནྟསྶ, ‘པབྦཛིསྶཱམཱི’ཏི ཝིཧཱརཾ གཙྪནྟསྶ, པབྦཛནྟསྶ, ‘མནོརཐཾ མཏྠཀཾ པཱཔེཏྭཱ པབྦཛིཏོ ཝཏ’མྷི, ‘སཱདྷུ སཱདྷཱུ’ཏི ཨཱཝཛྫེནྟསྶ, པཱཏིམོཀྑཾ སཾཝརནྟསྶ, ཙཱིཝརཱདཡོ པཙྩཡེ པཙྩཝེཀྑནྟསྶ, ཨཱཔཱཐགཏེསུ རཱུཔཱདཱིསུ ཙཀྑུདྭཱརཱདཱིནི སཾཝརནྟསྶ ¶ , ཨཱཛཱིཝཾ སོདྷེནྟསྶ ཙ པཝཏྟཱ ཙེཏནཱ ‘སཱིལམཡཾ པུཉྙཀིརིཡཝཏྠུ’ ནཱམ.

པཊིསམྦྷིདཱཡཾ ཝུཏྟེན ཝིཔསྶནཱམགྒེན ཙཀྑུཾ ཨནིཙྩཏོ དུཀྑཏོ ཨནཏྟཏོ བྷཱཝེནྟསྶ…པེ… མནཾ… རཱུཔེ…པེ… དྷམྨེ… ཙཀྑུཝིཉྙཱཎཾ…པེ… མནོཝིཉྙཱཎཾ,… ཙཀྑུསམྥསྶཾ…པེ… མནོསམྥསྶཾ, ཙཀྑུསམྥསྶཛཾ ཝེདནཾ…པེ… མནོསམྥསྶཛཾ ཝེདནཾ, …པེ… རཱུཔསཉྙཾ…པེ… ཛརཱམརཎཾ ཨནིཙྩཏོ དུཀྑཏོ ཨནཏྟཏོ བྷཱཝེནྟསྶ པཝཏྟཱ ཙེཏནཱ, ཨཊྛཏིཾསཱཡ ཝཱ ཨཱརམྨཎེསུ ཨཔྤནཾ ཨཔྤཏྟཱ སབྦཱཔི ཙེཏནཱ ‘བྷཱཝནཱམཡཾ པུཉྙཀིརིཡཝཏྠུ’ ནཱམ.

མཧལླཀཾ པན དིསྭཱ པཙྩུགྒམནཔཏྟཙཱིཝརཔཊིགྒཧཎཨབྷིཝཱདནམགྒསམྤདཱནཱདིཝསེན ‘ཨཔཙིཏིསཧགཏཾ’ ཝེདིཏབྦཾ.

ཝུཌྜྷཏརཱནཾ ཝཏྟཔྤཊིཔཏྟིཀརཎཝསེན གཱམཾ པིཎྜཱཡ པཝིཊྛཾ བྷིཀྑུཾ དིསྭཱ པཏྟཾ གཧེཏྭཱ གཱམེ བྷིཀྑཾ སམཱདཔེཏྭཱ ཨུཔསཾཧརཎཝསེན, ‘གཙྪ བྷིཀྑཱུནཾ པཏྟཾ ཨཱཧརཱ’ཏི སུཏྭཱ ཝེགེན གནྟྭཱ པཏྟཱཧརཎཱདིཝསེན ཙ ཀཱཡཝེཡྻཱཝཊིཀཀཱལེ ‘ཝེཡྻཱཝཙྩསཧགཏཾ’ ཝེདིཏབྦཾ.

དཱནཾ དཏྭཱ གནྡྷཱདཱིཧི པཱུཛཾ ཀཏྭཱ ‘ཨསུཀསྶ ནཱམ པཏྟི ཧོཏཱུ’ཏི ཝཱ, ‘སབྦསཏྟཱནཾ ཧོཏཱུ’ཏི ཝཱ པཏྟིཾ དདཏོ ‘པཏྟཱནུཔྤདཱནཾ’ ཝེདིཏབྦཾ. ཀིཾ པནེཝཾ པཏྟིཾ དདཏོ པུཉྙཀྑཡོ ཧོཏཱིཏི? ན ཧོཏི. ཡཐཱ པན ཨེཀཾ དཱིཔཾ ཛཱལེཏྭཱ ཏཏོ དཱིཔསཧསྶཾ ཛཱལེནྟསྶ པཋམདཱིཔོ ཁཱིཎོཏི ¶ ན ཝཏྟབྦོ; པུརིམཱལོཀེན པན སདྡྷིཾ པཙྪིམཱལོཀོ ཨེཀཏོ ཧུཏྭཱ ཨཏིམཧཱ ཧོཏི. ཨེཝམེཝ པཏྟིཾ དདཏོ པརིཧཱནི ནཱམ ནཏྠི. ཝུཌྜྷིཡེཝ པན ཧོཏཱིཏི ཝེདིཏབྦོ.

པརེཧི ¶ དིནྣཱཡ པཏྟིཡཱ ཝཱ ཨཉྙཱཡ ཝཱ པུཉྙཀིརིཡཱཡ ‘སཱདྷུ སཱདྷཱུ’ཏི ཨནུམོདནཝསེན ‘ཨབྦྷནུམོདནཾ’ ཝེདིཏབྦཾ.

ཨེཀོ ‘ཨེཝཾ མཾ དྷམྨཀཐིཀོཏི མཾ ཛཱནིསྶནྟཱི’ཏི ཨིཙྪཱཡ ཋཏྭཱ ལཱབྷགརུཀོ ཧུཏྭཱ དེསེཏི, ཏཾ ན མཧཔྥལཾ. ཨེཀོ ཨཏྟནོ པགུཎཾ དྷམྨཾ ཨཔཙྩཱསཱིསམཱནོ ཝིམུཏྟཱཡཏནསཱིསེན པརེསཾ དེསེཏི, ཨིདཾ ‘དེསནཱམཡཾ པུཉྙཀིརིཡཝཏྠུ’ ནཱམ.

ཨེཀོ སུཎནྟོ ‘ཨིཏི མཾ སདྡྷོཏི ཛཱནིསྶནྟཱི’ཏི སུཎཱཏི, ཏཾ ན མཧཔྥལཾ. ཨེཀོ ‘ཨེཝཾ མེ མཧཔྥལཾ བྷཝིསྶཏཱི’ཏི ཧིཏཕརཎེན མུདུཙིཏྟེན དྷམྨཾ སུཎཱཏི, ཨིདཾ ‘སཝནམཡཾ པུཉྙཀིརིཡཝཏྠུ’ ནཱམ.

དིཊྛིཾ ¶ ཨུཛུཾ ཀརོནྟསྶ ‘དིཊྛིཛུཀམྨཾ པུཉྙཀིརིཡཝཏྠུ’ ནཱམ. དཱིགྷབྷཱཎཀཱ པནཱཧུ – ‘དིཊྛིཛུཀམྨཾ སབྦེསཾ ནིཡམལཀྑཎཾ, ཡཾཀིཉྩི པུཉྙཾ ཀརོནྟསྶ ཧི དིཊྛིཡཱ ཨུཛུཀབྷཱཝེནེཝ མཧཔྥལཾ ཧོཏཱི’ཏི.

ཨེཏེསུ པན པུཉྙཀིརིཡཝཏྠཱུསུ དཱནམཡཾ ཏཱཝ ‘དཱནཾ དསྶཱམཱི’ཏི ཙིནྟེནྟསྶ ཨུཔྤཛྫཏི, དཱནཾ དདཏོ ཨུཔྤཛྫཏི, ‘དིནྣཾ མེ’ཏི པཙྩཝེཀྑནྟསྶ ཨུཔྤཛྫཏི. ཨེཝཾ པུབྦཙེཏནཾ མུཉྩནཙེཏནཾ ཨཔརཙེཏནནྟི ཏིསྶོཔི ཙེཏནཱ ཨེཀཏོ ཀཏྭཱ ‘དཱནམཡཾ པུཉྙཀིརིཡཝཏྠུ’ ནཱམ ཧོཏི. སཱིལམཡམྤི ‘སཱིལཾ པཱུརེསྶཱམཱི’ཏི ཙིནྟེནྟསྶ ཨུཔྤཛྫཏི, སཱིལཔཱུརཎཀཱལེ ཨུཔྤཛྫཏི, ‘པཱུརིཏཾ མེ’ཏི པཙྩཝེཀྑནྟསྶ ཨུཔྤཛྫཏི. ཏཱ སབྦཱཔི ཨེཀཏོ ཀཏྭཱ ‘སཱིལམཡཾ པུཉྙཀིརིཡཝཏྠུ’ ནཱམ ཧོཏི…པེ… དིཊྛིཛུཀམྨམྤི ‘དིཊྛིཾ ཨུཛུཀཾ ཀརིསྶཱམཱི’ཏི ཙིནྟེནྟསྶ ཨུཔྤཛྫཏི, དིཊྛིཾ ཨུཛུཾ ཀརོནྟསྶ ཨུཔྤཛྫཏི, ‘དིཊྛི མེ ཨུཛུཀཱ ཀཏཱ’ཏི པཙྩཝེཀྑནྟསྶ ཨུཔྤཛྫཏི. ཏཱ སབྦཱཔི ཨེཀཏོ ཀཏྭཱ ‘དིཊྛིཛུཀམྨཾ པུཉྙཀིརིཡཝཏྠུ’ ནཱམ ཧོཏི.

སུཏྟེ ¶ པན ཏཱིཎིཡེཝ པུཉྙཀིརིཡཝཏྠཱུནི ཨཱགཏཱནི. ཏེསུ ཨིཏརེསམྤི སངྒཧོ ཝེདིཏབྦོ. ཨཔཙིཏིཝེཡྻཱཝཙྩཱནི ཧི སཱིལམཡེ སངྒཧཾ གཙྪནྟི. པཏྟཱནུཔྤདཱནཨབྦྷནུམོདནཱནི དཱནམཡེ. དེསནཱསཝནདིཊྛིཛུཀམྨཱནི བྷཱཝནཱམཡེ. ཡེ པན ‘དིཊྛིཛུཀམྨཾ སབྦེསཾ ནིཡམལཀྑཎ’ནྟི ཝདནྟི ཏེསཾ ཏཾ ཏཱིསུཔི སངྒཧཾ གཙྪཏི. ཨེཝམེཏཱནི སངྑེཔཏོ ཏཱིཎི ཧུཏྭཱ ཝིཏྠཱརཏོ དས ཧོནྟི.

ཏེསུ ¶ ‘དཱནཾ དསྶཱམཱི’ཏི ཙིནྟེནྟོ ཨཊྛནྣཾ ཀཱམཱཝཙརཀུསལཙིཏྟཱནཾ ཨཉྙཏརེནེཝ ཙིནྟེཏི; དདམཱནོཔི ཏེསཾཡེཝ ཨཉྙཏརེན དེཏི; ‘དཱནཾ མེ དིནྣ’ནྟི པཙྩཝེཀྑནྟོཔི ཏེསཾཡེཝ ཨཉྙཏརེན པཙྩཝེཀྑཏི. ‘སཱིལཾ པཱུརེསྶཱམཱི’ཏི ཙིནྟེནྟོཔི ཏེསཾཡེཝ ཨཉྙཏརེན ཙིནྟེཏི; སཱིལཾ པཱུརེནྟོཔི ཏེསཾཡེཝ ཨཉྙཏརེན པཱུརེཏི, ‘སཱིལཾ མེ པཱུརིཏ’ནྟི པཙྩཝེཀྑནྟོཔི ཏེསཾཡེཝ ཨཉྙཏརེན པཙྩཝེཀྑཏི. ‘བྷཱཝནཾ བྷཱཝེསྶཱམཱི’ཏི ཙིནྟེནྟོཔི ཏེསཾཡེཝ ཨཉྙཏརེན ཙིནྟེཏི; བྷཱཝེནྟོཔི ཏེསཾཡེཝ ཨཉྙཏརེན བྷཱཝེཏི; ‘བྷཱཝནཱ མེ བྷཱཝིཏཱ’ཏི པཙྩཝེཀྑནྟོཔི ཏེསཾཡེཝ ཨཉྙཏརེན པཙྩཝེཀྑཏི.

‘ཛེཊྛཱཔཙིཏིཀམྨཾ ¶ ཀརིསྶཱམཱི’ཏི ཙིནྟེནྟོཔི ཏེསཾཡེཝ ཨཉྙཏརེན ཙིནྟེཏི, ཀརོནྟོཔི ཏེསཾཡེཝ ཨཉྙཏརེན ཀརོཏི, ‘ཀཏཾ མེ’ཏི པཙྩཝེཀྑནྟོཔི ཏེསཾཡེཝ ཨཉྙཏརེན པཙྩཝེཀྑཏི. ‘ཀཱཡཝེཡྻཱཝཊིཀཀམྨཾ ཀརིསྶཱམཱི’ཏི ཙིནྟེནྟོཔི, ཀརོནྟོཔི, ‘ཀཏཾ མེ’ཏི པཙྩཝེཀྑནྟོཔི ཏེསཾཡེཝ ཨཉྙཏརེན པཙྩཝེཀྑཏི. ‘པཏྟིཾ དསྶཱམཱི’ཏི ཙིནྟེནྟོཔི, དདནྟོཔི, ‘དིནྣཾ མེ’ཏི པཙྩཝེཀྑནྟོཔི, ‘པཏྟིཾ ཝཱ སེསཀུསལཾ ཝཱ ཨནུམོདིསྶཱམཱི’ཏི ཙིནྟེནྟོཔི ཏེསཾཡེཝ ཨཉྙཏརེན ཙིནྟེཏི; ཨནུམོདནྟོཔི ཏེསཾཡེཝ ཨཉྙཏརེན ཨནུམོདཏི, ‘ཨནུམོདིཏཾ མེ’ཏི པཙྩཝེཀྑནྟོཔི ཏེསཾཡེཝ ཨཉྙཏརེན པཙྩཝེཀྑཏི. ‘དྷམྨཾ དེསེསྶཱམཱི’ཏི ཙིནྟེནྟོཔི ཏེསཾཡེཝ ཨཉྙཏརེན ཙིནྟེཏི, དེསེནྟོཔི ཏེསཾཡེཝ ཨཉྙཏརེན དེསེཏི, ‘དེསིཏོ མེ’ཏི པཙྩཝེཀྑནྟོཔི ཏེསཾཡེཝ ཨཉྙཏརེན པཙྩཝེཀྑཏི. ‘དྷམྨཾ སོསྶཱམཱི’ཏི ཙིནྟེནྟོཔི ཏེསཾཡེཝ ཨཉྙཏརེན ཙིནྟེཏི, སུཎནྟོཔི ཏེསཾཡེཝ ཨཉྙཏརེན སུཎཱཏི, ‘སུཏོ མེ’ཏི པཙྩཝེཀྑནྟོཔི ཏེསཾཡེཝ ཨཉྙཏརེན པཙྩཝེཀྑཏི. ‘དིཊྛིཾ ཨུཛུཀཾ ཀརིསྶཱམཱི’ཏི ཙིནྟེནྟོཔི ཏེསཾཡེཝ ཨཉྙཏརེན ཙིནྟེཏི, ཨུཛུཾ ཀརོནྟོ པན ཙཏུནྣཾ ཉཱཎསམྤཡུཏྟཱནཾ ཨཉྙཏརེན ཀརོཏི, ‘དིཊྛི མེ ཨུཛུཀཱ ཀཏཱ’ཏི པཙྩཝེཀྑནྟོ ཨཊྛནྣཾ ཨཉྙཏརེན པཙྩཝེཀྑཏི.

ཨིམསྨིཾ ¶ ཋཱནེ ཙཏྟཱརི ཨནནྟཱནི ནཱམ གཧིཏཱནི. ཙཏྟཱརི ཧི ཨནནྟཱནི – ཨཱཀཱསོ ཨནནྟོ, ཙཀྐཝཱལཱ༹ནི ཨནནྟཱནི, སཏྟནིཀཱཡོ ཨནནྟོ, བུདྡྷཉྙཱཎཾ ¶ ཨནནྟཾ. ཨཱཀཱསསྶ ཧི པུརཏྠིམཱཡ དིསཱཡ ཝཱ པཙྪིམུཏྟརདཀྑིཎཱསུ ཝཱ ཨེཏྟཀཱནི ཝཱ ཡོཛནསཏཱནི ཨེཏྟཀཱནི ཝཱ ཡོཛནསཧསྶཱནཱིཏི པརིཙྪེདོ ནཏྠི. སིནེརུམཏྟམྤི ཨཡོཀཱུཊཾ པཐཝིཾ དྭིདྷཱ ཀཏྭཱ ཧེཊྛཱ ཁིཏྟཾ བྷསྶེཐེཝ, ནོ པཏིཊྛཾ ལབྷེཐ, ཨེཝཾ ཨཱཀཱསཾ ཨནནྟཾ ནཱམ.

ཙཀྐཝཱལཱ༹ནམྤི སཏེཧི ཝཱ སཧསྶེཧི ཝཱ པརིཙྪེདོ ནཏྠི. སཙེཔི ཧི ཨཀནིཊྛབྷཝནེ ནིབྦཏྟཱ, དལ༹ྷཐཱམདྷནུགྒཧསྶ ལཧུཀེན སརེན ཏིརིཡཾ ཏཱལཙྪཱཡཾ ཨཏིཀྐམནམཏྟེན ཀཱལེན ཙཀྐཝཱལ༹སཏསཧསྶཾ ཨཏིཀྐམནསམཏྠེན ཛཝེན སམནྣཱགཏཱ ཙཏྟཱརོ མཧཱབྲཧྨཱནོ ¶ ‘ཙཀྐཝཱལ༹པརིཡནྟཾ པསྶིསྶཱམཱ’ཏི ཏེན ཛཝེན དྷཱཝེཡྻུཾ, ཙཀྐཝཱལ༹པརིཡནྟཾ ཨདིསྭཱཝ པརིནིབྦཱཡེཡྻུཾ, ཨེཝཾ ཙཀྐཝཱལཱ༹ནི ཨནནྟཱནི ནཱམ.

ཨེཏྟཀེསུ པན ཙཀྐཝཱལེ༹སུ ཨུདཀཊྛཀཐལཊྛཀསཏྟཱནཾ པམཱཎཾ ནཏྠི. ཨེཝཾ སཏྟནིཀཱཡོ ཨནནྟོ ནཱམ. ཏཏོཔི བུདྡྷཉཱཎཾ ཨནནྟམེཝ.

ཨེཝཾ ཨཔརིམཱཎེསུ ཙཀྐཝཱལེ༹སུ ཨཔརིམཱཎཱནཾ སཏྟཱནཾ ཀཱམཱཝཙརསོམནསྶསཧགཏཉཱཎསམྤཡུཏྟཨསངྑཱརིཀཀུསལཙིཏྟཱནི ཨེཀསྶ བཧཱུནི ཨུཔྤཛྫནྟི. བཧཱུནམྤི བཧཱུནི ཨུཔྤཛྫནྟི. ཏཱནི སབྦཱནིཔི ཀཱམཱཝཙརཊྛེན སོམནསྶསཧགཏཊྛེན ཉཱཎསམྤཡུཏྟཊྛེན ཨསངྑཱརིཀཊྛེན ཨེཀཏྟཾ གཙྪནྟི. ཨེཀམེཝ སོམནསྶསཧགཏཾ ཏིཧེཏུཀཾ ཨསངྑཱརིཀཾ མཧཱཙིཏྟཾ ཧོཏི. ཏཐཱ སསངྑཱརིཀཾ མཧཱཙིཏྟཾ…པེ… ཏཐཱ ཨུཔེཀྑཱསཧགཏཾ ཉཱཎཝིཔྤཡུཏྟཾ དྭིཧེཏུཀཾ སསངྑཱརིཀཙིཏྟནྟི. ཨེཝཾ སབྦཱནིཔི ཨཔརིམཱཎེསུ ཙཀྐཝཱལེ༹སུ ཨཔརིམཱཎཱནཾ སཏྟཱནཾ ཨུཔྤཛྫམཱནཱནི ཀཱམཱཝཙརཀུསལཙིཏྟཱནི སམྨཱསམྦུདྡྷོ མཧཱཏུལཱཡ ཏུལཡམཱནོ ཝིཡ, ཏུམྦེ པཀྑིཔིཏྭཱ མིནམཱནོ ཝིཡ, སབྦཉྙུཏཉྙཱཎེན པརིཙྪིནྡིཏྭཱ ‘ཨཊྛེཝེཏཱནཱི’ཏི སརིཀྑཊྛེན ཨཊྛེཝ ཀོཊྛཱསེ ཀཏྭཱ དསྶེསི.

པུན ཨིམསྨིཾ ཋཱནེ ཚབྦིདྷེན པུཉྙཱཡཱུཧནཾ ནཱམ གཧིཏཾ. པུཉྙཉྷི ཨཏྠི སཡཾཀཱརཾ ཨཏྠི པརཾཀཱརཾ, ཨཏྠི སཱཧཏྠིཀཾ ཨཏྠི ཨཱཎཏྟིཀཾ, ཨཏྠི སམྤཛཱནཀཏཾ ཨཏྠི ཨསམྤཛཱནཀཏནྟི.

ཏཏྠ ¶ ཨཏྟནོ དྷམྨཏཱཡ ཀཏཾ ‘སཡཾཀཱརཾ’ ནཱམ. པརཾ ཀརོནྟཾ དིསྭཱ ཀཏཾ ‘པརཾཀཱརཾ’ ནཱམ. སཧཏྠེན ཀཏཾ ‘སཱཧཏྠིཀཾ’ ནཱམ. ཨཱཎཱཔེཏྭཱ ཀཱརིཏཾ ¶ ‘ཨཱཎཏྟིཀཾ’ ནཱམ. ཀམྨཉྩ ཕལཉྩ སདྡཧིཏྭཱ ཀཏཾ ‘སམྤཛཱནཀཏཾ’ ནཱམ. ཀམྨམྤི ཕལམྤི ཨཛཱནིཏྭཱ ཀཏཾ ‘ཨསམྤཛཱནཀཏཾ’ ནཱམ. ཏེསུ སཡཾཀཱརཾ ཀརོནྟོཔི ཨིམེསཾ ཨཊྛནྣཾ ཀུསལཙིཏྟཱནཾ ཨཉྙཏརེནེཝ ཀརོཏི. པརཾཀཱརཾ ཀརོནྟོཔི, སཧཏྠེན ཀརོནྟོཔི, ཨཱཎཱཔེཏྭཱ ཀརོནྟོཔི ཨིམེསཾ ཨཊྛནྣཾ ཀུསལཙིཏྟཱནཾ ཨཉྙཏརེནེཝ ཀརོཏི. སམྤཛཱནཀརཎཾ པན ཙཏཱུཧི ཉཱཎསམྤཡུཏྟེཧི ཧོཏི. ཨསམྤཛཱནཀརཎཾ ཙཏཱུཧི ཉཱཎཝིཔྤཡུཏྟེཧི.

ཨཔརཱཔི ཨིམསྨིཾ ཋཱནེ ཙཏསྶོ དཀྑིཎཱཝིསུདྡྷིཡོ གཧིཏཱ – པཙྩཡཱནཾ དྷམྨིཀཏཱ, ཙེཏནཱམཧཏྟཾ, ཝཏྠུསམྤཏྟི, གུཎཱཏིརེཀཏཱཏི. ཏཏྠ དྷམྨེན སམེན ཨུཔྤནྣཱ པཙྩཡཱ ‘དྷམྨིཀཱ’ ནཱམ. སདྡཧིཏྭཱ ¶ ཨོཀཔྤེཏྭཱ དདཏོ པན ‘ཙེཏནཱམཧཏྟཾ’ ནཱམ ཧོཏི. ཁཱིཎཱསཝབྷཱཝོ ‘ཝཏྠུསམྤཏྟི’ ནཱམ. ཁཱིཎཱསཝསྶེཝ ནིརོདྷཱ ཝུཊྛིཏབྷཱཝོ ‘གུཎཱཏིརེཀཏཱ’ ནཱམ. ཨིམཱནི ཙཏྟཱརི སམོདྷཱནེཏྭཱ དཱཏུཾ སཀྐོནྟསྶ ཀཱམཱཝཙརཾ ཀུསལཾ ཨིམསྨིཾཡེཝ ཨཏྟབྷཱཝེ ཝིཔཱཀཾ དེཏི. པུཎྞཀསེཊྛིཀཱཀཝལིཡསུམནམཱལཱཀཱརཱདཱིནཾ (དྷ. པ. ཨཊྛ. ༢.༢༢༥ པུཎྞདཱསཱིཝཏྠུ) (དྷ. པ. ཨཊྛ. ༡.༦༧ སུམནམཱལཱཀཱརཝཏྠུ) ཝིཡ.

སངྑེཔཏོ པནེཏཾ སབྦམྤི ཀཱམཱཝཙརཀུསལཙིཏྟཾ ‘ཙིཏྟ’ནྟི ཀརིཏྭཱ ཙིཏྟཝིཙིཏྟཊྛེན ཨེཀམེཝ ཧོཏི. ཝེདནཱཝསེན སོམནསྶསཧགཏཾ ཨུཔེཀྑཱསཧགཏནྟི དུཝིདྷཾ ཧོཏི. ཉཱཎཝིབྷཏྟིདེསནཱཝསེན ཙཏུབྦིདྷཾ ཧོཏི. སོམནསྶསཧགཏཾ ཉཱཎསམྤཡུཏྟཾ ཨསངྑཱརིཀཾ མཧཱཙིཏྟཉྷི ཨུཔེཀྑཱསཧགཏཾ ཉཱཎསམྤཡུཏྟཾ ཨསངྑཱརིཀཾ མཧཱཙིཏྟཉྩ ཉཱཎསམྤཡུཏྟཊྛེན ཨསངྑཱརིཀཊྛེན ཙ ཨེཀམེཝ ཧོཏི. ཏཐཱ ཉཱཎསམྤཡུཏྟཾ སསངྑཱརིཀཾ, ཉཱཎཝིཔྤཡུཏྟཾ ཨསངྑཱརིཀཾ, ཉཱཎཝིཔྤཡུཏྟཾ སསངྑཱརིཀཉྩཱཏི. ཨེཝཾ ཉཱཎཝིབྷཏྟིདེསནཱཝསེན ཙཏུབྦིདྷེ པནེཏསྨིཾ ཨསངྑཱརསསངྑཱརཝིབྷཏྟིཏོ ཙཏྟཱརི ཨསངྑཱརིཀཱནི ཙཏྟཱརི སསངྑཱརིཀཱནཱིཏི ཨཊྛེཝ ཀུསལཙིཏྟཱནི ཧོནྟི. ཏཱནི ཡཱཐཱཝཏོ ཉཏྭཱ བྷགཝཱ སབྦཉྙཱུ གཎཱིཝརོ མུནིསེཊྛོ ཨཱཙིཀྑཏི དེསེཏི པཉྙཔེཏི པཊྛཔེཏི ཝིཝརཏི ཝིབྷཛཏི ཨུཏྟཱནཱིཀརོཏཱིཏི.

ཨཊྛསཱལིནིཡཱ དྷམྨསངྒཧཊྛཀཐཱཡ

ཀཱམཱཝཙརཀུསལནིདྡེསོ སམཏྟོ.

རཱུཔཱཝཙརཀུསལཝཎྞནཱ

ཙཏུཀྐནཡོ པཋམཛ྄ཛྷཱནཾ

༡༦༠. ཨིདཱནི ¶ ¶ རཱུཔཱཝཙརཀུསལཾ དསྶེཏུཾ ཀཏམེ དྷམྨཱ ཀུསལཱཏིཨཱདི ཨཱརདྡྷཾ. ཏཏྠ རཱུཔཱུཔཔཏྟིཡཱ མགྒཾ བྷཱཝེཏཱིཏི རཱུཔཾ ཝུཙྩཏི རཱུཔབྷཝོ. ཨུཔཔཏྟཱིཏི ནིབྦཏྟི ཛཱཏི སཉྫཱཏི. མགྒོཏི ཨུཔཱཡོ. ཝཙནཏྠོ པནེཏྠ – ཏཾ ཨུཔཔཏྟིཾ མགྒཏི གཝེསཏི ཛནེཏི ནིཔྥཱདེཏཱིཏི མགྒོ. ཨིདཾ ཝུཏྟཾ ཧོཏི – ཡེན མགྒེན རཱུཔབྷཝེ ཨུཔཔཏྟི ཧོཏི ནིབྦཏྟི ཛཱཏི སཉྫཱཏི, ཏཾ མགྒཾ བྷཱཝེཏཱིཏི. ཀིཾ པནེཏེན ནིཡམཏོ རཱུཔབྷཝེ ཨུཔཔཏྟི ཧོཏཱིཏི? ན ཧོཏི. ‘‘སམཱདྷིཾ, བྷིཀྑཝེ, བྷཱཝེཐ, སམཱཧིཏོ ཡཐཱབྷཱུཏཾ པཛཱནཱཏི པསྶཏཱི’’ཏི (སཾ. ནི. ༣.༥; ༤.༩༩; ༥.༡༠༧༡; ནེཏྟི. ༤༠; མི. པ. ༢.༡.༡༥) ཨེཝཾ ཝུཏྟེན ཧི ནིབྦེདྷབྷཱགིཡེན རཱུཔབྷཝཱཏིཀྐམོཔི ཧོཏི. རཱུཔཱུཔཔཏྟིཡཱ པན ཨིཏོ ཨཉྙོ མགྒོ ནཱམ ¶ ནཏྠི, ཏེན ཝུཏྟཾ ‘རཱུཔཱུཔཔཏྟིཡཱ མགྒཾ བྷཱཝེཏཱི’ཏི. ཨཏྠཏོ ཙཱཡཾ མགྒོ ནཱམ ཙེཏནཱཔི ཧོཏི, ཙེཏནཱཡ སམྤཡུཏྟདྷམྨཱཔི, ཏདུབྷཡམྤི. ‘‘ནིརཡཉྩཱཧཾ, སཱརིཔུཏྟ, པཛཱནཱམི ནིརཡགཱམིཉྩ མགྒ’’ནྟི (མ. ནི. ༡.༡༥༣) ཧི ཨེཏྠ ཙེཏནཱ མགྒོ ནཱམ.

‘‘སདྡྷཱ ཧིརིཡཾ ཀུསལཉྩ དཱནཾ, དྷམྨཱ ཨེཏེ སཔྤུརིསཱནུཡཱཏཱ;

ཨེཏཉྷི མགྒཾ དིཝིཡཾ ཝདནྟི, ཨེཏེན ཧི གཙྪཏི དེཝལོཀ’’ནྟི. (ཨ. ནི. ༨.༣༢);

ཨེཏྠ ཙེཏནཱསམྤཡུཏྟདྷམྨཱ མགྒོ ནཱམ. ‘‘ཨཡཾ, བྷིཀྑཝེ, མགྒོ, ཨཡཾ པཊིཔདཱ’’ཏི སངྑཱརུཔཔཏྟིསུཏྟཱདཱིསུ (མ. ནི. ༣.༡༦༡ ཨཱདཡོ) ཙེཏནཱཔི ཙེཏནཱསམྤཡུཏྟདྷམྨཱཔི མགྒོ ནཱམ. ཨིམསྨིཾ པན ཋཱནེ ‘ཛྷཱན’ནྟི ཝཙནཏོ ཙེཏནཱསམྤཡུཏྟཱ ཨདྷིཔྤེཏཱ. ཡསྨཱ པན ཛྷཱནཙེཏནཱ པཊིསནྡྷིཾ ཨཱཀཌྜྷཏི, ཏསྨཱ ཙེཏནཱཔི ཙེཏནཱསམྤཡུཏྟདྷམྨཱཔི ཝཊྚནྟིཡེཝ.

བྷཱཝེཏཱིཏི ཛནེཏི ཨུཔྤཱདེཏི ཝཌྜྷེཏི. ཨཡཾ ཏཱཝ ཨིདྷ བྷཱཝནཱཡ ཨཏྠོ. ཨཉྙཏྠ པན ཨུཔསགྒཝསེན སམྦྷཱཝནཱ པརིབྷཱཝནཱ ཝིབྷཱཝནཱཏི ཨེཝཾ ཨཉྙཐཱཔི ཨཏྠོ ཧོཏི. ཏཏྠ ‘‘ཨིདྷུདཱཡི མམ སཱཝཀཱ ཨདྷིསཱིལེ སམྦྷཱཝེནྟི – སཱིལཝཱ སམཎོ གོཏམོ, པརམེན སཱིལཀྑནྡྷེན སམནྣཱགཏོ’’ཏི ¶ ¶ (མ. ནི. ༢.༢༤༣) ཨཡཾ སམྦྷཱཝནཱ ནཱམ; ཨོཀཔྤནཱཏི ཨཏྠོ. ‘‘སཱིལཔརིབྷཱཝིཏོ སམཱདྷི མཧཔྥལོ ཧོཏི མཧཱནིསཾསོ, སམཱདྷིཔརིབྷཱཝིཏཱ པཉྙཱ མཧཔྥལཱ ཧོཏི མཧཱནིསཾསཱ, པཉྙཱཔརིབྷཱཝིཏཾ ཙིཏྟཾ སམྨདེཝ ཨཱསཝེཧི ཝིམུཙྩཏཱི’’ཏི (དཱི. ནི. ༢.༡༨༦) ཨཡཾ པརིབྷཱཝནཱ ནཱམ; ཝཱསནཱཏི ཨཏྠོ. ‘‘ཨིངྒྷ རཱུཔཾ ཝིབྷཱཝེཧི, ཝེདནཾ… སཉྙཾ… སངྑཱརེ… ཝིཉྙཱཎཾ ཝིབྷཱཝེཧཱི’’ཏི ཨཡཾ ཝིབྷཱཝནཱ ནཱམ; ཨནྟརདྷཱཔནཱཏི ཨཏྠོ. ‘‘པུན ཙཔརཾ, ཨུདཱཡི, ཨཀྑཱཏཱ མཡཱ སཱཝཀཱནཾ པཊིཔདཱ, ཡཐཱཔཊིཔནྣཱ མེ སཱཝཀཱ ཙཏྟཱརོ སཏིཔཊྛཱནེ བྷཱཝེནྟཱི’’ཏི (མ. ནི. ༢.༢༤༧), ཨཡཾ པན ཨུཔྤཱདནཝཌྜྷནཊྛེན བྷཱཝནཱ ནཱམ. ཨིམསྨིམྤི ཋཱནེ ཨཡམེཝ ཨདྷིཔྤེཏཱ. ཏེན ཝུཏྟཾ – ‘བྷཱཝེཏཱིཏི ཛནེཏི ཨུཔྤཱདེཏི ཝཌྜྷེཏཱི’ཏི.

ཀསྨཱ པནེཏྠ, ཡཐཱ ཀཱམཱཝཙརཀུསལནིདྡེསེ དྷམྨཔུབྦངྒམཱ དེསནཱ ཀཏཱ ཏཐཱ ཨཀཏྭཱ, པུགྒལཔུབྦངྒམཱ ¶ ཀཏཱཏི? པཊིཔདཱཡ སཱདྷེཏབྦཏོ. ཨིདཉྷི ཙཏཱུསུ པཊིཔདཱསུ ཨཉྙཏརཱཡ སཱདྷེཏབྦཾ; ན ཀཱམཱཝཙརཾ ཝིཡ ཝིནཱ པཊིཔདཱཡ ཨུཔྤཛྫཏི. པཊིཔདཱ ཙ ནཱམེསཱ པཊིཔནྣཀེ སཏི ཧོཏཱིཏི ཨེཏམཏྠཾ དསྶེཏུཾ པུགྒལཔུབྦངྒམཾ དེསནཾ ཀརོནྟོ ‘རཱུཔཱུཔཔཏྟིཡཱ མགྒཾ བྷཱཝེཏཱི’ཏི ཨཱཧ.

ཝིཝིཙྩེཝ ཀཱམེཧཱིཏི ཀཱམེཧི ཝིཝིཙྩིཏྭཱ, ཝིནཱ ཧུཏྭཱ, ཨཔཀྐམིཏྭཱ. ཡོ པནཱཡམེཏྠ ‘ཨེཝ’-ཀཱརོ སོ ནིཡམཏྠོཏི ཝེདིཏབྦོ. ཡསྨཱ ཙ ནིཡམཏྠོ, ཏསྨཱ ཏསྨིཾ པཋམཾ ཛྷཱནཾ ཨུཔསམྤཛྫ ཝིཧརཎསམཡེ ཨཝིཛྫམཱནཱནམྤི ཀཱམཱནཾ ཏསྶ པཋམཛ྄ཛྷཱནསྶ པཊིཔཀྑབྷཱཝཾ, ཀཱམཔརིཙྩཱགེནེཝ ཙསྶ ཨདྷིགམཾ དཱིཔེཏི. ཀཐཾ? ‘ཝིཝིཙྩེཝ ཀཱམེཧཱི’ཏི ཨེཝཉྷི ནིཡམེ ཀརིཡམཱནེ ཨིདཾ པཉྙཱཡཏི – ནཱུནིམསྶ ཀཱམཱ པཊིཔཀྑབྷཱུཏཱ ཡེསུ སཏི ཨིདཾ ན པཝཏྟཏི, ཨནྡྷཀཱརེ སཏི པདཱིཔོབྷཱསོ ཝིཡ? ཏེསཾ པརིཙྩཱགེནེཝ ཙསྶ ཨདྷིགམོ ཧོཏི ཨོརིམཏཱིརཔརིཙྩཱགེན པཱརིམཏཱིརསྶེཝ. ཏསྨཱ ནིཡམཾ ཀརོཏཱིཏི.

ཏཏྠ སིཡཱ – ‘ཀསྨཱ པནེས པུབྦཔདེཡེཝ ཝུཏྟོ, ན ཨུཏྟརཔདེ? ཀིཾ ཨཀུསལེཧི དྷམྨེཧི ཨཝིཝིཙྩཱཔི ཛྷཱནཾ ཨུཔསམྤཛྫ ཝིཧརེཡྻཱ’ཏི? ན ཁོ པནེཏཾ ཨེཝཾ དཊྛབྦཾ. ཏཾནིསྶརཎཏོ ཧི པུབྦཔདེ ཨེས ཝུཏྟོ. ཀཱམདྷཱཏུསམཏིཀྐམནཏོ ¶ ཧི ཀཱམརཱགཔཊིཔཀྑཏོ ཙ ཨིདཾ ཛྷཱནཾ ཀཱམཱནམེཝ ནིསྶརཎཾ. ཡཐཱཧ – ‘‘ཀཱམཱནམེཏཾ ནིསྶརཎཾ ཡདིདཾ ནེཀྑམྨ’’ནྟི (ཨིཏིཝུ. ༧༢; དཱི. ནི. ༣.༣༥༣). ཨུཏྟརཔདེཔི པན, ཡཐཱ ‘‘ཨིདྷེཝ, བྷིཀྑཝེ, སམཎོ, ཨིདྷ དུཏིཡོ སམཎོ’’ཏི ¶ (མ. ནི. ༡.༡༣༩; ཨ. ནི. ༤.༢༤༡) ཨེཏྠ ‘ཨེཝ’-ཀཱརོ ཨཱནེཏྭཱ ཝུཙྩཏི, ཨེཝཾ ཝཏྟབྦོ. ན ཧི སཀྐཱ ཨིཏོ ཨཉྙེཧིཔི ནཱིཝརཎསངྑཱཏེཧི ཨཀུསལེཧི དྷམྨེཧི ཨཝིཝིཙྩ ཛྷཱནཾ ཨུཔསམྤཛྫ ཝིཧརིཏུཾ, ཏསྨཱ ‘ཝིཝིཙྩེཝ ཀཱམེཧི ཝིཝིཙྩེཝ ཨཀུསལེཧི དྷམྨེཧཱི’ཏི ཨེཝཾ པདདྭཡེཔི ཨེས དཊྛབྦོ. པདདྭཡེཔི ཙ ཀིཉྩཱཔི ཝིཝིཙྩཱཏི ཨིམིནཱ སཱདྷཱརཎཝཙནེན ཏདངྒཝིཝེཀཱདཡོ ཀཱཡཝིཝེཀཱདཡོ ཙ སབྦེཔི ཝིཝེཀཱ སངྒཧཾ གཙྪནྟི, ཏཐཱཔི ཀཱཡཝིཝེཀོ ཙིཏྟཝིཝེཀོ ཝིཀྑམྦྷནཝིཝེཀོཏི ཏཡོ ཨེཝ ཨིདྷ དཊྛབྦཱ.

ཀཱམེཧཱིཏི ཨིམིནཱ པན པདེན ཡེ ཙ ནིདྡེསེ ‘‘ཀཏམེ ཝཏྠུཀཱམཱ? མནཱཔིཡཱ རཱུཔཱ’’ཏིཨཱདིནཱ (མཧཱནི. ༡) ནཡེན ཝཏྠུཀཱམཱ ཝུཏྟཱ, ཡེ ཙ ཏཏྠེཝ ཝིབྷངྒེ ཙ ‘‘ཚནྡོ ཀཱམོ, རཱགོ ¶ ཀཱམོ, ཚནྡརཱགོ ཀཱམོ; སངྐཔྤོ ཀཱམོ, རཱགོ ཀཱམོ, སངྐཔྤརཱགོ ཀཱམོ; ཨིམེ ཝུཙྩནྟི ཀཱམཱ’’ཏི (མཧཱནི. ༡; ཝིབྷ. ༥༦༤) ཨེཝཾ ཀིལེསཀཱམཱ ཝུཏྟཱ, ཏེ སབྦེཔི སངྒཧིཏཱཨིཙྩེཝ དཊྛབྦཱ. ཨེཝཉྷི སཏི ཝིཝིཙྩེཝ ཀཱམེཧཱིཏི ཝཏྠུཀཱམེཧིཔི ཝིཝིཙྩེཝཱཏི ཨཏྠོ ཡུཛྫཏི. ཏེན ཀཱཡཝིཝེཀོ ཝུཏྟོ ཧོཏི.

ཝིཝིཙྩ ཨཀུསལེཧི དྷམྨེཧཱིཏི ཀིལེསཀཱམེཧི སབྦཱཀུསལེཧི ཝཱ ཝིཝིཙྩཱཏི ཨཏྠོ ཡུཛྫཏི. ཏེན ཙིཏྟཝིཝེཀོ ཝུཏྟོ ཧོཏི. པུརིམེན ཙེཏྠ ཝཏྠུཀཱམེཧི ཝིཝེཀཝཙནཏོ ཨེཝ ཀཱམསུཁཔརིཙྩཱགོ, དུཏིཡེན ཀིལེསཀཱམེཧི ཝིཝེཀཝཙནཏོ ནེཀྑམྨསུཁཔརིགྒཧོ ཝིབྷཱཝིཏོ ཧོཏི. ཨེཝཾ ཝཏྠུཀཱམཀིལེསཀཱམཝིཝེཀཝཙནཏོཡེཝ ཙ ཨེཏེསཾ པཋམེན སཾཀིལེསཝཏྠུཔྤཧཱནཾ, དུཏིཡེན སཾཀིལེསཔྤཧཱནཾ; པཋམེན ལོལབྷཱཝསྶ ཧེཏུཔརིཙྩཱགོ, དུཏིཡེན བཱལབྷཱཝསྶ; པཋམེན ཙ པཡོགསུདྡྷི, དུཏིཡེན ཨཱསཡཔོསནཾ ཝིབྷཱཝིཏཾ ཧོཏཱིཏི ཉཱཏབྦཾ. ཨེས ཏཱཝ ནཡོ ‘ཀཱམེཧཱི’ཏི ཨེཏྠ ཝུཏྟཀཱམེསུ ཝཏྠུཀཱམཔཀྑེ.

ཀིལེསཀཱམཔཀྑེ པན ‘ཚནྡོཏི ཙ རཱགོ’ཏི ཙ ཨེཝམཱདཱིཧི ཨནེཀབྷེདོ ཀཱམཙྪནྡོཡེཝ ཀཱམོཏི ཨདྷིཔྤེཏོ. སོ ཙ ཨཀུསལཔརིཡཱཔནྣོཔི ¶ སམཱནོ ‘‘ཏཏྠ ཀཏམོ ཀཱམཙྪནྡོ ཀཱམོ’’ཏིཨཱདིནཱ ནཡེན ཝིབྷངྒེ (ཝིབྷ. ༥༦༤) ཛྷཱནཔཊིཔཀྑཏོ ཝིསུཾ ཝུཏྟོ. ཀིལེསཀཱམཏྟཱ ཝཱ པུརིམཔདེ ཝུཏྟོ, ཨཀུསལཔརིཡཱཔནྣཏྟཱ དུཏིཡཔདེ. ཨནེཀབྷེདཏོ ཙསྶ ‘ཀཱམཏོ’ཏི ཨཝཏྭཱ ‘ཀཱམེཧཱི’ཏི ཝུཏྟཾ. ཨཉྙེསམྤི ཙ དྷམྨཱནཾ ཨཀུསལབྷཱཝེ ཝིཛྫམཱནེ ‘‘ཏཏྠ ཀཏམེ ཨཀུསལཱ དྷམྨཱ? ཀཱམཙྪནྡོ’’ཏིཨཱདིནཱ ནཡེན ཝིབྷངྒེ ཨུཔརིཛྷཱནངྒཔཙྩནཱིཀཔཊིཔཀྑབྷཱཝདསྶནཏོ ¶ ནཱིཝརཎཱནེཝ ཝུཏྟཱནི. ནཱིཝརཎཱནི ཧི ཛྷཱནངྒཔཙྩནཱིཀཱནི. ཏེསཾ ཛྷཱནངྒཱནེཝ པཊིཔཀྑཱནི, ཝིདྡྷཾསཀཱནི, ཝིགྷཱཏཀཱནཱིཏི ཝུཏྟཾ ཧོཏི. ཏཐཱ ཧི ‘‘སམཱདྷི ཀཱམཙྪནྡསྶ པཊིཔཀྑོ, པཱིཏི བྱཱཔཱདསྶ, ཝིཏཀྐོ ཐིནམིདྡྷསྶ, སུཁཾ ཨུདྡྷཙྩཀུཀྐུཙྩསྶ, ཝིཙཱརོ ཝིཙིཀིཙྪཱཡཱ’’ཏི པེཊཀེ ཝུཏྟཾ.

ཨེཝམེཏྠ ‘ཝིཝིཙྩེཝ ཀཱམེཧཱི’ཏི ཨིམིནཱ ཀཱམཙྪནྡསྶ ཝིཀྑམྦྷནཝིཝེཀོ ཝུཏྟོ ཧོཏི. ‘ཝིཝིཙྩ ཨཀུསལེཧི དྷམྨེཧཱི’ཏི ཨིམིནཱ པཉྩནྣམྤི ནཱིཝརཎཱནཾ. ཨགྒཧིཏགྒཧཎེན པན པཋམེན ཀཱམཙྪནྡསྶ, དུཏིཡེན སེསནཱིཝརཎཱནཾ; ཏཐཱ པཋམེན ཏཱིསུ ཨཀུསལམཱུལེསུ པཉྩཀཱམགུཎབྷེདཝིསཡསྶ ལོབྷསྶ, དུཏིཡེན ཨཱགྷཱཏཝཏྠུབྷེདཱདིཝིསཡཱནཾ ¶ དོསམོཧཱནཾ. ཨོགྷཱདཱིསུ ཝཱ དྷམྨེསུ པཋམེན ཀཱམོགྷཀཱམཡོགཀཱམཱསཝཀཱམུཔཱདཱནཨབྷིཛ྄ཛྷཱཀཱཡགནྠཀཱམརཱགསཾཡོཛནཱནཾ, དུཏིཡེན ཨཝསེསཨོགྷཡོགཱསཝཨུཔཱདཱནགནྠསཾཡོཛནཱནཾ. པཋམེན ཙ ཏཎྷཱཡ ཏཾསམྤཡུཏྟཀཱནཉྩ, དུཏིཡེན ཨཝིཛྫཱཡ ཏཾསམྤཡུཏྟཀཱནཉྩ. ཨཔིཙ པཋམེན ལོབྷསམྤཡུཏྟཨཊྛཙིཏྟུཔྤཱདཱནཾ, དུཏིཡེན སེསཱནཾ ཙཏུནྣཾ ཨཀུསལཙིཏྟུཔྤཱདཱནཾ ཝིཀྑམྦྷནཝིཝེཀོ ཝུཏྟོ ཧོཏཱིཏི ཝེདིཏབྦོ. ཨཡཾ ཏཱཝ ‘ཝིཝིཙྩེཝ ཀཱམེཧི ཝིཝིཙྩ ཨཀུསལེཧི དྷམྨེཧཱི’ཏི ཨེཏྠ ཨཏྠཔྤཀཱསནཱ.

ཨེཏྟཱཝཏཱ ཙ པཋམསྶ ཛྷཱནསྶ པཧཱནངྒཾ དསྶེཏྭཱ ཨིདཱནི སམྤཡོགངྒཾ དསྶེཏུཾ སཝིཏཀྐཾ སཝིཙཱརནྟིཨཱདི ཝུཏྟཾ. ཏཏྠ ཧེཊྛཱ ཝུཏྟལཀྑཎཱདིཝིབྷཱགེན ཨཔྤནཱསམྤཡོགཏོ རཱུཔཱཝཙརབྷཱཝཔྤཏྟེན ཝིཏཀྐེན ཙེཝ ཝིཙཱརེན ཙ སཧ ཝཏྟཏི. རུཀྑོ ཝིཡ པུཔྥེན ཙ ཕལེན ཙཱཏི ཨིདཾ ཛྷཱནཾ སཝིཏཀྐཾ སཝིཙཱརནྟི ཝུཙྩཏི. ཝིབྷངྒེ པན ‘‘ཨིམིནཱ ཙ ཝིཏཀྐེན ཨིམིནཱ ཙ ཝིཙཱརེན ¶ ཨུཔེཏོ ཧོཏི སམུཔེཏོ’’ཏིཨཱདིནཱ (ཝིབྷ. ༥༦༥) ནཡེན པུགྒལཱདྷིཊྛཱནཱ དེསནཱ ཀཏཱ. ཨཏྠོ པན ཏཏྲཔི ཨེཝམེཝ དཊྛབྦོ.

ཝིཝེཀཛནྟི – ཨེཏྠ ཝིཝིཏྟི ཝིཝེཀོ. ནཱིཝརཎཝིགམོཏི ཨཏྠོ. ཝིཝིཏྟོཏི ཝཱ ཝིཝེཀོ, ནཱིཝརཎཝིཝིཏྟོ ཛྷཱནསམྤཡུཏྟདྷམྨརཱསཱིཏི ཨཏྠོ. ཏསྨཱ ཝིཝེཀཱ, ཏསྨིཾ ཝཱ ཝིཝེཀེ, ཛཱཏནྟི ཝིཝེཀཛཾ. པཱིཏིསུཁནྟི – ཨེཏྠ པཱིཏིསུཁཱནི ཧེཊྛཱ པཀཱསིཏཱནེཝ. ཏེསུ པན ཝུཏྟཔྤཀཱརཱཡ པཉྩཝིདྷཱཡ པཱིཏིཡཱ ཡཱ ཨཔྤནཱསམཱདྷིསྶ མཱུལཾ ཧུཏྭཱ ཝཌྜྷམཱནཱ སམཱདྷིསམྤཡོགཾ གཏཱ ཕརཎཱཔཱིཏི – ཨཡཾ ཨིམསྨིཾ ཨཏྠེ ཨདྷིཔྤེཏཱ པཱིཏཱིཏི. ཨཡཉྩ པཱིཏི ཨིདཉྩ སུཁཾ ཨསྶ ¶ ཛྷཱནསྶ, ཨསྨིཾ ཝཱ ཛྷཱནེ ཨཏྠཱིཏི ཨིདཾ ཛྷཱནཾ པཱིཏིསུཁནྟི ཝུཙྩཏི. ཨཐ ཝཱ པཱིཏི ཙ སུཁཉྩ པཱིཏིསུཁཾ, དྷམྨཝིནཡཱདཡོ ཝིཡ. ཝིཝེཀཛཾ པཱིཏིསུཁམསྶ ཛྷཱནསྶ, ཨསྨིཾ ཝཱ ཛྷཱནེ, ཨཏྠཱིཏི ཨེཝམྤི ཝིཝེཀཛཾ པཱིཏིསུཁཾ. ཡཐེཝ ཧི ཛྷཱནཾ ཨེཝཾ པཱིཏིསུཁམྤེཏྠ ཝིཝེཀཛམེཝ ཧོཏི. ཏཉྩསྶ ཨཏྠི. ཏསྨཱ ཨེཀཔདེནེཝ ‘ཝིཝེཀཛཾ པཱིཏིསུཁ’ནྟི ཝཏྟུཾ ཡུཛྫཏི. ཝིབྷངྒེ པན ‘‘ཨིདཾ སུཁཾ ཨིམཱཡ པཱིཏིཡཱ སཧགཏ’’ནྟིཨཱདིནཱ ནཡེན ཝུཏྟཾ. ཨཏྠོ པན ཏཏྠཱཔི ཨེཝམེཝ དཊྛབྦོ.

པཋམཾ ¶ ཛྷཱནནྟི – ཨེཏྠ གཎནཱནུཔུབྦཏཱ པཋམཾ. པཋམཾ ཨུཔྤནྣནྟི པཋམཾ. པཋམཾ སམཱཔཛྫིཏབྦནྟིཔི པཋམཾ. ཨིདཾ པན ན ཨེཀནྟལཀྑཎཾ. ཙིཎྞཝསཱིབྷཱཝོ ཧི ཨཊྛསམཱཔཏྟིལཱབྷཱི ཨཱདིཏོ པཊྛཱཡ མཏྠཀཾ པཱཔེནྟོཔི སམཱཔཛྫིཏུཾ སཀྐོཏི. མཏྠཀཏོ པཊྛཱཡ ཨཱདིཾ པཱཔེནྟོཔི སམཱཔཛྫིཏུཾ སཀྐོཏི. ཨནྟརནྟརཱ ཨོཀྐམནྟོཔི སཀྐོཏི. ཨེཝཾ པུབྦུཔྤཏྟིཡཊྛེན པན པཋམཾ ནཱམ ཧོཏི.

ཛྷཱནནྟི དུཝིདྷཾ ཛྷཱནཾ – ཨཱརམྨཎཱུཔནིཛ྄ཛྷཱནཾ ལཀྑཎཱུཔནིཛ྄ཛྷཱནནྟི. ཏཏྠ ཨཊྛ སམཱཔཏྟིཡོ པཐཝིཀསིཎཱདིཨཱརམྨཎཾ ཨུཔནིཛ྄ཛྷཱཡནྟཱིཏི ཨཱརམྨཎཱུཔནིཛ྄ཛྷཱནནྟི སངྑྱཾ གཏཱ. ཝིཔསྶནཱམགྒཕལཱནི པན ལཀྑཎཱུཔནིཛ྄ཛྷཱནཾ ནཱམ. ཏཏྠ ཝིཔསྶནཱ ཨནིཙྩཱདིལཀྑཎསྶ ཨུཔནིཛ྄ཛྷཱནཏོ ལཀྑཎཱུཔནིཛ྄ཛྷཱནཾ. ཝིཔསྶནཱཡ ཀཏཀིཙྩསྶ མགྒེན ཨིཛ྄ཛྷནཏོ མགྒོ ལཀྑཎཱུཔནིཛ྄ཛྷཱནཾ. ཕལཾ པན ནིརོདྷསཙྩཾ ཏཐལཀྑཎཾ ཨུཔནིཛ྄ཛྷཱཡཏཱིཏི ལཀྑཎཱུཔནིཛ྄ཛྷཱནཾ ནཱམ. ཏེསུ ཨིམསྨིཾ ཨཏྠེ ཨཱརམྨཎཱུཔནིཛ྄ཛྷཱནཾ ཨདྷིཔྤེཏཾ. ཏསྨཱ ཨཱརམྨཎཱུཔནིཛ྄ཛྷཱནཏོ པཙྩནཱིཀཛ྄ཛྷཱཔནཏོ ཝཱ ཛྷཱནནྟི ཝེདིཏབྦཾ.

ཨུཔསམྤཛྫཱཏི ¶ ཨུཔགནྟྭཱ, པཱཔུཎིཏྭཱཏི ཝུཏྟཾ ཧོཏི. ཨུཔསམྤཱདཡིཏྭཱ ཝཱ ནིཔྥཱདེཏྭཱཏི ཝུཏྟཾ ཧོཏི. ཝིབྷངྒེ པན ‘‘ཨུཔསམྤཛྫཱཏི པཋམསྶ ཛྷཱནསྶ ལཱབྷོ པཊིལཱབྷོ པཏྟི སམྤཏྟི ཕུསནཱ སཙྪིཀིརིཡཱ ཨུཔསམྤདཱ’’ཏི (ཝིབྷ. ༥༧༠) ཝུཏྟཾ. ཏསྶཱཔི ཨེཝམེཝཏྠོ དཊྛབྦོ. ཝིཧརཏཱིཏི ཏདནུརཱུཔེན ཨིརིཡཱཔཐཝིཧཱརེན ཨིཏིཝུཏྟཔྤཀཱརཛ྄ཛྷཱནསམངྒཱི ཧུཏྭཱ ཨཏྟབྷཱཝསྶ ཨིརིཡནཾ ཝུཏྟིཾ པཱལནཾ ཡཔནཾ ཡཱཔནཾ ཙཱརཾ ཝིཧཱརཾ ཨབྷིནིཔྥཱདེཏི. ཝུཏྟཉྷེཏཾ ཝིབྷངྒེ – ‘‘ཝིཧརཏཱིཏི ཨིརིཡཏི ཝཏྟཏི པཱལེཏི ཡཔེཏི ཡཱཔེཏི ཙརཏི ཝིཧརཏི, ཏེན ཝུཙྩཏི ཝིཧརཏཱི’’ཏི (ཝིབྷ. ༥༡༢, ༥༧༡).

པཐཝིཀསིཎནྟི ¶ ཨེཏྠ པཐཝིམཎྜལམྤི སཀལཊྛེན པཐཝིཀསིཎནྟི ཝུཙྩཏི. ཏཾ ནིསྶཱཡ པཊིལདྡྷཾ ནིམིཏྟམྤི. པཐཝིཀསིཎནིམིཏྟེ པཊིལདྡྷཛ྄ཛྷཱནམྤི. ཏཏྠ ཨིམསྨིཾ ཨཏྠེ ཛྷཱནཾ པཐཝཱིཀསིཎནྟི ཝེདིཏབྦཾ. པཐཝིཀསིཎསངྑཱཏཾ ཛྷཱནཾ ཨུཔསམྤཛྫ ཝིཧརཏཱིཏི ཨཡཉྷེཏྠ སངྑེཔཏྠོ. ཨིམསྨིཾ པན ¶ པཐཝིཀསིཎེ པརིཀམྨཾ ཀཏྭཱ ཙཏུཀྐཔཉྩཀཛ྄ཛྷཱནཱནི ནིབྦཏྟེཏྭཱ ཛྷཱནཔདཊྛཱནཾ ཝིཔསྶནཾ ཝཌྜྷེཏྭཱ ཨརཧཏྟཾ པཏྟུཀཱམེན ཀུལཔུཏྟེན ཀིཾ ཀཏྟབྦནྟི? ཨཱདིཏོ ཏཱཝ པཱཏིམོཀྑསཾཝརཨིནྡྲིཡསཾཝརཨཱཛཱིཝཔཱརིསུདྡྷིཔཙྩཡསནྣིསྶིཏསངྑཱཏཱནི ཙཏྟཱརི སཱིལཱནི ཝིསོདྷེཏྭཱ སུཔརིསུདྡྷེ སཱིལེ པཏིཊྛིཏེན, ཡྭཱསྶ ཨཱཝཱསཱདཱིསུ དསསུ པལིབོདྷེསུ པལིབོདྷོ ཨཏྠི, ཏཾ ཨུཔཙྪིནྡིཏྭཱ ཀམྨཊྛཱནདཱཡཀཾ ཀལྱཱཎམིཏྟཾ ཨུཔསངྐམིཏྭཱ པཱལི༹ཡཱ ཨཱགཏེསུ ཨཊྛཏིཾསཱཡ ཀམྨཊྛཱནེསུ ཨཏྟནོ ཙརིཡཱནུཀཱུལཾ ཀམྨཊྛཱནཾ ཨུཔཔརིཀྑནྟེན སཙསྶ ཨིདཾ པཐཝིཀསིཎཾ ཨནུཀཱུལཾ ཧོཏི, ཨིདམེཝ ཀམྨཊྛཱནཾ གཧེཏྭཱ ཛྷཱནབྷཱཝནཱཡ ཨནནུརཱུཔཾ ཝིཧཱརཾ པཧཱཡ ཨནུརཱུཔེ ཝིཧཱརེ ཝིཧརནྟེན ཁུདྡཀཔལིབོདྷུཔཙྪེདཾ ཀཏྭཱ ཀསིཎཔརིཀམྨནིམིཏྟཱནུརཀྑཎསཏྟཨསཔྤཱཡཔརིཝཛྫནསཏྟསཔྤཱཡསེཝནདསཝིདྷཨཔྤནཱཀོསལླཔྤབྷེདཾ སབྦཾ བྷཱཝནཱཝིདྷཱནཾ ཨཔརིཧཱཔེནྟེན ཛྷཱནཱདྷིགམཏྠཱཡ པཊིཔཛྫིཏབྦཾ. ཨཡམེཏྠ སངྑེཔོ. ཝིཏྠཱརོ པན ཝིསུདྡྷིམགྒེ (ཝིསུདྡྷི. ༡.༥༡ ཨཱདཡོ) ཝུཏྟནཡེནེཝ ཝེདིཏབྦོ. ཡཐཱ ཙེཏྠ ཨེཝཾ ཨིཏོ པརེསུཔི. སབྦཀམྨཊྛཱནཱནཉྷི བྷཱཝནཱཝིདྷཱནཾ སབྦཾ ཨཊྛཀཐཱནཡེན གཧེཏྭཱ ཝིསུདྡྷིམགྒེ ¶ ཝིཏྠཱརིཏཾ. ཀིཾ ཏེན ཏཏྠ ཏཏྠ པུན ཝུཏྟེནཱཏི ན ནཾ པུན ཝིཏྠཱརཡཱམ. པཱལི༹ཡཱ པན ཧེཊྛཱ ཨནཱགཏཾ ཨཏྠཾ ཨཔརིཧཱཔེནྟཱ ནིརནྟརཾ ཨནུཔདཝཎྞནམེཝ ཀརིསྶཱམ.

ཏསྨིཾ སམཡེཏི ཏསྨིཾ པཋམཛ྄ཛྷཱནཾ ཨུཔསམྤཛྫ ཝིཧརཎསམཡེ. ཕསྶོ ཧོཏི…པེ… ཨཝིཀྑེཔོ ཧོཏཱིཏི ཨིམེ ཀཱམཱཝཙརཔཋམཀུསལཙིཏྟེ ཝུཏྟཔྤཀཱརཱཡ པདཔཊིཔཱཊིཡཱ ཚཔཎྞཱས དྷམྨཱ ཧོནྟི. ཀེཝལཉྷི ཏེ ཀཱམཱཝཙརཱ, ཨིམེ བྷཱུམནྟརཝསེན མཧགྒཏཱ རཱུཔཱཝཙརཱཏི ཨཡམེཏྠ ཝིསེསོ. སེསཾ ཏཱདིསམེཝ. ཡེཝཱཔནཀཱ པནེཏྠ ཚནྡཱདཡོ ཙཏྟཱརོཝ ལབྦྷནྟི. ཀོཊྛཱསཝཱརསུཉྙཏཝཱརཱ པཱཀཏིཀཱ ཨེཝཱཏི.

པཋམཾ.

དུཏིཡཛ྄ཛྷཱནཾ

༡༦༡-༡༦༢. དུཏིཡཛ྄ཛྷཱནནིདྡེསེ ¶ ཝིཏཀྐཝིཙཱརཱནཾ ཝཱུཔསམཱཏི ¶ ཝིཏཀྐསྶ ཙ ཝིཙཱརསྶ ཙཱཏི ཨིམེསཾ དྭིནྣཾ ཝཱུཔསམཱ, སམཏིཀྐམཱ; དུཏིཡཛ྄ཛྷཱནཀྑཎེ ཨཔཱཏུབྷཱཝཱཏི ཝུཏྟཾ ཧོཏི. ཏཏྠ ཀིཉྩཱཔི དུཏིཡཛ྄ཛྷཱནེ སབྦེཔི པཋམཛ྄ཛྷཱནདྷམྨཱ ན སནྟི, ཨཉྙེཡེཝ ཧི པཋམཛ྄ཛྷཱནེ ཕསྶཱདཡོ ཨཉྙེ ཨིདྷ, ཨོལཱ༹རིཀསྶ པན ཨོལཱ༹རིཀསྶ ཨངྒསྶ སམཏིཀྐམཱ པཋམཛ྄ཛྷཱནཏོ པརེསཾ དུཏིཡཛ྄ཛྷཱནཱདཱིནཾ ཨདྷིགམོ ཧོཏཱིཏི དཱིཔནཏྠཾ ཝིཏཀྐཝིཙཱརཱནཾ ཝཱུཔསམཱཏི ཨེཝཾ ཝུཏྟནྟི ཝེདིཏབྦཾ. ཨཛ྄ཛྷཏྟནྟི ཨིདྷ – ནིཡཀཛ྄ཛྷཏྟཾ ཨདྷིཔྤེཏཾ. ཝིབྷངྒེ པན ‘‘ཨཛ྄ཛྷཏྟཾ པཙྩཏྟ’’ནྟི (ཝིབྷ. ༥༧༣) ཨེཏྟཀམེཝ ཝུཏྟཾ. ཡསྨཱ ནིཡཀཛ྄ཛྷཏྟཾ ཨདྷིཔྤེཏཾ, ཏསྨཱ ཨཏྟནི ཛཱཏཾ, ཨཏྟནོ སནྟཱནེ ནིབྦཏྟནྟི ཨཡམེཏྠ ཨཏྠོ.

སམྤསཱདནནྟི སམྤསཱདནཾ ཝུཙྩཏི སདྡྷཱ. སམྤསཱདནཡོགཏོ ཛྷཱནམྤི སམྤསཱདནཾ, ནཱིལཝཎྞཡོགཏོ ནཱིལཝཏྠཾ ཝིཡ. ཡསྨཱ ཝཱ ཏཾ ཛྷཱནཾ སམྤསཱདནསམནྣཱགཏཏྟཱ ཝིཏཀྐཝིཙཱརཀྑོབྷཝཱུཔསམནེན ཙ ཙེཏོ སམྤསཱདཡཏི, ཏསྨཱཔི སམྤསཱདནནྟི ཝུཏྟཾ. ཨིམསྨིཉྩ ཨཏྠཝིཀཔྤེ ‘སམྤསཱདནཾ ཙེཏསོ’ཏི ཨེཝཾ པདསམྦནྡྷོ ཝེདིཏབྦོ. པུརིམསྨིཾ པན ཨཏྠཝིཀཔྤེ ‘ཙེཏསོ’ཏི ཨེཏཾ ཨེཀོདིབྷཱཝེན སདྡྷིཾ ཡོཛེཏབྦཾ.

ཏཏྲཱཡཾ ཨཏྠཡོཛནཱ – ཨེཀོ ཨུདེཏཱིཏི ཨེཀོདི, ཝིཏཀྐཝིཙཱརེཧི ཨནཛ྄ཛྷཱརུལ༹ྷཏྟཱ ཨགྒོ སེཊྛོ ཧུཏྭཱ ཨུདེཏཱིཏི ཨཏྠོ. སེཊྛོཔི ¶ ཧི ལོཀེ ཨེཀོཏི ཝུཙྩཏི. ཝིཏཀྐཝིཙཱརཝིརཧཏོ ཝཱ ཨེཀོ ཨསཧཱཡོ ཧུཏྭཱཏིཔི ཝཏྟུཾ ཝཊྚཏི. ཨཐ ཝཱ སམྤཡུཏྟདྷམྨེ ཨུདཱཡཏཱིཏི ཨུདི. ཨུཊྛཱཔེཏཱིཏི ཨཏྠོ. སེཊྛཊྛེན ཨེཀོ ཙ སོ ཨུདི ཙཱཏི ཨེཀོདི. སམཱདྷིསྶེཏཾ ཨདྷིཝཙནཾ. ཨིཏི ཨིམཾ ཨེཀོདིཾ བྷཱཝེཏི ཝཌྜྷེཏཱིཏི ཨིདཾ དུཏིཡཛ྄ཛྷཱནཾ ཨེཀོདིབྷཱཝཾ. སོ པནཱཡཾ ཨེཀོདི ཡསྨཱ ཙེཏསོ, ན སཏྟསྶ, ན ཛཱིཝསྶ, ཏསྨཱ ཨེཏཾ ‘ཙེཏསོ ཨེཀོདིབྷཱཝ’ནྟི ཝུཏྟཾ.

‘ནནུ ཙཱཡཾ སདྡྷཱ པཋམཛ྄ཛྷཱནེཔི ཨཏྠི, ཨཡཉྩ ཨེཀོདིནཱམཀོ སམཱདྷི, ཨཐ ཀསྨཱ ཨིདམེཝ སམྤསཱདནཾ ཙེཏསོ ཨེཀོདིབྷཱཝཉྩཱཏི ཝུཏྟནྟི? ཝུཙྩཏེ – ‘ཨདུཉྷི པཋམཛ྄ཛྷཱནཾ ཝིཏཀྐཝིཙཱརཀྑོབྷེན ཝཱིཙིཏརངྒསམཱཀུལམིཝ ཛལཾ ན སུཔྤསནྣཾ ཧོཏི, ཏསྨཱ སཏིཡཱཔི སདྡྷཱཡ ¶ སམྤསཱདན’ནྟི ¶ ན ཝུཏྟཾ. ན སུཔྤསནྣཏྟཱ ཨེཝ ཙེཏྠ སམཱདྷིཔི ན སུཊྛུ པཱཀཊོ. ཏསྨཱ ཨེཀོདིབྷཱཝནྟིཔི ན ཝུཏྟཾ. ཨིམསྨིཾ པན ཛྷཱནེ ཝིཏཀྐཝིཙཱརཔལིབོདྷཱབྷཱཝེན ལདྡྷོཀཱསཱ བལཝཏཱི སདྡྷཱ, བལཝསདྡྷཱསཧཱཡཔཊིལཱབྷེནེཝ སམཱདྷིཔི པཱཀཊོ. ཏསྨཱ ཨིདམེཝ ཨེཝཾ ཝུཏྟནྟི ཝེདིཏབྦཾ. ཝིབྷངྒེ པན ‘‘སམྤསཱདནནྟི ཡཱ སདྡྷཱ སདྡཧནཱ ཨོཀཔྤནཱ ཨབྷིཔྤསཱདོ; ཙེཏསོ ཨེཀོདིབྷཱཝནྟི ཡཱ ཙིཏྟསྶ ཋིཏི…པེ… སམྨཱསམཱདྷཱི’’ཏི (ཝིབྷ. ༥༧༤-༥༧༥) ཨེཏྟཀམེཝ ཝུཏྟཾ. ཨེཝཾ ཝུཏྟེན པནེཏེན སདྡྷིཾ ཨཡཾ ཨཏྠཝཎྞནཱ ཡཐཱ ན ཝིརུཛ྄ཛྷཏི ཨཉྙདཏྠུ སཾསནྡཏི ཙེཝ སམེཏི ཙ, ཨེཝཾ ཝེདིཏབྦཱ.

ཨཝིཏཀྐཾ ཨཝིཙཱརནྟི བྷཱཝནཱཡ པཧཱིནཏྟཱ ཨེཏསྨིཾ ཨེཏསྶ ཝཱ ཝིཏཀྐོ ནཏྠཱིཏི ཨཝིཏཀྐཾ. ཨིམིནཱཝ ནཡེན ཨཝིཙཱརཾ. ཝིབྷངྒེཔི ཝུཏྟཾ – ‘‘ཨིཏི ཨཡཉྩ ཝིཏཀྐོ ཨཡཉྩ ཝིཙཱརོ སནྟཱ ཧོནྟི སམིཏཱ ཝཱུཔསནྟཱ ཨཏྠངྒཏཱ ཨབྦྷཏྠངྒཏཱ ཨཔྤིཏཱ བྱཔྤིཏཱ སོསིཏཱ ཝིསོསིཏཱ བྱནྟཱིཀཏཱ, ཏེན ཝུཙྩཏི ཨཝིཏཀྐཾ ཨཝིཙཱར’’ནྟི.

ཨེཏྠཱཧ – ནནུ ཙ ཝིཏཀྐཝིཙཱརཱནཾ ཝཱུཔསམཱཏི ཨིམིནཱཔི ཨཡམཏྠོ སིདྡྷོ? ཨཐ ཀསྨཱ པུན ‘ཝུཏྟཾ ཨཝིཏཀྐཾ ཨཝིཙཱར’ནྟི? ཝུཙྩཏེ – ཨེཝམེཏཾ, སིདྡྷོཝཱཡམཏྠོ, ན པནེཏཾ ཏདཏྠདཱིཔཀཾ. ནནུ ཨཝོཙུམྷ – ‘ཨོལཱ༹རིཀསྶ པན ཨོལཱ༹རིཀསྶ ཨངྒསྶ སམཏིཀྐམཱ པཋམཛ྄ཛྷཱནཏོ པརེསཾ དུཏིཡཛ྄ཛྷཱནཱདཱིནཾ ¶ སམདྷིགམོ ཧོཏཱིཏི དཱིཔནཏྠཾ ཝིཏཀྐཝིཙཱརཱནཾ ཝཱུཔསམཱཏི ཨེཝཾ ཝུཏྟ’ནྟི.

ཨཔིཙ ཝིཏཀྐཝིཙཱརཱནཾ ཝཱུཔསམཱ ཨིདཾ སམྤསཱདནཾ, ན ཀིལེསཀཱལུསིཡསྶ; ཝིཏཀྐཝིཙཱརཱནཉྩ ཝཱུཔསམཱ ཨེཀོདིབྷཱཝཾ, ན ཨུཔཙཱརཛ྄ཛྷཱནམིཝ ནཱིཝརཎཔྤཧཱནཱ; ན པཋམཛ྄ཛྷཱནམིཝ ཙ ཨངྒཔཱཏུབྷཱཝཱཏི ཨེཝཾ སམྤསཱདནཨེཀོདིབྷཱཝཱནཾ ཧེཏུཔརིདཱིཔཀམིདཾ ཝཙནཾ. ཏཐཱ ཝིཏཀྐཝིཙཱརཱནཾ ཝཱུཔསམཱ ཨིདཾ ཨཝིཏཀྐཾ ཨཝིཙཱརཾ, ན ཏཏིཡཙཏུཏྠཛ྄ཛྷཱནཱནི ཝིཡ, ཙཀྑུཝིཉྙཱཎཱདཱིནི ཝིཡ ཙ, ཨབྷཱཝཱཏི ཨེཝཾ ཨཝིཏཀྐཨཝིཙཱརབྷཱཝསྶ ཧེཏུཔརིདཱིཔཀཉྩ, ན ཝིཏཀྐཝིཙཱརཱབྷཱཝམཏྟཔརིདཱིཔཀཾ. ཝིཏཀྐཝིཙཱརཱབྷཱཝམཏྟཔརིདཱིཔཀམེཝ པན ཨཝིཏཀྐཾ ཨཝིཙཱརནྟི ཨིདཾ ཝཙནཾ, ཏསྨཱ པུརིམཾ ཝཏྭཱཔི པུན ཝཏྟབྦམེཝཱཏི.

སམཱདྷིཛནྟི པཋམཛ྄ཛྷཱནསམཱདྷིཏོ སམྤཡུཏྟསམཱདྷིཏོ ཝཱ ཛཱཏནྟི ཨཏྠོ. ཏཏྠ ཀིཉྩཱཔི ¶ ¶ པཋམམྤི སམྤཡུཏྟསམཱདྷིཏོ ཛཱཏཾ, ཨཐ ཁོ ཨཡམེཝ སམཱདྷི ‘སམཱདྷཱི’ཏི ཝཏྟབྦཏཾ ཨརཧཏི, ཝིཏཀྐཝིཙཱརཀྑོབྷཝིརཧེན ཨཏིཝིཡ ཨཙལཏྟཱ སུཔྤསནྣཏྟཱ ཙ. ཏསྨཱ ཨིམསྶ ཝཎྞབྷཎནཏྠཾ ཨིདམེཝ སམཱདྷིཛནྟི ཝུཏྟཾ. པཱིཏིསུཁནྟི ཨིདཾ ཝུཏྟནཡམེཝ.

དུཏིཡནྟི གཎནཱནུཔུབྦཏཱ དུཏིཡཾ. ཨིདཾ དུཏིཡཾ སམཱཔཛྫཏཱིཏིཔི དུཏིཡཾ. ཏསྨིཾ སམཡེ ཕསྶོ ཧོཏཱིཏིཨཱདཱིསུ ཛྷཱནཔཉྩཀེ ཝིཏཀྐཝིཙཱརཔདཱནི མགྒཔཉྩཀེ ཙ སམྨཱསངྐཔྤཔདཾ པརིཧཱིནཾ. ཏེསཾ ཝསེན སཝིབྷཏྟིཀཱཝིབྷཏྟིཀཔདཝིནིཙྪཡོ ཝེདིཏབྦོ. ཀོཊྛཱསཝཱརེཔི ཏིཝངྒིཀཾ ཛྷཱནཾ ཧོཏི, ཙཏུརངྒིཀོ མགྒོ ཧོཏཱིཏི ཨཱགཏཾ. སེསཾ པཋམཛ྄ཛྷཱནསདིསམེཝཱཏི.

དུཏིཡཾ.

ཏཏིཡཛ྄ཛྷཱནཾ

༡༦༣. ཏཏིཡཛ྄ཛྷཱནནིདྡེསེ པཱིཏིཡཱ ཙ ཝིརཱགཱཏི ཝིརཱགོ ནཱམ ཝུཏྟཔྤཀཱརཱཡ པཱིཏིཡཱ ཛིགུཙྪནཾ ཝཱ སམཏིཀྐམོ ཝཱ. ཨུབྷིནྣཾ པན ཨནྟརཱ ‘ཙ’-སདྡོ སམྤིཎྜནཏྠོ. སོ ཝཱུཔསམཾ ཝཱ སམྤིཎྜེཏི ཝིཏཀྐཝིཙཱརཝཱུཔསམཾ ཝཱ. ཏཏྠ ཡདཱ ཝཱུཔསམམེཝ སམྤིཎྜེཏི ཏདཱ པཱིཏིཡཱ ཝིརཱགཱ ཙ, ཀིཉྩ བྷིཡྻོ ‘ཝཱུཔསམཱ’ ཙཱཏི ཨེཝཾ ཡོཛནཱ ཝེདིཏབྦཱ. ཨིམིསྶཱ ཙ ཡོཛནཱཡ ཝིརཱགོ ཛིགུཙྪནཏྠོ ཧོཏི. ཏསྨཱ པཱིཏིཡཱ ཛིགུཙྪནཱ ཙ ཝཱུཔསམཱ ¶ ཙཱཏི ཨཡམཏྠོ དཊྛབྦོ. ཡདཱ པན ཝིཏཀྐཝིཙཱརཱནཾ ཝཱུཔསམཾ སམྤིཎྜེཏི ཏདཱ པཱིཏིཡཱ ཙ ཝིརཱགཱ ཀིཉྩ བྷིཡྻོ ‘ཝིཏཀྐཝིཙཱརཱནཉྩ ཝཱུཔསམཱ’ཏི ཨེཝཾ ཡོཛནཱ ཝེདིཏབྦཱ. ཨིམིསྶཱ ཙ ཡོཛནཱཡ ཝིརཱགོ སམཏིཀྐམནཏྠོ ཧོཏི, ཏསྨཱ པཱིཏིཡཱ ཙ སམཏིཀྐམཱ ཝིཏཀྐཝིཙཱརཱནཉྩ ཝཱུཔསམཱཏི ཨཡམཏྠོ དཊྛབྦོ.

ཀཱམཉྩེཏེ ཝིཏཀྐཝིཙཱརཱ དུཏིཡཛ྄ཛྷཱནེཡེཝ ཝཱུཔསནྟཱ, ཨིམསྶ པན ཛྷཱནསྶ མགྒཔརིདཱིཔནཏྠཾ ཝཎྞབྷཎནཏྠཉྩེཏཾ ཝུཏྟཾ. ཝིཏཀྐཝིཙཱརཱནཉྩ ཝཱུཔསམཱཏི ཧི ཝུཏྟེ ཨིདཾ པཉྙཱཡཏི – ནཱུན ཝིཏཀྐཝིཙཱརཝཱུཔསམོ མགྒོ ཨིམསྶ ཛྷཱནསྶཱཏི? ཡཐཱ ཙ ཏཏིཡེ ཨརིཡམགྒེ ¶ ཨཔྤཧཱིནཱནམྤི སཀྐཱཡདིཊྛཱདཱིནཾ ‘‘པཉྩནྣཾ ཨོརམྦྷཱགིཡཱནཾ ¶ སཾཡོཛནཱནཾ པཧཱནཱ’’ཏི (མ. ནི. ༢.༡༣༢) ཨེཝཾ པཧཱནཾ ཝུཙྩམཱནཾ ཝཎྞབྷཎནཾ ཧོཏི, ཏདདྷིགམཱཡ ཨུསྶུཀྐཱནཾ ཨུསྶཱཧཛནཀཾ, ཨེཝམེཝ ཨིདྷ ཨཝཱུཔསནྟཱནམྤི ཝིཏཀྐཝིཙཱརཱནཾ ཝཱུཔསམོ ཝུཙྩམཱནོ ཝཎྞབྷཎནཾ ཧོཏི. ཏེནཱཡམཏྠོ ཝུཏྟོ – ‘པཱིཏིཡཱ ཙ སམཏིཀྐམཱ ཝིཏཀྐཝིཙཱརཱནཉྩ ཝཱུཔསམཱ’ཏི.

ཨུཔེཀྑཀོ ཙ ཝིཧརཏཱིཏི – ཨེཏྠ ཨུཔཔཏྟིཏོ ཨིཀྑཏཱིཏི ཨུཔེཀྑཱ. སམཾ པསྶཏི, ཨཔཀྑཔཏིཏཱ ཧུཏྭཱ པསྶཏཱིཏི ཨཏྠོ. ཏཱཡ ཝིསདཱཡ ཝིཔུལཱཡ ཐཱམགཏཱཡ སམནྣཱགཏཏྟཱ ཏཏིཡཛ྄ཛྷཱནསམངྒཱི ཨུཔེཀྑཀོཏི ཝུཙྩཏི.

ཨུཔེཀྑཱ པན དསཝིདྷཱ ཧོཏི – ཚལ༹ངྒུཔེཀྑཱ བྲཧྨཝིཧཱརུཔེཀྑཱ བོཛ྄ཛྷངྒུཔེཀྑཱ ཝཱིརིཡུཔེཀྑཱ སངྑཱརུཔེཀྑཱ ཝེདནུཔེཀྑཱ ཝིཔསྶནུཔེཀྑཱ ཏཏྲམཛ྄ཛྷཏྟུཔེཀྑཱ ཛྷཱནུཔེཀྑཱ པཱརིསུདྡྷུཔེཀྑཱཏི.

ཏཏྠ ཡཱ ‘‘ཨིདྷ, བྷིཀྑཝེ, བྷིཀྑུ ཙཀྑུནཱ རཱུཔཾ དིསྭཱ ནེཝ སུམནོ ཧོཏི, ན དུམྨནོ, ཨུཔེཀྑཀོ ཙ ཝིཧརཏི སཏོ སམྤཛཱནོ’’ཏི (ཨ. ནི. ༥.༡; མཧཱནི. ༩༠; ཙཱུལ༹ནི. མེཏྟགཱུམཱཎཝཔུཙྪཱནིདྡེས ༡༨; པཊི. མ. ༣.༡༧) ཨེཝམཱགཏཱ ཁཱིཎཱསཝསྶ ཚསུ དྭཱརེསུ ཨིཊྛཱནིཊྛཚལཱ༹རམྨཎཱཔཱཐེ པརིསུདྡྷཔཀཏིབྷཱཝཱཝིཛཧནཱཀཱརབྷཱུཏཱ ཨུཔེཀྑཱ, ཨཡཾ ‘ཚལ༹ངྒུཔེཀྑཱ’ ནཱམ.

ཡཱ ¶ པན ‘‘ཨུཔེཀྑཱསཧགཏེན ཙེཏསཱ ཨེཀཾ དིསཾ ཕརིཏྭཱ ཝིཧརཏཱི’’ཏི (དཱི. ནི. ༡.༥༥༦; མ. ནི. ༡.༧༧) ཨེཝམཱགཏཱ སཏྟེསུ མཛ྄ཛྷཏྟཱཀཱརབྷཱུཏཱ ཨུཔེཀྑཱ, ཨཡཾ ‘བྲཧྨཝིཧཱརུཔེཀྑཱ’ ནཱམ.

ཡཱ ‘‘ཨུཔེཀྑཱསམྦོཛ྄ཛྷངྒཾ བྷཱཝེཏི ཝིཝེཀནིསྶིཏ’’ནྟི (མ. ནི. ༡.༢༧; ༣.༢༤༧) ཨེཝམཱགཏཱ སཧཛཱཏདྷམྨཱནཾ མཛ྄ཛྷཏྟཱཀཱརབྷཱུཏཱ ཨུཔེཀྑཱ, ཨཡཾ ‘བོཛ྄ཛྷངྒུཔེཀྑཱ’ ནཱམ.

ཡཱ ¶ པན ‘‘ཀཱལེན ཀཱལཾ ཨུཔེཀྑཱནིམིཏྟཾ མནསི ཀརོཏཱི’’ཏི (ཨ. ནི. ༣.༡༠༣) ཨེཝམཱགཏཱ ཨནཙྩཱརདྡྷནཱཏིསིཐིལཝཱིརིཡསངྑཱཏཱ ཨུཔེཀྑཱ, ཨཡཾ ‘ཝཱིརིཡུཔེཀྑཱ’ ནཱམ.

ཡཱ ‘‘ཀཏི སངྑཱརུཔེཀྑཱ སམཐཝསེན ཨུཔྤཛྫནྟི, ཀཏི སངྑཱརུཔེཀྑཱ ཝིཔསྶནཱཝསེན ཨུཔྤཛྫནྟི? ཨཊྛ སངྑཱརུཔེཀྑཱ སམཐཝསེན ཨུཔྤཛྫནྟི, དས སངྑཱརུཔེཀྑཱ ཝིཔསྶནཱཝསེན ཨུཔྤཛྫནྟཱི’’ཏི (པཊི. མ. ༡.༥༧) ཨེཝམཱགཏཱ ནཱིཝརཎཱདིཔཊིསངྑཱསནྟིཊྛནཱགཧཎེ མཛ྄ཛྷཏྟབྷཱུཏཱ ཨུཔེཀྑཱ, ཨཡཾ ‘སངྑཱརུཔེཀྑཱ’ ནཱམ.

ཡཱ པན ‘‘ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི ཨུཔེཀྑཱསཧགཏ’’ནྟི (དྷ. ས. ༡༥༠) ཨེཝམཱགཏཱ ཨདུཀྑམསུཁསངྑཱཏཱ ཨུཔེཀྑཱ ཨཡཾ ‘ཝེདནུཔེཀྑཱ’ ནཱམ.

ཡཱ ‘‘ཡདཏྠི, ཡཾ བྷཱུཏཾ, ཏཾ པཛཧཏི, ཨུཔེཀྑཾ པཊིལབྷཏཱི’’ཏི ¶ (མ. ནི. ༣.༧༡; ཨ. ནི. ༧.༥༥) ཨེཝམཱགཏཱ ཝིཙིནནེ མཛ྄ཛྷཏྟབྷཱུཏཱ ཨུཔེཀྑཱ, ཨཡཾ ‘ཝིཔསྶནུཔེཀྑཱ’ ནཱམ.

ཡཱ པན ཚནྡཱདཱིསུ ཡེཝཱཔནཀེསུ ཨཱགཏཱ སཧཛཱཏཱནཾ སམཝཱཧིཏབྷཱུཏཱ ཨུཔེཀྑཱ ཨཡཾ, ‘ཏཏྲམཛ྄ཛྷཏྟུཔེཀྑཱ’ ནཱམ.

ཡཱ ‘‘ཨུཔེཀྑཀོ ཙ ཝིཧརཏཱི’’ཏི (དྷ. ས. ༡༦༣; དཱི. ནི. ༡.༢༣༠) ཨེཝམཱགཏཱ ཨགྒསུཁེཔི ཏསྨིཾ ཨཔཀྑཔཱཏཛནནཱི ཨུཔེཀྑཱ, ཨཡཾ ‘ཛྷཱནུཔེཀྑཱ’ ནཱམ.

ཡཱ ‘‘ཨུཔེཀྑཱསཏིཔཱརིསུདྡྷིཾ ཙཏུཏྠཾ ཛྷཱན’’ནྟི ཨེཝམཱགཏཱ སབྦཔཙྩནཱིཀཔརིསུདྡྷཱ པཙྩནཱིཀཝཱུཔསམནེཔི ཨབྱཱཔཱརབྷཱུཏཱ ཨུཔེཀྑཱ, ཨཡཾ ‘པཱརིསུདྡྷུཔེཀྑཱ’ ནཱམ.

ཏཏྠ ཚལ༹ངྒུཔེཀྑཱ ཙ བྲཧྨཝིཧཱརུཔེཀྑཱ ཙ བོཛ྄ཛྷངྒུཔེཀྑཱ ཙ ཏཏྲམཛ྄ཛྷཏྟུཔེཀྑཱ ཙ ཛྷཱནུཔེཀྑཱ ཙ པཱརིསུདྡྷུཔེཀྑཱ ཙ ཨཏྠཏོ ཨེཀཱ ཏཏྲམཛ྄ཛྷཏྟུཔེཀྑཱཝ ཧོཏི. ཏེན ཏེན ཨཝཏྠཱབྷེདེན པནསྶཱ ཨཡཾ བྷེདོ ¶ . ཨེཀསྶཱཔི སཏོ སཏྟསྶ ཀུམཱརཡུཝཐེར སེནཱཔཏིརཱཛཱདིཝསེན བྷེདོ ཝིཡ. ཏསྨཱ ཏཱསུ ཡཏྠ ཚལ༹ངྒུཔེཀྑཱ ན ཏཏྠ བོཛ྄ཛྷངྒུཔེཀྑཱདཡོ, ཡཏྠ ཝཱ པན བོཛ྄ཛྷངྒུཔེཀྑཱ ན ཏཏྠ ཚལ༹ངྒུཔེཀྑཱདཡོ ཧོནྟཱིཏི ཝེདིཏབྦཱ.

ཡཐཱ ¶ ཙེཏཱསཾ ཨཏྠཏོ ཨེཀཱིབྷཱཝོ, ཨེཝཾ སངྑཱརུཔེཀྑཱཝིཔསྶནུཔེཀྑཱནམྤི. པཉྙཱ ཨེཝ ཧི ཨེསཱ ཀིཙྩཝསེན དྭིདྷཱ བྷིནྣཱ. ཡཐཱ ཧི པུརིསསྶ སཱཡཾ གེཧཾ པཝིཊྛཾ སཔྤཾ ཨཛཔདདཎྜཾ གཧེཏྭཱ པརིཡེསམཱནསྶ ཏཾ ཐུསཀོཊྛཀེ ནིཔནྣཾ དིསྭཱ ‘སཔྤོ ནུ ཁོ ནོ’ཏི ཨཝལོཀེནྟསྶ སོཝཏྠིཀཏྟཡཾ དིསྭཱ ནིབྦེམཏིཀསྶ ‘སཔྤོ, ན སཔྤོ’ཏི ཝིཙིནནེ མཛ྄ཛྷཏྟཏཱ ཧོཏི; ཨེཝམེཝ ཡཱ ཨཱརདྡྷཝིཔསྶཀསྶ ཝིཔསྶནཱཉཱཎེན ལཀྑཎཏྟཡེ དིཊྛེ སངྑཱརཱནཾ ཨནིཙྩབྷཱཝཱདིཝིཙིནནེ མཛ྄ཛྷཏྟཏཱ ཨུཔྤཛྫཏི, ཨཡཾ ‘ཝིཔསྶནུཔེཀྑཱ’. ཡཐཱ པན ཏསྶ པུརིསསྶ ཨཛཔདདཎྜཀེན གཱལ༹ྷཾ སཔྤཾ གཧེཏྭཱ ‘ཀིནྟཱཧཾ ཨིམཾ སཔྤཾ ཨཝིཧེཋེནྟོ ཨཏྟཱནཉྩ ཨིམིནཱ ཨཌཾསཱཔེནྟོ མུཉྩེཡྻ’ནྟི མུཉྩནཱཀཱརམེཝ པརིཡེསཏོ གཧཎེ མཛ྄ཛྷཏྟཏཱ ཧོཏི; ཨེཝམེཝ ཡཱ ལཀྑཎཏྟཡསྶ དིཊྛཏྟཱ, ཨཱདིཏྟེ ཝིཡ ཏཡོ བྷཝེ པསྶཏོ, སངྑཱརགྒཧཎེ མཛ྄ཛྷཏྟཏཱ, ཨཡཾ ‘སངྑཱརུཔེཀྑཱ’. ཨིཏི ཝིཔསྶནུཔེཀྑཱཡ སིདྡྷཱཡ སངྑཱརུཔེཀྑཱཔི སིདྡྷཱཝ ཧོཏི. ཨིམིནཱ པནེསཱ ཝིཙིནནགྒཧཎེསུ མཛ྄ཛྷཏྟསངྑཱཏེན ཀིཙྩེན དྭིདྷཱ བྷིནྣཱཏི. ཝིརིཡུཔེཀྑཱ པན ཝེདནུཔེཀྑཱ ཙ ཨཉྙམཉྙཉྩ ཨཝསེསཱཧི ¶ ཙ ཨཏྠཏོ བྷིནྣཱཡེཝཱཏི.

ཨིམཱསུ དསསུ ཨུཔེཀྑཱསུ ‘ཛྷཱནུཔེཀྑཱ’ ཨིདྷ ཨདྷིཔྤེཏཱ. སཱ མཛ྄ཛྷཏྟལཀྑཎཱ ཨནཱབྷོགརསཱ ཨབྱཱཔཱརཔཙྩུཔཊྛཱནཱ པཱིཏིཝིརཱགཔདཊྛཱནཱཏི. ཨེཏྠཱཧ – ནནུ ཙཱཡཾ ཨཏྠཏོ ཏཏྲམཛ྄ཛྷཏྟུཔེཀྑཱཝ ཧོཏི? སཱ ཙ པཋམདུཏིཡཛ྄ཛྷཱནེསུཔི ཨཏྠི, ཏསྨཱ ཏཏྲཱཔི ‘ཨུཔེཀྑཀོ ཙ ཝིཧརཏཱི’ཏི ཨེཝམཡཾ ཝཏྟབྦཱ སིཡཱ. སཱ ཀསྨཱ ན ཝུཏྟཱཏི? ཨཔརིབྱཏྟཀིཙྩཏོ. ཨཔརིབྱཏྟཉྷི ཏསྶཱ ཏཏྠ ཀིཙྩཾ, ཝིཏཀྐཱདཱིཧི ཨབྷིབྷཱུཏཏྟཱ. ཨིདྷ པནཱཡཾ ཝིཏཀྐཝིཙཱརཔཱིཏཱིཧི ཨནབྷིབྷཱུཏཏྟཱ ཨུཀྑིཏྟསིརཱ ཝིཡ ཧུཏྭཱ པརིབྱཏྟཀིཙྩཱ ཛཱཏཱ, ཏསྨཱ ཝུཏྟཱཏི.

ནིཊྛིཏཱ ཨུཔེཀྑཀོ ཙ ཝིཧརཏཱིཏི ཨེཏསྶ

སབྦསོ ཨཏྠཝཎྞནཱ.

ཨིདཱནི ¶ སཏོ ཙ སམྤཛཱནོཏི ཨེཏྠ སརཏཱིཏི སཏོ. སམྤཛཱནཱཏཱིཏི སམྤཛཱནོ. ཨིཏི པུགྒལེན སཏི ཙ སམྤཛཉྙཉྩ ཝུཏྟཾ. ཏཏྠ སརཎལཀྑཎཱ སཏི, ཨསམྨུསྶནརསཱ, ཨཱརཀྑཔཙྩུཔཊྛཱནཱ. ཨསམྨོཧལཀྑཎཾ སམྤཛཉྙཾ, ཏཱིརཎརསཾ, པཝིཙཡཔཙྩུཔཊྛཱནཾ.

ཏཏྠ ཀིཉྩཱཔི ཨིདཾ སཏིསམྤཛཉྙཾ པུརིམཛ྄ཛྷཱནེསུཔི ཨཏྠི – མུཊྛསྶཏིསྶ ཧི ཨསམྤཛཱནསྶ ¶ ཨུཔཙཱརམཏྟམྤི ན སམྤཛྫཏི, པགེཝ ཨཔྤནཱ – ཨོལཱ༹རིཀཏྟཱ པན ཏེསཾ ཛྷཱནཱནཾ, བྷཱུམིཡཾ ཝིཡ པུརིསསྶ, ཙིཏྟསྶ གཏི སུཁཱ ཧོཏི, ཨབྱཏྟཾ ཏཏྠ སཏིསམྤཛཉྙཀིཙྩཾ. ཨོལཱ༹རིཀངྒཔྤཧཱནེན པན སུཁུམཏྟཱ ཨིམསྶ ཛྷཱནསྶ, པུརིསསྶ ཁུརདྷཱརཱཡཾ ཝིཡ, སཏིསམྤཛཉྙཀིཙྩཔརིགྒཧིཏཱ ཨེཝ ཙིཏྟསྶ གཏི ཨིཙྪིཏབྦཱཏི ཨིདྷེཝ ཝུཏྟཾ. ཀིཉྩ བྷིཡྻོ? ཡཐཱ དྷེནུཔགོ ཝཙྪོ དྷེནུཏོ ཨཔནཱིཏོ ཨརཀྑིཡམཱནོ པུནདེཝ དྷེནུཾ ཨུཔགཙྪཏི, ཨེཝམིདཾ ཏཏིཡཛ྄ཛྷཱནསུཁཾ པཱིཏིཏོ ཨཔནཱིཏམྤི སཏིསམྤཛཉྙཱརཀྑེན ཨརཀྑིཡམཱནཾ པུནདེཝ པཱིཏིཾ ཨུཔགཙྪེཡྻ, པཱིཏིསམྤཡུཏྟམེཝ སིཡཱ. སུཁེ ཝཱཔི སཏྟཱ སཱརཛྫནྟི, ཨིདཉྩ ཨཏིམདྷུརཾ སུཁཾ, ཏཏོ པརཾ སུཁཱབྷཱཝཱ. སཏིསམྤཛཉྙཱནུབྷཱཝེན པནེཏྠ སུཁེ ཨསཱརཛྫནཱ ཧོཏི, ནོ ཨཉྙཐཱཏི ཨིམམྤི ཨཏྠཝིསེསཾ དསྶེཏུཾ ཨིདམིདྷེཝ ཝུཏྟནྟི ཝེདིཏབྦཾ.

ཨིདཱནི སུཁཉྩ ཀཱཡེན པཊིསཾཝེདེཏཱིཏི ཨེཏྠ ¶ ཀིཉྩཱཔི ཏཏིཡཛ྄ཛྷཱནསམངྒིནོ སུཁཔཊིསཾཝེདནཱབྷོགོ ནཏྠི, ཨེཝཾ སནྟེཔི ཡསྨཱ ཏསྶ ནཱམཀཱཡེན སམྤཡུཏྟཾ སུཁཾ, ཡཾ ཝཱ ཏཾ ནཱམཀཱཡསམྤཡུཏྟཾ སུཁཾ, ཏཾསམུཊྛཱནེནསྶ ཡསྨཱ ཨཏིཔཎཱིཏེན རཱུཔེན རཱུཔཀཱཡོ ཕུཊོ, ཡསྶ ཕུཊཏྟཱ ཛྷཱནཱ ཝུཊྛིཏོཔི སུཁཾ པཊིསཾཝེདེཡྻ, ཏསྨཱ ཨེཏམཏྠཾ དསྶེནྟོ ‘སུཁཉྩ ཀཱཡེན པཊིསཾཝེདེཏཱི’ཏི ཨཱཧ.

ཨིདཱནི ཡཾ ཏཾ ཨརིཡཱ ཨཱཙིཀྑནྟི ཨུཔེཀྑཀོ སཏིམཱ སུཁཝིཧཱརཱིཏི ཨེཏྠ ཡཾཛྷཱནཧེཏུ ཡཾཛྷཱནཀཱརཎཱ ཏཾ ཏཏིཡཛ྄ཛྷཱནསམངྒཱིཔུགྒལཾ བུདྡྷཱདཡོ ཨརིཡཱ ‘‘ཨཱཙིཀྑནྟི དེསེནྟི པཉྙཱཔེནྟི པཊྛཔེནྟི ཝིཝརནྟི ཝིབྷཛནྟི ཨུཏྟཱནཱིཀརོནྟི པཀཱསེ’’ནྟི པསཾསནྟཱིཏི ཨདྷིཔྤཱཡོ – ཀིནྟི? ‘ཨུཔེཀྑཀོ སཏིམཱ སུཁཝིཧཱརཱི’ཏི – ཏཾ ཏཏིཡཛ྄ཛྷཱནཾ ཨུཔསམྤཛྫ ཝིཧརཏཱིཏི ཨེཝམེཏྠ ཡོཛནཱ ཝེདིཏབྦཱ.

ཀསྨཱ ¶ པན ཏཾ ཏེ ཨེཝཾ པསཾསནྟཱིཏི? པསཾསཱརཧཏོ. ཨཡཉྷི ཡསྨཱ ཨཏིམདྷུརསུཁེ སུཁཔཱརམིཔྤཏྟེཔི ཏཏིཡཛ྄ཛྷཱནེ ཨུཔེཀྑཀོ, ན ཏཏྠ སུཁཱབྷིསངྒེན ཨཱཀཌྜྷཱིཡཏི, ‘ཡཐཱ ཙ པཱིཏི ན ཨུཔྤཛྫཏི’ ཨེཝཾ ཨུཔཊྛིཏསཏིཏཱཡ སཏིམཱ, ཡསྨཱ ཙ ཨརིཡཀནྟཾ ཨརིཡཛནསེཝིཏམེཝ ཨསཾཀིལིཊྛཾ སུཁཾ ནཱམཀཱཡེན པཊིསཾཝེདེཏི ཏསྨཱ པསཾསཱརཧོ; ཨིཏི པསཾསཱརཧཏོ ནཾ ཨརིཡཱ ཏེ ཨེཝཾ པསཾསཱཧེཏུབྷཱུཏེ གུཎེ པཀཱསེནྟཱ ‘ཨུཔེཀྑཀོ སཏིམཱ སུཁཝིཧཱརཱི’ཏི ཨེཝཾ པསཾསནྟཱིཏི ཝེདིཏབྦཾ.

ཏཏིཡནྟི ¶ གཎནཱནུཔུབྦཏཱ ཏཏིཡཾ. ཨིདཾ ཏཏིཡཾ སམཱཔཛྫཏཱིཏིཔི ཏཏིཡཾ. ཏསྨིཾ སམཡེ ཕསྶོ ཧོཏཱིཏིཨཱདཱིསུ ཛྷཱནཔཉྩཀེ པཱིཏིཔདམྤི པརིཧཱིནཾ. ཏསྶཱཔི ཝསེན སཝིབྷཏྟིཀཱཝིབྷཏྟིཀཔདཝིནིཙྪཡོ ཝེདིཏབྦོ. ཀོཊྛཱསཝཱརེཔི དུཝངྒིཀཾ ཛྷཱནཾ ཧོཏཱིཏི ཨཱགཏཾ. སེསཾ དུཏིཡཛ྄ཛྷཱནསདིསམེཝཱཏི.

ཏཏིཡཾ.

ཙཏུཏྠཛ྄ཛྷཱནཾ

༡༦༥. ཙཏུཏྠཛ྄ཛྷཱནནིདྡེསེ སུཁསྶ ཙ པཧཱནཱ དུཀྑསྶ ཙ པཧཱནཱཏི ཀཱཡིཀསུཁསྶ ཙ ཀཱཡིཀདུཀྑསྶ ཙ པཧཱནཱ. པུབྦེཝཱཏི ཏཉྩ ཁོ པུབྦེཝ ན ཙཏུཏྠཛ྄ཛྷཱནཀྑཎེ. སོམནསྶདོམནསྶཱནཾ ཨཏྠངྒམཱཏི ཙེཏསིཀསུཁསྶ ཙ ཙེཏསིཀདུཀྑསྶ ཙཱཏི ཨིམེསམྤི ¶ དྭིནྣཾ པུབྦེཝ ཨཏྠངྒམཱ; པཧཱནཱ ཨིཙྩེཝ ཝུཏྟཾ ཧོཏི. ཀདཱ པན ནེསཾ པཧཱནཾ ཧོཏི? ཙཏུནྣཾ ཛྷཱནཱནཾ ཨུཔཙཱརཀྑཎེ. སོམནསྶཉྷི ཙཏུཏྠཛ྄ཛྷཱནསྶ ཨུཔཙཱརཀྑཎེཡེཝ པཧཱིཡཏི. དུཀྑདོམནསྶསུཁཱནི པཋམདུཏིཡཏཏིཡཛ྄ཛྷཱནཱནཾ ཨུཔཙཱརཀྑཎེསུ. ཨེཝམེཏེསཾ པཧཱནཀྐམེན ཨཝུཏྟཱནཾ ཨིནྡྲིཡཝིབྷངྒེ པན ཨིནྡྲིཡཱནཾ ཨུདྡེསཀྐམེནེཝ ཨིདྷཱཔི ཝུཏྟཱནཾ སུཁདུཀྑསོམནསྶདོམནསྶཱནཾ པཧཱནཾ ཝེདིཏབྦཾ.

ཡདི པནེཏཱནི ཏསྶ ཏསྶ ཛྷཱནསྶ ཨུཔཙཱརཀྑཎེཡེཝ པཧཱིཡནྟི, ཨཐ ཀསྨཱ ‘‘ཀཏྠ ཙུཔྤནྣཾ དུཀྑིནྡྲིཡཾ ཨཔརིསེསཾ ནིརུཛ྄ཛྷཏི? ཨིདྷ, བྷིཀྑཝེ, བྷིཀྑུ ཝིཝིཙྩེཝ ¶ ཀཱམེཧི…པེ… པཋམཾ ཛྷཱནཾ ཨུཔསམྤཛྫ ཝིཧརཏི, ཨེཏྠུཔྤནྣཾ དུཀྑིནྡྲིཡཾ ཨཔརིསེསཾ ནིརུཛ྄ཛྷཏི. ཀཏྠ ཙུཔྤནྣཾ དོམནསྶིནྡྲིཡཾ… སུཁིནྡྲིཡཾ… སོམནསྶིནྡྲིཡཾ ཨཔརིསེསཾ ནིརུཛ྄ཛྷཏི? ཨིདྷ, བྷིཀྑཝེ, བྷིཀྑུ སུཁསྶ ཙ པཧཱནཱ…པེ… ཙཏུཏྠཾ ཛྷཱནཾ ཨུཔསམྤཛྫ ཝིཧརཏི. ཨེཏྠུཔྤནྣཾ སོམནསྶིནྡྲིཡཾ ཨཔརིསེསཾ ནིརུཛ྄ཛྷཏཱི’’ཏི (སཾ. ནི. ༥.༥༡༠) ཨེཝཾ ཛྷཱནེསྭེཝ ནིརོདྷོ ཝུཏྟོཏི? ཨཏིསཡནིརོདྷཏྟཱ. ཨཏིསཡནིརོདྷོ ཧི ཏེསཾ པཋམཛ྄ཛྷཱནཱདཱིསུ, ན ནིརོདྷོཡེཝ. ནིརོདྷོཡེཝ པན ཨུཔཙཱརཀྑཎེ, ནཱཏིསཡནིརོདྷོ. ཏཐཱ ཧི ནཱནཱཝཛྫནེ པཋམཛ྄ཛྷཱནུཔཙཱརེ ¶ ནིརུདྡྷསྶཱཔི དུཀྑིནྡྲིཡསྶ ཌཾསམཀསཱདིསམྥསྶེན ཝཱ, ཝིསམཱསནུཔཏཱཔེན ཝཱ སིཡཱ ཨུཔྤཏྟི, ནཏྭེཝ ཨནྟོཨཔྤནཱཡཾ. ཨུཔཙཱརེ ཝཱ ནིརུདྡྷམྤེཏཾ ན སུཊྛུ ནིརུདྡྷཾ ཧོཏི, པཊིཔཀྑེན ཨཝིཧཏཏྟཱ. ཨནྟོཨཔྤནཱཡཾ པན པཱིཏིཕརཎེན སབྦོ ཀཱཡོ སུཁོཀྐནྟོ ཧོཏི. སུཁོཀྐནྟཀཱཡསྶ ཙ སུཊྛུ ནིརུདྡྷཾ ཧོཏི དུཀྑིནྡྲིཡཾ, པཊིཔཀྑེན ཝིཧཏཏྟཱ. ནཱནཱཝཛྫནེཡེཝ ཙ དུཏིཡཛ྄ཛྷཱནུཔཙཱརེ པཧཱིནསྶ དོམནསྶིནྡྲིཡསྶ ཡསྨཱ ཨེཏཾ ཝིཏཀྐཝིཙཱརཔཙྩཡེཔི ཀཱཡཀིལམཐེ ཙིཏྟུཔགྷཱཏེ ཙ སཏི ཨུཔྤཛྫཏི, ཝིཏཀྐཝིཙཱརཱབྷཱཝེ ནེཝ ཨུཔྤཛྫཏི; ཡཏྠ པན ཨུཔྤཛྫཏི ཏཏྠ ཝིཏཀྐཝིཙཱརབྷཱཝེ; ཨཔྤཧཱིནཱ ཨེཝ ཙ དུཏིཡཛ྄ཛྷཱནུཔཙཱརེ ཝིཏཀྐཝིཙཱརཱཏི ཏཏྠསྶ སིཡཱ ཨུཔྤཏྟི, ནཏྭེཝ དུཏིཡཛ྄ཛྷཱནེ, པཧཱིནཔཙྩཡཏྟཱ. ཏཐཱ ཏཏིཡཛ྄ཛྷཱནུཔཙཱརེ པཧཱིནསྶཱཔི སུཁིནྡྲིཡསྶ པཱིཏིསམུཊྛཱནཔཎཱིཏརཱུཔཕུཊཀཱཡསྶ སིཡཱ ཨུཔྤཏྟི, ནཏྭེཝ ཏཏིཡཛ྄ཛྷཱནེ. ཏཏིཡཛ྄ཛྷཱནེ ཧི སུཁསྶ པཙྩཡབྷཱུཏཱ པཱིཏི སབྦསོ ནིརུདྡྷཱཏི. ཏཐཱ ¶ ཙཏུཏྠཛ྄ཛྷཱནུཔཙཱརེ པཧཱིནསྶཱཔི སོམནསྶིནྡྲིཡསྶ ཨཱསནྣཏྟཱ, ཨཔྤནཱཔྤཏྟཱཡ ཨུཔེཀྑཱཡ ཨབྷཱཝེན སམྨཱ ཨནཏིཀྐནྟཏྟཱ ཙ, སིཡཱ ཨུཔྤཏྟི, ནཏྭེཝ ཙཏུཏྠཛ྄ཛྷཱནེ. ཏསྨཱ ཨེཝ ཙ ‘ཨེཏྠུཔྤནྣཾ དུཀྑིནྡྲིཡཾ ཨཔརིསེསཾ ནིརུཛ྄ཛྷཏཱི’ཏི ཏཏྠ ཏཏྠ ཨཔརིསེསགྒཧཎཾ ཀཏནྟི.

ཨེཏྠཱཧ – ‘ཨཐེཝཾ ཏསྶ ཏསྶ ཛྷཱནསྶུཔཙཱརེ པཧཱིནཱཔི ཨེཏཱ ཝེདནཱ ཨིདྷ ཀསྨཱ སམཱཧཊཱ’ཏི? ‘སུཁགྒཧཎཏྠཾ’. ཡཱ ཧི ཨཡཾ ‘ཨདུཀྑམསུཁ’ནྟི ཨེཏྠ ཨདུཀྑམསུཁཱ ཝེདནཱ ཝུཏྟཱ, སཱ སུཁུམཱ, དུབྦིཉྙེཡྻཱ, ན སཀྐཱ སུཁེན གཧེཏུཾ. ཏསྨཱ ཡཐཱ ནཱམ དུཊྛསྶ ཡཐཱ ཏཐཱ ཝཱ ཨུཔསངྐམིཏྭཱ གཧེཏུཾ ཨསཀྐུཎེཡྻསྶ གོཎསྶ གཧཎཏྠཾ གོཔོ ཨེཀསྨིཾ ཝཛེ སབྦཱ གཱཝོ སམཱཧརཏི, ཨཐེཀེཀཾ ནཱིཧརནྟོ པཊིཔཱཊིཡཱ ཨཱགཏཾ ‘ཨཡཾ ¶ སོ, གཎྷཐ ན’ནྟི ཏམྤི གཱཧཱཔཡཏི; ཨེཝམེཝ བྷགཝཱ སུཁགཧཎཏྠཾ སབྦཱཔི ཨེཏཱ སམཱཧརཱིཏི. ཨེཝཉྷི སམཱཧཊཱ ཨེཏཱ དསྶེཏྭཱ ཡཾ ནེཝ སུཁཾ ན དུཀྑཾ, ན སོམནསྶཾ ན དོམནསྶཾ, ཨཡཾ ཨདུཀྑམསུཁཱཝེདནཱཏི སཀྐཱ ཧོཏི ཨེསཱ གཱཧཡིཏུཾ.

ཨཔིཙ ཨདུཀྑམསུཁཱཡ ཙེཏོཝིམུཏྟིཡཱ པཙྩཡདསྶནཏྠཉྩཱཔི ཨེཏཱ ཝུཏྟཱཏི ཝེདིཏབྦཱ. སུཁདུཀྑཔྤཧཱནཱདཡོ ཧི ཏསྶཱ པཙྩཡཱ. ཡཐཱཧ – ‘‘ཙཏྟཱརོ ཁོ, ཨཱཝུསོ, པཙྩཡཱ ཨདུཀྑམསུཁཱཡ ཙེཏོཝིམུཏྟིཡཱ སམཱཔཏྟིཡཱ. ཨིདྷཱཝུསོ བྷིཀྑུ, སུཁསྶ ཙ པཧཱནཱ…པེ… ཙཏུཏྠཾ ཛྷཱནཾ ཨུཔསམྤཛྫ ཝིཧརཏི, ཨིམེ ཁོ, ཨཱཝུསོ, ཙཏྟཱརོ པཙྩཡཱ ཨདུཀྑམསུཁཱཡ ¶ ཙེཏོཝིམུཏྟིཡཱ སམཱཔཏྟིཡཱ’’ཏི (མ. ནི. ༡.༤༥༨). ཡཐཱ ཝཱ ཨཉྙཏྠ པཧཱིནཱཔི སཀྐཱཡདིཊྛིཨཱདཡོ ཏཏིཡམགྒསྶ ཝཎྞབྷཎནཏྠཾ ཏཏྠ པཧཱིནཱཏི ཝུཏྟཱ, ཨེཝཾ ཝཎྞབྷཎནཏྠམྤེཏསྶ ཛྷཱནསྶེཏཱ ཨིདྷ ཝུཏྟཱཏི ཝེདིཏབྦཱ. པཙྩཡགྷཱཏེན ཝཱ ཨེཏྠ རཱགདོསཱནཾ ཨཏིདཱུརབྷཱཝཾ དསྶེཏུམྤེཏཱ ཝུཏྟཱཏི ཝེདིཏབྦཱ. ཨེཏཱསུ ཧི སུཁཾ སོམནསྶསྶ པཙྩཡོ, སོམནསྶཾ རཱགསྶ; དུཀྑཾ དོམནསྶསྶ, དོམནསྶཾ དོསསྶ. སུཁཱདིགྷཱཏེན ཙ སཔྤཙྩཡཱ རཱགདོསཱ ཧཏཱཏི ཨཏིདཱུརེ ཧོནྟཱིཏི.

ཨདུཀྑམསུཁནྟི དུཀྑཱབྷཱཝེན ཨདུཀྑཾ, སུཁཱབྷཱཝེན ཨསུཁཾ. ཨེཏེནེཏྠ དུཀྑསུཁཔྤཊིཔཀྑབྷཱུཏཾ ཏཏིཡཝེདནཾ དཱིཔེཏི, ན དུཀྑསུཁཱབྷཱཝམཏྟཾ. ཏཏིཡཝེདནཱ ནཱམ ཨདུཀྑམསུཁཱ. ཨུཔེཀྑཱཏིཔི ཝུཙྩཏི. སཱ ¶ ཨིཊྛཱནིཊྛཝིཔརཱིཏཱནུབྷཝནལཀྑཎཱ, མཛ྄ཛྷཏྟརསཱ, ཨཝིབྷཱུཏཔཙྩུཔཊྛཱནཱ, སུཁནིརོདྷཔདཊྛཱནཱཏི ཝེདིཏབྦཱ.

ཨུཔེཀྑཱསཏིཔཱརིསུདྡྷིནྟི ཨུཔེཀྑཱཡ ཛནིཏསཏིཔཱརིསུདྡྷིཾ. ཨིམསྨིཉྷི ཛྷཱནེ སུཔརིསུདྡྷཱ སཏི. ཡཱ ཙ ཏསྶཱ སཏིཡཱ པཱརིསུདྡྷི སཱ ཨུཔེཀྑཱཡ ཀཏཱ, ན ཨཉྙེན. ཏསྨཱ ཨེཏཾ ཨུཔེཀྑཱསཏིཔཱརིསུདྡྷཱིཏི ཝུཙྩཏི. ཝིབྷངྒེཔི ཝུཏྟཾ – ‘‘ཨཡཾ སཏི ཨིམཱཡ ཨུཔེཀྑཱཡ ཝིསདཱ ཧོཏི པརིསུདྡྷཱ པརིཡོདཱཏཱ, ཏེན ཝུཙྩཏི ཨུཔེཀྑཱསཏིཔཱརིསུདྡྷཱི’’ཏི (ཝིབྷ. ༥༩༧). ཡཱཡ ཙ ཨུཔེཀྑཱཡ ཨེཏྠ སཏི པཱརིསུདྡྷི ཧོཏི སཱ ཨཏྠཏོ ཏཏྲམཛ྄ཛྷཏྟཏཱཏི ཝེདིཏབྦཱ. ན ཀེཝལཉྩེཏྠ ཏཱཡ སཏིཡེཝ པརིསུདྡྷཱ ཨཔིཙ ཁོ སབྦེཔི སམྤཡུཏྟདྷམྨཱ. སཏིསཱིསེན པན དེསནཱ ཝུཏྟཱ.

ཏཏྠ ¶ ཀིཉྩཱཔི ཨཡཾ ཨུཔེཀྑཱ ཧེཊྛཱཔི ཏཱིསུ ཛྷཱནེསུ ཝིཛྫཏི – ཡཐཱ པན དིཝཱ སཱུརིཡཔྤབྷཱབྷིབྷཝཱ སོམྨབྷཱཝེན ཙ ཨཏྟནོ ཨུཔཀཱརཀཏྟེན ཝཱ སབྷཱགཱཡ རཏྟིཡཱ ཨལཱབྷཱ དིཝཱ ཝིཛྫམཱནཱཔི ཙནྡལེཁཱ ཨཔརིསུདྡྷཱ ཧོཏི ཨཔརིཡོདཱཏཱ – ཨེཝམཡམྤི ཏཏྲམཛ྄ཛྷཏྟུཔེཀྑཱཙནྡལེཁཱ ཝིཏཀྐཱདིཔཙྩནཱིཀདྷམྨཏེཛཱབྷིབྷཝཱ སབྷཱགཱཡ ཙ ཨུཔེཀྑཱཝེདནཱརཏྟིཡཱ ཨཔྤཊིལཱབྷཱ ཝིཛྫམཱནཱཔི པཋམཱདིཛ྄ཛྷཱནབྷེདེསུ ཨཔརིསུདྡྷཱ ཧོཏི. ཏསྶཱ ཙ ཨཔརིསུདྡྷཱཡ དིཝཱ ཨཔརིསུདྡྷཙནྡལེཁཱཡ པབྷཱ ཝིཡ སཧཛཱཏཱཔི སཏིཨཱདཡོ ཨཔརིསུདྡྷཱཝ ཧོནྟི. ཏསྨཱ ཏེསུ ཨེཀམྤི ‘ཨུཔེཀྑཱསཏིཔཱརིསུདྡྷཱི’ཏི ན ཝུཏྟཾ. ཨིདྷ པན ཝིཏཀྐཱདིཔཙྩནཱིཀདྷམྨཏེཛཱབྷིབྷཝཱབྷཱཝཱ སབྷཱགཱཡ ཙ ཨུཔེཀྑཱ ཝེདནཱརཏྟིཡཱ པཊིལཱབྷཱ ཨཡཾ ཏཏྲམཛ྄ཛྷཏྟུཔེཀྑཱཙནྡལེཁཱ ¶ ཨཏིཝིཡ པརིསུདྡྷཱ. ཏསྶཱ པརིསུདྡྷཏྟཱ པརིསུདྡྷཙནྡལེཁཱཡ པབྷཱ ཝིཡ སཧཛཱཏཱཔི སཏིཨཱདཡོ པརིསུདྡྷཱ ཧོནྟི པརིཡོདཱཏཱ. ཏསྨཱ ཨིདམེཝ ཨུཔེཀྑཱསཏིཔཱརིསུདྡྷཱིཏི ཝུཏྟནྟི ཝེདིཏབྦཾ.

ཙཏུཏྠནྟི གཎནཱནུཔུབྦཏཱ ཙཏུཏྠཾ. ཨིདཾ ཙཏུཏྠཾ སམཱཔཛྫཏཱིཏིཔི ཙཏུཏྠཾ. ཕསྶོ ཧོཏཱིཏིཨཱདཱིསུ ཕསྶཔཉྩཀེ ཏཱཝ ཝེདནཱཏི ཨུཔེཀྑཱཝེདནཱ ཝེདིཏབྦཱ. ཛྷཱནཔཉྩཀཨིནྡྲིཡཨཊྛཀེསུ པན ཨུཔེཀྑཱ ཧོཏི ཨུཔེཀྑིནྡྲིཡཾ ¶ ཧོཏཱིཏི (དྷ. ས. ༡༦༥) ཝུཏྟམེཝ. སེསཱནི ཏཏིཡེ པརིཧཱིནཔདཱནི ཨིདྷཱཔི པརིཧཱིནཱནེཝ. ཀོཊྛཱསཝཱརེཔི དུཝངྒིཀཾ ཛྷཱནནྟི ཨུཔེཀྑཱཙིཏྟེཀགྒཏཱཝསེནེཝ ཝེདིཏབྦཾ. སེསཾ སབྦཾ ཏཏིཡསདིསམེཝཱཏི.

ཙཏུཀྐནཡོ ནིཊྛིཏོ.

པཉྩཀནཡོ

༡༦༧. ཨིདཱནི ཀཏམེ དྷམྨཱ ཀུསལཱཏི པཉྩཀནཡོ ཨཱརདྡྷོ. ཀསྨཱཏི ཙེ, པུགྒལཛ྄ཛྷཱསཡཝསེན ཙེཝ དེསནཱཝིལཱསེན ཙ. སནྣིསིནྣདེཝཔརིསཱཡ ཀིར ཨེཀཙྩཱནཾ དེཝཱནཾ ཝིཏཀྐོ ཨེཝ ཨོལཱ༹རིཀཏོ ཨུཔཊྛཱསི, ཝིཙཱརཔཱིཏིསུཁཙིཏྟེཀགྒཏཱ སནྟཏོ. ཏེསཾ སཔྤཱཡཝསེན སཏྠཱ ཙཏུརངྒིཀཾ ཨཝིཏཀྐཾ ཝིཙཱརམཏྟཾ དུཏིཡཛ྄ཛྷཱནཾ ནཱམ བྷཱཛེསི. ཨེཀཙྩཱནཾ ¶ ཝིཙཱརོ ཨོལཱ༹རིཀཏོ ཨུཔཊྛཱསི, པཱིཏིསུཁཙིཏྟེཀགྒཏཱ སནྟཏོ. ཏེསཾ སཔྤཱཡཝསེན ཏིཝངྒིཀཾ ཏཏིཡཛ྄ཛྷཱནཾ ནཱམ བྷཱཛེསི. ཨེཀཙྩཱནཾ པཱིཏི ཨོལཱ༹རིཀཏོ ཨུཔཊྛཱསི, སུཁཙིཏྟེཀགྒཏཱ སནྟཏོ. ཏེསཾ སཔྤཱཡཝསེན དུཝངྒིཀཾ ཙཏུཏྠཛ྄ཛྷཱནཾ ནཱམ བྷཱཛེསི. ཨེཀཙྩཱནཾ སུཁཾ ཨོལཱ༹རིཀཏོ ཨུཔཊྛཱསི, ཨུཔེཀྑཱཙིཏྟེཀགྒཏཱ སནྟཏོ. ཏེསཾ སཔྤཱཡཝསེན དུཝངྒིཀཾ པཉྩམཛ྄ཛྷཱནཾ ནཱམ བྷཱཛེསི. ཨཡཾ ཏཱཝ ‘པུགྒལཛ྄ཛྷཱསཡོ’.

ཡསྶཱ པན དྷམྨདྷཱཏུཡཱ སུཔྤཊིཝིདྡྷཏྟཱ དེསནཱཝིལཱསཔྤཏྟོ ནཱམ ཧོཏི – སཱ ཏཐཱགཏསྶ སུཊྛུ པཊིཝིདྡྷཱ – ཏསྨཱ ཉཱཎམཧཏྟཏཱཡ དེསནཱཝིདྷཱནེསུ ཀུསལོ དེསནཱཝིལཱསཔྤཏྟོ སཏྠཱ ཡཾ ཡཾ ¶ ཨངྒཾ ལབྦྷཏི ཏསྶ ཏསྶ ཝསེན ཡཐཱ ཡཐཱ ཨིཙྪཏི ཏཐཱ ཏཐཱ དེསནཾ ནིཡཱམེཏཱིཏི སོ ཨིདྷ པཉྩངྒིཀཾ པཋམཛ྄ཛྷཱནཾ བྷཱཛེསི, ཙཏུརངྒིཀཾ ཨཝིཏཀྐཾ ཝིཙཱརམཏྟཾ དུཏིཡཛ྄ཛྷཱནཾ, བྷཱཛེསི ཏིཝངྒིཀཾ ཏཏིཡཛ྄ཛྷཱནཾ, བྷཱཛེསི དུཝངྒིཀཾ ཙཏུཏྠཛ྄ཛྷཱནཾ, དུཝངྒིཀམེཝ པཉྩམཛ྄ཛྷཱནཾ བྷཱཛེསི. ཨཡཾ ‘དེསནཱཝིལཱསོ’ ནཱམ.

ཨཔིཙ ཡེ བྷགཝཏཱ ‘‘ཏཡོམེ, བྷིཀྑཝེ, སམཱདྷཱི – སཝིཏཀྐསཝིཙཱརོ སམཱདྷི, ཨཝིཏཀྐཝིཙཱརམཏྟོ སམཱདྷི, ཨཝིཏཀྐཨཝིཙཱརོ སམཱདྷཱི’’ཏི (དཱི. ནི. ༣.༣༠༥) སུཏྟནྟེ ཏཡོ སམཱདྷཱི དེསིཏཱ, ཏེསུ ཧེཊྛཱ སཝིཏཀྐསཝིཙཱརོ སམཱདྷི ཨཝིཏཀྐཨཝིཙཱརོ ¶ སམཱདྷི ཙ བྷཱཛེཏྭཱ དསྶིཏོ, ཨཝིཏཀྐཝིཙཱརམཏྟོ ན དསྶིཏོ. ཏཾ དསྶེཏུམྤི ཨཡཾ པཉྩཀནཡོ ཨཱརདྡྷོཏི ཝེདིཏབྦོ.

ཏཏྠ དུཏིཡཛ྄ཛྷཱནནིདྡེསེ ཕསྶཱདཱིསུ ཝིཏཀྐམཏྟཾ པརིཧཱཡཏི, ཀོཊྛཱསཝཱརེ ‘‘ཙཏུརངྒིཀཾ ཛྷཱནཾ ཧོཏི ཙཏུརངྒིཀོ མགྒོ ཧོཏཱི’’ཏི ཨཡམེཝ ཝིསེསོ. སེསཾ སབྦཾ པཋམཛ྄ཛྷཱནསདིསམེཝ. ཡཱནི ཙ ཙཏུཀྐནཡེ དུཏིཡཏཏིཡཙཏུཏྠཱནི ཏཱནེཝ ཨིདྷ ཏཏིཡཙཏུཏྠཔཉྩམཱནི. ཏེསཾ ཨདྷིགམཔཊིཔཱཊིདཱིཔནཏྠཾ ཨཡཾ ནཡོ ཝེདིཏབྦོ –

ཨེཀོ ཀིར ཨམཙྩཔུཏྟོ རཱཛཱནཾ ཨུཔཊྛཱཏུཾ ཛནཔདཏོ ནགརཾ ཨཱགཏོ. སོ ཨེཀདིཝསམེཝ རཱཛཱནཾ དིསྭཱ པཱནབྱསནེན སབྦཾ ཝིབྷཝཛཱཏཾ ནཱསེསི. ཏཾ ཨེཀདིཝསཾ སུརཱམདམཏྟཾ ནིཙྩོལ༹ཾ ཀཏྭཱ ཛིཎྞཀཊསཱརཀམཏྟེན ¶ པཊིཙྪཱདེཏྭཱ པཱནཱགཱརཏོ ནཱིཧརིཾསུ. ཏམེནཾ སངྐཱརཀཱུཊེ ནིཔཛྫིཏྭཱ ནིདྡཱཡནྟཾ ཨེཀོ ཨངྒཝིཛྫཱཔཱཋཀོ དིསྭཱ ‘ཨཡཾ པུརིསོ མཧཱཛནསྶ ཨཝསྶཡོ བྷཝིསྶཏི, པཊིཛགྒིཏབྦོ ཨེསོ’ཏི སནྣིཊྛཱནཾ ཀཏྭཱ མཏྟིཀཱཡ ནྷཱཔེཏྭཱ ཐཱུལསཱཊཀཡུགཾ ནིཝཱསཱཔེཏྭཱ པུན གནྡྷོདཀེན ནྷཱཔེཏྭཱ སུཁུམེན དུཀཱུལཡུགལེ༹ན ཨཙྪཱདེཏྭཱ པཱསཱདཾ ཨཱརོཔེཏྭཱ སུབྷོཛནཾ བྷོཛེཏྭཱ ‘ཨེཝཾ ནཾ པརིཙཱརེཡྻཱཐཱ’ཏི པརིཙཱརཀེ པཊིཔཱདེཏྭཱ པཀྐཱམི. ཨཐ ནཾ ཏེ སཡནཾ ཨཱརོཔེསུཾ. པཱནཱགཱརགམནཔཊིབཱཧནཏྠཉྩ ནཾ ཙཏྟཱརོ ཏཱཝ ཛནཱ ཙཏཱུསུ ཧཏྠཔཱདེསུ ཨུཔྤཱིལེ༹ཏྭཱ ཨཊྛཾསུ. ཨེཀོ པཱདེ པརིམཛྫི. ཨེཀོ ཏཱལཝཎྚཾ གཧེཏྭཱ བཱིཛི. ཨེཀོ ཝཱིཎཾ ཝཱདཡམཱནོ གཱཡནྟོ ནིསཱིདི.

སོ སཡནུཔགམནེན ཝིགཏཀིལམཐོ ཐོཀཾ ནིདྡཱཡིཏྭཱ ཝུཊྛིཏོ ཧཏྠཔཱདནིཔྤཱིལ༹ནཾ ཨསཧམཱནོ ¶ ‘ཀོ མེ ཧཏྠཔཱདེ ཨུཔྤཱིལེ༹ཏི? ཨཔགཙྪཐཱ’ཏི ཏཛྫེསི. ཏེ ཨེཀཝཙནེནེཝ ཨཔགཙྪིཾསུ. ཏཏོ པུན ཐོཀཾ ནིདྡཱཡིཏྭཱ ཝུཊྛིཏོ པཱདཔརིམཛྫནཾ ཨསཧམཱནོ ‘ཀོ མེ པཱདེ པརིམཛྫཏི? ཨཔགཙྪཱ’ཏི ཨཱཧ. སོཔི ཨེཀཝཙནེནེཝ ཨཔགཙྪི. པུན ཐོཀཾ ནིདྡཱཡིཏྭཱ ཝུཊྛིཏོ ཝཱཏཝུཊྛི ཝིཡ ཏཱལཝཎྚཝཱཏཾ ཨསཧནྟོ ‘ཀོ ཨེས? ཨཔགཙྪཏཱུ’ཏི ཨཱཧ. སོཔི ཨེཀཝཙནེནེཝ ཨཔགཙྪི. པུན ཐོཀཾ ནིདྡཱཡིཏྭཱ ཝུཊྛིཏོ ཀཎྞསཱུལཾ ཝིཡ གཱིཏཝཱདིཏསདྡཾ ཨསཧམཱནོ ཝཱིཎཱཝཱདཀཾ ཏཛྫེསི. སོཔི ཨེཀཝཙནེནེཝ ཨཔགཙྪི. ཨཐེཝཾ ¶ ཨནུཀྐམེན པཧཱིནཀིལམཐུཔྤཱིལ༹ནཔརིམཛྫནཝཱཏཔྤཧཱརགཱིཏཝཱདིཏསདྡུཔདྡཝོ སུཁཾ སཡིཏྭཱ ཝུཊྛཱཡ རཉྙོ སནྟིཀཾ ཨགམཱསི. རཱཛཱཔིསྶ མཧནྟཾ ཨིསྶརིཡམདཱསི. སོ མཧཱཛནསྶ ཨཝསྶཡོ ཛཱཏོ.

ཏཏྠ པཱནབྱསནེན པཱརིཛུཉྙཔྤཏྟོ སོ ཨམཙྩཔུཏྟོ ཝིཡ ཨནེཀབྱསནཔཱརིཛུཉྙཔྤཏྟོ གྷརཱཝཱསགཏོ ཀུལཔུཏྟོ དཊྛབྦོ. ཨངྒཝིཛྫཱཔཱཋཀོ པུརིསོ ཝིཡ ཏཐཱགཏོ. ཏསྶ པུརིསསྶ ‘ཨཡཾ མཧཱཛནསྶ ཨཝསྶཡོ བྷཝིསྶཏི, པཊིཛགྒནཾ ཨརཧཏཱི’ཏི སནྣིཊྛཱནཾ ཝིཡ ཏཐཱགཏསྶ ‘ཨཡཾ མཧཱཛནསྶ ཨཝསྶཡོ བྷཝིསྶཏི, པབྦཛྫཾ ཨརཧཏི ཀུལཔུཏྟོ’ཏི སནྣིཊྛཱནཀརཎཾ.

ཨཐསྶ ¶ ཨམཙྩཔུཏྟསྶ མཏྟིཀཱམཏྟེན ནྷཱཔནཾ ཝིཡ ཀུལཔུཏྟསྶཱཔི པབྦཛྫཱཔཊིལཱབྷོ. ཨཐསྶ ཐཱུལསཱཊཀནིཝཱསནཾ ཝིཡ ཨིམསྶཱཔི དསསིཀྑཱཔདསངྑཱཏསཱིལཝཏྠནིཝཱསནཾ. པུན ཏསྶ གནྡྷོདཀནྷཱཔནཾ ཝིཡ ཨིམསྶཱཔི པཱཏིམོཀྑསཾཝརཱདིསཱིལགནྡྷོདཀནྷཱཔནཾ. པུན ཏསྶ སུཁུམདུཀཱུལཡུགལ༹ཙྪཱདནཾ ཝིཡ ཨིམསྶཱཔི ཡཐཱཝུཏྟསཱིལཝིསུདྡྷིསམྤདཱསངྑཱཏདུཀཱུལཙྪཱདནཾ.

དུཀཱུལཙྪཱདིཏསྶ པནསྶ པཱསཱདཱརོཔནཾ ཝིཡ ཨིམསྶཱཔི སཱིལཝིསུདྡྷིདུཀཱུལཙྪཱདིཏསྶ སམཱདྷིབྷཱཝནཱཔཱསཱདཱརོཧནཾ. ཏཏོ ཏསྶ སུབྷོཛནབྷུཉྫནཾ ཝིཡ ཨིམསྶཱཔི སམཱདྷིཨུཔཀཱརཀསཏིསམྤཛཉྙཱདིདྷམྨཱམཏཔརིབྷུཉྫནཾ.

བྷུཏྟབྷོཛནསྶ པན ཏསྶ པརིཙཱརཀེཧི སཡནཱརོཔནཾ ཝིཡ ཨིམསྶཱཔི ཝིཏཀྐཱདཱིཧི ཨུཔཙཱརཛ྄ཛྷཱནཱརོཔནཾ. པུན ཏསྶ པཱནཱགཱརགམནཔཊིབཱཧནཏྠཾ ཧཏྠཔཱདུཔྤཱིལ༹ནཀཔུརིསཙཏུཀྐཾ ཝིཡ ཨིམསྶཱཔི ཀཱམསཉྙཱབྷིམུཁགམནཔཊིབཱཧནཏྠཾ ཨཱརམྨཎེ ཙིཏྟུཔྤཱིལ༹ནཀོ ནེཀྑམྨཝིཏཀྐོ. ཏསྶ ¶ པཱདཔརིམཛྫཀཔུརིསོ ཝིཡ ཨིམསྶཱཔི ཨཱརམྨཎེ ཙིཏྟཱནུམཛྫནཀོ ཝིཙཱརོ. ཏསྶ ཏཱལཝཎྚཝཱཏདཱཡཀོ ཝིཡ ཨིམསྶཱཔི ཙེཏསོ སཱིཏལབྷཱཝདཱཡིཀཱ པཱིཏི.

ཏསྶ སོཏཱནུགྒཧཀརོ གནྡྷབྦཔུརིསོ ཝིཡ ཨིམསྶཱཔི ཙིཏྟཱནུགྒཱཧཀཾ སོམནསྶཾ. ཏསྶ སཡནུཔགམནེན ཝིགཏཀིལམཐསྶ ཐོཀཾ ནིདྡུཔགམནཾ ཝིཡ ཨིམསྶཱཔི ཨུཔཙཱརཛ྄ཛྷཱནསནྣིསྶཡེན ཝིགཏནཱིཝརཎཀིལམཐསྶ པཋམཛ྄ཛྷཱནུཔགམནཾ.

ཨཐསྶ ནིདྡཱཡིཏྭཱ ཝུཊྛིཏསྶ ཧཏྠཔཱདུཔྤཱིལ༹ནཱསཧནེན ཧཏྠཔཱདུཔྤཱིལ༹ཀཱནཾ སནྟཛྫནཾ ཏེསཉྩ ཨཔགམནེན པུན ཐོཀཾ ནིདྡུཔགམནཾ ཝིཡ ཨིམསྶཱཔི པཋམཛ྄ཛྷཱནཏོ ཝུཊྛིཏསྶ ¶ ཙིཏྟུཔྤཱིལ༹ཀཝིཏཀྐཱསཧནེན ཝིཏཀྐདོསདསྶནཾ, ཝིཏཀྐཔྤཧཱནཱ ཙ པུན ཨཝིཏཀྐཝིཙཱརམཏྟདུཏིཡཛ྄ཛྷཱནུཔགམནཾ.

ཏཏོ ཏསྶ པུནཔྤུནཾ ནིདྡཱཡིཏྭཱ ཝུཊྛིཏསྶ ཡཐཱཝུཏྟེན ཀམེན པཱདཔརིམཛྫནཱདཱིནཾ ཨསཧནེན པཊིཔཱཊིཡཱ པཱདཔརིམཛྫཀཱདཱིནཾ སནྟཛྫནཾ, ཏེསཾ ཏེསཉྩ ཨཔགམནེན པུནཔྤུནཾ ཐོཀཾ ནིདྡུཔགམནཾ ཝིཡ ཨིམསྶཱཔི པུནཔྤུནཾ དུཏིཡཱདཱིཧི ཛྷཱནེཧི ཝུཊྛིཏསྶ ཡཐཱཝུཏྟདོསཱནཾ ཝིཙཱརཱདཱིནཾ ཨསཧནེན ¶ པཊིཔཱཊིཡཱ ཝིཙཱརཱདིདོསདསྶནཾ. ཏེསཾ ཏེསཉྩ པཧཱནཱ པུནཔྤུནཾ ཨཝིཏཀྐཨཝིཙཱརནིཔྤཱིཏིཀ པཧཱིནསོམནསྶཛ྄ཛྷཱནུཔགམནཾ.

ཏསྶ པན སཡནཱ ཝུཊྛཱཡ རཉྙོ སནྟིཀཾ གཏསྶ ཨིསྶརིཡཔྤཏྟི ཝིཡ ཨིམསྶཱཔི པཉྩམཛ྄ཛྷཱནཏོ ཝུཊྛིཏསྶ ཝིཔསྶནཱ མགྒཾ ཨུཔགཏསྶ ཨརཧཏྟཔྤཏྟི.

ཏསྶ པཏྟིསྶརིཡསྶ བཧཱུནཾ ཛནཱནཾ ཨཝསྶཡབྷཱཝོ ཝིཡ ཨིམསྶཱཔི ཨརཧཏྟཔྤཏྟསྶ བཧཱུནཾ ཨཝསྶཡབྷཱཝོ ཝེདིཏབྦོ. ཨེཏྟཱཝཏཱ ཧི ཨེས ཨནུཏྟརཾ པུཉྙཀྑེཏྟཾ ནཱམ ཧོཏཱིཏི.

པཉྩཀནཡོ ནིཊྛིཏོ.

ཨེཏྟཱཝཏཱ ཙཏུཀྐཔཉྩཀནཡདྭཡབྷེདོ སུདྡྷིཀནཝཀོ ནཱམ པཀཱསིཏོ ཧོཏི. ཨཏྠཏོ པནེས པཉྩཀནཡེ ཙཏུཀྐནཡསྶ པཝིཊྛཏྟཱ ཛྷཱནཔཉྩཀོ ཨེཝཱཏི ཝེདིཏབྦོ.

པཊིཔདཱཙཏུཀྐཾ

༡༧༦-༡༨༠. ཨིདཱནི ¶ ཡསྨཱ ཨེཏཾ ཛྷཱནཾ ནཱམ པཊིཔདཱཀམེན སིཛ྄ཛྷཏི, ཏསྨཱ ཏསྶ པཊིཔདཱབྷེདཾ དསྶེཏུཾ པུན ཀཏམེ དྷམྨཱ ཀུསལཱཏིཨཱདི ཨཱརདྡྷཾ. ཏཏྠ དུཀྑཱ པཊིཔདཱ ཨསྶཱཏི དུཀྑཔཊིཔདཾ. དནྡྷཱ ཨབྷིཉྙཱ ཨསྶཱཏི དནྡྷཱབྷིཉྙཾ. ཨིཏི དུཀྑཔཊིཔདནྟི ཝཱ དནྡྷཱབྷིཉྙནྟི ཝཱ པཐཝཱིཀསིཎནྟི ཝཱ ཏཱིཎིཔི ཛྷཱནསྶེཝ ནཱམཱནི. དུཀྑཔཊིཔདཾ ཁིཔྤཱབྷིཉྙནྟིཨཱདཱིསུཔི ཨེསེཝ ནཡོ.

ཏཏྠ པཋམསམནྣཱཧཱརཏོ པཊྛཱཡ ཡཱཝ ཏསྶ ཏསྶ ཛྷཱནསྶ ཨུཔཙཱརཾ ཨུཔྤཛྫཏི ཏཱཝ པཝཏྟཱ ཛྷཱནབྷཱཝནཱ ‘པཊིཔདཱ’ཏི ཝུཙྩཏི. ཨུཔཙཱརཏོ པན པཊྛཱཡ ཡཱཝ ཨཔྤནཱ ཏཱཝ པཝཏྟཱ པཉྙཱ ‘ཨབྷིཉྙཱ’ཏི ཝུཙྩཏི. སཱ པནེསཱ པཊིཔདཱ ཨེཀཙྩསྶ དུཀྑཱ ཧོཏི. ནཱིཝརཎཱདིཔཙྩནཱིཀདྷམྨསམུདཱཙཱརགཧནཏཱཡ ¶ ཀིཙྪཱ ཨསུཁསེཝནཱཏི ཨཏྠོ. ཨེཀཙྩསྶ ཏདབྷཱཝེན སུཁཱ. ཨབྷིཉྙཱཔི ཨེཀཙྩསྶ དནྡྷཱ ཧོཏི, མནྡཱ, ཨསཱིགྷཔྤཝཏྟི. ཨེཀཙྩསྶ ཁིཔྤཱ ཨམནྡཱ སཱིགྷཔྤཝཏྟི. ཏསྨཱ ཡོ ཨཱདིཏོ ཀིལེསེ ཝིཀྑམྦྷེནྟོ དུཀྑེན སསངྑཱརེན སཔྤཡོགེན ཀིལམནྟོ ཝིཀྑམྦྷེཏི ¶ , ཏསྶ དུཀྑཱ པཊིཔདཱ ནཱམ ཧོཏི. ཡོ པན ཝིཀྑམྦྷིཏཀིལེསོ ཨཔྤནཱཔརིཝཱསཾ ཝསནྟོ ཙིརེན ཨངྒཔཱཏུབྷཱཝཾ པཱཔུཎཱཏི, ཏསྶ དནྡྷཱབྷིཉྙཱ ནཱམ ཧོཏི. ཡོ ཁིཔྤཾ ཨངྒཔཱཏུབྷཱཝཾ པཱཔུཎཱཏི ཏསྶ ཁིཔྤཱབྷིཉྙཱ ནཱམ ཧོཏི. ཡོ ཀིལེསེ ཝིཀྑམྦྷེནྟོ སུཁེན ཨཀིལམནྟོ ཝིཀྑམྦྷེཏི, ཏསྶ སུཁཱ པཊིཔདཱ ནཱམ ཧོཏི.

ཏཏྠ ཡཱནི སཔྤཱཡཱསཔྤཱཡཱནི ཙ པལིབོདྷུཔཙྪེདཱདཱིནི པུབྦཀིཙྩཱནི ཙ ཨཔྤནཱཀོསལླཱནི ཙ ཝིསུདྡྷིམགྒེ ཙིཏྟབྷཱཝནཱནིདྡེསེ ནིདྡིཊྛཱནི, ཏེསུ ཡོ ཨསཔྤཱཡསེཝཱི ཧོཏི, ཏསྶ དུཀྑཱ པཊིཔདཱ དནྡྷཱ ཙ ཨབྷིཉྙཱ ཧོཏི. སཔྤཱཡསེཝིནོ སུཁཱ པཊིཔདཱ ཁིཔྤཱ ཙ ཨབྷིཉྙཱ. ཡོ པན པུབྦབྷཱགེ ཨསཔྤཱཡཾ སེཝིཏྭཱ ཨཔརབྷཱགེ སཔྤཱཡསེཝཱི ཧོཏི, པུབྦབྷཱགེ ཝཱ སཔྤཱཡཾ སེཝིཏྭཱ ཨཔརབྷཱགེ ཨསཔྤཱཡསེཝཱི, ཏསྶ ཝོམིསྶཀཏཱ ཝེདིཏབྦཱ. ཏཐཱ པལིབོདྷུཔཙྪེདཱདིཀཾ པུབྦཀིཙྩཾ ཨསམྤཱདེཏྭཱ བྷཱཝནཾ ཨནུཡུཏྟསྶ དུཀྑཱ པཊིཔདཱ ཧོཏི, ཝིཔརིཡཱཡེན སུཁཱ. ཨཔྤནཱཀོསལླཱནི པན ཨསམྤཱདེནྟསྶ དནྡྷཱ ཨབྷིཉྙཱ ཧོཏི, སམྤཱདེནྟསྶ ཁིཔྤཱ.

ཨཔིཙ ¶ ཏཎྷཱཨཝིཛྫཱཝསེན སམཐཝིཔསྶནཱཀཏཱདྷིཀཱརཝསེན ཙཱཔི ཨེཏཱསཾ པབྷེདོ ཝེདིཏབྦོ. ཏཎྷཱབྷིབྷཱུཏསྶ ཧི དུཀྑཱ པཊིཔདཱ ཧོཏི, ཨནབྷིབྷཱུཏསྶ སུཁཱ. ཨཝིཛྫཱབྷིབྷཱུཏསྶ ཙ དནྡྷཱ ཨབྷིཉྙཱ ཧོཏི, ཨནབྷིབྷཱུཏསྶ ཁིཔྤཱ. ཡོ ཙ སམཐེ ཨཀཏཱདྷིཀཱརོ ཏསྶ དུཀྑཱ པཊིཔདཱ ཧོཏི, ཀཏཱདྷིཀཱརསྶ སུཁཱ. ཡོ པན ཝིཔསྶནཱཡ ཨཀཏཱདྷིཀཱརོ ཧོཏི, ཏསྶ དནྡྷཱ ཨབྷིཉྙཱ ཧོཏི, ཀཏཱདྷིཀཱརསྶ ཁིཔྤཱ.

ཀིལེསིནྡྲིཡཝསེན ཙཱཔི ཨེཏཱསཾ པབྷེདོ ཝེདིཏབྦོ. ཏིབྦཀིལེསསྶ ཧི མུདིནྡྲིཡསྶ དུཀྑཱ པཊིཔདཱ ཧོཏི དནྡྷཱ ཙ ཨབྷིཉྙཱ, ཏིཀྑིནྡྲིཡསྶ པན ཁིཔྤཱ ཨབྷིཉྙཱ. མནྡཀིལེསསྶ ཙ མུདིནྡྲིཡསྶ སུཁཱ པཊིཔདཱ ཧོཏི དནྡྷཱ ཙ ཨབྷིཉྙཱ, ཏིཀྑིནྡྲིཡསྶ པན ཁིཔྤཱ ཨབྷིཉྙཱཏི.

ཨིཏི ཨིམཱསུ པཊིཔདཱཨབྷིཉྙཱསུ ཡོ པུགྒལོ དུཀྑཱཡ པཊིཔདཱཡ ¶ དནྡྷཱཡ ཨབྷིཉྙཱཡ ཛྷཱནཾ པཱཔུཎཱཏི, ཏསྶ ཏཾ ཛྷཱནཾ དུཀྑཔཊིཔདཾ དནྡྷཱབྷིཉྙནྟི ཝུཙྩཏི. སེསེསུཔི ཨེསེཝ ནཡོ.

ཏཏྠ ¶ ‘ཏདནུདྷམྨཏཱ སཏི སནྟིཊྛཏི ཋིཏིབྷཱགིནཱི པཉྙཱ’ཏི (ཝིབྷ. ༧༩༩) ཨེཝཾ ཝུཏྟསཏིཡཱ ཝཱ ཏཾཏཾཛྷཱནནིཀནྟིཡཱ ཝཱ ཝིཀྑམྦྷནེ པཊིཔདཱ, ཏཾཏཾཛྷཱནུཔཙཱརཔྤཏྟསྶ ཨཔྤནཱཡ པརིཝཱསེ ཨབྷིཉྙཱ ཙ ཝེདིཏབྦཱ. ཨཱགམནཝསེནཱཔི ཙ པཊིཔདཱ ཨབྷིཉྙཱ ཧོནྟིཡེཝ. དུཀྑཔཊིཔདཉྷི དནྡྷཱབྷིཉྙཾ པཋམཛ྄ཛྷཱནཾ པཏྭཱ པཝཏྟཾ དུཏིཡམྤི ཏཱདིསམེཝ ཧོཏི. ཏཏིཡཙཏུཏྠེསུཔི ཨེསེཝ ནཡོ. ཡཐཱ ཙ ཙཏུཀྐནཡེ ཨེཝཾ པཉྩཀནཡེཔི པཊིཔདཱཝསེན ཙཏུདྷཱ བྷེདོ ཝེདིཏབྦོ. ཨིཏི པཊིཔདཱཝསེནཔི ཙཏྟཱརོ ནཝཀཱ ཝུཏྟཱ ཧོནྟི. ཏེསུ པཱཋཏོ ཚཏྟིཾས ཙིཏྟཱནི, ཨཏྠཏོ པན པཉྩཀནཡེ ཙཏུཀྐནཡསྶ པཝིཊྛཏྟཱ ཝཱིསཏིམེཝ བྷཝནྟཱིཏི.

པཊིཔདཱཙཏུཀྐཾ.

ཨཱརམྨཎཙཏུཀྐཾ

༡༨༡. ཨིདཱནི ¶ ཡསྨཱ ཨེཏཾ ཛྷཱནཾ ནཱམ ཡཐཱ པཊིཔདཱབྷེདེན ཨེཝཾ ཨཱརམྨཎབྷེདེནཱཔི ཙཏུབྦིདྷཾ ཧོཏི. ཏསྨཱསྶ ཏཾ པབྷེདཾ དསྶེཏུཾ པུན ཀཏམེ དྷམྨཱ ཀུསལཱཏིཨཱདི ཨཱརདྡྷཾ. ཏཏྠ པརིཏྟཾ པརིཏྟཱརམྨཎནྟིཨཱདཱིསུ ཡཾ ཨཔྤགུཎཾ ཧོཏི, ཨུཔརིཛ྄ཛྷཱནསྶ པཙྩཡོ བྷཝིཏུཾ ན སཀྐོཏི, ཨིདཾ པརིཏྟཾ ནཱམ. ཡཾ པན ཨཝཌྜྷིཏེ སུཔྤམཏྟེ ཝཱ སརཱཝམཏྟེ ཝཱ ཨཱརམྨཎེ པཝཏྟཾ, ཏཾ པརིཏྟཾ ཨཱརམྨཎཾ ཨསྶཱཏི པརིཏྟཱརམྨཎཾ. ཡཾ པགུཎཾ སུབྷཱཝིཏཾ ཨུཔརིཛ྄ཛྷཱནསྶ པཙྩཡོ བྷཝིཏུཾ སཀྐོཏི, ཨིདཾ ཨཔྤམཱཎཾ ནཱམ. ཡཾ ཝིཔུལེ ཨཱརམྨཎེ པཝཏྟཾ ཏཾ ཝུཌྜྷིཔྤམཱཎཏྟཱ ཨཔྤམཱཎཾ ཨཱརམྨཎཾ ཨསྶཱཏི ཨཔྤམཱཎཱརམྨཎཾ. ཝུཏྟལཀྑཎཝོམིསྶཀཏཱཡ པན ཝོམིསྶཀནཡོ ཝེདིཏབྦོ. ཨིཏི ཨཱརམྨཎཝསེནཔི ཙཏྟཱརོ ནཝཀཱ ཝུཏྟཱ ཧོནྟི. ཙིཏྟགཎནཱཔེཏྠ པུརིམསདིསཱ ཨེཝཱཏི.

ཨཱརམྨཎཙཏུཀྐཾ.

ཨཱརམྨཎཔཊིཔདཱམིསྶཀཾ

༡༨༦. ཨིདཱནི ཨཱརམྨཎཔཊིཔདཱམིསྶཀཾ སོལ༹སཀྑཏྟུཀནཡཾ ¶ དསྶེཏུཾ པུན ཀཏམེ དྷམྨཱ ཀུསལཱཏིཨཱདི ཨཱརདྡྷཾ. ཏཏྠ པཋམནཡེ ཝུཏྟཛ྄ཛྷཱནཾ ¶ དུཀྑཔཊིཔདཏྟཱ དནྡྷཱབྷིཉྙཏྟཱ པརིཏྟཏྟཱ པརིཏྟཱརམྨཎཏྟཱཏི ཙཏཱུཧི ཀཱརཎེཧི ཧཱིནཾ, སོལ༹སམནཡེ ཝུཏྟཛ྄ཛྷཱནཾ སུཁཔཊིཔདཏྟཱ ཁིཔྤཱབྷིཉྙཏྟཱ ཨཔྤམཱཎཏྟཱ ཨཔྤམཱཎཱརམྨཎཏྟཱཏི ཙཏཱུཧི ཀཱརཎེཧི པཎཱིཏཾ. སེསེསུ ཙུདྡསསུ ཨེཀེན དྭཱིཧི ཏཱིཧི ཙ ཀཱརཎེཧི ཧཱིནཔྤཎཱིཏཏཱ ཝེདིཏབྦཱ.

ཀསྨཱ པནཱཡཾ ནཡོ དེསིཏོཏི? ཛྷཱནུཔྤཏྟིཀཱརཎཏྟཱ. སམྨཱསམྦུདྡྷེན ཧི པཐཝཱིཀསིཎེ སུདྡྷིཀཛ྄ཛྷཱནཾ ཙཏུཀྐནཡཝསེན པཉྩཀནཡཝསེན ཙ དསྶིཏཾ; ཏཐཱ སུདྡྷིཀཔཊིཔདཱ, ཏཐཱ སུདྡྷིཀཱརམྨཎཾ. ཏཏྠ ཡཱ དེཝཏཱ པཐཝཱིཀསིཎེ སུདྡྷིཀཛ྄ཛྷཱནཾ ཙཏུཀྐནཡཝསེན དེསིཡམཱནཾ བུཛ྄ཛྷིཏུཾ སཀྐོནྟི, ཏཱསཾ སཔྤཱཡཝསེན སུདྡྷིཀཛ྄ཛྷཱནེ ཙཏུཀྐནཡོ དེསིཏོ. ཡཱ པཉྩཀནཡཝསེན དེསིཡམཱནཾ བུཛ྄ཛྷིཏུཾ སཀྐོནྟི, ཏཱསཾ སཔྤཱཡཝསེན པཉྩཀནཡོ. ཡཱ སུདྡྷིཀཔཊིཔདཱཡ ¶ , སུདྡྷིཀཱརམྨཎེ ཙཏུཀྐནཡཝསེན དེསིཡམཱནཾ བུཛ྄ཛྷིཏུཾ སཀྐོནྟི, ཏཱསཾ སཔྤཱཡཝསེན སུདྡྷིཀཔཊིཔདཱཡ སུདྡྷིཀཱརམྨཎེ ཙཏུཀྐནཡོ དེསིཏོ. ཡཱ པཉྩཀནཡཝསེན དེསིཡམཱནཾ བུཛ྄ཛྷིཏུཾ སཀྐོནྟི ཏཱསཾ སཔྤཱཡཝསེན པཉྩཀནཡོ. ཨིཏི ཧེཊྛཱ པུགྒལཛ྄ཛྷཱསཡཝསེན དེསནཱ ཀཏཱ.

དེསནཱཝིལཱསཔྤཏྟོ ཙེས པབྷིནྣཔཊིསམྦྷིདོ དསབལཙཏུཝེསཱརཛྫཝིསདཉཱཎོ དྷམྨཱནཾ ཡཱཐཱཝསརསལཀྑཎསྶ སུཔྤཊིཝིདྡྷཏྟཱ དྷམྨཔཉྙཏྟིཀུསལཏཱཡ ཡོ ཡོ ནཡོ ལབྦྷཏི ཏསྶ ཏསྶ ཝསེན དེསནཾ ནིཡམེཏུཾ སཀྐོཏི, ཏསྨཱ ཨིམཱཡ དེསནཱཝིལཱསཔྤཏྟིཡཱཔི ཏེན ཨེསཱ པཐཝཱིཀསིཎེ སུདྡྷིཀཙཏུཀྐནཡཱདིཝསེན དེསནཱ ཀཏཱ.

ཡསྨཱ པན ཡེ ཀེཙི ཛྷཱནཾ ཨུཔྤཱདེནྟི ནཱམ ན ཏེ ཨཱརམྨཎཔཊིཔདཱཧི ཝིནཱ ཨུཔྤཱདེཏུཾ སཀྐོནྟི, ཏསྨཱ ནིཡམཏོ ཛྷཱནུཔྤཏྟིཀཱརཎཏྟཱ ཨཡཾ སོལ༹སཀྑཏྟུཀནཡོ ཀཐིཏོ.

ཨེཏྟཱཝཏཱ སུདྡྷིཀནཝཀོ, ཙཏྟཱརོ པཊིཔདཱནཝཀཱ, ཙཏྟཱརོ ཨཱརམྨཎནཝཀཱ, ཨིམེ ཙ སོལ༹ས ནཝཀཱཏི པཉྩཝཱིསཏི ནཝཀཱ ཀཐིཏཱ ཧོནྟི. ཏཏྠ ཨེཀེཀསྨིཾ ནཝཀེ ཙཏུཀྐཔཉྩཀཝསེན དྭེ དྭེ ནཡཱཏི པཉྙཱས ནཡཱ. ཏཏྠ ‘‘པཉྩཝཱིསཏིཡཱ ཙཏུཀྐནཡེསུ ¶ སཏཾ, པཉྩཀནཡེསུ པཉྩཝཱིསསཏ’’ནྟི པཱཋཏོ པཉྩཝཱིསཱདྷིཀཱནི དྭེ ཛྷཱནཙིཏྟསཏཱནི ཧོནྟི. པཉྩཀནཡེ པན ཙཏུཀྐནཡསྶ པཝིཊྛཏྟཱ ཨཏྠཏོ པཉྩཝཱིསཱདྷིཀམེཝ ཙིཏྟསཏཾ ¶ ཧོཏི. ཡཱནི ཙེཏཱནི པཱཋེ པཉྩཝཱིསཱདྷིཀཱནི དྭེ ཙིཏྟསཏཱནི ཏེསུ ཨེཀེཀསྶ ནིདྡེསེ དྷམྨཝཝཏྠཱནཱདཡོ ཏཡོ ཏཡོ མཧཱཝཱརཱ ཧོནྟི. ཏེ པན ཏཏྠ ཏཏྠ ནཡམཏྟམེཝ དསྶེཏྭཱ སཾཁིཏྟཱཏི.

པཐཝཱིཀསིཎཾ.

༢༠༣. ཨིདཱནི ཡསྨཱ ཨཱཔོཀསིཎཱདཱིསུཔི ཨེཏཱནི ཛྷཱནཱནི ཨུཔྤཛྫནྟི, ཏསྨཱ ཏེསཾ དསྶནཏྠཾ པུན ཀཏམེ དྷམྨཱ ཀུསལཱཏིཨཱདི ཨཱརདྡྷཾ. ཏེསུ སབྦོ པཱལི༹ནཡོ ཙ ཨཏྠཝིབྷཱཝནཱ ཙ ཙིཏྟགཎནཱ ཙ ཝཱརསངྑེཔོ ཙ པཐཝཱིཀསིཎེ ཝུཏྟནཡེནེཝ ཝེདིཏབྦོ. བྷཱཝནཱནཡོ པན ཀསིཎཔརིཀམྨཾ ཨཱདིཾ ཀཏྭཱ སབྦོ ཝིསུདྡྷིམགྒེ (ཝིསུདྡྷི ༡.༩༡ ཨཱདཡོ) པཀཱསིཏོཡེཝ. མཧཱསཀུལུདཱཡིསུཏྟེ པན དསཀསིཎཱནི (མ. ནི. ༢.༢༥༠) ཝུཏྟཱནི. ཏེསུ ཝིཉྙཱཎཀསིཎཾ ཨཱཀཱསེ ¶ པཝཏྟིཏམཧགྒཏཝིཉྙཱཎམྤི ཏཏྠ པརིཀམྨཾ ཀཏྭཱ ནིབྦཏྟཱ ཝིཉྙཱཎཉྩཱཡཏནསམཱཔཏྟིཔི ཧོཏཱིཏི སབྦཔྤཀཱརེན ཨཱརུཔྤདེསནམེཝ བྷཛཏི, ཏསྨཱ ཨིམསྨིཾ ཋཱནེ ན ཀཐིཏཾ.

ཨཱཀཱསཀསིཎནྟི པན ཀསིཎུགྒྷཱཊིམམཱཀཱསམྤི, ཏཾ ཨཱརམྨཎཾ ཀཏྭཱ པཝཏྟཀྑནྡྷཱཔི, བྷིཏྟིཙྪིདྡཱདཱིསུ ཨཉྙཏརསྨིཾ གཧེཏབྦནིམིཏྟཔརིཙྪེདཱཀཱསམྤི, ཏཾ ཨཱརམྨཎཾ ཀཏྭཱ ཨུཔྤནྣཾ ཙཏུཀྐཔཉྩཀཛ྄ཛྷཱནམྤི ཝུཙྩཏི. ཏཏྠ པུརིམནཡོ ཨཱརུཔྤདེསནཾ བྷཛཏི, པཙྪིམནཡོ རཱུཔཱཝཙརདེསནཾ. ཨིཏི མིསྶཀཏྟཱ ཨིམཾ རཱུཔཱཝཙརདེསནཾ ན ཨཱརུལ༹ྷཾ. པརིཙྪེདཱཀཱསེ ནིབྦཏྟཛ྄ཛྷཱནཾ པན རཱུཔཱུཔཔཏྟིཡཱ མགྒོ ཧོཏི ཏསྨཱ ཏཾ གཧེཏབྦཾ. ཏསྨིཾ པན ཙཏུཀྐཔཉྩཀཛ྄ཛྷཱནམེཝ ཨུཔྤཛྫཏི, ཨརཱུཔཛ྄ཛྷཱནཾ ནུཔྤཛྫཏི. ཀསྨཱ? ཀསིཎུགྒྷཱཊནསྶ ཨལཱབྷཏོ. ཏཉྷི པུནཔྤུནཾ ཨུགྒྷཱཊིཡམཱནམྤི ཨཱཀཱསམེཝ ཧོཏཱིཏི ན ཏཏྠ ཀསིཎུགྒྷཱཊནཾ ལབྦྷཏི, ཏསྨཱ ཏཏྠུཔྤནྣཾ ཛྷཱནཾ དིཊྛདྷམྨསུཁཝིཧཱརཱཡ སཾཝཏྟཏི, ཨབྷིཉྙཱཔཱདཀཾ ཧོཏི, ཝིཔསྶནཱཔཱདཀཾ ཧོཏི, ནིརོདྷཔཱདཀཾ ན ཧོཏི. ཨནུཔུབྦནིརོདྷོ པནེཏྠ ཡཱཝ ¶ པཉྩམཛ྄ཛྷཱནཱ ལབྦྷཏི ཝཊྚཔཱདཀཾ ཧོཏིཡེཝ. ཡཐཱ ཙེཏཾ ཨེཝཾ པུརིམཀསིཎེསུ ཨུཔྤནྣཾ ཛྷཱནམྤི. ནིརོདྷཔཱདཀབྷཱཝོ པནེཏྠ ཝིསེསོ. སེསམེཏྠ ཨཱཀཱསཀསིཎེ ཡཾ ཝཏྟབྦཾ སིཡཱ ཏཾ སབྦཾ ཝིསུདྡྷིམགྒེ (ཝིསུདྡྷི. ༡.༩༨-༩༩) ཝུཏྟམེཝ.

‘ཨེཀོཔི ¶ ཧུཏྭཱ བཧུདྷཱ ཧོཏཱི’ཏིཨཱདིནཡཾ (དཱི. ནི. ༡.༢༣༩; པཊི. མ. ༡.༡༠༢) པན ཝིཀུབྦནཾ ཨིཙྪནྟེན པུརིམེསུ ཨཊྛསུ ཀསིཎེསུ ཨཊྛ སམཱཔཏྟིཡོ ནིབྦཏྟེཏྭཱ ཀསིཎཱནུལོམཏོ ཀསིཎཔཊིལོམཏོ, ཀསིཎཱནུལོམཔཊིལོམཏོ; ཛྷཱནཱནུལོམཏོ, ཛྷཱནཔཊིལོམཏོ, ཛྷཱནཱནུལོམཔཊིལོམཏོ; ཛྷཱནུཀྐནྟིཀཏོ, ཀསིཎུཀྐནྟིཀཏོ, ཛྷཱནཀསིཎུཀྐནྟིཀཏོ; ཨངྒསངྐནྟིཀཏོ, ཨཱརམྨཎསངྐནྟིཀཏོ, ཨངྒཱརམྨཎསངྐནྟིཀཏོ; ཨངྒཝཝཏྠཱནཏོ, ཨཱརམྨཎཝཝཏྠཱནཏོཏི ཨིམེཧི ཙུདྡསཧཱཀཱརེཧི ཙིཏྟཾ པརིདམེཏབྦཾ. ཏེསཾ ཝིཏྠཱརཀཐཱ ཝིསུདྡྷིམགྒེ (ཝིསུདྡྷི. ༢.༣༦༥-༣༦༦) ཝུཏྟཱཡེཝ.

ཨེཝཾ པན ཙུདྡསཧཱཀཱརེཧི ཙིཏྟཾ ཨཔརིདམེཏྭཱ, པུབྦེ ཨབྷཱཝིཏབྷཱཝནོ ཨཱདིཀམྨིཀོ ཡོགཱཝཙརོ ཨིདྡྷིཝིཀུབྦནཾ སམྤཱདེསྶཏཱིཏི ནེཏཾ ཋཱནཾ ཝིཛྫཏི. ཨཱདིཀམྨིཀསྶ ཧི ཀསིཎཔརིཀམྨམྤི བྷཱརོ; སཏེསུ སཧསྶེསུ ཝཱ ཨེཀོཝ སཀྐོཏི. ཀཏཀསིཎཔརིཀམྨསྶ ནིམིཏྟུཔྤཱདནཾ བྷཱརོ; སཏེསུ སཧསྶེསུ ཝཱ ཨེཀོཝ སཀྐོཏི. ཨུཔྤནྣེ ནིམིཏྟེ ཏཾ ཝཌྜྷེཏྭཱ ཨཔྤནཱདྷིགམོ ¶ བྷཱརོ, སཏེསུ སཧསྶེསུ ཝཱ ཨེཀོཝ སཀྐོཏི. ཨདྷིགཏཔྤནསྶ ཙུདྡསཧཱཀཱརེཧི ཙིཏྟཔརིདམནཾ བྷཱརོ; སཏེསུ སཧསྶེསུ ཝཱ ཨེཀོཝ སཀྐོཏི. ཙུདྡསཧཱཀཱརེཧི པརིདམིཏཙིཏྟསྶཱཔི ཨིདྡྷིཝིཀུབྦནཾ ནཱམ བྷཱརོ, སཏེསུ སཧསྶེསུ ཝཱ ཨེཀོཝ སཀྐོཏི. ཝིཀུབྦནཔྤཏྟསྶཱཔི ཁིཔྤནིསནྟིབྷཱཝོ ནཱམ བྷཱརོ; སཏེསུ སཧསྶེསུ ཝཱ ཨེཀོཝ ཁིཔྤནིསནྟི ཧོཏི. ཐེརམྦཏྠལེ མཧཱརོཧནགུཏྟཏྠེརསྶ གིལཱནུཔཊྛཱནཾ ཨཱགཏེསུ ཏིཾསམཏྟེསུ ཨིདྡྷིམནྟསཧསྶེསུ ཨུཔསམྤདཱཡ ཨཊྛཝསྶིཀོ རཀྑིཏཏྠེརོ ཝིཡ. སབྦཾ ཝཏྠུ ཝིསུདྡྷིམགྒེ (ཝིསུདྡྷི. ༢.༣༦༧) ཝིཏྠཱརིཏམེཝཱཏི.

ཀསིཎཀཐཱ.

