📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཨབྷིདྷམྨཔིཊཀེ

སམྨོཧཝིནོདནཱི ནཱམ

ཝིབྷངྒ-ཨཊྛཀཐཱ

༡. ཁནྡྷཝིབྷངྒོ

༡. སུཏྟནྟབྷཱཛནཱིཡཝཎྞནཱ

ཙཏུསཙྩདསོ ¶ ¶ ¶ ནཱཐོ, ཙཏུདྷཱ དྷམྨསངྒཎིཾ;

པཀཱསཡིཏྭཱ སམྦུདྡྷོ, ཏསྶེཝ སམནནྟརཾ.

ཨུཔེཏོ བུདྡྷདྷམྨེཧི, ཨཊྛཱརསཧི ནཱཡཀོ;

ཨཊྛཱརསནྣཾ ཁནྡྷཱདི-ཝིབྷངྒཱནཾ ཝསེན ཡཾ.

ཝིབྷངྒཾ ¶ དེསཡཱི སཏྠཱ, ཏསྶ སཾཝཎྞནཱཀྐམོ;

ཨིདཱནི ཡསྨཱ སམྤཏྟོ, ཏསྨཱ ཏསྶཏྠཝཎྞནཾ.

ཀརིསྶཱམི ཝིགཱཧེཏྭཱ, པོརཱཎཊྛཀཐཱནཡཾ;

སདྡྷམྨེ གཱརཝཾ ཀཏྭཱ, ཏཾ སུཎཱཐ སམཱཧིཏཱཏི.

༡. པཉྩཀྑནྡྷཱ – རཱུཔཀྑནྡྷོ…པེ… ཝིཉྙཱཎཀྑནྡྷོཏི ཨིདཾ ཝིབྷངྒཔྤཀརཎསྶ ཨཱདིབྷཱུཏེ ཁནྡྷཝིབྷངྒེ སུཏྟནྟབྷཱཛནཱིཡཾ ནཱམ. ཏཏྠ པཉྩཱཏི གཎནཔརིཙྪེདོ. ཏེན ན ཏཏོ ཧེཊྛཱ ན ཨུདྡྷནྟི དསྶེཏི. ཁནྡྷཱཏི པརིཙྪིནྣདྷམྨནིདསྶནཾ. ཏཏྲཱཡཾ ཁནྡྷ-སདྡོ སམྦཧུལེསུ ཋཱནེསུ དིསྶཏི – རཱསིམྷི, གུཎེ, པཎྞཏྟིཡཾ, རུལ༹ྷིཡནྟི. ‘‘སེཡྻཐཱཔི, བྷིཀྑཝེ, མཧཱསམུདྡེ ན སུཀརཾ ཨུདཀསྶ པམཱཎཾ གཧེཏུཾ – ཨེཏྟཀཱནི ཨུདཀཱལ༹ྷཀཱནཱིཏི ཝཱ ཨེཏྟཀཱནི ཨུདཀཱལ༹ྷཀསཏཱནཱིཏི ཝཱ ཨེཏྟཀཱནི ཨུདཀཱལ༹ྷཀསཧསྶཱནཱིཏི ཝཱ ཨེཏྟཀཱནི ཨུདཀཱལ༹ྷཀསཏསཧསྶཱནཱིཏི ཝཱ, ཨཐ ཁོ ཨསངྑྱེཡྻོ ཨཔྤམེཡྻོ མཧཱཨུདཀཀྑནྡྷོཏྭེཝ ¶ སངྑྱཾ ¶ གཙྪཏཱི’’ཏིཨཱདཱིསུ (ཨ. ནི. ༤.༥༡; ༦.༣༧) ཧི རཱསིཏོ ཁནྡྷོ ནཱམ. ནཧི པརིཏྟཀཾ ཨུདཀཾ ཨུདཀཀྑནྡྷོཏི ཝུཙྩཏི, བཧུཀམེཝ ཝུཙྩཏི. ཏཐཱ ན པརིཏྟཀོ རཛོ རཛཀྑནྡྷོ, ན ཨཔྤམཏྟཀཱ གཱཝོ གཝཀྑནྡྷོ, ན ཨཔྤམཏྟཀཾ བལཾ བལཀྑནྡྷོ, ན ཨཔྤམཏྟཀཾ པུཉྙཾ པུཉྙཀྑནྡྷོཏི ཝུཙྩཏི. བཧུཀམེཝ ཧི རཛོ རཛཀྑནྡྷོ, བཧུཀཱཝ གཝཱདཡོ གཝཀྑནྡྷོ, བལཀྑནྡྷོ, པུཉྙཀྑནྡྷོཏི ཝུཙྩནྟི. ‘‘སཱིལཀྑནྡྷོ སམཱདྷིཀྑནྡྷོ’’ཏིཨཱདཱིསུ (དཱི. ནི. ༣.༣༥༥) པན གུཎཏོ ཁནྡྷོ ནཱམ. ‘‘ཨདྡསཱ ཁོ བྷགཝཱ མཧནྟཾ དཱརུཀྑནྡྷཾ གངྒཱཡ ནདིཡཱ སོཏེན ཝུཡ྄ཧམཱན’’ནྟི (སཾ. ནི. ༤.༢༤༡). ཨེཏྠ པཎྞཏྟིཏོ ཁནྡྷོ ནཱམ. ‘‘ཡཾ ཙིཏྟཾ མནོ མཱནསཾ…པེ… ཝིཉྙཱཎཾ ཝིཉྙཱཎཀྑནྡྷོ’’ཏིཨཱདཱིསུ (དྷ. ས. ༦༣, ༦༥) རུལ༹ྷིཏོ ཁནྡྷོ ནཱམ. སྭཱཡམིདྷ རཱསིཏོ ཨདྷིཔྤེཏོ. ཨཡཉྷི ཁནྡྷཊྛོ ནཱམ པིཎྜཊྛོ པཱུགཊྛོ གྷཊཊྛོ རཱསཊྛོ. ཏསྨཱ ‘རཱསིལཀྑཎཱ ཁནྡྷཱ’ཏི ཝེདིཏབྦཱ. ཀོཊྛཱསཊྛོཏིཔི ཝཏྟུཾ ཝཊྚཏི; ལོཀསྨིཉྷི ཨིཎཾ གཧེཏྭཱ ཙོདིཡམཱནཱ ‘དྭཱིཧི ཁནྡྷེཧི དསྶཱམ, ཏཱིཧི ཁནྡྷེཧི དསྶཱམཱ’ཏི ཝདནྟི. ཨིཏི ‘ཀོཊྛཱསལཀྑཎཱ ཁནྡྷཱ’ཏིཔི ཝཏྟུཾ ཝཊྚཏི. ཨེཝམེཏྠ རཱུཔཀྑནྡྷོཏི རཱུཔརཱསི རཱུཔཀོཊྛཱསོ, ཝེདནཱཀྑནྡྷོཏི ཝེདནཱརཱསི ཝེདནཱཀོཊྛཱསོཏི ཨིམིནཱ ནཡེན སཉྙཱཀྑནྡྷཱདཱིནཾ ཨཏྠོ ཝེདིཏབྦོ.

ཨེཏྟཱཝཏཱ ¶ སམྨཱསམྦུདྡྷོ ཡྭཱཡཾ ‘‘ཙཏྟཱརོ ཙ མཧཱབྷཱུཏཱ ཙཏུནྣཉྩ མཧཱབྷཱུཏཱནཾ ཨུཔཱདཱཡརཱུཔ’’ནྟི ཨཏཱིཏཱནཱགཏཔཙྩུཔྤནྣཱདཱིསུ ཨེཀཱདསསུ ཨོཀཱསེསུ ཝིབྷཏྟོ ‘པཉྩཝཱིསཏི རཱུཔཀོཊྛཱསཱ’ཏི ཙ ‘ཚནྣཝུཏི རཱུཔཀོཊྛཱསཱ’ཏི ཙ ཨེཝཾཔབྷེདོ རཱུཔརཱསི, ཏཾ སབྦཾ པརིཔིཎྜེཏྭཱ རཱུཔཀྑནྡྷོ ནཱམཱཏི དསྶེསི. ཡོ པནཱཡཾ ‘‘སུཁཱ ཝེདནཱ, དུཀྑཱ ཝེདནཱ, ཨདུཀྑམསུཁཱ ཝེདནཱ’’ཏི ཏེསུཡེཝ ཨེཀཱདསསུ ཨོཀཱསེསུ ཝིབྷཏྟོ ཙཏུབྷཱུམིཀཝེདནཱརཱསི, ཏཾ སབྦཾ པརིཔིཎྜེཏྭཱ ཝེདནཱཀྑནྡྷོ ནཱམཱཏི དསྶེསི. ཡོ པནཱཡཾ ‘‘ཙཀྑུསམྥསྶཛཱ སཉྙཱ…པེ… མནོསམྥསྶཛཱ སཉྙཱ’’ཏི ཏེསུཡེཝ ཨེཀཱདསསུ ཨོཀཱསེསུ ཝིབྷཏྟོ ཙཏུབྷཱུམིཀསཉྙཱརཱསི ¶ , ཏཾ སབྦཾ པརིཔིཎྜེཏྭཱ སཉྙཱཀྑནྡྷོ ནཱམཱཏི དསྶེསི. ཡོ པནཱཡཾ ‘‘ཙཀྑུསམྥསྶཛཱ ཙེཏནཱ…པེ… མནོསམྥསྶཛཱ ཙེཏནཱ’’ཏི ཏེསུཡེཝ ཨེཀཱདསསུ ཨོཀཱསེསུ ཝིབྷཏྟོ ཙཏུབྷཱུམིཀཙེཏནཱརཱསི, ཏཾ སབྦཾ པརིཔིཎྜེཏྭཱ སངྑཱརཀྑནྡྷོ ནཱམཱཏི དསྶེསི. ཡོ ¶ པནཱཡཾ ‘‘ཙཀྑུཝིཉྙཱཎཾ, སོཏགྷཱནཛིཝ྄ཧཱཀཱཡཝིཉྙཱཎཾ, མནོདྷཱཏུ, མནོཝིཉྙཱཎདྷཱཏཱུ’’ཏི ཏེསུཡེཝ ཨེཀཱདསསུ ཨོཀཱསེསུ ཝིབྷཏྟོ ཙཏུབྷཱུམིཀཙིཏྟརཱསི, ཏཾ སབྦཾ པརིཔིཎྜེཏྭཱ ཝིཉྙཱཎཀྑནྡྷོ ནཱམཱཏི དསྶེསི.

ཨཔིཙེཏྠ སབྦམྤི ཙཏུསམུཊྛཱནིཀཾ རཱུཔཾ རཱུཔཀྑནྡྷོ, ཀཱམཱཝཙརཨཊྛཀུསལཙིཏྟཱདཱིཧི ཨེཀཱུནནཝུཏིཙིཏྟེཧི སཧཛཱཏཱ ཝེདནཱ ཝེདནཱཀྑནྡྷོ, སཉྙཱ སཉྙཱཀྑནྡྷོ, ཕསྶཱདཡོ དྷམྨཱ སངྑཱརཀྑནྡྷོ, ཨེཀཱུནནཝུཏི ཙིཏྟཱནི ཝིཉྙཱཎཀྑནྡྷོཏི. ཨེཝམྤི པཉྩསུ ཁནྡྷེསུ དྷམྨཔརིཙྪེདོ ཝེདིཏབྦོ.

༡. རཱུཔཀྑནྡྷནིདྡེསོ

༢. ཨིདཱནི ཏེ རཱུཔཀྑནྡྷཱདཡོ ཝིབྷཛིཏྭཱ དསྶེཏུཾ ཏཏྠ ཀཏམོ རཱུཔཀྑནྡྷོཏིཨཱདིམཱཧ. ཏཏྠ ཏཏྠཱཏི ཏེསུ པཉྩསུ ཁནྡྷེསུ. ཀཏམོཏི ཀཐེཏུཀམྱཏཱཔུཙྪཱ. རཱུཔཀྑནྡྷོཏི པུཙྪིཏདྷམྨནིདསྶནཾ. ཨིདཱནི ཏཾ ཝིབྷཛནྟོ ཡཾ ཀིཉྩི རཱུཔནྟིཨཱདིམཱཧ. ཏཏྠ ཡཾ ཀིཉྩཱིཏི ཨནཝསེསཔརིཡཱདཱནཾ. རཱུཔནྟི ཨཏིཔྤསངྒནིཡམནཾ. ཨེཝཾ པདདྭཡེནཱཔི རཱུཔསྶ ཨནཝསེསཔརིགྒཧོ ཀཏོ ཧོཏི.

ཏཏྠ ཀེནཊྛེན རཱུཔནྟི? རུཔྤནཊྛེན རཱུཔཾ. ཝུཏྟཉྷེཏཾ བྷགཝཏཱ –

‘‘ཀིཉྩ ¶ , བྷིཀྑཝེ, རཱུཔཾ ཝདེཐ? རུཔྤཏཱིཏི ¶ ཁོ, བྷིཀྑཝེ, ཏསྨཱ རཱུཔནྟི ཝུཙྩཏི. ཀེན རུཔྤཏི? སཱིཏེནཔི རུཔྤཏི, ཨུཎྷེནཔི རུཔྤཏི, ཛིགྷཙྪཱཡཔི རུཔྤཏི, པིཔཱསཱཡཔི རུཔྤཏི, ཌཾསམཀསཝཱཏཱཏཔསརིསཔསམྥསྶེནཔི རུཔྤཏི. རུཔྤཏཱིཏི ཁོ, བྷིཀྑཝེ, ཏསྨཱ རཱུཔནྟི ཝུཙྩཏཱི’’ཏི (སཾ. ནི. ༣.༧༩).

ཏཏྠ ཀིནྟི ཀཱརཎཔུཙྪཱ; ཀེན ཀཱརཎེན རཱུཔཾ ཝདེཐ, ཀེན ཀཱརཎེན ཏཾ རཱུཔཾ ནཱམཱཏི ཨཏྠོ. རུཔྤཏཱིཏི ཨེཏྠ ཨིཏཱིཏི ཀཱརཎུདྡེསོ. ཡསྨཱ རུཔྤཏི ཏསྨཱ རཱུཔནྟི ཝུཙྩཏཱིཏི ཨཏྠོ. རུཔྤཏཱིཏི ཀུཔྤཏི གྷཊྚཱིཡཏི པཱིལི༹ཡཏི བྷིཛྫཏཱིཏི ཨཏྠོ. ཨེཝཾ ཨིམིནཱ ཨེཏྟཀེན ཋཱནེན རུཔྤནཊྛེན རཱུཔཾ ཝུཏྟཾ. རུཔྤནལཀྑཎེན རཱུཔནྟིཔི ཝཏྟུཾ ཝཊྚཏི. རུཔྤནལཀྑཎཉྷེཏཾ.

སཱིཏེནཔི ¶ རུཔྤཏཱིཏིཨཱདཱིསུ པན སཱིཏེན ཏཱཝ རུཔྤནཾ ལོཀནྟརིཀནིརཡེ པཱཀཊཾ. ཏིཎྞཾ ཏིཎྞཉྷི ཙཀྐཝཱལཱ༹ནཾ ཨནྟརེ ཨེཀེཀོ ལོཀནྟརིཀནིརཡོ ནཱམ ཧོཏི ཨཊྛཡོཛནསཧསྶཔྤམཱཎོ, ཡསྶ ནེཝ ཧེཊྛཱ པཐཝཱི ཨཏྠི, ན ཨུཔརི ཙནྡིམསཱུརིཡདཱིཔམཎིཨཱལོཀོ, ནིཙྩནྡྷཀཱརོ. ཏཏྠ ནིབྦཏྟསཏྟཱནཾ ཏིགཱཝུཏོ ཨཏྟབྷཱཝོ ཧོཏི. ཏེ ཝགྒུལིཡོ ཝིཡ པབྦཏཔཱདེ དཱིགྷཔུཐུལེཧི ནཁེཧི ལགྒིཏྭཱ ཨཝཾསིརཱ ཨོལམྦནྟི. ཡདཱ སཾསཔྤནྟཱ ཨཉྙམཉྙསྶ ཧཏྠཔཱསགཏཱ ཧོནྟི ཨཐ ‘བྷཀྑོ ནོ ལདྡྷོ’ཏི མཉྙམཱནཱ ཏཏྠ བྱཱཝཊཱ ཝིཔརིཝཏྟིཏྭཱ ལོཀསནྡྷཱརཀེ ཨུདཀེ པཏནྟི, སཱིཏཝཱཏེ པཧརནྟེཔི པཀྐམདྷུཀཕལཱནི ཝིཡ ཚིཛྫིཏྭཱ ཨུདཀེ པཏནྟི. པཏིཏམཏྟཱཝ ཨཙྩནྟཁཱརེན སཱིཏོདཀེན ཚིནྣཙམྨནྷཱརུམཾསཨཊྛཱིཧི བྷིཛྫམཱནེཧི ཏཏྟཏེལེ པཏིཏཔིཊྛཔིཎྜི ཝིཡ པཊཔཊཱཡམཱནཱ ཝིལཱིཡནྟི. ཨེཝཾ སཱིཏེན རུཔྤནཾ ལོཀནྟརིཀནིརཡེ པཱཀཊཾ. མཧིཾསཀརཊྛཱདཱིསུཔི ཧིམཔཱཏསཱིཏལེསུ པདེསེསུ ཨེཏཾ པཱཀཊམེཝ. ཏཏྠ ཧི སཏྟཱ སཱིཏེན བྷིནྣཙྪིནྣསརཱིརཱ ཛཱིཝིཏཀྑཡམྤི པཱཔུཎནྟི.

ཨུཎྷེན རུཔྤནཾ ཨཝཱིཙིམཧཱནིརཡེ པཱཀཊཾ. ཏཏྠ ཧི ཏཏྟཱཡ ལོཧཔཐཝིཡཱ ནིཔཛྫཱཔེཏྭཱ པཉྩཝིདྷབནྡྷནཱདིཀརཎཀཱལེ སཏྟཱ མཧཱདུཀྑཾ ཨནུབྷཝནྟི.

ཛིགྷཙྪཱཡ རུཔྤནཾ པེཏྟིཝིསཡེ ཙེཝ དུབྦྷིཀྑཀཱལེ ཙ ¶ པཱཀཊཾ. པེཏྟིཝིསཡསྨིཉྷི སཏྟཱ དྭེ ཏཱིཎི བུདྡྷནྟརཱནི ཀིཉྩིདེཝ ཨཱམིསཾ ཧཏྠེན གཧེཏྭཱ མུཁེ པཀྑིཔནྟཱ ནཱམ ན ཧོནྟི ¶ . ཨནྟོཨུདརཾ ཨཱདིཏྟསུསིརརུཀྑོ ཝིཡ ཧོཏི. དུབྦྷིཀྑེ ཀཉྫིཀམཏྟམྤི ཨལབྷིཏྭཱ མརཎཔྤཏྟཱནཾ པམཱཎཾ ནཱམ ནཏྠི.

པིཔཱསཱཡ རུཔྤནཾ ཀཱལཀཉྫིཀཱདཱིསུ པཱཀཊཾ. ཏཏྠ ཧི སཏྟཱ དྭེ ཏཱིཎི བུདྡྷནྟརཱནི ཧདཡཏེམནམཏྟཾ ཝཱ ཛིཝ྄ཧཱཏེམནམཏྟཾ ཝཱ ཨུདཀབིནྡུཾ ལདྡྷུཾ ན སཀྐོནྟི. ‘པཱནཱིཡཾ པིཝིསྶཱམཱ’ཏི ནདིཾ གཏཱནམྤི ནདཱི ཝཱལིཀཱཏལཾ སམྤཛྫཏི. མཧཱསམུདྡཾ པཀྑནྟཱནམྤི མཧཱསམུདྡོ པིཊྛིཔཱསཱཎོ ཧོཏི. ཏེ སུསྶནྟཱ བལཝདུཀྑཔཱིལི༹ཏཱ ཝིཙརནྟི.

ཨེཀོ ¶ ཀིར ཀཱལཀཉྫིཀཨསུརོ པིཔཱསཾ ཨདྷིཝཱསེཏུཾ ཨསཀྐོནྟོ ཡོཛནགམྦྷཱིརཝིཏྠཱརཾ མཧཱགངྒཾ ཨོཏརི. ཏསྶ གཏགཏཊྛཱནེ ཨུདཀཾ ཚིཛྫཏི, དྷཱུམོ ཨུགྒཙྪཏི, ཏཏྟེ པིཊྛིཔཱསཱཎེ ཙངྐམནཀཱལོ ཝིཡ ཧོཏི. ཏསྶ ཨུདཀསདྡཾ སུཏྭཱ ཨིཏོ ཙིཏོ ཙ ཝིཙརནྟསྶེཝ རཏྟི ཝིབྷཱཡི. ཨཐ ནཾ པཱཏོཝ བྷིཀྑཱཙཱརཾ གཙྪནྟཱ ཏིཾསམཏྟཱ པིཎྜཙཱརིཀབྷིཀྑཱུ དིསྭཱ – ‘‘ཀོ ནཱམ ཏྭཾ, སཔྤུརིསཱ’’ཏི པུཙྪིཾསུ. ‘‘པེཏོཧམསྨི, བྷནྟེ’’ཏི. ‘‘ཀིཾ པརིཡེསསཱི’’ཏི? ‘‘པཱནཱིཡཾ, བྷནྟེ’’ཏི. ‘‘ཨཡཾ གངྒཱ པརིཔུཎྞཱ, ཀིཾ ཏྭཾ ན པསྶསཱི’’ཏི? ‘‘ན ཨུཔཀཔྤཏི, བྷནྟེ’’ཏི. ‘‘ཏེན ཧི གངྒཱཔིཊྛེ ནིཔཛྫ, མུཁེ ཏེ པཱནཱིཡཾ ཨཱསིཉྩིསྶཱམཱ’’ཏི. སོ ཝཱལིཀཱཔུལི༹ནེ ཨུཏྟཱནོ ནིཔཛྫི. བྷིཀྑཱུ ཏིཾསམཏྟེ པཏྟེ ནཱིཧརིཏྭཱ ཨུདཀཾ ཨཱཧརིཏྭཱ ཨཱཧརིཏྭཱ ཏསྶ མུཁེ ཨཱསིཉྩིཾསུ. ཏེསཾ ཏཐཱ ཀརོནྟཱནཾཡེཝ ཝེལཱ ཨུཔཀཊྛཱ ཛཱཏཱ. ཏཏོ ‘‘བྷིཀྑཱཙཱརཀཱལོ ཨམྷཱཀཾ, སཔྤུརིས; ཀཙྩི ཏེ ཨསྶཱདམཏྟཱ ལདྡྷཱ’’ཏི ཨཱཧཾསུ. པེཏོ ‘‘སཙེ མེ, བྷནྟེ, ཏིཾསམཏྟཱནཾ ཨཡྻཱནཾ ཏིཾསམཏྟེཧི པཏྟེཧི ཨཱསིཏྟཨུདཀཏོ ཨཌྜྷཔསཏམཏྟམྤི པརགལགཏཾ, པེཏཏྟབྷཱཝཏོ མོཀྑོ མཱ ཧོཏཱུ’’ཏི ཨཱཧ. ཨེཝཾ པིཔཱསཱཡ རུཔྤནཾ པེཏྟིཝིསཡེ པཱཀཊཾ.

ཌཾསཱདཱིཧི རུཔྤནཾ ཌཾསམཀྑིཀཱདིསམྦབཧུལེསུ པདེསེསུ པཱཀཊཾ. ཨེཏྠ ཙ ཌཾསཱཏི པིངྒལམཀྑིཀཱ, མཀསཱཏི མཀསཱཝ ཝཱཏཱཏི ཀུཙྪིཝཱཏཔིཊྛིཝཱཏཱདིཝསེན ཝེདིཏབྦཱ. སརཱིརསྨིཉྷི ¶ ཝཱཏརོགོ ཨུཔྤཛྫིཏྭཱ ཧཏྠཔཱདཔིཊྛིཨཱདཱིནི བྷིནྡཏི, ཀཱཎཾ ཀརོཏི, ཁུཛྫཾ ཀརོཏི, པཱིཋསཔྤིཾ ཀརོཏི. ཨཱཏཔོཏི སཱུརིཡཱཏཔོ. ཏེན རུཔྤནཾ མརུཀནྟཱརཱདཱིསུ པཱཀཊཾ. ཨེཀཱ ཀིར ཨིཏྠཱི མརུཀནྟཱརེ རཏྟིཾ སཏྠཏོ ཨོཧཱིནཱ དིཝཱ སཱུརིཡེ ཨུགྒཙྪནྟེ ཝཱལིཀཱཡ ཏཔྤམཱནཱཡ པཱདེ ཋཔེཏུཾ ཨསཀྐོནྟཱི སཱིསཏོ པཙྪིཾ ཨོཏཱརེཏྭཱ ཨཀྐམི. ཀམེན པཙྪིཡཱ ཨུཎྷཱབྷིཏཏྟཱཡ ¶ ཋཱཏུཾ ཨསཀྐོནྟཱི ཏསྶཱ ཨུཔརི སཱཊཀཾ ཋཔེཏྭཱ ཨཀྐམི. ཏསྨིམྤི སནྟཏྟེ ཨངྐེན གཧིཏཾ པུཏྟཀཾ ཨདྷོམུཁཾ ནིཔཛྫཱཔེཏྭཱ ཀནྡནྟཾ ཀནྡནྟཾ ཨཀྐམིཏྭཱ སདྡྷིཾ ཏེན ཏསྨིཾཡེཝ ཋཱནེ ཨུཎྷཱབྷིཏཏྟཱ ཀཱལམཀཱསི.

སརཱིསཔཱཏི ཡེ ཀེཙི དཱིགྷཛཱཏིཀཱ སརནྟཱ གཙྪནྟི. ཏེསཾ སམྥསྶེན རུཔྤནཾ ཨཱསཱིཝིསདཊྛཱདཱིནཾ ཝསེན ཝེདིཏབྦཾ.

ཨིདཱནི ¶ ‘ཡཾ ཀིཉྩི རཱུཔ’ནྟི པདེན སཾགཧིཏཾ པཉྩཝཱིསཏིཀོཊྛཱསཚནྣཝུཏིཀོཊྛཱསཔྤབྷེདཾ སབྦམྤི རཱུཔཾ ཨཏཱིཏཱདིཀོཊྛཱསེསུ པཀྑིཔིཏྭཱ དསྶེཏུཾ ཨཏཱིཏཱནཱགཏཔཙྩུཔྤནྣནྟི ཨཱཧ. ཏཏོ པརཾ ཏདེཝ ཨཛ྄ཛྷཏྟདུཀཱདཱིསུ ཙཏཱུསུ དུཀེསུ པཀྑིཔིཏྭཱ དསྶེཏུཾ ཨཛ྄ཛྷཏྟཾ ཝཱ བཧིདྡྷཱ ཝཱཏིཨཱདི ཝུཏྟཾ. ཏཏོ པརཾ སབྦམྤེཏཾ ཨེཀཱདསསུ པདེསེསུ པརིཡཱདིཡིཏྭཱ དསྶིཏཾ རཱུཔཾ ཨེཀཏོ པིཎྜཾ ཀཏྭཱ དསྶེཏུཾ ཏདེཀཛ྄ཛྷནྟིཨཱདི ཝུཏྟཾ.

ཏཏྠ ཏདེཀཛ྄ཛྷནྟི ཏཾ ཨེཀཛ྄ཛྷཾ; ཨབྷིསཉྙཱུཧིཏྭཱཏི ཨབྷིསཾཧརིཏྭཱ; ཨབྷིསངྑིཔིཏྭཱཏི སངྑེཔཾ ཀཏྭཱ; ཨིདཾ ཝུཏྟཾ ཧོཏི – སབྦམྤེཏཾ ཝུཏྟཔྤཀཱརཾ རཱུཔཾ རུཔྤནལཀྑཎསངྑཱཏེ ཨེཀཝིདྷབྷཱཝེ པཉྙཱཡ རཱསིཾ ཀཏྭཱ རཱུཔཀྑནྡྷོ ནཱམཱཏི ཝུཙྩཏཱིཏི. ཨེཏེན སབྦམྤི རཱུཔཾ རུཔྤནལཀྑཎེ རཱསིབྷཱཝཱུཔགམནེན རཱུཔཀྑནྡྷོཏི དསྶིཏཾ ཧོཏི. ན ཧི རཱུཔཏོ ཨཉྙོ རཱུཔཀྑནྡྷོ ནཱམ ཨཏྠི. ཡཐཱ ཙ རཱུཔཾ, ཨེཝཾ ཝེདནཱདཡོཔི ཝེདཡིཏལཀྑཎཱདཱིསུ རཱསིབྷཱཝཱུཔགམནེན. ན ཧི ཝེདནཱདཱིཧི ཨཉྙེ ཝེདནཱཀྑནྡྷཱདཡོ ནཱམ ཨཏྠི.

༣. ཨིདཱནི ཨེཀེཀསྨིཾ ཨོཀཱསེ པཀྑིཏྟཾ རཱུཔཾ ཝིསུཾ ཝིསུཾ བྷཱཛེཏྭཱ དསྶེནྟོ ཏཏྠ ཀཏམཾ རཱུཔཾ ཨཏཱིཏནྟིཨཱདིམཱཧ. ཏཏྠ ཏཏྠཱཏི ཨེཀཱདསསུ ཨོཀཱསེསུ པཀྑིཔིཏྭཱ ཋཔིཏམཱཏིཀཱཡ བྷུམྨཾ. ཨིདཾ ཝུཏྟཾ ཧོཏི – ཨཏཱིཏཱནཱགཏཔཙྩུཔྤནྣནྟིཨཱདིནཱ ¶ ནཡེན ཋཔིཏཱཡ མཱཏིཀཱཡ ཡཾ ཨཏཱིཏཾ རཱུཔནྟི ཝུཏྟཾ, ཏཾ ཀཏམནྟི? ཨིམིནཱ ཨུཔཱཡེན སབྦཔུཙྪཱསུ ཨཏྠོ ཝེདིཏབྦོ. ཨཏཱིཏཾ ནིརུདྡྷནྟིཨཱདཱིནི པདཱནི ནིཀྑེཔཀཎྜསྶ ཨཏཱིཏཏྟིཀབྷཱཛནཱིཡཝཎྞནཱཡཾ (དྷ. ས. ཨཊྛ. ༡༠༤༤) ཝུཏྟཱནེཝ. ཙཏྟཱརོ ཙ མཧཱབྷཱུཏཱཏི ཨིདཾ ཨཏཱིཏནྟི ཝུཏྟརཱུཔསྶ སབྷཱཝདསྶནཾ. ཡཐཱ ཙེཏྠ ཨེཝཾ སབྦཏྠ ཨཏྠོ ཝེདིཏབྦོ. ཨིམིནཱ ཨིདཾ དསྶེཏི – ཨཏཱིཏརཱུཔམྤི བྷཱུཏཱནི ཙེཝ བྷཱུཏཱནི ཨུཔཱདཱཡ ནིབྦཏྟརཱུཔཉྩ, ཨནཱགཏམྤི…པེ… དཱུརསནྟིཀམྤི ¶ . ན ཧི བྷཱུཏེཧི ཙེཝ བྷཱུཏཱནི ཨུཔཱདཱཡ པཝཏྟརཱུཔཏོ ཙ ཨཉྙཾ རཱུཔཾ ནཱམ ཨཏྠཱིཏི.

ཨཔརོ ནཡོ – ཨཏཱིཏཾསེན སངྒཧིཏནྟི ཨཏཱིཏཀོཊྛཱསེནེཝ སངྒཧིཏཾ, ཨེཏྠེཝ གཎནཾ གཏཾ. ཀིནྟི? ཙཏྟཱརོ ཙ མཧཱབྷཱུཏཱ ཙཏུནྣཉྩ མཧཱབྷཱུཏཱནཾ ¶ ཨུཔཱདཱཡརཱུཔནྟི. ཨེཝཾ སབྦཏྠ ཨཏྠོ ཝེདིཏབྦོ. ཨནཱགཏཔཙྩུཔྤནྣནིདྡེསཔདཱནིཔི ཧེཊྛཱ ཝུཏྟཏྠཱནེཝ.

ཨིདཾ པན ཨཏཱིཏཱནཱགཏཔཙྩུཔྤནྣཾ ནཱམ སུཏྟནྟཔརིཡཱཡཏོ ཨབྷིདྷམྨནིདྡེསཏོཏི དུཝིདྷཾ. ཏཾ སུཏྟནྟཔརིཡཱཡེ བྷཝེན པརིཙྪིནྣཾ. པཊིསནྡྷིཏོ ཧི པཊྛཱཡ ཨཏཱིཏབྷཝེསུ ནིབྦཏྟཾ རཱུཔཾ, ཨནནྟརབྷཝེ ཝཱ ནིབྦཏྟཾ ཧོཏུ ཀཔྤཀོཊིསཏསཧསྶམཏྠཀེ ཝཱ, སབྦཾ ཨཏཱིཏམེཝ ནཱམ. ཙུཏིཏོ པཊྛཱཡ ཨནཱགཏབྷཝེསུ ནིབྦཏྟནཀརཱུཔཾ, ཨནནྟརབྷཝེ ཝཱ ནིབྦཏྟཾ ཧོཏུ ཀཔྤཀོཊིསཏསཧསྶམཏྠཀེ ཝཱ, སབྦཾ ཨནཱགཏམེཝ ནཱམ. ཙུཏིཔཊིསནྡྷིཨནནྟརེ པཝཏྟརཱུཔཾ པཙྩུཔྤནྣཾ ནཱམ. ཨབྷིདྷམྨནིདྡེསེ པན ཁཎེན པརིཙྪིནྣཾ. ཏཡོ ཧི རཱུཔསྶ ཁཎཱ – ཨུཔྤཱདོ, ཋིཏི, བྷངྒོཏི. ཨིམེ ཏཡོ ཁཎེ པཏྭཱ ནིརུདྡྷཾ རཱུཔཾ, སམནནྟརནིརུདྡྷཾ ཝཱ ཧོཏུ ཨཏཱིཏེ ཀཔྤཀོཊིསཏསཧསྶམཏྠཀེ ཝཱ, སབྦཾ ཨཏཱིཏམེཝ ནཱམ. ཏཡོ ཁཎེ ཨསམྤཏྟཾ རཱུཔཾ, ཨེཀཙིཏྟཀྑཎམཏྟེན ཝཱ ཨསམྤཏྟཾ ཧོཏུ ཨནཱགཏེ ཀཔྤཀོཊིསཏསཧསྶམཏྠཀེ ཝཱ, སབྦཾ ཨནཱགཏམེཝ ནཱམ. ཨིམེ ཏཡོ ཁཎེ སམྤཏྟཾ རཱུཔཾ པན པཙྩུཔྤནྣཾ ནཱམ. ཏཏྠ ཀིཉྩཱཔི ཨིདཾ སུཏྟནྟབྷཱཛནཱིཡཾ, ཨེཝཾ སནྟེཔི ཨབྷིདྷམྨནིདྡེསེནེཝ ཨཏཱིཏཱནཱགཏཔཙྩུཔྤནྣརཱུཔཾ ནིདྡིཊྛནྟི ¶ ཝེདིཏབྦཾ.

ཨཔརོ ནཡོ – ཨིདཉྷི རཱུཔཾ ཨདྡྷཱསནྟཏིསམཡཁཎཝསེན ཙཏུདྷཱ ཨཏཱིཏཾ ནཱམ ཧོཏི. ཏཐཱ ཨནཱགཏཔཙྩུཔྤནྣཾ. ཨདྡྷཱཝསེན ཏཱཝ ཨེཀསྶ ཨེཀསྨིཾ བྷཝེ པཊིསནྡྷིཏོ པུབྦེ ཨཏཱིཏཾ, ཙུཏིཏོ ཨུདྡྷཾ ཨནཱགཏཾ, ཨུབྷིནྣམནྟརེ པཙྩུཔྤནྣཾ. སནྟཏིཝསེན སབྷཱགཨེཀཨུཏུསམུཊྛཱནཾ ཨེཀཱཧཱརསམུཊྛཱནཉྩ པུབྦཱཔརིཡཝསེན པཝཏྟམཱནམྤི པཙྩུཔྤནྣཾ. ཏཏོ པུབྦེ ཝིསབྷཱགཨུཏུཨཱཧཱརསམུཊྛཱནཾ ཨཏཱིཏཾ, པཙྪཱ ཨནཱགཏཾ. ཙིཏྟཛཾ ཨེཀཝཱིཐིཨེཀཛཝནཨེཀསམཱཔཏྟིསམུཊྛཱནཾ པཙྩུཔྤནྣཾ. ཏཏོ པུབྦེ ཨཏཱིཏཾ, པཙྪཱ ཨནཱགཏཾ. ཀམྨསམུཊྛཱནསྶ པཱཊིཡེཀྐཾ སནྟཏིཝསེན ཨཏཱིཏཱདིབྷེདོ ནཏྠི. ཏེསཉྙེཝ པན ཨུཏུཨཱཧཱརཙིཏྟསམུཊྛཱནཱནཾ ཨུཔཏྠམྦྷཀཝསེན ཏསྶ ཨཏཱིཏཱདིབྷེདོ ཝེདིཏབྦོ. སམཡཝསེན ཨེཀམུཧུཏྟཔུབྦཎྷསཱཡནྷརཏྟིདིཝཱདཱིསུ སམཡེསུ སནྟཱནཝསེན ¶ པཝཏྟམཱནཾ ཏཾ ཏཾ སམཡཾ པཙྩུཔྤནྣཾ ནཱམ. ཏཏོ པུབྦེ ཨཏཱིཏཾ, པཙྪཱ ཨནཱགཏཾ. ཁཎཝསེན ཨུཔྤཱདཱདིཀྑཎཏྟཡཔརིཡཱཔནྣཾ ¶ པཙྩུཔྤནྣཾ ནཱམ. ཏཏོ པུབྦེ ཨཏཱིཏཾ, པཙྪཱ ཨནཱགཏཾ.

ཨཔིཙ ཨཏིཀྐཧེཏུཔཙྩཡཀིཙྩཾ ཨཏཱིཏཾ. ནིཊྛིཏཧེཏུཀིཙྩཾ ཨནིཊྛིཏཔཙྩཡཀིཙྩཾ པཙྩུཔྤནྣཾ. ཨུབྷཡཀིཙྩམསམྤཏྟཾ ཨནཱགཏཾ. སཀིཙྩཀྑཎེ ཝཱ པཙྩུཔྤནྣཾ. ཏཏོ པུབྦེ ཨཏཱིཏཾ, པཙྪཱ ཨནཱགཏཾ. ཨེཏྠ ཙ ཁཎཱདིཀཐཱཝ ནིཔྤརིཡཱཡཱ, སེསཱ སཔརིཡཱཡཱ. ཏཱསུ ནིཔྤརིཡཱཡཀཐཱ ཨིདྷ ཨདྷིཔྤེཏཱ. ཨཛ྄ཛྷཏྟདུཀསྶཱཔི ནིདྡེསཔདཱནི ཧེཊྛཱ ཨཛ྄ཛྷཏྟཏྟིཀནིདྡེསེ (དྷ. ས. ཨཊྛ. ༡༠༥༠) ཝུཏྟཏྠཱནེཝ. ཨོལཱ༹རིཀཱདཱིནི རཱུཔཀཎྜཝཎྞནཱཡཾ (དྷ. ས. ཨཊྛ. ༦༧༤) ཝུཏྟཏྠཱནེཝ.

༦. ཧཱིནདུཀནིདྡེསེ ཏེསཾ ཏེསཾ སཏྟཱནནྟི བཧཱུསུ སཏྟེསུ སཱམིཝཙནཾ. ཨཔརསྶཱཔི ཨཔརསྶཱཔཱིཏི ཧི ཝུཙྩམཱནེ དིཝསམྤི ཀཔྤསཏསཧསྶམྤི ཝདནྟོ ཨེཏྟཀམེཝ ཝདེཡྻ. ཨིཏི སཏྠཱ དྭཱིཧེཝ པདེཧི ཨནཝསེསེ སཏྟེ པརིཡཱདིཡནྟོ ‘ཏེསཾ ཏེསཾ སཏྟཱན’ནྟི ཨཱཧ. ཨེཏྟཀེན ཧི སབྦམྤི ཨཔརདཱིཔནཾ ¶ སིདྡྷཾ ཧོཏི. ཨུཉྙཱཏནྟི ཨཝམཏཾ. ཨཝཉྙཱཏནྟི ཝམྦྷེཏྭཱ ཉཱཏཾ. རཱུཔནྟིཔི ན ཝིདིཏཾ. ཧཱིལི༹ཏནྟི ཨགཧེཏབྦཊྛེན ཁིཏྟཾ ཚཌྜིཏཾ, ཛིགུཙྪིཏནྟིཔི ཝདནྟི. པརིབྷཱུཏནྟི ཀིམེཏེནཱཏི ཝཱཙཱཡ པརིབྷཝིཏཾ. ཨཙིཏྟཱིཀཏནྟི ན གརུཀཏཾ. ཧཱིནནྟི ལཱམཀཾ. ཧཱིནམཏནྟི ཧཱིནནྟི མཏཾ, ལཱམཀཾ ཀཏྭཱ ཉཱཏཾ. ཧཱིནསམྨཏནྟི ཧཱིནནྟི ལོཀེ སམྨཏཾ, ཧཱིནེཧི ཝཱ སམྨཏཾ, གཱུཐབྷཀྑེཧི གཱུཐོ ཝིཡ. ཨནིཊྛནྟི ཨཔྤིཡཾ, པཊིལཱབྷཏྠཱཡ ཝཱ ཨཔརིཡེསིཏཾ. སཙེཔི ནཾ ཀོཙི པརིཡེསེཡྻ, པརིཡེསཏུ. ཨེཏསྶ པན ཨཱརམྨཎསྶ ཨེཏདེཝ ནཱམཾ. ཨཀནྟནྟི ཨཀཱམིཏཾ, ནིསྶིརིཀཾ ཝཱ. ཨམནཱཔནྟི མནསྨིཾ ན ཨཔྤིཏཾ. ཏཱདིསཉྷི ཨཱརམྨཎཾ མནསྨིཾ ན ཨཔྤཱིཡཏི. ཨཐ ཝཱ མནཾ ཨཔྤཱཡཏི ཝཌྜྷེཏཱིཏི མནཱཔཾ, ན མནཱཔཾ ཨམནཱཔཾ.

ཨཔརོ ནཡོ – ཨནིཊྛཾ སམྤཏྟིཝིརཧཏོ. ཏཾ ཨེཀནྟེན ཀམྨསམུཊྛཱནེསུ ཨཀུསལཀམྨསམུཊྛཱནཾ. ཨཀནྟཾ སུཁསྶ ཨཧེཏུབྷཱཝཏོ. ཨམནཱཔཾ དུཀྑསྶ ཧེཏུབྷཱཝཏོ. རཱུཔཱ སདྡཱཏི ཨིདམསྶ སབྷཱཝདཱིཔནཾ. ཨིམསྨིཉྷི པདེ ཨཀུསལཀམྨཛཝསེན ཨནིཊྛཱ པཉྩ ཀཱམགུཎཱ ཝིབྷཏྟཱ. ཀུསལཀམྨཛཾ པན ཨནིཊྛཾ ནཱམ ནཏྠི, སབྦཾ ཨིཊྛམེཝ.

པཎཱིཏཔདནིདྡེསོ ¶ ཝུཏྟཔཊིཔཀྑནཡེན ཝེདིཏབྦོ. ཨིམསྨིཾ པན པདེ ཀུསལཀམྨཛཝསེན ཨིཊྛཱ པཉྩ ཀཱམགུཎཱ ཝིབྷཏྟཱ. ཀུསལཀམྨཛཉྷི ཨནིཊྛཾ ནཱམ ¶ ནཏྠི, སབྦཾ ཨིཊྛམེཝ. ཡཐཱ ཙ ཀམྨཛེསུ ཨེཝཾ ཨུཏུསམུཊྛཱནཱདཱིསུཔི ཨིཊྛཱནིཊྛཏཱ ཨཏྠི ཨེཝཱཏི ཨིམསྨིཾ དུཀེ ཨིཊྛཱནིཊྛཱརམྨཎཾ པཊིཝིབྷཏྟནྟི ཝེདིཏབྦཾ. ཨཡཾ ཏཱཝ ཨཱཙརིཡཱནཾ སམཱནཏྠཀཐཱ. ཝིཏཎྜཝཱདཱི པནཱཧ – ཨིཊྛཱནིཊྛཾ ནཱམ པཱཊིཡེཀྐཾ པཊིཝིབྷཏྟཾ ནཏྠི, ཏེསཾ ཏེསཾ རུཙིཝསེན ཀཐིཏཾ.

ཡཐཱཧ –

‘‘མནཱཔཔརིཡནྟཾ ཁྭཱཧཾ, མཧཱརཱཛ, པཉྩསུ ཀཱམགུཎེསུ ཨགྒནྟི ཝདཱམི. ཏེཝ, མཧཱརཱཛ, རཱུཔཱ ཨེཀཙྩསྶ མནཱཔཱ ཧོནྟི, ཨེཀཙྩསྶ ཨམནཱཔཱ ཧོནྟི. ཏེཝ, མཧཱརཱཛ, སདྡཱ, གནྡྷཱ, རསཱ, ཕོཊྛབྦཱ ཨེཀཙྩསྶ མནཱཔཱ ཧོནྟི, ཨེཀཙྩསྶ ཨམནཱཔཱ ཧོནྟཱི’’ཏི ¶ (སཾ. ནི. ༡.༡༢༣).

ཨེཝཾ ཡསྨཱ ཏེཡེཝ རཱུཔཱདཡོ ཨེཀོ ཨསྶཱདེཏི ཨབྷིནནྡཏི, ཏཏྠ ལོབྷཾ ཨུཔྤཱདེཏི. ཨེཀོ ཀུཛ྄ཛྷཏི པཊིཧཉྙཏི, ཏཏྠ དོསཾ ཨུཔྤཱདེཏི. ཨེཀསྶ ཨིཊྛཱ ཧོནྟི ཀནྟཱ མནཱཔཱ, ཨེཀསྶ ཨནིཊྛཱ ཨཀནྟཱ ཨམནཱཔཱ. ཨེཀོ ཙེཏེ ‘ཨིཊྛཱ ཀནྟཱ མནཱཔཱ’ཏི དཀྑིཎཏོ གཎྷཱཏི, ཨེཀོ ‘ཨནིཊྛཱ ཨཀནྟཱ ཨམནཱཔཱ’ཏི ཝཱམཏོ. ཏསྨཱ ཨིཊྛཱནིཊྛཾ ནཱམ པཱཊིཡེཀྐཾ པཊིཝིབྷཏྟཾ ནཱམ ནཏྠི. པཙྩནྟཝཱསཱིནཉྷི གཎྜུཔྤཱདཱཔི ཨིཊྛཱ ཧོནྟི ཀནྟཱ མནཱཔཱ, མཛ྄ཛྷིམདེསཝཱསཱིནཾ ཨཏིཛེགུཙྪཱ. ཏེསཉྩ མོརམཾསཱདཱིནི ཨིཊྛཱནི ཧོནྟི, ཨིཏརེསཾ ཏཱནི ཨཏིཛེགུཙྪཱནཱིཏི.

སོ ཝཏྟབྦོ – ‘‘ཀིཾ པན ཏྭཾ ཨིཊྛཱནིཊྛཱརམྨཎཾ པཱཊིཡེཀྐཾ པཊིཝིབྷཏྟཾ ནཱམ ནཏྠཱིཏི ཝདེསཱི’’ཏི? ‘‘ཨཱམ ནཏྠཱི’’ཏི ཝདཱམི. པུན ཏཐེཝ ཡཱཝཏཏིཡཾ པཏིཊྛཱཔེཏྭཱ པཉྷོ པུཙྪིཏབྦོ – ‘‘ནིབྦཱནཾ ནཱམ ཨིཊྛཾ ཨུདཱཧུ ཨནིཊྛ’’ནྟི? ཛཱནམཱནོ ‘‘ཨིཊྛ’’ནྟི ཝཀྑཏི. སཙེཔི ན ཝདེཡྻ, མཱ ཝདཏུ. ནིབྦཱནཾ པན ཨེཀནྟཨིཊྛམེཝ. ‘‘ནནུ ཨེཀོ ནིབྦཱནསྶ ཝཎྞེ ཀཐིཡམཱནེ ཀུཛ྄ཛྷིཏྭཱ – ‘ཏྭཾ ནིབྦཱནསྶ ཝཎྞཾ ཀཐེསི, ཀིཾ ཏཏྠ ཨནྣཔཱནམཱལཱགནྡྷཝིལེཔནསཡནཙྪཱདནསམིདྡྷཱ པཉྩ ཀཱམགུཎཱ ཨཏྠཱི’ཏི ཝཏྭཱ ‘ནཏྠཱི’ཏི ཝུཏྟེ ‘ཨལཾ ཏཝ ནིབྦཱནེནཱ’ཏི ནིབྦཱནསྶ ཝཎྞེ ཀཐིཡམཱནེ ཀུཛ྄ཛྷིཏྭཱ ཨུབྷོ ཀཎྞེ ཐཀེཏཱིཏི ཨིཊྛེཏཾ. ཨེཏསྶ པན ¶ ཝསེན ཏཝ ཝཱདེ ནིབྦཱནཾ ཨནིཊྛཾ ནཱམ ཧོཏི ¶ . ན པནེཏཾ ཨེཝཾ གཧེཏབྦཾ. ཨེསོ ཧི ཝིཔརཱིཏསཉྙཱཡ ཀཐེཏི. སཉྙཱཝིཔལླཱསེན ཙ ཏདེཝ ཨཱརམྨཎཾ ཨེཀསྶ ཨིཊྛཾ ཧོཏི, ཨེཀསྶ ཨནིཊྛཾ’’.

ཨིཊྛཱནིཊྛཱརམྨཎཾ པན པཱཊིཡེཀྐཾ ཝིབྷཏྟཾ ཨཏྠཱིཏི. ཀསྶ ཝསེན ཝིབྷཏྟནྟི? མཛ྄ཛྷིམཀསཏྟསྶ. ཨིདཉྷི ན ཨཏིཨིསྶརཱནཾ མཧཱསམྨཏམཧཱསུདསྶནདྷམྨཱསོཀཱདཱིནཾ ཝསེན ཝིབྷཏྟཾ. ཏེསཉྷི དིབྦཀཔྤམྤི ཨཱརམྨཎཾ ཨམནཱཔཾ ཨུཔཊྛཱཏི. ན ཨཏིདུགྒཏཱནཾ དུལླབྷནྣཔཱནཱནཾ ཝསེན ཝིབྷཏྟཾ. ཏེསཉྷི ཀཎཱཛཀབྷཏྟསིཏྠཱནིཔི པཱུཏིམཾསརསོཔི ཨཏིམདྷུརོ ཨམཏསདིསོ ཙ ཧོཏི. མཛ྄ཛྷིམཀཱནཾ པན ¶ གཎཀམཧཱམཏྟསེཊྛིཀུཊུམྦིཀཝཱཎིཛཱདཱིནཾ ཀཱལེན ཨིཊྛཾ ཀཱལེན ཨནིཊྛཾ ལབྷམཱནཱནཾ ཝསེན ཝིབྷཏྟཾ. ཨེཝརཱུཔཱ ཧི ཨིཊྛཱནིཊྛཾ པརིཙྪིནྡིཏུཾ སཀྐོནྟཱིཏི.

ཏིཔིཊཀཙཱུལ༹ནཱགཏྠེརོ པནཱཧ – ‘‘ཨིཊྛཱནིཊྛཾ ནཱམ ཝིཔཱཀཝསེནེཝ པརིཙྪིནྣཾ, ན ཛཝནཝསེན. ཛཝནཾ པན སཉྙཱཝིཔལླཱསཝསེན ཨིཊྛསྨིཾཡེཝ རཛྫཏི, ཨིཊྛསྨིཾཡེཝ དུསྶཏི; ཨནིཊྛསྨིཾཡེཝ རཛྫཏི, ཨནིཊྛསྨིཾཡེཝ དུསྶཏཱི’’ཏི. ཝིཔཱཀཝསེནེཝ པནེཏཾ ཨེཀནྟཏོ པརིཙྪིཛྫཏི. ན ཧི སཀྐཱ ཝིཔཱཀཙིཏྟཾ ཝཉྩེཏུཾ. སཙེ ཨཱརམྨཎཾ ཨིཊྛཾ ཧོཏི, ཀུསལཝིཔཱཀཾ ཨུཔྤཛྫཏི. སཙེ ཨནིཊྛཾ, ཨཀུསལཝིཔཱཀཾ ཨུཔྤཛྫཏི. ཀིཉྩཱཔི ཧི མིཙྪཱདིཊྛིཀཱ བུདྡྷཾ ཝཱ སངྒྷཾ ཝཱ མཧཱཙེཏིཡཱདཱིནི ཝཱ ཨུལཱ༹རཱནི ཨཱརམྨཎཱནི དིསྭཱ ཨཀྑཱིནི པིདཧནྟི, དོམནསྶཾ ཨཱཔཛྫནྟི, དྷམྨསདྡཾ སུཏྭཱ ཀཎྞེ ཐཀེནྟི, ཙཀྑུཝིཉྙཱཎསོཏཝིཉྙཱཎཱནི པན ནེསཾ ཀུསལཝིཔཱཀཱནེཝ ཧོནྟི.

ཀིཉྩཱཔི གཱུཐསཱུཀརཱདཡོ གཱུཐགནྡྷཾ གྷཱཡིཏྭཱ ‘ཁཱདིཏུཾ ལབྷིསྶཱམཱ’ཏི སོམནསྶཛཱཏཱ ཧོནྟི, གཱུཐདསྶནེ པན ཏེསཾ ཙཀྑུཝིཉྙཱཎཾ, ཏསྶ གནྡྷགྷཱཡནེ གྷཱནཝིཉྙཱཎཾ, རསསཱཡནེ ཛིཝ྄ཧཱཝིཉྙཱཎཉྩ ཨཀུསལཝིཔཱཀམེཝ ཧོཏི. བནྡྷིཏྭཱ ཝརསཡནེ སཡཱཔིཏསཱུཀརོ ཙ ཀིཉྩཱཔི ཝིརཝཏི, སཉྙཱཝིཔལླཱསེན པནསྶ ཛཝནསྨིཾཡེཝ དོམནསྶཾ ཨུཔྤཛྫཏི, ཀཱཡཝིཉྙཱཎཾ ཀུསལཝིཔཱཀམེཝ. ཀསྨཱ? ཨཱརམྨཎསྶ ཨིཊྛཏཱཡ.

ཨཔིཙ དྭཱརཝསེནཱཔི ཨིཊྛཱནིཊྛཏཱ ཝེདིཏབྦཱ. སུཁསམྥསྶཉྷི གཱུཐཀལལཾ ཙཀྑུདྭཱརགྷཱནདྭཱརེསུ ¶ ཨནིཊྛཾ, ཀཱཡདྭཱརེ ཨིཊྛཾ ཧོཏི. ཙཀྐཝཏྟིནོ མཎིརཏནེན ¶ པོཐིཡམཱནསྶ, སུཝཎྞསཱུལེ ཨུཏྟཱསིཏསྶ ཙ མཎིརཏནསུཝཎྞསཱུལཱནི ཙཀྑུདྭཱརེ ཨིཊྛཱནི ཧོནྟི, ཀཱཡདྭཱརེ ཨནིཊྛཱནི. ཀསྨཱ? མཧཱདུཀྑསྶ ཨུཔྤཱདནཏོ. ཨེཝཾ ཨིཊྛཱནིཊྛཾ ཨེཀནྟཏོ ཝིཔཱཀེནེཝ པརིཙྪིཛྫཏཱིཏི ཝེདིཏབྦཾ.

ཏཾ ཏཾ ཝཱ པནཱཏི ཨེཏྠ ན ཧེཊྛིམནཡོ ཨོལོཀེཏབྦོ. ན ཧི བྷགཝཱ སམྨུཏིམནཱཔཾ བྷིནྡཏི, པུགྒལམནཱཔཾ པན བྷིནྡཏི. ཏསྨཱ ཏཾཏཾཝཱཔནཝསེནེཝ ཨུཔཱདཱཡུཔཱདཱཡ ཧཱིནཔྤཎཱིཏཏཱ ཝེདིཏབྦཱ. ནེརཡིཀཱནཉྷི རཱུཔཾ ¶ ཀོཊིཔྤཏྟཾ ཧཱིནཾ ནཱམ; ཏཾ ཨུཔཱདཱཡ ཏིརཙྪཱནེསུ ནཱགསུཔཎྞཱནཾ རཱུཔཾ པཎཱིཏཾ ནཱམ. ཏེསཾ རཱུཔཾ ཧཱིནཾ; ཏཾ ཨུཔཱདཱཡ པེཏཱནཾ རཱུཔཾ པཎཱིཏཾ ནཱམ. ཏེསམྤི ཧཱིནཾ; ཏཾ ཨུཔཱདཱཡ ཛཱནཔདཱནཾ རཱུཔཾ པཎཱིཏཾ ནཱམ. ཏེསམྤི ཧཱིནཾ; ཏཾ ཨུཔཱདཱཡ གཱམབྷོཛཀཱནཾ རཱུཔཾ པཎཱིཏཾ ནཱམ. ཏེསམྤི ཧཱིནཾ; ཏཾ ཨུཔཱདཱཡ ཛནཔདསཱམིཀཱནཾ རཱུཔཾ པཎཱིཏཾ ནཱམ. ཏེསམྤི ཧཱིནཾ; ཏཾ ཨུཔཱདཱཡ པདེསརཱཛཱུནཾ རཱུཔཾ པཎཱིཏཾ ནཱམ. ཏེསམྤི ཧཱིནཾ; ཏཾ ཨུཔཱདཱཡ ཙཀྐཝཏྟིརཉྙོ རཱུཔཾ པཎཱིཏཾ ནཱམ. ཏསྶཱཔི ཧཱིནཾ; ཏཾ ཨུཔཱདཱཡ བྷུམྨདེཝཱནཾ རཱུཔཾ པཎཱིཏཾ ནཱམ. ཏེསམྤི ཧཱིནཾ; ཏཾ ཨུཔཱདཱཡ ཙཱཏུམཧཱརཱཛིཀཱནཾ དེཝཱནཾ རཱུཔཾ པཎཱིཏཾ ནཱམ. ཏེསམྤི ཧཱིནཾ; ཏཾ ཨུཔཱདཱཡ ཏཱཝཏིཾསཱནཾ དེཝཱནཾ རཱུཔཾ པཎཱིཏཾ ནཱམ…པེ… ཨཀནིཊྛདེཝཱནཾ པན རཱུཔཾ མཏྠཀཔྤཏྟཾ པཎཱིཏཾ ནཱམ.

༧. དཱུརདུཀནིདྡེསེ ཨིཏྠིནྡྲིཡཱདཱིནི ཧེཊྛཱ ཝིབྷཏྟཱནེཝ. ཨིམསྨིཾ པན དུཀེ དུཔྤརིགྒཧཊྛེན ལཀྑཎདུཔྤཊིཝིཛ྄ཛྷཏཱཡ སུཁུམརཱུཔཾ དཱུརེཏི ཀཐིཏཾ. སུཁཔརིགྒཧཊྛེན ལཀྑཎསུཔྤཊིཝིཛ྄ཛྷཏཱཡ ཨོལཱ༹རིཀརཱུཔཾ སནྟིཀེཏི. ཀབལཱི༹ཀཱརཱཧཱརཔརིཡོསཱནེ ཙ ནིཡྻཱཏནཊྛཱནེཔི ‘ཨིདཾ ཝུཙྩཏི རཱུཔཾ དཱུརེ’ཏི ན ནཱིཡྻཱཏིཏཾ. ཀསྨཱ? དུཝིདྷཉྷི དཱུརེ ནཱམ – ལཀྑཎཏོ ཙ ཨོཀཱསཏོ ཙཱཏི. ཏཏྠ ལཀྑཎཏོ དཱུརེཏི ན ཀཐིཏཾ, ཏཾ ཨོཀཱསཏོ ཀཐེཏབྦཾ. ཏསྨཱ དཱུརེཏི ཨཀཐིཏཾ. ཨོལཱ༹རིཀརཱུཔཾ ཨོཀཱསཏོ དཱུརེཏི དསྶེཏུཾ ཨནིཡྻཱཏེཏྭཱཝ ཡཾ ཝཱ པནཉྙམྤཱིཏིཨཱདིམཱཧ. སནྟིཀཔདནིདྡེསེཔི ཨེསེཝ ནཡོ. ཏཏྠ ཨནཱསནྣེཏི ན ཨཱསནྣེ, ཨནུཔཀཊྛེཏི ནིསྶཊེ, དཱུརེཏི དཱུརམྷི, ཨསནྟིཀེཏི ན སནྟིཀེ. ཨིདཾ ཝུཙྩཏི རཱུཔཾ དཱུརེཏི ཨིདཾ པཎྞརསཝིདྷཾ སུཁུམརཱུཔཾ ལཀྑཎཏོ དཱུརེ, དསཝིདྷཾ པན ཨོལཱ༹རིཀརཱུཔཾ ཡེཝཱཔནཀཝསེན ཨོཀཱསཏོ དཱུརེཏི ཝུཙྩཏི. སནྟིཀཔདནིདྡེསོ ཨུཏྟཱནཏྠོཡེཝ.

ཨིདཾ ¶ ¶ ཝུཙྩཏི རཱུཔཾ སནྟིཀེཏི ཨིདཾ དསཝིདྷཾ ཨོལཱ༹རིཀརཱུཔཾ ལཀྑཎཏོ སནྟིཀེ, པཉྩདསཝིདྷཾ པན སུཁུམརཱུཔཾ ཡེཝཱཔནཀཝསེན ཨོཀཱསཏོ སནྟིཀེཏི ཝུཙྩཏི. ཀིཏྟཀཏོ ¶ པཊྛཱཡ པན རཱུཔཾ ཨོཀཱསཝསེན སནྟིཀེ ནཱམ? ཀིཏྟཀཏོ པཊྛཱཡ དཱུརེ ནཱམཱཏི? པཀཏིཀཐཱཡ ཀཐེནྟཱནཾ དྭཱདསཧཏྠོ སཝནཱུཔཙཱརོ ནཱམ ཧོཏི. ཏསྶ ཨོརཏོ རཱུཔཾ སནྟིཀེ, པརཏོ དཱུརེ. ཏཏྠ སུཁུམརཱུཔཾ དཱུརེ ཧོནྟཾ ལཀྑཎཏོཔི ཨོཀཱསཏོཔི དཱུརེ ཧོཏི; སནྟིཀེ ཧོནྟཾ པན ཨོཀཱསཏོཝ སནྟིཀེ ཧོཏི, ན ལཀྑཎཏོ. ཨོལཱ༹རིཀརཱུཔཾ སནྟིཀེ ཧོནྟཾ ལཀྑཎཏོཔི ཨོཀཱསཏོཔི སནྟིཀེ ཧོཏི; དཱུརེ ཧོནྟཾ ཨོཀཱསཏོཝ དཱུརེ ཧོཏི, ན ལཀྑཎཏོ.

ཏཾ ཏཾ ཝཱ པནཱཏི ཨེཏྠ ན ཧེཊྛིམནཡོ ཨོལོཀེཏབྦོ. ཧེཊྛཱ ཧི བྷིནྡམཱནོ གཏོ. ཨིདྷ པན ན ལཀྑཎཏོ དཱུརཾ བྷིནྡཏི, ཨོཀཱསཏོ དཱུརམེཝ བྷིནྡཏི. ཨུཔཱདཱཡུཔཱདཱཡ དཱུརསནྟིཀཉྷི ཨེཏྠ དསྶིཏཾ. ཨཏྟནོ ཧི རཱུཔཾ སནྟིཀེ ནཱམ; ཨནྟོཀུཙྪིགཏསྶཱཔི པརསྶ དཱུརེ. ཨནྟོཀུཙྪིགཏསྶ སནྟིཀེ; བཧིཋིཏསྶ དཱུརེ. ཨེཀམཉྩེ སཡིཏསྶ སནྟིཀེ; བཧིཔམུཁེ ཋིཏསྶ དཱུརེ. ཨནྟོཔརིཝེཎེ རཱུཔཾ སནྟིཀེ; བཧིཔརིཝེཎེ དཱུརེ. ཨནྟོསངྒྷཱརཱམེ རཱུཔཾ སནྟིཀེ; བཧིསངྒྷཱརཱམེ དཱུརེ. ཨནྟོསཱིམཱཡ རཱུཔཾ སནྟིཀེ; བཧིསཱིམཱཡ དཱུརེ. ཨནྟོགཱམཁེཏྟེ རཱུཔཾ སནྟིཀེ; བཧིགཱམཀྑེཏྟེ དཱུརེ. ཨནྟོཛནཔདེ རཱུཔཾ སནྟིཀེ; བཧིཛནཔདེ དཱུརེ. ཨནྟོརཛྫསཱིམཱཡ རཱུཔཾ སནྟིཀེ; བཧིརཛྫསཱིམཱཡ དཱུརེ. ཨནྟོསམུདྡེ རཱུཔཾ སནྟིཀེ; བཧིསམུདྡེརཱུཔཾ དཱུརེ. ཨནྟོཙཀྐཝཱལེ༹ རཱུཔཾ སནྟིཀེ; བཧིཙཀྐཝཱལེ༹ དཱུརེཏི.

ཨཡཾ རཱུཔཀྑནྡྷནིདྡེསོ.

༢. ཝེདནཱཀྑནྡྷནིདྡེསོ

༨. ཝེདནཱཀྑནྡྷནིདྡེསཱདཱིསུ ཧེཊྛཱ ཝུཏྟསདིསཾ པཧཱཡ ཨཔུབྦམེཝ ཝཎྞཡིསྶཱམ. ཡཱ ཀཱཙི ཝེདནཱཏི ཙཏུབྷཱུམིཀཝེདནཾ པརིཡཱདིཡཏི. སུཁཱ ཝེདནཱཏིཨཱདཱིནི ཨཏཱིཏཱདིཝསེན ནིདྡིཊྛཝེདནཾ སབྷཱཝཏོ དསྶེཏུཾ ¶ ཝུཏྟཱནི. ཏཏྠ སུཁཱ ཝེདནཱ ཨཏྠི ཀཱཡིཀཱ, ཨཏྠི ཙེཏསིཀཱ ¶ . ཏཐཱ དུཀྑཱ ཝེདནཱ. ཨདུཀྑམསུཁཱ པན ཙཀྑཱདཡོ པསཱདཀཱཡེ སནྡྷཱཡ པརིཡཱཡེན ‘ཨཏྠི ཀཱཡིཀཱ, ཨཏྠི ཙེཏསིཀཱ’. ཏཏྠ སབྦཱཔི ཀཱཡིཀཱ ཀཱམཱཝཙརཱ. ཏཐཱ ཙེཏསིཀཱ དུཀྑཱ ཝེདནཱ ¶ . ཙེཏསིཀཱ སུཁཱ པན ཏེབྷཱུམིཀཱ. ཨདུཀྑམསུཁཱ ཙཏུབྷཱུམིཀཱ. ཏསྶཱ སབྦཔྤཀཱརཱཡཔི སནྟཏིཝསེན, ཁཎཱདིཝསེན ཙ ཨཏཱིཏཱདིབྷཱཝོ ཝེདིཏབྦོ.

ཏཏྠ སནྟཏིཝསེན ཨེཀཝཱིཐིཨེཀཛཝནཨེཀསམཱཔཏྟིཔརིཡཱཔནྣཱ, ཨེཀཝིདྷཝིསཡསམཱཡོགཔྤཝཏྟཱ ཙ པཙྩུཔྤནྣཱ. ཏཏོ པུབྦེ ཨཏཱིཏཱ, པཙྪཱ ཨནཱགཏཱ. ཁཎཱདིཝསེན ཁཎཏྟཡཔརིཡཱཔནྣཱ པུབྦནྟཱཔརནྟམཛ྄ཛྷགཏཱ སཀིཙྩཉྩ ཀུརུམཱནཱ ཝེདནཱ པཙྩུཔྤནྣཱ. ཏཏོ པུབྦེ ཨཏཱིཏཱ, པཙྪཱ ཨནཱགཏཱ. ཏཏྠ ཁཎཱདིཝསེན ཨཏཱིཏཱདིབྷཱཝཾ སནྡྷཱཡ ཨཡཾ ནིདྡེསོ ཀཏོཏི ཝེདིཏབྦོ.

༡༡. ཨོལཱ༹རིཀསུཁུམནིདྡེསེ ཨཀུསལཱ ཝེདནཱཏིཨཱདཱིནི ཛཱཏིཏོ ཨོལཱ༹རིཀསུཁུམབྷཱཝཾ དསྶེཏུཾ ཝུཏྟཱནི. དུཀྑཱ ཝེདནཱ ཨོལཱ༹རིཀཱཏིཨཱདཱིནི སབྷཱཝཏོ. ཨསམཱཔནྣསྶ ཝེདནཱཏིཨཱདཱིནི པུགྒལཏོ. སཱསཝཱཏིཨཱདཱིནི ལོཀིཡལོཀུཏྟརཏོ ཨོལཱ༹རིཀསུཁུམབྷཱཝཾ དསྶེཏུཾ ཝུཏྟཱནི. ཏཏྠ ཨཀུསལཱ ཏཱཝ སདརཐཊྛེན དུཀྑཝིཔཱཀཊྛེན ཙ ཨོལཱ༹རིཀཱ. ཀུསལཱ ནིདྡརཐཊྛེན སུཁཝིཔཱཀཊྛེན ཙ སུཁུམཱ. ཨབྱཱཀཏཱ ནིརུསྶཱཧཊྛེན ཨཝིཔཱཀཊྛེན ཙ སུཁུམཱ. ཀུསལཱཀུསལཱ སཨུསྶཱཧཊྛེན སཝིཔཱཀཊྛེན ཙ ཨོལཱ༹རིཀཱ. ཨབྱཱཀཏཱ ཝུཏྟནཡེནེཝ སུཁུམཱ.

དུཀྑཱ ཨསཱཏཊྛེན དུཀྑཊྛེན ཙ ཨོལཱ༹རིཀཱ. སུཁཱ སཱཏཊྛེན སུཁཊྛེན ཙ སུཁུམཱ. ཨདུཀྑམསུཁཱ སནྟཊྛེན པཎཱིཏཊྛེན ཙ སུཁུམཱ. སུཁདུཀྑཱ ཁོབྷནཊྛེན ཕརཎཊྛེན ཙ ཨོལཱ༹རིཀཱ. སུཁཝེདནཱཔི ཧི ཁོབྷེཏི ཕརཏི. ཏཐཱ དུཀྑཝེདནཱཔི. སུཁཉྷི ཨུཔྤཛྫམཱནཾ སཀལསརཱིརཾ ཁོབྷེནྟཾ ཨཱལུལེ༹ནྟཾ ཨབྷིསནྡཡམཱནཾ མདྡཡམཱནཾ ཚཱདཡམཱནཾ སཱིཏོདཀགྷཊེན ཨཱསིཉྩཡམཱནཾ ཝིཡ ཨུཔྤཛྫཏི. དུཀྑཾ ཨུཔྤཛྫམཱནཾ ཏཏྟཕཱལཾ ཨནྟོ པཝེསནྟཾ ཝིཡ ཏིཎུཀྐཱཡ བཧི ཛྷཱཔཡམཱནཾ ཝིཡ ཨུཔྤཛྫཏི. ཨདུཀྑམསུཁཱ པན ཝུཏྟནཡེནེཝ སུཁུམཱ. ཨསམཱཔནྣསྶ ཝེདནཱ ནཱནཱརམྨཎེ ཝིཀྑིཏྟབྷཱཝཏོ ཨོལཱ༹རིཀཱ ¶ . སམཱཔནྣསྶ ཝེདནཱ ཨེཀཏྟནིམིཏྟེཡེཝ ཙརཏཱིཏི སུཁུམཱ. སཱསཝཱ ཨཱསཝུཔྤཏྟིཧེཏུཏོ ཨོལཱ༹རིཀཱ. ཨཱསཝཙཱརོ ¶ ནཱམ ཨེཀནྟཨོལཱ༹རིཀོ. ཨནཱསཝཱ ཝུཏྟཝིཔརིཡཱཡེན སུཁུམཱ.

ཏཏྠ ¶ ཨེཀོ ནེཝ ཀུསལཏྟིཀེ ཀོཝིདོ ཧོཏི, ན ཝེདནཱཏྟིཀེ. སོ ‘ཀུསལཏྟིཀཾ རཀྑཱམཱི’ཏི ཝེདནཱཏྟིཀཾ བྷིནྡཏི; ‘ཝེདནཱཏྟིཀཾ རཀྑཱམཱི’ཏི ཀུསལཏྟིཀཾ བྷིནྡཏི. ཨེཀོ ‘ཏིཀཾ རཀྑཱམཱི’ཏི བྷཱུམནྟརཾ བྷིནྡཏི. ཨེཀོ ན བྷིནྡཏི. ཀཐཾ? ‘‘སུཁདུཀྑཱ ཝེདནཱ ཨོལཱ༹རིཀཱ, ཨདུཀྑམསུཁཱ ཝེདནཱ སུཁུམཱ’’ཏི ཧི ཝེདནཱཏྟིཀེ ཝུཏྟཾ. ཏཾ ཨེཀོ པཊིཀྑིཔཏི – ན སབྦཱ ཨདུཀྑམསུཁཱ སུཁུམཱ. སཱ ཧི ཀུསལཱཔི ཨཏྠི ཨཀུསལཱཔི ཨབྱཱཀཏཱཔི. ཏཏྠ ཀུསལཱཀུསལཱ ཨོལཱ༹རིཀཱ, ཨབྱཱཀཏཱ སུཁུམཱ. ཀསྨཱ? ཀུསལཏྟིཀེ པཱལི༹ཡཾ ཨཱགཏཏྟཱཏི. ཨེཝཾ ཀུསལཏྟིཀོ རཀྑིཏོ ཧོཏི, ཝེདནཱཏྟིཀོ པན བྷིནྣོ.

ཀུསལཱཀུསལཱ ཝེདནཱ ཨོལཱ༹རིཀཱ, ཨབྱཱཀཏཱ ཝེདནཱ སུཁུམཱ’’ཏི ཡཾ པན ཀུསལཏྟིཀེ ཝུཏྟཾ, ཏཾ ཨེཀོ པཊིཀྑིཔཏི – ན སབྦཱ ཨབྱཱཀཏཱ སུཁུམཱ. སཱ ཧི སུཁཱཔི ཨཏྠི དུཀྑཱཔི ཨདུཀྑམསུཁཱཔི. ཏཏྠ སུཁདུཀྑཱ ཨོལཱ༹རིཀཱ, ཨདུཀྑམསུཁཱ སུཁུམཱ. ཀསྨཱ? ཝེདནཱཏྟིཀེ པཱལི༹ཡཾ ཨཱགཏཏྟཱཏི. ཨེཝཾ ཝེདནཱཏྟིཀོ རཀྑིཏོ ཧོཏི, ཀུསལཏྟིཀོ པན བྷིནྣོ. ཀུསལཏྟིཀསྶ པན ཨཱགཏཊྛཱནེ ཝེདནཱཏྟིཀཾ ཨནོལོཀེཏྭཱ ཝེདནཱཏྟིཀསྶ ཨཱགཏཊྛཱནེ ཀུསལཏྟིཀཾ ཨནོལོཀེཏྭཱ ཀུསལཱདཱིནཾ ཀུསལཏྟིཀལཀྑཎེན, སུཁཱདཱིནཾ ཝེདནཱཏྟིཀལཀྑཎེན ཨོལཱ༹རིཀསུཁུམཏཾ ཀཐེནྟོ ན བྷིནྡཏི ནཱམ.

ཡམྤི ‘‘ཀུསལཱཀུསལཱ ཝེདནཱ ཨོལཱ༹རིཀཱ, ཨབྱཱཀཏཱ ཝེདནཱ སུཁུམཱ’’ཏི ཀུསལཏྟིཀེ ཝུཏྟཾ, ཏཏྠེཀོ ‘ཀུསལཱ ལོཀུཏྟརཝེདནཱཔི སམཱནཱ ཨོལཱ༹རིཀཱ ནཱམ, ཝིཔཱཀཱ ཨནྟམསོ དྭིཔཉྩཝིཉྙཱཎསཧཛཱཏཱཔི སམཱནཱ སུཁུམཱ ནཱམ ཧོཏཱི’ཏི ཝདཏི. སོ ཨེཝརཱུཔཾ སནྟཾ པཎཱིཏཾ ལོཀུཏྟརཝེདནཾ ཨོལཱ༹རིཀཾ ནཱམ ཀརོནྟོ, དྭིཔཉྩཝིཉྙཱཎསམྤཡུཏྟཾ ཨཧེཏུཀཾ ཧཱིནཾ ཛལ༹ཾ ཝེདནཾ སུཁུམཾ ནཱམ ཀརོནྟོ ‘ཏིཀཾ རཀྑིསྶཱམཱི’ཏི བྷཱུམནྟརཾ བྷིནྡཏི ནཱམ. ཏཏྠ ཏཏྠ བྷཱུམིཡཾ ཀུསལཾ པན ཏཾཏཾབྷཱུམིཝིཔཱཀེནེཝ སདྡྷིཾ ཡོཛེཏྭཱ ཀཐེནྟོ ན བྷིནྡཏི ནཱམ. ཏཏྲཱཡཾ ནཡོ – ཀཱམཱཝཙརཀུསལཱ ཧི ཨོལཱ༹རིཀཱ; ཀཱམཱཝཙརཝིཔཱཀཱ སུཁུམཱ ¶ . རཱུཔཱཝཙརཱརཱུཔཱཝཙརལོཀུཏྟརཀུསལཱ ¶ ཨོལཱ༹རིཀཱ; རཱུཔཱཝཙརཱརཱུཔཱཝཙརལོཀུཏྟརཝིཔཱཀཱ སུཁུམཱཏི. ཨིམིནཱ ནཱིཧཱརེན ཀཐེནྟོ ན བྷིནྡཏི ནཱམ.

ཏིཔིཊཀཙཱུལ༹ནཱགཏྠེརོ པནཱཧ – ‘‘ཨཀུསལེ ཨོལཱ༹རིཀསུཁུམཏཱ ནཱམ ན ཨུདྡྷརིཏབྦཱ. ཏཉྷི ཨེཀནྟཨོལཱ༹རིཀམེཝ. ལོཀུཏྟརེཔི ཨོལཱ༹རིཀསུཁུམཏཱ ན ཨུདྡྷརིཏབྦཱ. ཏཉྷི ཨེཀནྟསུཁུམ’’ནྟི ¶ . ཨིམཾ ཀཐཾ ཨཱཧརིཏྭཱ ཏིཔིཊཀཙཱུལཱ༹བྷཡཏྠེརསྶ ཀཐཡིཾསུ – ཨེཝཾ ཐེརེན ཀཐིཏནྟི. ཏིཔིཊཀཙཱུལཱ༹བྷཡཏྠེརོ ཨཱཧ – ‘‘སམྨཱསམྦུདྡྷེན ཨབྷིདྷམྨཾ པཏྭཱ ཨེཀཔདསྶཱཔི དྭིནྣམྤི པདཱནཾ ཨཱགཏཊྛཱནེ ནཡཾ དཱཏུཾ ཡུཏྟཊྛཱནེ ནཡོ ཨདིནྣོ ནཱམ ནཏྠི, ནཡཾ ཀཱཏུཾ ཡུཏྟཊྛཱནེ ནཡོ ཨཀཏོ ནཱམ ནཏྠི. ཨིདྷ པནེཀཙྩོ ‘ཨཱཙརིཡོ ཨསྨཱི’ཏི ཝིཙརནྟོ ཨཀུསལེ ཨོལཱ༹རིཀསུཁུམཏཾ ཨུདྡྷརམཱནོ ཀུཀྐུཙྩཱཡཏི. སམྨཱསམྦུདྡྷེན པན ལོཀུཏྟརེཔི ཨོལཱ༹རིཀསུཁུམཏཱ ཨུདྡྷརིཏཱ’’ཏི. ཨེཝཉྩ པན ཝཏྭཱ ཨིདཾ སུཏྟཾ ཨཱཧརི – ‘‘ཏཏྲ, བྷནྟེ, ཡཱཡཾ པཊིཔདཱ དུཀྑཱ དནྡྷཱབྷིཉྙཱ, ཨཡཾ, བྷནྟེ, པཊིཔདཱ ཨུབྷཡེནེཝ ཧཱིནཱ ཨཀྑཱཡཏི – དུཀྑཏྟཱ དནྡྷཏྟཱ ཙཱ’’ཏི (དཱི. ནི. ༣.༡༥༢). ཨེཏྠ ཧི ཙཏསྶོ པཊིཔདཱ ལོཀིཡལོཀུཏྟརམིསྶཀཱ ཀཐིཏཱ.

ཏཾ ཏཾ ཝཱ པནཱཏི ཨེཏྠ ན ཧེཊྛིམནཡོ ཨོལོཀེཏབྦོ. ཏཾཏཾཝཱཔནཝསེནེཝ ཀཐེཏབྦཾ. དུཝིདྷཱ ཧི ཨཀུསལཱ – ལོབྷསཧགཏཱ དོསསཧགཏཱ ཙ. ཏཏྠ དོསསཧགཏཱ ཨོལཱ༹རིཀཱ, ལོབྷསཧགཏཱ སུཁུམཱ. དོསསཧགཏཱཔི དུཝིདྷཱ – ནིཡཏཱ ཨནིཡཏཱ ཙ. ཏཏྠ ནིཡཏཱ ཨོལཱ༹རིཀཱ, ཨནིཡཏཱ སུཁུམཱ. ནིཡཏཱཔི ཀཔྤཊྛིཏིཀཱ ཨོལཱ༹རིཀཱ, ནོཀཔྤཊྛིཏིཀཱ སུཁུམཱ. ཀཔྤཊྛིཏིཀཱཔི ཨསངྑཱརིཀཱ ཨོལཱ༹རིཀཱ, སསངྑཱརིཀཱ སུཁུམཱ. ལོབྷསཧགཏཱཔི དྭིདྷཱ – དིཊྛིསམྤཡུཏྟཱ དིཊྛིཝིཔྤཡུཏྟཱ ཙ. ཏཏྠ དིཊྛིསམྤཡུཏྟཱ ཨོལཱ༹རིཀཱ, དིཊྛིཝིཔྤཡུཏྟཱ སུཁུམཱ. དིཊྛིསམྤཡུཏྟཱཔི ནིཡཏཱ ཨོལཱ༹རིཀཱ, ཨནིཡཏཱ སུཁུམཱ. སཱཔི ཨསངྑཱརིཀཱ ཨོལཱ༹རིཀཱ, སསངྑཱརིཀཱ སུཁུམཱ.

