📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཨབྷིདྷམྨཔིཊཀེ

དྷམྨསངྒཎཱི-མཱུལཊཱིཀཱ

ཝཱིསཏིགཱཐཱཝཎྞནཱ

༡. དྷམྨསཾཝཎྞནཱཡཾ ¶ ¶ སཏྠརི པཎཱམཀརཎཾ དྷམྨསྶ སྭཱཀྑཱཏབྷཱཝེན སཏྠརི པསཱདཛནནཏྠཾ, སཏྠུ ཙ ཨཝིཏཐདེསནབྷཱཝཔྤཀཱསནེན དྷམྨེ པསཱདཛནནཏྠཾ. ཏདུབྷཡཔྤསཱདཱ ཧི དྷམྨསམྤཊིཔཏྟི མཧཏོ ཙ ཨཏྠསྶ སིདྡྷི ཧོཏཱིཏི. ཨཐ ཝཱ རཏནཏྟཡཔཎཱམཝཙནཾ ཨཏྟནོ རཏནཏྟཡཔསཱདསྶ ཝིཉྙཱཔནཏྠཾ, ཏཾ པན ཝིཉྙཱུནཾ ཙིཏྟཱརཱདྷནཏྠཾ, ཏཾ ཨཊྛཀཐཱཡ གཱཧཎཏྠཾ, ཏཾ སབྦསམྤཏྟིནིཔྥཱདནཏྠནྟི. ཨིདཾ པན ཨཱཙརིཡེན ཨདྷིཔྤེཏཔྤཡོཛནཾ ཨནྟརཱཡཝིསོསནཾ. ཝཀྑཏི ཧི ‘‘ནིཔཙྩཀཱརསྶེཏསྶ…པེ… ཨསེསཏོ’’ཏི. རཏནཏྟཡཔཎཱམཀརཎཉྷི ཨནྟརཱཡཀརཱཔུཉྙཝིགྷཱཏཀརཔུཉྙཝིསེསབྷཱཝཏོ ¶ མངྒལབྷཱཝཏོ བྷཡཱདིཨུཔདྡཝནིཝཱརཎཏོ ཙ ཨནྟརཱཡཝིསོསནེ སམཏྠཾ ཧོཏི. ཀཐཾ པནེཏསྶཱཔུཉྙཝིགྷཱཏཀརཱདིབྷཱཝོ ཝིཛཱནིཏབྦོཏི? ‘‘ཡསྨིཾ མཧཱནཱམ སམཡེ ཨརིཡསཱཝཀོ ཏཐཱགཏཾ ཨནུསྶརཏི, ནེཝསྶ ཏསྨིཾ སམཡེ རཱགཔརིཡུཊྛིཏཾ ཙིཏྟཾ ཧོཏཱི’’ཏིཨཱདིཝཙནཏོ (ཨ. ནི. ༦.༡༠; ༡༡.༡༡), ‘‘པཱུཛཱ ཙ པཱུཛནེཡྻཱནཾ, ཨེཏཾ མངྒལམུཏྟམ’’ནྟི (ཁུ. པཱ. ༥.༣; སུ. ནི. ༢༦༢) ཙ, ‘‘ཨེཝཾ བུདྡྷཾ སརནྟཱནཾ, དྷམྨཾ སངྒྷཉྩ བྷིཀྑཝོ. བྷཡཾ ཝཱ ཚམྦྷིཏཏྟཾ ཝཱ, ལོམཧཾསོ ན ཧེསྶཏཱི’’ཏི (སཾ. ནི. ༡.༢༤༩) ཙ ཝཙནཏོཏི.

ཏཏྠ ཡསྶ སཏྠུནོ པཎཱམཾ ཀཏྟུཀཱམོ, ཏསྶ གུཎཝིསེསདསྶནཏྠཾ ‘‘ཀརུཎཱ ཝིཡཱ’’ཏིཨཱདིམཱཧ. གུཎཝིསེསཝཱ ཧི པཎཱམཱརཧོ ¶ ཧོཏི, པཎཱམཱརཧེ ཙ ཀཏོ པཎཱམོ ཝུཏྟཔྤཡོཛནསིདྡྷིཀརོཝ ཧོཏཱིཏི. བྷགཝཏོ ཙ དེསནཱ ཝིནཡཔིཊཀེ ཀརུཎཱཔྤདྷཱནཱ, སུཏྟནྟཔིཊཀེ པཉྙཱཀརུཎཱཔྤདྷཱནཱ. ཏེནེཝ ཙ ཀཱརཎེན ཝིནཡཔིཊཀསྶ སཾཝཎྞནཾ ཀརོནྟེན ཀརུཎཱཔྤདྷཱནཱ བྷགཝཏོ ཐོམནཱ ཀཏཱ, ཨཱགམསཾཝཎྞནཉྩ ཀརོནྟེན ཨུབྷཡཔྤདྷཱནཱ, ཨབྷིདྷམྨདེསནཱ པན པཉྙཱཔྤདྷཱནཱཏི ཀཏྭཱ པཉྙཱཔྤདྷཱནམེཝ ཐོམནཾ ཀརོནྟོ ‘‘ཀརུཎཱ ཝིཡ སཏྟེསཱུ’’ཏི ཀརུཎཾ ཨུཔམཱབྷཱཝེན གཧེཏྭཱ པཉྙཱཡ ཐོམེཏི.

ཏཏྠ ཀརུཎཱ ཝིཡཱཏི ནིདསྶནཝཙནམེཏཾ, ཡསྶ ཡཐཱ ཀརུཎཱ སབྦེསུ སཏྟེསུ པཝཏྟིཏྠ, ཨེཝཾ སབྦེསུ ཉེཡྻདྷམྨེསུ པཉྙཱཔི པཝཏྟིཏྠཱཏི ཨཏྠོ. སཏྟེསཱུཏི ཝིསཡནིདསྶནམེཏཾ. པཉྙཱཏི ནིདསྶེཏབྦདྷམྨནིདསྶནཾ. ཡསྶཱཏི ཏདདྷིཊྛཱནཔུགྒལནིདསྶནཾ. མཧེསིནོཏི ཏབྦིསེསནཾ. ཉེཡྻདྷམྨེསཱུཏི པཉྙཱཝིསཡནིདསྶནཾ. སབྦེསཱུཏི ཏབྦིསེསནཾ. པཝཏྟིཏྠཱཏི ཀིརིཡཱནིདསྶནཾ. ཡཐཱརུཙཱིཏི ཝསཱིབྷཱཝནིདསྶནཾ.

ཏཏྠ ཀིརཏཱིཏི ཀརུཎཱ, པརདུཀྑཾ ཝིཀྑིཔཏི ཨཔནེཏཱིཏི ཨཏྠོ. རཱུཔཱདཱིསུ སཏྟཱ ཝིསཏྟཱཏི སཏྟཱ. ཏསྶཱ པན པཉྙཏྟིཡཱ ཁནྡྷསནྟཱནེ ནིརུལ༹ྷབྷཱཝཏོ ནིཙྪནྡརཱགཱཔི ‘‘སཏྟཱ’’ཏི ཝུཙྩནྟི. པཛཱནཱཏཱིཏི པཉྙཱ, ཡཐཱསབྷཱཝཾ པཀཱརེཧི པཊིཝིཛ྄ཛྷཏཱིཏི ཨཏྠོ. ཡསྶཱཏི ཨནིཡམནཾ. ‘‘ཏསྶ པཱདེ ནམསྶིཏྭཱ’’ཏི ཨེཏེན ནིཡམནཾ ཝེདིཏབྦཾ. མཧེསཱིཏི མཧནྟེ སཱིལཀྑནྡྷཱདཡོ ཨེསི གཝེསཱིཏི མཧེསི. ཉཱཏབྦཱཏི ཉེཡྻཱ, སབྷཱཝདྷཱརཎཱདིནཱ ཨཏྠེན དྷམྨཱ. ཏཏྠ ‘‘ཉེཡྻཱ’’ཏི ཝཙནེན དྷམྨཱནཾ ཨཉེཡྻཏྟཾ པཊིཀྑིཔཏི. ‘‘དྷམྨཱ’’ཏི ཝཙནེན ཉེཡྻཱནཾ ¶ སཏྟཛཱིཝཱདིབྷཱཝཾ པཊིཀྑིཔཏི. ཉེཡྻཱ ཙ ཏེ དྷམྨཱ ཙཱཏི ཉེཡྻདྷམྨཱ. སབྦེསཱུཏི ཨནཝསེསཔརིཡཱདཱནཾ. ཏེན ཨཉྙཱཏཱབྷཱཝཾ དསྶེཏི. པཝཏྟིཏྠཱཏི ཨུཔྤཛྫིཏྠ. ཡཐཱརུཙཱིཏི ཡཱ ཡཱ རུཙི ཡཐཱརུཙི, རུཙཱིཏི ཙ ཨིཙྪཱ, ཀཏྟུཀཱམཏཱ སཱ. ཡཱ ཡཱ པཝཏྟཱ ཏཔྤབྷེདཱ, ཡཐཱ ཝཱ རུཙི ཏཐཱ, རུཙིཨནུརཱུཔཾ པཝཏྟཱ ‘‘ཡཐཱརུཙི པཝཏྟིཏྠཱ’’ཏི ཝུཙྩཏི. ཡཐཱ ཡཐཱ ཝཱ རུཙི པཝཏྟཱ, ཏཐཱ ཏཐཱ པཝཏྟཱ པཉྙཱ ‘‘ཡཐཱརུཙི པཝཏྟིཏྠཱ’’ཏི ཝུཙྩཏི.

ཏཏྠ བྷགཝཏི པཝཏྟཱཝ ཀརུཎཱ བྷགཝཏོ པཉྙཱཡ ནིདསྶནནྟི གཧེཏབྦཱ. སཱ ཧི ཨསཱདྷཱརཎཱ མཧཱཀརུཎཱ, ན ཨཉྙཱ. ཡསྶཱཏི ཙ ཀརུཎཱཔཉྙཱནཾ ཨུབྷིནྣམྤི ཨཱདྷཱརཔུགྒལནིདསྶནཾ. ན ཧི ནིརཱདྷཱརཱ ཀརུཎཱ ཨཏྠཱིཏི ¶ ‘‘ཀརུཎཱ’’ཏི ཝུཏྟེ ཏདཱདྷཱརབྷཱུཏོ པུགྒལོ ནིདསྶེཏབྦོ ཧོཏི, སོ ཙ ཨིདྷ ཨཉྙོ ཝུཏྟོ ནཏྠི, ན ཙ ཨཱསནྣཾ ཝཛྫེཏྭཱ དཱུརསྶ གཧཎེ པཡོཛནཾ ཨཏྠཱིཏི ‘‘ཡསྶཱ’’ཏི ནིདསྶིཏཔུགྒལོཝ ཀརུཎཱཡ ཨཱདྷཱརོ. ཏེན ཨིདཾ ཝུཏྟཾ ཧོཏི ‘‘ཡསྶ ཨཏྟནོ ཀརུཎཱ ཝིཡ པཉྙཱཔི པཝཏྟིཏྠཱ’’ཏི. ཀཐཾ པན ཀརུཎཱ སཏྟེསུ པཝཏྟིཏྠ ཡཐཱ པཉྙཱཔི དྷམྨེསུ པཝཏྟིཏྠཱཏི? ནིརཝསེསཏོ ཡཐཱརུཙི ཙ. བྷགཝཏོ ཧི ཀརུཎཱ ཀཉྩི སཏྟཾ ཨཝཛྫེཏྭཱ སབྦེསུ སཏྟེསུ ནིརཝསེསེསུ པཝཏྟཏི, པཝཏྟམཱནཱ ཙ རུཙིཝསེན ཨེཀསྨིཾ ཨནེཀེསུ ཙ ཨཉྙེཧི ཨསཱདྷཱརཎཱ པཝཏྟཏི. ན ཧི ཨཉྙེསཾ ‘‘མཧོགྷཔཀྑནྡཱནཾ སཏྟཱནཾ ནཏྠཉྙོ ཀོཙི ཨོགྷཱ ཨུདྡྷཏཱ ཨཉྙཏྲ མཡཱ’’ཏི པསྶནྟཱནཾ ཀརུཎོཀྐམནཾ ཧོཏི ཡཐཱ བྷགཝཏོཏི. པཉྙཱཔི བྷགཝཏོ སབྦེསུ དྷམྨེསུ ནིརཝསེསེསུ པཝཏྟཏི, པཝཏྟམཱནཱ ཙ ཨེཀསྨིཾ ཨནེཀེསུ ཙ དྷམྨེསུ སབྷཱཝཀིཙྩཱདིཛཱནནེན ཨནཱཝརཎཱ ཨསཱདྷཱརཎཱ པཝཏྟཏི ཡཐཱརུཙི, ཡཐཱ ཙ པསྶནྟསྶ བྷགཝཏོ ཀརུཎཱ ཡཐཱརུཙི པཝཏྟཏི. ཏཾ སབྦཾ པཊིསམྦྷིདཱམགྒེ མཧཱཀརུཎཱཉཱཎཝིབྷངྒཝསེན ཛཱནིཏབྦཾ, པཉྙཱཡ ཙ ཡཐཱརུཙི པཝཏྟི སེསཱསཱདྷཱརཎཉཱཎཝིབྷངྒཱདིཝསེན. པཉྙཱགཧཎེན ཙ ཏཱིསུ ཀཱལེསུ ཨཔྤཊིཧཏཉཱཎཾ ཙཏུསཙྩཉཱཎཾ ཙཏུཔཊིསམྦྷིདཱཉཱཎཾ, ཀརུཎཱགཧཎེན མཧཱཀརུཎཱསམཱཔཏྟིཉཱཎསྶ གཧིཏཏྟཱ ཏཾ ཝཛྫེཏྭཱ ཨཉྙཱནི ཨསཱདྷཱརཎཉཱཎཱནི ཙཏུཝེསཱརཛྫཉཱཎཾ དསབལཱནི ཚ ཨབྷིཉྙཱ ཙཏུཙཏྟཱལཱིས ཉཱཎཝཏྠཱུནི སཏྟསཏྟཏི ཉཱཎཝཏྠཱུནཱིཏི ཨེཝམཱདཡོ ཨནེཀེ པཉྙཱཔྤབྷེདཱ སངྒཡ྄ཧནྟི, ཏསྨཱ ཏསྶཱ ཏསྶཱ པཉྙཱཡ པཝཏྟིཝསེན ཡཐཱརུཙི པཝཏྟི ཝེདིཏབྦཱ. ཏེནཱཧ ‘‘ཀརུཎཱ ཝིཡ…པེ… ཡཐཱརུཙཱི’’ཏི.

ཏཏྠ ཀརུཎཱགཧཎེན མཧཱབོདྷིཡཱ མཱུལཾ དསྶེཏི. མཧཱདུཀྑསམྦཱདྷཔྤཊིཔནྣཉྷི སཏྟནིཀཱཡཾ དིསྭཱ ¶ ‘‘ཏསྶ ནཏྠཉྙོ ཀོཙི སརཎཾ, ཨཧམེཏཾ མུཏྟོ མོཙེསྶཱམཱི’’ཏི ཀརུཎཱཡ སཉྩོདིཏམཱནསོ ཨབྷིནཱིཧཱརཾ དཱིཔངྐརསྶ བྷགཝཏོ པཱདམཱུལེ ཀཏྭཱ བོདྷིསམྦྷཱརེ སམོདྷཱནེཏྭཱ ཨནུཔུབྦེན སམྦོདྷིཾ པཏྟོཏི ཀརུཎཱ མཧཱབོདྷིཡཱ མཱུལནྟི. སཏྟེསཱུཏི ཨེཏེན མཧཱབོདྷིཡཱ པཡོཛནཾ དསྶེཏི. སཏྟཱ ཧི མཧཱབོདྷིཾ པཡོཛེནྟི. སཏྟསནྟཱརཎཏྠཉྷི སབྦཉྙུཏཱ ཨབྷིཔཏྠིཏཱ. ཡཐཱཧ –

‘‘ཀིཾ ¶ མེ ཨེཀེན ཏིཎྞེན, པུརིསེན ཐཱམདསྶིནཱ;

སབྦཉྙུཏཾ པཱཔུཎིཏྭཱ, སནྟཱརེསྶཾ སདེཝཀ’’ནྟི. (བུ. ཝཾ. ༢. ༥༦);

པཉྙཱགཧཎེན མཧཱབོདྷིཾ དསྶེཏི. སབྦཉྙུཏཱཡ ཧི པདཊྛཱནབྷཱུཏཾ མགྒཉཱཎཾ, མགྒཉཱཎཔདཊྛཱནཉྩ སབྦཉྙུཏཉྙཱཎཾ ‘‘མཧཱབོདྷཱི’’ཏི ཝུཙྩཏཱིཏི. ཉེཡྻདྷམྨེསུ སབྦེསཱུཏི ཨེཏེན སནྟཱརེཏབྦཱནཾ སཏྟཱནཾ ཨབྷིཉྙེཡྻཔརིཉྙེཡྻཔཧཱཏབྦབྷཱཝེཏབྦསཙྪིཀཱཏབྦེ ཁནྡྷཱཡཏནདྷཱཏུསཙྩིནྡྲིཡཔཊིཙྩསམུཔྤཱདསཏིཔཊྛཱནཱདིབྷེདེ ཀུསལཱདིབྷེདེ ཙ སབྦདྷམྨེ དསྶེཏི. པཝཏྟིཏྠ ཡཐཱརུཙཱིཏི ཨེཏེན པཊིཝེདྷཔཙྩཝེཀྑཎཔུབྦངྒམདེསནཱཉཱཎཔྤཝཏྟིདཱིཔནེན པཡོཛནསམྤཏྟིཾ དསྶེཏི. སབྦདྷམྨཱནཉྷི པཊིཝེདྷཉཱཎཾ བོདྷིཔལླངྐེ ཨཧོསི. མགྒཉཱཎམེཝ ཧི ཏནྟི. པཙྩཝེཀྑཎཉཱཎཉྩ ཝིསེསེན རཏནགྷརསཏྟཱཧེ ཨཧོསི. ཨེཝཾ པཊིཝིདྡྷཔཙྩཝེཀྑིཏཱནཾ དྷམྨཱནཾ དྷམྨཙཀྐཔྤཝཏྟནཱདཱིསུ དེསནཱཉཱཎཾ ཨཧོསི, ཝིསེསེན ཙ པཎྜུཀམྦལསིལཱཡཾ སཏྟཔྤཀརཎདེསནཱཡནྟི. དེསནཱཉཱཎེན ཙ དེསེནྟོ བྷགཝཱ སཏྟེསུ ཧིཏཔཊིཔཏྟིཾ པཊིཔཛྫཏཱིཏི. ཨེཏེན སབྦེན ཨཏྟཧིཏཔཊིཔཏྟིཾ པརཧིཏཔཊིཔཏྟིཉྩ དསྶེཏི. མཧཱབོདྷིདསྶནེན ཧི ཨཏྟཧིཏཔཊིཔཏྟི, ཨིཏརེཧིཔི པརཧིཏཔཊིཔཏྟི དསྶིཏཱཏི. ཏེན ཨཏྟཧིཏཔཊིཔནྣཱདཱིསུ ཙཏཱུསུ པུགྒལེསུ བྷགཝཏོ ཙཏུཏྠཔུགྒལབྷཱཝཾ དསྶེཏི, ཏེན ཙ ཨནུཏྟརདཀྑིཎེཡྻབྷཱཝཾ ནིརཏིསཡཔཎཱམཱརཧབྷཱཝཉྩ ཨཏྟནོ ཙ ཀིརིཡཱཡ ཁེཏྟངྒཏབྷཱཝཾ དསྶེཏི.

ཨེཏྠ ཙ ཀརུཎཱགཧཎེན ལོཀིཡེསུ མཧགྒཏབྷཱཝཔྤཏྟཱསཱདྷཱརཎགུཎདཱིཔནཏོ སབྦལོཀིཡགུཎསམྤཏྟི བྷགཝཏོ དསྶིཏཱ ཧོཏི, པཉྙཱགཧཎེནཔི སབྦཉྙུཏཉྙཱཎཔདཊྛཱནམགྒཉཱཎདཱིཔནཏོ སབྦལོཀུཏྟརགུཎསམྤཏྟི. ཀརུཎཱཝཙནེན ཙ ཨུཔགམནཾ ནིརུཔཀྐིལེསཾ, པཉྙཱཝཙནེན ཨཔགམནཾ དསྶེཏི. ཨུཔགམནཾ དསྶེནྟོ ཙ ལོཀེ སཉྫཱཏསཾཝཌྜྷབྷཱཝཾ དསྶེཏི, ཨཔགམནཾ དསྶེནྟོ ལོཀེན ཨནུཔལིཏྟཏཾ. ‘‘ཀརུཎཱ ཝིཡ སཏྟེསཱུ’’ཏི ཙ ལོཀསམཉྙཱནུརཱུཔཾ བྷགཝཏོ ¶ པཝཏྟིཾ དསྶེཏི, ‘‘ཉེཡྻདྷམྨེསུ སབྦེསུ ཡཐཱརུཙི པཉྙཱ པཝཏྟིཏྠཱ’’ཏི ཨེཏེན སམཉྙཱཡ ཨནཏིདྷཱཝནཾ. སབྦདྷམྨསབྷཱཝཱནཝབོདྷེ ཧི སཏི སམཉྙཾ ཨཏིདྷཱཝིཏྭཱ ‘‘སཏྟོ ཛཱིཝོ ཨཏྠཱི’’ཏི པརཱམསནཾ ཧོཏཱིཏི. སབྦེསཉྩ བུདྡྷགུཎཱནཾ ཀརུཎཱ ཨཱདི ཏནྣིདཱནབྷཱཝཏོ, པཉྙཱ པརིཡོསཱནཾ ཏཏོ ¶ ཨུཏྟརིཀརཎཱིཡཱབྷཱཝཏོ. ཨཱདིཔརིཡོསཱནདསྶནེན ཙ སབྦེ བུདྡྷགུཎཱ དསྶིཏཱཝ ཧོནྟི. ཀརུཎཱགཧཎེན ཙ སཱིལཀྑནྡྷཔུབྦངྒམོ སམཱདྷིཀྑནྡྷོ དསྶིཏོ ཧོཏི. ཀརུཎཱནིདཱནཉྷི སཱིལཾ ཏཏོ པཱཎཱཏིཔཱཏཱདིཝིརཏིཔྤཝཏྟིཏོ ཏསྶཱ ཙ ཛྷཱནཏྟཡསམྤཡོགཏོ. པཉྙཱཝཙནེན པཉྙཱཀྑནྡྷོ. སཱིལཉྩ སབྦབུདྡྷགུཎཱནཾ ཨཱདི, སམཱདྷི མཛ྄ཛྷཾ, པཉྙཱ པརིཡོསཱནནྟི ཨེཝམྤི ཨཱདིམཛ྄ཛྷཔརིཡོསཱནཀལྱཱཎཱ སབྦེ བུདྡྷགུཎཱ དསྶིཏཱ ཧོནྟི.

༢. ཨེཝཾ སངྑེཔེན སབྦབུདྡྷགུཎེཧི བྷགཝནྟཾ ཐོམེཏྭཱ ཡསྶཱ སཾཝཎྞནཾ ཀཏྟུཀཱམོ, ཏཱཡ ཨབྷིདྷམྨདེསནཱཡ ཨཉྙེཧི ཨསཱདྷཱརཎཱཡ ཐོམེཏུཾ ‘‘དཡཱཡ ཏཱཡཱ’’ཏིཨཱདིམཱཧ. ཏསྶཱ པན དེསནཱཡ ནིདཱནཉྩ སམུཊྛཱནཉྩ དསྶེཏུཾ ‘‘དཡཱཡ ཏཱཡཱ’’ཏིཨཱདི ཝུཏྟཾ. ནིདཱནཉྩ དུཝིདྷཾ ཨབྦྷནྟརཾ བཱཧིརཉྩཱཏི. ཨབྦྷནྟརཾ ཀརུཎཱ, བཱཧིརཾ དེསཀཱལཱདི. སམུཊྛཱནཾ དེསནཱཔཉྙཱ. ཏཏྠ ཨབྦྷནྟརནིདཱནཾ དསྶེནྟོ ‘‘དཡཱཡ ཏཱཡ སཏྟེསུ, སམུསྶཱཧིཏམཱནསོ’’ཏི ཨཱཧ. ཏཏྠ དཡཱཏི ཀརུཎཱ ཨདྷིཔྤེཏཱ. ཏཱཡ ཧི སམུསྶཱཧིཏོ ཨབྷིདྷམྨཀཐཱམགྒཾ སམྤཝཏྟཡཱིཏི. ཏཱཡཱཏི ཨཡཾ ཏ-སདྡོ པུབྦེ ཝུཏྟསྶ པཊིནིདྡེསོ ཧོཏི.

པུརིམགཱཐཱཡ ཙ པདྷཱནབྷཱཝེན པཉྙཱ ནིདྡིཊྛཱ, ཏབྦིསེསནབྷཱཝེན ཀརུཎཱ. སཱ ཧི ཏསྶཱ ནིདསྶནབྷཱུཏཱ ཨཔྤདྷཱནཱ ཏཾ ཝིསེསེཏྭཱ ཝིནིཝཏྟཱ, ཏསྨཱ ‘‘ཏཱཡཱ’’ཏི པཊིནིདྡེསཾ ནཱརཧཏི. ཡཱ ཙ པདྷཱནབྷཱུཏཱ པཉྙཱ, སཱ དེསནཱཡ སམུཊྛཱནཾ, ན སམུསྶཱཧིནཱིཏི ཏསྶཱ ཙ པཊིནིདྡེསོ ན ཡུཏྟོཏི? པཉྙཱཡ ཏཱཝ པཊིནིདྡེསོ ན ཡུཏྟོཏི སུཝུཏྟམེཏཾ, ཀརུཎཱཡ པན པཊིནིདྡེསོ ནོ ན ཡུཏྟོ ‘‘དཡཱཡ ཏཱཡཱ’’ཏི དྭིནྣཾ པདཱནཾ སམཱནཱདྷིཀརཎབྷཱཝཏོ. སམཱནཱདྷིཀརཎཱནཉྷི དྭིནྣཾ པདཱནཾ རཱུཔཀྑནྡྷཱདཱིནཾ ཝིཡ ཝིསེསནཝིསེསིཏབྦབྷཱཝོ ཧོཏི. རཱུཔ-སདྡོ ཧི ཨཉྙཀྑནྡྷནིཝཏྟནཏྠཾ ཝུཙྩམཱནོ ཝིསེསནཾ ཧོཏི, ཁནྡྷ-སདྡོ ཙ ནིཝཏྟེཏབྦགཧེཏབྦསཱདྷཱརཎཝཙནབྷཱཝཏོ ཝིསེསིཏབྦོ, ཨེཝམིདྷཱཔི ‘‘དཡཱཡ ཏཱཡཱ’’ཏི དྭིནྣཾ པདཱནཾ ཨེཀཝིབྷཏྟིཡུཏྟཱནཾ སམཱནཱདྷིཀརཎབྷཱཝཏོ ཝིསེསནཝིསེསིཏབྦབྷཱཝོ ཧོཏི. ཏཏྠ དཡཱ སམུསྶཱཧིནཱིཏི པདྷཱནཱ, ནིཝཏྟེཏབྦགཧེཏབྦསཱདྷཱརཎཝཙནཉྩིདཾ. ཏསྨཱ ‘‘དཡཱཡཱ’’ཏི ཝིསེསིཏབྦཝཙནམེཏཾ, ཏསྶ ཙ ཡཐཱ ཝིསེསནཾ ཧོཏི ‘‘ཏཱཡཱ’’ཏི ¶ ཨིདཾ ཝཙནཾ, ཏཐཱ ཏསྶ པཊིནིདྡེསབྷཱཝོ ¶ ཡོཛེཏབྦོ. ན ཧི པཉྙཱཔཊིནིདྡེསབྷཱཝེ དཡཱཝིསེསནཾ ཏ-སདྡོ ཧོཏི, ཀརུཎཱཔཊིནིདྡེསབྷཱཝེ ཙ ཧོཏཱིཏི. པདྷཱནཉྩ པཉྙཾ ཝཛྫེཏྭཱ ‘‘དཡཱཡཱ’’ཏི ཨེཏེན སམྦཛ྄ཛྷམཱནོ ‘‘ཏཱཡཱ’’ཏི ཨཡཾ ཏ-སདྡོ ཨཔྤདྷཱནཱཡ ཀརུཎཱཡ པཊིནིདྡེསོ བྷཝིཏུམརཧཏི. ཨཡམེཏྠ ཨཏྠོ – ཡཱཡ དཡཱཡ སམུསྶཱཧིཏོ, ན སཱ ཡཱ ཀཱཙི, སབྦཉྙུཏཉྙཱཎསྶ པན ནིདསྶནབྷཱུཏཱ མཧཱཀརུཎཱ, ཏཱཡ སམུསྶཱཧིཏོཏི.

ཀཐཾ པན ཀརུཎཱ ‘‘དཡཱ’’ཏི ཉཱཏབྦཱ, ནནུ ཝུཏྟཾ ‘‘དཡཱཔནྣོ’’ཏི ཨེཏསྶ ཨཊྛཀཐཱཡཾ (དཱི. ནི. ཨཊྛ. ༡.༨) ‘‘མེཏྟཙིཏྟཏཾ ཨཱཔནྣོ’’ཏི, ཏསྨཱ དཡཱ མེཏྟཱཏི ཡུཛྫེཡྻ, ན ཀརུཎཱཏི? ཡདི ཨེཝཾ ‘‘ཨདཡཱཔནྣོ’’ཏི ཨེཏསྶ ཨཊྛཀཐཱཡཾ ‘‘ནིཀྐརུཎཏཾ ཨཱཔནྣོ’’ཏི ཝུཏྟནྟི དཡཱ མེཏྟཱཏི ཙ ན ཡུཛྫེཡྻ, ཏསྨཱ དཡཱ-སདྡོ ཡཏྠ ཡཏྠ པཝཏྟཏི, ཏཏྠ ཏཏྠ ཨདྷིཔྤཱཡཝསེན ཡོཛེཏབྦོ. དཡཱ-སདྡོ ཧི ཨནུརཀྑཎཏྠཾ ཨནྟོནཱིཏཾ ཀཏྭཱ པཝཏྟམཱནོ མེཏྟཱཡ ཙ ཀརུཎཱཡ ཙ པཝཏྟཏཱིཏི ནོ ན ཡུཛྫཏི. ཨེཝཉྷི ཨཊྛཀཐཱནཾ ཨཝིརོདྷོ ཧོཏཱིཏི. ཀརུཎཱ ཙ དེསནཱཡ ནིདཱནབྷཱཝེན ཝུཏྟཱ, ན མེཏྟཱ ‘‘ཨཙྩནྟམེཝ ཧི ཏཾ སམཡཾ བྷགཝཱ ཀརུཎཱཝིཧཱརེན ཝིཧཱསཱི’’ཏི (དཱི. ནི. ཨཊྛ. ༡.༡; མ. ནི. ཨཊྛ. ༡.༡ མཱུལཔརིཡཱཡསུཏྟཝཎྞནཱ; སཾ. ནི. ཨཊྛ. ༡.༡.༡; ཨ. ནི. ཨཊྛ. ༡.༡.༡) ཨེཝམཱདཱིསུ, ཏསྨཱ ཨིདྷ ཀརུཎཱཝ དཡཱཝཙནེན གཧིཏཱཏི ཝེདིཏབྦཱ. སཱ ཧི སམུསྶཱཧིནཱི, ན མེཏྟཱ, མེཏྟཱ པན པཉྙཱགཏིཀཔཝཏྟིནཱི ཧོཏཱིཏི.

‘‘སཏྟེསཱུ’’ཏི ཀསྨཱ ཨེཝཾ ཝུཏྟཾ, ནནུ ‘‘ཏཱཡཱ’’ཏི ཨེཏེན ཝཙནེན སཏྟཝིསཡཱ ཀརུཎཱ གཧིཏཱཏི? ནོ ན གཧིཏཱ, པུརིམགཱཐཱཡ པན ‘‘སཏྟེསུ ཀརུཎཱ ཡཐཱརུཙི པཝཏྟིཏྠཱ’’ཏི སཔྤདེསསཏྟཝིསཡཱ ནིཔྤདེསསཏྟཝིསཡཱ ཙ སབྦཱ ཝུཏྟཱ, ཨིདྷ པན ནིཔྤདེསསཏྟཝིསཡཏཾ གཧེཏུཾ ‘‘སཏྟེསཱུ’’ཏི ནིཔྤདེསསཏྟཝིསཡབྷཱུཏཱ དསྶིཏཱ. ཏེན སབྦསཏྟཝིསཡཱཡ ཀརུཎཱཡ སམུསྶཱཧིཏོ ཨབྷིདྷམྨཀཐཱམགྒཾ དེཝཱནཾ སམྤཝཏྟཡི, ན དེཝཝིསཡཱཡ ཨེཝ, ཏསྨཱ སབྦསཏྟཧིཏཏྠཾ ཨབྷིདྷམྨཀཐཱམགྒཾ དེཝཱནཾ སམྤཝཏྟཡི, ན དེཝཱནཾཡེཝ ཨཏྠཱཡཱཏི ཨཡམཏྠོ དསྶིཏོཝ ཧོཏི. ཨཐ ཝཱ ‘‘སཏྟེསཱུ’’ཏི ཨིདཾ ན དཡཱཡ ཨཱལམྦནནིདསྶནཾ, སམུསྶཱཧནཝིསཡོ པན ཨེཏེན དསྶིཏོ. ཨབྷིདྷམྨཀཐཱམགྒཔྤཝཏྟནཏྠཉྷི བྷགཝཱ ཀརུཎཱཡ ན དེཝེསུཡེཝ སམུསྶཱཧིཏོ ¶ , སབྦབོདྷནེཡྻེསུ པན སཏྟེསུ སམུསྶཱཧིཏོ སབྦེསཾ ཨཏྠཱཡ པཝཏྟཏྟཱ, ཏསྨཱ སཏྟེསུ སམུསྶཱཧིཏམཱནསོཏི ¶ སཏྟེསུ ཝིསཡབྷཱུཏེསུ ནིམིཏྟབྷཱུཏེསུ ཝཱ སམུསྶཱཧིཏམཱནསོ ཨུཡྻོཛིཏཙིཏྟོཏི ཨཏྠོ དཊྛབྦོ.

ཨེཝཾ ཨབྦྷནྟརནིདཱནཾ དསྶེཏྭཱ བཱཧིརནིདཱནཾ དསྶེནྟོ ‘‘པཱཊིཧཱིརཱཝསཱནམྷཱི’’ཏིཨཱདིམཱཧ. ཏཏྠ ཡསྨིཾ ཀཱལེ བྷགཝཏཱ ཨབྷིདྷམྨཀཐཱམགྒོ པཝཏྟིཏོ, ཏཾ དསྶེཏུཾ ‘‘པཱཊིཧཱིརཱཝསཱནམྷི ཝསནྟོ’’ཏི ཝུཏྟཾ. ‘‘ཨཝསཱནམྷི ཝསནྟོ ཏིདསཱལཡེ’’ཏི ཝཙནཏོ ཡསྶཱཝསཱནམྷི ཏིདསཱལཡེ ཝསི, ཏཾ ཀཎྜམྦམཱུལེ ཀཏཾ ཡམཀཔཱཊིཧཱརིཡཾ ཨིདྷ ‘‘པཱཊིཧཱིར’’ནྟི ཝུཏྟཾ, ན བོདྷིམཱུལཱདཱིསུ ཀཏཾ པཱཊིཧཱརིཡཾ, ནཱཔི ཨཱདེསནཱནུསཱསནིཡོཏི ཝིཉྙཱཡཏི, པཱཀཊཏྟཱ ཙ ཨཱསནྣཏྟཱ ཙ ཏདེཝ གཧིཏནྟི དཊྛབྦཾ. པཱཊིཧཱརིཡཔདསྶ ཝཙནཏྠཾ (ཨུདཱ. ཨཊྛ. ༡; ཨིཏིཝུ. ཨཊྛ. ནིདཱནཝཎྞནཱ) ‘‘པཊིཔཀྑཧརཎཏོ རཱགཱདིཀིལེསཱཔནཡནཏོ པཱཊིཧཱརིཡ’’ནྟི ཝདནྟི, བྷགཝཏོ པན པཊིཔཀྑཱ རཱགཱདཡོ ན སནྟི ཡེ ཧརིཏབྦཱ. པུཐུཛྫནཱནམྤི ཧི ཝིགཏུཔཀྐིལེསེ ཨཊྛངྒགུཎསམནྣཱགཏེ ཙིཏྟེ ཧཏཔཊིཔཀྑེ ཨིདྡྷིཝིདྷཾ པཝཏྟཏི, ཏསྨཱ ཏཏྠ པཝཏྟཝོཧཱརེན ཙ ན སཀྐཱ ཨིདྷ ‘‘པཱཊིཧཱརིཡ’’ནྟི ཝཏྟུཾ. སཙེ པན མཧཱཀཱརུཎིཀསྶ བྷགཝཏོ ཝེནེཡྻགཏཱ ཙ ཀིལེསཱ པཊིཔཀྑཱ, ཏེསཾ ཧརཎཏོ ‘‘པཱཊིཧཱརིཡ’’ནྟི ཝུཏྟཾ, ཨེཝཾ སཏི ཡུཏྟམེཏཾ. ཨཐ ཝཱ བྷགཝཏོ ཙ སཱསནསྶ ཙ པཊིཔཀྑཱ ཏིཏྠིཡཱ, ཏེསཾ ཧརཎཏོ པཱཊིཧཱརིཡཾ. ཏེ ཧི དིཊྛིཧརཎཝསེན དིཊྛིཔྤཀཱསནེ ཨསམཏྠབྷཱཝེན ཙ ཨིདྡྷིཨཱདེསནཱནུསཱསནཱིཧི ཧརིཏཱ ཨཔནཱིཏཱ ཧོནྟཱིཏི. ཨཐ ཝཱ པཊཱིཏི ཨཡཾ སདྡོ ‘‘པཙྪཱ’’ཏི ཨེཏསྶ ཨཏྠཾ བོདྷེཏི ‘‘ཏསྨིཾ པཊིཔཝིཊྛམྷི, ཨཉྙོ ཨཱགཉྪི བྲཱཧྨཎོ’’ཏིཨཱདཱིསུ (སུ. ནི. ༩༨༥; ཙཱུལ༹ནི. པཱརཱཡནཝགྒ, ཝཏྠུགཱཐཱ ༤) ཝིཡ, ཏསྨཱ སམཱཧིཏེ ཙིཏྟེ ཝིགཏུཔཀྐིལེསེ ཙ ཀཏཀིཙྩེན པཙྪཱ ཧརིཏབྦཾ པཝཏྟེཏབྦནྟི པཊིཧཱརིཡཾ, ཨཏྟནོ ཝཱ ཨུཔཀྐིལེསེསུ ཙཏུཏྠཛ྄ཛྷཱནམགྒེཧི ཧརིཏེསུ པཙྪཱ ཧརཎཾ པཊིཧཱརིཡཾ, ཨིདྡྷིཨཱདེསནཱནུསཱསནིཡོ ཙ ཝིགཏུཔཀྐིལེསེན ཀཏཀིཙྩེན ཙ སཏྟཧིཏཏྠཾ པུན པཝཏྟེཏབྦཱ, ཧརིཏེསུ ཙ ཨཏྟནོ ཨུཔཀྐིལེསེསུ པརསཏྟཱནཾ ཨུཔཀྐིལེསཧརཎཱནི ཧོནྟཱིཏི པཊིཧཱརིཡཱནི བྷཝནྟི, པཊིཧཱརིཡམེཝ པཱཊིཧཱརིཡཾ. པཊིཧཱརིཡེ ཝཱ ཨིདྡྷིཨཱདེསནཱནུསཱསནིསམུདཱཡེ བྷཝཾ ཨེཀེཀཾ པཱཊིཧཱརིཡནྟི ཝུཙྩཏི. པཊིཧཱརིཡཾ ¶ ཝཱ ཙཏུཏྠཛ྄ཛྷཱནཾ མགྒོ ཙ པཊིཔཀྑཧརཎཏོ, ཏཏྠ ཛཱཏཾ, ཏསྨིཾ ཝཱ ནིམིཏྟབྷཱུཏེ, ཏཏོ ཝཱ ཨཱགཏནྟི པཱཊིཧཱརིཡཾ. པཱཊིཧཱརིཡམེཝ ཨིདྷ ‘‘པཱཊིཧཱིར’’ནྟི ཝུཏྟཾ. ཨཝསཱནམྷི ཝསནྟོཏི ཨེཏེཧི ཀཱལཾ ནིདསྶེཏི. པཱཊིཧཱིརཀརཎཱཝསཱནེན ཧི ཏིདསཱལཡཝཱསེན ཙ པརིཙྪིནྣོ ཨབྷིདྷམྨཀཐཱམགྒཔྤཝཏྟནསྶ ཀཱལོཏི ¶ . ཏིདསཱལཡེཏི དེསཾ ནིདསྶེཏི. སོ ཧི ཨབྷིདྷམྨཀཐཱམགྒཔྤཝཏྟནསྶ དེསོ ཏཏྠ ཝསནྟེན པཝཏྟིཏཏྟཱཏི.

༣. ཏཏྠཱཔི དེསཝིསེསདསྶནཏྠཾ ‘‘པཱརིཙྪཏྟཀམཱུལམྷཱི’’ཏིཨཱདི ཝུཏྟཾ. ཡུགནྡྷརེཏི སཱིཏཔབྦཏེསྭེཀོ དྭེཙཏྟཱལཱིསཡོཛནསཧསྶུབྦེདྷོ, ཨཱདིཙྩོ ཙ ཏདུབྦེདྷམགྒཙཱརཱི, སོ སཏི སམྦྷཝེ ཡཐཱ ཡུགནྡྷརེ སོབྷེཡྻ, ཨེཝཾ སོབྷམཱནོ ནིསིནྣོཏི ཨཏྠོ.

༤-༥. ཨིདཱནི པུགྒལེ དྷམྨཔཊིགྒཱཧཀེ ཨཔདིསནྟོ ‘‘ཙཀྐཝཱལ༹སཧསྶེཧཱི’’ཏིཨཱདིམཱཧ. སབྦསོཏི སམནྟཏོ ཨཱགམྨ སབྦེཧི དིསཱབྷཱགེཧི, སནྣིཝེསཝསེན ཝཱ སམནྟཏོ སནྣིཝིཊྛེཧི དསཧི ཙཀྐཝཱལ༹སཧསྶེཧཱིཏི ཨདྷིཔྤཱཡོ, ན སབྦསོ ཙཀྐཝཱལ༹སཧསྶེཧི དསཧི དསཧཱིཏི. ཨེཝཾ སཏི ཙཏྟཱལཱིསཙཀྐཝཱལ༹སཧསྶེཧི ཨདྷིཀེཧི ཝཱ ཨཱགམནཾ ཝུཏྟཾ སིཡཱ, ན ཙེཏཾ ཨདྷིཔྤེཏནྟི. སམནྟཏོ སནྣིསིནྣེནཱཏི ཝཱ ཡོཛེཏབྦཾ. སམཾ, སམྨཱ ཝཱ ནིསིནྣེན སནྣིསིནྣེན, ཨཉྙམཉྙཾ ཨབྱཱབཱདྷེཏྭཱ བྷགཝཏི གཱརཝཾ ཀཏྭཱ སོཏཾ ཨོདཧིཏྭཱ ནིསཛྫདོསེ ཝཛྫིཏབྦེ ཝཛྫེཏྭཱ ནིསིནྣེནཱཏི ཨཏྠོ. མཱཏརཾ པམུཁཾ ཀཏྭཱ སནྣིསིནྣེན དེཝཱནཾ གཎེན པརིཝཱརིཏོཏི ཝཱ, མཱཏརཾ པམུཁཾ ཀཏྭཱ ཨབྷིདྷམྨཀཐཱམགྒཾ སམྤཝཏྟཡཱིཏི ཝཱ ཡོཛནཱ ཀཱཏབྦཱ.

ཨིདཱནི དེསནཱཡ སམུཊྛཱནཾ དསྶེནྟོ ‘‘ཏསྶཱ པཉྙཱཡ ཏེཛསཱ’’ཏི ཨཱཧ. ཡཱ སཱ ཨཱདིམྷི ཀརུཎཱཡ ཨུཔམིཏཱ སབྦཉེཡྻདྷམྨཱནཾ ཡཐཱསབྷཱཝཛཱནནསམཏྠཱ, ཏེསཾ དེསེཏབྦཔྤཀཱརཛཱནནསམཏྠཱ, བོདྷེཏབྦཔུགྒལཱནཾ ཨཱསཡཱདྷིམུཏྟིཡཱདིཝིབྷཱཝནསམཏྠཱ ཙ པཉྙཱ, ཏསྶཱ ཙ ཡཐཱཝུཏྟབལཡོགཏོཏི ཨཏྠོ. ཏེན སབྦཉྙུཏཉྙཱཎམེཝ ཨབྷིདྷམྨཀཐཱཡ སམུཊྛཱནབྷཱཝེ སམཏྠཾ, ནཱཉྙནྟི ཨིམམཏྠཾ དཱིཔེནྟོ ཨབྷིདྷམྨཀཐཱཡ ཨསཱདྷཱརཎབྷཱཝཾ དསྶེཏི. མགྒོཏི ཨུཔཱཡོ. ཁནྡྷཱཡཏནཱདཱིནཾ ཀུསལཱདཱིནཉྩ དྷམྨཱནཾ ཨཝབོདྷསྶ, སཙྩཔྤཊིཝེདྷསྶེཝ ཝཱ ཨུཔཱཡབྷཱཝཏོ ‘‘ཨབྷིདྷམྨཀཐཱམགྒོ’’ཏི ཝུཏྟོ. པབནྡྷོ ¶ ཝཱ ‘‘མགྒོ’’ཏི ཝུཙྩཏི. སོ ཧི དཱིགྷཏྟཱ མགྒོ ཝིཡཱཏི མགྒོ, ཏསྨཱ ཨབྷིདྷམྨཀཐཱཔབནྡྷོ ‘‘ཨབྷིདྷམྨཀཐཱམགྒོ’’ཏི ཝུཏྟོ. དེཝཱནཾ གཎེན པརིཝཱརིཏོཏི ཝཏྭཱ པུན དེཝཱནནྟི ཝཙནཾ ཏེསཾ གཧཎསམཏྠཏཾ དཱིཔེཏི. ན ཧི ཨསམཏྠཱནཾ བྷགཝཱ དེསེཏཱིཏི.

༦. ཨེཝཾ ¶ ཀརུཎཱཔཉྙཱམུཁེཧི གུཎེཧི བྷགཝཏོ ཨབྷིདྷམྨཀཐཱམགྒཔྤཝཏྟནེན ཙ ཧིཏཔྤཊིཔཏྟིཡཱ པརམཔཎཱམཱརཧཏཾ དསྶེཏྭཱ ཨིདཱནི ཨདྷིཔྤེཏཾ པཎཱམཾ ཀརོནྟོ ཨཱཧ ‘‘ཏསྶ པཱདེ ནམསྶིཏྭཱ’’ཏི. བྷགཝཏོ ཐོམནེནེཝ ཙ དྷམྨསྶ སྭཱཀྑཱཏཏཱ སངྒྷསྶ ཙ སུཔྤཊིཔནྣཏཱ དསྶིཏཱ ཧོཏི ཏཔྤབྷཝསྶ ཨནཉྙཐཱབྷཱཝཏོ, ཏསྨཱ པཎཱམཱརཧཾ ཏཉྩ རཏནདྭཡཾ པཎམནྟོ ‘‘སདྡྷམྨཉྩསྶ…པེ… ཙཉྫལི’’ནྟི ཨཱཧ. ཏཏྠ ཡསྨཱ བུདྡྷོ ‘‘སདེཝཀེ ལོཀེ ཏཐཱགཏོ ཝནྡནཱིཡོ’’ཏི, སངྒྷོ ཙ ‘‘སུཔྤཊིཔནྣོ…པེ… ཨཉྫལིཀརཎཱིཡོ’’ཏི (ཨ. ནི. ༦.༡༠) ཝུཏྟོ, ཏསྨཱ ‘‘ཏསྶ པཱདེ ནམསྶིཏྭཱ, ཀཏྭཱ སངྒྷསྶ ཙཉྫལི’’ནྟི ཝུཏྟཾ. དྷམྨོ པན སྭཱཀྑཱཏཏཱདིགུཎཡུཏྟོ ཏཐཱནུསྶརཎེན པཱུཛེཏབྦོ ཧོཏི ‘‘ཏམེཝ དྷམྨཾ སཀྐཏྭཱ གརུཾཀཏྭཱ ཨུཔནིསྶཱཡ ཝིཧརེཡྻ’’ནྟི (སཾ. ནི. ༡.༡༧༣; ཨ. ནི. ༤.༢༡) ཝཙནཏོ, ཀཱཡཝཱཙཱཙིཏྟེཧི སབྦཐཱ པཱུཛེཏབྦོ, ཏསྨཱ ‘‘སདྡྷམྨཉྩསྶ པཱུཛེཏྭཱ’’ཏི ཝུཏྟཾ. སིརཱིམཏོཏི ཨེཏྠ སིརཱིཏི པཉྙཱཔུཉྙཱནཾ ཨདྷིཝཙནནྟི ཝདནྟི. ཨཐ ཝཱ པུཉྙནིབྦཏྟཱ སརཱིརསོབྷགྒཱདིསམྤཏྟི ཀཏཔུཉྙེ ནིསྶཡཏི, ཀཏཔུཉྙེཧི ཝཱ ནིསྶཱིཡཏཱིཏི ‘‘སིརཱི’’ཏི ཝུཙྩཏི, སཱ ཙ ཨཏིསཡཝཏཱི བྷགཝཏོ ཨཏྠཱིཏི སིརཱིམཱ, བྷགཝཱ, ཏསྶ སིརཱིམཏོ.

༧. ནིཔཙྩཀཱརསྶཱཏི པཎཱམཀིརིཡཱཡ. ཨཱནུབྷཱཝེནཱཏི བལེན. སོསེཏྭཱཏི སུཀྑཱཔེཏྭཱ ཨནྟརདྷཱཔེཏྭཱ ཨཏྠཾ པཀཱསཡིསྶཱམཱིཏི སམྦནྡྷོ. ཨནྟརཱཡེཏི ཨཏྠཔྤཀཱསནསྶ ཨུཔགྷཱཏཀེ. ཨསེསཏོཏི ནིསྶེསེ སཀལེ.

༨. ཨིདཱནི ཨབྷིདྷམྨསྶ གམྦྷཱིརཏྠཏྟཱ ཨཏྠཔྤཀཱསནསྶ དུཀྐརབྷཱཝཾ དཱིཔེཏུཾ ‘‘ཝིསུདྡྷཱཙཱརསཱིལེནཱ’’ཏིཨཱདིནཱ ཨབྷིཡཱཙནཾ དསྶེཏི. ཐུལླཙྩཡཱདིཝིསུདྡྷིཡཱ ཝིསུདྡྷཱཙཱརོ, པཱརཱཛིཀསངྒྷཱདིསེསཝིསུདྡྷིཡཱ ཝིསུདྡྷསཱིལོ. ཙཱརིཏྟཝཱརིཏྟཝིསུདྡྷིཡཱ ¶ ཝཱ ཝིསུདྡྷཱཙཱརསཱིལོ, ཏེན. སཀྐཙྩནྟི ཙིཏྟིཾ ཀཏྭཱ. ཨབྷིཡཱཙིཏོཏི ཨབྷིམུཁཾ ཡཱཙིཏོ. ཏེན ཨནཱདརིཡཾ ཨཏྠཔྤཀཱསནེ ཀཱཏུཾ ཨསཀྐུཎེཡྻཾ དསྶེཏི.

༩. ཨིདཱནི ཡསྶ ཨཏྠཾ པཀཱསེཏུཀཱམོ, ཏཾ དསྶེཏུཾ ‘‘ཡཾ དེཝདེཝོ’’ཏིཨཱདིམཱཧ. ཏཏྠ ཡནྟི ཨབྷིདྷམྨཾ. དེཝདེཝོཏི ཝིསུདྡྷིསམྨུཏིཨུཔཔཏྟིདེཝཱནཾ དེཝོ. ལོཀེ ཧི ཡེ ‘‘སརཎཾ པརཱཡཎ’’ནྟི གནྟབྦཱ གཏིབྷཱུཏཱ, ཏེ ‘‘དེཝཱ’’ཏི ཝུཙྩནྟི, བྷགཝཱ ཙ སབྦདེཝཱནཾ གཏིབྷཱུཏོཏི ¶ . ནཡཏོཏི སངྑེཔཏོ. སམཱཙིཀྑཱིཏི སམྨཱ ཨཱཙིཀྑི ཡཐཱ ཐེརོ བུཛ྄ཛྷཏི. ཝེནེཡྻསཏྟེ ཝིནེཏཱིཏི ཝིནཱཡཀོ, ནཱཡཀཝིརཧིཏོ ཝཱ, སཡམྦྷཱུཏི ཨཏྠོ.

༡༠-༡༢. ཡཉྩཱཏི ཡཉྩ ཨབྷིདྷམྨཾ བྷིཀྑཱུནཾ པཡིརུདཱཧཱསཱིཏི སམྦནྡྷོ. པཡིརུདཱཧཱསཱིཏི ཀཐེསི. ཨིཏཱིཏི ཨིམིནཱ ཨནུཀྐམེན. ‘‘ཡོ དྷཱརིཏོ’’ཏི ཡནྟི ཨུཔཡོགཝསེན ཝུཏྟོ ཡཾ-སདྡོ དྷཱརིཏོཏི པཙྩཏྟེན སམྦཛ྄ཛྷམཱནོ པཙྩཏྟཝསེན པརིཎམཏི, ཏསྨཱ ཡོ དྷཱརིཏོ, ཡོ ཙ སངྒཱིཏོ, ཏསྶ ཨཏྠཾ པཀཱསཡིསྶཱམཱིཏི ཡོཛནཱ ཀཱཏབྦཱ. ཝེདེན པཉྙཱཡ ཨཱིཧཏི པཝཏྟཏཱིཏི ཝེདེཧོ, ཏེན མུནིནཱ. ཨབྷིཎྷསོཏི བཧུསོ. ཨབྷིདྷམྨསྶཱཏི ཨེཏཾ ‘‘ཨཏྠཾ པཀཱསཡིསྶཱམཱི’’ཏི ཨེཏེན ཡོཛེཏབྦཾ. ཨིདཱནི ཡོ ཨཏྠཔྤཀཱསནསྶ ནིསྶཡོ, ཏཾ དསྶེཏུཾ ‘‘ཨཱདིཏོ’’ཏིཨཱདིམཱཧ. ཏཏྠ ཨཱདིཏོཏི ཨཱདིམྷི པཋམསངྒཱིཏིཡཾ.

༡༣. ཡཱ ཨཊྛཀཐཱ སངྒཱིཏཱ, ཀསྶ པན སཱ ཨཊྛཀཐཱཏི? ཨཉྙསྶ ཝུཏྟསྶ ཨབྷཱཝཱ ‘‘ཡསྶ ཨཏྠཾ པཀཱསཡིསྶཱམཱི’’ཏི ཝུཏྟཾ, ཨདྷིཀཱརཝསེན ‘‘ཏསྶ ཨབྷིདྷམྨསྶཱ’’ཏི ཝིཉྙཱཡཏི. སངྒཱིཏཱཏི ཨཏྠཾ པཀཱསེཏུཾ ཡུཏྟཊྛཱནེ ‘‘ཨཡཾ ཨེཏསྶ ཨཏྠོ, ཨཡཾ ཨེཏསྶ ཨཏྠོ’’ཏི སངྒཧེཏྭཱ ཝུཏྟཱ, པཙྪཱཔི ཙ དུཏིཡཏཏིཡསངྒཱིཏཱིསུ ཨནུསངྒཱིཏཱ.

༡༤-༡༦. ཨབྷིསངྑཏཱཏི རཙིཏཱ. ཏཏོཏི ཨཊྛཀཐཱཏོ. ཏནྟིནཡཱནུགནྟི ཏནྟིགཏིཾ ཨནུགཏཾ. བྷཱསནྟི མཱགདྷབྷཱསཾ. ནིཀཱཡནྟརལདྡྷཱིཧཱིཏི ཨནྟརནྟརཱ ཨནུཔྤཝེསིཏཱཧི. ཨསམྨིསྶནྟི ཨཝོཀིཎྞཾ. ཨནཱཀུལནྟི སནིཀཱཡེཔི ཨནཱཝིལཾ པརིཙྪིནྣཾ. ཨསམྨིསྶོ ཨནཱཀུལོ ཙ ཡོ མཧཱཝིཧཱརཝཱསཱིནཾ ཨཏྠཝིནིཙྪཡོ, ཏཾ དཱིཔཡནྟོ ཨཏྠཾ པཀཱསཡིསྶཱམཱིཏི ¶ . ཨེཏེན ཏིཔིཊཀཙཱུལ༹ནཱགཏྠེརཱདཱིཧི ཝུཏྟོ ཐེརཝཱདོཔི སངྒཧིཏོ ཧོཏི. ཨཐ ཝཱ ཏམྦཔཎྞིབྷཱསཾ ཨཔནེཏྭཱ མཱགདྷབྷཱསཉྩ ཨཱརོཔེཏྭཱ པཀཱསིཡམཱནོ ཡོ ཨབྷིདྷམྨསྶ ཨཏྠོ ཨསམྨིསྶོ ཨནཱཀུལོཡེཝ ཙ ཧོཏི མཧཱཝིཧཱརཝཱསཱིནཉྩ ཝིནིཙྪཡབྷཱུཏོ, ཏཾ ཨཏྠཾ ‘‘ཨེསོ མཧཱཝིཧཱརཝཱསཱིནཾ ཝིནིཙྪཡོ’’ཏི དཱིཔཡནྟོ པཀཱསཡིསྶཱམི. ཏཔྤཀཱསནེནེཝ ཧི སོ ཏཐཱ དཱིཔིཏོ ཧོཏཱིཏི.

༡༧. ཏོསཡནྟོ ཝིཙཀྑཎེཏི ཝིཙཀྑཎེ ཏོསཡནྟོ གཧེཏབྦཾ གཧེཏྭཱནཱཏི ཨེཝཾ ཡོཛེཏྭཱ ‘‘གཧེཏབྦཊྛཱནེཡེཝ གཧིཏཾ སུཊྛུ ཀཏ’’ནྟི ཨེཝཾ ཏོསཡནྟོཏི ཨཏྠཾ ཝདནྟི. ཨེཝཾ སཏི ¶ གཧེཏབྦགྒཧཎེནེཝ ཏོསནཾ ཀཏཾ, ན ཨཉྙེན ཨཏྠཔྤཀཱསནེནཱཏི ཨེཏཾ ཨཱཔཛྫེཡྻ. ཏོསཡནྟོ ཨཏྠཾ པཀཱསཡིསྶཱམཱིཏི ཨེཝཾ པན ཡོཛནཱཡ སཏི གཧེཏབྦགྒཧཎཾ ཨཉྙཉྩ སབྦཾ ཨཏྠཔྤཀཱསནཾ ཧོཏཱིཏི སབྦེན ཏེན ཏོསནཾ ཀཏཾ ཧོཏི, ཏསྨཱ ཏོསཡནྟོ ཨཏྠཾ པཀཱསཡིསྶཱམཱིཏི ཡུཏྟརཱུཔཱ.

༡༨-༢༠. ཨིདཱནི ཡཾ ཨཏྠཔྤཀཱསནཾ ཀཏྟུཀཱམོ, ཏསྶ མཧཏྟཾ པརིཧརིཏུཾ ‘‘ཀམྨཊྛཱནཱནཱི’’ཏིཨཱདིམཱཧ. ཨཏྠཝཎྞནནྟི ཨེཏྠ ཝཎྞནཱ ནཱམ ཝིཝརིཏྭཱ ཝིཏྠཱརེཏྭཱ ཝཙནཾ. ཨིཏཱིཏི ‘‘ཨཔནེཏྭཱ ཏཏོ བྷཱས’’ནྟི ཨེཝམཱདིནཱ ཡཐཱདསྶིཏཔྤཀཱརེན. ཨིཏི སོཏཱུནཾ ཨུསྶཱཧུཔྤཱདནསྶ ཧེཏུཾ དསྶེཏི. ཨབྷིདྷམྨཀཐནྟི ཨབྷིདྷམྨཊྛཀཐཾ. ནིསཱམེཐཱཏི སུཎཱཐ. ཨིདཱནི ཨཝསྶཾ ཨཡཾ སོཏབྦཱཡེཝཱཏི དལ༹ྷཾ ཨུསྶཱཧེནྟོ ཨཱཧ ‘‘དུལླབྷཱ ཧི ཨཡཾ ཀཐཱ’’ཏི.

ཝཱིསཏིགཱཐཱཝཎྞནཱ ནིཊྛིཏཱ.

ནིདཱནཀཐཱཝཎྞནཱ

ཨཊྛསཱལིནིཾ ཏཱཝ ཝཎྞེནྟེཧི ཨཱཙརིཡེཧི ཏསྶཱ སནྣིཝེསོ ཝིབྷཱཝེཏབྦོ. ཏསྨཱ ཨིདཾ ཝུཙྩཏི –

‘‘ཝཙནཏྠོ པརིཙྪེདོ, སནྣིཝེསོ ཙ པཱལི༹ཡཱ;

སཱགརེཧི ཏཐཱ ཙིནྟཱ, དེསནཱཧི གམྦྷཱིརཏཱ.

‘‘དེསནཱཡ ¶ སརཱིརསྶ, པཝཏྟིགྒཧཎཾ ཏཐཱ;

ཐེརསྶ ཝཱཙནཱམགྒ-ཏཔྤབྷཱཝིཏཏཱཔི ཙ.

‘‘པཊིཝེདྷཱ ཏཐཱ བུདྡྷ-ཝཙནཱདཱིཧི ཨཱདིཏོ;

ཨཱབྷིདྷམྨིཀབྷཱཝསྶ, སཱདྷནཾ སབྦདསྶིནོ.

‘‘ཝིནཡེནཱཐ ¶ གོསིངྒ-སུཏྟེན ཙ མཧེསིནཱ;

བྷཱསིཏཏྟསྶ སཾསིདྡྷི, ནིདཱནེན ཙ དཱིཔིཏཱ.

‘‘པཀཱསེཏྭཱ ཨིམཾ སབྦཾ, པཊིཉྙཱཏཀཐཱ ཀཏཱ;

ཨཊྛསཱལིནིཡཱ ཨེཏཾ, སནྣིཝེསཾ ཝིབྷཱཝཡེ’’ཏི.

ཝཙནཏྠཝིཛཱནནེན ཝིདིཏཱབྷིདྷམྨསཱམཉྙཏྠསྶ ཨབྷིདྷམྨཀཐཱ ཝུཙྩམཱནཱ སོབྷེཡྻཱཏི ཨབྷིདྷམྨཔརིཛཱནནམེཝ ཨཱདིམྷི ཡུཏྟརཱུཔནྟི ཏདཏྠཾ པུཙྪཏི ‘‘ཏཏྠ ཀེནཊྛེན ཨབྷིདྷམྨོ’’ཏི. ཏཏྠ ཏཏྠཱཏི ‘‘ཨབྷིདྷམྨསྶ ཨཏྠཾ པཀཱསཡིསྶཱམཱི’’ཏི ཡདིདཾ ཝུཏྟཾ, ཏསྨིཾ. ‘‘ཡསྶ ཨཏྠཾ པཀཱསཡིསྶཱམཱི’’ཏི པཊིཉྙཱཏཾ, སོ ཨབྷིདྷམྨོ ཀེནཊྛེན ཨབྷིདྷམྨོཏི ཨཏྠོ. ཏཏྠཱཏི ཝཱ ‘‘ཨབྷིདྷམྨཀཐ’’ནྟི ཨེཏསྨིཾ ཝཙནེ ཡོ ཨབྷིདྷམྨོ ཝུཏྟོ, སོ ཀེནཊྛེན ཨབྷིདྷམྨོཏི ཨཏྠོ. དྷམྨཱཏིརེཀདྷམྨཝིསེསཊྛེནཱཏི ཨེཏྠ དྷམྨོ ཨཏིརེཀོ དྷམྨཱཏིརེཀོ, སུཏྟནྟཱདྷིཀཱ པཱལཱི༹ཏི ཨཏྠོ. དྷམྨོ ཝིསེསོ དྷམྨཝིསེསོ དྷམྨཱཏིསཡོ, ཝིཙིཏྟཱ པཱལཱི༹ཏི ཨཏྠོ, དྷམྨཱཏིརེཀདྷམྨཝིསེསཱ ཨེཝ ཨཏྠོ དྷམྨཱཏིརེཀདྷམྨཝིསེསཊྛོ. དྭིནྣམྤི ཨཏྠཱནཾ ཨབྷིདྷམྨསདྡསྶ ཨཏྠབྷཱཝེན སཱམཉྙཏོ ཨེཀཝཙནནིདྡེསོ ཀཏོ. ཏསྨཱཏི ཡསྨཱ ‘‘ཨབྷིཀྐམནྟི, ཨབྷིཀྐནྟཝཎྞཱ’’ཏིཨཱདཱིསུ ཝིཡ ཨཏིརེཀཝིསེསཊྛདཱིཔཀོ ཨབྷིསདྡོ, ཏསྨཱ ཨཡམྤི དྷམྨོ དྷམྨཱཏིརེཀདྷམྨཝིསེསཊྛེན ‘‘ཨབྷིདྷམྨོ’’ཏི ཝུཙྩཏཱིཏི སམྦནྡྷོ.

ཏཏྠ སིཡཱ – ‘‘ཨབྷིཀྐམནྟི, ཨབྷིཀྐནྟཝཎྞཱ’’ཏི ཨེཏྠ དྷཱཏུསདྡསྶ པུརཏོ པཡུཛྫམཱནོ ཨབྷིསདྡོ ཀིརིཡཱཡ ཨཏིརེཀཝིསེསབྷཱཝདཱིཔཀོ ཧོཏཱིཏི ཡུཏྟཾ ཨུཔསགྒབྷཱཝཏོ, དྷམྨསདྡོ པན ན དྷཱཏུསདྡོཏི ཨེཏསྨཱ པུརཏོ ཨབྷིསདྡོ པཡོགམེཝ ནཱརཧཏི. ཨཐཱཔི པཡུཛྫེཡྻ, ཀིརིཡཱཝིསེསཀཱ ཨུཔསགྒཱ, ན ཙ དྷམྨོ ཀིརིཡཱཏི དྷམྨསྶ ཨཏིརེཀཝིསེསབྷཱཝདཱིཔནཾ ན ཡུཏྟནྟི? ནོ ན ཡུཏྟཾ. ཨཉྙསྶཔི ཧི ཨུཔསགྒསྶ ཨདྷཱཏུསདྡཱ ¶ པུརཏོ པཡུཛྫམཱནསྶ ཨཀིརིཡཱཡཔི ཨཏིརེཀཝིསེསབྷཱཝདཱིཔཀསྶ དསྶནཏོཏི ཨེཏམཏྠཾ ཝིབྷཱཝེཏུཾ ཨཏིཚཏྟཱདིཨུདཱཧརཎཾ དསྶེནྟོ ཨཱཧ ‘‘ཡཐཱ’’ཏིཨཱདི. ཨེཝམེཝཱཏི ཡཐཱ ཚཏྟཱཏིརེཀཚཏྟཝིསེསཱདིཨཏྠེན ཨཏིཚཏྟཱདཡོ ཧོནྟི ཨཏིསདྡསྶ ཨུཔསགྒསྶ ཨདྷཱཏུསདྡསྶཔི པུརཏོ པཡུཛྫམཱནསྶ ཨཀིརིཡཱཡ ཙ ཏབྦྷཱཝདཱིཔཀཏྟཱ, ཨེཝམཡམྤི དྷམྨོ དྷམྨཱཏིརེཀདྷམྨཝིསེསཊྛེན ¶ ‘‘ཨབྷིདྷམྨོ’’ཏི ཝུཙྩཏི ཨབྷི-སདྡསྶ ཨུཔསགྒསྶ ཨདྷཱཏུསདྡསྶཔི པུརཏོ པཡུཛྫམཱནསྶ ཨཀིརིཡཱཡ ཙ ཏབྦྷཱཝདཱིཔཀཏྟཱཏི ཨདྷིཔྤཱཡོ.

ཨེཀདེསེནེཝ ཝིབྷཏྟཱཏི ‘‘ཀཏམེ ཙ, བྷིཀྑཝེ, པཉྩཀྑནྡྷཱ? རཱུཔཀྑནྡྷོ…པེ… ཝིཉྙཱཎཀྑནྡྷོ. ཀཏམོ ཙ, བྷིཀྑཝེ, རཱུཔཀྑནྡྷོ? ཡཾ ཀིཉྩི རཱུཔཾ ཨཏཱིཏཱ…པེ… སནྟིཀེ ཝཱ, ཨཡཾ ཝུཙྩཏི རཱུཔཀྑནྡྷོ’’ཏིཨེཝམཱདིནཱ (སཾ. ནི. ༣.༤༨; ཝིབྷ. ༢) ཨུདྡེསནིདྡེསམཏྟེནེཝ ཝིབྷཏྟཱ, ‘‘ཏཏྠ ཀཏམཾ རཱུཔཾ ཨཏཱིཏ’’ནྟིཨེཝམཱདིནཱ (ཝིབྷ. ༣) པཊིནིདྡེསསྶ ཨབྷིདྷམྨབྷཱཛནཱིཡསྶ པཉྷཔུཙྪཀསྶ ཙ ཨབྷཱཝཱ ན ནིཔྤདེསེན. ཨབྷིདྷམྨཾ པཏྭཱ པན…པེ… ནིཔྤདེསཏོཝ ཝིབྷཏྟཱ, ཏསྨཱ ཨཡམྤི དྷམྨོ དྷམྨཱཏིརེཀདྷམྨཝིསེསཊྛེན ‘‘ཨབྷིདྷམྨོ’’ཏི ཝུཙྩཏི ནིཔྤདེསཱནཾ ཏིཎྞམྤི ནཡཱནཾ ཨཏིརེཀཔཱལི༹བྷཱཝཏོ ཝིསེསཔཱལི༹བྷཱཝཏོ ཙཱཏི ཨདྷིཔྤཱཡོ. སུཏྟནྟེ བཱཝཱིསཏིཡཱ ཨིནྡྲིཡཱནཾ ཨེཀཏོ ཨནཱགཏཏྟཱ ཨིནྡྲིཡཝིབྷངྒེ སུཏྟནྟབྷཱཛནཱིཡཾ ནཏྠི. ‘‘ཨཝིཛྫཱཔཙྩཡཱ སངྑཱརཱ སམྦྷཝནྟཱི’’ཏིཨཱདིནཱ པཊིཙྩསམུཔྤཱདེ ཏསྶ ཏསྶ པཙྩཡདྷམྨསྶ པཙྩཡུཔྤནྣདྷམྨཱནཾ པཙྩཡབྷཱཝོ ཨུདྡིཊྛོ, ཨུདྡིཊྛདྷམྨཱནཉྩ ཀུསལཱདིབྷཱཝོ པུཙྪིཏྭཱ ཝིསྶཛྫེཏབྦོ, ན ཙེཏྠ ‘‘ཨཝིཛྫཱསངྑཱརཱ’’ཏི ཨེཝཾ ཝུཏྟོ ཨུདྡེསོ ཨཏྠཱིཏི པཉྷཔུཙྪཀཾ ནཏྠི. སུཏྟནྟེ པཉྩ སིཀྑཱཔདཱནི ཨུདྡིཊྛཱནི པཱཎཱཏིཔཱཏཱ ཝེརམཎཱིཏིཨཱདཱིནི. སཱ པན ཝེརམཎཱི ཡདི སབྷཱཝཀིཙྩཱདིཝསེན ཝིབྷཛཱིཡེཡྻ, ‘‘ཨཱརཏི ཝིརཏཱི’’ཏིཨཱདིནཱ ཨབྷིདྷམྨབྷཱཛནཱིཡམེཝ ཧོཏི. ཨཐཱཔི ཙིཏྟུཔྤཱདཝསེན ཝིབྷཛཱིཡེཡྻ, ཏཐཱཔི ཨབྷིདྷམྨབྷཱཛནཱིཡམེཝ ཧོཏི. ཨཉྙོ པན ཝེརམཎཱིནཾ ཝིབྷཛིཏབྦཔྤཀཱརོ ནཏྠི, ཡེན པཀཱརེན སུཏྟནྟབྷཱཛནཱིཡཾ ཝཏྟབྦཾ སིཡཱ. ཏསྨཱ སིཀྑཱཔདཝིབྷངྒེ སུཏྟནྟབྷཱཛནཱིཡཾ ནཏྠི.

ཝཙནཏྠཏོ ཨབྷིདྷམྨེ ཉཱཏེ པརིཙྪེདཏོ ཉཱཔེཏུཾ ཨཱཧ ‘‘པཀརཎཔརིཙྪེདཏོ’’ཏིཨཱདི. ཀཏིཔཡཱཝ པཉྷཝཱརཱ ཨཝསེསཱཏི དྷམྨཧདཡཝིབྷངྒེ ཨནཱགཏཱ ཧུཏྭཱ མཧཱདྷམྨཧདཡེ ཨཱགཏཱ དྷམྨཧདཡཝིབྷངྒཝཙནཝསེན ¶ ཨཝསེསཱ ཀཏིཔཡཱཝ པཉྷཝཱརཱཏི ཨཏྠོ. ཨེཏྠེཝ སངྒཧིཏཱཏི ‘‘ཨཔུབྦཾ ནཏྠཱི’’ཏི ཝུཏྟཾ. ཨཔྤམཏྟིཀཱཝ ཏནྟི ཨཝསེསཱཏི དྷམྨཧདཡཝིབྷངྒེ ཨནཱགནྟྭཱ མཧཱདྷམྨཧདཡེ ཨཱགཏཏནྟིཏོ ཡདི པཐཝཱིཨཱདཱིནཾ ཝིཏྠཱརཀཐཱ མཧཱདྷཱཏུཀཐཱ རཱུཔཀཎྜདྷཱཏུཝིབྷངྒཱདཱིསུ, ཨཐ དྷཱཏུཀཐཱཡ ཝིཏྠཱརཀཐཱ དྷཱཏུཀཐཱཡ ཨནཱགནྟྭཱ མཧཱདྷཱཏུཀཐཱཡ ཨཱགཏཏནྟི ཨཔྤམཏྟིཀཱཝཱཏི ཨདྷིཔྤཱཡོ.

ཡཾ ¶ པན ཝུཏྟཾ ‘‘སཱཝཀབྷཱསིཏཏྟཱ ཚཌྜེཐ ན’’ནྟི, ཏཾ བུདྡྷབྷཱསིཏབྷཱཝདསྶནེན པཊིསེདྷེཏུཾ ‘‘སམྨཱསམྦུདྡྷོ ཧཱི’’ཏིཨཱདིམཱཧ. ཙཏཱུསུ པཉྷེསཱུཏི ‘‘ཨུཔལབྦྷཏི ནུཔལབྦྷཏཱི’’ཏི པཊིཉྙཱཡ གཧིཏཱཡ པཊིཀྑེཔགཧཎཏྠཾ ‘‘ཡོ སཙྩིཀཊྛོ’’ཏི ཝུཏྟཾ སཙྩིཀཊྛཾ ནིསྶཡཾ ཀཏྭཱ ཨུཔཱདཱཡ པཝཏྟཱ དྭེཔི པཉྩཀཱ ཨེཀོ པཉྷོ, ‘‘སབྦཏྠཱ’’ཏི སརཱིརཾ སབྦཾ ཝཱ དེསཾ ཨུཔཱདཱཡ པཝཏྟཱ ཨེཀོ, ‘‘སབྦདཱ’’ཏི ཀཱལམུཔཱདཱཡ ཨེཀོ, ‘‘སབྦེསཱུ’’ཏི ཡདི ཁནྡྷཱཡཏནཱདཡོ གཧིཏཱ, ཏེ ཨུཔཱདཱཡ པཝཏྟཱ, ཨཐ པན ‘‘ཡོ སཙྩིཀཊྛོ སབྦཏྠ སབྦདཱ’’ཏི ཨེཏེཧི ན ཀོཙི སཙྩིཀཊྛོ དེསོ ཀཱལོ ཝཱ ཨགྒཧིཏོ ཨཏྠི, ཏེ པན སཱམཉྙཝསེན གཧེཏྭཱ ཨནུཡོགོ ཀཏོ, ན བྷེདཝསེནཱཏི བྷེདཝསེན གཧེཏྭཱ ཨནུཡུཉྫིཏུཾ ‘‘སབྦེསཱུ’’ཏི ཝུཏྟཱ སཙྩིཀཊྛདེསཀཱལཔྤདེསེ ཨུཔཱདཱཡ ཙ པཝཏྟཱ ཨེཀོཏི ཨེཏེསུ ཙཏཱུསུ. དྭིནྣཾ པཉྩཀཱནནྟི ཨེཏྠ ‘‘པུགྒལོ ཨུཔལབྦྷཏི…པེ… མིཙྪཱ’’ཏི ཨེཀཾ, ‘‘པུགྒལོ ནུཔལབྦྷཏི…པེ… མིཙྪཱ’’ཏི (ཀཐཱ. ༡༨) ཨེཀཾ, ‘‘ཏྭཾ ཙེ པན མཉྙསི…པེ… ཨིདཾ ཏེ མིཙྪཱ’’ཏི (ཀཐཱ. ༣) ཨེཀཾ, ‘‘ཨེསེ ཙེ དུནྣིགྒཧིཏེ…པེ… ཨིདཾ ཏེ མིཙྪཱ’’ཏི ཨེཀཾ, ‘‘ན ཧེཝཾ ནིགྒཧེཏབྦེ, ཏེན ཧི ཡཾ ནིགྒཎྷཱསི…པེ… སུཀཏཱ པཊིཔཱདནཱ’’ཏི (ཀཐཱ. ༡༠) ཨེཀནྟི ཨེཝཾ ནིགྒཧཀརཎཾ, པཊིཀམྨཀརཎཾ, ནིགྒཧསྶ སུནིགྒཧབྷཱཝཾ ཨིཙྪཏོ པཊིཉྙཱཋཔནེན པཊིཀམྨཝེཋནཾ, པཊིཀམྨསྶ དུཔྤཊིཀམྨབྷཱཝཾ ཨིཙྪཏོ ཏཾནིདསྶནེན ནིགྒཧསྶ དུནྣིགྒཧབྷཱཝདསྶནེན ནིགྒཧནིབྦེཋནཾ, ཨནིགྒཧབྷཱཝཱརོཔནཱདིནཱ ཚེདོཏི ཨཡཾ ཨེཀོ པཉྩཀོ, ཡོ ཨཊྛཀཐཱཡཾ ཨནུལོམཔཉྩཀཔཊིཀམྨཙཏུཀྐནིགྒཧཙཏུཀྐཨུཔནཡནཙཏུཀྐནིགམནཙཏུཀྐ ནཱམེཧི སཀཝཱདིཔུབྦཔཀྑེ ཨནུལོམཔཙྩནཱིཀཔཉྩཀོཏི ཝུཏྟོ, པརཝཱདིཔུབྦཔཀྑེ ཙ ཨེཝམེཝ པཙྩནཱིཡཱནུལོམཔཉྩཀོཏི ཝུཏྟོ. ཨེཝཾ དྭེ པཉྩཀཱ ཝེདིཏབྦཱ. ཨེཝཾ སེསཔཉྷེསུཔཱིཏི ཨཊྛ པཉྩཀཱ ཨཊྛམུཁཱ ཝཱདཡུཏྟཱིཏི ¶ ཝུཏྟཱ. ཡུཏྟཱིཏི ཨུཔཱཡོ, ཝཱདསྶ ཡུཏྟི ཝཱདཡུཏྟི, ཝཱདཔྤཝཏྟནསྶ ཨུཔཱཡོཏི ཨཏྠོ.

ཨནུལོམཔཙྩནཱིཀཔཉྩཀེ ཨཱདིནིགྒཧཾ དསྶེཏྭཱ པཙྩནཱིཡཱནུལོམཔཉྩཀེ ཙ ཨཱདིནིགྒཧམེཝ དསྶེཏྭཱ མཱཏིཀཾ དཱིཔེཏུཾ ‘‘སཱ པནེསཱ’’ཏིཨཱདིམཱཧ. པུགྒལོཏི ཨཏྟཱ སཏྟོ ཛཱིཝོ. ཨུཔལབྦྷཏཱིཏི པཉྙཱཡ ཨུཔགནྟྭཱ ལབྦྷཏི. སཙྩིཀཊྛཔརམཊྛེནཱཏི མཱཡཱམརཱིཙིཨཱདཡོ ཝིཡ ནཱབྷཱུཏཱཀཱརེན, ཨནུསྶཝཱདཱིཧི གཧེཏབྦཱ ཝིཡ ན ཨནུཏྟམཏྠབྷཱཝེན, ཨཐ ཁོ བྷཱུཏེན ཨུཏྟམཏྠབྷཱཝེན ཨུཔལབྦྷཏཱིཏི པུཙྪཏི. ཨིཏརོ ཏཱདིསཾ ཨིཙྪནྟོ པཊིཛཱནཱཏི. པུན ཡོ སཙྩིཀཊྛཔརམཊྛེན ཨུཔལབྦྷཏི, སོ སཙྩིཀཊྛཔརམཊྛཏོ ཨཉྙོ ཏདཱདྷཱརོ, ཨཉྙཏྲ ཝཱ ཏེཧི, ཏེསཾ ¶ ཝཱ ཨཱདྷཱརབྷཱུཏོ, ཨནཉྙོ ཝཱ ཏཏོ རུཔྤནཱདིསབྷཱཝཏོ སཔྤཙྩཡཱདིསབྷཱཝཏོ ཝཱ ཨུཔལབྦྷམཱནོ ཨཱཔཛྫཏཱིཏི ཨནུཡུཉྫཏི ‘‘ཡོ སཙྩིཀཊྛོ…པེ… པརམཊྛེནཱ’’ཏི. ཨིཏརོ པུགྒལསྶ རཱུཔཱདཱིཧི ཨཉྙཏྟཾ ཨནཉྙཏྟཉྩ ཨནིཙྪནྟོ ‘‘ན ཧེཝ’’ནྟི པཊིཀྑིཔཏི. པུན སཀཝཱདཱི པཊིཉྙཱཡ ཨེཀཏྟཱཔནྣཾ ཨཔྤཊིཀྑིཔིཏབྦཾ པཊིཀྑིཔཏཱིཏི ཀཏྭཱ ནིགྒཧཾ ཨཱརོཔེནྟོ ཨཱཧ ‘‘ཨཱཛཱནཱཧི ནིགྒཧ’’ནྟི. ‘‘པུགྒལོ ནུཔལབྦྷཏཱི’’ཏི པུཊྛོ སཀཝཱདཱི པུགྒལདིཊྛིཾ པཊིསེདྷེནྟོ ‘‘ཨཱམནྟཱ’’ཏི པཊིཛཱནཱཏི. པུན ཨིཏརོ ཡོ སཙྩིཀཊྛེན ནུཔལབྦྷཏི པུགྒལོ, སོ སཙྩིཀཊྛཔརམཊྛཏོ ཨཉྙོ ཝཱ ཨནཉྙོ ཝཱ ནུཔལབྦྷཏཱིཏི ཨཱཔཛྫཏི ཨཉྙསྶ པཀཱརསྶ ཨབྷཱཝཱཏི ཨནུཡུཉྫཏི ‘‘ཡོ སཙྩིཀཊྛོ…པེ… པརམཊྛེནཱ’’ཏི. ཡསྨཱ པན པུགྒལོ སབྦེན སབྦཾ ནུཔལབྦྷཏི, ཏསྨཱ ཏསྶ ཨཉྙཏྟཱནཉྙཏྟཱནུཡོགོ ཨནནུཡོགོ པུགྒལལདྡྷིཾ པཊིསེདྷེནྟསྶ ཨནཱཔཛྫནཏོཏི ‘‘ན ཧེཝ’’ནྟི པཊིཀྑིཔཏི. ཨིཏརོ པཊིཉྙཱཡ ཨཱཔཛྫནལེསམེཝ པསྶནྟོ ཨཝིཔརཱིཏཾ ཨཏྠཾ ཨསམྦུཛ྄ཛྷནྟོཡེཝ ནིགྒཧཾ ཨཱརོཔེཏི ‘‘ཨཱཛཱནཱཧི ནིགྒཧ’’ནྟི.

ཨིཏཱིཏི ཡཾ དིསྭཱ མཱཏིཀཱ ཋཔིཏཱ, ཨེཝཾ དེསིཏཏྟཱཏི ཨདྷིཔྤཱཡོ. ཡཐཱ ཀིནྟི ཡེན པཀཱརེན བུདྡྷབྷཱསིཏཾ ནཱམ ཛཱཏཾ, ཏཾ ནིདསྶནཾ ཀིནྟི ཨཏྠོ. ཡཏོནིདཱནནྟི ཡཾཀཱརཎཱ ཚཨཛ྄ཛྷཏྟིཀབཱཧིརཱཡཏནཱདིནིདཱནནྟི ཨཏྠོ. པཔཉྩསཉྙཱསངྑཱཏི ཏཎྷཱམཱནདིཊྛིཔཔཉྩསམྤཡུཏྟཱ སཉྙཱཀོཊྛཱསཱ. སམུདཱཙརནྟཱིཏི ཨཛ྄ཛྷཱཙརནྟི. ཨེཏྠ ཙེཏི ཨེཏེསུ ཨཱཡཏནཱདཱིསུ ཏཎྷཱམཱནདིཊྛཱིཧི ཨབྷིནནྡིཏབྦཾ ཨབྷིཝདིཏབྦཾ ཨཛ྄ཛྷོསིཏབྦཉྩ ནཏྠི ཙེ ¶ . ནནུ ནཏྠིཡེཝ, ཀསྨཱ ‘‘ནཏྠི ཙེ’’ཏི ཝུཏྟནྟི? སཙྩཾ ནཏྠི, ཨཔྤཧཱིནཱབྷིནནྡནཱབྷིཝདནཛ྄ཛྷོསཱནཱནཾ པན པུཐུཛྫནཱནཾ ཨབྷིནནྡིཏབྦཱདིཔྤཀཱརཱནི ཨཱཡཏནཱདཱིནི ཧོནྟཱིཏི ཏེསཾ ན སཀྐཱ ‘‘ནཏྠཱི’’ཏི ཝཏྟུཾ, པཧཱིནཱབྷིནནྡནཱདཱིནཾ པན སབྦཐཱ ནཏྠཱིཏི ‘‘ནཏྠི ཙེ’’ཏི ཝུཏྟཾ. ཨེསེཝནྟོཏི ཨབྷིནནྡནཱདཱིནཾ ནཏྠིབྷཱཝཀརོ མགྒོ ཏཔྤཊིཔྤསྶདྡྷིབྷཱུཏཾ ཕལཾ ཝཱ རཱགཱནུསཡཱདཱིནཾ ཨནྟོ ཨཝསཱནཾ, ཨཔྤཝཏྟཱིཏི ཨཏྠོ.

ཛཱནཾ ཛཱནཱཏཱིཏི སབྦཉྙུཏཉྙཱཎེན ཛཱནིཏབྦཾ ཛཱནཱཏི. ན ཧི པདེསཉཱཎཝཱ ཛཱནིཏབྦཾ སབྦཾ ཛཱནཱཏཱིཏི. པསྶཾ པསྶཏཱིཏི དིབྦཙཀྑུཔཉྙཱཙཀྑུདྷམྨཙཀྑུབུདྡྷཙཀྑུསམནྟཙཀྑུསངྑཱཏེཧི པཉྩཧི ཙཀྑཱུཧི པསྶིཏབྦཾ པསྶཏི. ཨཐ ཝཱ ཛཱནཾ ཛཱནཱཏཱིཏི ཡཐཱ ཨཉྙེ སཝིཔལླཱསཱ ཀཱམརཱུཔཔརིཉྙཱཝཱདིནོ ཛཱནནྟཱཔི ཝིཔལླཱསཝསེན ཛཱནནྟི, ན ཨེཝཾ བྷགཝཱ ¶ , བྷགཝཱ པན པཧཱིནཝིཔལླཱསཏྟཱ ཛཱནནྟོ ཛཱནཱཏིཡེཝ, དིཊྛིདསྶནསྶ ཙ ཨབྷཱཝཱ པསྶནྟོ པསྶཏིཡེཝཱཏི ཨཏྠོ. ཙཀྑུབྷཱུཏོཏི པཉྙཱཙཀྑུམཡཏྟཱ སཏྟེསུ ཙ ཏདུཔྤཱདནཏོ ལོཀསྶ ཙཀྑུབྷཱུཏོ. ཉཱཎབྷཱུཏོཏི ཨེཏསྶ ཙ ཨེཝམེཝ ཨཏྠོ དཊྛབྦོ. དྷམྨཱ བོདྷིཔཀྑིཡཱ. བྲཧྨཱ མགྒོ, ཏེཧི ཨུཔྤནྣཏྟཱ ལོཀསྶ ཙ ཏདུཔྤཱདནཏོ ཏབྦྷཱུཏོ. ཝཏྟཱཏི ཙཏུསཙྩདྷམྨེ ཝདཏཱིཏི ཝཏྟཱ. པཝཏྟཱཏི ཙིརཾ སཙྩཔྤཊིཝེདྷཾ པཝཏྟེནྟོ ཝདཏཱིཏི པཝཏྟཱ. ཨཏྠསྶ ནིནྣེཏཱཏི ཨཏྠཾ ཨུདྡྷརིཏྭཱ དསྶེཏཱ, པརམཏྠཾ ཝཱ ནིབྦཱནཾ པཱཔཡིཏཱ. ཨམཏསྶ དཱཏཱཏི ཨམཏསཙྪིཀིརིཡཾ སཏྟེསུ ཨུཔྤཱདེནྟོ ཨམཏཾ དདཱཏཱིཏི ཨམཏསྶ དཱཏཱ. བོདྷིཔཀྑིཡདྷམྨཱནཾ ཏདཱཡཏྟབྷཱཝཏོ དྷམྨསྶཱམཱི. སུཝཎྞཱལིངྒནྟི སུཝཎྞམཡཾ ཨཱལིངྒཾ ཁུདྡཀམུདིངྒཾ. སུཔུཔྥིཏསཏཔཏྟཔདུམམིཝ སསྶིརིཀཾ སསོབྷཾ སུཔུཔྥིཏསཏཔཏྟསསྶིརིཀཾ.

ཨནུམོདིཏཀཱལཏོ པཊྛཱཡ…པེ… བུདྡྷབྷཱསིཏཾ ནཱམ ཛཱཏནྟི ཨེཏེན ཨནུམོདནཱ བུདྡྷབྷཱསིཏབྷཱཝསྶ ཀཱརཎནྟི ཨཡམཏྠོ ཝུཏྟོ ཝིཡ དིསྶཏི, ཨེཝཉྩ སཏི ཀཐཱཝཏྠུསྶ བུདྡྷབྷཱསིཏབྷཱཝོ ན སིཡཱ ཨནནུམོདིཏཏྟཱ, ཏསྨཱ ཨེཝམེཏྠ ཨཏྠོ དཊྛབྦོ – ‘‘མཧཱཀཙྩཱཡནོ ཨེཝཾ ཝིབྷཛིསྶཏཱི’’ཏི དིསྭཱ བྷགཝཱ མཱཏིཀཾ ནིཀྑིཔིཏྭཱ ཝིཧཱརཾ པཝིཊྛོ, ཏཐེཝ ཙ ཐེརོ བྷགཝཏཱ དིནྣནཡེན ཋཔིཏམཱཏིཀཱཡ ཝིབྷཛཱིཏི བུདྡྷབྷཱསིཏཾ ནཱམ ཛཱཏཾ, ཏཾ པན ཨནུམོདནཱཡ པཱཀཊཾ ཛཱཏནྟི ཨེཏམཏྠཾ སནྡྷཱཡ ‘‘ཨེཝཾ སཏྠཱརཱ…པེ… ནཱམ ཛཱཏ’’ནྟི ཝུཏྟནྟི.

ཨིདཱནི ¶ པཱལི༹ཡཱ སནྣིཝེསཾ དསྶེཏུཾ ‘‘ཏཏྠ དྷམྨསངྒཎཱིཔཀརཎེ’’ཏིཨཱདིམཱཧ. ཀཱམཱཝཙརཀུསལཏོ ཨཊྛཱཏི ཀཱམཱཝཙརཀུསལེ ཙཏྟཱརོ ཁནྡྷེ གཧེཏྭཱ ཏཏོ ཨཊྛ ཙིཏྟཱནི ཨུདྡྷརཏི. པཋམཱ ཝིབྷཏྟཱིཏིཔི ཝདནྟི. ཨེཀཱུནནཝུཏི ཙིཏྟཱནཱིཏི ཡཏྠ ཨེཏཱནི ཙིཏྟཱནི ཝིབྷཏྟཱནི, ཏེ པཱལི༹པྤདེསཱ ‘‘ཨེཀཱུནནཝུཏི ཙིཏྟཱནཱི’’ཏི ཝུཏྟཱ. ཏེསཉྩ སམུདཱཡོ ཙིཏྟཝིབྷཏྟི, ཏསྨཱ ཨུཔཔནྣམེཏཾ ‘‘ཨེཀཱུནནཝུཏི ཙིཏྟཱནི ཙིཏྟཝིབྷཏྟཱི’’ཏི. མཱཏིཀཉྩ ཨུདྡིསིཏྭཱ ཏཏྠ ཨེཀེཀཾ པདཾ ཨུདྡྷརིཏྭཱ ཡསྨཱ ཙིཏྟཱནི ཝིབྷཏྟཱནི, ཏསྨཱ མཱཏིཀཱཔི ཙིཏྟཝིབྷཏྟིཨནྟོགདྷཱཡེཝཱཏི ཙིཏྟུཔྤཱདཀཎྜཾ མཱཏིཀཱཔདབྷཱཛནཱིཡཝསེན དུཝིདྷནྟི ཨིདམྤི ཝཙནཾ ཡུཛྫཏི.

མཱུལཏོཏི ‘‘ཏཱིཎི ཀུསལམཱུལཱནཱི’’ཏིཨཱདིནཱ (དྷ. ས. ༩༨༥) ཀུསལཱདཱིནཾ མཱུལཝསེན སངྑིཔིཏྭཱ ཝཙནཾ. ‘‘ཝེདནཱཀྑནྡྷོ’’ཏིཨཱདིནཱ ཁནྡྷཏོ. ‘‘ཀཱཡཀམྨ’’ནྟིཨཱདིནཱ དྭཱརཏོ. ‘‘སུཁབྷཱུམིཡཾ ཀཱམཱཝཙརེ’’ཏིཨཱདིནཱ (དྷ. ས. ༩༨༨) བྷཱུམིཏོ. ཨཏྠོཏི ཧེཏུཕལཾ. དྷམྨོཏི ཧེཏུ ¶ . ‘‘ཏཱིཎི ཀུསལམཱུལཱནི ཏཱིཎི ཨཀུསལམཱུལཱནཱི’’ཏིཨཱདིནཱ (དྷ. ས. ༩༨༥-༩༨༦) ཧེཏུཝསེན སངྒཧོ དྷམྨཏོ ནིཀྑེཔོ. ‘‘ཏཾསམྤཡུཏྟོ, ཏཾསམུཊྛཱནཱ ཏདེཀཊྛཱ ཙ ཀིལེསཱ’’ཏིཨཱདིནཱ (དྷ. ས. ༩༨༥-༩༨༦) ཧེཏུཕལཝསེན སངྒཧོ ཨཏྠཏོ ནིཀྑེཔོ. ཨཐ ཝཱ དྷམྨོཏི བྷཱསིཏོ. ཨཏྠོཏི བྷཱསིཏཏྠོ. ‘‘ཏཡོ ཀུསལཧེཏཱུ’’ཏི (དྷ. ས. ༡༠༥༩) དྷམྨོ. ‘‘ཏཏྠ ཀཏམེ ཏཡོ ཀུསལཧེཏཱུ ཨལོབྷོ’’ཏིཨཱདི (དྷ. ས. ༡༠༦༠) ཨཏྠོ, སོ ཙ དྷམྨོ. ‘‘ཏཏྠ ཀཏམོ ཨལོབྷོ’’ཏིཨཱདི (དྷ. ས. ༡༠༦༡) ཨཏྠོཏི ཨེཝཾ ཨཏྠདྷམྨཝསེན ནིཀྑེཔོ ཝེདིཏབྦོ. ནཱམཏོཏི ‘‘ཏཱིཎི ཀུསལམཱུལཱནཱི’’ཏི ཝུཏྟདྷམྨཱནཾ ཨལོབྷོཏིཨཱདིནཱམཝསེན. ལིངྒཏོཏི ཨུདྡིཊྛསྶ ཨེཀསྶེཝ དྷམྨསྶ ‘‘ཨལོབྷོ ཨལུབྦྷནཱ ཨལུབྦྷིཏཏྟ’’ནྟི (དྷ. ས. ༡༠༦༡) པུརིསཱདིལིངྒཝསེན ནིཀྑེཔོ.

གཎནཙཱརནྟི གཎནཔྤཝཏྟིཾ. སམཱནེནྟཱིཏི སམཱནཾ ཀརོནྟི པཱུརེནྟི, ཏཐཱ སམཱནེཏབྦནྟི ཨེཏྠཱཔི. ‘‘ཝིཛྫཱབྷཱགིནོ ཨཝིཛྫཱབྷཱགིནོ’’ཏི (དྷ. ས. དུཀམཱཏིཀཱ ༡༠༡) ཨེཝམཱདཱིསུ ཨེཏྠ ཝིཉྙཱཏེསུ ཨཱབྷིདྷམྨིཀཏྠེརཱ སུཏྟནྟཾ སུཎནྟཱ ཙིནྟེནྟཱ ཙ སུཏྟནྟེསུ ‘‘ཝིཛྫཱབྷཱགིནོ’’ཏིཨཱདཱིསུ ཨཱགཏེསུ ཨཏྠསྶ ཝིཉྙཱཏཏྟཱ ན ཀིལམནྟཱིཏི ཨེཏམཏྠཾ སནྡྷཱཡ ཝུཏྟཾ ‘‘ཨཱབྷིདྷམྨིཀཏྠེརཱནཾ…པེ… ཨཀིལམཏྠཾ ཋཔིཏཱ’’ཏི.

ཨནམཏགྒོཏི ¶ ཨཉྙཱཏགྒོ. ཁནྡྷནྟརནྟི ཁནྡྷནཱནཏྟཾ, ཁནྡྷམེཝ ཝཱ. གཧེཏུཾ ཨསཀྐུཎེཡྻཏྟཱ སཎྷཾ, སུཁུམཱཡ པཉྙཱཡ གཧེཏབྦཏོ སུཁུམཉྩ དྷམྨཾ སཎྷསུཁུམདྷམྨཾ. བལཝཏཱ ཉཱཎཝེགེན པཝཏྟཏྟཱ བལཝཏོ ཉཱཎཝེགསྶ ནིམིཏྟབྷཱཝཏོ ཙ བལཝཾ. གམྦྷཱིརམེཝ གམྦྷཱིརགཏཾ, གམྦྷཱིརཱནི ཝཱ གཏཱནི གམནཱནི ཨེཏསྶ སནྟཱིཏི གམྦྷཱིརགཏཾ. ཡཐཱནུཔུབྦནྟི ཡཐཱནུཔུབྦེན. ནིཁིལེནཱཏི ནིརཝསེསེན དེསིཏཾ, པཉྩཁིལརཧིཏེན ཝཱ བྷགཝཏཱ དེསིཏཾ. རཱུཔགཏཾཝཱཏི ཧཏྠགཏཾ རཱུཔཾ ཝིཡ ཙཀྑུནཱ. ‘‘པཊིཝེདྷཉཱཎེན སམནྟཔཊྛཱནཾ ཡོ པསྶཏི, སོ ཨཏྠེཝ, ནོ ནཏྠཱི’’ཏི ཨཏྟཱནཾ སནྡྷཱཡ ཐེརོ ཝདཏཱིཏི.

ཁུདྡཀཝཏྠུཝིབྷངྒེ ཨཱགཏེསུ ཨེཀཱདྷིཀེསུ ཨཊྛསུ ཀིལེསསཏེསུ ཨཊྛསཏཏཎྷཱཝིཙརིཏཱནི ཨཔནེཏྭཱ སེསཱ དྭཱསཊྛི དིཊྛིཡོ ཙ ཨུཔྤནྣཱནུཔྤནྣབྷཱཝེན དིགུཎིཏཱནི དིཡཌྜྷཀིལེསསཧསྶཱནི དསཱདྷིཀཱནི ཧོནྟི, ཨཔྤཀཾ པན ཨཱུནམདྷིཀཾ ཝཱ ན གཎནཱུཔགཾ ཧོཏཱིཏི ‘‘དིཡཌྜྷཀིལེསསཧསྶ’’ནྟི ཝུཏྟཾ. ཨིཏརེསཾ ཨཏཱིཏཱདིབྷཱཝཱམསནཱ ཨགྒཧཎཾ ཁེཔནེ དཊྛབྦཾ.

མེཙཀཔཊཱཏི ¶ ནཱིལནིབྷཱ པཊཱ. ཙིཏྟསམུཊྛཱནཱ ཝཎྞདྷཱཏཱུཏི ཙིཏྟཔཙྩཡཨུཏུསམུཊྛཱནཱ ཝཎྞདྷཱཏཱུཏི ཨཏྠོ གཧེཏབྦོ. ཀསྨཱ? ན ཧི ཙིཏྟསམུཊྛཱནཾ རཱུཔཾ བཧི ནིགཙྪཏཱིཏི, ཙིཏྟསམུཊྛཱནརཱུཔཔརམྤརཱཡ ཨཱགཏཏྟཱ པན ཨེཝཾ ཝུཏྟཾ. ཨཐ ཝཱ ཙིཏྟསམུཊྛཱནཱ ཝཎྞདྷཱཏཱུཏི ཨེཏྠ པཙྩཡཨུཏུསདྡཱནཾ ལོཔཾ ཀཏྭཱ སོཡེཝ པུབྦེ ཝུཏྟོ ཨཏྠོ སུཝཎྞཏཱ སུསྶརཏཱ ཝིཡ. ཨེཏྠ ཧི ‘‘སུསྶརཏཱ’’ཏི ཨུཔཱདིནྣཀཱདྷིཀཱརེ ཨཱགཏཾ, ན ཙ སདྡོ ཨུཔཱདིནྣཀོ ཨཏྠི, ཏསྨཱ ཨུཔཱདིནྣཀརཱུཔཨོཊྛཏཱལུཨཱདིནིསྶཡཏྟཱ ཨེཝཾ ཝུཏྟནྟི, ཨེཝམེཏྠཱཔི ཙིཏྟཔཙྩཡཨུཏུསམུཊྛཱནཾ སནྡྷཱཡ ‘‘ཙིཏྟསམུཊྛཱནཱ ཝཎྞདྷཱཏཱུ’’ཏི ཝདཏི.

ཀཱཡསཀྑིནྟི པཙྩཀྑཾ. དནྟཱཝརཎནྟི ཨོཊྛདྭཡཾ. མུཁཱདཱནནྟི མུཁཝིཝརཾ. སིལིཊྛནྟི སཾགཏཾ སུསཎྛིཏཾ. སརེ ནིམིཏྟཾ གཧེཏྭཱཏི ‘‘དྷམྨོ ཨེསོ ཝུཙྩཏཱི’’ཏི དྷམྨསྶརཝསེན ནིམིཏྟཾ གཧེཏྭཱ, ན ཀིལེསཱནུབྱཉྫནཝསེན. ཨེཀཔྤཧཱརེནཱཏི ཨེཏྠ པཧཱརོཏི དིཝསསྶ ཏཏིཡོ བྷཱགོ ཝུཙྩཏི. ཨེཝཾ སནྟེཏི པུབྦེ ཝུཏྟམགྒཧེཏྭཱ ཝཱཙནཱམགྒསྶ ཐེརཔྤབྷཝཏྟཝཙནམེཝ གཧེཏྭཱ ཏེན པུརིམཝཙནཉྩ པཊིཀྑིཔནྟོ ཙོདེཏི.

ཏེནེཏམེཏསྶཱཏི ¶ ཝིནཡསྶ. ཨཏྟཏྠཔརཏྠཱདིབྷེདེཏི ཡོ ཏཾ སུཏྟཾ སཛ྄ཛྷཱཡཏི སུཎཱཏི ཝཱཙེཏི ཙིནྟེཏི དེསེཏི, སུཏྟེན སངྒཧིཏོ སཱིལཱདིཨཏྠོ ཏསྶཔི ཧོཏི, ཏེན པརསྶ སཱདྷེཏབྦཏོ པརསྶཔི ཧོཏཱིཏི ཏདུབྷཡཾ ཏཾ སུཏྟཾ སཱུཙེཏི དཱིཔེཏི. ཏཐཱ དིཊྛདྷམྨིཀསམྤརཱཡིཀཏྠེ ལོཀིཡལོཀུཏྟརཏྠེཏི ཨེཝམཱདིབྷེདེ ཨཏྠེ ཨཱདིསདྡེན སངྒཎྷཱཏི. ཨཏྠསདྡོ ཙཱཡཾ ཧིཏཔརིཡཱཡཝཙནཾ, ན བྷཱསིཏཏྠཝཙནཾ. ཡདི སིཡཱ, སུཏྟཾ ཨཏྟནོཔི བྷཱསིཏཏྠཾ སཱུཙེཏི པརསུཏྟསྶཔཱིཏི ཨཡམཏྠོ སིཡཱ, སུཏྟེན ཙ ཡོ ཨཏྠོ པཀཱསིཏོ, སོ ཏསྶེཝ ཧོཏཱིཏི ན ཏེན པརཏྠོ སཱུཙིཏོ ཧོཏི, ཏེན ཙ སཱུཙེཏབྦསྶ པརཏྠསྶ ནིཝཏྟེཏབྦསྶ ཨབྷཱཝཱ ཨཏྟགྒཧཎཾ ན ཀཏྟབྦཾ, ཨཏྟཏྠཔརཏྠཝིནིམུཏྟསྶ བྷཱསིཏཏྠསྶ ཨབྷཱཝཱ ཨཱདིགྒཧཎཉྩ ན ཀཏྟབྦཾ, ཏསྨཱ ཡཐཱཝུཏྟསྶ ཨཏྠསྶ སུཏྟེ ཨསམྦྷཝཏོ སུཏྟཱདྷཱརསྶ པུགྒལསྶ ཝསེན ཨཏྟཏྠཔརཏྠཱ ཝུཏྟཱ.

ཨཐ ཝཱ སུཏྟཾ ཨནཔེཀྑིཏྭཱ ཡེ ཨཏྟཏྠཱདཡོཔི ཨཏྠཔྤབྷེདཱ ཝུཏྟཱ ནིདྡེསེ (མཧཱནི. ༦༩; ཙཱུལ༹ནི. མོགྷརཱཛམཱཎཝཔུཙྪཱནིདྡེས ༨༥) ‘‘ཨཏྟཏྠོ པརཏྠོ ཨུབྷཡཏྠོ དིཊྛདྷམྨིཀོ ཨཏྠོ སམྤརཱཡིཀོ ཨཏྠོ ཨུཏྟཱནོ ཨཏྠོ གམྦྷཱིརོ ཨཏྠོ གུལ༹ྷོ ཨཏྠོ པཊིཙྪནྣོ ཨཏྠོ ནེཡྻོ ཨཏྠོ ¶ ནཱིཏོ ཨཏྠོ ཨནཝཛྫོ ཨཏྠོ ནིཀྐིལེསོ ཨཏྠོ ཝོདཱནོ ཨཏྠོ པརམཏྠོ ཨཏྠོ’’ཏི, ཏེ སུཏྟཾ སཱུཙེཏཱིཏི ཨཏྠོ. ཨཐ ཝཱ ‘‘ཨཏྟནཱ ཙ ཨཔྤིཙྪོ ཧོཏཱི’’ཏི ཨཏྟཏྠཾ, ‘‘ཨཔྤིཙྪཀཐཉྩ པརེསཾ ཀཏྟཱ ཧོཏཱི’’ཏི པརཏྠཾ སཱུཙེཏཱིཏི. ཨེཝཾ ‘‘ཨཏྟནཱ ཙ པཱཎཱཏིཔཱཏཱ པཊིཝིརཏོ ཧོཏཱི’’ཏིཨཱདིསུཏྟཱནི (ཨ. ནི. ༤.༩༩) ཡོཛེཏབྦཱནི. ཝིནཡཱབྷིདྷམྨེཧི ཙ ཝིསེསེཏྭཱ སུཏྟསདྡསྶ ཨཏྠོ ཝཏྟབྦོ, ཏསྨཱ ཝེནེཡྻཛ྄ཛྷཱསཡཝསཔྤཝཏྟཱཡ དེསནཱཡ ཨཏྟཧིཏཔརཧིཏཱདཱིནི སཱཏིསཡཾ པཀཱསིཏཱནི ཧོནྟི, ན ཨཱཎཱདྷམྨསབྷཱཝཝསཔྤཝཏྟཱཡཱཏི ཨིདམེཝ ‘‘ཨཏྠཱནཾ སཱུཙནཏོ སུཏྟ’’ནྟི ཝུཏྟཾ.

སུཏྟེ ཙ ཨཱཎཱདྷམྨསབྷཱཝཱ ཝེནེཡྻཛ྄ཛྷཱསཡཾ ཨནུཝཏྟནྟི, ན ཝིནཡཱབྷིདྷམྨེསུ ཝིཡ ཝེནེཡྻཛ྄ཛྷཱསཡོ ཨཱཎཱདྷམྨསབྷཱཝེ ཨནུཝཏྟཏི, ཏསྨཱ ཝེནེཡྻཱནཾ ཨེཀནྟཧིཏཔཊིལཱབྷསཾཝཏྟནིཀཱ སུཏྟནྟདེསནཱ ཧོཏཱིཏི ‘‘སུཝུཏྟཱ ཙེཏྠ ཨཏྠཱ’’ཏིཨཱདི ཝུཏྟཾ. པསཝཏཱིཏི ཕལཏི ¶ . ‘‘སུཏྟཱཎཱ’’ཏི ཨེཏསྶ ཨཏྠཾ པཀཱསེཏུཾ ‘‘སུཊྛུ ཙ ནེ ཏཱཡཏཱི’’ཏི ཝུཏྟཾ. ཨཏྟཏྠཔརཏྠཱདིཝིདྷཱནེསུ ཙ སུཏྟསྶ པམཱཎབྷཱཝོ ཏེསཉྩ སངྒཱཧཀཏྟཾ ཡོཛེཏབྦཾ, ཏདཏྠཔྤཀཱསནེ པདྷཱནཏྟཱ སུཏྟསྶ ཨིཏརེཧི ཝིསེསནཉྩ. ཨེཏནྟི ‘‘ཨཏྠཱནཾ སཱུཙནཏོ’’ཏིཨཱདིཀཾ ཨཏྠཝཙནཾ. ཨེཏསྶཱཏི སུཏྟསྶ.

ཨབྷིཀྐམནྟཱིཏི ཨེཏྠ ཨབྷི-སདྡོ ཀམནསྶ ཝུདྡྷིབྷཱཝཾ ཨཏིརེཀཏྟཾ དཱིཔེཏི. ཨབྷིཀྐནྟེནཱཏི ཙ ཨེཏྠ ཀནྟིཡཱ ཨདྷིཀཏྟཾ ཝིསེསབྷཱཝནྟི ཡུཏྟཾ ཀིརིཡཱཝིསེསཀཏྟཱ ཨུཔསགྒསྶ. ཨབྷིཉྙཱཏཱ, ཨབྷིརཱཛཱ, ཨབྷིཝིནཡེཏི ཨེཏྠ ལཀྑཎཔཱུཛིཏཔརིཙྪིནྣེསུ རཏྟིཨཱདཱིསུ ཨབྷི-སདྡོ ཝཏྟཏཱིཏི ཀཐམེཏཾ ཡུཛྫེཡྻཱཏི? ལཀྑཎཀརཎཉཱཎཔཱུཛནཔརིཙྪེདཀིརིཡཱདཱིཔནཏོ ཏཱཧི ཙ ཀིརིཡཱཧི རཏྟིརཱཛཝིནཡཱནཾ ཡུཏྟཏྟཱ. བྷཱཝནཱཕརཎཝུདྡྷཱིཧི ཝུདྡྷིམནྟོ. ཨཱརམྨཎཱདཱིཧཱིཏི ཨཱརམྨཎསམྤཡུཏྟཀམྨདྭཱརཔཊིཔདཱདཱིཧི. ཨཝིསིཊྛནྟི ཨཉྙམཉྙཝིསིཊྛེསུ ཝིནཡསུཏྟནྟཱབྷིདྷམྨེསུ ཨཝིསིཊྛཾ སམཱནཾ པིཊཀསདྡནྟི ཨཏྠོ. ཡཐཱཝུཏྟེནེཝཱཏི ‘‘ཨེཝཾ དུཝིདྷཏྠེནཱ’’ཏིཨཱདིནཱ ནཡེན.

ཀཐེཏབྦཱནཾ ཨཏྠཱནཾ དེསཀཱཡཏྟེན ཨཱཎཱདིཝིདྷིནཱ ཨཏིསཛྫནཾ པབོདྷནཾ དེསནཱ. སཱསིཏབྦཔུགྒལགཏེན ཡཐཱཔརཱདྷཱདིནཱ སཱསིཏབྦབྷཱཝེན ཨནུསཱསནཾ ཝིནཡནཾ སཱསནཾ. ཀཐེཏབྦསྶ སཾཝརཱསཾཝརཱདིནོ ཨཏྠསྶ ཀཐནཾ ཝཙནཔཊིབདྡྷཀརཎཾ ཀཐཱ. བྷེད-སདྡོ ཝིསུཾ ཝིསུཾ ཡོཛེཏབྦོ ‘‘དེསནཱབྷེདཾ སཱསནབྷེདཾ ཀཐཱབྷེདཉྩ ཡཐཱརཧཾ པརིདཱིཔཡེ’’ཏི. བྷེདནྟི ནཱནཏྟཾ, ནཱནཱཀརཎནྟི ¶ ཨཏྠོ. སིཀྑཱ ཙ པཧཱནཱནི ཙ གམྦྷཱིརབྷཱཝོ ཙ སིཀྑཱཔཧཱནགམྦྷཱིརབྷཱཝཾ, ཏཉྩ པརིདཱིཔཡེ. ཡནྟི པརིཡཏྟིཨཱདིཾ. ཡཐཱཏི ཨུཔཱརམྦྷཱདིཧེཏུ པརིཡཱཔུཎནཱདིཔྤཀཱརེཧི.

ཏཱིསུཔི ཙེཏེསུ ཨེཏེ དྷམྨཏྠདེསནཱཔཊིཝེདྷཱཏི ཨེཏྠ ཏནྟིཨཏྠོ ཏནྟིདེསནཱ ཏནྟིཨཏྠཔཊིཝེདྷོ ཙ ཏནྟིཝིསཡཱ ཧོནྟཱིཏི ཝིནཡཔིཊཀཱདཱིནཾ ཨཏྠདེསནཱཔཊིཝེདྷཱདྷཱརབྷཱཝོ ཡུཏྟོ, པིཊཀཱནི པན ཏནྟིཡོཡེཝཱཏི དྷམྨཱདྷཱརབྷཱཝོ ཀཐཾ ཡུཛྫེཡྻཱཏི? ཏནྟིསམུདཱཡསྶ ཨཝཡཝཏནྟིཡཱ ཨཱདྷཱརབྷཱཝཏོ, དྷམྨཱདཱིནཉྩ དུཀྑོགཱཧབྷཱཝཏོ ཏེཧི ཝིནཡཱདཡོ གམྦྷཱིརཱཏི ཝིནཡཱདཱིནཉྩ ཙཏུབྦིདྷོ གམྦྷཱིརབྷཱཝོ ཝུཏྟོ, ཏསྨཱ ‘‘དྷམྨཱདཡོ ཨེཝ དུཀྑོགཱཧཏྟཱ གམྦྷཱིརཱ, ན ¶ ཝིནཡཱདཡོ’’ཏི ན ཙོདེཏབྦམེཏཾ. ཏཏྠ པཊིཝེདྷསྶ དུཀྐརབྷཱཝཏོ དྷམྨཏྠཱནཾ, དེསནཱཉཱཎསྶ དུཀྐརབྷཱཝཏོ དེསནཱཡ ཙ དུཀྑོགཱཧབྷཱཝོ ཝེདིཏབྦོ. པཊིཝེདྷསྶ པན ཨུཔྤཱདེཏུཾ ཨསཀྐུཎེཡྻཏྟཱ ཏབྦིསཡཉཱཎུཔྤཏྟིཡཱ ཙ དུཀྐརབྷཱཝཏོ དུཀྑོགཱཧཏཱ ཝེདིཏབྦཱ.

ཧེཏུམྷི ཉཱཎཾ དྷམྨཔཊིསམྦྷིདཱཏི ཨེཏེན ཝཙནཏྠེན དྷམྨསྶ ཧེཏུབྷཱཝོ ཀཐཾ ཉཱཏབྦོཏི? ‘‘དྷམྨཔཊིསམྦྷིདཱ’’ཏི ཨེཏསྶ སམཱསཔདསྶ ཨཝཡཝཔདཏྠཾ དསྶེནྟེན ‘‘ཧེཏུམྷི ཉཱཎ’’ནྟི ཝུཏྟཏྟཱ. ‘‘དྷམྨེ པཊིསམྦྷིདཱ’’ཏི ཨེཏྠ ཧི ‘‘དྷམྨེ’’ཏི ཨེཏསྶ ཨཏྠཾ དསྶེནྟེན ‘‘ཧེཏུམྷཱི’’ཏི ཝུཏྟཾ, ‘‘པཊིསམྦྷིདཱ’’ཏི ཨེཏསྶ ཙ ཨཏྠཾ དསྶེནྟེན ‘‘ཉཱཎ’’ནྟི, ཏསྨཱ ཧེཏུདྷམྨསདྡཱ ཨེཀཏྠཱ ཉཱཎཔཊིསམྦྷིདཱསདྡཱ ཙཱཏི ཨིམམཏྠཾ དསྶེནྟེན སཱདྷིཏོ དྷམྨསྶ ཧེཏུབྷཱཝོ. ཨཏྠསྶ ཧེཏུཕལབྷཱཝོ ཙ ཨེཝམེཝ དཊྛབྦོ. ཡཐཱདྷམྨནྟི ཨེཏྠ དྷམྨ-སདྡོ ཧེཏུཾ ཧེཏུཕལཉྩ སབྦཾ གཎྷཱཏི. སབྷཱཝཝཱཙཀོ ཧེས, ན པརིཡཏྟིཧེཏུབྷཱཝཝཱཙཀོ, ཏསྨཱ ཡཐཱདྷམྨནྟི ཡོ ཡོ ཨཝིཛྫཱསངྑཱརཱདིདྷམྨོ, ཏསྨིཾ ཏསྨིནྟི ཨཏྠོ. དྷམྨཱབྷིལཱཔོཏི ཨཏྠབྱཉྫནཀོ ཨཝིཔརཱིཏཱབྷིལཱཔོ. ཨེཏེན ‘‘ཏཏྲ དྷམྨནིརུཏྟཱབྷིལཱཔེ ཉཱཎཾ ནིརུཏྟིཔཊིསམྦྷིདཱ’’ཏི (ཝིབྷ. ༧༡༨-༧༢༠) ཨེཏྠ ཝུཏྟདྷམྨནིརུཏྟིཾ དསྶེཏི. ཨནུལོམཱདིཝསེན ཝཱ ཀཐནནྟི ཨེཏེན ཏསྶཱ དྷམྨནིརུཏྟིཡཱ ཨབྷིལཱཔཾ ཀཐནཾ ཏསྶ ཝཙནསྶ པཝཏྟནཾ དསྶེཏི. ཨདྷིཔྤཱཡོཏི ཨེཏེན ‘‘དེསནཱཏི པཉྙཏྟཱི’’ཏི ཨེཏཾ ཝཙནཾ དྷམྨནིརུཏྟཱབྷིལཱཔཾ སནྡྷཱཡ ཝུཏྟཾ, ན ཏབྦིནིམུཏྟཾ པཉྙཏྟིཾ སནྡྷཱཡཱཏི དསྶེཏི.

སོ ཙ ལོཀིཡལོཀུཏྟརོཏི ཨེཝཾ ཝུཏྟཾ ཨབྷིསམཡཾ ཡེན པཀཱརེན ཨབྷིསམེཏི, ཡཉྩ ཨབྷིསམེཏི, ཡོ ཙ ཏསྶ སབྷཱཝོ, ཏེཧི པཱཀཊཾ ཀཱཏུཾ ‘‘ཝིསཡཏོ ཨསམྨོཧཏོ ཙ ཨཏྠཱདིཨནུརཱུཔཾ ¶ དྷམྨཱདཱིསུ ཨཝབོདྷོ’’ཏི ཨཱཧ. ཏཏྠ ཧི ཝིསཡཏོ ཨཏྠཱདིཨནུརཱུཔཾ དྷམྨཱདཱིསུ ཨཝབོདྷོ ཨཝིཛྫཱདིདྷམྨསངྑཱརཱདིཨཏྠཏདུབྷཡཔཉྙཱཔནཱརམྨཎོ ལོཀིཡོ ཨབྷིསམཡོ. ཨསམྨོཧཏོ ཨཏྠཱདིཨནུརཱུཔཾ དྷམྨཱདཱིསུ ཨཝབོདྷོ ནིབྦཱནཱརམྨཎོ མགྒསམྤཡུཏྟོ ཡཐཱཝུཏྟདྷམྨཏྠཔཉྙཏྟཱིསུ སམྨོཧཝིདྡྷཾསནོ ལོཀུཏྟརོ ཨབྷིསམཡོཏི. ཨབྷིསམཡཏོ ཨཉྙམྤི པཊིཝེདྷཏྠཾ དསྶེཏུཾ ‘‘ཏེསཾ ཏེསཾ ཝཱ’’ཏིཨཱདིམཱཧ. ‘‘པཊིཝེདྷནཾ ¶ པཊིཝེདྷོ’’ཏི ཨིམིནཱ ཧི ཝཙནཏྠེན ཨབྷིསམཡོ, པཊིཝིཛ྄ཛྷཱིཡཏཱིཏི པཊིཝེདྷོཏི ཨིམིནཱ ཏཾཏཾརཱུཔཱདིདྷམྨཱནཾ ཨཝིཔརཱིཏསབྷཱཝོ ཙ པཊིཝེདྷོཏི ཡུཛྫཏི.

ཡཐཱཝུཏྟེཧི དྷམྨཱདཱིཧི པིཊཀཱནཾ གམྦྷཱིརབྷཱཝཾ དསྶེཏུཾ ‘‘ཨིདཱནི ཡསྨཱ ཨེཏེསུ པིཊཀེསཱུ’’ཏིཨཱདིམཱཧ. ཡོ ཙེཏྠཱཏི ཨེཏེསུ ཏཾཏཾཔིཊཀགཏེསུ དྷམྨཱདཱིསུ ཡོ པཊིཝེདྷོ ཨེཏེསུ ཙ པིཊཀེསུ ཏེསཾ ཏེསཾ དྷམྨཱནཾ ཡོ ཨཝིཔརཱིཏསབྷཱཝོཏི ཡོཛེཏབྦོ. དུཀྑོགཱཧཏཱ ཙ ཝུཏྟནཡེནེཝ ཝེདིཏབྦཱ. ཨཡཾ པནེཏྠ ཝིསེསོ ‘‘ཨཝིཔརཱིཏསབྷཱཝསངྑཱཏོ པཊིཝེདྷོ དུབྦིཉྙེཡྻཏཱཡ ཨེཝ དུཀྑོགཱཧོ’’ཏི.

ཡནྟི པརིཡཏྟིདུགྒཧཎཾ སནྡྷཱཡ ཝུཏྟཾ. ཨཏྠནྟི བྷཱསིཏཏྠཾ པཡོཛནཏྠཉྩ. ན ཨུཔཔརིཀྑནྟཱིཏི ན ཝིཙཱརེནྟི. ན ནིཛ྄ཛྷཱནཾ ཁམནྟཱིཏི ནིཛ྄ཛྷཱནཔཉྙཾ ན ཁམནྟི, ནིཛ྄ཛྷཱཡིཏྭཱ པཉྙཱཡ དིསྭཱ རོཙེཏྭཱ ན གཧེཏབྦཱ ཧོནྟཱིཏི ཨདྷིཔྤཱཡོ. ཨིཏཱིཏི ཨེཝཾ ཨེཏཱཡ པརིཡཏྟིཡཱ ཝཱདཔྤམོཀྑཱནིསཾསཱ ཨཏྟནོ ཨུཔརི པརེཧི ཨཱརོཔིཏཝཱདསྶ ནིགྒཧསྶ པམོཀྑཔྤཡོཛནཱ ཧུཏྭཱ དྷམྨཾ པརིཡཱཔུཎནྟི. ཝཱདཔྤམོཀྑོཏི ཝཱ ནིནྡཱཔམོཀྑོ. ཡསྶ ཙཏྠཱཡཱཏི ཡསྶ ཙ སཱིལཱདིཔརིཔཱུརཎསྶ ཨནུཔཱདཱཝིམོཀྑསྶ ཝཱ ཨཏྠཱཡ. དྷམྨཾ པརིཡཱཔུཎནྟཱིཏི ཉཱཡེན པརིཡཱཔུཎནྟཱིཏི ཨདྷིཔྤཱཡོ. ཨསྶཱཏི ཨསྶ དྷམྨསྶ. ནཱནུབྷོནྟཱིཏི ན ཝིནྡནྟི. ཏེསཾ ཏེ དྷམྨཱ དུགྒཧིཏཏྟཱ ཨུཔཱརམྦྷམཱནདཔྤམཀྑཔལཱསཱདིཧེཏུབྷཱཝེན དཱིགྷརཏྟཾ ཨཧིཏཱཡ དུཀྑཱཡ སཾཝཏྟནྟི. བྷཎྜཱགཱརེ ནིཡུཏྟོ བྷཎྜཱགཱརིཀོ, བྷཎྜཱགཱརིཀོ ཝིཡཱཏི བྷཎྜཱགཱརིཀོ, དྷམྨརཏནཱནུཔཱལཀོ. ཨཉྙཾ ཨཏྠཾ ཨནཔེཀྑིཏྭཱ བྷཎྜཱགཱརིཀསྶེཝ སཏོ པརིཡཏྟི བྷཎྜཱགཱརིཀཔརིཡཏྟི.

ཏཱསཾཡེཝཱཏི ཨཝདྷཱརཎཾ པཱཔུཎིཏབྦཱནཾ ཚལ༹བྷིཉྙཱཙཏུཔཊིསམྦྷིདཱནཾ ཝིནཡེ པབྷེདཝཙནཱབྷཱཝཾ སནྡྷཱཡ ཝུཏྟཾ. ཝེརཉྫཀཎྜེ ཧི ཏིསྶོ ཝིཛྫཱཝ ཝིབྷཏྟཱཏི. དུཏིཡེ ཏཱསཾཡེཝཱཏི ¶ ཨཝདྷཱརཎཾ ཙཏསྶོ པཊིསམྦྷིདཱ ཨཔེཀྑིཏྭཱ ཀཏཾ, ན ཏིསྶོ ཝིཛྫཱ. ཏཱ ཧི ཚསུ ཨབྷིཉྙཱསུ ཨནྟོགདྷཱཏི སུཏྟེ ཝིབྷཏྟཱཡེཝཱཏི. ཉཏྭཱ སངྒཡ྄ཧམཱནནྟི ཡོཛནཱ. ཏེསནྟི ཏེསཾ པིཊཀཱནཾ. སབྦམྤཱིཏི སབྦམྤི བུདྡྷཝཙནཾ.

ཨཏྠཱནུལོམནཱམཏོ ཨནུལོམིཀོ. ཨནུལོམིཀཏྟཾཡེཝ ཝིབྷཱཝེཏུཾ ‘‘ཀསྨཱ པནཱ’’ཏིཨཱདི ཝུཏྟཾ. ཨེཀནིཀཱཡམྤཱིཏི ཨེཀསམཱུཧམྤི. པོཎིཀཱ ¶ ཙ ཙིཀྑལླིཀཱ ཙ ཁཏྟིཡཱ, ཏེསཾ ནིཝཱསོ པོཎིཀནིཀཱཡོ ཙིཀྑལླིཀནིཀཱཡོ ཙ. ཨེཝཾ དྷམྨཀྑནྡྷཏོ ཙཏུརཱསཱིཏི དྷམྨཀྑནྡྷསཧསྶཱནཱིཏི བུདྡྷཝཙནཔིཊཀཱདཱིནི ནིཊྛཱཔེཏྭཱ ཨནེཀཙྪརིཡཔཱཏུབྷཱཝཔཊིམཎྜིཏཱཡ སངྒཱིཏིཡཱ པཋམབུདྡྷཝཙནཱདིཀོ སབྦོ ཝུཏྟཔྤབྷེདོ ཨཉྙོཔི ཨུདྡཱནསངྒཧཱདིབྷེདོ སངྒཱིཏིཡཱ ཉཱཡཏཱིཏི ཨེཏསྶ དསྶནཏྠཾ ‘‘ཨེཝམེཏཾ སབྦམྤཱི’’ཏིཨཱདི ཨཱརདྡྷཾ. ཨཡཾ ཨབྷིདྷམྨོ པིཊཀཏོ ཨབྷིདྷམྨཔིཊཀནྟིཨཱདིནཱ པིཊཀཱདིབྷཱཝདསྶནེནེཝ མཛ྄ཛྷིམབུདྡྷཝཙནབྷཱཝོ ཏཐཱགཏསྶ ཙ ཨཱདིཏོ ཨཱབྷིདྷམྨིཀབྷཱཝོ དསྶིཏོཏི ཝེདིཏབྦོ.

ཨེཏྠ སིཡཱ ‘‘ཡདི ཏཐཱགཏབྷཱསིཏབྷཱཝོ ཨབྷིདྷམྨསྶ སིདྡྷོ སིཡཱ, མཛ྄ཛྷིམབུདྡྷཝཙནབྷཱཝོ ཙ སིདྡྷོ བྷཝེཡྻ, སོ ཨེཝ ཙ ན སིདྡྷོ’’ཏི ཏསྶ ཝིནཡཱདཱིཧི བུདྡྷབྷཱསིཏབྷཱཝཾ སཱདྷེཏུཾ ཝཏྠུཾ དསྶེནྟོ ‘‘ཏཾ དྷཱརཡནྟེསུ བྷིཀྑཱུསཱུ’’ཏིཨཱདིམཱཧ. སབྦསཱམཡིཀཔརིསཱཡཱཏི སབྦནིཀཱཡིཀཔརིསཱཡ པཉྩཔི ནིཀཱཡེ པརིཡཱཔུཎནྟིཡཱ. ན ཨུགྒཧིཏནྟི སཀལསྶ ཝིནཡཔིཊཀསྶ ཨནུགྒཧིཏཏྟཱ ཨཱཧ. ཝིནཡམཏྟཾ ཨུགྒཧིཏནྟི ཝིབྷངྒདྭཡསྶ ཨུགྒཧིཏཏྟཱ ཨཱཧ. ཝིནཡཾ ཨཝིཝཎྞེཏུཀཱམཏཱཡ ‘‘ཨབྷིདྷམྨཾ པརིཡཱཔུཎསྶཱུ’’ཏི བྷཎནྟསྶ ཨནཱཔཏྟིཾ, ཨབྷིདྷམྨེ ཨནོཀཱསཀཏཾ བྷིཀྑུཾ པཉྷཾ པུཙྪནྟིཡཱ པཱཙིཏྟིཡཉྩ ཝདནྟེན བྷགཝཏཱ ཨབྷིདྷམྨསྶ བུདྡྷབྷཱསིཏབྷཱཝོ དཱིཔིཏོ བུདྡྷབྷཱསིཏེཧི སུཏྟཱདཱིཧིསཧ ཝཙནཏོ, བཱཧིརཀབྷཱསིཏེསུ ཙ ཨཱིདིསསྶ ཝཙནསྶ ཨབྷཱཝཱ.

ཨིཏོཔི བལཝཏརཾ ཨཱབྷིདྷམྨིཀསྶ སཱདྷུཀཱརདཱནེན ཝིཙིཀིཙྪཱཝིཙྪེདསྶ ཀཏཏྟཱ. ཀམྨཏོ ཨཉྙཾ ཀམྨཾ ཀམྨནྟརཾ, ཏཾ ཀཱམཱཝཙརཱདིཾ རཱུཔཱཝཙརཱདིབྷཱཝེན, ཀཎྷཝིཔཱཀཱདིཾ སུཀྐཝིཔཱཀཱདིབྷཱཝེན ཀཐེནྟོ ཨཱལོལེ༹ཏི.

ཛིནཙཀྐེཏི ཛིནསཱསནེ. ཝིསཾཝཱདེཏཱིཏི ཝིཔྤལམྦྷེཏི. བྷེདཀརཝཏྠཱུསུ ཨེཀསྨིནྟི ‘‘བྷཱསིཏཾ ¶ ལཔིཏཾ ཏཐཱགཏེན ཨབྷཱསིཏཾ ཨལཔིཏཾ ཏཐཱགཏེནཱཏི དཱིཔེཏཱི’’ཏི ཨེཀསྨིཾ སནྡིསྶཏི. ཨུཏྟརིཔི ཨེཝཾ ཝཏྟབྦོ…པེ… ན ཨཉྙེསཾ ཝིསཡོ…པེ… ནིདཱནཀིཙྩཾ ནཱམ ནཏྠཱིཏི ཨཔཱཀཊཱནཾ ཀཱལདེསདེསཀཔརིསཱནཾ པཱཀཊབྷཱཝཀརཎཏྠཾ ཏདུཔདེསསཧིཏེན ནིདཱནེན བྷཝིཏབྦཾ, ཨཉྙེསཾ ཨཝིསཡཏྟཱ དེསཀོ པཱཀཊོ, ཨོཀྐནྟིཀཱལཱདཱིནཾ པཱཀཊཏྟཱ ཀཱལོ ཙ, དེཝལོཀེ དེསིཏབྷཱཝསྶ པཱཀཊཏྟཱ དེསཔརིསཱ ཙ པཱཀཊཱཏི ཀིཾ ནིདཱནཀིཙྩཾ སིཡཱཏི.

ཡཏྠ ¶ ཁནྡྷཱདཡོ ནིཔྤདེསེན ཝིབྷཏྟཱ, སོ ཨབྷིདྷམྨོ ནཱམ, ཏསྨཱ ཏསྶ ནིདཱནེན ཁནྡྷཱདཱིནཾ ནིཔྤདེསཏོཔི པཊིཝིདྡྷཊྛཱནེན བྷཝིཏབྦནྟི ཨདྷིཔྤཱཡེན ཐེརོ ‘‘མཧཱབོདྷིནིདཱནོ ཨབྷིདྷམྨོ’’ཏི དསྶེཏི. ‘‘སོ ཨེཝཾ པཛཱནཱམི སམྨཱདིཊྛིཔཙྩཡཱཔི ཝེདཡིཏ’’ནྟིཨཱདིནཱ (སཾ. ནི. ༥.༡༢) ནཡེན པཙྩཡཱདཱིཧི ཝེདནཾ ཨུཔཔརིཀྑནྟོ ཁནྡྷཱདིཔདེསཱནཾ ཝེདནཱཀྑནྡྷཱདཱིནཾ ཝསེན ཝིཧཱསི. དྷམྨེཏི ཀུསལཱདིཨརཎནྟེ.

དྷམྨཾ པརིཝཏྟེནྟོཏི སཱཊྛཀཐཾ པཱལི༹ཾ པརིཝཏྟེནྟོ ཨེཏཾ པརཝཱདཱིཙོདནཾ པཏྭཱ ‘‘ཨཡཾ པརཝཱདཱི’’ཏིཨཱདིམཱཧ. ཨམྷཱདིསེསུ ནིདཱནཾ ཛཱནནྟེསུ པཊིསརཎེསུ ཝིཛྫམཱནེསུ ཨཔྤཊིསརཎོ ཨརཉྙེ ཀནྡནྟོ ཝིཡ ནིདཱནསབྦྷཱཝེ སཀྑིབྷཱུཏེསུཔི ཨམྷེསུ ཝིཛྫམཱནེསུ ཨསཀྑིཀཾ ཨཌྜཾ ཀརོནྟོ ཝིཡ ཧོཏི, ནིདཱནསྶ ཨཏྠིབྷཱཝམྤི ན ཛཱནཱཏི, ནནུ ཨེཏཾ ནིདཱནནྟི ཀཐེནྟོ ཨེཝམཱཧ. ཨེཀམེཝཱཏི དེསནཱནིདཱནམེཝ ཨཛ྄ཛྷཱསཡཱནུརཱུཔེན དེསིཏཏྟཱ. དྭེ ནིདཱནཱནཱིཏི ཨདྷིགནྟབྦདེསེཏབྦདྷམྨཱནུརཱུཔེན དེསིཏཏྟཱ. ཨབྷིདྷམྨཱདྷིགམསྶ མཱུལཾ ཨདྷིགམཾ ནིདེཏཱིཏི ཨདྷིགམནིདཱནཾ. བོདྷིཨབྷིནཱིཧཱརསདྡྷཱཡཱཏི ཡཱཡ སདྡྷཱཡ དཱིཔངྐརདསབལསྶ སནྟིཀེ བོདྷིཡཱ ཙིཏྟཾ ཨབྷིནཱིཧརི པཎིདྷཱནཾ ཨཀཱསི.

སུམེདྷཀཐཱཝཎྞནཱ

ཙཏུརོ ཙ ཨསངྑིཡེཏི (བུ. ཝཾ. ཨཊྛ. ༢.༡-༢) ཨུདྡྷཾ ཨཱརོཧནཝསེན ཨཏིཀྐམིཏྭཱ ཨམརཾ ནཱམ ནགརཾ ཨཧོསཱིཏི ཝཙནསེསཡོཛནཱ ཀཱཏབྦཱ. དསཧཱིཏི ཧཏྠིཨསྶརཐབྷེརཱིསངྑམུདིངྒཝཱིཎཱགཱིཏསམྨཏཱལེ༹ཧི ‘‘ཨསྣཱཐ པིཝཐ ཁཱདཐཱ’’ཏི དསམེན སདྡེན. ཏེ པན ཨེཀདེསེན དསྶེཏུཾ ‘‘ཧཏྠིསདྡ’’ནྟིཨཱདི ཝུཏྟཾ. ཧཏྠིསདྡནྟི ཀརཎཏྠེ ཨུཔཡོགོ དཊྛབྦོ. བྷེརཱིསངྑརཐཱནཉྩ སདྡེཧི ¶ ཨཝིཝིཏྟནྟི ཝཱ གྷོསིཏནྟི ཝཱ ཡོཛེཏབྦཾ. ཧཏྠིསདྡནྟི ཝཱ ཧཏྠིསདྡཝནྟཾ ནགརཾ. ཁཱདཐ པིཝཐ ཙེཝཱཏི ཨིཏི-སདྡོ ཉཱཏཏྠཏྟཱ ཨཔྤཡུཏྟོ དཊྛབྦོ.

སབྦངྒསམྤནྣཾ ཨུཡྻཱནཔོཀྑརཎཱིཨཱདིསམྤནྣཏྟཱ. ལཀྑཎེཏི ཨིཏྠིལཀྑཎེ པུརིསལཀྑཎེ ཙ. ཨིཏིཧཱསེཏི པོརཱཎེ. སདྷམྨེཏི ཨཏྟནོ ཏེཝིཛྫདྷམྨེ ཙ ཡཉྙཝིདྷིཨཱདིཀེ ཙ. པཱརམིནྟི པཱརཉཱཎཾ པཱརཱདྷིགམཾ གཏོ. ཙིནྟེསཧནྟི ཙིནྟེསིཾ ཨཧཾ སུམེདྷབྷཱུཏོཏི སཏྠཱ ཝདཏི. ཨཏྠི ¶ ཧེཧིཏཱིཏི སོ ཝིཛྫམཱནོ བྷཝིསྶཏི. ན ཧེཏུཡེཏི ཨབྷཝིཏུཾ. ཨེཝམེཝཱཏི ཨེཝམེཝཾ. ན གཝེསཏཱིཏི ན གནྟུཾ ཨེསཏི ན ཨིཙྪཏི ནཱནུགཙྪཏི ཝཱ. དྷོཝེཏི དྷོཝནྟེ. སེརཱིཏི སཱཡཏྟིཀོ. སཡཾཝསཱིཏི སཝསོ. མཧཱཙོརསམོ ཝིཡཱཏི ཀཱཡསཱརཱགཝསེན དུཙྩརིཏཱནེསནེཧི ཀུསལབྷཎྜཙྪེདནཱ. ནཱཐཱཏི ནཱཐཝནྟོ. པཉྩདོསཝིཝཛྫིཏནྟི ཨེཝམཱདིཀསྶ ཨཏྠོ ཀེསུཙི ཨཊྛཀཐཱཔོཏྠཀེསུ ལིཁིཏོཏི ཀཏྭཱ ན ཝཀྑཱམ.

སཱསནེཏི ཨེཏྠ ཏཱཔསསཱསནཾ ཛྷཱནཱབྷིཉྙཱ ཙ. ཝསཱིབྷཱུཏསྶ སཏོ. མཡི ཨེཝཾབྷཱུཏེ དཱིཔངྐརོ ཛིནོ ཨུཔྤཛྫི. སོདྷེཏི ཛནོ. ཨཉྫསཾ ཝཊུམཱཡནནྟི པརིཡཱཡཝཙནེཧི མགྒམེཝ ཝདཏི. མཱ ནཾ ཨཀྐམིཏྠཱཏི ཨེཏྠ ནནྟི པདཔཱུརཎམཏྟེ ནིཔཱཏོ. གྷཱཏིཡཱམཧནྟི ཨེཏྠ ཙ ཨ-ཨིཏི ཙ ཧཾ-ཨིཏི ཙ ནིཔཱཏཱ, ཨཧཾ-ཨིཏི ཝཱ ཨེཀོ ནིཔཱཏོ སཱནུནཱསིཀོ ཀཏོ. ཨཱཧུཏཱིནནྟི དཀྑིཎཱཧུཏཱིནཾ. མནྟི མམ, མཾ ཝཱ ཨབྲྭི.

ཀཔྤེ ཨཏིཀྐམིཏྭཱ ཝུཏྟེཔི བོདྷིམྷི མཱཏཱདིསཾཀིཏྟནེ སངྒཎྷིཏུཾ ‘‘བོདྷི ཏསྶ བྷགཝཏོ’’ཏིཨཱདིམཱཧ. སུཁེནཱཏི ཨུཏྟམེན སུཁེན. ཨསམོཏི ཏཱཔསེཧི ཨསམོ. ཨབྷིཉྙཱསུཁཏོཔི ཝིསིཊྛཾ ཨཱིདིསཾ བུདྡྷཏྟབྱཱཀརཎཛཾ སུཁཾ ཨལབྷིཾ. ཡཱཏི ཡཱནི ནིམིཏྟཱནི. ཨཱབྷུཛཏཱིཏི ཨཱཝཏྟཏི. ཨབྷིརཝནྟཱིཏི སདྡཾ ཀརོནྟི. ཚུདྡྷཱཏི ནིཀྑནྟཱ. ནུདྡྷཾསཏཱིཏི ན ཨུདྡྷཾ གཙྪཏི. ཨུབྷཡནྟི ཨུབྷཡཝཙནཾ. དྷུཝསསྶཏནྟི ཨེཀནྟསསྶཏཾ, ཨཝིཔརཱིཏམེཝཱཏི ཨཏྠོ. ཨཱཔནྣསཏྟཱནནྟི གབྦྷིནཱིནཾ. ཡཱཝཏཱདས དིསཱ, ཏཏྠ. དྷམྨདྷཱཏུཡཱཏི དྷམྨདྷཱཏུཡཾ, སབྦེསུ དྷམྨེསུ ཝིཙིནཱམཱིཏི ཨཏྠོ.