ཨབྷིབྷཱཡཏནཀཐཱ

༢༠༤. ཨེཝཾ ཨཊྛསུ ཀསིཎེསུ རཱུཔཱཝཙརཀུསལཾ ནིདྡིསིཏྭཱ, ཨིདཱནི ཡསྨཱ སམཱནེཔི ཨཱརམྨཎེ བྷཱཝནཱཡ ཨསམཱནཾ ཨིམེསུ ཨཊྛསུ ཀསིཎེསུ ཨཉྙམྤི ཨབྷིབྷཱཡཏནསངྑཱཏཾ རཱུཔཱཝཙརཀུསལཾ ¶ པཝཏྟཏི, ཏསྨཱ ¶ ཏཾ དསྶེཏུཾ པུན ཀཏམེ དྷམྨཱ ཀུསལཱཏིཨཱདི ཨཱརདྡྷཾ. ཏཏྠ ཨཛ྄ཛྷཏྟཾ ཨརཱུཔསཉྙཱིཏི ཨལཱབྷིཏཱཡ ཝཱ ཨནཏྠིཀཏཱཡ ཝཱ ཨཛ྄ཛྷཏྟརཱུཔེ པརིཀམྨསཉྙཱཝིརཧིཏོ. བཧིདྡྷཱ རཱུཔཱནི པསྶཏཱིཏི བཧིདྡྷཱ ཨཊྛསུ ཀསིཎེསུ ཀཏཔརིཀམྨཏཱཡ པརིཀམྨཝསེན ཙེཝ ཨཔྤནཱཝསེན ཙ ཏཱནི བཧིདྡྷཱ ཨཊྛསུ ཀསིཎེསུ རཱུཔཱནི པསྶཏི. པརིཏྟཱནཱིཏི ཨཝཌྜྷིཏཱནི. ཏཱནི ཨབྷིབྷུཡྻཱཏི ཡཐཱ ནཱམ སམྤནྣགཧཎིཀོ ཀཊཙྪུམཏྟཾ བྷཏྟཾ ལབྷིཏྭཱ ‘ཀིཾ ཨེཏྠ བྷུཉྫིཏབྦཾ ཨཏྠཱི’ཏི སངྐཌྜྷིཏྭཱ ཨེཀཀབལ༹མེཝ ཀརོཏི, ཨེཝམེཝ ཉཱཎུཏྟརིཀོ པུགྒལོ ཝིསདཉཱཎོ ‘ཀིམེཏྠ པརིཏྟཀེ ཨཱརམྨཎེ སམཱཔཛྫིཏབྦཾ ཨཏྠི, ནཱཡཾ མམ བྷཱརོ’ཏི ཏཱནི རཱུཔཱནི ཨབྷིབྷཝིཏྭཱ སམཱཔཛྫཏི. སཧ ནིམིཏྟུཔྤཱདེནེཝེཏྠ ཨཔྤནཾ ནིབྦཏྟེཏཱིཏི ཨཏྠོ. ཛཱནཱམི པསྶཱམཱིཏི ཨིམིནཱ པནསྶ པུབྦབྷཱགོ ཀཐིཏོ. ཨཱགམཊྛཀཐཱསུ པན ཝུཏྟཾ – ཨིམིནཱསྶ པན ཨཱབྷོགོ ཀཐིཏོ. སོ ཙ ཁོ སམཱཔཏྟིཏོ ཝུཊྛིཏསྶ, ན ཨནྟོསམཱཔཏྟིཡནྟི (ཨ. ནི. ཨཊྛ. ༣.༨.༦༥).

ཨཔྤམཱཎཱནཱིཏི ¶ ཝཌྜྷིཏཔྤམཱཎཱནི. ཨབྷིབྷུཡྻཱཏི ཨེཏྠ པན ཡཐཱ མཧགྒྷསོ པུརིསོ ཨེཀཾ བྷཏྟཝཌྜྷིཏཀཾ ལབྷིཏྭཱ ‘ཨཉྙཱཔི ཧོཏུ ‘ཀིམེསཱ མཡ྄ཧཾ ཀརིསྶཏཱི’ཏི ཏཾ ན མཧནྟཏོ པསྶཏི, ཨེཝམེཝ ཉཱཎུཏྟརོ པུགྒལོ ཝིསདཉྙཱཎོ ‘ཀིམེཏྠ སམཱཔཛྫིཏབྦཾ, ན ཨིདཾ ཨཔྤམཱཎཾ, ན མཡ྄ཧཾ ཙིཏྟེཀགྒཏཱཀརཎེ བྷཱརོ ཨཏྠཱི’ཏི ཏཱནི ཨབྷིབྷཝིཏྭཱ སམཱཔཛྫཏི. སཧ ནིམིཏྟུཔྤཱདེནེཝེཏྠ ཨཔྤནཾ ནིབྦཏྟེཏཱིཏི ཨཏྠོ.

པརིཏྟཾ པརིཏྟཱརམྨཎཾ ཨཔྤམཱཎཾ པརིཏྟཱརམྨཎནྟི ཨིདྷ པརིཏྟཱནཱིཏི ཨཱགཏཏྟཱ ཨཔྤམཱཎཱརམྨཎཏཱ ན གཧིཏཱ, པརཏོ ཨཔྤམཱཎཱནཱིཏི ཨཱགཏཏྟཱ པརིཏྟཱརམྨཎཏཱ. ཨཊྛཀཐཱཡཾ པན ཝུཏྟཾ – ‘ཨིམསྨིཾ ཋཱནེ ཙཏྟཱརི ཙཏྟཱརི ཨཱརམྨཎཱནི ཨགྒཧེཏྭཱ དྭེ དྭེཝ གཧིཏཱནི ¶ . ཀིཾ ཀཱརཎཱ? ཙཏཱུསུ ཧི གཧིཏེསུ དེསནཱ སོལ༹སཀྑཏྟུཀཱ ཧོཏི, སཏྠཱརཱ ཙ ཧེཊྛཱ སོལ༹སཀྑཏྟུཀཱ དེསནཱ ཀིལཉྫམྷི ཏིལེ པཏྠརནྟེན ཝིཡ ཝིཏྠཱརཏོ ཀཐིཏཱ. ཏསྶ ཨིམསྨིཾ ཋཱནེ ཨཊྛཀྑཏྟུཀཾ དེསནཾ ཀཱཏུཾ ཨཛ྄ཛྷཱསཡོ. ཏསྨཱ དྭེ དྭེཡེཝ གཧིཏཱནཱིཏི ཝེདིཏབྦཱནཱིཏི.

སུཝཎྞདུབྦཎྞཱནཱིཏི ¶ པརིསུདྡྷཱཔརིསུདྡྷཝཎྞཱནི. པརིསུདྡྷཱནི ཧི ནཱིལཱདཱིནི སུཝཎྞཱནི, ཨཔརིསུདྡྷཱནི ཙ དུབྦཎྞཱནཱིཏི ཨིདྷ ཨདྷིཔྤེཏཱནི. ཨཱགམཊྛཀཐཱསུ པན ‘སུཝཎྞཱནི ཝཱ ཧོནྟུ དུབྦཎྞཱནི ཝཱ, པརིཏྟཨཔྤམཱཎཝསེནེཝ ཨིམཱནི ཨབྷིབྷཱཡཏནཱནི དེསིཏཱནཱི’ཏི (ཨ. ནི. ཨཊྛ. ༣.༨.༦༥) ཝུཏྟཾ. ཨིམེསུ པན ཙཏཱུསུ པརིཏྟཾ ཝིཏཀྐཙརིཏཝསེན ཨཱགཏཾ, ཨཔྤམཱཎཾ མོཧཙརིཏཝསེན, སུཝཎྞཾ དོསཙརིཏཝསེན, དུབྦཎྞཾ རཱགཙརིཏཝསེན. ཨེཏེསཉྷི ཨེཏཱནི སཔྤཱཡཱནི. སཱ ཙ ཏེསཾ སཔྤཱཡཏཱ ཝིཏྠཱརཏོ ཝིསུདྡྷིམགྒེ (ཝིསུདྡྷི. ༡.༤༣) ཙརིཡནིདྡེསེ ཝུཏྟཱ.

ཀསྨཱ པན, ཡཐཱ སུཏྟནྟེ ‘‘ཨཛ྄ཛྷཏྟཾ རཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པརིཏྟཱནཱི’’ཏིཨཱདི (དཱི. ནི. ༢.༡༧༣; མ. ནི. ༢.༢༤༩; ཨ. ནི. ༨.༦༥) ཝུཏྟཾ, ཨེཝཾ ཨཝཏྭཱ ཨིདྷ ཙཏཱུསུཔི ཨབྷིབྷཱཡཏནེསུ ཨཛ྄ཛྷཏྟཾ ཨརཱུཔསཉྙིཏཱཝ ཝུཏྟཱཏི? ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏོ. ཏཏྠ ཝཱ ཧི ཨིདྷ ཝཱ བཧིདྡྷཱརཱུཔཱནེཝ ཨབྷིབྷཝིཏབྦཱནི, ཏསྨཱ ཏཱནི ནིཡམཏོ ཝཏྟབྦཱནཱིཏི ཏཏྲཔི ཨིདྷཔི ཝུཏྟཱནི. ཨཛ྄ཛྷཏྟཾ ཨརཱུཔསཉྙཱིཏི ཨིདཾ པན སཏྠུ དེསནཱཝིལཱསམཏྟམེཝ. ཨཡཾ ཏཱཝ ཙཏཱུསུ ཨབྷིབྷཱཡཏནེསུ ཨཔུབྦཔདཝཎྞནཱ. སུདྡྷིཀནཡཔཊིཔདཱབྷེདོ པནེཏྠ པཐཝཱིཀསིཎེ ཝུཏྟནཡེནེཝ ཨེཀེཀསྨིཾ ཨབྷིབྷཱཡཏནེ ཝེདིཏབྦོ. ཀེཝལཉྩེཏྠ ¶ ཨཱརམྨཎཙཏུཀྐཾ ཨཱརམྨཎདུཀཾ ཧོཏི, སོལ༹སཀྑཏྟུཀཉྩ ཨཊྛཀྑཏྟུཀཾ. སེསཾ ཏཱདིསམེཝ. ཨེཝམེཏྠ ཨེཀེཀསྨིཾ ཨབྷིབྷཱཡཏནེ ཨེཀོ སུདྡྷིཀནཝཀོ, ཙཏྟཱརོ པཊིཔདཱནཝཀཱ, དྭེ ཨཱརམྨཎནཝཀཱ, ཨཱརམྨཎཔཊིཔདཱམིསྶཀེ ཨཊྛ ནཝཀཱཏི པནྣརས ནཝཀཱཏི ཙཏཱུསུཔི ཨབྷིབྷཱཡཏནེསུ སམསཊྛི ནཝཀཱ ཝེདིཏབྦཱ.

༢༤༦. པཉྩམཨབྷིབྷཱཡཏནཱདཱིསུ ¶ ནཱིལཱནཱིཏི སབྦསངྒཱཧིཀཝསེན ཝུཏྟཾ. ནཱིལཝཎྞཱནཱིཏི ཝཎྞཝསེན, ནཱིལནིདསྶནཱནཱིཏི ནིདསྶནཝསེན, ཨཔཉྙཱཡམཱནཝིཝརཱནི, ཨསམྦྷིནྣཝཎྞཱནི, ཨེཀནཱིལཱནེཝ ཧུཏྭཱ དིསྶནྟཱིཏི ཝུཏྟཾ ཧོཏི. ནཱིལནིབྷཱསཱནཱིཏི ཨིདཾ པན ཨོབྷཱསནཝསེན ཝུཏྟཾ; ནཱིལོབྷཱསཱནི ནཱིལཔྤབྷཱཡུཏྟཱནཱིཏི ཨཏྠོ. ཨེཏེན ནེསཾ སུཝིསུདྡྷཏཾ དསྶེཏི. སུཝིསུདྡྷཝཎྞཝསེན ཧི ཨིམཱནི ཙཏྟཱརི ཨབྷིབྷཱཡཏནཱནི ཝུཏྟཱནི. པཱིཏཱནཱིཏིཨཱདཱིསུཔི ཨིམིནཱཝ ནཡེན ཨཏྠོ ཝེདིཏབྦོ. ནཱིལཀསིཎཾ ཨུགྒཎྷནྟོ ནཱིལསྨིཾ ནིམིཏྟཾ གཎྷཱཏི. པུཔྥསྨིཾ ཝཱ ཝཏྠསྨིཾ ཝཱ ཝཎྞདྷཱཏུཡཱ ཝཱཏིཨཱདིཀཾ ¶ པནེཏྠ ཀསིཎཀརཎཉྩ པརིཀམྨཉྩ ཨཔྤནཱཝིདྷཱནཉྩ སབྦཾ ཝིསུདྡྷིམགྒེ (ཝིསུདྡྷི. ༡.༩༣ ཨཱདཡོ) ཝིཏྠཱརཏོ ཝུཏྟམེཝ. ཡཐཱ ཙ པཐཝཱིཀསིཎེ ཨེཝམེཏྠ ཨེཀེཀསྨིཾ ཨབྷིབྷཱཡཏནེ པཉྩཝཱིསཏི པཉྩཝཱིསཏི ནཝཀཱ ཝེདིཏབྦཱ.

ཨབྷིབྷཱཡཏནཀཐཱ.

ཝིམོཀྑཀཐཱ

༢༤༨. ཨིདཱནི ཡསྨཱ ཨིདཾ རཱུཔཱཝཙརཀུསལཾ ནཱམ ན ཀེཝལཾ ཨཱརམྨཎསངྑཱཏཱནཾ ཨཱཡཏནཱནཾ ཨབྷིབྷཝནཏོ ཨབྷིབྷཱཡཏནཝསེནེཝ ཨུཔྤཛྫཏི, ཨཐ ཁོ ཝིམོཀྑཝསེནཔི ཨུཔྤཛྫཏི, ཏསྨཱ ཏམྤི ནཡཾ དསྶེཏུཾ པུན ཀཏམེ དྷམྨཱ ཀུསལཱཏིཨཱདི ཨཱརདྡྷཾ.

ཀེནཊྛེན པན ཝིམོཀྑོ ཝེདིཏབྦོཏི? ཨདྷིམུཙྩནཊྛེན. ཀོ ཨཡཾ ཨདྷིམུཙྩནཊྛོ ནཱམ? པཙྩནཱིཀདྷམྨེཧི ཙ སུཊྛུ ཝིམུཙྩནཊྛོ, ཨཱརམྨཎེ ཙ ཨབྷིརཏིཝསེན སུཊྛུ ཝིམུཙྩནཊྛོ ¶ . པིཏུཨངྐེ ཝིསྶཊྛཨངྒཔཙྩངྒསྶ དཱརཀསྶ སཡནཾ ཝིཡ ཨནིགྒཧིཏབྷཱཝེན ནིརཱསངྐཏཱཡ ཨཱརམྨཎེ པཝཏྟཱིཏི ཝུཏྟཾ ཧོཏི. ཨེཝཾལཀྑཎཉྷི ཝིམོཀྑབྷཱཝཔྤཏྟཾ རཱུཔཱཝཙརཀུསལཾ དསྶེཏུཾ ཨཡཾ ནཡོ ཨཱརདྡྷོ.

ཏཏྠ རཱུཔཱིཏི ཨཛ྄ཛྷཏྟཾ ཀེསཱདཱིསུ ཨུཔྤཱདིཏཾ རཱུཔཛ྄ཛྷཱནཾ རཱུཔཾ, ཏདསྶཏྠཱིཏི རཱུཔཱི. ཨཛ྄ཛྷཏྟཉྷི ནཱིལཔརིཀམྨཾ ཀརོནྟོ ཀེསེ ཝཱ པིཏྟེ ཝཱ ཨཀྑིཏཱརཀཱཡ ཝཱ ཀརོཏི. པཱིཏཔརིཀམྨཾ ཀརོནྟོ མེདེ ཝཱ ཚཝིཡཱ ཝཱ ཨཀྑཱིནཾ ¶ པཱིཏཊྛཱནེ ཝཱ ཀརོཏི. ལོཧིཏཔརིཀམྨཾ ཀརོནྟོ མཾསེ ཝཱ ལོཧིཏེ ཝཱ ཛིཝ྄ཧཱཡ ཝཱ ཧཏྠཏལཔཱདཏལེསུ ཝཱ ཨཀྑཱིནཾ རཏྟཊྛཱནེ ཝཱ ཀརོཏི. ཨོདཱཏཔརིཀམྨཾ ཀརོནྟོ ཨཊྛིམྷི ཝཱ དནྟེ ཝཱ ནཁེ ཝཱ ཨཀྑཱིནཾ སེཏཊྛཱནེ ཝཱ ཀརོཏི. ཨེཝཾ པརིཀམྨཾ ཀཏྭཱ ཨུཔྤནྣཛ྄ཛྷཱནསམངྒིནཾ སནྡྷཱཡེཏཾ ཝུཏྟཾ. རཱུཔཱནི པསྶཏཱིཏི བཧིདྡྷཱཔི ནཱིལཀསིཎཱདིརཱུཔཱནི ཛྷཱནཙཀྑུནཱ པསྶཏི. ཨིམིནཱ ཨཛ྄ཛྷཏྟབཧིདྡྷཱཝཏྠུཀེསུ ཀསིཎེསུ ཛྷཱནཔཊིལཱབྷོ དསྶིཏོ.

ཨཛ྄ཛྷཏྟཾ ¶ ཨརཱུཔསཉྙཱིཏི ཨཛ྄ཛྷཏྟཾ ན རཱུཔསཉྙཱི. ཨཏྟནོ ཀེསཱདཱིསུ ཨནུཔྤཱདིཏརཱུཔཱཝཙརཛ྄ཛྷཱནོཏི ཨཏྠོ. ཨིམིནཱ བཧིདྡྷཱ པརིཀམྨཾ ཀཏྭཱ བཧིདྡྷཱཝ པཊིལདྡྷཛ྄ཛྷཱནཏཱ དསྶིཏཱ.

སུབྷནྟི ཨིམིནཱ སུཝིསུདྡྷེསུ ནཱིལཱདཱིསུ ཝཎྞཀསིཎེསུ ཛྷཱནཱནི དསྶིཏཱནི. ཏཏྠ ཀིཉྩཱཔི ཨནྟོཨཔྤནཱཡ ‘སུབྷ’ནྟི ཨཱབྷོགོ ནཏྠི, ཡོ པན སུཝིསུདྡྷཾ སུབྷཀསིཎཾ ཨཱརམྨཎཾ ཀཏྭཱ ཝིཧརཏི, སོ ཡསྨཱ ‘སུབྷ’ནྟི…པེ… པཋམཾ ཛྷཱནཾ ཨུཔསམྤཛྫ ཝིཧརཏི, ཏཐཱ དུཏིཡཱདཱིནི, ཏསྨཱ ཨེཝཾ དེསནཱ ཀཏཱ. པཊིསམྦྷིདཱམགྒེ པན ‘‘ཀཐཾ སུབྷནྟྭེཝ ཨདྷིམུཏྟོ ཧོཏཱིཏི ཝིམོཀྑོ? ཨིདྷ བྷིཀྑུ མེཏྟཱསཧགཏེན ཙེཏསཱ ཨེཀཾ དིསཾ…པེ… ཝིཧརཏི, མེཏྟཱཡ བྷཱཝིཏཏྟཱ སཏྟཱ ཨཔྤཊིཀཱུལཱ ཧོནྟི; ཀརུཎཱ… མུདིཏཱ… ཨུཔེཀྑཱསཧགཏེན ཙེཏསཱ ཨེཀཾ དིསཾ…པེ… ཝིཧརཏི, ཨུཔེཀྑཱཡ བྷཱཝིཏཏྟཱ སཏྟཱ ཨཔྤཊིཀཱུལཱ ཧོནྟི, ཨེཝཾ སུབྷནྟྭེཝ ཨདྷིམུཏྟོ ཧོཏཱི’’ཏི ཝིམོཀྑོཏི (པཊི. མ. ༡.༢༡༢) ཝུཏྟཾ. ཨིདྷ པན ཨུཔརི པཱལི༹ཡཾཡེཝ བྲཧྨཝིཧཱརཱནཾ ཨཱགཏཏྟཱ ཏཾ ནཡཾ པཊིཀྑིཔིཏྭཱ སུནཱིལཀསུཔཱིཏཀསུལོཧིཏཀསུཨོདཱཏཀཔརིསུདྡྷནཱིལཀཔརིསུདྡྷཔཱིཏཀཔརིསུདྡྷལོཧིཏཀཔརིསུདྡྷཨོདཱཏཀཝསེནེཝ སུབྷཝིམོཀྑོ ཨནུཉྙཱཏོ. ཨིཏི ཀསིཎནྟི ཝཱ ཨབྷིབྷཱཡཏནནྟི ཝཱ ཝིམོཀྑོཏི ཝཱ རཱུཔཱཝཙརཛ྄ཛྷཱནམེཝ ¶ . ཏཉྷི ཨཱརམྨཎསྶ སཀལཊྛེན ཀསིཎཾ ནཱམ, ཨཱརམྨཎཾ ཨབྷིབྷཝནཊྛེན ཨབྷིབྷཱཡཏནཾ ནཱམ, ཨཱརམྨཎེ ཨདྷིམུཙྩནཊྛེན པཙྩནཱིཀདྷམྨེཧི ཙ ཝིམུཙྩནཊྛེན ¶ ཝིམོཀྑོ ནཱམཱཏི ཝུཏྟཾ. ཏཏྠ ཀསིཎདེསནཱ ཨབྷིདྷམྨཝསེན, ཨིཏརཱ པན སུཏྟནྟདེསནཱཝསེན ཝུཏྟཱཏི ཝེདིཏབྦཱ. ཨཡམེཏྠ ཨཔུབྦཔདཝཎྞནཱ. ཨེཀེཀསྨིཾ པན ཝིམོཀྑེ པཐཝཱིཀསིཎེ ཝིཡ པཉྩཝཱིསཏི པཉྩཝཱིསཏཱིཏི ཀཏྭཱ པཉྩསཏྟཏི ནཝཀཱ ཝེདིཏབྦཱ.

ཝིམོཀྑཀཐཱ.

བྲཧྨཝིཧཱརཀཐཱ

༢༥༡. ཨིདཱནི མེཏྟཱདིབྲཧྨཝིཧཱརཝསེན པཝཏྟམཱནཾ རཱུཔཱཝཙརཀུསལཾ དསྶེཏུཾ པུན ཀཏམེ དྷམྨཱ ཀུསལཱཏིཨཱདི ཨཱརདྡྷཾ. ཏཏྠ མེཏྟཱསཧགཏནྟི ¶ མེཏྟཱཡ སམནྣཱགཏཾ. པརཏོ ཀརུཎཱསཧགཏཱདཱིསུཔི ཨེསེཝ ནཡོ. ཡེན པནེས ཝིདྷཱནེན པཊིཔནྣོ མེཏྟཱདིསཧགཏཱནི ཛྷཱནཱནི ཨུཔསམྤཛྫ ཝིཧརཏི, ཏཾ མེཏྟཱདཱིནཾ བྷཱཝནཱཝིདྷཱནཾ སབྦཾ ཝིསུདྡྷིམགྒེ (ཝིསུདྡྷི. ༡.༢༤༠) ཝིཏྠཱརིཏམེཝ. ཨཝསེསཱཡ པཱལི༹ཡཱ ཨཏྠོ པཐཝཱིཀསིཎེ ཝུཏྟནཡེནེཝ ཝེདིཏབྦོ.

ཀེཝལཉྷི པཐཝཱིཀསིཎེ པཉྩཝཱིསཏི ནཝཀཱ, ཨིདྷ པུརིམཱསུ ཏཱིསུ ཏིཀཙཏུཀྐཛ྄ཛྷཱནིཀཝསེན པཉྩཝཱིསཏི སཏྟཀཱ, ཨུཔེཀྑཱཡ ཙཏུཏྠཛ྄ཛྷཱནཝསེན པཉྩཝཱིསཏི ཨེཀཀཱ, ཀརུཎཱམུདིཏཱསུ ཙ ཚནྡཱདཱིཧི ཙཏཱུཧི སདྡྷིཾ ཀརུཎཱམུདིཏཱཏི ཨིམེཔི ཡེཝཱཔནཀཱ ལབྦྷནྟི. དུཀྑཔཊིཔདཱདིབྷཱཝོ ཙེཏྠ མེཏྟཱཡ ཏཱཝ བྱཱཔཱདཝིཀྑམྦྷནཝསེན, ཀརུཎཱཡ ཝིཧིཾསཱཝིཀྑམྦྷནཝསེན, མུདིཏཱཡ ཨརཏིཝིཀྑམྦྷནཝསེན, ཨུཔེཀྑཱཡ རཱགཔཊིགྷཝིཀྑམྦྷནཝསེན ཝེདིཏབྦོ. པརིཏྟཱརམྨཎཏཱ པན ནབཧུསཏྟཱརམྨཎཝསེན; ཨཔྤམཱཎཱརམྨཎཏཱ བཧུསཏྟཱརམྨཎཝསེན ཧོཏཱིཏི ཨཡཾ ཝིསེསོ. སེསཾ ཏཱདིསམེཝ.

ཨེཝཾ ཏཱཝ པཱལི༹ཝསེནེཝ –

བྲཧྨུཏྟམེན ¶ ཀཐིཏེ, བྲཧྨཝིཧཱརེ ཨིམེ ཨིཏི ཝིདིཏྭཱ;

བྷིཡྻོ ཨེཏེསུ ཨཡཾ, པཀིཎྞཀཀཐཱཔི ཝིཉྙེཡྻཱ.

ཨེཏཱསུ ཧི མེཏྟཱཀརུཎཱམུདིཏཱཨུཔེཀྑཱསུ ཨཏྠཏོ ཏཱཝ མེཛྫཏཱིཏི མེཏྟཱ, སིནིཡ྄ཧཏཱིཏི ཨཏྠོ. མིཏྟེ ཝཱ བྷཝཱ, མིཏྟསྶ ཝཱ ཨེསཱ པཝཏྟཏཱིཔི མེཏྟཱ. པརདུཀྑེ སཏི སཱདྷཱུནཾ ཧདཡཀམྤནཾ ཀརོཏཱིཏི ཀརུཎཱ. ཀིཎཱཏི ཝཱ པརདུཀྑཾ ཧིཾསཏི ཝིནཱསེཏཱིཏི ཀརུཎཱ ¶ . ཀིརཱིཡཏི ཝཱ དུཀྑིཏེསུ ཕརཎཝསེན པསཱརིཡཏཱིཏི ཀརུཎཱ. མོདནྟི ཏཱཡ ཏཾསམངྒིནོ, སཡཾ ཝཱ མོདཏི, མོདནམཏྟམེཝ ཝཱ ཏནྟི མུདིཏཱ. ‘ཨཝེརཱ ཧོནྟཱུ’ཏིཨཱདིབྱཱཔཱརཔྤཧཱནེན མཛ྄ཛྷཏྟབྷཱཝཱུཔགམནེན ཙ ཨུཔེཀྑཏཱིཏི ཨུཔེཀྑཱ.

ལཀྑཎཱདིཏོ པནེཏྠ ཧིཏཱཀཱརཔྤཝཏྟིལཀྑཎཱ ‘མེཏྟཱ’, ཧིཏཱུཔསཾཧཱརརསཱ, ཨཱགྷཱཏཝིནཡཔཙྩུཔཊྛཱནཱ, སཏྟཱནཾ མནཱཔབྷཱཝདསྶནཔདཊྛཱནཱ. བྱཱཔཱདཱུཔསམོ ཨེཏིསྶཱ སམྤཏྟི, སིནེཧསམྦྷཝོ ཝིཔཏྟི. དུཀྑཱཔནཡནཱཀཱརཔྤཝཏྟིལཀྑཎཱ ‘ཀརུཎཱ’, པརདུཀྑཱསཧནརསཱ, ཨཝིཧིཾསཱཔཙྩུཔཊྛཱནཱ ¶ , དུཀྑཱབྷིབྷཱུཏཱནཾ ཨནཱཐབྷཱཝདསྶནཔདཊྛཱནཱ. ཝིཧིཾསཱུཔསམོ ཏསྶཱ སམྤཏྟི, སོཀསམྦྷཝོ ཝིཔཏྟི. སཏྟེསུ པམོདནལཀྑཎཱ ‘མུདིཏཱ’, ཨནིསྶཱཡནརསཱ, ཨརཏིཝིགྷཱཏཔཙྩུཔཊྛཱནཱ, སཏྟཱནཾ སམྤཏྟིདསྶནཔདཊྛཱནཱ. ཨརཏིཝཱུཔསམོ ཏསྶཱ སམྤཏྟི, པཧཱསསམྦྷཝོ ཝིཔཏྟི. སཏྟེསུ མཛ྄ཛྷཏྟཱཀཱརཔྤཝཏྟིལཀྑཎཱ ‘ཨུཔེཀྑཱ’, སཏྟེསུ སམབྷཱཝདསྶནརསཱ, པཊིགྷཱནུནཡཝཱུཔསམཔཙྩུཔཊྛཱནཱ, ‘‘ཀམྨསྶཀཱ སཏྟཱ, ཏེ ཀསྶ རུཙིཡཱ སུཁིཏཱ ཝཱ བྷཝིསྶནྟི, དུཀྑཏོ ཝཱ མུཙྩིསྶནྟི, པཏྟསམྤཏྟིཏོ ཝཱ ན པརིཧཱཡིསྶནྟཱི’’ཏི? ཨེཝཾ པཝཏྟཀམྨསྶཀཏཱདསྶནཔདཊྛཱནཱ. པཊིགྷཱནུནཡཝཱུཔསམོ ཏསྶཱ སམྤཏྟི, གེཧསྶིཏཱཡ ཨཉྙཱཎུཔེཀྑཱཡ སམྦྷཝོ ཝིཔཏྟི.

ཙཏུནྣམྤི པནེཏེསཾ བྲཧྨཝིཧཱརཱནཾ ཝིཔསྶནཱསུཁཉྩེཝ བྷཝསམྤཏྟི ཙ སཱདྷཱརཎཔྤཡོཛནཾ, བྱཱཔཱདཱདིཔཊིགྷཱཏོ ཨཱཝེཎིཀཾ. བྱཱཔཱདཔཊིགྷཱཏཔྤཡོཛནཱ ཧེཏྠ མེཏྟཱ, ཝིཧིཾསཱཨརཏིརཱགཔཊིགྷཱཏཔྤཡོཛནཱ ཨིཏརཱ. ཝུཏྟམྤི ཙེཏཾ –

‘‘ནིསྶརཎཉྷེཏཾ, ཨཱཝུསོ, བྱཱཔཱདསྶ ཡདིདཾ མེཏྟཱཙེཏོཝིམུཏྟི, ནིསྶརཎཉྷེཏཾ, ཨཱཝུསོ, ཝིཧེསཱཡ ཡདིདཾ ཀརུཎཱཙེཏོཝིམུཏྟི; ནིསྶརཎཉྷེཏཾ, ཨཱཝུསོ, ཨརཏིཡཱ ཡདིདཾ ¶ མུདིཏཱཙེཏོཝིམུཏྟི, ནིསྶརཎཉྷེཏཾ, ཨཱཝུསོ, རཱགསྶ ཡདིདཾ ཨུཔེཀྑཱཙེཏོཝིམུཏྟཱི’’ཏི (དཱི. ནི. ༣.༣༢༦; ཨ. ནི. ༦.༡༣).

ཨེཀམེཀསྶ ཙེཏྠ ཨཱསནྣདཱུརཝསེན དྭེ དྭེ པཙྩཏྠིཀཱ. མེཏྟཱབྲཧྨཝིཧཱརསྶ ཧི, སམཱིཔཙཱརོ ཝིཡ པུརིསསྶ སཔཏྟོ, གུཎདསྶནསབྷཱགཏཱཡ རཱགོ ཨཱསནྣཔཙྩཏྠིཀོ. སོ ལཧུཾ ཨོཏཱརཾ ལབྷཏི. ཏསྨཱ ཏཏོ སུཊྛུ མེཏྟཱ རཀྑིཏབྦཱ. པབྦཏཱདིགཧནནིསྶིཏོ ཝིཡ པུརིསསྶ སཔཏྟོ སབྷཱཝཝིསབྷཱགཏཱཡ བྱཱཔཱདོ དཱུརཔཙྩཏྠིཀོ. ཏསྨཱ ཏཏོ ¶ ནིབྦྷཡེན མེཏྟཱཡིཏབྦཾ. མེཏྟཱཡིསྶཏི ཙ ནཱམ ཀོཔཉྩ ཀརིསྶཏཱིཏི ཨཊྛཱནམེཏཾ.

ཀརུཎཱབྲཧྨཝིཧཱརསྶ ‘‘ཙཀྑུཝིཉྙེཡྻཱནཾ རཱུཔཱནཾ ཨིཊྛཱནཾ ཀནྟཱནཾ མནཱཔཱནཾ མནོརམཱནཾ ལོཀཱམིསཔཊིསཾཡུཏྟཱནཾ ཨཔྤཊིལཱབྷཾ ཝཱ ཨཔྤཊིལཱབྷཏོ སམནུཔསྶཏོ པུབྦེ ཝཱ པཊིལདྡྷཔུབྦཾ ཨཏཱིཏཾ ནིརུདྡྷཾ ཝིཔརིཎཏཾ སམནུསྶརཏོ ¶ ཨུཔྤཛྫཏི དོམནསྶཾ. ཡཾ ཨེཝརཱུཔཾ དོམནསྶཾ ཨིདཾ ཝུཙྩཏི གེཧསྶིཏཾ དོམནསྶ’’ནྟིཨཱདིནཱ ནཡེན ཨཱགཏཾ གེཧསྶིཏཾ དོམནསྶཾ ཝིཔཏྟིདསྶནསབྷཱགཏཱཡ ཨཱསནྣཔཙྩཏྠིཀཾ. སབྷཱཝཝིསབྷཱགཏཱཡ ཝིཧེསཱ དཱུརཔཙྩཏྠིཀཱ. ཏསྨཱ ཏཏོ ནིབྦྷཡེན ཀརུཎཱཡིཏབྦཾ. ཀརུཎཉྩ ནཱམ ཀརིསྶཏི པཱཎིཨཱདཱིཧི ཙ ཝིཧེསིསྶཏཱིཏི ཨཊྛཱནམེཏཾ.

མུདིཏཱབྲཧྨཝིཧཱརསྶ ‘‘ཙཀྑུཝིཉྙེཡྻཱནཾ རཱུཔཱནཾ ཨིཊྛཱནཾ ཀནྟཱནཾ མནཱཔཱནཾ མནོརམཱནཾ ལོཀཱམིསཔཊིསཾཡུཏྟཱནཾ པཊིལཱབྷཾ ཝཱ པཊིལཱབྷཏོ སམནུཔསྶཏོ པུབྦེ ཝཱ པཊིལདྡྷཔུབྦཾ ཨཏཱིཏཾ ནིརུདྡྷཾ ཝིཔརིཎཏཾ སམནུསྶརཏོ ཨུཔྤཛྫཏི སོམནསྶཾ. ཡཾ ཨེཝརཱུཔཾ སོམནསྶཾ ཨིདཾ ཝུཙྩཏི གེཧསྶིཏཾ སོམནསྶ’’ནྟིཨཱདིནཱ (མ. ནི. ༣.༣༠༦) ནཡེན ཨཱགཏཾ གེཧསྶིཏཾ སོམནསྶཾ སམྤཏྟིདསྶནསབྷཱགཏཱཡ ཨཱསནྣཔཙྩཏྠིཀཾ. སབྷཱཝཝིསབྷཱགཏཱཡ ཨརཏི དཱུརཔཙྩཏྠིཀཱ. ཏསྨཱ ཏཏོ ནིབྦྷཡེན མུདིཏཱ བྷཱཝེཏབྦཱ. པམུདིཏོ ཙ ནཱམ བྷཝིསྶཏི པནྟསེནཱསནེསུ ཙ ཨདྷིཀུསལདྷམྨེསུ ཙ ཨུཀྐཎྛིསྶཏཱིཏི ཨཊྛཱནམེཏཾ.

ཨུཔེཀྑཱབྲཧྨཝིཧཱརསྶ པན ‘‘ཙཀྑུནཱ རཱུཔཾ དིསྭཱ ཨུཔྤཛྫཏི ཨུཔེཀྑཱ བཱལསྶ མཱུལ༹ྷསྶ པུཐུཛྫནསྶ ཨནོདྷིཛིནསྶ ཨཝིཔཱཀཛིནསྶ ཨནཱདཱིནཝདསྶཱཝིནོ ཨསྶུཏཝཏོ པུཐུཛྫནསྶ. ཡཱ ཨེཝརཱུཔཱ ཨུཔེཀྑཱ རཱུཔཾ སཱ ནཱཏིཝཏྟཏི. ཏསྨཱ སཱ ཨུཔེཀྑཱ གེཧསྶིཏཱཏི ཝུཙྩཏཱི’’ཏིཨཱདིནཱ ¶ (མ. ནི. ༣.༣༠༨) ནཡེན ཨཱགཏཱ གེཧསྶིཏཱ ཨཉྙཱཎུཔེཀྑཱ དོསགུཎཱནཾ ཨཝིཙཱརཎཝསེན སབྷཱགཏྟཱ ཨཱསནྣཔཙྩཏྠིཀཱ. སབྷཱཝཝིསབྷཱགཏཱཡ རཱགཔཊིགྷཱ དཱུརཔཙྩཏྠིཀཱ. ཏསྨཱ ཏཏོ ནིབྦྷཡེན ཨུཔེཀྑིཏབྦཾ. ཨུཔེཀྑིསྶཏི ཙ ནཱམ རཛྫིསྶཏི ཙ པཊིཧཉྙིསྶཏི ཙཱཏི ཨཊྛཱནམེཏཾ.

སབྦེསམྤི ཙ ཨེཏེསཾ ཀཏྟུཀཱམཏཱཚནྡོ ཨཱདི, ནཱིཝརཎཱདིཝིཀྑམྦྷནཾ མཛ྄ཛྷཾ, ཨཔྤནཱ པརིཡོསཱནཾ, པཉྙཏྟིདྷམྨཝསེན ¶ ཨེཀོ ཝཱ སཏྟོ ཨནེཀཱ ཝཱ སཏྟཱ ཨཱརམྨཎཾ, ཨུཔཙཱརེ ཝཱ ཨཔྤནཱཡ ཝཱ པཏྟཱཡ ཨཱརམྨཎཝཌྜྷནཾ.

ཏཏྲཱཡཾ ཝཌྜྷནཀྐམོ – ཡཐཱ ཧི ཀུསལོ ཀསྶཀོ ཀསིཏབྦཊྛཱནཾ པརིཙྪིནྡིཏྭཱ ཀསཏི, ཨེཝཾ པཋམམེཝ ཨེཀཾ ཨཱཝཱསཾ པརིཙྪིནྡིཏྭཱ ཏཏྠ སཏྟེསུ ‘ཨིམསྨིཾ ཨཱཝཱསེ སཏྟཱ ཨཝེརཱ ཧོནྟཱུ’ཏིཨཱདིནཱ ནཡེན མེཏྟཱ བྷཱཝེཏབྦཱ. ཏཏྠ ཙིཏྟཾ མུདུཾ ཀམྨནིཡཾ ཀཏྭཱ དྭེ ཨཱཝཱསཱ པརིཙྪིནྡིཏབྦཱ ¶ . ཏཏོ ཨནུཀྐམེན ཏཡོ ཙཏྟཱརོ པཉྩ ཚ སཏྟ ཨཊྛ ནཝ དས, ཨེཀཱ རཙྪཱ, ཨུཔཌྜྷགཱམོ, གཱམོ, ཛནཔདོ, རཛྫཾ, ཨེཀཱ དིསཱཏི ཨེཝཾ ཡཱཝ ཨེཀཾ ཙཀྐཝཱལ༹ཾ, ཏཏོ ཝཱ པན བྷིཡྻོ ཏཏྠ ཏཏྠ སཏྟེསུ མེཏྟཱ བྷཱཝེཏབྦཱ. ཏཐཱ ཀརུཎཱདཡོཏི. ཨཡམེཏྠ ཨཱརམྨཎཝཌྜྷནཀྐམོ.

ཡཐཱ པན ཀསིཎཱནཾ ནིསྶནྡོ ཨཱརུཔྤཱ, སམཱདྷཱིནཾ ནིསྶནྡོ ནེཝསཉྙཱནཱསཉྙཱཡཏནཾ, ཝིཔསྶནཱནཾ ནིསྶནྡོ ཕལསམཱཔཏྟི, སམཐཝིཔསྶནཱནཾ ནིསྶནྡོ ནིརོདྷསམཱཔཏྟི, ཨེཝཾ པུརིམབྲཧྨཝིཧཱརཏྟཡསྶ ནིསྶནྡོ ཨེཏྠ ཨུཔེཀྑཱབྲཧྨཝིཧཱརོ. ཡཐཱ ཧི ཐམྦྷེ ཨནུསྶཱཔེཏྭཱ ཏུལཱསངྒྷཱཊཾ ཨནཱརོཔེཏྭཱ ན སཀྐཱ ཨཱཀཱསེ ཀཱུཊགོཔཱནསིཡོ ཋཔེཏུཾ, ཨེཝཾ པུརིམེསུ ཏཏིཡཛ྄ཛྷཱནཾ ཝིནཱ ན སཀྐཱ ཙཏུཏྠཾ བྷཱཝེཏུཾ. ཀསིཎེསུ པན ཨུཔྤནྣཏཏིཡཛ྄ཛྷཱནསྶཔེསཱ ནུཔྤཛྫཏི ཝིསབྷཱགཱརམྨཎཏྟཱཏི.

ཨེཏྠ སིཡཱ – ‘ཀསྨཱ པནེཏཱ མེཏྟཱ ཀརུཎཱ མུདིཏཱ ཨུཔེཀྑཱ བྲཧྨཝིཧཱརཱཏི ཝུཙྩནྟི? ཀསྨཱ ཙ, ཙཏསྶོཝ? ཀོ ཙ ཨེཏཱསཾ ཀམོ? ཝིབྷངྒེ ཙ ཀསྨཱ ཨཔྤམཉྙཱཏི ཝུཏྟཱ’ཏི? ཝུཙྩཏེ – སེཊྛཊྛེན ཏཱཝ ནིདྡོསབྷཱཝེན ཙེཏྠ བྲཧྨཝིཧཱརཏཱ ཝེདིཏབྦཱ. སཏྟེསུ སམྨཱཔཊིཔཏྟིབྷཱཝེན ཧི སེཊྛཱ ཨེཏེ ཝིཧཱརཱ. ཡཐཱ ཙ བྲཧྨཱནོ ནིདྡོསཙིཏྟཱ ཝིཧརནྟི, ཨེཝཾ ཨེཏེཧི ¶ སམྤཡུཏྟཱ ཡོགིནོ བྲཧྨསམཱཝ ཧུཏྭཱ ཝིཧརནྟཱིཏི སེཊྛཊྛེན ནིདྡོསབྷཱཝེན ཙ བྲཧྨཝིཧཱརཱཏི ཝུཙྩནྟི.

ཀསྨཱ ཙ ཙཏསྶོཏིཨཱདིཔཉྷསྶ པན ཨིདཾ ཝིསྶཛྫནཾ –

ཝིསུདྡྷིམགྒཱདིཝསཱ ཙཏསྶོ,

ཧིཏཱདིཨཱཀཱརཝསཱ པནཱསཾ;

ཀམོ པཝཏྟནྟི ཙ ཨཔྤམཱཎེ,

ཏཱ གོཙརེ ཡེན ཏདཔྤམཉྙཱ.

ཨེཏཱསུ ཧི ཡསྨཱ མེཏྟཱ བྱཱཔཱདབཧུལསྶ, ཀརུཎཱ ཝིཧིཾསཱབཧུལསྶ, མུདིཏཱ ཨརཏིབཧུལསྶ, ཨུཔེཀྑཱ རཱགབཧུལསྶ ཝིསུདྡྷིམགྒོ; ཡསྨཱ ཙ ཧིཏཱུཔསཾཧཱརཨཧིཏཱཔནཡནསམྤཏྟིམོདནཨནཱབྷོགཝསེན ¶ ཙཏུབྦིདྷོཡེཝ སཏྟེསུ མནསིཀཱརོ; ཡསྨཱ ཙ ཡཐཱ མཱཏཱ དཧརགིལཱནཡོབྦནཔྤཏྟསཀིཙྩཔསུཏེསུ ¶ ཙཏཱུསུ པུཏྟེསུ དཧརསྶ ཨབྷིཝུཌྜྷིཀཱམཱ ཧོཏི, གིལཱནསྶ གེལཉྙཱཔནཡནཀཱམཱ, ཡོབྦནཔྤཏྟསྶ ཡོབྦནསམྤཏྟིཡཱ ཙིརཊྛིཏིཀཱམཱ, སཀིཙྩཔསུཏསྶ ཀིསྨིཉྩིཔི པརིཡཱཡེ ཨབྱཱཝཊཱ ཧོཏི, ཏཐཱ ཨཔྤམཉྙཱཝིཧཱརིཀེནཱཔི སབྦསཏྟེསུ མེཏྟཱདིཝསེན བྷཝིཏབྦཾ, ཏསྨཱ ཨིཏོ ཝིསུདྡྷིམགྒཱདིཝསཱ ཙཏསྶོཝ ཨཔྤམཉྙཱ.

ཡསྨཱ པན ཙཏསྶོཔེཏཱ བྷཱཝེཏུཀཱམེན པཋམཾ ཧིཏཱཀཱརཔྤཝཏྟིཝསེན སཏྟེསུ པཊིཔཛྫིཏབྦཾ, ཧིཏཱཀཱརཔྤཝཏྟིལཀྑཎཱ ཙ མེཏྟཱ; ཏཏོ ཨེཝཾ པཏྠིཏཧིཏཱནཾ སཏྟཱནཾ དུཀྑཱབྷིབྷཝཾ དིསྭཱ ཝཱ སུཏྭཱ ཝཱ སམྦྷཱཝེཏྭཱ ཝཱ དུཀྑཱཔནཡནཱཀཱརཔྤཝཏྟིཝསེན, དུཀྑཱཔནཡནཱཀཱརཔྤཝཏྟིལཀྑཎཱ ཙ ཀརུཎཱ; ཨཐེཝཾ པཏྠིཏཧིཏཱནཾ པཏྠིཏདུཀྑཱཔགམཱནཉྩ ནེསཾ སམྤཏྟིཾ དིསྭཱ སམྤཏྟིཔྤམོདནཝསེན, པམོདནལཀྑཎཱ ཙ མུདིཏཱ; ཏཏོ པརཾ པན ཀཏྟབྦཱབྷཱཝཏོ ཨཛ྄ཛྷུཔེཀྑཀཏཱསངྑཱཏེན མཛ྄ཛྷཏྟཱཀཱརེན པཊིཔཛྫིཏབྦཾ, མཛ྄ཛྷཏྟཱཀཱརཔྤཝཏྟིལཀྑཎཱ ཙ ཨུཔེཀྑཱ; ཏསྨཱ ཨིཏོ ཧིཏཱདིཨཱཀཱརཝསཱ པནཱསཾ པཋམཾ མེཏྟཱ ཝུཏྟཱ. ཨཐ ཀརུཎཱ མུདིཏཱ ཨུཔེཀྑཱཏི ཨཡཾ ཀམོ ཝེདིཏབྦོ.

ཡསྨཱ པན སབྦཱཔེཏཱ ཨཔྤམཱཎེ གོཙརེ པཝཏྟནྟི, ཏསྨཱ ཨཔྤམཉྙཱཏི ཝུཙྩནྟི. ཨཔྤམཱཎཱ ¶ ཧི སཏྟཱ ཨེཏཱསཾ གོཙརབྷཱུཏཱ, ‘ཨེཀསཏྟསྶཱཔི ཙ ཨེཏྟཀེ པདེསེ མེཏྟཱདཡོ བྷཱཝེཏབྦཱ’ཏི ཨེཝཾ པམཱཎཾ ཨགྒཧེཏྭཱ སཀལཕརཎཝསེནེཝ པཝཏྟཱཏི, ཏེན ཝུཏྟཾ –

ཝིསུདྡྷིམགྒཱདིཝསཱ ཙཏསྶོ,

ཧིཏཱདིཨཱཀཱརཝསཱ པནཱསཾ;

ཀམོ པཝཏྟནྟི ཙ ཨཔྤམཱཎེ,

ཏཱ གོཙརེ ཡེན ཏདཔྤམཉྙཱཏི.

ཨེཝཾ ཨཔྤམཱཎགོཙརཏཱཡ ཨེཀལཀྑཎཱསུ ཙཱཔི ཨེཏཱསུ པུརིམཱ ཏིསྶོ ཏིཀཙཏུཀྐཛ྄ཛྷཱནིཀཱཝ ཧོནྟི. ཀསྨཱ? སོམནསྶཱཝིཔྤཡོགཏོ. ཀསྨཱ པནཱསཾ སོམནསྶེན ཨཝིཔྤཡོགོཏི? དོམནསྶསམུཊྛིཏཱནཾ ¶ བྱཱཔཱདཱདཱིནཾ ནིསྶརཎཏྟཱ. པཙྪིམཱ པན ཨཝསེསེཀཛ྄ཛྷཱནིཀཱཝ. ཀསྨཱ? ཨུཔེཀྑཱཝེདནཱསམྤཡོགཏོ. ན ཧི སཏྟེསུ མཛ྄ཛྷཏྟཱཀཱརཔྤཝཏྟཱ ¶ བྲཧྨཝིཧཱརུཔེཀྑཱ ཨུཔེཀྑཱཝེདནཾ ཝིནཱ ཝཏྟཏཱིཏི.

བྲཧྨཝིཧཱརཀཐཱ.

ཨསུབྷཀཐཱ

༢༦༣. ཨིདཱནི རཱགཙརིཏསཏྟཱནཾ ཨེཀནྟཧིཏཾ ནཱནཱརམྨཎེསུ ཨེཀེཀཛ྄ཛྷཱནཝསེནེཝ པཝཏྟམཱནཾ རཱུཔཱཝཙརཀུསལཾ དསྶེཏུཾ པུན ཀཏམེ དྷམྨཱ ཀུསལཱཏིཨཱདི ཨཱརདྡྷཾ.

ཏཏྠ ཨུདྡྷུམཱཏཀསཉྙཱསཧགཏནྟིཨཱདཱིསུ, བྷསྟཱ ཝིཡ ཝཱཡུནཱ, ཨུདྡྷཾ ཛཱིཝིཏཔརིཡཱདཱནཱ ཡཐཱནུཀྐམཾ སམུགྒཏེན སཱུནབྷཱཝེན དྷུམཱཏཏྟཱ ཨུདྡྷུམཱཏཾ. ཨུདྡྷུམཱཏམེཝ ཨུདྡྷུམཱཏཀཾ. པཊིཀཱུལཏྟཱ ཝཱ ཀུཙྪིཏཾ ཨུདྡྷུམཱཏནྟི ཨུདྡྷུམཱཏཀཾ. ཏཐཱརཱུཔསྶ ཚཝསརཱིརསྶེཏཾ ཨདྷིཝཙནཾ. ཝིནཱིལཾ ཝུཙྩཏི ཝིཔརིབྷིནྣནཱིལཝཎྞཾ. ཝིནཱིལམེཝ ཝིནཱིལཀཾ. པཊིཀཱུལཏྟཱ ཝཱ ཀུཙྪིཏཾ ཝིནཱིལནྟི ཝིནཱིལཀཾ. མཾསུསྶདཊྛཱནེསུ རཏྟཝཎྞསྶ, པུབྦསནྣིཙཡཊྛཱནེསུ སེཏཝཎྞསྶ, ཡེབྷུཡྻེན ཙ ནཱིལཝཎྞསྶ ¶ , ནཱིལཊྛཱནེ ནཱིལསཱཊཀཔཱརུཏསྶེཝ ཚཝསརཱིརསྶེཏཾ ཨདྷིཝཙནཾ. པརིབྷིནྣཊྛཱནེསུ ཝིསྶནྡམཱནཾ པུབྦཾ ཝིཔུབྦཾ. ཝིཔུབྦམེཝ ཝིཔུབྦཀཾ. པཊིཀཱུལཏྟཱ ཝཱ ཀུཙྪིཏཾ ཝིཔུབྦནྟི ཝིཔུབྦཀཾ. ཏཐཱརཱུཔསྶ ཚཝསརཱིརསྶེཏཾ ཨདྷིཝཙནཾ. ཝིཙྪིདྡཾ ཝུཙྩཏི དྭིདྷཱ ཚིནྡནེན ཨཔདྷཱརིཏཾ, ཝིཙྪིདྡམེཝ ཝིཙྪིདྡཀཾ. པཊིཀཱུལཏྟཱ ཝཱ ཀུཙྪིཏཾ ཝིཙྪིདྡནྟི ཝིཙྪིདྡཀཾ. ཝེམཛ྄ཛྷེ ཚིནྣསྶ ཚཝསརཱིརསྶེཏཾ ཨདྷིཝཙནཾ. ཨིཏོ ཙ ཨེཏྟོ ཙ ཝིཝིདྷཱཀཱརེན སོཎསིངྒཱལཱདཱིཧི ཁཱཡིཏཾ ཝིཀྑཱཡིཏཾ. ཝིཀྑཱཡིཏམེཝ ཝིཀྑཱཡིཏཀཾ. པཊིཀཱུལཏྟཱ ཝཱ ཀུཙྪིཏཾ ཝིཀྑཱཡིཏནྟི ཝིཀྑཱཡིཏཀཾ. ཏཐཱརཱུཔསྶ ཚཝསརཱིརསྶེཏཾ ཨདྷིཝཙནཾ. ཝིཝིདྷཱ ཁིཏྟཾ ཝིཀྑིཏྟཾ. ཝིཀྑིཏྟམེཝ ཝིཀྑིཏྟཀཾ. པཊིཀཱུལཏྟཱ ཝཱ ཀུཙྪིཏཾ ཝིཀྑིཏྟནྟི ཝིཀྑིཏྟཀཾ. ‘ཨཉྙེན ཧཏྠཾ ཨཉྙེན པཱདཾ ཨཉྙེན སཱིས’ནྟི ཨེཝཾ ཏཏོ ཏཏོ ཁིཏྟསྶ ཚཝསརཱིརསྶེཏཾ ཨདྷིཝཙནཾ. ཧཏཉྩ ཏཾ པུརིམནཡེནེཝ ཝིཀྑིཏྟཀཉྩཱཏི ཧཏཝིཀྑིཏྟཀཾ. ཀཱཀཔདཱཀཱརེན ཨངྒཔཙྩངྒེསུ སཏྠེན ཧནིཏྭཱ ¶ ཝུཏྟནཡེན ཝིཀྑིཏྟཀསྶ ཚཝསརཱིརསྶེཏཾ ¶ ཨདྷིཝཙནཾ. ལོཧིཏཾ ཀིརཏི, ཝིཀྑིཔཏི, ཨིཏོ ཙིཏོ ཙ པགྒྷརཏཱིཏི ལོཧིཏཀཾ. པགྒྷརིཏལོཧིཏམཀྑིཏསྶ ཚཝསརཱིརསྶེཏཾ ཨདྷིཝཙནཾ. པུལ༹ཝཱ ཝུཙྩནྟི ཀིམཡོ. པུལ༹ཝེ ཝིཀིརཏཱིཏི པུལ༹ཝཀཾ. ཀིམིཔརིཔུཎྞསྶ ཚཝསརཱིརསྶེཏཾ ཨདྷིཝཙནཾ. ཨཊྛིཡེཝ ཨཊྛིཀཾ. པཊིཀཱུལཏྟཱ ཝཱ ཀུཙྪིཏཾ ཨཊྛཱིཏི ཨཊྛིཀཾ. ཨཊྛིསངྑལིཀཱཡཔི ཨེཀཊྛིཀསྶཔི ཨེཏཾ ཨདྷིཝཙནཾ. ཨིམཱནི ཙ པན ཨུདྡྷུམཱཏཀཱདཱིནི ནིསྶཱཡ ཨུཔྤནྣནིམིཏྟཱནམྤི ནིམིཏྟེསུ པཊིལདྡྷཛ྄ཛྷཱནཱནམྤི ཨེཏཱནེཝ ནཱམཱནི.

ཏཏྠ ཨུདྡྷུམཱཏཀནིམིཏྟེ ཨཔྤནཱཝསེན ཨུཔྤནྣཱ སཉྙཱ ཨུདྡྷུམཱཏཀསཉྙཱ. ཏཱཡ ཨུདྡྷུམཱཏཀསཉྙཱཡ སམྤཡོགཊྛེན སཧགཏཾ ཨུདྡྷུམཱཏཀསཉྙཱསཧགཏཾ. ཝིནཱིལཀསཉྙཱསཧགཏཱདཱིསུཔི ཨེསེཝ ནཡོ. ཡཾ པནེཏྠ བྷཱཝནཱཝིདྷཱནཾ ཝཏྟབྦཾ བྷཝེཡྻ, ཏཾ སབྦཱཀཱརེན ཝིསུདྡྷིམགྒེ (ཝིསུདྡྷི. ༡.༡༠༣ ཨཱདཡོ) ཝུཏྟམེཝ. ཨཝསེསཱ པཱལི༹ཝཎྞནཱ ཧེཊྛཱ ཝུཏྟནཡེནེཝ ཝེདིཏབྦཱ. ཀེཝལཉྷི ཨིདྷ, ཙཏུཏྠཛ྄ཛྷཱནཝསེན ཨུཔེཀྑཱབྲཧྨཝིཧཱརེ ཝིཡ, པཋམཛ྄ཛྷཱནཝསེན ཨེཀེཀསྨིཾ པཉྩཝཱིསཏི ཨེཀཀཱ ཧོནྟི. ཨསུབྷཱརམྨཎསྶ ཙ ཨཝཌྜྷནཱིཡཏྟཱ, པརིཏྟེ ཨུདྡྷུམཱཏཀཊྛཱནེ ཨུཔྤནྣནིམིཏྟཱརམྨཎཾ པརིཏྟཱརམྨཎཾ, མཧནྟེ ཨཔྤམཱཎཱརམྨཎཾ ཝེདིཏབྦཾ. སེསེསུཔི ཨེསེཝ ནཡོཏི.

ཨིཏི ¶ ཨསུབྷཱནི སུབྷགུཎོ,

དསསཏལོཙནེན ཐུཏཀིཏྟི;

ཡཱནི ཨཝོཙ དསབལོ,

ཨེཀེཀཛ྄ཛྷཱནཧེཏཱུནི.

ཨེཝཾ པཱལི༹ནཡེནེཝ, ཏཱཝ སབྦཱནི ཏཱནི ཛཱནིཏྭཱ;

ཏེསྭེཝ ཨཡཾ བྷིཡྻོ, པཀིཎྞཀཀཐཱཔི ཝིཉྙེཡྻཱ. (ཝིསུདྡྷི. ༡.༡༢༠);

ཨེཏེསུ ཧི ཡཏྠ ཀཏྠཙི ཨདྷིགཏཛ྄ཛྷཱནོ སུཝིཀྑམྦྷིཏརཱགཏྟཱ ཝཱིཏརཱགོ ཝིཡ ནིལློལུཔྤཙཱརོ ཧོཏི. ཨེཝཾ སནྟེཔི ཡྭཱཡཾ ཨསུབྷབྷེདོ ཝུཏྟོ, སོ སརཱིརསབྷཱཝཔྤཏྟིཝསེན ཙ རཱགཙརིཏབྷེདཝསེན ཙཱཏི ཝེདིཏབྦོ.

ཚཝསརཱིརཉྷི པཊིཀཱུལབྷཱཝཾ ཨཱཔཛྫམཱནཾ ཨུདྡྷུམཱཏཀསབྷཱཝཔྤཏྟཾ ཝཱ སིཡཱ, ཝིནཱིལཀཱདཱིནཾ ཝཱ ཨཉྙཏརསབྷཱཝཔྤཏྟཾ. ཨིཏི ཡཱདིསཾ ཡཱདིསཾ སཀྐཱ ¶ ཧོཏི ལདྡྷུཾ ཏཱདིསེ ¶ ཏཱདིསེ ཨུདྡྷུམཱཏཀཔཊིཀཱུལཾ ཝིནཱིལཀཔཊིཀཱུལནྟི ཨེཝཾ ནིམིཏྟཾ གཎྷིཏབྦམེཝཱཏི སརཱིརསབྷཱཝཔྤཏྟིཝསེན དསདྷཱ ཨསུབྷཔྤབྷེདོ ཝུཏྟོཏི ཝེདིཏབྦོ.

ཝིསེསཏོ ཙེཏྠ ཨུདྡྷུམཱཏཀཾ སརཱིརསཎྛཱནཝིཔཏྟིཔྤཀཱསནཏོ སརཱིརསཎྛཱནརཱགིནོ སཔྤཱཡཾ. ཝིནཱིལཀཾ ཚཝིརཱགཝིཔཏྟིཔྤཀཱསནཏོ སརཱིརཝཎྞརཱགིནོ སཔྤཱཡཾ. ཝིཔུབྦཀཾ ཀཱཡཝཎཔཊིབདྡྷསྶ དུགྒནྡྷབྷཱཝསྶ པཀཱསནཏོ མཱལཱགནྡྷཱདིཝསེན སམུཊྛཱཔིཏསརཱིརགནྡྷརཱགིནོ སཔྤཱཡཾ. ཝིཙྪིདྡཀཾ ཨནྟོསུསིརབྷཱཝཔྤཀཱསནཏོ སརཱིརེ གྷནབྷཱཝརཱགིནོ སཔྤཱཡཾ. ཝིཀྑཱཡིཏཀཾ མཾསཱུཔཙཡསམྤཏྟིཝིནཱསཔྤཀཱསནཏོ ཐནཱདཱིསུ སརཱིརཔྤདེསེསུ མཾསཱུཔཙཡརཱགིནོ སཔྤཱཡཾ. ཝིཀྑིཏྟཀཾ ཨངྒཔཙྩངྒཱནཾ ཝིཀྑེཔཔྤཀཱསནཏོ ཨངྒཔཙྩངྒལཱིལཱརཱགིནོ སཔྤཱཡཾ. ཧཏཝིཀྑིཏྟཀཾ སརཱིརསངྒྷཱཊབྷེདཝིཀཱརཔྤཀཱསནཏོ སརཱིརསངྒྷཱཊསམྤཏྟིརཱགིནོ སཔྤཱཡཾ. ལོཧིཏཀཾ ལོཧིཏམཀྑིཏཔཊིཀཱུལབྷཱཝཔྤཀཱསནཏོ ཨལངྐཱརཛནིཏསོབྷརཱགིནོ སཔྤཱཡཾ. པུལ༹ཝཀཾ ཀཱཡསྶ ཨནེཀཀིམིཀུལསཱདྷཱརཎབྷཱཝཔྤཀཱསནཏོ ཀཱཡེ མམཏྟརཱགིནོ སཔྤཱཡཾ. ཨཊྛིཀཾ སརཱིརཊྛཱིནཾ པཊིཀཱུལབྷཱཝཔྤཀཱསནཏོ དནྟསམྤཏྟིརཱགིནོ སཔྤཱཡནྟི. ཨེཝཾ རཱགཙརིཏཝསེནཱཔི དསདྷཱ ཨསུབྷཔྤབྷེདོ ཝུཏྟོཏི ཝེདིཏབྦོ.

ཡསྨཱ ¶ པན དསཝིདྷེཔི ཨེཏསྨིཾ ཨསུབྷེ སེཡྻཐཱཔི ནཱམ ཨཔརིསཎྛིཏཛལཱཡ སཱིགྷསོཏཱཡ ནདིཡཱ ཨརིཏྟབལེནེཝ ནཱཝཱ ཏིཊྛཏི, ཝིནཱ ཨརིཏྟེན ན སཀྐཱ ཋཔེཏུཾ, ཨེཝམེཝ དུབྦལཏྟཱ ཨཱརམྨཎསྶ ཝིཏཀྐབལེནེཝ ཙིཏྟཾ ཨེཀགྒཾ ཧུཏྭཱ ཏིཊྛཏི, ཝིནཱ ཝིཏཀྐེན ན སཀྐཱ ཋཔེཏུཾ, ཏསྨཱ པཋམཛ྄ཛྷཱནམེཝེཏྠ ཧོཏི, ན དུཏིཡཱདཱིནི. པཊིཀཱུལེཔི ཙེཏསྨིཾ ཨཱརམྨཎེ ‘ཨདྡྷཱ ཨིམཱཡ པཊིཔདཱཡ ཛརཱམརཎམྷཱ པརིམུཙྩིསྶཱམཱི’ཏི ཨེཝཾ ཨཱནིསཾསདསྶཱཝིཏཱཡ ཙེཝ ནཱིཝརཎསནྟཱཔཔྤཧཱནེན ཙ པཱིཏིསོམནསྶཾ ¶ ཨུཔྤཛྫཏི, ‘བཧུཾ དཱནི ཝེཏནཾ ལབྷིསྶཱམཱི’ཏི ཨཱནིསཾསདསྶཱཝིནོ པུཔྥཚཌྜཀསྶ གཱུཐརཱསིམྷི ཝིཡ, ཨུསྶནྣབྱཱདྷིདུཀྑསྶ རོགིནོ ཝམནཝིརེཙནཔྤཝཏྟིཡཾ ཝིཡ ཙ.

དསཝིདྷམྤི ཙེཏཾ ཨསུབྷཾ ལཀྑཎཏོ ཨེཀམེཝ ཧོཏི. དསཝིདྷསྶཔི ཧི ཨེཏསྶ ཨསུཙིདུགྒནྡྷཛེགུཙྪཔཊིཀཱུལབྷཱཝོ ཨེཝ ལཀྑཎཾ. ཏདེཏཾ ཨིམིནཱ ¶ ལཀྑཎེན ན ཀེཝལཾ མཏསརཱིརེཡེཝ དནྟཊྛིཀདསྶཱཝིནོ པན ཙེཏིཡཔབྦཏཝཱསིནོ མཧཱཏིསྶཏྠེརསྶ ཝིཡ, ཧཏྠིཀྑནྡྷགཏཾ རཱཛཱནཾ ཨུལློཀེནྟསྶ སངྒྷརཀྑིཏཏྠེརུཔཊྛཱཀསཱམཎེརསྶ ཝིཡ ཙ, ཛཱིཝམཱནཀསརཱིརེཔི ཨུཔཊྛཱཏི. ཡཐེཝ ཧི མཏསརཱིརཾ ཨེཝཾ ཛཱིཝམཱནཀམྤི ཨསུབྷམེཝ. ཨསུབྷལཀྑཎཾ པནེཏྠ ཨཱགནྟུཀེན ཨལངྐཱརེན པཊིཙྪནྣཏྟཱ ན པཉྙཱཡཏཱིཏི.

ཨསུབྷཀཐཱ.

ཀིཾ པན པཐཝཱིཀསིཎཾ ཨཱདིཾ ཀཏྭཱ ཨཊྛིཀསཉྙཱཔརིཡོསཱནཱཝེསཱ རཱུཔཱཝཙརཔྤནཱ, ཨུདཱཧུ ཨཉྙཱཔི ཨཏྠཱིཏི? ཨཏྠི; ཨཱནཱཔཱནཛ྄ཛྷཱནཉྷི ཀཱཡགཏཱསཏིབྷཱཝནཱ ཙ ཨིདྷ ན ཀཐིཏཱ. ཀིཉྩཱཔི ན ཀཐིཏཱ ཝཱཡོཀསིཎེ པན གཧིཏེ ཨཱནཱཔཱནཛ྄ཛྷཱནཾ གཧིཏམེཝ; ཝཎྞཀསིཎེསུ ཙ གཧིཏེསུ ཀེསཱདཱིསུ ཙཏུཀྐཔཉྩཀཛ྄ཛྷཱནཝསེན ཨུཔྤནྣཱ ཀཱཡགཏཱསཏི, དསསུ ཨསུབྷེསུ གཧིཏེསུ དྭཏྟིཾསཱཀཱརེ པཊིཀཱུལམནསིཀཱརཛ྄ཛྷཱནཝསེན ཙེཝ ནཝསིཝཐིཀཱཝཎྞཛ྄ཛྷཱནཝསེན ཙ པཝཏྟཱ ཀཱཡགཏཱསཏི གཧིཏཱཝཱཏི. སབྦཱཔི རཱུཔཱཝཙརཔྤནཱ ཨིདྷ ཀཐིཏཱཝ ཧོཏཱིཏི.

རཱུཔཱཝཙརཀུསལཀཐཱ ནིཊྛིཏཱ.

ཨརཱུཔཱཝཙརཀུསལཝཎྞནཱ

ཨཱཀཱསཱནཉྩཱཡཏནཾ

༢༦༥. ཨིདཱནི ¶ ཨརཱུཔཱཝཙརཀུསལཾ དསྶེཏུཾ པུན ཀཏམེ དྷམྨཱ ཀུསལཱཏིཨཱདི ཨཱརདྡྷཾ. ཏཏྠ ཨརཱུཔཱུཔཔཏྟིཡཱཏི ཨརཱུཔབྷཝོ ཨརཱུཔཾ, ཨརཱུཔེ ཨུཔཔཏྟི ཨརཱུཔཱུཔཔཏྟི, ཏསྶཱ ཨརཱུཔཱུཔཔཏྟིཡཱ. མགྒཾ བྷཱཝེཏཱིཏི ཨུཔཱཡཾ ཧེཏུཾ ཀཱརཎཾ ཨུཔྤཱདེཏི ཝཌྜྷེཏི. སབྦསོཏི སབྦཱཀཱརེན. སབྦཱསཾ ཝཱ ཨནཝསེསཱནནྟི ཨཏྠོ. རཱུཔསཉྙཱནནྟི སཉྙཱསཱིསེན ཝུཏྟརཱུཔཱཝཙརཛ྄ཛྷཱནཱནཉྩེཝ ¶ ཏདཱརམྨཎཱནཉྩ. རཱུཔཱཝཙརཛ྄ཛྷཱནམྤི ཧི རཱུཔནྟི ཝུཙྩཏི ‘རཱུཔཱི རཱུཔཱནི པསྶཏཱི’ཏིཨཱདཱིསུ (དྷ. ས. ༢༤༨; དཱི. ནི. ༢.༡༢༩). ཏསྶ ཨཱརམྨཎམྤི ‘‘བཧིདྡྷཱ རཱུཔཱནི པསྶཏི སུཝཎྞདུབྦཎྞཱནཱི’’ཏིཨཱདཱིསུ (དྷ. ས. ༢༤༤-༢༤༦; དཱི. ནི. ༢.༡༧༣); ཏསྨཱ ཨིདྷ རཱུཔེ སཉྙཱ རཱུཔསཉྙཱཏི ཨེཝཾ སཉྙཱསཱིསེན ¶ ཝུཏྟརཱུཔཱཝཙརཛ྄ཛྷཱནསྶེཏཾ ཨདྷིཝཙནཾ. རཱུཔཾ སཉྙཱ ཨསྶཱཏི རཱུཔསཉྙཾ, རཱུཔམསྶ ནཱམནྟི ཝུཏྟཾ ཧོཏི. ཨེཝཾ པཐཝཱིཀསིཎཱདིབྷེདསྶ ཏདཱརམྨཎསྶ ཙེཏཾ ཨདྷིཝཙནནྟི ཝེདིཏབྦཾ.

སམཏིཀྐམཱཏི ཝིརཱགཱ ནིརོདྷཱ ཙ. ཀིཾ ཝུཏྟཾ ཧོཏི? ཨེཏཱསཾ ཀུསལཝིཔཱཀཀིརིཡཝསེན པཉྩདསནྣཾ ཛྷཱནསངྑཱཏཱནཾ རཱུཔསཉྙཱནཾ, ཨེཏེསཉྩ པཐཝཱིཀསིཎཱདིཝསེན ཨཊྛནྣཾ ཨཱརམྨཎསངྑཱཏཱནཾ རཱུཔསཉྙཱནཾ, སབྦཱཀཱརེན ཨནཝསེསཱནཾ ཝཱ ཝིརཱགཱ ཙ ནིརོདྷཱ ཙ ཝིརཱགཧེཏུ ཙེཝ ནིརོདྷཧེཏུ ཙ ཨཱཀཱསཱནཉྩཱཡཏནཾ ཨུཔསམྤཛྫ ཝིཧརཏི. ན ཧི སཀྐཱ སབྦསོ ཨནཏིཀྐནྟརཱུཔསཉྙེན ཨེཏཾ ཨུཔསམྤཛྫ ཝིཧརིཏུནྟི.

ཏཏྠ ཡསྨཱ ཨཱརམྨཎེ ཨཝིརཏྟསྶ སཉྙཱསམཏིཀྐམོ ན ཧོཏི, སམཏིཀྐནྟཱསུ ཙ སཉྙཱསུ ཨཱརམྨཎཾ སམཏིཀྐནྟམེཝ ཧོཏི, ཏསྨཱ ཨཱརམྨཎསམཏིཀྐམཾ ཨཝཏྭཱ ‘‘ཏཏྠ ཀཏམཱ རཱུཔསཉྙཱ? རཱུཔཱཝཙརསམཱཔཏྟིཾ སམཱཔནྣསྶ ཝཱ ཨུཔཔནྣསྶ ཝཱ དིཊྛདྷམྨསུཁཝིཧཱརིསྶ ཝཱ སཉྙཱ སཉྫཱནནཱ སཉྫཱནིཏཏྟཾ, ཨིམཱ ཝུཙྩནྟི རཱུཔསཉྙཱཡོ. ཨིམཱ རཱུཔསཉྙཱཡོ ཨཏིཀྐནྟོ ཧོཏི, ཝཱིཏིཀྐནྟོ, སམཏིཀྐནྟོ, ཏེན ཝུཙྩཏི སབྦསོ རཱུཔསཉྙཱནཾ སམཏིཀྐམཱ’’ཏི (ཝིབྷ. ༦༠༢) ཨེཝཾ ཝིབྷངྒེ སཉྙཱནཾཡེཝ སམཏིཀྐམོ ཝུཏྟོ. ཡསྨཱ པན ཨཱརམྨཎསམཏིཀྐམེན ¶ པཏྟབྦཱ ཨེཏཱ སམཱཔཏྟིཡོ, ན ཨེཀསྨིཾཡེཝ ཨཱརམྨཎེ པཋམཛ྄ཛྷཱནཱདཱིནི ཝིཡ, ཏསྨཱ ཨཡཾ ཨཱརམྨཎསམཏིཀྐམཝསེནཱཔི ཨཏྠཝཎྞནཱ ཀཏཱཏི ཝེདིཏབྦཱ.

པཊིགྷསཉྙཱནཾ ཨཏྠངྒམཱཏི ཙཀྑཱདཱིནཾ ཝཏྠཱུནཾ རཱུཔཱདཱིནཾ ཨཱརམྨཎཱནཉྩ པཊིགྷཱཏེན སམུཔྤནྣཱ སཉྙཱ པཊིགྷསཉྙཱ. རཱུཔསཉྙཱདཱིནཾ ཨེཏཾ ཨདྷིཝཙནཾ. ཡཐཱཧ – ‘‘ཏཏྠ ཀཏམཱ པཊིགྷསཉྙཱ? རཱུཔསཉྙཱ སདྡསཉྙཱ གནྡྷསཉྙཱ རསསཉྙཱ ཕོཊྛབྦསཉྙཱ, ཨིམཱ ཝུཙྩནྟི པཊིགྷསཉྙཱཡོ’’ཏི (ཝིབྷ. ༦༠༣). ཏཱསཾ ཀུསལཝིཔཱཀཱནཾ པཉྩནྣཾ ཨཀུསལཝིཔཱཀཱནཾ པཉྩནྣནྟི སབྦསོ ¶ དསནྣམྤི པཊིགྷསཉྙཱནཾ ཨཏྠངྒམཱ པཧཱནཱ ཨསམུཔྤཱདཱ ཨཔྤཝཏྟིཾ ཀཏྭཱཏི ཝུཏྟཾ ཧོཏི.

ཀཱམཉྩེཏཱ པཋམཛ྄ཛྷཱནཱདཱིནི སམཱཔནྣསྶཱཔི ན སནྟི – ན ཧི ཏསྨིཾ སམཡེ པཉྩདྭཱརཝསེན ཙིཏྟཾ པཝཏྟཏི – ཨེཝཾ སནྟེཔི, ཨཉྙཏྠ པཧཱིནཱནཾ སུཁདུཀྑཱནཾ ¶ ཙཏུཏྠཛ྄ཛྷཱནེ ཝིཡ, སཀྐཱཡདིཊྛཱདཱིནཾ ཏཏིཡམགྒེ ཝིཡ ཙ, ཨིམསྨིཾ ཛྷཱནེ ཨུསྶཱཧཛནནཏྠཾ ཨིམསྶ ཛྷཱནསྶ པསཾསཱཝསེན ཨེཏཱསཾ ཨེཏྠ ཝཙནཾ ཝེདིཏབྦཾ. ཨཐ ཝཱ ཀིཉྩཱཔི ཏཱ རཱུཔཱཝཙརཾ སམཱཔནྣསྶ ན སནྟི, ཨཐ ཁོ ན པཧཱིནཏྟཱ ན སནྟི. ན ཧི རཱུཔཝིརཱགཱཡ རཱུཔཱཝཙརབྷཱཝནཱ སཾཝཏྟཏི, རཱུཔཱཡཏྟཱ ཙ ཨེཏཱསཾ པཝཏྟི. ཨཡཾ པན བྷཱཝནཱ རཱུཔཝིརཱགཱཡ སཾཝཏྟཏི. ཏསྨཱ ཏཱ ཨེཏྠ པཧཱིནཱཏི ཝཏྟུཾ ཝཊྚཏི. ན ཀེཝལཉྩ ཝཏྟུཾ, ཨེཀཾསེནེཝ ཨེཝཾ དྷཱརེཏུམྤི ཝཊྚཏི. ཏཱསཉྷི ཨིཏོ པུབྦེ ཨཔྤཧཱིནཏྟཱཡེཝ པཋམཛ྄ཛྷཱནཾ སམཱཔནྣསྶ ‘‘སདྡོ ཀཎྚཀོ’’ཏི (ཨ. ནི. ༡༠.༧༢) ཝུཏྟོ བྷགཝཏཱ. ཨིདྷ ཙ པཧཱིནཏྟཱཡེཝ ཨརཱུཔསམཱཔཏྟཱིནཾ ཨཱནེཉྫཏཱ སནྟཝིམོཀྑཏཱ ཙ ཝུཏྟཱ. ཨཱལཱ༹རོ ཙ ཀཱལཱ༹མོ ཨཱརུཔྤསམཱཔནྣོ པཉྩམཏྟཱནི སཀཊསཏཱནི ནིསྶཱཡ ནིསྶཱཡ ཨཏིཀྐནྟཱནི ནེཝ ཨདྡས, ན པན སདྡཾ ཨསྶོསཱིཏི (དཱི. ནི. ༢.༡༩༢).

ནཱནཏྟསཉྙཱནཾ ཨམནསིཀཱརཱཏི ནཱནཏྟེ གོཙརེ པཝཏྟཱནཾ སཉྙཱནཾ ནཱནཏྟཱནཾ ཝཱ སཉྙཱནཾ. ཡསྨཱ ཧི ཨེཏཱ ‘‘ཏཏྠ ཀཏམཱ ནཱནཏྟསཉྙཱ? ཨསམཱཔནྣསྶ མནོདྷཱཏུསམངྒིསྶ ཝཱ མནོཝིཉྙཱཎདྷཱཏུསམངྒིསྶ ཝཱ སཉྙཱ སཉྫཱནནཱ སཉྫཱནིཏཏྟཾ, ཨིམཱ ཝུཙྩནྟི ནཱནཏྟསཉྙཱཡོ’’ཏི (ཝིབྷ. ༦༠༤) ཨེཝཾ ཝིབྷངྒེ ཝིབྷཛིཏྭཱ ཝུཏྟཱ ཨིདྷ ཨདྷིཔྤེཏཱ; ཨསམཱཔནྣསྶ མནོདྷཱཏུམནོཝིཉྙཱཎདྷཱཏུསངྒཧིཏཱ སཉྙཱ རཱུཔསདྡཱདིབྷེདེ ནཱནཏྟེ ནཱནཱསབྷཱཝེ གོཙརེ པཝཏྟནྟི; ཡསྨཱ ཙེཏཱ ཨཊྛ ཀཱམཱཝཙརཀུསལསཉྙཱ, དྭཱདས ཨཀུསལསཉྙཱ, ཨེཀཱདས ཀཱམཱཝཙརཀུསལཝིཔཱཀསཉྙཱ ¶ , དྭེ ཨཀུསལཝིཔཱཀསཉྙཱ, ཨེཀཱདས ཀཱམཱཝཙརཀིརིཡསཉྙཱཏི ཨེཝཾ ཙཏུཙཏྟཱལཱིསམྤི སཉྙཱ ནཱནཏྟཱ ནཱནཱསབྷཱཝཱ ཨཉྙམཉྙཾ ཨསདིསཱ, ཏསྨཱ ནཱནཏྟསཉྙཱཏི ཝུཏྟཱ. ཏཱསཾ སབྦསོ ནཱནཏྟསཉྙཱནཾ ཨམནསིཀཱརཱ ཨནཱཝཛྫནཱ ཨསམནྣཱཧཱརཱ ཨཔཙྩཝེཀྑཎཱ. ཡསྨཱ ཏཱ ནཱཝཛྫཏི, ན མནསིཀརོཏི, ན པཙྩཝེཀྑཏི, ཏསྨཱཏི ¶ ཝུཏྟཾ ཧོཏི.

ཡསྨཱ ཙེཏྠ པུརིམཱ རཱུཔསཉྙཱ པཊིགྷསཉྙཱ ཙ ཨིམིནཱ ཛྷཱནེན ནིབྦཏྟེ བྷཝེཔི ན ཝིཛྫནྟི, པགེཝ ཏསྨིཾ བྷཝེ ཨིམཾ ཛྷཱནཾ ཨུཔསམྤཛྫ ཝིཧརཎཀཱལེ, ཏསྨཱ ཏཱསཾ ‘སམཏིཀྐམཱ ཨཏྠངྒམཱ’ཏི དྭེདྷཱཔི ཨབྷཱཝོཡེཝ ཝུཏྟོ. ནཱནཏྟསཉྙཱསུ པན ཡསྨཱ ཨཊྛ ཀཱམཱཝཙརཀུསལསཉྙཱ, ནཝ ¶ ཀིརིཡཱསཉྙཱ, དས ཨཀུསལསཉྙཱཏི ཨིམཱ སཏྟཝཱིསཏི སཉྙཱ ཨིམིནཱ ཛྷཱནེན ནིབྦཏྟེ བྷཝེ ཝིཛྫནྟི, ཏསྨཱ ཏཱསཾ ཨམནསིཀཱརཱཏི ཝུཏྟནྟི ཝེདིཏབྦཾ. ཏཏྲཱཔི ཧི ཨིམཾ ཛྷཱནཾ ཨུཔསམྤཛྫ ཝིཧརནྟོ ཏཱསཾ ཨམནསིཀཱརཱཡེཝ ཨུཔསམྤཛྫ ཝིཧརཏི. ཏཱ པན མནསིཀརོནྟོ ཨསམཱཔནྣོ ཧོཏཱིཏི. སངྑེཔཏོ ཙེཏྠ ‘རཱུཔསཉྙཱནཾ སམཏིཀྐམཱ’ཏི ཨིམིནཱ སབྦརཱུཔཱཝཙརདྷམྨཱནཾ པཧཱནཾ ཝུཏྟཾ. ‘པཊིགྷསཉྙཱནཾ ཨཏྠངྒམཱ ནཱནཏྟསཉྙཱནཾ ཨམནསིཀཱརཱ’ཏི ཨིམིནཱ སབྦེསཾ ཀཱམཱཝཙརཙིཏྟཙེཏསིཀཱནཉྩ པཧཱནཾ ཨམནསིཀཱརོ ཙ ཝུཏྟོཏི ཝེདིཏབྦོ.

ཨིཏི བྷགཝཱ ‘པནྣརསནྣཾ རཱུཔསཉྙཱནཾ སམཏིཀྐམེན, དསནྣཾ པཊིགྷསཉྙཱནཾ ཨཏྠངྒམེན, ཙཏུཙཏྟཱལཱིསཱཡ ནཱནཏྟསཉྙཱནཾ ཨམནསིཀཱརེནཱ’ཏི ཏཱིཧི པདེཧི ཨཱཀཱསཱནཉྩཱཡཏནསམཱཔཏྟིཡཱ ཝཎྞཾ ཀཐེསི. ཀིཾ ཀཱརཎཱཏི ཙེ སོཏཱུནཾ ཨུསྶཱཧཛནནཏྠཉྩེཝ པལོབྷནཏྠཉྩ. སཙེ ཧི ཀེཙི ཨཔཎྜིཏཱ ཝདེཡྻུཾ ‘སཏྠཱ ཨཱཀཱསཱནཉྩཱཡཏནསམཱཔཏྟིཾ ནིབྦཏྟེཐཱཏི ཝདཏི, ཀོ ནུ ཁོ ཨེཏཱཡ ནིབྦཏྟིཏཱཡ ཨཏྠོ? ཀོ ཨཱནིསཾསོ’ཏི ཏེ ཨེཝཾ ཝཏྟུཾ མཱ ལབྷནྟཱུཏི ཨིམེཧི ཨཱཀཱརེཧི སམཱཔཏྟིཡཱ ཝཎྞཾ ཀཐེསི. ཏཉྷི ནེསཾ སུཏྭཱ ཨེཝཾ བྷཝིསྶཏི – ‘ཨེཝཾསནྟཱ ཀིར ཨཡཾ སམཱཔཏྟི, ཨེཝཾཔཎཱིཏཱ, ནིབྦཏྟེསྶཱམ ན’ནྟི. ཨཐསྶ ནིབྦཏྟནཏྠཱཡ ཨུསྶཱཧཾ ཀརིསྶནྟཱིཏི.

པལོབྷནཏྠཉྩཱཔི ནེསཾ ཨེཏིསྶཱ ཝཎྞཾ ཀཐེསི, ཝིསཀཎྚཀཝཱཎིཛོ ཝིཡ. ཝིསཀཎྚཀཝཱཎིཛོ ནཱམ གུལ༹ཝཱཎིཛོ ཝུཙྩཏི. སོ ཀིར གུལ༹ཕཱཎིཏཁཎྜསཀྐརཱདཱིནི སཀཊེནཱདཱཡ ¶ པཙྩནྟགཱམཾ གནྟྭཱ ‘ཝིསཀཎྚཀཾ གཎྷཐ ཝིསཀཎྚཀཾ གཎྷཐཱ’ཏི ཨུགྒྷོསེསི. ཏཾ སུཏྭཱ གཱམིཀཱ ‘ཝིསཾ ནཱམ ཀཀྑལ༹ཾ, ཡོ ནཾ ཁཱདཏི སོ མརཏི, ཀཎྚཀོཔི ཝིཛ྄ཛྷིཏྭཱ མཱརེཏི. ཨུབྷོཔེཏེ ཀཀྑལཱ༹, ཀོ ཨེཏྠ ཨཱནིསཾསོ’ཏི གེཧདྭཱརཱནི ཐཀེསུཾ, དཱརཀེ ཙ པལཱཔེསུཾ. ཏཾ དིསྭཱ ཝཱཎིཛོ ‘ཨཝོཧཱརཀུསལཱ ཨིམེ ¶ གཱམིཀཱ, ཧནྡ ནེ ཨུཔཱཡེན གཎྷཱཔེམཱི’ཏི ‘ཨཏིམདྷུརཾ གཎྷཐ ཨཏིསཱདུཾ གཎྷཐ, གུལ༹ཾ ཕཱཎིཏཾ སཀྐརཾ སམགྒྷཾ ལབྦྷཏི, ཀཱུཊམཱསཀཀཱུཊཀཧཱཔཎཱདཱིཧིཔི ལབྦྷཏཱི’ཏི ཨུགྒྷོསེསི. ཏཾ སུཏྭཱ གཱམིཀཱ ཧཊྛཔཧཊྛཱ ནིགྒནྟྭཱ བཧུམྤི མཱུལཾ དཏྭཱ གཧེསུཾ.

ཏཏྠ ཝཱཎིཛསྶ ‘ཝིསཀཎྚཀཾ གཎྷཐཱ’ཏི ཨུགྒྷོསནཾ ཝིཡ བྷགཝཏོ ‘ཨཱཀཱསཱནཉྩཱཡཏནསམཱཔཏྟིཾ ནིབྦཏྟེཐཱ’ཏི ཝཙནཾ. ‘ཨུབྷོཔེཏེ ཀཀྑལཱ༹ ¶ , ཀོ ཨེཏྠ ཨཱནིསཾསོ’ཏི? གཱམིཀཱནཾ ཙིནྟནཾ ཝིཡ ‘བྷགཝཱ ཨཱཀཱསཱནཉྩཱཡཏནཾ ནིབྦཏྟེཐཱཏི ཨཱཧ, ཀོ ཨེཏྠ ཨཱནིསཾསོ? ནཱསྶ གུཎཾ ཛཱནཱམཱ’ཏི སོཏཱུནཾ ཙིནྟནཾ. ཨཐསྶ ཝཱཎིཛསྶ ‘ཨཏིམདྷུརཾ གཎྷཐཱ’ཏིཨཱདིཝཙནཾ ཝིཡ བྷགཝཏོ རཱུཔསཉྙཱསམཏིཀྐམནཱདིཀཾ ཨཱནིསཾསཔྤཀཱསནཾ. ཨིདཉྷི སུཏྭཱ ཏེ བཧུམྤི མཱུལཾ དཏྭཱ, གཱམིཀཱ ཝིཡ གུལ༹ཾ, ཨིམིནཱ ཨཱནིསཾསེན པལོབྷིཏཙིཏྟཱ མཧནྟམྤི ཨུསྶཱཧཾ ཀཏྭཱ ཨིམཾ སམཱཔཏྟིཾ ནིབྦཏྟེསྶནྟཱིཏི ཨུསྶཱཧཛནནཏྠཾ པལོབྷནཏྠཉྩ ཀཐེསི.

ཨཱཀཱསཱནཉྩཱཡཏནསཉྙཱསཧགཏནྟི ཨེཏྠ ནཱསྶ ཨནྟོཏི ཨནནྟཾ. ཨཱཀཱསཾ ཨནནྟཾ ཨཱཀཱསཱནནྟཾ. ཨཱཀཱསཱནནྟམེཝ ཨཱཀཱསཱནཉྩཾ. ཏཾ ཨཱཀཱསཱནཉྩཾ ཨདྷིཊྛཱནཊྛེན ཨཱཡཏནམསྶ སསམྤཡུཏྟདྷམྨསྶ ཛྷཱནསྶ, དེཝཱནཾ དེཝཱཡཏནམིཝཱཏི ཨཱཀཱསཱནཉྩཱཡཏནཾ. ཨིཏི ཨཱཀཱསཱནཉྩཾ ཙ ཏཾ ཨཱཡཏནཉྩཱཏིཔི ཨཱཀཱསཱནཉྩཱཡཏནཾ. ཀསིཎུགྒྷཱཊིམཱཀཱསསྶེཏཾ ཨདྷིཝཙནཾ. ཏསྨིཾ ཨཱཀཱསཱནཉྩཱཡཏནེ ཨཔྤནཱཔྤཏྟཱཡ སཉྙཱཡ སཧགཏཾ ཨཱཀཱསཱནཉྩཱཡཏནསཉྙཱསཧགཏཾ.

ཡཐཱ པན ཨཉྙཏྠ ‘ཨནནྟོ ཨཱཀཱསོ’ཏི (ཝིབྷ. ༥༠༨; དཱི. ནི. ༢.༡༢༩) ཝུཏྟཾ, ཨེཝམིདྷ ཨནནྟནྟི ཝཱ པརིཏྟནྟི ཝཱ ན གཧིཏཾ. ཀསྨཱ? ཨནནྟེ ཧི གཧིཏེ པརིཏྟཾ ན གཡ྄ཧཏི, པརིཏྟེ གཧིཏེ ཨནནྟཾ ན གཡ྄ཧཏི. ཨེཝཾ སནྟེ ཨཱརམྨཎཙཏུཀྐཾ ན པཱུརཏི, དེསནཱ སོལ༹སཀྑཏྟུཀཱ ན ཧོཏི. སམྨཱསམྦུདྡྷསྶ ཙ ཨིམསྨིཾ ཋཱནེ དེསནཾ སོལ༹སཀྑཏྟུཀཾ ཀཱཏུཾ ¶ ཨཛ྄ཛྷཱསཡོ, ཏསྨཱ ཨནནྟནྟི ཝཱ པརིཏྟནྟི ཝཱ ཨཝཏྭཱ ‘ཨཱཀཱསཱནཉྩཱཡཏནསཉྙཱསཧགཏ’ནྟི ཨཱཧ. ཨེཝཉྷི སཏི ཨུབྷཡམྤི གཧིཏམེཝ ཧོཏི. ཨཱརམྨཎཙཏུཀྐཾ པཱུརཏི, དེསནཱ སོལ༹སཀྑཏྟུཀཱ སམྤཛྫཏི. ཨཝསེསོ པཱལི༹ཨཏྠོ ཧེཊྛཱ ཝུཏྟནཡེནེཝ ཝེདིཏབྦོ. རཱུཔཱཝཙརཙཏུཏྠཛ྄ཛྷཱནནིཀནྟིཔརིཡཱདཱནདུཀྑཏཱཡ ¶ ཙེཏྠ དུཀྑཱ པཊིཔདཱ, པརིཡཱདིནྣནིཀནྟིཀསྶ ཨཔྤནཱཔརིཝཱསདནྡྷཏཱཡ དནྡྷཱབྷིཉྙཱ ཧོཏི. ཝིཔརིཡཱཡེན སུཁཱ པཊིཔདཱ ཁིཔྤཱབྷིཉྙཱ ཙ ཝེདིཏབྦཱ. པརིཏྟཀསིཎུགྒྷཱཊིམཱཀཱསེ པན པཝཏྟཾ ཛྷཱནཾ པརིཏྟཱརམྨཎཾ ཝིཔུལཀསིཎུགྒྷཱཊིམཱཀཱསེ པཝཏྟཾ ཨཔྤམཱཎཱརམྨཎནྟི ཝེདིཏབྦཾ. ཨུཔེཀྑཱབྲཧྨཝིཧཱརེ ཝིཡ ཙ ཨིདྷཱཔི ཙཏུཏྠཛ྄ཛྷཱནཝསེན པཉྩཝཱིསཏི ཨེཀཀཱ ཧོནྟི ¶ . ཡཐཱ ཙེཏྠ ཨེཝཾ ཨིཏོ པརེསུཔི. ཝིསེསམཏྟམེཝ པན ཏེསུ ཝཎྞཡིསྶཱམ.

ཝིཉྙཱཎཉྩཱཡཏནཾ

༢༦༦. ཨཱཀཱསཱནཉྩཱཡཏནཾ སམཏིཀྐམྨཱཏི, ཨེཏྠ ཏཱཝ པུབྦེ ཝུཏྟནཡེན ཨཱཀཱསཱནཉྩཾ ཨཱཡཏནམསྶ ཨདྷིཊྛཱནཊྛེནཱཏི ཛྷཱནམྤི ཨཱཀཱསཱནཉྩཱཡཏནཾ. ཝུཏྟནཡེནེཝ ཨཱརམྨཎམྤི. ཨེཝམེཏཾ ཛྷཱནཉྩ ཨཱརམྨཎཉྩཱཏི ཨུབྷཡམྤི ཨཔྤཝཏྟིཀརཎེན ཙ ཨམནསིཀརཎེན ཙ སམཏིཀྐམིཏྭཱཝ ཡསྨཱ ཨིདཾ ཝིཉྙཱཎཉྩཱཡཏནཾ ཨུཔསམྤཛྫ ཝིཧཱཏབྦཾ, ཏསྨཱ ཨུབྷཡམྤེཏཾ ཨེཀཛ྄ཛྷཾ ཀཏྭཱ ‘ཨཱཀཱསཱནཉྩཱཡཏནཾ སམཏིཀྐམྨཱ’ཏི ཨིདཾ ཝུཏྟནྟི ཝེདིཏབྦཾ.

ཝིཉྙཱཎཉྩཱཡཏནསཉྙཱསཧགཏནྟི, ཨེཏྠ པན ཨནནྟནྟི མནསིཀཱཏབྦཝསེན ནཱསྶ ཨནྟོཏི ཨནནྟཾ. ཨནནྟམེཝ ཨཱནཉྩཾ. ཝིཉྙཱཎཾ ཨཱནཉྩཾ ཝིཉྙཱཎཱནཉྩནྟི ཨཝཏྭཱ ཝིཉྙཱཎཉྩནྟི ཝུཏྟཾ. ཨཡཉྷེཏྠ རཱུལ༹ྷཱིསདྡོ. ཏདེཝ ཝིཉྙཱཎཉྩཾ ཨདྷིཊྛཱནཊྛེན ཨིམཱཡ སཉྙཱཡ ཨཱཡཏནནྟི ཝིཉྙཱཎཉྩཱཡཏནཾ. ཏསྨིཾ ཝིཉྙཱཎཉྩཱཡཏནེ པཝཏྟཱཡ སཉྙཱཡ སཧགཏནྟི ཝིཉྙཱཎཉྩཱཡཏནསཉྙཱསཧགཏཾ. ཨཱཀཱསེ པཝཏྟཝིཉྙཱཎཱརམྨཎསྶ ཛྷཱནསྶེཏཾ ཨདྷིཝཙནཾ. ཨིདྷ ཨཱཀཱསཱནཉྩཱཡཏནསམཱཔཏྟིཡཱ ནིཀནྟིཔརིཡཱདཱནདུཀྑཏཱཡ དུཀྑཱ པཊིཔདཱ, པརིཡཱདིནྣནིཀནྟིཀསྶ ཨཔྤནཱཔརིཝཱསདནྡྷཏཱཡ དནྡྷཱབྷིཉྙཱ. ཝིཔརིཡཱཡེན སུཁཱ པཊིཔདཱ ཁིཔྤཱབྷིཉྙཱ ཙ. པརིཏྟཀསིཎུགྒྷཱཊིམཱཀཱསཱརམྨཎཾ སམཱཔཏྟིཾ ཨཱརབྦྷ པཝཏྟིཡཱ པརིཏྟཱརམྨཎཏཱ, ཝིཔརིཡཱཡེན ཨཔྤམཱཎཱརམྨཎཏཱ ཝེདིཏབྦཱ. སེསཾ པུརིམསདིསམེཝ.

ཨཱཀིཉྩཉྙཱཡཏནཾ

༢༦༧. ཝིཉྙཱཎཉྩཱཡཏནཾ ¶ སམཏིཀྐམྨཱཏི ཨེཏྠཱཔི པུབྦེ ཝུཏྟནཡེནེཝ ཝིཉྙཱཎཉྩ ཨཱཡཏནམསྶ ཨདྷིཊྛཱནཊྛེནཱཏི ཛྷཱནམྤི ཝིཉྙཱཎཉྩཱཡཏནཾ. ཝུཏྟནཡེནེཝ ཙ ཨཱརམྨཎམྤི. ཨེཝམེཏཾ ཛྷཱནཉྩ ཨཱརམྨཎཉྩཱཏི ¶ ཨུབྷཡམྤི ཨཔྤཝཏྟིཀརཎེན ཙ ཨམནསིཀརཎེན ཙ སམཏིཀྐམིཏྭཱཝ ཡསྨཱ ཨིདཾ ཨཱཀིཉྩཉྙཱཡཏནཾ ཨུཔསམྤཛྫ ཝིཧཱཏབྦཾ, ཏསྨཱ ཨུབྷཡམྤེཏཾ ཨེཀཛ྄ཛྷཾ ཀཏྭཱ ‘ཝིཉྙཱཎཉྩཱཡཏནཾ སམཏིཀྐམྨཱ’ཏི ཨིདཾ ཝུཏྟནྟི ཝེདིཏབྦཾ.

ཨཱཀིཉྩཉྙཱཡཏནསཉྙཱསཧགཏནྟི ¶ ཨེཏྠ པན ནཱསྶ ཀིཉྩནནྟི ཨཀིཉྩནཾ; ཨནྟམསོ བྷངྒམཏྟམྤི ཨསྶ ཨཝསིཊྛཾ ནཏྠཱིཏི ཝུཏྟཾ ཧོཏི. ཨཀིཉྩནསྶ བྷཱཝོ ཨཱཀིཉྩཉྙཾ. ཨཱཀཱསཱནཉྩཱཡཏནཝིཉྙཱཎཱཔགམསྶེཏཾ ཨདྷིཝཙནཾ. ཏཾ ཨཱཀིཉྩཉྙཾ ཨདྷིཊྛཱནཊྛེན ཨིམིསྶཱ སཉྙཱཡ ཨཱཡཏནནྟི ཨཱཀིཉྩཉྙཱཡཏནཾ. ཏསྨིཾ ཨཱཀིཉྩཉྙཱཡཏནེ པཝཏྟཱཡ སཉྙཱཡ སཧགཏནྟི ཨཱཀིཉྩཉྙཱཡཏནསཉྙཱསཧགཏཾ. ཨཱཀཱསེ པཝཏྟིཏཝིཉྙཱཎཱཔགམཱརམྨཎསྶ ཛྷཱནསྶེཏཾ ཨདྷིཝཙནཾ. ཨིདྷ ཝིཉྙཱཎཉྩཱཡཏནསམཱཔཏྟིཡཱ ནིཀནྟིཔརིཡཱདཱནདུཀྑཏཱཡ དུཀྑཱ པཊིཔདཱ, པརིཡཱདིནྣནིཀནྟིཀསྶ ཨཔྤནཱ པརིཝཱསདནྡྷཏཱཡ དནྡྷཱབྷིཉྙཱ. ཝིཔརིཡཱཡེན སུཁཱ པཊིཔདཱ ཁིཔྤཱབྷིཉྙཱ ཙ. པརིཏྟཀསིཎུགྒྷཱཊིམཱཀཱསེ པཝཏྟིཏཝིཉྙཱཎཱཔགམཱརམྨཎཏཱཡ པརིཏྟཱརམྨཎཏཱ, ཝིཔརིཡཱཡེན ཨཔྤམཱཎཱརམྨཎཏཱ ཝེདིཏབྦཱ. སེསཾ པུརིམསདིསམེཝ.

ནེཝསཉྙཱནཱསཉྙཱཡཏནཾ

ཨཱཀིཉྩཉྙཱཡཏནཾ སམཏིཀྐམྨཱཏི ཨེཏྠཱཔི པུབྦེ ཝུཏྟནཡེནེཝ ཨཱཀིཉྩཉྙཾ ཨཱཡཏནམསྶ ཨདྷིཊྛཱནཊྛེནཱཏི ཛྷཱནམྤི ཨཱཀིཉྩཉྙཱཡཏནཾ. ཝུཏྟནཡེནེཝ ཨཱརམྨཎམྤི. ཨེཝམེཏཾ ཛྷཱནཉྩ ཨཱརམྨཎཉྩཱཏི ཨུབྷཡམྤི ཨཔྤཝཏྟིཀརཎེན ཙ ཨམནསིཀརཎེ ཙ སམཏིཀྐམིཏྭཱཝ ཡསྨཱ ཨིདཾ ནེཝསཉྙཱནཱསཉྙཱཡཏནཾ ཨུཔསམྤཛྫ ཝིཧཱཏབྦཾ, ཏསྨཱ ཨུབྷཡམྤེཏཾ ཨེཀཛ྄ཛྷཾ ཀཏྭཱ ‘ཨཱཀིཉྩཉྙཱཡཏནཾ སམཏིཀྐམྨཱ’ཏི ཨིདཾ ཝུཏྟནྟི ཝེདིཏབྦཾ.

ནེཝསཉྙཱནཱསཉྙཱཡཏནསཉྙཱསཧགཏནྟི ཨེཏྠ པན ཡཱཡ སཉྙཱཡ བྷཱཝཏོ ཏཾ ནེཝསཉྙཱནཱསཉྙཱཡཏནནྟི ཝུཙྩཏི, ཡཐཱ པཊིཔནྣསྶ སཱ སཉྙཱ ཧོཏི, ཏཾ ཏཱཝ དསྶེཏུཾ ཝིབྷངྒེ ‘‘ནེཝསཉྙཱིནཱསཉྙཱི’’ཏི ཨུདྡྷརིཏྭཱ ‘‘ཏཉྙེཝ ཨཱཀིཉྩཉྙཱཡཏནཾ སནྟཏོ མནསིཀརོཏི ¶ ¶ སངྑཱརཱཝསེསསམཱཔཏྟིཾ བྷཱཝེཏི, ཏེན ཝུཙྩཏི ནེཝསཉྙཱིནཱསཉྙཱི’’ཏི (ཝིབྷ. ༦༡༩) ཝུཏྟཾ. ཏཏྠ ‘སནྟཏོ མནསིཀརོཏཱི’ཏི ‘སནྟཱ ཝཏཱཡཾ སམཱཔཏྟི, ཡཏྲ ཧི ནཱམ ནཏྠིབྷཱཝམྤི ཨཱརམྨཎཾ ཀརིཏྭཱ ཋསྶཏཱི’ཏི ཨེཝཾ སནྟཱརམྨཎཏཱཡ ནཾ ‘སནྟཱ’ཏི མནསིཀརོཏི. སནྟཏོ ཙེ མནསིཀརོཏི, ཀཐཾ སམཏིཀྐམོ ཧོཏཱིཏི? ཨནཱཝཛྫིཏུཀཱམཏཱཡ. སོ ཧི ཀིཉྩཱཔི ནཾ སནྟཏོ ¶ མནསིཀརོཏི, ཨཐ ཁྭསྶ ‘ཨཧམེཏཾ ཨཱཝཛྫིསྶཱམི སམཱཔཛྫིསྶཱམི ཨདྷིཊྛཧིསྶཱམི ཝུཊྛཧིསྶཱམི པཙྩཝེཀྑིསྶཱམཱི’ཏི ཨེས ཨཱབྷོགོ སམནྣཱཧཱརོ མནསིཀཱརོ ན ཧོཏི. ཀསྨཱ? ཨཱཀིཉྩཉྙཱཡཏནཏོ ནེཝསཉྙཱནཱསཉྙཱཡཏནསྶ སནྟཏརཔཎཱིཏཏརཏཱཡ.

ཡཐཱ ཧི རཱཛཱ མཧཙྩརཱཛཱནུབྷཱཝེན ཧཏྠིཀྑནྡྷགཏོ ནགརཝཱིཐིཡཾ ཝིཙརནྟོ དནྟཀཱརཱདཡོ སིཔྤིཀེ ཨེཀཾ ཝཏྠཾ དལ༹ྷཾ ནིཝཱསེཏྭཱ ཨེཀེན སཱིསཾ ཝེཋེཏྭཱ དནྟཙུཎྞཱདཱིཧི སམོཀིཎྞགཏྟེ ཨནེཀཱནི དནྟཝིཀཏིཨཱདཱིནི ཀརོནྟེ དིསྭཱ ‘ཨཧོ ཝཏ རེ ཚེཀཱ ཨཱཙརིཡཱ, ཨཱིདིསཱནིཔི ནཱམ སིཔྤཱནི ཀརིསྶནྟཱི’ཏི, ཨེཝཾ ཏེསཾ ཚེཀཏཱཡ ཏུསྶཏི, ན ཙསྶ ཨེཝཾ ཧོཏི – ‘ཨཧོ ཝཏཱཧཾ རཛྫཾ པཧཱཡ ཨེཝརཱུཔོ སིཔྤིཀོ བྷཝེཡྻ’ནྟི. ཏཾ ཀིསྶ ཧེཏུ? རཛྫསིརིཡཱ མཧཱནིསཾསཏཱཡ. སོ སིཔྤིཀེ སམཏིཀྐམིཏྭཱཝ གཙྪཏི. ཨེཝམེཝེས ཀིཉྩཱཔི ཏཾ སམཱཔཏྟིཾ སནྟཏོ མནསིཀརོཏི, ཨཐ ཁྭསྶ ‘ཨཧམེཏཾ སམཱཔཏྟིཾ ཨཱཝཛྫིསྶཱམི སམཱཔཛྫིསྶཱམི ཨདྷིཊྛཧིསྶཱམི ཝུཊྛཧིསྶཱམི པཙྩཝེཀྑིསྶཱམཱི’ཏི ནེཝ ཨེས ཨཱབྷོགོ སམནྣཱཧཱརོ མནསིཀཱརོ ཧོཏི. སོ ཏཾ སནྟཏོ མནསི ཀརོནྟོ ཏཾ པརམསུཁུམཾ ཨཔྤནཱཔྤཏྟཾ སཉྙཾ པཱཔུཎཱཏི, ཡཱཡ ‘ནེཝསཉྙཱིནཱསཉྙཱི ནཱམ ཧོཏི, སངྑཱརཱཝསེསསམཱཔཏྟིཾ བྷཱཝེཏཱི’ཏི ཝུཙྩཏི. ‘སངྑཱརཱཝསེསསམཱཔཏྟི’ནྟི ཨཙྩནྟསུཁུམབྷཱཝཔྤཏྟསངྑཱརཾ ཙཏུཏྠཱརུཔྤསམཱཔཏྟིཾ.

ཨིདཱནི ཡཾ ཏཾ ཨེཝཾ ཨདྷིགཏཱཡ སཉྙཱཡ ཝསེན ནེཝསཉྙཱནཱསཉྙཱཡཏནནྟི ཝུཙྩཏི, ཏཾ ཨཏྠཏོ དསྶེཏུཾ ‘‘ནེཝསཉྙཱནཱསཉྙཱཡཏནནྟི ནེཝསཉྙཱནཱསཉྙཱཡཏནཾ སམཱཔནྣསྶ ཝཱ, ཨུཔཔནྣསྶ ཝཱ, དིཊྛདྷམྨསུཁཝིཧཱརིསྶ ཝཱ ཙིཏྟཙེཏསིཀཱ དྷམྨཱ’’ཏི (ཝིབྷ. ༦༢༠) ཝུཏྟཾ. ཏེསུ ཨིདྷ སམཱཔནྣསྶ ཙིཏྟཙེཏསིཀཱ དྷམྨཱ ཨདྷིཔྤེཏཱ.

ཝཙནཏྠོ པནེཏྠ – ཨོལཱ༹རིཀཱཡ སཉྙཱཡ ཨབྷཱཝཏོ, སུཁུམཱཡ ཙ བྷཱཝཏོ, ནེཝསྶ སསམྤཡུཏྟདྷམྨསྶ ཛྷཱནསྶ སཉྙཱ, ནཱསཉྙཱཏི ནེཝསཉྙཱནཱསཉྙཾ. ནེཝསཉྙཱནཱསཉྙཉྩ ཏཾ མནཱཡཏནདྷམྨཱཡཏནཔརིཡཱཔནྣཏྟཱ ¶ ཨཱཡཏནཉྩཱཏི ¶ ནེཝསཉྙཱནཱསཉྙཱཡཏནཾ. ཨཐ ཝཱ ཡཱཡམེཏྠ སཉྙཱ, སཱ པཊུསཉྙཱཀིཙྩཾ ཀཱཏུཾ ཨསམཏྠཏཱཡ ནེཝསཉྙཱ ¶ , སངྑཱརཱཝསེསསུཁུམབྷཱཝེན ཝིཛྫམཱནཏྟཱ ནཱསཉྙཱཏི ནེཝསཉྙཱནཱསཉྙཱ. ནེཝསཉྙཱནཱསཉྙཱ ཙ སཱ སེསདྷམྨཱནཾ ཨདྷིཊྛཱནཊྛེན ཨཱཡཏནཉྩཱཏི ནེཝསཉྙཱནཱསཉྙཱཡཏནཾ.

ན ཀེཝལཉྩེཏྠ སཉྙཱཝ ཨེདིསཱི, ཨཐ ཁོ ཝེདནཱཔི ནེཝཝེདནཱ ནཱཝེདནཱ, ཙིཏྟམྤི ནེཝཙིཏྟཾ ནཱཙིཏྟཾ, ཕསྶོཔི ནེཝཕསྶོ ནཱཕསྶོཏི. ཨེས ནཡོ སེསསམྤཡུཏྟདྷམྨེསུ. སཉྙཱསཱིསེན པནཱཡཾ དེསནཱ ཀཏཱཏི ཝེདིཏབྦཱ. པཏྟམཀྑནཏེལཔྤབྷུཏཱིཧི ཙ ཨུཔམཱཧི ཨེསམཏྠོ ཝིབྷཱཝེཏབྦོ – སཱམཎེརོ ཀིར ཏེལེན པཏྟཾ མཀྑེཏྭཱ ཋཔེསི. ཏཾ ཡཱགུཔཱནཀཱལེ ཐེརོ ‘པཏྟམཱཧརཱ’ཏི ཨཱཧ. སོ ‘པཏྟེ ཏེལམཏྠི, བྷནྟེ’ཏི ཨཱཧ. ཏཏོ ‘ཨཱཧར, སཱམཎེར, ཏེལཾ ནཱལི༹ཾ པཱུརེསྶཱམཱི’ཏི ཝུཏྟེ ‘ནཏྠི, བྷནྟེ, ཏེལ’ནྟི ཨཱཧ. ཏཏྠ ཡཐཱ ཨནྟོཝུཏྠཏྟཱ ཡཱགུཡཱ སདྡྷིཾ ཨཀཔྤིཡཊྛེན ཏེལཾ ཨཏྠཱིཏི ཧོཏི, ནཱལི༹པཱུརཎཱདཱིནཾ ཨབྷཱཝཝསེན ནཏྠཱིཏི ཧོཏི, ཨེཝཾ སཱཔི སཉྙཱ པཊུསཉྙཱཀིཙྩཾ ཀཱཏུཾ ཨསམཏྠཏཱཡ ནེཝསཉྙཱ, སངྑཱརཱཝསེསསུཁུམབྷཱཝེན ཝིཛྫམཱནཏྟཱ ནཱསཉྙཱ ཧོཏི.

ཀིམྤནེཏྠ སཉྙཱཀིཙྩནྟི? ཨཱརམྨཎསཉྫཱནནཉྩེཝ ཝིཔསྶནཱཡ ཙ ཝིསཡབྷཱཝཾ ཨུཔགནྟྭཱ ནིབྦིདཱཛནནཾ. དཧནཀིཙྩམིཝ ཧི སུཁོདཀེ ཏེཛོདྷཱཏུ, སཉྫཱནནཀིཙྩམྤེསཱ པཊུཾ ཀཱཏུཾ ན སཀྐོཏི. སེསསམཱཔཏྟཱིསུ སཉྙཱ ཝིཡ ཝིཔསྶནཱཡ ཝིསཡབྷཱཝཾ ཨུཔགནྟྭཱ ནིབྦིདཱཛནནམྤི ཀཱཏུཾ ན སཀྐོཏི. ཨཉྙེསུ ཧི ཁནྡྷེསུ ཨཀཏཱབྷིནིཝེསོ བྷིཀྑུ ནེཝསཉྙཱནཱསཉྙཱཡཏནཀྑནྡྷེ སམྨསིཏྭཱ ནིབྦིདཾ པཏྟུཾ སམཏྠོ ནཱམ ནཏྠི. ཨཔིཙ ཨཱཡསྨཱ སཱརིཔུཏྟོ, པཀཏིཝིཔསྶཀོ པན མཧཱཔཉྙོ སཱརིཔུཏྟསདིསོཝ སཀྐུཎེཡྻ. སོཔི ‘‘ཨེཝཾ ཀིརིམེ དྷམྨཱ ཨཧུཏྭཱ སམྦྷོནྟི, ཧུཏྭཱ པཊིཝེནྟཱི’’ཏི (མ. ནི. ༣.༩༥) ཨེཝཾ ཀལཱཔསམྨསནཝསེནེཝ, ནོ ཨནུཔདདྷམྨཝིཔསྶནཱཝསེན. ཨེཝཾ སུཁུམཏྟཾ གཏཱ ཨེསཱ སམཱཔཏྟི.

ཡཐཱ ཙ པཏྟམཀྑནཏེལཱུཔམཱཡ ཨེཝཾ མགྒུདཀཱུཔམཱཡཔི ཨཡམཏྠོ ཝིབྷཱཝེཏབྦོ. མགྒཔཊིཔནྣསྶ ¶ ཀིར ཐེརསྶ པུརཏོ གཙྪནྟོ སཱམཎེརོ ཐོཀམུདཀཾ དིསྭཱ ‘ཨུདཀཾ, བྷནྟེ, ཨུཔཱཧནཱ ཨོམུཉྩཐཱ’ཏི ཨཱཧ. ཏཏོ ཐེརེན ‘སཙེ ཨུདཀམཏྠི, ཨཱཧར ནྷཱནསཱཊཀཾ, ནྷཱཡིསྶཱམཱི’ཏི ¶ ཝུཏྟེ ‘ནཏྠི, བྷནྟེ’ཏི ཨཱཧ. ཏཏྠ ཡཐཱ ཨུཔཱཧནཏེམནམཏྟཊྛེན ཨུདཀཾ ཨཏྠཱིཏི ཧོཏི ¶ , ནྷཱནཊྛེན ནཏྠཱིཏི ཧོཏི, ཨེཝམྤི སཱ པཊུསཉྙཱཀིཙྩཾ ཀཱཏུཾ ཨསམཏྠཏཱཡ ནེཝ སཉྙཱ, སངྑཱརཱཝསེསསུཁུམབྷཱཝེན ཝིཛྫམཱནཏྟཱ ནཱསཉྙཱ ཧོཏི. ན ཀེཝལཉྩ ཨེཏཱཧེཝ, ཨཉྙཱཧིཔི ཨནུརཱུཔཱཧི ཨུཔམཱཧི ཨེས ཨཏྠོ ཝིབྷཱཝེཏབྦོ. ཨིཏི ཨིམཱཡ ནེཝསཉྙཱནཱསཉྙཱཡཏནེ པཝཏྟཱཡ སཉྙཱཡ ནེཝསཉྙཱནཱསཉྙཱཡཏནབྷཱུཏཱཡ ཝཱ སཉྙཱཡ སཧགཏནྟི ནེཝསཉྙཱནཱསཉྙཱཡཏནསཉྙཱསཧགཏཾ. ཨཱཀིཉྩཉྙཱཡཏནསམཱཔཏྟིཨཱརམྨཎསྶ ཛྷཱནསྶེཏཾ ཨདྷིཝཙནཾ.

ཨིདྷ ཨཱཀིཉྩཉྙཱཡཏནསམཱཔཏྟིཡཱ ནིཀནྟིཔརིཡཱདཱནདུཀྑཏཱཡ དུཀྑཱ པཊིཔདཱ, པརིཡཱདིནྣནིཀནྟིཀསྶ ཨཔྤནཱཔརིཝཱསདནྡྷཏཱཡ དནྡྷཱབྷིཉྙཱ. ཝིཔརིཡཱཡེན སུཁཱ པཊིཔདཱ ཁིཔྤཱབྷིཉྙཱ ཙ. པརིཏྟཀསིཎུགྒྷཱཊིམཱཀཱསེ པཝཏྟིཏཝིཉྙཱཎཱཔགམཱརམྨཎཾ སམཱཔཏྟིཾ ཨཱརབྦྷ པཝཏྟིཏཱཡ པརིཏྟཱརམྨཎཏཱ, ཝིཔརིཡཱཡེན ཨཔྤམཱཎཱརམྨཎཏཱ ཝེདིཏབྦཱ. སེསཾ པུརིམསདིསམེཝ.

ཨསདིསརཱུཔོ ནཱཐོ, ཨཱརུཔྤཾ ཡཾ ཙཏུབྦིདྷཾ ཨཱཧ;

ཏཾ ཨིཏི ཉཏྭཱ ཏསྨིཾ, པཀིཎྞཀཀཐཱཔི ཝིཉྙེཡྻཱ.

ཨརཱུཔསམཱཔཏྟིཡོ ཧི –

ཨཱརམྨཎཱཏིཀྐམཏོ, ཙཏསྶོཔི བྷཝནྟིམཱ;

ཨངྒཱཏིཀྐམམེཏཱསཾ, ན ཨིཙྪནྟི ཝིབྷཱཝིནོ.

ཨེཏཱསུ ཧི རཱུཔནིམིཏྟཱཏིཀྐམཏོ པཋམཱ, ཨཱཀཱསཱཏིཀྐམཏོ དུཏིཡཱ, ཨཱཀཱསེ པཝཏྟིཏཝིཉྙཱཎཱཏིཀྐམཏོ ཏཏིཡཱ, ཨཱཀཱསེ པཝཏྟིཏཝིཉྙཱཎསྶ ཨཔགམཱཏིཀྐམཏོ ཙཏུཏྠཱཏི སབྦཐཱ ‘ཨཱརམྨཎཱཏིཀྐམཏོ ཙཏསྶོཔི བྷཝནྟིམཱ’ ཨརཱུཔསམཱཔཏྟིཡོཏི ཝེདིཏབྦཱ. ཨངྒཱཏིཀྐམཾ པན ཨེཏཱསཾ ན ཨིཙྪནྟི པཎྜིཏཱ. ན ཧི རཱུཔཱཝཙརསམཱཔཏྟཱིསུ ཝིཡ ཨེཏཱསུ ཨངྒཱཏིཀྐམོ ཨཏྠི. སབྦཱསུཔི ཧི ཨེཏཱསུ ཨུཔེཀྑཱ ཙིཏྟེཀགྒཏཱཏི དྭེ ཨེཝ ཛྷཱནངྒཱནི ཧོནྟི. ཨེཝཾ སནྟེཔི –

སུཔཎཱིཏཏརཱ ཧོནྟི, པཙྪིམཱ པཙྪིམཱ ཨིདྷ;

ཨུཔམཱ ཏཏྠ ཝིཉྙེཡྻཱ, པཱསཱདཏལསཱཊིཀཱ.

ཡཐཱ ¶ ¶ ¶ ཧི ཙཏུབྷཱུམཀཔཱསཱདསྶ ཧེཊྛིམཏལེ དིབྦནཙྩགཱིཏཝཱདིཏསུརབྷིགནྡྷམཱལཱསཱདུརསཔཱནབྷོཛནསཡནཙྪཱདནཱདིཝསེན པཎཱིཏཱ པཉྩ ཀཱམགུཎཱ པཙྩུཔཊྛིཏཱ ཨསྶུ, དུཏིཡེ ཏཏོ པཎཱིཏཏརཱ, ཏཏིཡེ ཏཏོ པཎཱིཏཏམཱ, ཙཏུཏྠེ སབྦཔཎཱིཏཱ; ཏཏྠ ཀིཉྩཱཔི ཏཱནི ཙཏྟཱརིཔི པཱསཱདཏལཱནེཝ, ནཏྠི ནེསཾ པཱསཱདཏལབྷཱཝེན ཝིསེསོ, པཉྩཀཱམགུཎསམིདྡྷིཝིསེསེན པན ཧེཊྛིམཏོ ཧེཊྛིམཏོ ཨུཔརིམཾ ཨུཔརིམཾ པཎཱིཏཏརཾ ཧོཏི.

ཡཐཱ ཙ ཨེཀཱཡ ཨིཏྠིཡཱ ཀནྟིཏཐཱུལསཎྷསཎྷཏརསཎྷཏམསུཏྟཱནཾ ཙཏུཔལཏིཔལདྭིཔལཨེཀཔལསཱཊིཀཱ ཨསྶུ, ཨཱཡཱམེན ཝིཏྠཱརེན ཙ སམཔྤམཱཎཱ; ཏཏྠ ཀིཉྩཱཔི ཏཱ སཱཊིཀཱ ཙཏསྶོཔི ཨཱཡཱམཏོ ཙ ཝིཏྠཱརཏོ ཙ སམཔྤམཱཎཱ, ནཏྠི ཏཱསཾ པམཱཎཏོ ཝིསེསོ, སུཁསམྥསྶསུཁུམབྷཱཝམཧགྒྷབྷཱཝེཧི པན པུརིམཱཡ པུརིམཱཡ པཙྪིམཱ པཙྪིམཱ པཎཱིཏཏརཱ ཧོནྟི, ཨེཝམེཝ ཀིཉྩཱཔི ཙཏཱུསུཔི ཨེཏཱསུ ཨུཔེཀྑཱ ཙིཏྟེཀགྒཏཱཏི ཨེཏཱནི དྭེཡེཝ ཨངྒཱནི ཧོནྟི, ཨཐ ཁོ བྷཱཝནཱཝིསེསེན ཏེསཾ ཨངྒཱནཾ པཎཱིཏཔཎཱིཏཏརབྷཱཝེན སུཔཎཱིཏཏརཱ ཧོནྟི པཙྪིམཱ པཙྪིམཱ ཨིདྷཱཏི ཝེདིཏབྦཱ. ཨེཝཾ ཨནུཔུབྦེན པཎཱིཏཔཎཱིཏཱ ཙེཏཱ –

ཨསུཙིམྷི མཎྜཔེ ལགྒོ, ཨེཀོ ཏཾ ནིསྶིཏོ པརོ;

ཨཉྙོ བཧི ཨནིསྶཱཡ, ཏཾ ཏཾ ནིསྶཱཡ ཙཱཔརོ.

ཋིཏོ ཙཏཱུཧི ཨེཏེཧི, པུརིསེཧི ཡཐཱཀྐམཾ;

སམཱནཏཱཡ ཉཱཏབྦཱ, ཙཏསྶོཔི ཝིབྷཱཝིནཱ. (ཝིསུདྡྷི. ༡.༢༩༡);

ཏཏྲཱཡམཏྠཡོཛནཱ – ཨསུཙིམྷི ཀིར དེསེ ཨེཀོ མཎྜཔོ. ཨཐེཀོ པུརིསོ ཨཱགནྟྭཱ ཏཾ ཨསུཙིཾ ཛིགུཙྪམཱནོ ཏཾ མཎྜཔཾ ཧཏྠེཧི ཨཱལམྦིཏྭཱ ཏཏྠ ལགྒོ, ལགྒིཏོ ཝིཡ ཨཊྛཱསི. ཨཐཱཔརོ ཨཱགནྟྭཱ ཏཾ མཎྜཔལགྒཾ པུརིསཾ ནིསྶིཏོ. ཨཐཉྙོ ཨཱགནྟྭཱ ཙིནྟེསི – ‘ཡོ ཨེས མཎྜཔེ ལགྒོ, ཡོ ཙ ཏཾ ནིསྶིཏོ, ཨུབྷོཔེཏེ དུཊྛིཏཱ; དྷུཝོ ཙ ནེསཾ མཎྜཔཔཔཱཏེ པཱཏོ, ཧནྡཱཧཾ བཧིཡེཝ ཏིཊྛཱམཱི’ཏི སོ ཏནྣིསྶིཏཾ ཨནིསྶཱཡ བཧིཡེཝ ཨཊྛཱསི. ཨཐཱཔརོ ཨཱགནྟྭཱ མཎྜཔལགྒསྶ ¶ ཏནྣིསྶིཏསྶ ཙ ཨཁེམབྷཱཝཾ ཙིནྟེཏྭཱ བཧིཋིཏཉྩ སུཊྛིཏོཏི མནྟྭཱ ཏཾ ནིསྶཱཡ ཨཊྛཱསི.

ཏཏྠ ¶ ཨསུཙིམྷི དེསེ མཎྜཔོ ཝིཡ ཀསིཎུགྒྷཱཊིམཱཀཱསཾ དཊྛབྦཾ. ཨསུཙིཛིགུཙྪཱཡ མཎྜཔལགྒོ པུརིསོ ཝིཡ རཱུཔནིམིཏྟཛིགུཙྪཱཡ ཨཱཀཱསཱརམྨཎཾ ཨཱཀཱསཱནཉྩཱཡཏནཾ ¶ . མཎྜཔལགྒཾ པུརིསཾ ནིསྶིཏོ ཝིཡ ཨཱཀཱསཱརམྨཎཾ ཨཱཀཱསཱནཉྩཱཡཏནཾ ཨཱརབྦྷ པཝཏྟཾ ཝིཉྙཱཎཉྩཱཡཏནཾ. ཏེསཾ དྭིནྣམྤི ཨཁེམབྷཱཝཾ ཙིནྟེཏྭཱ ཨནིསྶཱཡ ཏཾ མཎྜཔལགྒཾ, བཧིཋིཏོ ཝིཡ, ཨཱཀཱསཱནཉྩཱཡཏནཾ ཨཱརམྨཎཾ ཨཀཏྭཱ ཏདབྷཱཝཱརམྨཎཾ ཨཱཀིཉྩཉྙཱཡཏནཾ. མཎྜཔལགྒསྶ ཏནྣིསྶིཏསྶ ཙ ཨཁེམཏཾ ཙིནྟེཏྭཱ བཧིཋིཏཉྩ ‘སུཊྛིཏོ’ཏི མནྟྭཱ ཏཾ ནིསྶཱཡ ཋིཏོ ཝིཡ ཝིཉྙཱཎཱབྷཱཝསངྑཱཏེ བཧིཔདེསེ ཋིཏཾ ཨཱཀིཉྩཉྙཱཡཏནཾ ཨཱརབྦྷ པཝཏྟཾ ནེཝསཉྙཱནཱསཉྙཱཡཏནཾ དཊྛབྦཾ. ཨེཝཾ པཝཏྟམཱནཉྩ –

ཨཱརམྨཎཾ ཀརོཏེཝ, ཨཉྙཱབྷཱཝེན ཏཾ ཨིདཾ;

དིཊྛདོསམྤི རཱཛཱནཾ, ཝུཏྟིཧེཏུ ཡཐཱ ཛནོ. (ཝིསུདྡྷི. ༡.༢༩༢);

ཨིདཉྷི ནེཝསཉྙཱནཱསཉྙཱཡཏནཾ ‘ཨཱསནྣཝིཉྙཱཎཉྩཱཡཏནཔཙྩཏྠིཀཱ ཨཡཾ སམཱཔཏྟཱི’ཏི ཨེཝཾ དིཊྛདོསམྤི ཏཾ ཨཱཀིཉྩཉྙཱཡཏནཾ ཨཉྙསྶ ཨཱརམྨཎསྶ ཨབྷཱཝཱ ཨཱརམྨཎཾ ཀརོཏེཝ. ཡཐཱ ཀིཾ? ‘དིཊྛདོསམྤི རཱཛཱནཾ ཝུཏྟིཧེཏུ ཡཐཱ ཛནོ’. ཡཐཱ ཧི ཨསཾཡཏཾ ཕརུསཀཱཡཝཙཱིམནོསམཱཙཱརཾ ཀཉྩི སབྦདིསམྤཏིཾ རཱཛཱནཾ ‘ཕརུསསམཱཙཱརོ ཨཡ’ནྟི ཨེཝཾ དིཊྛདོསམྤི ཨཉྙཏྠ ཝུཏྟིཾ ཨལབྷམཱནོ ཛནོ ཝུཏྟིཧེཏུ ནིསྶཱཡ ཝཏྟཏི, ཨེཝཾ དིཊྛདོསམྤི ཏཾ ཨཱཀིཉྩཉྙཱཡཏནཾ ཨཉྙཾ ཨཱརམྨཎཾ ཨལབྷམཱནམིདཾ ནེཝསཉྙཱནཱསཉྙཱཡཏནཾ ཨཱརམྨཎཾ ཀརོཏེཝ. ཨེཝཾ ཀུརུམཱནཉྩ –

ཨཱརུལ༹ྷོ དཱིགྷནིསྶེཎིཾ, ཡཐཱ ནིསྶེཎིབཱཧུཀཾ;

པབྦཏགྒཉྩ ཨཱརུལ༹ྷོ, ཡཐཱ པབྦཏམཏྠཀཾ.

ཡཐཱ ཝཱ གིརིམཱརུལ༹ྷོ, ཨཏྟནོཡེཝ ཛཎྞུཀཾ;

ཨོལུབྦྷཏི ཏཐེཝེཏཾ, ཛྷཱནམོལུབྦྷ ཝཏྟཏཱིཏི. (ཝིསུདྡྷི. ༡.༢༩༣);

ཨརཱུཔཱཝཙརཀུསལཀཐཱ ནིཊྛིཏཱ.

ཏེབྷཱུམཀཀུསལཝཎྞནཱ

༢༦༩. ཨིདཱནི ¶ ¶ ཡསྨཱ སབྦཱནིཔེཏཱནི ཏེབྷཱུམཀཀུསལཱནི ཧཱིནཱདིནཱ པབྷེདེན ཝཏྟནྟི, ཏསྨཱ ཏེསཾ ཏཾ པབྷེདཾ དསྶེཏུཾ པུན ཀཏམེ དྷམྨཱ ཀུསལཱཏིཨཱདི ཨཱརདྡྷཾ. ཏཏྠ ཧཱིནནྟི ལཱམཀཾ. ཏཾ ཨཱཡཱུཧནཝསེན ཝེདིཏབྦཾ. ཧཱིནུཏྟམཱནཾ ¶ མཛ྄ཛྷེ བྷཝཾ མཛ྄ཛྷིམཾ. པདྷཱནབྷཱཝཾ ནཱིཏཾ པཎཱིཏཾ, ཨུཏྟམནྟི ཨཏྠོ. ཏཱནིཔི ཨཱཡཱུཧནཝསེནེཝ ཝེདིཏབྦཱནི. ཡསྶ ཧི ཨཱཡཱུཧནཀྑཎེ ཚནྡོ ཝཱ ཧཱིནོ ཧོཏི, ཝཱིརིཡཾ ཝཱ, ཙིཏྟཾ ཝཱ, ཝཱིམཾསཱ ཝཱ, ཏཾ ཧཱིནཾ ནཱམ. ཡསྶ ཏེ དྷམྨཱ མཛ྄ཛྷིམཱ ཙེཝ པཎཱིཏཱ, ཙ ཏཾ མཛ྄ཛྷིམཉྩེཝ པཎཱིཏཉྩ. ཡཾ པན ཀཏྟུཀཱམཏཱསངྑཱཏཾ ཚནྡཾ དྷུརཾ ཚནྡཾ ཛེཊྛཀཾ ཚནྡཾ པུབྦངྒམཾ ཀཏྭཱ ཨཱཡཱུཧིཏཾ, ཏཾ ཚནྡཱདྷིཔཏིཏོ ཨཱགཏཏྟཱ ཚནྡཱདྷིཔཏེཡྻཾ ནཱམ. ཝཱིརིཡཱདྷིཔཏེཡྻཱདཱིསུཔི ཨེསེཝ ནཡོ.

ཨིམསྨིཾ པན ཋཱནེ ཋཏྭཱ ནཡཱ གཎེཏབྦཱ. སབྦཔཋམཾ ཝིབྷཏྟོ ཧི ཨེཀོ ནཡོ, ཧཱིནནྟི ཨེཀོ, མཛ྄ཛྷིམནྟི ཨེཀོ, པཎཱིཏནྟི ཨེཀོ, ཚནྡཱདྷིཔཏེཡྻནྟི ཨེཀོ. ཨིམེ ཏཱཝ ཚནྡཱདྷིཔཏེཡྻེ པཉྩ ནཡཱ. ཨེཝཾ ཝཱིརིཡཱདྷིཔཏེཡྻཱདཱིསུཔཱིཏི ཙཏྟཱརོ པཉྩཀཱ ཝཱིསཏི ཧོནྟི. པུརིམོ ཝཱ ཨེཀོ སུདྡྷིཀནཡོ, ཧཱིནནྟིཨཱདཡོ ཏཡོ, ཚནྡཱདྷིཔཏེཡྻནྟིཨཱདཡོ ཙཏྟཱརོ, ཚནྡཱདྷིཔཏེཡྻཾ ཧཱིནནྟིཨཱདཡོ དྭཱདསཱཏི ཨེཝམྤི ཝཱིསཏི ནཡཱ ཧོནྟི.

ཨིམེ ཝཱིསཏི མཧཱནཡཱ ཀཏྠ ཝིབྷཏྟཱཏི? མཧཱཔཀརཎེ (པཊྛཱ. ༢.༡༤.༡) ཧཱིནཏྟིཀེ ཝིབྷཏྟཱ. ཨིམསྨིཾ པན ཋཱནེ ཧཱིནཏྟིཀཏོ མཛ྄ཛྷིམརཱསིཾ གཧེཏྭཱ ཧཱིནམཛ྄ཛྷིམཔཎཱིཏཝསེན ཏཡོ ཀོཊྛཱསཱ ཀཱཏབྦཱ. ཏཏོཔི མཛ྄ཛྷིམརཱསིཾ ཋཔེཏྭཱ ཧཱིནཔཎཱིཏེ གཧེཏྭཱ ནཝ ནཝ ཀོཊྛཱསཱ ཀཱཏབྦཱ. ཧཱིནསྨིཾཡེཝ ཧི ཧཱིནཾ ཨཏྠི མཛ྄ཛྷིམཾ ཨཏྠི པཎཱིཏཾ ཨཏྠི. པཎཱིཏསྨིམྤི ཧཱིནཾ ཨཏྠི མཛ྄ཛྷིམཾ ཨཏྠི པཎཱིཏཾ ཨཏྠི. ཏཐཱ ཧཱིནཧཱིནསྨིཾ ཧཱིནཾ, ཧཱིནཧཱིནསྨིཾ མཛ྄ཛྷིམཾ, ཧཱིནཧཱིནསྨིཾ པཎཱིཏཾ. ཧཱིནམཛ྄ཛྷིམསྨིཾ ཧཱིནཾ, ཧཱིནམཛ྄ཛྷིམསྨིཾ མཛ྄ཛྷིམཾ, ཧཱིནམཛ྄ཛྷིམསྨིཾ པཎཱིཏཾ. ཧཱིནཔཎཱིཏསྨིཾ ཧཱིནཾ, ཧཱིནཔཎཱིཏསྨིཾ མཛ྄ཛྷིམཾ, ཧཱིནཔཎཱིཏསྨིཾ པཎཱིཏནྟི ཨཡམེཀོ ནཝཀོ. པཎཱིཏཧཱིནསྨིམྤི ཧཱིནཾ ནཱམ ཨཏྠི, པཎཱིཏཧཱིནསྨིཾ མཛ྄ཛྷིམཾ, པཎཱིཏཧཱིནསྨིཾ པཎཱིཏཾ. ཏཐཱ པཎཱིཏམཛ྄ཛྷིམསྨིཾ ཧཱིནཾ, པཎཱིཏམཛ྄ཛྷིམསྨིཾ མཛ྄ཛྷིམཾ, པཎཱིཏམཛ྄ཛྷིམསྨིཾ པཎཱིཏཾ. པཎཱིཏཔཎཱིཏསྨིཾ ཧཱིནཾ, པཎཱིཏཔཎཱིཏསྨིཾ མཛ྄ཛྷིམཾ, པཎཱིཏཔཎཱིཏསྨིཾ པཎཱིཏནྟི. ཨཡཾ དུཏིཡོ ནཝཀོཏི དྭེ ནཝཀཱ ཨཊྛཱརས. ཨིམཱནི ཨཊྛཱརས ཀམྨདྭཱརཱནི ¶ ནཱམ ¶ . ཨིམེཧི པབྷཱཝིཏཏྟཱ ¶ , ཨིམེསཾ ཝསེན, ཨཊྛཱརས ཁཏྟིཡཱ, ཨཊྛཱརས བྲཱཧྨཎཱ, ཨཊྛཱརས ཝེསྶཱ, ཨཊྛཱརས སུདྡཱ, ཨཊྛཙཏྟཱལཱིས གོཏྟཙརཎཱནི ཝེདིཏབྦཱནི.

ཨིམེསུ ཙ པན ཏེབྷཱུམཀེསུ ཀུསལེསུ ཀཱམཱཝཙརཀུསལཾ ཏིཧེཏུཀམྤི དུཧེཏུཀམྤི ཧོཏི ཉཱཎསམྤཡུཏྟཝིཔྤཡུཏྟཝསེན. རཱུཔཱཝཙརཱརཱུཔཱཝཙརཾ པན ཏིཧེཏུཀམེཝ ཉཱཎསམྤཡུཏྟམེཝ. ཀཱམཱཝཙརམྤེཏྠ ཨདྷིཔཏིནཱ སཧཱཔི ཨུཔྤཛྫཏི ཝིནཱཔི. རཱུཔཱཝཙརཱརཱུཔཱཝཙརཾ ཨདྷིཔཏིསམྤནྣམེཝ ཧོཏི. ཀཱམཱཝཙརཀུསལེ ཙེཏྠ ཨཱརམྨཎཱདྷིཔཏི སཧཛཱཏཱདྷིཔཏཱིཏི དྭེཔི ཨདྷིཔཏཡོ ལབྦྷནྟི. རཱུཔཱཝཙརཱརཱུཔཱཝཙརེསུ ཨཱརམྨཎཱདྷིཔཏི ན ལབྦྷཏི, སཧཛཱཏཱདྷིཔཏིཡེཝ ལབྦྷཏི. ཏཏྠ ཙིཏྟསྶ ཙིཏྟཱདྷིཔཏེཡྻབྷཱཝོ སམྤཡུཏྟདྷམྨཱནཾ ཝསེན ཝུཏྟོ. དྭིནྣཾ པན ཙིཏྟཱནཾ ཨེཀཏོ ཨབྷཱཝེན སམྤཡུཏྟཙིཏྟསྶ ཙིཏྟཱདྷིཔཏི ནཱམ ནཏྠི. ཏཐཱ ཚནྡཱདཱིནཾ ཚནྡཱདྷིཔཏིཨཱདཡོ. ཀེཙི པན ‘སཙེ ཙིཏྟཝཏོ ཀུསལཾ ཧོཏི, མཡ྄ཧཾ བྷཝིསྶཏཱིཏི ཨེཝཾ ཡཾ ཙིཏྟཾ དྷུརཾ ཀཏྭཱ ཛེཊྛཀཾ ཀཏྭཱ ཨཔརཾ ཀུསལཙིཏྟཾ ཨཱཡཱུཧིཏཾ, ཏསྶ ཏཾ པུརིམཙིཏྟཾ ཙིཏྟཱདྷིཔཏི ནཱམ ཧོཏི, ཏཏོ ཨཱགཏཏྟཱ ཨིདཾ ཙིཏྟཱདྷིཔཏེཡྻཾ ནཱམཱ’ཏི ཨེཝཾ ཨཱགམནཝསེནཱཔི ཨདྷིཔཏིཾ ནཱམ ཨིཙྪནྟི. ཨཡཾ པན ནཡོ ནེཝ པཱལི༹ཡཾ ན ཨཊྛཀཐཱཡཾ དིསྶཏི. ཏསྨཱ ཝུཏྟནཡེནེཝ ཨདྷིཔཏིབྷཱཝོ ཝེདིཏབྦོ. ཨིམེསུ ཙ ཨེཀཱུནཝཱིསཏིཡཱ མཧཱནཡེསུ པུརིམེ སུདྡྷིཀནཡེ ཝུཏྟཔརིམཱཎཱནེཝ ཙིཏྟཱནི ཙ ནཝཀཱ ཙ པཱཋཝཱརཱ ཙ ཧོནྟི. ཏསྨཱ ཉཱཎསམྤཡུཏྟེསུ ཝུཏྟཔརིམཱཎཏོ ཝཱིསཏིགུཎོ ཙིཏྟནཝཀཝཱརབྷེདོ ཝེདིཏབྦོ, ཙཏཱུསུ ཉཱཎཝིཔྤཡུཏྟེསུ སོལ༹སགུཎོཏི, ཨཡཾ ཏེབྷཱུམཀཀུསལེ པཀིཎྞཀཀཐཱ ནཱམཱཏི.

ཏེབྷཱུམཀཀུསལཾ.

ལོཀུཏྟརཀུསལཝཎྞནཱ

༢༧༧. ཨེཝཾ བྷཝཏྟཡསམྤཏྟིནིབྦཏྟཀཾ ཀུསལཾ དསྶེཏྭཱ ཨིདཱནི སབྦབྷཝསམཏིཀྐམནཱཡ ལོཀུཏྟརཀུསལཾ དསྶེཏུཾ པུན ཀཏམེ དྷམྨཱ ཀུསལཱཏིཨཱདི ཨཱརདྡྷཾ. ཏཏྠ ལོཀུཏྟརནྟི ཀེནཊྛེན ལོཀུཏྟརཾ? ལོཀཾ ¶ ¶ ཏརཏཱིཏི, ལོཀུཏྟརཾ ལོཀཾ ཨུཏྟརཏཱིཏི ལོཀུཏྟརཾ; ལོཀཾ ¶ སམཏིཀྐམྨ ཨབྷིབྷུཡྻ ཏིཊྛཏཱིཏི ལོཀུཏྟརཾ (པཊི. མ. ༢.༤༣). ཛྷཱནཾ བྷཱཝེཏཱིཏི ཨེཀཙིཏྟཀྑཎིཀཾ ཨཔྤནཱཛྷཱནཾ བྷཱཝེཏི ཛནེཏི ཝཌྜྷེཏི.

ལོཀཏོ ནིཡྻཱཏི ཝཊྚཏོ ནིཡྻཱཏཱིཏི ནིཡྻཱནིཀཾ. ནིཡྻཱཏི ཝཱ ཨེཏེནཱཏི ནིཡྻཱནིཀཾ. ཏཾསམངྒཱི ཧི པུགྒལོ དུཀྑཾ པརིཛཱནནྟོ ནིཡྻཱཏི, སམུདཡཾ པཛཧནྟོ ནིཡྻཱཏི, ནིརོདྷཾ སཙྪིཀརོནྟོ ནིཡྻཱཏི, མགྒཾ བྷཱཝེནྟོ ནིཡྻཱཏི. ཡཐཱ ཙ པན ཏེབྷཱུམཀཀུསལཾ ཝཊྚསྨིཾ ཙུཏིཔཊིསནྡྷིཡོ ཨཱཙིནཱཏི ཝཌྜྷེཏཱིཏི ཨཱཙཡགཱམཱི ནཱམ ཧོཏི, ན ཏཐཱ ཨིདཾ. ཨིདཾ པན ཡཐཱ ཨེཀསྨིཾ པུརིསེ ཨཊྛཱརསཧཏྠཾ པཱཀཱརཾ ཙིནནྟེ ཨཔརོ མཧཱམུགྒརཾ གཧེཏྭཱ ཏེན ཙིཏཙིཏཊྛཱནཾ ཨཔཙིནནྟོ ཝིདྡྷཾསེནྟོ ཨེཝ གཙྪེཡྻ, ཨེཝམེཝ ཏེབྷཱུམཀཀུསལེན ཙིཏཱ ཙུཏིཔཊིསནྡྷིཡོ པཙྩཡཝེཀལླཀརཎེན ཨཔཙིནནྟཾ ཝིདྡྷཾསེནྟཾ གཙྪཏཱིཏི ཨཔཙཡགཱམི.

དིཊྛིགཏཱནཾ པཧཱནཱཡཱཏི, ཨེཏྠ དིཊྛིཡོ ཨེཝ དིཊྛིགཏཱནི, གཱུཐགཏཾ མུཏྟགཏནྟིཨཱདཱིནི (ཨ. ནི. ༩.༡༡) ཝིཡ. དྭཱསཊྛིཡཱ ཝཱ དིཊྛཱིནཾ ཨནྟོགདྷཏྟཱ དིཊྛཱིསུ གཏཱནཱིཏིཔི དིཊྛིགཏཱནི. དིཊྛིཡཱ ཝཱ གཏཾ ཨེཏེསནྟིཔི དིཊྛིགཏཱནི. དིཊྛིསདིསགམནཱནི དིཊྛིསདིསཔྤཝཏྟཱནཱིཏི ཨཏྠོ. ཀཱནི པན ཏཱནཱིཏི? སསམྤཡུཏྟཱནི སཀྐཱཡདིཊྛིཝིཙིཀིཙྪཱསཱིལབྦཏཔརཱམཱསཨཔཱཡགམནཱིཡརཱགདོསམོཧཱཀུསལཱནི. ཏཱནི ཧི ཡཱཝ པཋམམགྒབྷཱཝནཱ ཏཱཝ པཝཏྟིསབྦྷཱཝཏོ དིཊྛིསདིསགམནཱནཱིཏི ཝུཙྩནྟི. ཨིཏི དིཊྛིཡོ ཙ དིཊྛིགཏཱནི ཙ དིཊྛིགཏཱནི. ཏེསཾ དིཊྛིགཏཱནཾ. པཧཱནཱཡཱཏི སམུཙྪེདཝསེནེཝ པཛཧནཏྠཱཡ. པཋམཱཡཱཏི གཎནཝསེནཔི པཋམུཔྤཏྟིཝསེནཔི པཋམཱཡ. བྷཱུམིཡཱཏི ‘‘ཨནནྟརཧིཏཱཡ བྷཱུམིཡཱ’’ཏིཨཱདཱིསུ (པཱརཱ. ༢༧; མ. ནི. ༢.༢༩༦) ཏཱཝ ཨཡཾ མཧཱཔཐཝཱི བྷཱུམཱིཏི ཝུཙྩཏི. ‘‘སུཁབྷཱུམིཡཾ ཀཱམཱཝཙརེ’’ཏིཨཱདཱིསུ (དྷ. ས. ༩༨༨) ཙིཏྟུཔྤཱདོ. ཨིདྷ པན སཱམཉྙཕལཾ ཨདྷིཔྤེཏཾ. ཏཉྷི སམྤཡུཏྟཱནཾ ནིསྶཡབྷཱཝཏོ ཏེ དྷམྨཱ བྷཝནྟི ཨེཏྠཱཏི བྷཱུམི. ཡསྨཱ ཝཱ སམཱནེཔི ལོཀུཏྟརབྷཱཝེ སཡམྤི བྷཝཏི ཨུཔྤཛྫཏི, ན ནིབྦཱནཾ ཝིཡ ཨཔཱཏུབྷཱཝཾ, ཏསྨཱཔི བྷཱུམཱིཏི ཝུཙྩཏི; ཏསྶཱ པཋམཱཡ བྷཱུམིཡཱ. པཏྟིཡཱཏི སོཏཱཔཏྟིཕལསངྑཱཏསྶ ¶ པཋམསྶ སཱམཉྙཕལསྶ ¶ པཏྟཏྠཱཡ པཊིལཱབྷཏྠཱཡཱཏི ཨེཝམེཏྠ ཨཏྠོ ཝེདིཏབྦོ. ཝིཝིཙྩཱཏི སམུཙྪེདཝིཝེཀཝསེན ཝིཝིཙྩིཏྭཱ, ཝིནཱ ཧུཏྭཱ.

ཨིདཱནི ཀིཉྩཱཔི ལོཀིཡཛ྄ཛྷཱནམྤི ན ཝིནཱ པཊིཔདཱཡ ཨིཛ྄ཛྷཏི, ཨེཝཾ སནྟེཔི ཨིདྷ སུདྡྷིཀནཡཾ ¶ པཧཱཡ ལོཀུཏྟརཛ྄ཛྷཱནཾ པཊིཔདཱཡ སདྡྷིཾཡེཝ གརུཾ ཀཏྭཱ དེསེཏུཀཱམཏཱཡ དུཀྑཔཊིཔདཾ དནྡྷཱབྷིཉྙནྟིཨཱདིམཱཧ.

ཏཏྠ ཡོ ཨཱདིཏོཝ ཀིལེསེ ཝིཀྑམྦྷེནྟོ དུཀྑེན སསངྑཱརེན སཔྤཡོགེན ཀིལམནྟོ ཝིཀྑམྦྷེཏི ཏསྶ དུཀྑཱ པཊིཔདཱ ཧོཏི; ཡོ པན ཝིཀྑམྦྷིཏ ཀིལེསོ ཝིཔསྶནཱཔརིཝཱསཾ ཝསནྟོ ཙིརེན མགྒཔཱཏུབྷཱཝཾ པཱཔུཎཱཏི ཏསྶ དནྡྷཱབྷིཉྙཱ ཧོཏི. ཨིཏི ཡོ ཀོཙི ཝཱརོ དུཀྑཔཊིཔདདནྡྷཱབྷིཉྙོ ནཱམ ཀཏོ.

ཀཏམཾ པན ཝཱརཾ རོཙེསུནྟི? ཡཏྠ སཀིཾ ཝིཀྑམྦྷིཏཱ ཀིལེསཱ སམུདཱཙརིཏྭཱ དུཏིཡམྤི ཝིཀྑམྦྷིཏཱ པུན སམུདཱཙརནྟི, ཏཏིཡཾ ཝིཀྑམྦྷིཏེ པན ཏཐཱཝིཀྑམྦྷིཏེཝ ཀཏྭཱ མགྒེན སམུགྒྷཱཏཾ པཱཔེཏི, ཨིམཾ ཝཱརཾ རོཙེསུཾ. ཨིམསྶ ཝཱརསྶ དུཀྑཱཔཊིཔདཱ དནྡྷཱབྷིཉྙཱཏི ནཱམཾ ཀཏཾ. ཨེཏྟཀེན པན ན པཱཀཊཾ ཧོཏི. ཏསྨཱ ཨེཝམེཏྠ ཨཱདིཏོ པཊྛཱཡ ཝིབྷཱཝནཱ ཝེདིཏབྦཱ – ཡོ ཧི ཙཏྟཱརི མཧཱབྷཱུཏཱནི པརིགྒཧེཏྭཱ ཨུཔཱདཱརཱུཔཾ པརིགྒཎྷཱཏི, ཨརཱུཔཾ པརིགྒཎྷཱཏི, ‘རཱུཔཱརཱུཔཾ’ པན པརིགྒཎྷནྟོ དུཀྑེན ཀསིརེན ཀིལམནྟོ པརིགྒཧེཏུཾ སཀྐོཏི, ཏསྶ དུཀྑཱ པཊིཔདཱ ནཱམ ཧོཏི. པརིགྒཧིཏརཱུཔཱརཱུཔསྶ པན ཝིཔསྶནཱཔརིཝཱསེ མགྒཔཱཏུབྷཱཝདནྡྷཏཱཡ དནྡྷཱབྷིཉྙཱ ནཱམ ཧོཏི.

ཡོཔི རཱུཔཱརཱུཔཾ པརིགྒཧེཏྭཱ ‘ནཱམརཱུཔཾ’ ཝཝཏྠཔེནྟོ དུཀྑེན ཀསིརེན ཀིལམནྟོ ཝཝཏྠཔེཏི, ཝཝཏྠཱཔིཏེ ཙ ནཱམརཱུཔེ ཝིཔསྶནཱཔརིཝཱསཾ ཝསནྟོ ཙིརེན མགྒཾ ཨུཔྤཱདེཏུཾ སཀྐོཏི, ཏསྶཱཔི དུཀྑཱ པཊིཔདཱ དནྡྷཱབྷིཉྙཱ ནཱམ ཧོཏི.

ཨཔརོ ནཱམརཱུཔམྤི ཝཝཏྠཔེཏྭཱ ‘པཙྩཡེ’ པརིགྒཎྷནྟོ དུཀྑེན ཀསིརེན ཀིལམནྟོ པརིགྒཎྷཱཏི, པཙྩཡེ ཙ པརིགྒཧེཏྭཱ ཝིཔསྶནཱཔརིཝཱསཾ ཝསནྟོ ཙིརེན མགྒཾ ¶ ཨུཔྤཱདེཏི, ཨེཝམྤི དུཀྑཱ པཊིཔདཱ དནྡྷཱབྷིཉྙཱ ནཱམ ཧོཏི.

ཨཔརོ ¶ པཙྩཡེཔི པརིགྒཧེཏྭཱ ‘ལཀྑཎཱནི’ པཊིཝིཛ྄ཛྷནྟོ དུཀྑེན ཀསིརེན ཀིལམནྟོ པཊིཝིཛ྄ཛྷཏི, པཊིཝིདྡྷལཀྑཎོ ཙ ཝིཔསྶནཱཔརིཝཱསཾ ཝསནྟོ ཙིརེན མགྒཾ ཨུཔྤཱདེཏི, ཨེཝམྤི དུཀྑཱ པཊིཔདཱ དནྡྷཱབྷིཉྙཱ ནཱམ ཧོཏི.

ཨཔརོ ¶ ལཀྑཎཱནིཔི པཊིཝིཛ྄ཛྷིཏྭཱ ཝིཔསྶནཱཉཱཎེ ཏིཀྑེ སཱུརེ པསནྣེ ཝཧནྟེ ཨུཔྤནྣཾ ‘ཝིཔསྶནཱནིཀནྟིཾ’ པརིཡཱདིཡམཱནོ དུཀྑེན ཀསིརེན ཀིལམནྟོ པརིཡཱདིཡཏི, ནིཀནྟིཉྩ པརིཡཱདིཡིཏྭཱ ཝིཔསྶནཱཔརིཝཱསཾ ཝསནྟོ ཙིརེན མགྒཾ ཨུཔྤཱདེཏི, ཨེཝམྤི དུཀྑཱ པཊིཔདཱ དནྡྷཱབྷིཉྙཱ ནཱམ ཧོཏི. ཨིམཾ ཝཱརཾ རོཙེསུཾ. ཨིམསྶ ཝཱརསྶ ཨེཏཾ ནཱམཾ ཀཏཾ. ཨིམིནཱཝ ཨུཔཱཡེན པརཏོ ཏིསྶོ པཊིཔདཱ ཝེདིཏབྦཱ.

ཕསྶོ ཧོཏཱིཏིཨཱདཱིསུ ཨནཉྙཱཏཉྙསྶཱམཱིཏིནྡྲིཡཾ, སམྨཱཝཱཙཱ, སམྨཱཀམྨནྟོ, སམྨཱཨཱཛཱིཝོཏི ཙཏྟཱརི པདཱནི ཨདྷིཀཱནི. ནིདྡེསཝཱརེ ཙ ཝིཏཀྐཱདིནིདྡེསེསུ ‘མགྒངྒ’ནྟིཨཱདཱིནི པདཱནི ཨདྷིཀཱནི. སེསཾ སབྦཾ ཧེཊྛཱ ཝུཏྟསདིསམེཝ. བྷཱུམནྟརཝསེན པན ལོཀུཏྟརཏཱཝ ཨིདྷ ཝིསེསོ.

ཏཏྠ ཨནཉྙཱཏཉྙསྶཱམཱིཏིནྡྲིཡནྟི ‘ཨནམཏགྒེ སཾསཱརཝཊྚེ ཨནཉྙཱཏཾ ཨམཏཾ པདཾ ཙཏུསཙྩདྷམྨམེཝ ཝཱ ཛཱནིསྶཱམཱི’ཏི པཊིཔནྣསྶ ཨིམིནཱ པུབྦཱབྷོགེན ཨུཔྤནྣཾ ཨིནྡྲིཡཾ. ལཀྑཎཱདཱིནི པནསྶ ཧེཊྛཱ པཉྙིནྡྲིཡེ ཝུཏྟནཡེནེཝ ཝེདིཏབྦཱནི.

སུནྡརཱ པསཏྠཱ ཝཱ ཝཱཙཱ སམྨཱཝཱཙཱ. ཝཙཱིདུཙྩརིཏསམུགྒྷཱཊིཀཱཡ མིཙྪཱཝཱཙཱཝིརཏིཡཱ ཨེཏཾ ཨདྷིཝཙནཾ. སཱ པརིགྒཧལཀྑཎཱ ཝིརམཎརསཱ མིཙྪཱཝཱཙཔྤཧཱནཔཙྩུཔཊྛཱནཱ. སུནྡརོ པསཏྠོ ཝཱ ཀམྨནྟོ སམྨཱཀམྨནྟོ. མིཙྪཱཀམྨནྟསམུཙྪེདིཀཱཡ པཱཎཱཏིཔཱཏཱདིཝིརཏིཡཱ ཨེཏཾ ནཱམཾ. སོ སམུཊྛཱནལཀྑཎོ ཝིརམཎརསོ མིཙྪཱཀམྨནྟཔྤཧཱནཔཙྩུཔཊྛཱནོ. སུནྡརོ པསཏྠོ ཝཱ ཨཱཛཱིཝོ སམྨཱཨཱཛཱིཝོ. མིཙྪཱཛཱིཝཝིརཏིཡཱ ཨེཏཾ ཨདྷིཝཙནཾ. སོ ཝོདཱནལཀྑཎོ ཉཱཡཱཛཱིཝཔྤཝཏྟིརསོ ¶ མིཙྪཱཛཱིཝཔྤཧཱནཔཙྩུཔཊྛཱནོ.

ཨཔིཙ ཧེཊྛཱ ཝིརཏིཏྟཡེ ཝུཏྟཝསེནཔེཏྠ ལཀྑཎཱདཱིནི ཝེདིཏབྦཱནི. ཨིཏི ཨིམེསཾ ཏིཎྞཾ དྷམྨཱནཾ ཝསེན ཧེཊྛཱ ཝུཏྟཾ མགྒཔཉྩཀཾ ཨིདྷ མགྒཊྛཀཾ ཝེདིཏབྦཾ. ཡེཝཱཔནཀེསུ ཙ ཨིམེསཾ ཨབྷཱཝོ. ཏཐཱ ཀརུཎཱམུདིཏཱནཾ. ཨིམེ ¶ ཧི ཏཡོ དྷམྨཱ ཨིདྷ པཱལི༹ཡཾ ཨཱགཏཏྟཱཝ ཡེཝཱཔནཀེསུ ན གཧིཏཱ. ཀརུཎཱམུདིཏཱ པན སཏྟཱརམྨཎཱ, ཨིམེ དྷམྨཱ ནིབྦཱནཱརམྨཎཱཏི ཏཱཔེཏྠ ན གཧིཏཱ. ཨཡཾ ཏཱཝ ཨུདྡེསཝཱརེ ཝིསེསཏྠོ.

༢༨༣. ནིདྡེསཝཱརེ ¶ པན མགྒངྒཾ མགྒཔརིཡཱཔནྣནྟི ཨེཏྠ ཏཱཝ མགྒསྶ ཨངྒནྟི མགྒངྒཾ; མགྒཀོཊྛཱསོཏི ཨཏྠོ. ཡཐཱ པན ཨརཉྙེ པརིཡཱཔནྣཾ ཨརཉྙཔརིཡཱཔནྣཾ ནཱམ ཧོཏི, ཨེཝཾ མགྒེ པརིཡཱཔནྣནྟི མགྒཔརིཡཱཔནྣཾ. མགྒསནྣིསྶིཏནྟི ཨཏྠོ.

༢༨༥. པཱིཏིསམྦོཛ྄ཛྷངྒོཏི ཨེཏྠ པཱིཏི ཨེཝ སམྦོཛ྄ཛྷངྒོཏི པཱིཏིསམྦོཛ྄ཛྷངྒོ. ཏཏྠ བོདྷིཡཱ བོདྷིསྶ ཝཱ ཨངྒོཏི བོཛ྄ཛྷངྒོ. ཨིདཾ ཝུཏྟཾ ཧོཏི – ཡཱ ཨཡཾ དྷམྨསཱམགྒཱི ཡཱཡ ལོཀུཏྟརམགྒཀྑཎེ ཨུཔྤཛྫམཱནཱཡ ལཱིནུདྡྷཙྩཔཏིཊྛཱནཱཡཱུཧནཀཱམསུཁཏྟཀིལམཐཱནུཡོགཨུཙྪེདསསྶཏཱབྷིནིཝེསཱདཱིནཾ ཨནེཀེསཾ ཨུཔདྡཝཱནཾ པཊིཔཀྑབྷཱུཏཱཡ སཏིདྷམྨཝིཙཡཝཱིརིཡཔཱིཏིཔསྶདྡྷིསམཱདྷིཨུཔེཀྑཱསངྑཱཏཱཡ དྷམྨསཱམགྒིཡཱ ཨརིཡསཱཝཀོ བུཛ྄ཛྷཏཱིཏི ཀཏྭཱ བོདྷཱིཏི ཝུཙྩཏི. བུཛ྄ཛྷཏཱིཏི ཀིལེསསནྟཱནནིདྡཱཡ ཨུཊྛཧཏི, ཙཏྟཱརི ཝཱ ཨརིཡསཙྩཱནི པཊིཝིཛ྄ཛྷཏི, ནིབྦཱནམེཝ ཝཱ སཙྪིཀརོཏི. ཏསྶཱ དྷམྨསཱམགྒཱིསངྑཱཏཱཡ བོདྷིཡཱ ཨངྒོཏིཔི བོཛ྄ཛྷངྒོ, ཛྷཱནངྒམགྒངྒཱདཱིནི ཝིཡ. ཡོཔེས ཡཐཱཝུཏྟཔྤཀཱརཱཡ ཨེཏཱཡ དྷམྨསཱམགྒིཡཱ བུཛ྄ཛྷཏཱིཏི ཀཏྭཱ ཨརིཡསཱཝཀོ བོདྷཱིཏི ཝུཙྩཏི, ཏསྶ བོདྷིསྶ ཨངྒོཏིཔི བོཛ྄ཛྷངྒོ; སེནངྒརཐངྒཱདཡོ ཝིཡ. ཏེནཱཧུ ཨཊྛཀཐཱཙརིཡཱ – ‘‘བུཛ྄ཛྷནཀསྶ པུགྒལསྶ ཨངྒཱཏི ཝཱ བོཛ྄ཛྷངྒཱ’’ཏི (ཝིབྷ. ཨཊྛ. ༤༦༦; སཾ. ནི. ཨཊྛ. ༣.༥.༡༨༢).

ཨཔིཙ ‘‘བོཛ྄ཛྷངྒཱཏི ཀེནཊྛེན བོཛ྄ཛྷངྒཱ? བོདྷཱཡ སཾཝཏྟནྟཱིཏི བོཛ྄ཛྷངྒཱ, བུཛ྄ཛྷནྟཱིཏི བོཛ྄ཛྷངྒཱ, ཨནུབུཛ྄ཛྷནྟཱིཏི ¶ བོཛ྄ཛྷངྒཱ, པཊིབུཛ྄ཛྷནྟཱིཏི བོཛ྄ཛྷངྒཱ, སམྦུཛ྄ཛྷནྟཱིཏི བོཛ྄ཛྷངྒཱ’’ཏི (པཊི. མ. ༢.༡༧) ཨིམིནཱ པཊིསམྦྷིདཱནཡེནཱཔི བོཛ྄ཛྷངྒཏྠོ ཝེདིཏབྦོ. པསཏྠོ སུནྡརོ ཝཱ བོཛ྄ཛྷངྒོཏི སམྦོཛ྄ཛྷངྒོ. ཨེཝཾ པཱིཏི ཨེཝ སམྦོཛ྄ཛྷངྒོ པཱིཏིསམྦོཛ྄ཛྷངྒོཏི. ཙིཏྟེཀགྒཏཱནིདྡེསཱདཱིསུཔི ཨིམིནཱཝ ནཡེན ཨཏྠོ ཝེདིཏབྦོ.

༢༩༦. ཏེསཾ དྷམྨཱནནྟི ཡེ ཏསྨིཾ སམཡེ པཊིཝེདྷཾ གཙྪནྟི ཙཏུསཙྩདྷམྨཱ, ཏེསཾ དྷམྨཱནཾ. ཨནཉྙཱཏཱནནྟི ཀིཉྩཱཔི པཋམམགྒེན ཏེ དྷམྨཱ ཉཱཏཱ ¶ ནཱམ ཧོནྟི, ཡཐཱ པན པཀཏིཡཱ ཨནཱགཏཔུབྦཾ ཝིཧཱརཾ ཨཱགནྟྭཱ ཝིཧཱརམཛ྄ཛྷེ ཋིཏོཔི པུགྒལོ པཀཏིཡཱ ཨནཱགཏབྷཱཝཾ ཨུཔཱདཱཡ ‘ཨནཱགཏཔུབྦཾ ཋཱནཾ ཨཱགཏོམྷཱི’ཏི ཝདཏི, ཡཐཱ ཙ པཀཏིཡཱ ཨཔིལ༹ནྡྷཔུབྦཾ མཱལཾ པིལ༹ནྡྷིཏྭཱ, ཨནིཝཏྠཔུབྦཾ ཝཏྠཾ ནིཝཱསེཏྭཱ, ཨབྷུཏྟཔུབྦཾ བྷོཛནཾ བྷུཉྫིཏྭཱ, པཀཏིཡཱ ཨབྷུཏྟབྷཱཝཾ ཨུཔཱདཱཡ ཨབྷུཏྟཔུབྦཾ བྷོཛནཾ བྷུཏྟོམྷཱིཏི ཝདཏི, ཨེཝམིདྷཱཔི ¶ ཡསྨཱ པཀཏིཡཱ ཨིམིནཱ པུགྒལེན ཨིམེ དྷམྨཱ ན ཉཱཏཔུབྦཱ ཏསྨཱ ཨནཉྙཱཏཱནནྟི ཝུཏྟཾ. ཨདིཊྛཱདཱིསུཔི ཨེསེཝ ནཡོ. ཏཏྠ ཨདིཊྛཱནནྟི ཨིཏོ པུབྦེ པཉྙཱཙཀྑུནཱ ཨདིཊྛཱནཾ. ཨཔྤཏྟཱནནྟི ཨདྷིགམནཝསེན ཨཔྤཏྟཱནཾ. ཨཝིདིཏཱནནྟི ཉཱཎེན ཨཔཱཀཊཀཏཱནཾ. ཨསཙྪིཀཏཱནནྟི ཨཔཙྩཀྑཀཏཱནཾ. སཙྪིཀིརིཡཱཡཱཏི པཙྩཀྑཀརཎཏྠཾ. ཡཐཱ ཙ ཨིམིནཱ པདེན, ཨེཝཾ སེསེཧིཔི སདྡྷིཾ ཨནཉྙཱཏཱནཾ ཉཱཎཱཡ, ཨདིཊྛཱནཾ དསྶནཱཡ, ཨཔྤཏྟཱནཾ པཏྟིཡཱ, ཨཝིདིཏཱནཾ ཝེདཱཡཱཏི ཡོཛནཱ ཀཱཏབྦཱ.

༢༩༩. ཙཏཱུཧི ཝཙཱིདུཙྩརིཏེཧཱིཏིཨཱདཱིསུ ཝཙཱིཏི ཝཙཱིཝིཉྙཏྟི ཝེདིཏབྦཱ. ཏིཎྞཾ དོསཱནཾ ཡེན ཀེནཙི དུཊྛཱནི ཙརིཏཱནཱིཏི དུཙྩརིཏཱནི. ཝཙཱིཏོ པཝཏྟཱནི དུཙྩརིཏཱནི ཝཙཱིདུཙྩརིཏཱནི, ཝཙིཡཱ ཝཱ ནིཔྥཱདིཏཱནི དུཙྩརིཏཱནི ཝཙཱིདུཙྩརིཏཱནི. ཏེཧི ཝཙཱིདུཙྩརིཏེཧི. ཨཱརཀཱ རམཏཱིཏི ཨཱརཏི. ཝིནཱ ཏེཧི རམཏཱིཏི ཝིརཏི. ཏཏོ ཏཏོ པཊིནིཝཏྟཱཝ ཧུཏྭཱ ཏེཧི ཝིནཱ རམཏཱིཏི པཊིཝིརཏི. ཨུཔསགྒཝསེན ཝཱ པདཾ ཝཌྜྷིཏཾ. སབྦམིདཾ ཨོརམཎབྷཱཝསྶེཝཱདྷིཝཙནཾ. ཝེརཾ མཎཏི, ཝིནཱསེཏཱིཏི ཝེརམཎཱི. ཨིདམྤི ཨོརམཎསྶེཝ ཝེཝཙནཾ. ཡཱཡ ¶ པན ཙེཏནཱཡ མུསཱཝཱདཱདཱིནི བྷཱསམཱནོ ཀརོཏི ནཱམ, ཨཡཾ ལོཀུཏྟརམགྒཝིརཏི. ཨུཔྤཛྫིཏྭཱ ཏཾ ཀིརིཡཾ ཀཱཏུཾ ན དེཏི, ཀིརིཡཱཔཐཾ པཙྪིནྡཏཱིཏི ཨཀིརིཡཱ. ཏཐཱ ཏཾ ཀརཎཾ ཀཱཏུཾ ན དེཏི, ཀརཎཔཐཾ པཙྪིནྡཏཱིཏི ཨཀརཎཾ. ཡཱཡ ཙ ཙེཏནཱཡ ཙཏུབྦིདྷཾ ཝཙཱིདུཙྩརིཏཾ བྷཱསམཱནོ ཨཛ྄ཛྷཱཔཛྫཏི ནཱམ, ཨཡཾ ཨུཔྤཛྫིཏྭཱ ཏཐཱ ཨཛ྄ཛྷཱཔཛྫིཏུཾ ན དེཏཱིཏི ཨནཛ྄ཛྷཱཔཏྟི.

ཝེལཱཨནཏིཀྐམོཏི ཨེཏྠ ‘‘ཏཱཡ ཝེལཱཡཱ’’ཏིཨཱདཱིསུ (དཱི. ནི. ༢.༡༥༤; མཧཱཝ. ༡-༣; ཨུདཱ. ༡ ཨཱདཡོ) ཏཱཝ ཀཱལོ ཝེལཱཏི ཨཱགཏོ. ‘‘ཨུརུཝེལཱཡཾ ཝིཧརཏཱི’’ཏི (མཧཱཝ. ༡; སཾ. ནི. ༡.༡༣༧) ཨེཏྠ རཱསི. ‘‘ཋིཏདྷམྨོ ཝེལཾ ནཱཏིཝཏྟཏཱི’’ཏི (ཙཱུལ༹ཝ. ༣༨༤; ཨ. ནི. ༨.༡༩; ཨུདཱ. ༤༥) ཨེཏྠ སཱིམཱ. ཨིདྷཱཔི སཱིམཱཝ. ཨནཏིཀྐམནཱིཡཊྛེན ¶ ཧི ཙཏྟཱརི ཝཙཱིསུཙརིཏཱནི ཝེལཱཏི ཨདྷིཔྤེཏཱནི. ཨིཏི ཡཱཡ ཙེཏནཱཡ ཙཏྟཱརི ཝཙཱིདུཙྩརིཏཱནི བྷཱསམཱནོ ཝེལཾ ཨཏིཀྐམཏི ནཱམ, ཨཡཾ ཨུཔྤཛྫིཏྭཱ ཏཾ ཝེལཾ ཨཏིཀྐམིཏུཾ ན དེཏཱིཏི ཝེལཱཨནཏིཀྐམོཏི ཝུཏྟཱ. ཝེལཱཡཏཱིཏི ཝཱ ཝེལཱ, ཙལཡཏི ཝིདྡྷཾསེཏཱིཏི ཨཏྠོ. ཀིཾ ཝེལཱཡཏི? ཙཏུབྦིདྷཾ ཝཙཱིདུཙྩརིཏཾ. ཨིཏི ཝེལཱཡནཏོ ‘ཝེལཱ’. པུརིསསྶ ¶ པན ཧིཏསུཁཾ ཨནཏིཀྐམིཏྭཱ ཝཏྟཏཱིཏི ‘ཨནཏིཀྐམོ’. ཨེཝམེཏྠ པདདྭཡཝསེནཱཔི ཨཏྠོ ཝེདིཏབྦོ.