སངྑེཔཏོ ཨཀུསལཾ པཏྭཱ ཡཱ ཝིཔཱཀཾ བཧུཾ དེཏི སཱ ཨོལཱ༹རིཀཱ, ཡཱ ཨཔྤཾ སཱ སུཁུམཱ. ཀུསལཾ པཏྭཱ པན ཨཔྤཝིཔཱཀཱ ཨོལཱ༹རིཀཱ, བཧུཝིཔཱཀཱ ¶ སུཁུམཱ. ཙཏུབྦིདྷེ ཀུསལེ ཀཱམཱཝཙརཀུསལཱ ཨོལཱ༹རིཀཱ, རཱུཔཱཝཙརཀུསལཱ སུཁུམཱ. སཱཔི ཨོལཱ༹རིཀཱ, ཨརཱུཔཱཝཙརཀུསལཱ སུཁུམཱ ¶ . སཱཔི ཨོལཱ༹རིཀཱ, ལོཀུཏྟརཀུསལཱ སུཁུམཱ. ཨཡཾ ཏཱཝ བྷཱུམཱིསུ ཨབྷེདཏོ ནཡོ.

བྷེདཏོ པན ཀཱམཱཝཙརཱ དཱནསཱིལབྷཱཝནཱམཡཝསེན ཏིཝིདྷཱ. ཏཏྠ དཱནམཡཱ ཨོལཱ༹རིཀཱ, སཱིལམཡཱ སུཁུམཱ. སཱཔི ཨོལཱ༹རིཀཱ, བྷཱཝནཱམཡཱ སུཁུམཱ. སཱཔི དུཧེཏུཀཱ ཏིཧེཏུཀཱཏི དུཝིདྷཱ. ཏཏྠ དུཧེཏུཀཱ ཨོལཱ༹རིཀཱ, ཏིཧེཏུཀཱ སུཁུམཱ. ཏིཧེཏུཀཱཔི སསངྑཱརིཀཨསངྑཱརིཀབྷེདཏོ ¶ དུཝིདྷཱ. ཏཏྠ སསངྑཱརིཀཱ ཨོལཱ༹རིཀཱ, ཨསངྑཱརིཀཱ སུཁུམཱ. རཱུཔཱཝཙརེ པཋམཛ྄ཛྷཱནཀུསལཝེདནཱ ཨོལཱ༹རིཀཱ, དུཏིཡཛ྄ཛྷཱནཀུསལཝེདནཱ སུཁུམཱ…པེ… ཙཏུཏྠཛ྄ཛྷཱནཀུསལཝེདནཱ སུཁུམཱ. སཱཔི ཨོལཱ༹རིཀཱ, ཨཱཀཱསཱནཉྩཱཡཏནཀུསལཝེདནཱ སུཁུམཱ ཨཱཀཱསཱནཉྩཱཡཏནཀུསལཝེདནཱ ཨོལཱ༹རིཀཱ…པེ…. ནེཝསཉྙཱནཱསཉྙཱཡཏནཀུསལཝེདནཱ སུཁུམཱ. སཱཔི ཨོལཱ༹རིཀཱ, ཝིཔསྶནཱསཧཛཱཏཱ སུཁུམཱ. སཱཔི ཨོལཱ༹རིཀཱ, སོཏཱཔཏྟིམགྒསཧཛཱཏཱ སུཁུམཱ. སཱཔི ཨོལཱ༹རིཀཱ…པེ… ཨརཧཏྟམགྒསཧཛཱཏཱ སུཁུམཱ.

ཙཏུབྦིདྷེ ཝིཔཱཀེ ཀཱམཱཝཙརཝིཔཱཀཝེདནཱ ཨོལཱ༹རིཀཱ, རཱུཔཱཝཙརཝིཔཱཀཝེདནཱ སུཁུམཱ. སཱཔི ཨོལཱ༹རིཀཱ…པེ… ལོཀུཏྟརཝིཔཱཀཝེདནཱ སུཁུམཱ. ཨེཝཾ ཏཱཝ ཨབྷེདཏོ.

བྷེདཏོ པན ཀཱམཱཝཙརཝིཔཱཀཱ ཨཏྠི ཨཧེཏུཀཱ, ཨཏྠི སཧེཏུཀཱ. སཧེཏུཀཱཔི ཨཏྠི དུཧེཏུཀཱ, ཨཏྠི ཏིཧེཏུཀཱ. ཏཏྠ ཨཧེཏུཀཱ ཨོལཱ༹རིཀཱ, སཧེཏུཀཱ སུཁུམཱ. སཱཔི དུཧེཏུཀཱ ཨོལཱ༹རིཀཱ, ཏིཧེཏུཀཱ སུཁུམཱ. ཏཏྠཱཔི སསངྑཱརིཀཱ ཨོལཱ༹རིཀཱ, ཨསངྑཱརིཀཱ སུཁུམཱ. པཋམཛ྄ཛྷཱནཝིཔཱཀཱ ཨོལཱ༹རིཀཱ, དུཏིཡཛ྄ཛྷཱནཝིཔཱཀཱ སུཁུམཱ…པེ… ཙཏུཏྠཛ྄ཛྷཱནཝིཔཱཀཱ སུཁུམཱ. སཱཔི ཨོལཱ༹རིཀཱ, ཨཱཀཱསཱནཉྩཱཡཏནཝིཔཱཀཱ སུཁུམཱ. སཱཔི ཨོལཱ༹རིཀཱ…པེ… ནེཝསཉྙཱནཱསཉྙཱཡཏནཝིཔཱཀཱ སུཁུམཱ. སཱཔི ཨོལཱ༹རིཀཱ, སོཏཱཔཏྟིཕལཝེདནཱ སུཁུམཱ. སཱཔི ཨོལཱ༹རིཀཱ, སཀདཱགཱམི…པེ… ཨརཧཏྟཕལཝེདནཱ སུཁུམཱ.

ཏཱིསུ ¶ ཀིརིཡཱསུ ཀཱམཱཝཙརཀིརིཡཝེདནཱ ཨོལཱ༹རིཀཱ, རཱུཔཱཝཙརཀིརིཡཝེདནཱ སུཁུམཱ. སཱཔི ཨོལཱ༹རིཀཱ, ཨརཱུཔཱཝཙརཀིརིཡཝེདནཱ སུཁུམཱ. ཨེཝཾ ཏཱཝ ཨབྷེདཏོ. བྷེདཏོ པན ཨཧེཏུཀཱདིཝསེན བྷིནྣཱཡ ཀཱམཱཝཙརཀིརིཡཱཡ ཨཧེཏུཀཀིརིཡཝེདནཱ ¶ ཨོལཱ༹རིཀཱ, སཧེཏུཀཱ སུཁུམཱ. སཱཔི དུཧེཏུཀཱ ཨོལཱ༹རིཀཱ, ཏིཧེཏུཀཱ སུཁུམཱ. ཏཏྠཱཔི སསངྑཱརིཀཱ ཨོལཱ༹རིཀཱ, ཨསངྑཱརིཀཱ སུཁུམཱ. པཋམཛ྄ཛྷཱནེ ཀིརིཡཝེདནཱ ཨོལཱ༹རིཀཱ, དུཏིཡཛ྄ཛྷཱནེ སུཁུམཱ. སཱཔི ཨོལཱ༹རིཀཱ, ཏཏིཡེ…པེ… ཙཏུཏྠེ སུཁུམཱ. སཱཔི ཨོལཱ༹རིཀཱ, ཨཱཀཱསཱནཉྩཱཡཏནཀིརིཡཝེདནཱ སུཁུམཱ. སཱཔི ཨོལཱ༹རིཀཱ, ཝིཉྙཱཎཉྩཱ…པེ… ནེཝསཉྙཱནཱསཉྙཱཡཏནཀིརིཡཝེདནཱ སུཁུམཱ. ཡཱ ཨོལཱ༹རིཀཱ སཱ ཧཱིནཱ. ཡཱ སུཁུམཱ སཱ པཎཱིཏཱ.

༡༣. དཱུརདུཀནིདྡེསེ ¶ ཨཀུསལཝེདནཱ ཝིསབྷཱགཊྛེན ཝིསཾསཊྛེན ཙ ཀུསལཱབྱཱཀཏཱཧི དཱུརེ. ཨིམིནཱ ནཡེན སབྦཔདེསུ དཱུརཏཱ ཝེདིཏབྦཱ. སཙེཔི ཧི ཨཀུསལཱདིཝེདནཱསམངྒིནོ དུཀྑཱདིཝེདནཱསམངྒིནོ ཙ ཏཡོ ཏཡོ ཛནཱ ཨེཀམཉྩེ ནིསིནྣཱ ཧོནྟི, ཏེསམྤི ཏཱ ཝེདནཱ ཝིསབྷཱགཊྛེན ཝིསཾསཊྛེན ཙ དཱུརེཡེཝ ནཱམ. སམཱཔནྣཝེདནཱདིསམངྒཱིསུཔི ཨེསེཝ ནཡོ. ཨཀུསལཱ པན ཨཀུསལཱཡ སབྷཱགཊྛེན སརིཀྑཊྛེན ཙ སནྟིཀེ ནཱམ. ཨིམིནཱ ནཡེན སབྦཔདེསུ སནྟིཀཏཱ ཝེདིཏབྦཱ. སཙེཔི ཧི ཨཀུསལཱདིཝེདནཱསམངྒཱིསུ ཏཱིསུ ཛནེསུ ཨེཀོ ཀཱམབྷཝེ, ཨེཀོ རཱུཔབྷཝེ, ཨེཀོ ཨརཱུཔབྷཝེ, ཏེསམྤི ཏཱ ཝེདནཱ སབྷཱགཊྛེན སརིཀྑཊྛེན ཙ སནྟིཀེཡེཝ ནཱམ. ཀུསལཱདིཝེདནཱསམངྒཱིསུཔི ཨེསེཝ ནཡོ.

ཏཾ ཏཾ ཝཱ པནཱཏི ཨེཏྠ ཧེཊྛིམནཡཾ ཨནོལོཀེཏྭཱ ཏཾ ཏཾ ཝཱཔནཝསེནེཝ ཀཐེཏབྦཾ. ཀཐེནྟེན ཙ ན དཱུརཏོ སནྟིཀཾ ཨུདྡྷརིཏབྦཾ, སནྟིཀཏོ པན དཱུརཾ ཨུདྡྷརིཏབྦཾ. དུཝིདྷཱ ཧི ཨཀུསལཱ – ལོབྷསཧགཏཱ དོསསཧགཏཱ ཙ. ཏཏྠ ལོབྷསཧགཏཱ ལོབྷསཧགཏཱཡ སནྟིཀེ ནཱམ, དོསསཧགཏཱཡ དཱུརེ ནཱམ. དོསསཧགཏཱ དོསསཧགཏཱཡ སནྟིཀེ ནཱམ, ལོབྷསཧགཏཱཡ དཱུརེ ནཱམ. དོསསཧགཏཱཔི ནིཡཏཱ ནིཡཏཱཡ སནྟིཀེ ནཱམཱཏི. ཨེཝཾ ཨནིཡཏཱ. ཀཔྤཊྛིཏིཀཨསངྑཱརིཀསསངྑཱརིཀབྷེདཾ ལོབྷསཧགཏཱདཱིསུ ཙ དིཊྛིསམྤཡུཏྟཱདིབྷེདཾ སབྦཾ ཨོལཱ༹རིཀདུཀནིདྡེསེ ཝིཏྠཱརིཏཝསེན ཨནུགནྟྭཱ ཨེཀེཀཀོཊྛཱསཝེདནཱ ¶ ¶ ཏཾཏཾཀོཊྛཱསཝེདནཱཡ ཨེཝ སནྟིཀེ, ཨིཏརཱ ཨིཏརཱཡ དཱུརེཏི ཝེདིཏབྦཱཏི.

ཨཡཾ ཝེདནཱཀྑནྡྷནིདྡེསོ.

༣. སཉྙཱཀྑནྡྷནིདྡེསོ

༡༤. སཉྙཱཀྑནྡྷནིདྡེསེ ཡཱ ཀཱཙི སཉྙཱཏི ཙཏུབྷཱུམིཀསཉྙཾ པརིཡཱདིཡཏི. ཙཀྑུསམྥསྶཛཱ སཉྙཱཏིཨཱདཱིནི ཨཏཱིཏཱདིཝསེན ནིདྡིཊྛསཉྙཾ སབྷཱཝཏོ དསྶེཏུཾ ཝུཏྟཱནི. ཏཏྠ ཙཀྑུསམྥསྶཏོ ཙཀྑུསམྥསྶསྨིཾ ཝཱ ཛཱཏཱ ཙཀྑུསམྥསྶཛཱ ནཱམ. སེསཱསུཔི ཨེསེཝ ནཡོ ¶ . ཨེཏྠ ཙ པུརིམཱ པཉྩ ཙཀྑུཔསཱདཱདིཝཏྠུཀཱཝ. མནོསམྥསྶཛཱ ཧདཡཝཏྠུཀཱཔི ཨཝཏྠུཀཱཔི. སབྦཱ ཙཏུབྷཱུམིཀསཉྙཱ.

༡༧. ཨོལཱ༹རིཀདུཀནིདྡེསེ པཊིགྷསམྥསྶཛཱཏི སཔྤཊིགྷེ ཙཀྑུཔསཱདཱདཡོ ཝཏྠུཾ ཀཏྭཱ སཔྤཊིགྷེ རཱུཔཱདཡོ ཨཱརབྦྷ ཨུཔྤནྣོ ཕསྶོ པཊིགྷསམྥསྶོ ནཱམ. ཏཏོ ཏསྨིཾ ཝཱ ཛཱཏཱ པཊིགྷསམྥསྶཛཱ ནཱམ. ཙཀྑུསམྥསྶཛཱ སཉྙཱ…པེ… ཀཱཡསམྥསྶཛཱ སཉྙཱཏིཔི ཏསྶཱཡེཝ ཝཏྠུཏོ ནཱམཾ. རཱུཔསཉྙཱ…པེ… ཕོཊྛབྦསཉྙཱཏིཔི ཏསྶཱཡེཝ ཨཱརམྨཎཏོ ནཱམཾ. ཨིདཾ པན ཝཏྠཱརམྨཎཏོ ནཱམཾ. སཔྤཊིགྷཱནི ཧི ཝཏྠཱུནི ནིསྶཱཡ, སཔྤཊིགྷཱནི ཙ ཨཱརམྨཎཱནི ཨཱརབྦྷ ཨུཔྤཏྟིཏོ ཨེསཱ པཊིགྷསམྥསྶཛཱ སཉྙཱཏི ཝུཏྟཱ. མནོསམྥསྶཛཱཏིཔི པརིཡཱཡེན ཨེཏིསྶཱ ནཱམཾ ཧོཏིཡེཝ. ཙཀྑུཝིཉྙཱཎཉྷི མནོ ནཱམ. ཏེན སཧཛཱཏོ ཕསྶོ མནོསམྥསྶོ ནཱམ. ཏསྨིཾ མནོསམྥསྶེ, ཏསྨཱ ཝཱ མནོསམྥསྶཱ ཛཱཏཱཏི མནོསམྥསྶཛཱ. ཏཐཱ སོཏགྷཱནཛིཝ྄ཧཱཀཱཡཝིཉྙཱཎཾ མནོ ནཱམ. ཏེན སཧཛཱཏོ ཕསྶོ མནོསམྥསྶོ ནཱམ. ཏསྨིཾ མནོསམྥསྶེ, ཏསྨཱ ཝཱ མནོསམྥསྶཱ ཛཱཏཱཏི མནོསམྥསྶཛཱ.

ཨདྷིཝཙནསམྥསྶཛཱ སཉྙཱཏིཔི པརིཡཱཡེན ཨེཏིསྶཱ ནཱམཾ ཧོཏིཡེཝ. ཏཡོ ཧི ཨརཱུཔིནོ ཁནྡྷཱ སཡཾ པིཊྛིཝཊྚཀཱ ཧུཏྭཱ ཨཏྟནཱ སཧཛཱཏཱཡ སཉྙཱཡ ཨདྷིཝཙནསམྥསྶཛཱ སཉྙཱཏིཔི ནཱམཾ ཀརོནྟི. ནིཔྤརིཡཱཡེན པན པཊིགྷསམྥསྶཛཱ སཉྙཱ ནཱམ པཉྩདྭཱརིཀསཉྙཱ ¶ , ཨདྷིཝཙནསམྥསྶཛཱ སཉྙཱ ནཱམ མནོདྭཱརིཀསཉྙཱ. ཏཏྠ པཉྩདྭཱརིཀསཉྙཱ ཨོལོཀེཏྭཱཔི ¶ ཛཱནིཏུཾ སཀྐཱཏི ཨོལཱ༹རིཀཱ. རཛྫིཏྭཱ ཨུཔནིཛ྄ཛྷཱཡནྟཉྷི ‘རཛྫིཏྭཱ ཨུཔནིཛ྄ཛྷཱཡཏཱི’ཏི, ཀུཛ྄ཛྷིཏྭཱ ཨུཔནིཛ྄ཛྷཱཡནྟཾ ‘ཀུཛ྄ཛྷིཏྭཱ ཨུཔནིཛ྄ཛྷཱཡཏཱི’ཏི ཨོལོཀེཏྭཱཝ ཛཱནནྟི.

ཏཏྲིདཾ ཝཏྠུ – དྭེ ཀིར ཨིཏྠིཡོ ནིསཱིདིཏྭཱ སུཏྟཾ ཀནྟནྟི. དྭཱིསུ དཧརེསུ གཱམེ ཙརནྟེསུ ཨེཀོ པུརཏོ གཙྪནྟོ ཨེཀཾ ཨིཏྠིཾ ཨོལོཀེསི. ཨིཏརཱ ཏཾ པུཙྪི ‘ཀསྨཱ ནུ ཁོ ཏཾ ཨེསོ ཨོལོཀེསཱི’ཏི? ‘ན ཨེསོ བྷིཀྑུ མཾ ཝིསབྷཱགཙིཏྟེན ཨོལོཀེསི, ཀནིཊྛབྷགིནཱིསཉྙཱཡ པན ཨོལོཀེསཱི’ཏི. ཏེསུཔི གཱམེ ཙརིཏྭཱ ཨཱསནསཱལཱཡ ནིསིནྣེསུ ཨིཏརོ བྷིཀྑུ ཏཾ བྷིཀྑུཾ པུཙྪི – ‘ཏཡཱ སཱ ཨིཏྠཱི ཨོལོཀིཏཱ’ཏི? ‘ཨཱམ ཨོལོཀིཏཱ’. ‘ཀིམཏྠཱཡཱ’ཏི? ‘མཡ྄ཧཾ བྷགིནཱིསརིཀྑཏྟཱ ཏཾ ཨོལོཀེསི’ནྟི ཨཱཧ. ཨེཝཾ པཉྩདྭཱརིཀསཉྙཱ ཨོལོཀེཏྭཱཔི ¶ ཛཱནིཏུཾ སཀྐཱཏི ཝེདིཏབྦཱ. སཱ པནེསཱ པསཱདཝཏྠུཀཱ ཨེཝ. ཀེཙི པན ཛཝནཔྤཝཏྟཱཏི དཱིཔེནྟི. མནོདྭཱརིཀསཉྙཱ པན ཨེཀམཉྩེ ཝཱ ཨེཀཔཱིཋེ ཝཱ ནིསཱིདིཏྭཱཔི ཨཉྙཾ ཙིནྟེནྟཾ ཝིཏཀྐེནྟཉྩ ‘ཀིཾ ཙིནྟེསི, ཀིཾ ཝིཏཀྐེསཱི’ཏི པུཙྪིཏྭཱ ཏསྶ ཝཙནཝསེནེཝ ཛཱནིཏབྦཏོ སུཁུམཱ. སེསཾ ཝེདནཱཀྑནྡྷསདིསམེཝཱཏི.

ཨཡཾ སཉྙཱཀྑནྡྷནིདྡེསོ.

༤. སངྑཱརཀྑནྡྷནིདྡེསོ

༢༠. སངྑཱརཀྑནྡྷནིདྡེསེ ཡེ ཀེཙི སངྑཱརཱཏི ཙཏུབྷཱུམིཀསངྑཱརེ པརིཡཱདིཡཏི. ཙཀྑུསམྥསྶཛཱ ཙེཏནཱཏིཨཱདཱིནི ཨཏཱིཏཱདིཝསེན ནིདྡིཊྛསངྑཱརེ སབྷཱཝཏོ དསྶེཏུཾ ཝུཏྟཱནི. ཙཀྑུསམྥསྶཛཱཏིཨཱདཱིནི ཝུཏྟཏྠཱནེཝ. ཙེཏནཱཏི ཧེཊྛིམཀོཊིཡཱ པདྷཱནསངྑཱརཝསེན ཝུཏྟཾ. ཧེཊྛིམཀོཊིཡཱ ཧི ཨནྟམསོ ཙཀྑུཝིཉྙཱཎེན སདྡྷིཾ པཱལི༹ཡཾ ཨཱགཏཱ ཙཏྟཱརོ སངྑཱརཱ ཨུཔྤཛྫནྟི. ཏེསུ ཙེཏནཱ པདྷཱནཱ ཨཱཡཱུཧནཊྛེན པཱཀཊཏྟཱ. ཏསྨཱ ཨཡམེཝ གཧིཏཱ. ཏཾསམྤཡུཏྟསངྑཱརཱ པན ཏཱཡ གཧིཏཱཡ གཧིཏཱཝ ཧོནྟི. ཨིདྷཱཔི པུརིམཱ པཉྩ ཙཀྑུཔསཱདཱདིཝཏྠུཀཱཝ. མནོསམྥསྶཛཱ ཧདཡཝཏྠུཀཱཔི ཨཝཏྠུཀཱཔི. སབྦཱ ཙཏུབྷཱུམིཀཙེཏནཱ. སེསཾ ཝེདནཱཀྑནྡྷསདིསམེཝཱཏི.

ཨཡཾ སངྑཱརཀྑནྡྷནིདྡེསོ.

༥. ཝིཉྙཱཎཀྑནྡྷནིདྡེསོ

༢༦. ཝིཉྙཱཎཀྑནྡྷནིདྡེསེ ¶ ¶ ཡཾ ཀིཉྩི ཝིཉྙཱཎནྟི ཙཏུབྷཱུམཀཝིཉྙཱཎཾ པརིཡཱདིཡཏི. ཙཀྑུཝིཉྙཱཎནྟིཨཱདཱིནི ཨཏཱིཏཱདིཝསེན ནིདྡིཊྛཝིཉྙཱཎཾ སབྷཱཝཏོ དསྶེཏུཾ ཝུཏྟཱནི. ཏཏྠ ཙཀྑུཝིཉྙཱཎཱདཱིནི ¶ པཉྩ ཙཀྑུཔསཱདཱདིཝཏྠུཀཱནེཝ, མནོཝིཉྙཱཎཾ ཧདཡཝཏྠུཀམྤི ཨཝཏྠུཀམྤི. སབྦཾ ཙཏུབྷཱུམཀཝིཉྙཱཎཾ. སེསཾ ཝེདནཱཀྑནྡྷསདིསམེཝཱཏི.

ཨཡཾ ཝིཉྙཱཎཀྑནྡྷནིདྡེསོ.

པཀིཎྞཀཀཐཱ

ཨིདཱནི པཉྩསུཔི ཁནྡྷེསུ སམུགྒམཏོ, པུབྦཱཔརཏོ, ཨདྡྷཱནཔརིཙྪེདཏོ, ཨེཀུཔྤཱདནཱནཱནིརོདྷཏོ, ནཱནུཔྤཱདཨེཀནིརོདྷཏོ, ཨེཀུཔྤཱདཨེཀནིརོདྷཏོ, ནཱནུཔྤཱདནཱནཱནིརོདྷཏོ, ཨཏཱིཏཱནཱགཏཔཙྩུཔྤནྣཏོ, ཨཛ྄ཛྷཏྟིཀབཱཧིརཏོ, ཨོལཱ༹རིཀསུཁུམཏོ, ཧཱིནཔཎཱིཏཏོ, དཱུརསནྟིཀཏོ, པཙྩཡཏོ, སམུཊྛཱནཏོ, པརིནིཔྥནྣཏོ, སངྑཏཏོཏི སོལ༹སཧཱཀཱརེཧི པཀིཎྞཀཾ ཝེདིཏབྦཾ.

ཏཏྠ དུཝིདྷོ སམུགྒམོ – གབྦྷསེཡྻཀསམུགྒམོ, ཨོཔཔཱཏིཀསམུགྒམོཏི. ཏཏྠ གབྦྷསེཡྻཀསམུགྒམོ ཨེཝཾ ཝེདིཏབྦོ – གབྦྷསེཡྻཀསཏྟཱནཉྷི པཊིསནྡྷིཀྑཎེ པཉྩཀྑནྡྷཱ ཨཔཙྪཱཨཔུརེ ཨེཀཏོ པཱཏུབྷཝནྟི. ཏསྨིཾ ཁཎེ པཱཏུབྷཱུཏཱ ཀལལསངྑཱཏཱ རཱུཔསནྟཏི པརིཏྟཱ ཧོཏི. ཁུདྡཀམཀྑིཀཱཡ ཨེཀཝཱཡཱམེན པཱཏབྦམཏྟཱཏི ཝཏྭཱ པུན ‘ཨཏིབཧུཾ ཨེཏཾ, སཎྷསཱུཙིཡཱ ཏེལེ པཀྑིཔིཏྭཱ ཨུཀྑིཏྟཱཡ པགྒྷརིཏྭཱ ཨགྒེ ཋིཏབིནྡུམཏྟ’ནྟི ཝུཏྟཾ. ཏམྤི པཊིཀྑིཔིཏྭཱ ‘ཨེཀཀེསེ ཏེལཏོ ཨུདྡྷརིཏྭཱ གཧིཏེ ཏསྶ པགྒྷརིཏྭཱ ཨགྒེ ཋིཏབིནྡུམཏྟ’ནྟི ཝུཏྟཾ. ཏམྤི པཊིཀྑིཔིཏྭཱ ‘ཨིམསྨིཾ ཛནཔདེ མནུསྶཱནཾ ཀེསེ ཨཊྛདྷཱ ཕཱལིཏེ ཏཏོ ཨེཀཀོཊྛཱསཔྤམཱཎོ ཨུཏྟརཀུརུཀཱནཾ ཀེསོ; ཏསྶ པསནྣཏིལཏེལཏོ ཨུདྡྷཊསྶ ཨགྒེ ཋིཏབིནྡུམཏྟ’ནྟི ཝུཏྟཾ. ཏམྤི པཊིཀྑིཔིཏྭཱ ‘ཨེཏཾ བཧུ, ཛཱཏིཨུཎྞཱ ནཱམ སུཁུམཱ; ཏསྶཱ ཨེཀཨཾསུནོ པསནྣཏིལཏེལེ པཀྑིཔིཏྭཱ ཨུདྡྷཊསྶ པགྒྷརིཏྭཱ ཨགྒེ ཋིཏབིནྡུམཏྟ’ནྟི ཝུཏྟཾ. ཏཾ པནེཏཾ ¶ ཨཙྪཾ ཧོཏི ཝིཔྤསནྣཾ ཨནཱཝིལཾ པརིསུདྡྷཾ པསནྣཏིལཏེལབིནྡུསམཱནཝཎྞཾ ¶ . ཝུཏྟམྤི ཙེཏཾ –

ཏིལཏེལསྶ ¶ ཡཐཱ བིནྡུ, སཔྤིམཎྜོ ཨནཱཝིལོ;

ཨེཝཾ ཝཎྞཔཊིབྷཱགཾ, ཀལལནྟི པཝུཙྩཏཱིཏི.

ཨེཝཾ པརིཏྟཱཡ རཱུཔསནྟཏིཡཱ ཏཱིཎི སནྟཏིསཱིསཱནི ཧོནྟི – ཝཏྠུདསཀཾ, ཀཱཡདསཀཾ, ཨིཏྠིཡཱ ཨིཏྠིནྡྲིཡཝསེན པུརིསསྶ པུརིསིནྡྲིཡཝསེན བྷཱཝདསཀནྟི. ཏཏྠ ཝཏྠུརཱུཔཾ, ཏསྶ ནིསྶཡཱནི ཙཏྟཱརི མཧཱབྷཱུཏཱནི, ཏཾནིསྶིཏཱ ཝཎྞགནྡྷརསོཛཱ, ཛཱིཝིཏནྟི – ཨིདཾ ཝཏྠུདསཀཾ ནཱམ. ཀཱཡཔསཱདོ, ཏསྶ ནིསྶཡཱནི ཙཏྟཱརི མཧཱབྷཱུཏཱནི, ཏནྣིསྶིཏཱ ཝཎྞགནྡྷརསོཛཱ, ཛཱིཝིཏནྟི – ཨིདཾ ཀཱཡདསཀཾ ནཱམ. ཨིཏྠིཡཱ ཨིཏྠིབྷཱཝོ, པུརིསསྶ པུརིསབྷཱཝོ, ཏསྶ ནིསྶཡཱནི ཙཏྟཱརི མཧཱབྷཱུཏཱནི, ཏནྣིསྶིཏཱ ཝཎྞགནྡྷརསོཛཱ, ཛཱིཝིཏནྟི – ཨིདཾ བྷཱཝདསཀཾ ནཱམ.

ཨེཝཾ གབྦྷསེཡྻཀཱནཾ པཊིསནྡྷིཡཾ ཨུཀྐཊྛཔརིཙྪེདེན སམཏིཾས ཀམྨཛརཱུཔཱནི རཱུཔཀྑནྡྷོ ནཱམ ཧོཏི. པཊིསནྡྷིཙིཏྟེན པན སཧཛཱཏཱ ཝེདནཱ ཝེདནཱཀྑནྡྷོ, སཉྙཱ སཉྙཱཀྑནྡྷོ, སངྑཱརཱ སངྑཱརཀྑནྡྷོ, པཊིསནྡྷིཙིཏྟཾ ཝིཉྙཱཎཀྑནྡྷོཏི. ཨེཝཾ གབྦྷསེཡྻཀཱནཾ པཊིསནྡྷིཀྑཎེ པཉྩཀྑནྡྷཱ པརིཔུཎྞཱ ཧོནྟི. སཙེ པན ནཔུཾསཀཔཊིསནྡྷི ཧོཏི, བྷཱཝདསཀཾ ཧཱཡཏི. དྭིནྣཾ དསཀཱནཾ ཝསེན སམཝཱིསཏི ཀམྨཛརཱུཔཱནི རཱུཔཀྑནྡྷོ ནཱམ ཧོཏི. ཝེདནཱཀྑནྡྷཱདཡོ ཝུཏྟཔྤཀཱརཱ ཨེཝཱཏི. ཨེཝམྤི གབྦྷསེཡྻཀཱནཾ པཊིསནྡྷིཀྑཎེ པཉྩཀྑནྡྷཱ པརིཔུཎྞཱ ཧོནྟི.

ཨིམསྨིཾ ཋཱནེ ཏིསམུཊྛཱནིཀཔྤཝེཎཱི ཀཐེཏབྦཱ བྷཝེཡྻ. ཏཾ པན ཨཀཐེཏྭཱ ‘ཨོཔཔཱཏིཀསམུགྒམོ’ ནཱམ དསྶིཏོ. ཨོཔཔཱཏིཀཱནཉྷི པརིཔུཎྞཱཡཏནཱནཾ པཊིསནྡྷིཀྑཎེ ཧེཊྛཱ ཝུཏྟཱནི ཏཱིཎི, ཙཀྑུསོཏགྷཱནཛིཝ྄ཧཱདསཀཱནི ཙཱཏི སཏྟ རཱུཔསནྟཏིསཱིསཱནི པཱཏུབྷཝནྟི. ཏཏྠ ཙཀྑུདསཀཱདཱིནི ཀཱཡདསཀསདིསཱནེཝ. ནཔུཾསཀསྶ པན བྷཱཝདསཀཾ ནཏྠི. ཨེཝཾ པརིཔུཎྞཱཡཏནཱནཾ ཨོཔཔཱཏིཀཱནཾ སམསཏྟཏི ཙེཝ ¶ སམསཊྛི ཙ ཀམྨཛརཱུཔཱནི རཱུཔཀྑནྡྷོ ནཱམ. ཝེདནཱཀྑནྡྷཱདཡོ ཝུཏྟཔྤཀཱརཱ ཨེཝཱཏི. ཨེཝཾ ཨོཔཔཱཏིཀཱནཾ པཊིསནྡྷིཀྑཎེ པཉྩཀྑནྡྷཱ པརིཔུཎྞཱ ཧོནྟི. ཨཡཾ ‘ཨོཔཔཱཏིཀསམུགྒམོ’ ནཱམ. ཨེཝཾ ཏཱཝ པཉྩཀྑནྡྷཱ ‘སམུགྒམཏོ’ ཝེདིཏབྦཱ.

‘པུབྦཱཔརཏོ’ཏི ¶ ཨེཝཾ པན གབྦྷསེཡྻཀཱནཾ ཨཔཙྪཱཨཔུརེ ཨུཔྤནྣེསུ པཉྩསུ ཁནྡྷེསུ ཀིཾ རཱུཔཾ ¶ པཋམཾ རཱུཔཾ སམུཊྛཱཔེཏི ཨུདཱཧུ ཨརཱུཔནྟི? རཱུཔཾ རཱུཔམེཝ སམུཊྛཱཔེཏི, ན ཨརཱུཔཾ. ཀསྨཱ? པཊིསནྡྷིཙིཏྟསྶ ན རཱུཔཛནཀཏྟཱ. སབྦསཏྟཱནཉྷི པཊིསནྡྷིཙིཏྟཾ, ཁཱིཎཱསཝསྶ ཙུཏིཙིཏྟཾ, དྭིཔཉྩཝིཉྙཱཎཱནི, ཙཏྟཱརི ཨརཱུཔྤཝིཔཱཀཱནཱིཏི སོལ༹ས ཙིཏྟཱནི རཱུཔཾ ན སམུཊྛཱཔེནྟི. ཏཏྠ པཊིསནྡྷིཙིཏྟཾ ཏཱཝ ཝཏྠུནོ དུབྦལཏཱཡ ཨཔྤཏིཊྛིཏཏཱཡ པཙྩཡཝེཀལླཏཱཡ ཨཱགནྟུཀཏཱཡ ཙ རཱུཔཾ ན སམུཊྛཱཔེཏི. ཏཏྠ ཧི སཧཛཱཏཾ ཝཏྠུ ཨུཔྤཱདཀྑཎེ དུབྦལཾ ཧོཏཱིཏི ཝཏྠུནོ དུབྦལཏཱཡ རཱུཔཾ ན སམུཊྛཱཔེཏི. ཡཐཱ ཙ པཔཱཏེ པཏནྟོ པུརིསོ ཨཉྙསྶ ནིསྶཡོ བྷཝིཏུཾ ན སཀྐོཏི, ཨེཝཾ ཨེཏམྤི ཀམྨཝེགཀྑིཏྟཏྟཱ པཔཱཏེ པཏམཱནཾ ཝིཡ ཨཔྤཏིཊྛིཏཾ. ཨིཏི ཀམྨཝེགཀྑིཏྟཏྟཱ, ཨཔྤཏིཊྛིཏཏཱཡཔི རཱུཔཾ ན སམུཊྛཱཔེཏི.

པཊིསནྡྷིཙིཏྟཉྩ ཝཏྠུནཱ སདྡྷིཾ ཨཔཙྪཱཨཔུརེ ཨུཔྤནྣཾ. ཏསྶ ཝཏྠུ པུརེཛཱཏཾ ཧུཏྭཱ པཙྩཡོ བྷཝིཏུཾ ན སཀྐོཏི. སཙེ སཀྐུཎེཡྻ, རཱུཔཾ སམུཊྛཱཔེཡྻ. ཡཏྲཱཔི ཝཏྠུ པུརེཛཱཏཾ ཧུཏྭཱ པཙྩཡོ བྷཝིཏུཾ སཀྐོཏི, པཝེཎཱི གྷཊིཡཏི, ཏཏྲཱཔི ཙིཏྟཾ ཨངྒཏོ ཨཔརིཧཱིནཾཡེཝ རཱུཔཾ སམུཊྛཱཔེཏི. ཡདི ཧི ཙིཏྟཾ ཋཱནཀྑཎེ ཝཱ བྷངྒཀྑཎེ ཝཱ རཱུཔཾ སམུཊྛཱཔེཡྻ, པཊིསནྡྷིཙིཏྟམྤི རཱུཔཾ སམུཊྛཱཔེཡྻ. ན པན ཙིཏྟཾ ཏསྨིཾ ཁཎདྭཡེ རཱུཔཾ སམུཊྛཱཔེཏི. ཡཐཱ པན ཨཧིཙྪཏྟཀམཀུལཾ པཐཝིཏོ ཨུཊྛཧནྟཾ པཾསུཙུཎྞཾ གཧེཏྭཱཝ ཨུཊྛཧཏི, ཨེཝཾ ཙིཏྟཾ པུརེཛཱཏཾ ཝཏྠུཾ ནིསྶཱཡ ཨུཔྤཱདཀྑཎེ ཨཊྛ རཱུཔཱནི གཧེཏྭཱཝ ཨུཊྛཧཏི. པཊིསནྡྷིཀྑཎེ ཙ ཝཏྠུ པུརེཛཱཏཾ ཧུཏྭཱ པཙྩཡོ བྷཝིཏུཾ ན སཀྐོཏཱིཏི པཙྩཡཝེཀལླཏཱཡཔི པཊིསནྡྷིཙིཏྟཾ རཱུཔཾ ན སམུཊྛཱཔེཏི.

ཡཐཱ ཙ ཨཱགནྟུཀཔུརིསོ ཨགཏཔུབྦཾ པདེསཾ གཏོ ཨཉྙེསཾ ¶ – ‘ཨེཐ བྷོ, ཨནྟོགཱམེ ཝོ ཨནྣཔཱནགནྡྷམཱལཱདཱིནི དསྶཱམཱི’ཏི ཝཏྟུཾ ན སཀྐོཏི, ཨཏྟནོ ཨཝིསཡཏཱཡ ཨཔྤཧུཏཏཱཡ, ཨེཝམེཝ པཊིསནྡྷིཙིཏྟཾ ཨཱགནྟུཀནྟི ཨཏྟནོ ཨཱགནྟུཀཏཱཡཔི རཱུཔཾ ན སམུཊྛཱཔེཏི. ཨཔིཙ སམཏིཾས ཀམྨཛརཱུཔཱནི ཙིཏྟསམུཊྛཱནརཱུཔཱནཾ ཋཱནཾ གཧེཏྭཱ ཋིཏཱནཱིཏིཔི པཊིསནྡྷིཙིཏྟཾ རཱུཔཾ ན སམུཊྛཱཔེཏི.

ཁཱིཎཱསཝསྶ པན ཙུཏིཙིཏྟཾ ཝཊྚམཱུལསྶ ཝཱུཔསནྟཏྟཱ ན སམུཊྛཱཔེཏི. ཏསྶ ཧི སབྦབྷཝེསུ ཝཊྚམཱུལཾ ཝཱུཔསནྟཾ ཨབྷབྦུཔྤཏྟིཀཾ པུནབྦྷཝེ པཝེཎཱི ནཱམ ¶ ནཏྠི. སོཏཱཔནྣསྶ པན སཏྟ བྷཝེ ཋཔེཏྭཱ ཨཊྛམེཝ ཝཊྚམཱུལཾ ཝཱུཔསནྟཾ. ཏསྨཱ ཏསྶ ཙུཏིཙིཏྟཾ སཏྟསུ བྷཝེསུ རཱུཔཾ སམུཊྛཱཔེཏི ¶ , སཀདཱགཱམིནོ དྭཱིསུ, ཨནཱགཱམིནོ ཨེཀསྨིཾ. ཁཱིཎཱསཝསྶ སབྦབྷཝེསུ ཝཊྚམཱུལསྶ ཝཱུཔསནྟཏྟཱ ནེཝ སམུཊྛཱཔེཏི.

དྭིཔཉྩཝིཉྙཱཎེསུ པན ཛྷཱནངྒཾ ནཏྠི, མགྒངྒཾ ནཏྠི, ཧེཏུ ནཏྠཱིཏི ཙིཏྟངྒཾ དུབྦལཾ ཧོཏཱིཏི ཙིཏྟངྒདུབྦལཏཱཡ ཏཱནི རཱུཔཾ ན སམུཊྛཱཔེནྟི. ཙཏྟཱརི ཨརཱུཔཝིཔཱཀཱནི ཏསྨིཾ བྷཝེ རཱུཔསྶ ནཏྠིཏཱཡ རཱུཔཾ ན སམུཊྛཱཔེནྟི. ན ཀེཝལཉྩ ཏཱནེཝ, ཡཱནི ཨཉྙཱནིཔི ཏསྨིཾ བྷཝེ ཨཊྛ ཀཱམཱཝཙརཀུསལཱནི, དས ཨཀུསལཱནི, ནཝ ཀིརིཡཙིཏྟཱནི, ཙཏྟཱརི ཨཱརུཔྤཀུསལཱནི, ཙཏསྶོ ཨཱརུཔྤཀིརིཡཱ, ཏཱིཎི མགྒཙིཏྟཱནི, ཙཏྟཱརི ཕལཙིཏྟཱནཱིཏི དྭེཙཏྟཱལཱིས ཙིཏྟཱནི ཨུཔྤཛྫནྟི, ཏཱནིཔི ཏཏྠ རཱུཔསྶ ནཏྠིཏཱཡ ཨེཝ རཱུཔཾ ན སམུཊྛཱཔེནྟི. ཨེཝཾ པཊིསནྡྷིཙིཏྟཾ རཱུཔཾ ན སམུཊྛཱཔེཏི.

ཨུཏུ པན པཋམཾ རཱུཔཾ སམུཊྛཱཔེཏི. ཀོ ཨེས ཨུཏུ ནཱམཱཏི? པཊིསནྡྷིཀྑཎེ ཨུཔྤནྣཱནཾ སམཏིཾསཀམྨཛརཱུཔཱནཾ ཨབྦྷནྟརཱ ཏེཛོདྷཱཏུ. སཱ ཋཱནཾ པཏྭཱ ཨཊྛ རཱུཔཱནི སམུཊྛཱཔེཏི. ཨུཏུ ནཱམ ཙེས དནྡྷནིརོདྷོ; ཙིཏྟཾ ཁིཔྤནིརོདྷཾ. ཏསྨིཾ དྷརནྟེཡེཝ སོལ༹ས ཙིཏྟཱནི ཨུཔྤཛྫིཏྭཱ ནིརུཛ྄ཛྷནྟི. ཏེསུ པཊིསནྡྷིཨནནྟརཾ པཋམབྷཝངྒཙིཏྟཾ ཨུཔྤཱདཀྑཎེཡེཝ ཨཊྛ རཱུཔཱནི སམུཊྛཱཔེཏི. ཡདཱ པན སདྡསྶ ཨུཔྤཏྟིཀཱལོ བྷཝིསྶཏི, ཏདཱ ཨུཏུཙིཏྟཱནི སདྡནཝཀཾ ནཱམ སམུཊྛཱཔེསྶནྟི. ཀབལཱི༹ཀཱརཱཧཱརོཔི ཋཱནཾ པཏྭཱ ¶ ཨཊྛ རཱུཔཱནི སམུཊྛཱཔེཏི. ཀུཏོ པནསྶ ཀབལཱི༹ཀཱརཱཧཱརོཏི? མཱཏིཏོ. ཝུཏྟམྤི ཙེཏཾ –

‘‘ཡཉྩསྶ བྷུཉྫཏཱི མཱཏཱ, ཨནྣཾ པཱནཉྩ བྷོཛནཾ;

ཏེན སོ ཏཏྠ ཡཱཔེཏི, མཱཏུཀུཙྪིགཏོ ནརོ’’ཏི. (སཾ. ནི. ༡.༢༣༥);

ཨེཝཾ ཀུཙྪིགཏོ དཱརཀོ མཱཏརཱ ཨཛ྄ཛྷོཧཊཨནྣཔཱནཨོཛཱཡ ཡཱཔེཏི. སཱཝ ཋཱནཔྤཏྟཱ ཨཊྛ རཱུཔཱནི སམུཊྛཱཔེཏི. ནནུ ཙ སཱ ཨོཛཱ ཁརཱ? ཝཏྠུ སུཁུམཾ? ཀཐཾ ཏཏྠ པཏིཊྛཱཏཱིཏི? པཋམཾ ཏཱཝ ན པཏིཊྛཱཏི; ཨེཀསྶ ཝཱ དྭིནྣཾ ཝཱ སཏྟཱཧཱནཾ གཏཀཱལེ པཏིཊྛཱཏི. ཏཏོ པན པུརེ ཝཱ པཏིཊྛཱཏུ པཙྪཱ ཝཱ; ཡདཱ མཱཏརཱ ཨཛ྄ཛྷོཧཊཨནྣཔཱནཨོཛཱ དཱརཀསྶ སརཱིརེ པཏིཊྛཱཏི, ཏདཱ ཨཊྛ རཱུཔཱནི སམུཊྛཱཔེཏི.

ཨོཔཔཱཏིཀསྶཱཔི ¶ ¶ པཀཏིཔཊིཡཏྟཱནཾ ཁཱདནཱིཡབྷོཛནཱིཡཱནཾ ཨཏྠིཊྛཱནེ ནིབྦཏྟསྶ ཏཱནི གཧེཏྭཱ ཨཛ྄ཛྷོཧརཏོ ཋཱནཔྤཏྟཱ ཨོཛཱ རཱུཔཾ སམུཊྛཱཔེཏི. ཨེཀོ ཨནྣཔཱནརཧིཏེ ཨརཉྙེ ནིབྦཏྟཏི, མཧཱཚཱཏཀོ ཧོཏི, ཨཏྟནོཝ ཛིཝ྄ཧཱཡ ཁེལ༹ཾ པརིཝཏྟེཏྭཱ གིལཏི. ཏཏྲཱཔིསྶ ཋཱནཔྤཏྟཱ ཨོཛཱ རཱུཔཾ སམུཊྛཱཔེཏི.

ཨེཝཾ པཉྩཝཱིསཏིཡཱ ཀོཊྛཱསེསུ དྭེཝ རཱུཔཱནི རཱུཔཾ སམུཊྛཱཔེནྟི – ཏེཛོདྷཱཏུ ཙ ཀབལཱི༹ཀཱརཱཧཱརོ ཙ. ཨརཱུཔེཔི དྭེཡེཝ དྷམྨཱ རཱུཔཾ སམུཊྛཱཔེནྟི – ཙིཏྟཉྩེཝ ཀམྨཙེཏནཱ ཙ. ཏཏྠ རཱུཔཾ ཨུཔྤཱདཀྑཎེ ཙ བྷངྒཀྑཎེ ཙ དུབྦལཾ, ཋཱནཀྑཎེ བལཝནྟི ཋཱནཀྑཎེ རཱུཔཾ སམུཊྛཱཔེཏི. ཙིཏྟཾ ཋཱནཀྑཎེ ཙ བྷངྒཀྑཎེ ཙ དུབྦལཾ, ཨུཔྤཱདཀྑཎེཡེཝ བལཝནྟི ཨུཔྤཱདཀྑཎེཡེཝ རཱུཔཾ སམུཊྛཱཔེཏི. ཀམྨཙེཏནཱ ནིརུདྡྷཱཝ པཙྩཡོ ཧོཏི. ཨཏཱིཏེ ཀཔྤཀོཊིསཏསཧསྶམཏྠཀེཔི ཧི ཨཱཡཱུཧིཏཾ ཀམྨཾ ཨེཏརཧི པཙྩཡོ ཧོཏི. ཨེཏརཧི ཨཱཡཱུཧིཏཾ ཨནཱགཏེ ཀཔྤཀོཊིསཏསཧསྶཔརིཡོསཱནེཔི པཙྩཡོ ཧོཏཱིཏི. ཨེཝཾ ‘པུབྦཱཔརཏོ’ ཝེདིཏབྦཱ.

‘ཨདྡྷཱནཔརིཙྪེདཏོ’ཏི རཱུཔཾ ཀིཏྟཀཾ ཨདྡྷཱནཾ ཏིཊྛཏི? ཨརཱུཔཾ ཀིཏྟཀནྟི? རཱུཔཾ གརུཔརིཎཱམཾ དནྡྷནིརོདྷཾ. ཨརཱུཔཾ ལཧུཔརིཎཱམཾ ཁིཔྤནིརོདྷཾ. རཱུཔེ དྷརནྟེཡེཝ སོལ༹ས ཙིཏྟཱནི ཨུཔྤཛྫིཏྭཱ ནིརུཛ྄ཛྷནྟི. ཏཾ ¶ པན སཏྟརསམེན ཙིཏྟེན སདྡྷིཾ ནིརུཛ྄ཛྷཏི. ཡཐཱ ཧི པུརིསོ ‘ཕལཾ པཱཏེསྶཱམཱི’ཏི མུགྒརེན རུཀྑསཱཁཾ པཧརེཡྻ, ཕལཱནི ཙ པཏྟཱནི ཙ ཨེཀཀྑཎེཡེཝ ཝཎྚཏོ མུཙྩེཡྻུཾ. ཏཏྠ ཕལཱནི ཨཏྟནོ བྷཱརིཀཏཱཡ པཋམཏརཾ པཐཝིཡཾ པཏནྟི, པཏྟཱནི ལཧུཀཏཱཡ པཙྪཱ. ཨེཝམེཝ མུགྒརཔྤཧཱརེན པཏྟཱནཉྩ ཕལཱནཉྩ ཨེཀཀྑཎེ ཝཎྚཏོ མུཏྟཀཱལོ ཝིཡ པཊིསནྡྷིཀྑཎེ རཱུཔཱརཱུཔདྷམྨཱནཾ ཨེཀཀྑཎེ པཱཏུབྷཱཝོ; ཕལཱནཾ བྷཱརིཀཏཱཡ པཋམཏརཾ པཐཝིཡཾ པཏནཾ ཝིཡ རཱུཔེ དྷརནྟེཡེཝ སོལ༹སནྣཾ ཙིཏྟཱནཾ ཨུཔྤཛྫིཏྭཱ ནིརུཛ྄ཛྷནཾ; པཏྟཱནཾ ལཧུཀཏཱཡ པཙྪཱ པཐཝིཡཾ པཏནཾ ཝིཡ རཱུཔསྶ སཏྟརསམེན ཙིཏྟེན སཧ ནིརུཛ྄ཛྷནཾ.

ཏཏྠ ཀིཉྩཱཔི རཱུཔཾ དནྡྷནིརོདྷཾ གརུཔརིཎཱམཾ, ཙིཏྟཾ ཁིཔྤནིརོདྷཾ ལཧུཔརིཎཱམཾ, རཱུཔཾ པན ཨརཱུཔཾ ཨརཱུཔཾ ཝཱ རཱུཔཾ ཨོཧཱཡ པཝཏྟིཏུཾ ན སཀྐོནྟི. དྭིནྣམྤི ཨེཀཔྤམཱཎཱཝ པཝཏྟི. ཏཏྲཱཡཾ ཨུཔམཱ – ཨེཀོ པུརིསོ ལཀུཎྚཀཔཱདོ, ཨེཀོ དཱིགྷཔཱདོ. ཏེསུ ཨེཀཏོ མགྒཾ གཙྪནྟེསུ ཡཱཝ དཱིགྷཔཱདོ ¶ ཨེཀཔདཝཱརཾ ཨཀྐམཏི, ཏཱཝ ཨིཏརོ པདེ པདཾ ཨཀྐམིཏྭཱ སོལ༹སཔདཝཱརེན གཙྪཏི. དཱིགྷཔཱདོ ལཀུཎྚཀཔཱདསྶ སོལ༹ས པདཝཱརེ ཨཏྟནོ པཱདཾ ཨཉྪིཏྭཱ ¶ ཨཱཀཌྜྷིཏྭཱ ཨེཀམེཝ པདཝཱརཾ ཀརོཏི. ཨིཏི ཨེཀོཔི ཨེཀཾ ཨཏིཀྐམིཏུཾ ན སཀྐོཏི. དྭིནྣམྤི གམནཾ ཨེཀཔྤམཱཎམེཝ ཧོཏི. ཨེཝཾསམྤདམིདཾ དཊྛབྦཾ. ལཀུཎྚཀཔཱདཔུརིསོ ཝིཡ ཨརཱུཔཾ; དཱིགྷཔཱདཔུརིསོ ཝིཡ རཱུཔཾ; དཱིགྷཔཱདསྶ ཨེཀཾ པདཝཱརཾ ཨཀྐམཎཀཱལེ ཨིཏརསྶ སོལ༹སཔདཝཱརཨཀྐམནཾ ཝིཡ རཱུཔེ དྷརནྟེཡེཝ ཨརཱུཔདྷམྨེསུ སོལ༹སནྣཾ ཙིཏྟཱནཾ ཨུཔྤཛྫིཏྭཱ ནིརུཛ྄ཛྷནཾ; དྭིནྣཾ པུརིསཱནཾ ལཀུཎྚཀཔཱདཔུརིསསྶ སོལ༹ས པདཝཱརེ ཨིཏརསྶ ཨཏྟནོ པཱདཾ ཨཉྪིཏྭཱ ཨཱཀཌྜྷིཏྭཱ ཨེཀཔདཝཱརཀརཎཾ ཝིཡ རཱུཔསྶ སཏྟརསམེན ཙིཏྟེན སདྡྷིཾ ནིརུཛ྄ཛྷནཾ; དྭིནྣཾ པུརིསཱནཾ ཨཉྙམཉྙཾ ཨནོཧཱཡ ཨེཀཔྤམཱཎེནེཝ གམནཾ ཝིཡ ཨརཱུཔསྶ རཱུཔཾ རཱུཔསྶ ཨརཱུཔཾ ཨནོཧཱཡ ཨེཀཔྤམཱཎེནེཝ པཝཏྟནནྟི. ཨེཝཾ ‘ཨདྡྷཱནཔརིཙྪེདཏོ’ ཝེདིཏབྦཱ.

‘ཨེཀུཔྤཱདནཱནཱནིརོདྷཏོ’ཏི ཨིདཾ པཙྪིམཀམྨཛཾ ཋཔེཏྭཱ དཱིཔེཏབྦཾ. པཋམཉྷི པཊིསནྡྷིཙིཏྟཾ, དུཏིཡཾ ¶ བྷཝངྒཾ, ཏཏིཡཾ བྷཝངྒཾ…པེ… སོལ༹སམཾ བྷཝངྒཾ. ཏེསུ ཨེཀེཀསྶ ཨུཔྤཱདཊྛིཏིབྷངྒཝསེན ཏཡོ ཏཡོ ཁཎཱ. ཏཏྠ ཨེཀེཀསྶ ཙིཏྟསྶ ཏཱིསུ ཏཱིསུ ཁཎེསུ སམཏིཾས སམཏིཾས ཀམྨཛརཱུཔཱནི ཨུཔྤཛྫནྟི. ཏེསུ པཊིསནྡྷིཙིཏྟསྶ ཨུཔྤཱདཀྑཎེ སམུཊྛིཏཾ ཀམྨཛརཱུཔཾ སཏྟརསམསྶ བྷཝངྒཙིཏྟསྶ ཨུཔྤཱདཀྑཎེཡེཝ ནིརུཛ྄ཛྷཏི; ཋིཏིཀྑཎེ སམུཊྛིཏཾ ཋིཏིཀྑཎེཡེཝ; བྷངྒཀྑཎེ སམུཊྛིཏཾ བྷངྒཀྑཎེཡེཝ ནིརུཛ྄ཛྷཏི. ཨེཝཾ དུཏིཡབྷཝངྒཙིཏྟཾ ཨཱདིཾ ཀཏྭཱ ཨཏྟནོ ཨཏྟནོ སཏྟརསམེན ཙིཏྟེན སདྡྷིཾ ཡོཛེཏྭཱ ནཡོ ནེཏབྦོ. ཨིཏི སོལ༹ས ཏིཀཱ ཨཊྛཙཏྟཱལཱིས ཧོནྟི. ཨཡཾ ཨཊྛཙཏྟཱལཱིསཀམྨཛརཱུཔཔཝེཎཱི ནཱམ. སཱ པནེསཱ རཏྟིཉྩ དིཝཱ ཙ ཁཱདནྟཱནམྤི བྷུཉྫནྟཱནམྤི སུཏྟཱནམྤི པམཏྟཱནམྤི ནདཱིསོཏོ ཝིཡ ཨེཀནྟཾ པཝཏྟཏི ཡེཝཱཏི. ཨེཝཾ ‘ཨེཀུཔྤཱདནཱནཱནིརོདྷཏོ’ ཝེདིཏབྦཱ.

‘ནཱནུཔྤཱདཨེཀནིརོདྷཏཱ’ པཙྪིམཀམྨཛེན དཱིཔེཏབྦཱ. ཏཏྠ ཨཱཡུསཾཁཱརཔརིཡོསཱནེ སོལ༹སནྣཾ ཙིཏྟཱནཾ ཝཱརེ སཏི ཧེཊྛཱསོལ༹སཀཾ ཨུཔརིསོལ༹སཀནྟི དྭེ ཨེཀཏོ ཡོཛེཏབྦཱནི. ཧེཊྛཱསོལ༹སཀསྨིཉྷི པཋམཙིཏྟསྶ ཨུཔྤཱདཀྑཎེ སམུཊྛིཏཾ སམཏིཾསཀམྨཛརཱུཔཾ ཨུཔརིསོལ༹སཀསྨིཾ པཋམཙིཏྟསྶ ཨུཔྤཱདཀྑཎེཡེཝ ནིརུཛ྄ཛྷཏི; ཋིཏིཀྑཎེ སམུཊྛིཏཾ ཏསྶ ཋིཏིཀྑཎེཡེཝ ¶ བྷངྒཀྑཎེ སམུཊྛིཏཾ ཏསྶ བྷངྒཀྑཎེཡེཝ ནིརུཛ྄ཛྷཏི. ཧེཊྛིམསོལ༹སཀསྨིཾ པན དུཏིཡཙིཏྟསྶ…པེ… སོལ༹སམཙིཏྟསྶ ཨུཔྤཱདཀྑཎེ སམུཊྛིཏཾ སམཏིཾསཀམྨཛརཱུཔཾ ཙུཏིཙིཏྟསྶ ཨུཔྤཱདཀྑཎེཡེཝ ནིརུཛ྄ཛྷཏི; ཏསྶ ཋིཏིཀྑཎེ སམུཊྛིཏཾ ཙུཏིཙིཏྟསྶ ཋིཏིཀྑཎེཡེཝ; བྷངྒཀྑཎེ སམུཊྛིཏཾ ཙུཏིཙིཏྟསྶ བྷངྒཀྑཎེཡེཝ ནིརུཛ྄ཛྷཏི. ཏཏོ པཊྛཱཡ ཀམྨཛརཱུཔཔཝེཎཱི ¶ ན པཝཏྟཏི. ཡདི པཝཏྟེཡྻ, སཏྟཱ ཨཀྑཡཱ ཨཝཡཱ ཨཛརཱ ཨམརཱ ནཱམ བྷཝེཡྻུཾ.

ཨེཏྠ པན ཡདེཏཾ ‘སཏྟརསམསྶ བྷཝངྒཙིཏྟསྶ ཨུཔྤཱདཀྑཎེཡེཝ ནིརུཛ྄ཛྷཏཱི’ཏིཨཱདིནཱ ནཡེན ‘ཨེཀསྶ ཙིཏྟསྶ ཨུཔྤཱདཀྑཎེ ཨུཔྤནྣཾ རཱུཔཾ ཨཉྙསྶ ཨུཔྤཱདཀྑཎེ ནིརུཛ྄ཛྷཏཱི’ཏི ཨཊྛཀཐཱཡཾ ཨཱགཏཏྟཱ ཝུཏྟཾ, ཏཾ ‘‘ཡསྶ ¶ ཀཱཡསངྑཱརོ ནིརུཛ྄ཛྷཏི, ཏསྶ ཙིཏྟསངྑཱརོ ནིརུཛ྄ཛྷཏཱི’’ཏི? ‘‘ཨཱམནྟཱ’’ཏི (ཡམ. ༢.སངྑཱརཡམཀ.༧༩) ཨིམཱཡ པཱལི༹ཡཱ ཝིརུཛ྄ཛྷཏི. ཀཐཾ? ཀཱཡསངྑཱརོ ཧི ཙིཏྟསམུཊྛཱནོ ཨསྶཱསཔསྶཱསཝཱཏོ. ཙིཏྟསམུཊྛཱནརཱུཔཉྩ ཙིཏྟསྶ ཨུཔྤཱདཀྑཎེ ཨུཔྤཛྫིཏྭཱ ཡཱཝ ཨཉྙཱནི སོལ༹ས ཙིཏྟཱནི ཨུཔྤཛྫནྟི ཏཱཝ ཏིཊྛཏི. ཏེསཾ སོལ༹སནྣཾ སབྦཔཙྪིམེན སདྡྷིཾ ནིརུཛ྄ཛྷཏི. ཨིཏི ཡེན ཙིཏྟེན སདྡྷིཾ ཨུཔྤཛྫཏི, ཏཏོ པཊྛཱཡ སཏྟརསམེན སདྡྷིཾ ནིརུཛ྄ཛྷཏི; ན ཀསྶཙི ཙིཏྟསྶ ཨུཔྤཱདཀྑཎེ ཝཱ ཋིཏིཀྑཎེ ཝཱ ནིརུཛ྄ཛྷཏི, ནཱཔི ཋིཏིཀྑཎེ ཝཱ བྷངྒཀྑཎེ ཝཱ ཨུཔྤཛྫཏི. ཨེསཱ ཙིཏྟསམུཊྛཱནརཱུཔསྶ དྷམྨཏཱཏི ནིཡམཏོ ཙིཏྟསངྑཱརེན སདྡྷིཾ ཨེཀཀྑཎེ ནིརུཛ྄ཛྷནཏོ ‘‘ཨཱམནྟཱ’’ཏི ཝུཏྟཾ.

ཡོ ཙཱཡཾ ཙིཏྟསམུཊྛཱནསྶ ཁཎནིཡམོ ཝུཏྟོ ཀམྨཱདིསམུཊྛཱནསྶཱཔི ཨཡམེཝ ཁཎནིཡམོ. ཏསྨཱ པཊིསནྡྷིཙིཏྟེན སཧུཔྤནྣཾ ཀམྨཛརཱུཔཾ ཏཏོ པཊྛཱཡ སཏྟརསམེན སདྡྷིཾ ནིརུཛ྄ཛྷཏི. པཊིསནྡྷིཙིཏྟསྶ ཋིཏིཀྑཎེ ཨུཔྤནྣཾ ཨཊྛཱརསམསྶ ཨུཔྤཱདཀྑཎེ ནིརུཛ྄ཛྷཏི. པཊིསནྡྷིཙིཏྟསྶ བྷངྒཀྑཎེ ཨུཔྤནྣཾ ཨཊྛཱརསམསྶ ཋཱནཀྑཎེ ནིརུཛ྄ཛྷཏཱིཏི ཨིམིནཱ ནཡེནེཏྠ ཡོཛནཱ ཀཱཏབྦཱ. ཏཏོ པརཾ པན ཨུཏུསམུཊྛཱནིཀཔཝེཎཱིཡེཝ ཏིཊྛཏི. ‘ནཱིཧརིཏྭཱ ཛྷཱཔེཐཱ’ཏི ཝཏྟབྦཾ ཧོཏི. ཨེཝཾ ‘ནཱནུཔྤཱདཨེཀནིརོདྷཏོ’ ཝེདིཏབྦཱ.

‘ཨེཀུཔྤཱདཨེཀནིརོདྷཏོ’ཏི རཱུཔཾ པན རཱུཔེན སཧ ཨེཀུཔྤཱདཾ ཨེཀནིརོདྷཾ. ཨརཱུཔཾ ཨརཱུཔེན སཧ ཨེཀུཔྤཱདཾ ཨེཀནིརོདྷཾ. ཨེཝཾ ‘ཨེཀུཔྤཱདཨེཀནིརོདྷཏོ’ ཝེདིཏབྦཱ.

‘ནཱནུཔྤཱདནཱནཱནིརོདྷཏཱ’ ¶ པན ཙཏུསནྟཏིརཱུཔེན དཱིཔེཏབྦཱ. ཨིམསྶ ཧི ཨུདྡྷཾ པཱདཏལཱ ཨདྷོ ཀེསམཏྠཀཱ ཏཙཔརིཡནྟསྶ སརཱིརསྶ ཏཏྠ ཏཏྠ ཙཏུསནྟཏིརཱུཔཾ གྷནཔུཉྫབྷཱཝེན ཝཏྟཏི. ཨེཝཾ ཝཏྟམཱནསྶཱཔིསྶ ན ཨེཀུཔྤཱདཱདིཏཱ སལླཀྑེཏབྦཱ. ཡཐཱ པན ཨུཔཙིཀརཱཛི ཝཱ ཀིཔིལླིཀརཱཛི ཝཱ ཨོལོཀིཡམཱནཱ ཨེཀཱབདྡྷཱ ཝིཡ ཧོཏི, ན པན ཨེཀཱབདྡྷཱ. ཨཉྙིསྶཱ ཧི ¶ སཱིསསནྟིཀེ ཨཉྙིསྶཱ སཱིསམྤི ཨུདརམྤི པཱདཱཔི, ཨཉྙིསྶཱ ཨུདརསནྟིཀེ ཨཉྙིསྶཱ སཱིསམྤི ཨུདརམྤི པཱདཱཔི, ཨཉྙིསྶཱ པཱདསནྟིཀེ ཨཉྙིསྶཱ སཱིསམྤི ཨུདརམྤི པཱདཱཔི ཧོནྟི. ཨེཝམེཝ ཙཏུསནྟཏིརཱུཔཱནམྤི ཨཉྙསྶ ཨུཔྤཱདཀྑཎེ ¶ ཨཉྙསྶ ཨུཔྤཱདོཔི ཧོཏི ཋིཏིཔི བྷངྒོཔི, ཨཉྙསྶ ཋིཏིཀྑཎེ ཨཉྙསྶ ཨུཔྤཱདོཔི ཧོཏི ཋིཏིཔི བྷངྒོཔི, ཨཉྙསྶ བྷངྒཀྑཎེ ཨཉྙསྶ ཨུཔྤཱདོཔི ཧོཏི ཋིཏིཔི བྷངྒོཔི. ཨེཝམེཏྠ ‘ནཱནུཔྤཱདནཱནཱནིརོདྷཏཱ’ ཝེདིཏབྦཱ.

‘ཨཏཱིཏཱདཱིནི’ པན དཱུརདུཀཔརིཡོསཱནཱནི པཱལི༹ཡཾ ཨཱགཏཱནེཝ. ‘པཙྩཡསམུཊྛཱནཱནི’པི ‘‘ཀམྨཛཾ, ཀམྨཔཙྩཡཾ, ཀམྨཔཙྩཡཨུཏུསམུཊྛཱན’’ནྟིཨཱདིནཱ (དྷ. ས. ཨཊྛ. ༩༧༥) ནཡེན ཧེཊྛཱ ཀཐིཏཱནིཡེཝ. པཉྩཔི པན ཁནྡྷཱ པརིནིཔྥནྣཱཝ ཧོནྟི, ནོ ཨཔརིནིཔྥནྣཱ; སངྑཏཱཝ ནོ ཨསངྑཏཱ; ཨཔིཙ ནིཔྥནྣཱཔི ཧོནྟིཡེཝ. སབྷཱཝདྷམྨེསུ ཧི ནིབྦཱནམེཝེཀཾ ཨཔརིནིཔྥནྣཾ ཨནིཔྥནྣཉྩ. ནིརོདྷསམཱཔཏྟི པན ནཱམཔཉྙཏྟི ཙ ཀཐནྟི? ནིརོདྷསམཱཔཏྟི ལོཀིཡལོཀུཏྟརཱཏི ཝཱ སངྑཏཱསངྑཏཱཏི ཝཱ པརིནིཔྥནྣཱཔརིནིཔྥནྣཱཏི ཝཱ ན ཝཏྟབྦཱ. ནིཔྥནྣཱ པན ཧོཏི སམཱཔཛྫནྟེན སམཱཔཛྫིཏབྦཏོ. ཏཐཱ ནཱམཔཉྙཏྟི. སཱཔི ཧི ལོཀིཡཱདིབྷེདཾ ན ལབྷཏི; ནིཔྥནྣཱ པན ཧོཏི ནོ ཨནིཔྥནྣཱ; ནཱམགྒཧཎཉྷི གཎྷནྟོཝ གཎྷཱཏཱིཏི.

ཀམཱདིཝིནིཙྪཡཀཐཱ

ཨེཝཾ པཀིཎྞཀཏོ ཁནྡྷེ ཝིདིཏྭཱ པུན ཨེཏེསུཡེཝ –

ཁནྡྷེསུ ཉཱཎབྷེདཏྠཾ, ཀམཏོཐ ཝིསེསཏོ;

ཨནཱུནཱདྷིཀཏོ ཙེཝ, ཨུཔམཱཏོ ཏཐེཝ ཙ.

དཊྛབྦཏོ དྭིདྷཱ ཨེཝཾ, པསྶནྟསྶཏྠསིདྡྷིཏོ;

ཝིནིཙྪཡནཡོ སམྨཱ, ཝིཉྙཱཏབྦོ ཝིབྷཱཝིནཱ.

ཏཏྠ ¶ ¶ ‘ཀམཏོ’ཏི ཨིདྷ ཨུཔྤཏྟིཀྐམོ, པཧཱནཀྐམོ, པཊིཔཏྟིཀྐམོ, བྷཱུམིཀྐམོ, དེསནཱཀྐམོཏི བཧུཝིདྷོ ཀམོ.

ཏཏྠ ‘‘པཋམཾ ཀལལཾ ཧོཏི, ཀལལཱ ཧོཏི ཨབྦུད’’ནྟི (སཾ. ནི. ༡.༢༣༥) ཨེཝམཱདི ཨུཔྤཏྟིཀྐམོ. ‘‘དསྶནེན པཧཱཏབྦཱ དྷམྨཱ, བྷཱཝནཱཡ པཧཱཏབྦཱ དྷམྨཱ’’ཏི (དྷ. ས. ཏིཀམཱཏིཀཱ ༨) ཨེཝམཱདི པཧཱནཀྐམོ. ‘‘སཱིལཝིསུདྡྷི, ཙིཏྟཝིསུདྡྷཱི’’ཏི (མ. ནི. ༡.༢༥༩; པཊི. མ. ༣.༤༡) ཨེཝམཱདི པཊིཔཏྟིཀྐམོ. ‘‘ཀཱམཱཝཙརཱ ¶ , རཱུཔཱཝཙརཱ’’ཏི ཨེཝམཱདི བྷཱུམིཀྐམོ. ‘‘ཙཏྟཱརོ སཏིཔཊྛཱནཱ, ཙཏྟཱརོ སམྨཔྤདྷཱནཱ’’ཏི (དཱི. ནི. ༣.༡༤༥) ཝཱ ‘‘དཱནཀཐཾ སཱིལཀཐ’’ནྟི (མ. ནི. ༢.༦༩; དཱི. ནི. ༡.༢༩༨) ཝཱ ཨེཝམཱདི དེསནཱཀྐམོ. ཏེསུ ཨིདྷ ཨུཔྤཏྟིཀྐམོ ཏཱཝ ན ཡུཛྫཏི, ཀལལཱདཱིནཾ ཝིཡ ཁནྡྷཱནཾ པུབྦཱཔརིཡཝཝཏྠཱནེན ཨནུཔྤཏྟིཏོ; ན པཧཱནཀྐམོ ཀུསལཱབྱཱཀཏཱནཾ ཨཔྤཧཱཏབྦཏོ; ན པཊིཔཏྟིཀྐམོ ཨཀུསལཱནཾ ཨཔྤཊིཔཛྫནཱིཡཏོ; ན བྷཱུམིཀྐམོ ཝེདནཱདཱིནཾ ཙཏུབྷཱུམཀཔརིཡཱཔནྣཏྟཱ.

དེསནཱཀྐམོ པན ཡུཛྫཏི. ཨབྷེདེན ཧི ཡཾ པཉྩསུ ཁནྡྷེསུ ཨཏྟགྒཱཧཔཏིཏཾ ཝེནེཡྻཛནཾ སམཱུཧགྷནཝིནིབྦྷོགདསྶནེན ཨཏྟགྒཱཧཏོ མོཙེཏུཀཱམོ བྷགཝཱ ཧིཏཀཱམོ ཏསྶ ཛནསྶ སུཁགྒཧཎཏྠཾ ཙཀྑུཨཱདཱིནམྤི ཝིསཡབྷཱུཏཾ ཨོལཱ༹རིཀཾ པཋམཾ རཱུཔཀྑནྡྷཾ དེསེསི. ཏཏོ ཨིཊྛཱནིཊྛརཱུཔསཾཝེདིཏཾ ཝེདནཾ, ཡཾ ཝེདཡཏི ཏཾ སཉྫཱནཱཏཱིཏི ཨེཝཾ ཝེདནཱཝིསཡསྶ ཨཱཀཱརགྒཱཧིཀཾ སཉྙཾ, སཉྙཱཝསེན ཨབྷིསངྑཱརཀེ སངྑཱརེ, ཏེསཾ ཝེདནཱདཱིནཾ ནིསྶཡཾ ཨདྷིཔཏིབྷཱུཏཉྩ ཝིཉྙཱཎནྟི ཨེཝཾ ཏཱཝ ‘ཀམཏོ’ ཝིནིཙྪཡནཡོ ཝིཉྙཱཏབྦོ.

‘ཝིསེསཏོ’ཏི ཁནྡྷཱནཉྩ ཨུཔཱདཱནཀྑནྡྷཱནཉྩ ཝིསེསཏོ. ཀོ པན ཏེསཾ ཝིསེསོ? ཁནྡྷཱ ཏཱཝ ཨཝིསེསཏོ ཝུཏྟཱ, ཨུཔཱདཱནཀྑནྡྷཱ སཱསཝཨུཔཱདཱནཱིཡབྷཱཝེན ཝིསེསེཏྭཱ. ཡཐཱཧ –

‘‘པཉྩ, བྷིཀྑཝེ, ཁནྡྷེ དེསེསྶཱམི པཉྩུཔཱདཱནཀྑནྡྷེ ཙ, ཏཾ སུཎཱཐ. ཀཏམེ ཙ, བྷིཀྑཝེ, པཉྩཀྑནྡྷཱ? ཡཾ ཀིཉྩི, བྷིཀྑཝེ, རཱུཔཾ ཨཏཱིཏཱནཱགཏཔཙྩུཔྤནྣཾ…པེ… སནྟིཀེ ཝཱ – ཨཡཾ ཝུཙྩཏི, རཱུཔཀྑནྡྷོ. ཡཱ ཀཱཙི ཝེདནཱ…པེ… ཡཱ ཀཱཙི སཉྙཱ…པེ… ཡེ ཀེཙི སངྑཱརཱ…པེ… ཡཾ ཀིཉྩི ཝིཉྙཱཎཾ ¶ …པེ… སནྟིཀེ ཝཱ – ཨཡཾ ཝུཙྩཏི, ཝིཉྙཱཎཀྑནྡྷོ. ཨིམེ ཝུཙྩནྟི, བྷིཀྑཝེ, པཉྩཀྑནྡྷཱ. ཀཏམེ ཙ, བྷིཀྑཝེ, པཉྩུཔཱདཱནཀྑནྡྷཱ? ཡཾ ¶ ཀིཉྩི, བྷིཀྑཝེ, རཱུཔཾ…པེ… སནྟིཀེ ཝཱ སཱསཝཾ ཨུཔཱདཱནིཡཾ – ཨཡཾ ཝུཙྩཏི, རཱུཔཱུཔཱདཱནཀྑནྡྷོ. ཡཱ ཀཱཙི ཝེདནཱ…པེ… ཡཾ ཀིཉྩི ཝིཉྙཱཎཾ…པེ… སནྟིཀེ ཝཱ སཱསཝཾ ཨུཔཱདཱནིཡཾ – ཨཡཾ ¶ ཝུཙྩཏི, བྷིཀྑཝེ, ཝིཉྙཱཎུཔཱདཱནཀྑནྡྷོ. ཨིམེ ཝུཙྩནྟི, བྷིཀྑཝེ, པཉྩུཔཱདཱནཀྑནྡྷཱ’’ཏི (སཾ. ནི. ༣.༤༨).

ཨེཏྠ ཙ ཡཐཱ ཝེདནཱདཡོ ཨནཱསཝཱཔི སཱསཝཱཔི ཨཏྠི, ན ཨེཝཾ རཱུཔཾ. ཡསྨཱ པནསྶ རཱསཊྛེན ཁནྡྷབྷཱཝོ ཡུཛྫཏི ཏསྨཱ ཁནྡྷེསུ ཝུཏྟཾ. ཡསྨཱ རཱསཊྛེན ཙ སཱསཝཊྛེན ཙ ཨུཔཱདཱནཀྑནྡྷབྷཱཝོ ཡུཛྫཏི ཏསྨཱ ཨུཔཱདཱནཀྑནྡྷེསུ ཝུཏྟཾ. ཝེདནཱདཡོ པན ཨནཱསཝཱཝ ཁནྡྷེསུ ཝུཏྟཱ, སཱསཝཱ ཨུཔཱདཱནཀྑནྡྷེསུ. ‘ཨུཔཱདཱནཀྑནྡྷཱ’ཏི ཨེཏྠ ཙ ཨུཔཱདཱནགོཙརཱ ཁནྡྷཱ ཨུཔཱདཱནཀྑནྡྷཱཏི ཨེཝམཏྠོ དཊྛབྦོ. ཨིདྷ པན སབྦེཔེཏེ ཨེཀཛ྄ཛྷཾ ཀཏྭཱ ཁནྡྷཱཏི ཨདྷིཔྤེཏཱ.

‘ཨནཱུནཱདྷིཀཏོ’ཏི ཀསྨཱ པན བྷགཝཏཱ པཉྩེཝ ཁནྡྷཱ ཝུཏྟཱ ཨནཱུནཱ ཨནདྷིཀཱཏི? སབྦསངྑཏསབྷཱགེཀསངྒཧཏོ, ཨཏྟཏྟནིཡགྒཱཧཝཏྠུསྶ ཨེཏཔྤརམཏོ, ཨཉྙེསཉྩ ཏདཝརོདྷཏོ. ཨནེཀཔྤབྷེདེསུ ཧི སངྑཏདྷམྨེསུ སབྷཱགཝསེན སངྒཡ྄ཧམཱནེསུ རཱུཔཾ རཱུཔསབྷཱགསངྒཧཝསེན ཨེཀོ ཁནྡྷོ ཧོཏི, ཝེདནཱ ཝེདནཱསབྷཱགསངྒཧཝསེན ཨེཀོ ཁནྡྷོ ཧོཏི. ཨེས ནཡོ སཉྙཱདཱིསུཔི. ཏསྨཱ སབྦསངྑཏསབྷཱགསངྒཧཏོ པཉྩེཝ ཝུཏྟཱ. ཨེཏཔརམཉྩེཏཾ ཨཏྟཏྟནིཡགྒཱཧཝཏྠུ ཡདིདཾ རཱུཔཱདཡོ པཉྩ. ཝུཏྟཉྷེཏཾ – ‘‘རཱུཔེ ཁོ, བྷིཀྑཝེ, སཏི རཱུཔཾ ཨུཔཱདཱཡ རཱུཔཾ ཨབྷིནིཝིསྶ ཨེཝཾ དིཊྛི ཨུཔྤཛྫཏི – ‘ཨེཏཾ མམ, ཨེསོཧམསྨི, ཨེསོ མེ ཨཏྟཱ’ཏི (སཾ. ནི. ༣.༢༠༧). ཝེདནཱཡ… སཉྙཱཡ… སངྑཱརེསུ…. ཝིཉྙཱཎེ སཏི ཝིཉྙཱཎཾ ཨུཔཱདཱཡ ཝིཉྙཱཎཾ ཨབྷིནིཝིསྶ ཨེཝཾ དིཊྛི ཨུཔྤཛྫཏི – ‘ཨེཏཾ མམ, ཨེསོཧམསྨི, ཨེསོ མེ ཨཏྟཱ’’’ཏི. ཏསྨཱ ཨཏྟཏྟནིཡགྒཱཧཝཏྠུསྶ ཨེཏཔརམཏོཔི པཉྩེཝ ཝུཏྟཱ. ཡེཔི ཙཉྙེ སཱིལཱདཡོ པཉྩ དྷམྨཀྑནྡྷཱ ཝུཏྟཱ, ཏེཔི སངྑཱརཀྑནྡྷཔརིཡཱཔནྣཏྟཱ ཨེཏྠེཝ ཨཝརོདྷཾ གཙྪནྟི. ཏསྨཱ ཨཉྙེསཾ ཏདཝརོདྷཏོཔི པཉྩེཝ ཝུཏྟཱཏི. ཨེཝཾ ‘ཨནཱུནཱདྷིཀཏོ’ ཝིནིཙྪཡནཡོ ཝིཉྙཱཏབྦོ.

‘ཨུཔམཱཏོ’ཏི ཨེཏྠ ཧི གིལཱནསཱལཱུཔམོ རཱུཔུཔཱདཱནཀྑནྡྷོ ¶ གིལཱནཱུཔམསྶ ཝིཉྙཱཎུཔཱདཱནཀྑནྡྷསྶ ¶ ཝཏྠུདྭཱརཱརམྨཎཝསེན ནིཝཱསནཊྛཱནཏོ, གེལཉྙཱུཔམོ ¶ ཝེདནུཔཱདཱནཀྑནྡྷོ ཨཱབཱདྷཀཏྟཱ, གེལཉྙསམུཊྛཱནཱུཔམོ སཉྙུཔཱདཱནཀྑནྡྷོ ཀཱམསཉྙཱདིཝསེན རཱགཱདིསམྤཡུཏྟཝེདནཱསམྦྷཝཱ, ཨསཔྤཱཡསེཝནཱུཔམོ སངྑཱརུཔཱདཱནཀྑནྡྷོ ཝེདནཱགེལཉྙསྶ ནིདཱནཏྟཱ. ‘‘ཝེདནཾ ཝེདནཏྟཱཡ སངྑཏམབྷིསངྑརོནྟཱི’’ཏི (སཾ. ནི. ༣.༧༩) ཧི ཝུཏྟཾ. ཏཐཱ ‘‘ཨཀུསལསྶ ཀམྨསྶ ཀཏཏྟཱ ཨུཔཙིཏཏྟཱ ཝིཔཱཀཾ ཀཱཡཝིཉྙཱཎཾ ཨུཔྤནྣཾ ཧོཏི དུཀྑསཧགཏ’’ནྟི (དྷ. ས. ༥༥༦). གིལཱནཱུཔམོ ཝིཉྙཱཎུཔཱདཱནཀྑནྡྷོ ཝེདནཱགེལཉྙེན ཨཔརིམུཏྟཏྟཱ. ཨཔིཙ ཙཱརཀཀཱརཎཨཔརཱདྷཀཱརཎཀཱརཀཨཔརཱདྷིཀཱུཔམཱ ཨེཏེ བྷཱཛནབྷོཛནབྱཉྫནཔརིཝེསཀབྷུཉྫཀཱུཔམཱ ཙཱཏི, ཨེཝཾ ‘ཨུཔམཱཏོ’ ཝིནིཙྪཡནཡོ ཝིཉྙཱཏབྦོ.