ཡསྶ སམྤུཎྞོ, ཏཾ ཝམཏེཝ ཨུདཀཾ ནིསྶེསཾ. ཨེཏེཏི ཨེཀིསྶཱཔི དཱནཔཱརམིཏཱཡ ཨནེཀཔྤཀཱརཏཱཡ བཧུཝཙནནིདྡེསོ ཀཏོ. པཊིལགྒིཏཾ རཀྑཏཱིཏི ཝཙནསེསོ, བྷུམྨཏྠེ ཝཱ ཨུཔཡོགོ ¶ . ཙཏཱུསུ བྷཱུམཱིསཱུཏི པཱཏིམོཀྑཱདཱིསུ སཾཝརབྷཱུམཱིསུ. ཨདྭེཛ྄ཛྷམཱནསོཏི ཀདཱཙི ཁམནཾ ཀདཱཙི ཨཀྑམནཾ, ཀསྶཙི ཁམནཾ ཀསྶཙི ཨཀྑམནནྟི ཨེཝཾ དྭེདྷཱབྷཱཝཾ ཨནཱཔནྣམཱནསོ ཧུཏྭཱ. སཙྩསྶ ཝཱིཐི ནཱམ དིཊྛཱདི ཙ ཨདིཊྛཱདི ཙ ཡཐཱབྷཱུཏཾཝ ཝཏྠུ. ཨདྷིཊྛཱནནྟི ཀུསལསམཱདཱནཱདྷིཊྛཱནཾ, སམཱདིནྣེསུ ཀུསལེསུ ཨཙལཏཱ ཨདྷིཊྛཱནཾ ནཱམ. པཐཝིཡཱ ཨུཔེཀྑནཾ ནཱམ ཝིཀཱརཱནཱཔཏྟི. ཨཉྙཏྲཱཏི ཨཉྙཾ. སབྷཱཝརསལཀྑཎེཏི ཨེཏྠ བྷཱཝོཏི ཨཝིཔརཱིཏཏཱ ཝིཛྫམཱནཏཱ, སཧ བྷཱཝེན སབྷཱཝོ, ཨཝིཔརཱིཏོ ཨཏྟནོ བོདྷིཔརིཔཱཙནཀིཙྩསངྑཱཏོ ¶ རསོ, ཨནཝཛྫཝཏྠུཔརིཙྩཱགཱདིསངྑཱཏཾ ལཀྑཎཉྩ སབྷཱཝརསལཀྑཎཾ, ཏཏོ སམྨསཏོ. དྷམྨཏེཛེནཱཏི ཉཱཎཏེཛེན. ཙལཏཱཏི ཙལཏཱཡ ཀམྤནཏཱཡ. སེསཱིཏི སཡི. མཱ བྷཱཐཱཏི མཱ བྷཱཡིཏྠ. སབྦཱིཏིཡོཏི སབྦཱ ཨཱིཏིཡོ ཨུཔདྡཝཱ ཏཾ ཝིཝཛྫནྟུ.

སུམེདྷཀཐཱཝཎྞནཱ ནིཊྛིཏཱ.

པཝཙྪཏཱིཏི དེཏི. ཡོགེནཱཏི ཨུཔཱཡེན. སམིཾསཱུཏི སནྣིཔཏིཾསུ. ཨཔྤཏྟམཱནསཱཏི ཨཔྤཏྟཨརཧཏྟཱ བྷིཀྑཱུ གརཧིཏཱ བྷཝནྟི. རིཏྟཱཏི སུཉྙཱ ཨནྟརཧིཏཱ. སཱལཀལྱཱཎཱི ནཱམ ཨེཀོ རུཀྑོ. བུདྡྷཙཀྐཝཏྟིཀཱལེཡེཝ ཀིར ཨེཀཱཧེནེཝ ཨུཔྤཛྫཏི.

ལིངྒསམྤཏྟཱིཏི པུརིསལིངྒཏཱ. ཧེཏཱུཏི ཏིཧེཏུཀཔཊིསནྡྷིཏཱ. གུཎསམྤཏྟཱིཏི ཨབྷིཉྙཱསམཱཔཏྟིལཱབྷིཏཱ. ཨདྷིཀཱརོཏི བུདྡྷཱནཾ སཀྐཱརཀརཎཾ. ཚནྡཏཱཏི བུདྡྷཏྟཔྤཏྟིཡཾ ཚནྡསམཱཡོགོ. སབྦངྒསམྤནྣཱཏི ཨཊྛངྒཱནི སམོདྷཱནེཏྭཱ ཀཏཔཎིདྷཱནཱ. པཀྑིཀཱཏི པཱིཋསཔྤིཀཱ. པཎྜཀཱཏི ཨུབྷཡལིངྒརཧིཏཱ. བོདྷིསཏྟཱ ཙ བྲཧྨལོཀཱུཔཔཏྟིཔཋམཀཔྤིཀེསུ ཀཱལེསུ ཨུབྷཡལིངྒརཧིཏཱ ཧོནྟི, ན པན པཎྜཀཔརིཡཱཔནྣཱཏི ཨེཏམཏྠཾ དསྶེཏུཾ ‘‘པརིཡཱཔནྣཱ ན བྷཝནྟཱི’’ཏི ཝུཏྟཾ, ཡཐཱཝུཏྟེསུ ཝཱ དོསེསུ སབྦེསུ པརིཡཱཔནྣཱ ན བྷཝནྟི, བོདྷིསཏྟེསུ ཝཱ པརིཡཱཔནྣཱ ཏདནྟོགདྷཱ, པརིཙྪིནྣསཾསཱརཏྟཱ ཝཱ པརིཡཱཔནྣཱ བོདྷིསཏྟཱ ཨུབྷཏོབྱཉྫནཔཎྜཀཱ ན བྷཝནྟཱིཏི ཨཏྠོ. སབྦཏྠ སུདྡྷགོཙརཱ ཡསྨཱ, ཏསྨཱ མིཙྪཱདིཊྛིཾ ན སེཝནྟི. མིཙྪཱདིཊྛིནྟི ནཏྠིཀཱཧེཏུཀཱཀིརིཡདིཊྛིཾ. བྷཝཱབྷཝེཏི ཁུདྡཀེ ཙེཝ མཧནྟེ ཙ བྷཝེ. བྷོཛཔུཏྟེཏི ལུདྡཀེ. ལགནནྟི སངྒོ. ཨཉྙཐཱཏི ལཱིནཏཱ. གཱམཎྜལཱཏི གཱམདཱརཀཱ. རཱུཔནྟི ཝིཔྤཀཱརཾ. ཨཡཾ ཏཱཝ ནིདཱནཀཐཱ ཡཱཡ ཨབྷིདྷམྨསྶ བུདྡྷབྷཱསིཏཏཱསིདྡྷཱིཏི ཨཏྠཡོཛནཱ ཀཱཏབྦཱ.

ནིདཱནཀཐཱཝཎྞནཱ ནིཊྛིཏཱ.

༡. ཙིཏྟུཔྤཱདཀཎྜཾ

ཏིཀམཱཏིཀཱཔདཝཎྞནཱ

ཨིདཱནི ¶ ¶ པཊིཉྙཱཏཀཐཾ ཀཱཏུཾ ‘‘ཨིདཱནི ཨིཏི མེ…པེ… ཀཐནོཀཱསོ སམྤཏྟོ’’ཏིཨཱདིམཱཧ. ཨིཏོ པཊྛཱཡཱཏི ཀུསལདྷམྨཔདཏོ པཊྛཱཡ.

༡. སབྦཔདེཧི ལདྡྷནཱམོཏི ཏཱིསུཔི པདེསུ ཝེདནཱསདྡསྶ ཝིཛྫམཱནཏྟཱ ཏེན ལདྡྷནཱམོ སབྦཔདེཧི ལདྡྷནཱམོ ཧོཏི. ནནུ སུཁཱཡ ཝེདནཱཡ སམྤཡུཏྟཱ དྷམྨཱཏི ཙཏྟཱརི པདཱནི, ཨེཝཾ སེསེསུཔཱིཏི དྭཱདསེཏཱནི པདཱནི, ན ཏཱིཎཱིཏི ཝེདནཱསདྡསྶ པདཏྟཡཱཝཡཝཏྟཾ སནྡྷཱཡ ‘‘སབྦཔདེཧཱི’’ཏི ཝུཙྩེཡྻ, ན ཡུཏྟཾ. ‘‘ཝེདནཱཡཱ’’ཏི ཧི ཝིསུཾ པདཾ ན ཀསྶཙི པདསྶ ཨཝཡཝོ ཧོཏི, ནཱཔི སུཁཱདིཔདབྷཱཝཾ བྷཛཏཱིཏི ཏེན ལདྡྷནཱམོ ཀཐཾ སབྦཔདེཧི ལདྡྷནཱམོ སིཡཱཏི? ཨདྷིཔྤེཏཔྤཀཱརཏྠགམཀསྶ པདསམུདཱཡསྶ པདཏྟཱ. པཛྫཏི ཨཝབུཛ྄ཛྷཱིཡཏི ཨེཏེནཱཏི ཧི པདཾ, ‘‘སུཁཱཡ ཝེདནཱཡ སམྤཡུཏྟཱ དྷམྨཱ’’ཏི ཨེཏེན ཙ པདསམུདཱཡེན ཡཐཱདྷིཔྤེཏོ ཨཏྠོ སམཏྟོ ཝིཉྙཱཡཏི, ཏསྨཱ སོ པདསམུདཱཡོ ‘‘པད’’ནྟི ཝུཙྩཏི. ཨེཝཾ ཨིཏརེཔི ཝེདིཏབྦཱ. ཏསྨཱ ཏེསཾ ཏིཎྞཾ སམུདཱཡཱནཾ ཨཝཡཝེན ལདྡྷནཱམོ སབྦཔདེཧི ལདྡྷནཱམོཏི ཡུཏྟོ.

གནྠཏོ ཙ ཨཏྠཏོ ཙཱཏི ཨེཏྠ ཧེཏུཔདསཧེཏུཀཔདཱདཱིཧི སམྦནྡྷཏྟཱ གནྠཏོ ཙ ཧེཏུཨཏྠསཧེཏུཀཏྠཱདཱིཧི སམྦནྡྷཏྟཱ ཨཏྠཏོ ཙ ཨཉྙམཉྙསམྦནྡྷོ ཝེདིཏབྦོ. སཧེཏུཀཧེཏུསམྤཡུཏྟདུཀཱ ཧི ཧེཏུདུཀེ ཧེཏཱུཧི སམྦནྡྷཏྟཱ ཧེཏུདུཀསམྦནྡྷཱ, ཧེཏུསཧེཏུཀདུཀོ ཧེཏུདུཀསཧེཏུཀདུཀསམྦནྡྷོ ཨུབྷཡེཀཔདཝསེན. ཏཐཱ ཧེཏུཧེཏུསམྤཡུཏྟདུཀོ ཧེཏུདུཀཧེཏུསམྤཡུཏྟདུཀསམྦནྡྷོ ¶ , ནཧེཏུསཧེཏུཀདུཀོ ཨེཀདྭིཔདཝསེན ཧེཏུདུཀསཧེཏུཀདུཀསམྦནྡྷོཏི. ཀཎྞིཀཱ ཝིཡཱཏི པུཔྥམཡཀཎྞིཀཱ ཝིཡ. གྷཊཱ ཝིཡཱཏི པུཔྥཧཏྠཀཱདཱིསུ པུཔྥཱདཱིནཾ སམཱུཧོ ཝིཡ. ཀཎྞིཀཱགྷཊཱདཱིསུ ཧི པུཔྥཱདཱིནི ཝཎྚཱདཱིཧི ཨཉྙམཉྙསམྦནྡྷཱནི ཧོནྟཱིཏི ཏཐཱསམྦནྡྷཏཱ ཨེཏེསཾ དུཀཱནཾ ཝུཏྟཱ. དུཀསཱམཉྙཏོཏི ཨཉྙེཧི ཧེཏུདུཀཱདཱིཧི དུཀཝསེན སམཱནབྷཱཝཱ. ཨཉྙེཧཱིཏི སཱརམྨཎདུཀཱདཱིཧི. ཨསངྒཧིཏོ པདེསོ ཡེསཾ ཨཏྠི, ཏེ སཔྤདེསཱ. ཡེསཾ པན ནཏྠི, ཏེ ནིཔྤདེསཱ.

‘‘ཀཙྩི ¶ ནུ བྷོཏོ ཀུསལ’’ནྟི ཨེཝཾ པུཙྪིཏམེཝཏྠཾ པཱཀཊཾ ཀཏྭཱ པུཙྪིཏུཾ ‘‘ཀཙྩི བྷོཏོ ཨནཱམཡ’’ནྟི ཝུཏྟཾ, ཏསྨཱ ཀུསལསདྡོ ཨནཱམཡཏྠོ ཧོཏི. བཱཧིཏིཀསུཏྟེ (མ. ནི. ༢.༣༦༡) བྷགཝཏོ ཀཱཡསམཱཙཱརཱདཡོ ཝཎྞེནྟེན དྷམྨབྷཎྜཱགཱརིཀེན ‘‘ཡོ ཁོ, མཧཱརཱཛ, ཀཱཡསམཱཙཱརོ ཨནཝཛྫོ’’ཏི ཀུསལོ ཀཱཡསམཱཙཱརོ ཝུཏྟོ. ན ཧི བྷགཝཏོ སུཁཝིཔཱཀཾ ཀམྨཾ ཨཏྠཱིཏི སབྦསཱཝཛྫརཧིཏཱ ཀཱཡསམཱཙཱརཱདཡོ ཀུསལཱཏི ཝུཏྟཱ. ཀུསལེསུ དྷམྨེསཱུཏི ཙ བོདྷིཔཀྑིཡདྷམྨཱ ‘‘ཀུསལཱ’’ཏི ཝུཏྟཱ. ཏེ ཙ ཝིཔསྶནཱམགྒཕལསམྤཡུཏྟཱ ན ཨེཀནྟེན སུཁཝིཔཱཀཱཡེཝཱཏི ཨནཝཛྫཏྠོ ཀུསལསདྡོ. ཨངྒཔཙྩངྒཱནནྟི ཀུསལསདྡཡོགེན བྷུམྨཏྠེ སཱམིཝཙནཾ, ཨངྒཔཙྩངྒཱནཾ ཝཱ ནཱམཀིརིཡཱཔཡོཛནཱདཱིསཱུཏི ཨཏྠོ. ནཙྩགཱིཏསྶཱཏི ཙ སཱམིཝཙནཾ བྷུམྨཏྠེ, ནཙྩགཱིཏསྶ ཝིསེསེསཱུཏི ཝཱ ཡོཛེཏབྦཾ. ཀུསལཱནཾ དྷམྨཱནཾ སམཱདཱནཧེཏུ ཨེཝམིདཾ པུཉྙཾ པཝཌྜྷཏཱིཏི པུཉྙཝིཔཱཀནིབྦཏྟཀཀམྨཾ ‘‘ཀུསལ’’ནྟི ཝུཏྟཾ. དྷམྨཱ ཧོནྟཱིཏི སུཉྙདྷམྨཏྟཱ སབྷཱཝམཏྟཱ ཧོནྟཱིཏི ཨཏྠོ. ཨེཝཾ དྷམྨེསུ དྷམྨཱནུཔསྶཱིཏི ཨེཏྠཱཔི སུཉྙཏཏྠོ དྷམྨསདྡོ དཊྛབྦོ.

སལཡནྟི…པེ… ཝིདྡྷཾསེནྟཱིཏི ཨེཏྠ པུརིམསྶ པུརིམསྶ པཙྪིམཾ པཙྪིམཾ ཨཏྠཝཙནཾ. ཨཐ ཝཱ སལནསྶ ཨཏྠདཱིཔནཱནི ཙལནཱདཱིནི ཏཱིཎི ཏདངྒཔྤཧཱནཱདཱིཧི ཡོཛེཏབྦཱནི. ཨཔྤཧཱིནབྷཱཝེན སནྟཱནེ སཡམཱནཱ ཨཀུསལཱ དྷམྨཱ རཱགཱདིཨསུཙིསམྤཡོགཏོ ནཱནཱཝིདྷདུཀྑཧེཏུཏོ ཙ ཀུཙྪིཏེན ཨཱཀཱརེན སཡནྟི. ཉཱཎཝིཔྤཡུཏྟཱནམྤི ཉཱཎཾ ཨུཔནིསྶཡཔཙྩཡོ ཧོཏཱིཏི སབྦེཔི ཀུསལཱ དྷམྨཱ ཀུསེན ཉཱཎེན པཝཏྟེཏབྦཱཏི ཀུསལཱ. ཨུཔྤནྣཾསཱནུཔྤནྣཾསབྷཱགེསུ སངྒཧིཏཏྟཱ ཨུབྷཡབྷཱགགཏཾ སཾཀིལེསཔཀྑཾ པཧཱནཱནུཔྤཱདནེཧི ལུནནྟི སམྨཔྤདྷཱནདྭཡཾ ཝིཡ.

སཏྟཱདིགཱཧཀཱནཾ ¶ ཙིཏྟཱནཾ གོཙརཱ སཏྟཱདཡོ ཝིཡ པཉྙཱཡ ཨུཔཔརིཀྑིཡམཱནཱ ན ནིསྶབྷཱཝཱ, ཀིནྟུ ཨཏྟནོ སབྷཱཝཾ དྷཱརེནྟཱིཏི དྷམྨཱ. ན ཙ དྷཱརིཡམཱནསབྷཱཝཱ ཨཉྙོ དྷམྨོ ནཱམ ཨཏྠི. ན ཧི རུཔྤནཱདཱིཧི ཨཉྙེ རཱུཔཱདཡོ, ཀཀྑལཱ༹དཱིཧི ཙ ཨཉྙེ པཐཝཱིཨཱདཡོ དྷམྨཱ ཝིཛྫནྟཱིཏི. ཨཉྙཐཱ པན ཨཝབོདྷེཏུཾ ན སཀྐཱཏི ནཱམཝསེན ཝིཉྙཱཏཱཝིཉྙཱཏེ སབྷཱཝདྷམྨེ ཨཉྙེ ཝིཡ ཀཏྭཱ ‘‘ཨཏྟནོ སབྷཱཝཾ དྷཱརེནྟཱི’’ཏི ¶ ཝུཏྟཾ. སཔྤཙྩཡདྷམྨེསུ ཝིསེསཾ དསྶེནྟོ ‘‘དྷཱརཱིཡནྟི ཝཱ པཙྩཡེཧཱི’’ཏི ཨཱཧ. དྷཱརཱིཡནྟཱིཏི ཨུཔདྷཱརཱིཡནྟི, ལཀྑཱིཡནྟཱིཏི ཨཏྠོ.

ཨཀུསལཱཏི ཀུསལཔཊིསེདྷནམཏྟཾ ཀུསལཱབྷཱཝམཏྟཝཙནཾ ཏདཉྙམཏྟཝཙནཾ ཝཱ ཨེཏཾ ན ཧོཏི, ཀིནྟུ ཏཔྤཊིཔཀྑཝཙནནྟི དསྶེཏུཾ ‘‘མིཏྟཔཊིཔཀྑཱ ཨམིཏྟཱ ཝིཡཱ’’ཏིཨཱདི ཝུཏྟཾ. ཏཔྤཊིཔཀྑཝཙནཏཱ ཙ ཨབྱཱཀཏཏཏིཡརཱསིཝཙནེན ཝིཉྙཱཡཏི. ཡདི ཧི ཀུསལཱབྷཱཝམཏྟཝཙནཾ ཨཀུསལསདྡོ, ཏེན ན ཀོཙི དྷམྨོ ཝུཏྟོཏི ཨབྱཱཀཏཝཙནེནེཝ ཙ ཏཏིཡོ རཱསི ཝུཏྟོ ན སིཡཱ, ཀུསལཱ ཙེཝ དྷམྨཱ ཨབྱཱཀཏཱ ཙཱཏི དུཀོཝཱཡཾ ཨཱཔཛྫཏི, ན ཏིཀོ, ཨེཝཉྩ སཏི ཨཀུསལཝཙནེན ན ཀོཙི ཨཏྠོ. ཨཐ སིཡཱ, ‘‘ཨནབྱཱཀཏཱ’’ཏི ཙ ཝཏྟབྦཾ སིཡཱ ཀུསལཱནཾ ཝིཡ ཨབྱཱཀཏཱནཉྩ ཨབྷཱཝམཏྟསམྦྷཝཱ, ཏསྨཱ ཨབྷཱཝམཏྟཝཙནེ ཨབྱཱཀཏབྷཱཝམཏྟཾ ཝིཡ ཀུསལཱབྷཱཝམཏྟཾ ཨཀུསལཾ ན ཀོཙི རཱསཱིཏི ‘‘ཨབྱཱཀཏཱ’’ཏི ཏཏིཡོ རཱསི ན སིཡཱ. ཏཏིཡརཱསིབྷཱཝེན ཙ ཨབྱཱཀཏཱ ཝུཏྟཱཏི ཨཀུསལོ ཙ ཨེཀོ རཱསཱིཏི ཝིཉྙཱཡཏི. ཏསྨཱ ནཱབྷཱཝཝཙནཏཱ, སབྷཱཝདྷཱརཎཱདིཨཏྠེན དྷམྨསདྡེན སམཱནཱདྷིཀརཎབྷཱཝཏོ ཙ ཨཀུསལསདྡསྶ ཀུསལཱབྷཱཝམཏྟཝཙནཏཱ ན ཧོཏི, ནཱཔི ཏདཉྙམཏྟཝཙནཏཱ ཏཏིཡརཱསིཝཙནཏོ ཨེཝ. ཡདི ཧི ཀུསལེཧི ཨཉྙེ ཨཀུསལཱ ཙེཏསིཀེཧི ཨཉྙེ ཨཙེཏསིཀཱ ཝིཡ, ཀུསལཱཀུསལཝཙནེཧི སབྦེསཾ དྷམྨཱནཾ སངྒཧིཏཏྟཱ ཨསངྒཧིཏསྶ ཏཏིཡརཱསིསྶ ཨབྷཱཝཱ ཙེཏསིཀདུཀོ ཝིཡ ཨཡཉྩ དུཀོ ཝཏྟབྦོ སིཡཱ ‘‘ཀུསལཱ དྷམྨཱ ཨཀུསལཱ དྷམྨཱ’’ཏི, ན ‘‘ཨབྱཱཀཏཱ’’ཏི ཏཏིཡོ རཱསི ཝཏྟབྦོ, ཝུཏྟོ ཙ སོ, ཏསྨཱ ན ཏདཉྙམཏྟཝཙནཾ ཨཀུསལསདྡོ, པཱརིསེསེན ཏཔྤཊིཔཀྑེསུ ཨ-ཀཱརསྶ པཡོགདསྶནཏོ ལོཀེ ‘‘ཨམིཏྟཱ’’ཏི སཱསནེ ‘‘ཨལོབྷོ’’ཏི ཨིདྷཱཔི ཏཔྤཊིཔཀྑཝཙནཏཱ ཨཀུསལསདྡསྶ སིདྡྷཱ, ཏཏྠ ནིརུལ༹ྷཏྟཱ ཙ ན ཨིཏརཝཙནཏཱ, ཏཔྤཊིཔཀྑབྷཱཝོ ཙ ཝིརུདྡྷསབྷཱཝཏྟཱ ཏཔྤཧེཡྻབྷཱཝཏོ ཙ ཝེདིཏབྦོ, ན ཀུསལཝིནཱསནཏོ. ན ཧི ཀུསལཱ ཨཀུསལེཧི པཧཱཏབྦཱ, མཧཱབལཝཏཱཡ པན ཀུསལཱཡེཝ པཡོགནིཔྥཱདིཏཱ སདཱནུསཡིཏེ ཨཀུསལེ ཏདངྒཝིཀྑམྦྷནསམུཙྪེདཝསེན པཛཧནྟཱིཏི.

ན ¶ ¶ བྱཱཀཏཱཏི ཨཀཐིཏཱ. ཀཐཾ པནེཏེ ཨཀཐིཏཱ ཧོནྟི, ནནུ ‘‘སུཁཱཡ ཝེདནཱཡ སམྤཡུཏྟཱ’’ཏིཨཱདཱིཧི ཏིཀདུཀཔདེཧི ཙཀྑུཝིཉྙཱཎཱདིཝཙནེཧི ཕསྶཱདིཝཙནེཧི ཙ ཀཐིཏཱཏི? ནོ ན ཀཐིཏཱ, ཏཱནི པན ཝཙནཱནི ཨིདྷ ཨནདྷིཔྤེཏཱནི ཨཝུཏྟཏྟཱ ཨནནུཝཏྟནཏོ. ན ཧི ‘‘སུཁཱཡ ཝེདནཱཡ སམྤཡུཏྟཱ དྷམྨཱ’’ཏིཨཱདིཾ ཝཏྭཱ ‘‘ཨབྱཱཀཏཱ’’ཏི ཝུཏྟཾ, ཏསྨཱ ན ཏཱནི ཨིདྷ ཨནུཝཏྟནྟཱིཏི ཏབྦཙནཱིཡབྷཱཝེན ཨཀཐིཏཏཱ ན ཧོཏི, ཀུསལཱཀུསལཝཙནཱནི པན ཨིདྷ ཝུཏྟཏྟཱ ཨནུཝཏྟནྟཱིཏི ཏབྦཙནཱིཡབྷཱཝེན ཨཀཐིཏཏཱ ཉཱཡཏཱིཏི ‘‘ཀུསལཱཀུསལབྷཱཝེན ཨཀཐིཏཱཏི ཨཏྠོ’’ཏི ཨཱཧ. ན བྱཱཀཏཱཏི ཝཱ ཨཝིཔཱཀཱ, ཨབྱཱཀཏཝཙནེནེཝ ཙ ཨཝིཔཱཀཏྠཱ ཉཱཡནྟི. ན ཧི བྷགཝཏོ ཝཙནཾ ཉཱཔཀསཱདྷནཱིཡཾ, ཨཱསཡཱནུསཡཙརིཡཱདིཀུསལེན བྷགཝཏཱ ཡེསཾ ཨཝབོདྷནཏྠཾ དྷམྨཱ ཝུཏྟཱ ཏེསཾ ཝཙནཱནནྟརཾ ཏདཏྠཔཊིཝེདྷཏོ, པཙྪིམེཧི པན ཡཐཱ ཏེསཾ ཨཝབོདྷནཏྠཾ བྷགཝཏཱ ཏཾ ཏཾ ཝཙནཾ ཝུཏྟཾ, ཡཐཱ ཙ ཏེཧི ཏདཏྠོ པཊིཝིདྡྷོ, ཏཾ སབྦཾ ཨཱཙརིཡེ པཡིརུཔཱསིཏྭཱ སུཏྭཱ ཝེདིཏབྦཾ ཧོཏི, ཏསྨཱ ཀཱརཎཾ ཨཝཏྭཱ ‘‘ཀུསལཱཀུསལབྷཱཝེན ཨཀཐིཏཱཏི ཨཏྠོ’’ཏི ཨཱཧ. ཡོ ཙ ཝདེཡྻ ‘‘ཨཀུསལཝིཔཱཀབྷཱཝེན ཨཀཐིཏཏྟཱ, ཀུསལཱ ཨབྱཱཀཏཱཏི ཨཱཔཛྫནྟི, ཀུསལཝིཔཱཀབྷཱཝེན ཨཀཐིཏཏྟཱ ཨཀུསལཱཔཱི’’ཏི, སོཔི ‘‘ཨཉྙཱཔཀསཱདྷནཱིཡཝཙནོ བྷགཝཱ’’ཏི ནིཝཱརེཏབྦོ ཨནུཝཏྟམཱནཝཙནཝཙནཱིཡབྷཱཝེན ཨཀཐིཏསྶ ཙ ཨབྱཱཀཏབྷཱཝཏོ. ན ཧི ཨཝིཔཱཀཝཙནཾ ཝུཏྟཾ ཀུསལཝཙནཉྩ ཨཝུཏྟཾ, ཡཏོ ཨཝིཔཱཀཝཙནསྶ ཨདྷིཀཏབྷཱཝོ ཀུསལསྶ ཙ ཏབྦཙནཱིཡབྷཱཝེན ཨཀཐིཏབྷཱཝོ སིཡཱ, ཏསྨཱ ན ཀུསལཱནཾ ཨབྱཱཀཏཏཱ, ཨེཝཾ ཨཀུསལཱནཉྩ ཨནབྱཱཀཏབྷཱཝེ ཡོཛནཱ ཀཱཏབྦཱ.

ཨཐ ཝཱ ཝི-སདྡོ ཝིརོདྷཝཙནོ, ཨཱ-སདྡོ ཨབྷིམུཁབྷཱཝཔྤཀཱསནོ, ཏསྨཱ ཨཏྟནོ པཙྩཡེཧི ཨཉྙམཉྙཝིརོདྷཱབྷིམུཁཱ ཀཏཱ, ལཀྑཎཝིརོདྷཏོ ཝིནཱསཀཝིནཱསིཏབྦཏོ ཙཱཏི བྱཱཀཏཱ, ཀུསལཱཀུསལཱ. ན བྱཱཀཏཱཏི ཨབྱཱཀཏཱ. ཏེ ཧི ལཀྑཎཏོ ཀུསལཱཀུསལཱ ཝིཡ ཝིརུདྡྷཱ ན ཧོནྟི. ན ཧི ཨཝིཔཱཀཏཱ དུཀྑཝིཔཱཀཏཱ ཝིཡ སུཁཝིཔཱཀཏཱཡ སུཁཝིཔཱཀཏཱ ཝིཡ ཙ དུཀྑཝིཔཱཀཏཱཡ སུཁདུཀྑཝིཔཱཀཏཱཧི ཝིརུཛ྄ཛྷཏཱིཏི ནཱཔི ཏེ ཀིཉྩི པཛཧནྟི, ན ཙ ཏེ ཀེནཙི པཧཱཏབྦཱཏི ཨཡམེཏྠ ཨཏྟནོམཏི.

ཨནཝཛྫསུཁཝིཔཱཀལཀྑཎཱཏི ¶ ཨེཏྠ ནཏྠི ཨེཏེསཾ ཨཝཛྫནྟི ཨནཝཛྫཱ, གརཧིཏབྦབྷཱཝརཧིཏཱ ནིདྡོསཱཏི ཨཏྠོ. ཏེན ནེསཾ ཨགརཧིཏབྦབྷཱཝཾ དསྶེཏི, ན གཱརཡ྄ཧཝིརཧམཏྟཾ ¶ . ཨཉྙེཔི ཨཏྠི ནིདྡོསཱ ཨབྱཱཀཏཱཏི ཨནཝཛྫཝཙནམཏྟེན ཏེསམྤི ཀུསལཏཱཔཏྟིདོསཾ དིསྭཱ ཏཾ པརིཧརིཏུཾ སུཁཝིཔཱཀཝཙནཾ ཨཱཧ. ཨཝཛྫཔཊིཔཀྑཱ ཝཱ ཨིདྷ ཨནཝཛྫཱཏི ཝུཏྟཱ, ན བཱཧིཏིཀསུཏྟེ (མ. ནི. ༢.༣༦༡) ཝིཡ པཊིཔྤསྶདྡྷཱཝཛྫཱ ཝིརཧིཏཱཝཛྫམཏྟཱ ཝཱ, ཏསྨཱ ཨནཝཛྫཝཙནེན ཨཝཛྫཝིནཱསནབྷཱཝོ དསྶིཏོ. ཨབྱཱཀཏེཧི པན ཝིསིཊྛཾ ཀུསལཱཀུསལཱནཾ སཱདྷཱརཎཾ སཝིཔཱཀཏཱལཀྑཎནྟི ཏསྨིཾ ལཀྑཎེ ཝིསེསདསྶནཏྟཾ སུཁཝིཔཱཀཝཙནཾ ཨཝོཙ. སིདྡྷོ ཧི པུརིམེནེཝ ཨཀུསལཱབྱཱཀཏེཧི ཀུསལཱནཾ ཝིསེསོཏི. སུཁོ ཝིཔཱཀོ ཨེཏེསནྟི སུཁཝིཔཱཀཱ. ཏེན ཀུསལཱཀུསལཱནཾ སཱམཉྙེ ཝིཔཱཀདྷམྨབྷཱཝེ སུཁཝིཔཱཀཝིཔཙྩནསབྷཱཝཾ དསྶེཏི, ན ཏེསཾ སུཁཝིཔཱཀསབྦྷཱཝམེཝ. ཨནཝཛྫཱ ཙ ཏེ སུཁཝིཔཱཀཱ ཙཱཏི ཨནཝཛྫསུཁཝིཔཱཀཱ. ཀུསལཱ ལཀྑཱིཡནྟི ཨེཏེནཱཏི ལཀྑཎཾ, ཨནཝཛྫསུཁཝིཔཱཀལཀྑཎཾ ཨེཏེསནྟི ཨནཝཛྫསུཁཝིཔཱཀལཀྑཎཱ. ནནུ ཏེ ཨེཝ ཀུསལཱ ཨནཝཛྫསུཁཝིཔཱཀཱ, ཀཐཾ ཏེ སཡམེཝ ཨཏྟནོ ལཀྑཎཾ ཧོནྟཱིཏི? ཝིཉྙཱཏཱཝིཉྙཱཏསདྡཏྠབྷཱཝེན ལཀྑཎལཀྑིཏབྦབྷཱཝཡུཏྟིཏོ. ཀུསལསདྡཏྠཝསེན ཧི ཨཝིཉྙཱཏཱ ཀུསལཱ ལཀྑིཏབྦཱ ཧོནྟི, ཨནཝཛྫསུཁཝིཔཱཀསདྡཏྠབྷཱཝེན ཝིཉྙཱཏཱ ལཀྑཎནྟི ཡུཏྟམེཏཾ. ཨཐ ཝཱ ལཀྑཱིཡཏཱིཏི ལཀྑཎཾ, སབྷཱཝོ. ཨནཝཛྫསུཁཝིཔཱཀཱ ཙ ཏེ ལཀྑཎཉྩཱཏི ཨནཝཛྫསུཁཝིཔཱཀལཀྑཎཱ, ཨནཝཛྫསུཁཝིཔཱཀཱ ཧུཏྭཱ ལཀྑིཡམཱནཱ སབྷཱཝཱ ཀུསལཱ ནཱམཱཏི ཨཏྠོ.

ཨཐ ཝཱ ཨནཝཛྫཝཙནེན ཨནཝཛྫཏྟཾ ཨཱཧ, སུཁཝིཔཱཀཝཙནེན སུཁཝིཔཱཀཏྟཾ, ཏསྨཱ ཨནཝཛྫཉྩ སུཁཝིཔཱཀོ ཙ ཨནཝཛྫསུཁཝིཔཱཀཾ, ཏཾ ལཀྑཎཾ ཨེཏེསཾ ཀརཎཏྠེ ཙ ཀམྨཏྠེ ཙ ལཀྑཎསདྡེ སབྷཱཝབྷཱུཏནྟི ཨནཝཛྫསུཁཝིཔཱཀལཀྑཎཱ, ཨནཝཛྫསུཁཝིཔཱཀསབྷཱཝེན ལཀྑིཡམཱནཱ ཏཾསབྷཱཝཝནྟོ ཙ ཀུསལཱཏི ཝུཏྟཾ ཧོཏི. ཏཏྠ ཨནཝཛྫཝཙནེན པཝཏྟིསུཁཏཾ ཀུསལཱནཾ དསྶེཏི, སུཁཝིཔཱཀཝཙནེན ཝིཔཱཀསུཁཏཾ. པུརིམཉྷི ཨཏྟནོ པཝཏྟིསབྷཱཝཝསེན ལཀྑཎཏཱཝཙནཾ, པཙྪིམཾ ཀཱལནྟརེ ཝིཔཱཀུཔྤཱདནསམཏྠཏཱཡཱཏི. ཏཐཱ པུརིམེན ཀུསལཱནཾ ཨཏྟསུདྡྷིཾ དསྶེཏི ¶ , པཙྪིམེན ཝིསུདྡྷཝིཔཱཀཏཾ. པུརིམེན ཙ ཀུསལཾ ཨཀུསལསབྷཱཝཏོ ནིཝཏྟེཏི, པཙྪིམེན ཨབྱཱཀཏསབྷཱཝཏོ སཝིཔཱཀཏྟདཱིཔཀཏྟཱ པཙྪིམསྶ. པུརིམེན ཝཱ ཝཛྫཔཊིཔཀྑབྷཱཝདསྶནཏོ ཀིཙྩཊྛེན རསེན ཨཀུསལཝིདྡྷཾསནརསཏཾ དཱིཔེཏི, པཙྪིམེན སམྤཏྟིཨཏྠེན ཨིཊྛཝིཔཱཀརསཏཾ. པུརིམེན ཙ ཨུཔཊྛཱནཱཀཱརཊྛེན པཙྩུཔཊྛཱནེན ཝོདཱནཔཙྩུཔཊྛཱནཏཾ དསྶེཏི, པཙྪིམེན ཕལཏྠེན སུཁཝིཔཱཀཔཙྩུཔཊྛཱནཏཾ. པུརིམེན ཙ ཡོནིསོམནསིཀཱརཾ ཀུསལཱནཾ ¶ པདཊྛཱནཾ ཝིབྷཱཝེཏི. ཏཏོ ཧི ཏེ ཨནཝཛྫཱ ཛཱཏཱཏི. པཙྪིམེན ཀུསལཱནཾ ཨཉྙེསཾ པདཊྛཱནབྷཱཝཾ དསྶེཏི. ཏེ ཧི སུཁཝིཔཱཀསྶ ཀཱརཎཾ ཧོནྟཱིཏི. ཨེཏྠ ཙ སུཁཝིཔཱཀསདྡེ སུཁསདྡོ ཨིཊྛཔརིཡཱཡཝཙནནྟི དཊྛབྦོ. ཨིཊྛཙཏུཀྑནྡྷཝིཔཱཀཱ ཧི ཀུསལཱ, ན སུཁཝེདནཱཝིཔཱཀཱཝ. སངྑཱརདུཀྑོཔསམསུཁཝིཔཱཀཏཱཡ ཙ སམྦྷཝོ ཨེཝ ནཏྠི. ན ཧི ཏཾཝིཔཱཀོཏི. ཡདི པན ཝིཔཱཀསདྡོ ཕལཔརིཡཱཡཝཙནཾ, ནིསྶནྡཝིཔཱཀེན ཨིཊྛརཱུཔེནཱཔི སུཁཝིཔཱཀཏཱ ཡོཛེཏབྦཱ.

སཱཝཛྫདུཀྑཝིཔཱཀལཀྑཎཱཏི ཨེཏྠ ཙ ཝུཏྟཝིདྷིཨནུསཱརེན ཨཏྠོ ཙ ཡོཛནཱ ཙ ཡཐཱསམྦྷཝཾ ཝེདིཏབྦཱ. ཝིཔཱཀཱརཧཏཱ ཀུསལཱཀུསལཱནཾ ལཀྑཎབྷཱཝེན ཝུཏྟཱ, ཏབྦྷཱཝེན ཨཀཐིཏཱ ཨབྱཱཀཏཱ ཨཝིཔཱཀཱརཧསབྷཱཝཱ ཧོནྟཱིཏི ཨཱཧ ‘‘ཨཝིཔཱཀལཀྑཎཱ ཨབྱཱཀཏཱ’’ཏི. ཡཐེཝ ཧི སུཁདུཀྑཝིཔཱཀཱརཧཱ སུཁདུཀྑཝིཔཱཀཱཏི ཨེཝཾལཀྑཎཏཱ ཀུསལཱཀུསལཱནཾ ཝུཏྟཱ, ཨེཝམིདྷཱཔི ཨཝིཔཱཀཱརཧཱ ཨཝིཔཱཀཱཏི ཨེཝཾལཀྑཎཏཱ ཨབྱཱཀཏཱནཾ ཝུཏྟཱ. ཏསྨཱ ‘‘ཨཧོསི ཀམྨཾ ནཱཧོསི ཀམྨཝིཔཱཀོ ན བྷཝིསྶཏི ཀམྨཝིཔཱཀོ ནཏྠི ཀམྨཝིཔཱཀོ, ཨཏྠི ཀམྨཾ ནཏྠི ཀམྨཝིཔཱཀོ ན བྷཝིསྶཏི ཀམྨཝིཔཱཀོ, བྷཝིསྶཏི ཀམྨཾ ན བྷཝིསྶཏི ཀམྨཝིཔཱཀོ’’ཏི (པཊི. མ. ༡.༢༣༤) ཨེཝཾཔཀཱརཱནཾ ཀུསལཱཀུསལཱནཾ ཀུསལཱཀུསལབྷཱཝཱནཱཔཏྟི ཨབྱཱཀཏབྷཱཝཱཔཏྟི ཝཱ ན ཧོཏི. ན ཧི ཏེ སུཁདུཀྑཝིཔཱཀཱརཧཱ ན ཧོནྟི ཝིཔཱཀདྷམྨཏྟཱ, ཨཝིཔཱཀཱརཧཱ ཝཱ ན ཧོནྟི ཨཝིཔཱཀདྷམྨཏྟཱབྷཱཝཱཏི.

ཀུསལཱཏི ཝཱ དྷམྨཱཏི ཝཱཏིཨཱདཱིནཱིཏི ཀུསལདྷམྨཔདཱནི དྭེ, ཨཀུསལདྷམྨཔདཱནི དྭེ, ཨབྱཱཀཏདྷམྨཔདཱནི དྭེཏི. ཨེཀཏྠནཱནཏྠཱནཱིཏི ཝིསུཾ ཝིསུཾ དྭིནྣཾ དྭིནྣཾ ཨཉྙམཉྙཱཔེཀྑཾ ཨེཀཏྠནཱནཏྠཏཾ ཙོདེཏི, ན ཚནྣཾ. དོསམེཏྠ ཝཏྟུཀཱམོ ཙོདཀོ པུཙྪཏཱིཏི ཉཏྭཱ ཨཱཙརིཡོ ཨཱཧ ‘‘ཀིཉྩེཏྠཱ’’ཏི. ཨེཏྠ ¶ ཨེཀཏྠནཱནཏྠཏཱཡཾ ཀིཉྩི ཝཏྟབྦཾ ཨསམཏྟཱ ཏེ ཙོདནཱ, ཨཝསིཊྛཾ ཏཱཝ བྲཱུཧཱིཏི ཝུཏྟཾ ཧོཏི. ཡདི ཨེཀཏྠཱནི ཨིནྡསཀྐསདྡཱནཾ ཝིཡ སདྡམཏྟེ ཨེཝ བྷེདོ, ཨེཝཾ ཀུསལདྷམྨསདྡཱནཾ, ན ཨཏྠེཏི. ཡཐཱ ‘‘ཨིནྡོ སཀྐོ’’ཏི ཝུཏྟེ ‘‘ཨིནྡོ ཨིནྡོ’’ཏི ཝུཏྟསདིསཾ ཧོཏི, ཨེཝཾ ‘‘ཀུསལཱ དྷམྨཱ’’ཏི ཨིདཾ ཝཙནཾ ‘‘ཀུསལཱ ཀུསལཱ’’ཏི ཝུཏྟསདིསཾ ཧོཏི. ཨེཝཾ ཨིཏརེསུཔི ‘‘ཨཀུསལཱ ཨཀུསལཱ’’ཏི ཝུཏྟསདིསཏཱ ‘‘ཨབྱཱཀཏཱ ཨབྱཱཀཏཱ’’ཏི ཝུཏྟསདིསཏཱ ཙ ཡོཛེཏབྦཱ. ཨཐ ནཱནཏྠཱནི, ཨིནྡཀུཝེརསདྡཱནཾ ཝིཡ སདྡཏོ ཨཏྠཏོ ཙ ཀུསལདྷམྨསདྡཱནཾ བྷེདོ, ཏཐཱ ཨཀུསལདྷམྨསདྡཱདཱིནནྟི ཚཧི པདེཧི ཙཏཱུཧི པདེཧི ཙ ཚ ཙཏྟཱརོ ¶ ཙ ཨཏྠཱ བྷིནྣཱ ཝུཏྟཱཏི ཀུསལཏྟིཀཱདཱིནཾ ཀུསལཚཀྐཱདིབྷཱཝོ, ཧེཏུདུཀཱདཱིནཉྩ ཧེཏུཙཏུཀྐཱདིབྷཱཝོ ཨཱཔཛྫཏཱིཏི.

ནནུ ཏིཎྞཾ དྷམྨསདྡཱནཾ ཏིཎྞཾ ཨིནྡསདྡཱནཾ ཝིཡ རཱུཔཱབྷེདཱ ཨཏྠཱབྷེདོཏི ཚཀྐབྷཱཝོ ན བྷཝིསྶཏི, ཏསྨཱ ཨེཝམིདཾ ཝཏྟབྦཾ སིཡཱ ‘‘ཏིཀདུཀཱནཾ ཙཏུཀྐཏིཀབྷཱཝོ ཨཱཔཛྫཏཱི’’ཏི, ན ཝཏྟབྦཾ, ཏིཎྞཾ དྷམྨསདྡཱནཾ ཨེཀཏྠཱནཾ ཏིཎྞཾ ཨིནྡསདྡཱནཾ ཝིཡ ཝཙནེ པཡོཛནཱབྷཱཝཱ ཝུཏྟཱནཾ ཏེསཾ མཱསསདྡཱནཾ ཝིཡ ཨབྷིནྣརཱུཔཱནཉྩ ཨཏྠབྷེདོ ཨུཔཔཛྫཏཱིཏི, ཨེཝམཔི ཡཐཱ ཨེཀོ མཱསསདྡོ ཨབྷིནྣརཱུཔོ ཀཱལཾ ཨཔརཎྞཝིསེསཾ སུཝཎྞམཱསཉྩ ཝདཏི, ཨེཝཾ དྷམྨསདྡོཔི ཨེཀོ བྷིནྣེ ཨཏྠེ ཝཏྟུམརཧཏཱིཏི ཀཱལཱདཱིནཾ མཱསཔདཏྠཏཱཡ ཝིཡ ཏབྦཙནཱིཡབྷིནྣཏྠཱནཾ དྷམྨཔདཏྠཏཱཡ ཨབྷེདོཏི ཙཏུཀྐཏིཀབྷཱཝོ ཨེཝ ཨཱཔཛྫཏཱིཏི, ནཱཔཛྫཏི ཨེཀསྶ སདྡསྶ ཛཱཏིགུཎཀིརིཡཱབྷིནྣཱནཾ ཨནབྷིདྷཱནཏོ. ན ཧི མཱས-སདྡོ ཨེཀོ ཛཱཏིབྷིནྣཱནཾ ཀཱལཱདཱིནཾ ཨནྟརེན སརཱུཔེཀསེསཾ ཝཱཙཀོ ཧོཏི. ཨིདྷ ཙ ཡདི སརཱུཔེཀསེསོ ཀཏོ སིཡཱ, དུཏིཡོ ཏཏིཡོ ཙ དྷམྨ-སདྡོ ན ཝཏྟབྦོ སིཡཱ, ཝུཏྟོ ཙ སོ, ཏསྨཱ ཀུསལཱདི-སདྡཱ ཝིཡ ཨབྷིནྣཀུསལཱདིཛཱཏཱིསུ རཱུཔསཱམཉྙེཔི མཱས-སདྡཱ ཝིཡ ཏཡོ ཝིནིཝཏྟཨཉྙཛཱཏཱིསུ ཝཏྟམཱནཱ ཏཡོ དྭེ ཙ དྷམྨ-སདྡཱ ཨཱཔནྣཱཏི ཏིཀདུཀཱནཾ ཚཀྐཙཏུཀྐབྷཱཝོ ཨེཝ ཨཱཔཛྫཏཱིཏི.

པདཱནཉྩ ཨསམྦནྡྷོཏི ཀུསལདྷམྨཔདཱནཾ ཨཉྙམཉྙཾ ཏཐཱ ཨཀུསལདྷམྨཔདཱནཾ ཨབྱཱཀཏདྷམྨཔདཱནཉྩ ཨསམྦནྡྷོ ཨཱཔཛྫཏཱིཏི ཨཏྠོ. དྭིནྣཾ དྭིནྣཉྷི ཨིཙྪིཏོ སམྦནྡྷོ, ན སབྦེསཾ ཚནྣཾ ཙཏུནྣཾ ཝཱ ཨཉྙམཉྙནྟི. ཨིདཾ པན ཀསྨཱ ཙོདེཏི, ནནུ ནཱནཏྠཏྟེ སཏི ཨཏྠནྟརདསྶནཏྠཾ ཝུཙྩམཱནེསུ དྷམྨ-སདྡེསུ ཀུསལཱཀུསལཱབྱཱཀཏ-སདྡཱནཾ ¶ ཝིཡ ཨསམྦནྡྷོ ཝུཏྟོ ཡུཏྟོ ཨེཝཱཏི? སཙྩམེཏཾ, ཨསམྦནྡྷཾ པན སིདྡྷཾ ཀཏྭཱ པུརིམཙོདནཱ ཀཏཱ ‘‘ཏིཀདུཀཱནཾ ཚཀྐཙཏུཀྐབྷཱཝོ ཨཱཔཛྫཏཱི’’ཏི, ཨིདྷ པན ཏཾ ཨསམྦནྡྷཾ སཱདྷེཏུཾ ཨིདཾ ཙོདིཏནྟི ཝེདིཏབྦཾ. ཨཐ ཝཱ ཨེཝམེཏྠ ཡོཛནཱ ཀཱཏབྦཱ – ཡདི པན ཚཀྐཙཏུཀྐབྷཱཝཾ ན ཨིཙྪསི, པདཱནཾ སམྦནྡྷེན བྷཝིཏབྦཾ ཡཐཱཝུཏྟནཡེན, སོ ཙ སམཱནཝིབྷཏྟཱིནཾ དྭིནྣཾ དྭིནྣཾ སམྦནྡྷོ ཨེཀཏྠཏྟེ སཏི ཡུཛྫེཡྻ, ཏྭཾ པན ནཱནཏྠཏཾ ཝདསཱིཏི པདཱནཉྩ ཏེ ཨསམྦནྡྷོ ཨཱཔཛྫཏི, ནེཝ ནཱཔཛྫཏཱིཏི. ནིཡམནཏྠོ ཙ-སདྡོ. པུབྦཱཔར…པེ… ནིཔྤཡོཛནཱནི ནཱམ ཧོནྟཱིཏི ཚཀྐཙཏུཀྐབྷཱཝཾ ཨནིཙྪནྟསྶ, ནཱནཏྠཏཾ པན ཨིཙྪནྟསྶཱཏི ཨདྷིཔྤཱཡོ. ཨཝསྶཉྩ སམྦནྡྷོ ཨིཙྪིཏབྦོ པུབྦཱཔརཝིརོདྷཱཔཏྟིཏོཏི དསྶེཏུཾ ‘‘ཡཱཔི ཙེསཱ’’ཏིཨཱདིམཱཧ. པུཙྪཱ ཧི པདཝིཔལླཱསཀརཎེན ¶ དྷམྨཱ ཨེཝ ཀུསལཱཏི ཀུསལདྷམྨ-སདྡཱནཾ ཨིདྷ ཨུདྡིཊྛཱནཾ ཨེཀཏྠཏཾ དཱིཔེཏི, ཏཝ ཙ ནཱནཏྠཏཾ ཝདནྟསྶ ནེཝ ཧི དྷམྨཱ ཀུསལཱཏི ཀཏྭཱ ཏཱཡཔི པུཙྪཱཡ ཝིརོདྷོ ཨཱཔཛྫཏི, ཝུཙྩཏི ཙ ཏཐཱ སཱ པུཙྪཱཏི ན ནཱནཏྠཏཱ ཡུཛྫཏི.

ཨཔརོ ནཡོཏི ‘‘ཀུསལཱ དྷམྨཱ’’ཏིཨཱདཱིནཾ དྭིནྣཾ དྭིནྣཾ ཨེཀཏྠཏྟམེཝ ཏིཎྞཾ དྷམྨསདྡཱནཾ ཨེཀཏྠནཱནཏྠཏྟེཧི ཙོདེཏི. ཏིཎྞཾ དྷམྨཱནཾ ཨེཀཏྟཱཏིཨཱདིམྷི ཡཐཱ ཏཱིཧི ཨིནྡ-སདྡེཧི ཝུཙྩམཱནཱནཾ ཨིནྡཏྠཱནཾ ཨིནྡབྷཱཝེན ཨེཀཏྟཱ ཏཏོ ཨནཉྙེསཾ སཀྐཔུརིནྡདསཧསྶཀྑསདྡཏྠཱནཾ ཨེཀཏྟཾ, ཨེཝཾ ཏིཎྞཾ དྷམྨ-སདྡཏྠཱནཾ དྷམྨབྷཱཝེན ཨེཀཏྟཱ ཏཏོ ཨནཉྙེསཾ ཀུསལཱཀུསལཱབྱཱཀཏ-སདྡཏྠཱནཾ ཨེཀཏྟཾ ཨཱཔཛྫཏཱིཏི ཨཏྠོ. དྷམྨོ ནཱམ བྷཱཝོཏི སབྷཱཝདྷཱརཎཱདིནཱ ཨཏྠེན དྷམྨོཏི ཝུཏྟོ, སོ ཙ སབྷཱཝསྶེཝ ཧོཏི, ནཱསབྷཱཝསྶཱཏི ཨིམིནཱ ཨདྷིཔྤཱཡེན ཝདཏི. ཧོཏུ བྷཱཝོ, ཏཏོ ཀིནྟི? ཡདི ཏིཎྞཾ དྷམྨསདྡཱནཾ ནཱནཏྠཏཱ, ཏཱིསུ དྷམྨེསུ ཡོ ཀོཙི ཨེཀོ དྷམྨོ བྷཱཝོ, ཏཏོ ཨནཉྙཾ ཀུསལཾ ཨཀུསལཾ ཨབྱཱཀཏཾ ཝཱ ཨེཀེཀམེཝ བྷཱཝོ. བྷཱཝབྷཱུཏཱ པན དྷམྨཱ ཨཉྙེ དྭེ ཨབྷཱཝཱ ཧོནྟཱིཏི ཏེཧི ཨནཉྙེ ཀུསལཱདཱིསུ དྭེ ཡེ ཀེཙི ཨབྷཱཝཱ. ཡོཔི ཙ སོ ཨེཀོ དྷམྨོ བྷཱཝོཏི གཧིཏོ, སོཔི སམཱནརཱུཔེསུ ཏཱིསུ དྷམྨསདྡེསུ ཨཡམེཝ བྷཱཝཏྠོ ཧོཏཱིཏི ནིཡམསྶ ཨབྷཱཝཱ ཨཉྙསྶ བྷཱཝཏྠཏྟེ སཏི ཨབྷཱཝོ ཧོཏཱིཏི ཏཏོ ཨནཉྙསྶཔི ཨབྷཱཝཏྟཾ ཨཱཔནྣནྟི ཀུསལཱདཱིནཾ སབྦེསམྤི ཨབྷཱཝཏྟཱཔཏྟི ཧོཏི. ན ཧི ཨིནྡསྶ ཨམནུསྶཏྟེ ཏཏོ ཨནཉྙེསཾ སཀྐཱདཱིནཾ མནུསྶཏྟཾ ཨཏྠཱིཏི.

ནནུ ¶ ཨེཝམཔི ཨེཀསྶ བྷཱཝཏྟཾ ཝིནཱ ཨཉྙེསཾ ཨབྷཱཝཏྟཾ ན སཀྐཱ ཝཏྟུཾ, ཏཏྠ ཙ ཨེཀེནེཝ བྷཱཝེན བྷཝིཏབྦནྟི ནིཡམཱབྷཱཝཏོ ཏིཎྞམྤི བྷཱཝཏྟེ སིདྡྷེ ཏེཧི ཨནཉྙེསཾ ཀུསལཱདཱིནམྤི བྷཱཝཏྟཾ སིདྡྷཾ ཧོཏཱིཏི? ན ཧོཏི ཏིཎྞཾ དྷམྨ-སདྡཱནཾ ནཱནཏྠབྷཱཝསྶ ཨནུཉྙཱཏཏྟཱ. ན ཧི ཏིཎྞཾ བྷཱཝཏྟེ ནཱནཏྠཏཱ ཨཏྠི, ཨནུཉྙཱཏཱ ཙ སཱ ཏཡཱཏི. ནནུ ཏིཎྞཾ དྷམྨཱནཾ ཨབྷཱཝཏྟེཔི ནཱནཏྠཏཱ ན སིཡཱཏི? མཱ ཧོཏུ ནཱནཏྠཏཱ, ཏཝ པན ནཱནཏྠཏཾ པཊིཛཱནནྟསྶ ‘‘ཨེསོ དོསོ’’ཏི ཝདཱམི, ན པན མཡཱ ནཱནཏྠཏཱ ཨེཀཏྠཏཱ ཝཱ ཨནུཉྙཱཏཱཏི ཀུཏོ མེ ཝིརོདྷོ སིཡཱཏི. ཨཐ ཝཱ ཨབྷཱཝཏྟཾ ཨཱཔནྣེཧི དྷམྨེཧི ཨནཉྙེ ཀུསལཱདཡོཔི ཨབྷཱཝཱ ཨེཝ སིཡུནྟི ཨིདཾ ཝཙནཾ ཨནིཡམེན ཡེ ཀེཙི དྭེ དྷམྨཱ ཨབྷཱཝཏྟཾ ཨཱཔནྣཱ, ཏེཧི ཨནཉྙེསཾ ཀུསལཱདཱིསུ ཡེསཾ ཀེསཉྩི དྭིནྣཾ ཀུསལཱདཱིནཾ ཨབྷཱཝཏྟཱཔཏྟིཾ སནྡྷཱཡ ཝུཏྟཾ ¶ ཨེཀསྶ བྷཱཝཏྟཱ. ཡམྤི ཝུཏྟཾ ‘‘ཏེཧི ཙ ཨཉྙོ ཀུསལཔརོཔི ཨབྷཱཝོ སིཡཱ’’ཏི, ཏཾ ཨནིཡམདསྶནཏྠཾ ཝུཏྟཾ, ན སབྦེསཾ ཨབྷཱཝསཱདྷནཏྠཾ. ཨཡཉྷི ཏཏྠ ཨཏྠོ ཨཀུསལཔརསྶ ཝཱ ཨབྱཱཀཏཔརསྶ ཝཱ དྷམྨསྶ བྷཱཝཏྟེ སཏི ཏེཧི ཨཉྙོ ཀུསལཔརོཔི ཨབྷཱཝོ སིཡཱཏི.

སབྦམེཏཾ ཨཀཱརཎནྟི ཨེཏྠ ཀཱརཎཾ ནཱམ ཡུཏྟི. ཀུསལཀུསལསདྡཱནཾ ཝིཡ ཨེཀནྟཨེཀཏྠཏཾ, ཀུསལརཱུཔཙཀྑུམ-སདྡཱནཾ ཝིཡ ཨེཀནྟནཱནཏྠཏཉྩ ཝིཀཔྤེཏྭཱ ཡཱཡཾ པུནརུཏྟི ཚཀྐཙཏུཀྐཱཔཏྟི ཨསམྦནྡྷཝིརོདྷཱབྷཱཝཱཔཏྟི དོསཱརོཔནཡུཏྟི ཝུཏྟཱ, སབྦཱ སཱ ཨཡུཏྟི, ཏཐཱ ཨེཀཏྠནཱནཏྠཏཱབྷཱཝཏོཏི ཝུཏྟཾ ཧོཏི. ཡཱ ཡཱ ཨནུམཏི ཡཐཱནུམཏི ཨནུམཏིཡཱ ཨནུམཏིཡཱ ཝོཧཱརསིདྡྷིཏོ. ཨནུམཏིཡཱ ཨནུརཱུཔཾ ཝཱ ཡཐཱནུམཏི, ཡཐཱ ཨནུམཏི པཝཏྟཱ, ཏཐཱ ཏདནུརཱུཔཾ ཝོཧཱརསིདྡྷིཏོཏི ཨཏྠོ. ཨནུམཏི ཧི ཝིསེསནཝིསེསིཏབྦཱབྷཱཝཏོ ཨཙྩནྟམབྷིནྣེསུ ཀཏྠཙི ཀིརིཡཱགུཎཱདིཔརིགྒཧཝིསེསེན ཨཝིཝཊསདྡཏྠཝིཝརཎཏྠཾ པཝཏྟཱ ཡཐཱ ‘‘སཀྐོ ཨིནྡོ པུརིནྡདོ’’ཏི. ཀཏྠཙི ཨཙྩནྟཾ བྷིནྣེསུ ཡཐཱ ‘‘དྷཝོ ཁདིརོ པལཱསོ ཙ ཨཱནཱིཡནྟཱུ’’ཏི. ཀཏྠཙི ཝིསེསནཝིསེསིཏབྦབྷཱཝཏོ བྷེདཱབྷེདཝནྟེསུ སེཡྻཐཱཔི ‘‘ནཱིལུཔྤལཾ པཎྜིཏཔུརིསོ’’ཏི, ཏཱཡ ཏཱཡ ཨནུམཏིཡཱ ཏདནུརཱུཔཉྩ ཏེ ཏེ ཝོཧཱརཱ སིདྡྷཱ. ཏསྨཱ ཨིཧཱཔི ཀུསལདྷམྨ-སདྡཱནཾ ཝིསེསནཝིསེསིཏབྦབྷཱཝཏོ ཝིསེསཏྠསཱམཉྙཏྠཔརིགྒཧེན སམཱནེ ཨཏྠེ བྷེདཱབྷེདཡུཏྟེ པཝཏྟི ཨནུམཏཱཏི ¶ ཏཱཡ ཏཱཡ ཨནུམཏིཡཱ ཏདནུརཱུཔཉྩ སིདྡྷོ ཨེསོ ཝོཧཱརོ. ཏསྨཱ ཝུཏྟཾ ‘‘སབྦམེཏཾ ཨཀཱརཎ’’ནྟི.

ཨཏྟནོ ཨཏྟནོ ཨཏྠཝིསེསཾ ཏསྶ དཱིཔེནྟཱིཏི ཨཏྟནཱ པརིགྒཧིཏཾ ཨཏྟནཱ ཝུཙྩམཱནཾ ཨནཝཛྫསུཁཝིཔཱཀཱདིཀུསལཱདིབྷཱཝཾ དྷམྨ-སདྡསྶ དཱིཔེནྟི ཏདཏྠསྶ ཏབྦྷཱཝདཱིཔནཝསེནཱཏི ཨདྷིཔྤཱཡོ. ན ཧི དྷམྨ-སདྡོ ཀུསལཱདིབྷཱཝོ ཧོཏཱིཏི. ཨིམིནཱཝཱཏི ‘‘དྷམྨ-སདྡོ པརིཡཏྟིཨཱདཱིསུ དིསྶཏཱི’’ཏིཨཱདིནཱ ‘‘ཨཏྟནོ སབྷཱཝཾ དྷཱརེནྟཱི’’ཏིཨཱདིནཱ ཙ ནཡེན. སོ ཧི སབྦཏྠ སམཱནོ, ན ཀུསལ-སདྡོ ཨཱརོགྱཱདཱིསུ དིསྶཏཱིཏི ‘‘ཀུཙྪིཏེ སལཡནྟཱི’’ཏིཨཱདིཀོ, སོ ཙ ཝིསེསནཡོ ‘‘ཨིཏོ པརཾ ཝིསེསམཏྟམེཝ ཝཀྑཱམཱ’’ཏི ཨེཏེན ཨཔནཱིཏོཏི དཊྛབྦོ. ན ཧི ཀུསལཱདིཝིསེསཾ གཧེཏྭཱ པཝཏྟཱ སུཁཱཡ ཝེདནཱཡ སམྤཡུཏྟཱཏིཨཱདཡོ ཝིསེསཱཏི.

༢. སུཁསྶ ཙ པཧཱནཱཏི ཨེཏྠ སུཁིནྡྲིཡཾ ‘‘སུཁ’’ནྟི ཝུཏྟཾ, ཏཉྩ སུཁཝེདནཱཝ ཧོཏཱིཏི ¶ ‘‘སུཁཝེདནཱཡཾ དིསྶཏཱི’’ཏི ཝུཏྟཾ, ན པན ‘‘ཏིསྶོ ཨིམཱ, བྷིཀྑཝེ, ཝེདནཱ སུཁཱ ཝེདནཱ’’ཏིཨེཝམཱདཱིསུ (སཾ. ནི. ༤.༢༤༩ ཨཱདཡོ) སུཁ-སདྡོ ཝིཡ སུཁཝེདནཱསདྡེན སམཱནཏྠཏྟཱ. ཨཡཉྷི སུཁིནྡྲིཡཏྠོ སུཁ-སདྡོ ཀཱཡསུཁནཾ ཀཱཡཱནུགྒཧཾ སཱཏཝིསེསཾ གཧེཏྭཱ པཝཏྟོ, ན པན སུཁཱ ཝེདནཱ ‘‘ཡཾ ཀིཉྩི ཝེདནཾ ཝེདེཏི སུཁཾ ཝཱ (མ. ནི. ༡.༤༠༩), ཡོ སུཁཾ དུཀྑཏོ’’ཏིཨེཝམཱདཱིསུ (སཾ. ནི. ༤.༢༥༣) སུཁ-སདྡོ ཝིཡ སཱཏསཱམཉྙཾ གཧེཏྭཱ པཝཏྟོཏི. ཡསྨིཾ སཏི སུཁཧེཏཱུནཾ པཝཏྟི, ཏཾ སུཁམཱུལཾ. བུདྡྷུཔྤཱདེ ཙ ཀཱམསམཏིཀྐམཱདིཀེ ཝིརཱགེ ཙ སཏི སུཁཧེཏཱུནཾ པུཉྙཔསྶདྡྷིཨཱདཱིནཾ པཝཏྟི ཧོཏཱིཏི ཏཾ ‘‘སུཁམཱུལཾ སུཁ’’ནྟི ཝུཏྟཾ. སུཁསྶ ཙ ཨཱརམྨཎཏྟཱ ‘‘རཱུཔཾ སུཁ’’ནྟི ཝུཏྟཾ. པུཉྙཱནཱིཏི ཡདིདཾ ཝཙནཾ, ཏཾ སུཁསྶ ཙ ཨདྷིཝཙནཾ ཨིཊྛཝིཔཱཀསྶ ཨདྷིཝཙནཾ ཏདཏྠསྶ ཨིཊྛཝིཔཱཀཝིཔཙྩནཏོཏི ཨཏྠོ. སུཁཔཙྩཡཱནཾ རཱུཔཱདཱིནཾ ཨིཊྛཱནཾ ཋཱནཾ ཨོཀཱསོ སགྒཱ ནནྡནཉྩཱཏི ‘‘སུཁཱ སགྒཱ སུཁཾ ནནྡན’’ནྟི ཝུཏྟཾ. དིཊྛདྷམྨེཏི ཨིམསྨིཾ ཨཏྟབྷཱཝེ. སུཁཝིཧཱརཱཏི པཋམཛ྄ཛྷཱནཝིཧཱརཱདཱི. ནཱིཝརཎཱདིབྱཱབཱདྷརཧིཏཏྟཱ ‘‘ཨབྱཱབཛ྄ཛྷཱ’’ཏི ཝུཏྟཱ. སབྦསངྑཱརདུཀྑནིབྦཱཔནཏོ ཏཾནིརོདྷཏྟཱ ཝཱ ‘‘ནིབྦཱནཾ སུཁ’’ནྟི ཝུཏྟཾ. ཨཱདི-སདྡེན ‘‘ཨདུཀྑམསུཁཾ སནྟཾ, སུཁམིཙྩེཝ བྷཱསིཏ’’ནྟི ཨདུཀྑམསུཁེ. ‘‘དྭེཔི མཡཱ, ཨཱནནྡ, ¶ ཝེདནཱ ཝུཏྟཱ པརིཡཱཡེན སུཁཱ ཝེདནཱ དུཀྑཱ ཝེདནཱ’’ཏི (སཾ. ནི. ༤.༢༦༧) སུཁོཔེཀྑཱསུ ཙ ཨིཊྛཱསཱུཏི ཨེཝམཱདཱིསུ པཝཏྟི སངྒཧིཏཱ.

དུཀྑཝཏྠཱུཏི དུཀྑསྶ ཨོཀཱསོ. ཨཏྟནོ པཙྩཡེཧི ཨུཔྤཛྫམཱནམྤི ཧི ཏཾ དུཀྑཾ ཛཱཏིཨཱདཱིསུ ཝིཛྫམཱནེསུ ཏབྦཏྠུཀཾ ཧུཏྭཱ ཨུཔྤཛྫཏི. དུཀྑཔཙྩཡེཏི དུཀྑཧེཏུམྷི, དུཀྑསྶ ཛནཀེཏི ཨཏྠོ. དུཀྑཔཙྩཡཊྛཱནེཏི དུཀྑཛནཀཀམྨསྶ སཧཱཡབྷཱུཏཱནཾ ཨནིཊྛརཱུཔཱདིཔཙྩཡཱནཾ ཋཱནེ. པཙྩཡསདྡོ ཧི ཛནཀེ ཛནཀསཧཱཡེ ཙ པཝཏྟཏཱིཏི. ཨཱདི-སདྡེན ‘‘ཡདནིཙྩཾ ཏཾ དུཀྑ’’ནྟིཨཱདིནཱ (སཾ. ནི. ༣.༡༥, ༤༥-༤༦, ༧༦) སངྑཱརདུཀྑཱདཱིསུ པཝཏྟི དཊྛབྦཱ. སམྤཡུཏྟེ ཝཏྠུཉྩ ཀརཛཀཱཡཾ སུཁཡཏི ལདྡྷསྶཱདེ ཨནུགྒཧིཏེ ཀརོཏཱིཏི སུཁཱ. སུཁཱཏི ཝེདནཱསདྡམཔེཀྑིཏྭཱ སུཁབྷཱཝམཏྟསྶ ཨཔྤཀཱསནེན ནཔུཾསཀལིངྒཏཱ ན ཀཏཱ. སབྷཱཝཏོ སངྐཔྤཏོ ཙ ཡཾ ཨིཊྛཾ, ཏདནུབྷཝནཾ ཨིཊྛཱཀཱརཱནུབྷཝནཾ ཝཱ ཨིཊྛཱནུབྷཝནཾ.

སམནྟི ཨཝིསམཾ. སམཱ ཨེཀཱིབྷཱཝཱུཔགཏཱ ཝིཡ ཡུཏྟཱ, སམཾ ཝཱ སཧ ཡུཏྟཱཏི ཡོཛེཏབྦཾ. ཨེཀུཔྤཱདཱཏི ཨེཀོ སམཱནོ ཨུཔྤཱདོ ཨེཏེསནྟི ཨེཀུཔྤཱདཱ, སམཱནཔཙྩཡེཧི སཧུཔྤཏྟིཀཱཏི ¶ ཨཏྠོ. སཧུཔྤཏྟིཀཱནཾ རཱུཔཱརཱུཔཱནཉྩ ཨཉྙམཉྙསམྤཡུཏྟཏཱ ཨཱཔཛྫེཡྻཱཏི ‘‘ཨེཀནིརོདྷཱ’’ཏི ཝུཏྟཾ, ཡེ སམཱནུཔྤཱདཱ སམཱནནིརོདྷཱ ཙ, ཏེ སམྤཡུཏྟཱཏི རཱུཔཱརཱུཔཱནཾ ཨཉྙམཉྙསམྤཡོགོ ནིཝཱརིཏོ ཧོཏི. ཨེཝམཔི ཨཝིནིབྦྷོགརཱུཔཱནཾ ཨཉྙམཉྙསམྤཡུཏྟཏཱ ཨཱཔཛྫེཡྻཱཏི ‘‘ཨེཀཝཏྠུཀཱ’’ཏི ཝུཏྟཾ, ཡེ ཨེཀུཔྤཱདཱ ཨེཀནིརོདྷཱ ཨེཀཝཏྠུཀཱ ཙ, ཏེ སམྤཡུཏྟཱཏི. ཨེཝམཔི ཨཝིནིབྦྷོགརཱུཔེསུ ཨེཀཾ མཧཱབྷཱུཏཾ སེསམཧཱབྷཱུཏོཔཱདཱརཱུཔཱནཾ ནིསྶཡཔཙྩཡོ ཧོཏཱིཏི ཏེན ཏཱནི ཨེཀཝཏྠུཀཱནཱིཏི, ཙཀྑཱདིནིསྶཡབྷཱུཏཱནི ཝཱ བྷཱུཏཱནི ཨེཀཾ ཝཏྠུ ཨེཏེསུ སནྣིསྶིཏནྟི ཨེཀཝཏྠུཀཱནཱིཏི ཀཔྤེནྟསྶ ཏེསཾ སམྤཡུཏྟཏཱཔཏྟི སིཡཱཏི ཏནྣིཝཱརཎཏྠཾ ‘‘ཨེཀཱརམྨཎཱ’’ཏི ཝུཏྟཾ, ཡེ ཨེཀུཔྤཱདཱ…པེ… ཨེཀཱརམྨཎཱ ཙ ཧོནྟི, ཏེ སམྤཡུཏྟཱཏི. པཊིལོམཏོ ཝཱ ཨེཀཱརམྨཎཱཏི ཝུཏྟེ ཨེཀཝཱིཐིཡཉྩ པཉྩཝིཉྙཱཎསམྤཊིཙྪནཱནཾ ནཱནཱཝཱིཐིཡཾ པརསནྟཱནེ ཙ ཨེཀསྨིཾ ཨཱརམྨཎེ ཨུཔྤཛྫམཱནཱནཾ བྷིནྣཝཏྠུཀཱནཾ སམྤཡུཏྟཏཱ ཨཱཔཛྫེཡྻཱཏི ‘‘ཨེཀཝཏྠུཀཱ’’ཏི ཝུཏྟཾ, ཡེ ཨེཀཝཏྠུཀཱ ཧུཏྭཱ ཨེཀཱརམྨཎཱ, ཏེ སམྤཡུཏྟཱཏི. ཨེཝམཔི སམྤཊིཙྪནསནྟཱིརཎཱདཱིནཾ སམྤཡུཏྟཏཱ ཨཱཔཛྫེཡྻཱཏི ‘‘ཨེཀནིརོདྷཱ’’ཏི ཝུཏྟཾ, ཡེ ཨེཀནིརོདྷཱ ¶ ཧུཏྭཱ ཨེཀཝཏྠུཀཱ ཨེཀཱརམྨཎཱ, ཏེ སམྤཡུཏྟཱཏི. ཀིཾ པན ནཱནུཔྤཱདཱཔི ཨེཝཾ ཏིཝིདྷལཀྑཎཱ ཧོནྟི, ཨཐ ཨེཀུཔྤཱདཱ ཨེཝཱཏི ཝིཙཱརཎཱཡ ཨེཀུཔྤཱདཱ ཨེཝ ཨེཝཾ ཏིཝིདྷལཀྑཎཱ ཧོནྟཱིཏི དསྶནཏྠཾ ‘‘ཨེཀུཔྤཱདཱ’’ཏི ཝུཏྟཾ.

༣. ཝིཔཀྐབྷཱཝམཱཔནྣཱནཾ ཨརཱུཔདྷམྨཱནནྟི ཡཐཱ སཱལིབཱིཛཱདཱིནཾ ཕལཱནི ཏཾསདིསཱནི ནིབྦཏྟཱནི ཝིཔཀྐཱནི ནཱམ ཧོནྟི, ཝིཔཱཀནིརུཏྟིཉྩ ལབྷནྟི, ན མཱུལངྐུརཔཏྟཁནྡྷནཱལཱ༹ནི, ཨེཝཾ ཀུསལཱཀུསལཱནཾ ཕལཱནི ཨརཱུཔདྷམྨབྷཱཝེན སཱརམྨཎབྷཱཝེན སུཀྐཀཎྷཱདིབྷཱཝེན ཙ ཏཾསདིསཱནི ཝིཔཀྐབྷཱཝམཱཔནྣཱནཱིཏི ཝིཔཱཀནིརུཏྟིཾ ལབྷནྟི, ན རཱུཔདྷམྨཱ ཀམྨནིབྦཏྟཱཔི ཀམྨཱསདིསཱཏི དསྶེཏུཾ ཝུཏྟཾ. ཛཱཏིཛརཱསབྷཱཝཱཏི ཛཱཡནཛཱིརཎསབྷཱཝཱ. ཝིཔཱཀཔཀཏིཀཱཏི ཝིཔཙྩནཔཀཏིཀཱ. ཝིཔཙྩནསབྷཱཝཏཱ ཙ ཨནུཔཙྪིནྣཱཝིཛྫཱཏཎྷཱམཱནསནྟཱནེ སབྱཱཔཱརཏཱ, ཏེན ཨབྷིཉྙཱདིཀུསལཱནཾ བྷཱཝནཱཡཔཧཱཏབྦཱདིཨཀུསལཱནཉྩ ཝིཔཱཀཱནུཔྤཱདནེཔི ཝིཔཱཀདྷམྨཏཱ སིདྡྷཱ ཧོཏི. ཝིཔཀྐབྷཱཝནྟི ཙེཏྠ བྷཱཝ-སདྡེན སབྷཱཝོ ཨེཝ ཝུཏྟོ. ཏཾ ཡཐཱཝུཏྟཾ ཝིཔཀྐསབྷཱཝཾ དུཏིཡསྶ ཝུཏྟཾ ཝིཔཙྩནསབྷཱཝཉྩ གཧེཏྭཱ ‘‘ཨུབྷཡསབྷཱཝཔཊིཀྑེཔཝསེནཱ’’ཏི ཨཱཧ.

༤. ཨུཔེཏེན ཨཱདིནྣཱ ཨུཔཱདིནྣཱ. ཀིཾ པན ཏཾ ཨུཔེཏཾ, ཀེན ཙ ཨུཔེཏཾ, ཀཐཉྩ ཨུཔེཏཾ, ཀེ ཙ ཏེན ཨཱདིནྣཱཏི? སཏི ཙ ལོཀུཏྟརཱནཾ ཀེསཉྩི ཨཱརམྨཎབྷཱཝེ ཏནྣིཝཏྟནཏྠཾ ཨུཔེཏསདྡསམྦནྡྷིནཱ ¶ ཨུཔཡ-སདྡེན ཝུཙྩམཱནཱཧི ཙཏུབྦིདྷུཔཱདཱནབྷཱུཏཱཧི ཏཎྷཱདིཊྛཱིཧི ཨུཔེཏཾ, ཏེཧི ཙ ཨཱརམྨཎཀརཎཝསེན ཨུཔེཏཾ, ན སམནྣཱགམཝསེན. སཏི ཙ སབྦཏེབྷཱུམཀདྷམྨཱནཾ ཨུཔཱདཱནཱརམྨཎཏྟེ ཡེཧི ཝིཔཱཀཀཊཏྟཱརཱུཔཱནི ཨམྷེཧི ནིབྦཏྟཏྟཱ ཨམྷཱཀཾ ཨེཏཱནི ཕལཱནཱིཏི གཎྷནྟེཧི ཝིཡ ཨཱདིནྣཱནི, ཏཱནི ཏེབྷཱུམཀཀམྨཱནི ཀམྨབྷཱཝེན ཨེཀཏྟཾ ཨུཔནེཏྭཱ ཨུཔེཏནྟི ཨིདྷ གཧིཏཱནི. ཏེཧི ཙ ནིབྦཏྟཱནི ཝིཔཱཀཀཊཏྟཱརཱུཔཱནི ཨུཔཱདིནྣཱ དྷམྨཱཏི སབྦམེཏཾ དསྶེཏུཾ ‘‘ཨཱརམྨཎཀརཎཝསེནཱ’’ཏིཨཱདི ཝུཏྟཾ. ཨཡཉྩ ཨཏྠནཡོ ཡཐཱསམྦྷཝཾ ཡོཛེཏབྦོ, ན ཝཙནཱནུཔུབྦེནཱཏི. ཨེཏྠཱཧ – ཡདི ཨཱརམྨཎཀརཎཝསེན ཏཎྷཱདིཊྛཱིཧི ཨུཔེཏེན ཨཱདིནྣཱ ཨུཔཱདིནྣཱ, སབྦཏེབྷཱུམཀདྷམྨཱ ཙ ཏཎྷཱདཱིནཾ ཨཱརམྨཎཱ ཧོནྟི, ན ཙ ཨུཔེཏསདྡོ ཀམྨེ ཨེཝ ནིརུལ༹ྷོ, ཏེན ཀམྨསྶེཝ གཧཎེ ཀཱརཎཾ ནཏྠི, ཏསྨཱ སབྦཏེབྷཱུམཀདྷམྨཔཙྩཡུཔྤནྣཱནཾ ¶ ཨཝིཛྫཱདིཧེཏཱུཧི ནིབྦཏྟཱནཾ སངྑཱརཱདིཕལཱནཾ ཨུཔཱདིནྣཏྟཾ ཨཱཔཛྫཏི ཏེསམྤི ཏེཧིཕལབྷཱཝེན གཧིཏཏྟཱ. ཨུཔ-སདྡེན ཙ ཨུཔེཏཏཱམཏྟཾ ཛོཏིཏཾ, ན ཨཱརམྨཎཀརཎཾ སམནྣཱགམནིཝཏྟཀཾ, ཨཱདིནྣ-སདྡེན ཙ གཧིཏཏཱམཏྟཾ ཝུཏྟཾ, ན ཀམྨསམུཊྛཱནཏཱཝིསེསོ. ཏསྨཱ སབྦཔཙྩཡུཔྤནྣཱནཾ ཨུཔཱདིནྣཏྟཾ ཨཱཔཛྫཏཱིཏི? ནཱཔཛྫཏི བོདྷནེཡྻཛ྄ཛྷཱསཡཝསེན དེསནཱཔཝཏྟིཏོ. ཡེསཉྷི བོདྷནཏྠཾ ‘‘ཨུཔཱདིནྣཱ’’ཏི ཨེཏཾ ཝུཏྟཾ, ཏེ ཏེནེཝ ཝཙནེན ཡཐཱཝུཏྟཔྤཀཱརེ དྷམྨེ བུཛ྄ཛྷིཾསུ, ཨེཏརཧི པན ཏཱཝཏཱ བུཛ྄ཛྷིཏུཾ ཨསཀྐོནྟེན སུཏྭཱ ཏདཏྠོ ཝེདིཏབྦོཏི ཨེསཱ ཨཏྠཝིབྷཱཝནཱ ཀཏཱ ‘‘ཀམྨུནཱ’’ཏི.

ཨཡཾ པན ཨཔརོ ཨཏྠོ དཊྛབྦོ – ཨུཔ-སདྡོ ཨུཔེཏཾ དཱིཔེཏི. ཨཡཉྷི ཨུཔ-སདྡོ སམཱསེ པཡུཛྫམཱནོ ‘‘ཨཏིམཱལཱ’’ཏིཨཱདཱིསུ ཨཏི-སདྡོ ཝིཡ ཨཏིཀྐམནཾ སསཱདྷནཾ ཨུཔགམནཾ སསཱདྷནཾ ཝདཏི, ཨུཔགམནཉྩ ཨུཔཱདཱནཨུཔཡོ, ཏེན ཨུཔགཏཾ ཨུཔེཏཾ. ཀིཾ པན ཏནྟི? ཡཾ ཨསཏི ཨུཔཱདཱནེ ན ཧོཏི, ཏཾ ‘‘ཨུཔཱདཱནཔཙྩཡཱ བྷཝོ’’ཏི ཨེཝཾ ཝུཏྟཾ ཏེབྷཱུམཀཀམྨཾ པཙྩཡབྷཱཝེན པུརིམཛཱཏུཔྤནྣེན ཨུཔཱདཱནེན ཨུཔགཏཏྟཱ ‘‘ཨུཔེཏ’’ནྟི ཝུཙྩཏི. ན ཧི ཀོཙི ཨནུཔགྒམྨ ཨནིཙྪནྟོ ཀམྨཾ ཀརོཏཱིཏི. ཏེན ཨུཔེཏེན ཀམྨུནཱ པུནབྦྷཝསྶ ཨཱདཱནཾ ཧོཏི. ཀམྨུནཱ ཧི སཱསཝེན སཏྟཱ ཨཱདིཡནྟི པུནབྦྷཝཾ, ཏསྨཱ ཨཱདཱཏབྦབྷཱཝེན པཱཀཊོ པུནབྦྷཝོ. སོ ཙ ཨུཔཔཏྟིབྷཝོ ཏེབྷཱུམཀཝིཔཱཀཀཊཏྟཱརཱུཔསངྒཧོ ‘‘བྷཝཔཙྩཡཱ ཛཱཏཱི’’ཏི ཨེཏྠ ཛཱཏིཝཙནེ སམཝརུདྡྷོཏི ཨུཔཱདིནྣཝཙནེན ཨུཔཔཏྟིབྷཝོ ཝུཙྩཏི, ཨུཔཔཏྟིབྷཝོ ཙ ཏེབྷཱུམཀཝིཔཱཀཀཊཏྟཱརཱུཔཱནཱིཏི དྷཱཏུཀཐཱཡཾ པཀཱསིཏམེཏཾ. ཏསྨཱ ཨུཔེཏེན ཨཱདིནྣཱཏི ཏེ ཨེཝ དྷམྨཱ ཝུཙྩནྟཱིཏི སིདྡྷོ ཨཡམཏྠོཏི. ཨུཔཱདིནྣ-སདྡསྶ ཨཏྠཾ ཝཏྭཱ ཏཾ ཝིསྶཛྫེཏྭཱ ཨུཔཱདཱནིཡ-སདྡསྶ ¶ ཝིསུཾ ཨུཔཱདིནྣསདྡཱནཔེཀྑཾ ཨཏྠཾ ཝཏྟུཾ ‘‘ཨཱརམྨཎབྷཱཝཾ ཨུཔགནྟྭཱ’’ཏིཨཱདིམཱཧ. ཏསྨཱ ཨེཝ ཨཝིསེསེཏྭཱ ‘‘ཨུཔཱདཱནསྶ ཨཱརམྨཎཔཙྩཡབྷཱུཏཱནམེཏཾ ཨདྷིཝཙན’’ནྟི ཝུཏྟཾ. ཏཾ པན ཨུཔཱདཱནིཡཾ ཨུཔཱདིནྣཾ ཨནུཔཱདིནྣནྟི དུཝིདྷཾ. ཏསྨཱ ཏཾ ཝིསེསནེན དསྶེནྟོ ‘‘ཨུཔཱདིནྣཱ ཙ ཏེ ཨུཔཱདཱནིཡཱ ཙཱ’’ཏིཨཱདིམཱཧ.

༥. སཾཀིལེསོཏི དས ཀིལེསཝཏྠཱུནི ཝུཙྩནྟི. སཾཀིལིཊྛཱཏི ཏེཧི ཝིབཱདྷིཏཱ ཨུཔཏཱཔིཏཱ ཙ. ཏེ པན ཡསྨཱ སཾཀིལེསསམྤཡུཏྟཱ ཨེཀུཔྤཱདཱདཱིཧི ནིནྣཱནཏྟཱ ཨེཀཱིབྷཱཝམིཝ གཏཱ ཝིསཱདཱིཧི ཝིཡ སཔྤིཨཱདཡོ ཝིདཱུསིཏཱ ¶ མལཱིནཱ ཝིབཱདྷིཏཱ ཨུཔཏཱཔིཏཱ ཙ ནཱམ ཧོནྟི, ཏསྨཱ ཨཱཧ ‘‘སཾཀིལེསེན སམནྣཱགཏཱ སཾཀིལིཊྛཱ’’ཏི. སཾཀིལེསཾ ཨརཧནྟཱིཏི སཾཀིལེསསྶ ཨཱརམྨཎབྷཱཝེན ཏཾ ལདྡྷུཾ ཨརཧནྟཱིཏི ཨཏྠོ. ཨཱརམྨཎབྷཱཝཱནཏིཀྐམནཏོཏི ཨེཏེན སཾཀིལེསཱནཏིཀྐམནམེཝ དསྶེཏི, ཝཏྠཡུགིཀསུངྐསཱལིཀསདྡཱནཾ ཝིཡ སཾཀིལེསིཀ-སདྡསྶ པཝཏྟི ཝེདིཏབྦཱ.

༦. སཧ ཝིཏཀྐེན ཧོནྟཱིཏི ཝཙནསེསོ ཡོཛེཏབྦོ ཨཝུཙྩམཱནསྶཔི བྷཝཏི-ཨཏྠསྶ ཝིཉྙཱཡམཱནཏྟཱ. མཏྟཱཏི པམཱཎཝཱཙཀཾ ཨེཀཾ པདནྟི གཧེཏྭཱ ‘‘ཝིཙཱརོཝ མཏྟཱ ཨེཏེས’’ནྟི ཨཏྠོ ཝུཏྟོ. ཨཉྙཏྠ ཨཝིཔྤཡོགཱིསུ ཝིཏཀྐཝིཙཱརེསུ ཝིཙཱརོཝ ཨེཏེསཾ མཏྟཱ, ཏཏོ ཨུདྡྷཾ ཝིཏཀྐེན སམྤཡོགཾ ན གཙྪནྟཱིཏི ཨཏྠོ. ཨཡམཔརོ ཨཏྠོ – མཏྟ-སདྡོ ཝིསེསནིཝཏྟིཨཏྠོ. སཝིཏཀྐསཝིཙཱརཱ དྷམྨཱ ཧི ཝིཏཀྐཝིསིཊྛེན ཝིཙཱརེན སཝིཙཱརཱ, ཨེཏེ པན ཝིཙཱརམཏྟེན ཝིཏཀྐསངྑཱཏཝིསེསརཧིཏེན, ཏསྨཱ ‘‘ཝིཙཱརམཏྟཱ’’ཏི ཝུཙྩནྟི, ཝིཙཱརམཏྟཝནྟོཏི ཨཏྠོ. ཝིཙཱརམཏྟཝཙནེན ཨཝིཏཀྐཏྟེ སིདྡྷེ ཨཝིཏཀྐཱནཾ ཨཉྙེསམྤི ཨཏྠིབྷཱཝཛོཏནཏྠཾ ཨཝིཏཀྐཝཙནཾ. ཨཝིཏཀྐཱ ཧི ཝིཙཱརམཏྟཱ ཙ སནྟི ཨཝིཙཱརཱ ཙཱཏི ནིཝཏྟེཏབྦཱ གཧེཏབྦཱ ཙ ཧོནྟི, ཏེསུ ཨཝུཙྩམཱནེསུ ནིཝཏྟེཏབྦགཧེཏབྦསྶ ཨདསྶིཏཏྟཱ ཝིཙཱརམཏྟཱཝཨཝིཏཀྐཱཏི ཨཱཔཛྫེཡྻཱཏི. ཝིསེསནཝིསེསིཏབྦབྷཱཝོ པན ཡཐཱཀཱམཾ ཧོཏཱིཏི སཱམཉྙེན ཨཝིཏཀྐབྷཱཝེན སཧ ཝིཙཱརམཏྟཏཱཡ དྷམྨཝིསེསནབྷཱཝཾ དསྶེཏུཾ ‘‘ཨཝིཏཀྐཝིཙཱརམཏྟཱ’’ཏི པདཱནུཀྐམོ ཀཏོ.

ཨཐ ཝཱ སཝིཙཱརཱ དུཝིདྷཱ སཝིཏཀྐཱ ཨཝིཏཀྐཱ ཙ, ཏེསུ ཨཝིཏཀྐེ ནིཝཏྟེཏུཾ ཨཱདིཔདཾ ཝུཏྟཾ. ཨཝིཙཱརཱ ཙ དུཝིདྷཱ སཝིཏཀྐཱ ཨཝིཏཀྐཱ ཙ, ཏེསུ སཝིཏཀྐེ ནིཝཏྟེཏུཾ ཏཏིཡཔདཾ ¶ ཝུཏྟཾ. ཡེ པན དྭཱིཧིཔི ནིཝཏྟིཏཱ ཨཝིཏཀྐཱ སཝིཏཀྐཱ ཙ སཝིཙཱརཱ ཨཝིཙཱརཱ ཙ, ཏེསུ ཨཉྙཏརདསྶནཾ ཝཱ ཀཏྟབྦཾ སིཡཱ ཨུབྷཡདསྶནཾ ཝཱ. ཨུབྷཡདསྶནེ ཀརིཡམཱནེ ཡདི ‘‘སཝིཏཀྐསཝིཙཱརཱ’’ཏི ཝུཙྩེཡྻ, ཨཱདིཔདཏྠཏཱཝ ཨཱཔཛྫཏི. ཨཐ ‘‘ཨཝིཏཀྐཨཝིཙཱརཱ’’ཏི ཝུཙྩེཡྻ, ཨནྟཔདཏྠཏཱ. ཨཐ པན ‘‘ཨཝིཏཀྐསཝིཙཱརཱ སཝིཏཀྐཨཝིཙཱརཱ’’ཏི ཝུཙྩེཡྻ, ཨཛ྄ཛྷཏྟབཧིདྡྷཱནཾ ཝིཡ ཨཏྠནྟརཱབྷཱཝོ ཝཱ སངྐརདོསོ ཝཱ ཨེཀསྶེཝ སཝིཏཀྐཱཝིཏཀྐཏཱསཝིཙཱརཱཝིཙཱརཏཱཝིརོདྷོ ཝཱ ཨཱཔཛྫེཡྻ, ཏསྨཱ ¶ ཨཉྙཏརདསྶནེན ཨིཏརམྤི པཀཱསེཏུཾ ཨཝིཏཀྐཝཙནེན དྭིཔྤཀཱརེསུ ཝཏྟབྦེསུ སཝིཏཀྐཨཝིཙཱརེ ནིཝཏྟེཏྭཱ ཨཝིཏཀྐསཝིཙཱརེ དསྶེནྟོ ཨཱཧ ‘‘ཨཝིཏཀྐཝིཙཱརམཏྟཱ’’ཏི. ཨཐ ཝཱ ཝིཏཀྐཱབྷཱཝེན ཨེཏེ ཝིཙཱརམཏྟཱ, ན ཝིཙཱརཏོ ཨཉྙསྶ ཀསྶཙི དྷམྨསྶ ཨབྷཱཝཱཏི དསྶེཏུཾ ཨཝིཏཀྐཝཙནེན ཝིཙཱརམཏྟཱ ཝིསེསིཏཱ.

༧. ཨུཔེཀྑཏཱིཏི ཝེདཡམཱནཱཔི མཛ྄ཛྷཏྟཝེདནཱ སུཁཱཀཱརེ དུཀྑཱཀཱརེ ཙ ཨུདཱསིནཱ ཧོཏཱིཏི ཨཏྠོ. ཨཐ ཝཱ ཨུཔེཏཱ ཡུཏྟཱ སུཁདུཀྑཱནཾ ཨཝིརུདྡྷཱ ཨིཀྑཱ ཨནུབྷཝནཾ ཨུཔེཀྑཱ. ཝིསེསདསྶནཝསེནཱཏི ནཱནཏྟདསྶནཝསེན. ཡདི ཧི པཱིཏིསཧགཏཱ ཨེཝ སུཁསཧགཏཱ སིཡུཾ, ‘‘པཱིཏིསཧགཏཱ’’ཏི ཨེཏེནེཝ སིདྡྷཏྟཱ ‘‘སུཁསཧགཏཱ’’ཏི ཨིདཾ ན ཝཏྟབྦཾ སིཡཱ, ‘‘སུཁསཧགཏཱ’’ཏི ཝཱ ཝུཙྩམཱནེ ‘‘པཱིཏིསཧགཏཱ’’ཏི ན ཝཏྟབྦཾ, ཏཏོ ཏིཀཾ པཱུརེནྟེན དུཀྑསཧགཏཔདཾ ཝཏྟབྦཾ སིཡཱ, ཨེཝཉྩ སཏི ‘‘ཝེདནཱཏྟིཀོ ཨེཝཱཡ’’ནྟི ཝུཏྟཝཙནཾ ཨཱཔཛྫཏི, ཏསྨཱ ‘‘པཱིཏིསཧགཏཱ’’ཏི ཝཏྭཱ ‘‘སུཁསཧགཏཱ’’ཏི ཝདནྟོ པཱིཏིཝིཔྤཡུཏྟམྤི སུཁཾ ཨཏྠཱིཏི ཏཏིཡཛ྄ཛྷཱནཀཱཡཝིཉྙཱཎསམྤཡུཏྟཾ སུཁཾ སཔྤཱིཏིཀསུཁཏོ བྷིནྣཾ ཀཏྭཱ དསྶེཏཱིཏི ཨདྷིཔྤཱཡོ. ཨཐ ཝཱ པཱིཏིསུཁཱནཾ དུབྦིཉྙེཡྻནཱནཏྟཱནཾ ནཱནཏྟདསྶནཏྠཾ ཨཡཾ ཏིཀོ ཝུཏྟོ. ‘‘པཱིཏིསཧགཏཱ’’ཏི ཨེཏྠ ཧི སུཁེཀདེསོ སངྒཧིཏོ, ན པཱིཏི. ‘‘སུཁསཧགཏཱ’’ཏི ཨེཏྠ པཱིཏི སངྒཧིཏཱ, ན སུཁཾ. པཱིཏིཝིཔྤཡུཏྟསུཁསཧགཏཱ ཙ པུརིམེན ཨསངྒཧིཏཱ པཙྪིམེན སངྒཧིཏཱཏི སིདྡྷོ པཱིཏིསུཁཱནཾ ཝིསེསོཏི.

༨. ནིབྦཱནཾ དསྶནཏོཏི ནིབྦཱནཱརམྨཎཏཾ སནྡྷཱཡཱཧ. ཨཐ ཝཱ དྷམྨཙཀྑུ པུནཔྤུནཾ ནིབྦཏྟནེན བྷཱཝནཱབྷཱཝཾ ཨཔྤཏྟཾ དསྶནཾ ནཱམ, དྷམྨཙཀྑུ ཙ པརིཉྙཱདིཀིཙྩཀརཎེན ཙཏུསཙྩདྷམྨདསྶནཾ ཏདཏིསཡོ, ཏསྨཱ ནཏྠེཏྠ གོཏྲབྷུསྶ དསྶནབྷཱཝཱཔཏྟཱིཏི. ཨུབྷཡཔཊིཀྑེཔཝསེནཱཏི དྭཱིཧི པདེཧི ཝུཏྟདྷམྨཔཊིཀྑེཔཝསེན, ན པཧཱཡཀཔཊིཀྑེཔཝསེན. ཏཐཱ ¶ ཧི སཏི དསྶནབྷཱཝནཱཧི ཨཉྙོ སམུཙྪེདཝསེན པཧཱཡཀོ ཨཏྠི, ཏེན པཧཱཏབྦཱ ནེཝ དསྶནེན ན བྷཱཝནཱཡ པཧཱཏབྦཱཏི ཨཡམཏྠོ ཨཱཔཛྫཏི, ན ཙ ཨཉྙོ པཧཱཡཀོ ཨཏྠི ཨཉྙེཧི ཝིཀྑམྦྷིཏཱནཉྩ པུནཔྤཝཏྟིསབྦྷཱཝཱ, ནཱཔི པཧཱཏབྦཱ ཏཏིཡཔདེན སངྒཡ྄ཧནྟི, ཀིནྟུ ¶ ཨཔྤཧཱཏབྦཱ ཨེཝཱཏི. ཏསྨཱ པཧཱཏབྦཔདཾ པཙྩེཀཾ ཡོཛེཏྭཱ ནེཝ དསྶནེན པཧཱཏབྦཱ ན བྷཱཝནཱཡ པཧཱཏབྦཱཏི དསྶནེན བྷཱཝནཱཡ པཧཱཏབྦེཧི ཨཉྙེ གཧིཏཱཏི ཝེདིཏབྦཱ.

༩. ཨེཝམཏྠཾ ཨགྒཧེཏྭཱཏི ཨཏྠཱཡུཏྟིཏོ ཙ སདྡཱཡུཏྟིཏོ ཙ ཨགྒཧེཏབྦཏཾ དསྶེཏི. དསྶནབྷཱཝནཱཧི ཨཔྤཧཱཏབྦཧེཏུམཏྟེསུ ཧི གཡ྄ཧམཱནེསུ ཨཧེཏུཀཱ ཨསངྒཧིཏཱཏི ཡཐཱདྷིཔྤེཏསྶ ཨཏྠསྶ ཨཔརིཔུཎྞཏྟཱ ཨཏྠཱཡུཏྟི, པཧཱཏབྦསདྡསྶ ནིཙྩསཱཔེཀྑཏྟེ ཙ སཏི ན སམྦནྡྷཱིསདྡཏོ པཧཱཡཀཏོ ཨཉྙཾ པཊིསེདྷཾ ཨཔེཀྑམཱནསྶ ཧེཏུསདྡེན སམཱསོ ཨུཔཔཛྫཏཱིཏི སདྡཱཡུཏྟི ཙ ཝེདིཏབྦཱ. ཨེཝམཏྠོ གཧེཏབྦོཏི པཧཱཏབྦ-སདྡཾ པཊིསེདྷེན ཨཡོཛེཏྭཱ ཡེསཾ ཨཉྙཔདཏྠེ སམཱསོ, ཏབྦིསེསནཾ ཨཏྠཱིཏི ཨིདཾ པཊིསེདྷེན ཡོཛེཏྭཱ དསྶནབྷཱཝནཱཧི པཧཱཏབྦོ ཧེཏུ ཨེཏེསཾ ནེཝཏྠཱིཏི ཨཏྠོ གཧེཏབྦོཏི ཝུཏྟཾ ཧོཏི. ཨེཝཉྩ སཏི ཡཐཱདྷིཔྤེཏཏྠོ སབྦོ སངྒཧིཏོཏི. ཨཏྠཱཡུཏྟི མཱ ཧོཏུ, སདྡོ པན ཨིདྷཱཔི ན ཡུཏྟོ. ཨེཀནྟཡོགཱིནཾ ཨཏྠི-སདྡམེཝ ཧི ཨཔེཀྑམཱནཱནཾ ཨུབྷིནྣཾ པཧཱཏབྦཧེཏུ-སདྡཱནཾ སམཱསོ ཡུཏྟོ, ན པཊིསེདྷཾ ཨཔེཀྑམཱནཱནནྟི, ཏསྨཱ གཧེཏབྦཏྠདསྶནམཏྟཾ ཨེཏཾ ཀཏཾ, སདྡོ པན ཡཐཱ ཡུཛྫཏི, ཏཐཱ ཡོཛེཏབྦོ. ཨེཝཾ པན ཡུཛྫཏི – པཧཱཏབྦོ ཧེཏུ ཨེཏེསཾ ཨཏྠཱིཏི པཧཱཏབྦཧེཏུཀཱ. ཀེན པཧཱཏབྦོཏི? དསྶནེན བྷཱཝནཱཡ ཙ. ཏཡིདཾ པཧཱཏབྦཧེཏུཀཔདཾ དསྶནབྷཱཝནཱཔདེཧི ཝིསུཾ ཝིསུཾ ཡོཛེཏྭཱ ཏེཧི ཡུཏྟེན ཡེ དསྶནེན པཧཱཏབྦཧེཏུཀཱ ནེཝ ཧོནྟི, བྷཱཝནཱཡ པཧཱཏབྦཧེཏུཀཱ ཙ ན ཧོནྟཱིཏི པཊིསེདྷཉྩ ཝིསུཾ ཝིསུཾ ཡོཛེཏྭཱ ཏེ ནེཝ དསྶནེན ན བྷཱཝནཱཡ པཧཱཏབྦཧེཏུཀཱཏི ཝུཙྩནྟི. ནེཝཝིཔཱཀནཝིཔཱཀདྷམྨདྷམྨཝཙནཾ ཝིཡ ཧི པུརིམཔདདྭཡསངྒཧིཏདྷམྨཔཊིསེདྷནེན ཏདཉྙདྷམྨནིདསྶནམེཏཾ ཧོཏི, ན ཨཧེཏུཀཔདཾ ཝིཡ ཧེཏུཝིརཧཔྤཀཱསནེནཱཏི. ཨེཝཉྩ ཀཏྭཱ དྭེ པཊིསེདྷཱ ཡུཏྟཱ ཧོནྟི.

ཧེཏུཡེཝ ཧི ཏེསཾ ནཏྠི, ཡོ དསྶནབྷཱཝནཱཧི པཧཱཏབྦོ སིཡཱཏི པུརིམསྨིཉྷི ཨཏྠེ ཧེཏཱུནཾ དསྶནབྷཱཝནཱཧི པཧཱཏབྦཏཱ པཊིཀྑིཏྟཱ, པཊིཀྑེཔོ ཙ པཧཱཏབྦཱསངྐཱསབྦྷཱཝེ ཧོཏི, པཧཱཏབྦཱསངྐཱ ཙ ཧེཏུམྷི སཏི སིཡཱ, ཏེསཾ པན ཨཧེཏུཀཱནཾ ཧེཏུཡེཝ ནཏྠི, ཡོ དསྶནབྷཱཝནཱཧི པཧཱཏབྦོ སིཡཱ, ཏདབྷཱཝཱ པཧཱཏབྦཱསངྐཱ ¶ ནཏྠཱིཏི ཏཾནིཝཱརཎཏྠོ པཊིཀྑེཔོ ན སམྦྷཝཏི, ཏསྨཱ ‘‘ནེཝདསྶནེན ན བྷཱཝནཱཡ པཧཱཏབྦོ ཧེཏུ ཨེཏེས’’ནྟི ཨེཝཾ ཨཧེཏུཀཱནཾ གཧཎཾ ན ¶ བྷཝེཡྻཱཏི ཨཏྠོ. ཨཐ ཝཱ ཨིཏརཐཱ ཧི ཨཧེཏུཀཱནཾ ཨགྒཧཎཾ བྷཝེཡྻཱཏི ཨཏྠསྶ པཱཀཊཏྟཱ ན ཀཱརཎསཱདྷནཱིཡོ ཨེསོཏི གཧེཏབྦཏྠསྶེཝ ཀཱརཎཾ ཝདནྟོ ‘‘ཧེཏུཡེཝ ཧི ཏེསཾ ནཏྠཱི’’ཏིཨཱདིམཱཧ. ཏེསཉྷི ནེཝདསྶནེན ན བྷཱཝནཱཡཔཧཱཏབྦཧེཏུཀཔདཝཙནཱིཡཱནཾ ཡོ དསྶནབྷཱཝནཱཧི པཧཱཏབྦོ སིཡཱ, སོ ཨེཝཾཔཀཱརོ ཧེཏུ ནཏྠི. ཏེ ཧི ཨནེཀཔྤཀཱརཱ སཧེཏུཀཱ ཨཧེཏུཀཱ ཙཱཏི, ཏསྨཱ ནེཝདསྶནེན ན བྷཱཝནཱཡ པཧཱཏབྦོ ཧེཏུ ཨེཏེསཾ ཨཏྠཱིཏི ཨཡམཏྠོ གཧེཏབྦོཏི ཨཏྠོ.

༡༠. ཏཾ ཨཱརམྨཎཾ ཀཏྭཱཏི ཨིདཾ ཙཏུཀིཙྩསཱདྷནཝསེན ཨཱརམྨཎཀརཎཾ སནྡྷཱཡ ཝུཏྟནྟི ཝེདིཏབྦཾ. ཨཉྙཐཱ གོཏྲབྷུཕལཔཙྩཝེཀྑཎཱདཱིནམྤི ཨཔཙཡགཱམིཏཱ ཨཱཔཛྫེཡྻཱཏི. ཨཐ ཝཱ ཧེཏུབྷཱཝེན ཨཔཙཡཾ ནིབྦཱནཾ གཙྪནྟཱིཏི ཨཔཙཡགཱམིནོ. ནིབྦཱནསྶ ཧི ཨནིབྦཏྟནིཡཏྟེཔི སམུདཡཔྤཧཱནསམུདཡནིརོདྷཱནཾ ཨདྷིགམཨདྷིགནྟབྦབྷཱཝཏོ ཧེཏུཧེཏུཕལབྷཱཝོ མགྒནིབྦཱནཱནཾ ཡུཛྫཏི. ཡཐཱཧ ‘‘དུཀྑནིརོདྷེ ཉཱཎཾ ཨཏྠཔཊིསམྦྷིདཱ, དུཀྑནིརོདྷགཱམིནིཡཱ པཊིཔདཱཡ ཉཱཎཾ དྷམྨཔཊིསམྦྷིདཱ’’ཏི (ཝིབྷ. ༧༡༩). ཨཏྠོཏི ཧི ཧེཏུཕལཾ. དྷམྨོཏི ཧེཏཱུཏི. པུརིམཔཙྪིམཱནཾ པུརིམེ སསམྤཡུཏྟཱ ཝུཏྟཱ, པཙྪིམེ ཀེཝལཱ. པུརིམེ ཝིཡ པན པཙྪིམེ ཨཏྠེཔི ཨརིཡམགྒསཱིསེན སབྦལོཀུཏྟརཀུསལཙིཏྟུཔྤཱདཱ གཧེཏབྦཱ. དུཏིཡེ ཨཏྠཝིཀཔྤེ ‘‘ཨཱཙཡཾ གཱམིནོ’’ཏི ཝཏྟབྦེ ཨནུནཱསིཀལོཔོ ཀཏོཏི དཊྛབྦོ. ཨཱཙིནནྟཱིཏི ཝཱ ཨཱཙཡཱ, ཨཱཙཡཱ ཧུཏྭཱ གཙྪནྟི པཝཏྟནྟཱིཏིཔི ཨཏྠོ དཊྛབྦོ.

༡༡. སཏྟ པན སེཀྑཱ སིཀྑནསཱིལཱཏི སེཀྑཱ, ཏེསཾ ཨིམེཏི སེཀྑཱ, ཨཉྙཱསཱདྷཱརཎཱ མགྒཕལཏྟཡདྷམྨཱ. སཡམེཝ སིཀྑནྟཱིཏི སིཀྑནསཱིལཱནམེཏཾ ནིདསྶནཾ. ཡེ ཧི དྷམྨཱ སིཀྑནྟི, ཏེ སིཀྑནསཱིལཱ ཧོནྟཱིཏི. ཨཀྑརཏྠོ པན སིཀྑཱ ཨེཏེསཾ སཱིལནྟི སེཀྑཱཏི. ན སེཀྑཱཏི ཡཏྠ སེཀྑབྷཱཝཱསངྐཱ ཨཏྠི, ཏཏྠཱཡཾ པཊིསེདྷོཏི ལོཀིཡནིབྦཱནེསུ ¶ ཨསེཀྑབྷཱཝཱནཱཔཏྟི དཊྛབྦཱ. སཱིལསམཱདྷིཔཉྙཱསངྑཱཏཱ ཧི སིཀྑཱ ཨཏྟནོ པཊིཔཀྑཀིལེསེཧི ཝིཔྤམུཏྟཱ པརིསུདྡྷཱ ཨུཔཀྐིལེསཱནཾ ཨཱརམྨཎབྷཱཝམྤི ཨནུཔགམནཏོ ཨེཏཱ སིཀྑཱཏི ཝཏྟུཾ ཡུཏྟཱ ཨཊྛསུ མགྒཕལེསུ ཝིཛྫནྟི, ཏསྨཱ ཙཏུམགྒཧེཊྛིམཕལཏྟཡདྷམྨཱ ཝིཡ ཨརཧཏྟཕལདྷམྨཱཔི ཏཱསུ སིཀྑཱསུ ཛཱཏཱཏི ཙ, ཏཾསིཀྑཱསམངྒིནོ ཨརཧཏོ ཨིཏརེསཾ ཝིཡ སེཀྑཏྟེ སཏི སེཀྑསྶ ཨེཏེཏི ཙ, སིཀྑཱ སཱིལཾ ཨེཏེསནྟི ཙ སེཀྑཱཏི ཨཱསངྐིཏབྦཱ སིཡུནྟི ཏདཱསངྐཱནིཝཏྟནཏྠཾ ‘‘ཨསེཀྑཱ’’ཏི ¶ ཡཐཱཝུཏྟསེཀྑབྷཱཝཔཊིསེདྷོ ཀཏོ. ཨརཧཏྟཕལེ ཧི པཝཏྟམཱནཱ སིཀྑཱ པརིནིཊྛིཏསིཀྑཱཀིཙྩཏྟཱ ན སིཀྑཱཀིཙྩཾ ཀརོནྟི, ཀེཝལཾ སིཀྑཱཕལབྷཱཝེནེཝ པཝཏྟནྟི, ཏསྨཱ ཏཱ ན སིཀྑཱཝཙནཾ ཨརཧནྟི, ནཱཔི ཏཾསམངྒིནོ སེཀྑཝཙནཾ, ན ཙ ཏཾསམྤཡུཏྟཱ སིཀྑནསཱིལཱཏི སིཀྑཱསུ ཛཱཏཱཏིཨཱདིཨཏྠེཧི ཨགྒཕལདྷམྨཱ སེཀྑཱ ན ཧོནྟི, ཧེཊྛིམཕལེསུ པན སིཀྑཱ སཀདཱགཱམིམགྒཝིཔསྶནཱདཱིནཾ ཨུཔནིསྶཡབྷཱཝཏོ སིཀྑཱཀིཙྩཾ ཀརོནྟཱིཏི སིཀྑཱཝཙནཾ ཨརཧནྟི, ཏཾསམངྒིནོ ཙ སེཀྑཝཙནཾ, ཏཾསམྤཡུཏྟཱ ཙ སིཀྑནསཱིལཝུཏྟཱིཏི ཏཏྠ དྷམྨཱ ཡཐཱཝུཏྟེཧི ཨཏྠེཧི སེཀྑཱ ཧོནྟི ཨེཝ.

སེཀྑཱཏི ཝཱ ཨཔརིཡོསིཏསིཀྑཱ དསྶིཏཱ. ཨནནྟརམེཝ ‘‘ཨསེཀྑཱ’’ཏི ཝཙནཾ པརིཡོསིཏསིཀྑཱནཾ དསྶནནྟི ན ལོཀིཡནིབྦཱནཱནཾ ཨསེཀྑཏཱཔཏྟི. ཝུདྡྷིཔྤཏྟཱ ཝཱ སེཀྑཱཏི ཨེཏསྨིཾ ཨཏྠེ སེཀྑདྷམྨེསུ ཨེཝ ཀེསཉྩི ཝུདྡྷིཔྤཏྟཱནཾ ཨསེཀྑཏཱ ཨཱཔཛྫཏི, ཏེན ཨརཧཏྟམགྒདྷམྨཱ ཝུདྡྷིཔྤཏྟཱ ཙ ཡཐཱཝུཏྟེཧི ཙ ཨཏྠེཧི སེཀྑཱཏི ཀཏྭཱ ཨསེཀྑཱ ཨཱཔནྣཱཏི? ན, ཏཾསདིསེསུ ཏབྦོཧཱརཱ. ཨརཧཏྟམགྒཏོ ཧི ནིནྣཱནཱཀརཎཾ ཨརཧཏྟཕལཾ ཋཔེཏྭཱ པརིཉྙཱདིཀིཙྩཀརཎཾ ཝིཔཱཀབྷཱཝཉྩ, ཏསྨཱ ཏེ ཨེཝ སེཀྑཱ དྷམྨཱ ཨརཧཏྟཕལབྷཱཝཾ ཨཱཔནྣཱཏི སཀྐཱ ཝཏྟུཾ, ཀུསལསུཁཏོ ཙ ཝིཔཱཀསུཁཾ སནྟཏརཏཱཡ པཎཱིཏཏརནྟི ཝུདྡྷིཔྤཏྟཱ ཙ ཏེ དྷམྨཱ ཧོནྟཱིཏི ཨསེཀྑཱཏི ཝུཙྩནྟཱིཏི.

༡༢. ཀིལེསཝིཀྑམྦྷནཱསམཏྠཏཱདཱིཧི པརིཏྟཱ. ‘‘ཀིལེས…པེ… ཏཱཡཱ’’ཏི ཨཏྠཏྟཡམྤི ཀུསལེསུ ཡུཛྫཏི, ཝིཔཱཀཀིརིཡེསུ དཱིགྷསནྟཱནཏཱཝ. པམཱཎཀརེཧི ཝཱ ཨོལཱ༹རིཀེཧི ཀཱམཏཎྷཱདཱིཧི པརིཙྪིནྣཱ པརིཏྟཱ. ཏེཧི ཨཔརིཙྪིནྣཏྟཱ སུཁུམེཧི རཱུཔཏཎྷཱདཱིཧི པརིཙྪིནྣཱ པམཱཎམཧཏྟཾ གཏཱཏི མཧགྒཏཱ. ཨཔརིཙྪིནྣཱ ཨཔྤམཱཎཱ.

༡༤. ཨཏཔྤཀཊྛེནཱཏི ¶ དིཝསམྤི པཙྩཝེཀྑིཡམཱནཱ ལོཀུཏྟརདྷམྨཱ ཏིཏྟིཾ ན ཛནེནྟི སམཱཔཛྫིཡམཱནཱཔི ཕལདྷམྨཱཏི.

༡༥. མཱཏུགྷཱཏཱདཱིསུ པཝཏྟམཱནཱཔི ཧིཏསུཁཾ ཨིཙྪནྟཱཝ པཝཏྟནྟཱིཏི ཏེ དྷམྨཱ ཧིཏསུཁཱཝཧཱ མེ བྷཝིསྶནྟཱིཏི ཨཱསཱིསིཏཱ ཧོནྟི, ཏཐཱ ཨསུབྷཱསུཁཱནིཙྩཱནཏྟེསུ སུབྷཱདིཝིཔརིཡཱསདལ༹ྷཏཱཡ ཨཱནནྟརིཡཀམྨནིཡཏམིཙྪཱདིཊྛཱིསུ པཝཏྟི ཧོཏཱིཏི ཏེ དྷམྨཱ ཨསུབྷཱདཱིསུ ¶ སུབྷཱདིཝིཔརཱིཏཔྤཝཏྟིཀཱ ཧོནྟི. མིཙྪཱསབྷཱཝཱཏི མུསཱསབྷཱཝཱ. ཨནེཀེསུ ཨཱནནྟརིཡེསུ ཀཏེསུ ཡཾ ཏཏྠ བལཝཾ, ཏཾ ཝིཔཙྩཏི, ན ཨིཏརཱནཱིཏི ཨེཀནྟཝིཔཱཀཛནཀཏཱཡ ནིཡཏཏཱ ན སཀྐཱ ཝཏྟུནྟི ‘‘ཝིཔཱཀདཱནེ སཏཱི’’ཏིཨཱདིམཱཧ. ཏཏྠ ཁནྡྷབྷེདཱནནྟརནྟི ཙུཏིཨནནྟརཾ. ཙུཏི ཧི མརཎནིདྡེསེ (ཝིབྷ. ༡༩༣) ‘‘ཁནྡྷཱནཾ བྷེདོ’’ཏི ཝུཏྟཱཏི. ཨེཏེན ཝཙནེན སཏི ཕལདཱནེ ཙུཏིཨནནྟརོ ཨེཝ, ན ཨཉྙོ ཨེཏེསཾ ཕལཀཱལོཏི ཕལཀཱལནིཡམེནེཝ ནིཡཏཏཱ ཝུཏྟཱ ཧོཏི, ན ཕལདཱནནིཡམེནཱཏི ནིཡཏཕལཀཱལཱནཾ ཨཉྙེསམྤི ཨུཔཔཛྫཝེདནཱིཡཱནཾ དིཊྛདྷམྨཝེདནཱིཡཱནམྤི ནིཡཏཏཱ ཨཱཔཛྫཏི, ཏསྨཱ ཝིཔཱཀདྷམྨདྷམྨཱནཾ པཙྩཡནྟརཝིཀལཏཱདཱིཧི ཨཝིཔཙྩམཱནཱནམྤི ཨཏྟནོ སབྷཱཝེན ཝིཔཱཀདྷམྨཏཱ ཝིཡ བལཝཏཱ ཨཱནནྟརིཡེན ཝིཔཱཀེ དིནྣེ ཨཝིཔཙྩམཱནཱནམྤི ཨཱནནྟརིཡཱནཾ ཕལདཱནེ ནིཡཏསབྷཱཝཱ ཨཱནནྟརིཡསབྷཱཝཱ ཙ པཝཏྟཱིཏི ཨཏྟནོ སབྷཱཝེན ཕལདཱནནིཡམེནེཝ ནིཡཏཏཱ ཨཱནནྟརིཡཏཱ ཙ ཝེདིཏབྦཱ. ཨཝསྶཉྩ ནིཡཏསབྷཱཝཱ ཨཱནནྟརིཡསབྷཱཝཱ ཙ ཏེསཾ པཝཏྟཱིཏི སམྤཊིཙྪིཏབྦམེཏཾ ཨཉྙསྶ བལཝཏོ ཨཱནནྟརིཡསྶ ཨབྷཱཝེ ཙུཏིཨནནྟརཾ ཨེཀནྟེན ཕལདཱནཏོ.

ནནུ ཨེཝཾ ཨཉྙེསམྤི ཨུཔཔཛྫཝེདནཱིཡཱནཾ ཨཉྙསྨིཾ ཝིཔཱཀདཱཡཀེ ཨསཏི ཙུཏིཨནནྟརམེཝ ཨེཀནྟེན ཕལདཱནཏོ ཨཱནནྟརིཡསབྷཱཝཱ ནིཡཏསབྷཱཝཱ ཙ པཝཏྟི ཨཱཔཛྫཏཱིཏི? ནཱཔཛྫཏི ཨསམཱནཛཱཏིཀེན ཙེཏོཔཎིདྷིཝསེན ཨུཔགྷཱཏཀེན ཙ ནིཝཏྟེཏབྦཝིཔཱཀཏྟཱ ཨནནྟརེཀནྟཕལདཱཡཀཏྟཱབྷཱཝཱ, ན པན ཨཱནནྟརིཡཀཱནཾ པཋམཛ྄ཛྷཱནཱདཱིནཾ དུཏིཡཛ྄ཛྷཱནཱདཱིནི ཝིཡ ཨསམཱནཛཱཏིཀཾ ཕལནིཝཏྟཀཾ ཨཏྠི སབྦཱནནྟརིཡཀཱནཾ ཨཝཱིཙིཕལཏྟཱ, ན ཙ ཧེཊྛུཔཔཏྟིཾ ཨིཙྪཏོ སཱིལཝཏོ ཙེཏོཔཎིདྷི ཝིཡ ཨུཔརཱུཔཔཏྟིཛནཀཀམྨཕལཾ ཨཱནནྟརིཡཀཕལཾ ནིཝཏྟེཏུཾ སམཏྠོ ¶ ཙེཏོཔཎིདྷི ཨཏྠི ཨནིཙྪནྟསྶེཝ ཨཝཱིཙིཔཱཏནཏོ, ན ཙ ཨཱནནྟརིཡཀོཔགྷཱཏཀཾ ཀིཉྩི ཀམྨཾ ཨཏྠི, ཏསྨཱ ཏེསཾཡེཝ ཨནནྟརེཀནྟཝིཔཱཀཛནཀསབྷཱཝཱ པཝཏྟཱིཏི.

ཨནེཀཱནི ཙ ཨཱནནྟརིཡཀཱནི ཀཏཱནི ཨེཀནྟེ ཝིཔཱཀེ སནྣིཡཏཏྟཱ ཨུཔརཏཱཝིཔཙྩནསབྷཱཝཱསངྐཏྟཱ ནིཙྪིཏཱནི སབྷཱཝཏོ ནིཡཏཱནེཝ. ཙུཏིཨནནྟརཾ པན ཕལཾ ཨནནྟརཾ ནཱམ ཏསྨིཾ ཨནནྟརེ ནིཡུཏྟཱནི ཏནྣིབྦཏྟནེན ཨནནྟརཀརཎསཱིལཱནི ཨནནྟརཔྤཡོཛནཱནི ཙཱཏི སབྷཱཝཏོ ཨཱནནྟརིཡཀཱནེཝ ཙ ཧོནྟི. ཏེསུ པན སམཱནསབྷཱཝེསུ ཨེཀེན ཝིཔཱཀེ དིནྣེ ཨིཏརཱནི ¶ ཨཏྟནཱ ཀཏྟབྦསྶ ཀིཙྩསྶ ཏེནེཝ ཀཏཏྟཱ ན དུཏིཡཾ ཏཏིཡམྤི ཙ པཊིསནྡྷིཾ ཀརོནྟི, ན སམཏྠཏཱཝིགྷཱཏཏྟཱཏི ནཏྠི ཏེསཾ ནིཡཏཱནནྟརིཡཏཱནིཝཏྟཱིཏི. ན ཧི སམཱནསབྷཱཝཾ སམཱནསབྷཱཝསྶ སམཏྠཏཾ ཝིཧནཏཱིཏི. ཨེཀསྶ པན ཨཉྙཱནིཔི ཨུཔཏྠམྦྷཀཱནི ཧོནྟཱིཏི དཊྛབྦཱནཱིཏི. སམྨཱ སབྷཱཝཱཏི སཙྩསབྷཱཝཱ.

༡༦. པརིཔུཎྞམགྒཀིཙྩཏྟཱ ཙཏྟཱརོ ཨརིཡམགྒཱཝ ཨིདྷ ‘‘མགྒཱ’’ཏི ཝུཏྟཱ. པཙྩཡཊྛེནཱཏི མགྒཔཙྩཡཊྛེན. ནིཀྑེཔཀཎྜེཔི ཧི ཡེ མགྒཔཙྩཡཾ ལབྷནྟི, ན པན སཡཾ མགྒཔཙྩཡབྷཱཝཾ གཙྪནྟི, ཏེ མགྒཧེཏུཀཱཏི དསྶེཏུཾ ‘‘ཨརིཡམགྒསམངྒིསྶ མགྒངྒཱནི ཋཔེཏྭཱ’’ཏིཨཱདི (དྷ. ས. ༡༠༣༩) ཝུཏྟཾ. ཡོ པན ཏཏྠེཝ ‘‘ཨརིཡམགྒསམངྒིསྶ ཨལོབྷོ ཨདོསོ ཨམོཧོ, ཨིམེ དྷམྨཱ མགྒཧེཏཱུ’’ཏི ཨཱདིནཡོ ཝུཏྟོ, ཏཾ དསྶེཏུཾ ‘‘མགྒསམྤཡུཏྟཱ ཝཱ’’ཏིཨཱདི ཝུཏྟཾ. ‘‘ཨརིཡམགྒསམངྒིསྶ སམྨཱདིཊྛི མགྒོ ཙེཝ ཧེཏུ ཙཱ’’ཏིཨཱདིནཱ པན ཝུཏྟནཡཾ དསྶེཏུཾ ‘‘སམྨཱདིཊྛི སཡ’’ནྟིཨཱདིམཱཧ. ཏཏྠ པན ཨསངྒཧིཏསངྒཎྷནཝསེན པཊིཔཱཊིཡཱ ཏཡོ ནཡཱ ཝུཏྟཱ, ཧེཏུབཧུཏཱཝསེན ཏཏིཡོ ནཡོ ཨིདྷ དུཏིཡོ ཝུཏྟོ.

ཨབྷིབྷཝིཏྭཱ པཝཏྟནཊྛེནཱཏི སཧཛཱཏཱདྷིཔཏིཔི པུབྦཱབྷིསངྑཱརཝསེན ཛེཊྛཀབྷཱཝེ པཝཏྟམཱནོ སཧཛཱཏེ ཨཏྟནོ ཝསེ ཨནུཝཏྟཡམཱནོ ཏེ ཨབྷིབྷཝིཏྭཱ པཝཏྟཏི, ཨཱརམྨཎཱདྷིཔཏིཔི ཏདཱརམྨཎེ དྷམྨེ ཏཐེཝ ཨཏྟཱནཾ ཨནུཝཏྟཡམཱནོ ཏེ དྷམྨེ ཨབྷིབྷཝིཏྭཱ ཨཱརམྨཎབྷཱཝེན པཝཏྟཏི, ན པཙྩུཔྤནྣབྷཱཝེན, ཏསྨཱ ཨདྷིཔཏིདྭཡམྤི སངྒཧིཏནྟི ཝེདིཏབྦཾ. ‘‘མགྒོ ཨདྷིཔཏི ཨེཏེས’’ནྟི ཨཡཉྩ ཨཏྠོ ནིཀྑེཔཀཎྜེ ཨུདཱཧརཎཝསེན ¶ ཨཱགཏཾ ཨཏྠནཡཾ གཧེཏྭཱ ཝུཏྟོ. ཡསྨཱ པན པཊྛཱནེ (པཊྛཱ. ༢.༡༦.༡༡) ‘‘མགྒཱདྷིཔཏིཾ དྷམྨཾ པཊིཙྩ མགྒཱདྷིཔཏི དྷམྨོ ཨུཔྤཛྫཏི ནཱདྷིཔཏིཔཙྩཡཱ, མགྒཱདྷིཔཏཱི ཁནྡྷེ པཊིཙྩ མགྒཱདྷིཔཏི ཨདྷིཔཏཱི’’ཏི ཝུཏྟཾ, ཏསྨཱ མགྒོ ཨདྷིཔཏི མགྒཱདྷིཔཏཱིཏི ཨཡམྤི ཨཏྠོ པཱལི༹ཡཾ སརཱུཔེཀསེསཝསེན སམཱནསདྡཏྠཝསེན ཝཱ སངྒཧིཏོཏི ཝེདིཏབྦོ.

༡༧. ཨནུཔྤནྣཱཏི ཨེཏེན སབྦོ ཨུཔྤནྣབྷཱཝོ པཊིསིདྡྷོ, ན ཨུཔྤནྣདྷམྨབྷཱཝོ ཨེཝཱཏི ཏེན ཨུཔྤནྣཱ ཝིགཏཱ ཨཏཱིཏཱཔི ན སངྒཧིཏཱཏི དཊྛབྦཱ. ཡདི ཧི སངྒཧིཏཱ སིཡུཾ, ‘‘ཨནུཔྤནྣོ དྷམྨོ ཨུཔྤནྣསྶ དྷམྨསྶ ཨནནྟརཔཙྩཡེན པཙྩཡོ’’ཏིཨེཝམཱདི ཝུཙྩེཡྻ, ན ཏུ ཝུཏྟནྟི. ཨནཱགཏཱནི ཝིཔཱཀཀཊཏྟཱརཱུཔཱནི ཨཏཱིཏེ ཨནཱགཏེ ཝཱ ཀམྨེ པུརིམནིཔྥནྣེ ཨེཝ ཨུཔྤཛྫིསྶནྟི ¶ , ནཱནིཔྥནྣེཏི པརིནིཊྛིཏཀཱརཎེཀདེསཱནེཝ ཧོནྟི, ཏསྨཱ ཏཱནི ‘‘ཨཝསྶཾ ཨུཔྤཛྫིསྶནྟཱིཏི ཨུཔྤཱདིནོ དྷམྨཱ’’ཏི ཝུཙྩནྟི.

༡༨. ཨཏྟནོ སབྷཱཝནྟི ཀཀྑལ༹ཕུསནཱདིསབྷཱཝཾ.

༢༠. ཨེཝཾ པཝཏྟམཱནཱཏི ཨེཝཾ ཙཀྑཱདིབྷཱཝེན ཕུསནཱདིབྷཱཝེན ཙ ཨེཀསནྟཏིཔརིཡཱཔནྣཏཱཝསེན པཝཏྟམཱནཱ. ཨཏྟཱནཾ ཨདྷི ཨཛ྄ཛྷཏྟཱཏི ཨདྷི-སདྡོ སམཱསཝིསཡེ ཨདྷིཀཱརཏྠཾ པཝཏྟིཨཏྠཉྩ གཧེཏྭཱ པཝཏྟཏཱིཏི ཨཏྟཱནཾ ཨདྷིཀིཙྩ ཨུདྡིསྶ པཝཏྟཱ ཨཛ྄ཛྷཏྟཱ. ཏེནཱཏི ཡསྶ ཛྷཱནཱ ཝུཊྛཧིཏྭཱ ཨཛ྄ཛྷཏྟཾ བཧིདྡྷཱ ཨཛ྄ཛྷཏྟབཧིདྡྷཱ ཙ སུཉྙཏཾ ཨཱནེཉྫཉྩ མནསིཀརོཏོ ཨཛ྄ཛྷཏྟསུཉྙཏཱདཱིསུ ཙིཏྟཾ ན པཀྑནྡཏི ན པསཱིདཏི ན སནྟིཊྛཏི ནཱདྷིམུཙྩཏི, ཡོ ཙ ཨིཏིཧ ཏཏྠ སམྤཛཱནོ, ཏེན བྷིཀྑུནཱ. ཏསྨིཾཡེཝ པུརིམསྨིཾ སམཱདྷིནིམིཏྟེཏི པཋམཛ྄ཛྷཱནཱདིསམཱདྷིནིམིཏྟེ. ཨཛ྄ཛྷཏྟམེཝཱཏི ཛྷཱནགོཙརེ ཀསིཎཱདིམྷི. ཙིཏྟཾ སཎྛཔེཏབྦནྟི པཋམཛ྄ཛྷཱནཱདིཙིཏྟཾ སཎྛཔེཏབྦཾ. ཨཛ྄ཛྷཏྟརཏོཏི གོཙརཛ྄ཛྷཏྟེ ནིབྦཱནེ རཏོ, སམཱདྷིགོཙརེ ཀམྨཊྛཱནེ ཝཱ རཏོ. ‘‘སམཱཧིཏོ ཨེཀོ སནྟུསིཏོ ཏམཱཧུ བྷིཀྑུ’’ནྟི (དྷ. པ. ༣༦༢) གཱཐཱསེསོ.

ཨཛ྄ཛྷཏྟཾ སམྤསཱདནནྟི ཨེཏྠ ཛྷཱནཾ སཀསནྟཏིཔརིཡཱཔནྣཏྟཱ ‘‘ཨཛ྄ཛྷཏྟ’’ནྟི ཝུཏྟནྟི ནིཡཀཛ྄ཛྷཏྟཏྠོ ཨཛ྄ཛྷཏྟ-སདྡོ ཧོཏི. ཨཛ྄ཛྷཏྟནྟི སཀསནྟཏིནིཡཀཾ. ཨཛ྄ཛྷཏྟེ བྷཝཱ ཨཛ྄ཛྷཏྟིཀཱཏི ནིཡཀཛ྄ཛྷཏྟེསུཔི ཨབྦྷནྟརཱ ཙཀྑཱདཡོ ཝུཙྩནྟི. ཨེཏྠ པན ཨཛ྄ཛྷཏྟིཀ-སདྡོ ཙཀྑཱདཱིསུ པཝཏྟམཱནོ དསྶིཏོ ¶ , ན ཨཛ྄ཛྷཏྟསདྡོ, ཨཏྠི ཙ ཨཛ྄ཛྷཏྟཨཛ྄ཛྷཏྟིཀསདྡཱནཾ བཧིདྡྷཱབཱཧིར-སདྡཱནཾ ཝིཡ ཝིསེསོ. ཨཛ྄ཛྷཏྟིཀསདྡོ ཧི སཔརསནྟཱནིཀེསུ སབྦེསུ ཙཀྑཱདཱིསུ རཱུཔཱདཱིསུ བཱཧིར-སདྡོ ཝིཡ པཝཏྟཏི, ཨཛ྄ཛྷཏྟ-སདྡོ པན སཀསནྟཱནིཀེསྭེཝ ཙཀྑུརཱུཔཱདཱིསུ ཏཏོ ཨཉྙེསྭེཝ བཧིདྡྷཱ-སདྡོ ཝིཡ པཝཏྟཏཱིཏི ཏསྨཱ སདྡཏོ ཨཏྠཏོ ཙ ཨསམཱནཏྟཱ ན ཨིདམེཏྠ ཨུདཱཧརཎཾ ཡུཏྟནྟི. ཨཡཾ པནེཏྠ ཨདྷིཔྤཱཡོ དཊྛབྦོ – ཨཛ྄ཛྷཏྟེ བྷཝཱ ཨཛ྄ཛྷཏྟིཀཱཏི ཨཡཉྷི ཝཙནཏྠོ. ཡཉྩ ཨཛ྄ཛྷཏྟེ བྷཝཾ, ཏེན ཨཛ྄ཛྷཏྟེནེཝ བྷཝིཏབྦཾ, ཏེན ཏཾཝཱཙཀསྶ ཨཛ྄ཛྷཏྟ-སདྡསྶ ཨཛ྄ཛྷཏྟིཀ-སདྡསྶ ཙ སམཱནཏྠཏཱ. ཨུབྷིནྣམྤི སདྡཱནཾ སམཱནཏྠབྷཱཝཏོ ཨཛ྄ཛྷཏྟཛ྄ཛྷཏྟེ པཝཏྟམཱནེ ཨཛ྄ཛྷཏྟིཀ-སདྡེ ཨཛ྄ཛྷཏྟ-སདྡོ ཏཏྠ པཝཏྟོཏི སཀྐཱ ཝཏྟུནྟི.

ཨཡཾ ¶ ཁོ པནཱནནྡ, ཝིཧཱརོཏི ཝིཧཱརསུཉྙཏཱསུཏྟེ (མ. ནི. ༣.༡༨༧) སངྒཎིཀཱརཱམཏཱཡ རཱུཔཱདིརཏིཡཱ ཙ ཨཱདཱིནཝཾ ཝཏྭཱ ཏཔྤཊིཔཀྑཝིཧཱརདསྶནཏྠཾ ཝུཏྟཾ. ཨཛ྄ཛྷཏྟཾ སུཉྙཏནྟི ཝིསཡབྷཱུཏཾ ཨིསྶརིཡཊྛཱནབྷཱུཏཾ སུཉྙཏཾ, སུཉྙཏཱཕལསམཱཔཏྟིནྟི ཨཏྠོ. ཙིཏྟིསྶརཱ ཧི བུདྡྷཱ བྷགཝནྟོ དྷམྨཾ དེསེནྟཱཔི ཡཾ མུཧུཏྟཾ ཏུཎྷཱི བྷཝིཏབྦཾ ཧོཏི, ཏཾ མུཧུཏྟཾ ཕལསམཱཔཏྟིཾ སམཱཔཛྫནྟི, པགེཝ ཨཉྙསྨིཾ ཀཱལེ, ཏསྨཱ སབྦཏྠཱཔི ཨིསྶརིཡཱནཾ བཧུལཾ ཕལསམཱཔཏྟིཡཾ ཨིསྶརིཡསྶ པཝཏྟནཏོ ཕལསམཱཔཏྟི ‘‘ཨིསྶརིཡཊྛཱན’’ནྟི ཝུཏྟཱ. ཨརཧཏྟཕལཱདྷིགམེན ཝཱ ཏཐཱགཏཱནཾ ཨིསྶརིཡཾ ནིབྦཏྟཾ ཏཾཛནཀེནེཝ མགྒེནཱཏི ཏཾ ཏེསཾ ཨིསྶརིཡཊྛཱནཾ. ཝིསཡོ ཙ ཨནཉྙཏྠབྷཱཝོཝ ཡཐཱ ‘‘ཨཱཀཱསེ སཀུཎཱ ཨུདཀེ མཙྪཱ’’ཏི, བུདྡྷཱ ཙ ཨཉྙཏྠ དིསྶམཱནཱཔི ཝིཝེཀཔབྦྷཱརཏཱཡ ཕལསམཱཔཏྟིནིནྣཱཝ, ཏེན ཏསྶཱ ཏསྶཱ ཀིརིཡཱཡ ཨནནྟརཾ ཕལསམཱཔཏྟིཡཾཡེཝ བྷཝནྟཱིཏི སཱ ཏེསཾ ཝིསཡོ, ཏབྦིསཡཏཱ ཙ སཙྩཀསུཏྟེན (མ. ནི. ༡.༣༦༤ ཨཱདཡོ) དཱིཔེཏབྦཱ.

༢༢. ཡེསཾ དཊྛབྦབྷཱཝོ ཨཏྠི, ཏེ སནིདསྶནཱ. ཙཀྑུཝིཉྙཱཎགོཙརབྷཱཝོཝ དཊྛབྦབྷཱཝོ, ཏསྶ རཱུཔཱཡཏནཱ ཨནཉྙཏྟེཔི ཨཉྙེཧི དྷམྨེཧི རཱུཔཱཡཏནཾ ཝིསེསེཏུཾ ཨཉྙཾ ཝིཡ ཀཏྭཱ ‘‘སཧ ནིདསྶནེནཱཏི སནིདསྶནཱ’’ཏི ཝུཏྟཾ. དྷམྨསབྷཱཝསཱམཉྙེན ཧི ཨེཀཱིབྷཱུཏེསུ དྷམྨེསུ ཡོ ནཱནཏྟཀརོ སབྷཱཝོ, སོ ཨཉྙོ ཝིཡ ཀཏྭཱ ཨུཔཙརིཏུཾ ཡུཏྟོ ¶ . ཨེཝཉྷི ཨཏྠཝིསེསཱཝབོདྷོ ཧོཏཱིཏི. སཡཉྩ ནིསྶཡཝསེན ཙ སམྤཏྟཱནཾ ཨསམྤཏྟཱནཉྩ པཊིམུཁབྷཱཝོ ཨཉྙམཉྙཔཏནཾ པཊིཧནནབྷཱཝོ, ཡེན བྱཱཔཱརཱདིཝིཀཱརཔཙྩཡནྟརསཧིཏེསུ ཙཀྑཱདཱིནཾ ཝིསཡེསུ ཝིཀཱརུཔྤཏྟི.

ཏིཀམཱཏིཀཱཔདཝཎྞནཱ ནིཊྛིཏཱ.

དུཀམཱཏིཀཱཔདཝཎྞནཱ

༡-༦. མཱུལཊྛེནཱཏི སུཔྤཏིཊྛིཏབྷཱཝསཱདྷནེན མཱུལབྷཱཝེན, ན པཙྩཡམཏྟཊྛེན ཧེཏུདྷམྨཱ ཧེཏཱུ དྷམྨཱཏི སམཱསཱསམཱསནིདྡེསབྷཱཝོ དྭིནྣཾ པཱཋཱནཾ ཝིསེསོ. ཏཐེཝཱཏི སམྤཡོགཏོཝ. སཧེཏུཀཱནཾ ཧེཏུསམྤཡུཏྟབྷཱཝཏོ ¶ ‘‘སམྤཡོགཏོ’’ཏི ཝུཏྟནྟི ཝེདིཏབྦཾ, ན སཧསདྡསྶ སམྤཡོགཏྠཏྟཱ. སཧ-སདྡོ པན ཨེཀཔུཉྫེ ཨུཔྤཱདཏོ ཡཱཝ བྷངྒཱ སཧེཏུཀཱནཾ ཧེཏཱུཧི སམཱནདེསགཧཎཱནཾ ཧེཏུཨཱདིསབྦྷཱཝཾ དཱིཔེཏི, སམྤཡུཏྟ-སདྡོ ཨེཀུཔྤཱདཱདིཝསེན སཧ ཧེཏཱུཧི ཨེཀཱིབྷཱཝུཔགམནཾ, ཏཏོ ཨེཝ ཙ དྭིནྣཾ དུཀཱནཾ ནཱནཏྟཾ ཝེདིཏབྦཾ. དྷམྨནཱནཏྟཱབྷཱཝེཔི ཧི པདཏྠནཱནཏྟེན དུཀནྟརཾ ཝུཙྩཏི. ན ཧི ཧེཏུདུཀསངྒཧིཏེཧི དྷམྨེཧི ཨཉྙེ སཧེཏུཀདུཀཱདཱིཧི ཝུཙྩནྟི, ཏེ ཨེཝ པན སཧེཏུཀཱཧེཏུཀཱདིབྷཱཝཏོ སཧེཏུཀདུཀཱདཱིཧི ཝུཏྟཱ. ཨེཝཾ སཧེཏུཀདུཀསངྒཧིཏཱ ཨེཝ ཧེཏུསམྤཡུཏྟཝིཔྤཡུཏྟབྷཱཝཏོ ཧེཏུསམྤཡུཏྟདུཀེན ཝུཏྟཱ. ན ཧི དྷམྨཱནཾ ཨཝུཏྟཏཱཔེཀྑཾ དུཀནྟརཝཙནནྟི ནཏྠི པུནརུཏྟིདོསོ. དེསེཏབྦཔྤཀཱརཛཱནནཉྷི དེསནཱཝིལཱསོ ཏཐཱ དེསནཱཉཱཎཉྩཱཏི. ཏེན དྷམྨཱནཾ ཏཔྤཀཱརཏཱ ཝུཏྟཱ ཧོཏི. སཀལེཀདེསཝསེན པཋམདུཀཾ དུཏིཡཏཏིཡེཧི སདྡྷིཾ ཡོཛེཏྭཱ ཙཏུཏྠཱདཡོ ཏཡོ དུཀཱ ཝུཏྟཱ. སཀལཉྷི པཋམདུཀཾ དུཏིཡདུཀེཀདེསེན སཧེཏུཀཔདེན ཏཏིཡདུཀེཀདེསེན ཧེཏུསམྤཡུཏྟཔདེན ཙ ཡོཛེཏྭཱ ཡཐཱཀྐམཾ ཙཏུཏྠཔཉྩམདུཀཱ ཝུཏྟཱ, ཏཐཱ པཋམདུཀེཀདེསཾ ནཧེཏུཔདཾ སཀལེན དུཏིཡདུཀེན ཡོཛེཏྭཱ ཚཊྛདུཀོ ཝུཏྟོ. ཨིདམྤི སམྦྷཝཏཱིཏི ཨེཏེན ཨཝུཏྟམྤི སམྦྷཝཝསེན དཱིཔིཏནྟི དསྶེཏི. སམྦྷཝོ ཧི གཧཎསྶ ཀཱརཎནྟི. ཡཐཱ ཧེཏུསཧེཏུཀཱཏི ཨིདཾ སམྦྷཝཏཱིཏི ཀཏྭཱ གཧིཏཾ, ཨེཝཾ ཧེཏུཨཧེཏུཀཱཏི ཨིདམྤི སམྦྷཝཏཱིཏི ཀཏྭཱ གཧེཏབྦམེཝཱཏི ཨེཝཾ ཨཉྙཏྠཱཔི ཡོཛེཏབྦཾ.