སེཏུཾ ཧནཏཱིཏི སེཏུགྷཱཏོ; ཙཏུནྣཾ ཝཙཱིདུཙྩརིཏཱནཾ པདགྷཱཏོ པཙྩཡགྷཱཏོཏི ཨཏྠོ. པཙྩཡོ ཧི ཨིདྷ སེཏཱུཏི ཨདྷིཔྤེཏོ. ཏཏྲཱཡཾ ཝཙནཏྠོ – རཱགཱདིཀོ ཙཏུནྣཾ ཝཙཱིདུཙྩརིཏཱནཾ པཙྩཡོ ཝཊྚསྨིཾ པུགྒལཾ སིནོཏི བནྡྷཏཱིཏི སེཏུ. སེཏུསྶ གྷཱཏོ སེཏུགྷཱཏོ. ཝཙཱིདུཙྩརིཏཔཙྩཡསམུགྒྷཱཊིཀཱཡ ཝིརཏིཡཱ ཨེཏཾ ཨདྷིཝཙནཾ. ཨཡཾ པན སམྨཱཝཱཙཱསངྑཱཏཱ ཝིརཏི པུབྦབྷཱགེ ནཱནཱཙིཏྟེསུ ལབྦྷཏི. ཨཉྙེནེཝ ཧི ཙིཏྟེན མུསཱཝཱདཱ ཝིརམཏི, ཨཉྙེན པེསུཉྙཱདཱིཧི. ལོཀུཏྟརམགྒཀྑཎེ པན ཨེཀཙིཏྟསྨིཾཡེཝ ལབྦྷཏི. ཙཏུབྦིདྷཱཡ ཧི ཝཙཱིདུཙྩརིཏཙེཏནཱཡ པདཔཙྪེདཾ ཀུརུམཱནཱ མགྒངྒཾ པཱུརཡམཱནཱ ཨེཀཱཝ ཝིརཏི ཨུཔྤཛྫཏི.

༣༠༠. ཀཱཡདུཙྩརིཏེཧཱིཏི ཀཱཡཏོ པཝཏྟེཧི ཀཱཡེན ཝཱ ནིཔྥཱདིཏེཧི པཱཎཱཏིཔཱཏཱདཱིཧི དུཙྩརིཏེཧི. སེསཾ པུརིམནཡེནེཝ ཝེདིཏབྦཾ. ཨཡམྤི སམྨཱཀམྨནྟསངྑཱཏཱ ཝིརཏི པུབྦབྷཱགེ ནཱནཱཙིཏྟེསུ ལབྦྷཏི. ཨཉྙེནེཝ ཧི ཙིཏྟེན པཱཎཱཏིཔཱཏཱ ¶ ཝིརམཏི, ཨཉྙེན ཨདིནྣཱདཱནམིཙྪཱཙཱརེཧི. ལོཀུཏྟརམགྒཀྑཎེ པན ཨེཀཙིཏྟསྨིཾཡེཝ ལབྦྷཏི. ཏིཝིདྷཱཡ ཧི ཀཱཡདུཙྩརིཏཙེཏནཱཡ པདཔཙྪེདཾ ཀུརུམཱནཱ མགྒངྒཾ པཱུརཡམཱནཱ ཨེཀཱཝ ཝིརཏི ཨུཔྤཛྫཏི.

༣༠༡. སམྨཱཨཱཛཱིཝནིདྡེསེ ཨཀིརིཡཱཏིཨཱདཱིསུ ཡཱཡ ཙེཏནཱཡ མིཙྪཱཛཱིཝཾ ཨཱཛཱིཝམཱནོ ཀིརིཡཾ ཀརོཏི ནཱམ, ཨཡཾ ཨུཔྤཛྫིཏྭཱ ཏཾ ཀིརིཡཾ ཀཱཏུཾ ན དེཏཱིཏི ཨཀིརིཡཱཏི. ཨིམིནཱ ནཡེན ཡོཛནཱ ཝེདིཏབྦཱ. ཨཱཛཱིཝོ ཙ ནཱམེས པཱཊིཡེཀྐོ ནཏྠི, ཝཱཙཱཀམྨནྟེསུ གཧིཏེསུ གཧིཏོཝ ཧོཏི, ཏཔྤཀྑིཀཏྟཱ. དྷུཝཔཊིསེཝནཝསེན པནཱཡཾ ཏཏོ ནཱིཧརིཏྭཱ དསྶིཏོཏི. ཨེཝཾ སནྟེ སམྨཱཨཱཛཱིཝོ སཀིཙྩཀོ ན ཧོཏི ¶ , ཨཊྛ མགྒངྒཱནི ན པརིཔཱུརེནྟི, ཏསྨཱ སམྨཱཨཱཛཱིཝོ སཀིཙྩཀོ ཀཱཏབྦོ, ཨཊྛ མགྒངྒཱནི པརིཔཱུརེཏབྦཱནཱིཏི. ཏཏྲཱཡཾ ནཡོ – ཨཱཛཱིཝོ ནཱམ བྷིཛྫམཱནོ ཀཱཡཝཙཱིདྭཱརེསུཡེཝ བྷིཛྫཏི. མནོདྭཱརེ ཨཱཛཱིཝབྷེདོ ནཱམ ནཏྠི. པཱུརཡམཱནོཔི ཏསྨིཾཡེཝ དྭཱརདྭཡེ པཱུརཏི. མནོདྭཱརེ ཨཱཛཱིཝཔཱུརཎཾ ནཱམ ནཏྠི. ཀཱཡདྭཱརེ པན ཝཱིཏིཀྐམོ ཨཱཛཱིཝཧེཏུཀོཔི ཨཏྠི ནཨཱཛཱིཝཧེཏུཀོཔི. ཏཐཱ ཝཙཱིདྭཱརེ.

ཏཏྠ ¶ ཡཾ རཱཛརཱཛམཧཱམཏྟཱ ཁིཌྜཱཔསུཏཱ སཱུརབྷཱཝཾ དསྶེནྟཱ མིགཝདྷཾ ཝཱ པནྠདུཧནཾ ཝཱ པརདཱརཝཱིཏིཀྐམཾ ཝཱ ཀརོནྟི, ཨིདཾ ཨཀུསལཾ ཀཱཡཀམྨཾ ནཱམ. ཏཏོ ཝིརཏིཔི ‘སམྨཱཀམྨནྟོ’ ནཱམ. ཡཾ པན ནཨཱཛཱིཝཧེཏུཀཾ ཙཏུབྦིདྷཾ ཝཙཱིདུཙྩརིཏཾ བྷཱསནྟི, ཨིདཾ ཨཀུསལཾ ཝཙཱིཀམྨཾ ནཱམ. ཏཏོ ཝིརཏིཔི ‘སམྨཱཝཱཙཱ’ ནཱམ.

ཡཾ པན ཨཱཛཱིཝཧེཏུ ནེསཱདམཙྪབནྡྷཱདཡོ པཱཎཾ ཧནནྟི, ཨདིནྣཾ ཨཱདིཡནྟི, མིཙྪཱཙཱརཾ ཙརནྟི, ཨཡཾ མིཙྪཱཛཱིཝོ ནཱམ. ཏཏོ ཝིརཏི ‘སམྨཱཨཱཛཱིཝོ’ ནཱམ. ཡམྤི ལཉྫཾ གཧེཏྭཱ མུསཱ བྷཎནྟི, པེསུཉྙཕརུསསམྥཔྤལཱཔེ པཝཏྟེནྟི, ཨཡམྤི མིཙྪཱཛཱིཝོ ནཱམ. ཏཏོ ཝིརཏི སམྨཱཨཱཛཱིཝོ ནཱམ.

མཧཱསཱིཝཏྠེརོ པནཱཧ – ‘ཀཱཡཝཙཱིདྭཱརེསུཔི ཝཱིཏིཀྐམོ ཨཱཛཱིཝཧེཏུཀོ ¶ ཝཱ ཧོཏུ ནོ ཝཱ ཨཱཛཱིཝཧེཏུཀོ, ཨཀུསལཾ ཀཱཡཀམྨཾ ཝཙཱིཀམྨནྟྭེཝ སངྑྱཾ གཙྪཏི. ཏཏོ ཝིརཏིཔི སམྨཱཀམྨནྟོ སམྨཱཝཱཙཱཏྭེཝ ཝུཙྩཏཱི’ཏི. ‘ཨཱཛཱིཝོ ཀུཧི’ནྟི ཝུཏྟེ པན ‘ཏཱིཎི ཀུཧནཝཏྠཱུནི ནིསྶཱཡ ཙཏྟཱརོ པཙྩཡེ ཨུཔྤཱདེཏྭཱ ཏེསཾ པརིབྷོགོ’ཏི ཨཱཧ. ཨཡཾ པན ཀོཊིཔྤཏྟོ མིཙྪཱཛཱིཝོ. ཏཏོ ཝིརཏི སམྨཱཨཱཛཱིཝོ ནཱམ.

ཨཡམྤི སམྨཱཨཱཛཱིཝོ པུབྦབྷཱགེ ནཱནཱཙིཏྟེསུ ལབྦྷཏི, ཨཉྙེནེཝ ཧི ཙིཏྟེན ཀཱཡདྭཱརཝཱིཏིཀྐམཱ ཝིརམཏི, ཨཉྙེན ཝཙཱིདྭཱརཝཱིཏིཀྐམཱ. ལོཀུཏྟརམགྒཀྑཎེ པན ཨེཀཙིཏྟསྨིཾཡེཝ ལབྦྷཏི. ཀཱཡཝཙཱིདྭཱརེསུ ཧི སཏྟཀམྨཔཐཝསེན ཨུཔྤནྣཱཡ མིཙྪཱཛཱིཝསངྑཱཏཱཡ དུསྶཱིལྱཙེཏནཱཡ པདཔཙྪེདཾ ཀུརུམཱནཱ མགྒངྒཾ པཱུརཡམཱནཱ ཨེཀཱཝ ཝིརཏི ཨུཔྤཛྫཏཱིཏི. ཨཡཾ ནིདྡེསཝཱརེ ཝིསེསོ.

ཡཾ ¶ པནེཏཾ ཨིནྡྲིཡེསུ ཨནཉྙཱཏཉྙསྶཱམཱིཏིནྡྲིཡཾ ཝཌྜྷིཏཾ, མགྒངྒེསུ ཙ སམྨཱཝཱཙཱདཱིནི, ཏེསཾ ཝསེན སངྒཧཝཱརེ ‘‘ནཝིནྡྲིཡཱནི, ཨཊྛངྒིཀོ མགྒོ’’ཏི ཝུཏྟཾ. སུཉྙཏཝཱརོ པཱཀཏིཀོཡེཝཱཏི. ཨཡཾ ཏཱཝ སུདྡྷིཀཔཊིཔདཱཡ ཝིསེསོ.

༣༤༣. ཨིཏོ པརཾ སུདྡྷིཀསུཉྙཏཱ སུཉྙཏཔཊིཔདཱ སུདྡྷིཀཨཔྤཎིཧིཏཱ ཨཔྤཎིཧིཏཔཊིཔདཱཏི ཨཡཾ དེསནཱབྷེདོ ཧོཏི. ཏཏྠ སུཉྙཏནྟི ལོཀུཏྟརམགྒསྶ ནཱམཾ. སོ ཧི ¶ ཨཱགམནཏོ སགུཎཏོ ཨཱརམྨཎཏོཏི ཏཱིཧི ཀཱརཎེཧི ནཱམཾ ལབྷཏི. ཀཐཾ? ཨིདྷ བྷིཀྑུ ཨནཏྟཏོ ཨབྷིནིཝིསིཏྭཱ ཨནཏྟཏོ སངྑཱརེ པསྶཏི. ཡསྨཱ པན ཨནཏྟཏོ དིཊྛམཏྟེནེཝ མགྒཝུཊྛཱནཾ ནཱམ ན ཧོཏི, ཨནིཙྩཏོཔི དུཀྑཏོཔི དཊྛུམེཝ ཝཊྚཏི, ཏསྨཱ ‘ཨནིཙྩཾ དུཀྑམནཏྟཱ’ཏི ཏིཝིདྷཾ ཨནུཔསྶནཾ ཨཱརོཔེཏྭཱ སམྨསནྟོ ཙརཏི. ཝུཊྛཱནགཱམིནིཝིཔསྶནཱ པནསྶ ཏེབྷཱུམཀེཔི སངྑཱརེ སུཉྙཏོཝ པསྶཏི. ཨཡཾ ཝིཔསྶནཱ སུཉྙཏཱ ནཱམ ཧོཏི. སཱ ཨཱགམནཱིཡཊྛཱནེ ཋཏྭཱ ཨཏྟནོ མགྒསྶ ‘སུཉྙཏ’ནྟི ནཱམཾ དེཏི. ཨེཝཾ མགྒོ ‘ཨཱགམནཏོ’ སུཉྙཏནཱམཾ ལབྷཏི. ཡསྨཱ པན སོ རཱགཱདཱིཧི སུཉྙོ ཏསྨཱ ‘སགུཎེནེཝ’ སུཉྙཏནཱམཾ ལབྷཏི. ནིབྦཱནམྤི རཱགཱདཱིཧི སུཉྙཏྟཱ སུཉྙཏནྟི ཝུཙྩཏི. ཏཾ ཨཱརམྨཎཾ ཀཏྭཱ ཨུཔྤནྣཏྟཱ མགྒོ ‘ཨཱརམྨཎཏོ’ སུཉྙཏནཱམཾ ལབྷཏི.

ཏཏྠ སུཏྟནྟིཀཔརིཡཱཡེན ¶ སགུཎཏོཔི ཨཱརམྨཎཏོཔི ནཱམཾ ལབྷཏི. པརིཡཱཡདེསནཱ ཧེསཱ. ཨབྷིདྷམྨཀཐཱ པན ནིཔྤརིཡཱཡདེསནཱ. ཏསྨཱ ཨིདྷ སགུཎཏོ ཝཱ ཨཱརམྨཎཏོ ཝཱ ནཱམཾ ན ལབྷཏི, ཨཱགམནཏོཝ ལབྷཏི. ཨཱགམནམེཝ ཧི དྷུརཾ. ཏཾ དུཝིདྷཾ ཧོཏི – ཝིཔསྶནཱགམནཾ མགྒཱགམནནྟི. ཏཏྠ མགྒསྶ ཨཱགཏཊྛཱནེ ཝིཔསྶནཱགམནཾ དྷུརཾ, ཕལསྶ ཨཱགཏཊྛཱནེ མགྒཱགམནཾ དྷུརཾ. ཨིདྷ མགྒསྶ ཨཱགཏཏྟཱ ཝིཔསྶནཱགམནམེཝ དྷུརཾ ཛཱཏཾ.

༣༥༠. ཨཔྤཎིཧིཏནྟི, ཨེཏྠཱཔི ཨཔྤཎིཧིཏནྟི མགྒསྶེཝ ནཱམཾ. ཨིདམྤི ནཱམཾ མགྒོ ཏཱིཧེཝ ཀཱརཎེཧི ལབྷཏི. ཀཐཾ? ཨིདྷ བྷིཀྑུ ཨཱདིཏོཝ དུཀྑཏོ ཨབྷིནིཝིསིཏྭཱ དུཀྑཏོཝ སངྑཱརེ པསྶཏི. ཡསྨཱ པན དུཀྑཏོ དིཊྛམཏྟེནེཝ མགྒཝུཊྛཱནཾ ནཱམ ན ཧོཏི, ཨནིཙྩཏོཔི ཨནཏྟཏོཔི དཊྛུམེཝ ཝཊྚཏི, ཏསྨཱ ཨནིཙྩཾ དུཀྑམནཏྟཱ’ཏི ཏིཝིདྷཾ ཨནུཔསྶནཾ ཨཱརོཔེཏྭཱ ¶ སམྨསནྟོ ཙརཏི. ཝུཊྛཱནགཱམིནིཝིཔསྶནཱ པནསྶ ཏེབྷཱུམཀསངྑཱརེསུ པཎིདྷིཾ སོསེཏྭཱ པརིཡཱདིཡིཏྭཱ ཝིསྶཛྫེཏི. ཨཡཾ ཝིཔསྶནཱ ཨཔྤཎིཧིཏཱ ནཱམ ཧོཏི. སཱ ཨཱགམནཱིཡཊྛཱནེ ཋཏྭཱ ཨཏྟནོ མགྒསྶ ‘ཨཔྤཎིཧིཏ’ནྟི ནཱམཾ དེཏི. ཨེཝཾ མགྒོ ‘ཨཱགམནཏོ’ ཨཔྤཎིཧིཏནཱམཾ ལབྷཏི. ཡསྨཱ པན ཏཏྠ རཱགདོསམོཧཔཎིདྷཡོ ནཏྠི, ཏསྨཱ ‘སགུཎེནེཝ’ ཨཔྤཎིཧིཏནཱམཾ ལབྷཏི. ནིབྦཱནམྤི ཏེསཾ པཎིདྷཱིནཾ ཨབྷཱཝཱ ཨཔྤཎིཧིཏནྟི ཝུཙྩཏི. ཏཾ ཨཱརམྨཎཾ ཀཏྭཱ ཨུཔྤནྣཏྟཱ མགྒོ ཨཔྤཎིཧིཏནཱམཾ ལབྷཏི.

ཏཏྠ སུཏྟནྟིཀཔརིཡཱཡེན སགུཎཏོཔི ཨཱརམྨཎཏོཔི ནཱམཾ ལབྷཏི. པརིཡཱཡདེསནཱ ཧེསཱ ¶ . ཨབྷིདྷམྨཀཐཱ པན ནིཔྤརིཡཱཡདེསནཱ. ཏསྨཱ ཨིདྷ སགུཎཏོ ཝཱ ཨཱརམྨཎཏོ ཝཱ ནཱམཾ ན ལབྷཏི, ཨཱགམནཏོཝ ལབྷཏི. ཨཱགམནམེཝ ཧི དྷུརཾ. ཏཾ དུཝིདྷཾ ཧོཏི – ཝིཔསྶནཱགམནཾ མགྒཱགམནནྟི. ཏཏྠ མགྒསྶ ཨཱགཏཊྛཱནེ ཝིཔསྶནཱགམནཾ དྷུརཾ, ཕལསྶ ཨཱགཏཊྛཱནེ ¶ མགྒཱགམནཾ དྷུརཾ. ཨིདྷ མགྒསྶ ཨཱགཏཏྟཱ ཝིཔསྶནཱགམནམེཝ དྷུརཾ ཛཱཏཾ.

ནནུ ཙ སུཉྙཏོ ཨནིམིཏྟོ ཨཔྤཎིཧིཏོཏི ཏཱིཎི མགྒསྶ ནཱམཱནི? ཡཐཱཧ – ‘‘ཏཡོམེ, བྷིཀྑཝེ, ཝིམོཀྑཱ – སུཉྙཏོ ཝིམོཀྑོ, ཨནིམིཏྟོ ཝིམོཀྑོ, ཨཔྤཎིཧིཏོ ཝིམོཀྑོ’’ཏི (པཊི. མ. ༡.༢༠༩). ཏེསུ ཨིདྷ དྭེ མགྒེ གཧེཏྭཱ ཨནིམིཏྟོ ཀསྨཱ ན གཧིཏོཏི? ཨཱགམནཱབྷཱཝཏོ. ཨནིམིཏྟཝིཔསྶནཱ ཧི སཡཾ ཨཱགམནཱིཡཊྛཱནེ ཋཏྭཱ ཨཏྟནོ མགྒསྶ ནཱམཾ དཱཏུཾ ན སཀྐོཏི. སམྨཱསམྦུདྡྷོ པན ཨཏྟནོ པུཏྟསྶ རཱཧུལཏྠེརསྶ.

‘‘ཨནིམིཏྟཉྩ བྷཱཝེཧི, མཱནཱནུསཡམུཛྫཧ;

ཏཏོ མཱནཱབྷིསམཡཱ, ཨུཔསནྟོ ཙརིསྶསཱི’’ཏི. (སུ. ནི. ༣༤༤);

ཨནིམིཏྟཝིཔསྶནཾ ཀཐེསི. ཝིཔསྶནཱ ཧི ནིཙྩནིམིཏྟཾ དྷུཝནིམིཏྟཾ སུཁནིམིཏྟཾ ཨཏྟནིམིཏྟཉྩ ཨུགྒྷཱཊེཏི. ཏསྨཱ ཨནིམིཏྟཱཏི ཀཐིཏཱ. སཱ ཙ ཀིཉྩཱཔི ཏཾ ནིམིཏྟཾ ཨུགྒྷཱཊེཏི, སཡཾ པན ནིམིཏྟདྷམྨེསུ ཙརཏཱིཏི སནིམིཏྟཱཝ ཧོཏི. ཏསྨཱ སཡཾ ཨཱགམནཱིཡཊྛཱནེ ཋཏྭཱ ཨཏྟནོ མགྒསྶ ནཱམཾ དཱཏུཾ ན སཀྐོཏི.

ཨཔརོ ¶ ནཡོ – ཨབྷིདྷམྨོ ནཱམ པརམཏྠདེསནཱ. ཨནིམིཏྟམགྒསྶ ཙ པརམཏྠཏོ ཧེཏུཝེཀལླམེཝ ཧོཏི. ཀཐཾ? ཨནིཙྩཱནུཔསྶནཱཡ ཧི ཝསེན ཨནིམིཏྟཝིམོཀྑོ ཀཐིཏོ. ཏེན ཙ ཝིམོཀྑེན སདྡྷིནྡྲིཡཾ ཨདྷིམཏྟཾ ཧོཏི. ཏཾ ཨརིཡམགྒེ ཨེཀངྒམྤི ན ཧོཏི, ཨམགྒངྒཏྟཱ ཨཏྟནོ མགྒསྶ པརམཏྠཏོ ནཱམཾ དཱཏུཾ ན སཀྐོཏི. ཨིཏརེསུ པན དྭཱིསུ ཨནཏྟཱནུཔསྶནཱཡ ཏཱཝ ཝསེན སུཉྙཏཝིམོཀྑོ, དུཀྑཱནུཔསྶནཱཡ ཝསེན ཨཔྤཎིཧིཏཝིམོཀྑོ ཀཐིཏོ. ཏེསུ སུཉྙཏཝིམོཀྑེན པཉྙིནྡྲིཡཾ ཨདྷིམཏྟཾ ཧོཏི, ཨཔྤཎིཧིཏཝིམོཀྑེན སམཱདྷིནྡྲིཡཾ. ཏཱནི ཨརིཡམགྒསྶ ཨངྒཏྟཱ ཨཏྟནོ མགྒསྶ པརམཏྠཏོ ནཱམཾ དཱཏུཾ སཀྐོནྟི. མགྒཱརམྨཎཏྟིཀེཔི ཧི མགྒཱདྷིཔཏིདྷམྨཝིབྷཛནེ ཚནྡཙིཏྟཱནཾ ཨདྷིཔཏིཀཱལེ ¶ ཏེསཾ དྷམྨཱནཾ ཨམགྒངྒཏྟཱཝ མགྒཱདྷིཔཏིབྷཱཝོ ན ཝུཏྟོ. ཨེཝཾསམྤདམིདཾ ཝེདིཏབྦནྟི. ཨཡམེཏྠ ཨཊྛཀཐཱམུཏྟཀོ ཨེཀསྶ ཨཱཙརིཡསྶ མཏིཝིནིཙྪཡོ.

ཨེཝཾ ¶ སབྦཐཱཔི ཨནིམིཏྟཝིཔསྶནཱ སཡཾ ཨཱགམནཱིཡཊྛཱནེ ཋཏྭཱ ཨཏྟནོ མགྒསྶ ནཱམཾ དཱཏུཾ ན སཀྐོཏཱིཏི ཨནིམིཏྟམགྒོ ན གཧིཏོ. ཀེཙི པན ‘ཨནིམིཏྟམགྒོ ཨཱགམནཏོ ནཱམཾ ཨལབྷནྟོཔི སུཏྟནྟཔརིཡཱཡེན སགུཎཏོ ཙ ཨཱརམྨཎཏོ ཙ ནཱམཾ ལབྷཏཱི’ཏི ཨཱཧཾསུ. ཏེ ཨིདཾ ཝཏྭཱ པཊིཀྑིཏྟཱ – ཨནིམིཏྟམགྒེ སགུཎཏོ ཙ ཨཱརམྨཎཏོ ཙ ནཱམཾ ལབྷནྟེ སུཉྙཏཨཔྤཎིཧིཏམགྒཱཔི སགུཎཏོཡེཝ ཨཱརམྨཎཏོཡེཝ ཙ ཨིདྷ ནཱམཾ ལབྷེཡྻུཾ. ན པན ལབྷནྟི. ཀིཾ ཀཱརཎཱ? ཨཡཉྷི མགྒོ ནཱམ དྭཱིཧི ཀཱརཎེཧི ནཱམཾ ལབྷཏི – སརསཏོ ཙ པཙྩནཱིཀཏོ ཙ; སབྷཱཝཏོ ཙ པཊིཔཀྑཏོ ཙཱཏི ཨཏྠོ. ཏཏྠ སུཉྙཏཨཔྤཎིཧིཏམགྒཱ སརསཏོཔི པཙྩནཱིཀཏོཔི ནཱམཾ ལབྷནྟི. སུཉྙཏཨཔྤཎིཧིཏམགྒཱ ཧི རཱགཱདཱིཧི སུཉྙཱ, རཱགཔཎིདྷིཨཱདཱིཧི ཙ ཨཔྤཎིཧིཏཱཏི ཨེཝཾ ‘སརསཏོ’ ནཱམཾ ལབྷནྟི. སུཉྙཏོ ཙ ཨཏྟཱབྷིནིཝེསསྶ པཊིཔཀྑོ, ཨཔྤཎིཧིཏོ པཎིདྷིསྶཱཏི ཨེཝཾ ‘པཙྩནཱིཀཏོ’ ནཱམཾ ལབྷནྟི. ཨནིམིཏྟམགྒོ པན རཱགཱདིནིམིཏྟཱནཾ ནིཙྩནིམིཏྟཱདཱིནཉྩ ཨབྷཱཝེན སརསཏོཝ ནཱམཾ ལབྷཏི, ནོ པཙྩནཱིཀཏོ. ན ཧི སོ སངྑཱརནིམིཏྟཱརམྨཎཱཡ ཨནིཙྩཱནུཔསྶནཱཡ པཊིཔཀྑོ. ཨནིཙྩཱནུཔསྶནཱ པནསྶ ཨནུལོམབྷཱཝེ ཋིཏཱཏི. སབྦཐཱཔི ཨབྷིདྷམྨཔརིཡཱཡེན ཨནིམིཏྟམགྒོ ནཱམ ནཏྠཱིཏི.

སུཏྟནྟིཀཔརིཡཱཡེན ¶ པནེས ཨེཝཾ ཨཱཧརིཏྭཱ དཱིཔིཏོ – ཡསྨིཉྷི ཝཱརེ མགྒཝུཊྛཱནཾ ཧོཏི, ཏཱིཎི ལཀྑཎཱནི ཨེཀཱཝཛྫནེན ཝིཡ ཨཱཔཱཐམཱགཙྪནྟི, ཏིཎྞཉྩ ཨེཀཏོ ཨཱཔཱཐགམནཾ ནཱམ ནཏྠི. ཀམྨཊྛཱནསྶ པན ཝིབྷཱུཏབྷཱཝདཱིཔནཏྠཾ ཨེཝཾ ཝུཏྟཾ. ཨཱདིཏོ ཧི ཡཏྠ ཀཏྠཙི ཨབྷིནིཝེསོ ཧོཏུ, ཝུཊྛཱནགཱམིནཱི པན ཝིཔསྶནཱ ཡཾ ཡཾ སམྨསིཏྭཱ ཝུཊྛཱཏི ཏསྶ ཏསྶེཝ ཝསེན ཨཱགམནཱིཡཊྛཱནེ ཋཏྭཱ ཨཏྟནོ མགྒསྶ ནཱམཾ དེཏི. ཀཐཾ? ཨནིཙྩཱདཱིསུ ཧི ཡཏྠ ཀཏྠཙི ཨབྷིནིཝིསིཏྭཱ ཨིཏརམྤི ལཀྑཎདྭཡཾ དཊྛུཾ ཝཊྚཏི ཨེཝ. ཨེཀལཀྑཎདསྶནམཏྟེནེཝ ཧི མགྒཝུཊྛཱནཾ ནཱམ ན ཧོཏི, ཏསྨཱ ཨནིཙྩཏོ ཨབྷིནིཝིཊྛོ བྷིཀྑུ ¶ ན ཀེཝལཾ ཨནིཙྩཏོཝ ཝུཊྛཱཏི, དུཀྑཏོཔི ཨནཏྟཏོཔི ཝུཊྛཱཏིཡེཝ. དུཀྑཏོ ཨནཏྟཏོ ཨབྷིནིཝིཊྛེཔི ཨེསེཝ ནཡོ. ཨིཏི ཨཱདིཏོ ཡཏྠ ཀཏྠཙི ཨབྷིནིཝེསོ ཧོཏུ, ཝུཊྛཱནགཱམིནཱི པན ཝིཔསྶནཱ ཡཾ ཡཾ སམྨསིཏྭཱ ཝུཊྛཱཏི ཏསྶ ཏསྶེཝ ཝསེན ཨཱགམནཱིཡཊྛཱནེ ཋཏྭཱ ¶ ཨཏྟནོ མགྒསྶ ནཱམཾ དེཏི. ཏཏྠ ཨནིཙྩཏོ ཝུཊྛཧནྟསྶ མགྒོ ཨནིམིཏྟོ ནཱམ ཧོཏི, དུཀྑཏོ ཝུཊྛཧནྟསྶ ཨཔྤཎིཧིཏོ, ཨནཏྟཏོ ཝུཊྛཧནྟསྶ སུཉྙཏོཏི. ཨེཝཾ སུཏྟནྟཔརིཡཱཡེན ཨཱཧརིཏྭཱ དཱིཔིཏོ.

ཝུཊྛཱནགཱམིནཱི པན ཝིཔསྶནཱ ཀིམཱརམྨཎཱཏི? ལཀྑཎཱརམྨཎཱཏི. ལཀྑཎཾ ནཱམ པཉྙཏྟིགཏིཀཾ ན ཝཏྟབྦདྷམྨབྷཱུཏཾ. ཡོ པན ཨནིཙྩཾ དུཀྑམནཏྟཱཏི ཏཱིཎི ལཀྑཎཱནི སལླཀྑེཏི, ཏསྶ པཉྩཀྑནྡྷཱ ཀཎྛེ བདྡྷཀུཎཔཾ ཝིཡ ཧོནྟི. སངྑཱརཱརམྨཎམེཝ ཉཱཎཾ སངྑཱརཏོ ཝུཊྛཱཏི. ཡཐཱ ཧི ཨེཀོ བྷིཀྑུ པཏྟཾ ཀིཎིཏུཀཱམོ པཏྟཝཱཎིཛེན པཏྟཾ ཨཱབྷཏཾ དིསྭཱ ཧཊྛཔཧཊྛོ གཎྷིསྶཱམཱིཏི ཙིནྟེཏྭཱ ཝཱིམཾསམཱནོ ཏཱིཎི ཚིདྡཱནི པསྶེཡྻ, སོ ན ཚིདྡེསུ ནིརཱལཡོ ཧོཏི, པཏྟེ པན ནིརཱལཡོ ཧོཏི; ཨེཝམེཝ ཏཱིཎི ལཀྑཎཱནི སལླཀྑེཏྭཱ སངྑཱརེསུ ནིརཱལཡོ ཧོཏི. སངྑཱརཱརམྨཎེནེཝ ཉཱཎེན སངྑཱརཏོ ཝུཊྛཱཏཱིཏི ཝེདིཏབྦཾ. དུསྶོཔམཱཡཔི ཨེསེཝ ནཡོ.

ཨིཏི བྷགཝཱ ལོཀུཏྟརཾ ཛྷཱནཾ བྷཱཛེནྟོ སུདྡྷིཀཔཊིཔདཱཡ ཙཏུཀྐནཡཾ པཉྩཀནཡནྟི དྭེཔི ནཡེ ཨཱཧརི. ཏཐཱ སུདྡྷིཀསུཉྙཏཱཡ སུཉྙཏཔཊིཔདཱཡ སུདྡྷིཀཨཔྤཎིཧིཏཱཡ ཨཔྤཎིཧིཏཔཊིཔདཱཡཱཏི. ཀསྨཱ ཨེཝཾ ཨཱཧརཱིཏི? པུགྒལཛ྄ཛྷཱསཡེན ཙེཝ དེསནཱཝིལཱསེན ཙ. ཏདུབྷཡམྤི ཧེཊྛཱ ¶ ཝུཏྟནཡེནེཝ ཝེདིཏབྦཾ. ཨེཝཾ ལོཀུཏྟརཾ ཛྷཱནཾ བྷཱཝེཏཱིཏི ཨེཏྠ སུདྡྷིཀཔཊིཔདཱཡ ཙཏུཀྐཔཉྩཀཝསེན དྭེ ནཡཱ, ཏཐཱ སེསེསཱུཏི སབྦེསུཔི པཉྩསུ ཀོཊྛཱསེསུ དས ནཡཱ བྷཱཛིཏཱ.

ལོཀུཏྟརཀུསལཾ པཀིཎྞཀཀཐཱ

ཏཏྲིདཾ པཀིཎྞཀཾ –

ཨཛ྄ཛྷཏྟཉྩ བཧིདྡྷཱ ཙ, རཱུཔཱརཱུཔེསུ པཉྩསུ;

སཏྟཊྛངྒཔརིཎཱམཾ, ནིམིཏྟཾ པཊིཔདཱཔཏཱིཏི.

ལོཀུཏྟརམགྒོ ཧི ཨཛ྄ཛྷཏྟཾ ཨབྷིནིཝིསིཏྭཱ ཨཛ྄ཛྷཏྟཾ ཝུཊྛཱཏི ¶ , ཨཛ྄ཛྷཏྟཾ ཨབྷིནིཝིསིཏྭཱ བཧིདྡྷཱ ཝུཊྛཱཏི, བཧིདྡྷཱ ཨབྷིནིཝིསིཏྭཱ ¶ བཧིདྡྷཱ ཝུཊྛཱཏི, བཧིདྡྷཱ ཨབྷིནིཝིསིཏྭཱ ཨཛ྄ཛྷཏྟཾ ཝུཊྛཱཏི. རཱུཔེ ཨབྷིནིཝིསིཏྭཱ རཱུཔཱ ཝུཊྛཱཏི, རཱུཔེ ཨབྷིནིཝིསིཏྭཱ ཨརཱུཔཱ ཝུཊྛཱཏི. ཨརཱུཔེ ཨབྷིནིཝིསིཏྭཱ ཨརཱུཔཱ ཝུཊྛཱཏི, ཨརཱུཔེ ཨབྷིནིཝིསིཏྭཱ རཱུཔཱ ཝུཊྛཱཏི, ཨེཀཔྤཧཱརེནེཝ པཉྩཧི ཁནྡྷེཧི ཝུཊྛཱཏི.

‘སཏྟཊྛངྒཔརིཎཱམ’ནྟི སོ པནེས མགྒོ ཨཊྛངྒིཀོཔི ཧོཏི སཏྟངྒིཀོཔི. བོཛ྄ཛྷངྒཱཔི སཏྟ ཝཱ ཧོནྟི ཚ ཝཱ. ཛྷཱནཾ པན པཉྩངྒིཀཾ ཝཱ ཧོཏི ཙཏུརངྒིཀཾ ཝཱ; ཏིཝངྒིཀཾ ཝཱ དུཝངྒིཀཾ ཝཱ. ཨེཝཾ སཏྟཨཊྛཱདཱིནཾ ཨངྒཱནཾ པརིཎཱམོ ཝེདིཏབྦོཏི ཨཏྠོ.

‘ནིམིཏྟཾ པཊིཔདཱཔཏཱི’ཏི ནིམིཏྟནྟི ཡཏོ ཝུཊྛཱནཾ ཧོཏི; ‘པཊིཔདཱཔཏཱི’ཏི པཊིཔདཱཡ ཙ ཨདྷིཔཏིནོ ཙ ཙལནཱཙལནཾ ཝེདིཏབྦཾ.

ཏཏྠ ཨཛ྄ཛྷཏྟཾ ཨབྷིནིཝིསིཏྭཱ ཨཛ྄ཛྷཏྟཾ ཝུཊྛཱཏཱིཏིཨཱདཱིསུ ཏཱཝ ཨིདྷེཀཙྩོ ཨཱདིཏོཝ ཨཛ྄ཛྷཏྟཾ པཉྩསུ ཁནྡྷེསུ ཨབྷིནིཝིསཏི, ཨབྷིནིཝིསིཏྭཱ ཏེ ཨནིཙྩཱདིཏོ པསྶཏི, ཡསྨཱ པན ན སུདྡྷཨཛ྄ཛྷཏྟདསྶནམཏྟེནེཝ མགྒཝུཊྛཱནཾ ཧོཏི, བཧིདྡྷཱཔི དཊྛབྦམེཝ, ཏསྨཱ པརསྶ ཁནྡྷེཔི ཨནུཔཱདིནྣསངྑཱརེཔི ཨནིཙྩཾ དུཀྑམནཏྟཱཏི པསྶཏི. སོ ཀཱལེན ཨཛ྄ཛྷཏྟཾ སམྨསཏི ཀཱལེན བཧིདྡྷཱཏི. ཏསྶེཝཾ སམྨསཏོ ཨཛ྄ཛྷཏྟཾ སམྨསནཀཱལེ ཝིཔསྶནཱ མགྒེན སདྡྷིཾ གྷཊིཡཏི. ཨེཝཾ ཨཛ྄ཛྷཏྟཾ ཨབྷིནིཝིསིཏྭཱ ཨཛ྄ཛྷཏྟཾ ཝུཊྛཱཏི ནཱམ. སཙེ པནསྶ བཧིདྡྷཱ སམྨསནཀཱལེ ཝིཔསྶནཱ མགྒེན ¶ སདྡྷིཾ གྷཊིཡཏི, ཨེཝཾ ཨཛ྄ཛྷཏྟཾ ཨབྷིནིཝིསིཏྭཱ བཧིདྡྷཱ ཝུཊྛཱཏི ནཱམ. ཨེསེཝ ནཡོ བཧིདྡྷཱ ཨབྷིནིཝིསིཏྭཱ བཧིདྡྷཱ ཙ ཨཛ྄ཛྷཏྟཉྩ ཝུཊྛཱནེཔི.

ཨཔརོ ཨཱདིཏོཝ རཱུཔེ ཨབྷིནིཝིསཏི ཨབྷིནིཝིསིཏྭཱ བྷཱུཏརཱུཔཉྩ ཨུཔཱདཱརཱུཔཉྩ པརིཙྪིནྡིཏྭཱ ཨནིཙྩཱདིཏོ པསྶཏི, ཡསྨཱ པན ན སུདྡྷརཱུཔདསྶནམཏྟེནེཝ ཝུཊྛཱནཾ ཧོཏི ཨརཱུཔམྤི དཊྛབྦམེཝ, ཏསྨཱ ཏཾ རཱུཔཾ ཨཱརམྨཎཾ ཀཏྭཱ ¶ ཨུཔྤནྣཾ ཝེདནཾ སཉྙཾ སངྑཱརེ ཝིཉྙཱཎཉྩ ཨིདཾ ཨརཱུཔནྟི པརིཙྪིནྡིཏྭཱ ཨནིཙྩཱདིཏོ པསྶཏི. སོ ཀཱལེན རཱུཔཾ སམྨསཏི ཀཱལེན ཨརཱུཔཾ. ཏསྶེཝཾ སམྨསཏོ རཱུཔསམྨསནཀཱལེ ཝིཔསྶནཱ མགྒེན སདྡྷིཾ གྷཊིཡཏི. ཨེཝཾ རཱུཔེ ཨབྷིནིཝིསིཏྭཱ རཱུཔཱ ཝུཊྛཱཏི ནཱམ. སཙེ པནསྶ ཨརཱུཔསམྨསནཀཱལེ ཝིཔསྶནཱ ¶ མགྒེན སདྡྷིཾ གྷཊིཡཏི, ཨེཝཾ རཱུཔེ ཨབྷིནིཝིསིཏྭཱ ཨརཱུཔཱ ཝུཊྛཱཏི ནཱམ. ཨེས ནཡོ ཨརཱུཔེ ཨབྷིནིཝིསིཏྭཱ ཨརཱུཔཱ ཙ རཱུཔཱ ཙ ཝུཊྛཱནེཔི.

‘‘ཡཾཀིཉྩི སམུདཡདྷམྨཾ སབྦཾ ཏཾ ནིརོདྷདྷམྨ’’ནྟི (མཧཱཝ. ༡༦; དཱི. ནི. ༡.༢༩༨) ཨེཝཾ ཨབྷིནིཝིསིཏྭཱ ཨེཝམེཝ ཝུཊྛཱནཀཱལེ པན ཨེཀཔྤཧཱརེན པཉྩཧི ཁནྡྷེཧི ཝུཊྛཱཏི ནཱམཱཏི. ཨཡཾ ཏིཀྑཝིཔསྶཀསྶ མཧཱཔཉྙསྶ བྷིཀྑུནོ ཝིཔསྶནཱ.

ཡཐཱ ཧི ཚཱཏཛ྄ཛྷཏྟསྶ པུརིསསྶ མཛ྄ཛྷེ གཱུཐཔིཎྜཾ ཋཔེཏྭཱ ནཱནགྒརསབྷོཛནཔུཎྞཾ པཱཏིཾ ཨུཔནེཡྻུཾ, སོ བྱཉྫནཾ ཧཏྠེན ཝིཡཱུཧནྟོ ཏཾ གཱུཐཔིཎྜཾ དིསྭཱ ‘ཀིམིད’ནྟི པུཙྪིཏྭཱ གཱུཐཔིཎྜོཏི ཝུཏྟེ ‘དྷི དྷི, ཨཔནེཐཱ’ཏི བྷཏྟེཔི པཱཏིཡམྤི ནིརཱལཡོ ཧོཏི. ཨེཝཾསམྤདམིདཾ དཊྛབྦཾ.

བྷོཛནཔཱཏིདསྶནསྨིཉྷི ཏསྶ ཨཏྟམནཀཱལོ ཝིཡ ཨིམསྶ བྷིཀྑུནོ བཱལཔུཐུཛྫནཀཱལེ པཉྩཀྑནྡྷེ ‘ཨཧཾ མམཱ’ཏི གཧིཏཀཱལོ. གཱུཐཔིཎྜསྶ དིཊྛཀཱལོ ཝིཡ ཏིཎྞཾ ལཀྑཎཱནཾ སལླཀྑིཏཀཱལོ. བྷཏྟེཔི པཱཏིཡམྤི ནིརཱལཡཀཱལོ ཝིཡ ཏིཀྑཝིཔསྶཀསྶ མཧཱཔཉྙསྶ བྷིཀྑུནོ ‘‘ཡཾཀིཉྩི སམུདཡདྷམྨཾ སབྦཾ ཏཾ ནིརོདྷདྷམྨ’’ནྟི པཉྩཧི ཁནྡྷེཧི ཨེཀཔྤཧཱརེན ཝུཊྛིཏཀཱལོ ཝེདིཏབྦོ.

‘སཏྟཊྛངྒཔརིཎཱམ’ནྟི ཨེཏྠ ཨཡཾ ཝུཏྟཔྤབྷེདོ ཨངྒཔརིཎཱམོ ཡཐཱ ཧོཏི ཏཐཱ ཝེདིཏབྦོ. སངྑཱརུཔེཀྑཱཉཱཎམེཝ ཧི ཨརིཡམགྒསྶ བོཛ྄ཛྷངྒམགྒངྒཛྷཱནངྒཝིསེསཾ ¶ ནིཡམེཏི. ཀེཙི པན ཐེརཱ ‘བོཛ྄ཛྷངྒམགྒངྒཛྷཱནངྒཝིསེསཾ པཱདཀཛ྄ཛྷཱནཾ ནིཡམེཏཱི’ཏི ཝདནྟི. ཀེཙི ‘ཝིཔསྶནཱཡ ཨཱརམྨཎབྷཱུཏཱ ཁནྡྷཱ ནིཡམེནྟཱི’ཏི ཝདནྟི. ཀེཙི ‘པུགྒལཛ྄ཛྷཱསཡོ ནིཡམེཏཱི’ཏི ཝདནྟི. ཏེསམྤི ཝཱདེསུ ཨཡཾ སངྑཱརུཔེཀྑཱསངྑཱཏཱ པུབྦབྷཱགཱ ཝུཊྛཱནགཱམིནིཝིཔསྶནཱཝ ནིཡམེཏཱིཏི ཝེདིཏབྦཱ.

ཏཏྲཱཡཾ ཨནུཔུབྦཱིཀཐཱ – ཝིཔསྶནཱནིཡམེན ཧི སུཀྑཝིཔསྶཀསྶ ¶ ཨུཔྤནྣམགྒོཔི སམཱཔཏྟིལཱབྷིནོ ཛྷཱནཾ པཱདཀཾ ཨཀཏྭཱ ཨུཔྤནྣམགྒོཔི པཋམཛ྄ཛྷཱནཾ པཱདཀཾ ཀཏྭཱ པཀིཎྞཀསངྑཱརེ སམྨསིཏྭཱ ཨུཔྤཱདིཏམགྒོཔི པཋམཛ྄ཛྷཱནིཀོཝ ཧོཏི. སབྦེསུ སཏྟ བོཛ྄ཛྷངྒཱནི ཨཊྛ མགྒངྒཱནི པཉྩ ཛྷཱནངྒཱནི ཧོནྟི. ཏེསཉྷི པུབྦབྷཱགཝིཔསྶནཱ སོམནསྶསཧགཏཱཔི ¶ ཨུཔེཀྑཱསཧགཏཱཔི ཧུཏྭཱ ཝུཊྛཱནཀཱལེ སངྑཱརུཔེཀྑཱབྷཱཝཾ པཏྟཱ སོམནསྶསཧགཏཱཝ ཧོཏི.

པཉྩཀནཡེ དུཏིཡཏཏིཡཙཏུཏྠཛ྄ཛྷཱནཱནི པཱདཀཱནི ཀཏྭཱ ཨུཔྤཱདིཏམགྒེསུ ཡཐཱཀྐམེནེཝ ཛྷཱནཾ ཙཏུརངྒིཀཾ ཏིཝངྒིཀཾ དུཝངྒིཀཉྩ ཧོཏི. སབྦེསུ པན སཏྟ མགྒངྒཱནི ཧོནྟི, ཙཏུཏྠེ ཚ བོཛ྄ཛྷངྒཱནི. ཨཡཾ ཝིསེསོ པཱདཀཛ྄ཛྷཱནནིཡམེན ཙེཝ ཝིཔསྶནཱནིཡམེན ཙ ཧོཏི. ཏེསམྤི ཧི པུབྦབྷཱགཝིཔསྶནཱ སོམནསྶསཧགཏཱཔི ཨུཔེཀྑཱསཧགཏཱཔི ཧོཏི. ཝུཊྛཱནགཱམིནཱི སོམནསྶསཧགཏཱཝ.

པཉྩམཛ྄ཛྷཱནཾ པཱདཀཾ ཀཏྭཱ ནིབྦཏྟིཏམགྒེ པན ཨུཔེཀྑཱཙིཏྟེཀགྒཏཱཝསེན དྭེ ཛྷཱནངྒཱནི བོཛ྄ཛྷངྒམགྒངྒཱནི ཚ སཏྟ ཙེཝ. ཨཡམྤི ཝིསེསོ ཨུབྷཡནིཡམཝསེན ཧོཏི. ཨིམསྨིཉྷི ནཡེ པུབྦབྷཱགཝིཔསྶནཱ སོམནསྶསཧགཏཱ ཝཱ ཨུཔེཀྑཱསཧགཏཱ ཝཱ ཧོཏི, ཝུཊྛཱནགཱམིནཱི ཨུཔེཀྑཱསཧགཏཱཝ. ཨརཱུཔཛ྄ཛྷཱནཱནི པཱདཀཱནི ཀཏྭཱ ཨུཔྤཱདིཏམགྒེཔི ཨེསེཝ ནཡོ. ཨེཝཾ པཱདཀཛ྄ཛྷཱནཏོ ཝུཊྛཱཡ ཡེ ཀེཙི སངྑཱརེ སམྨསིཏྭཱ ནིབྦཏྟིཏམགྒསྶ ཨཱསནྣཔདེསེ ཝུཊྛིཏཱ སམཱཔཏྟི ཨཏྟནཱ སདིསབྷཱཝཾ ཀརོཏི, བྷཱུམིཝཎྞོ ཝིཡ གོདྷཱཝཎྞསྶ.

དུཏིཡཏྠེརཝཱདེ པན ཡཏོ ཡཏོ སམཱཔཏྟིཏོ ཝུཊྛཱཡ ཡེ ཡེ སམཱཔཏྟིདྷམྨེ སམྨསིཏྭཱ མགྒོ ནིབྦཏྟིཏོ ཧོཏི ཏཾཏཾསམཱཔཏྟིསདིསོཝ ཧོཏི, སམྨསིཏསམཱཔཏྟིསདིསོཏི ཨཏྠོ. སཙེ ¶ པན ཀཱམཱཝཙརདྷམྨེ སམྨསཏི པཋམཛ྄ཛྷཱནིཀོཝ ཧོཏི. ཏཏྲཱཔི ཝིཔསྶནཱནིཡམོ ཝུཏྟནཡེནེཝ ཝེདིཏབྦོ.

ཏཏིཡཏྠེརཝཱདེ ¶ ‘ཨཧོ ཝཏཱཧཾ སཏྟངྒིཀཾ མགྒཾ པཱཔུཎེཡྻཾ, ཨཊྛངྒིཀཾ མགྒཾ པཱཔུཎེཡྻ’ནྟི ཨཏྟནོ ཨཛ྄ཛྷཱསཡཱནུརཱུཔེན ཡཾ ཡཾ ཛྷཱནཾ པཱདཀཾ ཀཏྭཱ ཡེ ཝཱ ཡེ ཝཱ ཛྷཱནདྷམྨེ སམྨསིཏྭཱ མགྒོ ནིབྦཏྟིཏོ ཏཾཏཾཛྷཱནསདིསོཝ ཧོཏི. པཱདཀཛ྄ཛྷཱནཾ པན སམྨསིཏཛ྄ཛྷཱནཾ ཝཱ ཝིནཱ, ཨཛ྄ཛྷཱསཡམཏྟེནེཝ ཏཾ ན ཨིཛ྄ཛྷཏི. སྭཱཡམཏྠོ ནནྡཀོཝཱདསུཏྟེན དཱིཔེཏབྦོ. ཝུཏྟཉྷེཏཾ –

‘‘སེཡྻཐཱཔི, བྷིཀྑཝེ, ཏདཧུཔོསཐེ པནྣརསེ ན ཧོཏི བཧུནོ ཛནསྶ ཀངྑཱ ཝཱ ཝིམཏི ¶ ཝཱ ‘ཨཱུནོ ནུ ཁོ ཙནྡོ པུཎྞོ ནུ ཁོ ཙནྡོ’ཏི, ཨཐ ཁོ པུཎྞོ ཙནྡོཏྭེཝ ཧོཏི, ཨེཝམེཝ ཁོ, བྷིཀྑཝེ, ཏཱ བྷིཀྑུནིཡོ ནནྡཀསྶ དྷམྨདེསནཱཡ ཨཏྟམནཱ ཙེཝ པརིཔུཎྞསངྐཔྤཱ ཙ. ཏཱསཾ, བྷིཀྑཝེ, པཉྩནྣཾ བྷིཀྑུནིསཏཱནཾ ཡཱ པཙྪིམིཀཱ བྷིཀྑུནཱི སཱ སོཏཱཔནྣཱ ཨཝིནིཔཱཏདྷམྨཱ ནིཡཏཱ སམྦོདྷིཔརཱཡཎཱ’’ཏི (མ. ནི. ༣.༤༡༥).

ཏཱསུ ཧི ཡསྶཱ བྷིཀྑུནིཡཱ སོཏཱཔཏྟིཕལསྶ ཨུཔནིསྶཡོ, སཱ སོཏཱཔཏྟིཕལེནེཝ པརིཔུཎྞསངྐཔྤཱ ཨཧོསི…པེ… ཡསྶཱ ཨརཧཏྟསྶ ཨུཔནིསྶཡོ སཱ ཨརཧཏྟེནེཝ. ཨེཝམེཝ ཨཏྟནོ ཨཛ྄ཛྷཱསཡཱནུརཱུཔེན ཡཾ ཡཾ ཛྷཱནཾ པཱདཀཾ ཀཏྭཱ ཡེ ཝཱ ཡེ ཝཱ ཛྷཱནདྷམྨེ སམྨསིཏྭཱ མགྒོ ནིབྦཏྟིཏོ ཏཾཏཾཛྷཱནསདིསོཝ སོ ཧོཏི. པཱདཀཛ྄ཛྷཱནཾ པན སམྨསིཏཛ྄ཛྷཱནཾ ཝཱ ཝིནཱ, ཨཛ྄ཛྷཱསཡམཏྟེནེཝ ཏཾ ན ཨིཛ྄ཛྷཏཱིཏི. ཨེཏྠཱཔི ཙ ཝིཔསྶནཱནིཡམོ ཝུཏྟནཡེནེཝ ཝེདིཏབྦོ.

ཏཏྠ ‘པཱདཀཛ྄ཛྷཱནམེཝ ནིཡམེཏཱི’ཏི ཨེཝཾཝཱདིཾ ཏིཔིཊཀཙཱུལ༹ནཱགཏྠེརཾ ཨནྟེཝཱསིཀཱ ཨཱཧཾསུ – ‘བྷནྟེ, ཡཏྠ ཏཱཝ པཱདཀཛ྄ཛྷཱནཾ ཨཏྠི ཏཏྠ ཏཾ ནིཡམེཏུ; ཡསྨིཾ པན པཱདཀཛ྄ཛྷཱནཾ ནཏྠི, ཏསྨིཾ ཨརཱུཔབྷཝེ ཀིཾ ནིཡམེཏཱི’ཏི? ‘ཨཱཝུསོ, ཏཏྠཔི པཱདཀཛ྄ཛྷཱནམེཝ ནིཡམེཏི. ཡོ ཧི བྷིཀྑུ ཨཊྛསམཱཔཏྟིལཱབྷཱི པཋམཛ྄ཛྷཱནཾ པཱདཀཾ ཀཏྭཱ སོཏཱཔཏྟིམགྒཕལཱནི ནིབྦཏྟེཏྭཱ ཨཔརིཧཱིནཛ྄ཛྷཱནོ ཀཱལཾ ཀཏྭཱ ཨརཱུཔབྷཝེ ནིབྦཏྟོ, པཋམཛ྄ཛྷཱནིཀཱཡ སོཏཱཔཏྟིཕལསམཱཔཏྟིཡཱ ཝུཊྛཱཡ ཝིཔསྶནཾ པཊྛཔེཏྭཱ ཨུཔརི ¶ ཏཱིཎི མགྒཕལཱནི ནིབྦཏྟེཏི, ཏསྶ ཏཱནི པཋམཛ྄ཛྷཱནིཀཱནེཝ ཧོནྟི. དུཏིཡཛ྄ཛྷཱནིཀཱདཱིསུཔི ཨེསེཝ ནཡོ. ཨརཱུཔེ ¶ ཏིཀཙཏུཀྐཛ྄ཛྷཱནཾ ཨུཔྤཛྫཏི, ཏཉྩ ཁོ ལོཀུཏྟརཾ ན ལོཀིཡཾ. ཨེཝཾ ཏཏྠཱཔི པཱདཀཛ྄ཛྷཱནམེཝ ནིཡམེཏི ཨཱཝུསོ’ཏི. ‘སུཀཐིཏོ, བྷནྟེ, པཉྷོ’ཏི.

‘ཝིཔསྶནཱཡ ཨཱརམྨཎབྷཱུཏཱ ཁནྡྷཱ ནིཡམེནྟི; ཡཾ ཡཾ ཧི པཉྩཀྑནྡྷཾ སམྨསིཏྭཱ ཝུཊྛཱཏི ཏཾཏཾསདིསོཝ མགྒོ ཧོཏཱི’ཏི ཝཱདིཾ མོརཝཱཔིཝཱསིམཧཱདཏྟཏྠེརམྤི ཨནྟེཝཱསིཀཱ ཨཱཧཾསུ ‘བྷནྟེ, ཏུམྷཱཀཾ ཝཱདེ དོསོ པཉྙཱཡཏི – རཱུཔཾ སམྨསིཏྭཱ ཝུཊྛིཏབྷིཀྑུནོ ཧི རཱུཔསདིསེན ཨབྱཱཀཏེན མགྒེན བྷཝིཏབྦཾ, ནེཝསཉྙཱནཱསཉྙཱཡཏནཾ ནཡཏོ པརིགྒཧེཏྭཱ ཝུཊྛིཏསྶ ཏཾསདིསེནེཝ ནེཝསཉྙཱནཱསཉྙཱབྷཱཝཔྤཏྟེན མགྒེན བྷཝིཏབྦ’ནྟི. ‘ན, ཨཱཝུསོ, ཨེཝཾ ཧོཏི. ལོཀུཏྟརམགྒོ ཧི ཨཔྤནཾ ཨཔྤཏྟོ ནཱམ ནཏྠི, ཏསྨཱ རཱུཔཾ སམྨསིཏྭཱ ཝུཊྛིཏསྶ ཨཊྛངྒིཀོ སོམནསྶསཧགཏམགྒོ ¶ ཧོཏི, ནེཝསཉྙཱནཱསཉྙཱཡཏནཾ སམྨསིཏྭཱ ཝུཊྛིཏསྶཔི ན སབྦཱཀཱརེན ཏཱདིསོ ཧོཏི, སཏྟངྒིཀོ པན ཨུཔེཀྑཱསཧགཏམགྒོ ཧོཏཱི’ཏི.

‘པུགྒལཛ྄ཛྷཱསཡོ ནིཡམེཏཱི’ཏིཝཱདིནོ ཙཱུལཱ༹བྷཡཏྠེརསྶཱཔི ཝཱདཾ ཨཱཧརིཏྭཱ ཏིཔིཊཀཙཱུལ༹ནཱགཏྠེརསྶ ཀཐཡིཾསུ. སོ ཨཱཧ – ‘ཡསྶ ཏཱཝ པཱདཀཛ྄ཛྷཱནཾ ཨཏྠི ཏསྶ པུགྒལཛ྄ཛྷཱསཡོ ནིཡམེཏུ, ཡསྶ ཏཾ ནཏྠི ཏསྶ ཀཏརཛ྄ཛྷཱསཡོ ནིཡམེསྶཏི ནིདྡྷནསྶ ཝུཌྜྷིགཝེསནཀཱལོ ཝིཡ ཧོཏཱི’ཏི.

ཏཾ ཀཐཾ ཨཱཧརིཏྭཱ ཏིཔིཊཀཙཱུལཱ༹བྷཡཏྠེརསྶ པུན ཀཐཡིཾསུ. སོ ‘པཱདཀཛ྄ཛྷཱནཝཏོ ཨིདཾ ཀཐིཏཾ ཨཱཝུསོ’ཏི ཨཱཧ. ཡཐཱ པན པཱདཀཛ྄ཛྷཱནཝཏོ, སམྨསིཏཛ྄ཛྷཱནཝཏོཔི ཏཐེཝ ཝེདིཏབྦཾ. པཉྩམཛ྄ཛྷཱནཏོ ཝུཊྛཱཡ ཧི པཋམཱདཱིནི སམྨསཏོ ཨུཔྤནྣམགྒོ པཋམཏྠེརཝཱདེན པཉྩམཛ྄ཛྷཱནིཀོ. དུཏིཡཝཱདེན པཋམཱདིཛ྄ཛྷཱནིཀོ ཨཱཔཛྫཏཱིཏི དྭེཔི ཝཱདཱ ཝིརུཛ྄ཛྷནྟི. ཏཏིཡཝཱདེན པནེཏྠ ‘ཡཾ ཨིཙྪཏི ཏཛ྄ཛྷཱནིཀོ ཧོཏཱི’ཏི ཏེ ཙ ཝཱདཱ ན ཝིརུཛ྄ཛྷནྟི, ཨཛ྄ཛྷཱསཡོ ཙ སཱཏྠཀོ ཧོཏཱིཏི. ཨེཝཾ ཏཡོཔི ཐེརཱ པཎྜིཏཱ བྱཏྟཱ བུདྡྷིསམྤནྣཱཝ ¶ . ཏེན ཏེསཾ ཝཱདཾ ཏནྟིཾ ཀཏྭཱ ཋཔཡིཾསུ. ཨིདྷ པན ཨཏྠམེཝ ཨུདྡྷརིཏྭཱ ཏཡོཔེཏེ ཝཱདེ ཝིཔསྶནཱཝ ནིཡམེཏཱིཏི དསྶིཏཾ.

ཨིདཱནི ¶ ‘ནིམིཏྟཾ པཊིཔདཱཔཏཱི’ཏི ཨེཏྠ ཨེཝཾ ཨངྒཔརིཎཱམཝཏོ མགྒསྶ ཨུཔྤཱདཀཱལེ གོཏྲབྷུ ཀུཏོ ཝུཊྛཱཏི? མགྒོ ཀུཏོཏི? གོཏྲབྷུ ཏཱཝ ནིམིཏྟཏོ ཝུཊྛཱཏི, པཝཏྟཾ ཚེཏྟུཾ ན སཀྐོཏི, ཨེཀཏོཝུཊྛཱནོ ཧེས. མགྒོ ནིམིཏྟཏོ ཝུཊྛཱཏི, པཝཏྟམྤི ཚིནྡཏི ཨུབྷཏོཝུཊྛཱནོ ཧེས. ཏེསཾ ཨཡཾ ཨུཔྤཏྟིནཡོ – ཡསྨིཉྷི ཝཱརེ མགྒཝུཊྛཱནཾ ཧོཏི, ཏསྨིཾ ཨནུལོམཾ ནེཝ ཨེཀཾ ཧོཏི, ན པཉྩམཾ. ཨེཀཉྷི ཨཱསེཝནཾ ན ལབྷཏི, པཉྩམཾ བྷཝངྒསྶ ཨཱསནྣཏྟཱ པཝེདྷཏི. ཏདཱ ཧི ཛཝནཾ པཏིཏཾ ནཱམ ཧོཏི. ཏསྨཱ ནེཝ ཨེཀཾ ཧོཏི ན པཉྩམཾ. མཧཱཔཉྙསྶ པན དྭེ ཨནུལོམཱནི ཧོནྟི, ཏཏིཡཾ གོཏྲབྷུ, ཙཏུཏྠཾ མགྒཙིཏྟཾ, ཏཱིཎི ཕལཱནི, ཏཏོ བྷཝངྒོཏརཎཾ. མཛ྄ཛྷིམཔཉྙསྶ ཏཱིཎི ཨནུལོམཱནི ཧོནྟི, ཙཏུཏྠཾ གོཏྲབྷུ, པཉྩམཾ མགྒཙིཏྟཾ, དྭེ ཕལཱནི, ཏཏོ བྷཝངྒོཏརཎཾ. མནྡཔཉྙསྶ ཙཏྟཱརི ཨནུལོམཱནི, ཧོནྟི པཉྩམཾ གོཏྲབྷུ, ཚཊྛཾ མགྒཙིཏྟཾ, སཏྟམཾ ཕལཾ, ཏཏོ བྷཝངྒོཏརཎཾ. ཏཏྲ མཧཱཔཉྙམནྡཔཉྙཱནཾ ཝསེན ཨཀཐེཏྭཱ མཛ྄ཛྷིམཔཉྙསྶ ཝསེན ཀཐེཏབྦཾ.

ཡསྨིཉྷི ¶ ཝཱརེ མགྒཝུཊྛཱནཾ ཧོཏི, ཏསྨིཾ ཀིརིཡཱཧེཏུཀམནོཝིཉྙཱཎདྷཱཏུ ཨུཔེཀྑཱསཧགཏཱ མནོདྭཱརཱཝཛྫནཾ ཧུཏྭཱ ཝིཔསྶནཱགོཙརེ ཁནྡྷེ ཨཱརམྨཎཾ ཀཏྭཱ བྷཝངྒཾ ཨཱཝཊྚེཏི. ཏདནནྟརཾ ཏེནེཝ ཨཱཝཛྫནེན གཧིཏཀྑནྡྷེ གཧེཏྭཱ ཨུཔྤཛྫཏི པཋམཾ ཛཝནཾ ཨནུལོམཉཱཎཾ. ཏཾ ཏེསུ ཁནྡྷེསུ ཨནིཙྩཱཏི ཝཱ དུཀྑཱཏི ཝཱ ཨནཏྟཱཏི ¶ ཝཱ པཝཏྟིཏྭཱ ཨོལཱ༹རིཀཾ ཨོལཱ༹རིཀཾ སཙྩཔཊིཙྪཱདཀཏམཾ ཝིནོདེཏྭཱ ཏཱིཎི ལཀྑཎཱནི བྷིཡྻོ བྷིཡྻོ པཱཀཊཱནི ཀཏྭཱ ནིརུཛ྄ཛྷཏི. ཏདནནྟརཾ ཨུཔྤཛྫཏི དུཏིཡཱནུལོམཾ. ཏེསུ པུརིམཾ ཨནཱསེཝནཾ. དུཏིཡསྶ པུརིམཾ ཨཱསེཝནཾ ཧོཏི. ཏམྤི ལདྡྷཱསེཝནཏྟཱ ཏིཀྑཾ སཱུརཾ པསནྣཾ ཧུཏྭཱ ཏསྨིཾཡེཝཱརམྨཎེ ཏེནེཝཱཀཱརེན པཝཏྟིཏྭཱ མཛ྄ཛྷིམཔྤམཱཎཾ སཙྩཔཊིཙྪཱདཀཏམཾ ཝིནོདེཏྭཱ ཏཱིཎི ལཀྑཎཱནི བྷིཡྻོ བྷིཡྻོ པཱཀཊཱནི ཀཏྭཱ ནིརུཛ྄ཛྷཏི. ཏདནནྟརཾ ཨུཔྤཛྫཏི ཏཏིཡཱནུལོམཾ. ཏསྶ དུཏིཡཾ ཨཱསེཝནཾ ཧོཏི. ཏམྤི ལདྡྷཱསེཝནཏྟཱ ཏིཀྑཾ སཱུརཾ པསནྣཾ ཧུཏྭཱ ཏསྨིཾཡེཝཱརམྨཎེ ཏེནེཝཱཀཱརེན པཝཏྟིཏྭཱ ཏདཝསེསཾ ཨཎུསཧགཏཾ སཙྩཔཊིཙྪཱདཀཏམཾ ཝིནོདེཏྭཱ ནིརཝསེསཾ ཀཏྭཱ ཏཱིཎི ལཀྑཎཱནི བྷིཡྻོ བྷིཡྻོ པཱཀཊཱནི ¶ ཀཏྭཱ ནིརུཛ྄ཛྷཏི. ཨེཝཾ ཏཱིཧི ཨནུལོམེཧི སཙྩཔཊིཙྪཱདཀཏམེ ཝིནོདིཏེ ཏདནནྟརཾ ཨུཔྤཛྫཏི གོཏྲབྷུཉྙཱཎཾ ནིབྦཱནཾ ཨཱརམྨཎཾ ཀུརུམཱནཾ.

ཏཏྲཱཡཾ ཨུཔམཱ – ཨེཀོ ཀིར ཙཀྑུམཱ པུརིསོ ནཀྑཏྟཡོགཾ ཛཱནིསྶཱམཱིཏི རཏྟིབྷཱགེ ནིཀྑམིཏྭཱ ཙནྡཾ པསྶིཏུཾ ཨུདྡྷཾ ཨུལློཀེསི. ཏསྶ ཝལཱཧཀེཧི པཊིཙྪནྣཏྟཱ ཙནྡོ ན པཉྙཱཡིཏྠ. ཨཐེཀོ ཝཱཏོ ཨུཊྛཧིཏྭཱ ཐཱུལཐཱུལེ ཝལཱཧཀེ ཝིདྡྷཾསེསི. ཨཔརོ མཛ྄ཛྷིམེ. ཨཔརོ སུཁུམེ. ཏཏོ སོ པུརིསོ ཝིགཏཝལཱཧཀེ ནབྷེ ཙནྡཾ དིསྭཱ ནཀྑཏྟཡོགཾ ཨཉྙཱསི.

ཏཏྠ ཏཡོ ཝལཱཧཀཱ ཝིཡ སཙྩཔཊིཙྪཱདཀཐཱུལམཛ྄ཛྷིམསུཁུམཀིལེསནྡྷཀཱརཱ. ཏཡོ ཝཱཏཱ ཝིཡ ཏཱིཎི ཨནུལོམཙིཏྟཱནི. ཙཀྑུམཱ པུརིསོ ཝིཡ གོཏྲབྷུཉྙཱཎཾ. ཙནྡོ ཝིཡ ནིབྦཱནཾ. ཨེཀེཀསྶ ཝཱཏསྶ ཡཐཱཀྐམེན ཝལཱཧཀཏྟཡཝིདྡྷཾསནཾ ཝིཡ ཨེཀེཀསྶ ཨནུལོམཙིཏྟསྶ སཙྩཔཊིཙྪཱདཀཏམཝིནོདནཾ. ཝིགཏཝལཱཧཀེ ནབྷེ ཏསྶ པུརིསསྶ ཝིསུདྡྷཙནྡདསྶནཾ ཝིཡ ཝིགཏེ སཙྩཔཊིཙྪཱདཀེ ¶ ཏམེ གོཏྲབྷུཉྙཱཎསྶ སུཝིསུདྡྷནིབྦཱནཱརམྨཎཀརཎཾ.

ཡཐེཝ ཧི ཏཡོ ཝཱཏཱ ཙནྡཔཊིཙྪཱདཀེ ཝལཱཧཀེཡེཝ ཝིདྡྷཾསེཏུཾ སཀྐོནྟི, ན ཙནྡཾ དཊྛུཾ, ཨེཝཾ ཨནུལོམཱནི སཙྩཔཊིཙྪཱདཀཏམེཡེཝ ཝིནོདེཏུཾ སཀྐོནྟི, ན ནིབྦཱནཾ ཨཱརམྨཎཾ ཀཱཏུཾ ¶ . ཡཐཱ སོ པུརིསོ ཙནྡམེཝ དཊྛུཾ སཀྐོཏི ན ཝལཱཧཀེ ཝིདྡྷཾསེཏུཾ, ཨེཝཾ གོཏྲབྷུཉྙཱཎཾ ནིབྦཱནམེཝ ཨཱརམྨཎཾ ཀཱཏུཾ སཀྐོཏི ན ཀིལེསཏམཾ ཝིནོདེཏུཾ. ཨེཝཾ ཨནུལོམཾ སངྑཱརཱརམྨཎཾ ཧོཏི, གོཏྲབྷུ ནིབྦཱནཱརམྨཎཾ.

ཡདི ཧི གོཏྲབྷུ ཨནུལོམེན གཧིཏཱརམྨཎཾ གཎྷེཡྻ པུན ཨནུལོམཾ ཏཾ ཨནུབནྡྷེཡྻཱཏི མགྒཝུཊྛཱནམེཝ ན བྷཝེཡྻ. གོཏྲབྷུཉྙཱཎཾ པན ཨནུལོམསྶ ཨཱརམྨཎཾ ཨགྒཧེཏྭཱ ཏཾ ཨཔཙྪཏོཔཝཏྟིཀཾ ཀཏྭཱ སཡཾ ཨནཱཝཛྫནམྤི སམཱནཾ ཨཱཝཛྫནཊྛཱནེ ཋཏྭཱ ཨེཝཾ ནིབྦཏྟཱཧཱིཏི མགྒསྶ སཉྙཾ དཏྭཱ ཝིཡ ནིརུཛ྄ཛྷཏི. མགྒོཔི ཏེན དིནྣསཉྙཾ ཨམུཉྩིཏྭཱཝ ཨཝཱིཙིསནྟཏིཝསེན ཏཾ ཉཱཎཾ ཨནུབནྡྷམཱནོ ཨནིབྦིདྡྷཔུབྦཾ ཨཔདཱལིཏཔུབྦཾ ལོབྷཀྑནྡྷཾ དོསཀྑནྡྷཾ མོཧཀྑནྡྷཾ ནིབྦིཛ྄ཛྷམཱནོཝ པདཱལཡམཱནོཝ ནིབྦཏྟཏི.

ཏཏྲཱཡཾ ¶ ཨུཔམཱ – ཨེཀོ ཀིར ཨིསྶཱསོ དྷནུསཏམཏྠཀེ ཕལཀསཏཾ ཋཔཱཔེཏྭཱ ཝཏྠེན མུཁཾ ཝེཋེཏྭཱ སརཾ སནྣཡ྄ཧིཏྭཱ ཙཀྐཡནྟེ ཨཊྛཱསི. ཨཉྙོ པུརིསོ ཙཀྐཡནྟཾ ཨཱཝཉྪིཏྭཱ ཡདཱ ཨིསྶཱསསྶ ཕལཀསཏཾ ཨབྷིམུཁཾ ཧོཏི ཏདཱ ཏཏྠ དཎྜཀེན སཉྙཾ དེཏི, ཨིསྶཱསོ དཎྜཀསཉྙཾ ཨམུཉྩིཏྭཱཝ སརཾ ཁིཔིཏྭཱ ཕལཀསཏཾ ནིབྦིཛ྄ཛྷཏི. ཏཏྠ དཎྜཀསཉྙཱ ཝིཡ གོཏྲབྷུཉྙཱཎཾ. ཨིསྶཱསོ ཝིཡ མགྒཉཱཎཾ. ཨིསྶཱསསྶ དཎྜཀསཉྙཾ ཨམུཉྩིཏྭཱཝ ཕལཀསཏནིབྦིཛ྄ཛྷནཾ ཝིཡ མགྒཉཱཎསྶ གོཏྲབྷུཉྙཱཎེན དིནྣསཉྙཾ ཨམུཉྩིཏྭཱཝ ནིབྦཱནཾ ཨཱརམྨཎཾ ཀཏྭཱ ཨནིབྦིདྡྷཔུབྦཨཔདཱལིཏཔུབྦཱནཾ ལོབྷཀྑནྡྷཱདཱིནཾ ནིབྦིཛ྄ཛྷནཔདཱལནཾ. བྷཱུམིལདྡྷཝཊྚསེཏུསམུགྒྷཱཏཀརཎནྟིཔི ¶ ཨེཏདེཝ. མགྒསྶ ཧི ཨེཀམེཝ ཀིཙྩཾ ཨནུསཡཔྤཛཧནཾ. ཨིཏི སོ ཨནུསཡེ པཛཧནྟོ ནིམིཏྟཱ ཝུཊྛཱཏི ནཱམ, པཝཏྟཾ ཚིནྡཏི ནཱམ. ‘ནིམིཏྟ’ནྟི རཱུཔཝེདནཱསཉྙཱསངྑཱརཝིཉྙཱཎནིམིཏྟཾ. ‘པཝཏྟ’མྤི རཱུཔཝེདནཱསཉྙཱསངྑཱརཝིཉྙཱཎཔཝཏྟམེཝ. ཏཾ དུཝིདྷཾ ཧོཏི – ཨུཔཱདིནྣཀཾ ཨནུཔཱདིནྣཀནྟི. ཏེསུ མགྒསྶ ཨནུཔཱདིནྣཀཏོ ཝུཊྛཱནཙྪཱཡཱ དིསྶཏཱིཏི ཝཏྭཱ ཨནུཔཱདིནྣཀཏོ ཝུཊྛཱཏཱིཏི ཝདིཾསུ.

སོཏཱཔཏྟིམགྒེན ཧི ཙཏྟཱརི དིཊྛིགཏསམྤཡུཏྟཱནི ཝིཙིཀིཙྪཱསཧགཏནྟི པཉྩ ཙིཏྟཱནི པཧཱིཡནྟི. ཏཱནི རཱུཔཾ སམུཊྛཱཔེནྟི. ཏཾ ཨནུཔཱདིནྣཀརཱུཔཀྑནྡྷོ. ཏཱནི ཙིཏྟཱནི ཝིཉྙཱཎཀྑནྡྷོ. ཏཾསམྤཡུཏྟཱ ཝེདནཱ སཉྙཱ སངྑཱརཱ ཏཡོ ཨརཱུཔཀྑནྡྷཱ. ཏཏྠ སཙེ སོཏཱཔནྣསྶ སོཏཱཔཏྟིམགྒོ ཨབྷཱཝིཏོ ཨབྷཝིསྶ ཏཱནི པཉྩ ཙིཏྟཱནི ཚསུ ཨཱརམྨཎེསུ པརིཡུཊྛཱནཾ ¶ པཱཔུཎེཡྻུཾ. སོཏཱཔཏྟིམགྒོ པན ཏེསཾ པརིཡུཊྛཱནེནཔྤཏྟིཾ ཝཱརཡམཱནོ སེཏུསམུགྒྷཱཏཾ ཨབྷབྦུཔྤཏྟིཀབྷཱཝཾ ཀུརུམཱནོ ཨནུཔཱདིནྣཀཏོ ཝུཊྛཱཏི ནཱམ.

སཀདཱགཱམིམགྒེན ཙཏྟཱརི དིཊྛིགཏཝིཔྤཡུཏྟཱནི དྭེ དོམནསྶསཧགཏཱནཱིཏི ཨོལཱ༹རིཀཀཱམརཱགབྱཱཔཱདཝསེན ཚ ཙིཏྟཱནི པཧཱིཡནྟི. ཨནཱགཱམིམགྒེན ཨཎུསཧགཏཀཱམརཱགབྱཱཔཱདཝསེན ཏཱནི ཨེཝ ཚ ཙིཏྟཱནི པཧཱིཡནྟི. ཨརཧཏྟམགྒེན ཙཏྟཱརི དིཊྛིགཏཝིཔྤཡུཏྟཱནི ཨུདྡྷཙྩསཧགཏཉྩཱཏི པཉྩ ཨཀུསལཙིཏྟཱནི པཧཱིཡནྟི. ཏཏྠ སཙེ ཏེསཾ ཨརིཡཱནཾ ཏེ མགྒཱ ཨབྷཱཝིཏཱ ཨསྶུ, ཏཱནི ཙིཏྟཱནི ཚསུ ཨཱརམྨཎེསུ པརིཡུཊྛཱནཾ པཱཔུཎེཡྻུཾ. ཏེ པན ཏེསཾ མགྒཱ པརིཡུཊྛཱནཔྤཏྟིཾ ཝཱརཡམཱནཱ སེཏུསམུགྒྷཱཏཾ ¶ ཨབྷབྦུཔྤཏྟིཀབྷཱཝཾ ཀུརུམཱནཱ ཨནུཔཱདིནྣཀཏོ ཝུཊྛཧནྟི ནཱམ.

ཨུཔཱདིནྣཀཏོ ཝུཊྛཱནཙྪཱཡཱ དིསྶཏཱིཏི ཝཏྭཱ ཨུཔཱདིནྣཀཏོ ¶ ཝུཊྛཱཏཱིཏིཔི ཝདིཾསུ. སཙེ ཧི སོཏཱཔནྣསྶ སོཏཱཔཏྟིམགྒོ ཨབྷཱཝིཏོ ཨབྷཝིསྶ, ཋཔེཏྭཱ སཏྟ བྷཝེ ཨནམཏགྒེ སཾསཱརཝཊྚེ ཨུཔཱདིནྣཀཔྤཝཏྟཾ པཝཏྟེཡྻ. ཀསྨཱ? ཏསྶ པཝཏྟིཡཱ ཧེཏཱུནཾ ཨཏྠིཏཱཡ. ཏཱིཎི སཾཡོཛནཱནི དིཊྛཱནུསཡོ ཝིཙིཀིཙྪཱནུསཡོཏི ཨིམེ པན པཉྩ ཀིལེསེ སོཏཱཔཏྟིམགྒོ ཨུཔྤཛྫམཱནོཝ སམུགྒྷཱཏེཏི. ཨིདཱནི ཀུཏོ སོཏཱཔནྣསྶ སཏྟ བྷཝེ ཋཔེཏྭཱ ཨནམཏགྒེ སཾསཱརཝཊྚེ ཨུཔཱདིནྣཀཔྤཝཏྟཾ པཝཏྟིསྶཏི? ཨེཝཾ སོཏཱཔཏྟིམགྒོ ཨུཔཱདིནྣཀཔྤཝཏྟཾ ཨཔྤཝཏྟཾ ཀུརུམཱནོ ཨུཔཱདིནྣཀཏོ ཝུཊྛཱཏི ནཱམ.

སཙེ སཀདཱགཱམིསྶ སཀདཱགཱམིམགྒོ ཨབྷཱཝིཏོ ཨབྷཝིསྶ, ཋཔེཏྭཱ དྭེ བྷཝེ པཉྩསུ བྷཝེསུ ཨུཔཱདིནྣཀཔཝཏྟཾ པཝཏྟེཡྻ. ཀསྨཱ? ཏསྶ པཝཏྟིཡཱ ཧེཏཱུནཾ ཨཏྠིཏཱཡ. ཨོལཱ༹རིཀཱནི ཀཱམརཱགཔཊིགྷསཾཡོཛནཱནི ཨོལཱ༹རིཀོ ཀཱམརཱགཱནུསཡོ པཊིགྷཱནུསཡོཏི ཨིམེ པན ཙཏྟཱརོ ཀིལེསེ སོ མགྒོ ཨུཔྤཛྫམཱནོཝ སམུགྒྷཱཏེཏི. ཨིདཱནི ཀུཏོ སཀདཱགཱམིསྶ དྭེ བྷཝེ ཋཔེཏྭཱ པཉྩསུ བྷཝེསུ ཨུཔཱདིནྣཀཔྤཝཏྟཾ པཝཏྟིསྶཏི? ཨེཝཾ སཀདཱགཱམིམགྒོ ཨུཔཱདིནྣཀཔྤཝཏྟཾ ཨཔྤཝཏྟཾ ཀུརུམཱནོ ཨུཔཱདིནྣཀཏོ ཝུཊྛཱཏི ནཱམ.

སཙེ ཨནཱགཱམིསྶ ཨནཱགཱམིམགྒོ ཨབྷཱཝིཏོ ཨབྷཝིསྶ, ཋཔེཏྭཱ ཨེཀཾ བྷཝཾ དུཏིཡབྷཝེ ཨུཔཱདིནྣཀཔྤཝཏྟཾ པཝཏྟེཡྻ. ཀསྨཱ? ཏསྶ པཝཏྟིཡཱ ཧེཏཱུནཾ ཨཏྠིཏཱཡ. ཨཎུསཧགཏཱནི ¶ ཀཱམརཱགཔཊིགྷསཾཡོཛནཱནི ཨཎུསཧགཏོ ཀཱམརཱགཱནུསཡོ པཊིགྷཱནུསཡོཏི ཨིམེ པན ཙཏྟཱརོ ཀིལེསེ སོ མགྒོ ཨུཔྤཛྫམཱནོཝ སམུགྒྷཱཏེཏི. ཨིདཱནི ཀུཏོ ཨནཱགཱམིསྶ ཨེཀཾ བྷཝཾ ཋཔེཏྭཱ དུཏིཡབྷཝེ ཨུཔཱདིནྣཀཔྤཝཏྟཾ པཝཏྟིསྶཏི? ཨེཝཾ ཨནཱགཱམིམགྒོ ཨུཔཱདིནྣཀཔྤཝཏྟཾ ཨཔྤཝཏྟཾ ཀུརུམཱནོ ཨུཔཱདིནྣཀཏོ ཝུཊྛཱཏི ནཱམ.

སཙེ ཨརཧཏོ ཨརཧཏྟམགྒོ ཨབྷཱཝིཏོ ཨབྷཝིསྶ, རཱུཔཱརཱུཔབྷཝེསུ ཨུཔཱདིནྣཀཔྤཝཏྟཾ པཝཏྟེཡྻ. ཀསྨཱ? ཏསྶ པཝཏྟིཡཱ ཧེཏཱུནཾ ཨཏྠིཏཱཡ ¶ . རཱུཔརཱགོ ཨརཱུཔརཱགོ མཱནོ ཨུདྡྷཙྩཾ ཨཝིཛྫཱ མཱནཱནུསཡོ བྷཝརཱགཱནུསཡོ ཨཝིཛྫཱནུསཡོཏི ཨིམེ པན ཨཊྛ ཀིལེསེ སོ མགྒོ ཨུཔྤཛྫམཱནོཝ སམུགྒྷཱཏེཏི. ཨིདཱནི ཀུཏོ ཁཱིཎཱསཝསྶ པུནབྦྷཝེ ཨུཔཱདིནྣཀཔྤཝཏྟཾ པཝཏྟིསྶཏི? ཨེཝཾ ཨརཧཏྟམགྒོ ¶ ཨུཔཱདིནྣཀཔྤཝཏྟཾ ཨཔྤཝཏྟཾ ཀུརུམཱནོ ཨུཔཱདིནྣཀཏོ ཝུཊྛཱཏི ནཱམ.

སོཏཱཔཏྟིམགྒོ ཙེཏྠ ཨཔཱཡབྷཝཏོ ཝུཊྛཱཏི, སཀདཱགཱམིམགྒོ སུགཏིཀཱམབྷཝེཀདེསཏོ, ཨནཱགཱམིམགྒོ ཀཱམབྷཝཏོ, ཨརཧཏྟམགྒོ རཱུཔཱརཱུཔབྷཝཏོ སབྦབྷཝེཧིཔི ཝུཊྛཱཏི ཨེཝཱཏི ཝདནྟི.

ཨིམསྶ པནཏྠསྶ ཝིབྷཱཝནཏྠཾ ཨཡཾ པཱལི༹ – ‘‘སོཏཱཔཏྟིམགྒཉཱཎེན ཨབྷིསངྑཱརཝིཉྙཱཎསྶ ནིརོདྷེན སཏྟ བྷཝེ ཋཔེཏྭཱ ཨནམཏགྒེ སཾསཱརཝཊྚེ ཡེ ཨུཔྤཛྫེཡྻུཾ, ནཱམཉྩ རཱུཔཉྩ ཨེཏྠེཏེ ནིརུཛ྄ཛྷནྟི ཝཱུཔསམནྟི ཨཏྠཾ གཙྪནྟི པཊིཔྤསྶམྦྷནྟི.

‘སཀདཱགཱམིམགྒཉཱཎེན ཨབྷིསངྑཱརཝིཉྙཱཎསྶ ནིརོདྷེན དྭེ བྷཝེ ཋཔེཏྭཱ པཉྩསུ བྷཝེསུ ཡེ ཨུཔྤཛྫེཡྻུཾ, ནཱམཉྩ རཱུཔཉྩ ཨེཏྠེཏེ ནིརུཛ྄ཛྷནྟི ཝཱུཔསམནྟི ཨཏྠཾ གཙྪནྟི པཊིཔྤསྶམྦྷནྟི.

‘ཨནཱགཱམིམགྒཉཱཎེན ཨབྷིསངྑཱརཝིཉྙཱཎསྶ ནིརོདྷེན ཨེཀཾ བྷཝཾ ཋཔེཏྭཱ ཀཱམདྷཱཏུཡཱ དྭཱིསུ བྷཝེསུ ཡེ ཨུཔྤཛྫེཡྻུཾ, ནཱམཉྩ རཱུཔཉྩ ཨེཏྠེཏེ ནིརུཛ྄ཛྷནྟི ཝཱུཔསམནྟི ཨཏྠཾ གཙྪནྟི པཊིཔྤསྶམྦྷནྟི.

‘ཨརཧཏྟམགྒཉཱཎེན ཨབྷིསངྑཱརཝིཉྙཱཎསྶ ནིརོདྷེན རཱུཔདྷཱཏུཡཱ ཝཱ ཨརཱུཔདྷཱཏུཡཱ ཝཱ ཡེ ཨུཔྤཛྫེཡྻུཾ ¶ , ནཱམཉྩ རཱུཔཉྩ ཨེཏྠེཏེ ནིརུཛ྄ཛྷནྟི ཝཱུཔསམནྟི ཨཏྠཾ གཙྪནྟི པཊིཔྤསྶམྦྷནྟི. ཨརཧཏོ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡནྟསྶ ཙརིམཝིཉྙཱཎསྶ ནིརོདྷེན པཉྙཱ ཙ སཏི ཙ ནཱམཉྩ རཱུཔཉྩ ཨེཏྠེཏེ ནིརུཛ྄ཛྷནྟི ཝཱུཔསམནྟི ཨཏྠཾ གཙྪནྟི པཊིཔྤསྶམྦྷནྟཱི’’ཏི (ཙཱུལ༹ནི. ཨཛིཏམཱཎཝཔུཙྪཱནིདྡེས ༦). ཨཡཾ ཏཱཝ ནིམིཏྟེ ཝིནིཙྪཡོ.

‘པཊིཔདཱཔཏཱི’ཏི – ཨེཏྠ པན པཊིཔདཱ ཙལཏི ན ཙལཏཱིཏི? ཙལཏི. ཏཐཱགཏསྶ ཧི སཱརིཔུཏྟཏྠེརསྶ ཙ ཙཏྟཱརོཔི མགྒཱ སུཁཔཊིཔདཱ ཁིཔྤཱབྷིཉྙཱ ཨཧེསུཾ. མཧཱམོགྒལླཱནཏྠེརསྶ པཋམམགྒོ སུཁཔཊིཔདོ ཁིཔྤཱབྷིཉྙོ, ཨུཔརི ཏཡོ མགྒཱ དུཀྑཔཊིཔདཱ ཁིཔྤཱབྷིཉྙཱ. ཀསྨཱ? ནིདྡཱབྷིབྷཱུཏཏྟཱ. སམྨཱསམྦུདྡྷོ ¶ ཀིར སཏྟཱཧཾ དཧརཀུམཱརཀཾ ཝིཡ ཐེརཾ པརིཧརི. ཐེརོཔི ཨེཀདིཝསཾ ནིདྡཱཡམཱནོ ནིསཱིདི. ཨཐ ནཾ སཏྠཱ ཨཱཧ – ‘‘པཙལཱཡསི ནོ ཏྭཾ, མོགྒལླཱན, པཙལཱཡསི ནོ ཏྭཾ མོགྒལླཱནཱ’’ཏི (ཨ. ནི. ༧.༦༡). ཨེཝརཱུཔསྶཔི མཧཱབྷིཉྙཔྤཏྟསྶ སཱཝཀསྶ པཊིཔདཱ ¶ ཙལཏི, སེསཱནཾ ཀིཾ ན ཙལིསྶཏི? ཨེཀཙྩསྶ ཧི བྷིཀྑུནོ ཙཏྟཱརོཔི མགྒཱ དུཀྑཔཊིཔདཱ དནྡྷཱབྷིཉྙཱ ཧོནྟི, ཨེཀཙྩསྶ དུཀྑཔཊིཔདཱ ཁིཔྤཱབྷིཉྙཱ, ཨེཀཙྩསྶ སུཁཔཊིཔདཱ དནྡྷཱབྷིཉྙཱ, ཨེཀཙྩསྶ སུཁཔཊིཔདཱ ཁིཔྤཱབྷིཉྙཱ. ཨེཀཙྩསྶ པཋམམགྒོ དུཀྑཔཊིཔདོ དནྡྷཱབྷིཉྙོ ཧོཏི, དུཏིཡམགྒོ དུཀྑཔཊིཔདོ ཁིཔྤཱབྷིཉྙོ, ཏཏིཡམགྒོ སུཁཔཊིཔདོ དནྡྷཱབྷིཉྙོ, ཙཏུཏྠམགྒོ སུཁཔཊིཔདོ ཁིཔྤཱབྷིཉྙོཏི.

ཡཐཱ ཙ པཊིཔདཱ ཨེཝཾ ཨདྷིཔཏིཔི ཙལཏི ཨེཝ. ཨེཀཙྩསྶ ཧི བྷིཀྑུནོ ཙཏྟཱརོཔི མགྒཱ ཚནྡཱདྷིཔཏེཡྻཱ ཧོནྟི, ཨེཀཙྩསྶ ཝཱིརིཡཱདྷིཔཏེཡྻཱ, ཨེཀཙྩསྶ ཙིཏྟཱདྷིཔཏེཡྻཱ, ཨེཀཙྩསྶ ཝཱིམཾསཱདྷིཔཏེཡྻཱ. ཨེཀཙྩསྶ པན པཋམམགྒོ ཚནྡཱདྷིཔཏེཡྻོ ཧོཏི, དུཏིཡོ ཝཱིརིཡཱདྷིཔཏེཡྻོ, ཏཏིཡོ ཙིཏྟཱདྷིཔཏེཡྻོ, ཙཏུཏྠོ ཝཱིམཾསཱདྷིཔཏེཡྻོཏི.

པཀིཎྞཀཀཐཱ ནིཊྛིཏཱ.

པཋམམགྒཝཱིསཏིམཧཱནཡོ

༣༥༧. ཨིདཱནི ¶ ཡསྨཱ ལོཀུཏྟརཀུསལཾ བྷཱཝེནྟོ ན ཀེཝལཾ ཨུཔནིཛ྄ཛྷཱཡནཊྛེན ཛྷཱནཾཡེཝ བྷཱཝེཏི, ནིཡྻཱནཊྛེན པན མགྒམྤི བྷཱཝེཏི, ཨུཔཊྛཱནཊྛེན སཏིཔཊྛཱནམྤི, པདཧནཊྛེན སམྨཔྤདྷཱནམྤི, ཨིཛ྄ཛྷནཊྛེན ཨིདྡྷིཔཱདམྤི, ཨདྷིཔཏིཡཊྛེན ཨིནྡྲིཡམྤི, ཨཀམྤིཡཊྛེན བལམྤི, བུཛ྄ཛྷནཊྛེན བོཛ྄ཛྷངྒམྤི, ཏཐཊྛེན སཙྩམྤི, ཨཝིཀྑེཔཊྛེན སམཐམྤི, སུཉྙཏཊྛེན དྷམྨམྤི, རཱསཊྛེན ཁནྡྷམྤི, ཨཱཡཏནཊྛེན ཨཱཡཏནམྤི, སུཉྙསབྷཱཝནིསྶཏྟཊྛེན དྷཱཏུམྤི, པཙྩཡཊྛེན ཨཱཧཱརམྤི, ཕུསནཊྛེན ཕསྶམྤི, ཝེདཡིཏཊྛེན ཝེདནམྤི, སཉྫཱནནཊྛེན སཉྙམྤི, ཙེཏཡིཏཊྛེན ཙེཏནམྤི, ཝིཛཱནནཊྛེན ཙིཏྟམྤི བྷཱཝེཏི, ཏསྨཱ ཨེཏེསཾ ཨེཀཱུནཝཱིསཏིཡཱ པདཱནཾ དསྶནཏྠཾ པུན ཀཏམེ དྷམྨཱ ཀུསལཱཏིཨཱདི ཝུཏྟཾ. ཨེཝཾ ‘ཨིདམྤི བྷཱཝེཏི, ཨིདམྤི བྷཱཝེཏཱི’ཏི པུགྒལཛ྄ཛྷཱསཡེན ཙེཝ དེསནཱཝིལཱསེན ཙ ཝཱིསཏི ནཡཱ དེསིཏཱ ཧོནྟི ¶ . དྷམྨཾ སོཏུཾ ནིསིནྣདེཝཔརིསཱཡ ཧི ཡེ ཨུཔནིཛ྄ཛྷཱཡནཊྛེན ལོཀུཏྟརཾ ¶ ‘ཛྷཱན’ནྟི ཀཐིཏེ བུཛ྄ཛྷནྟི, ཏེསཾ སཔྤཱཡཝསེན ཛྷཱནནྟི ཀཐིཏཾ…པེ… ཡེ ཝིཛཱནནཊྛེན ‘ཙིཏྟ’ནྟི ཝུཏྟེ བུཛ྄ཛྷནྟི, ཏེསཾ སཔྤཱཡཝསེན ཙིཏྟནྟི ཀཐིཏཾ. ཨཡམེཏྠ ‘པུགྒལཛ྄ཛྷཱསཡོ’.

སམྨཱསམྦུདྡྷོ པན ཨཏྟནོ བུདྡྷསུབོདྷིཏཱཡ དསབལཙཏུཝེསཱརཛྫཙཏུཔཊིསམྦྷིདཏཱཡ ཚཨསཱདྷཱརཎཉཱཎཡོགེན ཙ དེསནཾ ཡདིཙྪཀཾ ནིཡམེཏྭཱ དསྶེཏི. ཨིཙྪནྟོ ཨུཔནིཛ྄ཛྷཱཡནཊྛེན ལོཀུཏྟརཾ ཛྷཱནནྟི དསྶེཏི, ཨིཙྪནྟོ ནིཡྻཱནཊྛེན…པེ… ཝིཛཱནནཊྛེན ལོཀུཏྟརཾ ཙིཏྟནྟི. ཨཡཾ ‘དེསནཱཝིལཱསོ’ ནཱམ. ཏཏྠ ཡཐེཝ ལོཀུཏྟརཾ ཛྷཱནནྟི ཝུཏྟཊྛཱནེ དས ནཡཱ ཝིབྷཏྟཱ, ཨེཝཾ མགྒཱདཱིསུཔི ཏེཡེཝ ཝེདིཏབྦཱ. ཨིཏི ཝཱིསཏིཡཱ ཋཱནེསུ དས དས ཀཏྭཱ དྭེ ནཡསཏཱནི ཝིབྷཏྟཱནི ཧོནྟི.

༣༥༨. ཨིདཱནི ཨདྷིཔཏིབྷེདཾ དསྶེཏུཾ པུན ཀཏམེ དྷམྨཱ ཀུསལཱཏིཨཱདི ཨཱརདྡྷཾ. ཏཏྠ ཚནྡཾ དྷུརཾ ཛེཊྛཀཾ པུབྦངྒམཾ ཀཏྭཱ ནིབྦཏྟིཏཾ ལོཀུཏྟརཾ ཛྷཱནཾ ཚནྡཱདྷིཔཏེཡྻཾ ནཱམ. སེསེསུཔི ཨེསེཝ ནཡོ. ཨིཏི པུརིམསྨིཾ སུདྡྷིཀེ དྭེནཡསཏཱནི ཚནྡཱདྷིཔཏེཡྻཱདཱིསུཔི དྭེ དྭེཏི ནཡསཧསྶེན བྷཱཛེཏྭཱ པཋམམགྒཾ དསྶེསི དྷམྨརཱཛཱ.

པཋམམགྒོ ནིཊྛིཏོ.

དུཏིཡམགྒོ

༣༦༡. ཨིདཱནི ¶ དུཏིཡམགྒཱདཱིནཾ དསྶནཏྠཾ པུན ཀཏམེ དྷམྨཱ ཀུསལཱཏིཨཱདི ཨཱརདྡྷཾ. ཏཏྠ ཀཱམརཱགབྱཱཔཱདཱནཾ ཏནུབྷཱཝཱཡཱཏི ཨེཏེསཾ ཀིལེསཱནཾ ཏནུབྷཱཝཏྠཱཡ. ཏཏྠ དྭཱིཧི ཀཱརཎེཧི ཏནུབྷཱཝོ ཝེདིཏབྦོ – ཨདྷིཙྩུཔྤཏྟིཡཱ ཙ པརིཡུཊྛཱནམནྡཏཱཡ ཙ. སཀདཱགཱམིསྶ ཧི, ཝཊྚཱནུསཱརིམཧཱཛནསྶེཝ, ཀིལེསཱ ཨབྷིཎྷཾ ནུཔྤཛྫནྟི, ཀདཱཙི ཀདཱཙི ཨུཔྤཛྫནྟི; ཨུཔྤཛྫནྟཱཔི ཝིརལཱ༹ཀཱརཱ ཧུཏྭཱ ཨུཔྤཛྫནྟི, ཝིརལ༹ཝཱཔིཏཁེཏྟེ ཨངྐུརཱ ཝིཡ. ཨུཔྤཛྫམཱནཱཔི, ཙ ཝཊྚཱནུསཱརིམཧཱཛནསྶེཝ, མདྡནྟཱ ཕརནྟཱ ཚཱདེནྟཱ ཨནྡྷཀཱརཾ ¶ ཀརོནྟཱ ནུཔྤཛྫནྟི. དྭཱིཧི པན མགྒེཧི པཧཱིནཏྟཱ མནྡཱ མནྡཱ ¶ ཨུཔྤཛྫནྟི. ཏནུཀཱཀཱརཱ ཧུཏྭཱ ཨུཔྤཛྫནྟི, ཨབྦྷཔཊལཾ ཝིཡ མཀྑིཀཱཔཏྟཾ ཝིཡ ཙ.

ཏཏྠ ཀེཙི ཐེརཱ ཝདནྟི – ‘སཀདཱགཱམིསྶ ཀིལེསཱ ཀིཉྩཱཔི ཙིརེན ཨུཔྤཛྫནྟི, བཧལཱཝ པན ཧུཏྭཱ ཨུཔྤཛྫནྟི, ཏཐཱ ཧིསྶ པུཏྟཱ ཙ དྷཱིཏརོ ཙ དིསྶནྟཱི’ཏི. ཨེཏཾ པན ཨཔྤམཱཎཾ. པུཏྟདྷཱིཏརོ ཧི ཨངྒཔཙྩངྒཔརཱམསནམཏྟེནཔི ཧོནྟི. དྭཱིཧི པན མགྒེཧི པཧཱིནཏྟཱ ནཏྠི ཀིལེསཱནཾ བཧལཏཱཏི. དྭཱིཧི ཨེཝ ཀཱརཎེཧིསྶ ཀིལེསཱནཾ ཏནུབྷཱཝོ ཝེདིཏབྦོ – ཨདྷིཙྩུཔྤཏྟིཡཱ ཙ པརིཡུཊྛཱནམནྡཏཱཡ ཙཱཏི.

དུཏིཡཱཡཱཏི གཎནཝསེནཱཔི དུཏིཡུཔྤཏྟིཝསེནཱཔི དུཏིཡཱཡ. བྷཱུམིཡཱ པཏྟིཡཱཏི སཱམཉྙཕལསྶ པཊིལཱབྷཏྠཱཡ. ཏཏིཡཙཏུཏྠེསུཔི ཨེསེཝ ནཡོ. ཝིསེསམཏྟཾཡེཝ པན ཝཀྑཱམ.

ཨཉྙིནྡྲིཡནྟི ཨཱཛཱནནཀཾ ཨིནྡྲིཡཾ. པཋམམགྒེན ཉཱཏམརིཡཱདཾ ཨནཏིཀྐམིཏྭཱ ཏེསཾཡེཝ ཏེན མགྒེན ཉཱཏཱནཾ ཙཏུསཙྩདྷམྨཱནཾ ཛཱནནཀཾ ཨིནྡྲིཡནྟི ཝུཏྟཾ ཧོཏི. ནིདྡེསཝཱརེཔིསྶ ཨིམིནཱཝ ནཡེན ཨཏྠོ ཝེདིཏབྦོ. ཀོཊྛཱསཝཱརེཔི ཨིམིནཱཝ སདྡྷིཾ ནཝིནྡྲིཡཱནི ཧོནྟི. སེསཾ པུརིམནཡེནེཝ ཝེདིཏབྦཾ.

དུཏིཡམགྒོ ནིཊྛིཏོ.

ཏཏིཡཙཏུཏྠམགྒཱ

༣༦༢. ཏཏིཡེ ¶ ཨནཝསེསཔྤཧཱནཱཡཱཏི ཏེསཾཡེཝ སཀདཱགཱམིམགྒེན ཏནུབྷཱུཏཱནཾ སཾཡོཛནཱནཾ ནིསྶེསཔཛཧནཏྠཱཡ.

ཙཏུཏྠེ རཱུཔརཱགཨརཱུཔརཱགམཱནཨུདྡྷཙྩཨཝིཛྫཱཡ ཨནཝསེསཔྤཧཱནཱཡཱཏི ཨེཏེསཾ པཉྩནྣཾ ཨུདྡྷམྦྷཱགིཡསཾཡོཛནཱནཾ ནིསྶེསཔཛཧནཏྠཱཡ. ཏཏྠ རཱུཔརཱགོཏི རཱུཔབྷཝེ ཚནྡརཱགོ. ཨརཱུཔརཱགོཏི ཨརཱུཔབྷཝེ ཚནྡརཱགོ. མཱནོཏི ཨརཧཏྟམགྒཝཛ྄ཛྷཀོ མཱནོ ཨེཝ. ཏཐཱ ¶ ཨུདྡྷཙྩཱཝིཛྫཱ. ཨིམེསུཔི དྭཱིསུ མགྒེསུ ནཝམཾ ཨཉྙིནྡྲིཡམེཝ ཧོཏི.

ཙཏུམགྒནཡསཧསྶཾ

སབྦམགྒེསུ ¶ པདཔཊིཔཱཊིཡཱ སམསཊྛིཔདཱནི, ཙཏཱུཧི ཨཔཎྞཀངྒེཧི སདྡྷིཾ ཙཏུསཊྛི ཧོནྟི. ཨསམྦྷིནྣཏོ པན ཏེཏྟིཾས. ཀོཊྛཱསཝཱརསུཉྙཏཝཱརཱ པཱཀཏིཀཱ ཨེཝ. ཡཐཱ ཙ པན པཋམམགྒེ ཨེཝཾ དུཏིཡཱདཱིསུཔི ནཡསཧསྶམེཝཱཏི ཙཏྟཱརོ མགྒེ ཙཏཱུཧི ནཡསཧསྶེཧི བྷཱཛེཏྭཱ དསྶེསི དྷམྨརཱཛཱ.

སཙྩཝིབྷངྒེ པན སཊྛི ནཡསཧསྶཱནི ལོཀུཏྟརཱནི ཨིམེསཾ ཨེཝ ཝསེན ནིཀྑིཏྟཱནི. སཏིཔཊྛཱནཝིབྷངྒེ ཝཱིསཏི ནཡསཧསྶཱནི ལོཀུཏྟརཱནི, སམྨཔྤདྷཱནཝིབྷངྒེ ཝཱིསཏི, ཨིདྡྷིཔཱདཝིབྷངྒེ དྭཏྟིཾས, བོཛ྄ཛྷངྒཝིབྷངྒེ དྭཏྟིཾས, མགྒངྒཝིབྷངྒེ ཨཊྛཝཱིསཏི ནཡསཧསྶཱནི ལོཀུཏྟརཱནི ཨིམེསཾ ཨེཝ ཝསེན ནིཀྑིཏྟཱནི.

ཨིདྷ པན ཙཏཱུསུ མགྒེསུ ཙཏྟཱརིཡེཝ ནཡསཧསྶཱནི. ཏེསུ པཋམཛ྄ཛྷཱནིཀེ པཋམམགྒེ ཨཊྛངྒཱནི བྷཱཛིཏཱནི; ཏཐཱ དུཏིཡཱདཱིསུ. ཏཏྠ པཋམམགྒེ སམྨཱདིཊྛི མིཙྪཱདིཊྛིཾ པཛཧཏཱིཏི སམྨཱདིཊྛི. སམྨཱསངྐཔྤཱདཡོཔི མིཙྪཱསངྐཔྤཱདཱིནཾ པཛཧནཊྛེནེཝ ཝེདིཏབྦཱ. ཨེཝཾ སནྟེ ‘པཋམམགྒེནེཝ དྭཱསཊྛིཡཱ དིཊྛིགཏཱནཾ པཧཱིནཏྟཱ ཨུཔརིམགྒཏྟཡེན པཧཱཏབྦཱ དིཊྛི ནཱམ ནཏྠི. ཏཏྠ སམྨཱདིཊྛཱིཏི ནཱམཾ ཀཐཾ ཧོཏཱི’ཏི? ‘ཡཐཱ ཝིསཾ ཨཏྠི ཝཱ, ཧོཏུ མཱ ཝཱ, ཨགདོ ཨགདོ ཏྭེཝ ཝུཙྩཏི, ཨེཝཾ མིཙྪཱདིཊྛི ཨཏྠི ཝཱ, ཧོཏུ མཱ ཝཱ, ཨཡཾ སམྨཱདིཊྛི ཨེཝ ནཱམ’.

‘ཡདི ¶ ཨེཝཾ ནཱམམཏྟམེཝེཏཾ ཧོཏི, ཨུཔརིམགྒཏྟཡེ པན སམྨཱདིཊྛིཡཱ ཀིཙྩཱབྷཱཝོ ཨཱཔཛྫཏི, མགྒངྒཱནི ན པརིཔཱུརེནྟི, ཏསྨཱ སམྨཱདིཊྛི སཀིཙྩཀཱ ཀཱཏབྦཱ མགྒངྒཱནི པཱུརེཏབྦཱནཱི’ཏི. སཀིཙྩཀཱ ཙེཏྠ སམྨཱདིཊྛི ཡཐཱལཱབྷནིཡམེན དཱིཔེཏབྦཱ. ཨུཔརིམགྒཏྟཡཝཛ྄ཛྷོ ཧི ཨེཀོ མཱནོ ཨཏྠི, སོ དིཊྛིཊྛཱནེ ཏིཊྛཏི. སཱ ཏཾ མཱནཾ པཛཧཏཱིཏི སམྨཱདིཊྛི. སོཏཱཔཏྟིམགྒསྨིཉྷི སམྨཱདིཊྛི མིཙྪཱདིཊྛིཾ པཛཧཏི. སོཏཱཔནྣསྶ པན སཀདཱགཱམིམགྒཝཛ྄ཛྷོ མཱནོ ཨཏྠི, སོ དིཊྛིཊྛཱནེ ཏིཊྛཏི སཱ ཏཾ མཱནཾ པཛཧཏཱིཏི སམྨཱདིཊྛི. ཏསྶེཝ སཏྟཨཀུསལཙིཏྟསཧཛཱཏོ སངྐཔྤོ ཨཏྠི. ཏེཧེཝ ཙིཏྟེཧི ཝཱཙངྒཙོཔནཾ ཨཏྠི, ཀཱཡངྒཙོཔནཾ ཨཏྠི ¶ , པཙྩཡཔརིབྷོགོ ཨཏྠི, སཧཛཱཏཝཱཡཱམོ ¶ ཨཏྠི, ཨསཏིབྷཱཝོ ཨཏྠི, སཧཛཱཏཙིཏྟེཀགྒཏཱ ཨཏྠི. ཨེཏེ མིཙྪཱསངྐཔྤཱདཡོ ནཱམ སཀདཱགཱམིམགྒེ སམྨཱསངྐཔྤཱདཡོ. ཏེསཾ པཧཱནེན སམྨཱསངྐཔྤཱདཡོཏི ཝེདིཏབྦཱ. ཨེཝཾ སཀདཱགཱམིམགྒེ ཨཊྛངྒཱནི སཀིཙྩཀཱནི ཀཏྭཱ ཨཱགཏཱནི. སཀདཱགཱམིསྶ ཨནཱགཱམིམགྒཝཛ྄ཛྷོ མཱནོ ཨཏྠི. སོ དིཊྛིཊྛཱནེ ཏིཊྛཏི. ཏསྶེཝ སཏྟཧི ཙིཏྟེཧི སཧཛཱཏཱ སངྐཔྤཱདཡོ. ཏེསཾ པཧཱནེན ཨནཱགཱམིམགྒེ ཨཊྛནྣཾ ཨངྒཱནཾ སཀིཙྩཀཏཱ ཝེདིཏབྦཱ. ཨནཱགཱམིསྶ ཨརཧཏྟམགྒཝཛ྄ཛྷོ མཱནོ ཨཏྠི. སོ དིཊྛིཊྛཱནེ ཏིཊྛཏི. ཡཱནི པནསྶ པཉྩ ཨཀུསལཙིཏྟཱནི, ཏེཧི སཧཛཱཏཱ སངྐཔྤཱདཡོ. ཏེསཾ པཧཱནེན ཨརཧཏྟམགྒེ ཨཊྛནྣཾ ཨངྒཱནཾ སཀིཙྩཀཏཱ ཝེདིཏབྦཱ.

ཨིམེསུ ཙཏཱུསུ མགྒེསུ པཋམམགྒེན ཙཏྟཱརི སཙྩཱནི དིཊྛཱནི. ‘ཨུཔརིམགྒཏྟཡཾ དིཊྛཀམེཝ པསྶཏི, ཨདིཊྛཀཾ པསྶཏཱི’ཏི དིཊྛཀམེཝ པསྶཏཱིཏི ཨཡཾ ཨཱཙརིཡཱནཾ སམཱནཏྠཀཐཱ. ཝིཏཎྜཝཱདཱི པནཱཧ ‘ཨདིཊྛཾ པསྶཏཱི’ཏི. སོ ཝཏྟབྦོ – ‘པཋམམགྒེ ཀཏམཾ ཨིནྡྲིཡཾ བྷཱཛེསཱི’ཏི? ཛཱནམཱནོ ‘ཨནཉྙཱཏཉྙསྶཱམཱིཏིནྡྲིཡ’ནྟི ཝཀྑཏི. ‘ཨུཔརིམགྒེསུ ཀཏར’ནྟི? ཝུཏྟེཔི ‘ཨཉྙིནྡྲིཡ’ནྟི ཝཀྑཏི. སོ ཝཏྟབྦོ – ‘ཨདིཊྛསཙྩདསྶནེ སཏི ཨུཔརིམགྒེསུཔི ཨནཉྙཱཏཉྙསྶཱམཱིཏིནྡྲིཡམེཝ བྷཱཛེཧི. ཨེཝཾ ཏེ པཉྷོ སམེསྶཏཱི’ཏི. ‘ཀིལེསེ པན ཨཉྙེ ཨཉྙོ པཛཧཏི; པཧཱིནེ ཨེཝ པཛཧཏཱི’ཏི? ‘ཨཉྙེ ཨཉྙོ པཛཧཏཱི’ཏི. ‘ཡདི ཨཉྙེ ཨཉྙོ, ཨཔྤཧཱིནེ ཀིལེསེ པཛཧཏི. སཙྩཱནིཔི ཨདིཊྛཱནེཝ པསྶཏཱི’ཏི ཨེཝཾཝཱདཱི པུགྒལོ པུཙྪིཏབྦོ – ‘སཙྩཱནི ནཱམ ཀཏཱི’ཏི? ཛཱནནྟོ ‘ཙཏྟཱརཱི’ཏི ཝཀྑཏི. སོ ཝཏྟབྦོ – ‘ཏཝ ཝཱདེ སོལ༹ས སཙྩཱནི ཨཱཔཛྫནྟི. ཏྭཾ བུདྡྷེཧིཔི ཨདིཊྛཾ པསྶསི. བཧུསཙྩཀོ ནཱམ ཏྭཾ. ཨེཝཾ མཱ གཎྷ. སཙྩདསྶནཾ ནཱམ ཨཔུབྦཾ ནཏྠི, ཀིལེསེ པན ཨཔྤཧཱིནེ པཛཧཏཱི’ཏི.

ཏཏྠ ¶ ¶ སཙྩདསྶནསྶ ཨཔུབྦཱབྷཱཝེ པེལོ༹པམཾ ནཱམ གཧིཏཾ – ཨེཀསྶ ཀིར ཙཏྟཱརོ རཏནཔེལཱ༹ སཱརགབྦྷེ ཋཔིཏཱ. སོ རཏྟིབྷཱགེ པེལཱ༹སུ ཨུཔྤནྣཀིཙྩོ དྭཱརཾ ཝིཝརིཏྭཱ, དཱིཔཾ ཛཱལེཏྭཱ, དཱིཔེན ཝིཧཏེ ཨནྡྷཀཱརེ, པེལཱ༹སུ པཱཀཊབྷཱཝཾ གཏཱསུ, ཏཱསུ ཀིཙྩཾ ཀཏྭཱ དྭཱརཾ པིདཧིཏྭཱ གཏོ. པུན ཨནྡྷཀཱརཾ ཨཝཏྠརི. དུཏིཡཝཱརེཔི ཏཏིཡཝཱརེཔི ཏཐེཝ ཨཀཱསི. ཙཏུཏྠཝཱརེ དྭཱརེ ཝིཝཊེ ཨནྡྷཀཱརེ པེལཱ༹ ན པཉྙཱཡནྟཱིཏི ཝཱིམཾསནྟསྶེཝ ¶ སཱུརིཡོ ཨུགྒཉྪི, སཱུརིཡོབྷཱསེན ཝིཧཏེ ཨནྡྷཀཱརེ པེལཱ༹སུ ཀིཙྩཾ ཀཏྭཱ པཀྐཱམི.

ཏཏྠ ཙཏྟཱརོ པེལཱ༹ ཝིཡ ཙཏྟཱརི སཙྩཱནི. ཏཱསུ ཀིཙྩེ ཨུཔྤནྣེ དྭཱརཝིཝརཎཀཱལོ ཝིཡ སོཏཱཔཏྟིམགྒསྶ ཝིཔསྶནཱབྷིནཱིཧརཎཀཱལོ. ཨནྡྷཀཱརཾ ཝིཡ སཙྩཔཊིཙྪཱདཀཏམཾ. དཱིཔོ བྷཱསོ ཝིཡ སོཏཱཔཏྟིམགྒོབྷཱསོ. ཝིཧཏེ ཨནྡྷཀཱརེ ཏསྶ པུརིསསྶ པེལཱ༹ནཾ པཱཀཊབྷཱཝོ ཝིཡ མགྒཉཱཎསྶ སཙྩཱནཾ པཱཀཊབྷཱཝོ. མགྒཉཱཎསྶ པཱཀཊཱནི པན མགྒསམངྒིསྶ པུགྒལསྶ པཱཀཊཱནེཝ ཧོནྟི. པེལཱ༹སུ ཀིཙྩཾ ཀཏྭཱ གཏཀཱལོ ཝིཡ སོཏཱཔཏྟིམགྒསྶ ཨཏྟནཱ པཧཱཏབྦཀིལེསེ པཛཧིཏྭཱ ནིརུདྡྷཀཱལོ. པུན ཨནྡྷཀཱརཱཝཏྠརཎཾ ཝིཡ ཨུཔརིམགྒཏྟཡཝཛ྄ཛྷསཙྩཔཊིཙྪཱདཀཏམཾ.

དུཏིཡཝཱརེ དྭཱརཝིཝརཎཀཱལོ ཝིཡ སཀདཱགཱམིམགྒསྶ ཝིཔསྶནཱབྷིནཱིཧརཎཀཱལོ. དཱིཔོབྷཱསོ ཝིཡ སཀདཱགཱམིམགྒོབྷཱསོ. པེལཱ༹སུ ཀིཙྩཾ ཀཏྭཱ གཏཀཱལོ ཝིཡ སཀདཱགཱམིམགྒསྶ ཨཏྟནཱ པཧཱཏབྦཀིལེསེ པཛཧིཏྭཱ ནིརུདྡྷཀཱལོ. པུན ཨནྡྷཀཱརཱཝཏྠརཎཾ ཝིཡ ཨུཔརིམགྒདྭཡཝཛ྄ཛྷསཙྩཔཊིཙྪཱདཀཏམཾ.

ཏཏིཡཝཱརེ དྭཱརཝིཝརཎཀཱལོ ཝིཡ ཨནཱགཱམིམགྒསྶ ཝིཔསྶནཱབྷིནཱིཧརཎཀཱལོ. དཱིཔོབྷཱསོ ཝིཡ ཨནཱགཱམིམགྒོབྷཱསོ. པེལཱ༹སུ ཀིཙྩཾ ཀཏྭཱ གཏཀཱལོ ཝིཡ ཨནཱགཱམིམགྒསྶ ཨཏྟནཱ པཧཱཏབྦཀིལེསེ པཛཧིཏྭཱ ནིརུདྡྷཀཱལོ. པུན ཨནྡྷཀཱརཱཝཏྠརཎཾ ཝིཡ ཨུཔརིཨརཧཏྟམགྒཝཛ྄ཛྷསཙྩཔཊིཙྪཱདཀཏམཾ.

ཙཏུཏྠཝཱརེ དྭཱརཝིཝརཎཀཱལོ ཝིཡ ཨརཧཏྟམགྒསྶ ཝིཔསྶནཱབྷིནཱིཧརཎཀཱལོ. སཱུརིཡུགྒམནཾ ཝིཡ ཨརཧཏྟམགྒུཔྤཱདོ. ཨནྡྷཀཱརཝིདྷམནཾ ཝིཡ ཨརཧཏྟམགྒསྶ སཙྩཔཊིཙྪཱདཀཏམཝིནོདནཾ ¶ . ཝིཧཏེ ཨནྡྷཀཱརེ ཏསྶ པེལཱ༹ནཾ པཱཀཊབྷཱཝོ ཝིཡ ཨརཧཏྟམགྒཉཱཎསྶ ཙཏུནྣཾ ¶ སཙྩཱནཾ པཱཀཊབྷཱཝོ. ཉཱཎསྶ པཱཀཊཱནི པན པུགྒལསྶ པཱཀཊཱནེཝ ཧོནྟི. པེལཱ༹སུ ཀིཙྩཾ ཀཏྭཱ གཏཀཱལོ ཝིཡ ཨརཧཏྟམགྒསྶ སབྦཀིལེསཁེཔནཾ. སཱུརིཡུགྒམནཏོ པཊྛཱཡ ཨཱལོཀསྶེཝ པཝཏྟིཀཱལོ ཝིཡ ཨརཧཏྟམགྒསྶ ཨུཔྤནྣཀཱལཏོ པཊྛཱཡ པུན སཙྩཔཊིཙྪཱདཀཏམཱབྷཱཝོ ¶ . ཨིདཾ ཏཱཝ སཙྩདསྶནསྶ ཨཔུབྦཱབྷཱཝེ ཨོཔམྨཾ.

དིཊྛཀམེཝ ཧི པསྶཏི. ‘ཀིལེསེ པན ཨཉྙེ ཨཉྙོ པཛཧཏཱི’ཏི ཨེཏྠ ཁཱརོཔམཾ ནཱམ གཧིཏཾ. ཨེཀོ པུརིསོ ཀིལིཊྛཾ ཝཏྠཾ རཛཀསྶ ཨདཱསི. རཛཀོ ཨཱུསཁཱརཾ ཚཱརིཀཁཱརཾ གོམཡཁཱརནྟི ཏཡོ ཁཱརེ དཏྭཱ ཁཱརེཧི ཁཱདིཏབྷཱཝཾ ཉཏྭཱ ཨུདཀེ ཝིཀྑཱལེཏྭཱ ཨོལཱ༹རིཀོལཱ༹རིཀཾ མལཾ པཝཱཧེསི. ཏཏོ ན ཏཱཝ པརིསུདྡྷནྟི དུཏིཡམྤི ཏཐེཝ ཁཱརེ དཏྭཱ, ཨུདཀེ ཝིཀྑཱལེཏྭཱ, ཏཏོ ནཱཏིསཎྷཏརཾ མལཾ པཝཱཧེསི. ཏཏོ ན ཏཱཝ པརིསུདྡྷནྟི ཏཏིཡམྤི ཏེ ཁཱརེ དཏྭཱ ཨུདཀེ ཝིཀྑཱལེཏྭཱ ཏཏོ སཎྷཏརཾ མལཾ པཝཱཧེསི. ཏཏོ ན ཏཱཝ པརིསུདྡྷནྟི ཙཏུཏྠམྤི ཏེ ཁཱརེ དཏྭཱ, ཨུདཀེ ཝིཀྑཱལེཏྭཱ ཨཾསུཨབྦྷནྟརགཏམྤི ནིསྶེསཾ མལཾ པཝཱཧེཏྭཱ སཱམིཀསྶ ཨདཱསི. སོ གནྡྷཀརཎྜཀེ པཀྑིཔིཏྭཱ ཨིཙྪིཏིཙྪིཏཀཱལེ པརིདཧཏི.

ཏཏྠ ཀིལིཊྛཝཏྠཾ ཝིཡ ཀིལེསཱནུགཏཾ ཙིཏྟཾ. ཏིཝིདྷཁཱརདཱནཀཱལོ ཝིཡ ཏཱིསུ ཨནུཔསྶནཱསུ ཀམྨསྶ པཝཏྟནཀཱལོ. ཨུདཀེ ཝིཀྑཱལེཏྭཱ ཨོལཱ༹རིཀོལཱ༹རིཀམལཔྤཝཱཧནཾ ཝིཡ སོཏཱཔཏྟིམགྒེན པཉྩཀིལེསཁེཔནཾ. དུཏིཡམྤི ཏེསཾ ཁཱརཱནཾ ཨནུཔྤདཱནཾ ཝིཡ ‘ན ཏཱཝ པརིསུདྡྷཾ ཨིདཾ ཙིཏྟ’ནྟི ཏཱསུཡེཝ ཏཱིསུ ཨནུཔསྶནཱསུ ཀམྨཔྤཝཏྟནཾ. ཏཏོ ནཱཏིསཎྷཏརམལཔྤཝཱཧནཾ ཝིཡ སཀདཱགཱམིམགྒེན ཨོལཱ༹རིཀསཾཡོཛནདྭཡཁེཔནཾ. ཏཏོ ‘ན ཏཱཝ པརིསུདྡྷཾ ཝཏྠ’ནྟི པུན ཁཱརཏྟཡདཱནཾ ཝིཡ ‘ན ཏཱཝ པརིསུདྡྷཾ ¶ ཨིདཾ ཙིཏྟ’ནྟི ཏཱསུཡེཝ ཏཱིསུ ཨནུཔསྶནཱསུ ཀམྨཔྤཝཏྟནཾ. ཏཏོ སཎྷཏརམལཔྤཝཱཧནཾ ཝིཡ ཨནཱགཱམིམགྒེན ཨཎུསཧགཏསཾཡོཛནདྭཡཁེཔནཾ. ‘ན ཏཱཝ པརིསུདྡྷཾ ཝཏྠ’ནྟི པུན ཁཱརཏྟཡདཱནཾ ཝིཡ ‘ན ཏཱཝ པརིསུདྡྷཾ ཨིདཾ ཙིཏྟ’ནྟི ཏཱསུཡེཝ ཏཱིསུ ཨནུཔསྶནཱསུ ཀམྨཔྤཝཏྟནཾ. ཏཏོ ཝིཀྑཱལནེན ཨཾསུཨབྦྷནྟརགཏེ མལེ པཝཱཧེཏྭཱ པརིསུདྡྷསྶ རཛཏཔཊྚསདིསསྶ གནྡྷཀརཎྜཀེ ནིཀྑིཏྟསྶ ཝཏྠསྶ ཨིཙྪིཏིཙྪིཏཀྑཎེ པརིདཧནཾ ཝིཡ ཨརཧཏྟམགྒེན ཨཊྛནྣཾ ཀིལེསཱནཾ ཁེཔིཏཏྟཱ པརིསུདྡྷསྶ ཁཱིཎཱསཝཙིཏྟསྶ ཨིཙྪིཏིཙྪིཏཀྑཎེ ཕལསམཱཔཏྟིཝིཧཱརེན ཝཱིཏིནཱམནཾ. ཨིདཾ ‘ཨཉྙེ ཨཉྙོ ཀིལེསེ པཛཧཏཱི’ཏི ཨེཏྠ ཨོཔམྨཾ. ཝུཏྟམྤི ཙེཏཾ –

‘‘སེཡྻཐཱཔི ¶ , ཨཱཝུསོ, ཝཏྠཾ སཾཀིལིཊྛཾ མལགྒཧིཏཾ, ཏམེནཾ སཱམིཀཱ རཛཀསྶ ཨནུཔདཛྫེཡྻུཾ. ཏམེནཾ རཛཀོ ཨཱུསེ ཝཱ ¶ ཁཱརེ ཝཱ གོམཡེ ཝཱ སམྨདྡིཏྭཱ ཨཙྪེ ཨུདཀེ ཝིཀྑཱལེཏི. ཀིཉྩཱཔི ཏཾ ཧོཏི ཝཏྠཾ པརིསུདྡྷཾ པརིཡོདཱཏཾ, ཨཐ ཁྭསྶ ཧོཏིཡེཝ ‘ཨཎུསཧགཏོ ཨཱུསགནྡྷོ ཝཱ ཁཱརགནྡྷོ ཝཱ གོམཡགནྡྷོ ཝཱ ཨསམཱུཧཏོ’. ཏམེནཾ རཛཀོ སཱམིཀཱནཾ དེཏི. ཏམེནཾ སཱམིཀཱ གནྡྷཔརིབྷཱཝིཏེ ཀརཎྜཀེ ནིཀྑིཔནྟི. ཡོཔིསྶ ཧོཏི ཨཎུསཧགཏོ ཨཱུསགནྡྷོ ཝཱ ཁཱརགནྡྷོ ཝཱ གོམཡགནྡྷོ ཝཱ ཨསམཱུཧཏོ, སོཔི སམུགྒྷཱཏཾ གཙྪཏི. ཨེཝམེཝ ཁོ, ཨཱཝུསོ, ཀིཉྩཱཔི ཨརིཡསཱཝཀསྶ པཉྩོརམྦྷཱགིཡཱནི སཾཡོཛནཱནི པཧཱིནཱནི བྷཝནྟི, ཨཐ ཁྭསྶ ཧོཏིཡེཝ པཉྩསུ ཨུཔཱདཱནཀྑནྡྷེསུ ཨཎུསཧགཏོ ‘ཨསྨཱི’ཏི མཱནོ, ‘ཨསྨཱི’ཏི ཚནྡོ, ‘ཨསྨཱི’ཏི ཨནུསཡོ ཨསམཱུཧཏོ, སོ ཨཔརེན སམཡེན པཉྩསུ ཨུཔཱདཱནཀྑནྡྷེསུ ཨུདཡབྦཡཱནུཔསྶཱི ཝིཧརཏི – ‘ཨིཏི རཱུཔཾ, ཨིཏི རཱུཔསྶ སམུདཡོ, ཨིཏི རཱུཔསྶ ཨཏྠངྒམོ; ཨིཏི ཝེདནཱ ཨིཏི སཉྙཱ ཨིཏི སངྑཱརཱ ཨིཏི ཝིཉྙཱཎཾ, ཨིཏི ཝིཉྙཱཎསྶ སམུདཡོ, ཨིཏི ཝིཉྙཱཎསྶ ཨཏྠངྒམོ’ཏི. ཏསྶིམེསུ པཉྩསུ ཨུཔཱདཱནཀྑནྡྷེསུ ཨུདཡབྦཡཱནུཔསྶིནོ ཝིཧརཏོ ཡོཔིསྶ ཧོཏི པཉྩསུ ཨུཔཱདཱནཀྑནྡྷེསུ ཨཎུསཧགཏོ ‘ཨསྨཱི’ཏི མཱནོ, ‘ཨསྨཱི’ཏི ཚནྡོ, ‘ཨསྨཱི’ཏི ཨནུསཡོ ཨསམཱུཧཏོ, སོཔི སམུགྒྷཱཏཾ གཙྪཏཱི’’ཏི (སཾ. ནི. ༣.༨༩).

ཏཏྠ ¶ སོཏཱཔཏྟིམགྒེན པཉྩ ཨཀུསལཙིཏྟཱནི པཧཱིཡནྟི སདྡྷིཾ ཙིཏྟངྒཝསེན ཨུཔྤཛྫནཀཔཱཔདྷམྨེཧི. སཀདཱགཱམིམགྒེན དྭེ དོམནསྶསཧགཏཙིཏྟཱནི ཏནུཀཱནི བྷཝནྟི སདྡྷིཾ ཙིཏྟངྒཝསེན ཨུཔྤཛྫནཀཔཱཔདྷམྨེཧི. ཨནཱགཱམིམགྒེན ཏཱནིཡེཝ པཧཱིཡནྟི སདྡྷིཾ སམྤཡུཏྟདྷམྨེཧི. ཨརཧཏྟམགྒེན པཉྩ ཨཀུསལཙིཏྟཱནི པཧཱིཡནྟི སདྡྷིཾ ཙིཏྟངྒཝསེན ཨུཔྤཛྫནཀཔཱཔདྷམྨེཧི. ཨིམེསཾ དྭཱདསནྣཾ ཨཀུསལཙིཏྟཱནཾ པཧཱིནཀཱལཏོ པཊྛཱཡ ཁཱིཎཱསཝསྶ ཙིཏྟངྒཝསེན པུན པཙྪཏོཔཝཏྟནཀཀིལེསོ ནཱམ ན ཧོཏི.

ཏཏྲིདཾ ཨོཔམྨཾ – ཨེཀོ ཀིར མཧཱརཱཛཱ པཙྩནྟེ ཨཱརཀྑཾ དཏྭཱ མཧཱནགརེ ཨིསྶརིཡཾ ཨནུབྷཝནྟོ ཝསཏི. ཨཐསྶ པཙྩནྟོ ཀུཔྤི. ཏསྨིཾ སམཡེ དྭཱདས ཙོརཛེཊྛཀཱ ཨནེཀེཧི པུརིསསཧསྶེཧི སདྡྷིཾ ¶ རཊྛཾ ཝིལུམྤནྟི. པཙྩནྟཝཱསིནོ མཧཱམཏྟཱ ‘པཙྩནྟོ ཀུཔིཏོ’ཏི རཉྙོ པཧིཎིཾསུ. རཱཛཱ ‘ཝིསྶཊྛཱ གཎྷཐ, ཨཧཾ ཏུམྷཱཀཾ ཀཏྟབྦཾ ཀརིསྶཱམཱི’ཏི སཱསནཾ པཧིཎི ¶ . ཏེ པཋམསམྤཧཱརེནེཝ ཨནེཀེཧི པུརིསསཧསྶེཧི སདྡྷིཾ པཉྩ ཙོརཛེཊྛཀེ གྷཱཏཡིཾསུ. སེསཱ སཏྟ ཛནཱ ཨཏྟནོ ཨཏྟནོ པརིཝཱརེ གཧེཏྭཱ པབྦཏཾ པཝིསིཾསུ. ཨམཙྩཱ ཏཾ པཝཏྟིཾ རཉྙོ པེསཡིཾསུ.

རཱཛཱ ‘ཏུམྷཱཀཾ ཀཏྟབྦཡུཏྟཾ ཨཧཾ ཛཱནིསྶཱམི, ཏེཔི གཎྷཐཱ’ཏི དྷནཾ པཧིཎི. ཏེ དུཏིཡསམྤཧཱརེན དྭེ ཙོརཛེཊྛཀེ པཧརིཾསུ, པརིཝཱརེཔི ཏེསཾ དུབྦལེ ཨཀཾསུ. ཏེ སབྦེཔི པལཱཡིཏྭཱ པབྦཏཾ པཝིསིཾསུ. ཏམྤི པཝཏྟིཾ ཨམཙྩཱ རཉྙོ པེསཡིཾསུ.

པུན རཱཛཱ ‘ཝིསྶཊྛཱ གཎྷནྟཱུ’ཏི དྷནཾ པཧིཎི. ཏེ ཏཏིཡསམྤཧཱརེན སདྡྷིཾ སཧཱཡཔུརིསེཧི དྭེ ཙོརཛེཊྛཀེ གྷཱཏཡིཏྭཱ ཏཾ པཝཏྟིཾ རཉྙོ པེསཡིཾསུ.

པུན རཱཛཱ ‘ཨཝསེསེ ཝིསྶཊྛཱ གཎྷནྟཱུ’ཏི དྷནཾ པཧིཎི. ཏེ ཙཏུཏྠསམྤཧཱརེན སཔརིཝཱརེ པཉྩ ཙོརཛེཊྛཀེ གྷཱཏཡིཾསུ. དྭཱདསནྣཾ ཙོརཛེཊྛཀཱནཾ གྷཱཏིཏཀཱལཏོ པཊྛཱཡ ཀོཙི ཙོརོ ནཱམ ནཏྠི. ཁེམཱ ཛནཔདཱ ཨུརེ པུཏྟེ ནཙྩེནྟཱ མཉྙེ ཝིཧརནྟི. རཱཛཱ ཝིཛིཏསངྒཱམེཧི ཡོདྷེཧི པརིཝུཏོ ¶ ཝརཔཱསཱདགཏོ མཧཱསམྤཏྟིཾ ཨནུབྷཝི.

ཏཏྠ མཧནྟོ རཱཛཱ ཝིཡ དྷམྨརཱཛཱ. པཙྩནྟཝཱསིནོ ཨམཙྩཱ ཝིཡ ཡོགཱཝཙརཱ ཀུལཔུཏྟཱ. དྭཱདས ཙོརཛེཊྛཀཱ ཝིཡ དྭཱདས ཨཀུསལཙིཏྟཱནི. ཏེསཾ སཧཱཡཱ ཨནེཀསཧསྶཔུརིསཱ ཝིཡ ཙིཏྟངྒཝསེན ཨུཔྤཛྫནཀཔཱཔདྷམྨཱ. རཉྙོ པཙྩནྟོ ཀུཔིཏོཏི པཧིཏཀཱལོ ཝིཡ ཨཱརམྨཎེ ཀིལེསེསུ ཨུཔྤནྣེསུ ‘བྷནྟེ, ཀིལེསོ མེ ཨུཔྤནྣོ’ཏི སཏྠུ ཨཱརོཙནཀཱལོ. ‘ཝིསྶཊྛཱ གཎྷནྟཱུ’ཏི དྷནདཱནཾ ཝིཡ ‘ཀིལེསེ ནིགྒཎྷ བྷིཀྑཱུ’ཏི དྷམྨརཉྙོ ཀམྨཊྛཱནཱཙིཀྑནཾ. སཔརིཝཱརཱནཾ པཉྩནྣཾ ཙོརཛེཊྛཀཱནཾ གྷཱཏིཏཀཱལོ ཝིཡ སོཏཱཔཏྟིམགྒེན སམྤཡུཏྟཱནཾ པཉྩནྣཾ ཨཀུསལཙིཏྟཱནཾ པཧཱནཾ.

པུན ¶ རཉྙོ པཝཏྟིཔེསནཾ ཝིཡ སམྨཱསམྦུདྡྷསྶ པཊིལདྡྷགུཎཱརོཙནཾ. ‘སེསཀེ ཙ གཎྷནྟཱུ’ཏི པུན དྷནདཱནཾ ཝིཡ བྷགཝཏོ སཀདཱགཱམིམགྒསྶ ཝིཔསྶནཱཙིཀྑནཾ. དུཏིཡསམྤཧཱརེན སཔརིཝཱརཱནཾ དྭིནྣཾ ཙོརཛེཊྛཀཱནཾ དུབྦལཱིཀརཎཾ ཝིཡ སཀདཱགཱམིམགྒེན སསམྤཡུཏྟཱནཾ དྭིནྣཾ དོམནསྶཙིཏྟཱནཾ ཏནུབྷཱཝཀརཎཾ.

པུན ¶ རཉྙོ པཝཏྟིཔེསནཾ ཝིཡ སཏྠུ པཊིལདྡྷགུཎཱརོཙནཾ. ‘ཝིསྶཊྛཱ གཎྷནྟཱུ’ཏི པུན དྷནདཱནཾ ཝིཡ བྷགཝཏོ ཨནཱགཱམིམགྒསྶ ཝིཔསྶནཱཙིཀྑནཾ. ཏཏིཡསམྤཧཱརེན སཔརིཝཱརཱནཾ དྭིནྣཾ ཙོརཛེཊྛཀཱནཾ གྷཱཏནཾ ཝིཡ ཨནཱགཱམིམགྒེན སསམྤཡུཏྟཱནཾ དྭིནྣཾ དོམནསྶཙིཏྟཱནཾ པཧཱནཾ.

པུན རཉྙོ པཝཏྟིཔེསནཾ ཝིཡ ཏཐཱགཏསྶ པཊིལདྡྷགུཎཱརོཙནཾ. ‘ཝིསྶཊྛཱ གཎྷནྟཱུ’ཏི པུན དྷནདཱནཾ ཝིཡ བྷགཝཏོ ཨརཧཏྟམགྒསྶ ཝིཔསྶནཱཙིཀྑནཾ. ཙཏུཏྠསམྤཧཱརེན སཔརིཝཱརཱནཾ པཉྩནྣཾ ཙོརཛེཊྛཀཱནཾ གྷཱཏིཏཀཱལཏོ པཊྛཱཡ ཛནཔདསྶ ཁེམཀཱལོ ཝིཡ ཨརཧཏྟམགྒེན སསམྤཡུཏྟེསུ པཉྩསུ ཨཀུསལཙིཏྟེསུ པཧཱིནེསུ དྭཱདསནྣཾ ཨཀུསལཙིཏྟཱནཾ པཧཱིནཀཱལཏོ པཊྛཱཡ པུན ཙིཏྟངྒཝསེན ཨུཔྤཛྫནཀསྶ ཨཀུསལདྷམྨསྶ ཨབྷཱཝོ. རཉྙོ ཝིཛིཏསངྒཱམསྶ ཨམཙྩགཎཔརིཝུཏསྶ ཝརཔཱསཱདེ མཧཱསམྤཏྟིཨནུབྷཝནཾ ཝིཡ ཁཱིཎཱསཝཔརིཝུཏསྶ དྷམྨརཉྙོ སུཉྙཏཨནིམིཏྟཨཔྤཎིཧིཏབྷེདེསུ སམཱཔཏྟིསུཁེསུ ¶ ཨིཙྪིཏིཙྪིཏཕལསམཱཔཏྟིསུཁཱནུབྷཝནཾ ཝེདིཏབྦནྟི.

ཀུསལཱ དྷམྨཱཏིཔདསྶ ཝཎྞནཱ ནིཊྛིཏཱ.

ཨཀུསལཔདཾ

དྷམྨུདྡེསཝཱརཀཐཱ

པཋམཙིཏྟཾ

༣༦༥. ཨིདཱནི ཨཀུསལདྷམྨཔདཾ བྷཱཛེཏྭཱ དསྶེཏུཾ ཀཏམེ དྷམྨཱ ཨཀུསལཱཏིཨཱདི ཨཱརདྡྷཾ. ཏཏྠ དྷམྨཝཝཏྠཱནཱདིཝཱརཔྤབྷེདོ ཙ ཧེཊྛཱ ཨཱགཏཱནཾ པདཱནཾ ཨཏྠཝིནིཙྪཡོ ཙ ཧེཊྛཱ ཝུཏྟནཡེནེཝ ཝེདིཏབྦོ. ཏཏྠ ཏཏྠ པན ཝིསེསམཏྟམེཝ ཝཎྞཡིསྶཱམ. ཏཏྠ སམཡཝཝཏྠཱནེ ཏཱཝ ཡསྨཱ, ཀུསལསྶ ཝིཡ, ཨཀུསལསྶ བྷཱུམིབྷེདོ ནཏྠི, ཏསྨཱ ཨེཀནྟཾ ཀཱམཱཝཙརམྤི སམཱནཾ ཨེཏཾ ‘ཀཱམཱཝཙར’ནྟི ན ཝུཏྟཾ. དིཊྛིགཏསམྤཡུཏྟནྟི ཨེཏྠ དིཊྛི ¶ ཨེཝ དིཊྛིགཏཾ ‘གཱུཐགཏཾ ¶ མུཏྟགཏ’ནྟིཨཱདཱིནི (ཨ. ནི. ༩.༡༡) ཝིཡ. གནྟབྦཱབྷཱཝཏོ ཝཱ དིཊྛིཡཱ གཏམཏྟམེཝེཏནྟིཔི དིཊྛིགཏཾ. ཏེན སམྤཡུཏྟཾ དིཊྛིགཏསམྤཡུཏྟཾ.

ཏཏྠ ཨསདྡྷམྨསཝནཾ, ཨཀལྱཱཎམིཏྟཏཱ, ཨརིཡཱནཾ ཨདསྶནཀཱམཏཱདཱིནི ཨཡོནིསོ མནསིཀཱརོཏི ཨེཝམཱདཱིཧི ཀཱརཎེཧི ཨིམསྶ དིཊྛིགཏསངྑཱཏསྶ མིཙྪཱདསྶནསྶ ཨུཔྤཏྟི ཝེདིཏབྦཱ. ཡེ ཧི ཨེཏེ དིཊྛིཝཱདཔཊིསཾཡུཏྟཱ ཨསདྡྷམྨཱ ཏེསཾ བཧུམཱནཔུབྦངྒམེན ཨཏིཀྐནྟམཛ྄ཛྷཏྟེན ཨུཔཔརིཀྑཱརཧིཏེན སཝནེན, ཡེ ཙ དིཊྛིཝིཔནྣཱ ཨཀལྱཱཎམིཏྟཱ ཏཾསམྤཝངྐཏཱསངྑཱཏཱཡ ཨཀལྱཱཎམིཏྟཏཱཡ, བུདྡྷཱདཱིནཾ ཨརིཡཱནཉྩེཝ སཔྤུརིསཱནཉྩ ཨདསྶནཀཱམཏཱཡ ཙཏུསཏིཔཊྛཱནཱདིབྷེདེ ཨརིཡདྷམྨེ ཨཀོཝིདཏྟེན པཱཏིམོཀྑསཾཝརཨིནྡྲིཡསཾཝརསཏིསཾཝརཉཱཎསཾཝརཔཧཱནསཾཝརཔྤབྷེདེ ཨརིཡདྷམྨེ ཙེཝ སཔྤུརིསདྷམྨེ ཙ སཾཝརབྷེདསངྑཱཏེན ཨཝིནཡེན ཏེཧེཝ ཀཱརཎེཧི པརིབྷཱཝིཏེན ཨཡོནིསོ མནསིཀཱརེན ཀོཏཱུཧལམངྒལཱདིཔསུཏཏཱཡ ཙ ཨེཏཾ ཨུཔྤཛྫཏཱིཏི ཝེདིཏབྦཾ. ཨསངྑཱརབྷཱཝོ པནསྶ ཙིཏྟསྶ ཧེཊྛཱ ཝུཏྟནཡེནེཝ ཝེདིཏབྦོ.

དྷམྨུདྡེསཝཱརེ ¶ ཕསྶོཏི ཨཀུསལཙིཏྟསཧཛཱཏོ ཕསྶོ. ཝེདནཱདཱིསུཔི ཨེསེཝ ནཡོ. ཨིཏི ཨཀུསལམཏྟམེཝ ཨེཏེསཾ པུརིམེཧི ཝིསེསོ.

ཙིཏྟསྶེཀགྒཏཱ ཧོཏཱིཏི པཱཎཱཏིཔཱཏཱདཱིསུཔི ཨཝིཀྑིཏྟབྷཱཝེན ཙིཏྟསྶ ཨེཀགྒཏཱ ཧོཏི. མནུསྶཱ ཧི ཙིཏྟཾ སམཱདཧིཏྭཱ ཨཝིཀྑིཏྟཱ ཧུཏྭཱ ཨཝིརཛ྄ཛྷམཱནཱནི སཏྠཱནི པཱཎསརཱིརེསུ ནིཔཱཏེནྟི, སུསམཱཧིཏཱ པརེསཾ སནྟཀཾ ཧརནྟི, ཨེཀརསེན ཙིཏྟེན མིཙྪཱཙཱརཾ ཨཱཔཛྫནྟི. ཨེཝཾ ཨཀུསལཔྤཝཏྟིཡམྤི ཙིཏྟསྶ ཨེཀགྒཏཱ ཧོཏི.

མིཙྪཱདིཊྛཱིཏི ཨཡཱཐཱཝདིཊྛི, ཝིརཛ྄ཛྷིཏྭཱ གཧཎཏོ ཝཱ ཝིཏཐཱ དིཊྛི མིཙྪཱདིཊྛི. ཨནཏྠཱཝཧཏྟཱ པཎྜིཏེཧི ཛིགུཙྪིཏཱ དིཊྛཱིཏིཔི མིཙྪཱདིཊྛི. མིཙྪཱསངྐཔྤཱདཱིསུཔི ཨེསེཝ ནཡོ. ཨཔིཙ མིཙྪཱ པསྶནྟི ཏཱཡ, སཡཾ ཝཱ མིཙྪཱ པསྶཏི, མིཙྪཱདསྶནམཏྟམེཝ ཝཱ ཨེསཱཏི མིཙྪཱདིཊྛི. སཱ ཨཡོནིསོ ཨབྷིནིཝེསལཀྑཎཱ, པརཱམཱསརསཱ, མིཙྪཱབྷིནིཝེསཔཙྩུཔཊྛཱནཱ, ཨརིཡཱནཾ ཨདསྶནཀཱམཏཱདིཔདཊྛཱནཱ; པརམཾ ཝཛྫནྟི དཊྛབྦཱ. མིཙྪཱསངྐཔྤཱདཱིསུ ¶ ‘མིཙྪཱ’ཏི པདམཏྟམེཝ ཝིསེསོ. སེསཾ ཀུསལཱདྷིཀཱརེ ཝུཏྟནཡེནེཝ ཝེདིཏབྦཾ.

ཨཧིརིཀབལཾ ¶ ཨནོཏྟཔྤབལནྟི ཨེཏྠ བལཏྠོ ནིདྡེསཝཱརེ ཨཱཝི བྷཝིསྶཏི. ཨིཏརེསུ པན – ན ཧིརིཡཏཱིཏི ཨཧིརིཀོ. ཨཧིརིཀསྶ བྷཱཝོ ཨཧིརིཀཾ. ན ཨོཏྟཔྤཾ ཨནོཏྟཔྤཾ. ཏེསུ ཨཧིརིཀཾ ཀཱཡདུཙྩརིཏཱདཱིཧི ཨཛིགུཙྪནལཀྑཎཾ, ཨལཛྫཱལཀྑཎཾ ཝཱ. ཨནོཏྟཔྤཾ ཏེཧེཝ ཨསཱརཛྫནལཀྑཎཾ ཨནུཏྟཱསནལཀྑཎཾ ཝཱ. ཨཧིརིཀམེཝ བལཾ ཨཧིརིཀབལཾ. ཨནོཏྟཔྤམེཝ བལཾ ཨནོཏྟཔྤབལཾ. ཨཡམེཏྠ སངྑེཔཏྠོ. ཝིཏྠཱརོ པན ཧེཊྛཱ ཝུཏྟཔཊིཔཀྑཝསེན ཝེདིཏབྦོ.

ལུབྦྷནྟི ཏེན, སཡཾ ཝཱ ལུབྦྷཏི, ལུབྦྷནམཏྟམེཝ ¶ ཝཱ ཏནྟི ལོབྷོ. མུཡ྄ཧནྟི ཏེན, སཡཾ ཝཱ མུཡ྄ཧཏི, མུཡ྄ཧནམཏྟམེཝ ཝཱ ཏནྟི མོཧོ. ཏེསུ ལོབྷོ ཨཱརམྨཎགྒཧཎལཀྑཎོ མཀྐཊཱལེཔོ ཝིཡ, ཨབྷིསངྒརསོ ཏཏྟཀཔཱལེ ཁིཏྟམཾསཔེསི ཝིཡ, ཨཔརིཙྩཱགཔཙྩུཔཊྛཱནོ ཏེལཉྫནརཱགོ ཝིཡ, སཾཡོཛནིཡདྷམྨེསུ ཨསྶཱདདསྶནཔདཊྛཱནོ. སོ ཏཎྷཱནདཱིབྷཱཝེན ཝཌྜྷམཱནོ, སཱིགྷསོཏཱ ནདཱི ཝིཡ མཧཱསམུདྡཾ, ཨཔཱཡམེཝ གཧེཏྭཱ གཙྪཏཱིཏི དཊྛབྦོ.

མོཧོ ཙིཏྟསྶ ཨནྡྷབྷཱཝལཀྑཎོ ཨཉྙཱཎལཀྑཎོ ཝཱ, ཨསམྤཊིཝེདྷརསོ ཨཱརམྨཎསབྷཱཝཙྪཱདནརསོ ཝཱ, ཨསམྨཱཔཊིཔཏྟིཔཙྩུཔཊྛཱནོ ཨནྡྷཀཱརཔཙྩུཔཊྛཱནོ ཝཱ, ཨཡོནིསོམནསིཀཱརཔདཊྛཱནོ. སབྦཱཀུསལཱནཾ མཱུལནྟི དཊྛབྦོ.

ཨབྷིཛ྄ཛྷཱཡནྟི ཏཱཡ, སཡཾ ཝཱ ཨབྷིཛ྄ཛྷཱཡཏི, ཨབྷིཛ྄ཛྷཱཡནམཏྟམེཝ ཝཱ ཨེསཱཏི ཨབྷིཛ྄ཛྷཱ. སཱ པརསམྤཏྟཱིནཾ སཀཀརཎཨིཙྪཱལཀྑཎཱ, ཏེནཱཀཱརེན ཨེསནབྷཱཝརསཱ, པརསམྤཏྟི-ཨབྷིམུཁབྷཱཝཔཙྩུཔཊྛཱནཱ, པརསམྤཏྟཱིསུ ཨབྷིརཏིཔདཊྛཱནཱ. པརསམྤཏྟིཨབྷིམུཁཱ ཨེཝ ཧི སཱ ཨུཔཊྛཧཏི. ཏཱསུ ཙ ཨབྷིརཏིཡཱ སཏི པཝཏྟཏི, པརསམྤཏྟཱིསུ ཙེཏསོ ཧཏྠཔྤསཱརོཝིཡཱཏི དཊྛབྦཱ.

སམཐོ ཧོཏཱིཏིཨཱདཱིསུ ཨཉྙེསུ ཀིཙྩེསུ ཝིཀྑེཔསམནཏོ སམཐོ. ཨཀུསལཔྤཝཏྟིཡཾ ཙིཏྟཾ པགྒཎྷཱཏཱིཏི པགྒཱཧོ. ན ཝིཀྑིཔཏཱིཏི ཨཝིཀྑེཔོ.

ཨིམསྨིཾ ¶ ཙིཏྟེ སདྡྷཱ, སཏི, པཉྙཱ, ཚ ཡུགལ༹ཀཱནཱིཏི ཨིམེ དྷམྨཱ ན གཧིཏཱ. ཀསྨཱ? ཨསྶདྡྷིཡཙིཏྟེ པསཱདོ ནཱམ ནཏྠི. ཏསྨཱ ཏཱཝ སདྡྷཱ ན གཧིཏཱ. ཀིཾ པན དིཊྛིགཏིཀཱ ¶ ཨཏྟནོ ཨཏྟནོ སཏྠཱརཱནཾ ན སདྡཧནྟཱིཏི? སདྡཧནྟི. སཱ པན སདྡྷཱ ནཱམ ན ཧོཏི, ཝཙནསམྤཊིཙྪནམཏྟམེཝེཏཾ. ཨཏྠཏོ ཨནུཔཔརིཀྑཱ ཝཱ ¶ ཧོཏི, དིཊྛི ཝཱ. ཨསཏིཡཙིཏྟེ པན སཏི ནཏྠཱིཏི ན གཧིཏཱ. ཀིཾ དིཊྛིགཏིཀཱ ཨཏྟནཱ ཀཏཀམྨཾ ན སརནྟཱིཏི? སརནྟི. སཱ པན སཏི ནཱམ ན ཧོཏི. ཀེཝལཾ ཏེནཱཀཱརེན ཨཀུསལཙིཏྟཔྤཝཏྟི. ཏསྨཱ སཏི ན གཧིཏཱ. ཨཐ ཀསྨཱ ‘‘མིཙྪཱསཏཱི’’ཏི (དཱི. ནི. ༣.༣༣༣; སཾ. ནི. ༥.༡) སུཏྟནྟེ ཝུཏྟཱ? སཱ པན ཨཀུསལཀྑནྡྷཱནཾ སཏིཝིརཧིཏཏྟཱ སཏིཔཊིཔཀྑཏྟཱ ཙ མིཙྪཱམགྒམིཙྪཏྟཱནཾ པཱུརཎཏྠཾ ཏཏྠ པརིཡཱཡེན དེསནཱ ཀཏཱ. ནིཔྤརིཡཱཡེན པནེསཱ ནཏྠི. ཏསྨཱ ན གཧིཏཱ. ཨནྡྷབཱལཙིཏྟེ པན པཉྙཱ ནཏྠཱིཏི ན གཧིཏཱ. ཀིཾ དིཊྛིགཏིཀཱནཾ ཝཉྩནཱཔཉྙཱ ནཏྠཱིཏི? ཨཏྠི. ན པནེསཱ པཉྙཱ, མཱཡཱ ནཱམེསཱ ཧོཏི. སཱ ཨཏྠཏོ ཏཎྷཱཝ. ཨིདཾ པན ཙིཏྟཾ སདརཐཾ གརུཀཾ བྷཱརིཡཾ ཀཀྑལ༹ཾ ཐདྡྷཾ ཨཀམྨཉྙཾ གིལཱནཾ ཝངྐཾ ཀུཊིལཾ. ཏསྨཱ པསྶདྡྷཱདཱིནི ཚ ཡུགལ༹ཀཱནི ན གཧིཏཱནི.

ཨེཏྟཱཝཏཱ པདཔཊིཔཱཊིཡཱ ཙིཏྟངྒཝསེན པཱལི༹ཨཱརུལ༹ྷཱནི དྭཏྟིཾས པདཱནི དསྶེཏྭཱ ཨིདཱནི ཡེཝཱཔནཀདྷམྨེ དསྶེཏུཾ ཡེ ཝཱ པན ཏསྨིཾ སམཡེཏིཨཱདིམཱཧ. ཏཏྠ སབྦེསུཔི ཨཀུསལཙིཏྟེསུ ཚནྡོ ཨདྷིམོཀྑོ མནསིཀཱརོ མཱནོ ཨིསྶཱ མཙྪརིཡཾ ཐིནཾ མིདྡྷཾ ཨུདྡྷཙྩཾ ཀུཀྐུཙྩནྟི ཨིམེ དསེཝ ཡེཝཱཔནཀཱ ཧོནྟི དྷམྨཱ, སུཏྟཱགཏཱ, སུཏྟཔདེསུ དིསྶརེཏི ཝུཏྟཱ. ཨིམསྨིཾ པན ཙིཏྟེ ཚནྡོ ཨདྷིམོཀྑོ མནསིཀཱརོ ཨུདྡྷཙྩནྟི ཨིམེ ཨཔཎྞཀངྒསངྑཱཏཱ ཙཏྟཱརོཝ ཡེཝཱཔནཀཱ ཧོནྟི.

ཏཏྠ ཚནྡཱདཡོ ཧེཊྛཱ ཝུཏྟནཡེནེཝ ཝེདིཏབྦཱ. ཀེཝལཉྷི ཏེ ཀུསལཱ, ཨིམེ ཨཀུསལཱ. ཨིཏརཾ པན ཨུདྡྷཏསྶ བྷཱཝོ ‘ཨུདྡྷཙྩཾ’. ཏཾ ཙེཏསོ ཨཝཱུཔསམལཀྑཎཾ ཝཱཏཱབྷིགྷཱཏཙལཛལཾ ཝིཡ, ཨནཝཊྛཱནརསཾ ཝཱཏཱབྷིགྷཱཏཙལདྷཛཔཊཱཀཱ ཝིཡ, བྷནྟཏྟཔཙྩུཔཊྛཱནཾ པཱསཱཎཱབྷིགྷཱཏསམུདྡྷཏབྷསྨཱ ཝིཡ, ཙེཏསོ ཨཝཱུཔསམེ ཨཡོནིསོམནསིཀཱརཔདཊྛཱནཾ. ཙིཏྟཝིཀྑེཔོཏི དཊྛབྦཾ.

ཨིཏི ཕསྶཱདཱིནི དྭཏྟིཾས, ཡེཝཱཔནཀཝསེན ཝུཏྟཱནི ཙཏྟཱརཱིཏི སབྦཱནིཔི ¶ ཨིམསྨིཾ དྷམྨུདྡེསཝཱརེ ཚཏྟིཾས དྷམྨཔདཱནི བྷཝནྟི. ཙཏྟཱརི ཨཔཎྞཀངྒཱནི ཧཱཔེཏྭཱ ¶ པཱལི༹ཡཾ ཨཱགཏཱནི དྭཏྟིཾསམེཝ. ཨགྒཧིཏགྒཧཎེན པནེཏྠ ཕསྶཔཉྩཀཾ, ཝིཏཀྐོ ཝིཙཱརོ པཱིཏི ཙིཏྟསྶེཀགྒཏཱ ¶ ཝཱིརིཡིནྡྲིཡཾ ཛཱིཝིཏིནྡྲིཡཾ མིཙྪཱདིཊྛི ཨཧིརིཀཾ ཨནོཏྟཔྤཾ ལོབྷོ མོཧོཏི སོལ༹ས དྷམྨཱ ཧོནྟི.

ཏེསུ སོལ༹སསུ སཏྟ དྷམྨཱ ཨཝིབྷཏྟིཀཱ ནཝ སཝིབྷཏྟིཀཱ ཧོནྟི. ཀཏམེ སཏྟ? ཕསྶོ སཉྙཱ ཙེཏནཱ ཝིཙཱརོ པཱིཏི ཛཱིཝིཏིནྡྲིཡཾ མོཧོཏི ཨིམེ སཏྟ ཨཝིབྷཏྟིཀཱ. ཝེདནཱ ཙིཏྟཾ ཝིཏཀྐོ ཙིཏྟསྶེཀགྒཏཱ ཝཱིརིཡིནྡྲིཡཾ མིཙྪཱདིཊྛི ཨཧིརིཀཾ ཨནོཏྟཔྤཾ ལོབྷོཏི ཨིམེ ནཝ སཝིབྷཏྟིཀཱ.

ཏེསུ ཚ དྷམྨཱ དྭཱིསུ ཋཱནེསུ ཝིབྷཏྟཱ, ཨེཀོ ཏཱིསུ, ཨེཀོ ཙཏཱུསུ, ཨེཀོ ཚསུ. ཀཐཾ? ཙིཏྟཾ ཝིཏཀྐོ མིཙྪཱདིཊྛི ཨཧིརིཀཾ ཨནོཏྟཔྤཾ ལོབྷོཏི ཨིམེ ཚ དྭཱིསུ ཋཱནེསུ ཝིབྷཏྟཱ. ཏེསུ ཧི ཙིཏྟཾ ཏཱཝ ཕསྶཔཉྩཀཾ པཏྭཱ ཙིཏྟཾ ཧོཏཱིཏི ཝུཏྟཾ, ཨིནྡྲིཡཱནི པཏྭཱ མནིནྡྲིཡནྟི. ཝིཏཀྐོ ཛྷཱནངྒཱནི པཏྭཱ ཝིཏཀྐོ ཧོཏཱིཏི ཝུཏྟོ, མགྒངྒཱནི པཏྭཱ མིཙྪཱསངྐཔྤོཏི. མིཙྪཱདིཊྛི མགྒངྒེསུཔི ཀམྨཔཐེསུཔི མིཙྪཱདིཊྛིཡེཝ. ཨཧིརིཀཾ བལཱནི པཏྭཱ ཨཧིརིཀབལཾ ཧོཏཱིཏི ཝུཏྟཾ, ལོཀནཱསཀདུཀཾ པཏྭཱ ཨཧིརིཀནྟི. ཨནོཏྟཔྤེཔི ཨེསེཝ ནཡོ. ལོབྷོ མཱུལཾ པཏྭཱ ལོབྷོ ཧོཏཱིཏི ཝུཏྟོ. ཀམྨཔཐཾ པཏྭཱ ཨབྷིཛ྄ཛྷཱཏི. ཨིམེ ཚ དྭཱིསུ ཋཱནེསུ ཝིབྷཏྟཱ.

ཝེདནཱ པན ཕསྶཔཉྩཀཾ པཏྭཱ ཝེདནཱ ཧོཏཱིཏི ཝུཏྟཱ, ཛྷཱནངྒཱནི པཏྭཱ སུཁནྟི, ཨིནྡྲིཡཱནི པཏྭཱ སོམནསྶིནྡྲིཡནྟི. ཨེཝཾ ཨེཀོཝ དྷམྨོ ཏཱིསུ ཋཱནེསུ ཝིབྷཏྟོ.

ཝཱིརིཡཾ པན ཨིནྡྲིཡཱནི པཏྭཱ ཝཱིརིཡིནྡྲིཡཾ ཧོཏཱིཏི ཝུཏྟཾ, མགྒངྒཱནི པཏྭཱ མིཙྪཱཝཱཡཱམོ ཧོཏཱིཏི, བལཱནི པཏྭཱ ཝཱིརིཡབལནྟི, པིཊྛིདུཀཾ པཏྭཱ པགྒཱཧོ ཧོཏཱིཏི. ཨེཝཾ ཨཡཾ ཨེཀོ དྷམྨོ ཙཏཱུསུ ཋཱནེསུ ཝིབྷཏྟོ.

སམཱདྷི པན ཛྷཱནངྒཱནི པཏྭཱ ཙིཏྟསྶེཀགྒཏཱ ཧོཏཱིཏི ཝུཏྟོ, ཨིནྡྲིཡཱནི པཏྭཱ སམཱདྷིནྡྲིཡནྟི, མགྒངྒཱནི པཏྭཱ མིཙྪཱསམཱདྷཱིཏི, བལཱནི པཏྭཱ སམཱདྷིབལནྟི, པིཊྛིདུཀཾ པཏྭཱ དུཏིཡདུཀེ ¶ ཨེཀཀཝསེནེཝ སམཐོཏི ¶ , ཏཏིཡེ ཨཝིཀྑེཔོཏི. ཨེཝམཡཾ ཨེཀོ དྷམྨོ ཚསུ ཋཱནེསུ ཝིབྷཏྟོ.

སབྦེཔི ¶ པནེཏེ དྷམྨཱ ཕསྶཔཉྩཀཝསེན ཛྷཱནངྒཝསེན ཨིནྡྲིཡཝསེན མགྒངྒཝསེན བལཝསེན མཱུལཝསེན ཀམྨཔཐཝསེན ལོཀནཱསཀཝསེན པིཊྛིདུཀཝསེནཱཏི ནཝ རཱསཡོ ཧོནྟི. ཏཏྠ ཡཾ ཝཏྟབྦཾ ཏཾ པཋམཀུསལཙིཏྟནིདྡེསེ ཝུཏྟམེཝཱཏི.

དྷམྨུདྡེསཝཱརཀཐཱ ནིཊྛིཏཱ.

ནིདྡེསཝཱརཀཐཱ

༣༧༥. ནིདྡེསཝཱརེ ཙིཏྟསྶེཀགྒཏཱནིདྡེསེ ཏཱཝ སཎྛིཏི ཨཝཊྛིཏཱིཏི. ཨིདཾ དྭཡཾ ཋིཏིཝེཝཙནམེཝ. ཡཾ པན ཀུསལནིདྡེསེ ‘ཨཱརམྨཎཾ ཨོགཱཧེཏྭཱ ཨནུཔཝིསིཏྭཱ ཏིཊྛཏཱིཏི ཨཝཊྛིཏཱི’ཏི ཝུཏྟཾ, ཏཾ ཨིདྷ ན ལབྦྷཏི. ཨཀུསལསྨིཉྷི དུབྦལཱ ཙིཏྟསྶེཀགྒཏཱཏི ཧེཊྛཱ དཱིཔིཏམེཝ.

༣༨༤. ཨུདྡྷཙྩཝིཙིཀིཙྪཱཝསེན པཝཏྟསྶ ཝིསཱཧཱརསྶ པཊིཔཀྑཏོ ཨཝིསཱཧཱརོཏི ཨེཝརཱུཔོཔི ཨཏྠོ ཨིདྷ ན ལབྦྷཏི. སཧཛཱཏདྷམྨེ པན ན ཝིསཱཧརཏཱིཏི ཨཝིསཱཧཱརོ. ན ཝིཀྑིཔཏཱིཏི ཨཝིཀྑེཔོ. ཨཀུསལཙིཏྟེཀགྒཏཱཝསེན ཨཝིསཱཧཊསྶ མཱནསསྶ བྷཱཝོ ཨཝིསཱཧཊམཱནསཏཱ. སཧཛཱཏདྷམྨེསུ ན ཀམྤཏཱིཏི སམཱདྷིབལཾ. ཨཡཱཐཱཝསམཱདྷཱནཏོ མིཙྪཱསམཱདྷཱིཏི ཨེཝམིདྷ ཨཏྠོ དཊྛབྦོ.

༣༨༥. ཝཱིརིཡིནྡྲིཡནིདྡེསེ ཡོ ཧེཊྛཱ ‘ནིཀྐམོ ཙེསོ ཀཱམཱནཾ པནུདནཱཡཱ’ཏིཨཱདི ནཡོ ཝུཏྟོ, སོ ཨིདྷ ན ལབྦྷཏི. སཧཛཱཏདྷམྨེསུ ཨཀམྤནཊྛེནེཝ ཝཱིརིཡབལཾ ཝེདིཏབྦཾ.

༣༨༦. མིཙྪཱདིཊྛིནིདྡེསེ ཨཡཱཐཱཝདསྶནཊྛེན མིཙྪཱདིཊྛི. དིཊྛཱིསུ གཏཾ ཨིདཾ དསྶནཾ, དྭཱསཊྛིདིཊྛིཨནྟོགཏཏྟཱཏི དིཊྛིགཏཾ. ཧེཊྛཱཔིསྶ ཨཏྠོ ཝུཏྟོཡེཝ. དིཊྛིཡེཝ དུརཏིཀྐམནཊྛེན དིཊྛིགཧནཾ, ཏིཎགཧནཝནགཧནཔབྦཏགཧནཱནི ཝིཡ. དིཊྛིཡེཝ སཱསངྐསཔྤཊིབྷཡཊྛེན དིཊྛིཀནྟཱརོ ¶ , ཙོརཀནྟཱརཝཱལ༹ཀནྟཱརམརུཀནྟཱརནིརུདཀཀནྟཱརདུབྦྷིཀྑཀནྟཱརཱ ¶ ཝིཡ. སམྨཱདིཊྛིཡཱ ¶ ཝིནིཝིཛ྄ཛྷནཊྛེན ཝིལོམནཊྛེན ཙ དིཊྛིཝིསཱུཀཱཡིཀཾ. མིཙྪཱདསྶནཉྷི ཨུཔྤཛྫམཱནཾ སམྨཱདསྶནཾ ཝིནིཝིཛ྄ཛྷཏི ཙེཝ ཝིལོམེཏི ཙ. ཀདཱཙི སསྶཏསྶ ཀདཱཙི ཨུཙྪེདསྶ གཧཎཏོ དིཊྛིཡཱ ཝིརཱུཔཾ ཕནྡིཏནྟི དིཊྛིཝིཔྥནྡིཏཾ. དིཊྛིགཏིཀོ ཧི ཨེཀསྨིཾ པཏིཊྛཱཏུཾ ན སཀྐོཏི, ཀདཱཙི སསྶཏཾ ཨནུཔཏཏི ཀདཱཙི ཨུཙྪེདཾ. དིཊྛིཡེཝ བནྡྷནཊྛེན སཾཡོཛནནྟི དིཊྛིསཾཡོཛནཾ.

སུསུམཱརཱདཡོ ཝིཡ པུརིསཾ, ཨཱརམྨཎཾ དལ༹ྷཾ གཎྷཱཏཱིཏི གཱཧོ. པཏིཊྛཧནཏོ པཏིཊྛཱཧོ. ཨཡཉྷི བལཝཔྤཝཏྟིབྷཱཝེན པཏིཊྛཧིཏྭཱ གཎྷཱཏི. ནིཙྩཱདིཝསེན ཨབྷིནིཝིསཏཱིཏི ཨབྷིནིཝེསོ. དྷམྨསབྷཱཝཾ ཨཏིཀྐམིཏྭཱ ནིཙྩཱདིཝསེན པརཏོ ཨཱམསཏཱིཏི པརཱམཱསོ. ཨནཏྠཱཝཧཏྟཱ ཀུཙྪིཏོ མགྒོ, ཀུཙྪིཏཱནཾ ཝཱ ཨཔཱཡཱནཾ མགྒོཏི ཀུམྨགྒོ. ཨཡཱཐཱཝཔཐཏོ མིཙྪཱཔཐོ. ཡཐཱ ཧི དིསཱམཱུལ༹ྷེན ཨཡཾ ཨསུཀགཱམསྶ ནཱམ པཐོཏི གཧིཏོཔི ཏཾ གཱམཾ ན སམྤཱཔེཏི, ཨེཝཾ དིཊྛིགཏིཀེན སུགཏིཔཐོཏི གཧིཏཱཔི དིཊྛི སུགཏིཾ ན པཱཔེཏཱིཏི ཨཡཱཐཱཝཔཐཏོ, མིཙྪཱཔཐོ. མིཙྪཱསབྷཱཝཏོ མིཙྪཏྟཾ. ཏཏྠེཝ པརིབྦྷམནཏོ ཏརནྟི ཨེཏྠ བཱལཱཏི ཏིཏྠཾ. ཏིཏྠཉྩ ཏཾ ཨནཏྠཱནཉྩ ཨཱཡཏནནྟི ཏིཏྠཱཡཏནཾ. ཏིཏྠིཡཱནཾ ཝཱ སཉྫཱཏིདེསཊྛེན ནིཝཱསཋཱནཊྛེན ཙ ཨཱཡཏནནྟིཔི ཏིཏྠཱཡཏནཾ. ཝིཔརིཡེསབྷཱུཏོ གཱཧོ, ཝིཔརིཡེསཏོ ཝཱ གཱཧོཏི ཝིཔརིཡེསགྒཱཧོ; ཝིཔལླཏྠ གཱཧོཏི ཨཏྠོ.