‘དཊྛབྦཏོ དྭིདྷཱ’ཏི སངྑེཔཏོ ཝིཏྠཱརཏོ ཙཱཏི ཨེཝཾ དྭིདྷཱ དཊྛབྦཏོ པེཏྠ ཝིནིཙྪཡནཡོ ཝིཉྙཱཏབྦོ. སངྑེཔཏོ ཧི པཉྩུཔཱདཱནཀྑནྡྷཱ ཨཱསིཝིསཱུཔམེ (སཾ. ནི. ༤.༢༣༨) ཝུཏྟནཡེན ཨུཀྑིཏྟཱསིཀཔཙྩཏྠིཀཏོ, བྷཱརསུཏྟཝསེན (སཾ. ནི. ༣.༢༢) བྷཱརཏོ, ཁཛྫནཱིཡཔརིཡཱཡཝསེན (སཾ. ནི. ༣.༧༩) ཁཱདཀཏོ, ཡམཀསུཏྟཝསེན (སཾ. ནི. ༣.༨༥) ཨནིཙྩདུཀྑཱནཏྟསངྑཏཝདྷཀཏོ དཊྛབྦཱ.

ཝིཏྠཱརཏོ པནེཏྠ ཕེཎཔིཎྜོ ཝིཡ རཱུཔཾ དཊྛབྦཾ, ཨུདཀཔུབྦུལོ༹ ཝིཡ ཝེདནཱ, མརཱིཙིཀཱ ཝིཡ སཉྙཱ, ཀདལིཀྑནྡྷོ ཝིཡ སངྑཱརཱ, མཱཡཱ ཝིཡ ཝིཉྙཱཎཾ. ཝུཏྟཉྷེཏཾ –

‘‘ཕེཎཔིཎྜཱུཔམཾ རཱུཔཾ, ཝེདནཱ པུབྦུལཱུ༹པམཱ;

མརཱིཙིཀཱུཔམཱ སཉྙཱ, སངྑཱརཱ ཀདལཱུཔམཱ;

མཱཡཱུཔམཉྩ ཝིཉྙཱཎཾ, དེསིཏཱདིཙྩབནྡྷུནཱ’’ཏི. (སཾ. ནི. ༣.༩༥);

ཏཏྠ རཱུཔཱདཱིནཾ ཕེཎཔིཎྜཱདཱིཧི ཨེཝཾ སདིསཏཱ ཝེདིཏབྦཱ – ཡཐཱ ཧི ཕེཎཔིཎྜོ ནིསྶཱརོཝ ཨེཝཾ རཱུཔམྤི ནིཙྩསཱརདྷུཝསཱརཨཏྟསཱརཝིརཧེན ནིསྶཱརམེཝ. ཡཐཱ ཙ སོ ‘ཨིམིནཱ པཏྟཾ ཝཱ ཐཱལཀཾ ཝཱ ཀརིསྶཱམཱི’ཏི གཧེཏུཾ ན སཀྐཱ, གཧིཏོཔི ཏམཏྠཾ ན སཱདྷེཏི བྷིཛྫཏེཝ; ཨེཝཾ རཱུཔམྤི ¶ ‘ནིཙྩ’ནྟི ཝཱ ‘དྷུཝ’ནྟི ཝཱ ‘ཨཧ’ནྟི ཝཱ ‘མམ’ནྟི ཝཱ གཧེཏུཾ ན ¶ སཀྐཱ, གཧིཏམྤི ན ཏཐཱ ཏིཊྛཏི, ཨནིཙྩཾ དུཀྑཾ ཨནཏྟཱ ཨསུབྷཉྙེཝ ཧོཏཱིཏི. ཨེཝཾ ‘ཕེཎཔིཎྜསདིསམེཝ’ ཧོཏི.

ཡཐཱ ¶ ཝཱ པན ཕེཎཔིཎྜོ ཚིདྡཱཝཚིདྡོ ཨནེཀསནྡྷིགྷཊིཏོ བཧཱུནྣཾ ཨུདཀསཔྤཱདཱིནཾ པཱཎཱནཾ ཨཱཝཱསོ, ཨེཝཾ རཱུཔམྤི ཚིདྡཱཝཚིདྡཾ ཨནེཀསནྡྷིགྷཊིཏཾ. ཀུལཝསེན ཙེཏྠ ཨསཱིཏི ཀིམིཀུལཱནི ཝསནྟི. ཏདེཝ ཏེསཾ སཱུཏིགྷརམྤི ཝཙྩཀུཊིཔི གིལཱནསཱལཱཔི སུསཱནམྤི. ན ཏེ ཨཉྙཏྠ གནྟྭཱ གབྦྷཝུཊྛཱནཱདཱིནི ཀརོནྟི. ཨེཝམྤི ཕེཎཔིཎྜསདིསཾ. ཡཐཱ ཙ ཕེཎཔིཎྜོ ཨཱདིཏོཝ བདརཔཀྐམཏྟོ ཧུཏྭཱ ཨནུཔུབྦེན པབྦཏཀཱུཊམཏྟོཔི ཧོཏི, ཨེཝཾ རཱུཔམྤི ཨཱདིཏོ ཀལལམཏྟཾ ཧུཏྭཱ ཨནུཔུབྦེན བྱཱམམཏྟམྤི གོམཧིཾསཧཏྠིཨཱདཱིནཾ ཝསེན པབྦཏཀཱུཊམཏྟམྤི ཧོཏི, མཙྪཀཙྪཔཱདཱིནཾ ཝསེན ཨནེཀཡོཛནསཏཔྤམཱཎམྤི. ཨེཝམྤི ཕེཎཔིཎྜསདིསཾ. ཡཐཱ ཙ ཕེཎཔིཎྜོ ཨུཊྛིཏམཏྟོཔི བྷིཛྫཏི, ཐོཀཾ གནྟྭཱཔི, སམུདྡཾ པཏྭཱ པན ཨཝསྶམེཝ བྷིཛྫཏི; ཨེཝམེཝ རཱུཔམྤི ཀལལབྷཱཝེཔི བྷིཛྫཏི, ཨབྦུདཱདིབྷཱཝེ, ཨནྟརཱ པན ཨབྷེཛྫམཱནམྤི ཝསྶསཏཱཡུཀཱནཾ ཝསྶསཏཾ པཏྭཱ ཨཝསྶམེཝ བྷིཛྫཏི, མརཎམུཁེ ཙུཎྞཝིཙུཎྞཾ ཧོཏི. ཨེཝམྤི ཕེཎཔིཎྜསདིསཾ.

ཡཐཱ པན པུབྦུལོ༹ ཨསཱརོ, ཨེཝཾ ཝེདནཱཔི. ཡཐཱ ཙ སོ ཨབལོ, ཨགཡ྄ཧུཔགོ, ན སཀྐཱ ཏཾ གཧེཏྭཱ ཕལཀཾ ཝཱ ཨཱསནཾ ཝཱ ཀཱཏུཾ, གཧིཏགྒཧིཏོཔི བྷིཛྫཏེཝ; ཨེཝཾ ཝེདནཱཔི ཨབལཱ, ཨགཡ྄ཧུཔགཱ, ན སཀྐཱ ‘ནིཙྩཱ’ཏི ཝཱ ‘དྷུཝཱ’ཏི ཝཱ གཧེཏུཾ, གཧིཏཱཔི ན ཏཐཱ ཏིཊྛཏི. ཨེཝཾ ཨགཡ྄ཧུཔགཏཱཡཔི ཝེདནཱ ‘པུབྦུལ༹སདིསཱ’. ཡཐཱ པན ཏསྨིཾ ཏསྨིཾ ཨུདཀབིནྡུམྷི པུབྦུལོ༹ ཨུཔྤཛྫཏི ཙེཝ ནིརུཛ྄ཛྷཏི ཙ, ན ཙིརཊྛིཏིཀོ ཧོཏི; ཨེཝཾ ཝེདནཱཔི ཨུཔྤཛྫཏི ཙེཝ ནིརུཛ྄ཛྷཏི ཙ, ན ཙིརཊྛིཏིཀཱ ཧོཏི, ཨེཀཙྪརཀྑཎེ ཀོཊིསཏསཧསྶསངྑྱཱ ཨུཔྤཛྫིཏྭཱ ནིརུཛ྄ཛྷཏི. ཡཐཱ ཙ པུབྦུལོ༹ ཨུདཀཏལཾ, ཨུདཀབིནྡུཾ ¶ , ཨུདཀཛལླཀཾ སངྐཌྜྷིཏྭཱ པུཊཾ ཀཏྭཱ གཧཎཝཱཏཉྩཱཏི ཙཏྟཱརི ཀཱརཎཱནི པཊིཙྩ ཨུཔྤཛྫཏི; ཨེཝཾ ཝེདནཱཔི ཝཏྠུཾ, ཨཱརམྨཎཾ, ཀིལེསཛཱལཾ, ཕསྶསངྒྷཊྚནཉྩཱཏི ཙཏྟཱརི ཀཱརཎཱནི པཊིཙྩ ཨུཔྤཛྫཏི. ཨེཝམྤི ཝེདནཱ པུབྦུལ༹སདིསཱ.

སཉྙཱཔི ཨསཱརཀཊྛེན ‘མརཱིཙིསདིསཱ’. ཏཐཱ ཨགཡ྄ཧུཔགཊྛེན; ན ཧི སཀྐཱ ཏཾ གཧེཏྭཱ པིཝིཏུཾ ཝཱ ནྷཱཡིཏུཾ ཝཱ བྷཱཛནཾ ཝཱ པཱུརེཏུཾ. ཨཔིཙ ཡཐཱ མརཱིཙི ཝིཔྥནྡཏི, སཉྫཱཏཱུམིཝེགོ ¶ ཝིཡ ཁཱཡཏི; ཨེཝཾ ནཱིལསཉྙཱདིབྷེདཱ སཉྙཱཔི ནཱིལཱདིཨནུབྷཝནཏྠཱཡ ཕནྡཏི ཝིཔྥནྡཏི. ཡཐཱ ཙ མརཱིཙི མཧཱཛནཾ ཝིཔྤལམྦྷེཏི ¶ , ‘པརིཔུཎྞཝཱཔཱི ཝིཡ པརིཔུཎྞནདཱི ཝིཡ དིསྶཏཱི’ཏི ཝདཱཔེཏི; ཨེཝཾ སཉྙཱཔི ཝིཔྤལམྦྷེཏི, ‘ཨིདཾ ནཱིལཀཾ སུབྷཾ སུཁཾ ནིཙྩ’ནྟི ཝདཱཔེཏི. པཱིཏཀཱདཱིསུཔི ཨེསེཝ ནཡོ. ཨེཝཾ ཝིཔྤལམྦྷནེནཱཔི མརཱིཙིསདིསཱ.

སངྑཱརཱཔི ཨསཱརཀཊྛེན ‘ཀདལིཀྑནྡྷསདིསཱ’. ཏཐཱ ཨགཡ྄ཧུཔགཊྛེན. ཡཐེཝ ཧི ཀདལིཀྑནྡྷཏོ ཀིཉྩི གཧེཏྭཱ ན སཀྐཱ གོཔཱནསཱིཨཱདཱིནམཏྠཱཡ ཨུཔནེཏུཾ, ཨུཔནཱིཏམྤི ན ཏཐཱ ཧོཏི; ཨེཝཾ སངྑཱརཱཔི ན སཀྐཱ ནིཙྩཱདིཝསེན གཧེཏུཾ, གཧིཏཱཔི ན ཏཐཱ ཧོནྟི. ཡཐཱ ཙ ཀདལིཀྑནྡྷོ བཧུཝཊྚིསམོདྷཱནོ ཧོཏི, ཨེཝཾ སངྑཱརཀྑནྡྷོཔི བཧུདྷམྨསམོདྷཱནོ. ཡཐཱ ཙ ཀདལིཀྑནྡྷོ ནཱནཱལཀྑཎོ, ཨཉྙོཡེཝ ཧི བཱཧིརཱཡ པཏྟཝཊྚིཡཱ ཝཎྞོ, ཨཉྙོ ཏཏོ ཨབྦྷནྟརབྦྷནྟརཱནཾ; ཨེཝམེཝ སངྑཱརཀྑནྡྷོཔི ཨཉྙདེཝ ཕསྶསྶ ལཀྑཎཾ, ཨཉྙཾ ཙེཏནཱདཱིནཾ. སམོདྷཱནེཏྭཱ པན སངྑཱརཀྑནྡྷོཏྭེཝ ཝུཙྩཏཱིཏི. ཨེཝམྤི སངྑཱརཀྑནྡྷོ ཀདལིཀྑནྡྷསདིསོ.

ཝིཉྙཱཎམྤི ཨསཱརཀཊྛེན ‘མཱཡཱསདིསཾ’. ཏཐཱ ཨགཡ྄ཧུཔགཊྛེན. ཡཐཱ ཙ མཱཡཱ ཨིཏྟརཱ ལཧུཔཙྩུཔཊྛཱནཱ, ཨེཝཾ ཝིཉྙཱཎཾ. ཏཉྷི ཏཏོཔི ཨིཏྟརཏརཉྩེཝ ལཧུཔཙྩུཔཊྛཱནཏརཉྩ. ཏེནེཝ ཧི ཙིཏྟེན པུརིསོ ཨཱགཏོ ཝིཡ, གཏོ ཝིཡ, ཋིཏོ ཝིཡ, ནིསིནྣོ ཝིཡ ཧོཏི. ཨཉྙདེཝ ཙཱགམནཀཱལེ ཙིཏྟཾ, ཨཉྙཾ གམནཀཱལཱདཱིསུ. ཨེཝམྤི ཝིཉྙཱཎཾ མཱཡཱསདིསཾ. མཱཡཱ ཙ མཧཱཛནཾ ཝཉྩེཏི, ཡཾ ཀིཉྩིདེཝ ‘ཨིདཾ སུཝཎྞཾ རཛཏཾ མུཏྟཱ’ཏིཔི གཧཱཔེཏི. ཝིཉྙཱཎམྤི ¶ མཧཱཛནཾ ཝཉྩེཏི, ཏེནེཝ ཙིཏྟེན ཨཱགཙྪནྟཾ ཝིཡ, གཙྪནྟཾ ཝིཡ, ཋིཏཾ ཝིཡ, ནིསིནྣཾ ཝིཡ ཀཏྭཱ གཱཧཱཔེཏི. ཨཉྙདེཝ ཙ ཨཱགམནེ ཙིཏྟཾ, ཨཉྙཾ གམནཱདཱིསུ. ཨེཝམྤི ཝིཉྙཱཎཾ མཱཡཱསདིསཾ. ཝིསེསཏོ ཙ སུབྷཱརམྨཎམྤི ཨོལཱ༹རིཀམྤི ཨཛ྄ཛྷཏྟིཀརཱུཔཾ ཨསུབྷནྟི དཊྛབྦཾ. ཝེདནཱ ཏཱིཧི དུཀྑཏཱཧི ཨཝིནིམུཏྟཏོ དུཀྑཱཏི སཉྙཱསངྑཱརཱ ཨཝིདྷེཡྻཏོ ཨནཏྟཱཏི ཝིཉྙཱཎཾ ཨུདཡབྦཡདྷམྨཏོ ཨནིཙྩནྟི དཊྛབྦཾ.

‘ཨེཝཾ པསྶནྟསྶཏྠསིདྡྷིཏོ’ཏི ཨེཝཉྩ སངྑེཔཝིཏྠཱརཝསེན དྭིདྷཱ པསྶཏོ ཡཱ ཨཏྠསིདྡྷི ཧོཏི, ཏཏོཔི ཝིནིཙྪཡནཡོ ཝིཉྙཱཏབྦོ, སེཡྻཐིདཾ – སངྑེཔཏོ ཏཱཝ པཉྩུཔཱདཱནཀྑནྡྷེསུ ཨུཀྑིཏྟཱསིཀཔཙྩཏྠིཀཱདིབྷཱཝེན པསྶནྟོ ཁནྡྷེཧི ན ཝིཧཉྙཏི. ཝིཏྠཱརཏོ པན རཱུཔཱདཱིནི ཕེཎཔིཎྜཱདིསདིསབྷཱཝེན པསྶནྟོ ན ཨསཱརེསུ སཱརདསྶཱི ཧོཏི. ཝིསེསཏོ ཙ ཨཛ྄ཛྷཏྟིཀརཱུཔཾ ¶ ཨསུབྷཏོ པསྶནྟོ ཀབལཱི༹ཀཱརཱཧཱརཾ པརིཛཱནཱཏི ¶ , ཨསུབྷེ སུབྷནྟི ཝིཔལླཱསཾ པཛཧཏི, ཀཱམོགྷཾ ཨུཏྟརཏི, ཀཱམཡོགེན ཝིསཾཡུཛྫཏི, ཀཱམཱསཝེན ཨནཱསཝོ ཧོཏི, ཨབྷིཛ྄ཛྷཱཀཱཡགནྠཾ བྷིནྡཏི, ཀཱམུཔཱདཱནཾ ན ཨུཔཱདིཡཏི. ཝེདནཾ དུཀྑཏོ པསྶནྟོ ཕསྶཱཧཱརཾ པརིཛཱནཱཏི, དུཀྑེ སུཁནྟི ཝིཔལླཱསཾ པཛཧཏི, བྷཝོགྷཾ ཨུཏྟརཏི, བྷཝཡོགེན ཝིསཾཡུཛྫཏི, བྷཝཱསཝེན ཨནཱསཝོ ཧོཏི, བྱཱཔཱདཀཱཡགནྠཾ བྷིནྡཏི, སཱིལབྦཏུཔཱདཱནཾ ན ཨུཔཱདིཡཏི. སཉྙཾ སངྑཱརེ ཙ ཨནཏྟཏོ པསྶནྟོ མནོསཉྩེཏནཱཧཱརཾ པརིཛཱནཱཏི, ཨནཏྟནི ཨཏྟཱཏི ཝིཔལླཱསཾ པཛཧཏི, དིཊྛོགྷཾ ཨུཏྟརཏི, དིཊྛིཡོགེན ཝིསཾཡུཛྫཏི, དིཊྛཱསཝེན ཨནཱསཝོ ཧོཏི, ཨིདཾ སཙྩཱབྷིནིཝེསཀཱཡགནྠཾ བྷིནྡཏི, ཨཏྟཝཱདུཔཱདཱནཾ ན ཨུཔཱདིཡཏི. ཝིཉྙཱཎཾ ཨནིཙྩཏོ པསྶནྟོ ཝིཉྙཱཎཱཧཱརཾ པརིཛཱནཱཏི, ཨནིཙྩེ ནིཙྩནྟི ཝིཔལླཱསཾ པཛཧཏི, ཨཝིཛྫོགྷཾ ཨུཏྟརཏི, ཨཝིཛྫཱཡོགེན ཝིསཾཡུཛྫཏི, ཨཝིཛྫཱསཝེན ཨནཱསཝོ ཧོཏི, སཱིལབྦཏཔརཱམཱསཀཱཡགནྠཾ བྷིནྡཏི, དིཊྛུཔཱདཱནཾ ན ཨུཔཱདིཡཏི.

ཨེཝཾ མཧཱནིསཾསཾ, ཝདྷཀཱདིཝསེན དསྶནཾ ཡསྨཱ;

ཏསྨཱ ཁནྡྷེ དྷཱིརོ, ཝདྷཀཱདིཝསེན པསྶེཡྻཱཏི.

སུཏྟནྟབྷཱཛནཱིཡཝཎྞནཱ.

༢. ཨབྷིདྷམྨབྷཱཛནཱིཡཝཎྞནཱ

༣༢. ཨིདཱནི ¶ ཨབྷིདྷམྨབྷཱཛནཱིཡཾ ཧོཏི. ཏཏྠ རཱུཔཀྑནྡྷནིདྡེསོ ཧེཊྛཱ རཱུཔཀཎྜེ ཝིཏྠཱརིཏནཡེནེཝ ཝེདིཏབྦོ.

༣༤. ཝེདནཱཀྑནྡྷནིདྡེསེ ཨེཀཝིདྷེནཱཏི ཨེཀཀོཊྛཱསེན. ཕསྶསམྤཡུཏྟོཏི ཕསྶེན སམྤཡུཏྟོ. སབྦཱཔི ཙཏུབྷཱུམིཀཝེདནཱ. སཧེཏུཀདུཀེ སཧེཏུཀཱ ཙཏུབྷཱུམིཀཝེདནཱ, ཨཧེཏུཀཱ ཀཱམཱཝཙརཱཝ. ཨིམིནཱ ཨུཔཱཡེན ཀུསལཔདཱདཱིཧི ཝུཏྟཱ ཝེདནཱ ཛཱནིཏབྦཱ. ཨཔིཙཱཡཾ ཝེདནཱཀྑནྡྷོ ཨེཀཝིདྷེན ཕསྶསམྤཡུཏྟཏོ དསྶིཏོ, དུཝིདྷེན སཧེཏུཀཱཧེཏུཀཏོ, ཏིཝིདྷེན ཛཱཏིཏོ ¶ , ཙཏུབྦིདྷེན བྷཱུམནྟརཏོ, པཉྩཝིདྷེན ཨིནྡྲིཡཏོ. ཏཏྠ སུཁིནྡྲིཡདུཀྑིནྡྲིཡཱནི ཀཱཡཔྤསཱདཝཏྠུཀཱནི ཀཱམཱཝཙརཱནེཝ. སོམནསྶིནྡྲིཡཾ ཚཊྛཝཏྠུཀཾ ཝཱ ཨཝཏྠུཀཾ ཝཱ ཏེབྷཱུམཀཾ ¶ . དོམནསྶིནྡྲིཡཾ ཚཊྛཝཏྠུཀཾ ཀཱམཱཝཙརཾ. ཨུཔེཀྑིནྡྲིཡཾ ཙཀྑཱདིཙཏུཔྤསཱདཝཏྠུཀཾ ཚཊྛཝཏྠུཀཾ ཨཝཏྠུཀཉྩ ཙཏུབྷཱུམཀཾ. ཚབྦིདྷེན ཝཏྠུཏོ དསྶིཏོ. ཏཏྠ པུརིམཱ པཉྩ ཝེདནཱ པཉྩཔྤསཱདཝཏྠུཀཱ ཀཱམཱཝཙརཱཝ ཚཊྛཱ ཨཝཏྠུཀཱ ཝཱ སཝཏྠུཀཱ ཝཱ ཙཏུབྷཱུམིཀཱ.

སཏྟཝིདྷེན ཏཏྠ མནོསམྥསྶཛཱ བྷེདཏོ དསྶིཏཱ, ཨཊྛཝིདྷེན ཏཏྠ ཀཱཡསམྥསྶཛཱ བྷེདཏོ, ནཝཝིདྷེན སཏྟཝིདྷབྷེདེ མནོཝིཉྙཱཎདྷཱཏུསམྥསྶཛཱ བྷེདཏོ, དསཝིདྷེན ཨཊྛཝིདྷབྷེདེ མནོཝིཉྙཱཎདྷཱཏུསམྥསྶཛཱ བྷེདཏོ. ཨེཏེསུ ཧི སཏྟཝིདྷབྷེདེ མནོསམྥསྶཛཱ མནོདྷཱཏུསམྥསྶཛཱ, མནོཝིཉྙཱཎདྷཱཏུསམྥསྶཛཱཏི དྭིདྷཱ བྷིནྣཱ. ཨཊྛཝིདྷབྷེདེ ཏཱཡ སདྡྷིཾ ཀཱཡསམྥསྶཛཱཔི སུཁཱ དུཀྑཱཏི དྭིདྷཱ བྷིནྣཱ. ནཝཝིདྷབྷེདེ སཏྟཝིདྷེ ཝུཏྟཱ མནོཝིཉྙཱཎདྷཱཏུསམྥསྶཛཱ ཀུསལཱདིཝསེན ཏིདྷཱ བྷིནྣཱ. དསཝིདྷབྷེདེ ཨཊྛཝིདྷེ ཝུཏྟཱ མནོཝིཉྙཱཎདྷཱཏུསམྥསྶཛཱ ཀུསལཱདིཝསེནེཝ ཏིདྷཱ བྷིནྣཱ.

ཀུསལཏྟིཀོ ཙེཏྠ ཀེཝལཾ པཱུརཎཏྠམེཝ ཝུཏྟོ. སཏྟཝིདྷཨཊྛཝིདྷནཝཝིདྷབྷེདེསུ པན ནཡཾ དཱཏུཾ ཡུཏྟཊྛཱནེ ¶ ནཡོ དིནྣོ. ཨབྷིདྷམྨཉྷི པཏྭཱ ཏཐཱགཏེན ནཡཾ དཱཏུཾ ཡུཏྟཊྛཱནེ ནཡོ ཨདིནྣོ ནཱམ ནཏྠི. ཨཡཾ ཏཱཝ དུཀམཱུལཀེ ཨེཀོ ཝཱརོ.

སཏྠཱ ཧི ཨིམསྨིཾ ཨབྷིདྷམྨབྷཱཛནཱིཡེ ཝེདནཱཀྑནྡྷཾ བྷཱཛེནྟོ ཏིཀེ གཧེཏྭཱ དུཀེསུ པཀྑིཔི, དུཀེ གཧེཏྭཱ ཏིཀེསུ པཀྑིཔི, ཏིཀེ ཙ དུཀེ ཙ ཨུབྷཏོཝཌྜྷནནཱིཧཱརེན ཨཱཧརི; སཏྟཝིདྷེན, ཙཏུཝཱིསཏིཝིདྷེན, ཏིཾསཝིདྷེན, བཧུཝིདྷེནཱཏི སབྦཐཱཔི བཧུཝིདྷེན ཝེདནཱཀྑནྡྷཾ དསྶེསི. ཀསྨཱ? པུགྒལཛ྄ཛྷཱསཡེན ཙེཝ དེསནཱཝིལཱསེན ཙ. དྷམྨཾ སོཏུཾ ནིསིནྣདེཝཔརིསཱཡ ཧི ཡེ དེཝཔུཏྟཱ ཏིཀེ ཨཱདཱཡ དུཀེསུ པཀྑིཔིཏྭཱ ཀཐིཡམཱནཾ པཊིཝིཛ྄ཛྷིཏུཾ སཀྐོནྟི, ཏེསཾ སཔྤཱཡཝསེན ཏཐཱ ཀཏྭཱ དེསེསི. ཡེ ཨིཏརེཧི ཨཱཀཱརེཧི ཀཐིཡམཱནཾ པཊིཝིཛ྄ཛྷིཏུཾ སཀྐོནྟི, ཏེསཾ ཏེཧཱཀཱརེཧི དེསེསཱིཏི. ཨཡམེཏྠ ‘པུགྒལཛ྄ཛྷཱསཡོ’. སམྨཱསམྦུདྡྷོ པན ཨཏྟནོ མཧཱཝིསཡཏཱཡ ཏིཀེ ཝཱ དུཀེསུ པཀྑིཔིཏྭཱ, དུཀེ ཝཱ ཏིཀེསུ ཨུབྷཏོཝཌྜྷནེན ཝཱ, སཏྟཝིདྷཱདིནཡེན ཝཱ, ཡཐཱ ¶ ཡཐཱ ཨིཙྪཏི ཏཐཱ ཏཐཱ དེསེཏུཾ སཀྐོཏི. ཏསྨཱཔི ཨིམེཧཱཀཱརེཧི དེསེསཱིཏི ཨཡམསྶ ‘དེསནཱཝིལཱསོ’.

ཏཏྠ ¶ ཏིཀེ ཨཱདཱཡ དུཀེསུ པཀྑིཔིཏྭཱ དེསིཏཝཱརོ དུཀམཱུལཀོ ནཱམ. དུཀེ ཨཱདཱཡ ཏིཀེསུ པཀྑིཔིཏྭཱ དེསིཏཝཱརོ ཏིཀམཱུལཀོ ནཱམ. ཏིཀེ ཙ དུཀེ ཙ ཨུབྷཏོ ཝཌྜྷེཏྭཱ དེསིཏཝཱརོ ཨུབྷཏོཝཌྜྷིཏཀོ ནཱམ. ཨཝསཱནེ སཏྟཝིདྷེནཱཏིཨཱདིཝཱརོ བཧུཝིདྷཝཱརོ ནཱམཱཏི ཨིམེ ཏཱཝ ཙཏྟཱརོ མཧཱཝཱརཱ.

ཏཏྠ དུཀམཱུལཀེ དུཀེསུ ལབྦྷམཱནེན ཨེཀེཀེན དུཀེན སདྡྷིཾ ཏིཀེསུ ཨལབྦྷམཱནེ ཝེདནཱཏྟིཀཔཱིཏིཏྟིཀསནིདསྶནཏྟིཀེ ཨཔནེཏྭཱ, སེསེ ལབྦྷམཱནཀེ ཨེཀཱུནཝཱིསཏི ཏིཀེ ཡོཛེཏྭཱ, དུཏིཡདུཀཔཋམཏྟིཀཡོཛནཝཱརཱདཱིནི ནཝཝཱརསཏཱནི པཉྙཱསཉྩ ཝཱརཱ ཧོནྟི. ཏེ སབྦེཔི པཱལི༹ཡཾ སཾཁིཔིཏྭཱ ཏཏྠ ཏཏྠ དསྶེཏབྦཡུཏྟཀཾ དསྶེཏྭཱ ཝུཏྟཱ. ཨསམྨུཡ྄ཧནྟེན པན ཝིཏྠཱརཏོ ཝེདིཏབྦཱ.

ཏིཀམཱུལཀེཔི ཏིཀེསུ ལབྦྷམཱནེན ཨེཀེཀེན ཏིཀེན སདྡྷིཾ དུཀེསུ ཨལབྦྷམཱནེ པཋམདུཀཱདཡོ དུཀེ ཨཔནེཏྭཱ, སེསེ ལབྦྷམཱནཀེ སཧེཏུཀདུཀཱདཡོ པཉྙཱས དུཀེ ཡོཛེཏྭཱ, པཋམཏྟིཀདུཏིཡདུཀཡོཛནཝཱརཱདཱིནི ནཝཝཱརསཏཱནི པཉྙཱསཉྩ ¶ ཝཱརཱ ཧོནྟི. ཏེཔི སབྦེ པཱལི༹ཡཾ སངྑིཔིཏྭཱ ཏཏྠ ཏཏྠ དསྶེཏབྦཡུཏྟཀཾ དསྶེཏྭཱ ཝུཏྟཱ. ཨསམྨུཡ྄ཧནྟེན པན ཝིཏྠཱརཏོ ཝེདིཏབྦཱ.

ཨུབྷཏོཝཌྜྷིཏཀེ དུཝིདྷབྷེདེ དུཏིཡདུཀཾ ཏིཝིདྷབྷེདེ ཙ པཋམཏིཀཾ ཨཱདིཾ ཀཏྭཱ ལབྦྷམཱནེཧི ཨེཀཱུནཝཱིསཏིཡཱ དུཀེཧི ལབྦྷམཱནེ ཨེཀཱུནཝཱིསཏིཏིཀེ ཡོཛེཏྭཱ དུཏིཡདུཀཔཋམཏིཀཡོཛནཝཱརཱདཡོ ཨེཀཱུནཝཱིསཏིཝཱརཱ ཝུཏྟཱ. ཨེས དུཀཏིཀཱནཾ ཝསེན ཨུབྷཏོཝཌྜྷིཏཏྟཱ ཨུབྷཏོཝཌྜྷིཏཀོ ནཱམ ཏཏིཡོ མཧཱཝཱརོ.

བཧུཝིདྷཝཱརསྶ སཏྟཝིདྷནིདྡེསེ ཨཱདིཏོ པཊྛཱཡ ལབྦྷམཱནེསུ ཨེཀཱུནཝཱིསཏིཡཱ ཏིཀེསུ ཨེཀེཀེན སདྡྷིཾ ཙཏསྶོ བྷཱུམིཡོ ཡོཛེཏྭཱ ཨེཀཱུནཝཱིསཏི སཏྟཝིདྷཝཱརཱ ཝུཏྟཱ. ཙཏུཝཱིསཏིཝིདྷནིདྡེསེཔི ཏེསཾཡེཝ ཏིཀཱནཾ ཝསེན ཨེཀཱུནཝཱིསཏིཝཱརཱ ཝུཏྟཱ. ཏཐཱ བཧུཝིདྷཝཱརེ ཙཱཏི ¶ . ཏིཾསཝིདྷཝཱརོ ཨེཀོཡེཝཱཏི སབྦེཔི ཨཊྛཔཉྙཱས ཝཱརཱ ཧོནྟི. ཨཡཾ ཏཱཝེཏྠ ཝཱརཔརིཙྪེདཝསེན པཱལི༹ཝཎྞནཱ.

ཨིདཱནི ¶ ཨཏྠཝཎྞནཱ ཧོཏི. ཏཏྠ སཏྟཝིདྷནིདྡེསོ ཏཱཝ ཨུཏྟཱནཏྠོཡེཝ. ཙཏུཝཱིསཏིཝིདྷནིདྡེསེ ཙཀྑུསམྥསྶཔཙྩཡཱ ཝེདནཱཀྑནྡྷོ ཨཏྠི ཀུསལོཏི ཀཱམཱཝཙརཨཊྛཀུསལཙིཏྟཝསེན ཝེདིཏབྦོ. ཨཏྠི ཨཀུསལོཏི དྭཱདསཨཀུསལཙིཏྟཝསེན ཝེདིཏབྦོ. ཨཏྠི ཨབྱཱཀཏོཏི ཏིསྶོ མནོདྷཱཏུཡོ, ཏིསྶོ ཨཧེཏུཀམནོཝིཉྙཱཎདྷཱཏུཡོ, ཨཊྛ མཧཱཝིཔཱཀཱནི, དས ཀཱམཱཝཙརཀིརིཡཱཏི ཙཏུཝཱིསཏིཡཱ ཙིཏྟཱནཾ ཝསེན ཝེདིཏབྦོ.

ཏཏྠ ཨཊྛ ཀུསལཱནི དྭཱདས ཨཀུསལཱནི ཙ ཛཝནཝསེན ལབྦྷནྟི. ཀིརིཡམནོདྷཱཏུ ཨཱཝཛྫནཝསེན ལབྦྷཏི. དྭེ ཝིཔཱཀམནོདྷཱཏུཡོ སམྤཊིཙྪནཝསེན, ཏིསྶོ ཝིཔཱཀམནོཝིཉྙཱཎདྷཱཏུཡོ སནྟཱིརཎཏདཱརམྨཎཝསེན, ཀིརིཡཱཧེཏུཀམནོཝིཉྙཱཎདྷཱཏུ ཝོཊྛབྦནཝསེན, ཨཊྛ མཧཱཝིཔཱཀཙིཏྟཱནི ཏདཱརམྨཎཝསེན, ནཝ ཀིརིཡཙིཏྟཱནི ཛཝནཝསེན ལབྦྷནྟི. སོཏགྷཱནཛིཝ྄ཧཱཀཱཡདྭཱརེསུཔི ཨེསེཝ ནཡོ.

མནོདྭཱརེ པན ཨཏྠི ཀུསལོཏི ཙཏུབྷཱུམཀཀུསལཝསེན ཀཐིཏཾ, ཨཏྠི ཨཀུསལོཏི དྭཱདསཨཀུསལཝསེན. ཨཏྠི ཨབྱཱཀཏོཏི ཨེཀཱདསནྣཾ ཀཱམཱཝཙརཝིཔཱཀཱནཾ, དསནྣཾ ཀིརིཡཱནཾ ¶ , ནཝནྣཾ རཱུཔཱཝཙརཱརཱུཔཱཝཙརཀིརིཡཱནཾ, ཙཏུནྣཾ སཱམཉྙཕལཱནནྟི ཙཏུཏྟིཾསཙིཏྟུཔྤཱདཝསེན ཀཐིཏཾ. ཏཏྠ ཙཏུབྷཱུམཀཀུསལཉྩེཝ ཨཀུསལཉྩ ཛཝནཝསེན ལབྦྷཏི. ཀིརིཡཏོ ཨཧེཏུཀམནོཝིཉྙཱཎདྷཱཏུ ཨཱཝཛྫནཝསེན, ཨེཀཱདས ཝིཔཱཀཙིཏྟཱནི ཏདཱརམྨཎཝསེན, ཏེབྷཱུམཀཀིརིཡཱ ཙེཝ སཱམཉྙཕལཱནི ཙ ཛཝནཝསེནེཝ ལབྦྷནྟི. ཏཱནི སཏྟཝིདྷཱདཱིསུ ཡཏྠ ཀཏྠཙི ཋཏྭཱ ཀཐེཏུཾ ཝཊྚནྟི. ཏིཾསཝིདྷེ པན ཋཏྭཱ དཱིཔིཡམཱནཱནི སུཁདཱིཔནཱནི ཧོནྟཱིཏི ཏིཾསཝིདྷསྨིཾཡེཝ ཋཏྭཱ དཱིཔཡིཾསུ.

ཨེཏཱནི ཧི སབྦཱནིཔི ཙིཏྟཱནི ཙཀྑུདྭཱརེ ཨུཔནིསྶཡཀོཊིཡཱ, སམཏིཀྐམཝསེན, བྷཱཝནཱཝསེནཱཏི ཏཱིཧཱཀཱརེཧི ལབྦྷནྟི. ཏཐཱ སོཏདྭཱརམནོདྭཱརེསུཔི. གྷཱནཛིཝ྄ཧཱཀཱཡདྭཱརེསུ པན སམཏིཀྐམཝསེན, བྷཱཝནཱཝསེནཱཏི དྭཱིཧེཝཱཀཱརེཧི ལབྦྷནྟཱིཏི ཝེདིཏབྦཱནི. ཀཐཾ? ཨིདྷ བྷིཀྑུ ཝིཧཱརཙཱརིཀཾ ཙརམཱནོ ཀསིཎམཎྜལཾ དིསྭཱ ‘ཀིཾ ནཱམེཏ’ནྟི པུཙྪིཏྭཱ ¶ ‘ཀསིཎམཎྜལ’ནྟི ཝུཏྟེ པུན ‘ཀིཾ ཨིམིནཱ ཀརོནྟཱི’ཏི པུཙྪཏི. ཨཐསྶ ཨཱཙིཀྑནྟི – ‘ཨེཝཾ བྷཱཝེཏྭཱ ཛྷཱནཱནི ཨུཔྤཱདེཏྭཱ, སམཱཔཏྟིཔདཊྛཱནཾ ཝིཔསྶནཾ ཝཌྜྷེཏྭཱ, ཨརཧཏྟཾ པཱཔུཎནྟཱི’ཏི. ཨཛ྄ཛྷཱསཡསམྤནྣོ ཀུལཔུཏྟོ ‘བྷཱརིཡཾ ཨེཏ’ནྟི ཨསལླཀྑེཏྭཱ ‘མཡཱཔི ཨེས གུཎོ ¶ ནིབྦཏྟེཏུཾ ཝཊྚཏི, ན ཁོ པན སཀྐཱ ཨེས ནིཔཛྫིཏྭཱ ནིདྡཱཡནྟེན ནིབྦཏྟེཏུཾ, ཨཱདིཏོཝ ཝཱིརིཡཾ ཀཱཏུཾ སཱིལཾ སོདྷེཏུཾ ཝཊྚཏཱི’ཏི ཙིནྟེཏྭཱ སཱིལཾ སོདྷེཏི. ཏཏོ སཱིལེ པཏིཊྛཱཡ དས པལིབོདྷེ ཨུཔཙྪིནྡིཏྭཱ, ཏིཙཱིཝརཔརམེན སནྟོསེན སནྟུཊྛོ, ཨཱཙརིཡུཔཛ྄ཛྷཱཡཱནཾ ཝཏྟཔཊིཝཏྟཾ ཀཏྭཱ, ཀམྨཊྛཱནཾ ཨུགྒཎྷིཏྭཱ, ཀསིཎཔརིཀམྨཾ ཀཏྭཱ, སམཱཔཏྟིཡོ ཨུཔྤཱདེཏྭཱ, སམཱཔཏྟིཔདཊྛཱནཾ ཝིཔསྶནཾ ཝཌྜྷེཏྭཱ, ཨརཧཏྟཾ པཱཔུཎཱཏི. ཏཏྠ སབྦཱཔི པརིཀམྨཝེདནཱ ཀཱམཱཝཙརཱ, ཨཊྛསམཱཔཏྟིཝེདནཱ རཱུཔཱཝཙརཱརཱུཔཱཝཙརཱ, མགྒཕལཝེདནཱ ལོཀུཏྟརཱཏི ཨེཝཾ ཙཀྑུཝིཉྙཱཎཾ ཙཏུབྷཱུམིཀཝེདནཱནིབྦཏྟིཡཱ བལཝཔཙྩཡོ ཧོཏཱིཏི ཙཏུབྷཱུམིཀཝེདནཱ ཙཀྑུསམྥསྶཔཙྩཡཱ ནཱམ ཛཱཏཱ. ཨེཝཾ ཏཱཝ ‘ཨུཔནིསྶཡཝསེན’ ལབྦྷནྟི.

ཙཀྑུདྭཱརེ ¶ པན རཱུཔེ ཨཱཔཱཐགཏེ ‘ཨིཊྛེ མེ ཨཱརམྨཎེ རཱགོ ཨུཔྤནྣོ, ཨནིཊྛེ པཊིགྷོ, ཨསམཔེཀྑནཱཡ མོཧོ, ཝིནིབནྡྷསྶ པན མེ མཱནོ ཨུཔྤནྣོ, པརཱམཊྛསྶ དིཊྛི, ཝིཀྑེཔགཏསྶ ཨུདྡྷཙྩཾ, ཨསནྣིཊྛཱགཏསྶ ཝིཙིཀིཙྪཱ, ཐཱམགཏསྶ ཨནུསཡོ ཨུཔྤནྣོ’ཏི པརིགྒཧེ ཋིཏོ ཀུལཔུཏྟོ ཨཏྟནོ ཀིལེསུཔྤཏྟིཾ ཉཏྭཱ ‘ཨིམེ མེ ཀིལེསཱ ཝཌྜྷམཱནཱ ཨནཡབྱསནཱཡ སཾཝཏྟིསྶནྟི, ཧནྡ ནེ ནིགྒཎྷཱམཱི’ཏི ཙིནྟེཏྭཱ ‘ན ཁོ པན སཀྐཱ ནིཔཛྫིཏྭཱ ནིདྡཱཡནྟེན ཀིལེསེ ནིགྒཎྷིཏུཾ; ཨཱདིཏོཝ ཝཱིརིཡཾ ཀཱཏུཾ ཝཊྚཏི སཱིལཾ སོདྷེཏུ’ནྟི ཧེཊྛཱ ཝུཏྟནཡེནེཝ པཊིཔཛྫིཏྭཱ ཨརཧཏྟཾ པཱཔུཎཱཏི. ཏཏྠ སབྦཱཔི པརིཀམྨཝེདནཱ ཀཱམཱཝཙརཱ, ཨཊྛསམཱཔཏྟིཝེདནཱ རཱུཔཱཝཙརཱརཱུཔཱཝཙརཱ, མགྒཕལཝེདནཱ ལོཀུཏྟརཱཏི ཨེཝཾ རཱུཔཱརམྨཎེ ཨུཔྤནྣཾ ཀིལེསཾ སམཏིཀྐམིཏྭཱ གཏཱཏི ཙཏུབྷཱུམིཀཝེདནཱ ཙཀྑུསམྥསྶཔཙྩཡཱ ནཱམ ཛཱཏཱ. ཨེཝཾ ‘སམཏིཀྐམཝསེན’ ལབྦྷནྟི.

ཙཀྑུདྭཱརེ པན རཱུཔེ ཨཱཔཱཐགཏེ ཨེཀོ ཨེཝཾ པརིགྒཧཾ པཊྛཔེཏི – ‘ཨིདཾ རཱུཔཾ ཀིཾ ནིསྶིཏ’ནྟི? ཏཏོ ནཾ ‘བྷཱུཏནིསྶིཏ’ནྟི ཉཏྭཱ ཙཏྟཱརི མཧཱབྷཱུཏཱནི ཨུཔཱདཱརཱུཔཉྩ རཱུཔནྟི པརིགྒཎྷཱཏི, ཏདཱརམྨཎེ དྷམྨེ ཨརཱུཔནྟི པརིགྒཎྷཱཏི. ཏཏོ སཔྤཙྩཡཾ ནཱམརཱུཔཾ པརིགཎྷིཏྭཱ ཏཱིཎི ལཀྑཎཱནི ཨཱརོཔེཏྭཱ ཝིཔསྶནཱཔཊིཔཱཊིཡཱ སངྑཱརེ སམྨསིཏྭཱ ཨརཧཏྟཾ པཱཔུཎཱཏི. ཏཏྠ སབྦཱཔི ¶ པརིཀམྨཝེདནཱ ཀཱམཱཝཙརཱ, ཨཊྛསམཱཔཏྟིཝེདནཱ རཱུཔཱཝཙརཱརཱུཔཱཝཙརཱ, མགྒཕལཝེདནཱ ལོཀུཏྟརཱཏི ཨེཝཾ རཱུཔཱརམྨཎཾ སམྨསིཏྭཱ ནིབྦཏྟིཏཱཏི ཨཡཾ ཝེདནཱ ཙཀྑུསམྥསྶཔཙྩཡཱ ནཱམ ཛཱཏཱ. ཨེཝཾ ‘བྷཱཝནཱཝསེན’ ལབྦྷནྟི.

ཨཔརོ ¶ བྷིཀྑུ སུཎཱཏི – ‘ཀསིཎཔརིཀམྨཾ ཀིར ཀཏྭཱ སམཱཔཏྟིཡོ ཨུཔྤཱདེཏྭཱ སམཱཔཏྟིཔདཊྛཱནཾ ཝིཔསྶནཾ ཝཌྜྷེཏྭཱ ཨརཧཏྟཾ པཱཔུཎནྟཱི’ཏི. ཨཛ྄ཛྷཱསཡསམྤནྣོ ཀུལཔུཏྟོ ‘བྷཱརིཡཾ ཨེཏ’ནྟི ཨསལླཀྑེཏྭཱ ‘མཡཱཔི ཨེས གུཎོ ནིབྦཏྟེཏུཾ ཝཊྚཏཱི’ཏི པུརིམནཡེནེཝ པཊིཔཛྫིཏྭཱ ཨརཧཏྟཾ པཱཔུཎཱཏི. ཏཏྠ སབྦཱཔི པརིཀམྨཝེདནཱ ཀཱམཱཝཙརཱ, ཨཊྛསམཱཔཏྟིཝེདནཱ རཱུཔཱཝཙརཱརཱུཔཱཝཙརཱ, མགྒཕལཝེདནཱ ལོཀུཏྟརཱཏི ཨེཝཾ སོཏཝིཉྙཱཎཾ ཙཏུབྷཱུམིཀཝེདནཱ ¶ ནིབྦཏྟིཡཱ བལཝཔཙྩཡོ ཧོཏཱིཏི ཙཏུབྷཱུམིཀཝེདནཱ སོཏསམྥསྶཔཙྩཡཱ ནཱམ ཛཱཏཱ. ཨེཝཾ ཏཱཝ ‘ཨུཔནིསྶཡཝསེན’ ལབྦྷནྟི.

སོཏདྭཱརེ པན སདྡེ ཨཱཔཱཐགཏེཏི སབྦཾ ཙཀྑུདྭཱརེ ཝུཏྟནཡེནེཝ ཝེདིཏབྦཾ. ཨེཝཾ སདྡཱརམྨཎེ ཨུཔྤནྣཾ ཀིལེསཾ སམཏིཀྐམིཏྭཱ གཏཱཏི ཙཏུབྷཱུམིཀཝེདནཱ སོཏསམྥསྶཔཙྩཡཱ ནཱམ ཛཱཏཱ. ཨེཝཾ ‘སམཏིཀྐམཝསེན’ ལབྦྷནྟི.

སོཏདྭཱརེ པན སདྡེ ཨཱཔཱཐགཏེ ཨེཀོ ཨེཝཾ པརིགྒཧཾ པཊྛཔེཏི – ཨཡཾ སདྡོ ཀིཾ ནིསྶིཏོཏི སབྦཾ ཙཀྑུདྭཱརེ ཝུཏྟནཡེནེཝ ཝེདིཏབྦཾ. ཨེཝཾ སདྡཱརམྨཎཾ སམྨསིཏྭཱ ནིབྦཏྟིཏཱཏི ཨཡཾ ཝེདནཱ སོཏསམྥསྶཔཙྩཡཱ ནཱམ ཛཱཏཱ. ཨེཝཾ ‘བྷཱཝནཱཝསེན’ ལབྦྷནྟི.

གྷཱནཛིཝ྄ཧཱཀཱཡདྭཱརེསུ པན གནྡྷཱརམྨཎཱདཱིསུ ཨཱཔཱཐགཏེསུ ‘ཨིཊྛེ མེ ཨཱརམྨཎེ རཱགོ ཨུཔྤནྣོ’ཏི སབྦཾ ཙཀྑུདྭཱརེ ཝུཏྟནཡེནེཝ ཝེདིཏབྦཾ. ཨེཝཾ གནྡྷཱརམྨཎཱདཱིསུ ཨུཔྤནྣཾ ཀིལེསཾ སམཏིཀྐམིཏྭཱ གཏཱཏི ཙཏུབྷཱུམིཀཝེདནཱ གྷཱནཛིཝ྄ཧཱཀཱཡསམྥསྶཔཙྩཡཱ ནཱམ ཛཱཏཱ. ཨེཝཾ ཏཱིསུ དྭཱརེསུ ‘སམཏིཀྐམཝསེན’ ལབྦྷནྟི.

གྷཱནདྭཱརཱདཱིསུ པན གནྡྷཱདཱིསུ ཨཱཔཱཐགཏེསུ ཨེཀོ ཨེཝཾ པརིགྒཧཾ པཊྛཔེཏི – ‘ཨཡཾ གནྡྷོ, ཨཡཾ རསོ, ཨིདཾ ཕོཊྛབྦཾ ཀིཾ ནིསྶིཏ’ནྟི སབྦཾ ཙཀྑུདྭཱརེ ཝུཏྟནཡེནེཝ ཝེདིཏབྦཾ. ཨེཝཾ གནྡྷཱརམྨཎཱདཱིནི སམྨསིཏྭཱ ནིབྦཏྟིཏཱཏི ¶ ཨཡཾ ཝེདནཱ གྷཱནཛིཝ྄ཧཱཀཱཡསམྥསྶཔཙྩཡཱ ནཱམ ཛཱཏཱ. ཨེཝཾ ‘བྷཱཝནཱཝསེན’ ལབྦྷནྟི.

མནོདྭཱརེ པན ཏཱིཧིཔི ཨཱཀཱརེཧི ལབྦྷནྟི. ཨེཀཙྩོ ཧི ཛཱཏིཾ བྷཡཏོ པསྶཏི, ཛརཾ བྱཱདྷིཾ མརཎཾ བྷཡཏོ པསྶཏི, བྷཡཏོ དིསྭཱ ‘ཛཱཏིཛརཱབྱཱདྷིམརཎེཧི མུཙྩིཏུཾ ཝཊྚཏི, ན ཁོ ¶ པན སཀྐཱ ནིཔཛྫིཏྭཱ ནིདྡཱཡནྟེན ཛཱཏིཨཱདཱིཧི མུཙྩིཏུཾ, ཨཱདིཏོཝ ཝཱིརིཡཾ ཀཱཏུཾ སཱིལཾ སོདྷེཏུཾ ཝཊྚཏཱི’ཏི ཙིནྟེཏྭཱ ཙཀྑུདྭཱརེ ཝུཏྟནཡེནེཝ པཊིཔཛྫིཏྭཱ ཨརཧཏྟཾ པཱཔུཎཱཏི. ཏཏྠ སབྦཱཔི པརིཀམྨཝེདནཱ ཀཱམཱཝཙརཱ, ཨཊྛསམཱཔཏྟིཝེདནཱ རཱུཔཱཝཙརཱརཱུཔཱཝཙརཱ, མགྒཕལཝེདནཱ ལོཀུཏྟརཱཏི ཨེཝཾ ཛཱཏིཛརཱབྱཱདྷིམརཎཾ ཙཏུབྷཱུམིཀཝེདནཱནིབྦཏྟིཡཱ བལཝཔཙྩཡོ ཧོཏཱིཏི ¶ ཙཏུབྷཱུམིཀཝེདནཱ མནོསམྥསྶཔཙྩཡཱ ནཱམ ཛཱཏཱ. ཨེཝཾ ཏཱཝ ‘ཨུཔནིསྶཡཝསེན’ ལབྦྷནྟི.

མནོདྭཱརེ པན དྷམྨཱརམྨཎེ ཨཱཔཱཐགཏེཏི སབྦཾ ཙཀྑུདྭཱརེ ཝུཏྟནཡེནེཝ ཝེདིཏབྦཾ. ཨེཝཾ དྷམྨཱརམྨཎེ ཨུཔྤནྣཾ ཀིལེསཾ སམཏིཀྐམིཏྭཱ གཏཱཏི ཙཏུབྷཱུམིཀཝེདནཱ མནོསམྥསྶཔཙྩཡཱ ནཱམ ཛཱཏཱ. ཨེཝཾ ‘སམཏིཀྐམཝསེན’ ལབྦྷནྟི.

མནོདྭཱརེ པན དྷམྨཱརམྨཎེ ཨཱཔཱཐགཏེ ཨེཀོ ཨེཝཾ པརིགྒཧཾ པཊྛཔེཏི – ‘ཨེཏཾ དྷམྨཱརམྨཎཾ ཀིཾ ནིསྶིཏ’ནྟི? ‘ཝཏྠུནིསྶིཏ’ནྟི. ‘ཝཏྠུ ཀིཾ ནིསྶིཏ’ནྟི? ‘མཧཱབྷཱུཏཱནི ནིསྶིཏ’ནྟི. སོ ཙཏྟཱརི མཧཱབྷཱུཏཱནི ཨུཔཱདཱརཱུཔཉྩ རཱུཔནྟི པརིགྒཎྷཱཏི, ཏདཱརམྨཎེ དྷམྨེ ཨརཱུཔནྟི པརིགྒཎྷཱཏི. ཏཏོ སཔྤཙྩཡཾ ནཱམརཱུཔཾ པརིགྒཎྷིཏྭཱ ཏཱིཎི ལཀྑཎཱནི ཨཱརོཔེཏྭཱ ཝིཔསྶནཱཔཊིཔཱཊིཡཱ སངྑཱརེ སམྨསིཏྭཱ ཨརཧཏྟཾ པཱཔུཎཱཏི. ཏཏྠ སབྦཱཔི པརིཀམྨཝེདནཱ ཀཱམཱཝཙརཱ, ཨཊྛསམཱཔཏྟིཝེདནཱ རཱུཔཱཝཙརཱརཱུཔཱཝཙརཱ, མགྒཕལཝེདནཱ ལོཀུཏྟརཱཏི ཨེཝཾ དྷམྨཱརམྨཎཾ སམྨསིཏྭཱ ནིབྦཏྟིཏཱཏི ཨཡཾ ཝེདནཱ མནོསམྥསྶཔཙྩཡཱ ནཱམ ཛཱཏཱ. ཨེཝཾ ‘བྷཱཝནཱཝསེན’ ལབྦྷནྟི. ཡཱ པནེཏཱ སབྦེསམྤི ཙཏུཝཱིསཏིཝིདྷཱདཱིནཾ ཝཱརཱནཾ པརིཡོསཱནེསུ ཙཀྑུསམྥསྶཛཱ ཝེདནཱ…པེ… མནོསམྥསྶཛཱ ཝེདནཱཏི ཚ ཚ ཝེདནཱ ཝུཏྟཱ, ཏཱ སམྤཡུཏྟཔཙྩཡཝསེན ཝུཏྟཱཏི.

ཨཡཾ ཝེདནཱཀྑནྡྷནིདྡེསོ.

སཉྙཱཀྑནྡྷཱདཡོཔི ¶ ཨིམིནཱ ཨུཔཱཡེན ཝེདིཏབྦཱ. ཀེཝལཉྷི སཉྙཱཀྑནྡྷནིདྡེསེ ཏིཀེསུ ཝེདནཱཏྟིཀཔཱིཏིཏྟིཀཱཔི ལབྦྷནྟི, དུཀེསུ ཙ སུཁསཧགཏདུཀཱདཡོཔི. སངྑཱརཀྑནྡྷནིདྡེསེ ཕསྶསྶཱཔི སངྑཱརཀྑནྡྷཔརིཡཱཔནྣཏྟཱ ཕསྶསམྤཡུཏྟོཏི ཨཝཏྭཱ ཙིཏྟསམྤཡུཏྟོཏི ཝུཏྟཾ. དུཀེསུ ཙེཏྠ ཧེཏུདུཀཱདཡོཔི ལབྦྷནྟི. ཏིཀཱ སཉྙཱཀྑནྡྷསདིསཱ ཨེཝ ¶ . ཝིཉྙཱཎཀྑནྡྷནིདྡེསེ ཙཀྑུསམྥསྶཛཱདིབྷཱཝཾ ཨཝཏྭཱ ཙཀྑུཝིཉྙཱཎནྟིཨཱདི ཝུཏྟཾ. ན ཧི སཀྐཱ ཝིཉྙཱཎཾ མནོསམྥསྶཛནྟི ནིདྡིསིཏུཾ. སེསམེཏྠ སཉྙཱཀྑནྡྷེ ཝུཏྟསདིསམེཝ. ཨིམེསཾ པན ཏིཎྞམྤི ཁནྡྷཱནཾ ནིདྡེསེཡེཝ ¶ ཝེདནཱཀྑནྡྷནིདྡེསཏོ ཨཏིརེཀཏིཀདུཀཱ ལདྡྷཱ. ཏེསཾ ཝསེན ཝཱརཔྤབྷེདོ ཝེདིཏབྦོཏི.

ཨབྷིདྷམྨབྷཱཛནཱིཡཝཎྞནཱ.

༣. པཉྷཱཔུཙྪཀཝཎྞནཱ

༡༥༠. ཨིདཱནི པཉྷཱཔུཙྪཀཾ ཧོཏི. ཏཏྠ པཉྷཱཔུཙྪནེ པཉྩནྣཾ ཁནྡྷཱནཾ ‘‘ཀཏིཀུསལཱ? ཀཏིཨཀུསལཱ? ཀཏིཨབྱཱཀཏཱ’’ཏིཨཱདིནཱ ནཡེན ཡཾ ལབྦྷཏི, ཡཉྩ ན ལབྦྷཏི, ཏཾ སབྦཾ པུཙྪིཏྭཱ ཝིསྶཛྫནེ ‘‘རཱུཔཀྑནྡྷོ ཨབྱཱཀཏོ’’ཏིཨཱདིནཱ ནཡེན ཡཾ ལབྦྷཏི ཏདེཝ ཨུདྡྷཊནྟི ཝེདིཏབྦཾ. ཡཏྠ ཡཏྠ ཙ ‘ཨེཀོ ཁནྡྷོ’ཏི ཝཱ ‘དྭེ ཁནྡྷཱ’ཏི ཝཱ པརིཙྪེདཾ ཨཀཏྭཱ ‘‘སིཡཱ ཨུཔྤནྣཱ, སིཡཱ ཨནུཔྤནྣཱ’’ཏིཨཱདིནཱ ནཡེན ཏནྟི ཋཔིཏཱ, ཏཏྠ ཏཏྠ པཉྩནྣམྤི ཁནྡྷཱནཾ གཧཎཾ ཝེདིཏབྦཾ. སེསོ ཏེསཾ ཏེསཾ ཁནྡྷཱནཾ ཀུསལཱདིཝིབྷཱགོ ཧེཊྛཱ དྷམྨསངྒཧཊྛཀཐཱཡཾ (དྷ. ས. ཨཊྛ. ༩༨༥) ཝུཏྟོཡེཝ.

ཨཱརམྨཎཏྟིཀེསུ པན ཙཏྟཱརོ ཁནྡྷཱ པཉྩཔཎྞཱས ཀཱམཱཝཙརདྷམྨེ ཨཱརབྦྷ རཛྫནྟསྶ དུསྶནྟསྶ མུཡ྄ཧནྟསྶ སཾཝརནྟསྶ སམྨསནྟསྶ པཙྩཝེཀྑནྟསྶ ཙ པརིཏྟཱརམྨཎཱ ཧོནྟི, སཏྟཝཱིསཏི རཱུཔཱརཱུཔཱཝཙརདྷམྨེ ཨཱརབྦྷ རཛྫནྟསྶ དུསྶནྟསྶ མུཡ྄ཧནྟསྶ སཾཝརནྟསྶ པརིགྒཧཾ པཊྛཔེནྟསྶ མཧགྒཏཱརམྨཎཱ, མགྒཕལནིབྦཱནཱནི པཙྩཝེཀྑནྟསྶ ཨཔྤམཱཎཱརམྨཎཱ, པཉྙཏྟིཾ པཙྩཝེཀྑཎཀཱལེ ནཝཏྟབྦཱརམྨཎཱཏི.

ཏེཡེཝ ¶ སེཀྑཱསེཀྑཱནཾ མགྒཔཙྩཝེཀྑཎཀཱལེ མགྒཱརམྨཎཱ ཧོནྟི, མགྒཀཱལེ སཧཛཱཏཧེཏུནཱ མགྒཧེཏུཀཱ, མགྒཾ གརུཾ ཀཏྭཱ པཙྩཝེཀྑཎཀཱལེ ཨཱརམྨཎཱདྷིཔཏིནཱ མགྒཱདྷིཔཏིནོ ¶ , ཝཱིརིཡཛེཊྛཀཾ ཝཱ ཝཱིམཾསཛེཊྛཀཾ ཝཱ མགྒཾ བྷཱཝེནྟསྶ སཧཛཱཏཱདྷིཔཏིནཱ མགྒཱདྷིཔཏིནོ, ཚནྡཛེཊྛཀཾ པན ཙིཏྟཛེཊྛཀཾ ཝཱ བྷཱཝེནྟསྶ ནཝཏྟབྦཱརམྨཎཱ ནཱམ ཧོནྟི.

ཨཏཱིཏཱནི པན ཁནྡྷདྷཱཏུཨཱཡཏནཱནི ཨཱརབྦྷ རཛྫནྟསྶ དུསྶནྟསྶ མུཡ྄ཧནྟསྶ སཾཝརནྟསྶ པརིགྒཧཾ པཊྛཔེནྟསྶ ཨཏཱིཏཱརམྨཎཱ ཧོནྟི, ཨནཱགཏཱནི ཨཱརབྦྷ ཨནཱགཏཱརམྨཎཱ ¶ ཧོནྟི, པཙྩུཔྤནྣཱནི ཨཱརབྦྷ པཙྩུཔྤནྣཱརམྨཎཱ ཧོནྟི, པཉྙཏྟིཾ ཝཱ ནིབྦཱནཾ ཝཱ པཙྩཝེཀྑནྟསྶ ནཝཏྟབྦཱརམྨཎཱ ཧོནྟི.

ཏཐཱ ཨཏྟནོ ཁནྡྷདྷཱཏུཨཱཡཏནཱནི ཨཱརབྦྷ རཛྫནྟསྶ དུསྶནྟསྶ མུཡ྄ཧནྟསྶ སཾཝརནྟསྶ པརིགྒཧཾ པཊྛཔེནྟསྶ ཨཛ྄ཛྷཏྟཱརམྨཎཱ ཧོནྟི, པརེསཾ ཁནྡྷདྷཱཏུཨཱཡཏནཱནི ཨཱརབྦྷ ཨེཝཾ པཝཏྟེནྟསྶ བཧིདྡྷཱརམྨཎཱ, པཎྞཏྟིནིབྦཱནཔཙྩཝེཀྑཎཀཱལེཔི བཧིདྡྷཱརམྨཎཱཡེཝ, ཀཱལེན ཨཛ྄ཛྷཏྟཾ ཀཱལེན བཧིདྡྷཱ དྷམྨེསུ ཨེཝཾ པཝཏྟེནྟསྶ ཨཛ྄ཛྷཏྟབཧིདྡྷཱརམྨཎཱ, ཨཱཀིཉྩཉྙཱཡཏནཀཱལེ ནཝཏྟབྦཱརམྨཎཱཏི ཝེདིཏབྦཱ.

ཨིཏི བྷགཝཱ ཨིམཾ ཁནྡྷཝིབྷངྒཾ སུཏྟནྟབྷཱཛནཱིཡཱདིཝསེན ཏཡོ པརིཝཊྚེ ནཱིཧརིཏྭཱ བྷཱཛེནྟོ དསྶེསི. ཏཱིསུཔི ཧི པརིཝཊྚེསུ ཨེཀོཝ པརིཙྪེདོ. རཱུཔཀྑནྡྷོ ཧི སབྦཏྠ ཀཱམཱཝཙརོཡེཝ. ཙཏྟཱརོ ཁནྡྷཱ ཙཏུབྷཱུམཀཱ ལོཀིཡལོཀུཏྟརམིསྶཀཱ ཀཐིཏཱཏི.

སམྨོཧཝིནོདནིཡཱ ཝིབྷངྒཊྛཀཐཱཡ

ཁནྡྷཝིབྷངྒཝཎྞནཱ ནིཊྛིཏཱ.

༢. ཨཱཡཏནཝིབྷངྒོ

༡. སུཏྟནྟབྷཱཛནཱིཡཝཎྞནཱ

༡༥༤. ཨིདཱནི ¶ ¶ ¶ ཏདནནྟརེ ཨཱཡཏནཝིབྷངྒནིདྡེསེ སུཏྟནྟབྷཱཛནཱིཡཾ ཏཱཝ དསྶེནྟོ དྭཱདསཱཡཏནཱནི ཙཀྑཱཡཏནཾ རཱུཔཱཡཏནནྟིཨཱདིམཱཧ. ཏཏྠ པཱལི༹མུཏྟཀེན ཏཱཝ ནཡེན –

ཨཏྠལཀྑཎཏཱཝཏྭ, ཀམསངྑེཔཝིཏྠཱརཱ;

ཏཐཱ དཊྛབྦཏོ ཙེཝ, ཝིཉྙཱཏབྦོ ཝིནིཙྪཡོ.

ཏཏྠ ཝིསེསཏོ ཏཱཝ ཙཀྑཏཱིཏི ཙཀྑུ; རཱུཔཾ ཨསྶཱདེཏི, ཝིབྷཱཝེཏི ཙཱཏི ཨཏྠོ. རཱུཔཡཏཱིཏི རཱུཔཾ; ཝཎྞཝིཀཱརཾ ཨཱཔཛྫམཱནཾ ཧདཡངྒཏབྷཱཝཾ པཀཱསེཏཱིཏི ཨཏྠོ. སུཎཱཏཱིཏི སོཏཾ. སཔྤཏཱིཏི སདྡོ; ཨུདཱཧརིཡཏཱིཏི ཨཏྠོ. གྷཱཡཏཱིཏི གྷཱནཾ. གནྡྷཡཏཱིཏི གནྡྷོ; ཨཏྟནོ ཝཏྠུཾ སཱུཙཡཏཱིཏི ཨཏྠོ. ཛཱིཝིཏཾ ཨཝ྄ཧཱཡཏཱིཏི ཛིཝ྄ཧཱ. རསནྟི ཏཾ སཏྟཱཏི རསོ; ཨསྶཱདེནྟཱིཏི ཨཏྠོ. ཀུཙྪིཏཱནཾ སཱསཝདྷམྨཱནཾ ཨཱཡོཏི ཀཱཡོ. ཨཱཡོཏི ཨུཔྤཏྟིདེསོ. ཕུསཱིཡཏཱིཏི ཕོཊྛབྦཾ. མནཏཱིཏི མནོ. ཨཏྟནོ ལཀྑཎཾ དྷཱརཡནྟཱིཏི དྷམྨཱ.

ཨཝིསེསཏོ པན ཨཱཡཏནཏོ, ཨཱཡཱནཾ ཏནནཏོ, ཨཱཡཏསྶ ཙ ནཡནཏོ ཨཱཡཏནནྟི ཝེདིཏབྦཾ. ཙཀྑུརཱུཔཱདཱིསུ ཧི ཏཾཏཾདྭཱརཱརམྨཎཱ ཙིཏྟཙེཏསིཀཱ དྷམྨཱ སེན སེན ཨནུབྷཝནཱདིནཱ ཀིཙྩེན ཨཱཡཏནྟི ཨུཊྛཧནྟི གྷཊྚེནྟི ཝཱཡམནྟཱིཏི ཝུཏྟཾ ཧོཏི. ཏེ ཙ པན ཨཱཡབྷཱུཏེ དྷམྨེ ཨེཏཱནི ཏནོནྟི ཝིཏྠཱརེནྟཱིཏི ཝུཏྟཾ ཧོཏི. ཨིདཉྩ ཨནམཏགྒེ སཾསཱརེ པཝཏྟཾ ཨཏཱིཝ ཨཱཡཏཾ སཾསཱརདུཀྑཾ ཡཱཝ ན ནིཝཏྟཏི ཏཱཝ ནཡནྟེཝ, པཝཏྟཡནྟཱིཏི ཝུཏྟཾ ཧོཏི. ཨིཏི ¶ སབྦེཔི མེ དྷམྨཱ ཨཱཡཏནཏོ ཨཱཡཱནཾ ཏནནཏོ ཨཱཡཏསྶ ཙ ནཡནཏོ ‘ཨཱཡཏནཾ ཨཱཡཏན’ནྟི ཝུཙྩནྟི.

ཨཔིཙ ནིཝཱསཊྛཱནཊྛེན, ཨཱཀརཊྛེན, སམོསརཎཊྛཱནཊྛེན ¶ , སཉྫཱཏིདེསཊྛེན, ཀཱརཎཊྛེན ཙ ཨཱཡཏནཾ ཝེདིཏབྦཾ. ཏཐཱ ཧི ལོཀེ ‘‘ཨིསྶརཱཡཏནཾ ཝཱསུདེཝཱཡཏན’’ནྟིཨཱདཱིསུ ནིཝཱསཊྛཱནཾ ཨཱཡཏནནྟི ཝུཙྩཏི ¶ . ‘‘སུཝཎྞཱཡཏནཾ རཛཏཱཡཏན’’ནྟིཨཱདཱིསུ ཨཱཀརོ. སཱསནེ པན ‘‘མནོརམེ ཨཱཡཏནེ སེཝནྟི ནཾ ཝིཧངྒམཱ’’ཏིཨཱདཱིསུ (ཨ. ནི. ༥.༣༨) སམོསརཎཊྛཱནཾ. ‘‘དཀྑིཎཱཔཐོ གུནྣཾ ཨཱཡཏན’’ནྟིཨཱདཱིསུ སཉྫཱཏིདེསོ. ‘‘ཏཏྲ ཏཏྲེཝ སཀྑིབྷབྦཏཾ པཱཔུཎཱཏི སཏི སཏིཨཱཡཏནེ’’ཏིཨཱདཱིསུ (ཨ. ནི. ༥.༢༣) ཀཱརཎཾ.

ཙཀྑུརཱུཔཱདཱིསུ ཙཱཔི ཏེ ཏེ ཙིཏྟཙེཏསིཀཱ དྷམྨཱ ནིཝསནྟི ཏདཱཡཏྟཝུཏྟིཏཱཡཱཏི ཙཀྑཱདཡོ ནེསཾ ནིཝཱསནཊྛཱནཾ. ཙཀྑཱདཱིསུ ཙ ཏེ ཨཱཀིཎྞཱ ཏཾ ནིསྶིཏཏྟཱ ཏདཱརམྨཎཏྟཱ ཙཱཏི ཙཀྑཱདཡོ ནེསཾ ཨཱཀརོ. ཙཀྑཱདཡོ ཙ ནེསཾ སམོསརཎཊྛཱནཾ, ཏཏྠ ཏཏྠ ཝཏྠུདྭཱརཱརམྨཎཝསེན སམོསརཎཏོ. ཙཀྑཱདཡོ ཙ ནེསཾ སཉྫཱཏིདེསོ; ཏཾ ནིསྶཡཱརམྨཎབྷཱཝེན ཏཏྠེཝ ཨུཔྤཏྟིཏོ. ཙཀྑཱདཡོ ཙ ནེསཾ ཀཱརཎཾ, ཏེསཾ ཨབྷཱཝེ ཨབྷཱཝཏོཏི. ཨིཏི ནིཝཱསཊྛཱནཊྛེན, ཨཱཀརཊྛེན, སམོསརཎཊྛཱནཊྛེན, སཉྫཱཏིདེསཊྛེན, ཀཱརཎཊྛེནཱཏི ཨིམེཧི ཀཱརཎེཧི ཨེཏེ དྷམྨཱ ‘ཨཱཡཏནཾ ཨཱཡཏན’ནྟི ཝུཙྩནྟི. ཏསྨཱ ཡཐཱཝུཏྟེནཏྠེན ཙཀྑུ ཙ ཏཾ ཨཱཡཏནཉྩཱཏི ཙཀྑཱཡཏནཾ…པེ… དྷམྨཱ ཙ ཏེ ཨཱཡཏནཉྩཱཏི དྷམྨཱཡཏནནྟི ཨེཝཾ ཏཱཝེཏྠ ‘ཨཏྠཏོ’ ཝིཉྙཱཏབྦོ ཝིནིཙྪཡོ.

‘ལཀྑཎཏོ’ཏི ཙཀྑཱདཱིནཾ ལཀྑཎཏོཔེཏྠ ཝིཉྙཱཏབྦོ ཝིནིཙྪཡོ. ཏཱནི ཙ པན ནེསཾ ལཀྑཎཱནི ཧེཊྛཱ རཱུཔཀཎྜནིདྡེསེ ཝུཏྟནཡེནེཝ ཝེདིཏབྦཱནི.

‘ཏཱཝཏྭཏོ’ཏི ཏཱཝབྷཱཝཏོ. ཨིདཾ ཝུཏྟཾ ཧོཏི – ཙཀྑཱདཡོཔི ཧི དྷམྨཱ ཨེཝ. ཨེཝཾ སཏི དྷམྨཱཡཏནམིཙྩེཝ ཨཝཏྭཱ ཀསྨཱ དྭཱདསཱཡཏནཱནི ཝུཏྟཱནཱིཏི ཙེ? ཚ ཝིཉྙཱཎཀཱཡུཔྤཏྟིདྭཱརཱརམྨཎཝཝཏྠཱནཏོ. ཨིདྷ ཚནྣཾ ཝིཉྙཱཎཀཱཡཱནཾ དྭཱརབྷཱཝེན ཨཱརམྨཎབྷཱཝེན ཙ ཝཝཏྠཱནཏོ ཨཡམེཝ ཏེསཾ བྷེདོ ཧོཏཱིཏི དྭཱདས ཝུཏྟཱནི. ཙཀྑུཝིཉྙཱཎཝཱིཐིཔརིཡཱཔནྣསྶ ཧི ཝིཉྙཱཎཀཱཡསྶ ཙཀྑཱཡཏནམེཝ ཨུཔྤཏྟིདྭཱརཾ, རཱུཔཱཡཏནམེཝ ཙཱརམྨཎཾ ¶ ¶ . ཏཐཱ ཨིཏརཱནི ཨིཏརེསཾ. ཚཊྛསྶ པན བྷཝངྒམནསངྑཱཏོ མནཱཡཏནེཀདེསོཝ ཨུཔྤཏྟིདྭཱརཾ, ཨསཱདྷཱརཎཉྩ དྷམྨཱཡཏནཾ ཨཱརམྨཎནྟི ¶ . ཨིཏི ཚནྣཾ ཝིཉྙཱཎཀཱཡཱནཾ ཨུཔྤཏྟིདྭཱརཱརམྨཎཝཝཏྠཱནཏོ དྭཱདས ཝུཏྟཱནཱིཏི. ཨེཝམེཏྠ ‘ཏཱཝཏྭཏོ’ ཝིཉྙཱཏབྦོ ཝིནིཙྪཡོ.

‘ཀམཏོ’ཏི ཨིདྷཱཔི པུབྦེ ཝུཏྟེསུ ཨུཔྤཏྟིཀྐམཱདཱིསུ དེསནཱཀྐམོཝ ཡུཛྫཏི. ཨཛ྄ཛྷཏྟིཀེསུ ཧི ཨཱཡཏནེསུ སནིདསྶནསཔྤཊིགྷཝིསཡཏྟཱ ཙཀྑཱཡཏནཾ པཱཀཊནྟི པཋམཾ དེསིཏཾ. ཏཏོ ཨནིདསྶནསཔྤཊིགྷཝིསཡཱནི སོཏཱཡཏནཱདཱིནི. ཨཐ ཝཱ དསྶནཱནུཏྟརིཡསཝནཱནུཏྟརིཡཧེཏུབྷཱཝེན བཧཱུཔཀཱརཏྟཱ ཨཛ྄ཛྷཏྟིཀེསུ ཙཀྑཱཡཏནསོཏཱཡཏནཱནི པཋམཾ དེསིཏཱནི. ཏཏོ གྷཱནཱཡཏནཱདཱིནི ཏཱིཎི. པཉྩནྣམྤི གོཙརཝིསཡཏྟཱ ཨནྟེ མནཱཡཏནཾ. ཙཀྑཱདཱིནཾ པན གོཙརཏྟཱ ཏསྶ ཏསྶ ཨནནྟརཱནི བཱཧིརེསུ རཱུཔཱཡཏནཱདཱིནི. ཨཔིཙ ཝིཉྙཱཎུཔྤཏྟིཀཱརཎཝཝཏྠཱནཏོཔི ཨཡམེཝ ཏེསཾ ཀམོ ཝེདིཏབྦོ. ཝུཏྟཉྷེཏཾ ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎཾ…པེ… མནཉྩ པཊིཙྩ དྷམྨེ ཙ ཨུཔྤཛྫཏི མནོཝིཉྙཱཎ’’ནྟི (མ. ནི. ༣.༤༢༡) ཨེཝཾ ‘ཀམཏོ’པེཏྠ ཝིཉྙཱཏབྦོ ཝིནིཙྪཡོ.

‘སངྑེཔཝིཏྠཱརཱ’ཏི སངྑེཔཏོ ཧི མནཱཡཏནསྶ ཙེཝ དྷམྨཱཡཏནེཀདེསསྶ ཙ ནཱམེན, ཏདཝསེསཱནཉྩ ཨཱཡཏནཱནཾ རཱུཔེན སངྒཧིཏཏྟཱ དྭཱདསཱཔི ཨཱཡཏནཱནི ནཱམརཱུཔམཏྟམེཝ ཧོནྟི.

ཝིཏྠཱརཏོ པན ཨཛ྄ཛྷཏྟིཀེསུ ཏཱཝ ཙཀྑཱཡཏནཾ ཛཱཏིཝསེན ཙཀྑུཔསཱདམཏྟམེཝ, པཙྩཡགཏིནིཀཱཡཔུགྒལབྷེདཏོ པན ཨནནྟཔྤབྷེདཾ. ཏཐཱ སོཏཱཡཏནཱདཱིནི ཙཏྟཱརི. མནཱཡཏནཾ ཏེབྷཱུམཀཀུསལཱཀུསལཝིཔཱཀཀིརིཡཝིཉྙཱཎབྷེདེན ཨེཀཱསཱིཏིཔྤབྷེདཾ, ཝཏྠུཔཊིཔདཱདིབྷེདཏོ པན ཨནནྟཔྤབྷེདཾ. རཱུཔགནྡྷརསཱཡཏནཱནི སམུཊྛཱནབྷེདཏོ ཙཏུཔྤབྷེདཱནི, སདྡཱཡཏནཾ དྭིཔྤབྷེདཾ. སབྷཱགཝིསབྷཱགབྷེདཏོ པན སབྦཱནིཔི ཨནནྟཔྤབྷེདཱནི. ཕོཊྛབྦཱཡཏནཾ པཐཝཱིདྷཱཏུཏེཛོདྷཱཏུཝཱཡོདྷཱཏུཝསེན ཏིཔྤབྷེདཾ, སམུཊྛཱནཏོ ཙཏུཔྤབྷེདཾ, སབྷཱགཝིསབྷཱགཏོ ཨནེཀཔྤབྷེདཾ. དྷམྨཱཡཏནཾ ཏེབྷཱུམཀདྷམྨཱརམྨཎཝསེན ཨནེཀཔྤབྷེདནྟི. ཨེཝཾ སངྑེཔཝིཏྠཱརཱ ཝིཉྙཱཏབྦོ ཝིནིཙྪཡོ.

‘དཊྛབྦཏོ’ཏི ¶ ཨེཏྠ པན སབྦཱནེཝེཏཱནི ཨཱཡཏནཱནི ཨནཱགམནཏོ ཨནིགྒམནཏོ ཙ དཊྛབྦཱནི. ན ཧི ཏཱནི པུབྦེ ཨུདཡཱ ཀུཏོཙི ཨཱགཙྪནྟི, ནཱཔི ཨུདྡྷཾ ཝཡཱ ཀུཧིཉྩི གཙྪནྟི; ཨཐ ཁོ པུབྦེ ཨུདཡཱ ཨཔྤཊིལདྡྷསབྷཱཝཱནི, ཨུདྡྷཾ ¶ ཝཡཱ པརིབྷིནྣསབྷཱཝཱནི, པུབྦནྟཱཔརནྟཝེམཛ྄ཛྷེ ¶ པཙྩཡཱཡཏྟཝུཏྟིཏཱཡ ཨཝསཱནི པཝཏྟནྟི. ཏསྨཱ ཨནཱགམནཏོ ཨནིགྒམནཏོ ཙ དཊྛབྦཱནི. ཏཐཱ ནིརཱིཧཏོ ཨབྱཱཔཱརཏོ ཙ. ན ཧི ཙཀྑུརཱུཔཱདཱིནཾ ཨེཝཾ ཧོཏི – ‘ཨཧོ ཝཏ ཨམྷཱཀཾ སཱམགྒིཡཱ ཝིཉྙཱཎཾ ནཱམ ཨུཔྤཛྫེཡྻཱ’ཏི, ན ཙ ཏཱནི ཝིཉྙཱཎུཔྤཱདནཏྠཾ དྭཱརབྷཱཝེན ཝཏྠུབྷཱཝེན ཨཱརམྨཎབྷཱཝེན ཝཱ ཨཱིཧནྟི, ན བྱཱཔཱརམཱཔཛྫནྟི; ཨཐ ཁོ དྷམྨཏཱཝེསཱ ཡཾ ཙཀྑུརཱུཔཱདཱིནཾ སཱམགྒིཡཾ ཙཀྑུཝིཉྙཱཎཱདཱིནི སམྦྷཝནྟི. ཏསྨཱ ནིརཱིཧཏོ ཨབྱཱཔཱརཏོ ཙ དཊྛབྦཱནི. ཨཔིཙ ཨཛ྄ཛྷཏྟིཀཱནི སུཉྙགཱམོ ཝིཡ དཊྛབྦཱནི དྷུཝསུབྷསུཁཏྟབྷཱཝཝིརཧིཏཏྟཱ, བཱཧིརཱནི གཱམགྷཱཏཀཙོརཱ ཝིཡ ཨཛ྄ཛྷཏྟིཀཱནཾ ཨབྷིགྷཱཏཀཏྟཱ. ཝུཏྟཉྷེཏཾ – ‘‘ཙཀྑུ, བྷིཀྑཝེ, ཧཉྙཏི མནཱཔཱམནཱཔེཧི རཱུཔེཧཱིཏི ཝིཏྠཱརོ. ཨཔིཙ ཨཛ྄ཛྷཏྟིཀཱནི ཚ པཱཎཀཱ ཝིཡ དཊྛབྦཱནི, བཱཧིརཱནི ཏེསཾ གོཙརཱ ཝིཡཱཏི. ཨེཝམྤེཏྠ ‘དཊྛབྦཏོ’ ཝིཉྙཱཏབྦོ ཝིནིཙྪཡོཏི.