ཨེཝཾ ¶ པཋམདུཀཾ དུཏིཡཏཏིཡདུཀེསུ དུཏིཡཔདེཧི ཡོཛེཏྭཱ ‘‘ཧེཏཱུ ཙེཝ དྷམྨཱ ཨཧེཏུཀཱ ཙ, ཨཧེཏུཀཱ ཙེཝ དྷམྨཱ ན ཙ ཧེཏཱུ, ཧེཏཱུ ཙེཝ དྷམྨཱ ཧེཏུཝིཔྤཡུཏྟཱ ཙ, ཧེཏུཝིཔྤཡུཏྟཱ ཙེཝ དྷམྨཱ ན ཙ ཧེཏཱུ’’ཏི ཡེ དྭེ དུཀཱ ཀཱཏབྦཱ, ཏེསཾ སམྦྷཝཝསེནེཝ སངྒཧཾ དསྶེཏྭཱ ཁོ པན-པདེན ཨཔརེསམྤི དུཀཱནཾ སངྒཧཾ དསྶེཏུཾ ‘‘ཏཏྲ ཡདེཏ’’ནྟིཨཱདིམཱཧ. ཏཏྲཱཏི པཱལི༹ཡཾ. ཨཡཾ ཨཏིརེཀཏྠོཏི ཨིདཱནི ཡཾ ཝཀྑཏི, ཏམཏྠམཱཧ. ཏཏྠ པན ཨཉྙེཔི ཨཉྙཐཱཔཱིཏི ཨེཏེསཾ ཝིསུཾ པཝཏྟིཡཱ དྭེ དུཀཱ དསྶིཏཱ, སཧ པཝཏྟིཡཱ པན ཨཡམྤི དུཀོ ཝེདིཏབྦོ ‘‘ཧེཏཱུ ཙེཝ དྷམྨཱ ཧེཏུསམྤཡུཏྟཱཔི ཧེཏུཝིཔྤཡུཏྟཱཔཱི’’ཏི, ཨེཏེསུ པན པཉྩསུ དུཀེསུ དུཏིཡདུཀེན ཏཏིཡདུཀོ ཝིཡ, ཙཏུཏྠདུཀེན པཉྩམདུཀོ ཝིཡ ཙ ཚཊྛདུཀེན ནིནྣཱནཏྠཏྟཱ ‘‘ན ཧེཏུ ཁོ པན དྷམྨཱ ཧེཏུསམྤཡུཏྟཱཔི ཧེཏུཝིཔྤཡུཏྟཱཔཱི’’ཏི ཨཡཾ དུཀོ ན ཝུཏྟོ. དསྶིཏནིནྣཱནཏྠནཡོ ཧི སོ པུརིམདུཀེཧཱིཏི. ཨིཏརེསུ ཙཏཱུསུ ཧེཏཱུ ཙེཝ ཨཧེཏུཀདུཀེན སམཱནཏྠཏྟཱ ཧེཏཱུ ཙེཝ ཧེཏུཝིཔྤཡུཏྟདུཀོ, ཧེཏུསཧེཏུཀདུཀེན སམཱནཏྠཏྟཱ ཧེཏུཧེཏུསམྤཡུཏྟདུཀོ ཙ ནཧེཏུཧེཏུསམྤཡུཏྟདུཀོ ཝིཡ ན ཝཏྟབྦོ. ཏེསུ པན དྭཱིསུ པཙྪིམདུཀེ ‘‘ཧེཏཱུ ཁོ པན དྷམྨཱ སཧེཏུཀཱ’’ཏི པདཾ ཙཏུཏྠདུཀེ པཋམཔདེན ནིནྣཱནཱཀརཎཏྟཱ ¶ ན ཝཏྟབྦཾ, ‘‘ཧེཏཱུ ཁོ པན དྷམྨཱ ཨཧེཏུཀཱ’’ཏི པདཾ ‘‘ཧེཏཱུ ཙེཝ དྷམྨཱ ཨཧེཏུཀཱ’’ཏི ཨེཏེན ནིནྣཱནཏྟཱ ན ཝཏྟབྦཾ. ཨཝསིཊྛེ པན ཨེཀསྨིཾ དུཀེ ‘‘ཨཧེཏུཀཱ ཙེཝ དྷམྨཱ ན ཙ ཧེཏཱུ’’ཏི པདཾ ཚཊྛདུཀེ དུཏིཡཔདེན ཨེཀཏྠཏྟཱ ན ཝཏྟབྦཾ. ཨིདཱནི ‘‘ཧེཏཱུ ཙེཝ དྷམྨཱ ཨཧེཏུཀཱ ཙཱ’’ཏི ཨིདམེཝེཀཾ པདཾ ཨཝསིཊྛཾ, ན ཙ ཨེཀེན པདེན དུཀོ ཧོཏཱིཏི ཏཉྩ ན ཝུཏྟནྟི. ཙཏུཏྠདུཀེ དུཏིཡཔདེན པན སམཱནཏྠསྶ ཚཊྛདུཀེ པཋམཔདསྶ ཝཙནཾ དུཀཔཱུརཎཏྠཾ, ཨེཏེན ཝཱ གཏིདསྶནེན སབྦསྶ སམྦྷཝནྟསྶ སངྒཧོ ཀཏོཏི དཊྛབྦོ. ཏཐཱ ཧི སབྦོ སམྦྷཝདུཀོ པཋམདུཀེ དུཏིཡཏཏིཡདུཀཔཀྑེཔེན དསྶིཏོ, ཏེསུ ཙ པཋམདུཀཔཀྑེཔེནཱཏི.

༧-༡༣. སམཱནཀཱལེན ཨསམཱནཀཱལེན ཀཱལཝིམུཏྟེན ཙ པཙྩཡེན ནིཔྥནྣཱནཾ པཙྩཡཱཡཏྟཱནཾ པཙྩཡབྷཱཝམཏྟེན ཏེསཾ པཙྩཡཱནཾ ཨཏྠིཏཾ དཱིཔེཏུཾ སཔྤཙྩཡཝཙནཾ, ན སཧེཏུཀཝཙནཾ ཝིཡ སམཱནཀཱལཱནམེཝ, ནཱཔི སནིདསྶནཾ ཝིཡ ཏཾསབྷཱཝསྶ ཨནཏྠནྟརབྷཱུཏསྶ. སངྑཏ-སདྡོ པན སམེཏེཧི ¶ ནིཔྥཱདིཏབྷཱཝཾ དཱིཔེཏཱིཏི ཨཡམེཏེསཾ ཝིསེསོ དུཀནྟརཝཙནེ ཀཱརཎཾ. ཨེཏྠ ཙ ཨཔྤཙྩཡཱ ཨསངྑཏཱཏི བཧུཝཙནནིདྡེསོ ཨཝིནིཙྪིཏཏྠཔརིཙྪེདདསྶནཝསེན མཱཏིཀཱཋཔནཏོ ཀཏོཏི ཝེདིཏབྦོ. ཨུདྡེསེན ཧི ཀུསལཱདིསབྷཱཝཱནཾ དྷམྨཱནཾ ཨཏྠིཏཱམཏྟཾ ཝུཙྩཏི, ན པརིཙྪེདོཏི ཨཔརིཙྪེདེན བཧུཝཙནེན ཨུདྡེསོ ཝུཏྟོཏི. རཱུཔནྟི རཱུཔཱཡཏནཾ པཐཝིཡཱདི ཝཱ. པུརིམསྨིཾ ཨཏྠཝིཀཔྤེ རཱུཔཱཡཏནསྶ ཨསངྒཧིཏཏཱ ཨཱཔཛྫཏཱིཏི རུཔྤནལཀྑཎཾ ཝཱ རཱུཔནྟི ཨཡཾ ཨཏྠནཡོ ཝུཏྟོ. ཏཏྠ རཱུཔནྟི རུཔྤནསབྷཱཝོ. ན ལུཛྫཏི ན པལུཛྫཏཱིཏི ཡོ གཧིཏོ ཏཐཱ ན ཧོཏི, སོ ལོཀོཏི ཏཾགཧཎརཧིཏཱནཾ ལོཀུཏྟརཱནཾ ནཏྠི ལོཀཏཱ. དུཀྑསཙྩཾ ཝཱ ལོཀོ, ཏཏྠ ཏེནེཝ ལོཀསབྷཱཝེན ཝིདིཏཱཏི ལོཀིཡཱ.

ཨེཝཾ སནྟེ ཙཀྑུཝིཉྙཱཎེན ཝིཛཱནིཏབྦསྶ རཱུཔཱཡཏནསྶ ཏེནེཝ ནཝིཛཱནིཏབྦསྶ སདྡཱཡཏནཱདིཀསྶ ཙ ནཱནཏྟཱ དྭིནྣམྤི པདཱནཾ ཨཏྠནཱནཏྟཏོ དུཀོ ཧོཏི. ཨེཝཾ པན དུཀེ ཝུཙྩམཱནེ དུཀབཧུཏཱ ཨཱཔཛྫཏི, ཡཏྟཀཱནི ཝིཉྙཱཎཱནི, ཏཏྟཀཱ དུཀཱ ཝུཏྟཱ སམཏྟཱ ཋཔེཏྭཱ སབྦདྷམྨཱརམྨཎཱནི ཝིཉྙཱཎཱནི. ཏེསུ ཙ དུཀསྶ པཙྪེདོ ཨཱཔཛྫཏི, ཏཐཱ ཙ སཏི ‘‘ཀེནཙཱི’’ཏི པདཾ སབྦཝིཉྙཱཎསངྒཱཧཀཾ ན སིཡཱ, ནིདྡེསེན ཙ ཝིརུདྡྷཾ ཨིདཾ ཝཙནཾ. ཡོ ཙ ཏཏྠ ‘‘ཡེ ཏེ དྷམྨཱ ཙཀྑུཝིཉྙེཡྻཱ, ན ཏེ དྷམྨཱ སོཏཝིཉྙེཡྻཱཏི ཨཡཾ དུཀོ ན ཧོཏཱི’’ཏི པཊིསེདྷོ ཀཏོ, སོ ཙ ཀཐཾ ཡུཛྫེཡྻ. ན ཧི སམཏྠཱ ཨཊྛཀཐཱ པཱལི༹ཾ པཊིསེདྷེཏུནྟི, ན ཙ ཀེནཙི-སདྡསྶ ཏེནེཝཱཏི ཨཡཾ པདཏྠོ སམྦྷཝཏི, ‘‘ཀེནཙཱི’’ཏི ཨེཏསྶ ཨཱདིཔདསྶ ཨནིཡམིཏཾ ཡཾ ¶ ཀིཉྩི ཨེཀཾ པདཏྠོ, ཏཾ ཝཏྭཱ ཝུཙྩམཱནསྶ ‘‘ཀེནཙཱི’’ཏི དུཏིཡཔདསྶ ཡཾ ཀིཉྩི ཨཔརཾ ཨནིཡམིཏཾ པདཏྠོཏི ལོཀསིདྡྷམེཏཾ, ཏཐེཝ ཙ ནིདྡེསོ པཝཏྟོ, ན ཙེཏྠ ཝིཉྙཱཏབྦདྷམྨབྷེདེན དུཀབྷེདོ སམཏྟོ ཨཱཔཛྫཏི ཡཏྟཀཱ ཝིཉྙཱཏབྦཱ, ཏཏྟཀཱ དུཀཱཏི, ཏསྨཱ ནཏྠི དུཀབཧུཏཱ. ན ཧི ཨེཀཾཡེཝ ཝིཉྙཱཏབྦཾ ཀེནཙི ཝིཉྙེཡྻཾ ཀེནཙི ན ཝིཉྙེཡྻཉྩ, ཀིནྟུ ཨཔརམྤི ཨཔརམྤཱིཏི སབྦཝིཉྙཱཏབྦསངྒཧེ དུཀོ སམཏྟོ ཧོཏི, ཨེཝཉྩ སཏི ‘‘ཀེནཙཱི’’ཏི པདཾ ཨནིཡམེན སབྦཝིཉྙཱཎསངྒཱཧཀནྟི སིདྡྷཾ ཧོཏི, ཝིཉྙཱཎནཱནཏྟེན ཙ ཝིཉྙཱཏབྦཾ བྷིནྡིཏྭཱ ཨཡཾ དུཀོ ཝུཏྟོ, ན ཝིཉྙཱཏབྦཱནཾ ཨཏྠནྟརཏཱཡཱཏི. ཨེཏསྶ པན དུཀསྶ ནིཀྑེཔརཱསིནིདྡེསོ དུཀསངྒཧིཏདྷམྨེཀདེསེསུ ¶ དུཀཔདདྭཡཔྤཝཏྟིདསྶནཝསེན པཝཏྟོ. ཨཏྠུདྡྷཱརནིདྡེསོ ནིརཝསེསདུཀསངྒཧིཏདྷམྨདསྶནཝསེནཱཏི ཝེདིཏབྦོ.

༡༤-༡༩. ཙཀྑུཏོཔི…པེ… མནཏོཔཱིཏི ཙཀྑུཝིཉྙཱཎཱདིཝཱིཐཱིསུ ཏདནུགཏམནོཝིཉྙཱཎཝཱིཐཱིསུ ཙ ཀིཉྩཱཔི ཀུསལཱདཱིནམྤི པཝཏྟི ཨཏྠི, ཀཱམཱསཝཱདཡོ ཨེཝ པན ཝཎཏོ ཡཱུསཾ ཝིཡ པགྒྷརཎཀཨསུཙིབྷཱཝེན སནྡནྟི, ཏསྨཱ ཏེ ཨེཝ ‘‘ཨཱསཝཱ’’ཏི ཝུཙྩནྟི. ཏཏྠ ཧི པགྒྷརཎཀཨསུཙིམྷི ནིརུལ༹ྷོ ཨཱསཝསདྡོཏི. དྷམྨཏོ ཡཱཝ གོཏྲབྷུནྟི ཏཏོ པརཾ མགྒཕལེསུ ཨཔྤཝཏྟིཏོ ཝུཏྟཾ. ཨེཏེ ཧི ཨཱརམྨཎཀརཎཝསེན དྷམྨེ གཙྪནྟཱ ཏཏོ པརཾ ན གཙྪནྟཱིཏི. ནནུ ཏཏོ པརཾ བྷཝངྒཱདཱིནིཔི གཙྪནྟཱིཏི ཙེ? ན, ཏེསམྤི པུབྦེ ཨཱལམྦིཏེསུ ལོཀིཡདྷམྨེསུ སཱསཝབྷཱཝེན ཨནྟོགདྷཏྟཱ ཏཏོ པརཏཱབྷཱཝཏོ. ཨེཏྠ ཙ གོཏྲབྷུཝཙནེན གོཏྲབྷུཝོདཱནཕལསམཱཔཏྟིཔུརེཙཱརིཀཔརིཀམྨཱནི ཝུཏྟཱནཱིཏི ཝེདིཏབྦཱནི, པཋམམགྒཔུརེཙཱརིཀམེཝ ཝཱ གོཏྲབྷུ ཨཝདྷིནིདསྶནབྷཱཝེན གཧིཏཾ, ཏཏོ པརཾ མགྒཕལསམཱནཏཱཡ པན ཨཉྙེསུ མགྒེསུ མགྒཝཱིཐིཡཾ ཕལསམཱཔཏྟིཝཱིཐིཡཾ ནིརོདྷཱནནྟརཉྩ པཝཏྟམཱནེསུ ཕལེསུ ནིབྦཱནེ ཙ པཝཏྟི ནིཝཱརིཏཱ ཨཱསཝཱནནྟི ཝེདིཏབྦཱ. སཝནྟཱིཏི གཙྪནྟི. དུཝིདྷོ ཧི ཨཝདྷི ཨབྷིཝིདྷིཝིསཡོ ཨནབྷིཝིདྷིཝིསཡོ ཙ. ཨབྷིཝིདྷིཝིསཡཾ ཀིརིཡཱ བྱཱཔེཏྭཱ པཝཏྟཏི ‘‘ཨཱབྷཝགྒཱ བྷགཝཏོ ཡསོ གཏོ’’ཏི, ཨིཏརཾ བཧི ཀཏྭཱ ‘‘ཨཱཔཱཊལིཔུཏྟཱ ཝུཊྛོ དེཝོ’’ཏི. ཨཡཉྩ ཨཱ-ཀཱརོ ཨབྷིཝིདྷིཨཏྠོ ཨིདྷ གཧིཏོཏི ‘‘ཨནྟོཀརཎཏྠོ’’ཏི ཝུཏྟཾ.

ཙིརཔཱརིཝཱསིཡཊྛོ ཙིརཔརིཝུཏྠཏཱ པུརཱཎབྷཱཝོ. ཨཱདི-སདྡེན ‘‘པུརིམཱ, བྷིཀྑཝེ, ཀོཊི ན པཉྙཱཡཏི བྷཝཏཎྷཱཡཱ’’ཏི (ཨ. ནི. ༡༠.༦༢) ཨིདཾ སུཏྟཾ སངྒཧིཏཾ. ཨཝིཛྫཱསཝབྷཝཱསཝཱནཉྩ ¶ ཙིརཔརིཝུཏྠཏཱཡ དསྶིཏཱཡ ཏབྦྷཱཝབྷཱཝཱིནཾ ཀཱམཱསཝདིཊྛཱསཝཱནཉྩ ཙིརཔརིཝུཏྠཏཱ དསྶིཏཱ ཧོཏི. ཨཉྙེསུཔི ཡཐཱཝུཏྟེ དྷམྨེ ཨོཀཱསཉྩ ཨཱརམྨཎཾ ཀཏྭཱ པཝཏྟམཱནེསུ མཱནཱདཱིསུ ཝིཛྫམཱནེསུ ཨཏྟཏྟནིཡཱདིགྒཱཧཝསེན ཨབྷིབྱཱཔནཾ མདཀརཎཝསེན ཨཱསཝསདིསཏཱ ཙ ཨེཏེསཾཡེཝ, ནཱཉྙེསནྟི ཨེཏེསྭེཝ ཨཱསཝསདྡོ ནིརུལ༹ྷོ དཊྛབྦོ. ཨཱཡཏཾ ཝཱ སཝནྟི ཕལནྟཱིཏི ཨཱསཝཱ ¶ . ན ཧི ཀིཉྩི སཾསཱརདུཀྑཾ ཨཱསཝེཧི ཝིནཱ ཨུཔྤཛྫམཱནཾ ཨཏྠཱིཏི. ཨཱརམྨཎབྷཱཝེན ཡེ དྷམྨཱ ཝཎོ ཝིཡ ཨཱསཝེ པགྒྷརནྟི, ཏེ ཨསམྤཡོགེ ཨཏབྦྷཱཝེཔི སཧ ཨཱསཝེཧཱིཏི སཱསཝཱ, ཨཱསཝཝནྟོཏི ཨཏྠོ.

ཨོསཱནདུཀེ ‘‘ནོ ཨཱསཝཱ ཁོ པནཱ’’ཏི ཨཝཏྭཱ ‘‘ཨཱསཝཝིཔྤཡུཏྟཱ ཁོ པནཱ’’ཏི ཝཙནཾ སཱསཝཱནཾ སཧེཏུཀཱནཾ ཝིཡ སམྤཡུཏྟེཧི ཏཾསཧིཏཏཱ ན ཧོཏཱིཏི དསྶནཏྠཾ. ཨེཝཾ སེསགོཙྪཀེསུཔི ཡཐཱསམྦྷཝཾ ཝིཔྤཡུཏྟགྒཧཎེ པཡོཛནཾ དཊྛབྦཾ. ཨཔིཙ ‘‘ནོ ཨཱསཝཱ ཁོ པན དྷམྨཱ སཱསཝཱ’’ཏི ཨིདཾ པདཾ ཙཏུཏྠདུཀེ དུཏིཡཔདེན ནིནྣཱནཾ, ན ཙ ཨེཀེན དུཀོ ཧོཏི, ཏསྨཱ ཨཱསཝཝིཔྤཡུཏྟཔདམེཝ གཧེཏྭཱ ཨོསཱནདུཀཡོཛནཱ ཉཱཡཱགཏཱཏི ཀཏཱ. ཧེཏུགོཙྪཀེ པན ཧེཏུཝིཔྤཡུཏྟཱནཾ སཧེཏུཀཏཱ ནཏྠཱིཏི ཏེ གཧེཏྭཱ དུཀཡོཛནཱཡ ཨསཀྐུཎེཡྻཏྟཱ ནཧེཏུཔདཾ གཧེཏྭཱ ཨོསཱནདུཀཡོཛནཱ ཀཏཱ. ཡེ ཝཱ པན པཋམེ དུཀེ དུཏིཡསྶ པཀྑེཔེ ཨེཀོ, ཏཏིཡསྶ དྭེ, པཋམསྶ དུཏིཡེ ཨེཀོ, ཏཏིཡེ དྭེ, དུཏིཡསྶ ཏཏིཡེ ཨེཀོ, དུཏིཡེ ཙ ཏཏིཡསྶ ཨེཀོཏི ཨཊྛ དུཀཱ ལབྦྷནྟི, ཏེསུ ཏཱིཧི ཨིཏརེ ཙ ནཡཏོ དསྶིཏཱཏི ཝེདིཏབྦཱ. ཨེས ནཡོ སེསགོཙྪཀེསུཔི.

༢༠-༢༥. ཀིལེསཀམྨཝིཔཱཀཝཊྚཱནཾ པཙྩཡབྷཱཝེན ཏཏྠ སཾཡོཛེནྟི, སཏིཔི ཨཉྙེསཾ ཏཔྤཙྩཡབྷཱཝེ ན ཝིནཱ སཾཡོཛནཱནི ཏེསཾ ཏཔྤཙྩཡབྷཱཝོ ཨཏྠི, ཨོརམྦྷཱགིཡུདྡྷམྦྷཱགིཡསངྒཧིཏེཧི ཙ ཏཾཏཾབྷཝནིབྦཏྟཀཀམྨནིཡམོ བྷཝནིཡམོ ཙ ཧོཏི, ན ཙ ཨུཔཙྪིནྣསཾཡོཛནསྶ ཀཏཱནིཔི ཀམྨཱནི བྷཝཾ ནིབྦཏྟེནྟཱིཏི. སཾཡོཛེཏབྦཱཏི ཝཱ སཾཡོཛནིཡཱ, སཾཡོཛནེ ནིཡུཏྟཱཏི ཝཱ. དཱུརགཏསྶཔི ཨཱཀཌྜྷནཏོ ནིསྶརིཏུཾ ཨཔྤདཱནཝསེན བནྡྷནཾ སཾཡོཛནཾ, གནྠཀརཎཾ སངྑལིཀཙཀྐལཀཱནཾ ཝིཡ པཊིབདྡྷཏཱཀརཎཾ ཝཱ གནྠནཾ གནྠོ, སཾསིལིསཀརཎཾ ཡོཛནཾ ཡོགོཏི ཨཡམེཏེསཾ ཝིསེསོཏི ཝེདིཏབྦོ. དྷམྨཱནཾ སབྷཱཝཀིཙྩཝིསེསཉྙུནཱ པན བྷགཝཏཱ སམྤཡུཏྟེསུ ཨཱརམྨཎེསུ ཏཔྤཙྩཡེསུ ཙ ཏེཧི ཏེཧི ནིཔྥཱདིཡམཱནཾ ཏཾ ཏཾ ཀིཙྩཝིསེསཾ པསྶནྟེན ཏེ ཏེ དྷམྨཱ ཏཐཱ ཏཐཱ ཨཱསཝསཾཡོཛནགནྠཱདིཝསེན ¶ ཝུཏྟཱཏི ‘‘ཀིམཏྠཾ ཨེཏེཡེཝ དྷམྨཱ ཨེཝཾ ཝུཏྟཱ, ཀསྨཱ ཙ ཝུཏྟཱ ཨེཝ པུན ཝུཏྟཱ’’ཏི ན ཙོདེཏབྦམེཏཾ.

༢༦-༣༧. གནྠནིཡཱཏི ¶ ཨེཏྠ ཨཡམཉྙོ ཨཏྠོ ‘‘གནྠཀརཎཾ གནྠནཾ, གནྠནེ ནིཡུཏྟཱཏི གནྠནིཡཱ, གནྠཡིཏུཾ སཀྐུཎེཡྻཱ, གནྠཡིཏུཾ ཨརཧནྟཱིཏི ཝཱ གནྠནིཡཱ’’ཏི. ཨེཝཾ ཨོགྷནིཡཱདཱིསུཔི དཊྛབྦཾ. ཏེནཱཏིཀྐམཏཱིཏི ཨེཏཾ དྷཱཏྭཏྠཾ གཧེཏྭཱ ཨོགྷནིཡཱཏི པདསིདྡྷི ཀཏཱ.

༥༠-༥༤. དྷམྨསབྷཱཝཾ ཨགྒཧེཏྭཱ པརཏོ ཨཱམསནྟཱིཏི པརཱམཱསཱ. པརཏོཏི ནིཙྩཱདིཏོ. ཨཱམསནྟཱིཏི སབྷཱཝཔཊིསེདྷེན པརིམཛྫནྟི.

༥༥-༦༨. སབྷཱཝཏོ ཝིཛྫམཱནཾ ཨཝིཛྫམཱནཾ ཝཱ ཝིཙིཏྟསཉྙཱཡ སཉྙིཏཾ ཨཱརམྨཎཾ ཨགྒཧེཏྭཱ ཨཔྤཝཏྟིཏོ ཨཱལམྦམཱནཱ དྷམྨཱ སཱརམྨཎཱ. ཙིནྟནཾ གཧཎཾ ཨཱརམྨཎཱུཔལདྡྷི. ཙེཏསི ནིཡུཏྟཱ, ཙེཏསཱ སཾསཊྛཱ ཝཱ ཙེཏསིཀཱ. དུབྦིཉྙེཡྻནཱནཏྟཏཱཡ ཨེཀཱིབྷཱཝམིཝུཔགམནཾ ནིརནྟརབྷཱཝུཔགམནཾ. ཡེསཾ རཱུཔཱནཾ ཙིཏྟཾ སཧཛཱཏཔཙྩཡོ ཧོཏི, ཏེསཾ ཙིཏྟསྶ ཙ སུཝིཉྙེཡྻནཱནཏྟནྟི ནིརནྟརབྷཱཝཱནུཔགམནཾ ཝེདིཏབྦཾ. ཨེཀཏོ ཝཏྟམཱནཱཔཱིཏི ཨཔི-སདྡོ ཀོ པན ཝཱདོ ཨེཀཏོ ཨཝཏྟམཱནཱཏི ཨེཏམཏྠཾ དཱིཔེཏི. ཨིདམེཏྠ ཝིཙཱརེཏབྦཾ – ཨཝིནིབྦྷོགརཱུཔཱནཾ ཀིཾ ཨཉྙམཉྙཾ སཾསཊྛཏཱ, ཨུདཱཧུ ཝིསཾསཊྛཏཱཏི? ཝིསུཾ ཨཱརམྨཎབྷཱཝེན སུཝིཉྙེཡྻནཱནཏྟཏྟཱ ན སཾསཊྛཏཱ, ནཱཔི ཝིསཾསཊྛཏཱ སཾསཊྛཱཏི ཨནཱསངྐནཱིཡསབྷཱཝཏྟཱ. ཙཏུནྣཉྷི ཁནྡྷཱནཾ ཨཉྙམཉྙཾ སཾསཊྛསབྷཱཝཏྟཱ རཱུཔནིབྦཱནེཧིཔི སོ སཾསཊྛབྷཱཝོ ཨཏྠི ནཏྠཱིཏི སིཡཱ ཨཱསངྐཱ, ཏསྨཱ ཏེསཾ ཨིཏརེཧི, ཨིཏརེསཉྩ ཏེཧི ཝིསཾསཊྛསབྷཱཝཏཱ ཝུཙྩཏི, ན པན རཱུཔཱནཾ རཱུཔེཧི ཀཏྠཙི སཾསཊྛཏཱ ཨཏྠཱིཏི ཏདཱསངྐཱབྷཱཝཏོ ཝིསཾསཊྛཏཱ ཙ རཱུཔཱནཾ རཱུཔེཧི ན ཝུཙྩཏཱིཏི. ཨེས ཧི ཏེསཾ སབྷཱཝོཏི. ཙིཏྟསཾསཊྛསམུཊྛཱནཱདིཔདེསུ སཾསཊྛསམུཊྛཱནཱདིསདྡཱ ཙིཏྟསདྡཱཔེཀྑཱཏི པཙྩེཀཾ ཙིཏྟསདྡསམྦནྡྷཏྟཱ ཙིཏྟསཾསཊྛཱ ཙ ཏེ ཙིཏྟསམུཊྛཱནཱ ཙཱཏི པཙྩེཀཾ ཡོཛེཏྭཱ ཨཏྠོ ཝུཏྟོ. ཨུཔཱདིཡནྟེཝཱཏི བྷཱུཏཱནི གཎྷནྟི ཨེཝ, ནིསྶཡནྟི ཨེཝཱཏི ཨཏྠོ. ཡཐཱ བྷཱུཏཱནི ཨུཔཱདིཡནྟི གཡ྄ཧནྟི ནིསྶཱིཡནྟི, ན ཏཐཱ ཨེཏཱནི གཡ྄ཧནྟི ནིསྶཱིཡནྟི, ཏསྨཱ ཨུཔཱདཱ. ཨཐ ཝཱ བྷཱུཏཱནི ཨམུཉྩིཏྭཱ ཏེསཾ ཝཎྞནིབྷཱདིབྷཱཝེན གཧེཏབྦཏོ ཨུཔཱདཱ.

༧༥-༨༢. སཾཀིལིཊྛཏྟིཀེ ¶ ཝུཏྟནཡེནཱཏི སཾ-སདྡཾ ཨཔནེཏྭཱ ཀིལིསནྟཱིཏི ཀིལེསཱཏིཨཱདིནཱ ནཡེན.

༨༣-༡༠༠. ཀཱམཱཝཙརཱདཱིསུ ¶ ཨཡམཔརོ ཨཏྠོ – ཀཱམཏཎྷཱ ཀཱམོ, ཨེཝཾ རཱུཔཱརཱུཔཏཎྷཱ རཱུཔཾ ཨརཱུཔཉྩ. ཨཱརམྨཎཀརཎཝསེན ཏཱནི ཡཏྠ ཨཝཙརནྟི, ཏེ ཀཱམཱཝཙརཱདཡོཏི. ཨེཝཉྷི སཏི ཨཉྙབྷཱུམཱིསུ ཨུཔྤཛྫམཱནཱནཾ ཨཀཱམཱཝཙརཱདིཏཱ ཀཱམཱཝཙརཱདིཏཱ ཙ ནཱཔཛྫཏཱིཏི སིདྡྷཾ ཧོཏི. ནིཀྑེཔཀཎྜེཔི ‘‘ཨེཏྠཱཝཙརཱ’’ཏི ཝཙནཾ ཨཝཱིཙིཔརནིམྨིཏཔརིཙྪིནྣོཀཱསཱཡ ཀཱམཏཎྷཱཡ ཨཱརམྨཎབྷཱཝཾ སནྡྷཱཡ ཝུཏྟནྟི ཝེདིཏབྦཾ, ཏདོཀཱསཏཱ ཙ ཏཎྷཱཡ ཏནྣིནྣཏཱཡ ཝེདིཏབྦཱ. ཡདི པརིཡཱཔནྣསདྡསྶ ཨནྟོགདྷཱཏི ཨཡམཏྠོ, མགྒཱདིདྷམྨཱནཉྩ ལོཀུཏྟརནྟོགདྷཏྟཱ པརིཡཱཔནྣཏཱ ཨཱཔཛྫཏི. ན ཧི ‘‘པརིཡཱཔནྣཱ’’ཏི ཨེཏྠ ཏེབྷཱུམཀགཧཎཾ ཨཏྠཱིཏི? ནཱཔཛྫཏི སབྦདཱ པཝཏྟམཱནསྶ པཙྩཀྑསྶ ལོཀསྶ ཝསེན པརིཡཱཔནྣནིཙྪཡཏོ. ཨཐ ཝཱ པརིཙྪེདཀཱརིཀཱཡ ཏཎྷཱཡ པརིཙྪིནྡིཏྭཱ ཨཱཔནྣཱ པཊིཔནྣཱ གཧིཏཱཏི པརིཡཱཔནྣཱ.

ཨནཱིཡ-སདྡོ བཧུལཱ ཀཏྟུཨབྷིདྷཱཡཀོཏི ཝཊྚཙཱརཀཏོ ནིཡྻནྟཱིཏི ནིཡྻཱནཱིཡཱ, ནཱི-ཀཱརསྶ རསྶཏྟཾ ཡ-ཀཱརསྶ ཙ ཀ-ཀཱརཏྟཾ ཀཏྭཱ ‘‘ནིཡྻཱནིཀཱ’’ཏི ཝུཏྟཾ, ནིཡྻཱནཀརཎསཱིལཱ ཝཱ ནིཡྻཱནིཀཱ. ཨུཏྟརིཏབྦསྶ ཨཉྙསྶ ནིདྡིཊྛསྶ ཨབྷཱཝཱ ནིདྡིསིཡམཱནཱ སཨུཏྟརཱ དྷམྨཱཝ ཨུཏྟརིཏབྦཱཏི ‘‘ཨཏྟཱན’’ནྟི ཨཱཧ. རཱགཱདཱིནནྟི རཱགཱདཱིནཾ དསནྣཾ ཀིལེསཱནཾ སབྦནིཡཏཱཀུསལཱནཾ ཝཱ. ཏེཧི ནཱནཔྤཀཱརདུཀྑནིབྦཏྟཀེཧི ཨབྷིབྷཱུཏཱ སཏྟཱ ཀནྡནྟི ཨཀནྡནྟཱཔི ཀནྡནཀཱརཎབྷཱཝཏོ. ཡསྨཱ པན པཧཱནེཀཊྛཏཱཝསེན ཙ ‘‘སརཎཱ’’ཏི ཨཱཧ, ཏསྨཱ ‘‘རཱགཱདཱིན’’ནྟི ཝཙནེན རཱགདོསམོཧཱཝ གཧིཏཱཏི ཉཱཡཏི. རཎ-སདྡོ ཝཱ རཱགཱདིརེཎཱུསུ ནིརུལ༹ྷོ དཊྛབྦོ, རཎཾ ཝཱ ཡུདྡྷཾ, ‘‘ཀཱམཱ ཏེ པཋམཱ སེནཱ’’ཏི (སུ. ནི. ༤༣༨; མཧཱནི. ༢༨, ༦༨, ༡༤༩; ཙཱུལ༹ནི. ནནྡམཱཎཝཔུཙྪཱནིདྡེས ༤༧) ཨེཝམཱདིཀཱ ཙ ཨཀུསལཱ སེནཱ ཨརིཡམགྒཡུདྡྷེན ཛེཏབྦཏྟཱ སཡུདྡྷཏྟཱ ‘‘སརཎཱ’’ཏི ཝུཙྩནྟཱིཏི. ཨརཎཝིབྷངྒསུཏྟེ (མ. ནི. ༣.༣༢༣ ཨཱདཡོ) པན སདུཀྑཱ སཨུཔགྷཱཏཱ སཨུཔཱཡཱསཱ སཔརིལཱ༹ཧཱ མིཙྪཱཔཊིཔདཱབྷཱུཏཱ ཀཱམསུཁཱནུཡོགཱདཡོ ‘‘སརཎཱ’’ཏི ཝུཏྟཱཏི དུཀྑཱདཱིནཾ རཎབྷཱཝོ ཏནྣིབྦཏྟཀསབྷཱཝཱནཾ ཨཀུསལཱནཾ སརཎཏཱ ཙ ཝེདིཏབྦཱ.

པིཊྛིདུཀཱ སམཏྟཱ.

སུཏྟནྟིཀདུཀམཱཏིཀཱཔདཝཎྞནཱ

༡༠༡-༡༠༨. ཝིཛྫཱརཱསནྟོགདྷདྷམྨཱ ¶ ¶ ཝིཛྫཱསབྷཱགཏཱཡ ཏདེཀདེསེ ཝིཛྫཱཀོཊྛཱསེ ཝཏྟནྟཱིཏི ཝུཏྟཱ. ཝཛིརསྶ ཡཏྠ ཏཾ པཏཏི, ཏཏྠ ཨབྷེཛྫཾ ནཱམ ཀིཉྩི མཎིཔཱསཱཎཱདི ནཏྠི, ན ཙ ཏེན གམནམགྒོ ཝིརུཧཏི, ཨེཝམེཝ ཨརཧཏྟམགྒེན ཡཏྠ སོ ཨུཔྤཛྫཏི, ཏསྨིཾ སནྟཱནེ ཨབྷེཛྫོ ཀིལེསོ ནཱམ ནཏྠི, ན ཙ བྷིནྣོ པུན ཝིརུཧཏཱིཏི ཝཛིརུཔམཏཱ ཝེདིཏབྦཱ. ཏདུཔཙཱརེན བཱལཱ ཡཐཱ ‘‘མཉྩཱ གྷོསནྟཱི’’ཏི. ཀཎྷཱབྷིཛཱཏཱིཏི ཨཔཱཡཱ ཝུཙྩནྟི མནུསྶེསུ ཙ དོབྷགྒིཡཾ. ཏཔནསྶ ཝཱ དུཀྑསྶ ཧིཏཱཏི ཏཔནིཡཱ.

དཱསཱདཱིསུཔི སིརིཝཌྜྷཀཱདིསདྡཱ ཝིཡ ཨཏཐཏྟཱ ཝཙནམཏྟམེཝ ཨདྷིཀཱརཾ ཀཏྭཱ པཝཏྟཱ ཨདྷིཝཙནཱ. ཡསྨཱ པན ཨདྷིཝཙནནིརུཏྟིཔཉྙཏྟིཔདཱནི སམཱནཏྠཱནི, སབྦཉྩ ཝཙནཾ ཨདྷིཝཙནཱདིབྷཱཝཾ བྷཛཏི, ཏསྨཱ ཏེསུཔི ཝཙནཝིསེསེསུ ཝིསེསེན པཝཏྟེཧི ཨདྷིཝཙནཱདིསདྡེཧི སབྦཱནི ཝཙནཱནི ཨཏྠཔྤཀཱསནསཱམཉྙེན ཝུཏྟཱནཱིཏི ཨེཏེནཱདྷིཔྤཱཡེན ཨཡཾ ཨཏྠཡོཛནཱ ཀཏཱཏི ཝེདིཏབྦཱ. ཨཐ ཝཱ ཨདྷི-སདྡོ ཨུཔརིབྷཱགེ, ཨུཔརི ཝཙནཾ ཨདྷིཝཙནཾ. ཀསྶ ཨུཔརི? པཀཱསེཏབྦསྶ ཨཏྠསྶཱཏི ཝིདིཏོཝཱཡམཏྠོ. ཨདྷཱིནཾ ཝཱ ཝཙནཾ ཨདྷིཝཙནཾ. ཀེན ཨདྷཱིནཾ? ཨཏྠེན. ཏཐཱ ཏཾཏཾཨཏྠཔྤཀཱསནེ ནིཙྪིཏཾ, ནིཡཏཾ ཝཱ ཝཙནཾ ནིརུཏྟི. པཐཝཱིདྷཱཏུཔུརིསཱདིཏཾཏཾཔཀཱརེན ཉཱཔནཏོ པཉྙཏྟཱིཏི ཨེཝཾ ཨདྷིཝཙནཱདིཔདཱནཾ སབྦཝཙནེསུ པཝཏྟི ཝེདིཏབྦཱ. ཨཉྙཐཱ སིརིཝཌྜྷཀདྷནཝཌྜྷཀཔྤཀཱརཱནམེཝ ཨབྷིལཱཔཱནཾ ཨདྷིཝཙནཏཱ, ཨབྷིསངྑརོནྟཱིཏི ཨེཝཾཔཀཱརཱནམེཝ ནིདྡྷཱརཎཝཙནཱནཾ ནིརུཏྟིཏཱ, ཏཀྐོ ཝིཏཀྐོཏི ཨེཝཾཔཀཱརཱནམེཝ ཨེཀམེཝཏྠཾ ཏེན ཏེན པཀཱརེན ཉཱཔེནྟཱནཾ པཉྙཏྟིཏཱ ཙ ཨཱཔཛྫེཡྻཱཏི.

༡༠༩-༡༡༨. ཕསྶོ ཝེདནཱཏི སབྦདཱཔི ཨརཱུཔདྷམྨཱནཾ ཕསྶཱདིནཱམཀཏྟཱ པཐཝིཡཱདཱིནཾ ཀེསཀུམྦྷཱདིནཱམནྟརཱཔཏྟི ཝིཡ ནཱམནྟརཱནཱཔཛྫནཏོ ཙ སདཱ ཨཏྟནཱཝ ཀཏནཱམཏཱཡ ཙཏུཀྑནྡྷནིབྦཱནཱནི ནཱམཀརཎཊྛེན ནཱམཾ. ནམནཾ ཨཝིནཱབྷཱཝཏོ ཨཱརམྨཎཱབྷིམུཁཏཱ, ནམནཧེཏུབྷཱུཏཏཱ ནཱམནཾ. ཨཐ ཝཱ ཨདྷིཝཙནསམྥསྶོ ཝིཡ ཨདྷིཝཙནཾ ནཱམམནྟརེན ཡེ ཨནུཔཙིཏབོདྷིསམྦྷཱརཱནཾ གཧཎཾ ན གཙྪནྟི, ཏེ ནཱམཱཡཏྟགྒཧཎཱ ནཱམཾ. རཱུཔཾ པན ཝིནཱཔི ནཱམསཱདྷནཾ ཨཏྟནོ རུཔྤནསབྷཱཝེན གཧཎཾ ཨུཔཡཱཏཱིཏི རཱུཔཾ.

༡༡༩-༡༢༣. ཨིཏོ ¶ ¶ པུབྦེ པརིཀམྨཾ པཝཏྟཾ, ཨིཏོ པརཾ བྷཝངྒཾ, མཛ྄ཛྷེ སམཱཔཏྟཱིཏི ཨེཝཾ སམཱཔཏྟཱིནཾ ཨཔྤནཱཔརིཙྪེདཔཉྙཱ སམཱཔཏྟིཀུསལཏཱ. ཝུཊྛཱནེ ཀུསལབྷཱཝོ པུབྦེ ཝུཊྛཱནེ པརིཙྪེདཀརཎཉཱཎཾ. ལཀྑཎཱདིཝསེན ཨནིཙྩཱདིཝསེན ཙ མནསི ཀརཎཾ མནསིཀཱརོ.

༡༢༤-༡༣༤. སུཙིསཱིལཏཱ སོརཙྩཾ. སཱ ཧི སོབྷནཀམྨརཏཏཱཏི. སམྨོདཀསྶ, སམྨོདཀོ ཝཱ མུདུབྷཱཝོ སམྨོདཀམུདུབྷཱཝོ, སཎྷཝཱཙཏཱ. ‘‘ཨགུཏྟདྭཱརཏཱ’’ཏི ཝུཏྟེ ཀེསུ དྭཱརེསཱུཏི ན པཉྙཱཡཏཱིཏི ‘‘ཨིནྡྲིཡེསཱུ’’ཏི ཝུཏྟཾ. སམྤཛཱནཱཏཱིཏི སམྤཛཱནོ, ཏསྶ བྷཱཝོ སམྤཛཉྙཾ. ཏདཔི ཉཱཎཾ ཡསྨཱ སམྤཛཱནཱཏི, ཏསྨཱ ‘‘སམྤཛཱནཱཏཱིཏི སམྤཛཉྙ’’ནྟི ཨཱཧ. ཨཔྤཊིསངྑཱནེ ནིམིཏྟེ ཝིསཡེ ཝཱ. ཝཱིརིཡསཱིསེནཱཏི ཝཱིརིཡཔཱམོཀྑེན. ཨུཔྤནྣཾ བལནྟི ཝཱིརིཡོཔཏྠམྦྷེན ཧི ཀུསལབྷཱཝནཱ བལཝཏཱི ཐིརཱ ཨུཔྤཛྫཏཱིཏི ཏཐཱ ཨུཔྤནྣཱ བལཝཏཱི ཀུསལབྷཱཝནཱ བལཝནྟོ སཏྟ བོཛ྄ཛྷངྒཱཏིཔི ཝུཙྩནྟི. ཀསིཎནིམིཏྟཾ ཝིཡ སཉྙཱཎཾ ཝིཡ སཝིགྒཧཾ ཝིཡ ཙ སུཊྛུ ཨུཔལཀྑེཏབྦཱཀཱརཾ ‘‘ནིམིཏྟ’’ནྟི ཝུཙྩཏི. སམཐོ ཙ ཨེཝཾ ཨཱཀཱརོཏི ‘‘ནིམིཏྟ’’ནྟི ཝུཏྟོ. ཏཐཱ ཧི སོ པཙྩཝེཀྑནྟེན པཙྩཝེཀྑཎཏོ གཡ྄ཧཏཱིཏི. ཨུདྡྷཙྩམིཝ ཙིཏྟཾ ན ཝིཀྑིཔཏཱིཏི, ཝིཀྑེཔཔཊིཀྑེཔོ ཝཱ ཨཝིཀྑེཔོ.

༡༣༥-༡༤༢. སཱིལམེཝ པུནཔྤུནཾ ཨཱསེཝིཡམཱནཾ ལོཀིཡཾ ལོཀུཏྟརམྤི སཱིལཾ པརིཔཱུརེཏཱིཏི ‘‘སཱིལཔརིཔཱུརཎཏོ’’ཏི ཝུཏྟཾ. སཱིལསྶ སམྤདཱཏི ཀཱརཎསཱིལམྤི ཕལསཱིལམྤི སམྤནྣསམུདཱཡསྶ ཨེཀདེསཝསེན ཝུཏྟཾ. ཨཐ ཝཱ ‘‘ཀཏམེ ཙ ཐཔཏི ཨཀུསལཱ སཱིལཱ? ཨཀུསལཾ ཀཱཡཀམྨཾ ཨཀུསལཾ ཝཙཱིཀམྨཾ པཱཔཀོ ཨཱཛཱིཝོ’’ཏི (མ. ནི. ༢.༢༦༤) ཝུཏྟཏྟཱ སབྦམྤི ཀུསལཱཀུསལཾ ‘‘སཱིལ’’ནྟི གཧེཏྭཱ ཏཏྠ ཀུསལསཱིལཾ ནིདྡྷཱརེཏྭཱ ‘‘སཱིལསམྤདཱ’’ཏི ཝུཏྟཾ. ཨེཝཾ དིཊྛིསམྤདཱཔི ཝེདིཏབྦཱ.

དིཊྛིཝིསུདྡྷི ཁོ པན ཡཐཱདིཊྛིསྶ ཙ པདྷཱནནྟི ཀམྨསྶཀཏཉཱཎཱདིསངྑཱཏཱ དིཊྛིཝིསུདྡྷི ཙེཝཱཏི པཊིཔཱཊིཡཱ དིཊྛིཝིསུདྡྷི དིཊྛིཝིསུདྡྷི ཁོ པནཱཏི ཙ པདདྭཡསྶ སམཱནཏྟཱ པཉྙཱ. ཡཐཱདིཊྛིསྶཱཏི ནིབྦཏྟིཏཔྤཀཱརདིཊྛིསྶ ནིབྦཏྟེཏབྦཔདྷཱནཱནུརཱུཔདིཊྛིསྶ ཝཱ ཡཐཱདིཊྛིཔཝཏྟཀིརིཡསྶ ཝཱ. སཾཝེགོཏི སཧོཏྟཔྤཾ ཉཱཎཾ, ཨོཏྟཔྤམེཝ ཝཱ. སམཏྟཾ ཏུསྶནཾ ཏིཏྟི ¶ སནྟུཊྛི, ནཏྠི ཨེཏསྶ སནྟུཊྛཱིཏི ཨསནྟུཊྛི, ཨསནྟུཊྛིསྶ བྷཱཝོ ཨསནྟུཊྛིཏཱ. ཝཱིརིཡཔྤཝཱཧེ པཝཏྟམཱནེ ཨནྟརཱ ཨེཝ པཊིགམནཾ ནིཝཏྟནཾ པཊིཝཱནཾ, ཏཾ ཨསྶ ཨཏྠཱིཏི པཊིཝཱནཱི ¶ , ན པཊིཝཱནཱི ཨཔྤཊིཝཱནཱི, ཏསྶ བྷཱཝོ ཨཔྤཊིཝཱནིཏཱ. ཝིམུཙྩནཾ ནཱམ ཨཱརམྨཎེ ཨདྷིམུཏྟཏཱ ཀིལེསེཧི སབྦསངྑཱརེཧི ཙ ནིསྶཊཏཱ ཙ. པཊིསནྡྷིཝསེནཱཏི ཀིལེསཱནཾ ཏཾཏཾམགྒཝཛ྄ཛྷཱནཾ ཨུཔྤནྣམགྒེ ཁནྡྷསནྟཱནེ པུན སཾདཧནཝསེན. ཨནུཔྤཱདབྷཱུཏེཏི ཏཾཏཾཕལེ. ཨནུཔྤཱདཔརིཡོསཱནེཏི ཨནུཔྤཱདཀརོ མགྒོ ཨནུཔྤཱདོ, ཏསྶ པརིཡོསཱནེ.

སུཏྟནྟིཀདུཀམཱཏིཀཱཔདཝཎྞནཱ ནིཊྛིཏཱ.

དུཀམཱཏིཀཱཔདཝཎྞནཱ ནིཊྛིཏཱ.

ཀཱམཱཝཙརཀུསལཔདབྷཱཛནཱིཡཝཎྞནཱ

༡. ‘‘ཡེ ཝཱ པན…པེ… ཨརཱུཔིནོ དྷམྨཱ’’ཏི ཨིདཾ ‘‘ཕསྶོ ཧོཏཱི’’ཏི ཨེཝམཱདིཀཾ ཝིཡ ན ཝིསུཾ ‘‘ཏེཔི ཧོནྟཱི’’ཏི ཧོཏི-སདྡེན སམྦནྡྷཾ ཀཏྭཱ ཝུཏྟཾ, ཨུདྡིཊྛཱཝསེསེ ཙ པན གཧེཏྭཱ ‘‘ཨིམེ དྷམྨཱ ཀུསལཱ’’ཏི ཨཔྤེཏུཾ ཝུཏྟནྟི ཨཔྤནཱཡ ཨཝརོདྷིཏཾ. ཨེཝཉྩ ཀཏྭཱ ནིདྡེསེཔི ཨེཏསྶ པདབྷཱཛནཱིཡཾ ན ཝུཏྟནྟི. སརཱུཔེན པན ཨདསྶིཏཏྟཱ ‘‘ཨཏྠཱི’’ཏི ཝཏྭཱ དུཏིཡེན ཧོཏི-སདྡེན སམྦནྡྷོ ནིདྡེསོ ཙ ན ཀཏོ, སངྑེཔེན པན ཨུདྡིསིཏྭཱ སངྑེཔེནེཝ ཡེ ཝཱ པན དྷམྨཱ ནིདྡིཊྛཱཏི ཨེཏསྶ དྷམྨསྶ ཨུདྡེསེ ཨཝརོདྷོ ཡུཏྟོ. དྷམྨནིདྡེསེ ཙ ནིདྡེསཱཝསཱནེ ཝུཏྟསྶཱཏི.

པུཙྪཱཔརིཙྪེདཝཙནེནེཝ པུཙྪཱབྷཱཝེ ཝིཉྙཱཏེ པུཙྪཱཝིསེསཉཱཔནཏྠཾ ཨཱཧ ‘‘ཨཡཾ ཀཐེཏུཀམྱཏཱཔུཙྪཱ’’ཏི. པཉྩཝིདྷཱ ཧཱིཏི མཧཱནིདྡེསེ (མཧཱནི. ༡༥༠; ཙཱུལ༹ནི. པུཎྞཀམཱཎཝཔུཙྪཱནིདྡེས ༡༢; མེཏྟགཱུམཱཎཝཔུཙྪཱནིདྡེས ༡༨) ཨཱགཏཱ པུཙྪཱ དསྶེཏི. ལཀྑཎནྟི ཉཱཏུཾ ཨིཙྪིཏོ ཡོ ཀོཙི སབྷཱཝོ. ཨཉྙཱཏནྟི ཡེན ཀེནཙི ཉཱཎེན ཨཉྙཱཏབྷཱཝཾ ཨཱཧ. ཨདིཊྛནྟི དསྶནབྷཱུཏེན ཉཱཎེན པཙྩཀྑཾ ཝིཡ ཨདིཊྛཏཾ. ཨཏུལིཏནྟི ‘‘ཨེཏྟཀཾ ཨིད’’ནྟི ཏུལཱབྷཱུཏཱཡ པཉྙཱཡ ཨཏུལིཏཏཾ. ཨཏཱིརིཏནྟི ཏཱིརཎབྷཱུཏཱཡ པཉྙཱཡ ཨཀཏཉཱཎཀིརིཡཱསམཱཔནཏཾ. ཨཝིབྷཱུཏནྟི ཉཱཎསྶ ཨཔཱཀཊབྷཱཝཾ ¶ . ཨཝིབྷཱཝིཏནྟི ཉཱཎེན ཨཔཱཀཊཱིཀཏབྷཱཝཾ. ཨདིཊྛཾ ཛོཏཱིཡཏི ཨེཏཱཡཱཏི ཨདིཊྛཛོཏནཱ. ཨནུམཏིཡཱ པུཙྪཱ ཨནུམཏིཔུཙྪཱ ¶ . ‘‘ཏཾ ཀིཾ མཉྙཐ, བྷིཀྑཝེ’’ཏིཨཱདིཔུཙྪཱཡ ཧི ‘‘ཀཱ ཏུམྷཱཀཾ ཨནུམཏཱི’’ཏི ཨནུམཏི པུཙྪིཏཱ ཧོཏི. ཀཐེཏུཀམྱཏཱཏི ཀཐེཏུཀམྱཏཱཡ.

པབྷེདཏོ དྷམྨཱནཾ དེསནནྟི མཱཏིཀཱདེསནཾ ཨཱཧ. ཏཏྠ ཧི པུརཏོ ཀུསལཱདིཀེ པབྷེདེ ཝཏྭཱ པཙྪཏོ དྷམྨཱ ཝུཏྟཱཏི ‘‘པབྷེདཝནྟདསྶནཏྠ’’ནྟི ནིདྡེསཾ ཨཱཧ. ཨིདཾ ཝུཏྟཾ ཧོཏི – མཱཏིཀཱཡ སཝིསེསནཱ དྷམྨཱ ཝུཏྟཱ, ཏེ ཙ ཝིསེསིཏབྦཏྟཱ པདྷཱནཱ, པདྷཱནཉྩ ཨིཏིཀཏྟབྦཏཱཡ ཡུཛྫཏཱིཏི དྷམྨཱནམེཝ པདྷཱནཱནཾ པུཙྪིཏབྦཏཱ ཝིསྶཛྫིཏབྦཏཱ ཙ ཧོཏི, ཏསྨཱ ཏེ པུཙྪིཏབྦེ དསྶེཏུཾ ‘‘ཀཏམེ དྷམྨཱ’’ཏི ཝུཏྟཾ, ཏེ པན ཝིསེསཝནྟོ པུཙྪིཏཱཏི དསྶེཏུཾ པུན ‘‘ཀུསལཱ’’ཏི ཝུཏྟནྟི ཨེཝཾ པབྷེདཝནྟདསྶནཏྠཾ ཨཡཾ པདཱནུཀྐམོ ཀཏོཏི. ‘‘ཨིམེ དྷམྨཱ ཀུསལཱ’’ཏི ཝིསྶཛྫནེཔི ཨེཝམེཝ ཡོཛནཱ ཀཱཏབྦཱ. ‘‘པབྷེདཏོ དྷམྨཱནཾ དེསནཾ དཱིཔེཏྭཱ’’ཏི ཨེཏསྶ ཨཏྠཾ ཝིཝརིཏུཾ ‘‘ཨིམསྨིཉྷཱི’’ཏིཨཱདིམཱཧ. ཨནེཀཔྤབྷེདཱ དེསེཏབྦཱཏི སམྦནྡྷོ. ཏསྨཱཏི ཨཝོཧཱརདེསནཏོ དྷམྨཱནམེཝ དེསེཏབྦཏྟཱ ཏེསཉྩ གྷནཝིནིབྦྷོགཔཊིསམྦྷིདཱཉཱཎཱཝཧནཏོ པབྷེདཝནྟཱནཾ དེསེཏབྦཏྟཱ ‘‘ཀུསལཱ…པེ… དཱིཔེཏྭཱ’’ཏི ཨེཏེན སམྦནྡྷོ. ཨེཝམེཝ ཧི ཡཐཱཝུཏྟདཱིཔནསྶ ཧེཏུཾ སཀཱརཎཾ པཀཱསེཏུཾ པུན ‘‘དྷམྨཱཡེཝཱ’’ཏིཨཱདི ཝུཏྟནྟི. དྷམྨཱཏི སཱམཉྙམཏྟཝཙནེན སམཱུཧཱདིགྷནཝསེན ཨེཀཏྟགྒཧཎཾ ཧོཏཱིཏི ཨེཀཏྟཝིནིབྦྷོགཀརཎཾ གྷནཝིནིབྦྷོགཉཱཎཾ ཨཱཝཧཏི པབྷེདདེསནཱ, ཏཐཱ ཀུསལཱདིདྷམྨཱནཾ ཨབྱཱཀཏཱདིཨཏྠཱནཉྩ དཱིཔནཏོ དྷམྨཔཊིསམྦྷིདཱདིཉཱཎཉྩ ཨཱཝཧཏི. ‘‘པབྷེདཝནྟདསྶནཏྠ’’ནྟི ཨེཏཾ ཝིཝརིཏུཾ ‘‘ཨིདཱནི ཡེ ཏེནཱ’’ཏིཨཱདིམཱཧ. པབྷེད…པེ… ཡུཛྫཏི ཨིཏིཀཏྟབྦཏཱཡུཏྟསྶ ཝིསེསནཏྟཱ. ཨཐ ཝཱ ཨུདྡེསོ དྷམྨཔྤདྷཱནོ, པུཙྪཱ སཾསཡིཏཔྤདྷཱནཱ, ན ཙ དྷམྨབྷཱཝོ སཾསཡིཏོ, ཀུསལཱདིབྷེདོ པན སཾསཡིཏོཏི ནིཙྪིཏསཾསཡིཏཝསེནཱཡཾ པདཱནུཀྐམོ ཀཏོ.

ཨེཏྠཱཏི ཨེཏསྨིཾ ཝཙནེ. ཀིམཏྠམཱཧ བྷགཝཱཏི ཏཾ དསྶེཏུཾ ཨཱཧ ‘‘སམཡེ ནིདྡིསི ཙིཏྟ’’ནྟི. པརིཡོསཱནེཏི སམཡེ ཙིཏྟནིདྡེསསྶ ‘‘ཡསྨིཾ…པེ… ཨཱརབྦྷཱ’’ཏི ཨེཏསྶ པརིཡོསཱནེ. ཏསྨིཾ སམཡེཏི ཏསྨིཾ ཙིཏྟུཔྤཱདསམཡེ ¶ . ཙིཏྟེན སམཡཾ ནིཡམེཏྭཱན ཨཐ པཙྪཱ བོདྷེཏུནྟི སམྦནྡྷོ. ཝིཛྫམཱནེཔི བྷོཛནགམནཱདིསམཡནཱནཏྟེ སམཝཱཡཱདིནཱནཏྟེ ཙ ཡཐཱཝུཏྟཙིཏྟནིཡམིཏཱ ཝིསེསིཏཱ ཨཉྙསྨིཾ སམཡེ ཡཐཱདྷིཔྤེཏཱནཾ ཕསྶཱདཱིནཾ ཨབྷཱཝཱ ཙིཏྟནིཡམིཏེ སམཡེ ཕསྶཱདཡོ བོདྷེཏུཾ ཝིསེསནམེཝ ཏཱཝ ཙིཏྟཾ དསྶེཏུཾ སམཡེ ཙིཏྟཾ ནིདྡིསཱིཏི ཨཏྠོ. ཝིསེསིཏབྦོཔི ཧི སམཡོ ཨཏྟནོ ཨུཔཀཱརཏྠཾ ཝིསེསནབྷཱཝཾ ཨཱཔཛྫཏི, ཝིསེསནབྷཱུཏཉྩ ¶ ཙིཏྟཾ ཏདུཔཀཱརཏྠཾ ཝིསེསིཏབྦབྷཱཝནྟི. སནྟཏིགྷནཱདཱིནཾ ཨཡཾ ཝིསེསོ – པུརིམཔཙྪིམཱནཾ ནིརནྟརཏཱཡ ཨེཀཱིབྷཱུཏཱནམིཝ པཝཏྟི སནྟཏིགྷནཏཱ, ཏཐཱ ཕསྶཱདཱིནཾ ཨེཀསམཱུཧཝསེན དུབྦིཉྙེཡྻཀིཙྩབྷེདཝསེན ཨེཀཱརམྨཎཏཱཝསེན ཙ ཨེཀཱིབྷཱུཏཱནམིཝ པཝཏྟི སམཱུཧཱདིགྷནཏཱཏི.

ཀཱལཉྩ སམཡཉྩཱཏི ཡུཏྟཀཱལཉྩ པཙྩཡསཱམགྒིཉྩ. ཁཎོཏི ཨོཀཱསོ. ཏཐཱགཏུཔྤཱདཱདིཀོ ཧི མགྒབྲཧྨཙརིཡསྶ ཨོཀཱསོ ཏཔྤཙྩཡཔཊིལཱབྷཧེཏུཏྟཱ. ཁཎོ ཨེཝ ཙ སམཡོ. ཡོ ‘‘ཁཎོ’’ཏི ཙ ‘‘སམཡོ’’ཏི ཙ ཝུཙྩཏི, སོ ཨེཀོཝཱཏི ཨཏྠོ. མཧཱསམཡོཏི མཧཱསམཱུཧོ. སམཡོཔི ཁོཏི སིཀྑཱཔརིཔཱུརཎསྶ ཧེཏུཔི. སམཡཔྤཝཱདཀེཏི དིཊྛིཔྤཝཱདཀེ. ཏཏྠ ཧི ནིསིནྣཱ ཏིཏྠིཡཱ ཨཏྟནོ ཨཏྟནོ སམཡཾ པཝདནྟཱིཏི. ཨཏྠཱབྷིསམཡཱཏི ཧིཏཔཊིལཱབྷཱ. ཨབྷིསམེཏབྦོཏི ཨབྷིསམཡོ, ཨབྷིསམཡོ ཨཏྠོ ཨབྷིསམཡཊྛོཏི པཱིལ༹ནཱདཱིནི ཨབྷིསམིཏབྦབྷཱཝེན ཨེཀཱིབྷཱཝཾ ཨུཔནེཏྭཱ ཝུཏྟཱནི, ཨབྷིསམཡསྶ ཝཱ པཊིཝེདྷསྶ ཝིསཡབྷཱུཏོ ཨཏྠོ ཨབྷིསམཡཊྛོཏི ཏཱནེཝ ཏཐཱ ཨེཀཏྟེན ཝུཏྟཱནི. ཏཏྠ པཱིལ༹ནཾ དུཀྑསཙྩསྶ ཏཾསམངྒིནོ ཧིཾ སནཾ ཨཝིཔྥཱརིཀཏཱཀརཎཾ. སནྟཱཔོ དུཀྑདུཀྑཏཱདིབྷཱཝེན སནྟཱཔནཾ པརིདཧནཾ.

‘‘ཨིདྷཱ’’ཏི ཝཙནཾ ཨཀུསལེསུ ཨབྱཱཀཏེསུ ཙ ཀེསུཙི ཁཎསྶ ཨསམྦྷཝཏོ. ནནུ ཀུསལཱནཉྩ ནཝམེན ཁཎེན ཝིནཱ ཨུཔྤཏྟི ཧོཏཱིཏི? ནོ ན ཧོཏི, ན པན ནཝམོ ཨེཝ ཁཎོ, ཙཏུཙཀྐཱནིཔི ཁཎོཏི ཝུཏྟཱནི. སབྦནྟིམེན པརིཙྪེདེན ཨཏྟསམྨཱཔཎིདྷིཁཎམནྟརེན ནཏྠི ཀུསལསྶ ཨུཔྤཏྟཱིཏི ཁཎོ ཨིདྷ གཧིཏོ. ཨིནྡྲིཡཝིསཡམནསིཀཱརཱདྷཱིནཾ ཝིཉྙཱཎནྟི ཨེཝམཱདི སཱདྷཱརཎཕལཾ དཊྛབྦཾ. ནཝམོཏི ཨཊྛཀྑཎེ ཨུཔཱདཱཡ ཝུཏྟཾ. ཙཏུཙཀྐཾ ཝཏྟཏཱིཏི པུན པཏིརཱུཔདེསཝཱསཱདིསམྤཏྟི ཙཏུཙཀྐཾ ཝིཔརིཝཏྟཏཱིཏི ¶ ཨཏྠོ. ཨོཀཱསབྷཱུཏཱནཱིཏི ཨཏྟནོ ནིབྦཏྟིཡཱ ‘‘ཨིདཱནི ཨུཔྤཛྫནྟུ ཀུསལཱནཱི’’ཏི ཨནུམཏིདཱནཾ ཝིཡ བྷཱུཏཱནི.

ཙིཏྟཀཱལོཏི དྷམྨེནེཝ སཏཱ ཀཱལོ ཝིསེསིཏོ, ན ཏསྶ པཝཏྟིཏྠ པཝཏྟིསྶཏི པཝཏྟཏཱིཏི ཨེཏེན ཨཝཏྠཱཝིསེསེན, ནཱཔི ཏསྶ ཝིཛཱནནཀིཙྩེན, ཏསྨཱ ཨེཝཾཝིདྷེ དྷམྨེ ཨུཔཱདཱཡ པཉྙཏྟོཏི ཝུཏྟོ. ཀམཔྤཝཏྟཱ ཝིསེསཱ ཨེཝ པཊིཔཱཊཱིཏི བཱིཛབྷཱཝོ ཙ པཊིཔཱཊཱིཏི ཝཏྟུམརཧཏཱིཏི ཨིམིནཱདྷིཔྤཱཡེན ‘‘བཱིཛཀཱལོཏི དྷམྨཔཊིཔཱཊིཾ ཨུཔཱདཱཡ པཉྙཏྟོ’’ཏི ཨཱཧ. དྷམྨཔཊིཔཱཊིཾ ཝཱཏི ཨཊྛཀལཱཔདྷམྨེ སནྡྷཱཡཱཧ. སཉྩིཏཱ ཝིཡ གཡ྄ཧམཱནཀཱལཱ ཨེཝ ཀཱལསཉྩཡོ ¶ , ཡཐཱ ཝཱ ཏཐཱ ཝཱ ཀཱལོཏི ཨེཀཾ སབྷཱཝཾ གཧེཏྭཱ ཨབྷིནིཝེསཾ ཀརོནྟསྶ ཏདབྷིནིཝེསནིསེདྷནཏྠཾ ‘‘སོ པནེས སབྷཱཝཏོ ཨཝིཛྫམཱནཏྟཱ པཉྙཏྟིམཏྟཀོ’’ཏི ཨཱཧ. ཉཏྭཱ ཝིཉྙེཡྻོཏི སམྦནྡྷོ. ཨིཏརོ པན ཧེཏཱུཏི ཨེས སམཡོ པཙྩཡོཝ ཝིཉྙེཡྻོ. ཨེཏྠཱཏི ཨེཏསྨིཾ ཨདྷིཀཱརེ ན ཧེཏུཧེཏུ སཱདྷཱརཎཧེཏུ ཙཱཏི ཨཏྠོ. སམཝཱཡོ པཙྩཡསཱམགྒཱི, ཧེཏུ པན ཨེཀེཀོ པཙྩཡོཏི ཨཡམེཏེསཾ ཝིསེསོ ཝེདིཏབྦོ. ཙཀྑུཝིཉྙཱཎཱདཱིནཾ ཨནེཀཔཙྩཡདསྶནེན ཏཾཏཾདྭཱརིཀཱནཾ ཀུསལཱནཉྩ ཏཔྤཙྩཡཏཾ དསྶེཏི.

པརིགྒཧོ ཀཏོ ཨཊྛཀཐཱཙརིཡེཧི. ཨེཀཀཱརཎཝཱདོཏི པཀཏིཀཱརཎཝཱདོ, ཨིསྶརཀཱརཎཝཱདོ ཝཱ. ཨཉྙམཉྙཱཔེཀྑོཏི ཨཝཡཝཱནཾ ཨཉྙམཉྙཱཔེཀྑཏཱཡ སམུདཱཡོ ཝུཏྟོ. ཨཔེཀྑཱ ཙ ཡཱཝ སཧཱཡཀཱརཎསམཱགམོ ན ཧོཏི, ཏཱཝ ཕལསྶ ཨནིཔྥཱདནཾ སམཱགམེ ནིཔྥཱདནསམཏྠསྶ ནིཔྥཱདནཉྩ. སམཱགམོ ཙ ཡེསུ ཡུཛྫམཱནེསུ ནིབྱཱཔཱརེསུཔི ཕལསྶ པཝཏྟི, ཏེསཾ སབྦྷཱཝོཏི.

ཨསཱམགྒཱི…པེ… པཏྟིཏོཏི ཙཀྑུརཱུཔཱལོཀམནསིཀཱརཱནཾ ཨསམཝེཏཱནཾ ཙཀྑུཝིཉྙཱཎསྶ ཨཧེཏུབྷཱཝེ སཏི སམཝེཏཱནཉྩ ཏཾསབྷཱཝཱཝིནིཝཏྟིཏོ ཧེཏུབྷཱཝཱནཱཔཏྟིཏོཏི ཨཏྠོ. ན ཧི སབྷཱཝནྟརཾ ཨཉྙེན སཧིཏཾ སབྷཱཝནྟརཾ ཧོཏཱིཏི. ཨེཀསྨིནྟི ཨནྡྷསཏེ ཨེཀེཀསྨིཾ ཨནྡྷེཏི ཨདྷིཔྤཱཡོ. ཨཉྙཐཱ ཡཐཱརུཏཝསེན ཨཏྠེ གཡ྄ཧམཱནེ ཨེཀསྶ ཨནྡྷསྶ དསྶནཱསམཏྠཏཱ སབྦེསམྤི ན ཧོཏི, ནཱཔི ཨེཀསྶ ཨསམཏྠཏཱཡ སབྦེསམྤི ཨསམཏྠཏཱ ཝུཏྟཱ, ཀིནྟུ སབྦེསཾ ཝིསུཾ ཨསམཏྠཏཱཡ ཨེཝཱཏི ཨུཔམཱཝཙནཾ ན ཡུཛྫེཡྻ, ནཱཔི ཨུཔམོཔམིཏབྦསམྦནྡྷོ. ན ¶ ཧི ཨུཔམིཏབྦེསུ ཙཀྑཱདཱིསུ ཨེཀསྶ ཨསམཏྠཏཱཡ སབྦེསམྤི ཨསམཏྠཏཱ ཝུཏྟཱ, ཀིནྟུ སབྦེསཾ ཝིསུཾ ཨསམཏྠཏཱཡ སཧིཏཱནཾ ཨསམཏྠཏཱཏི. ཨནྡྷསཏཾ པསྶཏཱིཏི ཙ ཨནྡྷསཏཾ སཧིཏཾ པསྶཏཱིཏི ཨདྷིཔྤཱཡོ ཨཉྙཐཱ ཝུཏྟནཡེན ཨུཔམིཏབྦཱསམཱནཏཱཔཏྟིཏོ. སཱདྷཱ…པེ… ཋིཏབྷཱཝོཏི ཡེསུ ཝིཛྫམཱནེསུ ཕལཔྤཝཏྟི ཏེསཾ སམོདྷཱནེ, ཡཐཱ པཝཏྟམཱནེསུ ཏེསུ ཕལཔྤཝཏྟི, ཏཐཱ པཝཏྟིམཱཧ. ན ཡེསཾ ཀེསཉྩི ཨནེཀེསཾ སམོདྷཱནམཏྟཾ སཱམགྒཱི. ན ཧི སདྡགནྡྷརསཕོཊྛབྦསམོདྷཱནཾ ཙཀྑུཝིཉྙཱཎསྶ, ཀཊྛཀཔཱལཔཱསཱཎསམོདྷཱནཾ ཝཱ སོཏཝིཉྙཱཎསྶ ཧེཏཱུཏི. ཏནྟི ཏཾ དསྶནཾ. ཨསཱ…པེ… སིདྡྷོཏི ནཱཡམཏྠོ སཱདྷེཏབྦོ ཝིསུཾ ཨཧེཏཱུནཾ ཙཀྑཱདཱིནཾ སཧིཏཱནཾ ཧེཏུབྷཱཝསྶ པཙྩཀྑསིདྡྷཏྟཱཏི ཨཏྠོ. ན ཧི པཙྩཀྑསིདྡྷེ ཡུཏྟིམགྒནཾ ཡུཏྟནྟི.

མནུསྶཏྟཱདཱིནཾ ¶ ཁཎཱཝཡཝཱནཾ སཱམགྒཱི ཁཎསཱམགྒཱི, ཏཾ ཝིནཱ སོ ནཝམཙཀྐསམྤཏྟིསངྑཱཏོ ཁཎོ ནཏྠི. སཱ ཨེཝ ཧི ཁཎསཱམགྒཱི སོ ཁཎོཏི ཨཏྠོ. ཁཎ…པེ… དཱིཔེཏི ཨཏྟནོ དུལླབྷཏཱཡཱཏི ཨཏྠོ. ཁཎཏྠོ ཝཱ སམཡསདྡོ ཁཎསངྑཱཏོ སམཡོཏི ཝུཏྟོ. སོ ཡསྨིཾ དུལླབྷེ ཁཎེ སཏཱིཏི ཨིམསྶཏྠསྶ ཝིབྷཱཝནཝསེན ཏདཱཡཏྟཱཡ ཀུསལུཔྤཏྟིཡཱ དུལླབྷབྷཱཝཾ དཱིཔེཏི. ཨེཏེནུཔཱཡེན སམཝཱཡ…པེ… ཝུཏྟིཾ དཱིཔེཏཱིཏི ཨེཏྠ ཨིཏོ པརེསུ ཙ ཡོཛནཱ ཏསྶ ཏསྶ ཏཾཏཾདཱིཔནེ ཀཱཏབྦཱ.

ཏསྶ པུརིསསྶཱཏི ‘‘སེཡྻཐཱཔི བྷིཀྑཝེ ཙཏྟཱརོ དལ༹ྷདྷམྨཱ དྷནུགྒཧཱ སིཀྑིཏཱ ཀཏཧཏྠཱ ཀཏུཔཱསནཱ ཙཏུདྡིསཱ ཋིཏཱ ཨསྶུ, ཨཐ པུརིསོ ཨཱགཙྪེཡྻ ‘ཨཧཾ ཨིམེསཾ…པེ… ཀཏུཔཱསནཱནཾ ཀཎྜེ ཁིཏྟེ ཁིཏྟེ ཨཔྤཏིཊྛིཏེ པཐཝིཡཾ གཧེཏྭཱ ཨཱཧརིསྶཱམཱི’’’ཏི (སཾ. ནི. ༢.༢༢༨) ཨེཝཾ ཝུཏྟཛཝནཔུརིསསྶ. ཏཱཝ པརིཏྟཀོཏི གམནསྶཱདཱནཾ དེཝཔུཏྟཱནཾ ཧེཊྛུཔརིཡཱཡེན པཊིམུཁཾ དྷཱཝནྟཱནཾ སིརསི པཱདེ ཙ བདྡྷཁུརདྷཱརཱསནྣིཔཱཏཏོ ཙ པརིཏྟཏརོ ཀཱལོ. ཀཱལསངྑཱཏོ སམཡོ ཙིཏྟཔརིཙྪིནྣོ ཝུཙྩམཱནོ ཏེནེཝ པརིཙྪེདཀཙིཏྟེན ‘‘ཨེཝཾ པརིཏྟོ ཨཧ’’ནྟི ཨཏྟནོ པརིཏྟཏཾ དཱིཔེཏི. ཡཐཱ ཙཱཧཾ, ཨེཝཾ སབྦོ ཀུསལཙིཏྟཔྤཝཏྟིཀཱལོཏི ཏསྶ པརིཏྟཏཾ དཱིཔེཏི. སདྡསྶ དཱིཔནཱ ཝུཏྟནཡཱནུསཱརེན ཝེདིཏབྦཱ.

པཀཏིཝཱདཱིནཾ ¶ མཧཏོ ཝིཡ ཨཎུཝཱདཱིནཾ དྭིཨཎུཀསྶ ཝིཡ ཙ ཨེཀསྶེཝ. ཧེཏུ…པེ… ཝུཏྟིཏཾ དཱིཔེཏཱིཏི པཙྩཡཱཡཏྟཝུཏྟིདཱིཔནཏོ ཏཔྤརབྷཱཝཱ ཧེཏུསངྑཱཏསྶ པརཱཡཏྟཝུཏྟིདཱིཔནཏཱ ཝུཏྟཱ. སཏི པན པཙྩཡཱཡཏྟབྷཱཝེ པཙྩཡསཱམགྒཱིཨཱཡཏྟཏཱ སམཝཱཡསངྑཱཏེན དཱིཔིཡཏཱིཏི ཨཏཔྤརབྷཱཝཏོ ཏསྶ ཏཾདཱིཔནཏཱ ན ཝུཏྟཱ. ཨནེན སམཡེན ཀཏྟུབྷཱུཏེན, ཨནེན སམཡེན ཝཱ ཀརཎབྷཱུཏེན བྷགཝཏཱ པཊིསེདྷིཏོཏི ཨཏྠོ. ཨེས ནཡོ པུརིམཱསུ དཱིཔནཱསུ.

ཨདྷིཀརཎཝསེནཱཏི ཨཱདྷཱརཝསེན. ཨེཏྠཱཏི ཀཱལསམཱུཧསངྑཱཏེ སམཡེ གཧིཏེཏི ཨཏྠོ. ཀཱལོཔི ཧི ཙིཏྟཔརིཙྪིནྣོ སབྷཱཝཏོ ཨཝིཛྫམཱནོཔི ཨཱདྷཱརབྷཱཝེནེཝ སཉྙཱཏོ ‘‘ཨདྷིཀརཎ’’ནྟི ཝུཏྟོ ཏཾཁཎཔྤཝཏྟཱནཾ ཏཏོ པུབྦེ པརཏོ ཙ ཨབྷཱཝཱ. བྷཱཝོཏི ཀིརིཡཱ. ཀིརིཡཱཡ ཀིརིཡནྟརལཀྑཎཾ བྷཱཝེནབྷཱཝལཀྑཎཾ. ཡཐཱ གཱཝཱིསུ དུཡ྄ཧམཱནཱསུ གཏོ, དུདྡྷཱསུ ཨཱགཏོཏི དོཧནཀིརིཡཱ གམནཀིརིཡཱཡ ལཀྑཎཾ ཧོཏི, ཨེཝམིཧཱཔི ‘‘ཡསྨིཾ སམཡེ ཏསྨིཾ སམཡེ’’ཏི ཙ ཝུཏྟེ སཏཱིཏི ཨཡམཏྠོ ཝིཉྙཱཡམཱནོ ཨེཝ ཧོཏི ཨཉྙཀིརིཡཱསམྦནྡྷཱབྷཱཝེན པདཏྠསྶ ¶ སཏྟཱཝིརཧཱབྷཱཝཏོཏི སམཡསྶ སཏྟཱཀིརིཡཱཡ ཙིཏྟུཔྤཱདཀིརིཡཱ ཕསྶཱདིབྷཝནཀིརིཡཱ ཙ ལཀྑཱིཡཏཱིཏི ཨུབྷཡཏྠ སམཡསདྡེ བྷུམྨནིདྡེསོ ཀཏོ ལཀྑཎབྷཱུཏབྷཱཝཡུཏྟོཏི.

ཨུདྡཱནཏོཏི ཨུདྡེསཏོ སངྑེཔཏོ. ཀིལེསཀཱམོ ཝཏྠུཀཱམབྷཱཝཾ བྷཛནྟོ ཀཱམནཱིཡཝསེན བྷཛཏི, ན ཀཱམནཝསེནཱཏི ཀཱམནཝསེན ཀིལེསཀཱམོ ཨེཝ ཧོཏི, ན ཝཏྠུཀཱམོ. དུཝིདྷོཔེསོཏི ཝཙནེན དུཝིདྷསྶཔི སཧིཏསྶ ཨཝཙརཎཔྤདེསཾ སངྒཎྷཱཏི. ཏེན ཝཏྠུཀཱམསྶེཝ པཝཏྟིདེསོ རཱུཔཱརཱུཔདྷཱཏུདྭཡཾ ཨཔནཱིཏཾ ཧོཏི. ནནུ ཙ དུཝིདྷོཔི སཧིཏོ རཱུཔཱརཱུཔདྷཱཏཱུསུ པཝཏྟཏི རཱུཔཱརཱུཔཱཝཙརདྷམྨཱནཾ ཝཏྠུཀཱམཏྟཱ ཏདཱརམྨཎཱནཾ རཱུཔཱརཱུཔརཱགཱནཉྩ ཀིལེསཀཱམབྷཱཝསིདྡྷིཏོཏི? ཏཾ ན, བཧལཀིལེསསྶ ཀཱམརཱགསྶ ཀིལེསཀཱམབྷཱཝེན ཨིདྷ སངྒཧིཏཏྟཱ. ཨེཝཉྩ ཀཏྭཱ རཱུཔཱརཱུཔདྷཱཏཱུསུ པཝཏྟམཱནེསུ ཀཱམཱཝཙརདྷམྨེསུ ནིཀནྟི ཨིདྷ ན སངྒཧིཏཱ སུཁུམཏྟཱ. ‘‘ཨུདྡཱནཏོ དྭེ ཀཱམཱ’’ཏི སབྦཀཱམེ ཨུདྡིསིཏྭཱཔི ཧི ‘‘དུཝིདྷོཔེསོ’’ཏི ཨེཏྠ ཏདེཀདེསབྷཱུཏཱ ཨཉྙམཉྙསཧིཏཏཱཔརིཙྪིནྣཱ ཀཱམརཱགཏབྦཏྠུཀདྷམྨཱཝ སངྒཧིཏཱཏི, ནིརཝསེསོ ¶ ཝཱ ཀིལེསཀཱམོ ཀཱམརཱགོ ཀཱམཏཎྷཱརཱུཔཏཎྷཱཨརཱུཔཏཎྷཱནིརོདྷཏཎྷཱབྷེདོ ཨིདྷ པཝཏྟཏཱིཏི ཨནཝསེསཔྤཝཏྟིཏཾ སནྡྷཱཡ ‘‘དུཝིདྷོཔེསོ’’ཏི ཝུཏྟཾ, ཝཏྠུཀཱམོཔི ཙ ཨཔྤཀོ ཨིདྷཱཔི ན ཝཏྟཏི རཱུཔཱརཱུཔཱཝཙརཝིཔཱཀམཏྟོ, ཏཐཱཔི པརིཔུཎྞཝཏྠུཀཱམཏྟཱ ཀཱམཱཝཙརདྷམྨཱཝ ཨིདྷ གཧིཏཱ. ཨེཝཉྩ ཀཏྭཱ སསཏྠཱཝཙརོཔམཱ ཡུཏྟཱ ཧོཏི. ‘‘རཱུཔཱུཔཔཏྟིཡཱ མགྒཾ བྷཱཝེཏཱི’’ཏི (དྷ. ས. ༡༦༣; ཝིབྷ. ༦༢༥) ཨེཏྠ རཱུཔབྷཝོ ཨུཏྟརཔདལོཔཾ ཀཏྭཱ ‘‘རཱུཔ’’ནྟི ཝུཏྟོ, ཨེཝམིདྷཱཔི ཨུཏྟརཔདལོཔོ དཊྛབྦོ. ཨཉྙཐཱ ཧི ཙིཏྟཾ ཀཱམཱཝཙརཱཝཙརནྟི ཝུཙྩེཡྻཱཏི. ཨཱརམྨཎཀརཎཝསེནཱཏིཨཱདིཀེ ‘‘ཀཱམོ’’ཏི སབྦཾ ཏཎྷམཱཧ, ཏསྨཱ ‘‘ཀཱམཉྩེསཱ’’ཏིཨཱདི ཝུཏྟཾ, ‘‘ཀཱམེ ཨཝཙཱརེཏཱིཏི ཀཱམཱཝཙཱར’’ནྟི ཝཏྟབྦེ ཙཱ-སདྡསྶ རསྶཏྟཾ ཀཏཾ.

རུལ༹ྷིསདྡེནཱཏི ཉཱཎསམྤཡུཏྟེསུ རུལ༹ྷེན སདྡེན, ཉཱཎསམྤཡུཏྟེསུ ཝཱ པཝཏྟིཏྭཱ ཨནཝཛྫསུཁཝིཔཱཀཏཱཡ ཏཾསདིསེསུ ཉཱཎཝིཔྤཡུཏྟེསུ རུལ༹ྷེན སདྡེན. ཨཐ ཝཱ ཀིཉྩི ནིམིཏྟཾ གཧེཏྭཱ སཏིཔི ཨཉྙསྨིཾ ཏཾནིམིཏྟཡུཏྟེ ཀིསྨིཉྩིདེཝ ཝིསཡེ སམྨུཏིཡཱ ཙིརཀཱལཏཱཝསེན ནིམིཏྟཝིརཧེཔི པཝཏྟི རུལ༹ྷི ནཱམ ཡཐཱ ‘‘མཧིཡཾ སེཏཱིཏི མཧིཾསོ, གཙྪནྟཱིཏི གཱཝོ’’ཏི, ཨེཝཾ ཀུསལསདྡསྶཔི རུལ༹ྷིབྷཱཝོ ཝེདིཏབྦོ. པཉྙཱནིདྡེསེ ‘‘ཀོསལླ’’ནྟི ཨབྷིདྷམྨེ (དྷ. ས. ༡༦) ཝུཏྟཾ, ཏསྶ ཙ བྷཱཝཱ ཀུསལསདྡཔྤཝཏྟཱིཏི ཀོསལླཡོགཱ ཀུསལནྟི ཨཡཾ ཨབྷིདྷམྨཔརིཡཱཡོ ཧོཏི. ཀུསལནྟི ཀུསལབྷཱཝཾ ཨཱཧ.

ཝིཔཱཀཱདཱིནཾ ¶ ཨཝཛྫཔཊིཔཀྑཏཱ ནཏྠཱིཏི ཀུསལམེཝ ཨནཝཛྫལཀྑཎཾ ཝུཏྟཾ. ཨནཝཛྫལཀྑཎམེཝཱཏི སུཁཝིཔཱཀསབྷཱཝསྶ ལཀྑཎབྷཱཝནིཝཱརཎཏྠཾ ཨཝདྷཱརཎཾ ཀཏཾ, ཏཾནིཝཱརཎཉྩ ཏསྶ པཙྩུཔཊྛཱནཏཾ ཝཏྠུཀཱམཏཱཡ ཀཏཾ. སམྤཏྟིཨཏྠེན རསེན ཝོདཱནབྷཱཝརསཾ. ཕལཊྛེན པཙྩུཔཊྛཱནེན ཨིཊྛཝིཔཱཀཔཙྩུཔཊྛཱནཾ. སབྷཱཝོ ཀཀྑལཱ༹དིཕུསནཱདིཀོ ཨསཱདྷཱརཎོ. སཱམཉྙཾ སཱདྷཱརཎོ ཨནིཙྩཱདིསབྷཱཝོ. ཨིདྷ ཙ ཀུསལལཀྑཎཾ སབྦཀུསལསཱདྷཱརཎསབྷཱཝཏྟཱ སཱམཉྙཾ དཊྛབྦཾ, ཨཀུསལཱདཱིཧི ཨསཱདྷཱརཎཏཱཡ སབྷཱཝོ ཝཱ. ཨུཔཊྛཱནཱཀཱརོཏི གཧེཏབྦབྷཱཝེན ཉཱཎསྶ ཨུཔཊྛཧནཱཀཱརོ. ཕལཾ པན ཨཏྟནོ ཀཱརཎཾ པཊིཙྩ ཏཔྤཊིབིམྦབྷཱཝེན, པཊིམུཁཾ ཝཱ ཨུཔཊྛཱཏཱིཏི པཙྩུཔཊྛཱནཾ.

ཝིཛཱནཱཏཱིཏི ¶ སཉྙཱཔཉྙཱཀིཙྩཝིསིཊྛཾ ཝིསཡགྒཧཎཾ ཨཱཧ. སབྦཙིཏྟསཱདྷཱརཎཏྟཱ ཡཏྠ ཡཏྠ ཡཐཱ ཡཐཱ ཨཏྠོ ལབྦྷཏི, ཏཏྠ ཏཏྠ ཏཐཱ ཏཐཱ གཧེཏབྦོཏི. ཡཾ ཨཱསེཝནཔཙྩཡབྷཱཝེན ཙིནོཏི, ཡཉྩ ཀམྨུནཱ ཨབྷིསངྑཏཏྟཱ ཙིཏཾ, ཏཾ ཏཐཱ ‘‘ཙིཏྟ’’ནྟི ཝུཏྟཾ. ཡཾ པན ཏཐཱ ན ཧོཏི, ཏཾ པརིཏྟཀིརིཡདྭཡཾ ཨནྟིམཛཝནཉྩ ལབྦྷམཱནཙིནྟནཝིཙིཏྟཏཱདིཝསེན ‘‘ཙིཏྟ’’ནྟི ཝེདིཏབྦཾ. ཧསིཏུཔྤཱདོ པན ཨཉྙཛཝནགཏིཀོཝ. ཙིཏྟཱནཾ པནཱཏི ཝིཙིཏྲཱནནྟི ཨཏྠོ. ཏདནྟོགདྷཏྟཱ ཧི སམུདཱཡཝོཧཱརེན ཨཝཡཝོཔི ‘‘ཙིཏྟ’’ནྟི ཝུཙྩཏི ཡཐཱ པབྦཏནདཱིསམུདྡཱདིཨེཀདེསེསུ དིཊྛེསུ པབྦཏཱདཡོ དིཊྛཱཏི ཝུཙྩནྟཱིཏི. ཙརཎཾ ནཱམ གཧེཏྭཱ ཙརིཏབྦཙིཏྟཔཊོ. རཱུཔཱནཱིཏི བིམྦཱནི.

ཨཛ྄ཛྷཏྟིཀནྟི ཨིནྡྲིཡབདྡྷཾ ཝདཏི. ཙིཏྟཀཏམེཝཱཏི ཙིཏྟསྶ མཱུལཀཱརཎཏཾ སནྡྷཱཡ ཝུཏྟཾ. ཀམྨསྶ ཧེཏཾ ཙིཏྟཾ ཀཱརཎནྟི. ཏཾ པན ཨཏྠཾ ཝིབྷཱཝེཏུཾ ‘‘ཀཱཡཀམྨཱདིབྷེད’’ནྟིཨཱདིམཱཧ. ལིངྒནཱནཏྟནྟི སཎྛཱནནཱནཏྟཾ, བྷིནྣསཎྛཱནངྒཔཙྩངྒཝཏོ སརཱིརསྶ ཝཱ ནཱནཏྟཾ. ཝོཧཱརཝསེན ཨིཏྠིཔུརིསཱདིབྷཱཝེན ཝོཧརིཏབྦེསུ པཏྠནཱཝིསེསཱ ཨུཔྤཛྫནྟི, ཏཏོ ཀམྨཝིསེསཱ. ཨེཝམིདཾ ཀམྨནཱནཏྟཾ ཝོཧཱརནཱནཏྟཏོ ཧོཏི. ཨཔཱ…པེ… ཀཱདིཏཱཏི ཨེཝམཱདཱིསུ ཨཱདི-སདྡེཧི གཏིཡཱ ཨུཔཔཏྟིཡཱ ཨཏྟབྷཱཝེ ལོཀདྷམྨེསུ ཙ ནཱནཱཀརཎཱནི སུཏྟཱགཏཱནི སངྒཎྷཱཏི.

ཀམྨནཱནཏྟཱདིཝསེནཱཏི ཨེཏྠ ཀུསལཱཀུསལཝསེན ཀམྨནཱནཏྟཾ ཝེདིཏབྦཾ. ཝིསདིསསབྷཱཝཏཱ ཧི ནཱནཏྟནྟི. ཀུསལཀམྨསྶ དཱནཱདིཝསེན ཀཱཡསུཙརིཏཱདིབྷཱཝེན ཙ པུཐུཏྟཾ, ཨཀུསལཀམྨསྶ ཙ མཙྪརིཡཱདཱིཧི ཀཱཡདུཙྩརིཏཱདཱིཧི ཙ པུཐུཏྟཾ ཝེདིཏབྦཾ. བཧུཔྤཀཱརཏཱ ཧི པུཐུཏྟནྟི ¶ . ཨནྣདཱནཱདིཝསེན དཱནཱདཱིནཾ པཱཎཱཏིཔཱཏཱཝིརཏིཨཱདིཝསེན ཀཱཡསུཙརིཏཱདཱིནཾ ཨཱཝཱསམཙྪརིཡཱདིཝསེན མཙྪརིཡཱདཱིནཾ པཱཎཱཏིཔཱཏཱདིཝསེན ཀཱཡདུཙྩརིཏཱདཱིནཉྩ པབྷེདོ ཝེདིཏབྦོ. ཨེཀེཀསྶ ཧི པཀཱརསྶ བྷེདོ པབྷེདོཏི. ནཱནཏྟཱདཱིནཾ ཝཝཏྠཱནཾ ཏཐཱ ཏཐཱ ཝཝཏྠིཏཏཱ ནིཙྪིཏཏཱ. ཨེཏེནུཔཱཡེན ལིངྒནཱནཏྟཱདཱིནི ཝེདིཏབྦཱནི. ཀམྨནཱནཏྟཱདཱིཧི ནིབྦཏྟཱནི ཧི ཏཱནཱིཏི.

པཙྩུཔྤནྣསྶ ལིངྒསྶ ཀམྨཏོ པཝཏྟིཾ ཏདནུཀྐམེན པཙྩུཔྤནྣཀམྨསྶ ནིཔྥཏྟིཉྩ དསྶེཏྭཱ ཏཏོ ཨནཱགཏལིངྒནཱནཏྟཱདིནིཔྥཏྟིདསྶནེན སཾསཱརཾ གྷཊེནྟོ ‘‘ཀམྨནཱནཱཀརཎཾ པཊིཙྩཱ’’ཏིཨཱདིམཱཧ. ཏཏྠ པུརིམེན ཀམྨཝཙནེན ¶ ཨཝིཛྫཱསངྑཱརཱ, ལིངྒཱདིཝཙནེན ཝིཉྙཱཎཱདཱིནི བྷཝཔརིཡོསཱནཱནི, གཏིཨཱདིཝཙནེན ཛཱཏིཛརཱམརཎཱནི གཧིཏཱནཱིཏི དཊྛབྦཱནི. ཏཏྠ གཏཱིཏི ནིརཡཱདཡོ པཉྩ གཏིཡོ ཝུཙྩནྟི, ཏཱསཾ ནཱནཱཀརཎཾ ཨཔདཱདིབྷཱཝོ. ཏཱ ཧི ཏཐཱ བྷིནྣཱཏི. ཨུཔཔཏྟཱིཏི གོམཧིཾསཱདིཁཏྟིཡཱདིཙཱཏུམཧཱརཱཛིཀཱདིཨུཔཔཏྟིཡོ, ཏཱསཾ ནཱནཱཀརཎཾ ཨུཙྩཱདིཏཱ. ཁཏྟིཡོ ཨེཝ ཧི ཨེཀཙྩོ ཀུལབྷོགཨིསྶརིཡཱདཱིཧི ཨུཙྩོ ཧོཏི, ཨེཀཙྩོ ནཱིཙོ. ཏེཧི ཨེཝ ཧཱིནཏཱཡ ཧཱིནོ, པདྷཱནབྷཱཝཾ ནཱིཏཏཱཡ པཎཱིཏོ, ཨཌྜྷཏཱཡ སུགཏོ, དལིདྡཏཱཡ དུགྒཏོ. ཀུལཝསེན ཝཱ ཨུཙྩནཱིཙཏཱ, ཨིསྶརིཡཝསེན ཧཱིནཔཎཱིཏཏཱ, བྷོགཝསེན སུགཏདུགྒཏཏཱ ཡོཛེཏབྦཱ. སུཝཎྞདུབྦཎྞཏཱཏི ཨོདཱཏསཱམཱདིཝཎྞསུདྡྷིཨསུདྡྷིཝསེན ཝུཏྟཾ. སུཛཱཏདུཛྫཱཏཏཱཏི ནིགྲོདྷཔརིམཎྜལཱདིཨཱརོཧཔརིཎཱཧེཧི ལཀྑཎེཧི ཝཱ ཨཏྟབྷཱཝཔརིཔུཎྞཱཔརིཔུཎྞཛཱཏཏཱཝསེན. སུསཎྛིཏདུསྶཎྛིཏཏཱཏི ཨངྒཔཙྩངྒཱནཾ སཎྛཱནཝསེན.

ཨཔརམྤི ཝུཏྟཾ ཨཛ྄ཛྷཏྟིཀཙིཏྟསྶ ཡཐཱཝུཏྟསྶ ཙིཏྟཀཏབྷཱཝསཱདྷཀཾ སུཏྟཾ ‘‘ཀམྨཏོ’’ཏིཨཱདི. ཀམྨཉྷི ཙིཏྟཏོ ནིབྦཏྟནྟི ཏཏོ ནིཔྥཛྫམཱནཾ སབྦམྤི ཙིཏྟཾ ཙིཏྟཀཏམེཝཱཏི སཱདྷེཏི. ཀམྨནིབྦཏྟཏོ ལིངྒཏོ པཝཏྟམཱནལིངྒསཉྙཱ མཱུལཀཱརཎཏོ ཀམྨཏོ ཨཱསནྣཀཱརཎཏོ ལིངྒཏོ ཙ པཝཏྟཱ ཧོཏཱིཏི ‘‘ཀམྨཏོ…པེ… པཝཏྟརེ’’ཏི ཨཱཧ. ཨཐ ཝཱ ལིངྒཉྩ སཉྙཱ ཙ ལིངྒསཉྙཱ, ཏཱ ཡཐཱསངྑྱཾ ཀམྨཏོ ལིངྒཏོ ཙ པཝཏྟརེཏི ཨཏྠོ. སཉྙཱཏོ བྷེདཾ གཙྪནྟཱིཏི ཏེ ཨིཏྠིཔུརིསཱདིལིངྒསཉྙཱཏོ ཨིཏྠིཔུརིསཱདིཝོཧཱརབྷེདཾ དྷམྨཱ གཙྪནྟི, ཏཐཱ ཏཐཱ ཝོཧརིཏབྦཱཏི ཨཏྠོ. ཨིམཱཡ གཱཐཱཡ ཨཏཱིཏཔཙྩུཔྤནྣདྡྷཔཊིཙྩསམུཔྤཱདཝསེན ཙིཏྟཀཏཾ ཙིཏྟཾ དསྶིཏཾ.

ལོཀོ ¶ ཨེཝ པཛཱཏཏྟཱ པཛཱཏི པུརིམཔཱདསྶ ཝིཝརཎཾ པཙྪིམཔཱདོ དཊྛབྦོ. ཡཐཱ རཐསྶ ཨཱཎི ནིབནྡྷནཱ, ཨེཝཾ སཏྟལོཀརཐསྶ ཀམྨཾ ནིབནྡྷནནྟི ཨུཔམཱསཾསནྡནཾ ཝེདིཏབྦཾ. ཨིམཱཡ ཙ གཱཐཱཡ ཨདྡྷདྭཡཝསེན ཙིཏྟསྶ ཀམྨཝིཉྙཱཎཀཏཏཱ དསྶིཏཱ. ཀིཏྟིནྟི པརམྨུཁཱ ཀིཏྟནཾ པཏྠཊཡསཏཾ. པསཾསནྟི སམྨུཁཱ པསཾསནཾ ཐུཏིཾ. ཀམྨནཱནཱཀརཎནྟི ཀམྨཏོ ནིབྦཏྟནཱནཱཀརཎཾ ཀམྨཛེཧི ཨནུམིཡམཱནཾ ཀམྨསྶེཝ ཝཱ ནཱནཱཀརཎཾ.

ཀམྨསྶཀཱཏི ¶ ཀམྨསཡཱ. ཀམྨསྶ དཱཡཾ ཏེན དཱཏབྦཾ ཨཱདིཡནྟཱིཏི ཀམྨདཱཡཱདཱ. ཨཎྜཛཱདཱིནཉྩ ཡོནཱིནཾ ཀམྨཏོ ནིབྦཏྟཏྟཱ ཀམྨམེཝ ཡོནི ཨཏྟབྷཱཝཔཊིལཱབྷནིམིཏྟཾ ཨེཏེསནྟི ཀམྨཡོནཱི. བནྡྷནཊྛེན ཀམྨཾ བནྡྷུ ཨེཏེསནྟི ཀམྨབནྡྷཱུ.

ཙིཏྟསྶཱཏི ཀམྨཝིཉྙཱཎསྶ. ཏསྶ པན ཨལདྡྷོཀཱསཏཱ ཨཉྙེན ཀམྨེན པཊིབཱཧིཏཏྟཱ ཏདཝིཔཙྩནོཀཱསེ པུགྒལསྶ ནིབྦཏྟཏྟཱ ཙ ཝེདིཏབྦཱ. ཝིཛྫམཱནམྤི ཨཔརཱཔརིཡཝེདནཱིཡཀམྨཝིཉྙཱཎཾ ཀཱལགཏིཔཡོགཱདིསཧཀཱརཱིཔཙྩཡཝིཀལཏཱཡ ཨཝསེསཔཙྩཡཝེཀལླཾ དཊྛབྦཾ. ཨེཀཙྩཙིཏྟནྟི ཙིཏྟེན ཀཏྟབྦཙིཏྲེན ཨེཀཙྩབྷཱུཏཾ ཏེན ཀཏྟབྦཙིཏྲམཱཧ.

ཨནུབྷཝིཏྭཱ བྷཝིཏྭཱ ཙ ཨཔགཏཾ བྷཱུཏཱཔགཏཾ. ཨནུབྷཱུཏབྷཱུཏཏཱ ཧི བྷཱུཏཏཱསཱམཉྙེན བྷཱུཏསདྡེན ཝུཏྟཱ. སཱམཉྙམེཝ ཧི ཨུཔསགྒེན ཝིསེསཱིཡཏཱིཏི. ཨནུབྷཱུཏསདྡོ ཙ ཀམྨཝཙནིཙྪཱབྷཱཝཏོ ཨནུབྷཝཀཝཱཙཀོ དཊྛབྦོ. ཝིཀཔྤགཱཧཝསེན རཱགཱདཱིཧི ཏབྦིཔཀྑེཧི ཙ ཨཀུསལཾ ཀུསལཉྩ ཨཱརམྨཎརསཾ ཨནུབྷཝཏི, ན ཝིཔཱཀོ ཀམྨཝེགཀྑིཏྟཏྟཱ, ནཱཔི ཀིརིཡཱ ཨཧེཏུཀཱནཾ ཨཏིདུབྦལཏཱཡ སཧེཏུཀཱནཉྩ ཁཱིཎཀིལེསསྶ ཚལ༹ངྒུཔེཀྑཱཝཏོ ཨུཔྤཛྫམཱནཱནཾ ཨཏིསནྟཝུཏྟིཏྟཱ. ཨེཏྠ ཙ པུརིམནཡེ ཀུསལཱཀུསལམེཝ ཝཏྟུཾ ཨདྷིཔྤཱཡཝསེན ‘‘བྷཱུཏཱཔགཏ’’ནྟི ཝུཏྟཾ. ཡཾ ‘‘ཨུཔྤནྣཱནཾ ཨཀུསལཱནཾ དྷམྨཱནཾ པཧཱནཱཡ ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ’’ཏི (སཾ. ནི. ༥.༦༥༡-༦༦༢; ཝིབྷ. ༣༩༠-༣༩༡) ཨེཏྠ ཨུཔྤནྣནྟི གཧེཏྭཱ ཏཾསདིསཱནཾ པཧཱནཾ, ཝུདྡྷི ཙ ཝུཏྟཱ, པཙྪིམནཡེ པན ཙ-སདྡེན ཀུསལཱཀུསལཉྩ ཨཱཀཌྜྷིཏྭཱ སབྦཾ སངྑཏཾ ཝུཏྟཾ བྷཱུཏཱཔགཏབྷཱཝཱབྷིདྷཱནཱདྷིཔྤཱཡེན.

ཝིཔཙྩིཏུཾ ཨོཀཱསཀརཎཝསེན ཨུཔྤཏིཏཾ ཨཏཱིཏཀམྨཉྩ ཏཏོ ཨུཔྤཛྫིཏུཾ ཨཱརདྡྷོ ཨནཱགཏོ ཝིཔཱཀོ ཙ ‘‘ཨོཀཱསཀཏུཔྤནྣ’’ནྟི ཝུཏྟོ. ཡཾ ཨུཔྤནྣསདྡེན ཝིནཱཔི ཝིཉྙཱཡམཱནཾ ཨུཔྤནྣཾ ¶ , ཏཾ སནྡྷཱཡ ‘‘ནཱཧཾ, བྷིཀྑཝེ, སཉྩེཏནིཀཱན’’ནྟིཨཱདི (ཨ. ནི. ༡༠.༢༡༧, ༢༡༩) ཝུཏྟཾ. ཏཱསུ ཏཱསུ བྷཱུམཱིསཱུཏི མནུསྶདེཝཱདིཨཏྟབྷཱཝསངྑཱཏེསུ ཨུཔཱདཱནཀྑནྡྷེསུ. ཏསྨིཾ ཏསྨིཾ སནྟཱནེ ཨནུཔྤཏྟིཨནཱཔཱདིཏཏཱཡ ཨསམཱུཧཏཾ. ཨེཏྠ ཙ ལདྡྷབྷཱུམིཀཾ ‘‘བྷཱུམིལདྡྷ’’ནྟི ཝུཏྟཾ ཨགྒིཨཱཧིཏོ ཝིཡ. ཨོཀཱསཀཏུཔྤནྣསདྡེཔི ཙ ཨོཀཱསོ ཀཏོ ཨེཏེནཱཏི, ཨོཀཱསོ ཀཏོ ཨེཏསྶཱཏི ཙ དུཝིདྷཏྠེཔི ཨེཝམེཝ ཀཏསདྡསྶ པརནིཔཱཏོ ཝེདིཏབྦོ.

སབྦདཱ ¶ ཨཝཏྟམཱནམྤི གམིཡཙིཏྟཾ པཊིཔཀྑཔཙྩཝེཀྑཎཱཡ ཨཝིཀྑམྦྷིཏཏྟཱ ‘‘ཨུཔྤནྣ’’ནྟི ཝུཏྟཾ. ཨནྟརདྷཱཔེཏཱིཏི ཝིཀྑམྦྷིཀཱ ཨཱནཱཔཱནསྶཏི ཝིཀྑམྦྷེཏི. ཨནྟརཱཡེཝཱཏི བྷཱུམིལདྡྷེ སབྷཱུམིཡཾ ཨབྦོཙྪིནྣེ ཝིཙྪིནྡིཏྭཱཏི ཨཏྠོ. ཨནཏཱིཏཾ ཨནནཱགཏཉྩ ཁཎཏྟཡེཀདེསགཏམྤི ཨུཔྤཛྫམཱནཾ ‘‘ཁཎཏྟཡགཏ’’ནྟི ཝུཏྟཾ. དེསནཱཡ པདྷཱནེན གཧིཏོ ཨཏྠོ ‘‘སཱིས’’ནྟི ཝུཙྩཏི. ལོཀིཡདྷམྨཉྷི དེསེཏབྦཾ པཏྭཱ དེསནཱཡ ཙིཏྟཾ པུབྦངྒམཾ ཧོཏི, དྷམྨསབྷཱཝཾ ཝཱ སནྡྷཱཡེཏཾ ཝུཏྟཾ. ཨཀུསལཱཏི སབྦེཔི ཨཀུསལཱ དྷམྨཱ ཝུཏྟཱ. ཙེཏནཱཏི ཀེཙི. ཨཀུསལབྷཱགིཡཱཏི རཱགཱདཡོ ཨེཀནྟཨཀུསལཱ. ཨཀུསལཔཀྑིཀཱཏི ཕསྶཱདཡོཔི ཏཔྤཀྑིཀཱ. མནོ ཏེསཾ དྷམྨཱནཾ པཋམཾ ཨུཔྤཛྫཏཱིཏི སཧཛཱཏོཔི མནོ སམྤཡུཏྟེ སངྒཎྷིཏྭཱ ཨདྷིཔཏིབྷཱཝེན པཝཏྟམཱནོ པཋམཾ ཨུཔྤནྣོ ཝིཡ ཧོཏཱིཏི ཨེཝཾ ཝུཏྟོ. སམྤཡུཏྟཱཔི ཏདནུཝཏྟནཏཱཡ ཨནྭདེཝ ཨཀུསལཱ དྷམྨཱཏི ཝུཏྟཱ, ཨནནྟརཔཙྩཡམནཾ ཝཱ སནྡྷཱཡ མནོཔུབྦངྒམཏཱ ཝུཏྟཱ. ཙིཏྟེན ནཱིཡཏཱིཏི ཨབྷིསངྑཱརཝིཉྙཱཎཾ སནྡྷཱཡཱཧ, ཏཎྷཱསམྤཡུཏྟཾ ཝཱ. པབྷསྶརནྟི སབྷཱཝཔཎྜརཏཾ སནྡྷཱཡཱཧ. ཨརཀྑིཏེཏི སཏིཡཱ ཨནུནཡཔཊིགྷཱདཱིཧི ཨརཀྑིཏེ, རཱགཱདཱིཧི བྱཱཔནྣེ, ཏེཧི ཨེཝ ཨཝསྶུཏེ. ཙིཏྟསྶ པུབྦངྒམབྷཱཝསཱདྷནེ ཨཉྙམཉྙཾ བལདཱནཝསེན སུཏྟཱནུརཀྑཎཾ, ཨིདྷ ཝཱ ཨུཔསཾཧཏཱནཾ ཨཱབྷིདྷམྨིཀེཧི ཝིཉྙཱཏཱནཾ ཙིརཀཱལཔྤཝཏྟིཝསེན ཝེདིཏབྦཾ.

ཀཏརཔཉྙཾ ཏྭནྟིཨཱདི ན པཱལི༹ཨཱརུལ༹ྷཾ, ཨེཝཾ བྷགཝཱ པུཙྪཏཱིཏི ཨཊྛཀཐཱཡམེཝ ཝུཏྟཾ. པཉྙཱ པན ཀིམཏྠིཡཱཏི ཨིདམྤི ཨེཀཾ སུཏྟཾ. ‘‘ཨབྷིཉྙཏྠཱ པརིཉྙཏྠཱ པཧཱནཏྠཱ’’ཏི ཏསྶ ཝིསྶཛྫནཾ.

སཱཏནྟི སབྷཱཝཝསེན ཝུཏྟཾ, མདྷུརནྟི མདྷུརཾ ཝིཡཱཏི ཨུཔམཱཝསེན. པོནོབྦྷཝིཀཱཏི པུནབྦྷཝཀརཎསཱིལཱ. ཏཏྲཏཏྲཱབྷིནནྡནཏོ ནནྡཱི, ནནྡིབྷཱུཏོ རཱགོ ནནྡིརཱགོ, ནནྡིརཱགབྷཱཝེན སཧགཏཱཏི ¶ ནནྡིརཱགསཧགཏཱཏི ན ཨེཏྠ སམྤཡོགཝསེན སཧགཏབྷཱཝོ ཨཏྠཱིཏི སཧགཏསདྡོ ཏཎྷཱཡ ནནྡིརཱགབྷཱཝཾ ཛོཏེཏི. ནནྡིརཱགབྷཱུཏཱཏི ཙསྶ ཨཏྠོ. ནིསྶཡེཏི པཱདཀེ. རཱུཔཱརཱུཔཱརམྨཎཱནནྟི པཐཝཱིཀསིཎཱདིཨཱཀཱསཱདིཨཱརམྨཎཱནཾ. སཾསཊྛེཏི ཁཱིརོདཀཾ ཝིཡ སམོདིཏེ ཨེཀཱིབྷཱཝམིཝ གཏེ. སཧཛཱཏེཏི སམྤཡུཏྟསཧཛཱཏེ, ན སཧཛཱཏམཏྟེ. ཨིདྷཱཔཱིཏི ‘‘ཨིམསྨིམྤི པདེ ཨཡམེཝ ཨཏྠོ ཨདྷིཔྤེཏོ’’ཏི ཨིམིསྶཱ ཨཊྛཀཐཱཡ ཡཐཱདསྶིཏསཾསཊྛསདྡོ ¶ སཧཛཱཏེ ཨདྷིཔྤེཏོཏི. ཨརཱུཔཾ རཱུཔེནཱཏི པཊིསནྡྷིཀྑཎེ ཝཏྠུནཱ. ཨུཀྐཊྛནིདྡེསོཏི ཨནཝསེསསངྒཧེན ཀཏོ ཨཏིསཡནིདྡེསོ.

ཨནཱབྷཊྛཏཱཡེཝཱཏི ‘‘དིཊྛཾ སུཏ’’ནྟིཨཱདཱིསུ དིཊྛཏཱདཡོ ཝིཡ ཨབྷཱསིཏབྦཏཱ ཨནཱབྷཊྛཏཱ. སབྦཱཀཱརེན སདིསསྶ དུཏིཡཙིཏྟསྶ སསངྑཱརིཀཏཱཝཙནེན ཨིམསྶ ཨསངྑཱརིཀཏཱ ཝིཉྙཱཡཏི, ཏསྨཱ ཨབྷཱསིཏབྦཏཱཡ ན གཧིཏོཏི ཨཏྠོ ཡུཛྫཏི. ཨདྷིཔྤཱཡོ པན པཱལི༹ཡཾ ཨབྷཱསིཏཏྟཱ ཨེཝ ཏཏྠ དེསེཏབྦབྷཱཝེན ན གཧིཏོ ན སངྒཧིཏོ ན ཏསྶཏྠསྶ ཨབྷཱཝཱཏི. ཨཐ ཝཱ པཱལི༹ཡཾ ཨནཱབྷཊྛཏཱཡ ཨེཝ ཨཊྛཀཐཱཡཾ ན གཧིཏོ ན ཏསྶཏྠོ ཝུཏྟོ. ནིཡམེཏྭཱཝཱཏི པརཏོ ཨེཝཾཝིདྷསྶེཝ སསངྑཱརིཀབྷཱཝཝཙནཏོ ཨིདྷ ཏདཝཙནེནེཝ ཨསངྑཱརིཀབྷཱཝཾ ནིཡམེཏྭཱ.

མནོཝིཉྙཱཎནྟི ཨེཏྠ དྭཱརཾ ཝཏྠཱུཏི ཝུཏྟཾ, དྭཱརེན ཝཱ ཏཾསཧཱཡབྷཱུཏཾ ཧདཡཝཏྠུ ཝུཏྟཾ. སརསབྷཱཝེནཱཏི སཀིཙྩབྷཱཝེན. ཨཝིཛྫཱ ཧི སངྑཱརཱནཾ པཙྩཡབྷཱཝཀིཙྩཱ, ཨཉྙཱསཱདྷཱརཎོ ཝཱ རསིཏབྦོ ཝིཉྙཱཏབྦོ བྷཱཝོ སརསབྷཱཝོ, ཨཝིཛྫཱསབྷཱཝོ སངྑཱརསབྷཱཝོཏི ཨེཝམཱདིཀོ. ‘‘སརསསབྷཱཝེནཱ’’ཏིཔི པཱཋོ, སོཡེཝ ཨཏྠོ. ཨཝིཛྫཱཔཙྩཡཱཏི ཝཱ སརསེན, སངྑཱརཱཏི སབྷཱཝེན.

ཨེཀསམུཊྛཱནཱདིཏཱ རཱུཔདྷམྨེསུ ཨེཝ ཡོཛེཏབྦཱ ཏེསུ ཏབྦོཧཱརབཱཧུལླཏོ. ཨཏཱིཏཱདིབྷཱཝོ རཱུཔཱརཱུཔདྷམྨེསུ, ཙིཏྟཙེཏསིཀནིབྦཱནཱནམྤི ཝཱ ཡཐཱསབྷཱཝཾ ཨེཀདྭིནཀུཏོཙིསམུཊྛཱནཏཱ ཡོཛེཏབྦཱ. ཨནཱཔཱཐགཏཱཏི ཙཀྑཱདཱིནཾ ཨགོཙརགཏཱ སུཁུམརཛཱདིརཱུཔཾ ཝིཡ ཝཏྠུཔརིཏྟཏཱཡ ཏཏྟཱཡོགུལེ༹ པཏིཏོདཀབིནྡུརཱུཔཾ ཝིཡ ཁཎཔརིཏྟཏཱཡ ཨཏིདཱུརཏཱཡ ཨཙྩཱསནྣཱདིཏཱཡ ཨཏཱིཏཱནཱགཏཏཱཡ ཙ. ཝིསཡོ ཨནཉྙཏྠབྷཱཝེན, གོཙརོ ཙ ཏཏྠ ཙརཎེན ཝུཏྟོ, ཏབྦིསཡནིཙྪཡེན མནོ པཊིསརཎཾ. ཨཡམཏྠོ སིདྡྷོ ཧོཏི ཨཉྙཐཱ ཏེསཾ དྷམྨཱརམྨཎབྷཱཝེན ‘‘ནེསཾ གོཙརཝིསཡཾ པཙྩནུབྷོཏཱི’’ཏི ཝཙནསྶ ཨནུཔཔཏྟིཏོ. དིབྦཙཀྑུདིབྦསོཏཨིདྡྷིཝིདྷཉཱཎེཧི ¶ ཡཐཱཝུཏྟནཡེན ཨནཱཔཱཐགཏཱནི རཱུཔཱདཱིནི ཨཱལམྦིཡམཱནཱནི ན དྷམྨཱརམྨཎནྟི ཀཏྠཙི ཝུཙྩམཱནཱནི དིཊྛཱནི, ཨིཏརཐཱ ཙ དིཊྛཱནི ‘‘དིབྦེན ཙཀྑུནཱ རཱུཔཾ པསྶཏཱི’’ཏིཨཱདཱིསཱུཏི.

ཨཱཔཱཐམཱགཙྪཏི ¶ མནསཱ པཉྩཝིཉྙཱཎེཧི ཙ གཧེཏབྦབྷཱཝཱུཔགམནེན. གྷཊྚེཏྭཱཏི པཊིམུཁབྷཱཝཱཔཱཐཾ གནྟྭཱ. སརབྷཱཎཀསྶ ཨོསཱརཀསྶ. པཀཏིཡཱ དིཊྛཱདིཝསེན ཨཱཔཱཐགམནཉྩ བྷོཛནཔརིཎཱམཨུཏུབྷོཛནཝིསེསཨུསྶཱཧཱདཱིཧི ཀལྱཾ, རོགིནོ ཝཱཏཱདཱིཧི ཙ ཨུཔདྡུཏཾ ཝཱ ཀཱཡཾ ཨནུཝཏྟནྟསྶ ཛཱགརསྶ བྷཝངྒསྶ ཙལནཔཙྩཡཱནཾ ཀཱཡིཀསུཁདུཀྑཨུཏུབྷོཛནཱདིཨུཔནིསྶཡཱནཾ ཙིཏྟཔཎིདཧནསདིསཱསདིསསམྦནྡྷདསྶནཱདིཔཙྩཡཱནཾ, སུཏྟསྶ ཙ སུཔིནདསྶནེ དྷཱཏུཀྑོབྷཱདིཔཙྩཡཱནཾ ཝསེན ཝེདིཏབྦཾ. ཨདིཊྛསྶ ཨསུཏསྶ ཨནཱགཏབུདྡྷརཱུཔཱདིནོ པསཱདདཱཏུཀཱམཏཱཝཏྠུསྶ ཏཾསདིསཏཱསངྑཱཏེན དིཊྛསུཏསམྦནྡྷེནེཝ. ན ཀེཝལཾ ཏཾསདིསཏཱཝ ཨུབྷཡསམྦནྡྷོ, ཀིནྟུ ཏབྦིཔཀྑཏཱ ཏདེཀདེསཏཱ ཏཾསམྤཡུཏྟཏཱདིཀོ ཙ ཝེདིཏབྦོ. ཀེནཙི ཝུཏྟེ ཀིསྨིཉྩི སུཏེ ཨཝིཙཱརེཏྭཱ སདྡཧནཾ སདྡྷཱ, སཡམེཝ ཏཾ ཝིཙཱརེཏྭཱ རོཙནཾ རུཙི, ‘‘ཨེཝཾ ཝཱ ཨེཝཾ ཝཱ བྷཝིསྶཏཱི’’ཏི ཨཱཀཱརཝིཙཱརཎཾ ཨཱཀཱརཔརིཝིཏཀྐོ, ཝིཙཱརེནྟསྶ ཀཏྠཙི དིཊྛིཡཱ ནིཛ྄ཛྷཱནཀྑམནཾ དིཊྛིནིཛ྄ཛྷཱནཀྑནྟི.

གེརུཀཧརིཏཱལཉྫནཱདིདྷཱཏཱུསུ. སུབྷནིམིཏྟཾ སུབྷགྒཧཎསྶ ནིམིཏྟཾ. ཏཾ སུབྷནིམིཏྟཏྟཱ རཉྫནཱིཡཏྟཱ ཙ ལོབྷསྶ ཝཏྠུ. ནིཡམིཏསྶ ཙིཏྟསྶ ཝསེན ནིཡམིཏཝསེན. ཨེཝམིཏརེསུ དྭཱིསུ. ཨཱབྷོགོ ཨཱབྷུཛིཏཾ. ལཱུཁཔུགྒལཱ དོསབཧུལཱ. ཨདོསབཧུལཱ སིནིདྡྷཔུགྒལཱ. ཏདདྷིམུཏྟཏཱཏི པཱིཏིནིནྣཙིཏྟཏཱ. ཨིམེཧི…པེ… ཝེདིཏབྦོ པཱིཏིཡཱ སོམནསྶཝིཔྤཡོགཱསམྦྷཝཏོཏི ཨདྷིཔྤཱཡོ.

ཛཱིཝིཏཝུཏྟིཡཱ ཨཱཡཏནབྷཱཝཏོ ཧཏྠཱརོཧཱདིསིཔྤམེཝ སིཔྤཱཡཏནཾ. ཀསིཝཱཎིཛྫཱདིཀམྨམེཝ ཀམྨཱཡཏནཾ. ཨཱཡུཝེདཱདིཝིཛྫཱ ཨེཝ ཝིཛྫཱཊྛཱནཾ. ཨབྱཱཔཛྫེཏི དོམནསྶབྱཱཔཱདརཧིཏེ རཱུཔབྷཝེ. དྷམྨཔདཱཏི དྷམྨཀོཊྛཱསཱ. པིལཝནྟཱིཏི ཨུཔཊྛཧནྟི པདིསྶནྟི. ཡོགཱཏི བྷཱཝནཱབྷིཡོགཱ སམཱདྷིཏོ. ཝཏྠུཝིསདཀིརིཡཱཏི ཨཛ྄ཛྷཏྟིཀབཱཧིརཱནཾ ཝཏྠཱུནཾ ནིམྨལབྷཱཝཀིརིཡཱ. སདྡྷཱདཱིནཾ ཨིནྡྲིཡཱནཾ ཨཉྙམཉྙཱནཏིཝཏྟནཾ ཨིནྡྲིཡསམཏྟཔཊིཔཱདནཏཱ ¶ . གམྦྷཱིརཱནཾ ཉཱཎེན ཙརིཏབྦཱནཾ, གམྦྷཱིརཉཱཎེན ཝཱ ཙརིཏབྦཱནཾ སུཏྟནྟཱནཾ པཙྩཝེཀྑཎཱ གམྦྷཱིརཉཱཎཙརིཡཔཙྩཝེཀྑཎཱ.

ཝཾསོཏི ཨནུཀྐམོ. ཏནྟཱིཏི སནྟཏི. པཝེཎཱིཏི སམྦནྡྷོ. སབྦམེཏཾ ཙཱརིཏྟཀིརིཡཱཔབནྡྷསྶ ཝཙནཾ. ཙཱརིཏྟསཱིལཏྟཱ སཱིལམཡཾ. ‘‘དསྶཱམཱི’’ཏི ཝཙཱིབྷེདེན ཝཏྠུསྶ པརིཎཏཏྟཱ ཏཏོ པཊྛཱཡ དཱནཾ ཨཱརདྡྷཾ ནཱམ ཧོཏི ¶ , ཡཏོ ཏསྶ ཨཏྟནོ པརིཎཱམནཱདཱིསུ ཨཱཔཏྟི ཧོཏི. ཝིཛྫམཱནཝཏྠུསྨིཾ ཙིནྟནཀཱལཏོ པཊྛཱཡ དཱནཾ ཨཱརདྡྷནྟི ཏཏྠ དཱནམཡཾ ཀུསལཾ ཧོཏཱིཏི ཨདྷིཔྤཱཡོ. ན ཧི དཱནཝཏྠུཾ ཨཝིཛྫམཱནཀམྤི སངྑརོནྟསྶ ཀུསལཾ ན ཧོཏཱིཏི. ཏཾ པན དཱནམཡསྶ པུབྦབྷཱགོཏི ཏདེཝ བྷཛེཡྻ, ཝུཏྟཾ ཨཊྛཀཐཱཡཾ. ཀུལཝཾསཱདིཝསེནཱཏི ཨུདཱཧརཎམཏྟམེཝེཏཾ. ཨཏྟནཱ སམཱདིནྣཝཏྟཝསེན སཔྤུརིསཝཏྟགཱམཛནཔདཝཏྟཱདིཝསེན ཙ ཙཱརིཏྟསཱིལཏཱ ཝེདིཏབྦཱ.

སཝཏྠུཀནྟི བྷེརིཨཱདིཝཏྠུསཧིཏཾ ཀཏྭཱ. ཝིཛྫམཱནཀཝཏྠུནྟི བྷེརིཨཱདིཝཏྠུཾ. དྷམྨསྶཝནགྷོསནཱདཱིསུ ཙ སཝཏྠུཀཾ ཀཏྭཱ སདྡསྶ དཱནཾ སདྡཝཏྠཱུནཾ ཋཱནཀརཎཱནཾ སསདྡཔྤཝཏྟིཀརཎམེཝཱཏི ཏསྶ ཙིནྟནཾ ཝིཛྫམཱནཝཏྠུཔརིཙྩཱགོ ཝེདིཏབྦོ. བྷཱཛེཏྭཱ དསྶེསི དྷམྨརཱཛཱ ཨིདྷ ཙ རཱུཔཱརམྨཎཱདིབྷཱཝཾ, ཨཉྙཏྠ ཙ ‘‘ཏཱིཎིམཱནི, བྷིཀྑཝེ, པུཉྙཀིརིཡཝཏྠཱུནཱི’’ཏི (དཱི. ནི. ༣.༣༠༥) དཱནམཡཱདིབྷཱཝཾ, ཨཔརཏྠ ཙ ‘‘ཀཏམེ དྷམྨཱ ཀུསལཱ? ཏཱིཎི…པེ… ཏཾསམུཊྛཱནཾ ཀཱཡཀམྨ’’ནྟིཨཱདིནཱ ཀཱཡཀམྨཱདིབྷཱཝཉྩ ཝདནྟོ. ཨཔརིཡཱཔནྣཱ ཙཱཏི པརམཏྠཏོ ཨཝིཛྫམཱནཏྟཱ ཨཉྙཱཡཏནཏྟཱ ཙ ཨསངྒཧིཏཱ.

པརིབྷོགརསོ པརིབྷོགཔཙྩཡཾ པཱིཏིསོམནསྶཾ. ཨཡཾ པན རསསམཱནཏཱཝསེན གཧཎཾ ཨུཔཱདཱཡ རསཱརམྨཎནྟི ཝུཏྟོ, ན སབྷཱཝཏོ. སབྷཱཝེན པན གཧཎཾ ཨུཔཱདཱཡ པཱིཏིསོམནསྶཾ དྷམྨཱརམྨཎམེཝ ཧོཏཱིཏི ‘‘སུཁཱ ཝེདནཱ དྷམྨཱརམྨཎ’’ནྟི ཝུཏྟཾ. ཨཱརམྨཎམེཝ ནིབདྡྷནྟི རཱུཔཱརམྨཎཾ…པེ… དྷམྨཱརམྨཎནྟི ཨེཝཾ ནིཡམེཏྭཱ ཝུཏྟཾ. ཀམྨསྶ ཨནིབདྡྷཏྟཱཏི ཀམྨསྶ ཨནིཡཏཏྟཱ. ཡཐཱ ཧི རཱུཔཱདཱིསུ ཨེཀཱརམྨཎཾ ཙིཏྟཾ ཨནཉྙཱརམྨཎཾ ཧོཏི, ན ཨེཝཾ ཀཱཡདྭཱརཱདཱིསུ ཨེཀདྭཱརིཀཀམྨཾ ཨཉྙསྨིཾ དྭཱརེ ནུཔྤཛྫཏི, ཏསྨཱ ཀམྨསྶ དྭཱརནིཡམརཧིཏཏྟཱ དྭཱརམྤི ཀམྨནིཡམརཧིཏནྟི ཨིདྷ ཨཱརམྨཎཾ ཝིཡ ནིཡམེཏྭཱ ན ཝུཏྟཾ. ཝིནཱ ཨཱརམྨཎེན ཨནུཔྤཛྫནཏོཏི ཨེཏསྶཔི ཙཏྠོ ‘‘ཡཐཱ ཀཱཡཀམྨཱདཱིསུ ཨེཀཾ ཀམྨཾ ཏེན དྭཱརེན ཝིནཱ ཨཉྙསྨིཾ ¶ དྭཱརེ ཙརཏི, ན ཨེཝཾ རཱུཔཱདཱིསུ ཨེཀཱརམྨཎཾ ཙིཏྟཾ ཏེནཱརམྨཎེན ཝིནཱ ཨཱརམྨཎནྟརེ ཨུཔྤཛྫཏཱི’’ཏི ཝེདིཏབྦོ. ན ཧི ཡཐཱ ཝཙཱིདྭཱརེ ཨུཔྤཛྫམཱནམྤི ‘‘ཀཱཡཀམྨ’’ནྟི ཝུཙྩཏི, ཨེཝཾ སདྡཱརམྨཎེ ཨུཔྤཛྫམཱནཾ ‘‘རཱུཔཱརམྨཎ’’ནྟི ཝུཙྩཏི.

ཀཱམཱཝཙརཀུསལཾ

ཀཱཡཀམྨདྭཱརཀཐཱཝཎྞནཱ

ཨིམསྶ ¶ པནཏྠསྶཱཏི ཀམྨདྭཱརཱནཾ ཨཉྙམཉྙསྨིཾ ཨནིཡཏཏཱཡ ‘‘དྭཱརེ ཙརནྟི ཀམྨཱནཱི’’ཏིཨཱདིནཱ པཀཱསནཏྠཾ. པཉྩ ཝིཉྙཱཎཱནཱིཏི ཨེཏྠ ཚཊྛསྶ ཝིཉྙཱཎསྶ ཏསྶ ཙ དྭཱརསྶ ཨནུདྡེསོ དྭཱརདྭཱརཝནྟཱནཾ སཧཱབྷཱཝཱ. ནིཡཏརཱུཔརཱུཔཝསེན ཙཏུསམུཊྛཱནིཀཀཱཡཱ ཝུཏྟཱཏི སདྡསྶ ཝིཀཱརརཱུཔཱདཱིནཉྩ ཨསངྒཧོ.

པཋམཛཝནསམུཊྛིཏཱ ཝཱཡོདྷཱཏུ ཡདིཔི ཏསྨིཾ ཁཎེ རཱུཔཱནཾ དེསནྟརུཔྤཏྟིཧེཏུབྷཱཝེན ཙཱལེཏུཾ ན སཀྐོཏི, ཏཐཱཔི ཝིཉྙཏྟིཝིཀཱརསཧིཏཱཝ སཱ ཝེདིཏབྦཱ. དསསུ ཧི དིསཱསུ ཡཾ དིསཾ གནྟུཀཱམོ ཨངྒཔཙྩངྒཱནི ཝཱ ཁིཔིཏུཀཱམོ, ཏཾདིསཱབྷིམུཁཱནེཝ རཱུཔཱནི སཱ སནྠམྦྷེཏི སནྡྷཱརེཏི ཙཱཏི ཏདབྷིམུཁབྷཱཝཝིཀཱརཝཏཱི ཧོཏི, ཨདྷིཔྤཱཡསཧབྷཱཝཱི ཙ ཝིཀཱརོ ཝིཉྙཏྟཱིཏི. ཨེཝཉྩ ཀཏྭཱ ཨཱཝཛྫནསྶཔི ཝིཉྙཏྟིསམུཊྛཱཔཀབྷཱཝོ ཡཐཱདྷིཔྤཱཡཝིཀཱརརཱུཔུཔྤཱདནེན ཨུཔཔནྣོ ཧོཏི, ཡཏོ བཱཏྟིཾས ཙིཏྟཱནི རཱུཔིརིཡཱཔཐཝིཉྙཏྟིཛནཀཱནི ཝུཏྟཱནཱིཏི. ཡོཛནཾ གཏོ, དསཡོཛནཾ གཏོཏི ཝཏྟབྦཏཾ ཨཱཔཛྫཱཔེཏི ཨནེཀསཧསྶཝཱརཾ ཨུཔྤནྣཱ.

ཝཱཡོདྷཱཏུཡཱ…པེ… པཙྩཡོ བྷཝིཏུནྟི ཐམྦྷནཙལནེསུ ཝཱཡོདྷཱཏུཡཱ པཙྩཡོ བྷཝིཏུཾ སམཏྠོ ཙིཏྟསམུཊྛཱནམཧཱབྷཱུཏཱནཾ ཨེཀོ ཨཱཀཱརཝིསེསོ ཨཏྠི, ཨཡཾ ཝིཉྙཏྟི ནཱམ. ཏེསཉྷི ཏདཱཀཱརཏྟཱ ཝཱཡོདྷཱཏུ ཐམྦྷེཏི ཙཱལེཏི ཙཱཏི. ན ཙིཏྟསམུཊྛཱནཱཏི ཨེཏེན པརམཏྠཏོ ཨབྷཱཝཾ དསྶེཏི. ན ཧི རཱུཔཾ ཨཔྤཙྩཡཾ ཨཏྠི, ན ཙ ནིབྦཱནཝཛྫོ ཨཏྠོ ནིཙྩོ ཨཏྠཱིཏི. ཝིཉྙཏྟིཏཱཡཱཏི ཝིཉྙཏྟིཝིཀཱརཏཱཡ. ཙིཏྟསམུཊྛཱནབྷཱཝོ ཝིཡ མཧཱབྷཱུཏཝིཀཱརཏཱཡ ཨུཔཱདཱརཱུཔབྷཱཝོ ཙ ཨདྷིཔྤེཏོཏི ཝེདིཏབྦོ.

ཀཱཡིཀཀརཎནྟི ¶ ཀཱཡདྭཱརཔྤཝཏྟཾ ཙིཏྟཀིརིཡཾ, ཨདྷིཔྤཱཡནྟི ཨཏྠོ. ཀཱརེཏི མཉྙེཏི ཨེཏེན ཝཎྞགྒཧཎཱནུསཱརེན གཧིཏཱཡ ཝིཉྙཏྟིཡཱ ཡཾ ཀརཎཾ ཝིཉྙཱཏབྦཾ, ཏསྶ ཝིཛཱནནེན ཝིཉྙཏྟིཡཱ ཝིཉྙཱཏཏྟཾ དསྶེཏི. ན ཧི ཝིཉྙཏྟིརཧིཏེསུ རུཀྑཙལནཱདཱིསུ ‘‘ཨིདམེས ཀཱརེཏཱི’’ཏི ཝིཛཱནནཾ ཧོཏཱིཏི. ཙཀྑུཝིཉྙཱཎསྶ ཧི རཱུཔེ ཨབྷིནིཔཱཏམཏྟཾ ཀིཙྩཾ, ན ཨདྷིཔྤཱཡསཧབྷུནོ ཙལནཝིཀཱརསྶ གཧཎཾ. ཙིཏྟསྶ པན ལཧུཔརིཝཏྟིཏཱཡ ཙཀྑུཝིཉྙཱཎཝཱིཐིཡཱ ¶ ཨནནྟརཾ མནོཝིཉྙཱཎེན ཝིཉྙཱཏམྤི ཙལནཾ ཙཀྑུནཱ དིཊྛཾ ཝིཡ མཉྙནྟི ཨཝིསེསཝིདུནོ, ཏསྨཱ ཡཐཱ ནཱིལཱབྷིནིཔཱཏཝསཔྤཝཏྟཱཡ ཙཀྑུཝིཉྙཱཎཝཱིཐིཡཱ ནཱིལནྟི པཝཏྟཱཡ མནོཝིཉྙཱཎཝཱིཐིཡཱ ཙ ཨནྟརཾ ན ཝིཉྙཱཡཏི, ཨེཝཾ ཨཝིཉྙཱཡམཱནནྟརེན མནོདྭཱརཝིཉྙཱཎེན གཧིཏེ ཏསྨིཾ ཙིཏྟེན སཧེཝ ཨནུཔརིཝཏྟེ ཀཱཡཐམྦྷནཝིཀཱརཙོཔནསངྑཱཏེ ‘‘ཨིདམེས ཀཱརེཏི, ཨཡམསྶ ཨདྷིཔྤཱཡོ’’ཏི ཝིཛཱནནཾ ཧོཏི.

ཏཱལཔཎྞཱདིརཱུཔཱནི དིསྭཱ ཏདནནྟརཔྤཝཏྟཱཡ མནོདྭཱརཝཱིཐིཡཱ ཨཝིཉྙཱཡམཱནནྟརཱཡ ཏཱལཔཎྞཱདཱིནཾ ཨུདཀཱདིསཧཙཱརིཔྤཀཱརཏཾ སཉྙཱཎཱཀཱརཾ གཧེཏྭཱ ཨུདཀཱདིགྒཧཎཾ ཝིཡ. ཨེཏྠ ཨུདཀཾ བྷཝིསྶཏཱིཏིཨཱདིནཱ ཙ ཨུདཀཱདིསམྦནྡྷནཱཀཱརེན རཱུཔགྒཧཎཱནུསཱརཝིཉྙཱཎེན ཡཾ ཨུདཀཱདི ཝིཉྙཱཏབྦཾ, ཏསྶ ཝིཛཱནནེན ཏདཱཀཱརསྶ ཝིཉྙཱཏཏཱ ཝུཏྟཱཏི དཊྛབྦཱ. ཨེཏསྶ པན ཀཱཡིཀཀརཎགྒཧཎསྶ ཨུདཀཱདིགྒཧཎསྶ ཙ པུརིམསིདྡྷསམྦནྡྷགྒཧཎཾ ཨུཔནིསྶཡོ ཧོཏཱིཏི དཊྛབྦཾ. ཨཐ པན ནཱལམྦིཏཱཔི ཝིཉྙཏྟི ཀཱཡིཀཀརཎགྒཧཎསྶ ཙ པཙྩཡོ པུརིམསིདྡྷསམྦནྡྷགྒཧཎོཔནིསྶཡཝསེན སཱདྷིཔྤཱཡཝིཀཱརབྷཱུཏཝཎྞགྒཧཎཱནནྟརཾ པཝཏྟམཱནསྶ ཨདྷིཔྤཱཡགྒཧཎསྶ ཨདྷིཔྤཱཡསཧབྷཱུཝིཀཱརཱབྷཱཝེ ཨབྷཱཝཏོ, ཨེཝཾ སཏི ཝཎྞགྒཧཎཱནནྟརེན ཨུདཀཱདིགྒཧཎེནེཝ ཏཱལཔཎྞཱདིསཉྙཱཎཱཀཱརོ ཝིཡ ཝཎྞགྒཧཎཱནནྟརེན ཨདྷིཔྤཱཡགྒཧཎེནེཝ ཝིཉྙཏྟི པཱཀཊཱ ཧོཏཱིཏི ‘‘ཨིདཉྩིདཉྩ ཨེས ཀཱརེཏི མཉྙེ’’ཏི ཨདྷིཔྤཱཡཝིཛཱནནེནེཝ ཝིཉྙཏྟིཡཱ ཝིཉྙཱཏཏཱ ཝུཏྟཱ.

ཨཡཾ ནོ པཧརིཏུཀཱམོཏི ཨདྷིཔྤཱཡཝིཛཱནནེན ཝིཉྙཏྟིཡཱ པཱཀཊབྷཱཝཾ དསྶེཏི. ན ཧི ཏདཔཱཀཊབྷཱཝེ ཨདྷིཔྤཱཡཝིཛཱནནཾ ཧོཏཱིཏི. སམྨུཁཱི…པེ… ཡེཝ ནཱམ ཧོཏཱིཏི ཨསམྨུཁཱིབྷཱུཏཏཱཡ ཨནཱཔཱཐགཏཱནཾ རཱུཔཱདཱིནཾ ཙཀྑུཝིཉྙེཡྻཱདིབྷཱཝོ ཝིཡ སབྷཱཝབྷཱུཏཾ ཏཾ དྭིདྷཱ ཝིཉྙཏྟིབྷཱཝཾ སཱདྷེཏི. པརཾ བོདྷེཏུཀཱམཏཱཡ ཝིནཱཔི ཨབྷིཀྐམནཱདིཔྤཝཏྟནེན སོ ཙིཏྟསཧབྷཱུཝིཀཱརོ ¶ ཨདྷིཔྤཱཡཾ ཝིཉྙཱཔེཏི, སཡཉྩ ཝིཉྙཱཡཏཱིཏི དྭིདྷཱཔི ཝིཉྙཏྟིཡེཝཱཏི ཝེདིཏབྦཱ.

ཏསྨིཾ དྭཱརེ སིདྡྷཱཏི ཏེན དྭཱརེན ཝིཉྙཱཏབྦབྷཱཝཏོ ཏེནེཝ དྭཱརེན ནཱམལཱབྷཏོ ཏསྨིཾ དྭཱརེ པཱཀཊབྷཱཝཝསེན སིདྡྷཱ. ཀུསལཾ ཝཱ ཨཀུསལཾ ཝཱཏི ཋཔེཏབྦཾ. ཀསྨཱ? ཡསྨཱ པརཝཱདིནོ ཨཝིཔཱཀསྶ ཀམྨབྷཱཝོ ¶ ན སིདྡྷོ, ཨིཏརསྶ པན སིདྡྷོཏི ཝིཉྙཏྟིསམུཊྛཱཔཀཱནཾ ཨེཀཱདསནྣཾ ཀིརིཡཙིཏྟཱནཾ ཝསེན ཏིཀཾ པཱུརེཏྭཱ ཋཔེཏབྦཾ.