༣༨༧-༣༨༨. ཨཧིརིཀཱནོཏྟཔྤནིདྡེསེསུ ཧིརོཏྟཔྤནིདྡེསཝིཔརིཡཱཡེན ཨཏྠོ ཝེདིཏབྦོ. སཧཛཱཏདྷམྨེསུ པན ཨཀམྤནཊྛེནེཝ ཨཧིརིཀབལཾ ཨནོཏྟཔྤབལཉྩ ཝེདིཏབྦཾ.

༣༨༩. ལོབྷམོཧནིདྡེསེསུ ལུབྦྷཏཱིཏི ལོབྷོ. ལུབྦྷནཱཏི ལུབྦྷནཱཀཱརོ. ལོབྷསམྤཡུཏྟཙིཏྟཾ, པུགྒལོ ཝཱ ལུབྦྷིཏོ; ལུབྦྷིཏསྶ བྷཱཝོ ལུབྦྷིཏཏྟཾ. སཱརཛྫཏཱིཏི སཱརཱགོ. སཱརཛྫནཱཀཱརོ སཱརཛྫནཱ. སཱརཛྫིཏསྶ བྷཱཝོ སཱརཛྫིཏཏྟཾ. ཨབྷིཛ྄ཛྷཱཡནཊྛེན ཨབྷིཛ྄ཛྷཱ ¶ . པུན ‘ལོབྷ’-ཝཙནེ ཀཱརཎཾ ¶ ཝུཏྟམེཝ. ཨཀུསལཉྩ ཏཾ མཱུལཉྩ ཨཀུསལཱནཾ ཝཱ མཱུལནྟི ཨཀུསལམཱུལཾ.

༣༩༠. ཉཱཎདསྶནཔཊིཔཀྑཏོ ཨཉྙཱཎཾ ཨདསྶནཾ. ཨབྷིམུཁོ ཧུཏྭཱ དྷམྨེན ན སམེཏི, ན སམཱགཙྪཏཱིཏི ཨནབྷིསམཡོ. ཨནུརཱུཔཏོ དྷམྨེ བུཛ྄ཛྷཏཱིཏི ཨནུབོདྷོ. ཏཔྤཊིཔཀྑཏཱཡ ¶ ཨནནུབོདྷོ. ཨནིཙྩཱདཱིཧི སདྡྷིཾ ཡོཛེཏྭཱ ན བུཛ྄ཛྷཏཱིཏི ཨསམྦོདྷོ. ཨསནྟཾ ཨསམཉྩ བུཛ྄ཛྷཏཱིཏིཔི ཨསམྦོདྷོ. ཙཏུསཙྩདྷམྨཾ ནཔྤཊིཝིཛ྄ཛྷཏཱིཏི ཨཔྤཊིཝེདྷོ. རཱུཔཱདཱིསུ ཨེཀདྷམྨམྤི ཨནིཙྩཱདིསཱམཉྙཏོ ན སངྒཎྷཱཏཱིཏི ཨསཾགཱཧནཱ. ཏམེཝ དྷམྨཾ ན པརིཡོགཱཧཏཱིཏི ཨཔརིཡོགཱཧནཱ. ན སམཾ པེཀྑཏཱིཏི ཨསམཔེཀྑཎཱ. དྷམྨཱནཾ སབྷཱཝཾ པཏི ན ཨཔེཀྑཏཱིཏི ཨཔཙྩཝེཀྑཎཱ.

ཀུསལཱཀུསལཀམྨེསུ ཝིཔརཱིཏཝུཏྟིཡཱ སབྷཱཝགྒཧཎཱབྷཱཝེན ཝཱ ཨེཀམྤི ཀམྨཾ ཨེཏསྶ པཙྩཀྑཾ ནཏྠི, སཡཾ ཝཱ ཀསྶཙི ཀམྨསྶ པཙྩཀྑཀརཎཾ ནཱམ ན ཧོཏཱིཏི ཨཔྤཙྩཀྑཀམྨཾ. ཡཾ ཨེཏསྨིཾ ཨནུཔྤཛྫམཱནེ ཙིཏྟསནྟཱནཾ མེཛ྄ཛྷཾ བྷཝེཡྻ, སུཙི, ཝོདཱནཾ, ཏཾ དུཊྛཾ མེཛ྄ཛྷཾ ཨིམིནཱཏི དུམྨེཛ྄ཛྷཾ. བཱལཱནཾ བྷཱཝོཏི བཱལྱཾ. མུཡ྄ཧཏཱིཏི མོཧོ. བལཝཏརོ མོཧོ པམོཧོ. སམནྟཏོ མུཡ྄ཧཏཱིཏི སམྨོཧོ. ཝིཛྫཱཡ པཊིཔཀྑབྷཱཝཏོ ན ཝིཛྫཱཏི ཨཝིཛྫཱ. ཨོགྷཡོགཏྠོ ཝུཏྟོཡེཝ. ཐཱམགཏཊྛེན ཨནུསེཏཱིཏི ཨནུསཡོ. ཙིཏྟཾ པརིཡུཊྛཱཏི, ཨབྷིབྷཝཏཱིཏི པརིཡུཊྛཱནཾ. ཧིཏགྒཧཎཱབྷཱཝེན ཧིཏཱབྷིམུཁཾ གནྟུཾ ན སཀྐོཏི, ཨཉྙདཏྠུ ལངྒཏིཡེཝཱཏི ལངྒཱི; ཁཉྫཏཱིཏི ཨཏྠོ. དུརུགྒྷཱཊནཊྛེན ཝཱ ལངྒཱི. ཡཐཱ ཧི མཧཱཔལིགྷསངྑཱཏཱ ལངྒཱི དུརུགྒྷཱཊཱ ཧོཏི, ཨེཝམཡམྤི ལངྒཱི ཝིཡཱཏི ལངྒཱི. སེསཾ ཨུཏྟཱནཏྠམེཝ. སངྒཧཝཱརསུཉྙཏཝཱརཱཔི ¶ ཧེཊྛཱ ཝུཏྟནཡེནེཝ ཨཏྠཏོ ཝེདིཏབྦཱཏི.

དུཏིཡཙིཏྟཾ

༣༩༩. དུཏིཡཙིཏྟེ སསངྑཱརེནཱཏི པདཾ ཝིསེསཾ. ཏམྤི ཧེཊྛཱ ཝུཏྟཏྠམེཝ. ཨིདཾ པན ཙིཏྟཾ ཀིཉྩཱཔི ཚསུ ཨཱརམྨཎེསུ སོམནསྶིཏསྶ ལོབྷཾ ཨུཔྤཱདེཏྭཱ ‘སཏྟོ སཏྟོ’ཏིཨཱདིནཱ ནཡེན པརཱམསནྟསྶ ཨུཔྤཛྫཏི, ཏཐཱཔི སསངྑཱརིཀཏྟཱ སཔྤཡོགེན སཨུཔཱཡེན ཨུཔྤཛྫནཏོ – ཡདཱ ¶ ཀུལཔུཏྟོ མིཙྪཱདིཊྛིཀསྶ ཀུལསྶ ཀུམཱརིཀཾ པཏྠེཏི. ཏེ ཙ ‘ཨཉྙདིཊྛིཀཱ ཏུམྷེ’ཏི ཀུམཱརིཀཾ ན དེནྟི. ཨཐཉྙེ ཉཱཏཀཱ ‘ཡཾ ཏུམྷེ ཀརོཐ ཏམེཝཱཡཾ ཀརིསྶཏཱི’ཏི དཱཔེནྟི. སོ ཏེཧི སདྡྷིཾ ཏིཏྠིཡེ ཨུཔསངྐམཏི. ཨཱདིཏོཝ ཝེམཏིཀོ ཧོཏི. གཙྪནྟེ གཙྪནྟེ ཀཱལེ ཨེཏེསཾ ཀིརིཡཱ མནཱཔཱཏི ལདྡྷིཾ རོཙེཏི, དིཊྛིཾ གཎྷཱཏི – ཨེཝརཱུཔེ ཀཱལེ ཨིདཾ ལབྦྷཏཱིཏི ཝེདིཏབྦཾ.

ཡེཝཱཔནཀེསུ ¶ པནེཏྠ ཐིནམིདྡྷཾ ཨདྷིཀཾ. ཏཏྠ ཐིནནཏཱ ‘ཐིནཾ’. མིདྡྷནཏཱ ‘མིདྡྷཾ’; ཨནུསྶཱཧསཾཧནནཏཱ ཨསཏྟིཝིགྷཱཏོ ཙཱཏི ཨཏྠོ. ཐིནཉྩ མིདྡྷཉྩ ཐིནམིདྡྷཾ. ཏཏྠ ཐིནཾ ཨནུསྶཱཧལཀྑཎཾ, ཝཱིརིཡཝིནོདནརསཾ, སཾསཱིདནཔཙྩུཔཊྛཱནཾ. མིདྡྷཾ ཨཀམྨཉྙཏཱལཀྑཎཾ, ཨོནཧནརསཾ, ལཱིནབྷཱཝཔཙྩུཔཊྛཱནཾ པཙལཱཡིཀཱནིདྡཱཔཙྩུཔཊྛཱནཾ ཝཱ. ཨུབྷཡམྤི ཨརཏིཏནྡཱིཝིཛམྦྷིཏཱདཱིསུ ཨཡོནིསོམནསིཀཱརཔདཊྛཱནནྟི.

ཏཏིཡཙིཏྟཾ

༤༠༠. ཏཏིཡཾ ཚསུ ཨཱརམྨཎེསུ སོམནསྶིཏསྶ ལོབྷཾ ཨུཔྤཱདེཏྭཱ ‘སཏྟོ སཏྟོ’ཏིཨཱདིནཱ ནཡེན ཨཔརཱམསནྟསྶ ནཱརཱཡཎཝིརཱཛནམལླཡུདྡྷནཊསམཛྫཱདཱིནི པསྶཏོ མནཱཔིཡསདྡསཝནཱདིཔསུཏསྶ ¶ ཝཱ ཨུཔྤཛྫཏི. ཨིདྷ མཱནེན སདྡྷིཾ པཉྩ ཨཔཎྞཀངྒཱནི ཧོནྟི. ཏཏྠ མཉྙཏཱིཏི ‘མཱནོ’. སོ ཨུནྣཏིལཀྑཎོ, སམྤགྒཧརསོ, ཀེཏུཀམྱཏཱཔཙྩུཔཊྛཱནོ, དིཊྛིཝིཔྤཡུཏྟལོབྷཔདཊྛཱནོ, ཨུམྨཱདོ ཝིཡ དཊྛབྦོཏི.

ཙཏུཏྠཙིཏྟཾ

༤༠༢. ཙཏུཏྠཾ ཝུཏྟཔྤཀཱརེསུ ཨེཝ ཋཱནེསུ ཡདཱ སཱིསེ ཁེལ༹ཾ ཁིཔནྟི, པཱདཔཾསུཾ ཨོཀིརནྟི, ཏདཱ ཏསྶ པརིཧརཎཏྠཾ སཨུསྶཱཧེན ཨནྟརནྟརཱ ཨོལོཀེནྟཱནཾ རཱཛནཱཊཀེསུ ནིཀྑནྟེསུ ཨུསྶཱརཎཱཡ ཝཏྟམཱནཱཡ ཏེན ཏེན ཚིདྡེན ཨོལོཀེནྟཱནཉྩཱཏི ཨེཝམཱདཱིསུ ཋཱནེསུ ཨུཔྤཛྫཏི. ཨིདྷ ¶ པན ཐིནམིདྡྷེཧི སདྡྷིཾ སཏྟ ཡེཝཱཔནཀཱ ཧོནྟི. ཨུབྷཡཏྠཱཔི མིཙྪཱདིཊྛི པརིཧཱཡཏི. ཏཾ ཋཔེཏྭཱ སེསཱནཾ ཝསེན དྷམྨགཎནཱ ཝེདིཏབྦཱཏི.

པཉྩམཙིཏྟཾ

༤༠༣. པཉྩམཾ ཚསུ ཨཱརམྨཎེསུ ཝེདནཱཝསེན མཛ྄ཛྷཏྟསྶ ལོབྷཾ ཨུཔྤཱདེཏྭཱ ‘སཏྟོ སཏྟོ’ཏིཨཱདིནཱ ནཡེན པརཱམསནྟསྶ ཨུཔྤཛྫཏི. སོམནསྶཊྛཱནེ པནེཏྠ ཨུཔེཀྑཱཝེདནཱ ཧོཏི, པཱིཏིཔདཾ པརིཧཱཡཏི. སེསཾ སབྦཾ པཋམཙིཏྟསདིསམེཝ.

ཚཊྛཙིཏྟཱདི

༤༠༩-༤༡༢. ཚཊྛསཏྟམཊྛམཱནིཔི ¶ ཝེདནཾ པརིཝཏྟེཏྭཱ པཱིཏིཔདཉྩ ཧཱཔེཏྭཱ དུཏིཡཏཏིཡཙཏུཏྠེསུ ཝུཏྟནཡེནེཝ ཝེདིཏབྦཱནི. ཨིམེསུ ཨཊྛསུ ལོབྷསཧགཏཙིཏྟེསུ སཧཛཱཏཱདྷིཔཏི ཨཱརམྨཎཱདྷིཔཏཱིཏི དྭེཔི ཨདྷིཔཏཡོ ལབྦྷནྟི.

ནཝམཙིཏྟཾ

༤༡༣. ནཝམཾ ཚསུ ཨཱརམྨཎེསུ དོམནསྶིཏསྶ པཊིགྷཾ ཨུཔྤཱདཡཏོ ཨུཔྤཛྫཏི. ཏསྶ སམཡཝཝཏྠཱནཝཱརེ ཏཱཝ དུཊྛུ མནོ, ཧཱིནཝེདནཏྟཱ ཝཱ ཀུཙྪིཏཾ མནོཏི དུམྨནོ; དུམྨནསྶ བྷཱཝོ དོམནསྶཾ. ཏེན སཧགཏནྟི དོམནསྶསཧགཏཾ. ཨསམྤིཡཱཡནབྷཱཝེན ཨཱརམྨཎསྨིཾ པཊིཧཉྙཏཱིཏི པཊིགྷཾ. ཏེན སམྤཡུཏྟནྟི པཊིགྷསམྤཡུཏྟཾ.

དྷམྨུདྡེསེ ¶ ཏཱིསུཔི ཋཱནེསུ དོམནསྶཝེདནཱཝ ཨཱགཏཱ. ཏཏྠ ཝེདནཱཔདཾ ཝུཏྟམེཝ. ཏཐཱ དུཀྑདོམནསྶཔདཱནི ལཀྑཎཱདིཏོ པན ཨནིཊྛཱརམྨཎཱནུབྷཝནལཀྑཎཾ དོམནསྶཾ, ཡཐཱཏཐཱ ཝཱ ཨནིཊྛཱཀཱརསམྦྷོགརསཾ, ཙེཏསིཀཱབཱདྷཔཙྩུཔཊྛཱནཾ, ཨེཀནྟེནེཝ ཧདཡཝཏྠུཔདཊྛཱནཾ.

མཱུལཀམྨཔཐེསུ ཡཐཱ པུརིམཙིཏྟེསུ ལོབྷོ ཧོཏི, ཨབྷིཛ྄ཛྷཱ ཧོཏཱིཏི ཨཱགཏཾ, ཨེཝཾ དོསོ ཧོཏི, བྱཱཔཱདོ ཧོཏཱིཏི ཝུཏྟཾ. ཏཏྠ དུསྶནྟི ཏེན, སཡཾ ཝཱ དུསྶཏི, དུསྶནམཏྟམེཝ ཝཱ ཏནྟི དོསོ ¶ སོ ཙཎྜིཀྐལཀྑཎོ པཧཊཱསིཝིསོ ཝིཡ, ཝིསཔྤནརསོ ཝིསནིཔཱཏོ ཝིཡ, ཨཏྟནོ ནིསྶཡདཧནརསོ ཝཱ དཱཝགྒི ཝིཡ, དུསྶནཔཙྩུཔཊྛཱནོ ལདྡྷོཀཱསོ ཝིཡ སཔཏྟོ, ཨཱགྷཱཏཝཏྠུཔདཊྛཱནོ ཝིསསཾསཊྛཔཱུཏིམུཏྟཾ ཝིཡ དཊྛབྦོ.

བྱཱཔཛྫཏི ཏེན ཙིཏྟཾ, པཱུཏིབྷཱཝཾ ཨུཔགཙྪཏི, བྱཱཔཱདཡཏི ཝཱ ཝིནཡཱཙཱརརཱུཔསམྤཏྟིཧིཏསུཁཱདཱིནཱིཏི བྱཱཔཱདོ. ཨཏྠཏོ པནེས དོསོཡེཝ. ཨིདྷ པདཔཊིཔཱཊིཡཱ ཨེཀཱུནཏིཾས པདཱནི ཧོནྟི. ཨགྒཧིཏགྒཧཎེན ཙུདྡས. ཏེསཾ ཝསེན སཝིབྷཏྟིཀཱཝིབྷཏྟིཀརཱསིབྷེདོ ཝེདིཏབྦོ.

ཡེཝཱཔནཀེསུ ཚནྡཱདྷིམོཀྑམནསིཀཱརཨུདྡྷཙྩཱནི ནིཡཏཱནི. ཨིསྶཱམཙྪརིཡཀུཀྐུཙྩེསུ པན ¶ ཨཉྙཏརེན སདྡྷིཾ པཉྩ པཉྩ ཧུཏྭཱཔི ཨུཔྤཛྫནྟི. ཨེཝམེཔི ཏཡོ དྷམྨཱ ཨནིཡཏཡེཝཱཔནཀཱ ནཱམ. ཏེསུ ཨིསྶཏཱིཏི ‘ཨིསྶཱ’. སཱ པརསམྤཏྟཱིནཾ ཨུསཱུཡནལཀྑཎཱ, ཏཏྠེཝ ཨནབྷིརཏིརསཱ, ཏཏོ ཝིམུཁབྷཱཝཔཙྩུཔཊྛཱནཱ, པརསམྤཏྟིཔདཊྛཱནཱ. སཾཡོཛནནྟི དཊྛབྦཱ. མཙྪེརབྷཱཝོ ‘མཙྪརིཡཾ’. ཏཾ ལདྡྷཱནཾ ཝཱ ལབྷིཏབྦཱནཾ ཝཱ ཨཏྟནོ སམྤཏྟཱིནཾ ནིགཱུཧནལཀྑཎཾ, ཏཱསཾཡེཝ པརེཧི སཱདྷཱརཎབྷཱཝཨཀྑམནརསཾ, སངྐོཙནཔཙྩུཔཊྛཱནཾ ¶ ཀཊུཀཉྩུཀཏཱཔཙྩུཔཊྛཱནཾ ཝཱ, ཨཏྟསམྤཏྟིཔདཊྛཱནཾ. ཙེཏསོ ཝིརཱུཔབྷཱཝོཏི དཊྛབྦཾ. ཀུཙྪིཏཾ ཀཏཾ ཀུཀཏཾ. ཏསྶ བྷཱཝོ ‘ཀུཀྐུཙྩཾ’. ཏཾ པཙྪཱནུཏཱཔལཀྑཎཾ, ཀཏཱཀཏཱནུསོཙནརསཾ, ཝིཔྤཊིསཱརཔཙྩུཔཊྛཱནཾ, ཀཏཱཀཏཔདཊྛཱནཾ. དཱསབྱཾ ཝིཡ དཊྛབྦཾ. ཨཡཾ ཏཱཝ ཨུདྡེསཝཱརེ ཝིསེསོ.

༤༡༥. ནིདྡེསཝཱརེ ཝེདནཱནིདྡེསེ ཨསཱཏཾ སཱཏཔཊིཔཀྑཝསེན ཝེདིཏབྦཾ.

༤༡༨. དོསནིདྡེསེ དུསྶཏཱིཏི དོསོ. དུསྶནཱཏི དུསྶནཱཀཱརོ. དུསྶིཏཏྟནྟི དུསྶིཏབྷཱཝོ. པཀཏིབྷཱཝཝིཛཧནཊྛེན བྱཱཔཛྫནཾ བྱཱཔཏྟི. བྱཱཔཛྫནཱཏི བྱཱཔཛྫནཱཀཱརོ. ཝིརུཛ྄ཛྷཏཱིཏི ཝིརོདྷོ. པུནཔྤུནཾ ཝིརུཛ྄ཛྷཏཱིཏི པཊིཝིརོདྷོ. ཝིརུདྡྷཱཀཱརཔཊིཝིརུདྡྷཱཀཱརཝསེན ཝཱ ཨིདཾ ཝུཏྟཾ. ཙཎྜིཀོ ཝུཙྩཏི ཙཎྜོ, ཐདྡྷཔུགྒལོ; ཏསྶ བྷཱཝོ ཙཎྜིཀྐཾ. ན ཨེཏེན སུརོཔིཏཾ ཝཙནཾ ཧོཏི, དུརུཏྟཾ ཨཔརིཔུཎྞམེཝ ཧོཏཱིཏི ཨསུརོཔོ. ཀུདྡྷཀཱལེ ཧི པརིཔུཎྞཝཙནཾ ནཱམ ནཏྠི. སཙེཔི ཀསྶཙི ཧོཏི ཏཾ ཨཔྤམཱཎཾ. ཨཔརེ ¶ པན ཨསྶུཛནནཊྛེན ཨསྶུརོཔནཏོ ཨསྶུརོཔོཏི ཝདནྟི. ཏཾ ཨཀཱརཎཾ, སོམནསྶསྶཱཔི ཨསྶུཛནནཏོ. ཧེཊྛཱ ཝུཏྟཨཏྟམནཏཱཔཊིཔཀྑཏོ ན ཨཏྟམནཏཱཏི ཨནཏྟམནཏཱ. སཱ པན ཡསྨཱ ཙིཏྟསྶེཝ, ན སཏྟསྶ, ཏསྨཱ ཙིཏྟསྶཱཏི ཝུཏྟཾ. སེསམེཏྠ སངྒཧསུཉྙཏཝཱརེསུ ཙ ཧེཊྛཱ ཝུཏྟནཡེནེཝ ཝེདིཏབྦནྟི.

དསམཙིཏྟཾ

༤༢༡. དསམཾ སསངྑཱརཏྟཱ པརེཧི ཨུསྶཱཧིཏསྶ ཝཱ, པརེསཾ ཝཱ ཨཔརཱདྷཾ སཱརིཏསྶ, སཡམེཝ ཝཱ པརེསཾ ཨཔརཱདྷཾ ཨནུསྶརིཏྭཱ ཀུཛ྄ཛྷམཱནསྶ ཨུཔྤཛྫཏི.

ཨིདྷཱཔི པདཔཊིཔཱཊིཡཱ ཨེཀཱུནཏིཾས, ཨགྒཧིཏགྒཧཎེན ཙ ཙུདྡསེཝ པདཱནི ཧོནྟི. ཡེཝཱཔནཀེསུ ¶ པན ཐིནམིདྡྷམྤི ལབྦྷཏི. ཏསྨཱ ཨེཏྠ ཝིནཱ ཨིསྶཱམཙྪརིཡཀུཀྐུཙྩེཧི ཙཏྟཱརི ཨཔཎྞཀངྒཱནི ཐིནམིདྡྷནྟི ཨིམེ ཚ ཨིསྶཱདཱིནཾ ཨུཔྤཏྟིཀཱལེ ཏེསུ ཨཉྙཏརེན སདྡྷིཾ སཏྟ ཡེཝཱཔནཀཱ ཨེཀཀྑཎེ ཨུཔྤཛྫནྟི. སེསཾ སབྦཾ སབྦཝཱརེསུ ནཝམསདིསམེཝ. ཨིམེསུ པན དྭཱིསུ དོམནསྶཙིཏྟེསུ སཧཛཱཏཱདྷིཔཏིཡེཝ ¶ ལབྦྷཏི, ན ཨཱརམྨཎཱདྷིཔཏི. ན ཧི ཀུདྡྷོ ཀིཉྩི གརུཾ ཀརོཏཱིཏི.

ཨེཀཱདསམཙིཏྟཾ

༤༢༢. ཨེཀཱདསམཾ ཚསུ ཨཱརམྨཎེསུ ཝེདནཱཝསེན མཛ྄ཛྷཏྟསྶ ཀངྑཱཔཝཏྟིཀཱལེ ཨུཔྤཛྫཏི. ཏསྶ སམཡཝཝཏྠཱནེ ཝིཙིཀིཙྪཱསམྤཡུཏྟནྟི པདཾ ཨཔུབྦཾ. ཏསྶཏྠོ – ཝིཙིཀིཙྪཱཡ སམྤཡུཏྟནྟི ཝིཙིཀིཙྪཱསམྤཡུཏྟཾ. དྷམྨུདྡེསེ ‘ཝིཙིཀིཙྪཱ ཧོཏཱི’ཏི པདམེཝ ཝིསེསོ. ཏཏྠ ཝིགཏཱ ཙིཀིཙྪཱཏི ཝིཙིཀིཙྪཱ. སབྷཱཝཾ ཝཱ ཝིཙིནནྟོ ཨེཏཱཡ ཀིཙྪཏི ཀིལམཏཱིཏི ཝིཙིཀིཙྪཱ. སཱ སཾསཡལཀྑཎཱ, ཀམྤནརསཱ, ཨནིཙྪཡཔཙྩུཔཊྛཱནཱ ཨནེཀཾསགཱཧཔཙྩུཔཊྛཱནཱ ཝཱ, ཨཡོནིསོམནསིཀཱརཔདཊྛཱནཱ. པཊིཔཏྟིཨནྟརཱཡཀརཱཏི དཊྛབྦཱ.

ཨིདྷ པདཔཊིཔཱཊིཡཱ ཏེཝཱིསཏི པདཱནི ཧོནྟི. ཨགྒཧིཏགྒཧཎེན ཙུདྡས. ཏེསཾ ཝསེན སཝིབྷཏྟིཀཱཝིབྷཏྟིཀརཱསིཝིནིཙྪཡོ ཝེདིཏབྦོ. མནསིཀཱརོ ཨུདྡྷཙྩནྟི དྭེཡེཝ ཡེཝཱཔནཀཱ.

༤༢༤. ནིདྡེསཝཱརསྶ ¶ ཙིཏྟསྶེཀགྒཏཱནིདྡེསེ ཡསྨཱ ཨིདཾ དུབྦལཾ ཙིཏྟཾ པཝཏྟིཊྛིཏིམཏྟཀམེཝེཏྠ ཧོཏི, ཏསྨཱ ‘སཎྛིཏཱི’ཏིཨཱདཱིནི ཨཝཏྭཱ ཙིཏྟསྶ ‘ཋིཏཱི’ཏི ཨེཀམེཝ པདཾ ཝུཏྟཾ. ཏེནེཝ ཙ ཀཱརཎེན ཨུདྡེསཝཱརེཔི ‘སམཱདྷིནྡྲིཡ’ནྟིཨཱདི ན ཝུཏྟཾ.

༤༢༥. ཝིཙིཀིཙྪཱནིདྡེསེ ཀངྑནཝསེན ཀངྑཱ. ཀངྑཱཡ ཨཱཡནཱཏི ཀངྑཱཡནཱ. པུརིམཀངྑཱ ཧི ཨུཏྟརཀངྑཾ ཨཱནེཏི ནཱམ. ཨཱཀཱརཝསེན ཝཱ ཨེཏཾ ཝུཏྟཾ. ཀངྑཱསམངྒིཙིཏྟཾ ཀངྑཱཡ ཨཱཡིཏཏྟཱ ཀངྑཱཡིཏཾ ནཱམ. ཏསྶ བྷཱཝོ ཀངྑཱཡིཏཏྟཾ. ཝིམཏཱིཏི ནམཏི. ཝིཙིཀིཙྪཱ ཝུཏྟཏྠཱ ཨེཝ. ཀམྤནཊྛེན དྭིདྷཱ ཨེལ༹ཡཏཱིཏི དྭེལ༹ྷཀཾ. པཊིཔཏྟིནིཝཱརཎེན དྭིདྷཱཔཐོ ཝིཡཱཏི དྭེདྷཱཔཐོ. ‘ནིཙྩཾ ནུ ཁོ ཨིདཾ, ཨནིཙྩཾ ནུ ཁོ’ཏིཨཱདིཔཝཏྟིཡཱ ཨེཀསྨིཾ ཨཱཀཱརེ སཎྛཱཏུཾ ཨསམཏྠཏཱཡ སམནྟཏོ ¶ སེཏཱིཏི སཾསཡོ. ཨེཀཾསཾ གཧེཏུཾ ཨསམཏྠཏཱཡ ན ཨེཀཾསགྒཱཧོཏི ཨནེཀཾསགྒཱཧོ ¶ . ནིཙྪེཏུཾ ཨསཀྐོནྟཱི ཨཱརམྨཎཏོ ཨོསཀྐཏཱིཏི ཨཱསཔྤནཱ. ཨོགཱཧིཏུཾ ཨསཀྐོནྟཱི པརིསམནྟཏོ སཔྤཏཱིཏི པརིསཔྤནཱ. པརིཡོགཱཧིཏུཾ ཨསམཏྠཏཱཡ ཨཔརིཡོགཱཧནཱ. ནིཙྪཡཝསེན ཨཱརམྨཎེ པཝཏྟིཏུཾ ཨསམཏྠཏཱཡ ཐམྦྷིཏཏྟཾ; ཙིཏྟསྶ ཐདྡྷབྷཱཝོཏི ཨཏྠོ. ཝིཙིཀིཙྪཱ ཧི ཨུཔྤཛྫིཏྭཱ ཙིཏྟཾ ཐདྡྷཾ ཀརོཏི. ཡསྨཱ པནེསཱ ཨུཔྤཛྫམཱནཱ ཨཱརམྨཎཾ གཧེཏྭཱ མནཾ ཝིལིཁནྟཱི ཝིཡ, ཏསྨཱ མནོཝིལེཁོཏི ཝུཏྟཱ. སེསཾ སབྦཏྠ ཨུཏྟཱནཏྠམེཝ.

དྭཱདསམཙིཏྟཾ

༤༢༧. དྭཱདསམསྶ སམཡཝཝཏྠཱནེ ཨུདྡྷཙྩེན སམྤཡུཏྟནྟི ཨུདྡྷཙྩསམྤཡུཏྟཾ. ཨིདཉྷི ཙིཏྟཾ ཚསུ ཨཱརམྨཎེསུ ཝེདནཱཝསེན མཛ྄ཛྷཏྟཾ ཧུཏྭཱ ཨུདྡྷཏཾ ཧོཏི. ཨིདྷ དྷམྨུདྡེསེ ‘ཝིཙིཀིཙྪཱ’-ཋཱནེ ‘ཨུདྡྷཙྩཾ ཧོཏཱི’ཏི ཨཱགཏཾ. པདཔཊིཔཱཊིཡཱ ཨཊྛཝཱིསཏི པདཱནི ཧོནྟི. ཨགྒཧིཏགྒཧཎེན ཙུདྡས. ཏེསཾ ཝསེན སཝིབྷཏྟིཀཱཝིབྷཏྟིཀརཱསིཝིདྷཱནཾ ཝེདིཏབྦཾ. ཨདྷིམོཀྑོ མནསིཀཱརོཏི དྭེཡེཝ ཡེཝཱཔནཀཱ.

༤༢༩. ནིདྡེསཝཱརསྶ ཨུདྡྷཙྩནིདྡེསེ ཙིཏྟསྶཱཏི ན སཏྟསྶ, ན པོསསྶ. ཨུདྡྷཙྩནྟི ཨུདྡྷཏཱཀཱརོ. ན ཝཱུཔསམོཏི ཨཝཱུཔསམོ. ཙེཏོ ཝིཀྑིཔཏཱིཏི ¶ ཙེཏསོཝིཀྑེཔོ. བྷནྟཏྟཾ ཙིཏྟསྶཱཏི ཙིཏྟསྶ བྷནྟབྷཱཝོ, བྷནྟཡཱནབྷནྟགོཎཱདཱིནི ཝིཡ. ཨིམིནཱ ཨེཀཱརམྨཎསྨིཾཡེཝ ཝིཔྥནྡནཾ ཀཐིཏཾ. ཨུདྡྷཙྩཉྷི ཨེཀཱརམྨཎེ ཝིཔྥནྡཏི, ཝིཙིཀིཙྪཱ ནཱནཱརམྨཎེ. སེསཾ སབྦཝཱརེསུ ཧེཊྛཱ ཝུཏྟནཡེནེཝ ཝེདིཏབྦཾ.

ཨིདཱནི ཨིམསྨིཾ ཙིཏྟདྭཡེ པཀིཎྞཀཝིནིཙྪཡོ ཧོཏི. ‘ཨཱརམྨཎེ པཝཊྚནཀཙིཏྟཱནི ནཱམ ཀཏཱི’ཏི? ཧི ཝུཏྟེ ‘ཨིམཱནེཝ དྭེ’ཏི ཝཏྟབྦཾ. ཏཏྠ ཝིཙིཀིཙྪཱསཧགཏཾ ¶ ཨེཀནྟེན པཝཊྚཏི, ཨུདྡྷཙྩསཧགཏཾ པན ལདྡྷཱདྷིམོཀྑཏྟཱ ལདྡྷཔཏིཊྛཾ པཝཊྚཏི. ཡཐཱ ཧི ཝཊྚཙཏུརསྶེསུ དྭཱིསུ མཎཱིསུ པབྦྷཱརཊྛཱནེ པཝཊྚེཏྭཱ ཝིསྶཊྛེསུ ཝཊྚམཎི ཨེཀནྟེནེཝ པཝཊྚཏི, ཙཏུརསྶོ པཏིཊྛཱཡ པཏིཊྛཱཡ པཝཊྚཏི, ཨེཝཾསམྤདམིདཾ ཝེདིཏབྦཾ. སབྦེསུཔི ཧཱིནཱདིབྷེདོ ན ཨུདྡྷཊོ, སབྦེསཾ ཨེཀནྟཧཱིནཏྟཱ. སཧཛཱཏཱདྷིཔཏི ལབྦྷམཱནོཔི ན ཨུདྡྷཊོ, ཧེཊྛཱ དསྶིཏནཡཏྟཱ. ཉཱཎཱབྷཱཝཏོ པནེཏྠ ཝཱིམཾསཱདྷིཔཏི ནཱམ ནཏྠི. པཙྪིམདྭཡེ སེསོཔི ནཏྠི ཨེཝ. ཀསྨཱ? ཀཉྩི དྷམྨཾ དྷུརཾ ཀཏྭཱ ཨནུཔྤཛྫནཏོ, པཊྛཱནེ ཙ པཊིསིདྡྷཏོ.

ཨིམེཧི ¶ པན དྭཱདསཧིཔི ཨཀུསལཙིཏྟེཧི ཀམྨེ ཨཱཡཱུཧིཏེ, ཋཔེཏྭཱ ཨུདྡྷཙྩསཧགཏཾ, སེསཱནི ཨེཀཱདསེཝ པཊིསནྡྷིཾ ཨཱཀཌྜྷནྟི. ཝིཙིཀིཙྪཱསཧགཏེ ཨལདྡྷཱདྷིམོཀྑེ དུབྦལེཔི པཊིསནྡྷིཾ ཨཱཀཌྜྷམཱནེ ཨུདྡྷཙྩསཧགཏཾ ལདྡྷཱདྷིམོཀྑཾ བལཝཾ ཀསྨཱ ནཱཀཌྜྷཏཱིཏི? དསྶནེན པཧཱཏབྦཱབྷཱཝཏོ. ཡདི ཧི ཨཱཀཌྜྷེཡྻ ‘དསྶནེནཔཧཱཏབྦ’-པདཝིབྷངྒེ ཨཱགཙྪེཡྻ, ཏསྨཱ, ཋཔེཏྭཱ ཏཾ, སེསཱནི ཨེཀཱདས ཨཱཀཌྜྷནྟི. ཏེསུ ཧི ཡེན ཀེནཙི ཀམྨེ ཨཱཡཱུཧིཏེ ཏཱཡ ཙེཏནཱཡ ཙཏཱུསུ ཨཔཱཡེསུ པཊིསནྡྷི ཧོཏི. ཨཀུསལཝིཔཱཀེསུ ཨཧེཏུཀམནོཝིཉྙཱཎདྷཱཏུཨུཔེཀྑཱསཧགཏཱཡ པཊིསནྡྷིཾ གཎྷཱཏི. ཨིཏརསྶཱཔི ཨེཏྠེཝ པཊིསནྡྷིདཱནཾ བྷཝེཡྻ. ཡསྨཱ པནེཏཾ ནཏྠི, ཏསྨཱ ‘དསྶནེནཔཧཱཏབྦ’-པདཝིབྷངྒེ ནཱགཏནྟི.

ཨཀུསལཱ དྷམྨཱཏིཔདསྶ ཝཎྞནཱ ནིཊྛིཏཱ.

ཨབྱཱཀཏཔདཾ

ཨཧེཏུཀཀུསལཝིཔཱཀོ

༤༣༡. ཨིདཱནི ¶ ཨབྱཱཀཏཔདཾ བྷཱཛེཏྭཱ དསྶེཏུཾ ཀཏམེ དྷམྨཱ ཨབྱཱཀཏཱཏིཨཱདི ཨཱརདྡྷཾ. ཏཏྠ ཙཏུབྦིདྷཾ ཨབྱཱཀཏཾ – ཝིཔཱཀཾ ཀིརིཡཾ རཱུཔཾ ནིབྦཱནནྟི. ཏེསུ ཝིཔཱཀཱབྱཱཀཏཾ. ཝིཔཱཀཱབྱཱཀཏེཔི ཀུསལཝིཔཱཀཾ. ཏསྨིམྤི པརིཏྟཝིཔཱཀཾ. ཏསྨིམྤི ཨཧེཏུཀཾ. ཏསྨིམྤི པཉྩཝིཉྙཱཎཾ. ཏསྨིམྤི དྭཱརཔཊིཔཱཊིཡཱ ཙཀྑུཝིཉྙཱཎཾ ¶ . ཏསྶཱཔི, ཋཔེཏྭཱ དྭཱརཱརམྨཎཱདིསཱདྷཱརཎཔཙྩཡཾ, ཨསཱདྷཱརཎཀམྨཔཙྩཡཝསེནེཝ ཨུཔྤཏྟིཾ དཱིཔེཏུཾ ཀཱམཱཝཙརསྶ ཀུསལསྶ ཀམྨསྶ ཀཏཏྟཱཏིཨཱདི ཝུཏྟཾ. ཏཏྠ ཀཏཏྟཱཏི ཀཏཀཱརཎཱ. ཨུཔཙིཏཏྟཱཏི ཨཱཙིཏཏྟཱ, ཝཌྜྷིཏཀཱརཎཱ. ཙཀྑུཝིཉྙཱཎནྟི ཀཱརཎབྷཱུཏསྶ ཙཀྑུསྶ ཝིཉྙཱཎཾ, ཙཀྑུཏོ ཝཱ པཝཏྟཾ, ཙཀྑུསྨིཾ ཝཱ ནིསྶིཏཾ ཝིཉྙཱཎནྟི ཙཀྑུཝིཉྙཱཎཾ. པརཏོ སོཏཝིཉྙཱཎཱདཱིསུཔི ཨེསེཝ ནཡོ.

ཏཏྠ ཙཀྑུསནྣིསྶིཏརཱུཔཝིཛཱནནལཀྑཎཾ ཙཀྑུཝིཉྙཱཎཾ, རཱུཔམཏྟཱརམྨཎརསཾ, རཱུཔཱབྷིམུཁབྷཱཝཔཙྩུཔཊྛཱནཾ ¶ , རཱུཔཱརམྨཎཱཡ ཀིརིཡམནོདྷཱཏུཡཱ ཨཔགམཔདཊྛཱནཾ. པརཏོ ཨཱགཏཱནི སོཏཱདིསནྣིསྶིཏསདྡཱདིཝིཛཱནནལཀྑཎཱནི སོཏགྷཱནཛིཝ྄ཧཱཀཱཡཝིཉྙཱཎཱནི སདྡཱདིམཏྟཱརམྨཎརསཱནི, སདྡཱདིཨབྷིམུཁབྷཱཝཔཙྩུཔཊྛཱནཱནི, སདྡཱདིཨཱརམྨཎཱནཾ ཀིརིཡམནོདྷཱཏཱུནཾ ཨཔགམཔདཊྛཱནཱནི.

ཨིདྷ པདཔཊིཔཱཊིཡཱ དས པདཱནི ཧོནྟི. ཨགྒཧིཏགྒཧཎེན སཏྟ. ཏེསུ པཉྩ ཨཝིབྷཏྟིཀཱནི, དྭེ སཝིབྷཏྟིཀཱནི. ཏེསུ ཙིཏྟཾ ཕསྶཔཉྩཀཝསེན ཙེཝ ཨིནྡྲིཡཝསེན ཙ དྭཱིསུ ཋཱནེསུ ཝིབྷཏྟིཾ གཙྪཏི, ཝེདནཱ ཕསྶཔཉྩཀཛྷཱནངྒཨིནྡྲིཡཝསེན ཏཱིསུཡེཝ. རཱསཡོཔི ཨིམེཝ ཏཡོ ཧོནྟི. ཡེཝཱཔནཀོ ཨེཀོ མནསིཀཱརོ ཨེཝ.

༤༣༦. ནིདྡེསཝཱརེ ཙཀྑུཝིཉྙཱཎཾ པཎྜརནྟི ཝཏྠུཏོ ཝུཏྟཾ. ཀུསལཉྷི ཨཏྟནོ པརིསུདྡྷཏཱཡ པཎྜརཾ ནཱམ, ཨཀུསལཾ བྷཝངྒནིསྶནྡེན, ཝིཔཱཀཾ ཝཏྠུཔཎྜརཏྟཱ.

༤༣༩. ཙིཏྟསྶེཀགྒཏཱནིདྡེསེ ཙིཏྟསྶ ཋིཏཱིཏི ཨེཀམེཝ པདཾ ཝུཏྟཾ. ཨིདམྤི ཧི དུབྦལཾ ཙིཏྟཾ པཝཏྟིཊྛིཏིམཏྟམེཝེཏྠ ལབྦྷཏི, ‘སཎྛིཏིཨཝཊྛིཏི’-བྷཱཝཾ ¶ པཱཔུཎིཏུཾ ན སཀྐོཏི. སངྒཧཝཱརེ ཛྷཱནངྒམགྒངྒཱནི ན ཨུདྡྷཊཱནི. ཀསྨཱ? ཝིཏཀྐཔཙྪིམཀཉྷི ཛྷཱནཾ ནཱམ, ཧེཏུཔཙྪིམཀོ མགྒོ ནཱམ. པཀཏིཡཱ ཨཝིཏཀྐཙིཏྟེ ཛྷཱནངྒཾ ན ལབྦྷཏི, ཨཧེཏུཀཙིཏྟེ ཙ མགྒངྒཱནི. ཏསྨཱ ཨིདྷ ཨུབྷཡམྤི ¶ ན ཨུདྡྷཊཾ. སངྑཱརཀྑནྡྷོཔེཏྠ ཙཏུརངྒིཀོཡེཝ བྷཱཛིཏོ. སུཉྙཏཝཱརོ པཱཀཏིཀོཡེཝ. སོཏཝིཉྙཱཎཱདིནིདྡེསཱཔི ཨིམིནཱཝ ནཡེན ཝེདིཏབྦཱ.

ཀེཝལཉྷི ཙཀྑུཝིཉྙཱཎཱདཱིསུ ‘ཨུཔེཀྑཱ’ བྷཱཛིཏཱ, ཀཱཡཝིཉྙཱཎེ ‘སུཁ’ནྟི, ཨཡམེཏྠ ཝིསེསོ. སོཔི ཙ གྷཊྚནཝསེན ཧོཏཱིཏི ཝེདིཏབྦོ. ཙཀྑུདྭཱརཱདཱིསུ ཧི ཙཏཱུསུ ཨུཔཱདཱརཱུཔམེཝ ཨུཔཱདཱརཱུཔཾ གྷཊྚེཏི, ཨུཔཱདཱརཱུཔེཡེཝ ཨུཔཱདཱརཱུཔཾ གྷཊྚེནྟེ པཊིགྷཊྚནཱནིགྷཾསོ བལཝཱ ན ཧོཏི. ཙཏུནྣཾ ཨདྷིཀརཎཱིནཾ ཨུཔརི ཙཏྟཱརོ ཀཔྤཱསཔིཙུཔིཎྜེ ཋཔེཏྭཱ པིཙུཔིཎྜེཧེཝ པཧཏཀཱལོ ཝིཡ ཕུཊྛམཏྟམེཝ ཧོཏི. ཝེདནཱ མཛ྄ཛྷཏྟཊྛཱནེ ཏིཊྛཏི. ཀཱཡདྭཱརེ པན བཧིདྡྷཱ མཧཱབྷཱུཏཱརམྨཎཾ ཨཛ྄ཛྷཏྟིཀཀཱཡཔསཱདཾ གྷཊྚེཏྭཱ པསཱདཔཙྩཡེསུ མཧཱབྷཱུཏེསུ པཊིཧཉྙཏི. ཡཐཱ ཨདྷིཀརཎཱིམཏྠཀེ ཀཔྤཱསཔིཙུཔིཎྜཾ ཋཔེཏྭཱ ཀཱུཊེན པཧརནྟསྶ ཀཔྤཱསཔིཙུཔིཎྜཾ ཚིནྡིཏྭཱ ཀཱུཊཾ ¶ ཨདྷིཀརཎིཾ གཎྷཏཱིཏི, ནིགྷཾསོ བལཝཱ ཧོཏི, ཨེཝམེཝ པཊིགྷཊྚནཱནིགྷཾསོ བལཝཱ ཧོཏི. ཨིཊྛེ ཨཱརམྨཎེ སུཁསཧགཏཾ ཀཱཡཝིཉྙཱཎཾ ཨུཔྤཛྫཏི, ཨནིཊྛེ དུཀྑསཧགཏཾ.

ཨིམེསཾ པན པཉྩནྣཾ ཙིཏྟཱནཾ ཝཏྠུདྭཱརཱརམྨཎཱནི ནིབདྡྷཱནེཝ ཧོནྟི, ཝཏྠཱདིསངྐམནཾ ནཱམེཏྠ ནཏྠི. ཀུསལཝིཔཱཀཙཀྑུཝིཉྙཱཎཉྷི ཙཀྑུཔསཱདཾ ཝཏྠུཾ ཀཏྭཱ ཨིཊྛེ ཙ ཨིཊྛམཛ྄ཛྷཏྟེ ཙ ཙཏུསམུཊྛཱནིཀརཱུཔཱརམྨཎེ དསྶནཀིཙྩཾ སཱདྷཡམཱནཾ ཙཀྑུདྭཱརེ ཋཏྭཱ ཝིཔཙྩཏི. སོཏཝིཉྙཱཎཱདཱིནི སོཏཔསཱདཱདཱིནི ཝཏྠུཾ ཀཏྭཱ ཨིཊྛཨིཊྛམཛ྄ཛྷཏྟེསུ སདྡཱདཱིསུ སཝནགྷཱཡནསཱཡནཕུསནཀིཙྩཱནི སཱདྷཡམཱནཱནི སོཏདྭཱརཱདཱིསུ ཋཏྭཱ ཝིཔཙྩནྟི. སདྡོ པནེཏྠ དྭིསམུཊྛཱནིཀོཡེཝ ཧོཏི.

༤༥༥. མནོདྷཱཏུནིདྡེསེ སབྷཱཝསུཉྙཏནིསྶཏྟཊྛེན མནོཡེཝ དྷཱཏུ མནོདྷཱཏུ. སཱ ཙཀྑུཝིཉྙཱཎཱདཱིནཾ ཨནནྟརཾ རཱུཔཱདིཝིཛཱནནལཀྑཎཱ, རཱུཔཱདཱིནཾ སམྤཊིཙྪནརསཱ, ཏཐཱབྷཱཝཔཙྩུཔཊྛཱནཱ, ཙཀྑུཝིཉྙཱཎཱདིཨཔགམཔདཊྛཱནཱ ¶ . ཨིདྷ དྷམྨུདྡེསེ དྭཱདས པདཱནི ཧོནྟི. ཨགྒཧིཏགྒཧཎེན ¶ ནཝ. ཏེསུ སཏྟ ཨཝིབྷཏྟིཀཱནི དྭེ སཝིབྷཏྟིཀཱནི. ཨདྷིམོཀྑོ མནསིཀཱརོཏི དྭེ ཡེཝཱཔནཀཱ. ཝིཏཀྐནིདྡེསོ ཨབྷིནིརོཔནཾ པཱཔེཏྭཱ ཋཔིཏོ. ཡསྨཱ པནེཏཾ ཙིཏྟཾ ནེཝ ཀུསལཾ ནཱཀུསལཾ, ཏསྨཱ སམྨཱསངྐཔྤོཏི ཝཱ མིཙྪཱསངྐཔྤོཏི ཝཱ ན ཝུཏྟཾ. སངྒཧཝཱརེ ལབྦྷམཱནམྤི ཛྷཱནངྒཾ པཉྩཝིཉྙཱཎསོཏེ པཏིཏྭཱ གཏནྟི. མགྒངྒཾ པན ན ལབྦྷཏིཡེཝཱཏི ན ཨུདྡྷཊཾ. སུཉྙཏཝཱརོ པཱཀཏིཀོཡེཝ. ཨིམསྶ ཙིཏྟསྶ ཝཏྠུ ནིབདྡྷཾ ཧདཡཝཏྠུམེཝ ཧོཏི. དྭཱརཱརམྨཎཱནི ཨནིབདྡྷཱནི. ཏཏྠ ཀིཉྩཱཔི དྭཱརཱརམྨཎཱནི སངྐམནྟི, ཋཱནཾ པན ཨེཀཾ. སམྤཊིཙྪནཀིཙྩམེཝ ཧེཏཾ ཧོཏི. ཨིདཉྷི པཉྩདྭཱརེ པཉྩསུ ཨཱརམྨཎེསུ སམྤཊིཙྪནཾ ཧུཏྭཱ ཝིཔཙྩཏི. ཀུསལཝིཔཱཀེསུ ཙཀྑུཝིཉྙཱཎཱདཱིསུ ནིརུདྡྷེསུ ཏཾསམནནྟརཱ ཏཱནེཝ ཋཱནཔྤཏྟཱནི རཱུཔཱརམྨཎཱདཱིནི སམྤཊིཙྪཏི.

༤༦༩. མནོཝིཉྙཱཎདྷཱཏུནིདྡེསེསུ པཋམམནོཝིཉྙཱཎདྷཱཏུཡཾ ‘པཱིཏི’པདཾ ཨདྷིཀཾ. ཝེདནཱཔི ‘སོམནསྶ’-ཝེདནཱ ཧོཏི. ཨཡཉྷི ཨིཊྛཱརམྨཎསྨིཾཡེཝ པཝཏྟཏི. དུཏིཡམནོཝིཉྙཱཎདྷཱཏུ ཨིཊྛམཛ྄ཛྷཏྟཱརམྨཎེ. ཏསྨཱ ཏཏྠ ‘ཨུཔེཀྑཱ’ ཝེདནཱ ཧོཏཱིཏི. པདཱནི མནོདྷཱཏུནིདྡེསསདིསཱནེཝ. ཨུབྷཡཏྠཱཔི པཉྩཝིཉྙཱཎསོཏེ པཏིཏྭཱ གཏཏྟཱཡེཝ ཛྷཱནངྒཱནི ན ཨུདྡྷཊཱནི. མགྒངྒཱནི ཨལཱབྷཏོཡེཝ. སེསཾ སབྦཏྠ ཝུཏྟནཡེནེཝ ཝེདིཏབྦཾ. ལཀྑཎཱདིཏོ པནེསཱ དུཝིདྷཱཔི མནོཝིཉྙཱཎདྷཱཏུ ¶ ཨཧེཏུཀཝིཔཱཀཱ, ཚལཱ༹རམྨཎཝིཛཱནནལཀྑཎཱ, སནྟཱིརཎཱདིརསཱ, ཏཐཱབྷཱཝཔཙྩུཔཊྛཱནཱ, ཧདཡཝཏྠུཔདཊྛཱནཱཏི ཝེདིཏབྦཱ.

ཏཏྠ པཋམཱ དྭཱིསུ ཋཱནེསུ ཝིཔཙྩཏི. སཱ ཧི པཉྩདྭཱརེ ཀུསལཝིཔཱཀཙཀྑུཝིཉྙཱཎཱདིཨནནྟརཾ, ཝིཔཱཀམནོདྷཱཏུཡཱ ཏཾ ཨཱརམྨཎཾ སམྤཊིཙྪིཏྭཱ ནིརུདྡྷཱཡ, ཏསྨིཾ ཡེཝཱརམྨཎེ སནྟཱིརཎཀིཙྩཾ སཱདྷཡམཱནཱ པཉྩསུ དྭཱརེསུ ཋཏྭཱ ཝིཔཙྩཏི. ཚསུ དྭཱརེསུ པན བལཝཱརམྨཎེ ¶ ཏདཱརམྨཎཱ ཧུཏྭཱ ཝིཔཙྩཏི. ཀཐཾ? ཡཐཱ ཧི ཙཎྜསོཏེ, ཏིརིཡཾ ནཱཝཱཡ གཙྪནྟིཡཱ, ཨུདཀཾ ཚིཛྫིཏྭཱ ཐོཀཾ ཋཱནཾ ནཱཝཾ ཨནུབནྡྷིཏྭཱ ཡཐཱསོཏམེཝ གཙྪཏི, ཨེཝམེཝ ཚསུ དྭཱརེསུ བལཝཱརམྨཎེ པལོབྷཡམཱནེ ཨཱཔཱཐགཏེ ཛཝནཾ ཛཝཏི. ཏསྨིཾ ཛཝིཏེ བྷཝངྒསྶ ཝཱརོ. ཨིདཾ པན ཙིཏྟཾ བྷཝངྒསྶ ཝཱརཾ ཨདཏྭཱ ཛཝནེན གཧིཏཱརམྨཎཾ གཧེཏྭཱ ཨེཀཾ དྭེ ཙིཏྟཝཱརེ པཝཏྟིཏྭཱ བྷཝངྒམེཝ ¶ ཨོཏརཏི. གཝཀྑནྡྷེ ནདིཾ ཏརནྟེཔི ཨེཝམེཝ ཨུཔམཱ ཝིཏྠཱརེཏབྦཱ. ཨེཝམེསཱ ཡཾ ཛཝནེན གཧིཏཱརམྨཎཾ ཏསྶེཝ གཧིཏཏྟཱ ཏདཱརམྨཎཾ ནཱམ ཧུཏྭཱ ཝིཔཙྩཏི.

དུཏིཡཱ པན པཉྩསུ ཋཱནེསུ ཝིཔཙྩཏི. ཀཐཾ? མནུསྶལོཀེ ཏཱཝ ཛཙྩནྡྷཛཙྩབདྷིརཛཙྩཨེལ༹ཛཙྩུམྨཏྟཀཨུབྷཏོབྱཉྫནཀནཔུཾསཀཱནཾ པཊིསནྡྷིགྒཧཎཀཱལེ པཊིསནྡྷི ཧུཏྭཱ ཝིཔཙྩཏི. པཊིསནྡྷིཡཱ ཝཱིཏིཝཏྟཱཡ ཡཱཝཏཱཡུཀཾ བྷཝངྒཾ ཧུཏྭཱ ཝིཔཙྩཏི. ཨིཊྛམཛ྄ཛྷཏྟེ པཉྩཱརམྨཎཝཱིཐིཡཱ སནྟཱིརཎཾ ཧུཏྭཱ, བལཝཱརམྨཎེ ཚསུ དྭཱརེསུ ཏདཱརམྨཎཾ ཧུཏྭཱ, མརཎཀཱལེ ཙུཏི ཧུཏྭཱཏི ཨིམེསུ པཉྩསུ ཋཱནེསུ ཝིཔཙྩཏཱིཏི.

མནོཝིཉྙཱཎདྷཱཏུདྭཡཾ ནིཊྛིཏཾ.

ཨཊྛམཧཱཝིཔཱཀཙིཏྟཝཎྞནཱ

༤༩༨. ཨིདཱནི ཨཊྛམཧཱཝིཔཱཀཙིཏྟཱནི དསྶེཏུཾ པུན ཀཏམེ དྷམྨཱ ཨབྱཱཀཏཱཏིཨཱདི ཨཱརདྡྷཾ. ཏཏྠ པཱལི༹ཡཾ ནཡམཏྟཾ དསྶེཏྭཱ སབྦཝཱརཱ སཾཁིཏྟཱ. ཏེསཾ ཨཏྠོ ཧེཊྛཱ ཝུཏྟནཡེནེཝ ཝེདིཏབྦོ. ཡོ པནེཏྠ ཝིསེསོ ཏཾ དསྶེཏུཾ ཨལོབྷོ ཨབྱཱཀཏམཱུལནྟིཨཱདི ཝུཏྟཾ. ཡམྤི ན ཝུཏྟཾ ¶ ཏཾ ཨེཝཾ ཝེདིཏབྦཾ – ཡོ ཧི ཀཱམཱཝཙརཀུསལེསུ ཀམྨདྭཱརཀམྨཔཐཔུཉྙཀིརིཡཝཏྠུབྷེདོ ཝུཏྟོ སོ ཨིདྷ ནཏྠི. ཀསྨཱ? ཨཝིཉྙཏྟིཛནཀཏོ ཨཝིཔཱཀདྷམྨཏོ ཏཐཱ ཨཔྤཝཏྟིཏོ ཙ. ཡཱཔི ཏཱ ཡེཝཱཔནཀེསུ ¶ ཀརུཎཱམུདིཏཱ ཝུཏྟཱ, ཏཱ སཏྟཱརམྨཎཏྟཱ ཝིཔཱཀེསུ ན སནྟི. ཨེཀནྟཔརིཏྟཱརམྨཎཱནི ཧི ཀཱམཱཝཙརཝིཔཱཀཱནི. ན ཀེཝལཉྩ ཀརུཎཱམུདིཏཱ, ཝིརཏིཡོཔེཏྠ ན སནྟི. ‘པཉྩ སིཀྑཱཔདཱནི ཀུསལཱནེཝཱ’ཏི (ཝིབྷ. ༧༡༥) ཧི ཝུཏྟཾ.

ཨསངྑཱརསསངྑཱརཝིདྷཱནཉྩེཏྠ ཀུསལཏོ ཙེཝ པཙྩཡབྷེདཏོ ཙ ཝེདིཏབྦཾ. ཨསངྑཱརིཀསྶ ཧི ཀུསལསྶ ཨསངྑཱརིཀམེཝ ཝིཔཱཀཾ, སསངྑཱརིཀསྶ སསངྑཱརིཀཾ. བལཝཔཙྩཡེཧི ཙ ཨུཔྤནྣཾ ཨསངྑཱརིཀཾ, ཨིཏརེཧི ཨིཏརཾ. ཧཱིནཱདིབྷེདེཔི ཨིམཱནི ཧཱིནམཛ྄ཛྷིམཔཎཱིཏེཧི ཚནྡཱདཱིཧི ཨནིཔྥཱདིཏཏྟཱ ཧཱིནམཛ྄ཛྷིམཔཎཱིཏཱནི ནཱམ ན ཧོནྟི. ཧཱིནསྶ པན ཀུསལསྶ ཝིཔཱཀཾ ཧཱིནཾ, མཛ྄ཛྷིམསྶ ¶ མཛ྄ཛྷིམཾ, པཎཱིཏསྶ པཎཱིཏཾ. ཨདྷིཔཏིནོ པེཏྠ ན སནྟི. ཀསྨཱ? ཚནྡཱདཱིནི དྷུརཾ ཀཏྭཱ ཨནུཔྤཱདེཏབྦཏོ. སེསཾ སབྦཾ ཨཊྛསུ ཀུསལེསུ ཝུཏྟསདིསམེཝ.

ཨིདཱནི ཨིམེསཾ ཨཊྛནྣཾ མཧཱཝིཔཱཀཙིཏྟཱནཾ ཝིཔཙྩནཊྛཱནཾ ཝེདིཏབྦཾ. ཨེཏཱནི ཧི ཙཏཱུསུ ཋཱནེསུ ཝིཔཙྩནྟི – པཊིསནྡྷིཡཾ, བྷཝངྒེ, ཙུཏིཡཾ, ཏདཱརམྨཎེཏི. ཀཐཾ? མནུསྶེསུ ཏཱཝ ཀཱམཱཝཙརདེཝེསུ ཙ པུཉྙཝནྟཱནཾ དུཧེཏུཀཏིཧེཏུཀཱནཾ པཊིསནྡྷིགྒཧཎཀཱལེ པཊིསནྡྷི ཧུཏྭཱ ཝིཔཙྩནྟི. པཊིསནྡྷིཡཱ ཝཱིཏིཝཏྟཱཡ པཝཏྟེ སཊྛིཔི ཨསཱིཏིཔི ཝསྶཱནི ཨསངྑྱེཡྻམྤི ཨཱཡུཀཱལཾ བྷཝངྒཾ ཧུཏྭཱ, བལཝཱརམྨཎེ ཚསུ དྭཱརེསུ ཏདཱརམྨཎཾ ཧུཏྭཱ, མརཎཀཱལེ ཙུཏི ཧུཏྭཱཏི. ཨེཝཾ ཙཏཱུསུ ཋཱནེསུ ཝིཔཙྩནྟི.

ཏཏྠ སབྦེཔི སབྦཉྙུབོདྷིསཏྟཱ པཙྪིམཔཊིསནྡྷིགྒཧཎེ པཋམེན སོམནསྶསཧགཏཏིཧེཏུཀཨསངྑཱརིཀམཧཱཝིཔཱཀཙིཏྟེན པཊིསནྡྷིཾ གཎྷནྟི. ཏཾ པན མེཏྟཱཔུབྦབྷཱགཙིཏྟསྶ ཝིཔཱཀཾ ཧོཏི. ཏེན དིནྣཱཡ པཊིསནྡྷིཡཱ ཨསངྑྱེཡྻཾ ཨཱཡུ. ཀཱལཝསེན པན པརིཎམཏི. མཧཱསཱིཝཏྠེརོ པནཱཧ – ‘སོམནསྶསཧགཏཏོ ཨུཔེཀྑཱསཧགཏཾ བལཝཏརཾ. ཏེན པཊིསནྡྷིཾ གཎྷནྟི. ཏེན གཧིཏཔཊིསནྡྷིཀཱ ཧི མཧཛ྄ཛྷཱསཡཱ ཧོནྟི. དིབྦེསུཔི ཨཱརམྨཎེསུ ཨུཔྤིལཱཝིནོ ན ཧོནྟི, ཏིཔིཊཀཙཱུལ༹ནཱགཏྠེརཱདཡོ ཝིཡཱ’ཏི ¶ . ཨཊྛཀཐཱཡཾ པན – ‘ཨཡཾ ཐེརསྶ མནོརཐོ,’‘ནཏྠི ཨེཏ’ནྟི པཊིཀྑིཔིཏྭཱ ‘སབྦཉྙུབོདྷིསཏྟཱནཾ ཧིཏཱུཔཙཱརོ བལཝཱ ཧོཏི ¶ , ཏསྨཱ མེཏྟཱཔུབྦབྷཱགཀཱམཱཝཙརཀུསལཝིཔཱཀསོམནསྶསཧགཏཏིཧེཏུཀཨསངྑཱརིཀཙིཏྟེན པཊིསནྡྷིཾ གཎྷནྟཱི’ཏི ཝུཏྟཾ.

ཝིཔཱཀུདྡྷཱརཀཐཱ

ཨིདཱནི ཝིཔཱཀུདྡྷཱརཀཐཱཡ མཱཏིཀཱ ཋཔེཏབྦཱ – ཏིཔིཊཀཙཱུལ༹ནཱགཏྠེརོ ཏཱཝ ཨཱཧ – ཨེཀཱཡ ཀུསལཙེཏནཱཡ སོལ༹ས ཝིཔཱཀཙིཏྟཱནི ཨུཔྤཛྫནྟི. ཨེཏྠེཝ དྭཱདསཀམགྒོཔི ཨཧེཏུཀཊྛཀམྤཱིཏི. མོརཝཱཔིཝཱསཱི མཧཱདཏྟཏྠེརོ པནཱཧ – ཨེཀཱཡ ཀུསལཙེཏནཱཡ དྭཱདས ཝིཔཱཀཙིཏྟཱནི ཨུཔྤཛྫནྟི. ཨེཏྠེཝ དསཀམགྒོཔི ཨཧེཏུཀཊྛཀམྤཱིཏི. ཏིཔིཊཀམཧཱདྷམྨརཀྑིཏཏྠེརོ ཨཱཧ – ཨེཀཱཡ ཀུསལཙེཏནཱཡ དས ཝིཔཱཀཙིཏྟཱནི ཨུཔྤཛྫནྟི, ཨེཏྠེཝ ཨཧེཏུཀཊྛཀནྟི.

ཨིམསྨིཾ ¶ ཋཱནེ སཱཀེཏཔཉྷཾ ནཱམ གཎྷིཾསུ. སཱཀེཏེ ཀིར ཨུཔཱསཀཱ སཱལཱཡཾ ནིསཱིདིཏྭཱ ‘ཀིཾ ནུ ཁོ ཨེཀཱཡ ཙེཏནཱཡ ཀམྨེ ཨཱཡཱུཧིཏེ ཨེཀཱ པཊིསནྡྷི ཧོཏི ཨུདཱཧུ ནཱནཱ’ཏི? པཉྷཾ ནཱམ སམུཊྛཱཔེཏྭཱ ནིཙྪེཏུཾ ཨསཀྐོནྟཱ ཨཱབྷིདྷམྨིཀཏྠེརེ ཨུཔསངྐམིཏྭཱ པུཙྪིཾསུ. ཐེརཱ ‘ཡཐཱ ཨེཀསྨཱ ཨམྦབཱིཛཱ ཨེཀོཝ ཨངྐུརོ ནིཀྑམཏི, ཨེཝཾ ཨེཀཱཝ པཊིསནྡྷི ཧོཏཱི’ཏི སཉྙཱཔེསུཾ. ཨཐེཀདིཝསཾ ‘ཀིཾ ནུ ཁོ ནཱནཱཙེཏནཱཧི ཀམྨེ ཨཱཡཱུཧིཏེ པཊིསནྡྷིཡོ ནཱནཱ ཧོནྟི ཨུདཱཧུ ཨེཀཱ’ཏི? པཉྷཾ སམུཊྛཱཔེཏྭཱ ནིཙྪེཏུཾ ཨསཀྐོནྟཱ ཐེརེ པུཙྪིཾསུ. ཐེརཱ ‘ཡཐཱ བཧཱུསུ ཨམྦབཱིཛེསུ རོཔིཏེསུ བཧཱུ ཨངྐུརཱ ནིཀྑམནྟི, ཨེཝཾ བཧུཀཱཝ པཊིསནྡྷིཡོ ཧོནྟཱི’ཏི སཉྙཱཔེསུཾ.

ཨཔརམྤི ཨིམསྨིཾ ཋཱནེ ཨུསྶདཀིཏྟནཾ ནཱམ གཧིཏཾ. ཨིམེསཉྷི སཏྟཱནཾ ལོབྷོཔི ཨུསྶནྣོ ཧོཏི, དོསོཔི མོཧོཔི; ཨལོབྷོཔི ཨདོསོཔི ཨམོཧོཔི. ཏཾ ནེསཾ ཨུསྶནྣབྷཱཝཾ ཀོ ནིཡཱམེཏཱིཏི? པུབྦཧེཏུ ནིཡཱམེཏི. ཀམྨཱཡཱུཧནཀྑཎེཡེཝ ནཱནཏྟཾ ཧོཏི. ཀཐཾ? ‘‘ཡསྶ ཧི ཀམྨཱཡཱུཧནཀྑཎེ ལོབྷོ བལཝཱ ཧོཏི ཨལོབྷོ མནྡོ, ཨདོསཱམོཧཱ བལཝནྟོ དོསམོཧཱ མནྡཱ, ཏསྶ མནྡོ ཨལོབྷོ ལོབྷཾ པརིཡཱདཱཏུཾ ན སཀྐོཏི, ཨདོསཱམོཧཱ པན བལཝནྟོ དོསམོཧེ ¶ པརིཡཱདཱཏུཾ སཀྐོནྟི. ཏསྨཱ སོ ཏེན ཀམྨེན དིནྣཔཊིསནྡྷིཝསེན ནིབྦཏྟོ ལུདྡྷོ ཧོཏི, སུཁསཱིལོ ཨཀྐོདྷནོ, པཉྙཝཱ པན ཧོཏི ཝཛིརཱུཔམཉཱཎོ’’ཏི.

‘ཡསྶ ¶ པན ཀམྨཱཡཱུཧནཀྑཎེ ལོབྷདོསཱ བལཝནྟོ ཧོནྟི ཨལོབྷཱདོསཱ མནྡཱ, ཨམོཧོ བལཝཱ མོཧོ མནྡོ, སོ པུརིམནཡེནེཝ ལུདྡྷོ ཙེཝ ཧོཏི དུཊྛོ ཙ, པཉྙཝཱ པན ཧོཏི ཝཛིརཱུཔམཉཱཎོ དཏྟཱབྷཡཏྠེརོ ཝིཡ.

‘ཡསྶ པན ཀམྨཱཡཱུཧནཀྑཎེ ལོབྷཱདོསམོཧཱ བལཝནྟོ ཧོནྟི ཨིཏརེ མནྡཱ, སོ པུརིམནཡེནེཝ ལུདྡྷོ ཙེཝ ཧོཏི དནྡྷོ ཙ, སུཁསཱིལཀོ པན ཧོཏི ཨཀྐོདྷནོ.

‘ཏཐཱ ཡསྶ ཀམྨཱཡཱུཧནཀྑཎེ ཏཡོཔི ལོབྷདོསམོཧཱ བལཝནྟོ ཧོནྟི ཨལོབྷཱདཡོ མནྡཱ, སོ པུརིམནཡེནེཝ ལུདྡྷོ ཙེཝ ཧོཏི དུཊྛོ ཙ མཱུལ༹ྷོ ཙ.

‘ཡསྶ ¶ པན ཀམྨཱཡཱུཧནཀྑཎེ ཨལོབྷདོསམོཧཱ བལཝནྟོ ཧོནྟི ཨིཏརེ མནྡཱ, སོ པུརིམནཡེནེཝ ཨཔྤཀིལེསོ ཧོཏི, དིབྦཱརམྨཎམྤི དིསྭཱ ནིཙྩལོ, དུཊྛོ པན ཧོཏི དནྡྷཔཉྙོ ཙཱཏི.

‘ཡསྶ པན ཀམྨཱཡཱུཧནཀྑཎེ ཨལོབྷཱདོསམོཧཱ བལཝནྟོ ཧོནྟི ཨིཏརེ མནྡཱ, སོ པུརིམནཡེནེཝ ཨལུདྡྷོ ཙེཝ ཧོཏི, སུཁསཱིལཀོ ཙ, དནྡྷོ པན ཧོཏི.

‘ཏཐཱ ཡསྶ ཀམྨཱཡཱུཧནཀྑཎེ ཨལོབྷདོསཱམོཧཱ བལཝནྟོ ཧོནྟི ཨིཏརེ མནྡཱ, སོ པུརིམནཡེནེཝ ཨལུདྡྷོ ཙེཝ ཧོཏི པཉྙཝཱ ཙ, དུཊྛོ ཙ པན ཧོཏི ཀོདྷནོ.

‘ཡསྶ པན ཀམྨཱཡཱུཧནཀྑཎེ ཏཡོཔི ཨལོབྷཱདཡོ བལཝནྟོ ཧོནྟི ལོབྷཱདཡོ མནྡཱ, སོ མཧཱསངྒྷརཀྑིཏཏྠེརོ ཝིཡ ཨལུདྡྷོ ཨདུཊྛོ པཉྙཝཱ ཙ ཧོཏཱི’ཏི.

ཨཔརམྤི ཨིམསྨིཾ ཋཱནེ ཧེཏུཀིཏྟནཾ ནཱམ གཧིཏཾ. ཏིཧེཏུཀཀམྨཉྷི ཏིཧེཏུཀམྤི དུཧེཏུཀམྤི ཨཧེཏུཀམྤི ཝིཔཱཀཾ དེཏི. དུཧེཏུཀཀམྨཾ ཏིཧེཏུཀཝིཔཱཀཾ ན དེཏི, ཨིཏརཾ དེཏི. ཏིཧེཏུཀཀམྨེན པཊིསནྡྷི ཏིཧེཏུཀཱཔི ཧོཏི, དུཧེཏུཀཱཔི; ཨཧེཏུཀཱ ན ཧོཏི. དུཧེཏུཀེན དུཧེཏུཀཱཔི ཧོཏི ཨཧེཏུཀཱཔི; ཏིཧེཏུཀཱ ན ཧོཏི. ཨསངྑཱརིཀཾ ཀུསལཾ ཨསངྑཱརིཀམྤི སསངྑཱརིཀམྤི ¶ ཝིཔཱཀཾ དེཏི. སསངྑཱརིཀཾ ¶ སསངྑཱརིཀམྤི ཨསངྑཱརིཀམྤི ཝིཔཱཀཾ དེཏི. ཨཱརམྨཎེན ཝེདནཱ པརིཝཏྟེཏབྦཱ. ཛཝནེན ཏདཱརམྨཎཾ ནིཡཱམེཏབྦཾ.

ཨིདཱནི ཏསྶ ཏསྶ ཐེརསྶ ཝཱདེ སོལ༹སམགྒཱདཡོ ཝེདིཏབྦཱ. པཋམཀཱམཱཝཙརཀུསལསདིསེན ཧི པཋམམཧཱཝིཔཱཀཙིཏྟེན གཧིཏཔཊིསནྡྷིཀསྶ གབྦྷཱཝཱསཏོ ནིཀྑམིཏྭཱ སཾཝརཱསཾཝརེ པཊྛཔེཏུཾ སམཏྠབྷཱཝཾ ཨུཔགཏསྶ ཙཀྑུདྭཱརསྨིཾ ‘ཨིཊྛཱརམྨཎེ’ ཨཱཔཱཐམཱགཏེ ཀིརིཡམནོདྷཱཏུཡཱ བྷཝངྒེ ཨནཱཝཊྚིཏེཡེཝ ཨཏིཀྐམནཨཱརམྨཎཱནཾ པམཱཎཾ ནཏྠི. ཀསྨཱ ཨེཝཾ ཧོཏི? ཨཱརམྨཎདུབྦལཏཱཡ. ཨཡཾ ཏཱཝ ཨེཀོ མོགྷཝཱརོ.

སཙེ པན བྷཝངྒཾ ཨཱཝཊྚེཏི, ཀིརིཡམནོདྷཱཏུཡཱ བྷཝངྒེ ཨཱཝཊྚིཏེ, ཝོཊྛབྦནཾ ཨཔཱཔེཏྭཱཝ ཨནྟརཱ, ཙཀྑུཝིཉྙཱཎེ ཝཱ སམྤཊིཙྪནེ ཝཱ སནྟཱིརཎེ ¶ ཝཱ ཋཏྭཱ ནིཝཏྟིསྶཏཱིཏི ནེཏཾ ཋཱནཾ ཝིཛྫཏི. ཝོཊྛབྦནཝསེན པན ཋཏྭཱ ཨེཀཾ ཝཱ དྭེ ཝཱ ཙིཏྟཱནི པཝཏྟནྟི. ཏཏོ ཨཱསེཝནཾ ལབྷིཏྭཱ ཛཝནཊྛཱནེ ཋཏྭཱ པུན བྷཝངྒཾ ཨོཏརཏི ཨིདམྤི ཨཱརམྨཎདུབྦལཏཱཡ ཨེཝ ཧོཏི. ཨཡཾ པན ཝཱརོ ‘དིཊྛཾ ཝིཡ མེ, སུཏཾ ཝིཡ མེ’ཏིཨཱདཱིནི ཝདནཀཱལེ ལབྦྷཏི. ཨཡམྤི དུཏིཡོ མོགྷཝཱརོ.

ཨཔརསྶ ཀིརིཡམནོདྷཱཏུཡཱ བྷཝངྒེ ཨཱཝཊྚིཏེ ཝཱིཐིཙིཏྟཱནི ཨུཔྤཛྫནྟི, ཛཝནཾ ཛཝཏི. ཛཝནཔརིཡོསཱནེ པན ཏདཱརམྨཎསྶ ཝཱརོ. ཏསྨིཾ ཨནུཔྤནྣེཡེཝ བྷཝངྒཾ ཨོཏརཏི. ཏཏྲཱཡཾ ཨུཔམཱ – ཡཐཱ ཧི ནདིཡཱ ཨཱཝརཎཾ བནྡྷིཏྭཱ མཧཱམཱཏིཀཱབྷིམུཁེ ཨུདཀེ ཀཏེ ཨུདཀཾ གནྟྭཱ ཨུབྷོསུ ཏཱིརེསུ ཀེདཱརེ པཱུརེཏྭཱ ཨཏིརེཀཾ ཀཀྐཊཀམགྒཱདཱིཧི པལཱཡིཏྭཱ པུན ནདིཾཡེཝ ཨོཏརཏི, ཨེཝམེཏཾ དཊྛབྦཾ. ཨེཏྠ ཧི ནདིཡཾ ཨུདཀཔྤཝཏྟནཀཱལོ ཝིཡ བྷཝངྒཝཱིཐིཔྤཝཏྟནཀཱལོ ¶ . ཨཱཝརཎབནྡྷནཀཱལོ ཝིཡ ཀིརིཡམནོདྷཱཏུཡཱ བྷཝངྒསྶ ཨཱཝཊྚནཀཱལོ. མཧཱམཱཏིཀཱཡ ཨུདཀཔྤཝཏྟནཀཱལོ ཝིཡ ཝཱིཐིཙིཏྟཔྤཝཏྟི. ཨུབྷོསུ ཏཱིརེསུ ཀེདཱརཔཱུརཎཾ ཝིཡ ཛཝནཾ. ཀཀྐཊཀམགྒཱདཱིཧི པལཱཡིཏྭཱ པུན ཨུདཀསྶ ནདཱིཨོཏརཎཾ ཝིཡ ཛཝནཾ ཛཝིཏྭཱ ཏདཱརམྨཎེ ཨནུཔྤནྣེཡེཝ པུན བྷཝངྒོཏརཎཾ. ཨེཝཾ བྷཝངྒཾ ཨོཏརཎཙིཏྟཱནམྤི གཎནཔཐོ ནཏྠི. ཨིདཉྩཱཔི ཨཱརམྨཎདུབྦལཏཱཡ ཨེཝ ཧོཏི. ཨཡཾ ཏཏིཡོ མོགྷཝཱརོ.

སཙེ པན བལཝཱརམྨཎཾ ཨཱཔཱཐགཏཾ ཧོཏི ཀིརིཡམནོདྷཱཏུཡཱ བྷཝངྒེ ཨཱཝཊྚིཏེ ཙཀྑུཝིཉྙཱཎཱདཱིནི ¶ ཨུཔྤཛྫནྟི. ཛཝནཊྛཱནེ པན པཋམཀཱམཱཝཙརཀུསལཙིཏྟཾ ཛཝནཾ ཧུཏྭཱ ཚསཏྟཝཱརེ ཛཝིཏྭཱ ཏདཱརམྨཎསྶ ཝཱརཾ དེཏི. ཏདཱརམྨཎཾ པཏིཊྛཧམཱནཾ ཏཾསདིསམེཝ མཧཱཝིཔཱཀཙིཏྟཾ པཏིཊྛཱཏི. ཨིདཾ དྭེ ནཱམཱནི ལབྷཏི – པཊིསནྡྷིཙིཏྟསདིསཏྟཱ ‘མཱུལབྷཝངྒ’ནྟི ཙ, ཡཾ ཛཝནེན གཧིཏཾ ཨཱརམྨཎཾ ཏསྶ གཧིཏཏྟཱ ‘ཏདཱརམྨཎ’ནྟི ཙ. ཨིམསྨིཾ ཋཱནེ ཙཀྑུཝིཉྙཱཎཾ སམྤཊིཙྪནཾ སནྟཱིརཎཾ ཏདཱརམྨཎནྟི ཙཏྟཱརི ཝིཔཱཀཙིཏྟཱནི གཎནཱུཔགཱནི ཧོནྟི.

ཡདཱ པན དུཏིཡཀུསལཙིཏྟཾ ཛཝནཾ ཧོཏི, ཏདཱ ཏཾསདིསཾ དུཏིཡཝིཔཱཀཙིཏྟམེཝ ཏདཱརམྨཎཾ ཧུཏྭཱ པཏིཊྛཱཏི. ཨིདཉྩ དྭེ ནཱམཱནི ལབྷཏི ¶ . པཊིསནྡྷིཙིཏྟེན ཨསདིསཏྟཱ ‘ཨཱགནྟུཀབྷཝངྒ’ནྟི ཙ པུརིམནཡེནེཝ ‘ཏདཱརམྨཎ’ནྟི ཙ. ཨིམིནཱ སདྡྷིཾ པུརིམཱནི ཙཏྟཱརི པཉྩ ཧོནྟི.

ཡདཱ པན ཏཏིཡཀུསལཙིཏྟཾ ཛཝནཾ ཧོཏི, ཏདཱ ཏཾསདིསཾ ཏཏིཡཝིཔཱཀཙིཏྟཾ ཏདཱརམྨཎཾ ཧུཏྭཱ པཏིཊྛཱཏི. ཨིདམྤི ཝུཏྟནཡེནེཝ ‘ཨཱགནྟུཀབྷཝངྒཾ’‘ཏདཱརམྨཎ’ནྟི ཙ དྭེ ནཱམཱནི ལབྷཏི. ཨིམིནཱ སདྡྷིཾ པུརིམཱནི པཉྩ ཚ ཧོནྟི.

ཡདཱ པན ཙཏུཏྠཀུསལཙིཏྟཾ ཛཝནཾ ཧོཏི, ཏདཱ ཏཾསདིསཾ ཙཏུཏྠཝིཔཱཀཙིཏྟཾ ཏདཱརམྨཎཾ ཧུཏྭཱ པཏིཊྛཱཏི. ཨིདམྤི ཝུཏྟནཡེནེཝ ‘ཨཱགནྟུཀབྷཝངྒཾ’‘ཏདཱརམྨཎ’ནྟི ¶ ཙ དྭེ ནཱམཱནི ལབྷཏི. ཨིམིནཱ སདྡྷིཾ པུརིམཱནི ཚ སཏྟ ཧོནྟི.

ཡདཱ པན ཏསྨིཾ དྭཱརེ ‘ཨིཊྛམཛ྄ཛྷཏྟཱརམྨཎཾ’ ཨཱཔཱཐམཱགཙྪཏི, ཏཏྲཱཔི ཝུཏྟནཡེནེཝ ཏཡོ མོགྷཝཱརཱ ལབྦྷནྟི. ཡསྨཱ པན ཨཱརམྨཎེན ཝེདནཱ པརིཝཏྟཏི ཏསྨཱ ཏཏྠ ཨུཔེཀྑཱསཧགཏསནྟཱིརཎཾ. ཙཏུནྣཉྩ ཨུཔེཀྑཱསཧགཏམཧཱཀུསལཛཝནཱནཾ པརིཡོསཱནེ ཙཏྟཱརི ཨུཔེཀྑཱསཧགཏམཧཱཝིཔཱཀཙིཏྟཱནེཝ ཏདཱརམྨཎབྷཱཝེན པཏིཊྛཧནྟི. ཏཱནིཔི ཝུཏྟནཡེནེཝ ‘ཨཱགནྟུཀབྷཝངྒཾ’‘ཏདཱརམྨཎ’ནྟི ཙ དྭེ ནཱམཱནི ལབྷནྟི. ‘པིཊྛིབྷཝངྒཱནཱི’ཏིཔི ཝུཙྩནྟི ཨེཝ. ཨིཏི ཨིམཱནི པཉྩ པུརིམེཧི སཏྟཧི སདྡྷིཾ དྭཱདས ཧོནྟི. ཨེཝཾ ཙཀྑུདྭཱརེ དྭཱདས, སོཏདྭཱརཱདཱིསུ དྭཱདས དྭཱདསཱཏི, སམསཊྛི ཧོནྟི. ཨེཝཾ ཨེཀཱཡ ཙེཏནཱཡ ཀམྨེ ཨཱཡཱུཧིཏེ སམསཊྛི ¶ ཝིཔཱཀཙིཏྟཱནི ཨུཔྤཛྫནྟི. ཨགྒཧིཏགྒཧཎེན པན ཙཀྑུདྭཱརེ དྭཱདས, སོཏགྷཱནཛིཝ྄ཧཱཀཱཡཝིཉྙཱཎཱནི ཙཏྟཱརཱིཏི སོལ༹ས ཧོནྟི.

ཨིམསྨིཾ ཋཱནེ ཨམྦོཔམཾ ནཱམ གཎྷིཾསུ – ཨེཀོ ཀིར པུརིསོ ཕལིཏམྦརུཀྑམཱུལེ སསཱིསཾ པཱརུཔིཏྭཱ ནིཔནྣོ ནིདྡཱཡཏི. ཨཐེཀཾ ཨམྦཔཀྐཾ ཝཎྚཏོ མུཙྩིཏྭཱ ཏསྶ ཀཎྞསཀྑལིཾ པུཉྪམཱནཾ ཝིཡ ‘ཐ’ནྟི བྷཱུམིཡཾ པཏི. སོ ཏསྶ སདྡེན པབུཛ྄ཛྷིཏྭཱ ཨུམྨཱིལེཏྭཱ ཨོལོཀེསི. ཏཏོ ཧཏྠཾ པསཱརེཏྭཱ ཕལཾ གཧེཏྭཱ མདྡིཏྭཱ ཨུཔསིངྒྷིཏྭཱ པརིབྷུཉྫི.

ཏཏྠ, ཏསྶ པུརིསསྶ ཨམྦརུཀྑམཱུལེ ནིདྡཱཡནཀཱལོ ཝིཡ བྷཝངྒསམངྒིཀཱལོ. ཨམྦཔཀྐསྶ ཝཎྚཏོ མུཙྩིཏྭཱ ཀཎྞསཀྑལིཾ པུཉྪམཱནསྶ པཏནཀཱལོ ཝིཡ ཨཱརམྨཎསྶ པསཱདགྷཊྚནཀཱལོ. ཏེན སདྡེན པབུདྡྷཀཱལོ ¶ ཝིཡ ཀིརིཡམནོདྷཱཏུཡཱ བྷཝངྒསྶ ཨཱཝཊྚིཏཀཱལོ. ཨུམྨཱིལེཏྭཱ ཨོལོཀིཏཀཱལོ ཝིཡ ཙཀྑུཝིཉྙཱཎསྶ དསྶནཀིཙྩསཱདྷནཀཱལོ. ཧཏྠཾ པསཱརེཏྭཱ གཧིཏཀཱལོ ཝིཡ ཝིཔཱཀམནོདྷཱཏུཡཱ ཨཱརམྨཎསྶ སམྤཊིཙྪིཏཀཱལོ. གཧེཏྭཱ མདྡིཏཀཱལོ ཝིཡ ཝིཔཱཀམནོཝིཉྙཱཎདྷཱཏུཡཱ ཨཱརམྨཎསྶ སནྟཱིརཎཀཱལོ. ཨུཔསིངྒྷིཏཀཱལོ ཝིཡ ཀིརིཡམནོཝིཉྙཱཎདྷཱཏུཡཱ ཨཱརམྨཎསྶ ཝཝཏྠཱཔིཏཀཱལོ ¶ . པརིབྷུཏྟཀཱལོ ཝིཡ ཛཝནསྶ ཨཱརམྨཎརསཾ ཨནུབྷཝིཏཀཱལོ. ཨཡཾ ཨུཔམཱ ཀིཾ དཱིཔེཏི? ཨཱརམྨཎསྶ པསཱདགྷཊྚནམེཝ ཀིཙྩཾ. ཏེན པསཱདེ གྷཊྚིཏེ ཀིརིཡམནོདྷཱཏུཡཱ བྷཝངྒཱཝཊྚནམེཝ, ཙཀྑུཝིཉྙཱཎསྶ དསྶནམཏྟཀམེཝ, ཝིཔཱཀམནོདྷཱཏུཡཱ ཨཱརམྨཎསམྤཊིཙྪནམཏྟཀམེཝ, ཝིཔཱཀམནོཝིཉྙཱཎདྷཱཏུཡཱ ཨཱརམྨཎསནྟཱིརཎམཏྟཀམེཝ, ཀིརིཡམནོཝིཉྙཱཎདྷཱཏུཡཱ ཨཱརམྨཎཝཝཏྠཱཔནམཏྟཀམེཝ ཀིཙྩཾ. ཨེཀནྟེན པན ཨཱརམྨཎརསཾ ཛཝནམེཝ ཨནུབྷཝཏཱིཏི དཱིཔེཏི.

ཨེཏྠ ཙ ‘ཏྭཾ བྷཝངྒཾ ནཱམ ཧོཧི, ཏྭཾ ཨཱཝཛྫནཾ ནཱམ, ཏྭཾ དསྶནཾ ནཱམ, ཏྭཾ སམྤཊིཙྪནཾ ནཱམ, ཏྭཾ སནྟཱིརཎཾ ནཱམ, ཏྭཾ ཝོཊྛབྦནཾ ནཱམ, ཏྭཾ ཛཝནཾ ནཱམ, ཧོཧཱི’ཏི ཀོཙི ཀཏྟཱ ཝཱ ཀཱརེཏཱ ཝཱ ནཏྠི.

ཨིམསྨིཾ པན ཋཱནེ པཉྩཝིདྷཾ ནིཡཱམཾ ནཱམ གཎྷིཾསུ – བཱིཛནིཡཱམཾ ཨུཏུནིཡཱམཾ ཀམྨནིཡཱམཾ དྷམྨནིཡཱམཾ ཙིཏྟནིཡཱམནྟི. ཏཏྠ ཀུལཏྠགཙྪསྶ ཨུཏྟརགྒབྷཱཝོ, དཀྑིཎཝལླིཡཱ དཀྑིཎཏོ ¶ རུཀྑཔརིཧརཎཾ, སཱུརིཡཱཝཊྚཔུཔྥཱནཾ སཱུརིཡཱབྷིམུཁབྷཱཝོ, མཱལུཝལཏཱཡ རུཀྑཱབྷིམུཁགམནམེཝ, ནཱལི༹ཀེརསྶ མཏྠཀེ ཚིདྡསབྦྷཱཝོཏི ཏེསཾ ཏེསཾ བཱིཛཱནཾ ཏཾཏཾསདིསཕལདཱནཾ བཱིཛནིཡཱམོ ནཱམ. ཏསྨིཾ ཏསྨིཾ སམཡེ ཏེསཾ ཏེསཾ རུཀྑཱནཾ ཨེཀཔྤཧཱརེནེཝ པུཔྥཕལཔལླཝགྒཧཎཾ ཨུཏུནིཡཱམོ ནཱམ. ཏིཧེཏུཀཀམྨཾ ཏིཧེཏུཀདུཧེཏུཀཱཧེཏུཀཝིཔཱཀཾ དེཏི. དུཧེཏུཀཀམྨཾ དུཧེཏུཀཱཧེཏུཀཝིཔཱཀཾ དེཏི, ཏིཧེཏུཀཾ ན དེཏཱིཏི, ཨེཝཾ ཏསྶ ཏསྶ ཀམྨསྶ ཏཾཏཾསདིསཝིཔཱཀདཱནམེཝ ཀམྨནིཡཱམོ ནཱམ.

ཨཔརོཔི ཀམྨསརིཀྑཀཝིཔཱཀཝསེནེཝ ཀམྨནིཡཱམོ ཧོཏི. ཏསྶ དཱིཔནཏྠམིདཾ ཝཏྠུཾ ཀཐེནྟི – སམྨཱསམྦུདྡྷཀཱལེ སཱཝཏྠིཡཱ དྭཱརགཱམོ ཛྷཱཡི ¶ . ཏཏོ པཛྫལིཏཾ ཏིཎཀརལ༹ཾ ཨུཊྛཧིཏྭཱ ཨཱཀཱསེན གཙྪཏོ ཀཱཀསྶ གཱིཝཱཡ པཊིམུཉྩི. སོ ཝིརཝནྟོ བྷཱུམིཡཾ པཏིཏྭཱ ཀཱལམཀཱསི. མཧཱསམུདྡེཔི ¶ ཨེཀཱ ནཱཝཱ ནིཙྩལཱ ཨཊྛཱསི. ཧེཊྛཱ ཀེནཙི ནིརུདྡྷབྷཱཝཾ ཨཔསྶནྟཱ ཀཱལ༹ཀཎྞིསལཱཀཾ ཝིཙཱརེསུཾ. སཱ ནཱཝིཀསྶེཝ ཨུཔཱསིཀཱཡ ཧཏྠེ པཏི. ཏཏོ ཨེཀིསྶཱ ཀཱརཎཱ མཱ སབྦེ ནསྶནྟུ, ཨུདཀེ ནཾ ཁིཔཱམཱཏི ཨཱཧཾསུ. ནཱཝིཀོ ‘ན སཀྑིསྶཱམི ཨེཏཾ ཨུདཀེ ཨུཔྤིལཝམཱནཾ པསྶིཏུ’ནྟི ཝཱལིཀཱགྷཊཾ གཱིཝཱཡཾ བནྡྷཱཔེཏྭཱ ཁིཔཱཔེསི. ཏངྑཎཉྙེཝ ནཱཝཱ ཁིཏྟསརོ ཝིཡ པཀྑནྡི. ཨེཀོ བྷིཀྑུ ལེཎེ ཝསཏི. མཧནྟཾ པབྦཏཀཱུཊཾ པཏིཏྭཱ དྭཱརཾ པིདཧི. ཏཾ སཏྟམེ དིཝསེ སཡམེཝ ཨཔགཏཾ. སམྨཱསམྦུདྡྷསྶ ཛེཏཝནེ ནིསཱིདིཏྭཱ དྷམྨཾ ཀཐེནྟསྶ ཨིམཱནི ཏཱིཎི ཝཏྠཱུནི ཨེཀཔྤཧཱརེནེཝ ཨཱརོཙེསུཾ. སཏྠཱ ‘ན ཨེཏཾ ཨཉྙེཧི ཀཏཾ, ཏེཧི ཀཏཀམྨམེཝ ཏ’ནྟི ཨཏཱིཏཾ ཨཱཧརིཏྭཱ དསྶེནྟོ ཨཱཧ –

ཀཱཀོ པུརིམཏྟབྷཱཝེ མནུསྶོ ཧུཏྭཱ ཨེཀཾ དུཊྛགོཎཾ དམེཏུཾ ཨསཀྐོནྟོ གཱིཝཱཡ པལཱལཝེཎིཾ བནྡྷིཏྭཱ ཨགྒིཾ ཨདཱསི. གོཎོ ཏེནེཝ མཏོ. ཨིདཱནི ཏཾ ཀམྨཾ ཨེཏསྶ ཨཱཀཱསེན གཙྪཏོཔི ན མུཙྩིཏུཾ ཨདཱསི. སཱཔི ཨིཏྠཱི པུརིམཏྟབྷཱཝེ ཨེཀཱ ཨིཏྠཱིཡེཝ. ཨེཀོ ཀུཀྐུརོ ཏཱཡ པརིཙིཏོ ཧུཏྭཱ ཨརཉྙཾ གཙྪནྟིཡཱ སདྡྷིཾ གཙྪཏི, སདྡྷིམེཝཱགཙྪཏི. མནུསྶཱ ‘ནིཀྑནྟོ ཨིདཱནི ཨམྷཱཀཾ སུནཁལུདྡཀོ’ཏི ཨུཔྤཎྜེནྟི. སཱ ཏེན ཨཊྚཱིཡམཱནཱ ཀུཀྐུརཾ ནིཝཱརེཏུཾ ཨསཀྐོནྟཱི ཝཱལིཀཱགྷཊཾ གཱིཝཱཡ བནྡྷིཏྭཱ ཨུདཀེ ཁིཔི. ཏཾ ཀམྨཾ ཏསྶཱ སམུདྡམཛ྄ཛྷེ མུཙྩིཏུཾ ནཱདཱསི. སོཔི བྷིཀྑུ པུརིམཏྟབྷཱཝེ གོཔཱལཀོ ཧུཏྭཱ བིལཾ པཝིཊྛཱཡ གོདྷཱཡ སཱཁཱབྷངྒམུཊྛིཡཱ དྭཱརཾ ཐཀེསི. ཏཏོ སཏྟམེ དིཝསེ སཡཾ ཨཱགནྟྭཱ ཝིཝརི. གོདྷཱ ཀམྤམཱནཱ ¶ ནིཀྑམི. ཀརུཎཱཡ ཏཾ ན མཱརེསི. ཏཾ ཀམྨཾ ཏསྶ པབྦཏནྟརཾ པཝིསིཏྭཱ ནིསིནྣསྶ མུཙྩིཏུཾ ནཱདཱསཱིཏི. ཨིམཱནི ཏཱིཎི ཝཏྠཱུནི སམོདྷཱནེཏྭཱ ཨིམཾ གཱཐམཱཧ –

‘‘ན ཨནྟལིཀྑེ ན སམུདྡམཛ྄ཛྷེ,

ན ¶ པབྦཏཱནཾ ཝིཝརཾ པཝིསྶ;

ན ཝིཛྫཏེ སོ ཛགཏིཔྤདེསོ,

ཡཏྠཊྛིཏོ མུཙྩེཡྻ པཱཔཀམྨཱ’’ཏི. (དྷ. པ. ༡༢༧);

ཨཡམྤི ¶ ཀམྨནིཡཱམོཡེཝ ནཱམ. ཨཉྙཱནིཔི ཨེཝརཱུཔཱནི ཝཏྠཱུནི ཀཐེཏབྦཱནི.

བོདྷིསཏྟཱནཾ པན པཊིསནྡྷིགྒཧཎེ, མཱཏུཀུཙྪིཏོ ནིཀྑམནེ, ཨབྷིསམྦོདྷིཡཾ ཏཐཱགཏསྶ དྷམྨཙཀྐཔྤཝཏྟནེ, ཨཱཡུསངྑཱརསྶ ཨོསྶཛྫནེ, པརིནིབྦཱནེ ཙ དསསཧསྶཙཀྐཝཱལ༹ཀམྤནཾ དྷམྨནིཡཱམོ ནཱམ.

ཨཱརམྨཎེན པན པསཱདེ གྷཊྚིཏེ ‘ཏྭཾ ཨཱཝཛྫནཾ ནཱམ ཧོཧི…པེ… ཏྭཾ ཛཝནཾ ནཱམ ཧོཧཱི’ཏི ཀོཙི ཀཏྟཱ ཝཱ ཀཱརེཏཱ ཝཱ ནཏྠི, ཨཏྟནོ ཨཏྟནོ པན དྷམྨཏཱཡ ཨེཝ ཨཱརམྨཎེན པསཱདསྶ གྷཊྚིཏཀཱལཏོ པཊྛཱཡ ཀིརིཡམནོདྷཱཏུཙིཏྟཾ བྷཝངྒཾ ཨཱཝཊྚེཏི, ཙཀྑུཝིཉྙཱཎཾ དསྶནཀིཙྩཾ སཱདྷེཏི, ཝིཔཱཀམནོདྷཱཏུ སམྤཊིཙྪནཀིཙྩཾ སཱདྷེཏི, ཝིཔཱཀམནོཝིཉྙཱཎདྷཱཏུ སནྟཱིརཎཀིཙྩཾ སཱདྷེཏི, ཀིརིཡམནོཝིཉྙཱཎདྷཱཏུ ཝོཊྛབྦནཀིཙྩཾ སཱདྷེཏི, ཛཝནཾ ཨཱརམྨཎརསཾ ཨནུབྷཝཏཱིཏི ཨཡཾ ཙིཏྟནིཡཱམོ ནཱམ. ཨཡཾ ཨིདྷ ཨདྷིཔྤེཏོ.

སསངྑཱརིཀཏིཧེཏུཀཀུསལེནཱཔི ཨུཔེཀྑཱསཧགཏེཧི ཨསངྑཱརིཀསསངྑཱརིཀཀུསལཙིཏྟེཧིཔི ཀམྨེ ཨཱཡཱུཧིཏེ ཏཾསདིསཝིཔཱཀཙིཏྟེཧི ཨཱདིནྣཱཡ པཊིསནྡྷིཡཱ ཨེསེཝ ནཡོ. ཨུཔེཀྑཱསཧགཏདྭཡེ པན པཋམཾ ‘ཨིཊྛམཛ྄ཛྷཏྟཱརམྨཎཝསེན’ པཝཏྟིཾ དསྶེཏྭཱ པཙྪཱ ‘ཨིཊྛཱརམྨཎཝསེན’ དསྶེཏབྦཱ.

ཨེཝམྤི ཨེཀེཀསྨིཾ དྭཱརེ དྭཱདས དྭཱདས ཧུཏྭཱ སམསཊྛི ཧོནྟི. ཨགྒཧིཏགྒཧཎེན སོལ༹ས ཝིཔཱཀཙིཏྟཱནི ཨུཔྤཛྫནྟི.

ཨིམསྨིཾ ¶ ཋཱནེ པཉྩཨུཙྪུནཱལི༹ཡནྟོཔམཾ ནཱམ གཎྷིཾསུ. ཨུཙྪུཔཱིལ༹ནསམཡེ ཀིར ཨེཀསྨཱ གཱམཱ ཨེཀཱདས ཡནྟཝཱཧཱ ནིཀྑམིཏྭཱ ཨེཀཾ ཨུཙྪུཝཱཊཾ དིསྭཱ ཏསྶ པརིཔཀྐབྷཱཝཾ ཉཏྭཱ ཨུཙྪུསཱམིཀཾ ཨུཔསངྐམིཏྭཱ ‘ཡནྟཝཱཧཱ ¶ མཡ’ནྟི ཨཱརོཙེསུཾ. སོ ‘ཨཧཾ ཏུམྷེཡེཝ པརིཡེསཱམཱི’ཏི ཨུཙྪུསཱལཾ ཏེ གཧེཏྭཱ ཨགམཱསི. ཏེ ཏཏྠ ནཱལི༹ཡནྟཾ སཛྫེཏྭཱ ‘མཡཾ ཨེཀཱདས ཛནཱ, ཨཔརམྤི ཨེཀཾ ལདྡྷུཾ ཝཊྚཏི, ཝེཏནེན གཎྷཐཱ’ཏི ཨཱཧཾསུ. ཨུཙྪུསཱམིཀོ ‘ཨཧམེཝ སཧཱཡོ བྷཝིསྶཱམཱི’ཏི ཨུཙྪཱུནཾ སཱལཾ པཱུརཱཔེཏྭཱ ཏེསཾ སཧཱཡོ ཨཧོསི. ཏེ ཨཏྟནོ ཨཏྟནོ ཀིཙྩཱནི ཀཏྭཱ, ཕཱཎིཏཔཱཙཀེན ¶ ཨུཙྪུརསེ པཀྐེ, གུལ༹བནྡྷཀེན བདྡྷེ, ཨུཙྪུསཱམིཀེན ཏུལཡིཏྭཱ བྷཱགེསུ དིནྣེསུ, ཨཏྟནོ ཨཏྟནོ བྷཱགཾ ཨཱདཱཡ ཨུཙྪུསཱལཾ སཱམིཀསྶ པཊིཙྪཱཔེཏྭཱ, ཨེཏེནེཝ ཨུཔཱཡེན ཨཔརཱསུཔི ཙཏཱུསུ སཱལཱསུ ཀམྨཾ ཀཏྭཱ པཀྐམིཾསུ.

ཏཏྠ པཉྩ ཡནྟསཱལཱ ཝིཡ པཉྩ པསཱདཱ དཊྛབྦཱ. པཉྩ ཨུཙྪུཝཱཊཱ ཝིཡ པཉྩ ཨཱརམྨཎཱནི. ཨེཀཱདས ཝིཙརཎཀཡནྟཝཱཧཱ ཝིཡ ཨེཀཱདས ཝིཔཱཀཙིཏྟཱནི. པཉྩ ཨུཙྪུསཱལཱསཱམིནོ ཝིཡ པཉྩཝིཉྙཱཎཱནི. པཋམཀསཱལཱཡཾ སཱམིཀེན སདྡྷིཾ དྭཱདསནྣཾ ཛནཱནཾ ཨེཀཏོཝ ཧུཏྭཱ ཀཏཀམྨཱནཾ བྷཱགགྒཧཎཀཱལོ ཝིཡ ཨེཀཱདསནྣཾ ཝིཔཱཀཙིཏྟཱནཾ ཙཀྑུཝིཉྙཱཎེན སདྡྷིཾ ཨེཀཏོ ཧུཏྭཱ ཙཀྑུདྭཱརེ རཱུཔཱརམྨཎེ སཀསཀཀིཙྩཀརཎཀཱལོ. སཱལཱསཱམིཀསྶ སཱལཱཡ སམྤཊིཙྪནཀཱལོ ཝིཡ ཙཀྑུཝིཉྙཱཎསྶ དྭཱརསངྐནྟིཨཀརཎཾ. དུཏིཡ ཏཏིཡ ཙཏུཏྠ པཉྩམསཱལཱཡ དྭཱདསནྣཾ ཨེཀཏོ ཧུཏྭཱ ཀཏཀམྨཱནཾ བྷཱགགྒཧཎཀཱལོ ཝིཡ ཨེཀཱདསནྣཾ ཝིཔཱཀཙིཏྟཱནཾ ཀཱཡཝིཉྙཱཎེན སདྡྷིཾ ཨེཀཏོ ཧུཏྭཱ ཀཱཡདྭཱརེ ཕོཊྛབྦཱརམྨཎེ སཀསཀཀིཙྩཀརཎཀཱལོ. སཱལཱསཱམིཀསྶ སཱལཱཡ སམྤཊིཙྪནཀཱལོ ཝིཡ ཀཱཡཝིཉྙཱཎསྶ དྭཱརསངྐནྟིཨཀརཎཾ ཝེདིཏབྦཾ. ཨེཏྟཱཝཏཱ ཏིཧེཏུཀཀམྨེན པཊིསནྡྷི ཏིཧེཏུཀཱ ཧོཏཱིཏི ཝཱརོ ཀཐིཏོ. ཡཱ པན ཏེན དུཧེཏུཀཔཊིསནྡྷི ཧོཏི, སཱ པཊིཙྪནྣཱཝ ཧུཏྭཱ གཏཱ.

ཨིདཱནི དུཧེཏུཀཀམྨེན དུཧེཏུཀཱ པཊིསནྡྷི ཧོཏཱིཏི ཝཱརོ ཀཐེཏབྦོ. དུཧེཏུཀེན ཧི སོམནསྶསཧགཏཨསངྑཱརིཀཙིཏྟེན ཀམྨེ ཨཱཡཱུཧིཏེ ཏཾསདིསེནེཝ དུཧེཏུཀཝིཔཱཀཙིཏྟེན གཧིཏཔཊིསནྡྷིཀསྶ ཝུཏྟནཡེནེཝ ཙཀྑུདྭཱརེ ¶ ‘ཨིཊྛཱརམྨཎེ’ ཨཱཔཱཐམཱགཏེ ཏཡོ མོགྷཝཱརཱ. དུཧེཏུཀསོམནསྶསཧགཏཨསངྑཱརིཀཛཝནཱཝསཱནེ ཏཾསདིསམེཝ མཱུལབྷཝངྒསངྑཱཏཾ ཏདཱརམྨཎཾ. སསངྑཱརིཀཛཝནཱཝསཱནེ ཏཾསདིསམེཝ ཨཱགནྟུཀབྷཝངྒསངྑཱཏཾ ཏདཱརམྨཎཾ. ‘ཨིཊྛམཛ྄ཛྷཏྟཱརམྨཎེ’ དྭིནྣཾ ཨུཔེཀྑཱསཧགཏཛཝནཱནཾ ཨཝསཱནེ ཏཱདིསཱནེཝ དྭེ ཏདཱརམྨཎཱནི ཨུཔྤཛྫནྟི. ཨིདྷ ཨེཀེཀསྨིཾ ¶ དྭཱརེ ཨཊྛ ཨཊྛ ཀཏྭཱ སམཙཏྟཱལཱིས ཙིཏྟཱནི. ཨགྒཧིཏགྒཧཎེན པན ཙཀྑུདྭཱརེ ཨཊྛ, སོཏགྷཱནཛིཝ྄ཧཱཀཱཡཝིཉྙཱཎཱནི ཙཏྟཱརཱིཏི དྭཱདས ཧོནྟི. ཨེཝཾ ཨེཀཱཡ ཙེཏནཱཡ ཀམྨེ ཨཱཡཱུཧིཏེ དྭཱདས ¶ ཝིཔཱཀཙིཏྟཱནི ཨུཔྤཛྫནྟི. ཨམྦོཔམཔཉྩནིཡཱམཀཐཱ པཱཀཏིཀཱ ཨེཝ. དུཧེཏུཀསེསཙིཏྟཏྟཡསདིསཝིཔཱཀེན གཧིཏཔཊིསནྡྷིཀེཔི ཨེསེཝ ནཡོ. ཡནྟཝཱཧོཔམཱཡ པནེཏྠ སཏྟ ཡནྟཝཱཧཱ. ཏེཧི ཏཏྠ ཡནྟེ ནཱམ སཛྫིཏེ སཱལཱསཱམིཀཾ ཨཊྛམཾ ཀཏྭཱ ཝུཏྟནཡཱནུསཱརེན ཡོཛནཱ ཝེདིཏབྦཱ. ཨེཏྟཱཝཏཱ དུཧེཏུཀཀམྨེན དུཧེཏུཀཔཊིསནྡྷི ཧོཏཱིཏི ཝཱརོ ཀཐིཏོ.

ཨིདཱནི ཨཧེཏུཀཔཊིསནྡྷིཀཐཱ ཧོཏི – ཙཏུནྣཉྷི དུཧེཏུཀཀུསལཙིཏྟཱནཾ ཨཉྙཏརེན ཀམྨེ ཨཱཡཱུཧིཏེ ཀུསལཝིཔཱཀཨུཔེཀྑཱསཧགཏཱཧེཏུཀམནོཝིཉྙཱཎདྷཱཏུཙིཏྟེན གཧིཏཔཊིསནྡྷིཀསྶ པཊིསནྡྷི ཀམྨསདིསཱཏི ན ཝཏྟབྦཱ. ཀམྨཉྷི དུཧེཏུཀཾ པཊིསནྡྷི ཨཧེཏུཀཱ. ཏསྶ ཝུཌྜྷིཔྤཏྟསྶ ཙཀྑུདྭཱརེ ‘ཨིཊྛམཛ྄ཛྷཏྟཱརམྨཎེ’ ཨཱཔཱཐམཱགཏེ པུརིམནཡེནེཝ ཏཡོ མོགྷཝཱརཱ ཝེདིཏབྦཱ. ཙཏུནྣཾ པན དུཧེཏུཀཀུསལཙིཏྟཱནཾ ཨཉྙཏརཛཝནསྶ པརིཡོསཱནེ ཨཧེཏུཀཙིཏྟཾ ཏདཱརམྨཎབྷཱཝེན པཏིཊྛཱཏི. ཏཾ ‘མཱུལབྷཝངྒཾ’‘ཏདཱརམྨཎ’ནྟི དྭེ ནཱམཱནི ལབྷཏི. ཨེཝམེཏྠ ཙཀྑུཝིཉྙཱཎཾ སམྤཊིཙྪནཾ ཨུཔེཀྑཱསཧགཏསནྟཱིརཎཾ ཏདཱརམྨཎམྤི ཨུཔེཀྑཱསཧགཏམེཝཱཏི ཏེསུ ཨེཀཾ གཧེཏྭཱ གཎནཱུཔགཱནི ཏཱིཎེཝ ཧོནྟི.

‘ཨིཊྛཱརམྨཎེ’ པན སནྟཱིརཎམྤི ཏདཱརམྨཎམྤི སོམནསྶསཧགཏམེཝ. ཏེསུ ཨེཀཾ གཧེཏྭཱ པུརིམཱནི ཏཱིཎི ཙཏྟཱརི ཧོནྟི. ཨེཝཾ པཉྩསུ དྭཱརེསུ ཙཏྟཱརི ཙཏྟཱརི ཀཏྭཱ ཨེཀཱཡ ཙེཏནཱཡ ཀམྨེ ཨཱཡཱུཧིཏེ ཝཱིསཏི ཝིཔཱཀཙིཏྟཱནི ཨུཔྤཛྫནྟཱིཏི ¶ ཝེདིཏབྦཱནི. ཨགྒཧིཏགྒཧཎེན པན ཙཀྑུདྭཱརེ ཙཏྟཱརི སོཏགྷཱནཛིཝ྄ཧཱཀཱཡཝིཉྙཱཎཱནི ཙཏྟཱརཱིཏི ཨཊྛ ཧོནྟི. ཨིདཾ ‘ཨཧེཏུཀཊྛཀཾ’ ནཱམ. ཨིདཾ མནུསྶལོཀེན གཧིཏཾ.

ཙཏཱུསུ པན ཨཔཱཡེསུ པཝཏྟེ ལབྦྷཏི. ཡདཱ ཧི མཧཱམོགྒལླཱནཏྠེརོ ནིརཡེ པདུམཾ མཱཔེཏྭཱ པདུམཀཎྞིཀཱཡ ནིསིནྣོ ནེརཡིཀཱནཾ དྷམྨཀཐཾ ཀཐེསི, ཏདཱ ཏེསཾ ཐེརཾ པསྶནྟཱནཾ ཀུསལཝིཔཱཀཾ ཙཀྑུཝིཉྙཱཎཾ ཨུཔྤཛྫཏི. སདྡཾ སུཎནྟཱནཾ སོཏཝིཉྙཱཎཾ, ཙནྡནཝནེ དིཝཱཝིཧཱརཾ ནིསཱིདིཏྭཱ གཏསྶ ཙཱིཝརགནྡྷགྷཱཡནཀཱལེ གྷཱནཝིཉྙཱཎཾ, ནིརཡགྒིཾ ནིབྦཱཔེཏུཾ དེཝཾ ཝསྶཱཔེཏྭཱ པཱནཱིཡདཱནཀཱལེ ཛིཝ྄ཧཱཝིཉྙཱཎཾ, མནྡམནྡཝཱཏསམུཊྛཱཔནཀཱལེ ཀཱཡཝིཉྙཱཎནྟི ཨེཝཾ ཙཀྑུཝིཉྙཱཎཱདཱིནི པཉྩ ¶ , ཨེཀཾ སམྤཊིཙྪནཾ, དྭེ སནྟཱིརཎཱནཱིཏི ཨཧེཏུཀཊྛཀཾ ལབྦྷཏི ¶ . ནཱགསུཔཎྞཝེམཱནིཀཔེཏཱནམྤི ཨཀུསལེན པཊིསནྡྷི ཧོཏི. པཝཏྟེ ཀུསལཾ ཝིཔཙྩཏི. ཏཐཱ ཙཀྐཝཏྟིནོ མངྒལཧཏྠིཨསྶཱདཱིནཾ. ཨཡཾ ཏཱཝ ‘ཨིཊྛཨིཊྛམཛ྄ཛྷཏྟཱརམྨཎེསུ’ ཀུསལཛཝནཝསེན ཀཐཱམགྒོ.

‘ཨིཊྛཱརམྨཎེ’ པན ཙཏཱུསུ སོམནསྶསཧགཏཱཀུསལཙིཏྟེསུ ཛཝིཏེསུ ཀུསལཝིཔཱཀཾ སོམནསྶསཧགཏཱཧེཏུཀཙིཏྟཾ ཏདཱརམྨཎཾ ཧོཏི. ‘ཨིཊྛམཛ྄ཛྷཏྟཱརམྨཎེ’ ཙཏཱུསུ ཨུཔེཀྑཱསཧགཏལོབྷསམྤཡུཏྟེསུ ཛཝིཏེསུ ཀུསལཝིཔཱཀཾ ཨུཔེཀྑཱསཧགཏཱཧེཏུཀཙིཏྟཾ ཏདཱརམྨཎཾ ཧོཏི. ཡཾ པན ‘ཛཝནེན ཏདཱརམྨཎཾ ནིཡམེཏབྦ’ནྟི ཝུཏྟཾ ཏཾ ཀུསལཾ སནྡྷཱཡ ཝུཏྟནྟི ཝེདིཏབྦཾ. དོམནསྶསཧགཏཛཝནཱནནྟརཾ ཏདཱརམྨཎཾ ཨུཔྤཛྫམཱནཾ ཀིཾ ཨུཔྤཛྫཏཱིཏི? ཨཀུསལཝིཔཱཀཱཧེཏུཀམནོཝིཉྙཱཎདྷཱཏུཙིཏྟཾ ཨུཔྤཛྫཏི.

ཨིདཾ པན ཛཝནཾ ཀུསལཏྠཱཡ ཝཱ ཨཀུསལཏྠཱཡ ཝཱ ཀོ ནིཡཱམེཏཱིཏི? ཨཱཝཛྫནཉྩེཝ ཝོཊྛབྦནཉྩ. ཨཱཝཛྫནེན ཧི ཡོནིསོ ཨཱཝཊྚིཏེ ཝོཊྛབྦནེན ཡོནིསོ ཝཝཏྠཱཔིཏེ ཛཝནཾ ཨཀུསལཾ བྷཝིསྶཏཱིཏི ཨཊྛཱནམེཏཾ. ཨཱཝཛྫནེན ¶ ཨཡོནིསོ ཨཱཝཊྚིཏེ ཝོཊྛབྦནེན ཨཡོནིསོ ཝཝཏྠཱཔིཏེ ཛཝནཾ ཀུསལཾ བྷཝིསྶཏཱིཏིཔི ཨཊྛཱནམེཏཾ. ཨུབྷཡེན པན ཡོནིསོ ཨཱཝཊྚིཏེ ཝཝཏྠཱཔིཏེ ཙ ཛཝནཾ ཀུསལཾ ཧོཏི, ཨཡོནིསོ ཨཀུསལནྟི ཝེདིཏབྦཾ.

‘ཨིཊྛཱརམྨཎེ’ པན ཀངྑཏོ ཨུདྡྷཏསྶ ཙ ཏདཱརམྨཎཾ ཀིཾ ཧོཏཱིཏི? ཨིཊྛཱརམྨཎསྨིཾ ཀངྑཏུ ཝཱ མཱ ཝཱ, ཨུདྡྷཏོ ཝཱ ཧོཏུ མཱ ཝཱ, ཀུསལཝིཔཱཀཱཧེཏུཀསོམནསྶཙིཏྟམེཝ ཏདཱརམྨཎཾ ཧོཏི, ‘ཨིཊྛམཛ྄ཛྷཏྟཱརམྨཎེ’ ‘ཀུསལཝིཔཱཀཱཧེཏུཀཨུཔེཀྑཱསཧགཏ’ནྟི, ཨཡཾ པནེཏྠ སངྑེཔཏོ ཨཏྠདཱིཔནོ མཧཱདྷམྨརཀྑིཏཏྠེརཝཱདོ ནཱམ. སོམནསྶསཧགཏསྨིཉྷི ཛཝནེ ཛཝིཏེ པཉྩ ཏདཱརམྨཎཱནི གཝེསིཏབྦཱནཱིཏི. ཨུཔེཀྑཱསཧགཏསྨིཾ ཛཝནེ ཛཝིཏེ ཚ གཝེསིཏབྦཱནཱིཏི.

ཨཐ ཡདཱ སོམནསྶསཧགཏཔཊིསནྡྷིཀསྶ པཝཏྟེ ཛྷཱནཾ ནིབྦཏྟེཏྭཱ པམཱདེན པརིཧཱིནཛ྄ཛྷཱནསྶ ‘པཎཱིཏདྷམྨོ མེ ནཊྛོ’ཏི པཙྩཝེཀྑཏོ ཝིཔྤཊིསཱརཝསེན ¶ དོམནསྶཾ ཨུཔྤཛྫཏི, ཏདཱ ཀིཾ ཨུཔྤཛྫཏི? ‘སོམནསྶཱནནྟརཉྷི དོམནསྶཾ དོམནསྶཱནནྟརཉྩ སོམནསྶཾ’ པཊྛཱནེ པཊིསིདྡྷཾ. མཧགྒཏདྷམྨཾ ཨཱརབྦྷ ཛཝནེ ཛཝིཏེ ཏདཱརམྨཎམྤི ཏཏྠེཝ པཊིསིདྡྷནྟི? ཀུསལཝིཔཱཀཱ ཝཱ ཨཀུསལཝིཔཱཀཱ ཝཱ ཨུཔེཀྑཱསཧགཏཱཧེཏུཀམནོཝིཉྙཱཎདྷཱཏུ ཨུཔྤཛྫཏི ¶ , ཀིམསྶཱ ཨཱཝཛྫནནྟི? ‘བྷཝངྒཱཝཛྫནཱནཾ ཝིཡ ནཏྠསྶཱ ཨཱཝཛྫནཀིཙྩ’ནྟི. ‘ཨེཏཱནི ཏཱཝ ཨཏྟནོ ནིནྣཏྟཱ ཙ ཙིཎྞཏྟཱ ཙ སམུདཱཙཱརཏྟཱ ཙ ཨུཔྤཛྫནྟུ, ཨཡཾ ཀཐཾ ཨུཔྤཛྫཏཱི’ཏི? ‘ཡཐཱ ནིརོདྷསྶ ཨནནྟརཔཙྩཡཾ ནེཝསཉྙཱནཱསཉྙཱཡཏནཾ, ནིརོདྷཱ ཝུཊྛཧནྟསྶ ཕལསམཱཔཏྟིཙིཏྟཾ, ཨརིཡམགྒཙིཏྟཾ, མགྒཱནནྟརཱནི ཕལཙིཏྟཱནི, ཨེཝཾ ཨསནྟེཔི ཨཱཝཛྫནེ, ནིནྣཙིཎྞསམུདཱཙཱརབྷཱཝེན ཨུཔྤཛྫཏི. ཝིནཱ ཧི ཨཱཝཛྫནེན ཙིཏྟཾ ཨུཔྤཛྫཏི, ཨཱརམྨཎེན པན ཝིནཱ ནུཔྤཛྫཏཱི’ཏི. ‘ཨཐ ཀིམསྶཱརམྨཎ’ནྟི? ‘རཱུཔཱདཱིསུ པརིཏྟདྷམྨེསུ ཨཉྙཏརཾ. ཨེཏེསུ ཧི ཡདེཝ ཏསྨིཾ སམཡེ ཨཱཔཱཐམཱགཏཾ ཧོཏི, ཏཾ ཨཱརབྦྷ ཨེཏཾ ཙིཏྟཾ ཨུཔྤཛྫཏཱི’ཏི ཝེདིཏབྦཾ.

ཨིདཱནི སབྦེསམྤི ¶ ཨེཏེསཾ ཙིཏྟཱནཾ པཱཀཊབྷཱཝཏྠཾ ཨཡཾ པཀིཎྞཀནཡོ ཝུཏྟོ –

སུཏྟཾ དོཝཱརིཀོ ཙ, གཱམིལློ ཨམྦོ ཀོལིཡཀེན ཙ;

ཛཙྩནྡྷོ པཱིཋསཔྤཱི ཙ, ཝིསཡགྒཱཧོ ཙ ཨུཔནིསྶཡམཏྠསོཏི.

ཏཏྠ ‘སུཏྟ’ནྟི, ཨེཀོ པནྠམཀྐཊཀོ པཉྩསུ དིསཱསུ སུཏྟཾ པསཱརེཏྭཱ ཛཱལཾ ཀཏྭཱ མཛ྄ཛྷེ ནིཔཛྫཏི. པཋམདིསཱཡ པསཱརིཏསུཏྟེ པཱཎཀེན ཝཱ པཊངྒེན ཝཱ མཀྑིཀཱཡ ཝཱ པཧཊེ ནིཔནྣཊྛཱནཏོ ཙལིཏྭཱ ནིཀྑམིཏྭཱ སུཏྟཱནུསཱརེན གནྟྭཱ ཏསྶ ཡཱུསཾ པིཝིཏྭཱ པུནཨཱགནྟྭཱ ཏཏྠེཝ ནིཔཛྫཏི. དུཏིཡདིསཱདཱིསུ པཧཊཀཱལེཔི ཨེཝམེཝ ཀརོཏི.

ཏཏྠ པཉྩསུ དིསཱསུ པསཱརིཏསུཏྟཾ ཝིཡ པཉྩཔསཱདཱ. མཛ྄ཛྷེ ནིཔནྣམཀྐཊཀོ ཝིཡ ཙིཏྟཾ. པཱཎཀཱདཱིཧི སུཏྟགྷཊྚནཀཱལོ ཝིཡ ཨཱརམྨཎེན པསཱདསྶ གྷཊྚིཏཀཱལོ. མཛ྄ཛྷེ ནིཔནྣམཀྐཊཀསྶ ཙལནཾ ཝིཡ པསཱདགྷཊྚནཀཾ ཨཱརམྨཎཾ གཧེཏྭཱ ཀིརིཡམནོདྷཱཏུཡཱ བྷཝངྒསྶ ཨཱཝཊྚིཏཀཱལོ. སུཏྟཱནུསཱརེན གམནཀཱལོ ཝིཡ ཝཱིཐིཙིཏྟཔྤཝཏྟི. སཱིསེ ཝིཛ྄ཛྷིཏྭཱ ¶ ཡཱུསཔིཝནཾ ཝིཡ ཛཝནསྶ ཨཱརམྨཎེ ཛཝིཏཀཱལོ. པུནཨཱགནྟྭཱ མཛ྄ཛྷེ ནིཔཛྫནཾ ཝིཡ ཙིཏྟསྶ ཧདཡཝཏྠུམེཝ ནིསྶཱཡ པཝཏྟནཾ.

ཨིདཾ ཨོཔམྨཾ ཀིཾ དཱིཔེཏི? ཨཱརམྨཎེན པསཱདེ གྷཊྚིཏེ པསཱདཝཏྠུཀཙིཏྟཏོ ཧདཡརཱུཔཝཏྠུཀཙིཏྟཾ པཋམཏརཾ ཨུཔྤཛྫཏཱིཏི དཱིཔེཏི. ཨེཀེཀཾ ཨཱརམྨཎཾ དྭཱིསུ དྭཱིསུ དྭཱརེསུ ཨཱཔཱཐམཱགཙྪཏཱིཏིཔི.

‘དོཝཱརིཀོ’ཏི ¶ , ཨེཀོ རཱཛཱ སཡནགཏོ ནིདྡཱཡཏི. ཏསྶ པརིཙཱརཀོ པཱདེ པརིམཛྫནྟོ ནིསཱིདི. བདྷིརདོཝཱརིཀོ དྭཱརེ ཋིཏོ. ཏཡོ པཊིཧཱརཱ པཊིཔཱཊིཡཱ ཋིཏཱ. ཨཐེཀོ པཙྩནྟཝཱསཱི མནུསྶོ པཎྞཱཀཱརཾ ཨཱདཱཡ ཨཱགནྟྭཱ དྭཱརཾ ཨཱཀོཊེསི. བདྷིརདོཝཱརིཀོ སདྡཾ ན སུཎཱཏི. པཱདཔརིམཛྫཀོ སཉྙཾ ཨདཱསི. ཏཱཡ སཉྙཱཡ དྭཱརཾ ཝིཝརིཏྭཱ པསྶི. པཋམཔཊིཧཱརོ པཎྞཱཀཱརཾ གཧེཏྭཱ དུཏིཡསྶ ཨདཱསི, དུཏིཡོ ཏཏིཡསྶ, ཏཏིཡོ རཉྙོ. རཱཛཱ པརིབྷུཉྫི.

ཏཏྠ ¶ སོ རཱཛཱ ཝིཡ ཛཝནཾ དཊྛབྦཾ. པཱདཔརིམཛྫཀོ ཝིཡ ཨཱཝཛྫནཾ. བདྷིརདོཝཱརིཀོ ཝིཡ ཙཀྑུཝིཉྙཱཎཾ. ཏཡོ པཊིཧཱརཱ ཝིཡ སམྤཊིཙྪནཱདཱིནི ཏཱིཎི ཝཱིཐིཙིཏྟཱནི. པཙྩནྟཝཱསིནོ པཎྞཱཀཱརཾ ཨཱདཱཡ ཨཱགནྟྭཱ དྭཱརཱཀོཊནཾ ཝིཡ ཨཱརམྨཎསྶ པསཱདགྷཊྚནཾ. པཱདཔརིམཛྫཀེན སཉྙཱཡ དིནྣཀཱལོ ཝིཡ ཀིརིཡམནོདྷཱཏུཡཱ བྷཝངྒསྶ ཨཱཝཊྚིཏཀཱལོ. ཏེན དིནྣསཉྙཱཡ བདྷིརདོཝཱརིཀསྶ དྭཱརཝིཝརཎཀཱལོ ཝིཡ ཙཀྑུཝིཉྙཱཎསྶ ཨཱརམྨཎེ དསྶནཀིཙྩསཱདྷནཀཱལོ. པཋམཔཊིཧཱརེན པཎྞཱཀཱརསྶ གཧིཏཀཱལོ ཝིཡ ཝིཔཱཀམནོདྷཱཏུཡཱ ཨཱརམྨཎསྶ སམྤཊིཙྪིཏཀཱལོ. པཋམེན དུཏིཡསྶ དིནྣཀཱལོ ཝིཡ ཝིཔཱཀམནོཝིཉྙཱཎདྷཱཏུཡཱ ཨཱརམྨཎསྶ སནྟཱིརཎཀཱལོ. དུཏིཡེན ཏཏིཡསྶ དིནྣཀཱལོ ཝིཡ ཀིརིཡམནོཝིཉྙཱཎདྷཱཏུཡཱ ཨཱརམྨཎསྶ ཝཝཏྠཱཔིཏཀཱལོ. ཏཏིཡེན རཉྙོ དིནྣཀཱལོ ཝིཡ ཝོཊྛབྦནེན ཛཝནསྶ ནིཡྻཱདིཏཀཱལོ. རཉྙོ པརིབྷོགཀཱལོ ཝིཡ ཛཝནསྶ ཨཱརམྨཎརསཱནུབྷཝནཀཱལོ.

ཨིདཾ ཨོཔམྨཾ ཀིཾ དཱིཔེཏི? ཨཱརམྨཎསྶ པསཱདགྷཊྚམཏྟནམེཝ ཀིཙྩཾ, ཀིརིཡམནོདྷཱཏུཡཱ བྷཝངྒཱཝཊྚནམཏྟམེཝ, ཙཀྑུཝིཉྙཱཎཱདཱིནཾ དསྶནསམྤཊིཙྪནསནྟཱིརཎཝཝཏྠཱཔནམཏྟཱནེཝ ཀིཙྩཱནི. ཨེཀནྟེན པན ཛཝནམེཝ ཨཱརམྨཎརསཾ ཨནུབྷོཏཱིཏི དཱིཔེཏི.

‘གཱམིལློ’ཏི ¶ , སམྦཧུལཱ གཱམདཱརཀཱ ཨནྟརཝཱིཐིཡཾ པཾསུཀཱིལ༹ཾ ཀཱིལ༹ནྟི. ཏཏྠེཀསྶ ཧཏྠེ ཀཧཱཔཎོ པཊིཧཉྙི. སོ ‘མཡ྄ཧཾ ཧཏྠེ པཊིཧཏཾ, ཀིཾ ནུ ཁོ ཨེཏ’ནྟི ཨཱཧ. ཨཐེཀོ ‘པཎྜརཾ ཨེཏ’ནྟི ཨཱཧ. ཨཔརོ སཧ པཾསུནཱ གཱལ༹ྷཾ གཎྷི. ཨཉྙོ ‘པུཐུལཾ ཙཏུརསྶཾ ཨེཏ’ནྟི ཨཱཧ. ཨཔརོ ‘ཀཧཱཔཎོ ཨེསོ’ཏི ཨཱཧ. ཨཐ ནཾ ཨཱཧརིཏྭཱ མཱཏུ ཨདཱསི. སཱ ཀམྨེ ཨུཔནེསི.

ཏཏྠ ¶ སམྦཧུལཱནཾ དཱརཀཱནཾ ཨནྟརཝཱིཐིཡཾ ཀཱིལ༹ནྟཱནཾ ནིསིནྣཀཱལོ ཝིཡ བྷཝངྒཙིཏྟཔྤཝཏྟི དཊྛབྦཱ. ཀཧཱཔཎསྶ ཧཏྠེ པཊིཧཏཀཱལོ ཝིཡ ཨཱརམྨཎེན པསཱདསྶ གྷཊྚིཏཀཱལོ. ‘ཀིཾ ནུ ཁོ ཨེཏ’ནྟི ཝུཏྟཀཱལོ ཝིཡ ཏཾ ཨཱརམྨཎཾ གཧེཏྭཱ ཀིརིཡམནོདྷཱཏུཡཱ བྷཝངྒསྶ ཨཱཝཊྚིཏཀཱལོ. ‘པཎྜརཾ ཨེཏ’ནྟི ཝུཏྟཀཱལོ ཝིཡ ཙཀྑུཝིཉྙཱཎེན དསྶནཀིཙྩསྶ སཱདྷིཏཀཱལོ. སཧ པཾསུནཱ གཱལ༹ྷཾ གཧིཏཀཱལོ ཝིཡ ཝིཔཱཀམནོདྷཱཏུཡཱ ¶ ཨཱརམྨཎསྶ སམྤཊིཙྪིཏཀཱལོ. ‘པུཐུལཾ ཙཏུརསྶཾ ཨེཏ’ནྟི ཝུཏྟཀཱལོ ཝིཡ ཝིཔཱཀམནོཝིཉྙཱཎདྷཱཏུཡཱ ཨཱརམྨཎསྶ སནྟཱིརཎཀཱལོ. ‘ཨེསོ ཀཧཱཔཎོ’ཏི ཝུཏྟཀཱལོ ཝིཡ ཀིརིཡམནོཝིཉྙཱཎདྷཱཏུཡཱ ཨཱརམྨཎསྶ ཝཝཏྠཱཔིཏཀཱལོ. མཱཏརཱ ཀམྨེ ཨུཔནཱིཏཀཱལོ ཝིཡ ཛཝནསྶ ཨཱརམྨཎརསཱནུབྷཝནཾ ཝེདིཏབྦཾ.

ཨིདཾ ཨོཔམྨཾ ཀིཾ དཱིཔེཏི? ཀིརིཡམནོདྷཱཏུ ཨདིསྭཱཝ བྷཝངྒཾ ཨཱཝཊྚེཏི, ཝིཔཱཀམནོདྷཱཏུ ཨདིསྭཱཝ སམྤཊིཙྪཏི, ཝིཔཱཀམནོཝིཉྙཱཎདྷཱཏུ ཨདིསྭཱཝ སནྟཱིརེཏི, ཀིརིཡམནོཝིཉྙཱཎདྷཱཏུ ཨདིསྭཱཝ ཝཝཏྠཱཔེཏི, ཛཝནཾ ཨདིསྭཱཝ ཨཱརམྨཎརསཾ ཨནུབྷོཏི. ཨེཀནྟེན པན ཙཀྑུཝིཉྙཱཎམེཝ དསྶནཀིཙྩཾ སཱདྷེཏཱིཏི དཱིཔེཏི.

‘ཨམྦོ ཀོལིཡཀེན ཙཱ’ཏི, ཨིདཾ ཧེཊྛཱ ཝུཏྟཾ ཨམྦོཔམཉྩ ཨུཙྪུསཱལཱསཱམིཀོཔམཉྩ སནྡྷཱཡ ཝུཏྟཾ.

‘ཛཙྩནྡྷོ པཱིཋསཔྤཱི ཙཱ’ཏི, ཨུབྷོཔི ཀིར ཏེ ནགརདྭཱརེ སཱལཱཡཾ ནིསཱིདིཾསུ. ཏཏྠ པཱིཋསཔྤཱི ཨཱཧ – ‘བྷོ ཨནྡྷཀ, ཀསྨཱ ཏྭཾ ཨིདྷ སུསྶམཱནོ ཝིཙརསི, ཨསུཀོ པདེསོ སུབྷིཀྑོ བཧྭནྣཔཱནོ, ཀིཾ ཏཏྠ གནྟྭཱ སུཁེན ཛཱིཝིཏུཾ ན ཝཊྚཏཱི’ཏི? ‘མཡ྄ཧཾ ཏཱཝ ཏཡཱ ཨཱཙིཀྑིཏཾ, ཏུཡ྄ཧཾ པན ཏཏྠ གནྟྭཱ སུཁེན ཛཱིཝིཏུཾ ཀིཾ ན ཝཊྚཏཱི’ཏི? ‘མཡ྄ཧཾ གནྟུཾ པཱདཱ ནཏྠཱི’ཏི. ‘མཡ྄ཧམྤི པསྶིཏུཾ ཙཀྑཱུནི ནཏྠཱི’ཏི. ‘ཡདི ཨེཝཾ, ཏཝ པཱདཱ ཧོནྟུ, མམ ཙཀྑཱུནཱི’ཏི ཨུབྷོཔི ‘སཱདྷཱུ’ཏི ¶ སམྤཊིཙྪིཏྭཱ ཛཙྩནྡྷོ པཱིཋསཔྤིཾ ཁནྡྷཾ ཨཱརོཔེསི. སོ ཏསྶ ཁནྡྷེ ནིསཱིདིཏྭཱ ཝཱམཧཏྠེནསྶ སཱིསཾ པརིཀྑིཔིཏྭཱ དཀྑིཎཧཏྠེན ‘ཨིམསྨིཾ ཋཱནེ མཱུལཾ ཨཱཝརིཏྭཱ ཋིཏཾ, ཨིམསྨིཾ པཱསཱཎོ, ཝཱམཾ མུཉྩ དཀྑིཎཾ གཎྷ, དཀྑིཎཾ མུཉྩ ཝཱམཾ གཎྷཱ’ཏི མགྒཾ ནིཡམེཏྭཱ ཨཱཙིཀྑཏི. ཨེཝཾ ཛཙྩནྡྷསྶ པཱདཱ པཱིཋསཔྤིསྶ ཙཀྑཱུནཱིཏི ཨུབྷོཔི སམྤཡོགེན ཨིཙྪིཏཊྛཱནཾ གནྟྭཱ སུཁེན ཛཱིཝིཾསུ.

ཏཏྠ ¶ ཛཙྩནྡྷོ ཝིཡ རཱུཔཀཱཡོ, པཱིཋསཔྤཱི ཝིཡ ཨརཱུཔཀཱཡོ. པཱིཋསཔྤིནཱ ཝིནཱ ཛཙྩནྡྷསྶ དིསཾ གནྟུཾ གམནཱབྷིསངྑཱརསྶ ཨནིབྦཏྟིཏཀཱལོ ¶ ཝིཡ རཱུཔསྶ ཨརཱུཔེན ཝིནཱ ཨཱདཱནགཧཎཙོཔནཾ པཱཔེཏུཾ ཨསམཏྠཏཱ. ཛཙྩནྡྷེན ཝིནཱ པཱིཋསཔྤིསྶ དིསཾ གནྟུཾ གམནཱབྷིསངྑཱརསྶ ཨཔྤཝཏྟནཾ ཝིཡ པཉྩཝོཀཱརེ རཱུཔཾ, ཝིནཱ ཨརཱུཔསྶ ཨཔྤཝཏྟི. དྭིནྣམྤི སམྤཡོགེན ཨིཙྪིཏཊྛཱནཾ གནྟྭཱ སུཁེན ཛཱིཝིཏཀཱལོ ཝིཡ རཱུཔཱརཱུཔདྷམྨཱནཾ ཨཉྙམཉྙཡོགེན སབྦཀིཙྩེསུ པཝཏྟིསམྦྷཱཝོཏི. ཨཡཾ པཉྷོ པཉྩཝོཀཱརབྷཝཝསེན ཀཐིཏོ.

‘ཝིསཡགྒཱཧོ’ ཙཱཏི, ཙཀྑུ རཱུཔཝིསཡཾ གཎྷཱཏི. སོཏཱདཱིནི སདྡཱདིཝིསཡེ.

‘ཨུཔནིསྶཡམཏྠསོ’ཏི, ‘ཨུཔནིསྶཡཏོ’ ཙ ‘ཨཏྠཏོ’ ཙ. ཏཏྠ ཨསམྦྷིནྣཏྟཱ ཙཀྑུསྶ, ཨཱཔཱཐགཏཏྟཱ རཱུཔཱནཾ, ཨཱལོཀསནྣིསྶིཏཾ, མནསིཀཱརཧེཏུཀཾ ཙཏཱུཧི པཙྩཡེཧི ཨུཔྤཛྫཏི ཙཀྑུཝིཉྙཱཎཾ, སདྡྷིཾ སམྤཡུཏྟདྷམྨེཧི. ཏཏྠ མཏསྶཱཔི ཙཀྑུ སམྦྷིནྣཾ ཧོཏི. ཛཱིཝཏོ ནིརུདྡྷམྤི, པིཏྟེན ཝཱ སེམྷེན ཝཱ རུཧིརེན ཝཱ པལིབུདྡྷམྤི, ཙཀྑུཝིཉྙཱཎསྶ པཙྩཡོ བྷཝིཏུཾ ཨསཀྐོནྟཾ ‘སམྦྷིནྣཾ’ ནཱམ ཧོཏི. སཀྐོནྟཾ ཨསམྦྷིནྣཾ ནཱམ. སོཏཱདཱིསུཔི ཨེསེཝ ནཡོ. ཙཀྑུསྨིཾ པན ཨསམྦྷིནྣེཔི བཧིདྡྷཱ རཱུཔཱརམྨཎེ ཨཱཔཱཐཾ ཨནཱགཙྪནྟེ ཙཀྑུཝིཉྙཱཎཾ ནུཔྤཛྫཏི. ཏསྨིཾ པན ཨཱཔཱཐཾ ཨཱགཙྪནྟེཔི ཨཱལོཀསནྣིསྶཡེ ཨསཏི ནུཔྤཛྫཏི. ཏསྨིཾ སནྟེཔི ཀིརིཡམནོདྷཱཏུཡཱ བྷཝངྒེ ཨནཱཝཊྚིཏེ ནུཔྤཛྫཏི. ཨཱཝཊྚིཏེཡེཝ ཨུཔྤཛྫཏི. ཨེཝཾ ཨུཔྤཛྫམཱནཾ སམྤཡུཏྟདྷམྨེཧི སདྡྷིཾཡེཝ ཨུཔྤཛྫཏི. ཨིཏི ཨིམེ ཙཏྟཱརོ པཙྩཡེ ལབྷིཏྭཱ ཨུཔྤཛྫཏི ཙཀྑུཝིཉྙཱཎཾ (མ. ནི. ༡.༣༠༦ ཐོཀཾ ཝིསདིསཾ).

ཨསམྦྷིནྣཏྟཱ ¶ སོཏསྶ, ཨཱཔཱཐགཏཏྟཱ སདྡཱནཾ, ཨཱཀཱསསནྣིསྶིཏཾ, མནསིཀཱརཧེཏུཀཾ ཙཏཱུཧི པཙྩཡེཧི ཨུཔྤཛྫཏི སོཏཝིཉྙཱཎཾ, སདྡྷིཾ སམྤཡུཏྟདྷམྨེཧི. ཏཏྠ ‘ཨཱཀཱསསནྣིསྶིཏ’ནྟི ཨཱཀཱསསནྣིསྶཡཾ ལདྡྷཱཝ ཨུཔྤཛྫཏི, ན ཝིནཱ ཏེན. ན ཧི པིཧིཏཀཎྞཙྪིདྡསྶ སོཏཝིཉྙཱཎཾ པཝཏྟཏི. སེསཾ པུརིམནཡེནེཝ ཝེདིཏབྦཾ. ཡཐཱ ཙེཏྠ ཨེཝཾ ཨིཏོ པརེསུཔི. ཝིསེསམཏྟཾ པན ཝཀྑཱམ.

ཨསམྦྷིནྣཏྟཱ གྷཱནསྶ, ཨཱཔཱཐགཏཏྟཱ གནྡྷཱནཾ, ཝཱཡོསནྣིསྶིཏཾ, མནསིཀཱརཧེཏུཀཾ ཙཏཱུཧི པཙྩཡེཧི ¶ ཨུཔྤཛྫཏི གྷཱནཝིཉྙཱཎཾ ¶ , སདྡྷིཾ སམྤཡུཏྟདྷམྨེཧི. ཏཏྠ ‘ཝཱཡོསནྣིསྶིཏ’ནྟི གྷཱནབིལཾ ཝཱཡུམྷི པཝིསནྟེཡེཝ ཨུཔྤཛྫཏི, ཏསྨིཾ ཨསཏི ནུཔྤཛྫཏཱིཏི ཨཏྠོ.

ཨསམྦྷིནྣཏྟཱ ཛིཝ྄ཧཱཡ, ཨཱཔཱཐགཏཏྟཱ རསཱནཾ, ཨཱཔོསནྣིསྶིཏཾ, མནསིཀཱརཧེཏུཀཾ ཙཏཱུཧི པཙྩཡེཧི ཨུཔྤཛྫཏི ཛིཝ྄ཧཱཝིཉྙཱཎཾ, སདྡྷིཾ སམྤཡུཏྟདྷམྨེཧི. ཏཏྠ ‘ཨཱཔོསནྣིསྶིཏ’ནྟི ཛིཝ྄ཧཱཏེམནཾ ཨཱཔཾ ལདྡྷཱཝ ཨུཔྤཛྫཏི, ན ཝིནཱ ཏེན. སུཀྑཛིཝ྄ཧཱནཉྷི སུཀྑཁཱདནཱིཡེ ཛིཝ྄ཧཱཡ ཋཔིཏེཔི ཛིཝ྄ཧཱཝིཉྙཱཎཾ ནུཔྤཛྫཏེཝ.

ཨསམྦྷིནྣཏྟཱ ཀཱཡསྶ, ཨཱཔཱཐགཏཏྟཱ ཕོཊྛབྦཱནཾ, པཐཝིསནྣིསྶིཏཾ, མནསིཀཱརཧེཏུཀཾ ཙཏཱུཧི པཙྩཡེཧི ཨུཔྤཛྫཏི ཀཱཡཝིཉྙཱཎཾ, སདྡྷིཾ སམྤཡུཏྟདྷམྨེཧི. ཏཏྠ ‘པཐཝིསནྣིསྶིཏ’ནྟི ཀཱཡཔསཱདཔཙྩཡཾ པཐཝིསནྣིསྶཡཾ ལདྡྷཱཝ ཨུཔྤཛྫཏི, ན ཏེན ཝིནཱ. ཀཱཡདྭཱརསྨིཉྷི བཧིདྡྷཱམཧཱབྷཱུཏཱརམྨཎཾ ཨཛ྄ཛྷཏྟིཀཾ ཀཱཡཔསཱདཾ གྷཊྚེཏྭཱ པསཱདཔཙྩཡེསུ མཧཱབྷཱུཏེསུ པཊིཧཉྙཏི.

ཨསམྦྷིནྣཏྟཱ མནསྶ, ཨཱཔཱཐགཏཏྟཱ དྷམྨཱནཾ, ཝཏྠུསནྣིསྶིཏཾ, མནསིཀཱརཧེཏུཀཾ ཙཏཱུཧི པཙྩཡེཧི ཨུཔྤཛྫཏི མནོཝིཉྙཱཎཾ, སདྡྷིཾ སམྤཡུཏྟདྷམྨེཧི. ཏཏྠ ‘མནོ’ཏི བྷཝངྒཙིཏྟཾ. ཏཾ ནིརུདྡྷམྤི, ཨཱཝཛྫནཙིཏྟསྶ པཙྩཡོ བྷཝིཏུཾ ཨསམཏྠཾ མནྡཐཱམགཏམེཝ པཝཏྟམཱནམྤི, སམྦྷིནྣཾ ནཱམ ཧོཏི. ཨཱཝཛྫནསྶ པན པཙྩཡོ བྷཝིཏུཾ སམཏྠཾ ཨསམྦྷིནྣཾ ནཱམ. ‘ཨཱཔཱཐགཏཏྟཱ དྷམྨཱན’ནྟི དྷམྨཱརམྨཎེ ཨཱཔཱཐགཏེ. ‘ཝཏྠུསནྣིསྶིཏ’ནྟི ཧདཡཝཏྠུསནྣིསྶཡཾ ལདྡྷཱཝ ཨུཔྤཛྫཏི, ན ཏེན ཝིནཱ. ཨཡམྤི པཉྷོ པཉྩཝོཀཱརབྷཝཾ ¶ སནྡྷཱཡ ཀཐིཏོ. ‘མནསིཀཱརཧེཏུཀ’ནྟི ཀིརིཡམནོཝིཉྙཱཎདྷཱཏུཡཱ བྷཝངྒེ ཨཱཝཊྚིཏེཡེཝ ཨུཔྤཛྫཏཱིཏི ཨཏྠོ. ཨཡཾ ཏཱཝ ‘ཨུཔནིསྶཡམཏྠསོ’ཏི ཨེཏྠ ཨུཔནིསྶཡཝཎྞནཱ.

‘ཨཏྠཏོ’ པན ཙཀྑུ དསྶནཏྠཾ, སོཏཾ སཝནཏྠཾ, གྷཱནཾ གྷཱཡནཏྠཾ, ཛིཝ྄ཧཱ སཱཡནཏྠཱ, ཀཱཡོ ཕུསནཏྠོ ¶ , མནོ ཝིཛཱནནཏྠོ. ཏཏྠ དསྶནཾ ཨཏྠོ ཨསྶ. ཏཉྷི ཏེན ནིཔྥཱདེཏབྦནྟི དསྶནཏྠཾ. སེསེསུཔི ཨེསེཝ ནཡོ. ཨེཏྟཱཝཏཱ ཏིཔིཊཀཙཱུལ༹ནཱགཏྠེརཝཱདེ སོལ༹སཀམགྒོ ནིཊྛིཏོ, སདྡྷིཾ དྭཱདསཀམགྒེན ཙེཝ ཨཧེཏུཀཊྛཀེན ཙཱཏི.

ཨིདཱནི མོརཝཱཔཱིཝཱསཱིམཧཱདཏྟཏྠེརཝཱདེ དྭཱདསཀམགྒཀཐཱ ཧོཏི. ཏཏྠ སཱཀེཏཔཉྷཨུསྶདཀིཏྟནཧེཏུཀིཏྟནཱནི ¶ པཱཀཏིཀཱནེཝ. ཨཡཾ པན ཐེརོ ཨསངྑཱརིཀསསངྑཱརིཀེསུ དོསཾ དིསྭཱ ‘ཨསངྑཱརིཀཾ ཨསངྑཱརིཀམེཝ ཝིཔཱཀཾ དེཏི, ནོ སསངྑཱརིཀཾ; སསངྑཱརིཀམྤི སསངྑཱརིཀམེཝ ནོ ཨསངྑཱརིཀ’ནྟི ཨཱཧ. ཛཝནེན ཙེས ཙིཏྟནིཡཱམཾ ན ཀཐེཏི. ཨཱརམྨཎེན པན ཝེདནཱནིཡཱམཾ ཀཐེཏི. ཏེནསྶ ཝིཔཱཀུདྡྷཱརེ དྭཱདསཀམགྒོ ནཱམ ཛཱཏོ. དསཀམགྒོཔི, ཨཧེཏུཀཊྛཀམྤི ཨེཏྠེཝ པཝིཊྛཾ.

ཏཏྲཱཡཾ ནཡོ – སོམནསྶསཧགཏཏིཧེཏུཀཨསངྑཱརིཀཙིཏྟེན ཧི ཀམྨེ ཨཱཡཱུཧིཏེ ཏཱདིསེནེཝ ཝིཔཱཀཙིཏྟེན གཧིཏཔཊིསནྡྷིཀསྶ ཝུཌྜྷིཔྤཏྟསྶ ཙཀྑུདྭཱརེ ‘ཨིཊྛཱརམྨཎེ’ ཨཱཔཱཐགཏེ ཧེཊྛཱ ཝུཏྟནཡེནེཝ ཏཡོ མོགྷཝཱརཱ ཧོནྟི. ཏསྶ ཀུསལཏོ ཙཏྟཱརི སོམནསྶསཧགཏཱནི, ཨཀུསལཏོ ཙཏྟཱརི, ཀིརིཡཏོ པཉྩཱཏི ཨིམེསཾ ཏེརསནྣཾ ཙིཏྟཱནཾ ཨཉྙཏརེན ཛཝིཏཔརིཡོསཱནེ ཏདཱརམྨཎཾ པཏིཊྛཧམཱནཾ སོམནསྶསཧགཏཨསངྑཱརིཀཏིཧེཏུཀཙིཏྟམྤི དུཧེཏུཀཙིཏྟམྤི པཏིཊྛཱཏི. ཨེཝམསྶ ཙཀྑུདྭཱརེ ཙཀྑུཝིཉྙཱཎཱདཱིནི ཏཱིཎི, ཏདཱརམྨཎཱནི དྭེཏི, པཉྩ གཎནཱུཔགཙིཏྟཱནི ཧོནྟི.

ཨཱརམྨཎེན པན ཝེདནཾ པརིཝཏྟེཏྭཱ ཀུསལཏོ ཙཏུནྣཾ, ཨཀུསལཏོ ཙཏུནྣཾ, ཀིརིཡཏོ ཙཏུནྣནྟི, དྭཱདསནྣཾ ཨུཔེཀྑཱསཧགཏཙིཏྟཱནཾ ཨཉྙཏརེན ཛཝིཏཱཝསཱནེ ཨུཔེཀྑཱསཧགཏཏིཧེཏུཀཨསངྑཱརིཀཝིཔཱཀམྤི དུཧེཏུཀཨསངྑཱརིཀཝིཔཱཀམྤི ཏདཱརམྨཎཾ ཧུཏྭཱ ཨུཔྤཛྫཏི. ཨེཝམསྶ ཙཀྑུདྭཱརེ ཨུཔེཀྑཱསཧགཏསནྟཱིརཎཾ, ཨིམཱནི དྭེ ཏདཱརམྨཎཱནཱིཏི, ཏཱིཎི གཎནཱུཔགཙིཏྟཱནི ¶ ཧོནྟི. ཏཱནི པུརིམེཧི པཉྩཧི སདྡྷིཾ ¶ ཨཊྛ. སོཏདྭཱརཱདཱིསུཔི ཨཊྛ ཨཊྛཱཏི ཨེཀཱཡ ཙེཏནཱཡ ཀམྨེ ཨཱཡཱུཧིཏེ སམཙཏྟཱལཱིས ཙིཏྟཱནི ཨུཔྤཛྫནྟི. ཨགྒཧིཏགྒཧཎེན པན ཙཀྑུདྭཱརེ ཨཊྛ, སོཏཝིཉྙཱཎཱདཱིནི ཙཏྟཱརཱིཏི, དྭཱདས ཧོནྟི. ཏཏྠ ‘མཱུལབྷཝངྒཏཱ’‘ཨཱགནྟུཀབྷཝངྒཏཱ’‘ཨམྦོཔམནིཡཱམཀཐཱ’ ཙ ཝུཏྟནཡེནེཝ ཝེདིཏབྦཱ.

སོམནསྶསཧགཏཏིཧེཏུཀསསངྑཱརིཀཀུསལཙིཏྟེན ཀམྨེ ཨཱཡཱུཧིཏེཔི ཨུཔེཀྑཱསཧགཏཏིཧེཏུཀཨསངྑཱརིཀསསངྑཱརིཀེཧི ཀམྨེ ཨཱཡཱུཧིཏེཔི ཨེསེཝ ནཡོ. ཏཏྠ ཡནྟོཔམཱཔི ཨེཏྠ པཱཀཏིཀཱ ཨེཝ. ཨེཏྟཱཝཏཱ ཏིཧེཏུཀཀམྨེན ཏིཧེཏུཀཔཊིསནྡྷི ཧོཏཱིཏི ཝཱརོ ཀཐིཏོ. ཏིཧེཏུཀཀམྨེན དུཧེཏུཀཔཊིསནྡྷི ཧོཏཱིཏི ཝཱརོ པན པཊིཙྪནྣོ ཧུཏྭཱ གཏོ.

ཨིདཱནི ¶ དུཧེཏུཀཀམྨེན དུཧེཏུཀཔཊིསནྡྷིཀཐཱ ཧོཏི. སོམནསྶསཧགཏདུཧེཏུཀཨསངྑཱརིཀཙིཏྟེན ཧི ཀམྨེ ཨཱཡཱུཧིཏེ ཏཱདིསེནེཝ ཝིཔཱཀཙིཏྟེན གཧིཏཔཊིསནྡྷིཀསྶ ཝུཌྜྷིཔྤཏྟསྶ ཙཀྑུདྭཱརེ ཨིཊྛཱརམྨཎེ ཨཱཔཱཐགཏེ ཧེཊྛཱ ཝུཏྟནཡེནེཝ ཏཡོ མོགྷཝཱརཱ ཧོནྟི. དུཧེཏུཀསྶ པན ཛཝནཀིརིཡཱ ནཏྠི. ཏསྨཱ ཀུསལཏོ ཙཏྟཱརི སོམནསྶསཧགཏཱནི, ཨཀུསལཏོ ཙཏྟཱརཱིཏི ཨིམེསཾ ཨཊྛནྣཾ ཨཉྙཏརེན ཛཝིཏཔརིཡོསཱནེ དུཧེཏུཀམེཝ སོམནསྶསཧགཏཨསངྑཱརིཀཾ ཏདཱརམྨཎཾ ཧོཏི. ཨེཝམསྶ ཙཀྑུཝིཉྙཱཎཱདཱིནི ཏཱིཎི, ཨིདཉྩ ཏདཱརམྨཎནྟི, ཙཏྟཱརི གཎནཱུཔགཙིཏྟཱནི ཧོནྟི. ‘ཨིཊྛམཛ྄ཛྷཏྟཱརམྨཎེ’ པན ཀུསལཏོ ཨུཔེཀྑཱསཧགཏཱནཾ ཙཏུནྣཾ, ཨཀུསལཏོ ཙཏུནྣནྟི, ཨཊྛནྣཾ ཨཉྙཏརེན ཛཝིཏཔརིཡོསཱནེ དུཧེཏུཀམེཝ ཨུཔེཀྑཱསཧགཏཾ ཨསངྑཱརིཀཾ ཏདཱརམྨཎཾ ཧོཏི. ཨེཝམསྶ ཨུཔེཀྑཱསཧགཏསནྟཱིརཎཾ, ཨིདཉྩ ཏདཱརམྨཎནྟི, དྭེ གཎནཱུཔགཙིཏྟཱནི ཧོནྟི. ཏཱནི པུརིམེཧི ཙཏཱུཧི སདྡྷིཾ ཚ. སོཏདྭཱརཱདཱིསུཔི ཚ ཚཱཏི ཨེཀཱཡ ཙེཏནཱཡ ཀམྨེ ཨཱཡཱུཧིཏེ སམཏིཾས ཙིཏྟཱནི ཨུཔྤཛྫནྟི. ཨགྒཧིཏགྒཧཎེན པན ཙཀྑུདྭཱརེ ཚ, སོཏཝིཉྙཱཎཱདཱིནི ཙཏྟཱརཱིཏི དས ཧོནྟི. ཨམྦོཔམནིཡཱམཀཐཱ པཱཀཏིཀཱ ཨེཝ. ཡནྟོཔམཱ ཨིདྷ ན ལབྦྷཏཱིཏི ཝུཏྟཾ.

སོམནསྶསཧགཏདུཧེཏུཀསསངྑཱརིཀཀུསལཙིཏྟེན ¶ ¶ ཀམྨེ ཨཱཡཱུཧིཏེཔི ཨུཔེཀྑཱསཧགཏདུཧེཏུཀཨསངྑཱརིཀསསངྑཱརིཀེཧི ཀམྨེ ཨཱཡཱུཧིཏེཔི ཨེསེཝ ནཡོ. ཨེཏྟཱཝཏཱ དུཧེཏུཀཀམྨེན དུཧེཏུཀཔཊིསནྡྷི ཧོཏཱིཏི ཝཱརོ ཀཐིཏོ.

ཨཧེཏུཀཔཊིསནྡྷི ཧོཏཱིཏི ཝཱརོ པན ཨེཝཾ ཝེདིཏབྦོ – ཀུསལཏོ ཙཏཱུཧི ཉཱཎཝིཔྤཡུཏྟེཧི ཀམྨེ ཨཱཡཱུཧིཏེ, ཀུསལཝིཔཱཀཱཧེཏུཀམནོཝིཉྙཱཎདྷཱཏུཡཱ ཨུཔེཀྑཱསཧགཏཱཡ པཊིསནྡྷིཡཱ གཧིཏཱཡ, ཀམྨསདིསཱ པཊིསནྡྷཱིཏི ན ཝཏྟབྦཱ. ཨིཏོ པཊྛཱཡ ཧེཊྛཱ ཝུཏྟནཡེནེཝ ཀཐེཏྭཱ ཨིཊྛེཔི ཨིཊྛམཛ྄ཛྷཏྟེཔི ཙིཏྟཔྤཝཏྟི ཝེདིཏབྦཱ. ཨིམསྶ ཧི ཐེརསྶ ཝཱདེ པིཎྜཛཝནཾ ཛཝཏི. སེསཱ ཨིདཾ པན ཛཝནཾ ཀུསལཏྠཱཡ ཝཱ ཨཀུསལཏྠཱཡ ཝཱ ཀོ ནིཡཱམེཏཱིཏིཨཱདིཀཐཱ སབྦཱ ཧེཊྛཱ ཝུཏྟནཡེནེཝ ཝེདིཏབྦཱཏི. ཨེཏྟཱཝཏཱ མོརཝཱཔཱིཝཱསཱིམཧཱདཏྟཏྠེརཝཱདེ དྭཱདསཀམགྒོ ནིཊྛིཏོ སདྡྷིཾ དསཀམགྒེན ཙེཝ ཨཧེཏུཀཊྛཀེན ཙ.

ཨིདཱནི མཧཱདྷམྨརཀྑིཏཏྠེརཝཱདེ དསཀམགྒཀཐཱ ཧོཏི. ཏཏྠ སཱཀེཏཔཉྷཨུསྶདཀིཏྟནཱནི པཱཀཏིཀཱནེཝ. ཧེཏུཀིཏྟནེ པན ཨཡཾ ཝིསེསོ. ཏིཧེཏུཀཀམྨཾ ཏིཧེཏུཀཝིཔཱཀམྤི དུཧེཏུཀཝིཔཱཀམྤི ¶ ཨཧེཏུཀཝིཔཱཀམྤི དེཏི. དུཧེཏུཀཀམྨཾ ཏིཧེཏུཀམེཝ ན དེཏི, ཨིཏརཾ དེཏི. ཏིཧེཏུཀཀམྨེན པཊིསནྡྷི ཏིཧེཏུཀཱཝ ཧོཏི; དུཧེཏུཀཱཧེཏུཀཱ ན ཧོཏི. དུཧེཏུཀཀམྨེན དུཧེཏུཀཱཧེཏུཀཱ ཧོཏི, ཏིཧེཏུཀཱ ན ཧོཏི. ཨསངྑཱརིཀཀམྨཾ ཝིཔཱཀཾ ཨསངྑཱརིཀམེཝ དེཏི, ནོ སསངྑཱརིཀཾ. སསངྑཱརིཀམྤི སསངྑཱརིཀམེཝ དེཏི, ནོ ཨསངྑཱརིཀཾ. ཨཱརམྨཎེན ཝེདནཱ པརིཝཏྟེཏབྦཱ. ཛཝནཾ པིཎྜཛཝནམེཝ ཛཝཏི. ཨཱདིཏོ པཊྛཱཡ ཙིཏྟཱནི ཀཐེཏབྦཱནི.

ཏཏྲཱཡཾ ཀཐཱ – ཨེཀོ པཋམཀུསལཙིཏྟེན ཀམྨཾ ཨཱཡཱུཧཏི, པཋམཝིཔཱཀཙིཏྟེནེཝ པཊིསནྡྷིཾ གཎྷཱཏི. ཨཡཾ ཀམྨསདིསཱ པཊིསནྡྷི. ཏསྶ ཝུཌྜྷིཔྤཏྟསྶ ཙཀྑུདྭཱརེ ‘ཨིཊྛཱརམྨཎེ’ ཨཱཔཱཐགཏེ ཝུཏྟནཡེནེཝ ཏཡོ མོགྷཝཱརཱ ཧོནྟི. ཨཐསྶ ཧེཊྛཱ ཝུཏྟཱནཾ ཏེརསནྣཾ སོམནསྶསཧགཏཛཝནཱནཾ ¶ ཨཉྙཏརེན ཛཝིཏཔརིཡོསཱནེ པཋམཝིཔཱཀཙིཏྟམེཝ ཏདཱརམྨཎཾ ¶ ཧོཏི. ཏཾ ‘མཱུལབྷཝངྒཾ’ ‘ཏདཱརམྨཎ’ནྟི དྭེ ནཱམཱནི ལབྷཏི. ཨེཝམསྶ ཙཀྑུཝིཉྙཱཎཱདཱིནི ཏཱིཎི, ཨིདཉྩ ཏདཱརམྨཎནྟི, ཙཏྟཱརི གཎནཱུཔགཙིཏྟཱནི ཧོནྟི. ‘ཨིཊྛམཛ྄ཛྷཏྟཱརམྨཎེ’ ཧེཊྛཱ ཝུཏྟཱནཾཡེཝ དྭཱདསནྣཾ ཨུཔེཀྑཱསཧགཏཛཝནཱནཾ ཨཉྙཏརེན ཛཝིཏཔརིཡོསཱནེ ཨུཔེཀྑཱསཧགཏཾ ཏིཧེཏུཀཾ ཨསངྑཱརིཀཙིཏྟཾ ཏདཱརམྨཎཏཱཡ པཝཏྟཏི. ཏཾ ‘ཨཱགནྟུཀབྷཝངྒཾ’‘ཏདཱརམྨཎ’ནྟི དྭེ ནཱམཱནི ལབྷཏི. ཨེཝམསྶ ཨུཔེཀྑཱསཧགཏསནྟཱིརཎཾ ཨིདཉྩ ཏདཱརམྨཎནྟི དྭེ གཎནཱུཔགཙིཏྟཱནི. ཏཱནི པུརིམེཧི ཙཏཱུཧི སདྡྷིཾ ཚ ཧོནྟི. ཨེཝཾ ཨེཀཱཡ ཙེཏནཱཡ ཀམྨེ ཨཱཡཱུཧིཏེ པཉྩསུ དྭཱརེསུ སམཏིཾས ཙིཏྟཱནི ཨུཔྤཛྫནྟི. ཨགྒཧིཏགྒཧཎེན པན ཙཀྑུདྭཱརེ ཚ, སོཏཝིཉྙཱཎཱདཱིནི ཙཏྟཱརཱིཏི དས ཧོནྟི. ཨམྦོཔམནིཡཱམཀཐཱ པཱཀཏིཀཱཡེཝ.

དུཏིཡཏཏིཡཙཏུཏྠཀུསལཙིཏྟེཧི ཀམྨེ ཨཱཡཱུཧིཏེཔི ཨེཏྟཀཱནེཝ ཝིཔཱཀཙིཏྟཱནི ཧོནྟི. ཙཏཱུཧི ཨུཔེཀྑཱསཧགཏཙིཏྟེཧི ཨཱཡཱུཧིཏེཔི ཨེསེཝ ནཡོ. ཨིདྷ པན པཋམཾ ཨིཊྛམཛ྄ཛྷཏྟཱརམྨཎཾ དསྶེཏབྦཾ. པཙྪཱ ཨིཊྛཱརམྨཎེན ཝེདནཱ པརིཝཏྟེཏབྦཱ. ཨམྦོཔམནིཡཱམཀཐཱ པཱཀཏིཀཱ ཨེཝ. ཡནྟོཔམཱ ན ལབྦྷཏི. ‘ཀུསལཏོ པན ཙཏུནྣཾ ཉཱཎཝིཔྤཡུཏྟཱནཾ ཨཉྙཏརེན ཀམྨེ ཨཱཡཱུཧིཏེ’ཏི ཨིཏོ པཊྛཱཡ སབྦཾ ཝིཏྠཱརེཏྭཱ ཨཧེཏུཀཊྛཀཾ ཀཐེཏབྦཾ. ཨེཏྟཱཝཏཱ མཧཱདྷམྨརཀྑིཏཏྠེརཝཱདེ དསཀམགྒོ ནིཊྛིཏོ ཧོཏི, སདྡྷིཾ ཨཧེཏུཀཊྛཀེནཱཏི.

ཨིམེསཾ པན ཏིཎྞཾ ཐེརཱནཾ ཀཏརསྶ ཝཱདོ གཧེཏབྦོཏི? ན ཀསྶཙི ཨེཀཾསེན. སབྦེསཾ པན ཝཱདེསུ ཡུཏྟཾ གཧེཏབྦཾ. པཋམཝཱདསྨིཉྷི སསངྑཱརཱསངྑཱརཝིདྷཱནཾ པཙྩཡབྷེདཏོ ཨདྷིཔྤེཏཾ. ཏེནེཏྠ ¶ , ཨསངྑཱརིཀཀུསལསྶ དུབྦལཔཙྩཡེཧི ཨུཔྤནྣཾ སསངྑཱརིཀཝིཔཱཀཾ, སསངྑཱརིཀཀུསལསྶ བལཝཔཙྩཡེཧི ཨུཔྤནྣཾ ཨསངྑཱརིཀཝིཔཱཀཉྩ གཧེཏྭཱ, ལབྦྷམཱནཱནིཔི ཀིརིཡཛཝནཱནི པཧཱཡ, ཀུསལཛཝནེན ཏདཱརམྨཎཾ ཨཱརམྨཎེན ཙ ཝེདནཾ ¶ ནིཡཱམེཏྭཱ, སེཀྑཔུཐུཛྫནཝསེན སོལ༹སཀམགྒོ ཀཐིཏོ. ཡཾ པནེཏྠ ཨཀུསལཛཝནཱཝསཱནེ ཨཧེཏུཀཝིཔཱཀམེཝ ཏདཱརམྨཎཾ དསྶིཏཾ, ཏཾ ཨིཏརེསུ ན དསྶིཏམེཝ. ཏསྨཱ ཏཾ ཏཏྠ ཏེསུ ཝུཏྟཾ སཧེཏུཀཝིཔཱཀཉྩ, ཨེཏྠཱཔི སབྦམིདཾ ལབྦྷཏེཝ. ཏཏྲཱཡཾ ནཡོ – ཡདཱ ཧི ཀུསལཛཝནཱནཾ ཨནྟརནྟརཱ ཨཀུསལཾ ཛཝཏི, ཏདཱ ཀུསལཱཝསཱནེ ཨཱཙིཎྞསདིསམེཝ, ཨཀུསལཱཝསཱནེ ¶ སཧེཏུཀཾ ཏདཱརམྨཎཾ ཡུཏྟཾ. ཡདཱ ནིརནྟརཾ ཨཀུསལམེཝ ཏདཱ ཨཧེཏུཀཾ. ཨེཝཾ ཏཱཝ པཋམཝཱདེ ཡུཏྟཾ གཧེཏབྦཾ.

དུཏིཡཝཱདེ པན ཀུསལཏོ སསངྑཱརཱསངྑཱརཝིདྷཱནཾ ཨདྷིཔྤེཏཾ. ཏེནེཏྠ ཨསངྑཱརིཀཀུསལསྶ ཨསངྑཱརིཀམེཝ ཝིཔཱཀཾ, སསངྑཱརིཀཀུསལསྶ ཙ སསངྑཱརིཀམེཝ གཧེཏྭཱ, ཛཝནེན ཏདཱརམྨཎནིཡཱམཾ ཨཀཏྭཱ, སབྦེསམྤི སེཀྑཱསེཀྑཔུཐུཛྫནཱནཾ ཨུཔྤཏྟིརཧོ པིཎྜཛཝནཝསེནེཝ དྭཱདསཀམགྒོ ཀཐིཏོ. ཏིཧེཏུཀཛཝནཱཝསཱནེ པནེཏྠ ཏིཧེཏུཀཾ ཏདཱརམྨཎཾ ཡུཏྟཾ. དུཧེཏུཀཛཝནཱཝསཱནེ དུཧེཏུཀཾ, ཨཧེཏུཀཛཝནཱཝསཱནེ ཨཧེཏུཀཾ བྷཱཛེཏྭཱ པན ན ཝུཏྟཾ. ཨེཝཾ དུཏིཡཝཱདེ ཡུཏྟཾ གཧེཏབྦཾ.