ཨིདཱནི ཏེསཾ ཝིཔསྶིཏབྦཱཀཱརཾ དསྶེཏུཾ ཙཀྑུཾ ཨནིཙྩནྟིཨཱདི ཨཱརདྡྷཾ. ཏཏྠ ཙཀྑུ ཏཱཝ ཧུཏྭཱ ཨབྷཱཝཊྛེན ཨནིཙྩནྟི ཝེདིཏབྦཾ. ཨཔརེཧིཔི ཙཏཱུཧི ཀཱརཎེཧི ཨནིཙྩཾ – ཨུཔྤཱདཝཡཝནྟཏོ, ཝིཔརིཎཱམཏོ, ཏཱཝཀཱལིཀཏོ, ནིཙྩཔཊིཀྑེཔཏོཏི.

ཏདེཝ པཊིཔཱིལ༹ནཊྛེན དུཀྑཾ. ཡསྨཱ ཝཱ ཨེཏཾ ཨུཔྤནྣཾ ཋིཏིཾ པཱཔུཎཱཏི, ཋིཏིཡཾ ཛརཱཡ ཀིལམཏི, ཛརཾ པཏྭཱ ཨཝསྶཾ བྷིཛྫཏི; ཏསྨཱ ཨབྷིཎྷསམྤཊིཔཱིལ༹ནཏོ, དུཀྑམཏོ, དུཀྑཝཏྠུཏོ, སུཁཔཊིཀྑེཔཏོཏི ཨིམེཧི ཙཏཱུཧི ཀཱརཎེཧི དུཀྑཾ.

ཨཝསཝཏྟནཊྛེན པན ཨནཏྟཱ. ཡསྨཱ ཝཱ ཨེཏཾ ཨུཔྤནྣཾ ཋིཏིཾ མཱ པཱཔུཎཱཏུ, ཋཱནཔྤཏྟཾ མཱ ཛིརཏུ, ཛརཔྤཏཾ མཱ བྷིཛྫཏཱུཏི ཨིམེསུ ཏཱིསུ ཋཱནེསུ ཀསྶཙི ཝསཝཏྟིབྷཱཝོ ནཏྠི, སུཉྙཾ ཏེན ཝསཝཏྟནཱཀཱརེན; ཏསྨཱ སུཉྙཏོ, ཨསྶཱམིཀཏོ, ཨཀཱམཀཱརིཡཏོ, ཨཏྟཔཊིཀྑེཔཏོཏི ཨིམེཧི ཙཏཱུཧི ཀཱརཎེཧི ཨནཏྟཱ.

ཝིབྷཝགཏིཀཏོ ¶ , པུབྦཱཔརཝསེན བྷཝསངྐནྟིགམནཏོ, པཀཏིབྷཱཝཝིཛཧནཏོ ཙ ཝིཔརིཎཱམདྷམྨཾ. ཨིདཾ ཨནིཙྩཝེཝཙནམེཝ. རཱུཔཱ ཨནིཙྩཱཏིཨཱདཱིསུཔི ཨེསེཝ ནཡོ. ཨཔིཙེཏྠ ཋཔེཏྭཱ ཙཀྑུཾ ཏེབྷཱུམཀདྷམྨཱ ཨནིཙྩཱ, ནོ ཙཀྑུ. ཙཀྑུ པན ཙཀྑུ ཙེཝ ཨནིཙྩཉྩ. ཏཐཱ ¶ སེསདྷམྨཱ དུཀྑཱ, ནོ ཙཀྑུ. ཙཀྑུ ¶ པན ཙཀྑུ ཙེཝ དུཀྑཉྩ. སེསདྷམྨཱ ཨནཏྟཱ, ནོ ཙཀྑུ. ཙཀྑུ པན ཙཀྑུ ཙེཝ ཨནཏྟཱ ཙཱཏི. རཱུཔཱདཱིསུཔི ཨེསེཝ ནཡོ.

ཨིམསྨིཾ པན སུཏྟནྟབྷཱཛནཱིཡེ ཏཐཱགཏེན ཀིཾ དསྶིཏནྟི? དྭཱདསནྣཾ ཨཱཡཏནཱནཾ ཨནཏྟལཀྑཎཾ. སམྨཱསམྦུདྡྷོ ཧི ཨནཏྟལཀྑཎཾ དསྶེནྟོ ཨནིཙྩེན ཝཱ དསྶེཏི, དུཀྑེན ཝཱ, ཨནིཙྩདུཀྑེཧི ཝཱ. ཏཏྠ ‘‘ཙཀྑུ, ཨཏྟཱཏི ཡོ ཝདེཡྻ, ཏཾ ན ཨུཔཔཛྫཏི. ཙཀྑུསྶ ཨུཔྤཱདོཔི ཝཡོཔི པཉྙཱཡཏི. ཡསྶ ཁོ པན ཨུཔྤཱདོཔི ཝཡོཔི པཉྙཱཡཏི ‘ཨཏྟཱ མེ ཨུཔྤཛྫཏི ཙ ཝེཏི ཙཱ’ཏི ཨིཙྩསྶ ཨེཝམཱགཏཾ ཧོཏི. ཏསྨཱ ཏཾ ན ཨུཔཔཛྫཏི – ཙཀྑུ ཨཏྟཱཏི ཡོ ཝདེཡྻ ཨིཏི ཙཀྑུ ཨནཏྟཱ’’ཏི (མ. ནི. ༣.༤༢༢). ཨིམསྨིཾ སུཏྟེ ཨནིཙྩེན ཨནཏྟལཀྑཎཾ དསྶེསི. ‘‘རཱུཔཾ, བྷིཀྑཝེ, ཨནཏྟཱ. རཱུཔཉྩ ཧིདཾ, བྷིཀྑཝེ, ཨཏྟཱ ཨབྷཝིསྶ, ན ཡིདཾ རཱུཔཾ ཨཱབཱདྷཱཡ སཾཝཏྟེཡྻ; ལབྦྷེཐ ཙ རཱུཔེ – ཨེཝཾ མེ རཱུཔཾ ཧོཏུ, ཨེཝཾ མེ རཱུཔཾ མཱ ཨཧོསཱིཏི. ཡསྨཱ ཙ ཁོ, བྷིཀྑཝེ, རཱུཔཾ ཨནཏྟཱ ཏསྨཱ རཱུཔཾ ཨཱབཱདྷཱཡ སཾཝཏྟཏི; ན ཙ ལབྦྷཏི རཱུཔེ – ཨེཝཾ མེ རཱུཔཾ ཧོཏུ, ཨེཝཾ མེ རཱུཔཾ མཱ ཨཧོསཱི’’ཏི (སཾ. ནི. ༣.༥༩; མཧཱཝ. ༢༠) ཨིམསྨིཾ སུཏྟེ དུཀྑེན ཨནཏྟལཀྑཎཾ དསྶེསི. ‘‘རཱུཔཾ, བྷིཀྑཝེ, ཨནིཙྩཾ, ཡདནིཙྩཾ ཏཾ དུཀྑཾ, ཡཾ དུཀྑཾ ཏདནཏྟཱ, ཡདནཏྟཱ ཏཾ ནེཏཾ མམ, ནེསོཧམསྨི, ན མེསོ ཨཏྟཱ’’ཏིཨཱདཱིསུ (སཾ. ནི. ༣.༡༥) ཨནིཙྩདུཀྑེཧི ཨནཏྟལཀྑཎཾ དསྶེསི. ཀསྨཱ? ཨནིཙྩདུཀྑཱནཾ པཱཀཊཏྟཱ.

ཧཏྠཏོ ཧི ཏཊྚཀེ ཝཱ སརཀེ ཝཱ ཀིསྨིཉྩིདེཝ ཝཱ པཏིཏྭཱ བྷིནྣེ ‘ཨཧོ ཨནིཙྩ’ནྟི ཝདནྟི. ཨེཝཾ ཨནིཙྩཾ པཱཀཊཾ ནཱམ. ཨཏྟབྷཱཝསྨིཾ པན གཎྜཔིལ༹ཀཱདཱིསུ ཝཱ ཨུཊྛིཏཱསུ ཁཱཎུཀཎྚཀཱདཱིཧི ཝཱ ཝིདྡྷཱསུ ‘ཨཧོ དུཀྑ’ནྟི ཝདནྟི. ཨེཝཾ དུཀྑཾ པཱཀཊཾ ནཱམ. ཨནཏྟལཀྑཎཾ ཨཔཱཀཊཾ ཨནྡྷཀཱརཾ ཨཝིབྷཱུཏཾ དུཔྤཊིཝིཛ྄ཛྷཾ དུདྡཱིཔནཾ དུཔྤཉྙཱཔནཾ ¶ . ཨནིཙྩདུཀྑལཀྑཎཱནི ཨུཔྤཱདཱ ཝཱ ཏཐཱགཏཱནཾ ཨནུཔྤཱདཱ ཝཱ པཉྙཱཡནྟི. ཨནཏྟལཀྑཎཾ ཝིནཱ བུདྡྷུཔྤཱདཱ ན པཉྙཱཡཏི, བུདྡྷུཔྤཱདེཡེཝ པཉྙཱཡཏི. མཧིདྡྷིཀཱ ཧི མཧཱནུབྷཱཝཱ ཏཱཔསཔརིབྦཱཛཀཱ སརབྷངྒསཏྠཱརཱདཡོཔི ‘ཨནིཙྩཾ དུཀྑ’ནྟི ཝཏྟུཾ སཀྐོནྟི, ‘ཨནཏྟཱ’ཏི ཝཏྟུཾ ན སཀྐོནྟི. སཙེ ཧི ཏེ སམྤཏྟཔརིསཱཡ ཨནཏྟཱཏི ཝཏྟུཾ སཀྐུཎེཡྻུཾ, སམྤཏྟཔརིསཱཡ མགྒཕལཔཊིཝེདྷོ བྷཝེཡྻ. ཨནཏྟལཀྑཎཔཉྙཱཔནཉྷི ཨཉྙསྶ ཀསྶཙི ཨཝིསཡོ, སབྦཉྙུབུདྡྷཱནམེཝ ཝིསཡོ. ཨེཝམེཏཾ ཨནཏྟལཀྑཎཾ ཨཔཱཀཊཾ. ཏསྨཱ སཏྠཱ ¶ ཨནཏྟལཀྑཎཾ དསྶེནྟོ ¶ ཨནིཙྩེན ཝཱ དསྶེསི, དུཀྑེན ཝཱ, ཨནིཙྩདུཀྑེཧི ཝཱ. ཨིདྷ པན ཏཾ ཨནིཙྩདུཀྑེཧི དསྶེསཱིཏི ཝེདིཏབྦཾ.

ཨིམཱནི པན ལཀྑཎཱནི ཀིསྶ ཨམནསིཀཱརཱ ཨཔྤཊིཝེདྷཱ, ཀེན པཊིཙྪནྣཏྟཱ, ན ཨུཔཊྛཧནྟི? ཨནིཙྩལཀྑཎཾ ཏཱཝ ཨུདཡབྦཡཱནཾ ཨམནསིཀཱརཱ ཨཔྤཊིཝེདྷཱ, སནྟཏིཡཱ པཊིཙྪནྣཏྟཱ, ན ཨུཔཊྛཱཏི. དུཀྑལཀྑཎཾ ཨབྷིཎྷསམྤཊིཔཱིལ༹ནསྶ ཨམནསིཀཱརཱ ཨཔྤཊིཝེདྷཱ, ཨིརིཡཱཔཐེཧི པཊིཙྪནྣཏྟཱ, ན ཨུཔཊྛཱཏི. ཨནཏྟལཀྑཎཾ ནཱནཱདྷཱཏུཝིནིབྦྷོགསྶ ཨམནསིཀཱརཱ ཨཔྤཊིཝེདྷཱ, གྷནེན པཊིཙྪནྣཏྟཱ, ན ཨུཔཊྛཱཏི. ཨུདཡབྦཡཾ པན པརིགྒཧེཏྭཱ སནྟཏིཡཱ ཝིཀོཔིཏཱཡ ཨནིཙྩལཀྑཎཾ ཡཱཐཱཝསརསཏོ ཨུཔཊྛཱཏི. ཨབྷིཎྷསམྤཊིཔཱིལ༹ནཾ མནསིཀཏྭཱ ཨིརིཡཱཔཐེ ཨུགྒྷཱཊིཏེ དུཀྑལཀྑཎཾ ཡཱཐཱཝསརསཏོ ཨུཔཊྛཱཏི. ནཱནཱདྷཱཏུཡོ ཝིནིབྦྷུཛིཏྭཱ གྷནཝིནིབྦྷོགེ ཀཏེ ཨནཏྟལཀྑཎཾ ཡཱཐཱཝསརསཏོ ཨུཔཊྛཱཏི.

ཨེཏྠ ཙ ཨནིཙྩཾ ཨནིཙྩལཀྑཎཾ, དུཀྑཾ དུཀྑལཀྑཎཾ, ཨནཏྟཱ ཨནཏྟལཀྑཎནྟི ཨཡཾ ཝིབྷཱགོ ཝེདིཏབྦོ. ཏཏྠ ཨནིཙྩནྟི ཁནྡྷཔཉྩཀཾ. ཀསྨཱ? ཨུཔྤཱདཝཡཉྙཐཏྟབྷཱཝཱ, ཧུཏྭཱ ཨབྷཱཝཏོ ཝཱ; ཨུཔྤཱདཝཡཉྙཐཏྟཾ ཨནིཙྩལཀྑཎཾ, ཧུཏྭཱ ཨབྷཱཝསངྑཱཏོ ཨཱཀཱརཝིཀཱརོ ཝཱ. ‘‘ཡདནིཙྩཾ ཏཾ དུཀྑ’’ནྟི ཝཙནཏོ པན ཏདེཝ ཁནྡྷཔཉྩཀཾ དུཀྑཾ. ཀསྨཱ? ཨབྷིཎྷསམྤཊིཔཱིལ༹ནཏོ; ཨབྷིཎྷསམྤཊིཔཱིལ༹ནཱཀཱརོ དུཀྑལཀྑཎཾ. ‘‘ཡཾ ¶ དུཀྑཾ ཏཾ ཨནཏྟཱ’’ཏི པན ཝཙནཏོ ཏདེཝ ཁནྡྷཔཉྩཀཾ ཨནཏྟཱ. ཀསྨཱ? ཨཝསཝཏྟནཏོ; ཨཝསཝཏྟནཱཀཱརོ ཨནཏྟལཀྑཎཾ. ཨིཏི ཨཉྙདེཝ ཨནིཙྩཾ དུཀྑཾ ཨནཏྟཱ, ཨཉྙཱནི ཨནིཙྩདུཀྑཱནཏྟལཀྑཎཱནི. པཉྩཀྑནྡྷཱ, དྭཱདསཱཡཏནཱནི, ཨཊྛཱརས དྷཱཏུཡོཏི ཨིདཉྷི སབྦམྤི ཨནིཙྩཾ དུཀྑཾ ཨནཏྟཱ ནཱམ. ཝུཏྟཔྤཀཱརཱཀཱརཝིཀཱརཱ ཨནིཙྩདུཀྑཱནཏྟལཀྑཎཱནཱིཏི.

སངྑེཔཏོ པནེཏྠ དསཱཡཏནཱནི ཀཱམཱཝཙརཱནི, དྭེ ཏེབྷཱུམཀཱནི. སབྦེསུཔི སམྨསནཙཱརོ ཀཐིཏོཏི ཝེདིཏབྦོ.

སུཏྟནྟབྷཱཛནཱིཡཝཎྞནཱ.

༢. ཨབྷིདྷམྨབྷཱཛནཱིཡཝཎྞནཱ

༡༥༥. ཨབྷིདྷམྨབྷཱཛནཱིཡེ ¶ ¶ ཡཐཱ ཧེཊྛཱ ཝིཔསྶཀཱནཾ ཨུཔཀཱརཏྠཱཡ ‘‘ཙཀྑཱཡཏནཾ རཱུཔཱཡཏན’’ནྟི ཡུགལཏོ ཨཱཡཏནཱནི ཝུཏྟཱནི, ཏཐཱ ཨཝཏྭཱ ཨཛ྄ཛྷཏྟིཀབཱཧིརཱནཾ སབྦཱཀཱརཏོ སབྷཱཝདསྶནཏྠཾ ‘‘ཙཀྑཱཡཏནཾ སོཏཱཡཏན’’ནྟི ཨེཝཾ ཨཛ྄ཛྷཏྟིཀབཱཧིརཝཝཏྠཱནནཡེན ཝུཏྟཱནི.

༡༥༦. ཏེསཾ ནིདྡེསཝཱརེ ཏཏྠ ཀཏམཾ ཙཀྑཱཡཏནནྟིཨཱདཱིནི ཧེཊྛཱ ཝུཏྟནཡེནེཝ ཝེདིཏབྦཱནི.

༡༦༧. ཡཾ པནེཏཾ དྷམྨཱཡཏནནིདྡེསེ ‘‘ཏཏྠ ཀཏམཱ ཨསངྑཏཱ དྷཱཏུ? རཱགཀྑཡོ དོསཀྑཡོ མོཧཀྑཡོ’’ཏི ཝུཏྟཾ, ཏཏྲཱཡམཏྠོ – ཨསངྑཏཱ དྷཱཏཱུཏི ཨསངྑཏསབྷཱཝཾ ནིབྦཱནཾ. ཡསྨཱ པནེཏཾ ཨཱགམྨ རཱགཱདཡོ ཁཱིཡནྟི, ཏསྨཱ རཱགཀྑཡོ དོསཀྑཡོ མོཧཀྑཡོཏི ཝུཏྟཾ. ཨཡམེཏྠ ཨཱཙརིཡཱནཾ སམཱནཏྠཀཐཱ.

ཝིཏཎྜཝཱདཱི པནཱཧ – ‘པཱཊིཡེཀྐཾ ནིབྦཱནཾ ནཱམ ནཏྠི, ཀིལེསཀྑཡོཝ ནིབྦཱན’ནྟི. ‘སུཏྟཾ ཨཱཧརཱ’ཏི ཙ ཝུཏྟེ ‘‘ནིབྦཱནཾ ནིབྦཱནནྟི ཁོ, ཨཱཝུསོ སཱརིཔུཏྟ, ཝུཙྩཏི; ཀཏམཾ ནུ ཁོ, ཨཱཝུསོ, ནིབྦཱནནྟི? ཡོ ཁོ, ཨཱཝུསོ, རཱགཀྑཡོ དོསཀྑཡོ མོཧཀྑཡོ – ཨིདཾ ཝུཙྩཏི ནིབྦཱན’’ནྟི ཨེཏཾ ཛམྦུཁཱདཀསུཏྟཾ ཨཱཧརིཏྭཱ ‘ཨིམིནཱ སུཏྟེན ཝེདིཏབྦཾ པཱཊིཡེཀྐཾ ནིབྦཱནཾ ནཱམ ནཏྠི, ཀིལེསཀྑཡོཝ ནིབྦཱན’ནྟི ཨཱཧ. སོ ཝཏྟབྦོ – ‘ཀིཾ པན ཡཐཱ ཙེཏཾ སུཏྟཾ ཏཐཱ ཨཏྠོ’ཏི? ཨདྡྷཱ ཝཀྑཏི – ‘ཨཱམ ¶ , ནཏྠི སུཏྟཏོ མུཉྩིཏྭཱ ཨཏྠོ’ཏི. ཏཏོ ཝཏྟབྦོ – ‘ཨིདཾ ཏཱཝ ཏེ སུཏྟཾ ཨཱབྷཏཾ; ཨནནྟརསུཏྟཾ ཨཱཧརཱ’ཏི. ཨནནྟརསུཏྟཾ ནཱམ – ‘‘ཨརཧཏྟཾ ཨརཧཏྟནྟི, ཨཱཝུསོ སཱརིཔུཏྟ, ཝུཙྩཏི; ཀཏམཾ ནུ ཁོ, ཨཱཝུསོ, ཨརཧཏྟནྟི? ཡོ ཁོ, ཨཱཝུསོ, རཱགཀྑཡོ དོསཀྑཡོ མོཧཀྑཡོ – ཨིདཾ ཝུཙྩཏི ཨརཧཏྟ’’ནྟི (སཾ. ནི. ༤.༣༡༥) ཨིདཾ ཏསྶེཝཱནནྟརཾ ཨཱབྷཏསུཏྟཾ.

ཨིམསྨིཾ པན ནཾ ཨཱབྷཏེ ཨཱཧཾསུ – ‘ནིབྦཱནཾ ནཱམ དྷམྨཱཡཏནཔརིཡཱཔནྣོ དྷམྨོ, ཨརཧཏྟཾ ཙཏྟཱརོ ཁནྡྷཱ. ནིབྦཱནཾ སཙྪིཀཏྭཱ ཝིཧརནྟོ དྷམྨསེནཱཔཏི ¶ ནིབྦཱནཾ པུཙྪིཏོཔི ཨརཧཏྟཾ པུཙྪིཏོཔི ཀིལེསཀྑཡམེཝ ཨཱཧ. ཀིཾ པན ནིབྦཱནཉྩ ཨརཧཏྟཉྩ ཨེཀཾ ཨུདཱཧུ ནཱན’ནྟི? ‘ཨེཀཾ ¶ ཝཱ ཧོཏུ ནཱནཾ ཝཱ. ཀོ ཨེཏྠ ཏཡཱ ཨཏིབཧུཾ ཙུཎྞཱིཀརཎཾ ཀརོནྟེན ཨཏྠོ’? ‘ན ཏྭཾ ཨེཀཾ ནཱནཾ ཛཱནཱསཱིཏི. ནནུ ཉཱཏེ སཱདྷུ ཧོཏཱི’ཏི ཨེཝཾ པུནཔྤུནཾ པུཙྪིཏོ ཝཉྩེཏུཾ ཨསཀྐོནྟོ ཨཱཧ – ‘རཱགཱདཱིནཾ ཁཱིཎནྟེ ཨུཔྤནྣཏྟཱ ཨརཧཏྟཾ རཱགཀྑཡོ དོསཀྑཡོ མོཧཀྑཡོ’ཏི ཝུཙྩཏཱིཏི. ཏཏོ ནཾ ཨཱཧཾསུ – ‘མཧཱཀམྨཾ ཏེ ཀཏཾ. ལཉྫཾ དཏྭཱཔི ཏཾ ཝདཱཔེནྟོ ཨེཏདེཝ ཝདཱཔེཡྻ. ཡཐེཝ ཙ ཏེ ཨེཏཾ ཝིབྷཛིཏྭཱ ཀཐིཏཾ, ཨེཝཾ ཨིདམྤི སལླཀྑེཧི – ནིབྦཱནཉྷི ཨཱགམྨ རཱགཱདཡོ ཁཱིཎཱཏི ནིབྦཱནཾ རཱགཀྑཡོ དོསཀྑཡོ མོཧཀྑཡོཏི ཝུཏྟཾ. ཏཱིཎིཔི ཧི ཨེཏཱནི ནིབྦཱནསྶེཝ ཨདྷིཝཙནཱནཱི’ཏི.

སཙེ ཨེཝཾ ཝུཏྟེ སཉྙཏྟིཾ གཙྪཏི ཨིཙྩེཏཾ ཀུསལཾ; ནོ ཙེ, བཧུནིབྦཱནཏཱཡ ཀཱརེཏབྦོ. ཀཐཾ? ཨེཝཾ ཏཱཝ པུཙྪིཏབྦོ – ‘རཱགཀྑཡོ ནཱམ རཱགསྶེཝ ཁཡོ ཨུདཱཧུ དོསམོཧཱནམྤི? དོསཀྑཡོ ནཱམ དོསསྶེཝ ཁཡོ ཨུདཱཧུ རཱགམོཧཱནམྤི? མོཧཀྑཡོ ནཱམ མོཧསྶེཝ ཁཡོ ཨུདཱཧུ རཱགདོསཱནམྤཱི’ཏི? ཨདྡྷཱ ཝཀྑཏི – ‘རཱགཀྑཡོ ནཱམ རཱགསྶེཝ ཁཡོ, དོསཀྑཡོ ནཱམ དོསསྶེཝ ཁཡོ, མོཧཀྑཡོ ནཱམ མོཧསྶེཝ ཁཡོ’ཏི.

ཏཏོ ཝཏྟབྦོ – ‘ཏཝ ཝཱདེ རཱགཀྑཡོ ཨེཀཾ ནིབྦཱནཾ ཧོཏི, དོསཀྑཡོ ཨེཀཾ, མོཧཀྑཡོ ཨེཀཾ; ཏིཎྞཾ ཨཀུསལམཱུལཱནཾ ཁཡེ ཏཱིཎི ནིབྦཱནཱནི ཧོནྟི, ཙཏུནྣཾ ཨུཔཱདཱནཱནཾ ཁཡེ ཙཏྟཱརི, པཉྩནྣཾ ནཱིཝརཎཱནཾ ཁཡེ པཉྩ, ཚནྣཾ ཏཎྷཱཀཱཡཱནཾ ཁཡེ ཚ, སཏྟནྣཾ ཨནུསཡཱནཾ ཁཡེ སཏྟ, ཨཊྛནྣཾ མིཙྪཏྟཱནཾ ཁཡེ ཨཊྛ, ནཝནྣཾ ཏཎྷཱམཱུལཀདྷམྨཱནཾ ¶ ཁཡེ ནཝ, དསནྣཾ སཾཡོཛནཱནཾ ཁཡེ དས, དིཡཌྜྷཀིལེསསཧསྶསྶ ཁཡེ པཱཊིཡེཀྐཾ པཱཊིཡེཀྐཾ ནིབྦཱནནྟི བཧཱུནི ནིབྦཱནཱནི ཧོནྟི. ནཏྠི པན ཏེ ནིབྦཱནཱནཾ པམཱཎནྟི. ཨེཝཾ པན ཨགྒཧེཏྭཱ ནིབྦཱནཾ ཨཱགམྨ རཱགཱདཡོ ཁཱིཎཱཏི ཨེཀམེཝ ནིབྦཱནཾ རཱགཀྑཡོ དོསཀྑཡོ མོཧཀྑཡོཏི ཝུཙྩཏི. ཏཱིཎིཔི ཧེཏཱནི ནིབྦཱནསྶེཝ ཨདྷིཝཙནཱནཱིཏི གཎྷ’.

སཙེ ¶ པན ཨེཝཾ ཝུཏྟེཔི ན སལླཀྑེཏི, ཨོལཱ༹རིཀཏཱཡ ཀཱརེཏབྦོ. ཀཐཾ? ‘ཨནྡྷབཱལཱ ཧི ཨཙྪདཱིཔིམིགམཀྐཊཱདཡོཔི ཀིལེསཔརིཡུཊྛིཏཱ ཝཏྠུཾ པཊིསེཝནྟི. ཨཐ ནེསཾ པཊིསེཝནཔརིཡནྟེ ཀིལེསོ ཝཱུཔསམྨཏི. ཏཝ ཝཱདེ ཨཙྪདཱིཔིམིགམཀྐཊཱདཡོ ནིབྦཱནཔྤཏྟཱ ནཱམ ཧོནྟི. ཨོལཱ༹རིཀཾ ཝཏ ཏེ ནིབྦཱནཾ ཐཱུལཾ, ཀཎྞེཧི པིལ༹ནྡྷིཏུཾ ན སཀྐཱཏི. ཨེཝཾ པན ¶ ཨགྒཧེཏྭཱ ནིབྦཱནཾ ཨཱགམྨ རཱགཱདཡོ ཁཱིཎཱཏི ཨེཀམེཝ ནིབྦཱནཾ རཱགཀྑཡོ དོསཀྑཡོ མོཧཀྑཡོཏི ཝུཙྩཏི. ཏཱིཎིཔི ཧེཏཱནི ནིབྦཱནསྶེཝ ཨདྷིཝཙནཱནཱིཏི གཎྷ’.

སཙེ པན ཨེཝཾ ཝུཏྟེཔི ན སལླཀྑེཏི, གོཏྲབྷུནཱཔི ཀཱརེཏབྦོ. ཀཐཾ? ཨེཝཾ ཏཱཝ པུཙྪིཏབྦོ – ‘ཏྭཾ གོཏྲབྷུ ནཱམ ཨཏྠཱིཏི ཝདེསཱི’ཏི? ‘ཨཱམ ཝདཱམཱི’ཏི. ‘གོཏྲབྷུཀྑཎེ ཀིལེསཱ ཁཱིཎཱ, ཁཱིཡནྟི, ཁཱིཡིསྶནྟཱི’ཏི? ན ཁཱིཎཱ, ན ཁཱིཡནྟི; ཨཔིཙ ཁོ ཁཱིཡིསྶནྟཱིཏི. ‘གོཏྲབྷུ པན ཀིཾ ཨཱརམྨཎཾ ཀརོཏཱི’ཏི? ‘ནིབྦཱནཾ’. ‘ཏཝ གོཏྲབྷུཀྑཎེ ཀིལེསཱ ན ཁཱིཎཱ, ན ཁཱིཡནྟི; ཨཐ ཁོ ཁཱིཡིསྶནྟི. ཏྭཾ ཨཁཱིཎེསུཡེཝ ཀིལེསེསུ ཀིལེསཀྑཡཾ ནིབྦཱནཾ པཉྙཔེསི, ཨཔྤཧཱིནེསུ ཨནུསཡེསུ ཨནུསཡཔྤཧཱནཾ ནིབྦཱནཾ པཉྙཔེསི. ཏཾ ཏེ ན སམེཏི. ཨེཝཾ པན ཨགྒཧེཏྭཱ ནིབྦཱནཾ ཨཱགམྨ རཱགཱདཡོ ཁཱིཎཱཏི ཨེཀམེཝ ནིབྦཱནཾ རཱགཀྑཡོ དོསཀྑཡོ མོཧཀྑཡོཏི ཝུཙྩཏི. ཏཱིཎིཔི ཧེཏཱནི ནིབྦཱནསྶེཝ ཨདྷིཝཙནཱནཱིཏི གཎྷ’.

སཙེ པན ཨེཝཾ ཝུཏྟེཔི ན སལླཀྑེཏི, མགྒེན ཀཱརེཏབྦོ. ཀཐཾ? ཨེཝཾ ཏཱཝ པུཙྪིཏབྦོ – ‘ཏྭཾ མགྒཾ ནཱམ ཝདེསཱི’ཏི? ‘ཨཱམ ཝདེམཱི’ཏི. ‘མགྒཀྑཎེ ཀིལེསཱ ཁཱིཎཱ, ཁཱིཡནྟི, ཁིཡིསྶནྟཱི’ཏི? ཛཱནམཱནོ ཝཀྑཏི – ‘ཁཱིཎཱཏི ཝཱ ཁཱིཡིསྶནྟཱིཏི ཝཱ ཝཏྟུཾ ན ཝཊྚཏི, ཁཱིཡནྟཱིཏི ཝཏྟུཾ ¶ ཝཊྚཏཱི’ཏི. ‘ཡདི ཨེཝཾ, མགྒསྶ ཀིལེསཀྑཡཾ ནིབྦཱནཾ ཀཏམཾ? མགྒེན ཁཱིཡནཀཀིལེསཱ ཀཏམེ? མགྒོ ཀཏམཾ ཀིལེསཀྑཡཾ ནིབྦཱནཾ ཨཱརམྨཎཾ ཀཏྭཱ ཀཏམེ ཀིལེསེ ཁེཔེཏི? ཏསྨཱ མཱ ཨེཝཾ གཎྷ. ནིབྦཱནཾ པན ཨཱགམྨ རཱགཱདཡོ ཁཱིཎཱཏི ཨེཀམེཝ ནིབྦཱནཾ རཱགཀྑཡོ དོསཀྑཡོ མོཧཀྑཡོཏི ཝུཙྩཏི. ཏཱིཎིཔི ཧེཏཱནི ནིབྦཱནསྶེཝ ཨདྷིཝཙནཱནཱི’ཏི.

ཨེཝཾ ཝུཏྟེ ཨེཝམཱཧ – ‘ཏྭཾ ཨཱགམྨ ཨཱགམྨཱཏི ཝདེསཱི’ཏི? ‘ཨཱམ ཝདེམཱི’ཏི. ‘ཨཱགམྨ ནཱམཱཏི ཨིདཾ ཏེ ཀུཏོ ལདྡྷ’ནྟི? ‘སུཏྟཏོ ལདྡྷ’ནྟི ¶ . ‘ཨཱཧར སུཏྟ’ནྟི. ‘‘ཨེཝཾ ཨཝིཛྫཱ ཙ ཏཎྷཱ ཙ ཏཾ ཨཱགམྨ, ཏམྷི ཁཱིཎཱ, ཏམྷི བྷགྒཱ, ན ཙ ཀིཉྩི ཀདཱཙཱི’’ཏི. ཨེཝཾ ཝུཏྟེ པརཝཱདཱི ཏུཎྷཱིབྷཱཝཾ ཨཱཔནྣོཏི.

ཨིདྷཱཔི དསཱཡཏནཱནི ཀཱམཱཝཙརཱནི, དྭེ པན ཙཏུབྷཱུམཀཱནི ལོཀིཡལོཀུཏྟརམིསྶཀཱནཱིཏི ཝེདིཏབྦཱནི.

ཨབྷིདྷམྨབྷཱཛནཱིཡཝཎྞནཱ.

༣. པཉྷཱཔུཙྪཀཝཎྞནཱ

༡༦༨. ཨིདྷཱཔི ¶ པཉྷཱཔུཙྪཀེ ཡཾ ལབྦྷཏི ཡཉྩ ན ལབྦྷཏི, ཏཾ སབྦཾ པུཙྪིཏྭཱ ལབྦྷམཱནཝསེནེཝ ཝིསྶཛྫནཾ ཝུཏྟཾ; ན ཀེཝལཉྩ ཨིདྷ, སབྦེསུཔི པཉྷཱཔུཙྪཀེསུ ཨེསེཝ ནཡོ. ཨིདྷ པན དསནྣཾ ཨཱཡཏནཱནཾ རཱུཔབྷཱཝེན ཨབྱཱཀཏཏཱ ཝེདིཏབྦཱ. དྭིནྣཾ ཨཱཡཏནཱནཾ ཁནྡྷཝིབྷངྒེ ཙཏུནྣཾ ཁནྡྷཱནཾ ཝིཡ ཀུསལཱདིབྷཱཝོ ཝེདིཏབྦོ. ཀེཝལཉྷི ཙཏྟཱརོ ཁནྡྷཱ སཔྤཙྩཡཱཝ སངྑཏཱཝ དྷམྨཱཡཏནཾ པན ‘‘སིཡཱ ཨཔྤཙྩཡཾ, སིཡཱ ཨསངྑཏ’’ནྟི ཨཱགཏཾ. ཨཱརམྨཎཏྟིཀེསུ ཙ ཨནཱརམྨཎཾ སུཁུམརཱུཔསངྑཱཏཾ དྷམྨཱཡཏནཾ ན-ཝཏྟབྦཀོཊྛཱསཾ བྷཛཏི. ཏཉྩ ཁོ ཨནཱརམྨཎཏྟཱ ན པརིཏྟཱདིབྷཱཝེན ནཝཏྟབྦདྷམྨཱརམྨཎཏྟཱཏི ཨཡམེཏྠ ཝིསེསོ. སེསཾ ཏཱདིསམེཝ. ཨིདྷཱཔི ཧི ཙཏྟཱརོ ཁནྡྷཱ ཝིཡ དྭཱཡཏནཱ པཉྩཔཎྞཱས ཀཱམཱཝཙརདྷམྨེ ཨཱརབྦྷ རཛྫནྟསྶ དུསྶནྟསྶ མུཡ྄ཧནྟསྶ སཾཝརནྟསྶ སམྨསནྟསྶ པཙྩཝེཀྑནྟསྶ ཙ པརིཏྟཱརམྨཎཱཏི སབྦཾ ཁནྡྷེསུ ཝུཏྟསདིསམེཝཱཏི.

སམྨོཧཝིནོདནིཡཱ ཝིབྷངྒཊྛཀཐཱཡ

ཨཱཡཏནཝིབྷངྒཝཎྞནཱ ནིཊྛིཏཱ.

༣. དྷཱཏུཝིབྷངྒོ

༡. སུཏྟནྟབྷཱཛནཱིཡཝཎྞནཱ

༡༧༢. ཨིདཱནི ¶ ¶ ¶ ཏདནནྟརེ དྷཱཏུཝིབྷངྒེ སབྦཱ དྷཱཏུཡོ ཚཧི ཚཧི དྷཱཏཱུཧི སངྑིཔིཏྭཱ ཏཱིཧི ཚཀྐེཧི སུཏྟནྟབྷཱཛནཱིཡཾ དསྶེནྟོ ཚ དྷཱཏུཡོཏིཨཱདིམཱཧ. ཏཏྠ ཚཱཏི གཎནཔརིཙྪེདོ. དྷཱཏུཡོཏི པརིཙྪིནྣདྷམྨནིདསྶནཾ. པཐཝཱིདྷཱཏཱུཏིཨཱདཱིསུ དྷཱཏྭཊྛོ ནཱམ སབྷཱཝཊྛོ, སབྷཱཝཊྛོ ནཱམ སུཉྙཏཊྛོ, སུཉྙཏཊྛོ ནཱམ ནིསྶཏྟཊྛོཏི ཨེཝཾ སབྷཱཝསུཉྙཏནིསྶཏྟཊྛེན པཐཝཱིཡེཝ དྷཱཏུ པཐཝཱིདྷཱཏུ. ཨཱཔོདྷཱཏུཨཱདཱིསུཔི ཨེསེཝ ནཡོ. ཨེཝམེཏྠ པདསམཱསཾ ཝིདིཏྭཱ ཨེཝམཏྠོ ཝེདིཏབྦོ – པཐཝཱིདྷཱཏཱུཏི པཏིཊྛཱནདྷཱཏུ. ཨཱཔོདྷཱཏཱུཏི ཨཱབནྡྷནདྷཱཏུ. ཏེཛོདྷཱཏཱུཏི པརིཔཱཙནདྷཱཏུ. ཝཱཡོདྷཱཏཱུཏི ཝིཏྠམྦྷནདྷཱཏུ. ཨཱཀཱསདྷཱཏཱུཏི ཨསམྥུཊྛདྷཱཏུ. ཝིཉྙཱཎདྷཱཏཱུཏི ཝིཛཱནནདྷཱཏུ.

༡༧༣. པཐཝཱིདྷཱཏུདྭཡནྟི པཐཝཱིདྷཱཏུ དྭེ ཨཡཾ. ཨཡཾ པཐཝཱིདྷཱཏུ ནཱམ ན ཨེཀཱ ཨེཝ ཨཛ྄ཛྷཏྟིཀབཱཧིརབྷེདེན པན དྭེ དྷཱཏུཡོ ཨེཝཱཏི ཨཏྠོ. ཏེནེཝཱཧ – ‘‘ཨཏྠི ཨཛ྄ཛྷཏྟིཀཱ ཨཏྠི བཱཧིརཱ’’ཏི. ཏཏྠ ཨཛ྄ཛྷཏྟིཀཱཏི སཏྟསནྟཱནཔརིཡཱཔནྣཱ ནིཡཀཛ྄ཛྷཏྟཱ. བཱཧིརཱཏི སངྑཱརསནྟཱནཔརིཡཱཔནྣཱ ཨནིནྡྲིཡབདྡྷཱ. ཨཛ྄ཛྷཏྟཾ པཙྩཏྟནྟི ཨུབྷཡམྤེཏཾ ནིཡཀཛ྄ཛྷཏྟཱདྷིཝཙནམེཝ. ཨིདཱནི ཏཾ སབྷཱཝཱཀཱརཏོ དསྶེཏུཾ ཀཀྑལ༹ནྟིཨཱདི ཝུཏྟཾ. ཏཏྠ ཀཀྑལ༹ནྟི ཐདྡྷཾ. ཁརིགཏནྟི ཕརུསཾ. ཀཀྑལ༹ཏྟནྟི ཀཀྑལ༹བྷཱཝོ. ཀཀྑལ༹བྷཱཝོཏི ཀཀྑལ༹སབྷཱཝོ. ཨཛ྄ཛྷཏྟཾ ཨུཔཱདིནྣནྟི ནིཡཀཛ྄ཛྷཏྟསངྑཱཏཾ ཨུཔཱདིནྣཾ. ཨུཔཱདིནྣཾ ནཱམ སརཱིརཊྛཀཾ. སརཱིརཊྛཀཉྷི ཀམྨསམུཊྛཱནཾ ཝཱ ཧོཏུ མཱ ཝཱ, ཏཾ སནྡྷཱཡ ཨུཔཱདིནྣམྤི ཨཏྠི ཨནུཔཱདིནྣམྤི; ཨཱདིནྣགྒཧིཏཔརཱམཊྛཝསེན ¶ པན ¶ སབྦམྤེཏཾ ཨུཔཱདིནྣམེཝཱཏི དསྶེཏུཾ ‘‘ཨཛ྄ཛྷཏྟཾ ཨུཔཱདིནྣ’’ནྟི ཨཱཧ.

ཨིདཱནི ཏམེཝ པཐཝཱིདྷཱཏུཾ ཝཏྠུཝསེན དསྶེཏུཾ སེཡྻཐིདཾ ཀེསཱ ལོམཱཏིཨཱདི ཝུཏྟཾ. ཏཏྠ སེཡྻཐིདནྟི ནིཔཱཏོ. ཏསྶཏྠོ – ཡཱ སཱ ཨཛ྄ཛྷཏྟིཀཱ པཐཝཱིདྷཱཏུ སཱ ཀཏམཱ? ཡཾ ཝཱ ཨཛ྄ཛྷཏྟཾ པཙྩཏྟཾ ཀཀྑལ༹ཾ ནཱམ ཏཾ ཀཏམནྟི? ཀེསཱ ལོམཱཏིཨཱདི ཏསྶཱ ཨཛ྄ཛྷཏྟིཀཱཡ པཐཝཱིདྷཱཏུཡཱ ཝཏྠུཝསེན པབྷེདདསྶནཾ. ཨིདཾ ཝུཏྟཾ ཧོཏི – ཀེསཱ ནཱམ ཨཛ྄ཛྷཏྟཱ ཨུཔཱདིནྣཱ སརཱིརཊྛཀཱ ཀཀྑལ༹ཏྟལཀྑཎཱ ཨིམསྨིཾ སརཱིརེ པཱཊིཡེཀྐོ ¶ ཀོཊྛཱསོ. ལོམཱ ནཱམ…པེ… ཀརཱིསཾ ནཱམ. ཨིདྷ པན ཨཝུཏྟམྤི པཊིསམྦྷིདཱམགྒེ (པཊི. མ. ༡.༤) པཱལི༹ཨཱརུལ༹ྷཾ མཏྠལུངྒཾ ཨཱཧརིཏྭཱ མཏྠལུངྒཾ ནཱམ ཨཛ྄ཛྷཏྟཾ ཨུཔཱདིནྣཾ སརཱིརཊྛཀཾ ཀཀྑལ༹ཏྟལཀྑཎཾ ཨིམསྨིཾ སརཱིརེ པཱཊིཡེཀྐོ ཀོཊྛཱསོ. པརཏོ ཨཱཔོདྷཱཏུཨཱདཱིནཾ ནིདྡེསེ པིཏྟཱདཱིསུཔི ཨེསེཝ ནཡོ.

ཨིམིནཱ ཀིཾ དསྶིཏཾ ཧོཏི? དྷཱཏུམནསིཀཱརོ. ཨིམསྨིཾ པན དྷཱཏུམནསིཀཱརེ ཀམྨཾ ཀཏྭཱ ཝིཔསྶནཾ པཊྛཔེཏྭཱ ཨུཏྟམཏྠཾ ཨརཧཏྟཾ པཱཔུཎིཏུཀཱམེན ཀིཾ ཀཏྟབྦཾ? ཙཏུཔཱརིསུདྡྷིསཱིལཾ སོདྷེཏབྦཾ. སཱིལཝཏོ ཧི ཀམྨཊྛཱནབྷཱཝནཱ ཨིཛ྄ཛྷཏི. ཏསྶ སོདྷནཝིདྷཱནཾ ཝིསུདྡྷིམགྒེ ཝུཏྟནཡེནེཝ ཝེདིཏབྦཾ. ཝིསུདྡྷསཱིལེན པན སཱིལེ པཏིཊྛཱཡ དས པུབྦཔལིབོདྷཱ ཚིནྡིཏབྦཱ. ཏེསམྤི ཚིནྡནཝིདྷཱནཾ ཝིསུདྡྷིམགྒེ ཝུཏྟནཡེནེཝ ཝེདིཏབྦཾ. ཚིནྣཔལིབོདྷེན དྷཱཏུམནསིཀཱརཀམྨཊྛཱནཾ ཨུགྒཎྷིཏབྦཾ. ཨཱཙརིཡེནཱཔི དྷཱཏུམནསིཀཱརཀམྨཊྛཱནཾ ཨུགྒཎྷཱཔེནྟེན སཏྟཝིདྷཾ ཨུགྒཧཀོསལླཾ དསཝིདྷཉྩ མནསིཀཱརཀོསལླཾ ཨཱཙིཀྑིཏབྦཾ. ཨནྟེཝཱསིཀེནཱཔི ཨཱཙརིཡསྶ སནྟིཀེ བཧུཝཱརེ སཛ྄ཛྷཱཡཾ ཀཏྭཱ ནིཛྫཊཾ པགུཎཾ ཀམྨཊྛཱནཾ ཀཱཏབྦཾ. ཝུཏྟཉྷེཏཾ ཨཊྛཀཐཱཡཾ – ‘‘ཨཱདིཀམྨིཀེན བྷིཀྑུནཱ ཛརཱམརཎཱ མུཙྩིཏུཀཱམེན སཏྟཧཱཀཱརེཧི ཨུགྒཧཀོསལླཾ ཨིཙྪིཏབྦཾ, དསཧཱཀཱརེཧི མནསིཀཱརཀོསལླཾ ཨིཙྪིཏབྦ’’ནྟི.

ཏཏྠ ཝཙསཱ, མནསཱ, ཝཎྞཏོ, སཎྛཱནཏོ, དིསཏོ, ཨོཀཱསཏོ, པརིཙྪེདཏོཏི ཨིམེཧི སཏྟཧཱཀཱརེཧི ཨིམསྨིཾ དྷཱཏུམནསིཀཱརཀམྨཊྛཱནེ ‘ཨུགྒཧཀོསལླཾ’ ཨིཙྪིཏབྦཾ. ཨནུཔུབྦཏོ, ནཱཏིསཱིགྷཏོ, ནཱཏིསཎིཀཏོ, ཝིཀྑེཔཔཊིབཱཧནཏོ ¶ , པཎྞཏྟིསམཏིཀྐམཏོ, ཨནུཔུབྦམུཉྩནཏོ, ལཀྑཎཏོ, ཏཡོ ཙ སུཏྟནྟཱཏི ཨིམེཧི དསཧཱཀཱརེཧི ‘མནསིཀཱརཀོསལླཾ’ ཨིཙྪིཏབྦཾ. ཏདུབྷཡམྤི པརཏོ སཏིཔཊྛཱནཝིབྷངྒེ ཨཱཝི བྷཝིསྶཏི.

ཨེཝཾ ¶ ཨུགྒཧིཏཀམྨཊྛཱནེན པན ཝིསུདྡྷིམགྒེ ཝུཏྟེ ཨཊྛཱརས སེནཱསནདོསེ ཝཛྫེཏྭཱ པཉྩངྒསམནྣཱགཏེ སེནཱསནེ ཝསནྟེན ཨཏྟནཱཔི པཉྩཧི པདྷཱནིཡངྒེཧི སམནྣཱགཏེན པཙྪཱབྷཏྟཾ པིཎྜཔཱཏཔཊིཀྐནྟེན ཝིཝིཏྟོཀཱསགཏེན ཀམྨཊྛཱནཾ མནསིཀཱཏབྦཾ. མནསིཀརོནྟེན ཙ ཝཎྞསཎྛཱནདིསོཀཱསཔརིཙྪེདཝསེན ¶ ཀེསཱདཱིསུ ཨེཀེཀཀོཊྛཱསཾ མནསིཀརིཏྭཱ ཨཝསཱནེ ཨེཝཾ མནསིཀཱརོ པཝཏྟེཏབྦོ – ཨིམེ ཀེསཱ ནཱམ སཱིསཀཊཱཧཔལིཝེཋནཙམྨེ ཛཱཏཱ. ཏཏྠ ཡཐཱ ཝམྨིཀམཏྠཀེ ཛཱཏེསུ ཀུཎྛཏིཎེསུ ན ཝམྨིཀམཏྠཀོ ཛཱནཱཏི ‘མཡི ཀུཎྛཏིཎཱནི ཛཱཏཱནཱི’ཏི, ནཱཔི ཀུཎྛཏིཎཱནི ཛཱནནྟི ‘མཡཾ ཝམྨིཀམཏྠཀེ ཛཱཏཱནཱི’ཏི, ཨེཝམེཝ ན སཱིསཀཊཱཧཔལིཝེཋནཙམྨཾ ཛཱནཱཏི ‘མཡི ཀེསཱ ཛཱཏཱ’ཏི, ནཱཔི ཀེསཱ ཛཱནནྟི ‘མཡཾ སཱིསཀཊཱཧཔལིཝེཋནཙམྨེ ཛཱཏཱ’ཏི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ཀེསཱ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

ལོམཱ སརཱིརཝེཋནཙམྨེ ཛཱཏཱ. ཏཏྠ ཡཐཱ སུཉྙགཱམཊྛཱནེ ཛཱཏེསུ དབྦཏིཎེསུ ན སུཉྙགཱམཊྛཱནཾ ཛཱནཱཏི ‘མཡི དབྦཏིཎཱནི ཛཱཏཱནཱི’ཏི, ནཱཔི དབྦཏིཎཱནི ཛཱནནྟི ‘མཡཾ སུཉྙགཱམཊྛཱནེ ཛཱཏཱནཱི’ཏི, ཨེཝམེཝ ན སརཱིརཝེཋནཙམྨཾ ཛཱནཱཏི ‘མཡི ལོམཱ ཛཱཏཱ’ཏི, ནཱཔི ལོམཱ ཛཱནནྟི ‘མཡཾ སརཱིརཝེཋནཙམྨེ ཛཱཏཱ’ཏི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ལོམཱ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

ནཁཱ ཨངྒུལཱིནཾ ཨགྒེསུ ཛཱཏཱ. ཏཏྠ ཡཐཱ ཀུམཱརཀེསུ དཎྜཀེཧི མདྷུཀཊྛིཀེ ཝིཛ྄ཛྷིཏྭཱ ཀཱིལ༹ནྟེསུ ན དཎྜཀཱ ཛཱནནྟི ‘ཨམྷེསུ མདྷུཀཊྛིཀཱ ཋཔིཏཱ’ཏི, ནཱཔི མདྷུཀཊྛིཀཱ ཛཱནནྟི ‘མཡཾ དཎྜཀེསུ ཋཔིཏཱ’ཏི, ཨེཝམེཝ ན ཨངྒུལིཡོ ཛཱནནྟི ‘ཨམྷཱཀཾ ཨགྒེསུ ནཁཱ ཛཱཏཱ’ཏི, ནཱཔི ནཁཱ ཛཱནནྟི ‘མཡཾ ཨངྒུལཱིནཾ ཨགྒེསུ ཛཱཏཱ’ཏི. ཨཉྙམཉྙཾ ¶ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ནཁཱ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

དནྟཱ ཧནུཀཊྛིཀེསུ ཛཱཏཱ. ཏཏྠ ཡཐཱ ཝཌྜྷཀཱིཧི པཱསཱཎཨུདུཀྑལེསུ ཀེནཙིདེཝ སིལེསཛཱཏེན བནྡྷིཏྭཱ ཋཔིཏཐམྦྷེསུ ན ཨུདུཀྑལཱནི ཛཱནནྟི ‘ཨམྷེསུ ཐམྦྷཱ ཋིཏཱ’ཏི, ནཱཔི ཐམྦྷཱ ¶ ཛཱནནྟི ‘མཡཾ ཨུདུཀྑལེསུ ཋིཏཱ’ཏི, ཨེཝམེཝ ན ཧནུཀཊྛིཀཱ ཛཱནནྟི ‘ཨམྷེསུ དནྟཱ ཛཱཏཱ’ཏི ¶ , ནཱཔི དནྟཱ ཛཱནནྟི ‘མཡཾ ཧནུཀཊྛིཀེསུ ཛཱཏཱ’ཏི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི དནྟཱ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

ཏཙོ སཀལསརཱིརཾ པརིཡོནནྡྷིཏྭཱ ཋིཏོ. ཏཏྠ ཡཐཱ ཨལླགོཙམྨཔརིཡོནདྡྷཱཡ མཧཱཝཱིཎཱཡ ན མཧཱཝཱིཎཱ ཛཱནཱཏི ‘ཨཧཾ ཨལླགོཙམྨེན པརིཡོནདྡྷཱ’ཏི, ནཱཔི ཨལླགོཙམྨཾ ཛཱནཱཏི ‘མཡཱ མཧཱཝཱིཎཱ པརིཡོདྡྷཱ’ཏི, ཨེཝམེཝ ན སརཱིརཾ ཛཱནཱཏི ‘ཨཧཾ ཏཙེན པརིཡོནདྡྷ’ནྟི, ནཱཔི ཏཙོ ཛཱནཱཏི ‘མཡཱ སརཱིརཾ པརིཡོནདྡྷནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ཏཙོ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

མཾསཾ ཨཊྛིསངྒྷཱཊཾ ཨནུལིམྤིཏྭཱ ཋིཏཾ. ཏཏྠ ཡཐཱ མཧཱམཏྟིཀཱཡ ལིཏྟཱཡ བྷིཏྟིཡཱ ན བྷིཏྟི ཛཱནཱཏི ‘ཨཧཾ མཧཱམཏྟིཀཱཡ ལིཏྟཱ’ཏི, ནཱཔི མཧཱམཏྟིཀཱ ཛཱནཱཏི ‘མཡཱ མཧཱབྷིཏྟི ལིཏྟཱ’ཏི, ཨེཝམེཝ ན ཨཊྛིསངྒྷཱཊོ ཛཱནཱཏི ‘ཨཧཾ ནཝམཾསཔེསིསཏཔྤབྷེདེན མཾསེན ལིཏྟོ’ཏི, ནཱཔི མཾསཾ ཛཱནཱཏི ‘མཡཱ ཨཊྛིསངྒྷཱཊོ ལིཏྟོ’ཏི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི མཾསཾ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

ནྷཱརུ སརཱིརབྦྷནྟརེ ཨཊྛཱིནི ཨཱབནྡྷམཱནཱ ཋིཏཱ. ཏཏྠ ཡཐཱ ཝལླཱིཧི ཝིནདྡྷེསུ ཀུཊྚདཱརཱུསུ ན ཀུཊྚདཱརཱུནི ཛཱནནྟི ‘མཡཾ ཝལླཱིཧི ཝིནདྡྷཱནཱི’ཏི, ནཱཔི ཝལླིཡོ ཛཱནནྟི ‘ཨམྷེཧི ཀུཊྚདཱརཱུནི ཝིནདྡྷཱནཱི’ཏི, ཨེཝམེཝ ན ཨཊྛཱིནི ཛཱནནྟི ‘མཡཾ ནྷཱརཱུཧི ཨཱབདྡྷཱནཱི’ཏི, ནཱཔི ནྷཱརཱུ ཛཱནནྟི ‘ཨམྷེཧི ཨཊྛཱིནི ཨཱབདྡྷཱནཱི’ཏི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ¶ ཨེཏེ དྷམྨཱ. ཨིཏི ནྷཱརུ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

ཨཊྛཱིསུ པཎྷིཀཊྛི གོཔྥཀཊྛིཾ ཨུཀྑིཔིཏྭཱ ཋིཏཾ. གོཔྥཀཊྛི ཛངྒྷཊྛིཾ ཨུཀྑིཔིཏྭཱ ཋིཏཾ. ཛངྒྷཊྛི ཨཱུརུཊྛིཾ ཨུཀྑིཔིཏྭཱ ཋིཏཾ. ཨཱུརུཊྛི ཀཊིཊྛིཾ ཨུཀྑིཔིཏྭཱ ཋིཏཾ ¶ . ཀཊིཊྛི པིཊྛིཀཎྚཀཾ ¶ ཨུཀྑིཔིཏྭཱ ཋིཏཾ. པིཊྛིཀཎྚཀོ གཱིཝཊྛིཾ ཨུཀྑིཔིཏྭཱ ཋིཏོ. གཱིཝཊྛི སཱིསཊྛིཾ ཨུཀྑིཔིཏྭཱ ཋིཏཾ. སཱིསཊྛི གཱིཝཊྛིཀེ པཏིཊྛིཏཾ. གཱིཝཊྛི པིཊྛིཀཎྚཀེ པཏིཊྛིཏཾ. པིཊྛིཀཎྚཀོ ཀཊིཊྛིམྷི པཏིཊྛིཏོ. ཀཊིཊྛི ཨཱུརུཊྛིཀེ པཏིཊྛིཏཾ. ཨཱུརུཊྛི ཛངྒྷཊྛིཀེ པཏིཊྛིཏཾ. ཛངྒྷཊྛི གོཔྥཀཊྛིཀེ པཏིཊྛིཏཾ. གོཔྥཀཊྛི པཎྷིཀཊྛིཀེ པཏིཊྛིཏཾ.

ཏཏྠ ཡཐཱ ཨིཊྛཀདཱརུགོམཡཱདིསཉྩཡེསུ ན ཧེཊྛིམཱ ཧེཊྛིམཱ ཛཱནནྟི ‘མཡཾ ཨུཔརིམེ ཨུཔརིམེ ཨུཀྑིཔིཏྭཱ ཋིཏཱ’ཏི, ནཱཔི ཨུཔརིམཱ ཨུཔརིམཱ ཛཱནནྟི ‘མཡཾ ཧེཊྛིམེསུ ཧེཊྛིམེསུ པཏིཊྛིཏཱ’ཏི, ཨེཝམེཝ ན པཎྷིཀཊྛི ཛཱནཱཏི ‘ཨཧཾ གོཔྥཀཊྛིཾ ཨུཀྑིཔིཏྭཱ ཋིཏ’ནྟི, ན གོཔྥཀཊྛི ཛཱནཱཏི ‘ཨཧཾ ཛངྒྷཊྛིཾ ཨུཀྑིཔིཏྭཱ ཋིཏ’ནྟི, ན ཛངྒྷཊྛི ཛཱནཱཏི ‘ཨཧཾ ཨཱུརུཊྛིཾ ཨུཀྑིཔིཏྭཱ ཋིཏ’ནྟི, ན ཨཱུརུཊྛི ཛཱནཱཏི ‘ཨཧཾ ཀཊིཊྛིཾ ཨུཀྑིཔིཏྭཱ ཋིཏ’ནྟི, ན ཀཊིཊྛི ཛཱནཱཏི ‘ཨཧཾ པིཊྛིཀཎྚཀཾ ཨུཀྑིཔིཏྭཱ ཋིཏ’ནྟི, ན པིཊྛིཀཎྚཀོ ཛཱནཱཏི ‘ཨཧཾ གཱིཝཊྛིཾ ཨུཀྑིཔིཏྭཱ ཋིཏོ’ཏི, ན གཱིཝཊྛི ཛཱནཱཏི ‘ཨཧཾ སཱིསཊྛིཾ ཨུཀྑིཔིཏྭཱ ཋིཏ’ནྟི, ན སཱིསཊྛི ཛཱནཱཏི ‘ཨཧཾ གཱིཝཊྛིམྷི པཏིཊྛིཏ’ནྟི, ན གཱིཝཊྛི ཛཱནཱཏི ‘ཨཧཾ པིཊྛིཀཎྚཀེ པཏིཊྛིཏ’ནྟི, ན པིཊྛིཀཎྚཀོ ཛཱནཱཏི ‘ཨཧཾ ཀཊིཊྛིམྷི པཏིཊྛིཏོ’ཏི, ན ཀཊིཊྛི ཛཱནཱཏི ‘ཨཧཾ ཨཱུརུཊྛིམྷི པཏིཊྛིཏ’ནྟི, ན ཨཱུརུཊྛི ཛཱནཱཏི ‘ཨཧཾ ཛངྒྷཊྛིམྷི པཏིཊྛིཏ’ནྟི, ན ཛངྒྷཊྛི ཛཱནཱཏི ‘ཨཧཾ གོཔྥཀཊྛིམྷི པཏིཊྛིཏ’ནྟི, ན གོཔྥཀཊྛི ཛཱནཱཏི ‘ཨཧཾ པཎྷིཀཊྛིམྷི པཏིཊྛིཏ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ཨཊྛི ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

ཨཊྛིམིཉྫཾ ཏེསཾ ཏེསཾ ཨཊྛཱིནཾ ཨབྦྷནྟརེ ཋིཏཾ. ཏཏྠ ཡཐཱ ཝེལུ༹པབྦཱདཱིནཾ ཨནྟོ པཀྑིཏྟེསུ སིནྣཝེཏྟགྒཱདཱིསུ ¶ ན ཝེལུ༹པབྦཱདཱིནི ཛཱནནྟི ‘ཨམྷེསུ ཝེཏྟགྒཱདཱིནི པཀྑིཏྟཱནཱི’ཏི, ནཱཔི ཝེཏྟགྒཱདཱིནི ཛཱནནྟི ‘མཡཾ ཝེལུ༹པབྦཱདཱིསུ ཋིཏཱནཱིཏི, ཨེཝམེཝ ན ཨཊྛཱིནི ཛཱནནྟི ‘ཨམྷཱཀཾ ཨནྟོ ཨཊྛིམིཉྫཾ ཋིཏ’ནྟི, ནཱཔི ཨཊྛིམིཉྫཾ ཛཱནཱཏི ‘ཨཧཾ ཨཊྛཱིནཾ ཨནྟོ ཋིཏ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ཨཊྛིམིཉྫཾ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

ཝཀྐཾ ¶ གལཝཱཊཀཏོ ནིཀྑནྟེན ཨེཀམཱུལེན ཐོཀཾ གནྟྭཱ དྭིདྷཱ བྷིནྣེན ཐཱུལནྷཱརུནཱ ཝིནིབདྡྷཾ ཧུཏྭཱ ཧདཡམཾསཾ པརིཀྑིཔིཏྭཱ ཋིཏཾ. ཏཏྠ ཡཐཱ ཝཎྚུཔནིབདྡྷེ ¶ ཨམྦཕལདྭཡེ ན ཝཎྚཾ ཛཱནཱཏི ‘མཡཱ ཨམྦཕལདྭཡཾ ཨུཔནིབདྡྷ’ནྟི, ནཱཔི ཨམྦཕལདྭཡཾ ཛཱནཱཏི ‘ཨཧཾ ཝཎྚེན ཨུཔནིབདྡྷ’ནྟི, ཨེཝམེཝ ན ཐཱུལནྷཱརུ ཛཱནཱཏི ‘མཡཱ ཝཀྐཾ ཨུཔནིབདྡྷ’ནྟི, ནཱཔི ཝཀྐཾ ཛཱནཱཏི ‘ཨཧཾ ཐཱུལནྷཱརུནཱ ཨུཔནིབདྡྷ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ཝཀྐཾ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

ཧདཡཾ སརཱིརབྦྷནྟརེ ཨུརཊྛིཔཉྫརམཛ྄ཛྷཾ ནིསྶཱཡ ཋིཏཾ. ཏཏྠ ཡཐཱ ཛིཎྞསནྡམཱནིཀཔཉྫརབྦྷནྟརཾ ནིསྶཱཡ ཋཔིཏཱཡ མཾསཔེསིཡཱ ན ཛིཎྞསནྡམཱནིཀཔཉྫརབྦྷནྟརཾ ཛཱནཱཏི ‘མཾ ནིསྶཱཡ མཾསཔེསི ཋཔིཏཱ’ཏི, ནཱཔི མཾསཔེསི ཛཱནཱཏི ‘ཨཧཾ ཛིཎྞསནྡམཱནིཀཔཉྫརབྦྷནྟརཾ ནིསྶཱཡ ཋིཏཱ’ཏི, ཨེཝམེཝ ན ཨུརཊྛིཔཉྫརབྦྷནྟརཾ ཛཱནཱཏི ‘མཾ ནིསྶཱཡ ཧདཡཾ ཋིཏ’ནྟི, ནཱཔི ཧདཡཾ ཛཱནཱཏི ‘ཨཧཾ ཨུརཊྛིཔཉྫརབྦྷནྟརཾ ནིསྶཱཡ ཋིཏ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ཧདཡཾ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

ཡཀནཾ ཨནྟོསརཱིརེ དྭིནྣཾ ཐནཱནཾ ཨབྦྷནྟརེ དཀྑིཎཔསྶཾ ནིསྶཱཡ ཋིཏཾ. ཏཏྠ ཡཐཱ ཨུཀྑལིཀཔཱལཔསྶམྷི ལགྒེ ཡམཀམཾསཔིཎྜེ ན ཨུཀྑལིཀཔཱལཔསྶཾ ཛཱནཱཏི ‘མཡི ཡམཀམཾསཔིཎྜོ ལགྒོ’ཏི, ནཱཔི ཡམཀམཾསཔིཎྜོ ¶ ཛཱནཱཏི ‘ཨཧཾ ཨུཀྑལིཀཔཱལཔསྶེ ལགྒོ’ཏི, ཨེཝམེཝ ན ཐནཱནཾ ཨབྦྷནྟརེ དཀྑིཎཔསྶཾ ཛཱནཱཏི ‘མཾ ནིསྶཱཡ ཡཀནཾ ཋིཏ’ནྟི, ནཱཔི ཡཀནཾ ཛཱནཱཏི ‘ཨཧཾ ཐནཱནཾ ཨབྦྷནྟརེ དཀྑིཎཔསྶཾ ནིསྶཱཡ ཋིཏ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ཡཀནཾ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

ཀིལོམཀེསུ པཊིཙྪནྣཀིལོམཀཾ ཧདཡཉྩ ཝཀྐཉྩ པརིཝཱརེཏྭཱ ཋིཏཾ, ཨཔཊིཙྪནྣཀིལོམཀཾ སཀལསརཱིརེ ཙམྨསྶ ཧེཊྛཏོ མཾསཾ པརིཡོནནྡྷིཏྭཱ ཋིཏཾ. ཏཏྠ ཡཐཱ པིལོཏིཀཔལིཝེཋིཏེ མཾསེ ན མཾསཾ ཛཱནཱཏི ‘ཨཧཾ པིལོཏིཀཱཡ པལིཝེཋིཏ’ནྟི, ནཱཔི པིལོཏིཀཱ ཛཱནཱཏི ‘མཡཱ མཾསཾ པལིཝེཋིཏ’ནྟི, ཨེཝམེཝ ན ཝཀྐཧདཡཱནི སཀལསརཱིརེ མཾསཉྩ ¶ ཛཱནཱཏི ‘ཨཧཾ ཀིལོམཀེན པཊིཙྪནྣ’ནྟི, ནཱཔི ཀིལོམཀཾ ཛཱནཱཏི ‘མཡཱ ཝཀྐཧདཡཱནི སཀལསརཱིརེ མཾསཉྩ པཊིཙྪནྣ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ¶ ཨེཏེ དྷམྨཱ. ཨིཏི ཀིལོམཀཾ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

པིཧཀཾ ཧདཡསྶ ཝཱམཔསྶེ ཨུདརཔཊལསྶ མཏྠཀཔསྶཾ ནིསྶཱཡ ཋིཏཾ. ཏཏྠ ཡཐཱ ཀོཊྛཀམཏྠཀཔསྶཾ ནིསྶཱཡ ཋིཏཱཡ གོམཡཔིཎྜིཡཱ ན ཀོཊྛཀམཏྠཀཔསྶཾ ཛཱནཱཏི ‘གོམཡཔིཎྜི མཾ ནིསྶཱཡ ཋིཏཱ’ཏི, ནཱཔི གོམཡཔིཎྜི ཛཱནཱཏི ‘ཨཧཾ ཀོཊྛཀམཏྠཀཔསྶཾ ནིསྶཱཡ ཋིཏཱ’ཏི, ཨེཝམེཝ ན ཨུདརཔཊལསྶ མཏྠཀཔསྶཾ ཛཱནཱཏི ‘པིཧཀཾ མཾ ནིསྶཱཡ ཋིཏ’ནྟི, ནཱཔི པིཧཀཾ ཛཱནཱཏི ‘ཨཧཾ ཨུདརཔཊལསྶ མཏྠཀཔསྶཾ ནིསྶཱཡ ཋིཏ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི པིཧཀཾ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

པཔྥཱསཾ སརཱིརབྦྷནྟརེ དྭིནྣཾ ཐནཱནཾ ཨབྦྷནྟརེ ཧདཡཉྩ ཡཀནཉྩ ཨུཔརིཚཱདེཏྭཱ ཨོལམྦནྟཾ ཋིཏཾ. ཏཏྠ ཡཐཱ ཛིཎྞཀོཊྛབྦྷནྟརེ ཨོལམྦམཱནེ སཀུཎཀུལཱཝཀེ ན ཛིཎྞཀོཊྛབྦྷནྟརཾ ཛཱནཱཏི ‘མཡི སཀུཎཀུལཱཝཀོ ཨོལམྦམཱནོ ཋིཏོ’ཏི, ནཱཔི སཀུཎཀུལཱཝཀོ ཛཱནཱཏི ‘ཨཧཾ ཛིཎྞཀོཊྛབྦྷནྟརེ ཨོལམྦམཱནོ ཋིཏོ’ཏི ¶ , ཨེཝམེཝ ན སརཱིརབྦྷནྟརཾ ཛཱནཱཏི ‘མཡི པཔྥཱསཾ ཨོལམྦམཱནཾ ཋིཏ’ནྟི, ནཱཔི པཔྥཱསཾ ཛཱནཱཏི ‘ཨཧཾ ཨེཝརཱུཔེ སརཱིརབྦྷནྟརེ ཨོལམྦམཱནཾ ཋིཏ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི པཔྥཱསཾ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

ཨནྟཾ གལཝཱཊཀཏོ ཀརཱིསམགྒཔརིཡནྟེ སརཱིརབྦྷནྟརེ ཋིཏཾ. ཏཏྠ ཡཐཱ ལོཧིཏདོཎིཀཱཡ ཨོབྷུཛིཏྭཱ ཋཔིཏེ ཚིནྣསཱིསདྷམནིཀལེ༹ཝརེ ན ལོཧིཏདོཎི ཛཱནཱཏི ‘མཡི དྷམནིཀལེ༹ཝརཾ ཋིཏ’ནྟི, ནཱཔི དྷམནིཀལེ༹ཝརཾ ཛཱནཱཏི ‘ཨཧཾ ལོཧིཏདོཎིཀཱཡཾ ཋིཏ’ནྟི, ཨེཝམེཝ ན སརཱིརབྦྷནྟརཾ ཛཱནཱཏི ‘མཡི ཨནྟཾ ཋིཏ’ནྟི, ནཱཔི ཨནྟཾ ཛཱནཱཏི ‘ཨཧཾ སརཱིརབྦྷནྟརེ ཋིཏ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ཨནྟཾ ནཱམ ¶ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

ཨནྟགུཎཾ ¶ ཨནྟནྟརེ ཨེཀཝཱིསཏི ཨནྟབྷོགེ བནྡྷིཏྭཱ ཋིཏཾ. ཏཏྠ ཡཐཱ པཱདཔུཉྪནརཛྫུམཎྜལཀཾ སིབྦེཏྭཱ ཋིཏེསུ རཛྫུཀེསུ ན པཱདཔུཉྪནརཛྫུམཎྜལཀཾ ཛཱནཱཏི ‘རཛྫུཀཱ མཾ སིབྦེཏྭཱ ཋིཏཱ’ཏི, ནཱཔི རཛྫུཀཱ ཛཱནནྟི ‘མཡཾ པཱདཔུཉྪནརཛྫུམཎྜལཀཾ སིབྦེཏྭཱ ཋིཏཱ’ཏི, ཨེཝམེཝ ན ཨནྟཾ ཛཱནཱཏི ‘ཨནྟགུཎཾ མཾ ཨཱབནྡྷིཏྭཱ ཋིཏ’ནྟི, ནཱཔི ཨནྟགུཎཾ ཛཱནཱཏི ‘ཨཧཾ ཨནྟཾ བནྡྷིཏྭཱ ཋིཏ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ཨནྟགུཎཾ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

ཨུདརིཡཾ ཨུདརེ ཋིཏཾ ཨསིཏཔཱིཏཁཱཡིཏསཱཡིཏཾ. ཏཏྠ ཡཐཱ སུཝཱནདོཎིཡཾ ཋིཏེ སུཝཱནཝམཐུམྷི ན སུཝཱནདོཎི ཛཱནཱཏི ‘མཡི སུཝཱནཝམཐུ ཋིཏོ’ཏི, ནཱཔི སུཝཱནཝམཐུ ཛཱནཱཏི ‘ཨཧཾ སུཝཱནདོཎིཡཾ ཋིཏོ’ཏི, ཨེཝམེཝ ན ཨུདརཾ ཛཱནཱཏི ‘མཡི ཨུདརིཡཾ ཋིཏ’ནྟི, ནཱཔི ཨུདརིཡཾ ཛཱནཱཏི ‘ཨཧཾ ཨུདརེ ཋིཏ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ཨུདརིཡཾ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

ཀརཱིསཾ ¶ པཀྐཱསཡསངྑཱཏེ ཨཊྛངྒུལཝེལུ༹པབྦསདིསེ ཨནྟཔརིཡོསཱནེ ཋིཏཾ. ཏཏྠ ཡཐཱ ཝེལུ༹པབྦེ ཨོམདྡིཏྭཱ པཀྑིཏྟཱཡ སཎྷཔཎྜུམཏྟིཀཱཡ ན ཝེལུ༹པབྦཾ ཛཱནཱཏི ‘མཡི པཎྜུམཏྟིཀཱ ཋིཏཱ’ཏི, ནཱཔི པཎྜུམཏྟིཀཱ ཛཱནཱཏི ‘ཨཧཾ ཝེལུ༹པབྦེ ཋིཏཱ’ཏི, ཨེཝམེཝ ན པཀྐཱསཡོ ཛཱནཱཏི ‘མཡི ཀརཱིསཾ ཋིཏ’ནྟི, ནཱཔི ཀརཱིསཾ ཛཱནཱཏི ‘ཨཧཾ པཀྐཱསཡེ ཋིཏ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ཀརཱིསཾ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

མཏྠལུངྒཾ སཱིསཀཊཱཧབྦྷནྟརེ ཋིཏཾ. ཏཏྠ ཡཐཱ པུརཱཎལཱབུཀཊཱཧེ པཀྑིཏྟཱཡ པིཊྛཔིཎྜིཡཱ ན ལཱབུཀཊཱཧཾ ཛཱནཱཏི ‘མཡི པིཊྛཔིཎྜི ཋིཏཱ’ཏི, ནཱཔི པིཊྛཔིཎྜི ཛཱནཱཏི ‘ཨཧཾ ལཱབུཀཊཱཧེ ཋིཏཱ’ཏི, ཨེཝམེཝ ན སཱིསཀཊཱཧབྦྷནྟརཾ ཛཱནཱཏི ‘མཡི མཏྠལུངྒཾ ཋིཏ’ནྟི, ནཱཔི མཏྠལུངྒཾ ཛཱནཱཏི ¶ ‘ཨཧཾ སཱིསཀཊཱཧབྦྷནྟརེ ཋིཏ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི མཏྠལུངྒཾ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུཏི.

ཡཾ ¶ ཝཱ པནཉྙམྤཱིཏི ཨིམིནཱ ཨཱཔོཀོཊྛཱསཱདཱིསུ ཏཱིསུ ཨནུགཏཾ པཐཝཱིདྷཱཏུཾ ལཀྑཎཝསེན ཡེཝཱཔནཀཾ པཐཝིཾ ཀཏྭཱ དསྶེཏི.

བཱཧིརཔཐཝཱིདྷཱཏུནིདྡེསེ ཨཡོཏི ཀཱལ༹ལོཧཾ. ལོཧནྟི ཛཱཏིལོཧཾ, ཝིཛཱཏིལོཧཾ, ཀིཏྟིམལོཧཾ, པིསཱཙལོཧནྟི ཙཏུབྦིདྷཾ. ཏཏྠ ཨཡོ, སཛ྄ཛྷུ, སུཝཎྞཾ, ཏིཔུ, སཱིསཾ, ཏམྦལོཧཾ, ཝེཀནྟཀནྟི ཨིམཱནི སཏྟ ཛཱཏིལོཧཱནི ནཱམ. ནཱགནཱསིཀལོཧཾ ཝིཛཱཏིལོཧཾ ནཱམ. ཀཾསལོཧཾ, ཝཊྚལོཧཾ, ཨཱརཀཱུཊནྟི ཏཱིཎི ཀིཏྟིམལོཧཱནི ནཱམ. མོརཀྑཀཾ, པུཐུཀཾ, མལིནཀཾ, ཙཔལཀཾ, སེལཀཾ, ཨཱཊཀཾ, བྷལླཀཾ, དཱུསིལོཧནྟི ཨཊྛ པིསཱཙལོཧཱནི ནཱམ. ཏེསུ པཉྩ ཛཱཏིལོཧཱནི པཱལི༹ཡཾ ཝིསུཾ ཝུཏྟཱནེཝ. ཏམྦལོཧཾ, ཝེཀནྟཀལོཧནྟི ཨིམེཧི པན དྭཱིཧི ཛཱཏིལོཧེཧི སདྡྷིཾ སེསཾ སབྦམྤི ཨིདྷ ལོཧནྟི ཝེདིཏབྦཾ.

ཏིཔཱུཏི སེཏཏིཔུ. སཱིསནྟི ཀཱལ༹ཏིཔུ. སཛ྄ཛྷཱུཏི ¶ རཛཏཾ. མུཏྟཱཏི སཱམུདྡིཀམུཏྟཱ. མཎཱིཏི ཋཔེཏྭཱ པཱལི༹ཨཱགཏེ ཝེལུ༹རིཡཱདཡོ སེསོ ཛོཏིརསཱདིབྷེདོ སབྦོཔི མཎི. ཝེལུ༹རིཡོཏི ཝཾསཝཎྞམཎི. སངྑོཏི སཱམུདྡིཀསངྑོ. སིལཱཏི ཀཱལ༹སིལཱ, པཎྜུསིལཱ, སེཏསིལཱཏིཨཱདིབྷེདཱ སབྦཱཔི སིལཱ. པཝཱལ༹ནྟི པཝཱལ༹མེཝ. རཛཏནྟི ཀཧཱཔཎོ. ཛཱཏརཱུཔནྟི སུཝཎྞཾ. ལོཧིཏངྐོཏི རཏྟམཎི. མསཱརགལླནྟི ཀབརམཎི. ཏིཎཱདཱིསུ བཧིསཱརཱ ཨནྟམསོ ནཱལི༹ཀེརཱདཡོཔི ཏིཎཾ ནཱམ. ཨནྟོསཱརཾ ཨནྟམསོ དཱརུཁཎྜམྤི ཀཊྛཾ ནཱམ. སཀྑརཱཏི མུགྒམཏྟཏོ ཡཱཝ མུཊྛིཔྤམཱཎཱ མརུམྦཱ སཀྑརཱ ནཱམ. མུགྒམཏྟཏོ པན ཧེཊྛཱ ཝཱལིཀཱཏི ཝུཙྩཏི. ཀཋལནྟི ཡཾ ཀིཉྩི ཀཔཱལཾ. བྷཱུམཱིཏི པཐཝཱི. པཱསཱཎོཏི ཨནྟོམུཊྛིཡཾ ཨསཎྛཧནཏོ པཊྛཱཡ ཧཏྠིཔྤམཱཎཾ ཨསམྤཏྟོ པཱསཱཎོ ནཱམ. ཧཏྠིཔྤམཱཎཏོ པཊྛཱཡ པན ཨུཔརི པབྦཏོ ¶ ནཱམ. ཡཾ ཝཱ པནཱཏི ཨིམིནཱ ཏཱལཊྛི-ནཱལི༹ཀེར-ཕལཱདིབྷེདཾ སེསཔཐཝིཾ གཎྷཱཏི. ཡཱ ཙ ཨཛ྄ཛྷཏྟིཀཱ པཐཝཱིདྷཱཏུ ཡཱ ཙ བཱཧིརཱཏི ཨིམིནཱ དྭེཔི པཐཝཱིདྷཱཏུཡོ ཀཀྑལ༹ཊྛེན ལཀྑཎཏོ ཨེཀཱ པཐཝཱིདྷཱཏུ ཨེཝཱཏི དསྶེཏི.

༡༧༤. ཨཱཔོདྷཱཏུནིདྡེསཱདཱིསུ ཧེཊྛཱ ཝུཏྟནཡེནེཝ ཝེདིཏབྦཾ. ཨཱཔོ ཨཱཔོགཏནྟིཨཱདཱིསུ ཨཱབནྡྷནཝསེན ཨཱཔོ. ཏདེཝ ཨཱཔོསབྷཱཝཾ གཏཏྟཱ ཨཱཔོགཏཾ ནཱམ. སྣེཧཝསེན སྣེཧོ. སོཡེཝ སྣེཧསབྷཱཝཾ གཏཏྟཱ སྣེཧགཏཾ ནཱམ. བནྡྷནཏྟཾ རཱུཔསྶཱཏི ཨཝིནིབྦྷོགརཱུཔསྶ བནྡྷནབྷཱཝོ. པིཏྟཾ སེམྷནྟིཨཱདཱིནིཔི ¶ ཝཎྞསཎྛཱནདིསོཀཱསཔརིཙྪེདཝསེན ¶ པརིགྒཧེཏྭཱ དྷཱཏུཝསེནེཝ མནསིཀཱཏབྦཱནི.