དྭཱརེ ཙརནྟི ཀམྨཱནཱིཏི ཨེཏྠ ཨཡམདྷིཔྤཱཡོ – ཡདི དྭཱརཱ དྭཱརནྟརཙཱརིནོ ཧོནྟི, དྭཱརསམྦྷེདཱ ཀམྨསམྦྷེདོཔཱིཏི ཀཱཡཀམྨཾ ཀཱཡཀམྨདྭཱརནྟི ཨཉྙམཉྙཝཝཏྠཱནཾ ན སིཡཱ, ཀམྨཱནམྤི ཀམྨནྟརཙརཎེ ཨེསེཝ ནཡོ. ཡདི པན དྭཱརཱནམྤི དྭཱརབྷཱཝེན ཀམྨནྟརཙརཎཾ ཀམྨཱནཉྩ དྭཱརནྟརཙརཎཾ ན སིཡཱ, སུཊྛུཏརཾ ཀམྨདྭཱརཝཝཏྠཱནཾ སིཡཱ. ན པན ཀམྨཱནཾ དྭཱརནྟརེ ཨཙརཎཾ ཨཏྠི, ཀིནྟུ དྭཱརེ ཨཉྙསྨིཉྩ ཙརནྟི ཀམྨཱནི ཨཉྙཱནིཔི. ཡསྨཱ པན དྭཱརེ དྭཱརཱནི ན ཙརནྟི, ཏསྨཱ ཨདྭཱརཙཱརཱིཧི དྭཱརེཧི ཀཱརཎབྷཱུཏེཧི ཀམྨཱནི དྭཱརནྟརེ ཙརནྟཱནིཔི ཝཝཏྠིཏཱནི. ན ཀེཝལཾ ཀམྨཱནེཝ, ཏེཧི པན དྭཱརཱནིཔཱིཏི ཨེཝཾ ཀམྨདྭཱརཱནི ཨཉྙམཉྙཾ ཝཝཏྠིཏཱནི ‘‘ཡེབྷུཡྻེནཝུཏྟིཏཱཡ ཏབྦཧུལཝུཏྟིཏཱཡ ཙཱ’’ཏི ཝུཙྩམཱནཱཡ ཝཝཏྠཱནཡུཏྟིཡཱ. ཏཏྠ དྭཱརཱཔེཀྑཏྟཱ ཀམྨཱནཾ ཀཱཡཀམྨཱདིབྷཱཝསྶ ཨདྭཱརཙཱརཱིཧི དྭཱརེཧི ཝཝཏྠཱནཾ ཧོཏི, ན པན དྭཱརནྟརཙཱརཱིཧི ཀམྨེཧི དྭཱརཱནཾ ཨཝཝཏྠཱནཾ ཀམྨཱནཔེཀྑཀཱཡདྭཱརཱདིབྷཱཝེཧི དྭཱརེཧི ཝཝཏྠིཏཱནཾ ཀཱཡཀམྨཱདཱིནཾ ཀཱཡཀམྨདྭཱརཱདིཝཝཏྠཱནཀརཏྟཱ. ཨཐ ཝཱ དྭཱརནྟརེ ཙརནྟཱནིཔི ཀཱཡཱདཱིཧི ཨུཔལཀྑིཏཱནེཝ ཙརནྟི པཱཎཱཏིཔཱཏཱདཱིནཾ ཨེཝཾསབྷཱཝཏྟཱ ཨཱཎཏྟིཧཏྠཝིཀཱརཱདཱིཧི ཝུཙྩམཱནསྶཔི ཀཱཡཱདཱིཧི སཱདྷེཏབྦསབྷཱཝཱཝབོདྷཏོ, ཏསྨཱ ན ཀམྨནྟརསྶ ཨཏྟནི ཙརནྟསྶཔི དྭཱརནྟརཾ སནཱམཾ དེཏི, ནཱཔི ཀམྨཾ དྭཱརསྶ, ཏཾཏཾདྭཱརམེཝ པན ཀམྨསྶ ཀམྨཉྩ དྭཱརནྟརེ ཙརནྟམྤི ཨཏྟནོཡེཝ དྭཱརསྶ ནཱམཾ དེཏཱིཏི སིདྡྷཾ ཨཉྙམཉྙཝཝཏྠཱནཾ. པུབྦེ པན དྭཱརེསུ ཨནིབདྡྷཏཱ ཀམྨཱནཾ དྭཱརནྟརཙརཎམེཝ སནྡྷཱཡ ཝུཏྟཱ, ན ཨེཏཾ ཝཝཏྠཱནནྟི.

ཏཏྠཱཏི ཏེསུ དྭཱརཀམྨེསུ. ཀཱཡཀམྨསྶ ཨུཔྤཛྫནཊྛཱནནྟི ཏཾསཧཛཱཏཱ ཝིཉྙཏྟིཡེཝ ཝུཙྩཏི. ཀིཉྩཱཔི ཧི སཱ ཏསྶ ཀེནཙི པཀཱརེན པཙྩཡོ ན ཧོཏི, ཏཐཱཔི ཀམྨསྶ ཝིསེསིཀཱ ¶ ཝིཉྙཏྟི ཏཾསཧཛཱཏཱ ཧོཏཱིཏི ཏསྶ ཨུཔྤཏྟིཊྛཱནབྷཱཝེན ཝུཏྟཱ ཡཐཱཝུཏྟནིཡམེན ཨཉྙཝིསེསནསྶ ཀམྨསྶ ཝིསེསནནྟརེ ཨུཔྤཏྟིཨབྷཱཝཱ. ཀཱཡེན པན ཀཏཏྟཱཏི ཀཱཡཝིཉྙཏྟིཾ ཛནེཏྭཱ ཏཱཡ ཛཱིཝིཏིནྡྲིཡུཔཙྪེདཱདིནིཔྥཱདནཏོ ཨཏྟནོ ནིཔྥཏྟིཝསེན ‘‘ཀཱཡེན ཀཏཾ ཀམྨ’’ནྟི ཝུཏྟཾ. ཀཱརཎབྷཱུཏོ ཧི པནེཏྠ ཀཱཡོཏི.

ཨཉྙམཉྙཾ ¶ ཝཝཏྠིཏཱཏི ཨེཏྠ ཀམྨུནཱ ཀཱཡོ ཀཱཡཀམྨདྭཱརནྟི ཨེཝཾ ཝཝཏྠིཏོ, ན ཀཱཡོ ཨིཙྩེཝ. ཡཐཱ སཱུཙིཀམྨུནཱ སཱུཙིཀམྨཀརཎནྟི ཝཝཏྠིཏཱ, ན སཱུཙི ཨིཙྩེཝ, ཏཐཱ ཨིདམྤི དཊྛབྦཾ. ཨཉྙམཉྙཾ ཝཝཏྠིཏཱཏི ཙ ཨཉྙམཉྙཾ ཝིསེསིཏཱཏི ཨཏྠོ. ཨེཝཾ སནྟེཏི ཡཐཱཝུཏྟཾ ཝཝཏྠཱནནིཡམཾ ཨགྒཧེཏྭཱ ‘‘དྭཱརེ ཙརནྟི ཀམྨཱནཱི’’ཏིཨཱདིཝཙནམེཝ གཧེཏྭཱ ཙོདེཏི. ཏཏྠ ཨེཝཾ སནྟེཏི ཀམྨཱནཾ དྭཱརཙརཎེ ཨཉྙམཉྙེན ཙ ཝཝཏྠཱནེ ནཱམལཱབྷེ ཝིསེསནེ སཏཱིཏི ཨཏྠོ.

ཀཱཡཀམྨདྭཱརཀཐཱཝཎྞནཱ ནིཊྛིཏཱ.

ཝཙཱིཀམྨདྭཱརཀཐཱཝཎྞནཱ

ཙཏཱུཧི, བྷིཀྑཝེ, ཨངྒེཧི སམནྣཱགཏཱཏི ཨེཏྠ སུབྷཱསིཏབྷཱསནསངྑཱཏཱ ཨཔིསུཎཝཱཙཱ, དྷམྨབྷཱསནསངྑཱཏོ ཨསམྥཔྤལཱཔོ, པིཡབྷཱསནསངྑཱཏཱ ཨཕརུསཝཱཙཱ, སཙྩབྷཱསནསངྑཱཏོ ཨམུསཱཝཱདོ ཙཱཏི ཨེཏཱ ཝཱཙཱ ཏཐཱཔཝཏྟཱ ཙེཏནཱ དཊྛབྦཱ. སཧསདྡཱ པནཱཏི ཏསྶ ཝིཀཱརསྶ སདྡེན སཧ སམྦྷཱུཏཏྟཱ ཝུཏྟཾ. ཙིཏྟཱནུཔརིཝཏྟིཏཱཡ པན སོ ན ཡཱཝ སདྡབྷཱཝཱིཏི དཊྛབྦོ, ཝིཏཀྐཝིཔྥཱརསདྡོ ན སོཏཝིཉྙེཡྻོཏི པཝཏྟེན མཧཱཨཊྛཀཐཱཝཱདེན ཙིཏྟསམུཊྛཱནསདྡོ ཝིནཱཔི ཝིཉྙཏྟིགྷཊྚནེན ཨུཔྤཛྫཏཱིཏི ཨཱཔཛྫཏི. ‘‘ཡཱ ཏཱཡ ཝཱཙཱཡ ཝིཉྙཏྟཱི’’ཏི (དྷ. ས. ༦༣༦) ཧི ཝཙནཏོ ཨསོཏཝིཉྙེཡྻསདྡེན སཧ ཝིཉྙཏྟིཡཱ ཨུཔྤཏྟི ནཏྠཱིཏི ཝིཉྙཱཡཏཱིཏི.

ཙིཏྟསམུཊྛཱནཾ སདྡཱཡཏནནྟི ཨེཏྠ ཙ ན ཀོཙི ཙིཏྟསམུཊྛཱནོ སདྡོ ཨསངྒཧིཏོ ནཱམ ཨཏྠཱིཏི ཨདྷིཔྤཱཡེན མཧཱཨཊྛཀཐཱཝཱདཾ པཊིསེདྷེཏི. ཚབྦིདྷེན རཱུཔསངྒཧཱདཱིསུ ཧི ‘‘སོཏཝིཉྙེཡྻ’’ནྟི ‘‘དིཊྛཾ སུཏ’’ནྟི ཨེཏྠ ‘‘སུཏ’’ནྟི ཙ ན ཀོཙི སདྡོ ན སངྒཡ྄ཧཏཱིཏི. མཧཱཨཊྛཀཐཱཡཾ ¶ པན ཝིཉྙཏྟིསཧཛམེཝ ཛིཝ྄ཧཱཏཱལུཙལནཱདིཀརཝིཏཀྐསམུཊྛིཏཾ སུཁུམསདྡཾ ‘‘དིབྦསོཏེན སུཏྭཱ ཨཱདིསཏཱི’’ཏི སུཏྟེ པཊྛཱནེ ཙ ཨོལཱ༹རིཀསདྡཾ སནྡྷཱཡ ‘‘སོཏཝིཉྙཱཎསྶ ཨཱརམྨཎཔཙྩཡེན པཙྩཡོ’’ཏི ཝུཏྟནྟི ཨིམིནཱ ཨདྷིཔྤཱཡེན ཨསོཏཝིཉྙེཡྻཏཱ ཝུཏྟཱ སིཡཱ. སདྡོ ¶ ཙ ཨསོཏཝིཉྙེཡྻོ ཙཱཏི ཝིརུདྡྷམེཏནྟི པན པཊིཀྑེཔོ ཝེདིཏབྦོ. ཝིཉྙཏྟིཔཙྩཡཱ གྷཊྚནཱ ཝིཉྙཏྟིགྷཊྚནཱ. ཝིཉྙཏྟི ཨེཝ ཝཱ. གྷཊྚནཱཀཱརཔྤཝཏྟབྷཱུཏཝིཀཱརོ ཧི ‘‘གྷཊྚནཱ’’ཏི ཝུཏྟོ. སངྒྷཊྚནེན སཧེཝ སདྡོ ཨུཔྤཛྫཏི, ན པུབྦཱཔརབྷཱཝེན. པཐཝཱིདྷཱཏུཡཱཏི ཨིདཾ ཝཱཡོདྷཱཏུཡཱ ཝིཡ ཙཱལནཾ པཐཝཱིདྷཱཏུཡཱ སངྒྷཊྚནཾ ཀིཙྩཾ ཨདྷིཀནྟི ཀཏྭཱ ཝུཏྟཾ, ཝིཀཱརསྶ ཙ ཏཔྤཙྩཡབྷཱཝོ ཝུཏྟནཡེནེཝ ཝེདིཏབྦོ. ཏབྦིཀཱརཱནཉྷི བྷཱུཏཱནཾ ཨཉྙམཉྙསྶ པཙྩཡབྷཱཝོཏི. ཨཉྙམྤི སབྦཾ ཝིདྷཱནཾ ཀཱཡཝིཉྙཏྟིཡཾ ཝིཡ ཝེདིཏབྦཾ.

ཏིསམུཊྛཱནིཀཀཱཡཾ…པེ… ན ལབྦྷཏི. ན ཧི ཙཱལནཾ ཨུཔཱདིནྣགྷཊྚནནྟི. ཙཱལནཉྷི དེསནྟརུཔྤཱདནཔརམྤརཏཱ, གྷཊྚནཾ པཙྩཡཝིསེསེན བྷཱུཏཀལཱཔཱནཾ ཨཱསནྣཏརུཔྤཱདོཏི. ཨུཔཏྠམྦྷནཀིཙྩམྤི ནཏྠཱིཏི ཨུཔཏྠམྦྷནེན ཝིནཱ པཋམཙིཏྟསམུཊྛཱནཱཔི གྷཊྚནཱཀཱརེན པཝཏྟཏཱིཏི གྷཊྚནཏྠཾ ཨུཔཏྠམྦྷནེན པཡོཛནཾ ནཏྠི, ལདྡྷཱསེཝནེན ཙིཏྟེནེཝ གྷཊྚནསྶ བལཝབྷཱཝཏོ ཙཱཏི ཨདྷིཔྤཱཡོ. ཨུཔཏྠམྦྷནཾ ནཏྠི ཨཏྠཱིཏི ཝིཙཱརེཏྭཱ གཧེཏབྦཾ.

ཝཙཱིཀམྨདྭཱརཀཐཱཝཎྞནཱ ནིཊྛིཏཱ.

མནོཀམྨདྭཱརཀཐཱཝཎྞནཱ

ཨཡཾ ནཱམ ཙེཏནཱ ཀམྨཾ ན ཧོཏཱིཏི ན ཝཏྟབྦཱཏི ཨིདཾ ཡསྶ དྭཱརཾ མནོ, ཏཾདསྶནཏྠཾ ཝུཏྟཾ. ཀཔྤེཏཱིཏི ‘‘ཏྭཾ ཕུསནཾ ཀརོཧི, ཏྭཾ ཝེདཡིཏ’’ནྟི ཨེཝཾ ཀཔྤེནྟཾ ཝིཡ པཝཏྟཏཱིཏི ཨཏྠོ. པཀཔྤནཉྩ ཏདེཝ. ཀིཾ པིཎྜཾ ཀརོཏཱིཏི ཨཱཡཱུཧནཏྠཝསེན པུཙྪཏི. ཕསྶཱདིདྷམྨེ ཧི ཨཝིཔྤཀིཎྞེ ཀཏྭཱ སཀིཙྩེསུ པཝཏྟནཾ ཨཱཡཱུཧནཾ, ཏཏྠེཝ བྱཱཔཱརཎཾ ཙེཏཡནཾ, ཏཐཱཀརཎཾ ཨབྷིསངྑརཎནྟི. ཏེབྷཱུམཀསྶེཝ གཧཎཾ ལོཀུཏྟརཀམྨསྶ ཀམྨཀྑཡཀརཏྟཱ.

མནོཀམྨདྭཱརཀཐཱཝཎྞནཱ ནིཊྛིཏཱ.

ཀམྨཀཐཱཝཎྞནཱ

ཙེཏཡིཏྭཱ ¶ ¶ ཀམྨཾ ཀརོཏཱིཏི ཨེཏྠ ཡསྨཱ པུརིམཙེཏནཱཡ ཙེཏཡིཏྭཱ སནྣིཊྛཱནཀམྨཾ ཀརོཏི, ཏསྨཱ ཙེཏནཱཔུབྦཀཾ ཀམྨཾ ཏཾཙེཏནཱསབྷཱཝམེཝཱཏི ཙེཏནཾ ཨཧཾ ཀམྨཾ ཝདཱམཱིཏི ཨཏྠོ. ཨཐ ཝཱ སམཱནཀཱལཏྟེཔི ཀཱརཎཀིརིཡཱ པུབྦཀཱལཱ ཝིཡ ཝཏྟུཾ ཡུཏྟཱ, ཕལཀིརིཡཱ ཙ ཨཔརཀཱལཱ ཝིཡ. ཡསྨཱ ཙ ཙེཏནཱཡ ཙེཏཡིཏྭཱ ཀཱཡཝཱཙཱཧི ཙོཔནཀིརིཡཾ མནསཱ ཙ ཨབྷིཛ྄ཛྷཱདིཀིརིཡཾ ཀརོཏི, ཏསྨཱ ཏསྶཱ ཀིརིཡཱཡ ཀཱརིཀཾ ཙེཏནཾ ཨཧཾ ཀམྨཾ ཝདཱམཱིཏི ཨཏྠོ. ཀཱཡེ ཝཱཏི ཀཱཡཝིཉྙཏྟིསངྑཱཏེ ཀཱཡེ ཝཱ. སཏཱིཏི དྷརམཱནེ, ཨནིརོདྷིཏེ ཝཱ. ཀཱཡསམུཊྛཱཔིཀཱ ཙེཏནཱ ཀཱཡསཉྩེཏནཱ. ཨེཏྠ ཙ སུཁདུཀྑུཔྤཱདཀེན ཀམྨེན བྷཝིཏབྦཾ, ཙེཏནཱ ཙ སུཁདུཀྑུཔྤཱདིཀཱ ཝུཏྟཱཏི ཏསྶཱ ཀམྨབྷཱཝོ སིདྡྷོ ཧོཏི. སཉྩེཏནིཡནྟི སཉྩེཏནསབྷཱཝཝནྟཾ. སམིདྡྷིཏྠེརེན ‘‘སཉྩེཏནིཡཾ, ཨཱཝུསོ…པེ… མནསཱ སུཁཾ སོ ཝེདཡཏཱི’’ཏི (མ. ནི. ༣.༣༠༠; ཀཐཱ. ༥༣༩) ཨཝིབྷཛིཏྭཱ བྱཱཀཏོ. སུཁཝེདནཱིཡནྟིཨཱདིནཱ པན ཝིབྷཛིཏྭཱ བྱཱཀཱཏབྦོ སོ པཉྷོ, ཏསྨཱ སམྨཱ བྱཱཀཏོ ནཱམ ན ཧོཏི. ཨིཏརདྭཡེཔི ཨེསེཝ ནཡོ. ཡཐཱ པན སུཏྟཱནི ཋིཏཱནི, ཏཐཱ ཙོཔནཀིརིཡཱནིསྶཡབྷཱུཏཱ ཀཱཡཝཱཙཱ ཨབྷིཛ྄ཛྷཱདིཀིརིཡཱནིསྶཡོ ཙ མནོདྭཱརཱནི, ཡཱཡ པན ཙེཏནཱཡ ཏེཧི ཀཱཡཱདཱིཧི ཀརཎབྷཱུཏེཧི ཙོཔནཱབྷིཛ྄ཛྷཱདིཀིརིཡཾ ཀརོནྟི ཝཱསིཨཱདཱིཧི ཝིཡ ཚེདནཱདིཾ, སཱ ཙེཏནཱ ཀམྨནྟི དྭཱརཔྤཝཏྟིཡམྤི ཀམྨདྭཱརཱབྷེདནཉྩ ཀམྨདྭཱརཝཝཏྠཱནཉྩ དིསྶཏི, ཨེཝཉྩ སཏི ‘‘ཀཱཡེན ཙེ ཀཏཾ ཀམྨ’’ནྟིཨཱདིགཱཐཱཡོ (དྷ. ས. ཨཊྛ. ༡ ཀཱཡཀམྨདྭཱར) ཨཏིཝིཡ ཡུཛྫནྟི.

ལོཀུཏྟརམགྒོ ཨིདྷ ལོཀིཡཀམྨཀཐཱཡཾ ཨནདྷིཔྤེཏོཔི བྷཛཱཔིཡམཱནོ ཏཱིཎི ཀམྨཱནི བྷཛཏི. མནེན དུསྶཱིལྱནྟི ཀཱཡིཀཝཱཙསིཀཝཱིཏིཀྐམཝཛྫཾ སབྦཾ ཨཀུསལཾ སངྒཎྷཱཏི, མིཙྪཱདིཊྛིསངྐཔྤཝཱཡཱམསཏིསམཱདྷིཾ ཝཱ. ཏམྤི ཙེཏཾ ‘‘མནསཱ སཾཝརོ སཱདྷཱུ’’ཏི (སཾ. ནི. ༡.༡༡༦; དྷ. པ. ༣༦༡) ཝུཏྟསྶ སཾཝརསྶ པཊིཔཀྑཝསེན ཝུཏྟཾ, ན སཱིལཝིཔཏྟིཝསེན. ན ཧི སཱ མཱནསིཀཱ ཨཏྠཱིཏི མགྒསྶེཝ བྷཛཱཔནཾ མཧཱཝིསཡཏྟཱ. བོཛ྄ཛྷངྒཱ ཧི མནོཀམྨམེཝ བྷཛེཡྻུཾ, ན ཙ ན སཀྐཱ མགྒབྷཛཱཔནེནེཝ ཏེསཾ བྷཛཱཔནཾ ཝིཉྙཱཏུནྟི.

ཀམྨཔཐཾ ¶ ཨཔྤཏྟཱནམྤི ཏཾཏཾདྭཱརེ སཾསནྡནཾ ཨཝརོདྷནཾ དྭཱརནྟརེ ཀམྨནྟརུཔྤཏྟིཡམྤི ཀམྨདྭཱརཱབྷེདནཉྩ ¶ དྭཱརསཾསནྡནཾ ནཱམ. ‘‘ཏིཝིདྷཱ, བྷིཀྑཝེ, ཀཱཡསཉྩེཏནཱ ཨཀུསལཾ ཀཱཡཀམྨ’’ནྟིཨཱདིནཱ (ཀཐཱ. ༥༣༩) ཀམྨཔཐཔྤཏྟཱཝ སནྣིཊྛཱཔཀཙེཏནཱ ཀམྨནྟི ཝུཏྟཱཏི པུརིམཙེཏནཱ སབྦཱ ཀཱཡཀམྨཾ ན ཧོཏཱིཏི ཝུཏྟཾ. ཨཱཎཱཔེཏྭཱ…པེ… ཨལབྷནྟསྶཱཏི ཨཱཎཏྟེཧི ཨམཱརིཏབྷཱཝཾ སནྡྷཱཡ ཝུཏྟཾ, ཝཙཱིདུཙྩརིཏཾ ནཱམ ཧོཏི ཨཀམྨཔཐབྷཱཝཏོཏི ཨདྷིཔྤཱཡོ. ‘‘ཨིམེ སཏྟཱ ཧཉྙནྟཱུ’’ཏི པཝཏྟབྱཱཔཱདཝསེན ཙེཏནཱཔཀྑིཀཱ ཝཱ བྷཝནྟི ཀཱཡཀམྨཝོཧཱརལཱབྷཱ. ཨབྦོཧཱརིཀཱ ཝཱ མནོཀམྨཝོཧཱརཝིརཧཱ. སསམྦྷཱརཔཐཝཱིཨཱདཱིསུ ཨཱཔཱདཡོ ཨེཏྠ ནིདསྶནཾ.

ཀུལུམྦསྶཱཏི གབྦྷསྶ, ཀུལསྶེཝ ཝཱ. ཏིསྶོཔི སངྒཱིཏིཡོ ཨཱརུལ༹ྷཏཱཡ ཨནནུཛཱནནཏོ ‘‘ཏཝ སུཏྟསྶཱ’’ཏི ཝུཏྟཾ. དསཝིདྷཱ ཨིདྡྷི པཊིསམྦྷིདཱམགྒེ ཨིདྡྷིཀཐཱཡ གཧེཏབྦཱ. བྷཱཝནཱམཡནྟི ཨདྷིཊྛཱནིདྡྷིཾ སནྡྷཱཡ ཝདཏི. གྷཊབྷེདོ ཝིཡ པརཱུཔགྷཱཏོ, ཨུདཀཝིནཱསོ ཝིཡ ཨིདྡྷིཝིནཱསོ ཙ ཧོཏཱིཏི ཨུཔམཱ སཾསནྡཏི. ཏཝ པཉྷོཏི བྷཱཝནཱམཡཱཡ པརཱུཔགྷཱཏོ ཧོཏཱིཏི ཝུཏྟོ ཉཱཔེཏུཾ ཨིཙྪིཏོ ཨཏྠོ. ཨཱཐབྦཎིདྡྷི ཝིཛྫཱམཡིདྡྷི ཧོཏི. སཏྟམེ པདེཏི མཎྜལཱདིཏོ སཏྟམེ པདེ.

ཝཙནནྟརེན གམེཏབྦཏྠཾ ནེཡྻཏྠཾ, སཡམེཝ གམིཏབྦཏྠཾ ནཱིཏཏྠཾ. ཀིརིཡཏོ སམུཊྛཱཏི, ཨུདཱཧུ ཨཀིརིཡཏོཏི ཏེནཱདྷིཔྤེཏཾ སམྤཛཱནམུསཱཝཱདཾ སནྡྷཱཡ པུཙྪཏི, ན ཨུཔོསཐཀྑནྡྷཀེ ཝུཏྟཾ. ཏཏྠ ཨཝུཏྟམེཝ ཧི སོ ཨནརིཡཝོཧཱརཾ ཝུཏྟནྟི གཧེཏྭཱ ཝོཧརཏཱིཏི. ཝཱཙཱགིརནྟི ཝཱཙཱསངྑཱཏཾ གིརཾ, ཝཱཙཱནུཙྩཱརཎཾ ཝཱ.

ཁནྡསིཝཱདཡོ སེཊྛཱཏི ཁནྡཱཏི ཀུམཱརཱ. སིཝཱཏི མཧེསྶརཱ, མིཙྪཱདིཊྛིཡཱ ནིདསྶནཏྠམིདཾ ཝུཏྟནྟི དཊྛབྦཾ. ནཏྠིཀདིཊྛཱདཡོ ཨེཝ ཧི ཀམྨཔཐཔྤཏྟཱ ཀམྨནྟི. ཙེཏནཱ པནེཏྠ ཨབྦོཧཱརིཀཱཏི ཀཱཡདྭཱརེ ཝཙཱིདྭཱརེ ཙ སམུཊྛིཏཱཔི ཀཱཡཀམྨཾ ཝཙཱིཀམྨནྟི ཙ ཝོཧཱརཾ ན ལབྷཏི ཨབྷིཛ྄ཛྷཱདིཔྤདྷཱནཏྟཱ. ‘‘ཏིཝིདྷཱ, བྷིཀྑཝེ, མནོསཉྩེཏནཱ ཨཀུསལཾ མནོཀམྨ’’ནྟི པན ཝཙནཏོ སབྷཱཝེནེཝ སཱ མནོཀམྨཾ, ན ཨབྷིཛ྄ཛྷཱདིཔཀྑིཀཏྟཱཏི ‘‘ཨབྷིཛ྄ཛྷཱདིཔཀྑིཀཱཝཱ’’ཏི ན ཝུཏྟཾ. ཨིམསྨིཾ པན ཋཱནེ ཀཱཡངྒཝཱཙངྒཱནི ཨཙོཔེཏྭཱ ཙིནྟནཀཱལེ ཙེཏནཱཔི ཙེཏནཱསམྤཡུཏྟདྷམྨཱཔི མནོདྭཱརེ ¶ ཨེཝ སམུཊྛཧནྟི, ཏསྨཱ ཙེཏནཱཡ ཨབྦོཧཱརིཀབྷཱཝོ ཀཐཉྩི ནཏྠཱིཏི ཨདྷིཔྤཱཡོ.

‘‘ཏིཝིདྷཱ ¶ , བྷིཀྑཝེ, ཀཱཡསཉྩེཏནཱ ཀུསལཾ ཀཱཡཀམྨ’’ནྟིཨཱདིཝཙནཏོ (ཀཐཱ. ༥༣༩) པཱཎཱཏིཔཱཏཱདིཔཊིཔཀྑབྷཱུཏཱ ཏབྦིརཏིཝིསིཊྛཱ ཙེཏནཱཝ པཱཎཱཏིཔཱཏཝིརཏིཨཱདིཀཱ ཧོནྟཱིཏི ‘‘ཙེཏནཱཔཀྑིཀཱ ཝཱ’’ཏི ཝུཏྟཾ, ན ‘‘ཝིརཏིཔཀྑིཀཱ’’ཏི. རཀྑཏཱིཏི ཨཝིནཱསེཏྭཱ ཀཐེཏི. བྷིནྡཏཱིཏི ཝིནཱསེཏྭཱ ཀཐེཏི.

ཀམྨཀཐཱཝཎྞནཱ ནིཊྛིཏཱ.

ཙཀྑུཝིཉྙཱཎདྭཱརནྟི ཙཀྑུཝིཉྙཱཎསྶ དྭཱརཾ. ཙཀྑུ ཙ ཏཾ ཝིཉྙཱཎདྭཱརཉྩཱཏི ཝཱ ཙཀྑུཝིཉྙཱཎདྭཱརཾ. ཙཀྑུ ཝིཉྙཱཎདྭཱརནྟི ཝཱ ཨསམཱསནིདྡེསོ. ཏཾ པན ཙཀྑུམེཝ. ཨེས ནཡོ སེསེསུཔི. ‘‘ཙཀྑུནཱ སཾཝརོ སཱདྷཱུ’’ཏིཨཱདིཀཱཡ (དྷ. པ. ༣༦༠) གཱཐཱཡ པསཱདཀཱཡཙོཔནཀཱཡསཾཝརེ ཨེཀཛ྄ཛྷཾ ཀཏྭཱ ཀཱཡེན སཾཝརོ ཝུཏྟོ, ཏཾ ཨིདྷ བྷིནྡིཏྭཱ ཨཊྛ སཾཝརཱ, ཏཔྤཊིཔཀྑབྷཱཝེན ཨསཾཝརཱ ཨཊྛ ཀཐིཏཱ. སཱིལསཾཝརཱདཡོཔི པཉྩེཝ སཾཝརཱ སབྦདྭཱརེསུ ཨུཔྤཛྫམཱནཱཔི, ཏཔྤཊིཔཀྑབྷཱཝེན དུསྶཱིལྱཱདཱིནི ཨསཾཝརཱཏི ཝུཏྟཱནི. ཏཏྠ དུསྶཱིལྱཾ པཱཎཱཏིཔཱཏཱདིཙེཏནཱ. མུཊྛསྶཙྩཾ སཏིཔཊིཔཀྑཱ ཨཀུསལཱ དྷམྨཱ. པམཱདནྟི ཀེཙི. སཱིཏཱདཱིསུ པཊིགྷོ ཨཀྑནྟི. ཐིནམིདྡྷཾ ཀོསཛྫཾ.

ཝིནཱ ཝཙཱིདྭཱརེན སུདྡྷཾ ཀཱཡདྭཱརསངྑཱཏནྟི ཨིདཾ ཝཙཱིདྭཱརསལླཀྑིཏསྶ མུསཱཝཱདཱདིནོཔི ཀཱཡདྭཱརེ པཝཏྟིསབྦྷཱཝཱ ཨསུདྡྷཏཱ ཨཏྠཱིཏི ཏཾནིཝཱརཎཏྠཾ ཝུཏྟཾ. ན ཧི ཏཾ ཀཱཡཀམྨཾ ཧོཏི. སུདྡྷཝཙཱིདྭཱརོཔལཀྑིཏཾ པན ཝཙཱིཀམྨམེཝ ཧོཏཱིཏི. ཨེཏྠ ཨསཾཝརོཏི ཨེཏེན སུདྡྷཀཱཡདྭཱརེན ཨུཔལཀྑིཏོ ཨསཾཝརོ དྭཱརནྟརེ ཨུཔྤཛྫམཱནོཔི ཝུཏྟོ. དྭཱརནྟརཱནུཔལཀྑིཏཾ སབྦཾ ཏཾདྭཱརིཀཱཀུསལཉྩེཏི ཝེདིཏབྦཾ. ཨེཝཉྩ ཀཏྭཱ ཀམྨཔཐསཾསནྡནེ ‘‘ཙོཔནཀཱཡཨསཾཝརདྭཱརཝསེན ཨུཔྤཛྫམཱནོ ཨསཾཝརོ ཨཀུསལཾ ཀཱཡཀམྨམེཝ ཧོཏཱི’’ཏིཨཱདི ‘‘ཨཀུསལཾ ཀཱཡཀམྨཾ ཙོཔནཀཱཡཨསཾཝརདྭཱརཝསེན ཝཙཱིཨསཾཝརཝསེན ཙ ཨུཔྤཛྫཏཱི’’ཏིཨཱདིནཱ སཧ ཨཝིརུདྡྷཾ ཧོཏི. ཨསཾཝརོ ཧི དྭཱརནྟརེ ¶ ཨུཔྤཛྫམཱནོཔི སདྭཱརེ ཨེཝཱཏི ཝུཙྩཏི, སདྭཱརཝསེན ཨུཔྤནྣོཏི ཙ, ཀམྨཾ ཨཉྙདྭཱརེ ཨཉྙདྭཱརཝསེན ཙཱཏི ཨེཝཾ ཨཝིརུདྡྷཾ.

ཨཐ ཝཱ ཨེཏྠཱཏི སུདྡྷཾ ཨསུདྡྷནྟི ཨེཏཾ ཨཝིཙཱརེཏྭཱ ཨེཏསྨིཾ ཙོཔནེཏི ཝུཏྟཾ ཧོཏི. ཨེཝཾ སཏི དྭཱརནྟརོཔལཀྑིཏཾ ཀམྨཔཐབྷཱཝཔྤཏྟཏཱཡ ཝཙཱིམནོཀམྨཾ ཙོཔནཀཱཡཨསཾཝརདྭཱརེ ཨུཔྤནྣཾ, སེསཾ ¶ སབྦཾ ཏཾདྭཱརུཔྤནྣཱཀུསལཾ ཝིཡ ‘‘ཙོཔནཀཱཡཨསཾཝརོ’’ཏི ཝུཙྩཏི. ཀམྨཔཐབྷཱཝཔྤཏྟིཡཱ དྭཱརནྟརུཔྤནྣཾ ཀཱཡཀམྨཉྩ ཏཐཱ ན ཝུཙྩཏཱིཏི ཀམྨཔཐསཾསནྡནཝིརོདྷོ སིཡཱ, ཏདཝིརོདྷཾ ཏཏྠེཝ ཝཀྑཱམ. སཱིལསཾཝརཱདཡོ པཉྩ ནིཀྑེཔཀཎྜེ ཨཱཝི བྷཝིསྶནྟི. ཏཏྠ ཉཱཎསཾཝརེ པཙྩཡསནྣིསྶིཏསཱིལསྶ, ཝཱིརིཡསཾཝརེ ཙ ཨཱཛཱིཝཔཱརིསུདྡྷིཡཱ ཨནྟོགདྷཏཱ དཊྛབྦཱ.

ཨཀུསལཀམྨཔཐཀཐཱཝཎྞནཱ

སརསེནེཝ ཙ པཏནསབྷཱཝསྶ པཱཎསྶ ཨནྟརཱ ཨེཝ ཨཏཱིཝ པཱཏནཾ ཨཏིཔཱཏོ, སཎིཀཾ པཏིཏུཾ ཨདཏྭཱཝ སཱིགྷཾ པཱཏནནྟི ཨཏྠོ. ཨཏིཀྐམྨ ཝཱ སཏྠཱདཱིཧི ཨབྷིབྷཝིཏྭཱ པཱཏནཾ ཨཏིཔཱཏོ. པཡོགཝཏྠུམཧནྟཏཱདཱིཧི མཧཱསཱཝཛྫཏཱ ཏེཧི པཙྩཡེཧི ཨུཔྤཛྫམཱནཱཡ ཙེཏནཱཡ བལཝབྷཱཝཏོ. ཡཐཱཝུཏྟཔཙྩཡཝིཔརིཡཱཡེཔི ཏཾཏཾཔཙྩཡེཧི ཨུཔྤཛྫམཱནཱཡ ཙེཏནཱཡ བལཝཱབལཝཝསེནེཝ ཨཔྤསཱཝཛྫམཧཱསཱཝཛྫཏཱ ཝེདིཏབྦཱ. ཨིདྡྷིམཡོ ཀམྨཝིཔཱཀཛིདྡྷིམཡོ དཱཋཱཀོཊིཀཱདཱིནཾ ཝིཡ.

གོཏྟརཀྑིཏཱ སགོཏྟེཧི རཀྑིཏཱ. དྷམྨརཀྑིཏཱ སཧདྷམྨིཀེཧི རཀྑིཏཱ. སསཱམིཀཱ སཱརཀྑཱ. ཡསྶཱ གམནེ རཉྙཱ དཎྜོ ཋཔིཏོ, སཱ སཔརིདཎྜཱ. ཨཏྠབྷཉྫཀོཏི ཀམྨཔཐཔྤཏྟཾ ཝུཏྟཾ. ཀམྨཔཐཀཐཱ ཧེསཱཏི. ཨཏྟནོ སནྟཀཾ ཨདཱཏུཀཱམཏཱཡཱཏིཨཱདི མུསཱཝཱདསཱམཉྙཏོ ཝུཏྟཾ. ཧསཱདྷིཔྤཱཡེན ཝིསཾཝཱདནཔུརེཀྑཱརསྶེཝ མུསཱཝཱདོ. སུཉྙབྷཱཝནྟི པཱིཏིཝིརཧིཏཏཱཡ རིཏྟཏཾ. ཨཏྠཝིཔནྣཏཱཡ ན ཧདཡངྒམཱ. ཨགྒཎྷནྟེཏི ཨསདྡཧནྟེ ཀམྨཔཐབྷེདོ ན ཧོཏི. ཡོ ཀོཙི པན སམྥཔྤལཱཔོ དྭཱིཧི སམྦྷཱརེཧི སིཛ྄ཛྷཏཱིཏི. ཨཏྟནོ པརིཎཱམནཾ ཙིཏྟེནེཝཱཏི ཝེདིཏབྦཾ. མིཙྪཱ པསྶཏཱིཏི ཝིཏཐཾ པསྶཏི.

ཀོཊྛཱསཏོཏི ¶ ཕསྶཔཉྩམཀཱདཱིསུ ཙིཏྟངྒཀོཊྛཱསེསུ ཡེ ཀོཊྛཱསཱ ཧོནྟི, ཏཏོཏི ཨཏྠོ. ནནུ ཙ ཙེཏནཱ ཀམྨཔཐེསུ ན ཝུཏྟཱཏི པཊིཔཱཊིཡཱ སཏྟནྣཾ ཀམྨཔཐབྷཱཝོ ན ཡུཏྟོཏི? ན, ཨཝཙནསྶ ཨཉྙཧེཏུཏྟཱ. ན ཧི ཙེཏནཱཡ ཨཀམྨཔཐཏྟཱ ཀམྨཔཐརཱསིམྷི ཨཝཙནཾ, ཀདཱཙི པན ཀམྨཔཐོ ཧོཏི, ན སབྦདཱཏི ཀམྨཔཐབྷཱཝསྶ ཨནིཡཏཏྟཱ ཨཝཙནཾ. ཡདཱ པན ཀམྨཔཐོ ཧོཏི, ཏདཱ ཀམྨཔཐརཱསིསངྒཧོ ན ནིཝཱརིཏོཏི. ‘‘པཉྩ སིཀྑཱཔདཱ པརིཏྟཱརམྨཎཱ ཨེཝཱ’’ཏི ཨེཏེན ཨདིནྣཱདཱནཱདཱིནཾ སཏྟཱརམྨཎབྷཱཝཝིརོདྷཾ ‘‘སཏྟསངྑཱཏེ སངྑཱརེ ཨེཝ ¶ ཨཱརབྦྷ པཝཏྟིཏོ’’ཏི སཡམེཝ པརིཧརིསྶཏི. ‘‘ནཏྠི སཏྟཱ ཨོཔཔཱཏིཀཱ’’ཏི པཝཏྟམཱནཱ དིཊྛི ཏེབྷཱུམཀདྷམྨཝིསཡཱཝཱཏི སངྑཱརཱརམྨཎཏཱ ཝུཏྟཱ. ཝིཔཱཀནིསྶནྡཕལཱནི ཡཐཱཀྐམཾ ནིརཡཱདིཝིཔཱཀདུགྒཏཏཱདཱིནི.

ཨཀུསལཀམྨཔཐཀཐཱཝཎྞནཱ ནིཊྛིཏཱ.

ཀུསལཀམྨཔཐཀཐཱཝཎྞནཱ

པཱཎཱཏིཔཱཏཱདཱིཧི པན ཝིརཏིཡོཏི ཨེཏཾ ཡཱཧི ཝིརཏཱིཧི སམྤཡུཏྟཱ ཙེཏནཱ ‘‘ཀཱཡཝཙཱིཀམྨཱནཱི’’ཏི ཝུཙྩནྟི, ཏཱསཉྩ ཀམྨཔཐབྷཱཝོ ཡུཏྟོཏི ཀཏྭཱ ཝུཏྟཾ. ཏཐཱ ཧི ཝཀྑཏི ‘‘པཊིཔཱཊིཡཱ སཏྟ ཙེཏནཱཔི ཝཊྚནྟི ཝིརཏིཡོཔཱི’’ཏི. ཨལླསསམཾསནྟི ཛཱིཝམཱནཀསསམཾསཾ. ཝོརོཔེཏཱ ཧུཏྭཱ ནཱབྷིཛཱནཱམི. དུསྶཱིལྱཱདཱརམྨཎཱ ཏདཱརམྨཎཱ. ཛཱིཝིཏིནྡྲིཡཱདིཨཱརམྨཎཱ ཀཐཾ དུསྶཱིལྱཱདཱིནི པཛཧནྟཱིཏི ཏཾ དསྶེཏུཾ ‘‘ཡཐཱ པནཱ’’ཏིཨཱདི ཝུཏྟཾ. ཨནབྷིཛ྄ཛྷཱ…པེ… ཝིརམནྟསྶཱཏི ཨབྷིཛ྄ཛྷཾ པཛཧནྟསྶཱཏི ཨཏྠོ. ན ཧི མནོདུཙྩརིཏཱ ཝིརཏི ཨཏྠི ཨནབྷིཛ྄ཛྷཱདཱིཧེཝ ཏཔྤཧཱནཏོ.

ཀམྨཔཐསཾསནྡནཀཐཱཝཎྞནཱ

ཀམྨཔཐཔྤཏྟཱནཾ དུསྶཱིལྱཱདཱིནཾ ཨསཾཝརཱནཾ ཏཐཱ དུཙྩརིཏཱནཉྩ ཨཀུསལཀམྨཔཐེཧི ཀམྨཔཐཔྤཏྟཱནམེཝ ཙ སུསཱིལྱཱདཱིནཾ སཾཝརཱནཾ ཏཐཱ སུཙརིཏཱནཉྩ ཀུསལཀམྨཔཐེཧི ཨཏྠཏོ ནཱནཏྟཱབྷཱཝདསྶནཾ. ཨཐ ཝཱ ཏེསཾ ཕསྶདྭཱརཱདཱིཧི ཨཝིརོདྷབྷཱཝེན དཱིཔནཾ ཀམྨཔཐསཾསནྡནནྟི ཀེཙི ཝདནྟི ¶ , ཏདེཏཾ ཝིཙཱརེཏབྦཾ. ན ཧི པཉྩཕསྶདྭཱརཔཉྩཨསཾཝརདྭཱརཔཉྩསཾཝརདྭཱརེསུ ཨུཔྤནྣཱནཾ ཨསཾཝརཱནཾ སཾཝརཱནཉྩ ཀམྨཔཐཏཱ ཨཏྠི པཱཎཱཏིཔཱཏཱདཱིནཾ པརསནྟཀཝཏྠུལོབྷཔརསཏྟཱརམྨཎབྱཱཔཱདཨཧེཏུཀདིཊྛིཨཱདཱིནཉྩ ཏེསུ དྭཱརེསུ ཨནུཔྤཏྟིཏོ. ཏིཝིདྷཀཨཱཡདུཙྩརིཏཱདཱིནི ཙ ཀམྨཔཐཱཏི པཱཀཊཱ ཨེཝཱཏི ཀིཾ ཏེསཾ ཀམྨཔཐེཧི ནཱནཏྟཱབྷཱཝདསྶནེན, ན ཙ དུཙྩརིཏཱནཾ སུཙརིཏཱནཉྩ ཕསྶདྭཱརཱདིཝསེན ཨུཔྤཏྟི དཱིཔིཏཱ, ནཱཔི ཨསཾཝརཱནཾ སཾཝརཱནཉྩ ཡཏོ ཏེསཾ ཕསྶདྭཱརཱདཱིཧི ཨཝིརོདྷབྷཱཝེན དཱིཔནཱ སིཡཱ, ཀེཝལཾ པན ཕསྶདྭཱརཱདིཝསེན ¶ ཨུཔྤནྣཱནཾ ཨསཾཝརཱནཾ སཾཝརཱནཉྩ ཀཱཡཀམྨཱདིཏཱ དཱིཔིཏཱ. ཡདི ཙ ཨེཏྟཀཾ ཀམྨཔཐསཾསནྡནཾ, ‘‘ཨཀུསལཾ ཀཱཡཀམྨཾ པཉྩཕསྶདྭཱརཝསེན ནུཔྤཛྫཏཱི’’ཏིཨཱདི ཀམྨཔཐསཾསནྡནཾ ན སིཡཱ. ཨེསཱཔི ཚཕསྶདྭཱརཱདཱིཧི ཨཝིརོདྷདཱིཔནཱཏི ཙེ, ཝུཏྟམེཝ པཀཱརནྟརེན དསྶེཏུཾ ‘‘ཨཐ ཝཱ’’ཏི ན ཝཏྟབྦཾ. སམུཙྩཡཏྠེ ཙ ཨཐ ཝཱ-སདྡེ ཀམྨཔཐཔྤཏྟཱནེཝ དུསྶཱིལྱཱདཱིནི ཀཱཡཀམྨཱདིནཱམེཧི ཝདནྟེཧི མནོཀམྨསྶ ཚཕསྶདྭཱརཝསེན ཨུཔྤཏྟི ན ཝཏྟབྦཱ. ན ཧི ཏཾ ཙཀྑུདྭཱརཱདིཝསེན ཨུཔྤཛྫཏཱིཏི. ཡདི ཙ ཀམྨཔཐཔྤཏྟཱ ཨེཝ ཨསཾཝརཱདཡོ གཧིཏཱ, དུཙྩརིཏེཧི ཨཉྙེསཾ ཨསཾཝརཱནཾ ཨབྷཱཝཱ ཏེསཉྩ ཏཾཏཾཀམྨབྷཱཝསྶ ཝུཏྟཏྟཱ ‘‘ཙོཔནཀཱཡཨསཾཝརདྭཱརཝསེན ཨུཔྤནྣོ ཨསཾཝརོ ཨཀུསལཾ ཀཱཡཀམྨམེཝ ཧོཏཱི’’ཏིཨཱདི ན ཝཏྟབྦཾ སིཡཱ. ཝུཙྩམཱནེ ཧི ཏསྨིཾ སངྐརོ སིཡཱ, ཝཙཱིམནོཀམྨཱནིཔི ཧི ཀཱཡདྭཱརེ ཨུཔྤཛྫནྟི, ཏཐཱ སེསདྭཱརེསུཔི ཀམྨནྟརཱནཱིཏི.

ཨཐ པན དྭཱརནྟརེ ཨུཔྤཛྫམཱནཾ ཀམྨནྟརམྤི ཏཾདྭཱརིཀཀམྨམེཝ སིཡཱ, ‘‘ཏིཝིདྷཾ ཀཱཡདུཙྩརིཏཾ ཨཀུསལཾ ཀཱཡཀམྨམེཝཱ’’ཏིཨཱདི, ‘‘ཨཀུསལཾ ཀཱཡཀམྨཾ ཙོཔནཀཱཡཨསཾཝརདྭཱརཝསེན ཝཱཙཱཨསཾཝརདྭཱརཝསེན ཙ ཨུཔྤཛྫཏཱི’’ཏིཨཱདི ཙ ཝིརུཛ྄ཛྷེཡྻ. དུཙྩརིཏཱནཉྷི ཨཉྙདྭཱརཙརཎཾ ཨཏྠི, ན ཙསྶ དྭཱརནྟརུཔྤནྣཾ ཀམྨནྟརཾ ཧོཏཱིཏི. ཏསྨཱ ཧེཊྛཱ ཀམྨཔཐཔྤཏྟཱནཾ ཨེཝ ཀཱཡཀམྨཱདིབྷཱཝསྶ ཝུཏྟཏྟཱ སེསཱནཉྩ ཏཾཏཾདྭཱརུཔྤནྣཱནཾ ཀུསལཱཀུསལཱནཾ དྭཱརསཾསནྡནེ ཏཾཏཾདྭཱརཔཀྑིཀབྷཱཝསྶ ཀཏཏྟཱ ཨིདྷ ཀམྨཔཐཾ ཨཔྤཏྟཱནཉྩ ཙེཏནཱབྷཱཝཏོ ཨཀམྨཱནཉྩ ཨསཾཝརཱནཾ སཾཝརཱནཉྩ བྷཛཱཔིཡམཱནཱནཾ ཀམྨཔཐཱནཾ ཝིཡ ཀཱཡཀམྨཱདིཏཱདཱིཔནཾ, ཀམྨཔཐཔྤཏྟཱནཾ ཏིཝིདྷཀཱཡདུཙྩརིཏཱདཱིནཾ ཏིཝིདྷཀཱཡསུཙརིཏཱདཱིནཉྩ དྭཱརནྟརཙརཎེཔི ཀཱཡཀམྨཱདིབྷཱཝཱཝིཛཧནདཱིཔནཾ, ཡཐཱཔཀཱསིཏཱནཉྩ ཀམྨཔཐབྷཱཝཾ པཏྟཱནཾ ¶ ཨཔཏྟཱནཉྩ ཨཀུསལཀཱཡཀམྨཱདཱིནཉྩ ཀུསལཀཱཡཀམྨཱདཱིནཉྩ ཕསྶདྭཱརཱདཱིཧི ཨུཔྤཏྟིཔཀཱསནཉྩ ཀམྨཔཐསཾསནྡནཾ ནཱམ. ཀསྨཱ? ཨཀམྨཔཐཱནཾ ཀམྨཔཐེསུ ཀམྨཔཐཱནཉྩ ཨཀམྨཔཐེསུ སམཱནནཱམཏཱཝསེན, ཀམྨཔཐཱནཾ ཀམྨཔཐེསུ སཱམཉྙནཱམཱཝིཛཧནཝསེན, ཨུབྷཡེསཉྩ ཨུཔྤཏྟིཝསེན དྭཱརེསུ ཨེཏྠ སཾསནྡིཏཏྟཱ.

ཏཏྠ ཏིཝིདྷཀམྨདྭཱརཝསེན ཨུཔྤནྣཱནཾ ཀམྨཱནཾ ཉཱཏཀམྨབྷཱཝཏཱཡ ཏཾཏཾཀམྨབྷཱཝསྶ ཨཝཙནཱིཡཏྟཱ ཀམྨདྭཱརེསུ ཏེསཾ ཨུཔྤཏྟིཡཱ ཙ ཝུཏྟཏྟཱ པཉྩཝིཉྙཱཎདྭཱརཝསེན ཨསཾཝརཱདཱིནཾ ཨུཔྤཏྟིཔརིཡཱཡཝཙནཱབྷཱཝཏོ ཙ ཀམྨདྭཱརཝིཉྙཱཎདྭཱརཱནི ཝིརཛ྄ཛྷིཏྭཱ ‘‘པཉྩཕསྶདྭཱརཝསེན ཧི ཨུཔྤནྣོ’’ཏིཨཱདི ¶ ཝུཏྟཾ. ‘‘ཡམྤིདཾ ཙཀྑུསམྥསྶཔཙྩཡཱ ཨུཔྤཛྫཏི སུཁཾ ཝཱ’’ཏིཨཱདིནཱ ‘‘ཙཀྑུསམྥསྶཔཙྩཡཱ ཝེདནཱཀྑནྡྷོ ཨཏྠི ཀུསལོ’’ཏིཨཱདིནཱ ཙ པཉྩཕསྶདྭཱརཝསེན ཨསཾཝརཱདཱིནཾ ཨུཔྤཏྟིཔརིཡཱཡོ ཝུཏྟོ, ན ཙ ‘‘ཡམིདཾ ཙཀྑུཝིཉྙཱཎཔཙྩཡཱ’’ཏིཨཱདིཝཙནཾ ཨཏྠཱིཏི. ཝུཏྟམྤི ཙེཏཾ ‘‘ཙཀྑུཝིཉྙཱཎསཧཛཱཏོ ཧི ཕསྶོ ཙཀྑུསམྥསྶོ’’ཏིཨཱདི (དྷ. ས. ༡ ཀམྨཀཐཱ; མཧཱནི. ཨཊྛ. ༨༦). ཏེན ཧི ཨསཾཝརཱནཾ སཾཝརཱནཉྩ ཙཀྑུསམྥསྶཱདཱིཧི ཨསཧཛཱཏཏྟཱ མནོསམྥསྶསཧཛཱཏཱནཉྩ ཙཀྑུསམྥསྶདྭཱརཱདིཝསེན ཨུཔྤཏྟི དཱིཔིཏཱཏི. ‘‘སོ ཧི ཀཱཡདྭཱརེ ཙོཔནཾ པཏྟོ ཨཀུསལཾ ཀཱཡཀམྨཾ ཧོཏཱི’’ཏིཨཱདིནཱ ‘‘ཙོཔནཀཱཡཨསཾཝརདྭཱརཝསེན ཨུཔྤནྣོ ཨཀུསལཾ ཀཱཡཀམྨམེཝ ཧོཏཱི’’ཏིཨཱདིནཱ ཙ ཝཙཱིཀམྨཱདཱིནཉྩ ཀམྨཔཐཔྤཏྟཱནཾ ཨསཾཝརབྷཱུཏཱནཾ ཀཱཡཀམྨཱདིབྷཱཝེ ཨཱཔནྣེ ‘‘ཙཏུབྦིདྷཾ ཝཙཱིདུཙྩརིཏཾ ཨཀུསལཾ ཝཙཱིཀམྨམེཝ ཧོཏཱི’’ཏིཨཱདིནཱ ཨཔཝཱདེན ནིཝཏྟི དཊྛབྦཱ. ཨེཝཉྩ ཀཏྭཱ པུབྦེ དསྶིཏེསུ ཨསཾཝརཝིནིཙྪཡེསུ དུཏིཡཝིནིཙྪཡེསུ ཙ ན ཀོཙི ཝིརོདྷོ. ན ཧི ཝཙཱིཀམྨཱདིབྷཱུཏོ ཙོཔནཀཱཡཨསཾཝརོ ཀཱཡཀམྨཱདི ཧོཏཱིཏི.

ཨཀུསལཾ མནོཀམྨཾ པན ཚཕསྶདྭཱརཝསེན ཨུཔྤཛྫཏི, ཏཾ ཀཱཡཝཙཱིདྭཱརེསུ ཙོཔནཾ པཏྟཾ ཨཀུསལཾ ཀཱཡཝཙཱིཀམྨཾ ཧོཏཱིཏི ཨེཏྠ ཀིཾ ཏཾ ཨཀུསལཾ མནོཀམྨཾ ནཱམ, ཧེཊྛཱ དསྶིཏནཡེན ཙ ཀཱཡཝཙཱིདྭཱརེསུ ཨུཔྤནྣཾ ཏིཝིདྷཾ མནོདུཙྩརིཏཾ ཙོཔནཾ ཨཔྤཏྟཾ སབྦཱཀུསལཉྩ. ཡདི ཨེཝཾ ཏསྶ ཀཱཡཝཙཱིཀམྨབྷཱཝོ ནཏྠཱིཏི ‘‘ཙོཔནཔྤཏྟཾ ཀཱཡཝཙཱིཀམྨཾ ཧོཏཱི’’ཏི ན ཡུཛྫཏཱིཏི ¶ ? ནོ ན ཡུཛྫཏི ཙོཔནཔྤཏྟཾ ཀཱཡེ ཝཱཙཱཡ ཙ ཨཀུསལཾ ཀམྨཾ ཧོཏཱིཏི ཨཏྠསིདྡྷིཏོ. ཀམྨཾ པན ཧོནྟཾ ཀིཾ ཀམྨཾ ཧོཏཱིཏི? མནོཀམྨམེཝ ཧོཏཱིཏི. ཨིདཾ ཝུཏྟཾ ཧོཏི – ཙོཔནཔྤཏྟཾ ཨཀུསལཾ ཀཱཡདྭཱརེ ཝཙཱིདྭཱརེ ཙ མནོཀམྨཾ ཧོཏཱིཏི. ཨཐ ཝཱ ཏཾ-སདྡསྶ མནོཀམྨེན སམྦནྡྷཾ ཨཀཏྭཱ ཚཕསྶདྭཱརཝསེན ཡཾ ཨུཔྤཛྫཏི, ཏནྟི ཡཐཱཝུཏྟཨུཔྤཱདམཏྟཔརིཙྪིནྣེན སམྦནྡྷོ ཀཱཏབྦོ. ཀིཾ པན ཏནྟི? ཀམྨཀཐཱཡ པཝཏྟམཱནཏྟཱ ཀམྨནྟི ཝིཉྙཱཡཏི, ཏཉྩ མནོསམྥསྶདྭཱརེ ཨུཔྤཛྫམཱནམྤི ཏིཝིདྷཾ ཀམྨཾ ཧོཏཱིཏི. ཡཐཱ ཏཾ ཧོཏི, ཏཾ དསྶེཏུཾ ‘‘ཀཱཡཝཙཱིདྭཱརེསུ ཙོཔནཾ པཏྟ’’ནྟིཨཱདིམཱཧ. ཏཏྠ ནིཡམསྶ ཨཀཏཏྟཱ ཙོཔནཔྤཏྟི ཨུཔལཀྑཎབྷཱཝེན ཀཱཡཝཙཱིཀམྨནཱམསཱདྷིཀཱཝ, ན པན སབྦམྤི ཙོཔནཔྤཏྟཾ ཀཱཡཝཙཱིཀམྨམེཝ, ནཱཔི ཀུསལཔཀྑེ ཙོཔནཾ ཨཔྤཏྟཾ ཀཱཡཝཙཱིཀམྨཾ ན ཧོཏཱིཏི ཨཡམཏྠོ སིདྡྷོཝ ཧོཏཱིཏི.

ཨཐ ¶ ཝཱ ཏནྟི ཏཾ ཚཕསྶདྭཱརཝསེན ཨུཔྤཛྫམཱནཾ མནོཀམྨནྟི སབྦཾ མནསཱཔི ནིཔྥཛྫམཱནཾ ཀམྨཾ མནོཀམྨནྟི ཙོདཀཱདྷིཔྤཱཡེན གཧེཏྭཱ ཝདཏི, ན པུབྦེ དསྶིཏམནོཀམྨནྟི. ཡོ ཧི པརསྶ ཨདྷིཔྤཱཡོ ‘‘མནསཱ ནིཔྥཏྟིཏོ སབྦེན མནོཀམྨེནེཝ བྷཝིཏབྦཾ, ན ཀཱཡཝཙཱིཀམྨེནཱ’’ཏི, ཏཾ ནིཝཏྟེཏྭཱ ཀམྨཏྟཡནིཡམཾ དསྶེཏུཾ ཨིདམཱརདྡྷཾ ‘‘ཏཾ ཀཱཡཝཙཱིདྭཱརེསུ ཙོཔནཾ པཏྟ’’ནྟིཨཱདི. ཨེཏྠ ཙ སངྐརཱབྷཱཝོ པུརིམནཡེནེཝ ཝེདིཏབྦོ. ཨཐ ཝཱ ཀམྨནྟི ཨཝིསེསེན ཀམྨསདྡམཏྟེན སམྦནྡྷཾ ཀཏྭཱ ཡཐཱཝུཏྟོ ཀམྨཔྤབྷེདོ ཡཐཱ ཧོཏི, ཏཾ པཀཱརཾ དསྶེཏི. ཨསངྐརོ ཙ ཝུཏྟནཡོཝ. ཡཾ པན ཝདནྟི ‘‘ཀཱཡཝཙཱིཀམྨསཧཛཱཏཱ ཨབྷིཛ྄ཛྷཱདཡོ ཡདཱ ཙེཏནཱཔཀྑིཀཱ ཧོནྟི, ཏདཱ ཏཱནི མནོཀམྨཱནི ཀཱཡཝཙཱིཀམྨཱནི ཧོནྟཱི’’ཏི, ཏཉྩ ན, ཙེཏནཱཔཀྑིཀཱནཾ མནོཀམྨཏྟཱབྷཱཝཱ. ཨབྦོཧཱརིཀཏྟེ ཙ མནོཀམྨཏཱ སུཊྛུཏརཾ ནཏྠི. ཝུཏྟམྤི ཙེཏཾ ‘‘ཨབྦོཧཱརིཀཱ ཝཱ’’ཏི. ཏསྨཱ མནོཀམྨསྶ ཀཱཡཝཙཱིཀམྨཏཱ ན ཝཏྟབྦཱ. ཨབྷིཛ྄ཛྷཱདིཀིརིཡཱཀཱརིཀཱཡ ཨེཝ ཙེཏནཱཡ སམྤཡུཏྟཱ ཨབྷིཛ྄ཛྷཱདཡོ མནོཀམྨཾ, ན པཱཎཱཏིཔཱཏཱདིཀཱཡཝཙཱིཀིརིཡཱཀཱརིཀཱཡཱཏི བྷིཡྻོཔི ཏེསཾ མནོཀམྨཏཱཏི ན ཏེསཾ མནོཀམྨཱནཾ སཏཾ ཀཱཡཝཙཱིཀམྨཏཱ ཝཏྟབྦཱཏི. ཨེཝཾ ཀམྨཱནཾ དྭཱརེསུ དྭཱརཱནཉྩ ཀམྨེསུ ཨནིཡཏཏྟཱ དྭཱརནིབནྡྷནཾ ན ཀཏཾ. ཨིདཱནི ཨཀཏེཔི ཙ དྭཱརནིབནྡྷནེ ཡེསཾ དྭཱརཱནཾ ཝསེན ཨིདཾ ཙིཏྟཾ ཨུཔྤཛྫཏི, ཏེསཾ ཏཾཏཾདྭཱརཀམྨཔཐཱནཉྩ ཝསེན ཨུཔྤཏྟིཡཱ ཡཐཱབྷཊྛཔཱལི༹ཡཱ ཝུཏྟཱཡ ¶ ཙ དཱིཔནཏྠཾ ‘‘ཏཏྠ ཀཱམཱཝཙར’’ནྟིཨཱདིམཱཧ. ཙིཏྟཾ ཏིཝིདྷཀམྨདྭཱརཝསེན ཨུཔྤཛྫཏཱིཏི ཨིདཾ མནོཀམྨདྭཱརབྷཱུཏསྶ ཏེན སབྷཱཝེན ཨུཔྤཏྟིཾ གཧེཏྭཱ ཝུཏྟཾ. ཡཐཱ ཝཱ ཙིཏྟཾ ཙིཏྟཱདྷིཔཏེཡྻནྟི སམྤཡུཏྟཝསེན ཝུཙྩཏི, ཨེཝམིདྷཱཔཱིཏི ཝེདིཏབྦཾ. ཙོཔནདྭཡརཧིཏསྶ མནོཔབནྡྷསྶ མནོཀམྨདྭཱརབྷཱཝེ པན ཝཏྟབྦམེཝ ནཏྠི.

ཀམྨཔཐསཾསནྡནཀཐཱཝཎྞནཱ ནིཊྛིཏཱ.

དྭཱརཀཐཱཝཎྞནཱ ནིཊྛིཏཱ.

ཨཡཾ ཡོཛནཱཏི ‘‘རཱུཔཱརམྨཎཾ ཝཱ…པེ… དྷམྨཱརམྨཎཾ ཝཱ’’ཏི ཨེཏེན སཧ ‘‘ཡཾ ཡཾ ཝཱ པནཱ’’ཏི ཨེཏསྶ ཨཡཾ སམྦནྡྷོཏི ཨཏྠོ. ཀོ པནཱཡཾ སམྦནྡྷོཏི? ཡེན ཝཙནཱནི ཨཉྙམཉྙཾ སམྦཛ྄ཛྷནྟི, ཏཾ པུབྦཱཔརཝཙནེ པཡོཛནཾ སམྦནྡྷོ. ཨིདྷ ཙ སབྦཱརམྨཎཏཱདིདསྶནཾ ‘‘རཱུཔཱརམྨཎཾ ཝཱ…པེ… དྷམྨཱརམྨཎཾ ཝཱ’’ཏི ཨེཏསྶ ཨནནྟརཾ ‘‘ཡཾ ཡཾ ཝཱ པནཱ’’ཏི ཨེཏསྶ ཝཙནེ པཡོཛནཾ ཡོཛནཱ དཊྛབྦཾ. ཏཏྠ ‘‘རཱུཔཱརམྨཎཾ ཝཱ…པེ… དྷམྨཱརམྨཎཾ ཝཱ ཨཱརབྦྷཱ’’ཏི ཨེཏྟཀེན ¶ ཨཱཔནྣཾ དོསཾ དསྶེཏྭཱ ཏནྣིཝཏྟནཝསེན ‘‘ཡཾ ཡཾ ཝཱ པནཱ’’ཏི ཨེཏསྶ པཡོཛནཾ དསྶེཏུཾ ‘‘ཧེཊྛཱ’’ཏིཨཱདིམཱཧ. དུཏིཡེ ཨཏྠཝིཀཔྤེ ‘‘ཡཾ ཡཾ ཝཱཔནཱ’’ཏི ཨེཏེན ཨཔྤདྷཱནམྤི རཱུཔཱདིཾ ཨཱཀཌྜྷཏི. ན ཧི པདྷཱནསྶ ཙིཏྟསྶ ཨཏྟནོཡེཝ ཨཱརམྨཎབྷཱཝོ ཨཏྠཱིཏི. ཧེཊྛཱ ཝུཏྟནཡེནཱཏི སབྦཱརམྨཎཏཱདིནཡེན. ‘‘ཧེཊྛཱ གཧིཏམེཝ གཧིཏནྟི ཝཏྭཱ ཏསྶ ཝཙནེ པཡོཛནཾ དསྶེཏུཾ ‘རཱུཔཾ ཝཱ…པེ… ཨིདཾ ཝཱ ཨིདཾ ཝཱ ཨཱརབྦྷཱ’ཏི ཀཐེཏུཾ ཨིདཾ ཝུཏྟ’’ནྟི ཝུཏྟཾ. ཏཏྠ ཨིདཾ ཝཱ ཨིདཾ ཝཱཏི ཨེཏཾ སབྦཱརམྨཎཏཱདིཾ སནྡྷཱཡ ཀཐིཏནྟི ཝེདིཏབྦཾ.

དྷམྨུདྡེསཝཱརཀཐཱ

ཕསྶཔཉྩམཀརཱསིཝཎྞནཱ

ཨཱཙརིཡཱནནྟི རེཝཏཱཙརིཡསྶ. ན པནེཏཾ སཱརཏོ དཊྛབྦཾ. ན ཧི ཕསྶཱདཱིནཾ ཀཱམཱཝཙརཱདིབྷཱཝདསྶནཏྠཾ ཨིདམཱརདྡྷཾ, ཀིནྟུ ཏསྨིཾ སམཡེ ཕསྶཱདིསབྷཱཝདསྶནཏྠནྟི.

ཙིཏྟསྶ པཋམཱབྷིནིཔཱཏཏྟཱཏི སབྦེ ཙེཏསིཀཱ ཙིཏྟཱཡཏྟཱ ཙིཏྟཀིརིཡཱབྷཱཝེན ཝུཙྩནྟཱིཏི ཕསྶོ ‘‘ཙིཏྟསྶ པཋམཱབྷིནིཔཱཏོ’’ཏི ཝུཏྟོ. ཀཱམཾ ¶ ཨུཔྤནྣཕསྶོ པུགྒལོ ཙིཏྟཙེཏསིཀརཱསི ཝཱ ཨཱརམྨཎེན ཕུཊྛོ ཕསྶསཧཛཱཏཱཡ ཝེདནཱཡ ཏཾསམཀཱལམེཝ ཝེདེཏི, ཕསྶོ པན ཨོབྷཱསསྶ པདཱིཔོ ཝིཡ ཝེདནཱདཱིནཾ པཙྩཡཝིསེསོ ཧོཏཱིཏི པུརིམཀཱལོ ཝིཡ ཝུཏྟོ. གོཔཱནསཱིནཾ ཨུཔརི ཏིརིཡཾ ཋཔིཏཀཊྛཾ པཀྑཔཱསོ. ཀཊྛདྭཡཱདི ཝིཡ ཨེཀདེསེན ཨེཀཔསྶེན ཨནལླཱིཡམཱནོཔི རཱུཔེན སཧ ཕསྶསྶ སཱམཉྙཾ ཨནལླཱིཡམཱནཾ སངྒྷཊྚནམེཝ, ན ཝིསཡབྷཱཝོ, སངྒྷཊྚནཉྩ ཕསྶསྶ ཙིཏྟཱརམྨཎཱནཾ སནྣིཔཏནབྷཱཝོ ཨེཝ. ཝཏྠཱརམྨཎསནྣིཔཱཏེན སམྤཛྫཏཱིཏི སངྒྷཊྚནསམྤཏྟིཀོ ཕསྶོ. པཱཎིདྭཡསྶ སནྣིཔཱཏོ ཝིཡ ཙིཏྟཱརམྨཎསནྣིཔཱཏོ ཕསྶོ ཙིཏྟསྶ ཨཱརམྨཎེ སནྣིཔཏིཏཔྤཝཏྟིཡཱ པཙྩཡོ ཧོཏཱིཏི ཀིཙྩཊྛེནེཝ རསེན སངྒྷཊྚནརསོ. ཏཐཱ པཙྩཡབྷཱཝོ ཧི ཏསྶ ཕསྶསྶ སངྒྷཊྚནཀིཙྩནྟི. ཡཐཱ ཧི པཱཎིཡཱ པཱཎིམྷི སངྒྷཊྚནཾ ཏབྦིསེསབྷཱུཏཱ རཱུཔདྷམྨཱ, ཨེཝཾ ཙིཏྟསྶ ཨཱརམྨཎེ སངྒྷཊྚནཾ ཏབྦིསེསབྷཱུཏོ ཨེཀོ ཙེཏསིཀདྷམྨོ དཊྛབྦོ. ཙིཏྟེཡེཝཱཏི ཨེཏེན ཙེཏསིཀསབྷཱཝཏཾ ཝཏྠཱརམྨཎེཧི ཨསཾསཊྛཾ སངྒྷཊྚནཾ ཝེདནཱཡ དསྶེཏི, ན པན ཝཏྠུནིསྶཡཏཾ པཊིཀྑིཔཏི. ཏསྶ ཕསྶསྶ ཀཱརཎབྷཱུཏོ ཏདནུརཱུཔོ ¶ སམནྣཱཧཱརོ ཏཛྫཱསམནྣཱཧཱརོ. ཨིནྡྲིཡསྶ ཏདབྷིམུཁབྷཱཝོ ཨཱཝཛྫནཱཡ ཙ ཨཱརམྨཎཀརཎཾ ཝིསཡསྶ པརིཀྑཏཏཱ ཨབྷིསངྑཏཏཱ ཝིཉྙཱཎསྶ ཝིསཡབྷཱཝཀརཎནྟི ཨཏྠོ.

སུཁཝེདནཱཡམེཝ ལབྦྷཏི ཨསྶཱདབྷཱཝཏོཏི ཨདྷིཔྤཱཡོ. ཝིསྶཝིཏཱཡཱཏི ཨརཧཏཱཡ. ཨནེཀཏྠཏྟཱ ཧི དྷཱཏཱུནཾ ཨརཧཏྠོ ཝིཔུབྦོ སུསདྡོ. ཝིསྶཝཾ ཝཱ སཛནཾ ཝསིཏཱ ཀཱམཀཱརིཏཱ ཝིསྶཝིཏཱ. ཨཱརམྨཎརསེཀདེསམེཝ ཨནུབྷཝནྟཱིཏི ཨིདཾ ཕུསནཱདིཀིཙྩཾ ཨེཀདེསཱནུབྷཝནམིཝ ཧོཏཱིཏི ཀཏྭཱ ཝུཏྟཾ. ཝེདཡིཏསབྷཱཝོ ཨེཝ ཧི ཨནུབྷཝནནྟི. ཕུསནཱདིབྷཱཝེན ཝཱ ཨཱརམྨཎགྒཧཎཾ ཨེཀདེསཱནུབྷཝནཾ, ཝེདཡིཏབྷཱཝེན གཧཎཾ ཡཐཱཀཱམཾ སབྦཱནུབྷཝནཾ. ཨེཝཾ སབྷཱཝཱནེཝ ཏཱནི གཧཎཱནཱིཏི ན ཝེདནཱཡ ཝིཡ ཕསྶཱདཱིནམྤི ཡཐཱསཀཀིཙྩཀརཎེན སཱམིབྷཱཝཱནུབྷཝནཾ ཙོདེཏབྦཾ. ཨཡཾ ཨིདྷཱཏི ཨེཏེན པཉྩསུ ཝེདནཱསུ ཨིམསྨིཾ ཙིཏྟེ ཨདྷིཔྤེཏཾ སོམནསྶཝེདནཾ ཝདཏི, ཏསྨཱ ཨསོམནསྶཝེདནཾ ཨཔནེཏྭཱ གཧིཏཱཡ སོམནསྶཝེདནཱཡ སམཱནཱ ཨིཊྛཱཀཱརསམྦྷོགརསཏཱ ཝུཏྟཱཏི ཝེདིཏབྦཱ.

ནིམིཏྟེན ¶ པུནསཉྫཱནནཀིཙྩཱ པཙྩཱབྷིཉྙཱཎརསཱ. པུནསཉྫཱནནསྶ པཙྩཡོ པུནསཉྫཱནནཔཙྩཡོ, ཏདེཝ ནིམིཏྟཾ པུན…པེ… ནིམིཏྟཾ, ཏསྶ ཀརཎཾ པུན…པེ… ཀརཎཾ. པུནསཉྫཱནནཔཙྩཡབྷཱུཏཾ ཝཱ ནིམིཏྟཀརཎཾ པུན…པེ… ཀརཎཾ, ཏདསྶཱ ཀིཙྩནྟི ཨཏྠོ. པུནསཉྫཱནནཔཙྩཡནིམིཏྟཀརཎཾ ནིམིཏྟཀཱརིཀཱཡ ནིམིཏྟེན སཉྫཱནནྟིཡཱ ཙ སབྦཱཡ སཉྙཱཡ སམཱནཾ ཝེདིཏབྦཾ. ཉཱཎམེཝ ཨནུཝཏྟཏི, ཏསྨཱ ཨབྷིནིཝེསཀཱརིཀཱ ཝིཔརཱིཏགྒཱཧིཀཱ ཙ ན ཧོཏཱིཏི ཨདྷིཔྤཱཡོ. ཨེཏེནུཔཱཡེན སམཱདྷིསམྤཡུཏྟཱཡ ཨཙིརཊྛཱནཏཱ ཙ ན ཧོཏཱིཏི དཊྛབྦཱ.

ཨབྷིསནྡཧཏཱིཏི པབནྡྷཏི པཝཏྟེཏི. ཙེཏནཱབྷཱཝོ བྱཱཔཱརབྷཱཝོ. དིགུཎུསྶཱཧཱཏི ན དིགུཎཾ ཝཱིརིཡཡོགཾ སནྡྷཱཡ ཝུཏྟཾ, ཨཏྟནོ ཨེཝ པན བྱཱཔཱརཀིཙྩསྶ མཧནྟབྷཱཝཾ དཱིཔེཏི. ཨུསྶཱཧནབྷཱཝེནཱཏི ཨཱདརབྷཱཝེན. སཱ ཧི སཡཾ ཨཱདརབྷཱུཏཱ སམྤཡུཏྟེ ཨཱདརཡཏཱིཏི.

ཝིཛཱནནཾ ཨཱརམྨཎསྶ ཨུཔལདྡྷི. སནྡཧནཾ ཙིཏྟནྟརསྶ ཨནུཔྤབནྡྷནཾ. ཙཀྑུནཱ ཧི དིཊྛནྟི ཙཀྑུནཱ དཊྛབྦཾ. ཡཐཱ ‘‘དིཊྛཾ སུཏཾ མུཏཾ ཝིཉྙཱཏ’’ནྟི དཊྛབྦཱདི ཝུཙྩཏི, ཨེཝམིདྷཱཔི ཝེདིཏབྦཾ. ཙཀྑུནཱ ཧཱིཏིཨཱདཱིསུ ཙཀྑུནཱ…པེ… མནསཱ དྭཱརེནཱཏི ཨཏྠོ. ནགརགུཏྟིཀསྶ ¶ ཝིཡ ཙིཏྟསྶ ཨཱརམྨཎཝིབྷཱཝནམཏྟཾ ཨུཔདྷཱརཎམཏྟཾ ཨུཔལདྡྷིམཏྟཾ ཀིཙྩཾ, ཨཱརམྨཎཔཊིཝེདྷནཔཙྩཱབྷིཉྙཱཎཱདི པན ཀིཙྩཾ པཉྙཱསཉྙཱདཱིནནྟི ཝེདིཏབྦཾ. པུརིམནིདྡིཊྛནྟི སམཡཝཝཏྠཱནེ ནིདྡིཊྛཾ. བྷཱཝེནྟོ ཝིཡ ན ན ཨུཔྤཛྫཏི, ཀིནྟུ ཨུཔྤཛྫཏཱིཏི དསྶེཏུཾ ‘‘ཙིཏྟཾ ཧོཏཱི’’ཏི ཝུཏྟནྟི ཨེཏཾ ཧོཏི-སདྡསྶ ཨུཔྤཛྫཏི-སདྡསྶ ཙ སམཱནཏྠཏྟེ སཏི ཡུཛྫེཡྻ, ཏདཏྠཏྟེ ཙ ཏཏྠ ཨུཔྤནྣཾ ཧོཏཱིཏི ན ཝུཙྩེཡྻ. ན ཧི ཡུཏྟཾ ཨུཔྤནྣཾ ཨུཔྤཛྫཏཱིཏི ཝཏྟུཾ. ཙིཏྟསྶ ཙ ཨུཔྤནྣཏཱ སམཡཝཝཏྠཱནེ ཝུཏྟཱ ཨེཝཱཏི ཀིཾ ཏསྶ པུན ཨུཔྤཏྟིདསྶནེན. ཡེན ཙ སམཡཝཝཏྠཱནཾ ཀཏཾ, ཏསྶ ནིདྡེསོ ན ན སཀྐཱ ཀཱཏུནྟི ཀིཾ ཏཾ ནིདྡེསཏྠཾ ཨུདྡེསེན དུཏིཡེན, ནིདྡེསེནེཝ ཙ ཕསྶཱདཱིཧི ཙ ཨཉྙཏྟཾ ཙིཏྟསྶ སིཛ྄ཛྷཏཱིཏི ཀིཾ ཏདཏྠེན པུན ཝཙནེན, ཨཉྙཔྤཡོཛནཏྟཱ པན པུརིམསྶ ཙིཏྟཝཙནསྶ པཙྪིམཾ ཝུཏྟཾ. པུརིམཉྷི སམཡཝཝཏྠཱནཏྠམེཝ ཝུཏྟཾ, ན ཝཝཏྠིཏསམཡེ ཝིཛྫམཱནདྷམྨདསྶནཏྠཾ, ཨིཏརཉྩ ཏསྨིཾ སམཡེ ཝིཛྫམཱནདྷམྨདསྶནཏྠཾ ཝུཏྟཾ, ན སམཡཝཝཏྠཱནཏྠཾ, ན ཙ ཨཉྙདཏྠཾ ཝཙནཾ ཨཉྙདཏྠཾ ཝདཏི, ན ཙ ལེསེན ཝུཏྟོཏི ཀཏྭཱ མཧཱཀཱརུཎིཀོ ཨཏྠཾ པཱཀཊཾ ན ཀརོཏཱིཏི.

ཕསྶཔཉྩམཀརཱསིཝཎྞནཱ ནིཊྛིཏཱ.

ཛྷཱནངྒརཱསིཝཎྞནཱ

ཝིཏཀྐེཏཱིཏི ¶ དྷམྨཏོ ཨཉྙསྶ ཀཏྟུནིཝཏྟནཏྠཾ དྷམྨམེཝ ཀཏྟཱརཾ ནིདྡིསཏི. ཏསྶ པན ཝསཝཏྟིབྷཱཝནིཝཱརཎཏྠཾ ‘‘ཝིཏཀྐནཾ ཝཱ’’ཏི བྷཱཝནིདྡེསོ. རཱུཔཾ རཱུཔནྟི པཐཝཱི པཐཝཱིཏི ཝཱ ཨཱཀོཊེནྟོ ཝིཡ ཧོཏཱིཏི ཨཱཀོཊནལཀྑཎོ. ཨཱདིཏོ, ཨབྷིམུཁཾ ཝཱ ཧནནཾ ཨཱཧནནཾ, པརིཏོ, པརིཝཏྟེཏྭཱ ཝཱ ཨཱཧནནཾ པརིཡཱཧནནཾ. ཝིཙཱརཏོ ཨོལཱ༹རིཀཊྛེན ཝིཙཱརསྶེཝ པུབྦངྒམཊྛེན ཨནུརཝཏོ ཨོལཱ༹རིཀོ ཏསྶ ཙ པུབྦངྒམོ གྷཎྚཱབྷིགྷཱཏོ ཝིཡ ཧོཏི ཝིཏཀྐོ. སོ ཡཐཱ གྷཎྚཱབྷིགྷཱཏོ པཋམཱབྷིནིཔཱཏོ ཧོཏི, ཨེཝཾ ཨཱརམྨཎཱབྷིམུཁནིརོཔནཊྛེན པཋམཱབྷིནིཔཱཏོ ཧོཏི. ཝིཔྥཱརཝཱཏི ཝིཙལནཡུཏྟོ. ཨནུཔྤབནྡྷེན པཝཏྟིཡནྟི ཨུཔཙཱརེ ཝཱ ཨཔྤནཱཡཾ ཝཱ སནྟཱནེན པཝཏྟིཡཾ. ཏཏྠ ཧི ཝིཏཀྐོ ནིཙྩལོ ཧུཏྭཱ ཨཱརམྨཎཾ ཨནུཔཝིསིཏྭཱ པཝཏྟཏི. མཎྜལནྟི ཁལམཎྜལཾ.

པིཎཡཏཱིཏི ¶ ཏཔྤེཏི, ཝཌྜྷེཏི ཝཱ. ཕརཎརསཱཏི པཎཱིཏརཱུཔེཧི ཀཱཡསྶ བྱཱཔནརསཱ. ཨུདགྒབྷཱཝོ ཨོདགྱཾ. ཁུདྡིཀཱ ལཧུཾ ལོམཧཾསནམཏྟཾ ཀཏྭཱ བྷིནྣཱ ན པུན ཨུཔྤཛྫཏི. ཁཎིཀཱ བཧུལཾ ཨུཔྤཛྫཏི. ཨུབྦེགཏོ ཕརཎཱ ནིཙྩལཏྟཱ ཙིརཊྛིཏིཀཏྟཱ ཙ པཎཱིཏཏརཱ. པསྶདྡྷིཡཱ ནིམིཏྟབྷཱཝེན གབྦྷཾ གཎྷནྟཱི. ཨཔྤནཱསམྤཡུཏྟཱཝ པཱིཏི ཨཔྤནཱསམཱདྷིཔཱུརིཀཱཏི ཀཏྭཱ སཱ ཋཔིཏཱ. ཨིཏརཱ དྭེ ཁཎིཀོཔཙཱརསམཱདྷིཔཱུརིཀཱ པཱིཏཱི.

སམཱདྷིཙིཏྟེནཱཏི སམཱདྷིསཧིཏཙིཏྟེན. ཨཝིསཱརོ ཨཏྟནོ ཨེཝ ཨཝིསརཎསབྷཱཝོ. ཨཝིཀྑེཔོ སམྤཡུཏྟཱནཾ ཨཝིཀྑིཏྟཏཱ. ཡེན སམྤཡུཏྟཱ ཨཝིཀྑིཏྟཱ ཧོནྟི, སོ དྷམྨོ ཨཝིཀྑེཔོཏི. ཝིསེསཏོཏི ཡེབྷུཡྻེན. སུཁཝིརཧིཏོཔི ཧི ཨཏྠི སམཱདྷཱིཏི. པདཱིཔནིདསྶནེན སནྟཱནཊྛིཏིབྷཱཝཾ སམཱདྷིསྶ དསྶེཏི.

ཛྷཱནངྒརཱསིཝཎྞནཱ ནིཊྛིཏཱ.

ཨིནྡྲིཡརཱསིཝཎྞནཱ

སདྡཧནྟི ཨེཏཱཡཱཏི སདྡཧནཀིརིཡཱཡ པཝཏྟམཱནཱནཾ དྷམྨཱནཾ ཏཏྠ ཨཱདྷིཔཙྩབྷཱཝེན སདྡྷཱཡ པཙྩཡཏཾ དསྶེཏི. ཏསྶཱ ཧི དྷམྨཱནཾ ཏཐཱཔཙྩཡབྷཱཝེ ¶ སཏི ‘‘པུགྒལོ སདྡཧཏཱི’’ཏི ཝོཧཱརོ ཧོཏི. པསཱདནཱིཡཊྛཱནེསུ པསཱདསྶ པཊིཔཀྑབྷཱུཏཾ ཨཀུསལཾ ཨསྶདྡྷིཡཾ མིཙྪཱདྷིམོཀྑོ ཙ. པསཱདབྷཱུཏོ ནིཙྪཡོ ཝཏྠུགཏོ ཨདྷིམོཀྑལཀྑཎཾ, ན ཡེཝཱཔནཀཱདྷིམོཀྑོཏི. ཨིནྡཊྛཾ ཀཱརེཏཱིཏི ‘‘མཾ ཨནྟརེན ཏུམྷཱཀཾ ཨདྷིམུཙྩནཾ ནཏྠི, མཡཱ སདྡཧཐཱ’’ཏི ཝིཡ ཨཏྟཱནཾ ཨནུཝཏྟེཏི སམྤཡུཏྟདྷམྨེ. ཨེཝཾ སེསེསུཔི. པཀྑནྡནནྟི སཾསཱིདནཾ. པངྐོ ཀདྡམཏོ གྷནཱིབྷཱུཏོ ཧོཏི. པཎཀཾ པིཙྪིལཾ ཨུདཀམལཾ. པཱིཏཾ ཨུདཀཾ. ཨོཀཔྤནལཀྑཎཱཏི ཨནུཔཝིསིཏྭཱ ཨེཝམེཏནྟི ཀཔྤནལཀྑཎཱ. ཨཀལུསབྷཱཝོ ཨཀཱལུསིཡཾ, ཨནཱཝིལབྷཱཝོཏི ཨཏྠོ. བུདྡྷཱདིཝཏྠཱུནི སདྡྷེཡྻཱནི. སཔྤུརིསཱུཔསེཝནསདྡྷམྨསཝནཡོནིསོམནསིཀཱརདྷམྨཱནུདྷམྨཔཊིཔཏྟིཡོ སོཏཱཔཏྟིཡངྒཱནི. ཀུསལདྷམྨཱནཾ ཨཱདཱནེ ཧཏྠོ ཝིཡ, སབྦསམྤཏྟིནིཔྥཱདནེ ཝིཏྟཾ ཝིཡ, ཨམཏཀསིཕལཕལནེ བཱིཛཾ ཝིཡ དཊྛབྦཱ.

ཝཱིརབྷཱཝོཏི ¶ ཡེན ཝཱིརོ ནཱམ ཧོཏི, སོ དྷམྨོཏི ཨཏྠོ. ཨནུབལཔྤདཱནཾ པགྒཧོ. མགྒོ གནྟབྦོ ཧོཏི, མགྒོ གཏོ, ཀམྨཾ ཀཏྟབྦཾ, ཀམྨཾ ཀཏཾ, ཨཔྤམཏྟཀོ ཨཱབཱདྷོ ཨུཔྤནྣོ, གིལཱནཱ ཝུཊྛིཏོ ཧོཏི ཨཙིརཝུཊྛིཏོ གེལཉྙཱ, གཱམཾ ཝཱ ནིགམཾ ཝཱ པིཎྜཱཡ ཙརནྟོ ན ལབྷཏི ལཱུཁསྶ ཝཱ པཎཱིཏསྶ ཝཱ བྷོཛནསྶ ཡཱཝདཏྠཾ པཱརིཔཱུརིཾ, ལབྷཏི…པེ… པཱརིཔཱུརིནྟི ཨེཏཱནི ཨནུརཱུཔཔཙྩཝེཀྑཎཱསཧིཏཱནི ཨཊྛ ཝཱིརིཡཱརམྦྷཝཏྠཱུནི ཏཾམཱུལཀཱནི ཝཱ པཙྩཝེཀྑཎཱནི.

ཙིརཀཏཱདིཨཱརམྨཎཾ ཨུཔགནྟྭཱ ཋཱནཾ, ཨནིསྶཛྫནཾ ཝཱ ཨཱརམྨཎསྶ ཨུཔཊྛཱནཾ. ཨུདཀེ ཨལཱབུ ཝིཡ ཨཱརམྨཎཾ པིལཝིཏྭཱ གནྟུཾ ཨཔྤདཱནཾ པཱསཱཎསྶ ཝིཡ ནིཙྩལསྶ ཨཱརམྨཎསྶ ཋཔནཾ སཱརཎཾ ཨསམྨུཊྛཏཱཀརཎཾ ཨཔིལཱཔནཾ. ཨཔིལཱཔེ ཀརོཏི ཨཔིལཱཔེཏི. གཏིཡོཏི ནིཔྥཏྟིཡོ སམྦྷཝཏོ ཕལཏོ ཙ. ཨཔརོ ནཡོཏི རསཱདིདསྶནཏྠཾ ཨཱརདྡྷཾ. སམྨོསཔཙྩནཱིཀཾ ཀིཙྩཾ ཨསམྨོསོ, ན སམྨོསཱབྷཱཝམཏྟཾ. སཏིཡཱ ཝཏྠུབྷཱུཏཱ ཀཱཡཱདཡོ ཀཱཡཱདིསཏིཔཊྛཱནཱ, སཏིཡོཡེཝ ཝཱ པུརིམཱ པཙྪིམཱནཾ པདཊྛཱནཾ.

ཝིཀྑེཔསྶ ཨུདྡྷཙྩསྶ. པཉྙཱཔེཏཱིཏི པཀཱརེཧི ཛཱནཱཔེཏི. ཨེཀཱལོཀཱ ཧོཏཱིཏི ཝིཔསྶནུཔཀྐིལེསོབྷཱསཾ སནྡྷཱཡཱཧ. མནཏེ ཝིཛཱནཱཏི ཨེཏེནཱཏི ཝཱ མནོ, ཨེཝཉྩ ཀཏྭཱ ‘‘མནཉྩ པཊིཙྩ དྷམྨེ ཙཱ’’ཏི (མ. ནི. ༡.༢༠༤, ༤༠༠; ༣.༤༢༡, ༤༢༥) ཀཱརཎབྷཱཝེན ¶ མནོ ཝུཏྟོ. སབྦོ ཧི མནོ ཨཏྟནོ ཨནནྟརསྶ ཝིཉྙཱཎསྶ ཀཱརཎནྟི. ཝིཛཱནཱཏཱིཏི པརིཙྪིནྣོཔལདྡྷིཝསེན ཛཱནཱཏི, ན སཉྙཱཔཉྙཱ ཝིཡ སཉྫཱནནཔཊིཝིཛ྄ཛྷནཝསེན.

པཱིཏིསོམནསྶསམྤཡོགཏོཏི ཝུཏྟེ ཡེན ཡོགཱ སུམནོ ཧོཏི, ཏཾ སོམནསྶནྟི ཝུཙྩཏཱིཏི པཱིཏིཡཱ ཙ སོམནསྶབྷཱཝོ ཨཱཔཛྫཏི, ཏསྨཱ ཝིནཱཔི ཀཱཡེན ཝཏྠུནཱ སཱཏཝེདནཱསམྤཡོགཏོཏི ཡོཛེཏབྦཾ. ཨེཝཉྩ ནིཔྤཱིཏིཀཾ སོམནསྶཉྩ སངྒཧིཏཾ ཧོཏི, པཱིཏིཨུཔལཀྑིཏཾ ཝཱ སོམནསྶཾ སཔྤཱིཏིཀཾ ནིཔྤཱིཏིཀཉྩ སོམནསྶནྟི ཨཏྠོ དཊྛབྦོ.

པཝཏྟསནྟཏཱདྷིཔཏེཡྻནྟི པཝཏྟསངྑཱཏཱཡ སནྟཏིཡཱ ཨདྷིཔཏིབྷཱུཏཾ. ཛཱིཝིཏིནྡྲིཡསྶ ཧི ཨཏྟནོ ཝིཛྫམཱནཀྑཎེ ཨནུཔཱལེནྟསྶ ཨནནྟརཉྩ སཱནུཔཱལནཱནཾ ཨུཔྤཏྟིཡཱ ཧེཏུབྷཱུཏསྶ ཝསེན པཝཏྟཾ ཙིརཊྛིཏིཀཾ ཧོཏི, ཏཾཏཾཀམྨཝིསེསེན ཝིསེསཡུཏྟཾ ཡཱཝ ཙུཏི ཨཝིསེསེན ཝཱ ཡཱཝ པརིནིབྦཱནཾ ཨཝིཙྪིནྣཾ པཝཏྟཏི ཛཱིཝམཱནཏཱཝིསེསཡུཏྟཉྩཱཏི རཱུཔཱརཱུཔཛཱིཝིཏིནྡྲིཡཱནཾ སམཱནལཀྑཎཱདིཾ ¶ ཝཏྟུཾ ‘‘ཨཏྟནཱ ཨཝིནིབྷུཏྟདྷམྨཱན’’ནྟི ཨཱཧ. ཨནུཔཱལེཏབྦཱནཾ ཨཏྠིཀྑཎེཡེཝ. ཨསཏི ཧི ཨནུཔཱལེཏབྦེ ཨུཔྤལཱདིམྷི ཀིཾ ཨུདཀཾ ཨནུཔཱལེཡྻཱཏི. ཏསྶ ཏསྶཱཏི ཨནུཔཱལནཱདིཀསྶ. སཱདྷནཏོཏི སཱདྷནེན. ཏཾསཱདྷནཉྩ ཛཱིཝམཱནཝིསེསཔཙྩཡབྷཱཝཏོ.

ཨིནྡྲིཡརཱསིཝཎྞནཱ ནིཊྛིཏཱ.

མགྒངྒརཱསིཝཎྞནཱ

སམྨཱཏི ཨཝིཔརཱིཏནིཡྻཱནིཀབྷཱཝེན. པསཏྠཏཱ ཙ ཨེཝམེཝ དཊྛབྦཱ.

བལརཱསིཝཎྞནཱ

ཨསྶདྡྷིཡེཏི ཨསྶདྡྷིཡཀཱརཎཱ. ཨུབྷཡཔདཝསེནཱཏི སདྡྷཱཔདཾ བལཔདནྟི ཨེཝམཱདིཔདདྭཡཝསེན. ནིཡཀཛ྄ཛྷཏྟཾ ཛཱཏིཨཱདིསམུཊྛཱནཾ ཨེཏིསྶཱཏི ཨཛ྄ཛྷཏྟསམུཊྛཱནཱ. གརུནཱ ཀིསྨིཉྩི ཝུཏྟེ གཱརཝཝསེན པཏིསྶཝནཾ པཏིསྶཝོ, སཧ པཏིསྶཝེན སཔྤཏིསྶཝཾ, པཏིསྶཝབྷཱུཏཾ ཏཾསབྷཱགཉྩ ཡཾཀིཉྩི ¶ གཱརཝནྟི ཨཏྠོ. ཛཱཏིཨཱདིམཧཏྟཔཙྩཝེཀྑཎེན ཨུཔྤཛྫམཱནཱ ཙ ཧིརཱི ཏཏྠ གཱརཝཝསེན པཝཏྟཏཱིཏི ‘‘སཔྤཏིསྶཝལཀྑཎཱ’’ཏི ཝུཙྩཏི. ཝཛྫཾ བྷཱཡཏི ཏཉྩ བྷཡཏོ པསྶཏཱིཏི ཝཛྫབྷཱིརུཀབྷཡདསྶཱཝཱི. ཨེཝཾསབྷཱཝཾ ཨོཏྟཔྤཾ. ཧིརཱི པཱཔདྷམྨེ གཱུཐཾ ཝིཡ པསྶཏི, ཨོཏྟཔྤཾ ཨུཎྷཾ ཝིཡ. དཱཡཛྫཾ ནཝལོཀུཏྟརདྷམྨཱདི. ཨཛ྄ཛྷཏྟསམུཊྛཱནཱདིཏཱ ཙ ཧིརཱིཨོཏྟཔྤཱནཾ ཏཏྠ ཏཏྠ པཱཀཊབྷཱཝེན ཝུཏྟཱ, ན པན ཏེསཾ ཀདཱཙི ཨཉྙམཉྙཾ ཝིཔྤཡོགཱ. ན ཧི ལཛྫནཾ ནིབྦྷཡཾ པཱཔབྷཡཾ ཝཱ ཨལཛྫནཾ ཧོཏཱིཏི.

མཱུལརཱསིཝཎྞནཱ

ཨགེདྷོ ཨནབྷིཛ྄ཛྷནཾ ཨནབྷིཀངྑནཾ. ཨནལླཱིནོ བྷཱཝོ ཨདྷིཔྤཱཡོ ཨེཏསྶཱཏི ཨནལླཱིནབྷཱཝོ, ཨེཝཉྷི ཨུཔམཱཡ སམེཏི. ཨནུཀཱུལམིཏྟོ ཨནུཝཏྟཀོ. ཝིནཡརསོཏི ཝིནཡནརསོ. ཨདོསོ དུསྶཱིལྱམལསྶཱཏི ཨིདཾ དུསྶཱིལྱསྶ དོསསམུཊྛཱནཏཾ དོསཱུཔནིསྶཡཏཉྩ སནྡྷཱཡ ¶ ཝུཏྟཾ. ཨབྷཱཝནཱཡཱཏི ‘‘ཏཏྠ ཛཱཏཱནཾ དྷམྨཱནཾ ཨནཏིཝཏྟནཊྛེན བྷཱཝནཱཨིནྡྲིཡཱནཾ ཨེཀརསཊྛེན བྷཱཝནཱ ཏདུཔགཝཱིརིཡཝཱཧནཊྛེན བྷཱཝནཱ ཨཱསེཝནཊྛེན བྷཱཝནཱ’’ཏི ཨེཝཾ ཝུཏྟཱཡ པཉྙཱསཱདྷནཱཡ བྷཱཝནཱཡ ཨཔྤཝཏྟི, ཏཔྤཊིཔཀྑབྷཱུཏཱ ཝཱ ཨཀུསལཱ ཨབྷཱཝནཱ. ནིགྒུཎེཔི གུཎགྒཧཎཾ ཨདྷིཀགྒཧཎཾ. ཝིཛྫམཱནམྤི གུཎཾ ཝིདྡྷཾསེཏྭཱ གཧཎཾ ཨཱུནགྒཧཎཾ. ཙཏུཝིཔལླཱསགྒཧཎཾ ཝིཔརཱིཏགྒཧཎཾ.

ཡཱཐཱཝསབྷཱཝེཏི ‘‘ཨེཏྟཀོ ཨེཏསྶ གུཎོ, ཨེཏྟཀོ དོསོ’’ཏི གུཎདོསཱནཾ སབྷཱཝེ ‘‘ཛརཱདྷམྨོ ཛཱིརཏི, ཏཾ ཀུཏེཏྠ ལབྦྷཱ མཱ ཛཱིརཱི’’ཏི ཨེཝམཱདིཔཙྩཝེཀྑཎསམྦྷཝཏོ. ཨལོབྷེན ཙ གཧཊྛཱནཾ ཁེཏྟཝཏྠཱདཱིསུ ཝིཝཱདཱབྷཱཝཏོ. ཨམོཧེན པབྦཛིཏཱནཾ དིཊྛིགཏཝིཝཱདཱབྷཱཝཏོ. ཀཱམརཱགཱབྷིནིཝེསཝིནིབནྡྷཱ ཧི གཧཊྛཱ གཧཊྛེཧི ཝིཝདནྟི, དིཊྛིརཱགཱབྷིནིཝེསཝིནིབནྡྷཱ སམཎཱ སམཎེཧཱིཏི. རཱགཝསེན མིཏྟསནྠཝོ དོསཝསེན ཝིརོདྷོ ཙ ཏབྦིསེསེན ཨུཔགམཱཔགམཱ, ཨཱརམྨཎེ ཝཱ རཱུཔཱདིམྷི ཨནུརོདྷཝིརོདྷཱ. ཨམཛ྄ཛྷཏྟབྷཱཝསྶ པཊིགྷཱནུནཡསངྑཱཏསྶ མོཧེན པཝཏྟི. སུཁཝིཔརིཎཱམེ དུཀྑསམཱཡོགེ ཙ པཊིགྷཔཝཏྟིཡཾ ཝེདནཱཔརིགྒཧོ ན སིཛ྄ཛྷཏཱིཏི ཨདོསཱནུབྷཱཝེན ཝེདནཱསཏིཔཊྛཱནཾ སིཛ྄ཛྷཏི. དིབྦཝིཧཱརསྶཱཏི ཙཏུནྣཾ ཛྷཱནཱནཾ. ཨརིཡཝིཧཱརོ ཕལསམཱཔཏྟི. མོཧེན ཨཝིཙཱརེནྟོ ཨུདཱསཱིནཔཀྑེསུཔི སཏྟསངྑཱརེསུ སབྦེསུ ¶ ཨབྷིསངྒཾ ཀརོཏཱིཏི ཨམཱུལ༹ྷསྶ ཏདབྷཱཝོ ཝེདིཏབྦོ. དུཀྑདསྶནསྶ ཨཱསནྣཔཊིཔཀྑཏྟཱ དོསསྶ ཏཔྤཊིཔཀྑེན ཨདོསེན དུཀྑདསྶནཾ ཧོཏི.

ཀམྨཔཐརཱསིཝཎྞནཱ

སུཁཱདཱིནི ཨཏྟནོ ན བྱཱཔཱདེཏི ན ཝིནཱསེཏི པརསྶ ཙཱཏི དཊྛབྦཾ. ཀམྨཔཐཏཱཏཾསབྷཱགཏཱཧི ཀམྨཔཐཝསེན.

པསྶདྡྷཱདིཡུགལཝཎྞནཱ

དརཐོ སཱརམྦྷོ, དུཀྑདོམནསྶཔཙྩཡཱནཾ ཨུདྡྷཙྩཱདིཀཱནཾ ཀིལེསཱནཾ ཙཏུནྣཾ ཝཱ ཁནྡྷཱནཾ ཨེཏཾ ཨདྷིཝཙནཾ. ཨུདྡྷཙྩཔྤདྷཱནཱ ཀིལེསཱ ཨུདྡྷཙྩཱདིཀིལེསཱ, ཨུདྡྷཙྩཾ ཝཱ ཨཱདིཾ ཀཏྭཱ སབྦཀིལེསེ སངྒཎྷཱཏི. སུཝཎྞཝིསུདྡྷི ཝིཡཱཏི ཡཐཱ སུཝཎྞཝིསུདྡྷི ཨལངྐཱརཝིཀཏིཝིནིཡོགཀྑམཱ, ཨེཝཾ ཨཡམྤི ཧིཏཀིརིཡཱཝིནིཡོགཀྑམཱ.

སམཾ ¶ , སམནྟཏོ ཝཱ པཀཱརེཧི ཛཱནནཾ སམྤཛཉྙཾ. ཙེཏིཡཝནྡནཱདིཨཏྠཾ ཨབྷིཀྐམཱདཱིསུ ཨཏྠཱནཏྠཔརིགྒཎྷནཾ སཱཏྠཀསམྤཛཉྙཾ. སཏི ཙ ཨཏྠེ སཔྤཱཡཱསཔྤཱཡརཱུཔཱདིཔརིགྒཎྷནཾ སཔྤཱཡསམྤཛཉྙཾ. གོཙརགཱམཱབྷིཀྐམནཱདཱིསུ ཀམྨཊྛཱནཱཝིཛཧནཾ གོཙརསམྤཛཉྙཾ. ཨབྷིཀྐམནཱདཱིནཾ དྷཱཏུཨཱདིཝསེན པཝིཙཡོ ཨསམྨོཧསམྤཛཉྙཾ. སབྦཀམྨཊྛཱནབྷཱཝནཱནུཡུཏྟཱནཾ སབྦཡོགཱིནཾ སབྦདཱ ཨུཔཀཱརཀཱ ཨིམེ དྭེ དྷམྨཱ པཱརིཔནྠཀཧརཎཏོ བྷཱཝནཱཝཌྜྷནཏོ ཙ. ཡཐཱཧ ‘‘དྭེ དྷམྨཱ བཧུཀཱརཱ སཏི ཙ སམྤཛཉྙཉྩཱ’’ཏི (དཱི. ནི. ༣.༣༥༢). ཡུགེ ནདྡྷཱ ཝིཡཱཏི ཡུགནདྡྷཱ, ཨཉྙམཉྙཾ ནིམིཏྟབྷཱཝེན སམཾ པཝཏྟཱཏི ཨཏྠོ. ‘‘པུན ཙཔརཾ, ཨཱཝུསོ, བྷིཀྑུ སམཐཝིཔསྶནཾ ཡུགནདྡྷཾ བྷཱཝེཏཱི’’ཏི (ཨ. ནི. ༤.༡༧༠; པཊི. མ. ༢.༡) ཧི སུཏྟེ ཨེཏེསཾ ཡུགནདྡྷཏཱ ཝུཏྟཱ. སབྦཀུསལདྷམྨེསུ ལཱིནུདྡྷཙྩཱབྷཱཝོ ཨེཏེཧི དྭཱིཧི སམཾ ཡུཏྟེཧཱིཏི ‘‘ཝཱིརིཡསམཱདྷིཡོཛནཏྠཱཡཱ’’ཏི ཨཱཧ, ཡོགཝཙནཏྠཱཡཱཏི ཨཏྠོ.

ཡེཝཱཔནཀཝཎྞནཱ

རཱུཔཱབྷཱཝེནཱཏི རུཔྤནཱབྷཱཝེན. དྷམྨཱཏི ཨེཏསྶ ཨཏྠོ སབྷཱཝཏོ ཨུཔལབྦྷམཱནཱཏི. མེཏྟཱཔུབྦབྷཱགོཏི ཨཔྤནཱཔྤཏྟཱཡ མེཏྟཱཡ པུབྦབྷཱགོ ¶ , པརིཀམྨམེཏྟཱ ཨེཏསྨིཾ ཙིཏྟེ ཨཏྠཱིཏི ཨཏྠོ. ཝིརཏིཝསེནཱཏི ཝཙཱིཔཝཏྟིཡཱ ན པཱུརེཏི, ཀིནྟུ ཝིརཏིཡོགེནཱཏི ཨཏྠོ. ཨཔཎྞཀངྒཱནཱིཏི ཨཝིརདྡྷངྒཱནི. ཡཐཱ ཏཐཱ ཝཱ ཨཱརམྨཎེ ཝིནིཙྪཡནཾ ཨདྷིམུཙྩནཾ. ན ཧི ཨནདྷིམུཙྩནྟོ པཱཎཱཏིཔཱཏཱདཱིསུ དཱནཱདཱིསུ ཝཱ པཝཏྟཏི, སདྡྷཱ པན པསཱདནཱིཡེསུ པསཱདཱདྷིམོཀྑོཏི ཨཡམེཏེསཾ ཝིསེསོ. དཱརཀསྶ ཝིཡ ཨིཏོ ཙིཏོ ཙ སཾསཔྤནསྶ ཀརིསྶཱམི ན ཀརིསྶཱམཱིཏི ཨཝིནིཙྪཡསྶ པཊིཔཀྑཀིརིཡཱ ཨསཾསཔྤནཾ. པུརིམམནཏོཏི བྷཝངྒཏོ. ཝིསདིསཾ ཝཱིཐིཛཝནཾ མནཾ ཀརོཏཱིཏི མནསིཀཱརསཱམཉྙེན ཝཱིཐིཛཝནཔཊིཔཱདཀེ དསྶེཏི. ཏེསུ དྷམྨེསཱུཏི ཙིཏྟཙེཏསིཀདྷམྨེསུ. ཨཏདཱརམྨཎཏྟེཔི ཧི ཏེསུ སམཔྤཝཏྟེསུ ཨུདཱསཱིནབྷཱཝཏོ ཏཏྲམཛ྄ཛྷཏྟཏཱཏི ཝུཙྩཏི. ཨལཱིནཱནུདྡྷཏཔྤཝཏྟིཔཙྩཡཏྟཱ ཨཱུནཱདྷིཀནིཝཱརཎརསཱ. ཀཱཡདུཙྩརིཏཱདིཝཏྠཱུནནྟི པཱཎཱདཱིནཾ. ཨམདྡནཱ མདྡནཔཊིཔཀྑབྷཱཝོཝ.

ཏཾཏཾརཱསིཀིཙྩཝསེན ཝིབྷཱགརཧིཏཱ ཨཝིབྷཏྟིཀཱ. ཨེཏྠཱཏི ཨེཏེསུ སཝིབྷཏྟིཀེསུ དུཏིཡཊྛཱནཱདཱིསུཔི བྷཱཛིཡམཱནེསུ ཨཔུབྦཾ ནཏྠཱིཏི ཨཏྠོ. པདཾ པཱུརིཏནྟི ཛྷཱནཱདིཔདཾ པཉྩཀཱདིཝསེན པཱུརིཏཾ. པཉྩ ཧི ཨངྒཱནི ཛྷཱནཔདསྶ ཨཏྠོ, ཏེསུ ཨེཀསྨིཉྩ ཨཱུནེ ཛྷཱནཔདཾ ¶ ཨཱུནཾ ཧོཏཱིཏི. པདསམཱུཧོ པདཀོཊྛཱསོ ཝཱ ཏཾ ཏམེཝ ཝཱ པདཾ, ཨཝུཏྟཾ ཧཱཔིཏཾ ནཱམ ཧོཏཱིཏི ཝུཏྟཾ ‘‘པཱུརིཏ’’ནྟི. ཝུཏྟསྨིཉྙེཝ ཝུཙྩམཱནེ ཨནེཀེསཾ པུརིསསདྡཱནཾ ཝིཡ ཀོཙི སམྦནྡྷོ ནཏྠཱིཏི མཉྙམཱནོ ཨཱཧ ‘‘ཨནནུསནྡྷིཀཱ ཀཐཱ’’ཏི. ཨནྟརནྟརཱ ཝུཏྟསྨིཉྙེཝ ཝུཙྩམཱནེ ཨནུཀྐམེན དྷམྨཱ ཀཐིཏཱ ན ཧོནྟཱིཏི ཨཱཧ ‘‘ཨུཔྤཊིཔཱཊིཡཱ’’ཏི. ཕསྶཔཉྩམཀརཱསི སབྦཙིཏྟུཔྤཱདསཱདྷཱརཎཝསེན ཙཏུཀྑནྡྷཏཔྤཙྩཡསངྒཧཝསེན ཙ ཝུཏྟོ. ཡཐཱཝུཏྟེསུ པན རཱསཱིསུ ཨེཀརཱསིཀིཙྩསྶཔི ཨབྷཱཝཱ ཚནྡཱདཡོ ཡེཝཱཔནཀཝསེན ཝུཏྟཱ. ཝུཏྟཱནམྤི ཙ དྷམྨཱནཾ ཡཐཱ ཝེདནཱདཱིནཾ ཛྷཱནངྒཱདིབྷཱཝོ ཝུཏྟོ, ན ཨེཝཾ སོཝཙསྶཏཱཀལྱཱཎམིཏྟཏཱདིཝིསེསོ ཝུཏྟོཏི ཏསྶ སངྒཎྷནཏྠཾ ཀེཙི དྷམྨེ ཝིསུཾ ཋཔེཏྭཱ ཏེ ཙ ཏཉྩ ཝིསེསཾ ‘‘ཡེ ཝཱ པནཱ’’ཏི ཨཱཧ. ཝེནེཡྻཛ྄ཛྷཱསཡཝསེན ཝཱ སཱཝསེསེ དྷམྨེ ཝཏྭཱ ‘‘ཡེ ཝཱ པནཱ’’ཏི ཝུཏྟཾ.

ཡེཝཱཔནཀཝཎྞནཱ ནིཊྛིཏཱ.

དྷམྨུདྡེསཝཱརཀཐཱཝཎྞནཱ ནིཊྛིཏཱ.

ཀཱམཱཝཙརཀུསལཾ

ནིདྡེསཝཱརཀཐཱཝཎྞནཱ

༢. ཕུསནཀཝསེནཱཏི ¶ སནྟེ ཨསནྟེཔི ཝིསཡེ ཨཱཔཱཐགཏེ ཙིཏྟསྶ སནྣིཔཏནཝསེན ‘‘ཙིཏྟཾ མནོ’’ཏིཨཱདཱིསུ (དྷ. ས. ༦, ༡༧) ཝིཡ ཀིཙྩཝིསེསཾ, ‘‘མཱནས’’ནྟིཨཱདཱིསུ (དྷ. ས. ༦, ༡༧) ཝིཡ སམཱནེ ཨཏྠེ སདྡཝིསེསཾ, ‘‘པཎྜར’’ནྟིཨཱདཱིསུ (དྷ. ས. ༦, ༡༧) ཝིཡ གུཎཝིསེསཾ, ‘‘ཙེཏསིཀཾ སཱཏ’’ནྟིཨཱདཱིསུ (དྷ. ས. ༢, ༡༨) ཝིཡ ནིསྶཡཝིསེསཾ, ‘‘ཙིཏྟསྶ ཋིཏཱི’’ཏིཨཱདཱིསུ (དྷ. ས. ༡༥, ༢༤) ཝིཡ ཨཉྙསྶ ཨཝཏྠཱབྷཱཝཝིསེསཾ, ‘‘ཨལུབྦྷནཱ’’ཏིཨཱདཱིསུ (དྷ. ས. ༣༢) ཝིཡ ཨཉྙསྶ ཀིརིཡཱབྷཱཝཝིསེསཾ, ‘‘ཨལུབྦྷིཏཏྟ’’ནྟིཨཱདཱིསུ (དྷ. ས. ༣༢) ཝིཡ ཨཉྙསྶ ཀིརིཡཱབྷཱཝབྷཱུཏཏཱཝིསེསནྟིཨཱདིཀཾ ཨནཔེཀྑིཏྭཱ དྷམྨམཏྟདཱིཔནཾ སབྷཱཝཔདཾ. ཕུསནྟསྶ ཧི ཙིཏྟསྶ ¶ ཕུསནཀིརིཡཱ ཕུསནཱཀཱརོ. སམྥུསནཱཏི ཨཱརམྨཎསམཱགམཕུསནཱ, ན པཊིལཱབྷསམྥུསནཱ. སམྥུསིཏསྶ ཨཱརམྨཎེན སམཱགཏསྶ ཙིཏྟསྶ བྷཱཝོ སམྥུསིཏཏྟཾ. ཡསྨིཾ སཏི ཙིཏྟཾ སམྥུསིཏནྟི ཝུཙྩཏི, སོ ཏསྶ བྷཱཝོ. ཨེཝཾ ཨཉྙེསུཔི བྷཱཝནིདྡེསེསུ དཊྛབྦཾ.

ཨཔརསྶ ཝེཝཙནསྶ, ཨཔརེན ཝཱ པུརིམཏྠསྶ དཱིཔནཱ ཨཔརདཱིཔནཱ. ‘‘པཎྜིཙྩཾ ཀོསལླ’’ནྟི ཨེཝམཱདཡོ པཉྙཱཝིསེསཱ ནཱནཱཀཱལེ ལབྦྷམཱནཱཔི ཨེཀསྨིཾ ཙིཏྟེ ལབྦྷནྟི. ཨེཀསྨིཉྩ ཝིསེསེ ཨིཏརེཔི ཨནུགཏཱ ཧོནྟཱིཏི དསྶེཏུཾ ཏཐཱ ཝིབྷཏྟི ཨཏྠཏོ ཝིབྷཏྟི ཧོཏི ཨཏྠནཱནཏྟེན ཀཏཏྟཱ. ཨཐ ཝཱ ཡཐཱ ‘‘ཀོདྷོ ཀུཛ྄ཛྷནཱ ཀུཛ྄ཛྷིཏཏྟ’’ནྟི (དྷ. ས. ༡༠༦༦) སབྷཱཝཱཀཱརབྷཱཝནིདྡེསེཧི ཀོདྷོཏི ཨེཝམཱཀཱརོཝ ཨཏྠོ ཝུཏྟོ, ན ཨེཝམིདྷ, ཨིདྷ པན པཎྜིཏཱདིབྷཱཝཱཀཱརབྷིནྣོ ཨཏྠོ ཝུཏྟོཏི ཨིདཾ ཝིབྷཏྟིགམནཾ ཨཏྠཝསེན ཧོཏི. སམྥུསིཏཏྟནྟི ཨེཏྠཱཔི ན ‘‘ཕསྶོ’’ཏི ཨེཝམཱཀཱརོཝ ཨཏྠོ ཝུཏྟོ. སམྥསྶོཏི ཨེཝམཱཀཱརོ པན ཝུཏྟོཏི ཨཏྠཏོ ཝིབྷཏྟིགམནནྟི ཝུཏྟཾ.

དོསོ བྱཱཔཱདོཏི ཨུདྡེསེཔི ནཱམནཱནཏྟེན ནཱནཱབྷཱུཏོ ཨུདྡིཊྛོ. ནིདྡེསེཔི ཏེནེཝ ནཱནཏྟེན ནིདྡིཊྛོ. ཨེཀོཝ ཁནྡྷོ ཧོཏཱིཏི ཨེཀེན ཁནྡྷསདྡེན ཝཏྟབྦཏཾ སནྡྷཱཡཱཧ. ཙེཏནཱཏི སངྑཱརཀྑནྡྷཾ དསྶེཏི ཏཔྤམུཁཏྟཱ. ཨསདྡྷམྨཱཏི ཨསཏཾ, ཨསནྟོ ཝཱ དྷམྨཱ, ན ཝཱ སདྡྷམྨཱཏི ཨསདྡྷམྨཱཏི ཨསདྡྷམྨཝཙནཱིཡབྷཱཝེན ཨེཀཱིབྷཱུཏོཔི ཨསདྡྷམྨོ ཀོདྷགརུཏཱདིཝིསིཊྛེན སདྡྷམྨགརུཏཱཔཊིཀྑེཔནཱནཏྟེན ནཱནཏྟཾ གཏོཏི ‘‘ཙཏྟཱརོ’’ཏི ¶ ཝུཏྟཾ. ན སདྡྷམྨགརུཏཱཏི ཝུཙྩམཱནཱ ཝཱ ཨསདྡྷམྨགརུཏཱ ཨསདྡྷམྨགརུཏཱབྷཱཝེན ཨེཀཱིབྷཱུཏཱཔི ཀོདྷཱདིཝིསིཊྛཔཊིཀྑེཔནཱནཏྟེན ནཱནཏྟཾ གཏཱ. པཊིཔཀྑོ ཝཱ པཊིཀྑིཔཱིཡཏི ཏེན, སཡཾ ཝཱ པཊིཀྑིཔཏཱིཏི པཊིཀྑེཔོཏི ཝུཙྩཏཱིཏི སདྡྷམྨགརུཏཱཔཊིཀྑེཔནཱནཏྟེན ཨསདྡྷམྨགརུཏཱ ཨསདྡྷམྨཱ ཝཱ ནཱནཏྟཾ གཏཱ. ཨལོབྷོཏིཨཱདཱིནཾ ཕསྶཱདཱིཧི ནཱནཏྟཾ ལོབྷཱདིཝིསིཊྛེན པཊིཀྑེཔེན ལོབྷཱདིཔཊིཔཀྑེན ཝཱ ཝེདིཏབྦཾ. ཨལོབྷཱདོསཱམོཧཱནཾ ཨཉྙམཉྙནཱནཏྟཾ ཡཐཱཝུཏྟེན པཊིཀྑེཔནཱནཏྟེན ཡོཛེཏབྦཾ. པདཏྠསྶ པདནྟརེན ཝིབྷཱཝནཾ པདཏྠུཏི. ཏེན ཧི ཏཾ པདཾ མཧཏྠནྟི དཱིཔིཏཾ ཧོཏི ཨལངྐཏཉྩཱཏི. ཨཏྠཝིསེསཱབྷཱཝེཔི ཨཱབྷརཎཝསེན ཙ ཨཱདརཝསེན ཙ པུན ཝཙནཾ དལ༹ྷཱིཀམྨཾ.

༣. ཏཛྫནྟི ཏསྶ ཕལསྶ ཨནུཙྪཝིཀཾ. ན ཀེཝལཾ ནིདྡིསིཡམཱནཾ སཱཏམེཝ ཨདྷིཀཏཾ ¶ , ཨཐ ཁོ ཡཐཱནིདྡིཊྛཱནི ཨཱརམྨཎཱནིཔཱིཏི ‘‘ཏེཧི ཝཱ’’ཏིཨཱདི ཝུཏྟཾ. ཏསྶ ཝཱ ཛཱཏཱ ཀཱརཎབྷཱཝེན ཕསྶཏྠཾ པཝཏྟཱཏི ཏཛྫཱ. ཏཾསམངྒཱིཔུགྒལཾ, སམྤཡུཏྟདྷམྨེ ཝཱ ཨཏྟནི སཱདཡཏཱིཏི སཱཏཾ ད-ཀཱརསྶ ཏ-ཀཱརཾ ཀཏྭཱ. སུཊྛུ ཁཱདཏི, ཁཎཏི ཝཱ དུཀྑནྟི སུཁཾ.

༥. པཱསོཏི རཱགཔཱསོ. སོ ཧི ནིརཱཝརཎཏྟཱ ཨནྟལིཀྑཙརོ. ཨཀུསལམྤི པཎྜརནྟི ཝུཏྟཾ, ཀོ པན ཝཱདོ ཀུསལནྟི ཨདྷིཔྤཱཡོ. ཏཉྷི པཎྜརཏོ ནིཀྑནྟཾ སཡཉྩ པཎྜརནྟི. ཨཐ ཝཱ སབྦམྤི ཙིཏྟཾ སབྷཱཝཏོ པཎྜརམེཝ, ཨཱགནྟུཀོཔཀྐིལེསཝོདཱནེཧི པན སཱཝཛྫཱནཝཛྫཱནཾ ཨུཔཀྐིལིཊྛཝིསུདྡྷཏརཏཱ ཧོནྟཱིཏི. དཱརུཔྤམཱཎེསུ སིལཱདཱིསུ ཁནྡྷཔཉྙཏྟིཡཱ ཨབྷཱཝཱ ཀིཉྩི ནིམིཏྟཾ ཨནཔེཀྑིཏྭཱ དཱརུམྷི པཝཏྟཱ ཁནྡྷཔཉྙཏྟཱིཏི ‘‘པཎྞཏྟིམཏྟཊྛེནཱ’’ཏི ཝུཏྟཾ. ཏཾ-སདྡེན མནོཝིཉྙཱཎདྷཱཏུཡེཝ ཝུཙྩེཡྻ ནིདྡིསིཏབྦཏྟཱཏི ན ཏསྶཱ ཏཛྫཏཱ. ཏེཧི ཨཱརམྨཎེཧི ཛཱཏཱ ཏཛྫཱཏི ཙ ཝུཙྩམཱནེ སམྥསྶཛཏཱ ན ཝཏྟབྦཱ. ན ཧི སོ ཨཱརམྨཎཾ, ནཱཔི ཝིསེསཔཙྩཡོ. ‘‘ཏིཎྞཾ སངྒཏི ཕསྶོ’’ཏི ཝིཉྙཱཎམེཝ ཕསྶསྶ ཝིསེསཔཙྩཡོཏི ཝུཏྟོཏི ཏསྨཱ ན ཝིཉྙཱཎཾ ཝིསེསཔཙྩཡབྷཱུཏཾ སམྥསྶཛཏཱཡ ཏཛྫཱམནོཝིཉྙཱཎདྷཱཏུསམྥསྶཛཱཔཉྙཏྟིཾ ལབྷཏི, ན ཙ ཏདེཝ ཏསྶ ཀཱརཎབྷཱཝེན ཕལབྷཱཝེན ཙ ཝུཙྩམཱནཾ སུཝིཉྙེཡྻཾ ཧོཏཱིཏི. ཀིཾ ཝཱ ཨེཏེན, ཡཐཱ བྷགཝཏཱ ཝུཏྟཱ ཏཾསབྷཱཝཱཡེཝ ཏེ དྷམྨཱཏི ན ཨེཝཾཝིདྷེསུ ཀཱརཎཾ མགྒིཏབྦཾ.

༧. ཨེཝཾ ¶ ཏཀྐནཝསེན ལོཀསིདྡྷེནཱཏི ཨདྷིཔྤཱཡོ. ཨེཝཉྩེཝཉྩ བྷཝིཏབྦནྟི ཝིཝིདྷཾ ཏཀྐནཾ ཀཱུཔེ ཝིཡ ཨུདཀསྶ ཨཱརམྨཎསྶ ཨཱཀཌྜྷནཾ ཝིཏཀྐནཾ.

༨. སམནྟཏོ ཙརཎཾ ཝིཙརཎཾ.

༩. ཨཏྟམནཏཱཏི ཨེཏྠ ཨཏྟ-སདྡེན ན ཙིཏྟཾ ཝུཏྟཾ. ན ཧི ཙིཏྟསྶ མནོ ཨཏྠཱིཏི. ཨཏྟམནསྶ པན པུགྒལསྶ བྷཱཝོ ཨཏྟམནཏཱཏི ཝཏྭཱ པུན པུགྒལདིཊྛིནིསེདྷནཏྠཾ ‘‘ཙིཏྟསྶཱ’’ཏི ཝུཏྟཾ.

༡༡. ན བལཝཏཱི, ཀསྨཱ ཨཝཊྛིཏི ཝུཏྟཱཏི? ཨེཀགྒཙིཏྟེན པཱཎཝདྷཱདིཀརཎེ ཏཐཱ ཨཝཊྛཱནམཏྟབྷཱཝཏོ ¶ . ཝིརཱུཔཾ, ཝིཝིདྷཾ ཝཱ སཾཧརཎཾ ཝིཀིརཎཾ ཝིསཱཧཱརོ, སཾཧརཎཾ ཝཱ སམྤིཎྜནཾ, ཏདབྷཱཝོ ཝིསཱཧཱརོ.

༡༢. ཨཉྙསྨིཾ པརིཡཱཡེཏི ཨཉྙསྨིཾ ཀཱརཎེ. སམཱནཱདྷིཀརཎབྷཱཝོ དྭིནྣཾ བཧཱུནཾ ཝཱ པདཱནཾ ཨེཀསྨིཾ ཨཏྠེ པཝཏྟི.

༡༣. ཨཱརམྦྷཏི ཙཱཏི ཨཱཔཛྫཏི ཙ. ཨུདྡྷཾ ཡམནཾ ཨུཡྻཱམོ. དྷུརནྟི ནིཔྥཱདེཏུཾ ཨཱརདྡྷཾ ཀུསལཾ, པཊིཉྙཾ ཝཱ.

༡༤. ཏིཎྞནྟི བུདྡྷཱདཱིནཾ. ཙིཏྟེ ཨཱརམྨཎསྶ ཨུཔཊྛཱནཾ ཛོཏནཉྩ སཏིཡེཝཱཏི ཏསྶཱ ཨེཏཾ ལཀྑཎཾ.

༡༦. པཱསཱཎསཀྑརཝཱལིཀཱདིརཧིཏཱ བྷཱུམི སཎྷཱཏི ‘‘སཎྷཊྛེནཱ’’ཏི ཝུཏྟཾ.

༡༩. ཨཡནྟཱིཏི ཨེཀཀམྨནིབྦཏྟམནུསྶཱདིསནྟཏིཨཝིཙྪེདཝསེན པཝཏྟནྟི. ཀུསལཱཀུསལེསུཔི ཧི ཛཱིཝིཏཾ ཨིནྡྲིཡཔཙྩཡབྷཱཝེན སམྤཡུཏྟེ པཝཏྟཡམཱནམེཝ ཏདཝིཙྪེདསྶ པཙྩཡོ ཧོཏི.

༣༠. ཡཾ ཧིརཱིཡཏཱིཏི ཧིརཱིཡཏི-སདྡེན ཝུཏྟོ བྷཱཝོ ཡཾ-སདྡེན ཝུཙྩཏཱིཏི ཡནྟི བྷཱཝནཔུཾསཀཾ ཝཱ ཨེཏཾ དཊྛབྦཾ. ཧིརིཡིཏབྦེནཱཏི ཙ ཧེཏུཨཏྠེ ཀརཎཝཙནཾ ཡུཛྫཏི.

༣༢. ཨལུབྦྷནཀཝསེནཱཏི ¶ ཨེཏྠ ཨལུབྦྷནམེཝ ཨལུབྦྷནཀནྟི བྷཱཝནིདྡེསོ དཊྛབྦོ.

༣༣. ཨབྱཱཔཛྫོཏི བྱཱཔཱདེན དུཀྑེན དོམནསྶསངྑཱཏེན དོསེན ཝིཡ ན བྱཱཔཱདེཏབྦོཏིཔི ཨཏྠོ ཡུཛྫཏི.

༤༢-༤༣. ཐིནམིདྡྷཱདིཔཊིཔཀྑབྷཱཝེན ཀུསལདྷམྨེ ཨནིཙྩཱདིམནསིཀཱརེ ཙ སཱིགྷཾ སཱིགྷཾ པརིཝཏྟནསམཏྠཏཱ ལཧུཔརིཎཱམཏཱ, ཨཝིཛྫཱནཱིཝརཎཱནཉྷི ཏཎྷཱསཾཡོཛནཱནཾ སཏྟཱནཾ ཨཀུསལཔྤཝཏྟི ¶ པཀཏིབྷཱུཏཱཏི ན ཏཏྠ ལཧུཔརིཎཱམཏཱཡ ཨཏྠོ. ཏེསཉྩ བྷཱཝོ གརུཏཱཡེཝཱཏི ཏབྦིདྷུརསབྷཱཝཱནཾ ལཧུཏཱ དཊྛབྦཱ. སཱ ཧི པཝཏྟམཱནཱ སཱིགྷཾ བྷཝངྒཝུཊྛཱནསྶ པཙྩཡོ ཧོཏི.

༤༤-༤༥. ཡེ ཙ དྷམྨཱ མོཧསམྤཡུཏྟཱ ཝིཡ ཨཝིཔནྣལཧུཏཱ, ཏེསཉྩ ཀུསལཀརཎེ ཨཔྤཊིགྷཱཏོ མུདུཏཱ. ཨཔྤཊིགྷཱཏེན མུདུཏཱདིརཱུཔསདིསཏཱཡ ཨརཱུཔདྷམྨཱནམྤི མུདུཏཱ མདྡཝཏཱཏིཨཱདི ཝུཏྟཾ.

༤༦-༤༧. སིནེཧཝསེན ཀིལིནྣཾ ཨཏིམུདུཀཾ ཙིཏྟཾ ཨཀམྨཉྙཾ ཧོཏི ཝིལཱིནཾ ཝིཡ སུཝཎྞཾ, མཱནཱདིཝསེན ཨཏིཐདྡྷཉྩ ཨཏཱཔིཏཾ ཝིཡ སུཝཎྞཾ, ཡཾ པནཱནུརཱུཔམུདུཏཱཡུཏྟཾ, ཏཾ ཀམྨཉྙཾ ཧོཏི ཡུཏྟམདྡཝཾ ཝིཡ སུཝཎྞཾ. ཏསྶེཝ མུདུཀསྶ ཡོ ཀམྨཉྙཱཀཱརོ, སཱ ཀམྨཉྙཏཱཏི མུདུཏཱཝིསིཊྛཱ ཀམྨཉྙཏཱ ཝེདིཏབྦཱ.

༥༠-༥༡. པཙྩོསཀྐནབྷཱཝེན པཝཏྟཾ ཨཀུསལམེཝ པཙྩོསཀྐནཾ. ཨེཀཝཱིསཏི ཨནེསནཱ ནཱམ ཝེཛྫཀམྨཾ ཀརོཏི, དཱུཏཀམྨཾ ཀརོཏི, པཧིཎཀམྨཾ ཀརོཏི, གཎྜཾ ཕཱལེཏི, ཨརུམཀྑནཾ དེཏི, ཨུདྡྷཾཝིརེཙནཾ དེཏི, ཨདྷོཝིརེཙནཾ དེཏི, ནཏྠུཏེལཾ པཙཏི, ཙཀྑུཏེལཾ པཙཏི, ཝེལུ༹དཱནཾ དེཏི, པཎྞདཱནཾ དེཏི, པུཔྥདཱནཾ དེཏི, ཕལདཱནཾ དེཏི, སིནཱནདཱནཾ དེཏི, དནྟཀཊྛདཱནཾ དེཏི, མུཁོདཀདཱནཾ དེཏི, ཙུཎྞདཱནཾ དེཏི, མཏྟིཀཱདཱནཾ དེཏི, ཙཱཊུཀཀམྨཾ ཀརོཏི, མུགྒསཱུཔིཡཾ, པཱརིབྷཊྱཾ, ཛངྒྷཔེསནིཡཾ དྭཱཝཱིསཏིམཾ དཱུཏཀམྨེན སདིསཾ, ཏསྨཱ ཨེཀཝཱིསཏི. ཚ ཨགོཙརཱ ཝེསིཡཱགོཙརོ, ཝིདྷཝཱ, ཐུལླཀུམཱརཱི, པཎྜཀ, པཱནཱགཱར, བྷིཀྑུནཱིཨགོཙརོཏི. སངྑེཔཏོཏི སརཱུཔེན ཨནུདྡིཊྛཏྟཱ ‘‘ཏཏྠ ཀཏམོ ཚནྡོ’’ཏིཨཱདི ན ¶ སཀྐཱ ཝཏྟུནྟི ‘‘ཡོ ཚནྡོ ཚནྡིཀཏཱ’’ཏིཨཱདིནིདྡེསཾ སངྑིཔིཏྭཱ ‘‘ཡེ ཝཱ པནཱ’’ཏི ནིདྡེསོ ཀཏོཏི ཨཏྠོ.

ནིདྡེསཝཱརཀཐཱཝཎྞནཱ ནིཊྛིཏཱ.

ཀོཊྛཱསཝཱརཝཎྞནཱ

༥༨-༡༢༠. ནིདྡེསཝཱརེ ¶ པུཙྪཱདཱིནཾ པཙྩེཀཾ ཨནེཀཏྟེཔི པུཙྪཱདིབྷཱཝེན ཨེཀཏྟཾ ཨུཔནེཏྭཱ ཙཏུཔརིཙྪེདཏཱ ཝུཏྟཱ. ཙཏྟཱརོ དྭེཏི ཨེཝམཱདིཀཾ སངྑིཔིཏྭཱ སཧ ཝཱ གཧཎཾ སངྒཧོ. ཋཔེཏྭཱ ཡེཝཱཔནཀེཏི སངྒཧེཏབྦེ སནྡྷཱཡ ཝུཏྟཾ. ཏེ ཧི ཝིསུཾ ཝིསུཾ ཨུདྡིཊྛཏྟཱ ནིདྡིཊྛཏྟཱ ཙ ཝིཔྤཀིཎྞཱཏི སངྒཧེཏབྦཱ ཧོནྟི, ན ཡེཝཱཔནཀཱ སངྒཧགམནེནེཝ ཏཐཱ ཨཝིཔྤཀིཎྞཏྟཱ. ཡསྨཱ པན སངྑཱརཀྑནྡྷཔརིཡཱཔནྣཱ ཧོནྟི, ཏསྨཱ ཏཾནིདྡེསེ ཨཁནྡྷབྷཱཝནིཝཱརཎཏྠཾ ཡེཝཱཔནཱཏྭེཝ ཝུཏྟཱཏི ན ཡེཝཱཔནཀཱ ཋཔེཏབྦཱཏི. པཙྩཡསངྑཱཏེནཱཏི ཨཱཧཱརཔཙྩཡསངྑཱཏེནཱཏི ཝུཏྟཾ ཧོཏི. ཨཐ ཝཱ ‘‘ཧེཏུ པཙྩཡོ’’ཏི ཨེཏེསུ དྭཱིསུ ཛནཀོ ཧེཏུ ཨུཔཏྠམྦྷཀོ པཙྩཡོཏི ཨེཝཾ ཝིསེསཝནྟེསུ པཙྩཡསངྑཱཏེན. ཡཐཱ ཧི ཀབལཱི༹ཀཱརཱཧཱརོ ཨོཛཊྛམཀརཱུཔཱཧརཎེན རཱུཔཀཱཡཾ ཨུཔཏྠམྦྷེཏི, ཨེཝམིམེཔི ཝེདནཱདིཨཱཧརཎེན ནཱམཀཱཡནྟི. ཏཐཱ ཙ ཧོནྟཱིཏི སཱདྷཱརཎེ སཧཛཱཏཱདིཔཙྩཡེ སནྡྷཱཡཱཧ. ཨཉྙཐཱ ཙཱཏི ཨཉྙེན ཙ ཨེཀེནཱཀཱརེན པཙྩཡཱ ཧོནྟིཡེཝཱཏི ཨཱཧཱརཱཏི ཝུཙྩནྟཱིཏི ཨཏྠོ. ཏསྨཱ ཨཱཧརཎཀིཙྩརཧིཏཱནཾ ཧེཏུཨདྷིཔཏིཨཱདཱིནཾ ནཏྠི ཨཱཧཱརབྷཱཝཔྤསངྒོ. ཏིསྶོ ཙ ཝེདནཱ ཨཱཧརཏཱིཏིཨཱདི ཡཐཱསམྦྷཝཝསེན ཝུཏྟཾ, ན ཨིམསྨིཾཡེཝ ཙིཏྟེ ཕསྶཱདིཝསེན. ཏཡོ ཙ བྷཝེཏི ཀཱམཱདིབྷཝབྷཱུཏཾ ཝིཉྙཱཎཾ ཝིསེསེན, ཨཝིསེསེན ཙ པཉྩུཔཱདཱནཀྑནྡྷེ.

ཨཱརམྨཎཾ ཨུཔགནྟྭཱ ནིཛ྄ཛྷཱཡནཾ ཙིནྟནཾ ཨུཔནིཛ྄ཛྷཱཡནཾ. ཧེཏྭཊྛེནཱཏི ཨུཔཱཡཏྠེན, ན མཱུལཏྠེན. པུབྦབྷཱགེ གཏོ པཊིཔནྣོ ནཱནཱཀྑཎིཀོ ཨཊྛངྒིཀོ མགྒོ ལོཀུཏྟརཀྑཎེཝ སཧ པཝཏྟོ ཡཐཱགཏམགྒོཏི ཝུཏྟོ. ཝིཔསྶནཱཀྑཎཏོ པུབྦེཝ ཀཱཡཀམྨཱདཱིནཾ སུཔརིསུདྡྷཏཱཡ ཨཊྛངྒིཀམགྒུཔནིསྶཡསྶ ‘‘ཨརིཡོ ཨཊྛངྒིཀོ མགྒོ བྷཱཝནཱཔཱརིཔཱུརིཾ གཙྪཏཱི’’ཏི ¶ (མ. ནི. ༣.༤༣༡) ཨེཝཾ ཝུཏྟེན པརིཡཱཡེན པུབྦབྷཱགམགྒསྶ ཨཊྛངྒིཀཏཱ ཡཐཱགཏཝཙནེན དཱིཔིཏཱ, ན ཨེཀཀྑཎེ ཨཊྛནྣཾ ཨངྒཱནཾ སབྦྷཱཝཱཏི ཨེཝམསྶཔི པརིཡཱཡདེསནཏཱ ཝེདིཏབྦཱ. ཝིཛཱནནམེཝ ཙིཏྟཝིཙིཏྟཏཱཏི ‘‘ཙིཏྟཝིཙིཏྟཊྛེན ཨེཀོཝ དྷམྨོ ཝིཉྙཱཎཀྑནྡྷོ’’ཏི ཨཱཧ. ཙཏྟཱརོ ཁནྡྷཱ ཧོནྟཱིཏིཨཱདཱིསུ ཝེདནཱཀྑནྡྷཱདཱིནཾ སངྒཧེ ཀཏེཔི པུན ‘‘ཨེཀོ ཝེདནཱཀྑནྡྷོ ཧོཏཱི’’ཏིཨཱདིཝཙནཾ ན ཨནེཀེ ཝེདནཱཀྑནྡྷཱདཡོ ཛཱཏིནིདྡེསེན ཨིདྷ ཝུཏྟཱཏི དསྶནཏྠཾ. ཨིནྡྲིཡེསུ ཙ ཨེཀསྶ ཛཱཏིནིདྡེསབྷཱཝེ པཊིཀྑིཏྟེ ཨཉྙེསཾ ཨིནྡྲིཡཱནཾ ཨཱཧཱརཱདཱིནཉྩ ཏཔྤཊིཀྑེཔོ ཀཏོ ཧོཏཱིཏི པུབྦངྒམསྶ མནིནྡྲིཡསྶེཝ ཀཏོཏི དཊྛབྦོ.

ཀོཊྛཱསཝཱརཝཎྞནཱ ནིཊྛིཏཱ.

སུཉྙཏཝཱརཝཎྞནཱ

༡༢༡-༡༤༥. ཨེཏྠཱཏི ¶ ཨེཏསྨིཾ ཡཐཱཝུཏྟེ སམཡེ, ཨེཏེསུ ཝཱ དྷམྨེསུ. བྷཱཝོཏི སཏྟོ, ཡོ ཀོཙི ཝཱ ཨཏྠོ.

དུཏིཡཙིཏྟཱདིཝཎྞནཱ

༡༤༦. སཔྤཡོགེནཱཏི ལཱིནསྶ ཙིཏྟསྶ ཨུསྶཱཧནཔཡོགསཧིཏེན. སཨུཔཱཡེནཱཏི ཀུསལསྶ ཀརཎཱཀརཎེསུ ཨཱདཱིནཝཱནིསཾསཔཙྩཝེཀྑཎཾ པརེཧི ཨུསྶཱཧནནྟི ཨེཝམཱདིཨུཔཱཡསཧིཏེན.

༡༥༦-༡༥༩. མཧཱཨཊྛཀཐཱཡཾ ཨནུཉྙཱཏཱ ནཱཏིསམཱཧིཏཱཡ བྷཱཝནཱཡཱཏི ཡེཝཱཔནཀེཧིཔི ནིབྦིསེསཏཾ དསྶེཏི.

པུཉྙཀིརིཡཝཏྠཱདིཀཐཱཝཎྞནཱ

ཨཔཙིཏི ཨེཝ ཨཔཙིཏིསཧགཏཾ པུཉྙཀིརིཡཱཝཏྠུ ཡཐཱ ‘‘ནནྡིརཱགསཧགཏཱ’’ཏི. ཨཔཙིཏི ཝཱ ཙེཏནཱསམྤཡུཏྟཀདྷམྨཱ ཀཱཡཝཙཱིཀིརིཡཱ ཝཱ, ཏཾསཧིཏཱ ཙེཏནཱ ཨཔཙིཏིསཧགཏཾ. ཧིཏཕརཎེནཱཏི དེསཀེ མེཏྟཱཕརཎེན, ‘‘ཨེཝཾ མེ ཧིཏཾ བྷཝིསྶཏཱི’’ཏི པཝཏྟེན ཧིཏཙིཏྟེན ཝཱ. ཀམྨསྶཀཏཱཉཱཎཾ ¶ དིཊྛིཛུཀམྨཾ. ནིཡམལཀྑཎནྟི མཧཔྥལཏཱནིཡམསྶ ལཀྑཎཾ. སཱིལམཡེ སངྒཧཾ གཙྪནྟི ཙཱརིཏྟཝསེན. ཨནཝཛྫཝཏྠུཾ པརིཙྩཛནྟོ ཝིཡ ཨབྦྷནུམོདམཱནོཔི པརསྶ སམྤཏྟིཡཱ མོདཏཱིཏི ཨབྦྷནུམོདནཱ དཱནམཡེ སངྒཧིཏཱ. བྷཱཝེནྟོཔཱིཏི ཨསམཏྟབྷཱཝནཾ སནྡྷཱཡཱཧ. སམཏྟཱ ཧི ཨཔྤནཱ ཧོཏཱིཏི. ཨཊྛེཝ ཀོཊྛཱསེ ཀཏྭཱཏི ཨེཀསྶ སཏྟསྶ ཨེཀསྨིཾ ཁཎེ ཨུཔྤནྣམེཀཾ པཋམཙིཏྟཾ དསྶེཏྭཱ ཨཉྙཱནི ཏཱདིསཱནི ཨདསྶེནྟེན སབྦཱནི ཏཱནི སརིཀྑཊྛེན ཨེཀཱིཀཏཱནི ཧོནྟི, ཏཐཱ སེསཱནིཔཱིཏི ཨེཝཾ ཨཊྛ ཀཏྭཱ.

ཀཱམཱཝཙརཀུསལཝཎྞནཱ ནིཊྛིཏཱ.