ཏཏིཡཝཱདེཔི ཀུསལཏོཝ ཨསངྑཱརསསངྑཱརཝིདྷཱནཾ ཨདྷིཔྤེཏཾ. ‘ཏིཧེཏུཀཀམྨཾ ཏིཧེཏུཀཝིཔཱཀམྤི དུཧེཏུཀཝིཔཱཀམྤི ཨཧེཏུཀཝིཔཱཀམྤི དེཏཱི’ཏི པན ཝཙནཏོ ཨསངྑཱརིཀཏིཧེཏུཀཔཊིསནྡྷིཀསྶ ཨསངྑཱརིཀདུཧེཏུཀེནཔི ཏདཱརམྨཎེན བྷཝིཏབྦཾ. ཏཾ ཨདསྶེཏྭཱ ཧེཏུསདིསམེཝ ཏདཱརམྨཎཾ དསྶིཏཾ. ཏཾ པུརིམཱཡ ཧེཏུཀིཏྟནལདྡྷིཡཱ ན ཡུཛྫཏི. ཀེཝལཾ དསཀམགྒཝིབྷཱཝནཏྠམེཝ ཝུཏྟཾ. ཨིཏརམྤི པན ལབྦྷཏེཝ. ཨེཝཾ ཏཏིཡཝཱདེཔི ཡུཏྟཾ གཧེཏབྦཾ. ཨཡཉྩ སབྦཱཔི པཊིསནྡྷིཛནཀསྶེཝ ཀམྨསྶ ཝིཔཱཀཾ སནྡྷཱཡ ཏདཱརམྨཎཀཐཱ. ‘སཧེཏུཀཾ བྷཝངྒཾ ཨཧེཏུཀསྶ བྷཝངྒསྶ ཨནནྟརཔཙྩཡེན པཙྩཡོ’ཏི (པཊྛཱ. ༣.༡.༡༠༢) ཝཙནཏོ པན ནཱནཱཀམྨེན ཨཧེཏུཀཔཊིསནྡྷིཀསྶཱཔི སཧེཏུཀཝིཔཱཀཾ ཏདཱརམྨཎཾ ཨུཔྤཛྫཏི. ཏསྶ ཨུཔྤཏྟིཝིདྷཱནཾ མཧཱཔཀརཎེ ཨཱཝི བྷཝིསྶཏཱིཏི.

ཀཱམཱཝཙརཀུསལཝིཔཱཀཀཐཱ ནིཊྛིཏཱ.

རཱུཔཱཝཙརཱརཱུཔཱཝཙརཝིཔཱཀཀཐཱ

༤༩༩. ཨིདཱནི ¶ ¶ རཱུཔཱཝཙརཱདིཝིཔཱཀཾ དསྶེཏུཾ པུན ཀཏམེ དྷམྨཱ ཨབྱཱཀཏཱཏིཨཱདི ཨཱརདྡྷཾ. ཏཏྠ ཡསྨཱ ཀཱམཱཝཙརཝིཔཱཀཾ ཨཏྟནོ ཀུསལེན སདིསམྤི ཧོཏི, ཨསདིསམྤི, ཏསྨཱ ན ཏཾ ཀུསལཱནུགཏིཀཾ ཀཏྭཱ བྷཱཛིཏཾ. རཱུཔཱཝཙརཱརཱུཔཱཝཙརཝིཔཱཀཾ པན ཡཐཱ ཧཏྠིཨསྶཔབྦཏཱདཱིནཾ ཚཱཡཱ ཧཏྠིཨཱདིསདིསཱཝ ཧོནྟི, ཏཐཱ ཨཏྟནོ ཀུསལསདིསམེཝ ཧོཏཱིཏི ཀུསལཱནུགཏིཀཾ ཀཏྭཱ བྷཱཛིཏཾ. ཀཱམཱཝཙརཀམྨཉྩ ཡདཱ ཀདཱཙི ¶ ཝིཔཱཀཾ དེཏི, རཱུཔཱཝཙརཱརཱུཔཱཝཙརཾ པན ཨནནྟརཱཡེན, དུཏིཡསྨིཾཡེཝ ཨཏྟབྷཱཝེ, ཝིཔཱཀཾ དེཏཱིཏིཔི ཀུསལཱནུགཏིཀམེཝ ཀཏྭཱ བྷཱཛིཏཾ. སེསཾ ཀུསལེ ཝུཏྟནཡེནེཝ ཝེདིཏབྦཾ. ཨཡཾ པན ཝིསེསོ – པཊིཔདཱདིབྷེདོ ཙ ཧཱིནཔཎཱིཏམཛ྄ཛྷིམབྷཱཝོ ཙ ཨེཏེསུ ཛྷཱནཱགམནཏོ ཝེདིཏབྦོ. ཚནྡཱདཱིནཾ པན ཨཉྙཏརཾ དྷུརཾ ཀཏྭཱ ཨནུཔྤཱདནཱིཡཏྟཱ ནིརདྷིཔཏིཀཱནེཝ ཨེཏཱནཱིཏི.

རཱུཔཱཝཙརཱརཱུཔཱཝཙརཝིཔཱཀཀཐཱ ནིཊྛིཏཱ.

ལོཀུཏྟརཝིཔཱཀཀཐཱ

༥༠༥. ལོཀུཏྟརཝིཔཱཀམྤི ཀུསལསདིསཏྟཱ ཀུསལཱནུགཏིཀམེཝ ཀཏྭཱ བྷཱཛིཏཾ. ཡསྨཱ པན ཏེབྷཱུམཀཀུསལཾ ཙུཏིཔཊིསནྡྷིཝསེན ཝཊྚཾ ཨཱཙིནཱཏི ཝཌྜྷེཏི, ཏསྨཱ ཏཏྠ ཀཏཏྟཱ ཨུཔཙིཏཏྟཱཏི ཝུཏྟཾ. ལོཀུཏྟརཾ པན ཏེན ཨཱཙིཏམྤི ཨཔཙིནཱཏི, སཡམྤི ཙུཏིཔཊིསནྡྷིཝསེན ན ཨཱཙིནཱཏི, ཏེནེཏྠ ‘ཀཏཏྟཱ ཨུཔཙིཏཏྟཱ’ཏི ཨཝཏྭཱ ཀཏཏྟཱ བྷཱཝིཏཏྟཱཏི ཝུཏྟཾ.

སུཉྙཏནྟིཨཱདཱིསུ ‘མགྒོ’ ཏཱཝ ‘ཨཱགམནཏོ སགུཎཏོ ཨཱརམྨཎཏོཏི ཏཱིཧི ཀཱརཎེཧི ནཱམཾ ལབྷཏཱི’ཏི, ཨིདཾ ཧེཊྛཱ ཀུསལཱདྷིཀཱརེ ཝིཏྠཱརིཏཾ. ཏཏྠ སུཏྟནྟིཀཔརིཡཱཡེན སགུཎཏོཔི ཨཱརམྨཎཏོཔི ནཱམཾ ལབྷཏི. པརིཡཱཡདེསནཱ ཧེསཱ. ཨབྷིདྷམྨཀཐཱ པན ནིཔྤརིཡཱཡདེསནཱ. ཏསྨཱ ཨིདྷ སགུཎཏོ ཝཱ ཨཱརམྨཎཏོ ཝཱ ནཱམཾ ན ལབྷཏི, ཨཱགམནཏོཝ ལབྷཏི. ཨཱགམནམེཝ ཧི དྷུརཾ. ཏཾ དུཝིདྷཾ ཧོཏི – ཝིཔསྶནཱགམནཾ མགྒཱགམནནྟི.

ཏཏྠ ¶ མགྒསྶ ཨཱགཏཊྛཱནེ ཝིཔསྶནཱགམནཾ དྷུརཾ, ཕལསྶ ¶ ཨཱགཏཊྛཱནེ མགྒཱགམནཾ དྷུརནྟི, ཨིདམྤི ཧེཊྛཱ ཝུཏྟམེཝ. ཏེསུ ཨིདཾ ཕལསྶ ཨཱགཏཊྛཱནཾ, ཏསྨཱ ཨིདྷ མགྒཱགམནཾ དྷུརནྟི ཝེདིཏབྦཾ. སོ པནེས མགྒོ ཨཱགམནཏོ ‘སུཉྙཏ’ནྟི ནཱམཾ ལབྷིཏྭཱ སགུཎཏོ ཙ ཨཱརམྨཎཏོ ཙ ‘ཨནིམིཏྟོ’‘ཨཔྤཎིཧིཏོ’ཏིཔི ཝུཙྩཏི. ཏསྨཱ སཡཾ ཨཱགམནཱིཡཊྛཱནེ ཋཏྭཱ ཨཏྟནོ ཕལསྶ ཏཱིཎི ནཱམཱནི དེཏི. ཀཐཾ? ཨཡཉྷི སུདྡྷཱགམནཝསེནེཝ ལདྡྷནཱམོ ‘སུཉྙཏམགྒོ’ སཡཾ ཨཱགམནཱིཡཊྛཱནེ ཋཏྭཱ ཨཏྟནོ ཕལསྶ ནཱམཾ དདམཱནོ ‘སུཉྙཏ’ནྟི ནཱམཾ ཨཀཱསི. ‘སུཉྙཏཨནིམིཏྟམགྒོ’ སཡཾ ཨཱགམནཱིཡཊྛཱནེ ཋཏྭཱ ཨཏྟནོ ཕལསྶ ནཱམཾ དདམཱནོ ‘ཨནིམིཏྟ’ནྟི ནཱམཾ ཨཀཱསི. ‘སུཉྙཏཨཔྤཎིཧིཏམགྒོ’ སཡཾ ཨཱགམནཱིཡཊྛཱནེ ¶ ཋཏྭཱ ཨཏྟནོ ཕལསྶ ནཱམཾ དདམཱནོ ‘ཨཔྤཎིཧིཏ’ནྟི ནཱམཾ ཨཀཱསི. ཨིམཱནི པན ཏཱིཎི ནཱམཱནི མགྒཱནནྟརེ ཕལཙིཏྟསྨིཾཡེཝ ཨིམིནཱ ནཡེན ལབྦྷནྟི, ནོ ཨཔརབྷཱགེ ཝལ༹ཉྫནཀཕལསམཱཔཏྟིཡཱ. ཨཔརབྷཱགེ པན ཨནིཙྩཏཱདཱིཧི ཏཱིཧི ཝིཔསྶནཱཧི ཝིཔསྶིཏུཾ སཀྐོཏི. ཨཐསྶ ཝུཊྛིཏཝུཊྛིཏཝིཔསྶནཱཝསེན ཨནིམིཏྟཨཔྤཎིཧིཏསུཉྙཏསངྑཱཏཱནི ཏཱིཎི ཕལཱནི ཨུཔྤཛྫནྟི. ཏེསཾ ཏཱནེཝ སངྑཱརཱརམྨཎཱནི. ཨནིཙྩཱནུཔསྶནཱདཱིནི ཉཱཎཱནི ཨནུལོམཉཱཎཱནི ནཱམ ཧོནྟི.

ཡོ ཙཱཡཾ སུཉྙཏམགྒེ ཝུཏྟོ. ཨཔྤཎིཧིཏམགྒེཔི ཨེསེཝ ནཡོ. ཨཡམྤི ཧི སུདྡྷཱགམནཝསེན ལདྡྷནཱམོ ‘ཨཔྤཎིཧིཏམགྒོ’ སཡཾ ཨཱགམནཱིཡཊྛཱནེ ཋཏྭཱ ཨཏྟནོ ཕལསྶ ནཱམཾ དདམཱནོ ‘ཨཔྤཎིཧིཏ’ནྟི ནཱམཾ ཨཀཱསི. ‘ཨཔྤཎིཧིཏཨནིམིཏྟམགྒོ’ སཡཾ ཨཱགམནཱིཡཊྛཱནེ ཋཏྭཱ ཨཏྟནོ ཕལསྶ ནཱམཾ དདམཱནོ ‘ཨནིམིཏྟ’ནྟི ནཱམཾ ཨཀཱསི. ‘ཨཔྤཎིཧིཏསུཉྙཏམགྒོ’ སཡཾ ཨཱགམནཱིཡཊྛཱནེ ཋཏྭཱ ཨཏྟནོ ཕལསྶ ནཱམཾ དདམཱནོ ‘སུཉྙཏ’ནྟི ནཱམཾ ¶ ཨཀཱསི. ཨིམཱནིཔི ཏཱིཎི ནཱམཱནི མགྒཱནནྟརེ ཕལཙིཏྟསྨིཾཡེཝ ཨིམིནཱ ནཡེན ལབྦྷནྟི, ན ཨཔརབྷཱགེ ཝལ༹ཉྫནཀཕལསམཱཔཏྟིཡཱཏི. ཨེཝཾ ཨིམསྨིཾ ཝིཔཱཀནིདྡེསེ ཀུསལཙིཏྟེཧི ཏིགུཎཱནི ཝིཔཱཀཙིཏྟཱནི ཝེདིཏབྦཱནི.

ཡཐཱ པན ཏེབྷཱུམཀཀུསལཱནི ཨཏྟནོ ཝིཔཱཀཾ ཨདྷིཔཏིཾ ལབྷཱཔེཏུཾ ན སཀྐོནྟི, ན ཨེཝཾ ལོཀུཏྟརཀུསལཱནི. ཀསྨཱ? ཏེབྷཱུམཀཀུསལཱནཉྷི ཨཉྙོ ཨཱཡཱུཧནཀཱལོ ཨཉྙོ ཝིཔཙྩནཀཱལོ. ཏེན ཏཱནི ཨཏྟནོ ཝིཔཱཀཾ ཨདྷིཔཏིཾ ལབྷཱཔེཏུཾ ན སཀྐོནྟི. ལོཀུཏྟརཱནི པན ཏཱཡ སདྡྷཱཡ, ཏསྨིཾ ཝཱིརིཡེ, ཏཱཡ སཏིཡཱ, ཏསྨིཾ སམཱདྷིམྷི, ཏཱཡ པཉྙཱཡ ཨཝཱུཔསནྟཱཡ ¶ , ཨཔཎྞཀཾ ཨཝིརདྡྷཾ མགྒཱནནྟརམེཝ ཝིཔཱཀཾ པཊིལབྷནྟི, ཏེན ཨཏྟནོ ཝིཔཱཀཾ ཨདྷིཔཏིཾ ལབྷཱཔེཏུཾ སཀྐོནྟི.

ཡཐཱ ཧི པརིཏྟཀསྶ ཨགྒིནོ གཏཊྛཱནེ ཨགྒིསྨིཾ ནིབྦུཏམཏྟེཡེཝ ཨུཎྷཱཀཱརོ ནིབྦཱཡིཏྭཱ ཀིཉྩི ན ཧོཏི, མཧནྟཾ པན ཨཱདིཏྟཾ ཨགྒིཀྑནྡྷཾ ནིབྦཱཔེཏྭཱ ¶ གོམཡཔརིབྷཎྜེ ཀཏེཔི ཨུཎྷཱཀཱརོ ཨཝཱུཔསནྟོཝ ཧོཏི, ཨེཝམེཝ ཏེབྷཱུམཀཀུསལེ ཨཉྙོ ཀམྨཀྑཎོ ཨཉྙོ ཝིཔཱཀཀྑཎོ པརིཏྟཨགྒིཊྛཱནེ ཨུཎྷབྷཱཝནིབྦུཏཀཱལོ ཝིཡ ཧོཏི. ཏསྨཱ ཏཾ ཨཏྟནོ ཝིཔཱཀཾ ཨདྷིཔཏིཾ ལབྷཱཔེཏུཾ ན སཀྐོཏི. ལོཀུཏྟརེ པན ཏཱཡ སདྡྷཱཡ…པེ… ཏཱཡ པཉྙཱཡ ཨཝཱུཔསནྟཱཡ, མགྒཱནནྟརམེཝ ཕལཾ ཨུཔྤཛྫཏི, ཏསྨཱ ཏཾ ཨཏྟནོ ཝིཔཱཀཾ ཨདྷིཔཏིཾ ལབྷཱཔེཏཱིཏི ཝེདིཏབྦཾ. ཏེནཱཧུ པོརཱཎཱ – ‘ཝིཔཱཀེ ཨདྷིཔཏི ནཏྠི ཋཔེཏྭཱ ལོཀུཏྟར’ནྟི.

༥༥༥. ཙཏུཏྠཕལནིདྡེསེ ཨཉྙཱཏཱཝིནྡྲིཡནྟི ཨཉྙཱཏཱཝིནོ ཙཏཱུསུ སཙྩེསུ ནིཊྛིཏཉཱཎཀིཙྩསྶ ཨིནྡྲིཡཾ, ཨཉྙཱཏཱཝཱིནཾ ཝཱ ཙཏཱུསུ སཙྩེསུ ནིཊྛིཏཀིཙྩཱནཾ ཙཏྟཱརི སཙྩཱནི ཉཏྭཱ པཊིཝིཛ྄ཛྷིཏྭཱ ཋིཏཱནཾ དྷམྨཱནཾ ཨབྦྷནྟརེ ¶ ཨིནྡཊྛསཱདྷནེན ཨིནྡྲིཡཾ. ནིདྡེསཝཱརེཔིསྶ ཨཉྙཱཏཱཝཱིནནྟི ཨཱཛཱནིཏྭཱ ཋིཏཱནཾ. དྷམྨཱནནྟི སམྤཡུཏྟདྷམྨཱནཾ ཨབྦྷནྟརེ. ཨཉྙཱཏི ཨཱཛཱནནཱ, པཉྙཱ པཛཱནནཱཏིཨཱདཱིནི ཝུཏྟཏྠཱནེཝ. མགྒངྒཾ མགྒཔརིཡཱཔནྣནྟི ཕལམགྒསྶ ཨངྒཾ, ཕལམགྒེ ཙ པརིཡཱཔནྣནྟི ཨཏྠོ.

ཨཔིཙེཏྠ ཨིདཾ པཀིཎྞཀཾ – ཨེཀཾ ཨིནྡྲིཡཾ ཨེཀཾ ཋཱནཾ གཙྪཏི, ཨེཀཾ ཚ ཋཱནཱནི གཙྪཏི, ཨེཀཾ ཨེཀཾ ཋཱནཾ གཙྪཏི. ཨེཀཉྷི ‘ཨནཉྙཱཏཉྙསྶཱམཱིཏིནྡྲིཡཾ’ ཨེཀཾ ཋཱནཾ གཙྪཏི སོཏཱཔཏྟིམགྒཾ. ཨེཀཾ ‘ཨཉྙིནྡྲིཡཾ’ ཧེཊྛཱ ཏཱིཎི ཕལཱནི, ཨུཔརི ཏཡོ མགྒེཏི ཚ ཋཱནཱནི གཙྪཏི. ཨེཀཾ ‘ཨཉྙཱཏཱཝིནྡྲིཡཾ’ ཨེཀཾ ཋཱནཾ གཙྪཏི ཨརཧཏྟཕལཾ. སབྦེསུཔི མགྒཕལེསུ ཨཏྠཏོ ཨཊྛ ཨཊྛ ཨིནྡྲིཡཱནཱིཏི ཙཏུསཊྛི ལོཀུཏྟརིནྡྲིཡཱནི ཀཐིཏཱནི. པཱལི༹ཏོ པན ནཝ ནཝ ཀཏྭཱ དྭཱསཏྟཏི ཧོནྟི. མགྒེ མགྒངྒནྟི ཝུཏྟཾ. ཕལེཔི མགྒངྒཾ. མགྒེ བོཛ྄ཛྷངྒོཏི ཝུཏྟོ ཕལེཔི བོཛ྄ཛྷངྒོ. མགྒཀྑཎེ ཨཱརཏི ཝིརཏཱིཏི ཝུཏྟཱ ཕལཀྑཎེཔི ཨཱརཏི ཝིརཏཱིཏི. ཏཏྠ མགྒོ མགྒབྷཱཝེནེཝ མགྒོ, ཕལཾ པན མགྒཾ ཨུཔཱདཱཡ མགྒོ ནཱམ; ཕལངྒཾ ཕལཔརིཡཱཔནྣནྟི ཝཏྟུམྤི ཝཊྚཏི. མགྒེ བུཛ྄ཛྷནཀསྶ ཨངྒོཏི སམྦོཛ྄ཛྷངྒོ, ཕལེ བུདྡྷསྶ ¶ ཨངྒོཏི སམྦོཛ྄ཛྷངྒོ. མགྒེ ཨཱརམཎཝིརམཎཝསེནེཝ ཨཱརཏི ཝིརཏི. ཕལེ པན ཨཱརཏིཝིརཏིཝསེནཱཏི.

ལོཀུཏྟརཝིཔཱཀཀཐཱ ནིཊྛིཏཱ.

ཨཀུསལཝིཔཱཀཀཐཱ

༥༥༦. ཨིཏོ ¶ པརཱནི ཨཀུསལཝིཔཱཀཱནི – པཉྩ ཙཀྑུསོཏགྷཱནཛིཝ྄ཧཱཀཱཡཝིཉྙཱཎཱནི, ཨེཀཱ མནོདྷཱཏུ, ཨེཀཱ མནོཝིཉྙཱཎདྷཱཏཱུཏི ཨིམཱནི སཏྟ ཙིཏྟཱནི – པཱལི༹ཏོ ཙ ཨཏྠཏོ ཙ ཧེཊྛཱ ཝུཏྟེཧི ཏཱདིསེཧེཝ ཀུསལཝིཔཱཀཙིཏྟེཧི སདིསཱནི.

ཀེཝལཉྷི ཏཱནི ཀུསལཀམྨཔཙྩཡཱནི ཨིམཱནི ཨཀུསལཀམྨཔཙྩཡཱནི. ཏཱནི ཙ ཨིཊྛཨིཊྛམཛ྄ཛྷཏྟེསུ ཨཱརམྨཎེསུ ཝཏྟནྟི, ཨིམཱནི ཨནིཊྛཨནིཊྛམཛ྄ཛྷཏྟེསུ. ཏཏྠ ཙ སུཁསཧགཏཾ ཀཱཡཝིཉྙཱཎཾ, ཨིདྷ དུཀྑསཧགཏཾ ¶ . ཏཏྠ ཙ ཨུཔེཀྑཱསཧགཏཱ མནོཝིཉྙཱཎདྷཱཏུ མནུསྶེསུ ཛཙྩནྡྷཱདཱིནཾ པཊིསནྡྷིཾ ཨཱདིཾ ཀཏྭཱ པཉྩསུ ཋཱནེསུ ཝིཔཙྩཏི. ཨིདྷ པན ཨེཀཱདསཝིདྷེནཱཔི ཨཀུསལཙིཏྟེན ཀམྨེ ཨཱཡཱུཧིཏེ ཀམྨཀམྨནིམིཏྟགཏིནིམིཏྟེསུ ཨཉྙཏརཾ ཨཱརམྨཎཾ ཀཏྭཱ ཙཏཱུསུ ཨཔཱཡེསུ པཊིསནྡྷི ཧུཏྭཱ ཝིཔཙྩཏི; དུཏིཡཝཱརཏོ པཊྛཱཡ ཡཱཝཏཱཡུཀཾ བྷཝངྒཾ ཧུཏྭཱ, ཨནིཊྛཨནིཊྛམཛ྄ཛྷཏྟཱརམྨཎཱཡ པཉྩཝིཉྙཱཎཝཱིཐིཡཱ སནྟཱིརཎཾ ཧུཏྭཱ, བལཝཱརམྨཎེ ཚསུ དྭཱརེསུ ཏདཱརམྨཎཾ ཧུཏྭཱ, མརཎཀཱལེ ཙུཏི ཧུཏྭཱཏི, ཨེཝཾ པཉྩསུ ཨེཝ ཋཱནེསུ ཝིཔཙྩཏཱིཏི.

ཨཀུསལཝིཔཱཀཀཐཱ ནིཊྛིཏཱ.

ཀིརིཡཱབྱཱཀཏཝཎྞནཱ

མནོདྷཱཏུཙིཏྟཾ

༥༦༦. ཨིདཱནི ¶ ཀིརིཡཱབྱཱཀཏཾ བྷཱཛེཏྭཱ དསྶེཏུཾ པུན ཀཏམེ དྷམྨཱ ཨབྱཱཀཏཱཏིཨཱདི ཨཱརདྡྷཾ. ཏཏྠ ཀིརིཡཱཏི ཀརཎམཏྟཾ. སབྦེསུཡེཝ ཧི ཀིརིཡཙིཏྟེསུ ཡཾ ཛཝནབྷཱཝཾ ཨཔྤཏྟཾ ཏཾ ཝཱཏཔུཔྥཾ ཝིཡ. ཡཾ ཛཝནབྷཱཝཔྤཏྟཾ ཏཾ ཚིནྣམཱུལཀརུཀྑཔུཔྥཾ ཝིཡ ཨཕལཾ ཧོཏི, ཏཾཏཾ ཀིཙྩསཱདྷནཝསེན པཝཏྟཏྟཱ པན ཀརཎམཏྟམེཝ ཧོཏི. ཏསྨཱ ཀིརིཡཱཏི ཝུཏྟཾ. ནེཝཀུསལཱནཱཀུསལཱཏིཨཱདཱིསུ ཀུསལམཱུལསངྑཱཏསྶ ཀུསལཧེཏུནོ ཨབྷཱཝཱ ‘ནེཝཀུསལཱ’; ཨཀུསལམཱུལསངྑཱཏསྶ ཨཀུསལཧེཏུནོ ཨབྷཱཝཱ ‘ནེཝཨཀུསལཱ’; ཡོནིསོམནསིཀཱརཨཡོནིསོམནསིཀཱརསངྑཱཏཱནམྤི ¶ ཀུསལཱཀུསལཔཙྩཡཱནཾ ཨབྷཱཝཱ ‘ནེཝཀུསལཱནཱཀུསལཱ’. ཀུསལཱཀུསལསངྑཱཏསྶ ཛནཀཧེཏུནོ ཨབྷཱཝཱ ནེཝཀམྨཝིཔཱཀཱ.

ཨིདྷཱཔི ཙིཏྟསྶེཀགྒཏཱནིདྡེསེ པཝཏྟིཊྛིཏིམཏྟམེཝ ལབྦྷཏི. དྭེ པཉྩཝིཉྙཱཎཱནི, ཏིསྶོ མནོདྷཱཏུཡོ, ཏིསྶོ མནོཝིཉྙཱཎདྷཱཏུཡོ, ཝིཙིཀིཙྪཱསཧགཏནྟི ཨིམེསུ སཏྟརསསུ ཙིཏྟེསུ དུབྦལཏྟཱ སཎྛིཏི ཨཝཊྛིཏིཨཱདཱིནི ན ལབྦྷནྟི. སེསཾ སབྦཾ ཝིཔཱཀམནོདྷཱཏུནིདྡེསེ ཝུཏྟནཡེནེཝ ¶ ཝེདིཏབྦཾ, ཨཉྙཏྲ ཨུཔྤཏྟིཊྛཱནཱ. ཏཉྷི ཙིཏྟཾ པཉྩཝིཉྙཱཎཱནནྟརཾ ཨུཔྤཛྫཏི. ཨིདཾ པན པཉྩདྭཱརེ ཝལ༹ཉྫནཀཔྤཝཏྟིཀཱལེ སབྦེསཾ པུརེ ཨུཔྤཛྫཏི. ཀཐཾ? ཙཀྑུདྭཱརེ ཏཱཝ ཨིཊྛཨིཊྛམཛ྄ཛྷཏྟཨནིཊྛཨནིཊྛམཛ྄ཛྷཏྟེསུ རཱུཔཱརམྨཎེསུ ཡེན ཀེནཙི པསཱདེ གྷཊྚིཏེ ཏཾ ཨཱརམྨཎཾ གཧེཏྭཱ ཨཱཝཛྫནཝསེན པུརེཙཱརིཀཾ ཧུཏྭཱ བྷཝངྒཾ ཨཱཝཊྚཡམཱནཾ ཨུཔྤཛྫཏི. སོཏདྭཱརཱདཱིསུཔི ཨེསེཝ ནཡོཏི.

ཀིརིཡམནོདྷཱཏུཙིཏྟཾ ནིཊྛིཏཾ.

ཀིརིཡམནོཝིཉྙཱཎདྷཱཏུཙིཏྟཱནི

༥༦༨. མནོཝིཉྙཱཎདྷཱཏུ ¶ ཨུཔྤནྣཱ ཧོཏི…པེ… སོམནསྶསཧགཏཱཏི, ཨིདཾ ཙིཏྟཾ ཨཉྙེསཾ ཨསཱདྷཱརཎཾ. ཁཱིཎཱསཝསྶེཝ པཱཊིཔུགྒལིཀཾ. ཚསུ དྭཱརེསུ ལབྦྷཏི. ཙཀྑུདྭཱརེ ཧི པདྷཱནསཱརུཔྤཾ ཋཱནཾ དིསྭཱ ཁཱིཎཱསཝོ ཨིམིནཱ ཙིཏྟེན སོམནསྶིཏོ ཧོཏི. སོཏདྭཱརེ བྷཎྜབྷཱཛནཱིཡཊྛཱནཾ པཏྭཱ མཧཱསདྡཾ ཀཏྭཱ ལུདྡྷལུདྡྷེསུ གཎྷནྟེསུ ‘ཨེཝརཱུཔཱ ནཱམ མེ ལོལུཔྤཏཎྷཱ པཧཱིནཱ’ཏི ཨིམིནཱ ཙིཏྟེན སོམནསྶིཏོ ཧོཏི. གྷཱནདྭཱརེ གནྡྷེཧི ཝཱ པུཔྥེཧི ཝཱ ཙེཏིཡཾ པཱུཛེནྟོ ཨིམིནཱ ཙིཏྟེན སོམནསྶིཏོ ཧོཏི. ཛིཝ྄ཧཱདྭཱརེ རསསམྤནྣཾ པིཎྜཔཱཏཾ ལདྡྷཱ བྷཱཛེཏྭཱ པརིབྷུཉྫནྟོ ‘སཱརཎཱིཡདྷམྨོ ཝཏ མེ པཱུརིཏོ’ཏི ཨིམིནཱ ཙིཏྟེན སོམནསྶིཏོ ཧོཏི. ཀཱཡདྭཱརེ ཨབྷིསམཱཙཱརིཀཝཏྟཾ ཀརོནྟོ ‘ཀཱཡདྭཱརེ མེ ཝཏྟཾ པཱུརིཏ’ནྟི ཨིམིནཱ ཙིཏྟེན སོམནསྶིཏོ ཧོཏི. ཨེཝཾ ཏཱཝ པཉྩདྭཱརེ ལབྦྷཏི.

མནོདྭཱརེ ¶ པན ཨཏཱིཏཱནཱགཏམཱརབྦྷ ཨུཔྤཛྫཏི. ཛོཏིཔཱལམཱཎཝ(མ. ནི. ༢.༢༨༢ ཨཱདཡོ) མགྒྷདེཝརཱཛ(མ. ནི. ༢.༣༠༨ ཨཱདཡོ) ཀཎྷཏཱཔསཱདིཀཱལསྨིཉྷི (ཛཱ. ༡.༡༠.༡༡ ཨཱདཡོ) ཀཏཾ ཀཱརཎཾ ཨཱཝཛྫེཏྭཱ ཏཐཱགཏོ སིཏཾ པཱཏྭཱཀཱསི. ཏཾ པན པུབྦེནིཝཱསཉཱཎསབྦཉྙུཏཉྙཱཎཱནཾ ཀིཙྩཾ. ཏེསཾ པན དྭིནྣཾ ཉཱཎཱནཾ ཙིཎྞཔརིཡནྟེ ཨིདཾ ཙིཏྟཾ ཧཱསཡམཱནཾ ཨུཔྤཛྫཏི. ཨནཱགཏེ ‘ཏནྟིསྶརོ མུདིངྒསྶརོ ¶ པཙྩེཀབུདྡྷོ བྷཝིསྶཏཱི’ཏི སིཏཾ པཱཏྭཱཀཱསི. ཏམྤི ཨནཱགཏཾསཉཱཎསབྦཉྙུཏཉྙཱཎཱནཾ ཀིཙྩཾ. ཏེསཾ པན དྭིནྣ ཉཱཎཱནཾ ཙིཎྞཔརིཡནྟེ ཨིདཾ ཙིཏྟཾ ཧཱསཡམཱནཾ ཨུཔྤཛྫཏི.

ནིདྡེསཝཱརེ པནསྶ སེསཨཧེཏུཀཙིཏྟེཧི བལཝཏརཏཱཡ ཙིཏྟེཀགྒཏཱ སམཱདྷིབལཾ པཱཔེཏྭཱ ཋཔིཏཱ. ཝཱིརིཡམྤི ཝཱིརིཡབལཾ པཱཔེཏྭཱ. ཨུདྡེསཝཱརེ པན ‘སམཱདྷིབལཾ ཧོཏི ཝཱིརིཡབལཾ ཧོཏཱི’ཏི ཨནཱགཏཏྟཱ པརིཔུཎྞེན བལཊྛེནེཏཾ དྭཡཾ བལཾ ནཱམ ན ཧོཏི. ཡསྨཱ པན ‘ནེཝ ཀུསལཾ ནཱཀུསལཾ’ ཏསྨཱ བལནྟི ཝཏྭཱན ཋཔིཏཾ. ཡསྨཱ ཙ ན ནིཔྤརིཡཱཡེན བལཾ, ཏསྨཱ སངྒཧཝཱརེཔི ‘དྭེ བལཱནི ཧོནྟཱི’ཏི ན ཝུཏྟཾ. སེསཾ སབྦཾ སོམནསྶསཧགཏཱཧེཏུཀམནོཝིཉྙཱཎདྷཱཏུནིདྡེསེ ཝུཏྟནཡེནེཝ ཝེདིཏབྦཾ.

༥༧༤. ཨུཔེཀྑཱསཧགཏཱཏི ཨིདཾ ཙིཏྟཾ ཏཱིསུ བྷཝེསུ སབྦེསཾ སཙིཏྟཀསཏྟཱནཾ སཱདྷཱརཎཾ, ན ¶ ཀསྶཙི སཙིཏྟཀསྶ ནུཔྤཛྫཏི ནཱམ. ཨུཔྤཛྫམཱནཾ པན པཉྩདྭཱརེ ཝོཊྛབྦནཾ ཧོཏི, མནོདྭཱརེ ཨཱཝཛྫནཾ. ཚ ཨསཱདྷཱརཎཉཱཎཱནིཔི ཨིམིནཱ གཧིཏཱརམྨཎམེཝ གཎྷནྟི. མཧཱགཛཾ ནཱམེཏཾ ཙིཏྟཾ; ཨིམསྶ ཨནཱརམྨཎཾ ནཱམ ནཏྠི. ‘ཨསབྦཉྙུཏཉྙཱཎཾ སབྦཉྙུཏཉྙཱཎགཏིཀཾ ནཱམ ཀཏམ’ནྟི ཝུཏྟེ ‘ཨིད’ནྟི ཝཏྟབྦཾ. སེསམེཏྠ པུརིམཙིཏྟེ ཝུཏྟནཡེནེཝ ཝེདིཏབྦཾ. ཀེཝལཉྷི ཏཏྠ སཔྤཱིཏིཀཏྟཱ ནཝངྒིཀོ སངྑཱརཀྑནྡྷོ ཝིབྷཏྟོ. ཨིདྷ ནིཔྤཱིཏིཀཏྟཱ ཨཊྛངྒིཀོ.

ཨིདཱནི ¶ ཡཱནི ཀུསལཏོ ཨཊྛ མཧཱཙིཏྟཱནེཝ ཁཱིཎཱསཝསྶ ཨུཔྤཛྫནཏཱཡ ཀིརིཡཱནི ཛཱཏཱནི, ཏསྨཱ ཏཱནི ཀུསལནིདྡེསེ ཝུཏྟནཡེནེཝ ཝེདིཏབྦཱནི.

ཨིདྷ ཋཏྭཱ ཧསནཀཙིཏྟཱནི སམོདྷཱནེཏབྦཱནི. ཀཏི པནེཏཱནི ཧོནྟཱིཏི? ཝུཙྩཏེ ཏེརས. པུཐུཛྫནཱ ཧི ཀུསལཏོ ཙཏཱུཧི སོམནསྶསཧགཏེཧི, ཨཀུསལཏོ ཙཏཱུཧཱིཏི, ཨཊྛཧི ཙིཏྟེཧི ཧསནྟི. སེཀྑཱ ཀུསལཏོ ཙཏཱུཧི སོམནསྶསཧགཏེཧི, ཨཀུསལཏོ དྭཱིཧི དིཊྛིགཏཝིཔྤཡུཏྟེཧི སོམནསྶསཧགཏེཧཱིཏི, ཚཧི ཙིཏྟེཧི ཧསནྟི. ཁཱིཎཱསཝཱ ཀིརིཡཏོ པཉྩཧི སོམནསྶསཧགཏེཧི ཧསནྟཱིཏི.

རཱུཔཱཝཙརཱརཱུཔཱཝཙརཀིརིཡཾ

༥༧༧. རཱུཔཱཝཙརཱརཱུཔཱཝཙརཀིརིཡནིདྡེསེསུ ¶ དིཊྛདྷམྨསུཁཝིཧཱརནྟི དིཊྛདྷམྨེ, ཨིམསྨིཾཡེཝ ཨཏྟབྷཱཝེ, སུཁཝིཧཱརམཏྟཾ. ཏཏྠ ཁཱིཎཱསཝསྶ པུཐུཛྫནཀཱལེ ནིབྦཏྟིཏཱ སམཱཔཏྟི ཡཱཝ ན ནཾ སམཱཔཛྫཏི ཏཱཝ ཀུསལཱཝ སམཱཔནྣཀཱལེ ཀིརིཡཱ ཧོཏི. ཁཱིཎཱསཝཀཱལེ པནསྶ ནིབྦཏྟིཏཱ སམཱཔཏྟི ཀིརིཡཱཝ ཧོཏི. སེསཾ སབྦཾ ཏཾསདིསཏྟཱ ཀུསལནིདྡེསེ ཝུཏྟནཡེནེཝ ཝེདིཏབྦནྟི.

ཨཊྛསཱལིནིཡཱ དྷམྨསངྒཧཨཊྛཀཐཱཡ

ཙིཏྟུཔྤཱདཀཎྜཀཐཱ ནིཊྛིཏཱ.

ཨབྱཱཀཏཔདཾ པན ནེཝ ཏཱཝ ནིཊྛིཏནྟི.

ཙིཏྟུཔྤཱདཀཎྜཝཎྞནཱ ནིཊྛིཏཱ.

༢. རཱུཔཀཎྜོ

ཨུདྡེསཝཎྞནཱ

ཨིདཱནི ¶ ¶ རཱུཔཀཎྜཾ བྷཱཛེཏྭཱ དསྶེཏུཾ པུན ཀཏམེ དྷམྨཱ ཨབྱཱཀཏཱཏིཨཱདི ཨཱརདྡྷཾ. ཏཏྠ ཀིཉྩཱཔི ཧེཊྛཱ ཙིཏྟུཔྤཱདཀཎྜེ ཝིཔཱཀཱབྱཱཀཏཉྩེཝ ཀིརིཡཱབྱཱཀཏཉྩ ནིསྶེསཾ ཀཏྭཱ བྷཱཛིཏཾ, རཱུཔཱབྱཱཀཏནིབྦཱནཱབྱཱཀཏཱནི པན ཨཀཐིཏཱནི, ཏཱནི ཀཐེཏུཾ ཙཏུབྦིདྷམྤི ཨབྱཱཀཏཾ སམོདྷཱནེཏྭཱ དསྶེནྟོ ཀུསལཱཀུསལཱནཾ དྷམྨཱནཾ ཝིཔཱཀཱཏིཨཱདིམཱཧ. ཏཏྠ ཀུསལཱཀུསལཱནནྟི ཙཏུབྷཱུམཀཀུསལཱནཉྩེཝ ཨཀུསལཱནཉྩ. ཨེཝཾ ཏཱཝ ཝིཔཱཀཱབྱཱཀཏཾ ཀུསལཝིཔཱཀཱཀུསལཝིཔཱཀཝསེན དྭཱིཧི པདེཧི པརིཡཱདིཡིཏྭཱ དསྶིཏཾ. ཡསྨཱ པན ཏཾ སབྦམྤི ཀཱམཱཝཙརཾ ཝཱ ཧོཏི, རཱུཔཱཝཙརཱདཱིསུ ཝཱ ཨཉྙཏརཾ, ཏསྨཱ ‘ཀཱམཱཝཙརཱ’ཏིཨཱདིནཱ ནཡེན ཏདེཝ ཝིཔཱཀཱབྱཱཀཏཾ བྷཱུམནྟརཝསེན པརིཡཱདིཡིཏྭཱ དསྶིཏཾ. ཡསྨཱ པན ཏཾ ཝེདནཱཀྑནྡྷོཔི ཧོཏི…པེ… ཝིཉྙཱཎཀྑནྡྷོཔི, ཏསྨཱ པུན སམྤཡུཏྟཙཏུཀྑནྡྷཝསེན པརིཡཱདིཡིཏྭཱ དསྶིཏཾ.

ཨེཝཾ ཝིཔཱཀཱབྱཱཀཏཾ ཀུསལཱཀུསལཝསེན བྷཱུམནྟརཝསེན སམྤཡུཏྟཀྑནྡྷཝསེནཱཏི ཏཱིཧི ནཡེཧི པརིཡཱདཱཡ དསྶེཏྭཱ, པུན ཀིརིཡཱབྱཱཀཏཾ ¶ དསྶེནྟོ ཡེ ཙ དྷམྨཱ ཀིརིཡཱཏིཨཱདིམཱཧ. ཏཏྠ ‘ཀཱམཱཝཙརཱ རཱུཔཱཝཙརཱ ཨརཱུཔཱཝཙརཱ ཝེདནཱཀྑནྡྷོ…པེ… ཝིཉྙཱཎཀྑནྡྷོ’ཏི ཝཏྟབྦཾ བྷཝེཡྻ. ཧེཊྛཱ པན གཧིཏམེཝཱཏི ནཡཾ དསྶེཏྭཱ ནིསྶཛྫིཏཾ. ཨིདཱནི ཨཝིབྷཏྟཾ དསྶེནྟོ སབྦཉྩ རཱུཔཾ ཨསངྑཏཱ ཙ དྷཱཏཱུཏི ཨཱཧ. ཏཏྠ ‘སབྦཉྩ རཱུཔ’ནྟི པདེན པཉྩཝཱིསཏི རཱུཔཱནི ཚནྣཝུཏིརཱུཔཀོཊྛཱསཱ ནིཔྤདེསཏོ གཧིཏཱཏི ཝེདིཏབྦཱ. ‘ཨསངྑཏཱ ཙ ¶ དྷཱཏཱུ’ཏི པདེན ནིབྦཱནཾ ནིཔྤདེསཏོ གཧིཏནྟི. ཨེཏྟཱཝཏཱ ‘ཨབྱཱཀཏཱ དྷམྨཱ’ཏི པདཾ ནིཊྛིཏཾ ཧོཏི.

༥༨༤. ཏཏྠ ཀཏམཾ སབྦཾ རཱུཔནྟི ཨིདཾ ཀསྨཱ གཧིཏཾ? ཧེཊྛཱ རཱུཔཱབྱཱཀཏཾ སངྑེཔེན ཀཐིཏཾ. ཨིདཱནི ཏཾ ཨེཀཀདུཀཏིཀཙཏུཀྐ…པེ… ཨེཀཱདསཀཝསེན ཝིཏྠཱརཏོ བྷཱཛེཏྭཱ དསྶེཏུཾ ཨིདཾ གཧིཏཾ. ཏསྶཏྠོ – ཡཾ ཝུཏྟཾ ‘སབྦཉྩ རཱུཔཾ, ཨསངྑཏཱ ཙ དྷཱཏཱུ’ཏི, ཏསྨིཾ པདདྭཡེ ‘ཀཏམཾ སབྦཾ རཱུཔཾ ནཱམ’? ཨིདཱནི ཏཾ དསྶེནྟོ ཙཏྟཱརོ ཙ མཧཱབྷཱུཏཱཏིཨཱདིམཱཧ ¶ . ཏཏྠ ཙཏྟཱརོཏི གཎནཔརིཙྪེདོ. ཏེན ཏེསཾ ཨཱུནཱདྷིཀབྷཱཝཾ ནིཝཱརེཏི. ‘ཙ’-སདྡོ སམྤིཎྜནཏྠོ. ཏེན ན ཀེཝལཾ ‘ཙཏྟཱརོ མཧཱབྷཱུཏཱཝ’ རཱུཔཾ, ཨཉྙམྤི ཨཏྠཱིཏི ‘ཨུཔཱདཱརཱུཔཾ’ སམྤིཎྜེཏི.

མཧཱབྷཱུཏཱཏི ཨེཏྠ མཧནྟཔཱཏུབྷཱཝཱདཱིཧི ཀཱརཎེཧི མཧཱབྷཱུཏཏཱ ཝེདིཏབྦཱ. ཨེཏཱནི ཧི མཧནྟཔཱཏུབྷཱཝཏོ, མཧཱབྷཱུཏསཱམཉྙཏོ, མཧཱཔརིཧཱརཏོ, མཧཱཝིཀཱརཏོ, མཧནྟབྷཱུཏཏྟཱ ཙཱཏི ཨིམེཧི ཀཱརཎེཧི མཧཱབྷཱུཏཱནཱིཏི ཝུཙྩནྟི. ཏཏྠ ‘མཧནྟཔཱཏུབྷཱཝཏོ’ཏི, ཨེཏཱནི ཧི ཨནུཔཱདིནྣཀསནྟཱནེཔི ཨུཔཱདིནྣཀསནྟཱནེཔི མཧནྟཱནི པཱཏུབྷཱུཏཱནི. ཏེསཾ ཨནུཔཱདིནྣཀསནྟཱནེ ཨེཝཾ མཧནྟཔཱཏུབྷཱཝཏཱ ཝེདིཏབྦཱ – ཨེཀཉྷི ཙཀྐཝཱལ༹ཾ ཨཱཡཱམཏོ ཙ ཝིཏྠཱརཏོ ཙ ཡོཛནཱནཾ དྭཱདས སཏསཧསྶཱནི ཏཱིཎི སཧསྶཱནི ཙཏྟཱརི སཏཱནི པཉྙཱསཉྩ ཡོཛནཱནི. པརིཀྑེཔཏོ –

སབྦཾ ¶ སཏསཧསྶཱནི, ཚཏྟིཾས པརིམཎྜལཾ;

དས ཙེཝ སཧསྶཱནི, ཨཌྜྷུཌྜྷཱནི སཏཱནི ཙ. (པཱརཱ. ཨཊྛ. ༡.༡; ཝིསུདྡྷི. ༡.༡༣༧);

ཏཏྠ –

དུཝེ སཏསཧསྶཱནི, ཙཏྟཱརི ནཧུཏཱནི ཙ;

ཨེཏྟཀཾ བཧལཏྟེན, སངྑཱཏཱཡཾ ཝསུནྡྷརཱ. (པཱརཱ. ཨཊྛ. ༡.༡; ཝིསུདྡྷི. ༡.༡༣༧);

ཏསྶཱཡེཝ སནྡྷཱརཀཾ –

ཙཏྟཱརི ¶ སཏསཧསྶཱནི, ཨཊྛེཝ ནཧུཏཱནི ཙ;

ཨེཏྟཀཾ བཧལཏྟེན, ཛལཾ ཝཱཏེ པཏིཊྛིཏཾ.

ཏསྶཱཔི སནྡྷཱརཀོ –

ནཝསཏསཧསྶཱནི, མཱལུཏོ ནབྷམུགྒཏོ;

སཊྛི ཙེཝ སཧསྶཱནི, ཨེསཱ ལོཀསྶ སཎྛིཏི.

ཨེཝཾ སཎྛིཏེ ཙེཏྠ ཡོཛནཱནཾ –

ཙཏུརཱསཱིཏིསཧསྶཱནི, ཨཛ྄ཛྷོགཱལ༹ྷོ མཧཎྞཝེ;

ཨཙྩུགྒཏོ ཏཱཝདེཝ, སིནེརུ པབྦཏུཏྟམོ.

ཏཏོ ¶ ཨུཔཌྜྷུཔཌྜྷེན, པམཱཎེན ཡཐཱཀྐམཾ;

ཨཛ྄ཛྷོགཱལ༹ྷུགྒཏཱ དིབྦཱ, ནཱནཱརཏནཙིཏྟིཏཱ.

ཡུགནྡྷརོ ཨཱིསདྷརོ, ཀརཝཱིཀོ སུདསྶནོ;

ནེམིནྡྷརོ ཝིནཏཀོ, ཨསྶཀཎྞོ གིརི བྲཧཱ.

ཨེཏེ སཏྟ མཧཱསེལཱ, སིནེརུསྶ སམནྟཏོ;

མཧཱརཱཛཱནམཱཝཱསཱ དེཝཡཀྑནིསེཝིཏཱ.

ཡོཛནཱནཾ སཏཱནུཙྩོ, ཧིམཝཱ པཉྩ པབྦཏོ;

ཡོཛནཱནཾ སཧསྶཱནི, ཏཱིཎི ཨཱཡཏཝིཏྠཏོ;

ཙཏུརཱསཱིཏིསཧསྶེཧི, ཀཱུཊེཧི པཊིམཎྜིཏོ.

ཏིཔཉྩཡོཛནཀྑནྡྷཔརིཀྑེཔཱ ནགཝ྄ཧཡཱ;

པཉྙཱསཡོཛནཀྑནྡྷསཱཁཱཡཱམཱ སམནྟཏོ.

སཏཡོཛནཝིཏྠིཎྞཱ ¶ , ཏཱཝདེཝ ཙ ཨུགྒཏཱ;

ཛམྦཱུ ཡསྶཱནུབྷཱཝེན, ཛམྦུདཱིཔོ པཀཱསིཏོ. (པཱརཱ. ཨཊྛ. ༡.༡; ཝིསུདྡྷི. ༡.༡༣༧);

ཡཉྩེཏཾ ཛམྦུཡཱ པམཱཎཾ ཏདེཝ ཨསུརཱནཾ ཙིཏྟཔཱཊལིཡཱ, གརུལཱ༹ནཾ སིམྦལིརུཀྑསྶ, ཨཔརགོཡཱནེ ཀདམྦརུཀྑསྶ, ཨུཏྟརཀུརུམྷི ཀཔྤརུཀྑསྶ, པུབྦཝིདེཧེ སིརཱིསསྶ, ཏཱཝཏིཾསེསུ པཱརིཙྪཏྟཀསྶཱཏི. ཏེནཱཧུ ¶ པོརཱཎཱ –

པཱཊལཱི སིམྦལཱི ཛམྦཱུ, དེཝཱནཾ པཱརིཙྪཏྟཀོ;

ཀདམྦོ ཀཔྤརུཀྑོ ཙ, སིརཱིསེན བྷཝཏི སཏྟམནྟི.

དྭེཨསཱིཏིསཧསྶཱནི, ཨཛ྄ཛྷོགཱལ༹ྷོ མཧཎྞཝེ;

ཨཙྩུགྒཏོ ཏཱཝདེཝ, ཙཀྐཝཱལ༹སིལུཙྩཡོ;

པརིཀྑིཔིཏྭཱ ཏཾ སབྦཾ, ལོཀདྷཱཏུམཡཾ ཋིཏོཏི.

ཨུཔཱདིནྣཀསནྟཱནེཔི མཙྪཀཙྪཔདེཝདཱནཝཱདིསརཱིརཝསེན མཧནྟཱནེཝ པཱཏུབྷཱུཏཱནི. ཝུཏྟཉྷེཏཾ བྷགཝཏཱ – ‘‘སནྟི, བྷིཀྑཝེ, མཧཱསམུདྡེ ཡོཛནསཏིཀཱཔི ཨཏྟབྷཱཝཱཏི’’ཨཱདི.

‘མཧཱབྷཱུཏསཱམཉྙཏོ’ཏི ¶ ཨེཏཱནི ཧི ཡཐཱ མཱཡཱཀཱརོ ཨམཎིཾཡེཝ ཨུདཀཾ མཎིཾ ཀཏྭཱ དསྶེཏི, ཨསུཝཎྞཾཡེཝ ལེཌྜུཾ སུཝཎྞཾ ཀཏྭཱ དསྶེཏི, ཡཐཱ ཙ སཡཾ ནེཝ ཡཀྑོ ན པཀྑཱི སམཱནོ ཡཀྑབྷཱཝམྤི པཀྑིབྷཱཝམྤི དསྶེཏི, ཨེཝམེཝ སཡཾ ཨནཱིལཱནེཝ ཧུཏྭཱ ནཱིལཾ ཨུཔཱདཱརཱུཔཾ དསྶེནྟི, ཨཔཱིཏཱནི… ཨལོཧིཏཱནི… ཨནོདཱཏཱནེཝ ཧུཏྭཱ ཨོདཱཏཾ ཨུཔཱདཱརཱུཔཾ དསྶེནྟཱིཏི མཱཡཱཀཱརམཧཱབྷཱུཏསཱམཉྙཏོ མཧཱབྷཱུཏཱནི. ཡཐཱ ཙ ཡཀྑཱདཱིནི མཧཱབྷཱུཏཱནི ཡཾ གཎྷནྟི ནེཝ ཏེསཾ ཏསྶ ཨནྟོ ན བཧིཋཱནཾ ཨུཔལབྦྷཏི, ན ཙ ཏཾ ནིསྶཱཡ ན ཏིཊྛནྟི, ཨེཝམེཝ ཨེཏཱནིཔི ནེཝ ཨཉྙམཉྙསྶ ཨནྟོ ན བཧི ཋིཏཱནི ཧུཏྭཱ ཨུཔལབྦྷནྟི, ན ཙ ཨཉྙམཉྙཾ ནིསྶཱཡ ན ཏིཊྛནྟཱིཏི. ཨཙིནྟེཡྻཊྛཱནཏཱཡ ཡཀྑཱདིམཧཱབྷཱུཏསཱམཉྙཏོཔི མཧཱབྷཱུཏཱནི.

ཡཐཱ ཙ ཡཀྑིནཱིསངྑཱཏཱནི མཧཱབྷཱུཏཱནི མནཱཔེཧི ཝཎྞསཎྛཱནཝིཀྑེཔེཧི ཨཏྟནོ བྷཡཱནཀབྷཱཝཾ ¶ པཊིཙྪཱདེཏྭཱ སཏྟེ ཝཉྩེནྟི, ཨེཝམེཝ ཨེཏཱནིཔི ཨིཏྠིཔུརིསསརཱིརཱདཱིསུ མནཱཔེན ཚཝིཝཎྞེན, མནཱཔེན ཨངྒཔཙྩངྒསཎྛཱནེན, མནཱཔེན ཙ ཧཏྠཔཱདངྒུལིབྷམུཀཝིཀྑེཔེན ཨཏྟནོ ཀཀྑལ༹ཏཱདིབྷེདཾ སརསལཀྑཎཾ པཊིཙྪཱདེཏྭཱ བཱལཛནཾ ཝཉྩེནྟི, ཨཏྟནོ སབྷཱཝཾ དཊྛུཾ ན དེནྟི. ཨིཏི ཝཉྩཀཊྛེན ཡཀྑིནཱིམཧཱབྷཱུཏསཱམཉྙཏོཔི མཧཱབྷཱུཏཱནི.

‘མཧཱཔརིཧཱརཏོ’ཏི ¶ མཧནྟེཧི པཙྩཡེཧི པརིཧརིཏབྦཏོ. ཨེཏཱནི ཧི དིཝསེ དིཝསེ ཨུཔནེཏབྦཏྟཱ མཧནྟེཧི གྷཱསཙྪཱདནཱདཱིཧི བྷཱུཏཱནི པཝཏྟཱནཱིཏི མཧཱབྷཱུཏཱནི. མཧཱཔརིཧཱརཱནི ཝཱ བྷཱུཏཱནཱིཏི མཧཱབྷཱུཏཱནི.

‘མཧཱཝིཀཱརཏོ’ཏི བྷཱུཏཱནཾ མཧཱཝིཀཱརཏོ. ཨེཏཱནི ཧི ཨུཔཱདིཎྞཱནིཔི ཨནུཔཱདིཎྞཱནིཔི མཧཱཝིཀཱརཱནི ཧོནྟི. ཏཏྠ ཨནུཔཱདིཎྞཱནཾ ཀཔྤཝུཊྛཱནེ ཝིཀཱརམཧཏྟཾ པཱཀཊཾ ཧོཏི, ཨུཔཱདིཎྞཱནཾ དྷཱཏུཀྑོབྷཀཱལེ. ཏཐཱ ཧི –

བྷཱུམིཏོ ཝུཊྛིཏཱ ཡཱཝ, བྲཧྨལོཀཱ ཝིདྷཱཝཏི;

ཨཙྩི ཨཙྩིམཏོ ལོཀེ, དཡ྄ཧམཱནམྷི ཏེཛསཱ.

ཀོཊིསཏསཧསྶེཀཾ, ཙཀྐཝཱལ༹ཾ ཝིལཱིཡཏི;

ཀུཔིཏེན ཡདཱ ལོཀོ, སལིལེན ཝིནསྶཏི.

ཀོཊིསཏསཧསྶེཀཾ ¶ , ཙཀྐཝཱལ༹ཾ ཝིཀཱིརཏི;

ཝཱཡོདྷཱཏུཔྤཀོཔེན, ཡདཱ ལོཀོ ཝིནསྶཏི.

པཏྠདྡྷོ བྷཝཏི ཀཱཡོ, དཊྛོ ཀཊྛམུཁེན ཝཱ;

པཐཝཱིདྷཱཏུཔྤཀོཔེན, ཧོཏི ཀཊྛམུཁེཝ སོ.

པཱུཏིཡོ བྷཝཏི ཀཱཡོ, དཊྛོ པཱུཏིམུཁེན ཝཱ;

ཨཱཔོདྷཱཏུཔྤཀོཔེན, ཧོཏི པཱུཏིམུཁེཝ སོ.

སནྟཏྟོ ¶ བྷཝཏི ཀཱཡོ, དཊྛོ ཨགྒིམུཁེན ཝཱ;

ཏེཛོདྷཱཏུཔྤཀོཔེན, ཧོཏི ཨགྒིམུཁེཝ སོ.

སཉྪིནྣོ བྷཝཏི ཀཱཡོ, དཊྛོ སཏྠམུཁེན ཝཱ;

ཝཱཡོདྷཱཏུཔྤཀོཔེན, ཧོཏི སཏྠམུཁེཝ སོ. (སཾ. ནི. ཨཊྛ. ༣.༤.༢༣༨);

ཨིཏི མཧཱཝིཀཱརཱནི བྷཱུཏཱནཱིཏི མཧཱབྷཱུཏཱནི.

‘མཧནྟབྷཱུཏཏྟཱ ཙཱ’ཏི ཨེཏཱནི ཧི མཧནྟཱནི མཧཏཱ ཝཱཡཱམེན པརིགྒཧེཏབྦཏྟཱ, བྷཱུཏཱནི ཝིཛྫམཱནཏྟཱཏི, མཧནྟབྷཱུཏཏྟཱ ཙ མཧཱབྷཱུཏཱནི. ཨེཝཾ མཧནྟཔཱཏུབྷཱཝཱདཱིཧི ཀཱརཎེཧི མཧཱབྷཱུཏཱནི.

ཙཏུནྣཉྩ མཧཱབྷཱུཏཱནཾ ཨུཔཱདཱཡ རཱུཔནྟི ཨུཔཡོགཏྠེ སཱམིཝཙནཾ. ཙཏྟཱརི མཧཱབྷཱུཏཱནི ཨུཔཱདཱཡ, ནིསྶཱཡ, ཨམུཉྩིཏྭཱ པཝཏྟརཱུཔནྟི ཨཏྠོ. ཨིདཾ ཝུཙྩཏི སབྦཾ རཱུཔནྟི ཨིདཾ ཙཏྟཱརི མཧཱབྷཱུཏཱནི, པདཔཊིཔཱཊིཡཱ ནིདྡིཊྛཱནི ཏེཝཱིསཏི ཨུཔཱདཱརཱུཔཱནཱིཏི, སཏྟཝཱིསཏིཔྤབྷེདཾ སབྦཾ རཱུཔཾ ནཱམ.

ཨེཀཝིདྷརཱུཔསངྒཧོ

ཨིདཱནི ¶ ཏཾ ཝིཏྠཱརཏོ དསྶེཏུཾ ཨེཀཝིདྷཱདཱིཧི ཨེཀཱདསཧི སངྒཧེཧི མཱཏིཀཾ ཋཔེནྟོ སབྦཾ རཱུཔཾ ན ཧེཏཱུཏིཨཱདིམཱཧ.

ཏཏྠ ‘སབྦཾ རཱུཔ’ནྟི ཨིདཾ པདཾ ‘སབྦཾ རཱུཔཾ ན ཧེཏུ’ ‘སབྦཾ རཱུཔཾ ཨཧེཏུཀ’ནྟི ཨེཝཾ སབྦཔདེཧི སདྡྷིཾ ཡོཛེཏབྦཾ. སབྦཱནེཝ ཙེཏཱནི ‘ན ཧེཏཱུ’ཏིཨཱདཱིནི ཏེཙཏྟཱལཱིསཔདཱནི ཨུདྡིཊྛཱནི. ཏེསུ པཊིཔཱཊིཡཱ ཙཏྟཱལཱིསཔདཱནི མཱཏིཀཏོ གཧེཏྭཱ ཋཔིཏཱནི, ཨཝསཱནེ ཏཱིཎི མཱཏིཀཱམུཏྟཀཱནཱིཏི. ཨེཝཾ ཏཱཝ པཋམེ སངྒཧེ པཱལི༹ཝཝཏྠཱནམེཝ ཝེདིཏབྦཾ. ཏཐཱ དུཏིཡསངྒཧཱདཱིསུ.

དུཝིདྷརཱུཔསངྒཧོ

ཏཏྲཱཡཾ ¶ ¶ ནཡོ – དུཏིཡསངྒཧེ ཏཱཝ སཏཾ ཙཏྟཱརོ ཙ དུཀཱ. ཏཏྠ ཨཏྠི རཱུཔཾ ཨུཔཱདཱ, ཨཏྠི རཱུཔཾ ནོཨུཔཱདཱཏིཨཱདཡོ ཨཱདིམྷི ཙུདྡས དུཀཱ ཨཉྙམཉྙསམྦནྡྷཱབྷཱཝཏོ པཀིཎྞཀདུཀཱ ནཱམ. ཏཏོ ཨཏྠི རཱུཔཾ ཙཀྑུསམྥསྶསྶ ཝཏྠཱུཏིཨཱདཡོ པཉྩཝཱིསཏི དུཀཱ ཝཏྠུཨཝཏྠུཨུཔཔརིཀྑཎཝསེན པཝཏྟཏྟཱ ཝཏྠུདུཀཱ ནཱམ. ཏཏོ ཨཏྠི རཱུཔཾ ཙཀྑུསམྥསྶསྶ ཨཱརམྨཎནྟིཨཱདཡོ པཉྩཝཱིསཏི ཨཱརམྨཎཱནཱརམྨཎཨུཔཔརིཀྑཎཝསེན པཝཏྟཏྟཱ ཨཱརམྨཎདུཀཱ ནཱམ. ཏཏོ ཨཏྠི རཱུཔཾ ཙཀྑཱཡཏནནྟི ཨཱདཡོ དས ཨཱཡཏནཱནཱཡཏནཨུཔཔརིཀྑཎཝསེན པཝཏྟཏྟཱ ཨཱཡཏནདུཀཱ ནཱམ. ཏཏོ ཨཏྠི རཱུཔཾ ཙཀྑུདྷཱཏཱུཏིཨཱདཡོ དས དྷཱཏུཨདྷཱཏུཨུཔཔརིཀྑཎཝསེན པཝཏྟཏྟཱ དྷཱཏུདུཀཱ ནཱམ. ཏཏོ ཨཏྠི རཱུཔཾ ཙཀྑུནྡྲིཡནྟིཨཱདཡོ ཨཊྛ ཨིནྡྲིཡཱནིནྡྲིཡཨུཔཔརིཀྑཎཝསེན པཝཏྟཏྟཱ ཨིནྡྲིཡདུཀཱ ནཱམ. ཏཏོ ཨཏྠི རཱུཔཾ ཀཱཡཝིཉྙཏྟཱིཏིཨཱདཡོ དྭཱདས སུཁུམཱསུཁུམརཱུཔཨུཔཔརིཀྑཎཝསེན པཝཏྟཏྟཱ སུཁུམརཱུཔདུཀཱ ནཱམཱཏི. ཨིདཾ དུཏིཡསངྒཧེ པཱལི༹ཝཝཏྠཱནཾ.

ཏིཝིདྷརཱུཔསངྒཧོ

༥༨༥. ཏཏིཡསངྒཧེ སཏཾ ཏཱིཎི ཙ ཏིཀཱནི. ཏཏྠ དུཏིཡསངྒཧེ ཝུཏྟེསུ ཙུདྡསསུ པཀིཎྞཀདུཀེསུ ཨེཀཾ ཨཛ྄ཛྷཏྟིཀདུཀཾ སེསེཧི ཏེརསཧི ཡོཛེཏྭཱ ཡཾ ཏཾ རཱུཔཾ ཨཛ྄ཛྷཏྟིཀཾ ཏཾ ཨུཔཱདཱ; ཡཾ ཏཾ རཱུཔཾ བཱཧིརཾ ཏཾ ཨཏྠི ཨུཔཱདཱ ¶ , ཨཏྠི ནོཨུཔཱདཱཏིཨཱདིནཱ ནཡེན ཋཔིཏཱ ཏེརས པཀིཎྞཀཏིཀཱ ནཱམ. ཏཏོ ཏམེཝ དུཀཾ སེསདུཀེཧི སདྡྷིཾ ཡོཛེཏྭཱ ཡཾ ཏཾ རཱུཔཾ བཱཧིརཾ ཏཾ ཙཀྑུསམྥསྶསྶ ན ཝཏྠུ, ཡཾ ཏཾ རཱུཔཾ ཨཛ྄ཛྷཏྟིཀཾ ཏཾ ཨཏྠི ཙཀྑུསམྥསྶསྶ ཝཏྠུ, ཨཏྠི ཙཀྑུསམྥསྶསྶ ན ཝཏྠཱུཏིཨཱདིནཱ ནཡེན སེསཏིཀཱ ཋཔིཏཱ. ཏེསཾ ནཱམཉྩ གཎནཱ ཙ ཏེསཾཡེཝ ཝཏྠུདུཀཱདཱིནཾ ཝསེན ཝེདིཏབྦཱཏི. ཨིདཾ ཏཏིཡསངྒཧེ པཱལི༹ཝཝཏྠཱནཾ.

ཙཏུབྦིདྷཱདིརཱུཔསངྒཧཱ

༥༨༦. ཙཏུཏྠསངྒཧེ དྭཱཝཱིསཏི ཙཏུཀྐཱ. ཏཏྠ སབྦཔཙྪིམོ ཨཏྠི རཱུཔཾ ཨུཔཱདཱ ཨཏྠི རཱུཔཾ ནོཨུཔཱདཱཏི ཨེཝཾ ཨིདྷ ཝུཏྟཾ མཱཏིཀཾ ཨནཱམསིཏྭཱ ཋཔིཏོ ¶ . ཨིཏརེ པན ཨཱམསིཏྭཱ ཋཔིཏཱ. ཀཐཾ? ཡེ ཏཱཝ ཨིདྷ དུཝིདྷསངྒཧེ པཀིཎྞཀེསུ ཨཱདིཏོ ཏཡོ དུཀཱ, ཏེསུ ཨེཀེཀཾ གཧེཏྭཱ ¶ ཡཾ ཏཾ རཱུཔཾ ཨུཔཱདཱ ཏཾ ཨཏྠི ཨུཔཱདིཎྞཾ, ཨཏྠི ཨནུཔཱདིཎྞནྟིཨཱདིནཱ ནཡེན པཉྩཧི པཉྩཧི དུཀེཧི སདྡྷིཾ ཡོཛེཏྭཱ དུཀཏྟཡམཱུལཀཱ ཨཱདིམྷི པཉྩདས ཙཏུཀྐཱ ཋཔིཏཱ.

ཨིདཱནི ཡོ ཡཾ ཙཏུཀྐོ སནིདསྶནདུཀོ སོ ཡསྨཱ ཡཾ ཏཾ རཱུཔཾ སནིདསྶནཾ ཏཾ ཨཏྠི སཔྤཊིགྷཾ, ཨཏྠི ཨཔྤཊིགྷནྟིཨཱདིནཱ ནཡེན པརེཧི ཝཱ, ཨཏྠི ཨུཔཱདཱ ཨཏྠི ནོཨུཔཱདཱཏིཨཱདིནཱ ནཡེན པུརིམེཧི ཝཱ, དུཀེཧི སདྡྷིཾ ཨཏྠཱབྷཱཝཏོ ཀམཱབྷཱཝཏོ ཝིསེསཱབྷཱཝཏོ ཙ ཡོགཾ ན གཙྪཏི. སནིདསྶནཉྷི ‘ཨཔྤཊིགྷཾ’ ནཱམ, ‘ནོ ཨུཔཱདཱ’ ཝཱ ནཏྠཱིཏི ཨཏྠཱབྷཱཝཏོ ཡོགཾ ན གཙྪཏི. ‘ཨུཔཱདིཎྞཾ པན ཨནུཔཱདིཎྞཉྩ ཨཏྠི ཏཾ ཀམཱབྷཱཝཱ ཡོགཾ ན གཙྪཏི. སབྦདུཀཱ ཧི པཙྪིམཔཙྪིམེཧེཝ སདྡྷིཾ ཡོཛིཏཱ. ཨཡམེཏྠ ཀམོ. པུརིམེཧི པན སདྡྷིཾ ཀམཱབྷཱཝོཏི. ‘སཏི ཨཏྠེ ཀམཱབྷཱཝོ ཨཀཱརཎཾ. ཏསྨཱ ཨུཔཱདིཎྞཔདཱདཱིཧི སདྡྷིཾ ཡོཛེཏབྦོ’ཏི ཙེ – ན, ཝིསེསཱབྷཱཝཱ; ཨུཔཱདིཎྞཔདཱདཱིནི ཧི ཨིམིནཱ སདྡྷིཾ ཡོཛིཏཱནི. ཏཏྠ ‘ཨུཔཱདིཎྞཾ ཝཱ སནིདསྶནཾ, སནིདསྶནཾ ཝཱ ཨུཔཱདིཎྞ’ནྟི ཝུཏྟེ ཝིསེསོ ནཏྠཱིཏི ཝིསེསཱབྷཱཝཱཔི ཡོགཾ ན གཙྪཏི. ཏསྨཱ ཏཾ ཙཏུཏྠདུཀཾ ཨནཱམསིཏྭཱ, ཏཏོ པརེཧི ཨཏྠི རཱུཔཾ སཔྤཊིགྷནྟིཨཱདཱིཧི ཏཱིཧི དུཀེཧི སདྡྷིཾ ‘ཡཾ ¶ ཏཾ རཱུཔཾ སཔྤཊིགྷཾ ཏཾ ཨཏྠི ཨིནྡྲིཡཾ, ཨཏྠི ན ཨིནྡྲིཡཾ, ཡཾ ཏཾ རཱུཔཾ ཨཔྤཊིགྷཾ ཏཾ ཨཏྠི ཨིནྡྲིཡཾ, ཨཏྠི ན ཨིནྡྲིཡ’ནྟིཨཱདིནཱ ནཡེན ཡུཛྫམཱནེ དྭེ དྭེ དུཀེ ཡོཛེཏྭཱ ཚ ཙཏུཀྐཱ ཋཔིཏཱ.

ཡཐཱ ཙཱཡཾ ཙཏུཏྠདུཀོ ཡོགཾ ན གཙྪཏི, ཏཐཱ ཏེན སདྡྷིཾ ཨཱདིདུཀོཔི. ཀསྨཱ? ཨནུཔཱདཱརཱུཔསྶ ཨེཀནྟེན ཨནིདསྶནཏྟཱ. སོ ཧི ཡཾ ཏཾ རཱུཔཾ ནོཨུཔཱདཱ ཏཾ ཨཏྠི སནིདསྶནཾ, ཨཏྠི ཨནིདསྶནནྟི – ཨེཝཾ ཙཏུཏྠེན དུཀེན སདྡྷིཾ ཡོཛིཡམཱནོ ཡོགཾ ན གཙྪཏི. ཏསྨཱ ཏཾ ཨཏིཀྐམིཏྭཱ པཉྩམེན སཧ ཡོཛིཏོ. ཨེཝཾ ཡོ ཡེན སདྡྷིཾ ཡོགཾ གཙྪཏི, ཡོ ཙ ན གཙྪཏི སོ ཝེདིཏབྦོཏི. ཨིདཾ ཙཏུཏྠསངྒཧེ པཱལི༹ཝཝཏྠཱནཾ. ཨིཏོ པརེ པན པཉྩཝིདྷསངྒཧཱདཡོ སཏྟ སངྒཧཱ ཨསམྨིསྶཱ ཨེཝ. ཨེཝཾ སཀལཱཡཔི མཱཏིཀཱཡ པཱལི༹ཝཝཏྠཱནཾ ཝེདིཏབྦཾ.

རཱུཔཝིབྷཏྟིཨེཀཀནིདྡེསཝཎྞནཱ

༥༩༤. ཨིདཱནི ¶ ¶ ཏསྶཱ ཨཏྠཾ བྷཱཛེཏྭཱ དསྶེཏུཾ སབྦཾ རཱུཔཾ ན ཧེཏུམེཝཱཏིཨཱདི ཨཱརདྡྷཾ. ཀསྨཱ པནེཏྠ ‘ཀཏམཾ ཏཾ སབྦཾ རཱུཔཾ ན ཧེཏཱུ’ཏི པུཙྪཱ ན ཀཏཱཏི? བྷེདཱབྷཱཝཏོ. ཡཐཱ ཧི དུཀཱདཱིསུ ‘ཨུཔཱདཱརཱུཔ’མྤི ཨཏྠི ‘ནོཨུཔཱདཱརཱུཔ’མྤི, ཨེཝམིདྷ ཧེཏུ ན ཧེཏཱུཏིཔི སཧེཏུཀམཧེཏུཀནྟིཔི བྷེདོ ནཏྠི, ཏསྨཱ པུཙྪཾ ཨཀཏྭཱཝ ཝིབྷཏྟཾ. ཏཏྠ ‘སབྦ’ནྟི སཀལཾ, ནིརཝསེསཾ. ‘རཱུཔ’ནྟི ཨཡམསྶ སཱིཏཱདཱིཧི རུཔྤནབྷཱཝདཱིཔནོ སཱམཉྙལཀྑཎནིདྡེསོ. ན ཧེཏུམེཝཱཏི སཱདྷཱརཎཧེཏུཔཊིཀྑེཔནིདྡེསོ.

ཏཏྠ ཧེཏུཧེཏུ པཙྩཡཧེཏུ ཨུཏྟམཧེཏུ སཱདྷཱརཎཧེཏཱུཏི ཙཏུབྦིདྷོ ཧེཏུ. ཏེསུ ‘ཏཡོ ཀུསལཧེཏཱུ, ཏཡོ ཨཀུསལཧེཏཱུ, ཏཡོ ཨབྱཱཀཏཧེཏཱུ’ཏི (དྷ. ས. ༡༠༥༩) ཨཡཾ ‘ཧེཏུཧེཏུ’ ནཱམ. ‘‘ཙཏྟཱརོ ཁོ, བྷིཀྑུ, མཧཱབྷཱུཏཱ ཧེཏུ, ཙཏྟཱརོ མཧཱབྷཱུཏཱ པཙྩཡོ རཱུཔཀྑནྡྷསྶ པཉྙཱཔནཱཡཱ’’ཏི (མ. ནི. ༣.༨༥; སཾ. ནི. ༣.༨༢) ཨཡཾ ‘པཙྩཡཧེཏུ’ ནཱམ. ‘‘ཀུསལཱཀུསལཾ ཨཏྟནོ ཝིཔཱཀཊྛཱནེ, ཨུཏྟམཾ ཨིཊྛཱརམྨཎཾ ཀུསལཝིཔཱཀཊྛཱནེ, ཨུཏྟམཾ ཨནིཊྛཱརམྨཎཾ ཨཀུསལཝིཔཱཀཊྛཱནེ’’ཏི ཨཡཾ ‘ཨུཏྟམཧེཏུ’ ནཱམ. ཡཐཱཧ – ‘ཨཏཱིཏཱནཱགཏཔཙྩུཔྤནྣཱནཾ ¶ ཀམྨསམཱདཱནཱནཾ ཋཱནསོ ཧེཏུསོ ཝིཔཱཀཾ ཡཐཱབྷཱུཏཾ པཛཱནཱཏཱི’ཏི (མ. ནི. ༡.༡༤༨; ཝིབྷ. ༨༡༠; པཱཊི. མ. ༢.༤༤), ‘‘ཨེསེཝ ཧེཏུ ཨེས པཙྩཡོ སངྑཱརཱནཾ ཡདིདཾ ཨཝིཛྫཱ’’ཏི ཨཝིཛྫཱ སངྑཱརཱནཾ སཱདྷཱརཎཧེཏུ ཧུཏྭཱ པཙྩཡཊྛཾ ཕརཏཱིཏི ཨཡཾ ‘སཱདྷཱརཎཧེཏུ’ ནཱམ. ཡཐཱ ཧི པཐཝཱིརསོ ཨཱཔོརསོ ཙ མདྷུརསྶཱཔི ཨམདྷུརསྶཱཔི པཙྩཡོ, ཨེཝཾ ཨཝིཛྫཱ ཀུསལསངྑཱརཱནམྤི ཨཀུསལསངྑཱརཱནམྤི སཱདྷཱརཎཔཙྩཡོ ཧོཏི. ཨིམསྨིཾ པནཏྠེ ‘ཧེཏུཧེཏུ’ ཨདྷིཔྤེཏོ. ཨིཏི ‘ཧེཏཱུ དྷམྨཱ ན ཧེཏཱུ དྷམྨཱ’ཏི (དྷ. ས. དུཀམཱཏིཀཱ ༡) མཱཏིཀཱཡ ཨཱགཏཾ ཧེཏུབྷཱཝཾ རཱུཔསྶ ནིཡམེཏྭཱ པཊིཀྑིཔནྟོ ‘ན ཧེཏུམེཝཱ’ཏི ཨཱཧ. ཨིམིནཱ ནཡེན སབྦཔདེསུ པཊིཀྑེཔནིདྡེསོ ཙ ཨཔྤཊིཀྑེཔནིདྡེསོ ཙ ཝེདིཏབྦོ. ཝཙནཏྠོ པན སབྦཔདཱནཾ མཱཏིཀཱཝཎྞནཱཡཾ ཝུཏྟོཡེཝ.

སཔྤཙྩཡམེཝཱཏི ཨེཏྠ པན ཀམྨསམུཊྛཱནཾ ཀམྨཔཙྩཡམེཝ ཧོཏི, ཨཱཧཱརསམུཊྛཱནཱདཱིནི ཨཱཧཱརཱདིཔཙྩཡཱནེཝཱཏི ཨེཝཾ རཱུཔསྶེཝ ཝུཏྟཙཏུཔཙྩཡཝསེན ¶ ཨཏྠོ ཝེདིཏབྦོ. རཱུཔམེཝཱཏི ‘རཱུཔིནོ དྷམྨཱ ཨརཱུཔིནོ དྷམྨཱ’ཏི མཱཏིཀཱཡ ཝུཏྟཾ ཨརཱུཔཱིབྷཱཝཾ པཊིཀྑིཔཏི. ཨུཔྤནྣཾ ཚཧི ཝིཉྙཱཎེཧཱིཏི ¶ པཙྩུཔྤནྣརཱུཔམེཝ ཙཀྑུཝིཉྙཱཎཱདཱིཧི ཚཧི ཝེདིཏབྦཾ. ནིཡཱམོ པན ཙཀྑུཝིཉྙཱཎཱདཱིནི སནྡྷཱཡ གཧིཏོ. ན ཧི ཏཱནི ཨཏཱིཏཱནཱགཏཾ ཝིཛཱནནྟི. མནོཝིཉྙཱཎཾ པན ཨཏཱིཏམྤི ཨནཱགཏམྤི ཝིཛཱནཱཏི. ཏཾ ཨིམསྨིཾ པཉྩཝིཉྙཱཎསོཏེ པཏིཏཏྟཱ སོཏཔཏིཏམེཝ ཧུཏྭཱ གཏཾ. ཧུཏྭཱ ཨབྷཱཝཊྛེན པན ཨནིཙྩམེཝ. ཛརཱཡ ཨབྷིབྷཝིཏབྦདྷམྨཀཏྟཱ ཛརཱབྷིབྷཱུཏམེཝ. ཡསྨཱ ཝཱ རཱུཔཀཱཡེ ཛརཱ པཱཀཊཱ ཧོཏི, ཏསྨཱཔི ‘ཛརཱབྷིབྷཱུཏམེཝཱ’ཏི ཝུཏྟཾ.

ཨེཝཾ ཨེཀཝིདྷེན རཱུཔསངྒཧོཏི ཨེཏྠ ‘ཝིདྷཱ’-སདྡོ མཱནསཎྛཱནཀོཊྛཱསེསུ དིསྶཏི. ‘‘སེཡྻོཧམསྨཱིཏི ཝིདྷཱ, སདིསོཧམསྨཱིཏི ཝིདྷཱ’’ཏིཨཱདཱིསུ (ཝིབྷ. ༩༦༢) ཧི མཱནོ ཝིདྷཱ ནཱམ. ‘‘ཀཐཾཝིདྷཾ སཱིལཝནྟཾ ཝདནྟི, ཀཐཾཝིདྷཾ པཉྙཝནྟཾ ཝདནྟཱི’’ཏིཨཱདཱིསུ (སཾ. ནི. ༡.༩༥) སཎྛཱནཾ. ‘ཀཐཾཝིདྷ’ནྟི ¶ ཧི པདསྶ ཀཐཾསཎྛཱནནྟི ཨཏྠོ. ‘‘ཨེཀཝིདྷེན ཉཱཎཝཏྠུཾ དུཝིདྷེན ཉཱཎཝཏྠཱུ’’ཏིཨཱདཱིསུ (ཝིབྷ. ༧༥༡-༧༥༢) ཀོཊྛཱསོ ཝིདྷཱ ནཱམ. ཨིདྷཱཔི ཀོཊྛཱསོཝ ཨདྷིཔྤེཏོ.

སངྒཧསདྡོཔི སཛཱཏིསཉྫཱཏིཀིརིཡཱགཎནཝསེན ཙཏུབྦིདྷོ. ཏཏྠ ‘‘སབྦེ ཁཏྟིཡཱ ཨཱགཙྪནྟུ, སབྦེ བྲཱཧྨཎཱ སབྦེ ཝེསྶཱ སབྦེ སུདྡཱ ཨཱགཙྪནྟུ’’, ‘‘ཡཱ ཙཱཝུསོ ཝིསཱཁ, སམྨཱཝཱཙཱ, ཡོ ཙ སམྨཱཀམྨནྟོ, ཡོ ཙ སམྨཱཨཱཛཱིཝོ – ཨིམེ དྷམྨཱ སཱིལཀྑནྡྷེ སངྒཧིཏཱ’’ཏི (མ. ནི. ༡.༤༦༢) ཨཡཾ ‘སཛཱཏིསངྒཧོ’ ནཱམ. ‘ཨེཀཛཱཏིཀཱ ཨཱགཙྪནྟཱུ’ཏི ཝུཏྟཊྛཱནེ ཝིཡ ཧི ཨིདྷ སབྦེ ཛཱཏིཡཱ ཨེཀསངྒཧཾ གཏཱ. ‘‘སབྦེ ཀོསལཀཱ ཨཱགཙྪནྟུ, སབྦེ མཱགདྷཀཱ, སབྦེ བྷཱརུཀཙྪཀཱ ཨཱགཙྪནྟུ’’, ‘‘ཡོ ཙཱཝུསོ ཝིསཱཁ, སམྨཱཝཱཡཱམོ, ཡཱ ཙ སམྨཱསཏི, ཡོ ཙ སམྨཱསམཱདྷི – ཨིམེ དྷམྨཱ སམཱདྷིཀྑནྡྷེ སངྒཧིཏཱ’’ཏི ཨཡཾ ‘སཉྫཱཏིསངྒཧོ’ ནཱམ. ཨེཀཊྛཱནེ ཛཱཏཱ སཾཝུདྡྷཱ ཨཱགཙྪནྟཱུཏི ཝུཏྟཊྛཱནེ ཝིཡ ཧི ཨིདྷ སབྦེ སཉྫཱཏིཊྛཱནེན ནིཝུཏྠོཀཱསེན ཨེཀསངྒཧཾ གཏཱ. ‘‘སབྦེ ཧཏྠཱརོཧཱ ཨཱགཙྪནྟུ, སབྦེ ཨསྶཱརོཧཱ, སབྦེ རཐིཀཱ ཨཱགཙྪནྟུ’’, ‘‘ཡཱ ཙཱཝུསོ ཝིསཱཁ, སམྨཱདིཊྛི, ཡོ ཙ སམྨཱསངྐཔྤོ – ཨིམེ དྷམྨཱ པཉྙཱཀྑནྡྷེ སངྒཧིཏཱ’’ཏི (མ. ནི. ༡.༤༦༢) ཨཡཾ ‘ཀིརིཡཱསངྒཧོ’ ནཱམ. སབྦེཝ ¶ ཧེཏེ ཨཏྟནོ ཀིརིཡཱཀརཎེན ཨེཀསངྒཧཾ གཏཱ. ‘‘ཙཀྑཱཡཏནཾ ཀཏམཀྑནྡྷགཎནཾ གཙྪཏི? ཙཀྑཱཡཏནཾ རཱུཔཀྑནྡྷགཎནཾ གཙྪཏི. ཧཉྩི ཙཀྑཱཡཏནཾ རཱུཔཀྑནྡྷགཎནཾ གཙྪཏི, ཏེན ཝཏ རེ ཝཏྟབྦེ – ཙཀྑཱཡཏནཾ རཱུཔཀྑནྡྷེན ¶ སངྒཧིཏ’’ནྟི (ཀཐཱ. ༤༧༡), ཨཡཾ ‘གཎནསངྒཧོ’ ནཱམ. ཨཡམིདྷ ཨདྷིཔྤེཏོ. ཨེཀཀོཊྛཱསེན རཱུཔགཎནཱཏི ཨཡཉྷེཏྠ ཨཏྠོ. ཨེས ནཡོ སབྦཏྠ.

དུཀནིདྡེསཝཎྞནཱ

ཨུཔཱདཱབྷཱཛནཱིཡཀཐཱ

༥༩༥. ཨིདཱནི དུཝིདྷསངྒཧཱདཱིསུ ‘ཨཏྠི རཱུཔཾ ཨུཔཱདཱ, ཨཏྠི རཱུཔཾ ནོཨུཔཱདཱ’ཏི ཨེཝཾ བྷེདསབྦྷཱཝཏོ པུཙྪཱཔུབྦངྒམཾ པདབྷཱཛནཾ དསྶེནྟོ ཀཏམཾ ཏཾ རཱུཔཾ ཨུཔཱདཱཏིཨཱདིམཱཧ. ཏཏྠ ཨུཔཱདིཡཏཱིཏི ‘ཨུཔཱདཱ’; མཧཱབྷཱུཏཱནི གཧེཏྭཱ, ཨམུཉྩིཏྭཱ, ཏཱནི ནིསྶཱཡ པཝཏྟཏཱིཏི ཨཏྠོ. ཨིདཱནི ¶ ཏཾ པབྷེདཏོ དསྶེནྟོ ཙཀྑཱཡཏནནྟིཨཱདིམཱཧ.

༥༩༦. ཨེཝཾ ཏེཝཱིསཏིཝིདྷཾ ཨུཔཱདཱརཱུཔཾ སངྑེཔཏོ ཨུདྡིསིཏྭཱ པུན ཏདེཝ ཝིཏྠཱརཏོ ནིདྡིསནྟོ ཀཏམཾ ཏཾ རཱུཔཾ ཙཀྑཱཡཏནནྟིཨཱདིམཱཧ. ཏཏྠ དུཝིདྷཾ ཙཀྑུ – མཾསཙཀྑུ པཉྙཱཙཀྑུ ཙ. ཨེཏེསུ ‘བུདྡྷཙཀྑུ སམནྟཙཀྑུ ཉཱཎཙཀྑུ དིབྦཙཀྑུ དྷམྨཙཀྑཱུ’ཏི པཉྩཝིདྷཾ པཉྙཱཙཀྑུ. ཏཏྠ ‘‘ཨདྡསཾ ཁོ ཨཧཾ, བྷིཀྑཝེ, བུདྡྷཙཀྑུནཱ ལོཀཾ ཝོལོཀེནྟོ སཏྟེ ཨཔྤརཛཀྑེ…པེ… དུཝིཉྙཱཔཡེ’’ཏི (མ. ནི. ༡.༢༨༣) ཨིདཾ བུདྡྷཙཀྑུ ནཱམ. ‘‘སམནྟཙཀྑུ ཝུཙྩཏི སབྦཉྙུཏཉྙཱཎ’’ནྟི ཨིདཾ སམནྟཙཀྑུ ནཱམ. ‘‘ཙཀྑུཾ ཨུདཔཱདི ཉཱཎཾ ཨུདཔཱདཱི’’ཏི (སཾ. ནི. ༥.༡༠༨༡; མཧཱཝ. ༡༥) ཨིདཾ ཉཱཎཙཀྑུ ནཱམ. ‘‘ཨདྡསཾ ཁོ ཨཧཾ, བྷིཀྑཝེ, དིབྦེན ཙཀྑུནཱ ཝིསུདྡྷེནཱ’’ཏི (མ. ནི. ༡.༢༨༤) ཨིདཾ དིབྦཙཀྑུ ནཱམ. ‘‘ཏསྨིཾ ཡེཝཱསནེ ཝིརཛཾ ཝཱིཏམལཾ དྷམྨཙཀྑུཾ ཨུདཔཱདཱི’’ཏི (མ. ནི. ༢.༣༩༥) ཨིདཾ ཧེཊྛིམམགྒཏྟཡསངྑཱཏཾ ཉཱཎཾ དྷམྨཙཀྑུ ནཱམ.

མཾསཙཀྑུཔི པསཱདཙཀྑུ སསམྦྷཱརཙཀྑཱུཏི དུཝིདྷཾ ཧོཏི. ཏཏྠ ཡོཡཾ ཨཀྑིཀཱུཔཀེ པཏིཊྛིཏོ ཧེཊྛཱ ཨཀྑིཀཱུཔཀཊྛིཀེན, ཨུཔརི བྷམུཀཊྛིཀེན, ཨུབྷཏོ ཨཀྑིཀཱུཊེཧི, ཨནྟོ མཏྠལུངྒེན, བཧིདྡྷཱ ཨཀྑིལོམེཧི པརིཙྪིནྣོ ¶ མཾསཔིཎྜོ. སངྑེཔཏོ ‘ཙཏསྶོ དྷཱཏུཡོ, ཝཎྞོ གནྡྷོ རསོ ཨོཛཱ, སམྦྷཝོ སཎྛཱནཾ, ཛཱིཝིཏཾ བྷཱཝོ ཀཱཡཔསཱདོ ཙཀྑུཔསཱདོ’ཏི ཙུདྡསསམྦྷཱརོ. ཝིཏྠཱརཏོ ‘ཙཏསྶོ དྷཱཏུཡོ, ཏཾསནྣིསྶིཏཝཎྞགནྡྷརསཨོཛཱསཎྛཱནསམྦྷཝཱ ཙཱ’ཏི ¶ ཨིམཱནི དས ཙཏུསམུཊྛཱནིཀཏྟཱ ཙཏྟཱལཱིསཾ ཧོནྟི. ཛཱིཝིཏཾ བྷཱཝོ ཀཱཡཔསཱདོ ཙཀྑུཔསཱདོཏི ཙཏྟཱརི ཨེཀནྟཀམྨསམུཊྛཱནཱནེཝཱཏི ཨིམེསཾ ཙཏུཙཏྟཱལཱིསཱཡ ¶ རཱུཔཱནཾ ཝསེན ཙཏུཙཏྟཱལཱིསསམྦྷཱརོ. ཡཾ ལོཀོ སེཏཾ ཙཀྑུཾ པུཐུལཾ ཝིསཊཾ ཝིཏྠིཎྞཾ ‘ཙཀྑུ’ནྟི སཉྫཱནནྟོ ན ཙཀྑུཾ སཉྫཱནཱཏི, ཝཏྠུཾ ཙཀྑུཏོ སཉྫཱནཱཏི, སོ མཾསཔིཎྜོ ཨཀྑིཀཱུཔེ པཏིཊྛིཏོ, ནྷཱརུསུཏྟཀེན མཏྠལུངྒེ ཨཱབདྡྷོ, ཡཏྠ སེཏམྤི ཨཏྠི, ཀཎྷམྤི ལོཧིཏཀམྤི, པཐཝཱིཔི ཨཱཔོཔི ཏེཛོཔི ཝཱཡོཔི, ཡཾ སེམྷཱུསྶདཏྟཱ སེཏཾ, པིཏྟུསྶདཏྟཱ ཀཎྷཾ, རུཧིརུསྶདཏྟཱ ལོཧིཏཀཾ, པཐཝུསྶདཏྟཱ པཏྠིཎྞཾ ཧོཏི, ཨཱཔུསྶདཏྟཱ པགྒྷརཏི, ཏེཛུསྶདཏྟཱ པརིདཡ྄ཧཏི, ཝཱཡུསྶདཏྟཱ སམྦྷམཏི, ཨིདཾ སསམྦྷཱརཙཀྑུ ནཱམ.

ཡོ པནེཏྠ སིཏོ ཨེཏྠ པཊིབདྡྷོ ཙཏུནྣཾ མཧཱབྷཱུཏཱནཾ ཨུཔཱདཱཡ པསཱདོ, ཨིདཾ པསཱདཙཀྑུ ནཱམ. ཏདེཏཾ ཏསྶ སསམྦྷཱརཙཀྑུནོ སེཏམཎྜལཔརིཀྑིཏྟསྶ ཀཎྷམཎྜལསྶ མཛ྄ཛྷེ, ཨབྷིམུཁེ ཋིཏཱནཾ སརཱིརསཎྛཱནུཔྤཏྟིདེསབྷཱུཏེ དིཊྛིམཎྜལེ, སཏྟསུ པིཙུཔཊལེསུ ཨཱསིཏྟཏེལཾ པིཙུཔཊལཱནི ཝིཡ, སཏྟཀྑིཔཊལཱནི བྱཱཔེཏྭཱ, དྷཱརཎནྷཱཔནམཎྜནབཱིཛནཀིཙྩཱཧི ཙཏཱུཧི དྷཱཏཱིཧི ཁཏྟིཡཀུམཱརོ ཝིཡ, སནྡྷཱརཎཨཱབནྡྷནཔརིཔཱཙནསམུདཱིརཎཀིཙྩཱཧི ཙཏཱུཧི དྷཱཏཱུཧི ཀཏཱུཔཀཱརཾ, ཨུཏུཙིཏྟཱཧཱརེཧི ཨུཔཏྠམྦྷིཡམཱནཾ, ཨཱཡུནཱ ཨནུཔཱལིཡམཱནཾ, ཝཎྞགནྡྷརསཱདཱིཧི པརིཝུཏཾ, པམཱཎཏོ ཨཱུཀཱསིརམཏྟཾ, ཙཀྑུཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཾ ཏིཊྛཏི. ཝུཏྟམྤི ཙེཏཾ དྷམྨསེནཱཔཏིནཱ –

‘‘ཡེན ཙཀྑུཔྤསཱདེན, རཱུཔཱནི མནུཔསྶཏི;

པརིཏྟཾ སུཁུམཾ ཨེཏཾ, ཨཱུཀཱསིརསམཱུཔམ’’ནྟི.

ཙཀྑུ ཙ ཏཾ ཨཱཡཏནཉྩཱཏི ཙཀྑཱཡཏནཾ. ཡཾ ཙཀྑུ ཙཏུནྣཾ མཧཱབྷཱུཏཱནཾ ཨུཔཱདཱཡ པསཱདོཏི ཨིདྷཱཔི ཨུཔཡོགཏྠེཡེཝ སཱམིཝཙནཾ; ཙཏྟཱརི མཧཱབྷཱུཏཱནི ¶ ཨུཔཱདིཡིཏྭཱ པཝཏྟཔྤསཱདོཏི ཨཏྠོ. ཨིམིནཱ པསཱདཙཀྑུམེཝ གཎྷཱཏི, སེསཙཀྑུཾ པཊིཀྑིཔཏི. ཡཾ པན ཨིནྡྲིཡགོཙརསུཏྟེ ‘‘ཨེཀཾ མཧཱབྷཱུཏཾ ཨུཔཱདཱཡ ¶ པསཱདོ པཐཝཱིདྷཱཏུཡཱ ཏཱིཧི མཧཱབྷཱུཏེཧི སངྒཧིཏོ ཨཱཔོདྷཱཏུཡཱ ཙ ཏེཛོདྷཱཏུཡཱ ཙ ཝཱཡོདྷཱཏུཡཱ ཙ,’’ ཙཏུཔརིཝཏྟསུཏྟེ ‘‘དྭིནྣཾ མཧཱབྷཱུཏཱནཾ ཨུཔཱདཱཡ པསཱདོ པཐཝཱིདྷཱཏུཡཱ ཙ ཨཱཔོདྷཱཏུཡཱ ཙ དྭཱིཧི མཧཱབྷཱུཏེཧི སངྒཧིཏོ ཏེཛོདྷཱཏུཡཱ ཙ ཝཱཡོདྷཱཏུཡཱ ཙཱ’’ཏི ཝུཏྟཾ, ཏཾ པརིཡཱཡེན ཝུཏྟཾ. ཨཡཉྷི སུཏྟནྟིཀཀཐཱ ནཱམ པརིཡཱཡདེསནཱ ¶ . ཡོ ཙ ཙཏུནྣཾ མཧཱབྷཱུཏཱནཾ ཨུཔཱདཱཡ པསཱདོ སོ ཏེསུ ཨེཀེཀསྶཱཔི དིནྣཾ དྭིནྣམྤི པསཱདོཡེཝཱཏི ཨིམིནཱ པརིཡཱཡེན ཏཏྠ དེསནཱ ཨཱགཏཱ. ཨབྷིདྷམྨོ པན ནིཔྤརིཡཱཡདེསནཱ ནཱམ. ཏསྨཱ ཨིདྷ ‘ཙཏུནྣཾ མཧཱབྷཱུཏཱནཾ ཨུཔཱདཱཡ པསཱདོ’ཏི ཝུཏྟཾ.

‘ཨཡཾ མེ ཨཏྟཱ’ཏི བཱལཛནེན པརིགྒཧིཏཏྟཱ ཨཏྟབྷཱཝོ ཝུཙྩཏི སརཱིརམྤི ཁནྡྷཔཉྩཀམྤི. ཏསྨིཾ པརིཡཱཔནྣོ ཏནྣིསྶིཏོཏི ཨཏྟབྷཱཝཔརིཡཱཔནྣོ ཙཀྑུཝིཉྙཱཎེན པསྶིཏུཾ ན སཀྐཱཏི ཨནིདསྶནོ. པཊིགྷཊྚནཱནིགྷཾསོ ཨེཏྠ ཛཱཡཏཱིཏི སཔྤཊིགྷོ.

ཡེནཱཏིཨཱདཱིསུ ཨཡཾ སངྑེཔཏྠོ – ཡེན ཀརཎབྷཱུཏེན ཙཀྑུནཱ ཨཡཾ སཏྟོ ཨིདཾ ཝུཏྟཔྤཀཱརཾ རཱུཔཾ ཨཏཱིཏེ པསྶི ཝཱ, ཝཏྟམཱནེ པསྶཏི ཝཱ, ཨནཱགཏེ པསྶིསྶཏི ཝཱ, སཙསྶ ཨཔརིབྷིནྣཾ ཙཀྑུ བྷཝེཡྻ, ཨཐཱནེན ཨཱཔཱཐགཏཾ རཱུཔཾ པསྶེ ཝཱ, ཨཏཱིཏཾ ཝཱ རཱུཔཾ ཨཏཱིཏེན ཙཀྑུནཱ པསྶི, པཙྩུཔྤནྣཾ པཙྩུཔྤནྣེན པསྶཏི, ཨནཱགཏཾ ཨནཱགཏེན པསྶིསྶཏི, སཙེ ཏཾ རཱུཔཾ ཙཀྑུསྶ ཨཱཔཱཐཾ ཨཱགཙྪེཡྻ ཙཀྑུནཱ ཏཾ རཱུཔཾ པསྶེཡྻཱཏི ཨིདམེཏྠ པརིཀཔྤཝཙནཾ. དསྶནཔརིཎཱཡཀཊྛེན ཙཀྑུཾཔེཏཾ, སཉྫཱཏིསམོསརཎཊྛེན ཙཀྑཱཡཏནཾཔེཏཾ, སུཉྙཏབྷཱཝནིསྶཏྟཊྛེན ཙཀྑུདྷཱཏུཔེསཱ. དསྶནལཀྑཎེ ཨིནྡཊྛཾ ཀཱརེཏཱིཏི ཙཀྑུནྡྲིཡཾཔེཏཾ. ལུཛྫནཔལུཛྫནཊྛེན ལོཀོཔེསོ. ཝལ༹ཉྫནཊྛེན དྭཱརཱཔེསཱ. ཨཔཱུརཎཱིཡཊྛེན སམུདྡོཔེསོ. པརིསུདྡྷཊྛེན པཎྜརཾཔེཏཾ. ཕསྶཱདཱིནཾ ཨབྷིཛཱཡནཊྛེན ཁེཏྟཾཔེཏཾ. ཏེསཾཡེཝ པཏིཊྛཱནཊྛེན ཝཏྠུཾཔེཏཾ. སམཝིསམཾ དསྶེནྟཾ ཨཏྟབྷཱཝཾ ནེཏཱིཏི ནེཏྟཾཔེཏཾ. ཏེནེཝཊྛེན ནཡནཾཔེཏཾ ¶ . སཀྐཱཡཔརིཡཱཔནྣཊྛེན ¶ ཨོརིམཾ ཏཱིརཾཔེཏཾ. བཧུསཱདྷཱརཎཊྛེན ཨསྶཱམིཀཊྛེན ཙ སུཉྙོ གཱམོཔེསོཏི.

ཨེཏྟཱཝཏཱ ‘པསྶི ཝཱ’ཏིཨཱདཱིཧི ཙཏཱུཧི པདེཧི ཙཀྑུཾཔེཏནྟིཨཱདཱིནི ཙུདྡས ནཱམཱནི ཡོཛེཏྭཱ ཙཀྑཱཡཏནསྶ ཙཏྟཱརོ ཝཝཏྠཱཔནནཡཱ ཝུཏྟཱཏི ཝེདིཏབྦཱ. ཀཐཾ? ཨེཏྠ ཧི ཡེན ཙཀྑུནཱ ཨནིདསྶནེན སཔྤཊིགྷེན རཱུཔཾ སནིདསྶནཾ སཔྤཊིགྷཾ པསྶི ཝཱ ཙཀྑུཾཔེཏཾ…པེ… སུཉྙོ གཱམོཔེསོ, ཨིདཾ ཏཾ རཱུཔཾ ཙཀྑཱཡཏནནྟི ཨཡམེཀོ ནཡོ. ཨེཝཾ སེསཱཔི ཝེདིཏབྦཱ.

༥༩༧. ཨིདཱནི ཡསྨཱ ཝིཛྫུནིཙྪརཎཱདིཀཱལེསུ ཨནོལོཀེཏུཀཱམསྶཱཔི རཱུཔཾ ཙཀྑུཔསཱདཾ གྷཊྚེཏི, ཏསྨཱ ཏཾ ཨཱཀཱརཾ དསྶེཏུཾ དུཏིཡོ ནིདྡེསཝཱརོ ཨཱརདྡྷོ. ཏཏྠ ཡམྷི ཙཀྑུམྷཱིཏི ཡམྷི ཨདྷིཀརཎབྷཱུཏེ ཙཀྑུམྷི. རཱུཔནྟི པཙྩཏྟཝཙནམེཏཾ. ཏཏྠ པཊིཧཉྙི ཝཱཏི ཨཏཱིཏཏྠོ. པཊིཧཉྙཏི ¶ ཝཱཏི པཙྩུཔྤནྣཏྠོ. པཊིཧཉྙིསྶཏི ཝཱཏི ཨནཱགཏཏྠོ. པཊིཧཉྙེ ཝཱཏི ཝིཀཔྤནཏྠོ. ཨཏཱིཏཉྷི རཱུཔཾ ཨཏཱིཏེ ཙཀྑུསྨིཾ པཊིཧཉྙི ནཱམ. པཙྩུཔྤནྣཾ པཙྩུཔྤནྣེ པཊིཧཉྙཏི ནཱམ. ཨནཱགཏཾ ཨནཱགཏེ པཊིཧཉྙིསྶཏི ནཱམ. སཙེ ཏཾ རཱུཔཾ ཙཀྑུསྶ ཨཱཔཱཐཾ ཨཱགཙྪེཡྻ, ཙཀྑུམྷི པཊིཧཉྙེཡྻ ཏཾ རཱུཔནྟི ཨཡམེཏྠ པརིཀཔྤོ. ཨཏྠཏོ པན པསཱདཾ གྷཊྚཡམཱནམེཝ རཱུཔཾ པཊིཧཉྙཏི ནཱམ. ཨིདྷཱཔི པུརིམནཡེནེཝ ཙཏྟཱརོ ཝཝཏྠཱཔནནཡཱ ཝེདིཏབྦཱ.

༥༩༨. ཨིདཱནི ཡསྨཱ ཨཏྟནོ ཨིཙྪཱཡ ཨོལོཀེཏུཀཱམསྶ རཱུཔེ ཙཀྑུཾ ཨུཔསཾཧརཏོ ཙཀྑུ རཱུཔསྨིཾ པཊིཧཉྙཏི, ཏསྨཱ ཏཾ ཨཱཀཱརཾ དསྶེཏུཾ ཏཏིཡོ ནིདྡེསཝཱརོ ཨཱརདྡྷོ. སོ ཨཏྠཏོ པཱཀཊོཡེཝ. ཨེཏྠ པན ཙཀྑུ ཨཱརམྨཎཾ སམྤཊིཙྪམཱནམེཝ རཱུཔམྷི པཊིཧཉྙཏི ནཱམ. ཨིདྷཱཔི པུརིམནཡེནེཝ ཙཏྟཱརོ ཝཝཏྠཱཔནནཡཱ ཝེདིཏབྦཱ.

༥༩༩. ཨིཏོ ¶ པརཾ ཕསྶཔཉྩམཀཱནཾ ཨུཔྤཏྟིདསྶནཝསེན པཉྩ, ཏེསཾཡེཝ ཨཱརམྨཎཔཊིབདྡྷཨུཔྤཏྟིདསྶནཝསེན པཉྩཱཏི, དས ཝཱརཱ དསྶིཏཱ. ཏཏྠ ཙཀྑུཾ ནིསྶཱཡཱཏི ཙཀྑུཾ ནིསྶཱཡ, པཙྩཡཾ ཀཏྭཱ. རཱུཔཾ ཨཱརབྦྷཱཏི རཱུཔཱརམྨཎཾ ཨཱགམྨ, སནྡྷཱཡ, པཊིཙྩ. ཨིམིནཱ ཙཀྑུཔསཱདཝཏྠུཀཱནཾ ཕསྶཱདཱིནཾ པུརེཛཱཏཔཙྩཡེན ¶ ཙཀྑུདྭཱརཛཝནཝཱིཐིཔརིཡཱཔནྣཱནཾ ཨཱརམྨཎཱདྷིཔཏིཨཱརམྨཎཱུཔནིསྶཡཔཙྩཡེཧི རཱུཔསྶ པཙྩཡབྷཱཝོ དསྶིཏོ. ཨིཏརེསུ པཉྩསུ ཝཱརེསུ རཱུཔཾ ཨཱརམྨཎམསྶཱཏི རཱུཔཱརམྨཎོཏི ཨེཝཾ ཨཱརམྨཎཔཙྩཡམཏྟེནེཝ པཙྩཡབྷཱཝོ དསྶིཏོ. ཡཐཱ པན པུརིམེསུ ཏཱིསུ, ཨེཝཾ ཨིམེསུཔི དསསུ ཝཱརེསུ ཙཏྟཱརོ ཙཏྟཱརོ ཝཝཏྠཱཔནནཡཱ ཝེདིཏབྦཱ. ཨེཝཾ ཀཏམཾ ཏཾ རཱུཔཾ ཙཀྑཱཡཏནནྟི པུཙྪཱཡ ཨུདྡྷཊཾ ཙཀྑུཾ ‘ཨིདཾ ཏ’ནྟི ནཱནཔྤཀཱརཏོ དསྶེཏུཾ, པུརིམཱ ཏཡོ, ཨིམེ དསཱཏི, ཏེརས ནིདྡེསཝཱརཱ དསྶིཏཱ. ཨེཀེཀསྨིཉྩེཏྠ ཙཏུནྣཾ ཙཏུནྣཾ ཝཝཏྠཱཔནནཡཱནཾ ཨཱགཏཏྟཱ དྭིཔཉྙཱསཱཡ ནཡེཧི པཊིམཎྜེཏྭཱཝ དསྶིཏཱཏི ཝེདིཏབྦཱ.

༦༠༠. ཨིཏོ པརེསུ སོཏཱཡཏནཱདིནིདྡེསེསུཔི ཨེསེཝ ནཡོ. ཝིསེསམཏྟཾ པནེཏྠ ཨེཝཾ ཝེདིཏབྦཾ – སུཎཱཏཱིཏི སོཏཾ. ཏཾ སསམྦྷཱརསོཏབིལསྶ ཨནྟོ ཏནུཏམྦལོམཱཙིཏེ ཨངྒུལིཝེདྷཀསཎྛཱནེ པདེསེ ཝུཏྟཔྤཀཱརཱཧི དྷཱཏཱུཧི ཀཏཱུཔཀཱརཾ, ཨུཏུཙིཏྟཱཧཱརེཧི ཨུཔཏྠམྦྷིཡམཱནཾ, ཨཱཡུནཱ ཨནུཔཱལིཡམཱནཾ, ཝཎྞཱདཱིཧི པརིཝུཏཾ སོཏཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཾ ཏིཊྛཏི.

གྷཱཡཏཱིཏི ¶ གྷཱནཾ. ཏཾ སསམྦྷཱརགྷཱནབིལསྶ ཨནྟོ ཨཛཔྤདསཎྛཱནེ པདེསེ ཡཐཱཝུཏྟཔྤཀཱརཨུཔཀཱརུཔཏྠམྦྷནཱནུཔཱལནཔརིཝཱརཾ ཧུཏྭཱ གྷཱནཝིཉྙཱཎཱདཱིནཾ ¶ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཾ ཏིཊྛཏི.

སཱཡནཊྛེན ཛིཝ྄ཧཱ. སཱ སསམྦྷཱརཛིཝ྄ཧཱམཛ྄ཛྷསྶ ཨུཔརི ཨུཔྤལདལགྒསཎྛཱནེ པདེསེ ཡཐཱཝུཏྟཔྤཀཱརཨུཔཀཱརུཔཏྠམྦྷནཱནུཔཱལནཔརིཝཱརཱ ཧུཏྭཱ ཛིཝ྄ཧཱཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཱ ཏིཊྛཏི.

ཡཱཝཏཱ པན ཨིམསྨིཾ ཀཱཡེ ཨུཔཱདིཎྞཀརཱུཔཾ ནཱམ ཨཏྠི, སབྦཏྠ ཀཱཡཱཡཏནཾ, ཀཔྤཱསཔཊལེ སྣེཧོ ཝིཡ, ཡཐཱཝུཏྟཔྤཀཱརཨུཔཀཱརུཔཏྠམྦྷནཱནུཔཱལནཔརིཝཱརམེཝ ཧུཏྭཱ ཀཱཡཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཾ ཏིཊྛཏི. ཨཡམེཏྠ ཝིསེསོ. སེསོ པཱལི༹པྤབྷེདོ ཙ ཨཏྠོ ཙ ཙཀྑུནིདྡེསེ ཝུཏྟནཡེནེཝ ཝེདིཏབྦོ. ཀེཝལཉྷི ཨིདྷ ཙཀྑུཔདསྶ ཋཱནེ སོཏཔདཱདཱིནི, རཱུཔཔདསྶ ཋཱནེ སདྡཔདཱདཱིནི, པསྶཱིཏི ཨཱདཱིནཾ ཋཱནེ སུཎཱིཏིཨཱདིཔདཱནི ཙ ཨཱགཏཱནི. ‘ནེཏྟཾཔེཏཾ ¶ , ནཡནཾཔེཏ’ནྟི ཨིམསྶ ཙ པདདྭཡསྶ ཨབྷཱཝཱ དྭཱདས དྭཱདས ནཱམཱནི ཧོནྟི. སེསཾ སབྦཏྠ ཝུཏྟསདིསམེཝ.

ཏཏྠ སིཡཱ – ཡདི ཡཱཝཏཱ ཨིམསྨིཾ ཀཱཡེ ཨུཔཱདིཎྞཀརཱུཔཾ ནཱམ ཨཏྠི, སབྦཏྠ ཀཱཡཱཡཏནཾ, ཀཔྤཱསཔཊལེ སྣེཧོ ཝིཡ. ‘ཨེཝཾ སནྟེ ལཀྑཎསམྨིསྶཏཱ ཨཱཔཛྫཏཱི’ཏི. ‘ནཱཔཛྫཏཱི’ཏི. ‘ཀསྨཱ’? ‘ཨཉྙསྶ ཨཉྙཏྠ ཨབྷཱཝཏོ’. ‘ཡདི ཨེཝཾ, ན སབྦཏྠ ཀཱཡཱཡཏན’ནྟི? ‘ནེཝ པརམཏྠཏོ སབྦཏྠ. ཝིནིབྦྷུཛིཏྭཱ པནསྶ ནཱནཱཀརཎཾ པཉྙཱཔེཏུཾ ན སཀྐཱ, ཏསྨཱ ཨེཝཾ ཝུཏྟཾ. ཡཐཱ ཧི རཱུཔརསཱདཡོ, ཝཱལིཀཱཙུཎྞཱནི ཝིཡ, ཝིཝེཙེཏུཾ ཨསཀྐུཎེཡྻཏཱཡ ཨཉྙམཉྙབྱཱཔིནོཏི ཝུཙྩནྟི, ན ཙ པརམཏྠཏོ རཱུཔེ རསོ ཨཏྠི. ཡདི སིཡཱ རཱུཔགྒཧཎེནེཝ རསགྒཧཎཾ གཙྪེཡྻ. ཨེཝཾ ཀཱཡཱཡཏནམྤི པརམཏྠཏོ ནེཝ སབྦཏྠ ཨཏྠི, ན ཙ སབྦཏྠ ནཏྠི, ཝིཝེཙེཏུཾ ཨསཀྐུཎེཡྻཏཱཡཱཏི. ཨེཝམེཏྠ ན ལཀྑཎསམྨིསྶཏཱ ཨཱཔཛྫཏཱིཏི ཝེདིཏབྦཱ’.

ཨཔིཙ ¶ ལཀྑཎཱདིཝཝཏྠཱཔནཏོཔེཏེསཾ ཨསམྨིསྶཏཱ ཝེདིཏབྦཱ – ཨེཏེསུ ཧི རཱུཔཱབྷིགྷཱཏཱརཧབྷཱུཏཔྤསཱདལཀྑཎཾ དཊྛུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎཾ ཝཱ ཙཀྑུ, རཱུཔེསུ ¶ ཨཱཝིཉྪནརསཾ, ཙཀྑུཝིཉྙཱཎསྶ ཨཱདྷཱརབྷཱཝཔཙྩུཔཊྛཱནཾ, དཊྛུཀཱམཏཱནིདཱནཀམྨཛབྷཱུཏཔདཊྛཱནཾ.

སདྡཱབྷིགྷཱཏཱརཧབྷཱུཏཔྤསཱདལཀྑཎཾ སོཏུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎཾ ཝཱ སོཏཾ, སདྡེསུ ཨཱཝིཉྪནརསཾ, སོཏཝིཉྙཱཎསྶ ཨཱདྷཱརབྷཱཝཔཙྩུཔཊྛཱནཾ, སོཏུཀཱམཏཱནིདཱནཀམྨཛབྷཱུཏཔདཊྛཱནཾ.

གནྡྷཱབྷིགྷཱཏཱརཧབྷཱུཏཔྤསཱདལཀྑཎཾ གྷཱཡིཏུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎཾ ཝཱ གྷཱནཾ, གནྡྷེསུ ཨཱཝིཉྪནརསཾ, གྷཱནཝིཉྙཱཎསྶ ཨཱདྷཱརབྷཱཝཔཙྩུཔཊྛཱནཾ གྷཱཡིཏུཀཱམཏཱནིདཱནཀམྨཛབྷཱུཏཔདཊྛཱནཾ.

རསཱབྷིགྷཱཏཱརཧབྷཱུཏཔྤསཱདལཀྑཎཱ སཱཡིཏུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎཱ ཝཱ ཛིཝ྄ཧཱ, རསེསུ ཨཱཝིཉྪནརསཱ, ཛིཝ྄ཧཱཝིཉྙཱཎསྶ ཨཱདྷཱརབྷཱཝཔཙྩུཔཊྛཱནཱ, སཱཡིཏུཀཱམཏཱནིདཱནཀམྨཛབྷཱུཏཔདཊྛཱནཱ.

ཕོཊྛབྦཱབྷིགྷཱཏཱརཧབྷཱུཏཔྤསཱདལཀྑཎོ ¶ ཕུསིཏུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎོ ཝཱ ཀཱཡོ, ཕོཊྛབྦེསུ ཨཱཝིཉྪནརསོ, ཀཱཡཝིཉྙཱཎསྶ ཨཱདྷཱརབྷཱཝཔཙྩུཔཊྛཱནོ, ཕུསིཏུཀཱམཏཱནིདཱནཀམྨཛབྷཱུཏཔདཊྛཱནོ.

ཀེཙི པན ‘ཏེཛཱདྷིཀཱནཾ བྷཱུཏཱནཾ པསཱདོ ཙཀྑུ, ཝཱཡུཔཐཝཱིཨཱཔཱདྷིཀཱནཾ བྷཱུཏཱནཾ པསཱདཱ སོཏགྷཱནཛིཝ྄ཧཱ, ཀཱཡོ སབྦེས’ནྟི ཝདནྟི. ཨཔརེ ‘ཏེཛཱདྷིཀཱནཾ པསཱདོ ཙཀྑུ, ཝིཝརཝཱཡུཨཱཔཔཐཝཱདྷིཀཱནཾ པསཱདཱ སོཏགྷཱནཛིཝ྄ཧཱཀཱཡཱ’ཏི ཝདནྟི. ཏེ ཝཏྟབྦཱ – ‘སུཏྟཾ ཨཱཧརཐཱ’ཏི. ཨདྡྷཱ སུཏྟམེཝ ན དཀྑིསྶནྟི. ཀེཙི པནེཏྠ ‘ཏེཛཱདཱིནཾ གུཎེཧི རཱུཔཱདཱིཧི ཨནུགྒཡ྄ཧབྷཱཝཏོ’ཏི ཀཱརཎཾ ཝདནྟི. ཏེ ཙ ཝཏྟབྦཱ – ‘ཀོ པནེཝམཱཧ ¶ – རཱུཔཱདཡོ ཏེཛཱདཱིནཾ གུཎཱ’ཏི? ཨཝིནིབྦྷོགེསུ ཧི རཱུཔེསུ ‘ཨཡཾ ཨིམསྶ གུཎོ, ཨཡཾ ཨིམསྶ གུཎོ’ཏི ན ལབྦྷཱ ཝཏྟུཾ. ཨཐཱཔི ཝདེཡྻུཾ – ‘ཡཐཱ ཏེསུ ཏེསུ སམྦྷཱརེསུ ཏསྶ ཏསྶ བྷཱུཏསྶ ཨདྷིཀཏཱཡ པཐཝཱིཨཱདཱིནཾ སནྡྷཱརཎཱདཱིནི ཀིཙྩཱནི ཨིཙྪཐ, ཨེཝཾ ཏེཛཱདིཨདྷིཀེསུ སམྦྷཱརེསུ རཱུཔཱདཱིནཾ ཨདྷིཀབྷཱཝདསྶནཏོ ཨིཙྪིཏབྦམེཏཾ རཱུཔཱདཡོ ཏེསཾ གུཎཱ’ཏི. ཏེ ཝཏྟབྦཱ – ཨིཙྪེཡྻཱམ ¶ , ཡདི ཨཱཔཱདྷིཀསྶ ཨཱསཝསྶ གནྡྷཏོ པཐཝཱིཨདྷིཀེ ཀཔྤཱསེ གནྡྷོ ཨདྷིཀཏརོ སིཡཱ, ཏེཛཱདྷིཀསྶ ཙ ཨུཎྷོདཀསྶ ཝཎྞཏོཔི སཱིཏཱུདཀསྶ ཝཎྞོ པརིཧཱཡེཐ. ཡསྨཱ པནེཏཾ ཨུབྷཡམྤི ནཏྠི, ཏསྨཱ པཧཱཡེཐེཏཾ ཨེཏེསཾ ནིསྶཡབྷཱུཏཱནཾ ཝིསེསཀཔྤནཾ, ཡཐཱ ཨཝིསེསེཔི ཨེཀཀལཱཔེ བྷཱུཏཱནཾ རཱུཔརསཱདཡོ ཨཉྙམཉྙཾ ཝིསདིསཱ ཧོནྟི, ཨེཝཾ ཙཀྑུཔསཱདཱདཡོ, ཨཝིཛྫམཱནེཔི ཨཉྙསྨིཾ ཝིསེསཀཱརཎེཏི གཧེཏབྦམེཏཾ.

ཀིཾ པན ཏཾ ཡཾ ཨཉྙམཉྙསྶ ཨསཱདྷཱརཎཾ? ཀམྨམེཝ ནེསཾ ཝིསེསཀཱརཎཾ. ཏསྨཱ ཀམྨཝིསེསཏོ ཨེཏེསཾ ཝིསེསོ, ན བྷཱུཏཝིསེསཏོ. བྷཱུཏཝིསེསེ ཧི སཏི པསཱདོཝ ནུཔྤཛྫཏི. སམཱནཱནཉྷི པསཱདོ, ན ཝིསམཱནཱནནྟི པོརཱཎཱ. ཨེཝཾ ཀམྨེཝིསསཏོ ཝིསེསཝནྟེསུ ཙ ཨེཏེསུ ཙཀྑུསོཏཱནི ཨསམྤཏྟཝིསཡགྒཱཧཀཱནི ཨཏྟནོ ནིསྶཡཾ ཨནལླཱིནནིསྶཡེ ཨེཝ ཝིསཡེ ཝིཉྙཱཎཧེཏུཏྟཱ. གྷཱནཛིཝ྄ཧཱཀཱཡཱ ¶ སམྤཏྟཝིསཡགྒཱཧཀཱ, ནིསྶཡཝསེན ཙེཝ སཡཉྩ ཨཏྟནོ ནིསྶཡཾ ཨལླཱིནེཡེཝ ཝིསཡེ ཝིཉྙཱཎཧེཏུཏྟཱ.

ཨཊྛཀཐཱཡཾ པན ‘‘ཨཱཔཱཐགཏཏྟཱཝ ཨཱརམྨཎཾ སམྤཏྟཾ ནཱམ. ཙནྡམཎྜལསཱུརིཡམཎྜལཱནཉྷི དྭཱཙཏྟཱལཱིསཡོཛནསཧསྶམཏྠཀེ ཋིཏཱནཾ ཝཎྞོ ཙཀྑུཔསཱདཾ གྷཊྚེཏི. སོ དཱུརེ ཋཏྭཱ པཉྙཱཡམཱནོཔི སམྤཏྟོཡེཝ ནཱམ. ཏཾགོཙརཏྟཱ ཙཀྑུ སམྤཏྟགོཙརམེཝ ནཱམ. དཱུརེ རུཀྑཾ ཚིནྡནྟཱནམྤི, རཛཀཱནཉྩ ཝཏྠཾ དྷོཝནྟཱནཾ དཱུརཏོཝ ཀཱཡཝིཀཱརོ པཉྙཱཡཏི. སདྡོ པན དྷཱཏུཔརམྤརཱཡ ཨཱགནྟྭཱ སོཏཾ གྷཊྚེཏྭཱ སཎིཀཾ ཝཝཏྠཱནཾ གཙྪཏཱི’’ཏི ཝུཏྟཾ.

ཏཏྠ ¶ ཀིཉྩཱཔི ཨཱཔཱཐགཏཏྟཱ ཨཱརམྨཎཾ སམྤཏྟནྟི ཝུཏྟཾ, ཙནྡམཎྜལཱདིཝཎྞོ པན ཙཀྑུཾ ཨསམྤཏྟོ དཱུརེ ཋིཏོཝ པཉྙཱཡཏི. སདྡོཔི སཙེ སཎིཀཾ ཨཱགཙྪེཡྻ, དཱུརེ ཨུཔྤནྣོ ཙིརེན སུཡྻེཡྻ, པརམྤརགྷཊྚནཱཡ ཙ ཨཱགནྟྭཱ སོཏཾ གྷཊྚེནྟོ ཨསུཀདིསཱཡ ནཱམཱཏི ན པཉྙཱཡེཡྻ. ཏསྨཱ ཨསམྤཏྟགོཙརཱནེཝ ཏཱནི.

ཨཧིཨཱདིསམཱནཱནི ཙེཏཱནི. ཡཐཱ ཧི ཨཧི ནཱམ བཧི སིཏྟསམྨཊྛཊྛཱནེ ནཱབྷིརམཏི, སངྐཱརཊྛཱནཏིཎཔཎྞགཧནཝམྨིཀཱནིཡེཝ པན པཝིསིཏྭཱ ནིཔནྣཀཱལེ ཨབྷིརམཏི, ཨེཀགྒཏཾ ཨཱཔཛྫཏི, ཨེཝམེཝ ཙཀྑུཔེཏཾ ཝིསམཛ྄ཛྷཱསཡཾ མཊྛེསུ སུཝཎྞབྷིཏྟིཨཱདཱིསུ ནཱབྷིརམཏི, ཨོལོཀེཏུམྤི ¶ ན ཨིཙྪཏི, རཱུཔཙིཏྟཔུཔྥལཏཱདིཙིཏྟེསུཡེཝ པན ཨབྷིརམཏི. ཏཱདིསེསུ ཧི ཋཱནེསུ ཙཀྑུམྷི ཨཔྤཧོནྟེ མུཁམྤི ཝིཝརིཏྭཱ ཨོལོཀེཏུཀཱམཱ ཧོནྟི.

སུསུམཱརོཔི བཧི ནིཀྑནྟོ གཧེཏབྦཾ ན པསྶཏི, ཨཀྑཱིནི ནིམྨཱིལེཏྭཱཝ ཙརཏི. ཡདཱ པན བྱཱམསཏམཏྟཾ ཨུདཀཾ ཨོགཱཧིཏྭཱ བིལཾ པཝིསིཏྭཱ ནིཔནྣོ ཧོཏི, ཏདཱ ཏསྶ ཙིཏྟཾ ཨེཀགྒཾ ཧོཏི སུཁཾ སུཔཏི, ཨེཝམེཝ སོཏཾ ཏམྤེ བིལཛ྄ཛྷཱསཡཾ ཨཱཀཱསསནྣིསྶིཏཾ ཀཎྞཙྪིདྡཀཱུཔཀེཡེཝ ཨཛ྄ཛྷཱསཡཾ ཀརོཏི. ཀཎྞཙྪིདྡཱཀཱསོཡེཝ ཏསྶ སདྡསཝནེ པཙྩཡོ ཧོཏི. ཨཛཊཱཀཱསོཔི ཝཊྚཏིཡེཝ. ཨནྟོལེཎསྨིཉྷི སཛ྄ཛྷཱཡེ ཀརིཡམཱནེ ན ལེཎཙྪདནཾ བྷིནྡིཏྭཱ སདྡོ བཧི ནིཀྑམཏི, དྭཱརཝཱཏཔཱནཙྪིདྡེཧི པན ནིཀྑམིཏྭཱ དྷཱཏུཔརམྤརཱཡེཝ གྷཊྚེནྟོ གནྟྭཱ སོཏཔསཱདཾ གྷཊྚེཏི. ཨཐ ¶ ཏསྨིཾ ཀཱལེ ‘ཨསུཀོ ནཱམ སཛ྄ཛྷཱཡཏཱི’ཏི ལེཎཔིཊྛེ ནིསིནྣཱ ཛཱནནྟི.

ཨེཝཾ སནྟེ སམྤཏྟགོཙརཏཱ ཧོཏི. ‘ཀིཾ པནེཏཾ སམྤཏྟགོཙར’ནྟི? ‘ཨཱམ, སམྤཏྟགོཙརཾ’. ‘ཡདི ཨེཝཾ, དཱུརེ བྷེརཱིཨཱདཱིསུ ཝཛྫམཱནེསུ དཱུརེ སདྡོཏི ཛཱནནཾ ན བྷཝེཡྻཱ’ཏི? ‘ནོ ན བྷཝཏི. སོཏཔསཱདསྨིཉྷི གྷཊྚིཏེ དཱུརེ སདྡོ ཨཱསནྣེ སདྡོ, པརཏཱིརེ ཨོརིམཏཱིརེཏི ཏཐཱ ཏཐཱ ཛཱནནཱཀཱརོ ཧོཏི. དྷམྨཏཱ ཨེསཱ’ཏི. ‘ཀིཾ ཨེཏཱཡ དྷམྨཏཱཡ? ཡཏོ ཡཏོ ཚིདྡཾ ཏཏོ ཏཏོ ¶ སཝནཾ ཧོཏི, ཙནྡིམསཱུརིཡཱདཱིནཾ དསྶནཾ ཝིཡཱཏི ཨསམྤཏྟགོཙརམེཝེཏཾ’.

པཀྑཱིཔི རུཀྑེ ཝཱ བྷཱུམིཡཾ ཝཱ ན རམཏི. ཡདཱ པན ཨེཀཾ ཝཱ དྭེ ཝཱ ལེཌྜུཔཱཏེ ཨཏིཀྐམྨ ཨཛཊཱཀཱསཾ པཀྑནྡོ ཧོཏི, ཏདཱ ཨེཀགྒཙིཏྟཏཾ ཨཱཔཛྫཏི, ཨེཝམེཝ གྷཱནམྤི ཨཱཀཱསཛ྄ཛྷཱསཡཾ ཝཱཏཱུཔནིསྶཡགནྡྷགོཙརཾ. ཏཐཱ ཧི གཱཝོ ནཝཝུཊྛེ དེཝེ བྷཱུམིཡཾ གྷཱཡིཏྭཱ གྷཱཡིཏྭཱ ཨཱཀཱསཱབྷིམུཁཱ ཧུཏྭཱ ཝཱཏཾ ཨཱཀཌྜྷནྟི. ཨངྒུལཱིཧི གནྡྷཔིཎྜཾ གཧེཏྭཱཔི ཙ ཨུཔསིངྒྷནཀཱལེ ཝཱཏཾ ཨནཱཀཌྜྷནྟོ ནེཝ ཏསྶ གནྡྷཾ ཛཱནཱཏི.

ཀུཀྐུརོཔི བཧི ཝིཙརནྟོ ཁེམཊྛཱནཾ ན པསྶཏི ལེཌྜུཔཧཱརཱདཱིཧི ཨུཔདྡུཏོ ཧོཏི. ཨནྟོགཱམཾ པཝིསིཏྭཱ ཨུདྡྷནཊྛཱནེ ཚཱརིཀཾ བྱཱུཧིཏྭཱ ནིཔནྣསྶ པན ཕཱསུཀཾ ཧོཏི, ཨེཝམེཝ ཛིཝ྄ཧཱཔི གཱམཛ྄ཛྷཱསཡཱ ཨཱཔོསནྣིསྶིཏརསཱརམྨཎཱ. ཏཐཱ ཧི ཏིཡཱམརཏྟིཾ སམཎདྷམྨཾ ཀཏྭཱཔི པཱཏོཝ ¶ པཏྟཙཱིཝརམཱདཱཡ གཱམོ པཝིསིཏབྦོ ཧོཏི. སུཀྑཁཱདནཱིཡསྶ ཙ ན སཀྐཱ ཁེལེ༹ན ཨཏེམིཏསྶ རསཾ ཛཱནིཏུཾ.

སིངྒཱལོཔི བཧི ཙརནྟོ རཏིཾ ན ཝིནྡཏི, ཨཱམཀསུསཱནེ མནུསྶམཾསཾ ཁཱདིཏྭཱ ནིཔནྣསྶེཝ པནསྶ ཕཱསུཀཾ ཧོཏི, ཨེཝམེཝ ཀཱཡོཔི ཨུཔཱདིཎྞཀཛ྄ཛྷཱསཡོ པཐཝཱིནིསྶིཏཕོཊྛབྦཱརམྨཎོ. ཏཐཱ ཧི ཨཉྙཾ ཨུཔཱདིཎྞཀཾ ཨལབྷམཱནཱ སཏྟཱ ཨཏྟནོཝ ཧཏྠཏལེ སཱིསཾ ཀཏྭཱ ནིཔཛྫནྟི. ཨཛ྄ཛྷཏྟིཀབཱཧིརཱ ཙསྶ པཐཝཱི ཨཱརམྨཎགྒཧཎེ པཙྩཡོ ཧོཏི. སུསནྠཏསྶཔི ཧི སཡནསྶ, ཧཏྠེ ཋཔིཏཱནམྤི ཝཱ ཕལཱནཾ, ན སཀྐཱ ཨནིསཱིདནྟེན ཝཱ ཨནིཔྤཱིལེ༹ནྟེན ཝཱ ཐདྡྷམུདུབྷཱཝོ ཛཱནིཏུནྟི. ཨཛ྄ཛྷཏྟིཀབཱཧིརཱཔཐཝཱི ¶ ཨེཏསྶ ཀཱཡཔསཱདསྶ ཕོཊྛབྦཛཱནནེ པཙྩཡོ ཧོཏི. ཨེཝཾ ལཀྑཎཱདིཝཝཏྠཱནཏོཔེཏེསཾ ཨསམྨིསྶཏཱ ཝེདིཏབྦཱ. ཨཉྙེཡེཝ ཧི ཙཀྑུཔསཱདསྶ ལཀྑཎརསཔཙྩུཔཊྛཱནཔདཊྛཱནགོཙརཛ྄ཛྷཱསཡནིསྶཡཱ ཨཉྙེ སོཏཔསཱདཱདཱིནནྟི ¶ ཨསམྨིསྶཱནེཝ ཙཀྑཱཡཏནཱདཱིནི.

ཨཔིཙ ནེསཾ ཨསམྨིསྶཏཱཡ ཨཡཾ ཨུཔམཱཔི ཝེདིཏབྦཱ – ཡཐཱ ཧི པཉྩཝཎྞཱནཾ དྷཛཱནཾ ཨུསྶཱཔིཏཱནཾ ཀིཉྩཱཔི ཚཱཡཱ ཨེཀཱབདྡྷཱ ཝིཡ ཧོཏི, ཏསྶ ཏསྶ པན ཨཉྙམཉྙཾ ཨསམྨིསྶཱཝ ཡཐཱ ཙ པཉྩཝཎྞེན ཀཔྤཱསེན ཝཊྚིཾ ཀཏྭཱ དཱིཔེ ཛཱལིཏེ ཀིཉྩཱཔི ཛཱལཱ ཨེཀཱབདྡྷཱ ཝིཡ ཧོཏི, ཏསྶ ཏསྶ པན ཨཾསུནོ པཱཊིཡེཀྐཱ པཱཊིཡེཀྐཱ ཛཱལཱ ཨསམྨིསྶཱ ཨེཝ, ཨེཝམེཝ ཀིཉྩཱཔི ཨིམཱནི པཉྩཱཡཏནཱནི ཨེཀསྨིཾ ཨཏྟབྷཱཝེ སམོསཊཱནི ཨཉྙམཉྙཾ པན ཨསམྨིསྶཱནེཝ. ན ཀེཝལཉྩ ཨིམཱནེཝ པཉྩ, སེསརཱུཔཱནིཔི ཨསམྨིསྶཱནེཝ. ཨིམསྨིཉྷི སརཱིརེ ཧེཊྛིམཀཱཡོ མཛ྄ཛྷིམཀཱཡོ ཨུཔརིམཀཱཡོཏི ཏཡོ ཀོཊྛཱསཱ. ཏཏྠ ནཱབྷིཏོ པཊྛཱཡ ཧེཊྛཱ ཧེཊྛིམཀཱཡོ ནཱམ. ཏསྨིཾ ཀཱཡདསཀཾ, བྷཱཝདསཀཾ, ཨཱཧཱརསམུཊྛཱནཱནི ཨཊྛ, ཨུཏུསམུཊྛཱནཱནི ཨཊྛ, ཙིཏྟསམུཊྛཱནཱནི ཨཊྛཱཏི ཙཏུཙཏྟཱལཱིས རཱུཔཱནི. ནཱབྷིཏོ ཨུདྡྷཾ ཡཱཝ གལཝཱཊཀཱ མཛ྄ཛྷིམཀཱཡོ ནཱམ. ཏཏྠ ཙ ཀཱཡདསཀཾ, བྷཱཝདསཀཾ, ཝཏྠུདསཀཾ, ཨཱཧཱརསམུཊྛཱནཱདཱིནི ཏཱིཎི ཨཊྛཀཱནཱིཏི ཙཏུཔཉྙཱས རཱུཔཱནི. གལཝཱཊཀཏོ ཨུདྡྷཾ ཨུཔརིམཀཱཡོ ནཱམ. ཏཏྠ ཙཀྑུདསཀཾ, སོཏདསཀཾ, གྷཱནདསཀཾ, ཛིཝ྄ཧཱདསཀཾ, ཀཱཡདསཀཾ, བྷཱཝདསཀཾ, ཨཱཧཱརསམུཊྛཱནཱདཱིནི ཏཱིཎི ཨཊྛཀཱནཱིཏི ཙཏུརཱསཱིཏི རཱུཔཱནི.

ཏཏྠ ཙཀྑུཔསཱདསྶ པཙྩཡཱནི ཙཏྟཱརི མཧཱབྷཱུཏཱནི, ཝཎྞོ གནྡྷོ རསོ ཨོཛཱ, ཛཱིཝིཏིནྡྲིཡཾ ¶ ཙཀྑུཔསཱདོཏི ཨིདཾ ཨེཀནྟཏོ ཨཝིནིབྷུཏྟཱནཾ དསནྣཾ ནིཔྥནྣརཱུཔཱནཾ ཝསེན ཙཀྑུདསཀཾ ནཱམ. ཨིམིནཱ ནཡེན སེསཱནིཔི ཝེདིཏབྦཱནི. ཏེསུ ཧེཊྛིམཀཱཡེ རཱུཔཾ མཛ྄ཛྷིམཀཱཡཨུཔརིམཀཱཡརཱུཔེཧི སདྡྷིཾ ཨསམྨིསྶཾ. སེསཀཱཡདྭཡེཔི རཱུཔཾ ཨིཏརེཧི སདྡྷིཾ ཨསམྨིསྶམེཝ. ཡཐཱ ཧི སཱཡནྷསམཡེ པབྦཏཙྪཱཡཱ ཙ རུཀྑཙྪཱཡཱ ཙ ཀིཉྩཱཔི ཨེཀཱབདྡྷཱ ཝིཡ ཧོནྟི ཨཉྙམཉྙཾ པན ཨསམྨིསྶཱཝ ཨེཝཾ ཨིམེསུཔི ཀཱཡེསུ ཙཏུཙཏྟཱལཱིས ཙཏུཔཉྙཱས ཙཏུརཱསཱིཏི རཱུཔཱནི ཙ ཀིཉྩཱཔི ཨེཀཱབདྡྷཱནི ཝིཡ ཧོནྟི, ཨཉྙམཉྙཾ པན ཨསམྨིསྶཱནེཝཱཏི.

༦༡༦. རཱུཔཱཡཏནནིདྡེསེ ¶ ཝཎྞོཝ ཝཎྞནིབྷཱ; ནིབྷཱཏཱིཏི ཝཱ ནིབྷཱ. ཙཀྑུཝིཉྙཱཎསྶ པཱཀཊཱ ཧོཏཱིཏི ཨཏྠོ. ཝཎྞོཝ ¶ ནིབྷཱ ཝཎྞནིབྷཱ. སདྡྷིཾ ནིདསྶནེན སནིདསྶནཾ, ཙཀྑུཝིཉྙཱཎེན པསྶིཏབྦནྟི ཨཏྠོ. སདྡྷིཾ པཊིགྷེན སཔྤཊིགྷཾ, པཊིགྷཊྚནནིགྷཾསཛནཀནྟི ཨཏྠོ. ནཱིལཱདཱིསུ ཨུམཱཔུཔྥསམཱནཾ ནཱིལཾ, ཀཎིཀཱརཔུཔྥསམཱནཾ པཱིཏཀཾ, བནྡྷུཛཱིཝཀཔུཔྥསམཱནཾ ལོཧིཏཀཾ, ཨོསདྷིཏཱརཀསམཱནཾ ཨོདཱཏཾ. ཛྷཱམངྒཱརསམཱནཾ ཀཱལ༹ཀཾ, མནྡརཏྟཾ སིནྡུཝཱརཀརཝཱིརམཀུལ༹སམཱནཾ མཉྫིཊྛཀཾ. ‘‘ཧརིཏྟཙཧེམཝཎྞཀཱམཾསུམུཁཔཀྐམཱ’’ཏི (ཛཱ. ༡.༡༥.༡༣༣) ཨེཏྠ པན ཀིཉྩཱཔི ‘ཧརཱི’ཏི སུཝཎྞཾ ཝུཏྟཾ, པརཏོ པནསྶ ཛཱཏརཱུཔགྒཧཎེན གཧིཏཏྟཱ ཨིདྷ སཱམཾ ཧརི ནཱམ. ཨིམཱནི སཏྟ ཝཏྠུཾ ཨནཱམསིཏྭཱ སབྷཱཝེནེཝ དསྶིཏཱནི.

ཧརིཝཎྞནྟི ཧརིཏསདྡལཝཎྞཾ. ཨམྦངྐུརཝཎྞནྟི ཨམྦངྐུརེན སམཱནཝཎྞཾ. ཨིམཱནི དྭེ ཝཏྠུཾ ཨཱམསིཏྭཱ དསྶིཏཱནི. དཱིགྷཱདཱིནི དྭཱདས ཝོཧཱརཏོ དསྶིཏཱནི. སོ ཙ ནེསཾ ཝོཧཱརོ ཨུཔནིདྷཱཡསིདྡྷོ ཙེཝ སནྣིཝེསསིདྡྷོ ཙ. དཱིགྷཱདཱིནི ཧི ཨཉྙམཉྙཾ ཨུཔནིདྷཱཡསིདྡྷཱནི, ཝཊྚཱདཱིནི སནྣིཝེསཝིསེསེན. ཏཏྠ རསྶཾ ཨུཔནིདྷཱཡ ཏཏོ ཨུཙྩཏརཾ དཱིགྷཾ, ཏཾ ཨུཔནིདྷཱཡ ཏཏོ ནཱིཙཏརཾ རསྶཾ. ཐཱུལཾ ཨུཔནིདྷཱཡ ཏཏོ ཁུདྡཀཏརཾ ཨཎུཾ, ཏཾ ཨུཔནིདྷཱཡ ཏཏོ མཧནྟཏརཾ ཐཱུལཾ. ཙཀྐསཎྛཱནཾ ཝཊྚཾ, ཀུཀྐུཊཎྜསཎྛཱནཾ པརིམཎྜལཾ. ཙཏཱུཧི ཨཾསེཧི ཡུཏྟཾ ཙཏུརཾསཾ. ཚལ༹ཾསཱདཱིསུཔི ཨེསེཝ ནཡོ. ནིནྣནྟི ཨོནཏཾ, ཐལནྟི ཨུནྣཏཾ.

ཏཏྠ ཡསྨཱ དཱིགྷཱདཱིནི ཕུསིཏྭཱ སཀྐཱ ཛཱནིཏུཾ, ནཱིལཱདཱིནི པནེཝཾ ན སཀྐཱ, ཏསྨཱ ན ནིཔྤརིཡཱཡེན དཱིགྷཾ རཱུཔཱཡཏནཾ; ཏཐཱ རསྶཱདཱིནི. ཏཾ ཏཾ ནིསྶཱཡ པན ཏཐཱ ཏཐཱ ཋིཏཾ དཱིགྷཾ རསྶནྟི ¶ ཏེན ཏེན ཝོཧཱརེན རཱུཔཱཡཏནམེཝེཏྠ བྷཱསིཏནྟི ཝེདིཏབྦཾ. ཚཱཡཱ ཨཱཏཔོཏི ཨིདཾ ཨཉྙམཉྙཔརིཙྪིནྣཾ; ཏཐཱ ཨཱལོཀོ ཨནྡྷཀཱརོ ཙ. ཨབྦྷཱ མཧིཀཱཏིཨཱདཱིནི ཙཏྟཱརི ཝཏྠུནཱཝ དསྶིཏཱནི. ཏཏྠ ‘ཨབྦྷཱ’ཏི ཝལཱཧཀོ. ‘མཧིཀཱ’ཏི ཧིམཾ. ཨིམེཧི ཙཏཱུཧི ཨབྦྷཱདཱིནཾ ཝཎྞཱ དསྶིཏཱ. ཙནྡམཎྜལསྶ ཝཎྞནིབྷཱཏིཨཱདཱིཧི ཏེསཾ ཏེསཾ པབྷཱཝཎྞཱ ¶ དསྶིཏཱ.

ཏཏྠ ཙནྡམཎྜལཱདཱིནཾ ཝཏྠཱུནཾ ཨེཝཾ ཝིསེསོ ཝེདིཏབྦོ – མཎིམཡཾ རཛཏཔཊིཙྪནྣཾ ཨེཀཱུནཔཉྙཱསཡོཛནཱཡཱམཝིཏྠཱརཾ ཙནྡསྶ དེཝཔུཏྟསྶ ཝིམཱནཾ ¶ ཙནྡམཎྜལཾ ནཱམ. སོཝཎྞམཡཾ ཕལིཀཔཊིཙྪནྣཾ སམཔཎྞཱསཡོཛནཱཡཱམཝིཏྠཱརཾ སཱུརིཡསྶ དེཝཔུཏྟསྶ ཝིམཱནཾ སཱུརིཡམཎྜལཾ ནཱམ. སཏྟརཏནམཡཱནི སཏྟཊྛདསདྭཱདསཡོཛནཱཡཱམཝིཏྠཱརཱནི ཏེསཾ ཏེསཾ དེཝཔུཏྟཱནཾ ཝིམཱནཱནི ཏཱརཀརཱུཔཱནི ནཱམ.

ཏཏྠ ཧེཊྛཱ ཙནྡོ, སཱུརིཡོ ཨུཔརི, ཨུབྷིནྣམནྟརཾ ཡོཛནཾ ཧོཏི. ཙནྡསྶ ཧེཊྛིམནྟཏོ སཱུརིཡསྶ ཨུཔརིམནྟོ ཡོཛནསཏཾ ཧོཏི. དྭཱིསུ པསྶེསུ ནཀྑཏྟཏཱརཀཱ གཙྪནྟི. ཨེཏེསུ པན ཏཱིསུ ཙནྡོ དནྡྷགམནོ, སཱུརིཡོ སཱིགྷགམནོ, ནཀྑཏྟཏཱརཀཱ སབྦསཱིགྷགམནཱ. ཀཱལེན ཙནྡིམསཱུརིཡཱནཾ པུརཏོ ཧོནྟི ཀཱལེན པཙྪཱ.

ཨཱདཱསམཎྜལནྟི ཀཾསམཡཾ. མཎཱིཏི ཋཔེཏྭཱ ཝེལུ༹རིཡཾ སེསོ ཛོཏིརསཱདིཨནེཀཔྤབྷེདོ. སངྑོཏི སཱམུདྡིཀོ; མུཏྟཱ སཱམུདྡིཀཱཔི, སེསཱཔི. ཝེལུ༹རིཡོཏི ཝེལུ༹ཝཎྞམཎི. ཛཱཏརཱུཔཾ ཝུཙྩཏི སཏྠུཝཎྞོ. སཏྠཱ ཧི སུཝཎྞཝཎྞོ, སུཝཎྞམྤི སཏྠུཝཎྞཾ. རཛཏཾ ཝུཙྩཏི ཀཧཱཔཎོ – ལོཧམཱསཀོ དཱརུམཱསཀོ ཛཏུམཱསཀོ, ཡེ ‘ཝོཧཱརཾ གཙྪནྟཱི’ཏི (པཱརཱ. ༥༨༤) ཝུཏྟཾ ཏཾ སབྦམྤི ཨིདྷ གཧིཏཾ.

ཡཾ ཝཱ པནཉྙམྤཱིཏི ཨིམིནཱ པཱལི༹ཨཱགཏཾ ཋཔེཏྭཱ སེསཾ ཏཊྚིཀཔིལོཏིཀཀཎྞིཀཝཎྞཱདིབྷེདཾ རཱུཔཾ གཧིཏཾ. ཏཉྷི སབྦཾ ཡེཝཱཔནཀེསུ པཝིཊྛཾ.

ཨེཝམེཏཾ ནཱིལཱདིནཱ བྷེདེན བྷིནྣམྤི རཱུཔཾ སབྦཾ ལཀྑཎཱདཱིཧི ཨབྷིནྣམེཝ. སབྦཉྷེཏཾ ཙཀྑུཔཊིཧནནལཀྑཎཾ རཱུཔཾ, ཙཀྑུཝིཉྙཱཎསྶ ཝིསཡབྷཱཝརསཾ, ཏསྶེཝ གོཙརཔཙྩུཔཊྛཱནཾ, ཙཏུམཧཱབྷཱུཏཔདཊྛཱནཾ. ཡཐཱ ཙེཏཾ ཏཐཱ སབྦཱནིཔི ཨུཔཱདཱརཱུཔཱནི. ཡཏྠ པན ཝིསེསོ ཨཏྠི ཏཏྠ ¶ ཝཀྑཱམ. སེསམེཏྠ ཙཀྑཱཡཏནནིདྡེསེ ཝུཏྟནཡེནེཝ ཝེདིཏབྦཾ. ཀེཝལཉྷི ¶ ཏཏྠ ཙཀྑུཔུབྦངྒམོ ནིདྡེསོ ཨིདྷ རཱུཔཔུབྦངྒམོ. ཏཏྠ ‘ཙཀྑུཾ པེཏ’ནྟིཨཱདཱིནི ཙུདྡས ནཱམཱནི, ཨིདྷ ‘རཱུཔཾཔེཏ’ནྟིཨཱདཱིནི ཏཱིཎི. སེསཾ ཏཱདིསམེཝ. ཡཐཱ ཧི ཙཏཱུཧི ཙཏཱུཧི ནཡེཧི པཊིམཎྜེཏྭཱ ཙཀྑུཾ ཝཝཏྠཱཔེཏུཾ ཏེརས ཝཱརཱ ཝུཏྟཱ, ཨིདྷཱཔི ཏེ ཏཐེཝ ཝུཏྟཱཏི.

༦༢༠. སདྡཱཡཏནནིདྡེསེ བྷེརིསདྡོཏི མཧཱབྷེརཱིཔཧཊབྷེརཱིནཾ སདྡོ. མུདིངྒསངྑཔཎཝསདྡཱཔི མུདིངྒཱདིཔཙྩཡཱ སདྡཱ. གཱིཏསངྑཱཏོ སདྡོ གཱིཏསདྡོ ¶ . ཝུཏྟཱཝསེསཱནཾ ཝཱིཎཱདཱིནཾ ཏནྟིབདྡྷཱནཾ སདྡོ ཝཱདིཏསདྡོ. སམྨསདྡོཏི ཀཾསཏཱལཀཊྛཏཱལསདྡོ. པཱཎིསདྡོཏི པཱཎིཔྤཧཱརསདྡོ. སཏྟཱནཾ ནིགྒྷོསསདྡོཏི བཧཱུནཾ སནྣིཔཏིཏཱནཾ ཨཔཉྙཱཡམཱནཔདབྱཉྫནནིགྒྷོསསདྡོ. དྷཱཏཱུནཾ སནྣིགྷཱཏསདྡོཏི རུཀྑཱནཾ ཨཉྙམཉྙནིགྷཾསནགྷཎྚིཀཱཀོཊནཱདིསདྡོ. ཝཱཏསྶ ཝཱཡཏོ སདྡོ ཝཱཏསདྡོ. ཨུདཀསྶ སནྡམཱནསྶ ཝཱ པཊིཧཏསྶ ཝཱ སདྡོ ཨུདཀསདྡོ. མནུསྶཱནཾ སལླཱཔཱདིསདྡོ མནུསྶསདྡོ. ཏཾ ཋཔེཏྭཱ སེསོ སབྦོཔི ཨམནུསྶསདྡོ. ཨིམིནཱ པདདྭཡེན སབྦོཔི སདྡོ པརིཡཱདིནྣོ. ཨེཝཾ སནྟེཔི ཝཾསཕཱལནཔིལོཏིཀཕཱལནཱདཱིསུ པཝཏྟོ པཱལི༹ཡཾ ཨནཱགཏསདྡོ ཡེཝཱཔནཀཊྛཱནཾ པཝིཊྛོཏི ཝེདིཏབྦོ.

ཨེཝམཡཾ བྷེརཱིསདྡཱདིནཱ བྷེདེན བྷིནྣོཔི སདྡོ ལཀྑཎཱདཱིཧི ཨབྷིནྣོཡེཝ. སབྦོཔི ཧེས སོཏཔཊིཧནནལཀྑཎོ སདྡོ སོཏཝིཉྙཱཎསྶ ཝིསཡབྷཱཝརསོ, ཏསྶེཝ གོཙརཔཙྩུཔཊྛཱནོ. སེསཾ ཙཀྑཱཡཏནནིདྡེསེ ཝུཏྟནཡེནེཝ ཝེདིཏབྦཾ. ཨིདྷཱཔི ཧི ཙཏཱུཧི ཙཏཱུཧི ནཡེཧི པཊིམཎྜིཏཱ ཏེརས ཝཱརཱ ཝུཏྟཱ. ཏེསཾ ཨཏྠོ སཀྐཱ ཝུཏྟནཡེནེཝ ཛཱནིཏུནྟི ན ཝིཏྠཱརིཏོ.

༦༢༤. གནྡྷཱཡཏནནིདྡེསེ མཱུལགནྡྷོཏི ཡཾ ཀིཉྩི མཱུལཾ པཊིཙྩ ནིབྦཏྟོ གནྡྷོ. སཱརགནྡྷཱདཱིསུཔི ཨེསེཝ ནཡོ. ཨསིདྡྷདུསིདྡྷཱནཾ ཌཱཀཱདཱིནཾ གནྡྷོ ཨཱམཀགནྡྷོ. མཙྪསཀལིཀཱཔཱུཏིམཾསསཾཀིལིཊྛསཔྤིཨཱདཱིནཾ གནྡྷོ ཝིསྶགནྡྷོ. སུགནྡྷོཏི ¶ ཨིཊྛགནྡྷོ. དུགྒནྡྷོཏི ཨནིཊྛགནྡྷོ. ཨིམིནཱ པདདྭཡེན སབྦོཔི གནྡྷོ པརིཡཱདིནྣོ. ཨེཝཾ སནྟེཔི ཀཎྞཀགནྡྷཔིལོཏིཀགནྡྷཱདཡོ པཱལི༹ཡཾ ཨནཱགཏཱ སབྦེཔི གནྡྷཱ ཡེཝཱཔནཀཊྛཱནཾ པཝིཊྛཱཏི ཝེདིཏབྦཱ.

ཨེཝམཡཾ མཱུལགནྡྷཱདིནཱ བྷེདེན བྷིནྣོཔི གནྡྷོ ལཀྑཎཱདཱིཧི ཨབྷིནྣོཡེཝ. སབྦོཔི ཧེས གྷཱནཔཊིཧནནལཀྑཎོ ¶ གནྡྷོ, གྷཱནཝིཉྙཱཎསྶ ཝིསཡབྷཱཝརསོ, ཏསྶེཝ གོཙརཔཙྩུཔཊྛཱནོ. སེསཾ ཙཀྑཱཡཏནནིདྡེསེ ཝུཏྟནཡེནེཝ ཝེདིཏབྦཾ. ཨིདྷཱཔི ཧི ཏཐེཝ དྭིཔཉྙཱསནཡཔཊིམཎྜིཏཱ ཏེརས ཝཱརཱ ཝུཏྟཱ. ཏེ ཨཏྠཏོ པཱཀཊཱཡེཝ.

༦༢༨. རསཱཡཏནནིདྡེསེ ¶ མཱུལརསོཏི ཡཾཀིཉྩི མཱུལཾ པཊིཙྩ ནིབྦཏྟརསོ. ཁནྡྷརསཱདཱིསུཔི ཨེསེཝ ནཡོ. ཨམྦིལནྟི ཏཀྐམྦིལཱདི. མདྷུརནྟི ཨེཀནྟཏོ གོསཔྤིཨཱདི. མདྷུ པན ཀསཱཝཡུཏྟཾ ཙིརནིཀྑིཏྟཾ ཀསཱཝཾ ཧོཏི. ཕཱཎིཏཾ ཁཱརིཡུཏྟཾ ཙིརནིཀྑིཏྟཾ ཁཱརིཡཾ ཧོཏི. སཔྤི པན ཙིརནིཀྑིཏྟཾ ཝཎྞགནྡྷེ ཛཧནྟམྤི རསཾ ན ཛཧཏཱིཏི ཏདེཝ ཨེཀནྟམདྷུརཾ. ཏིཏྟཀནྟི ནིམྦཔཎྞཱདི. ཀཊུཀནྟི སིངྒིཝེརམརིཙཱདི. ལོཎིཀནྟི སཱམུདྡིཀལོཎཱདི. ཁཱརིཀནྟི ཝཱཏིངྒཎཀལཱི༹རཱདི. ལམྦིལནྟི བདརཱམལཀཀཔིཊྛསཱལཝཱདི. ཀསཱཝནྟི ཧརིཏཀཱདི. ཨིམེ སབྦེཔི རསཱ ཝཏྠུཝསེན ཝུཏྟཱ. ཏཾཏཾཝཏྠུཏོ པནེཏྠ རསོཝ ཨམྦིལཱདཱིཧི ནཱམེཧི ཝུཏྟོཏི ཝེདིཏབྦོ. སཱདཱུཏི ཨིཊྛརསོ, ཨསཱདཱུཏི ཨནིཊྛརསོ. ཨིམིནཱ པདདྭཡེན སབྦོཔི རསོ པརིཡཱདིནྣོ. ཨེཝཾ སནྟེཔི ལེཌྜུརསབྷིཏྟིརསཔིལོཏིཀརསཱདཡོ པཱལི༹ཡཾ ཨནཱགཏཱ སབྦེཔི རསཱ ཡེཝཱཔནཀཊྛཱནཾ པཝིཊྛཱཏི ཝེདིཏབྦཱ.

ཨེཝམཡཾ མཱུལརསཱདིནཱབྷེདེན བྷིནྣོཔི རསོ ལཀྑཎཱདཱིཧི ཨབྷིནྣོཡེཝ. སབྦོཔི ཧེས ཛིཝ྄ཧཱཔཊིཧནནལཀྑཎོ རསོ, ཛིཝ྄ཧཱཝིཉྙཱཎསྶ ཝིསཡབྷཱཝརསོ, ཏསྶེཝ གོཙརཔཙྩུཔཊྛཱནོ. སེསཾ ཙཀྑཱཡཏནནིདྡེསེ ཝུཏྟནཡེནེཝ ཝེདིཏབྦཾ. ཨིདྷཱཔི ¶ ཧི ཏཐེཝ དྭིཔཉྙཱསནཡཔཊིམཎྜིཏཱ ཏེརས ཝཱརཱ ཝུཏྟཱ.

༦༣༢. ཨིཏྠིནྡྲིཡནིདྡེསེ ཡནྟི ཀརཎཝཙནཾ. ཡེན ཀཱརཎེན ཨིཏྠིཡཱ ཨིཏྠིལིངྒཱདཱིནི ཧོནྟཱིཏི ཨཡམེཏྠ ཨཏྠོ. ཏཏྠ ‘ལིངྒ’ནྟི སཎྛཱནཾ. ཨིཏྠིཡཱ ཧི ཧཏྠཔཱདགཱིཝཱཨུརཱདཱིནཾ སཎྛཱནཾ ན པུརིསསྶ ཝིཡ ཧོཏི. ཨིཏྠཱིནཉྷི ཧེཊྛིམཀཱཡོ ཝིསདོ ཧོཏི, ཨུཔརིམཀཱཡོ ཨཝིསདོ. ཧཏྠཔཱདཱ ཁུདྡཀཱ, མུཁཾ ཁུདྡཀཾ. ནིམིཏྟནྟི སཉྫཱནནཾ. ཨིཏྠཱིནཉྷི ཨུརམཾསཾ ཨཝིསདཾ ཧོཏི, མུཁཾ ནིམྨསྶུདཱཋིཀཾ. ཀེསབནྡྷཝཏྠགྒཧཎམྤི ན པུརིསཱནཾ ཝིཡ ཧོཏི. ཀུཏྟནྟི ཀིརིཡཱ. ཨིཏྠིཡོ ཧི དཧརཀཱལེ སུཔྤཀམུསལཀེཧི ཀཱིལ༹ནྟི, ཙིཏྟདྷཱིཏལིཀཱཡ ཀཱིལ༹ནྟི, མཏྟིཀཝཱཀེན སུཏྟཀཾ ནཱམ ཀནྟནྟི. ཨཱཀཔྤོཏི གམནཱདིཨཱཀཱརོ. ཨིཏྠིཡོ ཧི གཙྪམཱནཱ ཨཝིསདཱ གཙྪནྟི, ཏིཊྛམཱནཱ ནིཔཛྫམཱནཱ ནིསཱིདམཱནཱ ཁཱདམཱནཱ བྷུཉྫམཱནཱ ཨཝིསདཱ ¶ བྷུཉྫནྟི. པུརིསམྤི ཧི ཨཝིསདཾ དིསྭཱ མཱཏུགཱམོ ¶ ཝིཡ གཙྪཏི ཏིཊྛཏི ནིཔཛྫཏི ནིསཱིདཏི ཁཱདཏི བྷུཉྫཏཱིཏི ཝདནྟི.

ཨིཏྠཏྟཾ ཨིཏྠིབྷཱཝོཏི ཨུབྷཡམྤི ཨེཀཏྠཾ; ཨིཏྠིསབྷཱཝོཏི ཨཏྠོ. ཨཡཾ ཀམྨཛོ པཊིསནྡྷིསམུཊྛིཏོ. ཨིཏྠིལིངྒཱདཱིནི པན ཨིཏྠིནྡྲིཡཾ པཊིཙྩ པཝཏྟེ སམུཊྛིཏཱནི. ཡཐཱ ཧི བཱིཛེ སཏི, བཱིཛཾ པཊིཙྩ, བཱིཛཔཙྩཡཱ རུཀྑོ ཝཌྜྷིཏྭཱ སཱཁཱཝིཊཔསམྤནྣོ ཧུཏྭཱ ཨཱཀཱསཾ པཱུརེཏྭཱ ཏིཊྛཏི, ཨེཝམེཝ ཨིཏྠིབྷཱཝསངྑཱཏེ ཨིཏྠིནྡྲིཡེ སཏི ཨིཏྠིལིངྒཱདཱིནི ཧོནྟི. བཱིཛཾ ཝིཡ ཧི ཨིཏྠིནྡྲིཡཾ, བཱིཛཾ པཊིཙྩ ཝཌྜྷིཏྭཱ ཨཱཀཱསཾ པཱུརེཏྭཱ ཋིཏརུཀྑོ ཝིཡ ཨིཏྠིནྡྲིཡཾ པཊིཙྩ ཨིཏྠིལིངྒཱདཱིནི པཝཏྟེ སམུཊྛཧནྟི. ཏཏྠ ཨིཏྠིནྡྲིཡཾ ན ཙཀྑུཝིཉྙེཡྻཾ, མནོཝིཉྙེཡྻམེཝ. ཨིཏྠིལིངྒཱདཱིནི ཙཀྑུཝིཉྙེཡྻཱནིཔི མནོཝིཉྙེཡྻཱནིཔི.

ཨིདཾ ཏཾ རཱུཔཾ ཨིཏྠིནྡྲིཡནྟི ཨིདཾ ཏཾ རཱུཔཾ, ཡཐཱ ཙཀྑུནྡྲིཡཱདཱིནི པུརིསསྶཱཔི ཧོནྟི, ན ཨེཝཾ; ནིཡམཏོ པན ཨིཏྠིཡཱ ཨེཝ ཨིནྡྲིཡཾ ‘ཨིཏྠིནྡྲིཡཾ’.

༦༣༣. པུརིསིནྡྲིཡེཔི ཨེསེཝ ¶ ནཡོ. པུརིསལིངྒཱདཱིནི པན ཨིཏྠིལིངྒཱདཱིནཾ པཊིཔཀྑཏོ ཝེདིཏབྦཱནི. པུརིསསྶ ཧི ཧཏྠཔཱདགཱིཝཱཨུརཱདཱིནཾ སཎྛཱནཾ ན ཨིཏྠིཡཱ ཝིཡ ཧོཏི. པུརིསཱནཉྷི ཨུཔརིམཀཱཡོ ཝིསདོ ཧོཏི ཧེཊྛིམཀཱཡོ ཨཝིསདོ, ཧཏྠཔཱདཱ མཧནྟཱ, མུཁཾ མཧནྟཾ, ཨུརམཾསཾ ཝིསདཾ, མསྶུདཱཋིཀཱ ཨུཔྤཛྫནྟི. ཀེསབནྡྷནཝཏྠགྒཧཎཾ ན ཨིཏྠཱིནཾ ཝིཡ ཧོཏི. དཧརཀཱལེ རཐནངྒལཱདཱིཧི ཀཱིལ༹ནྟི, ཝཱལིཀཔཱལི༹ཾ ཀཏྭཱ ཝཱཔིཾ ནཱམ ཁནནྟི, གམནཱདཱིནི ཝིསདཱནི ཧོནྟི. ཨིཏྠིམྤི གམནཱདཱིནི ཝིསདཱནི ཀུརུམཱནཾ དིསྭཱ ‘པུརིསོ ཝིཡ གཙྪཏཱི’ཏིཨཱདཱིནི ཝདནྟི. སེསཾ ཨིཏྠིནྡྲིཡེ ཝུཏྟསདིསམེཝ.

ཏཏྠ ཨིཏྠིབྷཱཝལཀྑཎཾ ཨིཏྠིནྡྲིཡཾ, ཨིཏྠཱིཏི པཀཱསནརསཾ, ཨིཏྠིལིངྒནིམིཏྟཀུཏྟཱཀཔྤཱནཾ ཀཱརཎབྷཱཝཔཙྩུཔཊྛཱནཾ. པུརིསབྷཱཝལཀྑཎཾ པུརིསིནྡྲིཡཾ, པུརིསོཏི པཀཱསནརསཾ, པུརིསལིངྒནིམིཏྟཀུཏྟཱཀཔྤཱནཾ ཀཱརཎབྷཱཝཔཙྩུཔཊྛཱནཾ. ཨུབྷཡམྤེཏཾ པཋམཀཔྤིཀཱནཾ པཝཏྟེ སམུཊྛཱཏི. ཨཔརབྷཱགེ པཊིསནྡྷིཡཾ. པཊིསནྡྷིསམུཊྛིཏམྤི པཝཏྟེ ཙལཏི པརིཝཏྟཏི.

ཡཐཱཧ ¶ –

‘‘ཏེན ¶ ཁོ པན སམཡེན ཨཉྙཏརསྶ བྷིཀྑུནོ ཨིཏྠིལིངྒཾ པཱཏུབྷཱུཏཾ ཧོཏི. ཏེན ཁོ པན སམཡེན ཨཉྙཏརིསྶཱ བྷིཀྑུནིཡཱ པུརིསལིངྒཾ པཱཏུབྷཱུཏཾ ཧོཏཱི’’ཏི (པཱརཱ. ༦༩).

ཨིམེསུ པན དྭཱིསུ པུརིསལིངྒཾ ཨུཏྟམཾ, ཨིཏྠིལིངྒཾ ཧཱིནཾ. ཏསྨཱ པུརིསལིངྒཾ བལཝཨཀུསལེན ཨནྟརདྷཱཡཏི, ཨིཏྠིལིངྒཾ དུབྦལཀུསལེན པཏིཊྛཱཏི. ཨིཏྠིལིངྒཾ པན ཨནྟརདྷཱཡནྟཾ དུབྦལཨཀུསལེན ཨནྟརདྷཱཡཏི, པུརིསལིངྒཾ བལཝཀུསལེན པཏིཊྛཱཏི. ཨེཝཾ ཨུབྷཡམྤི ཨཀུསལེན ཨནྟརདྷཱཡཏི, ཀུསལེན པཏིཊྛཱཏཱིཏི ཝེདིཏབྦཾ.

ཨུབྷཏོབྱཉྫནཀསྶ པན ཀིཾ ཨེཀཾ ཨིནྡྲིཡཾ ཨུདཱཧུ དྭེཏི? ཨེཀཾ. ཏཉྩ ཁོ ཨིཏྠིཨུབྷཏོབྱཉྫནཀསྶ ཨིཏྠིནྡྲིཡཾ, པུརིསཨུབྷཏོབྱཉྫནཀསྶ པུརིསིནྡྲིཡཾ. ‘ཨེཝཾ སནྟེ དུཏིཡབྱཉྫནཀསྶ ཨབྷཱཝོ ཨཱཔཛྫཏི. ཨིནྡྲིཡཉྷི བྱཉྫནཀཱརཎཾ ཝུཏྟཾ. ཏཉྩསྶ ནཏྠཱི’ཏི? ‘ན ཏསྶ ཨིནྡྲིཡཾ བྱཉྫནཀཱརཎཾ’. ‘ཀསྨཱ’? ‘སདཱ ¶ ཨབྷཱཝཏོ. ཨིཏྠིཨུབྷཏོབྱཉྫནཀསྶ ཧི ཡདཱ ཨིཏྠིཡཱ རཱགཙིཏྟཾ ཨུཔྤཛྫཏི, ཏདཱཝ པུརིསབྱཉྫནཾ པཱཀཊཾ ཧོཏི, ཨིཏྠིབྱཉྫནཾ པཊིཙྪནྣཾ གུལ༹ྷཾ ཧོཏི. ཏཐཱ ཨིཏརསྶ ཨིཏརཾ.

ཡདི ཙ ཏེསཾ ཨིནྡྲིཡཾ དུཏིཡབྱཉྫནཀཱརཎཾ བྷཝེཡྻ, སདཱཔི བྱཉྫནདྭཡཾ ཏིཊྛེཡྻ. ན པན ཏིཊྛཏི. ཏསྨཱ ཝེདིཏབྦམེཏཾ ན ཏསྶ ཏཾ བྱཉྫནཀཱརཎཾ. ཀམྨསཧཱཡཾ པན རཱགཙིཏྟམེཝེཏྠ ཀཱརཎཾ. ཡསྨཱ ཙསྶ ཨེཀམེཝ ཨིནྡྲིཡཾ ཧོཏི, ཏསྨཱ ཨིཏྠིཨུབྷཏོབྱཉྫནཀོ སཡམྤི གབྦྷཾ གཎྷཱཏི, པརམྤི གཎྷཱཔེཏི. པུརིསཨུབྷཏོབྱཉྫནཀོ པརཾ གབྦྷཾ གཎྷཱཔེཏི, སཡཾ པན ན གཎྷཱཏཱིཏི.

༦༣༤. ཛཱིཝིཏིནྡྲིཡནིདྡེསེ ཡཾ ཝཏྟབྦཾ ཏཾ ཧེཊྛཱ ཨརཱུཔཛཱིཝིཏིནྡྲིཡེ ཝུཏྟམེཝ. ཀེཝལཉྷི ཏཏྠ ཡོ ཏེསཾ ཨརཱུཔཱིནཾ དྷམྨཱནནྟི ཝུཏྟཾ, ཨིདྷ རཱུཔཛཱིཝིཏིནྡྲིཡཏྟཱ ཡོ ཏེསཾ རཱུཔཱིནཾ དྷམྨཱནནྟི ཨཡམེཝ ཝིསེསོ. ལཀྑཎཱདཱིནི པནསྶ ཨེཝཾ ཝེདིཏབྦཱནི – སཧཛཱཏརཱུཔཱནུཔཱལནལཀྑཎཾ ཛཱིཝིཏིནྡྲིཡཾ, ཏེསཾ པཝཏྟནརསཾ, ཏེསཾ ཡེཝ ཋཔནཔཙྩུཔཊྛཱནཾ, ཡཱཔཡིཏབྦབྷཱུཏཔདཊྛཱནནྟི.