ཏཏྲཱཡཾ ནཡོ – པིཏྟེསུ ཧི ཨབདྡྷཔིཏྟཾ ཛཱིཝིཏིནྡྲིཡཔཊིབདྡྷཾ སཀལསརཱིརཾ བྱཱཔེཏྭཱ ཋིཏཾ, བདྡྷཔིཏྟཾ པིཏྟཀོསཀེ ཋིཏཾ. ཏཏྠ ཡཐཱ པཱུཝཾ བྱཱཔེཏྭཱ ཋིཏེ ཏེལེ ན པཱུཝཾ ཛཱནཱཏི ‘ཏེལཾ མཾ བྱཱཔེཏྭཱ ཋིཏ’ནྟི, ནཱཔི ཏེལཾ ཛཱནཱཏི ‘ཨཧཾ པཱུཝཾ བྱཱཔེཏྭཱ ཋིཏ’ནྟི, ཨེཝམེཝ ན སརཱིརཾ ཛཱནཱཏི ‘ཨབདྡྷཔིཏྟཾ མཾ བྱཱཔེཏྭཱ ཋིཏ’ནྟི, ནཱཔི ཨབདྡྷཔིཏྟཾ ཛཱནཱཏི ‘ཨཧཾ སརཱིརཾ བྱཱཔེཏྭཱ ཋིཏ’ནྟི. ཡཐཱ ཙ ཝསྶོདཀེན པུཎྞེ ཀོསཱཏཀཱིཀོསཀེ ན ཀོསཱཏཀཱིཀོསཀོ ཛཱནཱཏི ‘མཡི ཝསྶོདཀཾ ཋིཏ’ནྟི, ནཱཔི ཝསྶོདཀཾ ཛཱནཱཏི ‘ཨཧཾ ཀོསཱཏཀཱིཀོསཀེ ཋིཏ’ནྟི, ཨེཝམེཝ ན པིཏྟཀོསཀོ ཛཱནཱཏི མཡི བདྡྷཔིཏྟཾ ཋིཏནྟི, ནཱཔི བདྡྷཔིཏྟཾ ཛཱནཱཏི ‘ཨཧཾ པིཏྟཀོསཀེ ཋིཏ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི པིཏྟཾ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཡཱུསབྷཱུཏོ ཨཱབནྡྷནཱཀཱརོ ཨཱཔོདྷཱཏཱུཏི.

སེམྷཾ ཨེཀཔཏྠཔཱུརཔྤམཱཎཾ ཨུདརཔཊལེ ཋིཏཾ. ཏཏྠ ཡཐཱ ཨུཔརི སཉྫཱཏཕེཎཔཊལཱཡ ཙནྡནིཀཱཡ ན ཙནྡནིཀཱ ཛཱནཱཏི ‘མཡི ཕེཎཔཊལཾ ཋིཏ’ནྟི, ནཱཔི ཕེཎཔཊལཾ ཛཱནཱཏི ‘ཨཧཾ ཙནྡནིཀཱཡ ཋིཏ’ནྟི, ཨེཝམེཝ ན ཨུདརཔཊལཾ ཛཱནཱཏི ‘མཡི སེམྷཾ ཋིཏ’ནྟི, ནཱཔི སེམྷཾ ཛཱནཱཏི ‘ཨཧཾ ཨུདརཔཊལེ ཋིཏ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི སེམྷཾ ¶ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཡཱུསབྷཱུཏོ ཨཱབནྡྷནཱཀཱརོ ཨཱཔོདྷཱཏཱུཏི.

པུབྦོ ཨནིབདྡྷོཀཱསོ, ཡཏྠ ཡཏྠེཝ ཁཱཎུཀཎྚཀཔྤཧརཎཨགྒིཛཱལཱདཱིཧི ཨབྷིཧཊེ སརཱིརཔྤདེསེ ལོཧིཏཾ སཎྛཧིཏྭཱ པཙྩཏི, གཎྜཔཱིལ༹ཀཱདཡོ ཝཱ ཨུཔྤཛྫནྟི, ཏཏྠ ཏཏྠེཝ ཏིཊྛཏི. ཏཏྠ ཡཐཱ ཕརསུཔྤཧཱརཱདིཝསེན པགྒྷརིཏནིཡཱསེ རུཀྑེ ན རུཀྑསྶ ཕརསུཔྤཧཱརཱདིཔྤདེསཱ ཛཱནནྟི ‘ཨམྷེསུ ནིཡྻཱསོ ཋིཏོ’ཏི, ནཱཔི ནིཡྻཱསོ ཛཱནཱཏི ‘ཨཧཾ རུཀྑསྶ ཕརསུཔྤཧཱརཱདིཔྤདེསེསུ ཋིཏོ’ཏི, ཨེཝམེཝ ན སརཱིརསྶ ཁཱཎུཀཎྚཀཱདཱིཧི ཨབྷིཧཊཔྤདེསཱ ཛཱནནྟི ¶ ‘ཨམྷེསུ པུབྦོ ཋིཏོ’ཏི, ནཱཔི པུབྦོ ཛཱནཱཏི ‘ཨཧཾ ཏེསུ པདེསེསུ ཋིཏོ’ཏི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི པུབྦོ ནཱམ ཨིམསྨིཾ ¶ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཡཱུསབྷཱུཏོ ཨཱབནྡྷནཱཀཱརོ ཨཱཔོདྷཱཏཱུཏི.

ལོཧིཏེསུ སཾསརཎལོཧིཏཾ ཨབདྡྷཔིཏྟཾ ཝིཡ སཀལསརཱིརཾ བྱཱཔེཏྭཱ ཋིཏཾ. སནྣིཙིཏལོཧིཏཾ ཡཀནཊྛཱནསྶ ཧེཊྛཱབྷཱགཾ པཱུརེཏྭཱ ཨེཀཔཏྟཔཱུརཎཔྤམཱཎཾ ཝཀྐཧདཡཡཀནཔཔྥཱསཱནི ཏེམེནྟཾ ཋིཏཾ. ཏཏྠ སཾསརཎལོཧིཏེ ཨབདྡྷཔིཏྟསདིསོཝ ཝིནིཙྪཡོ. ཨིཏརཾ པན ཡཐཱ ཛཛྫརཀཔཱལཊྛེ ཨུདཀེ ཧེཊྛཱ ལེཌྜུཁཎྜཱནི ཏེམཡམཱནེ ན ལེཌྜུཁཎྜཱནི ཛཱནནྟི ‘མཡཾ ཨུདཀེན ཏེམིཡམཱནཱ ཋིཏཱ’ཏི, ནཱཔི ཨུདཀཾ ཛཱནཱཏི ‘ཨཧཾ ལེཌྜུཁཎྜཱནི ཏེམེམཱི’ཏི, ཨེཝམེཝ ན ཡཀནསྶ ཧེཊྛཱབྷཱགཊྛཱནཾ ཝཀྐཱདཱིནི ཝཱ ཛཱནནྟི ‘མཡི ལོཧིཏཾ ཋིཏཾ, ཨམྷེ ཝཱ ཏེམཡམཱནཾ ཋིཏ’ནྟི, ནཱཔི ལོཧིཏཾ ཛཱནཱཏི ‘ཨཧཾ ཡཀནསྶ ཧེཊྛཱབྷཱགཾ པཱུརེཏྭཱ ཝཀྐཱདཱིནི ཏེམཡམཱནཾ ཋིཏ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ལོཧིཏཾ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཡཱུསབྷཱུཏོ ཨཱབནྡྷནཱཀཱརོ ཨཱཔོདྷཱཏཱུཏི.

སེདོ ¶ ཨགྒིསནྟཱཔཱདིཀཱལེསུ ཀེསལོམཀཱུཔཝིཝརཱནི པཱུརེཏྭཱ ཏིཊྛཏི ཙེཝ པགྒྷརཏི ཙ. ཏཏྠ ཡཐཱ ཨུདཀཱ ཨབྦཱུལ༹ྷམཏྟེསུ བྷིསམུལཱ༹ལཀུམུདནཱལ༹ཀལཱཔེསུ ན བྷིསཱདིཀལཱཔཝིཝརཱནི ཛཱནནྟི ‘ཨམྷེཧི ཨུདཀཾ པགྒྷརཏཱི’ཏི, ནཱཔི བྷིསཱདིཀལཱཔཝིཝརེཧི པགྒྷརནྟཾ ཨུདཀཾ ཛཱནཱཏི ‘ཨཧཾ བྷིསཱདིཀལཱཔཝིཝརེཧི པགྒྷརཱམཱི’ཏི, ཨེཝམེཝ ན ཀེསལོམཀཱུཔཝིཝརཱནི ཛཱནནྟི ‘ཨམྷེཧི སེདོ པགྒྷརཏཱི’ཏི, ནཱཔི སེདོ ཛཱནཱཏི ‘ཨཧཾ ཀེསལོམཀཱུཔཝིཝརེཧི པགྒྷརཱམཱི’ཏི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི སེདོ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཡཱུསབྷཱུཏོ ཨཱབནྡྷནཱཀཱརོ ཨཱཔོདྷཱཏཱུཏི.

མེདོ ཐཱུལསྶ སཀལསརཱིརཾ ཕརིཏྭཱ ཀིསསྶ ཛངྒྷམཾསཱདཱིནི ¶ ནིསྶཱཡ ཋིཏོ པཏྠིནྣསྣེཧོ. ཏཏྠ ཡཐཱ ཧལིདྡིཔིལོཏིཀཔཊིཙྪནྣེ མཾསཔུཉྫེ ན མཾསཔུཉྫོ ཛཱནཱཏི ‘མཾ ནིསྶཱཡ ཧལིདྡིཔིལོཏིཀཱ ཋིཏཱ’ཏི, ནཱཔི ཧལིདྡིཔིལོཏིཀཱ ཛཱནཱཏི ‘ཨཧཾ མཾསཔུཉྫཾ ནིསྶཱཡ ཋིཏཱ’ཏི, ཨེཝམེཝ ན སཀལསརཱིརེ ཛངྒྷཱདཱིསུ ཝཱ མཾསཾ ཛཱནཱཏི ‘མཾ ནིསྶཱཡ མེདོ ཋིཏོ’ཏི, ནཱཔི མེདོ ཛཱནཱཏི ‘ཨཧཾ སཀལསརཱིརེ ཛངྒྷཱདཱིསུ ཝཱ མཾསཾ ནིསྶཱཡ ཋིཏོ’ཏི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི མེདོ ནཱམ ཨིམསྨིཾ སརཱིརེ པཱཊིཡེཀྐོ ¶ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ པཏྠིནྣསྣེཧོ པཏྠིནྣཡཱུསབྷཱུཏོ ཨཱབནྡྷནཱཀཱརོ ཨཱཔོདྷཱཏཱུཏི.

ཨསྶུ ཡདཱ སཉྫཱཡཏི ཏདཱ ཨཀྑིཀཱུཔཀེ པཱུརེཏྭཱ ཏིཊྛཏི ཝཱ པགྒྷརཏི ཝཱ. ཏཏྠ ཡཐཱ ཨུདཀཔུཎྞེསུ ཏརུཎཏཱལཊྛིཀཱུཔཀེསུ ན ཏརུཎཏཱལཊྛིཀཱུཔཀཱ ཛཱནནྟི ‘ཨམྷེསུ ཨུདཀཾ ཋིཏ’ནྟི, ནཱཔི ཨུདཀཾ ཛཱནཱཏི ‘ཨཧཾ ཏརུཎཏཱལཊྛིཀཱུཔཀེསུ ཋིཏ’ནྟི, ཨེཝམེཝ ན ཨཀྑིཀཱུཔཀཱ ཛཱནནྟི ‘ཨམྷེསུ ཨསྶུ ཋིཏ’ནྟི, ནཱཔི ཨསྶུ ཛཱནཱཏི ‘ཨཧཾ ཨཀྑིཀཱུཔཀེསུ ཋིཏ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ཨསྶུ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཡཱུསབྷཱུཏོ ཨཱབནྡྷནཱཀཱརོ ཨཱཔོདྷཱཏཱུཏི.

ཝསཱ ཨགྒིསནྟཱཔཱདིཀཱལེ ཧཏྠཏལཧཏྠཔིཊྛིཔཱདཏལཔཱདཔིཊྛིནཱསཔུཊནལཱཊཨཾསཀཱུཊེསུ ཋིཏཝིལཱིནསྣེཧོ. ཏཏྠ ཡཐཱ པཀྑིཏྟཏེལེ ཨཱཙཱམེ ¶ ན ཨཱཙཱམོ ཛཱནཱཏི ‘མཾ ཏེལཾ ཨཛ྄ཛྷོཏྠརིཏྭཱ ཋིཏ’ནྟི, ནཱཔི ཏེལཾ ཛཱནཱཏི ‘ཨཧཾ ཨཱཙཱམཾ ཨཛ྄ཛྷོཏྠརིཏྭཱ ཋིཏ’ནྟི, ཨེཝམེཝ ན ཧཏྠཏལཱདིཔྤདེསོ ཛཱནཱཏི ‘མཾ ཝསཱ ཨཛ྄ཛྷོཏྠརིཏྭཱ ཋིཏཱ’ཏི, ནཱཔི ཝསཱ ཛཱནཱཏི ‘ཨཧཾ ཧཏྠཏལཱདིཔྤདེསེ ཨཛ྄ཛྷོཏྠརིཏྭཱ ཋིཏཱ’ཏི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ཝསཱ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཡཱུསབྷཱུཏོ ཨཱབནྡྷནཱཀཱརོ ཨཱཔོདྷཱཏཱུཏི.

ཁེལོ༹ ཏཐཱརཱུཔེ ཁེལུ༹པྤཏྟིཔཙྩཡེ སཏི ཨུབྷོཧི ཀཔོལཔསྶེཧི ཨོརོཧིཏྭཱ ཛིཝ྄ཧཱཡ ཏིཊྛཏི. ཏཏྠ ཡཐཱ ཨབྦོཙྪིནྣཨུདཀནིསྶནྡེ ནདཱིཏཱིརཀཱུཔཀེ ན ཀཱུཔཏལཾ ཛཱནཱཏི ‘མཡི ཨུདཀཾ སནྟིཊྛཏཱི’ཏི, ནཱཔི ཨུདཀཾ ཛཱནཱཏི ‘ཨཧཾ ཀཱུཔཏལེ སནྟིཊྛཱམཱི’ཏི ¶ , ཨེཝམེཝ ན ཛིཝ྄ཧཱཏལཾ ཛཱནཱཏི ‘མཡི ཨུབྷོཧི ཀཔོལཔསྶེཧི ཨོརོཧིཏྭཱ ཁེལོ༹ ཋིཏོ’ཏི, ནཱཔི ཁེལོ༹ ཛཱནཱཏི ‘ཨཧཾ ཨུབྷོཧི ཀཔོལཔསྶེཧི ཨོརོཧིཏྭཱ ཛིཝ྄ཧཱཏལེ ཋིཏོ’ཏི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ཁེལོ༹ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཡཱུསབྷཱུཏོ ཨཱབནྡྷནཱཀཱརོ ཨཱཔོདྷཱཏཱུཏི.

སིངྒྷཱཎིཀཱ ཡདཱ སཉྫཱཡཏི ཏདཱ ནཱསཱཔུཊེ པཱུརེཏྭཱ ཏིཊྛཏི ཝཱ པགྒྷརཏི ཝཱ. ཏཏྠ ཡཐཱ ¶ པཱུཏིདདྷིབྷརིཏཱཡ སིཔྤིཀཱཡ ན སིཔྤིཀཱ ཛཱནཱཏི ‘མཡི པཱུཏིདདྷི ཋིཏ’ནྟི, ནཱཔི པཱུཏིདདྷི ཛཱནཱཏི ‘ཨཧཾ སིཔྤིཀཱཡ ཋིཏ’ནྟི, ཨེཝམེཝ ན ནཱསཱཔུཊཱ ཛཱནནྟི ‘ཨམྷེསུ སིངྒྷཱཎིཀཱ ཋིཏཱ’ཏི, ནཱཔི སིངྒྷཱཎིཀཱ ཛཱནཱཏི ‘ཨཧཾ ནཱསཱཔུཊེསུ ཋིཏཱ’ཏི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི སིངྒྷཱཎིཀཱ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཡཱུསབྷཱུཏོ ཨཱབནྡྷནཱཀཱརོ ཨཱཔོདྷཱཏཱུཏི.

ལསིཀཱ ཨཊྛིཀསནྡྷཱིནཾ ཨབྦྷཉྫནཀིཙྩཾ སཱདྷཡམཱནཱ ཨསཱིཏིསཏསནྡྷཱིསུ ཋིཏཱ. ཏཏྠ ཡཐཱ ཏེལབྦྷཉྫིཏེ ཨཀྑེ ན ཨཀྑོ ཛཱནཱཏི ‘མཾ ཏེལཾ ཨབྦྷཉྫིཏྭཱ ཋིཏ’ནྟི, ནཱཔི ཏེལཾ ཛཱནཱཏི ‘ཨཧཾ ཨཀྑཾ ཨབྦྷཉྫིཏྭཱ ཋིཏ’ནྟི, ཨེཝམེཝ ན ཨསཱིཏིསཏསནྡྷཡོ ཛཱནནྟི ‘ལསིཀཱ ཨམྷེ ཨབྦྷཉྫིཏྭཱ ¶ ཋིཏཱ’ཏི, ནཱཔི ལསིཀཱ ཛཱནཱཏི ‘ཨཧཾ ཨསཱིཏིསཏསནྡྷཡོ ཨབྦྷཉྫིཏྭཱ ཋིཏཱ’ཏི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི ལསིཀཱ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཡཱུསབྷཱུཏོ ཨཱབནྡྷནཱཀཱརོ ཨཱཔོདྷཱཏཱུཏི.

མུཏྟཾ ཝཏྠིསྶ ཨབྦྷནྟརེ ཋིཏཾ. ཏཏྠ ཡཐཱ ཙནྡནིཀཱཡ པཀྑིཏྟེ ཨདྷོམུཁེ རཝཎགྷཊེ ན རཝཎགྷཊོ ཛཱནཱཏི ‘མཡི ཙནྡནིཀཱརསོ ཋིཏོ’ཏི, ནཱཔི ཙནྡནིཀཱརསོ ཛཱནཱཏི ‘ཨཧཾ རཝཎགྷཊེ ཋིཏོ’ཏི, ཨེཝམེཝ ན ཝཏྠི ཛཱནཱཏི ‘མཡི མུཏྟཾ ཋིཏ’ནྟི, ནཱཔི མུཏྟཾ ཛཱནཱཏི ‘ཨཧཾ ཝཏྠིམྷི ཋིཏ’ནྟི. ཨཉྙམཉྙཾ ཨཱབྷོགཔཙྩཝེཀྑཎརཧིཏཱ ཨེཏེ དྷམྨཱ. ཨིཏི མུཏྟཾ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཡཱུསབྷཱུཏོ ཨཱབནྡྷནཱཀཱརོ ཨཱཔོདྷཱཏཱུཏི. ཡཾ ཝཱ པནཱཏི ཨཝསེསེསུ ཏཱིསུ ཀོཊྛཱསེསུ ཨཱཔོདྷཱཏུཾ སནྡྷཱཡ ¶ ཝུཏྟཾ.

བཱཧིརཨཱཔོདྷཱཏུནིདྡེསེ མཱུལཾ པཊིཙྩ ནིབྦཏྟོ རསོ མཱུལརསོ ནཱམ. ཁནྡྷརསཱདཱིསུཔི ཨེསེཝ ནཡོ. ཁཱིརཱདཱིནི པཱཀཊཱནེཝ. ཡཐཱ པན བྷེསཛྫསིཀྑཱཔདེ ཨེཝམིདྷ ནིཡམོ ནཏྠི. ཡཾ ཀིཉྩི ཁཱིརཾ ཁཱིརམེཝ. སེསེསུཔི ཨེསེཝ ནཡོ. བྷུམྨཱནཱིཏི ཨཱཝཱཊཱདཱིསུ ཋིཏཨུདཀཱནི. ཨནྟལིཀྑཱནཱིཏི པཐཝིཾ ཨཔྤཏྟཱནི ཝསྶོདཀཱནི. ཡཾ ཝཱ པནཱཏི ཧིམོདཀཀཔྤཝིནཱསཀཨུདཀཔཐཝཱིསནྡྷཱརཀཨུདཀཱདཱིནི ཨིདྷ ཡེཝཱཔནཀཊྛཱནཾ པཝིཊྛཱནི.

༡༧༥. ཏེཛོདྷཱཏུནིདྡེསེ ¶ ཏེཛནཝསེན ཏེཛོ. ཏེཛོཝ ཏེཛོབྷཱཝཾ གཏཏྟཱ ཏེཛོགཏཾ. ཨུསྨཱཏི ཨུཎྷཱཀཱརོ. ཨུསྨཱཝ ཨུསྨཱབྷཱཝཾ གཏཏྟཱ ཨུསྨཱགཏཾ. ཨུསུམནྟི ཙཎྜཨུསུམཾ. ཏདེཝ ཨུསུམབྷཱཝཾ གཏཏྟཱ ཨུསུམགཏཾ. ཡེན ཙཱཏི ཡེན ཏེཛོགཏེན ཀུཔྤིཏེན. སནྟཔྤཏཱིཏི ཨཡཾ ཀཱཡོ སནྟཔྤཏི, ཨེཀཱཧིཀཛརཱདིབྷཱཝེན ཨུསུམཛཱཏོ ཧོཏི. ཡེན ཙ ཛཱིརཱིཡཏཱིཏི ཡེན ཨཡཾ ཀཱཡོ ཛཱིརཱིཡཏི, ཨིནྡྲིཡཝེཀལླཏཾ བལཔརིཀྑཡཾ ཝལིཔལིཏཱདིབྷཱཝཉྩ པཱཔུཎཱཏི. ཡེན ཙ པརིཌཡ྄ཧཏཱིཏི ཡེན ཀུཔྤིཏེན ཨཡཾ ཀཱཡོ ཌཡ྄ཧཏི, སོ ཙ ¶ པུགྒལོ ‘ཌཡ྄ཧཱམི ཌཡ྄ཧཱམཱི’ཏི ཀནྡནྟོ སཏདྷོཏསཔྤིགོསཱིཏཙནྡནཱདིལེཔནཉྩེཝ ཏཱལཝཎྚཝཱཏཉྩ པཙྩཱསཱིསཏི. ཡེན ཙ ཨསིཏཔཱིཏཁཱཡིཏསཱཡིཏཾ སམྨཱ པརིཎཱམཾ གཙྪཏཱིཏི ཡེནེཏཾ ཨསིཏཾ ཝཱ ཨོདནཱདི, པཱིཏཾ ཝཱ པཱནཀཱདི, ཁཱཡིཏཾ ཝཱ པིཊྛཁཛྫཀཱདི, སཱཡིཏཾ ཝཱ ཨམྦཔཀྐམདྷུཕཱཎིཏཱདི སམྨཱ པརིཔཱཀཾ གཙྪཏི, རསཱདིབྷཱཝེན ཝིཝེཀཾ གཙྪཏཱིཏི ཨཏྠོ. ཨེཏྠ ཙ པུརིམཱ ཏཡོ ཏེཛོདྷཱཏཱུ ཙཏུསམུཊྛཱནཱ, པཙྪིམོ ཀམྨསམུཊྛཱནོཝ. ཨཡཾ ཏཱཝེཏྠ པདསཾཝཎྞནཱ.

ཨིདཾ པན མནསིཀཱརཝིདྷཱནཾ – ཨིདྷ བྷིཀྑུ ‘ཡེན སནྟཔྤཏི, ཨཡཾ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ པརིཔཱཙནཱཀཱརོ ཏེཛོདྷཱཏཱུ’ཏི མནསི ཀརོཏི; ‘ཡེན ཛཱིརཱིཡཏི, ཡེན པརིཌཡ྄ཧཏི, ཡེན ཨསིཏཔཱིཏཁཱཡིཏསཱཡིཏཾ སམྨཱ པརིཎཱམཾ གཙྪཏི, ཨཡཾ ཨིམསྨིཾ སརཱིརེ པཱཊིཡེཀྐོ ¶ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ པརིཔཱཙནཱཀཱརོ ཏེཛོདྷཱཏཱུ’ཏི མནསི ཀརོཏི. ཡཾ ཝཱ པནཱཏི ཨིམསྨིཾ སརཱིརེ པཱཀཏིཀོ ཨེཀོ ཨུཏུ ཨཏྠི, སོ ཡེཝཱཔནཀཊྛཱནཾ པཝིཊྛོ.

བཱཧིརཏེཛོདྷཱཏུནིདྡེསེ ཀཊྛཾ པཊིཙྩ པཛྫལིཏོ ཀཊྛུཔཱདཱནོ ཨགྒི ཀཊྛགྒི ནཱམ. སཀལིཀགྒིཨཱདཱིསུཔི ཨེསེཝ ནཡོ. སངྐཱརགྒཱིཏི ཀཙཝརཾ སཾཀཌྜྷིཏྭཱ ཛཱལཱཔིཏོ ཀཙཝརགྒི. ཨིནྡགྒཱིཏི ཨསནིཨགྒི. ཨགྒིསནྟཱཔོཏི ཛཱལཱཡ ཝཱ ཝཱིཏཙྩིཀངྒཱརཱནཾ ཝཱ སནྟཱཔོ. སཱུརིཡསནྟཱཔོཏི ཨཱཏཔོ. ཀཊྛསནྣིཙཡསནྟཱཔོཏི ཀཊྛརཱསིཊྛཱནེ སནྟཱཔོ. སེསེསུཔི ཨེསེཝ ནཡོ. ཡཾ ཝཱ པནཱཏི པེཏགྒི ཀཔྤཝིནཱསགྒི ནིརཡགྒིཨཱདཡོ ཨིདྷ ཡེཝཱཔནཀཊྛཱནཾ པཝིཊྛཱ.

༡༧༦. ཝཱཡོདྷཱཏུནིདྡེསེ ཝཱཡནཝསེན ཝཱཡོ. ཝཱཡོཝ ཝཱཡོབྷཱཝཾ གཏཏྟཱ ཝཱཡོགཏཾ. ཐམྦྷིཏཏྟཾ རཱུཔསྶཱཏི ཨཝིནིབྦྷོགརཱུཔསྶ ཐམྦྷིཏབྷཱཝོ. ཨུདྡྷངྒམཱ ཝཱཏཱཏི ཨུགྒཱརཧིཀྐཱདི པཝཏྟཀཱ ཨུདྡྷཾ ཨཱརོཧནཝཱཏཱ ¶ . ཨདྷོགམཱ ཝཱཏཱཏི ཨུཙྩཱརཔསྶཱཝཱདིནཱིཧརཎཀཱ ཨདྷོ ཨོརོཧནཝཱཏཱ. ཀུཙྪིསཡཱ ཝཱཏཱཏི ཨནྟཱནཾ བཧིཝཱཏཱ. ཀོཊྛཱསཡཱ ཝཱཏཱཏི ཨནྟཱནཾ ཨནྟོཝཱཏཱ. ཨངྒམངྒཱནུསཱརིནོ ཝཱཏཱཏི དྷམནིཛཱལཱནུསཱརེན སཀལསརཱིརེ ཨངྒམངྒཱནི ཨནུསཊཱ སམིཉྫནཔསཱརཎཱདིནིབྦཏྟཀཱ ¶ ཝཱཏཱ. སཏྠཀཝཱཏཱཏི སནྡྷིབནྡྷནཱནི ཀཏྟརིཡཱ ཚིནྡནྟཱ ཝིཡ པཝཏྟཝཱཏཱ. ཁུརཀཝཱཏཱཏི ཁུརེན ཝིཡ ཧདཡཾ ཕཱལནཝཱཏཱ. ཨུཔྤལཀཝཱཏཱཏི ཧདཡམཾསམེཝ ཨུཔྤཱཊནཀཝཱཏཱ. ཨསྶཱསོཏི ¶ ཨནྟོཔཝིསནནཱསིཀཱཝཏོ. པསྶཱསོཏི བཧིནིཀྑམནནཱསིཀཱཝཏོ. ཨེཏྠ ཙ པུརིམཱ སབྦེ ཙཏུསམུཊྛཱནཱ, ཨསྶཱསཔསྶཱསཱ ཙིཏྟསམུཊྛཱནཱཝ. ཨཡམེཏྠ པདཝཎྞནཱ.

ཨིདཾ པན མནསིཀཱརཝིདྷཱནཾ – ཨིདྷ བྷིཀྑུ ཨུདྡྷངྒམཱདིབྷེདེ ཝཱཏེ ཨུདྡྷངྒམཱདིཝསེན པརིགྒཧེཏྭཱ ‘ཨུདྡྷངྒམཱ ཝཱཏཱ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཝིཏྠམྦྷནཱཀཱརོ ཝཱཡོདྷཱཏཱུ’ཏི མནསི ཀརོཏི. སེསེསུཔི ཨེསེཝ ནཡོ. ཡཾ ཝཱ པནཱཏི སེསེ ཝཱཡོཀོཊྛཱསེ ཨནུགཏཱ ཝཱཏཱ ཨིདྷ ཡེཝཱཔནཀཊྛཱནཾ པཝིཊྛཱ.

བཱཧིརཝཱཡོདྷཱཏུནིདྡེསེ པུརཏྠིམཱ ཝཱཏཱཏི པུརཏྠིམདིསཏོ ཨཱགཏཱ ཝཱཏཱ. པཙྪིམུཏྟརདཀྑིཎེསུཔི ཨེསེཝ ནཡོ. སརཛཱ ཝཱཏཱཏི སཧ རཛེན སརཛཱ. ཨརཛཱ ཝཱཏཱཏི རཛཝིརཧིཏཱ སུདྡྷཱ ཨརཛཱ ནཱམ. སཱིཏཱཏི སཱིཏཨུཏུསམུཊྛཱནཱ སཱིཏཝལཱཧཀནྟརེ སམུཊྛིཏཱ. ཨུཎྷཱཏི ཨུཎྷཨུཏུསམུཊྛཱནཱ ཨུཎྷཝལཱཧཀནྟརེ སམུཊྛིཏཱ. པརིཏྟཱཏི མནྡཱ ཏནུཀཝཱཏཱ. ཨདྷིམཏྟཱཏི བལཝཝཱཏཱ. ཀཱལཱ༹ཏི ཀཱལ༹ཝལཱཧཀནྟརེ སམུཊྛིཏཱ, ཡེཧི ཨབྦྷཱཧཏོ ཚཝིཝཎྞོ ཀཱལ༹ཀོ ཧོཏི. ཏེསཾ ཨེཏཾ ཨདྷིཝཙནནྟིཔི ཨེཀེ. ཝེརམྦྷཝཱཏཱཏི ཡོཛནཏོ ཨུཔརི ཝཱཡནཝཱཏཱ. པཀྑཝཱཏཱཏི ཨནྟམསོ མཀྑིཀཱཡཔི པཀྑཱཡཱུཧནསམུཊྛིཏཱ ཝཱཏཱ. སུཔཎྞཝཱཏཱཏི གརུལ༹ཝཱཏཱ. ཀཱམཉྩ ཨིམེཔི པཀྑཝཱཏཱཝ ཨུསྶདཝསེན པན ཝིསུཾ གཧིཏཱ. ཏཱལཝཎྚཝཱཏཱཏི ཏཱལཔཎྞེཧི ཝཱ ཨཉྙེན ཝཱ ཀེནཙི མཎྜལསཎྛཱནེན སམུཊྛཱཔིཏཱ ཝཱཏཱ. ཝིདྷཱུཔནཝཱཏཱཏི བཱིཛནཔཏྟཀེན སམུཊྛཱཔིཏཱ ཝཱཏཱ. ཨིམཱནི ཙ ཏཱལཝཎྚཝིདྷཱུཔནཱནི ཨནུཔྤནྣམྤི ཝཱཏཾ ཨུཔྤཱདེནྟི, ཨུཔྤནྣམྤི པརིཝཏྟེནྟི. ཡཾ ཝཱ པནཱཏི ཨིདྷ པཱལི༹ཨཱགཏེ ཋཔེཏྭཱ སེསཝཱཏཱ ཡེཝཱཔནཀཊྛཱནཾ པཝིཊྛཱ.

༡༧༧. ཨཱཀཱསདྷཱཏུནིདྡེསེ ¶ ཨཔྤཊིགྷཊྚནཊྛེན ན ཀསྶཏཱིཏི ཨཱཀཱསོ. ཨཱཀཱསོཝ ཨཱཀཱསབྷཱཝཾ གཏཏྟཱ ཨཱཀཱསགཏཾ. ཨགྷཊྚནཱིཡཏཱཡ ¶ ཨགྷཾ. ཨགྷམེཝ ཨགྷབྷཱཝཾ གཏཏྟཱ ཨགྷགཏཾ ¶ . ཝིཝརོཏི ཨནྟརཾ. ཏདེཝ ཝིཝརབྷཱཝཾ གཏཏྟཱ ཝིཝརགཏཾ. ཨསམྥུཊྛཾ མཾསལོཧིཏེཧཱིཏི མཾསལོཧིཏེཧི ནིསྶཊཾ. ཀཎྞཙྪིདྡནྟིཨཱདི པན ཏསྶེཝ པབྷེདདསྶནཾ. ཏཏྠ ཀཎྞཙྪིདྡནྟི ཀཎྞསྨིཾ ཚིདྡཾ ཝིཝརཾ མཾསལོཧིཏེཧི ཨསམྥུཊྛོཀཱསོ. སེསེསུཔི ཨེསེཝ ནཡོ. ཡེནཱཏི ཡེན ཝིཝརེན ཨེཏཾ ཨསིཏཱདིབྷེདཾ ཨཛ྄ཛྷོཧརཎཱིཡཾ ཨཛ྄ཛྷོཧརཏི, ཨནྟོ པཝེསེཏི. ཡཏྠཱཏི ཡསྨིཾ ཨནྟོཨུདརཔཊལསངྑཱཏེ ཨོཀཱསེ ཨེཏདེཝ ཙཏུབྦིདྷཾ ཨཛ྄ཛྷོཧརཎཱིཡཾ ཏིཊྛཏི. ཡེནཱཏི ཡེན ཝིཝརེན སབྦམྤེཏཾ ཝིཔཀྐཾ ཀསཊབྷཱཝཾ ཨཱཔནྣཾ ནིཀྑམཏི, ཏཾ ཨུདརཔཊལཏོ ཡཱཝ ཀརཱིསམགྒཱ ཝིདཏྠིཙཏུརངྒུལམཏྟཾ ཚིདྡཾ མཾསལོཧིཏེཧི ཨསམྥུཊྛཾ ནིསྶཊཾ ཨཱཀཱསདྷཱཏཱུཏི ཝེདིཏབྦཾ. ཡཾ ཝཱ པནཱཏི ཨེཏྠ ཙམྨནྟརཾ མཾསནྟརཾ ནྷཱརུནྟརཾ ཨཊྛིནྟརཾ ལོམནྟརནྟི ཨིདཾ སབྦཾ ཡེཝཱཔནཀཊྛཱནཾ པཝིཊྛཾ.

བཱཧིརཀཨཱཀཱསདྷཱཏུནིདྡེསེ ཨསམྥུཊྛཾ ཙཏཱུཧི མཧཱབྷཱུཏེཧཱིཏི ཙཏཱུཧི མཧཱབྷཱུཏེཧི ནིསྶཊཾ བྷིཏྟིཚིདྡཀཝཱཊཚིདྡཱདིཀཾ ཝེདིཏབྦཾ. ཨིམིནཱ ཡསྨིཾ ཨཱཀཱསེ པརིཀམྨཾ ཀརོནྟསྶ ཙཏུཀྐཔཉྩཀཛ྄ཛྷཱནཱནི ཨུཔྤཛྫནྟི ཏཾ ཀཐིཏཾ.

༡༧༨. ཝིཉྙཱཎདྷཱཏུནིདྡེསེ ཙཀྑུཝིཉྙཱཎསངྑཱཏཱ དྷཱཏུ ཙཀྑུཝིཉྙཱཎདྷཱཏུ. སེསཱསུཔི ཨེསེཝ ནཡོ. ཨིཏི ཨིམཱསུ ཚསུ དྷཱཏཱུསུ པརིགྒཧིཏཱསུ ཨཊྛཱརས དྷཱཏུཡོ པརིགྒཧིཏཱཝ ཧོནྟི. ཀཐཾ? པཐཝཱིཏེཛོཝཱཡོདྷཱཏུགྒཧཎེན ཏཱཝ ཕོཊྛབྦདྷཱཏུ གཧིཏཱཝ ཧོཏི, ཨཱཔོདྷཱཏུཨཱཀཱསདྷཱཏུགྒཧཎེན དྷམྨདྷཱཏུ, ཝིཉྙཱཎདྷཱཏུགྒཧཎེན ཏསྶཱ པུརེཙཱརིཀཔཙྪཱཙཱརིཀཏྟཱ མནོདྷཱཏུ གཧིཏཱཝ ཧོཏི. ཙཀྑུཝིཉྙཱཎདྷཱཏུཨཱདཡོ སུཏྟེ ཨཱགཏཱ ཨེཝ. སེསཱ ནཝ ཨཱཧརིཏྭཱ དསྶེཏབྦཱ ¶ . ཙཀྑུཝིཉྙཱཎདྷཱཏུགྒཧཎེན ཧི ཏསྶཱ ནིསྶཡབྷཱུཏཱ ཙཀྑུདྷཱཏུ, ཨཱརམྨཎབྷཱུཏཱ རཱུཔདྷཱཏུ ཙ གཧིཏཱཝ ཧོནྟི. ཨེཝཾ སོཏཝིཉྙཱཎདྷཱཏུཨཱདིགྒཧཎེན སོཏདྷཱཏུཨཱདཡོཏི ཨཊྛཱརསཱཔི གཧིཏཱཝ ཧོནྟི. ཏཱསུ དསཧི དྷཱཏཱུཧི རཱུཔཔརིགྒཧོ ཀཐིཏོ ཧོཏི. སཏྟཧི ཨརཱུཔཔརིགྒཧོ. དྷམྨདྷཱཏུཡཱ སིཡཱ རཱུཔཔརིགྒཧོ, སིཡཱ ཨརཱུཔཔརིགྒཧོ. ཨིཏི ཨཌྜྷེཀཱདསཧི དྷཱཏཱུཧི རཱུཔཔརིགྒཧོ, ཨཌྜྷཊྛདྷཱཏཱུཧི ཨརཱུཔཔརིགྒཧོཏི རཱུཔཱརཱུཔཔརིགྒཧོ ཀཐིཏོ ཧོཏི. རཱུཔཱརཱུཔཾ པཉྩཀྑནྡྷཱ. ཏཾ ཧོཏི དུཀྑསཙྩཾ. ཏཾསམུཊྛཱཔིཀཱ པུརིམཏཎྷཱ སམུདཡསཙྩཾ ¶ . ཨུབྷིནྣཾ ཨཔྤཝཏྟི ནིརོདྷསཙྩཾ. ཏཾཔཛཱནནོ མགྒོ མགྒསཙྩནྟི ཨིདཾ ཙཏུསཙྩཀམྨཊྛཱནཾ ཨཊྛཱརསདྷཱཏུཝསེན ཨབྷིནིཝིཊྛསྶ བྷིཀྑུནོ ཡཱཝ ཨརཧཏྟཱ མཏྠཀཾ པཱཔེཏྭཱ ནིགམནཾ ཀཐིཏནྟི ཝེདིཏབྦཾ.

༡༧༩. ཨིདཱནི ¶ དུཏིཡཚཀྐཾ དསྶེནྟོ ཨཔརཱཔི ཚ དྷཱཏུཡོཏིཨཱདིམཱཧ. ཏཏྠ སུཁདྷཱཏུ དུཀྑདྷཱཏཱུཏི ཀཱཡཔྤསཱདཝཏྠུཀཱནི སུཁདུཀྑཱནི སཔྤཊིཔཀྑཝསེན ཡུགལ༹ཀཏོ དསྶིཏཱནི. སུཁཉྷི དུཀྑསྶ པཊིཔཀྑོ, དུཀྑཾ སུཁསྶ. ཡཏྟཀཾ སུཁེན ཕརིཏཊྛཱནཾ ཏཏྟཀཾ དུཀྑཾ ཕརཏི. ཡཏྟཀཾ དུཀྑེན ཕརིཏཊྛཱནཾ ཏཏྟཀཾ སུཁཾ ཕརཏི. སོམནསྶདྷཱཏུ དོམནསྶདྷཱཏཱུཏི ཨིདམྤི ཏཐེཝ ཡུགལ༹ཀཾ ཀཏཾ. སོམནསྶཉྷི དོམནསྶསྶ པཊིཔཀྑོ, དོམནསྶཾ སོམནསྶསྶ. ཡཏྟཀཾ སོམནསྶེན ཕརིཏཊྛཱནཾ ཏཏྟཀཾ དོམནསྶཾ ཕརཏི. ཡཏྟཀཾ དོམནསྶེན ཕརིཏཊྛཱནཾ ཏཏྟཀཾ སོམནསྶཾ ཕརཏི.

ཨུཔེཀྑཱདྷཱཏུ ཨཝིཛྫཱདྷཱཏཱུཏི ཨིདཾ པན དྭཡཾ སརིཀྑཀཝསེན ཡུགལ༹ཀཾ ཀཏཾ. ཨུབྷཡམྤི ཧེཏཾ ཨཝིབྷཱུཏཏྟཱ སརིཀྑཀཾ ཧོཏི. ཏཏྠ སུཁདུཀྑདྷཱཏུགྒཧཎེན ཏཾ སམྤཡུཏྟཱ ཀཱཡཝིཉྙཱཎདྷཱཏུ, ཝཏྠུབྷཱུཏཱ ཀཱཡདྷཱཏུ, ཨཱརམྨཎབྷཱུཏཱ ཕོཊྛབྦདྷཱཏུ ཙ གཧིཏཱཝ ཧོནྟི. སོམནསྶདོམནསྶདྷཱཏུགྒཧཎེན ཏཾ སམྤཡུཏྟཱ མནོཝིཉྙཱཎདྷཱཏུ གཧིཏཱ ཧོཏི. ཨཝིཛྫཱདྷཱཏུགྒཧཎེན དྷམྨདྷཱཏུ གཧིཏཱ. ཨུཔེཀྑཱདྷཱཏུགྒཧཎེན ཙཀྑུསོཏགྷཱནཛིཝ྄ཧཱཝིཉྙཱཎདྷཱཏུམནོདྷཱཏུཡོ ¶ , ཏཱསཾཡེཝ ཝཏྠཱརམྨཎབྷཱུཏཱ ཙཀྑུདྷཱཏུརཱུཔདྷཱཏུཨཱདཡོ ཙ གཧིཏཱཏི ཨེཝཾ ཨཊྛཱརསཔི དྷཱཏུཡོ གཧིཏཱཝ ཧོནྟི. ཨིདཱནི ཏཱསུ དསཧི དྷཱཏཱུཧི རཱུཔཔརིགྒཧོཏིཨཱདི སབྦཾ ཧེཊྛཱ ཝུཏྟནཡེནེཝ ཝེདིཏབྦཾ. ཨེཝམྤི ཨེཀསྶ བྷིཀྑུནོ ཡཱཝ ཨརཧཏྟཱ མཏྠཀཾ པཱཔེཏྭཱ ནིགམནཾ ཀཐིཏཾ ཧོཏཱིཏི ཝེདིཏབྦཾ. ཏཏྠ ཀཏམཱ སུཁདྷཱཏུ ཡཾ ཀཱཡིཀཾ སཱཏནྟི ཨཱདཱིནི ཧེཊྛཱ ཝུཏྟནཡཱནེཝ.

༡༨༡. ཏཏིཡཚཀྐེ ཀཱམོཏི དྭེ ཀཱམཱ – ཝཏྠུཀཱམོ ཙ ཀིལེསཀཱམོ ཙ. ཏཏྠ ཀིལེསཀཱམཾ སནྡྷཱཡ ཀཱམཔཊིསཾཡུཏྟཱ དྷཱཏུ ཀཱམདྷཱཏུ, ཀཱམཝིཏཀྐསྶེཏཾ ནཱམཾ. ཝཏྠུཀཱམཾ སནྡྷཱཡ ཀཱམོཡེཝ དྷཱཏུ ཀཱམདྷཱཏུ, ཀཱམཱཝཙརདྷམྨཱནམེཏཾ ནཱམཾ. བྱཱཔཱདཔཊིསཾཡུཏྟཱ དྷཱཏུ བྱཱཔཱདདྷཱཏུ, བྱཱཔཱདཝིཏཀྐསྶེཏཾ ནཱམཾ. བྱཱཔཱདོཝ དྷཱཏུ བྱཱཔཱདདྷཱཏུ, དསཨཱགྷཱཏཝཏྠུཀསྶ ¶ པཊིགྷསྶེཏཾ ནཱམཾ. ཝིཧིཾསཱ པཊིསཾཡུཏྟཱ དྷཱཏུ ཝིཧིཾསཱདྷཱཏུ, ཝིཧིཾསཱཝིཏཀྐསྶེཏཾ ནཱམཾ. ཝིཧིཾསཱཡེཝ དྷཱཏུ ཝིཧིཾསཱདྷཱཏུ, པརསཏྟཝིཧེསནསྶེཏཾ ནཱམཾ. ཨཡཾ པན ཧེཊྛཱ ཨནཱགཏཏྟཱ ཨེཝཾ ཨཏྠཱདིཝིབྷཱགཏོ ཝེདིཏབྦཱ – ཝིཧིཾསནྟི ཨེཏཱཡ སཏྟེ, ཝིཧིཾསནཾ ཝཱ ཨེཏཾ སཏྟཱནནྟི ཝིཧིཾསཱ. སཱ ཝིཧེཋནལཀྑཎཱ, ཀརུཎཱཔཊིཔཀྑལཀྑཎཱ ཝཱ; པརསནྟཱནེ ཨུབྦེགཛནནརསཱ, སཀསནྟཱནེ ཀརུཎཱཝིདྡྷཾསནརསཱ ཝཱ; དུཀྑཱཡཏནཔཙྩུཔཊྛཱནཱ; པཊིགྷཔདཊྛཱནཱཏི ཝེདིཏབྦཱ. ནེཀྑམྨཾ ¶ ཝུཙྩཏི ལོབྷཱ ནིཀྑནྟཏྟཱ ཨལོབྷོ, ནཱིཝརཎེཧི ནིཀྑནྟཏྟཱ པཋམཛ྄ཛྷཱནཾ, སབྦཱཀུསལེཧི ནིཀྑནྟཏྟཱ སབྦཀུསལཾ. ནེཀྑམྨཔཊིསཾཡུཏྟཱ དྷཱཏུ ནེཀྑམྨདྷཱཏུ, ནེཀྑམྨཝིཏཀྐསྶེཏཾ ནཱམཾ. ནེཀྑམྨམེཝ དྷཱཏུ ནེཀྑམྨདྷཱཏུ, སབྦསྶཱཔི ཀུསལསྶེཏཾ ནཱམཾ. ཨབྱཱཔཱདཔཊིསཾཡུཏྟཱ དྷཱཏུ ཨབྱཱཔཱདདྷཱཏུ, ཨབྱཱཔཱདཝིཏཀྐསྶེཏཾ ནཱམཾ. ཨབྱཱཔཱདོཝ དྷཱཏུ ཨབྱཱཔཱདདྷཱཏུ, མེཏྟཱཡེཏཾ ནཱམཾ. ཨཝིཧིཾསཱཔཊིསཾཡུཏྟཱ དྷཱཏུ ཨཝིཧིཾསཱདྷཱཏུ, ཨཝིཧིཾསཱ ཝིཏཀྐསྶེཏཾ ¶ ནཱམཾ. ཨཝིཧིཾསཱཝ དྷཱཏུ ཨཝིཧིཾསཱདྷཱཏུ, ཀརུཎཱཡེཏཾ ནཱམཾ.

༡༨༢. ཨིདཱནི ཏམེཝཏྠཾ དསྶེཏུཾ ཏཏྠ ཀཏམཱ ཀཱམདྷཱཏཱུཏི པདབྷཱཛནཾ ཨཱརདྡྷཾ. ཏཏྠ པཊིསཾཡུཏྟོཏི སཾཔཡོགཝསེན པཊིསཾཡུཏྟོ. ཏཀྐོ ཝིཏཀྐོཏིཨཱདཱིནི ཝུཏྟཏྠཱནེཝ. ཝིཧེཋེཏཱིཏི བཱདྷེཏི, དུཀྑཱཔེཏི. ཧེཋནཱཏི པཱཎིཔྤཧཱརཱདཱིཧི བཱདྷནཱ, དུཀྑུཔྤཱདནཱ. བལཝཧེཋནཱ ཝིཧེཋནཱ. ཧིཾསནྟི ཨེཏཱཡཱཏི ཧིཾསནཱ. བལཝཧིཾསནཱ ཝིཧིཾསནཱ. རོསནཱཏི གྷཊྚནཱ. ཝིརོསནཱཏི བལཝགྷཊྚནཱ. སབྦཏྠ ཝཱ ‘ཝི’ ཨུཔསགྒེན པདཾ ཝཌྜྷིཏཾ. ཨུཔཧནནྟི ཨེཏེནཱཏི ཨུཔགྷཱཏོ, པརེསཾ ཨུཔགྷཱཏོ པརཱུཔགྷཱཏོ.

མེཏྟཱཡནྟི ཨེཏཱཡཱཏི མེཏྟི. མེཏྟཱཡནཱཀཱརོ མེཏྟཱཡནཱ. མེཏྟཱཡ ཨཡིཏསྶ མེཏྟཱསམངྒིནོ བྷཱཝོ མེཏྟཱཡིཏཏྟཾ. བྱཱཔཱདེན ཝིམུཏྟསྶ ཙེཏསོ ཝིམུཏྟི ཙེཏོཝིམུཏྟི. ཨེཏྠ ཙ པུརིམེཧི ཏཱིཧི ཨུཔཙཱརཔྤཏྟཱཔི ཨཔྤནཱཔཏཱཔི མེཏྟཱ ཀཐིཏཱ, པཙྪིམེན ཨཔྤནཱཔཏྟཱཝ.

ཀརུཎཱཡནྟི ¶ ཨེཏཱཡཱཏི ཀརུཎཱ. ཀརུཎཱཡནཱཀཱརོ ཀརུཎཱཡནཱ. ཀརུཎཱཡ ཨཡིཏསྶ ཀརུཎཱསམངྒིནོ བྷཱཝོ ཀརུཎཱཡིཏཏྟཾ. ཝིཧིཾསཱཡ ཝིམུཏྟསྶ ཙེཏསོ ཝིམུཏྟི ཙེཏོཝིམུཏྟི. ཨིདྷཱཔི པུརིམནཡེནེཝ ཨུཔཙཱརཔྤནཱབྷེདོ ཝེདིཏབྦོ. ཨུབྷཡཏྠཱཔི ཙ པརིཡོསཱནཔདེ མེཏྟཱཀརུཎཱཏི ཙེཏོཝིམུཏྟིཝིསེསནཏྠཾ ཝུཏྟཾ.

ཨེཏྠ ཙ ཀཱམཝིཏཀྐོ སཏྟེསུཔི ཨུཔྤཛྫཏི སངྑཱརེསུཔི. ཨུབྷཡཏྠ ཨུཔྤནྣོཔི ཀམྨཔཐབྷེདོཝ. བྱཱཔཱདོ པན སཏྟེསུ ཨུཔྤནྣོཡེཝ ཀམྨཔཐཾ བྷིནྡཏི, ན ཨིཏརོ. ཝིཧིཾསཱཡཔི ཨེསེཝ ནཡོ. ཨེཏྠ ཙ དུཝིདྷཱ ཀཐཱ – སབྦསངྒཱཧིཀཱ ཙེཝ ཨསམྦྷིནྣཱ ཙ. ཀཱམདྷཱཏུགྒཧཎེན ཧི བྱཱཔཱདཝིཧིཾསཱདྷཱཏུཡོཔི གཧིཏཱ. ཀཱམདྷཱཏུཡཱཡེཝ པན ནཱིཧརིཏྭཱ ནཱིཧརིཏྭཱ དྭེཔི ཨེཏཱ དསྶིཏཱཏི. ཨཡཾ ཏཱཝེཏྠ སབྦསངྒཱཧིཀཀཐཱ ¶ . ཋཔེཏྭཱ པན བྱཱཔཱདཝིཧིཾསཱདྷཱཏུཡོ སེསཱ སབྦཱཔི ¶ ཀཱམདྷཱཏུ ཨེཝཱཏི. ཨཡཾ ཨསམྦྷིནྣཀཐཱ ནཱམ. ནེཀྑམྨདྷཱཏུགྒཧཎེནཱཔི ཨབྱཱཔཱདཨཝིཧིཾསཱདྷཱཏུཡོ གཧིཏཱཡེཝ. ནེཀྑམྨདྷཱཏུཏོ པན ནཱིཧརིཏྭཱ ནཱིཧརིཏྭཱ ཏདུབྷཡམྤི དསྶིཏནྟི ཨཡམེཏྠཱཔི སབྦསངྒཱཧིཀཀཐཱ. ཋཔེཏྭཱ ཨབྱཱཔཱདཨཝིཧིཾསཱདྷཱཏུཡོ ཨཝསེསཱ ནེཀྑམྨདྷཱཏཱུཏི ཨཡཾ ཨསམྦྷིནྣཀཐཱ ནཱམ.

ཨིམཱཧི ཙ ཚཧི དྷཱཏཱུཧི པརིགྒཧིཏཱ ཧི ཨཊྛཱརས དྷཱཏུཡོ པརིགྒཧིཏཱཝ ཧོནྟི. སབྦཱཔི ཧི ཏཱ ཀཱམདྷཱཏུཏོཝ ནཱིཧརིཏྭཱ ནཱིཧརིཏྭཱ ལབྷཱཔེཏབྦཱ ཨཊྛཱརས དྷཱཏུཡོཝ ཧོནྟཱིཏི ཏིཎྞཾ ཚཀྐཱནཾ ཝསེན ཨཊྛཱརས ཧོནྟི. ཨེཝཾ པན ཨགྒཧེཏྭཱ ཨེཀེཀསྨིཾ ཚཀྐེ ཝུཏྟནཡེན ཨཊྛཱརས ཨཊྛཱརས ཀཏྭཱ སབྦཱནིཔི ཏཱནི ཨཊྛཱརསཀཱནི ཨེཀཛ྄ཛྷཾ ཨབྷིསངྑིཔིཏྭཱ ཨཊྛཱརསེཝ ཧོནྟཱིཏི ཝེདིཏབྦཱ. ཨིཏི ཨིམསྨིཾ སུཏྟནྟབྷཱཛནཱིཡེ སོལ༹ས དྷཱཏུཡོ ཀཱམཱཝཙརཱ, དྭེ ཏེབྷཱུམིཀཱཏི ཨེཝམེཏྠ སམྨསནཙཱརོཝ ཀཐིཏོཏི ཝེདིཏབྦོ.

སུཏྟནྟབྷཱཛནཱིཡཝཎྞནཱ.

༢. ཨབྷིདྷམྨབྷཱཛནཱིཡཝཎྞནཱ

༡༨༣. ཨབྷིདྷམྨབྷཱཛནཱིཡེ ¶ སརཱུཔེནེཝ སབྦཱཔི དྷཱཏུཡོ དསྶེནྟོ ཨཊྛཱརས དྷཱཏུཡོ – ཙཀྑུདྷཱཏུ རཱུཔདྷཱཏཱུཏིཨཱདིམཱཧ. ཏཏྠ ཨུདྡེསཝཱརེ ཏཱཝ –

ཨཏྠཏོ ལཀྑཎཱདིཏོ, ཀམཏཱཝཏྭསངྑཏོ;

པཙྩཡཱ ཨཐ དཊྛབྦཱ, ཝེདིཏབྦོ ཝིནིཙྪཡོ.

ཏཏྠ ‘ཨཏྠཏོ’ཏི ཙཀྑཏཱིཏི ཙཀྑུ. རཱུཔཡཏཱིཏི རཱུཔཾ. ཙཀྑུསྶ ཝིཉྙཱཎཾ ཙཀྑུཝིཉྙཱཎནྟི ཨེཝམཱདིནཱ ཏཱཝ ནཡེན ཙཀྑཱདཱིནཾ ཝིསེསཏྠཏོ ཝེདིཏབྦོ ཝིནིཙྪཡོ. ཨཝིསེསེན པན ཝིདཧཏི, དྷཱིཡཏེ, ཝིདྷཱནཾ, ཝིདྷཱིཡཏེ ཨེཏཱཡ, ཨེཏྠ ཝཱ དྷཱིཡཏཱིཏི དྷཱཏུ. ལོཀིཡཱ ཧི དྷཱཏུཡོ ཀཱརཎབྷཱཝེན ཝཝཏྠིཏཱ ཧུཏྭཱ སུཝཎྞརཛཏཱདིདྷཱཏུཡོ ཝིཡ སུཝཎྞརཛཏཱདིཾ ¶ ཨནེཀཔྤཀཱརཾ སཾསཱརདུཀྑཾ ཝིདཧནྟི ¶ ; བྷཱརཧཱརེཧི ཙ བྷཱརོ ཝིཡ སཏྟེཧི དྷཱིཡནྟེ དྷཱརཱིཡནྟེཏི ཨཏྠོ. དུཀྑཝིདྷཱནམཏྟམེཝ ཙེཏཱ ཨཝསཝཏྟནཏོ. ཨེཏཱཧི ཙ ཀརཎབྷཱུཏཱཧི སཾསཱརདུཀྑཾ སཏྟེཧི ཨནུཝིདྷཱིཡཏི; ཏཐཱཝིཧིཏཉྩེཏཾ ཨེཏཱསྭེཝ དྷཱིཡཏི ཋཔཱིཡཏཱིཏི ཨཏྠོ. ཨིཏི ཙཀྑཱདཱིསུ ཨེཀེཀོ དྷམྨོ ཡཐཱསམྦྷཝཾ ཝིདཧཏི དྷཱིཡཏེཏིཨཱདིཨཏྠཝསེན དྷཱཏཱུཏི ཝུཙྩཏི.

ཨཔིཙ ཡཐཱ ཏིཏྠིཡཱནཾ ཨཏྟཱ ནཱམ སབྷཱཝཏོ ནཏྠི, ན ཨེཝམེཏཱ. ཨེཏཱ པན ཨཏྟནོ སབྷཱཝཾ དྷཱརེནྟཱིཏི དྷཱཏུཡོ. ཡཐཱ ཙ ལོཀེ ཝིཙིཏྟཱ ཧརིཏཱལམནོསིལཱདཡོ སིལཱཝཡཝཱ དྷཱཏུཡོཏི ཝུཙྩནྟི, ཨེཝམེཏཱཔི དྷཱཏུཡོ ཝིཡ དྷཱཏུཡོ. ཝིཙིཏྟཱ ཧེཏཱ ཉཱཎཉེཡྻཱཝཡཝཱཏི. ཡཐཱ ཝཱ སརཱིརསངྑཱཏསྶ སམུདཱཡསྶ ཨཝཡཝབྷཱུཏེསུ རསསོཎིཏཱདཱིསུ ཨཉྙམཉྙཾ ཝིསབྷཱགལཀྑཎཔརིཙྪིནྣེསུ དྷཱཏུསམཉྙཱ, ཨེཝམེཏེསུཔི པཉྩཀྑནྡྷསངྑཱཏསྶ ཨཏྟབྷཱཝསྶ ཨཝཡཝེསུ དྷཱཏུསམཉྙཱ ཝེདིཏབྦཱ. ཨཉྙམཉྙཝིསབྷཱགལཀྑཎཔརིཙྪིནྣཱ ཧེཏེ ཙཀྑཱདཡོཏི. ཨཔིཙ དྷཱཏཱུཏི ནིཛྫཱིཝམཏྟསྶེཏཾ ཨདྷིཝཙནཾ. ཏཐཱ ཧི བྷགཝཱ – ‘‘ཚ དྷཱཏུརོ ཨཡཾ, བྷིཀྑུ, པུརིསོ’’ཏིཨཱདཱིསུ (མ. ནི. ༣.༣༤༣-༣༤༤) ཛཱིཝསཉྙཱསམཱུཧནཏྠཾ དྷཱཏུདེསནཾ ཨཀཱསཱིཏི. ཏསྨཱ ཡཐཱཝུཏྟེནཏྠེན ཙཀྑུ ཙ ཏཾ དྷཱཏུ ཙཱཏི ཙཀྑུདྷཱཏུ ¶ …པེ… མནོཝིཉྙཱཎཉྩ ཏཾ དྷཱཏུ ཙཱཏི མནོཝིཉྙཱཎདྷཱཏཱུཏི ཨེཝཾ ཏཱཝེཏྠ ཨཏྠཏོ ཝིཉྙཱཏབྦོ ཝིནིཙྪཡོ.

‘ལཀྑཎཱདིཏོ’ཏི ཙཀྑཱདཱིནཾ ལཀྑཎཱདིཏོ པེཏྠ ཝེདིཏབྦོ ཝིནིཙྪཡོ. ཏཱནི ཙ པན ཏེསཾ ལཀྑཎཱདཱིནི ཧེཊྛཱ ཝུཏྟནཡེནེཝ ཝེདིཏབྦཱནི.

‘ཀམཏོ’ཏི ཨིདྷཱཔི པུབྦེ ཝུཏྟེསུ ཨུཔྤཏྟིཀྐམཱདཱིསུ དེསནཱཀྐམོཝ ཡུཛྫཏི. སོ ཙ པནཱཡཾ ཧེཏུཕལཱནུཔུབྦཝཝཏྠཱནཝསེན ཝུཏྟོ. ཙཀྑུདྷཱཏུ རཱུཔདྷཱཏཱུཏི ཨིདཉྷི དྭཡཾ ཧེཏུ. ཙཀྑུཝིཉྙཱཎདྷཱཏཱུཏི ཕལཾ. ཨེཝཾ སབྦཏྠ ཀམཏོ ཝེདིཏབྦོ ཝིནིཙྪཡོ.

‘ཏཱཝཏྭཏོ’ཏི ཏཱཝབྷཱཝཏོ. ཨིདཾ ཝུཏྟཾ ཧོཏི – ཏེསུ ཏེསུ ཧི སུཏྟཱབྷིདྷམྨཔདེསེསུ ཨཱབྷཱདྷཱཏུ, སུབྷདྷཱཏུ, ཨཱཀཱསཱནཉྩཱཡཏནདྷཱཏུ, ཝིཉྙཱཎཉྩཱཡཏནདྷཱཏུ, ཨཱཀིཉྩཉྙཱཡཏནདྷཱཏུ ¶ , ནེཝསཉྙཱནཱསཉྙཱཡཏནདྷཱཏུ, སཉྙཱཝེདཡིཏནིརོདྷདྷཱཏུ, ཀཱམདྷཱཏུ, བྱཱཔཱདདྷཱཏུ, ཝིཧིཾསཱདྷཱཏུ, ནེཀྑམྨདྷཱཏུ, ཨབྱཱཔཱདདྷཱཏུ, ཨཝིཧིཾསཱདྷཱཏུ, སུཁདྷཱཏུ, དུཀྑདྷཱཏུ, སོམནསྶདྷཱཏུ, དོམནསྶདྷཱཏུ, ཨུཔེཀྑཱདྷཱཏུ ¶ , ཨཝིཛྫཱདྷཱཏུ, ཨཱརམྦྷདྷཱཏུ, ནིཀྐམདྷཱཏུ, པརཀྐམདྷཱཏུ, ཧཱིནདྷཱཏུ, མཛ྄ཛྷིམདྷཱཏུ, པཎཱིཏདྷཱཏུ, པཐཝཱིདྷཱཏུ, ཨཱཔོདྷཱཏུ, ཏེཛོདྷཱཏུ, ཝཱཡོདྷཱཏུ, ཨཱཀཱསདྷཱཏུ, ཝིཉྙཱཎདྷཱཏུ, སངྑཏདྷཱཏུ, ཨསངྑཏདྷཱཏུ, ཨནེཀདྷཱཏུནཱནཱདྷཱཏུལོཀོཏི ཨེཝམཱདཡོ ཨཉྙཱཔི དྷཱཏུཡོ དིསྶནྟི.

ཨེཝཾ སཏི སབྦཱསཾ ཝསེན པརིཙྪེདཾ ཨཀཏྭཱ ཀསྨཱ ཨཊྛཱརསཱཏི ཨཡམེཝ པརིཙྪེདོ ཀཏོཏི ཙེ? སབྷཱཝཏོ ཝིཛྫམཱནཱནཾ སབྦདྷཱཏཱུནཾ ཏདནྟོགདྷཏྟཱ. རཱུཔདྷཱཏུཡེཝ ཧི ཨཱབྷཱདྷཱཏུ. སུབྷདྷཱཏུ པན རཱུཔཱདིཔྤཊིབདྡྷཱ. ཀསྨཱ? སུབྷནིམིཏྟཏྟཱ. སུབྷནིམིཏྟཉྷི སུབྷདྷཱཏུ. ཏཉྩ རཱུཔཱདིཝིནིམུཏྟཾ ན ཝིཛྫཏི, ཀུསལཝིཔཱཀཱརམྨཎཱ ཝཱ རཱུཔཱདཡོ ཨེཝ སུབྷདྷཱཏཱུཏི རཱུཔཱདིམཏྟམེཝེསཱ. ཨཱཀཱསཱནཉྩཱཡཏནདྷཱཏུཨཱདཱིསུ ཙིཏྟཾ མནོཝིཉྙཱཎདྷཱཏུ. སེསཱ དྷམྨཱ དྷམྨདྷཱཏུ. སཉྙཱཝེདཡིཏནིརོདྷདྷཱཏུ པན སབྷཱཝཏོ ནཏྠི; དྷཱཏུདྭཡནིརོདྷམཏྟམེཝ ཧི སཱ. ཀཱམདྷཱཏུ དྷམྨདྷཱཏུམཏྟཾ ཝཱ ཧོཏི, ཡཐཱཧ ‘‘ཏཏྠ ཀཏམཱ ཀཱམདྷཱཏུ? ཀཱམཔཊིསཾཡུཏྟོ ཏཀྐོ …པེ… མིཙྪཱསངྐཔྤོ’’ཏི; ཨཊྛཱརསཔི དྷཱཏུཡོ ¶ ཝཱ, ཡཐཱཧ ‘‘ཧེཊྛཏོ ཨཝཱིཙིནིརཡཾ པརིཡནྟཾ ཀཏྭཱ ཨུཔརིཏོ པརནིམྨིཏཝསཝཏྟིདེཝེ ཨནྟོཀརིཏྭཱ ཡཾ ཨེཏསྨིཾ ཨནྟརེ ཨེཏྠཱཝཙརཱ ཨེཏྠ པརིཡཱཔནྣཱ ཁནྡྷདྷཱཏུཨཱཡཏནཱ, རཱུཔཱ, ཝེདནཱ, སཉྙཱ, སངྑཱརཱ, ཝིཉྙཱཎཾ – ཨཡཾ ཝུཙྩཏི ཀཱམདྷཱཏཱུ’’ཏི. ནེཀྑམྨདྷཱཏུ དྷམྨདྷཱཏུ ཨེཝ; ‘‘སབྦེཔི ཀུསལཱ དྷམྨཱ ནེཀྑམྨདྷཱཏཱུ’’ཏི ཝཱ ཝཙནཏོ མནོཝིཉྙཱཎདྷཱཏུཔི ཧོཏིཡེཝ. བྱཱཔཱདཝིཧིཾསཱཨབྱཱཔཱདཨཝིཧིཾསཱསུཁདུཀྑསོམནསྶདོམནསྶུཔེཀྑཱཨཝིཛྫཱཨཱརམྦྷནིཀྐམཔརཀྐམདྷཱཏུཡོ དྷམྨདྷཱཏུཡེཝ.

ཧཱིནམཛ྄ཛྷིམཔཎཱིཏདྷཱཏུཡོ ཨཊྛཱརསདྷཱཏུམཏྟམེཝ. ཧཱིནཱ ཧི ཙཀྑཱདཡོ ཧཱིནདྷཱཏུ. མཛ྄ཛྷིམཔཎཱིཏཱ ཙཀྑཱདཡོ མཛ྄ཛྷིམཱ ཙེཝ པཎཱིཏཱ ཙ དྷཱཏཱུ. ནིཔྤརིཡཱཡེན པན ཨཀུསལཱ ¶ དྷམྨདྷཱཏུམནོཝིཉྙཱཎདྷཱཏུཡོ ཧཱིནདྷཱཏུ. ལོཀིཡཱ ཀུསལཱབྱཱཀཏཱ ཨུབྷོཔི ཙཀྑུདྷཱཏུཨཱདཡོ ཙ མཛ྄ཛྷིམདྷཱཏུ. ལོཀུཏྟརཱ པན དྷམྨདྷཱཏུམནོཝིཉྙཱཎདྷཱཏུཡོ པཎཱིཏདྷཱཏུ. པཐཝཱིཏེཛོཝཱཡོདྷཱཏུཡོ ཕོཊྛབྦདྷཱཏུཡེཝ. ཨཱཔོདྷཱཏུ ཨཱཀཱསདྷཱཏུ ཙ དྷམྨདྷཱཏུཡེཝ. ཝིཉྙཱཎདྷཱཏུ ཙཀྑུཝིཉྙཱཎཱདིསཏྟཝིཉྙཱཎདྷཱཏུསངྑེཔོཡེཝ. སཏྟརས དྷཱཏུཡོ དྷམྨདྷཱཏུཨེཀདེསོ ཙ སངྑཏདྷཱཏུ. ཨསངྑཏདྷཱཏུ པན དྷམྨདྷཱཏུཨེཀདེསོཝ. ཨནེཀདྷཱཏུནཱནཱདྷཱཏུལོཀོ པན ཨཊྛཱརསདྷཱཏུཔྤབྷེདམཏྟམེཝཱཏི. ཨིཏི སབྷཱཝཏོ ཝིཛྫམཱནཱནཾ སབྦདྷཱཏཱུནཾ ཏདནྟོགདྷཏྟཱ ཨཊྛཱརསེཝ ཝུཏྟཱཏི.

ཨཔིཙ ཝིཛཱནནསབྷཱཝེ ཝིཉྙཱཎེ ཛཱིཝསཉྙཱིནཾ ཛཱིཝསཉྙཱསམཱུཧནཏྠམྤི ཨཊྛཱརསེཝ ཝུཏྟཱ ¶ . སནྟི ཧི སཏྟཱ ཝིཛཱནནསབྷཱཝེ ཝིཉྙཱཎེ ཛཱིཝསཉྙིནོ. ཏེསཾ ཙཀྑུསོཏགྷཱནཛིཝ྄ཧཱཀཱཡཝིཉྙཱཎམནོཝིཉྙཱཎདྷཱཏུབྷེདེན ཏསྶཱ ཨནེཀཏྟཾ, ཙཀྑུརཱུཔཱདིཔཙྩཡཱཡཏྟཝུཏྟིཏཱཡ ཨནིཙྩཏཉྩ པཀཱསེཏྭཱ དཱིགྷརཏྟཱནུསཡིཏཾ ཛཱིཝསཉྙཾ སམཱུཧནིཏུཀཱམེན བྷགཝཏཱ ཨཊྛཱརས དྷཱཏུཡོ པཀཱསིཏཱ. ཀིཉྩ བྷིཡྻོ? ཏཐཱ ཝེནེཡྻཛ྄ཛྷཱསཡཝསེན; ཡེ ཙ ཨིམཱཡ ནཱཏིསངྑེཔཝིཏྠཱརཱཡ དེསནཱཡ ཝེནེཡྻཱ སཏྟཱ, ཏདཛ྄ཛྷཱསཡཝསེན ཙ ཨཊྛཱརསེཝ པཀཱསིཏཱ.

སངྑེཔཝིཏྠཱརནཡེན ¶ ཏཐཱ ཏཐཱ ཧི,

དྷམྨཾ པཀཱསཡཏི ཨེས ཡཐཱ ཡཐཱསྶ;

སདྡྷམྨཏེཛཝིཧཏཾ ཝིལཡཾ ཁཎེན,

ཝེནེཡྻསཏྟཧདཡེསུ ཏམོ པཡཱཏཱིཏི.

ཨེཝམེཏྠ ‘ཏཱཝཏྭཏོ’ ཝེདིཏབྦོ ཝིནིཙྪཡོ.

‘སངྑཏོ’ཏི ཙཀྑུདྷཱཏུ ཏཱཝ ཛཱཏིཏོ ཨེཀོ དྷམྨོཏྭེཝ སངྑཾ གཙྪཏི ཙཀྑུཔསཱདཝསེན. ཏཐཱ སོཏགྷཱནཛིཝ྄ཧཱཀཱཡརཱུཔསདྡགནྡྷརསདྷཱཏུཡོ སོཏཔསཱདཱདིཝསེན. ཕོཊྛབྦདྷཱཏུ པན པཐཝཱིཏེཛོཝཱཡོཝསེན ཏཡོ དྷམྨཱཏི སངྑཾ གཙྪཏི. ཙཀྑུཝིཉྙཱཎདྷཱཏུ ཀུསལཱཀུསལཝིཔཱཀཝསེན དྭེ དྷམྨཱཏི སངྑཾ གཙྪཏི. ཏཐཱ ¶ སོཏགྷཱནཛིཝ྄ཧཱཀཱཡཝིཉྙཱཎདྷཱཏུཡོ. མནོདྷཱཏུ པན པཉྩདྭཱརཱཝཛྫནཀུསལཱཀུསལཝིཔཱཀསམྤཊིཙྪནཝསེན ཏཡོ དྷམྨཱཏི སངྑཾ གཙྪཏི. དྷམྨདྷཱཏུ ཏིཎྞཾ ཨརཱུཔཀྑནྡྷཱནཾ, སོལ༹སནྣཾ སུཁུམརཱུཔཱནཾ, ཨསངྑཏཱཡ ཙ དྷཱཏུཡཱ ཝསེན ཝཱིསཏིདྷམྨཱཏི སངྑཾ གཙྪཏི. མནོཝིཉྙཱཎདྷཱཏུ སེསཀུསལཱཀུསལཱབྱཱཀཏཝིཉྙཱཎཝསེན ཚསཏྟཏིདྷམྨཱཏི སངྑཾ གཙྪཏཱིཏི ཨེཝམེཏྠ ‘སངྑཏོ’ ཝེདིཏབྦོ ཝིནིཙྪཡོ.

‘པཙྩཡཱ’ཏི ཙཀྑུདྷཱཏུཨཱདཱིནཾ ཙཀྑུཝིཉྙཱཎདྷཱཏུཨཱདཱིསུ པཙྩཡཏོ ཝེདིཏབྦོ ཝིནིཙྪཡོ. སོ པནེཏེསཾ པཙྩཡབྷཱཝོ ནིདྡེསཝཱརེ ཨཱཝི བྷཝིསྶཏི.

‘དཊྛབྦཱ’ཏི དཊྛབྦཏོཔེཏྠ ཝིནིཙྪཡོ ཝེདིཏབྦོཏི ཨཏྠོ. སབྦཱ ཨེཝ ཧི སངྑཏཱ དྷཱཏུཡོ པུབྦནྟཱཔརནྟཝིཝིཏྟཏོ, དྷུཝསུབྷསུཁཏྟབྷཱཝསུཉྙཏོ, པཙྩཡཱཡཏྟཝུཏྟིཏོ ཙ དཊྛབྦཱ. ཝིསེསཏོ པནེཏྠ བྷེརིཏལཾ ཝིཡ ཙཀྑུདྷཱཏུ དཊྛབྦཱ, དཎྜོ ཝིཡ རཱུཔདྷཱཏུ, སདྡོ ཝིཡ ཙཀྑུཝིཉྙཱཎདྷཱཏུ ¶ . ཏཐཱ ཨཱདཱསཏལཾ ཝིཡ ཙཀྑུདྷཱཏུ, མུཁཾ ཝིཡ རཱུཔདྷཱཏུ, མུཁནིམིཏྟཾ ཝིཡ ཙཀྑུཝིཉྙཱཎདྷཱཏུ. ཨཐ ཝཱ ཨུཙྪུཏིལཱནི ཝིཡ ཙཀྑུདྷཱཏུ, ཡནྟཙཀྐཡཊྛི ཝིཡ རཱུཔདྷཱཏུ, ཨུཙྪུརསཏེལཱནི ཝིཡ ཙཀྑུཝིཉྙཱཎདྷཱཏུ. ཏཐཱ ཨདྷརཱརཎཱི ཝིཡ ཙཀྑུདྷཱཏུ, ཨུཏྟརཱརཎཱི ཝིཡ རཱུཔདྷཱཏུ, ཨགྒི ཝིཡ ཙཀྑུཝིཉྙཱཎདྷཱཏུ. ཨེས ནཡོ སོཏདྷཱཏུཨཱདཱིསུཔི.

མནོདྷཱཏུ པན ཡཐཱསམྦྷཝཏོ ཙཀྑུཝིཉྙཱཎདྷཱཏུཨཱདཱིནཾ པུརེཙརཱནུཙརཱ ཝིཡ དཊྛབྦཱ. དྷམྨདྷཱཏུཡཱ ཝེདནཱཀྑནྡྷོ སལླམིཝ སཱུལམིཝ ཙ དཊྛབྦོ ¶ ; སཉྙཱསངྑཱརཀྑནྡྷཱ ཝེདནཱསལླསཱུལཡོགཱ ཨཱཏུརཱ ཝིཡ; པུཐུཛྫནཱནཾ ཝཱ སཉྙཱ ཨཱསཱདུཀྑཛནནཏོ རིཏྟམུཊྛི ཝིཡ, ཨཡཐཱབྷུཙྩནིམིཏྟགྒཱཧཀཏོ ཝནམིགོ ཝིཡ; སངྑཱརཱ པཊིསནྡྷིཡཾ པཀྑིཔནཏོ ཨངྒཱརཀཱསུཡཾ ཁིཔནཀཔུརིསོ ཝིཡ, ཛཱཏིདུཀྑཱནུབནྡྷནཏོ རཱཛཔུརིསཱནུབནྡྷཙོརཱ ཝིཡ, སབྦཱནཏྠཱཝཧསྶ ཁནྡྷསནྟཱནསྶ ཧེཏུཏོ ཝིསརུཀྑབཱིཛཱནི ཝིཡ; རཱུཔཾ ནཱནཱཝིདྷཱུཔདྡཝནིམིཏྟཏོ ཁུརཙཀྐཾ ཝིཡ དཊྛབྦཾ.

ཨསངྑཏཱ པན དྷཱཏུ ཨམཏཏོ སནྟཏོ ཁེམཏོ ཙ དཊྛབྦཱ. ཀསྨཱ? སབྦཱནཏྠཔཊིཔཀྑབྷཱུཏཏྟཱ. མནོཝིཉྙཱཎདྷཱཏུ གཧིཏཱརམྨཎཾ ¶ མུཉྩིཏྭཱཔི ཨཉྙཾ གཧེཏྭཱཝ པཝཏནཏོ ཝནམཀྐཊོ ཝིཡ, དུདྡམནཏོ ཨསྶཁལུ༹ངྐོ ཝིཡ, ཡཏྠཀཱམནིཔཱཏིཏོ ཝེཧཱསཾ ཁིཏྟདཎྜོ ཝིཡ, ལོབྷདོསཱདིནཱནཔྤཀཱརཀིལེསཡོགཏོ རངྒནཊོ ཝིཡ དཊྛབྦོཏི.

༡༨༤. ནིདྡེསཝཱརེ ཙཀྑུཉྩ པཊིཙྩ རཱུཔེ ཙཱཏི ཨིདཉྩ དྭཡཾ པཊིཙྩ ཨཉྙཉྩ ཀིརིཡཱམནོདྷཱཏུཉྩེཝ སམྤཡུཏྟཁནྡྷཏྟཡཉྩཱཏི ཨཏྠོ. ཙཀྑུཝིཉྙཱཎདྷཱཏུཡཱ ཧི ཙཀྑུ ནིསྶཡཔཙྩཡོ ཧོཏི, རཱུཔཾ ཨཱརམྨཎཔཙྩཡོ, ཀིརིཡམནོདྷཱཏུ ཝིགཏཔཙྩཡོ, ཏཡོ ཨརཱུཔཀྑནྡྷཱ སཧཛཱཏཔཙྩཡོ. ཏསྨཱ ཨེསཱ ཙཀྑུཝིཉྙཱཎདྷཱཏུ ཨིམེ ཙཏྟཱརོ པཊིཙྩ ཨུཔྤཛྫཏི ནཱམ. སོཏཉྩ པཊིཙྩཱཏིཨཱདཱིསུཔི ཨེསེཝ ནཡོ.

ནིརུདྡྷསམནནྟརཱཏི ནིརུདྡྷཱཡ སམནནྟརཱ. ཏཛྫཱ མནོདྷཱཏཱུཏི ཏསྨིཾ ཨཱརམྨཎེ ཛཱཏཱ ཀུསལཱཀུསལཝིཔཱཀཏོ དུཝིདྷཱ མནོདྷཱཏུ སམྤཊིཙྪནཀིཙྩཱ. སབྦདྷམྨེསུ ཝཱ པན པཋམསམནྣཱཧཱརོཏི ཨེཏེསུ ཙཀྑུཝིཉྙཱཎཱདཱིསུ སབྦདྷམྨེསུ ཨུཔྤཛྫམཱནེསུ པཋམསམནྣཱཧཱརོ; ཙཀྑུཝིཉྙཱཎདྷཱཏུཨཱདཱིནཾ ¶ ཝཱ ཨཱརམྨཎསངྑཱཏེསུ སབྦདྷམྨེསུ པཋམསམནྣཱཧཱརོཏི ཨཡམེཏྠ ཨཏྠོ ཝེདིཏབྦོ. ཨེཏེན པཉྩདྭཱརཱཝཛྫནཀིཙྩཱ ཀིརིཡམནོདྷཱཏུ གཧིཏཱཏི ཝེདིཏབྦཱ.

མནོདྷཱཏུཡཱཔི ཨུཔྤཛྫིཏྭཱ ནིརུདྡྷསམནནྟརཱཏི ཨེཏྠ པི-ཀཱརོ སམྤིཎྜནཏྠོ. ཏསྨཱ མནོདྷཱཏུཡཱཔི མནོཝིཉྙཱཎདྷཱཏུཡཱཔཱིཏི ཨཡམེཏྠ ཨཏྠོ ཝེདིཏབྦོ. ཏེན ཡཱ ཙ ཝིཔཱཀམནོདྷཱཏུཡཱ ཨུཔྤཛྫིཏྭཱ ནིརུདྡྷཱཡ སམནནྟརཱ ཨུཔྤཛྫཏི སནྟཱིརཎཀིཙྩཱ ཝིཔཱཀམནོཝིཉྙཱཎདྷཱཏུ, ཡཱ ཙ ཏསྶཱ ཨུཔྤཛྫིཏྭཱ ནིརུདྡྷཱཡ སམནནྟརཱ ཨུཔྤཛྫཏི ཝོཊྛབྦནཀིཙྩཱ ཀིརིཡམནོཝིཉྙཱཎདྷཱཏུ, ཡཱ ཙ ཏསྶཱ ཨུཔྤཛྫིཏྭཱ ནིརུདྡྷཱཡ ¶ སམནནྟརཱ ཨུཔྤཛྫཏི ཛཝནཀིཙྩཱ མནོཝིཉྙཱཎདྷཱཏུ – ཏཱ སབྦཱཔི ཀཐིཏཱ ཧོཏཱིཏི ཝེདིཏབྦཱ. མནཉྩ པཊིཙྩཱཏི བྷཝངྒམནཾ. དྷམྨེ ཙཱཏི ཙཏུབྷཱུམིཀདྷམྨཱརམྨཎཾ. ཨུཔྤཛྫཏི མནོཝིཉྙཱཎནྟི སཧཱཝཛྫནཀཾ ཛཝནཾ ནིབྦཏྟཏི.