རཱུཔཱཝཙརཀུསལཾ

ཙཏུཀྐནཡོ

པཋམཛ྄ཛྷཱནཀཐཱཝཎྞནཱ

༡༦༠. ཨུཏྟརཔདལོཔཾ ¶ ཀཏྭཱ རཱུཔབྷཝོ རཱུཔནྟི ཝུཏྟོ. ཛྷཱནསྶ ཨམགྒབྷཱཝེཔི སཏི མགྒཝཙནཾ ཨཉྙམགྒབྷཱཝནིཝཱརཎཏྠནྟི ཨིམསྨིཾ ཨཏྠེ མགྒགྒཧཎསྶ པཡོཛནཾ ཝུཏྟཾ, ན སབྦསྶ ཀུསལཛ྄ཛྷཱནསྶ མགྒབྷཱཝོཏི. ཏཏྠ མགྒསྶ བྷཱཝནཱཡ སམཡཝཝཏྠཱནསྶ ཀཏཏྟཱ ཨམགྒབྷཱཝནཱསམཡེ པཝཏྟཱནཾ ཕསྶཱདཱིནཾ ཀུསལབྷཱཝོ ན དསྶིཏོ སིཡཱ, ཏསྨཱ སབྦསྶ མགྒབྷཱཝོ དསྶེཏབྦོཏི. ཨིཏོ ཨཉྙོ མགྒོ ནཏྠཱིཏི ཨེཝཾ ཨཉྙབྷཱུམིཀཝིདྷུརོ སཏི པཙྩཡནྟརེ རཱུཔཱུཔཔཏྟིཛནཀསབྷཱཝོ ཝིཔཱཀདྷམྨསབྷཱཝོ ཝིཡ ཝིཔཱཀདྷམྨཝསེན སབྦསམཱནོ མགྒསདྡེན ཝུཏྟོཏི དསྶེཏཱིཏི ཝེདིཏབྦཾ. ཀུསལཾ དཱནནྟི ཨལོབྷོ དཊྛབྦོ. ཨཐ ཝཱ ཙེཏནཱ དཱནཾ, ཏཾ ཝཛྫེཏྭཱ ཨིཏརེ དྭེ ཙེཏནཱསམྤཡུཏྟཀཱཏི ཝུཏྟཱ. ཝཊྚནྟཱིཏི མགྒབྷཱཝཏོ ཛྷཱནཝཙནེན སངྒཧེཏྭཱ མགྒོཏི ཝཏྟུཾ ཝཊྚནྟཱིཏི ཨཏྠོ. ཨོཀཔྤནཱཏི སདྡཧནཱ. ཨཉྙཏྠ དིཊྛཾ ཨཏྠཾ པརིཙྩཛིཏྭཱ ‘‘ཛནེཏི ཝཌྜྷེཏཱི’’ཏི ཨཡམཏྠོ ཀསྨཱ ཝུཏྟོཏི ནིརུཔསགྒསྶ ཨཉྙཏྠ ཨེཝམཏྠསྶེཝ དིཊྛཏྟཱཏི ཨིམམཏྠཾ ཝིབྷཱཝེཏུཾ ‘‘པུན ཙཔརཾ ཨུདཱཡཱི’’ཏི (མ. ནི. ༢.༢༤༦ ཨཱདཡོ) སུཏྟམཱཧཊཾ. ཀེསཉྩི ཨརིཡཱནཾ ཨརིཡམགྒེན སིདྡྷཱནི ཨཉྙཱནི ཙ ཛྷཱནཱནི བྷཱཝནཱསབྷཱཝཱནེཝཱཏི ཏེསུཔི བྷཱཝེནྟེན སམཡཝཝཏྠཱནཾ ཨིཛ྄ཛྷཏཱིཏི.

ནིསྶརནྟི ¶ ནིགྒཙྪནྟི ཨེཏེན, ཨེཏྠ ཝཱཏི ནིསྶརཎཾ. ཀེ ནིགྒཙྪནྟི? ཀཱམཱ. ཏེསཾ ཀཱམཱནཾ ནིསྶརཎཾ པཧཱནནྟི ཨཏྠོ. ཨེཝཉྷི ‘‘ཀཱམཱན’’ནྟི ཀཏྟརི སཱམིཝཙནཾ ཡུཛྫཏི. ཝཏྠུཀཱམེཧིཔཱིཏི ཝཏྠུཀཱམེཧི ཝིཝིཙྩེཝཱཏིཔི ཨཏྠོ ཡུཛྫཏཱིཏི ཨེཝཾ ཡུཛྫམཱནཏྠནྟརསམུཙྩཡཏྠོ པི-སདྡོ, ན ཀིལེསཀཱམསམུཙྩཡཏྠོ. ཀསྨཱ? ཨིམསྨིཾ ཨཏྠེ ཀིལེསཀཱམཱནཾ དུཏིཡཔདེན ཝིཝེཀསྶ ཝུཏྟཏྟཱ. ཨཀུསལསདྡེན ཡདིཔི ཀིལེསཀཱམཱ, ཨཐཱཔི སབྦཱཀུསལཱ གཧིཏཱ, སབྦཐཱ པན ཀིལེསཀཱམེཧི ཝིཝེཀོ ཝུཏྟོཏི ཨཱཧ ‘‘དུཏིཡེན ཀིལེསཀཱམེཧི ཝིཝེཀཝཙནཏོ’’ཏི. ཀཱམགུཎཱདྷིགམཧེཏུཔི པཱཎཱཏིཔཱཏཱདིཨསུདྡྷཔྤཡོགོ ཧོཏཱིཏི ཏབྦིཝེཀེན པཡོགསུདྡྷི ཝིབྷཱཝིཏཱ. ཏཎྷཱསཾཀིལེསསོདྷནེན ཨཱསཡཔོསནཾ.

ཨཉྙེསམྤི ¶ ཙཱཏི དིཊྛིམཱནཱདཱིནཾ ཕསྶཱདཱིནཉྩ. ཨུཔརི ཝུཙྩམཱནཱནི ཛྷཱནངྒཱནི ཨུཔརིཛ྄ཛྷཱནངྒཱནི, ཏེསཾ ཨཏྟནོ ཝིཔཙྩནཱིཀཱནཾ པཊིཔཀྑབྷཱཝདསྶནཏྠཾ ཏཔྤཙྩནཱིཀནཱིཝརཎཝཙནཾ. བྱཱཔཱདཝིཝེཀཝཙནེན ‘‘ཨནཏྠཾ མེ ཨཙརཱི’’ཏིཨཱདིཨཱགྷཱཏཝཏྠུབྷེདཝིསཡསྶ དོསསྶ མོཧཱདྷིཀཱནཾ ཐིནམིདྡྷཱདཱིནཾ ཝིཝེཀཝཙནེན པཊིཙྪཱདནཝསེན དུཀྑཱདིཔུབྦནྟཱདིབྷེདཝིསཡསྶ མོཧསྶ ཝིཀྑམྦྷནཝིཝེཀོ ཝུཏྟོ. ཀཱམརཱགབྱཱཔཱདཏདེཀཊྛཐིནམིདྡྷཱདིཝིཀྑམྦྷནཀཉྩེདཾ སབྦཱཀུསལཔཊིཔཀྑསབྷཱཝཏྟཱ སབྦཀུསལཱནཾ ཏེན སབྷཱཝེན སབྦཱཀུསལཱནཾ པཧཱནཾ ཧོནྟམྤི ཀཱམརཱགཱདིཝིཀྑམྦྷནསབྷཱཝམེཝཱཏི ཏཾསབྷཱཝཏྟཱ ཨཝིསེསེཏྭཱ ནཱིཝརཎཱཀུསལམཱུལཱདཱིནཾ ཝིཀྑམྦྷནཝིཝེཀོ ཝུཏྟོ ཧོཏཱིཏི ཨཱཧ.

ཝིཏཀྐསྶ ཀིཙྩཝིསེསེན ཐིརབྷཱཝཔྤཏྟེ པཋམཛ྄ཛྷཱནསམཱདྷིམྷི པཙྩནཱིཀདཱུརཱིབྷཱཝཀཏེན ཐིརབྷཱཝེན ཏཾསདིསེསུ ཝིཏཀྐརཧིཏེསུ དུཏིཡཛ྄ཛྷཱནཱདིསམཱདྷཱིསུ ཙ ཨཔྤནཱཏི ཨཊྛཀཐཱཝོཧཱརོཏི ཝིཏཀྐསྶ ཨཔྤནཱཡོགོ ཝུཏྟོ, ཨཉྙཐཱ ཝིཏཀྐོཝ ཨཔྤནཱཏི ཏསྶ ཏཾསམྤཡོགོ ན སིཡཱཏི. ཨཏྠོ…པེ… དཊྛབྦོ ཛྷཱནསམངྒིནོ ཝིཏཀྐཝིཙཱརསམངྒིཏཱདསྶནེན ཛྷཱནསྶེཝ སཝིཏཀྐསཝིཙཱརབྷཱཝསྶ ཝུཏྟཏྟཱ.

ཝིཝེཀཛཾ པཱིཏིསུཁནྟི ཨེཏྠ པུརིམསྨིཾ ཨཏྠེ ཝིཝེཀཛནྟི ཛྷཱནཾ. པཱིཏིསུཁསདྡཏོ ཙ ཨཏྠིཨཏྠཝིསེསཝཏོ ཨསྶ, ཨསྨིཾ ཝཱཏི ཨེཏྠ ཨ-ཀཱརོ ཝུཏྟོ. དུཏིཡེ པཱིཏིསུཁམེཝ ཝིཝེཀཛཾ. ཝིཝེཀཛཾཔཱིཏིསུཁནྟི ཙ ཨཉྙཔདཏྠེ སམཱསོ པཙྩཏྟནིདྡེསསྶ ཙ ཨལོཔོ ཀཏོ, ལོཔེ ཝཱ ¶ སཏི ‘‘ཝིཝེཀཛཔཱིཏིསུཁ’’ནྟི པཱཋོཏི ཨཡཾ ཝིསེསོ. གཎནཱནུཔུབྦཏཱཏི གཎནཱནུཔུབྦཏཱཡ, གཎནཱནུཔུབྦཏཱམཏྟཾ ཝཱ པཋམནྟི ཝཙནནྟི ཨཏྠོ. ནིཙྩཱདིཝིཔལླཱསཔྤཧཱནེན མགྒོ ཨསམྨོཧཏོ ཨནིཙྩཱདིལཀྑཎཱནི པཊིཝིཛ྄ཛྷཏཱིཏི ལཀྑཎཱུཔནིཛ྄ཛྷཱནཾ. ཨསམྨོསདྷམྨཾ ནིབྦཱནཾ ཨཝིཔརཱིཏལཀྑཎཏྟཱ ཨནཉྙཐཱབྷཱཝཏོ ཏཐལཀྑཎཾ.

དུཏིཡཛ྄ཛྷཱནཀཐཱཝཎྞནཱ

༡༦༡-༢. ཝིཏཀྐཝིཙཱརཱནཾ ཝཱུཔསམཱཏི ཨེཏེན ཡེཧི ཝིཏཀྐཝིཙཱརེཧི པཋམཛ྄ཛྷཱནསྶ ཨོལཱ༹རིཀཏཱ, ཏེསཾ སམཏིཀྐམཱ དུཏིཡཛ྄ཛྷཱནསྶ སམདྷིགམོ, ན སབྷཱཝཏོ ཨནོལཱ༹རིཀཱནཾ ཕསྶཱདཱིནཾ སམཏིཀྐམཱཏི ཨཡམཏྠོ དཱིཔིཏོ ཧོཏི. ཨེཝཾ ‘‘པཱིཏིཡཱ ཙ ཝིརཱགཱ’’ཏིཨཱདཱིསུ ནཡོ ¶ . ཏསྨཱ ཝིཏཀྐཝིཙཱརཔཱིཏིསུཁསམཏིཀྐམཝཙནཱནི ཨོལཱ༹རིཀོལཱ༹རིཀངྒསམཏིཀྐམཱ དུཏིཡཱདིཨདྷིགམཔརིདཱིཔཀཱནཱིཏི ཏེསཾ ཨེཀདེསབྷཱུཏཾ ཝིཏཀྐཝིཙཱརསམཏིཀྐམཝཙནཾ ཏཾདཱིཔཀནྟི ཝུཏྟཾ. ཨཐ ཝཱ ཝིཏཀྐཝིཙཱརཝཱུཔསམཝཙནེནེཝ ཏཾསམཏིཀྐམཱ དུཏིཡཱདྷིགམདཱིཔཀེན པཱིཏིཝིརཱགཱདིཝཙནཱནཾ པཱིཏིཡཱདིསམཏིཀྐམཱ ཏཏིཡཱདིཨདྷིགམདཱིཔཀཏཱ ཧོཏཱིཏི ཏསྶ ཏཾདཱིཔཀཏཱ ཝུཏྟཱ.

ནཱིལཝཎྞཡོགཏོ ནཱིལཝཏྠཾ ཝིཡཱཏི ནཱིལཡོགཏོ ཝཏྠཾ ནཱིལཾ ཝིཡཱཏི ཨདྷིཔྤཱཡོ. ཡེན སམྤསཱདནེན ཡོགཱ ཛྷཱནཾ སམྤསཱདནཾ, ཏསྨིཾ དསྶིཏེ ‘‘སམྤསཱདནཾ ཛྷཱན’’ནྟི སམཱནཱདྷིཀརཎནིདྡེསེནེཝ ཏཾཡོགཱ ཛྷཱནེ ཏཾསདྡཔྤཝཏྟི དསྶིཏཱཏི ཨཝིརོདྷོ ཡུཏྟོ. ཨེཀོདིབྷཱཝེ ཀཐནྟི ཨེཀོདིམྷི དསྶིཏེ ‘‘ཨེཀོདིབྷཱཝཾ ཛྷཱན’’ནྟི སམཱནཱདྷིཀརཎནིདྡེསེནེཝ ཛྷཱནསྶ ཨེཀོདིཝཌྜྷནཏཱ ཝུཏྟཱ ཧོཏཱིཏི. ཨེཀོདིབྷཱཝནྟི པནིདཾ ཨུདྡྷརིཏྭཱ ཨེཀོདིསྶ ནིདྡེསོ ན ཀཏྟབྦོ སིཡཱཏི ཨེཀོདིབྷཱཝསདྡོ ཨེཝ སམཱདྷིམྷི པཝཏྟོ སམྤསཱདནསདྡོ ཝིཡ ཛྷཱནམྷི པཝཏྟཏཱིཏི ཡུཏྟཾ.

ཨཔྤིཏཱཏི གམིཏཱ ཝིནཱསཾ. དུཏིཡཛ྄ཛྷཱནཱདིཨདྷིགམུཔཱཡདཱིཔཀེན ཨཛ྄ཛྷཏྟསམྤསཱདནཏཱཡ ཙེཏསོ ཨེཀོདིབྷཱཝཏཱཡ ཙ ཧེཏུདཱིཔཀེན ཨཝིཏཀྐཱཝིཙཱརབྷཱཝཧེཏུདཱིཔཀེན ཙ ཝིཏཀྐཝིཙཱརཝཱུཔསམཝཙནེནེཝ ཝིཏཀྐཝིཙཱརཱབྷཱཝོ དཱིཔིཏོཏི ཀིཾ པུན ཨཝིཏཀྐཨཝིཙཱརཝཙནེན ཀཏེནཱཏི? ན, ཨདཱིཔིཏཏྟཱ. ན ཧི ཝིཏཀྐཝིཙཱརཝཱུཔསམཝཙནེན ཝིཏཀྐཝིཙཱརཱནཾ ཨཔྤཝཏྟི ཝུཏྟཱ ཧོཏི. ཝིཏཀྐཝིཙཱརེསུ ཧི ཏཎྷཱཔཧཱནཉྩ ཨེཏེསཾ ¶ ཝཱུཔསམནཾ. ཡེ ཙ སངྑཱརེསུ ཏཎྷཱཔཧཱནཾ ཀརོནྟི, ཏེསུ མགྒེསུ པཧཱིནཏཎྷེསུ ཕལེསུ ཙ སངྑཱརཔྤཝཏྟི ཧོཏི, ཨེཝམིདྷཱཔི ཝིཀྑམྦྷིཏཝིཏཀྐཝིཙཱརཏཎྷསྶ དུཏིཡཛ྄ཛྷཱནསྶ ཝིཏཀྐཝིཙཱརསམྤཡོགོ པུརིམེན ན ནིཝཱརིཏོ སིཡཱཏི ཏཾནིཝཱརཎཏྠཾ ཨཱཝཛྫིཏུཀཱམཏཱདིཨཏིཀྐམོཝ ཏེསཾ ཝཱུཔསམོཏི དསྶནཏྠཉྩ ‘‘ཨཝིཏཀྐཾ ཨཝིཙཱར’’ནྟི ཝུཏྟཾ.

ཏཏིཡཛ྄ཛྷཱནཀཐཱཝཎྞནཱ

༡༦༣. པརིསུདྡྷཔཀཏི ཁཱིཎཱསཝཔཀཏི ནིཀྐིལེསཏཱ. ཨུཔེཀྑཱནིམིཏྟནྟི ཨེཏྠ ལཱིནུདྡྷཙྩཔཀྑཔཱཏརཧིཏཾ མཛ྄ཛྷཏྟཾ ཝཱིརིཡཾ ‘‘ཨུཔེཀྑཱ’’ཏི ཝུཏྟཾ, ཏདེཝ ཏཾ ཨཱཀཱརཾ གཧེཏྭཱ པཝཏྟེཏབྦསྶ ¶ ཏཱདིསསྶ ཝཱིརིཡསྶ ནིམིཏྟབྷཱཝཏོ ཨུཔེཀྑཱནིམིཏྟཾ. པཋམཛ྄ཛྷཱནཔྤཊིལཱབྷཏྠཱཡ ནཱིཝརཎེ…པེ… ནེཝསཉྙཱནཱསཉྙཱཡཏནསམཱཔཏྟིཔཊིལཱབྷཏྠཱཡ ཨཱཀིཉྩཉྙཱཡཏནསཉྙཾ པཊིསངྑཱསནྟིཊྛནཱཔཉྙཱསངྑཱརུཔེཀྑཱསུ ཉཱཎནྟི ཨིམཱ ཨཊྛ སམཱཔཏྟིཝསེན ཨུཔྤཛྫནྟི. སོཏཱཔཏྟིམགྒཔཊིལཱབྷཏྠཱཡ ཨུཔྤཱདཾ པཝཏྟཾ ནིམིཏྟཾ ཨཱཡཱུཧནཾ པཊིསནྡྷིཾ གཏིཾ ནིབྦཏྟིཾ ཨུཔཔཏྟིཾ ཛཱཏིཾ ཛརཱམརཎསོཀཔརིདེཝདུཀྑདོམནསྶཨུཔཱཡཱསེ. སོཏཱཔཏྟིཕལསམཱཔཏྟཏྠཱཡ ཨུཔྤཱདཾ…པེ… ཨུཔཱཡཱསེ…པེ… ཨརཧཏྟམགྒཔཊིལཱབྷཏྠཱཡ ཨུཔྤཱདཾ…པེ… ཨུཔཱཡཱསེ. ཨརཧཏྟཕལསམཱཔཏྟཏྠཱཡ…པེ… སུཉྙཏཝིཧཱརསམཱཔཏྟཏྠཱཡ…པེ… ཨནིམིཏྟཝིཧཱརསམཱཔཏྟཏྠཱཡ ཨུཔྤཱདཾ པཝཏྟཾ ཨཱཡཱུཧནཾ པཊིསནྡྷིཾ…པེ… པཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎནྟི ཨིམཱ དས ཝིཔསྶནཱཝསེན ཨུཔྤཛྫནྟི.

ཡདཏྠི ཡཾ བྷཱུཏནྟི ཁནྡྷཔཉྩཀཾ, ཏཾ མུཉྩིཏུཀམྱཏཱཉཱཎེན པཛཧཏི. དིཊྛསོཝཏྠིཀཏྟཡསྶ སཔྤལཀྑཎཝིཙིནནེ ཝིཡ དིཊྛལཀྑཎཏྟཡསྶ བྷཱུཏསྶ སངྑཱརལཀྑཎཝིཙིནནེ ཨུཔེཀྑཾ པཊིལབྷཏི. ཨནཱབྷོགརསཱཏི པཎཱིཏསུཁེཔི ཏསྨིཾ ཨཝནཏི པཊིཔཀྑཀིཙྩཱཏི ཨཏྠོ. ནཱམཀཱཡེན ཙེཏསིཀསུཁཾ ཀཱཡིཀསུཁཧེཏུ རཱུཔསམུཊྛཱཔནེན ཀཱཡིཀསུཁཉྩ ཛྷཱནསམངྒཱི པཊིསཾཝེདེཏཱིཏི ཝུཙྩཏི. ཕུཊཏྟཱ བྱཱཔིཏཏྟཱ. ཡཐཱ ཧི ཨུདཀེན ཕུཊསརཱིརསྶ ཏཱདིསེ ནཱཏིཔཙྩནཱིཀེ ཝཱཏཱདིཀེ ཕོཊྛབྦེ ཕུཊྛེ སུཁཾ ཨུཔྤཛྫཏི, ཨེཝཾ ཨེཏེཧི ཕུཊསརཱིརསྶཔི.

ཙཏུཏྠཛ྄ཛྷཱནཀཐཱཝཎྞནཱ

༡༦༥. ཨཝིབྷཱུཏཔཙྩུཔཊྛཱནཱཏི ¶ སུཁདུཀྑཱནི ཝིཡ ཨཝིབྷཱུཏཱཀཱརཱ པིཊྛིཔཱསཱཎགཏམིགམགྒོ ཝིཡ ཏདནུམཱཏབྦཱཝིབྷཱུཏཱཀཱརོཔཊྛཱནཱ.

ཙཏུཀྐནཡཝཎྞནཱ ནིཊྛིཏཱ.

པཉྩཀནཡཝཎྞནཱ

༡༦༧. ཡསྶཱ པན དྷམྨདྷཱཏུཡཱཏི སབྦཉྙུཏཉྙཱཎསྶ. ཏེན ཧི དྷམྨཱནཾ ཨཱཀཱརབྷེདཾ ཉཏྭཱ ཏདནུརཱུཔཾ དེསནཾ ནིཡཱམེཏཱིཏི. ཨེཏྠ ཙ པཉྩཀནཡེ དུཏིཡཛ྄ཛྷཱནཾ ཙཏུཀྐནཡེ དུཏིཡཛ྄ཛྷཱནཔཀྑིཀཾ ¶ ཀཏྭཱ ཝིབྷཏྟཾ ‘‘ཡསྨིཾ…པེ… མགྒཾ བྷཱཝེཏི ཨཝིཏཀྐཾ ཝིཙཱརམཏྟཾ སམཱདྷིཛཾ པཱིཏིསུཁཾ དུཏིཡཛ྄ཛྷཱནཾ ཨུཔསམྤཛྫ ཝིཧརཏཱི’’ཏི. ཀསྨཱ? ཨེཀཏྟཀཱཡནཱནཏྟསཉྙཱིསཏྟཱཝཱསཕལཏཱཡ དུཏིཡཛ྄ཛྷཱནེན སམཱནཕལཏྟཱ པཋམཛ྄ཛྷཱནསམཱདྷིཏོ ཛཱཏཏྟཱ ཙ. པཋམཛ྄ཛྷཱནམེཝ ཧི ཀཱམེཧི ཨཀུསལེཧི ཙ ཝིཝིཏྟནྟི ཏདབྷཱཝཱ ན ཨིདྷ ‘‘ཝིཝིཙྩེཝ ཀཱམེཧི ཝིཝིཙྩ ཨཀུསལེཧཱི’’ཏི སཀྐཱ ཝཏྟུཾ, ནཱཔི ‘‘ཝིཝེཀཛ’’ནྟི. སུཏྟནྟདེསནཱསུ ཙ པཉྩཀནཡེ དུཏིཡཏཏིཡཛ྄ཛྷཱནཱནི དུཏིཡཛ྄ཛྷཱནམེཝ བྷཛནྟི ཝིཏཀྐཝཱུཔསམཱ ཝིཙཱརཝཱུཔསམཱ ཨཝིཏཀྐཏྟཱ ཨཝིཙཱརཏྟཱ ཙཱཏི.

པཊིཔདཱཙཏུཀྐཝཎྞནཱ

༡༧༦-༡༨༠. ཏསྶ ཏསྶ ཛྷཱནསྶ ཨུཔཙཱརནྟི ནཱིཝརཎཝིཏཀྐཝིཙཱརནིཀནྟིཡཱདཱིནཾ ཝཱུཔསམཱ ཐིརབྷཱུཏོ ཀཱམཱཝཙརསམཱདྷི. ཏདནུདྷམྨཏཱཏི ཏདནུརཱུཔཏཱབྷཱུཏཱ, སཱ པན ཏདསྶཱདསངྑཱཏཱ ཏདསྶཱདསམྤཡུཏྟཀྑནྡྷསངྑཱཏཱ ཝཱ མིཙྪཱསཏཱིཏི ཝདནྟི. ཨཝིགཏནིཀནྟིཀཱ ཏཾཏཾཔརིཧརཎསཏཱིཏིཔི ཝཏྟུཾ ཝཊྚཏཱིཏི ཨེཝཉྩ ཀཏྭཱ ‘‘སཏིཡཱ ཝཱ ནིཀནྟིཡཱ ཝཱ’’ཏི ཝིཀཔྤོ ཀཏོ. ཨཱགམནཝསེནཱཔི ཙ པཊིཔདཱ ཧོནྟིཡེཝཱཏི ཨིདཾ ཀདཱཙི དུཏིཡཱདཱིནཾ པཋམཱདིཨཱགམནཀཏཔཊིཔདཏཾ སནྡྷཱཡ ཝུཏྟཾ. ཨཔི-སདྡོ ཧི ཨནེཀནྟིཀཏཾ དཱིཔེཏི, ཨེཏསྶ ཨནེཀནྟིཀཏྟཱ ཨེཝ ཙ པཱལི༹ཡཾ ཨེཀེཀསྨིཾ ཛྷཱནེ ཙཏསྶོ པཊིཔདཱ ཙཏྟཱརི ཨཱརམྨཎཱནི སོལ༹སཀྑཏྟུཀཉྩ ཝིསུཾ ཝིསུཾ ཡོཛིཏཾ. ཨཉྙཐཱ ཨེཀེཀསྨིཾ པཊིཔདཱདིམྷི ནཝ ནཝ ཛྷཱནཱནི ཡོཛེཏབྦཱནི སིཡུནྟི.

ཨཱརམྨཎཙཏུཀྐཝཎྞནཱ

༡༨༡. ཨཔྤགུཎནྟི ¶ པཉྩཧི ཝསིཏཱཧི ཨཝསཱིཀཏཾ.

ཨཱརམྨཎཔཊིཔདཱམིསྶཀཝཎྞནཱ

༡༨༦. ཧེཊྛཱཏི སོལ༹སཀྑཏྟུཀཏོ པུབྦེ. ཡེ ཀེཙི ཛྷཱནཾ ཨུཔྤཱདེནྟི ནཱམཱཏི ཝཙནེན ཡེ ཀཏཱདྷིཀཱརཱ སེཀྑཱ མགྒེནེཝ ཨུཔྤཱདིཏཛ྄ཛྷཱནཱ, ཏེསཾ ཛྷཱནཱནི མགྒཔཊིབདྡྷཏཱཡ སུདྡྷིཀནཝཀསངྒཧིཏཱནཱིཏི ཝེདིཏབྦཱནི. ན ཧི ཏེ ཨུཔྤཱདེནྟི ནཱམཱཏི.

ཀསིཎཀཐཱཝཎྞནཱ

༢༠༣. ནིརོདྷཔཱདཀཏཱཝཙནེན ¶ ཨཱརུཔྤཔཱདཀཏཱ ཙ དསྶིཏཱ. ཁིཔྤདསྶནཾ ཁིཔྤཱབྷིཉྙཏཱ ཁིཔྤནིསནྟིབྷཱཝོ.

ཨབྷིབྷཱཡཏནཀཐཱཝཎྞནཱ

༢༠༤. ཨཉྙམྤཱིཏི ཀེཝལཾ ཀསིཎཱཡཏནསངྑཱཏམེཝ ཨཧུཏྭཱ ཨབྷིབྷཱཡཏནསངྑཱཏམྤི པཝཏྟཏཱིཏི སཏིཔི ཨབྷིབྷཱཡཏནཱནཾ ཀསིཎཱཡཏནཏྟེ ཀསིཎཱཡཏནབྷཱཝཏོ ཨཉྙོ ཨབྷིབྷཱཡཏནབྷཱཝོ ཀསིཎནིམིཏྟཱབྷིབྷཝནཀབྷཱཝནཱནིམིཏྟནཱནཏྟཏོཏི དསྶེཏི. ཏཏྠ ཨབྷིབྷཝཏཱིཏི ཨབྷིབྷུ, པརིཀམྨཾ, ཉཱཎཾ ཝཱ. ཨབྷིབྷུ ཨཱཡཏནཾ ཨེཏསྶཱཏི ཨབྷིབྷཱཡཏནཾ, ཛྷཱནཾ. ཨབྷིབྷཝིཏབྦཾ ཝཱ ཨཱརམྨཎསངྑཱཏཾ ཨཱཡཏནཾ ཨེཏསྶཱཏི ཨབྷིབྷཱཡཏནཾ, ཛྷཱནཾ. ཨཱརམྨཎཱབྷིབྷཝནཏོ ཨབྷིབྷུ ཙ ཏཾ ཨཱཡཏནཉྩ ཡོགིནོ སུཁཝིསེསཱནཾ ཨདྷིཊྛཱནབྷཱཝཏོ མནཱཡཏནདྷམྨཱཡཏནབྷཱཝཏོ ཙཱཏིཔི སསམྤཡུཏྟཾ ཛྷཱནཾ ཨབྷིབྷཱཡཏནཾ. མགྒཔྤཊིབདྡྷཏཱཡ ཏདཱ སམཱཔཏྟིཏོ ཝུཊྛིཏསྶ ཨཱབྷོགོ པུབྦབྷཱགབྷཱཝནཱཝསེན ཛྷཱནཀྑཎེ པཝཏྟཾ ཨབྷིབྷཝནཱཀཱརཾ གཧེཏྭཱ པཝཏྟོ ཝུཏྟོཏི དཊྛབྦོ. ཨཱགམེསུ པན ‘‘ཨཛ྄ཛྷཏྟཾ རཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པརིཏྟཱནི སུཝཎྞདུབྦཎྞཱནི. ཨཔྤམཱཎཱནི སུཝཎྞདུབྦཎྞཱནི. ཨཛ྄ཛྷཏྟཾ ཨརཱུཔསཉྙཱི ཨེཀོ…པེ… པརིཏྟཱནི སུཝཎྞདུབྦཎྞཱནི. ཨཔྤམཱཎཱནི སུཝཎྞདུབྦཎྞཱནཱི’’ཏི (དཱི. ནི. ༢.༡༧༣; མ. ནི. ༢.༢༤༩; ཨ. ནི. ༨.༦༥) ཨིམེསཾ ཙཏུནྣཾ ཨབྷིབྷཱཡཏནཱནཾ ཨཱགཏཏྟཱ ཨཱགམཊྛཀཐཱསུ ¶ (དཱི. ནི. ཨཊྛ. ༢.༡༧༣; མ. ནི. ཨཊྛ. ༢. ༢༤༩-༢༥༠; ཨ. ནི. ཨཊྛ. ༣.༨.༦༥) ‘‘ཝཎྞཝསེན ཨཱབྷོགེ ཝིཛྫམཱནེཔི པརིཏྟཨཔྤམཱཎཝསེནེཝ ཨིམཱནི ཨབྷིབྷཱཡཏནཱནི དེསིཏཱནཱི’’ཏི ཝུཏྟཾ. པརིཏྟཨཔྤམཱཎཏཱ ཧི ཨབྷིབྷཝནསྶ ཀཱརཎཾ ཝཎྞཱབྷོགེ སཏིཔི ཨསཏིཔི. ཏཏྠ ཙ ཝཎྞཱབྷོགརཧིཏཱནི སཧིཏཱནི ཙ སབྦཱནི པརིཏྟཱནི ‘‘སུཝཎྞདུབྦཎྞཱནཱི’’ཏི ཝུཏྟཱནི, ཏཐཱ ཨཔྤམཱཎཱནཱིཏི དཊྛབྦཱནི. ཨཏྠི ཧི ཨེསོ པརིཡཱཡོ པརིཏྟཱནི ཨབྷིབྷུཡྻ ཏཱནི ཙེ ཀདཱཙི ཝཎྞཝསེན ཨཱབྷུཛིཏཱནི ཧོནྟི སུཝཎྞདུབྦཎྞཱནི ཨབྷིབྷུཡྻཱཏི. ཨིདྷ པན ནིཔྤརིཡཱཡདེསནཏྟཱ ཝཎྞཱབྷོགརཧིཏཱནི ཝིསུཾ ཝུཏྟཱནི སཧིཏཱནི ཙ. ཨཏྠི ཧི ཨུབྷཡཏྠ ཨབྷིབྷཝནཝིསེསོཏི.

ཏཏྠ ཙ པརིཡཱཡདེསནཏྟཱ ཝིམོཀྑཱནམྤི ཨབྷིབྷཝནཔརིཡཱཡོ ཨཏྠཱིཏི ‘‘ཨཛ྄ཛྷཏྟཾ རཱུཔསཉྙཱི’’ཏི ¶ ཨབྷིབྷཱཡཏནདྭཡཾ ཝུཏྟཾ, ཏཏིཡཙཏུཏྠཨབྷིབྷཱཡཏནེསུ དུཏིཡཝིམོཀྑོ ཝཎྞཱབྷིབྷཱཡཏནེསུ ཏཏིཡཝིམོཀྑོ ཙ ཨབྷིབྷཝནཔྤཝཏྟིཏོ སངྒཧིཏོ, ཨིདྷ པན ནིཔྤརིཡཱཡདེསནཏྟཱ ཝིམོཀྑཱབྷིབྷཱཡཏནཱནི ཨསངྐརཏོ དསྶེཏུཾ ཝིམོཀྑེ ཝཛྫེཏྭཱ ཨབྷིབྷཱཡཏནཱནི ཀཐིཏཱནི. སབྦཱནི ཙ ཝིམོཀྑཀིཙྩཱནི ཝིམོཀྑདེསནཱཡ ཝུཏྟཱནི, ཏདེཏཾ ‘‘ཨཛ྄ཛྷཏྟཾ རཱུཔསཉྙཱི’’ཏི ཨཱགཏསྶ ཨབྷིབྷཱཡཏནདྭཡསྶ ཨབྷིབྷཱཡཏནེསུ ཨཝཙནཏོ ‘‘རཱུཔཱི རཱུཔཱནི པསྶཏཱི’’ཏིཨཱདཱིནཉྩ སབྦཝིམོཀྑཀིཙྩསཱདྷཱརཎཝཙནབྷཱཝཏོ ཝཝཏྠཱནཾ ཀཏནྟི ཝིཉྙཱཡཏི.

ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏོཏི ཨིདཾ ཀཏྠཙིཔི ‘‘ཨཛ྄ཛྷཏྟཾ རཱུཔཱནི པསྶཏཱི’’ཏི ཨཝཏྭཱ སབྦཏྠ ཡཾ ཝུཏྟཾ ‘‘བཧིདྡྷཱ རཱུཔཱནི པསྶཏཱི’’ཏི, ཏསྶ ཀཱརཎཝཙནཾ. ཏེན ཡཾ ཨཉྙཧེཏུཀཾ, ཏཾ ཏེན ཧེཏུནཱ ཝུཏྟཾ. ཡཾ པན དེསནཱཝིལཱསཧེཏུཀཾ ཨཛ྄ཛྷཏྟཾ ཨརཱུཔསཉྙིཏཱཡ ཨེཝ ཨིདྷ ཝཙནཾ, ན ཏསྶ ཨཉྙཾ ཀཱརཎཾ མགྒིཏབྦནྟི དསྶེཏི. ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏཱ ཙ བཧིདྡྷཱརཱུཔཱནཾ ཝིཡ ཨཝིབྷཱུཏཏྟཱ, དེསནཱཝིལཱསོ ཙ ཡཐཱཝུཏྟཝཝཏྠཱནཝསེན ཝེདིཏབྦོ. སུཝཎྞདུབྦཎྞཱནཱིཏི ཨེཏེནེཝ སིདྡྷཏྟཱ ནཱིལཱདིཨབྷིབྷཱཡཏནཱནི ན ཝཏྟབྦཱནཱིཏི ཙེ? ན, ནཱིལཱདཱིསུ ཀཏཱདྷིཀཱརཱནཾ ནཱིལཱདིབྷཱཝསྶེཝ ཨབྷིབྷཝནཀཱརཎཏྟཱ. ན ཧི ཏེསཾ པརིསུདྡྷཱཔརིསུདྡྷཝཎྞཔརིཏྟཏཱ ཏདཔྤམཱཎཏཱ ཝཱ ཨབྷིབྷཝནཀཱརཎཾ, ཨཐ ཁོ ནཱིལཱདིབྷཱཝོ ཨེཝཱཏི.

ཨབྷིབྷཱཡཏནཀཐཱཝཎྞནཱ ནིཊྛིཏཱ.

ཝིམོཀྑཀཐཱཝཎྞནཱ

༢༤༨. རཱུཔཱིཏི ¶ ཡེནཱཡཾ སསནྟཏིཔརིཡཱཔནྣེན རཱུཔེན སམནྣཱགཏོ, ཏཾ ཡསྶ ཛྷཱནསྶ ཧེཏུབྷཱཝེན ཝིསིཊྛཾ རཱུཔཾ ཧོཏི. ཡེན ཝིསིཊྛེན རཱུཔཱིཏི ཝུཙྩེཡྻ, ཏདེཝ སསནྟཏིཔརིཡཱཔནྣརཱུཔནིམིཏྟཾ ཛྷཱནམིཝ པརམཏྠཏོ རཱུཔཱིབྷཱཝསཱདྷཀནྟི དཊྛབྦཾ. ཀསིཎདེསནཱ ཛྷཱནཱནམེཝ ཀསིཎབྷཱཝེན པཝཏྟཱ ཨབྷིདྷམྨེ, སུཏྟེ པན ཨཱརམྨཎཱནནྟི ‘‘ཨབྷིདྷམྨཝསེནཱ’’ཏི ཝུཏྟཾ.

ཝིམོཀྑཀཐཱཝཎྞནཱ ནིཊྛིཏཱ.

བྲཧྨཝིཧཱརཀཐཱཝཎྞནཱ

༢༥༡. སོམནསྶདོམནསྶརཧིཏཾ ¶ ཨཉྙཱཎམེཝ ཨཉྙཱཎུཔེཀྑཱ. ཀིལེསོདྷཱིནཾ མགྒོདྷཱིཧི ཨཛིཏཏྟཱ ཨནོདྷིཛིནསྶ. སཏྟམབྷཝཱདིཏོ ཨུདྡྷཾ པཝཏྟཝིཔཱཀསྶ ཨཛིཏཏྟཱ ཨཝིཔཱཀཛིནསྶ. ནིདྡོསབྷཱཝེནཱཏི ནིཔྤཊིགྷབྷཱཝེན. ཨེཀསྶཔི སཏྟསྶ ཨཔྤཊིབྷཱགནིམིཏྟཏྟཱ པརིཙྪེདགྒཧཎཾ ནཏྠི, ན ཙ སམྨུཏིསཙྩཝསེན པཝཏྟཾ སཏྟགྒཧཎཾ པརིཙྪིནྣརཱུཔཱདིགྒཧཎཾ ཧོཏཱིཏི ཨཔྤནཱཔྤཏྟིཡཱཔི ཨཔརཱམཱསསཏྟགྒཧཎམུདྡྷབྷཱུཏཱནཾ མེཏྟཱདཱིནཾ ཨེཀསཏྟཱརམྨཎཱནམྤི ཨཔྤམཱཎགོཙརཏཱ ཝུཏྟཱཏི ཝེདིཏབྦཱ.

བྲཧྨཝིཧཱརཀཐཱཝཎྞནཱ ནིཊྛིཏཱ.

ཨསུབྷཀཐཱཝཎྞནཱ

༢༦༣. ཨུདྡྷཾ དྷུམཱཏཏྟཱ ཨུདྡྷུམཱཏཾ. སེཏརཏྟེཧི པརིབྷིནྣཾ ཝིམིསྶིཏཾ ནཱིལཾ ཝིནཱིལཾ, པུརིམཝཎྞཝིཔརིཎཱམབྷཱུཏཾ ཝཱ ནཱིལཾ ཝིནཱིལཾ. སངྒྷཱཊོ ཨངྒཱནཾ སུསམྦདྡྷཏཱ. ཨཱརམྨཎསྶ དུབྦལཏཱ པཊིཔཀྑབྷཱཝེན ཙིཏྟཾ ཋཔེཏུཾ ཨསམཏྠཏཱ. ཨཏྟནི ཨཱནིསཾསདསྶནནཱིཝརཎརོགཝཱུཔསམཱནཾ ཡཐཱཀྐམཾ པུཔྥཚཌྜཀཝམནཝིརེཙནཨུཔམཱ ཡོཛེཏབྦཱ. པཊིཀཱུལམནསིཀཱརསཱམཉྙེན ཨསུབྷེཧི ཀེསཱདཱིཧི པཊིཀཱུལཛ྄ཛྷཱནསྶ གཧཎཾ སིཝཐིཀཱཝཎྞཛ྄ཛྷཱནསྶ ཙ. ཏམྤི ཧི པཊིཀཱུལམནསིཀཱརཝསེནེཝ ཨུཔྤཛྫཏཱིཏི, སིཝཐིཀཔྤཀཱརཱནི ཝཱ སིཝཐིཀཱཝཎྞཱནི.

ཨསུབྷཀཐཱཝཎྞནཱ ནིཊྛིཏཱ.

རཱུཔཱཝཙརཀུསལཀཐཱཝཎྞནཱ ནིཊྛིཏཱ.

ཨརཱུཔཱཝཙརཀུསལཀཐཱཝཎྞནཱ

༢༦༥. སབྦཱཀཱརེནཱཏི ¶ ¶ ཨེཝཾ རཱུཔནིམིཏྟཾ དཎྜཱདཱནསམྦྷཝདསྶནཱདིནཱ སབྦེན རཱུཔརཱུཔནིམིཏྟེསུ ཏདཱརམྨཎཛ྄ཛྷཱནེསུ དོསདསྶནཱཀཱརེན, རཱུཔཱདཱིསུ ནིཀནྟིཔྤཧཱནཨནཱཝཛྫིཏུཀཱམཏཱདིནཱ ཝཱ. ཝིརཱགཱཏི ཛིགུཙྪནཱ. ཨཱནེཉྫཱབྷིསངྑཱརཝཙནཱདཱིཧི ཨཱནེཉྫཏཱ ‘‘སནྟཱ ཨིམེ ཙུནྡ ཨརིཡསྶ ཝིནཡེ ཝིམོཀྑཱ’’ཏིཨཱདིནཱ སནྟཝིམོཀྑཏཱ ཙ ཝུཏྟཱ. དོསདསྶནཔཊིཔཀྑབྷཱཝནཱཝསེན པཊིགྷསཉྙཱནཾ སུཔྤཧཱིནཏྟཱ མཧཏཱཔི སདྡེན ཨརཱུཔསམཱཔཏྟིཏོ ན ཝུཊྛཱཏི. ཏཐཱ པན ན སུཔྤཧཱིནཏྟཱ སབྦརཱུཔསམཱཔཏྟིཏོ ཝུཊྛཱནཾ སིཡཱ, པཋམཛ྄ཛྷཱནཾ པན ཨཔྤཀམྤི སདྡཾ ན སཧཏཱིཏི ཏཾ སམཱཔནྣསྶ སདྡོ ཀཎྚཀོཏི ཝུཏྟཾ.

ཨཱརུཔྤབྷཱཝནཱཡ ཨབྷཱཝེ ཙུཏིཏོ ཨུདྡྷཾ ཨུཔྤཏྟིརཧཱནཾ རཱུཔསཉྙཱཔཊིགྷསཉྙཱནཾ ཡཱཝ ཨཏྟནོ ཝིཔཱཀཔྤཝཏྟི, ཏཱཝ ཨནུཔྤཏྟིདྷམྨཏཱཔཱདནེན སམཏིཀྐམོ ཨཏྠངྒམོ ཙ ཝུཏྟོ. ནཱནཏྟསཉྙཱསུ པན ཡཱ ཏསྨིཾ བྷཝེ ན ཨུཔྤཛྫནྟི, ཏཱ ཨནོཀཱསཏཱཡ ན ཨུཔྤཛྫནྟི, ན ཨཱརུཔྤབྷཱཝནཱཡ ནིཝཱརིཏཏྟཱ. ཨནིཝཱརིཏཏྟཱ ཙ ཀཱཙི ཨུཔྤཛྫནྟི. ཏསྨཱ ཏཱསཾ ཨམནསིཀཱརོ ཨནཱཝཛྫནཾ ཨཔཙྩཝེཀྑཎཾ, ཛཝནཔཊིཔཱདཀེན ཝཱ བྷཝངྒམནསྶ ཨནྟརེ ཨཀརཎཾ ཨཔྤཝེསནཾ ཝུཏྟཾ, ཏེན ཙ ནཱནཏྟསཉྙཱམནསིཀཱརཧེཏཱུནཾ རཱུཔཱནཾ སམཏིཀྐམཱ སམཱདྷིསྶ ཐིརབྷཱཝཾ དསྶེཏི. རཱུཔསམཏིཀྐམཱབྷཱཝེནེཝ ཧི རཱུཔསམཱཔཏྟཱིསུ ‘‘ནཱནཏྟསཉྙཱནཾ ཨམནསིཀཱརཱ’’ཏི ཨེཀསྶ ཨཝཙནནྟི. ཀོ ཨཱནིསཾསོ, ན ཧི སབྦསྶཱདཝཏྠུརཧིཏེ ཨཱཀཱསེ པཝཏྟིཏསཉྙཱཡ ཨཱནིསཾསོ དིསྶཏཱིཏི ཝུཏྟཾ ཧོཏི. རཱུཔསཉྙཱསམཏིཀྐམནཱདིཀཾ ཝཙནཾ ཨཱནིསཾསསྶ པཀཱསནཾ, ན ཨཏྠོ.

ཨཉྙཏྠཱཏི སུཏྟེསུ. ཏཏྠ ཧི པརིཏྟཀསིཎུགྒྷཱཊནེཔི རཱུཔཝིཝེཀམཏྟགྒཧཎེན པརིཙྪེདསྶ ཨགྒཧཎཏོ ཨནནྟཕརཎཏཱ ཙ ཝུཏྟཱ, ཨིདྷ པན ཨནནྟཕརཎཏཱསབྦྷཱཝེཔི ཨུགྒྷཱཊིཏཀསིཎཝསེན པརིཏྟཱནནྟཏཱ ཧོཏཱིཏི དསྶནཏྠཾ ‘‘ཨནནྟོ ཨཱཀཱསོ’’ཏི ན ཝུཏྟནྟི ཨདྷིཔྤཱཡོ. སམཡཝཝཏྠཱཔནཛྷཱནཝིསེསནེནེཝེཏྠ ཨཏྠོ, ན པཊིཔཏྟིཡཱཏི ཏདཝཙནཾ.

༢༦༦. པཋམཱརུཔྤཝིཉྙཱཎཾ ¶ ཨཏྟནོ ཕརཎཱཀཱརེནེཝ ཨནནྟནྟི མནསིཀཱཏབྦཏྟཱ ‘‘ཨནནྟ’’ནྟི ཝུཏྟཾ. ཨུགྒྷཱཊབྷཱཝོ ཨུགྒྷཱཊིམཾ.

༢༦༧. ཨཀིཉྩནནྟི ¶ ཝིཉྙཱཎསྶ ཀིཉྩི པཀཱརཾ ཨགྒཧེཏྭཱ སབྦེན སབྦཾ ཝིབྷཱཝནཾ ཨཱཧ.

༢༦༨. ཡཱཡཱཏི སངྑཱརཱཝསེསསཉྙཱཡ. ཏཾ ཏཱཝ པཊིཔཏྟིཾ. ཨཱཝཛྫིསྶཱམཱིཏིཨཱདིནཱ ཏནྣིནྣཱཝཛྫནཱདིཔཝཏྟིཡཱ ཨབྷཱཝཾ དསྶེཏི, ན ཏདཏིཀྐམནཏྠཱཡ ཨཱཝཛྫནབྷཱཝནཱཔཝཏྟིཡཱ. ནཱསཉྙཱཏི སཉྙཱབྷཱཝོ ཙ ཨེཏིསྶཱ ཨཏྠཱིཏི ཨཏྠོ. སམཱུཧགཧཎཝསེན པཝཏྟཾ ཀལཱཔསམྨསནཾ. ཕསྶཱདིཨེཀེཀདྷམྨགཧཎཝསེན པཝཏྟཱ ཨནུཔདདྷམྨཝིཔསྶནཱ.

ཨཱཀཱསེ པཝཏྟིཏཝིཉྙཱཎཱཏིཀྐམཏོ ཏཏིཡཱ. ཏདཏིཀྐམཏོ ཧི ཏསྶེཝ ཝིབྷཱཝནཾ ཧོཏི. དུཏིཡཱརུཔྤཝིཉྙཱཎཝིབྷཱཝནེ ཧི ཏདེཝ ཨཏིཀྐནྟཾ སིཡཱ, ན ཏསྶ ཨཱརམྨཎཾ, ན ཙཱརམྨཎེ དོསཾ དིསྭཱ ཨནཱརམྨཎསྶ ཝིབྷཱཝནཱཏིཀྐམོ ཡུཛྫཏི. པཱལི༹ཡཉྩ ‘‘ཝིཉྙཱཎཉྩཱཡཏནསམཱཔཏྟིཾ སཏོ སམཱཔཛྫིཏྭཱ ཏཏོ ཝུཊྛཧིཏྭཱ ཏཉྙེཝ ཝིཉྙཱཎཾ ཨབྷཱཝེཏཱི’’ཏི (ཙཱུལ༹ནི. ཨུཔསཱིཝམཱཎཝཔུཙྪཱནིདྡེས ༣༩) ཏྟཾ, ན ཝུཏྟཾ ‘‘ཏཉྙེཝ ཝིཉྙཱཎཉྩཱཡཏནཾ ཨབྷཱཝེཏཱི’’ཏི, ‘‘ཏཉྙེཝ ཨབྷཱཝེཏཱི’’ཏི ཝཱ. ‘‘ཨནནྟཾ ཝིཉྙཱཎནྟི ཝིཉྙཱཎཉྩཱཡཏནཾ ཨུཔསམྤཛྫཱ’’ཏི (ཝིབྷ. ༥༠༨) ཨེཏྠ པན དྭཡཾ ཝུཏྟཾ ཨཱརམྨཎཉྩ ཝིཉྙཱཎཾ ཝིཉྙཱཎཉྩཱཡཏནཉྩ. ཏསྨིཾ དྭཡེ ཡེན ཀེནཙི ཡཏོ ཝཱ ཝུཊྛིཏོ, ཏེནེཝ པཊྛཱནནིདྡིཊྛེན ཏཾསདྡསྶ སམྦནྡྷེ ཨཱཔནྣེ ཝིཉྙཱཎཉྩཱཡཏནསྶ ནིཝཏྟནཏྠཾ ཝིཉྙཱཎཝཙནཾ, ཏསྨཱ པཋམཱརུཔྤཝིཉྙཱཎསྶེཝ ཨབྷཱཝནཱཏིཀྐམོ ཝུཏྟོ. ཏནྣིསྶིཏནྟི ཏེན ནིསྶིཏཾ. ཏཾ མཎྜཔལགྒཾ ཨནིསྶཱཡ ཏེན ཝིནཱབྷཱུཏེ ཝིཝིཏྟེ བཧི ཨོཀཱསེ ཋཱནཾ ཝིཡ ཨཱཀཱསལགྒཝིཉྙཱཎསྶ ཝིཝེཀེ ཏདཔགམེ ཏཏིཡཱརུཔྤསྶ ཋཱནཾ.

ཨརཱུཔཱཝཙརཀུསལཀཐཱཝཎྞནཱ ནིཊྛིཏཱ.

ཏེབྷཱུམཀཀུསལཝཎྞནཱ

༢༦༩. ཨིམེ ¶ ཏཱཝ ཚནྡཱདྷིཔཏེཡྻེ པཉྩ ནཡཱཏི ཚནྡཱདྷིཔཏེཡྻནཡེ ཨནྟེ པུརིམནཡཱནཾ ཏཾནཡཱབྷིམུཁཔྤཝཏྟིཾ ¶ སནྡྷཱཡ ཝུཏྟཾ, ཨཡཾ པན པཀཱརོ ན པཱལི༹ཨནུགཏོ. ན ཧི པཱལི༹ཡཾ སུདྡྷིཀནཡཱདཡོ ཝཏྭཱ ཝཱིརིཡཱདྷིཔཏེཡྻཱདིནཡཱ ཝུཏྟཱཏི. མཧཱཔཀརཎེ སཏྟཧི མཧཱཝཱརེཧི ཨནུལོམཱདིནཡཝིཙིཏྟེཧི ཧཱིནཏྟིཀོ ཝིབྷཏྟོ. ཏཏྠ ཙ མཛ྄ཛྷིམདྷམྨེཀདེསབྷཱུཏཱ ཨིམེ ཝཱིསཏི ལོཀིཡམཧཱནཡཱཏི ཀཏྭཱ ‘‘ཏཏྠ ཝིབྷཏྟཱ’’ཏི ཝུཏྟཾ, ན ཨེཏེན ཀམེན ཨིམེསཾ ནཡཱནཾ ཏཏྠ ཨཱགཏཏྟཱ.

ཨེཝམེཏེསཾ ཝིབྷཏྟཊྛཱནཾ དསྶེཏྭཱ ཨིདཱནི ཨེཏསྨིཾ ཏེབྷཱུམཀཀུསལཀཐཱཝསཱནཊྛཱནེ ཨཊྛཱརསཀམྨདྭཱརདསྶནཏྠཾ ‘‘ཨིམསྨིཾ པན ཋཱནེ’’ཏིཨཱདིམཱཧ. ཨཐ ཝཱ ཧཱིནཔཎཱིཏེཧི ཝིནིཝཏྟེཏྭཱ མཛ྄ཛྷིམརཱསིཨནྟོགདྷབྷཱཝཾ དསྶེནྟེན ཨེཏེསཾ ཏེབྷཱུམཀཀུསལནཡཱནཾ ཧཱིནཏྟིཀེ ཝིབྷཱགོ ཀཏོ. ‘‘ཨིམསྨིཾ པན ཋཱནེ’’ཏིཨཱདིཀསྶ ཡཐཱཝུཏྟོཝ སམྦནྡྷོ. ཧཱིནཏྟིཀེ མཛ྄ཛྷིམརཱསིམྷི ཡེ སཝིཔཱཀཱ ཝཊྚནིསྶིཏེནེཝ དཱནཱདིཝསེན པཝཏྟིཏཱ, ཏེ ཧཱིནཱཏི ཀཱཏབྦཱ. ཡེ ཝིཝཊྚནིསྶིཏེན དཱནཱདིཝསེན པཝཏྟིཏཱ, ཏེ པཎཱིཏཱཏི ཀཱཏབྦཱ. ཨཝིཔཱཀཱ མཛ྄ཛྷིམཱཏི ཀཱཏབྦཱ. ཨཝིཔཱཀཏྟཱ ཙ ཏེསུ མཛ྄ཛྷིམརཱསིཾ ཋཔེཏྭཱ ཨིཏརེ དྭེ ཨེཀནྟཝཊྚནིསྶིཏཱ ནཝ, ཝིཝཊྚུཔནིསྶཡབྷཱུཏཱ ཙ ནཝཱཏི ཨཊྛཱརས ཀམྨདྭཱརཱནི, ཀམྨཱནི ཙ ཏཱནི ཏསྶ ཏསྶ ཕལསྶ ཀཱརཎབྷཱཝེན དྭཱརཱནི ཙཱཏི ཀམྨདྭཱརཱནི. ཏཏྠ ཏཏྠ ཝཱ ཙིཏྟཱནི ཀམྨདྭཱརཱནཱིཏི ཨཱཧ. ཏཾཏཾདྭཱརཱནི ཝཱ ཀཱཡཱདཱིནི. ཨཊྛཱརས ཁཏྟིཡཱ ཙ ཨབྷབྦཱ ཧཱིནཧཱིནཏྟཡཱདཡོ ནཝ, བྷབྦཱ ཙ པཎཱིཏཔཎཱིཏཏྟཡཱདཡོ ནཝཱཏི ཀམྨཱནུརཱུཔེནེཝ ཝེདིཏབྦཱ. ཨེཝཾ བྲཱཧྨཎཱདཡོ དེཝཱ ཙ ཡོཛེཏབྦཱ. ཨཊྛཙཏྟཱལཱིས གོཏྟཙརཎཱནི ཏེསཉྙེཝ ཁཏྟིཡཱདཱིནཾ བྷེདཱ. ‘‘ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི…པེ… ཙིཏྟཱདྷིཔཏེཡྻ’’ནྟི (དྷ. ས. ༢༦༩-༢༧༠) ཨེཝཾ ཝུཏྟོ ཙིཏྟསྶ ཙིཏྟཱདྷིཔཏེཡྻབྷཱཝོ, ཙིཏྟཙེཏསིཀསམུདཱཡེ སམཡཝཝཏྠཱཔཀོ ཙིཏྟསདྡོ པཝཏྟོཏི ‘‘སམྤཡུཏྟདྷམྨཱནཾ ཝསེན ཝུཏྟོ’’ཏི ཨཱཧ.

ཏེབྷཱུམཀཀུསལཝཎྞནཱ ནིཊྛིཏཱ.

ལོཀུཏྟརཀུསལཝཎྞནཱ

༢༧༧. ལོཀཾ ¶ ¶ ཏརཏཱིཏི ཨེཏེན ལོཀསམཏིཀྐམཔཊིཔཏྟིམཱཧ. ཨུཏྟརཏཱིཏི ཨེཏེན ལོཀསྶནྟགམནཾ ཕལེ པཏིཊྛཱནཾ ཕལཾ. སམཏིཀྐམྨཱཏིཨཱདིནཱ ནིབྦཱནཾ. སམཏིཀྐམྨཱཏི ཧི ནིསྶརིཏྭཱ. ཨབྷིབྷུཡྻཱཏི ཝིསཾཡུཏྟཾ ཧུཏྭཱཏི ཨཏྠོ. ཏིཝིདྷོཔི ཙཏྠོ མགྒཱདཱིསུ ཨེཀེཀསྨིཾ ཡོཛེཏབྦོ, མགྒེཡེཝ ཝཱ ཨིདྷ ཏསྶ ཨདྷིཔྤེཏཏྟཱ. ཨེཀཙིཏྟཀྑཎིཀནྟི ཨེཀམགྒསྶ དྭེ ཝཱརེ ཨནུཔྤཏྟིཾ སནྡྷཱཡཱཧ. ཨཉྙམཉྙཾ དྷམྨཱནཾ ཨནཏིཝཏྟནཱདིསཱདྷིཀཱཡ པཉྙཱཡ ཝཌྜྷེཏི. ‘‘ནིཡྻཱཏཱིཏི ནིཡྻཱནཱིཡ’’ནྟི ཝཏྟབྦེ ཨཱི-ཀཱརསྶ རསྶཏྟཾ ཡ-ཀཱརསྶ ཙ ཀ-ཀཱརཾ ཀཏྭཱ ‘‘ནིཡྻཱནིཀ’’ནྟི ཝུཏྟཾ. ནིཡྻཱཏི ཨེཏེནཱཏི ནིཡྻཱནཾ, ནིཡྻཱནམེཝ ནིཡྻཱནིཀཾ ཝེནཡིཀོ ཝིཡ. ཨེཏྠ ‘‘ནེཡྻཱནིཀ’’ནྟི ཝཏྟབྦེ ཨི-ཀཱརསྶ ཨེ-ཀཱརཏྟཾ ཨཀཏྭཱ ཝུཏྟཾ.

ཕལནྟི ཙིཏྟཙེཏསིཀརཱསི ཝུཙྩཏི, ཏཾ ཨཉྙམཉྙཾ སམྤཡུཏྟཱནཾ དྷམྨཱནཾ ཨཏྟནོ ཨཝཡཝབྷཱུཏཱནཾ ནིསྶཡོ ཧོཏི. ཕལཉཱཎཾ ཝཱ ཕལཾ, སམྨཱདིཊྛིཨཱདཡོ ཨངྒཱནི ཝཱ. ལོཀུཏྟརབྷཱཝེཏི ལོཀཾ ཨུཏྟིཎྞབྷཱཝེ. ཏེན ཕལནིབྦཱནཱནི སངྒཎྷཱཏི. ཏེསུ ཡཾ བྷཝཏི ཕལཾ, ཏཾ ‘‘བྷཱུམཱི’’ཏི ཝུཙྩཏི. ཡཐཱ ཝཱ ཀམྨནིབྦཏྟཱ ཀཱམབྷཝཱདཡོ ཏཾསམངྒིནོ ནིསྶཡབྷཱཝེན ‘‘བྷཱུམཱི’’ཏི ཝུཙྩནྟི, ཨེཝཾ མགྒེན ནིབྦཏྟཾ ཕལཾ ཨརིཡསཱཝཀསྶ ཀཱལེན ཀཱལཾ སམཱཔཛྫིཏབྦཏཱཡ ནིསྶཡབྷཱཝཏོ ‘‘བྷཱུམཱི’’ཏི ཝུཙྩཏི, ཏཏོཡེཝ ཨརིཡཱ ཙིརཏརཾ ཏིཊྛནྟི. སམུཙྪེདཝིཝེཀཝསེནཱཏི ཨེཏྠ ཨཔཱཡགམནཱིཡཱནཾ ཨཙྩནྟསམུཙྪེདོ ཨིཏརེསཉྩ ཝིཛྫུཏོབྷཱསེན ཝིཡ ཏམསྶ སམུཙྪེདོ དཊྛབྦོ. ལོཀིཡཛ྄ཛྷཱནམྤི པུཐུཛྫནསྶ ཨརིཡསྶ ཙ ཨཀཏཱདྷིཀཱརསྶ ན ཝིནཱ པཊིཔདཱཡ ཨིཛ྄ཛྷཏི, ཀཏཱདྷིཀཱརསྶ པན ཨརིཡསྶ མགྒེནེཝ སམིཛ྄ཛྷནཏོ ཝིཔཱཀཱནཾ ཝིཡ ཀུསལེན ཏཐཱ སམིདྡྷསྶ ཨརིཡམགྒེན སདིསཏཱཡ ཨབྷཱཝཏོ ཨཏབྦིཔཱཀཏྟཱ ཙ ན མགྒཔཊིཔདཱ ཏསྶ ཛྷཱནསྶ པཊིཔདཱཏི སཀྐཱ ཝཏྟུནྟི ཏཏྠ ཏཐཱ གརུཾ ཀཏྭཱ པཊིཔདཱཧི ཨེཝ དེསནཱ ན ཀཏཱ, ཡཐཱཝུཏྟཛ྄ཛྷཱནསངྒཧཏྠཾ སུདྡྷིཀདེསནཱཔི ཀཏཱ.

ཨིདྷ པན ཀསྶཙི ཝིནཱ པཊིཔདཱཡ ཨསིདྡྷིཏོ གརུཾ ཀཏྭཱ དསྶེཏུཾ ‘‘དུཀྑཔཊིཔད’’ནྟིཨཱདི ཝུཏྟཾ. ཡོ ཀོཙི ཝཱརོཏི སཀིཾ དྭིཀྑཏྟུཾ ཏིཀྑཏྟུཾ ཙཏུཀྑཏྟུཾ ཨནེཀཀྑཏྟུནྟི ཨེཝམཱདཱིསུ ཝིཀྑམྦྷནཝཱརེསུ ཡོ ཀོཙི. སཀིཾ དྭིཀྑཏྟུཉྩ ཝིཀྑམྦྷནཝཱརཱ སུཁཱ པཊིཔདཱ ཨེཝ, ན ཙ ཏཏོ ཨུདྡྷཾ སུཁཱ པཊིཔདཱ ¶ ཧོཏཱིཏི ཏིཀྑཏྟུཾ ཝིཀྑམྦྷནཝཱརཾ དུཀྑཱ ¶ པཊིཔདཱཏི རོཙེསུཾ ཨཊྛཀཐཱཙརིཡཱ. ཏསྨིཾ ཏཐཱརོཙིཏེ ཏཏོ པརེསུ ཙཏུཀྑཏྟུཾ ཝིཀྑམྦྷནཝཱརཱདཱིསུ ཝཏྟབྦམེཝ ནཏྠཱིཏི. རཱུཔཱརཱུཔཱནཾ ལཀྑཎཱདཱིཧི པརིཙྪིནྡིཏྭཱ གཧཎཾ རཱུཔཱརཱུཔཔརིགྒཧོ, ནཱམརཱུཔམཏྟམེཏཾ, ན ཨཉྙོ ཀོཙི སཏྟཱདིཀོཏི ཝཝཏྠཱཔནཾ ནཱམརཱུཔཝཝཏྠཱཔནཾ. པརིགྒཧིཏརཱུཔཱརཱུཔསྶ མགྒཔཱཏུབྷཱཝདནྡྷཏཱ ཙ ནཱམརཱུཔཝཝཏྠཱཔནཱདཱིནཾ ཀིཙྪསིདྡྷིཏོ སིཡཱཏི ན རཱུཔཱརཱུཔཔརིགྒཧཀིཙྪཏཱཡ ཨེཝ དུཀྑཔཊིཔདཏཱ ཝཏྟབྦཱཏི ཙེ? ཏཾ ན, ནཱམརཱུཔཝཝཏྠཱཔནཱདཱིནཾ པཙྩནཱིཀཀིལེསམནྡཏཱཡ སུཁསིདྡྷིཡམྤི ཏཐཱསིདྡྷཝིཔསྶནཱསཧགཏཱནཾ ཨིནྡྲིཡཱནཾ མནྡཏཱཡ མགྒཔཱཏུབྷཱཝདནྡྷབྷཱཝཏོ.

རཱུཔཱརཱུཔཾ པརིགྒཧེཏྭཱཏི ཨཀིཙྪེནཔི པརིགྒཧེཏྭཱ. ཀིཙྪེན པརིགྒཧིཏེ ཝཏྟབྦམེཝ ནཏྠི. ཨེཝཾ སེསེསུཔི. ཨིམཾ ཝཱརཾ རོཙེསུནྟི ཀལཱཔསམྨསནཱཝསཱནེ ཨུདཡབྦཡཱནུཔསྶནཱཡ ཝཏྟམཱནཱཡ ཨུཔྤནྣསྶ ཝིཔསྶནུཔཀྐིལེསསྶ ཏིཀྑཏྟུཾ ཝིཀྑམྦྷནེན ཀིཙྪཏཱཝཱརཾ དུཀྑཱ པཊིཔདཱཏི རོཙེསུཾ ཨེཏདནྟཏྟཱ པཊིཔདཱཡ. ཨེཏསྶ ཨཀིཙྪཏྟེཔི པུརིམཱནཾ ཀིཙྪཏྟེ དུཀྑཔཊིཔདཏཱ ཝུཏྟནཡཱཝཱཏི ན པཊིསིདྡྷཱཏི དཊྛབྦཾ. ཡཐཱཝུཏྟཾ ཝཱ སབྦཾ རཱུཔཱརཱུཔཔརིགྒཧཱདིཀིཙྪཏཾ ཏིཀྑཏྟུཾ ཝིཀྑམྦྷནཝཱརཏཱཝསེན ‘‘ཨིམཾ ཝཱར’’ནྟི ཨཱཧ. ཡསྶ པན སབྦཏྠ ཨཀིཙྪཏཱ, ཏསྶ སུཁཱ པཊིཔདཱ ཝེདིཏབྦཱ.

མུསཱཝཱདཱདཱིནཾ ཝིསཾཝཱདནཱདིཀིཙྩཏཱཡ ལཱུཁཱནཾ ཨཔརིགྒཱཧཀཱནཾ པཊིཔཀྑབྷཱཝཏོ པརིགྒཱཧཀསབྷཱཝཱ སམྨཱཝཱཙཱ. སཱ སིནིདྡྷབྷཱཝཏོ སམྤཡུཏྟདྷམྨེ པརིགྒཎྷཱཏི སམྨཱཝཱཙཱཔཙྩཡསུབྷཱསིཏསོཏཱརཉྩ ཛནཾ. ཀཱཡིཀཀིརིཡཱཀིཙྩཾ ཀཏྟབྦཾ སམུཊྛཱཔེཏི, སཡཉྩ སམུཊྛཧནཾ གྷཊནཾ ཧོཏཱིཏི སམྨཱཀམྨནྟསངྑཱཏཱ ཝིརཏིཔི སམུཊྛཱནསབྷཱཝཱཏི ཝུཏྟཱ. སམྤཡུཏྟདྷམྨཱནཾ ཝཱ ཨུཀྑིཔནཾ སམུཊྛཧནཾ ཀཱཡིཀཀིརིཡཱཡ བྷཱརུཀྑིཔནཾ ཝིཡ, ཛཱིཝམཱནསྶ སཏྟསྶ, སམྤཡུཏྟདྷམྨཱནཾ ཝཱ སུདྡྷི ཝོདཱནཾ ཨཱཛཱིཝསྶེཝ ཝཱ ཛཱིཝིཏིནྡྲིཡཝུཏྟིཡཱ.

༢༨༣. མགྒསནྣིསྶིཏནྟི པརམཏྠམགྒསབྷཱཝཏྟཱ མགྒཱཝཡཝབྷཱཝེན སམུདཱཡསནྣིསྶིཏནྟི ཨཏྠོ.

༢༨༥. པཏིཊྛཱནཾ ཀིལེསཝསེན, ཨཱཡཱུཧནཾ ཨབྷིསངྑཱརཝསེན. ཏཎྷཱཝསེན ཝཱ པཏིཊྛཱནཾ, དིཊྛིཝསེན ཨཱཡཱུཧནཾ. བོདྷཱིཏི ཡཱ ཨཡཾ དྷམྨསཱམགྒཱི ཝུཙྩཏཱིཏི ཡོཛེཏབྦཱ. སེནངྒརཐངྒཱདཡོ ཝིཡཱཏི ¶ ཨེཏེན ¶ པུགྒལཔཉྙཏྟིཡཱ ཨཝིཛྫམཱནཔཉྙཏྟིབྷཱཝཾ དསྶེཏི. ཨངྒ-སདྡོ ཀཱརཎཏྠོཔི ཧོཏཱིཏི ཙཏུསཙྩབོདྷཱཡ སཾཝཏྟནྟཱིཏི བོཛ྄ཛྷངྒཱ. བུཛ྄ཛྷནྟཱིཏི བོདྷིཡོ, བོདྷིཡོ ཨེཝ ཨངྒཱཏི ‘‘ཨནུབུཛ྄ཛྷནྟཱིཏི བོཛ྄ཛྷངྒཱ’’ཏི ཝུཏྟཾ. ཝིཔསྶནཱདཱིནཾ ཀཱརཎཱནཾ བུཛ྄ཛྷིཏབྦཱནཉྩ སཙྩཱནཾ ཨནུརཱུཔཾ པཙྩཀྑབྷཱཝེན པཊིམུཁཾ ཨཝིཔརཱིཏཏཱཡ སམྨཱ ཙ བུཛ྄ཛྷནྟཱིཏི ཨེཝམཏྠཝིསེསདཱིཔཀེཧི ཨུཔསགྒེཧི ‘‘ཨནུབུཛ྄ཛྷནྟཱི’’ཏིཨཱདི ཝུཏྟཾ. བོདྷི-སདྡོ ཧི སབྦཝིསེསཡུཏྟཾ བུཛ྄ཛྷནཾ སཱམཉྙེན སངྒཎྷཱཏཱིཏི.

༢༩༩. ཏིཎྞནྟི རཱགཱདཱིནཾ. ཀརོཏི ནཱམ ཀིཾ དུཙྩརིཏཱནི ཨནུཝཏྟམཱནཱནི.

༣༠༡. པཱཎཱཏིཔཱཏཱདིནིཔྥཱདིཏཔཙྩཡཱནཾ ནིཙྩསེཝནཾ དྷུཝཔཊིསེཝནཾ. སཀིཙྩཀོཏི ཝིསུཾ ཨཏྟནོ ཀིཙྩཝཱ. ན ཧོཏཱིཏི ཨཏྠནྟརབྷཱཝཾ པཊིཀྑིཔཏི. པཙྩཡཔཊིསེཝནསཱམནྟཛཔྤནཨིརིཡཱཔཐཔྤཝཏྟནཱནི པཱཔིཙྪཏཱནིབྦཏྟཱནི ཏཱིཎི ཀུཧནཝཏྠཱུནཱིཏི.

༣༤༣. ཝུཊྛཱནགཱམིནཱིཝིཔསྶནཱ སངྑཱརུཔེཀྑཱ སཱནུལོམཱ, སཱ སུཉྙཏོ པསྶནྟཱི ‘‘སུཉྙཏཱ’’ཏི ཝུཙྩཏི, དུཀྑཏོ པསྶནྟཱི ཏཎྷཱཔཎིདྷིསོསནཏོ ‘‘ཨཔྤཎིཧིཏ’’ནྟི. སཱ ཨཱགམནཱིཡཊྛཱནེ མགྒཱདྷིགམཏྠཾ ཨཱགམནཔཊིཔདཱཋཱནེ ཋཏྭཱ སུཉྙཏཱཔྤཎིཧིཏནྟི ནཱམཾ དེཏི. ཨཱགམནཏོ ནཱམེ ལདྡྷེ སགུཎཏོ ཨཱརམྨཎཏོ ཙ ནཱམཾ སིདྡྷམེཝ ཧོཏི, ན པན སགུཎཱརམྨཎེཧི ནཱམལཱབྷེ སབྦཏྠ ཨཱགམནཏོ ནཱམཾ སིདྡྷཾ ཧོཏཱིཏི པརིཔུཎྞནཱམསིདྡྷིཧེཏུཏྟཱ སགུཎཱརམྨཎེཧི སབྦེསམྤི ནཱམཏྟཡཡོགོ, ན ཨཱགམནཏོཏི ཝཝཏྠཱནཀརཏྟཱ ཙ ནིཔྤརིཡཱཡདེསནཱཡ ཨཱགམནཏོཝ ཨིདྷ ནཱམཾ ལབྷཏི, ན ཨིཏརེཧཱིཏི ཝུཏྟཾ.

༣༥༠. ཨནིམིཏྟཝིཔསྶནནྟི ཨནིཙྩཱནུཔསྶནཾ. ནིམིཏྟདྷམྨེསཱུཏི སམཱུཧཱདིགྷནཝསེན ཙ སཀིཙྩཔརིཙྪེདཏཱཡ ཙ སཔརིགྒཧེསུ ཁནྡྷེསུ. ཨནིམིཏྟཝིམོཀྑོཏི ཨནིཙྩཱནུཔསྶནམཱཧ. ཨེཝཾསམྤདམིདནྟི ཀཐམིདྷ ཨུཔམཱསཾསནྡནཾ ཧོཏི. ན ཧི ཚནྡཙིཏྟཱནཾ མགྒསངྑཱཏཨདྷིཔཏིབྷཱཝཱབྷཱཝོ ཝིཡ སདྡྷིནྡྲིཡཱདྷིཀསྶ ཨནིམིཏྟཝིམོཀྑསྶ ཨནིམིཏྟབྷཱཝཱབྷཱཝོ ཨཏྠི, ན ཙ ཨམགྒཱདྷིཔཏཱིནཾ མགྒཱདྷིཔཏིནཱམདཱནཱབྷཱཝོ ཝིཡ ཨནིམིཏྟསྶ ཨནིམིཏྟནཱམདཱནཱབྷཱཝོཏི སཀྐཱ ཝཏྟུཾ ཨནིམིཏྟཝིམོཀྑསྶ ཨནནིམིཏྟཏཱཡ ཨབྷཱཝཏོ ¶ . མགྒོ ཨདྷིཔཏི ཨེཏེསནྟི ཙ མགྒཱདྷིཔཏིནོཏི ཡུཏྟོ ཏཏྠ ཚནྡཙིཏྟེཧི ཏཾསམྤཡུཏྟཱནཾ མགྒཱདྷིཔཏིབྷཱཝཱབྷཱཝོ. ཨིདྷ ¶ པན མགྒོ ཨནིམིཏྟཾ ཨེཏསྶཱཏི མགྒཱནིམིཏྟོཏི ཨཡམཏྠོ ན སམྦྷཝཏཱིཏི ན ཏེན ཨམགྒེན མགྒསྶ ཨནིམིཏྟབྷཱཝོ ན ཡུཛྫཏི, ཀིཾ ཝཱ ཨེཏྠ སཱམཉྙཾ ཨདྷིཔྤེཏནྟི. ཨམགྒངྒམགྒནཱམཱབྷཱཝོ. ཡཐཱ སཏིཔི ཨདྷིཔཏིབྷཱཝེ ཚནྡཙིཏྟཱནཾ ན མགྒཱདྷིཔཏཱིཏི མགྒནཱམཾ, ན ཙ ཏེཧི མགྒསྶ ཏེསཾ ཨམགྒངྒཏྟཱ, ཏཐཱ སཏིཔི སདྡྷཱཡ ཨཱགམནབྷཱཝེན ཏསྶཱ ཨནིམིཏྟནྟི མགྒནཱམཾ, ན ཙ ཏཱཡ མགྒསྶ ཏསྶཱ ཨམགྒངྒཏྟཱ. ཨེཝཾ ཨནིམིཏྟཝིཔསྶནཱཡཔི ཨནིམིཏྟབྷཱཝོ ནིཔྤརིཡཱཡེན ནཏྠཱིཏི དཱིཔིཏོ ཧོཏི.

ནནུ ཙ ཨིདྷ ཛྷཱནཾ སུཉྙཏཱདིནཱམེན ཝུཏྟཾ, ན མགྒོཏི ཙེ? ན, མགྒསམྤཡོགཏོ ཛྷཱནསྶ སུཉྙཏཱདིནཱམཀཏྟཱ. སུཏྟནྟཔརིཡཱཡེན སགུཎཱརམྨཎེཧི ཨིདྷ ཨབྷིདྷམྨེཔི ནཱམཾ ལབྷཏཱིཏི ཨཱཧཾསུ. ཏསྨཱ པཊིཀྑིཏྟཱ ‘‘ན པན ལབྷནྟཱི’’ཏི. ཀིཾ ཀཱརཎཱ? ཨབྷིདྷམྨེ སརསཾ ཨནཱམསིཏྭཱ པཙྩནཱིཀཏོཝ ནཱམལཱབྷཱཏི ཨདྷིཔྤཱཡོ. ཡོ ཧི སགུཎཱརམྨཎེཧི ནཱམལཱབྷོ, སོ སརསཔྤདྷཱནོ ཧོཏི. སརསེནེཝ ཙ ནཱམལཱབྷེ སབྦམགྒཱནཾ སུཉྙཏཱདིབྷཱཝོཏི ཝཝཏྠཱནཾ ན སིཡཱ. ཏསྨཱ ཨབྷིདྷམྨེ སཏིཔི དྭཱིཧི ནཱམལཱབྷེ པཙྩནཱིཀཏོ ནཱམཝཝཏྠཱནཀརཾ གཧིཏནྟི སགུཎཱརམྨཎེཧི སུཉྙཏཱཔྤཎིཧིཏམགྒཱ ནཱམཾ ན ལབྷནྟཱིཏི ཨཱཧ. ཨཐ ཝཱ ན པན ལབྷནྟཱིཏི ཨཉྙནིརཔེཀྑེཧི སགུཎཱརམྨཎེཧི ན ལབྷནྟི. ཀིཾ ཀཱརཎཱ? ཨབྷིདྷམྨེ སརསཔཙྩནཱིཀེཧི སཧིཏེཧི ནཱམལཱབྷཱཏི ཨཏྠོ. པཙྩནཱིཀཉྷི ཝཝཏྠཱནཀརཾ ཨནཔེཀྑིཏྭཱ ཀེཝལསྶ སརསསྶ ནཱམཧེཏུབྷཱཝོ ཨབྷིདྷམྨེ ནཏྠི ཨཝཝཏྠཱནཱཔཏྟིཏོ. ཏསྨཱ ཨཏྟཱབྷིནིཝེསཔཎིདྷིཔཊིཔཀྑཝིཔསྶནཱནུལོམཱ མགྒཱ སཏིཔི སརསནྟརེ པཙྩནཱིཀསཧིཏེན སརསེན ནཱམཾ ལབྷནྟི. ཨནིམིཏྟམགྒསྶ པན ཝིཔསྶནཱ ནིམིཏྟཔཊིཔཀྑཱ ན ཧོཏི སཡཾ ནིམིཏྟགྒཧཎཏོ ནིམིཏྟགྒཧཎཱནིཝཱརཎཱཏི ཏདནུལོམམགྒོཔི ན ནིམིཏྟསྶ པཊིཔཀྑོ. ཡདི སིཡཱ, ནིམིཏྟགཏཝིཔསྶནཱཡཔི པཊིཔཀྑོ སིཡཱཏི. ཏསྨཱ ཝིཛྫམཱནོཔི སརསོ ཝཝཏྠཱནཀརཔཙྩནཱིཀཱབྷཱཝཱ ཨབྷིདྷམྨེ ཨནིམིཏྟནྟི ནཱམདཱཡཀོ ན གཧིཏོ. ཨནིཙྩཱནུཔསྶནཱནུལོམོ པན མགྒོ སུདྡྷིཀཔཊིཔདཱནཡེཡེཝ སངྒཧིཏོཏི དཊྛབྦོ. ཏསྨཱ ཨེཝ ཙ སོ ནཡོ ཝུཏྟོཏི. ཨེཝནྟི ཡཾ ¶ ཝཀྑཏི ‘‘ཨནིཙྩཏོ ཝུཊྛཧནྟསྶ མགྒོ ཨནིམིཏྟོ ཧོཏཱི’’ཏི (དྷ. ས. ཨཊྛ. ༣༥༠), ཨེཝཾ ཨཱཧརིཏྭཱ ཨཊྛཀཐཱཙརིཡེཧི སོ ཨནིམིཏྟམགྒོ དཱིཔིཏོཏི ཨཏྠོ.

ཝུཊྛཱན…པེ… ཀིམཱརམྨཎཱཏི ཨནིཙྩཱདིཏོ ཝུཊྛཧནྟསྶ ཝུཊྛཱནགཱམིནིཡཱ ལཀྑཎཱརམྨཎཏྟེ སཏི སངྑཱརེཧི ཝུཊྛཱནཾ ན སིཡཱ, སངྑཱརཱརམྨཎཏྟེ ཙ ལཀྑཎཔཊིཝེདྷོཏི མཉྙམཱནོ ¶ པུཙྪཏི. ‘‘ཨནིཙྩ’’ནྟིཨཱདིནཱ སངྑཱརེསུ པཝཏྟམཱནེན ཉཱཎེན ལཀྑཎཱནིཔི པཊིཝིདྡྷཱནི ཧོནྟི ཏདཱཀཱརསངྑཱརགཧཎཏོཏི ཨཱཧ ‘‘ལཀྑཎཱརམྨཎཱ’’ཏི. སངྑཱརཱརམྨཎཱ ཨེཝ ཡཐཱཝུཏྟཱདྷིཔྤཱཡེན ‘‘ལཀྑཎཱརམྨཎཱ’’ཏི ཝུཏྟཱཏི དསྶེནྟོ ‘‘ལཀྑཎཾ ནཱམཱ’’ཏིཨཱདིམཱཧ. ཨནིཙྩཏཱ དུཀྑཏཱ ཨནཏྟཏཱཏི ཧི ཝིསུཾ གཡ྄ཧམཱནཾ ལཀྑཎཾ པཉྙཏྟིགཏིཀཾ པརམཏྠཏོ ཨཝིཛྫམཱནཾ, ཨཝིཛྫམཱནཏྟཱ ཨེཝ པརིཏྟཱདིཝསེན ནཝཏྟབྦདྷམྨབྷཱུཏཾ. ཏསྨཱ ཝིསུཾ གཧེཏབྦསྶ ལཀྑཎསྶ པརམཏྠཏོ ཨབྷཱཝཱ ‘‘ཨནིཙྩཾ དུཀྑམནཏྟཱ’’ཏི སངྑཱརེ སབྷཱཝཏོ སལླཀྑེནྟོཝ ལཀྑཎཱནི སལླཀྑེཏི ནཱམཱཏི ཨཱཧ ‘‘ཡོ པན ཨནིཙྩཾ དུཀྑམནཏྟཱཏི ཏཱིཎི ལཀྑཎཱནི སལླཀྑེཏཱི’’ཏི. ཡསྨཱ ཙ ཨནིཙྩནྟིཨཱདིནཱ སངྑཱརཱཝ དིསྶམཱནཱ, ཏསྨཱ ཏེ ཀཎྛེ བདྡྷཀུཎཔཾ ཝིཡ པཊིནིསྶཛྫནཱིཡཱ ཧོནྟི.

ལོཀུཏྟརཀུསལཾ

པཀིཎྞཀཀཐཱཝཎྞནཱ

ཏཏྲཱཏི ལོཀུཏྟརཛ྄ཛྷཱནེ. ཨཛ྄ཛྷཏྟཉྩཱཏི ཨུཔཌྜྷགཱཐཱཡ ཨབྷིནིཝིསིཏབྦཾ ཝུཊྛཱཏབྦཾ ཝིཔསྶནཱབྷཱུམིཾ པཉྩདྷཱ ཨུདྡིསཏི. སཏྟཨཊྛཱདཱིནི ཨངྒཱནི སཏྟཊྛངྒཱནཱིཏི ཨཱདིསདྡསྶ ལོཔོ དཊྛབྦོ. ནིམིཏྟནྟི ཡཏོ ཝུཊྛཱནཾ, ཏཱནི ནིམིཏྟཔཝཏྟཱནི ནིམིཏྟཝཙནེནེཝ ཨུདྡིསཏི. སངྑཱརུཔེཀྑཱཉཱཎམེཝ ཨརིཡམགྒསྶ བོཛ྄ཛྷངྒཱདིཝིསེསཾ ནིཡམེཏི. ཀསྨཱ? ཏཏོ ཏཏོ དུཏིཡཱདིཔཱདཀཛ྄ཛྷཱནཏོ ཨུཔྤནྣསྶ སསངྑཱརུཔེཀྑཱཉཱཎསྶ པཱདཀཛ྄ཛྷཱནཱཏིཀྐནྟཱནཾ ཨངྒཱནཾ ཨསམཱཔཛྫིཏུཀཱམཏཱཝིརཱགབྷཱཝནཱབྷཱཝཏོ ཨིཏརསྶ ཙ ཨཏབྦྷཱཝཏོ. ཏེསམྤི ཝཱདེསུ…པེ… ཝིཔསྶནཱཝ ནིཡམེཏཱིཏི ཝེདིཏབྦཱ. ཀསྨཱ? ཝིཔསྶནཱནིཡམེནེཝ ཧི པཋམཏྠེརཝཱདེཔི ཨཔཱདཀཔཋམཛ྄ཛྷཱནཔཱདཀམགྒཱ པཋམཛ྄ཛྷཱནིཀཱཝ ཧོནྟི, ཨིཏརེ ཙ པཱདཀཛ྄ཛྷཱནཝིཔསྶནཱནིཡམེཧི ཏཾཏཾཛྷཱནིཀཱ. ཨེཝཾ སེསཝཱདེསུཔི ཝིཔསྶནཱནིཡམོ ཡཐཱསམྦྷཝཾ ཡོཛེཏབྦོ.

པཀིཎྞཀསངྑཱརེཏི ¶ པཱདཀཛ྄ཛྷཱནཏོ ཨཉྙསངྑཱརེ. ཏེན པཱདཀཛ྄ཛྷཱནསངྑཱརེསུ སམྨསིཏེསུ ཝཏྟབྦམེཝ ནཏྠཱིཏི དསྶེཏི. ཏཏྲཱཔཱིཏི དུཏིཡཏྠེརཝཱདེཔི. ཏཾཏཾཛྷཱནིཀཏཱ ཏཾཏཾསམྨསིཏསངྑཱརཝིཔསྶནཱནིཡམེཧི ཧོཏི. ཏཏྲཱཔི ཧི ཝིཔསྶནཱ ཏཾཏཾཝིརཱགཱཝིརཱགབྷཱཝནཱབྷཱཝེན སོམནསྶསཧགཏཱ ¶ ཨུཔེཀྑཱསཧགཏཱ ཙ ཧུཏྭཱ ཛྷཱནངྒཱདིནིཡམཾ མགྒསྶ ཀརོཏཱིཏི ཨེཝཾ ཝིཔསྶནཱནིཡམོ ཝུཏྟནཡེནེཝ ཝེདིཏབྦོ.

ཏནྟི ཏཾཏཾཛྷཱནསདིསབྷཝནཾ. སྭཱཡམཏྠོ པཱདཀཛ྄ཛྷཱནསམྨསིཏཛ྄ཛྷཱནུཔནིསྶཡེཧི ཝིནཱ ཨཛ྄ཛྷཱསཡམཏྟེན ཨསིཛ྄ཛྷནཱ ཨུཔནིསྶཡེན ཝིནཱ སངྐཔྤམཏྟེན སཀདཱགཱམིཕལཱདཱིནཾ ཨསིཛ྄ཛྷནདཱིཔཀེན ནནྡཀོཝཱདེན (མ. ནི. ༣.༣༩༨ ཨཱདཡོ) དཱིཔེཏབྦོ. ཏཏྠ ཧི སོཏཱཔནྣཱཡཔི པརིཔུཎྞསངྐཔྤབྷཱཝཾ ཝདནྟེན བྷགཝཏཱ ཡསྶ ཡསྶ ཨུཔནིསྶཡོ ཨཏྠི, ཏསྶ ཏསྶེཝ ཨཛ྄ཛྷཱསཡོ ནིཡཱམཀོ, ནཱཉྙསྶཱཏི ཏེན ཏེན པརིཔུཎྞསངྐཔྤཏཱ ཧོཏི, ན ཏཏོ པརཾ སངྐཔྤསབྦྷཱཝེཔི ཨསིཛ྄ཛྷནཏོཏི ཨཡམཏྠོ དཱིཔིཏོ ཧོཏི. ཨེཝམིདྷཱཔི ཡསྶ ཡསྶ དུཏིཡཱདིཛྷཱནིཀསྶ མགྒསྶ ཡཐཱཝུཏྟོ ཨུཔནིསྶཡོ ཨཏྠི, ཏསྶ ཏསྶེཝ ཨཛ྄ཛྷཱསཡོ ནིཡཱམཀོ, ནཱཉྙསྶ སཏིཔི ཏསྨིཾ ཨསིཛ྄ཛྷནཏོ. ཨིམསྨིཾ པན ཝཱདེ པཱདཀསམྨསིཏཛ྄ཛྷཱནུཔནིསྶཡསབྦྷཱཝེ ཨཛ྄ཛྷཱསཡོ ཨེཀནྟེན ཧོཏི, ཏཾཏཾཕལཱུཔནིསྶཡསབྦྷཱཝེ ཏཾཏཾསངྐཔྤོ ཝིཡཱཏི ཏདབྷཱཝཱབྷཱཝཏོ ཨཛ྄ཛྷཱསཡོ ནིཡམེཏཱིཏི ཝུཏྟཾ.

ཡསྨིཾ པན པཱདཀཛ྄ཛྷཱནཾ ནཏྠཱིཏི ཙཏུཏྠཛ྄ཛྷཱནིཀཝཛྫཱནཾ པཱདཀཱནི ལོཀིཡཛ྄ཛྷཱནཱནི སནྡྷཱཡ ཝུཏྟཾ. ཨཔྤནཱཔྤཏྟི ཙ ཨོལཱ༹རིཀངྒཱཏིཀྐམནུཔནིསྶཡཱབྷཱཝེ པཉྩཧི ཨངྒེཧི ཝིནཱ ན ཧོཏཱིཏི ‘‘སོམནསྶསཧགཏམགྒོ ཧོཏཱི’’ཏི ཨཱཧ. ཨུཔེཀྑཱསཧགཏམགྒོཏི ཨེཏེན ཙཏུཏྠཛ྄ཛྷཱནིཀཏཱཔི སམཱནཱ ཨནུསཡསམུགྒྷཱཊནསམཏྠསྶ ན སངྑཱརཱཝསེསཏཱཏི དསྶེཏི. ཏེ ཙ ཝཱདཱ ན ཝིརུཛ྄ཛྷནྟི ཨཛ྄ཛྷཱསཡཝསེན པཉྩམཛ྄ཛྷཱནིཀཏཱཡ པཋམཱདིཛ྄ཛྷཱནིཀཏཱཡ ཙ སམྦྷཝཏོཏི ཨདྷིཔྤཱཡོ. ཨཛ྄ཛྷཱསཡོ ཙ སཱཏྠཀོ ཧོཏི, ཨཉྙཐཱ པཱདཀསམྨསིཏཛ྄ཛྷཱནེཧེཝ ནིཡམསྶ སིདྡྷཏྟཱ ཨཛ྄ཛྷཱསཡོ ནིཡཱམཀོ ཝུཙྩམཱནོ ནིརཏྠཀོ སིཡཱཏི. ཨིདྷ པན ཨཊྛསཱལིནིཡཱ ནིཡཱམནེ ཨེཀནྟིཀཾ ཝིཔསྶནཱསངྑཱཏཾ ཨཏྠམེཝ ཨུདྡྷརིཏྭཱ ‘‘ཏེསམྤི ཝཱདེསུ ཨཡཾ…པེ… ཝིཔསྶནཱཝ ནིཡམེཏཱི’’ཏི ཝདནྟེན ¶ ཏཡོཔེཏེ ཝཱདེ ཝིཔསྶནཱཝ ནིཡམེཏཱིཏི དསྶིཏཾ. ཏཾཏཾཝཱདཱནཉྷི ཝིཔསྶནཱསཧིཏཱནམེཝ སིདྡྷི, ནཱཉྙཐཱཏི དསྶིཏནྟི.

པཝེདྷཏཱིཏི གོཏྲབྷུསྶ པཙྩཡོ བྷཝིཏུཾ ན སཀྐོཏཱིཏི ཨཏྠོ. ཡདི པཉྩམཙིཏྟཀྑཎེ ཛཝནཾ པཏིཏཾ ནཱམ ཧོཏི, ཀཐཾ ཏདཱ གོཏྲབྷུ ཏདནནྟརཉྩ མགྒོ ཛཝནསྶ པཏིཏཀྑཎེ ཨུཔྤཛྫཏཱིཏི? ཨཔུབྦསྶ ཛཝནནྟརསྶ པཏིཏཏཱབྷཱཝཏོ. ཏདེཝ ཧི ཛཝནཾ ཨནེཀཀྑཏྟུཾ པཝཏྟམཱནཾ ¶ པཏིཏཾ སིཡཱཏི, གོཏྲབྷུ པན ཨཱརམྨཎནྟརེ ཨུཔྤནྣཾ ཨཔུབྦཾ ཛཝནཾ, ཏཐཱ མགྒོ བྷཱུམནྟརཏོ ཙཱཏི. ནནུ ཙ སཏྟམཛཝནཙེཏནཱཡ བལཝཏཱཡ ཨུཔཔཛྫཝེདནཱིཡབྷཱཝོ ཧོཏི ཨཱནནྟརིཡཏཱཔཱིཏི, ཏཏྠཱཡཾ ཨདྷིཔྤཱཡོ སིཡཱ ‘‘པཊིསནྡྷིཡཱ ཨནནྟརཔཙྩཡབྷཱཝིནོ ཝིཔཱཀསནྟཱནསྶ ཨནནྟརཔཙྩཡབྷཱཝེན ཨནྟིམཛཝནཙེཏནཱཡ སུསངྑཏཏྟཱ སཱ སཏྟམཛཝནཙེཏནཱ ཨུཔཔཛྫཝེདནཱིཡཱ ཨཱནནྟརིཀཱ ཙ ཧོཏི, ན ཨཔཏིཏཛཝནཙེཏནཱ ཝིཡ བལཝཏཱཡཱ’’ཏི.

པུན ཨནུལོམཾ ཏཾ ཨནུབནྡྷེཡྻཱཏི གོཏྲབྷུསྶ ཧི སངྑཱརཱརམྨཎཏྟེ སཏི ཏདཔི ཨནུལོམམེཝཱཏི པུརིམཨནུལོམཾ ཝིཡ ཏཾ ཏདཔི ཨཉྙཾ ཨནུལོམཾ ཨནུབནྡྷེཡྻ, ན མགྒོཏི མགྒཝུཊྛཱནམེཝ ཙ ན བྷཝེཡྻ ཨཏྟནོ སདིསཱལམྦནསྶ ཨཱཝཛྫནཊྛཱནིཡསྶ པཙྩཡསྶ ཨལཱབྷཱ. ཨཔྤཧཱིནབྷཱཝེན པཉྩསུ ཨུཔཱདཱནཀྑནྡྷེསུ ཨནུསཡིཏཱ ཀིལེསཱ སཱ བྷཱུམི ཨེཏེཧི ལདྡྷཱཏི ཀཏྭཱ བྷཱུམིལདྡྷཱ. ཝཊྚཾ སིནོནྟི བནྡྷནྟཱིཏི ཀཏྭཱ ཝཊྚསེཏཱུ ཙ, ཏེསཾ སམུགྒྷཱཏཀརཎནྟིཔི ཨེཏདེཝསྶ ལོབྷཀྑནྡྷཱདིཔདཱལནཾ ཝུཙྩཏི. ཏནྟི པཝཏྟཾ. ཨེཀཾ བྷཝནྟི ཨནཱགཱམིནོ ཨནེཀཀྑཏྟུཉྩ ཏཏྠེཝ ཨུཔཔཛྫནྟསྶ ཧེཊྛཱ ཨནཱགམནཝསེན ཨེཀོ བྷཝོཏི གཧེཏྭཱ ཝུཏྟཾ.

ཨིམསྶ པནཏྠསྶཱཏི ཡཐཱཝུཏྟསྶ ཨུཔཱདིནྣཀཔཝཏྟཏོ ཝུཊྛཱནསྶ. ཨཔཱཡེསུ སཏྟམབྷཝཏོ ཨུདྡྷཾ སུགཏིཡཉྩ ཝིཔཱཀདཱཡཀསྶ ཨབྷིསངྑཱརཝིཉྙཱཎསྶ པཙྩཡགྷཱཏོ སོཏཱཔཏྟིམགྒཉཱཎེན ཨབྷིསངྑཱརཝིཉྙཱཎསྶ ནིརོདྷོ དཊྛབྦོ. དྭཱིསུ བྷཝེསཱུཏི ཨནཱགཱམིམགྒེ ཨབྷཱཝིཏེ སཀདཱགཱམིསྶ ཀཱམདྷཱཏུཡཾ ཡེ དྭེ བྷཝཱ ཨུཔྤཛྫེཡྻུཾ, ཏེསཱུཏི ཨཏྠོ. ཙལཏཱིཏི ཨེཏེན ཙལནསབྷཱཝམེཝ དསྶེཏི, ན ཨཙལནཱབྷཱཝཾ, ཏསྨཱ ཨཙལནཾ དསྶེཏྭཱ པུན ཙལནཾ དསྶེཏུཾ ‘‘ཏཐཱགཏསྶ ཧཱི’’ཏིཨཱདིམཱཧ. ཡེཔི ཝཱ ཀཏྠཙི ཙཏྟཱརོཔི མགྒེ སམཱནཔཊིཔདེ དིསྭཱ སབྷཱཝཏོ ཨཙལནམེཝ ¶ གཎྷེཡྻུཾ, ཏེསཾ ཏཾགཧཎནིཝཱརཎཏྠཾ ‘‘ཙལཏཱི’’ཏི ཝུཏྟཾ, ན ཙལནཱཝདྷཱརཎཏྠནྟི ཡུཏྟཾ ཨུབྷཡདསྶནཾ. ཨཐ ཝཱ ཡདིཔི ཀེསཉྩི ཙཏྟཱརོཔི མགྒཱ སམཱནཔཊིཔདཱ, ཏཐཱཔི ཀིལེསིནྡྲིཡེཧི སིཛ྄ཛྷམཱནཱ པཊིཔདཱ ཏེསཾ ཝསེན ཙལནཔཀཏིཀཱ ཨེཝཱཏི ‘‘ཙལཏི’’ཙྩེཝ ཝུཏྟཾ, ན ‘‘ན ཙལཏཱི’’ཏི.

ལོཀུཏྟརཀུསལཔཀིཎྞཀཀཐཱཝཎྞནཱ ནིཊྛིཏཱ.

པཋམམགྒཝཱིསཏིམཧཱནཡཝཎྞནཱ

༣༥༧. ཡསྶ ¶ པུབྦབྷཱགེ ‘‘མགྒཾ བྷཱཝེམཱི’’ཏི ཨཛ྄ཛྷཱསཡོ པཝཏྟོ, སོ མགྒཾ བྷཱཝེཏི. ཨེཝཾ སབྦཏྠ ཨཛ྄ཛྷཱསཡཝིསེསེན ཏཾཏཾབྷཱཝནཱཝིསེསོ དཊྛབྦོ.

༣༥༨. ཚནྡཱདྷིཔཏེཡྻནྟིཨཱདཱིསུ ཨེཀཙིཏྟཀྑཎེ ཝཏྟམཱནེསུ དྷམྨེསུ ཀཐཾ ཚནྡསྶ ཏཾསཧཛཱཏསྶ ཨདྷིཔཏིབྷཱཝོ ཝཱིརིཡཱདཱིནཉྩཱཏི? ཨུཔནིསྶཡཝསེན. ཡསྶ ཧི སཙེ ཚནྡཝཏོ ཀུསལཾ ནིཔྥཛྫཏི, ‘‘ཨཧཾ ནིཔྥཱདེསྶཱམཱི’’ཏི པཝཏྟམཱནསྶ ཀུསལཾ ནིཔྥནྣཾ, ཏསྶ ཏཾསཧཛཱཏོ ཚནྡོ ཏེན པུརིམུཔནིསྶཡེན ཝིསིཊྛོ སཧཛཱཏདྷམྨེ ཨཏྟནོ ཝསེ ཝཏྟེཏི. ཏསྨིཉྩ པཝཏྟམཱནེ ཏེ པཝཏྟནྟི, ནིཝཏྟམཱནེ ནིཝཏྟནྟི, ཏདནུརཱུཔབལཱ ཙ ཧོནྟི རཱཛཔུརིསཱ ཝིཡཱཏི. ཨེཝཾ ཝཱིརིཡཱདཱིསུ. སེསདྷམྨཱནཾ པན ཀཏྠཙི ཝུཏྟཔྤཀཱརཔྤཝཏྟིསབྦྷཱཝེཔི ཨཏཾསབྷཱཝཏྟཱ ཨདྷིཔཏིབྷཱཝོ ནཏྠཱིཏི དཊྛབྦོ.

དུཏིཡམགྒཝཎྞནཱ

༣༦༡. ཨཱ-ཀཱརསྶ རསྶཏྟཾ ཀཏྭཱ ཨཉྙིནྡྲིཡཾ ཝུཏྟཾ, ཨཱ-ཀཱརོ ཙ དྷམྨམརིཡཱདཏྠོ.

ཏཏིཡཙཏུཏྠམགྒཝཎྞནཱ

༣༦༢. མགྒངྒཱནི ན པཱུརེནྟི ཨཀིཙྩཀཏྟཱ སམྨཱདིཊྛིཡཱཏི ཨདྷིཔྤཱཡོ. མཱརེནྟོ གཙྪཏཱིཏི ཧི མགྒོ, ན ཙེཏཱཡ མཱརེཏབྦཾ ཨཏྠཱིཏི. མཱནསྶ དིཊྛིསདིསཱ ¶ པཝཏྟི ཨཧམསྨཱིཏི པཝཏྟམཱནསྶ དིཊྛིཊྛཱནེ ཋཱནཾ. ཨཱལོཀསྶེཝ པཝཏྟིཀཱལོ ཝིཡཱཏི ཙིརཔྤཝཏྟིཾ སནྡྷཱཡཱཧ. ཨེཀདེསསཱམཉྙེན ཧི ཡཐཱདྷིཔྤེཏེན ཨུཔམཱ ཧོཏཱིཏི. ཁཱརེ ཝཱཏི ཀཊྛཱདཱིནཾ ཁཱརཙྪཱརིཀཱཡཾ. སམྨདྡིཏྭཱཏི ཀིལེདེཏྭཱ. ཚནྡོཏི ཏཎྷཱ. ཨནུསཡོཏི ཏཎྷཱ མཱནཱནུསཡོ ཙ. ཨེཏསྨིཉྩ སུཏྟེ ཨསམཱུཧཏསྶ གནྡྷསྶ སམུགྒྷཱཊནཾ ཝིཡ ཨསམཱུཧཏམཱནཱདིསམུགྒྷཱཏཾ དསྶེནྟེན ཨཉྙམཉྙེ ཀིལེསེ པཛཧཏཱིཏི དསྶིཏནྟི ཨཱནཱིཏཾ, ན ཡཐཱཝུཏྟནཡེན ཨུཔམཱཡ ཝུཏྟཏྟཱཏི དཊྛབྦཾ. ནིརནྟརཾ པཝཏྟམཱནེ ཙིཏྟེ ཏསྶ སཾཀིལེསཝོདཱནཀརཱ སཱཝཛྫཱནཝཛྫཱ ཙེཏསིཀཱ ཨུཔྤཛྫམཱནཱ ཏསྶངྒབྷཱུཏཱ ཨཝཡཝཱ ཝིཡ ཧོནྟཱིཏི ‘‘ཙིཏྟངྒཝསེནཱ’’ཏི ཝུཏྟཾ.

ལོཀུཏྟརཀུསལཝཎྞནཱ ནིཊྛིཏཱ.

ཀུསལཀཐཱཝཎྞནཱ ནིཊྛིཏཱ.

ཨཀུསལཔདཾ

དྷམྨུདྡེསཝཱརོ

པཋམཙིཏྟཀཐཱཝཎྞནཱ

༣༦༥. ཀུསལེ ¶ ཝུཏྟནཡཾ ཨནུགནྟྭཱ ཡཐཱནུརཱུཔཾ ཝེདིཏབྦཏཱཡ ‘‘ཝུཏྟནཡེནཱ’’ཏི ཨཱཧ. གནྟབྦཱབྷཱཝཏོཏི བུཛ྄ཛྷིཏབྦཱབྷཱཝཏོ. དིཊྛིཡཱ གཏམཏྟནྟི དིཊྛིཡཱ གཏིམཏྟཾ གཧཎམཏྟཾ. ཨཱསནྣཀཱརཎཏྟཱ ཨཡོནིསོམནསིཀཱརསྶ ཝིསུཾ གཧཎཾ ཨེཀནྟཀཱརཎཏྟཱ ཙ. སཏིསཾཝརོཏི ཨིདྷ སཱིཏཱདཱིཧི ཕུཊྛསྶ ཨཔྤམཛྫནཾ ཁམནཾ དཊྛབྦཾ. པཧཱནསཾཝརོཏི ཝཱིརིཡསཾཝརོ.

ཨསྶཱདདསྶནནྟི ཨསྶཱདདིཊྛི. ཕལཊྛེན པཙྩུཔཊྛཱནེན ཨསམྨཱཔཊིཔཏྟིཔཙྩུཔཊྛཱནོམོཧོ, སམྨཱཔཊིཔཏྟིཔཊིཔཀྑབྷཱཝགྒཧཎཱཀཱརོ ཝཱ. སབྦསྶ ལོབྷསྶ ཨབྷིཛ྄ཛྷཱབྷཱཝེ སཏིཔི ཝིསེསཡུཏྟཱཡ ཨབྷིཛ྄ཛྷཱཡ ཀམྨཔཐཔྤཏྟཱཡ ཨིདྷུཔྤཛྫམཱནཱཡ ལཀྑཎཱདིཾ དསྶེཏུཾ ‘‘སཱ པརསམྤཏྟཱིན’’ནྟིཨཱདིམཱཧ. ཨཏྟནོ པརིཎཱམནསྶ པུརེཙཱརིཀཱ ཏཎྷཱབྷིརཏི ཨབྷིརཏི.

ཨནུཔཔརིཀྑཱ ¶ མོཧོ. མོཧཝསེན ཧི དིཊྛིཝསེན ཝཱ ཨཝཏྠུསྨིཾ སཱནུནཡོ ཨདྷིམོཀྑོ ཨུཔྤཛྫཏཱིཏི. ཨསཏིཡཙིཏྟེཏི ཨཧིརིཀཱདཱིཧི ཨཱརཀྑརཧིཏཙིཏྟེ. སཏིརཧིཏཏྟཱ སཏིཔཊིཔཀྑཏྟཱ ཙཱཏི ཨེཏེན སཏིརཧིཏཱ སཏིཔཊིཔཀྑཱ ཙ ཨཀུསལཱ ཁནྡྷཱ ཨེཝ མིཙྪཱསཏཱིཏི དསྶེཏི. ཏེ པན ཨུཔནཱཧཱདིཔྤཝཏྟིཡཾ ཙིརཀཏཱདིསལླཀྑཎེ པཊུསཉྙཱསམྤཡུཏྟཱ དཊྛབྦཱ. སདརཐཱདིབྷཱཝོ ཨཝིསེསེན ཀིལེསསམྤཡོགཏོ ཝུཏྟོ ལཧུཏཱདིཨེཀནྟཔཊིཔཀྑཱནཾ ཐིནམིདྡྷཱདཱིནཾ ཀེསཉྩི ཨིདྷ ཨབྷཱཝཱ. ཨཝཱུཔསམོཏི ཨསནྣིསིནྣསབྦྷཱཝམཱཧ. ཨནཝཊྛཱནརསནྟི ཙལནཀིཙྩཾ. ཙེཏསོ ཨཝཱུཔསམེཏི ནིཔྥཱདེཏབྦེ པཡོཛནེ བྷུམྨཾ, ཨཝཱུཔསམཔཙྩཡབྷཱུཏཾ ཨཱརམྨཎཾ ཝཱ ‘‘ཨཝཱུཔསམོ’’ཏི ཝུཏྟཾ.

དྷམྨུདྡེསཝཱརཀཐཱཝཎྞནཱ ནིཊྛིཏཱ.

ནིདྡེསཝཱརཀཐཱཝཎྞནཱ

༣༧༧. སཧཛཱཏདྷམྨེསུ ¶ ཨཀམྤནཾ ན ཀོསཛྫེསུ ཨཀམྤནཾ ཝིཡ ཏཔྤཊིཔཀྑབྷཱཝཏོ དཊྛབྦཾ, ཏཾཏཾཔཱཔཀིརིཡཱཡ ཨུསྶཧནཝསེན པན ཐིརཏཱ ཏཏྠ ཨཀམྤནཾ.

༣༨༡. དིཊྛིཡཱ ཝིརཱུཔཾ ཕནྡིཏནྟི ཏཐཱ ཏཐཱ སསྶཏཱདིཝསེན པཝཏྟཱ དིཊྛི ཨེཝ ཝུཙྩཏི. ཏརནྟཱིཏི ཏིཏྠེ ཝིཡ པིལཝནྟི. ཝིཔརིཡེསཏོཏི ཝཏྠུསྶ ཝིཔརཱིཏཏོ.

༣༩༠. སབྷཱཝཔཊིཙྪཱདནཝསེན པཀཏིཨཏྟཱདིཨསནྟགཧཎསྶ ཨནིཙྩཱདཱིནཾ ནིཙྩཱདིཝིསམགཧཎསྶ ཙ སཉྙཱདིཝིཔརིཡེསསྶ ནིསྶཡཏྟཱ ‘‘ཨསནྟཾ ཨསམཉྩ བུཛ྄ཛྷཏཱི’’ཏི ཝུཏྟཾ.

དུཏིཡཙིཏྟཝཎྞནཱ

༣༩༩. ཀིཉྩཱཔི…པེ… པརཱམསནྟསྶ ཨུཔྤཛྫཏཱིཏི པུརིམཙིཏྟེན ཨཝིསེསཾ དསྶེཏི. ཨནུསྶཱཧནཱཝསཱིདནབྷཱཝེན སཾཧཏབྷཱཝོ ཐིནཾ.

ཏཏིཡཙིཏྟཝཎྞནཱ

༤༠༠. ཨིདྷ མཱནེན སདྡྷིཾ པཉྩ ཨཔཎྞཀངྒཱནཱིཏི ཨཝིརཛ྄ཛྷནཀངྒཱནི ཨུཔྤཏྟིཨརཧངྒཱནི ཧོནྟཱིཏི ཨཏྠོ དཊྛབྦོ. མཱནསྶ ཨནིཡཏཏྟཱ ན ནིཡཏཡེཝཱཔནཀཱཏི ¶ . པཊྛཱནེ ཧི ‘‘སཾཡོཛནཾ དྷམྨཾ པཊིཙྩ སཾཡོཛནོ དྷམྨོ ཨུཔྤཛྫཏི ཧེཏུཔཙྩཡཱ’’ཏི (པཊྛཱ. ༣.༤.༡) ཨེཏྠ ‘‘ཙཏུཀྑཏྟུཾ ཀཱམརཱགེན ཏིཀྑཏྟུཾ པཊིགྷེན ཙ མཱནོ ཝིཙིཀིཙྪཱ བྷཝརཱགོ ཏཡོཔེཏེ སཀདཱགཱམིནོ སཾཡོཛནཱནཾ སཾཡོཛནེཧི དསཝིདྷཱ ཡོཛནཱ’’ཏི དསྶིཏཱཡ དསཝིདྷཱཡ ཡོཛནཱཡ ‘‘ཀཱམརཱགསཾཡོཛནཾ པཊིཙྩ མཱནསཾཡོཛནཾ ཨཝིཛྫཱསཾཡོཛན’’ནྟི ཝཏྭཱ ‘‘ཀཱམརཱགསཾཡོཛནཾ པཊིཙྩ ཨཝིཛྫཱསཾཡོཛན’’ནྟི ‘‘མཱནསཾཡོཛནཾ པཊིཙྩ བྷཝརཱགསཾཡོཛནཾ ཨཝིཛྫཱསཾཡོཛན’’ནྟི ཙ ཝཏྭཱ ‘‘བྷཝརཱགསཾཡོཛནཾ པཊིཙྩ ཨཝིཛྫཱསཾཡོཛན’’ནྟི ཝུཏྟཱཧི ཡོཛནཱཧི མཱནསྶ ཨནིཡཏབྷཱཝོ པཀཱསིཏོ, ཏཐཱ ཀིལེསདུཀེཔི. ཨིདྷ ཙ ཝཀྑཏི ‘‘དསཝིདྷཱ སཾཡོཛནཱནཾ ཡོཛནཱ, ཏཐཱ དསཝིདྷཱ ཀིལེསཱན’’ནྟི ཙ. ཨུནྣམནཝསེནེཝ སམྤགྒཧརསོ ¶ , ན ཝཱིརིཡཾ ཝིཡ ཏཾཏཾཀིཙྩསཱདྷནེ ཨབྦྷུསྶཱཧནཝསེན. ཨོམཱནསྶཔི ཨཏྟཱནཾ ཨཝཾཀཏྭཱ གཧཎཾ སམྤགྒཧོཏི དཊྛབྦོ.

ཙཏུཏྠཙིཏྟཝཎྞནཱ

༤༠༢. པརིཧརཎཏྠཾ ཝིཀྑིཏྟཱ ཧུཏྭཱ ཨུསྶཱཧཾ ཛནེནྟཱ ‘‘པརིཧརཎཏྠཾ སཨུསྶཱཧཱ’’ཏི ཝུཏྟཱ, ཏེསཾ.

ནཝམཙིཏྟཝཎྞནཱ

༤༡༣. ཝིསཔྤནཨནིཊྛརཱུཔསམུཊྛཱནཝསེན ཨཏྟནོ པཝཏྟིཨཱཀཱརཝསེན ཙ ཝིསཔྤནརསོ. དོསོ ཨུཔཡོགཕལེསུ ཨནིཊྛཏྟཱ ཝིསསཾསཊྛཔཱུཏིམུཏྟཾ ཝིཡ དཊྛབྦོ. ཨནབྷིརཏིརསཱཏི ཨེཝཾཔཀཱརེསུ པཊིཀྑེཔེན རསཝཙནེསུ ཏཾཏཾཔཊིཔཀྑཀིཙྩགཧཎཾ དཊྛབྦཾ. ཀཊུཀཱཀཱརགཏི ཀཊུཀཉྩུཀཏཱ, ཨཏྟསམྤཏྟི ཨཱཝཱསཱདི, པརཱཡཏྟཏཱཡ དཱསབྱཾ ཝིཡ དཊྛབྦཾ. ཡཐཱ ཧི དཱསབྱེ སཏི དཱསོ པརཱཡཏྟོ ཧོཏི, ཨེཝཾ ཀུཀྐུཙྩེ སཏི ཏཾསམངྒཱི. ན ཧི སོ ཨཏྟནོ དྷམྨཏཱཡ པཝཏྟིཏུཾ སཀྐོཏི ཀུསལེཏི. ཨཐ ཝཱ ཀཏཱཀཏཱཀུསལཀུསལཱནུསོཙནེ ཨཱཡཏྟཏཱཡ ཏདུབྷཡཝསེན ཀུཀྐུཙྩེན ཏཾསམངྒཱི ཧོཏཱིཏི དཱསབྱཾ ཝིཡ ཏཾ ཧོཏི.

༤༡༨. ཝིརུདྡྷཱཀཱརོཏི ¶ ཝིརུདྡྷསྶ པུགྒལསྶ, ཙིཏྟསྶ ཝཱ ཨཱཀཱརོ ཝིརུདྡྷབྷཱཝོ. ཏེན ཝིརུཛ྄ཛྷནཾ ཝིརོདྷོཏི དསྶེཏི. ཝཙནནྟི ཨེཏཾ ནིདསྶནམཏྟཾ དཊྛབྦཾ. སབྦམེཝ ཧི ཀིཙྩཾ ཨེཏེན ཀརིཡམཱནཾ སུརོཔིཏཾ སུཛནིཏཾ ན ཧོཏཱིཏི. རོཔསདྡཝཙནཏྠམེཝ ཀེཙི ཝཎྞེནྟི. ཏཾ ཨཔྤམཱཎནྟི ཀོདྷསྶ ཏཐཱཔཝཏྟནསབྷཱཝཱབྷཱཝཱ ཨཉྙེན ཀེནཙི ཀཱརཎེན པརིཔུཎྞཏཱ སིཡཱཏི སནྡྷཱཡ ཝུཏྟཾ.

ཨེཀཱདསམཙིཏྟཝཎྞནཱ

༤༢༢. ཝིགཏཱ ཙིཀིཙྪཱཏི ཙིཀིཙྪིཏུཾ དུཀྐརཏཱཡ ཝུཏྟཾ, ན སབྦཐཱ ཙིཀིཙྪཱབྷཱཝཱ ཝིཙིཀིཙྪཱཡཱཏི ཏདཏྠཾ དསྶེཏི.

༤༢༤. ནིཙྪཡཱབྷཱཝཱ ¶ ཨསཎྛཧནཏོ ཙེཏསོ པཝཏྟིཔཙྩཡམཏྟཏཱཡ ‘‘པཝཏྟིཊྛིཏིམཏྟ’’ནྟི ཝུཏྟཾ.

༤༢༥. ཨེཀཾ ཨཱཀཱརཾ གནྟུཾ ཨསམཏྠཏཱཡ ཨཏྟནོ ཨཱམུཁཾ སཔྤནཏོ ཨོསཀྐཏི.

དྭཱདསམཙིཏྟཝཎྞནཱ

༤༢༩. ཨུདྡྷཙྩཾ ཨཏྟནོ གཧིཏཱཀཱརེ ཨེཝ ཋཏྭཱ བྷམཏཱིཏི ཨེཀཱརམྨཎསྨིཾཡེཝ ཝིཔྥནྡནཾ ཧོཏི. ཝིཙིཀིཙྪཱ པན ཡདིཔི རཱུཔཱདཱིསུ ཨེཀསྨིཉྙེཝཱརམྨཎེ ཨུཔྤཛྫཏི, ཏཐཱཔི ‘‘ཨེཝཾ ནུ ཁོ, ཨིདཾ ནུ ཁོ’’ཏི ཨུཔྤཛྫམཱནཱ ‘‘ནནུ ཁོ, ཨཉྙཾ ནུ ཁོ’’ཏི ཨཉྙཾ གཧེཏབྦཱཀཱརཾ ཨཔེཀྑཏཱིཏི ནཱནཱརམྨཎེ ཙལནཾ ཧོཏི.

‘‘ཨེཝཾསམྤདམིདཾ ཝེདིཏབྦ’’ནྟི ཨེཏྟཱཝཏཱ ཨིམསྨིཾ ཙིཏྟདྭཡེ ཝུཏྟཔཀིཎྞཀཾ དསྶེཏྭཱ དྭཱདསསུ དསྶེཏུཾ ‘‘སབྦེསུཔཱི’’ཏིཨཱདིམཱཧ. ཀུསལེསུཔི ཨཱརམྨཎཱདྷིཔཏིཾ ཨནུདྡྷརིཏྭཱ སཧཛཱཏཱདྷིཔཏིནོ ཨེཝ ཨུདྡྷཊཏྟཱ ཨིདྷཱཔི སོ ཨེཝ ཨུདྡྷརིཏབྦོ སིཡཱཏི ‘‘སཧཛཱཏཱདྷིཔཏི ལབྦྷམཱནོཔི ན ཨུདྡྷཊོ’’ཏི ཝུཏྟཾ ནཱརམྨཎཱདྷིཔཏིནོ ཨལབྦྷམཱནཏྟཱ. སོཔི ཧི ཨཊྛསུ ལོབྷསཧགཏེསུ ལབྦྷཏཱིཏི. སེསོཔཱིཏི ཝཱིམཾསཏོ ཨཉྙོཔི སཧཛཱཏཱདྷིཔཏི ནཏྠི, ཡོ ཨུདྡྷརིཏབྦོ སིཡཱ. ཨཱརམྨཎཱདྷིཔཏིམྷི ཝཏྟབྦམེཝ ནཏྠི. ཀཉྩི དྷམྨནྟི ཚནྡཱདཱིསུ ཨེཀམྤི སཧཛཱཏཾ. ཀུསལཏྟིཀེ ཏཱཝ པཊིཙྩཝཱརཱདཱིསུ ‘‘ན ཧེཏུཔཙྩཡཱ ཨདྷིཔཏིཔཙྩཡཱ’’ཏི ཨེཀསྶཔི པཉྷསྶ ¶ ཨནུདྡྷཊཏྟཱ པཊྛཱནེ པཊིསིདྡྷཏཱ ཝེདིཏབྦཱ. ཨཉྙཐཱ ཧི ‘‘ཨཀུསལཾ དྷམྨཾ པཊིཙྩ ཨཀུསལོ དྷམྨོ ཨུཔྤཛྫཏི ན ཧེཏུཔཙྩཡཱ ཨདྷིཔཏིཔཙྩཡཱ’’ཏི (པཊྛཱ. ༡.༡.༨༦) ཨེཏསྶ ཝསེན ‘‘ཨེཀ’’ནྟི ཝཏྟབྦཾ སིཡཱ.

དསྶནེན པཧཱཏབྦཱབྷཱཝཏོཏི དསྶནེན པཧཱཏབྦསྶ ཨབྷཱཝཏོ, དསྶནེན པཧཱཏབྦེསུ ཝཱ ཨབྷཱཝཏོ. ཨེཏེན པཊིསནྡྷིཨནཱཀཌྜྷནཏོ དསྶནེན པཧཱཏབྦེསུ ཨནཱགམནནྟི ཏཏྠ ཨནཱགམནེན པཊིསནྡྷིཨནཱཀཌྜྷནཾ སཱདྷེཏི. ཨནཱཀཌྜྷནཏོ ཨནཱགམནཾ པན སཱདྷེཏུཾ ‘‘ཏེསུ ཧཱི’’ཏིཨཱདིམཱཧ. ཨེཏྠེཝ པཊིསནྡྷིདཱནཾ བྷཝེཡྻ. ཏཐཱ ཙ སཏི དསྶནེན པཧཱཏབྦཾ སིཡཱ ཨཔཱཡགམནཱིཡསྶ དསྶནེན ¶ པཧཱཏབྦབྷཱཝཏོ. ན ཙེཏཾ དསྶནེན པཧཱཏབྦཾ སིཡཱ, ཏསྨཱ དསྶནེན པཧཱཏབྦཝིབྷངྒེ ནཱགཏནྟི ཨདྷིཔྤཱཡོ.

ཀཐཾ པནེཏཾ ཉཱཡཏི ‘‘པཊིསནྡྷིཨནཱཀཌྜྷནཏོ དསྶནེན པཧཱཏབྦེསུ ཨནཱགམན’’ནྟི? དསྶནེན པཧཱཏབྦཱནཉྙེཝ ནཱནཱཀྑཎིཀཀམྨཔཙྩཡབྷཱཝསྶ ཝུཏྟཏྟཱ. དུཝིདྷཱ ཧི ཨཀུསལཱ དསྶནེན པཧཱཏབྦཱ བྷཱཝནཱཡ པཧཱཏབྦཱཏི. ཏཏྠ བྷཱཝནཱཡ པཧཱཏབྦཙེཏནཱནཾ ནཱནཱཀྑཎིཀཀམྨཔཙྩཡབྷཱཝོ ན ཝུཏྟོ, ཨིཏརཱསཉྙེཝ ཝུཏྟོ. ‘‘བྷཱཝནཱཡ པཧཱཏབྦོ དྷམྨོ ནེཝ དསྶནེན ན བྷཱཝནཱཡ པཧཱཏབྦསྶ དྷམྨསྶ ཀམྨཔཙྩཡེན པཙྩཡོ’’ཏི ཨེཏྠ ཧི སཧཛཱཏམེཝ ཝིབྷཏྟཾ, ན ནཱནཱཀྑཎིཀནྟི. ཏཐཱ པཙྩནཱིཡེཔི ‘‘བྷཱཝནཱཡ པཧཱཏབྦོ དྷམྨོ ནེཝ དསྶནེན ན བྷཱཝནཱཡ པཧཱཏབྦསྶ དྷམྨསྶ ཨཱརམྨཎཔཙྩཡེན པཙྩཡོ…པེ… སཧཛཱཏཔཙྩཡེན…པེ… ཨུཔནིསྶཡཔཙྩཡེན…པེ…. པཙྪཱཛཱཏཔཙྩཡེན པཙྩཡོ’’ཏི ཨེཏྟཀམེཝ ཝུཏྟཾ, ན ཝུཏྟཾ ‘‘ཀམྨཔཙྩཡེན པཙྩཡོ’’ཏི. ཨིཏརཏྠ ཙ ཝུཏྟཾ. ཨུདྡྷཙྩསཧགཏཱ ཙ ཙེཏནཱ བྷཱཝནཱཡ པཧཱཏབྦེསུ ཨེཝ ཨཱགཏཱཏི ནཱནཱཀྑཎིཀཀམྨཔཙྩཡོ ན སིཡཱཏི. ཡདི སིཡཱ, བྷཱཝནཱཡ པཧཱཏབྦཙེཏནཱཡ ཙ ནཱནཱཀྑཎིཀཀམྨཔཙྩཡབྷཱཝོ ཝུཙྩེཡྻ, ན ཏུ ཝུཏྟོ. ཏསྨཱ ཨུདྡྷཙྩསཧགཏཱ ནཱནཱཀྑཎིཀཀམྨཔཙྩཡབྷཱཝེ སཏི དསྶནེན པཧཱཏབྦེསུ ཝཏྟབྦཱ སིཡཱ, ཏདབྷཱཝཱ ན ཝུཏྟཱཏི. པཊིསནྡྷིཨནཱཀཌྜྷནཏོ ཏཏྠ ཨནཱགཏཱཏི ཨཡམེཏྠཱདྷིཔྤཱཡོ. ནཱནཱཀྑཎིཀཀམྨཔཙྩཡཱཝཙནེན པན བྷཱཝནཱཡ པཧཱཏབྦཱནཾ པཝཏྟིཝིཔཱཀཏཱ པཊིཀྑིཏྟཱ. པཝཏྟིཝིཔཱཀསྶཔི ཧི ནཱནཱཀྑཎིཀཀམྨཔཙྩཡཏཱ ན སཀྐཱ ནིཝཱརེཏུཾ. ཝུཏྟཉྩ ¶ ‘‘སུཁཱཡ ཝེདནཱཡ སམྤཡུཏྟོ དྷམྨོ དུཀྑཱཡ ཝེདནཱཡ སམྤཡུཏྟསྶ དྷམྨསྶ ཀམྨཔཙྩཡེན པཙྩཡོ, ནཱནཱཀྑཎིཀཱ’’ཏིཨཱདི (པཊྛཱ. ༡.༣.༥༦-༥༧). ཡདི བྷཱཝནཱཡ པཧཱཏབྦཱནཾ ཝིཔཱཀདཱནཾ ནཏྠི, ཀཐཾ ཏེ ཝིཔཱཀདྷམྨདྷམྨཱ ཧོནྟཱིཏི? ཨབྷིཉྙཱཙིཏྟཱདཱིནཾ ཝིཡ ཝིཔཱཀཱརཧསབྷཱཝཏྟཱ. ཡཾ པན ཝུཏྟཾ ‘‘ཡསྨིཾ སམཡེ ཨཀུསལཾ ཙིཏྟཾ ཨུཔྤནྣཾ ཧོཏི ཨུཔེཀྑཱསཧགཏཾ ཨུདྡྷཙྩསམྤཡུཏྟཾ…པེ… ཨཝིཀྑེཔོ ཧོཏི, ཨིམེསུ དྷམྨེསུ ཉཱཎཾ དྷམྨཔཊིསམྦྷིདཱ, ཏེསཾ ཝིཔཱཀེ ཉཱཎཾ ཨཏྠཔཊིསམྦྷིདཱ’’ཏི (ཝིབྷ. ༧༣༠-༧༣༡) ཨིདམྤི ཏེསཾ ཝིཔཱཀཱརཧཏཉྙེཝ སནྡྷཱཡ ཝུཏྟཾ སིཡཱ. ཨིདཾ པན ཋཱནཾ སུཊྛུ ཝིཙཱརེཏབྦཾ. ཨཏྠི ཧི ཨེཏྠ ཝཙནོཀཱསོ. ན ཧི ཝིཔཱཀེཏི ཝཙནཾ ཝིཔཱཀདྷམྨཝཙནཾ ཝིཡ ཝིཔཱཀཱརཧཏཾ ཝདཏཱིཏི.

ཨཀུསལཔདཝཎྞནཱ ནིཊྛིཏཱ.

ཨབྱཱཀཏཔདཾ

ཨཧེཏུཀཀུསལཝིཔཱཀཝཎྞནཱ

༤༣༡. ཏེསུ ¶ ཝིཔཱཀཱབྱཱཀཏནྟིཨཱདཱིནཾ ‘‘བྷཱཛེཏྭཱ དསྶེཏུཾ ཀཏམེ དྷམྨཱ ཨབྱཱཀཏཱཏིཨཱདི ཨཱརདྡྷ’’ནྟི ཨེཏེན སམྦནྡྷོ. ཏསྶཱཔཱིཏི ཨེཏསྶ ‘‘ཨུཔྤཏྟིཾ དཱིཔེཏུཾ ཀཱམཱ…པེ… ཨཱདི ཝུཏྟ’’ནྟི ཨེཏེན སམྦནྡྷོ. ཨུཔཙིཏཏྟཱཏི ཡཐཱ ཨཉྙསྶ ཝིཔཱཀཾ པཊིབཱཧིཏྭཱ ཨཏྟནོ ཝིཔཱཀཱབྷིམུཁཾ ཧོཏི ཏཐཱ ཝཌྜྷིཏཏྟཱ. རཱུཔཱདཱིནཾ པཙྩཡཱནཾ ཨཉྙཝིཉྙཱཎསཱདྷཱརཎཏྟཱ ཨསཱདྷཱརཎེན ཝཏྠུནཱ ཙཀྑུཝིཉྙཱཎཾ སོཏཝིཉྙཱཎནྟི ནཱམཾ ཨུདྡྷཊཾ. ཙཀྑཱདཱིནཾ ཏིཀྑམནྡབྷཱཝེ ཝིཉྙཱཎཱནཾ ཏིཀྑམནྡབྷཱཝཱ ཝིསེསཔཙྩཡཏྟཱ ཙ.

ཙཀྑུསནྣིསྶིཏཉྩ ཏཾ རཱུཔཝིཛཱནནཉྩཱཏི ཙཀྑུསནྣིསྶིཏརཱུཔཝིཛཱནནཾ. ཨེཝཾལཀྑཎཾ ཙཀྑུཝིཉྙཱཎཾ. ཏཏྠ ཙཀྑུསནྣིསྶིཏཝཙནེན རཱུཔཱརམྨཎཾ ཨཉྙཝིཉྙཱཎཾ པཊིཀྑིཔཏི. རཱུཔཝིཛཱནནཝཙནེན ཙཀྑུནིསྶཡེ ཕསྶཱདཡོ ནིཝཏྟེཏི. ཙཀྑུརཱུཔཝཙནེཧི ཙ ནིསྶཡཏོ ཨཱརམྨཎཏོ ཙ ཝིཛཱནནཾ ཝིབྷཱཝེཏི. རཱུཔམཏྟསྶ ཨཱརམྨཎསྶ གཧཎཾ ཀིཙྩམེཏསྶཱཏི རཱུཔམཏྟཱརམྨཎརསཾ. ཛྷཱནངྒཝསེནཱཏི ཨིདཾ དྭིཔཉྩཝིཉྙཱཎཝཛྫེསུ ཝིཛྫམཱནཱནཾ ཨུཔེཀྑཱསུཁདུཀྑེཀགྒཏཱནཾ ཛྷཱནངྒིཀཏྟཱ ཨིདྷཱཔི ཏཾསདིསཱནཾ ཏདུཔཙཱརཾ ¶ ཀཏྭཱ ཝུཏྟཾ. ན ཧི ཛྷཱནཔཙྩཡཏྟཱབྷཱཝེ ཛྷཱནངྒཏཱ ཨཏྠི. ཝུཏྟཉྷི ‘‘ཛྷཱནངྒཱནི ཛྷཱནསམྤཡུཏྟ…པེ… རཱུཔཱནཾ ཛྷཱནཔཙྩཡེན པཙྩཡོ’’ཏི (པཊྛཱ. ༡.༣.༡༡༢). ཨེཏེསཉྩ ཛྷཱནཔཙྩཡབྷཱཝོ པཊིཀྑིཏྟོ. ཡཐཱཧ ‘‘ཨབྱཱཀཏཾ དྷམྨཾ པཊིཙྩ ཨབྱཱཀཏོ དྷམྨོ ཨུཔྤཛྫཏི ན ཛྷཱནཔཙྩཡཱ. པཉྩཝིཉྙཱཎསཧགཏཾ ཨེཀཾ ཁནྡྷཾ པཊིཙྩ ཏཡོ ཁནྡྷཱ’’ཏིཨཱདི (པཊྛཱ. ༡.༡.༩༨). ཛྷཱནཔཙྩཡཏྟཱབྷཱཝེཔི ཝེདནཱཙིཏྟཊྛིཏཱིནཾ ཨུཔེཀྑཱདིབྷཱཝཏོ ཏཐཱབྷཱུཏཱནཾ ཝཙནེ ཨཉྙཊྛཱནཱབྷཱཝཏོ ཙ དུཏིཡརཱསིནིདྡེསོ.

༤༣༦. ཝཏྠུཔཎྜརཏྟཱཏི སཡཾ ཀཎྷདྷམྨཱནཾ ཨཔྤཊིཔཀྑཏྟཱ སབྷཱཝཔརིསུདྡྷཱནཾ པསཱདཧདཡཝཏྠུནིསྶཡཱནཾ ཝསེན པཎྜརསབྷཱཝཾ ཛཱཏནྟི ཨདྷིཔྤཱཡོ. ཨཡཾ པན ནཡོ ཙཏུཝོཀཱརེ ན ལབྦྷཏཱིཏི ཏཏྠ བྷཝངྒསྶ ཏཏོ ནིཀྑནྟཱཀུསལསྶ ཙ པཎྜརཏཱ ན སིཡཱ, ཏསྨཱ ཏཏྠ པཎྜརཏཱཡ ཀཱརཎཾ ཝཏྟབྦཾ. སབྷཱཝོ ཝཱཡཾ ཙིཏྟསྶ པཎྜརཏཱཏི.

༤༣༩. ཨིདམྤཱིཏི ¶ པི-སདྡོ ཋིཏིམཏྟསཧིཏཾ པུབྦེ ཝུཏྟཾ ཝིཙིཀིཙྪཱསཧགཏཾ ཨཔེཀྑིཏྭཱ ཝུཏྟོ. པཀཏིཡཱཏི ཨནཏིཀྐམནེན. སོཔི ཝིསེསོ. ཀཱཡཔྤསཱདཾ གྷཊྚེཏྭཱ པསཱདཔཙྩཡེསུ མཧཱབྷཱུཏེསུ པཊིཧཉྙཏཱིཏི ཨཱཔཱཐཾ གནྟྭཱ པཊིཧཉྙཏཱིཏི ཨཏྠོ. ཡཐཱ ཙ ‘‘རཱུཔཾ ཨཱརབྦྷ ཨུཔྤནྣ’’ནྟི ཝུཏྟེ ན ཨཱརམྨཎུཔྤཱདཱནཾ པུབྦཱཔརཀཱལཏཱ ཧོཏི, ཨེཝམིདྷཱཔི གྷཊྚནཔཊིཧནནེསུ དཊྛབྦཾ. ཨུཔམཱཔི ཨུབྷཡགྷཊྚནདསྶནཏྠཾ ཝུཏྟཱ, ན ནིསྶིཏནིསྶཡགྷཊྚནཱནཾ པུབྦཱཔརཏཱདསྶནཏྠཾ. ཨེཏྠ ཙ བཧིདྡྷཱཏི ཨེཏཾ ནིདསྶནམཏྟཾ. ཨཛ྄ཛྷཏྟམྤི ཧི ཨཱརམྨཎཾ ཧོཏཱིཏི. ཝིཉྙཱཎདྷཱཏུནིསྶཡབྷཱུཏེཧི ཝཱ ཨཉྙཾ ‘‘བཧིདྡྷཱ’’ཏི ཝུཏྟཾ. པཊིགྷཊྚནཱནིགྷཾསོ བལཝཱ ཧོཏི, ཏཏོ ཨེཝ ཨིཊྛཱནིཊྛཕོཊྛབྦསམཱཡོགེ སུཁདུཀྑཔཙྩཡཱ དྷཱཏུཨནུགྒཧདྷཱཏུཀྑོབྷཱ ཙིརཾ ཨནུཝཏྟནྟི.

༤༥༥. ཨཉྙེསཾ ཙིཏྟཱནཾ སབྷཱཝསུཉྙཏསབྦྷཱཝཱ མནོདྷཱཏུབྷཱཝོ ཨཱཔཛྫཏཱིཏི ཙེ? ན, ཝིསེསསབྦྷཱཝཱ. ཙཀྑུཝིཉྙཱཎཱདཱིནཉྷི ཙཀྑཱདིནིསྶིཏཏཱ ཙཀྑཱདཱིནཾ སཝིསཡེསུ དསྶནཱདིཔྤཝཏྟིབྷཱཝཏཱ ཙ ཝིསེསོ. མནོཝིཉྙཱཎསྶ པན ཨནཉྙནིསྶཡམནོཔུབྦངྒམཏཱཡ ཨཉྙནིསྶཡཝིཉྙཱཎསྶ ཨནནྟརཔཙྩཡཏྟཱབྷཱཝེན མནོདྭཱརནིགྒམནམུཁབྷཱཝཱབྷཱཝཏོ ཙ སཱཏིསཡཝིཛཱནནཀིཙྩཏཱ ཝིསེསོ. ཏབྦིསེསཝིརཧཱ མནོམཏྟཱ དྷཱཏུ ¶ མནོདྷཱཏཱུཏི ཏིཝིདྷཱ མནོདྷཱཏུ ཨེཝ ཝུཙྩཏི, ན ཝིསེསམནོ. ཏསྨཱ ཨེཏྠ མནོ ཨེཝ དྷཱཏུ མནོདྷཱཏཱུཏི ཨེཝ-སདྡོ མཏྟསདྡཏྠོ དཊྛབྦོ. ཝིསེསནིཝཏྟནཏྠོ ཧི སོ ཝིཉྙཱཎསྶཱཏི. མནོདྭཱརནིགྒམནཔཝེསམུཁབྷཱཝཏོ པན མནོདྷཱཏུཡཱ ཝིཛཱནནཝིསེསཝིརཧོ དཊྛབྦོ, ཏཏོ ཨེཝ མནོཝིཉྙཱཎནྟིཔི ན ཝུཙྩཏི. ན ཧི ཏཾ ཝིཉྙཱཎཾ མནཏོ པཝཏྟཾ མནསོ པཙྩཡོ, ནཱཔི མནསོ པཙྩཡབྷཱུཏཾ མནཏོ པཝཏྟཾ, དསྶནཱདཱིནཾ པན པཙྩཡོ, ཏེཧི ཙ པཝཏྟཾ ཏེསཾ པུརེཙརཾ ཨནུཙརཉྩཱཏི. སམྨཱསངྐཔྤོཏི ཨཝཙནཾ མཧཱཝིཔཱཀཱནཾ ཝིཡ ཛནཀསདིསཏྟཱབྷཱཝཏོ. ཏཏྠ ཧི ཏིཧེཏུཀཏོ དུཧེཏུཀམྤི ཨུཔྤཛྫམཱནཾ སམྨཱསངྐཔྤཏཱདཱིཧི སདིསཾ སཧེཏུཀཏཱཡཱཏི. པཉྩཝིཉྙཱཎསོཏེཏི ཨེཏྠ ཡཐཱ པགུཎཾ གནྠཾ སཛ྄ཛྷཱཡནྟོ སཛ྄ཛྷཱཡསོཏེ པཏིཏཾ ཀཉྩི ཀཉྩི ཝཱཙནཱམགྒཾ ན སལླཀྑེཏི, ཨེཝཾ ཏཐཱགཏསྶ ཨསལླཀྑཎཱ ནཱམ ནཏྠི, ན ཙ པཉྩཝིཉྙཱཎསོཏེ ཛྷཱནངྒཱབྷཱཝོ ཨིདྷ ཨཝཙནསྶ ཀཱརཎཾ. ཡདི ཏདནནྟརཾ ནིདྡེསོ ཏཾསོཏཔཏིཏཏཱ, ཨིཏོ པརེསཾ དྭིནྣཾ མནོཝིཉྙཱཎདྷཱཏཱུནཾ ཏཾསོཏཔཏིཏཏཱ ན སིཡཱ. ཏསྨཱ པཉྩཝིཉྙཱཎཱནཾ ཝིཡ ཨཧེཏུཀཏཱཡ མགྒཔཙྩཡཝིརཧཱ ཙ ཝིཛྫམཱནེསུཔི ཝིཏཀྐཝིཙཱརེསུ ཛྷཱནངྒདྷམྨཱནཾ དུབྦལཏྟཱ པཉྩཝིཉྙཱཎེསུ ཝིཡ ཨགཎནུཔགབྷཱཝཱ ཙ པཉྩཝིཉྙཱཎསོཏཔཏིཏཏཱ. ཏཏོ ཨེཝ ཧི ཨཧེཏུཀཀིརིཡཏྟཡེཔི ཛྷཱནངྒཱནི བལཱནི ཙ སངྒཧཝཱརེ ¶ ན ཨུདྡྷཊཱནི, ཛྷཱནཔཙྩཡཀིཙྩམཏྟཏོ པན པཊྛཱནེ དུབྦལཱནཾ ཨེཏྠ ཝིཏཀྐཱདཱིནཾ ཛྷཱནཔཙྩཡཏཱ ཝུཏྟཱ.

༤༦༩. སམཱནཝཏྠུཀཾ ཨནནྟརཔཙྩཡཾ ལབྷིཏྭཱ ཨུཔྤཛྫམཱནཾ སནྟཱིརཎཾ མནོདྷཱཏུཏོ བལཝཏརཾ ཧོཏཱིཏི ཏཾ ཡཐཱརམྨཎཾ ཨཱརམྨཎརསཾ ཨནུབྷཝནྟཾ ཨིཊྛེ སོམནསྶསཧགཏཾ ཧོཏི, ཨིཊྛམཛ྄ཛྷཏྟེ ཨུཔེཀྑཱསཧགཏཾ སཱཏིསཡཱནུབྷཝཏྟཱ, ཏསྨཱ ‘‘ཨཡཉྷི ཨིཊྛཱརམྨཎསྨིཾ ཡེཝཱ’’ཏིཨཱདི ཝུཏྟཾ. ཝོཊྛབྦནཾ པན སཏིཔི བལཝབྷཱཝེ ཝིཔཱཀཔྤཝཏྟིཾ ནིཝཏྟེཏྭཱ ཝིསདིསཾ མནཾ ཀརོནྟཾ མནསིཀཱརཀིཙྩནྟརཡོགཏོ ཝིཔཱཀོ ཝིཡ ཨནུབྷཝནམེཝ ན ཧོཏཱིཏི སབྦཏྠ ཨུཔེཀྑཱསཧགཏམེཝ ཧོཏི, ཏཐཱ པཉྩདྭཱརཱཝཛྫནཾ མནོདྭཱརཱཝཛྫནཉྩ ཀིཙྩཝསེན ཨཔུབྦཏྟཱ.

ཨཧེཏུཀཀུསལཝིཔཱཀཝཎྞནཱ ནིཊྛིཏཱ.