༦༣༥. ཀཱཡཝིཉྙཏྟིནིདྡེསེ ¶ ¶ ཀཱཡཝིཉྙཏྟཱིཏི ཨེཏྠ ཏཱཝ ཀཱཡེན ཨཏྟནོ བྷཱཝཾ ཝིཉྙཱཔེནྟཱནཾ ཏིརཙྪཱནེཧིཔི པུརིསཱནཾ, པུརིསེཧི ཝཱ ཏིརཙྪཱནཱནམྤི ཀཱཡགཧཎཱནུསཱརེན གཧིཏཱཡ ཨེཏཱཡ བྷཱཝོ ཝིཉྙཱཡཏཱིཏི ‘ཝིཉྙཏྟི’. སཡཾ ཀཱཡགཧཎཱནུསཱརེན ཝིཉྙཱཡཏཱིཏིཔི ‘ཝིཉྙཏྟི’. ‘‘ཀཱཡེན སཾཝརོ སཱདྷཱུ’’ཏིཨཱདཱིསུ (དྷ. པ. ༣༦༡) ཨཱགཏོ ཙོཔནསངྑཱཏོ ཀཱཡོཝ ཝིཉྙཏྟི ‘ཀཱཡཝིཉྙཏྟི’. ཀཱཡཝིཔྥནྡནེན ཨདྷིཔྤཱཡཝིཉྙཱཔནཧེཏུཏྟཱ, སཡཉྩ ཏཐཱ ཝིཉྙེཡྻཏྟཱ ཀཱཡེན ཝིཉྙཏྟཱིཏིཔི ‘ཀཱཡཝིཉྙཏྟི’.

ཀུསལཙིཏྟསྶ ཝཱཏིཨཱདཱིསུ ཨཊྛཧི ཀཱམཱཝཙརེཧི ཨབྷིཉྙཱཙིཏྟེན ཙཱཏི ནཝཧི ཀུསལཙིཏྟེཧི ཀུསལཙིཏྟསྶ ཝཱ, དྭཱདསཧིཔི ཨཀུསལཙིཏྟེཧི ཨཀུསལཙིཏྟསྶ ཝཱ, ཨཊྛཧི མཧཱཀིརིཡེཧི དྭཱིཧི ཨཧེཏུཀཀིརིཡེཧི ཨབྷིཉྙཱཔྤཏྟེན ཨེཀེན རཱུཔཱཝཙརཀིརིཡེནཱཏི ཨེཀཱདསཧི ཀིརིཡཙིཏྟེཧི ཨབྱཱཀཏཙིཏྟསྶ ཝཱ. ཨིཏོ ཨཉྙཱནི ཧི ཙིཏྟཱནི ཝིཉྙཏྟིཾ ན ཛནེནྟི. སེཀྑཱསེཀྑཔུཐུཛྫནཱནཾ ¶ པན ཨེཏྟཀེཧེཝ ཙིཏྟེཧི ཝིཉྙཏྟི ཧོཏཱིཏི ཨེཏེསཾ ཀུསལཱདཱིནཾ ཝསེན ཏཱིཧི པདེཧི ‘ཧེཏུཏོ’ དསྶིཏཱ.

ཨིདཱནི ཚཧི པདེཧི ‘ཕལཏོ’ དསྶེཏུཾ ཨབྷིཀྐམནྟསྶ ཝཱཏིཨཱདི ཝུཏྟཾ. ཨབྷིཀྐམཱདཡོ ཧི ཝིཉྙཏྟིཝསེན པཝཏྟཏྟཱ ཝིཉྙཏྟིཕལཾ ནཱམ. ཏཏྠ ‘ཨབྷིཀྐམནྟསྶཱ’ཏི པུརཏོ ཀཱཡཾ ཨབྷིཧརནྟསྶ. པཊིཀྐམནྟསྶཱཏི པཙྪཏོ པཙྩཱཧརནྟསྶ. ཨཱལོཀེནྟསྶཱཏི ཨུཛུཀཾ པེཀྑནྟསྶ. ཝིལོཀེནྟསྶཱཏི ཨིཏོ ཙིཏོ ཙ པེཀྑནྟསྶ. སམིཉྫེནྟསྶཱཏི སནྡྷཡོ སངྐོཙེནྟསྶ. པསཱརེནྟསྶཱཏི སནྡྷཡོ པཊིཔཎཱམེནྟསྶ.

ཨིདཱནི ཚཧི པདེཧི ‘སབྷཱཝཏོ’ དསྶེཏུཾ ཀཱཡསྶ ཐམྦྷནཱཏི ཨཱདི ཝུཏྟཾ. ཏཏྠ ‘ཀཱཡསྶཱ’ཏི སརཱིརསྶ. ཀཱཡཾ ཐམྦྷེཏྭཱ ཐདྡྷཾ ཀརོཏཱིཏི ཐམྦྷནཱ. ཏམེཝ ཨུཔསགྒེན ཝཌྜྷེཏྭཱ སནྠམྦྷནཱཏི ཨཱཧ. བལཝཏརཱ ཝཱ ཐམྦྷནཱ ‘སནྠམྦྷནཱ’. སནྠམྦྷིཏཏྟནྟི སནྠམྦྷིཏབྷཱཝོ. ཝིཉྙཱཔནཝསེན ཝིཉྙཏྟི. ཝིཉྙཱཔནཱཏི ཝིཉྙཱཔནཱཀཱརོ. ཝིཉྙཱཔིཏབྷཱཝོ ཝིཉྙཱཔིཏཏྟཾ. སེསམེཏྠ ཡཾ ཝཏྟབྦཾ ཏཾ ཧེཊྛཱ དྭཱརཀཐཱཡཾ ཝུཏྟམེཝ. ཏཐཱ ཝཙཱིཝིཉྙཏྟིཡཾ.

༦༣༦. ཝཙཱིཝིཉྙཏྟཱིཏིཔདསྶ ¶ པན ནིདྡེསཔདཱནཉྩ ཨཏྠོ ཏཏྠ ན ཝུཏྟོ, སོ ཨེཝཾ ཝེདིཏབྦོ – ཝཱཙཱཡ ཨཏྟནོ བྷཱཝཾ ཝིཉྙཱཔེནྟཱནཾ ཏིརཙྪཱནེཧིཔི པུརིསཱནཾ, པུརིསེཧི ཝཱ ཏིརཙྪཱནཱནམྤི ¶ , ཝཙཱིགཧཎཱནུསཱརེན གཧིཏཱཡ ཨེཏཱཡ བྷཱཝོ ཝིཉྙཱཡཏཱིཏི ཝིཉྙཏྟི. སཡཉྩ ཝཙཱིགཧཎཱནུསཱརེན ཝིཉྙཱཡཏཱིཏིཔི ཝིཉྙཏྟི. ‘‘སཱདྷུ ཝཱཙཱཡ སཾཝརོ’’ཏིཨཱདཱིསུ (དྷ. པ. ༣༦༡) ཨཱགཏཱ ཙོཔནསངྑཱཏཱ ཝཙཱི ཨེཝ ཝིཉྙཏྟི ‘ཝཙཱིཝིཉྙཏྟི’. ཝཙཱིགྷོསེན ཨདྷིཔྤཱཡཝིཉྙཱཔནཧེཏུཏྟཱ སཡཉྩ ཏཐཱཝིཉྙེཡྻཏྟཱ ཝཱཙཱཡ ཝིཉྙཏྟཱིཏིཔི ‘ཝཙཱིཝིཉྙཏྟི’. ཝཱཙཱ གིརཱཏིཨཱདཱིསུ ཝུཙྩཏཱིཏི ‘ཝཱཙཱ’. གིརིཡཏཱིཏི ‘གིརཱ’. བྱཔྤཐོཏི ཝཱཀྱབྷེདོ. ཝཱཀྱཉྩ ཏཾ པཐོ ཙ ཨཏྠཾ ཉཱཏུཀཱམཱནཾ ཉཱཔེཏུཀཱམཱནཉྩཱཏིཔི ‘བྱཔྤཐོ’. ཨུདཱིརིཡཏཱིཏི ཨུདཱིརཎཾ. གྷུསྶཏཱིཏི གྷོསོ. ཀརིཡཏཱིཏི ཀམྨཾ. གྷོསོཝ ཀམྨཾ གྷོསཀམྨཾ. ནཱནཔྤཀཱརེཧི ཀཏོ ¶ གྷོསོཏི ཨཏྠོ. ཝཙིཡཱ བྷེདོ ཝཙཱིབྷེདོ. སོ པན ‘ན བྷངྒོ, པབྷེདགཏཱ ཝཱཙཱ ཨེཝཱ’ཏི ཉཱཔནཏྠཾ ཝཱཙཱ ཝཙཱིབྷེདོཏི ཝུཏྟཾ. ཨིམེཧི སབྦེཧིཔི པདེཧི ‘སདྡཝཱཙཱཝ’ དསྶིཏཱ. ཨིདཱནི ཏཱཡ ཝཱཙཱཡ སདྡྷིཾ ཡོཛེཏྭཱ ཧེཊྛཱ ཝུཏྟཏྠཱནཾ ཝིཉྙཏྟིཨཱདཱིནཾ པདཱནཾ ཝསེན ཏཱིཧཱཀཱརེཧི སབྷཱཝཏོ ཏཾ དསྶེཏུཾ ཡཱ ཏཱཡ ཝཱཙཱཡ ཝིཉྙཏྟཱིཏིཨཱདི ཝུཏྟཾ. ཏཾ ཧེཊྛཱ ཝུཏྟནཡཏྟཱ ཨུཏྟཱནཏྠམེཝ.

ཨིདཱནི ཝིཉྙཏྟིསམུཊྛཱཔཀཙིཏྟེསུ ཨསམྨོཧཏྠཾ དྭཏྟིཾས ཚབྦཱིས ཨེཀཱུནཝཱིསཏི སོལ༹ས པཙྪིམཱནཱིཏི ཨིདཾ པཀིཎྞཀཾ ཝེདིཏབྦཾ – དྭཏྟིཾས ཙིཏྟཱནི ཧི རཱུཔཾ སམུཊྛཱཔེནྟི, ཨིརིཡཱཔཐམྤི ཨུཔཏྠམྦྷེནྟི, དུཝིདྷམྤི ཝིཉྙཏྟིཾ ཛནེནྟི. ཚབྦཱིསཏི ཝིཉྙཏྟིམེཝ ན ཛནེནྟི, ཨིཏརདྭཡཾ ཀརོནྟི. ཨེཀཱུནཝཱིསཏི རཱུཔམེཝ སམུཊྛཱཔེནྟི, ཨིཏརདྭཡཾ ན ཀརོནྟི. སོལ༹ས ཨིམེསུ ཏཱིསུ ཨེཀམྤི ན ཀརོནྟི.

ཏཏྠ དྭཏྟིཾསཱཏི ཧེཊྛཱ ཝུཏྟཱནེཝ ཀཱམཱཝཙརཏོ ཨཊྛ ཀུསལཱནི, དྭཱདས ཨཀུསལཱནི, ཀིརིཡཏོ དས ཙིཏྟཱནི, སེཀྑཔུཐུཛྫནཱནཾ ཨབྷིཉྙཱཙིཏྟཾ, ཁཱིཎཱསཝཱནཾ ཨབྷིཉྙཱཙིཏྟནྟི. ཚབྦཱིསཱཏི རཱུཔཱཝཙརཏོ པཉྩ ཀུསལཱནི, པཉྩ ཀིརིཡཱནི, ཨརཱུཔཱཝཙརཏོ ཙཏྟཱརི ཀུསལཱནི, ཙཏྟཱརི ཀིརིཡཱནི, ཙཏྟཱརི མགྒཙིཏྟཱནི, ཙཏྟཱརི ཕལཙིཏྟཱནཱིཏི. ཨེཀཱུནཝཱིསཏཱིཏི ཀཱམཱཝཙརཀུསལཝིཔཱཀཏོ ཨེཀཱདས, ཨཀུསལཝིཔཱཀཏོ དྭེ ¶ , ཀིརིཡཏོ ཀིརིཡམནོདྷཱཏུ, རཱུཔཱཝཙརཏོ པཉྩ ཝིཔཱཀཙིཏྟཱནཱིཏི. སོལ༹སཱཏི དྭེ པཉྩཝིཉྙཱཎཱནི, སབྦསཏྟཱནཾ པཊིསནྡྷིཙིཏྟཾ, ཁཱིཎཱསཝཱནཾ ཙུཏིཙིཏྟཾ, ཨརཱུཔེ ཙཏྟཱརི ཝིཔཱཀཙིཏྟཱནཱིཏི. ཨིམཱནི སོལ༹ས རཱུཔིརིཡཱཔཐཝིཉྙཏྟཱིསུ ཨེཀམྤི ན ཀརོནྟི. ཨཉྙཱནིཔི བཧཱུནི ཨརཱུཔེ ཨུཔྤནྣཱནི ཨནོཀཱསགཏཏྟཱ རཱུཔཾ ན སམུཊྛཱཔེནྟི. ན ཏཱནེཝ, ཀཱཡཝཙཱིཝིཉྙཏྟིཡོཔི.

༦༣༧. ཨཱཀཱསདྷཱཏུནིདྡེསེ ¶ ན ཀསྶཏི, ན ནིཀསྶཏི, ཀསིཏུཾ ཝཱ ཚིནྡིཏུཾ ཝཱ བྷིནྡིཏུཾ ཝཱ ན སཀྐཱཏི ཨཱཀཱསོ. ཨཱཀཱསོཝ ཨཱཀཱསགཏཾ ¶ , ཁེལ༹གཏཱདི ཝིཡ. ཨཱཀཱསོཏི ཝཱ གཏནྟི ‘ཨཱཀཱསགཏཾ’. ན ཧཉྙཏཱིཏི ཨགྷཾ, ཨགྷཊྚནཱིཡནྟི ཨཏྠོ. ཨགྷམེཝ ཨགྷགཏཾ. ཚིདྡཊྛེན ཝིཝརོ. ཝིཝརོཝ ཝིཝརགཏཾ. ཨསམྥུཊྛཾ ཙཏཱུཧི མཧཱབྷཱུཏེཧཱིཏི ཨེཏེཧི ཨསམྥུཊྛཾ ནིཛྫཊཱཀཱསཾཝ ཀཐིཏཾ. ལཀྑཎཱདིཏོ པན རཱུཔཔརིཙྪེདལཀྑཎཱ ཨཱཀཱསདྷཱཏུ, རཱུཔཔརིཡནྟཔྤཀཱསནརསཱ, རཱུཔམརིཡཱདཔཙྩུཔཊྛཱནཱ ཨསམྥུཊྛབྷཱཝཚིདྡཝིཝརབྷཱཝཔཙྩུཔཊྛཱནཱ ཝཱ, པརིཙྪིནྣརཱུཔཔདཊྛཱནཱ, ཡཱཡ པརིཙྪིནྣེསུ རཱུཔེསུ ‘ཨིདམིཏོ ཨུདྡྷཾ ཨདྷོ ཏིརིཡ’ནྟི ཙ ཧོཏི.

༦༣༨. ཨིཏོ པརེ རཱུཔསྶལཧུཏཱདཱིནཾ ནིདྡེསཱ ཙིཏྟསྶལཧུཏཱདཱིསུ ཝུཏྟནཡེནེཝ ཝེདིཏབྦཱ. ལཀྑཎཱདིཏོ པནེཏྠ ཨདནྡྷཏཱལཀྑཎཱ རཱུཔསྶ ལཧུཏཱ, རཱུཔཱནཾ གརུབྷཱཝཝིནོདནརསཱ, ལཧུཔརིཝཏྟིཏཱཔཙྩུཔཊྛཱནཱ, ལཧུརཱུཔཔདཊྛཱནཱ. ཨཐདྡྷཏཱལཀྑཎཱ རཱུཔསྶ མུདུཏཱ, རཱུཔཱནཾ ཐདྡྷབྷཱཝཝིནོདནརསཱ, སབྦཀིརིཡཱསུ ཨཝིརོདྷིཏཱཔཙྩུཔཊྛཱནཱ, མུདུརཱུཔཔདཊྛཱནཱ. སརཱིརཀིརིཡཱནུཀཱུལཀམྨཉྙབྷཱཝལཀྑཎཱ རཱུཔསྶ ཀམྨཉྙཏཱ, ཨཀམྨཉྙཏཱཝིནོདནརསཱ, ཨདུབྦལབྷཱཝཔཙྩུཔཊྛཱནཱ, ཀམྨཉྙརཱུཔཔདཊྛཱནཱ.

ཨེཏཱ པན ཏིསྶོ ན ཨཉྙམཉྙཾ ཝིཛཧནྟི. ཨེཝཾ སནྟེཔི ཡོ ཨརོགིནོ ཝིཡ རཱུཔཱནཾ ལཧུབྷཱཝོ, ཨདནྡྷཏཱལཧུཔརིཝཏྟིཔྤཀཱརོ, རཱུཔདནྡྷཏྟཀརདྷཱཏུཀྑོབྷཔཊིཔཀྑཔཙྩཡསམུཊྛཱནོ, སོ རཱུཔཝིཀཱརོ ‘རཱུཔསྶལཧུཏཱ’. ཡོ སུཔརིམདྡིཏཙམྨསྶེཝ རཱུཔཱནཾ མུདུབྷཱཝོ སབྦཀིརིཡཱཝིསེསེསུ སརསཝཏྟནབྷཱཝོ ཝསཝཏྟནབྷཱཝམདྡཝཔྤཀཱརོ རཱུཔཐདྡྷཏྟཀརདྷཱཏུཀྑོབྷཔཊིཔཀྑཔཙྩཡསམུཊྛཱནོ ¶ , སོ རཱུཔཝིཀཱརོ ‘རཱུཔསྶ མུདུཏཱ’. ཡོ པན སུདྷནྟསུཝཎྞསྶེཝ རཱུཔཱནཾ ཀམྨཉྙབྷཱཝོ སརཱིརཀིརིཡཱནུཀཱུལབྷཱཝཔྤཀཱརོ སརཱིརཀིརིཡཱནཾ ¶ ཨནནུཀཱུལཀརདྷཱཏུཀྑོབྷཔཊིཔཀྑཔཙྩཡསམུཊྛཱནོ, སོ རཱུཔཝིཀཱརོ ‘རཱུཔསྶ ཀམྨཉྙཏཱ’ཏི. ཨེཝམེཏཱསཾ ཝིསེསོ ཝེདིཏབྦོ.

ཨེཏཱ པན ཏིསྶོཔི ཀམྨཾ ཀཱཏུཾ ན སཀྐོཏི, ཨཱཧཱརཱདཡོཝ ཀརོནྟི. ཏཐཱ ཧི ཡོགིནོ ‘ཨཛྫ ཨམྷེཧི བྷོཛནསཔྤཱཡཾ ལདྡྷཾ, ཀཱཡོ ནོ ལཧུ མུདུ ཀམྨཉྙོ’ཏི ཝདནྟི. ‘ཨཛྫ ཨུཏུསཔྤཱཡཾ ལདྡྷཾ, ཨཛྫ ཨམྷཱཀཾ ཙིཏྟཾ ཨེཀགྒཾ, ཀཱཡོ ནོ ལཧུ མུདུ ཀམྨཉྙོ’ཏི ཝདནྟཱིཏི.

༦༤༡. ཨུཔཙཡསནྟཏིནིདྡེསེསུ ¶ ཨཱཡཏནཱནནྟི ཨཌྜྷེཀཱདསནྣཾ རཱུཔཱཡཏནཱནཾ. ཨཱཙཡོཏི ནིབྦཏྟི. སོ རཱུཔསྶ ཨུཔཙཡོཏི ཡོ ཨཱཡཏནཱནཾ ཨཱཙཡོ པུནཔྤུནཾ ནིབྦཏྟམཱནཱནཾ, སོཝ རཱུཔསྶ ཨུཔཙཡོ ནཱམ ཧོཏི; ཝཌྜྷཱིཏི ཨཏྠོ. ཡོ རཱུཔསྶ ཨུཔཙཡོ སཱ རཱུཔསྶ སནྟཏཱིཏི ཡཱ ཨེཝཾ ཨུཔཙིཏཱནཾ རཱུཔཱནཾ ཝཌྜྷི, ཏཏོ ཨུཏྟརིཏརཾ པཝཏྟིཀཱལེ སཱ རཱུཔསྶ སནྟཏི ནཱམ ཧོཏི; པཝཏྟཱིཏི ཨཏྠོ. ནདིཏཱིརེ ཁཏཀཱུཔསྨིཉྷི ཨུདཀུགྒམནཀཱལོ ཝིཡ ཨཱཙཡོ, ནིབྦཏྟི; པརིཔུཎྞཀཱལོ ཝིཡ ཨུཔཙཡོ, ཝཌྜྷི; ཨཛ྄ཛྷོཏྠརིཏྭཱ གམནཀཱལོ ཝིཡ སནྟཏི, པཝཏྟཱིཏི ཝེདིཏབྦཱ.

ཨེཝཾ ཀིཾ ཀཐིཏཾ ཧོཏཱིཏི? ཨཱཡཏནེན ཧི ཨཱཙཡོ ཀཐིཏོ, ཨཱཙཡེན ཨཱཡཏནཾ ཀཐིཏཾ. ཨཱཙཡོཝ ཀཐིཏོ ཨཱཡཏནམེཝ ཀཐིཏཾ. ཨེཝམྤི ཀིཾ ཀཐིཏཾ ཧོཏཱིཏི? ཙཏུསནྟཏིརཱུཔཱནཾ ཨཱཙཡོ ཨུཔཙཡོ ནིབྦཏྟི ཝཌྜྷི ཀཐིཏཱ. ཨཏྠཏོ ཧི ཨུབྷཡམྤེཏཾ ཛཱཏིརཱུཔསྶེཝ ཨདྷིཝཙནཾ. ཨཱཀཱརནཱནཏྟེན པན ཝེནེཡྻཝསེན ཙ ཨུཔཙཡོ སནྟཏཱིཏི ཨུདྡེསདེསནཾ ཀཏྭཱ ཡསྨཱ ཨེཏྠ ཨཏྠཏོ ནཱནཏྟཾ ནཏྠི, ཏསྨཱ ནིདྡེསེ ‘‘ཡོ ཨཱཡཏནཱནཾ ཨཱཙཡོ སོ རཱུཔསྶ ཨུཔཙཡོ, ཡོ རཱུཔསྶ ཨུཔཙཡོ སཱ རཱུཔསྶ སནྟཏཱི’’ཏི ཝུཏྟཾ.

ཡསྨཱ ཙ ཨུབྷཡམྤེཏཾ ཛཱཏིརཱུཔསྶེཝ ཨདྷིཝཙནཾ ཏསྨཱ ཨེཏྠ ཨཱཙཡལཀྑཎོ རཱུཔསྶ ཨུཔཙཡོ, པུབྦནྟཏོ རཱུཔཱནཾ ཨུམྨུཛྫཱཔནརསོ, ནིཡྻཱཏནཔཙྩུཔཊྛཱནོ ¶ པརིཔུཎྞབྷཱཝཔཙྩུཔཊྛཱནོ ཝཱ, ཨུཔཙིཏརཱུཔཔདཊྛཱནོ. པཝཏྟིལཀྑཎཱ རཱུཔསྶ སནྟཏི, ཨནུཔྤབནྡྷརསཱ, ཨནུཔཙྪེདཔཙྩུཔཊྛཱནཱ, ཨནུཔྤབནྡྷརཱུཔཔདཊྛཱནཱཏི ཝེདིཏབྦཱ.

༦༤༣. ཛརཏཱནིདྡེསེ ཛཱིརཎཀཝསེན ཛརཱ; ཨཡམེཏྠ སབྷཱཝནིདྡེསོ ¶ . ཛཱིརཎཱཀཱརོ ཛཱིརཎཏཱ. ཁཎྜིཙྩནྟི ཨཱདཡོ ཏཡོ ཀཱལཱཏིཀྐམེ ཀིཙྩནིདྡེསཱ. པཙྪིམཱ དྭེ པཀཏིནིདྡེསཱ. ཨཡཉྷི ‘ཛརཱ’ཏི ཨིམིནཱ པདེན སབྷཱཝཏོ དཱིཔིཏཱ; ཏེནསྶཱཡཾ སབྷཱཝནིདྡེསོ. ‘ཛཱིརཎཏཱ’ཏི ཨིམིནཱ ཨཱཀཱརཏོ; ཏེནསྶཱཡཾ ཨཱཀཱརནིདྡེསོ. ཁཎྜིཙྩནྟི ཨིམིནཱ ཀཱལཱཏིཀྐམེ དནྟནཁཱནཾ ཁཎྜིཏབྷཱཝཀརཎཀིཙྩཏོ. པཱལིཙྩནྟི ཨིམིནཱ ཀེསལོམཱནཾ པལིཏབྷཱཝཀརཎཀིཙྩཏོ. ཝལིཏྟཙཏཱཏི ཨིམིནཱ མཾསཾ མིལཱཔེཏྭཱ ཏཙེ ཝལིབྷཱཝཀརཎཀིཙྩཏོ དཱིཔིཏཱ. ཏེནསྶཱ ཨིམེ ‘ཁཎྜིཙྩ’ནྟིཨཱདཡོ ཏཡོ ཀཱལཱཏིཀྐམེ ཀིཙྩནིདྡེསཱ. ཏེཧི ཨིམེསཾ ཝིཀཱརཱནཾ དསྶནཝསེན པཱཀཊཱིབྷཱུཏཱ པཱཀཊཛརཱ དསྶིཏཱ. ཡཐེཝ ཧི ¶ ཨུདཀསྶ ཝཱ ཨགྒིནོ ཝཱ ཏིཎརུཀྑཱདཱིནཾ སཾབྷགྒཔལིབྷགྒཏཱཡ ཝཱ ཛྷཱམཏཱཡ ཝཱ གཏམགྒོ པཱཀཊོ ཧོཏི, ན ཙ སོ གཏམགྒོ ཏཱནེཝ ཨུདཀཱདཱིནི, ཨེཝམེཝ ཛརཱཡ དནྟཱདཱིསུ ཁཎྜིཙྩཱདིཝསེན གཏམགྒོ པཱཀཊོ, ཙཀྑུཾ ཨུམྨཱིལེཏྭཱཔི གཡ྄ཧཏི, ན ཙ ཁཎྜིཙྩཱདཱིནེཝ ཛརཱ. ན ཧི ཛརཱ ཙཀྑུཝིཉྙེཡྻཱ ཧོཏི.

ཨཱཡུནོ སཾཧཱནི ཨིནྡྲིཡཱནཾ པརིཔཱཀོཏི ཨིམེཧི པན པདེཧི ཀཱལཱཏིཀྐམེཡེཝ ཨབྷིབྱཏྟཱཡ ཨཱཡུཀྑཡཙཀྑཱདིཨིནྡྲིཡཔརིཔཱཀསཉྙིཏཱཡ པཀཏིཡཱ དཱིཔིཏཱ. ཏེནསྶིམེ པཙྪིམཱ དྭེ པཀཏིནིདྡེསཱཏི ཝེདིཏབྦཱ. ཏཏྠ ཡསྨཱ ཛརཾ པཏྟསྶ ཨཱཡུ ཧཱཡཏི, ཏསྨཱ ཛརཱ ‘ཨཱཡུནོ སཾཧཱནཱི’ཏི ཕལཱུཔཙཱརེན ཝུཏྟཱ. ཡསྨཱ ཙ དཧརཀཱལེ སུཔྤསནྣཱནི, སུཁུམམྤི ཨཏྟནོ ཝིསཡཾ སུཁེནེཝ གཎྷནསམཏྠཱནི ཙཀྑཱདཱིནི ཨིནྡྲིཡཱནི ཛརཾ པཏྟསྶ པརིཔཀྐཱནི ཨཱལུལི༹ཏཱནི ཨཝིསདཱནི, ཨོལཱ༹རིཀམྤི ཨཏྟནོ ཝིསཡཾ གཧེཏུཾ ཨསམཏྠཱནི ཧོནྟི, ཏསྨཱ ‘ཨིནྡྲིཡཱནཾ པརིཔཱཀོ’ཏིཔི ཕལཱུཔཙཱརེནེཝ ཝུཏྟཱ.

སཱ པནཱཡཾ ཨེཝཾ ནིདྡིཊྛཱ སབྦཱཔི ཛརཱ པཱཀཊཱ པཊིཙྪནྣཱཏི དུཝིདྷཱ ཧོཏི. ཏཏྠ དནྟཱདཱིསུ ཁཎྜབྷཱཝཱདིདསྶནཏོ རཱུཔདྷམྨེསུ ཛརཱ པཱཀཊཛརཱ ནཱམ ¶ . ཨརཱུཔདྷམྨེསུ པན ཛརཱ ཏཱདིསསྶ ཝིཀཱརསྶ ཨདསྶནཏོ པཊིཙྪནྣཛརཱ ནཱམ. པུན ཨཝཱིཙི སཝཱིཙཱིཏི ཨེཝམྤི དུཝིདྷཱ ཧོཏི. ཏཏྠ མཎིཀནཀརཛཏཔཝཱལ༹ཙནྡིམསཱུརིཡཱདཱིནཾ ཝིཡ, མནྡདསཀཱདཱིསུ པཱཎཱིནཾ ཝིཡ ཙ, པུཔྥཕལཔལླཝཱདཱིསུ ¶ ཙ ཨཔཱཎཱིནཾ ཝིཡ, ཨནྟརནྟརཱ ཝཎྞཝིསེསཱདཱིནཾ དུཝིཉྙེཡྻཏྟཱ ཛརཱ ཨཝཱིཙིཛརཱ ནཱམ; ནིརནྟརཛརཱཏི ཨཏྠོ. ཏཏོ ཨཉྙེསུ པན ཡཐཱཝུཏྟེསུ ཨནྟརནྟརཱ ཝཎྞཝིསེསཱདཱིནཾ སུཝིཉྙེཡྻཏྟཱ ཛརཱ སཝཱིཙིཛརཱ ནཱམཱཏི ཝེདིཏབྦཱ.

ལཀྑཎཱདིཏོཔི རཱུཔཔརིཔཱཀལཀྑཎཱ རཱུཔསྶ ཛརཏཱ, ཨུཔནཡནརསཱ, སབྷཱཝཱནཔགམེཔི ནཝབྷཱཝཱཔགམཔཙྩུཔཊྛཱནཱ, ཝཱིཧིཔུརཱཎབྷཱཝོ ཝིཡ པརིཔཙྩམཱནརཱུཔཔདཊྛཱནཱཏི ཝེདིཏབྦཱ.

༦༤༤. ཨནིཙྩཏཱནིདྡེསེ ཁཡགམནཝསེན ཁཡོ, ཝཡགམནཝསེན ཝཡོ, བྷིཛྫནཝསེན བྷེདོ. ཨཐ ཝཱ, ཡསྨཱ ཏཾ པཏྭཱ རཱུཔཾ ཁཱིཡཏི, ཝེཏི, བྷིཛྫཏི ཙ, ཏསྨཱ ཁཱིཡཏི ཨེཏསྨིནྟི ‘ཁཡོ’, ཝེཏི ཨེཏསྨིནྟི ‘ཝཡོ’, བྷིཛྫཏི ཨེཏསྨིནྟི ‘བྷེདོ’. ཨུཔསགྒཝསེན པདཾ ཝཌྜྷེཏྭཱ བྷེདོཝ པརིབྷེདོ. ཧུཏྭཱ ཨབྷཱཝཊྛེན, ན ནིཙྩནྟི ཨནིཙྩཾ. ཏསྶ བྷཱཝོ ཨནིཙྩཏཱ ¶ . ཨནྟརདྷཱཡཏི ཨེཏྠཱཏི ཨནྟརདྷཱནཾ. མརཎཉྷི པཏྭཱ རཱུཔཾ ཨནྟརདྷཱཡཏི, ཨདསྶནཾ གཙྪཏི. ན ཀེཝལཉྩ རཱུཔམེཝ, སབྦེཔི པཉྩཀྑནྡྷཱ. ཏསྨཱ པཉྩནྣམྤི ཁནྡྷཱནཾ ཨནིཙྩཏཱཡ ཨིདམེཝ ལཀྑཎནྟི ཝེདིཏབྦཾ. ལཀྑཎཱདིཏོ པན པརིབྷེདལཀྑཎཱ རཱུཔསྶ ཨནིཙྩཏཱ, སཾསཱིདནརསཱ, ཁཡཝཡཔཙྩུཔཊྛཱནཱ, པརིབྷིཛྫམཱནརཱུཔཔདཊྛཱནཱཏི ཝེདིཏབྦཱ.

ཧེཊྛཱ ཛཱཏི གཧིཏཱ ཛརཱ གཧིཏཱ, ཨིམསྨིཾ ཋཱནེ མརཎཾ གཧིཏཾ. ཨིམེ ཏཡོ དྷམྨཱ ཨིམེསཾ སཏྟཱནཾ ཨུཀྑིཏྟཱསིཀཔཙྩཱམིཏྟསདིསཱ. ཡཐཱ ཧི པུརིསསྶ ཏཡོ པཙྩཱམིཏྟཱ ཨོཏཱརཾ གཝེསམཱནཱ ཝིཙརེཡྻུཾ. ཏེསུ ཨེཀོ ཨེཝཾ ཝདེཡྻ – ‘ཨེཏཾ ནཱིཧརིཏྭཱ ཨཊཝིཔཝེསནཾ མཡ྄ཧཾ བྷཱརོ ཧོཏཱུ’ཏི. དུཏིཡོ ‘ཨཊཝིགཏཀཱལེ པོཐེཏྭཱ པཐཝིཡཾ པཱཏནཾ མཡ྄ཧཾ བྷཱརོ’ཏི. ཏཏིཡོ ‘པཐཝིགཏཀཱལཏོ པཊྛཱཡ ཨསིནཱ སཱིསཙྪེདནཾ མཡ྄ཧཾ བྷཱརོ’ཏི. ཨེཝརཱུཔཱ ཨིམེ ཛཱཏི ཨཱདཡོ. ནཱིཧརིཏྭཱ ཨཊཝིཔཝེསནཔཙྩཱམིཏྟསདིསཱ ཧེཏྠ ཛཱཏི, ཏསྨིཾ ཏསྨིཾ ཋཱནེ ནིབྦཏྟཱཔནཏོ. ཨཊཝིགཏཾ པོཐེཏྭཱ པཐཝིཡཾ པཱཏནཔཙྩཱམིཏྟསདིསཱ ཛརཱ ¶ , ནིབྦཏྟཀྑནྡྷཱནཾ དུབྦལཔརཱདྷཱིནམཉྩཔརཱཡཎབྷཱཝཀརཎཏོ. པཐཝིགཏསྶ ¶ ཨསིནཱ སཱིསཙྪེདཀཔཙྩཱམིཏྟསདིསཾ མརཎཾ, ཛརཱཔྤཏྟཱནཾ ཁནྡྷཱནཾ ཛཱིཝིཏཀྑཡཔཱཔནཏོཏི.

༦༤༥. ཀབལཱི༹ཀཱརཱཧཱརནིདྡེསེ ཀབལ༹ཾ ཀརཱིཡཏཱིཏི ཀབལཱི༹ཀཱརོ. ཨཱཧརཱིཡཏཱིཏི ཨཱཧཱརོ. ཀབལ༹ཾ ཀཏྭཱ ཨཛ྄ཛྷོཧརཱིཡཏཱིཏི ཨཏྠོ. རཱུཔཾ ཝཱ ཨཱཧརཏཱིཏིཔི ‘ཨཱཧཱརོ’. ཨེཝཾ ཝཏྠུཝསེན ནཱམཾ ཨུདྡྷརིཏྭཱ པུན ཝཏྠུཝསེནེཝེཏཾ པབྷེདཏོ དསྶེཏུཾ ཨོདནོ ཀུམྨཱསོཏིཨཱདི ཝུཏྟཾ. ཨོདནཱདཱིནི ཧི ཕཱཎིཏཔརིཡནྟཱནི དྭཱདས ཨིདྷཱདྷིཔྤེཏསྶ ཨཱཧཱརསྶ ཝཏྠཱུནི. པཱལི༹ཡཾ ཨནཱགཏཱནི མཱུལཕལཱདཱིནི ཡེཝཱཔནཀཾ པཝིཊྛཱནི.

ཨིདཱནི ཏཱནི མཱུལཕལཱདཱིནི ཀཏྟབྦཏོ དསྶེཏུཾ ཡམྷི ཡམྷི ཛནཔདེཏིཨཱདིམཱཧ. ཏཏྠ མུཁེན ཨསིཏབྦཾ བྷུཉྫིཏབྦནྟི མུཁཱསིཡཾ. དནྟེཧི ཝིཁཱདིཏབྦནྟི དནྟཝིཁཱདནཾ. གལེན ཨཛ྄ཛྷོཧརིཏབྦནྟི གལཛ྄ཛྷོཧརཎཱིཡཾ. ཨིདཱནི ཏཾ ཀིཙྩཝསེན དསྶེཏུཾ ཀུཙྪིཝིཏྠམྦྷནནྟི ཨཱཧ. ཏཉྷི མཱུལཕལཱདི ཨོདནཀུམྨཱསཱདི ཝཱ ཨཛ྄ཛྷོཧཊཾ ཀུཙྪིཾ ཝིཏྠམྦྷེཏི. ཨིདམསྶ ཀིཙྩཾ. ཡཱཡ ཨོཛཱཡ སཏྟཱ ཡཱཔེནྟཱིཏི ཧེཊྛཱ སབྦཔདེཧི སཝཏྠུཀཾ ཨཱཧཱརཾ དསྶེཏྭཱ ཨིདཱནི ནིབྦཊྚིཏཨོཛམེཝ དསྶེཏུཾ ཨིདཾ ཝུཏྟཾ.

ཀིཾ ¶ པནེཏྠ ཝཏྠུསྶ ཀིཙྩཾ? ཀིཾ ཨོཛཱཡ? པརིསྶཡཧརཎཔཱལནཱནི. ཝཏྠུཧི པརིསྶཡཾ ཧརཏི པཱལེཏུཾ ན སཀྐོཏི, ཨོཛཱ པཱལེཏི པརིསྶཡཾ ཧརིཏུཾ ན སཀྐོཏི. དྭེཔི ཨེཀཏོ ཧུཏྭཱ པཱལེཏུམྤི སཀྐོནྟི པརིསྶཡམྤི ཧརིཏུཾ. ཀོ པནེས པརིསྶཡོ ནཱམ? ཀམྨཛཏེཛོ. ཨནྟོཀུཙྪིཡཉྷི ཨོདནཱདིཝཏྠུསྨིཾ ཨསཏི, ཀམྨཛཏེཛོ ཨུཊྛཧིཏྭཱ ཨུདརཔཊལཾ གཎྷཱཏི, ‘ཚཱཏོམྷི, ཨཱཧཱརཾ མེ དེཐཱ’ཏི ཝདཱཔེཏི. བྷུཏྟཀཱལེ ཨུདརཔཊལཾ མུཉྩིཏྭཱ ཝཏྠུཾ གཎྷཱཏི. ཨཐ སཏྟོ ཨེཀགྒོ ཧོཏི.

ཡཐཱ ཧི ཚཱཡཱརཀྑསོ ཚཱཡཾ པཝིཊྛཾ གཧེཏྭཱ དེཝསངྑལིཀཱཡ བནྡྷིཏྭཱ ཨཏྟནོ བྷཝནེ མོདནྟོ ཚཱཏཀཱལེ ཨཱགནྟྭཱ སཱིསེ ཌཾསཏི. སོ ཌཊྛཏྟཱ ཝིརཝཏི. ཏཾ ཝིརཝཾ སུཏྭཱ ‘དུཀྑཔྤཏྟོ ཨེཏྠ ཨཏྠཱི’ཏི ཏཏོ ཏཏོ མནུསྶཱ ཨཱགཙྪནྟི. སོ ཨཱགཏཱགཏེ ¶ གཧེཏྭཱ ཁཱདིཏྭཱ ¶ བྷཝནེ མོདཏི. ཨེཝཾསམྤདམིདཾ ཝེདིཏབྦཾ. ཚཱཡཱརཀྑསོ ཝིཡ ཧི ཀམྨཛཏེཛོ, དེཝསངྑལིཀཱཡ བནྡྷིཏྭཱ ཋཔིཏསཏྟོ ཝིཡ ཨུདརཔཊལཾ, པུན ཨཱགཏམནུསྶཱ ཝིཡ ཨོདནཱདིཝཏྠུ, ཨོཏརིཏྭཱ སཱིསེ ཌཾསནཾ ཝིཡ ཀམྨཛཏེཛསྶ ཝཏྠུཏོ མུཏྟསྶ ཨུདརཔཊལགྒཧཎཾ, ཌཊྛསྶ ཝིརཝནཀཱལོ ཝིཡ ‘ཨཱཧཱརཾ དེཐཱ’ཏི ཝཙནཀཱལོ, ཏཱཡ སཉྙཱཡ ཨཱགཏཱགཏེ གཧེཏྭཱ ཁཱདིཏྭཱ བྷཝནེ མོདནཀཱལོ ཝིཡ ཀམྨཛཏེཛེན ཨུདརཔཊལཾ མུཉྩིཏྭཱ ཝཏྠུསྨིཾ གཧིཏེ ཨེཀགྒཙིཏྟཏཱ.

ཏཏྠ ཨོལཱ༹རིཀེ ཝཏྠུསྨིཾ ཨོཛཱ མནྡཱ ཧོཏི. སུཁུམེ བལཝཏཱི. ཀུདྲཱུསཀབྷཏྟཱདཱིནི ཧི བྷུཉྫིཏྭཱ མུཧུཏྟེནེཝ ཚཱཏོ ཧོཏི. སཔྤིཨཱདཱིནི པིཝིཏྭཱ ཋིཏསྶ དིཝསམྤི བྷཏྟཾ ན རུཙྩཏི. ཨེཏྠ ཙ ཨུཔཱདཱཡུཔཱདཱཡ ཨོལཱ༹རིཀསུཁུམཏཱ ཝེདིཏབྦཱ. ཀུམྦྷཱིལཱནཉྷི ཨཱཧཱརཾ ཨུཔཱདཱཡ མོརཱནཾ ཨཱཧཱརོ སུཁུམོ. ཀུམྦྷཱིལཱ ཀིར པཱསཱཎེ གིལནྟི. ཏེ ཙ ནེསཾ ཀུཙྪིཔྤཏྟཱ ཝིལཱིཡནྟི. མོརཱ སཔྤཝིཙྪིཀཱདིཔཱཎེ ཁཱདནྟི. མོརཱནཾ པན ཨཱཧཱརཾ ཨུཔཱདཱཡ ཏརཙྪཱནཾ ཨཱཧཱརོ སུཁུམོ. ཏེ ཀིར ཏིཝསྶཚཌྜིཏཱནི ཝིསཱཎཱནི ཙེཝ ཨཊྛཱིནི ཙ ཁཱདནྟི. ཏཱནི ཙ ནེསཾ ཁེལེ༹ན ཏེམིཏམཏྟཱནེཝ ཀནྡམཱུལཾ ཝིཡ མུདུཀཱནི ཧོནྟི. ཏརཙྪཱནམྤི ཨཱཧཱརམུཔཱདཱཡ ཧཏྠཱིནཾ ཨཱཧཱརོ སུཁུམོ. ཏེ ཧི ནཱནཱརུཀྑསཱཁཱདཡོ ཁཱདནྟི. ཧཏྠཱིནཾ ཨཱཧཱརཏོ གཝཡགོཀཎྞམིགཱདཱིནཾ ཨཱཧཱརོ སུཁུམོ. ཏེ ཀིར ནིསྶཱརཱནི ནཱནཱརུཀྑཔཎྞཱདཱིནི ཁཱདནྟི. ཏེསམྤི ཨཱཧཱརཏོ གུནྣཾ ཨཱཧཱརོ སུཁུམོ. ཏེ ཨལླསུཀྑཏིཎཱནི ཁཱདནྟི. ཏེསམྤི ཨཱཧཱརཏོ སསཱནཾ ཨཱཧཱརོ སུཁུམོ. སསཱནཾ ཨཱཧཱརཏོ སཀུཎཱནཾ ཨཱཧཱརོ སུཁུམོ. སཀུཎཱནཾ ཨཱཧཱརཏོ པཙྩནྟཝཱསཱིནཾ ཨཱཧཱརོ སུཁུམོ. པཙྩནྟཝཱསཱིནཾ ¶ ཨཱཧཱརཏོ གཱམབྷོཛཀཱནཾ ཨཱཧཱརོ སུཁུམོ. གཱམབྷོཛཀཱནཾ ཨཱཧཱརཏོ རཱཛརཱཛམཧཱམཏྟཱནཾ ཨཱཧཱརོ སུཁུམོ. ཏེསམྤི ཨཱཧཱརཏོ ཙཀྐཝཏྟིནོ ཨཱཧཱརོ སུཁུམོ. ཙཀྐཝཏྟིནོ ཨཱཧཱརཏོ བྷུམྨདེཝཱནཾ ཨཱཧཱརོ སུཁུམོ. བྷུམྨདེཝཱནཾ ཨཱཧཱརཏོ ཙཱཏུམཧཱརཱཛིཀཱནཾ ཨཱཧཱརོ སུཁུམོ. ཨེཝཾ ཡཱཝ པརནིམྨིཏཝསཝཏྟཱིནཾ ¶ ¶ ཨཱཧཱརོ ཝིཏྠཱརེཏབྦོ. ཏེསཾ པནཱཧཱརོ སུཁུམོཏྭེཝ ནིཊྛཾ པཏྟོ.

ལཀྑཎཱདིཏོཔི ཨོཛཱལཀྑཎོ ཀབལཱི༹ཀཱརོ ཨཱཧཱརོ, རཱུཔཱཧརཎརསོ, ཨུཔཏྠམྦྷནཔཙྩུཔཊྛཱནོ, ཀབལ༹ཾ ཀཏྭཱ ཨཱཧརིཏབྦཝཏྠུཔདཊྛཱནོཏི ཝེདིཏབྦོ.

༦༤༦. ནོཨུཔཱདཱནིདྡེསེ ཡཐཱ ཨུཔཱདཱརཱུཔཾ ཨུཔཱདིཡཏེཝ, ན ཨཉྙེན ཨུཔཱདིཡཏི, ཨེཝམེཏཾ ན ཨུཔཱདིཡཏེཝཱཏི ནོཨུཔཱདཱ.

༦༤༧. ཕུསིཏབྦནྟི ཕོཊྛབྦཾ. ཕུསིཏྭཱ ཛཱནིཏབྦནྟི ཨཏྠོ. ཕོཊྛབྦཉྩ ཏཾ ཨཱཡཏནཉྩཱཏི ཕོཊྛབྦཱཡཏནཾ. ཨཱཔོ ཙ ཏཾ ནིསྶཏྟསུཉྙཏསབྷཱཝཊྛེན དྷཱཏུ ཙཱཏི ཨཱཔོདྷཱཏུ. ཨིདཱནི ཡསྨཱ ཏཱིཎི རཱུཔཱནི ཕུསིཏྭཱ ཛཱནིཏབྦཱནི ཏསྨཱ ཏཱནི བྷཱཛེཏྭཱ དསྶེཏུཾ ཀཏམཾ ཏཾ རཱུཔཾ ཕོཊྛབྦཱཡཏནཾ? པཐཝཱིདྷཱཏཱུཏིཨཱདིམཱཧ. ཏཏྠ ཀཀྑལ༹ཏྟལཀྑཎཱ པཐཝཱིདྷཱཏུ, པཏིཊྛཱནརསཱ, སམྤཊིཙྪནཔཙྩུཔཊྛཱནཱ. ཏེཛོདྷཱཏུ ཨུཎྷཏྟལཀྑཎཱ, པརིཔཱཙནརསཱ, མདྡཝཱནུཔྤདཱནཔཙྩུཔཊྛཱནཱ. ཝཱཡོདྷཱཏུ ཝིཏྠམྦྷནལཀྑཎཱ, སམུདཱིརཎརསཱ, ཨབྷིནཱིཧཱརཔཙྩུཔཊྛཱནཱ. པུརིམཱ པན ‘ཨཱཔོདྷཱཏུ’ པགྒྷརཎལཀྑཎཱ, བྲཱུཧནརསཱ, སངྒཧཔཙྩུཔཊྛཱནཱ. ཨེཀེཀཱ ཙེཏྠ སེསཏྟཡཔདཊྛཱནཱཏི ཝེདིཏབྦཱ.

ཀཀྑལ༹ནྟི ཐདྡྷཾ. མུདུཀནྟི ཨཐདྡྷཾ. སཎྷནྟི མཊྛཾ. ཕརུསནྟི ཁརཾ. སུཁསམྥསྶནྟི སུཁཝེདནཱཔཙྩཡཾ ཨིཊྛཕོཊྛབྦཾ. དུཀྑསམྥསྶནྟི དུཀྑཝེདནཱཔཙྩཡཾ ཨནིཊྛཕོཊྛབྦཾ. གརུཀནྟི བྷཱརིཡཾ. ལཧུཀནྟི ཨབྷཱརིཡཾ, སལླཧུཀནྟི ཨཏྠོ. ཨེཏྠ ཙ ‘ཀཀྑལ༹ཾ མུདུཀཾ སཎྷཾ ཕརུསཾ གརུཀཾ ལཧུཀ’ནྟི པདེཧི པཐཝཱིདྷཱཏུ ཨེཝ བྷཱཛིཏཱ. ‘‘ཡདཱཡཾ ཀཱཡོ ཨཱཡུསཧགཏོ ཙ ཧོཏི ཨུསྨཱསཧགཏོ ཙ ཝིཉྙཱཎསཧགཏོ ཙ ཏདཱ ལཧུཏརོ ཙ ཧོཏི མུདུཏརོ ཙ ཀམྨཉྙཏརོ ¶ ཙཱ’’ཏི (དཱི. ནི. ༢.༤༢༤) སུཏྟེཔི ལཧུམུདུབྷཱུཏཾ པཐཝཱིདྷཱཏུམེཝ སནྡྷཱཡ ཝུཏྟཾ.

‘སུཁསམྥསྶཾ ¶ དུཀྑསམྥསྶ’ནྟི པདདྭཡེན པན ཏཱིཎིཔི མཧཱབྷཱུཏཱནི བྷཱཛིཏཱནི. པཐཝཱིདྷཱཏུ ཧི སུཁསམྥསྶཱཔི ཨཏྠི དུཀྑསམྥསྶཱཔི. ཏཐཱ ཏེཛོདྷཱཏུཝཱཡོདྷཱཏུཡོ. ཏཏྠ སུཁསམྥསྶཱ པཐཝཱིདྷཱཏུ མུདུཏལུཎཧཏྠེ ¶ དཧརེ པཱདེ སམྦཱཧནྟེ ཨསྶཱདེཏྭཱ ཨསྶཱདེཏྭཱ ‘སམྦཱཧ ཏཱཏ, སམྦཱཧ ཏཱཏཱ’ཏི ཝདཱཔནཱཀཱརཾ ཀརོཏི. སུཁསམྥསྶཱ ཏེཛོདྷཱཏུ སཱིཏསམཡེ ཨངྒཱརཀཔལླཾ ཨཱཧརིཏྭཱ གཏྟཾ སེདེནྟེ ཨསྶཱདེཏྭཱ ཨསྶཱདེཏྭཱ ‘སེདེཧི ཏཱཏ, སེདེཧི ཏཱཏཱ’ཏི ཝདཱཔནཱཀཱརཾ ཀརོཏི. སུཁསམྥསྶཱ ཝཱཡོདྷཱཏུ ཨུཎྷསམཡེ ཝཏྟསམྤནྣེ དཧརེ བཱིཛནེན བཱིཛནྟེ ཨསྶཱདེཏྭཱ ཨསྶཱདེཏྭཱ ‘བཱིཛ ཏཱཏ, བཱིཛ ཏཱཏཱ’ཏི ཝདཱཔནཱཀཱརཾ ཀརོཏི. ཐདྡྷཧཏྠེ པན དཧརེ པཱདེ སམྦཱཧནྟེ ཨཊྛཱིནཾ བྷིཛྫནཀཱལོ ཝིཡ ཧོཏི. སོཔི ‘ཨཔེཧཱི’ཏི ཝཏྟབྦཏཾ ཨཱཔཛྫཏི. ཨུཎྷསམཡེ ཨངྒཱརཀཔལླེ ཨཱབྷཏེ ‘ཨཔནེཧི ན’ནྟི ཝཏྟབྦཾ ཧོཏི. སཱིཏསམཡེ བཱིཛནེན བཱིཛནྟེ ‘ཨཔེཧི, མཱ བཱིཛཱ’ཏི ཝཏྟབྦཾ ཧོཏི. ཨེཝམེཏཱསཾ སུཁསམྥསྶཏཱ དུཀྑསམྥསྶཏཱ ཙ ཝེདིཏབྦཱ.

ཡཾ ཕོཊྛབྦཾ ཨནིདསྶནཾ སཔྤཊིགྷནྟིཨཱདིནཱ ནཡེན ཝུཏྟཱ པན ཙཏཱུཧི ཙཏཱུཧི ནཡེཧི པཊིམཎྜིཏཱ ཏེརས ཝཱརཱ ཧེཊྛཱ རཱུཔཱཡཏནཱདཱིསུ ཝུཏྟནཡེནེཝ ཝེདིཏབྦཱ.

ཀིཾ པནེཏཱནི ཏཱིཎི མཧཱབྷཱུཏཱནི ཨེཀཔྤཧཱརེནེཝ ཨཱཔཱཐཾ ཨཱགཙྪནྟི ཨུདཱཧུ ནོཏི? ཨཱགཙྪནྟི. ཨེཝཾ ཨཱགཏཱནི ཀཱཡཔསཱདཾ གྷཊྚེནྟི ན གྷཊྚེནྟཱིཏི? གྷཊྚེནྟི. ཨེཀཔྤཧཱརེནེཝ ཏཱནི ཨཱརམྨཎཾ ཀཏྭཱ ཀཱཡཝིཉྙཱཎཾ ཨུཔྤཛྫཏི ནུཔྤཛྫཏཱིཏི? ནུཔྤཛྫཏི. ཨཱབྷུཛིཏཝསེན ཝཱ ཧི ཨུསྶདཝསེན ཝཱ ཨཱརམྨཎཀརཎཾ ཧོཏི.

ཏཏྠ ཨཱབྷུཛིཏཝསེན ཏཱཝ, པཏྟསྨིཉྷི ཨོདནེན པཱུརེཏྭཱ ཨཱབྷཏེ ཨེཀཾ སིཏྠཾ གཧེཏྭཱ ཐདྡྷཾ ཝཱ མུདུཀཾ ཝཱཏི ཝཱིམཾསནྟོ ཀིཉྩཱཔི ཏཏྠ ཏེཛོཔི ཨཏྠི ཝཱཡོཔི ཨཏྠི, པཐཝཱིདྷཱཏུམེཝ པན ཨཱབྷུཛཏི. ཨུཎྷོདཀེ ཧཏྠཾ ཨོཏཱརེཏྭཱ ཝཱིམཾསནྟོ ཀིཉྩཱཔི ཏཏྠ པཐཝཱིཔི ཨཏྠི ཝཱཡོཔི ཨཏྠི, ཏེཛོདྷཱཏུམེཝ པན ཨཱབྷུཛཏི. ཨུཎྷསམཡེ ཝཱཏཔཱནཾ ཝིཝརིཏྭཱ ཝཱཏེན སརཱིརཾ པཧརཱཔེནྟོ ཋིཏོ མནྡམནྡེ ཝཱཏེ པཧརནྟེ ¶ ཀིཉྩཱཔི ཏཏྠ པཐཝཱིཔི ཨཏྠི ཏེཛོཔི ཨཏྠི, ཝཱཡོདྷཱཏུམེཝ པན ཨཱབྷུཛཏི. ཨེཝཾ ཨཱབྷུཛིཏཝསེན ཨཱརམྨཎཾ ཀརོཏི ནཱམ.

ཡོ ¶ པན ཨུཔཀྑལཏི ཝཱ སཱིསེན ཝཱ རུཀྑཾ པཧརཏི བྷུཉྫནྟོ ཝཱ སཀྑརཾ ཌཾསཏི, སོ ¶ ཀིཉྩཱཔི ཏཏྠ ཏེཛོཔི ཨཏྠི ཝཱཡོཔི ཨཏྠི, ཨུསྶདཝསེན པན པཐཝཱིདྷཱཏུམེཝ ཨཱརམྨཎཾ ཀརོཏི. ཨགྒིཾ ཨཀྐམནྟོཔི ཀིཉྩཱཔི ཏཏྠ པཐཝཱིཔི ཨཏྠི ཝཱཡོཔི ཨཏྠི, ཨུསྶདཝསེན པན ཏེཛོདྷཱཏུམེཝ ཨཱརམྨཎཾ ཀརོཏི. བལཝཝཱཏེ ཀཎྞསཀྑལིཾ པཧརིཏྭཱ བདྷིརབྷཱཝཾ ཀརོནྟེ. ཀིཉྩཱཔི ཏཏྠ པཐཝཱིཔི ཨཏྠི ཏེཛོཔི ཨཏྠི, ཨུསྶདཝསེན པན ཝཱཡོདྷཱཏུམེཝ ཨཱརམྨཎཾ ཀརོཏི.

ཡཾཀིཉྩི དྷཱཏུཾ ཨཱརམྨཎཾ ཀརོནྟསྶ ཀཱཡཝིཉྙཱཎམྤི ཨེཀཔྤཧཱརེན ནུཔྤཛྫཏི. སཱུཙིཀལཱཔེན ཝིདྡྷསྶ ཨེཀཔྤཧཱརེན ཀཱཡོ གྷཊྚིཡཏི. ཡསྨིཾ ཡསྨིཾ པན ཋཱནེ ཀཱཡཔསཱདོ ཨུསྶནྣོ ཧོཏི, ཏཏྠ ཏཏྠ ཀཱཡཝིཉྙཱཎཾ ཨུཔྤཛྫཏི. ཡཏྠ ཡཏྠཱཔི པཊིགྷཊྚནནིགྷཾསོ བལཝཱ ཧོཏི ཏཏྠ ཏཏྠ པཋམཾ ཨུཔྤཛྫཏི. ཀུཀྐུཊཔཏྟེན ཝཎེ དྷོཝིཡམཱནེ ཨཾསུཨཾསུ ཀཱཡཔསཱདཾ གྷཊྚེཏི. ཡཏྠ ཡཏྠ པན པསཱདོ ཨུསྶནྣོ ཧོཏི, ཏཏྠ ཏཏྠེཝ ཀཱཡཝིཉྙཱཎཾ ཨུཔྤཛྫཏི. ཨེཝཾ ཨུསྶདཝསེན ཨཱརམྨཎཾ ཀརོཏི. ཨུསྶདཝསེནེཝ ཙ ཀཱཡཝིཉྙཱཎཾ ཨུཔྤཛྫཏི ནཱམ.

ཀཐཾ པན ཙིཏྟསྶ ཨཱརམྨཎཏོ སངྐནྟི ཧོཏཱིཏི? དྭཱིཧཱཀཱརེཧི ཧོཏི – ཨཛ྄ཛྷཱསཡཏོ ཝཱ ཝིསཡཱདྷིམཏྟཏོ ཝཱ. ཝིཧཱརཔཱུཛཱདཱིསུ ཧི ‘ཏཱནི ཏཱནི ཙེཏིཡཱནི ཙེཝ པཊིམཱཡོ ཙ ཝནྡིསྶཱམི, པོཏྠཀམྨཙིཏྟཀམྨཱནི ཙ ཨོལོཀེསྶཱམཱི’ཏི ཨཛ྄ཛྷཱསཡེན གཏོ ཨེཀཾ ཝནྡིཏྭཱ ཝཱ པསྶིཏྭཱ ཝཱ ཨིཏརསྶ ཝནྡནཏྠཱཡ ཝཱ དསྶནཏྠཱཡ ཝཱ མནཾ ཀཏྭཱ ཝནྡིཏུམྤི པསྶིཏུམྤི གཙྪཏིཡེཝ, ཨེཝཾ ཨཛ྄ཛྷཱསཡཏོ སངྐམཏི ནཱམ.

ཀེལཱསཀཱུཊཔཊིབྷཱགཾ པན མཧཱཙེཏིཡཾ ཨོལོཀེནྟོ ཋིཏོཔི ཨཔརབྷཱགེ སབྦཏཱུརིཡེསུ པགྒཧིཏེསུ རཱུཔཱརམྨཎཾ ཝིསྶཛྫེཏྭཱ སདྡཱརམྨཎཾ སངྐམཏི. མནུཉྙགནྡྷེསུ པུཔྥེསུ ཝཱ གནྡྷེསུ ཝཱ ཨཱབྷཏེསུ སདྡཱརམྨཎཾ ཝིསྶཛྫེཏྭཱ གནྡྷཱརམྨཎཾ སངྐམཏི. ཨེཝཾ ཝིསཡཱདྷིམཏྟཏོ སངྐམཏི ནཱམ.

༦༥༡. ཨཱཔོདྷཱཏུནིདྡེསེ ¶ ཨཱཔོཏི སབྷཱཝནིདྡེསོ. ཨཱཔོཝ ཨཱཔོགཏཾ. སིནེཧཝསེན སིནེཧོ, སིནེཧོཝ སིནེཧགཏཾ. བནྡྷནཏྟཾ ¶ རཱུཔསྶཱཏི པཐཝཱིདྷཱཏུཨཱདིཀསྶ བྷཱུཏརཱུཔསྶ བནྡྷནབྷཱཝོ. ཨཡོཔིཎྜིཨཱདཱིནི ཧི ཨཱཔོདྷཱཏུ ཨཱབནྡྷིཏྭཱ བདྡྷཱནི ཀརོཏི. ཏཱཡ ཨཱབདྡྷཏྟཱ ཏཱནི བདྡྷཱནི ནཱམ ཧོནྟི. པཱསཱཎཔབྦཏཏཱལཊྛིཧཏྠིདནྟགོསིངྒཱདཱིསུཔི ཨེསེཝ ནཡོ ¶ . སབྦཱནི ཧེཏཱནི ཨཱཔོདྷཱཏུ ཨེཝ ཨཱབནྡྷིཏྭཱ བདྡྷཱནི ཀརོཏི. ཨཱཔོདྷཱཏུཡཱ ཨཱབདྡྷཏྟཱཝ བདྡྷཱནི ཧོནྟི.

ཀིཾ པན པཐཝཱིདྷཱཏུ སེསདྷཱཏཱུནཾ པཏིཊྛཱ ཧོཏི ན ཧོཏཱིཏི ཧོཏི ཕུསིཏྭཱ ཧོཏི ཨུདཱཧུ ཨཕུསིཏྭཱ? ཨཱཔོདྷཱཏུ ཝཱ སེསཱ ཨཱབནྡྷམཱནཱ ཕུསིཏྭཱ ཨཱབནྡྷཏི ཨུདཱཧུ ཨཕུསིཏྭཱཏི? པཐཝཱིདྷཱཏུ ཏཱཝ ཨཱཔོདྷཱཏུཡཱ ཨཕུསིཏྭཱཝ པཏིཊྛཱ ཧོཏི, ཏེཛོདྷཱཏུཡཱ ཙ ཝཱཡོདྷཱཏུཡཱ ཙ ཕུསིཏྭཱ. ཨཱཔོདྷཱཏུ པན པཐཝཱིདྷཱཏུམྤི ཏེཛོཝཱཡོདྷཱཏུཡོཔི ཨཕུསིཏྭཱཝ ཨཱབནྡྷཏི. ཡདི ཕུསིཏྭཱ ཨཱབནྡྷེཡྻ ཕོཊྛབྦཱཡཏནཾ ནཱམ བྷཝེཡྻ.

ཏེཛོདྷཱཏུཝཱཡོདྷཱཏཱུནམྤི སེསདྷཱཏཱུསུ སཀསཀཀིཙྩཀརཎེ ཨེསེཝ ནཡོ. ཏེཛོདྷཱཏུ ཧི པཐཝཱིདྷཱཏུཾ ཕུསིཏྭཱ ཛྷཱཔེཏི. སཱ པན ན ཨུཎྷཱ ཧུཏྭཱ ཛྷཱཡཏི. ཡདི ཨུཎྷཱ ཧུཏྭཱ ཛྷཱཡེཡྻ ཨུཎྷཏྟལཀྑཎཱ ནཱམ བྷཝེཡྻ. ཨཱཔོདྷཱཏུཾ པན ཨཕུསིཏྭཱཝ ཏཱཔེཏི. སཱཔི ཏཔམཱནཱ ན ཨུཎྷཱ ཧུཏྭཱ ཏཔཏི. ཡདི ཨུཎྷཱ ཧུཏྭཱ ཏཔེཡྻ ཨུཎྷཏྟལཀྑཎཱ ནཱམ བྷཝེཡྻ. ཝཱཡོདྷཱཏུཾ པན ཕུསིཏྭཱཝ ཏཱཔེཏི. སཱཔི ཏཔམཱནཱ ན ཨུཎྷཱ ཧུཏྭཱ ཏཔཏི. ཡདི ཨུཎྷཱ ཧུཏྭཱ ཏཔེཡྻ ཨུཎྷཏྟལཀྑཎཱ ནཱམ བྷཝེཡྻ. ཝཱཡོདྷཱཏུ པཐཝཱིདྷཱཏུཾ ཕུསིཏྭཱ ཝིཏྠམྦྷེཏི, ཏཐཱ ཏེཛོདྷཱཏུཾ ཨཱཔོདྷཱཏུཾ ¶ པན ཨཕུསིཏྭཱཝ ཝིཏྠམྦྷེཏི.

ཨུཙྪུརསཾ པཙིཏྭཱ ཕཱཎིཏཔིཎྜེ ཀརིཡམཱནེ ཨཱཔོདྷཱཏུ ཐདྡྷཱ ཧོཏི ན ཧོཏཱིཏི? ན ཧོཏི. སཱ ཧི པགྒྷརཎལཀྑཎཱ. པཐཝཱིདྷཱཏུ ཀཀྑལ༹ལཀྑཎཱ. ཨོམཏྟཾ པན ཨཱཔོ ཨདྷིམཏྟཔཐཝཱིགཏིཀཾ ཛཱཏཾ. སཱ ཧི རསཱཀཱརེན ཋིཏབྷཱཝཾ ཝིཛཧཏི, ལཀྑཎཾ ན ཝིཛཧཏི. ཕཱཎིཏཔིཎྜེ ཝིལཱིཡམཱནེཔི པཐཝཱིདྷཱཏུ ན ཝིལཱིཡཏི. ཀཀྑལ༹ལཀྑཎཱ ཧི པཐཝཱིདྷཱཏུ པགྒྷརཎལཀྑཎཱ ཨཱཔོདྷཱཏུ. ཨོམཏྟཱ པན པཐཝཱི ཨདྷིམཏྟཨཱཔགཏིཀཱ ཧོཏི. སཱ པིཎྜཱཀཱརེན ཋིཏབྷཱཝཾ ཝིཛཧཏི, ལཀྑཎཾ ན ཝིཛཧཏི. ཙཏུནྣཉྷི ¶ མཧཱབྷཱུཏཱནཾ བྷཱཝཉྙཐཏྟམེཝ ཧོཏི, ལཀྑཎཉྙཐཏྟཾ ནཱམ ནཏྠི. ཏསྶ ཨབྷཱཝོ ཨཊྛཱནཔརིཀཔྤསུཏྟེན དཱིཔིཏོ. ཝུཏྟཉྷེཏཾ –

‘‘སིཡཱ, ཨཱནནྡ, ཙཏུནྣཾ མཧཱབྷཱུཏཱནཾ ཨཉྙཐཏྟཾ, པཐཝཱིདྷཱཏུཡཱ…པེ… ཝཱཡོདྷཱཏུཡཱ ¶ ; ན ཏྭེཝ བུདྡྷེ ཨཝེཙྩཔྤསཱདེན སམནྣཱགཏསྶ ཨརིཡསཱཝཀསྶ སིཡཱ ཨཉྙཐཏྟ’’ནྟི (ཨ. ནི. ༣.༧༦).

ཨཡཉྷེཏྠ ཨཏྠོ – ཨཱནནྡ, ཀཀྑལ༹ཏྟལཀྑཎཱ པཐཝཱིདྷཱཏུ པརིཝཏྟིཏྭཱ པགྒྷརཎལཀྑཎཱ ཨཱཔོདྷཱཏུ ནཱམ བྷཝེཡྻ, ཨརིཡསཱཝཀསྶ པན ཨཉྙཐཏྟཾ ནཱམ ནཏྠཱིཏི. ཨེཝམེཏྠ ཨཊྛཱནཔརིཀཔྤོ ཨཱགཏོ.

༦༥༢. ཨིཏོ པརེསུ ཨུཔཱདིཎྞརཱུཔཱདིནིདྡེསེསུ ཨུཔཱདིཎྞཔདཱདཱིནཾ ཨཏྠོ མཱཏིཀཱཀཐཱཡཾ ཝུཏྟནཡེནེཝ ཝེདིཏབྦོ. ཙཀྑཱཡཏནཱདཱིནི ཧེཊྛཱ ཝིཏྠཱརིཏཱནེཝ. ཏཏྠ ཏཏྠ པན ཝིསེསམཏྟམེཝ ཝཀྑཱམ.

ཨུཔཱདིཎྞནིདྡེསེ ཏཱཝ ཙཀྑཱཡཏནཱདཱིནི ཨེཀནྟཨུཔཱདིཎྞཏྟཱ ཝུཏྟཱནི. ཡསྨཱ པན རཱུཔཱཡཏནཱདཱིནི ཨུཔཱདིཎྞཱནིཔི ཨཏྠི ཨནུཔཱདིཎྞཱནིཔི, ཏསྨཱ ཏཱནི ཡཾ ཝཱ པནཱཏི སངྑེཔཏོ དསྶེཏྭཱ པུན ཀམྨསྶ ཀཏཏྟཱ རཱུཔཱཡཏནནྟིཨཱདིནཱ ནཡེན ཝིཏྠཱརིཏཱནི. ཨིམིནཱ ཨུཔཱཡེན སབྦཡེཝཱཔནཀེསུ ཨཏྠོ ཝེདིཏབྦོ.

ཀསྨཱ པན ‘ཀམྨསྶ ཀཏཏྟཱ’ཏི ཙ ‘ན ཀམྨསྶ ཀཏཏྟཱ’ཏི ཙ ཨུབྷིནྣམྤི ནིདྡེསེ ‘ཛརཏཱ ཙ ཨནིཙྩཏཱ ཙ’ ན གཧིཏཱ, ཨནུཔཱདིཎྞཱདཱིནཾཡེཝ ནིདྡེསེསུ གཧིཏཱཏི? ན ཀམྨསྶ ¶ ཀཏཏྟཱཏི ཨེཏྠ ཏཱཝ ཀམྨཏོ ཨཉྙཔཙྩཡསམུཊྛཱནཾ སངྒཧིཏཾ. ‘ཀམྨསྶ ཀཏཏྟཱ’ཏི ཨེཏྠ ཀམྨསམུཊྛཱནམེཝ. ཨིམཱནི ཙ དྭེ རཱུཔཱནི ནེཝ ཀམྨཏོ ན ཨཉྙསྨཱ རཱུཔཛནཀཔཙྩཡཱ ཨུཔྤཛྫནྟི, ཏསྨཱ ན གཧིཏཱནི. སཱ ཙ ནེསཾ ཨནུཔྤཏྟི པརཏོ ཨཱཝི བྷཝིསྶཏི. ཨནུཔཱདིཎྞནྟིཨཱདཱིསུ པན ཀེཝལཾ ཨནུཔཱདིཎྞཱདིགྒཧཎེན ཀམྨཱདིསམུཊྛཱནཏཱ པཊིཀྑིཏྟཱ, ནཨཉྙཔཙྩཡསམུཊྛཱནཏཱ ཨནུཉྙཱཏཱ. ཏསྨཱ ཏཏྠ གཧིཏཱནཱིཏི ཝེདིཏབྦཱནི.

༦༦༦. ཙིཏྟསམུཊྛཱནནིདྡེསེ ཀཱཡཝིཉྙཏྟི ཝཙཱིཝིཉྙཏྟཱིཏི ཨིདཾ དྭཡཾ ཡསྨཱ ཨེཀནྟཙིཏྟསམུཊྛཱནཱནི བྷཱུཏཱནི ཨུཔཱདཱཡ པཉྙཱཡཏི, ཏསྨཱ ཝུཏྟཾ. པརམཏྠཏོ ¶ པན ཏསྶ ནིསྶཡབྷཱུཏཱནི བྷཱུཏཱནེཝ ཙིཏྟསམུཊྛཱནཱནི, ཏཾནིསྶིཏཏྟཱ. ཡཐཱ ཨནིཙྩསྶ རཱུཔསྶ ཛརཱམརཎཾ ཨནིཙྩཾ ནཱམ ཧོཏི, ཨེཝམིདམྤི ཙིཏྟསམུཊྛཱནཾ ནཱམ ཛཱཏཾ.

༦༦༨. ཙིཏྟསཧབྷུནིདྡེསེཔི ¶ ཨེསེཝ ནཡོ. ཡཱཝ ཙིཏྟཾ ཏཱཝ པཉྙཱཡནཏོ ཨིདམེཝ དྭཡཾ ཝུཏྟཾ. ན པནེཏཾ ཙིཏྟེན སཧ བྷཱུཏཱནི ཝིཡ, ཙེཏནཱདཡོ ཝིཡ ཙ ཨུཔྤཛྫཏི.

༦༧༠. ཙིཏྟཱནུཔརིཝཏྟིཏཱཡཔི ཨེསེཝ ནཡོ. ཡཱཝ ཙིཏྟཾ ཏཱཝ པཉྙཱཡནཏོ ཨེཝ ཧེཏཾ དྭཡཾ ཙིཏྟཱནུཔརིཝཏྟཱིཏི ཝུཏྟཾ.

༦༧༤. ཨོལཱ༹རིཀནྟི ཝཏྠཱརམྨཎབྷཱུཏཏྟཱ སཾངྒྷཊྚནཝསེན གཧེཏབྦཏོ ཐཱུལཾ. ཝུཏྟཝིཔལླཱསཏོ སུཁུམཾ ཝེདིཏབྦཾ.

༦༧༦. དཱུརེཏི གྷཊྚནཝསེན ཨགྒཧེཏབྦཏྟཱ དུབྦིཉྙེཡྻབྷཱཝེན སམཱིཔེ ཋིཏམྤི དཱུརེ. ཨིཏརཾ པན གྷཊྚནཝསེན གཧེཏབྦཏྟཱ སུཝིཉྙེཡྻབྷཱཝེན དཱུརེ ཋིཏམྤི སནྟིཀེ. ཙཀྑཱཡཏནཱདིནིདྡེསཱ ཧེཊྛཱ ཝུཏྟནཡེནེཝ ཝིཏྠཱརཏོ ཝེདིཏབྦཱ. ཨིདཾ ¶ ཏཱཝ དུཝིདྷེན རཱུཔསངྒཧེ ཝིསེསམཏྟཾ. ཏིཝིདྷསངྒཧོ ཨུཏྟཱནཏྠོཝ.

ཙཏུཀྐནིདྡེསཝཎྞནཱ

༩༦༦. ཙཏུབྦིདྷསངྒཧཱཝསཱནེ དིཊྛཱདཱིནཾ པཙྪིམཔདསྶ བྷེདཱབྷཱཝེན ཨཱདིཏོ པཊྛཱཡ པུཙྪཾ ཨཀཏྭཱཝ རཱུཔཱཡཏནཾ དིཊྛཾ སདྡཱཡཏནཾ སུཏནྟིཨཱདི ཝུཏྟཾ. ཏཏྠ རཱུཔཱཡཏནཾ ཙཀྑུནཱ ཨོལོཀེཏྭཱ དཀྑིཏུཾ སཀྐཱཏི ‘དིཊྛཾ’ ནཱམ ཛཱཏཾ. སདྡཱཡཏནཾ སོཏེན སུཏྭཱ ཛཱནིཏུཾ སཀྐཱཏི ‘སུཏཾ’ ནཱམ ཛཱཏཾ. གནྡྷཱཡཏནཱདིཏྟཡཾ གྷཱནཛིཝ྄ཧཱཀཱཡེཧི པཏྭཱ གཧེཏབྦཏོ མུནིཏྭཱ ཛཱནིཏབྦཊྛེན མུཏཾ ནཱམ ཛཱཏཾ. ཕུསིཏྭཱ ཝིཉྙཱཎུཔྤཏྟིཀཱརཎཏོ ‘མུཏཾ’ ནཱམཱཏིཔི ཝུཏྟཾ. སབྦམེཝ པན རཱུཔཾ མནོཝིཉྙཱཎེན ཛཱནིཏབྦནྟི མནསཱ ཝིཉྙཱཏཾ ནཱམ ཛཱཏཾ.

པཉྩཀནིདྡེསཝཎྞནཱ

༩༦༧. པཉྩཝིདྷསངྒཧནིདྡེསེ ¶ ཀཀྑལ༹ནྟི ཐདྡྷཾ. ཁརམེཝ ཁརགཏཾ, ཕརུསནྟི ཨཏྠོ. ཨིཏརེ དྭེཔི སབྷཱཝནིདྡེསཱ ཨེཝ. ཨཛ྄ཛྷཏྟནྟི ནིཡཀཛ྄ཛྷཏྟཾ. བཧིདྡྷཱཏི བཱཧིརཾ. ཨུཔཱདིཎྞནྟི ན ཀམྨསམུཊྛཱནམེཝ. ཨཝིསེསེན པན སརཱིརཊྛཀསྶེཏཾ གཧཎཾ. སརཱིརཊྛཀཉྷི ཨུཔཱདིཎྞཾ ཝཱ ཧོཏུ ཨནུཔཱདིཎྞཾ ཝཱ, ཨཱདིནྣགཧིཏཔརཱམཊྛཝསེན སབྦཾ ཨུཔཱདིཎྞམེཝ ནཱམ.

༩༦༩. ཏེཛོགཏནྟི ¶ སབྦཏེཛེསུ གཏཾ ཨུཎྷཏྟལཀྑཎཾ, ཏེཛོ ཨེཝ ཝཱ ཏེཛོབྷཱཝཾ གཏནྟི ‘ཏེཛོགཏཾ’. ཨུསྨཱཏི ཨུསྨཱཀཱརོ. ཨུསྨཱགཏནྟི ཨུསྨཱབྷཱཝཾ གཏཾ. ཨུསྨཱཀཱརསྶེཝེཏཾ ནཱམཾ. ཨུསུམནྟི བལཝཨུསྨཱ. ཨུསུམམེཝ ཨུསུམབྷཱཝཾ གཏནྟི ཨུསུམགཏཾ.

༩༧༠. ཝཱཡནཀཝསེན ཝཱཡོ. ཝཱཡོཝ ཝཱཡོབྷཱཝཾ གཏཏྟཱ ཝཱཡོགཏཾ. ཐམྦྷིཏཏྟནྟི ཨུཔྤལནཱལ༹ཏཙཱདཱིནཾ ཝིཡ ཝཱཏཔུཎྞཱནཾ ཐམྦྷིཏབྷཱཝོ རཱུཔསྶ.

ཚཀྐཱདིནིདྡེསཝཎྞནཱ

༩༧༢-༤. ཚབྦིདྷཱདིསངྒཧཱནཾ ¶ ཏིཎྞཾ ཨོསཱནཔདསྶ བྷེདཱབྷཱཝཏོ ཨཱདིཏོ པཊྛཱཡ ཨཔུཙྪིཏྭཱཝ ནིདྡེསོ ཀཏོ. ཏཏྠ ཙཀྑུཝིཉྙཱཎེན ཛཱནིཏུཾ སཀྐཱཏི ཙཀྑུཝིཉྙེཡྻཾ…པེ… མནོཝིཉྙཱཎེན ཛཱནིཏུཾ སཀྐཱཏི མནོཝིཉྙེཡྻཾ. ཏིཝིདྷཱཡ མནོདྷཱཏུཡཱ ཛཱནིཏུཾ སཀྐཱཏི མནོདྷཱཏུཝིཉྙེཡྻཾ སབྦཾ རཱུཔནྟི ཨེཏྠ ཡསྨཱ ཨེཀཾ རཱུཔམྤི མནོཝིཉྙཱཎདྷཱཏུཡཱ ཨཛཱནིཏབྦཾ ནཱམ ནཏྠི, ཏསྨཱ ‘སབྦཾ རཱུཔ’ནྟི ཝུཏྟཾ. སམྨཱསམྦུདྡྷེན ཧི ཨབྷིདྷམྨཾ པཏྭཱ ནཡཾ ཀཱཏུཾ ཡུཏྟཊྛཱནེ ནཡོ ཨཀཏོ ནཱམ ནཏྠི. ཨིདཉྩ ཨེཀརཱུཔསྶཱཔི མནོཝིཉྙཱཎདྷཱཏུཡཱ ཨཛཱནིཏབྦསྶ ཨབྷཱཝེན ནཡཾ ཀཱཏུཾ ཡུཏྟཊྛཱནཾ ནཱམ, ཏསྨཱ ནཡཾ ཀརོནྟོ ‘སབྦཾ རཱུཔ’ནྟི ཨཱཧ.

༩༧༤. སུཁསམྥསྶོཏི སུཁཝེདནཱཔཊིལཱབྷཔཙྩཡོ. དུཀྑསམྥསྶོཏི དུཀྑཝེདནཱཔཊིལཱབྷཔཙྩཡོ. ཨིདྷཱཔི ཕོཊྛབྦཱརམྨཎསྶ སུཁདུཀྑསྶ སབྦྷཱཝཏོ ཨཡཾ ནཡོ དིནྣོ.

ནཝཀཱདིནིདྡེསཝཎྞནཱ

༩༧༥. ནཝཀེ ¶ པན ཨིནྡྲིཡརཱུཔསྶ ནཱམ ཨཏྠིཏཱཡ ནཡོ དིནྣོ. ཏསྶེཝ སཔྤཊིགྷཨཔྤཊིགྷཏཱཡ དསཀེ ནཡོ དིནྣོ. ཨེཀཱདསཀེ ཨཌྜྷེཀཱདས ཨཱཡཏནཱནི ཝིབྷཏྟཱནི. ཏེསཾ ནིདྡེསཝཱརཱ ཧེཊྛཱ ཝུཏྟནཡེན ཝིཏྠཱརཏོ ཝེདིཏབྦཱ. སེསཾ སབྦཏྠ ཨུཏྟཱནཏྠམེཝ.

པཀིཎྞཀཀཐཱ

ཨིམེསུ ¶ པན རཱུཔེསུ ཨསམྨོཧཏྠཾ སམོདྷཱནཾ སམུཊྛཱནཾ པརིནིཔྥནྣཉྩ སངྑཏནྟི ཨིདཾ ‘པཀིཎྞཀཾ’ ཝེདིཏབྦཾ.

ཏཏྠ ‘སམོདྷཱན’ནྟི སབྦམེཝ ཧིདཾ རཱུཔཾ སམོདྷཱནཏོ ཙཀྑཱཡཏནཾ…པེ… ཀབལཱི༹ཀཱརོ ཨཱཧཱརོ, ཕོཊྛབྦཱཡཏནཾ ཨཱཔོདྷཱཏཱུཏི པཉྩཝཱིསཏིསངྑྱཾ ཧོཏི. ཏཾ ཝཏྠུརཱུཔེན སདྡྷིཾ ཚབྦཱིསཏིསངྑྱཾ ཝེདིཏབྦཾ. ཨིཏོ ¶ ཨཉྙཾ རཱུཔཾ ནཱམ ནཏྠི. ཀེཙི པན ‘མིདྡྷརཱུཔཾ ནཱམ ཨཏྠཱི’ཏི ཝདནྟི. ཏེ ‘‘ཨདྡྷཱ མུནཱིསི སམྦུདྡྷོ, ནཏྠི ནཱིཝརཎཱ ཏཝཱ’’ཏིཨཱདཱིནི (སུ. ནི. ༥༤༦) ཝཏྭཱ མིདྡྷརཱུཔཾ ནཱམ ནཏྠཱིཏི པཊིསེདྷེཏབྦཱ. ཨཔརེ བལརཱུཔེན སདྡྷིཾ སཏྟཝཱིསཏི, སམྦྷཝརཱུཔེན སདྡྷིཾ ཨཊྛཝཱིསཏི, ཛཱཏིརཱུཔེན སདྡྷིཾ ཨེཀཱུནཏིཾསཏི, རོགརཱུཔེན སདྡྷིཾ སམཏིཾསཏི རཱུཔཱནཱིཏི ཝདནྟི. ཏེཔི ཏེསཾ ཝིསུཾ ཨབྷཱཝཾ དསྶེཏྭཱ པཊིཀྑིཔིཏབྦཱ. ཝཱཡོདྷཱཏུཡཱ ཧི གཧིཏཱཡ བལརཱུཔཾ གཧིཏམེཝ, ཨཉྙཾ བལརཱུཔཾ ནཱམ ནཏྠི. ཨཱཔོདྷཱཏུཡཱ སམྦྷཝརཱུཔཾ, ཨུཔཙཡསནྟཏཱིཧི ཛཱཏིརཱུཔཾ, ཛརཏཱཨནིཙྩཏཱཧི གཧིཏཱཧི རོགརཱུཔཾ གཧིཏམེཝ. ཨཉྙཾ རོགརཱུཔཾ ནཱམ ནཏྠི. ཡོཔི ཀཎྞརོགཱདི ཨཱབཱདྷོ སོ ཝིསམཔཙྩཡསམུཊྛིཏདྷཱཏུམཏྟམེཝ. ན ཨཉྙོ ཏཏྠ རོགོ ནཱམ ཨཏྠཱིཏི སམོདྷཱནཏོ ཚབྦཱིསཏིམེཝ རཱུཔཱནི.

‘སམུཊྛཱན’ནྟི ཀཏི རཱུཔཱནི ཀཏིསམུཊྛཱནཱནི? དས ཨེཀསམུཊྛཱནཱནི, ཨེཀཾ དྭིསམུཊྛཱནཾ, ཏཱིཎི ཏིསམུཊྛཱནཱནི, ནཝ ཙཏུསམུཊྛཱནཱནི, དྭེ ན ཀེནཙི སམུཊྛཧནྟི.

ཏཏྠ ཙཀྑུཔསཱདོ…པེ… ཛཱིཝིཏིནྡྲིཡནྟི ཨིམཱནི ཨཊྛ ཨེཀནྟཾ ཀམྨཏོཝ སམུཊྛཧནྟི. ཀཱཡཝིཉྙཏྟིཝཙཱིཝིཉྙཏྟིདྭཡཾ ཨེཀནྟེན ཙིཏྟཏོ སམུཊྛཱཏཱིཏི དས ¶ ‘ཨེཀསམུཊྛཱནཱནི’ ནཱམ. སདྡོ ཨུཏུཏོ ཙ ཙིཏྟཏོ ཙ སམུཊྛཱཏཱིཏི ཨེཀོ ‘དྭིསམུཊྛཱནོ’ ནཱམ. ཏཏྠ ཨཝིཉྙཱཎཀསདྡོ ཨུཏུཏོ སམུཊྛཱཏི, སཝིཉྙཱཎཀསདྡོ ཙིཏྟཏོ. ལཧུཏཱདིཏྟཡཾ པན ཨུཏུཙིཏྟཱཧཱརེཧི སམུཊྛཱཏཱིཏི ཏཱིཎི ‘ཏིསམུཊྛཱནཱནི’ ནཱམ. ཨཝསེསཱནི ནཝ རཱུཔཱནི ཏེཧི ཀམྨེན ཙཱཏི ཙཏཱུཧི སམུཊྛཧནྟཱིཏི ནཝ ‘ཙཏུསམུཊྛཱནཱནི’ ནཱམ. ཛརཏཱ ཨནིཙྩཏཱ པན ཨེཏེསུ ཨེཀཏོཔི ན སམུཊྛཧནྟཱིཏི དྭེ ‘ན ཀེནཙི སམུཊྛཧནྟི’ ནཱམ. ཀསྨཱ? ཨཛཱཡནཏོ. ན ཧི ཨེཏཱནི ཛཱཡནྟི. ཀསྨཱ? ཛཱཏསྶ པཱཀབྷེདཏྟཱ. ཨུཔྤནྣཉྷི རཱུཔཾ ཛཱིརཏི བྷིཛྫཏཱིཏི ¶ ཨཝསྶཾ ¶ པནེཏཾ སམྤཊིཙྪིཏབྦཾ. ན ཧི ཨུཔྤནྣཾ རཱུཔཾ ཨརཱུཔཾ ཝཱ ཨཀྑཡཾ ནཱམ དིསྶཏི. ཡཱཝ པན ན བྷིཛྫཏི ཏཱཝསྶ པརིཔཱཀོཏི སིདྡྷམེཏཾ. ‘ཛཱཏསྶ པཱཀབྷེདཏྟཱ’ཏི ཡདི ཙ ཏཱནི ཛཱཡེཡྻུཾ ཏེསམྤི པཱཀབྷེདཱ བྷཝེཡྻུཾ. ན ཙ པཱཀོ པཙྩཏི, བྷེདོ ཝཱ བྷིཛྫཏཱིཏི ཛཱཏསྶ པཱཀབྷེདཏྟཱ ནེཏཾ དྭཡཾ ཛཱཡཏི.

ཏཏྠ སིཡཱ – ཡཐཱ ‘ཀམྨསྶ ཀཏཏྟཱ’ཏི ཨཱདིནིདྡེསེསུ ‘རཱུཔསྶ ཨུཔཙཡོ རཱུཔསྶ སནྟཏཱི’ཏི ཝཙནེན ‘ཛཱཏི’ ཛཱཡཏཱིཏི སམྤཊིཙྪིཏཾ ཧོཏི, ཨེཝཾ ‘པཱཀོ’པི པཙྩཏུ ‘བྷེདོ’པི བྷིཛྫཏཱུཏི. ‘‘ན ཏཏྠ ‘ཛཱཏི ཛཱཡཏཱི’ཏི སམྤཊིཙྪིཏཾ. ཡེ པན དྷམྨཱ ཀམྨཱདཱིཧི ནིབྦཏྟནྟི ཏེསཾ ཨབྷིནིབྦཏྟིབྷཱཝཏོ ཛཱཏིཡཱ ཏཔྤཙྩཡབྷཱཝཝོཧཱརོ ཨནུམཏོ. ན པན པརམཏྠཏོ ཛཱཏི ཛཱཡཏི. ཛཱཡམཱནསྶ ཧི ཨབྷིནིབྦཏྟིམཏྟཾ ཛཱཏཱི’’ཏི.

ཏཏྠ སིཡཱ – ‘ཡཐེཝ ཛཱཏི ཡེསཾ དྷམྨཱནཾ ཨབྷིནིབྦཏྟི ཏཔྤཙྩཡབྷཱཝཝོཧཱརཾ ཨབྷིནིབྦཏྟིཝོཧཱརཉྩ ལབྷཏི, ཏཐཱ པཱཀབྷེདཱཔི ཡེསཾ དྷམྨཱནཾ པཱཀབྷེདཱ ཏཔྤཙྩཡབྷཱཝཝོཧཱརཾ ཨབྷིནིབྦཏྟིཝོཧཱརཉྩ ལབྷནྟུ. ཨེཝཾ ཨིདམྤི དྭཡཾ ཀམྨཱདིསམུཊྛཱནམེཝཱཏི ཝཏྟབྦཾ བྷཝིསྶཏཱི’ཏི. ‘ན པཱཀབྷེདཱ ཏཾ ཝོཧཱརཾ ལབྷནྟི. ཀསྨཱ? ཛནཀཔཙྩཡཱནུབྷཱཝཀྑཎེ ཨབྷཱཝཏོ. ཛནཀཔཙྩཡཱནཉྷི ཨུཔྤཱདེཏབྦདྷམྨསྶ ཨུཔྤཱདཀྑཎེཡེཝ ཨཱནུབྷཱཝོ, ན ཏཏོ ཨུཏྟརི. ཏེཧི ཨབྷིནིབྦཏྟིཏདྷམྨཀྑཎསྨིཉྩ ཛཱཏི པཉྙཱཡམཱནཱ ཏཔྤཙྩཡབྷཱཝཝོཧཱརཾ ཨབྷིནིབྦཏྟིཝོཧཱརཉྩ ལབྷཏི, ཏསྨིཾ ཁཎེ སབྦྷཱཝཏོ; ན ཨིཏརདྭཡཾ, ཏསྨིཾ ཁཎེ ཨབྷཱཝཏོཏི ནེཝེཏཾ ཛཱཡཏཱི’ཏི ཝཏྟབྦཾ. ‘‘ཛརཱམརཎཾ, བྷིཀྑཝེ, ཨནིཙྩཾ སངྑཏཾ པཊིཙྩསམུཔྤནྣ’’ནྟི (སཾ. ནི. ༢.༢༠) ཨཱགཏཏྟཱ ¶ ཨིདམྤི དྭཡཾ ཛཱཡཏཱིཏི ཙེ – ‘ན, པརིཡཱཡདེསིཏཏྟཱ. ཏཏྠ ཧི པཊིཙྩསམུཔྤནྣཱནཾ དྷམྨཱནཾ ཛརཱམརཎཏྟཱ པརིཡཱཡེན ཏཾ པཊིཙྩསམུཔྤནྣ’ནྟི ཝུཏྟཾ.

‘ཡདི ཨེཝཾ, ཏཡམྤེཏཾ ཨཛཱཏཏྟཱ སསཝིསཱཎཾ ¶ ཝིཡ ནཏྠི; ནིབྦཱནཾ ཝིཡ ཝཱ ནིཙྩ’ནྟི ཙེ – ན, ནིསྶཡཔཊིབདྡྷཝུཏྟིཏོ; པཐཝཱིཨཱདཱིནཉྷི ནིསྶཡཱནཾ བྷཱཝེ ཛཱཏིཨཱདིཏྟཡཾ པཉྙཱཡཏི, ཏསྨཱ ན ནཏྠི. ཏེསཉྩ ཨབྷཱཝེ ན པཉྙཱཡཏི, ཏསྨཱ ན ནིཙྩཾ. ཨེཏམྤི ཙ ཨབྷིནིཝེསཾ པཊིསེདྷེཏུཾ ཨེཝ ཨིདཾ ཝུཏྟཾ – ‘‘ཛརཱམརཎཾ, བྷིཀྑཝེ, ཨནིཙྩཾ སངྑཏཾ ¶ པཊིཙྩསམུཔྤནྣ’’ནྟི (སཾ. ནི. ༢.༢༠). ཨེཝམཱདཱིཧི ནཡེཧི ཏཱནི དྭེ རཱུཔཱནི ན ཀེཧིཙི སམུཊྛཧནྟཱིཏི ཝེདིཏབྦཾ.

ཨཔིཙ ‘སམུཊྛཱན’ནྟི ཨེཏྠ ཨཡམཉྙོཔི ཨཏྠོ. ཏསྶཱཡཾ མཱཏིཀཱ – ‘ཀམྨཛཾ ཀམྨཔཙྩཡཾ ཀམྨཔཙྩཡཨུཏུསམུཊྛཱནཾ, ཨཱཧཱརསམུཊྛཱནཾ ཨཱཧཱརཔཙྩཡཾ ཨཱཧཱརཔཙྩཡཨུཏུསམུཊྛཱནཾ, ཨུཏུསམུཊྛཱནཾ ཨུཏུཔཙྩཡཾ ཨུཏུཔཙྩཡཨུཏུསམུཊྛཱནཾ, ཙིཏྟསམུཊྛཱནཾ ཙིཏྟཔཙྩཡཾ ཙིཏྟཔཙྩཡཨུཏུསམུཊྛཱན’ནྟི.

ཏཏྠ ཙཀྑུཔསཱདཱདི ཨཊྛཝིདྷཾ རཱུཔཾ སདྡྷིཾ ཧདཡཝཏྠུནཱ ‘ཀམྨཛཾ’ ནཱམ. ཀེསམསྶུ ཧཏྠིདནྟཱ ཨསྶཝཱལཱ ཙམརཝཱལཱཏི ཨེཝམཱདི ‘ཀམྨཔཙྩཡཾ’ ནཱམ. ཙཀྐརཏནཾ དེཝཏཱནཾ ཨུཡྻཱནཝིམཱནཱདཱིནཱིཏི ཨེཝམཱདི ‘ཀམྨཔཙྩཡཨུཏུསམུཊྛཱནཾ’ ནཱམ.

ཨཱཧཱརཏོ སམུཊྛིཏཾ སུདྡྷཊྛཀཾ ‘ཨཱཧཱརསམུཊྛཱནཾ’ ནཱམ. ཀབལཱི༹ཀཱརོ ཨཱཧཱརོ དྭིནྣམྤི རཱུཔསནྟཏཱིནཾ པཙྩཡོ ཧོཏི ཨཱཧཱརསམུཊྛཱནསྶ ཙ ཨུཔཱདིནྣསྶ ཙ. ཨཱཧཱརསམུཊྛཱནསྶ ཛནཀོ ཧུཏྭཱ པཙྩཡོ ཧོཏི, ཀམྨཛསྶ ཨནུཔཱལཀོ ཧུཏྭཱཏི ཨིདཾ ཨཱཧཱརཱནུཔཱལིཏཾ ཀམྨཛརཱུཔཾ ‘ཨཱཧཱརཔཙྩཡཾ’ ནཱམ. ཝིསབྷཱགཱཧཱརཾ སེཝིཏྭཱ ཨཱཏཔེ གཙྪནྟསྶ ཏིལཀཀཱལ༹ཀུཊྛཱདཱིནི ཨུཔྤཛྫནྟི, ཨིདཾ ‘ཨཱཧཱརཔཙྩཡཨུཏུསམུཊྛཱནཾ’ ནཱམ.

ཨུཏུཏོ སམུཊྛིཏཾ སུདྡྷཊྛཀཾ ‘ཨུཏུསམུཊྛཱནཾ’ ནཱམ. ཏསྨིཾ ཨུཏུ ཨཉྙཾ ཨཊྛཀཾ སམུཊྛཱཔེཏི, ཨིདཾ ‘ཨུཏུཔཙྩཡཾ’ ¶ ནཱམ. ཏསྨིམྤི ཨུཏུ ཨཉྙཾ ཨཊྛཀཾ སམུཊྛཱཔེཏི, ཨིདཾ ‘ཨུཏུཔཙྩཡཨུཏུསམུཊྛཱནཾ’ ནཱམ. ཨེཝཾ ཏིསྶོཡེཝ སནྟཏིཡོ གྷཊྚེཏུཾ སཀྐོཏི. ན ཏཏོ པརཾ. ཨིམམཏྠཾ ཨནུཔཱདིནྣཀེནཱཔི དཱིཔེཏུཾ ཝཊྚཏི. ཨུཏུསམུཊྛཱནོ ནཱམ ཝལཱཧཀོ. ཨུཏུཔཙྩཡཱ ནཱམ ¶ ཝུཊྛིདྷཱརཱ. དེཝེ པན ཝུཊྛེ བཱིཛཱནི ཝིརཱུཧནྟི, པཐཝཱི གནྡྷཾ མུཉྩཏི, པབྦཏཱ ནཱིལཱ ཁཱཡནྟི, སམུདྡོ ཝཌྜྷཏི, ཨེཏཾ ཨུཏུཔཙྩཡཨུཏུསམུཊྛཱནཾ ནཱམ.

ཙིཏྟཏོ སམུཊྛིཏཾ སུདྡྷཊྛཀཾ ‘ཙིཏྟསམུཊྛཱནཾ’ ནཱམ. ‘‘པཙྪཱཛཱཏཱ ཙིཏྟཙེཏསིཀཱ དྷམྨཱ པུརེཛཱཏསྶ ཨིམསྶ ཀཱཡསྶ པཙྪཱཛཱཏཔཙྩཡེན པཙྩཡོ’’ཏི (པཊྛཱ. ༡.༡.༡༡) ཨིདཾ ‘ཙིཏྟཔཙྩཡཾ’ ནཱམ. ཨཱཀཱསེ ཨནྟལིཀྑེ ཧཏྠིམྤི དསྶེཏི, ཨསྶམྤི དསྶེཏི, རཐམྤི དསྶེཏི ¶ , ཝིཝིདྷམྤི སེནཱབྱཱུཧཾ དསྶེཏིཏཱི (པཊི. མ. ༣.༡༨) ཨིདཾ ‘ཙིཏྟཔཙྩཡཨུཏུསམུཊྛཱནཾ’ ནཱམ.

‘པརིནིཔྥནྣ’ནྟི པནྣརས རཱུཔཱནི པརིནིཔྥནྣཱནི ནཱམ, དས ཨཔརིནིཔྥནྣཱནི ནཱམ. ‘ཡདི ཨཔརིནིཔྥནྣཱ, ཨསངྑཏཱ ནཱམ བྷཝེཡྻུཾ’. ‘‘ཏེསཾཡེཝ པན རཱུཔཱནཾ ཀཱཡཝིཀཱརོ ‘ཀཱཡཝིཉྙཏྟི’ ནཱམ, ཝཙཱིཝིཀཱརོ ‘ཝཙཱིཝིཉྙཏྟི’ ནཱམ, ཚིདྡཾ ཝིཝརཾ ‘ཨཱཀཱསདྷཱཏུ’ ནཱམ, ལཧུབྷཱཝོ ‘ལཧུཏཱ’ ནཱམ, མུདུབྷཱཝོ ‘མུདུཏཱ’ ནཱམ, ཀམྨཉྙབྷཱཝོ ‘ཀམྨཉྙཏཱ’ ནཱམ, ནིབྦཏྟི ‘ཨུཔཙཡོ’ ནཱམ, པཝཏྟི ‘སནྟཏི’ ནཱམ, ཛཱིརཎཱཀཱརོ ‘ཛརཏཱ’ ནཱམ, ཧུཏྭཱ ཨབྷཱཝཱཀཱརོ ‘ཨནིཙྩཏཱ’ ནཱམཱཏི. སབྦཾ པརིནིཔྥནྣཾ སངྑཏམེཝ ཧོཏཱི’’ཏི.

ཨཊྛསཱལིནིཡཱ དྷམྨསངྒཧཨཊྛཀཐཱཡ

རཱུཔཀཎྜཝཎྞནཱ ནིཊྛིཏཱ.

༣. ནིཀྑེཔཀཎྜོ

ཏིཀནིཀྑེཔཀཐཱ

༩༨༥. ཨེཏྟཱཝཏཱ ¶ ¶ ཀུསལཏྟིཀོ སབྦེསཾ ཀུསལཱདིདྷམྨཱནཾ པདབྷཱཛནནཡེན ཝིཏྠཱརིཏོ ཧོཏི. ཡསྨཱ པན ཡྭཱཡཾ ཀུསལཏྟིཀསྶ ཝིབྷཛནནཡོ ཝུཏྟོ, སེསཏིཀདུཀཱནམྤི ཨེསེཝ ཝིབྷཛནནཡོ ཧོཏི – ཡཐཱ ཧི ཨེཏྠ, ཨེཝཾ ‘ཀཏམེ དྷམྨཱ སུཁཱཡ ཝེདནཱཡ སམྤཡུཏྟཱ? ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི སོམནསྶསཧགཏཾ ཉཱཎསམྤཡུཏྟཾ རཱུཔཱརམྨཎཾ ཝཱ…པེ… ¶ ཡེ ཝཱ པན ཏསྨིཾ སམཡེ ཨཉྙེཔི ཨཏྠི པཊིཙྩསམུཔྤནྣཱ ཨརཱུཔིནོ དྷམྨཱ ཋཔེཏྭཱ ཝེདནཱཁནྡྷཾ, ཨིམེ དྷམྨཱ སུཁཱཡ ཝེདནཱཡ སམྤཡུཏྟཱ’ཏིཨཱདིནཱ ཨནུཀྐམེན སབྦཏིཀདུཀེསུ སཀྐཱ པཎྜིཏེཧི ཝིབྷཱཛནནཡཾ སལླཀྑེཏུཾ – ཏསྨཱ ཏཾ ཝིཏྠཱརདེསནཾ ནིཀྑིཔིཏྭཱ, ཨཉྙེན ནཱཏིསངྑེཔནཱཏིཝིཏྠཱརནཡེན སབྦཏིཀདུཀདྷམྨཝིབྷཱགཾ དསྶེཏུཾ ཀཏམེ དྷམྨཱ ཀུསལཱཏི ནིཀྑེཔཀཎྜཾ ཨཱརདྡྷཾ. ཙིཏྟུཔྤཱདཀཎྜཉྷི ཝིཏྠཱརདེསནཱ, ཨཊྛཀཐཱཀཎྜཾ སངྑེཔདེསནཱ. ཨིདཾ པན ནིཀྑེཔཀཎྜཾ ཙིཏྟུཔྤཱདཀཎྜཾ ཨུཔཱདཱཡ སངྑེཔོ, ཨཊྛཀཐཱཀཎྜཾ ཨུཔཱདཱཡ ཝིཏྠཱརོཏི སངྑིཏྟཝིཏྠཱརདྷཱཏུཀཾ ཧོཏི. ཏཡིདཾ, ཝིཏྠཱརདེསནཾ ནིཀྑིཔིཏྭཱ དེསིཏཏྟཱཔི, ཧེཊྛཱ ཝུཏྟཀཱརཎཝསེནཱཔི, ནིཀྑེཔཀཎྜཾ ནཱམཱཏི ཝེདིཏབྦཾ. ཝུཏྟཉྷེཏཾ –

མཱུལཏོ ཁནྡྷཏོ ཙཱཔི, དྭཱརཏོ ཙཱཔི བྷཱུམིཏོ;

ཨཏྠཏོ དྷམྨཏོ ཙཱཔི, ནཱམཏོ ཙཱཔི ལིངྒཏོ;

ནིཀྑིཔིཏྭཱ དེསིཏཏྟཱ, ནིཀྑེཔོཏི པཝུཙྩཏཱིཏི.

ཨིདཉྷི ཏཱིཎི ཀུསལམཱུལཱནཱིཏིཨཱདིནཱ ནཡེན མཱུལཏོ ནིཀྑིཔིཏྭཱ དེསིཏཾ. ཏཾསམྤཡུཏྟོ ཝེདནཱཀྑནྡྷོཏི ¶ ཁནྡྷཏོ. ཏཾསམུཊྛཱནཾ ཀཱཡཀམྨནྟི དྭཱརཏོ. ཀཱཡདྭཱརཔྤཝཏྟཉྷི ཀམྨཾ ཀཱཡཀམྨནྟི ཝུཙྩཏི. སུཁབྷཱུམིཡཾ, ཀཱམཱཝཙརེཏི བྷཱུམིཏོ ནིཀྑིཔིཏྭཱ དེསིཏཾ. ཏཏྠ ཏཏྠ ཨཏྠདྷམྨནཱམལིངྒཱནཾ ཝསེན དེསིཏཏྟཱ ཨཏྠཱདཱིཧི ནིཀྑིཔིཏྭཱ དེསིཏཾ ནཱམཱཏི ཝེདིཏབྦཾ.

ཏཏྠ ¶ ཀུསལཔདནིདྡེསེ ཏཱཝ ཏཱིཎཱིཏི གཎནཔརིཙྪེདོ. ཀུསལཱནི ཙ ཏཱནི མཱུལཱནི ཙ, ཀུསལཱནཾ ཝཱ དྷམྨཱནཾ ཧེཏུཔཙྩཡཔབྷཝཛནཀསམུཊྛཱནནིབྦཏྟཀཊྛེན མཱུལཱནཱིཏི ཀུསལམཱུལཱནི. ཨེཝཾ ཨཏྠཝསེན དསྶེཏྭཱ ཨིདཱནི ནཱམཝསེན དསྶེཏུཾ ཨལོབྷོ ཨདོསོ ཨམོཧོཏི ཨཱཧ. ཨེཏྟཱཝཏཱ ཡསྨཱ མཱུལེན མུཏྟཾ ཀུསལཾ ནཱམ ནཏྠི, ཏསྨཱ ཙཏུབྷཱུམཀཀུསལཾ ཏཱིཧི མཱུལེཧི པརིཡཱདིཡིཏྭཱ དསྶེསི དྷམྨརཱཛཱ. ཏཾསམྤཡུཏྟོཏི ¶ ཏེཧི ཨལོབྷཱདཱིཧི སམྤཡུཏྟོ. ཏཏྠ ཨལོབྷེན སམྤཡུཏྟེ སངྑཱརཀྑནྡྷེ, ཨདོསཱམོཧཱཔི ཨལོབྷེན སམྤཡུཏྟསངྑཱརཀྑནྡྷགཎནཾཡེཝ གཙྪནྟི. སེསདྭཡཝསེན སམྤཡོགེཔི ཨེསེཝ ནཡོ. ཨིཏི ཙཏུབྷཱུམཀཀུསལཾ པུན ཏཾསམྤཡུཏྟཀཙཏུཀྑནྡྷཝསེན པརིཡཱདིཡིཏྭཱ དསྶེསི དྷམྨརཱཛཱ. ཏཾསམུཊྛཱནནྟི ཏེཧི ཨལོབྷཱདཱིཧི སམུཊྛིཏཾ. ཨིམིནཱཔི ནཡེན ཏདེཝ ཙཏུབྷཱུམིཀཀུསལཾ ཏིཎྞཾ ཀམྨདྭཱརཱནཾ ཝསེན པརིཡཱདིཡིཏྭཱ དསྶེསི དྷམྨརཱཛཱ. ཨེཝཾ ཏཱཝ ཀུསལཾ ཏཱིསུ ཋཱནེསུ པརིཡཱདིཡིཏྭཱ དསྶིཏཾ.

༩༨༦. ཨཀུསལེཔི ཨེསེཝ ནཡོ. དྭཱདསནྣཉྷི ཨཀུསལཙིཏྟཱནཾ ཨེཀམྤི མཱུལེན མུཏྟཾ ནཱམ ནཏྠཱིཏི མཱུལེན པརིཡཱདིཡིཏྭཱ དསྶེསི དྷམྨརཱཛཱ. ཏཾསམྤཡུཏྟཙཏུཀྑནྡྷཏོ ཙ ཨུདྡྷཾ ཨཀུསལཾ ནཱམ ནཏྠཱིཏི ཏཱནེཝ དྭཱདས ཨཀུསལཙིཏྟཱནི ཙཏུཀྑནྡྷཝསེན པརིཡཱདིཡིཏྭཱ དསྶེསི. དྷམྨརཱཛཱ ཀཱཡཀམྨཱདིཝསེན པན ནེསཾ པཝཏྟིསབྦྷཱཝཏོ ཀམྨདྭཱརཝསེན པརིཡཱདིཡིཏྭཱ དསྶེསི དྷམྨརཱཛཱ. ཡཾ པནེཏྠ ཏདེཀཊྛཱ ཙ ཀིལེསཱཏིཨཱདི ཝུཏྟཾ, ཏཏྠ ཨེཀསྨིཾ ཙིཏྟེ པུགྒལེ ཝཱ ཋིཏནྟི ‘ཨེཀཊྛཾ’. ཏཏྠ ཨེཀསྨིཾ ཙིཏྟེ ཋིཏཾ སཧཛེཀཊྛཾ ནཱམ ཧོཏི. ཨེཀསྨིཾ པུགྒལེ ཋིཏཾ པཧཱནེཀཊྛཾ ནཱམ. ཏེན ལོབྷཱདིནཱ ཨཉྙེན ཝཱ ཏཏྠ ཏཏྠ ནིདྡིཊྛེན སཧ ཨེཀསྨིཾ ཋིཏནྟི ཏདེཀཊྛཾ. ཏཏྠ ‘ཀཏམེ དྷམྨཱ སཾཀིལིཊྛསཾཀིལེསིཀཱ? ཏཱིཎི ཨཀུསལམཱུལཱནི – ལོབྷོ དོསོ མོཧོ, ཏདེཀཊྛཱ ཙ ཀིལེསཱ’ཏི སཾཀིལིཊྛཏྟིཀེ; ‘ཀཏམེ དྷམྨཱ ཧཱིནཱ? ཏཱིཎི ཨཀུསལམཱུལཱནི – ལོབྷོ དོསོ མོཧོ, ཏདེཀཊྛཱ ཙ ཀིལེསཱ’ཏི ཧཱིནཏྟིཀེ ‘ཀཏམེ དྷམྨཱ ཨཀུསལཱ? ཏཱིཎི ཨཀུསལམཱུལཱནི – ལོབྷོ དོསོ མོཧོ, ཏདེཀཊྛཱ ཙ ཀིལེསཱ’ཏི ཨིམསྨིཾ ¶ ཀུསལཏྟིཀེ; ‘ཀཏམེ ¶ དྷམྨཱ སཾཀིལིཊྛཱ? ཏཱིཎི ཨཀུསལམཱུལཱནི – ལོབྷོ དོསོ མོཧོ, ཏདེཀཊྛཱ ཙ ཀིལེསཱ’ཏི ཀིལེསགོཙྪཀེ ‘ཀཏམེ དྷམྨཱ སརཎཱ? ཏཱིཎི ཨཀུསལམཱུལཱནི ¶ – ལོབྷོ དོསོ མོཧོ, ཏདེཀཊྛཱ ཙ ཀིལེསཱཏི སརཎདུཀེ’ཏི – ཨིམེསུ ཨེཏྟཀེསུ ཋཱནེསུ ‘སཧཛེཀཊྛཾ’ ཨཱགཏཾ.

དསྶནེནཔཧཱཏབྦཏྟིཀེ པན ‘ཨིམཱནི ཏཱིཎི སཾཡོཛནཱནི, ཏདེཀཊྛཱ ཙ ཀིལེསཱ’ཏི, དསྶནེནཔཧཱཏབྦཧེཏུཀཏྟིཀེཔི ‘ཨིམཱནི ཏཱིཎི སཾཡོཛནཱནི, ཏདེཀཊྛཱ ཙ ཀིལེསཱ’ཏི, པུན ཏཏྠེཝ ཏཱིཎི སཾཡོཛནཱནི – སཀྐཱཡདིཊྛི ཝིཙིཀིཙྪཱ སཱིལབྦཏཔརཱམཱསོ, ཨིམེ དྷམྨཱ དསྶནེནཔཧཱཏབྦཱ; ཏདེཀཊྛོ ལོབྷོ དོསོ མོཧོ, ཨིམེ དྷམྨཱ དསྶནེནཔཧཱཏབྦཧེཏཱུ; ཏདེཀཊྛཱ ཙ ཀིལེསཱ ཏཾསམྤཡུཏྟོ ཝེདནཱཁནྡྷོ…པེ… ཝིཉྙཱཎཀྑནྡྷོ, ཏཾསམུཊྛཱནཾ ཀཱཡཀམྨཾ ཝཙཱིཀམྨཾ མནོཀམྨཾ, ཨིམེ དྷམྨཱ དསྶནེནཔཧཱཏབྦཧེཏུཀཱཏི; སམྨཔྤདྷཱནཝིབྷངྒེ ‘‘ཏཏྠ ཀཏམེ པཱཔཀཱ ཨཀུསལཱ དྷམྨཱ? ཏཱིཎི ཨཀུསལམཱུལཱནི – ལོབྷོ དོསོ མོཧོ, ཏདེཀཊྛཱ ཙ ཀིལེསཱ’’ཏི (ཝིབྷ. ༣༩༡) – ཨིམེསུ པན ཨེཏྟཀེསུ ཋཱནེསུ ‘པཧཱནེཀཊྛཾ’ ཨཱགཏནྟི ཝེདིཏབྦཾ.

༩༨༧. ཨབྱཱཀཏཔདནིདྡེསོ ཨུཏྟཱནཏྠོཡེཝཱཏི. ཨིམསྨིཾ ཏིཀེ ཏཱིཎི ལཀྑཎཱནི ཏིསྶོ པཉྙཏྟིཡོ ཀསིཎུགྒྷཱཊིམཱཀཱསཾ ཨཛཊཱཀཱསཾ ཨཱཀིཉྩཉྙཱཡཏནསྶ ཨཱརམྨཎཾ ནིརོདྷསམཱཔཏྟི ཙ ན ལབྦྷཏཱིཏི ཝུཏྟཾ.

༩༨༨. ཝེདནཱཏྟིཀནིདྡེསེ སུཁབྷཱུམིཡནྟི ཨེཏྠ ཡཐཱ ཏམྦབྷཱུམི ཀཎྷབྷཱུམཱིཏི ཏམྦཀཎྷབྷཱུམིཡོཝ ཝུཙྩནྟི, ཨེཝཾ སུཁམྤི སུཁབྷཱུམི ནཱམ. ཡཐཱ ཨུཙྪུབྷཱུམི སཱལིབྷཱུམཱིཏི ཨུཙྪུསཱལཱིནཾ ཨུཔྤཛྫནཊྛཱནཱནི ཝུཙྩནྟི, ཨེཝཾ སུཁསྶ ཨུཔྤཛྫནཊྛཱནཾ ཙིཏྟམྤི སུཁབྷཱུམི ནཱམ. ཏཾ ཨིདྷ ཨདྷིཔྤེཏཾ. ཡསྨཱ པན སཱ ཀཱམཱཝཙརེ ཝཱ ཧོཏི, རཱུཔཱཝཙརཱདཱིསུ ཝཱ, ཏསྨཱསྶཱ ¶ ཏཾ པབྷེདཾ དསྶེཏུཾ ཀཱམཱཝཙརེཏིཨཱདི ཝུཏྟཾ. སུཁཝེདནཾ ཋཔེཏྭཱཏི ཡཱ སཱ སུཁབྷཱུམིཡཾ སུཁཝེདནཱ, ཏཾ ཋཔེཏྭཱ. ཏཾསམྤཡུཏྟོཏི ཏཱཡ ཋཔིཏཱཡ སུཁཝེདནཱཡ སམྤཡུཏྟོ. སེསཔདདྭཡེཔི ཨིམིནཱཝ ནཡེན ཨཏྠོ ཝེདིཏབྦོཏི.

ཨིམསྨིཾ ¶ ཏིཀེ ཏིསྶོ ཝེདནཱ, སབྦཾ རཱུཔཾ, ནིབྦཱནནྟི ཨིདམྤི ན ལབྦྷཏི. ཨཡཉྷི ཏིཀོ ཀུསལཏྟིཀེ ཙ ཨལབྦྷམཱནེཧི ཨིམེཧི ཙ ཏཱིཧི ཀོཊྛཱསེཧི མུཏྟཀོ ནཱམ. ཨིཏོ པརེསུ པན ཏིཀདུཀེསུ པཱལི༹ཏོ ཙ ཨཏྠཏོ ཙ ཡཾ ཝཏྟབྦཾ སིཡཱ ཏཾ སབྦཾ པདཱནུཀྐམེན མཱཏིཀཱཀཐཱཡཉྩེཝ ཀུསལཱདཱིནཾ ནིདྡེསེ ཙ ཝུཏྟམེཝ. ཡཾ པན ཡཏྠ ཝིསེསམཏྟཾ ཏདེཝ ཝཀྑཱམ.

༩༩༡. ཏཏྠ ¶ ཝིཔཱཀཏྟིཀེ ཏཱཝ ཀིཉྩཱཔི ཨརཱུཔདྷམྨཱ ཝིཡ རཱུཔདྷམྨཱཔི ཀམྨསམུཊྛཱནཱ ཨཏྠི, ཨནཱརམྨཎཏྟཱ པན ཏེ ཀམྨསརིཀྑཀཱ ན ཧོནྟཱིཏི སཱརམྨཎཱ ཨརཱུཔདྷམྨཱཝ ཀམྨསརིཀྑཀཏྟཱ ཝིཔཱཀཱཏི ཝུཏྟཱ, བཱིཛསརིཀྑཀཾ ཕལཾ ཝིཡ. སཱལིབཱིཛསྨིཉྷི ཝཔིཏེ ཨངྐུརཔཏྟཱདཱིསུ ནིཀྑནྟེསུཔི སཱལིཕལནྟི ན ཝུཙྩཏི. ཡདཱ པན སཱལིསཱིསཾ པཀྐཾ ཧོཏི པརིཎཏཾ, ཏདཱ བཱིཛསརིཀྑཀོ སཱལི ཨེཝ སཱལིཕལནྟི ཝུཙྩཏི. ཨངྐུརཔཏྟཱདཱིནི པན བཱིཛཛཱཏཱནི བཱིཛཏོ ནིབྦཏྟཱནཱིཏི ཝུཙྩནྟི, ཨེཝམེཝ རཱུཔམྤི ཀམྨཛནྟི ཝཱ ཨུཔཱདིཎྞནྟི ཝཱ ཝཏྟུཾ ཝཊྚཏི.

༩༩༤. ཨུཔཱདིཎྞཏྟིཀེ ཀིཉྩཱཔི ཁཱིཎཱསཝསྶ ཁནྡྷཱ ‘ཨམྷཱཀཾ མཱཏུལཏྠེརོ ཨམྷཱཀཾ ཙཱུལ༹པིཏུཏྠེརོ’ཏི ཝདནྟཱནཾ པརེསཾ ཨུཔཱདཱནསྶ པཙྩཡཱ ཧོནྟི, མགྒཕལནིབྦཱནཱནི པན ཨགྒཧིཏཱནི ཨཔརཱམཊྛཱནི ཨནུཔཱདིཎྞཱནེཝ. ཏཱནི ཧི, ཡཐཱ དིཝསཾ སནྟཏྟོ ཨཡོགུལོ༹ མཀྑིཀཱནཾ ཨབྷིནིསཱིདནསྶ པཙྩཡོ ན ཧོཏི, ཨེཝམེཝ ཏེཛུསྶདཏྟཱ ཏཎྷཱམཱནདིཊྛིཝསེན གཧཎསྶ པཙྩཡཱ ན ཧོནྟི. ཏེན ཝུཏྟཾ – ཨིམེ དྷམྨཱ ཨནུཔཱདིཎྞཨནུཔཱདཱནིཡཱཏི.

༩༩༨. ཨསཾཀིལིཊྛཨསཾཀིལེསིཀེསུཔི ཨེསེཝ ནཡོ.

༡༠༠༠. ཝིཏཀྐཏྟིཀེ ཝིཏཀྐསཧཛཱཏེན ཝིཙཱརེན སདྡྷིཾ ཀུསལཏྟིཀེ ཨལབྦྷམཱནཱཝ ན ལབྦྷནྟི.

༡༠༠༣. པཱིཏིསཧགཏཏྟིཀེ ¶ པཱིཏིཨཱདཡོ ཨཏྟནཱ སཧཛཱཏདྷམྨཱནཾ པཱིཏིསཧགཏཱདིབྷཱཝཾ དཏྭཱ སཡཾ པིཊྛིཝཊྚཀཱ ཛཱཏཱ. ཨིམསྨིཉྷི ཏིཀེ དྭེ དོམནསྶསཧགཏཙིཏྟུཔྤཱདཱ ¶ དུཀྑསཧགཏཾ ཀཱཡཝིཉྙཱཎཾ ཨུཔེཀྑཱཝེདནཱ རཱུཔཾ ནིབྦཱནནྟི – ཨིདམྤི ན ལབྦྷཏི. ཨཡཉྷི ཏིཀོ ཀུསལཏྟིཀེ ཙ ཨལབྦྷམཱནེཧི ཨིམེཧི ཙ པཉྩཧི ཀོཊྛཱསེཧི མུཏྟཀོ ནཱམ.

༡༠༠༦. དསྶནེནཔཧཱཏབྦཏྟིཀེ སཉྙོཛནཱནཱིཏི བནྡྷནཱནི. སཀྐཱཡདིཊྛཱིཏི ཝིཛྫམཱནཊྛེན སཏི ཁནྡྷཔཉྩཀསངྑཱཏེ ཀཱཡེ; སཡཾ ཝཱ སཏཱི ཏསྨིཾ ཀཱཡེ དིཊྛཱིཏི ‘སཀྐཱཡདིཊྛི’. སཱིལེན སུཛ྄ཛྷིཏུཾ སཀྐཱ, ཝཏེན སུཛ྄ཛྷིཏུཾ སཀྐཱ, སཱིལཝཏེཧི སུཛ྄ཛྷིཏུཾ སཀྐཱཏི གཧིཏསམཱདཱནཾ པན སཱིལབྦཏཔརཱམཱསོ ནཱམ.

༡༠༠༧. ཨིདྷཱཏི ¶ དེསཱཔདེསེ ནིཔཱཏོ. སྭཱཡཾ ཀཏྠཙི ལོཀཾ ཨུཔཱདཱཡ ཝུཙྩཏི. ཡཐཱཧ – ‘‘ཨིདྷ ཏཐཱགཏོ ལོཀེ ཨུཔྤཛྫཏཱི’’ཏི (དཱི. ནི. ༡.༡༨༩). ཀཏྠཙི སཱསནཾ. ཡཐཱཧ – ‘‘ཨིདྷེཝ, བྷིཀྑཝེ, སམཎོ ཨིདྷ དུཏིཡོ སམཎོ’’ཏི (མ. ནི. ༡.༡༣༩; ཨ. ནི. ༤.༢༤༡). ཀཏྠཙི ཨོཀཱསཾ. ཡཐཱཧ –

‘‘ཨིདྷེཝ ཏིཊྛམཱནསྶ, དེཝབྷཱུཏསྶ མེ སཏོ;

པུནརཱཡུ ཙ མེ ལདྡྷོ, ཨེཝཾ ཛཱནཱཧི མཱརིསཱ’’ཏི. (དཱི. ནི. ༢.༣༦༩);

ཀཏྠཙི པདཔཱུརཎམཏྟམེཝ. ཡཐཱཧ – ‘‘ཨིདྷཱཧཾ, བྷིཀྑཝེ, བྷུཏྟཱཝཱི ཨསྶཾ པཝཱརིཏོ’’ཏི (མ. ནི. ༡.༣༠). ཨིདྷ པན ལོཀཾ ཨུཔཱདཱཡ ཝུཏྟོཏི ཝེདིཏབྦོ.

ཨསྶུཏཝཱ པུཐུཛྫནོཏི ཨེཏྠ པན ‘ཨཱགམཱདྷིགམཱབྷཱཝཱ ཉེཡྻོ ཨསྶུཏཝཱ ཨིཏི’. ཡསྶ ཧི ཁནྡྷདྷཱཏུཨཱཡཏནཔཙྩཡཱཀཱརསཏིཔཊྛཱནཱདཱིསུ ཨུགྒཧཔརིཔུཙྪཱཝིནིཙྪཡརཧིཏཏྟཱ དིཊྛིཔཊིསེདྷཀོ ནེཝ ‘ཨཱགམོ’, པཊིཔཏྟིཡཱ ཨདྷིགནྟབྦསྶ ཨནདྷིགཏཏྟཱ ནེཝ ‘ཨདྷིགམོ’ ཨཏྠི, སོ ‘ཨཱགམཱདྷིགམཱབྷཱཝཱ ཉེཡྻོ ཨསྶུཏཝཱ ཨིཏི’. སྭཱཡཾ –

པུཐཱུནཾ ཛནནཱདཱིཧི, ཀཱརཎེཧི པུཐུཛྫནོ;

པུཐུཛྫནནྟོགདྷཏྟཱ, པུཐུཝཱཡཾ ཛནོ ཨིཏི. (དཱི. ནི. ཨཊྛ. ༡.༧; མ. ནི. ཨཊྛ. ༡.༢; ཨ. ནི. ཨཊྛ. ༡.༡.༥༡; པཊི. མ. ཨཊྛ. ༢.༡.༡༣༠; ཙཱུལ༹ནི. ཨཊྛ. ༨༨; ནེཏྟི. ཨཊྛ. ༥༦);

སོ ¶ ཧི པུཐཱུནཾ ནཱནཔྤཀཱརཱནཾ ཀིལེསཱདཱིནཾ ཛནནཱདཱིཧི ཀཱརཎེཧི པུཐུཛྫནོ. ཡཐཱཧ – ‘‘པུཐུ ཀིལེསེ ཛནེནྟཱིཏི པུཐུཛྫནཱ. པུཐུ ཨཝིཧཏསཀྐཱཡདིཊྛིཀཱཏི པུཐུཛྫནཱ. པུཐུ སཏྠཱརཱནཾ མུཁུལློཀིཀཱཏི པུཐུཛྫནཱ. པུཐུ སབྦགཏཱིཧི ཨཝུཊྛིཏཱཏི པུཐུཛྫནཱ. པུཐུ ནཱནཱབྷིསངྑཱརེ ཨབྷིསངྑརོནྟཱིཏི ¶ པུཐུཛྫནཱ. པུཐུ ནཱནཱཨོགྷེཧི ཝུཡ྄ཧནྟཱིཏི པུཐུཛྫནཱ. པུཐུ ནཱནཱསནྟཱཔེཧི སནྟཔྤནྟཱིཏི པུཐུཛྫནཱ. པུཐུ ནཱནཱཔརིལཱ༹ཧེཧི པརིཌཡ྄ཧནྟཱིཏི པུཐུཛྫནཱ. པུཐུ པཉྩསུ ཀཱམགུཎེསུ རཏྟཱ གིདྡྷཱ གདྷིཏཱ མུཙྪིཏཱ ཨཛ྄ཛྷོསནྣཱ ལགྒཱ ལགྒིཏཱ པལིབུདྡྷཱཏི པུཐུཛྫནཱ. པུཐུ ¶ པཉྩཧི ནཱིཝརཎེཧི ཨཱཝུཏཱ ནིཝུཏཱ ཨོཝུཏཱ པིཧིཏཱ པཊིཙྪནྣཱ པཊིཀུཛྫིཏཱཏི པུཐུཛྫནཱ’’ཏི (མཧཱནི. ༩༤). པུཐཱུནཾ ཝཱ གཎནཔཐམཏཱིཏཱནཾ ཨརིཡདྷམྨཔརམྨུཁཱནཾ ནཱིཙདྷམྨསམཱཙཱརཱནཾ ཛནཱནཾ ཨནྟོགདྷཏྟཱཔི པུཐུཛྫནཱ. པུཐུ ཝཱ ཨཡཾ – ཝིསུཾཡེཝ སངྑྱཾ གཏོ, ཝིསཾསཊྛོ སཱིལསུཏཱདིགུཎཡུཏྟེཧི ཨརིཡེཧི – ཛནོཏིཔི པུཐུཛྫནོ. ཨེཝམེཏེཧི ‘ཨསྶུཏཝཱ པུཐུཛྫནོ’ཏི དྭཱིཧི པདེཧི ཡེ ཏེ –

‘‘དུཝེ པུཐུཛྫནཱ ཝུཏྟཱ, བུདྡྷེནཱདིཙྩབནྡྷུནཱ;

ཨནྡྷོ པུཐུཛྫནོ ཨེཀོ, ཀལྱཱཎེཀོ པུཐུཛྫནོ’’ཏི. (དཱི. ནི. ཨཊྛ. ༡.༧; ཨ. ནི. ཨཊྛ. ༡.༡.༥༡; པཊི. མ. ཨཊྛ. ༢.༡.༡༣༠; ཙཱུལ༹ནི. ཨཊྛ. ༨༨);

དྭེ པུཐུཛྫནཱ ཝུཏྟཱ, ཏེསུ ཨནྡྷཔུཐུཛྫནོ ཝུཏྟོ ཧོཏཱིཏི ཝེདིཏབྦོ.

ཨརིཡཱནཾ ཨདསྶཱཝཱིཏིཨཱདཱིསུ ཨརིཡཱཏི ཨཱརཀཏྟཱ ཀིལེསེཧི, ཨནཡེ ན ཨིརིཡནཏོ, ཨཡེ ཨིརིཡནཏོ, སདེཝཀེན ལོཀེན ཙ ཨརཎཱིཡཏོ བུདྡྷཱ ཙ པཙྩེཀབུདྡྷཱ ཙ བུདྡྷསཱཝཀཱ ཙ ཝུཙྩནྟི. བུདྡྷཱ ཨེཝ ཝཱ ཨིདྷ ཨརིཡཱ. ཡཐཱཧ – ‘‘སདེཝཀེ, བྷིཀྑཝེ, ལོཀེ…པེ… ཏཐཱགཏོ ཨརིཡོཏི ཝུཙྩཏཱི’’ཏི (སཾ. ནི. ༥.༡༠༩༨).

སཔྤུརིསཱཏི ཨེཏྠ པན པཙྩེཀབུདྡྷཱ ཏཐཱགཏསཱཝཀཱ ཙ སཔྤུརིསཱཏི ཝེདིཏབྦཱ. ཏེ ཧི ལོཀུཏྟརགུཎཡོགེན སོབྷནཱ པུརིསཱཏི སཔྤུརིསཱ. སབྦེཝ ¶ ཝཱ ཨེཏེ དྭེདྷཱཔི ཝུཏྟཱ. བུདྡྷཱཔི ཧི ཨརིཡཱ ཙ སཔྤུརིསཱ ཙ པཙྩེཀབུདྡྷཱ བུདྡྷསཱཝཀཱཔི. ཡཐཱཧ –

‘‘ཡོ ཝེ ཀཏཉྙཱུ ཀཏཝེདི དྷཱིརོ,

ཀལྱཱཎམིཏྟོ དལ༹ྷབྷཏྟི ཙ ཧོཏི;

དུཁིཏསྶ སཀྐཙྩ ཀརོཏི ཀིཙྩཾ,

ཏཐཱཝིདྷཾ སཔྤུརིསཾ ཝདནྟཱི’’ཏི. (ཛཱ. ༢.༡༧.༧༨);

‘ཀལྱཱཎམིཏྟོ ¶ དལ༹ྷབྷཏྟི ཙ ཧོཏཱི’ཏི ཨེཏྟཱཝཏཱ ཧི བུདྡྷསཱཝཀོ ཝུཏྟོ. ཀཏཉྙུཏཱདཱིཧི ¶ པཙྩེཀབུདྡྷཱ བུདྡྷཱཏི. ཨིདཱནི ཡོ ཏེསཾ ཨརིཡཱནཾ ཨདསྶནསཱིལོ, ན ཙ དསྶནེ སཱདྷུཀཱརཱི, སོ ཨརིཡཱནཾ ཨདསྶཱཝཱིཏི ཝེདིཏབྦོ. སོ ཙཀྑུནཱ ཨདསྶཱཝཱི ཉཱཎེན ཨདསྶཱཝཱིཏི དུཝིདྷོ. ཏེསུ ཉཱཎེན ཨདསྶཱཝཱི ཨིདྷ ཨདྷིཔྤེཏོ. མཾསཙཀྑུནཱ ཧི དིབྦཙཀྑུནཱ ཝཱ ཨརིཡཱ དིཊྛཱཔི ཨདིཊྛཱཝ ཧོནྟི, ཏེསཾ ཙཀྑཱུནཾ ཝཎྞམཏྟགྒཧཎཏོ, ན ཨརིཡབྷཱཝགོཙརཏོ. སོཎསིངྒཱལཱདཡོཔི ཙཀྑུནཱ ཨརིཡེ པསྶནྟི, ན ཙ ཏེ ཨརིཡཱནཾ དསྶཱཝིནོ.

ཏཏྲིདཾ ཝཏྠུ – ཙིཏྟལཔབྦཏཝཱསིནོ ཀིར ཁཱིཎཱསཝཏྠེརསྶ ཨུཔཊྛཱཀོ ཝུཌྜྷཔབྦཛིཏོ ཨེཀདིཝསཾ ཐེརེན སདྡྷིཾ པིཎྜཱཡ ཙརིཏྭཱ ཐེརསྶ པཏྟཙཱིཝརཾ གཧེཏྭཱ པིཊྛིཏོ ཨཱགཙྪནྟོ ཐེརཾ པུཙྪི – ‘ཨརིཡཱ ནཱམ བྷནྟེ ཀཱིདིསཱ’ཏི? ཐེརོ ཨཱཧ – ‘ཨིདྷེཀཙྩོ མཧལླཀོ ཨརིཡཱནཾ པཏྟཙཱིཝརཾ གཧེཏྭཱ ཝཏྟཔཊིཔཏྟིཾ ཀཏྭཱ སཧ ཙརནྟོཔི ནེཝ ཨརིཡེ ཛཱནཱཏི, ཨེཝཾདུཛྫཱནཱཝུསོ, ཨརིཡཱ’ཏི. ཨེཝཾ ཝུཏྟེཔི སོ ནེཝ ཨཉྙཱསི. ཏསྨཱ ན ཙཀྑུནཱ དསྶནཾ ‘དསྶནཾ’, ཉཱཎདསྶནམེཝ ‘དསྶནཾ’. ཡཐཱཧ – ‘‘ཀིཾ ཏེ ཝཀྐལི ཨིམིནཱ པཱུཏིཀཱཡེན དིཊྛེན? ཡོ ཁོ, ཝཀྐལི, དྷམྨཾ པསྶཏི, སོ མཾ པསྶཏཱི’’ཏི (སཾ. ནི. ༣.༨༧). ཏསྨཱ ཙཀྑུནཱ པསྶནྟོཔི, ཉཱཎེན ཨརིཡེཧི དིཊྛཾ ཨནིཙྩཱདིལཀྑཎཾ ཨཔསྶནྟོ, ཨརིཡཱདྷིགཏཉྩ དྷམྨཾ ཨནདྷིགཙྪནྟོ, ཨརིཡཀརདྷམྨཱནཾ ཨརིཡབྷཱཝསྶ ཙ ཨདིཊྛཏྟཱ, ‘ཨརིཡཱནཾ ཨདསྶཱཝཱི’ཏི ཝེདིཏབྦོ.

ཨརིཡདྷམྨསྶ ¶ ཨཀོཝིདོཏི སཏིཔཊྛཱནཱདིབྷེདེ ཨརིཡདྷམྨེ ཨཀུསལོ. ཨརིཡདྷམྨེ ཨཝིནཱིཏོཏི, ཨེཏྠ པན

དུཝིདྷོ ཝིནཡོ ནཱམ, ཨེཀམེཀེཏྠ པཉྩདྷཱ;

ཨབྷཱཝཏོ ཏསྶ ཨཡཾ, ཨཝིནཱིཏོཏི ཝུཙྩཏི.

ཨཡཉྷི སཾཝརཝིནཡོ པཧཱནཝིནཡོཏི དུཝིདྷོ ཝིནཡོ. ཨེཏྠ ཙ དུཝིདྷེཔི ཝིནཡེ ཨེཀམེཀོ ཝིནཡོ པཉྩདྷཱ བྷིཛྫཏི. སཾཝརཝིནཡོཔི ཧི སཱིལསཾཝརོ སཏིསཾཝརོ ཉཱཎསཾཝརོ ཁནྟིསཾཝརོ ཝཱིརིཡསཾཝརོཏི པཉྩཝིདྷོ. པཧཱནཝིནཡོཔི ཏདངྒཔཧཱནཾ ཝིཀྑམྦྷནཔཧཱནཾ སམུཙྪེདཔཧཱནཾ པཊིཔྤསྶདྡྷིཔཧཱནཾ ནིསྶརཎཔཧཱནནྟི པཉྩཝིདྷོ.

ཏཏྠ ¶ ¶ ‘‘ཨིམིནཱ པཱཏིམོཀྑསཾཝརེན ཨུཔེཏོ ཧོཏི སམུཔེཏོ’’ཏི (ཝིབྷ. ༥༡༡) ཨཡཾ སཱིལསཾཝརོ. ‘‘རཀྑཏི ཙཀྑུནྡྲིཡཾ, ཙཀྑུནྡྲིཡེ སཾཝརཾ ཨཱཔཛྫཏཱི’’ཏི (དཱི. ནི. ༡.༢༡༣; མ. ནི. ༡.༢༩༥; སཾ. ནི. ༤.༢༣༩; ཨ. ནི. ༣.༡༦) ཨཡཾ སཏིསཾཝརོ.

‘‘ཡཱནི སོཏཱནི ལོཀསྨིཾ, (ཨཛིཏཱཏི བྷགཝཱ)

སཏི ཏེསཾ ནིཝཱརཎཾ;

སོཏཱནཾ སཾཝརཾ བྲཱུམི,

པཉྙཱཡེཏེ པིདྷཱིཡརེ’’ཏི. (སུ. ནི. ༡༠༤༡) –

ཨཡཾ ཉཱཎསཾཝརོ ནཱམ. ‘‘ཁམོ ཧོཏི སཱིཏསྶ ཨུཎྷསྶཱ’’ཏི (མ. ནི. ༡.༢༤; ཨ. ནི. ༤.༡༡༤; ༦.༥༨) ཨཡཾ ཁནྟིསཾཝརོ. ‘‘ཨུཔྤནྣཾ ཀཱམཝིཏཀྐཾ ནཱདྷིཝཱསེཏཱི’’ཏི (མ. ནི. ༡.༢༦; ཨ. ནི. ༤.༡༡༤; ༦.༥༨) ཨཡཾ ཝཱིརིཡསཾཝརོ. སབྦོཔི ཙཱཡཾ སཾཝརོ ཡཐཱསཀཾ སཾཝརིཏབྦཱནཾ ཝིནེཏབྦཱནཉྩ ཀཱཡདུཙྩརིཏཱདཱིནཾ སཾཝརཎཏོ སཾཝརོ, ཝིནཡནཏོ ཝིནཡོཏི ཝུཙྩཏི. ཨེཝཾ ཏཱཝ ‘སཾཝརཝིནཡོ’ པཉྩདྷཱ བྷིཛྫཏཱིཏི ཝེདིཏབྦོ.

ཏཐཱ ཡཾ ནཱམརཱུཔཔརིཙྪེདཱདཱིསུ ཝིཔསྶནཱཉཱཎེསུ པཊིཔཀྑབྷཱཝཏོ, དཱིཔཱལོཀེནེཝ ཏམསྶ, ཏེན ཏེན ཝིཔསྶནཱཉཱཎེན ཏསྶ ཏསྶ ཨནཏྠསྶ པཧཱནཾ, སེཡྻཐིདཾ – ནཱམརཱུཔཝཝཏྠཱནེན སཀྐཱཡདིཊྛིཡཱ, པཙྩཡཔརིགྒཧེན ¶ ཨཧེཏུཝིསམཧེཏུདིཊྛཱིནཾ, ཏསྶེཝ ཨཔརབྷཱགེན ཀངྑཱཝིཏརཎེན ཀཐཾཀཐིབྷཱཝསྶ, ཀལཱཔསམྨསནེན ‘ཨཧཾ མམཱ’ཏི གཱཧསྶ, མགྒཱམགྒཝཝཏྠཱནེན ཨམགྒེ མགྒསཉྙཱཡ, ཨུདཡདསྶནེན ཨུཙྪེདདིཊྛིཡཱ, ཝཡདསྶནེན སསྶཏདིཊྛིཡཱ, བྷཡདསྶནེན སབྷཡེ ཨབྷཡསཉྙཱཡ, ཨཱདཱིནཝདསྶནེན ཨསྶཱདསཉྙཱཡ, ནིབྦིདཱནུཔསྶནཱཡ ཨབྷིརཏིསཉྙཱཡ, མུཙྩིཏུཀམྱཏཱཉཱཎེན ཨམུཙྩིཏུཀཱམཏཱཡ, ཨུཔེཀྑཱཉཱཎེན ཨནུཔེཀྑཱཡ, ཨནུལོམེན དྷམྨཊྛིཏིཡཾ ནིབྦཱནེ ཙ པཊིལོམབྷཱཝསྶ, གོཏྲབྷུནཱ སངྑཱརནིམིཏྟགྒཱཧསྶ པཧཱནཾ, ཨེཏཾ ‘ཏདངྒཔཧཱནཾ’ ནཱམ.

ཡཾ པན ཨུཔཙཱརཔྤནཱབྷེདེན སམཱདྷིནཱ པཝཏྟིབྷཱཝནིཝཱརཎཏོ, གྷཊཔྤཧཱརེནེཝ ཨུདཀཔིཊྛེ སེཝཱལསྶ, ཏེསཾ ཏེསཾ ནཱིཝརཎཱདིདྷམྨཱནཾ པཧཱནཾ, ཨེཏཾ ‘ཝིཀྑམྦྷནཔཧཱནཾ’ ནཱམ. ‘‘ཡཾ ཙཏུནྣཾ ཨརིཡམགྒཱནཾ བྷཱཝིཏཏྟཱ ཏཾཏཾམགྒཝཏོ ¶ ཨཏྟནོ ཨཏྟནོ སནྟཱནེ དིཊྛིགཏཱནཾ པཧཱནཱཡཱ’’ཏིཨཱདིནཱ ¶ (དྷ. ས. ༢༧༧) ནཡེན ཝུཏྟསྶ སམུདཡཔཀྑིཀསྶ ཀིལེསགཎསྶ ཨཙྩནྟཾ ཨཔྤཝཏྟིབྷཱཝེན པཧཱནཾ, ཨིདཾ ‘སམུཙྪེདཔཧཱནཾ’ ནཱམ. ཡཾ པན ཕལཀྑཎེ པཊིཔྤསྶདྡྷཏྟཾ ཀིལེསཱནཾ, ཨེཏཾ ‘པཊིཔྤསྶདྡྷིཔཧཱནཾ’ ནཱམ. ཡཾ སབྦསངྑཏནིསྶཊཏྟཱ པཧཱིནསབྦསངྑཏཾ ནིབྦཱནཾ, ཨེཏཾ ‘ནིསྶརཎཔཧཱནཾ’ ནཱམ. སབྦམྤི ཙེཏཾ པཧཱནཾ ཡསྨཱ ཙཱགཊྛེན པཧཱནཾ, ཝིནཡནཊྛེན ཝིནཡོ, ཏསྨཱ ‘པཧཱནཝིནཡོ’ཏི ཝུཙྩཏི. ཏཾཏཾཔཧཱནཝཏོ ཝཱ ཏསྶ ཏསྶ ཝིནཡསྶ སམྦྷཝཏོཔེཏཾ པཧཱནཝིནཡོཏི ཝུཙྩཏི. ཨེཝཾ པཧཱནཝིནཡོཔི པཉྩདྷཱ བྷིཛྫཏཱིཏི ཝེདིཏབྦོ.

ཨེཝམཡཾ སངྑེཔཏོ དུཝིདྷོ, བྷེདཏོ ཙ དསཝིདྷོ ཝིནཡོ, བྷིནྣསཾཝརཏྟཱ, པཧཱཏབྦསྶ ཙ ཨཔྤཧཱིནཏྟཱ, ཡསྨཱ ཨེཏསྶ ཨསྶུཏཝཏོ པུཐུཛྫནསྶ ནཏྠི, ཏསྨཱ ཨབྷཱཝཏོ ཏསྶ, ཨཡཾ ‘ཨཝིནཱིཏོ’ཏི ཝུཙྩཏཱིཏི. ཨེས ¶ ནཡོ སཔྤུརིསཱནཾ ཨདསྶཱཝཱི སཔྤུརིསདྷམྨསྶ ཨཀོཝིདོ སཔྤུརིསདྷམྨེ ཨཝིནཱིཏོཏི ཨེཏྠཱཔི. ནིནྣཱནཱཀརཎཉྷེཏཾ ཨཏྠཏོ. ཡཐཱཧ – ‘‘ཡེཝ ཏེ ཨརིཡཱ ཏེཝ ཏེ སཔྤུརིསཱ, ཡེཝ ཏེ སཔྤུརིསཱ ཏེཝ ཏེ ཨརིཡཱ. ཡོ ཨེཝ སོ ཨརིཡཱནཾ དྷམྨོ སོ ཨེཝ སོ སཔྤུརིསཱནཾ དྷམྨོ, ཡོ ཨེཝ སོ སཔྤུརིསཱནཾ དྷམྨོ སོ ཨེཝ སོ ཨརིཡཱནཾ དྷམྨོ. ཡེཝ ཏེ ཨརིཡཝིནཡཱ ཏེཝ ཏེ སཔྤུརིསཝིནཡཱ, ཡེཝ ཏེ སཔྤུརིསཝིནཡཱ ཏེཝ ཏེ ཨརིཡཝིནཡཱ. ཨརིཡེཏི ཝཱ སཔྤུརིསེཏི ཝཱ, ཨརིཡདྷམྨེཏི ཝཱ སཔྤུརིསདྷམྨེཏི ཝཱ, ཨརིཡཝིནཡེཏི ཝཱ སཔྤུརིསཝིནཡེཏི ཝཱ, ཨེསེསེ ཨེཀེ ཨེཀཊྛེ སམེ སམབྷཱགེ ཏཛྫཱཏེ ཏཉྙེཝཱ’’ཏི.

རཱུཔཾ ཨཏྟཏོ སམནུཔསྶཏཱིཏི ཨིདྷེཀཙྩོ རཱུཔཾ ཨཏྟཏོ སམནུཔསྶཏི – ‘ཡཾ རཱུཔཾ སོ ཨཧཾ, ཡོ ཨཧཾ ཏཾ རཱུཔ’ནྟི རཱུཔཉྩ ཨཏྟཱནཉྩ ཨདྭཡཾ སམནུཔསྶཏི. ‘‘སེཡྻཐཱཔི ནཱམ ཏེལཔྤདཱིཔསྶ ཛྷཱཡཏོ ཡཱ ཨཙྩི སོ ཝཎྞོ, ཡོ ཝཎྞོ སཱ ཨཙྩཱིཏི ཨཙྩིཉྩ ཝཎྞཉྩ ཨདྭཡཾ སམནུཔསྶཏི,’’ ཨེཝམེཝ ཨིདྷེཀཙྩོ རཱུཔཾ ཨཏྟཏོ སམནུཔསྶཏཱིཏི ཨེཝཾ རཱུཔཾ ཨཏྟཱཏི དིཊྛིཔསྶནཱཡ པསྶཏི. རཱུཔཝནྟཾ ཝཱ ཨཏྟཱནནྟི ‘ཨརཱུཔཾ ཨཏྟཱ’ཏི གཧེཏྭཱ, ཚཱཡཱཝནྟཾ རུཀྑཾ ཝིཡ, ཏཾ རཱུཔཝནྟཾ སམནུཔསྶཏི. ཨཏྟནི ཝཱ རཱུཔནྟི ‘ཨརཱུཔམེཝ ཨཏྟཱ’ཏི གཧེཏྭཱ, པུཔྥམྷི གནྡྷཾ ཝིཡ, ཨཏྟནི རཱུཔཾ སམནུཔསྶཏི. རཱུཔསྨིཾ ¶ ཝཱ ཨཏྟཱནནྟི ‘ཨརཱུཔམེཝ ཨཏྟཱ’ཏི གཧེཏྭཱ, ཀརཎྜཀེ མཎིཾ ཝིཡ, ཨཏྟཱནཾ རཱུཔསྨིཾ སམནུཔསྶཏི. ཝེདནཱདཱིསུཔི ཨེསེཝ ནཡོ.

ཏཏྠ ¶ ‘རཱུཔཾ ཨཏྟཏོ སམནུཔསྶཏཱི’ཏི སུདྡྷརཱུཔམེཝ ཨཏྟཱཏི ཀཐིཏཾ. ‘རཱུཔཝནྟཾ ཝཱ ཨཏྟཱནཾ, ཨཏྟནི ཝཱ རཱུཔཾ, རཱུཔསྨིཾ ཝཱ ཨཏྟཱནཾ; ཝེདནཾ ཨཏྟཏོ སམནུཔསྶཏི… སཉྙཾ… སངྑཱརེ… ཝིཉྙཱཎཾ ཨཏྟཏོ སམནུཔསྶཏཱི’ཏི ཨིམེསུ སཏྟསུ ཋཱནེསུ ‘ཨརཱུཔཾ ཨཏྟཱ’ཏི ཀཐིཏཾ. ཝེདནཱཝནྟཾ ¶ ཝཱ ཨཏྟཱནཾ, ཨཏྟནི ཝཱ ཝེདནཾ, ཝེདནཱཡ ཝཱ ཨཏྟཱནནྟི ཨེཝཾ ཙཏཱུསུ ཁནྡྷེསུ ཏིཎྞཾ ཏིཎྞཾ ཝསེན དྭཱདསསུ ཋཱནེསུ ‘རཱུཔཱརཱུཔམིསྶཀོ ཨཏྟཱ’ ཀཐིཏོ. ཏཏྠ ‘རཱུཔཾ ཨཏྟཏོ སམནུཔསྶཏི ཝེདནཾ… སཉྙཾ… སངྑཱརེ… ཝིཉྙཱཎཾ ཨཏྟཏོ སམནུཔསྶཏཱི’ཏི ཨིམེསུ པཉྩསུ ཋཱནེསུ ཨུཙྪེདདིཊྛི ཀཐིཏཱ. ཨཝསེསེསུ སསྶཏདིཊྛི. ཨེཝམེཏྠ པནྣརས བྷཝདིཊྛིཡོ པཉྩ ཝིབྷཝདིཊྛིཡོ ཧོནྟི. ཏཱ སབྦཱཔི མགྒཱཝརཎཱ, ན སགྒཱཝརཎཱ, པཋམམགྒཝཛ྄ཛྷཱཏི ཝེདིཏབྦཱ.

༡༠༠༨. སཏྠརི ཀངྑཏཱིཏི སཏྠུ སརཱིརེ ཝཱ གུཎེ ཝཱ ཨུབྷཡཏྠ ཝཱ ཀངྑཏི. སརཱིརེ ཀངྑམཱནོ ‘དྭཏྟིཾསཝརལཀྑཎཔཊིམཎྜིཏཾ ནཱམ སརཱིརཾ ཨཏྠི ནུ ཁོ ནཏྠཱི’ཏི ཀངྑཏི. གུཎེ ཀངྑམཱནོ ‘ཨཏཱིཏཱནཱགཏཔཙྩུཔྤནྣཛཱནནསམཏྠཾ སབྦཉྙུཏཉཱཎཾ ཨཏྠི ནུ ཁོ ནཏྠཱི’ཏི ཀངྑཏི. ཨུབྷཡཏྠ ཀངྑམཱནོ ‘ཨསཱིཏིཨནུབྱཉྫནབྱཱམཔྤབྷཱནུརཉྫིཏཱཡ སརཱིརནིཔྥཏྟིཡཱ སམནྣཱགཏོ སབྦཉེཡྻཛཱནནསམཏྠཾ སབྦཉྙུཏཉྙཱཎཾ པཊིཝིཛ྄ཛྷིཏྭཱ ཋིཏོ ལོཀཏཱརཀོ བུདྡྷོ ནཱམ ཨཏྠི ནུ ཁོ ནཏྠཱི’ཏི ཀངྑཏི. ཨཡཉྷིསྶ ཨཏྟབྷཱཝེ གུཎེ ཝཱ ཀངྑནཏོ ཨུབྷཡཏྠ ཀངྑཏི ནཱམ. ཝིཙིཀིཙྪཏཱིཏི ཨཱརམྨཎཾ ནིཙྪེཏུཾ ཨསཀྐོནྟོ ཀིཙྪཏི ཀིལམཏི. ནཱདྷིམུཙྩཏཱིཏི ཏཏྠེཝ ཨདྷིམོཀྑཾ ན ལབྷཏི. ན སམྤསཱིདཏཱིཏི ཙིཏྟཾ ཨནཱཝིལཾ ཀཏྭཱ པསཱིདིཏུཾ ན སཀྐོཏི, གུཎེསུ ནཔྤསཱིདཏི.

དྷམྨེ ཀངྑཏཱིཏིཨཱདཱིསུ པན ‘ཀིལེསེ པཛཧནྟཱ ཙཏྟཱརོ ཨརིཡམགྒཱ, པཊིཔྤསྶདྡྷཀིལེསཱནི ཙཏྟཱརི སཱམཉྙཕལཱནི, མགྒཕལཱནཾ ཨཱརམྨཎཔཙྩཡབྷཱུཏཾ ཨམཏཾ མཧཱནིབྦཱནཾ ནཱམ ཨཏྠི ནུ ཁོ ནཏྠཱི’ཏི ཀངྑནྟོཔི ‘ཨཡཾ དྷམྨོ ནིཡྻཱནིཀོ ནུ ཁོ ཨནིཡྻཱནིཀོ’ཏི ཀངྑནྟོཔི དྷམྨེ ཀངྑཏི ¶ ནཱམ. ‘ཙཏྟཱརོ ¶ མགྒཊྛཀཱ ཙཏྟཱརོ ཕལཊྛཀཱཏི ཨིདཾ སངྒྷརཏནཾ ཨཏྠི ནུ ཁོ ནཏྠཱི’ཏི ཀངྑནྟོཔི, ‘ཨཡཾ སངྒྷོ སུཔྤཊིཔནྣོ ནུ ཁོ དུཔྤཊིཔནྣོ’ཏི ཀངྑནྟོཔི, ‘ཨེཏསྨིཾ སངྒྷརཏནེ དིནྣསྶ ཝིཔཱཀཕལཾ ཨཏྠི ནུ ཁོ ནཏྠཱི’ཏི ཀངྑནྟོཔི སངྒྷེ ཀངྑཏི ནཱམ. ‘ཏིསྶོ པན སིཀྑཱ ཨཏྠི ནུ ཁོ ནཏྠཱི’ཏི ཀངྑནྟོཔི, ‘ཏིསྶོ སིཀྑཱ སིཀྑིཏཔཙྩཡེན ཨཱནིསཾསོ ཨཏྠི ནུ ཁོ ནཏྠཱི’ཏི ཀངྑནྟོཔི སིཀྑཱཡ ཀངྑཏི ནཱམ.

པུབྦནྟོ ¶ ཝུཙྩཏི ཨཏཱིཏཱནི ཁནྡྷདྷཱཏཱཡཏནཱནི. ཨཔརནྟོ ཨནཱགཏཱནི. ཏཏྠ ཨཏཱིཏེསུ ཁནྡྷཱདཱིསུ ‘ཨཏཱིཏཱནི ནུ ཁོ, ན ནུ ཁོ’ཏི ཀངྑནྟོ པུབྦནྟེ ཀངྑཏི ནཱམ. ཨནཱགཏེསུ ‘ཨནཱགཏཱནི ནུ ཁོ, ན ནུ ཁོ’ཏི ཀངྑནྟོ ཨཔརནྟེ ཀངྑཏི ནཱམ. ཨུབྷཡཏྠ ཀངྑནྟོ པུབྦནྟཱཔརནྟེ ཀངྑཏི ནཱམ. ‘དྭཱདསཔདིཀཾ པཙྩཡཝཊྚཾ ཨཏྠི ནུ ཁོ ནཏྠཱི’ཏི ཀངྑནྟོ ཨིདཔྤཙྩཡཏཱཔཊིཙྩསམུཔྤནྣེསུ དྷམྨེསུ ཀངྑཏི ནཱམ. ཏཏྲཱཡཾ ཝཙནཏྠོ – ཨིམེསཾ ཛརཱམརཎཱདཱིནཾ པཙྩཡཱ ‘ཨིདཔྤཙྩཡཱ’. ཨིདཔྤཙྩཡཱནཾ བྷཱཝོ ‘ཨིདཔྤཙྩཡཏཱ’. ཨིདཔྤཙྩཡཱ ཨེཝ ཝཱ ‘ཨིདཔྤཙྩཡཏཱ’; ཛཱཏིཨཱདཱིནམེཏཾ ཨདྷིཝཙནཾ. ཛཱཏིཨཱདཱིསུ ཏཾ ཏཾ པཊིཙྩ ཨཱགམྨ སམུཔྤནྣཱཏི ‘པཊིཙྩསམུཔྤནྣཱ’. ཨིདཾ ཝུཏྟཾ ཧོཏི – ཨིདཔྤཙྩཡཏཱཡ ཙ པཊིཙྩསམུཔྤནྣེསུ ཙ དྷམྨེསུ ཀངྑཏཱིཏི.

༡༠༠༩. སཱིལེནཱཏི གོསཱིལཱདིནཱ. ཝཏེནཱཏི གོཝཏཱདིནཱཝ. སཱིལབྦཏེནཱཏི ཏདུབྷཡེན. སུདྡྷཱིཏི ཀིལེསསུདྡྷི; པརམཏྠསུདྡྷིབྷཱུཏཾ ཝཱ ནིབྦཱནམེཝ. ཏདེཀཊྛཱཏི ཨིདྷ པཧཱནེཀཊྛཾ དྷུརཾ. ཨིམིསྶཱ ཙ པཱལི༹ཡཱ དིཊྛིཀིལེསོ ཝིཙིཀིཙྪཱཀིལེསོཏི དྭེཡེཝ ཨཱགཏཱ. ལོབྷོ དོསོ མོཧོ མཱནོ ཐིནཾ ཨུདྡྷཙྩཾ ཨཧིརིཀཾ ཨནོཏྟཔྤནྟི ཨིམེ པན ཨཊྛ ཨནཱགཏཱ. ཨཱཧརིཏྭཱ པན དཱིཔེཏབྦཱ. ཨེཏྠ ཧི དིཊྛིཝིཙིཀིཙྪཱསུ པཧཱིཡམཱནཱསུ ཨཔཱཡགམནཱིཡོ ལོབྷོ དོསོ མོཧོ མཱནོ ཐིནཾ ཨུདྡྷཙྩཾ ཨཧིརིཀཾ ཨནོཏྟཔྤནྟི སབྦེཔིམེ པཧཱནེཀཊྛཱ ཧུཏྭཱ པཧཱིཡནྟི. སཧཛེཀཊྛཾ པན ཨཱཧརིཏྭཱ དཱིཔེཏབྦཾ. སོཏཱཔཏྟིམགྒེན ཧི ¶ ཙཏྟཱརི དིཊྛིསཧགཏཱནི ཝིཙིཀིཙྪཱསཧགཏཉྩཱཏི པཉྩ ཙིཏྟཱནི པཧཱིཡནྟི. ཏཏྠ དྭཱིསུ ཨསངྑཱརིཀདིཊྛིཙིཏྟེསུ པཧཱིཡནྟེསུ ཏེཧི སཧཛཱཏོ ལོབྷོ མོཧོ ཨུདྡྷཙྩཾ ཨཧིརིཀཾ ཨནོཏྟཔྤནྟི ཨིམེ ཀིལེསཱ སཧཛེཀཊྛཝསེན པཧཱིཡནྟི. སེསདིཊྛིཀིལེསོ ཙ ཝིཙིཀིཙྪཱཀིལེསོ ཙ པཧཱནེཀཊྛཝསེན པཧཱིཡནྟི. དིཊྛིགཏསམྤཡུཏྟསསངྑཱརིཀཙིཏྟེསུཔི པཧཱིཡནྟེསུ ཏེཧི སཧཛཱཏོ ལོབྷོ མོཧོ ¶ ཐིནཾ ཨུདྡྷཙྩཾ ཨཧིརིཀཾ ཨནོཏྟཔྤནྟི ཨིམེ ཀིལེསཱ སཧཛེཀཊྛཝསེན པཧཱིཡནྟི. སེསདིཊྛིཀིལེསོ ཙ ཝིཙིཀིཙྪཱཀིལེསོ ཙ པཧཱནེཀཊྛཝསེན པཧཱིཡནྟི. ཨེཝཾ པཧཱནེཀཊྛསྨིཾཡེཝ སཧཛེཀཊྛཾ ལབྦྷཏཱིཏི ཨིདཾ སཧཛེཀཊྛཾ ཨཱཧརིཏྭཱ དཱིཔཡིཾསུ.

ཏཾསམྤཡུཏྟོཏི ཏེཧི ཏདེཀཊྛེཧི ཨཊྛཧི ཀིལེསེཧི སམྤཡུཏྟོ. ཝིནིབྦྷོགཾ ཝཱ ཀཏྭཱ ཏེན ལོབྷེན ཏེན དོསེནཱཏི ཨེཝཾ ཨེཀེཀེན སམྤཡུཏྟཏཱ དཱིཔེཏབྦཱ. ཏཏྠ ལོབྷེ གཧིཏེ, མོཧོ མཱནོ ཐིནཾ ཨུདྡྷཙྩཾ ཨཧིརིཀཾ ཨནོཏྟཔྤནྟི ཨཡཾ སངྑཱརཀྑནྡྷེ ཀིལེསགཎོ ལོབྷསམྤཡུཏྟོ ནཱམ. དོསེ ¶ གཧིཏེ, མོཧོ ཐིནཾ ཨུདྡྷཙྩཾ ཨཧིརིཀཾ ཨནོཏྟཔྤནྟི ཨཡཾ ཀིལེསགཎོ དོསསམྤཡུཏྟོ ནཱམ. མོཧེ གཧིཏེ, ལོབྷོ དོསོ མཱནོ ཐིནཾ ཨུདྡྷཙྩཾ ཨཧིརིཀཾ ཨནོཏྟཔྤནྟི ཨཡཾ ཀིལེསགཎོ མོཧསམྤཡུཏྟོ ནཱམ. མཱནེ གཧིཏེ, ཏེན སཧུཔྤནྣོ ལོབྷོ མོཧོ ཐིནཾ ཨུདྡྷཙྩཾ ཨཧིརིཀཾ ཨནོཏྟཔྤནྟི ཨཡཾ ཀིལེསགཎོ མཱནསམྤཡུཏྟོ ནཱམ. ཨིམིནཱ ཨུཔཱཡེན ཏེན ཐིནེན ཏེན ཨུདྡྷཙྩེན ཏེན ཨཧིརིཀེན ཏེན ཨནོཏྟཔྤེན སམྤཡུཏྟོ ཏཾསམྤཡུཏྟོཏི ཡོཛནཱ ཀཱཏབྦཱ. ཏཾསམུཊྛཱནནྟི ཏེན ལོབྷེན…པེ… ཏེན ཨནོཏྟཔྤེན སམུཊྛིཏནྟི ཨཏྠོ.

ཨིམེ དྷམྨཱ དསྶནེན པཧཱཏབྦཱཏི ཨེཏྠ དསྶནཾ ནཱམ སོཏཱཔཏྟིམགྒོ; ཏེན པཧཱཏབྦཱཏི ཨཏྠོ. ‘ཀསྨཱ པན སོཏཱཔཏྟིམགྒོ དསྶནཾ ནཱམ ཛཱཏོ’ཏི? ‘པཋམཾ ནིབྦཱནདསྶནཏོ’. ‘ནནུ གོཏྲབྷུ པཋམཏརཾ པསྶཏཱི’ཏི ¶ ? ‘ནོ ན པསྶཏི; དིསྭཱཔི ཀཏྟབྦཀིཙྩཾ པན ན ཀརོཏི, སཾཡོཛནཱནཾ ཨཔྤཧཱནཏོ. ཏསྨཱ པསྶཏཱི’ཏི ན ཝཏྟབྦོ. ཡཏྠ ཀཏྠཙི རཱཛཱནཾ དིསྭཱཔི པཎྞཱཀཱརཾ དཏྭཱ ཀིཙྩནིཔྥཏྟིཡཱ ཨདིཊྛཏྟཱ ‘ཨཛྫཱཔི རཱཛཱནཾ ན པསྶཱམཱི’ཏི ཝདནྟོ ཙེཏྠ ཛཱནཔདཔུརིསོ ནིདསྶནཾ.

༡༠༡༡. ཨཝསེསོ ལོབྷོཏི དསྶནེན པཧཱིནཱཝསེསོ. ལོབྷོ དོསམོཧེསུཔི ཨེསེཝ ནཡོ. དསྶནེན ཧི ཨཔཱཡགམནཱིཡཱཝ པཧཱིནཱ. ཏེཧི པན ཨཉྙེ དསྶེཏུཾ ཨིདཾ ཝུཏྟཾ. ‘ཏདེཀཊྛཱ’ཏི ཏེཧི པཱལི༹ཡཾ ཨཱགཏེཧི ཏཱིཧི ཀིལེསེཧི སམྤཡོགཏོཔི པཧཱནཏོཔི ཨེཀཊྛཱ པཉྩ ཀིལེསཱ. ནེཝ དསྶནེན ན བྷཱཝནཱཡཱཏི ཨིདཾ སཾཡོཛནཱདཱིནཾ ཝིཡ ¶ ཏེཧི མགྒེཧི ཨཔྤཧཱཏབྦཏཾ སནྡྷཱཡ ཝུཏྟཾ. ཡཾ པན ‘‘སོཏཱཔཏྟིམགྒཉཱཎེན ཨབྷིསངྑཱརཝིཉྙཱཎསྶ ནིརོདྷེན སཏྟ བྷཝེ ཋཔེཏྭཱ ཨནམཏགྒེ སཾསཱརཝཊྚེ ཡེ ཨུཔྤཛྫེཡྻུཾ, ནཱམཉྩ རཱུཔཉྩ ཨེཏྠེཏེ ནིརུཛ྄ཛྷནྟཱི’’ཏིཨཱདིནཱ ནཡེན ཀུསལཱདཱིནམྤི པཧཱནཾ ཨནུཉྙཱཏཾ, ཏཾ ཏེསཾ མགྒཱནཾ ཨབྷཱཝིཏཏྟཱ ཡེ ཨུཔྤཛྫེཡྻུཾ, ཏེ ཨུཔནིསྶཡཔཙྩཡཱནཾ ཀིལེསཱནཾ པཧཱིནཏྟཱ པཧཱིནཱཏི ཨིམཾ པརིཡཱཡཾ སནྡྷཱཡ ཝུཏྟནྟི ཝེདིཏབྦཾ.

༡༠༡༣. དསྶནེནཔཧཱཏབྦཧེཏུཀཏྟིཀེ ཨིམེ དྷམྨཱ དསྶནེན པཧཱཏབྦཧེཏུཀཱཏི ནིཊྛཔེཏྭཱ, པུན ‘ཏཱིཎི སཾཡོཛནཱནཱི’ཏིཨཱདི པཧཱཏབྦེ དསྶེཏྭཱ, ཏདེཀཊྛབྷཱཝེན ཧེཏཱུ ཙེཝ སཧེཏུཀེ ཙ དསྶེཏུཾ ཝུཏྟཾ. ཏཏྠ ‘ཀིཉྩཱཔི དསྶནེན པཧཱཏབྦེསུ ཧེཏཱུསུ ལོབྷསཧགཏོ མོཧོ ལོབྷེན སཧེཏུཀོ ཧོཏི, དོསསཧགཏོ མོཧོ དོསེན, ལོབྷདོསཱ ཙ མོཧེནཱཏི པཧཱཏབྦཧེཏུཀཔདེཔེཏེ སངྒཧཾ ¶ གཙྪནྟི, ཝིཙིཀིཙྪཱསཧགཏོ པན མོཧོ ཨཉྙསྶ སམྤཡུཏྟཧེཏུནོ ཨབྷཱཝེན ཧེཏུཡེཝ, ན སཧེཏུཀོཏི ཏསྶ པཧཱནཾ དསྶེཏུཾ ཨིམེ དྷམྨཱ དསྶནེན པཧཱཏབྦཧེཏཱུ’ཏི ཝུཏྟཾ.

༡༠༡༨. དུཏིཡཔདེ ¶ ཨུདྡྷཙྩསཧགཏསྶ མོཧསྶ པཧཱནཾ དསྶེཏུཾ ཨིམེ དྷམྨཱ བྷཱཝནཱཡ པཧཱཏབྦཧེཏཱུཏི ཝུཏྟཾ. སོ ཧི ཨཏྟནཱ སམྤཡུཏྟདྷམྨེ སཧེཏུཀེ ཀཏྭཱ པིཊྛིཝཊྚཀོ ཛཱཏོ, ཝིཙིཀིཙྪཱསཧགཏོ ཝིཡ ཨཉྙསྶ སམྤཡུཏྟཧེཏུནོ ཨབྷཱཝཱ པཧཱཏབྦཧེཏུཀཔདཾ ན བྷཛཏི. ཏཏིཡཔདེ ཨཝསེསཱ ཨཀུསལཱཏི པུན ཨཀུསལགྒཧཎཾ ཝིཙིཀིཙྪུདྡྷཙྩསཧགཏཱནཾ མོཧཱནཾ སངྒཧཏྠཾ ཀཏཾ. ཏེ ཧི སམྤཡུཏྟཧེཏུནོ ཨབྷཱཝཱ པཧཱཏབྦཧེཏུཀཱ ནཱམ ན ཧོནྟི.

༡༠༢༩. པརིཏྟཱརམྨཎཏྟིཀེ ཨཱརབྦྷཱཏི ཨཱརམྨཎཾ ཀཏྭཱ. སཡཉྷི པརིཏྟཱ ཝཱ ཧོནྟུ མཧགྒཏཱ ཝཱ, པརིཏྟདྷམྨེ ཨཱརམྨཎཾ ཀཏྭཱ ཨུཔྤནྣཱ པརིཏྟཱརམྨཎཱ, མཧགྒཏེ ཨཱརམྨཎཾ ཀཏྭཱ ཨུཔྤནྣཱ མཧགྒཏཱརམྨཎཱ, ཨཔྤམཱཎེ ཨཱརམྨཎཾ ཀཏྭཱ ཨུཔྤནྣཱ ཨཔྤམཱཎཱརམྨཎཱ. ཏེ པན པརིཏྟཱཔི ཧོནྟི མཧགྒཏཱཔི ཨཔྤམཱཎཱཔི.

༡༠༣༥. མིཙྪཏྟཏྟིཀེ ¶ ཨཱནནྟརིཀཱནཱིཏི ཨནནྟརཱཡེན ཕལདཱཡཀཱནི; མཱཏུགྷཱཏཀཀམྨཱདཱིནམེཏཾ ཨདྷིཝཙནཾ. ཏེསུ ཧི ཨེཀསྨིམྤི ཀམྨེ ཀཏེ ཏཾ པཊིབཱཧིཏྭཱ ཨཉྙཾ ཀམྨཾ ཨཏྟནོ ཝིཔཱཀསྶ ཨོཀཱསཾ ཀཱཏུཾ ན སཀྐོཏི. སིནེརུཔྤམཱཎེཔི ཧི སུཝཎྞཐཱུཔེ ཀཏྭཱ ཙཀྐཝཱལ༹མཏྟཾ ཝཱ རཏནམཡཔཱཀཱརཾ ཝིཧཱརཾ ཀཱརེཏྭཱ ཏཾ པཱུརེཏྭཱ ནིསིནྣསྶ བུདྡྷཔྤམུཁསྶ སངྒྷསྶ ཡཱཝཛཱིཝཾ ཙཏྟཱརོ པཙྩཡེ དདཏོཔི ཏཾ ཀམྨཾ ཨེཏེསཾ ཀམྨཱནཾ ཝིཔཱཀཾ པཊིབཱཧེཏུཾ ན སཀྐོཏི ཨེཝ. ཡཱ ཙ མིཙྪཱདིཊྛི ནིཡཏཱཏི ཨཧེཏུཀཝཱདཨཀིརིཡཝཱདནཏྠིཀཝཱདེསུ ཨཉྙཏརཱ. ཏཉྷི གཧེཏྭཱ ཋིཏཾ པུགྒལཾ བུདྡྷསཏམྤི བུདྡྷསཧསྶམྤི བོདྷེཏུཾ ན སཀྐོཏི.