ཨིམསྨིཾ པན ཋཱནེ ཧཏྠེ གཧིཏཔཉྷཾ ནཱམ གཎྷིཾསུ. མཧཱདྷམྨརཀྑིཏཏྠེརོ ཀིར ནཱམ དཱིགྷབྷཱཎཀཱབྷཡཏྠེརཾ ཧཏྠེ གཧེཏྭཱ ཨཱཧ – ‘པཊིཙྩཱཏི ནཱམ ཨཱགཏཊྛཱནེ ¶ ཨཱཝཛྫནཾ ཝིསུཾ ན ཀཱཏབྦཾ, བྷཝངྒནིསྶིཏཀམེཝ ཀཱཏབྦ’ནྟི. ཏསྨཱ ཨིདྷ མནོཏི སཧཱཝཛྫནཀཾ བྷཝངྒཾ. མནོཝིཉྙཱཎནྟི ཛཝནམནོཝིཉྙཱཎཾ. ཨིམསྨིཾ པན ཨབྷིདྷམྨབྷཱཛནཱིཡེ སོལ༹ས དྷཱཏུཡོ ཀཱམཱཝཙརཱ, དྭེ ཙཏུབྷཱུམིཀཱ ལོཀིཡལོཀུཏྟརམིསྶཀཱ ཀཐིཏཱཏི.

ཨབྷིདྷམྨབྷཱཛནཱིཡཝཎྞནཱ.

༣. པཉྷཱཔུཙྪཀཝཎྞནཱ

༡༨༥. པཉྷཱཔུཙྪཀེ ཨཊྛཱརསནྣཾ དྷཱཏཱུནཾ ཧེཊྛཱ ཝུཏྟནཡཱནུསཱརེནེཝ ཀུསལཱདིབྷཱཝོ ཝེདིཏབྦོ. ཨཱརམྨཎཏྟིཀེསུ པན ཚ དྷཱཏུཡོ པརིཏྟཱརམྨཎཱཏི ཨིདཾ པན པཉྩནྣཾ ཙཀྑུཝིཉྙཱཎཱདཱིནཾ མནོདྷཱཏུཡཱ ཙ ཨེཀནྟེན པཉྩསུ རཱུཔཱརམྨཎཱདཱིསུ པཝཏྟིཾ སནྡྷཱཡ ཝུཏྟཾ. དྭེ དྷཱཏུཡོཏི ཝུཏྟཱནཾ པན དྷམྨདྷཱཏུམནོཝིཉྙཱཎདྷཱཏཱུནཾ མནཱཡཏནདྷམྨཱཡཏནེསུ ཝུཏྟནཡེནེཝ པརིཏྟཱརམྨཎཱདིཏཱ ¶ ཝེདིཏབྦཱ. ཨིཏི ཨིམསྨིམྤི པཉྷཱཔུཙྪཀེ སོལ༹ས དྷཱཏུཡོ ཀཱམཱཝཙརཱ, དྭེ ཙཏུབྷཱུམིཀཱ ལོཀིཡལོཀུཏྟརམིསྶཀཱ ཀཐིཏཱ. ཨེཝམཡཾ དྷཱཏུཝིབྷངྒོཔི ཏེཔརིཝཊྚཾ ནཱིཧརིཏྭཱཝ བྷཱཛེཏྭཱ དེསིཏོཏི.

སམྨོཧཝིནོདནིཡཱ ཝིབྷངྒཊྛཀཐཱཡ

དྷཱཏུཝིབྷངྒཝཎྞནཱ ནིཊྛིཏཱ.

༤. སཙྩཝིབྷངྒོ

༡. སུཏྟནྟབྷཱཛནཱིཡཝཎྞནཱ

༡༨༩. ཨིདཱནི ¶ ¶ ¶ ཏདནནྟརེ སཙྩཝིབྷངྒེ ཙཏྟཱརཱིཏི གཎནཔརིཙྪེདོ. ཨརིཡསཙྩཱནཱིཏི པརིཙྪིནྣདྷམྨནིདསྶནཾ. དུཀྑཾ ཨརིཡསཙྩནྟིཨཱདིམྷི པན ཨུདྡེསཝཱརེ –

ཝིབྷཱགཏོ ནིབྦཙན-ལཀྑཎཱདིཔྤབྷེདཏོ;

ཨཏྠཏྠུདྡྷཱརཏོ ཙེཝ, ཨནཱུནཱདྷིཀཏོ ཏཐཱ.

ཀམཏོ ཨརིཡསཙྩེསུ, ཡཾ ཉཱཎཾ ཏསྶ ཀིཙྩཏོ;

ཨནྟོགདྷཱནཾ པབྷེདོ, ཨུཔམཱཏོ ཙཏུཀྐཏོ.

སུཉྙཏེཀཝིདྷཱདཱིཧི, སབྷཱགཝིསབྷཱགཏོ;

ཝིནིཙྪཡོ ཝེདིཏབྦོ, ཝིཉྙུནཱ སཱསནཀྐམེ.

ཏཏྠ ‘ཝིབྷཱགཏོ’ཏི དུཀྑཱདཱིནཉྷི ཙཏྟཱརོ ཙཏྟཱརོ ཨཏྠཱ ཝིབྷཏྟཱ ཏཐཱ ཨཝིཏཐཱ ཨནཉྙཐཱ, ཡེ དུཀྑཱདཱིནི ཨབྷིསམེནྟེཧི ཨབྷིསམེཏབྦཱ. ཡཐཱཧ, ‘‘དུཀྑསྶ པཱིལ༹ནཊྛོ, སངྑཏཊྛོ, སནྟཱཔཊྛོ, ཝིཔརིཎཱམཊྛོ – ཨིམེ ཙཏྟཱརོ དུཀྑསྶ དུཀྑཊྛཱ ཏཐཱ ཨཝིཏཐཱ ཨནཉྙཐཱ. སམུདཡསྶ ཨཱཡཱུཧནཊྛོ, ནིདཱནཊྛོ, སཾཡོགཊྛོ, པལིབོདྷཊྛོ…པེ… ནིརོདྷསྶ ནིསྶརཎཊྛོ, ཝིཝེཀཊྛོ, ཨསངྑཏཊྛོ, ཨམཏཊྛོ…པེ… མགྒསྶ ནིཡྻཱནཊྛོ, ཧེཏྭཊྛོ, དསྶནཊྛོ, ཨཱདྷིཔཏེཡྻཊྛོ – ཨིམེ ཙཏྟཱརོ མགྒསྶ མགྒཊྛཱ ཏཐཱ ཨཝིཏཐཱ ཨནཉྙཐཱ’’ཏི (པཊི. མ. ༢.༨). ཏཐཱ ¶ ‘‘དུཀྑསྶ པཱིལ༹ནཊྛོ, སངྑཏཊྛོ, སནྟཱཔཊྛོ, ཝིཔརིནཱམཊྛོ, ཨབྷིསམཡཊྛོ’’ཏི (པཊི. མ. ༢.༡༡) ཨེཝམཱདི. ཨིཏི ཨེཝཾ ཝིབྷཏྟཱནཾ ཙཏུནྣཾ ཙཏུནྣཾ ཨཏྠཱནཾ ཝསེན དུཀྑཱདཱིནི ཝེདིཏབྦཱནཱིཏི. ཨཡཾ ཏཱཝེཏྠ ཝིབྷཱགཏོ ཝིནིཙྪཡོ ཝེདིཏབྦོ.

‘ནིབྦཙནལཀྑཎཱདིཔྤབྷེདཏོ’ཏི ¶ ཨེཏྠ པན ‘ནིབྦཙནཏོ’ ཏཱཝ ཨིདྷ ‘དུ’ཨིཏི ཨཡཾ སདྡོ ཀུཙྪིཏེ དིསྶཏི; ཀུཙྪིཏཉྷི པུཏྟཾ དུཔུཏྟོཏི ཝདནྟི. ‘ཁཾ’སདྡོ པན ཏུཙྪེ; ཏུཙྪཉྷི ཨཱཀཱསཾ ཁནྟི ཝུཙྩཏི. ཨིདཉྩ པཋམསཙྩཾ ཀུཙྪིཏཾ ཨནེཀཨུཔདྡཝཱདྷིཊྛཱནཏོ, ཏུཙྪཾ བཱལཛནཔརིཀཔྤིཏདྷུཝསུབྷསུཁཏྟབྷཱཝཝིརཧིཏཏོ. ཏསྨཱ ཀུཙྪིཏཏྟཱ ཏུཙྪཏྟཱ ཙ དུཀྑནྟི ཝུཙྩཏི. ‘སཾ’ཨིཏི ཙ ཨཡཾ ¶ སདྡོ ‘‘སམཱགམོ སམེཏ’’ནྟིཨཱདཱིསུ (ཝིབྷ. ༡༩༩; དཱི. ནི. ༢.༣༩༦) སཾཡོགཾ དཱིཔེཏི; ‘ཨུ’ཨིཏི ཨཡཾ སདྡོ ‘‘ཨུཔྤནྣཾ ཨུདིཏ’’ནྟིཨཱདཱིསུ (པཱརཱ. ༡༧༢; ཙཱུལ༹ནི. ཁགྒཝིསཱཎསུཏྟནིདྡེས ༡༤༡) ཨུཔྤཏྟིཾ. ‘ཨཡ’སདྡོ པན ཀཱརཎཾ དཱིཔེཏི. ཨིདཉྩཱཔི དུཏིཡསཙྩཾ ཨཝསེསཔཙྩཡསམཱཡོགེ སཏི དུཀྑསྶུཔྤཏྟིཀཱརཎཾ. ཨིཏི དུཀྑསྶ སཾཡོགེ ཨུཔྤཏྟིཀཱརཎཏྟཱ དུཀྑསམུདཡནྟི ཝུཙྩཏི.

ཏཏིཡསཙྩཾ པན ཡསྨཱ ‘ནི’སདྡོ ཨབྷཱཝཾ ‘རོདྷ’སདྡོ ཙ ཙཱརཀཾ དཱིཔེཏི, ཏསྨཱ ཨབྷཱཝོ ཨེཏྠ སཾསཱརཙཱརཀསངྑཱཏསྶ དུཀྑརོདྷསྶ སབྦགཏིསུཉྙཏྟཱ, སམདྷིགཏེ ཝཱ ཏསྨིཾ སཾསཱརཙཱརཀསངྑཱཏསྶ དུཀྑརོདྷསྶ ཨབྷཱཝོ ཧོཏི ཏཔྤཊིཔཀྑཏྟཱཏིཔི དུཀྑནིརོདྷནྟི ཝུཙྩཏི, དུཀྑསྶ ཝཱ ཨནུཔྤཱདནིརོདྷཔཙྩཡཏྟཱ དུཀྑནིརོདྷནྟི. ཙཏུཏྠསཙྩཾ པན ཡསྨཱ ཨེཏཾ དུཀྑནིརོདྷཾ གཙྪཏི ཨཱརམྨཎཝསེན ཏདབྷིམུཁཱིབྷཱུཏཏྟཱ, པཊིཔདཱ ཙ ཧོཏི དུཀྑནིརོདྷཔྤཏྟིཡཱ, ཏསྨཱ དུཀྑནིརོདྷགཱམིནཱི པཊིཔདཱཏི ཝུཙྩཏི.

ཡསྨཱ པནེཏཱནི བུདྡྷཱདཡོ ཨརིཡཱ པཊིཝིཛ྄ཛྷནྟི, ཏསྨཱ ཨརིཡསཙྩཱནཱིཏི ཝུཙྩནྟི. ཡཐཱཧ – ‘‘ཙཏཱརིམཱནི, བྷིཀྑཝེ, ཨརིཡསཙྩཱནི (སཾ. ནི. ༥.༡༠༩༧). ཀཏམཱནི…པེ… ཨིམཱནི ཁོ, བྷིཀྑཝེ, ཙཏྟཱརི ཨརིཡསཙྩཱནི. ཨརིཡཱ ཨིམཱནི པཊིཝིཛ྄ཛྷནྟི, ཏསྨཱ ཨརིཡསཙྩཱནཱིཏི ཝུཙྩནྟཱི’’ཏི. ཨཔིཙ ཨརིཡསྶ སཙྩཱནཱིཏིཔི ཨརིཡསཙྩཱནི. ཡཐཱཧ – ‘‘སདེཝཀེ, བྷིཀྑཝེ, ལོཀེ…པེ… སདེཝམནུསྶཱཡ ཏཐཱགཏོ ཨརིཡོ, ཏསྨཱ ཨརིཡསཙྩཱནཱིཏི ཝུཙྩནྟཱི’’ཏི. ཨཐ ཝཱ ཨེཏེསཾ ཨབྷིསམྦུདྡྷཏྟཱ ཨརིཡབྷཱཝསིདྡྷིཏོཔི ཨརིཡསཙྩཱནི. ཡཐཱཧ – ‘‘ཨིམེསཾ ཁོ, བྷིཀྑཝེ, ཙཏུནྣཾ ཨརིཡསཙྩཱནཾ ¶ ཡཐཱབྷཱུཏཾ ཨབྷིསམྦུདྡྷཏྟཱ ཏཐཱགཏོ ཨརཧཾ སམྨཱསམྦུདྡྷོ ‘ཨརིཡོ’ཏི ཝུཙྩཏཱི’’ཏི. ཨཔིཙ ཁོ པན ཨརིཡཱནི ¶ སཙྩཱནཱིཏིཔི ཨརིཡསཙྩཱནི; ཨརིཡཱནཱིཏི ཏཐཱནི ཨཝིཏཐཱནི ཨཝིསཾཝཱདཀཱནཱིཏི ཨཏྠོ. ཡཐཱཧ – ‘‘ཨིམཱནི ཁོ, བྷིཀྑཝེ, ཙཏྟཱརི ཨརིཡསཙྩཱནི ཏཐཱནི ཨཝིཏཐཱནི ཨནཉྙཐཱནི, ཏསྨཱ ཨརིཡསཙྩཱནཱིཏི ཝུཙྩནྟཱི’’ཏི. ཨེཝམེཏྠ ནིབྦཙནཏོ ཝིནིཙྪཡོ ཝེདིཏབྦོ.

ཀཐཾ ‘ལཀྑཎཱདིཔྤབྷེདཏོ’? ཨེཏྠ ཧི བཱདྷནལཀྑཎཾ དུཀྑསཙྩཾ, སནྟཱཔནརསཾ, པཝཏྟིཔཙྩུཔཊྛཱནཾ. པབྷཝལཀྑཎཾ སམུདཡསཙྩཾ, ཨནུཔཙྪེདཀརཎརསཾ, པལིབོདྷཔཙྩུཔཊྛཱནཾ. སནྟིལཀྑཎཾ ནིརོདྷསཙྩཾ, ཨཙྩུཏིརསཾ, ཨནིམིཏྟཔཙྩུཔཊྛཱནཾ ¶ . ནིཡྻཱནལཀྑཎཾ མགྒསཙྩཾ, ཀིལེསཔྤཧཱནཀརཎརསཾ, ཝུཊྛཱནཔཙྩུཔཊྛཱནཾ. ཨཔིཙ པཝཏྟིཔཝཏྟཀནིཝཏྟིནིཝཏྟཀལཀྑཎཱནི པཊིཔཱཊིཡཱ. ཏཐཱ སངྑཏཏཎྷཱཨསངྑཏདསྶནལཀྑཎཱནི ཙཱཏི ཨེཝམེཏྠ ‘ལཀྑཎཱདིཔྤབྷེདཏོ’ ཝིནིཙྪཡོ ཝེདིཏབྦོ.

‘ཨཏྠཏྠུདྡྷཱརཏོ ཙེཝཱ’ཏི ཨེཏྠ པན ཨཏྠཏོ ཏཱཝ ཀོ སཙྩཊྛོཏི ཙེ? ཡོ པཉྙཱཙཀྑུནཱ ཨུཔཔརིཀྑམཱནཱནཾ མཱཡཱཝ ཝིཔརཱིཏཀོ, མརཱིཙཱིཝ ཝིསཾཝཱདཀོ, ཏིཏྠིཡཱནཾ ཨཏྟཱཝ ཨནུཔལབྦྷསབྷཱཝོ ཙ ན ཧོཏི; ཨཐ ཁོ བཱདྷནཔབྷཝསནྟིནིཡྻཱནཔྤཀཱརེན ཏཙྪཱཝིཔརཱིཏབྷཱུཏབྷཱཝེན ཨརིཡཉཱཎསྶ གོཙརོ ཧོཏིཡེཝ; ཨེས ཨགྒིལཀྑཎཾ ཝིཡ, ལོཀཔཀཏི ཝིཡ ཙ ཏཙྪཱཝིཔརཱིཏབྷཱུཏབྷཱཝོ སཙྩཊྛོཏི ཝེདིཏབྦོ. ཡཐཱཧ – ‘‘ཨིདཾ དུཀྑནྟི ཁོ, བྷིཀྑཝེ, ཏཐམེཏཾ ཨཝིཏཐམེཏཾ ཨནཉྙཐམེཏ’’ནྟི (སཾ. ནི. ༥.༡༠༩༠) ཝིཏྠཱརོ. ཨཔིཙ –

ནཱབཱདྷཀཾ ཡཏོ དུཀྑཾ, དུཀྑཱ ཨཉྙཾ ན བཱདྷཀཾ;

བཱདྷཀཏྟནིཡཱམེན, ཏཏོ སཙྩམིདཾ མཏཾ.

ཏཾ ཝིནཱ ནཱཉྙཏོ དུཀྑཾ, ན ཧོཏི ན ཙ ཏཾ ཏཏོ;

དུཀྑཧེཏུནིཡཱམེན, ཨིཏི སཙྩཾ ཝིསཏྟིཀཱ.

ནཱཉྙཱ ནིབྦཱནཏོ སནྟི, སནྟཾ ན ཙ ན ཏཾ ཡཏོ;

སནྟབྷཱཝནིཡཱམེན, ཏཏོ སཙྩམིདཾ མཏཾ.

མགྒཱ ¶ ཨཉྙཾ ན ནིཡྻཱནཾ, ཨནིཡྻཱནོ ན ཙཱཔི སོ;

ཏཙྪནིཡྻཱནབྷཱཝཏྟཱ, ཨིཏི སོ སཙྩསམྨཏོ.

ཨིཏི ཏཙྪཱཝིཔལླཱས-བྷཱུཏབྷཱཝཾ ཙཏཱུསུཔི;

དུཀྑཱདཱིསྭཝིསེསེན, སཙྩཊྛཾ ཨཱཧུ པཎྜིཏཱཏི.

ཨེཝཾ ¶ ‘ཨཏྠཏོ’ ཝིནིཙྪཡོ ཝེདིཏབྦོ.

ཀཐཾ ‘ཨཏྠུདྡྷཱརཏོ’? ཨིདྷཱཡཾ ‘སཙྩ’སདྡོ ཨནེཀེསུ ཨཏྠེསུ དིསྶཏི, སེཡྻཐིདཾ – ‘‘སཙྩཾ བྷཎེ, ན ཀུཛ྄ཛྷེཡྻཱ’’ཏིཨཱདཱིསུ (དྷ. པ. ༢༢༤) ཝཱཙཱསཙྩེ. ‘‘སཙྩེ ཋིཏཱ སམཎབྲཱཧྨཎཱ ཙཱ’’ཏིཨཱདཱིསུ (ཛཱ. ༢.༢༡.༤༣༣) ཝིརཏིསཙྩེ. ‘‘ཀསྨཱ ནུ སཙྩཱནི ¶ ཝདནྟི ནཱནཱ, པཝཱདིཡཱསེ ཀུསལཱཝདཱནཱ’’ཏིཨཱདཱིསུ (སུ. ནི. ༨༩༡) དིཊྛིསཙྩེ. ‘‘ཨེཀཉྷི སཙྩཾ ན དུཏིཡམཏྠཱི’’ཏིཨཱདཱིསུ (སུ. ནི. ༨༩༠) པརམཏྠསཙྩེ ནིབྦཱནེ ཙེཝ མགྒེ ཙ. ‘‘ཙཏུནྣཾ ཨརིཡསཙྩཱནཾ ཀཏི ཀུསལཱ’’ཏིཨཱདཱིསུ (ཝིབྷ. ༢༡༦) ཨརིཡསཙྩེ. སྭཱཡམིདྷཱཔི ཨརིཡསཙྩེ ཝཏྟཏཱིཏི ཨེཝམེཏྠ ‘ཨཏྠུདྡྷཱརཏོ’པི ཝིནིཙྪཡོ ཝེདིཏབྦོ.

‘ཨནཱུནཱདྷིཀཏོ’ཏི ཀསྨཱ པན ཙཏྟཱརེཝ ཨརིཡསཙྩཱནི ཝུཏྟཱནི, ཨནཱུནཱནི ཨནདྷིཀཱནཱིཏི ཙེ? ཨཉྙསྶཱསམྦྷཝཏོ, ཨཉྙཏརསྶ ཙ ཨནཔནེཡྻབྷཱཝཏོ; ན ཧི ཨེཏེཧི ཨཉྙཾ ཨདྷིཀཾ ཝཱ ཨེཏེསཾ ཝཱ ཨེཀམྤི ཨཔནེཏབྦཾ སམྦྷོཏི. ཡཐཱཧ – ‘‘ཨིདྷ, བྷིཀྑཝེ, ཨཱགཙྪེཡྻ སམཎོ ཝཱ བྲཱཧྨཎོ ཝཱ ‘ནེཏཾ དུཀྑཾ ཨརིཡསཙྩཾ, ཨཉྙཾ དུཀྑཾ ཨརིཡསཙྩཾ ཡཾ སམཎེན གོཏམེན དེསིཏཾ. ཨཧམེཏཾ དུཀྑཾ ཨརིཡསཙྩཾ ཋཔེཏྭཱ ཨཉྙཾ དུཀྑཾ ཨརིཡསཙྩཾ པཉྙཔེསྶཱམཱི’ཏི ནེཏཾ ཋཱནཾ ཝིཛྫཏཱི’’ཏིཨཱདི. ཡཐཱ ཙཱཧ – ‘‘ཡོ ཧི ཀོཙི, བྷིཀྑཝེ, སམཎོ ཝཱ བྲཱཧྨཎོ ཝཱ ཨེཝཾ ཝདེཡྻ ‘ནེཏཾ དུཀྑཾ པཋམཾ ཨརིཡསཙྩཾ, ཡཾ སམཎེན གོཏམེན དེསིཏཾ. ཨཧམེཏཾ དུཀྑཾ པཋམཾ ཨརིཡསཙྩཾ པཙྩཀྑཱཡ ཨཉྙཾ དུཀྑཾ པཋམཾ ཨརིཡསཙྩཾ པཉྙཔེསྶཱམཱི’ཏི ནེཏཾ ཋཱནཾ ཝིཛྫཏཱི’’ཏིཨཱདི (སཾ. ནི. ༥.༡༠༨༦).

ཨཔིཙ པཝཏྟིམཱཙིཀྑནྟོ བྷགཝཱ སཧེཏུཀཾ ཨཱཙིཀྑི, ནིཝཏྟིཉྩ སཨུཔཱཡཾ. ཨིཏི པཝཏྟིནིཝཏྟིཏདུབྷཡཧེཏཱུནཾ ¶ ཨེཏཔྤརམཏོ ཙཏྟཱརེཝ ཝུཏྟཱནི. ཏཐཱ པརིཉྙེཡྻ པཧཱཏབྦ སཙྪིཀཱཏབྦ བྷཱཝེཏབྦཱནཾ, ཏཎྷཱཝཏྠུཏཎྷཱཏཎྷཱནིརོདྷཏཎྷཱནིརོདྷུཔཱཡཱནཾ, ཨཱལཡཱལཡརཱམཏཱཨཱལཡསམུགྒྷཱཏཨཱལཡསམུགྒྷཱཏཱུཔཱཡཱནཉྩ ཝསེནཱཔི ཙཏྟཱརེཝ ཝུཏྟཱནཱིཏི. ཨེཝམེཏྠ ‘ཨནཱུནཱདྷིཀཏོ’ ཝིནིཙྪཡོ ཝེདིཏབྦོ.

‘ཀམཏོ’ཏི ཨཡམྤི དེསནཱཀྐམོཝ. ཨེཏྠ ཙ ཨོལཱ༹རིཀཏྟཱ སབྦསཏྟསཱདྷཱརཎཏྟཱ ཙ སུཝིཉྙེཡྻནྟི དུཀྑསཙྩཾ པཋམཾ ¶ ཝུཏྟཾ, ཏསྶེཝ ཧེཏུདསྶནཏྠཾ ཏདནནྟརཾ སམུདཡསཙྩཾ, ཧེཏུནིརོདྷཱ ཕལནིརོདྷོཏི ཉཱཔནཏྠཾ ཏཏོ ནིརོདྷསཙྩཾ, ཏདདྷིགམུཔཱཡདསྶནཏྠཾ ཨནྟེ མགྒསཙྩཾ. བྷཝསུཁསྶཱདགདྷིཏཱནཾ ཝཱ སཏྟཱནཾ སཾཝེགཛནནཏྠཾ པཋམཾ དུཀྑམཱཧ. ཏཾ ནེཝ ཨཀཏཾ ཨཱགཙྪཏི, ན ཨིསྶརནིམྨཱནཱདིཏོ ཧོཏི, ཨིཏོ པན ཧོཏཱིཏི ¶ ཉཱཔནཏྠཾ ཏདནནྟརཾ སམུདཡཾ. ཏཏོ སཧེཏུཀེན དུཀྑེན ཨབྷིབྷཱུཏཏྟཱ སཾཝིགྒམཱནསཱནཾ དུཀྑནིསྶརཎགཝེསཱིནཾ ནིསྶརཎདསྶནེན ཨསྶཱསཛནནཏྠཾ ནིརོདྷཾ. ཏཏོ ནིརོདྷཱདྷིགམཏྠཾ ནིརོདྷསམྤཱཔཀཾ མགྒནྟི ཨེཝམེཏྠ ‘ཀམཏོ’ ཝིནིཙྪཡོ ཝེདིཏབྦོ.

‘ཨརིཡསཙྩེསུ ཡཾ ཉཱཎཾ ཏསྶ ཀིཙྩཏོ’ཏི སཙྩཉཱཎཀིཙྩཏོཔི ཝིནིཙྪཡོ ཝེདིཏབྦོཏི ཨཏྠོ. དུཝིདྷཉྷི སཙྩཉཱཎཾ – ཨནུབོདྷཉཱཎཉྩ པཊིཝེདྷཉཱཎཉྩ. ཏཏྠ ཨནུབོདྷཉཱཎཾ ལོཀིཡཾ ཨནུསྶཝཱདིཝསེན ནིརོདྷེ མགྒེ ཙ པཝཏྟཏི. པཊིཝེདྷཉཱཎཾ ལོཀུཏྟརཾ ནིརོདྷཱརམྨཎཾ ཀཏྭཱ ཀིཙྩཏོ ཙཏྟཱརིཔི སཙྩཱནི པཊིཝིཛ྄ཛྷཏི. ཡཐཱཧ – ‘‘ཡོ, བྷིཀྑཝེ, དུཀྑཾ པསྶཏི དུཀྑསམུདཡམྤི སོ པསྶཏི, དུཀྑནིརོདྷམྤི པསྶཏི, དུཀྑནིརོདྷགཱམིནིཾ པཊིཔདམྤི པསྶཏཱི’’ཏི (སཾ. ནི. ༥.༡༡༠༠) སབྦཾ ཝཏྟབྦཾ. ཡཾ པནེཏཾ ལོཀིཡཾ, ཏཏྠ དུཀྑཉཱཎཾ པརིཡུཊྛཱནཱབྷིབྷཝནཝསེན པཝཏྟམཱནཾ སཀྐཱཡདིཊྛིཾ ནིཝཏྟེཏི, སམུདཡཉཱཎཾ ཨུཙྪེདདིཊྛིཾ, ནིརོདྷཉཱཎཾ སསྶཏདིཊྛིཾ, མགྒཉཱཎཾ ཨཀིརིཡདིཊྛིཾ; དུཀྑཉཱཎཾ ཝཱ དྷུཝསུབྷསུཁཏྟབྷཱཝརཧིཏེསུ ཁནྡྷེསུ དྷུཝསུབྷསུཁཏྟབྷཱཝསཉྙཱསངྑཱཏཾ ཕལེ ཝིཔྤཊིཔཏྟིཾ, སམུདཡཉཱཎཾ ཨིསྶརཔྤདྷཱནཀཱལསབྷཱཝཱདཱིཧི ལོཀོ པཝཏྟཏཱིཏི ཨཀཱརཎེ ཀཱརཎཱབྷིམཱནཔྤཝཏྟཾ ཧེཏུམྷི ཝིཔྤཊིཔཏྟིཾ, ནིརོདྷཉཱཎཾ ཨརཱུཔལོཀལོཀཐཱུཔིཀཱདཱིསུ ཨཔཝགྒགྒཱཧབྷཱུཏཾ ནིརོདྷེ ཝིཔྤཊིཔཏྟིཾ, མགྒཉཱཎཾ ཀཱམསུཁལླིཀཨཏྟཀིལམཐཱནུཡོགཔྤབྷེདེ ¶ ཨཝིསུདྡྷིམགྒེ ཝིསུདྡྷིམགྒགྒཱཧཝསེན པཝཏྟཾ ཨུཔཱཡེ ཝིཔྤཊིཔཏྟིཾ ནིཝཏྟེཏི. ཏེནེཏཾ ཝུཙྩཏི –

ལོཀེ ¶ ལོཀཔྤབྷཝེ, ལོཀཏྠགམེ སིཝེ ཙ ཏདུཔཱཡེ;

སམྨུཡ྄ཧཏི ཏཱཝ ནརོ, ན ཝིཛཱནཱཏི ཡཱཝ སཙྩཱནཱིཏི.

ཨེཝམེཏྠ ‘ཉཱཎཀིཙྩཏོ’པི ཝིནིཙྪཡོ ཝེདིཏབྦོ.

‘ཨནྟོགདྷཱནཾ པབྷེདཱ’ཏི དུཀྑསཙྩསྨིཉྷི, ཋཔེཏྭཱ ཏཎྷཉྩེཝ ཨནཱསཝདྷམྨེ ཙ, སེསཱ སབྦདྷམྨཱ ཨནྟོགདྷཱ; སམུདཡསཙྩེ ཚཏྟིཾས ཏཎྷཱཝིཙརིཏཱནི; ནིརོདྷསཙྩཾ ཨསམྨིསྶཾ; མགྒསཙྩེ སམྨཱདིཊྛིམུཁེན ཝཱིམཾསིདྡྷིཔཱདཔཉྙིནྡྲིཡཔཉྙཱབལདྷམྨཝིཙཡསམྦོཛ྄ཛྷངྒཱནི. སམྨཱསངྐཔྤཱཔདེསེན ཏཡོ ནེཀྑམྨཝིཏཀྐཱདཡོ, སམྨཱཝཱཙཱཔདེསེན ཙཏྟཱརི ཝཙཱིསུཙརིཏཱནི, སམྨཱཀམྨནྟཱཔདེསེན ཏཱིཎི ཀཱཡསུཙརིཏཱནི, སམྨཱཨཱཛཱིཝམུཁེན ཨཔྤིཙྪཏཱ སནྟུཊྛིཏཱ ¶ ཙ, སབྦེསཾཡེཝ ཝཱ ཨེཏེསཾ སམྨཱཝཱཙཱཀམྨནྟཱཛཱིཝཱནཾ ཨརིཡཀནྟསཱིལཏྟཱ སཱིལསྶ ཙ སདྡྷཱཧཏྠེན པཊིགྒཧེཏབྦཏྟཱ ཏེསཾ ཨཏྠིཏཱཡ ཙ ཨཏྠིབྷཱཝཏོ སདྡྷིནྡྲིཡསདྡྷཱབལཚནྡིདྡྷིཔཱདཱ, སམྨཱཝཱཡཱམཱཔདེསེན ཙཏུབྦིདྷསམྨཔྤདྷཱནཝཱིརིཡིནྡྲིཡཝཱིརིཡབལཝཱིརིཡསམྦོཛ྄ཛྷངྒཱནི, སམྨཱསཏིཨཔདེསེན ཙཏུབྦིདྷསཏིཔཊྛཱནསཏིནྡྲིཡསཏིབལསཏིསམྦོཛ྄ཛྷངྒཱནི, སམྨཱསམཱདྷིཨཔདེསེན སཝིཏཀྐསཝིཙཱརཱདཡོ ཏཡོ ཏཡོ སམཱདྷཱི, ཙིཏྟསམཱདྷིསམཱདྷིནྡྲིཡསམཱདྷིབལཔཱིཏིཔསྶདྡྷིསམཱདྷིཨུཔེཀྑཱསམྦོཛ྄ཛྷངྒཱནི ཨནྟོགདྷཱནཱིཏི. ཨེཝམེཏྠ ‘ཨནྟོགདྷཱནཾ པབྷེདཱ’པི ཝིནིཙྪཡོ ཝེདིཏབྦོ.

‘ཨུཔམཱཏོ’ཏི བྷཱརོ ཝིཡ ཧི དུཀྑསཙྩཾ དཊྛབྦཾ, བྷཱརཱདཱནམིཝ སམུདཡསཙྩཾ, བྷཱརནིཀྑེཔནམིཝ ནིརོདྷསཙྩཾ, བྷཱརནིཀྑེཔནཱུཔཱཡོ ཝིཡ མགྒསཙྩཾ; རོགོ ཝིཡ ཙ དུཀྑསཙྩཾ, རོགནིདཱནམིཝ སམུདཡསཙྩཾ, རོགཝཱུཔསམོ ཝིཡ ནིརོདྷསཙྩཾ, བྷེསཛྫམིཝ མགྒསཙྩཾ; དུབྦྷིཀྑམིཝ ཝཱ དུཀྑསཙྩཾ, དུབྦུཊྛི ཝིཡ སམུདཡསཙྩཾ, སུབྷིཀྑམིཝ ནིརོདྷསཙྩཾ ¶ , སུཝུཊྛི ཝིཡ མགྒསཙྩཾ. ཨཔིཙ ཝེརཱིཝེརམཱུལཝེརསམུགྒྷཱཏཝེརསམུགྒྷཱཏུཔཱཡེཧི, ཝིསརུཀྑརུཀྑམཱུལམཱུལུཔཙྪེདཏདུཔཙྪེདུཔཱཡེཧི, བྷཡབྷཡམཱུལནིབྦྷཡཏདདྷིགམུཔཱཡེཧི, ཨོརིམཏཱིརམཧོགྷཔཱརིམཏཱིརཏཾསམྤཱཔཀཝཱཡཱམེཧི ཙ ཡོཛེཏྭཱཔེཏཱནི ཨུཔམཱཏོ ཝེདིཏབྦཱནཱིཏི. ཨེཝམེཏྠ ‘ཨུཔམཱཏོ’ ཝིནིཙྪཡོ ཝེདིཏབྦོ.

‘ཙཏུཀྐཏོ’ཏི ཨཏྠི ཙེཏྠ དུཀྑཾ ན ཨརིཡསཙྩཾ, ཨཏྠི ཨརིཡསཙྩཾ ན དུཀྑཾ, ཨཏྠི དུཀྑཉྩེཝ ¶ ཨརིཡསཙྩཉྩ, ཨཏྠི ནེཝ དུཀྑཾ ན ཨརིཡསཙྩཾ. ཨེས ནཡོ སམུདཡཱདཱིསུ. ཏཏྠ མགྒསམྤཡུཏྟཱ དྷམྨཱ སཱམཉྙཕལཱནི ཙ ‘‘ཡདནིཙྩཾ ཏཾ དུཀྑ’’ནྟི (སཾ. ནི. ༣.༡༥) ཝཙནཏོ སངྑཱརདུཀྑཏཱཡ དུཀྑཾ ན ཨརིཡསཙྩཾ. ནིརོདྷོ ཨརིཡསཙྩཾ ན དུཀྑཾ. ཨིཏརཾ པན ཨརིཡསཙྩདྭཡཾ སིཡཱ དུཀྑཾ ཨནིཙྩཏོ, ན པན ཡསྶ པརིཉྙཱཡ བྷགཝཏི བྲཧྨཙརིཡཾ ཝུསྶཏི ཏཐཏྠེན. སབྦཱཀཱརེན པན ཨུཔཱདཱནཀྑནྡྷཔཉྩཀཾ དུཀྑཉྩེཝ ཨརིཡསཙྩཉྩ ཨཉྙཏྲ ཏཎྷཱཡ. མགྒསམྤཡུཏྟཱ དྷམྨཱ སཱམཉྙཕལཱནི ཙ ཡསྶ པརིཉྙཏྠཾ བྷགཝཏི བྲཧྨཙརིཡཾ ཝུསྶཏི ཏཐཏྠེན ནེཝ དུཀྑཾ ན ཨརིཡསཙྩཾ. ཨེཝཾ སམུདཡཱདཱིསུཔི ཡཐཱཡོགཾ ཡོཛེཏྭཱ ‘ཙཏུཀྐཏོ’པེཏྠ ཝིནིཙྪཡོ ཝེདིཏབྦོ.

‘སུཉྙཏེཀཝིདྷཱདཱིཧཱི’ཏི ¶ ཨེཏྠ སུཉྙཏོ ཏཱཝ པརམཏྠེན ཧི སབྦཱནེཝ སཙྩཱནི ཝེདཀཀཱརཀནིབྦུཏགམཀཱབྷཱཝཏོ སུཉྙཱནཱིཏི ཝེདིཏབྦཱནི. ཏེནེཏཾ ཝུཙྩཏི –

དུཀྑམེཝ ཧི ན ཀོཙི དུཀྑིཏོ, ཀཱརཀོ ན ཀིརིཡཱཝ ཝིཛྫཏི;

ཨཏྠི ནིབྦུཏི ན ནིབྦུཏོ པུམཱ, མགྒམཏྠི གམཀོ ན ཝིཛྫཏཱིཏི.

ཨཐ ཝཱ –

དྷུཝསུབྷསུཁཏྟསུཉྙཾ, པུརིམདྭཡམཏྟསུཉྙམམཏཔདཾ;

དྷུཝསུཁཨཏྟཝིརཧིཏོ, མགྒོ ཨིཏི སུཉྙཏོ ཏེསུ.

ནིརོདྷསུཉྙཱནི ¶ ཝཱ ཏཱིཎི, ནིརོདྷོ ཙ སེསཏྟཡསུཉྙོ. ཕལསུཉྙོ ཝཱ ཨེཏྠ ཧེཏུ སམུདཡེ དུཀྑསྶཱབྷཱཝཏོ མགྒེ ཙ ནིརོདྷསྶ, ན ཕལེན སགབྦྷོ པཀཏིཝཱདཱིནཾ པཀཏི ཝིཡ. ཧེཏུསུཉྙཉྩ ཕལཾ དུཀྑསམུདཡཱནཾ ནིརོདྷམགྒཱནཉྩ ཨསམཝཱཡཱ, ན ཧེཏུསམཝེཏཾ ཧེཏུཕལཾ ཧེཏུཕལསམཝཱཡཝཱདཱིནཾ དྭིཨཎུཀཱདཱིནི ཝིཡ. ཏེནེཏཾ ཝུཙྩཏི –

ཏཡམིདྷ ནིརོདྷསུཉྙཾ, ཏཡེན ཏེནཱཔི ནིབྦུཏི སུཉྙཱ;

སུཉྙོ ཕལེན ཧེཏུ, ཕལམྤི ཏཾ ཧེཏུནཱ སུཉྙནྟི.

ཨེཝཾ ¶ ཏཱཝ ‘སུཉྙཏོ’ ཝིནིཙྪཡོ ཝེདིཏབྦོ.

‘ཨེཀཝིདྷཱདཱིཧཱི’ཏི སབྦམེཝ ཙེཏྠ དུཀྑཾ ཨེཀཝིདྷཾ པཝཏྟིབྷཱཝཏོ, དུཝིདྷཾ ནཱམརཱུཔཏོ, ཏིཝིདྷཾ ཀཱམརཱུཔཱརཱུཔཱུཔཔཏིབྷཝབྷེདཏོ, ཙཏུབྦིདྷཾ ཙཏུཨཱཧཱརབྷེདཏོ, པཉྩཝིདྷཾ པཉྩུཔཱདཱནཀྑནྡྷབྷེདཏོ. སམུདཡོཔི ཨེཀཝིདྷོ པཝཏྟཀབྷཱཝཏོ, དུཝིདྷོ དིཊྛིསམྤཡུཏྟཱསམྤཡུཏྟཏོ, ཏིཝིདྷོ ཀཱམབྷཝཝིབྷཝཏཎྷཱབྷེདཏོ, ཙཏུབྦིདྷོ ཙཏུམགྒཔྤཧེཡྻཏོ, པཉྩཝིདྷོ རཱུཔཱབྷིནནྡནཱདིབྷེདཏོ, ཚབྦིདྷོ ཚཏཎྷཱཀཱཡབྷེདཏོ. ནིརོདྷོཔི ཨེཀཝིདྷོ ཨསངྑཏདྷཱཏུབྷཱཝཏོ, པརིཡཱཡེན པན དུཝིདྷོ སཨུཔཱདིསེསཨནུཔཱདིསེསཏོ, ཏིཝིདྷོ བྷཝཏྟཡཝཱུཔསམཏོ, ཙཏུབྦིདྷོ ཙཏུམགྒཱདྷིགམནཱིཡཏོ, པཉྩཝིདྷོ པཉྩཱབྷིནནྡནཝཱུཔསམཏོ, ཚབྦིདྷོ ཚཏཎྷཱཀཱཡཀྑཡབྷེདཏོ. མགྒོཔི ཨེཀཝིདྷོ བྷཱཝེཏབྦཏོ, དུཝིདྷོ སམཐཝིཔསྶནཱབྷེདཏོ དསྶནབྷཱཝནཱབྷེདཏོ ཝཱ ¶ , ཏིཝིདྷོ ཁནྡྷཏྟཡབྷེདཏོ. ཨཡཉྷི སཔྤདེསཏྟཱ ནགརཾ ཝིཡ རཛྫེན ནིཔྤདེསེཧི ཏཱིཧི ཁནྡྷེཧི སངྒཧིཏོ. ཡཐཱཧ –

‘‘ན ཁོ, ཨཱཝུསོ ཝིསཱཁ, ཨརིཡེན ཨཊྛངྒིཀེན མགྒེན ཏཡོ ཁནྡྷཱ སངྒཧིཏཱ. ཏཱིཧི ཙ ཁོ, ཨཱཝུསོ ཝིསཱཁ, ཁནྡྷེཧི ཨརིཡོ ཨཊྛངྒིཀོ མགྒོ སངྒཧིཏོ. ཡཱ ཙཱཝུསོ ཝིསཱཁ, སམྨཱཝཱཙཱ, ཡོ ཙ སམྨཱཀམྨནྟོ, ཡོ ཙ སམྨཱཨཱཛཱིཝོ – ཨིམེ དྷམྨཱ སཱིལཀྑནྡྷེ སངྒཧིཏཱ; ཡོ ཙ སམྨཱཝཱཡཱམོ, ཡཱ ཙ སམྨཱསཏི, ཡོ ཙ སམྨཱསམཱདྷི – ཨིམེ དྷམྨཱ སམཱདྷིཀྑནྡྷེ སངྒཧིཏཱ; ཡཱ ཙ སམྨཱདིཊྛི, ཡོ ཙ སམྨཱསངྐཔྤོ – ཨིམེ དྷམྨཱ པཉྙཱཀྑནྡྷེ ¶ སངྒཧིཏཱ’’ཏི (མ. ནི. ༡.༤༦༢).

ཨེཏྠ ཧི སམྨཱཝཱཙཱདཡོ ཏཡོ སཱིལམེཝ. ཏསྨཱ ཏེ སཛཱཏིཏོ སཱིལཀྑནྡྷེན སངྒཧིཏཱ. ཀིཉྩཱཔི ཧི པཱལི༹ཡཾ སཱིལཀྑནྡྷེཏི བྷུམྨེན ནིདྡེསོ ཀཏོ, ཨཏྠོ པན ཀརཎཝསེནེཝ ཝེདིཏབྦོ. སམྨཱཝཱཡཱམཱདཱིསུ པན ཏཱིསུ སམཱདྷི ཨཏྟནོ དྷམྨཏཱཡ ཨཱརམྨཎེ ཨེཀགྒབྷཱཝེན ཨཔྤེཏུཾ ན སཀྐོཏི, ཝཱིརིཡེ པན པགྒཧཀིཙྩཾ སཱདྷེནྟེ སཏིཡཱ ཙ ཨཔིལཱཔནཀིཙྩཾ སཱདྷེནྟིཡཱ ལདྡྷཱུཔཀཱརོ ཧུཏྭཱ སཀྐོཏི.

ཏཏྲཱཡཾ ཨུཔམཱ – ཡཐཱ ཧི ནཀྑཏྟཾ ཀཱིལི༹སྶཱམཱཏི ཨུཡྻཱནཾ པཝིཊྛེསུ ཏཱིསུ སཧཱཡེསུ ཨེཀོ སུཔུཔྥིཏཾ ཙམྤཀརུཀྑཾ དིསྭཱ ཧཏྠཾ ཨུཀྑིཔིཏྭཱཔི གཧེཏུཾ ན སཀྐུཎེཡྻ. ཨཐསྶ དུཏིཡོ ¶ ཨོནམིཏྭཱ པིཊྛིཾ དདེཡྻ. སོ ཏསྶ པིཊྛིཡཾ ཋཏྭཱཔི ཀམྤམཱནོ གཧེཏུཾ ན སཀྐུཎེཡྻ. ཨཐསྶ ཨིཏརོ ཨཾསཀཱུཊཾ ཨུཔནཱམེཡྻ. སོ ཨེཀསྶ པིཊྛིཡཾ ཋཏྭཱ ཨེཀསྶ ཨཾསཀཱུཊཾ ཨོལུབྦྷ ཡཐཱརུཙི པུཔྥཱནི ཨོཙིནིཏྭཱ པིལ༹ནྡྷིཏྭཱ ནཀྑཏྟཾ ཀཱིལེ༹ཡྻ. ཨེཝཾསམྤདམིདཾ དཊྛབྦཾ.

ཨེཀཏོ ཨུཡྻཱནཾ པཝིཊྛཱ ཏཡོ སཧཱཡཱ ཝིཡ ཧི ཨེཀཏོ ཛཱཏཱ སམྨཱཝཱཡཱམཱདཡོ ཏཡོ དྷམྨཱ, སུཔུཔྥིཏཙམྤཀརུཀྑོ ཝིཡ ཨཱརམྨཎཾ, ཧཏྠཾ ཨུཀྑིཔིཏྭཱཔི གཧེཏུཾ ཨསཀྐོནྟོ ཝིཡ ཨཏྟནོ དྷམྨཏཱཡ ཨཱརམྨཎེ ཨེཀགྒབྷཱཝེན ཨཔྤེཏུཾ ཨསཀྐོནྟོ སམཱདྷི, པིཊྛིཾ དཏྭཱ ཨོནཏསཧཱཡོ ཝིཡ ཝཱཡཱམོ, ཨཾསཀཱུཊཾ དཏྭཱ ཋིཏསཧཱཡོ ¶ ཝིཡ སཏི. ཡཐཱ ཏེསུ ཨེཀསྶ པིཊྛིཡཾ ཋཏྭཱ ཨེཀསྶ ཨཾསཀཱུཊཾ ཨོལུབྦྷ ཨིཏརོ ཡཐཱརུཙི པུཔྥཾ གཧེཏུཾ སཀྐོཏི, ཨེཝམེཝ ཝཱིརིཡེ པགྒཧཀིཙྩཾ སཱདྷེནྟེ སཏིཡཱ ཙ ཨཔིལཱཔནཀིཙྩཾ སཱདྷེནྟིཡཱ ལདྡྷཱུཔཀཱརོ སམཱདྷི སཀྐོཏི ཨཱརམྨཎེ ཨེཀགྒབྷཱཝེན ཨཔྤེཏུཾ. ཏསྨཱ སམཱདྷིཡེཝེཏྠ སཛཱཏིཏོ སམཱདྷིཀྑནྡྷེན སངྒཧིཏོ. ཝཱཡཱམསཏིཡོ པན ཀིརིཡཏོ སངྒཧིཏཱ ཧོནྟི.

སམྨཱདིཊྛིསམྨཱསངྐཔྤེསུཔི པཉྙཱ ཨཏྟནོ དྷམྨཏཱཡ ‘ཨནིཙྩཾ དུཀྑཾ ཨནཏྟཱ’ཏི ཨཱརམྨཎཾ ནིཙྪེཏུཾ ན སཀྐོཏི, ཝིཏཀྐེ པན ཨཱཀོཊེཏྭཱ ཨཱཀོཊེཏྭཱ དེནྟེ སཀྐོཏི. ཀཐཾ? ཡཐཱ ཧི ཧེརཉྙིཀོ ཀཧཱཔཎཾ ཧཏྠེ ཋཔེཏྭཱ སབྦབྷཱགེསུ ¶ ཨོལོཀེཏུཀཱམོ སམཱནོཔི ན ཙཀྑུཏལེནེཝ པརིཝཏྟེཏུཾ སཀྐོཏི, ཨངྒུལིཔབྦེཧི པན པརིཝཏྟེཏྭཱ པརིཝཏྟེཏྭཱ ཨིཏོ ཙིཏོ ཙ ཨོལོཀེཏུཾ སཀྐོཏི; ཨེཝམེཝ ན པཉྙཱ ཨཏྟནོ དྷམྨཏཱཡ ཨནིཙྩཱདིཝསེན ཨཱརམྨཎཾ ནིཙྪེཏུཾ སཀྐོཏི, ཨབྷིནིརོཔནལཀྑཎེན པན ཨཱཧནནཔརིཡཱཧནནརསེན ཝིཏཀྐེན ཨཱཀོཊེནྟེན ཝིཡ པརིཝཏྟེནྟེན ཝིཡ ཙ ཨཱདཱཡ ཨཱདཱཡ དིནྣམེཝ ནིཙྪེཏུཾ སཀྐོཏི. ཏསྨཱ ཨིདྷཱཔི སམྨཱདིཊྛིཡེཝ སཛཱཏིཏོ པཉྙཱཀྑནྡྷེན སངྒཧིཏཱ, སམྨཱསངྐཔྤོ པན ཀིརིཡཏོ སངྒཧིཏོ ཧོཏི. ཨིཏི ཨིམེཧི ཏཱིཧི ཁནྡྷེཧི མགྒོ སངྒཧཾ གཙྪཏི. ཏེན ཝུཏྟཾ – ‘‘ཏིཝིདྷོ ཁནྡྷཏྟཡབྷེདཏོ’’ཏི. ཙཏུབྦིདྷོ སོཏཱཔཏྟིམགྒཱདིཝསེན.

ཨཔིཙ སབྦཱནེཝ སཙྩཱནི ཨེཀཝིདྷཱནི ཨཝིཏཐཏྟཱ ཨབྷིཉྙེཡྻཏྟཱ ཝཱ, དུཝིདྷཱནི ལོཀིཡལོཀུཏྟརཏོ སངྑཏཱསངྑཏཏོ ཙ, ཏིཝིདྷཱནི དསྶནབྷཱཝནཱཧི པཧཱཏབྦཏོ ཨཔྤཧཱཏབྦཏོ ནེཝཔཧཱཏབྦནཱཔཧཱཏབྦཏོ ¶ ཙ, ཙཏུབྦིདྷཱནི པརིཉྙེཡྻཱདིབྷེདཏོཏི. ཨེཝམེཏྠ ‘ཨེཀཝིདྷཱདཱིཧི’ ཝིནིཙྪཡོ ཝེདིཏབྦོ.

‘སབྷཱགཝིསབྷཱགཏོ’ཏི སབྦཱནེཝ ཙ སཙྩཱནི ཨཉྙམཉྙཾ སབྷཱགཱནི ཨཝིཏཐཏོ ཨཏྟསུཉྙཏོ དུཀྐརཔཊིཝེདྷཏོ ཙ. ཡཐཱཧ –

‘‘ཏཾ ཀིཾ མཉྙསི, ཨཱནནྡ, ཀཏམཾ ནུ ཁོ དུཀྐརཏརཾ ཝཱ དུརབྷིསམྦྷཝཏརཾ ཝཱ – ཡོ དཱུརཏོཝ སུཁུམེན ཏཱལཙྪིགྒལེ༹ན ཨསནཾ ཨཏིཔཱཏེཡྻ པོངྑཱནུཔོངྑཾ ཨཝིརཱདྷིཏཾ, ཡོ ཝཱ སཏྟདྷཱ ¶ བྷིནྣསྶ ཝཱལསྶ ཀོཊིཡཱ ཀོཊིཾ པཊིཝིཛ྄ཛྷེཡྻཱ’’ཏི? ‘‘ཨེཏདེཝ, བྷནྟེ, དུཀྐརཏརཉྩེཝ དུརབྷིསམྦྷཝཏརཉྩ – ཡོ སཏྟདྷཱ བྷིནྣསྶ ཝཱལསྶ ཀོཊིཡཱ ཀོཊིཾ པཊིཝིཛ྄ཛྷེཡྻཱ’’ཏི. ‘‘ཏཏོ ཁོ ཏེ, ཨཱནནྡ, དུཔྤཊིཝིཛ྄ཛྷཏརཾ པཊིཝིཛ྄ཛྷནྟི ཡེ ཨིདཾ དུཀྑནྟི ཡཐཱབྷཱུཏཾ པཊིཝིཛ྄ཛྷནྟི…པེ… ཨཡཾ དུཀྑནིརོདྷགཱམིནཱི པཊིཔདཱཏི ཡཐཱབྷཱུཏཾ པཊིཝིཛ྄ཛྷནྟཱི’’ཏི (སཾ. ནི. ༥.༡༡༡༥).

ཝིསབྷཱགཱནི སལཀྑཎཝཝཏྠཱནཏོ. པུརིམཱནི ཙ དྭེ སབྷཱགཱནི དུརཝགཱཧཏྠེན གམྦྷཱིརཏྟཱ ལོཀིཡཏྟཱ སཱསཝཏྟཱ ཙ, ཝིསབྷཱགཱནི ཕལཧེཏུབྷེདཏོ ¶ པརིཉྙེཡྻཔྤཧཱཏབྦཏོ ཙ. པཙྪིམཱནིཔི དྭེ སབྷཱགཱནི གམྦྷཱིརཏྠེན དུརཝགཱཧཏྟཱ ལོཀུཏྟརཏྟཱ ཨནཱསཝཏྟཱ ཙ, ཝིསབྷཱགཱནི ཝིསཡཝིསཡཱིབྷེདཏོ སཙྪིཀཱཏབྦབྷཱཝེཏབྦཏོ ཙ. པཋམཏཏིཡཱནི ཙཱཔི སབྷཱགཱནི ཕལཱཔདེསཏོ, ཝིསབྷཱགཱནི སངྑཏཱསངྑཏཏོ. དུཏིཡཙཏུཏྠཱནི ཙཱཔི སབྷཱགཱནི ཧེཏུཨཔདེསཏོ, ཝིསབྷཱགཱནི ཨེཀནྟཀུསལཱཀུསལཏོ. པཋམཙཏུཏྠཱནི ཙཱཔི སབྷཱགཱནི སངྑཏཏོ, ཝིསབྷཱགཱནི ལོཀིཡལོཀུཏྟརཏོ. དུཏིཡཏཏིཡཱནི ཙཱཔི སབྷཱགཱནི ནེཝསེཀྑཱནཱསེཀྑབྷཱཝཏོ, ཝིསབྷཱགཱནི སཱརམྨཎཱནཱརམྨཎཏོ.

ཨིཏི ཨེཝཾ པཀཱརེཧི, ནཡེཧི ཙ ཝིཙཀྑཎོ;

ཝིཛཉྙཱ ཨརིཡསཙྩཱནཾ, སབྷཱགཝིསབྷཱགཏནྟི.

སུཏྟནྟབྷཱཛནཱིཡཨུདྡེསཝཎྞནཱ ནིཊྛིཏཱ.

༡. དུཀྑསཙྩནིདྡེསཝཎྞནཱ

ཛཱཏིནིདྡེསོ

༡༩༠. ཨིདཱནི ¶ སངྑེཔཏོ ཨུདྡིཊྛཱནི དུཀྑཱདཱིནི ཝིབྷཛིཏྭཱ དསྶེཏུཾ ཨཡཾ ཏཏྠ ཀཏམཾ དུཀྑཾ ཨརིཡསཙྩཾ ཛཱཏིཔི དུཀྑཱཏི ནིདྡེསཝཱརོ ཨཱརདྡྷོ. ཏཏྠ ཛཱཏི ཝེདིཏབྦཱ, ཛཱཏིཡཱ དུཀྑཊྛོ ཝེདིཏབྦོ; ཛརཱ, མརཎཾ, སོཀོ ¶ , པརིདེཝོ, དུཀྑཾ, དོམནསྶཾ, ཨུཔཱཡཱསོ, ཨཔྤིཡསམྤཡོགོ, པིཡཝིཔྤཡོགོ ཝེདིཏབྦོ; ཨཔྤིཡསམྤཡོགསྶ པིཡཝིཔྤཡོགསྶ དུཀྑཊྛོ ཝེདིཏབྦོ; ཨིཙྪཱ ཝེདིཏབྦཱ, ཨིཙྪཱཡ དུཀྑཊྛོ ཝེདིཏབྦོ; ཁནྡྷཱ ཝེདིཏབྦཱ, ཁནྡྷཱནཾ དུཀྑཊྛོ ཝེདིཏབྦོ.

ཏཏྠ དུཀྑསྶ ཨརིཡསཙྩསྶ ཀཐནཏྠཱཡ ཨཡཾ མཱཏིཀཱ – ཨིདཉྷི དུཀྑཾ ནཱམ ཨནེཀཾ ནཱནཔྤཀཱརཾ, སེཡྻཐིདཾ – དུཀྑདུཀྑཾ, ཝིཔརིཎཱམདུཀྑཾ, སངྑཱརདུཀྑཾ, པཊིཙྪནྣདུཀྑཾ, ཨཔྤཊིཙྪནྣདུཀྑཾ, པརིཡཱཡདུཀྑཾ, ནིཔྤརིཡཱཡདུཀྑནྟི.

ཏཏྠ ཀཱཡིཀཙེཏསིཀཱ དུཀྑཝེདནཱ སབྷཱཝཏོ ཙ ནཱམཏོ ཙ དུཀྑཏྟཱ ‘དུཀྑདུཀྑཾ’ ནཱམ. སུཁཝེདནཱ ཝིཔརིཎཱམེན དུཀྑུཔྤཏྟིཧེཏུཏོ ‘ཝིཔརིཎཱམདུཀྑཾ’ ནཱམ. ཨུཔེཀྑཱཝེདནཱ ཙེཝ ཨཝསེསཱ ཙ ཏེབྷཱུམཀཱ སངྑཱརཱ ཨུདཡབྦཡཔཱིལི༹ཏཏྟཱ ‘སངྑཱརདུཀྑཾ’ ནཱམ. ཏཐཱ པཱིལ༹ནཾ པན མགྒཕལཱནམྤི ཨཏྠི. ཏསྨཱ ཨེཏེ དྷམྨཱ དུཀྑསཙྩཔརིཡཱཔནྣཏྟེན སངྑཱརདུཀྑཾ ནཱམཱཏི ཝེདིཏབྦཱ. ཀཎྞསཱུལདནྟསཱུལརཱགཛཔརིལཱ༹ཧདོསཛཔརིལཱ༹ཧཱདི ཀཱཡིཀཙེཏསིཀོ ཨཱབཱདྷོ པུཙྪིཏྭཱ ཛཱནིཏབྦཏོ ¶ ཨུཔཀྐམསྶ ཙ ཨཔཱཀཊབྷཱཝཏོ ‘པཊིཙྪནྣདུཀྑཾ’ ནཱམ, ཨཔཱཀཊདུཀྑནྟིཔི ཝུཙྩཏི. དྭཏྟིཾསཀམྨཀཱརཎཱདིསམུཊྛཱནོ ཨཱབཱདྷོ ཨཔུཙྪིཏྭཱཝ ཛཱནིཏབྦཏོ ཨུཔཀྐམསྶ ཙ པཱཀཊབྷཱཝཏོ ‘ཨཔྤཊིཙྪནྣདུཀྑཾ’ ནཱམ, པཱཀཊདུཀྑནྟིཔི ཝུཙྩཏི. ཋཔེཏྭཱ དུཀྑདུཀྑཾ སེསཾ དུཀྑསཙྩཝིབྷངྒེ ཨཱགཏཾ ཛཱཏིཨཱདི སབྦམྤི ཏསྶ ཏསྶ དུཀྑསྶ ཝཏྠུབྷཱཝཏོ ‘པརིཡཱཡདུཀྑཾ’ ནཱམ. དུཀྑདུཀྑཾ ‘ནིཔྤརིཡཱཡདུཀྑཾ’ ནཱམ.

ཏཏྠ པརིཡཱཡདུཀྑཾ ནིཔྤརིཡཱཡདུཀྑནྟི ཨིམསྨིཾ པདདྭཡེ ཋཏྭཱ དུཀྑཾ ཨརིཡསཙྩཾ ཀཐེཏབྦཾ. ཨརིཡསཙྩཉྩ ནཱམེཏཾ པཱལི༹ཡཾ སངྑེཔཏོཔི ཨཱགཙྪཏི ཝིཏྠཱརཏོཔི. སངྑེཔཏོ ཨཱགཏཊྛཱནེ སངྑེཔེནཔི ཝིཏྠཱརེནཔི ཀཐེཏུཾ ཝཊྚཏི ¶ . ཝིཏྠཱརཏོ ཨཱགཏཊྛཱནེ པན ཝིཏྠཱརེནེཝ ཀཐེཏུཾ ཝཊྚཏི, ན སངྑེཔེན. ཏཾ ཨིདཾ ཨིམསྨིཾ ཋཱནེ ཝིཏྠཱརེན ཨཱགཏནྟི ཝིཏྠཱརེནེཝ ཀཐེཏབྦཾ. ཏསྨཱ ཡཾ ཏཾ ནིདྡེསཝཱརེ ‘‘ཏཏྠ ཀཏམཾ དུཀྑཾ ཨརིཡསཙྩཾ? ཛཱཏིཔི དུཀྑཱ’’ཏིཨཱདཱིནི པདཱནི གཧེཏྭཱ ‘‘ཛཱཏི ཝེདིཏབྦཱ, ཛཱཏིཡཱ དུཀྑཊྛོ ཝེདིཏབྦོ’’ཏིཨཱདི ཝུཏྟཾ. ཏཏྠ ཛཱཏིཨཱདཱིནི ཏཱཝ ‘‘ཏཏྠ ཀཏམཱ ཛཱཏི? ཡཱ ཏེསཾ ཏེསཾ སཏྟཱནཾ ཏམྷི ཏམྷི སཏྟནིཀཱཡེ ཛཱཏི སཉྫཱཏཱི’’ཏི ཨིམསྶ པན པདབྷཱཛནཱིཡསྶ ཝསེན ཝེདིཏབྦཱནི.

༡༩༡. ཏཏྲཱཡཾ ¶ ཨཏྠཝཎྞནཱ – ཏེསཾ ཏེསཾ སཏྟཱནནྟི ཨཡཾ སངྑེཔཏོ ཨནེཀེསཾ སཏྟཱནཾ སཱདྷཱརཎནིདྡེསོ. ཡཱ དེཝདཏྟསྶ ཛཱཏི, ཡཱ སོམདཏྟསྶ ཛཱཏཱིཏི ཨེཝཉྷི དིཝསམྤི ཀཐིཡམཱནེ ནེཝ སཏྟཱ པརིཡཱདཱནཾ གཙྪནྟི, ན སབྦཾ ཨཔརཏྠདཱིཔནཾ སིཛ྄ཛྷཏི. ཨིམེཧི པན དྭཱིཧི པདེཧི ན ཀོཙི སཏྟོ ཨཔརིཡཱདིནྣོ ཧོཏི, ན ཀིཉྩི ཨཔརཏྠདཱིཔནཾ ན སིཛ྄ཛྷཏི. ཏེན ཝུཏྟཾ – ‘‘ཡཱ ཏེསཾ ཏེསཾ སཏྟཱན’’ནྟི. ཏམྷི ཏམྷཱིཏི ཨཡཾ ཛཱཏིགཏིཝསེན ཨནེཀེསཾ སཏྟནིཀཱཡཱནཾ སཱདྷཱརཎནིདྡེསོ. སཏྟནིཀཱཡེཏི སཏྟཱནཾ ནིཀཱཡེ, སཏྟགྷཊཱཡཾ སཏྟསམཱུཧེཏི ཨཏྠོ.

ཛཱཏཱིཏི ཨཡཾ ཛཱཏིསདྡོ ཨནེཀཏྠོ. ཏཐཱ ཧེས ‘‘ཨེཀམྤི ཛཱཏིཾ, དྭེཔི ཛཱཏིཡོ’’ཏི (པཱརཱ. ༡༢; མ. ནི. ༢.༢༥༧) ཨེཏྠ བྷཝེ ཨཱགཏོ. ‘‘ཨཏྠི ཝིསཱཁེ ¶ , ནིགཎྛཱ ནཱམ སམཎཛཱཏིཀཱ’’ཏི (ཨ. ནི. ༣.༧༡) ཨེཏྠ ནིཀཱཡེ. ‘‘ཏིརིཡཱ ནཱམ ཏིཎཛཱཏི ནཱབྷིཡཱ ཨུགྒནྟྭཱ ནབྷཾ ཨཱཧཙྩ ཋིཏཱ ཨཧོསཱི’’ཏི (ཨ. ནི. ༥.༡༩༦) ཨེཏྠ པཉྙཏྟིཡཾ. ‘‘ཛཱཏི དྭཱིཧི ཁནྡྷེཧི སངྒཧིཏཱ’’ཏི (དྷཱཏུ. ༧༡) ཨེཏྠ སངྑཏལཀྑཎེ. ‘‘ཡཾ, བྷིཀྑཝེ, མཱཏུཀུཙྪིམྷི པཋམཾ ཙིཏྟཾ ཨུཔྤནྣཾ, པཋམཾ ཝིཉྙཱཎཾ པཱཏུབྷཱུཏཾ, ཏདུཔཱདཱཡ སཱཝསྶ ཛཱཏཱི’’ཏི (མཧཱཝ. ༡༢༤) ཨེཏྠ པཊིསནྡྷིཡཾ. ‘‘སམྤཏིཛཱཏོ, ཨཱནནྡ, བོདྷིསཏྟོ’’ཏི (མ. ནི. ༣.༢༠༧) ཨེཏྠ པསཱུཏིཡཾ. ‘‘ཨནུཔཀྐུཊྛོ ཛཱཏིཝཱདེནཱ’’ཏི (དཱི. ནི. ༡.༣༣༡) ཨེཏྠ ཀུལེ. ‘‘ཡཏོཧཾ, བྷགིནི, ཨརིཡཱཡ ཛཱཏིཡཱ ཛཱཏོ’’ཏི (མ. ནི. ༢.༣༥༡) ཨེཏྠ ཨརིཡསཱིལེ. ཨིདྷ པནཱཡཾ སཝིཀཱརེསུ པཋམཱབྷིནིབྦཏྟཀྑནྡྷེསུ ཝཏྟཏི. ཏསྨཱ ཛཱཡམཱནཀཝསེན ཛཱཏཱིཏི ཨིདམེཏྠ སབྷཱཝཔཙྩཏྟཾ. སཉྫཱཡནཝསེན སཉྫཱཏཱིཏི ཨུཔསགྒེན པདཾ ཝཌྜྷིཏཾ. ཨོཀྐམནཝསེན ཨོཀྐནྟི. ཛཱཡནཊྛེན ཝཱ ཛཱཏི, སཱ ཨཔརིཔུཎྞཱཡཏནཝསེན ཡུཏྟཱ. སཉྫཱཡནཊྛེན སཉྫཱཏི, སཱ པརིཔུཎྞཱཡཏནཝསེན ཡུཏྟཱ. ཨོཀྐམནཊྛེན ཨོཀྐནྟི, སཱ ཨཎྜཛཛལཱབུཛཝསེན ཡུཏྟཱ. ཏེ ཧི ཨཎྜཀོསཉྩ ཝཏྠིཀོསཉྩ ¶ ཨོཀྐམནྟི, ཨོཀྐམནྟཱཔི པཝིསནྟཱ ཝིཡ པཊིསནྡྷིཾ གཎྷནྟི. ཨབྷིནིབྦཏྟནཊྛེན ཨབྷིནིབྦཏྟི. སཱ སཾསེདཛཨོཔཔཱཏིཀཝསེན ཡུཏྟཱ. ཏེ ཧི པཱཀཊཱ ཨེཝ ཧུཏྭཱ ནིབྦཏྟནྟི. ཨཡཾ ཏཱཝ སམྨུཏིཀཐཱ.

ཨིདཱནི ¶ པརམཏྠཀཐཱ ཧོཏི. ཁནྡྷཱ ཨེཝ ཧི པརམཏྠཏོ པཱཏུབྷཝནྟི, ན སཏྟཱ. ཏཏྠ ཙ ཁནྡྷཱནནྟི ཨེཀཝོཀཱརབྷཝེ ཨེཀསྶ, ཙཏུཝོཀཱརབྷཝེ ཙཏུནྣཾ, པཉྩཝོཀཱརབྷཝེ པཉྩནྣཾ གཧཎཾ ཝེདིཏབྦཾ. པཱཏུབྷཱཝོཏི ཨུཔྤཏྟི. ཨཱཡཏནཱནནྟི ཨེཏྠ ཏཏྲ ཏཏྲ ཨུཔྤཛྫམཱནཱཡཏནཝསེན སངྒཧོ ཝེདིཏབྦོ. པཊིལཱབྷོཏི སནྟཏིཡཾ པཱཏུབྷཱཝོཡེཝ; པཱཏུབྷཝནྟཱནེཝ ཧི ཏཱནི པཊིལདྡྷཱནི ནཱམ ཧོནྟི. ཨཡཾ ཝུཙྩཏི ཛཱཏཱིཏི ཨཡཾ ཛཱཏི ནཱམ ཀཐིཡཏི. སཱ པནེསཱ ཏཏྠ ཏཏྠ བྷཝེ པཋམཱབྷིནིབྦཏྟིལཀྑཎཱ, ནཱིཡྻཱཏནརསཱ, ཨཏཱིཏབྷཝཏོ ཨིདྷ ཨུམྨུཛྫནཔཙྩུཔཊྛཱནཱ, ཕལཝསེན དུཀྑཝིཙིཏྟཏཱཔཙྩུཔཊྛཱནཱ ཝཱ.

ཨིདཱནི ‘ཛཱཏིཡཱ དུཀྑཊྛོ ཝེདིཏབྦོ’ཏི ཨཡཉྷི ཛཱཏི སཡཾ ན དུཀྑཱ, དུཀྑུཔྤཏྟིཡཱ པན ཝཏྠུབྷཱཝེན དུཀྑཱཏི ¶ ཝུཏྟཱ. ཀཏརདུཀྑསྶ པནཱཡཾ ཝཏྠཱུཏི? ཡཾ ཏཾ བཱལཔཎྜིཏསུཏྟཱདཱིསུ (མ. ནི. ༣.༢༤༦ ཨཱདཡོ) བྷགཝཏཱཔི ཨུཔམཱཝསེན པཀཱསིཏཾ ཨཱཔཱཡིཀཾདུཀྑཾ, ཡཉྩ སུགཏིཡཾ མནུསྶལོཀེ གབྦྷོཀྐནྟིམཱུལཀཱདིབྷེདཾ དུཀྑཾ ཨུཔྤཛྫཏི, ཏསྶ སབྦསྶཱཔི ཨེསཱ ཝཏྠུ. ཏཏྲིདཾ གབྦྷོཀྐནྟིམཱུལཀཱདིབྷེདཾ དུཀྑཾ – ཨཡཉྷི སཏྟོ མཱཏུཀུཙྪིམྷི ནིབྦཏྟམཱནོ ན ཨུཔྤལཔདུམཔུཎྜརཱིཀཱདཱིསུ ནིབྦཏྟཏི. ཨཐ ཁོ ཧེཊྛཱ ཨཱམཱསཡསྶ ཨུཔརི པཀྐཱསཡསྶ ཨུདརཔཊལཔིཊྛིཀཎྜཀཱནཾ ཝེམཛ྄ཛྷེ པརམསམྦཱདྷེ ཏིབྦནྡྷཀཱརེ ནཱནཱཀུཎཔགནྡྷཔརིབྷཱཝིཏེ ཨསུཙིཔརམདུགྒནྡྷཔཝནཝིཙརིཏེ ཨདྷིམཏྟཛེགུཙྪེ ཀུཙྪིཔྤདེསེ པཱུཏིམཙྪཔཱུཏིཀུམྨཱསཙནྡནིཀཱདཱིསུ ཀིམི ཝིཡ ནིབྦཏྟཏི. སོ ཏཏྠ ནིབྦཏྟོ དས མཱསེ མཱཏུཀུཙྪིསམྦྷཝེན ཨུསྨནཱ པུཊཔཱཀཾ ཝིཡ པཙྩམཱནོ པིཊྛཔིཎྜི ཝིཡ སེདིཡམཱནོ སམིཉྫནཔསཱརཎཱདིརཧིཏོ ཨདྷིམཏྟཾ དུཀྑཾ པཙྩནུབྷོཏཱིཏི. ཨིདཾ ཏཱཝ ‘གབྦྷོཀྐནྟིམཱུལཀཾ’ དུཀྑཾ.

ཡཾ པན སོ མཱཏུ སཧསཱ ཨུཔཀྑལནགམནནིསཱིདནཨུཊྛཱནཔརིཝཏྟནཱདཱིསུ སུརཱདྷུཏྟཧཏྠགཏོ ཨེལ༹ཀོ ཝིཡ ཨཧིགུཎྛིཀཧཏྠགཏོ སཔྤཔོཏཀོ ཝིཡ ཙ ཨཱཀཌྜྷནཔརིཀཌྜྷནཨོདྷུནནནིདྡྷུནནཱདིནཱ ཨུཔཀྐམེན ཨདྷིམཏྟཾ དུཀྑམནུབྷཝཏི, ཡཉྩ མཱཏུ སཱིཏུདཀཔཱནཀཱལེ སཱིཏནརཀཱུཔཔནྣོ ¶ ཝིཡ, ཨུཎྷཡཱགུབྷཏྟཱདིཨཛ྄ཛྷོཧརཎཀཱལེ ཨངྒཱརཝུཊྛིསམྤརིཀིཎྞོ ཝིཡ, ལོཎམྦིལཱདིཨཛ྄ཛྷོཧརཎཀཱལེ ཁཱརཱཔཊིཙྪཀཱདིཀམྨཀཱརཎཔྤཏྟོ ཝིཡ ཏིབྦཾ དུཀྑམནུབྷོཏི – ཨིདཾ ‘གབྦྷཔརིཧརཎམཱུལཀཾ’ དུཀྑཾ.

ཡཾ ¶ པནསྶ མཱུལ༹ྷགབྦྷཱཡ མཱཏུཡཱ མིཏྟཱམཙྩསུཧཛྫཱདཱིཧིཔི ཨདསྶནཱརཧེ དུཀྑུཔྤཏྟིཊྛཱནེ ཚེདནཕཱལནཱདཱིཧི དུཀྑཾ ཨུཔྤཛྫཏི – ཨིདཾ ‘གབྦྷཝིཔཏྟིམཱུལཀཾ’ དུཀྑཾ. ཡཾ ཝིཛཱཡམཱནཱཡ མཱཏུཡཱ ཀམྨཛེཧི ཝཱཏེཧི པརིཝཏྟེཏྭཱ ནརཀཔཔཱཏཾ ཝིཡ ཨཏིབྷཡཱནཀཾ ཡོནིམགྒཾ པཊིཔཱཏིཡམཱནསྶ ¶ པརམསམྦཱདྷེན ཡོནིམུཁེན ཏཱལ༹ཙྪིགྒལེ༹ན ཝིཡ ནིཀྐཌྜྷིཡམཱནསྶ མཧཱནཱགསྶ ནརཀསཏྟསྶ ཝིཡ ཙ སངྒྷཱཊཔབྦཏེཧི ཝིཙུཎྞིཡམཱནསྶ དུཀྑཾ ཨུཔྤཛྫཏི – ཨིདཾ ‘ཝིཛཱཡནམཱུལཀཾ’ དུཀྑཾ. ཡཾ པན ཛཱཏསྶ ཏརུཎཝཎསདིསསྶ སུཀུམཱརསརཱིརསྶ ཧཏྠགྒཧཎནྷཱཔནདྷོཝནཙོལ༹པརིམཛྫནཱདིཀཱལེ སཱུཙིམུཁཁུརདྷཱརཝིཛ྄ཛྷནཕཱལནསདིསཾ དུཀྑཾ ཨུཔྤཛྫཏི – ཨིདཾ མཱཏུཀུཙྪིཏོ ‘བཧི ནིཀྑམནམཱུལཀཾ’ དུཀྑཾ. ཡཾ ཏཏོ པརཾ པཝཏྟིཡཾ ཨཏྟནཱཝ ཨཏྟཱནཾ ཝདྷནྟསྶ, ཨཙེལཀཝཏཱདིཝསེན ཨཱཏཱཔནཔརིཏཱཔནཱནུཡོགམནུཡུཏྟསྶ, ཀོདྷཝསེན ཨབྷུཉྫནྟསྶ, ཨུབྦནྡྷནྟསྶ ཙ དུཀྑཾ ཧོཏི – ཨིདཾ ‘ཨཏྟཱུཔཀྐམམཱུལཀཾ’ དུཀྑཾ.

ཡཾ པན པརཏོ ཝདྷབནྡྷནཱདཱིནི ཨནུབྷཝནྟསྶ དུཀྑཾ ཨུཔྤཛྫཏི – ཨིདཾ ‘པརཱུཔཀྐམམཱུལཀཾ’ དུཀྑནྟི. ཨིཏི ཨིམསྶ སབྦསྶཱཔི དུཀྑསྶ ཨཡཾ ཛཱཏི ཝཏྠུམེཝ ཧོཏཱིཏི. ཏེནེཏཾ ཝུཙྩཏི –

ཛཱཡེཐ ནོ ཙེ ནརཀེསུ སཏྟོ,

ཏཏྠགྒིདཱཧཱདིཀམཔྤསཡ྄ཧཾ;

ལབྷེཐ དུཀྑཾ ནུ ཀུཧིཾ པཏིཊྛཾ,

ཨིཙྩཱཧ དུཀྑཱཏི མུནཱིདྷ ཛཱཏི.

དུཀྑཾ ཏིརཙྪེསུ ཀསཱཔཏོད-

དཎྜཱབྷིགྷཱཏཱདིབྷཝཾ ཨནེཀཾ;

ཡཾ ¶ ཏཾ ཀཐཾ ཏཏྠ བྷཝེཡྻ ཛཱཏིཾ,

ཝིནཱ ཏཧིཾ ཛཱཏི ཏཏོཔི དུཀྑཱ.

པེཏེསུ དུཀྑཾ པན ཁུཔྤིཔཱསཱ-

ཝཱཏཱཏཔཱདིཔྤབྷཝཾ ཝིཙིཏྟཾ;

ཡསྨཱ ཨཛཱཏསྶ ན ཏཏྠ ཨཏྠི,

ཏསྨཱཔི དུཀྑཾ མུནི ཛཱཏིམཱཧ.

ཏིབྦནྡྷཀཱརེ ¶ ཙ ཨསཡ྄ཧསཱིཏེ,

ལོཀནྟརེ ཡཾ ཨསུརེསུ དུཀྑཾ;

ན ཏཾ བྷཝེ ཏཏྠ ན ཙསྶ ཛཱཏི,

ཡཏོ ཨཡཾ ཛཱཏི ཏཏོཔི དུཀྑཱ.

ཡཉྩཱཔི ¶ གཱུཐནརཀེ ཝིཡ མཱཏུགབྦྷེ,

སཏྟོ ཝསཾ ཙིརམཏོ བཧི ནིཀྑམནཉྩ;

པཔྤོཏི དུཀྑམཏིགྷོརམིདམྤི ནཏྠི,

ཛཱཏིཾ ཝིནཱ ཨིཏིཔི ཛཱཏིརཡཉྷི དུཀྑཱ.

ཀིཾ བྷཱསིཏེན བཧུནཱ ནནུ ཡཾ ཀུཧིཉྩི,

ཨཏྠཱིདྷ ཀིཉྩིདཔི དུཀྑམིདཾ ཀདཱཙི;

ནེཝཏྠི ཛཱཏིཝིརཧེ ཡདཏོ མཧེསཱི,

དུཀྑཱཏི སབྦཔཋམཾ ཨིམམཱཧ ཛཱཏིནྟི.

ཛརཱནིདྡེསོ

༡༩༢. ཛརཱནིདྡེསེ ཛརཱཏི སབྷཱཝཔཙྩཏྟཾ. ཛཱིརཎཏཱཏི ཨཱཀཱརནིདྡེསོ. ཁཎྜིཙྩནྟིཨཱདཡོ ཏཡོ ཀཱལཱཏིཀྐམེ ཀིཙྩནིདྡེསཱ. པཙྪིམཱ དྭེ པཀཏིནིདྡེསཱ. ཨཡཉྷི ཛརཱཏི ཨིམིནཱ པདེན སབྷཱཝཏོ དཱིཔིཏཱ, ཏེནསྶཱ ཨིདཾ སབྷཱཝཔཙྩཏྟཾ. ཛཱིརཎཏཱཏི ཨིམིནཱ ཨཱཀཱརཏོ ¶ , ཏེནསྶཱཡཾ ཨཱཀཱརནིདྡེསོ. ཁཎྜིཙྩནྟི ཨིམིནཱ ཀཱལཱཏིཀྐམེ དནྟནཁཱནཾ ཁཎྜིཏབྷཱཝཀརཎཀིཙྩཏོ. པཱལིཙྩནྟི ཨིམིནཱ ཀེསལོམཱནཾ པལིཏབྷཱཝཀརཎཀིཙྩཏོ. ཝལིཏྟཙཏཱཏི ཨིམིནཱ མཾསཾ མིལཱཔེཏྭཱ ཏཙེ ཝལིཏྟབྷཱཝཀརཎཀིཙྩཏོ དཱིཔིཏཱ. ཏེནསྶཱ ཨིམེ ཁཎྜིཙྩནྟི ཨཱདཡོ ཏཡོ ཀཱལཱཏིཀྐམེ ཀིཙྩནིདྡེསཱ. ཏེཧི ཨིམེསཾ ཝིཀཱརཱནཾ དསྶནཝསེན པཱཀཊཱིབྷཱུཏཱཏི པཱཀཊཛརཱ དསྶིཏཱ. ཡཐེཝ ཧི ཨུདཀསྶ ཝཱ ཝཱཏསྶ ཝཱ ཨགྒིནོ ཝཱ ཏིཎརུཀྑཱདཱིནཾ སཾསགྒཔལིབྷགྒཏཱཡ ཝཱ ཛྷཱམཏཱཡ ཝཱ གཏམགྒོ པཱཀཊོ ཧོཏི, ན ཙ སོ གཏམགྒོ ཏཱནེཝ ཨུདཀཱདཱིནི, ཨེཝམེཝ ཛརཱཡ དནྟཱདཱིསུ ཁཎྜིཙྩཱདིཝསེན གཏམགྒོ པཱཀཊོ, ཙཀྑུཾ ཨུམྨཱིལེཏྭཱཔི གཡ྄ཧཏི. ན ཙ ཁཎྜིཙྩཱདཱིནེཝ ཛརཱ; ན ཧི ཛརཱ ཙཀྑུཝིཉྙེཡྻཱ ཧོཏི.