ཨཊྛམཧཱཝིཔཱཀཙིཏྟཝཎྞནཱ

༤༩༨. ཨལོབྷོ ¶ ཨབྱཱཀཏམཱུལནྟིཨཱདཱིསུ ཀུསལཔཀྑེ ཏཱཝ ཨལོབྷཱདོསཱནཾ ནིདྡེསེསུ ‘‘ཡོ ཏསྨིཾ སམཡེ ཨལོབྷོ ཨལུབྦྷནཱ…པེ… ཨལོབྷོ ཀུསལམཱུལ’’ནྟི (དྷ. ས. ༣༢), ‘‘ཡོ ཏསྨིཾ སམཡེ ཨདོསོ ཨདུསྶནཱ…པེ… ཨདོསོ ཀུསལམཱུལ’’ནྟི (དྷ. ས. ༣༣) ཙ ཝུཏྟཏྟཱ ཨིདྷཱཔི ཏཾནིདྡེསེསུ ‘‘ཨལོབྷོ ཨབྱཱཀཏམཱུལ’’ནྟི ‘‘ཨདོསོ ཨབྱཱཀཏམཱུལ’’ནྟི ཝཙནཾ ཡུཛྫེཡྻ. པཉྙིནྡྲིཡཱདིནིདྡེསེསུ པན ‘‘པཉྙཱརཏནཾ ཨམོཧོ དྷམྨཝིཙཡོ སམྨཱདིཊྛཱི’’ཏི (དྷ. ས. ༣༤, ༣༧) ཨེཝཾ ཏཏྠཔི ཝུཏྟཾ, ན ཝུཏྟཾ ‘‘ཨམོཧོ ཀུསལམཱུལ’’ནྟི. ཏསྨཱ ཨིདྷཱཔི ‘‘ཨམོཧོ ཨབྱཱཀཏམཱུལ’’ནྟི པཱཋེན ན བྷཝིཏབྦཾ སིཡཱ. ཨལོབྷཱདོསཱནཾ ཝིཡ ཨམོཧསྶཔི ཨབྱཱཀཏམཱུལདསྶནཏྠཾ པནེཏཾ ཝུཏྟནྟི ཝེདིཏབྦཾ. ཨཝིཉྙཏྟིཛནཀཏོཏི ཀཱཡཝཙཱིཀམྨདྭཱརནིཝཱརཎཾ ཀརོཏི. ཨཝིཔཱཀདྷམྨཏོཏི མནོཀམྨདྭཱརནིཝཱརཎཉྩ. ཝིཔཱཀདྷམྨཱནཉྷི ཀམྨདྭཱརཾ ཝུཏྟནྟི. ཏཐཱ ཨཔྤཝཏྟིཏོཏི དཱནཱདིཔུཉྙཀིརིཡབྷཱཝེན ཨཔྤཝཏྟིཏོ. ཨེཏེན པུཉྙཀིརིཡཝཏྠུབྷེདམེཝ ནིཝཱརེཏི.

བལཝཔཙྩཡེཧཱིཏི ¶ པཡོགེན ཝིནཱ ནིཔྥནྣེཧི ཨཱརམྨཎཱདིཔཙྩཡེཧི. ཨསངྑཱརིཀཱདཱིསུ ཧི ཡེན ཀེནཙི ཙིཏྟེན ཀམྨེ ཨཱཡཱུཧིཏེ ཨསངྑཱརེན ཨཔྤཡོགེན ཀམྨཀམྨནིམིཏྟགཏིནིམིཏྟཔཙྩུཔཊྛཱནེ པཊིསནྡྷི ཨུཔྤཛྫམཱནཱ ཨསངྑཱརིཀཱ ཧོཏི, སསངྑཱརེན སཔྤཡོགེན ཀམྨཱདིཔཙྩུཔཊྛཱནེ སསངྑཱརིཀཱ. བྷཝངྒཙུཏིཡོ པན པཊིསནྡྷིསདིསཱཝ. ཏདཱརམྨཎཉྩ ཀུསལཱཀུསལཱནི ཝིཡ ཨསངྑཱརིཀཾ སསངྑཱརིཀཉྩ དཊྛབྦནྟི. ཨེཏེསུ བལཝཾ དུབྦལཉྩ ཝིཙཱརེཏུཾ ‘‘ཏཏྠ སབྦེཔི སབྦཉྙུབོདྷིསཏྟཱ’’ཏིཨཱདིམཱཧ. ཀཱལཝསེན པན པརིཎམཏཱིཏི ཨཔྤཱཡུཀསཾཝཏྟནིཀཀམྨབཧུལེ ཀཱལེ ཏཾཀམྨསཧིཏསནྟཱནཛནིཏསུཀྐསོཎིཏཔཙྩཡཱནཾ ཏཾམཱུལཀཱནཾ ཙནྡསཱུརིཡཝིསམཔརིཝཏྟཱདིཛནིཏཨུཏཱཧཱརཱདིཝིསམཔཙྩཡཱནཉྩ ཝསེན པརིཎམཏི.

ཝིཔཱཀུདྡྷཱརཀཐཱཝཎྞནཱ

ཡཏོ ཡཏྟཀོ ཙ ཝིཔཱཀོ ཧོཏི, ཡསྨིཉྩ ཋཱནེ ཝིཔཙྩཏི, ཏཾ དསྶེཏུཾ ཝིཔཱཀུདྡྷཱརཀཐཱ ཨཱརདྡྷཱ. ཨེཏྠེཝཱཏི ཨེཀཱཡ ཙེཏནཱཡ ཀམྨེ ཨཱཡཱུཧིཏེཡེཝ. དུཧེཏུཀཔཊིསནྡྷིཝསེན དྭཱདསཀམགྒོཔི ཧོཏི ¶ , དྭཱདསཀཔྤཀཱརོཔཱིཏི ཨཏྠོ. ཨཧེཏུཀཔཊིསནྡྷིཝསེན ཨཧེཏུཀཊྛཀམྤི. ཨསངྑཱརིཀསསངྑཱརིཀཱནཾ སསངྑཱརིཀཨསངྑཱརིཀཝིཔཱཀསངྐརཾ ཨནིཙྪནྟོ དུཏིཡཏྠེརོ ‘‘དྭཱདསཱ’’ཏིཨཱདིམཱཧ. པུརིམསྶ ཧི པཙྩཡཏོསསངྑཱརིཀཨསངྑཱརིཀབྷཱཝོ, ཨིཏརེསཾ ཀམྨཏོ. ཏཏིཡོ ཏིཧེཏུཀཏོ དུཧེཏུཀམྤི ཨནིཙྪནྟོ ‘‘དསཱ’’ཏིཨཱདིམཱཧ.

ཨིམསྨིཾ ཝིཔཱཀུདྡྷཱརཊྛཱནེ ཀམྨཔཊིསནྡྷིཝཝཏྠཱནཏྠཾ སཱཀེཏཔཉྷཾ གཎྷིཾསུ. ཀམྨཝསེན ཝིཔཱཀསྶ ཏཾཏཾགུཎདོསུསྶདནིམིཏྟཏཾ དསྶེཏུཾ ཨུསྶདཀིཏྟནཾ གཎྷིཾསུ. ཧེཏུཀིཏྟནཾ ཨིདྷ པཋམཏྠེརསྶ ཨདྷིཔྤཱཡེན ཝུཏྟཾ. དུཏིཡཏྠེརཝཱདཱདཱིསུ ཝིསེསཾ ཏཏྠ ཏཏྠེཝ ཝཀྑཱམི. ཉཱཎསྶ ཛཙྩནྡྷཱདིཝིཔཏྟིནིམིཏྟཔཊིཔཀྑབྷཱཝཏོ ཏིཧེཏུཀཾ ཨཏིདུབྦལམྤི སམཱནཾ པཊིསནྡྷིཾ ཨཱཀཌྜྷནྟཾ དུཧེཏུཀཾ ཨཱཀཌྜྷེཡྻཱཏི ‘‘ཨཧེཏུཀཱ ན ཧོཏཱི’’ཏི ཨཱཧ. ཡཾ པན པཊིསམྦྷིདཱམགྒེ སུགཏིཡཾ ཛཙྩནྡྷབདྷིརཱདིཝིཔཏྟིཡཱ ཨཧེཏུཀཨུཔཔཏྟིཾ ཝཛྫེཏྭཱ གཏིསམྤཏྟིཡཱ སཧེཏུཀོཔཔཏྟིཾ དསྶེནྟེན ‘‘གཏིསམྤཏྟིཡཱ ཉཱཎསམྤཡུཏྟེ ཀཏམེསཾ ཨཊྛནྣཾ ཧེཏཱུནཾ པཙྩཡཱ ཨུཔཔཏྟི ཧོཏི’’ཙྩེཝ (པཊི. མ. ༡.༢༣༢) ཝུཏྟཾ. ཏེན ཉཱཎཝིཔྤཡུཏྟེན ཀམྨུནཱ ཉཱཎསམྤཡུཏྟཔཊིསནྡྷི ན ཧོཏཱིཏི དཱིཔིཏཾ ཧོཏི. ཨཉྙཐཱ ‘‘སཏྟནྣཾ ཧེཏཱུནཾ པཙྩཡཱ ཨུཔཔཏྟི ཧོཏཱི’’ཏི ཨིདམྤི ཝུཙྩེཡྻ. ཏཐཱ ཧི ‘‘གཏིསམྤཏྟིཡཱ ཉཱཎསམྤཡུཏྟེ ཀཏམེསཾ ཨཊྛནྣཾ ཧེཏཱུནཾ པཙྩཡཱ ཨུཔཔཏྟི ཧོཏི? ཀུསལསྶ ¶ ཀམྨསྶ ཛཝནཀྑཎེ ཏཡོ ཧེཏཱུ ཀུསལཱ ཏསྨིཾ ཁཎེ ཛཱཏཙེཏནཱཡ སཧཛཱཏཔཙྩཡཱ ཧོནྟི. ཏེན ཝུཙྩཏི ཀུསལམཱུལཔཙྩཡཱཔི སངྑཱརཱ. ནིཀནྟིཀྑཎེ དྭེ ཧེཏཱུ ཨཀུསལཱ ཏསྨིཾ ཁཎེ ཛཱཏཙེཏནཱཡ སཧཛཱཏཔཙྩཡཱ ཧོནྟི. ཏེན ཝུཙྩཏི ཨཀུསལམཱུལཔཙྩཡཱཔི སངྑཱརཱ. པཊིསནྡྷིཀྑཎེ ཏཡོ ཧེཏཱུ ཨབྱཱཀཏཱ ཏསྨིཾ ཁཎེ ཛཱཏཙེཏནཱཡ སཧཛཱཏཔཙྩཡཱ ཧོནྟི. ཏེན ཝུཙྩཏི ནཱམརཱུཔཔཙྩཡཱཔི ཝིཉྙཱཎཾ, ཝིཉྙཱཎཔཙྩཡཱཔི ནཱམརཱུཔ’’ནྟི ཝིསྶཛྫིཏཾ ཉཱཎསམྤཡུཏྟོཔཔཏྟིཡཾ.

ཨེཝཾ ཉཱཎཝིཔྤཡུཏྟཏོ ཉཱཎསམྤཡུཏྟུཔཔཏྟིཡཱ ཙ ཝིཛྫམཱནཱཡ ‘‘གཏིསམྤཏྟིཡཱ ཉཱཎསམྤཡུཏྟེ ཀཏམེསཾ སཏྟནྣཾ ཧེཏཱུནཾ པཙྩཡཱ ཨུཔཔཏྟི ཧོཏི? ཀུསལསྶ ཀམྨསྶ ཛཝནཀྑཎེ དྭེ ཧེཏཱུ ཀུསལཱ’’ཏི ཝཏྭཱ ཨཉྙཏྠ ཙ པུབྦེ ཝུཏྟནཡེནེཝ སཀྐཱ ཝིསྶཛྫནཾ ཀཱཏུནྟི. ཡཐཱ ¶ པན ‘‘ཉཱཎསམྤཡུཏྟེ སཏྟནྣཾ ཧེཏཱུནཾ པཙྩཡཱ’’ཏི ཨཝཙནཏོ ཉཱཎཝིཔྤཡུཏྟཏོ ཉཱཎསམྤཡུཏྟཱ པཊིསནྡྷི ན ཧོཏི, ཨེཝཾ ‘‘གཏིསམྤཏྟིཡཱ ཉཱཎཝིཔྤཡུཏྟེ ཚནྣཾ ཧེཏཱུནཾ པཙྩཡཱ ཨུཔཔཏྟི ཧོཏི’’ཙྩེཝ (པཊི. མ. ༡.༢༣༣) ཝཏྭཱ ‘‘སཏྟནྣཾ ཧེཏཱུནཾ པཙྩཡཱ’’ཏི ཨཝཙནཏོ ཉཱཎསམྤཡུཏྟཏོ ཉཱཎཝིཔྤཡུཏྟཱཔི པཊིསནྡྷི ན ཧོཏཱིཏི ཨཱཔནྣཾ. ཨེཏྠཱཔི ཧི ན ན སཀྐཱ ཀམྨནིཀནྟིཀྑཎེསུ ཏཡོ ཙ དྭེ ཙ ཧེཏཱུ ཡོཛེཏྭཱ པཊིསནྡྷིཀྑཎེ དྭེ ཡོཛེཏུནྟི. ཨིམསྶ པན ཐེརསྶ ཨཡམདྷིཔྤཱཡོ སིཡཱ ‘‘ཀམྨསརིཀྑཀཝིཔཱཀདསྶནཝསེན ཨིདྷ པཱཋོ སཱཝསེསོ ཀཐིཏོ’’ཏི. ‘‘ཉཱཎསམྤཡུཏྟེ ཨཊྛནྣཾ ཧེཏཱུནཾ པཙྩཡཱ’’ཏི ཨེཏྠཱཔི པཱཋསྶ སཱཝསེསཏཱཔཏྟཱིཏི ཙེ? ན, དུབྦལསྶ དུཧེཏུཀཀམྨསྶ ཉཱཎསམྤཡུཏྟཝིཔཱཀདཱནེ ཨསམཏྠཏྟཱ. ཏིཧེཏུཀསྶ པན ཨཧེཏུཀཝིཔཙྩནེ ཝིཡ དུཧེཏུཀཝིཔཙྩནེཔི ནཏྠི སམཏྠཏཱཝིགྷཱཏོཏི. ཨཱརམྨཎེན ཝེདནཱ པརིཝཏྟེཏབྦཱཏི སནྟཱིརཎཏདཱརམྨཎེ སནྡྷཱཡ ཝུཏྟཾ. ཝིབྷཱགགྒཧཎསམཏྠཏཱབྷཱཝཏོ ཧི ཙཀྑུཝིཉྙཱཎཱདཱིནི ཨིཊྛཨིཊྛམཛ྄ཛྷཏྟེསུ ཨུཔེཀྑཱསཧགཏཱནེཝ ཧོནྟི, ཀཱཡཝིཉྙཱཎཉྩ སུཁསཧགཏམེཝ པཊིགྷཊྚནཱཝིསེསེནཱཏི.

ཝིསེསཝཏཱ ཀཱལེན ཏདཱརམྨཎཔཙྩཡསབྦཛཝནཝཏཱ ཝིཔཱཀཔྤཝཏྟིཾ དསྶེཏུཾ ‘‘སཾཝརཱསཾཝརེ…པེ… ཨུཔགཏསྶཱ’’ཏི ཝུཏྟཾ ཨཉྙཀཱལེ པཉྩཝིཉྙཱཎཱདིཔརིཔུཎྞཝིཔཱཀཔྤཝཏྟིཨབྷཱཝཱ. ཀཀྐཊཀ…པེ… བྷཝངྒོཏརཎནྟི ཨེཏེན ཨིདཾ དསྶེཏི – ཀེདཱརེ པཱུརེཏྭཱ ནདཱིཔཝེསནམགྒབྷཱུཏཾ མཱཏིཀཾ ཨཔྤཝིསིཏྭཱ ཀཀྐཊཀམགྒཱདིནཱ ཨམགྒེན ནདཱིཨོཏརཎཾ ཝིཡ ཙིཏྟསྶ ཛཝིཏྭཱ བྷཝངྒཔྤཝེསནམགྒབྷཱུཏེ ཏདཱརམྨཎེ ཨནུཔྤནྣེ མགྒེན ཝིནཱ བྷཝངྒོཏརཎནྟི.

ཨེཏེསུ ¶ ཏཱིསུ མོགྷཝཱརེསུ དུཏིཡོ ཨུཔཔརིཀྑིཏྭཱ གཧེཏབྦོ. ཡདི ཧི ཨནུལོམེ ཝེདནཱཏྟིཀེ པཊིཙྩཝཱརཱདཱིསུ ‘‘ཨཱསེཝནཔཙྩཡཱ ན མགྒེ དྭེ’’ཏི ‘‘ན མགྒཔཙྩཡཱ ཨཱསེཝནེ དྭེ’’ཏི ཙ ཝུཏྟཾ སིཡཱ, སོཔི མོགྷཝཱརོ ལབྦྷེཡྻ. ཡདི པན ཝོཊྛབྦནམྤི ཨཱསེཝནཔཙྩཡོ སིཡཱ, ཀུསལཱཀུསལཱནམྤི སིཡཱ. ན ཧི ཨཱསེཝནཔཙྩཡཾ ལདྡྷུཾ ཡུཏྟསྶ ཨཱསེཝནཔཙྩཡབྷཱཝཱི དྷམྨོ ཨཱསེཝནཔཙྩཡོཏི ཨཝུཏྟོ ཨཏྠི. ཝོཊྛབྦནསྶ པན ཀུསལཱཀུསལཱནཾ ཨཱསེཝནཔཙྩཡབྷཱཝོ ཨཝུཏྟོ. ‘‘ཀུསལཾ ¶ དྷམྨཾ པཊིཙྩ ཀུསལོ དྷམྨོ ཨུཔྤཛྫཏི ནཱསེཝནཔཙྩཡཱ. ཨཀུསལཾ དྷམྨཾ…པེ… ནཱསེཝནཔཙྩཡཱ’’ཏི (པཊྛཱ. ༡.༡.༩༣) ཝཙནཏོ པཊིཀྑིཏྟོཝ. ཨཐཱཔི སིཡཱ ‘‘ཨསམཱནཝེདནཱནཾ ཝསེན ཨེཝཾ ཝུཏྟ’’ནྟི, ཨེཝམཔི ཡཐཱ ‘‘ཨཱཝཛྫནཱ ཀུསལཱནཾ ཁནྡྷཱནཾ ཨཀུསལཱནཾ ཁནྡྷཱནཾ ཨནནྟརཔཙྩཡེན པཙྩཡོ’’ཏི (པཊྛཱ. ༡.༡.༤༡༧) ཝུཏྟཾ, ཨེཝཾ ‘‘ཨཱསེཝནཔཙྩཡེན པཙྩཡོཏི’’པི ཝཏྟབྦཾ སིཡཱ, ཛཱཏིབྷེདཱ ན ཝུཏྟནྟི ཙེ? བྷཱུམིབྷིནྣསྶ ཀཱམཱཝཙརསྶ རཱུཔཱཝཙརཱདཱིནཾ ཨཱསེཝནཔཙྩཡབྷཱཝོ ཝིཡ ཛཱཏིབྷིནྣསྶཔི བྷཝེཡྻཱཏི ཝཏྟབྦོ ཨེཝ སིཡཱ. ཨབྷིནྣཛཱཏིཀསྶ ཙ ཝསེན ཡཐཱ ‘‘ཨཱཝཛྫནཱ སཧེཏུཀཱནཾ ཁནྡྷཱནཾ ཨནནྟརཔཙྩཡེན པཙྩཡོ’’ཏི ཝུཏྟཾ, ཨེཝཾ ‘‘ཨཱསེཝནཔཙྩཡེན པཙྩཡོ’’ཏིཔི ཝཏྟབྦཾ སིཡཱ, ན ཏུ ཝུཏྟཾ. ཏསྨཱ ཝེདནཱཏྟིཀེཔི སངྑིཏྟཱཡ གཎནཱཡ ‘‘ཨཱསེཝནཔཙྩཡཱ ན མགྒེ ཨེཀཾ, ན མགྒཔཙྩཡཱ ཨཱསེཝནེ ཨེཀ’’ནྟི ཨེཝཾ གཎནཱཡ ནིདྡྷཱརིཡམཱནཱཡ ཝོཊྛབྦནསྶ ཨཱསེཝནཔཙྩཡཏྟསྶ ཨབྷཱཝཱ ཡཐཱཝུཏྟཔྤཀཱརོ དུཏིཡོ མོགྷཝཱརོ ཝཱིམཾསིཏབྦོ.

ཝོཊྛབྦནཾ པན ཝཱིཐིཝིཔཱཀསནྟཏིཡཱ ཨཱཝཊྚནཏོ ཨཱཝཛྫནཱ, ཏཏོ ཝིསདིསསྶ ཛཝནསྶ ཀརཎཏོ མནསིཀཱརོ ཙ. ཨེཝཉྩ ཀཏྭཱ པཊྛཱནེ ‘‘ཝོཊྛབྦནཾ ཀུསལཱནཾ ཁནྡྷཱནཾ ཨནནྟརཔཙྩཡེན པཙྩཡོ’’ཏིཨཱདི ན ཝུཏྟཾ, ‘‘ཨཱཝཛྫནཱ’’ཨིཙྩེཝ ཝུཏྟཾ. ཏསྨཱ ཝོཊྛབྦནཏོ ཙཏུནྣཾ ཝཱ པཉྩནྣཾ ཝཱ ཛཝནཱནཾ ཨཱརམྨཎཔུརེཛཱཏཾ བྷཝིཏུཾ ཨསཀྐོནྟཾ རཱུཔཱདིཨཱཝཛྫནཱདཱིནཾ པཙྩཡོ བྷཝིཏུཾ ན སཀྐོཏི, ཨཡམེཏསྶ སབྷཱཝོཏི ཛཝནཱཔཱརིཔཱུརིཡཱ དུཏིཡོ མོགྷཝཱརོ དསྶེཏུཾ ཡུཏྟོ སིཡཱ, ཨཡམྤི ཨཊྛཀཐཱཡཾ ཨནཱགཏཏྟཱ སུཊྛུ ཝིཙཱརེཏབྦོ. བྷཝངྒསྶ ཛཝནཱནུབནྡྷནབྷཱུཏཏྟཱ ‘‘ཏདཱརམྨཎཾ བྷཝངྒ’’ནྟི ཝུཏྟཾ. པཊྛཱནེ (པཊྛཱ. ༣.༡.༡༠༢) ཙ ཝུཏྟཾ ‘‘སཧེཏུཀཾ བྷཝངྒཾ ཨཧེཏུཀསྶ བྷཝངྒསྶ ཨནནྟརཔཙྩཡེན པཙྩཡོ’’ཏི, ‘‘ཨཧེཏུཀཾ བྷཝངྒཾ སཧེཏུཀསྶ བྷཝངྒསྶ ཨནནྟརཔཙྩཡེན པཙྩཡོ’’ཏི ཙ. ཀུསལཱཀུསལཱནཾ སུཁདུཀྑཝིཔཱཀམཏྟོ ཝིཔཱཀོ ན ཨིཊྛཱནིཊྛཱནཾ ཝིབྷཱགཾ ཀརོཏི, ཛཝནཾ པན རཛྫནཝིརཛྫནཱདིཝསེན ཨིཊྛཱནིཊྛཝིབྷཱགཾ ཀརོཏཱིཏི ‘‘ཨཱརམྨཎརསཾ ཛཝནམེཝ ཨནུབྷཝཏཱི’’ཏི ཝུཏྟཾ.

ཨཝིཛྫམཱནེ ¶ ཀཱརཀེ ཀཐཾ ཨཱཝཛྫནཱདིབྷཱཝེན པཝཏྟི ཧོཏཱིཏི ཏཾ དསྶེཏུཾ པཉྩཝིདྷཾ ནིཡཱམཾ ནཱམ གཎྷིཾསུ. ནིཡཱམོ ཙ དྷམྨཱནཾ སབྷཱཝཀིཙྩཔཙྩཡབྷཱཝཝིསེསོཝ. ཏཾཏཾསདིསཕལདཱནནྟི ཏསྶ ཏསྶ ཨཏྟནོ ཨནུརཱུཔཕལསྶ ¶ དཱནཾ. སདིསཝིཔཱཀདཱནནྟི ཙ ཨནུརཱུཔཝིཔཱཀདཱནནྟི ཨཏྠོ. ཨིདཾ ཝཏྠུནྟི ཨེཀཝཙནནིདྡེསོ ཨེཀགཱཐཱཝཏྠུབྷཱཝེན ཀཏོ. ཛགཏིཔྤདེསོཏི ཡཐཱཝུཏྟཏོ ཨཉྙོཔི ལོཀཔྤདེསོ. ཀཱལགཏིཨུཔདྷིཔཡོགཔཊིབཱལ༹ྷཉྷི པཱཔཾ ན ཝིཔཙྩེཡྻ, ན པདེསཔཊིབཱལ༹ྷནྟི. སབྦཉྙུཏཉྙཱཎཔདཊྛཱནཔཊིསནྡྷིཡཱདིདྷམྨཱནཾ ནིཡཱམོ དསསཧསྶིཀམྤནཔཙྩཡབྷཱཝོ དྷམྨནིཡཱམོ. ཨཡཾ ཨིདྷ ཨདྷིཔྤེཏོཏི ཨེཏེན ནིཡཱམཝསེན ཨཱཝཛྫནཱདིབྷཱཝོ, ན ཀཱརཀཝསེནཱཏི ཨེཏམཏྠཾ དསྶེཏི.

ཨིམསྨིཾ ཋཱནེཏི སོལ༹སཝིཔཱཀཀཐཱཋཱནེ. དྭཱདསཧི ཝཱཧེཏབྦཱ ནཱལི༹ཡནྟོཔམཱ ན དྭཱདསནྣཾ ཙིཏྟཱནཾ ཨེཀསྨིཾ དྭཱརེ ཨེཀཱརམྨཎེ སཧ ཀིཙྩཀརཎཝསེན ཝུཏྟཱ, ཨཐ ཁོ དྭཱདསནྣཾ ཨེཀསྨིཾ དྭཱརེ སཀིཙྩཀརཎམཏྟཝསེན. ཨཧེཏུཀཔཊིསནྡྷིཛནཀསདིསཛཝནཱནནྟརཾ ཨཧེཏུཀཏདཱརམྨཎཾ དསྶེནྟོ ‘‘ཙཏུནྣཾ པན དུཧེཏུཀཀུསལཙིཏྟཱནཾ ཨཉྙཏརཛཝནསྶ…པེ… པཏིཊྛཱཏཱི’’ཏི ཨཱཧ. ཨཧེཏུཀཔཊིསནྡྷིཀསྶ པན ཏིཧེཏུཀཛཝནེ ཛཝིཏེ པཊིསནྡྷིདཱཡཀེན ཀམྨེན ཨཧེཏུཀསྶ ཏདཱརམྨཎསྶ ནིབྦཏྟི ན པཊིསེདྷིཏཱ. ཨེཝཾ དུཧེཏུཀཔཊིསནྡྷིཀསྶཔི ཏིཧེཏུཀཱནནྟརཾ དུཧེཏུཀཏདཱརམྨཎཾ ཨཔྤཊིསིདྡྷཾ དཊྛབྦཾ. པརིཔུཎྞཝིཔཱཀསྶ ཙ པཊིསནྡྷིཛནཀཀམྨསྶ ཝསེནཱཡཾ ཝིཔཱཀཝིབྷཱཝནཱ ཏསྶཱ མུཁནིདསྶནམཏྟམེཝཱཏི པཝཏྟིཝིཔཱཀསྶ ཙ ཨེཀསྶ ཏིཧེཏུཀཱདིཀམྨསྶ སོལ༹སཝིཔཱཀཙིཏྟཱདཱིནི ཝུཏྟནཡེན ཡོཛེཏབྦཱནི. ཏསྨཱ ཡེན ཀེནཙི ཀམྨུནཱ ཨེཀེན ཨནེཀཾ ཏདཱརམྨཎཾ པཝཏྟམཱནཾ ཀམྨཝིསེསཱབྷཱཝཱ ཡེསཾ ཏཾ ཨནུབནྡྷབྷཱུཏཾ, ཏེསཾ ཛཝནསངྑཱཏཱནཾ པཙྩཡཱནཾ ཝིསེསེན ཝིསིཊྛཾ ཧོཏཱིཏི ཛཝནེནཱཡཾ ཏདཱརམྨཎནིཡཱམོ ཝུཏྟོ, ན ནཱནཱཀམྨུནཱ ནིབྦཏྟམཱནསྶ ཝསེན. ཨེཝཉྩ ཀཏྭཱ པཊྛཱནེ (པཊྛཱ. ༣.༡.༩༨) ‘‘སཧེཏུཀེ ཁནྡྷེ ཨནིཙྩཏོ དུཀྑཏོ ཨནཏྟཏོ ཝིཔསྶཏི. ཀུསལཱཀུསལེ ནིརུདྡྷེ ཨཧེཏུཀོ ཝིཔཱཀོ ཏདཱརམྨཎཏཱ ཨུཔྤཛྫཏཱི’’ཏི ཉཱཎཱནནྟརཾ ཨཧེཏུཀཏདཱརམྨཎཾ, ‘‘ཀུསལཱཀུསལེ ནིརུདྡྷེ སཧེཏུཀོ ཝིཔཱཀོ ཏདཱརམྨཎཏཱ ཨུཔྤཛྫཏཱི’’ཏི ཨཀུསལཱནནྟརཉྩ སཧེཏུཀཏདཱརམྨཎཾ ཝུཏྟཾ, ན ཙ ‘‘ཏཾ ཨེཏེན ཐེརེན ཨདསྶིཏ’’ནྟི ཀཏྭཱ ཏསྶ པཊིསེདྷོ ཀཏོ ཧོཏཱིཏི.

ཡཾ ¶ པན ཛཝནེན…པེ… ཏཾ ཀུསལཾ སནྡྷཱཡ ཝུཏྟནྟི ཨིདཾ ཀུསལསྶ ཝིཡ ཨཀུསལསྶ སདིསོ ¶ ཝིཔཱཀོ ནཏྠཱིཏི ཀཏྭཱ ཝུཏྟཾ. སསངྑཱརིཀཱསངྑཱརིཀནིཡམནཾ པན སནྡྷཱཡ ཏསྨིཾ ཝུཏྟེ ཨཀུསལེཔི ན ཏཾ ན ཡུཛྫཏཱིཏི. ཨཊྛཱནམེཏནྟི ཨིདཾ ནིཡམིཏཱདིཝསེན ཡོནིསོ ཨཡོནིསོ ཝཱ ཨཱཝཊྚིཏེ ཨཡོནིསོ ཡོནིསོ ཝཱ ཝཝཏྠཱཔནསྶ ཨབྷཱཝཾ སནྡྷཱཡ ཝུཏྟཾ.

པཊིསིདྡྷནྟི ཨཝཙནམེཝ པཊིསེདྷོཏི ཀཏྭཱ ཝུཏྟཾ. ཀཱམཏཎྷཱནིབྦཏྟེན ཀམྨུནཱ མཧགྒཏལོཀུཏྟརཱནུབྷཝནཝིཔཱཀོ ན ཧོཏཱིཏི ཏཏྠ ཏདཱརམྨཎཱབྷཱཝོ ཝེདིཏབྦོ. ཨཱཔཱཐགཏེ ཝིསཡེ ཏནྣིནྣཾ བྷཝངྒཾ ཨཱཝཛྫནཾ ཨུཔྤཱདེཏཱིཏི ཨཱཝཛྫནཾ ཝིསཡེ ནིནྣཏྟཱ ཨུཔྤཛྫཏི. བྷཝངྒཾ པན སབྦདཱ སཝིསཡེ ནིནྣམེཝཱཏི ཝིསཡནྟརཝིཉྙཱཎསྶ པཙྩཡོ ཧུཏྭཱཔི ཏདབྷཱཝཱ ཝིནཱ ཨཱཝཛྫནེན སཝིསཡེ ནིནྣཏྟཱཝ ཨུཔྤཛྫཏི. ཙིཎྞཏྟཱཏི ཨཱཝཛྫནེན ཝིནཱ བཧུལཾ ཨུཔྤནྣཔུབྦཏྟཱ. སམུདཱཙཱརཏྟཱཏི ཨཱཔཱཐགཏེ ཝིསཡེ པཊིསནྡྷིཝིསཡེ ཙ བཧུལཾ ཨུཔྤཱདིཏཔུབྦཏྟཱ. ཙིཎྞཏྟཱཏི ཝཱ པུགྒལེན ཨཱསེཝིཏབྷཱཝོ ཝུཏྟོ. སམུདཱཙཱརཏྟཱཏི སཡཾ བཧུལཾ པཝཏྟབྷཱཝོ. ནིརོདྷསྶ ཨནནྟརཔཙྩཡཾ ནེཝསཉྙཱནཱསཉྙཱཡཏནནྟི ཨིདཾ ཏདནནྟརམེཝ ནིརོདྷཕུསནཾ སནྡྷཱཡ ཝུཏྟཾ, ན ཨརཱུཔཀྑནྡྷཱནཾ ཝིཡ ནིརོདྷསྶ ཨནནྟརཔཙྩཡབྷཱཝཾ. ནེཝསཉྙཱནཱསཉྙཱཡཏནཾ པན ཀིཉྩི པརིཀམྨེན ཝིནཱ ཨུཔྤཛྫམཱནཾ ནཏྠི. པརིཀམྨཱཝཛྫནམེཝ ཏསྶ ཨཱཝཛྫནནྟི ཨཉྙསྶ ཝིཡ ཨེཏསྶཔི སཱཝཛྫནཏཱཡ བྷཝིཏབྦཾ.

ཨཡཾ པནེཏྠཱདྷིཔྤཱཡོ དཊྛབྦོ – ནེཝསཉྙཱནཱསཉྙཱཡཏནསྶ ན ནིརོདྷསྶ ཨནནྟརཔཙྩཡབྷཱཝེ ནིནྣཱདིཏཱ ཨཉྙཏྠ དིཊྛཱ ཨཏདཏྠཔརིཀམྨབྷཱཝེ ཙ ཨུཔྤཏྟིཡཱ, ཨཐ ཙ ཏཾ ཏསྶ ཨནནྟརཔཙྩཡོ ཧོཏི, ཏཐཱ ཙ ཨུཔྤཛྫཏི. ཨེཝཾ ཡཐཱཝུཏྟཱ མནོཝིཉྙཱཎདྷཱཏུ ཨསཏིཔི ནིརཱཝཛྫནུཔྤཏྟིཡཾ ནིནྣཱདིབྷཱཝེ ནིརཱཝཛྫནཱ ཨུཔྤཛྫཏཱིཏི. ཨེཝཉྩ ཀཏྭཱ ‘‘ཨརིཡམགྒཙིཏྟཾ མགྒཱནནྟརཱནི ཕལཙིཏྟཱནཱི’’ཏི ཨིདཾ ཝུཏྟཾ. ཡདི ཧི ནིབྦཱནཱརམྨཎཱཝཛྫནཱབྷཱཝཾ སནྡྷཱཡེཏཾ ཝུཏྟཾ སིཡཱ, གོཏྲབྷུཝོདཱནཱནི ནིདསྶནཱནི སིཡུཾ ཏེཧེཝ ཨེཏེསཾ ནིརཱཝཛྫནཏཱསིདྡྷིཏོ. ཕལསམཱཔཏྟིཀཱལེ ཙ ‘‘པརིཏྟཱརམྨཎཾ མཧགྒཏཱརམྨཎཾ ཨནུལོམཾ ཕལསམཱཔཏྟིཡཱ ¶ ཨནནྟརཔཙྩཡེན པཙྩཡོ’’ཏི ཝཙནཏོ སམཱནཱརམྨཎཱཝཛྫནརཧིཏཏྟཱ ‘‘མགྒཱནནྟརཱནི ཕལཙིཏྟཱནཱི’’ཏི ཨེཝཾ ཕལསམཱཔཏྟིཙིཏྟཱནི ན ཝཛྫེཏབྦཱནི སིཡུཾ, གོཏྲབྷུཝོདཱནཱནི པན ཡདིཔི ནིབྦཱནེ ཙིཎྞཱནི སམུདཱཙཱརཱནི ཙ ན ཧོནྟི, ཨཱརམྨཎནྟརེ ཙིཎྞསམུདཱཙཱརཱནེཝ. ཕལསམཱཔཏྟིཙིཏྟཱནི ཙ མགྒཝཱིཐིཏོ ཨུདྡྷཾ ཏདཏྠཔརིཀམྨསབྦྷཱཝཱཏི ཏེསཾ གཧཎཾ ན ཀཏཾ, ཨནུལོམཱནནྟརཉྩ ཕལསམཱཔཏྟིཙིཏྟཾ ཙིཎྞཾ སམུདཱཙཱརཾ, ན ནེཝསཉྙཱནཱསཉྙཱཡཏནཱནནྟརཾ ¶ མགྒཱནནྟརསྶ ཝིཡ ཏདཏྠཔརིཀམྨཱབྷཱཝཱཏི ‘‘ནིརོདྷཱ ཝུཊྛཧནྟསྶཱ’’ཏི ཏཉྩ ནིདསྶནཾ. ཨཱརམྨཎེན པན ཝིནཱ ནུཔྤཛྫཏཱིཏི ཨིདཾ ཨེཏསྶ མཧགྒཏཱརམྨཎཏྟཱབྷཱཝཱ པུཙྪཾ ཀཱརེཏྭཱ ཨཱརམྨཎནིདྡྷཱརཎཏྠཾ ཝུཏྟཾ.

ཏཏྠཱཏི ཝིཔཱཀཀཐཱཡཾ. ཛཙྩནྡྷཔཱིཋསཔྤིཨུཔམཱནིདསྶནཾ ཝིཔཱཀསྶ ནིསྶཡེན ཝིནཱ ཨཔྤཝཏྟིདསྶནཏྠཾ. ཝིསཡགྒཱཧོཏི ཨིདཾ ཙཀྑཱདཱིནཾ སཝིསཡགྒཧཎེན ཙཀྑུཝིཉྙཱཎཱདིཝིཔཱཀསྶ དསྶནཏྠཾ ཝུཏྟཾ. ཨུཔནིསྶཡཏོ ཙཀྑཱདཱིནཾ དསྶནཱདིཨཏྠཏོ ཙ ཏསྶེཝ ཝིཔཱཀསྶ དསྶནཏྠཾ ‘‘ཨུཔནིསྶཡམཏྠསོ’’ཏི ཝུཏྟཾ. ཧདཡཝཏྠུམེཝཱཏི ཡཐཱ པུརིམཙིཏྟཱནི ཧདཡཝཏྠུནིསྶིཏཱནི ཙ པསཱདཝཏྠུཨནུགཏཱནི ཙ ཨཉྙཱརམྨཎཱནི ཧོནྟི, ན ཨེཝཾ བྷཝངྒཾ, ཏཾ པནེཏཾ ཝཏྠཱརམྨཎནྟརརཧིཏཾ ཀེཝལཾ ཧདཡཝཏྠུམེཝ ནིསྶཱཡ པཝཏྟཏཱིཏི ཝུཏྟཾ ཧོཏི. ཧདཡརཱུཔཝཏྠུཀནྟི ཨིདྷཱཔི ཨཉྙཝཏྠཱནུགཏནྟི ཨདྷིཔྤཱཡོ ཝེདིཏབྦོ. མཀྐཊཀསྶ ཧི སུཏྟཱརོཧཎཾ ཝིཡ པསཱདཝཏྠུཀཾ ཙིཏྟཾ, སུཏྟེན གམནཱདཱིནི ཝིཡ ཏདནུགཏཱནི སེསཙིཏྟཱནཱིཏི. སུཏྟགྷཊྚནམཀྐཊཀཙལནཱནི ཝིཡ པསཱདགྷཊྚནབྷཝངྒཙལནཱནི སཧ ཧོནྟཱིཏི དཱིཔནཏོ ‘‘ཨེཀེཀཾ…པེ… ཨཱགཙྪཏཱི’’ཏིཔི དཱིཔེཏི.

བྷཝངྒསྶ ཨཱཝཊྚིཏཀཱལོཏི ཨིདཾ དོཝཱརིཀསདིསཱནཾ ཙཀྑུཝིཉྙཱཎཱདཱིནཾ པཱདཔརིམཛྫཀསདིསསྶ ཨཱཝཛྫནསྶ སཉྙཱདཱནསདིསོ ཨནནྟརཔཙྩཡབྷཱཝོ ཨེཝ བྷཝངྒཱཝཊྚནནྟི ཀཏྭཱ ཝུཏྟཾ. ཝིཔཱཀམནོདྷཱཏུཨཱདཱིནཾ ཨདིསྭཱཝ སམྤཊིཙྪནཱདིཀརཎཾ གཱལ༹ྷགྒཧཎམཏྟཔུཐུལཙཏུརསྶབྷཱཝཝིཛཱནནམཏྟཀཧཱཔཎབྷཱཝཝིཛཱནནམཏྟཀམྨོཔནཡནམཏྟསཱམཉྙཝསེན ཝུཏྟཾ, ན གཱལ༹ྷགྒཱཧཀཱདཱིནཾ ཀཧཱཔཎདསྶནསྶ ཨབྷཱཝོ ཏཾསམཱནབྷཱཝོ ཙ སམྤཊིཙྪནཱདཱིནཾ ཨདྷིཔྤེཏོཏི ཝེདིཏབྦོ.

པཎྜརཾ ¶ ཨེཏནྟི པཎྜརརཱུཔདསྶནསཱམཉྙཏོ ཙཀྑུཝིཉྙཱཎམེཝ དསྶནཀིཙྩཾ སཱདྷེཏཱིཏི དཱིཔནཾ ཝེདིཏབྦཾ. ཨེཝཾ སོཏདྭཱརཱདཱིསུཔི ཡོཛེཏབྦཾ སཝནཱདིཝསེན. སནྟཱཔནཝསེན གུལ༹སཱིལོ གུལ༹པྤཡོཛནོ ཝཱ གོལི༹ཡཀོ. ཨུཔནིསྶཡཏོཏི ན ཨུཔནིསྶཡཔཙྩཡཾ སནྡྷཱཡ ཝུཏྟཾ. ཡསྨིཾ པན ཨསཏི ཡོ ན ཧོཏི, སོ ཨིདྷ ‘‘ཨུཔནིསྶཡོ’’ཏི ཨདྷིཔྤེཏོ. ཨཱལོཀསནྣིསྶིཏནྟི ཨིདམྤི ཨཱལོཀེ སཏི སབྦྷཱཝཾ སནྡྷཱཡ ཝུཏྟཾ, ན ཨུཔནིསྶཡཔཙྩཡཏཾ. མནྡཐཱམགཏཾ ནཱམ ཀིརིཡཙིཏྟསྶ པཙྩཡབྷཱཝཾ ཨནུཔགནྟྭཱ སཡམེཝ པཝཏྟམཱནཾ.

ཨསངྑཱརིཀསསངྑཱརིཀེསུ ¶ དོསཾ དིསྭཱཏི ན ཀམྨསྶ ཝིརུདྡྷསབྷཱཝེན ཝིཔཱཀེན བྷཝིཏབྦནྟི ཨསངྑཱརིཀཀམྨསྶ སསངྑཱརིཀཝིཔཱཀེསུ, སསངྑཱརིཀཀམྨསྶ ཙ ཨསངྑཱརིཀཝིཔཱཀེསུ དོསཾ དིསྭཱ. ཨཧེཏུཀཱནཾ པན རཱུཔཱདཱིསུ ཨབྷིནིཔཱཏམཏྟཱདིཀིཙྩཱནཾ ན སསངྑཱརིཀཝིརུདྡྷོ སབྷཱཝོཏི ཨསངྑཱརིཀཏཱ ནཏྠི, ཨསངྑཱརིཀཝིརུདྡྷསབྷཱཝཱབྷཱཝཱ ནཱཔི སསངྑཱརིཀཏཱཏི ཨུབྷཡཱཝིརོདྷཱ ཨུབྷཡེནཔི ཏེསཾ ནིབྦཏྟིཾ ཨནུཛཱནཱཏི. ཙིཏྟནིཡཱམནྟི ཏདཱརམྨཎནིཡཱམཾ. ཀིརིཡཏོ པཉྩཱཏི ཨིམེསཾ…པེ… པཏིཊྛཱཏཱིཏི ཀིརིཡཛཝནཱནནྟརཉྩ ཏདཱརམྨཎཾ ཝུཏྟཾ. པཊྛཱནེ (པཊྛཱ. ༡.༣.༩༤) པན ‘‘ཀུསལཱཀུསལེ ནིརུདྡྷེ ཝིཔཱཀོ ཏདཱརམྨཎཏཱ ཨུཔྤཛྫཏཱི’’ཏི ཝིཔཱཀདྷམྨདྷམྨཱནམེཝ ཨནནྟརཱ ཏདཱརམྨཎཾ ཝུཏྟཾ. ཀུསལཏྟིཀེ ཙ ‘‘སེཀྑཱ ཝཱ པུཐུཛྫནཱ ཝཱ ཀུསལཾ ཨནིཙྩཏོ’’ཏིཨཱདིནཱ (པཊྛཱ. ༡.༡.༤༠༦) ཀུསལཱཀུསལཛཝནམེཝ ཝཏྭཱ ཏདནནྟརཾ ཏདཱརམྨཎཾ ཝུཏྟཾ, ན ཨབྱཱཀཏཱནནྟརཾ, ན ཙ ཀཏྠཙི ཀིརིཡཱནནྟརཾ ཏདཱརམྨཎསྶ ཝུཏྟཊྛཱནཾ དིསྶཏི. ཝིཛྫམཱནེ ཙ ཏསྨིཾ ཨཝཙནེ ཀཱརཎཾ ནཏྠི, ཏསྨཱ ཨུཔཔརིཀྑིཏབྦོ ཨེསོ ཐེརཝཱདོ. ཝིཔྥཱརིཀཉྷི ཛཝནཾ ནཱཝཾ ཝིཡ ནདཱིསོཏོ བྷཝངྒཾ ཨནུབནྡྷཏཱིཏི ཡུཏྟཾ, ན པན ཚལ༹ངྒུཔེཀྑཝཏོ སནྟཝུཏྟིཾ ཀིརིཡཛཝནཾ པཎྞཔུཊཾ ཝིཡ ནདཱིསོཏོཏི.

པིཎྜཛཝནཾ ཛཝཏཱིཏི ཀུསལཱཀུསལཀིརིཡཛཝནཱནི པིཎྜེཏྭཱ ཀཐིཏཱནཱིཏི ཏཐཱ ཀཐིཏཱནི ཛཝནཱནི པིཎྜིཏཱནི ཝིཡ ཝུཏྟཱནི, ཨེཀསྨིཾ ཝཱ ཏདཱརམྨཎེ པིཎྜེཏྭཱ དསྶིཏཱནི ཧུཏྭཱ ཛཝིཏཱནེཝ ཝུཏྟཱནི. ཨིམཉྩ པན པིཎྜཛཝནཾ ཝདནྟེན ཨཀུསལཏོ ཙཏྟཱརིཡེཝ ཨུཔེཀྑཱསཧགཏཱནི གཧེཏྭཱ དྭཱདསུཔེཀྑཱསཧགཏཛཝནཱནི པིཎྜིཏཱནི ཝིཡ ཝུཏྟཱནི. པཊྛཱནེ པན ‘‘ཀུསལཾ ཨསྶཱདེཏི ཨབྷིནནྡཏི, ཏཾ ཨཱརབྦྷ རཱགོ ཨུཔྤཛྫཏི. དིཊྛི, ཝིཙིཀིཙྪཱ ¶ , ཨུདྡྷཙྩཾ, དོམནསྶཾ ཨུཔྤཛྫཏི. ཨཀུསལེ ནིརུདྡྷེ ཝིཔཱཀོ ཏདཱརམྨཎཏཱ ཨུཔྤཛྫཏཱི’’ཏི ཝུཏྟཏྟཱ ཨིཏརཱནི དྭེ ཨིཊྛཱརམྨཎེ པཝཏྟཝིཙིཀིཙྪུདྡྷཙྩསཧགཏཱནིཔི ཀུསལཝིཔཱཀེ ཏདཱརམྨཎེ པིཎྜེཏབྦཱནི སིཡུཾ. ཏེསཾ པན ཨནནྟརཾ ཨཧེཏུཀཝིཔཱཀེནེཝ ཏདཱརམྨཎེན བྷཝིཏབྦཾ, སོ ཙ སནྟཱིརཎབྷཱཝེནེཝ གཧིཏོཏི ཨཔུབྦཾ གཧེཏབྦཾ ནཏྠི. ཨཧེཏུཀེ ཙ པིཎྜེཏབྦཾ ནཱརཧནྟཱིཏི ཨདྷིཔྤཱཡེན ན པིཎྜེཏཱིཏི.

ཏིཧེཏུཀཛཝནཱཝསཱནེ པནེཏྠཱཏི ཨེཏསྨིཾ དུཏིཡཝཱདེ ཏིཧེཏུཀཛཝནཱཝསཱནེ ཏིཧེཏུཀཏདཱརམྨཎཾ ཡུཏྟནྟི དསྶེཏུཾ ཡུཏྟཾ ཝདཏི ཛཝནསམཱནཏྟཱ, ནཱལབྦྷམཱནཏྟཱ ཨཉྙསྶ. པཋམཏྠེརེན ཨཀུསལཱནནྟརཾ ཝུཏྟསྶ ཨཧེཏུཀཏདཱརམྨཎསྶ, ཀུསལཱནནྟརཾ ཝུཏྟསྶ ཙ སཧེཏུཀཏདཱརམྨཎསྶ ¶ ཨཀུསལཱནནྟརཾ ཨུཔྤཏྟིཾ ཝདནྟསྶ ཧི པཊིསནྡྷིཛནཀཾ ཏིཧེཏུཀཀམྨཾ དུཧེཏུཀཱཧེཏུཀཾ ཝིཔཱཀཾ ཛནཡནྟམྤི ཏིཧེཏུཀཛཝནཱནནྟརཾ ན ཛནེཏཱིཏི ན ཨེཏྠ ཀཱརཎཾ དིསྶཏཱིཏི ཨེཝཾ ཡུཏྟཾ གཧེཏབྦཾ ཨཝུཏྟམྤཱིཏི ཨདྷིཔྤཱཡོ. ཨཐ ཝཱ ཏསྨིཾ ཏསྨིཾ ཐེརཝཱདེ ཡེན ཨདྷིཔྤཱཡེན སསངྑཱརཱསངྑཱརཝིདྷཱནཱདི ཝུཏྟཾ, ཏཾ ཏེནེཝ ཨདྷིཔྤཱཡེན ཡུཏྟཾ གཧེཏབྦཾ, ན ཨདྷིཔྤཱཡནྟརཾ ཨདྷིཔྤཱཡནྟརེན ཨཱལོལེ༹ཏབྦནྟི ཨཏྠོ. ཧེཏུསདིསམེཝཱཏི ཛནཀཀམྨཧེཏུསདིསམེཝ. མཧཱཔཀརཎེ ཨཱཝི བྷཝིསྶཏཱིཏི མཧཱཔཀརཎེ ཨཱགཏཔཱལི༹ཡཱ པཱཀཊཾ ཨུཔྤཏྟིཝིདྷཱནཾ ཨཱཝི བྷཝིསྶཏཱིཏི ཨདྷིཔྤཱཡེན ཝདཏི.

ཀཱམཱཝཙརཀུསལཝིཔཱཀཀཐཱཝཎྞནཱ ནིཊྛིཏཱ.

རཱུཔཱཝཙརཱརཱུཔཱཝཙརཝིཔཱཀཀཐཱཝཎྞནཱ

༤༩༩. ཨནནྟརཱཡེནཱཏི པརིཧཱནིཔཙྩཡཝིརཧེན. པཊིཔདཱདིབྷེདོཏི པཊིཔདཱརམྨཎབྷེདོ. ཏཐཱ ཧི དུཀྑཔཊིཔདཾ དནྡྷཱབྷིཉྙཾ ཛྷཱནཾ ཨུཔྤཱདེཏྭཱ པུནཔྤུནཾ སམཱཔཛྫནྟསྶ ཏཾ ཛྷཱནཾ ཏཾཔཊིཔདམེཝ ཧོཏི. ཨེཏསྨིཾ ཨཔརིཧཱིནེ ཏསྶ ཝིཔཱཀོ ནིབྦཏྟམཱནོ ཏཔྤཊིཔདོཝ བྷཝིཏུཾ ཨརཧཏཱིཏི. ཚནྡཱདྷིཔཏེཡྻཱདིབྷཱཝོ པན ཏསྨིཾ ཁཎེ ཝིཛྫམཱནཱནཾ ཚནྡཱདཱིནཾ ཨདྷིཔཏིཔཙྩཡབྷཱཝེན ཧོཏི, ན ཨཱགམནཝསེན. ཏཐཱ ཧི ཨེཀམེཝ ¶ ཛྷཱནཾ ནཱནཱཀྑཎེསུ ནཱནཱདྷིཔཏེཡྻཾ ཧོཏི. ཙཏུཏྠཛ྄ཛྷཱནསྶེཝ ཧི ཙཏུརིདྡྷིཔཱདབྷཱཝེན བྷཱཝནཱ ཧོཏི, ཏསྨཱ ཝིཔཱཀསྶ ཨཱགམནཝསེན ཚནྡཱདྷིཔཏེཡྻཱདིཏཱ ན ཝུཏྟཱ.

རཱུཔཱཝཙརཱརཱུཔཱཝཙརཝིཔཱཀཀཐཱཝཎྞནཱ ནིཊྛིཏཱ.

ལོཀུཏྟརཝིཔཱཀཀཐཱཝཎྞནཱ

༥༠༥. ཡཐཱ ཝཊྚཾ ཨཱཙིནཏི, ཏཐཱ ཏཎྷཱདཱིཧི ཨབྷིསངྑཏཾ ལོཀིཡཀམྨཾ ཨུཔཙིཏནྟི ཝུཙྩཏི ¶ . ལོཀུཏྟརཾ པན ཨེཝཾ ན ཧོཏཱིཏི ཏཐཱ ན ཝུཏྟཾ. སུདྡྷཱགམནཝསེནཱཏི ཨནིམིཏྟཱཔྤཎིཧིཏནཱམདཱཡཀེཧི སགུཎཱརམྨཎེཧི ཝིཛྫམཱནེཧིཔི ཕལསྶ སུཉྙཏནཱམདཱནདཱིཔནེ ཨགྒཧིཏབྷཱཝེནེཝ ཨཝོམིསྶེནཱཏི ཨཏྠོ. ཨཱགམནཏོ སུཉྙཏཱཔྤཎིཧིཏནཱམཝཏོ མགྒསྶ ཨཱགམནཱིཡཊྛཱནེ ཋཏྭཱ ཨཏྟནོ ཕལསྶ ནཱམཏྟཡདཱནཾ ཡོཛིཏཾ, ཨིཏརསྶཔི པན ཏཐེཝ ཡོཛེཏབྦཾ. ནཡམཏྟདསྶནཉྷེཏཾ. སགུཎཱརམྨཎེཧི པན ནཱམཏྟཡཝཏོ ཨནིཙྩཱནུཔསྶནཱནནྟརསྶཔི མགྒསྶ ཨཱགམནཱིཡཊྛཱནེ ཋཏྭཱ ཨཏྟནོ ཕལསྶ ནཱམཏྟཡདཱནཾ ན ནིཝཱརིཏནྟི. ཝལ༹ཉྫནཀཕལསམཱཔཏྟིཡཱ ཙ ཝིཔསྶནཱགམནཝསེན ནཱམལཱབྷེ མགྒསྶ ཝིཡ ཨནིམིཏྟནཱམལཱབྷོ ན སིཡཱ. ཡཐཱ པན མགྒཱནནྟརསྶ ཝིཡ ཝལ༹ཉྫནཀཕལསམཱཔཏྟིཡཱཔི ཛྷཱནཔཊིཔདཱབྷེདོ ཧོཏི, ཨེཝཾ སུཉྙཏཱདིནཱམལཱབྷེ སཏི ཨནིམིཏྟནཱམཉྩ ལབྷཏཱིཏི. ཨཝཱུཔསནྟཱཡཱཏི ཨིདཾ ཀེནཙི ཨཉྙེན ཨནནྟརིཏཏྟཱ ཏཱདིསཱཡ ཨེཝ སདྡྷཱཡ…པེ… པཉྙཱཡ ཙ ཨནནྟརཔཙྩཡབྷཱཝཾ སནྡྷཱཡ ཝུཏྟཾ. ཏེན ཚནྡཱདཡོཔི ཨཏྟནོ ཨནནྟརསདིསཱནཾ ཚནྡཱདཱིནཾ ཨུཔྤཱདཀཱ ཨདྷིཔཏིབྷཱུཏཱ ཨདྷིཔཏིབྷཱུཏེ ཨེཝ ཨུཔྤཱདེནྟཱིཏི ཨིམམཏྠཾ དཱིཔེཏི.

༥༥༥. ཀིལེསསམུཙྪེདཀསྶ མགྒསྶ སམྨཱདིཊྛིཨཱདིཀསྶ ནིཡྻཱནིཀསབྷཱཝསྶ ཕལེནཔི པཊིཔྤསྶདྡྷཀིལེསེན ནིཡྻཱནསབྷཱཝེནེཝ བྷཝིཏབྦཾ, ཏསྨཱ ཕལེཔི ‘‘མགྒངྒཾ མགྒཔརིཡཱཔནྣ’’ནྟི ཝུཏྟཾ. ཨེཝཉྩ ཀཏྭཱ མགྒཝིབྷངྒེ ཕལེསུ ཙ ཨཊྛངྒིཀོ པཉྩངྒིཀོ ཙ མགྒོ ཨུདྡྷཊོ, ཨེཝཾ བོཛ྄ཛྷངྒཱཔཱིཏི. མགྒཾ ཨུཔཱདཱཡཱཏི མགྒསདིསཏཱཡ མགྒོཏི ཨིམམཏྠཾ སནྡྷཱཡཱཧ.

ལོཀུཏྟརཝིཔཱཀཀཐཱཝཎྞནཱ ནིཊྛིཏཱ.

ཨཀུསལཝིཔཱཀཀཐཱཝཎྞནཱ

༥༥༦. ཨིཊྛཨིཊྛམཛ྄ཛྷཏྟེསུ ¶ ཝིཡ ན ཨནིཊྛཨནིཊྛམཛ྄ཛྷཏྟེསུ སནྟཱིརཎཝིསེསོ ཨཏྠི, ཨནིཊྛཱརམྨཎམེཝ པན ཨདྷིམཏྟཾ མནྡཉྩ ཨེཝཾ དྭིདྷཱ ཝུཏྟཾ.

ཨཀུསལཝིཔཱཀཀཐཱཝཎྞནཱ ནིཊྛིཏཱ.

ཀིརིཡཱབྱཱཀཏཾ

མནོདྷཱཏུཙིཏྟཝཎྞནཱ

༥༦༦. ཝཱཏཔུཔྥནྟི ¶ མོགྷཔུཔྥཾ. ཏཾ ཨཙྪིནྣེཔི རུཀྑེ ན ཕལཏི, ཚིནྣརུཀྑཔུཔྥཾ པན ཨཙྪིནྣེ ཕལེཡྻ. ཨེཝཾ ཨཙྪིནྣབྷཝམཱུལསྶཔི པཝཏྟམཱནཾ ཡཾ ན ཕལཏི, ཏཾ ཝཱཏཔུཔྥསདིསཾ. ཨིཏརསྶེཝ པན པཝཏྟམཱནཾ ཚིནྣརུཀྑཔུཔྥསདིསཾ. ཏཉྷི ཨཙྪིནྣེ བྷཝམཱུལེ ཕལེཡྻཱཏི.

ཀིརིཡམནོཝིཉྙཱཎདྷཱཏུཙིཏྟཝཎྞནཱ

༥༦༨. ལོལུཔྤཏཎྷཱ པཧཱིནཱཏི ཨིམསྶ ཙིཏྟསྶ པཙྩཡབྷཱུཏཱ པུརིམཱ པཝཏྟི དསྶིཏཱ. ཨིདཾ པན ཙིཏྟཾ ཝིཙཱརཎཔཉྙཱརཧིཏནྟི ཀེཝལཾ སོམནསྶམཏྟཾ ཨུཔྤཱདེནྟསྶ ཧོཏཱིཏི. ཨེཝཾ ཙེཏིཡཔཱུཛཱདཱིསུཔི དཊྛབྦཾ. ཝཏྟཾ ཀརོནྟོཏི ཨིདཾ ཝཏྟཾ ཀརོནྟསྶ ཕོཊྛབྦཱརམྨཎེ ཀཱཡདྭཱརཙིཏྟཔྤཝཏྟིཾ སནྡྷཱཡ ཝུཏྟཾ. པཉྩདྭཱརཱནུགཏཾ ཧུཏྭཱ ལབྦྷམཱནཾ སནྡྷཱཡ པཉྩདྭཱརེ ཨེཝ ཝཱ ལོལུཔྤཏཎྷཱཔཧཱནཱདིཔཙྩཝེཀྑཎཧེཏུབྷཱུཏཾ ཨིདམེཝ པཝཏྟིཾ སནྡྷཱཡ ཏཏྠ ཏཏྠ ‘‘ཨིམིནཱ ཙིཏྟེན སོམནསྶིཏོ ཧོཏཱི’’ཏི ཝུཏྟནྟི ‘‘ཨེཝཾ ཏཱཝ པཉྩདྭཱརེ ལབྦྷཏཱི’’ཏི ཨཱཧ. ཨཏཱིཏཾསཱདཱིསུ ཨཔྤཊིཧཏཾ ཉཱཎཾ ཝཏྭཱ ‘‘ཨིམེཧི ཏཱིཧི དྷམྨེཧི སམནྣཱགཏསྶ བུདྡྷསྶ བྷགཝཏོ སབྦཾ ཀཱཡཀམྨཾ ཉཱཎཱནུཔརིཝཏྟཱི’’ཏིཨཱདིཝཙནཏོ (མཧཱནི. ༡༥༦ ཨཏྠཏོ སམཱནཾ) ‘‘བྷགཝཏོ ཨིདཾ ཨུཔྤཛྫཏཱི’’ཏི ཝུཏྟཝཙནཾ ཝིཙཱརེཏབྦཾ. ཨཧེཏུཀསྶ མཱུལཱབྷཱཝེན སུཔྤཏིཊྛིཏཏཱ ནཏྠཱིཏི བལབྷཱཝོ ཨཔརིཔུཎྞོ, ཏསྨཱ ཨུདྡེསཝཱརེ ‘‘སམཱདྷིབལཾ ཧོཏི, ཝཱིརིཡབལཾ ཧོཏཱི’’ཏི ན ཝུཏྟཾ. ཏཏོ ཨེཝ ཧི ཨཧེཏུཀཱནཾ སངྒཧཝཱརེ ཛྷཱནངྒཱནི ཙ ན ཨུདྡྷཊཱནི. ཏེནེཝ ཨིམསྨིམྤི ཨཧེཏུཀདྭཡེ བལཱནི ཨནུདྡེསཱསངྒཧིཏཱནི. ཡསྨཱ པན ཝཱིརིཡསྶ ཝིཛྫམཱནཏྟཱ སེསཱཧེཏུཀེཧི ¶ བལཝཾ, ཡསྨཱ ཙ ཨེཏྠ ཝིཏཀྐཱདཱིནཾ ཛྷཱནཔཙྩཡམཏྟཏཱ ཝིཡ སམཱདྷིཝཱིརིཡཱནཾ བལམཏྟཏཱ ཨཏྠི, ཏསྨཱ ནིདྡེསཝཱརེ ‘‘སམཱདྷིབལཾ ཝཱིརིཡབལ’’ནྟི ཝཏྭཱ ཋཔིཏཾ. ཡསྨཱ པན ནེཝ ཀུསལཾ ནཱཀུསལཾ, ཏསྨཱ སམྨཱསམཱདྷི མིཙྪཱསམཱདྷཱིཏི, སམྨཱཝཱཡཱམོ མིཙྪཱཝཱཡཱམོཏི ཙ ན ཝུཏྟནྟི ཨདྷིཔྤཱཡོ. ཨེཝཾ སཏི མཧཱཀིརིཡཙིཏྟེསུ ཙ ཨེཏཾ ན ཝཏྟབྦཾ སིཡཱ, ཝུཏྟཉྩ, ཏསྨཱ སམྨཱ, མིཙྪཱ ཝཱ ནིཡྻཱནིཀསབྷཱཝཱབྷཱཝཏོ མགྒཔཙྩཡབྷཱཝཾ ཨཔྤཏྟཱ སམཱདྷིཝཱཡཱམཱ ཨིདྷ ཏཐཱ ན ཝུཏྟཱཏི དཊྛབྦཱ.

༥༧༤. ཨིནྡྲིཡཔརོཔརིཡཏྟཨཱསཡཱནུསཡསབྦཉྙུཏཱནཱཝརཎཉཱཎཱནི ¶ ཨིམསྶཱནནྟརཾ ཨུཔྤཛྫམཱནཱནི ཡམཀཔཱཊིཧཱརིཡམཧཱཀརུཎཱསམཱཔཏྟིཉཱཎཱནི ཙ ཨིམསྶ ཨནནྟརཾ ཨུཔྤནྣཔརིཀམྨཱནནྟརཱནི ཨིམིནཱ ཨཱཝཛྫིཏཱརམྨཎེཡེཝ པཝཏྟནྟཱིཏི ཨཱཧ ‘‘ཚ…པེ… གཎྷནྟཱི’’ཏི. མཧཱཝིསཡཏྟཱ མཧཱགཛོ ཝིཡ མཧནྟནྟི མཧཱགཛཾ.

རཱུཔཱཝཙརཱརཱུཔཱཝཙརཀིརིཡཙིཏྟཝཎྞནཱ

༥༧༧. ཨིདཱནི ཡཱནི ཀིརིཡཱནི ཛཱཏཱནི, ཏཱནི ཝེདིཏབྦཱནཱིཏི ཨེཝཾ ཡོཛནཱ ཀཱཏབྦཱ. ཨཏྟབྷཱཝོཏི པཉྩཀྑནྡྷཱ ཝུཙྩནྟི.

ཙིཏྟུཔྤཱདཀཎྜཝཎྞནཱ ནིཊྛིཏཱ.

༢. རཱུཔཀཎྜཾ

ཨུདྡེསཝཎྞནཱ

ཨིདཱནི ¶ ¶ རཱུཔམབྱཱཀཏཾ བྷཱཛེཏབྦཾ, ཏཉྩ ཀེནཙི སམཡཝཝཏྠཱནཾ ཀཏྭཱ ན སཀྐཱ བྷཱཛེཏུཾ. ན ཧི རཱུཔསྶ ཙིཏྟུཔྤཱདེན སམཡཝཝཏྠཱནཾ སཀྐཱ ཀཱཏུཾ ཨཙིཏྟསམུཊྛཱནསབྦྷཱཝཏོ, ཙིཏྟསམུཊྛཱནསྶ ཙ ཨནེཀཙིཏྟསམུཊྛཱནཏཱཡ རཱུཔསམུཊྛཱཔཀཙིཏྟཱནཉྩ ཀེསཉྩི ཀཏྠཙི ཨསམུཊྛཱཔནཏཱཡ ཝཝཏྠཱནཱབྷཱཝཏོ, ཝིཉྙཏྟིདྭཡཝཛྫིཏསྶ རཱུཔསྶ ཨཙིཏྟསཧབྷུབྷཱཝཏོ ཙ, ན ཙ རཱུཔཱནཾ ཨུཔསམྤཛྫ ཝིཧརཎེན སམཡཝཝཏྠཱནཾ ཡུཛྫཏི མཧགྒཏཔྤམཱཎཱནཾ ཛྷཱནཱནཾ ཝིཡ རཱུཔཱནཾ ཨུཔསམྤཛྫ ཝིཧཱཏབྦཏཱབྷཱཝཱ, ཨུཔཱདཱརཱུཔེཧི ཙ ན ཡུཛྫཏི ཏེསཾ སཧཛཱཏཱདིཔཙྩཡབྷཱཝེན ཨཔྤཝཏྟནཏོ, ནཱཔི མཧཱབྷཱུཏེཧི ཡུཛྫཏི ཀེསཉྩི མཧཱབྷཱུཏཱནཾ ཀེཧིཙི ཨུཔཱདཱརཱུཔེཧི ཝིནཱ པཝཏྟིཏོ ཨསམཱནཀཱལཱནཉྩ སབྦྷཱཝཏོ. ན ཧི ‘‘ཡསྨིཾ སམཡེ པཐཝཱིདྷཱཏུ ཨུཔྤནྣཱ ཧོཏི, ཏསྨིཾ སམཡེ ཙཀྑཱཡཏནཾ ཧོཏཱི’’ཏི སཀྐཱ ཝཏྟུཾ སོཏཱདིནིསྶཡབྷཱུཏཱཡ པཐཝིཡཱ ཙིཏྟཱདིསམུཊྛཱནཱཡ ཙ སཧ ཙཀྑཱཡཏནསྶ ཨབྷཱཝཱ. ཨེཝཾ སོཏཱཡཏནཱདཱིསུཔི ཡོཛེཏབྦཾ.

མཧཱབྷཱུཏེཧི ཨསམཱནཀཱལཱནི ཝིཉྙཏྟིཨུཔཙཡཱདཱིནིཔི ཏསྨིཾ སམཡེ ཧོནྟཱིཏི ན སཀྐཱ ཝཏྟུནྟི. ཨེཀསྨིཉྩ ཀཱལེ ཨནེཀཱནི ཀལཱཔསཧསྶཱནི ཨུཔྤཛྫནྟི པཝཏྟནྟི ཙ, ན ཨརཱུཔདྷམྨཱནཾ ཝིཡ རཱུཔཱནཾ ཀལཱཔདྭཡསཧཱབྷཱཝོ ཨཏྠི. ཨེཀསྨིཉྩ ཀལཱཔེ ཝཏྟམཱནེ ཨེཝ ཨཉྙསྶ ནིརོདྷོ, ཨཉྙསྶ ཙུཔྤཏྟི ཧོཏཱིཏི སབྦཐཱ རཱུཔཱབྱཱཀཏཾ སམཡཝཝཏྠཱནཾ ཀཏྭཱ ན སཀྐཱ ཝིབྷཛིཏུཾ. ཨེཀཀཱདཱིཧི པན ནཡེཧི ན ཧེཏུཨཱདིནཱ སབྷཱཝེན ཝིབྷཛིཏུཾ སཀྐཱཏི ཏཐཱ ཝིབྷཛནཏྠཾ ཙིཏྟུཔྤཱདཀཎྜེ ཏཱཝ ཨཝིབྷཏྟཾ ཨབྱཱཀཏཾ ཨཏྠཱིཏི དསྶེཏུཾ སམཡཝཝཏྠཱནེན ཝིནཱ ཨབྱཱཀཏསྶ སབྷཱཝཏོཡེཝ ནིདྡེསེ ཨེཀདེསཾ ནིདྡིསིཏྭཱ ནིགམནཀརཎསྶ ཨནུཔཔཏྟིཏོ ཙ ¶ ཝིབྷཏྟཉྩ ཨཝིབྷཏྟཉྩ སབྦཾ སངྒཎྷནྟོ ཨཱཧ ‘‘ཀཏམེ དྷམྨཱ ཨབྱཱཀཏཱ? ཀུསལཱ…པེ… ཨསངྑཏཱ ཙ དྷཱཏུ. ཨིམེ དྷམྨཱ ཨབྱཱཀཏཱ’’ཏི. ཨཝིབྷཏྟེ ཧི ཝིབྷཛིཏབྦེ དསྶིཏེ ཝིབྷཛནཾ ཡུཏྟཾ ཉཱཏུཾ ཨིཙྪཱཡ ཨུཔྤཱདིཏཱཡཱཏི. ཨེཏྠ པན ཝིཔཱཀཀིརིཡཱབྱཱཀཏཾ ཝིབྷཏྟཏྟཱ ¶ ན ཝིབྷཛིཏབྦཾ, ཨསངྑཏཱ ཙ དྷཱཏུ བྷེདཱབྷཱཝཏོ. ཡཾ པནེཏྠ བྷེདཡུཏྟཏྟཱ ཨཝིབྷཏྟཏྟཱ ཙ ཝིབྷཛིཏབྦཾ, ཏཾ ཝིབྷཛནྟོ ཨཱཧ ‘‘ཏཏྠ ཀཏམཾ སབྦཾ རཱུཔ’’ནྟིཨཱདི. ཨཡམེཏྠ པཱལི༹ཡོཛནཱ.

ནཡཾ དསྶེཏྭཱཏི ཨེཏྠ ཧེཊྛཱ གཧཎམེཝ ནཡདསྶནཾ. ཏཾ ཝིཔཱཀེསུ ཀཏྭཱ ཝིཉྙཱཏཏྟཱ ཀིརིཡཱབྱཱཀཏེསུ ནིསྶཊྛཾ. ཀཱམཱཝཙརཱདིབྷཱཝེན ཝཏྟབྦསྶ ཀིརིཡཱབྱཱཀཏསྶ ཝཱ དསྶནཾ, ཏཾ ཀཏྭཱ ཀཱམཱཝཙརཱཏིཨཱདིཀཾ གཧེཏྭཱ ཝུཏྟཏྟཱ ནིསྶཊྛཾ. པཉྩཝཱིསཏི རཱུཔཱནཱིཏི པཱལི༹ཡཾ ཝུཏྟཱནི དསཱཡཏནཱནི པཉྩདས ཙ སུཁུམརཱུཔཱནི, ཨུཔཙཡསནྟཏིཡོ ཝཱ ཨེཀནྟི ཀཏྭཱ ཧདཡཝཏྠུཉྩ. ཚནྣཝུཏཱིཏི ཙཀྑཱདིདསཀཱ སཏྟ ཨུཏུསམུཊྛཱནཱདཡོ ཏཡོ ཨཊྛཀཱ ཨུཏུཙིཏྟཛཱ དྭེ སདྡཱ ཙ. ཀལཱཔབྷཱཝེན པཝཏྟརཱུཔརཱུཔཱནི ‘‘རཱུཔཀོཊྛཱསཱ’’ཏི ཝུཏྟཱནི རཱུཔཀལཱཔཀོཊྛཱསབྷཱཝཏོ. ཀོཊྛཱསཱཏི ཙ ཨཾསཱ, ཨཝཡཝཱཏི ཨཏྠོ. ཀོཊྛནྟི ཝཱ སརཱིརཾ, ཏསྶ ཨཾསཱ ཀེསཱདཡོ ཀོཊྛཱསཱཏི ཨཉྙེཔི ཨཝཡཝཱ ཀོཊྛཱསཱ ཝིཡ ཀོཊྛཱསཱ. ནིབྦཱནཾ ནིཔྤདེསཏོ གཧིཏནྟི སོཔཱདིསེསནིརུཔཱདིསེསརཱགཀྑཡཱདིཨསངྑཏཱདིཝཙནཱིཡབྷཱཝེན བྷིནྣཾ ནིཔྤདེསཏོ གཧིཏཾ. ཨཏྠཏོ ཧི ཨེཀཱཝ ཨསངྑཏཱ དྷཱཏཱུཏི.

༥༨༤. སབྦནྟི སཀལཾ ཙཀྐཝཱལ༹ཾ. པརིམཎྜལཾ པརིམཎྜལསཎྛཱནཾ, པརིཀྑེཔཏོ ཚཏྟིཾས སཏསཧསྶཱནི དས ཙེཝ སཧསྶཱནི ཨཌྜྷཙཏུཏྠཱནི ཙ ཡོཛནསཏཱནི ཧོནྟཱིཏི ཨཏྠོ. ཨེཏྠ ཙ ཝཊྚཾ ‘‘པརིམཎྜལ’’ནྟི ཝུཏྟཾ. ཙཏྟཱརི ནཧུཏཱནཱིཏི ཙཏྟཱལཱིས སཧསྶཱནི. ནགཝ྄ཧཡཱཏི ནགཱཏི ཨཝ྄ཧཱཏབྦཱ ནགསདྡནཱམཱཏི ཨཏྠོ.

དེཝདཱནཝཱདཱིནཾ ཏིགཱཝུཏཱདིསརཱིརཝསེན མཧནྟཱནི པཱཏུབྷཱུཏཱནི. ཏཏྠཱཡཾ ཝཙནཏྠོ – བྷཱུཏཱནི ཛཱཏཱནི ནིབྦཏྟཱནི མཧནྟཱནི མཧཱབྷཱུཏཱནཱིཏི. ཨནེཀཙྪརིཡདསྶནེན ཨནེཀཱབྷཱུཏཝིསེསདསྶནཝསེན ཙ མཱཡཱཀཱརོ མཧནྟོ བྷཱུཏོཏི མཧཱབྷཱུཏོ. ཡཀྑཱདཡོ ཛཱཏིཝསེནེཝ མཧནྟཱ བྷཱུཏཱཏི མཧཱབྷཱུཏཱ. ནིརུལ༹ྷོ ཝཱ ཨཡཾ མཧཱབྷཱུཏསདྡོ ཏེསུ དཊྛབྦོ. པཐཝིཡཱདཡོ པན མཧཱབྷཱུཏཱ ཝིཡ མཧཱབྷཱུཏཱ. བྷཱུཏསདྡསྶ ཨུབྷཡལིངྒཏྟཱ ནཔུཾསཀཏཱ ཀཏཱ. མཧཱཔརིཧཱརཏོཏི ¶ ཨེཏྠ ཝཙནཏྠཾ ཝདནྟོ ཨཱཧ ‘‘མཧནྟེཧི བྷཱུཏཱནི, མཧཱཔརིཧཱརཱནི ¶ ཝཱ བྷཱུཏཱནཱི’’ཏི. ཏཏྠ པཙྪིམཏྠེ པུརིམཔདེ ཨུཏྟརཔདསྶ པརིཧཱརསདྡསྶ ལོཔཾ ཀཏྭཱ ‘‘མཧཱབྷཱུཏཱནཱི’’ཏི ཝུཙྩནྟི.

ཨཙྩིམཏོཏི ཨགྒིསྶ. ཀོཊིསཏསཧསྶཾ ཨེཀཾ ཀོཊིསཏསཧསྶེཀཾ. ཙཀྐཝཱལ༹ནྟི ཏཾ སབྦཾ ཨཱཎཱཀྑེཏྟཝསེན ཨེཀཾ ཀཏྭཱ ཝོཧརནྟི. ཝིལཱིཡཏི ཁཱརོདཀེན. ཝིཀཱིརཏཱིཏི ཝིདྡྷཾསཏི. ཨུཔཱདིནྣཀེསུ ཝིཀཱརཾ དསྶེནྟོ ‘‘པཏྠདྡྷོ’’ཏིཨཱདིམཱཧ. ཀཊྛམུཁེན ཝཱཏི ཝཱ-སདྡོ ཨུཔམཏྠོ. ཡཐཱ ཀཊྛམུཁསཔྤེན དཊྛོ པཏྠདྡྷོ ཧོཏི, ཨེཝཾ པཐཝཱིདྷཱཏུཔྤཀོཔེན སོ ཀཱཡོ ཀཊྛམུཁེཝ ཧོཏི, ཀཊྛམུཁམུཁགཏོ ཝིཡ པཏྠདྡྷོ ཧོཏཱིཏི ཨཏྠོ. ཨཐ ཝཱ ཝཱ-སདྡོ ཨེཝསདྡསྶཏྠེ. ‘‘པཐཝཱིདྷཱཏུཔྤཀོཔེནཱ’’ཏི ཨེཏསྶ ཙ པརཏོ ཨཱཧརིཏྭཱ ཝེདིཏབྦོ. ཏཏྲཱཡམཏྠོ – ‘‘ཀཊྛམུཁེན དཊྛོཔི ཀཱཡོ པཐཝཱིདྷཱཏུཔྤཀོཔེནེཝ པཏྠདྡྷོ ཧོཏི, ཏསྨཱ པཐཝཱིདྷཱཏུཡཱ ཨཝིཡུཏྟོ སོ ཀཱཡོ སབྦདཱ ཀཊྛམུཁམུཁགཏོ ཝིཡ ཧོཏཱི’’ཏི. ཨཐ ཝཱ ཨནིཡམཏྠོ ཝཱ-སདྡོ. ཏཏྲཱཡམཏྠོ – ‘‘ཀཊྛམུཁེན དཊྛོ ཀཱཡོ པཏྠདྡྷོ ཧོཏི ཝཱ ན ཝཱ ཧོཏི མནྟཱགདཝསེན, པཐཝཱིདྷཱཏུཔྤཀོཔེན པན མནྟཱགདརཧིཏོ སོ ཀཱཡོ ཀཊྛམུཁམུཁགཏོ ཝིཡ ཧོཏི ཨེཀནྟཔཏྠདྡྷོ’’ཏི. པཱུཏིཡོཏི ཀུཐིཏོ. མཧཱཝིཀཱརཱནི བྷཱུཏཱནཱིཏི མཧཱཝིཀཱརཱནི ཛཱཏཱནི, ཝིཛྫམཱནཱནཱིཏི ཝཱ ཨཏྠོ. ཨེཏྠ ཙ པུརིམཔདེ ཨུཏྟརཔདསྶ ཝིཀཱརསདྡསྶ ལོཔཾ ཀཏྭཱ ‘‘མཧཱབྷཱུཏཱནཱི’’ཏི ཝུཏྟཱནི.

པཐཝཱིཏིཨཱདིནཱ སབྦལོཀསྶ པཱཀཊཱནིཔི ཝིཔལླཱསཾ མུཉྩིཏྭཱ ཡཐཱསབྷཱཝཏོ པརིགྒཡ྄ཧམཱནཱནི མཧནྟེན ཝཱཡཱམེན ཝིནཱ ན པརིགྒཡ྄ཧནྟཱིཏི པཱཀཊཱནིཔི དུཝིཉྙེཡྻསབྷཱཝཏྟཱ ‘‘མཧནྟཱནཱི’’ཏི ཝུཙྩནྟི. ཏཱནི ཧི སུཝིཉྙེཡྻཱནི ཨམཧནྟཱནཱིཏི གཧེཏྭཱ ཋིཏོ ཏེསཾ དུཔྤརིགྒཧིཏཏཾ དིསྭཱ ‘‘ཨཧོ མཧནྟཱནི ཨེཏཱནཱི’’ཏི པཛཱནཱཏི. ཨུཔཱདཱཡཱཏི ཨེཏེན ཝིཉྙཱཡམཱནཱ པཙྪིམཀཱལཀིརིཡཱ པཝཏྟཱིཏི ཀཏྭཱ ‘‘པཝཏྟརཱུཔ’’ནྟི ཝུཏྟཾ. ཨེཝཉྷི ‘‘ཨུཔཱདཱཡཱ’’ཏི ཨེཏེན པཊིཙྩསམུཔྤནྣཏཱ ཝུཏྟཱ ཧོཏཱིཏི. ཨཐ ཝཱ ཨུཔཱདཱཡཏི ནིསྶཡཏཱིཏི ཨུཔཱདཱཡཾ, ཨུཔཱདཱཡམེཝ རཱུཔཾ ཨུཔཱདཱཡརཱུཔཾ, ཨཉྙནིསྶཡསྶ ཨེཀནྟནིསྶིཏསྶ རཱུཔསྶེཏཾ ཨདྷིཝཙནཾ. ཏཾ པན ན སཏྟསྶ, ནཱཔི ཝེདནཱདིནོ ཏདབྷཱཝེཔི བྷཱཝཏོཏི དསྶེཏུཾ ‘‘ཙཏུནྣཾ མཧཱབྷཱུཏཱན’’ནྟིཨཱདིམཱཧ. བྷཝཏི ཧི ནིསྶཡརཱུཔཱནཾ སཱམིབྷཱཝོཏི.

ཏིཝིདྷརཱུཔསངྒཧཝཎྞནཱ

༥༨༥. པཀིཎྞཀདུཀེསུ ¶ ¶ ཨཛ྄ཛྷཏྟིཀདུཀཾ མུཉྩིཏྭཱ ཨཉྙོ སབྦདུཀེཧི ཏིཀཝསེན ཡོཛནཾ གཙྪནྟོ ནཏྠི, ཝིཉྙཏྟིདུཀོ ཙ ཡོཛནཾ ན གཙྪཏཱིཏི སབྦདུཀཡོགཱིསུ ཨཱདིབྷཱུཏཾ ཨཛ྄ཛྷཏྟིཀདུཀམེཝ གཧེཏྭཱ སེསེཧི སབྦདུཀེཧི ཡོཛེཏྭཱ ཏིཀཱ ཝུཏྟཱ. སཀྐཱ ཧི ཨེཏེན ནཡེན ཨཉྙེསམྤི དུཀཱནཾ དུཀནྟརེཧི ལབྦྷམཱནཱ ཏིཀཡོཛནཱ ཝིཉྙཱཏུནྟི.

ཙཏུབྦིདྷཱདིརཱུཔསངྒཧཝཎྞནཱ

༥༨༦. ཙཏུཀྐེསུ ཨེཀནྟཙིཏྟསམུཊྛཱནསྶ ཝིཉྙཏྟིདྭཡབྷཱཝཏོ ཝིཉྙཏྟིདུཀཱདཱིཧི སམཱནགཏིཀོ ཙིཏྟསམུཊྛཱནདུཀོཏི ཏེན སཧ ཨུཔཱདཱདུཀསྶ ཡོཛནཱཡ ལབྦྷམཱནོཔི ཙཏུཀྐོ ན ཝུཏྟོ, ཏཐཱ སནིདསྶནདུཀཱདཱིནཾ ཏེན ཏསྶ ཙ ཨོལཱ༹རིཀདཱུརདུཀེཧི ཡོཛནཱཡ ལབྦྷམཱནཱ ན ཝུཏྟཱ, དྷམྨཱནཾ ཝཱ སབྷཱཝཀིཙྩཱནི བོདྷེཏབྦཱཀཱརཉྩ ཡཱཐཱཝཏོ ཛཱནནྟེན བྷགཝཏཱ ཏེན ཨཉྙེསཾ ཏསྶ ཙ ཨཉྙེཧི ཡོཛནཱ ན ཀཏཱཏི ཀིཾ ཨེཏྠ ཀཱརཎཔརིཡེསནཱཡ, ཨདྡྷཱ སཱ ཡོཛནཱ ན ཀཱཏབྦཱ, ཡཏོ བྷགཝཏཱ ན ཀཏཱཏི ཝེདིཏབྦཱ. ཨཉྙེ པན པཀིཎྞཀདུཀཱ ཨཉྙེཧི པཀིཎྞཀདུཀེཧི ཡོཛེཏུཾ ཡུཏྟཱ, ཏེཧི ཡོཛིཏཱ ཨེཝ. ཝཏྠུདུཀཱདཱིསུ པན སོཏསམྥསྶཱརམྨཎདུཀཱདཡོ ཝཛྫེཏྭཱ ཨཉྙེཧི ཨཱརམྨཎབཱཧིརཱཡཏནཱདིལབྦྷམཱནདུཀེཧི ཨུཔཱདིནྣཀདུཀསྶ ཨུཔཱདིནྣུཔཱདཱནིཡདུཀསྶ ཙ ཡོཛནཱཡ ཙཏུཀྐཱ ལབྦྷནྟི, ཙིཏྟསམུཊྛཱནདུཀསྶ ཙ སབྦཱརམྨཎབཱཧིརཱཡཏནཱདིལབྦྷམཱནདུཀེཧི. ཨཝསེསེཧི པན ཏེསཾ ཨཉྙེསཉྩ སབྦཝཏྠུདུཀཱདཱིཧི ཡོཛནཱཡ ན ལབྦྷནྟཱིཏི ཝེདིཏབྦཱ.

ཨུདྡེསཝཎྞནཱ ནིཊྛིཏཱ.

རཱུཔཝིབྷཏྟི

ཨེཀཀནིདྡེསཝཎྞནཱ

༥༩༤. ཨཝིཛྫམཱནཝིབྷཱགསྶ ཝིབྷཱགཱབྷཱཝདསྶནམེཝ ནིདྡེསོ ནིཙྪཡཀརཎཏོ, ཏསྨཱ ‘‘སབྦཾ ¶ རཱུཔཾ ན ཧེཏུམེཝཱ’’ཏིཨཱདིནཱ ཝིབྷཱགཱབྷཱཝཱཝདྷཱརཎེན ¶ ཨེཝ-སདྡེན ནིདྡེསཾ ཀརོཏི. ཧེཏུཧེཏཱུཏི མཱུལཧེཏུ, ཧེཏུཔཙྩཡཧེཏཱུཏི ཝཱ ཨཡམཏྠོ. མཧཱབྷཱུཏཱ ཧེཏཱུཏི ཨཡམེཝཏྠོ མཧཱབྷཱུཏཱ པཙྩཡོཏི ཨེཏེནཔི ཝུཏྟོཏི. ཧེཏུཔཙྩཡསདྡཱནཾ སམཱནཏྠཏྟཱ པཙྩཡོ ཨེཝ ཧེཏུ པཙྩཡཧེཏུ. ཡོ ཙ རཱུཔཀྑནྡྷསྶ ཧེཏུ, སོ ཨེཝ ཏསྶ པཉྙཱཔནཱཡ ཧེཏཱུཏི ཝུཏྟོ ཏདབྷཱཝེ ཨབྷཱཝཏོ. ཨཏཱིཏཱནཱགཏཔཙྩུཔྤནྣཱནཾ ཀམྨསམཱདཱནཱནཾ ཋཱནསོ ཧེཏུསོ ཝིཔཱཀནྟི ཨེཏྠ ཝིཛྫམཱནེསུཔི ཨཉྙེསུ པཙྩཡེསུ ཨིཊྛཱནིཊྛཝིཔཱཀནིཡཱམཀཏྟཱ ཨུཏྟམཾ པདྷཱནཾ ཀུསལཱཀུསལཾ གཏིཨུཔདྷིཀཨཱལཔཡོགསམྤཏྟིཝིཔཏྟིཊྛཱནནིཔྥཱདིཏཾ ཨིཊྛཱནིཊྛཱརམྨཎཉྩ ཀམྨམིཝ པདྷཱནཏྟཱ ‘‘ཧེཏཱུ’’ཏི ཝུཏྟནྟི ཨིམིནཱ ཨདྷིཔྤཱཡེན ཀམྨཱརམྨཎཱནི ‘‘ཨུཏྟམཧེཏཱུ’’ཏི ཝུཏྟཱནི. ཝཀྑཏི ཙ ‘‘གཏིཨུཔདྷིཀཱལཔཡོགཱ ཝིཔཱཀསྶ ཋཱནཾ, ཀམྨཾ ཧེཏཱུ’’ཏི. ཨིདྷ པན ཀམྨམིཝ ཨུཏྟམཏྟཱ ཨཱརམྨཎམྤི ཧེཏུཝཙནཾ ཨརཧཏཱིཏི ‘‘ཨུཏྟམཧེཏཱུ’’ཏི ཝུཏྟཾ. སངྑཱརཱནནྟི པུཉྙཱབྷིསངྑཱརཱདཱིནཾ ཨཝིཛྫཱ སཱདྷཱརཎཔཙྩཡཏྟཱ ‘‘ཧེཏཱུ’’ཏི ཝུཏྟཱ. ཕརཏཱིཏི གཙྪཏི པཱཔུཎཱཏི. པཊིཀྑེཔནིདྡེསོཏི ཨིདཾ མཱཏིཀཱཡ ཨཱགཏཔཊིཀྑེཔཝསེན ཝུཏྟཾ. ཨིདྷ པན མཱཏིཀཱཡ ན ཧེཏུཔདཱདིསངྒཧིཏཏཱ ཙ རཱུཔསྶ ཝུཏྟཱ ཏཾཏཾསབྷཱཝཏྟཱ, ཨཝདྷཱརིཏཏཱ ཙ ཨནཉྙསབྷཱཝཏོ.

རཱུཔཱིདུཀེ རཱུཔཱིཔདམེཝ ཨིདྷ ‘‘རཱུཔ’’ནྟི ཝུཏྟཾ. ཏེན རཱུཔཱིརཱུཔཔདཱནཾ ཨེཀཏྠཏཱ སིདྡྷཱ ཧོཏི རུཔྤནལཀྑཎཡུཏྟསྶེཝ རཱུཔཱིརཱུཔབྷཱཝཏོ. ཨུཔྤནྣཾ ཚཧི ཝིཉྙཱཎེཧི ཝིཉྙེཡྻནྟི ཨརཱུཔཏོ ཝིདྷུརཾ རཱུཔསྶ སབྷཱཝཾ དསྶེཏི. ན ཧི ཨརཱུཔཾ ཨུཔྤནྣཾ ཚཧི ཝིཉྙཱཎེཧི ཝིཉྙེཡྻཾ ཡཐཱ རཱུཔཾ, ཏེན རཱུཔཾ ཨུཔྤནྣཾ ཚཧི ཝིཉྙཱཎེཧི ཝིཉྙེཡྻཾ, ན ཨརཱུཔནྟི ཨརཱུཔཏོ ནིཝཏྟེཏྭཱ རཱུཔེ ཨེཝ ཨེཏཾ སབྷཱཝཾ ནིཡམེཏི, ན རཱུཔཾ ཨེཏསྨིཾ སབྷཱཝེ. ཨཏྠི ཧི རཱུཔཾ ཨཏཱིཏཱནཱགཏཾ ཡཾ ཨུཔྤནྣཾ ཚཧི ཝིཉྙཱཎེཧི ཝིཉྙེཡྻསབྷཱཝཾ ན ཧོཏཱིཏི. ཨེཏམེཝ ཙ ནིཡམཾ པུན ཨེཝསདྡེན ནིཡམེཏི ‘‘ཡཐཱཝུཏྟོ ནིཡམོ རཱུཔེ ཨཏྠི ཨེཝ, ཨརཱུཔེ ཝིཡ ན ནཏྠཱི’’ཏི. ཨཐ ཝཱ སབྦཾ རཱུཔནྟི བྷཱུཏུཔཱདཱཡརཱུཔཾ ཀཱལབྷེདཾ ཨནཱམསིཏྭཱ ‘‘སབྦ’’ནྟི ཝུཏྟཾ, ཏཾ སབྦཾ ཨརཱུཔེཧི སམཱནཝིཉྙེཡྻསབྷཱཝཾ ཨཏཱིཏཱནཱགཏཾ ནིཝཏྟེཏུཾ ཨུཔྤནྣནྟི ཨེཏེན ཝིསེསེཏི, ཏཾ ཨུཔྤནྣཾ སབྦཾ རཱུཔཾ ཚཧི ཝིཉྙཱཎེཧི ཝིཉྙེཡྻམེཝཱཏི ཨཏྠོ.

ནནུ ཨེཝཾ རཱུཔཱཡཏནསྶཔི སོཏཝིཉྙཱཎཱདཱིཧི ཝིཉྙེཡྻཏཱ ཨཱཔཛྫཏཱིཏི? ནཱཔཛྫཏི རཱུཔཾ སབྦཾ སམྤིཎྜེཏྭཱ ཨེཀནྟལཀྑཎདསྶནཝསེན ཨེཀཱིབྷཱཝེན ¶ གཧེཏྭཱ ཨརཱུཔཏོ ཝིདྷུརསྶ ཚཧི ཝིཉྙཱཎེཧི ཝིཉྙེཡྻསབྷཱཝསྶ དསྶནཏོ. པཙྩུཔྤནྣརཱུཔམེཝ ཚཧི ཝིཉྙཱཎེཧི ཝིཉྙེཡྻནྟི ¶ ཨེཏསྨིཾ པན ནིཡམེ ‘‘སབྦཾ རཱུཔ’’ནྟི ཨེཏྠཱཡཾ ཝིཉྙེཡྻབྷཱཝནིཡམོ ན ཝུཏྟོ, ཨཐ ཁོ པཙྩུཔྤནྣནྟི སབྦརཱུཔསྶ ཨེཀནྟལཀྑཎནིཡམོ དསྶིཏོ ན སིཡཱ. པཱལི༹ཡཉྩ ཝིཉྙེཡྻམེཝཱཏི ཨེཝ-ཀཱརོ ཝུཏྟོ, ན ཨུཔྤནྣམེཝཱཏི. ཏསྨཱ ཨུཔྤནྣསྶེཝ མནོཝིཉྙེཡྻནིཡམཱཔཏྟི ནཏྠཱིཏི ཀིཾ སོཏཔཏིཏཏྟེན, ཏསྨཱ ཝུཏྟནཡེནཏྠོ ཡོཛེཏབྦོ.

ཀཐཾཝིདྷནྟི གུཎེཧི ཀཐཾ སཎྛིཏཾ. ཉཱཎམེཝ ཉཱཎཝཏྠུ. སམཱནཛཱཏིཀཱནཾ སངྒཧོ, སམཱནཛཱཏིཡཱ ཝཱ སངྒཧོ སཛཱཏིསངྒཧོ. སཉྫཱཡནྟི ཨེཏྠཱཏི སཉྫཱཏི, སཉྫཱཏིཡཱ སངྒཧོ སཉྫཱཏིསངྒཧོ, སཉྫཱཏིདེསེན སངྒཧོཏི ཨཏྠོ. ཨཉྙམཉྙོཔཀཱརཝསེན ཨཝིཔྤཡོགེན ཙ སམཱདྷིདེསེ ཛཱཏཱ སམྨཱསཏིཨཱདཡོ སམཱདྷིཀྑནྡྷེ སངྒཧིཏཱ. ཡཏྠ ཙ སཏིཨཱདིསཧཱཡཝཏོ སམཱདྷིསྶ ཨཏྟནོ ཀིཙྩཀརཎཾ, སོ ཙིཏྟུཔྤཱདོ སམཱདྷིདེསོ. སམྨཱསངྐཔྤསྶ ཙ ཨཔྤནཱབྷཱཝཏོ པཊིཝེདྷསདིསཾ ཀིཙྩནྟི སམཱནེན པཊིཝེདྷཀིཙྩེན དིཊྛིསངྐཔྤཱ པཉྙཀྑནྡྷེ སངྒཧིཏཱ.

རཱུཔཝིབྷཏྟིཨེཀཀནིདྡེསཝཎྞནཱ ནིཊྛིཏཱ.

དུཀནིདྡེསོ

ཨུཔཱདཱབྷཱཛནཱིཡཀཐཱཝཎྞནཱ

༥༩༦. ཨཔྤརཛཀྑཱདིསཏྟསམཱུཧདསྶནཾ བུདྡྷཙཀྑུ, ཚསུ ཨསཱདྷཱརཎཉཱཎེསུ ཨིནྡྲིཡཔརོཔརིཡཏྟཉཱཎཾ དཊྛབྦཾ. སབྦསངྑཏཱསངྑཏདསྶནཾ སམནྟཙཀྑུ. ‘‘དུཀྑཾ པརིཉྙེཡྻཾ པརིཉྙཱཏ’’ནྟི (སཾ. ནི. ༥.༡༠༨༡; མཧཱཝ. ༡༥) ཨེཝམཱདིནཱ ཨཱཀཱརེན པཝཏྟཾ ཉཱཎདསྶནཾ ཉཱཎཙཀྑུ, ཏམྤི པུརིམདྭཡམིཝ ཀཱམཱཝཙརཾ. ཙཏུསཙྩདྷམྨདསྶནཾ དྷམྨཙཀྑུ. ཨུཔཏྠམྦྷབྷཱུཏཱ ཙཏུསམུཊྛཱནིཀརཱུཔསནྟཏིཡོ སམྦྷཱརཱ. སཧ སམྦྷཱརེཧི སསམྦྷཱརཾ, སམྦྷཱརཝནྟཾ. སམྦྷཝོཏི ཨཱཔོདྷཱཏུམེཝ སམྦྷཝསམྦྷཱུཏམཱཧ. སཎྛཱནནྟི ཝཎྞཱཡཏནམེཝ པརིམཎྜལཱདིསཎྛཱནབྷཱུཏཾ. ཏེསཾ པན ཝིསུཾ ཝཙནཾ ཏཐཱབྷཱུཏཱནཾ ཨཏཐཱབྷཱུཏཱནཉྩ ཨཱཔོདྷཱཏུཝཎྞཱཡཏནཱནཾ ¶ ཡཐཱཝུཏྟེ མཾསཔིཎྜེ ཝིཛྫམཱནཏྟཱ. ཙུདྡསསམྦྷཱརོ ཧི མཾསཔིཎྜོ. སམྦྷཝསྶ ཙཏུདྷཱཏུནིསྶིཏེཧི ¶ སཧ ཝུཏྟསྶ དྷཱཏུཏྟཡནིསྶིཏཏཱ ཡོཛེཏབྦཱ. ཨཱཔོདྷཱཏུཝཎྞཱཡཏནཱནམེཝ ཝཱ སམྦྷཝསཎྛཱནཱབྷཱཝཱ ཝིསུཾ ཝུཏྟཱཏི ཙཏུདྷཱཏུནིསྶིཏཏཱ ཙ ན ཝིརུཛ྄ཛྷཏི. ཡཾ མཾསཔིཎྜཾ སེཏཱདིནཱ སཉྫཱནནྟོ ན པསཱདཙཀྑུཾ སཉྫཱནཱཏི, པཏྠིཎྞཏཱདིཝིསེསཾ ཝཏྟུཀཱམོ ‘‘པཐཝཱིཔི ཨཏྠཱི’’ཏིཨཱདི ཝུཏྟམྤི ཝདཏི.

སརཱིརསཎྛཱནུཔྤཏྟིདེསབྷཱུཏེཏི ཨེཏེན ཨཝསེསཾ ཀཎྷམཎྜལཾ པཊིཀྑིཔཏི. སྣེཧམིཝ སཏྟཀྑིཔཊལཱནི བྱཱཔེཏྭཱ ཋིཏཱཧེཝ ཨཏྟནོ ནིསྶཡབྷཱུཏཱཧི ཙཏཱུཧི དྷཱཏཱུཧི ཀཏཱུཔཀཱརཾ ཏཾནིསྶིཏེཧི ཨེཝ ཨཱཡུཝཎྞཱདཱིཧི ཨནུཔཱལིཏཔརིཝཱརིཏཾ ཏིསནྟཏིརཱུཔསམུཊྛཱཔཀེཧི ཨུཏུཙིཏྟཱཧཱརེཧི ཨུཔཏྠམྦྷིཡམཱནཾ ཏིཊྛཏི. སཏྟཀྑིཔཊལཱནཾ བྱཱཔནཝཙནེན ཙ ཨནེཀཀལཱཔགཏབྷཱཝཾ ཙཀྑུསྶ དསྶེཏི. པམཱཎཏོ ཨཱུཀཱསིརམཏྟནྟི ཨཱུཀཱསིརམཏྟེ པདེསེ པཝཏྟནཏོ ཝུཏྟཾ. རཱུཔཱནི མནུཔསྶཏཱིཏི མ-ཀཱརོ པདསནྡྷིཀརོ. ཨཐ ཝཱ མནཱུཏི མཙྩོ. ཨུཔཀཱརབྷཱུཏེཧི སངྒཧིཏོ. པརིཡཱཡེནཱཏི ཙཏུནྣཾ པསཱདོ ཏེསུ ཨེཀསྶ དྭིནྣཉྩཱཏིཔི ཝཏྟུཾ ཡུཏྟོ སམཱནདྷནཱནཾ དྷནཾ ཝིཡཱཏི ཨེཏེན པརིཡཱཡེན. སརཱིརཾ རཱུཔཀྑནྡྷོ ཨེཝ. པཊིགྷཊྚནམེཝ ནིགྷཾསོ པཊིགྷཊྚནཱནིགྷཾསོ. རཱུཔཱབྷིམུཁབྷཱཝེན ཙཀྑུཝིཉྙཱཎསྶ ནིསྶཡབྷཱཝཱཔཏྟིསངྑཱཏོ པཊིགྷཊྚནཏོ ཛཱཏོ ཝཱ ནིགྷཾསོ པཊིགྷཊྚནཱནིགྷཾསོ.

པརིཀཔྤཝཙནཾ ‘‘སཙེ ཨཱཔཱཐཾ ཨཱགཙྪེཡྻཱ’’ཏི ཧེཏུཀིརིཡཾ, ‘‘པསྶེཡྻཱ’’ཏི ཕལཀིརིཡཉྩ པརིཀཔྤེཏྭཱ ཏེན པརིཀཔྤེན ཝཙནཾ. ཨེཏྠ ཙ ཧེཏུཀིརིཡཱ ཨནེཀཏྟཱ ཨཝུཏྟཱཔི ཝིཉྙཱཡཏཱིཏི དཊྛབྦཱ. ‘‘པསྶེ ཝཱ’’ཏི ཨིམིནཱ ཝཙནེན ཏཱིསུཔི ཀཱལེསུ ཙཀྑུཝིཉྙཱཎསྶ ནིསྶཡབྷཱཝཾ ཨནུཔགཙྪནྟཾ ཙཀྑུཾ སངྒཎྷཱཏི. དསྶནེ པརིཎཱཡཀབྷཱཝོ དསྶནཔརིཎཱཡཀཊྛོ. ཡཐཱ ཧི ཨིསྶརོ ‘‘ཨིདཉྩིདཉྩ ཀརོཐཱ’’ཏི ཝདནྟོ ཏསྨིཾ ཏསྨིཾ ཀིཙྩེ སཔུརིསེ པརིཎཱཡཏི པཝཏྟཡཏི, ཨེཝམིདམྤི ཙཀྑུསམྥསྶཱདཱིནཾ ནིསྶཡབྷཱཝེན ཏེ དྷམྨེ དསྶནཀིཙྩེ ཨཱཎཱཔེནྟཾ ཝིཡ པརིཎཱཡཏཱིཏི ཙཀྑཱུཏི ཝུཙྩཏི. ཙཀྑཏཱིཏི ཧི ཙཀྑུ, ཡཐཱཝུཏྟེན ནཡེན ཨཱཙིཀྑཏི པརིཎཱཡཏཱིཏི ཨཏྠོ. ཨཐ ཝཱ སམཝིསམཱནི རཱུཔཱནི ཙཀྑཏི ཨཱཙིཀྑཏི, པཀཱསེཏཱིཏི ཝཱ ཙཀྑུ. སཉྫཱཡནྟི ཨེཏྠཱཏི སཉྫཱཏི. ཀེ སཉྫཱཡནྟི? ཕསྶཱདཱིནི ¶ . ཏཐཱ སམོསརཎཾ. ཙཀྑུསམྥསྶཱདཱིནཾ ཨཏྟནོ ཏིཀྑམནྡབྷཱཝཱནུཔཝཏྟནེན ཨིནྡཊྛཾ ཀཱརེཏཱིཏི. ནིཙྩཾ དྷུཝཾ ཨཏྟཱཏི གཧིཏསྶཔི ལུཛྫནཔལུཛྫནཊྛེན. ཝལ༹ཉྫནྟི པཝིསནྟི ཨེཏེནཱཏི ཝལ༹ཉྫནཾ, ཏཾདྭཱརིཀཱནཾ ཕསྶཱདཱིནཾ ཝལ༹ཉྫནཊྛེན.

༥༩༧. པུབྦེ ¶ ཝུཏྟོ པརིཀཔྤོ ཨེཝ ཝིཀཔྤནཏྠོ. གྷཊྚཡམཱནམེཝཱཏི པསཱདསྶ ཨབྷིམུཁབྷཱཝཝིསེསཾ གཙྪནྟམེཝ.

༥༩༩. རཱུཔཾ ཨཱརབྦྷ ཙཀྑུསམྥསྶཱདཱིནཾ ཨུཔྤཏྟིཝཙནེནེཝ ཏེསཾ ཏཾདྭཱརིཀཱནཾ ཨཉྙེསཉྩ རཱུཔཾ ཨཱརབྦྷ ཨུཔྤཏྟི ཝུཏྟཱ ཧོཏི. ཡཐཱ ཙ ཏེསཾ རཱུཔཾ པཙྩཡོ ཧོཏི, ཏེན པཙྩཡེན ཨུཔྤཏྟི ཝུཏྟཱ ཧོཏཱིཏི ཨདྷིཔྤཱཡེན ‘‘ཨིམིནཱ’’ཏིཨཱདིམཱཧ. ཏཏྠ ཙཀྑུཔསཱདཝཏྠུཀཱནཾ ཕསྶཱདཱིནནྟི ཨིམིནཱ ཝཙནེན ཏདཱལམྦནརཱུཔཱརམྨཎཏཱཡ ཏཾསདིསཱནཾ མནོདྷཱཏུཨཱདཱིནཉྩ པུརེཛཱཏཔཙྩཡེན ཨུཔྤཏྟི དསྶིཏཱཏི དཊྛབྦཱ. ཡཏྠ པན ཝིསེསོ ཨཏྠི, ཏཾ དསྶེཏུཾ ‘‘ཙཀྑུདྭཱརཛཝནཝཱིཐིཔརིཡཱཔནྣཱན’’ནྟིཨཱདིམཱཧ. ཏཱནི ཧི རཱུཔཾ གརུཾ ཀཏྭཱ པཝཏྟམཱནསྶཱདནཱབྷིནནྡནབྷཱུཏཱནི ཏཾསམྤཡུཏྟཱནི ཙ ཨཱརམྨཎཱདྷིཔཏིཨཱརམྨཎཱུཔནིསྶཡེཧི ཨུཔྤཛྫནྟི, ཨཉྙཱནི ཨཱརམྨཎཔུརེཛཱཏེནེཝཱཏི ཨེཝཾ ‘‘ཨཱརབྦྷཱ’’ཏི ཝཙནཾ ཨཱརམྨཎཔཙྩཡཏོ ཨཉྙཔཙྩཡབྷཱཝསྶཔི དཱིཔཀཾ, ཨཱརམྨཎཝཙནཾ ཨཱརམྨཎཔཙྩཡབྷཱཝསྶེཝཱཏི ཨཡམེཏེསཾ ཝིསེསོ.

༦༠༠. སུཎཱཏཱིཏི སོཏཝིཉྙཱཎསྶ ནིསྶཡབྷཱཝེན སུཎཱཏི. ཛིཝ྄ཧཱསདྡེན ཝིཉྙཱཡམཱནཱ ཀིརིཡཱ སཱཡནནྟི ཀཏྭཱ ‘‘སཱཡནཊྛེནཱ’’ཏི ཨཱཧ. ཀུཙྪིཏཱནཾ དུཀྑསམྤཡུཏྟཕསྶཱདཱིནཾ ཨཱཡོཏི ཀཱཡོ, དུཀྑདུཀྑཝིཔརིཎཱམདུཀྑཱནཾ ཝཱ. ཀཱཡཱཡཏནསྶ བྱཱཔིཏཱཡ ཙཀྑུཔསཱདེ ཀཱཡཔསཱདབྷཱཝོཔི ཨཏྠི, ཏེན ཙཀྑུཔསཱདསྶ ཨནུཝིདྡྷཏྟཱ ནོ བྱཱཔིཏཱ ཙ ན སིཡཱ, ཝུཏྟཱ ཙ སཱ. ཏསྨཱ ཙཀྑུཔསཱདསྶ ཕོཊྛབྦཱཝབྷཱསནཾ ཀཱཡཔསཱདསྶ ཙ རཱུཔཱཝབྷཱསནཾ ཨཱཔནྣནྟི ལཀྑཎསམྨིསྶཏཾ ཙོདེཏི. ཙཀྑུཀཱཡཱནཾ ཨཉྙནིསྶཡཏྟཱ ཀལཱཔནྟརགཏཏཱཡ ‘‘ཨཉྙསྶ ཨཉྙཏྠ ཨབྷཱཝཏོ’’ཏི ཨཱཧ. རཱུཔརསཱདིནིདསྶནཾ སམཱནནིསྶཡཱནཉྩ ཨཉྙམཉྙསབྷཱཝཱནུཔགམེན ཨཉྙམཉྙསྨིཾ ཨབྷཱཝོ, ཀོ པན ཝཱདོ ཨསམཱནནིསྶཡཱནནྟི དསྶེཏུཾ ཝུཏྟཾ.

རཱུཔཱབྷིགྷཱཏཱརཧོ ¶ ཙ སོ བྷཱུཏཔྤསཱདོ ཙཱཏི རཱུཔཱབྷིགྷཱཏཱརཧབྷཱུཏཔྤསཱདོ. ཨེཝཾལཀྑཎཾ ཙཀྑུ. རཱུཔཱབྷིགྷཱཏོཏི ཙ རཱུཔེ, རཱུཔསྶ ཝཱ ཨབྷིགྷཱཏོཏི ཨཏྠོ. པརིཔུཎྞཱཔརིཔུཎྞཱཡཏནཏྟབྷཱཝནིབྦཏྟཀསྶ ཀམྨསྶ ནིདཱནབྷཱུཏཱ ཀཱམཏཎྷཱ རཱུཔཏཎྷཱ ཙ ཏདཱཡཏནིཀབྷཝཔཏྠནཱབྷཱཝཏོ དཊྛུཀཱམཏཱདིཝོཧཱརཾ ཨརཧཏཱིཏི དུཏིཡོ ནཡོ སབྦཏྠ ཝུཏྟོ. ཏཏྠ དཊྛུཀཱམཏཱནིདཱནཾ ཀམྨཾ སམུཊྛཱནམེཏེསནྟི དཊྛུཀཱམཏཱནིདཱནཀམྨསམུཊྛཱནཱནི, ཨེཝཾཝིདྷཱནཾ བྷཱུཏཱནཾ ¶ པསཱདལཀྑཎཾ ཙཀྑུ, ཨེཝཾཝིདྷོ ཝཱ བྷཱུཏཔྤསཱདོ དཊྛུཀཱམཏཱནི…པེ… པསཱདོ. ཨེཝཾལཀྑཎཾ ཙཀྑུ. རཱུཔེསུ པུགྒལསྶ ཝཱ ཝིཉྙཱཎསྶ ཝཱ ཨཱཝིཉྪནརསཾ.

ཀཱཡོ སབྦེསནྟི ཀོ ཨེཏྠ ཝིསེསོ, ནནུ ཏེཛཱདིཨདྷིཀཱནཉྩ བྷཱུཏཱནཾ པསཱདཱ སབྦེསཾཡེཝཱཏི? སཙྩམེཏཾ, ཨིདཾ པན ‘‘སབྦེས’’ནྟི ཝཙནཾ ‘‘སམཱནཱན’’ནྟི ཨིམམཏྠཾ དཱིཔེཏི ཨནུཝཏྟམཱནསྶ ཨེཀདེསཱདྷིཀབྷཱཝསྶ ནིཝཱརཎཝསེན ཝུཏྟཏྟཱ. ཏེཛཱདཱིནནྟི པདཱིཔསངྑཱཏསྶ ཏེཛསྶ ཨོབྷཱསེན ཝཱཡུསྶ སདྡེན པཐཝིཡཱ གནྡྷེན ཁེལ༹སངྑཱཏསྶ ཨུདཀསྶ རསེནཱཏི པུརིམཝཱདེ པཙྪིམཝཱདེ ཙ ཡཐཱཡོགཾ ཏཾཏཾབྷཱུཏགུཎེཧི ཨནུགྒཡ྄ཧབྷཱཝཏོ རཱུཔཱདིགྒཧཎེ ཨུཔཀརིཏབྦཏོཏི ཨཏྠོ. རཱུཔཱདཱིནཾ ཨདྷིཀབྷཱཝདསྶནཏོཏི ཨགྒིམྷི རཱུཔསྶ པབྷསྶརསྶ ཝཱཡུམྷི སདྡསྶ སབྷཱཝེན སུཡྻམཱནསྶ པཐཝིཡཱ སུརབྷིཨཱདིནོ གནྡྷསྶ ཨཱཔེ ཙ རསསྶ མདྷུརསྶ ཝིསེསཡུཏྟཱནཾ དསྶནཏོ ‘‘རཱུཔཱདཡོ ཏེསཾ གུཎཱ’’ཏི པཋམཝཱདཱི ཨཱཧ. ཏསྶེཝ ཙ ‘‘ཨིཙྪེཡྻཱམཱ’’ཏིཨཱདིནཱ ཨུཏྟརམཱཧ. ཨིམིནཱཝུཔཱཡེན དུཏིཡཝཱདིསྶཔི ནིགྒཧོ ཧོཏཱིཏི.

ཨཐ ཝཱ རཱུཔཱདིཝིསེསགུཎེཧི ཏེཛཨཱཀཱསཔཐཝཱིཨཱཔཝཱཡཱུཧི ཙཀྑཱདཱིནི ཀཏཱནཱིཏི ཝདནྟསྶ ཀཎཱདསྶ ཝཱདཾ ཏཏིཡཾ ཨུདྡྷརིཏྭཱ ཏཾ ནིགྒཧེཏུཾ ‘‘ཨཐཱཔི ཝདེཡྻུ’’ནྟིཨཱདི ཝུཏྟནྟི དཊྛབྦཾ. ཨཱསཝེ ཨུཔལབྦྷམཱནོཔི གནྡྷོ པཐཝིཡཱ ཨཱཔོསཾཡུཏྟཱཡ ཀཔྤཱསཏོ ཝིསདིསཱཡཱཏི ན ཀཔྤཱསགནྡྷསྶ ཨདྷིཀབྷཱཝཱཔཏྟཱིཏི ཙེ? ན, ཨནབྷིབྷཱུཏཏྟཱ. ཨཱསཝེཧི ཨུདཀསཾཡུཏྟཱ པཐཝཱི ཨུདཀེན ཨབྷིབྷཱུཏཱ, ན ཀཔྤཱསཔཐཝཱིཏི ཏསྶཱཡེཝ ཨདྷིཀེན གནྡྷེན བྷཝིཏབྦནྟི. ཨུཎྷོདཀསཉྙུཏྟོ ཙ ཨགྒི ཨུཔལབྦྷནཱིཡོ མཧནྟོཏི ཀཏྭཱ ཏསྶ ཕསྶོ ཝིཡ ཝཎྞོཔི པབྷསྶརོ ཨུཔལབྦྷིཏབྦོཏི ཨུཎྷོདཀཝཎྞཏོ ཨགྒིནཱ ཨནབྷིསམྦནྡྷསྶ སཱིཏུདཀསྶ ཝཎྞོ པརིཧཱཡེཐ. ཏསྨཱཏི ཨེཏསྶུབྷཡསྶ ཨབྷཱཝཱ. ཏདབྷཱཝེན ཧི ¶ རཱུཔཱདཱིནཾ ཏེཛཱདིཝིསེསགུཎཏཱ ནིཝཏྟིཏཱ, ཏཾནིཝཏྟནེན ‘‘ཏེཛཱདཱིནཾ གུཎེཧི རཱུཔཱདཱིཧི ཨནུགྒཡ྄ཧབྷཱཝཏོ’’ཏི ཨིདཾ ཀཱརཎཾ ནིཝཏྟིཏནྟི. ཨེཝཾ པརམྤརཱཡ ཨུབྷཡཱབྷཱཝོ ཝིསེསཀཔྤནཔྤཧཱནསྶ ཀཱརཎཾ ཧོཏཱིཏི ཨཱཧ ‘‘ཏསྨཱ པཧཱཡེཐེཏ’’ནྟིཨཱདི. ཨེཀཀལཱཔེཔི རཱུཔརསཱདཡོ ཝིསདིསཱ, ཀོ པན ཝཱདོ ནཱནཱཀལཱཔེ ཙཀྑཱདཡོ བྷཱུཏཝིསེསཱབྷཱཝེཔཱིཏི དསྶེཏུཾ རཱུཔརསཱདིནིདསྶནཾ ཝུཏྟཾ.

ཡདི བྷཱུཏཝིསེསོ ནཏྠི, ཀིཾ པན ཙཀྑཱདིཝིསེསསྶ ཀཱརཎནྟི ཏཾ དསྶེཏུཾ ‘‘ཡཾ ཨཉྙམཉྙསྶཱ’’ཏིཨཱདིམཱཧ. ཨེཀམྤི ཀམྨཾ པཉྩཱཡཏནིཀཏྟབྷཱཝཔཏྠནཱནིཔྥནྣཾ ཙཀྑཱདཱིནཾ ཝིསེསཧེཏུཏྟཱ ¶ ‘‘ཨཉྙམཉྙསྶ ཨསཱདྷཱརཎ’’ནྟི ཙ ‘‘ཀམྨཝིསེསོ’’ཏི ཙ ཝུཏྟནྟི དཊྛབྦཾ. ན ཧི ཏཾ ཡེན ཝིསེསེན ཙཀྑུསྶ པཙྩཡོ, ཏེནེཝ སོཏསྶ ཧོཏི ཨིནྡྲིཡནྟརཱབྷཱཝཔྤཏྟིཏོ. ‘‘པཊིསནྡྷིཀྑཎེ མཧགྒཏཱ ཨེཀཱ ཙེཏནཱ ཀཊཏྟཱརཱུཔཱནཾ ཀམྨཔཙྩཡེན པཙྩཡོ’’ཏི (པཊྛཱ. ༢.༡༢.༧༨) ཝཙནེན པཊིསནྡྷིཀྑཎེ ཝིཛྫམཱནཱནཾ སབྦེསཾ ཀཊཏྟཱརཱུཔཱནཾ ཨེཀཱ ཙེཏནཱ ཀམྨཔཙྩཡོ ཧོཏཱིཏི ཝིཉྙཱཡཏི. ནཱནཱཙེཏནཱཡ ཧི ཏདཱ ཨིནྡྲིཡུཔྤཏྟིཡཾ སཏི པརིཏྟེན ཙ མཧགྒཏེན ཙ ཀམྨུནཱ ནིབྦཏྟིཏཾ ཀཊཏྟཱརཱུཔཾ ཨཱཔཛྫེཡྻཱཏི ན ཙེཀཱ པཊིསནྡྷི ཨནེཀཀམྨནིབྦཏྟཱ ཧོཏཱིཏི སིདྡྷམེཀེན ཀམྨེན ཨནེཀིནྡྲིཡུཔྤཏྟི ཧོཏཱིཏི. ཨནལླཱིནོ ནིསྶཡོ ཨེཏསྶཱཏི ཨནལླཱིནནིསྶཡོ, རཱུཔསདྡསངྑཱཏོ ཝིསཡོ. གནྡྷརསཱནཾ ནིསྶཡཱ གྷཱནཛིཝ྄ཧཱནིསྶཡེ ཨལླཱིཡནྟཱིཏི ཏེ ནིསྶཡཝསེན ཨལླཱིནཱ, ཕོཊྛབྦཾ སཡཾ ཀཱཡནིསྶཡཨལླཱིནཾ བྷཱུཏཏྟཡཏྟཱ. དཱུརེ…པེ… སམྤཏྟོ ཨེཝ ནཱམ པཊིགྷཊྚནནིགྷཾསཛནཀཏོཏི ཨདྷིཔྤཱཡོ. སདྡོ པན དྷཱཏུཔརམྤརཱཡ ཝཱཡུ ཝིཡ ཨཱགནྟྭཱ ནིསྶཡཝསེན སོཏནིསྶཡེ ཨལླཱིཡིཏྭཱ སོཏཾ གྷཊྚེཏྭཱ ཝཝཏྠཱནཾ གཙྪནྟོ སཎིཀཾ ཝཝཏྠཱནཾ གཙྪཏཱིཏི ཝུཏྟོ. ཨེཝཾ པན སཏིཙིཏྟསམུཊྛཱནཾ སདྡཱཡཏནཾ སོཏཝིཉྙཱཎསྶ ཀདཱཙིཔི ཨཱརམྨཎཔཙྩཡོ ན སིཡཱ. ན ཧི བཧིདྡྷཱ ཙིཏྟསམུཊྛཱནུཔྤཏྟི ཨུཔཔཛྫཏཱིཏི.

ཙིརེན སུཡྻེཡྻཱཏི ཀསྨཱ ཨེཏཾ ཝུཏྟཾ, ནནུ དཱུརེ ཋིཏེཧི རཛཀཱདིསདྡཱ ཙིརེན སུཡྻནྟཱིཏི? ན, དཱུརཱསནྣཱནཾ ཡཐཱཔཱཀཊེ སདྡེ གཧཎཝིསེསཏོ. ཡཐཱ ཧི དཱུརཱསནྣཱནཾ ཝཙནསདྡེ ཡཐཱ པཱཀཊཱིབྷཱུཏེ གཧཎཝིསེསཏོ ཨཱཀཱརཝིསེསཱནཾ ཨགྒཧཎཾ གཧཎཉྩ ཧོཏི, ཨེཝཾ རཛཀཱདིསདྡེཔི ཨཱསནྣསྶ ཨཱདིཏོ པབྷུཏི ཡཱཝཱཝསཱནཱ ཀམེན པཱཀཊཱིབྷཱུཏེ ¶ དཱུརསྶ ཙཱཝསཱནེ མཛ྄ཛྷེ ཝཱ པིཎྜཝསེན པཝཏྟིཔཱཀཊཱིབྷཱུཏེ ནིཙྪཡགཧཎཱནཾ སོཏཝིཉྙཱཎཝཱིཐིཡཱ པརཏོ པཝཏྟཱནཾ ཝིསེསཏོ ལཧུཀཾ སུཏོ ཙིརེན སུཏོཏི ཨབྷིམཱནོ ཧོཏི. སོ པན སདྡོ ཡཏྠ ཨུཔྤནྣོ, ཏཾ ནིསྶིཏོཝ ཨཏྟནོ ཝིཛྫམཱནཀྑཎེ སོཏསྶ ཨཱཔཱཐམཱགཙྪཏི. དཱུརེ ཋིཏོ པན སདྡོ ཨཉྙཏྠ པཊིགྷོསུཔྤཏྟིཡཱ བྷཱཛནཱདིཙལནསྶ ཙ ཨཡོཀནྟོ ཝིཡ ཨཡོཙལནསྶ པཙྩཡོ ཧོཏཱིཏི དཊྛབྦོ. ཡཐཱ ཝཱ གྷཎྚཱབྷིགྷཱཏཱནུཛཱནི བྷཱུཏཱནི ཨནུརཝསྶ ནིསྶཡབྷཱུཏཱནི གྷཊྚནསབྷཱཝཱནི, ཨེཝཾ གྷཊྚནཱནུཛཱནི ཡཱཝ སོཏཔྤསཱདཱ ཨུཔྤཏྟིཝསེན ཨཱགཏཱནི བྷཱུཏཱནི གྷཊྚནསབྷཱཝཱནེཝཱཏི ཏཾནིསྶིཏོ སདྡོ ནིསྶཡཝསེན དྷཱཏུཔརམྤརཱཡ གྷཊྚེཏྭཱ སཎིཀཾ ཝཝཏྠཱནཾ གཙྪཏཱིཏི ཝུཏྟོ. ཨསུཀདིསཱཡ ནཱམཱཏི ན པཉྙཱཡེཡྻ. ཀསྨཱ? སོཏཔྤདེསསྶེཝ སདྡསྶ གཧཎཏོ.

ཝིསམེ ¶ ཨཛ྄ཛྷཱསཡོ ཨེཏསྶཱཏི ཝིསམཛ྄ཛྷཱསཡོ, ཨཛ྄ཛྷཱསཡརཧིཏམྤི ཙཀྑུ ཝིསམནིནྣཏྟཱ ཝིསམཛ྄ཛྷཱསཡཾ ཝིཡ ཧོཏཱིཏི ‘‘ཝིསམཛ྄ཛྷཱསཡ’’ནྟི ཝུཏྟཾ. ཙཀྑུམཏོ ཝཱ པུགྒལསྶ ཨཛ྄ཛྷཱསཡཝསེན ཙཀྑུ ‘‘ཝིསམཛ྄ཛྷཱསཡ’’ནྟི ཝུཏྟཾ.

ཀཎྞཀཱུཔཚིདྡེཡེཝ པཝཏྟནཏོ ཨཱརམྨཎགྒཧཎཧེཏུཏོ ཙ ཏཏྠེཝ ‘‘ཨཛ྄ཛྷཱསཡཾ ཀརོཏཱི’’ཏི ཝུཏྟཾ. ཏསྶ སོཏསྶ སོཏཝིཉྙཱཎནིསྶཡབྷཱཝེན སདྡསཝནེ. ཨཛཊཱཀཱསོཔི ཝཊྚཏཱིཏི ཨེཏསྶ ཨཊྛཀཐཱདྷིཔྤཱཡེན ཨཏྠཾ ཝདནྟོ ‘‘ཨནྟོལེཎསྨི’’ནྟིཨཱདིམཱཧ. ཨཏྟནོ ཨདྷིཔྤཱཡེན ཝདནྟོ ‘‘ཀིཾ ཨེཏཱཡ དྷམྨཏཱཡཱ’’ཏིཨཱདིམཝོཙ.

ཝཱཏཱུཔནིསྶཡོ གནྡྷོ གོཙརོ ཨེཏསྶཱཏི ཝཱཏཱུཔནིསྶཡགནྡྷགོཙརཾ. ཨེཏྠ ཙ གནྡྷགྒཧཎསྶ ཝཱཏོ ཨུཔནིསྶཡོ, ཏབྦོཧཱརེན པན གནྡྷོ ‘‘ཝཱཏཱུཔནིསྶཡོ’’ཏི ཝུཏྟོ. ཨཐ ཝཱ ཝཱཏོ ཨེཝ ཨུཔནིསྶཡོ ཝཱཏཱུཔནིསྶཡོ. ཀསྶཱཏི? གྷཱནཝིཉྙཱཎསྶ. སོ སཧཀཱརཱིཔཙྩཡནྟརབྷཱུཏོ ཨེཏསྶ ཨཏྠཱིཏི ཝཱཏཱུཔནིསྶཡོ, གནྡྷོ པཙྩཡོ.

ཨཱཔོ ཙ སཧཀཱརཱིཔཙྩཡནྟརབྷཱུཏོ ཁེལཱ༹དིཀོ. ཏཐཱ པཐཝཱི. གཧེཏབྦསྶ ཧི ཕོཊྛབྦསྶ ཨུཔྤཱིལི༹ཡམཱནསྶ ཨཱདྷཱརབྷཱུཏཱ པཐཝཱི ཀཱཡསྶ ཙ ཕོཊྛབྦེན ཨུཔྤཱིལི༹ཡམཱནསྶ ནིསྶཡབྷཱུཏཱནཾ ཨཱདྷཱརབྷཱུཏཱ སབྦདཱ ¶ ཕོཊྛབྦགཧཎསྶ ཨུཔནིསྶཡོཏི. ཨུཔྤཱིལ༹ནེན པན ཝིནཱ ཕོཊྛབྦགཧཎེ ཀཱཡཱཡཏནསྶ ནིསྶཡབྷཱུཏཱ པཐཝཱི ཨུཔནིསྶཡོཏི དཊྛབྦཱ. སབྦདཱཔི ཙ ཏསྶཱ ཨུཔནིསྶཡབྷཱཝོ ཡུཏྟོ ཨེཝ.

པཉྩཝཎྞཱནནྟི ཝཙནཾ ཏདཱདྷཱརཱནཾ སུཏྟཱནཾ ནཱནཏྟདསྶནཏྠཾ. པཉྩཔྤཀཱརཱ པཉྩཝཎྞཱ. ཨེཀནྟཏོཏི ཨིདཾ སབྦདཱ ཨུཔྤཱིལ༹ནེན ཝིནིབྦྷུཛྫིཏུཾ ཨསཀྐུཎེཡྻཱནཾ ཀལཱཔནྟརརཱུཔཱནཾ སབྦྷཱཝཱ ཏེསཾ ནིཝཏྟནཏྠཾ ཝུཏྟཾ. ན ཧི ཏཱནི ཨེཀནྟེན ཨཝིནིབྷུཏྟཱནི ཀལཱཔནྟརགཏཏྟཱཏི.

༦༡༦. ཝཎྞནིབྷཱཏི རཱུཔཱཡཏནམེཝ ནིདྡིཊྛནྟི ཏདེཝ ཨཔེཀྑིཏྭཱ ‘‘སནིདསྶན’’ནྟི ནཔུཾསཀནིདྡེསོ ཀཏོ. ཏསྨཱཏི ནིཔྤརིཡཱཡརཱུཔཱནཾ ནཱིལཱདཱིནཾ ཕུསིཏྭཱ ཨཛཱནིཏབྦཏོ དཱིགྷཱདཱིནཉྩ ཕུསིཏྭཱ ཛཱནིཏབྦཏོ ན ནིཔྤརིཡཱཡེན དཱིགྷཾ རཱུཔཱཡཏནཾ. ཏཾ ཏཾ ནིསྶཱཡཱཏི དཱིགྷཱདིསནྣིཝེསཾ བྷཱུཏསམུདཱཡཾ ནིསྶཱཡ. ཏཐཱ ཏཐཱ ཋིཏནྟི དཱིགྷཱདིསནྣིཝེསེན ཋིཏཾ ཝཎྞསམུདཱཡབྷཱུཏཾ ¶ རཱུཔཱཡཏནམེཝ དཱིགྷཱདིཝོཧཱརེན བྷཱསིཏཾ. ཨཉྙམཉྙཔརིཙྪིནྣཾ ཨེཀསྨིཾ ཨིཏརསྶ ཨབྷཱཝཱ. ཝིསཡགོཙརཱནཾ ཝིསེསོ ཨནཉྙཏྠབྷཱཝོ ཏབྦཧུལཙཱརིཏཱ ཙ ཙཀྑུཝིཉྙཱཎསྶ.

༦༢༠. བྷེརིསདྡཱདཱིནཉྩ ཝཱདིཏསདྡཏྟཱ ‘‘ཝུཏྟཱཝསེསཱན’’ནྟི ཨཱཧ. ཨམནུསྶཝཙནེན ན མནུསྶེཧི ཨཉྙེ པཱཎིནོ ཨེཝ གཧིཏཱ, ཨཐ ཁོ ཀཊྛཱདཡོཔཱིཏི ཨདྷིཔྤཱཡེན ‘‘སེསོ སབྦོཔཱི’’ཏི ཨཱཧ. ཨེཝཾ སནྟེཔི ཝཏྠུཝིསེསཀིཏྟནཝསེན པཱལི༹ཡཾ ཨནཱགཏོ ཏཐཱ ཀིཏྟེཏབྦོ ཡེ ཝཱ པནཱཏི ཝུཏྟོཏི ཨདྷིཔྤཱཡོ.

༦༢༤. ཝིསྶགནྡྷོཏི ཝིརཱུཔོ མཾསཱདིགནྡྷོ. ལམྦིལནྟི མདྷུརམྦིལཾ.

༦༣༢. སཉྫཱནནྟི ཨེཏེནཱཏི སཉྫཱནནཾ, ཨུཔལཀྑཎཾ. སཀེན སཀེན ཀམྨཙིཏྟཱདིནཱ པཙྩཡེན སམུཊྛིཏཱནིཔི ཨིཏྠིལིངྒཱདཱིནི ཨིནྡྲིཡསཧིཏེ སརཱིརེ ཨུཔྤཛྫམཱནཱནི ཏཾཏདཱཀཱརཱནི ཧུཏྭཱ ཨུཔྤཛྫནྟཱིཏི ‘‘ཨིཏྠིནྡྲིཡཾ པཊིཙྩ སམུཊྛཧནྟཱི’’ཏི ཝུཏྟཱནི. ཨིཏྠིལིངྒཱདཱིསུ ཨེཝ ཙ ཨདྷིཔཏིབྷཱཝཱ ཨེཏསྶ ཨིནྡྲིཡཏཱ ཝུཏྟཱ, ཨིནྡྲིཡསཧིཏེ སནྟཱནེ ཨིཏྠིལིངྒཱདིཨཱཀཱརརཱུཔཔཙྩཡཱནཾ ཨཉྙཐཱ ཨནུཔྤཱདནཏོ ཨིཏྠིགྒཧཎསྶ ཙ ཏེསཾ རཱུཔཱནཾ པཙྩཡབྷཱཝཏོ. ཡསྨཱ པན བྷཱཝདསཀེཔི རཱུཔཱནཾ ཨིཏྠིནྡྲིཡཾ ན ཛནཀཾ, ནཱཔི ཨནུཔཱལཀཾ ཨུཔཏྠམྦྷཀཾ ཝཱ, ན ཙ ཨཉྙཀལཱཔརཱུཔཱནཾ, ཏསྨཱ ཏཾ ཛཱིཝིཏིནྡྲིཡཾ ཝིཡ སཀལཱཔརཱུཔཱནཾ ཨཱཧཱརོ ¶ ཝིཡ ཝཱ ཀལཱཔནྟརརཱུཔཱནཉྩ ཨིནྡྲིཡཨཏྠིཨཝིགཏཔཙྩཡོཏི ན ཝུཏྟཾ. ཨེས ནཡོ པུརིསིནྡྲིཡེཔི. ལིངྒཱདིཨཱཀཱརེསུ རཱུཔེསུ རཱུཔཱཡཏནསྶ ཙཀྑུཝིཉྙེཡྻཏྟཱ ལིངྒཱདཱིནཾ ཙཀྑུཝིཉྙེཡྻཏཱ ཝུཏྟཱ.

༦༣༣. ཨུབྷཡམྤི…པེ… ཀུསལེན པཏིཊྛཱཏཱིཏི སུགཏིཾ སནྡྷཱཡ ཝུཏྟནྟི ཝེདིཏབྦཾ. དུགྒཏིཡཉྷི པཊིསནྡྷི ཨཀུསལེནེཝཱཏི ཏདཱ ཨུཔྤཛྫམཱནོ བྷཱཝོཔི ཨཀུསལེནེཝ བྷཝེཡྻ, པཊིསནྡྷིཡཾ ཝིཡ པཝཏྟེཔཱིཏི. ཏཡིདཾ དྭཡཾ ཡསྨཱ སནྟཱནེ སཧ ན པཝཏྟཏི ‘‘ཡསྶ ཨིཏྠིནྡྲིཡཾ ཨུཔྤཛྫཏི, ཏསྶ པུརིསིནྡྲིཡཾ ཨུཔྤཛྫཏཱིཏི? ནོ’’ཏིཨཱདིཝཙནཏོ (ཡམ. ༣.ཨིནྡྲིཡཡམཀ.༡༨༨), ཏསྨཱ ཨུབྷཏོབྱཉྫནཀསྶཔི ཨེཀམེཝིནྡྲིཡཾ ཧོཏཱིཏི ཝུཏྟཾ.

༦༣༥. ཨེཀནྟཾ ཀཱཡཝིཉྙཏྟིཡཾ ཀཱཡཝོཧཱརསྶ པཝཏྟིདསྶནཏྠཾ ‘‘ཀཱཡེན སཾཝརོ སཱདྷཱུ’’ཏི (དྷ. པ. ༣༦༡; སཾ. ནི. ༡.༡༡༦) སཱདྷཀསུཏྟཾ ཨཱཧཊཾ. བྷཱཝསྶ གམནཾ པཀཱསནཾ ¶ ཙོཔནཾ. ཐམྦྷནཱཏི ཝཱཡོདྷཱཏུཨདྷིཀཱནཾ བྷཱུཏཱནཾ ཐམྦྷནཱཀཱརོ ཝིཉྙཏྟཱིཏི ཨཏྠོ. ཨུདྡྷངྒམཝཱཏཱདཡོ ཝིཡ ཧི ཡོ ཝཱཏཱདྷིཀོ ཀལཱཔོ, ཏཏྠ བྷཱུཏཱནཾ ཝིཉྙཏྟིཨཱཀཱརཏཱ ཧོཏཱིཏི. ཏེནེཝ ‘‘ཀཱཡཾ ཐམྦྷེཏྭཱ ཐདྡྷཾ ཀརོཏཱིཏི ཐམྦྷནཱ’’ཏི ཝཱཡོདྷཱཏུཀིཙྩཝསེན ཝིཉྙཏྟི ཝུཏྟཱ. ཏཏོ ཨེཝ ཙ ‘‘ཝཱཡོདྷཱཏུཡཱ ཨཱཀཱརོ ཀཱཡཝིཉྙཏྟཱི’’ཏི ཙ ཝཏྟུཾ ཝཊྚཏི, ཏཐཱ ‘‘པཐཝཱིདྷཱཏུཡཱ ཝཙཱིཝིཉྙཏྟཱི’’ཏི པཐཝཱིདྷཱཏུཨདྷིཀབྷཱུཏཝིཀཱརཏོ.

༦༣༦. པབྷེདགཏཱ ཝཱཙཱ ཨེཝཱཏི ཏིསྶ ཕུསྶཱཏི པབྷེདགཏཱ. ཨཐ ཝཱ ཝཙཱིསངྑཱརེཧི ཝིཏཀྐཝིཙཱརེཧི པརིགྒཧིཏཱ སཝནཝིསཡབྷཱཝཾ ཨནུཔནཱིཏཏཱཡ ཨབྷིནྣཱ ཏབྦྷཱཝཾ ནཱིཡམཱནཱ ཝཱཙཱ ‘‘ཝཙཱིབྷེདོ’’ཏི ཝུཙྩཏི. ཨིརིཡཱཔཐམྤི ཨུཔཏྠམྦྷེནྟཱིཏི ཡཐཱཔཝཏྟཾ ཨིརིཡཱཔཐཾ ཨུཔཏྠམྦྷེནྟི. ཡཐཱ ཧི ཨབྦོཀིཎྞེ བྷཝངྒེ ཝཏྟམཱནེ ཨངྒཱནི ཨོསཱིདནྟི པཝིཊྛཱནི ཝིཡ ཧོནྟི, ན ཨེཝཾ ‘‘དྭཏྟིཾས ཚབྦཱིསཱ’’ཏི ཝུཏྟེསུ ཛཱགརཎཙིཏྟེསུ ཝཏྟམཱནེསུ. ཏེསུ པན ཝཏྟམཱནེསུ ཨངྒཱནི ཨུཔཏྠདྡྷཱནི ཡཐཱཔཝཏྟིརིཡཱཔཐབྷཱཝེནེཝ པཝཏྟནྟཱིཏི. ཁཱིཎཱསཝཱནཾ ཙུཏིཙིཏྟནྟི ཝིསེསེཏྭཱ ཝུཏྟཾ, ‘‘ཀཱམཱཝཙརཱནཾ པཙྪིམཙིཏྟསྶ ཨུཔྤཱདཀྑཎེ ཡསྶ ཙིཏྟསྶ ཨནནྟརཱ ཀཱམཱཝཙརཱནཾ པཙྪིམཙིཏྟཾ ཨུཔྤཛྫིསྶཏི, རཱུཔཱཝཙརེ ཨརཱུཔཱཝཙརེ པཙྪིམབྷཝིཀཱནཾ, ཡེ ཙ རཱུཔཱཝཙརཾ ཨརཱུཔཱཝཙརཾ ཨུཔཔཛྫིཏྭཱ པརིནིབྦཱཡིསྶནྟི, ཏེསཾ ཙཝནྟཱནཾ ¶ ཏེསཾ ཝཙཱིསངྑཱརོ ནིརུཛ྄ཛྷིསྶཏི, ནོ ཙ ཏེསཾ ཀཱཡསངྑཱརོ ནིརུཛ྄ཛྷིསྶཏཱི’’ཏི (ཡམ. ༢.སངྑཱརཡམཀ.༨༨) པན ཝཙནཏོ ཨཉྙེསམྤི ཙུཏིཙིཏྟཾ རཱུཔཾ ན སམུཊྛཱཔེཏཱིཏི ཝིཉྙཱཡཏི. ན ཧི རཱུཔསམུཊྛཱཔཀཙིཏྟསྶ གབྦྷགམནཱདིཝིནིབདྡྷཱབྷཱཝེན ཀཱཡསངྑཱརཱསམུཊྛཱཔནཾ ཨཏྠི, ན ཙ ཡུཏྟཾ ‘‘ཙུཏོ ཙ ཙིཏྟསམུཊྛཱནཉྩསྶ པཝཏྟཏཱི’’ཏི, ནཱཔི ‘‘ཙུཏིཙིཏྟཾ རཱུཔཾ སམུཊྛཱཔེཏཱི’’ཏི པཱལི༹ ཨཏྠཱིཏི.

༦༣༧. ན ཀསྶཏཱིཏི ན ཝིལེཁིཡཏི. གཏནྟི ཝིཉྙཱཏཾ. ཨསམྥུཊྛཾ ཙཏཱུཧི མཧཱབྷཱུཏེཧཱིཏི ཡསྨིཾ ཀལཱཔེ བྷཱུཏཱནཾ པརིཙྪེདོ, ཏེཧེཝ ཨསམྥུཊྛཾ. ཝིཛྫམཱནེཔི ཧི ཀལཱཔནྟརབྷཱུཏཱནཾ ཀལཱཔནྟརབྷཱུཏསམྥུཊྛབྷཱཝེ ཏཾཏཾབྷཱུཏཝིཝིཏྟཏཱ རཱུཔཔརིཡནྟོ ཨཱཀཱསོཏི ཡེསཾ ཡོ པརིཙྪེདོ, ཏེཧི སོ ཨསམྥུཊྛོཝ, ཨཉྙཐཱ པརིཙྪིནྣབྷཱཝོ ན སིཡཱ ཏེསཾ བྷཱུཏཱནཾ བྱཱཔིཏབྷཱཝཱཔཏྟིཏོ. ཨབྱཱཔིཏཱ ཧི ཨསམྥུཊྛཏཱཏི.