༡༠༣༨. མགྒཱརམྨཎཏྟིཀེ ཨརིཡམགྒཾ ཨཱརབྦྷཱཏི ལོཀུཏྟརམགྒཾ ཨཱརམྨཎཾ ཀཏྭཱ. ཏེ པན པརིཏྟཱཔི ཧོནྟི མཧགྒཏཱཔི.

༡༠༣༩. མགྒཧེཏུཀནིདྡེསེ ¶ པཋམནཡེན པཙྩཡཊྛེན ཧེཏུནཱ མགྒསམྤཡུཏྟཱནཾ ཁནྡྷཱནཾ སཧེཏུཀབྷཱཝོ དསྶིཏོ. དུཏིཡནཡེན མགྒབྷཱུཏེན སམྨཱདིཊྛིསངྑཱཏེན ཧེཏུནཱ སེསམགྒངྒཱནཾ སཧེཏུཀབྷཱཝོ ¶ དསྶིཏོ. ཏཏིཡནཡེན མགྒེ ཨུཔྤནྣཧེཏཱུཧི སམྨཱདིཊྛིཡཱ སཧེཏུཀབྷཱཝོ དསྶིཏོཏི ཝེདིཏབྦོ.

༡༠༤༠. ཨདྷིཔཏིཾ ཀརིཏྭཱཏི ཨཱརམྨཎཱདྷིཔཏིཾ ཀཏྭཱ. ཏེ ཙ ཁོ པརིཏྟདྷམྨཱཝ ཧོནྟི. ཨརིཡསཱཝཀཱནཉྷི ཨཏྟནོ མགྒཾ གརུཾ ཀཏྭཱ པཙྩཝེཀྑཎཀཱལེ ཨཱརམྨཎཱདྷིཔཏི ལབྦྷཏི. ཙེཏོཔརིཡཉཱཎེན པན ཨརིཡསཱཝཀོ པརསྶ མགྒཾ པཙྩཝེཀྑམཱནོ གརུཾ ཀརོནྟོཔི ཨཏྟནཱ པཊིཝིདྡྷམགྒཾ ཝིཡ གརུཾ ན ཀརོཏི. ‘ཡམཀཔཱཊིཧཱརིཡཾ ཀརོནྟཾ ཏཐཱགཏཾ དིསྭཱ ཏསྶ མགྒཾ གརུཾ ཀརོཏི ན ཀརོཏཱི’ཏི? ཀརོཏི, ན པན ཨཏྟནོ མགྒཾ ཝིཡ. ཨརཧཱ ན ཀིཉྩི དྷམྨཾ གརུཾ ཀརོཏི ཋཔེཏྭཱ མགྒཾ ཕལཾ ནིབྦཱནནྟི. ཨེཏྠཱཔི ཨཡམེཝཏྠོ. ཝཱིམཾསཱདྷིཔཏེཡྻནྟི ཨིདཾ སཧཛཱཏཱདྷིཔཏིཾ དསྶེཏུཾ ཝུཏྟཾ. ཚནྡཉྷི ཛེཊྛཀཾ ཀཏྭཱ མགྒཾ བྷཱཝེནྟསྶ ཚནྡོ ཨདྷིཔཏི ནཱམ ཧོཏི, ན མགྒོ. སེསདྷམྨཱཔི ཚནྡཱདྷིཔཏིནོ ནཱམ ཧོནྟི, ན མགྒཱདྷིཔཏིནོ. ཙིཏྟེཔི ཨེསེཝ ནཡོ. ཝཱིམཾསཾ པན ཛེཊྛཀཾ ཀཏྭཱ མགྒཾ བྷཱཝེནྟསྶ ཝཱིམཾསཱདྷིཔཏི ཙེཝ ཧོཏི མགྒོ ཙཱཏི. སེསདྷམྨཱ མགྒཱདྷིཔཏིནོ ནཱམ ཧོནྟི. ཝཱིརིཡེཔི ཨེསེཝ ནཡོ.

༡༠༤༡. ཨུཔྤནྣཏྟིཀནིདྡེསེ ¶ ཛཱཏཱཏི ནིབྦཏྟཱ, པཊིལདྡྷཏྟབྷཱཝཱ. བྷཱུཏཱཏིཨཱདཱིནི ཏེསཾཡེཝ ཝེཝཙནཱནི. ཛཱཏཱ ཨེཝ ཧི བྷཱཝཔྤཏྟིཡཱ བྷཱུཏཱ. པཙྩཡསཾཡོགེ ཛཱཏཏྟཱ སཉྫཱཏཱ. ནིབྦཏྟིལཀྑཎཔྤཏྟཏྟཱ ནིབྦཏྟཱ. ཨུཔསགྒེན པན པདཾ ཝཌྜྷེཏྭཱ ཨབྷིནིབྦཏྟཱཏི ཝུཏྟཱ. པཱཀཊཱིབྷཱུཏཱཏི པཱཏུབྷཱུཏཱ. པུབྦནྟཏོ ¶ ཨུདྡྷཾ པནྣཱཏི ཨུཔྤནྣཱ. ཨུཔསགྒེན པདཾ ཝཌྜྷེཏྭཱ སམུཔྤནྣཱཏི ཝུཏྟཱ. ནིབྦཏྟཊྛེནེཝ ཨུདྡྷཾ ཋིཏཱཏི ཨུཊྛིཏཱ. པཙྩཡསཾཡོགེ ཨུཊྛིཏཱཏི སམུཊྛིཏཱ. པུན ཨུཔྤནྣཱཏིཝཙནེ ཀཱརཎཾ ཧེཊྛཱ ཝུཏྟནཡེནེཝ ཝེདིཏབྦཾ. ཨུཔྤནྣཾསེན སངྒཧིཏཱཏི ཨུཔྤནྣཀོཊྛཱསེན གཎནཾ གཏཱ. རཱུཔཾ ཝེདནཱ སཉྙཱ སངྑཱརཱ ཝིཉྙཱཎནྟི ཨིདཾ ནེསཾ སབྷཱཝདསྶནཾ. དུཏིཡཔདནིདྡེསོ ཝུཏྟཔཊིསེདྷནཡེན ཝེདིཏབྦོ. ཏཏིཡཔདནིདྡེསོ ཨུཏྟཱནཏྠོཡེཝ.

ཨཡཾ པན ཏིཀོ དྭིནྣཾ ཨདྡྷཱནཾ ཝསེན པཱུརེཏྭཱ དསྶིཏོ. ལདྡྷོཀཱསསྶ ཧི ཀམྨསྶ ཝིཔཱཀོ དུཝིདྷོ – ཁཎཔྤཏྟོ, ཙ ཨཔྤཏྟོ ཙ. ཏཏྠ ‘ཁཎཔྤཏྟོ’ ཨུཔྤནྣོ ནཱམ. ‘ཨཔྤཏྟོ’ ཙིཏྟཱནནྟརེ ཝཱ ཨུཔྤཛྫཏུ, ཀཔྤསཏསཧསྶཱཏིཀྐམེ ཝཱ. དྷུཝཔཙྩཡཊྛེན ནཏྠི ནཱམ ན ཧོཏི, ཨུཔྤཱདིནོ དྷམྨཱ ནཱམ ཛཱཏོ. ཡཐཱ ཧི – ‘‘ཏིཊྛཏེཝ སཱཡཾ, པོཊྛཔཱད, ཨརཱུཔཱི ཨཏྟཱ སཉྙཱམཡོ ¶ . ཨཐ ཨིམསྶ པུརིསསྶ ཨཉྙཱ ཙ སཉྙཱ ཨུཔྤཛྫནྟི ཨཉྙཱ ཙ སཉྙཱ ནིརུཛ྄ཛྷནྟཱི’’ཏི (དཱི. ནི. ༡.༤༡༩). ཨེཏྠ ཨཱརུཔྤེ ཀཱམཱཝཙརསཉྙཱཔཝཏྟིཀཱལེ ཀིཉྩཱཔི མཱུལབྷཝངྒསཉྙཱ ནིརུདྡྷཱ ཀཱམཱཝཙརསཉྙཱཡ པན ནིརུདྡྷཀཱལེ ཨཝསྶཾ སཱ ཨུཔྤཛྫིསྶཏཱིཏི ཨརཱུཔསངྑཱཏོ ཨཏྟཱ ནཏྠཱིཏི སངྑྱཾ ཨགནྟྭཱ ‘ཏིཊྛཏེཝ’ ནཱམཱཏི ཛཱཏོ. ཨེཝམེཝ ལདྡྷོཀཱསསྶ ཀམྨསྶ ཝིཔཱཀོ དུཝིདྷོ…པེ… དྷུཝཔཙྩཡཊྛེན ནཏྠི ནཱམ ན ཧོཏི, ཨུཔྤཱདིནོ དྷམྨཱ ནཱམ ཛཱཏོ.

ཡདི པན ཨཱཡཱུཧིཏཾ ཀུསལཱཀུསལཀམྨཾ སབྦཾ ཝིཔཱཀཾ དདེཡྻ, ཨཉྙསྶ ཨོཀཱསོ ན བྷཝེཡྻ. ཏཾ པན དུཝིདྷཾ ཧོཏི – དྷུཝཝིཔཱཀཾ, ཨདྷུཝཝིཔཱཀཉྩ. ཏཏྠ པཉྩ ཨཱནནྟརིཡཀམྨཱནི, ཨཊྛ སམཱཔཏྟིཡོ, ཙཏྟཱརོ ཨརིཡམགྒཱཏི ཨེཏཾ ‘དྷུཝཝིཔཱཀཾ’ ནཱམ. ཏཾ ¶ པན ཁཎཔྤཏྟམྤི ཨཏྠི, ཨཔྤཏྟམྤི. ཏཏྠ ‘ཁཎཔྤཏྟཾ’ ཨུཔྤནྣཾ ནཱམ. ‘ཨཔྤཏྟཾ’ ཨནུཔྤནྣཾ ནཱམ. ཏསྶ ཝིཔཱཀོ ཙིཏྟཱནནྟརེ ཝཱ ཨུཔྤཛྫཏུ ཀཔྤསཏསཧསྶཱཏིཀྐམེ ཝཱ. དྷུཝཔཙྩཡཊྛེན ཨནུཔྤནྣཾ ནཱམ ན ཧོཏི, ཨུཔྤཱདིནོ དྷམྨཱ ནཱམ ཛཱཏཾ. མེཏྟེཡྻབོདྷིསཏྟསྶ མགྒོ ཨནུཔྤནྣོ ནཱམ, ཕལཾ ཨུཔྤཱདིནོ དྷམྨཱཡེཝ ནཱམ ཛཱཏཾ.

༡༠༤༤. ཨཏཱིཏཏྟིཀནིདྡེསེ ¶ ཨཏཱིཏཱཏི ཁཎཏྟཡཾ ཨཏིཀྐནྟཱ. ནིརུདྡྷཱཏི ནིརོདྷཔྤཏྟཱ. ཝིགཏཱཏི ཝིབྷཝཾ གཏཱ, ཝིགཙྪིཏཱ ཝཱ. ཝིཔརིཎཏཱཏི པཀཏིཝིཛཧནེན ཝིཔརིཎཱམཾ གཏཱ. ནིརོདྷསངྑཱཏཾ ཨཏྠཾ གཏཱཏི ཨཏྠངྒཏཱ. ཨབྦྷཏྠངྒཏཱཏི ཨུཔསགྒེན པདཾ ཝཌྜྷིཏཾ. ཨུཔྤཛྫིཏྭཱ ཝིགཏཱཏི ནིབྦཏྟིཏྭཱ ཝིགཙྪིཏཱ. པུན ཨཏཱིཏཝཙནེ ཀཱརཎཾ ཧེཊྛཱ ཝུཏྟམེཝ. པརཏོ ཨནཱགཏཱདཱིསུཔི ཨེསེཝ ནཡོ. ཨཏཱིཏཾསེན སངྒཧིཏཱཏི ཨཏཱིཏཀོཊྛཱསེན གཎནཾ གཏཱ. ཀཏམེ ཏེཏི? རཱུཔཾ ཝེདནཱ སཉྙཱ སངྑཱརཱ ཝིཉྙཱཎཾ. པརཏོ ཨནཱགཏཱདཱིསུཔི ཨེསེཝ ནཡོ.

༡༠༤༧. ཨཏཱིཏཱརམྨཎཏྟིཀནིདྡེསེ ཨཏཱིཏེ དྷམྨེ ཨཱརབྦྷཱཏིཨཱདཱིསུ པརིཏྟམཧགྒཏཱཝ དྷམྨཱ ཝེདིཏབྦཱ. ཏེ ཧི ཨཏཱིཏཱདཱིནི ཨཱརབྦྷ ཨུཔྤཛྫནྟི.

༡༠༥༠. ཨཛ྄ཛྷཏྟཏྟིཀནིདྡེསེ ཏེསཾ ཏེསནྟི པདདྭཡེན སབྦསཏྟེ པརིཡཱདིཡཏི. ཨཛ྄ཛྷཏྟཾ པཙྩཏྟནྟི ཨུབྷཡཾ ནིཡཀཛ྄ཛྷཏྟཱདྷིཝཙནཾ. ནིཡཏཱཏི ཨཏྟནི ཛཱཏཱ. པཱཊིཔུགྒལིཀཱཏི པཱཊིཡེཀྐསྶ པཱཊིཡེཀྐསྶ ¶ པུགྒལསྶ སནྟཀཱ. ཨུཔཱདིཎྞཱཏི སརཱིརཊྛཀཱ. ཏེ ཧི ཀམྨནིབྦཏྟཱ ཝཱ ཧོནྟུ མཱ ཝཱ, ཨཱདིནྣགཧིཏཔརཱམཊྛཝསེན པན ཨིདྷ ཨུཔཱདིཎྞཱཏི ཝུཏྟཱ.

༡༠༥༡. པརསཏྟཱནནྟི ཨཏྟཱནཾ ཋཔེཏྭཱ ཨཝསེསསཏྟཱནཾ. པརཔུགྒལཱནནྟི ཏསྶེཝ ཝེཝཙནཾ. སེསཾ ཧེཊྛཱ ཝུཏྟསདིསམེཝ. ཏདུབྷཡནྟི ཏཾ ཨུབྷཡཾ.

༡༠༥༣. ཨཛ྄ཛྷཏྟཱརམྨཎཏྟིཀསྶ པཋམཔདེ པརིཏྟམཧགྒཏཱ དྷམྨཱ ཝེདིཏབྦཱ. དུཏིཡེ ¶ ཨཔྤམཱཎཱཔི. ཏཏིཡེ པརིཏྟམཧགྒཏཱཝ. ཨཔྤམཱཎཱ པན ཀཱལེན བཧིདྡྷཱ ཀཱལེན ཨཛ྄ཛྷཏྟཾ ཨཱརམྨཎཾ ན ཀརོནྟི. སནིདསྶནཏྟིཀནིདྡེསོ ཨུཏྟཱནོཡེཝཱཏི.

དུཀནིཀྑེཔཀཐཱ

༡༠༦༢. དུཀེསུ ཨདོསནིདྡེསེ མེཏྟཱཡནཝསེན མེཏྟི. མེཏྟཱཀཱརོ མེཏྟཱཡནཱ. མེཏྟཱཡ ཨཡིཏསྶ མེཏྟཱསམངྒིནོ ཙིཏྟསྶ བྷཱཝོ ¶ མེཏྟཱཡིཏཏྟཾ. ཨནུདཡཏཱིཏི ཨནུདྡཱ, རཀྑཏཱིཏི ཨཏྠོ. ཨནུདྡཱཀཱརོ ཨནུདྡཱཡནཱ. ཨནུདྡཱཡིཏསྶ བྷཱཝོ ཨནུདྡཱཡིཏཏྟཾ. ཧིཏསྶ ཨེསནཝསེན ཧིཏེསིཏཱ. ཨནུཀམྤནཝསེན ཨནུཀམྤཱ. སབྦེཧིཔི ཨིམེཧི པདེཧི ཨུཔཙཱརཔྤནཱཔྤཏྟཱ མེཏྟཱཝ ཝུཏྟཱ. སེསཔདེཧི ལོཀིཡལོཀུཏྟརོ ཨདོསོ ཀཐིཏོ.

༡༠༦༣. ཨམོཧནིདྡེསེ དུཀྑེ ཉཱཎནྟི དུཀྑསཙྩེ པཉྙཱ. དུཀྑསམུདཡེཏིཨཱདཱིསུཔི ཨེསེཝ ནཡོ. ཨེཏྠ ཙ དུཀྑེ ཉཱཎཾ སཝནསམྨསནཔཊིཝེདྷཔཙྩཝེཀྑཎཱསུ ཝཏྟཏི. ཏཐཱ དུཀྑསམུདཡེ. ནིརོདྷེ པན སཝནཔཊིཝེདྷཔཙྩཝེཀྑཎཱསུ ཨེཝ. ཏཐཱ པཊིཔདཱཡ. པུབྦནྟེཏི ཨཏཱིཏཀོཊྛཱསེ. ཨཔརནྟེཏི ཨནཱགཏཀོཊྛཱསེ. པུབྦནྟཱཔརནྟེཏི ཏདུབྷཡེ. ཨིདཔྤཙྩཡཏཱཔཊིཙྩསམུཔྤནྣེསུ དྷམྨེསུ ཉཱཎནྟི ཨཡཾ པཙྩཡོ, ཨིདཾ པཙྩཡུཔྤནྣཾ, ཨིདཾ པཊིཙྩ ཨིདཾ ནིབྦཏྟནྟི, ཨེཝཾ པཙྩཡེསུ ཙ པཙྩཡུཔྤནྣདྷམྨེསུ ཙ ཉཱཎཾ.

༡༠༦༥. ལོབྷནིདྡེསེཔི ཧེཊྛཱ ཨནཱགཏཱནཾ པདཱནཾ ཨཡམཏྠོ – རཉྫནཝསེན རཱགོ. བལཝརཉྫནཊྛེན སཱརཱགོ. ཝིསཡེསུ སཏྟཱནཾ ཨནུནཡནཏོ ཨནུནཡོ. ཨནུརུཛ྄ཛྷཏཱིཏི ཨནུརོདྷོ, ཀཱམེཏཱིཏི ཨཏྠོ. ཡཏྠ ཀཏྠཙི བྷཝེ སཏྟཱ ¶ ཨེཏཱཡ ནནྡནྟི, སཡཾ ཝཱ ནནྡཏཱིཏི ནནྡཱི. ནནྡཱི ¶ ཙ སཱ རཉྫནཊྛེན རཱགོ ཙཱཏི ནནྡཱིརཱགོ. ཏཏྠ ཨེཀསྨིཾ ཨཱརམྨཎེ སཀིཾ ཨུཔྤནྣཱ ཏཎྷཱ ‘ནནྡཱི’. པུནཔྤུནཾ ཨུཔྤཛྫམཱནཱ ‘ནནྡཱིརཱགོ’ཏི ཝུཙྩཏི. ཙིཏྟསྶ སཱརཱགོཏི ཡོ ཧེཊྛཱ བལཝརཉྫནཊྛེན སཱརཱགོཏི ཝུཏྟོ, སོ ན སཏྟསྶ, ཙིཏྟསྶེཝ སཱརཱགོཏི ཨཏྠོ.

ཨིཙྪནྟི ཨེཏཱཡ ཨཱརམྨཎཱནཱིཏི ཨིཙྪཱ. བཧལཀིལེསབྷཱཝེན མུཙྪནྟི ཨེཏཱཡ པཱཎིནོཏི མུཙྪཱ. གིལིཏྭཱ པརིནིཊྛཔེཏྭཱ གཧཎཝསེན ཨཛ྄ཛྷོསཱནཾ. ཨིམིནཱ སཏྟཱ གིཛ྄ཛྷནྟི, གེདྷཾ ཨཱཔཛྫནྟཱིཏི གེདྷོ; བཧལཊྛེན ཝཱ གེདྷོ. ‘‘གེདྷཾ ཝཱ པཝནསཎྜ’’ནྟི ཧི བཧལཊྛེནེཝ ཝུཏྟཾ. ཨནནྟརཔདཾ ཨུཔསགྒཝསེན ཝཌྜྷིཏཾ. སབྦཏོབྷཱགེན ཝཱ གེདྷོཏི པལིགེདྷོ. སཉྫནྟི ཨེཏེནཱཏི སངྒོ; ལགྒནཊྛེན ཝཱ སངྒོ. ཨོསཱིདནཊྛེན པངྐོ. ཨཱཀཌྜྷནཝསེན ཨེཛཱ. ‘‘ཨེཛཱ ཨིམཾ པུརིསཾ པརིཀཌྜྷཏི ཏསྶ ཏསྶེཝ བྷཝསྶ ཨབྷིནིབྦཏྟིཡཱ’’ཏི ཧི ཝུཏྟཾ. ཝཉྩནཊྛེན མཱཡཱ. ཝཊྚསྨིཾ སཏྟཱནཾ ཛནནཊྛེན ¶ ཛནིཀཱ. ‘‘ཏཎྷཱ ཛནེཏི པུརིསཾ ཙིཏྟམསྶ ཝིདྷཱཝཏཱི’’ཏི (སཾ. ནི. ༡.༥༥-༥༧) ཧི ཝུཏྟཾ. ཝཊྚསྨིཾ སཏྟེ དུཀྑེན སཾཡོཛཡམཱནཱ ཛནེཏཱིཏི སཉྫནནཱི. གྷཊནཊྛེན སིབྦིནཱི. ཨཡཉྷི ཝཊྚསྨིཾ སཏྟེ ཙུཏིཔཊིསནྡྷིཝསེན སིབྦཏི གྷཊེཏི, ཏུནྣཀཱརོ ཝིཡ པིལོཏིཀཱཡ པིལོཏིཀཾ; ཏསྨཱ གྷཊནཊྛེན སིབྦིནཱིཏི ཝུཏྟཱ. ཨནེཀཔྤཀཱརཾ ཝིསཡཛཱལཾ ཏཎྷཱཝིཔྥནྡིཏནིཝེསསངྑཱཏཾ ཝཱ ཛཱལམསྶཱ ཨཏྠཱིཏི ཛཱལིནཱི.

ཨཱཀཌྜྷནཊྛེན སཱིགྷསོཏཱ སརིཏཱ ཝིཡཱཏི སརིཏཱ. ཨལླཊྛེན ཝཱ སརིཏཱ. ཝུཏྟཉྷེཏཾ – ‘‘སརིཏཱནི སིནེཧིཏཱནི ཙ སོམནསྶཱནི བྷཝནྟི ཛནྟུནོ’’ཏི (དྷ. པ. ༣༤༡). ཨལླཱནི ཙེཝ སིནིདྡྷཱནི ཙཱཏི ཨཡཉྷེཏྠ ཨཏྠོ. ཝིསཏཱཏི ¶ ཝིསཏྟིཀཱ. ཝིསཊཱཏི ཝིསཏྟིཀཱ. ཝིསཱལཱཏི ཝིསཏྟིཀཱ. ཝིསཀྐཏཱིཏི ཝིསཏྟིཀཱ. ཝིསཾཝཱདིཀཱཏི ཝིསཏྟིཀཱ. ཝིསཾཧརཏཱིཏི ཝིསཏྟིཀཱ. ཝིསམཱུལཱཏི ཝིསཏྟིཀཱ. ཝིསཕལཱཏི ཝིསཏྟིཀཱ. ཝིསཔརིབྷོགཱཏི ཝིསཏྟིཀཱ. ཝིསཏཱ ཝཱ པན སཱ ཏཎྷཱ རཱུཔེ སདྡེ གནྡྷེ རསེ ཕོཊྛབྦེ དྷམྨེ ཀུལེ གཎེ ཝིཏྠཏཱཏི ཝིསཏྟིཀཱ (མཧཱནི. ༣). ཨནཡབྱསནཔཱཔནཊྛེན ཀུམྨཱནུབནྡྷསུཏྟཀཾ ཝིཡཱཏི སུཏྟཾ. ཝུཏྟཉྷེཏཾ – ‘‘སུཏྟཀནྟི ཁོ, བྷིཀྑཝེ, ནནྡཱིརཱགསྶེཏཾ ཨདྷིཝཙན’’ནྟི (སཾ. ནི. ༢.༡༥༩). རཱུཔཱདཱིསུ ཝིཏྠཏཊྛེན ཝིསཊཱ. ཏསྶ ཏསྶ པཊིལཱབྷཏྠཱཡ སཏྟེ ཨཱཡཱུཧཱཔེཏཱིཏི ཨཱཡཱུཧིནཱི. ཨུཀྐཎྛིཏུཾ ཨཔྤདཱནཏོ སཧཱཡཊྛེན དུཏིཡཱ. ཨཡཉྷི སཏྟཱནཾ ཝཊྚསྨིཾ ཨུཀྐཎྛིཏུཾ ན དེཏི, གཏགཏཊྛཱནེ པིཡསཧཱཡོ ཝིཡ ཨབྷིརམཱཔེཏི. ཏེན ཝུཏྟཾ –

‘‘ཏཎྷཱདུཏིཡོ ¶ པུརིསོ, དཱིགྷམདྡྷཱན སཾསརཾ;

ཨིཏྠབྷཱཝཉྙཐཱབྷཱཝཾ, སཾསཱརཾ ནཱཏིཝཏྟཏཱི’’ཏི. (ཨ. ནི. ༤.༩; ཨིཏིཝུ. ༡༥; མཧཱནི. ༡༩༡; ཙཱུལ༹ནི. པཱརཱཡནཱནུགཱིཏིགཱཐཱནིདྡེས ༡༠༧);

པཎིདྷཱནཀཝསེན པཎིདྷི. བྷཝནེཏྟཱིཏི བྷཝརཛྫུ. ཨེཏཱཡ ཧི སཏྟཱ, རཛྫུཡཱ གཱིཝཱཡ བདྡྷཱ གོཎཱ ཝིཡ, ཨིཙྪིཏིཙྪིཏཊྛཱནཾ ནིཡྻནྟི. ཏཾ ཏཾ ཨཱརམྨཎཾ ཝནཏི བྷཛཏི ཨལླཱིཡཏཱིཏི ཝནཾ. ཝནཏི ཡཱཙཏཱིཏི ཝཱ ཝནཾ. ཝནཐོཏི བྱཉྫནེན པདཾ ཝཌྜྷིཏཾ. ཨནཏྠདུཀྑཱནཾ ཝཱ སམུཊྛཱཔནཊྛེན གཧནཊྛེན ཙ ཝནཾ ¶ ཝིཡཱཏི ‘ཝནཾ’; བལཝཏཎྷཱཡེཏཾ ནཱམཾ. གཧནཏརཊྛེན པན ཏཏོ བལཝཏརོ ‘ཝནཐོ’ ནཱམ. ཏེན ཝུཏྟཾ –

‘‘ཝནཾ ཚིནྡཐ མཱ རུཀྑཾ, ཝནཏོ ཛཱཡཏེ བྷཡཾ;

ཚེཏྭཱ ཝནཉྩ ཝནཐཉྩ, ནིབྦནཱ ཧོཐ བྷིཀྑཝོ’’ཏི. (དྷ. པ. ༢༨༣);

སནྠཝནཝསེན སནྠཝོ; སཾསགྒོཏི ཨཏྠོ. སོ ¶ དུཝིདྷོ – ཏཎྷཱསནྠཝོ མིཏྟསནྠཝོ ཙ. ཏེསུ ཨིདྷ ཏཎྷཱསནྠཝོ ཨདྷིཔྤེཏོ. སིནེཧཝསེན སིནེཧོ. ཨཱལཡཀརཎཝསེན ཨཔེཀྑཏཱིཏི ཨཔེཀྑཱ. ཝུཏྟམྤི ཙེཏཾ – ‘‘ཨིམཱནི ཏེ དེཝ ཙཏུརཱསཱིཏིནགརསཧསྶཱནི ཀུསཱཝཏཱིརཱཛདྷཱནཱིཔམུཁཱནི. ཨེཏྠ དེཝ ཚནྡཾ ཛནེཧི, ཛཱིཝིཏེ ཨཔེཀྑཾ ཀརོཧཱི’’ཏི (དཱི. ནི. ༢.༢༦༦). ཨཱལཡཾ ཀརོཧཱིཏི ཨཡཉྷེཏྠ ཨཏྠོ. པཱཊིཡེཀྐེ པཱཊིཡེཀྐེ ཨཱརམྨཎེ བནྡྷཏཱིཏི པཊིབནྡྷུ. ཉཱཏཀཊྛེན ཝཱ པཱཊིཡེཀྐོ བནྡྷཱུཏིཔི པཊིབནྡྷུ. ནིཙྩསནྣིསྶིཏཊྛེན ཧི སཏྟཱནཾ ཏཎྷཱསམོ བནྡྷུ ནཱམ ནཏྠི.

ཨཱརམྨཎཱནཾ ཨསནཏོ ཨཱསཱ. ཨཛ྄ཛྷོཏྠརཎཏོ ཙེཝ ཏིཏྟིཾ ཨནུཔགནྟྭཱཝ པརིབྷུཉྫནཏོ ཙཱཏི ཨཏྠོ. ཨཱསིསནཝསེན ཨཱསིསནཱ. ཨཱསིསིཏསྶ བྷཱཝོ ཨཱསིསིཏཏྟཾ. ཨིདཱནི ཏསྶཱ པཝཏྟིཊྛཱནཾ དསྶེཏུཾ རཱུཔཱསཱཏིཨཱདི ཝུཏྟཾ. ཏཏྠ ཨཱསིསནཝསེན ཨཱསཱཏི ཨཱསཱཡ ཨཏྠཾ གཧེཏྭཱ རཱུཔེ ཨཱསཱ རཱུཔཱསཱཏི ཨེཝཾ ནཝཔི པདཱནི ཝེདིཏབྦཱནི. ཨེཏྠ ཙ པུརིམཱནི པཉྩ པཉྩཀཱམགུཎཝསེན ཝུཏྟཱནི. པརིཀྑཱརལོབྷཝསེན ཚཊྛཾ. ཏཾ ཝིསེསཏོ པབྦཛིཏཱནཾ. ཏཏོ པརཱནི ¶ ཏཱིཎི ཨཏིཏྟིཡཝཏྠུཝསེན གཧཊྛཱནཾ. ན ཧི ཏེསཾ དྷནཔུཏྟཛཱིཝིཏེཧི ཨཉྙཾ པིཡཏརཾ ཨཏྠི. ‘ཨེཏཾ མཡ྄ཧཾ ཨེཏཾ མཡ྄ཧ’ནྟི ཝཱ ‘ཨསུཀེན མེ ཨིདཾ དིནྣཾ ཨིདཾ དིནྣ’ནྟི ཝཱ ཨེཝཾ སཏྟེ ཛཔྤཱཔེཏཱིཏི ཛཔྤཱ. པརཏོ དྭེ པདཱནི ཨུཔསགྒེན ཝཌྜྷིཏཱནི. ཏཏོ པརཾ ཨཉྙེནཱཀཱརེན ཝིབྷཛིཏུཾ ཨཱརདྡྷཏྟཱ པུན ཛཔྤཱཏི ཝུཏྟཾ. ཛཔྤནཱཀཱརོ ཛཔྤནཱ. ཛཔྤིཏསྶ བྷཱཝོ ཛཔྤིཏཏྟཾ. པུནཔྤུནཾ ཝིསཡེ ལུམྤཏི ཨཱཀཌྜྷཏཱིཏི ལོལུཔོ. ལོལུཔསྶ བྷཱཝོ ལོལུཔྤཾ. ལོལུཔྤཱཀཱརོ ལོལུཔྤཱཡནཱ. ལོལུཔྤསམངྒིནོ བྷཱཝོ ལོལུཔྤཱཡིཏཏྟཾ.

པུཙྪཉྫིཀཏཱཏི ¶ ཡཱཡ ཏཎྷཱཡ ལཱབྷཊྛཱནེསུ, པུཙྪཾ ཙཱལཡམཱནཱ སུནཁཱ ཝིཡ, ཀམྤམཱནཱ ཝིཙརནྟི, ཏཾ ཏསྶཱ ཀམྤནཏཎྷཱཡ ནཱམཾ. སཱདྷུ མནཱཔམནཱཔེ ཝིསཡེ ཀཱམེཏཱིཏི སཱདྷུཀཱམོ. ཏསྶ བྷཱཝོ སཱདྷུཀམྱཏཱ. མཱཏཱ ¶ མཱཏུཙྪཱཏིཨཱདིཀེ ཨཡུཏྟཊྛཱནེ རཱགོཏི ཨདྷམྨརཱགོ. ཡུཏྟཊྛཱནེཔི བལཝཱ ཧུཏྭཱ ཨུཔྤནྣལོབྷོ ཝིསམལོབྷོ. ‘‘རཱགོ ཝིསམ’’ནྟིཨཱདིཝཙནཏོ (ཝིབྷ. ༩༢༤) ཝཱ ཡུཏྟཊྛཱནེ ཝཱ ཨཡུཏྟཊྛཱནེ ཝཱ ཨུཔྤནྣོ ཚནྡརཱགོ ཨདྷམྨཊྛེན ‘ཨདྷམྨརཱགོ’, ཝིསམཊྛེན ‘ཝིསམལོབྷོ’ཏི ཝེདིཏབྦོ.

ཨཱརམྨཎཱནཾ ནིཀཱམནཝསེན ནིཀནྟི. ནིཀཱམནཱཀཱརོ ནིཀཱམནཱ. པཏྠནཱཝསེན པཏྠནཱ. པིཧཱཡནཝསེན པིཧནཱ. སུཊྛུ པཏྠནཱ སམྤཏྠནཱ. པཉྩསུ ཀཱམགུཎེསུ ཏཎྷཱ ཀཱམཏཎྷཱ. རཱུཔཱརཱུཔབྷཝེ ཏཎྷཱ བྷཝཏཎྷཱ. ཨུཙྪེདསངྑཱཏེ ཝིབྷཝེ ཏཎྷཱ ཝིབྷཝཏཎྷཱ. སུདྡྷེ རཱུཔབྷཝསྨིཾཡེཝ ཏཎྷཱ རཱུཔཏཎྷཱ. ཨརཱུཔབྷཝེ ཏཎྷཱ ཨརཱུཔཏཎྷཱ. ཨུཙྪེདདིཊྛིསཧགཏོ རཱགོ དིཊྛིརཱགོ. ནིརོདྷེ ཏཎྷཱ ནིརོདྷཏཎྷཱ. རཱུཔེ ཏཎྷཱ རཱུཔཏཎྷཱ. སདྡེ ཏཎྷཱ སདྡཏཎྷཱ. གནྡྷཏཎྷཱདཱིསུཔི ཨེསེཝ ནཡོ. ཨོགྷཱདཡོ ཝུཏྟཏྠཱཝ.

ཀུསལདྷམྨེ ཨཱཝརཏཱིཏི ཨཱཝརཎཾ. ཚཱདནཝསེན ཚཱདནཾ. སཏྟེ ཝཊྚསྨིཾ བནྡྷཏཱིཏི བནྡྷནཾ. ཙིཏྟཾ ཨུཔགནྟྭཱ ཀིལིསྶཏི སཾཀིལིཊྛཾ ཀརོཏཱིཏི ཨུཔཀྐིལེསོ. ཐཱམགཏཊྛེན ཨནུསེཏཱིཏི ཨནུསཡོ. ཨུཔྤཛྫམཱནཱ ཙིཏྟཾ པརིཡུཊྛཱཏཱིཏི པརིཡུཊྛཱནཾ; ཨུཔྤཛྫིཏུཾ ཨཔྤདཱནེན ཀུསལཙཱརཾ གཎྷཱཏཱིཏི ཨཏྠོ. ‘‘ཙོརཱ མགྒེ པརིཡུཊྛིཾསུ དྷུཏྟཱ མགྒེ པརིཡུཊྛིཾསཱུ’’ཏིཨཱདཱིསུ (ཙཱུལ༹ཝ. ༤༣༠) ཧི མགྒཾ གཎྷིཾསཱུཏི ཨཏྠོ. ཨེཝམིདྷཱཔི གཧཎཊྛེན པརིཡུཊྛཱནཾ ཝེདིཏབྦཾ. པལིཝེཋནཊྛེན ལཏཱ ཝིཡཱཏི ལཏཱ. ‘‘ལཏཱ ཨུབྦྷིཛྫ ཏིཊྛཏཱི’’ཏི (དྷ. པ. ༣༤༠) ཨཱགཏཊྛཱནེཔི ཨཡཾ ཏཎྷཱ ལཏཱཏི ཝུཏྟཱ. ཝིཝིདྷཱནི ཝཏྠཱུནི ཨིཙྪཏཱིཏི ཝེཝིཙྪཾ. ཝཊྚདུཀྑསྶ མཱུལནྟི ¶ དུཀྑམཱུལཾ. ཏསྶེཝ དུཀྑསྶ ནིདཱནནྟི དུཀྑནིདཱནཾ. ཏཾ དུཀྑཾ ཨིཏོ པབྷཝཏཱིཏི དུཀྑཔྤབྷཝོ. བནྡྷནཊྛེན པཱསོ ཝིཡཱཏི པཱསོ. མཱརསྶ པཱསོ མཱརཔཱསོ. དུརུགྒིལནཊྛེན བལི༹སཾ ཝིཡཱཏི བལི༹སཾ. མཱརསྶ བལི༹སཾ ¶ མཱརབལི༹སཾ. ཏཎྷཱབྷིབྷཱུཏཱ མཱརསྶ ཝིསཡཾ ནཱཏིཀྐམནྟི, ཏེསཾ ཨུཔརི མཱརོ ཝསཾ ཝཏྟེཏཱིཏི ཨིམིནཱ པརིཡཱཡེན མཱརསྶ ཝིསཡོཏི མཱརཝིསཡོ ¶ . སནྡནཊྛེན ཏཎྷཱཝ ནདཱི ཏཎྷཱནདཱི. ཨཛ྄ཛྷོཏྠརཎཊྛེན ཏཎྷཱཝ ཛཱལཾ ཏཎྷཱཛཱལཾ. ཡཐཱ སུནཁཱ གདྡུལབདྡྷཱ ཡདིཙྪཀཾ ནཱིཡནྟི, ཨེཝཾ ཏཎྷཱབདྡྷཱ སཏྟཱཔཱིཏི དལ༹ྷབནྡྷནཊྛེན གདྡུལཾ ཝིཡཱཏི གདྡུལཾ. ཏཎྷཱཝ གདྡུལཾ ཏཎྷཱགདྡུལཾ. དུཔྤཱུརཎཊྛེན ཏཎྷཱཝ སམུདྡོ ཏཎྷཱསམུདྡོ.

༡༠༦༦. དོསནིདྡེསེ ཨནཏྠཾ མེ ཨཙརཱིཏི ཨཝུཌྜྷིཾ མེ ཨཀཱསི. ཨིམིནཱ ཨུཔཱཡེན སབྦཔདེསུ ཨཏྠོ ཝེདིཏབྦོ. ཨཊྛཱནེ ཝཱ པན ཨཱགྷཱཏོཏི ཨཀཱརཎེ ཀོཔོ – ཨེཀཙྩོ ཧི ‘དེཝོ ཨཏིཝསྶཏཱི’ཏི ཀུཔྤཏི, ‘ན ཝསྶཏཱི’ཏི ཀུཔྤཏི, ‘སཱུརིཡོ ཏཔྤཏཱི’ཏི ཀུཔྤཏི, ‘ན ཏཔྤཏཱི’ཏི ཀུཔྤཏི, ཝཱཏེ ཝཱཡནྟེཔི ཀུཔྤཏི, ཨཝཱཡནྟེཔི ཀུཔྤཏི, སམྨཛྫིཏུཾ ཨསཀྐོནྟོ བོདྷིཔཎྞཱནཾ ཀུཔྤཏི, ཙཱིཝརཾ པཱརུཔིཏུཾ ཨསཀྐོནྟོ ཝཱཏསྶ ཀུཔྤཏི, ཨུཔཀྑལིཏྭཱ ཁཱཎུཀསྶ ཀུཔྤཏི ཨིདཾ སནྡྷཱཡ ཝུཏྟཾ – ཨཊྛཱནེ ཝཱ པན ཨཱགྷཱཏོ ཛཱཡཏཱིཏི. ཏཏྠ ཧེཊྛཱ ནཝསུ ཋཱནེསུ སཏྟེ ཨཱརབྦྷ ཨུཔྤནྣཏྟཱ ཀམྨཔཐབྷེདོ ཧོཏི. ཨཊྛཱནཱགྷཱཏོ པན སངྑཱརེསུ ཨུཔྤནྣོ ཀམྨཔཐབྷེདཾ ན ཀརོཏི. ཙིཏྟཾ ཨཱགྷཱཏེནྟོ ཨུཔྤནྣོཏི ཙིཏྟསྶ ཨཱགྷཱཏོ. ཏཏོ བལཝཏརོ པཊིགྷཱཏོ. པཊིཧཉྙནཝསེན པཊིགྷཾ. པཊིཝིརུཛ྄ཛྷཏཱིཏི པཊིཝིརོདྷོ. ཀུཔྤནཝསེན ཀོཔོ. པཀོཔོ སམྤཀོཔོཏི ཨུཔསགྒེན པདཾ ཝཌྜྷིཏཾ. དུསྶནཝསེན དོསོ. པདོསོ སམྤདོསོཏི ཨུཔསགྒེན པདཾ ཝཌྜྷིཏཾ. ཙིཏྟསྶ བྱཱཔཏྟཱིཏི ཙིཏྟསྶ ཝིཔནྣཏཱ, ཝིཔརིཝཏྟནཱཀཱརོ. མནཾ པདཱུསཡམཱནོ ཨུཔྤཛྫཏཱིཏི མནོཔདོསོ. ཀུཛ྄ཛྷནཝསེན ཀོདྷོ. ཀུཛ྄ཛྷནཱཀཱརོ ཀུཛ྄ཛྷནཱ. ཀུཛ྄ཛྷིཏསྶ བྷཱཝོ ཀུཛ྄ཛྷིཏཏྟཾ.

ཨིདཱནི ཨཀུསལནིདྡེསེ ཝུཏྟནཡཾ དསྶེཏུཾ དོསོ དུསྶནཱཏིཨཱདི ཝུཏྟཾ. ཏསྨཱ ‘‘ཡོ ཨེཝརཱུཔོ ཙིཏྟསྶ ཨཱགྷཱཏོ…པེ… ཀུཛ྄ཛྷིཏཏྟ’’ནྟི ཙ ཨིདྷ ཝུཏྟོ, ‘‘དོསོ དུསྶནཱ’’ཏིཨཱདིནཱ ནཡེན ཧེཊྛཱ ཝུཏྟོ, ཨཡཾ ཝུཙྩཏི དོསོཏི. ཨེཝམེཏྠ ཡོཛནཱ ཀཱཏབྦཱ. ཨེཝཉྷི སཏི པུནརུཏྟིདོསོ པཊིསེདྷིཏོ ཧོཏི. མོཧནིདྡེསོ ¶ ཨམོཧནིདྡེསེ ཝུཏྟཔཊིཔཀྑནཡེན ¶ ཝེདིཏབྦོ. སབྦཱཀཱརེན པནེས ཝིབྷངྒཊྛཀཐཱཡཾ ཨཱཝི བྷཝིསྶཏི.

༡༠༧༩. ཏེཧི ¶ དྷམྨེཧི ཡེ དྷམྨཱ སཧེཏུཀཱཏི ཏེཧི ཧེཏུདྷམྨེཧི ཡེ ཨཉྙེ ཧེཏུདྷམྨཱ ཝཱ ནཧེཏུདྷམྨཱ ཝཱ ཏེ སཧེཏུཀཱ. ཨཧེཏུཀཔདེཔི ཨེསེཝ ནཡོ. ཨེཏྠ ཙ ཧེཏུ ཧེཏུཡེཝ ཙ ཧོཏི, ཏིཎྞཾ ཝཱ དྭིནྣཾ ཝཱ ཨེཀཏོ ཨུཔྤཏྟིཡཾ སཧེཏུཀོ ཙ. ཝིཙིཀིཙྪུདྡྷཙྩསཧགཏོ པན མོཧོ ཧེཏུ ཨཧེཏུཀོ. ཧེཏུསམྤཡུཏྟདུཀནིདྡེསེཔི ཨེསེཝ ནཡོ.

༡༠༩༡. སངྑཏདུཀནིདྡེསེ པུརིམདུཀེ ཝུཏྟཾ ཨསངྑཏདྷཱཏུཾ སནྡྷཱཡ ཡོ ཨེཝ སོ དྷམྨོཏི ཨེཀཝཙནནིདྡེསོ ཀཏོ. པུརིམདུཀེ པན བཧུཝཙནཝསེན པུཙྪཱཡ ཨུདྡྷཊཏྟཱ ཨིམེ དྷམྨཱ ཨཔྤཙྩཡཱཏི པུཙྪཱནུསནྡྷིནཡེན བཧུཝཙནཾ ཀཏཾ. ཨིམེ དྷམྨཱ སནིདསྶནཱཏིཨཱདཱིསུཔི ཨེསེཝ ནཡོ.

༡༡༠༡. ཀེནཙི ཝིཉྙེཡྻདུཀནིདྡེསེ ཙཀྑུཝིཉྙེཡྻཱཏི ཙཀྑུཝིཉྙཱཎེན ཝིཛཱནིཏབྦཱ. སེསཔདེསུཔི ཨེསེཝ ནཡོ. ཨེཏྠ ཙ ཀེནཙི ཝིཉྙེཡྻཱཏི ཙཀྑུཝིཉྙཱཎཱདཱིསུ ཀེནཙི ཨེཀེན ཙཀྑུཝིཉྙཱཎེན ཝཱ སོཏཝིཉྙཱཎེན ཝཱ ཝིཛཱནིཏབྦཱ. ཀེནཙི ན ཝིཉྙེཡྻཱཏི ཏེནེཝ ཙཀྑུཝིཉྙཱཎེན ཝཱ སོཏཝིཉྙཱཎེན ཝཱ ན ཝིཛཱནིཏབྦཱ. ‘ཨེཝཾ སནྟེ དྭིནྣམྤི པདཱནཾ ཨཏྠནཱནཏྟཏོ དུཀོ ཧོཏཱི’ཏི ཧེཊྛཱ ཝུཏྟཏྟཱ ‘ཡེ ཏེ དྷམྨཱ ཙཀྑུཝིཉྙེཡྻཱ ན ཏེ དྷམྨཱ སོཏཝིཉྙེཡྻཱ’ཏི ཨཡཾ དུཀོ ན ཧོཏི. རཱུཔཾ པན ཙཀྑུཝིཉྙེཡྻཾ སདྡོ ན ཙཀྑུཝིཉྙེཡྻོཏི ཨིམམཏྠཾ གཧེཏྭཱ ‘ཡེ ཏེ དྷམྨཱ ཙཀྑུཝིཉྙེཡྻཱ ན ཏེ དྷམྨཱ སོཏཝིཉྙེཡྻཱ, ཡེ ཝཱ པན ཏེ དྷམྨཱ སོཏཝིཉྙེཡྻཱ ན ཏེ དྷམྨཱ ཙཀྑུཝིཉྙེཡྻཱ’ཏི ཨཡམེཀོ དུཀོཏི ཝེདིཏབྦོ. ཨེཝཾ ཨེཀེཀཨིནྡྲིཡམཱུལཀེ ཙཏྟཱརོ ཙཏྟཱརོ ཀཏྭཱ ཝཱིསཏི དུཀཱ ཝིབྷཏྟཱཏི ཝེདིཏབྦཱ.

ཀིཾ ¶ པན ‘མནོཝིཉྙཱཎེན ཀེནཙི ཝིཉྙེཡྻཱ ཀེནཙི ན ཝིཉྙེཡྻཱ’ ནཏྠི? ཏེནེཏྠ དུཀཱ ན ཝུཏྟཱཏི? ནོ ནཏྠི, ཝཝཏྠཱནཱབྷཱཝཏོ པན ན ཝུཏྟཱ. ན ཧི, ཡཐཱ ཙཀྑུཝིཉྙཱཎེན ཨཝིཉྙེཡྻཱ ཨེཝཱཏི ཝཝཏྠཱནཾ ཨཏྠི, ཨེཝཾ མནོཝིཉྙཱཎེནཱཔཱིཏི ཝཝཏྠཱནཱབྷཱཝཏོ ཨེཏྠ དུཀཱ ན ཝུཏྟཱ. མནོཝིཉྙཱཎེན ¶ པན ཀེནཙི ཝིཉྙེཡྻཱ ཙེཝ ཨཝིཉྙེཡྻཱ ཙཱཏི ཨཡམཏྠོ ཨཏྠི. ཏསྨཱ སོ ཨཝུཏྟོཔི ཡཐཱལཱབྷཝསེན ཝེདིཏབྦོ. མནོཝིཉྙཱཎནྟི ཧི སངྑྱཾ གཏེཧི ཀཱམཱཝཙརདྷམྨེཧི ཀཱམཱཝཙརདྷམྨཱ ཨེཝ ཏཱཝ ཀེཧིཙི ཝིཉྙེཡྻཱ ཀེཧིཙི ཨཝིཉྙེཡྻཱ. ཏེཧིཡེཝ རཱུཔཱཝཙརཱདིདྷམྨཱཔི ཀེཧིཙི ཝིཉྙེཡྻཱ ཀེཧིཙི ཨཝིཉྙེཡྻཱ. རཱུཔཱཝཙརེཧིཔི ཀཱམཱཝཙརཱ ཀེཧིཙི ཝིཉྙེཡྻཱ ཀེཧིཙི ཨཝིཉྙེཡྻཱ. ཏེཧེཝ རཱུཔཱཝཙརཱདཡོཔི ¶ ཀེཧིཙི ཝིཉྙེཡྻཱ ཀེཧིཙི ཨཝིཉྙེཡྻཱ. ཨརཱུཔཱཝཙརེཧི པན ཀཱམཱཝཙརཱ རཱུཔཱཝཙརཱ ཨཔརིཡཱཔནྣཱ ཙ ནེཝ ཝིཉྙེཡྻཱ. ཨརཱུཔཱཝཙརཱ པན ཀེཧིཙི ཝིཉྙེཡྻཱ ཀེཧིཙི ཨཝིཉྙེཡྻཱ. ཏེཔི ཙ ཀེཙིདེཝ ཝིཉྙེཡྻཱ ཀེཙི ཨཝིཉྙེཡྻཱ. ཨཔརིཡཱཔནྣེཧི ཀཱམཱཝཙརཱདཡོ ནེཝ ཝིཉྙེཡྻཱ. ཨཔརིཡཱཔནྣཱ པན ནིབྦཱནེན ཨཝིཉྙེཡྻཏྟཱ ཀེཧིཙི ཝིཉྙེཡྻཱ ཀེཧིཙི ཨཝིཉྙེཡྻཱ. ཏེཔི ཙ མགྒཕལཱནཾ ཨཝིཉྙེཡྻཏྟཱ ཀེཙིདེཝ ཝིཉྙེཡྻཱ ཀེཙི ཨཝིཉྙེཡྻཱཏི.

༡༡༠༢. ཨཱསཝནིདྡེསེ པཉྩཀཱམགུཎིཀོ རཱགོ ཀཱམཱསཝོ ནཱམ. རཱུཔཱརཱུཔབྷཝེསུ ཚནྡརཱགོ ཛྷཱནནིཀནྟི སསྶཏདིཊྛིསཧཛཱཏོ རཱགོ བྷཝཝསེན པཏྠནཱ བྷཝཱསཝོ ནཱམ. དྭཱསཊྛི དིཊྛིཡོ དིཊྛཱསཝོ ནཱམ. ཨཊྛསུ ཋཱནེསུ ཨཉྙཱཎཾ ཨཝིཛྫཱསཝོ ནཱམ. ཏཏྠ ཏཏྠ ཨཱགཏེསུ པན ཨཱསཝེསུ ཨསམྨོཧཏྠཾ ཨེཀཝིདྷཱདིབྷེདོ ཝེདིཏབྦོ. ཨཏྠཏོ ཧེཏེ ཙིརཔཱརིཝཱསིཡཊྛེན ཨཱསཝཱཏི ཨེཝཾ ཨེཀཝིདྷཱཝ ཧོནྟི. ཝིནཡེ པན ‘‘དིཊྛདྷམྨིཀཱནཾ ཨཱསཝཱནཾ སཾཝརཱཡ སམྤརཱཡིཀཱནཾ ཨཱསཝཱནཾ པཊིགྷཱཏཱཡཱ’’ཏི (པཱརཱ. ༣༩) དུཝིདྷེན ཨཱགཏཱ. སུཏྟནྟེ སལཱ༹ཡཏནེ ཏཱཝ ‘‘ཏཡོམེ, ཨཱཝུསོ, ཨཱསཝཱ – ཀཱམཱསཝོ བྷཝཱསཝོ ཨཝིཛྫཱསཝོ’’ཏི (སཾ. ནི. ༤.༣༢༡) ཏིཝིདྷེན ཨཱགཏཱ. ནིབྦེདྷིཀཔརིཡཱཡེ ‘‘ཨཏྠི, བྷིཀྑཝེ, ཨཱསཝཱ ནིརཡགམནཱིཡཱ ¶ , ཨཏྠི ཨཱསཝཱ ཏིརཙྪཱནཡོནིགམནཱིཡཱ, ཨཏྠི ཨཱསཝཱ པེཏྟིཝིསཡགམནཱིཡཱ, ཨཏྠི ཨཱསཝཱ མནུསྶལོཀགམནཱིཡཱ, ཨཏྠི ཨཱསཝཱ དེཝལོཀགམནཱིཡཱ’’ཏི (ཨ. ནི. ༦.༦༣) པཉྩཝིདྷེན ཨཱགཏཱ. ཚཀྐནིཔཱཏེ ཨཱཧུནེཡྻསུཏྟེ – ‘‘ཨཏྠི ཨཱསཝཱ སཾཝརཱ པཧཱཏབྦཱ, ཨཏྠི ཨཱསཝཱ པཊིསེཝནཱ པཧཱཏབྦཱ, ཨཏྠི ཨཱསཝཱ ཨདྷིཝཱསནཱ པཧཱཏབྦཱ, ཨཏྠི ཨཱསཝཱ པརིཝཛྫནཱ པཧཱཏབྦཱ, ཨཏྠི ཨཱསཝཱ ¶ ཝིནོདནཱ པཧཱཏབྦཱ, ཨཏྠི ཨཱསཝཱ བྷཱཝནཱ པཧཱཏབྦཱ’’ཏི (ཨ. ནི. ༦.༥༨) ཚབྦིདྷེན ཨཱགཏཱ. སབྦཱསཝཔརིཡཱཡེ (མ. ནི. ༡.༡༤ ཨཱདཡོ) ‘དསྶནཔཧཱཏབྦེཧི’ སདྡྷིཾ སཏྟཝིདྷེན ཨཱགཏཱ. ཨིདྷ པནེཏེ ཀཱམཱསཝཱདིབྷེདཏོ ཙཏུབྦིདྷེན ཨཱགཏཱ. ཏཏྲཱཡཾ ཝཙནཏྠོ – པཉྩཀཱམགུཎསངྑཱཏེ ཀཱམེ ཨཱསཝོ ‘ཀཱམཱསཝོ’. རཱུཔཱརཱུཔསངྑཱཏེ ཀམྨཏོ ཙ ཨུཔཔཏྟིཏོ ཙ དུཝིདྷེཔི བྷཝེ ཨཱསཝོ ‘བྷཝཱསཝོ’. དིཊྛི ཨེཝ ཨཱསཝོ ‘དིཊྛཱསཝོ’. ཨཝིཛྫཱཝ ཨཱསཝོ ‘ཨཝིཛྫཱསཝོ’.

༡༡༠༣. ཀཱམེསཱུཏི པཉྩསུ ཀཱམགུཎེསུ. ཀཱམཙྪནྡོཏི ཀཱམསངྑཱཏོ ཚནྡོ, ན ཀཏྟུཀམྱཏཱཚནྡོ, ན དྷམྨཙྪནྡོ. ཀཱམནཝསེན རཛྫནཝསེན ཙ ཀཱམོཡེཝ རཱགོ ཀཱམརཱགོ. ཀཱམནཝསེན ¶ ནནྡནཝསེན ཙ ཀཱམོཝ ནནྡཱིཏི ཀཱམནནྡཱི. ཨེཝཾ སབྦཏྠ ཀཱམཏྠཾ ཝིདིཏྭཱ ཏཎྷཱཡནཊྛེན ཀཱམཏཎྷཱ, སིནེཧནཊྛེན ཀཱམསིནེཧོ, པརིཌཡ྄ཧནཊྛེན ཀཱམཔརིལཱ༹ཧོ, མུཙྪནཊྛེན ཀཱམམུཙྪཱ, གིལིཏྭཱ པརིནིཊྛཱཔནཊྛེན ཀཱམཛ྄ཛྷོསཱནནྟི ཝེདིཏབྦཾ. ཨཡཾ ཝུཙྩཏཱིཏི ཨཡཾ ཨཊྛཧི པདེཧི ཝིབྷཏྟོ ཀཱམཱསཝོ ནཱམ ཝུཙྩཏི.

༡༡༠༤. བྷཝེསུ བྷཝཚནྡོཏི རཱུཔཱརཱུཔབྷཝེསུ བྷཝཔཏྠནཱཝསེནེཝ པཝཏྟོ ཚནྡོ ‘བྷཝཚནྡོ’. སེསཔདཱནིཔི ཨིམིནཱཝ ནཡེན ཝེདིཏབྦཱནི.

༡༡༠༥. སསྶཏོ ལོཀོཏི ཝཱཏིཨཱདཱིཧི དསཧཱཀཱརེཧི དིཊྛིཔྤབྷེདོཝ ཝུཏྟོ. ཏཏྠ སསྶཏོ ལོཀོཏི ཨེཏྠ ཁནྡྷཔཉྩཀཾ ལོཀོཏི གཧེཏྭཱ ‘ཨཡཾ ལོཀོ ནིཙྩོ དྷུཝོ སབྦཀཱལིཀོ’ཏི གཎྷནྟསྶ ‘སསྶཏ’ནྟི གཧཎཱཀཱརཔྤཝཏྟཱ དིཊྛི. ཨསསྶཏོཏི ¶ ཏམེཝ ལོཀཾ ‘ཨུཙྪིཛྫཏི ཝིནསྶཏཱི’ཏི གཎྷནྟསྶ ཨུཙྪེདགཧཎཱཀཱརཔྤཝཏྟཱ དིཊྛི. ཨནྟཝཱཏི པརིཏྟཀསིཎལཱབྷིནོ ‘སུཔྤམཏྟེ ཝཱ སརཱཝམཏྟེ ཝཱ’ ཀསིཎེ སམཱཔནྣསྶ ཨནྟོསམཱཔཏྟིཡཾ པཝཏྟིཏརཱུཔཱརཱུཔདྷམྨེ ལོཀོཏི ཙ ཀསིཎཔརིཙྪེདནྟེན ཙ ‘ཨནྟཝཱ’ཏི གཎྷནྟསྶ ‘ཨནྟཝཱ ལོཀོ’ཏི གཧཎཱཀཱརཔྤཝཏྟཱ དིཊྛི. སཱ སསྶཏདིཊྛིཔི ཧོཏི ཨུཙྪེདདིཊྛིཔི. ཝིཔུལཀསིཎལཱབྷིནོ པན ཏསྨིཾ ཀསིཎེ སམཱཔནྣསྶ ཨནྟོསམཱཔཏྟིཡཾ པཝཏྟིཏརཱུཔཱརཱུཔདྷམྨེ ལོཀོཏི ཙ ཀསིཎཔརིཙྪེདནྟེན ¶ ཙ ‘ཨནནྟོ’ཏི གཎྷནྟསྶ ‘ཨནནྟཝཱ ལོཀོ’ཏི གཧཎཱཀཱརཔྤཝཏྟཱ དིཊྛི. སཱ སསྶཏདིཊྛིཔི ཧོཏི, ཨུཙྪེདདིཊྛིཔི.

ཏཾ ཛཱིཝཾ ཏཾ སརཱིརནྟི བྷེདནདྷམྨསྶ སརཱིརསྶེཝ ‘ཛཱིཝ’ནྟི གཧིཏཏྟཱ སརཱིརེ ཨུཙྪིཛྫམཱནེ ‘ཛཱིཝམྤི ཨུཙྪིཛྫཏཱི’ཏི ཨུཙྪེདགཧཎཱཀཱརཔྤཝཏྟཱ དིཊྛི. དུཏིཡཔདེ སརཱིརཏོ ཨཉྙསྶ ཛཱིཝསྶ གཧིཏཏྟཱ སརཱིརེ ཨུཙྪིཛྫམཱནེཔི ‘ཛཱིཝཾ ན ཨུཙྪིཛྫཏཱི’ཏི སསྶཏགཧཎཱཀཱརཔྤཝཏྟཱ དིཊྛི. ཧོཏི ཏཐཱགཏོ པརཾ མརཎཱཏིཨཱདཱིསུ སཏྟོ ཏཐཱགཏོ ནཱམ. སོ པརཾ མརཎཱ ཧོཏཱིཏི གཎྷཏོ པཋམཱ སསྶཏདིཊྛི. ན ཧོཏཱིཏི གཎྷཏོ དུཏིཡཱ ཨུཙྪེདདིཊྛི. ཧོཏི ཙ ན ཙ ཧོཏཱིཏི གཎྷཏོ ཏཏིཡཱ ཨེཀཙྩསསྶཏདིཊྛི. ནེཝ ཧོཏི ན ནཧོཏཱིཏི གཎྷཏོ ཙཏུཏྠཱ ཨམརཱཝིཀྑེཔདིཊྛི. ཨིམེ དྷམྨཱ ཨཱསཝཱཏི ཨིམེ ཀཱམཱསཝཉྩ བྷཝཱསཝཉྩ རཱགཝསེན ཨེཀཏོ ཀཏྭཱ, སངྑེཔཏོ ཏཡོ, ཝིཏྠཱརཏོ ཙཏྟཱརོ དྷམྨཱ ཨཱསཝཱ ནཱམ.

ཡོ ¶ པན བྲཧྨཱནཾ ཝིམཱནཀཔྤརུཀྑཨཱབྷརཎེསུ ཚནྡརཱགོ ཨུཔྤཛྫཏི, སོ ཀཱམཱསཝོ ཧོཏི ན ཧོཏཱིཏི? ན ཧོཏི. ཀསྨཱ? པཉྩཀཱམགུཎིཀསྶ རཱགསྶ ཨིདྷེཝ པཧཱིནཏྟཱ. ཧེཏུགོཙྪཀཾ པན པཏྭཱ ལོབྷོ ཧེཏུ ནཱམ ཧོཏི. གནྠགོཙྪཀཾ པཏྭཱ ཨབྷིཛ྄ཛྷཱཀཱཡགནྠོ ནཱམ. ཀིལེསགོཙྪཀཾ པཏྭཱ ལོབྷོ ཀིལེསོ ནཱམ ཧོཏི. དིཊྛིསཧཛཱཏོ པན རཱགོ ཀཱམཱསཝོ ཧོཏི ན ཧོཏཱིཏི? ན ཧོཏི; དིཊྛིརཱགོ ནཱམ ཧོཏི. ཝུཏྟཉྷེཏཾ ‘‘དིཊྛིརཱགརཏྟེ པུརིསཔུགྒལེ དིནྣདཱནཾ ན མཧཔྥལཾ ཧོཏི, ན མཧཱནིསཾས’’ནྟི ¶ (པཊི. མ. ༡.༡༢༩).

ཨིམེ པན ཨཱསཝེ ཀིལེསཔཊིཔཱཊིཡཱཔི ཨཱཧརིཏུཾ ཝཊྚཏི, མགྒཔཊིཔཱཊིཡཱཔི. ཀིལེསཔཊིཔཱཊིཡཱ ཀཱམཱསཝོ ཨནཱགཱམིམགྒེན པཧཱིཡཏི, བྷཝཱསཝོ ཨརཧཏྟམགྒེན, དིཊྛཱསཝོ སོཏཱཔཏྟིམགྒེན, ཨཝིཛྫཱསཝོ ཨརཧཏྟམགྒེན. མགྒཔཊིཔཱཊིཡཱ སོཏཱཔཏྟིམགྒེན དིཊྛཱསཝོ པཧཱིཡཏི, ཨནཱགཱམིམགྒེན ཀཱམཱསཝོ, ཨརཧཏྟམགྒེན བྷཝཱསཝོ ཨཝིཛྫཱསཝོ ཙཱཏི.

༡༡༢༡. སཾཡོཛནེསུ མཱནནིདྡེསེ སེཡྻོཧམསྨཱིཏི མཱནོཏི ཨུཏྟམཊྛེན ‘ཨཧཾ སེཡྻོ’ཏི ཨེཝཾ ཨུཔྤནྣམཱནོ. སདིསོཧམསྨཱིཏི མཱནོཏི ¶ སམསམཊྛེན ‘ཨཧཾ སདིསོ’ཏི ཨེཝཾ ཨུཔྤནྣམཱནོ. ཧཱིནོཧམསྨཱིཏི མཱནོཏི ལཱམཀཊྛེན ‘ཨཧཾ ཧཱིནོ’ཏི ཨེཝཾ ཨུཔྤནྣམཱནོ. ཨེཝཾ སེཡྻམཱནོ སདིསམཱནོ ཧཱིནམཱནོཏི ཨིམེ ཏཡོ མཱནཱ ཏིཎྞཾ ཛནཱནཾ ཨུཔྤཛྫནྟི. སེཡྻསྶཱཔི ཧི ‘ཨཧཾ སེཡྻོ སདིསོ ཧཱིནོ’ཏི ཏཡོ མཱནཱ ཨུཔྤཛྫནྟི. སདིསསྶཱཔི, ཧཱིནསྶཱཔི. ཏཏྠ སེཡྻསྶ སེཡྻམཱནོཝ ཡཱཐཱཝམཱནོ, ཨིཏརེ དྭེ ཨཡཱཐཱཝམཱནཱ. སདིསསྶ སདིསམཱནོཝ…པེ… ཧཱིནསྶ ཧཱིནམཱནོཝ ཡཱཐཱཝམཱནོ, ཨིཏརེ དྭེ ཨཡཱཐཱཝམཱནཱ. ཨིམིནཱ ཀིཾ ཀཐིཏཾ? ཨེཀསྶ ཏཡོ མཱནཱ ཨུཔྤཛྫནྟཱིཏི ཀཐིཏཾ. ཁུདྡཀཝཏྠུཀེ པན པཋམཀམཱནབྷཱཛནཱིཡེ ཨེཀོ མཱནོ ཏིཎྞཾ ཛནཱནཾ ཨུཔྤཛྫཏཱིཏི ཀཐིཏོ.

མཱནཀརཎཝསེན མཱནོ. མཉྙནཱ མཉྙིཏཏྟནྟི ཨཱཀཱརབྷཱཝནིདྡེསཱ. ཨུསྶིཏཊྛེན ཨུནྣཏི. ཡསྶུཔྤཛྫཏི ཏཾ པུགྒལཾ ཨུནྣཱམེཏི, ཨུཀྑིཔིཏྭཱ ཋཔེཏཱིཏི ཨུནྣམོ. སམུསྶིཏཊྛེན དྷཛོ. ཨུཀྑིཔནཊྛེན ཙིཏྟཾ སམྤགྒཎྷཱཏཱིཏི སམྤགྒཱཧོ. ཀེཏུ ཝུཙྩཏི བཧཱུསུ དྷཛེསུ ཨཙྩུགྒཏདྷཛོ. མཱནོཔི པུནཔྤུནཾ ཨུཔྤཛྫམཱནོ ཨཔརཱཔརེ ཨུཔཱདཱཡ ཨཙྩུགྒཏཊྛེན ཀེཏུ ཝིཡཱཏི ‘ཀེཏུ’. ཀེཏུཾ ཨིཙྪཏཱིཏི ཀེཏུཀམྱཾ, ཏསྶ བྷཱཝོ ཀེཏུཀམྱཏཱ. སཱ པན ཙིཏྟསྶ, ན ཨཏྟནོ. ཏེན ཝུཏྟཾ – ‘ཀེཏུཀམྱཏཱ ¶ ཙིཏྟསྶཱ’ཏི. མཱནསམྤཡུཏྟཉྷི ཙིཏྟཾ ཀེཏུཾ ཨིཙྪཏི. ཏསྶ ཙ བྷཱཝོ ཀེཏུཀམྱཏཱ; ཀེཏུསངྑཱཏོ མཱནོཏི.

༡༡༢༦. ཨིསྶཱནིདྡེསེ ¶ ཡཱ པརལཱབྷསཀྐཱརགརུཀཱརམཱནནཝནྡནཔཱུཛནཱསུ ཨིསྶཱཏི ཡཱ ཨེཏེསུ པརེསཾ ལཱབྷཱདཱིསུ ‘ཀིཾ ཨིམིནཱ ཨིམེས’ནྟི པརསམྤཏྟིཁིཡྻནལཀྑཎཱ ཨིསྶཱ. ཏཏྠ ལཱབྷོཏི ཙཱིཝརཱདཱིནཾ ཙཏུནྣཾ པཙྩཡཱནཾ པཊིལཱབྷོ. ཨིསྶུཀཱི ཧི པུགྒལོ པརསྶ ཏཾ ལཱབྷཾ ཁིཡྻཏི, ‘ཀིཾ ཨིམསྶ ཨིམིནཱ’ཏི ན ཨིཙྪཏི. སཀྐཱརོཏི ཏེསཾཡེཝ པཙྩཡཱནཾ སུཀཏཱནཾ སུནྡརཱནཾ པཊིལཱབྷོ. གརུཀཱརོཏི གརུཀིརིཡཱ, བྷཱརིཡཀརཎཾ. མཱནནནྟི མནེན པིཡཀརཎཾ. ཝནྡནནྟི པཉྩཔཏིཊྛིཏེན ཝནྡནཾ. པཱུཛནཱཏི གནྡྷམཱལཱདཱིཧི པཱུཛནཱ. ཨིསྶཱཡནཝསེན ཨིསྶཱ. ཨིསྶཱཀཱརོ ཨིསྶཱཡནཱ. ཨིསྶཱཡིཏབྷཱཝོ ཨིསྶཱཡིཏཏྟཾ. ཨུསཱུཡཱདཱིནི ཨིསྶཱདིཝེཝཙནཱནི.

ཨིམིསྶཱ ¶ པན ཨིསྶཱཡ ཁིཡྻནལཀྑཎཾ ཨཱགཱརིཀེནཱཔི ཨནཱགཱརིཀེནཱཔི དཱིཔེཏབྦཾ. ཨཱགཱརིཀོ ཧི ཨེཀཙྩོ ཀསིཝཎིཛྫཱདཱིསུ ཨཉྙཏརེན ཨཱཛཱིཝེན ཨཏྟནོ པུརིསཀཱརཾ ནིསྶཱཡ བྷདྡཀཾ ཡཱནཾ ཝཱ ཝཱཧནཾ ཝཱ རཏནཾ ཝཱ ལབྷཏི. ཨཔརོ ཏསྶ ཨལཱབྷཏྠིཀོ ཏེན ལཱབྷེན ན ཏུསྶཏི. ‘ཀདཱ ནུ ཁོ ཨེས ཨིམཱཡ སམྤཏྟིཡཱ པརིཧཱཡིཏྭཱ ཀཔཎོ ཧུཏྭཱ ཙརིསྶཏཱི’ཏི ཙིནྟེཏྭཱ ཨེཀེན ཀཱརཎེན ཏསྨིཾ ཏཱཡ སམྤཏྟིཡཱ པརིཧཱིནེ ཨཏྟམནོ ཧོཏི. ཨནཱགཱརིཀོཔི ཨེཀོ ཨིསྶཱམནཀོ ཨཉྙཾ ཨཏྟནོ སུཏཔརིཡཏྟིཨཱདཱིནི ནིསྶཱཡ ཨུཔྤནྣལཱབྷཱདིསམྤཏྟིཾ དིསྭཱ ‘ཀདཱ ནུ ཁོ ཨེསོ ཨིམེཧི ལཱབྷཱདཱིཧི པརིཧཱཡིསྶཏཱི’ཏི ཙིནྟེཏྭཱ, ཡདཱ ཏཾ ཨེཀེན ཀཱརཎེན པརིཧཱིནཾ པསྶཏི, ཏདཱ ཨཏྟམནོ ཧོཏི. ཨེཝཾ པརསམྤཏྟིཁིཡྻནལཀྑཎཱ ‘ཨིསྶཱ’ཏི ཝེདིཏབྦཱ.

༡༡༢༧. མཙྪརིཡནིདྡེསེ ཝཏྠུཏོ མཙྪརིཡདསྶནཏྠཾ ‘པཉྩ མཙྪརིཡཱནི ཨཱཝཱསམཙྪརིཡ’ནྟིཨཱདི ཝུཏྟཾ. ཏཏྠ ཨཱཝཱསེ མཙྪརིཡཾ ཨཱཝཱསམཙྪརིཡཾ. སེསཔདེསུཔི ཨེསེཝ ནཡོ.

ཨཱཝཱསོ ནཱམ སཀལཱརཱམོཔི པརིཝེཎམྤི ཨེཀོཝརཀོཔི རཏྟིཊྛཱནདིཝཱཊྛཱནཱདཱིནིཔི. ཏེསུ ཝསནྟཱ སུཁཾ ཝསནྟི པཙྩཡེ ལབྷནྟི. ཨེཀོ བྷིཀྑུ ཝཏྟསམྤནྣསྶེཝ པེསལསྶ བྷིཀྑུནོ ཏཏྠ ཨཱགམནཾ ན ཨིཙྪཏི. ཨཱགཏོཔི ‘ཁིཔྤཾ ¶ གཙྪཏཱུ’ཏི ཙིནྟེཏི. ཨིདཾ ‘ཨཱཝཱསམཙྪརིཡཾ’ ¶ ནཱམ. བྷཎྜནཀཱརཀཱདཱིནཾ པན ཏཏྠ ཝཱསཾ ཨནིཙྪཏོ ཨཱཝཱསམཙྪརིཡཾ ནཱམ ན ཧོཏི.

ཀུལནྟི ཨུཔཊྛཱཀཀུལམྤི ཉཱཏིཀུལམྤི. ཏཏྠ ཨཉྙསྶ ཨུཔསངྐམནཾ ཨནིཙྪཏོ ཀུལམཙྪརིཡཾ ཧོཏི. པཱཔཔུགྒལསྶ པན ཨུཔསངྐམནཾ ཨནིཙྪནྟོཔི མཙྪརཱི ནཱམ ན ཧོཏི. སོ ཧི ཏེསཾ པསཱདབྷེདཱཡ པཊིཔཛྫཏི. པསཱདཾ རཀྑིཏུཾ སམཏྠསྶེཝ པན བྷིཀྑུནོ ཏཏྠ ཨུཔསངྐམནཾ ཨནིཙྪནྟོ མཙྪརཱི ནཱམ ཧོཏི.

ལཱབྷོཏི ཙཏུཔཙྩཡལཱབྷོཝ. ཏཾ ཨཉྙསྨིཾ སཱིལཝནྟེཡེཝ ལབྷནྟེ ‘མཱ ལབྷཏཱུ’ཏི ཙིནྟེནྟསྶ ལཱབྷམཙྪརིཡཾ ཧོཏི. ཡོ པན སདྡྷཱདེཡྻཾ ཝིནིཔཱཏེཏི, ཨཔརིབྷོགདུཔྤརིབྷོགཱདིཝསེན ཝིནཱསེཏི, པཱུཏིབྷཱཝཾ གཙྪནྟམྤི ཨཉྙསྶ ན དེཏི, ཏཾ དིསྭཱ ‘སཙེ ཨིམཾ ཨེས ན ལབྷེཡྻ ¶ , ཨཉྙོ སཱིལཝཱ ལབྷེཡྻ, པརིབྷོགཾ གཙྪེཡྻཱ’ཏི ཙིནྟེནྟསྶ མཙྪརིཡཾ ནཱམ ནཏྠི.

ཝཎྞོ ནཱམ སརཱིརཝཎྞོཔི གུཎཝཎྞོཔི. ཏཏྠ སརཱིརཝཎྞེ མཙྪརིཔུགྒལོ ‘པརོ པཱསཱདིཀོ རཱུཔཝཱ’ཏི ཝུཏྟེ ཏཾ ན ཀཐེཏུཀཱམོ ཧོཏི. གུཎཝཎྞམཙྪརཱི སཱིལེན དྷུཏངྒེན པཊིཔདཱཡ ཨཱཙཱརེན ཝཎྞཾ ན ཀཐེཏུཀཱམོ ཧོཏི.

དྷམྨོཏི པརིཡཏྟིདྷམྨོ ཙ པཊིཝེདྷདྷམྨོ ཙ. ཏཏྠ ཨརིཡསཱཝཀཱ པཊིཝེདྷདྷམྨཾ ན མཙྪརཱཡནྟི, ཨཏྟནཱ པཊིཝིདྡྷདྷམྨེ སདེཝཀསྶ ལོཀསྶ པཊིཝེདྷཾ ཨིཙྪནྟི. ཏཾ པན པཊིཝེདྷཾ ‘པརེ ཛཱནནྟཱུ’ཏི ཨིཙྪནྟི. ཏནྟིདྷམྨེཡེཝ པན དྷམྨམཙྪརིཡཾ ནཱམ ཧོཏི. ཏེན སམནྣཱགཏོ པུགྒལོ ཡཾ གུལ༹ྷཾ གནྠཾ ཝཱ ཀཐཱམགྒཾ ཝཱ ཛཱནཱཏི ཏཾ ཨཉྙཾ ན ཛཱནཱཔེཏུཀཱམོ ཧོཏི. ཡོ པན པུགྒལཾ ཨུཔཔརིཀྑིཏྭཱ དྷམྨཱནུགྒཧེན, དྷམྨཾ ཝཱ ཨུཔཔརིཀྑིཏྭཱ པུགྒལཱནུགྒཧེན ན དེཏི, ཨཡཾ དྷམྨམཙྪརཱི ནཱམ ན ཧོཏི.

ཏཏྠ ཨེཀཙྩོ པུགྒལོ ལོལོ ཧོཏི, ཀཱལེན སམཎོ ཧོཏི, ཀཱལེན བྲཱཧྨཎོ, ཀཱལེན ¶ ནིགཎྛོ. ཡོ ཧི བྷིཀྑུ ‘ཨཡཾ པུགྒལོ པཝེཎིཨཱགཏཾ ཏནྟིཾ སཎྷཾ སུཁུམཾ དྷམྨནྟརཾ བྷིནྡིཏྭཱ ཨཱལུལི༹སྶཏཱི’ཏི ན དེཏི, ཨཡཾ པུགྒལཾ ཨུཔཔརིཀྑིཏྭཱ དྷམྨཱནུགྒཧེན ན དེཏི ནཱམ ¶ . ཡོ པན ‘ཨཡཾ དྷམྨོ སཎྷོ སུཁུམོ, སཙཱཡཾ པུགྒལོ གཎྷིསྶཏི ཨཉྙཾ བྱཱཀརིཏྭཱ ཨཏྟཱནཾ ཨཱཝིཀཏྭཱ ནསྶིསྶཏཱི’ཏི ན དེཏི, ཨཡཾ དྷམྨཾ ཨུཔཔརིཀྑིཏྭཱ པུགྒལཱནུགྒཧེན ན དེཏི ནཱམ. ཡོ པན ‘སཙཱཡཾ ཨིམཾ དྷམྨཾ གཎྷིསྶཏི, ཨམྷཱཀཾ སམཡཾ བྷིནྡིཏུཾ སམཏྠོ བྷཝིསྶཏཱི’ཏི ན དེཏི, ཨཡཾ དྷམྨམཙྪརཱི ནཱམ ཧོཏི.

ཨིམེསུ པཉྩསུ མཙྪརིཡེསུ ཨཱཝཱསམཙྪརིཡེན ཏཱཝ ཡཀྑོ ཝཱ པེཏོ ཝཱ ཧུཏྭཱ ཏསྶེཝ ཨཱཝཱསསྶ སངྐཱརཾ སཱིསེན ཨུཀྑིཔིཏྭཱ ཝིཙརཏི. ཀུལམཙྪརིཡེན ཏསྨིཾ ཀུལེ ཨཉྙེསཾ དཱནམཱནནཱདཱིནི ཀརོནྟེ དིསྭཱ ‘བྷིནྣཾ ཝཏིདཾ ཀུལཾ མམཱ’ཏི ཙིནྟཡཏོ ལོཧིཏམྤི མུཁཏོ ཨུགྒཙྪཏི, ཀུཙྪིཝིརེཙནམྤི ཧོཏི, ཨནྟཱནིཔི ཁཎྜཱཁཎྜཱནི ཧུཏྭཱ ནིཀྑམནྟི. ལཱབྷམཙྪརིཡེན སངྒྷསྶ ཝཱ གཎསྶ ཝཱ སནྟཀེ ལཱབྷེ མཙྪརཱཡིཏྭཱ པུགྒལིཀཔརིབྷོགཾ ཝིཡ པརིབྷུཉྫིཏྭཱ ཡཀྑོ ཝཱ པེཏོ ཝཱ མཧཱཨཛགརོ ཝཱ ཧུཏྭཱ ནིབྦཏྟཏི. སརཱིརཝཎྞགུཎཝཎྞམཙྪརེན པརིཡཏྟིདྷམྨམཙྪརིཡེན ཙ ཨཏྟནོཝ ¶ ཝཎྞཾ ཝཎྞེཏི, པརེསཾ ཝཎྞེ ‘ཀིཾ ཝཎྞོ ཨེསོ’ཏི ཏཾ ཏཾ དོསཾ ཝདནྟོ པརིཡཏྟིདྷམྨཉྩ ཀསྶཙི ཀིཉྩི ཨདེནྟོ དུབྦཎྞོ ཙེཝ ཨེལ༹མཱུགོ ཙ ཧོཏི.

ཨཔིཙ ཨཱཝཱསམཙྪརིཡེན ལོཧགེཧེ པཙྩཏི. ཀུལམཙྪརིཡེན ཨཔྤལཱབྷོ ཧོཏི. ལཱབྷམཙྪརིཡེན གཱུཐནིརཡེ ནིབྦཏྟཏི. ཝཎྞམཙྪརིཡེན བྷཝེ བྷཝེ ནིབྦཏྟསྶ ཝཎྞོ ནཱམ ན ཧོཏི. དྷམྨམཙྪརིཡེན ཀུཀྐུལ༹ནིརཡེ ནིབྦཏྟཏཱིཏི.

མཙྪརཱཡནཝསེན མཙྪེརཾ. མཙྪརཱཡནཱཀཱརོ མཙྪརཱཡནཱ. མཙྪརེན ཨཡིཏསྶ མཙྪེརསམངྒིནོ བྷཱཝོ མཙྪརཱཡིཏཏྟཾ. ‘མཡ྄ཧམེཝ ཧོནྟུ མཱ ཨཉྙསྶཱ’ཏི སབྦཱཔི ཨཏྟནོ སམྤཏྟིཡོ བྱཱཔེཏུཾ ན ཨིཙྪཏཱིཏི ཝིཝིཙྪོ. ཝིཝིཙྪསྶ བྷཱཝོ ཝེཝིཙྪཾ, མུདུམཙྪརིཡསྶེཏཾ ནཱམཾ. ཀདརིཡོ ¶ ཝུཙྩཏི ཨནཱདརོ. ཏསྶ བྷཱཝོ ཀདརིཡཾ. ཐདྡྷམཙྪརིཡསྶེཏཾ ནཱམཾ. ཏེན ཧི སམནྣཱགཏོ པུགྒལོ པརམྤི པརེསཾ དདམཱནཾ ནིཝཱརེཏི. ཝུཏྟམྤི ཙེཏཾ –

ཀདརིཡོ པཱཔསངྐཔྤོ, མིཙྪཱདིཊྛི ཨནཱདརོ;

དདམཱནཾ ནིཝཱརེཏི, ཡཱཙམཱནཱན བྷོཛནནྟི. (སཾ. ནི. ༡.༡༣༢);

ཡཱཙཀེ ¶ དིསྭཱ ཀཊུཀབྷཱཝེན ཙིཏྟཾ ཨཉྩཏི སངྐོཙེཏཱིཏི ཀཊུཀཉྩུཀོ. ཏསྶ བྷཱཝོ ཀཊུཀཉྩུཀཏཱ. ཨཔརོ ནཡོ – ཀཊུཀཉྩུཀཏཱ ཝུཙྩཏི ཀཊཙྪུགྒཱཧོ. སམཏིཏྟིཀཔུཎྞཱཡ ཧི ཨུཀྑལིཡཱ བྷཏྟཾ གཎྷནྟོ སབྦཏོབྷཱགེན སངྐུཊིཏེན ཨགྒཀཊཙྪུནཱ གཎྷཱཏི, པཱུརེཏྭཱ གཧེཏུཾ ན སཀྐོཏི; ཨེཝཾ མཙྪརིཔུགྒལསྶ ཙིཏྟཾ སངྐུཙཏི. ཏསྨིཾ སངྐུཙིཏེ ཀཱཡོཔི ཏཐེཝ སངྐུཙཏི, པཊིཀུཊཏི, པཊིནིཝཏྟཏི, ན སམྤསཱརིཡཏཱིཏི མཙྪེརཾ ‘ཀཊུཀཉྩུཀཏཱ’ཏི ཝུཏྟཾ.

ཨགྒཧིཏཏྟཾ ཙིཏྟསྶཱཏི པརེསཾ ཨུཔཀཱརཀརཎེ དཱནཱདིནཱ ཨཱཀཱརེན ཡཐཱ ན སམྤསཱརིཡཏི, ཨེཝཾ ཨཱཝརིཏྭཱ གཧིཏབྷཱཝོ ཙིཏྟསྶ. ཡསྨཱ པན མཙྪརིཔུགྒལོ ཨཏྟནོ སནྟཀཾ པརེསཾ ཨདཱཏུཀཱམོ ཧོཏི པརསནྟཀཾ གཎྷིཏུཀཱམོ, ཏསྨཱ ‘ཨིདཾ ཨཙྪརིཡཾ མཡ྄ཧམེཝ ཧོཏུ, མཱ ཨཉྙསྶཱ’ཏི པཝཏྟིཝསེནསྶ ཨཏྟསམྤཏྟིནིགཱུཧནལཀྑཎཏཱ ཨཏྟསམྤཏྟིགྒཧཎལཀྑཎཏཱ ¶ ཝཱ ཝེདིཏབྦཱ. སེསཾ ཨིམསྨིཾ གོཙྪཀེ ཨུཏྟཱནཏྠམེཝ.

ཨིམཱནི པན སཾཡོཛནཱནི ཀིལེསཔཊིཔཱཊིཡཱཔི ཨཱཧརིཏུཾ ཝཊྚཏི མགྒཔཊིཔཱཊིཡཱཔི. ཀིལེསཔཊིཔཱཊིཡཱ ཀཱམརཱགཔཊིགྷསཾཡོཛནཱནི ཨནཱགཱམིམགྒེན པཧཱིཡནྟི, མཱནསཾཡོཛནཾ ཨརཧཏྟམགྒེན, དིཊྛིཝིཙིཀིཙྪཱསཱིལབྦཏཔརཱམཱསཱ སོཏཱཔཏྟིམགྒེན, བྷཝརཱགསཾཡོཛནཾ ཨརཧཏྟམགྒེན, ཨིསྶཱམཙྪརིཡཱནི སོཏཱཔཏྟིམགྒེན, ཨཝིཛྫཱ ཨརཧཏྟམགྒེན. མགྒཔཊིཔཱཊིཡཱ དིཊྛིཝིཙིཀིཙྪཱསཱིལབྦཏཔརཱམཱསཨིསྶཱམཙྪརིཡཱནི སོཏཱཔཏྟིམགྒེན པཧཱིཡནྟི, ཀཱམརཱགཔཊིགྷཱ ¶ ཨནཱགཱམིམགྒེན, མཱནབྷཝརཱགཨཝིཛྫཱ ཨརཧཏྟམགྒེནཱཏི.

༡༡༤༠. གནྠགོཙྪཀེ ནཱམཀཱཡཾ གནྠེཏི, ཙུཏིཔཊིསནྡྷིཝསེན ཝཊྚསྨིཾ གྷཊེཏཱིཏི ཀཱཡགནྠོ. སབྦཉྙུབྷཱསིཏམྤི པཊིཀྑིཔིཏྭཱ སསྶཏོ ལོཀོ ཨིདམེཝ སཙྩཾ མོགྷམཉྙནྟི ཨིམིནཱ ཨཱཀཱརེན ཨབྷིནིཝིསཏཱིཏི ཨིདཾསཙྩཱབྷིནིཝེསོ. ཡསྨཱ པན ཨབྷིཛ྄ཛྷཱཀཱམརཱགཱནཾ ཝིསེསོ ཨཏྠི, ཏསྨཱ ཨབྷིཛ྄ཛྷཱཀཱཡགནྠསྶ པདབྷཱཛནེ ‘‘ཡོ ཀཱམེསུ ཀཱམཙྪནྡོ ཀཱམརཱགོ’’ཏི ཨཝཏྭཱ ཡོ རཱགོ སཱརཱགོཏིཨཱདི ཝུཏྟཾ. ཨིམིནཱ ཡཾ ཧེཊྛཱ ཝུཏྟཾ ‘བྲཧྨཱནཾ ཝིམཱནཱདཱིསུ ཚནྡརཱགོ ཀཱམཱསཝོ ན ཧོཏི, གནྠགོཙྪཀཾ པཏྭཱ ཨབྷིཛ྄ཛྷཱཀཱཡགནྠོ ཧོཏཱི’ཏི ཏཾ སུཝུཏྟནྟི ཝེདིཏབྦཾ. པརཏོ ཀིལེསགོཙྪཀེཔི ཨེསེཝ ནཡོ. ཋཔེཏྭཱ སཱིལབྦཏཔརཱམཱསནྟི ཨིདཾ ཡསྨཱ སཱིལབྦཏཔརཱམཱསོ ‘ཨིདམེཝ སཙྩ’ནྟིཨཱདིནཱ ཨཱཀཱརེན ནཱབྷིནིཝིསཏི, ‘སཱིལེན སུདྡྷཱི’ཏིཨཱདིནཱ ¶ ཨེཝ པན ཨབྷིནིཝིསཏི, ཏསྨཱ མིཙྪཱདིཊྛིབྷཱུཏམྤི ཏཾ པཊིཀྑིཔནྟོ ‘ཋཔེཏྭཱ’ཏི ཨཱཧ.

༡༡༦༢. ནཱིཝརཎགོཙྪཀསྶ ཐིནམིདྡྷནིདྡེསེ ཙིཏྟསྶ ཨཀལླཏཱཏི ཙིཏྟསྶ གིལཱནབྷཱཝོ. གིལཱནོ ཧི ཨཀལླཀོཏི ཝུཙྩཏི. ཝིནཡེཔི ཝུཏྟཾ – ‘‘ནཱཧཾ, བྷནྟེ, ཨཀལླཀོ’’ཏི (པཱརཱ. ༡༥༡). ཨཀམྨཉྙཏཱཏི ཙིཏྟགེལཉྙསངྑཱཏོཝ ཨཀམྨཉྙཏཱཀཱརོ. ཨོལཱིཡནཱཏི ཨོལཱིཡནཱཀཱརོ. ཨིརིཡཱཔཐིཀཙིཏྟཉྷི ཨིརིཡཱཔཐཾ སནྡྷཱརེཏུཾ ཨསཀྐོནྟཾ, རུཀྑེ ཝགྒུལི ཝིཡ, ཁཱིལེ ལགྒིཏཕཱཎིཏཝཱརཀོ ཝིཡ ཙ, ཨོལཱིཡཏི. ཏསྶ ཏཾ ཨཱཀཱརཾ ¶ སནྡྷཱཡ ཨོལཱིཡནཱཏི ཝུཏྟཾ. དུཏིཡཔདཾ ཨུཔསགྒཝསེན ཝཌྜྷིཏཾ. ལཱིནནྟི ཨཝིཔྥཱརིཀཏཱཡ པཊིཀུཊིཏཾ. ཨིཏརེ དྭེ ཨཱཀཱརབྷཱཝནིདྡེསཱ. ཐིནནྟི སཔྤིཔིཎྜོ ཝིཡ ཨཝིཔྥཱརིཀཏཱཡ གྷནབྷཱཝེན ཋིཏཾ. ཐིཡནཱཏི ཨཱཀཱརནིདྡེསོ. ཐིཡིཏབྷཱཝོ ཐིཡིཏཏྟཾ, ཨཝིཔྥཱརཝསེནེཝ ཐདྡྷཏཱཏི ཨཏྠོ.

༡༡༦༣. ཀཱཡསྶཱཏི ¶ ཁནྡྷཏྟཡསངྑཱཏསྶ ནཱམཀཱཡསྶ. ཨཀལླཏཱ ཨཀམྨཉྙཏཱཏི ཧེཊྛཱ ཝུཏྟནཡམེཝ. མེགྷོ ཝིཡ ཨཱཀཱསཾ ཀཱཡཾ ཨོནཡ྄ཧཏཱིཏི ཨོནཱཧོ. སབྦཏོབྷཱགེན ཨོནཱཧོ པརིཡོནཱཧོ. ཨབྦྷནྟརེ སམོརུནྡྷཏཱིཏི ཨནྟོསམོརོདྷོ. ཡཐཱ ཧི ནགརེ རུནྡྷིཏྭཱ གཧིཏེ མནུསྶཱ བཧི ནིཀྑམིཏུཾ ན ལབྷནྟི, ཨེཝམྤི མིདྡྷེན སམོརུདྡྷཱ དྷམྨཱ ཝིཔྥཱརཝསེན ནིཀྑམིཏུཾ ན ལབྷནྟི. ཏསྨཱ ཨནྟོསམོརོདྷོཏི ཝུཏྟཾ. མེདྷཏཱིཏི མིདྡྷཾ; ཨཀམྨཉྙབྷཱཝེན ཝིཧིཾསཏཱིཏི ཨཏྠོ. སུཔནྟི ཏེནཱཏི སོཔྤཾ. ཨཀྑིདལཱདཱིནཾ པཙལབྷཱཝཾ ཀརོཏཱིཏི པཙལཱཡིཀཱ. སུཔནཱ སུཔིཏཏྟནྟི ཨཱཀཱརབྷཱཝནིདྡེསཱ. ཡཾ པན ཏེསཾ པུརཏོ སོཔྤཔདཾ ཏསྶ པུནཝཙནེ ཀཱརཎཾ ཝུཏྟམེཝ. ཨིདཾ ཝུཙྩཏི ཐིནམིདྡྷནཱིཝརཎནྟི ཨིདཾ ཐིནཉྩ མིདྡྷཉྩ ཨེཀཏོ ཀཏྭཱ ཨཱཝརཎཊྛེན ཐིནམིདྡྷནཱིཝརཎནྟི ཝུཙྩཏི. ཡཾ ཡེབྷུཡྻེན སེཀྑཔུཐུཛྫནཱནཾ ནིདྡཱཡ པུབྦབྷཱགཨཔརབྷཱགེསུ ཨུཔྤཛྫཏི ཏཾ ཨརཧཏྟམགྒེན སམུཙྪིཛྫཏི. ཁཱིཎཱསཝཱནཾ པན ཀརཛཀཱཡསྶ དུབྦལབྷཱཝེན བྷཝངྒོཏརཎཾ ཧོཏི, ཏསྨིཾ ཨསམྨིསྶེ ཝཏྟམཱནེ ཏེ སུཔནྟི, སཱ ནེསཾ ནིདྡཱ ནཱམ ཧོཏི. ཏེནཱཧ བྷགཝཱ – ‘‘ཨབྷིཛཱནཱམི ཁོ པནཱཧཾ, ཨགྒིཝེསྶན, གིམྷཱནཾ པཙྪིམེ མཱསེ ཙཏུགྒུཎཾ སངྒྷཱཊིཾ པཉྙཔེཏྭཱ དཀྑིཎེན པསྶེན སཏོ སམྤཛཱནོ ནིདྡཾ ཨོཀྐམིཏཱ’’ཏི (མ. ནི. ༡.༣༨༧). ཨེཝརཱུཔོ པནཱཡཾ ཀརཛཀཱཡསྶ དུབྦལབྷཱཝོ ན མགྒཝཛ྄ཛྷོ, ཨུཔཱདིནྣཀེཔི ཨནུཔཱདིནྣཀེཔི ལབྦྷཏི. ཨུཔཱདིནྣཀེ ལབྦྷམཱནོ ཡདཱ ཁཱིཎཱསཝོ དཱིགྷམགྒཾ ¶ གཏོ ཧོཏི, ཨཉྙཏརཾ ཝཱ པན ཀམྨཾ ཀཏྭཱ ཀིལནྟོ, ཨེཝརཱུཔེ ཀཱལེ ལབྦྷཏི. ཨནུཔཱདིནྣཀེ ལབྦྷམཱནོ པཎྞཔུཔྥེསུ ལབྦྷཏི. ཨེཀཙྩཱནཉྷི རུཀྑཱནཾ པཎྞཱནི སཱུརིཡཱཏཔེན པསཱརིཡནྟི རཏྟིཾ པཊིཀུཊནྟི, པདུམཔུཔྥཱདཱིནི སཱུརིཡཱཏཔེན པུཔྥནྟི, རཏྟིཾ པུན པཊིཀུཊནྟི ¶ . ཨིདཾ པན མིདྡྷཾ ཨཀུསལཏྟཱ ཁཱིཎཱསཝཱནཾ ན ཧོཏཱིཏི.

ཏཏྠ ¶ སིཡཱ – ‘‘ན མིདྡྷཾ ཨཀུསལཾ. ཀསྨཱ? རཱུཔཏྟཱ. རཱུཔཉྷི ཨབྱཱཀཏཾ. ཨིདཉྩ རཱུཔཾ. ཏེནེཝེཏྠ ‘ཀཱཡསྶ ཨཀལླཏཱ ཨཀམྨཉྙཏཱ’ཏི ཀཱཡགྒཧཎཾ ཀཏ’’ནྟི. ཡདི ‘ཀཱཡསྶཱ’ཏི ཝུཏྟམཏྟེནེཝེཏཾ རཱུཔཾ, ཀཱཡཔསྶདྡྷཱདཡོཔི དྷམྨཱ རཱུཔམེཝ བྷཝེཡྻུཾ. ‘སུཁཉྩ ཀཱཡེན པཊིསཾཝེདེཏི’ (དྷ. ས. ༡༦༣; དཱི. ནི. ༡.༢༣༠) ‘ཀཱཡེན ཙེཝ པརམསཙྩཾ སཙྪིཀརོཏཱི’ཏི (མ. ནི. ༢.༡༨༣; ཨ. ནི. ༤.༡༡༣) སུཁཔཊིསཾཝེདནཔརམཏྠསཙྩསཙྪིཀརཎཱནིཔི རཱུཔཀཱཡེནེཝ སིཡུཾ. ཏསྨཱ ན ཝཏྟབྦམེཏཾ ‘རཱུཔཾ མིདྡྷ’ནྟི. ནཱམཀཱཡོ ཧེཏྠ ཀཱཡོ ནཱམ. ཡདི ནཱམཀཱཡོ, ཨཐ ཀསྨཱ ‘སོཔྤཾ པཙལཱཡིཀཱ’ཏི ཝུཏྟཾ? ན ཧི ནཱམཀཱཡོ སུཔཏི, ན ཙ པཙལཱཡཏཱིཏི. ‘ལིངྒཱདཱིནི ཝིཡ ཨིནྡྲིཡསྶ, ཏསྶ ཕལཏྟཱ. ཡཐཱ ཧི ‘ཨིཏྠིལིངྒཾ ཨིཏྠིནིམིཏྟཾ ཨིཏྠིཀུཏྟཾ ཨིཏྠཱཀཔྤོ’ཏི ཨིམཱནི ལིངྒཱདཱིནི ཨིཏྠིནྡྲིཡསྶ ཕལཏྟཱ ཝུཏྟཱནི, ཨེཝཾ ཨིམསྶཱཔི ནཱམཀཱཡགེལཉྙསངྑཱཏསྶ མིདྡྷསྶ ཕལཏྟཱ སོཔྤཱདཱིནི ཝུཏྟཱནི. མིདྡྷེ ཧི སཏི ཏཱནི ཧོནྟཱིཏི. ཕལཱུཔཙཱརེན, མིདྡྷཾ ཨརཱུཔམྤི སམཱནཾ ‘སོཔྤཾ པཙལཱཡིཀཱ སུཔནཱ སུཔིཏཏྟ’ནྟི ཝུཏྟཾ.

‘ཨཀྑིདལཱདཱིནཾ པཙལབྷཱཝཾ ཀརོཏཱིཏི པཙལཱཡིཀཱ’ཏི ཝཙནཏྠེནཱཔི ཙཱཡམཏྠོ སཱདྷིཏོཡེཝཱཏི ན རཱུཔཾ མིདྡྷཾ. ཨོནཱཧཱདཱིཧིཔི ཙསྶ ཨརཱུཔབྷཱཝོ དཱིཔིཏོཡེཝ. ན ཧི རཱུཔཾ ནཱམཀཱཡསྶ ‘ཨོནཱཧོ པརིཡོནཱཧོ ཨནྟོསམོརོདྷོ’ ཧོཏཱིཏི. ‘ནནུ ཙ ཨིམིནཱཝ ཀཱརཎེནེཏཾ རཱུཔཾ? ན ཧི ཨརཱུཔཾ ཀསྶཙི ཨོནཱཧོ, ན པརིཡོནཱཧོ, ན ཨནྟོསམོརོདྷོ ཧོཏཱི’ཏི. ཡདི ཨེཝཾ, ཨཱཝརཎམྤི ན བྷཝེཡྻ. ཏསྨཱ. ཡཐཱ ཀཱམཙྪནྡཱདཡོ ཨརཱུཔདྷམྨཱ ཨཱཝརཎཊྛེན ནཱིཝརཎཱ, ཨེཝཾ ཨིམསྶཱཔི ཨོནཱཧནཱདིཨཏྠེན ཨོནཱཧཱདིཏཱ ཝེདིཏབྦཱ. ཨཔིཙ ‘‘པཉྩ ནཱིཝརཎེ པཧཱཡ ཙེཏསོ ཨུཔཀྐིལེསེ པཉྙཱཡ དུབྦལཱིཀརཎེ’’ཏི (དཱི. ནི. ༢.༡༤༦; སཾ. ནི. ༥.༢༣༣) ཝཙནཏོཔེཏཾ ཨརཱུཔཾ. ན ཧི ¶ རཱུཔཾ ཙིཏྟུཔཀྐིལེསོ, ན པཉྙཱཡ དུབྦལཱིཀརཎཾ ཧོཏཱིཏི.

ཀསྨཱ ¶ ན ཧོཏི? ནནུ ཝུཏྟཾ –

‘‘སནྟི, བྷིཀྑཝེ, ཨེཀེ སམཎབྲཱཧྨཎཱ སུརཾ པིཝནྟི མེརཡཾ, སུརཱམེརཡཔཱནཱ ཨཔྤཊིཝིརཏཱ, ཨཡཾ, བྷིཀྑཝེ, པཋམོ སམཎབྲཱཧྨཎཱནཾ ཨུཔཀྐིལེསོ’’ཏི (ཨ. ནི. ༤.༥༠).

ཨཔརམྤི ¶ ཝུཏྟཾ ‘‘ཚ ཁོམེ, གཧཔཏིཔུཏྟ, ཨཱདཱིནཝཱ སུརཱམེརཡམཛྫཔམཱདཊྛཱནཱནུཡོགེ – སནྡིཊྛིཀཱ དྷནཛཱནི, ཀལཧཔྤཝཌྜྷནཱི, རོགཱནཾ ཨཱཡཏནཾ, ཨཀིཏྟིསཉྫནནཱི, ཀོཔཱིནནིདཾསནཱི, པཉྙཱཡ དུབྦལཱིཀརཎཱིཏྭེཝ ཚཊྛཾ པདཾ བྷཝཏཱི’’ཏི (དཱི. ནི. ༣.༢༤༨). པཙྩཀྑཏོཔི ཙེཏཾ སིདྡྷམེཝ. ཡཐཱ མཛྫེ ཨུདརགཏེ, ཙིཏྟཾ སཾཀིལིསྶཏི, པཉྙཱ དུབྦལཱ ཧོཏི, ཏསྨཱ མཛྫཾ ཝིཡ མིདྡྷམྤི ཙིཏྟསཾཀིལེསོ ཙེཝ པཉྙཱཡ དུབྦལཱིཀརཎཉྩ སིཡཱཏི. ན, པཙྩཡནིདྡེསཏོ. ཡདི ཧི མཛྫཾ སཾཀིལེསོ བྷཝེཡྻ, སོ ‘‘ཨིམེ པཉྩ ནཱིཝརཎེ པཧཱཡ ཙེཏསོ ཨུཔཀྐིལེསེ’’ཏི (མ. ནི. ༡.༢༩༧) ཝཱ, ‘‘ཨེཝམེཝ ཁོ, བྷིཀྑཝེ, པཉྩིམེ ཙིཏྟསྶ ཨུཔཀྐིལེསཱ, ཡེཧི ཨུཔཀྐིལེསེཧི ཨུཔཀྐིལིཊྛཾ ཙིཏྟཾ ན ཙེཝ མུདུ ཧོཏི, ན ཙ ཀམྨནིཡཾ, ན ཙ པབྷསྶརཾ, པབྷངྒུ ཙ, ན ཙ སམྨཱ སམཱདྷིཡཏི ཨཱསཝཱནཾ ཁཡཱཡ. ཀཏམེ པཉྩ? ཀཱམཙྪནྡོ, བྷིཀྑཝེ, ཙིཏྟསྶ ཨུཔཀྐིལེསོ’’ཏི (སཾ. ནི. ༥.༢༡༤) ཝཱ, ‘‘ཀཏམེ ཙ, བྷིཀྑཝེ, ཙིཏྟསྶ ཨུཔཀྐིལེསཱ? ཨབྷིཛ྄ཛྷཱ ཝིསམལོབྷོ ཙིཏྟསྶ ཨུཔཀྐིལེསོ’’ཏི (མ. ནི. ༡.༧༡) ཝཱ – ཨེཝམཱདཱིསུ ཨུཔཀྐིལེསནིདྡེསེསུ ནིདྡེསཾ ཨཱགཙྪེཡྻ. ཡསྨཱ པན ཏསྨིཾ པཱིཏེ ཨུཔཀྐིལེསཱ ཨུཔྤཛྫནྟི ཡེ ཙིཏྟསཾཀིལེསཱ ཙེཝ པཉྙཱཡ ཙ དུབྦལཱིཀརཎཱ ཧོནྟི, ཏསྨཱ ཏཾ ཏེསཾ པཙྩཡཏྟཱ པཙྩཡནིདྡེསཏོ ཨེཝཾ ཝུཏྟཾ. མིདྡྷཾ པན སཡམེཝ ཙིཏྟསྶ སཾཀིལེསོ ཙེཝ པཉྙཱཡ དུབྦལཱིཀརཎཉྩཱཏི ཨརཱུཔམེཝ མིདྡྷཾ.

ཀིཉྩ བྷིཡྻོ? སམྤཡོགཝཙནཏོ. ‘‘ཐིནམིདྡྷནཱིཝརཎཾ ཨཝིཛྫཱནཱིཝརཎེན ནཱིཝརཎཉྩེཝ ནཱིཝརཎསམྤཡུཏྟཉྩཱ’’ཏི (དྷ. ས. ༡༡༧༦) ཧི ཝུཏྟཾ. ཏསྨཱ སམྤཡོགཝཙནཏོ ནཡིདཾ རཱུཔཾ. ན ཧི རཱུཔཾ སམྤཡུཏྟསངྑྱཾ ལབྷཏཱིཏི. ཨཐཱཔི སིཡཱ – ‘ཡཐཱལཱབྷཝསེནེཏཾ ¶ ཝུཏྟཾ. ཡཐཱ ཧི ‘‘སིཔྤིསམྦུཀམྤི སཀྑརཀཐལམྤི མཙྪགུམྦམྤི ཙརནྟམྤི ཏིཊྛནྟམྤཱི’’ཏི (དཱི. ནི. ༡.༢༤༩; མ. ནི. ༡.༤༣༣) ཨེཝཾ ཨེཀཏོ ཀཏྭཱ ཡཐཱལཱབྷཝསེན ཝུཏྟཾ. སཀྑརཀཐལཉྷི ཏིཊྛཏི ཡེཝ ན ཙརཏི, ཨིཏརདྭཡཾ ཏིཊྛཏིཔི ཙརཏིཔི. ཨེཝམིདྷཱཔི མིདྡྷཾ ནཱིཝརཎམེཝ, ན སམྤཡུཏྟཾ ¶ , ཐིནཾ ནཱིཝརཎམྤི སམྤཡུཏྟམྤཱིཏི སབྦཾ ཨེཀཏོ ཀཏྭཱ ཡཐཱལཱབྷཝསེན ‘‘ནཱིཝརཎཉྩེཝ ནཱིཝརཎསམྤཡུཏྟཉྩཱ’’ཏི ཝུཏྟཾ. མིདྡྷཾ པན ཡཐཱ སཀྑརཀཐལཾ ཏིཊྛཏེཝ ན ཙརཏི, ཨེཝཾ ནཱིཝརཎམེཝ, ན སམྤཡུཏྟཾ. ཏསྨཱ རཱུཔམེཝ མིདྡྷནྟི. ན, རཱུཔབྷཱཝཱསིདྡྷིཏོ. སཀྑརཀཐལཉྷི ན ཙརཏཱིཏི ཝིནཱཔི སུཏྟེན སིདྡྷཾ. ཏསྨཱ ཏཏྠ ཡཐཱལཱབྷཝསེནཏྠོ ཧོཏུ ¶ . མིདྡྷཾ པན རཱུཔནྟི ཨསིདྡྷམེཏཾ. ན སཀྐཱ ཏསྶ ཨིམིནཱ སུཏྟེན རཱུཔབྷཱཝོ སཱདྷེཏུནྟི མིདྡྷསྶ རཱུཔབྷཱཝཱསིདྡྷིཏོ ན ཨིདཾ ཡཐཱལཱབྷཝསེན ཝུཏྟནྟི ཨརཱུཔམེཝ མིདྡྷཾ.

ཀིཉྩ བྷིཡྻོ? ‘ཙཏྟཏྟཱ’ཏིཨཱདིཝཙནཏོ. ཝིབྷངྒསྨིཉྷི ‘‘ཝིགཏཐིནམིདྡྷོཏི ཏསྶ ཐིནམིདྡྷསྶ ཙཏྟཏྟཱ ཝནྟཏྟཱ མུཏྟཏྟཱ པཧཱིནཏྟཱ པཊིནིསྶཊྛཏྟཱ, ཏེན ཝུཙྩཏི ཝིགཏཐིནམིདྡྷོ’’ཏི (ཝིབྷ. ༥༤༧) ཙ, ‘‘ཨིདཾ ཙིཏྟཾ ཨིམམྷཱ ཐིནམིདྡྷཱ སོདྷེཏི ཝིསོདྷེཏི པརིསོདྷེཏི མོཙེཏི ཝིམོཙེཏི པརིམོཙེཏི, ཏེན ཝུཙྩཏི ཐིནམིདྡྷཱ ཙིཏྟཾ པརིསོདྷེཏི’’ ཙཱཏི (ཝིབྷ. ༥༥༡) – ཨེཝཾ ‘ཙཏྟཏྟཱ’ཏིཨཱདི ཝུཏྟཾ. ན ཙ ‘རཱུཔཾ’ ཨེཝཾ ཝུཙྩཏི, ཏསྨཱཔི ཨརཱུཔམེཝ མིདྡྷནྟི. ན, ཙིཏྟཛསྶཱསམྦྷཝཝཙནཏོ. ཏིཝིདྷཉྷི མིདྡྷཾ – ཙིཏྟཛཾ ཨུཏུཛཾ ཨཱཧཱརཛཉྩ. ཏསྨཱ ཡཾ ཏཏྠ ཙིཏྟཛཾ ཏསྶ ཝིབྷངྒེ ཛྷཱནཙིཏྟེཧི ཨསམྦྷཝོ ཝུཏྟོ, ན ཨརཱུཔབྷཱཝོ སཱདྷིཏོཏི རཱུཔམེཝ མིདྡྷནྟི. ན, རཱུཔབྷཱཝཱསིདྡྷིཏོཝ. མིདྡྷསྶ ཧི རཱུཔབྷཱཝེ སིདྡྷེ སཀྐཱ ཨེཏཾ ལདྡྷུཾ. ཏཏྠ ཙིཏྟཛསྶཱསམྦྷཝོ ཝུཏྟོ. སོ ཨེཝ ཙ ན སིཛ྄ཛྷཏཱིཏི ཨརཱུཔམེཝ མིདྡྷཾ.

ཀིཉྩ བྷིཡྻོ? པཧཱནཝཙནཏོ. བྷགཝཏཱ ཧི ‘‘ཚ, བྷིཀྑཝེ, དྷམྨེ པཧཱཡ བྷབྦོ པཋམཛ྄ཛྷཱནཾ ¶ ཨུཔསམྤཛྫ ཝིཧརིཏུཾ; ཀཏམེ ཚ? ཀཱམཙྪནྡཾ, བྱཱཔཱདཾ, ཐིནམིདྡྷཾ, ཨུདྡྷཙྩཾ, ཀཀྐུཙྩཾ, ཝིཙིཀིཙྪཾ; ཀཱམེསུ ཁོ པནསྶ ཨཱདཱིནཝོ སམྨཔཉྙཱཡ སུདིཊྛོ ཧོཏཱི’’ཏི (ཨ. ནི. ༦.༧༣) ཙ, ‘‘ཨིམེ པཉྩ ནཱིཝརཎེ པཧཱཡ བལཝཏིཡཱ པཉྙཱཡ ཨཏྟཏྠཾ ཝཱ པརཏྠཾ ཝཱ ཉསྶཏཱི’’ཏི (ཨ. ནི. ༥.༥༡) ཙ ཨཱདཱིསུ མིདྡྷསྶཱཔི པཧཱནཾ ཝུཏྟཾ. ན ཙ རཱུཔཾ པཧཱཏབྦཾ. ཡཐཱཧ – ‘‘རཱུཔཀྑནྡྷོ ཨབྷིཉྙེཡྻོ, པརིཉྙེཡྻོ, ན པཧཱཏབྦོ, ན བྷཱཝེཏབྦོ ན སཙྪིཀཱཏབྦོ’’ཏི (ཝིབྷ. ༡༠༣༡) ཨིམསྶཱཔི པཧཱནཝཙནཏོ ཨརཱུཔམེཝ མིདྡྷནྟི. ན, རཱུཔསྶཱཔི པཧཱནཝཙནཏོ. ‘‘རཱུཔཾ, བྷིཀྑཝེ, ན ཏུམྷཱཀཾ, ཏཾ པཛཧཐཱ’’ཏི (མ. ནི. ༡.༢༤༧; སཾ. ནི. ༣.༣༣). ཨེཏྠ ཧི རཱུཔསྶཱཔི པཧཱནཾ ཝུཏྟམེཝ. ཏསྨཱ ཨཀཱརཎམེཏནྟི. ན, ཨཉྙཐཱ ཝུཏྟཏྟཱ. ཏསྨིཉྷི སུཏྟེ ‘‘ཡོ, བྷིཀྑཝེ, རཱུཔེ ཚནྡརཱགཝིནཡོ ¶ ཏཾ ཏཏྠ པཧཱན’’ནྟི (སཾ. ནི. ༣.༢༥) ཨེཝཾ ཚནྡརཱགཔྤཧཱནཝསེན རཱུཔསྶ པཧཱནཾ ཝུཏྟཾ, ན ཡཐཱ ‘‘ཚ དྷམྨེ པཧཱཡ པཉྩ ནཱིཝརཎེ པཧཱཡཱ’’ཏི ཨེཝཾ པཧཱཏབྦམེཝ ཝུཏྟནྟི, ཨཉྙཐཱ ཝུཏྟཏྟཱ, ན རཱུཔཾ མིདྡྷཾ. ཏསྨཱ ཡཱནེཏཱནི ‘‘སོ ཨིམེ པཉྩ ནཱིཝརཎེ པཧཱཡ ཙེཏསོ ¶ ཨུཔཀྐིལེསེ’’ཏིཨཱདཱིནི སུཏྟཱནི ཝུཏྟཱནི, ཨེཏེཧི ཙེཝ ཨཉྙེཧི ཙ སུཏྟེཧི ཨརཱུཔམེཝ མིདྡྷནྟི ཝེདིཏབྦཾ. ཏཐཱ ཧི –

‘‘པཉྩིམེ, བྷིཀྑཝེ, ཨཱཝརཎཱ ནཱིཝརཎཱ ཙེཏསོ ཨཛ྄ཛྷཱརུཧཱ པཉྙཱཡ དུབྦལཱིཀརཎཱ. ཀཏམེ པཉྩ? ཀཱམཙྪནྡོ, བྷིཀྑཝེ, ཨཱཝརཎོ ནཱིཝརཎོ…པེ… ཐིནམིདྡྷཾ, བྷིཀྑཝེ, ཨཱཝརཎཾ ནཱིཝརཎཾ ཙེཏསོ ཨཛ྄ཛྷཱརུཧཾ པཉྙཱཡ དུབྦལཱིཀརཎ’’ནྟི (སཾ. ནི. ༥.༢༢༠) ཙ, ‘‘ཐིནམིདྡྷནཱིཝརཎཾ, བྷིཀྑཝེ, ཨནྡྷཀརཎཾ ཨཙཀྑུཀརཎཾ ཨཉྙཱཎཀརཎཾ པཉྙཱནིརོདྷིཀཾ ཝིགྷཱཏཔཀྑིཀཾ ཨནིབྦཱནསཾཝཏྟནིཀ’’ནྟི (སཾ. ནི. ༥.༢༢༡) ཙ, ‘‘ཨེཝམེཝ ཁོ, བྲཱཧྨཎ, ཡསྨིཾ སམཡེ ཐིནམིདྡྷཔརིཡུཊྛིཏེན ཙེཏསཱ ཝིཧརཏི ཐིནམིདྡྷཔརེཏེནཱ’’ཏི (སཾ. ནི. ༥.༢༣༦) ཙ, ‘‘ཨཡོནིསོ, བྷིཀྑཝེ, མནསིཀརོཏོ ཨནུཔྤནྣོ ཙེཝ ཀཱམཙྪནྡོ ཨུཔྤཛྫཏི…པེ… ཨནུཔྤནྣཉྩེཝ ¶ ཐིནམིདྡྷཾ ཨུཔྤཛྫཏཱི’’ཏི (སཾ. ནི. ༥.༢༡༦) ཙ, ‘‘ཀེཝལོཧཱཡཾ, བྷིཀྑཝེ, ཨཀུསལརཱསི ཡདིདཾ པཉྩ ནཱིཝརཎཱ’’ཏི (སཾ. ནི. ༥.༣༧༡) ཙ –

ཨེཝམཱདཱིནི ཙ ཨནེཀཱནི ཨེཏསྶ ཨརཱུཔབྷཱཝཛོཏཀཱནེཝ སུཏྟཱནི ཝུཏྟཱནི. ཡསྨཱ ཙེཏཾ ཨརཱུཔཾ ཏསྨཱ ཨཱརུཔྤེཔི ཨུཔྤཛྫཏི. ཝུཏྟཉྷེཏཾ མཧཱཔཀརཎེ པཊྛཱནེ – ‘‘ནཱིཝརཎཾ དྷམྨཾ པཊིཙྩ ནཱིཝརཎོ དྷམྨོ ཨུཔྤཛྫཏི, ན པུརེཛཱཏཔཙྩཡཱ’’ཏི ཨེཏསྶ ཝིབྷངྒེ ‘‘ཨཱརུཔྤེ ཀཱམཙྪནྡནཱིཝརཎཾ པཊིཙྩ ཐིནམིདྡྷཾ… ཨུདྡྷཙྩཾ ཨཝིཛྫཱནཱིཝརཎ’’ནྟི (པཊྛཱ. ༣.༨.༨) སབྦཾ ཝིཏྠཱརེཏབྦཾ. ཏསྨཱ སནྣིཊྛཱནམེཏྠ གནྟབྦཾ ཨརཱུཔམེཝ མིདྡྷནྟི.

༡༡༦༦. ཀུཀྐུཙྩནིདྡེསེ ཨཀཔྤིཡེ ཀཔྤིཡསཉྙིཏཱཏིཨཱདཱིནི མཱུལཏོ ཀུཀྐུཙྩདསྶནཏྠཾ ཝུཏྟཱནི. ཨེཝཾསཉྙིཏཱཡ ཧི ཀཏེ ཝཱིཏིཀམྨེ, ནིཊྛིཏེ ཝཏྠུཛ྄ཛྷཱཙཱརེ, པུན སཉྫཱཏསཏིནོཔི ‘དུཊྛུ མཡཱ ཀཏ’ནྟི ཨེཝཾ ཨནུཏཔྤམཱནསྶ པཙྪཱནུཏཱཔཝསེནེཏཾ ཨུཔྤཛྫཏི. ཏེན ཏཾ མཱུལཏོ དསྶེཏུཾ ‘ཨཀཔྤིཡེ ཀཔྤིཡསཉྙིཏཱ’ཏིཨཱདི ཝུཏྟཾ. ཏཏྠ ཨཀཔྤིཡབྷོཛནཾ ཀཔྤིཡསཉྙཱི ཧུཏྭཱ པརིབྷུཉྫཏི, ཨཀཔྤིཡམཾསཾ ཀཔྤིཡམཾསསཉྙཱི ཧུཏྭཱ, ཨཙྪམཾསཾ སཱུཀརམཾསནྟི, དཱིཔིམཾསཾ ཝཱ མིགམཾསནྟི ¶ ཁཱདཏི; ཀཱལེ ཝཱིཏིཝཏྟེ ཀཱལསཉྙཱཡ, པཝཱརེཏྭཱ ཨཔྤཝཱརིཏསཉྙཱཡ, པཏྟསྨིཾ རཛེ པཏིཏེ པཊིགྒཧིཏསཉྙཱཡ བྷུཉྫཏི – ཨེཝཾ ‘ཨཀཔྤིཡེ ཀཔྤིཡསཉྙཱཡ’ ཝཱིཏིཀྐམཾ ¶ ཀརོཏི ནཱམ. སཱུཀརམཾསཾ པན ཨཙྪམཾསསཉྙཱཡ ཁཱདམཱནོ, ཀཱལེ ཙ ཝིཀཱལསཉྙཱཡ བྷུཉྫམཱནོ ‘ཀཔྤིཡེ ཨཀཔྤིཡསཉྙིཏཱཡ’ ཝཱིཏིཀྐམཾ ཀརོཏི ནཱམ. ཨནཝཛྫཾ པན ཀིཉྩིདེཝ ཝཛྫསཉྙིཏཱཡ, ཝཛྫཉྩ ཨནཝཛྫསཉྙིཏཱཡ ཀརོནྟོ ‘ཨནཝཛྫེ ཝཛྫསཉྙཱཡ ཝཛྫེ ཙ ཨནཝཛྫསཉྙཱཡ’ ཝཱིཏིཀྐམཾ ཀརོཏི ནཱམ. ཡསྨཱ པནེཏཾ ‘‘ཨཀཏཾ ཝཏ མེ ཀལྱཱཎཾ, ཨཀཏཾ ཀུསལཾ, ཨཀཏཾ བྷཱིརུཏྟཱཎཾ, ཀཏཾ པཱཔཾ, ཀཏཾ ལུདྡཾ, ཀཏཾ ཀིབྦིས’’ནྟི ཨེཝཾ ཨནཝཛྫེ ཝཛྫསཉྙིཏཱཡཔི ཀཏེ ཝཱིཏིཀྐམེ ཨུཔྤཛྫཏི, ཏསྨཱསྶ ཨཉྙམྤི ཝཏྠུཾ ཨནུཛཱནནྟོ ཡཾ ཨེཝརཱུཔནྟིཨཱདིམཱཧ.

ཏཏྠ ¶ ཀུཀྐུཙྩཔདཾ ཝུཏྟཏྠམེཝ. ཀུཀྐུཙྩཱཡནཱཀཱརོ ཀུཀྐུཙྩཱཡནཱ. ཀུཀྐུཙྩེན ཨཡིཏསྶ བྷཱཝོ ཀུཀྐུཙྩཱཡིཏཏྟཾ. ཙེཏསོ ཝིཔྤཊིསཱརོཏི ཨེཏྠ ཀཏཱཀཏསྶ སཱཝཛྫཱནཝཛྫསྶ ཝཱ ཨབྷིམུཁགམནཾ ‘ཝིཔྤཊིསཱརོ’ ནཱམ. ཡསྨཱ པན སོ ཀཏཾ ཝཱ པཱཔཾ ཨཀཏཾ ན ཀརོཏི, ཨཀཏཾ ཝཱ ཀལྱཱཎཾ ཀཏཾ ན ཀརོཏི, ཏསྨཱ ཝིརཱུཔོ ཀུཙྪིཏོ ཝཱ པཊིསཱརོཏི ‘ཝིཔྤཊིསཱརོ’. སོ པན ཙེཏསོ, ན སཏྟསྶཱཏི ཉཱཔནཏྠཾ ‘ཙེཏསོ’ ཝིཔྤཊིསཱརོཏི ཝུཏྟཾ. ཨཡམསྶ སབྷཱཝནིདྡེསོ. ཨུཔྤཛྫམཱནཾ པན ཀུཀྐུཙྩཾ ཨཱརགྒམིཝ ཀཾསཔཏྟཾ མནཾ ཝིལིཁམཱནམེཝ ཨུཔྤཛྫཏི, ཏསྨཱ མནོཝིལེཁོཏི ཝུཏྟཾ. ཨཡམསྶ ཀིཙྩནིདྡེསོ. ཡཾ པན ཝིནཡེ ‘‘ཨཐ ཁོ ཨཱཡསྨཱ སཱརིཔུཏྟོ བྷགཝཏཱ པཊིཀྑིཏྟཾ ཨནུཝསིཏྭཱ ཨནུཝསིཏྭཱ ཨཱཝསཐཔིཎྜཾ པརིབྷུཉྫིཏུ’’ནྟི ཀུཀྐུཙྩཱཡནྟོ ན པཊིགྒཧེསཱིཏི (པཱཙི. ༢༠༤) ཀུཀྐུཙྩཾ ཨཱགཏཾ, ན ཏཾ ནཱིཝརཎཾ. ན ཧི ཨརཧཏོ ‘དུཊྛུ མཡཱ ཨིདཾ ཀཏ’ནྟི ཨེཝཾ ཨནུཏཱཔོ ཨཏྠི. ནཱིཝརཎཔཏིརཱུཔཀཾ པནེཏཾ ‘ཀཔྤཏི ན ཀཔྤཏཱི’ཏི ཝཱིམཾསནསངྑཱཏཾ ཝིནཡཀུཀྐུཙྩཾ ནཱམ.

༡༡༧༦. ‘‘ཀཏམེ དྷམྨཱ ནཱིཝརཎཱ ཙེཝ ནཱིཝརཎསམྤཡུཏྟཱ ཙཱ’’ཏི པདསྶ ནིདྡེསེ ཡསྨཱ ཐིནམིདྡྷཾ ཨཉྙམཉྙཾ ན ཝིཛཧཏི, ཏསྨཱ ཐིནམིདྡྷནཱིཝརཎཾ ཨཝིཛྫཱནཱིཝརཎེན ནཱིཝརཎཉྩེཝ ནཱིཝརཎསམྤཡུཏྟཉྩཱཏི ཨབྷིནྡིཏྭཱ ཝུཏྟཾ. ཡསྨཱ པན ཨུདྡྷཙྩེ སཏིཔི ཀུཀྐུཙྩསྶ ཨབྷཱཝཱ ཀུཀྐུཙྩེན ཝིནཱཔི ཨུདྡྷཙྩཾ ཨུཔྤཛྫཏི, ཏསྨཱ ཏཾ བྷིནྡིཏྭཱ ཝུཏྟཾ. ཡཉྩ ཡེན སམྤཡོགཾ ན གཙྪཏི, ཏཾ ན ཡོཛིཏནྟི ཝེདིཏབྦཾ.

ཨིམེ ¶ ¶ པན ནཱིཝརཎེ ཀིལེསཔཊིཔཱཊིཡཱཔི ཨཱཧརིཏུཾ ཝཊྚཏི མགྒཔཊིཔཱཊིཡཱཔི. ཀིལེསཔཊིཔཱཊིཡཱ ཀཱམཙྪནྡབྱཱཔཱདཱ ཨནཱགཱམིམགྒེན པཧཱིཡནྟི, ཐིནམིདྡྷུདྡྷཙྩཱནི ཨརཧཏྟམགྒེན, ཀུཀྐུཙྩཝིཙིཀིཙྪཱ སོཏཱཔཏྟིམགྒེན, ཨཝིཛྫཱ ཨརཧཏྟམགྒེན. མགྒཔཊིཔཱཊིཡཱ སོཏཱཔཏྟིམགྒེན ཀུཀྐུཙྩཝིཙིཀིཙྪཱ པཧཱིཡནྟི, ཨནཱགཱམིམགྒེན ཀཱམཙྪནྡབྱཱཔཱདཱ, ཨརཧཏྟམགྒེན ཐིནམིདྡྷུདྡྷཙྩཱཝིཛྫཱཏི.

༡༡༨༢. པརཱམཱསགོཙྪཀེ ¶ ཏེ དྷམྨེ ཋཔེཏྭཱཏི པུཙྪཱསབྷཱགེན བཧུཝཙནཾ ཀཏཾ.

༡༢༡༩. ཨུཔཱདཱནནིདྡེསེ ཝཏྠུསངྑཱཏཾ ཀཱམཾ ཨུཔཱདིཡཏཱིཏི ཀཱམུཔཱདཱནཾ ཀཱམོ ཙ སོ ཨུཔཱདཱནཉྩཱཏིཔི ཀཱམུཔཱདཱནཾ. ཨུཔཱདཱནནྟི དལ༹ྷགྒཧཎཾ. དལ༹ྷཏྠོ ཧི ཨེཏྠ ཨུཔསདྡོ ཨུཔཱཡཱསཨུཔཀཊྛཱདཱིསུ ཝིཡ. ཏཐཱ དིཊྛི ཙ སཱ ཨུཔཱདཱནཉྩཱཏི དིཊྛུཔཱདཱནཾ. དིཊྛིཾ ཨུཔཱདིཡཏཱིཏི དིཊྛུཔཱདཱནཾ. ‘སསྶཏོ ཨཏྟཱ ཙ ལོཀོ ཙཱ’ཏིཨཱདཱིསུ (དཱི. ནི. ༡.༣༡) ཧི པུརིམདིཊྛིཾ ཨུཏྟརདིཊྛི ཨུཔཱདིཡཧི. ཏཐཱ སཱིལབྦཏཾ ཨུཔཱདིཡཏཱིཏི སཱིལབྦཏུཔཱདཱནཾ. སཱིལབྦཏཉྩ ཏཾ ཨུཔཱདཱནཉྩཱཏིཔི སཱིལབྦཏུཔཱདཱནཾ. གོསཱིལགོཝཏཱདཱིནི ཧི ‘ཨེཝཾ སུདྡྷཱི’ཏི ཨབྷིནིཝེསཏོ སཡམེཝ ཨུཔཱདཱནཱནི. ཏཐཱ, ཝདནྟི ཨེཏེནཱཏི ‘ཝཱདོ’; ཨུཔཱདིཡནྟི ཨེཏེནཱཏི ‘ཨུཔཱདཱནཾ’. ཀིཾ ཝདནྟི, ཨུཔཱདིཡནྟི ཝཱ? ཨཏྟཱནཾ. ཨཏྟནོ ཝཱདུཔཱདཱནཾ ཨཏྟཝཱདུཔཱདཱནཾ; ‘ཨཏྟཝཱདམཏྟམེཝ ཝཱ ཨཏྟཱ’ཏི ཨུཔཱདིཡནྟི ཨེཏེནཱཏི ཨཏྟཝཱདུཔཱདཱནཾ.

༡༢༢༠. ཡོ ཀཱམེསུ ཀཱམཙྪནྡོཏི ཨེཏྠཱཔི ཝཏྠུཀཱམཱཝ ཨནཝསེསཏོ ཀཱམཱཏི ཨདྷིཔྤེཏཱ. ཏསྨཱ ཝཏྠུཀཱམེསུ ཀཱམཙྪནྡོ ཨིདྷ ཀཱམུཔཱདཱནནྟི ཨནཱགཱམིནོཔི ཏཾ སིདྡྷཾ ཧོཏི. པཉྩཀཱམགུཎཝཏྠུཀོ པནསྶ ཀཱམརཱགོཝ ནཏྠཱིཏི.

༡༢༢༡. དིཊྛུཔཱདཱནནིདྡེསེ ནཏྠི དིནྣནྟི. དིནྣཾ ནཱམ ཨཏྠི, སཀྐཱ ཀསྶཙི ཀིཉྩི དཱཏུནྟི ཛཱནཱཏི; དིནྣསྶ པན ཕལཾ ཝིཔཱཀོ ནཏྠཱིཏི གཎྷཱཏི. ནཏྠི ཡིཊྛནྟི. ཡིཊྛཾ ཝུཙྩཏི མཧཱཡཱགོ. ཏཾ ཡཛིཏུཾ སཀྐཱཏི ཛཱནཱཏི; ཡིཊྛསྶ པན ཕལཾ ཝིཔཱཀོ ནཏྠཱིཏི གཎྷཱཏི. ནཏྠི ཧུཏནྟི ཨཱཧུནཔཱཧུནམངྒལཀིརིཡཱ. ཏཾ ཀཱཏུཾ སཀྐཱཏི ཛཱནཱཏི; ཏསྶ པན ཕལཾ ཝིཔཱཀོ ནཏྠཱིཏི ¶ གཎྷཱཏི. ནཏྠི, སུཀཏདུཀྐཊཱནནྟི ཨེཏྠ དས ཀུསལཀམྨཔཐཱ སུཀཏཀམྨཱནི ནཱམ. དས ཨཀུསལཀམྨཔཐཱ དུཀྐཊཀམྨཱནི ¶ ནཱམ. ཏེསཾ ཨཏྠིབྷཱཝཾ ¶ ཛཱནཱཏི ཕལཾ ཝིཔཱཀོ པན ནཏྠཱིཏི གཎྷཱཏི. ནཏྠི ཨཡཾ ལོཀོཏི པརལོཀེ ཋིཏོ ཨིམཾ ལོཀཾ ནཏྠཱིཏི གཎྷཱཏི. ནཏྠི པརལོཀོཏི ཨིདྷ ལོཀེ ཋིཏོ པརལོཀཾ ནཏྠཱིཏི གཎྷཱཏི. ནཏྠི མཱཏཱ ནཏྠི པིཏཱཏི མཱཏཱཔིཏཱུནཾ ཨཏྠིབྷཱཝཾ ཛཱནཱཏི, ཏེསུ ཀཏཔཙྩཡེན ཀོཙི ཕལཾ ཝིཔཱཀོ ནཏྠཱིཏི གཎྷཱཏི. ནཏྠི སཏྟཱ ཨོཔཔཱཏིཀཱཏི ཙཝནཀཨུཔཔཛྫནཀཱ སཏྟཱ ནཏྠཱིཏི གཎྷཱཏི. སམྨགྒཏཱ སམྨཱ པཊིཔནྣཱཏི ཨནུལོམཔཊིཔདཾ པཊིཔནྣཱ དྷམྨིཀསམཎབྲཱཧྨཎཱ ལོཀསྨིཾ ནཏྠཱིཏི གཎྷཱཏི. ཡེ ཨིམཉྩ ལོཀཾ པརཉྩ ལོཀཾ སཡཾ ཨབྷིཉྙཱ སཙྪིཀཏྭཱ པཝེདེནྟཱིཏི ཨིམཉྩ ལོཀཾ པརཉྩ ལོཀཾ ཨཏྟནཱཝ ཨབྷིཝིསིཊྛེན ཉཱཎེན ཉཏྭཱ པཝེདནསམཏྠོ སབྦཉྙཱུ བུདྡྷོ ནཱམ ནཏྠཱིཏི གཎྷཱཏི.

ཨིམཱནི པན ཨུཔཱདཱནཱནི ཀིལེསཔཊིཔཱཊིཡཱཔི ཨཱཧརིཏུཾ ཝཊྚཏི མགྒཔཊིཔཱཊིཡཱཔི. ཀིལེསཔཊིཔཱཊིཡཱ ཀཱམུཔཱདཱནཾ ཙཏཱུཧི མགྒེཧི པཧཱིཡཏི, སེསཱནི ཏཱིཎི སོཏཱཔཏྟིམགྒེན. མགྒཔཊིཔཱཊིཡཱ སོཏཱཔཏྟིམགྒེན དིཊྛུཔཱདཱནཱདཱིནི པཧཱིཡནྟི, ཙཏཱུཧི མགྒེཧི ཀཱམུཔཱདཱནནྟི.

༡༢༣༥. ཀིལེསགོཙྪཀེ ཀིལེསཱ ཨེཝ ཀིལེསཝཏྠཱུནི. ཝསནྟི ཝཱ ཨེཏྠ ཨཁཱིཎཱསཝཱ སཏྟཱ ལོབྷཱདཱིསུ པཏིཊྛིཏཏྟཱཏི ‘ཝཏྠཱུནི’. ཀིལེསཱ ཙ ཏེ ཏཔྤཏིཊྛཱནཾ སཏྟཱནཾ ཝཏྠཱུནི ཙཱཏི ‘ཀིལེསཝཏྠཱུནི’. ཡསྨཱ ཙེཏྠ ཨནནྟརཔཙྩཡཱདིབྷཱཝེན ཨུཔྤཛྫམཱནཱ ཀིལེསཱཔི ཝསནྟི ཨེཝ ནཱམ, ཏསྨཱ ཀིལེསཱནཾ ཝཏྠཱུནཱིཏིཔི ‘ཀིལེསཝཏྠཱུནི’.

༡༢༣༦. ཏཏྠ ཀཏམོ ལོབྷོ? ཡོ རཱགོ སཱརཱགོཏི ཨཡཾ པན ལོབྷོ ཧེཏུགོཙྪཀེ གནྠགོཙྪཀེ ཨིམསྨིཾ ཀིལེསགོཙྪཀེཏི ཏཱིསུ ཋཱནེསུ ཨཏིརེཀཔདསཏེན ནིདྡིཊྛོ. ཨཱསཝསཾཡོཛནཨོགྷཡོགནཱིཝརཎཨུཔཱདཱནགོཙྪཀེསུ ཨཊྛཧི ཨཊྛཧི པདེཧི ནིདྡིཊྛོ. སྭཱཡཾ ཨཏིརེཀཔདསཏེན ནིདྡིཊྛཊྛཱནེཔི ཨཊྛཧི ཨཊྛཧི པདེཧི ནིདྡིཊྛཊྛཱནེཔི ནིཔྤདེསཏོཝ གཧིཏོཏི ཝེདིཏབྦོ. ཏེསུ ¶ ཧེཏུགནྠནཱིཝརཎཨུཔཱདཱནཀིལེསགོཙྪཀེསུ ཙཏུམགྒཝཛ྄ཛྷཱ ཏཎྷཱ ཨེཀེནེཝ ¶ ཀོཊྛཱསེན ཋིཏཱ. ཨཱསཝསཾཡོཛནཨོགྷཡོགེསུ ཙཏུམགྒཝཛ྄ཛྷཱཔི དྭེ ཀོཊྛཱསཱ ཧུཏྭཱ ཋིཏཱ. ཀཐཾ? ཨཱསཝེསུ ཀཱམཱསཝོ བྷཝཱསཝོཏི, སཾཡོཛནེསུ ཀཱམརཱགསཾཡོཛནཾ བྷཝརཱགསཾཡོཛནནྟི, ཨོགྷེསུ ཀཱམོགྷོ བྷཝོགྷོཏི, ཡོགེསུ ཀཱམཡོགོ བྷཝཡོགོཏི.

ཨིམཱནི པན ཀིལེསཝཏྠཱུནི ཀིལེསཔཊིཔཱཊིཡཱཔི ཨཱཧརིཏུཾ ཝཊྚཏི མགྒཔཊིཔཱཊིཡཱཔི. ཀིལེསཔཊིཔཱཊིཡཱ ¶ ལོབྷོ ཙཏཱུཧི མགྒེཧི པཧཱིཡཏི, དོསོ ཨནཱགཱམིམགྒེན, མོཧམཱནཱ ཨརཧཏྟམགྒེན, དིཊྛིཝིཙིཀིཙྪཱ སོཏཱཔཏྟིམགྒེན, ཐིནཱདཱིནི ཨརཧཏྟམགྒེན. མགྒཔཊིཔཱཊིཡཱ སོཏཱཔཏྟིམགྒེན དིཊྛིཝིཙིཀིཙྪཱ པཧཱིཡནྟི, ཨནཱགཱམིམགྒེན དོསོ, ཨརཧཏྟམགྒེན སེསཱ སཏྟཱཏི.

༡༢༨༧. ཀཱམཱཝཙརནིདྡེསེ ཧེཊྛཏོཏི ཧེཊྛཱབྷཱགེན. ཨཝཱིཙིནིརཡནྟི ཝཱ ཨགྒིཛཱལཱནཾ ཝཱ སཏྟཱནཾ ཝཱ དུཀྑཝེདནཱཡ ཝཱིཙི, ཨནྟརཾ, ཚིདྡཾ ཨེཏྠ ནཏྠཱིཏི ཨཝཱིཙི. སུཁསངྑཱཏོ ཨཡོ ཨེཏྠ ནཏྠཱིཏི ནིརཡོ. ནིརཏིཨཏྠེནཔི ནིརསྶཱདཏྠེནཔི ནིརཡོ. པརིཡནྟཾ ཀརིཏྭཱཏི ཏཾ ཨཝཱིཙིསངྑཱཏཾ ནིརཡཾ ཨནྟཾ ཀཏྭཱ. ཨུཔརིཏོཏི ཨུཔརིབྷཱགེན. པརནིམྨིཏཝསཝཏྟིདེཝེཏི པརནིམྨིཏེསུ ཀཱམེསུ ཝསཾ ཝཏྟནཏོ ཨེཝཾལདྡྷཝོཧཱརེ དེཝེ. ཨནྟོ ཀརིཏྭཱཏི ཨནྟོ པཀྑིཔིཏྭཱ. ཡཾ ཨེཏསྨིཾ ཨནྟརེཏི ཡེ ཨེཏསྨིཾ ཨོཀཱསེ. ཨེཏྠཱཝཙརཱཏི ཨིམིནཱ ཡསྨཱ ཨེཏསྨིཾ ཨནྟརེ ཨཉྙེཔི ཙརནྟི ཀདཱཙི ཀཏྠཙི སམྦྷཝཏོ, ཏསྨཱ ཏེསཾ ཨསངྒཎྷནཏྠཾ ‘ཨཝཙརཱ’ཏི ཝུཏྟཾ. ཏེན ཡེ ཨེཏསྨིཾ ཨནྟརེ ཨོགཱལ༹ྷཱ ཧུཏྭཱ ཙརནྟི སབྦཏྠ སདཱ ཙ སམྦྷཝཏོ, ཨདྷོབྷཱགེ ཙརནྟི ཨཝཱིཙིནིརཡསྶ ཧེཊྛཱ བྷཱུཏུཔཱདཱཡཔཝཏྟིབྷཱཝེན, ཏེསཾ སངྒཧོ ཀཏོ ཧོཏི. ཏེ ཧི ཨཝགཱལ༹ྷཱཝ ཙརནྟི, ཨདྷོབྷཱགེཝ ཙརནྟཱིཏི ཨཝཙརཱ. ཨེཏྠ པརིཡཱཔནྣཱཏི ཨིམིནཱ པན ཡསྨཱ ཨེཏེ ཨེཏྠཱཝཙརཱ ཨཉྙཏྠཱཔི ཨཝཙརནྟི, ན པན ཏཏྠ པརིཡཱཔནྣཱ ཧོནྟི, ཏསྨཱ ཏེསཾ ཨཉྙཏྠཱཔི ཨཝཙརནྟཱནཾ པརིགྒཧོ ཀཏོ ཧོཏི. ཨིདཱནི ཏེ ཨེཏྠ པརིཡཱཔནྣདྷམྨེ རཱསིསུཉྙཏཔཙྩཡབྷཱཝཏོ ¶ ཙེཝ སབྷཱཝཏོ ཙ དསྶེནྟོ ཁནྡྷཱཏིཨཱདིམཱཧ.

༡༢༨༩. རཱུཔཱཝཙརནིདྡེསེ ¶ བྲཧྨལོཀནྟི པཋམཛ྄ཛྷཱནབྷཱུམིསངྑཱཏཾ བྲཧྨཊྛཱནཾ. སེསམེཏྠ ཀཱམཱཝཙརནིདྡེསེ ཝུཏྟནཡེནེཝ ཝེདིཏབྦཾ. སམཱཔནྣསྶ ཝཱཏིཨཱདཱིསུ པཋམཔདེན ཀུསལཛ྄ཛྷཱནཾ ཝུཏྟཾ, དུཏིཡེན ཝིཔཱཀཛ྄ཛྷཱནཾ, ཝུཏྟཾ ཏཏིཡེན ཀིརིཡཛ྄ཛྷཱནཾ ཝུཏྟནྟི ཝེདིཏབྦཾ.

༡༢༩༡. ཨརཱུཔཱཝཙརནིདྡེསེ ཨཱཀཱསཱནཉྩཱཡཏནཱུཔགེཏི ཨཱཀཱསཱནཉྩཱཡཏནསངྑཱཏཾ བྷཝཾ ཨུཔགཏེ. དུཏིཡཔདེཔི ཨེསེཝ ནཡོ. སེསཾ ཧེཊྛཱ ཝུཏྟནཡེནེཝ ཝེདིཏབྦཾ.

༡༣༠༡. སརཎདུཀནིདྡེསེ ཡྭཱཡཾ ཏཱིསུ ཨཀུསལམཱུལེསུ མོཧོ, སོ ལོབྷསམྤཡུཏྟོ ཙ ལོབྷེན ¶ སརཎོ, དོསསམྤཡུཏྟོ ཙ དོསེན སརཎོ. ཝིཙིཀིཙྪུདྡྷཙྩསམྤཡུཏྟོ པན མོཧོ དིཊྛིསམྤཡུཏྟེན ཙེཝ རཱུཔརཱགཨརཱུཔརཱགསངྑཱཏེན ཙ རཱགརཎེན པཧཱནེཀཊྛབྷཱཝཏོ སརཎོ སརཛོཏི ཝེདིཏབྦོ.

སུཏྟནྟིཀདུཀནིཀྑེཔཀཐཱ

༡༣༠༣. སུཏྟནྟིཀདུཀེསུ མཱཏིཀཱཀཐཱཡཾ ཨཏྠཏོ ཝིཝེཙིཏཏྟཱ ཡཱནི ཙ ནེསཾ ནིདྡེསཔདཱནི ཏེསམྤི ཧེཊྛཱ ཝུཏྟནཡེནེཝ སུཝིཉྙེཡྻཏྟཱ ཡེབྷུཡྻེན ཨུཏྟཱནཏྠཱནི ཨེཝ. ཨིདཾ པནེཏྠ ཝིསེསམཏྟཾ – ཝིཛྫཱུཔམདུཀེ ཏཱཝ ཙཀྑུམཱ ཀིར པུརིསོ མེགྷནྡྷཀཱརེ རཏྟིཾ མགྒཾ པཊིཔཛྫི. ཏསྶ ཨནྡྷཀཱརཏཱཡ མགྒོ ན པཉྙཱཡི. ཝིཛྫུ ནིཙྪརིཏྭཱ ཨནྡྷཀཱརཾ ཝིདྡྷཾསེསི. ཨཐསྶ ཨནྡྷཀཱརཝིགམཱ མགྒོ པཱཀཊོ ཨཧོསི. སོ དུཏིཡམྤི གམནཾ ཨབྷིནཱིཧརི. དུཏིཡམྤི ཨནྡྷཀཱརོ ཨོཏྠརི. མགྒོ ན པཉྙཱཡི. ཝིཛྫུ ནིཙྪརིཏྭཱ ཏཾ ཝིདྡྷཾསེསི. ཝིགཏེ ཨནྡྷཀཱརེ མགྒོ པཱཀཊོ ཨཧོསི. ཏཏིཡམྤི གམནཾ ཨབྷིནཱིཧརི. ཨནྡྷཀཱརོ ཨོཏྠརི. མགྒོ ན པཉྙཱཡི. ཝིཛྫུ ནིཙྪརིཏྭཱ ཨནྡྷཀཱརཾ ཝིདྡྷཾསེསི.

ཏཏྠ ཙཀྑུམཏོ པུརིསསྶ ཨནྡྷཀཱརེ མགྒཔཊིཔཛྫནཾ ཝིཡ ཨརིཡསཱཝཀསྶ སོཏཱཔཏྟིམགྒཏྠཱཡ ཝིཔསྶནཱརམྦྷོ. ཨནྡྷཀཱརེ མགྒསྶ ཨཔཉྙཱཡནཀཱལོ ཝིཡ སཙྩཙྪཱདཀཏམཾ. ཝིཛྫུཡཱ ནིཙྪརིཏྭཱ ཨནྡྷཀཱརསྶ ཝིདྡྷཾསིཏཀཱལོ ཝིཡ སོཏཱཔཏྟིམགྒོབྷཱསེན ཨུཔྤཛྫིཏྭཱ སཙྩཙྪཱདཀཏམསྶ ¶ ཝིནོདིཏཀཱལོ. ཝིགཏེ ཨནྡྷཀཱརེ མགྒསྶ པཱཀཊཀཱལོ ཝིཡ ¶ སོཏཱཔཏྟིམགྒསྶ ཙཏུནྣཾ སཙྩཱནཾ པཱཀཊཀཱལོ. མགྒསྶ པཱཀཊཾ པན མགྒསམངྒིཔུགྒལསྶ པཱཀཊམེཝ. དུཏིཡགམནཱབྷིནཱིཧཱརོ ཝིཡ སཀདཱགཱམིམགྒཏྠཱཡ ཝིཔསྶནཱརམྦྷོ. ཨནྡྷཀཱརེ མགྒསྶ ཨཔཉྙཱཡནཀཱལོ ཝིཡ སཙྩཙྪཱདཀཏམཾ. དུཏིཡཾ ཝིཛྫུཡཱ ནིཙྪརིཏྭཱ ཨནྡྷཀཱརསྶ ཝིདྡྷཾསིཏཀཱལོ ཝིཡ སཀདཱགཱམིམགྒོབྷཱསེན ཨུཔྤཛྫིཏྭཱ སཙྩཙྪཱདཀཏམསྶ ཝིནོདིཏཀཱལོ. ཝིགཏེ ཨནྡྷཀཱརེ མགྒསྶ པཱཀཊཀཱལོ ཝིཡ སཀདཱགཱམིམགྒསྶ ཙཏུནྣཾ སཙྩཱནཾ པཱཀཊཀཱལོ. མགྒསྶ པཱཀཊཾ པན མགྒསམངྒིཔུགྒལསྶ པཱཀཊམེཝ. ཏཏིཡགམནཱབྷིནཱིཧཱརོ ཝིཡ ཨནཱགཱམིམགྒཏྠཱཡ ཝིཔསྶནཱརམྦྷོ. ཨནྡྷཀཱརེ མགྒསྶ ཨཔཉྙཱཡནཀཱལོ ཝིཡ སཙྩཙྪཱདཀཏམཾ. ཏཏིཡཾ ཝིཛྫུཡཱ ནིཙྪརིཏྭཱ ཨནྡྷཀཱརསྶ ཝིདྡྷཾསིཏཀཱལོ ཝིཡ ཨནཱགཱམིམགྒོབྷཱསེན ཨུཔྤཛྫིཏྭཱ སཙྩཙྪཱདཀཏམསྶ ཝིནོདིཏཀཱལོ. ཝིགཏེ ¶ ཨནྡྷཀཱརེ མགྒསྶ པཱཀཊཀཱལོ ཝིཡ ཨནཱགཱམིམགྒསྶ ཙཏུནྣཾ སཙྩཱནཾ པཱཀཊཀཱལོ. མགྒསྶ པཱཀཊཾ པན མགྒསམངྒིཔུགྒལསྶ པཱཀཊམེཝ.

ཝཛིརསྶ པན པཱསཱཎོ ཝཱ མཎི ཝཱ ཨབྷེཛྫོ ནཱམ ནཏྠི. ཡཏྠ པཏཏི ཏཾ ཝིནིཝིདྡྷམེཝ ཧོཏི. ཝཛིརཾ ཁེཔེནྟཾ ཨསེསེཏྭཱ ཁེཔེཏི. ཝཛིརེན གཏམགྒོ ནཱམ པུན པཱཀཏིཀོ ན ཧོཏི. ཨེཝམེཝ ཨརཧཏྟམགྒསྶ ཨཝཛ྄ཛྷཀིལེསོ ནཱམ ནཏྠི. སབྦཀིལེསེ ཝིནིཝིཛ྄ཛྷཏི ཝཛིརཾ ཝིཡ. ཨརཧཏྟམགྒོཔི ཀིལེསེ ཁེཔེནྟོ ཨསེསེཏྭཱ ཁེཔེཏི. ཝཛིརེན གཏམགྒསྶ པུན པཱཀཏིཀཏྟཱབྷཱཝོ ཝིཡ ཨརཧཏྟམགྒེན པཧཱིནཀིལེསཱནཾ པུན པཙྩུདཱཝཏྟནཾ ནཱམ ནཏྠཱིཏི.

༡༣༠༧. བཱལདུཀནིདྡེསེ བཱལེསུ ཨཧིརིཀཱནོཏྟཔྤཱནི པཱཀཊཱནི, མཱུལཱནི ཙ སེསཱནཾ བཱལདྷམྨཱནཾ. ཨཧིརིཀོ ཧི ཨནོཏྟཔྤཱི ཙ ན ཀིཉྩི ཨཀུསལཾ ན ཀརོཏི ནཱམཱཏི. ཨེཏཱནི དྭེ པཋམཾཡེཝ ཝིསུཾ ཝུཏྟཱནི. སུཀྐཔཀྑེཔི ཨཡམེཝ ནཡོ. ཏཐཱ ཀཎྷདུཀེ.

༡༣༡༡. ཏཔནཱིཡདུཀནིདྡེསེ ཀཏཏྟཱ ཙ ཨཀཏཏྟཱ ཙ ཏཔནཾ ཝེདིཏབྦཾ. ཀཱཡདུཙྩརིཏཱདཱིནི ¶ ཧི ཀཏཏྟཱ ཏཔནྟི, ཀཱཡསུཙརིཏཱདཱིནི ཨཀཏཏྟཱ. ཏཐཱ ཧི པུགྒལོ ‘ཀཏཾ མེ ཀཱཡདུཙྩརིཏ’ནྟི ཏཔྤཏི, ‘ཨཀཏཾ མེ ཀཱཡསུཙརིཏ’ནྟི ཏཔྤཏི. ‘ཀཏཾ མེ ཝཙཱིདུཙྩརིཏ’ནྟི ཏཔྤཏི…པེ… ‘ཨཀཏཾ མེ ¶ མནོསུཙརིཏ’ནྟི ཏཔྤཏི. ཨཏཔནཱིཡེཔི ཨེསེཝ ནཡོ. ཀལྱཱཎཀཱརཱི ཧི པུགྒལོ ‘ཀཏཾ མེ ཀཱཡསུཙརིཏ’ནྟི ན ཏཔྤཏི, ‘ཨཀཏཾ མེ ཀཱཡདུཙྩརིཏ’ནྟི ན ཏཔྤཏི…པེ… ‘ཨཀཏཾ མེ མནོདུཙྩརིཏ’ནྟི ན ཏཔྤཏཱིཏི (ཨ. ནི. ༢.༣).

༡༣༡༣. ཨདྷིཝཙནདུཀནིདྡེསེ ཡཱ ཏེསཾ ཏེསཾ དྷམྨཱནནྟི སབྦདྷམྨགྒཧཎཾ. སངྑཱཡཏཱིཏི སངྑཱ, སཾཀཐིཡཏཱིཏི ཨཏྠོ. ཀིནྟི སཾཀཐིཡཏི? ཨཧནྟི མམནྟི པརོཏི པརསྶཱཏི སཏྟོཏི བྷཱཝོཏི པོསོཏི པུགྒལོཏི ནརོཏི མཱཎཝོཏི ཏིསྶོཏི དཏྟོཏི, ‘མཉྩོ པཱིཋཾ བྷིསི བིམྦོཧནཾ’ ‘ཝིཧཱརོ པརིཝེཎཾ དྭཱརཾ ཝཱཏཔཱན’ནྟི ཨེཝཾ ཨནེཀེཧི ཨཱཀཱརེཧི སཾཀཐིཡཏཱིཏི ‘སངྑཱ’. སམཉྙཱཡཏཱིཏི སམཉྙཱ. ཀིནྟི སམཉྙཱཡཏི? ‘ཨཧནྟི…པེ… ཝཱཏཔཱན’ནྟི སམཉྙཱཡཏཱིཏི ¶ ‘སམཉྙཱ’. པཉྙཱཔིཡཏཱིཏི པཉྙཏྟི. ཝོཧརིཡཏཱིཏི ཝོཧཱརོ. ཀིནྟི ཝོཧརིཡཏི? ‘ཨཧ’ནྟི…པེ… ‘ཝཱཏཔཱན’ནྟི ཝོཧརིཡཏཱིཏི ཝོཧཱརོ.

ནཱམནྟི ཙཏུབྦིདྷཾ ནཱམཾ – སཱམཉྙནཱམཾ གུཎནཱམཾ ཀིཏྟིམནཱམཾ ཨོཔཔཱཏིཀནཱམནྟི. ཏཏྠ པཋམཀཔྤིཀེསུ མཧཱཛནེན སམྨནྣིཏྭཱ ཋཔིཏཏྟཱ མཧཱསམྨཏོཏི རཉྙོ ནཱམཾ ‘སཱམཉྙནཱམཾ’ ནཱམ. ཡཾ སནྡྷཱཡ ཝུཏྟཾ – ‘‘མཧཱཛནསམྨཏོཏི ཁོ, ཝཱསེཊྛ, མཧཱསམྨཏོ ཏྭེཝ པཋམཾ ཨཀྑརཾ ཨུཔནིབྦཏྟ’’ནྟི (དཱི. ནི. ༣.༡༣༡). དྷམྨཀཐིཀོ ¶ པཾསུཀཱུལིཀོ ཝིནཡདྷརོ ཏེཔིཊཀོ སདྡྷོ པསནྣོཏི ཨེཝརཱུཔཾ གུཎཏོ ཨཱགཏནཱམཾ ‘གུཎནཱམཾ’ ནཱམ. བྷགཝཱ ཨརཧཾ སམྨཱསམྦུདྡྷོཏིཨཱདཱིནིཔི ཏཐཱགཏསྶ ཨནེཀཱནི ནཱམསཏཱནི གུཎནཱམཱནེཝ. ཏེན ཝུཏྟཾ –

‘‘ཨསངྑྱེཡྻཱནི ནཱམཱནི, སགུཎེན མཧེསིནོ;

གུཎེན ནཱམམུདྡྷེཡྻཾ, ཨཔི ནཱམསཧསྶཏོ’’ཏི.

ཡཾ པན ཛཱཏསྶ ཀུམཱརཀསྶ ནཱམགྒཧཎདིཝསེ དཀྑིཎེཡྻཱནཾ སཀྐཱརཾ ཀཏྭཱ སམཱིཔེ ཋིཏཱ ཉཱཏཀཱ ཀཔྤེཏྭཱ པཀཔྤེཏྭཱ ‘ཨཡཾ ཨསུཀོནཱམཱ’ཏི ནཱམཾ ཀརོནྟི, ཨིདཾ ‘ཀིཏྟིམནཱམ’ ནཱམ. ཡཱ པན པུརིམཔཉྙཏྟི པཙྪིམཔཉྙཏྟིཡཾ པཏཏི, པུརིམཝོཧཱརོ པཙྪིམཝོཧཱརེ པཏཏི, སེཡྻཐིདཾ – པུརིམཀཔྤེཔི ཙནྡོ ཙནྡོཡེཝ ནཱམ, ཨེཏརཧིཔི ཙནྡོཝ. ཨཏཱིཏེ སཱུརིཡོ… སམུདྡོ… པཐཝཱི… པབྦཏོ པབྦཏོཡེཝ, ནཱམ, ཨེཏརཧིཔི ¶ པབྦཏོཡེཝཱཏི ཨིདཾ ‘ཨོཔཔཱཏིཀནཱམཾ’ ནཱམ. ཨིདཾ ཙཏུབྦིདྷམྤི ནཱམཾ ཨེཏྠ ནཱམམེཝ ཧོཏི.

ནཱམཀམྨནྟི ནཱམཀརཎཾ. ནཱམདྷེཡྻནྟི ནཱམཊྛཔནཾ. ནིརུཏྟཱིཏི ནཱམནིརུཏྟི. བྱཉྫནནྟི ནཱམབྱཉྫནཾ. ཡསྨཱ པནེཏཾ ཨཏྠཾ བྱཉྫེཏི ཏསྨཱ ཨེཝཾ ཝུཏྟཾ. ཨབྷིལཱཔོཏི ནཱམཱབྷིལཱཔོཝ. སབྦེཝ དྷམྨཱ ཨདྷིཝཙནཔཐཱཏི ཨདྷིཝཙནསྶ ནོཔཐདྷམྨོ ནཱམ ནཏྠི. ཨེཀདྷམྨོ སབྦདྷམྨེསུ ནིཔཏཏི, སབྦདྷམྨཱ ཨེཀདྷམྨསྨིཾ ནིཔཏནྟི. ཀཐཾ? ཨཡཉྷི ནཱམཔཉྙཏྟི ཨེཀདྷམྨོ, སོ སབྦེསུ ཙཏུབྷཱུམཀདྷམྨེསུ ནིཔཏཏི. སཏྟོཔི སངྑཱརོཔི ནཱམཏོ མུཏྟཀོ ནཱམ ནཏྠི.

ཨཊཝཱིཔབྦཏཱདཱིསུ རུཀྑོཔི ཛཱནཔདཱནཾ བྷཱརོ. ཏེ ཧི ‘ཨཡཾ ཀིཾ རུཀྑོ ནཱམཱ’ཏི པུཊྛཱ ‘ཁདིརོ’ ‘པལཱསོ’ཏི ཨཏྟནཱ ཛཱནནཀནཱམཾ ཀཐེནྟི. ཡསྶ ནཱམཾ ན ཛཱནནྟི ཏམྤི ‘ཨནཱམཀོ’ ¶ ནཱམཱཏི ཝདནྟི. ཏམྤི ཏསྶ ནཱམདྷེཡྻམེཝ ཧུཏྭཱ ཏིཊྛཏི. སམུདྡེ མཙྪཀཙྪཔཱདཱིསུཔི ཨེསེཝ ནཡོ. ཨིཏརེ དྭེ དུཀཱ ཨིམིནཱ སམཱནཏྠཱ ཨེཝ.

༡༣༡༦. ནཱམརཱུཔདུཀེ ¶ ནཱམཀརཎཊྛེན ཙ ནམནཊྛེན ཙ ནཱམནཊྛེན ཙ ནཱམཾ. ཏཏྠ ཙཏྟཱརོ ཁནྡྷཱ ཏཱཝ ནཱམཀརཎཊྛེན ‘ནཱམཾ’. ཡཐཱ ཧི མཧཱཛནསམྨཏཏྟཱ མཧཱསམྨཏསྶ མཧཱསམྨཏོཏི ནཱམཾ ཨཧོསི, ཡཐཱ ཝཱ མཱཏཱཔིཏརོ ‘ཨཡཾ ཏིསྶོ ནཱམ ཧོཏུ, ཕུསྶོ ནཱམ ཧོཏཱུ’ཏི ཨེཝཾ པུཏྟསྶ ཀིཏྟིམནཱམཾ ཀརོནྟི, ཡཐཱ ཝཱ ‘དྷམྨཀཐིཀོ’ ‘ཝིནཡདྷརོ’ཏི གུཎཏོ ནཱམཾ ཨཱགཙྪཏི, ན ཨེཝཾ ཝེདནཱདཱིནཾ. ཝེདནཱདཡོ ཧི མཧཱཔཐཝཱིཨཱདཡོ ཝིཡ ཨཏྟནོ ནཱམཾ ཀརོནྟཱཝ ཨུཔྤཛྫནྟི. ཏེསུ ཨུཔྤནྣེསུ ཏེསཾ ནཱམཾ ཨུཔྤནྣམེཝ ཧོཏི. ན ཧི ཝེདནཾ ཨུཔྤནྣཾ ‘ཏྭཾ ཝེདནཱ ནཱམ ཧོཧཱི’ཏི ཀོཙི བྷཎཏི. ན ཙ ཏསྶཱ ནཱམགྒཧཎཀིཙྩཾ ཨཏྠི. ཡཐཱ པཐཝིཡཱ ཨུཔྤནྣཱཡ ‘ཏྭཾ པཐཝཱི ནཱམ ཧོཧཱི’ཏི ནཱམགྒཧཎཀིཙྩཾ ནཏྠི, ཙཀྐཝཱལ༹སིནེརུཙནྡིམསཱུརིཡནཀྑཏྟེསུ ཨུཔྤནྣེསུ ‘ཏྭཾ ཙཀྐཝཱལ༹ཾ ནཱམ ཧོཧི ཏྭཾ ནཀྑཏྟཾ ནཱམ ཧོཧཱི’ཏི ནཱམགྒཧཎཀིཙྩཾ ནཏྠི, ནཱམཾ ཨུཔྤནྣམེཝ ཧོཏི, ཨོཔཔཱཏིཀཔཉྙཏྟིཡཾ ནིཔཏཏི, ཨེཝཾ ཝེདནཱཡ ཨུཔྤནྣཱཡ ‘ཏྭཾ ཝེདནཱ ནཱམ ཧོཧཱི’ཏི ནཱམགྒཧཎཀིཙྩཾ ནཏྠི. ཏཱཡ ¶ ཨུཔྤནྣཱཡ ཝེདནཱཏི ནཱམཾ ཨུཔྤནྣམེཝ ཧོཏི. ཨོཔཔཱཏིཀཔཉྙཏྟིཡཾ ནིཔཏཏི. སཉྙཱདཱིསུཔི ཨེསེཝ ནཡོ. ཨཏཱིཏེཔི ཧི ཝེདནཱ ཝེདནཱཡེཝ, སཉྙཱ… སངྑཱརཱ… ཝིཉྙཱཎཾ ཝིཉྙཱཎམེཝ. ཨནཱགཏེཔི, པཙྩུཔྤནྣེཔི. ནིབྦཱནཾ པན སདཱཔི ནིབྦཱནམེཝཱཏི. ‘ནཱམཀརཎཊྛེན’ ནཱམཾ.

‘ནམནཊྛེནཱ’པི ཙེཏྠ ཙཏྟཱརོ ཁནྡྷཱ ནཱམཾ. ཏེ ཧི ཨཱརམྨཎཱབྷིམུཁཱ ནམནྟི. ‘ནཱམནཊྛེན’ སབྦམྤི ནཱམཾ. ཙཏྟཱརོ ཧི ཁནྡྷཱ ཨཱརམྨཎེ ཨཉྙམཉྙཾ ནཱམེནྟི. ནིབྦཱནཾ ཨཱརམྨཎཱདྷིཔཏིཔཙྩཡཏཱཡ ཨཏྟནི ཨནཝཛྫདྷམྨེ ནཱམེཏི.

༡༣༡༨. ཨཝིཛྫཱབྷཝཏཎྷཱ ཝཊྚམཱུལསམུདཱཙཱརདསྶནཏྠཾ གཧིཏཱ.

༡༣༢༠. བྷཝིསྶཏི ཨཏྟཱ ཙ ལོཀོ ཙཱཏི ཁནྡྷཔཉྩཀཾ ཨཏྟཱ ཙ ལོཀོ ཙཱཏི གཧེཏྭཱ ‘ཏཾ བྷཝིསྶཏཱི’ཏི གཧཎཱཀཱརེན ནིཝིཊྛཱ སསྶཏདིཊྛི. དུཏིཡཱ ‘ན བྷཝིསྶཏཱི’ཏི ཨཱཀཱརེན ནིཝིཊྛཱ ཨུཙྪེདདིཊྛི.

༡༣༢༦. པུབྦནྟཾ ¶ ¶ ཨཱརབྦྷཱཏི ཨཏཱིཏཀོཊྛཱསཾ ཨཱརམྨཎཾ ཀརིཏྭཱ. ཨིམིནཱ བྲཧྨཛཱལེ ཨཱགཏཱ ཨཊྛཱརས པུབྦནྟཱནུདིཊྛིཡོ གཧིཏཱ. ཨཔརནྟཾ ཨཱརབྦྷཱཏི ཨནཱགཏཀོཊྛཱསཾ ཨཱརམྨཎཾ ཀརིཏྭཱ. ཨིམིནཱ ཏཏྠེཝ ཨཱགཏཱ ཙཏུཙཏྟཱལཱིས ཨཔརནྟཱནུདིཊྛིཡོ གཧིཏཱ.

༡༣༣༢. དོཝཙསྶཏཱནིདྡེསེ སཧདྷམྨིཀེ ཝུཙྩམཱནེཏི སཧདྷམྨིཀཾ ནཱམ ཡཾ བྷགཝཏཱ པཉྙཏྟཾ སིཀྑཱཔདཾ, ཏསྨིཾ ཝཏྠུཾ དསྶེཏྭཱ ཨཱཔཏྟིཾ ཨཱརོཔེཏྭཱ ‘ཨིདཾ ནཱམ ཏྭཾ ཨཱཔཏྟིཾ ཨཱཔནྣོ, ཨིངྒྷ དེསེཧི ཝུཊྛཱཧི པཊིཀརོཧཱི’ཏི ཝུཙྩམཱནེ. དོཝཙསྶཱཡནྟིཨཱདཱིསུ ཨེཝཾ ཙོདིཡམཱནསྶ པཊིཙོདནཱཡ ཝཱ ཨཔྤདཀྑིཎགཱཧིཏཱཡ ཝཱ དུབྦཙསྶ ཀམྨཾ དོཝཙསྶཱཡཾ. ཏདེཝ དོཝཙསྶནྟིཔི ཝུཙྩཏི. ཏསྶ བྷཱཝོ དོཝཙསྶིཡཾ. ཨིཏརཾ ཏསྶེཝ ཝེཝཙནཾ. ཝིཔྤཊིཀཱུལགཱཧིཏཱཏི ཝིལོམགཱཧིཏཱ. ཝིལོམགཧཎསངྑཱཏེན ཝིཔཙྩནཱིཀེན སཱཏཾ ཨསྶཱཏི ཝིཔཙྩནཱིཀསཱཏོ. ‘པཊཱཎིཀགཧཎཾ གཧེཏྭཱ ཨེཀཔདེནེཝ ཏཾ ནིསྶདྡམཀཱསི’ནྟི སུཁཾ པཊིལབྷནྟསྶེཏཾ ཨདྷིཝཙནཾ. ཏསྶ བྷཱཝོ ཝིཔཙྩནཱིཀསཱཏཏཱ. ཨོཝཱདཾ ཨནཱདིཡནཝསེན ཨནཱདརསྶ བྷཱཝོ ཨནཱདརིཡཾ. ཨིཏརཾ ཏསྶེཝ ཝེཝཙནཾ. ཨནཱདིཡནཱཀཱརོ ཝཱ ཨནཱདརཏཱ. གརུཝཱསཾ ཨཝསནཝསེན ཨུཔྤནྣོ ཨགཱརཝབྷཱཝོ ཨགཱརཝཏཱ. སཛེཊྛཀཝཱསཾ ཨཝསནཝསེན ཨུཔྤནྣོ ཨཔྤཊིསྶཝབྷཱཝོ ཨཔྤཊིསྶཝཏཱ. ཨཡཾ ཝུཙྩཏཱིཏི ཨཡཾ ¶ ཨེཝརཱུཔཱ དོཝཙསྶཏཱ ནཱམ ཝུཙྩཏི. ཨཏྠཏོ པནེསཱ ཏེནཱཀཱརེན པཝཏྟཱ ཙཏྟཱརོ ཁནྡྷཱ, སངྑཱརཀྑནྡྷོཡེཝ ཝཱཏི. པཱཔམིཏྟཏཱདཱིསུཔི ཨེསེཝ ནཡོ. དོཝཙསྶཏཱ པཱཔམིཏྟཏཱདཡོ ཧི ཝིསུཾ ཙེཏསིཀདྷམྨཱ ནཱམ ནཏྠི.