ཨཱཡུནོ ¶ སཾཧཱནི ཨིནྡྲིཡཱནཾ པརིཔཱཀོཏི ཨིམེཧི པན པདེཧི ཀཱལཱཏིཀྐམེཡེཝ ཨབྷིབྱཏྟཱཡ ཨཱཡུཀྑཡཙཀྑཱདིཨིནྡྲིཡཔརིཔཱཀསངྑཱཏཱཡ པཀཏིཡཱ དཱིཔིཏཱ. ཏེནསྶིམེ པཙྪིམཱ དྭེ པཀཏིནིདྡེསཱཏི ཝེདིཏབྦཱ. ཏཏྠ ཡསྨཱ ཛརཾ པཏྟསྶ ཨཱཡུ ཧཱཡཏི ཏསྨཱ ཛརཱ ‘‘ཨཱཡུནོ སཾཧཱནཱི’’ཏི ཕལཱུཔཙཱརེན ཝུཏྟཱ. ཡསྨཱ དཧརཀཱལེ སུཔྤསནྣཱནི སུཁུམམྤི ¶ ཨཏྟནོ ཝིསཡཾ སུཁེནེཝ གཎྷནསམཏྠཱནི ཙཀྑཱདཱིནི ཨིནྡྲིཡཱནི ཛརཾ པཏྟསྶ པརིཔཀྐཱནི ཨཱལུལི༹ཏཱནི ཨཝིསདཱནི ཨོལཱ༹རིཀམྤི ཨཏྟནོ ཝིསཡཾ གཧེཏུཾ ཨསམཏྠཱནི ཧོནྟི, ཏསྨཱ ‘‘ཨིནྡྲིཡཱནཾ པརིཔཱཀོ’’ཏི ཕལཱུཔཙཱརེནེཝ ཝུཏྟཱ.

སཱ པནེསཱ ཨེཝཾ ནིདྡིཊྛཱ སབྦཱཔི ཛརཱ པཱཀཊཱ པཊིཙྪནྣཱཏི དུཝིདྷཱ ཧོཏི. ཏཏྠ དནྟཱདཱིསུ ཁཎྜཱདིབྷཱཝདསྶནཏོ རཱུཔདྷམྨེསུ ཛརཱ ‘པཱཀཊཛརཱ’ ནཱམ. ཨརཱུཔདྷམྨེསུ པན ཛརཱ ཏཱདིསསྶ ཝིཀཱརསྶ ཨདསྶནཏོ ‘པཊིཙྪནྣཛརཱ’ ནཱམ. ཏཏྠ ཡྭཱཡཾ ཁཎྜཱདིབྷཱཝོ དིསྶཏི, སོ ཏཱདིསཱནཾ དནྟཱདཱིནཾ སུཝིཉྙེཡྻཏྟཱ ཝཎྞོཡེཝ. ཏཾ ཙཀྑུནཱ དིསྭཱ མནོདྭཱརེན ཙིནྟེཏྭཱ ‘‘ཨིམེ དནྟཱ ཛརཱཡ པཧཊཱ’’ཏི ཛརཾ ཛཱནཱཏི, ཨུདཀཊྛཱནེ བདྡྷཱནི གོསིངྒཱདཱིནི ཨོལོཀེཏྭཱ ཧེཊྛཱ ཨུདཀསྶ ཨཏྠིབྷཱཝཾ ཛཱནནཾ ཝིཡ. པུན ཨཝཱིཙི སཝཱིཙཱིཏི ཨེཝམྤི ཨཡཾ ཛརཱ དུཝིདྷཱ ཧོཏི. ཏཏྠ མཎིཀནཀརཛཏཔཝཱལ༹ཙནྡསཱུརིཡཱདཱིནཾ མནྡདསཀཱདཱིསུ པཱཎཱིནཾ ཝིཡ ཙ པུཔྥཕལཔལླཝཱདཱིསུ ཨཔཱཎཱིནཾ ཝིཡ ཙ ཨནྟརནྟརཱ ཝཎྞཝིསེསཱདཱིནཾ དུབྦིཉྙེཡྻཏྟཱ ཛརཱ ‘ཨཝཱིཙིཛརཱ’ ནཱམ, ནིརནྟརཛརཱཏི ཨཏྠོ. ཏཏོ ཨཉྙེསུ པན ཡཐཱཝུཏྟེསུ ཨནྟརནྟརཱ ཝཎྞཝིསེསཱདཱིནཾ སུཝིཉྙེཡྻཏྟཱ ཛརཱ ‘སཝཱིཙིཛརཱ’ ནཱམ.

ཏཏྠ ¶ སཝཱིཙིཛརཱ ཨུཔཱདིནྣཱནུཔཱདིནྣཀཝསེན ཨེཝཾ དཱིཔེཏབྦཱ – དཧརཀུམཱརཀཱནཉྷི པཋམམེཝ ཁཱིརདནྟཱ ནཱམ ཨུཊྛཧནྟི, ན ཏེ ཐིརཱ. ཏེསུ པན པཏིཏེསུ པུན དནྟཱ ཨུཊྛཧནྟི. ཏེ པཋམམེཝ སེཏཱ ཧོནྟི, ཛརཱཝཱཏེན པན པཧཊཀཱལེ ཀཱལ༹ཀཱ ཧོནྟི. ཀེསཱ པན པཋམམེཝ ཏམྦཱཔི ཧོནྟི ཀཱལ༹ཀཱཔི སེཏཱཔི. ཚཝི པན སལོཧིཏིཀཱ ཧོཏི. ཝཌྜྷནྟཱནཾ ཝཌྜྷནྟཱནཾ ཨོདཱཏཱནཾ ཨོདཱཏབྷཱཝོ, ཀཱལ༹ཀཱནཾ ཀཱལ༹ཀབྷཱཝོ པཉྙཱཡཏི, ཛརཱཝཱཏེན པན པཧཊཀཱལེ ཝལི༹ཾ གཎྷཱཏི. སབྦམྤི སསྶཾ ཝཔིཏཀཱལེ སེཏཾ ཧོཏི, པཙྪཱ ནཱིལཾ, ཛརཱཝཱཏེན པན པཧཊཀཱལེ པཎྜུཀཾ ཧོཏི. ཨམྦངྐུརེནཱཔི དཱིཔེཏུཾ ཝཊྚཏི ཨེཝ. ཨཡཾ ཝུཙྩཏི ཛརཱཏི ཨཡཾ ¶ ཛརཱ ནཱམ ཀཐིཡཏི. སཱ པནེསཱ ¶ ཁནྡྷཔརིཔཱཀལཀྑཎཱ, མརཎཱུཔནཡནརསཱ, ཡོབྦནཝིནཱསཔཙྩུཔཊྛཱནཱ.

‘ཛརཱཡ དུཀྑཊྛོ ཝེདིཏབྦོ’ཏི ཨེཏྠ པན ཨཡམྤི སཡཾ ན དུཀྑཱ, དུཀྑསྶ པན ཝཏྠུབྷཱཝེན དུཀྑཱཏི ཝུཏྟཱ. ཀཏརསྶ དུཀྑསྶ? ཀཱཡདུཀྑསྶ ཙེཝ དོམནསྶདུཀྑསྶ ཙ. ཛིཎྞསྶ ཧི ཨཏྟབྷཱཝོ ཛརསཀཊཾ ཝིཡ དུབྦལོ ཧོཏི, ཋཱཏུཾ ཝཱ གནྟུཾ ཝཱ ནིསཱིདིཏུཾ ཝཱ ཝཱཡམནྟསྶ བལཝཾ ཀཱཡདུཀྑཾ ཨུཔྤཛྫཏི; པུཏྟདཱརེ ཡཐཱཔུརེ ཨསལླཀྑེནྟེ དོམནསྶཾ ཨུཔྤཛྫཏི. ཨིཏི ཨིམེསཾ དྭིནྣམྤི དུཀྑཱནཾ ཝཏྠུབྷཱཝེན དུཀྑཱཏི ཝེདིཏབྦཱ. ཨཔིཙ –

ཨངྒཱནཾ སིཐིལབྷཱཝཱ, ཨིནྡྲིཡཱནཾ ཝིཀཱརཏོ;

ཡོབྦནསྶ ཝིནཱསེན, བལསྶ ཨུཔགྷཱཏཏོ.

ཝིཔྤཝཱསཱ སཏཱདཱིནཾ, པུཏྟདཱརེཧི ཨཏྟནོ;

ཨཔསཱདནཱིཡཏོ ཙེཝ, བྷཱིཡྻོ བཱལཏྟཔཏྟིཡཱ.

པཔྤོཏི དུཀྑཾ ཡཾ མཙྩོ, ཀཱཡིཀཾ མཱནསཾ ཏཐཱ;

སབྦམེཏཾ ཛརཱཧེཏུ, ཡསྨཱ ཏསྨཱ ཛརཱ དུཁཱཏི.

མརཎནིདྡེསོ

༡༩༣. མརཎནིདྡེསེ ཙཝནཀཝསེན ཙུཏི; ཨེཀཙཏུཔཉྩཀྑནྡྷཱཡ ཙུཏིཡཱ སཱམཉྙཝཙནམེཏཾ. ཙཝནཏཱཏི བྷཱཝཝཙནེན ལཀྑཎནིདསྶནཾ. བྷེདོཏི ཙུཏིཁནྡྷཱནཾ བྷངྒུཔྤཏྟིཔརིདཱིཔནཾ ¶ . ཨནྟརདྷཱནནྟི གྷཊསྶ ཝིཡ བྷིནྣསྶ བྷིནྣཱནཾ ཙུཏིཁནྡྷཱནཾ ཡེན ཀེནཙི པརིཡཱཡེན ཋཱནཱབྷཱཝཔརིདཱིཔནཾ. མཙྩུ མརཎནྟི མཙྩུསངྑཱཏཾ མརཎཾ. ཀཱལོ ནཱམ ཨནྟཀོ, ཏསྶ ཀིརིཡཱ ཀཱལཀིརིཡཱ. ཨེཏྟཱཝཏཱ སམྨུཏིཡཱ མརཎཾ དཱིཔིཏཾ ཧོཏི.

ཨིདཱནི པརམཏྠེན དཱིཔེཏུཾ ཁནྡྷཱནཾ བྷེདོཏིཨཱདིམཱཧ. པརམཏྠེན ཧི ཁནྡྷཱཡེཝ བྷིཛྫནྟི, ན སཏྟོ ནཱམ ཀོཙི མརཏི. ཁནྡྷེསུ པན བྷིཛྫམཱནེསུ སཏྟོ མརཏི བྷིནྣེསུ མཏོཏི ཝོཧཱརོ ཧོཏི. ཨེཏྠ ཙ ཙཏུཔཉྩཝོཀཱརཝསེན ཁནྡྷཱནཾ བྷེདོ, ཨེཀཝོཀཱརཝསེན ཀལེ༹ཝརསྶ ནིཀྑེཔོ; ཙཏུཝོཀཱརཝསེན ཝཱ ཁནྡྷཱནཾ བྷེདོ, སེསདྭཡཝསེན ¶ ཀལེ༹ཝརསྶ ¶ ནིཀྑེཔོ ཝེདིཏབྦོ. ཀསྨཱ? བྷཝདྭཡེཔི རཱུཔཀཱཡསངྑཱཏསྶ ཀལེ༹ཝརསྶ སམྦྷཝཏོ. ཡསྨཱ ཝཱ ཙཱཏུམཧཱརཱཛིཀཱདཱིསུ ཁནྡྷཱ བྷིཛྫནྟེཝ, ན ཀིཉྩི ནིཀྑིཔཏི, ཏསྨཱ ཏེསཾ ཝསེན ཁནྡྷཱནཾ བྷེདོ. མནུསྶཱདཱིསུ ཀལེ༹ཝརསྶ ནིཀྑེཔོ. ཨེཏྠ ཙ ཀལེ༹ཝརསྶ ནིཀྑེཔཀརཎཏོ མརཎཾ ‘‘ཀལེ༹ཝརསྶ ནིཀྑེཔོ’’ཏི ཝུཏྟཾ.

ཛཱིཝིཏིནྡྲིཡསྶ ཨུཔཙྪེདོཏི ཨིམིནཱ ཨིནྡྲིཡབདྡྷསྶེཝ མརཎཾ ནཱམ ཧོཏི, ཨནིནྡྲིཡབདྡྷསྶ མརཎཾ ནཱམ ནཏྠཱིཏི དསྶེཏི. ‘སསྶཾ མཏཾ, རུཀྑོ མཏོ’ཏི ཨིདཾ པན ཝོཧཱརམཏྟམེཝ. ཨཏྠཏོ པན ཨེཝརཱུཔཱནི ཝཙནཱནི སསྶཱདཱིནཾ ཁཡཝཡབྷཱཝམེཝ དཱིཔེནྟི. ཨིདཾ ཝུཙྩཏི མརཎནྟི ཨིདཾ སབྦམྤི མརཎཾ ནཱམ ཀཐིཡཏི.

ཨཔིཙེཏྠ ཁཎིཀམརཎཾ, སམྨུཏིམརཎཾ, སམུཙྪེདམརཎནྟི ཨཡམྤི བྷེདོ ཝེདིཏབྦོ. ཏཏྠ ‘ཁཎིཀམརཎཾ’ ནཱམ པཝཏྟེ རཱུཔཱརཱུཔདྷམྨཱནཾ བྷེདོ. ‘ཏིསྶོ མཏོ, ཕུསྶོ མཏོ’ཏི ཨིདཾ ‘སམྨུཏིམརཎཾ’ ནཱམ. ཁཱིཎཱསཝསྶ ཨཔྤཊིསནྡྷིཀཱ ཀཱལཀིརིཡཱ ‘སམུཙྪེདམརཎཾ’ ནཱམ. ཨིམསྨིཾ པནཏྠེ སམྨུཏིམརཎཾ ཨདྷིཔྤེཏཾ. ཛཱཏིཀྑཡམརཎཾ, ཨུཔཀྐམམརཎཾ, སརསམརཎཾ, ཨཱཡུཀྑཡམརཎཾ, པུཉྙཀྑཡམརཎནྟིཔི ཏསྶེཝ ནཱམཾ. ཏཡིདཾ ཙུཏིལཀྑཎཾ, ཝིཡོགརསཾ, ཝིཔྤཝཱསཔཙྩུཔཊྛཱནཾ.

‘མརཎསྶ དུཀྑཊྛོ ཝེདིཏབྦོ’ཏི ཨེཏྠ པན ཨིདམྤི སཡཾ ན དུཀྑཾ, དུཀྑསྶ པན ཝཏྠུབྷཱཝེན དུཀྑནྟི ཝུཏྟཾ. མརཎནྟིཀཱཔི ཧི སཱརཱིརིཀཱ ཝེདནཱ, པཊིཝཱཏེ གཧིཏཱ ཨཱདིཏྟཏིཎུཀྐཱ ¶ ཝིཡ, སརཱིརཾ ནིདཧནྟི. ནརཀནིམིཏྟཱདཱིནཾ ཨུཔཊྛཱནཀཱལེ བལཝདོམནསྶཾ ཨུཔྤཛྫཏི. ཨིཏི ཨིམེསཾ དྭིནྣམྤི དུཀྑཱནཾ ཝཏྠུབྷཱཝེན དུཀྑནྟི ཝེདིཏབྦཾ. ཨཔི ཙ –

པཱཔསྶ པཱཔཀམྨཱདི, ནིམིཏྟམནུཔསྶཏོ;

བྷདྡསྶཱཔསཧནྟསྶ, ཝིཡོགཾ པིཡཝཏྠུཀཾ.

མཱིཡམཱནསྶ ¶ ཡཾ དུཀྑཾ, མཱནསཾ ཨཝིསེསཏོ;

སབྦེསཉྩཱཔི ཡཾ སནྡྷི-བནྡྷནཙྪེདནཱདིཀཾ.

ཝིཏུཛྫམཱནམམྨཱནཾ, ཧོཏི དུཀྑཾ སརཱིརཛཾ;

ཨསཡ྄ཧམཔྤཊིཀཱརཾ, དུཀྑསྶེཏསྶིདཾ ཡཏོ;

མརཎཾ ཝཏྠུ ཏེནེཏཾ, དུཀྑམིཙྩེཝ བྷཱསིཏནྟི.

ཨཔིཙ ¶ ཨིམཱནི ཛཱཏིཛརཱམརཎཱནི ནཱམ ཨིམེསཾ སཏྟཱནཾ ཝདྷཀཔཙྩཱམིཏྟཱ ཝིཡ ཨོཏཱརཾ གཝེསནྟཱནི ཝིཙརནྟི. ཡཐཱ ཧི པུརིསསྶ ཏཱིསུ པཙྩཱམིཏྟེསུ ཨོཏཱརཱཔེཀྑེསུ ཝིཙརནྟེསུ ཨེཀོ ཝདེཡྻ – ‘‘ཨཧཾ ཨསུཀཨརཉྙསྶ ནཱམ ཝཎྞཾ ཀཐེཏྭཱ ཨེཏཾ ཨཱདཱཡ ཏཏྠ གམིསྶཱམི, ཨེཏྠ མཡ྄ཧཾ དུཀྐརཾ ནཏྠཱི’’ཏི. དུཏིཡོ ཝདེཡྻ ‘‘ཨཧཾ ཏཝ ཨེཏཾ གཧེཏྭཱ གཏཀཱལེ པོཐེཏྭཱ དུབྦལཾ ཀརིསྶཱམི, ཨེཏྠ མཡ྄ཧཾ དུཀྐརཾ ནཏྠཱི’’ཏི. ཏཏིཡོ ཝདེཡྻ – ‘‘ཏཡཱ ཨེཏསྨིཾ པོཐེཏྭཱ དུབྦལེ ཀཏེ ཏིཎྷེན ཨསིནཱ སཱིསཙྪེདནཾ ནཱམ མཡ྄ཧཾ བྷཱརོ ཧོཏཱུ’’ཏི. ཏེ ཨེཝཾ ཝཏྭཱ ཏཐཱ ཀརེཡྻུཾ.

ཏཏྠ པཋམཔཙྩཱམིཏྟསྶ ཨརཉྙསྶ ཝཎྞཾ ཀཐེཏྭཱ ཏཾ ཨཱདཱཡ ཏཏྠ གཏཀཱལོ ཝིཡ སུཧཛྫཉཱཏིམཎྜལཏོ ནིཀྐཌྜྷིཏྭཱ ཡཏྠ ཀཏྠཙི ནིབྦཏྟཱཔནཾ ནཱམ ཛཱཏིཡཱ ཀིཙྩཾ. དུཏིཡསྶ པོཐེཏྭཱ དུབྦལཀརཎཾ ཝིཡ ནིབྦཏྟཀྑནྡྷེསུ ནིཔཏིཏྭཱ པརཱདྷཱིནམཉྩཔརཱཡཎབྷཱཝཀརཎཾ ཛརཱཡ ཀིཙྩཾ. ཏཏིཡསྶ ཏིཎྷེན ཨསིནཱ སཱིསཙྪེདནཾ ཝིཡ ཛཱིཝིཏཀྑཡཔཱཔནཾ མརཎསྶ ཀིཙྩནྟི ཝེདིཏབྦཾ.

ཨཔིཙེཏྠ ཛཱཏིདུཀྑཾ སཱདཱིནཝམཧཱཀནྟཱརཔྤཝེསོ ཝིཡ དཊྛབྦཾ. ཛརཱདུཀྑཾ ཏཏྠ ཨནྣཔཱནརཧིཏསྶ ¶ དུབྦལྱཾ ཝིཡ དཊྛབྦཾ. མརཎདུཀྑཾ དུབྦལསྶ ཨིརིཡཱཔཐཔཝཏྟནེ ཝིཧཏཔརཀྐམསྶ ཝཱལཱ༹དཱིཧི ཨནཡབྱསནཱཔཱདནཾ ཝིཡ དཊྛབྦནྟི.

སོཀནིདྡེསོ

༡༩༤. སོཀནིདྡེསེ བྱསཏཱིཏི བྱསནཾ; ཧིཏསུཁཾ ཁིཔཏི ཝིདྡྷཾསེཏཱིཏི ཨཏྠོ. ཉཱཏཱིནཾ བྱསནཾ ཉཱཏིབྱསནཾ; ཙོརརོགབྷཡཱདཱིཧི ཉཱཏིཀྑཡོ ཉཱཏིཝིནཱསོཏི ཨཏྠོ. ཏེན ཉཱཏིབྱསནེན ཕུཊྛསྶཱཏི ¶ ཨཛ྄ཛྷོཏྠཊསྶ ཨབྷིབྷཱུཏསྶ སམནྣཱགཏསྶཱཏི ཨཏྠོ. སེསེསུཔི ཨེསེཝ ནཡོ. ཨཡཾ པན ཝིསེསོ – བྷོགཱནཾ བྱསནཾ བྷོགབྱསནཾ; རཱཛཙོརཱདིཝསེན བྷོགཀྑཡོ བྷོགཝིནཱསོཏི ཨཏྠོ. རོགོཡེཝ བྱསནཾ རོགབྱསནཾ; རོགོ ཧི ཨཱརོགྱཾ བྱསཏི ཝིནཱསེཏཱིཏི བྱསནཾ. སཱིལསྶ བྱསནཾ སཱིལབྱསནཾ; དུསྶཱིལྱསྶེཏཾ ནཱམཾ. སམྨཱདིཊྛིཾ ཝིནཱསཡམཱནཱ ཨུཔྤནྣཱ དིཊྛིཡེཝ བྱསནཾ དིཊྛིབྱསནཾ. ཨེཏྠ ཙ པུརིམཱནི དྭེ ཨནིཔྥནྣཱནི, པཙྪིམཱནི ཏཱིཎི ནིཔྥནྣཱནི ཏིལཀྑཎབྦྷཱཧཏཱནི. པུརིམཱནི ཙ ཏཱིཎི ནེཝ ཀུསལཱནི ན ཨཀུསལཱནི. སཱིལདིཊྛིབྱསནདྭཡཾ ཨཀུསལཾ.

ཨཉྙཏརཉྙཏརེནཱཏི ¶ གཧིཏེསུ ཝཱ ཡེན ཀེནཙི ཨགྒཧིཏེསུ ཝཱ མིཏྟཱམཙྩབྱསནཱདཱིསུ ཡེན ཀེནཙི. སམནྣཱགཏསྶཱཏི སམནུབནྡྷསྶ ཨཔརིམུཙྩམཱནསྶ. ཨཉྙཏརཉྙཏརེན དུཀྑདྷམྨེནཱཏི ཡེན ཀེནཙི སོཀདུཀྑསྶ ཨུཔྤཏྟིཧེཏུནཱ. སོཀོཏི སོཙནཀཝསེན སོཀོ; ཨིདཾ ཏེཧི ཀཱརཎེཧི ཨུཔཛྫནཀསོཀསྶ སབྷཱཝཔཙྩཏྟཾ. སོཙནཱཏི སོཙནཱཀརོ. སོཙིཏཏྟནྟི སོཙིཏབྷཱཝོ. ཨནྟོསོཀོཏི ཨབྦྷནྟརེ སོཀོ. དུཏིཡཔདཾ ཨུཔསགྒཝསེན ཝཌྜྷིཏཾ. སོ ཧི ཨབྦྷནྟརེ སུཀྑཱཔེནྟོ ཝིཡ པརིསུཀྑཱཔེནྟོ ཝིཡ ཨུཔྤཛྫཏཱིཏི ‘‘ཨནྟོསོཀོ ཨནྟོཔརིསོཀོ’’ཏི ཝུཙྩཏི.

ཙེཏསོ པརིཛ྄ཛྷཱཡནཱཏི ཙིཏྟསྶ ཛྷཱཡནཱཀཱརོ. སོཀོ ཧི ཨུཔྤཛྫམཱནོ ཨགྒི ཝིཡ ཙིཏྟཾ ཛྷཱཔེཏི པརིདཧཏི, ‘‘ཙིཏྟཾ མེ ཛྷཱམཾ, ན མེ ཀིཉྩི པཊིབྷཱཏཱི’’ཏི ཝདཱཔེཏི. དུཀྑིཏོ མནོ དུམྨནོ, ཏསྶ བྷཱཝོ དོམནསྶཾ. ཨནུཔཝིཊྛཊྛེན སོཀོཝ སལླནྟི སོཀསལླཾ. ཨཡཾ ཝུཙྩཏི སོཀོཏི ཨཡཾ སོཀོ ནཱམ ཀཐིཡཏི. སོ པནཱཡཾ ཀིཉྩཱཔི ཨཏྠཏོ དོམནསྶཝེདནཱཝ ¶ ཧོཏི, ཨེཝཾ ¶ སནྟེཔི ཨནྟོནིཛ྄ཛྷཱནལཀྑཎོ, ཙེཏསོ པརིནིཛ྄ཛྷཱཡནརསོ, ཨནུསོཙནཔཙྩུཔཊྛཱནོ.

‘སོཀསྶ དུཀྑཊྛོ ཝེདིཏབྦོ’ཏི ཨེཏྠ པན ཨཡཾ སབྷཱཝདུཀྑཏྟཱ ཙེཝ དུཀྑསྶ ཙ ཝཏྠུབྷཱཝེན དུཀྑོཏི ཝུཏྟོ. ཀཏརདུཀྑསྶཱཏི? ཀཱཡིཀདུཀྑསྶ ཙེཝ ཛཝནཀྑཎེ ཙ དོམནསྶདུཀྑསྶ. སོཀཝེགེན ཧི ཧདཡེ མཧཱགཎྜོ ཨུཊྛཧིཏྭཱ པརིཔཙྩིཏྭཱ བྷིཛྫཏི, མུཁཏོ ཝཱ ཀཱལ༹ལོཧིཏཾ ནིཀྑམཏི, བལཝཾ ཀཱཡདུཀྑཾ ཨུཔྤཛྫཏི. ‘‘ཨེཏྟཀཱ མེ ཉཱཏཡོ ཁཡཾ གཏཱ, ཨེཏྟཀཱ མེ བྷོགཱ’’ཏི ཙིནྟེནྟསྶ ཙ བལཝཾ དོམནསྶཾ ཨུཔྤཛྫཏི. ཨིཏི ཨིམེསཾ དྭིནྣཾ དུཀྑཱནཾ ཝཏྠུབྷཱཝེནཔེས དུཀྑོཏི ཝེདིཏབྦོ. ཨཔིཙ –

སཏྟཱནཾ ཧདཡཾ སོཀོ, སལླཾ ཝིཡ ཝིཏུཛྫཏི;

ཨགྒིཏཏྟོཝ ནཱརཱཙོ, བྷུསཉྩ ཌཧཏེ པུན.

སམཱཝཧཏི ཙ བྱཱདྷི-ཛརཱམརཎབྷེདནཾ;

དུཀྑམྤི ཝིཝིདྷཾ ཡསྨཱ, ཏསྨཱ དུཀྑོཏི ཝུཙྩཏཱིཏི.

པརིདེཝནིདྡེསོ

༡༩༥. པརིདེཝནིདྡེསེ ¶ ‘མཡ྄ཧཾ དྷཱིཏཱ, མཡ྄ཧཾ པུཏྟོ’ཏི ཨེཝཾ ཨཱདིསྶ ཨཱདིསྶ དེཝནྟི རོདནྟི ཨེཏེནཱཏི ཨཱདེཝོ. ཏཾ ཏཾ ཝཎྞཾ པརིཀིཏྟེཏྭཱ པརིཀིཏྟེཏྭཱ དེཝནྟི ཨེཏེནཱཏི པརིདེཝོ. ཏཏོ པརཱནི དྭེ དྭེ པདཱནི པུརིམདྭཡསྶེཝ ཨཱཀཱརབྷཱཝནིདྡེསཝསེན ཝུཏྟཱནི. ཝཱཙཱཏི ཝཙནཾ. པལཱཔོཏི ཏུཙྪཾ ནིརཏྠཀཝཙནཾ. ཨུཔཌྜྷབྷཎིཏཨཉྙབྷཎིཏཱདིཝསེན ཝིརཱུཔོ པལཱཔོ ཝིཔྤལཱཔོ. ལཱལཔྤོཏི པུནཔྤུནཾ ལཔནཾ. ལཱལཔྤནཱཀཱརོ ལཱལཔྤནཱ. ལཱལཔྤིཏསྶ བྷཱཝོ ལཱལཔྤིཏཏྟཾ. ཨཡཾ ཝུཙྩཏི པརིདེཝོཏི ཨཡཾ པརིདེཝོ ནཱམ ཀཐིཡཏི. སོ ལཱལཔྤནལཀྑཎོ, གུཎདོསཔརིཀིཏྟནརསོ, སམྦྷམཔཙྩུཔཊྛཱནོ.

‘པརིདེཝསྶ དུཀྑཊྛོ ཝེདིཏབྦོ’ཏི ཨེཏྠ པན ཨཡམྤི སཡཾ ན དུཀྑོ, ཀཱཡདུཀྑདོམནསྶདུཀྑཱནཾ པན ཝཏྠུབྷཱཝེན དུཀྑོཏི ཝུཏྟོ. པརིདེཝནྟོ ཧི ཨཏྟནོ ཁནྡྷཾ མུཊྛཱིཧི ¶ པོཐེཏི, ཨུབྷོཧི ཧཏྠེཧི ཨུརཾ པཧརཏི ¶ པིཾསཏི, སཱིསེན བྷིཏྟིཡཱ སདྡྷིཾ ཡུཛ྄ཛྷཏི. ཏེནསྶ བལཝཾ ཀཱཡདུཀྑཾ ཨུཔྤཛྫཏི. ‘ཨེཏྟཀཱ མེ ཉཱཏཡོ ཁཡཾ ཝཡཾ ཨབྦྷཏྠཾ གཏཱ’ཏིཨཱདཱིནི ཙིནྟེཏི. ཏེནསྶ བལཝཾ དོམནསྶཾ ཨུཔྤཛྫཏི. ཨིཏི ཨིམེསཾ དྭིནྣམྤི དུཀྑཱནཾ ཝཏྠུབྷཱཝེན དུཀྑོཏི ཝེདིཏབྦོ. ཨཔིཙ –

ཡཾ སོཀསལླཝིཧཏོ པརིདེཝམཱནོ,

ཀཎྛོཊྛཏཱལུཏལསོསཛམཔྤསཡ྄ཧཾ;

བྷིཡྻོདྷིམཏྟམདྷིགཙྪཏིཡེཝ དུཀྑཾ,

དུཀྑོཏི ཏེན བྷགཝཱ པརིདེཝམཱཧཱཏི.

དུཀྑདོམནསྶནིདྡེསོ

༡༩༦-༧. དུཀྑདོམནསྶནིདྡེསཱ ཧེཊྛཱ དྷམྨསངྒཧཊྛཀཐཱཡཾ ཝཎྞིཏཏྟཱ པཱཀཊཱ ཨེཝ. ལཀྑཎཱདཱིནི པན ཏེསཾ ཏཏྠ ཝུཏྟཱནེཝ.

‘དུཀྑསྶ དུཀྑཊྛོ ཝེདིཏབྦོ, དོམནསྶསྶ དུཀྑཊྛོ ཝེདིཏབྦོ’ཏི ཨེཏྠ པན ཨུབྷཡམྤེཏཾ སཡཉྩ དུཀྑཏྟཱ ཀཱཡིཀཙེཏསིཀདུཀྑཱནཉྩ ཝཏྠུབྷཱཝེན དུཀྑནྟི ཝུཏྟཾ. ཧཏྠཔཱདཱནཉྷི ཀཎྞནཱསིཀཱནཉྩ ཚེདནདུཀྑེན དུཀྑིཏསྶ ¶ , ཨནཱཐསཱལཱཡཾ ཨུཙྪིཊྛཀཔཱལཾ པུརཏོ ཀཏྭཱ ནིཔནྣསྶ, ཝཎམུཁེཧི པུལུ༹ཝཀེསུ ནིཀྑམནྟེསུ བལཝཾ ཀཱཡདུཀྑཾ ཨུཔྤཛྫཏི; ནཱནཱརངྒརཏྟཝཏྠམནུཉྙཱལངྐཱརཾ ནཀྑཏྟཾ ཀཱིལ༹ནྟཾ མཧཱཛནཾ དིསྭཱ བལཝདོམནསྶཾ ཨུཔྤཛྫཏི. ཨེཝཾ ཏཱཝ དུཀྑསྶ དྭིནྣམྤི དུཀྑཱནཾ ཝཏྠུབྷཱཝོ ཝེདིཏབྦོ. ཨཔིཙ –

པཱིལེ༹ཏི ཀཱཡིཀམིདཾ, དུཀྑཾ དུཀྑཉྩ མཱནསཾ བྷིཡྻོ;

ཛནཡཏི ཡསྨཱ ཏསྨཱ, དུཀྑནྟི ཝིསེསཏོ ཝུཏྟནྟི.

ཙེཏོདུཀྑསམཔྤིཏཱ པན ཀེསེ པཀིརིཡ ཨུརཱནི པཏིཔིསེནྟི, ཨཱཝཊྚནྟི, ཝིཝཊྚནྟི, ཚིནྣཔཔཱཏཾ པཔཏནྟི, སཏྠཾ ཨཱཧརནྟི, ཝིསཾ ཁཱདནྟི, རཛྫུཡཱ ཨུབྦནྡྷནྟི, ཨགྒིཾ པཝིསནྟི ¶ . ཏཾ ཏཾ ཝིཔརཱིཏཾ ཝཏྠུཾ ཏཐཱ ཏཐཱ ཝིཔྤཊིསཱརིནོ པརིཌཡ྄ཧམཱནཙིཏྟཱ ཙིནྟེནྟི. ཨེཝཾ དོམནསྶསྶ ཨུབྷིནྣམྤི དུཀྑཱནཾ ཝཏྠུབྷཱཝོ ཝེདིཏབྦོ. ཨཔིཙ –

པཱིལེ༹ཏི ཡཏོ ཙིཏྟཾ, ཀཱཡསྶ ཙ པཱིལ༹ནཾ སམཱཝཧཏི;

དུཀྑནྟི དོམནསྶམྤི, དོམནསྶཾ ཏཏོ ཨཧཱུཏི.

ཨུཔཱཡཱསནིདྡེསོ

༡༩༨. ཨུཔཱཡཱསནིདྡེསེ ¶ ཨཱཡཱསནཊྛེན ཨཱཡཱསོ; སཾསཱིདནཝིསཱིདནཱཀཱརཔྤཝཏྟསྶ ཙིཏྟཀིལམཐསྶེཏཾ ནཱམཾ. བལཝཾ ཨཱཡཱསོ ཨུཔཱཡཱསོ. ཨཱཡཱསིཏབྷཱཝོ ཨཱཡཱསིཏཏྟཾ. ཨུཔཱཡཱསིཏབྷཱཝོ ཨུཔཱཡཱསིཏཏྟཾ. ཨཡཾ ཝུཙྩཏི ཨུཔཱཡཱསོཏི ཨཡཾ ཨུཔཱཡཱསོ ནཱམ ཀཐིཡཏི. སོ པནེས བྱཱསཏྟིལཀྑཎོ, ནིཏྠུནནརསོ, ཝིསཱདཔཙྩུཔཊྛཱནོ.

‘ཨུཔཱཡཱསསྶ དུཀྑཊྛོ ཝེདིཏབྦོ’ཏི ཨེཏྠ པན ཨཡམྤི སཡཾ ན དུཀྑོ, ཨུབྷིནྣམྤི དུཀྑཱནཾ ཝཏྠུབྷཱཝེན དུཀྑོཏི ཝུཏྟོ. ཀུཔིཏེན ཧི རཉྙཱ ཨིསྶརིཡཾ ཨཙྪིནྡིཏྭཱ ཧཏཔུཏྟབྷཱཏིཀཱནཾ ཨཱཎཏྟཝདྷཱནཾ བྷཡེན ཨཊཝིཾ པཝིསིཏྭཱ ནིལཱིནཱནཾ མཧཱཝིསཱདཔྤཏྟཱནཾ དུཀྑཊྛཱནེན དུཀྑསེཡྻཱཡ དུཀྑནིསཛྫཱཡ བལཝཾ ཀཱཡདུཀྑཾ ཨུཔྤཛྫཏི. ‘ཨེཏྟཀཱ ནོ ཉཱཏཀཱ, ཨེཏྟཀཱ བྷོགཱ ནཊྛཱ’ཏི ཙིནྟེནྟཱནཾ བལཝདོམནསྶཾ ཨུཔྤཛྫཏི. ཨིཏི ཨིམེསཾ དྭིནྣམྤི དུཀྑཱནཾ ཝཏྠུབྷཱཝེན དུཀྑོཏི ཝེདིཏབྦོཏི. ཨཔིཙ –

ཙིཏྟསྶ ¶ པརིདཧནཱ, ཀཱཡསྶ ཝིསཱདནཱ ཙ ཨདྷིམཏྟཾ;

ཡཾ དུཀྑམུཔཱཡཱསོ, ཛནེཏི དུཀྑོ ཏཏོ ཝུཏྟོ.

ཨེཏྠ ཙ མནྡགྒིནཱ ཨནྟོབྷཱཛནེཡེཝ ཏེལཱདཱིནཾ པཱཀོ ཝིཡ སོཀོ. ཏིཀྑགྒིནཱ པཙྩམཱནསྶ བྷཱཛནཏོ བཧིནིཀྑམནཾ ཝིཡ པརིདེཝོ. བཧིནིཀྑནྟཱཝསེསསྶ ནིཀྑམིཏུམྤི ཨཔྤཧོནྟསྶ ཨནྟོབྷཱཛནེཡེཝ ཡཱཝ པརིཀྑཡཱ པཱཀོ ཝིཡ ཨུཔཱཡཱསོ དཊྛབྦོ.

ཨཔྤིཡསམྤཡོགནིདྡེསོ

༡༩༩. ཨཔྤིཡསམྤཡོགནིདྡེསེ ¶ ཡསྶཱཏི ཡེ ཨསྶ. ཨནིཊྛཱཏི ཨཔརིཡེསིཏཱ. པརིཡེསིཏཱ ཝཱ ཧོནྟུ ཨཔརིཡེསིཏཱ ཝཱ, ནཱམམེཝེཏཾ ཨམནཱཔཱརམྨཎཱནཾ. མནསྨིཾ ན ཀམནྟི, ན པཝིསནྟཱིཏི ཨཀནྟཱ. མནསྨིཾ ན ཨཔྤིཡནྟི, ན ཝཱ མནཾ ཝཌྜྷེནྟཱིཏི ཨམནཱཔཱ. རཱུཔཱཏིཨཱདི ཏེསཾ སབྷཱཝནིདསྶནཾ. ཨནཏྠཾ ཀཱམེནྟི ཨིཙྪནྟཱིཏི ཨནཏྠཀཱམཱ. ཨཧིཏཾ ཀཱམེནྟི ཨིཙྪནྟཱིཏི ཨཧིཏཀཱམཱ. ཨཕཱསུཀཾ དུཀྑཝིཧཱརཾ ཀཱམེནྟི ཨིཙྪནྟཱིཏི ཨཕཱསུཀཀཱམཱ. ཙཏཱུཧི ¶ ཡོགེཧི ཁེམཾ ནིབྦྷཡཾ ཝིཝཊྚཾ ན ཨིཙྪནྟི, སབྷཡཾ ཝཊྚམེཝ ནེསཾ ཀཱམེནྟི ཨིཙྪནྟཱིཏི ཨཱཡོགཀྑེམཀཱམཱ.

ཨཔིཙ སདྡྷཱདཱིནཾ ཝུདྡྷིསངྑཱཏསྶ ཨཏྠསྶ ཨཀཱམནཏོ ཏེསཾཡེཝ ཧཱནིསངྑཱཏསྶ ཨནཏྠསྶ ཙ ཀཱམནཏོ ཨནཏྠཀཱམཱ. སདྡྷཱདཱིནཾཡེཝ ཨུཔཱཡབྷཱུཏསྶ ཧིཏསྶ ཨཀཱམནཏོ སདྡྷཱཧཱནིཨཱདཱིནཾ ཨུཔཱཡབྷཱུཏསྶ ཨཧིཏསྶ ཙ ཀཱམནཏོ ཨཧིཏཀཱམཱ. ཕཱསུཀཝིཧཱརསྶ ཨཀཱམནཏོ ཨཕཱསུཀཝིཧཱརསྶ ཙ ཀཱམནཏོ ཨཕཱསུཀཀཱམཱ. ཡསྶ ཀསྶཙི ནིབྦྷཡསྶ ཨཀཱམནཏོ བྷཡསྶ ཙ ཀཱམནཏོ ཨཡོགཀྑེམཀཱམཱཏི ཨེཝམྤེཏྠ ཨཏྠོ དཊྛབྦོ.

སངྒཏཱིཏི གནྟྭཱ སཾཡོགོ. སམཱགམོཏི ཨཱགཏེཧི སཾཡོགོ. སམོདྷཱནནྟི ཋཱནནིསཛྫཱདཱིསུ སཧབྷཱཝོ. མིསྶཱིབྷཱཝོཏི སབྦཀིཙྩཱནཾ སཧཀརཎཾ. ཨཡཾ སཏྟཝསེན ཡོཛནཱ. སངྑཱརཝསེན པན ཡཾ ལབྦྷཏི ཏཾ གཧེཏབྦཾ. ཨཡཾ ཝུཙྩཏཱིཏི ཨཡཾ ཨཔྤིཡསམྤཡོགོ ནཱམ ཀཐིཡཏི. སོ ཨནིཊྛསམོདྷཱནལཀྑཎོ, ཙིཏྟཝིགྷཱཏཀརཎརསོ, ཨནཏྠབྷཱཝཔཙྩུཔཊྛཱནོ.

སོ ¶ ཨཏྠཏོ ཨེཀོ དྷམྨོ ནཱམ ནཏྠི. ཀེཝལཾ ཨཔྤིཡསམྤཡུཏྟཱནཾ དུཝིདྷསྶཱཔི དུཀྑསྶ ཝཏྠུབྷཱཝཏོ དུཀྑོཏི ཝུཏྟོ. ཨནིཊྛཱནི ཧི ཝཏྠཱུནི སམོདྷཱནགཏཱནི ཝིཛ྄ཛྷནཚེདནཕཱལནཱདཱིཧི ཀཱཡིཀམྤི དུཀྑཾ ཨུཔྤཱདེནྟི, ཨུབྦེགཛནནཏོ མཱནསམྤི. ཏེནེཏཾ ཝུཙྩཏི –

དིསྭཱཝ ཨཔྤིཡེ དུཀྑཾ, པཋམཾ ཧོཏི ཙེཏསི;

ཏདུཔཀྐམསམྦྷཱུཏ-མཐ ཀཱཡེ ཡཏོ ཨིདྷ.

ཏཏོ ¶ དུཀྑདྭཡསྶཱཔི, ཝཏྠུཏོ སོ མཧེསིནཱ;

དུཀྑོ ཝུཏྟོཏི ཝིཉྙེཡྻོ, ཨཔྤིཡེཧི སམཱགམོཏི.

པིཡཝིཔྤཡོགནིདྡེསོ

༢༠༠. པིཡཝིཔྤཡོགནིདྡེསོ ཝུཏྟཔཊིཔཀྑནཡེན ཝེདིཏབྦོ. མཱཏཱ ཝཱཏིཨཱདི པནེཏྠ ཨཏྠཀཱམེ སརཱུཔེན དསྶེཏུཾ ཝུཏྟཾ. ཏཏྠ མམཱཡཏཱིཏི མཱཏཱ. པིཡཱཡཏཱིཏི ¶ པིཏཱ. བྷཛཏཱིཏི བྷཱཏཱ. ཏཐཱ བྷགིནཱི. མེཏྟཱཡནྟཱིཏི མིཏྟཱ, མིནནྟཱིཏི ཝཱ མིཏྟཱ; སབྦགུཡ྄ཧེསུ ཨནྟོ པཀྑིཔནྟཱིཏི ཨཏྠོ. ཀིཙྩཀརཎཱིཡེསུ སཧབྷཱཝཊྛེན ཨམཱ ཧོནྟཱིཏི ཨམཙྩཱ. ཨཡཾ ཨམྷཱཀཾ ཨཛ྄ཛྷཏྟིཀོཏི ཨེཝཾ ཛཱནནྟི ཉཱཡནྟཱིཏི ཝཱ ཉཱཏཱི. ལོཧིཏེན སམྦནྡྷཱཏི སཱལོཧིཏཱ. ཨེཝམེཏཱནི པདཱནི ཨཏྠཏོ ཝེདིཏབྦཱནི. ཨཡཾ ཝུཙྩཏཱིཏི ཨཡཾ པིཡེཧི ཝིཔྤཡོགོ ནཱམ ཀཐིཡཏི. སོ ཨིཊྛཝཏྠུཝིཡོགལཀྑཎོ, སོཀུཔྤཱདནརསོ, བྱསནཔཙྩུཔཊྛཱནོ.

སོ ཨཏྠཏོ ཨེཀོ དྷམྨོ ནཱམ ནཏྠི. ཀེཝལཾ པིཡཝིཔྤཡུཏྟཱནཾ དུཝིདྷསྶཱཔི དུཀྑསྶ ཝཏྠུབྷཱཝཏོ དུཀྑོཏི ཝུཏྟོ. ཨིཊྛཱནི ཧི ཝཏྠཱུནི ཝིཡུཛྫམཱནཱནི སརཱིརསྶ སོསནམིལཱཔནཱདིབྷཱཝེན ཀཱཡིཀམྤི དུཀྑཾ ཨུཔྤཱདེནྟི, ‘ཡམྤི ནོ ཨཧོསི, ཏམྤི ནོ ནཏྠཱི’ཏི ཨནུསོཙཱཔནཏོ མཱནསམྤི. ཏེནེཏཾ ཝུཙྩཏི –

ཉཱཏིདྷནཱདིཝིཡོགཱ, སོཀསརསམཔྤིཏཱ ཝིཏུཛྫནྟི;

བཱལཱ ཡཏོ ཏཏོ ཡཾ, དུཀྑོཏི མཏོ པིཡཝིཡོགོཏི.

ཨིཙྪཱནིདྡེསོ

༢༠༡. ཨིཙྪཱནིདྡེསེ ཛཱཏིདྷམྨཱནནྟི ཛཱཏིསབྷཱཝཱནཾ ཛཱཏིཔཀཏིཀཱནཾ. ཨིཙྪཱ ཨུཔྤཛྫཏཱིཏི ཏཎྷཱ ཨུཔྤཛྫཏི. ཨཧོ ཝཏཱཏི པཏྠནཱ. ན ¶ ཁོ པནེཏཾ ཨིཙྪཱཡ པཏྟབྦནྟི ཡཾ ཨེཏཾ ‘‘ཨཧོ ཝཏ མཡཾ ན ཛཱཏིདྷམྨཱ ཨསྶཱམ, ན ཙ ཝཏ ནོ ཛཱཏི ཨཱགཙྪེཡྻཱ’’ཏི ཨེཝཾ པཧཱིནསམུདཡེསུ སཱདྷཱུསུ ཝིཛྫམཱནཾ ཨཛཱཏིདྷམྨཏྟཾ, པརིནིབྦུཏེསུ ཙ ཝིཛྫམཱནཾ ཛཱཏིཡཱ ཨནཱགམནཾ ཨིཙྪིཏཾ, ཏཾ ཨིཙྪནྟསྶཱཔི མགྒབྷཱཝནཱཡ ཝིནཱ ཨཔཏྟབྦཏོ ཨནིཙྪནྟསྶ ཙ བྷཱཝནཱཡ པཏྟབྦཏོ ན ཨིཙྪཱཡ པཏྟབྦཾ ནཱམ ཧོཏི. ཨིདམྤཱིཏི ཨེཏམྤི; ཨུཔརི སེསཱནི ཨུཔཱདཱཡ ¶ པིཀཱརོ. ཡམྤིཙྪནྟི ཡེནཔི དྷམྨེན ཨལབྦྷནེཡྻཾ ཝཏྠུཾ ཨིཙྪནྟོ ན ལབྷཏི, ཏཾ ཨལབྦྷནེཡྻཝཏྠུཨིཙྪནཾ དུཀྑནྟི ཝེདིཏབྦཾ. ཛརཱདྷམྨཱནནྟིཨཱདཱིསུཔི ¶ ཨེསེཝ ནཡོ. ཨེཝམེཏྠ ཨལབྦྷནེཡྻཝཏྠཱུསུ ཨིཙྪཱཝ ‘‘ཡམྤིཙྪཾ ན ལབྷཏི ཏམྤི དུཀྑ’’ནྟི ཝུཏྟཱ. སཱ ཨལབྦྷནེཡྻཝཏྠུཨིཙྪནལཀྑཎཱ, ཏཔྤརིཡེསནརསཱ, ཏེསཾ ཨཔྤཏྟིཔཙྩུཔཊྛཱནཱ.

དྭིནྣཾ པན དུཀྑཱནཾ ཝཏྠུབྷཱཝཏོ དུཀྑཱཏི ཝུཏྟཱ. ཨེཀཙྩོ ཧི རཱཛཱ བྷཝིསྶཏཱིཏི སམྦྷཱཝིཏོ ཧོཏི. སོ ཚིནྣབྷིནྣགཎེན པརིཝཱརིཏོ པབྦཏཝིསམཾ ཝཱ ཝནགཧནཾ ཝཱ པཝིསཏི. ཨཐ རཱཛཱ ཏཾ པཝཏྟིཾ ཉཏྭཱ བལཀཱཡཾ པེསེཏི. སོ རཱཛཔུརིསེཧི ནིཧཏཔརིཝཱརོ སཡམྤི ལདྡྷཔྤཧཱརོ པལཱཡམཱནོ རུཀྑནྟརཾ ཝཱ པཱསཱཎནྟརཾ ཝཱ པཝིསཏི. ཏསྨིཾ སམཡེ མཧཱམེགྷོ ཨུཊྛཧཏི, ཏིབྦནྡྷཀཱརཱ ཀཱལ༹ཝདྡལིཀཱ ཧོཏི. ཨཐ ནཾ སམནྟཏོ ཀཱལ༹ཀིཔིལླིཀཱདཡོ པཱཎཱ པརིཝཱརེཏྭཱ གཎྷནྟི. ཏེནསྶ བལཝཀཱཡདུཀྑཾ ཨུཔྤཛྫཏི. ‘མཾ ཨེཀཾ ནིསྶཱཡ ཨེཏྟཀཱ ཉཱཏཱི ཙ བྷོགཱ ཙ ཝིནཊྛཱ’ཏི ཙིནྟེནྟསྶ བལཝདོམནསྶཾ ཨུཔྤཛྫཏི. ཨིཏི ཨཡཾ ཨིཙྪཱ ཨིམེསཾ དྭིནྣམྤི དུཀྑཱནཾ ཝཏྠུབྷཱཝེན དུཀྑཱཏི ཝེདིཏབྦཱ. ཨཔིཙ –

ཏཾ ཏཾ པཏྠཡམཱནཱནཾ, ཏསྶ ཏསྶ ཨལཱབྷཏོ;

ཡཾ ཝིགྷཱཏམཡཾ དུཀྑཾ, སཏྟཱནཾ ཨིདྷ ཛཱཡཏི.

ཨལབྦྷནེཡྻཝཏྠཱུནཾ, པཏྠནཱ ཏསྶ ཀཱརཎཾ;

ཡསྨཱ ཏསྨཱ ཛིནོ དུཀྑཾ, ཨིཙྪིཏཱལཱབྷམབྲཝཱིཏི.

ཨུཔཱདཱནཀྑནྡྷནིདྡེསོ

༢༠༢. ཨུཔཱདཱནཀྑནྡྷནིདྡེསེ སཾཁིཏྟེནཱཏི དེསནཾ སནྡྷཱཡ ཝུཏྟཾ. དུཀྑཉྷི ཨེཏྟཀཱནི དུཀྑསཏཱནཱིཏི ཝཱ ཨེཏྟཀཱནི དུཀྑསཧསྶཱནཱིཏི ཝཱ ཨེཏྟཀཱནི དུཀྑསཏསཧསྶཱནཱིཏི ¶ ཝཱ སཾཁིཔིཏུཾ ན སཀྐཱ, དེསནཱ པན སཀྐཱ, ཏསྨཱ ‘‘དུཀྑཾ ནཱམ ཨཉྙཾ ཀིཉྩི ནཏྠི, སཾཁིཏྟེན པཉྩུཔཱདཱནཀྑནྡྷཱ དུཀྑཱ’’ཏི དེསནཾ སངྑིཔེནྟོ ཨེཝམཱཧ. སེཡྻཐིདནྟི ནིཔཱཏོ; ཏསྶ ཏེ ཀཏམེཏི ཙེཏི ཨཏྠོ. རཱུཔཱུཔཱདཱནཀྑནྡྷོཏིཨཱདཱིནཾ ཨཏྠོ ཁནྡྷཝིབྷངྒེ ཝཎྞིཏོཡེཝ.

‘ཁནྡྷཱནཾ ¶ དུཀྑཊྛོ ཝེདིཏབྦོ’ཏི ཨེཏྠ པན –

ཛཱཏིཔྤབྷུཏིཀཾ ¶ དུཀྑཾ, ཡཾ ཝུཏྟཾ ཨིདྷ ཏཱདིནཱ;

ཨཝུཏྟཾ ཡཉྩ ཏཾ སབྦཾ, ཝིནཱ ཨེཏེ ན ཝིཛྫཏི.

ཡསྨཱ ཏསྨཱ ཨུཔཱདཱན-ཀྑནྡྷཱ སངྑེཔཏོ ཨིམེ;

དུཀྑཱཏི ཝུཏྟཱ དུཀྑནྟ-དེསཀེན མཧེསིནཱ.

ཏཐཱ ཧི ཨིནྡྷནམིཝ པཱཝཀོ, ལཀྑམིཝ པཧརཎཱནི, གོརཱུཔམིཝ ཌཾསམཀསཱདཡོ, ཁེཏྟམིཝ ལཱཝཀཱ, གཱམཾ ཝིཡ གཱམགྷཱཏཀཱ, ཨུཔཱདཱནཀྑནྡྷཔཉྩཀམེཝ ཛཱཏིཨཱདཡོ ནཱནཔྤཀཱརེཧི བཱདྷཡམཱནཱ, ཏིཎལཏཱདཱིནི ཝིཡ བྷཱུམིཡཾ, པུཔྥཕལཔལླཝཱདཱིནི ཝིཡ རུཀྑེསུ, ཨུཔཱདཱནཀྑནྡྷེསུཡེཝ ནིབྦཏྟནྟི. ཨུཔཱདཱནཀྑནྡྷཱནཉྩ ཨཱདིདུཀྑཾ ཛཱཏི, མཛ྄ཛྷེདུཀྑཾ ཛརཱ, པརིཡོསཱནདུཀྑཾ མརཎཾ. མཱརཎནྟིཀདུཀྑཱབྷིགྷཱཏེན པརིཌཡ྄ཧམཱནདུཀྑཾ སོཀོ, ཏདསཧནཏོ ལཱལཔྤནདུཀྑཾ པརིདེཝོ. ཏཏོ དྷཱཏུཀྑོབྷསངྑཱཏཨནིཊྛཕོཊྛབྦསམཱཡོགཏོ ཀཱཡསྶ ཨཱབཱདྷནདུཀྑཾ དུཀྑཾ. ཏེན བཱདྷིཡམཱནཱནཾ པུཐུཛྫནཱནཾ ཏཏྠ པཊིགྷུཔྤཏྟིཏོ ཙེཏོབཱདྷནདུཀྑཾ དོམནསྶཾ. སོཀཱདིཝུཌྜྷིཡཱ ཛནིཏཝིསཱདཱནཾ ཨནུཏྠུནནདུཀྑཾ ཨུཔཱཡཱསོ. མནོརཐཝིགྷཱཏཔྤཏྟཱནཾ ཨིཙྪཱཝིགྷཱཏདུཀྑཾ ཨིཙྪིཏཱལཱབྷོཏི ཨེཝཾ ནཱནཔྤཀཱརཏོ ཨུཔཔརིཀྑིཡམཱནཱ ཨུཔཱདཱནཀྑནྡྷཱཝ དུཀྑཱཏི ཡདེཏཾ ཨེཀམེཀཾ དསྶེཏྭཱ ཝུཙྩམཱནཾ ཨནེཀེཧི ཀཔྤེཧི ན སཀྐཱ ཨསེསཏོ ཝཏྟུཾ, ཏཾ སབྦམྤི དུཀྑཾ ཨེཀཛལབིནྡུམྷི སཀལསམུདྡཛལརསཾ ཝིཡ ཡེསུ ཀེསུཙི པཉྩསུ ཨུཔཱདཱནཀྑནྡྷེསུ སངྑིཔིཏྭཱ དསྶེཏུཾ ‘‘སཾཁིཏྟེན པཉྩུཔཱདཱནཀྑནྡྷཱ དུཀྑཱ’’ཏི བྷགཝཱ ཨཝོཙཱཏི.

དུཀྑསཙྩནིདྡེསཝཎྞནཱ ནིཊྛིཏཱ.

༢. སམུདཡསཙྩནིདྡེསཝཎྞནཱ

༢༠༣. སམུདཡསཙྩནིདྡེསེ ¶ ཡཱཡཾ ཏཎྷཱཏི ཡཱ ཨཡཾ ཏཎྷཱ. པོནོབྦྷཝིཀཱཏི པུནབྦྷཝཀརཎཾ ¶ པུནོབྦྷཝོ, པུནོབྦྷཝོ སཱིལམསྶཱཏི པོནོབྦྷཝིཀཱ. ཨཔིཙ པུནབྦྷཝཾ ¶ དེཏི, པུནབྦྷཝཱཡ སཾཝཏྟཏི, པུནཔྤུནཾ བྷཝེ ནིབྦཏྟེཏཱིཏི པོནོབྦྷཝིཀཱ. སཱ པནེསཱ པུནབྦྷཝསྶ དཱཡིཀཱཔི ཨཏྠི ཨདཱཡིཀཱཔི, པུནབྦྷཝཱཡ སཾཝཏྟནིཀཱཔི ཨཏྠི ཨསཾཝཏྟནིཀཱཔི, དིནྣཱཡ པཊིསནྡྷིཡཱ ཨུཔདྷིཝེཔཀྐམཏྟཱཔི. སཱ པུནབྦྷཝཾ དདམཱནཱཔི ཨདདམཱནཱཔི, པུནབྦྷཝཱཡ སཾཝཏྟམཱནཱཔི ཨསཾཝཏྟམཱནཱཔི, དིནྣཱཡ པཊིསནྡྷིཡཱ ཨུཔདྷིཝེཔཀྐམཏྟཱཔི པོནོབྦྷཝིཀཱ ཨེཝཱཏི ནཱམཾ ལབྷཏི. ཨབྷིནནྡནསངྑཱཏེན ནནྡིརཱགེན སཧགཏཱཏི ནནྡིརཱགསཧགཏཱ, ནནྡིརཱགེན སདྡྷིཾ ཨཏྠཏོ ཨེཀཏྟམེཝ གཏཱཏི ཝུཏྟཾ ཧོཏི. ཏཏྲཏཏྲཱབྷིནནྡིནཱིཏི ཡཏྲ ཡཏྲ ཨཏྟབྷཱཝོ ཏཏྲཏཏྲཱབྷིནནྡིནཱི, རཱུཔཱདཱིསུ ཝཱ ཨཱརམྨཎེསུ ཏཏྲཏཏྲཱབྷིནནྡིནཱི; རཱུཔཱབྷིནནྡིནཱི སདྡགནྡྷརསཕོཊྛབྦདྷམྨཱབྷིནནྡིནཱིཏི ཨཏྠོ. སེཡྻཐིདནྟི ནིཔཱཏོ; ཏསྶ སཱ ཀཏམཱཏི ཙེཏི ཨཏྠོ. ཀཱམཏཎྷཱཏི ཀཱམེ ཏཎྷཱ ཀཱམཏཎྷཱ; པཉྩཀཱམགུཎིཀརཱགསྶེཏཾ ཨདྷིཝཙནཾ. བྷཝེ ཏཎྷཱ བྷཝཏཎྷཱ; བྷཝཔཏྠནཱཝསེན ཨུཔྤནྣསྶ སསྶཏདིཊྛིསཧགཏསྶ རཱུཔཱརཱུཔབྷཝརཱགསྶ ཙ ཛྷཱནནིཀནྟིཡཱ ཙེཏཾ ཨདྷིཝཙནཾ. ཝིབྷཝེ ཏཎྷཱ ཝིབྷཝཏཎྷཱ; ཨུཙྪེདདིཊྛིསཧགཏསྶ རཱགསྶེཏཾ ཨདྷིཝཙནཾ.

ཨིདཱནི ཏསྶཱ ཏཎྷཱཡ ཝཏྠུཾ ཝིཏྠཱརཏོ དསྶེཏུཾ སཱ ཁོ པནེསཱཏིཨཱདིམཱཧ. ཏཏྠ ཨུཔྤཛྫཏཱིཏི ཛཱཡཏི. ནིཝིསཏཱིཏི པུནཔྤུནཾ པཝཏྟིཝསེན པཏིཊྛཧཏི. ཡཾ ལོཀེ པིཡརཱུཔཾ སཱཏརཱུཔནྟི ཡཾ ལོཀསྨིཾ པིཡསབྷཱཝཉྩེཝ མདྷུརསབྷཱཝཉྩ. ཙཀྑུཾ ལོཀེཏིཨཱདཱིསུ ལོཀསྨིཉྷི ཙཀྑཱདཱིསུ མམཏྟེན ཨབྷིནིཝིཊྛཱ སཏྟཱ སམྤཏྟིཡཾ པཏིཊྛིཏཱ ཨཏྟནོ ཙཀྑུཾ ཨཱདཱསཱདཱིསུ ནིམིཏྟགྒཧཎཱནུསཱརེན ཝིཔྤསནྣཔཉྩཔསཱདཾ སུཝཎྞཝིམཱནེ ཨུགྒྷཱཊིཏམཎིསཱིཧཔཉྫརཾ ཝིཡ མཉྙནྟི, སོཏཾ རཛཏཔནཱལི༹ཀཾ ཝིཡ པཱམངྒསུཏྟཀཾ ཝིཡ ཙ ¶ མཉྙནྟི, ཏུངྒནཱསཱཏི ལདྡྷཝོཧཱརཾ གྷཱནཾ ཝཊྚེཏྭཱ ཋཔིཏཧརིཏཱལཝཊྚིཾ ཝིཡ མཉྙནྟི, ཛིཝ྄ཧཾ རཏྟཀམྦལཔཊལཾ ཝིཡ མུདུསིནིདྡྷམདྷུརརསདཾ མཉྙནྟི, ཀཱཡཾ སཱལལཊྛིཾ ཝིཡ སུཝཎྞཏོརཎཾ ཝིཡ ཙ མཉྙནྟི, མནཾ ཨཉྙེསཾ མནེན ཨསདིསཾ ཨུལཱ༹རཾ མཉྙནྟི, རཱུཔཾ སུཝཎྞཀཎིཀཱརཔུཔྥཱདིཝཎྞཾ ཝིཡ ¶ , སདྡཾ མཏྟཀརཝཱིཀཀོཀིལམནྡདྷམིཏམཎིཝཾསནིགྒྷོསཾ ཝིཡ, ཨཏྟནཱ པཊིལདྡྷཱནི ཙཏུསམུཊྛཱནིཀགནྡྷཱརམྨཎཱདཱིནི ‘ཀསྶ ཨཉྙསྶ ཨེཝརཱུཔཱནི ཨཏྠཱི’ཏི མཉྙནྟི. ཏེསཾ ཨེཝཾ མཉྙམཱནཱནཾ ཏཱནི ཙཀྑཱདཱིནི པིཡརཱུཔཱནི ཙེཝ ཧོནྟི སཱཏརཱུཔཱནི ཙ. ཨཐ ནེསཾ ཏཏྠ ཨནུཔྤནྣཱ ཙེཝ ཏཎྷཱ ཨུཔྤཛྫཏི, ཨུཔྤནྣཱ ཙ པུནཔྤུནཾ པཝཏྟིཝསེན ནིཝིསཏི. ཏསྨཱ བྷགཝཱ – ‘‘ཙཀྑུཾ ལོཀེ ¶ པིཡརཱུཔཾ སཱཏརཱུཔཾ. ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏཱི’’ཏིཨཱདིམཱཧ. ཏཏྠ ཨུཔྤཛྫམཱནཱཏི ཡདཱ ཨུཔྤཛྫཏི ཏདཱ ཨེཏྠ ཨུཔྤཛྫཏཱིཏི ཨཏྠོ. ཨེས ནཡོ སབྦཏྠཱཔཱིཏི.

སམུདཡསཙྩནིདྡེསཝཎྞནཱ ནིཊྛིཏཱ.

༣. ནིརོདྷསཙྩནིདྡེསཝཎྞནཱ

༢༠༤. ནིརོདྷསཙྩནིདྡེསེ ཡོ ཏསྶཱཡེཝ ཏཎྷཱཡཱཏི ཨེཏྠ ‘ཡོ ཏསྶེཝ དུཀྑསྶཱ’ཏི ཝཏྟབྦེ ཡསྨཱ སམུདཡནིརོདྷེནེཝ དུཀྑཾ ནིརུཛ྄ཛྷཏི ནོ ཨཉྙཐཱ, ཡཐཱཧ –

‘‘ཡཐཱཔི མཱུལེ ཨནུཔདྡཝེ དལ༹ྷེ,

ཚིནྣོཔི རུཀྑོ པུནརེཝ རཱུཧཏི;

ཨེཝམྤི ཏཎྷཱནུསཡེ ཨནཱུཧཏེ,

ནིབྦཏྟཏི དུཀྑམིདཾ པུནཔྤུན’’ནྟི. (དྷ. པ. ༣༣༨);

ཏསྨཱ ཏཾ དུཀྑནིརོདྷཾ དསྶེནྟོ སམུདཡནིརོདྷེན དསྶེཏུཾ ཨེཝམཱཧ. སཱིཧསམཱནཝུཏྟིནོ ཧི ཏཐཱགཏཱ. ཏེ དུཀྑཾ ནིརོདྷེནྟཱ དུཀྑནིརོདྷཉྩ དསྶེནྟཱ ཧེཏུམྷི པཊིཔཛྫནྟི, ན ཕལེ. སུཝཱནཝུཏྟིནོ པན ཨཉྙཏིཏྠིཡཱ. ཏེ དུཀྑཾ ནིརོདྷེནྟཱ དུཀྑནིརོདྷཉྩ དསྶེནྟཱ ཨཏྟཀིལམཐཱནུཡོགེན ¶ ཙེཝ ཏསྶེཝ ཙ དེསནཱཡ ཕལེ པཊིཔཛྫནྟི, ན ཧེཏུམྷཱིཏི. སཱིཧསམཱནཝུཏྟིཏཱཡ སཏྠཱ ཧེཏུམྷི པཊིཔཛྫནྟོ ཡོ ཏསྶཱཡེཝཱཏིཨཱདིམཱཧ.

ཏཏྠ ཏསྶཱཡེཝཱཏི ཡཱ སཱ ཨུཔྤཏྟི ནིཝེསཝསེན ཧེཊྛཱ པཀཱསིཏཱ ཏསྶཱཡེཝ. ཨསེསཝིརཱགནིརོདྷོཏིཨཱདཱིནི སབྦཱནི ནིབྦཱནཝེཝཙནཱནེཝ ¶ . ནིབྦཱནཉྷི ཨཱགམྨ ཏཎྷཱ ཨསེསཱ ཝིརཛྫཏི ནིརུཛ྄ཛྷཏི. ཏསྨཱ ཏཾ ‘‘ཏསྶཱཡེཝ ཏཎྷཱཡ ཨསེསཝིརཱགནིརོདྷོ’’ཏི ཝུཙྩཏི. ནིབྦཱནཉྩ ཨཱགམྨ ཏཎྷཱ ཙཛིཡཏི, པཊིནིསྶཛྫིཡཏི, མུཙྩཏི, ན ཨལླིཡཏི. ཏསྨཱ ནིབྦཱནཾ ‘‘ཙཱགོ པཊིནིསྶགྒོ མུཏྟི ཨནཱལཡོ’’ཏི ཝུཙྩཏི. ཨེཀམེཝ ཧི ¶ ནིབྦཱནཾ. ནཱམཱནི པནསྶ སབྦསངྑཏཱནཾ ནཱམཔཊིཔཀྑཝསེན ཨནེཀཱནི ནིབྦཱནཝེཝཙནཱནེཝ ཧོནྟི, སེཡྻཐིདཾ – ཨསེསཝིརཱགནིརོདྷོ, ཙཱགོ, པཊིནིསྶགྒོ, མུཏྟི, ཨནཱལཡོ, རཱགཀྑཡོ, དོསཀྑཡོ, མོཧཀྑཡོ, ཏཎྷཱཀྑཡོ, ཨནུཔྤཱདོ, ཨཔྤཝཏྟཾ, ཨནིམིཏྟཾ, ཨཔྤཎིཧིཏཾ, ཨནཱཡཱུཧནཾ, ཨཔྤཊིསནྡྷི, ཨནུཔཔཏྟི, ཨགཏི, ཨཛཱཏཾ, ཨཛརཾ, ཨབྱཱདྷི, ཨམཏཾ, ཨསོཀཾ, ཨཔརིདེཝཾ, ཨནུཔཱཡཱསཾ, ཨསཾཀིལིཊྛནྟིཨཱདཱིནི.

ཨིདཱནི མགྒེན ཚིནྣཱཡ ནིབྦཱནཾ ཨཱགམྨ ཨཔྤཝཏྟིཔཏྟཱཡཔི ཙ ཏཎྷཱཡ ཡེསུ ཝཏྠཱུསུ ཏསྶཱ ཨུཔྤཏྟི དསྶིཏཱ, ཏཏྠེཝ ཨབྷཱཝཾ དསྶེཏུཾ སཱ ཁོ པནེསཱཏིཨཱདིམཱཧ. ཏཏྠ ཡཐཱ པུརིསོ ཁེཏྟེ ཛཱཏཾ ཏིཏྟཨལཱབུཝལླིཾ དིསྭཱ ཨགྒཏོ པཊྛཱཡ མཱུལཾ པརིཡེསིཏྭཱ ཚིནྡེཡྻ, སཱ ཨནུཔུབྦེན མིལཱཡིཏྭཱ ཨཔྤཝཏྟིཾ གཙྪེཡྻ. ཏཏོ ཏསྨིཾ ཁེཏྟེ ཏིཏྟཨལཱབུ ནིརུདྡྷཱ པཧཱིནཱཏི ཝུཙྩེཡྻ. ཨེཝམེཝ ཁེཏྟེ ཏིཏྟཨལཱབུ ཝིཡ ཙཀྑཱདཱིསུ ཏཎྷཱ. སཱ ཨརིཡམགྒེན མཱུལཙྪིནྣཱ ནིབྦཱནཾ ཨཱགམྨ ཨཔྤཝཏྟིཾ གཙྪཏི. ཨེཝཾ གཏཱ པན ཏེསུ ཝཏྠཱུསུ ཁེཏྟེ ཏིཏྟཨལཱབུ ཝིཡ ན པཉྙཱཡཏི. ཡཐཱ ཙ ཨཊཝིཏོ ཙོརེ ཨཱནེཏྭཱ ནགརསྶ དཀྑིཎདྭཱརེ གྷཱཏེཡྻུཾ, ཏཏོ ཨཊཝིཡཾ ཙོརཱ མཏཱཏི ཝཱ མཱརིཏཱཏི ཝཱ ཝུཙྩེཡྻུཾ; ཨེཝམེཝ ཨཊཝིཡཾ ཙོརཱ ཝིཡ ཡཱ ཙཀྑཱདཱིསུ ཏཎྷཱ, སཱ དཀྑིཎདྭཱརེ ཙོརཱ ཝིཡ ནིབྦཱནཾ ཨཱགམྨ ནིརུདྡྷཏྟཱ ནིབྦཱནེ ནིརུདྡྷཱ. ཨེཝཾ ནིརུདྡྷཱ པན ཏེསུ ཝཏྠཱུསུ ཨཊཝིཡཾ ¶ ཙོརཱ ཝིཡ ན པཉྙཱཡཏི. ཏེནསྶཱ ཏཏྠེཝ ནིརོདྷཾ དསྶེནྟོ ‘‘ཙཀྑུཾ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ པཧཱིཡམཱནཱ པཧཱིཡཏི, ཨེཏྠ ནིརུཛ྄ཛྷམཱནཱ ནིརུཛ྄ཛྷཏཱི’’ཏིཨཱདིམཱཧ. སེསམེཏྠ ཨུཏྟཱནཏྠམེཝཱཏི.

ནིརོདྷསཙྩནིདྡེསཝཎྞནཱ ནིཊྛིཏཱ.

༤. མགྒསཙྩནིདྡེསཝཎྞནཱ

༢༠༥. མགྒསཙྩནིདྡེསེ ¶ ཨཡམེཝཱཏི ཨཉྙམགྒཔཊིཀྑེཔནཏྠཾ ནིཡམནཾ. ཨརིཡོཏི ཏཾཏཾམགྒཝཛ྄ཛྷེཧི ཀིལེསེཧི ཨཱརཀཏྟཱ ཨརིཡབྷཱཝཀརཏྟཱ ཨརིཡཕལཔཊིལཱབྷཀརཏྟཱ ཙ ཨརིཡོ. ཨཊྛངྒཱནི ཨསྶཱཏི ཨཊྛངྒིཀོ. སྭཱཡཾ ཙཏུརངྒིཀཱ ཝིཡ སེནཱ, པཉྩངྒིཀཾ ཝིཡ ཏཱུརིཡཾ ཨངྒམཏྟམེཝ ¶ ཧོཏི, ཨངྒཝིནིམུཏྟོ ནཏྠི. ནིབྦཱནཏྠིཀེཧི མགྒཱིཡཏི, ནིབྦཱནཾ ཝཱ མགྒཏི, ཀིལེསེ ཝཱ མཱརེནྟོ གཙྪཏཱིཏི མགྒོ. སེཡྻཐིདནྟི སོ ཀཏམོཏི ཙེཏི ཨཏྠོ.

ཨིདཱནི ཨངྒམཏྟམེཝ མགྒོ ཧོཏི, ཨངྒཝིནིམྨུཏྟོ ནཏྠཱིཏི དསྶེནྟོ སམྨཱདིཊྛི…པེ… སམྨཱསམཱདྷཱིཏི ཨཱཧ. ཏཏྠ སམྨཱ དསྶནལཀྑཎཱ སམྨཱདིཊྛི. སམྨཱ ཨབྷིནིརོཔནལཀྑཎོ སམྨཱསངྐཔྤོ. སམྨཱ པརིགྒཧལཀྑཎཱ སམྨཱཝཱཙཱ. སམྨཱ སམུཊྛཱཔནལཀྑཎོ སམྨཱཀམྨནྟོ. སམྨཱ ཝོདཱནལཀྑཎོ སམྨཱཨཱཛཱིཝོ. སམྨཱ པགྒཧལཀྑཎོ སམྨཱཝཱཡཱམོ. སམྨཱ ཨུཔཊྛཱནལཀྑཎཱ སམྨཱསཏི. སམྨཱ སམཱདྷཱནལཀྑཎོ སམྨཱསམཱདྷི.

ཏེསུ ཙ ཨེཀེཀསྶ ཏཱིཎི ཏཱིཎི ཀིཙྩཱནི ཧོནྟི, སེཡྻཐིདཾ – སམྨཱདིཊྛི ཏཱཝ ཨཉྙེཧིཔི ཨཏྟནོ པཙྩནཱིཀཀིལེསེཧི སདྡྷིཾ མིཙྪཱདིཊྛིཾ པཛཧཏི, ནིརོདྷཾ ཨཱརམྨཎཾ ཀརོཏི, སམྤཡུཏྟདྷམྨེ ཙ པསྶཏི ཏཔྤཊིཙྪཱདཀམོཧཝིདྷམནཝསེན ཨསམྨོཧཏོ. སམྨཱསངྐཔྤཱདཡོཔི ཏཐེཝ མིཙྪཱསངྐཔྤཱདཱིནི ཙ པཛཧནྟི, ནིརོདྷཉྩ ཨཱརམྨཎཾ ཀརོནྟི. ཝིསེསཏོ པནེཏྠ སམྨཱསངྐཔྤོ སཧཛཱཏདྷམྨེ ¶ ཨབྷིནིརོཔེཏི, སམྨཱཝཱཙཱ སམྨཱ པརིགྒཎྷཱཏི, སམྨཱཀམྨནྟོ སམྨཱ སམུཊྛཱཔེཏི, སམྨཱཨཱཛཱིཝོ སམྨཱ ཝོདཱཔེཏི, སམྨཱཝཱཡཱམོ སམྨཱ པགྒཎྷཱཏི, སམྨཱསཏི སམྨཱ ཨུཔཊྛཱཏི, སམྨཱསམཱདྷི སམྨཱ པདཧཏི.

ཨཔིཙེསཱ སམྨཱདིཊྛི ནཱམ པུབྦབྷཱགེ ནཱནཱཀྑཎཱ ནཱནཱརམྨཎཱ ཧོཏི, མགྒཀཱལེ ཨེཀཀྑཎཱ ཨེཀཱརམྨཎཱ, ཀིཙྩཏོ པན དུཀྑེ ཉཱཎནྟིཨཱདཱིནི ཙཏྟཱརི ནཱམཱནི ལབྷཏི. སམྨཱསངྐཔྤཱདཡོཔི པུབྦབྷཱགེ ནཱནཱཀྑཎཱ ནཱནཱརམྨཎཱ ཧོནྟི, མགྒཀཱལེ ཨེཀཀྑཎཱ ཨེཀཱརམྨཎཱ. ཏེསུ སམྨཱསངྐཔྤོ ཀིཙྩཏོ ནེཀྑམྨསངྐཔྤོཏིཨཱདཱིནི ཏཱིཎི ¶ ནཱམཱནི ལབྷཏི. སམྨཱཝཱཙཱདཡོ ཏཡོ པུབྦབྷཱགེ ནཱནཱཀྑཎཱ ནཱནཱརམྨཎཱ ཝིརཏིཡོཔི ཧོནྟི ཙེཏནཱཡོཔི, མགྒཀྑཎེ པན ཝིརཏིཡོཝ. སམྨཱཝཱཡཱམོ སམྨཱསཏཱིཏི ཨིདམྤི དྭཡཾ ཀིཙྩཏོ སམྨཔྤདྷཱནསཏིཔཊྛཱནཝསེན ཙཏྟཱརི ནཱམཱནི ལབྷཏི. སམྨཱསམཱདྷི པན པུབྦབྷཱགེཔི མགྒཀྑཎེཔི སམྨཱསམཱདྷིཡེཝ.

ཨིཏི ཨིམེསུ ཨཊྛསུ དྷམྨེསུ བྷགཝཏཱ ནིབྦཱནཱདྷིགམཱཡ པཊིཔནྣསྶ ཡོགིནོ བཧཱུཔཀཱརཏྟཱ པཋམཾ སམྨཱདིཊྛི དེསིཏཱ. ཨཡཉྷི ‘‘པཉྙཱཔཛྫོཏོ པཉྙཱསཏྠ’’ནྟི (དྷ. ས. ༡༦, ༢༠, ༢༩, ༣༤) ཙ ¶ ཝུཏྟཱ. ཏསྨཱ ཨེཏཱཡ པུབྦབྷཱགེ ཝིཔསྶནཱཉཱཎསངྑཱཏཱཡ སམྨཱདིཊྛིཡཱ ཨཝིཛྫནྡྷཀཱརཾ ཝིདྡྷཾསེཏྭཱ ཀིལེསཙོརེ གྷཱཏེནྟོ ཁེམེན ཡོགཱཝཙརོ ནིབྦཱནཾ པཱཔུཎཱཏི. ཏེན ཝུཏྟཾ ‘‘ནིབྦཱནཱདྷིགམཱཡ པཊིཔནྣསྶ ཡོགིནོ བཧཱུཔཀཱརཏྟཱ པཋམཾ སམྨཱདིཊྛི དེསིཏཱ’’ཏི.

སམྨཱསངྐཔྤོ པན ཏསྶཱ བཧཱུཔཀཱརོ, ཏསྨཱ ཏདནནྟརཾ ཝུཏྟོ. ཡཐཱ ཧི ཧེརཉྙིཀོ ཧཏྠེན པརིཝཏྟེཏྭཱ པརིཝཏྟེཏྭཱ ཙཀྑུནཱ ཀཧཱཔཎཾ ཨོལོཀེནྟོ ‘ཨཡཾ ཀཱུཊོ, ཨཡཾ ཚེཀོ’ཏི ཛཱནཱཏི, ཨེཝཾ ཡོགཱཝཙརོཔི པུབྦབྷཱགེ ཝིཏཀྐེན ཝིཏཀྐེཏྭཱ ཝིཔསྶནཱཔཉྙཱཡ ཨོལོཀཡམཱནོ ‘ཨིམེ དྷམྨཱ ཀཱམཱཝཙརཱ, ཨིམེ དྷམྨཱ རཱུཔཱཝཙརཱདཡོ’ཏི ཛཱནཱཏི. ཡཐཱ ཝཱ པན པུརིསེན ཀོཊིཡཾ གཧེཏྭཱ པརིཝཏྟེཏྭཱ པརིཝཏྟེཏྭཱ དིནྣཾ མཧཱརུཀྑཾ ཏཙྪཀོ ཝཱསིཡཱ ཏཙྪེཏྭཱ ཀམྨེ ཨུཔནེཏི, ཨེཝཾ ཝིཏཀྐེན ཝིཏཀྐེཏྭཱ ཝིཏཀྐཏྭཱ དིནྣདྷམྨེ ཡོགཱཝཙརོ པཉྙཱཡ ‘ཨིམེ དྷམྨཱ ཀཱམཱཝཙརཱ, ཨིམེ དྷམྨཱ རཱུཔཱཝཙརཱ’ཏིཨཱདིནཱ ནཡེན པརིཙྪིནྡིཏྭཱ ཀམྨེ ཨུཔནེཏི. ཏེན ¶ ཝུཏྟཾ ‘སམྨཱསངྐཔྤོ པན ཏསྶཱ བཧཱུཔཀཱརོ, ཏསྨཱ ཏདནནྟརཾ ཝུཏྟོ’’ཏི.