༦༣༨. ལཧུཏཱདཱིནཾ ཨཉྙམཉྙཱཝིཛཧནེན དུབྦིཉྙེཡྻནཱནཏྟཏཱ ཝུཏྟཱཏི ཏཾཏཾཝིཀཱརཱདྷིཀརཱུཔེཧི ¶ ཏཾཏཾནཱནཏྟཔྤཀཱསནཏྠཾ ‘‘ཨེཝཾ སནྟེཔཱི’’ཏིཨཱདིམཱཧ. ཡཐཱཝུཏྟཱ ཙ པཙྩཡཱ ཏཾཏཾཝིཀཱརསྶ ཝིསེསཔཙྩཡབྷཱཝཏོ ཝུཏྟཱ, ཨཝིསེསེན པན སབྦེ སབྦེསཾ པཙྩཡཱཏི.

༦༤༡. ཨཱདིཏོ ཙཡོ ཨཱཙཡོ, པཋམུཔྤཏྟི. ཨུཔརི ཙཡོ ཨུཔཙཡོ. པབནྡྷོ སནྟཏི. ཏཏྠ ཨུདྡེསེ ཨཝུཏྟོཔི ཨཱཙཡོ ཨུཔཙཡསདྡེནེཝ ཝིཉྙཱཡཏཱིཏི ‘‘ཡོ ཨཱཡཏནཱནཾ ཨཱཙཡོ པུནཔྤུནཾ ནིབྦཏྟམཱནཱནཾ, སོཝ རཱུཔསྶ ཨུཔཙཡོ’’ཏི ཨཱཧ. པཱལི༹ཡཾ པན ཨུཔ-སདྡོ པཋམཏྠོ ཨུཔརིཨཏྠོ ཙ ཧོཏཱིཏི ‘‘ཨཱདིཙཡོ ཨུཔཙཡོ, ཨུཔརིཙཡོ སནྟཏཱི’’ཏི ཨཡམཏྠོ ཝིཉྙཱཡཏཱིཏི. ཨཉྙཐཱ ཧི ཨཱཙཡསངྑཱཏསྶ པཋམུཔྤཱདསྶ ཨཝུཏྟཏཱ ཨཱཔཛྫེཡྻ.

ཨེཝནྟི ‘‘ཡོ ཨཱཡཏནཱནཾ ཨཱཙཡོ’’ཏིཨཱདིནིདྡེསེན ཀིཾ ཀཐིཏཾ ཧོཏི? ཨཱཡཏནེན ཨཱཙཡོ ཀཐིཏོ. ཨཱཙཡཱུཔཙཡསནྟཏིཡོ ཧི ནིབྦཏྟིབྷཱཝེན ཨཱཙཡོ ཨེཝཱཏི ཨཱཡཏནེཧི ཨཱཙཡཱདཱིནཾ པཀཱསིཏཏྟཱ ཏེཧི ཨཱཙཡོ ཀཐིཏོ. ཨཱཡཏནཱནཾ ཨཱཙཡཱདིཝཙནེནེཝ ཨཱཙཡསབྷཱཝཱནི ཨུཔྤཱདདྷམྨཱནི ཨཱཡཏནཱནཱིཏི ཨཱཙཡེན ཏཾཔཀཏིཀཱནི ¶ ཨཱཡཏནཱནི ཀཐིཏཱནི. ལཀྑཎཉྷི ཨུཔྤཱདོ, ན རཱུཔརཱུཔནྟི. ཏེནེཝཱདྷིཔྤཱཡེནཱཧ ‘‘ཨཱཡཏནམེཝ ཀཐིཏ’’ནྟི. ཨཱཙཡཉྷི ལཀྑཎཾ ཀཐཡནྟེན ཏཾལཀྑཎཱནི ཨཱཡཏནཱནེཝ ཀཐིཏཱནི ཧོནྟཱིཏི. ཨེཝམྤི ཀིཾ ཀཐིཏཾ ཧོཏཱིཏི ཨཱཡཏནཱཙཡེཧི ཨཱཙཡཱཡཏནེཧི ཨཱཙཡམེཝ ཨཱཡཏནམེཝ ཀཐེནྟེན ཨུདྡེསེ ནིདྡེསེ ཙ ཨཱཙཡོཏི ཨིདམེཝ ཨཝཏྭཱ ཨུཔཙཡསནྟཏིཡོ ཨུདྡིསིཏྭཱ ཏེསཾ ཝིབྷཛནཝསེན ཨཱཡཏནེན ཨཱཙཡཀཐནཱདིནཱ ཀིཾ ཀཐིཏཾ ཧོཏཱིཏི ཨདྷིཔྤཱཡོ. ཨཱཙཡོཏི ཨུཔཙཡམཱཧ, ཨུཔཙཡོཏི ཙ སནྟཏིཾ. ཏདེཝུབྷཡཾ ཡཐཱཀྐམཾ ཝིཝརནྟོ ‘‘ནིབྦཏྟི ཝཌྜྷི ཀཐིཏཱ’’ཏི ཨཱཧ. ཨུཔཙཡསནྟཏིཡོ ཧི ཨཏྠཏོ ཨེཀཏྟཱ ཨཱཙཡོཝཱཏི ཏདུདྡེསཝིབྷཛནཝསེན ཨཱཡཏནེན ཨཱཙཡཀཐནཱདིནཱ ནིབྦཏྟིཝཌྜྷིཨཱཀཱརནཱནཏྟཾ ཨཱཙཡསྶ ཀཐིཏནྟི ཨཏྠོ. ཨིམམེཝཏྠཾ ཝིབྷཱཝེཏུཾ ‘‘ཨཏྠཏོ ཧཱི’’ཏིཨཱདིམཱཧ. ཡསྨཱ ཙ ཨུབྷཡམྤི ཨེཏཾ ཛཱཏིརཱུཔསྶེཝཱདྷིཝཙནཾ, ཏསྨཱ ཛཱཏིརཱུཔསྶ ལཀྑཎཱདིཝིསེསེསུ ཨཱཙཡཱདཱིསུ པཝཏྟིཨཱདཱིསུ ཙ ཨཱཙཡཱདིལཀྑཎཱདིཀོ ཨུཔཙཡོ, པཝཏྟིཨཱདིལཀྑཎཱདིཀཱ སནྟཏཱིཏི ཝེདིཏབྦཱཏི ཨཏྠོ.

༦༤༣. པཀཏིནིདྡེསཱཏི ཕལཝིཔཙྩནཔཀཏིཡཱ ནིདྡེསཱ, ཛརཱཡ པཱཔུཎིཏབྦཾ ཕལམེཝ ཝཱ པཀཏི. ན ཙ ཁཎྜིཙྩཱདཱིནེཝ ཛརཱཏི ཀལལཀཱལཏོ པབྷུཏི པུརིམརཱུཔཱནཾ ཛརཱཔཏྟཀྑཎེ ཨུཔྤཛྫམཱནཱནི པཙྪིམརཱུཔཱནི པརིཔཀྐརཱུཔཱནུརཱུཔཱནི པརིཎཏཔརིཎཏཱནི ཨུཔྤཛྫནྟཱིཏི ཨནུཀྐམེན སུཔརིཎཏརཱུཔཔརིཔཱཀཀཱལེ ཨུཔྤཛྫམཱནཱནི ཁཎྜིཙྩཱདིསབྷཱཝཱནི ཨུཔྤཛྫནྟི. ཏཱནི ¶ ཨུདཀཱདིམགྒེསུ ཏིཎརུཀྑསཾབྷགྒཏཱདཡོ ཝིཡ པརིཔཱཀགཏམགྒསངྑཱཏེསུ པརིཔཀྐརཱུཔེསུ ཨུཔྤནྣཱནི ཛརཱཡ གཏམགྒོཨིཙྩེཝ ཝུཏྟཱནི, ན ཛརཱཏི. ཨཝིཉྙཱཡམཱནནྟརཛརཱ ཨཝཱིཙིཛརཱ. མརཎེ ཨུཔནཡནརསཱ.

༦༤༤. ཏཾ པཏྭཱཏི ཏཾ ཨཏྟནོ ཨེཝ ཁཡཝཡསངྑཱཏཾ སབྷཱཝཾ པཏྭཱ རཱུཔཾ ཁཱིཡཏི ཝེཏི བྷིཛྫཏི. པོཐེཏྭཱ པཱཏིཏསྶ དུབྦལཏཱ པརཱདྷཱིནཏཱ སཡནཔརཱཡཎཏཱ ཙ ཧོཏི, ཏཐཱ ཛརཱབྷིབྷཱུཏསྶཱཏི པོཐཀསདིསཱི ཛརཱ.

༦༤༥. ཀཏྟབྦཏོཏི ཀཏྟབྦསབྷཱཝཏོ. ཝིསཱཎཱདཱིནཾ ཏརཙྪཁེལ༹ཏེམིཏཱནཾ པཱསཱཎཱནཾ ཝིཡ ཐདྡྷབྷཱཝཱབྷཱཝཏོ ཨཧིཝིཙྪིཀཱནཾ ཝིཡ ¶ སཝིསཏྟཱབྷཱཝཏོ ཙ སུཁུམཏཱ ཝུཏྟཱ. ཨོཛཱལཀྑཎོཏི ཨེཏྠ ཨངྒམངྒཱནུསཱརིནོ རསསྶ སཱརོ ཨུཔཏྠམྦྷབལཀཱརོ བྷཱུཏནིསྶིཏོ ཨེཀོ ཝིསེསོ ཨོཛཱཏི.

ཨུཔཱདཱབྷཱཛནཱིཡཀཐཱཝཎྞནཱ ནིཊྛིཏཱ.

ནོཨུཔཱདཱབྷཱཛནཱིཡཀཐཱཝཎྞནཱ

༦༤༦. ན ཨུཔཱདིཡཏེཝཱཏི ན ནིསྶཡཏི ཨེཝ, ཀིནྟུ ནིསྶཡཏི ཙ ནིསྶཱིཡཏི ཙཱཏི ཨཏྠོ.

༦༤༧. པུརིམཱ པནཱཏི པཉྩཝིདྷསངྒཧེ པཐཝཱིདྷཱཏུཨཱཔོདྷཱཏུཏེཛོདྷཱཏུཝཱཡོདྷཱཏཱུནཾ པུརིམུདྡེསཝསེན ཝུཏྟཾ. ཕོཊྛབྦཱཡཏནནིདྡེསེ ཝཱ ཝུཏྟཱནཾ པཐཝཱིདྷཱཏུཨཱདཱིནཾ པུརིམཱ ཨུདྡེསེ ཝུཏྟཱ ཨཱཔོདྷཱཏཱུཏི ཨདྷིཔྤཱཡོ, ཝུཏྟསྶ ཝཱ ཕོཊྛབྦཱཡཏནསྶ ཨཏཱིཏཏཱཡ པཙྪིམཏཱ, ཨནཱགཏཏཱཡ ཙ ཨཱཔོདྷཱཏུཡཱ པུརིམཏཱ ཝུཏྟཱཏི དཊྛབྦཱ. ཨཱཡཱུཏི ཛཱིཝིཏིནྡྲིཡཾ. ཀམྨཛཏེཛཾ ཨུསྨཱ. ཡཾ ཀིཉྩི དྷཱཏུཾ…པེ… ཨེཀཔྤཧཱརེན ནུཔྤཛྫཏཱིཏི ཨེཀསྨིཾ ཁཎེ ཨནེཀཱསུ པཐཝཱིསུ ཨཱཔཱཐགཏཱསུ ཏཱསུ ཏཱསུ སཧ ནུཔྤཛྫཏི, ཏཐཱ ཏེཛཝཱཡཱུསུ ཙཱཏི ཨཏྠོ. ཨནེཀེསུ ཨཱརམྨཎེསུ སནྣིཔཏིཏེསུ ཨཱབྷུཛིཏཝསེན ཨཱརམྨཎཔསཱདཱདྷིམཏྟཏཱཝསེན ཙ པཋམཾ ཀཏྠཙི ཨུཔྤཏྟི ¶ དསྶིཏཱ, ཨཉྙཏྠ ཙ པན ཨུཔྤཏྟི ཨཏྠི ཨེཝ. སཱཡཾ ཨཱརམྨཎཏོ ཨཱརམྨཎནྟརསངྐནྟི ཡེན ཨུཔཱཡེན ཧོཏི, ཏསྶ ཝིཛཱནནཏྠཾ པུཙྪཏི ‘‘ཀཐཾ པན ཙིཏྟསྶ ཨཱརམྨཎཏོ སངྐནྟི ཧོཏཱི’’ཏི.

༦༥༡. ཨཡཔིཎྜིཨཱདཱིསུ པཐཝཱིདྷཱཏུ ཏཱདིསཱཡ ཨཱཔོདྷཱཏུཡཱ ཨནཱབདྡྷཱ སནྟཱི ཝིསརེཡྻ, ཏསྨཱ ‘‘ཏཱནི ཨཱཔོདྷཱཏུ ཨཱབནྡྷིཏྭཱ བདྡྷཱནི ཀརོཏཱི’’ཏི ཝུཏྟཾ. ཡཐཱ ཧི ཡུཏྟཔྤམཱཎཾ ཨུདཀཾ པཾསུཙུཎྞཱནི ཨཱབནྡྷིཏྭཱ མཏྟིཀཱཔིཎྜཾ ཀཏྭཱ ཋཔེཏི, ཨེཝཾ ཨཡོཔིཎྜིཨཱདཱིསུཔི ཏདནུརཱུཔཔཙྩཡེཧི ཏཏྠེཝ ཨུཔྤནྣཱ ཨཱཔོདྷཱཏུ ཏཐཱ ཨཱབནྡྷིཏྭཱ ཋཔེཏཱིཏི དཊྛབྦཱ.

ཨཕུསིཏྭཱ པཏིཊྛཱ ཧོཏཱིཏི ཨཱཔོདྷཱཏུཡཱ ཨཕོཊྛབྦབྷཱཝཏོ ཝུཏྟཾ, ཏཐཱ ‘‘ཨཕུསིཏྭཱཝ ཨཱབནྡྷཏཱི’’ཏི. ན ཧི ཡཐཱ ཕོཊྛབྦདྷཱཏཱུནཾ ཕོཊྛབྦབྷཱཝེན ¶ ཨཉྙམཉྙནིསྶཡཏཱ, ཨེཝཾ ཕོཊྛབྦཱཕོཊྛབྦདྷཱཏཱུནཾ ཧོཏཱིཏི ཨདྷིཔྤཱཡོ ཝེདིཏབྦོ. ཨཝིནིབྦྷོགཝུཏྟཱིསུ ཧི བྷཱུཏེསུ ཨཉྙམཉྙནིསྶཡཏཱ ཨཉྙམཉྙཔཙྩཡབྷཱུཏེསུ ན སཀྐཱ ནིཝཱརེཏུཾ, ནཱཔི སཧཛཱཏེསུ ཨཝིནིབྦྷོགཏཱཡ ཨེཀཱིབྷཱུཏེསུ ཕུསནཱཕུསནཱནི ཝིཙཱརེཏུཾ ཡུཏྟཱནཱིཏི. ན ཨུཎྷཱ ཧུཏྭཱ ཛྷཱཡཏཱིཏི ཏེཛོསབྷཱཝཏཾཡེཝ པཊིཀྑིཔཏི, ན སཱིཏཏྟཾ ཨནུཛཱནཱཏི, ཏེཛོསབྷཱཝཔཊིཀྑེཔེནེཝ ཙ སཱིཏཏྟཉྩ པཊིཀྑིཏྟཾ ཧོཏི. ཏེཛོ ཨེཝ ཧི སཱིཏཾ ཧིམཔཱཏསམཡཱདཱིསུ སཱིཏསྶ པརིཔཱཙཀཏཱདསྶནཏོ, སཱིཏུཎྷཱནཉྩ ཨཉྙམཉྙཔཊིཔཀྑབྷཱཝཏོ ཨུཎྷེན སཧ ན སཱིཏཾ བྷཱུཏནྟརཾ པཝཏྟཏཱིཏི ཡུཛྫཏི. ཨུཎྷཀལཱཔེ པན སཱིཏསྶ ཨཔྤཝཏྟི སཱིཏཀལཱཔེ ཙ ཨུཎྷསྶ དྭིནྣཾ ཨཉྙམཉྙཔཊིཔཀྑཏྟཱ ཏེཛོཝིསེསབྷཱཝེ ཡུཛྫཏཱིཏི. བྷཱཝཉྙཐཏྟནྟི ཁརཱནཾ གུལཱ༹དཱིནཾ དཝཏཱ མུདུཏཱ རསཱདཱིནཉྩ དཝཱནཾ ཁརཏཱ པཙྩཡཝིསེསེཧི ཨོམཏྟཱདྷིམཏྟཔཐཝཱིདྷཱཏུཨཱདིཀཱནཾ ཨུཔྤཏྟི. ལཀྑཎཉྙཐཏྟཾ ཀཀྑལཱ༹དིལཀྑཎཝིཛཧནཾ, ཏཾ ཨེཏེསཾ ན ཧོཏི, ཨོམཏྟཱདྷིམཏྟཏཱསངྑཱཏཾ བྷཱཝཉྙཐཏྟཾཡེཝ ཧོཏཱིཏི ཨཏྠོ.

༦༥༢. ཨནུཔཱདིནྣཱདཱིནཾཡེཝཱཏི ཨེཀནྟཨནུཔཱདིནྣཨེཀནྟནཙིཏྟསམུཊྛཱནཱདཱིནཾ ནིདྡེསེསུ གཧཎེསུ གཧིཏཱཏི ཨཏྠོ. ཡཾ ཝཱ པནཉྙམྤཱིཏི པན ཝཙནེན པུརིམཱནམྤི ནཀམྨསྶཀཏཏྟཱབྷཱཝཱདིཀཾ དཱིཔེཏི. ཏཱ ཧི ཨནུཔཱདིནྣཱདིནཀམྨསྶཀཏཏྟཱདིཝཙནཱནཾ སམཱནཏྠཏྟཱ ཨེཀེན ཨཝཏྟབྦཏྟེ ཨིཏརེནཔི ཨཝཏྟབྦཱ སིཡུཾ, ཝཏྟབྦཏྟེ ཝཱ ཝཏྟབྦཱ. ཏསྨཱ ཨེཀནྟཱཀམྨཛཱདཱིསྭེཝ གཧེཏབྦཏྟཱ ཏཱ ཨནེཀནྟེསུ ན གཧིཏཱཏི དཊྛབྦཱ.

༦༦༦. ཨེཀནྟ ¶ …པེ… པཉྙཱཡཏི ཏེསཾ ཝིཀཱརཏྟཱ, ཨནིཔྥནྣཏྟཱ པན ཏསྶ ཨུཔྤཱདོ ན ཀེནཙི སཀྐཱ ཝཏྟུནྟི ཨདྷིཔྤཱཡོ.

དུཀནིདྡེསཝཎྞནཱ ནིཊྛིཏཱ.

ཙཏུཀྐནིདྡེསཝཎྞནཱ

༩༦༦. པཙྪིམཔདསྶཱཏི ཝིཉྙཱཏཔདསྶ. སབྦམེཝ ཧི རཱུཔཾ ཝིཉྙཱཏནྟི ཏསྶ ཨབྷིནྡིཏབྦཏྟཱ ཝིཉྙཱཏཏོ ཨཉྙཾ དིཊྛཾ སུཏཾ མུཏཉྩ ན ཧོཏཱིཏི པུཙྪཾ ཨཀཏྭཱཝ ཝིསྶཛྫིཏཾ. ན ཧི སཀྐཱ ཝིཉྙཱཏཏོ ཨཉྙཾ ‘‘ཀཏམཾ རཱུཔཾ དིཊྛ’’ནྟི ¶ པུཙྪིཏུནྟི ཨདྷིཔྤཱཡོ. ཡཐཱ ཧི དྭཱིསུ ཨུདྡིཊྛེསུ ནོཔཱདཏོ ཨཉྙཏྟཾ སནྡྷཱཡ ‘‘ཀཏམཾ ཏཾ རཱུཔཾ ཨུཔཱདཱ’’ཏི པུཙྪིཏཾ, ཨེཝཾ དིཊྛཱདཱིསུ ཙཏཱུསུ ཨུདྡིཊྛེསུ སུཏཱདཱིཧི ཏཱིཧིཔི ཨཉྙཏྟཾ སནྡྷཱཡ ‘‘ཀཏམཾ ཏཾ རཱུཔཾ དིཊྛ’’ནྟི པུཙྪིཏབྦཾ སིཡཱ, ཏདབྷཱཝོ ན པུཙྪིཏཾ, ཨེཝཾ སུཏཱདཱིསུཔཱིཏི. དསྶནཱདིགྒཧཎཝིསེསཏོ པན དིཊྛཱདཱིཧི ཨཉྙསྶ ཝིཉྙཱཏསྶ སབྦྷཱཝཏོ ཙ ཙཏུཀྐོ ཝུཏྟོ.

པཉྩཀནིདྡེསཝཎྞནཱ

༩༦༩. ཏེཛོབྷཱཝཾ གཏནྟི སབྷཱཝེནེཝ ཏེཛོབྷཱཝཾ པཏྟནྟི ཨཏྠོ. ཝུཏྟསྶཔི ཨཉྙེན པཀཱརེན སངྒཧཱརཧསྶ སངྒཎྷནཾ ནཡཀརཎཾ ཨིདྷ དཊྛབྦཾ, ཏཡིདཾ ‘‘ཝིཉྙཱཏ’’ནྟི ཙཏུཀྐཔདེཔི ཡོཛེཏབྦཾ. ཕོཊྛབྦསྶ བྷེདསབྦྷཱཝོ ཨཊྛཀེ ནཡོ.

པཀིཎྞཀཀཐཱཝཎྞནཱ

༩༧༥. ནཏྠི ནཱིཝརཎཱཏི ཝཙནེན མིདྡྷསྶཔི ནཱིཝརཎསྶ པཧཱནཾ ཝུཏྟཾ, ན ཙ རཱུཔཾ པཧཱཏབྦཾ, ན ཙ རཱུཔཀཱཡགེལཉྙཾ མུནིནོ ནཏྠཱིཏི སཀྐཱ ཝཏྟུཾ ‘‘པིཊྛི མེ ཨཱགིལཱཡཏི, ཏམཧཾ ཨཱཡམིསྶཱམཱི’’ཏི (མ. ནི. ༢.༢༢) ཝཙནཏོ. སཝིཉྙཱཎཀསདྡོཏི ཝིཉྙཱཎེན པཝཏྟིཏོ ཝཙཱིགྷོསཱདིསདྡོ. ན ཧི ཨེཏཱནི ཛཱཡནྟཱིཏི པརིཔཙྩམཱནསྶ རཱུཔསྶ པརིཔཙྩནཾ ཛརཱ ¶ , ཁཱིཡམཱནསྶ ཁཡོ ཨནིཙྩཏཱཏི རཱུཔབྷཱཝམཏྟཱནི ཨེཏཱནི, ན སཡཾ སབྷཱཝཝནྟཱནཱིཏི སནྡྷཱཡ ཝུཏྟཾ. ཏཐཱ ཛཱཡམཱནསྶ ཛནནཾ ཛཱཏི, སཱ ཙ རཱུཔབྷཱཝོཝ, ན སཡཾ སབྷཱཝཝཏཱིཏི ‘‘ན པན པརམཏྠཏོ ཛཱཏི ཛཱཡཏཱི’’ཏི ཝུཏྟཾ.

ཏེསཾ པཙྩཡོ ཨེཏིསྶཱཏི ཏཔྤཙྩཡཱ, ཏཔྤཙྩཡཱཡ བྷཱཝོ ཏཔྤཙྩཡབྷཱཝོ, ཏཔྤཙྩཡབྷཱཝེན པཝཏྟོ ཝོཧཱརོ ཏཔྤཙྩཡབྷཱཝཝོཧཱརོ, ཏཾ ལབྷཏི. ཨབྷིནིབྦཏྟིཏདྷམྨཀྑཎསྨིནྟི ཨབྷིནིབྦཏྟིཡམཱནདྷམྨཀྑཎསྨིནྟི ཨདྷིཔྤཱཡོ. ན ཧི ཏདཱ ཏེ དྷམྨཱ ན ཛཱཡནྟཱིཏི ཛཱཡམཱནབྷཱཝོཝ ཛཱཏཱིཏི ཡུཏྟཱ ཏསྶཱ ཀམྨཱདིསམུཊྛཱནཏཱ ཏཾནིབྦཏྟཏཱ ཙ, ན པན ཏདཱ ཏེ དྷམྨཱ ཛཱིཡནྟི ཁཱིཡནྟི ཙ, ཏསྨཱ ན ཏེསཾ ཏེ ཛཱིརཎབྷིཛྫནབྷཱཝཱ ཙིཏྟཱདིསམུཊྛཱནཱ ཏཾནིབྦཏྟཱ ཙཱཏི ཝཙནཾ ཨརཧནྟི. ཨེཝམཔི ཨུཔཱདིནྣ-སདྡོ ཨུཔེཏེན ཀམྨུནཱ ཨཱདིནྣཏཾ ཝདཏི, ན ནིབྦཏྟིནྟི ཨུཔཱདིནྣཔཱཀབྷེདཱནཾ ཨུཔཱདིནྣཏཱ ཏེསཾ ཝཏྟབྦཱཏི ཙེ? ན, ཨཱདིནྣ-སདྡསྶ ནིབྦཏྟིཝཱཙཀཏྟཱ. ཨུཔེཏེན ¶ ནིབྦཏྟཉྷི ཨུཔཱདིནྣནྟི པཙྩཡཱནུབྷཱཝཀྑཎཉྩ ནིབྦཏྟིཉྩ གཧེཏྭཱཝ པཝཏྟོ ཨཡཾ ཝོཧཱརོ ཏདཱ ཨབྷཱཝཱ ཛརཱམརཎེ ན པཝཏྟཏཱིཏི. པཊིཙྩསམུཔྤནྣཱནཾ དྷམྨཱནཾ ཛརཱམརཎཏྟཱ ཏེསཾ ཨུཔྤཱདེ སཏི ཛརཱམརཎཾ ཧོཏི, ཨསཏི ན ཧོཏི. ན ཧི ཨཛཱཏཾ པརིཔཙྩཏི བྷིཛྫཏི ཝཱ, ཏསྨཱ ཛཱཏིཔཙྩཡཏཾ སནྡྷཱཡ ‘‘ཛརཱམརཎཾ པཊིཙྩསམུཔྤནྣ’’ནྟི ཝུཏྟཾ.

ནིསྶཡཔཊིབདྡྷཝུཏྟིཏོཏི ཛཱཡམཱནཔརིཔཙྩམཱནབྷིཛྫམཱནཱནཾ ཛཱཡམཱནཱདིབྷཱཝམཏྟཏྟཱ ཛཱཡམཱནཱདིནིསྶཡཔཊིབདྡྷཝུཏྟིཀཱ ཛཱཏིཨཱདཡོཏི ཝུཏྟཾ ཧོཏི. ཡདི ཨེཝཾ ཨུཔཱདཱཡརཱུཔཱནཉྩ ཙཀྑཱཡཏནཱདཱིནཾ ཨུཔྤཱདཱདིསབྷཱཝབྷཱུཏཱ ཛཱཏིཨཱདཡོ ཏཾནིསྶིཏཱ ཧོནྟཱིཏི བྷཱུཏནིསྶིཏཱནཾ ཏེསཾ ལཀྑཎཱནཾ ཨུཔཱདཱཡབྷཱཝོ ཝིཡ ཨུཔཱདཱཡརཱུཔནིསྶིཏཱནཾ ཨུཔཱདཱཡུཔཱདཱཡབྷཱཝོ ཨཱཔཛྫཏཱིཏི ཙེ? ན, བྷཱུཏཔཊིབདྡྷཨུཔཱདཱཡརཱུཔལཀྑཎཱནཉྩ བྷཱུཏཔཊིབདྡྷབྷཱཝསྶ ཨཝིནིཝཏྟནཏོ. ཨཔིཙ ཨེཀཀལཱཔཔརིཡཱཔནྣཱནཾ རཱུཔཱནཾ སཧེཝ ཨུཔྤཱདཱདིཔྤཝཏྟིཏོ ཨེཀསྶ ཀལཱཔསྶ ཨུཔྤཱདཱདཡོ ཨེཀེཀཱཝ ཧོནྟཱིཏི ཡཐཱ ཨེཀེཀསྶ ཀལཱཔསྶ ཛཱིཝིཏིནྡྲིཡཾ ཀལཱཔཱནུཔཱལཀཾ ‘‘ཨུཔཱདཱཡརཱུཔ’’ནྟི ཝུཙྩཏི, ཨེཝཾ ཀལཱཔུཔྤཱདཱདིསབྷཱཝཱ ཛཱཏིཨཱདཡོ ‘‘ཨུཔཱདཱཡརཱུཔཱནི’’ཙྩེཝ ཝུཙྩནྟི. ཨེཝཾ ཝིཀཱརཔརིཙྪེདརཱུཔཱནི ཙ ཡོཛེཏབྦཱནི.

ཀམྨསམུཊྛཱནསམྦནྡྷཾ ཨུཏུསམུཊྛཱནཾ ཀམྨཝིསེསེན སུཝཎྞདུབྦཎྞསུསཎྛིཏདུསྶཎྛིཏཱདིཝིསེསཾ ¶ ཧོཏཱིཏི ‘‘ཀམྨཔཙྩཡ’’ནྟི ཝུཏྟཾ. ཀམྨཝིཔཱཀཱནུབྷཝནསྶ ཀཱརཎབྷཱུཏཾ བཱཧིརཨུཏུསམུཊྛཱནཾ ཀམྨཔཙྩཡཨུཏུསམུཊྛཱནཾ. ཀམྨསཧཱཡོ པཙྩཡོ, ཀམྨསྶ ཝཱ སཧཱཡབྷཱུཏོ པཙྩཡོ ཀམྨཔཙྩཡོ, སོཝ ཨུཏུ ཀམྨཔཙྩཡཨུཏུ, སོ སམུཊྛཱནཾ ཨེཏསྶཱཏི ཀམྨཔཙྩཡཨུཏུསམུཊྛཱནནྟི ཝཙནཏྠོ. སཱིཏེ ཨུཎྷེ ཝཱ ཀིསྨིཉྩི ཨུཏུམྷི སམཱགཏེ ཏཏོ སུདྡྷཊྛཀཾ ཨུཔྤཛྫཏི, ཏསྶ སོ ཨུཏུ སམུཊྛཱནཾ. དུཏིཡསྶ སུདྡྷཊྛཀསྶ ཨུཏུསམུཊྛཱནིཀཔཊིབནྡྷཀསྶ སོ ཨེཝ པུརིམོ ཨུཏུ པཙྩཡོ. ཏཏིཡཾ པན སུདྡྷཊྛཀཾ པུརིམཨུཏུསཧཱཡེན ཨུཏུནཱ ནིབྦཏྟཏྟཱ པུབྦེ ཝུཏྟནཡེནེཝ ‘‘ཨུཏུཔཙྩཡཨུཏུསམུཊྛཱན’’ནྟི ཝུཏྟཾ. ཨེཝམཡཾ པུརིམོ ཨུཏུ ཏིསྶོ སནྟཏིཡོ གྷཊྚེཏི, ཏཏོ པརཾ ཨཉྙཨུཏུསམཱགམེ ཨཉྙསནྟཏིཏྟཡཾ, ཏཏོ ཙ ཨཉྙེན ཨཉྙནྟི ཨེཝཾ པཝཏྟི དཊྛབྦཱ. ཏདེཏཾ སཱིཏུཎྷཱནཾ ཨཔྤབཧུབྷཱཝེ ཏཾསམྥསྶསྶ ཨཙིརཔྤཝཏྟིཡཱ ཙིརཔྤཝཏྟིཡཱ ¶ ཙ ཝེདིཏབྦཾ, ཨནུཔཱདིནྣེན དཱིཔནཱ ན སནྟཏིཏྟཡཝསེན, ཨཐ ཁོ མེགྷསམུཊྛཱཔཀམཱུལཨུཏུཝསེན པཀཱརནྟརེན དཊྛབྦཱ, ཏཾ དསྶེཏུཾ ‘‘ཨུཏུསམུཊྛཱནོ ནཱམ ཝལཱཧཀོ’’ཏིཨཱདིམཱཧ. རཱུཔརཱུཔཱནཾ ཝིཀཱརཱདིམཏྟབྷཱཝཏོ ཨཔརིནིཔྥནྣཏཱ ཝུཏྟཱ. ཏེསཉྷི རཱུཔཝིཀཱརཱདིབྷཱཝཏོ རཱུཔཏཱཏི ཨདྷིཔྤཱཡོ. རཱུཔཝིཀཱརཱདིབྷཱཝཏོ ཨེཝ པན རཱུཔེ སཏི སནྟི, ཨསཏི ན སནྟཱིཏི ཨསངྑཏབྷཱཝནིཝཱརཎཏྠཾ པརིནིཔྥནྣཏཱ ཝུཏྟཱཏི.

རཱུཔཀཎྜཝཎྞནཱ ནིཊྛིཏཱ.

༣. ནིཀྑེཔཀཎྜཾ

ཏིཀནིཀྑེཔཀཐཱཝཎྞནཱ

༩༨༥. སབྦེསནྟི ¶ ¶ ཙིཏྟུཔྤཱདཝསེན རཱུཔཱསངྑཏཝསེན ཙ བྷིནྣཱནཾ སབྦེསཾ ཕསྶཱདིཙཀྑཱདིཔདབྷཱཛནནཡེན ཝིཏྠཱརིཏོ. ཏཏྠ པན ཨསངྑཏསྶ བྷེདཱབྷཱཝཏོ ཨསངྑཏཱ དྷཱཏཱུཏྭེཝ པདབྷཱཛནཾ དཊྛབྦཾ. ཡེཝཱཔནཀཱནཾ པན སུཁུམུཔཱདཱཡརཱུཔསྶ ཙ ཨིནྡྲིཡཝིཀཱརཔརིཙྪེདལཀྑཎརཱུཔུཔཏྠམྦྷཀབྷཱཝརཧིཏསྶ ཧདཡཝཏྠུསྶ པདུདྡྷཱརེན ཨིདྷ ནིདྡེསཱནརཧཏྟཱ ནིདྡེསོ ན ཀཏོཏི དཊྛབྦོ. ན ཧི ཏཐཱགཏསྶ དྷམྨེསུ ཨཱཙརིཡམུཊྛི ཨཏྠཱིཏི. ནིཀྑིཔིཏྭཱཏི ཝིཏྠཱརདེསནཾ ཋཔེཏྭཱ, ཨཔནེཏྭཱཏི ཨཏྠོ, ཝིཏྠཱརདེསནཾ ཨནྟོགདྷཾ ཀཏྭཱཏི ཝཱ. གཱཐཱཏྠོ ནིདཱནེ ཝུཏྟོ ཨེཝ.

མཱུལཝསེན པཙྩཡབྷཱཝོ ཧེཏུཔཙྩཡཏྠོ. པབྷཝཏི ཨེཏསྨཱཏི པབྷཝོ, སོ ཨེཝ ‘‘ཛནཀོ’’ཏི ཝིསེསིཏོ. སམུཊྛཱཏི ཨེཏེནཱཏི སམུཊྛཱནཾ, ཏསྶ ཝིསེསནཾ ནིབྦཏྟཀནྟི. སབྦཱནི ཝཱ ཨེཏཱནི པརིཡཱཡཝཙནཱནི. ཨཏྠཝསེནཱཏི ཀསྨཱ ཝུཏྟཾ, ནནུ ཀུསལམཱུལཱནཾ ཧེཏུབྷཱཝཏོ དྷམྨཝསེནཱཏི ཡུཏྟནྟི? སཙྩམེཏཾ, ཨལོབྷཱདཱིནཾ པན ཏིཎྞཾ སམཱནསྶ མཱུལཊྛསྶ ཝསེན དསྶིཏཏཾ སནྡྷཱཡ ‘‘ཨཏྠཝསེནཱ’’ཏི ཝུཏྟཾ. ཨིམིནཱ དྷམྨོཏི བྷཱཝོ, ཨཏྠོཏི དྷམྨཀིཙྩཾ ཨདྷིཔྤེཏནྟི ཝིཉྙཱཡཏི. ‘‘ཨལོབྷོ ནིདཱནཾ ཀམྨཱནཾ སམུདཡཱཡཱ’’ཏིཨཱདིཝཙནཏོ (ཨ. ནི. ༣.༣༤) ཏཱནི ཀུསལམཱུལཱནི སམུཊྛཱནཾ ཨེཏསྶཱཏིཔི ཏཾསམུཊྛཱནཾ. ཏཾ པན ཏེཧི སམུཊྛིཏཾ ཧོཏཱིཏི ‘‘ཨལོབྷཱདཱིཧི སམུཊྛིཏ’’ནྟི ཨཱཧ. ཏེ ཀུསལམཱུལཏཾསམྤཡུཏྟཱ སམུཊྛཱནཾ ཨེཏསྶཱཏིཔི ཨཏྠོ སམྦྷཝཏི. ཨེཏྠ པན ཙེཏནཾ ཋཔེཏྭཱ ཨཉྙེ ‘‘ཏཾསམྤཡུཏྟཱ’’ཏི སམུཊྛཱནབྷཱཝེ ཝཏྟབྦཱ. ཏཏྠ མཱུལེཧི ཨཏྟནོ པཙྩཡཏོ ཀུསལེ པརིཡཱདིཡཏི, ཁནྡྷེཧི སབྷཱཝཏོ ¶ , ཀམྨེཧི ཨཉྙསྶ ནིབྦཏྟནཀིཙྩཏོ. མཱུལེཧི ཙ ཀུསལཱནཾ ཨནཝཛྫཏཱཡ ཧེཏུཾ དསྶེཏི, ཁནྡྷེཧི ཏཾསམྤཡོགཀཏཾ ཨནཝཛྫསབྷཱཝཾ, ཀམྨེཧི སུཁཝིཔཱཀཏཾ. མཱུལེཧི ཝཱ ནིདཱནསམྤཏྟིཡཱ ཨཱདིཀལྱཱཎཏཾ, ཁནྡྷེཧི སབྷཱཝསམྤཏྟིཡཱ མཛ྄ཛྷེཀལྱཱཎཏཾ, ཀམྨེཧི ནིབྦཏྟིསམྤཏྟིཡཱ པརིཡོསཱནཀལྱཱཎཏཾ.

༩༨༦. ཏཾ ¶ …པེ… ཨུདྡྷཾ ཨཀུསལཾ ནཱམ ནཏྠཱིཏི ཀསྨཱ ཝུཏྟཾ, ནནུ ཝིཙིཀིཙྪུདྡྷཙྩསཧགཏམོཧོ ཨཏྠཱིཏི? སཙྩམེཏཾ, ཏེན པན ཝིནཱ ཏཾསམྤཡུཏྟཏཱ ནཏྠཱིཏི ཏཾསམྤཡུཏྟེསུ གཧིཏེསུ མོཧོ གཧིཏོ ཨེཝཱཏི ཀཏྭཱ ‘‘ཏཏོ ཨུདྡྷཾ ནཏྠཱི’’ཏི ཝུཏྟཾ ཨཉྙཏྠ ཨབྷཱཝཱ. ཨེཀསྨིཾ ཋིཏཾ ཨེཀཊྛཾ, སཧཛབྷཱཝེན ཨེཀཊྛཾ སཧཛེཀཊྛཾ. པཧཱཏབྦནྟི པཧཱནཾ, པཧཱནབྷཱཝེན ཨེཀཊྛཾ པཧཱནེཀཊྛཾ. ཡེན ཧི ཡཾ སཧ པཧཱཏབྦཾ, ཏེན ཏཾ ཨེཀསྨིཾ པུགྒལེ ཋིཏཾ ཧོཏི, ཨེཀསྨིཾ སམུཙྪིནྣེ ཨསམུཙྪིནྣེ ཙ ཨིཏརསྶ སམུཙྪིནྣཏཱཡ ཨསམུཙྪིནྣཏཱཡ ཙ ཝསེན ཨཉྙམཉྙཱཝིརཧིཏཏོ.

༩༨༧. ཏཱིཎི ལཀྑཎཱནཱིཏི ཨནིཙྩདུཀྑཨནཏྟཏཱ. ནཱམཀསིཎསཏྟཔཉྙཏྟིཡོ ཏིསྶོ པཉྙཏྟིཡོ. པརམཏྠེ ཨམུཉྩིཏྭཱ ཝོཧརིཡམཱནཱ ཝིཧཱརམཉྩཱདིཀཱ ཨུཔཱདཱཔཉྙཏྟི སཏྟཔཉྙཏྟིགྒཧཎེན གཧིཏཱཏི ཝེདིཏབྦཱ, ཨེཏཱནི ཙ ལཀྑཎཱདཱིནི ཧེཊྛཱ དྭཱིསུ ཀཎྜེསུ ཝིཉྙཏྟིཨཱདཱིནི ཝིཡ ན ཝུཏྟཱནི, ན ཙ སབྷཱཝདྷམྨཱཏི ཀཏྭཱ ན ལབྦྷནྟཱིཏི ཝུཏྟཱནི. ན ཧི ཀོཙི སབྷཱཝོ ཀུསལཏྟིཀཱསངྒཧིཏོཏི ཝཏྟུཾ ཡུཏྟནྟི.

༩༨༨. སུཁབྷཱུམཱིཏི ཀཱམཱཝཙརཱདཡོཔི ཡུཛྫནྟི. སུཁསཧགཏཱ ཧི ཀཱམཱཝཙརཱདིབྷཱུམི སུཁབྷཱུམི. ཀཱམཱཝཙརཱདིབྷཱུམཱིཏི ཙ ཀཱམཱཝཙརཱདིཏཱཡ དྷམྨཱ ཨེཝ ཝུཙྩནྟཱིཏི ཀཱམཱཝཙརཱདིཙིཏྟུཔྤཱདེསཱུཏི ཨཏྠཏོ ཝིཉྙཱཡཏི. ཨེཝཉྩ ཀཏྭཱ ‘‘སུཁབྷཱུམིཡ’’ནྟི ཝཏྭཱ ཏསྶཱ ཨེཝ ཝིབྷཱགདསྶནཏྠཾ ‘‘ཀཱམཱཝཙརེ’’ཏིཨཱདི ཝུཏྟཾ. བྷཱུམི-སདྡོ ཙ ཨབྷིདྷམྨེ ཀཱམཱཝཙརཱདཱིསུ ནིརུལ༹ྷོཏི ‘‘ཙཏཱུསུ བྷཱུམཱིསུ ཀུསལ’’ནྟིཨཱདཱིསུ (དྷ. ས. ༡༣༨༤) ཨཉྙབྷཱུམིགྒཧཎཾ ན ཧོཏཱིཏི. པཱལི༹ཏོ ཙཱཏི ‘‘ཝིསིཊྛཱནཾ པཱཀཱཏི ཝིཔཱཀཱ’’ཏིཨཱདིཝཙནཏྠཝིབྷཱཝནེན པཱལི༹ཏོ. ‘‘ཝིཔཀྐབྷཱཝམཱཔནྣཱནཾ ཨརཱུཔདྷམྨཱནམེཏཾ ཨདྷིཝཙན’’ནྟིཨཱདིནཱ བྷཱསིཏཏྠཝིབྷཱཝནེན ཨཏྠཏོ ཙ. ནཱམཔརིཙྪེདཱདཱིཧི ཏིཀདུཀཱནཾ ཝཝཏྠཱནདསྶནེན ཝཱ པཱལི༹ཏོ, ཏདཏྠཝིཉྙཱཔནེན ཨཏྠཏོ.

༩༩༡. སཱལིཕལནྟི ¶ སཱལིཔཱཀམཱཧ.

༩༩༤. ཨམྷཱཀཾ མཱཏུལཏྠེརོཏི པུགྒལཱརམྨཎསྶཔི ཨུཔཱདཱནསྶ ཨུཔཱདཱནཀྑནྡྷཱ ཨེཝ པཙྩཡོ, ན ལོཀུཏྟརཱ, ཀོ པན ཝཱདོ ཁནྡྷཱརམྨཎསྶ. ཏེནཱཧ ‘‘ཨགྒཧིཏཱནཱི’’ཏི.

༩༩༨. ཡཐཱ ¶ ཨུཔཱདཱནེཧི ཨགྒཧེཏབྦཱ ཨནུཔཱདཱནིཡཱ, ཨེཝཾ སཾཀིལེསེཧི ཨགྒཧེཏབྦཱ ཨསཾཀིལེསིཀཱཏི ཀཏྭཱ ‘‘ཨསཾ…པེ… ཨེསེཝ ནཡོ’’ཏི ཨཱཧ.

༡༠༠༦. དིཊྛིཡཱ གཧིཏོ ཨཏྟཱ ན ཝིཛྫཏི. ཡེསུ པན ཝིཔལླཏྠགཱཧོ, ཏེ ཨུཔཱདཱནཀྑནྡྷཱཝ ཝིཛྫནྟི. ཏསྨཱ ཡསྨིཾ ཨཝིཛྫམཱནནིཙྩཱདིཝིཔརིཡཱསཱཀཱརགཧཎཾ ཨཏྠི, སོཝ ཨུཔཱདཱནཀྑནྡྷཔཉྩཀསངྑཱཏོ ཀཱཡོ. ཏཏྠ ནིཙྩཱདིཨཱཀཱརསྶ ཨཝིཛྫམཱནཏཱདསྶནཏྠཾ རུཔྤནཱདིསབྷཱཝསྶེཝ ཙ ཝིཛྫམཱནཏཱདསྶནཏྠཾ ཝིཛྫམཱནོ ཀཱཡོཏི ཝིསེསེཏྭཱ ཝུཏྟོ, ལོཀུཏྟརཱ པན ན ཀདཱཙི ཨཝིཛྫམཱནཱཀཱརེན གཡ྄ཧནྟཱིཏི ན ཨིདཾ ཝིསེསནཾ ཨརཧནྟི. སཀྐཱཡེ དིཊྛི, སཏཱི ཝཱ ཀཱཡེ དིཊྛི སཀྐཱཡདིཊྛི. ཨཏྟནཱ གཧིཏཱཀཱརསྶ ཨཝིཛྫམཱནཏཱཡ སཡམེཝ སཏཱི, ན ཏཱཡ གཧིཏོ ཨཏྟཱ ཨཏྟནིཡཾ ཝཱཏི ཨཏྠོ. ཨཡཾ པནཏྠོ སམྦྷཝཏཱིཏི ཀཏྭཱ ཝུཏྟོ, པུརིམོ ཨེཝ པན པདྷཱནོ. དུཏིཡེ ཧི དིཊྛིཡཱ ཝཏྠུ ཨཝིསེསིཏཾ ཧོཏི. ཀཱཡོཏི ཧི ཁནྡྷཔཉྩཀེ ཝུཙྩམཱནེ ལོཀུཏྟརཱཔནཡནཾ ནཏྠི. ན ཧི ལོཀུཏྟརེསུ ཀཱཡ-སདྡོ ན ཝཏྟཏི. ཀཱཡཔསྶདྡྷིཨཱདཱིསུ ཧི ལོཀུཏྟརེསུ ཀཱཡ-སདྡོཔི ལོཀུཏྟརཀྑནྡྷཝཱཙཀོཏི. སཱིལེནཱཏི སུདྡྷིཡཱ ཨཧེཏུབྷཱུཏེན སཱིལེན. གཧིཏསམཱདཱནནྟི ཨུཔྤཱདིཏཔརཱམཱསོཝ. སོ ཧི སམཱདིཡནྟི ཨེཏེན ཀུཀྐུརསཱིལཝཏཱདཱིནཱིཏི ‘‘སམཱདཱན’’ནྟི ཝུཏྟོ. ཏཏྠ ཨཝཱིཏིཀྐམནཱིཡཏཱཡ སཱིལཾ, བྷཏྟིཝསེན སཏཏཾ ཙརིཏབྦཏཱཡ ཝཏཾ དཊྛབྦཾ.

༡༠༠༧. ཨིདྷེཝ ཏིཊྛམཱནསྶཱཏི ཨིམིསྶཱཡེཝ ཨིནྡསཱལགུཧཱཡཾ ཏིཊྛམཱནསྶ. ཝཱཙུགྒཏཀརཎཾ ཨུགྒཧོ. ཨཏྠཔརིཔུཙྪནཾ པརིཔུཙྪཱ. ཀུསལེཧི སཧ ཙོདནཱཔརིཧརཎཝསེན ཝིནིཙྪཡཀརཎཾ ཝིནིཙྪཡོ. བཧཱུནཾ ནཱནཔྤཀཱརཱནཾ སཀྐཱཡདིཊྛཱིནཾ ཨཝིཧཏཏྟཱ ཏཱ ཛནེནྟི, ཏཱཧི ཛནིཏཱཏི ཝཱ པུཐུཛྫནཱ. ཨཝིགྷཱཏམེཝ ཝཱ ཛན-སདྡོ ཝདཏི. པུཐུ སཏྠཱརཱནཾ མུཁུལློཀིཀཱཏི ཨེཏྠ པུཐཱུ ཛནཱ ཨེཏེསནྟི པུཐུཛྫནཱཏི ཝཙནཏྠོ. པུཐུ…པེ… ཨཝུཊྛིཏཱཏི ཨེཏྠ ཛནེཏབྦཱ, ཛཱཡནྟི ཝཱ ཨེཏྠཱཏི ཛནཱ, གཏིཡོ. པུཐཱུ ཛནཱ ཨེཏེསནྟི པུཐུཛྫནཱ. ཨིཏོ པརེ ¶ ཛཱཡནྟི ཨེཏེཧཱིཏི ཛནཱ, ཨབྷིསངྑཱརཱདཡོ. ཏེ ཨེཏེསཾ པུཐཱུ ཝིཛྫནྟཱིཏི པུཐུཛྫནཱ. ཨབྷིསངྑརཎཱདིཨཏྠོ ཨེཝ ཝཱ ཛན-སདྡོ དཊྛབྦོ. རཱགགྒིཨཱདཡོ སནྟཱཔཱ. ཏེ ཨེཝ སབྦེཔི ཝཱ ཀིལེསཱ པརིལཱ༹ཧཱ. པུཐུ པཉྩསུ ¶ ཀཱམགུཎེསཱུཏི ཨེཏྠ ཛཱཡཏཱིཏི ཛནོ, ‘‘རཱགོ གེདྷོ’’ཏི ཨེཝམཱདིཀོ. པུཐུ ཛནོ ཨེཏེསནྟི པུཐུཛྫནཱ. པུཐཱུསུ ཝཱ ཛནཱ ཛཱཏཱ རཏྟཱཏི ཨེཝཾ རཱགཱདིཨཏྠོ ཨེཝ ཛན-སདྡོ དཊྛབྦོ. པལིབུདྡྷཱཏི སམྦདྡྷཱ ཨུཔདྡུཏཱ ཝཱ. ཨསྶུཏཝཱཏི ཨེཏེན ཨནྡྷཏཱ ཝུཏྟཱཏི ‘‘ཨནྡྷཔུཐུཛྫནོ ཝུཏྟོ’’ཏི ཨཱཧ.

ཨནཡེཏི ཨཝཌྜྷིཡཾ. སབྦཏྠ ནིརུཏྟིལཀྑཎེན པདསིདྡྷི ཝེདིཏབྦཱ. ཨནེཀེསུ ཙ ཀཔྤསཏསཧསྶེསུ ཀཏཾ ཛཱནནྟི, པཱཀཊཉྩ ཀརོནྟི ཨུཔཀཱརཾ སཏིཛནནཨཱམིསཔཊིགྒཧཎཱདིནཱ པཙྩེཀསམྦུདྡྷཱ, ཏཐེཝ དུཀྑིཏསྶ སཀྐཙྩཾ ཀཱཏབྦཾ ཀརོནྟི. སམྨཱསམྦུདྡྷོ པན ཨསངྑྱེཡྻཨཔྤམེཡྻེསུཔི ཀཏཾ ཨུཔཀཱརཾ མགྒཕལཱནཾ ཨུཔནིསྶཡཉྩ ཛཱནཱཏི, པཱཀཊཉྩ ཀརོཏི, སཱིཧོ ཝིཡ ཙ ཛཝཾ སབྦཏྠ སཀྐཙྩམེཝ དྷམྨདེསནཾ ཀརོཏི. ཨརིཡབྷཱཝོཏི ཡེཧི ཡོགཏོ ཨརིཡཱ ཝུཙྩནྟི, ཏེ མགྒཕལདྷམྨཱ དཊྛབྦཱ. ཨརིཡཀརདྷམྨཱ ཨནིཙྩདསྶནཱདཡོ, ཝིཔསྶིཡམཱནཱ ཝཱ ཨནིཙྩཱདཡོ.

སོཏཱནཱིཏི ཏཎྷཱདིཊྛིཀིལེསདུཙྩརིཏཨཝིཛྫཱསོཏཱནི. ‘‘སོཏཱནཾ སཾཝརཾ བྲཱུམཱི’’ཏི ཝཏྭཱ ‘‘པཉྙཱཡེཏེ པིདྷཱིཡརེ’’ཏི ཝཙནེན སོཏཱནཾ སཾཝརོ པིདཧནཾ སམུཙྪེདཉཱཎནྟི ཝིཉྙཱཡཏི. ཁནྟཱིཏི ཨདྷིཝཱསནཱ, སཱ ཙ ཏཐཱཔཝཏྟཱ ཁནྡྷཱ. པཉྙཱཏི ཨེཀེ, ཨདོསོ ཨེཝ ཝཱ. ཀཱཡདུཙྩརིཏཱདཱིནནྟི དུསྶཱིལྱསངྑཱཏཱནཾ ཀཱཡཝཙཱིདུཙྩརིཏཱནཾ མུཊྛསྶཙྩསངྑཱཏསྶ པམཱདསྶ ཨབྷིཛ྄ཛྷཱདོམནསྶཱནཾ པཱཔཀཱནཾ ཨཀྑནྟིཨཉྙཱཎཀོསཛྫཱནཉྩ. ཨནུཔེཀྑཱ སངྑཱརེཧི ཨཝིཝཊྚནཾ, སཱལཡཏཱཏི ཨཏྠོ. དྷམྨཊྛིཏིཡཾ པཊིཙྩསམུཔྤཱདེ པཊིལོམབྷཱཝོ སསྶཏུཙྪེདགཱཧོ, ཏཔྤཊིཙྪཱདཀམོཧོ ཝཱ. ནིབྦཱནེ པཊིལོམབྷཱཝོ སངྑཱརེསུ རཏི, ནིབྦཱནཔཊིཙྪཱདཀོ མོཧོ ཝཱ. སངྑཱརནིམིཏྟགྒཱཧོཏི ཡཱདིསསྶ ཀིལེསསྶ ཨཔྤཧཱིནཏྟཱ ཝིཔསྶནཱ སངྑཱརནིམིཏྟཾ ན མུཉྩཏི, སོ ཀིལེསོ དཊྛབྦོ. སངྑཱརནིམིཏྟགྒཧཎསྶ ཨཏིཀྐམནཾ ཝཱ པཧཱནཾ.

ཙཏུནྣཾ ཨརིཡམགྒཱནཾ བྷཱཝིཏཏྟཱ ཨཙྩནྟཾ ཨཔྤཝཏྟིབྷཱཝེན ཡཾ པཧཱནནྟི ཡོཛནཱ ཝེདིཏབྦཱ. ཀེན པན པཧཱནནྟི? ཨརིཡམགྒེཧེཝཱཏི ཝིཉྙཱཡམཱནོ ཨཡམཏྠོ ཏེསཾ བྷཱཝིཏཏྟཱ ཨཔྤཝཏྟིཝཙནེན. སམུདཡཔཀྑིཀསྶཱཏི ཨེཏྠ ཙཏྟཱརོཔི མགྒཱ ཙཏུསཙྩཱབྷིསམཡཱཏི ཀཏྭཱ ཏེཧི ¶ པཧཱཏབྦེན ¶ ཏེན ཏེན སམུདཡེན སཧ པཧཱཏབྦཏྟཱ སམུདཡསབྷཱགཏྟཱ ཙ སཙྩཝིབྷངྒེ ཙ སབྦཀིལེསཱནཾ སམུདཡབྷཱཝསྶ ཝུཏྟཏྟཱ ‘‘སམུདཡཔཀྑིཀཱ’’ཏི དིཊྛིཨཱདཡོ ཝུཙྩནྟི. ཀཱཡཝཱཙཱཙིཏྟཱནཾ ཝིརཱུཔཔྤཝཏྟིཡཱ ནཡནཾ ཨཔཡཱཔནཾ, ཀཱཡདུཙྩརིཏཱདཱིནཾ ཝིནཱསནཡནཾ ཝཱ ཝིནཡོ, ཏེསཾ ཝཱ ཛིམྷཔྤཝཏྟིཾ ཝིཙྪིནྡིཏྭཱ ཨུཛུཀནཡནཾ ཝིནཡནཾ. ཨེསེསེཏི ཨེསོ སོ ཨེཝ, ཨཏྠཏོ ཨནཉྙོཏི ཨཏྠོ. ཏཛྫཱཏེཏི ཨཏྠཏོ ཏཾསབྷཱཝོཝ. སཔྤུརིསོ ཨརིཡསབྷཱཝོ, ཨརིཡོ ཙ སཔྤུརིསབྷཱཝོཏི ཨཏྠོ.

ཨདྭཡནྟི དྭཡཏཱརཧིཏཾ, ཝཎྞམེཝ ‘‘ཨཙྩཱི’’ཏི གཧེཏྭཱ ཨཙྩིཾ ཝཱ ‘‘ཝཎྞོ ཨེཝཱ’’ཏི ཏེསཾ ཨེཀཏྟཾ པསྶནྟོ ཝིཡ ཡཐཱཏཀྐིཏཾ ཨཏྟཱནཾ ‘‘རཱུཔ’’ནྟི, ཡཐཱདིཊྛཾ ཝཱ རཱུཔཾ ‘‘ཨཏྟཱ’’ཏི གཧེཏྭཱ ཏེསཾ ཨེཀཏྟཾ པསྶནྟོ དཊྛབྦོ. ཨེཏྠ ཙ ‘‘རཱུཔཾ ཨཏྟཱ’’ཏི ཨིམིསྶཱ པཝཏྟིཡཱ ཨབྷཱཝེཔི རཱུཔེ ཨཏྟགྒཧཎཾ པཝཏྟམཱནཾ ཨཙྩིཡཾ ཝཎྞགྒཧཎཾ ཝིཡ. ཨུཔམཱཡོ ཙ ཨནཉྙཏྟཱདིགྒཧཎནིདསྶནཝསེནེཝ ཝུཏྟཱ, ན ཝཎྞཱདཱིནཾ ཝིཡ ཨཏྟནོ ཝིཛྫམཱནཏྟསྶ, ཨཏྟནོ ཝིཡ ཝཱ ཝཎྞཱདཱིནཾ ཨཝིཛྫམཱནཏྟསྶ དསྶནཏྠཾ.

༡༠༠༨. སརཱིརནིཔྥཏྟིཡཱཏི སརཱིརཔཱརིཔཱུརིཡཱ. ནིཙྪེཏུཾ ཨསཀྐོནྟོ ཝིཙིནནྟོ ཀིཙྪཏཱིཏི ཝིཙིཀིཙྪཱ. ཨིདཔྤཙྩཡཱནཾ བྷཱཝོཏི ཛཱཏིཨཱདིསབྷཱཝམེཝ ཨཱཧ, ཛཱཏིཨཱདཱིནཾ ཝཱ ཛརཱམརཎཱདིཨུཔྤཱདནསམཏྠཏཾ. སཱ པན ཛཱཏིཨཱདིཝིནིམུཏྟཱ ནཏྠཱིཏི ཏེསཾཡེཝཱདྷིཝཙནཾ ཧོཏི ‘‘ཨིདཔྤཙྩཡཏཱ’’ཏི.

༡༠༠༩. ཨིདྷ ཨནཱགཏཀིལེསཱ ‘‘ཏདེཀཊྛཱ ཀིལེསཱ’’ཏི ཝུཙྩནྟཱིཏི ཏེ དསྶེཏུཾ ‘‘ཨིམིསྶཱ ཙ པཱལི༹ཡཱ’’ཏིཨཱདི ཨཱརདྡྷཾ. སཧཛེཀཊྛཝསེནཱཏི ཏཏྠ ཨུཔྤནྣདིཊྛིཡཱ སཧཛེཀཊྛཝསེནཱཏི ཨཏྠཏོ ཝིཉྙཱཡཏི. ཏཾསམྤཡུཏྟོཏི ཏེཧི སཾཡོཛནཀིལེསེཧི སམྤཡུཏྟོཏིཔི ཨཏྠོ ཡུཛྫཏི. ཏཐཱ ཏེ སཾཡོཛནཀིལེསཱ སམུཊྛཱནཾ ཨེཏསྶཱཏི ཏཾསམུཊྛཱནནྟི ཝཱ. སཾཡོཛནརཧིཏེཧི ཙ པན ཀིལེསེཧི སམྤཡུཏྟཱནཾ སམུཊྛིཏཱནཉྩ སབྦྷཱཝཏོ ཀིལེསེཧེཝ ཡོཛནཱ ཀཏཱ.

༡༠༡༡. སཾཡོཛནཱདཱིནཾ ཝིཡཱཏི སཾཡོཛནཏདེཀཊྛཀིལེསཱདཱིནཾ ཡཐཱཝུཏྟཱནཾ ཝིཡ. ཏེཧཱིཏི དསྶནབྷཱཝནཱམགྒེཧི. ཨབྷིསངྑཱརཝིཉྙཱཎཾ ཀུསལཱཀུསལཾ, ¶ ནཱམརཱུཔཉྩ ཝིཔཱཀནྟི ཀཏྭཱ ‘‘ཀུསལཱདཱིནམྤི པཧཱནཾ ཨནུཉྙཱཏ’’ནྟི ཨཱཧ.

༡༠༡༣. ཧེཏཱུ ¶ ཙེཝཱཏི ‘‘པཧཱཏབྦཧེཏུཀཱ’’ཏི ཨེཏསྨིཾ སམཱསཔདེ ཨེཀདེསེན སམཱསཔདཏྠཾ ཝདཏི. ཨེཏྠ ཙ པུརིམནཡེན ‘‘ཨིམེ དྷམྨཱ དསྶནེནཔཧཱཏབྦཧེཏུཀཱ’’ཏི ཨིམེཡེཝ དསྶནེནཔཧཱཏབྦཧེཏུཀཱ, ན ཨིཏོ ཨཉྙེཏི ཨཡཾ ནིཡམོ པཉྙཱཡཏི, ན ཨིམེ དསྶནེནཔཧཱཏབྦཧེཏུཀཱཡེཝཱཏི. ཏསྨཱ ཨིམེསཾ དསྶནེནཔཧཱཏབྦཧེཏུཀབྷཱཝོ ཨནིཡཏོ ཝིཙིཀིཙྪཱསཧགཏམོཧསྶ ཨཧེཏུཀཏྟཱཏི པུརིམནཡོ ཝིཝརཎཱིཡཏྠཝཱ ཧོཏི. ཏསྨཱ པུརིམནཡེན དྷམྨཏོ དསྶནེནཔཧཱཏབྦཧེཏུཀེ ནིཀྑིཔིཏྭཱ ཨཏྠཏོ ནིཀྑིཔིཏུཾ དུཏིཡནཡོ ཝུཏྟོ.

༡༠༢༩. མཧགྒཏཱ ཝཱ ཨིདྡྷིཝིདྷཱདཡོ. ཨཔྤམཱཎཱརམྨཎཱ མཧགྒཏཱ ཙེཏོཔརིཡཔུབྦེནིཝཱསཱནཱགཏཾསཉཱཎསམྤཡུཏྟཱ.

༡༠༣༥. ཨནནྟརེ ནིཡུཏྟཱནི, ཨནནྟརཕལཔྤཡོཛནཱནི, ཨནནྟརཕལཀརཎསཱིལཱནི ཝཱ ཨཱནནྟརིཀཱནི. ཏཱནི པན པཊིཔཀྑེན ཨནིཝཱརཎཱིཡཕལཏྟཱ ཨནྟརཱཡརཧིཏཱནཱིཏི ‘‘ཨནནྟརཱཡེན ཕལདཱཡཀཱནཱི’’ཏི ཝུཏྟཾ. ཨནནྟརཱཡཱནི ཝཱ ཨཱནནྟརིཀཱནཱིཏི ནིརུཏྟིཝསེན པདསིདྡྷི ཝེདིཏབྦཱ. ཨེཀསྨིམྤཱིཏི པི-སདྡེན ཨནེཀསྨིམྤི ཨཱཡཱུཧིཏེ ཝཏྟབྦམེཝནཏྠཱིཏི དསྶེཏི. ན ཙ ཏེསཾ ཨཉྙམཉྙཔཊིབཱཧཀཏྟཾ ཨཏྠི ཨཔྤཊིཔཀྑཏྟཱ, ཨཔྤཊིཔཀྑཏཱ ཙ སམཱནཕལཏྟཱ ཨནུབལཔྤདཱནཏོ ཙ. ‘‘ནཏྠི ཧེཏུ ནཏྠི པཙྩཡོ སཏྟཱནཾ སཾཀིལེསཱཡཱ’’ཏི (དཱི. ནི. ༡.༡༦༨) ཨེཝམཱདིཀོ ཨཧེཏུཀཝཱདོ. ‘‘ཀརོཏོ ཁོ ཀཱརཡཏོ ཚིནྡཏོ ཚེདཱཔཡཏོ…པེ… ཀརོཏོ ན ཀརཱིཡཏི པཱཔ’’ནྟི (དཱི. ནི. ༡.༡༦༦) ཨེཝམཱདིཀོ ཨཀིརིཡཝཱདོ. ‘‘ནཏྠི དིནྣ’’ནྟི (དཱི. ནི. ༡.༡༧༡; མ. ནི. ༢.༩༤; ༣.༩༡) ཨེཝམཱདིཀོ ནཏྠིཀཝཱདོ. ཨེཏེསུ པུརིམཝཱདོ བནྡྷམོཀྑཱནཾ ཧེཏུཾ པཊིསེདྷེཏི, དུཏིཡོ ཀམྨཾ, ཏཏིཡོ ཝིཔཱཀནྟི ཨཡམེཏེསཾ ཝིསེསོ. ཏཉྷཱིཏི ཨཧེཏུཀཱདིནིཡཏམིཙྪཱདིཊྛིཾ, ན པན ནིཡཏབྷཱཝཾ ཨཔྤཏྟཾ.

༡༠༣༩. པཙྩཡཊྛེནཱཏི མགྒཔཙྩཡསངྑཱཏེན སམྤཡོགཝིསིཊྛེན པཙྩཡབྷཱཝེནཱཏི ཝེདིཏབྦཾ. ཨེཏྠ ཙ མགྒངྒཱནཾ ཋཔནཾ མགྒཔཙྩཡབྷཱཝརཧིཏེ མགྒཧེཏུཀེ ¶ དསྶེཏུཾ, ཏེན མགྒཧེཏུཀེ ཨསངྐརཏོ ཝཝཏྠཔེཏི. སཙེ པན ཀོཙི ཝདེཡྻ ‘‘ཨེཀེཀཾ ཨངྒཾ ཋཔེཏྭཱ ཏཾཏཾསམྤཡུཏྟཱནཾ མགྒཧེཏུཀབྷཱཝེཔི ‘མགྒངྒཱནི ཋཔེཏྭཱ’ཏི ཨིདཾ ཝཙནཾ ཡུཛྫཏཱི’’ཏི. ཨེཝཉྷི སཏི ཏཏིཡནཡེ ཝིཡ ཨིདྷཱཔི ‘‘ཋཔེཏྭཱ’’ཏི ན ཝཏྟབྦཾ སིཡཱ, ཝུཏྟཉྩེཏཾ, ཏསྨཱ ཝུཏྟནཡེནེཝཏྠོ ཝེདིཏབྦོ. མགྒངྒཱམགྒངྒཱནཉྷི ¶ སམྤཡུཏྟཱནཾ ཝིསེསདསྶནཏྠོ ཨཡཾ ནཡོཏི. སེསམགྒངྒཱནཾ པུབྦེ ཋཔིཏཱནནྟི ཨདྷིཔྤཱཡོ. ཕསྶཱདཱིནཉྷི པུརིམནཡེཔི མགྒཧེཏུཀཏཱ སིདྡྷཱཏི.

སམྨཱདིཊྛིཡཱ དུཏིཡནཡེཔི ཋཔིཏཱཡ ཏཏིཡནཡེ སཧེཏུཀབྷཱཝོ དསྶིཏོ. ཀཐཾ དསྶིཏོ, ནནུ ཨརིཡམགྒསམངྒིསྶ ‘‘ཨལོབྷོ ཨདོསོ ཨིམེ དྷམྨཱ མགྒཧེཏཱུ’’ཏི (དྷ. ས. ༡༠༣༩) ཨཝཏྭཱ ‘‘ཨལོབྷོ ཨདོསོ ཨམོཧོ ཨིམེ དྷམྨཱ མགྒཧེཏཱུ’’ཏི ཝིསུཾ སམྨཱདིཊྛིཨཱདིཀེ མགྒཧེཏཱུ དསྶེཏྭཱ ‘‘ཏཾསམྤཡུཏྟོ…པེ… ཝིཉྙཱཎཀྑནྡྷོ’’ཏི (དྷ. ས. ༡༠༣༩) ཝིསུཾ མགྒཧེཏུཀཱནཾ དསྶིཏཏྟཱ ‘‘མགྒཧེཏཱུསུ ཨམོཧོ’’ཏི (དྷ. ས. ༡༠༣༩) ཝུཏྟཱཡ སམྨཱདིཊྛིཡཱ མགྒཧེཏུཀཏཱ ན དསྶིཏཱ སིཡཱ? ནོ ན དསྶིཏཱ. ཡཐཱ ཧི ཏཱིཎི སཾཡོཛནཱནི དསྶེཏྭཱ ‘‘ཏདེཀཊྛོ ལོབྷོ དོསོ མོཧོ, ཨིམེ དྷམྨཱ དསྶནེན པཧཱཏབྦཧེཏཱུ’’ཏི (དྷ. ས. ༡༠༡༧) ཝིསུཾ པཧཱཏབྦཧེཏཱུ ནིཡམེཏྭཱ ‘‘ཏདེཀཊྛཱ ཙ ཀིལེསཱ’’ཏིཨཱདིཝཙནེན (དྷ. ས. ༡༠༡༧) ལོབྷདོསམོཧཱ ཙ ཨཉྙམཉྙསཧཛེཀཊྛཱ ཨཉྙམཉྙསམྤཡུཏྟཱ སངྑཱརཀྑནྡྷབྷཱུཏཱ ཙ དསྶནེནཔཧཱཏབྦཧེཏུཀཱཏི དསྶིཏཱ ཧོནྟི, ཨེཝམིདྷཱཔི ‘‘ཨལོབྷཱདཡོ ཨིམེ དྷམྨཱ མགྒཧེཏཱུ’’ཏི ནིགམིཏཱཔི ཨཉྙམཉྙསམྤཡུཏྟསངྑཱརཀྑནྡྷབྷཱཝཏོ ཏཾསམྤཡུཏྟསངྑཱརཀྑནྡྷཝཙནེན ‘‘མགྒཧེཏུཀཱ’’ཏི དསྶིཏཱ ཨེཝཱཏི སིདྡྷཾ ཧོཏི, སམྨཱདིཊྛིཡཱཔི ཨམོཧོཏི ཝུཏྟཱཡ མགྒཧེཏུཀབྷཱཝདསྶནཾ. སཙེ པན ཡོ དུཏིཡནཡེ མགྒོ ཙེཝ ཧེཏུ ཙཱཏི ཝུཏྟོ, ཏཏོ ཨཉྙསྶེཝ ཨཉྙེན ཨསཱདྷཱརཎེན པརིཡཱཡེན མགྒཧེཏུབྷཱཝཾ དསྶེཏྭཱ ཏཾསམྤཡོགཏོ སམྨཱདིཊྛིཡཱ མགྒཧེཏུཀབྷཱཝདསྶནཏྠོ ཏཏིཡནཡོ སིཡཱ. ‘‘ཨརིཡམགྒསམངྒིསྶ ཨལོབྷོ ཨདོསོ ཨིམེ དྷམྨཱ མགྒཧེཏཱུ’’ཏིཨཱདི ཝཏྟབྦཾ སིཡཱ. ཡསྨཱ པན ‘‘མགྒཧེཏཱུ’’ཏི ཨིམིནཱ ཨཉྙེན སཱདྷཱརཎེན པརིཡཱཡེན ཡེསཾ མགྒཧེཏུབྷཱཝོ སམྦྷཝཏི, ཏེ སབྦེ ‘‘མགྒཧེཏཱུ’’ཏི དསྶེཏྭཱ ཏཾསམྤཡུཏྟཱནཾ ¶ ཏེསཾ ཨཉྙེསཉྩ མགྒཧེཏུཀབྷཱཝདསྶནཏྠོ ཏཏིཡནཡོ, ཏསྨཱ ཏཏྠ ‘‘ཨམོཧོ’’ཏིཔི ཝུཏྟཾ. ན ཧི སོ མགྒཧེཏུ ན ཧོཏཱིཏི. ཨིམེ པན ཏཡོཔི ནཡཱ ཨཏྠཝིསེསཝསེན ནིཀྑིཏྟཏྟཱ ཨཏྠཏོ ནིཀྑེཔཱ དཊྛབྦཱ. ཨཐ ཝཱ སརཱུཔེན ཝཙནཾ དྷམྨཏོ ནིཀྑེཔོ, ཨཏྠེན ཨཏྠཏོཏི ཨེཝམྤི ཡོཛནཱ སམྦྷཝཏི. ཏཏྠ དུཏིཡཏཏིཡནཡཱ སརཱུཔཏོ ཧེཏུཧེཏུམནྟུདསྶནཝསེན དྷམྨཏོ ནིཀྑེཔོ. པཋམནཡོ ཏཐཱཨདསྶནཏོ ཨཏྠེན ཙ མགྒངྒཏཾསམྤཡུཏྟཱནཾ ཧེཏུཧེཏུམནྟུབྷཱཝཱཝགམནཏོ ཨཏྠཏོ ནིཀྑེཔོཏི.

༡༠༤༠. ཡསྨིཾ སབྷཱཝདྷམྨེ ནིནྣཔོཎཔབྦྷཱརབྷཱཝེན ཙིཏྟཾ པཝཏྟཏི, སོ ཏསྶ ཨཱརམྨཎཱདྷིཔཏི ¶ ཝེདིཏབྦོ. ཙེཏོཔརིཡཉཱཎེན ཛཱནིཏྭཱ པཙྩཝེཀྑམཱནོ ཏེན པཙྩཝེཀྑམཱནོཏི ཝུཏྟོ. ཨེཏྠཱཔཱིཏི ཨེཏསྨིམྤི ཨཊྛཀཐཱཝཙནེ, ཨེཏྠ ཝཱ པཊྛཱནེ མགྒཱདཱིནི ཋཔེཏྭཱ ཨཉྙེསཾ ཨདྷིཔཏིཔཙྩཡབྷཱཝསྶ ཨཝཙནེནེཝ པཊིཀྑེཔཔཱལི༹ཡཾ. ཨཡམེཝཏྠོཏི ཨཏྟནོ མགྒཕལཾ ཋཔེཏྭཱཏི ཨཏྠོ. ཝཱིམཾསཱདྷིཔཏེཡྻནྟི པདྷཱནེན ཨདྷིཔཏིནཱ སཧཛཱཏཱདྷིཔཏི ནིདསྶིཏོ, ཏཡིདཾ ནཡདསྶནམཏྟམེཝ ཧོཏཱིཏི ཨཉྙོཔི ཨེཝཾཔཀཱརོ སཧཛཱཏོ མགྒཱདྷིཔཏི ནིདསྶིཏོ ཧོཏི, ཏསྨཱ ཝཱིརིཡཱདྷིཔཏེཡྻནྟི ཙ ཡོཛེཏབྦཾ. ཨིདམྤི ཧི ཨཏྠཏོ ཝུཏྟམེཝཱཏི.

༡༠༤༡. ཨཏྟནོ སབྷཱཝོ ཨཏྟབྷཱཝོ. ལདྡྷོཀཱསསྶ ཀམྨསྶ ཝིཔཱཀོ ཀཔྤསཧསྶཱཏིཀྐམེ ཨུཔྤཛྫཏི ཨནེཀཀཔྤསཧསྶཱཡུཀཱནཾ སཏྟཱནཾ, ཀཔྤསཧསྶཱཏིཀྐམེཔི ཝཱ ལདྡྷོཀཱསཾ ཡཾ བྷཝིསྶཏི, ཏདཔི ལདྡྷོཀཱསམེཝཱཏི ཨཏྟནོ ཝིཔཱཀཾ སནྡྷཱཡ ཝུཙྩཏི. ནཏྠི ནཱམ ན ཧོཏཱིཏི ཨནུཔྤནྣོ ནཱམ ན ཧོཏཱིཏི ཨདྷིཔྤཱཡོ. ཨུཔྤཱདཱིསུ ཨནྟོགདྷཏྟཱ ‘‘ཨུཔྤཱདིནོ དྷམྨཱ’’ཏི ཨེཏེན ཝཙནེན ཝུཙྩཏཱིཏི ཀཏྭཱ ཨཱཧ ‘‘ཨུཔྤཱདིནོ དྷམྨཱ ནཱམ ཛཱཏོ’’ཏི. ཨརཱུཔསངྑཱཏོ ཨཏྟཱཏི ཨརཱུཔབྷཝངྒཾ ཨཱཧ. ཏཏྠ ཨཱཀཱསཱནཉྩཱཡཏནསཉྙཱདིམཡོ ཨཏྟཱཏི ཧི ཨཏྠཏོ ཝོཧཱརོ པཝཏྟོཏི.

ཡདི པན ཨཱཡཱུ…པེ… སབྦཾ ཝིཔཱཀཾ དདེཡྻ, ཨལདྡྷོཀཱསཉྩ ཝིཔཱཀཾ དེཏཱིཏི ཀཏྭཱ ཝིཔཀྐཝིཔཱཀཉྩ དདེཡྻ, ཏཏོ ཨེཀསྶེཝ ཀམྨསྶ སབྦཝིཔཱཀེན བྷཝིཏབྦནྟི ཨཉྙསྶ ཀམྨསྶ ཨོཀཱསོ ན བྷཝེཡྻ ནིརཏྠཀཏྟཱ ¶ , ཨུཔྤཏྟིཡཱཡེཝ ཨོཀཱསོ ན བྷཝེཡྻ, ཨུཔྤནྣསྶ ཝཱ ཕལདཱནེ. ཨཐ ཝཱ ཨལདྡྷོཀཱསསྶ ཝིཔཱཀདཱནེ པཙྩཡནྟརརཧིཏསྶཔི ཝིཔཱཀདཱནཾ ཨཱཔནྣནྟི ཨཝིཛྫཱཏཎྷཱདིཔཙྩཡནྟརཁེཔཀསྶ ཨཉྙསྶ ཨཔཙཡགཱམིཀམྨསྶ ཀམྨཀྑཡཀརསྶ ཨོཀཱསོ ན བྷཝེཡྻ. བྷཱཝིཏེཔི མགྒེ ཨཝིཛྫཱདིཔཙྩཡནྟརརཧིཏསྶ ཙ ཀམྨསྶ ཝིཔཙྩནཏོ སམཏྠཏཱ ན སིཡཱཏི ཨཏྠོ. སབྦདཱ ཝཱ ཝིཔཱཀཔྤཝཏྟིཡཱ ཨེཝ བྷཝིཏབྦཏྟཱ ཝིཔཱཀཏོ ཨཉྙསྶ པཝཏྟིཨོཀཱསོ ན བྷཝེཡྻ. ཏཾ པནཱཏི ཨཱཡཱུཧིཏཾ ཀམྨཾ. ཨིདཾ པན དྷུཝཝིཔཱཀསྶ ཝིཔཱཀེན ཨདྷུཝཝིཔཱཀསྶཔི ལདྡྷོཀཱསསྶ ཝིཔཱཀཾ ཨུཔྤཱདཱིཏི དསྶེཏུཾ ཨཱརདྡྷནྟི དཊྛབྦཾ. ཨཊྛ སམཱཔཏྟིཡོ ཙ བལཝཝིརཧེ ཨགྒམགྒབྷཱཝནཱཝིརཧེ ཙ ཨཔྤཧཱིནསབྷཱཝཏོ དྷུཝཾ ཝིཔཙྩནྟཱིཏི དྷུཝཝིཔཱཀཱཏི ཝུཏྟཱ. ཨཱཡཱུཧིཏཀམྨེ ཝུཙྩམཱནེ ཨནུཔྤནྣཾ ཀསྨཱ ཝུཏྟནྟི? ཡཾ ཨཱཡཱུཧིཏཾ བྷཝིསྶཏི, ཏཏྠཱཔི ཨཱཡཱུཧིཏ-སདྡཔྤཝཏྟིསབྦྷཱཝཱ.

༡༠༥༠. ཨུཔཱདིནྣཱཏི ¶ ཨེཏྠ ན ཨུཔེཏེན ཨཱདིནྣཱཏི ཨཡམཏྠོ, ཨུཔསདྡོ པན ཨུཔསགྒམཏྟམེཝ, ཏསྨཱ ཨུཔཱདཱནཱརམྨཎཱ ཨུཔཱདཱནེཧི, ཨཉྙེ ཙ ཨནབྷིནིཝེསེན ‘‘ཨཧཾ མགྒཾ བྷཱཝཡིཾ, མམ མགྒོ ཨུཔྤནྣོ’’ཏིཨཱདིཀེན གཧཎེན ཨཱདིནྣཱ ཨིཙྩེཝ ཨུཔཱདིནྣཱ. ཨུཔཱདིནྣ-སདྡེན ཝཱ ཨམགྒཕལདྷམྨཱཡེཝ ཝུཏྟཱ, ཨིཏརེཧི མགྒཕལདྷམྨཱ ཙཱཏི ཝེདིཏབྦཾ.

ཏིཀནིཀྑེཔཀཐཱཝཎྞནཱ ནིཊྛིཏཱ.

དུཀནིཀྑེཔཀཐཱཝཎྞནཱ

༡༠༦༢. མེཏྟཱཡནཝསེནཱཏི མེཏྟཱཕརཎཝསེན. ‘‘མེཏྟཡནཝསེནཱ’’ཏི ཝཏྟབྦེ དཱིགྷཾ ཀཏྭཱ ཝུཏྟནྟི དཊྛབྦཾ. མེཏྟཱ, མེདནཾ ཝཱ མེཏྟཱཡནཾ, ཏཉྩ སིནེཧཝསེན. ཨནུདཡཏཱིཏི ཨནུདཱཏི ཝཏྟབྦེ ‘‘ཨནུདྡཱ’’ཏི ད-ཀཱརཱགམནཾ ཀཏྭཱ ཝུཏྟཾ. ཨནུདྡཱཡནཱཀཱརོཏི ཨནུརཀྑཎཱཀཱརོ. རཀྑཎཉྷི དཱཡནཱ. ཨནུདྡཱཡིཏསྶཱཏི ཨནུདྡཱཡ ཨཡིཏསྶ. ‘‘ཛཱཏིཔི དུཀྑཱ’’ཏིཨཱདིཾ སུཎནྟསྶ སཝནེ, ཨནིཙྩཱདིཏོ སམྨསནྟསྶ སམྨསནེ, མགྒེནེཏྠ སམྨོཧཾ ཝིདྡྷཾསེནྟསྶ པཊིཝེདྷེ, པཊིཝིཛ྄ཛྷིཏྭཱ པཙྩཝེཀྑནྟསྶ པཙྩཝེཀྑཎེཏི ཙཏཱུསུ ཀཱལེསུ དུཀྑེ ཉཱཎཾ ཝཏྟཏི.

༡༠༦༥. ཙིཏྟསྶ ¶ སཾརཉྫནཾ ཙིཏྟསྶ སཱརཱགོ. གིཛ྄ཛྷནྟཱིཏི ཨབྷིཀངྑནྟི. སཉྫཾནྟཱིཏི བནྡྷནྟི. ལགྒནཊྛེནཱཏི སཾཝརཎཊྛེན, ཨོལམྦནཊྛེན ཝཱ. ཏསྶ ཏསྶེཝ བྷཝསྶཱཏི ཀཱམབྷཝཱདིསངྑཱཏསྶ ཝིཔཱཀཀཊཏྟཱརཱུཔསྶ ཨབྷིནིབྦཏྟིཨཏྠཾ པཊིསནྡྷིཡཱ པཙྩཡབྷཱཝཝསེན པརིཀཌྜྷཏི. ཙིཏྟམསྶ བྷཝནྟརེ ཝིདྷཱཝཏི ནིབྦཏྟཏི. ཏཎྷཱཝིཔྥནྡིཏནིཝེསོ ཨཊྛསཏཏཎྷཱཝིཙརིཏཱདིབྷཱཝེན ཏཎྷཱཔཝཏྟིཡེཝ.

སརིཏཱནཱིཏི རཱགཝསེན ཨལླཱནི. ཏཾསམྤཡུཏྟཔཱིཏིཝསེན སིནིདྡྷཱནི སིནེཧིཏཱནི. ཝིསཏཱཏི ཝིཏྠཏཱ. རཱུཔཱདཱིསུ ཏེབྷཱུམཀདྷམྨེསུ བྱཱཔནཝསེན ཝིསཊཱ. པུརིམཝཙནམེཝ ཏ-ཀཱརསྶ ཊ-ཀཱརཾ ཀཏྭཱ ཝུཏྟཾ. ཝིསཱལཱཏི ཝིཔུལཱ. ཝིསཀྐཏཱིཏི པརིསཔྤཏི, སཧཏི ཝཱ. རཏྟོ ཧི རཱགཝཏྠུནཱ པཱདེན ཏཱལིཡམཱནོཔི སཧཏཱིཏི. ཨོསཀྐནཾ, ཝིཔྥནྡནཾ ཝཱ ཝིསཀྐནནྟི ཝདནྟི ¶ . ཨནིཙྩཱདིཾ ནིཙྩཱདིཏོ གཎྷནྟཱི ཝིསཾཝཱདིཀཱ ཧོཏི. ཝིསཾཧརཏཱིཏི ཏཐཱ ཏཐཱ ཀཱམེསུ ཨཱནིསཾསཾ པསྶནྟཱི ཝིཝིདྷེཧཱཀཱརེཧི ནེཀྑམྨཱབྷིམུཁཔྤཝཏྟིཏོ ཙིཏྟཾ སཾཧརཏི སངྑིཔཏི. ཝིསཾ ཝཱ དུཀྑཾ, ཏཾ ཧརཏི ཝཧཏཱིཏི ཨཏྠོ. དུཀྑནིབྦཏྟཀསྶ ཀམྨསྶ ཧེཏུབྷཱཝཏོ ཝིསམཱུལཱ, ཝིསཾ ཝཱ དུཀྑཝེདནཱམཱུལཾ ཨེཏིསྶཱཏི ཝིསམཱུལཱ. དུཀྑསམུདཡཏྟཱ ཝིསཾ ཕལཾ ཨེཏིསྶཱཏི ཝིསཕལཱ. ཏཎྷཱཡ རཱུཔཱདིཀསྶ དུཀྑསྶེཝ པརིབྷོགོ ཧོཏི, ན ཨམཏསྶཱཏི སཱ ‘‘ཝིསཔརིབྷོགཱ’’ཏི ཝུཏྟཱ. སབྦཏྠ ནིརུཏྟིཝསེན པདསིདྡྷི ཝེདིཏབྦཱ. ཡོ པནེཏྠ པདྷཱནོ ཨཏྠོ, ཏཾ དསྶེཏུཾ པུན ‘‘ཝིསཏཱ ཝཱ པནཱ’’ཏིཨཱདི ཝུཏྟཾ. ཨིཏྠབྷཱཝཉྙཐཱབྷཱཝནྟི མནུསྶབྷཱཝདེཝཱདིབྷཱཝབྷཱུཏཾ.

པཎིདྷཱནཀཝསེནཱཏི ཙིཏྟསྶ རཱུཔཱདཱིསུ ཋཔནཀཝསེན. ཨཉྙོཔི བནྡྷུ ཏཎྷཱཡ ཨེཝ ཧོཏི, སོ པན ཨབནྡྷུཔི ཧོཏི. ཏཎྷཱ པན ནིཙྩསནྣིསྶིཏཱཏི ‘‘པཱཊིཡེཀྐོ བནྡྷཱུ’’ཏི ཝུཏྟཱ. ཨསནཏོཏི བྱཱཔནཏོ བྷུཉྫནཏོ ཙ. ཏདུབྷཡཾ དསྶེཏི ‘‘ཨཛ྄ཛྷོཏྠརཎཏོ’’ཏིཨཱདིནཱ. ཨཱསཱིསནཝསེནཱཏི ཨིཙྪནཝསེན. ཨཉྙེནཱཀཱརེནཱཏི ཛཔྤནཱཛཔྤིཏཏྟཱནཾ ཛཔྤཱཡ ཨནཉྙཏྟདསྶནཱཀཱརེན. ཙིཏྟཾ པརིཡུཊྛཱཏཱིཏི ཙིཏྟཾ མཱུསཏི. མཱརཔཱསོཏི མཱརེན གཧིཏཏཱཡ རཱགོ མཱརཔཱསོ.

༡༠༦༦. སངྑཱརེསུ ཨུཔྤནྣོ ཀམྨཔཐབྷེདཾ ན ཀརོཏཱིཏི ཨེཏེན སཏྟེསུ ཨུཔྤནྣོ ཨཊྛཱནཀོཔོ ཀརོཏཱིཏི ཝིཉྙཱཡཏི. ‘‘ཨཏྠཾ མེ ནཱཙརི ¶ , ན ཙརཏི, ན ཙརིསྶཏི, པིཡསྶ མེ མནཱཔསྶ ཨཏྠཾ ནཱཙརི, ན ཙརཏི, ན ཙརིསྶཏི, ཨཔྤིཡསྶ མེ ཨམནཱཔསྶ ཨནཏྠཾ ནཱཙརི, ན ཙརཏི, ན ཙརིསྶཏཱི’’ཏི ཨུཔྤཛྫམཱནོཔི ཧི ཀོཔོ ཨཝཏྠུསྨིཾ ཨུཔྤནྣཏྟཱ ཨཊྛཱནཀོཔོ ཨེཝ བྷཝིཏུཾ ཡུཏྟོ. ཨཱགྷཱཏེནྟོཏི ཧནནྟོ. པུནརུཏྟིདོསོ པཊིསེདྷིཏོཏི དོས-པདསྶ པཊིཝིརོདྷ-པདསྶ ཙ དྭིཀྑཏྟུཾ ཨཱགཏཏྟཱ ཝུཏྟཾ. པཊིགྷསྶ ཝཱ ཝིསེསནཏྠཾ པུབྦེ ‘‘པཊིཝིརོདྷོ’’ཏི, པདོསཱདིཝིསེསནཏྠཾ ‘‘དོསོ’’ཏི ཙ ཝུཏྟཾ, དུསྶནཱདིཝིསེསནཏྠཾ པཙྪཱ ‘‘དོསོ’’ཏི, ཝིརོདྷཝིསེསནཏྠཉྩ ‘‘པཊིཝིརོདྷོ’’ཏི ཝུཏྟནྟི ནཏྠི པུནརུཏྟིདོསོ.

༡༠༩༡. ཨནིདྡྷཱརིཏཔརིཙྪེདེ དྷམྨཱནཾ ཨཏྠིཏཱམཏྟདཱིཔཀེ མཱཏིཀུདྡེསེ ཨཔརིཙྪེདེན བཧུཝཙནེན ཨུདྡེསོ ཀཏོཏི བཧུཝཙནེནེཝ པུཙྪཏི – ‘‘ཀཏམེ དྷམྨཱ ཨཔྤཙྩཡཱ’’ཏི. སབྷཱཝསངྑཱཔརིཙྪེདཱདིཝསེན ཧི དྷམྨེ ཨཛཱནནྟསྶ ཝསེན ཨུདྡེསོ པུཙྪཱ ཙ ཀརཱིཡཏཱིཏི. ཏསྨཱ ¶ པརིཙྪེདཾ ཨཀཏྭཱ ཨུདྡིཊྛཱ པུཙྪིཏཱ ཙ. ཨིམེཏི ཨསངྑཏདྷཱཏུཏོ ཨུདྡྷཾ ནཏྠཱིཏི དཱིཔནཏྠཾ ཨེཀམྤི ཏཾ ནིདྡིསིཏྭཱ བཧུཝཙནེནེཝ ནིགམནཾ ཀཏཾ ནིདྡེསཏོ པུབྦེ བོདྷནེཡྻསྶ ཨཛཱནནཀཱལཾ ཨུཔཱདཱཡ.

༡༡༠༡. ཀིཾ པན ནཏྠི, ཀིཾ ཏེན ན ཝུཏྟཱཏི ཡོཛནཱ ཀཱཏབྦཱ. ཨིདམེཝ མནོཝིཉྙེཡྻནྟི ནིཡམཱབྷཱཝོ ཝཝཏྠཱནཱབྷཱཝོ. ཙཀྑུཝིཉྙཱཎཱདིཝིཉྙེཡྻམེཝ ཙཀྑཱདིཝིཉྙེཡྻནྟི པཱལི༹ཡཾ ཝུཏྟནྟི མནོཝིཉྙཱཎཝིཉྙེཡྻེནཔི མནོཝིཉྙེཡྻེན བྷཝིཏབྦནྟི ཀཏྭཱ ཨཊྛཀཐཱཡ ‘‘ཀིཾ པན མནོཝིཉྙཱཎེནཱ’’ཏིཨཱདི ཝུཏྟཾ. ཀེཧིཙི ཝིཉྙེཡྻཱ ཀེཧིཙི ཨཝིཉྙེཡྻཱཏི ཨིདཾ ཀཱམཱཝཙརཾ མནོཝིཉྙཱཎཾ ཨཱརམྨཎཱདིཝསེན བྷིནྡིཏྭཱ ཡོཛེཏབྦཾ. རཱུཔཱཝཙརཱདིཨཱརམྨཎེན ཧི ཀཱམཱཝཙརམནོཝིཉྙཱཎེན རཱུཔརཱགཱདིསམྤཡུཏྟེན ཙ ཀཱམཱཝཙརདྷམྨཱ ན ཝིཉྙེཡྻཱ, ཨིཏརེན ཙ ཝིཉྙེཡྻཱ. ཨེཝཾ ཀཱམཱཝཙརཱནམེཝ ཨཱརམྨཎཱནཾ ཀེསཉྩི སདྡཱདཱིནཾ རཱུཔཱརམྨཎཱདཱིཧི ཨཝིཉྙེཡྻཏཱ ཝིཉྙེཡྻཏཱ ཙ ཡོཛེཏབྦཱ, ཏཐཱ དྭཱརབྷེདཝསེན. ཨཐ ཝཱ སོམནསྶསཧགཏསནྟཱིརཎཾ ཨིཊྛཱརམྨཎམེཝཱཏི ཨིཏརཾ ཏེན ན ཝིཉྙེཡྻཾ. ཨེཝཾ ཨུཔེཀྑཱསཧགཏེ ཀུསལཝིཔཱཀེ ཨཀུསལཝིཔཱཀེ ཙཱཏི སབྦཏྠ ཡཐཱཡོགཾ ཡོཛེཏབྦཾ. རཱུཔཱཝཙརཱདཡོ ཀཱམཱཝཙརཝིཔཱཀཱདཱིཧི ཨཝིཉྙེཡྻཱ, ཀེཙིདེཝ ཝིཉྙེཡྻཱ ¶ ཨརཱུཔཱཝཙརེཧཱིཏི ཡོཛེཏབྦཾ ཨནུཝཏྟམཱནཏྟཱ. ནིབྦཱནེན ཨཝིཉྙེཡྻཏྟཱཏི ‘‘ཀེཧིཙི ཨཝིཉྙེཡྻཱ’’ཏི ཨིམསྶ པདསྶ ཨཏྠསམྦྷཝམཏྟཾ སནྡྷཱཡ ཝུཏྟཾ, ན ནིབྦཱནསྶ ཨནུཝཏྟམཱནམནོཝིཉྙཱཎབྷཱཝཏོ.

༡༡༠༢. པཉྩཀཱམགུཎིཀརཱགོཏི ཨུཀྐཊྛཝསེན ཝུཏྟཾ. བྷཝཱསཝཾ ཋཔེཏྭཱ སབྦོ ལོབྷོ ཀཱམཱསཝོཏི ཡུཏྟཾ སིཡཱ. སསྶཏདིཊྛིསཧགཏོ རཱགོ བྷཝདིཊྛིསམྤཡུཏྟཏྟཱ ‘‘བྷཝཱསཝོ’’ཏི ཨཊྛཀཐཱཡཾ ཝུཏྟོ. བྷཝཱསཝོ པན ‘‘དིཊྛིགཏཝིཔྤཡུཏྟེསུ ཨེཝ ཨུཔྤཛྫཏཱི’’ཏི པཱལི༹ཡཾ ཝུཏྟོ. སོཔི རཱགོ ཀཱམཱསཝོ བྷཝིཏུཾ ཡུཏྟོ. དིཊྛདྷམྨིཀསམྤརཱཡིཀདུཀྑཱནཾ ཀཱརཎབྷཱུཏཱ ཀཱམཱསཝཱདཡོཔི དྭིདྷཱ ཝུཏྟཱ.

༡༡༠༣. ཀཱམཱསཝནིདྡེསེ ཙ ཀཱམེསཱུཏི ཀཱམརཱགདིཊྛིརཱགཱདིཨཱརམྨཎབྷཱུཏེསུ ཏེབྷཱུམཀེསུ ཝཏྠུཀཱམེསཱུཏི ཨཏྠོ སམྦྷཝཏི. ཏཏྠ ཧི ཨུཔྤཛྫམཱནཱ སཱ ཏཎྷཱ སབྦཱཔི ན ཀཱམཙྪནྡཱདིནཱམཾ ན ལབྷཏཱིཏི. ཀཏྟུཀམྱཏཱཚནྡོ ཨཀུསལེཔི ཨུཔྤཛྫཏི, ན པན དྷམྨཙྪནྡོ.

༡༡༠༥. ཨཉྙཾ ¶ ཛཱིཝནྟི གཧཎཾ ཡདིཔི ཨུཔཱདཱནཀྑནྡྷེསྭེཝ པཝཏྟཏི, རཱུཔེ…པེ… ཝིཉྙཱཎེ ཝཱ པན ན པཏིཊྛཱཏི. ཏཏོ ཨཉྙཾ ཀཏྭཱ ཛཱིཝཾ གཎྷཱཏཱིཏི སསྶཏདིཊྛི ཧོཏཱིཏི. བྲཧྨཱདིཾ ཨེཀཙྩཾ ཨཏྟཱནཾ ‘‘ཧོཏཱི’’ཏི ནིཙྩཏོ ཨཉྙཉྩ ‘‘ན ཧོཏཱི’’ཏི ཨནིཙྩཏོ གཎྷནྟསྶ ‘‘ཧོཏི ཙ ན ཙ ཧོཏཱི’’ཏི ཨེཀཙྩསསྶཏདིཊྛི. ‘‘ཧོཏཱི’’ཏི ཙ པུཊྛེ ‘‘ནེཝཱ’’ཏི, ‘‘ན ཧོཏཱི’’ཏི ཙ པུཊྛེ ‘‘ན’’ཨིཏི སབྦཏྠ པཊིཀྑིཔནྟསྶ ཨམརཱཝིཀྑེཔདིཊྛི, ཨམརཱ ཨནུཔཙྪེདཱ, ཨམརམཙྪསདིསཱི ཝཱ ཝིཀྑེཔདིཊྛཱིཏི ཨཏྠོ.

པཉྩཀཱམགུཎིཀོ རཱགོ ཀཱམཱསཝོཏི ཝུཏྟོཏི ཀཏྭཱ བྲཧྨཱནཾ ཝིམཱནཱདཱིསུ རཱགསྶ དིཊྛིརཱགསྶ ཙ ཀཱམཱསཝབྷཱཝཾ པཊིཀྑིཔཏི. ཡདི པན ལོབྷོ ཀཱམཱསཝབྷཝཱསཝཝིནིམུཏྟོ ཨཏྠི, སོ ཡདཱ དིཊྛིགཏཝིཔྤཡུཏྟེསུ ཨུཔྤཛྫཏི, ཏདཱ ཏེན སམྤཡུཏྟོ ཨཝིཛྫཱསཝོ ཨཱསཝཝིཔྤཡུཏྟོཏི དོམནསྶཝིཙིཀིཙྪུདྡྷཙྩསམྤཡུཏྟསྶ ཝིཡ ཏསྶཔི ཨཱསཝཝིཔྤཡུཏྟཏཱ ཝཏྟབྦཱ སིཡཱ ‘‘ཙཏཱུསུ དིཊྛིགཏཝིཔྤཡུཏྟེསུ ལོབྷསཧགཏེསུ ཙིཏྟུཔྤཱདེསུ ཨུཔྤནྣོ མོཧོ སིཡཱ ཨཱསཝསམྤཡུཏྟོ སིཡཱ ཨཱསཝཝིཔྤཡུཏྟོ’’ཏི. ‘‘ཀཱམཱསཝོ ཨཊྛསུ ལོབྷསཧགཏེསུ ཙིཏྟུཔྤཱདེསུ ཨུཔྤཛྫཏཱི’’ཏི, ‘‘ཀཱམཱསཝཾ པཊིཙྩ དིཊྛཱསཝོ ཨཝིཛྫཱསཝོ’’ཏི ¶ (པཊྛཱ. ༣.༣.༡) ཙ ཝཙནཏོ དིཊྛིསཧགཏོ རཱགོ ཀཱམཱསཝོ ན ཧོཏཱིཏི ན སཀྐཱ ཝཏྟུཾ. ཀིལེསཔཊིཔཱཊིཡཱཔི ཨཱཧརིཏུཾ ཝཊྚཏཱིཏི ཨཱསཝཱནཾ ཝཙནཾ པཧཱཏབྦདསྶནཏྠནྟི ཀཏྭཱ ཏེ པཧཱནེ ཨཱཧརིཡམཱནཱ པཧཱཏབྦཱནམྤི ཏེསཾ ཀིལེསཱནཾ ཨུདྡེསཀྐམེན ཨཱཧརིཏུཾ ཝཊྚནྟི པཛཧནཀཱནཾ མགྒཱནམྤཱིཏི ཨཏྠོ.

༡༡༢༡. པཋམཀམཱནབྷཱཛནཱིཡེཏི ‘‘སེཡྻོཧམསྨཱི’’ཏི མཱནསྶ ནིདྡེསེ. ཏཏྠ ཧི ‘‘ཨེཀཙྩོ ཛཱཏིཡཱ ཝཱ གོཏྟེན ཝཱ ཀོལཔུཏྟིཡེན ཝཱ ཝཎྞཔོཀྑརཏཱཡ ཝཱ དྷནེན ཝཱ ཨཛ྄ཛྷེནེན ཝཱ ཀམྨཱཡཏནེན ཝཱ སིཔྤཱཡཏནེན ཝཱ ཝིཛྫཱཊྛཱནེན ཝཱ སུཏེན ཝཱ པཊིབྷཱནེན ཝཱ ཨཉྙཏརཉྙཏརེན ཝཱ ཝཏྠུནཱ མཱནཾ ཛཔྤེཏི, ཡོ ཨེཝརཱུཔོ མཱནོ མཉྙནཱ…པེ… ཀེཏུཀམྱཏཱ ཙིཏྟསྶཱ’’ཏི (ཝིབྷ. ༨༦༦) སེཡྻསྶ སདིསསྶ ཧཱིནསྶ ཙ པཝཏྟམཱནོ པུགྒལཝིསེསཾ ཨནཱམསིཏྭཱ སེཡྻམཱནོ ཝིབྷཏྟོཏི ཨིམམཏྠཾ སནྡྷཱཡ ‘‘ཨེཀོ མཱནོ ཏིཎྞཾ ཛནཱནཾ ཨུཔྤཛྫཏཱིཏི ཀཐིཏོ’’ཏི ཨཱཧ. ན ཀེཝལཉྩཱཡཾ པཋམཀམཱནབྷཱཛནཱིཡེ ཨེཝ ཨེཝཾ ཀཐིཏོ, དུཏིཡཀཏཏིཡཀམཱནབྷཱཛནཱིཡེཔི ཀཐིཏོ ཨེཝཱཏི ནིདསྶནམཏྠཾ ཨེཏཾ དཊྛབྦཾ. ཨཐ ཝཱ པུགྒལེ ཨནིསྶཱཡ ཝུཏྟཱནཾ ཏིཎྞམྤི མཱནཱནཾ བྷཱཛནཱིཡཾ ‘‘པཋམཀམཱནབྷཱཛནཱིཡེ’’ཏི ཨཱཧ. སེཡྻསྶ ‘‘སེཡྻོཧམསྨཱིཏི མཱནོ’’ཏིཨཱདཱིནཉྷི པུགྒལཾ ཨཱམསིཏྭཱ ཝུཏྟཱནཾ ནཝནྣཾ མཱནཱནཾ བྷཱཛནཱིཡཾ དུཏིཡཀམཱནབྷཱཛནཱིཡཾ ¶ ཧོཏི, ཏསྶ མཱནརཱསིསྶ པུགྒལཾ ཨནཱམསིཏྭཱ ཝུཏྟམཱནརཱསིཏོ དུཏིཡཏཏིཡཀཏྟཱཏི, ཨཐཱཔི ཙ ཡཐཱཝུཏྟེ དུཏིཡཀམཱནབྷཱཛནཱིཡེ ‘‘ཨེཀེཀསྶ ཏཡོ ཏཡོ མཱནཱ ཨུཔྤཛྫནྟཱིཏི ཀཐིཏ’’ནྟི ཨིདྷ ཝུཏྟཱཡ ཨཏྠཝཎྞནཱཡ སམཱནདསྶནཏྠཾ ‘‘པཋམཀམཱནབྷཱཛནཱིཡེ’’ཏི ཝུཏྟཾ. སོ ཨེཝ མཱནོ ཨིདྷཱགཏོཏི ཏཏྠ ཀཐིཏོ ཨེཝ ཨཏྠོ ཡུཛྫཏཱིཏི ཨདྷིཔྤཱཡོ. མཱནཀརཎཝསེནཱཏི ‘‘སེཡྻོ’’ཏིཨཱདིཀིཙྩཀརཎཝསེན. ཨཔརཱཔརེ ཨུཔཱདཱཡཱཏི ཨིདཾ པུརིམཔུརིམཱ མཱནཱ ཨཔརཱཔརེ ཨུཔནིསྶཡབྷཱཝེན ཏེ ཨུཔྤཱདེནྟཱ ཨཙྩུགྒཙྪནྟཱིཏི ཨིམམཏྠཾ སནྡྷཱཡ ཝུཏྟཾ. ཀེཏུཀམྱཏཱཙིཏྟཾ ཨཙྩུགྒཏབྷཱཝཾ གཙྪཏཱིཏི ཀཏྭཱ ཙིཏྟེནེཝ ཝིསེསིཏཾ.

༡༡༢༦. ཨཀྑམནབྷཱཝཔྤཀཱསནཾ ཁིཡྻནཾ. མནེན པིཡཀརཎནྟི ཨེཝཾཔཀཱརཾ པཱུཛནཾ མཱནནནྟི ཝུཙྩཏཱིཏི ཨཏྠོ. ཨིསྶཱཀརཎཝསེནཱཏི ལཱབྷཱདིཨཀྑམནཀིཙྩཝསེན.

༡༡༢༧. ཨརིཡསཱཝཀཱཏི ¶ ཝཙནཾ ‘‘ཨརིཡསཱཝཀཱནཾཡེཝ པཊིཝེདྷོ ཨཏྠི, ཏེ ཙ ཏཾ ན མཙྪརཱཡནྟཱི’’ཏི པཊིཝེདྷདྷམྨེ མཙྪརིཡཱབྷཱཝདསྶནཏྠཾ. གནྠོཏི པཱལི༹. ཀཐཱམགྒོཏི ཨཊྛཀཐཱཔབནྡྷོ. དྷམྨནྟརནྟི ཀུསལཱདིདྷམྨཾ བྷིནྡིཏྭཱ ཨཀུསལཱདིཾ ཨཏྟནོ ལོལཏཱཡ ཏཐཱགཏབྷཱསིཏཾ ཏིཏྠིཡབྷཱསིཏཾ ཝཱ ཀརོནྟོ ཨཱལོལེསྶཏི. ཨཏྟཱནཾ ཨཱཝིཀཏྭཱཏི ཨཏྟཱནཾ ཨཉྙཐཱ སནྟཾ ཨཉྙཐཱ པཝེདཡིཏྭཱ. ཡོ པནཱཏི ཏིཏྠིཡོ གཧཊྛོ ཝཱ ཨཏྟནོ སམཡསྶ སདོསབྷཱཝཾ དཊྛུཾ ཨནིཙྪནྟོ ཨཉྙཱཎེན ཨབྷིནིཝེསེན ཝཱ.

བྱཱཔིཏུམནིཙྪོཏི ཝིཝིཙྪོ, ཏསྶ བྷཱཝོ ཝེཝིཙྪཾ. ཨནཱདརོཏི མཙྪརིཡེན དཱནེ ཨཱདརརཧིཏོ. ཀཊཙྪུནཱ གཱཧོ བྷཏྟསྶ ཀཊཙྪུགྒཱཧོ, ཀཊཙྪུགྒཱཧོ ཝིཡ ཀཊཙྪུགྒཱཧོ. ཡཐཱ ཧི ཀཊཙྪུགྒཱཧོ ཡཐཱཝུཏྟེ བྷཏྟེ ན སཾཔསཱརཡཏི, ཨེཝཾ མཙྪརིཡམྤི ཨཱཝཱསཱདཱིསཱུཏི. གཡ྄ཧཏི ཨེཏེནཱཏི ཝཱ གཱཧོ, ཀཊཙྪུ ཨེཝ གཱཧོ ཀཊཙྪུགྒཱཧོ. སོ ཡཐཱ སངྐུཊིཏགྒོ ན སཾཔསཱརཡཏི, ཨེཝཾ མཙྪརིཡམྤཱིཏི. ཨཱཝརིཏྭཱ གཧིཏཾ ཨགྒཧིཏཾ, ཏསྶ བྷཱཝོ ཨགྒཧིཏཏྟཾ, མཙྪརིཡཾ. ‘‘ཨཱཝཱསཱདི པརེཧི སཱདྷཱརཎམསཱདྷཱརཎཾ ཝཱ མཡ྄ཧེཝ ཧོཏཱུ’’ཏི པཝཏྟིཝསེན ཨཏྟསམྤཏྟིགྒཧཎལཀྑཎཏཱ, ‘‘མཱ ཨཉྙསྶཱ’’ཏི པཝཏྟིཝསེན ཨཏྟསམྤཏྟིནིགཱུཧཎལཀྑཎཏཱ ཙ ཡོཛེཏབྦཱ. ཡཾ པན ‘‘པརསནྟཀཾ གཎྷིཏུཀཱམོ’’ཏི ཝུཏྟཾ, ཏཾ མཙྪརིཡསྶ པརསནྟཀལོབྷསྶ ཨུཔནིསྶཡབྷཱཝཾ དསྶེཏུཾ ཝུཏྟནྟི དཊྛབྦཾ. ཡདི ཧི ཏཾ མཙྪརིཡཔྤཝཏྟིདསྶནཾ, པརསམྤཏྟིགྒཧཎལཀྑཎཏཱ ཙ ཝཏྟབྦཱ སིཡཱཏི.

༡༡༤༠. ཨབྷིཛ྄ཛྷཱཀཱམརཱགཱནཾ ¶ ཝིསེསོ ཨཱསཝདྭཡཨེཀཱསཝབྷཱཝོ སིཡཱ, ནཨབྷིཛ྄ཛྷཱཡ ནོཨཱསཝབྷཱཝོ ཙཱཏི ནོཨཱསཝལོབྷསྶ སབྦྷཱཝོ ཝིཙཱརེཏབྦོ. ན ཧི ཨཏྠི ‘‘ཨཱསཝོ ཙ ནོཨཱསཝོ ཙ དྷམྨཱ ཨཱསཝསྶ དྷམྨསྶ ཨཱསཝསྶ ཙ ནོཨཱསཝསྶ ཙ དྷམྨསྶ ཧེཏུཔཙྩཡེན པཙྩཡོ’’ཏི སཏྟམོ ཙ ནཝམོ ཙ པཉྷོ. གཎནཱཡ ཙ ‘‘ཧེཏུཡཱ སཏྟཱ’’ཏི ཝུཏྟཾ, ན ‘‘ནཝཱ’’ཏི. དིཊྛིསམྤཡུཏྟེ པན ལོབྷེ ནོཨཱསཝེ ཝིཛྫམཱནེ སཏྟམནཝམཱཔི པཉྷཝིསྶཛྫནཾ ལབྷེཡྻུཾ, གཎནཱ ཙ ‘‘ཧེཏུཡཱ ནཝཱ’’ཏི ཝཏྟབྦཱ སིཡཱ. དིཊྛིཝིཔྤཡུཏྟེ ཙ ལོབྷེ ནོཨཱསཝེ ཝིཛྫམཱནེ པུབྦེ དསྶིཏོ དོསོཏི.

༡༡༥༩. ཀཱམཙྪནྡནཱིཝརཎནིདྡེསེ ¶ ཀཱམེསཱུཏི ཏེབྷཱུམཀེསུ སཱསཝེསུ སབྦེསུ ཝཏྠུཀཱམེསུ. སབྦོ ཧི ལོབྷོ ཀཱམཙྪནྡནཱིཝརཎཾ. ཏེནེཝ ཏསྶ ཨཱརུཔྤེ ཨུཔྤཏྟི ཝུཏྟཱ ‘‘ནཱིཝརཎཾ དྷམྨཾ པཊིཙྩ ནཱིཝརཎོ དྷམྨོ ཨུཔྤཛྫཏི ན པུརེཛཱཏཔཙྩཡཱ. ཨཱརུཔྤེ ཀཱམཙྪནྡནཱིཝརཎཾ པཊིཙྩ ཨུདྡྷཙྩནཱིཝརཎཾ ཨཝིཛྫཱནཱིཝརཎཾ. ཨཱརུཔྤེ ཀཱམཙྪནྡནཱིཝརཎཾ པཊིཙྩ ཐིནམིདྡྷནཱིཝརཎཾ ཨུདྡྷཙྩནཱིཝརཎཾ ཨཝིཛྫཱནཱིཝརཎ’’ནྟི (པཊྛཱ. ༣.༨.༡).

༡༡༦༢. ཨིརིཡཱཔཐིཀཙིཏྟནྟི ཨིརིཡཱཔཐཱུཔཏྠམྦྷཀཾ ཨཊྛཔཉྙཱསཝིདྷཾ ཙིཏྟཾ. ཏཏྠ པན བལཝཐིནམིདྡྷསཧགཏཾ ཙིཏྟཾ ‘‘ཨིརིཡཱཔཐཾ སནྡྷཱརེཏུཾ ཨསཀྐོནྟ’’ནྟི ཝུཏྟཾ. ཨོལཱིཡཏཱིཏི ཨོལམྦཏི.

༡༡༦༣. ཨོནཡ྄ཧཏཱིཏི ཚཱདེཏི, ཨཝཏྠརཏི ཝཱ. ནཱནཱརམྨཎེསུ པཝཏྟིནིཝཱརཎེན, ཝིཔྥཱརིཀཏཱནིཝཱརཎེནེཝ ཝཱ ཨནྟོསམོརོདྷོ. ཨེཀཙྩཱནནྟི སིརཱིསཱདིརུཀྑཱནཾ. རཱུཔཀཱཡེནེཝ སིཡུཾ, ཏེན སུཁཔྤཊིསཾཝེདནནིབྦཱནསཙྪིཀིརིཡཱནཾ རཱུཔཏཱཔཏྟི སིཡཱཏི ཨདྷིཔྤཱཡོ. ཏསྨཱཏི ‘‘ཀཱཡསྶཱ’’ཏི ཝཙནསྶ རཱུཔཏྟཱསཱདྷཀཏྟཱ. ན ཧི ནཱམཀཱཡོ སུཔཏཱིཏི ཨིདཾ ཐིནམིདྡྷསམུཊྛིཏརཱུཔེཧི རཱུཔཀཱཡསྶ གརུབྷཱཝཔྤཏྟཾ ཨངྒཔཙྩངྒཱདཱིནཾ སཾསཱིདནཾ སོཔྤནྟི སནྡྷཱཡ ཝུཏྟཾ, ན ཛཱགརཎཙིཏྟརཧིཏཾ བྷཝངྒསནྟཏིནྟི. ཏསྶ ཕལཏྟཱཏི ཕལཱུཔཙཱརེན ཨིནྡྲིཡཾ ཝིཡ མིདྡྷཾ དསྶེཏུཾ མིདྡྷསྶ ཕལཏྟཱ ཨིནྡྲིཡནིདྡེསེ ཝིཡ ལིངྒཱདཱིནི མིདྡྷནིདྡེསེཔི སོཔྤཱདཱིནི ཝུཏྟཱནཱིཏི ཨཏྠོ.

རཱུཔཀཱཡསྶ ཨནྟོསམོརོདྷོ ནཏྠཱིཏི སོ ནཱམཀཱཡེ ཝུཏྟོཏི ཝིཉྙཱཡཏི. ཏེན སཧ ཝུཏྟཱ ¶ ཨོནཱཧཔརིཡོནཱཧཱ ཙ. རཱུཔཀཱཡསྶ ཝཱ ཝིཔྥཱརིཀཱཝིཔྥཱརིཀབྷཱཝོ ནཱམ ཨཏྟནོ སབྷཱཝེན ནཏྠི, ནཱམཀཱཡསྶ ནཱམཀཱཡེ ཝིཔྥཱརིཀེ ལཧུཀོ, ཨཝིཔྥཱརིཀེ གརུཀོཏི ཨཝིཔྥཱརིཀབྷཱཝེན ཨོནཱཧནཱདི ནཱམཀཱཡསྶེཝ ཧོཏཱིཏི ཨོནཱཧནཱདཡོཔི ནཱམཀཱཡེ ཝིཉྙཱཡནྟི. ཏེནཱཧ ‘‘ན ཧི རཱུཔཾ ནཱམཀཱཡསྶ ཨོནཱཧོ…པེ… ཧོཏཱི’’ཏི. ཨཱཝརཎབྷཱཝོ ཝིཡ ཧི ཨོནཱཧནཱདིབྷཱཝོཔི ནཱམཀཱཡསྶེཝ ཧོཏཱིཏི. ཨིཏརོ ཨདྷིཔྤཱཡཾ ཨཛཱནནྟོ མེགྷཱདཱིཧི རཱུཔེཧི རཱུཔཱནཾ ཨོནཱཧནཱདིཾ པསྶནྟོ ‘‘ནནུ ཙཱ’’ཏིཨཱདིམཱཧ. ཡདི ཨེཝནྟི ཡདི རཱུཔསྶ ཨོནཱཧནཱདིཏཱ སིདྡྷཱ, ཨརཱུཔསྶ ན སིཡཱ ¶ , སེཏུབནྡྷཱདཱིསུ རཱུཔསྶ ཨཱཝརཎཾ དིཊྛནྟི ཨཱཝརཎམྤི ཨརཱུཔསྶ ན བྷཝེཡྻཱཏི ཨཏྠོ.

སུརཱམེརཡཔཱནཾ ཨཀུསལནྟི ཀཏྭཱ ཡུཏྟོ ཏསྶ ཨུཔཀྐིལེསབྷཱཝོ, སུརཱ…པེ… པམཱདཊྛཱནཱནུཡོགསྶ ཙ ཨཀུསལཏྟཱ པཉྙཱཡ དུབྦལཱིཀརཎབྷཱཝོ ཡུཏྟོ, ཏཐཱཔི པརསྶ ཨདྷིཔྤཱཡཾ ཨནུཛཱནིཏྭཱ སུརཱམེརཡསྶ ཨུཔཀྐིལེསཏཱ པཉྙཱཡ དུབྦལཱིཀརཎཏཱ ཙ ཨུཔཀྐིལེསཱནཾ པཉྙཱཡ དུབྦལཱིཀརཎཱནཉྩ པཙྩཡཏྟཱ ཕལཝོཧཱརེན ཝུཏྟཱཏི དསྶེནྟོ ཨཱཧ ‘‘ན, པཙྩཡནིདྡེསཏོ’’ཏི. ཨེཝམེཝ ཁོཏི ཡཐཱ ཛཱཏརཱུཔསྶ ཨཡོ ལོཧཾ ཏིཔུ སཱིསཾ སཛྫནྟི པཉྩུཔཀྐིལེསེཧི ཨུཔཀྐིལིཊྛཾ ཛཱཏརཱུཔཾ ན ཙེཝ མུདུ ཧོཏི, ན ཙ ཀམྨནིཡཾ, ན ཙ པབྷསྶརཾ པབྷངྒུ ཙ, ན ཙ སམྨཱ ཨུཔེཏི ཀམྨཱཡ, ཨེཝམེཝ. པཙྩཡནིདྡེསཏོཏི ཨུཔཀྐིལེསཔཉྙཱདུབྦལཱིཀརཎཱནཾ པཙྩཡབྷཱཝནིདྡེསཏོ, པཙྩཡེ ཕལནིདྡེསཏོཏི ཨཏྠོ. སཡམེཝ ཀིལེསོ ཨུཔཀྐིལེསནིདྡེསེསུ ནིདྡིཊྛོཏི ཨདྷིཔྤཱཡོ.

ནཱིཝརཎཾ ཧུཏྭཱཝ ནཱིཝརཎསམྤཡུཏྟེ དསྶིཡམཱནེ ན ནཱིཝརཎཏཱདསྶནཏྠོ ཨཱརམྦྷོ, ཨཐ ཁོ སིདྡྷནཱིཝརཎབྷཱཝསྶ ནཱིཝརཎསམྤཡུཏྟཏཱདསྶནཏྠོཏི ཡཐཱལཱབྷཝསེན ཙ ཨསམྤཡུཏྟསྶ ཝཙནཾ ན ཡུཛྫཏི. ཡཐཱ ཧི ཏིཊྛནྟམྤི ཙརནྟམྤཱིཏི སིཔྤིསམྦུཀཱདཱིསུ ཡཐཱལཱབྷསམྦྷཝཾ ཏཾ དྭཡཾ ཝུཏྟཾ, ན ཨེཝཾ ‘‘ཐིནམིདྡྷནཱིཝརཎཾ སམྤཡུཏྟམྤི ཨསམྤཡུཏྟམྤཱི’’ཏི ཝཙནཾ ཨཏྠི, ཡཾ ཡཐཱལཱབྷཾ སམྦྷཝེཡྻཱཏི. ཙིཏྟཛསྶཱསམྦྷཝཝཙནཏོཏི ‘‘ཙཏྟཏྟཱ’’ཏིཨཱདིཝཙནསྶ ཛྷཱནཀྑཎེ ཙིཏྟཛསྶ ཐིནམིདྡྷསྶ ཨསམྦྷཝཝཙནབྷཱཝཏོཏི ཨཏྠོ, ‘‘ཙཏྟཏྟཱ’’ཏིཨཱདིཝཙནེན ཝཱ ཨསམྦྷཝསྶ ཝཙནཏོ པཀཱསནཏོཏི ཨཏྠོ.

ཀཱམེསུ ཁོ པན…པེ… སུདིཊྛོཏི ཨིམིནཱ ཀཱམཱདཱིནཝེ ཨཉྙཱཎསྶ པཧཱནམཱཧ. ཏཾ ཏཏྠ ¶ པཧཱནནྟི ཏཾ ཏཏྠ རཱུཔེ པཧཱནནྟི པཧཱནཾ ཨཔེཀྑིཏྭཱ ‘‘ཏ’’ནྟི ཝུཏྟཾ, ཏཾ ཝིནཡནནྟི ཝཱ ཨཏྠོ. ཏེན རཱུཔསྶ ཨཔྤཧཱཏབྦཏྟམེཝ དསྶེཏི, ན པན ‘‘ཚ དྷམྨེ པཧཱཡཱ’’ཏིཨཱདཱིསུ མིདྡྷསྶ ཨཔྤཧཱཏབྦཏཱདསྶནཏོ ཨཉྙོ པཀཱརོ ཝུཏྟོ. ན ཡཐཱ…པེ… ཝུཏྟནྟི ཚ དྷམྨཱ པཉྩ ནཱིཝརཎཱནི ཙ ཡཐཱ པཧཱཏབྦཱནེཝ ཧོནྟཱནི ¶ ‘‘པཧཱཏབྦཱནཱི’’ཏི ཝུཏྟཱནི, ན ཨེཝཾ རཱུཔཾ པཧཱཏབྦམེཝ ཧོནྟཾ ‘‘པཧཱཏབྦ’’ནྟི ཝུཏྟནྟི ཨཏྠོ.

ཨཉྙེཧི ཙ སུཏྟེཧཱིཏི ཝུཏྟསུཏྟཱནཾ དསྶནཏྠཾ ‘‘ཏཐཱ ཧཱི’’ཏིཨཱདིམཱཧ. ཀུསལཔྤཝཏྟིཾ ཨཱཝརནྟཱིཏི ཨཱཝརཎཱ. ནཱིཝཱརེནྟཱིཏི ནཱིཝརཎཱ. ཙིཏྟཾ ཨབྷིབྷཝནྟཱ ཨཱརོཧནྟཱིཏི ཙེཏསོ ཨཛ྄ཛྷཱརུཧཱ. ཨཱཝརཎཱདིཀིཙྩཉྩ ཨརཱུཔསྶེཝ ཡུཛྫཏི, ཏཐཱ ཨནྡྷཀརཎཱདིཀིཙྩཾ. ཏཏྠ ཙཏཱུསུ པདེསུ པུརིམཔུརིམསྶ པཙྪིམཔཙྪིམོ ཨཏྠོ. སཾསཱརདུཀྑཾ ཝིགྷཱཏོ, ཏཾཛནཀཏཱཡ ཝིགྷཱཏཔཀྑིཀཾ. ཙེཏསོ པརིཡུཊྛཱནཾ ཨཡོནིསོམནསིཀཱརཏོ ཨུཔྤཏྟི ཨཀུསལརཱསིབྷཱཝོ ཙ ཨརཱུཔསྶེཝ ཧོཏཱིཏི ཨརཱུཔམེཝ མིདྡྷཾ.

༡༡༦༦. གཎབྷོཛནཱདིཨཀཔྤིཡབྷོཛནཾ ཀཔྤིཡསཉྙཱི བྷུཉྫིཏྭཱ པུན ཛཱནིཏྭཱ ཀོཙི ཝིཔྤཊིསཱརཱི ཧོཏི, ཨནཝཛྫཉྩ བྷིཀྑུདསྶནཙེཏིཡཝནྡནཱདིཾ ཝཛྫསཉྙཱི ཨཀཏྭཱ ཀཏྭཱ ཙ ཀོཙི ཨསྶདྡྷོ ཝིཔྤཊིསཱརཱི ཧོཏི. ཝཏྠུནྟི མཱུལཾ. ཨེཝརཱུཔནྟི མཱུལཝསེན ཨེཝཾཔཀཱརནྟི ཨཏྠོ. ཀུཀྐུཙྩཔདཾ ཡེཝཱཔནཀེསུ ‘‘ཀུཙྪིཏཾ ཀཏཾ ཀུཀཏཾ, ཏསྶ བྷཱཝོ’’ཏི ཝུཏྟཏྠམེཝ. ཀུཀྐུཙྩཱཡནཱཀཱརོཏི ཀུཀྐུཙྩབྷཱཝནཱཀཱརོ ཀུཀྐུཙྩཀརཎཱཀཱརོ ཀུཀྐུཙྩགམནཱཀཱརོ ཝཱ. ཨེཏེན ཀུཀྐུཙྩཾ ཀིརིཡབྷཱཝེན དསྶེཏི. ‘‘ཀཔྤཏི ན ཀཔྤཏཱི’’ཏི པཝཏྟཙིཏྟུཔྤཱདོཝ ཝིནཡཀུཀྐུཙྩཾ.

༡༡༧༦. ཙིཏྟཝིཀྑིཔནཀིཙྩསཱམཉྙེན ཨུདྡྷཙྩཾ ཀུཀྐུཙྩཉྩ སཧ ཝུཏྟནྟི ཝེདིཏབྦཾ. ཀཱམཙྪནྡསྶ ཨནཱགཱམིམགྒེན པཧཱནཾ ཨུཀྐཊྛནཱིཝརཎཝསེན ཝུཏྟནྟི ཝེདིཏབྦཾ. ཡདི ཧི ལོབྷོ ནོནཱིཝརཎོ སིཡཱ, ‘‘ནོནཱིཝརཎོ དྷམྨོ ནཱིཝརཎསྶ དྷམྨསྶ ཧེཏུཔཙྩཡེན པཙྩཡོ’’ཏིཨཱདི ཝཏྟབྦཾ སིཡཱ, ན ཙེཏཾ ཝུཏྟཾ. གཎནཱཡ ཙ ‘‘ཧེཏུཡཱ ཙཏྟཱརཱི’’ཏི ཝུཏྟཾ, ན ‘‘ནཝཱ’’ཏི. ཏསྨཱ སབྦོ ལོབྷོ ཀཱམཙྪནྡནཱིཝརཎནྟི ཨརཧཏྟམགྒེནསྶ པཧཱནཝཙནཾ ཡུཏྟཾ.

༡༢༡༩. ཀཱམོ ཙཱཏི ཀིལེསཀཱམོ ཙ. པུརིམདིཊྛིཾ ཨུཏྟརདིཊྛི ཨུཔཱདིཡཏཱིཏི པུརིམདིཊྛིཾ ‘‘སསྶཏོ’’ཏི ¶ གཎྷནྟཱི ཨུཔཱདིཡཏི, པུརིམདིཊྛིཨཱཀཱརེནེཝ ཝཱ ཨུཔྤཛྫམཱནཱ ཨུཏྟརདིཊྛི ཏེནེཝ པུརིམདིཊྛིཾ དལ༹ྷཾ ཀརོནྟཱི ཏཾ ཨུཔཱདིཡཏཱིཏི ཝུཏྟཾ. གོསཱིལགོཝཏཱདཱིནཱིཏི ཏཐཱབྷཱུཏཾ དིཊྛིམཱཧ. ཨབྷིནིཝེསཏོཏི ¶ ཨབྷིནིཝེསབྷཱཝཏོ, ཨབྷིནིཝིསནཏོ ཝཱ. ཨཏྟཝཱདམཏྟམེཝཱཏི ཨཏྟསྶ ཨབྷཱཝཱ ‘‘ཨཏྟཱ’’ཏི ཨིདཾ ཝཙནམཏྟམེཝ. ཨུཔཱདིཡནྟི དལ༹ྷཾ གཎྷནྟི. ཀཐཾ? ཨཏྟཱཏི. ཨཏྟཱཏི ཧི ཨབྷིནིཝིསནྟཱ ཝཙནམེཝ དལ༹ྷཾ ཀཏྭཱ གཎྷནྟཱིཏི ཨཏྠོ. ཨེཝཾ ཨཏྟཝཱདམཏྟམེཝ ཨུཔཱདིཡནྟཱིཏི ཝུཏྟཾ. ‘‘ཨཏྟཝཱདམཏྟ’’ནྟི ཝཱ ཝཱཙཱཝཏྠུམཏྟམཱཧ. ཝཱཙཱཝཏྠུམཏྟམེཝ ཧི ‘‘ཨཏྟཱ’’ཏི ཨུཔཱདིཡནྟི ཨཏྠསྶ ཨབྷཱཝཱཏི.

༡༢༢༡. དིནྣནྟི དཱནམཱཧ, ཏཾ ཨཕལཏྟཱ རཱུཔཾ ཝིཡ དཱནཾ ནཱམ ན ཧོཏཱིཏི པཊིཀྑིཔཏི. མཧཱཝིཛིཏཡཉྙསདིསོ ཡཉྙོ མཧཱཡཱགོ. ཨཱམནྟེཏྭཱ ཧཝནཾ དཱནཾ ཨཱཧུནཾ, པཱཧུནཱནཾ ཨཏིཐཱིནཾ ཨཏིཐིཀིརིཡཱ པཱཧུནཾ, ཨཱཝཱཧཱདཱིསུ མངྒལཏྠཾ དཱནཾ མངྒལཀིརིཡཱ. པརལོཀེ ཋིཏོ ཨིམཾ ལོཀཾ ‘‘ནཏྠཱི’’ཏི གཎྷཱཏཱིཏི ཨིམཾ ལོཀཾ ཨཝེཀྑིཏྭཱ པརལོཀོ, པརཉྩ ཨཝེཀྑིཏྭཱ ཨཡཾ ལོཀོ ཧོཏི གནྟབྦཏོ ཨཱགནྟབྦཏོ ཙཱཏི པརལོཀཏོ ཨིདྷཱགམནསྶ ཨབྷཱཝཱ ཏཏྠེཝ ཨུཙྪིཛྫནཏོ ཙིཏྟེན པརལོཀེ ཋིཏོ ཨིམཾ ལོཀཾ ‘‘ནཏྠཱི’’ཏི གཎྷཱཏཱིཏི ཨཏྠོ ཝེདིཏབྦོ. ན ཧི ཨཡཾ དིཊྛི པརལོཀེ ནིབྦཏྟསྶེཝ ཧོཏཱིཏི. ཨིདྷལོཀེ ཋིཏོཏི ཨེཏྠཱཔི ཨཡམེཝ ནཡོ. ཨཡཾ ཝཱ ཨེཏྠ ཨཏྠོ ‘‘སཾསརཎཔྤདེསོ ཨིདྷལོཀོ ཙ པརལོཀོ ཙ ནཱམ ཀོཙི ནཏྠི སཾསརཎསྶ ཨབྷཱཝཱ ཏཏྠ ཏཏྠེཝ ཨུཙྪིཛྫནཏོ’’ཏི. པུརིམབྷཝཏོ པཙྪིམབྷཝེ ཨུཔཔཏནཾ ཨུཔཔཱཏོ, སོ ཡེསཾ སཱིལཾ, ཏེ ཨོཔཔཱཏིཀཱ. ཏེ པན ཙཝནཀཱ ཨུཔཔཛྫནཀཱ ཧོནྟཱིཏི ཀཏྭཱ ཨཱཧ ‘‘ཙཝནཀཨུཔཔཛྫནཀསཏྟཱ ནཏྠཱིཏི གཎྷཱཏཱི’’ཏི. ཨནུལོམཔྤཊིཔདནྟི ནིབྦཱནཱནུཀཱུལཾ སཱིལཱདིཔྤཊིཔདཾ.

༡༢༣༦. ནིཔྤདེསཏོཝ གཧིཏོཏི ཨིམིནཱ ཡཾ ཨཱསཝགོཙྪཀེ བྲཧྨཱནཾ ཀཔྤརུཀྑཱདཱིསུ རཱགསྶ ཙ དིཊྛིརཱགསྶ ཙ ཨསངྒཧཎེན ནཱིཝརཎགོཙྪཀེ ཙ ཀཱམཙྪནྡསྶ ཨནཱགཱམིམགྒེན པཧཱཏབྦཏཱདསྶནེན སཔྤདེསཏྟཾ ཝུཏྟཾ, ཏཾ ནིཝཱརིཏཾ ཧོཏི. ཨརཧཏྟམགྒེནཱཏི ཝཙནེན ཙཏཱུཧི མགྒེཧི པཧཱཏབྦཏཱ ཝུཏྟཱཏི དཊྛབྦཾ. ན ཧི པུརིམེཧི ཨཏནུཀཏཱ མོཧཱདཡོ ཨརཧཏྟམགྒེན པཧཱིཡནྟཱིཏི.

༡༢༨༧. ནིརཏིཨཏྠེནཱཏི ¶ པཱིཏིཝིརཧེན, བལཝནིཀནྟིཝིརཧེན ཝཱ. ན ཧི དུཀྑཱཡ ཝེདནཱཡ རཛྫནྟཱིཏི. ཨཝ-སདྡེན ཨཝགཱཧཏྠོ ཨདྷོཨཏྠོ ཙཱཏི དྭིདྷཱ ཨཝ-སདྡསྶ ཨཏྠོ ཝུཏྟོ.

༡༣༠༡. ཝིཙིཀིཙྪཱསཧགཏོ ¶ མོཧརཎོ པཧཱནེཀཊྛེན དིཊྛིསམྤཡུཏྟེན རཱགརཎེན སརཎོ, ཨུདྡྷཙྩསཧགཏོ རཱུཔརཱགཨརཱུཔརཱགསངྑཱཏེན. ཨརཎཝིབྷངྒསུཏྟེ (མ. ནི. ༣.༣༣༣) པན ‘‘ཡོ ཀཱམཔཊིསནྡྷིསུཁིནོ སོམནསྶཱནུཡོགོ ཧཱིནོ གམྨོ པོཐུཛྫནིཀོ ཨནརིཡོ ཨནཏྠསཾཧིཏོ, སདུཀྑོ ཨེསོ དྷམྨོ སཨུཔགྷཱཏོ སཨུཔཱཡཱསོ སཔརིལཱ༹ཧོ མིཙྪཱཔཊིཔདཱ. ཏསྨཱ ཨེསོ དྷམྨོ སརཎོ’’ཏིཨཱདིཝཙནཏོ ཕལབྷཱུཏདུཀྑཨུཔགྷཱཏཨུཔཱཡཱསཔརིལཱ༹ཧསབྷཱཝབྷཱུཏོ མིཙྪཱཔཊིཔདཱབྷཱཝོཝ ‘‘སརཎོ’’ཏི ཝིཉྙཱཡཏཱིཏི ཏེཧི སབྦཱཀུསལཱནཾ སརཎཏཱ སིདྡྷཱ ཧོཏཱིཏི.

སུཏྟནྟིཀདུཀནིཀྑེཔཀཐཱཝཎྞནཱ

༡༣༠༣. ཝིཝེཙིཏཏྟཱཏི ཝིསུཾ ཀཏཏྟཱ པཀཱསིཏཏྟཱ. ཨསེསེཏྭཱ ཁེཔེཏཱིཏི ཝཛིརཾ ཨཏྟནཱ པཏིཏཊྛཱནཾ ཨསེསེཏྭཱ ཁེཔེཏི པུན ཨཔཱཀཏིཀཏཱཨཱཔཱདནེན.

༡༣༡༡. ཏཔྤཏཱིཏི ཝིཔྤཊིསཱརཱི ཧོཏི, ཨནུསོཙཏི ཝཱ.

༡༣༡༣. ཨཧནྟི ཨིཏི-སདྡཔརེན ཨཧཾ-སདྡེན ཧེཏུབྷཱུཏེན ཡོ ཨཏྠོ ཝིཉྙཱཡཏི, སོ སཾཀཐཱིཡཏི, ཨུདཱིརཱིཡཏཱིཏི ཨཏྠོ. ཨཉྙཐཱ ཧི ཝུཙྩམཱནསྶ ཝཙནེན པཀཱསིཡམཱནསྶ པདཏྠསྶ སངྑཱདིབྷཱཝེ སབྦེསཾ ཀུསལཱདིདྷམྨཱནཾ ཨདྷིཝཙནཱདིཏཱ སིཡཱཏི. བྷཱཝོཏི སཏྟཝེཝཙནནྟི བྷཎནྟི, དྷཱཏུཡཱ ཝཱ ཨེཏཾ ཨདྷིཝཙནཾ. དཏྟོཏི ཨེཏྟཱཝཏཱ སཏྟཔཉྙཏྟིཾ དསྶེཏྭཱ ཨཉྙམྤི ཨུཔཱདཱཔཉྙཏྟིཾ དསྶེཏུཾ ‘‘མཉྩོ’’ཏིཨཱདིམཱཧ. ཨཧནྟི ཙ པཝཏྟཾ ཨདྷིཝཙནཾ ཝདནྟེན སུཎནྟེན ཙ པུབྦེ གཧིཏསཉྙེན ཨཏྠཔྤཀཱསནབྷཱཝེན ཝིཉྙཱཡཏི. ན ཧི ཏསྨིཾ ཨཝིཉྙཱཏེ ཏདཏྠཝིཛཱནནཾ ཨཏྠཱིཏི ཝིསེསེན ཨདྷིཝཙནཾ ‘‘ཉཱཡཏཱིཏི སམཉྙཱ’’ཏི ཝུཏྟཾ. ཨེཏསྶཏྠསྶ ཨཧནྟི ཨིདཾ ཨདྷིཝཙནནྟི ཨེཝཾ ཝཱ སཉྙཱགཧཎཝསེན ཉཱཡཏི སམཉྙཱཡཏི པཱཀཊཱ ཧོཏཱིཏི སམཉྙཱ. པཉྙཱཔཱིཡཏཱིཏི ཨཧནྟི ཨིདཾ ཨེཏསྶ ཨདྷིཝཙནནྟི ཨེཝཾ ཋཔཱིཡཏཱིཏི ཨཏྠོ. ཝོཧརཱིཡཏཱིཏི ཝུཙྩཏི. ཨུདྡྷེཡྻནྟི ཨུདྡྷརིཏབྦཾ. ཨཔི ནཱམསཧསྶཏོཏི ཨནེཀེཧིཔི ནཱམསཧསྶེཧཱིཏི ཨཏྠོ. སཡམེཝ ཨུཔཔཏནསཱིལཾ ནཱམཾ ‘‘ཨོཔཔཱཏིཀནཱམ’’ནྟི ཝུཙྩཏི.

ཀརཱིཡཏཱིཏི ¶ ¶ ཀམྨཾ, ནཱམམེཝ ཀམྨཾ ནཱམཀམྨཾ. ཏཐཱ ནཱམདྷེཡྻཾ. ཀརཎཋཔནསདྡཱཔི ཧི ཀམྨཏྠཱ ཧོནྟཱིཏི. ཨཐ ཀརཎཏྠཱ, ཀརཱིཡཏི ཙ ཋཔཱིཡཏི ཙ ཨེཏེན ཨཏྠོ ཨེཝཾནཱམོཏི པཉྙཱཔཱིཡཏཱིཏི ཀརཎཾ ཋཔནཉྩ ནཱམ ཧོཏི. ཨཐ བྷཱཝཏྠཱ, ཉཱཔནམཏྟམེཝ ཀརཎཾ ཋཔནནྟི ཙ ཝུཏྟཾ. ནཱམནིརུཏྟི ནཱམབྱཉྫནནྟི ནཱམམིཙྩེཝ ཝུཏྟཾ ཧོཏི. ན ཧི པཐཝཱིསངྑཱཏཾ ཨཏྠཔྤཀཱརམཏྟཾ ནིཝདཏི བྱཉྫཡཏི ཝཱ པཐཝཱིཏི ནཱམཾ ནིཝདཏི བྱཉྫཡཏི ཝཱ, ཏསྨཱ ཨནཱམསྶ ནིརུཏྟིབྱཉྫནབྷཱཝནིཝཱརཎཏྠཾ ‘‘ནཱམནིརུཏྟི ནཱམབྱཉྫན’’ནྟི ཝུཏྟཾ. ཨེཝཾ ནཱམཱབྷིལཱཔོཏི ཨེཏྠཱཔི ནཡོ. ཨེཏྠ པན སངྑཱ སམཉྙཱ པཉྙཏྟི ཝོཧཱརོཏི ཙཏཱུཧི པདེཧི པཉྙཱཔིཏབྦཏོ པཉྙཏྟི ཝུཏྟཱ, ཨིཏརེཧི པཉྙཱཔནཏོ.

ཏཏྠ ཙ ‘‘པུརིམཱ ཨུཔཱདཱཔཉྙཏྟི ཨུཔྤཱདཝཡཀིཙྩརཧིཏཱ ལོཀསངྐེཏསིདྡྷཱ, པཙྪིམཱ ནཱམཔཉྙཏྟི, ཡཱཡ པུརིམཱ པཉྙཏྟི རཱུཔཱདཡོ ཙ སོཏདྭཱརཝིཉྙཱཎསནྟཱནཱནནྟརམུཔྤནྣེན གཧིཏཔུབྦསངྐེཏེན མནོདྭཱརཝིཉྙཱཎསནྟཱནེན གཧིཏཱཡ པཉྙཱཔཱིཡནྟཱི’’ཏི ཨཱཙརིཡཱ ཝདནྟི. ཨེཏསྨིཾ པན ཨིམིསྶཱ པཱལི༹ཡཱ ཨཊྛཀཐཱཡ ཙ ཨཏྠེ སཏི ཡཾ ཝུཏྟཾ མཱཏིཀཱཡཾ ‘‘ཝཙནམཏྟམེཝ ཨདྷིཀཱརཾ ཀཏྭཱ པཝཏྟཱ ཨདྷིཝཙནཱ ནཱམ, སཧེཏུཀཾ ཀཏྭཱ ཝུཙྩམཱནཱ ཨབྷིལཱཔཱ ནིརུཏྟི ནཱམ, པཀཱརེན ཉཱཔནཏོ པཉྙཏྟི ནཱམཱ’’ཏི (དྷ. ས. ཨཊྛ. ༡༠༡-༡༠༨), ཏེན ཝིརོདྷོ སིཡཱ. ན ཧི ཨུཔྤཱདཝཡཀིཙྩརཧིཏསྶ ཝཙནམཏྟཾ ཨདྷིཀཱརཾ ཀཏྭཱ པཝཏྟི ཨཏྠི ཨུཔྤཱདཱདིསཧིཏསྶེཝ པཝཏྟིསབྦྷཱཝཏོ, ན ཙ ཝཙནཝཙནཏྠཝིམུཏྟསྶ ནཱམསྶ ནིདྡྷཱརེཏྭཱ སཧེཏུཀཾ ཀཏྭཱ ཝུཙྩམཱནཏཱ ཨཏྠི, ནཱཔི ཨནིདྡྷཱརིཏསབྷཱཝསྶ པདཏྠསྶ ཏེན ཏེན པཀཱརེན ཉཱཔནཾ ཨཏྠཱིཏི.