༡༣༣༣. ནཏྠི ¶ ཨེཏེསཾ སདྡྷཱཏི ཨསྶདྡྷཱ; བུདྡྷཱདཱིནི ཝཏྠཱུནི ན སདྡཧནྟཱིཏི ཨཏྠོ. དུསྶཱིལཱཏི སཱིལསྶ དུནྣཱམཾ ནཏྠི, ནིསྶཱིལཱཏི ཨཏྠོ. ཨཔྤསྶུཏཱཏི སུཏརཧིཏཱ. པཉྩ མཙྪརིཡཱནི ཨེཏེསཾ ཨཏྠཱིཏི མཙྪརིནོ. དུཔྤཉྙཱཏི ནིཔྤཉྙཱ. སེཝནཀཝསེན སེཝནཱ. བལཝསེཝནཱ ནིསེཝནཱ. སབྦཏོབྷཱགེན སེཝནཱ སཾསེཝནཱ. ཨུཔསགྒཝསེན ཝཱ པདཾ ཝཌྜྷིཏཾ. ཏཱིཧིཔི སེཝནཱཝ ཀཐིཏཱ. བྷཛནཱཏི ཨུཔསངྐམནཱ. སམྦྷཛནཱཏི སབྦཏོབྷཱགེན བྷཛནཱ. ཨུཔསགྒཝསེན ཝཱ པདཾ ཝཌྜྷིཏཾ. བྷཏྟཱིཏི དལ༹ྷབྷཏྟི. སམྦྷཏྟཱིཏི སབྦཏོབྷཱགེན བྷཏྟི. ཨུཔསགྒཝསེན ཝཱ པདཾ ཝཌྜྷིཏཾ. དྭཱིཧིཔི དལ༹ྷབྷཏྟི ཨེཝ ཀཐིཏཱ. ཏཾསམྤཝངྐཏཱཏི ཏེསུ པུགྒལེསུ ཀཱཡེན ཙེཝ ཙིཏྟེན ཙ སམྤཝངྐབྷཱཝོ; ཏནྣིནྣཏཱ ཏཔྤོཎཏཱ ཏཔྤབྦྷཱརཏཱཏི ཨཏྠོ.

༡༣༣༤. སོཝཙསྶཏཱདུཀནིདྡེསོཔི ཝུཏྟཔཊིཔཀྑནཡེན ཝེདིཏབྦོ.

༡༣༣༦. པཉྩཔི ¶ ཨཱཔཏྟིཀྑནྡྷཱཏི མཱཏིཀཱནིདྡེསེན ‘པཱརཱཛིཀཾ སངྒྷཱདིསེསཾ པཱཙིཏྟིཡཾ པཱཊིདེསནཱིཡཾ དུཀྐཊ’ནྟི ཨིམཱ པཉྩ ཨཱཔཏྟིཡོ. སཏྟཔི ཨཱཔཏྟིཀྑནྡྷཱཏི ཝིནཡནིདྡེསེན ‘པཱརཱཛིཀཾ སངྒྷཱདིསེསཾ ཐུལླཙྩཡཾ པཱཙིཏྟིཡཾ པཱཊིདེསནཱིཡཾ དུཀྐཊཾ དུབྦྷཱསིཏ’ནྟི ཨིམཱ སཏྟ ཨཱཔཏྟིཡོ. ཏཏྠ སཧ ཝཏྠུནཱ ཏཱསཾ ཨཱཔཏྟཱིནཾ པརིཙྪེདཛཱནནཀཔཉྙཱ ཨཱཔཏྟིཀུསལཏཱ ནཱམ. སཧ ཀམྨཝཱཙཱཡ ཨཱཔཏྟིཝུཊྛཱནཔརིཙྪེདཛཱནནཀཔཉྙཱ པན ཨཱཔཏྟིཝུཊྛཱནཀུསལཏཱ ནཱམ.

༡༣༣༨. སམཱཔཛྫིཏབྦཏོ སམཱཔཏྟི. སཧ པརིཀམྨེན ཨཔྤནཱཔརིཙྪེདཛཱནནཀཔཉྙཱ པན སམཱཔཏྟིཀུསལཏཱ ནཱམ. ‘ཙནྡེ ཝཱ སཱུརིཡེ ཝཱ ནཀྑཏྟེ ཝཱ ཨེཏྟཀཾ ཋཱནཾ གཏེ ཝུཊྛཧིསྶཱམཱི’ཏི ཨཝིརཛ྄ཛྷིཏྭཱ ཏསྨིཾཡེཝ སམཡེ ཝུཊྛཱནཀཔཉྙཱཡ ཨཏྠིཏཱཡ སམཱཔཏྟིཝུཊྛཱནཀུསལཏཱ ནཱམ.

༡༣༤༠. ཨཊྛཱརསནྣཾ ¶ ¶ དྷཱཏཱུནཾ ཨུགྒཧམནསིཀཱརསཝནདྷཱརཎཔརིཙྪེདཛཱནནཀཔཉྙཱ དྷཱཏུཀུསལཏཱ ནཱམ. ཏཱསཾཡེཝ ཨུགྒཧམནསིཀཱརཛཱནནཀཔཉྙཱ མནསིཀཱརཀུསལཏཱ ནཱམ.

༡༣༤༢. དྭཱདསནྣཾ ཨཱཡཏནཱནཾ ཨུགྒཧམནསིཀཱརསཝནདྷཱརཎཔརིཙྪེདཛཱནནཀཔཉྙཱ ལཏཱ ནཱམ. ཏཱིསུཔི ཝཱ ཨེཏཱསུ ཀུསལཏཱསུ ཨུགྒཧོ མནསིཀཱརོ སཝནཾ སམྨསནཾ པཊིཝེདྷོ པཙྩཝེཀྑཎཱཏི སབྦཾ ཝཊྚཏི. ཏཏྠ སཝནཨུགྒཧཔཙྩཝེཀྑཎཱ ལོཀིཡཱ, པཊིཝེདྷོ ལོཀུཏྟརོ. སམྨསནམནསིཀཱརཱ ལོཀིཡལོཀུཏྟརམིསྶཀཱ. ‘ཨཝིཛྫཱཔཙྩཡཱ སངྑཱརཱ’ཏིཨཱདཱིནི (ཝིབྷ. ཨཊྛ. ༢༢༥) པཊིཙྩསམུཔྤཱདཝིབྷངྒེ ཨཱཝིབྷཝིསྶནྟི. ‘ཨིམིནཱ པན པཙྩཡེན ཨིདཾ ཧོཏཱི’ཏི ཛཱནནཀཔཉྙཱ པཊིཙྩསམུཔྤཱདཀུསལཏཱ ནཱམ.

༡༣༤༤. ཋཱནཱཊྛཱནཀུསལཏཱདུཀནིདྡེསེ ཧེཏཱུ པཙྩཡཱཏི ཨུབྷཡམྤེཏཾ ཨཉྙམཉྙཝེཝཙནཾ. ཙཀྑུཔསཱདོ ཧི རཱུཔཾ ཨཱརམྨཎཾ ཀཏྭཱ ཨུཔྤཛྫནཀསྶ ཙཀྑུཝིཉྙཱཎསྶ ཧེཏུ ཙེཝ པཙྩཡོ ཙ. ཏཐཱ སོཏཔསཱདཱདཡོ སོཏཝིཉྙཱཎཱདཱིནཾ, ཨམྦབཱིཛཱདཱིནི ཙ ཨམྦཕལཱདཱིནཾ. དུཏིཡནཡེ ཡེ ཡེ དྷམྨཱཏི ཝིསབྷཱགཔཙྩཡདྷམྨཱནཾ ནིདསྶནཾ. ཡེསཾ ཡེསནྟི ཝིསབྷཱགཔཙྩཡསམུཔྤནྣདྷམྨནིདསྶནཾ. ན ཧེཏཱུ ན པཙྩཡཱཏི ཙཀྑུཔསཱདོ སདྡཾ ཨཱརམྨཎཾ ཀཏྭཱ ཨུཔྤཛྫནཀསྶ སོཏཝིཉྙཱཎསྶ ན ཧེཏུ ན པཙྩཡོ. ཏཐཱ སོཏཔསཱདཱདཡོ ཨཝསེསཝིཉྙཱཎཱདཱིནཾ. ཨམྦཱདཡོ ཙ ཏཱལཱདཱིནཾ ཨུཔྤཏྟིཡཱཏི ཨེཝམཏྠོ ཝེདིཏབྦོ.

༡༣༤༦. ཨཛྫཝམདྡཝནིདྡེསེ ¶ ནཱིཙཙིཏྟཏཱཏི པདམཏྟམེཝ ཝིསེསོ. ཏསྶཏྠོ – མཱནཱབྷཱཝེན ནཱིཙཾ ཙིཏྟཾ ཨསྶཱཏི ནཱིཙཙིཏྟོ. ནཱིཙཙིཏྟསྶ བྷཱཝོ ནཱིཙཙིཏྟཏཱ. སེསཾ ཙིཏྟུཛུཀཏཱཙིཏྟམུདུཏཱནཾ པདབྷཱཛནཱིཡེ ཨཱགཏམེཝ.

༡༣༤༨. ཁནྟིནིདྡེསེ ཁམནཀཝསེན ཁནྟི. ཁམནཱཀཱརོ ཁམནཏཱ. ཨདྷིཝཱསེནྟི ཨེཏཱཡ, ཨཏྟནོ ཨུཔརི ཨཱརོཔེཏྭཱ ཝཱསེནྟི, ན པཊིབཱཧནྟི, ན པཙྩནཱིཀཏཱཡ ཏིཊྛནྟཱིཏི ཨདྷིཝཱསནཏཱ ¶ . ཨཙཎྜིཀསྶ བྷཱཝོ ཨཙཎྜིཀྐཾ. ཨནསུརོཔོཏི ཨསུརོཔོ ཝུཙྩཏི ན སམྨཱརོཔིཏཏྟཱ དུརུཏྟཝཙནཾ. ཏཔྤཊིཔཀྑཏོ ཨནསུརོཔོ སུརུཏྟཝཱཙཱཏི ཨཏྠོ. ཨེཝམེཏྠ ཕལཱུཔཙཱརེན ¶ ཀཱརཎཾ ནིདྡིཊྛཾ. ཨཏྟམནཏཱ ཙིཏྟསྶཱཏི སོམནསྶཝསེན ཙིཏྟསྶ སཀམནཏཱ, ཨཏྟནོ ཙིཏྟསབྷཱཝོཡེཝ, ན བྱཱཔནྣཙིཏྟཏཱཏི ཨཏྠོ.

༡༣༤༩. སོརཙྩནིདྡེསེ ཀཱཡིཀོ ཨཝཱིཏིཀྐམོཏི ཏིཝིདྷཾ ཀཱཡསུཙརིཏཾ. ཝཱཙསིཀོ ཨཝཱིཏིཀྐམོཏི ཙཏུབྦིདྷཾ ཝཙཱིསུཙརིཏཾ. ཀཱཡིཀཝཱཙསིཀོཏི ཨིམིནཱ ཀཱཡཝཙཱིདྭཱརསམུཊྛིཏཾ ཨཱཛཱིཝཊྛམཀསཱིལཾ པརིཡཱདིཡཏི. ཨིདཾ ཝུཙྩཏི སོརཙྩནྟི ཨིདཾ པཱཔཏོ སུཊྛུ ཨོརཏཏྟཱ སོརཙྩཾ ནཱམ ཝུཙྩཏི. སབྦོཔི སཱིལསཾཝརོཏི ཨིདཾ ཡསྨཱ ན ཀེཝལཾ ཀཱཡཝཱཙཱཧེཝ ཨནཱཙཱརཾ ཨཱཙརཏི མནསཱཔི ཨཱཙརཏི ཨེཝ, ཏསྨཱ མཱནསིཀསཱིལཾ པརིཡཱདཱཡ དསྶེཏུཾ ཝུཏྟཾ.

༡༣༥༠. སཱཁལྱནིདྡེསེ ཨཎྜཀཱཏི ཡཐཱ སདོསེ རུཀྑེ ཨཎྜཀཱནི ཨུཊྛཧནྟི, ཨེཝཾ སདོསཏཱཡ ཁུཾསནཝམྦྷནཱདིཝཙནེཧི ཨཎྜཀཱ ཛཱཏཱ. ཀཀྐསཱཏི པཱུཏིཀཱ སཱ ཡཐཱ ནཱམ པཱུཏིརུཀྑོ ཀཀྐསོ ཧོཏི པགྒྷརིཏཙུཎྞོ ཨེཝཾ ཀཀྐསཱ ཧོཏི. སོཏཾ གྷཾསཡམཱནཱ ཝིཡ པཝིསཏི. ཏེན ཝུཏྟཾ ‘ཀཀྐསཱ’ཏི. པརཀཊུཀཱཏི པརེསཾ ཀཊུཀཱ ཨམནཱཔཱ དོསཛནནཱི. པརཱབྷིསཛྫནཱིཏི ཀུཊིལཀཎྚཀསཱཁཱ ཝིཡ ཙམྨེསུ ཝིཛ྄ཛྷིཏྭཱ པརེསཾ ཨབྷིསཛྫནཱི, གནྟུཀཱམཱནམྤི གནྟུཾ ཨདཏྭཱ ལགྒནཀཱརཱི. ཀོདྷསཱམནྟཱཏི ཀོདྷསྶ ཨཱསནྣཱ. ཨསམཱདྷིསཾཝཏྟནིཀཱཏི ཨཔྤནཱསམཱདྷིསྶ ཝཱ ཨུཔཙཱརསམཱདྷིསྶ ཝཱ ཨསཾཝཏྟནིཀཱ. ཨིཏི སབྦཱནེཝེཏཱནི སདོསཝཱཙཱཡ ཝེཝཙནཱནི. ཏཐཱརཱུཔིཾ ཝཱཙཾ པཧཱཡཱཏི ཨིདཾ ཕརུསཝཱཙཾ ཨཔྤཛཧིཏྭཱ ¶ ཋིཏསྶ ཨནྟརནྟརེ པཝཏྟཱཔི སཎྷཝཱཙཱ ཨསཎྷཝཱཙཱ ཨེཝ ནཱམཱཏི དཱིཔནཏྠཾ ཝུཏྟཾ.

ནེལཱ༹ཏི ¶ ཨེལ༹ཾ ཝུཙྩཏི དོསོ. ནཱསྶཱ ཨེལ༹ནྟི ནེལཱ༹; ནིདྡོསཱཏི ཨཏྠོ. ‘‘ནེལ༹ངྒོ སེཏཔཙྪཱདོ’’ཏི (ཨུདཱ. ༦༥; སཾ. ནི. ༤.༣༤༧; པེཊཀོ. ༢༥) ཨེཏྠ ཝུཏྟནེལ༹ཾ ཝིཡ. ཀཎྞསུཁཱཏི བྱཉྫནམདྷུརཏཱཡ ཀཎྞཱནཾ སུཁཱ, སཱུཙིཝིཛ྄ཛྷནཾ ཝིཡ ཀཎྞསཱུལཾ ན ཛནེཏི. ཨཏྠམདྷུརཏཱཡ སརཱིརེ ཀོཔཾ ཨཛནེཏྭཱ པེམཾ ཛནེཏཱིཏི པེམནཱིཡཱ. ཧདཡཾ གཙྪཏི, ཨཔྤཊིཧཉྙམཱནཱ སུཁེན ཙིཏྟཾ པཝིསཏཱིཏི ཧདཡངྒམཱ. གུཎཔརིཔུཎྞཏཱཡ པུརེ བྷཝཱཏི པོརཱི. པུརེ སཾཝཌྜྷནཱརཱི ཝིཡ སུཀུམཱརཱཏིཔི པོརཱི. པུརསྶ ཨེསཱཏིཔི པོརཱི; ནགརཝཱསཱིནཾ ཀཐཱཏི ཨཏྠོ. ནགརཝཱསིནོ ཧི ¶ ཡུཏྟཀཐཱ ཧོནྟི. པིཏིམཏྟཾ པིཏཱཏི བྷཱཏིམཏྟཾ བྷཱཏཱཏི ཝདནྟི. ཨེཝརཱུཔཱི ཀཐཱ བཧུནོ ཛནསྶ ཀནྟཱ ཧོཏཱིཏི བཧུཛནཀནྟཱ. ཀནྟབྷཱཝེནེཝ བཧུནོ ཛནསྶ མནཱཔཱ ཙིཏྟཝུཌྜྷིཀརཱཏི བཧུཛནམནཱཔཱ. ཡཱ ཏཏྠཱཏི ཡཱ ཏསྨིཾ པུགྒལེ. སཎྷཝཱཙཏཱཏི མཊྛཝཱཙཏཱ. སཁིལཝཱཙཏཱཏི མུདུཝཱཙཏཱ. ཨཕརུསཝཱཙཏཱཏི ཨཀཀྑལ༹ཝཱཙཏཱ.

༡༣༥༡. པཊིསནྠཱརནིདྡེསེ ཨཱམིསཔཊིསནྠཱརོཏི ཨཱམིསཨལཱབྷེན ཨཏྟནཱ སཧ པརེསཾ ཚིདྡཾ ཡཐཱ པིཧིཏཾ ཧོཏི པཊིཙྪནྣཾ ཨེཝཾ ཨཱམིསེན པཊིསནྠརཎཾ. དྷམྨཔཊིསནྠཱརོཏི དྷམྨསྶ ཨཔྤཊིལཱབྷེན ཨཏྟནཱ སཧ པརེསཾ ཚིདྡཾ ཡཐཱ པིཧིཏཾ ཧོཏི པཊིཙྪནྣཾ, ཨེཝཾ དྷམྨེན པཊིསནྠརཎཾ. པཊིསནྠཱརཀོ ཧོཏཱིཏི དྭེཡེཝ ཧི ལོཀསནྣིཝཱསསྶ ཚིདྡཱནི, ཏེསཾ པཊིསནྠཱརཀོ ཧོཏི. ཨཱམིསཔཊིསནྠཱརེན ཝཱ དྷམྨཔཊིསནྠཱརེན ཝཱཏི ཨིམིནཱ དུཝིདྷེན པཊིསནྠཱརེན པཊིསནྠཱརཀོ ཧོཏི, པཊིསནྠརཏི, ནིརནྟརཾ ཀརོཏི.

ཏཏྲཱཡཾ ཨཱདིཏོ པཊྛཱཡ ཀཐཱ – པཊིསནྠཱརཀེན ཧི བྷིཀྑུནཱ ཨཱགནྟུཀཾ ཨཱགཙྪནྟཾ དིསྭཱཝ པཙྩུགྒནྟྭཱ པཏྟཙཱིཝརཾ ¶ གཧེཏབྦཾ, ཨཱསནཾ དཱཏབྦཾ, ཏཱལཝཎྚེན བཱིཛིཏབྦཾ, པཱདཱ དྷོཝིཏྭཱ མཀྑེཏབྦཱ, སཔྤིཕཱཎིཏེ སཏི བྷེསཛྫཾ དཱཏབྦཾ, པཱནཱིཡེན པུཙྪིཏབྦོ, ཨཱཝཱསོ པཊིཛགྒིཏབྦོ. ཨེཝཾ ཨེཀདེསེན ཨཱམིསཔཊིསནྠཱརོ ཀཏོ ནཱམ ཧོཏི.

སཱཡཾ པན ནཝཀཏརེཔི ཨཏྟནོ ཨུཔཊྛཱནཾ ཨནཱགཏེཡེཝ, ཏསྶ སནྟིཀཾ གནྟྭཱ ནིསཱིདིཏྭཱ ཨཝིསཡེ ཨཔུཙྪིཏྭཱ ཏསྶ ཝིསཡེ པཉྷོ པུཙྪིཏབྦོ. ‘ཏུམྷེ ཀཏརབྷཱཎཀཱ’ཏི ཨཔུཙྪིཏྭཱ ཏུམྷཱཀཾ ‘ཨཱཙརིཡུཔཛ྄ཛྷཱཡཱ ཀཏརཾ གནྠཾ ཝལ༹ཉྫེནྟཱི’ཏི པུཙྪིཏྭཱ པཧོནཀཊྛཱནེ པཉྷོ པུཙྪིཏབྦོ. སཙེ ཀཐེཏུཾ སཀྐོཏི ཨིཙྩེཏཾ ཀུསལཾ. ནོ ཙེ སཀྐོཏི སཡཾ ཀཐེཏྭཱ དཱཏབྦཾ. ཨེཝཾ ཨེཀདེསེན དྷམྨཔཊིསནྠཱརོ ཀཏོ ནཱམ ཧོཏི.

སཙེ ¶ ཨཏྟནོ སནྟིཀེ ཝསཏི ཏཾ ཨཱདཱཡ ནིབདྡྷཾ པིཎྜཱཡ ཙརིཏབྦཾ. སཙེ གནྟུཀཱམོ ཧོཏི པུནདིཝསེ གམནསབྷཱགེན ཏཾ ཨཱདཱཡ ཨེཀསྨིཾ གཱམེ པིཎྜཱཡ ཙརིཏྭཱ ཨུཡྻོཛེཏབྦོ. སཙེ ཨཉྙསྨིཾ དིསཱབྷཱགེ བྷིཀྑཱུ ནིམནྟིཏཱ ཧོནྟི ཏཾ བྷིཀྑུཾ ཨིཙྪམཱནཾ ཨཱདཱཡ གནྟབྦཾ. ‘ན ¶ མཡ྄ཧཾ ཨེསཱ དིསཱ སབྷཱགཱ’ཏི གནྟུཾ ཨནིཙྪནྟེ སེསབྷིཀྑཱུ པེསེཏྭཱ ཏཾ ཨཱདཱཡ པིཎྜཱཡ ཙརིཏབྦཾ. ཨཏྟནཱ ལདྡྷཱམིསཾ ཏསྶ དཱཏབྦཾ. ཨེཝཾ ‘ཨཱམིསཔཊིསནྠཱརོ’ ཀཏོ ནཱམ ཧོཏི.

ཨཱམིསཔཊིསནྠཱརཀེན པན ཨཏྟནཱ ལདྡྷཾ ཀསྶ དཱཏབྦནྟི? ཨཱགནྟུཀསྶ ཏཱཝ དཱཏབྦཾ. སཙེ གིལཱནོ ཝཱ ཨཝསྶིཀོ ཝཱ ཨཏྠི, ཏེསམྤི དཱཏབྦཾ. ཨཱཙརིཡུཔཛ྄ཛྷཱཡཱནཾ དཱཏབྦཾ. བྷཎྜགཱཧཀསྶ དཱཏབྦཾ. སཱརཱཎཱིཡདྷམྨཔཱུརཀེན པན སཏཝཱརམྤི སཧསྶཝཱརམྤི ཨཱགཏཱགཏཱནཾ ཐེརཱསནཏོ པཊྛཱཡ དཱཏབྦཾ. པཊིསནྠཱརཀེན པན ཡེན ཡེན ན ལདྡྷཾ, ཏསྶ ཏསྶ དཱཏབྦཾ. བཧིགཱམཾ ནིཀྑམིཏྭཱ ཛིཎྞཀཾ ཝཱ ཨནཱཐཾ བྷིཀྑུཾ ཝཱ བྷིཀྑུནིཾ ཝཱ དིསྭཱ ཏེསམྤི དཱཏབྦཾ.

ཏཏྲིདཾ ཝཏྠུ – ཙོརེཧི ཀིར གུཏྟསཱལགཱམེ པཧཏེ ཏངྑཎཉྙེཝ ཨེཀཱ ནིརོདྷཏོ ཝུཊྛིཏཱ ཁཱིཎཱསཝཏྠེརཱི དཧརབྷིཀྑུནིཡཱ བྷཎྜཀཾ གཱཧཱཔེཏྭཱ མཧཱཛནེན སདྡྷིཾ མགྒཾ པཊིཔཛྫིཏྭཱ ཋིཏམཛ྄ཛྷནྷིཀེ ནཀུལནགརགཱམདྭཱརཾ ¶ པཏྭཱ རུཀྑམཱུལེ ནིསཱིདི. ཏསྨིཾ སམཡེ ཀཱལ༹ཝལླིམཎྜཔཝཱསཱི མཧཱནཱགཏྠེརོ ནཀུལནགརགཱམེ པིཎྜཱཡ ཙརིཏྭཱ ནིཀྑནྟོ ཐེརིཾ དིསྭཱ བྷཏྟེན ཨཱཔུཙྪི. སཱ ‘པཏྟོ མེ ནཏྠཱི’ཏི ཨཱཧ. ཐེརོ ‘ཨིམིནཱཝ བྷུཉྫཐཱ’ཏི སཧ པཏྟེན ཨདཱསི. ཐེརཱི བྷཏྟཀིཙྩཾ ཀཏྭཱ པཏྟཾ དྷོཝིཏྭཱ ཐེརསྶ དཏྭཱ ཨཱཧ – ‘ཨཛྫ ཏཱཝ བྷིཀྑཱཙཱརེན ཀིལམིསྶཐ, ཨིཏོ པཊྛཱཡ པན ཝོ བྷིཀྑཱཙཱརཔརིཏྟཱསོ ནཱམ ན བྷཝིསྶཏི, ཏཱཏཱ’ཏི. ཏཏོ པཊྛཱཡ ཐེརསྶ ཨཱུནཀཧཱཔཎགྒྷནཀོ པིཎྜཔཱཏོ ནཱམ ན ཨུཔྤནྣཔུབྦོ. ཨཡཾ ‘ཨཱམིསཔཊིསནྠཱརོ’ ནཱམ.

ཨིམཾ པཊིསནྠཱརཾ ཀཏྭཱ བྷིཀྑུནཱ སངྒཧཔཀྑེ ཋཏྭཱ ཏསྶ བྷིཀྑུནོ ཀམྨཊྛཱནཾ ཀཐེཏབྦཾ, དྷམྨོ ཝཱཙེཏབྦོ, ཀུཀྐུཙྩཾ ཝིནོདེཏབྦཾ, ཨུཔྤནྣཾ ཀིཙྩཾ ཀརཎཱིཡཾ ཀཱཏབྦཾ, ཨབྦྷཱནཝུཊྛཱནམཱནཏྟཔརིཝཱསཱ དཱཏབྦཱ. པབྦཛྫཱརཧོ པབྦཱཛེཏབྦོ ཨུཔསམྤདཱརཧོ ཨུཔསམྤཱདེཏབྦོ. བྷིཀྑུནིཡཱཔི ཨཏྟནོ སནྟིཀེ ཨུཔསམྤདཾ ཨཱཀངྑམཱནཱཡ ཀམྨཝཱཙཾ ཀཱཏུཾ ཝཊྚཏི. ཨཡཾ ‘དྷམྨཔཊིསནྠཱརོ’ ནཱམ.

ཨིམེཧི ¶ ¶ དྭཱིཧི པཊིསནྠཱརེཧི པཊིསནྠཱརཀོ བྷིཀྑུ ཨནུཔྤནྣཾ ལཱབྷཾ ཨུཔྤཱདེཏི, ཨུཔྤནྣཾ ཐཱཝརཾ ཀརོཏི, སབྷཡཊྛཱནེ ཨཏྟནོ ཛཱིཝིཏཾ རཀྑཏི ཙོརནཱགརཉྙོ པཏྟགྒཧཎཧཏྠེནེཝ ཨགྒཾ གཧེཏྭཱ པཏྟེནེཝ བྷཏྟཾ ཨཱཀིརནྟོ ཐེརོ ཝིཡ. ཨལདྡྷལཱབྷུཔྤཱདནེ པན ཨིཏོ པལཱཡིཏྭཱ པརཏཱིརཾ གཏེན མཧཱནཱགརཉྙཱ ཨེཀསྶ ཐེརསྶ སནྟིཀེ སངྒཧཾ ལབྷིཏྭཱ པུན ཨཱགནྟྭཱ རཛྫེ པཏིཊྛིཏེན སེཏམྦངྒཎེ ཡཱཝཛཱིཝཾ པཝཏྟིཏཾ མཧཱབྷེསཛྫདཱནཝཏྠུ ཀཐེཏབྦཾ. ཨུཔྤནྣལཱབྷཐཱཝརཀརཎེ དཱིགྷབྷཱཎཀཨབྷཡཏྠེརསྶ ཧཏྠཏོ པཊིསནྠཱརཾ ལབྷིཏྭཱ ཙེཏིཡཔབྦཏེ ཙོརེཧི བྷཎྜཀསྶ ཨཝིལུཏྟབྷཱཝེ ཝཏྠུ ཀཐེཏབྦཾ.

༡༣༥༢. ཨིནྡྲིཡེསུ ཨགུཏྟདྭཱརཏཱནིདྡེསེ ཙཀྑུནཱ རཱུཔཾ དིསྭཱཏི ཀཱརཎཝསེན ཙཀྑཱུཏི ལདྡྷཝོཧཱརེན རཱུཔདསྶནསམཏྠེན ¶ ཙཀྑུཝིཉྙཱཎེན རཱུཔཾ དིསྭཱ. པོརཱཎཱ པནཱཧུ – ‘‘ཙཀྑུ རཱུཔཾ ན པསྶཏི, ཨཙིཏྟཀཏྟཱ; ཙིཏྟཾ ན པསྶཏི, ཨཙཀྑུཀཏྟཱ; དྭཱརཱརམྨཎསངྒྷཊྚནེན པན པསཱདཝཏྠུཀེན ཙིཏྟེན པསྶཏི. ཨཱིདིསཱི པནེསཱ ‘དྷནུནཱ ཝིཛྫཏཱི’ཏིཨཱདཱིསུ ཝིཡ སསམྦྷཱརཀཐཱ ནཱམ ཧོཏི. ཏསྨཱ ཙཀྑུཝིཉྙཱཎེན རཱུཔཾ དིསྭཱ’’ཏི ཨཡམེཝེཏྠ ཨཏྠོཏི. ནིམིཏྟགྒཱཧཱིཏི ཨིཏྠིཔུརིསནིམིཏྟཾ ཝཱ སུབྷནིམིཏྟཱདིཀཾ ཝཱ ཀིལེསཝཏྠུབྷཱུཏཾ ནིམིཏྟཾ ཚནྡརཱགཝསེན གཎྷཱཏི, དིཊྛམཏྟེཡེཝ ན སཎྛཱཏི. ཨནུབྱཉྫནགྒཱཧཱིཏི ཀིལེསཱནཾ ཨནུབྱཉྫནཏོ པཱཀཊབྷཱཝཀརཎཏོ ཨནུབྱཉྫནནྟི ལདྡྷཝོཧཱརཾ ཧཏྠཔཱདསིཏཧསིཏཀཐིཏཨཱལོཀིཏཝིལོཀིཏཱདིབྷེདཾ ཨཱཀཱརཾ གཎྷཱཏི. ཡཏྭཱདྷིཀརཎམེནནྟིཨཱདིམྷི ཡཾཀཱརཎཱ ཡསྶ ཙཀྑུནྡྲིཡཱསཾཝརསྶ ཧེཏུ, ཨེཏཾ པུགྒལཾ སཏིཀཝཱཊེན ཙཀྑུནྡྲིཡཾ ཨསཾཝུཏཾ ཨཔིཧིཏཙཀྑུདྭཱརཾ ཧུཏྭཱ ཝིཧརནྟཾ ཨེཏེ ཨབྷིཛ྄ཛྷཱདཡོ དྷམྨཱ ཨནྭཱསྶཝེཡྻུཾ ཨནུབནྡྷེཡྻུཾ ཨཛ྄ཛྷོཏྠརེཡྻུཾ. ཏསྶ སཾཝརཱཡ ན པཊིཔཛྫཏཱིཏི ཏསྶ ཙཀྑུནྡྲིཡསྶ སཏིཀཝཱཊེན པིདཧནཏྠཱཡ ན པཊིཔཛྫཏི. ཨེཝཾབྷཱུཏོཡེཝ ཙ ན རཀྑཏི ཙཀྑུནྡྲིཡཾ, ན ཙཀྑུནྡྲིཡེ སཾཝརཾ ཨཱཔཛྫཏཱིཏི ཝུཙྩཏི.

ཏཏྠ ཀིཉྩཱཔི ཙཀྑུནྡྲིཡེ སཾཝརོ ཝཱ ཨསཾཝརོ ཝཱ ནཏྠི, ན ཧི ཙཀྑུཔསཱདཾ ནིསྶཱཡ སཏི ཝཱ མུཊྛསྶཙྩཾ ཝཱ ཨུཔྤཛྫཏི. ཨཔིཙ ཡདཱ རཱུཔཱརམྨཎཾ ¶ ཙཀྑུསྶ ཨཱཔཱཐམཱགཙྪཏི ཏདཱ བྷཝངྒེ དྭིཀྑཏྟུཾ ཨུཔྤཛྫིཏྭཱ ནིརུདྡྷེ ཀིརིཡམནོདྷཱཏུ ཨཱཝཛྫནཀིཙྩཾ སཱདྷཡམཱནཱ ཨུཔྤཛྫིཏྭཱ ནིརུཛ྄ཛྷཏི. ཏཏོ ཙཀྑུཝིཉྙཱཎཾ དསྶནཀིཙྩཾ, ཏཏོ ཝིཔཱཀམནོདྷཱཏུ ¶ སམྤཊིཙྪནཀིཙྩཾ, ཏཏོ ཝིཔཱཀཱཧེཏུཀམནོཝིཉྙཱཎདྷཱཏུ སནྟཱིརཎཀིཙྩཾ, ཏཏོ ཀིརིཡཱཧེཏུཀམནོཝིཉྙཱཎདྷཱཏུ ¶ ཝོཊྛབྦནཀིཙྩཾ སཱདྷཡམཱནཱ ཨུཔྤཛྫིཏྭཱ ནིརུཛ྄ཛྷཏི. ཏདནནྟརཾ ཛཝནཾ ཛཝཏི. ཏཏྲཱཔི ནེཝ བྷཝངྒསམཡེ ན ཨཱཝཛྫནཱདཱིནཾ ཨཉྙཏརསམཡེ སཾཝརོ ཝཱ ཨསཾཝརོ ཝཱ ཨཏྠི. ཛཝནཀྑཎེ པན དུསྶཱིལྱཾ ཝཱ མུཊྛསྶཙྩཾ ཝཱ ཨཉྙཱཎཾ ཝཱ ཨཀྑནྟི ཝཱ ཀོསཛྫཾ ཝཱ ཨུཔྤཛྫཏི, ཨསཾཝརོ ཧོཏི.

ཨེཝཾ ཧོནྟོ པན སོ ‘ཙཀྑུནྡྲིཡེ ཨསཾཝརོ’ཏི ཝུཙྩཏི. ཀསྨཱ? ཡསྨཱ ཏསྨིཾ ཨསཾཝརེ སཏི དྭཱརམྤི ཨགུཏྟཾ ཧོཏི, བྷཝངྒམྤི, ཨཱཝཛྫནཱདཱིནིཔི ཝཱིཐིཙིཏྟཱནི. ཡཐཱ ཀིཾ? ཡཐཱ ནགརེ ཙཏཱུསུ དྭཱརེསུ ཨསཾཝུཏེསུ ཀིཉྩཱཔི ཨནྟོགྷརདྭཱརཀོཊྛཀགབྦྷཱདཡོ སུསཾཝུཏཱ, ཏཐཱཔི ཨནྟོནགརེ སབྦཾ བྷཎྜཾ ཨརཀྑིཏཾ ཨགོཔིཏམེཝ ཧོཏི. ནགརདྭཱརེན ཧི པཝིསིཏྭཱ ཙོརཱ ཡདིཙྪཀཾ ཀརེཡྻུཾ. ཨེཝམེཝ ཛཝནེ དུསྶཱིལྱཱདཱིསུ ཨུཔྤནྣེསུ ཏསྨིཾ ཨསཾཝརེ སཏི དྭཱརམྤི ཨགུཏྟཾ ཧོཏི, བྷཝངྒམྤི, ཨཱཝཛྫནཱདཱིནིཔི ཝཱིཐིཙིཏྟཱནཱིཏི.

སོཏེན སདྡཾ སུཏྭཱཏིཨཱདཱིསུཔི ཨེསེཝ ནཡོ. ཡཱ ཨིམེསནྟི ཨེཝཾ སཾཝརཾ ཨནཱཔཛྫནྟསྶ ཨིམེསཾ ཚནྣཾ ཨིནྡྲིཡཱནཾ ཡཱ ཨགུཏྟི ཡཱ ཨགོཔནཱ ཡོ ཨནཱརཀྑོ ཡོ ཨསཾཝརོ, ཨཐཀནཾ, ཨཔིདཧནནྟི ཨཏྠོ.

༡༣༥༣. བྷོཛནེ ཨམཏྟཉྙུཏཱནིདྡེསེ ཨིདྷེཀཙྩོཏི ཨིམསྨིཾ སཏྟལོཀེ ཨེཀཙྩོ. ཨཔྤཊིསངྑཱཏི པཊིསངྑཱནཔཉྙཱཡ ཨཛཱནིཏྭཱ ཨནུཔདྷཱརེཏྭཱ. ཨཡོནིསོཏི ཨནུཔཱཡེན. ཨཱཧཱརནྟི ཨསིཏཔཱིཏཱདིཨཛ྄ཛྷོཧརཎཱིཡཾ. ཨཱཧཱརེཏཱིཏི པརིབྷུཉྫཏི ཨཛ྄ཛྷོཧརཏི. དཝཱཡཱཏིཨཱདི ཨནུཔཱཡདསྶནཏྠཾ ཝུཏྟཾ. ཨནུཔཱཡེན ཧི ཨཱཧཱརེནྟོ དཝཏྠཱཡ མདཏྠཱཡ མཎྜནཏྠཱཡ ཝིབྷཱུསནཏྠཱཡ ཝཱ ཨཱཧཱརེཏི, ནོ ཨིདམཏྠིཏཾ པཊིཙྩ. ཡཱ ཏཏྠ ཨསནྟུཊྛིཏཱཏི ཡཱ ཏསྨིཾ ཨཡོནིསོ ཨཱཧཱརཔརིབྷོགེ ཨསནྟུསྶནཱ ¶ ཨསནྟུཊྛིབྷཱཝོ. ཨམཏྟཉྙུཏཱཏི ཨམཏྟཉྙུབྷཱཝོ, པམཱཎསངྑཱཏཱཡ མཏྟཱཡ ཨཛཱནནཾ. ཨཡཾ ཝུཙྩཏཱིཏི ཨཡཾ ཨཔཙྩཝེཀྑིཏཔརིབྷོགཝསེན པཝཏྟཱ བྷོཛནེ ཨམཏྟཉྙུཏཱ ནཱམ ཝུཙྩཏི.

༡༣༥༤. ཨིནྡྲིཡེསུ ¶ གུཏྟདྭཱརཏཱནིདྡེསེ ཙཀྑུནཱཏིཨཱདི ཝུཏྟནཡེནེཝ ཝེདིཏབྦཾ. ན ནིམིཏྟགྒཱཧཱི ཧོཏཱིཏི ཚནྡརཱགཝསེན ཝུཏྟཔྤཀཱརཾ ནིམིཏྟཾ ན གཎྷཱཏི. ཨེཝཾ སེསཔདཱནིཔི ཝུཏྟཔཊིཔཀྑནཡེནེཝ ¶ ཝེདིཏབྦཱནི. ཡཐཱ ཙ ཧེཊྛཱ ‘ཛཝནེ དུསྶཱིལྱཱདཱིསུ ཨུཔྤནྣེསུ ཏསྨིཾ ཨསཾཝརེ སཏི, དྭཱརམྤི ཨགུཏྟཾ ཧོཏི, བྷཝངྒམྤི, ཨཱཝཛྫནཱདཱིནིཔི ཝཱིཐིཙིཏྟཱནཱི’ཏི ཝུཏྟཾ, ཨེཝམིདྷ ཏསྨིཾ སཱིལཱདཱིསུ ཨུཔྤནྣེསུ དྭཱརམྤི གུཏྟཾ ཧོཏི, བྷཝངྒམྤི, ཨཱཝཛྫནཱདཱིནིཔི ཝཱིཐིཙིཏྟཱནི. ཡཐཱ ཀིཾ? ཡཐཱ ནགརདྭཱརེསུ སུསཾཝུཏེསུ, ཀིཉྩཱཔི ཨནྟོགྷརཱདཡོ ཨསཾཝུཏཱ ཧོནྟི, ཏཐཱཔི ཨནྟོནགརེ སབྦཾ བྷཎྜཾ སུརཀྑིཏཾ སུགོཔིཏམེཝ ཧོཏི – ནགརདྭཱརེསུ པིཧིཏེསུ ཙོརཱནཾ པཝེསོ ནཏྠི – ཨེཝམེཝ ཛཝནེ སཱིལཱདཱིསུ ཨུཔྤནྣེསུ དྭཱརམྤི གུཏྟཾ ཧོཏི, བྷཝངྒམྤི, ཨཱཝཛྫནཱདཱིནིཔི ཝཱིཐིཙིཏྟཱནི. ཏསྨཱ ཛཝནཀྑཎེ ཨུཔྤཛྫམཱནོཔི ‘ཙཀྑུནྡྲིཡེ སཾཝརོ’ཏི ཝུཏྟོ. སོཏེན སདྡཾ སུཏྭཱཏིཨཱདཱིསུཔི ཨེསེཝ ནཡོ.

༡༣༥༥. བྷོཛནེ མཏྟཉྙུཏཱནིདྡེསེ པཊིསངྑཱ ཡོནིསོ ཨཱཧཱརཾ ཨཱཧཱརེཏཱིཏི པཊིསངྑཱནཔཉྙཱཡ ཛཱནིཏྭཱ ཨུཔཱཡེན ཨཱཧཱརཾ པརིབྷུཉྫཏི. ཨིདཱནི ཏཾ ཨུཔཱཡཾ དསྶེཏུཾ ནེཝ དཝཱཡཱཏིཨཱདི ཝུཏྟཾ.

ཏཏྠ ‘ནེཝ དཝཱཡཱ’ཏི དཝཏྠཱཡ ན ཨཱཧཱརེཏི. ཏཏྠ ནཊལངྒྷཀཱདཡོ དཝཏྠཱཡ ཨཱཧཱརེནྟི ནཱམ. ཡཉྷི བྷོཛནཾ བྷུཏྟསྶ ནཙྩགཱིཏཀབྱསིལོཀསངྑཱཏོ དཝོ ཨཏིརེཀཏརེན པཊིབྷཱཏི, ཏཾ བྷོཛནཾ ཨདྷམྨེན ཝིསམེན པརིཡེསིཏྭཱ ཏེ ཨཱཧཱརེནྟི. ཨཡཾ པན བྷིཀྑུ ཨེཝཾ ན ཨཱཧཱརེཏི.

ན ¶ མདཱཡཱཏི མཱནམདཔུརིསམདཱནཾ ཝཌྜྷནཏྠཱཡ ན ཨཱཧཱརེཏི. ཏཏྠ རཱཛརཱཛམཧཱམཏྟཱ མདཏྠཱཡ ཨཱཧཱརེནྟི ནཱམ. ཏེ ཧི ཨཏྟནོ མཱནམདཔུརིསམདཱནཾ ཝཌྜྷནཏྠཱཡ པིཎྜརསབྷོཛནཱདཱིནི པཎཱིཏབྷོཛནཱནི བྷུཉྫནྟི. ཨཡཾ པན བྷིཀྑུ ཨེཝཾ ན ཨཱཧཱརེཏི.

ན མཎྜནཱཡཱཏི སརཱིརམཎྜནཏྠཱཡ ན ཨཱཧཱརེཏི. ཏཏྠ རཱུཔཱུཔཛཱིཝིནིཡོ མཱཏུགཱམཱ ཨནྟེཔུརིཀཱདཡོ ཙ སཔྤིཕཱཎིཏཾ ནཱམ པིཝནྟི, ཏེ ཧི སིནིདྡྷཾ མུདུཾ མནྡཾ བྷོཛནཾ ཨཱཧཱརེནྟི ‘ཨེཝཾ ནོ ཨངྒལཊྛི སུསཎྛིཏཱ ¶ བྷཝིསྶཏི, སརཱིརེ ཚཝིཝཎྞོ པསནྣོ བྷཝིསྶཏཱི’ཏི. ཨཡཾ པན བྷིཀྑུ ཨེཝཾ ན ཨཱཧཱརེཏི.

ན ཝིབྷཱུསནཱཡཱཏི སརཱིརེ མཾསཝིབྷཱུསནཏྠཱཡ ན ཨཱཧཱརེཏི. ཏཏྠ ནིབྦུདྡྷམལླམུཊྛིཀམལླཱདཡོ ¶ སུསིནིདྡྷེཧི མཙྪམཾསཱདཱིཧི སརཱིརམཾསཾ པཱིཎེནྟི ‘ཨེཝཾ ནོ མཾསཾ ཨུསྶདཾ བྷཝིསྶཏི པཧཱརསཧནཏྠཱཡཱ’ཏི. ཨཡཾ པན བྷིཀྑུ ཨེཝཾ སརཱིརེ མཾསཝིབྷཱུསནཏྠཱཡ ན ཨཱཧཱརེཏི.

ཡཱཝདེཝཱཏི ཨཱཧཱརཱཧརཎེ པཡོཛནསྶ པརིཙྪེདནིཡམདསྶནཾ. ཨིམསྶ ཀཱཡསྶ ཋིཏིཡཱཏི ཨིམསྶ ཙཏུམཧཱབྷཱུཏིཀཀརཛཀཱཡསྶ ཋཔནཏྠཱཡ ཨཱཧཱརེཏི. ཨིདམསྶ ཨཱཧཱརཱཧརཎེ པཡོཛནནྟི ཨཏྠོ. ཡཱཔནཱཡཱཏི ཛཱིཝིཏིནྡྲིཡཡཱཔནཏྠཱཡ ཨཱཧཱརེཏི. ཝིཧིཾསཱུཔརཏིཡཱཏི ཝིཧིཾསཱ ནཱམ ཨབྷུཏྟཔཙྩཡཱ ཨུཔྤཛྫནཀཱ ཁུདྡཱ. ཏསྶཱ ཨུཔརཏིཡཱ ཝཱུཔསམནཏྠཱཡ ཨཱཧཱརེཏི. བྲཧྨཙརིཡཱནུགྒཧཱཡཱཏི བྲཧྨཙརིཡཾ ནཱམ ཏིསྶོ སིཀྑཱ, སཀལཾ སཱསནཾ, ཏསྶ ཨནུགྒཎྷནཏྠཱཡ ཨཱཧཱརེཏི.

ཨིཏཱིཏི ཨུཔཱཡནིདསྶནཾ; ཨིམིནཱ ཨུཔཱཡེནཱཏི ཨཏྠོ. པུརཱཎཉྩ ཝེདནཾ པཊིཧངྑཱམཱིཏི པུརཱཎཝེདནཱ ནཱམ ཨབྷུཏྟཔྤཙྩཡཱ ཨུཔྤཛྫནཀཝེདནཱ. ཏཾ པཊིཧནིསྶཱམཱིཏི ཨཱཧཱརེཏི. ནཝཉྩ ཝེདནཾ ན ཨུཔྤཱདེསྶཱམཱིཏི ནཝཝེདནཱ ནཱམ ཨཏིབྷུཏྟཔྤཙྩཡེན ཨུཔྤཛྫནཀཝེདནཱ. ཏཾ ན ཨུཔྤཱདེསྶཱམཱིཏི ཨཱཧཱརེཏི. ཨཐ ཝཱ, ‘ནཝཝེདནཱ’ ནཱམ བྷུཏྟཔྤཙྩཡཱ ¶ ནཨུཔྤཛྫནཀཝེདནཱ. ཏསྶཱ ཨནུཔྤནྣཱཡ ཨནུཔྤཛྫནཏྠམེཝ ཨཱཧཱརེཏི. ཡཱཏྲཱ ཙ མེ བྷཝིསྶཏཱིཏི ཡཱཔནཱ ཙ མེ བྷཝིསྶཏི. ཨནཝཛྫཏཱ ཙཱཏི ཨེཏྠ ཨཏྠི སཱཝཛྫཾ ཨཏྠི ཨནཝཛྫཾ. ཏཏྠ ཨདྷམྨིཀཔརིཡེསནཱ ཨདྷམྨིཀཔཊིགྒཧཎཾ ཨདྷམྨེན པརིབྷོགོཏི ཨིདཾ ‘སཱཝཛྫཾ’ ནཱམ. དྷམྨེན པརིཡེསིཏྭཱ དྷམྨེན པཊིགྒཧེཏྭཱ པཙྩཝེཀྑིཏྭཱ པརིབྷུཉྫནཾ ‘ཨནཝཛྫཾ’ ནཱམ. ཨེཀཙྩོ ཨནཝཛྫེཡེཝ སཱཝཛྫཾ ཀརོཏི, ‘ལདྡྷཾ མེ’ཏི ཀཏྭཱ པམཱཎཱཏིཀྐནྟཾ བྷུཉྫཏི. ཏཾ ཛཱིརཱཔེཏུཾ ཨསཀྐོནྟོ ཨུདྡྷཾཝིརེཙནཨདྷོཝིརེཙནཱདཱིཧི ཀིལམཏི. སཀལཝིཧཱརེ བྷིཀྑཱུ ཏསྶ སརཱིརཔཊིཛགྒནབྷེསཛྫཔརིཡེསནཱདཱིསུ ཨུསྶུཀྐཾ ཨཱཔཛྫནྟི. ‘ཀིཾ ཨིད’ནྟི ཝུཏྟེ ‘ཨསུཀསྶ ¶ ནཱམ ཨུདརཾ ཨུདྡྷུམཱཏ’ནྟིཨཱདཱིནི ཝདནྟི. ‘ཨེས ནིཙྩཀཱལམྤི ཨེཝཾཔཀཏིཀོཡེཝ, ཨཏྟནོ ཀུཙྪིཔམཱཎཾ ནཱམ ན ཛཱནཱཏཱི’ཏི ནིནྡནྟི གརཧནྟི. ཨཡཾ ཨནཝཛྫེཡེཝ སཱཝཛྫཾ ཀརོཏི ནཱམ. ཨེཝཾ ཨཀཏྭཱ ‘ཨནཝཛྫཏཱ ཙ བྷཝིསྶཏཱི’ཏི ཨཱཧཱརེཏི.

ཕཱསུཝིཧཱརོ ཙཱཏི ཨེཏྠཱཔི ཨཏྠི ཕཱསུཝིཧཱརོ ཨཏྠི ན ཕཱསུཝིཧཱརོ. ཏཏྠ ‘ཨཱཧརཧཏྠཀོ ཨལཾསཱཊཀོ ཏཏྠཝཊྚཀོ ཀཱཀམཱསཀོ བྷུཏྟཝམིཏཀོ’ཏི ཨིམེསཾ པཉྩནྣཾ བྲཱཧྨཎཱནཾ བྷོཛནཾ ན ཕཱསུཝིཧཱརོ ནཱམ. ཨེཏེསུ ཧི ‘ཨཱཧརཧཏྠཀོ’ ནཱམ བཧུཾ བྷུཉྫིཏྭཱ ཨཏྟནོ ¶ དྷམྨཏཱཡ ཨུཊྛཱཏུཾ ཨསཀྐོནྟོ ‘ཨཱཧར ཧཏྠ’ནྟི ཝདཏི. ‘ཨལཾསཱཊཀོ’ ནཱམ ཨཙྩུདྡྷུམཱཏཀུཙྪིཏཱཡ ཨུཊྛིཏོཔི སཱཊཀཾ ནིཝཱསེཏུཾ ན སཀྐོཏི. ‘ཏཏྠཝཊྚཀོ’ ནཱམ ཨུཊྛཱཏུཾ ཨསཀྐོནྟོ ཏཏྠེཝ པརིཝཊྚཏི. ‘ཀཱཀམཱསཀོ’ ནཱམ ཡཐཱ ཀཱཀེཧི ཨཱམསིཏུཾ སཀྐཱ ཧོཏི, ཨེཝཾ ཡཱཝ མུཁདྭཱརཱ ཨཱཧཱརེཏི. ‘བྷུཏྟཝམིཏཀོ’ ནཱམ མུཁེན སནྡྷཱརེཏུཾ ཨསཀྐོནྟོ ཏཏྠེཝ ཝམཏི. ཨེཝཾ ཨཀཏྭཱ ‘ཕཱསུཝིཧཱརོ ཙ མེ བྷཝིསྶཏཱི’ཏི ཨཱཧཱརེཏི. ཕཱསུཝིཧཱརོ ནཱམ ཙཏཱུཧི པཉྩཧི ཨཱལོཔེཧི ཨཱུནཱུདརཏཱ. ཨེཏྟཀཉྷི བྷུཉྫིཏྭཱ པཱནཱིཡཾ པིཝཏོ ཙཏྟཱརོ ཨིརིཡཱཔཐཱ སུཁེན པཝཏྟནྟི. ཏསྨཱ དྷམྨསེནཱཔཏི ཨེཝམཱཧ –

‘‘ཙཏྟཱརོ ¶ པཉྩ ཨཱལོཔེ, ཨབྷུཏྭཱ ཨུདཀཾ པིཝེ;

ཨལཾ ཕཱསུཝིཧཱརཱཡ, པཧིཏཏྟསྶ བྷིཀྑུནོ’’ཏི. (ཐེརགཱ. ༩༨༣);

ཨིམསྨིཾ པན ཋཱནེ ཨངྒཱནི སམོདྷཱནེཏབྦཱནི. ‘ནེཝ དཝཱཡཱ’ཏིཧི ཨེཀཾ ཨངྒཾ, ‘ན མདཱཡཱ’ཏི ཨེཀཾ, ‘ན མཎྜནཱཡཱ’ཏི ཨེཀཾ, ‘ན ཝིབྷཱུསནཱཡཱ’ཏི ཨེཀཾ, ‘ཡཱཝདེཝ ཨིམསྶ ཀཱཡསྶ ཋིཏིཡཱ ཡཱཔནཱཡཱ’ཏི ཨེཀཾ, ‘ཝིཧིཾསཱུཔརཏིཡཱ བྲཧྨཙརིཡཱནུགྒཧཱཡཱ’ཏི ཨེཀཾ, ‘ཨིཏི པུརཱཎཉྩ ཝེདནཾ པཊིཧངྑཱམི ནཝཉྩ ཝེདནཾ ན ཨུཔྤཱདེསྶཱམཱི’ཏི ཨེཀཾ, ‘ཡཱཏྲཱ ཙ མེ བྷཝིསྶཏཱི’ཏི ཨེཀཾ ཨངྒཾ. ཨནཝཛྫཏཱ ཙ ཕཱསུཝིཧཱརོ ཙཱཏི ཨཡམེཏྠ བྷོཛནཱནིསཾསོ. མཧཱསཱིཝཏྠེརོ པནཱཧ – ཧེཊྛཱ ཙཏྟཱརི ཨངྒཱནི པཊིཀྑེཔོ ནཱམ. ཨུཔརི པན ཨཊྛངྒཱནི སམོདྷཱནེཏབྦཱནཱིཏི – ཏཏྠ ‘ཡཱཝདེཝ ཨིམསྶ ཀཱཡསྶ ཋིཏིཡཱ’ཏི ཨེཀཾ ཨངྒཾ, ‘ཡཱཔནཱཡཱ’ཏི ཨེཀཾ, ‘ཝིཧིཾསཱུཔརཏིཡཱཏི’ ཨེཀཾ, ‘བྲཧྨཙརིཡཱནུགྒཧཱཡཱ’ཏི ཨེཀཾ, ‘ཨིཏི པུརཱཎཉྩ ཝེདནཾ པཊིཧངྑཱམཱི’ཏི ཨེཀཾ, ‘ནཝཉྩ ¶ ཝེདནཾ ན ཨུཔྤཱདེསྶཱམཱི’ཏི ཨེཀཾ, ‘ཡཱཏྲཱ ཙ མེ བྷཝིསྶཏཱི’ཏི ཨེཀཾ, ‘ཨནཝཛྫཏཱ’ ཙཱཏི ཨེཀཾ. ཕཱསུཝིཧཱརོ པན བྷོཛནཱནིསཾསོཏི. ཨེཝཾ ཨཊྛངྒསམནྣཱགཏཾ ཨཱཧཱརཾ ཨཱཧཱརེནྟོ བྷོཛནེ མཏྟཉྙཱུ ནཱམ ཧོཏི. ཨཡཾ ཝུཙྩཏཱིཏི ཨཡཾ པརིཡེསནཔཊིགྒཧཎཔརིབྷོགེསུ ཡུཏྟཔྤམཱཎཛཱནནཝསེན པཝཏྟོ པཙྩཝེཀྑིཏཔརིབྷོགོ བྷོཛནེ མཏྟཉྙུཏཱ ནཱམ ཝུཙྩཏི.

༡༣༥༦. མུཊྛསྶཙྩནིདྡེསེ ཨསཏཱིཏི སཏིཝིརཧིཏཱ ཙཏྟཱརོ ཁནྡྷཱ. ཨནནུསྶཏི ཨཔྤཊིསྶཏཱིཏི ཨུཔསགྒཝསེན པདཾ ཝཌྜྷིཏཾ. ཨསརཎཏཱཏི ཨསརཎཱཀཱརོ. ཨདྷཱརཎཏཱཏི དྷཱརེཏུཾ ཨསམཏྠཏཱ. ཏཱཡ ཧི སམནྣཱགཏོ པུགྒལོ ཨཱདྷཱནཔྤཏྟོ ནིདྷཱནཀྑམོ ན ཧོཏི. ཨུདཀེ ཨལཱབུཀཊཱཧཾ ¶ ཝིཡ ཨཱརམྨཎེ པིལཝཏཱིཏི པིལཱཔནཏཱ. སཾམུསནཏཱཏི ནཊྛམུཊྛསྶཏིཏཱ. ཏཱཡ ཧི སམནྣཱགཏོ པུགྒལོ ནིཀྑིཏྟབྷཏྟོ ཝིཡ ཀཱཀོ, ནིཀྑིཏྟམཾསོ ཝིཡ ཙ སིངྒཱལོ ཧོཏི.

༡༣༦༡. བྷཱཝནཱབལནིདྡེསེ ཀུསལཱནཾ དྷམྨཱནནྟི ¶ བོདྷིཔཀྑིཡདྷམྨཱནཾ ཨཱསེཝནཱཏི ཨཱདིསེཝནཱ. བྷཱཝནཱཏི ཝཌྜྷནཱ. བཧུལཱིཀམྨནྟི པུནཔྤུནཾ ཀརཎཾ.

༡༣༦༨. སཱིལཝིཔཏྟིནིདྡེསོ སཱིལསམྤདཱནིདྡེསཔཊིཔཀྑཏོ ཝེདིཏབྦོ. དིཊྛིཝིཔཏྟིནིདྡེསོ ཙ དིཊྛིསམྤདཱནིདྡེསཔཊིཔཀྑཏོ དིཊྛིསམྤདཱནིདྡེསོ ཙ དིཊྛུཔཱདཱནནིདྡེསཔཊིཔཀྑཏོ. སཱིལཝིསུདྡྷིནིདྡེསོ ཀིཉྩཱཔི སཱིལསམྤདཱནིདྡེསེན སམཱནོ, ཏཏྠ པན ཝིསུདྡྷིསམྤཱཔཀཾ པཱཏིམོཀྑསཾཝརསཱིལཾ ཀཐིཏཾ, ཨིདྷ ཝིསུདྡྷིཔྤཏྟཾ སཱིལཾ. སཏི ཙ སམྤཛཉྙཉྩ, པཊིསངྑཱནབལཉྩ བྷཱཝནཱབལཉྩ, སམཐོ ཙ ཝིཔསྶནཱ ཙ, སམཐནིམིཏྟཉྩ པགྒཧནིམིཏྟཉྩ, པགྒཱཧོ ཙ ཨཝིཀྑེཔོ ཙ, སཱིལསམྤདཱ ཙ དིཊྛིསམྤདཱ ཙཱཏི ཨིམེཧི པན ཚཧི དུཀེཧི ཙཏུབྷཱུམཀཱཔི ལོཀིཡལོཀུཏྟརདྷམྨཱཝ ཀཐིཏཱ.

༡༣༧༣. དིཊྛིཝིསུདྡྷིནིདྡེསེ ཀམྨསྶཀཏཉྙཱཎནྟི ‘ཨིདཾ ཀམྨཾ སཀཾ, ཨིདཾ ནོ སཀ’ནྟི ཛཱནནཔཉྙཱ. ཏཏྠ ཨཏྟནཱ ཝཱ ཀཏཾ ཧོཏུ པརེན ཝཱ སབྦམྤི ཨཀུསལཀམྨཾ ནོ སཀཾ. ཀསྨཱ? ཨཏྠབྷཉྫནཏོ ཨནཏྠཛནནཏོ ཙ. ཀུསལཀམྨཾ པན ཨནཏྠབྷཉྫནཏོ ཨཏྠཛནནཏོ ཙ ‘སཀཾ’ ནཱམ. ཏཏྠ ཡཐཱ ¶ ནཱམ སདྷནོ སབྷོགོ པུརིསོ ཨདྡྷཱནམགྒཾ པཊིཔཛྫིཏྭཱ ཨནྟརཱམགྒེ གཱམནིགམཱདཱིསུ ནཀྑཏྟེ སངྒྷུཊྛེ ‘ཨཧཾ ཨཱགནྟུཀོ, ཀཾ ནུ ཁོ ནིསྶཱཡ ནཀྑཏྟཾ ཀཱིལེ༹ཡྻ’ནྟི ཨཙིནྟེཏྭཱ ཡཐཱ ཡཐཱ ཨིཙྪཏི ཏེན ཏེན ནཱིཧཱརེན ནཀྑཏྟཾ ཀཱིལ༹ནྟོ སུཁེན ཀནྟཱརཾ ཨཏིཀྐམཏི, ཨེཝམེཝ ཨིམསྨིཾ ཀམྨསྶཀཏཉྙཱཎེ ཋཏྭཱ ཨིམེ སཏྟཱ བཧུཾ ཝཊྚགཱམིཀམྨཾ ཨཱཡཱུཧིཏྭཱ སུཁེན སུཁཾ ཨནུབྷཝནྟཱ ཨརཧཏྟཾ པཏྟཱ གཎནཔཐཾ ཝཱིཏིཝཏྟཱ. སཙྩཱནུལོམིཀཉཱཎནྟི ¶ ཙཏུནྣཾ སཙྩཱནཾ ཨནུལོམཾ ཝིཔསྶནཱཉཱཎཾ. མགྒསམངྒིསྶ ཉཱཎཾ ཕལསམངྒིསྶ ཉཱཎནྟི མགྒཉཱཎཕལཉཱཎཱནིཡེཝ.

༡༣༧༤. ‘དིཊྛིཝིསུདྡྷི ཁོ པནཱ’ཏིཔདསྶ ནིདྡེསེ ཡཱ པཉྙཱ པཛཱནནཱཏིཨཱདཱིཧི པདེཧི ཧེཊྛཱ ཝུཏྟཱནི ཀམྨསྶཀཏཉྙཱཎཱདཱིནེཝ ཙཏྟཱརི ཉཱཎཱནི ཝིབྷཏྟཱནི.

༡༣༧༥. ‘ཡཐཱདིཊྛིསྶ ¶ ཙ པདྷཱན’ནྟི པདསྶ ནིདྡེསེ ཡོ ཙེཏསིཀོ ཝཱིརིཡཱརམྦྷོཏིཨཱདཱིཧི པདེཧི ནིདྡིཊྛཾ ཝཱིརིཡཾ པཉྙཱགཏིཀམེཝ; པཉྙཱཡ ཧི ལོཀིཡཊྛཱནེ ལོཀིཡཾ ལོཀུཏྟརཊྛཱནེ ལོཀུཏྟརནྟི ཝེདིཏབྦཾ.

༡༣༧༦. སཾཝེགདུཀནིདྡེསེ ཛཱཏིབྷཡནྟི ཛཱཏིཾ བྷཡཏོ དིསྭཱ ཋིཏཉཱཎཾ. ཛརཱམརཎབྷཡཱདཱིསུཔི ཨེསེཝ ནཡོ.

༡༣༧༧. ཨནུཔྤནྣཱནཾ པཱཔཀཱནནྟིཨཱདཱིཧི ཛཱཏིཨཱདཱིནི བྷཡཏོ དིསྭཱ ཛཱཏིཛརཱབྱཱདྷིམརཎེཧི མུཙྩིཏུཀཱམསྶ ཨུཔཱཡཔདྷཱནཾ ཀཐིཏཾ. པདབྷཱཛནཱིཡསྶ པནཏྠོ ཝིབྷངྒཊྛཀཐཱཡཾ (ཝིབྷ. ཨཊྛ. ༣༦༧ བོཛ྄ཛྷངྒཔབྦཝཎྞནཱ) ཨཱཝི བྷཝིསྶཏི.

༡༣༧༨. ‘ཨསནྟུཊྛིཏཱ ཙ ཀུསལེསུ དྷམྨེསཱུ’ཏི པདནིདྡེསེ བྷིཡྻོཀམྱཏཱཏི ཝིསེསཀཱམཏཱ. ཨིདྷེཀཙྩོ ཧི ཨཱདིཏོཝ པཀྑིཀབྷཏྟཾ ཝཱ སལཱཀབྷཏྟཾ ཝཱ ཨུཔོསཐིཀཾ ཝཱ པཱཊིཔདིཀཾ ཝཱ དེཏི, སོ ཏེན ཨསནྟུཊྛོ ཧུཏྭཱ པུན དྷུརབྷཏྟཾ སངྒྷབྷཏྟཾ ཝསྶཱཝཱསིཀཾ དེཏི, ཨཱཝཱསཾ ཀཱརེཏི, ཙཏྟཱརོཔི པཙྩཡེ དེཏི. ཏཏྲཱཔི ཨསནྟུཊྛོ ཧུཏྭཱ སརཎཱནི གཎྷཱཏི, པཉྩ སཱིལཱནི སམཱདིཡཏི. ཏཏྲཱཔི ཨསནྟུཊྛོ ཧུཏྭཱ པབྦཛཏི. པབྦཛིཏྭཱ ཨེཀཾ ནིཀཱཡཾ དྭེ ནིཀཱཡེཏི ཏེཔིཊཀཾ བུདྡྷཝཙནཾ གཎྷཱཏི, ཨཊྛ སམཱཔཏྟིཡོ བྷཱཝེཏི, ཝིཔསྶནཾ ཝཌྜྷེཏྭཱ ཨརཧཏྟཾ གཎྷཱཏི ¶ . ཨརཧཏྟཔྤཏྟིཏོ པཊྛཱཡ མཧཱསནྟུཊྛོ ནཱམ ཧོཏི. ཨེཝཾ ཡཱཝ ཨརཧཏྟཱ ཝིསེསཀཱམཏཱ ‘བྷིཡྻོཀམྱཏཱ’ ནཱམ.

༡༣༧༩. ‘ཨཔྤཊིཝཱནིཏཱ ཙ པདྷཱནསྨི’ནྟི པདསྶ ནིདྡེསེ ཡསྨཱ པནྟསེནཱསནེསུ ཨདྷིཀུསལཱནཾ དྷམྨཱནཾ བྷཱཝནཱཡ ཨུཀྐཎྛམཱནོ པདྷཱནཾ པཊིཝཱསེཏི ནཱམ ¶ , ཨནུཀྐཎྛམཱནོ ནོ པཊིཝཱསེཏི ནཱམ, ཏསྨཱ ཏཾ ནཡཾ དསྶེཏུཾ ཡཱ ཀུསལཱནཾ དྷམྨཱནནྟིཨཱདི ཝུཏྟཾ. ཏཏྠ སཀྐཙྩཀིརིཡཏཱཏི ཀུསལཱནཾ ཀརཎེ སཀྐཙྩཀཱརིཏཱ. སཱཏཙྩཀིརིཡཏཱཏི སཏཏམེཝ ཀརཎཾ. ཨཊྛིཏཀིརིཡཏཱཏི ཁཎྜཾ ཨཀཏྭཱ ཨཊྛཔེཏྭཱ ཀརཎཾ. ཨནོལཱིནཝུཏྟིཏཱཏི ཨལཱིནཛཱིཝིཏཱ, ཨལཱིནཔཝཏྟིཏཱ ཝཱ. ཨནིཀྑིཏྟཚནྡཏཱཏི ཀུསལཙྪནྡསྶ ཨནིཀྑིཔནཾ. ཨནིཀྑིཏྟདྷུརཏཱཏི ཀུསལཀརཎེ ཝཱིརིཡདྷུརསྶ ཨནིཀྑིཔནཾ.

༡༣༨༠. ‘པུབྦེནིཝཱསཱནུསྶཏིཉཱཎཾ ¶ ཝིཛྫཱ’ཏི ཨེཏྠ པུབྦེནིཝཱསོཏི པུབྦེ ནིཝུཏྠཀྑནྡྷཱ ཙ ཁནྡྷཔཊིབདྡྷཉྩ. པུབྦེནིཝཱསསྶ ཨནུསྶཏི པུབྦེནིཝཱསཱནུསྶཏི. ཏཱཡ སམྤཡུཏྟཾ ཉཱཎཾ པུབྦེནིཝཱསཱནུསྶཏིཉཱཎཾ. ཏཡིདཾ པུབྦེ ནིཝུཏྠཀྑནྡྷཔཊིཙྪཱདཀཾ ཏམཾ ཝིཛ྄ཛྷཏཱིཏི ཝིཛྫཱ. ཏཾ ཏམཾ ཝིཛ྄ཛྷིཏྭཱ ཏེ ཁནྡྷེ ཝིདིཏེ པཱཀཊེ ཀརོཏཱིཏི ཝིདིཏཀརཎཊྛེནཱཔི ཝིཛྫཱ.

ཙུཏཱུཔཔཱཏེ ཉཱཎནྟི ཙུཏིཡཉྩ ཨུཔཔཱཏེ ཙ ཉཱཎཾ. ཨིདམྤི སཏྟཱནཾ ཙུཏིཔཊིསནྡྷིཙྪཱདཀཾ ཏམཾ ཝིཛ྄ཛྷཏཱིཏི ཝིཛྫཱ. ཏཾ ཏམཾ ཝིཛ྄ཛྷིཏྭཱ སཏྟཱནཾ ཙུཏིཔཊིསནྡྷིཡོ ཝིདིཏཱ པཱཀཊཱ ཀརོཏཱིཏི ཝིདིཏཀརཎཊྛེནཱཔི ཝིཛྫཱ. ཨཱསཝཱནཾ ཁཡེ ཉཱཎནྟི སབྦཀིལེསཱནཾ ཁཡསམཡེ ཉཱཎཾ. ཏཡིདཾ ཙཏུསཙྩཙྪཱདཀཏམཾ ཝིཛ྄ཛྷཏཱིཏི ཝིཛྫཱ. ཏཾ ཏམཾ ཝིཛ྄ཛྷིཏྭཱ ཙཏྟཱརི སཙྩཱནི ཝིདིཏཱནི པཱཀཊཱནི ཀརོཏཱིཏི ཝིདིཏཀརཎཊྛེནཱཔི ཝིཛྫཱ.

༡༣༨༡. ‘ཙིཏྟསྶ ¶ ཙ ཨདྷིམུཏྟི ནིབྦཱནཉྩཱ’ཏི ཨེཏྠ ཨཱརམྨཎེ ཨདྷིམུཙྩནཊྛེན, པཙྩནཱིཀདྷམྨེཧི ཙ སུཊྛུམུཏྟཊྛེན ཨཊྛ སམཱཔཏྟིཡོ ཙིཏྟསྶ ཨདྷིམུཏྟི ནཱམ. ཨིཏརཾ པན ‘ནཏྠི ཨེཏྠ ཏཎྷཱསངྑཱཏཾ ཝཱནཾ’, ‘ནིགྒཏཾ ཝཱ ཏསྨཱ ཝཱནཱ’ཏི ནིབྦཱནཾ. ཏཏྠ ཨཊྛ སམཱཔཏྟིཡོ སཡཾ ཝིཀྑམྦྷིཏཀིལེསེཧི ཝིམུཏྟཏྟཱ ཝིམུཏྟཱིཏི ཝུཏྟཱ, ནིབྦཱནཾ པན སབྦཀིལེསེཧི ཨཙྩནྟཾ ཝིམུཏྟཏྟཱ ཝིམུཏྟཱིཏི.

༡༣༨༢. མགྒསམངྒིསྶ ¶ ཉཱཎནྟི ཙཏྟཱརི མགྒཉཱཎཱནི. ཕལསམངྒིསྶ ཉཱཎནྟི ཙཏྟཱརི ཕལཉཱཎཱནི. ཏཏྠ པཋམམགྒཉཱཎཾ པཉྩ ཀིལེསེ ཁེཔེནྟཾ ནིརོདྷེནྟཾ ཝཱུཔསམེནྟཾ པཊིཔྤསྶམྦྷེནྟཾ ཨུཔྤཛྫཏཱིཏི ཁཡེ ཉཱཎཾ ནཱམ ཛཱཏཾ. དུཏིཡམགྒཉཱཎཾ ཙཏྟཱརོ ཀིལེསེ. ཏཐཱ ཏཏིཡམགྒཉཱཎཾ. ཙཏུཏྠམགྒཉཱཎཾ པན ཨཊྛ ཀིལེསེ ཁེཔེནྟཾ ནིརོདྷེནྟཾ ཝཱུཔསམེནྟཾ པཊིཔྤསྶམྦྷེནྟཾ ཨུཔྤཛྫཏཱིཏི ‘ཁཡེ ཉཱཎཾ’ ནཱམ ཛཱཏཾ. ཏཾ ཏཾ མགྒཕལཉཱཎཾ པན ཏེསཾ ཏེསཾ ཀིལེསཱནཾ ཁཱིཎནྟེ ནིརུདྡྷནྟེ ཝཱུཔསམནྟེ པཊིཔྤསྶམྦྷནྟེ ཨནུཔྤཱདནྟེ ཨཔྤཝཏྟནྟེ ཨུཔྤནྣནྟི ཨནུཔྤཱདེ ཉཱཎཾ ནཱམ ཛཱཏནྟི.

ཨཊྛསཱལིནིཡཱ དྷམྨསངྒཧཨཊྛཀཐཱཡ

ནིཀྑེཔཀཎྜཝཎྞནཱ ནིཊྛིཏཱ.

༤. ཨཊྛཀཐཱཀཎྜོ

ཏིཀཨཏྠུདྡྷཱརཝཎྞནཱ

༡༣༨༤. ཨིདཱནི ¶ ¶ ནིཀྑེཔཀཎྜཱནནྟརཾ ཋཔིཏསྶ ཨཊྛཀཐཱཀཎྜསྶ ཝཎྞནཱཀྐམོ ཨནུཔྤཏྟོ. ཀསྨཱ པནེཏཾ ཨཊྛཀཐཱཀཎྜཾ ནཱམ ཛཱཏནྟི? ཏེཔིཊཀསྶ བུདྡྷཝཙནསྶ ཨཏྠཾ ཨུདྡྷརིཏྭཱ ཋཔིཏཏྟཱ. ཏཱིསུཔི ཧི པིཊཀེསུ དྷམྨནྟརཾ ཨཱགཏཾ ཨཊྛཀཐཱཀཎྜེནེཝ པརིཙྪིནྡིཏྭཱ ཝིནིཙྪིཏཾ སུཝིནིཙྪིཏཾ ནཱམ ཧོཏི. སཀལེ ཨབྷིདྷམྨཔིཊཀེ ནཡམགྒཾ མཧཱཔཀརཎེ པཉྷུདྡྷཱརཾ གཎནཙཱརཾ ཨསལླཀྑེནྟེནཱཔི ཨཊྛཀཐཱཀཎྜཏོཡེཝ སམཱནེཏུཾ ཝཊྚཏི.

ཀུཏོ ¶ པབྷཝཾ པན ཨེཏནྟི? སཱརིཔུཏྟཏྠེརཔྤབྷཝཾ. སཱརིཔུཏྟཏྠེརོ ཧི ཨེཀསྶ ཨཏྟནོ སདྡྷིཝིཧཱརིཀསྶ ནིཀྑེཔཀཎྜེ ཨཏྠུདྡྷཱརཾ སལླཀྑེཏུཾ ཨསཀྐོནྟསྶ ཨཊྛཀཐཱཀཎྜཾ ཀཐེཏྭཱ ཨདཱསི. ཨིདཾ པན མཧཱཨཊྛཀཐཱཡཾ པཊིཀྑིཔིཏྭཱ ཨིདཾ ཝུཏྟཾ – ཨབྷིདྷམྨོ ནཱམ ན སཱཝཀཝིསཡོ, ན སཱཝཀགོཙརོ; བུདྡྷཝིསཡོ ཨེས, བུདྡྷགོཙརོ. དྷམྨསེནཱཔཏི པན སདྡྷིཝིཧཱརིཀེན པུཙྪིཏོ ཏཾ ཨཱདཱཡ སཏྠུ སནྟིཀཾ གནྟྭཱ སམྨཱསམྦུདྡྷསྶ ཀཐེསི. སམྨཱསམྦུདྡྷོ ཏསྶ བྷིཀྑུནོ ཨཊྛཀཐཱཀཎྜཾ ཀཐེཏྭཱ ཨདཱསི. ཀཐཾ? བྷགཝཱ ཧི ‘ཀཏམེ དྷམྨཱ ཀུསལཱ’ཏི པུཙྪི. ‘ཀུསལཱ དྷམྨཱ ནཱམ ཀཏམེ’ཏི སལླཀྑེསཱིཏི ཨཏྠོ. ཨཐསྶ ཏུཎྷཱིབྷཱུཏསྶ ‘ནནུ ཡཾ མཡཱ ཀཏམེ དྷམྨཱ ཀུསལཱ? ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏཱིཏིཨཱདིནཱ ནཡེན བྷཱུམིབྷེདཏོ ཀུསལཾ དསྶིཏཾ, སབྦམྤི ཏཾ ཙཏཱུསུ བྷཱུམཱིསུ ཀུསལཾ, ཨིམེ དྷམྨཱ ཀུསལཱ’ཏི ཨིམིནཱ ནཡེན ཀཎྞིཀཾ ཀཎྞིཀཾ གྷཊཾ གྷཊཾ གོཙྪཀཾ གོཙྪཀཾ ཀཏྭཱ ཨཏྠུདྡྷཱརཝསེན ཀུསལཱདིདྷམྨེ དསྶེནྟོ ཀཐེཏྭཱ ཨདཱསི.

ཏཏྠ ¶ ཙཏཱུསཱུཏི ཀཱམཱཝཙརརཱུཔཱཝཙརཱརཱུཔཱཝཙརཨཔརིཡཱཔནྣཱསུ. ཀུསལནྟི ཕསྶཱདིབྷེདཾ ཀུསལཾ. ཨིམེ དྷམྨཱ ཀུསལཱཏི ཨིམེ སབྦེཔི ཏཱསུ ཏཱསུ བྷཱུམཱིསུ ཝུཏྟཱ ཕསྶཱདཡོ དྷམྨཱ ཀུསལཱ ནཱམ.

༡༣༨༥. ཨཀུསལཱནཾ པན བྷཱུམིཝསེན བྷེདཱབྷཱཝཏོ དྭཱདས ཨཀུསལཙིཏྟུཔྤཱདཱཏི ཨཱཧ. ཏཏྠ ཨུཔྤཛྫཏཱིཏི ཨུཔྤཱདོ. ཙིཏྟམེཝ ཨུཔྤཱདོ ¶ ཙིཏྟུཔྤཱདོ. དེསནཱསཱིསམེཝ ཙེཏཾ. ཡཐཱ པན ‘རཱཛཱ ཨཱགཏོ’ཏི ཝུཏྟེ ཨམཙྩཱདཱིནམྤི ཨཱགམནཾ ཝུཏྟམེཝ ཧོཏི, ཨེཝཾ ‘ཙིཏྟུཔྤཱདཱ’ཏི ཝུཏྟེ ཏེཧི སམྤཡུཏྟདྷམྨཱཔི ཝུཏྟཱཝ ཧོནྟཱིཏི. སབྦཏྠ ཙིཏྟུཔྤཱདགྒཧཎེན སསམྤཡུཏྟདྷམྨཾ ཙིཏྟཾ གཧིཏནྟི ཝེདིཏབྦཾ. ཨིཏོ པརཾ ཙཏཱུསུ བྷཱུམཱིསུ ཝིཔཱཀོཏིཨཱདཱིནཾ སབྦེསམྤི ཏིཀདུཀབྷཱཛནཱིཡཔདཱནཾ ཨཏྠོ, ཝེདནཱཏྟིཀཱདཱིསུ ཙ སུཁཱདཱིནཾ ནཝཏྟབྦཏཱ ཧེཊྛཱ ཝུཏྟནཡེནེཝ པཱལི༹ཡཏྠཾ ¶ ཝཱིམཾསིཏྭཱ ཝེདིཏབྦཱ. ཝིསེསམཏྟམེཝ པན ཝཀྑཱམ.

༡༤༢༠. ཏཏྠ པརིཏྟཱརམྨཎཏྟིཀེ ཏཱཝ སབྦོ ཀཱམཱཝཙརསྶ ཝིཔཱཀོཏི ཨེཏྠ དྭིཔཉྩཝིཉྙཱཎཱནི ཙཀྑུཔསཱདཱདཡོ ནིསྶཱཡ ནིཡམེནེཝ ཨིཊྛཱནིཊྛཱདིབྷེདེ རཱུཔསདྡགནྡྷརསཕོཊྛབྦདྷམྨེ ཨཱརབྦྷ པཝཏྟནྟཱིཏི པརིཏྟཱརམྨཎཱནི. ཀུསལཱཀུསལཝིཔཱཀཱ པན དྭེ མནོདྷཱཏུཡོ ཧདཡཝཏྠུཾ ནིསྶཱཡ ཙཀྑུཝིཉྙཱཎཱདཱིནཾ ཨནནྟརཱ ནིཡམཏོ རཱུཔཱདཱིནེཝ ཨཱརབྦྷ པཝཏྟནྟཱིཏི པརིཏྟཱརམྨཎཱ. ཀུསལཝིཔཱཀཱཧེཏུཀམནོཝིཉྙཱཎདྷཱཏུ སོམནསྶསཧགཏཱ པཉྩདྭཱརེ སནྟཱིརཎཝསེན ཚསུ དྭཱརེསུ ཏདཱརམྨཎཝསེནཱཏི ནིཡམཏོ རཱུཔཱདཱིནི ཚ པརིཏྟཱརམྨཎཱནེཝ ཨཱརབྦྷ པཝཏྟཏཱིཏི པརིཏྟཱརམྨཎཱ. ཀུསལཱཀུསལཝིཔཱཀཱཧེཏུཀམནོཝིཉྙཱཎདྷཱཏུདྭཡཾ པཉྩདྭཱརེ སནྟཱིརཎཝསེན ཚསུ དྭཱརེསུ ཏདཱརམྨཎཝསེན ནིཡམཏོ རཱུཔཱདཱིནི ཚ པརིཏྟཱརམྨཎཱནེཝ ཨཱརབྦྷ པཝཏྟཏི. པཊིསནྡྷིཝསེན པཝཏྟམཱནམྤི པརིཏྟཾ ཀམྨཾ ཀམྨནིམིཏྟཾ གཏིནིམིཏྟཾ ཝཱ ཨཱརམྨཎཾ ཀརོཏི, པཝཏྟིཡཾ བྷཝངྒཝསེན, པརིཡོསཱནེ ཙུཏིཝསེན པཝཏྟམཱནམྤི ཏདེཝ ཨཱརམྨཎཾ ཀརོཏཱིཏི པརིཏྟཱརམྨཎཾ. ཨཊྛ པན སཧེཏུཀཝིཔཱཀཙིཏྟུཔྤཱདཱ ཨེཏྠ ཝུཏྟནཡེནེཝ ཏདཱརམྨཎཝསེན པཊིསནྡྷིབྷཝངྒཙུཏིཝསེན ཙ པརིཏྟདྷམྨེཡེཝ ཨཱརབྦྷ པཝཏྟནྟི. ཀིརིཡམནོདྷཱཏུ པཉྩདྭཱརེ རཱུཔཱདཱིནི ཨཱརབྦྷ པཝཏྟཏི. སོམནསྶསཧགཏཱཧེཏུཀཀིརིཡམནོཝིཉྙཱཎདྷཱཏུ ཚསུ དྭཱརེསུ པཙྩུཔྤནྣེ མནོདྭཱརེ ཨཏཱིཏཱནཱགཏེཔི པརིཏྟེ རཱུཔཱདིདྷམྨེཡེཝ ཨཱརབྦྷ ཁཱིཎཱསཝཱནཾ པཧཊྛཱཀཱརཾ ཀུརུམཱནཱ པཝཏྟཏཱིཏི པརིཏྟཱརམྨཎཱ. ཨེཝམིམེ པཉྩཝཱིསཏི ཙིཏྟུཔྤཱདཱ ཨེཀནྟེནེཝ པརིཏྟཱརམྨཎཱཏི ཝེདིཏབྦཱ.

༡༤༢༡. ཝིཉྙཱཎཉྩཱཡཏནནེཝསཉྙཱནཱསཉྙཱཡཏནདྷམྨཱ ¶ ཨཏྟནོ ཨཏྟནོ ཧེཊྛིམཾ སམཱཔཏྟིཾ ཨཱརབྦྷ པཝཏྟནཏོ ¶ མཧགྒཏཱརམྨཎཱ. ཨེཝ མགྒཕལདྷམྨཱ ནིབྦཱནཱརམྨཎཏྟཱ ཨཔྤམཱཎཱརམྨཎཱ.

ཀུསལཏོ ¶ ཙཏྟཱརོ ཀིརིཡཏོ ཙཏྟཱརོཏི ཨཊྛ ཉཱཎཝིཔྤཡུཏྟཙིཏྟུཔྤཱདཱ སེཀྑཔུཐུཛྫནཁཱིཎཱསཝཱནཾ ཨསཀྐཙྩདཱནཔཙྩཝེཀྑཎདྷམྨསཝནཱདཱིསུ ཀཱམཱཝཙརདྷམྨེ ཨཱརབྦྷ པཝཏྟིཀཱལེ པརིཏྟཱརམྨཎཱ. ཨཏིཔགུཎཱནཾ པཋམཛ྄ཛྷཱནཱདཱིནཾ པཙྩཝེཀྑཎཀཱལེ མཧགྒཏཱརམྨཎཱ. ཀསིཎནིམིཏྟཱདིཔཉྙཏྟིཔཙྩཝེཀྑཎཀཱལེ ནཝཏྟབྦཱརམྨཎཱ. ཨཀུསལཏོ ཙཏྟཱརོ དིཊྛིགཏསམྤཡུཏྟཙིཏྟུཔྤཱདཱ པཉྩཔཎྞཱསཱཡ ཀཱམཱཝཙརདྷམྨཱནཾ ‘སཏྟོ སཏྟོ’ཏི པརཱམསནཨསྶཱདནཱབྷིནནྡནཀཱལེ པརིཏྟཱརམྨཎཱ. ཏེནེཝཱཀཱརེན སཏྟཝཱིསཏི མཧགྒཏདྷམྨེ ཨཱརབྦྷ པཝཏྟིཀཱལེ མཧགྒཏཱརམྨཎཱ. པཎྞཏྟིདྷམྨེ ཨཱརབྦྷ པཝཏྟནཀཱལེ སིཡཱ ནཝཏྟབྦཱརམྨཎཱ. དིཊྛིཝིཔྤཡུཏྟཱནཾ ཏེཡེཝ དྷམྨེ ཨཱརབྦྷ ཀེཝལཾ ཨསྶཱདནཱབྷིནནྡནཝསེན, པཝཏྟིཡཾ པཊིགྷསམྤཡུཏྟཱནཾ དོམནསྶཝསེན, ཝིཙིཀིཙྪཱསམྤཡུཏྟཙིཏྟུཔྤཱདསྶ ཨནིཊྛངྒཏཝསེན, ཨུདྡྷཙྩསཧགཏསྶ ཝིཀྑེཔཝསེན ཨཝཱུཔསམཝསེན ཙ པཝཏྟིཡཾ པརིཏྟམཧགྒཏནཝཏྟབྦཱརམྨཎཏཱ ཝེདིཏབྦཱ. ཨེཏེསུ པན ཨེཀདྷམྨོཔི ཨཔྤམཱཎེ ཨཱརབྦྷ པཝཏྟིཏུཾ ན སཀྐོཏི, ཏསྨཱ ན ཨཔྤམཱཎཱརམྨཎཱ.

ཀུསལཏོ ཙཏྟཱརོ ཀིརིཡཏོ ཙཏྟཱརོཏི ཨཊྛ ཉཱཎསམྤཡུཏྟཙིཏྟུཔྤཱདཱ སེཀྑཔུཐུཛྫནཁཱིཎཱསཝཱནཾ སཀྐཙྩདཱནཔཙྩཝེཀྑཎདྷམྨསཝནཱདཱིསུ ཡཐཱཝུཏྟཔྤཀཱརེ དྷམྨེ ཨཱརབྦྷ པཝཏྟིཀཱལེ པརིཏྟམཧགྒཏནཝཏྟབྦཱརམྨཎཱ ཧོནྟི. གོཏྲབྷུཀཱལེ ལོཀུཏྟརདྷམྨེ པཙྩཝེཀྑཎཀཱལེ ཙ ནེསཾ ཨཔྤམཱཎཱརམྨཎཏཱ ཝེདིཏབྦཱ.

ཡཾ པནེཏཾ རཱུཔཱཝཙརཙཏུཏྠཛ྄ཛྷཱནཾ ཏཾ སབྦཏྠཔཱདཀཙཏུཏྠཾ ཨཱཀཱསཀསིཎཙཏུཏྠཾ ཨཱལོཀཀསིཎཙཏུཏྠཾ བྲཧྨཝིཧཱརཙཏུཏྠཾ ཨཱནཱཔཱནཙཏུཏྠཾ ¶ ཨིདྡྷིཝིདྷཙཏུཏྠཾ དིབྦསོཏཙཏུཏྠཾ ཙེཏོཔརིཡཉཱཎཙཏུཏྠཾ ཡཐཱཀམྨུཔགཉཱཎཙཏུཏྠཾ དིབྦཙཀྑུཉཱཎཙཏུཏྠཾ པུབྦེནིཝཱསཉཱཎཙཏུཏྠཾ ཨནཱགཏཾསཉཱཎཙཏུཏྠནྟི ཀུསལཏོཔི ཀིརིཡཏོཔི དྭཱདསཝིདྷཾ ཧོཏི.

ཏཏྠ ‘སབྦཏྠཔཱདཀཙཏུཏྠཾ’ ནཱམ ཨཊྛསུ ཀསིཎེསུ ཙཏུཏྠཛ྄ཛྷཱནཾ. ཏཉྷི ཝིཔསྶནཱཡཔི པཱདཀཾ ¶ ཧོཏི, ཨབྷིཉྙཱནམྤི, ནིརོདྷསྶཱཔི, ཝཊྚསྶཱཔི པཱདཀཾ ཧོཏིཡེཝཱཏི སབྦཏྠཔཱདཀནྟི ཝུཏྟཾ. ‘ཨཱཀཱསཀསིཎཨཱལོཀཀསིཎཙཏུཏྠཱནི’ པན ཝིཔསྶནཱཡཔི ཨབྷིཉྙཱནམྤི ཝཊྚསྶཱཔི པཱདཀཱནི ¶ ཧོནྟི, ནིརོདྷཔཱདཀཱནེཝ ན ཧོནྟི. ‘བྲཧྨཝིཧཱརཨཱནཱཔཱནཙཏུཏྠཱནི’ ཝིཔསྶནཱཡ ཙེཝ ཝཊྚསྶ ཙ པཱདཀཱནི ཧོནྟི, ཨབྷིཉྙཱནཾ པན ནིརོདྷསྶ ཙ པཱདཀཱནི ན ཧོནྟི. ཏཏྠ དསཝིདྷམྤི ཀསིཎཛ྄ཛྷཱནཾ ཀསིཎཔཎྞཏྟིཾ ཨཱརབྦྷ པཝཏྟཏྟཱ, བྲཧྨཝིཧཱརཙཏུཏྠཾ སཏྟཔཎྞཏྟིཾ ཨཱརབྦྷ པཝཏྟཏྟཱ, ཨཱནཱཔཱནཙཏུཏྠཾ ནིམིཏྟཾ ཨཱརབྦྷ པཝཏྟཏྟཱ པརིཏྟཱདིཝསེན ནཝཏྟབྦདྷམྨཱརམྨཎཏོ ནཝཏྟབྦཱརམྨཎཾ ནཱམ ཧོཏི.

‘ཨིདྡྷིཝིདྷཙཏུཏྠཾ’ པརིཏྟམཧགྒཏཱརམྨཎཾ ཧོཏི. ཀཐཾ? ཏཉྷི ཡདཱ ཀཱཡཾ ཙིཏྟསནྣིསྶིཏཾ ཀཏྭཱ ཨདིསྶམཱནེན ཀཱཡེན གནྟུཀཱམོ ཙིཏྟཝསེན ཀཱཡཾ པརིཎཱམེཏི, མཧགྒཏཙིཏྟེ སམོདཧཏི, སམཱརོཔེཏི, ཏདཱ ཨུཔཡོགལདྡྷཾ ཨཱརམྨཎཾ ཧོཏཱིཏི ཀཏྭཱ རཱུཔཀཱཡཱརམྨཎཏོ པརིཏྟཱརམྨཎཾ ཧོཏི. ཡདཱ ཙིཏྟཾ ཀཱཡསནྣིསྶིཏཾ ཀཏྭཱ དིསྶམཱནེན ཀཱཡེན གནྟུཀཱམོ ཀཱཡཝསེན ཙིཏྟཾ པརིཎཱམེཏི, པཱདཀཛ྄ཛྷཱནཙིཏྟཾ རཱུཔཀཱཡེ སམོདཧཏི, སམཱརོཔེཏི, ཏདཱ ཨུཔཡོགལདྡྷཾ ཨཱརམྨཎཾ ཧོཏཱིཏི ཀཏྭཱ མཧགྒཏཙིཏྟཱརམྨཎཏོ མཧགྒཏཱརམྨཎཾ ཧོཏི.

‘དིབྦསོཏཙཏུཏྠཾ’ སདྡཾ ཨཱརབྦྷ པཝཏྟཏྟཱ ཨེཀནྟཔརིཏྟཱརམྨཎམེཝ. ‘ཙེཏོཔརིཡཉཱཎཙཏུཏྠཾ’ པརིཏྟམཧགྒཏཨཔྤམཱཎཱརམྨཎཾ ཧོཏི. ཀཐཾ? ཏཉྷི ¶ པརེསཾ ཀཱམཱཝཙརཙིཏྟཛཱནནཀཱལེ པརིཏྟཱརམྨཎཾ ཧོཏི, རཱུཔཱཝཙརཱརཱུཔཱཝཙརཙིཏྟཛཱནནཀཱལེ མཧགྒཏཱརམྨཎཾ, མགྒཕལཛཱནནཀཱལེ ཨཔྤམཱཎཱརམྨཎཾ ཧོཏི. ཨེཏྠ ཙ པུཐུཛྫནོ སོཏཱཔནྣསྶ ཙིཏྟཾ ན ཛཱནཱཏི, སོཏཱཔནྣོ ཝཱ སཀདཱགཱམིསྶཱཏི ཨེཝཾ ཡཱཝ ཨརཧཏོ ནེཏབྦཾ. ཨརཧཱ པན སབྦེསཾ ཙིཏྟཾ ཛཱནཱཏི. ཨཉྙོཔི ཙ ཨུཔརིམོ ཧེཊྛིམསྶཱཏི ཨཡཾ ཝིསེསོ ཝེདིཏབྦོ. ‘ཡཐཱཀམྨུཔགཉཱཎཙཏུཏྠཾ’ ཀཱམཱཝཙརཀམྨཛཱནནཀཱལེ པརིཏྟཱརམྨཎཾ ཧོཏི, རཱུཔཱཝཙརཱརཱུཔཱཝཙརཀམྨཛཱནནཀཱལེ མཧགྒཏཱརམྨཎཾ.

‘དིབྦཙཀྑུཉཱཎཙཏུཏྠཾ’ རཱུཔཱརམྨཎཏྟཱ ཨེཀནྟཔརིཏྟཱརམྨཎམེཝ. ‘པུབྦེནིཝཱསཉཱཎཙཏུཏྠཾ’ པརིཏྟམཧགྒཏཨཔྤམཱཎནཝཏྟབྦཱརམྨཎཾ ཧོཏི. ཀཐཾ? ཏཉྷི ཀཱམཱཝཙརཀྑནྡྷཱནུསྶརཎཀཱལེ པརིཏྟཱརམྨཎཾ ཧོཏི. རཱུཔཱཝཙརཱརཱུཔཱཝཙརཀྑནྡྷཱནུསྶརཎཀཱལེ མཧགྒཏཱརམྨཎཾ. ཨཏཱིཏེ ཨཏྟནཱ ཝཱ པརེཧི ཝཱ བྷཱཝིཏམགྒཾ སཙྪིཀཏཕལཉྩ ཨནུསྶརཎཀཱལེ ཨཔྤམཱཎཱརམྨཎཾ. ཨཏཱིཏེ བུདྡྷཱ མགྒཾ ¶ བྷཱཝཡིཾསུ, ཕལཾ སཙྪཱཀཾསུ, ནིབྦཱནདྷཱཏུཡཱ པརིནིབྦཱཡིཾསཱུཏི ¶ ཚིནྣཝཊུམཀཱནུསྶརཎཝསེན མགྒཕལནིབྦཱནཔཙྩཝེཀྑཎཏོཔི ཨཔྤམཱཎཱརམྨཎཾ. ཨཏཱིཏེ ‘ཝིཔསྶཱི ནཱམ བྷགཝཱ’ ཨཧོསི ¶ . ཏསྶ ‘བནྡྷུམཏཱི ནཱམ ནགརཾ ཨཧོསི, བནྡྷུམཱ ནཱམ རཱཛཱ པིཏཱ, བནྡྷུམཏཱི ནཱམ མཱཏཱ’ཏིཨཱདིནཱ ནཡེན ནཱམགོཏྟཔཐཝཱིནིམིཏྟཱདིཨནུསྶརཎཀཱལེ ནཝཏྟབྦཱརམྨཎཾ ཧོཏི.

‘ཨནཱགཏཾསཉཱཎཙཏུཏྠེ’པི ཨེསེཝ ནཡོ. ཏམྤི ཨཡཾ ཨནཱགཏེ ‘ཀཱམཱཝཙརེ ནིབྦཏྟིསྶཏཱི’ཏི ཛཱནནཀཱལེ པརིཏྟཱརམྨཎཾ ཧོཏི. ‘རཱུཔཱཝཙརེ ཝཱ ཨརཱུཔཱཝཙརེ ཝཱ ནིབྦཏྟིསྶཏཱི’ཏི ཛཱནནཀཱལེ མཧགྒཏཱརམྨཎཾ. ‘མགྒཾ བྷཱཝེསྶཏི ཕལཾ སཙྪིཀརིསྶཏི’ ‘ནིབྦཱནདྷཱཏུཡཱ པརིནིབྦཱཡིསྶཏཱི’ཏི ཛཱནནཀཱལེ ཨཔྤམཱཎཱརམྨཎཾ. ཨནཱགཏེ ‘‘མེཏྟེཡྻོ ནཱམ བྷགཝཱ ཨུཔྤཛྫིསྶཏི, སུབྲཧྨཱ ནཱམསྶ བྲཱཧྨཎོ པིཏཱ བྷཝིསྶཏི, བྲཧྨཝཏཱི ནཱམ བྲཱཧྨཎཱི མཱཏཱ བྷཝིསྶཏཱི’’ཏིཨཱདིནཱ ནཡེན ནཱམགོཏྟཛཱནནཀཱལེ ནཝཏྟབྦཱརམྨཎཾ ཧོཏི.

ཨརཱུཔཱཝཙརཙཏུཏྠཾ པན ཨཱསཝཱནཾ ཁཡཙཏུཏྠཉྩ པཱལི༹ཡཾ ཨཱགཏཊྛཱནེཡེཝ ཀཐེསྶཱམི. ཀིརིཡཱཧེཏུཀམནོཝིཉྙཱཎདྷཱཏུ ཨུཔེཀྑཱསཧགཏཱ སབྦེསམྤི ཨེཏེསཾ ཀུསལཱཀུསལཀིརིཡཙིཏྟཱནཾ པུརེཙཱརིཀཱ. ཏསྶཱ ཏེསུ ཝུཏྟནཡེནེཝ ཨཱརམྨཎབྷེདོ ཝེདིཏབྦོ. པཉྩདྭཱརེ པན ཝོཊྛབྦནཝསེན པཝཏྟིཡཾ ཨེཀནྟཔརིཏྟཱརམྨཎཱཝ ཧོཏི. རཱུཔཱཝཙརཏིཀཙཏུཀྐཛ྄ཛྷཱནཱདཱིནི པརིཏྟཱདིབྷཱཝེན ནཝཏྟབྦདྷམྨཾ ཨཱརབྦྷ པཝཏྟིཏོ ནཝཏྟབྦཱརམྨཎཱནི. ཨེཏྠ ཧི རཱུཔཱཝཙརཱནི པཐཝཱིཀསིཎཱདཱིསུ པཝཏྟནྟི, ཨཱཀཱསཱནཉྩཱཡཏནཾ ཨུགྒྷཱཊིམཱཀཱསེ, ཨཱཀིཉྩཉྙཱཡཏནཾ ཝིཉྙཱཎཱཔགམེཏི.

༡༤༢༩. མགྒཱརམྨཎཏྟིཀེ ཨཱདིམྷི ཝུཏྟཱ ཨཊྛ ཉཱཎསམྤཡུཏྟཙིཏྟུཔྤཱདཱ སེཀྑཱསེཀྑཱནཾ ཨཏྟནཱ པཊིཝིདྡྷམགྒཱནཾ པཙྩཝེཀྑཎཀཱལེ མགྒཱརམྨཎཱ, མགྒེན པན ཨསཧཛཱཏཏྟཱ ན མགྒཧེཏུཀཱ, ཨཏྟནཱ པཊིཝིདྡྷམགྒཾ གརུཾ ཀཏྭཱ པཙྩཝེཀྑཎཀཱལེ ཨཱརམྨཎཱདྷིཔཏིཝསེན མགྒཱདྷིཔཏིནོ, ཨཉྙདྷམྨཱརམྨཎཀཱལེ ན ཝཏྟབྦཱ མགྒཱརམྨཎཱཏིཔི མགྒཱདྷིཔཏིནོཏིཔི. ཙཏྟཱརོ ཨརིཡམགྒཱ མགྒསངྑཱཏསྶ མགྒསམྤཡུཏྟསྶ ཝཱ ཧེཏུནོ ཨཏྠིཏཱཡ ཨེཀནྟཏོ མགྒཧེཏུཀཱཝ. ཝཱིརིཡཾ པན ཝཱིམཾསཾ ཝཱ ¶ ཛེཊྛཀཾ ཀཏྭཱ མགྒབྷཱཝནཱཀཱལེ ¶ སཧཛཱཏཱདྷིཔཏིནཱ སིཡཱ མགྒཱདྷིཔཏིནོ, ཚནྡཙིཏྟཱནཾ ཨཉྙཏརཛེཊྛཀཀཱལེ སིཡཱ ན ཝཏྟབྦཱ མགྒཱདྷིཔཏིནོཏི.

དྭཱདསཝིདྷེ ¶ རཱུཔཱཝཙརཙཏུཏྠཛ྄ཛྷཱནེ སབྦཏྠཔཱདཀཙཏུཏྠཱདཱིནི ནཝ ཛྷཱནཱནི ནེཝ མགྒཱརམྨཎཱནི ན མགྒཧེཏུཀཱནི ན མགྒཱདྷིཔཏཱིནི. ཙེཏོཔརིཡཉཱཎཔུབྦེནིཝཱསཉཱཎཨནཱགཏཾསཉཱཎཙཏུཏྠཱནི པན ཨརིཡཱནཾ མགྒཙིཏྟཛཱནནཀཱལེ མགྒཱརམྨཎཱནི ཧོནྟི, མགྒེན པན ཨསཧཛཱཏཏྟཱ ན མགྒཧེཏུཀཱནི, མགྒཾ གརུཾ ཀཏྭཱ ཨཔྤཝཏྟིཏོ ན མགྒཱདྷིཔཏཱིནི. ཀསྨཱ པནེཏཱནི ན མགྒཾ གརུཾ ཀརོནྟཱིཏི? ཨཏྟནོ མཧགྒཏཏཱཡ. ཡཐཱ ཧི རཱཛཱནཾ སབྦོ ལོཀོ གརུཾ ཀརོཏི, མཱཏཱཔིཏརོ པན ན ཀརོནྟི. ན ཧི ཏེ རཱཛཱནཾ དིསྭཱ ཨཱསནཱ ཝུཊྛཧནྟི, ན ཨཉྫལིཀམྨཱདཱིནི ཀརོནྟི, དཧརཀཱལེ ཝོཧརིཏནཡེནེཝ ཝོཧརནྟི. ཨེཝམེཏཱནིཔི ཨཏྟནོ མཧགྒཏཏཱཡ ན མགྒཾ གརུཾ ཀརོནྟི.

ཀིརིཡཱཧེཏུཀམནོཝིཉྙཱཎདྷཱཏུཔི ཨརིཡཱནཾ མགྒཔཙྩཝེཀྑཎཀཱལེ པཙྩཝེཀྑཎཔུརེཙཱརིཀཏྟཱ མགྒཱརམྨཎཱ ཧོཏི, མགྒེན ཨསཧཛཱཏཏྟཱ པན ན མགྒཧེཏུཀཱ, མགྒཾ གརུཾ ཀཏྭཱ ཨཔྤཝཏྟིཏོ ན མགྒཱདྷིཔཏི. ཀསྨཱ གརུཾ ན ཀརོཏཱིཏི? ཨཏྟནོ ཨཧེཏུཀཏཱཡ ཧཱིནཏཱཡ ཛལ༹ཏཱཡ. ཡཐཱ ཧི རཱཛཱནཾ སབྦོ ལོཀོ གརུཾ ཀརོཏི, ཨཏྟནོ པརིཛནཱ པན ཁུཛྫཝཱམནཀཙེཊཀཱདཡོ ཨཏྟནོ ཨཉྙཱཎཏཱཡ པཎྜིཏམནུསྶཱ ཝིཡ ནཱཏིགརུཾ ཀརོནྟི, ཨེཝམེཝ ཨིདམྤི ཙིཏྟཾ ཨཏྟནོ ཨཧེཏུཀཏཱཡ ཧཱིནཏཱཡ ཛལ༹ཏཱཡ མགྒཾ གརུཾ ན ཀརོཏི.

ཉཱཎཝིཔྤཡུཏྟཀུསལཱདཱིནི ཉཱཎཱབྷཱཝེན ཙེཝ ལོཀིཡདྷམྨཱརམྨཎཏཱཡ ཙ མགྒཱརམྨཎཱདིབྷཱཝཾ ན ལབྷནྟི, ནཝཏྟབྦཱརམྨཎཱནེཝ ཧོནྟཱིཏི ཝེདིཏབྦཱནཱིཏི.

༡༤༣༢. ཨཏཱིཏཱརམྨཎཏྟིཀེ ¶ ཝིཉྙཱཎཉྩཱཡཏནནེཝསཉྙཱནཱསཉྙཱཡཏནདྷམྨཱ ཧེཊྛཱ ཨཏཱིཏསམཱཔཏྟིཾ ཨཱརབྦྷ པཝཏྟིཏཱ ཨེཀནྟེན ཨཏཱིཏཱརམྨཎཱཝ.

༡༤༣༣. ནིཡོགཱ ཨནཱགཏཱརམྨཎཱ ནཏྠཱིཏི ནིཡམེན པཱཊིཡེཀྐཾ ཙིཏྟཾ ཨནཱགཏཱརམྨཎཾ ནཱམ ནཏྠི. ནནུ ཙ ཨནཱགཏཾསཉཱཎཾ ཨེཀནྟེན ཨནཱགཏཱརམྨཎཾ, ཙེཏོཔརིཡཉཱཎམྤི ཨནཱགཏཾ ཨཱརབྦྷ པཝཏྟཏཱིཏི? ནོ ¶ ན པཝཏྟཏི. པཱཊིཡེཀྐཾ པན ཨེཏཾ ཨེཀཾ ཙིཏྟཾ ནཱམ ནཏྠི. རཱུཔཱཝཙརཙཏུཏྠཛ྄ཛྷཱནེན སངྒཧིཏཏྟཱ ཨཉྙེཧི མཧགྒཏཙིཏྟེཧི མིསྶཀཾ ཧོཏི. ཏེན ཝུཏྟཾ ‘ནིཡོགཱ ཨནཱགཏཱརམྨཎཱ ནཏྠཱི’ཏི.

༡༤༣༤. དྭིཔཉྩཝིཉྙཱཎཱནི ¶ , ཏིསྶོ མནོདྷཱཏུཡོ ཙ པཙྩུཔྤནྣེསུ རཱུཔཱདཱིསུ པཝཏྟིཏོ པཙྩུཔྤནྣཱརམྨཎཱ ནཱམ. དས ཙིཏྟུཔྤཱདཱཏི ཨེཏྠ ཨཊྛ ཏཱཝ སཧེཏུཀཱ དེཝམནུསྶཱནཾ པཊིསནྡྷིགྒཧཎཀཱལེ ཀམྨཾ ཝཱ ཀམྨནིམིཏྟཾ ཝཱ ཨཱརབྦྷ པཝཏྟིཡཾ ཨཏཱིཏཱརམྨཎཱ. བྷཝངྒཙུཏིཀཱལེསུཔི ཨེསེཝ ནཡོ. གཏིནིམིཏྟཾ པན ཨཱརབྦྷ པཊིསནྡྷིགྒཧཎཀཱལེ ཏཏོ པརཾ བྷཝངྒཀཱལེ ཙ པཙྩུཔྤནྣཱརམྨཎཱ. ཏཐཱ པཉྩདྭཱརེ ཏདཱརམྨཎཝསེན པཝཏྟིཡཾ. མནོདྭཱརེ པན ཨཏཱིཏཱནཱགཏཔཙྩུཔྤནྣཱརམྨཎཱནཾ ཛཝནཱནཾ ཨཱརམྨཎཾ གཧེཏྭཱ པཝཏྟིཏོ ཨཏཱིཏཱནཱགཏཔཙྩུཔྤནྣཱརམྨཎཱ. ‘ཀུསལཝིཔཱཀཱཧེཏུཀཨུཔེཀྑཱསཧགཏམནོཝིཉྙཱཎདྷཱཏུཡ’མྤི ཨེསེཝ ནཡོ. ཀེཝལཉྷི སཱ མནུསྶེསུ ཛཙྩནྡྷཱདཱིནཾ པཊིསནྡྷི ཧོཏི. པཉྩདྭཱརེ ཙ སནྟཱིརཎཝསེནཱཔི པཙྩུཔྤནྣཱརམྨཎཱ ཧོཏཱིཏི ཨཡམེཏྠ ཝིསེསོ. ‘སོམནསྶསཧགཏཱ’ པན པཉྩདྭཱརེ སནྟཱིརཎཝསེན ཏདཱརམྨཎཝསེན ཙ པཙྩུཔྤནྣཱརམྨཎཱ ཧོཏི. མནོདྭཱརེ ཏདཱརམྨཎཝསེན སཧེཏུཀཝིཔཱཀཱ ཝིཡ ཨཏཱིཏཱནཱགཏཔཙྩུཔྤནྣཱརམྨཎཱཏི ཝེདིཏབྦཱ.

‘ཨཀུསལཝིཔཱཀཱཧེཏུཀམནོཝིཉྙཱཎདྷཱཏུ’ པན ཀུསལཝིཔཱཀཱཡ ཨུཔེཀྑཱསཧགཏཱཧེཏུཀཱཡ སམཱནགཏིཀཱ ཨེཝ. ཀེཝལཉྷི ¶ སཱ ཨཱཔཱཡིཀཱནཾ པཊིསནྡྷིབྷཝངྒཙུཏིཝསེན པཝཏྟཏཱིཏི ཨཡམེཏྠ ཝིསེསོ. ‘ཀིརིཡཱཧེཏུཀམནོཝིཉྙཱཎདྷཱཏུ’ སོམནསྶསཧགཏཱ ཁཱིཎཱསཝཱནཾ པཉྩདྭཱརེ པཧཊྛཱཀཱརཾ ཀུརུམཱནཱ པཙྩུཔྤནྣཱརམྨཎཱ ཧོཏི. མནོདྭཱརེ ཨཏཱིཏཱདིབྷེདེ དྷམྨེ ཨཱརབྦྷ ཧསིཏུཔྤཱདཝསེན པཝཏྟིཡཾ ཨཏཱིཏཱནཱགཏཔཙྩུཔྤནྣཱརམྨཎཱ ཧོཏི.

ཀཱམཱཝཙརཀུསལནྟིཨཱདཱིསུ ཀུསལཏོ ཏཱཝ ཙཏྟཱརོ ཉཱཎསམྤཡུཏྟཙིཏྟུཔྤཱདཱ. སེཀྑཔུཐུཛྫནཱནཾ ཨཏཱིཏཱདིབྷེདཱནི ཁནྡྷདྷཱཏུཨཱཡཏནཱནི སམྨསནྟཱནཾ པཙྩཝེཀྑནྟཱནཾ ཨཏཱིཏཱནཱགཏཔཙྩུཔྤནྣཱརམྨཎཱ ཧོནྟི. པཎྞཏྟིནིབྦཱནཔཙྩཝེཀྑཎེ ནཝཏྟབྦཱརམྨཎཱ. ཉཱཎཝིཔྤཡུཏྟེསུཔི ཨེསེཝ ནཡོ ¶ . ཀེཝལཉྷི ཏེཧི མགྒཕལནིབྦཱནཔཙྩཝེཀྑཎཱ ནཏྠི. ཨཡམེཝེཏྠ ཝིསེསོ.

ཨཀུསལཏོ ཙཏྟཱརོ དིཊྛིསམྤཡུཏྟཙིཏྟུཔྤཱདཱ ཨཏཱིཏཱདིབྷེདཱནཾ ཁནྡྷདྷཱཏུཨཱཡཏནཱནཾ ཨསྶཱདནཱབྷིནནྡནཔརཱམཱསཀཱལེ ཨཏཱིཏཱདིཨཱརམྨཎཱ ཧོནྟི. པཎྞཏྟིཾ ཨཱརབྦྷ ཨསྶཱདེནྟསྶ ཨབྷིནནྡནྟསྶ ‘སཏྟོ སཏྟོ’ཏི པརཱམསིཏྭཱ གཎྷནྟསྶ ནཝཏྟབྦཱརམྨཎཱ ཧོནྟི. དིཊྛིཝིཔྤཡུཏྟེསུཔི ཨེསེཝ ནཡོ. ཀེཝལཉྷི ཏེཧི པརཱམཱསགྒཧཎཾ ནཏྠི. དྭེ པཊིགྷསམྤཡུཏྟཙིཏྟུཔྤཱདཱ ¶ ཨཏཱིཏཱདིབྷེདེ དྷམྨེ ཨཱརབྦྷ དོམནསྶིཏཱནཾ ཨཏཱིཏཱདིཨཱརམྨཎཱ, པཎྞཏྟིཾ ཨཱརབྦྷ དོམནསྶིཏཱནཾ ནཝཏྟབྦཱརམྨཎཱ. ཝིཙིཀིཙྪུདྡྷཙྩསམྤཡུཏྟཱ ཏེསུ ཨེཝ དྷམྨེསུ ཨནིཊྛངྒཏབྷཱཝེན ཙེཝ ཨུདྡྷཏབྷཱཝེན ཙ པཝཏྟིཡཾ ཨཏཱིཏཱནཱགཏཔཙྩུཔྤནྣནཝཏྟབྦཱརམྨཎཱ. ཀིརིཡཏོ ཨཊྛ སཧེཏུཀཙིཏྟུཔྤཱདཱ ཀུསལཙིཏྟུཔྤཱདགཏིཀཱ ཨེཝ. ཀིརིཡཱཧེཏུཀམནོཝིཉྙཱཎདྷཱཏུ ཨུཔེཀྑཱསཧགཏཱ པཉྩདྭཱརེ ཝོཊྛབྦནཝསེན པཝཏྟིཡཾ པཙྩུཔྤནྣཱརམྨཎཱཝ ¶ . མནོདྭཱརེ ཨཏཱིཏཱནཱགཏཔཙྩུཔྤནྣཱརམྨཎཱནཉྩེཝ པཎྞཏྟིནིབྦཱནཱརམྨཎཱནཉྩ ཛཝནཱནཾ པུརེཙཱརིཀཀཱལེ ཨཏཱིཏཱནཱགཏཔཙྩུཔྤནྣནཝཏྟབྦཱརམྨཎཱ.

ཡཐཱཝུཏྟཔྤབྷེདེ རཱུཔཱཝཙརཛ྄ཛྷཱནེ སབྦཏྠཔཱདཀཙཏུཏྠཾ ཨཱཀཱསཀསིཎཙཏུཏྠཾ ཨཱལོཀཀསིཎཙཏུཏྠཾ བྲཧྨཝིཧཱརཙཏུཏྠཾ ཨཱནཱཔཱནཙཏུཏྠནྟི ཨིམཱནི པཉྩ ནཝཏྟབྦཱརམྨཎཱནེཝ. ‘ཨིདྡྷིཝིདྷཙཏུཏྠཾ’ ཀཱཡཝསེན ཙིཏྟཾ པརིཎཱམེནྟསྶ ཨཏཱིཏཔཱདཀཛ྄ཛྷཱནཙིཏྟཾ ཨཱརབྦྷ པཝཏྟནཏོ ཨཏཱིཏཱརམྨཎཾ. མཧཱདྷཱཏུནིདྷཱནེ མཧཱཀསྶཔཏྠེརཱདཱིནཾ ཝིཡ ཨནཱགཏཾ ཨདྷིཊྛཧནྟཱནཾ ཨནཱགཏཱརམྨཎཾ ཧོཏི. མཧཱཀསྶཔཏྠེརོ ཀིར མཧཱདྷཱཏུནིདྷཱནཾ ཀརོནྟོ ཨནཱགཏེ ཨཊྛཱརསཝསྶཱདྷིཀཱནི དྭེ ཝསྶསཏཱནི ཨིམེ གནྡྷཱ མཱ སུསྶིཾསུ, པུཔྥཱནི མཱ མིལཱཡིཾསུ, དཱིཔཱ མཱ ནིབྦཱཡིཾསཱུཏི ཨདྷིཊྛཧི. སབྦཾ ཏཐེཝ ཨཧོསི. ཨསྶགུཏྟཏྠེརོ ཝཏྟནིཡསེནཱསནེ བྷིཀྑུསངྒྷཾ སུཀྑབྷཏྟཾ བྷུཉྫམཱནཾ དིསྭཱ ‘ཨུདཀསོཎྜི དིཝསེ དིཝསེ, པུརེབྷཏྟཾ དདྷིརསཱ ཧོཏཱུ’ཏི ཨདྷིཊྛཧི. པུརེབྷཏྟཾ གཧིཏཾ དདྷིརསཾ ཧོཏི པཙྪཱབྷཏྟེ པཱཀཏིཀམེཝ. ཀཱཡཾ པན ཙིཏྟསནྣིསྶིཏཾ ཀཏྭཱ ཨདིསྶམཱནེན ཀཱཡེན གམནཀཱལེ, ཨཉྙསྶ ཝཱ པཱཊིཧཱརིཡསྶ ¶ ཀརཎཀཱལེ, ཀཱཡཾ ཨཱརབྦྷ པཝཏྟཏྟཱ པཙྩུཔྤནྣཱརམྨཎཾ ཧོཏི.

‘དིབྦསོཏཙཏུཏྠཾ’ ཝིཛྫམཱནསདྡམེཝ ཨཱརབྦྷ པཝཏྟིཏོ པཙྩུཔྤནྣཱརམྨཎཾ ཧོཏི. ཙེཏོཔརིཡཉཱཎཙཏུཏྠཾ ཨཏཱིཏེ སཏྟདིཝསབྦྷནྟརེ ཨནཱགཏེ སཏྟདིཝསབྦྷནྟརེ པརེསཾ ཙིཏྟཾ ཛཱནནྟསྶ ཨཏཱིཏཱརམྨཎཾ ཨནཱགཏཱརམྨཎཉྩ ཧོཏི. སཏྟདིཝསཱཏིཀྐམེ པན ཏཾ ཛཱནིཏུཾ ན སཀྐོཏི. ཨཏཱིཏཱནཱགཏཾསཉཱཎཱནཉྷི ཨེས ཝིསཡོ. ན ཨེཏསྶ པཙྩུཔྤནྣཛཱནནཀཱལེ པན པཙྩུཔྤནྣཱརམྨཎཾ ཧོཏི.

པཙྩུཔྤནྣཉྩ ¶ ནཱམེཏཾ ཏིཝིདྷཾ – ཁཎཔཙྩུཔྤནྣཾ སནྟཏིཔཙྩུཔྤནྣཾ ཨདྡྷཱཔཙྩུཔྤནྣཉྩ. ཏཏྠ ཨུཔྤཱདཊྛིཏིབྷངྒཔྤཏྟཾ ‘ཁཎཔཙྩུཔྤནྣཾ’. ཨེཀདྭིསནྟཏིཝཱརཔརིཡཱཔནྣཾ ‘སནྟཏིཔཙྩུཔྤནྣཾ’. ཏཏྠ ཨནྡྷཀཱརེ ¶ ནིསཱིདིཏྭཱ ཨཱལོཀཊྛཱནཾ གཏསྶ ན ཏཱཝ ཨཱརམྨཎཾ པཱཀཊཾ ཧོཏི; ཡཱཝ པན ཏཾ པཱཀཊཾ ཧོཏི, ཨེཏྠནྟརེ ཨེཀདྭིསནྟཏིཝཱརཱ ཝེདིཏབྦཱ. ཨཱལོཀཊྛཱནེ ཝིཙརིཏྭཱ ཨོཝརཀཾ པཝིཊྛསྶཱཔི ན ཏཱཝ སཧསཱ རཱུཔཾ པཱཀཊཾ ཧོཏི; ཡཱཝ ཏཾ པཱཀཊཾ ཧོཏི, ཨེཏྠནྟརེ ཨེཀདྭིསནྟཏིཝཱརཱ ཝེདིཏབྦཱ. དཱུརེ ཋཏྭཱ པན རཛཀཱནཾ ཧཏྠཝིཀཱརཾ གྷཎྜིབྷེརཱིཨཱདིཨཱཀོཊནཝིཀཱརཉྩ དིསྭཱཔི ན ཏཱཝ སདྡཾ སུཎཱཏི; ཡཱཝ པན ཏཾ སུཎཱཏི, ཨེཏསྨིམྤི ཨནྟརེ ཨེཀདྭིསནྟཏིཝཱརཱ ཝེདིཏབྦཱ. ཨེཝཾ ཏཱཝ མཛ྄ཛྷིམབྷཱཎཀཱ. སཾཡུཏྟབྷཱཎཀཱ པན ‘རཱུཔསནྟཏི ཨརཱུཔསནྟཏཱི’ཏི དྭེ སནྟཏིཡོ ཝཏྭཱ, ‘ཨུདཀཾ ཨཀྐམིཏྭཱ གཏསྶ ཡཱཝ ཏཱིརེ ཨཀྐནྟཨུདཀལེཁཱ ན ཝིཔྤསཱིདཏི, ཨདྡྷཱནཏོ ཨཱགཏསྶ ཡཱཝ ཀཱཡེ ཨུསུམབྷཱཝོ ན ཝཱུཔསམྨཏི, ཨཱཏཔཱ ཨཱགནྟྭཱ གབྦྷཾ པཝིཊྛསྶ ཡཱཝ ཨནྡྷཀཱརབྷཱཝོ ན ཝིགཙྪཏི, ཨནྟོགབྦྷེ ཀམྨཊྛཱནཾ མནསིཀརིཏྭཱ དིཝཱ ཝཱཏཔཱནཾ ཝིཝརིཏྭཱ ཨོལོཀེནྟསྶ ཡཱཝ ཨཀྑཱིནཾ ཕནྡནབྷཱཝོ ན ཝཱུཔསམྨཏི, ཨཡཾ རཱུཔསནྟཏི ནཱམ; དྭེ ཏཡོ ཛཝནཝཱརཱ ཨརཱུཔསནྟཏི ནཱམཱ’ཏི ཝཏྭཱ ‘ཏདུབྷཡམྤི སནྟཏིཔཙྩུཔྤནྣཾ ནཱམཱ’ཏི ཝདནྟི.

ཨེཀབྷཝཔརིཙྪིནྣཾ པན ཨདྡྷཱཔཙྩུཔྤནྣཾ ནཱམ. ཡཾ སནྡྷཱཡ བྷདྡེཀརཏྟསུཏྟེ ‘‘ཡོ ཙཱཝུསོ, མནོ ཡེ ཙ དྷམྨཱ ཨུབྷཡམེཏཾ པཙྩུཔྤནྣཾ. ཏསྨིཾ ཙེ པཙྩུཔྤནྣེ ཚནྡརཱགཔཊིབདྡྷཾ ཧོཏི ཝིཉྙཱཎཾ, ཚནྡརཱགཔཊིབདྡྷཏྟཱ ཝིཉྙཱཎསྶ ཏདབྷིནནྡཏི, ཏདབྷིནནྡནྟོ པཙྩུཔྤནྣེསུ དྷམྨེསུ སཾཧཱིརཏཱི’’ཏི (མ. ནི. ༣.༢༨༤) ཝུཏྟཾ. སནྟཏིཔཙྩུཔྤནྣཉྩེཏྠ ¶ ཨཊྛཀཐཱསུ ཨཱགཏཾ. ཨདྡྷཱཔཙྩུཔྤནྣཾ སུཏྟེ.

ཏཏྠ ¶ ཀེཙི ‘ཁཎཔཙྩུཔྤནྣཾ ཙིཏྟཾ ཙེཏོཔརིཡཉཱཎསྶ ཨཱརམྨཎཾ ཧོཏཱི’ཏི ཝདནྟི. ཀིཾཀཱརཎཱ? ཡསྨཱ ཨིདྡྷིམསྶ ཙ པརསྶ ཙ ཨེཀཀྑཎེ ཙིཏྟཾ ཨུཔྤཛྫཏཱིཏི. ཨིདཉྩ ནེསཾ ཨོཔམྨཾ – ཡཐཱ ཨཱཀཱསེ ཁིཏྟེ པུཔྥམུཊྛིམྷི ཨཝསྶཾ ཨེཀཾ པུཔྥཾ ཨེཀསྶ ཝཎྚཾ པཊིཝིཛ྄ཛྷཏི ཝཎྚེན ཝཎྚཾ པཊིཝིཛ྄ཛྷཏི, ཨེཝཾ པརསྶ ཙིཏྟཾ ཛཱནིསྶཱམཱིཏི རཱསིཝསེན མཧཱཛནསྶ ཙིཏྟེ ཨཱཝཛྫིཏེ ཨཝསྶཾ ཨེཀསྶ ཙིཏྟཾ ཨེཀེན ཙིཏྟེན ཨུཔྤཱདཀྑཎེ ཝཱ ཋིཏིཀྑཎེ ཝཱ བྷངྒཀྑཎེ ཝཱ པཊིཝིཛ྄ཛྷཏཱིཏི. ཏཾ པན ཝསྶསཏམྤི ཝསྶསཧསྶམྤི ཨཱཝཛྫནྟོ ཡེན ཙིཏྟེན ཨཱཝཛྫེཏི, ཡེན ཙ ཛཱནཱཏི ཏེསཾ དྭིནྣཾ སཧཊྛཱནཱབྷཱཝཏོ ཨཱཝཛྫནཛཝནཱནཉྩ ཨནིཊྛེ ཋཱནེ ནཱནཱརམྨཎབྷཱཝཔྤཏྟིདོསཏོ ཨཡུཏྟནྟི ཨཊྛཀཐཱསུ པཊིཀྑིཏྟཾ. སནྟཏིཔཙྩུཔྤནྣཾ པན ཨདྡྷཱཔཙྩུཔྤནྣཉྩ ཨཱརམྨཎཾ ཧོཏཱིཏི ཝེདིཏབྦཾ.

ཏཏྠ ¶ ཡཾ ཝཏྟམཱནཛཝནཝཱིཐིཏོ ཨཏཱིཏཱནཱགཏཝསེན དྭིཏིཛཝནཝཱིཐིཔརིམཱཎཀཱལེ པརསྶ ཙིཏྟཾ, ཏཾ སབྦམྤི སནྟཏིཔཙྩུཔྤནྣཾ ནཱམ. ཨདྡྷཱཔཙྩུཔྤནྣཾ པན ཛཝནཝཱརེན དཱིཔེཏབྦནྟི ཡཾ ཨཊྛཀཐཱཡཾ ཝུཏྟཾ ཏཾ སུཝུཏྟཾ. ཏཏྲཱཡཾ དཱིཔནཱ – ཨིདྡྷིམཱ པརསྶ ཙིཏྟཾ ཛཱནིཏུཀཱམོ ཨཱཝཛྫེཏི. ཨཱཝཛྫནཾ ཁཎཔཙྩུཔྤནྣཾ ཨཱརམྨཎཾ ཀཏྭཱ ཏེནེཝ སཧ ནིརུཛ྄ཛྷཏི. ཏཏོ ཙཏྟཱརི པཉྩ ཛཝནཱནི ཡེསཾ པཙྪིམཾ ཨིདྡྷིཙིཏྟཾ, སེསཱནི ཀཱམཱཝཙརཱནི. ཏེསཾ སབྦེསམྤི ཏདེཝ ནིརུདྡྷཾ ཙིཏྟམཱརམྨཎཾ ཧོཏི. ན ཙ ཏཱནི ནཱནཱརམྨཎཱནི ཧོནྟི. ཨདྡྷཱཔཙྩུཔྤནྣཝསེན པཙྩུཔྤནྣཱརམྨཎཏྟཱ ཨེཀཱརམྨཎཱནི. ཨེཀཱརམྨཎཏྟེཔི ཙ ཨིདྡྷིཙིཏྟམེཝ པརསྶ ཙིཏྟཾ པཛཱནཱཏི, ན ཨིཏརཱནི; ཡཐཱ ཙཀྑུདྭཱརེ ཙཀྑུཝིཉྙཱཎམེཝ རཱུཔཾ པསྶཏི, ན ཨིཏརཱནཱིཏི. ཨིཏི ཨིདཾ སནྟཏིཔཙྩུཔྤནྣསྶ ཙེཝ ཨདྡྷཱཔཙྩུཔྤནྣསྶ ཙ ཝསེན པཙྩུཔྤནྣཱརམྨཎཾ ¶ ཧོཏི. ཡསྨཱ ཝཱ སནྟཏིཔཙྩུཔྤནྣམྤི ཨདྡྷཱཔཙྩུཔྤནྣེཡེཝ པཏཏི, ཏསྨཱ ཨདྡྷཱཔཙྩུཔྤནྣཝསེནེཏཾ པཙྩུཔྤནྣཱརམྨཎནྟི ཝེདིཏབྦཾ.

‘པུབྦེནིཝཱསཉཱཎཙཏུཏྠཾ’ ནཱམགོཏྟཱནུསྶརཎེ ནིབྦཱནནིམིཏྟཔཙྩཝེཀྑཎེ ཙ ནཝཏྟབྦཱརམྨཎཾ, སེསཀཱལེ ཨཏཱིཏཱརམྨཎམེཝ. ཡཐཱཀམྨུཔགཉཱཎཙཏུཏྠམྤི ཨཏཱིཏཱརམྨཎམེཝ. ཏཏྠ ཀིཉྩཱཔི པུབྦེནིཝཱསཙེཏོཔརིཡཉཱཎཱནིཔི ཨཏཱིཏཱརམྨཎཱནི ཧོནྟི, ཨཐ ཁོ ཏེསཾ པུབྦེནིཝཱསཉཱཎསྶ ཨཏཱིཏཀྑནྡྷཱ ཁནྡྷཔཊིབདྡྷཉྩ ཀིཉྩི ཨནཱརམྨཎཾ ནཱམ ནཏྠི. ཏཉྷི ཨཏཱིཏཀྑནྡྷཁནྡྷཔཊིབདྡྷེསུ དྷམྨེསུ སབྦཉྙུཏཉྙཱཎསམགཏིཀཾ ཧོཏི. ཙེཏོཔརིཡཉཱཎསྶ ཙ སཏྟདིཝསབྦྷནྟརཱཏཱིཏཾ ཙིཏྟམེཝ ཨཱརམྨཎཾ. ཏཉྷི ཨཉྙཾ ¶ ཁནྡྷཾ ཝཱ ཁནྡྷཔཊིབདྡྷཾ ཝཱ ན ཛཱནཱཏི, མགྒསམྤཡུཏྟཙིཏྟཱརམྨཎཏྟཱ པན པརིཡཱཡཏོ མགྒཱརམྨཎནྟི ཝུཏྟཾ. ཡཐཱཀམྨུཔགཉཱཎསྶ ཙ ཨཏཱིཏཙེཏནཱམཏྟམེཝཱརམྨཎནྟི. ཨཡཾ ཝིསེསོ ཝེདིཏབྦོ. ཨཡམེཏྠ ཨཊྛཀཐཱནཡོ. ཡསྨཱ པན ‘‘ཀུསལཱ ཁནྡྷཱ ཨིདྡྷིཝིདྷཉཱཎསྶ ཙེཏོཔརིཡཉཱཎསྶ པུབྦེནིཝཱསཱནུསྶཏིཉཱཎསྶ ཡཐཱཀམྨུཔགཉཱཎསྶ ཨནཱགཏཾསཉཱཎསྶ ཨཱརམྨཎཔཙྩཡེན པཙྩཡོ’’ཏི (པཊྛཱ. ༡.༡.༤༠༤) པཊྛཱནེ ཝུཏྟཾ, ཏསྨཱ ཙཏྟཱརོཔི ཁནྡྷཱ ཙེཏོཔརིཡཉཱཎཡཐཱཀམྨུཔགཉཱཎཱནཾ ཨཱརམྨཎཾ ཧོནྟི. ཏཏྲཱཔི ཡཐཱཀམྨུཔགཉཱཎསྶ ཀུསལཱཀུསལཱ ཨེཝཱཏི.

‘དིབྦཙཀྑུཉཱཎཙཏུཏྠཾ’ ཝིཛྫམཱནཝཎྞཱརམྨཎཏྟཱ པཙྩུཔྤནྣཱརམྨཎམེཝ. ཨནཱགཏཾསཉཱཎཙཏུཏྠཾ ཨནཱགཏཱརམྨཎམེཝ. ཏཉྷི ཨནཱགཏཀྑནྡྷཁནྡྷཔཊིབདྡྷེསུ དྷམྨེསུ པུབྦེནིཝཱསཉཱཎཾ ཝིཡ སབྦཉྙུཏཉྙཱཎསམགཏིཀཾ ¶ ཧོཏི. ཏཏྠ ཀིཉྩཱཔི ཙེཏོཔརིཡཉཱཎམྤི ཨནཱགཏཱརམྨཎཾ ཧོཏི, ཏཾ པན སཏྟདིཝསབྦྷནྟརེ ཨུཔྤཛྫནཀཙིཏྟམེཝ ཨཱརམྨཎཾ ¶ ཀརོཏི. ཨིདཾ ཨནཱགཏེ ཀཔྤསཏསཧསྶེ ཨུཔྤཛྫནཀཙིཏྟམྤི ཁནྡྷེཔི ཁནྡྷཔཊིབདྡྷམྤི. རཱུཔཱཝཙརཏིཀཙཏུཀྐཛ྄ཛྷཱནཱདཱིནི ཨཏཱིཏཱནཱགཏཔཙྩུཔྤནྣེསུ ཨེཀདྷམྨམྤི ཨཱརབྦྷ ཨཔྤཝཏྟིཏོ ཨེཀནྟནཝཏྟབྦཱརམྨཎཱནེཝཱཏི ཝེདིཏབྦཱནི.

༡༤༣༥. ཨཛ྄ཛྷཏྟཏྟིཀེ ཨནིནྡྲིཡབདྡྷརཱུཔཉྩ ནིབྦཱནཉྩ བཧིདྡྷཱཏི ཨིདཾ ཡཐཱ ཨིནྡྲིཡབདྡྷཾ པརཔུགྒལསནྟཱནེ བཧིདྡྷཱཏི ཝུཙྩམཱནམྤི ཏསྶ ཨཏྟནོ སནྟཱནཔརིཡཱཔནྣཏྟཱ ནིཡཀཛ྄ཛྷཏྟཾ ཧོཏི, ཨེཝཾ ན ཀེནཙི པརིཡཱཡེན ཨཛ྄ཛྷཏྟཾ ཧོཏཱིཏི ནིཡཀཛ྄ཛྷཏྟཔརིཡཱཡསྶ ཨབྷཱཝེན བཧིདྡྷཱཏི ཝུཏྟཾ, ན ནིཡཀཛ྄ཛྷཏྟམཏྟསྶ ཨསམྦྷཝཏོ. ནིཡཀཛ྄ཛྷཏྟམཏྟསྶ པན ཨསམྦྷཝམཏྟཾ སནྡྷཱཡ ཨཛ྄ཛྷཏྟཱརམྨཎཏྟིཀེ བཧིདྡྷཱརམྨཎཏཱ ཝུཏྟཱ. ཨཛ྄ཛྷཏྟདྷམྨཱཔགམམཏྟཏོཝ ཨཱཀིཉྩཉྙཱཡཏནཱརམྨཎསྶ ཨཛ྄ཛྷཏྟབྷཱཝམྤི བཧིདྡྷཱབྷཱཝམྤི ཨཛ྄ཛྷཏྟབཧིདྡྷཱབྷཱཝམྤི ཨནནུཛཱནིཏྭཱ ཨཱཀིཉྩཉྙཱཡཏནཾ ན ཝཏྟབྦཾ ཨཛ྄ཛྷཏྟཱརམྨཎནྟིཔཱིཏིཨཱདི ཝུཏྟཾ.

ཏཏྠ ན ཀེཝལཾ ཏདེཝ ནཝཏྟབྦཱརམྨཎཾ, ཏསྶ པན ཨཱཝཛྫནམྤི, ཨུཔཙཱརཙིཏྟཱནིཔི, ཏསྶཱརམྨཎསྶ པཙྩཝེཀྑཎཙིཏྟཱནིཔི, ཏསྶེཝ ཨསྶཱདནཱདིཝསེན པཝཏྟཱནི ཨཀུསལཙིཏྟཱནིཔི ནཝཏྟབྦཱརམྨཎཱནེཝཱཏི. ཏཱནི ¶ པན ཏསྨིཾ ཝུཏྟེ ཝུཏྟཱནེཝ ཧོནྟཱིཏི ཝིསུཾ ན ཝུཏྟཱནི. ཀཐཾ ཝུཏྟཱནེཝ ཧོནྟཱིཏི? ཨེཏཉྷི ཨཱཀིཉྩཉྙཱཡཏནཾ, ཡཉྩ ཏསྶ པུརེཙཱརིཀཾ ཨཱཝཛྫནཨུཔཙཱརཱདིཝསེན པཝཏྟཾ, ཏེན སཧ ཨེཀཱརམྨཎཾ བྷཝེཡྻ. ཏཾ སབྦཾ ཨཏཱིཏཱརམྨཎཏྟིཀེ ‘ཀཱམཱཝཙརཀུསལཾ, ཨཀུསལཾ, ཀིརིཡཏོ ནཝ ཙིཏྟུཔྤཱདཱ, རཱུཔཱཝཙརཙཏུཏྠཛ྄ཛྷཱན’ནྟི ཨེཝཾ ཝུཏྟཱནཾ ཨེཏེསཾ ཙིཏྟུཔྤཱདཱནཾ ‘སིཡཱ ན ཝཏྟབྦཱ ཨཏཱིཏཱརམྨཎཱཏིཔཱི’ཏིཨཱདིནཱ ནཡེན ནཝཏྟབྦཱརམྨཎབྷཱཝསྶ ཨནུཉྙཱཏཏྟཱ, ཨཱཀིཉྩཉྙཱཡཏནསྶ ཙ ‘ཨཱཀིཉྩཉྙཱཡཏནཾ, ཙཏྟཱརོ མགྒཱ ཨཔརིཡཱཔནྣཱ, ཙཏྟཱརི ཙ སཱམཉྙཕལཱནི, ཨིམེ དྷམྨཱ ན ཝཏྟབྦཱ ཨཏཱིཏཱརམྨཎཱཏིཔཱི’ཏི ཨེཝཾ ཨེཀནྟེན ནཝཏྟབྦཱརམྨཎཏྟཝཙནཏོ ནཝཏྟབྦཱརམྨཎནྟི ཝུཏྟཾ. ཨིདཱནི ¶ ཏཾ ཨཛ྄ཛྷཏྟཱརམྨཎཏྟིཀེ ཨེཀམྤི ཝུཙྩམཱནཾ ཡསྨཱ ཧེཊྛཱ ཏེན སཧ ཨེཀཱརམྨཎབྷཱཝམྤི སནྡྷཱཡ ཀཱམཱཝཙརཀུསལཱདཱིནཾ ནཝཏྟབྦཱརམྨཎཏཱ ཝུཏྟཱ, ཏསྨཱ ཨིདྷཱཔི ཏེསཾ ནཝཏྟབྦཱརམྨཎབྷཱཝཾ དཱིཔེཏི. ཀོ ཧི ཏེན སཧ ཨེཀཱརམྨཎཱནཾ ནཝཏྟབྦཱརམྨཎབྷཱཝེ ཨནྟརཱཡོཏི ¶ ? ཨེཝཾ ཏསྨིཾ ཝུཏྟེ ‘ཝུཏྟཱནེཝ ཧོནྟཱི’ཏི ཝེདིཏབྦཱནི. སེསམེཏྠ ཨཛ྄ཛྷཏྟཱརམྨཎཏྟིཀེ པཱལི༹ཏོ ཨུཏྟཱནམེཝ.

ཨཱརམྨཎཝིབྷཱགེ པན ཝིཉྙཱཎཉྩཱཡཏནཾ ནེཝསཉྙཱནཱསཉྙཱཡཏནནྟི ཨིམེསཾ ཏཱཝ ཀུསལཝིཔཱཀཀིརིཡཝསེན ཚནྣཾ ཙིཏྟུཔྤཱདཱནཾ ཨཏྟནོ སནྟཱནསམྦནྡྷཾ ཧེཊྛིམསམཱཔཏྟིཾ ཨཱརབྦྷ པཝཏྟིཏོ ཨཛ྄ཛྷཏྟཱརམྨཎཏཱ ཝེདིཏབྦཱ. ཨེཏྠ ཙ ཀིརིཡཨཱཀཱསཱནཉྩཱཡཏནཾ ཀིརིཡཝིཉྙཱཎཉྩཱཡཏནསྶེཝ ཨཱརམྨཎཾ ཧོཏི, ན ཨིཏརསྶ. ཀསྨཱ? ཨཱཀཱསཱནཉྩཱཡཏནཀིརིཡསམངྒིནོ ཀུསལསྶ ཝཱ ཝིཔཱཀསྶ ཝཱ ཝིཉྙཱཎཉྩཱཡཏནསྶ ཨབྷཱཝཏོ. ཀུསལཾ པན ཀུསལཝིཔཱཀཀིརིཡཱནཾ ཏིཎྞམྤི ཨཱརམྨཎཾ ཧོཏི. ཀསྨཱ? ཨཱཀཱསཱནཉྩཱཡཏནཀུསལཾ ནིབྦཏྟེཏྭཱ ཋིཏསྶ ཏཏོ ཨུདྡྷཾ ཏིཝིདྷསྶཔི ཝིཉྙཱཎཉྩཱཡཏནསྶ ཨུཔྤཏྟིསམྦྷཝཏོ. ཝིཔཱཀཾ པན ན ཀསྶཙི ཨཱརམྨཎཾ ཧོཏི. ཀསྨཱ? ཝིཔཱཀཏོ ཝུཊྛཧིཏྭཱ ཙིཏྟསྶ ཨབྷིནཱིཧཱརཱསམྦྷཝཏོ. ནེཝསཉྙཱནཱསཉྙཱཡཏནསྶ ཨཱརམྨཎཀརཎེཔི ཨེསེཝ ནཡོ. རཱུཔཱཝཙརཏྟིཀཙཏུཀྐཛ྄ཛྷཱནཱདཱིནཾ སབྦེསམྤི ནིཡཀཛ྄ཛྷཏྟཏོ བཧིདྡྷཱབྷཱཝེན བཧིདྡྷཱབྷཱུཏཱནི པཐཝཱིཀསིཎཱདཱིནི ཨཱརབྦྷ པཝཏྟིཏོ བཧིདྡྷཱརམྨཎཏཱ ཝེདིཏབྦཱ.

སབྦེཝ ཀཱམཱཝཙརཱ ཀུསལཱཀུསལཱབྱཱཀཏཱ དྷམྨཱ, རཱུཔཱཝཙརཾ ཙཏུཏྠཾ ཛྷཱནནྟི ཨེཏྠ ཀུསལཏོ ཏཱཝ ཙཏྟཱརོ ཉཱཎསམྤཡུཏྟཙིཏྟུཔྤཱདཱ ཨཏྟནོ ¶ ཁནྡྷཱདཱིནི པཙྩཝེཀྑནྟསྶ ཨཛ྄ཛྷཏྟཱརམྨཎཱ. པརེསཾ ཁནྡྷཱདིཔཙྩཝེཀྑཎེ པཎྞཏྟིནིབྦཱནཔཙྩཝེཀྑཎེ ཙ བཧིདྡྷཱརམྨཎཱ. ཏདུབྷཡཝསེན ཨཛ྄ཛྷཏྟབཧིདྡྷཱརམྨཎཱ. ཉཱཎཝིཔྤཡུཏྟེསུཔི ཨེསེཝ ནཡོ. ཀེཝལཉྷི ཏེསཾ ནིབྦཱནཔཙྩཝེཀྑཎཾ ¶ ནཏྠི. ཨཀུསལཏོ ཙཏྟཱརོ དིཊྛིསམྤཡུཏྟཙིཏྟུཔྤཱདཱ ཨཏྟནོ ཁནྡྷཱདཱིནཾ ཨསྶཱདནཱབྷིནནྡནཔརཱམཱསགཧཎཀཱལེ ཨཛ྄ཛྷཏྟཱརམྨཎཱ, པརསྶ ཁནྡྷཱདཱིསུ ཙེཝ ཨནིནྡྲིཡབདྡྷརཱུཔཀསིཎཱདཱིསུ ཙ ཏཐེཝ པཝཏྟིཀཱལེ བཧིདྡྷཱརམྨཎཱ, ཏདུབྷཡཝསེན ཨཛ྄ཛྷཏྟབཧིདྡྷཱརམྨཎཱ. དིཊྛིཝིཔྤཡུཏྟེསུཔི ཨེསེཝ ནཡོ. ཀེཝལཉྷི ཏེསཾ པརཱམཱསགཧཎཾ ནཏྠི. དྭེཔི པཊིགྷསམྤཡུཏྟཱ ཨཏྟནོ ཁནྡྷཱདཱིསུ དོམནསྶིཏསྶ ཨཛ྄ཛྷཏྟཱརམྨཎཱ, པརསྶ ཁནྡྷཱདཱིསུ ཙེཝ ཨནིནྡྲིཡབདྡྷརཱུཔཔཎྞཏྟཱིསུ ཙ བཧིདྡྷཱརམྨཎཱ, ཏདུབྷཡཝསེན ཨཛ྄ཛྷཏྟབཧིདྡྷཱརམྨཎཱ. ཝིཙིཀིཙྪུདྡྷཙྩསམྤཡུཏྟཱནམྤི ཝུཏྟཔཀཱརེསུ དྷམྨེསུ ཝིཙིཀིཙྪནཕནྡནབྷཱཝཝསེན པཝཏྟིཡཾ ཨཛ྄ཛྷཏྟཱདིཨཱརམྨཎཏཱ ཝེདིཏབྦཱ.

དྭིཔཉྩཝིཉྙཱཎཱནི ¶ , ཏིསྶོ ཙ མནོདྷཱཏུཡོཏི, ཨིམེ ཏེརས ཙིཏྟུཔྤཱདཱ ཨཏྟནོ རཱུཔཱདཱིནི ཨཱརབྦྷ པཝཏྟིཡཾ ཨཛ྄ཛྷཏྟཱརམྨཎཱ, པརསྶ རཱུཔཱདཱིསུ པཝཏྟཱ བཧིདྡྷཱརམྨཎཱ, ཏདུབྷཡཝསེན ཨཛ྄ཛྷཏྟབཧིདྡྷཱརམྨཎཱ. སོམནསྶསཧགཏཨཧེཏུཀཝིཔཱཀམནོཝིཉྙཱཎདྷཱཏུ པཉྩདྭཱརེ སནྟཱིརཎཏདཱརམྨཎཝསེན ཨཏྟནོ པཉྩ རཱུཔཱདིདྷམྨེ, མནོདྭཱརེ ཏདཱརམྨཎཝསེནེཝ ཨཉྙེཔི ཨཛ྄ཛྷཏྟིཀེ ཀཱམཱཝཙརདྷམྨེ ཨཱརབྦྷ པཝཏྟིཡཾ ཨཛ྄ཛྷཏྟཱརམྨཎཱ, པརེསཾ དྷམྨེསུ པཝཏྟམཱནཱ བཧིདྡྷཱརམྨཎཱ, ཨུབྷཡཝསེན ཨཛ྄ཛྷཏྟབཧིདྡྷཱརམྨཎཱ. ཨུཔེཀྑཱསཧགཏཝིཔཱཀཱཧེཏུཀམནོཝིཉྙཱཎདྷཱཏུདྭཡེཔི ཨེསེཝ ནཡོ. ཀེཝལཾ པནེཏཱ སུགཏིཡཾ དུགྒཏིཡཉྩ པཊིསནྡྷིབྷཝངྒཙུཏིཝསེནཱཔི ཨཛ྄ཛྷཏྟཱདིབྷེདེསུ ཀམྨཱདཱིསུ པཝཏྟནྟི.

ཨཊྛ མཧཱཝིཔཱཀཙིཏྟཱནིཔི ཏཱསཾཡེཝ དྭིནྣཾ སམཱནགཏིཀཱནི. ཀེཝལཾ པནེཏཱནི སནྟཱིརཎཝསེན ན པཝཏྟནྟི. པཊིསནྡྷིབྷཝངྒཙུཏིཝསེནེཝ ཨེཏཱནི སུགཏིཡཾཡེཝ པཝཏྟནྟི. སོམནསྶསཧགཏཱཧེཏུཀཀིརིཡཱ པཉྩདྭཱརེ ཨཏྟནོ རཱུཔཱདཱིནི ཨཱརབྦྷ པཧཊྛཱཀཱརཀརཎཝསེན པཝཏྟིཡཾ ཨཛ྄ཛྷཏྟཱརམྨཎཱ, པརསྶ ¶ རཱུཔཱདཱིསུ པཝཏྟཱ བཧིདྡྷཱརམྨཎཱ. མནོདྭཱརེ ཏཐཱགཏསྶ ཛོཏིཔཱལམཱཎཝམགྷདེཝརཱཛཀཎྷཏཱཔསཱདིཀཱལེསུ ཨཏྟནཱ ཀཏཀིརིཡཾ པཙྩཝེཀྑནྟསྶ ཧསིཏུཔྤཱདཝསེན པཝཏྟཱ ཨཛ྄ཛྷཏྟཱརམྨཎཱ ¶ .

མལླིཀཱཡ དེཝིཡཱ སནྟཏིམཧཱམཏྟསྶ སུམནམཱལཱཀཱརསྶཱཏི ཨེཝམཱདཱིནཾ ཀིརིཡཱཀརཎཾ ཨཱརབྦྷ པཝཏྟིཀཱལེ བཧིདྡྷཱརམྨཎཱ. ཨུབྷཡཝསེན ཨཛ྄ཛྷཏྟབཧིདྡྷཱརམྨཎཱ. ཨུཔེཀྑཱསཧགཏཀིརིཡཱཧེཏུཀམནོཝིཉྙཱཎདྷཱཏུ པཉྩདྭཱརེ ཝོཊྛབྦནཝསེན མནོདྭཱརེ ཙ ཨཱཝཛྫནཝསེན པཝཏྟིཡཾ ཨཛ྄ཛྷཏྟཱདིཨཱརམྨཎཱ. ཨཊྛ མཧཱཀིརིཡཱ ཀུསལཙིཏྟགཏིཀཱ ཨེཝ. ཀེཝལཉྷི ཏཱ ཁཱིཎཱསཝཱནཾ ཨུཔྤཛྫནྟི, ཀུསལཱནི སེཀྑཔུཐུཛྫནཱནནྟི ཨེཏྟཀམེཝེཏྠ ནཱནཱཀརཎཾ.

ཝུཏྟཔྤཀཱརེ རཱུཔཱཝཙརཙཏུཏྠཛ྄ཛྷཱནེ སབྦཏྠཔཱདཀཙཏུཏྠཱདཱིནི པཉྩ ཛྷཱནཱནི ཨིམསྨིཾ ཏིཀེ ཨོཀཱསཾ ལབྷནྟི. ཨེཏཱནི ཧི ཀསིཎཔཎྞཏྟིནིམིཏྟཱརམྨཎཏྟཱ བཧིདྡྷཱརམྨཎཱནི.

‘ཨིདྡྷིཝིདྷཙཏུཏྠཾ’ ཀཱཡཝསེན ཙིཏྟཾ, ཙིཏྟཝསེན ཝཱ ཀཱཡཾ པརིཎཱམནཀཱལེ ཨཏྟནོ ཀུམཱརཀཝཎྞཱདིནིམྨཱནཀཱལེ ཙ སཀཱཡཙིཏྟཱནཾ ཨཱརམྨཎཀརཎཏོ ཨཛ྄ཛྷཏྟཱརམྨཎཾ, བཧིདྡྷཱ ཧཏྠིཨསྶཱདིདསྶནཀཱལེ བཧིདྡྷཱརམྨཎཾ, ཀཱལེན ཨཛ྄ཛྷཏྟཾ ཀཱལེན བཧིདྡྷཱ, པཝཏྟིཡཾ ཨཛ྄ཛྷཏྟབཧིདྡྷཱརམྨཎཾ.

‘དིབྦསོཏཙཏུཏྠཾ’ ¶ ཨཏྟནོ ཀུཙྪིསདྡསཝནཀཱལེ ཨཛ྄ཛྷཏྟཱརམྨཎཾ, པརེསཾ སདྡསཝནཀཱལེ བཧིདྡྷཱརམྨཎཾ, ཨུབྷཡཝསེན ཨཛ྄ཛྷཏྟབཧིདྡྷཱརམྨཎཾ. ‘ཙེཏོཔརིཡཉཱཎཙཏུཏྠཾ’ པརེསཾ ཙིཏྟཱརམྨཎཏོ བཧིདྡྷཱརམྨཎམེཝ. ཨཏྟནོ ཙིཏྟཛཱནནེ པན ཏེན པཡོཛནཾ ནཏྠི. ‘པུབྦེནིཝཱསཙཏུཏྠཾ’ ཨཏྟནོ ཁནྡྷཱནུསྶརཎཀཱལེ ཨཛ྄ཛྷཏྟཱརམྨཎཾ, པརསྶ ཁནྡྷེ, ཨནིདྲིཡབདྡྷརཱུཔཾ, ཏིསྶོ ཙ པཎྞཏྟིཡོ ཨནུསྶརཎཏོ བཧིདྡྷཱརམྨཎཾ, ཨུབྷཡཝསེན ཨཛ྄ཛྷཏྟབཧིདྡྷཱརམྨཎཾ.

‘དིབྦཙཀྑུཙཏུཏྠཾ’ ¶ ཨཏྟནོ ཀུཙྪིགཏཱདིརཱུཔདསྶནཀཱལེ ཨཛ྄ཛྷཏྟཱརམྨཎཾ, ཨཝསེསརཱུཔདསྶནཀཱལེ བཧིདྡྷཱརམྨཎཾ, ཨུབྷཡཝསེན ཨཛ྄ཛྷཏྟབཧིདྡྷཱརམྨཎཾ. ‘ཨནཱགཏཾསཉཱཎཙཏུཏྠཾ’ ཨཏྟནོ ཨནཱགཏཀྑནྡྷཱནུསྶརཎཀཱལེ ཨཛ྄ཛྷཏྟཱརམྨཎཾ, པརསྶ ཨནཱགཏཀྑནྡྷཱནཾ ཝཱ ཨནིནྡྲིཡབདྡྷསྶ ཝཱ རཱུཔསྶ ཨནུསྶརཎཀཱལེ བཧིདྡྷཱརམྨཎཾ, ཨུབྷཡཝསེན ཨཛ྄ཛྷཏྟབཧིདྡྷཱརམྨཎཾ. ཨཱཀིཉྩཉྙཱཡཏནསྶ ནཝཏྟབྦཱརམྨཎཏཱཡ ཀཱརཎཾ ཧེཊྛཱ ཝུཏྟམེཝ.

དུཀཨཏྠུདྡྷཱརཝཎྞནཱ

༡༤༤༡. ཧེཏུགོཙྪཀནིདྡེསེ ¶ ཏཡོ ཀུསལཧེཏཱུཏིཨཱདིནཱ ནཡེན ཧེཏཱུ དསྶེཏྭཱ པུན ཏེཡེཝ ཨུཔྤཏྟིཊྛཱནཏོ དསྶེཏུཾ ཙཏཱུསུ བྷཱུམཱིསུ ཀུསལེསུ ཨུཔྤཛྫནྟཱིཏིཨཱདི ཝུཏྟཾ. ཨིམིནཱ ཨུཔཱཡེན སེསགོཙྪཀེསུཔི དེསནཱནཡོ ཝེདིཏབྦོ.

༡༤༧༣. ཡཏྠ དྭེ ཏཡོ ཨཱསཝཱ ཨེཀཏོ ཨུཔྤཛྫནྟཱིཏི ཨེཏྠ ཏིཝིདྷེན ཨཱསཝཱནཾ ཨེཀཏོ ཨུཔྤཏྟི ཝེདིཏབྦཱ. ཏཏྠ ཙཏཱུསུ དིཊྛིཝིཔྤཡུཏྟེསུ ཨཝིཛྫཱསཝེན, དིཊྛིསམྤཡུཏྟེསུ དིཊྛཱསཝཨཝིཛྫཱསཝེཧི སདྡྷིནྟི ཀཱམཱསཝོ དུཝིདྷེན ཨེཀཏོ ཨུཔྤཛྫཏི. བྷཝཱསཝོ ཙཏཱུསུ དིཊྛིཝིཔྤཡུཏྟེསུ ཨཝིཛྫཱསཝེན སདྡྷིནྟི ཨེཀདྷཱཝ ཨེཀཏོ ཨུཔྤཛྫཏི. ཡཐཱ ཙེཏྠ ཨེཝཾ ཡཏྠ དྭེ ཏཱིཎི སཾཡོཛནཱནི ཨེཀཏོ ཨུཔྤཛྫནྟཱིཏི ཨེཏྠཱཔི སཾཡོཛནཱནཾ ཨུཔྤཏྟི ཨེཀཏོ དསདྷཱ བྷཝེ. ཏཏྠ ཀཱམརཱགོ ཙཏུདྷཱ ཨེཀཏོ ཨུཔྤཛྫཏི, པཊིགྷོ ཏིདྷཱ, མཱནོ ཨེཀདྷཱ. ཏཐཱ ཝིཙིཀིཙྪཱ ཙེཝ བྷཝརཱགོ ཙ. ཀཐཾ? ཀཱམརཱགོ ཏཱཝ མཱནསཾཡོཛནཨཝིཛྫཱསཾཡོཛནེཧི ཙེཝ, དིཊྛིསཾཡོཛནཨཝིཛྫཱསཾཡོཛནེཧི ཙ, སཱིལབྦཏཔརཱམཱསཨཝིཛྫཱསཾཡོཛནེཧི ཙ, ཨཝིཛྫཱསཾཡོཛནམཏྟེནེཝ ཙ སདྡྷིནྟི ཨེཝཾ ཙཏུདྷཱ ཨེཀཏོ ཨུཔྤཛྫཏི. པཊིགྷོ པན ཨིསྶཱསཾཡོཛནཨཝིཛྫཱསཾཡོཛནེཧི ཙེཝ, མཙྪརིཡསཾཡོཛནཨཝིཛྫཱསཾཡོཛནེཧི ཙ, ཨཝིཛྫཱསཾཡོཛནམཏྟེནེཝ ¶ ཙ སདྡྷིནྟི ཨེཝཾ ཏིདྷཱ ཨེཀཏོ ཨུཔྤཛྫཏི. མཱནོ བྷཝརཱགཱཝིཛྫཱསཾཡོཛནེཧི སདྡྷིཾ ཨེཀདྷཱཝ ཨེཀཏོ ཨུཔྤཛྫཏི ¶ . ཏཐཱ ཝིཙིཀིཙྪཱ. སཱ ཧི ཨཝིཛྫཱསཾཡོཛནེན སདྡྷིཾ ཨེཀདྷཱ ཨུཔྤཛྫཏི. བྷཝརཱགེཔི ཨེསེཝ ནཡོཏི. ཨེཝམེཏྠ དྭེ ཏཱིཎི སཾཡོཛནཱནི ཨེཀཏོ ཨུཔྤཛྫནྟི.

༡༥༡༡. ཡཾ པནེཏཾ ནཱིཝརཎགོཙྪཀེ ཡཏྠ དྭེ ཏཱིཎི ནཱིཝརཎཱནི ཨེཀཏོ ཨུཔྤཛྫནྟཱིཏི ཝུཏྟཾ, ཏཏྠཱཔི ཨཊྛདྷཱ ནཱིཝརཎཱནཾ ཨེཀཏོ ཨུཔྤཏྟི ཝེདིཏབྦཱ. ཨེཏེསུ ཧི ཀཱམཙྪནྡོ དུཝིདྷཱ ཨེཀཏོ ཨུཔྤཛྫཏི, བྱཱཔཱདོ ཙཏུདྷཱ, ཨུདྡྷཙྩཾ ཨེཀདྷཱ. ཏཐཱ ཝིཙིཀིཙྪཱ. ཀཐཾ? ཀཱམཙྪནྡོ ཏཱཝ ཨསངྑཱརིཀཙིཏྟེསུ ཨུདྡྷཙྩནཱིཝརཎཨཝིཛྫཱནཱིཝརཎེཧི, སསངྑཱརིཀེསུ ཐིནམིདྡྷཨུདྡྷཙྩཨཝིཛྫཱནཱིཝརཎེཧི སདྡྷིཾ དུཝིདྷཱ ཨེཀཏོ ཨུཔྤཛྫཏི. ཡཾ པནེཏཾ དྭེ ཏཱིཎཱིཏི ཝུཏྟཾ, ཏཾ ཧེཊྛིམཔརིཙྪེདཝསེན ཝུཏྟཾ. ཏསྨཱ ཙཏུནྣམྤི ཨེཀཏོ ཨུཔྤཛྫཏཱིཏི ¶ ཝཙནཾ ཡུཛྫཏི ཨེཝ. བྱཱཔཱདོ པན ཨསངྑཱརིཀཙིཏྟེ ཨུདྡྷཙྩཨཝིཛྫཱནཱིཝརཎེཧི, སསངྑཱརིཀེ ཐིནམིདྡྷཨུདྡྷཙྩཨཝིཛྫཱནཱིཝརཎེཧི, ཨསངྑཱརིཀེཡེཝ ཨུདྡྷཙྩཀུཀྐུཙྩཨཝིཛྫཱནཱིཝརཎེཧི, སསངྑཱརིཀེཡེཝ ཐིནམིདྡྷཨུདྡྷཙྩཀུཀྐུཙྩཨཝིཛྫཱནཱིཝརཎེཧི སདྡྷིནྟི ཙཏུདྷཱ ཨེཀཏོ ཨུཔྤཛྫཏི. ཨུདྡྷཙྩཾ པན ཨཝིཛྫཱནཱིཝརཎམཏྟེན སདྡྷིཾ ཨེཀདྷཱཝ ཨེཀཏོ ཨུཔྤཛྫཏི. ཝིཙིཀིཙྪུདྡྷཙྩཨཝིཛྫཱནཱིཝརཎེཧི སདྡྷིཾ ཨེཀདྷཱཝ ཨེཀཏོ ཨུཔྤཛྫཏི.

༡༥༧༧. ཡམྤིདཾ ཀིལེསགོཙྪཀེ ཡཏྠ དྭེ ཏཡོ ཀིལེསཱ ཨེཀཏོ ཨུཔྤཛྫནྟཱིཏི ཝུཏྟཾ, ཏཏྠ ‘དྭེ ཀིལེསཱ ཨཉྙེཧི, ཏཡོ ཝཱ ཀིལེསཱ ཨཉྙེཧི ཀིལེསེཧི སདྡྷིཾ ཨུཔྤཛྫནྟཱི’ཏི ཨེཝམཏྠོ ཝེདིཏབྦོ. ཀསྨཱ? དྭིནྣཾ ཏིཎྞཾཡེཝ ཝཱ ཨེཀཏོ ཨུཔྤཏྟིཡཱ ཨསམྦྷཝཏོ.

ཏཏྠ དསདྷཱ ཀིལེསཱནཾ ཨེཀཏོ ཨུཔྤཏྟི ཧོཏི. ཨེཏྠ ཧི ལོབྷོ ཚདྷཱ ཨེཀཏོ ཨུཔྤཛྫཏི. པཊིགྷོ དྭིདྷཱ. ཏཐཱ མོཧོཏི ཝེདིཏབྦོ. ཀཐཾ? ལོབྷོ ཏཱཝ ཨསངྑཱརིཀེ དིཊྛིཝིཔྤཡུཏྟེ མོཧཨུདྡྷཙྩཨཧིརིཀཱནོཏྟཔྤེཧི, སསངྑཱརིཀེ མོཧཐིནཨུདྡྷཙྩཨཧིརིཀཱནོཏྟཔྤེཧི, ཨསངྑཱརིཀེཡེཝ མོཧམཱནུདྡྷཙྩཱཧིརིཀཱནོཏྟཔྤེཧི ¶ , སསངྑཱརིཀེཡེཝ མོཧམཱནཐིནཨུདྡྷཙྩཨཧིརིཀཱནོཏྟཔྤེཧི, དིཊྛིསམྤཡུཏྟེ པན ཨསངྑཱརིཀེ མོཧཨུདྡྷཙྩདིཊྛིཨཧིརིཀཱནོཏྟཔྤེཧི, སསངྑཱརིཀེ མོཧདིཊྛིཐིནཨུདྡྷཙྩཨཧིརིཀཱནོཏྟཔྤེཧི སདྡྷིནྟི ཚདྷཱ ཨེཀཏོ ཨུཔྤཛྫཏི.

པཊིགྷོ ¶ པན ཨསངྑཱརིཀེ མོཧཨུདྡྷཙྩཨཧིརིཀཱནོཏྟཔྤེཧི, སསངྑཱརིཀེ མོཧཐིནཨུདྡྷཙྩཨཧིརིཀཱནོཏྟཔྤེཧི སདྡྷིནྟི ཨེཝཾ དྭིདྷཱ ཨེཀཏོ ཨུཔྤཛྫཏི. མོཧོ པན ཝིཙིཀིཙྪཱསམྤཡུཏྟེ ཝིཙིཀིཙྪུདྡྷཙྩཨཧིརིཀཱནོཏྟཔྤེཧི, ཨུདྡྷཙྩསམྤཡུཏྟེ ཨུདྡྷཙྩཨཧིརིཀཱནོཏྟཔྤེཧི སདྡྷིནྟི ཨེཝཾ དྭིདྷཱ ཨེཀཏོ ཨུཔྤཛྫཏི. སེསཾ སབྦཏྠ ཨུཏྟཱནཏྠམེཝཱཏི.

ཨཊྛསཱལིནིཡཱ དྷམྨསངྒཧཨཊྛཀཐཱཡ

ཨཊྛཀཐཱཀཎྜཝཎྞནཱ ནིཊྛིཏཱ.

ནིགམནཀཐཱ

ཨེཏྟཱཝཏཱ ཙ –

ཙིཏྟཾ ¶ རཱུཔཉྩ ནིཀྑེཔཾ, ཨཏྠུདྡྷཱརཾ མནོརམཾ;

ཡཾ ལོཀནཱཐོ བྷཱཛེནྟོ, དེསེསི དྷམྨསངྒཎིཾ.

ཨབྷིདྷམྨསྶ སངྒཡ྄ཧ, དྷམྨེ ཨནཝསེསཏོ;

ཋིཏཱཡ ཏསྶཱ ཨཱརདྡྷཱ, ཡཱ མཡཱ ཨཏྠཝཎྞནཱ.

ཨནཱཀུལཱནམཏྠཱནཾ, སམྦྷཝཱ ཨཊྛསཱལིནཱི;

ཨིཏི ནཱམེན སཱ ཨེསཱ, སནྣིཊྛཱནམུཔཱགཏཱ.

ཨེཀཱུནཙཏྟཱལཱིསཱཡ, པཱལི༹ཡཱ བྷཱཎཝཱརཏོ;

ཙིརཊྛིཏཏྠཾ དྷམྨསྶ, ནིཊྛཱཔེནྟེན ཏཾ མཡཱ.

ཡཾ ¶ པཏྟཾ ཀུསལཾ ཏསྶ, ཨཱནུབྷཱཝེན པཱཎིནོ;

སབྦེ སདྡྷམྨརཱཛསྶ, ཉཏྭཱ དྷམྨཾ སུཁཱཝཧཾ.

པཱཔུཎནྟུ ¶ ཝིསུདྡྷཱཡ, སུཁཱཡ པཊིཔཏྟིཡཱ;

ཨསོཀམནུཔཱཡཱསཾ, ནིབྦཱནསུཁམུཏྟམཾ.

ཙིརཾ ཏིཊྛཏུ སདྡྷམྨོ, དྷམྨེ ཧོནྟུ སགཱརཝཱ;

སབྦེཔི སཏྟཱ ཀཱལེན, སམྨཱ དེཝོ པཝསྶཏུ.

ཡཐཱ རཀྑིཾསུ པོརཱཎཱ, སུརཱཛཱནོ ཏཐེཝིམཾ;

རཱཛཱ རཀྑཏུ དྷམྨེན, ཨཏྟནོཝ པཛཾ པཛནྟི.

པརམཝིསུདྡྷསདྡྷཱབུདྡྷིཝཱིརིཡཔཊིམཎྜིཏེན སཱིལཱཙཱརཛྫཝམདྡཝཱདིགུཎསམུདཡསམུདིཏེན སཀསམཡསམཡནྟརགཧནཛ྄ཛྷོགཱཧཎསམཏྠེན པཉྙཱཝེཡྻཏྟིཡསམནྣཱགཏེན ཏིཔིཊཀཔརིཡཏྟིཔྤབྷེདེ སཱཊྛཀཐེ སཏྠུསཱསནེ ཨཔྤཊིཧཏཉཱཎཔྤབྷཱཝེན མཧཱཝེཡྻཱཀརཎེན ཀརཎསམྤཏྟིཛནིཏསུཁཝིནིགྒཏམདྷུརོདཱརཝཙནལཱཝཎྞཡུཏྟེན ཡུཏྟམུཏྟཝཱདིནཱ ཝཱདཱིཝརེན མཧཱཀཝིནཱ པབྷིནྣཔཊིསམྦྷིདཱཔརིཝཱརེ ཚལ༹བྷིཉྙཱདིཔྤབྷེདགུཎཔཊིམཎྜིཏེ ཨུཏྟརིམནུསྶདྷམྨེ སུཔྤཏིཊྛིཏབུདྡྷཱིནཾ ཐེརཝཾསཔྤདཱིཔཱནཾ ཐེརཱནཾ མཧཱཝིཧཱརཝཱསཱིནཾ ཝཾསཱལངྐཱརབྷཱུཏེན ཝིཔུལཝིསུདྡྷབུདྡྷིནཱ བུདྡྷགྷོསོཏི གརཱུཧི ¶ གཧིཏནཱམདྷེཡྻེན ཐེརེན ཀཏཱ ཨཡཾ ཨཊྛསཱལིནཱི ནཱམ དྷམྨསངྒཧཊྛཀཐཱ.

ཏཱཝ ཏིཊྛཏུ ལོཀསྨིཾ, ལོཀནིཏྠརཎེསིནཾ;

དསྶེནྟཱི ཀུལཔུཏྟཱནཾ, ནཡཾ པཉྙཱཝིསུདྡྷིཡཱ.

ཡཱཝ ‘བུདྡྷོ’ཏི ནཱམམྤི, སུདྡྷཙིཏྟསྶ ཏཱདིནོ;

ལོཀམྷི ལོཀཛེཊྛསྶ, པཝཏྟཏི མཧེསིནོཏི.

ཨཊྛསཱལིནཱི ནཱམ

དྷམྨསངྒཧ-ཨཊྛཀཐཱ ནིཊྛིཏཱ.