དུཝིདྷཱ ཙཱཡཾ པཉྙཏྟི ཡཐཱཝུཏྟཔྤཀཱརཱཏི ཨཊྛཀཐཱཝཙནཉྩ ན དིསྶཏི, ཨཊྛཀཐཱཡཾ པན ཝིཛྫམཱནཔཉྙཏྟིཨཱདཡོ ཚ པཉྙཏྟིཡོཝ ཝུཏྟཱ. ཏཏྠ ‘‘རཱུཔཾ ཝེདནཱ’’ཏིཨཱདིཀཱ ཝིཛྫམཱནཔཉྙཏྟི. ‘‘ཨིཏྠཱི པུརིསོ’’ཏིཨཱདིཀཱ ཨཝིཛྫམཱནཔཉྙཏྟི. ‘‘ཏེཝིཛྫོ ཚལ༹བྷིཉྙོ’’ཏིཨཱདིཀཱ ཝིཛྫམཱནེན ཨཝིཛྫམཱནཔཉྙཏྟི. ‘‘ཨིཏྠིསདྡོ པུརིསསདྡོ’’ཏིཨཱདིཀཱ ཨཝིཛྫམཱནེན ཝིཛྫམཱནཔཉྙཏྟི. ‘‘ཙཀྑུཝིཉྙཱཎཾ སོཏཝིཉྙཱཎ’’ནྟིཨཱདིཀཱ ཝིཛྫམཱནེན ཝིཛྫམཱནཔཉྙཏྟི. ‘‘ཁཏྟིཡཀུམཱརོ བྲཱཧྨཎཀུམཱརོ’’ཏིཨཱདིཀཱ ཨཝིཛྫམཱནེན ཨཝིཛྫམཱནཔཉྙཏྟི. ན ཙེཏྠ ཡཐཱཝུཏྟཔྤཀཱརཱ དུཝིདྷཱ པཉྙཏྟི ཝུཏྟཱཏི ¶ སཀྐཱ ཝིཉྙཱཏུཾ. ཝིཛྫམཱནསྶ ཧི ¶ སངྑཱ…པེ… ཨབྷིལཱཔོ ཝིཛྫམཱནཔཉྙཏྟི. ཨཝིཛྫམཱནསྶ ཙ སངྑཱདིཀཱ ཨཝིཛྫམཱནཔཉྙཏྟི. ཏེསཾཡེཝ ཝིསེསནཝིསེསིཏབྦབྷཱཝེན པཝཏྟཱ སངྑཱདཡོ ཨིཏརཱཏི.

ཨཝིཛྫམཱནཔཉྙཏྟིཝཙནེན པཉྙཱཔིཏབྦཱ ཨུཔཱདཱཔཉྙཏྟི, ཏསྶཱ པཉྙཱཔནབྷཱུཏཱ ནཱམཔཉྙཏྟི ཙ ཝུཏྟཱ, ཨིཏརེཧི ནཱམཔཉྙཏྟིཡེཝ ཡཐཱཝུཏྟཱཏི ཙེ? ན, ཨསིདྡྷཏྟཱ. སཏི ཧི ཨུཛུཀེ པུརིམེ པཱལི༹ཨནུགཏེ ཨཏྠེ ཨཡམཏྠོ ཨིམཱཡ ཨཊྛཀཐཱཡ ཝུཏྟོཏི ཨསིདྡྷམེཏཾ. ཡདི ཙ སཏྟརཐགྷཊཱདིདིསཱཀཱལཀསིཎཨཛཊཱཀཱསཀསིཎུགྒྷཱཊིམཱཀཱསཨཱཀིཉྩཉྙཱཡཏནཝིསཡནིརོདྷསམཱཔཏྟིཨཱདིཔྤཀཱརཱ ཨུཔཱདཱཔཉྙཏྟི ཨཝིཛྫམཱནཔཉྙཏྟི, ཨེཏེནེཝ ཝཙནེན ཏསྶཱ ཨཝིཛྫམཱནཏཱ ཝུཏྟཱཏི ན སཱ ཨཏྠཱིཏི ཝཏྟབྦཱ. ཡཐཱ ཙ པཉྙཱཔིཏབྦཏོ ཨཝིཛྫམཱནཱནཾ སཏྟཱདཱིནཾ ཨཝིཛྫམཱནཔཉྙཏྟིབྷཱཝོ, ཨེཝཾ རཱུཔཱདཱིནཾ ཝིཛྫམཱནཱནཾ པཉྙཔེཏབྦཏོ ཝིཛྫམཱནཔཉྙཏྟིབྷཱཝོ ཨཱཔཛྫཏི. ཏཏོ ‘‘སབྦེ དྷམྨཱ པཉྙཏྟཱི’’ཏི པཉྙཏྟིཔཐེཧི ཨཝིསིཊྛོ པཉྙཏྟིདྷམྨནིདྡེསོ ཝཏྟབྦོ སིཡཱ. ཨཐཱཔི པཉྙཱཔིཏབྦཔཉྙཱཔནཝིསེསདསྶནཏྠོ སངྑཱདིནིདྡེསོ, ཏཐཱཔི ‘‘ཨེཀདྷམྨོ སབྦདྷམྨེསུ ནིཔཏཏི, སབྦདྷམྨཱ ཨེཀདྷམྨསྨིཾ ནིཔཏནྟཱི’’ཏིཨཱདིནཱ པཉྙཱཔིཏབྦཱནཾ པཉྙཏྟིཔཐབྷཱཝསྶ དསྶིཏཏྟཱ པཉྙཱཔིཏབྦཱནཾ པཉྙཏྟིབྷཱཝེ པཉྙཏྟིཔཐཱ པཉྙཏྟིསདྡེནེཝ ཝུཏྟཱཏི པཉྙཏྟིཔཐཔདཾ ན ཝཏྟབྦཾ སིཡཱ, ནཱཔི སཀྐཱ པཉྙཱཔིཏབྦཔཉྙཱཔནཝིསེསདསྶནཏྠོ སངྑཱདིནིདྡེསོཏི ཝཏྟུཾ སངྑཱདིསདྡཱནཾ སམཱནཏྠཏྟཱ. ཝུཏྟཉྷི ‘‘མརཎེནཔི ཏཾ པཧཱིཡཏི, ཡཾ པུརིསོ མམིདནྟི མཉྙཏཱི’’ཏི (མཧཱནི. ༤༡) ཨེཏྠ ‘‘པུརིསོཏི སངྑཱ སམཉྙཱ…པེ… ཨབྷིལཱཔོ’’ཏི (མཧཱནི. ༤༡). ཏཐཱ ‘‘མཱགཎྜིཡོཏི ཏསྶ བྲཱཧྨཎསྶ ནཱམཾ སངྑཱ སམཉྙཱ’’ཏིཨཱདི (མཧཱནི. ༧༣). ན ཙ ‘‘ཨཡཾ ཨིཏྠནྣཱམོ’’ཏི སངྐེཏགྒཧཎཾ ‘‘རཱུཔཾ ཏིསྶོ’’ཏིཨཱདིཝཙནགྒཧཎཉྩ མུཉྩིཏྭཱ ཨཉྙསྶ ཨསིདྡྷསབྷཱཝསྶ ཨཏྠཔཉྙཱཔནེ སམཏྠཏཱ སམྦྷཝཏི, ཏེསཉྩ ཨསམཏྠཏཱ. ཡདི ཧི ཏེསཾ ཝིནཱ པཉྙཏྟིཡཱ ཨཏྠཔཉྙཱཔནེ ཨསམཏྠཏཱ སིཡཱ, པཉྙཏྟིཔཉྙཱཔནེ ཙ ཨསམཏྠཏཱཏི ཏསྶཱ ཨཉྙཱ པཉྙཏྟི ཝཏྟབྦཱ སིཡཱ, ཏསྶཱ ཏསྶཱཏི ཨནཝཏྠཱནཾ, ཏཏོ ཨཏྠཝིཛཱནནམེཝ ན སིཡཱ, ནཱཔི སངྐེཏགྒཧཎཾ སངྐེཏསྶ པཉྙཏྟིབྷཱཝེ ‘‘ཨཡཾ ཨིམསྶ བྷཱསིཏསྶ ཨཏྠོ’’ཏི ཝཱ, ‘‘ཨིམསྶཏྠསྶ ཨིདཾ ཝཙནཾ ཛོཏཀ’’ནྟི ཝཱ. སཉྙུཔྤཱདམཏྟེ པན སངྐེཏགྒཧཎེ ཝཙནསྶ ཝཙནཏྠཝིནིམུཏྟསྶ ¶ ཀཔྤནེ པཡོཛནཾ ནཏྠི. ‘‘བུདྡྷསྶ བྷགཝཏོ ཝོཧཱརོ ལོཀིཡེ སོཏེ པཊིཧཉྙཏི’’ (ཀཐཱ. ༣༤༧), ‘‘ཨབྷིཛཱནཱསི ནོ ཏྭཾ ཨཱནནྡ ཨིཏོ པུབྦེ ཨེཝརཱུཔཾ ནཱམདྷེཡྻཾ སུཏཾ ཡདིདཾ ཛནཝསབྷོ’’ཏི (དཱི. ནི. ༢.༢༨༠), ‘‘ནཱམཉྩ སཱཝེཏི ཀོཎྜཉྙོ ཨཧཾ ¶ བྷགཝཱ’’ཏིཨཱདཱིཧི (སཾ. ནི. ༡.༢༡༧) ཙ པཉྙཏྟིཡཱ ཝཙནབྷཱཝོ སིདྡྷོ. ཏསྨཱ པཱལི༹ཡཱ ཨཊྛཀཐཱཡ ཙ ཨཝིརུདྡྷོ ཨཏྠོ ཝིཙཱརེཏྭཱ གཧེཏབྦོ.

ཡདི སཏྟཱདཡོ ཨཝིཛྫམཱནཔཉྙཏྟི ན ཧོནྟི, ཀཱ པན ཨཝིཛྫམཱནཔཉྙཏྟི ནཱམཱཏི? པཀཱསིཏོ ཨཡམཏྠོ ‘‘ཨཝིཛྫམཱནཱནཾ སཏྟཱདཱིནཾ སངྑཱ…པེ… ཨབྷིལཱཔོ ཨཝིཛྫམཱནཔཉྙཏྟཱི’’ཏི. སཏྟཱདཱིནཉྩ ཨཝིཛྫམཱནཏྟཱ ཨཏྠིཏཱ ནེཝ ཝཏྟབྦཱ, ཡེ ཙ ཝདེཡྻུཾ ‘‘རཱུཔཱདཱིནི ཝིཡ ཨཝིཛྫམཱནཏྟཱ ཨཝིཛྫམཱནཏཱ ཝུཏྟཱ, ན ནཏྠིབྷཱཝཏོ’’ཏི, ཨཡཉྩ ཝཱདོ ཧེཝཏྠིཀཐཱཡ པཊིསིདྡྷོ, ན ཙ རཱུཔཾ ཝེདནཱ ན ཧོཏཱིཏི ཨཝིཛྫམཱནཾ ནཱམ ཧོཏི. ཨེཝཾ སཏྟཱདཡོཔི ཡདི ཨཏྠི, རཱུཔཱདཡོ ན ཧོནྟཱིཏི ཨཝིཛྫམཱནཱཏི ན ཝཏྟབྦཱ. ཡསྨཱ པན ཡེསུ རཱུཔཱདཱིསུ ཙཀྑཱདཱིསུ ཙ ཏཐཱ ཏཐཱ པཝཏྟམཱནེསུ ‘‘སཏྟོ ཨིཏྠཱི རཐོ གྷཊོ’’ཏིཨཱདིཀཱ ཝིཙིཏྟསཉྙཱ ཨུཔྤཛྫཏི, སཉྙཱནུལོམཱནི ཙ ཨདྷིཝཙནཱནི, ཏེཧི རཱུཔཙཀྑཱདཱིཧི ཨཉྙོ སཏྟརཐཱདིསཉྙཱཝལམྦིཏོ ཝཙནཏྠོ ཝིཛྫམཱནོ ན ཧོཏི, ཏསྨཱ སཏྟརཐཱདིཨབྷིལཱཔཱ ‘‘ཨཝིཛྫམཱནཔཉྙཏྟཱི’’ཏི ཝུཙྩནྟི, ན ཙ ཏེ ‘‘མུསཱ’’ཏི ཝུཙྩནྟི ལོཀསམཉྙཱཝསེན པཝཏྟཏྟཱ. ཏཏོ ཨེཝ ཏེ ཨབྷིལཱཔཱ ‘‘སམྨུཏིསཙྩ’’ནྟི ཝུཙྩནྟི. སོ ཙ ཝཙནཏྠོ སཡཾ ཨཝིཛྫམཱནོཔི ཝིཛྫམཱནསྶ ཝཙནསྶེཝ ཝསེན པཉྙཏྟིཝོཧཱརཾ ལབྷཏི, ‘‘སམྨུཏིསཙྩ’’ནྟི ཙ ཝུཙྩཏི ཡཐཱགཧིཏསཉྙཱཝསེན པཝཏྟཝཙནཏྠབྷཱཝཏོ. ‘‘སམྨུཏིཉཱཎཾ སཙྩཱརམྨཎམེཝ, ནཱཉྙཱརམྨཎ’’ནྟི (ཀཐཱ. ༤༣༤) ཀཐཱཡ ཙ ‘‘པཐཝཱིཀསིཎཱདི ཙཱིཝརཱདི ཙ སམྨུཏིསཙྩམྷཱི’’ཏི ཨིམིནཱཝ ཨདྷིཔྤཱཡེན ཝུཏྟནྟི ཝིཉྙཱཡཏི. ཡསྨཱ རཱུཔཱདཱིསུ སནྟཱནེན པཝཏྟམཱནེསུ ཨེཀཏྟགྒཧཎཝསེན ཏེ ཨམུཉྩིཏྭཱ པཝཏྟཾ སཏྟཱདིགྒཧཎཾ ཙཀྑུཝིཉྙཱཎཱདཱིནི ཝིཡ རཱུཔཱདཱིསུ ཏེསུ ཁནྡྷེསུ ཙཀྑཱདཱིསུ ཙ ཨསནྟཾ ཨཝིཛྫམཱནཾ སཏྟརཐཱདིཾ གཎྷཱཏི, ཏསྨཱ ཏཾ པརིཏྟཱརམྨཎཱདིབྷཱཝེན ན ཝཏྟབྦནྟི ཝུཏྟཾ. ཏཐཱ ཡཾ ཁནྡྷསམཱུཧསནྟཱནཾ ཨེཀཏྟེན གཧིཏཾ ཨུཔཱདཱཡ ‘‘ཀལྱཱཎམིཏྟོ པཱཔམིཏྟོ ¶ པུགྒལོ’’ཏི གཧཎཾ པཉྙཏྟི ཙ པཝཏྟཏི, ཏཾ ཏདུཔཱདཱནབྷཱུཏཾ པུགྒལསཉྙཱཡ སེཝམཱནསྶ ཀུསལཱཀུསལཱནཾ ཨུཔྤཏྟི ཧོཏཱིཏི ‘‘པུགྒལོཔི ཨུཔནིསྶཡཔཙྩཡེན པཙྩཡོ’’ཏི (པཊྛཱ. ༡.༡.༩) ཝུཏྟཾ. ཡསྨཱ པན པུགྒལོ ནཱམ ཀོཙི བྷཱཝོ ནཏྠི, ཏསྨཱ ཡཐཱ ཨཱཔོདྷཱཏུཨཱདཱིནི ཙིཏྟེན ཝིཝེཙེཏྭཱ པཐཝཱིདྷཱཏུ ཨུཔལབྦྷཏི, ན ཨེཝཾ རཱུཔཱདཡོ ཁནྡྷེ ཝིཝེཙེཏྭཱ པུགྒལོ ཨུཔལབྦྷཏི. པཊིསེདྷིཏཱ ཙ པུགྒལཀཐཱཡ པུགྒལདིཊྛི. ཝཛིརཱཡ ཙ བྷིཀྑུནིཡཱ ཝུཏྟཾ –

‘‘ཀཾ ¶ ནུ སཏྟོཏི པཙྩེསི, མཱར དིཊྛིགཏཾ ནུ ཏེ;

སུདྡྷསངྑཱརཔུཉྫོཡཾ, ནཡིདྷ སཏྟུཔལབྦྷཏཱི’’ཏི. (སཾ. ནི. ༡.༡༧༡; མཧཱནི. ༡༨༦; ཀཐཱ. ༢༣༣);

སཏྟོཏི པན ཝཙནསྶ པཉྙཏྟིཡཱ པཝཏྟིཾ དསྶེཏུཾ སཱ ཨེཝམཱཧ –

‘‘ཡཐཱཔི ཨངྒསམྦྷཱརཱ, ཧོཏི སདྡོ རཐོ ཨིཏི;

ཨེཝཾ ཁནྡྷེསུ སནྟེསུ, ཧོཏི སཏྟོཏི སམྨུཏཱི’’ཏི. (སཾ. ནི. ༡.༡༧༡; མཧཱནི. ༡༨༦; ཀཐཱ. ༢༣༣);

ཡདི པུགྒལོ ན ཝིཛྫཏི, ཀཐཾ པུགྒལགྒཧཎསྶ སཱརམྨཎཏཱ སིཡཱཏི? ཨཝིཛྫམཱནསྶཔི ཨཱརམྨཎསྶ གཧཎཏོ. ཨཝིཛྫམཱནམྤི ཧི པརིཀཔྤིཏཾ ལོཀསཉྙཱཏཾ ཝཱ ཝིཛྫམཱནཾ ཝཱ སབྷཱཝབྷཱུཏཾ ཨཱརམྨཎཾ གཧེཏྭཱཝ ཨུཔྤཛྫནཏོ སཱརམྨཎཏཱ ཝུཏྟཱ. སཱརམྨཎཱཏི ཧི ཝཙནཾ ཙིཏྟཙེཏསིཀཱནཾ ཨཱརམྨཎེན ཝིནཱ ཨཔྤཝཏྟིཉྙེཝ དཱིཔེཏི, ན ཏེཧི གཧིཏསྶ ཨཱརམྨཎསྶ ཝིཛྫམཱནཏཾ ཨཝིཛྫམཱནཏཾ ཝཱཏི. ཨཡཾ སངྑཏཱསངྑཏཝིནིམུཏྟསྶ ཨཏྠིཏཱཔཊིསེདྷཾ སབྦཐཱ ཨནུཝཏྟནྟཱནཾ ཝིནིཙྪཡོ.

༡༣༡༦. ནཱམཀརཎཊྛེནཱཏི ཨཉྙཾ ཨནཔེཀྑིཏྭཱ སཡམེཝ ཨཏྟནོ ནཱམཀརཎསབྷཱཝཏོཏི ཨཏྠོ. ཡཉྷི པརསྶ ནཱམཾ ཀརོཏི, ཏསྶ ཙ ཏདཔེཀྑཏྟཱ ཨཉྙཱཔེཀྑཾ ནཱམཀརཎནྟི ནཱམཀརཎསབྷཱཝཏཱ ན ཧོཏི. ཏསྨཱ མཧཱཛནསྶ ཉཱཏཱིནཾ གུཎཱནཉྩ སཱམཉྙནཱམཱདིཀཱརཀཱནཾ ནཱམབྷཱཝོ ནཱཔཛྫཏི. ཡསྶ ཙ ཨཉྙེཧི ནཱམཾ ཀརཱིཡཏི, ཏསྶ ཙ ནཱམཀརཎསབྷཱཝཏཱ ནཏྠཱིཏི ནཏྠིཡེཝ ནཱམབྷཱཝོ, ཝེདནཱདཱིནཾ པན སབྷཱཝསིདྡྷཏྟཱ ཝེདནཱདིནཱམསྶ ནཱམཀརཎསབྷཱཝཏོ ནཱམཏཱ ཝུཏྟཱ. པཐཝཱིཨཱདིནིདསྶནེན ནཱམསྶ སབྷཱཝསིདྡྷཏཾཡེཝ ནིདསྶེཏི, ན ནཱམབྷཱཝསཱམཉྙཾ, ནིརུལ༹ྷཏྟཱ པན ནཱམསདྡོ ཨརཱུཔདྷམྨེསུ ཨེཝ ཝུཏྟོ, ན པཐཝཱིཨཱདཱིསཱུཏི ན ཏེསཾ ནཱམབྷཱཝོ. མཱཏིཀཱཡ ཙ པཐཝཱིཨཱདཱིནཾ ནཱམཏཱནཱཔཏྟི ¶ ཝུཏྟཱཝ. ན ཧི པཐཝཱིཨཱདིནཱམཾ ཝིཛཧིཏྭཱ ཀེསཱདིནཱམེཧི རཱུཔདྷམྨཱནཾ ཝིཡ ཝེདནཱདིནཱམཾ ཝིཛཧིཏྭཱ ཨཉྙེན ནཱམེན ཨརཱུཔདྷམྨཱནཾ ཝོཧརིཏབྦེན པིཎྜཱཀཱརེན པཝཏྟི ཨཏྠཱིཏི.

ཨཐ ¶ ཝཱ རཱུཔདྷམྨཱ ཙཀྑཱདཡོ རཱུཔཱདཡོ ཙ ཏེསཾ པཀཱསཀཔཀཱསིཏབྦབྷཱཝཏོ ཝིནཱ ནཱམེན པཱཀཊཱ ཧོནྟི, ན ཨེཝཾ ཨརཱུཔདྷམྨཱཏི ཨདྷིཝཙནསམྥསྶོ ཝིཡ ནཱམཱཡཏྟགཧཎཱིཡབྷཱཝེན ‘‘ནཱམ’’ནྟི ཝུཏྟཱ, པཊིགྷསམྥསྶོཔི ན ཙཀྑཱདཱིནི ཝིཡ ནཱམེན ཝིནཱ པཱཀཊོཏི ‘‘ནཱམ’’ནྟི ཝུཏྟོ. ཨརཱུཔཏཱཡ ཝཱ ཨཉྙནཱམསབྷཱགཏྟཱ སངྒཧིཏོཡཾ, ཨཉྙཕསྶསབྷཱགཏྟཱ ཝཱ. ཝཙནཏྠོཔི ཧི ‘‘རཱུཔཡཏཱིཏི རཱུཔཾ, ནཱམཡཏཱིཏི ནཱམ’’ནྟི ཨིདྷ པཙྪིམཔུརིམཱནཾ སམྦྷཝཏི. རཱུཔཡཏཱིཏི ཝིནཱཔི ནཱམེན ཨཏྟཱནཾ པཀཱསཡཏཱིཏི ཨཏྠོ, ནཱམཡཏཱིཏི ནཱམེན ཝིནཱ ཨཔཱཀཊབྷཱཝཏོ ཨཏྟནོ པཀཱསཀཾ ནཱམཾ ཀརོཏཱིཏི ཨཏྠོ. ཨཱརམྨཎཱདྷིཔཏིཔཙྩཡཏཱཡཱཏི སཏིཔི རཱུཔསྶ ཨཱརམྨཎཱདྷིཔཏིཔཙྩཡབྷཱཝེ ན པརམསྶཱསབྷཱུཏཾ ནིབྦཱནཾ ཝིཡ སཱཏིསཡཾ ཏཾནཱམནསབྷཱཝེན པཙྩཡོཏི ནིབྦཱནམེཝ ‘‘ནཱམ’’ནྟི ཝུཏྟཾ.

༡༣༡༨. ཝཊྚམཱུལསམུདཱཙཱརདསྶནཏྠནྟི སཏྟཱནཾ ཝཊྚམཱུལསམུདཱཙཱརོ ནཱམ ཨཝིཛྫཱ ཙ བྷཝཏཎྷཱ ཙ, ཏཾདསྶནཏྠནྟི ཨཏྠོ. ཏཏྠ སམུདཱཙརཏཱིཏི སམུདཱཙཱརོ, ཝཊྚམཱུལམེཝ སམུདཱཙཱརོ ཝཊྚམཱུལསམུདཱཙཱརོ, ཝཊྚམཱུལདསྶནེན ཝཊྚམཱུལཱནཾ པཝཏྟི དསྶིཏཱ ཧོཏཱིཏི ཝཊྚམཱུལཱནཾ སམུདཱཙཱརསྶ དསྶནཏྠནྟིཔི ཨཏྠོ.

༡༣༢༠. ཨེཀེཀསྨིཉྩ ཨཏྟཱཏི ཙ ལོཀོཏི ཙ གཧཎཝིསེསཾ ཨུཔཱདཱཡ ‘‘ཨཏྟཱ ཙ ལོཀོ ཙཱ’’ཏི ཝུཏྟཾ. ཨེཀཾ ཝཱ ཁནྡྷཾ ཨཏྟཏོ གཧེཏྭཱ ཨཉྙཾ ཨཏྟནོ ཨུཔབྷོགབྷཱུཏོ ལོཀོཏི གཎྷནྟསྶ ཨཏྟནོ ཨཏྟཱནཾ ‘‘ཨཏྟཱ’’ཏི གཧེཏྭཱ པརསྶ ཨཏྟཱནཾ ‘‘ལོཀོ’’ཏི གཎྷནྟསྶ ཝཱ ཝསེན ‘‘ཨཏྟཱ ཙ ལོཀོ ཙཱ’’ཏི ཝུཏྟཾ. ཏཾ བྷཝིསྶཏཱིཏི ཏཾ དྭིདྷཱཔི གཧིཏཾ ཁནྡྷཔཉྩཀཾ བྷཝིསྶཏཱིཏི ནིཝིཊྛཱ པརཱམསནྟཱིཏི ཨཏྠོ.

༡༣༣༢. སཧ སིཀྑིཏབྦོ དྷམྨོ སཧདྷམྨོ, ཏཏྠ བྷཝཾ སཧདྷམྨིཀཾ. ཀམྨཏྠེ ཝཏྟམཱནཏོ དོཝཙསྶསདྡཏོ ཨཱཡ-སདྡཾ ཨནཉྙཏྠཾ ཀཏྭཱ ‘‘དོཝཙསྶཱཡ’’ནྟི ཝུཏྟནྟི ཨདྷིཔྤཱཡེན ‘‘དུབྦཙསྶ ཀམྨ’’ནྟི ཨཱཧ. དོཝཙསྶསྶ ཝཱ ཨཡནཾ པཝཏྟི དོཝཙསྶཱཡཾ. ཝཙནསྶ པཊིཝིརུདྡྷཝཙནཾ པཊཱཎིཀགཧཎཾ ¶ . གུཎེཧི གརཱུསུ གཱརཝེན ཝསནཾ གརུཝཱསོ. ཛཱཏིཨཱདཱིཧི ཛེཊྛཀེསུ པཊིསྶུཎིཏབྦེསུ ཝསནཾ སཛེཊྛཀཝཱསོ. ཨོཏྟཔྤིཏབྦཱ ཝཱ གརུནོ. ཧིརིཡིཏབྦཱ ཛེཊྛཀཱ. ཡཱཡ ཙེཏནཱཡ དུབྦཙོ ཧོཏི, སཱ དོཝཙསྶཏཱ བྷཝིཏུཾ ཨརཧཏཱིཏི ‘‘སངྑཱརཀྑནྡྷོཡེཝཱ’’ཏི ཨཱཧ.

༡༣༣༣. དུ-སདྡེན ¶ ཡུཏྟཾ ནཱམཾ དུནྣཱམཾ. ཨནུཔསངྐམནྟསྶཔི ཨནུསིཀྑནཾ སེཝནཱཏི ཨདྷིཔྤཱཡེན ‘‘བྷཛནཱཏི ཨུཔསངྐམནཱ’’ཏི ཨཱཧ. སབྦཏོབྷཱགེནཱཏི ཀཱཡཝཱཙཱཙིཏྟེཧི ཨཱཝི ཙེཝ རཧོ ཙ.

༡༣༣༦. ཝིནཡོཏི ཝིབྷངྒཁནྡྷཀཱ ཝུཏྟཱ. ཝཏྠུཝཱིཏིཀྐམཏོ པུབྦེ པརཏོ ཙ ཨཱཔཏྟིཾ ཨཱཔཛྫནྟོ ནཱམ ན ཧོཏཱིཏི སཧ ཝཏྠུནཱ ཨཱཔཏྟིཾ པརིཙྪིནྡཏི. ཏེནཱཧ ‘‘སཧ ཝཏྠུནཱ…པེ… ཨཱཔཏྟིཀུསལཏཱ ནཱམཱ’’ཏི. སཧ ཀམྨཝཱཙཱཡཱཏི ཨབྦྷཱནཏིཎཝཏྠཱརཀཀམྨཝཱཙཱཡ ‘‘ཨཧཾ, བྷནྟེ, ཨིཏྠནྣཱམཾ ཨཱཔཏྟིཾ ཨཱཔཛྫི’’ནྟིཨཱདིཀཱཡ ཙ. སཧེཝ ཧི ཀམྨཝཱཙཱཡ ཨཱཔཏྟིཝུཊྛཱནཉྩ པརིཙྪིནྡཏཱིཏི. ཨཱཔཏྟིཡཱ ཝཱ ཀཱརཎཾ ཝཏྠུ, ཝུཊྛཱནསྶ ཀཱརཎཾ ཀམྨཝཱཙཱཏི ཀཱརཎེན སཧ ཕལསྶ ཛཱནནཝསེན ‘‘སཧ ཝཏྠུནཱ སཧ ཀམྨཝཱཙཱཡཱ’’ཏི ཝུཏྟཾ.

༡༣༣༨. ཨཡམེཝཏྠོ སཧ པརིཀམྨེནཱཏི ཨེཏྠ ཝུཏྟོ. ཝུཊྛཱནཀཔཉྙཱཡཱཏི ཝུཊྛཱནསྶ ཀཱརཎབྷཱུཏཱཡ པརིཀམྨཔཉྙཱཡ.

༡༣༤༠. དྷཱཏུཝིསཡཱ སབྦཱཔི པཉྙཱ དྷཱཏུཀུསལཏཱ, ཏདེཀདེསཱ མནསིཀཱརཀུསལཏཱཏི ཨདྷིཔྤཱཡེན པུརིམཔདེཔི ཨུགྒཧམནསིཀཱརཛཱནནཔཉྙཱ ཝུཏྟཱ. པུརིམཔདེ ཝཱ ཝཱཙུགྒཏཱཡ དྷཱཏུཔཱལི༹ཡཱ མནསིཀརཎཾ ‘‘མནསིཀཱརོ’’ཏི ཝུཏྟཾ. ཏཏྠ ཨུགྒཎྷནྟཱི མནསིཀརོནྟཱི དྷཱཏུཔཱལི༹ཡཱ ཨཏྠཾ སུཎནྟཱི གནྠཏོ ཙ ཨཏྠཏོ ཙ དྷཱརེནྟཱི ‘‘ཨཡཾ ཙཀྑུདྷཱཏུ ནཱམཱ’’ཏིཨཱདིནཱ སབྷཱཝཏོ ཨཊྛཱརསེཝཱཏི གཎནཏོ ཙ པརིཙྪེདཾ ཛཱནནྟཱི ཙ པཉྙཱ ཨུགྒཧཔཉྙཱདིཀཱ ཝུཏྟཱ. པཙྪིམཔདེ པཉྩཝིདྷཱཔི སཱ པཉྙཱ ཨུགྒཧོཏི ཏཏོ ཙ པཝཏྟོ ཨནིཙྩཱདིམནསིཀཱརོ ‘‘ཨུགྒཧམནསིཀཱརོ’’ཏི ཝུཏྟོ, ཏསྶ ཛཱནནཾ པཝཏྟནམེཝ, ཡཐཱ པཝཏྟཾ ཝཱ ཨུགྒཧཾ, ཨེཝམེཝ པཝཏྟོ ཨུགྒཧོཏི ཛཱནནཾ ཨུགྒཧཛཱནནཾ. མནསིཀཱརོཔི ‘‘ཨེཝཾ པཝཏྟེཏབྦོ ཨེཝཉྩ པཝཏྟོ’’ཏི ཛཱནནཾ མནསིཀཱརཛཱནནཾ. ཏདུབྷཡམྤི མནསིཀཱརཀོསལླནྟི ¶ ཝུཏྟཾ. ཨུགྒཧོཔི ཧི མནསིཀཱརསམྤཡོགཏོ མནསིཀཱརནིརུཏྟིཾ ལདྡྷུཾ ཡུཏྟོཏི ཡོ ཙ མནསི ཀཱཏབྦོ, ཡོ ཙ མནསིཀརཎུཔཱཡོ, སབྦོ སོ མནསིཀཱརོཏི ཝཏྟུཾ ཝཊྚཏཱིཏི. ཏཏྠ ཙ ཀོསལླཾ མནསིཀཱརཀུསལཏཱཏི.

༡༣༤༢. ཏཱིསུཔི ཝཱ…པེ… ཝཊྚཏཱིཏི ཏསྶཱ ཙ ཨུགྒཧཱདིབྷཱཝོ ཝུཏྟོ. སམྨསནཾ པཉྙཱ ¶ , སཱ མགྒསམྤཡུཏྟཱ ཨནིཙྩཱདིསམྨསནཀིཙྩཾ སཱདྷེཏི ནིཙྩསཉྙཱདིཔཛཧནཏོ. མནསིཀཱརོ སམྨསནསམྤཡུཏྟོ ཏཐེཝ ཨནིཙྩཱདིམནསིཀཱརཀིཙྩཾ མགྒསམྤཡུཏྟོ སཱདྷེཏི. ཏེནཱཧ ‘‘སམྨསནམནསིཀཱརཱ ལོཀིཡལོཀུཏྟརམིསྶཀཱ’’ཏི. ཨིམིནཱ པན པཙྩཡེན ཨིདཾ ཧོཏཱིཏི ཨེཝཾ ཨཝིཛྫཱདཱིནཾ སངྑཱརཱདིཔཙྩཡུཔྤནྣསྶ པཙྩཡབྷཱཝཛཱནནཾ པཊིཙྩསམུཔྤཱདཀུསལཏཱཏི དསྶེཏི.

༡༣༤༤. ཨམྦབཱིཛཱདཱིནི ཨནུཔཱདིནྣཀདསྶནཏྠཾ ཝུཏྟཱནི. སོཏཝིཉྙཱཎཱདཱིནཾ ཝིསབྷཱགཱ ཨནནུརཱུཔཱ ཨནུཔྤཱདཀཱཡེཝ ཙཀྑཱདཡོ ‘‘ཝིསབྷཱགཔཙྩཡཱ’’ཏི ཝུཏྟཱ, ཏེཧི ཨནུཔྤཛྫམཱནཱནེཝ ཙ སོཏཝིཉྙཱཎཱདཱིནི ‘‘ཝིསབྷཱགཔཙྩཡསམུཔྤནྣདྷམྨཱ’’ཏི. སོཏཝིཉྙཱཎེན ཝཱ ཝིསབྷཱགསྶ ཙཀྑུཝིཉྙཱཎསྶ པཙྩཡོཏི ཝིསབྷཱགཔཙྩཡོ, ཙཀྑཱཡཏནསྶ ཝིསབྷཱགེན སོཏཱཡཏནེན པཙྩཡེན སམུཔྤནྣོ ཝིསབྷཱགཔཙྩཡསམུཔྤནྣོ.

༡༣༤༦. ཨཛྫཝནིདྡེསེ ཨཛྫཝོ ཨཛྫཝཏཱཏི ཨུཛུཏཱ ཨུཛུཀཏཱ ཨིཙྩེཝ ཝུཏྟཾ ཧོཏཱིཏི ཨཛྫཝམདྡཝནིདྡེསེསུ ཨུཛུཀཏཱམུདུཏཱནིདྡེསེཧི ཝིསེསཾ མདྡཝནིདྡེསེ ཝུཏྟཾ ‘‘ནཱིཙཙིཏྟཏཱ’’ཏིཔདམཱཧ. ཏཏྠ ‘‘ནཱིཙཙིཏྟཏཱ མུདུཏཱ’’ཏི པུན མུདུཏཱཝཙནཾ ནཱིཙཙིཏྟཏཱཡ ཝིསེསནཏྠཾ. ཨོམཱནོཔི ཧི ནཱིཙཙིཏྟཏཱ ཧོཏི, ན པན མུདུཏཱཏི.

༡༣༤༨. པརེསཾ དུཀྐཊཾ དུརུཏྟཉྩ པཊིཝིརོདྷཱཀརཎེན ཨཏྟནོ ཨུཔརི ཨཱརོཔེཏྭཱ ཝཱསེནྟི. ཙིཏྟསྶ སཀམནཏཱཏི ཙིཏྟསྶ ཨབྱཱཔནྣོ སཀོ མནོབྷཱཝོཏི ཨཏྠོ. ཙིཏྟནྟི ཝཱ ཙིཏྟཔྤབནྡྷཾ ཨེཀཏྟེན གཧེཏྭཱ ཏསྶ ཨནྟརཱ ཨུཔྤནྣེན པཱིཏིསཧགཏམནེན སཀམནཏྟཾ ཨཱཧ. ཨཏྟམནོ ཝཱ པུགྒལོ, ཏསྶ བྷཱཝོ ཨཏྟམནཏཱ. སཱ ན སཏྟསྶཱཏི པུགྒལདིཊྛིནིཝཱརཎཏྟཾ ‘‘ཙིཏྟསྶཱ’’ཏི ཝུཏྟཾ.

༡༣༤༩. ཀཱཡཝཱཙཱཧི ¶ ཀཏྟབྦསྶ ཨཀརཎེན ཨསཱདིཡིཏབྦསྶ སཱདིཡནེན ཙ མནསཱཔི ཨཱཙརཏི ཨེཝ, ཨིནྡྲིཡསཾཝརཱདིབྷེདནཝསེན ཝཱ ཨེཏཾ ཝུཏྟནྟི ཝེདིཏབྦཾ.

༡༣༥༠. སདོསཝཎེ རུཀྑེ ནིཡྻཱསཔིཎྜིཡོ, ཨཧིཙྪཏྟཀཱནི ཝཱ ཨུཊྛིཏཱནི ‘‘ཨཎྜཀཱནཱི’’ཏི ཝདནྟི. ཕེགྒུརུཀྑསྶ པན ཀུཐིཏསྶ ཨཎྜཱནི ཝིཡ ཨུཊྛིཏཱ ཙུཎྞཔིཎྜིཡོ གཎྛིཡོ ཝཱ ‘‘ཨཎྜཀཱནཱི’’ཏི ཝེདིཏབྦཱ. པདུམནཱལ༹ཾ ཝིཡ སོཏཾ གྷཾསཡམཱནཱ ཝིཡ ¶ པཝིསནྟཱི ཀཀྐསཱ དཊྛབྦཱ. ཀོདྷེན ནིབྦཏྟཱ ཏསྶ པརིཝཱརབྷཱུཏཱ ཀོདྷསཱམནྟཱ. པུརེ སཾཝཌྜྷནཱརཱི པོརཱི, སཱ ཝིཡ སུཀུམཱརཱ མུདུཀཱ ཝཱཙཱ པོརཱི ཝིཡཱཏི པོརཱི. ཏཏྠཱཏི ‘‘བྷཱསིཏཱ ཧོཏཱི’’ཏི ཝུཏྟཱཡ ཀིརིཡཱཡཱཏིཔི ཡོཛནཱ སམྦྷཝཏི, ཏཏྠ ཝཱཙཱཡཱཏི ཝཱ. སཎྷཝཱཙཏཱཏིཨཱདིནཱ ཏཾ ཝཱཙཾ པཝཏྟཡམཱནཾ ཙེཏནཾ དསྶེཏི.

༡༣༥༡. ཨཱམིསཱལཱབྷེན ཡཾ ཚིདྡཾ ཧོཏི, ཏཾ ཨཱམིསཱལཱབྷེན ‘‘ཚིདྡ’’ནྟི ཝུཏྟཾ. དྭེཡེཝ ཧཱིཏི ཡཐཱཝུཏྟཱནི ཨཱམིསདྷམྨཱལཱབྷེཧི པཝཏྟམཱནཱནི ཚིདྡཱནི ཨཱཧ. གམནསབྷཱགེནཱཏི གམནམགྒསྶ ཨནུཙྪཝིཀདིསཱབྷཱགེན. སངྒཧཔཀྑེ ཋཏྭཱཏི སངྒཧཾ ཀརོམིཙྩེཝ ཀཐེཏབྦཾ, ན ལཱབྷསཀྐཱརཀཱམཏཱདཱིཧཱིཏི ཨཏྠོ. ཨཝསྶཾ ཀཱཏབྦཾ ཀིཙྩཾ, ཨིཏརཾ ཀརཎཱིཡཾ. ཨབྦྷཱནཏོ ཨཉྙཾ ཨཱཔཏྟིཝུཊྛཱནཾ ‘‘ཝུཊྛཱན’’ནྟི ཝུཏྟཾ.

༡༣༥༢. སསམྦྷཱརཀཐཱཏི དསྶནསྶ ཀཱརཎསཧིཏཱཏི ཨཏྠོ, སསམྦྷཱརསྶ ཝཱ དསྶནསྶ ཀཐཱ སསམྦྷཱརཀཐཱ. ཡསྶ ཙཀྑུནྡྲིཡཱསཾཝརསྶ ཧེཏཱུཏི ཝཏྭཱ པུན ‘‘ཏསྶ ཙཀྑུནྡྲིཡསྶ སཏིཀཝཱཊེན པིདཧནཏྠཱཡཱ’’ཏི ཝུཏྟཾ, ན ཨསཾཝརསྶཱཏི. ཏདིདཾ ཡཾ ཙཀྑུནྡྲིཡཱསཾཝརསྶ ཧེཏུ ཨབྷིཛ྄ཛྷཱདིཨནྭཱསྶཝནཾ དསྶིཏཾ, ཏཾ ཨསཾཝུཏཙཀྑུནྡྲིཡསྶེཝ ཧེཏུཔཝཏྟཾ དསྶིཏནྟི ཀཏྭཱ ཝུཏྟནྟི ཝེདིཏབྦཾ, ཡཏྭཱདྷིཀརཎནྟི ཧི ཡསྶ ཙཀྑུནྡྲིཡསྶ ཀཱརཎཱཏི ཨཏྠོ. ཀསྶ ཙ ཀཱརཎཱཏི? ཨསཾཝུཏསྶ. ཀིཉྩ ཨསཾཝུཏཾ? ཡསྶ ཙཀྑུནྡྲིཡཱསཾཝརསྶ ཧེཏུ ཨནྭཱསྶཝནྟི ཏདུཔལཀྑིཏཾ, ཏསྶ སཾཝརཱཡཱཏི ཨཡམཏྠཡོཛནཱ.

ཛཝནཀྑཎེ པན དུསྶཱིལྱཾ ཝཱཏིཨཱདི པུན ཨཝཙནཏྠཾ ཨིདྷེཝ སབྦཾ ཝུཏྟནྟི ཚསུ དྭཱརེསུ ཡཐཱསམྦྷཝཾ ཡོཛེཏབྦཾ. ན ཧི པཉྩདྭཱརེ ཀཱཡཝཙཱིདུཙྩརིཏསངྑཱཏཾ དུསྶཱིལྱཾ ཨཏྠཱིཏི. ཡཐཱ ཀིནྟིཨཱདིནཱ ནགརདྭཱརེ ཨསཾཝརེ སཏི ¶ ཏཾསམྦནྡྷཱནཾ གྷརཱདཱིནཾ ཨསཾཝུཏཏཱ ཝིཡ ཛཝནེ ཨསཾཝརེ སཏི ཏཾསམྦནྡྷཱནཾ དྭཱརཱདཱིནཾ ཨསཾཝུཏཏཱཏི ཨེཝཾ ཨཉྙེསཾ སཾཝརེ, ཨཉྙེསཾ སཾཝུཏཏཱསཱམཉྙམེཝ ནིདསྶེཏི, ན པུབྦཱཔརསཱམཉྙཾ ཨནྟོ བཧི སཱམཉྙཾ ཝཱ. སཏི ཝཱ དྭཱརབྷཝངྒཱདིཀེ པུན ཨུཔྤཛྫམཱནཾ ཛཝནཾ བཱཧིརཾ ཝིཡ ཀཏྭཱ ནགརདྭཱརསམཱནཾ ཝུཏྟཾ, ཨིཏརཉྩ ཨནྟོནགརདྭཱརསམཱནཾ. ཛཝནེ ཝཱ ཨསཾཝརེ ཨུཔྤནྣེ ཏཏོ པརཾ དྭཱརབྷཝངྒཱདཱིནཾ ཨསཾཝརཧེཏུབྷཱཝཱཔཏྟིཏོ ནགརདྭཱརསདིསེན ཛཝནེན པཝིསིཏྭཱ དུསྶཱིལྱཱདིཙོརཱནཾ དྭཱརབྷཝངྒཱདིམཱུསནཾ ཀུསལབྷཎྜཝིནཱསནཾ ཀཐིཏནྟི དཊྛབྦཾ.

༡༣༥༣. ཨིམིནཱ ¶ ཨཱཧཱརེན ནིཏྠརཎཏྠེན ཨཏྠིཀབྷཱཝོ ཨིདམཏྠིཀཏཱ. ཨཱཧཱརཔརིབྷོགེ ཨསནྟུསྶནཱཏི ཨཱཧཱརཔརིབྷོགཀྑཎེ པཝཏྟཱ ཨསནྟུསྶནཱ, དཝཏྠཱདིཨབྷིལཱསོཏི ཨཏྠོ. ཨེཏྠ ཙ ཨསནྟུཊྛིཏཱ ལོབྷོ, ཨམཏྟཉྙུཏཱ ཨཔྤཊིསངྑཱ ཙ མོཧོཏི ཨིམེ དྭེ དྷམྨཱ ‘‘བྷོཛནེ ཨམཏྟཉྙུཏཱ’’ཏི ཝེདིཏབྦཱ.

༡༣༥༥. ‘‘སེཡྻོཧམསྨཱི’’ཏིཨཱདིནཱ པཝཏྟམཱནོཝ མཱནམདོ. ཨསདྡྷམྨསེཝནཱསམཏྠཏཾ ནིསྶཱཡ པཝཏྟོ མཱནོ, རཱགོ ཨེཝ ཝཱ པུརིསམདོ. སཀྐརསཔྤིཁཱིརཱདཱིནི ཡོཛེཏྭཱ བཧལཔཀྐཾ བྷོཛནཾ པིཎྜརསབྷོཛནཾ, བཧལཔཀྐཾ ཝཱ མཾསརསཱདིབྷོཛནཾ. མནྡནྟི ཨཔྤཾ. ཋིཏིཡཱཏི ཋིཏཏྠཾ. ཏདཏྠཉྩ བྷུཉྫནྟོ ཡསྨཱ ‘‘ཀཱཡཾ ཋཔེསྶཱམཱི’’ཏི བྷུཉྫཏི, ཏསྨཱ ‘‘ཋཔནཏྠཱཡཱ’’ཏི ཝུཏྟཾ. ཨབྷུཏྟཔཙྩཡཱ ཨུཔྤཛྫནཀཱཏི ཨིདཾ ཁུདཱཡ ཝིསེསནཾ ཡསྶཱ ཨཔྤཝཏྟི བྷོཛནེན ཀཱཏབྦཱ, ཏསྶཱ དསྶནཏྠཾ. སཀལཾ སཱསནནྟི པཱལི༹དྷམྨམྤི སབྦཀུསལེཔི སངྒཎྷཱཏི. ཨབྷུཏྟཔཙྩཡཱ ཨུཔྤཛྫནཀཝེདནཱ, བྷུཏྟཔཙྩཡཱ ན ཨུཔྤཛྫནཀཝེདནཱཏི ཨེཏཱསཾ ཀོ ཝིསེསོ? པུརིམཱ ཡཐཱཔཝཏྟཱ ཛིགྷཙྪཱནིམིཏྟཱ ཝེདནཱ. སཱ ཧི ཨབྷུཉྫནྟསྶ བྷིཡྻོ པཝཏྟནཝསེན ཨུཔྤཛྫཏཱིཏི. པཙྪིམཱཔི ཁུདཱནིམིཏྟཱཝ ཨངྒདཱཧསཱུལཱདིཝེདནཱ ཨཔྤཝཏྟཱ. སཱ ཧི བྷུཏྟཔཙྩཡཱ པུབྦེ ཨནུཔྤནྣཱཝ ན ཨུཔྤཛྫིསྶཏི. ཝིཧིཾསཱནིམིཏྟཏཱ ཙེཏཱསཾ ཝིཧིཾསཱཡ ཝིསེསོ.

ཡཱཏྲཱཏི ཡཱཔནཱ ཝུཏྟཱ, པུབྦེཔི ‘‘ཡཱཔནཱཡཱ’’ཏི ཝུཏྟཾ, ཀོ ཨེཏྠ ཝིསེསོ? པུབྦེ ‘‘ཡཱཔནཱཡཱཏི ཛཱིཝིཏིནྡྲིཡཡཱཔནཏྠཱཡཱ’’ཏི ཝུཏྟཾ, ཨིདྷ པན ཙཏུནྣཾ ཨིརིཡཱཔཐཱནཾ ཨཝིཙྪེདསངྑཱཏཱ ཡཱཔནཱ ཡཱཏྲཱཏི ཨཡམེཏྠ ཝིསེསོ ¶ . དཱཡཀདེཡྻདྷམྨཱནཾ ཨཏྟནོ ཙ པམཱཎཾ ཨཛཱནིཏྭཱ པཊིགྒཧཎཾ, སདྡྷཱདེཡྻཝིནིཔཱཏནཏྠཾ ཝཱ པཊིགྒཧཎཾ ཨདྷམྨིཀཔཊིགྒཧཎཾ, ཡེན ཝཱ ཨཱཔཏྟིཾ ཨཱཔཛྫེཡྻ. ཨཔཙྩཝེཀྑིཏཔརིབྷོགོ ཨདྷམྨེན པརིབྷོགོ. ཨནཝཛྫེ ཨནིནྡིཏབྦེ པཙྩཡེ སཱཝཛྫཾ སནིནྡཾ པརིབྷོགེན ཨཏྟཱནཾ ཀརོཏི. ཨནཝཛྫཏཱ ཙ བྷཝིསྶཏཱིཏི ཨཏྟནོ པཀཏིཨགྒིབལཱདིཾ ཛཱནིཏྭཱ ‘‘ཨེཝཾ མེ ཨགརཧིཏབྦཏཱ ཙ བྷཝིསྶཏཱི’’ཏི པམཱཎཡུཏྟཾ ཨཱཧཱརེཏཱིཏི ཨཏྠོ.

སུཁོ ཨིརིཡཱཔཐཝིཧཱརོ ཕཱསུཝིཧཱརོ. ཨེཏྟཀཉྷི བྷུཉྫིཏྭཱ…པེ… པཝཏྟནྟཱིཏི ཨིརིཡཱཔཐཱནཾ སུཁཔྤཝཏྟིཡཱ ཀཱརཎབྷཱུཏཾ བྷུཉྫནཾ པིཝནཉྩ ཨིརིཡཱཔཐེཧི ཀཱརཎབྷཱཝེན གཧིཏཏྟཱ ཏེཧི ¶ སཱདྷིཏཾ ཝིཡ ཝུཏྟཾ. ‘‘ཨབྷུཏྭཱ ཨུདཀཾ པིཝེ’’ཏི ལིཁནྟི, ‘‘བྷུཏྭཱནཱ’’ཏི པན པཱཋོ. པུནཔི ཧི ཨཔྤསྶེཝ ཨནུཛཱནནཝསེན –

‘‘ཀཔྤིཡཾ ཏཾ ཙེ ཚཱདེཏི, ཙཱིཝརཾ ཨིདམཏྠིཀཾ;

ཨལཾ ཕཱསུཝིཧཱརཱཡ.

‘‘པལླངྐེན ནིསིནྣསྶ, ཛཎྞུཀེ ནཱབྷིཝསྶཏི;

ཨལཾ ཕཱསུཝིཧཱརཱཡཱ’’ཏི. (ཐེརགཱ. ༩༨༤-༩༨༥) –

ཨཱཧ.

བྷོཛནཱནིསཾསོཏི ཡཐཱཝུཏྟེཧི ཨཊྛཧངྒེཧི སམནྣཱགཏསྶ བྷོཛནསྶ ཨགརཧིཏབྦཏཱ སུཁཝིཧཱརོ ཙ ཨཱནིསཾསོཏི ཨཏྠོ. ཡུཏྟསྶ ནིདྡོསསྶ བྷོཛནསྶ པརིམཱཎསྶ ཙ ཝསེན ཛཱནནཾ ཡུཏྟཔམཱཎཛཱནནཾ ནཱམ.

༡༣༥༦. ཝིནཱསཾ པཏྟིཡཱ ནཊྛཱ, པཊིཔཀྑེཧི ཨབྷིབྷཱུཏཏྟཱ མུཊྛཱ ཙ སཏི ཡསྶ, སོ ནཊྛམུཊྛསྶཏི, ཏསྶ བྷཱཝོ ནཊྛམུཊྛསྶཏིཏཱ.

༡༣༦༨. ཝིསུདྡྷིཔྤཏྟནྟི མགྒཕལསཱིལཾ ཝུཙྩཏི. ལོཀུཏྟརདྷམྨཱཝཱཏི ལོཀུཏྟརསཏིཨཱདིདྷམྨཱཝ. སཱིལསམྤདཱ པན རཱུཔཱརཱུཔཱཝཙརཱ ནཏྠཱིཏི སམྦྷཝཏོ ཡོཛེཏབྦཱ.

༡༣༧༣. བྷོགཱུཔཀརཎེཧི ¶ སབྷོགོ. ཙཏུནྣཾ སཙྩཱནཾ ཨནུལོམནྟི ཙཏུསཙྩཔྤཊིཝེདྷསྶ ཨནུལོམནྟི ཨཏྠོ. ‘‘སཙྩཱན’’ནྟི ཧི པཊིཝིཛ྄ཛྷིཏབྦེཧི པཊིཝེདྷོ ཝུཏྟོ, ཙཏུསཙྩཔྤཊིཝེདྷསྶ ཝཱ ཨུཔནིསྶཡབྷཱུཏཾ པཊིཝིཛ྄ཛྷིཏབྦཱནཾ ཙཏུནྣཾ སཙྩཱནཾ ཨནུལོམནྟི ཝུཏྟཾ.

༡༣༧༨. ‘‘མམ གྷརཾ དྷུརཾ ཀཏྭཱ བྷིཀྑཾ པཝིསཐཱ’’ཏི དིཡྻམཱནཾ དྷུརབྷཏྟནྟི ཝདནྟི. ནིཙྩབྷཏྟཱདི ཝཱ ཨཉྙེཔི ཨཱཎཱཔེཏྭཱ སཡཾ དྷུརཾ ཧུཏྭཱ དིནྣཾ དྷུརབྷཏྟཾ.

༡༣༧༩. པཊིཝཱསེཏི ¶ ནཱམཱཏི ནིཝཏྟེཏི ནཱམ ཨོསཀྐེཏི ནཱམ.

༡༣༨༠. པུབྦེ ནིཝུཏྠཀྑནྡྷཱཏི པུརིམཛཱཏཱིསུ སནྟཏིཔརིཡཱཔནྣེ ཁནྡྷེ ཨཱཧ. ཁནྡྷཔཊིབདྡྷནྟི ཝཏྠཱབྷརཎཡཱནགཱམཛནཔདཱདི. ཁཡསམཡེཏི མགྒཀྑཎཾ ཨཱཧ.

༡༣༨༡. ཨདྷིམུཙྩནཊྛེནཱཏི ཨནིགྒཧིཏཔཀྑནྡནསངྑཱཏེན ཡཐཱསུཁཾ པཝཏྟནཊྛེན.

༡༣༨༢. ཁཱིཎཱནཾ ཨནྟོ ཨཝསཱནཾ ནིཊྛིཏབྷཱཝོ ཁཱིཎནྟོ, ཁཱིཎཱནཾ ཝཱ ཨཱདིཀཱལོ, ཏསྨིཾ ཁཱིཎནྟེ. ཨེས ནཡོ ནིརུདྡྷནྟེཏིཨཱདཱིསུ.

དུཀནིཀྑེཔཀཐཱཝཎྞནཱ ནིཊྛིཏཱ.

ནིཀྑེཔཀཎྜཝཎྞནཱ ནིཊྛིཏཱ.

༤. ཨཊྛཀཐཱཀཎྜཾ

ཏིཀཨཏྠུདྡྷཱརཝཎྞནཱ

༡༣༨༤. ནཡམགྒནྟི ¶ ¶ སུཏྟནྟབྷཱཛནཱིཡཱདིནཡགམནཾ ཨནུལོམཱདིནཡགམནཉྩ. ཏམྤི ཧི ཨེཏྠ ཨཏྠེསུ ནིཙྪིཏེསུ སུཁཾ སམཱནེནྟི. པཉྷུདྡྷཱརནྟི ཨེཀཱུནཔཉྙཱསཱཡ ཨེཀཱུནཔཉྙཱསཱཡ ནཝསུ ནཝསུ ཙ པཉྷེསུ ལབྦྷམཱནསྶ ཨུདྡྷརཎཾ, ཏེསུཡེཝ ལབྦྷམཱནཱནཾ གཎནཱནཾ ཋཔནཾ གཎནཱཙཱརོ. ཨཏྠུདྡྷཱརནྟི ‘‘ཨིམེ ནཱམ ཙིཏྟུཔྤཱདཱདཡོ ཨཏྠཱ ཀུསལཱདིཀཱ’’ཏི ཨུདྡྷརཎཾ. ཀཎྞིཀཾ ཀཎྞིཀནྟི ཙིཏྟུཔྤཱདཀཎྜརཱུཔཀཎྜེསུ ཝིབྷཏྟེ པསཊེ དྷམྨེ ‘‘ཙཏཱུསུ བྷཱུམཱིསུ ཀུསལཾ དྭཱདསཱཀུསལཙིཏྟུཔྤཱདཱ’’ཏིཨཱདིནཱ རཱསིརཱསིཝསེན སཧ གནྠེཏྭཱཏི ཨཏྠོ. གྷཊགོཙྪཀཱ ཀཎྞིཀཝེཝཙནཱནེཝ. ཨེཏྠ པན ཙཏཱུསུ བྷཱུམཱིསུ ཀུསལནྟི ཨེཀཝཙནནིདྡེསོ ཙཏུབྷཱུམཀཱནཾ ཀུསལཕསྶཱདཱིནཾ ཀུསལབྷཱཝེ ཨེཀཏྟཱུཔགམནཏོ. ཙིཏྟུཔྤཱདཀཎྜརཱུཔཀཎྜེསུ ཙཏུབྷཱུམིཙིཏྟུཔྤཱདཱདིཝསེན ཝིཉྙཱཏདྷམྨསྶ ཝསེནཱཡཾ ཨཏྠུདྡྷཱརདེསནཱ ཨཱརདྡྷཱཏི ཏཏྠ ཡཾ ཙཏཱུསུ བྷཱུམཱིསུ ཀུསལཾ ཝིབྷཏྟཾ ཡཱཝ ཝིཉྙཱཏཾ, ཨིམེ དྷམྨཱ ཀུསལཱཏི ཨཏྠོ.

ཡདིཔི ཀུསལཏྟིཀཝིཏྠཱརོ པུབྦེ ཝིཉྙཱཏོ, ཏཐཱཔི ཏཏྠ དྷམྨཱ སམཡཝསེན ཕསྶཱདིསབྷཱཝཝསེན ཙ ཝིབྷཏྟཱ བྷིནྣཱ ཝིཉྙཱཏཱ, ན པན ཨེཀསྨིཾ ལཀྑཎེ སམཱནེཏྭཱ, ཏསྨཱ ཏཏྠ ཝུཏྟཾ སམཡཱདིབྷེདཾ ཝཛྫེཏྭཱ སབྦབྷེདབྷིནྣཱནཾ ཨེཀསྨིཾ ཀུསལཱདིལཀྑཎེ སམཱནེཏྭཱ བོདྷནཏྠཾ ཨིདྷ ཀུསལཏྟིཀནིདྡེསོ པུན ཝིབྷཏྟོ. ཨེཏྠ ཙ ཨེཀཝཙནེན ཀུསལནིདྡེསཾ ཀཏྭཱ བཧུཝཙནེན ནིགམནསྶ ཀཱརཎཾ ཝུཏྟམེཝ. ཡདི དྷམྨཱནཾ ཀུསལཏྟེ ཨེཀཏྟཱུཔགམནཾ, ཀསྨཱ ཨེཀཝཙནེན པུཙྪཱཔི ན ཀཏཱ? ཨུདྡེསེ ཀུསལ-སདྡསྶ དྷམྨཝིསེསནབྷཱཝཏོ ཏབྦིསེསནཱནཾ དྷམྨཱནཾ པུཙྪིཏཏྟཱ ཏེསཉྩ ཨནིདྡྷཱརིཏསངྑཱཝིསེསཏྟཱ, ནིདྡེསེ པན ཙཏཱུཧི བྷཱུམཱིཧི ཝིཏྠཱརཏོ ཝིཉྙཱཏཱཧི ¶ ཀུསལེ ཝིསེསེཏྭཱ དསྶེཏཱིཏི ཡུཏྟཾ ‘‘ཙཏཱུསུ བྷཱུམཱིསུ ཀུསལ’’ནྟི ཨེཀཏྟཾ ནེཏྭཱ ཝཙནཾ. ཀུསལཔདཉྷི ཨེཏྠ པདྷཱནཾ, ཏཉྩ ཝིསེསིཏབྦཱནཔེཀྑཾ ཀུསལཱཀཱརམེཝ ཨཏྟནོ སབྷཱཝེ ཋིཏཾ གཧེཏྭཱ པཝཏྟམཱནཾ ཨེཀཏྟམེཝ ཨུཔཱདཱཡ པཝཏྟཏི, ན བྷེདནྟི.

༡༣༨༥. དྭཱདས ¶ ཨཀུསལཙིཏྟུཔྤཱདཱཏི ཨེཏྠཱཔི པཋམཱཀུསལཙིཏྟུཔྤཱདོ སམཡཕསྶཱདིཝསེན བྷེདཾ ཨནཱམསིཏྭཱ སོམནསྶསཧགཏདིཊྛིགཏསམྤཡུཏྟཙིཏྟུཔྤཱདབྷཱཝེ ཨེཀཏྟཾ ནེཏྭཱ ཝུཏྟོ, ཨེཝཾ ཡཱཝ དྭཱདསམོཏི ‘‘དྭཱདས ཨཀུསལཙིཏྟུཔྤཱདཱ’’ཏི ཝུཏྟཾ. ཨེཝཾ ཙཏཱུསུ བྷཱུམཱིསུ ཝིཔཱཀོཏིཨཱདཱིསུཔི ཡཐཱཡོགཾ ཡོཛེཏབྦཾ. ཙིཏྟུཔྤཱདཱཏི ཨེཏྠ ཨུཔྤཛྫཏི ཨེཏྠཱཏི ཨུཔྤཱདོ, ཀིཾ ཨུཔྤཛྫཏི? ཙིཏྟཾ, ཙིཏྟསྶ ཨུཔྤཱདོ ཙིཏྟུཔྤཱདོཏི ཨེཝཾ ཨཝཡཝེན སམུདཱཡོཔལཀྑཎཝསེན ཨཏྠོ སམྦྷཝཏི. ཨེཝཉྷི སཏི ཙིཏྟཙེཏསིཀརཱསི ཙིཏྟུཔྤཱདོཏི སིདྡྷོ ཧོཏི. ཨཊྛཀཐཱཡཾ པན ‘‘ཙིཏྟམེཝ ཨུཔྤཱདོ ཙིཏྟུཔྤཱདོ’’ཏི ཨཉྙསྶུཔྤཛྫནཀསྶ ནིཝཏྟནཏྠཾ ཙིཏྟགྒཧཎཾ ཀཏཾ, ཙིཏྟསྶ ཨནུཔྤཛྫནཀབྷཱཝནིཝཏྟནཏྠཾ ཨུཔྤཱདགྒཧཎཾ, ཙིཏྟུཔྤཱདཀཎྜེ ཝཱ ‘‘ཙིཏྟཾ ཨུཔྤནྣཾ ཧོཏཱི’’ཏི ཙིཏྟསྶ ཨུཔྤཛྫནཀབྷཱཝོ པཱཀཊོཏི ཀཏྭཱ ‘‘ཙིཏྟམེཝ ཨུཔྤཱདོ’’ཏི ཝུཏྟཾ, ཙིཏྟསྶ ཨནུཔྤཛྫནཀསྶ ནིཝཏྟེཏབྦསྶ སབྦྷཱཝཱ ཨུཔྤཱདགྒཧཎཾ ཀཏནྟི ཝེདིཏབྦཾ. ཨཡཉྩཏྠོ ‘‘དྭེཔཉྩཝིཉྙཱཎཱནཱི’’ཏིཨཱདཱིསུ ཝིཡ ཙིཏྟཔྤདྷཱནོ ནིདྡེསོཏི ཀཏྭཱ ཝུཏྟོཏི དཊྛབྦོ.

༡༤༢༠. ཚསུ དྭཱརེསཱུཏི ཨེཏྠ པཉྩདྭཱརེ ཝཏྟབྦམེཝ ནཏྠི, མནོདྭཱརེཔི པརིཏྟཱརམྨཎམེཝ ཛཝནཾ ཏདཱརམྨཎསངྑཱཏཾ བྷཝངྒཾ ཨནུབནྡྷཏི. ཏཉྷི པརིཏྟསྶ ཀམྨསྶ ཝིཔཱཀོ, ཝིཔཱཀོ ཙ ཨིཊྛཱནིཊྛཱརམྨཎཱནུབྷཝནཾ, ཀམྨཱནུརཱུཔོ ཙ ཝིཔཱཀོ ཧོཏཱིཏི པརིཏྟཀམྨཝིཔཱཀོ པརིཏྟཱརམྨཎསྶེཝ ཨནུབྷཝནཾ ཧོཏི. ཏསྨཱ སབྦཾ ཏདཱརམྨཎཾ ‘‘པརིཏྟཱརམྨཎ’’ནྟི ཝུཏྟཾ. ཡདི ཨེཝཾ མཧགྒཏཝིཔཱཀོཔི མཧགྒཏཱནུབྷཝནམེཝ ཨཱཔཛྫཏཱིཏི ཙེ? ན, སམཱདྷིཔྤདྷཱནསྶ ཀམྨསྶ ཨཔྤནཱཔྤཏྟསྶ སཉྙཱཝསཱརམྨཎསྶ ཏཱདིསེནེཝ ཝིཔཱཀེན བྷཝིཏབྦཏྟཱ. ཏསྨཱ སམཱདྷི སུཁཱནུབྷཝནབྷཱུཏོ, སོཔི ཀམྨཱནུརཱུཔཏོཡེཝ ཀམྨཱརམྨཎོ ཧོཏཱིཏི དཊྛབྦོ. ཀམྨཱནུརཱུཔཏོ ཨེཝ ཙ ཏདཱརམྨཎཾ པརིཏྟཱརམྨཎམྤི མཧགྒཏཛཝནཾ ནཱནུབནྡྷཏི. ཏཏོ ཨེཝ པཊིསནྡྷིཨཱདིབྷཱུཏོ ཀཱམཱཝཙརཝིཔཱཀོ ཀམྨནིམིཏྟམྤི པརིཏྟམེཝ ཨཱརམྨཎཾ ཀརོཏི, ན མཧགྒཏཾ ཨཔྤམཱཎཾ ཝཱ. ཡསྨཱ པན ཝུཏྟཾ ‘‘མཧགྒཏཱརམྨཎོ དྷམྨོ པརིཏྟཱརམྨཎསྶ དྷམྨསྶ ཀམྨཔཙྩཡེན པཙྩཡོ, ཨཔྤམཱཎཱརམྨཎོ དྷམྨོ པརིཏྟཱརམྨཎསྶ དྷམྨསྶ ཀམྨཔཙྩཡེན པཙྩཡོ’’ཏི, ན ཙ མཧགྒཏཔྤམཱཎཝིཔཱཀོ ¶ པརིཏྟཱརམྨཎོ ཨཏྠི, ཨིདྷ ཙ སབྦཀཱམཱཝཙརཝིཔཱཀཱནཾ པརིཏྟཱརམྨཎཏཱཝ ཝུཏྟཱ, ཏསྨཱ ཀམྨཱནུརཱུཔཏོ མཧགྒཏཔྤམཱཎཱརམྨཎམྤི ¶ པརིཏྟཀམྨཾ ཡདི པཊིསནྡྷིཾ དེཏི, ཀམྨགཏིནིམིཏྟཱརམྨཎམེཝ དེཏི. པཝཏྟིཝིཔཱཀམྤི རཱུཔཱདིཔརིཏྟཱརམྨཎམེཝཱཏི ཝེདིཏབྦཾ. ཁཱིཎཱསཝཱནཾ ཝཱསནཱཝསེན སཏིཝིཔྤཡུཏྟཧསནཾ པཝཏྟམཱནཾ པརིཏྟེསྭེཝ པཝཏྟཏི, ན ཨིཏརེསུ ཀིལེསཝིརཧེ ཏཱདིསཧསནཔཙྩཡབྷཱཝཱབྷཱཝཏོ. ཏསྨཱ ཏསྶ པརིཏྟཱརམྨཎཏཱ ཝུཏྟཱ. ཁཱིཎཱསཝཱནཾ ཨསཀྐཙྩདཱནཱདཱིནི ཨཱདརཱཀརཎཝསེནེཝ ཝེདིཏབྦཱནི, ན ཀོསཛྫཱདིཨཀུསལཝསེན. པཊིཔྤསྶདྡྷསབྦུསྶུཀྐཱ ཧི ཏེ ཨུཏྟམཔུརིསཱཏི. ཏེསཾ ཨཱདརཱཀརཎཉྩ ནིརུསྶུཀྐཏཱ ཨེཝཱཏི ཝེདིཏབྦཱ.

༡༤༢༡. ཨཏིཔགུཎཱནནྟི ཝཙནཾ ནིརཱདརསྶ ཉཱཎཝིཔྤཡུཏྟཔཙྩཝེཀྑཎསྶ ཝིསཡདསྶནཾ, ན ཏསྶེཝཱཏི ཝིསཡནིཡམནཾ. ཉཱཎསམྤཡུཏྟསྶཔི ཧི ཨཏིཔགུཎཱནཾ ཝིསཡཏཱ སུཊྛུཏརཾ ཧོཏི ཨེཝ. ཡཐཱ པགུཎཾ གནྠཾ སཛ྄ཛྷཱཡནྟོ དྭེ ཏཡོ ཝཱཙནཱམགྒེ གཏེཔི ན སལླཀྑེཏི ཉཱཎཝིཔྤཡུཏྟསཏིམནྟེན སཛ྄ཛྷཱཡིཏཏྟཱ, ཨེཝཾ པགུཎཛ྄ཛྷཱནེསུཔི པཝཏྟི ཧོཏཱིཏི ཨཱཧ ‘‘ཨཏིཔགུཎཱན’’ནྟིཨཱདི. ཀསིཎནིམིཏྟཱདིཔཉྙཏྟཱིཏི པུབྦེ དསྶིཏཾ སབྦཾ ཨུཔཱདཱཔཉྙཏྟིམཱཧ. ཏཾ པན རཱུཔཱདཡོ ཝིཡ ཨཝིཛྫམཱནོ ཝིཛྫམཱནོ ཙ ཨཏྠོཏི ཨཱཙརིཡཱ ཝདནྟི. སམྨུཏིསཙྩེ པན ཝུཙྩམཱནཱནཾ ཀསིཎནིམིཏྟཱདི ཝཱཙཱཝཏྠུམཏྟཏོ ཝཙནཝོཧཱརེནེཝ པཉྙཏྟཱིཏི ཝུཙྩཏི. ཏསྶ ཧི པཉྙཱཔནཾ ཨཝིཛྫམཱནཔཉྙཏྟཱིཏི ཏསྶ ཨཝིཛྫམཱནཏྟཾ ཨཊྛཀཐཱཡཾ ཝུཏྟནྟི. ཨཝིཛྫམཱནམྤི པན ཏཾ ཝིཛྫམཱནམིཝ གཧེཏྭཱ པཝཏྟམཱནཱཡ སཉྙཱཡ པརིཏྟཱདཱིསུ ‘‘ཨཡཾ ནཱམ དྷམྨོ ཨཱརམྨཎ’’ནྟི ན སཀྐཱ ཝཏྟུཾ ཏེ ཨེཝ དྷམྨེ ཨུཔཱདཱཡ པཝཏྟམཱནཱཡཔི དྷམྨེསྭེཝ ཨཊྛཱནཏོ. ཏསྨཱ སཱ སསམྤཡུཏྟཱ པརིཏྟཱདིཨཱརམྨཎཱཏི ན ཝཏྟབྦཱཏི ཝུཏྟཱ. ནཝཏྟབྦཱརམྨཎཱཏི ཨིདཾ པན ཝཙནཾ ཡཐཱགཧིཏཱཀཱརསྶ སཉྙཱཝིསཡསྶ ནཝཏྟབྦཏཾ སནྡྷཱཡ ནཝཏྟབྦཾ ཨཱརམྨཎཾ ཨེཏེསནྟི ནཝཏྟབྦཱརམྨཎཱ, ཙིཏྟུཔྤཱདཱཏི ཨཉྙཔདཏྠསམཱསཾ ཀཏྭཱ ཨཊྛཀཐཱཡཾ ཝུཏྟཾ.

ཙཏུཔཉྙཱསཙིཏྟུཔྤཱདཱནཾ རཱུཔསྶ ཙ ཝསེན པཉྩཔཎྞཱསཱཡ. ཀེཝལནྟི ཝིནཱ པརཱམསནེན. ཨནིཊྛངྒཏཝསེནཱཏི ཨནིཙྪཡགམནཝསེན, ཨནིཙྪཡཾ ཝཱ དྭེལ༹ྷཾ གཏོ ཙིཏྟུཔྤཱདོ ཨནིཊྛངྒཏོ, ཏེནཱཀཱརེན པཝཏྟི ‘‘ཨནིཊྛངྒཏཝསེན པཝཏྟཱི’’ཏི ཝུཏྟཱ. ནཱནཱརམྨཎེསུ ཙིཏྟསྶ ཝིཀྑིཔནཾ ¶ ཝིཀྑེཔོ. ཨནཝཊྛཱནཾ ཨཝཱུཔསམོ. གོཏྲབྷུཝོདཱནེ གོཏྲབྷཱུཏི གཧེཏྭཱ ‘‘གོཏྲབྷུཀཱལེ’’ཏི ཨཱཧ.

སབྦཏྠཔཱདཀཙཏུཏྠནྟི ¶ ཨིདྷ སབྦཏྠ-སདྡོ སཱམིཨཏྠོ དཊྛབྦོ, སབྦེསུ ཝཱ ཝིཔསྶནཱདཱིསུ པཱདཀཾ ཀཱརཎཾ སབྦཏྠཔཱདཀནྟི ཕལསྶ ཝིསཡབྷཱཝེན ནིདྡེསོ. ཨཱཀཱསཀསིཎཙཏུཏྠནྟི པརིཙྪེདཱཀཱསཀསིཎཙཏུཏྠམཱཧ. ཏཉྷི རཱུཔཱཝཙརཾ, ན ཨིཏརནྟི. ཀུསལཏོཔི དྭཱདསཝིདྷཾ ཀིརིཡཏོཔཱིཏི ཙཏུཝཱིསཏིཝིདྷཏཱ ཝུཏྟཱ ཧོཏི. ཝཊྚསྶཔི པཱདཀཾ ཧོཏིཡེཝཱཏི ཀུསལཾ ཀིརིཡཉྩ ཨེཀཏོ ཀཏྭཱ སབྦཏྠཔཱདཀཾ ཝུཏྟནྟི ཀིརིཡཛ྄ཛྷཱནསྶ ཨཝཊྚཔཱདཀཏྟཱ སཱསངྐཾ ཝདཏི. མཧགྒཏཙིཏྟེ སམོདཧཏཱིཏི ཨིདཾ ‘‘སོ ཨེཝཾ སམཱཧིཏེ ཙིཏྟེ’’ཏིཨཱདིནཱ ནཡེན ཝུཏྟཾ པཱཀཊཾ པཱདཀཛ྄ཛྷཱནཙིཏྟཾ པརིཀམྨེཧི གཧེཏྭཱ ཙིཏྟེ རཱུཔཀཱཡཾ ཨདྷིཊྛཱནཙིཏྟེན སམོདཧཏཱིཏི ཀཏྭཱ ཝུཏྟཾ. པཱདཀཛ྄ཛྷཱནཙིཏྟཾ རཱུཔཀཱཡེ སམོདཧཏཱིཏི ཨིདམྤི ཡཐཱཝུཏྟཾ པཱདཀཛ྄ཛྷཱནཙིཏྟཾ ཨཱརམྨཎཾ ཀཏྭཱ ཙིཏྟསནྟཱནཾ རཱུཔཀཱཡེ སམོདཧིཏཾ ཏདནུགཏིཀཾ ཀཏྭཱ ཨདྷིཊྛཱཏཱིཏི ཀཏྭཱ ཝུཏྟཾ, ཨིདཾ པན ཨདྷིཊྛཱནདྭཡཾ ཨདིསྶམཱནཀཱཡཏཾ དིསྶམཱནཀཱཡཏཉྩ ཨཱཔཱདེཏི. གནྟུཀཱམཏཱཔརིཀམྨཝསེན ཏཾསམྤཡུཏྟཱཡ སཉྙཱཡ སུཁསཉྙཱལཧུསཉྙཱབྷཱཝཏོ གམནམྤི ནིཔྥཱདེཏཱིཏི དཊྛབྦཾ.

སོཏཱཔནྣསྶ ཙིཏྟནྟི སོཏཱཔནྣསྶ པཱཊིཔུགྒལིཀཾ མགྒཕལཙིཏྟནྟི ཝེདིཏབྦཾ. མཱརཱདཱིནཉྷི བྷགཝཏོ ཙིཏྟཛཱནནཾ ཝུཏྟནྟི ཙེཏོཔརིཡཉཱཎལཱབྷཱི ཀསྨཱ སཱསཝཙིཏྟཾ ན ཛཱནིསྶཏཱིཏི. ཚིནྣཝཊུམཀཱ ཚིནྣསཾསཱརཝཊྚཱ བུདྡྷཱ. མགྒཕལནིབྦཱནཔཙྩཝེཀྑཎཏོཔཱིཏི ཨེཏྠ མགྒཕལཔཙྩཝེཀྑཎཱནི ཏཱཝ པུབྦེནིཝཱསཱནུསྶཏིཉཱཎེན མགྒཕལེསུ ཉཱཏེསུ པཝཏྟནྟི, ནིབྦཱནཔཙྩཝེཀྑཎཉྩ ནིབྦཱནཱརམྨཎེསུ ཨཔྤམཱཎདྷམྨེསུ ཉཱཏེསཱུཏི མགྒཱདིཔཙྩཝེཀྑཎཱནི པུབྦེནིཝཱསཱནུསྶཏིཉཱཎསྶ ཨཔྤམཱཎཱརམྨཎཏཾ སཱདྷེནྟཱིཏི ཝེདིཏབྦཱནི. ‘‘ཨཔྤམཱཎཱ ཁནྡྷཱ པུབྦེནིཝཱསཱནུསྶཏིཉཱཎསྶ ཨཱརམྨཎཔཙྩཡེན པཙྩཡོ’’ཨིཙྩེཝ (པཊྛཱ. ༢.༡༢.༥༨) ཧི ཝུཏྟཾ, ན ནིབྦཱནནྟི. ཏསྨཱ པུབྦེནིཝཱསཱནུསྶཏིཉཱཎེན ཨེཝ མགྒཕལཔཙྩཝེཀྑཎཀིཙྩེ ཝུཙྩམཱནེཔི ནིབྦཱནཔཙྩཝེཀྑཎཏཱ ན སཀྐཱ ཝཏྟུཾ, ཨཊྛཀཐཱཡཾ པན ཏསྶཔི ནིབྦཱནཱརམྨཎཏཱ ཨནུཉྙཱཏཱཏི དིསྶཏི. ཀཱམཱཝཙརེནིབྦཏྟིསྶཏཱིཏི ནིབྦཏྟཀྑནྡྷཛཱནནམཱཧ. ནིབྦཱནདྷཱཏུཡཱ པརིནིབྦཱཡིསྶཏཱིཏི ནིབྦཱནཱརམྨཎེཧི མགྒཕལེཧི ཀིལེསཔརིནིབྦཱནབྷཱུཏེཧི པརིནིབྦཱཡིསྶཏཱིཏི ཨཏྠོ སམྦྷཝཏི.

༡༤༢༩. ཨསཧཛཱཏཏྟཱཏི ¶ ¶ ཨསམྤཡུཏྟཏྟཱཏི ཨཏྠོ. ན ཧི ཨརཱུཔདྷམྨཱནཾ ཨརཱུཔདྷམྨེཧི སཧཛཱཏཏཱ སམྤཡོགཏོ ཨཉྙཱ ཨཏྠཱིཏི. ‘‘ཨཉྙདྷམྨཱརམྨཎཀཱལེ’’ཏི ཝུཏྟཾ, མགྒཱརམྨཎཀཱལེཔི པན གརུཾ ཨཀརཎེ མགྒཱདྷིཔཏིབྷཱཝེན ནཝཏྟབྦཏཱ ཡོཛེཏབྦཱ.

༡༤༣༣. ནིཡོགཱཏི ནིཡོགཏོཏི ཨིམམཏྠཾ སནྡྷཱཡ ‘‘ནིཡམེནཱ’’ཏི ཨཱཧ, ནིཡོགཝནྟོ ཝཱ ནིཡོགཱ, ནིཡཏཱཏི ཨཏྠོ. ཙིཏྟུཔྤཱདཀཎྜེ ཧི བོདྷིཏེསུ ཙིཏྟུཔྤཱདེསུ ཨེཀནྟེན ཨནཱགཏཱརམྨཎོ ཀོཙི ནཏྠཱིཏི.

༡༤༣༤. ཀམྨཾ ཝཱ ཀམྨནིམིཏྟཾ ཝཱ ཨཱརབྦྷ པཝཏྟིཡཾ ཨཏཱིཏཱརམྨཎཱཝཱཏི ཝུཏྟཾ, ཀམྨནིམིཏྟཾ པན ཨཱརབྦྷ པཝཏྟིཡཾ པཙྩུཔྤནྣཱརམྨཎབྷཱཝཉྩ པཊིསནྡྷིཡཱ པཊིཙྩསམུཔྤཱདཝིབྷངྒཝཎྞནཱཡཾ ཝཀྑཏི. ཏསྨཱ ཨིདཾ མནོདྭཱརཙུཏིཡཾ ཨཏཱིཏཀམྨནིམིཏྟཾ མནོདྭཱརེ ཨཱཔཱཐགཏཾ སནྡྷཱཡ ཝུཏྟནྟི ཝེདིཏབྦཾ. སཏདཱརམྨཎཱཡ ཙུཏིཡཱ པཉྩཙིཏྟཀྑཎཱཝསིཊྛཱཡུཀེ གཏིནིམིཏྟེ པཊིསནྡྷིཡཱ པཝཏྟཱཡ ཙཏྟཱརི བྷཝངྒཱནི པཙྩུཔྤནྣཱརམྨཎཱནི, ཨིཏརཏྠ ཙ ཚ སནྡྷཱཡཱཧ ‘‘ཏཏོ པརཾ བྷཝངྒཀཱལེ ཙཱ’’ཏི. ཡདཱ ཧི གཏིནིམིཏྟཱརམྨཎེ ཛཝནེ པཝཏྟེ ཨནུཔྤནྣེ ཨེཝ ཏདཱརམྨཎེ ཙུཏི ཧོཏི རཱུཔཱཝཙརཱརཱུཔཱཝཙརསཏྟསྶ ཝིཡ ཀཱམདྷཱཏུཾ ཨུཔཔཛྫནྟསྶ, ཏདཱ པཊིསནྡྷིཏོ པརཱནི ཚ བྷཝངྒཱནི པཙྩུཔྤནྣཱརམྨཎཱནི ཧོནྟཱིཏི. དིཊྛིསམྤཡུཏྟེཧི ཨསྶཱདནཱདཱིནི སཔརཱམཱསཱནེཝ དཊྛབྦཱནི. པཎྞཏྟིནིབྦཱནཱརམྨཎཱནཉྩ ཛཝནཱནཾ པུརེཙཱརིཀཀཱལེཏི ཡེསཾ པུརེཙཱརིཀཀཱལེ ཨེཀནྟེན ཨཱཝཛྫནཱཡ ཨཏཱིཏཱདིཨཱརམྨཎབྷཱཝེན ནཝཏྟབྦཏཱ, ཏེསཾ ཝསེན ནཡཾ དསྶེཏི. ནིབྦཱནཱརམྨཎཱནམྤི ཛཝནཱནཾ པུརེཙཱརིཀཀཱལེ སཱ ཏཐཱ ན ཝཏྟབྦཱ, ན པན ཨེཀནྟེན མགྒཕལཝཱིཐཱིསུ ཏསྶཱ ཨནིབྦཱནཱརམྨཎཏྟཱ.

ཨིམེ གནྡྷཱཏི ནནུ པཙྩུཔྤནྣཱ གནྡྷཱ གཧིཏཱ, ཀཐཾ ཨེཏྠ ཨནཱགཏཱརམྨཎཏཱ ཧོཏཱིཏི? ‘‘ཨཊྛཱརསཝསྶཱདྷིཀཱནི དྭེ ཝསྶསཏཱནི མཱ སུསྶིཾསཱུ’’ཏི པཝཏྟིཏོ, ཨནཱགཏེ མཱ སུསྶིཾ སཱུཏི ཧི ཨནཱགཏཾ གནྡྷཾ གཧེཏྭཱ པཝཏྟཏཱིཏི ཨདྷིཔྤཱཡོ. ཙིཏྟཝསེན ཀཱཡཾ པརིཎཱམེནྟོ ཨབྷིམུཁཱིབྷཱུཏཾ ཏདཱ ཝིཛྫམཱནམེཝ ཀཱཡཾ ཨཱརམྨཎཾ ཀརོཏཱིཏི པཙྩུཔྤནྣཱརམྨཎཾ ཨདྷིཊྛཱནཙིཏྟཾ ཧོཏི. ཏཐཱ ཨཏྟནོ ཀཱཡསྶ དཱིགྷརསྶཱཎུཐཱུལནཱིལཱདིབྷཱཝཱཔཱདནཝསེན ཨཉྙསྶ ཙ པཱཊིཧཱརིཡསྶ ཀརཎེ ཡོཛེཏབྦཾ ¶ . ཨེཏྠནྟརེ ཨེཀདྭེསནྟཏིཝཱརཱ ཝེདིཏབྦཱཏི ཨེཏྠནྟརེ པཝཏྟཱ རཱུཔསནྟཏིཨརཱུཔསནྟཏིཝཱརཱ ཨེཀདྭེསནྟཏིཝཱརཱ ¶ ནཱམཱཏི ཝེདིཏབྦཱཏི ཨཏྠོ. ཨཏིཔརིཏྟསབྷཱཝཨུཏུཨཱདིསམུཊྛཱནཱ ཝཱ ‘‘ཨེཀདྭེསནྟཏིཝཱརཱ’’ཏི ཝུཏྟཱ. ཨུབྷཡམེཏཾ པཙྩུཔྤནྣནྟི ཨདྡྷཱཔཙྩུཔྤནྣཾ ཧོནྟཾ ཨེཏཾ ཨུབྷཡཾ ཧོཏཱིཏི ཨཏྠོ. སཾཧཱིརཏཱིཏི ཏཎྷཱདིཊྛཱབྷིནནྡནཱཧི ཨཱཀཌྜྷཱིཡཏི.

ཀེཙཱིཏི ཨབྷཡགིརིཝཱསིནོཏི ཝདནྟི, ཏེ པན ཙིཏྟསྶ ཋིཏིཀྑཎཾ ན ཨིཙྪནྟཱིཏི ‘‘ཋིཏིཀྑཎེ ཝཱ པཊིཝིཛ྄ཛྷཏཱི’’ཏི ན ཝཏྟབྦཾ སིཡཱ. ཏཐཱ ཡེ ‘‘ཨིདྡྷིམསྶ ཙ པརསྶ ཙ ཨེཀཀྑཎེ ཝཏྟམཱནཾ ཙིཏྟཾ ཨུཔྤཛྫཏཱི’’ཏི ཝདནྟི, ཏེསཾ ‘‘ཋིཏིཀྑཎེ ཝཱ བྷངྒཀྑཎེ ཝཱ པཊིཝིཛ྄ཛྷཏཱི’’ཏི ཝཙནཾ ན སམེཏི. ན ཧི ཏསྨིཾ ཁཎདྭཡེ ཨུཔྤཛྫམཱནཾ པརཙིཏྟེན སཧ ཨེཀཀྑཎེ ཨུཔྤཛྫཏི ནཱམཱཏི. ཋིཏིབྷངྒཀྑཎེསུ ཙ ཨུཔྤཛྫམཱནཾ ཨེཀདེསཾ པཙྩུཔྤནྣཱརམྨཎཾ, ཨེཀདེསཾ ཨཏཱིཏཱརམྨཎཾ ཨཱཔཛྫཏི. ཡཉྩ ཝུཏྟཾ ‘‘པརསྶ ཙིཏྟཾ ཛཱནིསྶཱམཱིཏི རཱསིཝསེན མཧཱཛནསྶ ཙིཏྟེ ཨཱཝཛྫིཏེ’’ཏི, ཨེཏྠ ཙ མཧཱཛནོ ཨཏྟནཱ པརེ ཨནེཀེ པུགྒལཱཏི པརེསཾ ཙིཏྟཾ ཛཱནིསྶཱམཱིཏི ཨཱཝཛྫནཔྤཝཏྟི ཝཏྟབྦཱ སིཡཱ. ཨཐཱཔི པརསྶཱཏི མཧཱཛནསྶཱཏི ཨཏྠོ སམྦྷཝེཡྻ, ཏཐཱཔི ཏསྶ པུགྒལསྶེཝ ཝཱ ཙིཏྟརཱསིཾ ཨཱཝཛྫིཏྭཱ ཨེཀསྶ པཊིཝིཛ྄ཛྷནཾ ཨཡུཏྟཾ. ན ཧི རཱསིཨཱཝཛྫནཾ ཨེཀདེསཱཝཛྫནཾ ཧོཏཱིཏི. ཏསྨཱ ཏེཧི ‘‘མཧཱཛནསྶ ཙིཏྟེ ཨཱཝཛྫིཏེ’’ཏིཨཱདི ན ཝཏྟབྦཾ.

ཡཾ པན ཏེ ཝདནྟི ‘‘ཡསྨཱ ཨིདྡྷིམསྶ ཙ པརསྶ ཙ ཨེཀཀྑཎེ ཙིཏྟཾ ཨུཔྤཛྫཏཱི’’ཏི, ཏཏྠཱཡཾ ཨདྷིཔྤཱཡོ སིཡཱ – ཙེཏོཔརིཡཉཱཎལཱབྷཱི པརསྶ ཙིཏྟཾ ཉཱཏུཀཱམོ པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ཨཏཱིཏཱདིཝིབྷཱགཾ ཨཀཏྭཱ ཙིཏྟསཱམཉྙེན ‘‘ཨིམསྶ ཙིཏྟཾ ཛཱནཱམཱི’’ཏི པརིཀམྨཾ ཀཏྭཱ པུན པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ སཱམཉྙེནེཝ ཙིཏྟཾ ཨཱཝཛྫིཏྭཱ ཏིཎྞཾ ཙཏུནྣཾ ཝཱ པརིཀམྨཱནཾ ཨནནྟརཱ ཙེཏོཔརིཡཉཱཎེན པརཙིཏྟཾ པཊིཝིཛ྄ཛྷཏི ཝིབྷཱཝེཏི རཱུཔཾ ཝིཡ དིབྦཙཀྑུནཱ. ཏཏོ པརཾ པན ཀཱམཱཝཙརཙིཏྟེཧི སརཱགཱདིཝཝཏྠཱནཾ ཧོཏི ནཱིལཱདིཝཝཏྠཱནཾ ཝིཡ. ཏཏྠ དིབྦཙཀྑུནཱ དིཊྛཧདཡཝཏྠུརཱུཔསྶ སཏྟསྶ ཨབྷིམུཁཱིབྷཱུཏསྶ ཙིཏྟསཱམཉྙེན ཙིཏྟཾ ཨཱཝཛྫཡམཱནཾ ཨཱཝཛྫནཾ ཨབྷིམུཁཱིབྷཱུཏཾ ཝིཛྫམཱནཾ ཙིཏྟཾ ཨཱརམྨཎཾ ཀཏྭཱ ཙིཏྟཾ ཨཱཝཛྫེཏི. པརིཀམྨཱནི ཙ ཏཾ ཏཾ ཝིཛྫམཱནཾ ཙིཏྟཾ ཙིཏྟསཱམཉྙེནེཝ ཨཱརམྨཎཾ ¶ ཀཏྭཱ ཙིཏྟཛཱནནཔརིཀམྨཱནི ཧུཏྭཱ པཝཏྟནྟི. ཙེཏོཔརིཡཉཱཎཾ པན ཝིཛྫམཱནཾ ཙིཏྟཾ པཊིཝིཛ྄ཛྷནྟཾ ཝིབྷཱཝེནྟཾ ཏེན སཧ ཨེཀཀྑཎེ ཨེཝ ཨུཔྤཛྫཏི. ཏཏྠ ཡསྨཱ སནྟཱནསྶ སནྟཱནགྒཧཎཏོ ཨེཀཏྟཝསེན ཨཱཝཛྫནཱདཱིནི ཙིཏྟནྟྭེཝ པཝཏྟཱནི, ཏཉྩ ཙིཏྟམེཝ, ཡཾ ཙེཏོཔརིཡཉཱཎེན ¶ ཝིབྷཱཝིཏཾ, ཏསྨཱ སམཱནཱཀཱརཔྤཝཏྟིཏོ ན ཨནིཊྛེ མགྒཕལཝཱིཐིཏོ ཨཉྙསྨིཾ ཋཱནེ ནཱནཱརམྨཎཏཱ ཨཱཝཛྫནཛཝནཱནཾ ཧོཏི. པཙྩུཔྤནྣཱརམྨཎཉྩ པརིཀམྨཾ པཙྩུཔྤནྣཱརམྨཎསྶ ཙེཏོཔརིཡཉཱཎསྶ ཨཱསེཝནཔཙྩཡོཏི སིདྡྷཾ ཧོཏི. ཨཏཱིཏཏྟིཀོ ཙ ཨེཝཾ ཨབྷིནྣོ ཧོཏི. ཨཉྙཐཱ སནྟཏིཔཙྩུཔྤནྣེ ཨདྡྷཱཔཙྩུཔྤནྣེ ཙ པཙྩུཔྤནྣནྟི ཨིདྷ ཝུཙྩམཱནེ ཨཏཱིཏཱནཱགཏཱནཉྩ པཙྩུཔྤནྣཏཱ ཨཱཔཛྫེཡྻ, ཏཐཱ ཙ སཏི ‘‘པཙྩུཔྤནྣོ དྷམྨོ པཙྩུཔྤནྣསྶ དྷམྨསྶ ཨནནྟརཔཙྩཡེན པཙྩཡོ’’ཏིཨཱདི ཝཏྟབྦཾ སིཡཱ, ན ཙ ཏཾ ཝུཏྟཾ. ‘‘ཨཏཱིཏོ དྷམྨོ པཙྩུཔྤནྣསྶ དྷམྨསྶ ཨནནྟརཔཙྩཡེན པཙྩཡོ, པུརིམཱ པུརིམཱ ཨཏཱིཏཱ ཁནྡྷཱ པཙྪིམཱནཾ པཙྪིམཱནཾ པཙྩུཔྤནྣཱནཾ ཁནྡྷཱནཾ ཨནནྟར…པེ… ཨནུལོམཾ གོཏྲབྷུསྶཱ’’ཏིཨཱདིཝཙནཏོ (པཊྛཱ. ༢.༡༨.༥) པན ཨདྡྷཱསནྟཏིཔཙྩུཔྤནྣེསྭེཝ ཨནནྟརཱཏཱིཏཱ ཙཏྟཱརོ ཁནྡྷཱ ཨཏཱིཏཱཏི ཝིཉྙཱཡནྟི, ན ཙ ཨབྷིདྷམྨམཱཏིཀཱཡ ཨཱགཏསྶ པཙྩུཔྤནྣཔདསྶ ཨདྡྷཱསནྟཏིཔཙྩུཔྤནྣཔདཏྠཏཱ ཀཏྠཙི པཱལི༹ཡཾ ཝུཏྟཱ. ཏསྨཱ ཏེཧི ཨིདྡྷིམསྶ ཙ པརསྶ ཙ ཨེཀཀྑཎེ ཙིཏྟུཔྤཏྟིཡཱ ཙེཏོཔརིཡཉཱཎསྶ པཙྩུཔྤནྣཱརམྨཎཏཱ ཝུཏྟཱ. ཡདཱ པན ‘‘ཡཾ ཨིམསྶ ཙིཏྟཾ པཝཏྟཾ, ཏཾ ཛཱནཱམི. ཡཾ བྷཝིསྶཏི, ཏཾ ཛཱནིསྶཱམཱི’’ཏི ཝཱ ཨཱབྷོགཾ ཀཏྭཱ པཱདཀཛ྄ཛྷཱནསམཱཔཛྫནཱདཱིནི ཀརོཏི, ཏདཱ ཨཱཝཛྫནཔརིཀམྨཱནི ཙེཏོཔརིཡཉཱཎཉྩ ཨཏཱིཏཱནཱགཏཱརམྨཎཱནེཝ ཧོནྟི ཨཱཝཛྫནེནེཝ ཝིབྷཱགསྶ ཀཏཏྟཱ.

ཡེ པན ‘‘ཨིདྡྷིམཱ པརསྶ ཙིཏྟཾ ཛཱནིཏུཀཱམོ ཨཱཝཛྫེཏི, ཨཱཝཛྫནཾ ཁཎཔཙྩུཔྤནྣཾ ཨཱརམྨཎཾ ཀཏྭཱ ཏེནེཝ སཧ ནིརུཛ྄ཛྷཏི, ཏཏོ ཙཏྟཱརི པཉྩ ཝཱ ཛཝནཱནི. ཡེསཾ པཙྪིམཾ ཨིདྡྷིཙིཏྟཾ, སེསཱནི ཀཱམཱཝཙརཱནི, ཏེསཾ སབྦེསམྤི ཏདེཝ ནིརུདྡྷཾ ཙིཏྟམཱརམྨཎཾ ཧོཏི, ན ཙ ཏཱནི ནཱནཱརམྨཎཱནི ཧོནྟི, ཨདྡྷཱཝསེན པཙྩུཔྤནྣཱརམྨཎཏྟཱ’’ཏི ཨིདཾ ཝཙནཾ ནིསྶཱཡ ‘‘ཨཱཝཛྫནཛཝནཱནཾ པཙྩུཔྤནྣཱཏཱིཏཱརམྨཎབྷཱཝེཔི ནཱནཱརམྨཎཏྟཱབྷཱཝོ ཝིཡ ཨེཀདྭིཏིཙཏུཔཉྩཙིཏྟཀྑཎཱནཱགཏེསུཔི ཙིཏྟེསུ ཨཱཝཛྫིཏེསུ ཨཱཝཛྫནཛཝནཱནཾ ཡཐཱསམྦྷཝཾ ཨནཱགཏཔཙྩུཔྤནྣཱཏཱིཏཱརམྨཎབྷཱཝེཔི ནཱནཱརམྨཎཏཱ ན ¶ སིཡཱ, ཏེན ཙཏུཔཉྩཙིཏྟཀྑཎཱནཱགཏེ ཨཱཝཛྫིཏེ ཨནཱགཏཱརམྨཎཔརིཀམྨཱནནྟརཾ ཁཎཔཙྩུཔྤནྣཱརམྨཎཾ ཙེཏོཔརིཡཉཱཎཾ སིདྡྷ’’ནྟི ཝདནྟི, ཏེསཾ ཝཱདོ ‘‘ཨནཱགཏཱརམྨཎོ དྷམྨོ པཙྩུཔྤནྣཱརམྨཎསྶ དྷམྨསྶ ཨཱསེཝནཔཙྩཡེན པཙྩཡོ, པཙྩུཔྤནྣཱརམྨཎོ དྷམྨོ ཨཏཱིཏཱརམྨཎསྶ དྷམྨསྶ ཨཱསེཝནཔཙྩཡེན པཙྩཡོ’’ཏི ཨིམེསཾ པཉྷཱནཾ ཨནུདྡྷཊཏྟཱ གཎནཱཡ ཙ ‘‘ཨཱསེཝནེ ཏཱིཎཱི’’ཏི ཝུཏྟཏྟཱ ན སིཛ྄ཛྷཏི. ན ཧི ཀུསལཀིརིཡམཧགྒཏཾ ཨནཱསེཝནཾ ཨཏྠཱིཏི.

ཨེཏསྶ ¶ ཙ ཝཱདསྶ ནིསྶཡབྷཱཝོ ཨཱཝཛྫནཛཝནཱནཾ ཁཎཔཙྩུཔྤནྣནིརུདྡྷཱརམྨཎཏཱཝཙནསྶ ན སིཛ྄ཛྷཏི, ཡཾ པཝཏྟཾ ཡཾ པཝཏྟིསྶཏཱིཏི ཝཱ ཝིསེསཾ ཨཀཏྭཱ གཧཎེ ཨཱཝཛྫནསྶ ཨནཱགཏགྒཧཎབྷཱཝཾ, ཏདབྷཱཝཱ ཛཝནཱནམྤི ཝཏྟམཱནགྒཧཎཱབྷཱཝཉྩ སནྡྷཱཡེཝ ཏསྶ ཝུཏྟཏྟཱ. ཏདཱ ཧི བྷཝངྒཙལནཱནནྟརཾ ཨབྷིམུཁཱིབྷཱུཏམེཝ ཙིཏྟཾ ཨཱརབྦྷ ཨཱཝཛྫནཱ པཝཏྟཏཱིཏི. ཛཱནནཙིཏྟསྶཔི ཝཏྟམཱནཱརམྨཎབྷཱཝེ ཨཱཝཛྫནཛཱནནཙིཏྟཱནཾ སཧཊྛཱནདོསཱཔཏྟིཡཱ རཱསིཨེཀདེསཱཝཛྫནཔཊིཝེདྷེ སམྤཏྟསམྤཏྟཱཝཛྫནཛཱནནེ ཙ ཨནིཊྛེ ཋཱནེ ཨཱཝཛྫནཛཝནཱནཾ ནཱནཱརམྨཎབྷཱཝདོསཱཔཏྟིཡཱ ཙ ཡཾ ཝུཏྟཾ ‘‘ཁཎཔཙྩུཔྤནྣཾ ཙིཏྟཾ ཙེཏོཔརིཡཉཱཎསྶ ཨཱརམྨཎཾ ཧོཏཱི’’ཏི, ཏཾ ཨཡུཏྟནྟི པཊིཀྑིཔིཏྭཱ ཡཐཱཝུཏྟདོསཱནཱཔཏྟིཀཱལཝསེནེཝ ཨདྡྷཱསནྟཏིཔཙྩུཔྤནྣཱརམྨཎཏྟཱ ནཱནཱརམྨཎཏཱབྷཱཝཾ དིསྭཱ ཨཱཝཛྫནཛཝནཱནཾ ཝཏྟམཱནཏཾ ནིརུདྡྷཱརམྨཎབྷཱཝོ ཝུཏྟོཏི, ཏམྤི ཝཙནཾ པུརིམཝཱདིནོ ནཱནུཛཱནེཡྻུཾ. ཏསྨིཉྷི སཏི ཨཱཝཛྫནཱ ཀུསལཱནནྟིཨཱདཱིསུ ཝིཡ ཨཉྙཔདསངྒཧིཏསྶ ཨནནྟརཔཙྩཡཝིདྷཱནཏོ ‘‘པཙྩུཔྤནྣཱརམྨཎཱ ཨཱཝཛྫནཱ ཨཏཱིཏཱརམྨཎཱནཾ ཁནྡྷཱནཾ ཨནནྟརཔཙྩཡེན པཙྩཡོ’’ཏི ཝཏྟབྦཾ སིཡཱ, ན ཙ ཝུཏྟནྟི.

ཀསྨཱ པནེཝཾ ཙེཏོཔརིཡཉཱཎསྶ པཙྩུཔྤནྣཱརམྨཎཏཱ ཝིཙཱརིཏཱ, ནནུ ‘‘ཨཏཱིཏོ དྷམྨོ པཙྩུཔྤནྣསྶ དྷམྨསྶ, ཨནཱགཏོ དྷམྨོ པཙྩུཔྤནྣསྶ དྷམྨསྶ ཨཱརམྨཎཔཙྩཡེན པཙྩཡོ’’ཏི ཨེཏེསཾ ཝིབྷངྒེསུ ‘‘ཨཏཱིཏཱ ཁནྡྷཱ ཨིདྡྷིཝིདྷཉཱཎསྶཙེཏོཔརིཡཉཱཎསྶ པུབྦེནིཝཱསཱནུསྶཏིཉཱཎསྶ ཡཐཱཀམྨཱུཔགཉཱཎསྶ ཨཱཝཛྫནཱཡ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༡༨.༢), ‘‘ཨནཱགཏཱ ཁནྡྷཱ ཨིདྡྷིཝིདྷཉཱཎསྶ ཙེཏོཔརིཡཉཱཎསྶ ཨནཱགཏཾསཉཱཎསྶ ཨཱཝཛྫནཱཡ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༡༧.༣-༤), ཨུཔྤནྣཏྟིཀེ ཙ ‘‘ཨནུཔྤནྣཱཁནྡྷཱ, ཨུཔྤཱདིནོ ¶ ཁནྡྷཱ ཨིདྡྷིཝིདྷཉཱཎསྶ ཙེཏོཔརིཡཉཱཎསྶ ཨནཱགཏཾསཉཱཎསྶ ཨཱཝཛྫནཱཡ ཨཱརམྨཎཔཙྩཡེན པཙྩཡོ’’ཏི ཙེཏོཔརིཡཉཱཎགྒཧཎཾ ཀཏྭཱ ‘‘པཙྩུཔྤནྣོ དྷམྨོ པཙྩུཔྤནྣསྶཱ’’ཏི ཨེཏསྶ ཝིབྷངྒེ ‘‘པཙྩུཔྤནྣཱ ཁནྡྷཱ ཨིདྡྷིཝིདྷཉཱཎསྶ ཨཱཝཛྫནཱཡ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༡༨.༣), ཨུཔྤནྣཏྟིཀེ ཙ ‘‘ཨུཔྤནྣཱ ཁནྡྷཱ ཨིདྡྷིཝིདྷཉཱཎསྶ ཨཱཝཛྫནཱཡ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༡༧.༢) ཨེཏྟཀསྶེཝ ཝུཏྟཏྟཱ ‘‘པཙྩུཔྤནྣཙིཏྟེ ཙེཏོཔརིཡཉཱཎཾ ནཔྤཝཏྟཏཱི’’ཏི ཝིཉྙཱཡཏི. ཡདི ཧི པཝཏྟེཡྻ, པུརིམེསུ ཝིཡ ཨིཏརེསུ ཙ ཙེཏོཔརིཡཉཱཎགྒཧཎཾ ཀཏྟབྦཾ སིཡཱཏི? སཙྩཾ ཀཏྟབྦཾ, ནཡདསྶནཝསེན པནེཏཾ སཾཁིཏྟནྟི ཨཉྙཱཡ པཱལི༹ཡཱ ཝིཉྙཱཡཏི. ‘‘ཨཏཱིཏཱརམྨཎོ དྷམྨོ པཙྩུཔྤནྣཱརམྨཎསྶ ¶ དྷམྨསྶ ཨཱརམྨཎཔཙྩཡེན པཙྩཡོ (པཊྛཱ. ༢.༡༩.༢༠), ཨནཱགཏཱརམྨཎོ དྷམྨོ པཙྩུཔྤནྣཱརམྨཎསྶ. པཙྩུཔྤནྣཱརམྨཎོ དྷམྨོ པཙྩུཔྤནྣཱརམྨཎསྶཱ’’ཏི (པཊྛཱ. ༢.༡༩.༢༢) ཨེཏེསཉྷི ཝིབྷངྒེསུ ‘‘ཙེཏོཔརིཡཉཱཎེན ཨཏཱིཏཱརམྨཎཔཙྩུཔྤནྣཙིཏྟསམངྒིསྶ ཙིཏྟཾ ཛཱནཱཏི. ཨཏཱིཏཱརམྨཎཱ པཙྩུཔྤནྣཱ ཁནྡྷཱ ཙེཏོཔརིཡཉཱཎསྶ ཨཱཝཛྫནཱཡ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༡༩.༢༢), ‘‘ཙེཏོཔརིཡཉཱཎེན ཨནཱགཏཱརམྨཎཔཙྩུཔྤནྣཙིཏྟསམངྒིསྶ ཙིཏྟཾ…པེ… ཙེཏོཔརིཡཉཱཎེན པཙྩུཔྤནྣཱརམྨཎཔཙྩུཔྤནྣཙིཏྟསམངྒིསྶ ཙིཏྟཾ ཛཱནཱཏི. པཙྩུཔྤནྣཱརམྨཎཱ པཙྩུཔྤནྣཱ ཁནྡྷཱ ཙེཏོཔརིཡཉཱཎསྶ ཨཱཝཛྫནཱཡ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༡༩.༢༡) ཙེཏོཔརིཡཉཱཎསྶ པཙྩུཔྤནྣཱརམྨཎེ པཝཏྟི ཝུཏྟཱཏི. ཏེནེཝཱཡཾ ཝིཙཱརཎཱ ཀཏཱཏི ཝེདིཏབྦཱ.

ཏེསནྟི ཏེསུ དྭཱིསུ ཉཱཎེསཱུཏི ནིདྡྷཱརཎེ སཱམིཝཙནཾ. ཀུསལཱ ཁནྡྷཱཏི ཨིདྡྷིཝིདྷཔུབྦེནིཝཱསཱནཱགཏཾསཉཱཎཱཔེཀྑོ བཧུཝཙནནིདྡེསོ, ན ཙེཏོཔརིཡཉཱཎཡཐཱཀམྨཱུཔགཉཱཎཱཔེཀྑོཏི. ཏེསཾ ཙཏུཀྑནྡྷཱརམྨཎབྷཱཝསྶ ཨསཱདྷཀོཏི ཙེ? ན, ཨཉྙཏྠ ‘‘ཨཝིཏཀྐཝིཙཱརམཏྟཱ ཁནྡྷཱ ཙ ཝིཙཱརོ ཙ ཙེཏོཔརིཡཉཱཎསྶ པུབྦེནིཝཱསཱནུསྶཏིཉཱཎསྶ ཨནཱགཏཾསཉཱཎསྶ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༦.༧༢) ‘‘སཝིཏཀྐསཝིཙཱརཱ ཁནྡྷཱ ཙ ཝིཏཀྐོ ཙ ཙེཏོཔརིཡཉཱཎསྶ པུབྦེནིཝཱསཱནུསྶཏིཉཱཎསྶ ཨནཱགཏཾསཉཱཎསྶ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༦.༦༩) ཙ ཝུཏྟཏྟཱ ཙེཏོཔརིཡཉཱཎཱཔེཀྑོཔི བཧུཝཙནནིདྡེསོཏི ཨིམསྶཏྠསྶ སིདྡྷིཏོ. ཨེཝམཔི ¶ ཡཐཱཀམྨཱུཔགཉཱཎསྶ ‘‘ཨཝིཏཀྐཝིཙཱརམཏྟཱ ཁནྡྷཱ ཙ ཝིཙཱརོ ཙཱ’’ཏིཨཱདཱིསུ ཨཝུཏྟཏྟཱ ཙཏུཀྑནྡྷཱརམྨཎཏཱ ན སིཛ྄ཛྷཏཱིཏི? ན, ཏཏྠ ཨཝཙནསྶ ཨཉྙཀཱརཎཏྟཱ. ཡཐཱཀམྨཱུཔགཉཱཎེན ཧི ཀམྨསཾསཊྛཱ ཙཏྟཱརོ ཁནྡྷཱ ཀམྨཔྤམུཁེན གཡ྄ཧནྟི. ཏཉྷི ཡཐཱ ཙེཏོཔརིཡཉཱཎཾ པུརིམཔརིཀམྨཝསེན སཝིཏཀྐཱདིཝིབྷཱགཾ སརཱགཱདིཝིབྷཱགཉྩ ཙིཏྟཾ ཝིབྷཱཝེཏི, ན ཨེཝཾ སཝིབྷཱགཾ ཝིབྷཱཝེཏི, ཀམྨཝསེནེཝ པན སམུདཱཡཾ ཝིབྷཱཝེཏཱིཏི ‘‘ཨཝིཏཀྐཝིཙཱརམཏྟཱ ཁནྡྷཱ ཙ ཝིཙཱརོ ཙཱ’’ཏིཨཱདིཀེ ཝིབྷཱགཀརཎེ ཏཾ ན ཝུཏྟཾ, ན ཙཏུཀྑནྡྷཱནཱརམྨཎཏོཏི. ཨིདཾ པན ཨཝཙནསྶ ཀཱརཎནྟི. ཀེཙི ཏཏྠཱཔི ‘‘པུབྦེནིཝཱསཱནུསྶཏིཉཱཎསྶ ཡཐཱཀམྨཱུཔགཉཱཎསྶ ཨནཱགཏཾསཉཱཎསྶཱ’’ཏི པཋནྟི ཨེཝ. ན ཧི ཏཾ ཀུསལཱཀུསལཝིབྷཱགཾ ཝིཡ སཝིཏཀྐཱདིཝིབྷཱགཾ ཀམྨཾ ཝིབྷཱཝེཏུཾ ཨསམཏྠཾ. དུཙྩརིཏསུཙརིཏབྷཱཝཝིབྷཱཝནམྤི ཧི ལོབྷཱདིཨལོབྷཱདིསམྤཡོགཝིསེསཝིབྷཱཝནཾ ཧོཏཱིཏི.

༡༤༣༥. ནིཡཀཛ྄ཛྷཏྟཔརིཡཱཡསྶ ¶ ཨབྷཱཝེནཱཏི སབྷཱཝདྷམྨཏྟཱ ཀེནཙི པརིཡཱཡེན ནིཡཀཛ྄ཛྷཏྟཾ ཨཧོནྟཾ སབྦཐཱ བཧིདྡྷཱབྷཱཝེནེཝ ‘‘ཨེཀནྟབཧིདྡྷཱ’’ཏི ཝུཏྟཾ, ན ཨསབྷཱཝདྷམྨཏྟཱ བཧིདྡྷཱཔི ཨཧོནྟཾ ཀསིཎཱདི ཝིཡ ནིཡཀཛ྄ཛྷཏྟམཏྟསྶ ཨསམྦྷཝཏོ. ཨསབྷཱཝདྷམྨཏྟཱ ཨེཝ ཧི ཀསིཎཱདིཨཛ྄ཛྷཏྟདྷམྨབྷཱུཏོ ཙ ཀོཙི བྷཱཝོ ན ཧོཏཱིཏི ཨཛ྄ཛྷཏྟཏྟིཀེ ན ཝུཏྟནྟི ཨདྷིཔྤཱཡོ. ཏཾ སབྦཾ ཨཱཀིཉྩཉྙཱཡཏནཱདི ཨཏཱིཏཱརམྨཎཏྟིཀེ ‘‘ནཝཏྟབྦཱརམྨཎ’’ནྟི ཝུཏྟནྟི སམྦནྡྷོ. ཨེཏྠ ཙ ཝུཏྟནྟི ཨནུཉྙཱཏཏྟཱ ཝཙནཏོཏི ཨེཏེཧི ཀཱརཎེཧི པཀཱསིཏནྟི ཨཏྠོ.

ཨིདཱནི ཏནྟི ‘‘ཨེཏཉྷི ཨཱཀིཉྩཉྙཱཡཏན’’ནྟི ཝུཏྟཾ ཨཱཀིཉྩཉྙཱཡཏནཾ ཏཾ-སདྡེན ཨཱཀཌྜྷིཏྭཱ ཝདཏི. ཡོ པནཱཡམེཏྠ ཨཏྠོ ཝུཏྟོ ‘‘ཨཱཀིཉྩཉྙཱཡཏནཾ ཨེཀམྤི ཨིདྷ ཝུཙྩམཱནཾ ཨཏཱིཏཱརམྨཎཏྟིཀེ ཏེན སཧེཀཱརམྨཎཏམྤི སནྡྷཱཡ ཀཱམཱཝཙརཀུསལཱདཱིནཾ ནཝཏྟབྦཱརམྨཎཏཱཡ ཝུཏྟཏྟཱ ཨིདྷཱཔི ཏེསཾ ནཝཏྟབྦཱརམྨཎབྷཱཝཾ དཱིཔེཏཱིཏི ཀཏྭཱ ཏསྨིཾ ཝུཏྟེ ཏཱནིཔི ཝུཏྟཱནེཝ ཧོནྟི, ཏསྨཱ ཝིསུཾ ན ཝུཏྟཱནཱི’’ཏི, ཏམཉྙེ ནཱནུཛཱནནྟི. ན ཧི ཨཱིདིསཾ ལེསཝཙནཾ ཨཊྛཀཐཱཀཎྜེ ཨཏྠི. ཡདི སིཡཱ, པརིཏྟཱརམྨཎཏྟིཀེ ཡེསཾ སམཱནཱརམྨཎཱནཾ པརིཏྟཱདིཨཱརམྨཎཏཱ ནཝཏྟབྦཏཱ ཙ ཝུཏྟཱ. པུན ཨཏཱིཏཱརམྨཎཏྟིཀེ ཏེསུ ཨེཀམེཝ ཝཏྭཱ ཨཉྙཾ ན ཝཏྟབྦཾ སིཡཱ. ཏཐཱ ཝེདནཱཏྟིཀེ སམཱནཝེདནཱནཾ ཡེསཾ སུཁཱཡ ཝེདནཱཡ སམྤཡུཏྟཏཱ ¶ ཝུཏྟཱ, ཏེསུ ཨེཀམེཝ པཱིཏིཏྟིཀེ སུཁསཧགཏནིདྡེསེ ཝཏྭཱ ཨཉྙཾ ན ཝཏྟབྦཾ སིཡཱ. ཨེཝཾ ཨུཔེཀྑཱསཧགཏནིདྡེསཱདཱིསུ ཡོཛེཏབྦཾ. ལེསེན པན ཝིནཱ ཨཊྛཀཐཱཀཎྜེ ཨཏྠུདྡྷཱརསྶ ཀཏཏྟཱ ཨཱཀིཉྩཉྙཱཡཏནསྶ ཝིཡ ཀཱམཱཝཙརཀུསལཱདཱིནམྤི ཨཛ྄ཛྷཏྟཱརམྨཎཏྟིཀེ ནཝཏྟབྦཏཱཡ སཏི ཏཱནིཔི ནཝཏྟབྦཱནཱིཏི ཝཏྟབྦཱནི, ན པན ཝུཏྟཱནི. ཏསྨཱ ཨབྷཱཝནཱསཱམཉྙེཔི ཡཱཡ ཨབྷཱཝནཱནིཊྛཔྤཝཏྟིཡཱ ཨཱཀིཉྩཉྙཱཡཏནཾ པཝཏྟམཱནཾ ནཝཏྟབྦཾ ཛཱཏཾ, ཏསྶཱ པཝཏྟིཡཱ ཨབྷཱཝེན ཏཱནི ནཝཏྟབྦཱནཱིཏི ན ཝུཏྟཱནི. གཧཎཝིསེསནིམྨིཏཱནེཝ ཧི ཀསིཎཱདཱིནི སབྷཱཝཏོ ཨཝིཛྫམཱནཱནཱིཏི ཏདཱརམྨཎཱནཾ བཧིདྡྷཱགཧཎཝསེན བཧིདྡྷཱརམྨཎཏཱ ཝུཏྟཱ. ཨཱཀིཉྩཉྙཱཡཏནཾ པན ན བཧིདྡྷཱགཧཎབྷཱཝེན པཝཏྟཏི, ནཱཔི ཨཛ྄ཛྷཏྟགྒཧཎབྷཱཝེན པཝཏྟཏཱིཏི ནཝཏྟབྦནྟི ཝུཏྟཾ. ཡེན པན གཧཎཱཀཱརེན ཨཱཀིཉྩཉྙཱཡཏནཾ པཝཏྟཏི, ན ཏེན སབྦཉྙུཏཉྙཱཎམྤི པཝཏྟཏི. ཡདི པཝཏྟེཡྻ, ཏམྤི ཨཱཀིཉྩཉྙཱཡཏནམེཝ བྷཝེཡྻ. ཡཐཱ ཧི ཀིལེསཱནཾ གོཙརཾ པཝཏྟིཝིསེསཉྩ སབྦཾ ཛཱནནྟཾ སབྦཉྙུཏཉྙཱཎཾ ན ཡཐཱ ཏེ གཎྷནྟི, ཏཐཱ གཎྷཱཏི ཏསྶཔི ཀིལེསབྷཱཝཱཔཏྟིཏོ, ཨེཝཾ ཨཱཀིཉྩཉྙཱཡཏནསྶ ཙ པཝཏྟནཱཀཱརཾ ཡཐཱསབྷཱཝཏོ ཛཱནནྟཾ ཏཾ ཨཱཀིཉྩཉྙཱཡཏནམིཝ ན གཎྷཱཏི ¶ , ཀིམངྒཾ པན ཨཉྙནྟི. ཏེན ཀཱམཱཝཙརཀུསལཱནཾ ནཝཏྟབྦཏཱ ན ཝུཏྟཱཏི. ཨཡཾ ‘‘ཨཱཀིཉྩཉྙཱཡཏནསྶ ཝིསཡབྷཱུཏོ ཨཔགམོ ནཱམ ཨེཀོ ཨཏྠོ ཨཏྠཱི’’ཏི ཨནིཙྪནྟཱནཾ ཨཱཙརིཡཱནཾ ཝིནིཙྪཡོ.

ཝིཔཱཀཾ པན ན ཀསྶཙི ཨཱརམྨཎཾ ཧོཏཱིཏི ཝིཔཱཀཾ ཨཱཀཱསཱནཉྩཱཡཏནཾ ཝིཔཱཀཱདཱིསུ ཝིཉྙཱཎཉྩཱཡཏནེསུ ན ཀསྶཙི ཨཱརམྨཎཾ ཧོཏཱིཏི ཨཏྠོ, ཏཐཱ ཨཱཀིཉྩཉྙཱཡཏནཉྩ ནེཝསཉྙཱནཱསཉྙཱཡཏནསྶ. ཡཐཱ ཧི ཝིཔཱཀཏྟིཀེ ཝིཔཱཀདྷམྨདྷམྨནེཝཝིཔཱཀནཝིཔཱཀདྷམྨདྷམྨམཱུལཀེསུ པཉྷེསུ ‘‘ཨཱཀཱསཱནཉྩཱཡཏནཀུསལཾ ཝིཉྙཱཎཉྩཱཡཏནཀུསལསྶ ཨཱརམྨཎཔཙྩཡེན པཙྩཡོ, ཨཱཀིཉྩཉྙཱཡཏནཀུསལཾ ནེཝསཉྙཱནཱསཉྙཱཡཏནཀུསལསྶ, ཏཐཱ ཝིཔཱཀསྶ ཀིརིཡསྶ. ཨཱཀཱསཱནཉྩཱཡཏནཀིརིཡཾ ཝིཉྙཱཎཉྩཱཡཏནཀིརིཡསྶ. ཨཱཀིཉྩཉྙཱཡཏནཀིརིཡཾ ནེཝསཉྙཱནཱསཉྙཱཡཏནཀིརིཡསྶ ཨཱརམྨཎཔཙྩཡེན པཙྩཡོ’’ཏི (པཊྛཱ. ༡.༡.༤༠༦, ༤༡༠) ཝུཏྟཾ, ན ¶ ཏཐཱ ཝིཔཱཀདྷམྨམཱུལཀེསུ ‘‘ཨཱཀཱསཱནཉྩཱཡཏནཨཱཀིཉྩཉྙཱཡཏནཝིཔཱཀཱ ཝིཉྙཱཎཉྩཱཡཏནནེཝསཉྙཱནཱསཉྙཱཡཏནཝིཔཱཀཀུསལཀིརིཡཱནཾ ཨཱརམྨཎཔཙྩཡེན པཙྩཡོ’’ཏི ཝུཏྟཱ. ཝིཔཱཀཏོ ཝུཊྛཧིཏྭཱ ཙིཏྟསྶ ཨབྷིནཱིཧཱརཱསམྦྷཝཏོཏི ཝིཔཱཀཾ ཨཱརམྨཎཾ ཀཏྭཱ ཨབྷིནཱིཧཱརཱསམྦྷཝཏོཏི ཨཏྠོ. ཝིཔཱཀསྶ ཧི ཨཱརམྨཎཾ ཀཏྭཱ ནཏྠི ཨབྷིནཱིཧཱརོཏི.

ཨཏྟནོ ཁནྡྷཱདཱིནཱིཏི ཨརཱུཔཀྑནྡྷེ ‘‘ཁནྡྷཱ’’ཏི གཧེཏྭཱ ཨཱདི-སདྡེན རཱུཔཾ གཎྷཱཏི. ཨཛ྄ཛྷཏྟཾ ཝཱ གཡ྄ཧམཱནཾ ཨཧནྟི པཉྙཏྟིཾ ཨཱདི-སདྡེན གཎྷཱཏི. ཨེས ནཡོ པརེསཾ ཁནྡྷཱདིགྒཧཎེ ཙ. པུན པཉྙཏྟིགྒཧཎེན ཀསིཎཝིཧཱརཱདིཨནིནྡྲིཡབདྡྷུཔཱདཱཡཔཉྙཏྟིམཱཧ. ཨཱདི-སདྡེན ཝཱ ཨཧཾ པརཾ པཎྞཏྟིགྒཧཎེ སབྦཾ ཨུཔཱདཱཡཔཉྙཏྟིཾ. ཀམྨཱདཱིསུ ཀམྨཾ ཨཛ྄ཛྷཏྟཾ, ཀམྨནིམིཏྟཾ ཨུབྷཡཾ, གཏིནིམིཏྟཾ བཧིདྡྷཱཏི དཊྛབྦཾ. ཨཏྟནོ སརཱིརེ ཨེཝ ཀིམི ཧུཏྭཱ ནིབྦཏྟམཱནསྶ གཏིནིམིཏྟམྤི ཨཛ྄ཛྷཏྟཾ སིཡཱ. མལླིཀཱཡ ཀུམྨཱསཾ དདམཱནཱཡ རཉྙོ ཨགྒམཧེསིཊྛཱནལཱབྷཾ, སནྟཏིམཧཱམཏྟསྶ ཧཏྠིཀྑནྡྷགཏསྶ ཨརཧཏྟཔྤཏྟིཾ, སུམནམཱལཱཀཱརསྶ ཙ པུཔྥམུཊྛིནཱ པཱུཛེནྟསྶ པཙྩེཀབོདྷིསཙྪིཀིརིཡཾ ནིསྶཱཡ བྷགཝཱ སིཏཾ པཱཏྭཱཀཱསི.

ཨིམསྨིཾ ཏིཀེ ཨོཀཱསཾ ལབྷནྟཱིཏི པརིཏྟཱརམྨཎཱཏཱིཏཱརམྨཎཏྟིཀེསུ ཨལདྡྷོཀཱསཱནི ནཝཏྟབྦཱནཱིཏི ཝུཏྟཱནི, ཨིདྷ པན ནཝཏྟབྦཱནི ན ཧོནྟི, ཨཛ྄ཛྷཏྟཱདཱིསུ ཨེཀཱརམྨཎཏཾ ལབྷནྟཱིཏི ཨཏྠོ. ཨེཏཱནི ཧི པཉྩ སབྦཏྠཔཱདཀཱཀཱསཱལོཀཀསིཎཙཏུཏྠཱནཾ ཀསིཎཱརམྨཎཏྟཱ, བྲཧྨཝིཧཱརཙཏུཏྠསྶ ¶ པཉྙཏྟིཨཱརམྨཎཏྟཱ, ཨཱནཱཔཱནཙཏུཏྠསྶ ནིམིཏྟཱརམྨཎཏྟཱ བཧིདྡྷཱརམྨཎཱནཱིཏི. སཀཱཡཙིཏྟཱནནྟི སཀཀཱཡཙིཏྟཱནཾ, ཏེན པཡོཛནཾ ནཏྠི, ཏསྨཱ ན ཏཾ ཨཛ྄ཛྷཏྟཱརམྨཎནྟི ཨཏྠོ. ཨནིནྡྲིཡབདྡྷསྶ ཝཱ རཱུཔསྶཱཏི ཨེཏྠ ‘‘ཏིསྶནྣཾ ཝཱ པཉྙཏྟཱིན’’ནྟི ཨིདམྤི ཝཱ-སདྡེན ཨཱཧརིཏབྦཾ, ནཡདསྶནཾ ཝཱ ཨེཏཾ དཊྛབྦཾ. ཨཱིདིསེ ཧི ཀཱལེ བཧིདྡྷཱརམྨཎནྟི.

ཏིཀཨཏྠུདྡྷཱརཝཎྞནཱ ནིཊྛིཏཱ.

དུཀཨཏྠུདྡྷཱརཝཎྞནཱ

༡༤༧༣. མཱནོ ¶ …པེ… ཨེཀདྷཱཝཱཏི ཨིདཾ ཨཝུཏྟཔྤཀཱརདསྶནཝསེན ཝུཏྟཾ, ཨཉྙཐཱ མཱནོ ཀཱམརཱགཱཝིཛྫཱསཉྙོཛནེཧི ཨེཀཏོ ཨུཔྤཛྫཏཱིཏི དྭིདྷཱཏི ཝཏྟབྦོ སིཡཱ. ཨེས ནཡོ བྷཝརཱགཱདཱིསུ. ཏཐཱ ཝིཙིཀིཙྪཱཏི ཨེཏྠ ཏཐཱཏི ཨེཏསྶ ཨེཀདྷཱཝཱཏི ཨཏྠོ.

༡༥༡༡. སསངྑཱརིཀེསཱུཏི ཨིདཾ ཀཱམཙྪནྡནཱིཝརཎསྶ ཏཱིཧི ནཱིཝརཎེཧི སདྡྷིཾ ཨུཔྤཛྫནཊྛཱནདསྶནམཏྟཾ དཊྛབྦཾ, ན ནིཡམཏོ ཏཏྠ ཏསྶ ཏེཧི ཨུཔྤཏྟིདསྶནཏྠཾ ཐིནམིདྡྷསྶ ཨནིཡཏཏྟཱ. ཧེཊྛིམཔརིཙྪེདེནཱཏི ཨུདྡྷཙྩསྶ སབྦཱཀུསལེ ཨུཔྤཛྫནཏོ ཨུདྡྷཙྩསཧགཏེ དྭེ, ཨཉྙེསུ ཐིནམིདྡྷཀུཀྐུཙྩཝིརཧེ ཏཱིཎི ཧེཊྛིམནྟཏོ ཨུཔྤཛྫནྟཱིཏི ཀཏྭཱ ‘‘དྭེ ཏཱིཎཱི’’ཏི ཝུཏྟནྟི ཨཏྠོ. ཡཏྟཀཱནཾ པན ཨེཀཏོ ཨུཔྤཏྟིཡཾ ནཱིཝརཎཱ ཙེཝ ནཱིཝརཎསམྤཡུཏྟཱ ཙཱཏི ཨཡམཏྠོ སམྦྷཝཏི, ཧེཊྛིམནྟེན ཏེསཾ དསྶནཏྠཾ ‘‘དྭེ’’ཏི ཝུཏྟཾ. ཏཏོ ཨུདྡྷམྤི པཝཏྟིཡཾ ཨཡམཏྠོ སམྦྷཝཏི ཨེཝཱཏི དསྶནཏྠཾ ‘‘ཏཱིཎཱི’’ཏི ཝུཏྟཾ. དྭེ ཏཱིཎཱིཏི ཙ དྭེ ཝཱ ཏཱིཎི ཝཱཏི ཨནིཡམནིདྡེསོཏི ཙཏྟཱརི ཝཱ པཉྩ ཝཱཏིཔི ཝིཉྙཱཡཏི. ཡཏྠ སཧུཔྤཏྟི, ཏཏྠ ནཱིཝརཎཱ ཙེཝ ནཱིཝརཎསམྤཡུཏྟཱ ཙ ཧོནྟཱིཏི ཨེཏསྶ ཝཱ ལཀྑཎསྶ དསྶནམེཏནྟི. ཡཏྠ ཙཏྟཱརི པཉྩ ཙ ཨུཔྤཛྫནྟི, ཏཏྠ ཙཱཡམཏྠོ སཱདྷིཏོ ཧོཏི. ཨེཝཉྩ ཀཏྭཱ ཀིལེསགོཙྪཀེ ཙ ‘‘དྭེ ཏཡོ’’ཏི ཝུཏྟཾ. ལཀྑཎདསྶནཝསེན ཧི ཀིལེསཱ ཙེཝ ཀིལེསསམྤཡུཏྟཱ ཙ ཝུཏྟཱ, ན སབྦེསཾ སམྦྷཝནྟཱནཾ སརཱུཔེན དསྶནཝསེནཱཏི.

ཡདི ¶ ཨུདྡྷཙྩཾ སབྦཱཀུསལེ ཨུཔྤཛྫཏི, ཀསྨཱ ཝུཏྟཾ ‘‘ཨུདྡྷཙྩནཱིཝརཎཾ ཨུདྡྷཙྩསཧགཏེ ཙིཏྟུཔྤཱདེ ཨུཔྤཛྫཏཱི’’ཏི? སུཏྟནྟེ ཝུཏྟེསུ པཉྩསུ ནཱིཝརཎེསུ ཨཉྙནཱིཝརཎརཧིཏསྶ ཨུདྡྷཙྩསྶ ཝིསཡཝིསེསདསྶནཏྠཾ. ཚཊྛཾ པན ནཱིཝརཎཾ ཨབྷིདྷམྨེ ཨིཏརེཧི སཧགཏནྟི ཏསྶ ཨཉྙནཱིཝརཎརཧིཏསྶ ན ཀོཙི ཝིསཡཝིསེསོ ཨཏྠི, ཨཏྟནཱ སཧགཏེཧི ཝིནཱ ཨུཔྤཛྫནཊྛཱནཱབྷཱཝཱ ཏདུཔལཀྑིཏསྶ ཙིཏྟུཔྤཱདསྶ ཨབྷཱཝཱ ཙ ནཏྠེཝ ཝིསཡཝིསེསོ, ཏསྨཱ ‘‘ཏཾ སབྦཱཀུསལེ ཨུཔྤཛྫཏཱི’’ཏི ཝུཏྟཾ. ཨུདྡྷཙྩསཧགཏོ པན ཝུཏྟཙིཏྟུཔྤཱདོ སེསདྷམྨཱནཾ ཨུདྡྷཙྩཱནུཝཏྟནབྷཱཝེན ཏདུཔལཀྑིཏོ ཨུདྡྷཙྩསྶ ཝིསཡཝིསེསོ, ཏསྨཱ སབྦཱཀུསལེ ཨུཔྤཛྫམཱནཾ ཨུདྡྷཙྩཾ སཱམཉྙེན ‘‘ཨུདྡྷཙྩནཱིཝརཎ’’ནྟི ¶ གཧེཏྭཱཔི ཏཾ ཨཏྟནོ ཝིསཡཝིསེསེན པཀཱསེཏུཾ ‘‘ཨུདྡྷཙྩསཧགཏེ ཙིཏྟུཔྤཱདེ ཨུཔྤཛྫཏཱི’’ཏི ཨཱཧ. ཨེཝཉྩ པཀཱསནཾ ཝིསཡཝིསེསེསུ ལོབྷདོམནསྶསཧགཏསསངྑཱརིཀཝིཙིཀིཙྪུདྡྷཙྩསཧགཏེསུ པཉྩ ནཱིཝརཎཱནི ཝཝཏྠཔེཏྭཱ ཏེསཾ བྱཱཔཀབྷཱཝེན ཚཊྛཾ པཀཱསེཏུཾ ཀཏནྟི ཝེདིཏབྦཾ.

ཀེཙི པན ‘‘ཨུདྡྷཙྩསཧགཏེཏི སཱམཉྙེན སབྦཾ ཨུདྡྷཙྩཾ ‘ཨུདྡྷཙྩ’ནྟི གཧེཏྭཱ ཏེན སཧགཏེ ཙིཏྟུཔྤཱདེ’’ཏི ཝདནྟི, ཨཡཾ པནཏྠོ ན བཧུམཏོ དྭཱདསམཙིཏྟུཔྤཱདསྶ ཝིཡ སབྦཱཀུསལཙིཏྟུཔྤཱདཱནཾ ཨུདྡྷཙྩེན ཨནུཔལཀྑིཏཏྟཱ, སཏི ཙ ཨུཔལཀྑིཏཏྟེ ‘‘ཨཊྛསུ ལོབྷསཧགཏེསཱུ’’ཏིཨཱདཱིསུ ཝིཡ ཨཉྙེསཾ ཙིཏྟུཔྤཱདཱནཾ ནིཝཏྟནཏྠཾ ‘‘དྭཱདསསུ ཨུདྡྷཙྩསཧགཏེསཱུ’’ཏི ཝཏྟབྦཏྟཱ. ཨུདྡྷཙྩཱནུཔལཀྑིཏཏྟཱ པན སབྦཱཀུསལཱནཾ ཨཝིཛྫཱནཱིཝརཎཾ ཝིཡ ཨིདམྤི ‘‘སབྦཱཀུསལེསུ ཨུཔྤཛྫཏཱི’’ཏི ཝཏྟབྦཾ སིཡཱ, ན པན ཝུཏྟཾ, ཏསྨཱ ཝུཏྟནཡེནེཝ ཨཏྠོ ཝེདིཏབྦོ. ཡསྨཱ ཙ ཨཝིཛྫཱནཱིཝརཎཾ ཝིཡ ཨུདྡྷཙྩནཱིཝརཎཉྩ སབྦཱཀུསལེསུ ཨུཔྤཛྫཏི, ཏསྨཱ ནིཀྑེཔཀཎྜེ ‘‘ཀཱམཙྪནྡནཱིཝརཎཾ ཨུདྡྷཙྩནཱིཝརཎེན ནཱིཝརཎཉྩེཝ ནཱིཝརཎསམྤཡུཏྟཉྩཱ’’ཏིཨཱདི ཝུཏྟཾ. ཏེན ཨེཀསྨིཾཡེཝ ཙིཏྟུཔྤཱདེ ཨུདྡྷཙྩནཱིཝརཎཾ ཨུཔྤཛྫཏཱིཏི ཨགྒཧེཏྭཱ ཨདྷིཔྤཱཡོ མགྒིཏབྦོཏི.

ཀིལེསགོཙྪཀེ ལོབྷཱདཱིནི དས ཀིལེསཝཏྠཱུནི ཨིམིནཱ ཨནུཀྐམེན ཨིདྷེཝ ཨབྷིདྷམྨེ ཨཱགཏཱནི. ཏསྨཱ ཨིདྷེཝ ཝུཏྟསྶ ཨུདྡྷཙྩཀིལེསསྶ ཨཏྟནཱ སཧ ཝུཏྟེཧི ཀིལེསེཧི རཧིཏསྶ ཝིསཡཝིསེསོ ནཏྠཱིཏི ཝིསཡཝིསེསེན པཀཱསནཾ ཨཀཏྭཱ ‘‘ཨུདྡྷཙྩཉྩ ཨཧིརིཀཉྩ ཨནོཏྟཔྤཉྩ སབྦཱཀུསལེསུ ཨུཔྤཛྫཏཱི’’ཏི ཝུཏྟཾ. ཀིལེསཱ ཙེཝ སཾཀིལིཊྛཔདནིདྡེསེ ཡསྨཱ སཾཀིལིཊྛཔདཾ ཀིལེསསམྤཡུཏྟཔདེན ཨསམཱནཏྠཾ ཀེཝལཾ མལེན ཨུཔཏཱཔིཏཏཾ ཝིབཱདྷིཏཏཉྩ དཱིཔེཏི ¶ , ཏསྨཱ ཀིལེསཱ ཙེཝ ཀིལེསསམྤཡུཏྟཔདནིདྡེསེན སམཱནཾ ནིདྡེསཾ ཨཀཏྭཱ ‘‘ཏེཝ ཀིལེསཱ ཀིལེསཱ ཙེཝ སཾཀིལིཊྛཱ ཙཱ’’ཏི ཝུཏྟཾ.

༡༥༧༧. དྭེ ཏཡོ ཀིལེསཱཏི ཨེཏྠ ‘‘དྭེ ཏཡོཏི ཧེཏུགོཙྪཀཱདཱིསུ ཝུཏྟཱདྷིཀཱརཝསེན རུལ༹ྷིཡཱ ཝུཏྟ’’ནྟི ཀེཙི ཝདནྟི. ཡདི ཨཏྠཾ ཨནཔེཀྑིཏྭཱ རུལ༹ྷིཡཱ ཝུཙྩེཡྻ, གནྠགོཙྪཀེ ཙ ‘‘ཡཏྠ དྭེ ཏཡོ གནྠཱ ¶ ཨེཀཏོ ཨུཔྤཛྫནྟཱི’’ཏི ཝཏྟབྦཾ སིཡཱ. ཡཉྩ ཝདནྟི ‘‘ཡཏྠ དྭེ ཏཡོ ཨཉྙེཧི ཨེཀཏོ ཨུཔྤཛྫནྟཱིཏི ཨིམསྶཏྠསྶ སམྦྷཝཏོ ཨེཀཏོ-སདྡོ ཀིལེསགོཙྪཀེ སཱཏྠཀོ, ན ཧེཏུགོཙྪཀཱདཱིསུ ཏེན ཝིནཱཔི ཨདྷིཔྤཱཡཝིཛཱནནཏོ’’ཏི, ཏམྤི ན, ཧེཏུགོཙྪཀཱདཱིསུཔི ནཱནཱཨུཔྤཏྟིཡཾ ཧེཏཱུ ཙེཝ ཧེཏུསམྤཡུཏྟཱདིགྒཧཎནིཝཱརཎཏྠཏྟཱ ཨེཀཏོ-སདྡསྶ, ཏསྨཱ རུལ༹ྷཱིཨནྭཏྠཀཐཱརོཔནཉྩ ཝཛྫེཏྭཱ ཡཐཱཝུཏྟེནེཝ ནཡེན ཨཏྠོ ཝེདིཏབྦོཏི. ལོབྷོ ཚདྷཱཏིཨཱདིནཱ ལོབྷཔཊིགྷམོཧཱནཾ ཨཉྙེཧི ཨེཀཏོ ཨུཔྤཏྟིདསྶནེནེཝ ཏེསམྤི ལོབྷཱདཱིཧི ཨེཀཏོ ཨུཔྤཏྟི དསྶིཏཱཏི ཝེདིཏབྦཱ. སེསཾ ཨུཏྟཱནཏྠམེཝཱཏི.

ཨཊྛཀཐཱཀཎྜཝཎྞནཱ ནིཊྛིཏཱ.

ཙཏྟཱརི ཙ སཧསྶཱནི, པུན ཏཱིཎི སཏཱནི ཙ;

ཨཊྛསཱལིནིཡཱ ཨེཏེ, པདཱ ལཱིནཏྠཛོཏཀཱ.

དྷམྨམིཏྟོཏི ནཱམེན, སཀྐཙྩཾ ཨབྷིཡཱཙིཏོ;

ཨཱནནྡོཨིཏི ནཱམེན, ཀཏཱ གནྠཱ སུབུདྡྷིནཱཏི.

ཨིཏི ཨཊྛསཱལིནིཡཱ ལཱིནཏྠཔདཝཎྞནཱ

དྷམྨསངྒཎཱི-མཱུལཊཱིཀཱ སམཏྟཱ.