སྭཱཡཾ ཡཐཱ སམྨཱདིཊྛིཡཱ, ཨེཝཾ སམྨཱཝཱཙཱཡཔི ཨུཔཀཱརཀོ. ཡཐཱཧ – ‘‘པུབྦེ ཁོ, གཧཔཏི, ཝིཏཀྐེཏྭཱ ཝིཙཱརེཏྭཱ པཙྪཱ ཝཱཙཾ བྷིནྡཏཱི’’ཏི (མ. ནི. ༡.༤༦༣). ཏསྨཱ ཏདནནྟརཾ སམྨཱཝཱཙཱ ཝུཏྟཱ.

ཡསྨཱ པན ‘ཨིདཉྩིདཉྩ ཀརིསྶཱམཱ’ཏི པཋམཾ ཝཱཙཱཡ སཾཝིདཧིཏྭཱ ལོཀེ ཀམྨནྟེ པཡོཛེནྟི, ཏསྨཱ ཝཱཙཱ ཀཱཡཀམྨསྶ ཨུཔཀཱརིཀཱཏི སམྨཱཝཱཙཱཡ ཨནནྟརཾ སམྨཱཀམྨནྟོ ཝུཏྟོ.

ཙཏུབྦིདྷཾ ¶ པན ཝཙཱིདུཙྩརིཏཾ, ཏིཝིདྷཾ ཀཱཡདུཙྩརིཏཾ པཧཱཡ ཨུབྷཡཾ སུཙརིཏཾ པཱུརེནྟསྶེཝ ཡསྨཱ ཨཱཛཱིཝཊྛམཀསཱིལཾ པཱུརཏི, ན ཨིཏརསྶ, ཏསྨཱ ཏདུབྷཡཱནནྟརཾ སམྨཱཨཱཛཱིཝོ ཝུཏྟོ.

ཨེཝཾ སུདྡྷཱཛཱིཝེན ‘པརིསུདྡྷོ མེ ཨཱཛཱིཝོ’ཏི ཨེཏྟཱཝཏཱ པརིཏོསཾ ཨཀཏྭཱ སུཏྟཔྤམཏྟེན ཝིཧརིཏུཾ ན ཡུཏྟཾ, ཨཐ ཁོ སབྦཨིརིཡཱཔཐེསུ ཨིདཾ ཝཱིརིཡམཱརབྷིཏབྦནྟི དསྶེཏུཾ ཏདནནྟརཾ སམྨཱཝཱཡཱམོ ཝུཏྟོ.

ཏཏོ ¶ ཨཱརདྡྷཝཱིརིཡེནཱཔི ཀཱཡཱདཱིསུ ཙཏཱུསུ ཝཏྠཱུསུ སཏི སུཔྤཏིཊྛིཏཱ ཀཱཏབྦཱཏི དསྶནཏྠཾ ཏདནནྟརཾ སམྨཱསཏི དེསིཏཱ.

ཡསྨཱ པན ཨེཝཾ སུཔྤཏིཊྛིཏཱ སཏི སམཱདྷིསྶ ཨུཔཀཱརཱནུཔཀཱརཱནཾ དྷམྨཱནཾ གཏིཡོ སམནྭེསིཏྭཱ པཧོཏི ཨེཀཏྟཱརམྨཎེ ཙིཏྟཾ སམཱདྷཱཏུཾ, ཏསྨཱ སམྨཱསཏིཨནནྟརཾ སམྨཱསམཱདྷི དེསིཏོཏི ཝེདིཏབྦོ.

སམྨཱདིཊྛིནིདྡེསེ ‘‘དུཀྑེ ཉཱཎ’’ནྟིཨཱདིནཱ ཙཏུསཙྩཀམྨཊྛཱནཾ དསྶིཏཾ. ཏཏྠ པུརིམཱནི དྭེ སཙྩཱནི ཝཊྚཾ, པཙྪིམཱནི ཝིཝཊྚཾ. ཏེསུ བྷིཀྑུནོ ཝཊྚེ ཀམྨཊྛཱནཱབྷིནིཝེསོ ཧོཏི, ཝིཝཊྚེ ནཏྠི ཨབྷིནིཝེསོ. པུརིམཱནི ཧི དྭེ སཙྩཱནི ‘‘པཉྩཀྑནྡྷཱ དུཀྑཾ, ཏཎྷཱ སམུདཡོ’’ཏི ཨེཝཾ སངྑེཔེན ཙ ‘‘ཀཏམེ པཉྩཀྑནྡྷཱ? རཱུཔཀྑནྡྷོ’’ཏིཨཱདིནཱ ནཡེན ཝིཏྠཱརེན ཙ ཨཱཙརིཡསྶ སནྟིཀེ ཨུགྒཎྷིཏྭཱ ཝཱཙཱཡ པུནཔྤུནཾ པརིཝཏྟེནྟོ ཡོགཱཝཙརོ ཀམྨཾ ཀརོཏི; ཨིཏརེསུ པན དྭཱིསུ སཙྩེསུ ‘‘ནིརོདྷསཙྩཾ ཨིཊྛཾ ཀནྟཾ མནཱཔཾ, མགྒསཙྩཾ ཨིཊྛཾ ཀནྟཾ མནཱཔ’’ནྟི ཨེཝཾ སཝནེནེཝ ཀམྨཾ ཀརོཏི. སོ ཨེཝཾ ཀམྨཾ ཀརོནྟོ ཙཏྟཱརི སཙྩཱནི ཨེཀེན པཊིཝེདྷེན པཊིཝིཛ྄ཛྷཏི, ཨེཀཱབྷིསམཡེན ཨབྷིསམེཏི; དུཀྑཾ ¶ པརིཉྙཱཔཊིཝེདྷེན པཊིཝིཛ྄ཛྷཏི, སམུདཡཾ པཧཱནཔཊིཝེདྷེན, ནིརོདྷཾ སཙྪིཀིརིཡཔཊིཝེདྷེན, མགྒཾ བྷཱཝནཱཔཊིཝེདྷེན པཊིཝིཛ྄ཛྷཏི; དུཀྑཾ པརིཉྙཱབྷིསམཡེན…པེ… མགྒཾ བྷཱཝནཱབྷིསམཡེན ཨབྷིསམེཏི.

ཨེཝམསྶ པུབྦབྷཱགེ དྭཱིསུ སཙྩེསུ ཨུགྒཧཔརིཔུཙྪཱསཝནདྷཱརཎསམྨསནཔཊིཝེདྷོ ཧོཏི, དྭཱིསུ སཝནཔཊིཝེདྷོཡེཝ; ཨཔརབྷཱགེ ཏཱིསུ ཀིཙྩཏོ པཊིཝེདྷོ ཧོཏི, ནིརོདྷེ ཨཱརམྨཎཔཊིཝེདྷོ. ཏཏྠ སབྦམྤི པཊིཝེདྷཉཱཎཾ ལོཀུཏྟརཾ, སཝནདྷཱརཎསམྨསནཉཱཎཾ ལོཀིཡཾ ཀཱམཱཝཙརཾ, པཙྩཝེཀྑཎཱ པན པཏྟསཙྩསྶ ཧོཏི. ཨཡཉྩ ཨཱདིཀམྨིཀོ. ཏསྨཱ སཱ ཨིདྷ ན ཝུཏྟཱ. ཨིམསྶ ཙ བྷིཀྑུནོ པུབྦེ པརིགྒཧཏོ ‘དུཀྑཾ པརིཛཱནཱམི ¶ , སམུདཡཾ པཛཧཱམི, ནིརོདྷཾ སཙྪིཀརོམི, མགྒཾ བྷཱཝེམཱི’ཏི ཨཱབྷོགསམནྣཱཧཱརམནསིཀཱརཔཙྩཝེཀྑཎཱ ནཏྠི, པརིགྒཧཏོ པཊྛཱཡ ཧོཏི; ཨཔརབྷཱགེ པན དུཀྑཾ པརིཉྙཱཏམེཝ ཧོཏི…པེ… མགྒོ བྷཱཝིཏོཝ ཧོཏི.

ཏཏྠ དྭེ སཙྩཱནི དུདྡསཏྟཱ གམྦྷཱིརཱནི, དྭེ གམྦྷཱིརཏྟཱ དུདྡསཱནི. དུཀྑསཙྩཉྷི ཨུཔྤཏྟིཏོ པཱཀཊཾ; ཁཱཎུཀཎྚཀཔྤཧཱརཱདཱིསུ ‘ཨཧོ དུཀྑ’ནྟི ཝཏྟབྦཏམྤི ཨཱཔཛྫཏི. སམུདཡམྤི ¶ ཁཱདིཏུཀཱམཏཱབྷུཉྫིཏུཀཱམཏཱདིཝསེན ཨུཔྤཏྟིཏོ པཱཀཊཾ. ལཀྑཎཔཊིཝེདྷཏོ པན ཨུབྷཡམྤི གམྦྷཱིརཾ. ཨིཏི ཏཱནི དུདྡསཏྟཱ གམྦྷཱིརཱནི. ཨིཏརེསཾ པན དྭིནྣཾ དསྶནཏྠཱཡ པཡོགོ བྷཝགྒགཧཎཏྠཾ ཧཏྠཔྤསཱརཎཾ ཝིཡ, ཨཝཱིཙིཕུསནཏྠཾ པཱདཔྤསཱརཎཾ ཝིཡ, སཏདྷཱ བྷིནྣཝཱལསྶ ཀོཊིཡཱ ཀོཊིཾ པཊིཔཱདནཾ ཝིཡ ཙ ཧོཏི. ཨིཏི ཏཱནི གམྦྷཱིརཏྟཱ དུདྡསཱནི. ཨེཝཾ དུདྡསཏྟཱ གམྦྷཱིརེསུ གམྦྷཱིརཏྟཱ ཙ དུདྡསེསུ ཙཏཱུསུ སཙྩེསུ ཨུགྒཧཱདིཝསེན པུབྦབྷཱགཉཱཎུཔྤཏྟིཾ སནྡྷཱཡ ཨིདཾ ‘‘དུཀྑེ ཉཱཎ’’ནྟིཨཱདི ཝུཏྟཾ. པཊིཝེདྷཀྑཎེ པན ཨེཀམེཝ ཉཱཎཾ ཧོཏི.

སམྨཱསངྐཔྤནིདྡེསེ ཀཱམཏོ ནིསྶཊོཏི ནེཀྑམྨསངྐཔྤོ. བྱཱཔཱདཏོ ནིསྶཊོཏི ཨབྱཱཔཱདསངྐཔྤོ. ཝིཧིཾསཱཡ ནིསྶཊོཏི ཨཝིཧིཾསཱསངྐཔྤོ. ཏཏྠ ནེཀྑམྨཝིཏཀྐོ ཀཱམཝིཏཀྐསྶ པདགྷཱཏཾ པདཙྪེདཾ ཀརོནྟོ ¶ ཨུཔྤཛྫཏི, ཨབྱཱཔཱདཝིཏཀྐོ བྱཱཔཱདཝིཏཀྐསྶ, ཨཝིཧིཾསཱཝིཏཀྐོ ཝིཧིཾསཱཝིཏཀྐསྶ. ནེཀྑམྨཝིཏཀྐོ ཙ ཀཱམཝིཏཀྐསྶ པཙྩནཱིཀོ ཧུཏྭཱ ཨུཔྤཛྫཏི, ཨབྱཱཔཱདཨཝིཧིཾསཱཝིཏཀྐཱ བྱཱཔཱདཝིཧིཾསཱཝིཏཀྐཱནཾ.

ཏཏྠ ཡོགཱཝཙརོ ཀཱམཝིཏཀྐསྶ པདགྷཱཏནཏྠཾ ཀཱམཝིཏཀྐཾ ཝཱ སམྨསཏི ཨཉྙཾ ཝཱ པན ཀིཉྩི སངྑཱརཾ. ཨཐསྶ ཝིཔསྶནཱཀྑཎེ ཝིཔསྶནཱསམྤཡུཏྟོ སངྐཔྤོ ཏདངྒཝསེན ཀཱམཝིཏཀྐསྶ པདགྷཱཏཾ པདཙྪེདཾ ཀརོནྟོ ཨུཔྤཛྫཏི, ཝིཔསྶནཾ ཨུསྶུཀྐཱཔེཏྭཱ མགྒཾ པཱཔེཏི. ཨཐསྶ མགྒཀྑཎེ མགྒསམྤཡུཏྟོ སངྐཔྤོ སམུཙྪེདཝསེན ཀཱམཝིཏཀྐསྶ པདགྷཱཏཾ པདཙྪེདཾ ཀརོནྟོ ཨུཔྤཛྫཏི; བྱཱཔཱདཝིཏཀྐསྶཱཔི པདགྷཱཏནཏྠཾ བྱཱཔཱདཝིཏཀྐཾ ཝཱ ཨཉྙཾ ཝཱ སངྑཱརཾ སམྨསཏི; ཝིཧིཾསཱཝིཏཀྐསྶ པདགྷཱཏནཏྠཾ ཝིཧིཾསཱཝིཏཀྐཾ ཝཱ ཨཉྙཾ ཝཱ སངྑཱརཾ སམྨསཏི. ཨཐསྶ ཝིཔསྶནཱཀྑཎེཏི སབྦཾ པུརིམནཡེནེཝ ཡོཛེཏབྦཾ.

ཀཱམཝིཏཀྐཱདཱིནཾ ¶ པན ཏིཎྞཾ པཱལི༹ཡཾ ཝིབྷཏྟེསུ ཨཊྛཏིཾསཱརམྨཎེསུ ཨེཀཀམྨཊྛཱནམྤི ཨཔཙྩནཱིཀཾ ནཱམ ནཏྠི. ཨེཀནྟཏོ པན ཀཱམཝིཏཀྐསྶ ཏཱཝ ཨསུབྷེསུ པཋམཛ྄ཛྷཱནམེཝ པཙྩནཱིཀཾ, བྱཱཔཱདཝིཏཀྐསྶ མེཏྟཱཡ ཏིཀཙཏུཀྐཛ྄ཛྷཱནཱནི, ཝིཧིཾསཱཝིཏཀྐསྶ ཀརུཎཱཡ ཏིཀཙཏུཀྐཛ྄ཛྷཱནཱནི. ཏསྨཱ ཨསུབྷེ པརིཀམྨཾ ཀཏྭཱ ཛྷཱནཾ སམཱཔནྣསྶ སམཱཔཏྟིཀྑཎེ ཛྷཱནསམྤཡུཏྟོ སངྐཔྤོ ཝིཀྑམྦྷནཝསེན ཀཱམཝིཏཀྐསྶ པཙྩནཱིཀོ ཧུཏྭཱ ཨུཔྤཛྫཏི. ཛྷཱནཾ པཱདཀཾ ཀཏྭཱ ཝིཔསྶནཾ པཊྛཔེནྟསྶ ཝིཔསྶནཱཀྑཎེ ཝིཔསྶནཱསམྤཡུཏྟོ སངྐཔྤོ ཏདངྒཝསེན ཀཱམཝིཏཀྐསྶ པཙྩནཱིཀོ ཧུཏྭཱ ཨུཔྤཛྫཏི. ཝིཔསྶནཾ ཨུསྶུཀྐཱཔེཏྭཱ མགྒཾ པཱཔེནྟསྶ མགྒཀྑཎེ ¶ མགྒསམྤཡུཏྟོ སངྐཔྤོ སམུཙྪེདཝསེན ཀཱམཝིཏཀྐསྶ པཙྩནཱིཀོ ཧུཏྭཱ ཨུཔྤཛྫཏི. ཨེཝཾ ཨུཔྤནྣོ ནེཀྑམྨསངྐཔྤོཏི ཝུཙྩཏཱིཏི ཝེདིཏབྦོ.

མེཏྟཱཡ པན པརིཀམྨཾ ཀཏྭཱ, ཀརུཎཱཡ པརིཀམྨཾ ཀཏྭཱ ཛྷཱནཾ སམཱཔཛྫཏཱིཏི སབྦཾ པུརིམནཡེནེཝ ཡོཛེཏབྦཾ. ཨེཝཾ ཨུཔྤནྣོ ཨབྱཱཔཱདསངྐཔྤོཏི ཝུཙྩཏི, ཨཝིཧིཾསཱསངྐཔྤོཏི ཙ ཝུཙྩཏཱིཏི ¶ ཝེདིཏབྦོ. ཨེཝམེཏེ ནེཀྑམྨསངྐཔྤཱདཡོ ཝིཔསྶནཱཛྷཱནཝསེན ཨུཔྤཏྟཱིནཾ ནཱནཏྟཱ པུབྦབྷཱགེ ནཱནཱ; མགྒཀྑཎེ པན ཨིམེསུ ཏཱིསུ ཋཱནེསུ ཨུཔྤནྣསྶ ཨཀུསལསངྐཔྤསྶ པདཙྪེདཏོ ཨནུཔྤཏྟིསཱདྷནཝསེན མགྒངྒཾ པཱུརཡམཱནོ ཨེཀོཝ ཀུསལསངྐཔྤོ ཨུཔྤཛྫཏི. ཨཡཾ སམྨཱསངྐཔྤོ ནཱམ.

སམྨཱཝཱཙཱནིདྡེསེཔི ཡསྨཱ ཨཉྙེནེཝ ཙིཏྟེན མུསཱཝཱདཱ ཝིརམཏི, ཨཉྙེནཉྙེན པིསུཎཝཱཙཱདཱིཧི, ཏསྨཱ ཙཏསྶོཔེཏཱ ཝེརམཎིཡོ པུབྦབྷཱགེ ནཱནཱ; མགྒཀྑཎེ པན མིཙྪཱཝཱཙཱསངྑཱཏཱཡ ཙཏུབྦིདྷཱཡ ཨཀུསལདུསྶཱིལྱཙེཏནཱཡ པདཙྪེདཏོ ཨནུཔྤཏྟིསཱདྷནཝསེན མགྒངྒཾ པཱུརཡམཱནཱ ཨེཀཱཝ སམྨཱཝཱཙཱསངྑཱཏཱ ཀུསལཝེརམཎཱི ཨུཔྤཛྫཏི. ཨཡཾ སམྨཱཝཱཙཱ ནཱམ.

སམྨཱཀམྨནྟནིདྡེསེཔི ཡསྨཱ ཨཉྙེནེཝ ཙིཏྟེན པཱཎཱཏིཔཱཏཱ ཝིརམཏི, ཨཉྙེན ཨདིནྣཱདཱནཱ, ཨཉྙེན ཀཱམེསུམིཙྪཱཙཱརཱ, ཏསྨཱ ཏིསྶོཔེཏཱ ཝེརམཎིཡོ པུབྦབྷཱགེ ནཱནཱ; མགྒཀྑཎེ པན མིཙྪཱཀམྨནྟསངྑཱཏཱཡ ཏིཝིདྷཱཡ ཨཀུསལདུསྶཱིལྱཙེཏནཱཡ པདཙྪེདཏོ ཨནུཔྤཏྟིསཱདྷནཝསེན མགྒངྒཾ པཱུརཡམཱནཱ ཨེཀཱཝ སམྨཱཀམྨནྟསངྑཱཏཱ ཨཀུསལཝེརམཎཱི ཨུཔྤཛྫཏི. ཨཡཾ སམྨཱཀམྨནྟོ ནཱམ.

སམྨཱཨཱཛཱིཝནིདྡེསེ ¶ ཨིདྷཱཏི ཨིམསྨིཾ སཱསནེ. ཨརིཡསཱཝཀོཏི ཨརིཡསྶ བུདྡྷསྶ སཱཝཀོ. མིཙྪཱཨཱཛཱིཝཾ པཧཱཡཱཏི པཱཔཀཾ ཨཱཛཱིཝཾ པཛཧིཏྭཱ. སམྨཱཨཱཛཱིཝེནཱཏི བུདྡྷཔསཏྠེན ཀུསལཨཱཛཱིཝེན. ཛཱིཝིཀཾ ཀཔྤེཏཱིཏི ཛཱིཝིཏཔྤཝཏྟིཾ པཝཏྟེཏི. ཨིདྷཱཔི ཡསྨཱ ཨཉྙེནེཝ ཙིཏྟེན ཀཱཡདྭཱརཝཱིཏིཀྐམཱ ཝིརམཏི; ཨཉྙེན ཝཙཱིདྭཱརཝཱིཏིཀྐམཱ, ཏསྨཱ པུབྦབྷཱགེ ནཱནཱཀྑཎེསུ ཨུཔྤཛྫཏི; མགྒཀྑཎེ པན དྭཱིསུ དྭཱརེསུ སཏྟནྣཾ ཀམྨཔཐཱནཾ ཝསེན ཨུཔྤནྣཱཡ མིཙྪཱཨཱཛཱིཝདུསྶཱིལྱཙེཏནཱཡ པདཙྪེདཏོ ཨནུཔྤཏྟིསཱདྷནཝསེན མགྒངྒཾ པཱུརཡམཱནཱ ཨེཀཱཝ སམྨཱཨཱཛཱིཝསངྑཱཏཱ ཀུསལཝེརམཎཱི ཨུཔྤཛྫཏི. ཨཡཾ སམྨཱཨཱཛཱིཝོ ནཱམ.

སམྨཱཝཱཡཱམནིདྡེསོ ¶ སམྨཔྤདྷཱནཝིབྷངྒེ ཨནུཔདཝཎྞནཱཝསེན ཨཱཝིབྷཝིསྶཏི. ཨཡཾ པན པུབྦབྷཱགེ ནཱནཱཙིཏྟེསུ ལབྷཏི. ཨཉྙེནེཝ ཧི ཙིཏྟེན ཨནུཔྤནྣཱནཾ པཱཔཀཱནཾ ¶ ཨཀུསལཱནཾ དྷམྨཱནཾ ཨནུཔྤཱདཱཡ ཝཱཡཱམཾ ཀརོཏི, ཨཉྙེན ཨུཔྤནྣཱནཾ པཧཱནཱཡ; ཨཉྙེནེཝ ཙ ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ, ཨཉྙེན ཨུཔྤནྣཱནཾ ཋིཏིཡཱ; མགྒཀྑཎེ པན ཨེཀཙིཏྟེཡེཝ ལབྦྷཏི. ཨེཀམེཝ ཧི མགྒསམྤཡུཏྟཾ ཝཱིརིཡཾ ཙཏུཀིཙྩསཱདྷནཊྛེན ཙཏྟཱརི ནཱམཱནི ལབྦྷཏི.

སམྨཱསཏིནིདྡེསོཔི སཏིཔཊྛཱནཝིབྷངྒེ ཨནུཔདཝཎྞནཱཝསེན ཨཱཝིབྷཝིསྶཏི. ཨཡམྤི ཙ པུབྦབྷཱགེ ནཱནཱཙིཏྟེསུ ལབྦྷཏི. ཨཉྙེནེཝ ཧི ཙིཏྟེན ཀཱཡཾ པརིགྒཎྷཱཏི, ཨཉྙེནཉྙེན ཝེདནཱདཱིནི; མགྒཀྑཎེ པན ཨེཀཙིཏྟེཡེཝ ལབྦྷཏི. ཨེཀཱཡེཝ ཧི མགྒསམྤཡུཏྟཱ སཏི ཙཏུཀིཙྩསཱདྷནཊྛེན ཙཏྟཱརི ནཱམཱནི ལབྷཏི.

སམྨཱསམཱདྷིནིདྡེསེ ཙཏྟཱརི ཛྷཱནཱནི པུབྦབྷཱགེཔི ནཱནཱ, མགྒཀྑཎེཔི. པུབྦབྷཱགེ སམཱཔཏྟིཝསེན ནཱནཱ, མགྒཀྑཎེ ནཱནཱམགྒཝསེན. ཨེཀསྶ ཧི པཋམམགྒོ པཋམཛ྄ཛྷཱནིཀོ ཧོཏི, དུཏིཡམགྒཱདཡོཔི པཋམཛ྄ཛྷཱནིཀཱ, དུཏིཡཱདཱིསུ ཨཉྙཏརཛ྄ཛྷཱནིཀཱ ཝཱ. ཨེཀསྶ པཋམམགྒོ དུཏིཡཱདཱིནཾ ཨཉྙཏརཛ྄ཛྷཱནིཀོ ཧོཏི, དུཏིཡཱདཡོཔི དུཏིཡཱདཱིནཾ ཨཉྙཏརཛ྄ཛྷཱནིཀཱ ཝཱ པཋམཛ྄ཛྷཱནིཀཱ ཝཱ. ཨེཝཾ ཙཏྟཱརོཔི མགྒཱ ཛྷཱནཝསེན སདིསཱ ཝཱ ཨསདིསཱ ཝཱ ཨེཀཙྩསདིསཱ ཝཱ ཧོནྟི.

ཨཡཾ པནསྶ ཝིསེསོ པཱདཀཛ྄ཛྷཱནནིཡཱམེན ཧོཏི. པཱདཀཛ྄ཛྷཱནནིཡཱམེན ཏཱཝ པཋམཛ྄ཛྷཱནལཱབྷིནོ པཋམཛ྄ཛྷཱནཱ ཝུཊྛཱཡ ཝིཔསྶནྟསྶ ཨུཔྤནྣམགྒོ ¶ པཋམཛ྄ཛྷཱནིཀོ ཧོཏི; མགྒངྒབོཛ྄ཛྷངྒཱནི པནེཏྠ པརིཔུཎྞཱནེཝ ཧོནྟི. དུཏིཡཛ྄ཛྷཱནཏོ ཨུཊྛཱཡ ཝིཔསྶནྟསྶ ཨུཔྤནྣོ མགྒོ དུཏིཡཛ྄ཛྷཱནིཀོ ཧོཏི; མགྒངྒཱནི པནེཏྠ སཏྟ ཧོནྟི. ཏཏིཡཛ྄ཛྷཱནཏོ ཨུཊྛཱཡ ཝིཔསྶནྟསྶ ཨུཔྤནྣོ མགྒོ ཏཏིཡཛ྄ཛྷཱནིཀོ ཧོཏི; མགྒངྒཱནི པནེཏྠ སཏྟ, བོཛ྄ཛྷངྒཱནི ཚ ཧོནྟི. ཨེས ནཡོ ཙཏུཏྠཛ྄ཛྷཱནཏོ པཊྛཱཡ ཡཱཝ ནེཝསཉྙཱནཱསཉྙཱཡཏནཱ.

ཨཱརུཔྤེ ཙཏུཀྐཔཉྩཀཛ྄ཛྷཱནཾ ཨུཔྤཛྫཏི. ཏཉྩ ཁོ ལོཀུཏྟརཾ ནོ ལོཀིཡནྟི ཝུཏྟཾ. ཨེཏྠ ཀཐནྟི? ཨེཏྠཱཔི པཋམཛ྄ཛྷཱནཱདཱིསུ ཡཏོ ཨུཊྛཱཡ སོཏཱཔཏྟིམགྒཾ པཊིལབྷིཏྭཱ ཨཱརུཔྤསམཱཔཏྟིཾ བྷཱཝེཏྭཱ ཡོ ཨཱརུཔྤེ ཨུཔྤནྣོ, ཏཾཛྷཱནིཀཱཝ ཏསྶ ཏཏྠ ཏཡོ མགྒཱ ཨུཔྤཛྫནྟི ¶ . ཨེཝཾ ¶ པཱདཀཛ྄ཛྷཱནམེཝ ནིཡཱམེཏི. ཀེཙི པན ཐེརཱ ‘‘ཝིཔསྶནཱཡ ཨཱརམྨཎབྷཱུཏཱ ཁནྡྷཱ ནིཡཱམེནྟཱི’’ཏི ཝདནྟི. ཀེཙི ‘‘པུགྒལཛ྄ཛྷཱསཡོ ནིཡཱམེཏཱི’’ཏི ཝདནྟི. ཀེཙི ‘‘ཝུཊྛཱནགཱམིནཱིཝིཔསྶནཱ ནིཡཱམེཏཱི’’ཏི ཝདནྟི. ཏེསཾ ཝཱདཝིནིཙྪཡོ ཧེཊྛཱ ཙིཏྟུཔྤཱདཀཎྜེ ལོཀུཏྟརཔདབྷཱཛནཱིཡཝཎྞནཱཡཾ (དྷ. ས. ཨཊྛ. ༣༥༠) ཝུཏྟནཡེནེཝ ཝེདིཏབྦོ. ཨཡཾ ཝུཙྩཏི སམྨཱསམཱདྷཱིཏི ཡཱ ཨིམེསུ ཙཏཱུསུ ཛྷཱནེསུ ཨེཀགྒཏཱ, ཨཡཾ པུབྦབྷཱགེ ལོཀིཡོ, ཨཔརབྷཱགེ ལོཀུཏྟརོ སམྨཱསམཱདྷི ནཱམ ཝུཙྩཏཱིཏི. ཨེཝཾ ལོཀིཡལོཀུཏྟརཝསེན བྷགཝཱ མགྒསཙྩཾ དེསེསི.

ཏཏྠ ལོཀིཡམགྒེ སབྦཱནེཝ མགྒངྒཱནི ཡཐཱནུརཱུཔཾ ཚསུ ཨཱརམྨཎེསུ ཨཉྙཏརཱརམྨཎཱནི ཧོནྟི. ལོཀུཏྟརམགྒེ པན ཙཏུསཙྩཔཊིཝེདྷཱཡ པཝཏྟསྶ ཨརིཡསྶ ནིབྦཱནཱརམྨཎཾ ཨཝིཛྫཱནུསཡསམུགྒྷཱཏཀཾ པཉྙཱཙཀྑུ སམྨཱདིཊྛི. ཏཐཱ སམྤནྣདིཊྛིསྶ ཏཾསམྤཡུཏྟཾ ཏིཝིདྷམིཙྪཱསངྐཔྤསམུགྒྷཱཏཀཾ ཙེཏསོ ནིབྦཱནཔདཱབྷིནིརོཔནཾ སམྨཱསངྐཔྤོ. ཏཐཱ པསྶནྟསྶ ཝིཏཀྐེནྟསྶ ཙ ཏཾསམྤཡུཏྟཱཝ ཙཏུབྦིདྷཝཙཱིདུཙྩརིཏསམུགྒྷཱཏིཀཱཡ མིཙྪཱཝཱཙཱཡ ཝིརཏི སམྨཱཝཱཙཱ. ཏཐཱ ཝིརམནྟསྶ ཏཾསམྤཡུཏྟཱཝ མིཙྪཱཀམྨནྟསམུཙྪེདིཀཱ ཏིཝིདྷཀཱཡདུཙྩརིཏཝིརཏི སམྨཱཀམྨནྟོ. ཏེསཾཡེཝ སམྨཱཝཱཙཱཀམྨནྟཱནཾ ཝོདཱནབྷཱུཏཱ ཏཾསམྤཡུཏྟཱཝ ཀུཧནཱདིསམུཙྪེདིཀཱ མིཙྪཱཨཱཛཱིཝཝིརཏི སམྨཱཨཱཛཱིཝོ. ཨིམིསྶཱ སམྨཱཝཱཙཱཀམྨནྟཱཛཱིཝསཾཁཱཏཱཡ སཱིལབྷཱུམིཡཾ པཏིཊྛམཱནསྶ ཏདནུརཱུཔོ ཏཾསམྤཡུཏྟོཝ ཀོསཛྫསམུཙྪེདཀོ ¶ ཨནུཔྤནྣུཔྤནྣཱནཾ ཨཀུསལཀུསལཱནཾ ཨནུཔྤཱདཔཧཱནུཔྤཱདཊྛིཏིསཱདྷཀོ ཙ ཝཱིརིཡཱརམྦྷོ སམྨཱཝཱཡཱམོ. ཨེཝཾ ཝཱཡམནྟསྶ ཏཾསམྤཡུཏྟོཝ མིཙྪཱསཏིཝིནིདྡྷུནནཀོ ཀཱཡཱདཱིསུ ཀཱཡཱནུཔསྶནཱདིསཱདྷཀོ ཙ ཙེཏསོ ཨསམྨོསོ སམྨཱསཏི. ཨིཏི ཨནུཏྟརཱཡ སཏིཡཱ སུཝིཧིཏཙིཏྟཱརཀྑསྶ ཏཾསམྤཡུཏྟཱཝ མིཙྪཱསམཱདྷིསམུགྒྷཱཏིཀཱ ཙིཏྟེཀགྒཏཱ སམྨཱསམཱདྷཱིཏི. ཨེས ¶ ལོཀུཏྟརོ ཨརིཡོ ཨཊྛངྒིཀོ མགྒོ ཡོ སཧ ལོཀིཡེན མགྒེན དུཀྑནིརོདྷགཱམིནཱི པཊིཔདཱཏི སངྑཾ གཏོ.

སོ ཁོ པནེས མགྒོ སམྨཱདིཊྛིསངྐཔྤཱནཾ ཝིཛྫཱཡ, སེསདྷམྨཱནཾ ཙརཎེན སངྒཧིཏཏྟཱ ཝིཛྫཱ ཙེཝ ཙརཎཉྩ. ཏཐཱ ཏེསཾ དྭིནྣཾ ཝིཔསྶནཱཡཱནེན, ཨིཏརེསཾ སམཐཡཱནེན སངྒཧིཏཏྟཱ སམཐོ ཙེཝ ཝིཔསྶནཱ ཙ. ཏེསཾ ཝཱ དྭིནྣཾ པཉྙཱཀྑནྡྷེན, ཏདནནྟརཱནཾ ཏིཎྞཾ སཱིལཀྑནྡྷེན, ཨཝསེསཱནཾ སམཱདྷིཀྑནྡྷེན ཨདྷིཔཉྙཱཨདྷིསཱིལཨདྷིཙིཏྟསིཀྑཱཧི ཙ སངྒཧིཏཏྟཱ ཁནྡྷཏྟཡཉྩེཝ སིཀྑཱཏྟཡཉྩ ཧོཏི; ཡེན སམནྣཱགཏོ ཨརིཡསཱཝཀོ དསྶནསམཏྠེཧི ཙཀྑཱུཧི གམནསམཏྠེཧི ཙ ¶ པཱདེཧི སམནྣཱགཏོ ཨདྡྷིཀོ ཝིཡ ཝིཛྫཱཙརཎསམྤནྣོ ཧུཏྭཱ ཝིཔསྶནཱཡཱནེན ཀཱམསུཁལླིཀཱནུཡོགཾ, སམཐཡཱནེན ཨཏྟཀིལམཐཱནུཡོགནྟི ཨནྟདྭཡཾ པརིཝཛྫེཏྭཱ མཛ྄ཛྷིམཔཊིཔདཾ པཊིཔནྣོ པཉྙཱཀྑནྡྷེན མོཧཀྑནྡྷཾ, སཱིལཀྑནྡྷེན དོསཀྑནྡྷཾ, སམཱདྷིཀྑནྡྷེན ཙ ལོབྷཀྑནྡྷཾ པདཱལེནྟོ ཨདྷིཔཉྙཱསིཀྑཱཡ པཉྙཱསམྤདཾ, ཨདྷིསཱིལསིཀྑཱཡ སཱིལསམྤདཾ, ཨདྷིཙིཏྟསིཀྑཱཡ སམཱདྷིསམྤདནྟི ཏིསྶོ སམྤཏྟིཡོ པཏྭཱ ཨམཏཾ ནིབྦཱནཾ སཙྪིཀརོཏི, ཨཱདིམཛ྄ཛྷཔརིཡོསཱནཀལྱཱཎཾ སཏྟཏིཾསབོདྷིཔཀྑིཡདྷམྨརཏནཝིཙིཏྟཾ སམྨཏྟནིཡཱམསངྑཱཏཾ ཨརིཡབྷཱུམིཉྩ ཨོཀྐནྟོ ཧོཏཱིཏི.

སུཏྟནྟབྷཱཛནཱིཡཝཎྞནཱ.

༢. ཨབྷིདྷམྨབྷཱཛནཱིཡཝཎྞནཱ

༢༠༦-༢༡༤. ཨིདཱནི ཨབྷིདྷམྨབྷཱཛནཱིཡཾ ཧོཏི. ཏཏྠ ‘‘ཨརིཡསཙྩཱནཱི’’ཏི ཨཝཏྭཱ ནིཔྤདེསཏོ པཙྩཡསངྑཱཏཾ སམུདཡཾ དསྶེཏུཾ ‘‘ཙཏྟཱརི སཙྩཱནཱི’’ཏི ཝུཏྟཾ ¶ . ཨརིཡསཙྩཱནཱིཏི ཧི ཝུཏྟེ ཨཝསེསཱ ཙ ཀིལེསཱ, ཨཝསེསཱ ཙ ཨཀུསལཱ དྷམྨཱ, ཏཱིཎི ཙ ཀུསལམཱུལཱནི སཱསཝཱནི, ཨཝསེསཱ ཙ སཱསཝཱ ཀུསལཱ དྷམྨཱ ན སངྒཡ྄ཧནྟི. ན ཙ ཀེཝལཾ ཏཎྷཱཝ དུཀྑཾ སམུདཱནེཏི, ཨིམེཔི ཨཝསེསཱ ཙ ཀིལེསཱདཡོ པཙྩཡཱ སམུདཱནེནྟིཡེཝ. ཨིཏི ཨིམེཔི པཙྩཡཱ དུཀྑཾ སམུདཱནེནྟིཡེཝཱཏི ནིཔྤདེསཏོ པཙྩཡསངྑཱཏཾ སམུདཡཾ དསྶེཏུཾ ‘‘ཨརིཡསཙྩཱནཱི’’ཏི ཨཝཏྭཱ ‘‘ཙཏྟཱརི སཙྩཱནཱི’’ཏི ཝུཏྟཾ.

ནིདྡེསཝཱརེ ¶ ཙ ནེསཾ པཋམཾ དུཀྑཾ ཨནིདྡིསིཏྭཱ ཏསྶེཝ དུཀྑསྶ སུཁནིདྡེསཏྠཾ དུཀྑསམུདཡོ ནིདྡིཊྛོ. ཏསྨིཉྷི ནིདྡིཊྛེ ‘‘ཨཝསེསཱ ཙ ཀིལེསཱ’’ཏིཨཱདིནཱ ནཡེན དུཀྑསཙྩཾ སུཁནིདྡེསཾ ཧོཏི. ནིརོདྷསཙྩམྤེཏྠ ཏཎྷཱཡ པཧཱནཾ ‘‘ཏཎྷཱཡ ཙ ཨཝསེསཱནཉྩ ཀིལེསཱནཾ པཧཱན’’ནྟི ཨེཝཾ ཡཐཱཝུཏྟསྶ སམུདཡསྶ པཧཱནཝསེན པཉྩཧཱཀཱརེཧི ནིདྡིཊྛཾ. མགྒསཙྩཾ པནེཏྠ པཋམཛ྄ཛྷཱནིཀསོཏཱཔཏྟིམགྒཝསེན དྷམྨསངྒཎིཡཾ ཝིབྷཏྟསྶ དེསནཱནཡསྶ མུཁམཏྟམེཝ དསྶེནྟེན ནིདྡིཊྛཾ. ཏཏྠ ནཡབྷེདོ ཝེདིཏབྦོ. ཏཾ ཨུཔརི པཀཱསཡིསྶཱམ.

ཡསྨཱ ¶ པན ན ཀེཝལཾ ཨཊྛངྒིཀོ མགྒོཝ པཊིཔདཱ ‘‘པུབྦེཝ ཁོ པནསྶ ཀཱཡཀམྨཾ ཝཙཱིཀམྨཾ ཨཱཛཱིཝོ སུཔརིསུདྡྷོ ཧོཏཱི’’ཏི (མ. ནི. ༣.༤༣༣) ཝཙནཏོ པན པུགྒལཛ྄ཛྷཱསཡཝསེན པཉྩངྒིཀོཔི མགྒོ པཊིཔདཱ ཨེཝཱཏི དེསིཏོ, ཏསྨཱ ཏཾ ནཡཾ དསྶེཏུཾ པཉྩངྒིཀཝཱརོཔི ནིདྡིཊྛོ. ཡསྨཱ ཙ ན ཀེཝལཾ ཨཊྛངྒིཀཔཉྩངྒིཀམགྒཱཝ པཊིཔདཱ, སམྤཡུཏྟཀཱ པན ཨཏིརེཀཔཉྙཱསདྷམྨཱཔི པཊིཔདཱ ཨེཝ, ཏསྨཱ ཏཾ ནཡཾ དསྶེཏུཾ ཏཏིཡོ སབྦསངྒཱཧིཀཝཱརོཔི ནིདྡིཊྛོ. ཏཏྠ ‘‘ཨཝསེསཱ དྷམྨཱ དུཀྑནིརོདྷགཱམིནིཡཱ པཊིཔདཱཡ སམྤཡུཏྟཱ’’ཏི ཨིདཾ པརིཧཱཡཏི. སེསཾ སབྦཏྠ སདིསམེཝ.

ཏཏྠ ཨཊྛངྒིཀཝཱརསྶ ‘‘ཏཎྷཱཡ ཨཝསེསཱནཉྩ ཀིལེསཱནཾ པཧཱན’’ནྟིཨཱདཱིསུ པཉྩསུ ཀོཊྛཱསེསུ པཋམཀོཊྛཱསེ ཏཱཝ སོཏཱཔཏྟིམགྒེ ཛྷཱནཱབྷིནིཝེསེ སུདྡྷིཀཔཊིཔདཱ, སུདྡྷིཀསུཉྙཏཱ, སུཉྙཏཔཊིཔདཱ, སུདྡྷིཀཨཔྤཎིཧིཏཾ, ཨཔྤཎིཧིཏཔཊིཔདཱཏི ཨིམེསུ པཉྩསུ ཝཱརེསུ དྭིནྣཾ དྭིནྣཾ ཙཏུཀྐཔཉྩཀནཡཱནཾ ཝསེན དས ནཡཱ ཧོནྟི. ཨེཝཾ སེསེསུཔཱིཏི ཝཱིསཏིཡཱ ཨབྷིནིཝེསེསུ དྭེ ནཡསཏཱནི. ཏཱནི ཙཏཱུཧི ཨདྷིཔཏཱིཧི ཙཏུགྒུཎིཏཱནི ཨཊྛ ¶ . ཨིཏི སུདྡྷིཀཱནི དྭེ སཱདྷིཔཏཱི ཨཊྛཱཏི སབྦམྤི ནཡསཧསྶཾ ཧོཏི. ཡཐཱ ཙ སོཏཱཔཏྟིམགྒེ, ཨེཝཾ སེསམགྒེསུཔཱིཏི ཙཏྟཱརི ནཡསཧསྶཱནི ཧོནྟི. ཡཐཱ ཙ པཋམཀོཊྛཱསེ ཙཏྟཱརི, ཨེཝཾ སེསེསུཔཱིཏི ཨཊྛངྒིཀཝཱརེ པཉྩསུ ཀོཊྛཱསེསུ ཝཱིསཏི ནཡསཧསྶཱནི ཧོནྟི. ཏཐཱ པཉྩངྒིཀཝཱརེ སབྦསངྒཱཧིཀཝཱརེ ཙཱཏི སབྦཱནིཔི སཊྛི ¶ ནཡསཧསྶཱནི སཏྠཱརཱ ཝིབྷཏྟཱནི. པཱལི༹ པན སངྑེཔེན ཨཱགཏཱ. ཨེཝམིདཾ ཏིཝིདྷམཧཱཝཱརཾ པཉྩདསཀོཊྛཱསཾ སཊྛིནཡསཧསྶཔཊིམཎྜིཏཾ ཨབྷིདྷམྨབྷཱཛནཱིཡཾ ནཱམ ནིདྡིཊྛནྟི ཝེདིཏབྦཾ.

ཨབྷིདྷམྨབྷཱཛནཱིཡཝཎྞནཱ.

༣. པཉྷཱཔུཙྪཀཝཎྞནཱ

༢༡༥. པཉྷཱཔུཙྪཀེ ཙཏུནྣམྤི སཙྩཱནཾ ཁནྡྷཝིབྷངྒེ ཝུཏྟནཡཱནུསཱརེནེཝ ཀུསལཱདིབྷཱཝོ ཝེདིཏབྦོ. ཨཱརམྨཎཏྟིཀེསུ པན སམུདཡསཙྩཾ ཀཱམཱཝཙརདྷམྨེ ཨསྶཱདེནྟསྶ པརིཏྟཱརམྨཎཾ ཧོཏི, མཧགྒཏདྷམྨེ ཨསྶཱདེནྟསྶ མཧགྒཏཱརམྨཎཾ, པཉྙཏྟིཾ ཨསྶཱདེནྟསྶ ནཝཏྟབྦཱརམྨཎཾ. དུཀྑསཙྩཾ ¶ ཀཱམཱཝཙརདྷམྨེ ཨཱརབྦྷ ཨུཔྤནྣཾ པརིཏྟཱརམྨཎཾ, རཱུཔཱརཱུཔཱཝཙརདྷམྨེ ཨཱརབྦྷ ཨུཔྤཏྟིཀཱལེ མཧགྒཏཱརམྨཎཾ, ནཝ ལོཀུཏྟརདྷམྨེ པཙྩཝེཀྑཎཀཱལེ ཨཔྤམཱཎཱརམྨཎཾ, པཎྞཏྟིཾ པཙྩཝེཀྑཎཀཱལེ ནཝཏྟབྦཱརམྨཎཾ. མགྒསཙྩཾ སཧཛཱཏཧེཏུཝསེན སབྦདཱཔི མགྒཧེཏུཀཾ ཝཱིརིཡཾ ཝཱ ཝཱིམཾསཾ ཝཱ ཛེཊྛཀཾ ཀཏྭཱ མགྒབྷཱཝནཱཀཱལེ མགྒཱདྷིཔཏི, ཚནྡཙིཏྟེསུ ཨཉྙཏརཱདྷིཔཏིཀཱལེ ནཝཏྟབྦཾ ནཱམ ཧོཏི. དུཀྑསཙྩཾ ཨརིཡཱནཾ མགྒཔཙྩཝེཀྑཎཀཱལེ མགྒཱརམྨཎཾ, ཏེསཾཡེཝ མགྒཾ གརུཾ ཀཏྭཱ པཙྩཝེཀྑཎཀཱལེ མགྒཱདྷིཔཏི, སེསདྷམྨཔཙྩཝེཀྑཎཀཱལེ ནཝཏྟབྦཾ ཧོཏི.

དྭེ སཙྩཱནཱིཏི དུཀྑསམུདཡསཙྩཱནི. ཨེཏཱནི ཧི ཨཏཱིཏཱདིབྷེདེ དྷམྨེ ཨཱརབྦྷ ཨུཔྤཏྟིཀཱལེ ཨཏཱིཏཱདིཨཱརམྨཎཱནི ཧོནྟི. སམུདཡསཙྩཾ ཨཛ྄ཛྷཏྟཱདིབྷེདེ དྷམྨེ ཨསྶཱདེནྟསྶ ཨཛ྄ཛྷཏྟཱདིཨཱརམྨཎཾ ཧོཏི, དུཀྑསཙྩཾ ཨཱཀིཉྩཉྙཱཡཏནཀཱལེ ནཝཏྟབྦཱརམྨཎམྤཱིཏི ཝེདིཏབྦཾ. ཨིཏི ཨིམསྨིཾ པཉྷཱཔུཙྪཀེ དྭེ སཙྩཱནི ལོཀིཡཱནི ཧོནྟི, དྭེ ལོཀུཏྟརཱནི. ཡཐཱ ¶ ཙ ཨིམསྨིཾ, ཨེཝཾ པུརིམེསུཔི དྭཱིསུ. སམྨཱསམྦུདྡྷེན ཧི ཏཱིསུཔི སུཏྟནྟབྷཱཛནཱིཡཱདཱིསུ ལོཀིཡལོཀུཏྟརཱནེཝ སཙྩཱནི ཀཐིཏཱནི. ཨེཝམཡཾ སཙྩཝིབྷངྒོཔི ཏེཔརིཝཊྚཾ ནཱིཧརིཏྭཱཝ བྷཱཛེཏྭཱ དསྶིཏོཏི.

སམྨོཧཝིནོདནཱིཡཱ ཝིབྷངྒཊྛཀཐཱཡ

སཙྩཝིབྷངྒཝཎྞནཱ ནིཊྛིཏཱ.

༥. ཨིནྡྲིཡཝིབྷངྒོ

༡. ཨབྷིདྷམྨབྷཱཛནཱིཡཝཎྞནཱ

༢༡༩. ཨིདཱནི ¶ ¶ ¶ ཏདནནྟརེ ཨིནྡྲིཡཝིབྷངྒེ བཱཝཱིསཏཱིཏི གཎནཔརིཙྪེདོ. ཨིནྡྲིཡཱནཱིཏི པརིཙྪིནྣདྷམྨནིདསྶནཾ. ཨིདཱནི ཏཱནི སརཱུཔཏོ དསྶེནྟོ ཙཀྑུནྡྲིཡནྟིཨཱདིམཱཧ. ཏཏྠ ཙཀྑུདྭཱརེ ཨིནྡཊྛཾ ཀཱརེཏཱིཏི ཙཀྑུནྡྲིཡཾ. སོཏགྷཱནཛིཝ྄ཧཱཀཱཡདྭཱརེ ཨིནྡཊྛཾ ཀཱརེཏཱིཏི ཀཱཡིནྡྲིཡཾ. ཝིཛཱནནལཀྑཎེ ཨིནྡཊྛཾ ཀཱརེཏཱིཏི མནིནྡྲིཡཾ. ཨིཏྠིབྷཱཝེ ཨིནྡཊྛཾ ཀཱརེཏཱིཏི ཨིཏྠིནྡྲིཡཾ. པུརིསབྷཱཝེ ཨིནྡཊྛཾ ཀཱརེཏཱིཏི པུརིསིནྡྲིཡཾ. ཨནུཔཱལནལཀྑཎེ ཨིནྡཊྛཾ ཀཱརེཏཱིཏི ཛཱིཝིཏིནྡྲིཡཾ. སུཁལཀྑཎེ ཨིནྡཊྛཾ ཀཱརེཏཱིཏི སུཁིནྡྲིཡཾ. དུཀྑསོམནསྶ དོམནསྶ ཨུཔེཀྑཱལཀྑཎེ ཨིནྡཊྛཾ ཀཱརེཏཱིཏི ཨུཔེཀྑིནྡྲིཡཾ. ཨདྷིམོཀྑལཀྑཎེ ཨིནྡཊྛཾ ཀཱརེཏཱིཏི སདྡྷིནྡྲིཡཾ. པགྒཧལཀྑཎེ ཨིནྡཊྛཾ ཀཱརེཏཱིཏི ཝཱིརིཡིནྡྲིཡཾ. ཨུཔཊྛཱནལཀྑཎེ ཨིནྡཊྛཾ ཀཱརེཏཱིཏི སཏིནྡྲིཡཾ. ཨཝིཀྑེཔལཀྑཎེ ཨིནྡཊྛཾ ཀཱརེཏཱིཏི སམཱདྷིནྡྲིཡཾ. དསྶནལཀྑཎེ ཨིནྡཊྛཾ ཀཱརེཏཱིཏི པཉྙིནྡྲིཡཾ. ཨནཉྙཱཏཉྙསྶཱམཱིཏི པཝཏྟེ ཛཱནནལཀྑཎེ ཨིནྡཊྛཾ ཀཱརེཏཱིཏི ཨནཉྙཱཏཉྙསྶཱམཱིཏིནྡྲིཡཾ. ཉཱཏཱནཾཡེཝ དྷམྨཱནཾ པུན ཨཱཛཱནནེ ཨིནྡཊྛཾ ཀཱརེཏཱིཏི ཨཉྙིནྡྲིཡཾ. ཨཉྙཱཏཱཝཱིབྷཱཝེ ཨིནྡཊྛཾ ཀཱརེཏཱིཏི ཨཉྙཱཏཱཝིནྡྲིཡཾ.

ཨིདྷ སུཏྟནྟབྷཱཛནཱིཡཾ ནཱམ ན གཧིཏཾ. ཀསྨཱ? སུཏྟནྟེ ཨིམཱཡ པཊིཔཱཊིཡཱ བཱཝཱིསཏིཡཱ ཨིནྡྲིཡཱནཾ ཨནཱགཏཏྟཱ. སུཏྟནྟསྨིཉྷི ཀཏྠཙི དྭེ ཨིནྡྲིཡཱནི ཀཐིཏཱནི, ཀཏྠཙི ཏཱིཎི, ཀཏྠཙི པཉྩ. ཨེཝཾ པན ནིརནྟརཾ དྭཱཝཱིསཏི ཨཱགཏཱནི ནཱམ ནཏྠི. ཨཡཾ ཏཱཝེཏྠ ཨཊྛཀཐཱནཡོ. ཨཡཾ པན ཨཔརོ ནཡོ – ཨེཏེསུ ཧི

ཨཏྠཏོ ¶ ལཀྑཎཱདཱིཧི, ཀམཏོ ཙ ཝིཛཱནིཡཱ;

བྷེདཱབྷེདཱ ཏཐཱ ཀིཙྩཱ, བྷཱུམིཏོ ཙ ཝིནིཙྪཡཾ.

ཏཏྠ ¶ ཙཀྑཱདཱིནཾ ཏཱཝ ‘‘ཙཀྑཏཱིཏི ཙཀྑཱུ’’ཏིཨཱདིནཱ ནཡེན ཨཏྠོ པཀཱསིཏོ. པཙྪིམེསུ པན ཏཱིསུ པཋམཾ ‘པུབྦབྷཱགེ ཨནཉྙཱཏཾ ཨམཏཾ པདཾ ཙཏུསཙྩདྷམྨཾ ཝཱ ཛཱནིསྶཱམཱི’ཏི ཨེཝཾ པཊིཔནྣསྶ ཨུཔྤཛྫནཏོ ཨིནྡྲིཡཊྛསམྦྷཝཏོ ཙ ཨནཉྙཱཏཉྙསྶཱམཱིཏིནྡྲིཡནྟི ཝུཏྟཾ. དུཏིཡཾ ཨཱཛཱནནཏོ ཙ ཨིནྡྲིཡཊྛསམྦྷཝཏོ ཙ ཨཉྙིནྡྲིཡཾ. ཏཏིཡཾ ཨཉྙཱཏཱཝིནོ ཙཏཱུསུ སཙྩེསུ ནིཊྛིཏཉཱཎཀིཙྩསྶ ¶ ཁཱིཎཱསཝསྶེཝ ཨུཔྤཛྫནཏོ ཨིནྡྲིཡཊྛསམྦྷཝཏོ ཙ ཨཉྙཱཏཱཝིནྡྲིཡཾ.

ཀོ པནེས ཨིནྡྲིཡཊྛོ ནཱམཱཏི? ཨིནྡལིངྒཊྛོ ཨིནྡྲིཡཊྛོ, ཨིནྡདེསིཏཊྛོ ཨིནྡྲིཡཊྛོ, ཨིནྡདིཊྛཊྛོ ཨིནྡྲིཡཊྛོ, ཨིནྡསིཊྛཊྛོ ཨིནྡྲིཡཊྛོ, ཨིནྡཛུཊྛཊྛོ ཨིནྡྲིཡཊྛོ. སོ སབྦོཔི ཨིདྷ ཡཐཱཡོགཾ ཡུཛྫཏི. བྷགཝཱ ཧི སམྨཱསམྦུདྡྷོ པརམིསྶརིཡབྷཱཝཏོ ཨིནྡོ. ཀུསལཱཀུསལཉྩ ཀམྨཾ ཀམྨེསུ ཀསྶཙི ཨིསྶརིཡཱབྷཱཝཏོ. ཏེནེཝེཏྠ ཀམྨསཉྫནིཏཱནི ཨིནྡྲིཡཱནི ཀུསལཱཀུསལཀམྨཾ ཨུལླིངྒེནྟི. ཏེན ཙ སིཊྛཱནཱིཏི ཨིནྡལིངྒཊྛེན ཨིནྡསིཊྛཊྛེན ཙ ཨིནྡྲིཡཱནི. སབྦཱནེཝ པནེཏཱནི བྷགཝཏཱ ཡཐཱབྷཱུཏཏོ པཀཱསིཏཱནི ཙ ཨབྷིསམྦུདྡྷཱནི ཙཱཏི ཨིནྡདེསིཏཊྛེན ཨིནྡདིཊྛཊྛེན ཙ ཨིནྡྲིཡཱནི. ཏེནེཝ བྷགཝཏཱ མུནིནྡེན ཀཱནིཙི གོཙརཱསེཝནཱཡ, ཀཱནིཙི བྷཱཝནཱསེཝནཱཡ སེཝིཏཱནཱིཏི ཨིནྡཛུཊྛཊྛེནཔི ཨིནྡྲིཡཱནི. ཨཔིཙ ཨཱདྷིཔཙྩསངྑཱཏེན ཨིསྶརིཡཊྛེནཱཔི ཨེཏཱནི ཨིནྡྲིཡཱནི. ཙཀྑུཝིཉྙཱཎཱདིཔྤཝཏྟིཡཉྷི ཙཀྑཱདཱིནཾ སིདྡྷམཱདྷིཔཙྩཾ; ཏསྨིཾ ཏིཀྑེ ཏིཀྑཏྟཱ མནྡེ ཙ མནྡཏྟཱཏི. ཨཡཾ ཏཱཝེཏྠ ‘ཨཏྠཏོ’ ཝིནིཙྪཡོ.

‘ལཀྑཎཱདཱིཧཱི’ཏི ལཀྑཎརསཔཙྩུཔཊྛཱནཔདཊྛཱནེཧིཔི ཙཀྑཱདཱིནཾ ཝིནིཙྪཡཾ ཝིཛཱནིཡཱཏི ཨཏྠོ. ཏཱནི ནེསཾ ལཀྑཎཱདཱིནི ཧེཊྛཱ ཝུཏྟནཡཱནེཝ. པཉྙིནྡྲིཡཱདཱིནི ཧི ཙཏྟཱརི ཨཏྠཏོ ཨམོཧོཡེཝ. སེསཱནི ཏཏྠ སརཱུཔེནེཝཱགཏཱནི.

‘ཀམཏོ’ཏི ཨཡམྤི དེསནཱཀྐམོཝ. ཏཏྠ ཨཛ྄ཛྷཏྟདྷམྨཾ པརིཉྙཱཡ ཨརིཡབྷཱུམིཔཊིལཱབྷོ ཧོཏཱིཏི ཨཏྟབྷཱཝཔརིཡཱཔནྣཱནི ཙཀྑུནྡྲིཡཱདཱིནི པཋམཾ དེསིཏཱནི. སོ པནཏྟབྷཱཝོ ཡཾ དྷམྨཾ ཨུཔཱདཱཡ ཨིཏྠཱིཏི ཝཱ པུརིསོཏི ¶ ཝཱ སངྑཾ གཙྪཏི, ཨཡཾ སོཏི ནིདསྶནཏྠཾ ཏཏོ ཨིཏྠིནྡྲིཡཾ པུརིསིནྡྲིཡཉྩ ¶ . སོ དུཝིདྷོཔི ཛཱིཝིཏིནྡྲིཡཔཊིབདྡྷཝུཏྟཱིཏི ཉཱཔནཏྠཾ ཏཏོ ཛཱིཝིཏིནྡྲིཡཾ. ཡཱཝ ཏསྶ པཝཏྟི ཏཱཝ ཨེཏེསཾ ཝེདཡིཏཱནཾ ཨནིཝཏྟི. ཡཾ ཀིཉྩི ཝེདཡིཏཾ སབྦཾ ཏཾ སུཁདུཀྑནྟི ཉཱཔནཏྠཾ ཏཏོ སུཁིནྡྲིཡཱདཱིནི. ཏཾནིརོདྷཏྠཾ པན ཨེཏེ དྷམྨཱ བྷཱཝེཏབྦཱཏི པཊིཔཏྟིདསྶནཏྠཾ ཏཏོ སདྡྷཱདཱིནི. ཨིམཱཡ པཊིཔཏྟིཡཱ ཨེས དྷམྨོ པཋམཾ ཨཏྟནི པཱཏུབྷཝཏཱིཏི པཊིཔཏྟིཡཱ ཨམོགྷབྷཱཝདསྶནཏྠཾ ཏཏོ ཨནཉྙཱཏཉྙསྶཱམཱིཏིནྡྲིཡཾ. ཏསྶེཝ ཕལཏྟཱ ཏཏོ ཨནནྟརཾ བྷཱཝེཏབྦཏྟཱ ཙ ཏཏོ ཨཉྙིནྡྲིཡཾ. ཨིཏོ པརཾ བྷཱཝནཱཡ ཨིམསྶ ཨདྷིགམོ, ཨདྷིགཏེ ཙ པནིམསྨིཾ ནཏྠི ཀིཉྩི ཨུཏྟརི ¶ ཀརཎཱིཡནྟི ཉཱཔནཏྠཾ ཨནྟེ པརམསྶཱསབྷཱུཏཾ ཨཉྙཱཏཱཝིནྡྲིཡཾ དེསིཏནྟི ཨཡམེཏྠ ཀམོ.

‘བྷེདཱབྷེདཱ’ཏི ཛཱིཝིཏིནྡྲིཡསྶེཝ ཙེཏྠ བྷེདོ. ཏཉྷི རཱུཔཛཱིཝིཏིནྡྲིཡཾ ཨརཱུཔཛཱིཝིཏིནྡྲིཡནྟི དུཝིདྷཾ ཧོཏི. སེསཱནཾ ཨབྷེདོཏི ཨེཝམེཏྠ བྷེདཱབྷེདཏོ ཝིནིཙྪཡཾ ཝིཛཱནིཡཱ.

‘ཀིཙྩཱ’ཏི ཀིཾ ཨིནྡྲིཡཱནཾ ཀིཙྩནྟི ཙེ? ཙཀྑུནྡྲིཡསྶ ཏཱཝ ‘‘ཙཀྑཱཡཏནཾ ཙཀྑུཝིཉྙཱཎདྷཱཏུཡཱ ཏཾསམྤཡུཏྟཀཱནཉྩ དྷམྨཱནཾ ཨིནྡྲིཡཔཙྩཡེན པཙྩཡོ’’ཏི ཝཙནཏོ ཡཾ ཏཾ ཨིནྡྲིཡཔཙྩཡབྷཱཝེན སཱདྷེཏབྦཾ ཨཏྟནོ ཏིཀྑམནྡཱདིབྷཱཝེན ཙཀྑུཝིཉྙཱཎཱདིདྷམྨཱནཾ ཏིཀྑམནྡཱདིསངྑཱཏཾ ཨཏྟཱཀཱརཱནུཝཏྟཱཔནཾ ཨིདཾ ‘ཀིཙྩཾ’. ཨེཝཾ སོཏགྷཱནཛིཝ྄ཧཱཀཱཡཱནཾ. མནིནྡྲིཡསྶ པན སཧཛཱཏདྷམྨཱནཾ ཨཏྟནོ ཝསཝཏྟཱཔནཾ, ཛཱིཝིཏིནྡྲིཡསྶ སཧཛཱཏདྷམྨཱནུཔཱལནཾ, ཨིཏྠིནྡྲིཡཔུརིསིནྡྲིཡཱནཾ ཨིཏྠིཔུརིསནིམིཏྟཀུཏྟཱཀཔྤཱཀཱརཱནུཝིདྷཱནཾ, སུཁདུཀྑསོམནསྶདོམནསྶིནྡྲིཡཱནཾ སཧཛཱཏདྷམྨེ ཨབྷིབྷཝིཏྭཱ ཡཐཱསཀཾ ཨོལཱ༹རིཀཱཀཱརཱནུཔཱཔནཾ, ཨུཔེཀྑིནྡྲིཡསྶ སནྟཔཎཱིཏམཛ྄ཛྷཏྟཱཀཱརཱནུཔཱཔནཾ, སདྡྷཱདཱིནཾ པཊིཔཀྑཱབྷིབྷཝནཾ སམྤཡུཏྟདྷམྨཱནཉྩ པསནྣཱཀཱརཱདིབྷཱཝསམྤཱཔནཾ, ཨནཉྙཱཏཉྙསྶཱམཱིཏིནྡྲིཡསྶ སཾཡོཛནཏྟཡཔྤཧཱནཉྩེཝ སམྤཡུཏྟཀཱནཉྩ ¶ ཏཔྤཧཱནཱབྷིམུཁབྷཱཝཀརཎཾ, ཨཉྙིནྡྲིཡསྶ ཀཱམརཱགབྱཱཔཱདཱདིཏནུཀརཎཔཧཱནཉྩེཝ སཧཛཱཏཱནཉྩ ཨཏྟནོ ཝསཱནུཝཏྟཱཔནཾ, ཨཉྙཱཏཱཝིནྡྲིཡསྶ སབྦཀིཙྩེསུ ཨུསྶུཀྐཔྤཧཱནཉྩེཝ ཨམཏཱབྷིམུཁབྷཱཝཔཙྩཡཏཱ ཙ སམྤཡུཏྟཱནནྟི ཨེཝམེཏྠ ཀིཙྩཏོ ཝིནིཙྪཡཾ ཝིཛཱནིཡཱ.

‘བྷཱུམིཏོ’ཏི ཙཀྑུསོཏགྷཱནཛིཝ྄ཧཱཀཱཡཨིཏྠིཔུརིསསུཁདུཀྑདོམནསྶིནྡྲིཡཱནི ཙེཏྠ ཀཱམཱཝཙརཱནེཝ ¶ . མནིནྡྲིཡཛཱིཝིཏིནྡྲིཡཨུཔེཀྑིནྡྲིཡཱནི, སདྡྷཱཝཱིརིཡསཏིསམཱདྷིཔཉྙིནྡྲིཡཱནི ཙ ཙཏུབྷཱུམིཔརིཡཱཔནྣཱནི. སོམནསྶིནྡྲིཡཾ ཀཱམཱཝཙར-རཱུཔཱཝཙར-ལོཀུཏྟརཝསེན བྷཱུམིཏྟཡཔརིཡཱཔནྣཾ. ཨཝསཱནེ ཏཱིཎི ལོཀུཏྟརཱནེཝཱཏི ཨེཝཾ བྷཱུམིཏོ ཝིནིཙྪཡཾ ཝིཛཱནིཡཱ. ཨེཝཉྷི ཝིཛཱནནྟོ –

སཾཝེགབཧུལོ བྷིཀྑུ, ཋིཏོ ཨིནྡྲིཡསཾཝརེ;

ཨིནྡྲིཡཱནི པརིཉྙཱཡ, དུཀྑསྶནྟཾ ནིགཙྪཏཱིཏི.

༢༢༠. ནིདྡེསཝཱརེ ¶ ‘‘ཡཾ ཙཀྑུ ཙཏུནྣཾ མཧཱབྷཱུཏཱན’’ནྟིཨཱདི སབྦཾ དྷམྨསངྒཎིཡཾ པདབྷཱཛནེ (དྷ. ས. ཨཊྛ. ༥༩༥ ཨཱདཡོ) ཝུཏྟནཡེནེཝ ཝེདིཏབྦཾ. ཝཱིརིཡིནྡྲིཡསམཱདྷིནྡྲིཡནིདྡེསཱདཱིསུ ཙ སམྨཱཝཱཡཱམོ མིཙྪཱཝཱཡཱམོ སམྨཱསམཱདྷི མིཙྪཱསམཱདྷཱིཏིཨཱདཱིནི ན ཝུཏྟཱནི. ཀསྨཱ? སབྦསངྒཱཧཀཏྟཱ. སབྦསངྒཱཧཀཱནི ཧི ཨིདྷ ཨིནྡྲིཡཱནི ཀཐིཏཱནི. ཨེཝཾ སནྟེཔེཏྠ དས ཨིནྡྲིཡཱནི ལོཀིཡཱནི ཀཱམཱཝཙརཱནེཝ, ཏཱིཎི ལོཀུཏྟརཱནི, ནཝ ལོཀིཡལོཀུཏྟརམིསྶཀཱནཱིཏི.

ཨབྷིདྷམྨབྷཱཛནཱིཡཝཎྞནཱ.

༢. པཉྷཱཔུཙྪཀཝཎྞནཱ

༢༢༡. པཉྷཱཔུཙྪཀེ སབྦེསམྤི ཨིནྡྲིཡཱནཾ ཀུསལཱདིཝིབྷཱགོ པཱལི༹ནཡཱནུསཱརེནེཝ ཝེདིཏབྦོ.

༢༢༣. ཨཱརམྨཎཏྟིཀེསུ པན སཏྟིནྡྲིཡཱ ཨནཱརམྨཎཱཏི ཙཀྑུསོཏགྷཱནཛིཝ྄ཧཱཀཱཡཨིཏྠིཔུརིསིནྡྲིཡཱནི སནྡྷཱཡ ཝུཏྟཾ. ཛཱིཝིཏིནྡྲིཡཾ པན ཨརཱུཔམིསྶཀཏྟཱ ཨིདྷ ཨནཱབྷཊྛཾ. དྭིནྡྲིཡཱཏི དྭེ ཨིནྡྲིཡཱ; སུཁདུཀྑདྭཡཾ སནྡྷཱཡེཏཾ ཝུཏྟཾ. ཏཉྷི ཨེཀནྟཔརིཏྟཱརམྨཎཾ. དོམནསྶིནྡྲིཡཾ སིཡཱ པརིཏྟཱརམྨཎཾ, སིཡཱ མཧགྒཏཱརམྨཎནྟི ¶ ཀཱམཱཝཙརདྷམྨེ ཨཱརབྦྷ པཝཏྟིཀཱལེ པརིཏྟཱརམྨཎཾ ཧོཏི ¶ , རཱུཔཱཝཙརཱརཱུཔཱཝཙརེ པན ཨཱརབྦྷ པཝཏྟིཀཱལེ མཧགྒཏཱརམྨཎཾ, པཎྞཏྟིཾ ཨཱརབྦྷ པཝཏྟིཀཱལེ ནཝཏྟབྦཱརམྨཎཾ. ནཝིནྡྲིཡཱ སིཡཱ པརིཏྟཱརམྨཎཱཏི མནིནྡྲིཡཛཱིཝིཏིནྡྲིཡསོམནསྶིནྡྲིཡཨུཔེཀྑིནྡྲིཡཱནི ཙེཝ སདྡྷཱདིཔཉྩཀཉྩ སནྡྷཱཡ ཨིདཾ ཝུཏྟཾ. ཛཱིཝིཏིནྡྲིཡཉྷི རཱུཔམིསྶཀཏྟཱ ཨནཱརམྨཎེསུ རཱུཔདྷམྨེསུ སངྒཧིཏམྤི ཨརཱུཔཀོཊྛཱསེན སིཡཱཔཀྑེ སངྒཧིཏཾ.

ཙཏྟཱརི ཨིནྡྲིཡཱནཱིཏི སུཁདུཀྑདོམནསྶཨཉྙཱཏཱཝིནྡྲིཡཱནི. ཏཱནི ཧི མགྒཱརམྨཎཏྟིཀེ ན བྷཛནྟི. མགྒཧེཏུཀནྟི སཧཛཱཏཧེཏུཾ སནྡྷཱཡ ཝུཏྟཾ. ཝཱིརིཡཝཱིམཾསཱཛེཊྛཀཀཱལེ སིཡཱ མགྒཱདྷིཔཏི, ཚནྡཙིཏྟཛེཊྛཀཀཱལེ སིཡཱ ནཝཏྟབྦཱ.

དསིནྡྲིཡཱ ¶ སིཡཱ ཨུཔྤནྣཱ, སིཡཱ ཨུཔྤཱདིནོཏི སཏྟ རཱུཔིནྡྲིཡཱནི ཏཱིཎི ཙ ཝིཔཱཀིནྡྲིཡཱནི སནྡྷཱཡེཏཾ ཝུཏྟཾ. དསིནྡྲིཡཱནི དོམནསྶེན སདྡྷིཾ ཧེཊྛཱ ཝུཏྟཱནེཝ. ཏཏྠ དོམནསྶིནྡྲིཡཾ པཎྞཏྟིཾ ཨཱརབྦྷ པཝཏྟིཀཱལེ ནཝཏྟབྦཱརམྨཎཾ, སེསཱནི ནིབྦཱནཔཙྩཝེཀྑཎཀཱལེཔི. ཏཱིཎིནྡྲིཡཱནི བཧིདྡྷཱརམྨཎཱནཱིཏི ཏཱིཎི ལོཀུཏྟརིནྡྲིཡཱནི. ཙཏྟཱརཱིཏི སུཁདུཀྑསོམནསྶདོམནསྶཱནི. ཏཱནི ཧི ཨཛ྄ཛྷཏྟདྷམྨེཔི བཧིདྡྷཱདྷམྨེཔི ཨཱརབྦྷ པཝཏྟནྟི. ཨཊྛིནྡྲིཡཱཏི མནིནྡྲིཡཛཱིཝིཏིནྡྲིཡཨུཔེཀྑིནྡྲིཡཱནི ཙེཝ སདྡྷཱདིཔཉྩཀཉྩ. ཏཏྠ ཨཱཀིཉྩཉྙཱཡཏནཀཱལེ ནཝཏྟབྦཱརམྨཎཏཱ ཝེདིཏབྦཱ.

ཨིཏི ཨིམསྨིམྤི པཉྷཱཔུཙྪཀེ དསིནྡྲིཡཱནི ཀཱམཱཝཙརཱནི, ཏཱིཎི ལོཀུཏྟརཱནི, ནཝ ལོཀིཡལོཀུཏྟརམིསྶཀཱནེཝ ཀཐིཏཱནཱིཏི. ཨཡམྤི ཨབྷིདྷམྨབྷཱཛནཱིཡེན སདྡྷིཾ ཨེཀཔརིཙྪེདོཝ ཧོཏི. ཨཡཾ པན ཨིནྡྲིཡཝིབྷངྒོ དྭེཔརིཝཊྚཾ ནཱིཧརིཏྭཱ བྷཱཛེཏྭཱ དསྶིཏོཏི.

སམྨོཧཝིནོདནིཡཱ ཝིབྷངྒཊྛཀཐཱཡ

ཨིནྡྲིཡཝིབྷངྒཝཎྞནཱ ནིཊྛིཏཱ.

༦. པཊིཙྩསམུཔྤཱདཝིབྷངྒོ

༡. སུཏྟནྟབྷཱཛནཱིཡཾ ཨུདྡེསཝཱརཝཎྞནཱ

༢༢༥. ཨིདཱནི ¶ ¶ ¶ ཏདནནྟརེ པཊིཙྩསམུཔྤཱདཝིབྷངྒེ ཡཱ ‘‘ཨཡཾ ཨཝིཛྫཱཔཙྩཡཱ སངྑཱརཱ’’ཏིཨཱདིནཱ ནཡེན ཏནྟི ནིཀྑིཏྟཱ, ཏསྶཱ ཨཏྠསཾཝཎྞནཾ ཀརོནྟེན ཝིབྷཛྫཝཱདིམཎྜལཾ ཨོཏརིཏྭཱ ཨཱཙརིཡེ ཨནབྦྷཱཙིཀྑནྟེན སཀསམཡཾ ཨཝོཀྐམནྟེན པརསམཡཾ ཨནཱཡཱུཧནྟེན སུཏྟཾ ཨཔྤཊིབཱཧནྟེན ཝིནཡཾ ཨནུལོམེནྟེན མཧཱཔདེསེ ཨོལོཀེནྟེན དྷམྨཾ དཱིཔེནྟེན ཨཏྠཾ སངྒཧནྟེན ཏམེཝཏྠཾ པུན ཨཱཝཏྟེཏྭཱ ཨཔརེཧིཔི པརིཡཱཡེཧི ནིདྡིསནྟེན ཙ ཡསྨཱ ཨཏྠསཾཝཎྞནཱ ཀཱཏབྦཱ ཧོཏི, པཀཏིཡཱཔི ཙ དུཀྐརཱཝ པཊིཙྩསམུཔྤཱདསྶ ཨཏྠསཾཝཎྞནཱ, ཡཐཱཧུ པོརཱཎཱ –

‘‘སཙྩཾ སཏྟོ པཊིསནྡྷི, པཙྩཡཱཀཱརམེཝ ཙ;

དུདྡསཱ ཙཏུརོ དྷམྨཱ, དེསེཏུཉྩ སུདུཀྐརཱ’’ཏི.

ཏསྨཱ ‘‘ཨཉྙཏྲ ཨཱགམཱདྷིགམཔྤཏྟེཧི ན སུཀརཱ པཊིཙྩསམུཔྤཱདསྶ ཨཏྠཝཎྞནཱ’’ཏི པརིཏུལཡིཏྭཱ –

ཝཏྟུཀཱམོ ཨཧཾ ཨཛྫ, པཙྩཡཱཀཱརཝཎྞནཾ;

པཏིཊྛཾ ནཱདྷིགཙྪཱམི, ཨཛ྄ཛྷོགཱལ༹ྷོཝ སཱགརཾ.

སཱསནཾ ¶ པནིདཾ ནཱནཱ-དེསནཱནཡམཎྜིཏཾ;

པུབྦཱཙརིཡམགྒོ ཙ, ཨབྦོཙྪིནྣོ པཝཏྟཏི.

ཡསྨཱ ཏསྨཱ ཏདུབྷཡཾ, སནྣིསྶཱཡཏྠཝཎྞནཾ;

ཨཱརབྷིསྶཱམི ཨེཏསྶ, ཏཾ སུཎཱཐ སམཱཧིཏཱ.

ཝུཏྟཉྷེཏཾ པུབྦཱཙརིཡེཧི –

‘‘ཡོ ཀོཙིམཾ ཨཊྛིཾ ཀཏྭཱ སུཎེཡྻ,

ལབྷེཐ པུབྦཱཔརིཡཾ ཝིསེསཾ;

ལདྡྷཱན པུབྦཱཔརིཡཾ ཝིསེསཾ,

ཨདསྶནཾ མཙྩུརཱཛསྶ གཙྪེ’’ཏི.

ཨཝིཛྫཱཔཙྩཡཱ ¶ ¶ སངྑཱརཱཏིཨཱདཱིསུ ཧི ཨཱདིཏོཡེཝ ཏཱཝ –

དེསནཱབྷེདཏོ ཨཏྠ-ལཀྑཎེཀཝིདྷཱདིཏོ;

ཨངྒཱནཉྩ ཝཝཏྠཱནཱ, ཝིཉྙཱཏབྦོ ཝིནིཙྪཡོ.

ཏཏྠ ‘དེསནཱབྷེདཏོ’ཏི བྷགཝཏོ ཧི ཝལླིཧཱརཀཱནཾ ཙཏུནྣཾ པུརིསཱནཾ ཝལླིགྒཧཎཾ ཝིཡ ཨཱདིཏོ ཝཱ མཛ྄ཛྷཏོ ཝཱ པཊྛཱཡ ཡཱཝ པརིཡོསཱནཾ, ཏཐཱ པརིཡོསཱནཏོ ཝཱ མཛ྄ཛྷཏོ ཝཱ པཊྛཱཡ ཡཱཝ ཨཱདཱིཏི ཙཏུབྦིདྷཱ པཊིཙྩསམུཔྤཱདདེསནཱ. ཡཐཱ ཧི ཝལླིཧཱརཀེསུ ཙཏཱུསུ པུརིསེསུ ཨེཀོ ཝལླིཡཱ མཱུལམེཝ པཋམཾ པསྶཏི, སོ ཏཾ མཱུལེ ཚེཏྭཱ སབྦཾ ཨཱཀཌྜྷིཏྭཱ ཨཱདཱཡ ཀམྨེ ཨུཔནེཏི, ཨེཝཾ བྷགཝཱ ‘‘ཨིཏི ཁོ, བྷིཀྑཝེ, ཨཝིཛྫཱཔཙྩཡཱ སངྑཱརཱ…པེ… ཛཱཏིཔཙྩཡཱ ཛརཱམརཎ’’ནྟི ཨཱདིཏོ (མ. ནི. ༡.༤༠༢) པཊྛཱཡ ཡཱཝ པརིཡོསཱནཱཔི པཊིཙྩསམུཔྤཱདཾ དེསེཏི.

ཡཐཱ པན ཏེསུ པུརིསེསུ ཨེཀོ ཝལླིཡཱ མཛ྄ཛྷཾ པཋམཾ པསྶཏི, སོ མཛ྄ཛྷེ ཚིནྡིཏྭཱ ཨུཔརིབྷཱགཾཡེཝ ཨཱཀཌྜྷིཏྭཱ ཨཱདཱཡ ཀམྨེ ཨུཔནེཏི, ཨེཝཾ བྷགཝཱ ‘‘ཏསྶ ཏཾ ཝེདནཾ ཨབྷིནནྡཏོ ¶ ཨབྷིཝདཏོ ཨཛ྄ཛྷོསཱཡ ཏིཊྛཏོ ཨུཔྤཛྫཏི ནནྡཱི; ཡཱ ཝེདནཱསུ ནནྡཱི, ཏདུཔཱདཱནཾ, ཏསྶུཔཱདཱནཔཙྩཡཱ བྷཝོ, བྷཝཔཙྩཡཱ ཛཱཏཱི’’ཏི (མ. ནི. ༡.༤༠༩; སཾ. ནི. ༣.༥) མཛ྄ཛྷཏོ པཊྛཱཡ ཡཱཝ པརིཡོསཱནཱཔི དེསེཏི.

ཡཐཱ ཙ ཏེསུ པུརིསེསུ ཨེཀོ ཝལླིཡཱ ཨགྒཾ པཋམཾ པསྶཏི, སོ ཨགྒེ གཧེཏྭཱ ཨགྒཱནུསཱརེན ཡཱཝ མཱུལཱ སབྦཾ ཨཱདཱཡ ཀམྨེ ཨུཔནེཏི, ཨེཝཾ བྷགཝཱ ‘‘ཛཱཏིཔཙྩཡཱ ཛརཱམརཎནྟི ཨིཏི ཁོ པནེཏཾ ཝུཏྟཾ, ཛཱཏིཔཙྩཡཱ ནུ ཁོ, བྷིཀྑཝེ, ཛརཱམརཎཾ ནོ ཝཱ ཀཐཾ ཝཱ ཨེཏྠ ཧོཏཱི’’ཏི? ‘‘ཛཱཏིཔཙྩཡཱ, བྷནྟེ, ཛརཱམརཎཾ; ཨེཝཾ ནོ ཨེཏྠ ཧོཏི – ཛཱཏིཔཙྩཡཱ ཛརཱམརཎ’’ནྟི. ‘‘བྷཝཔཙྩཡཱ ཛཱཏི…པེ… ཨཝིཛྫཱཔཙྩཡཱ སངྑཱརཱཏི ཨིཏི ཁོ པནེཏཾ ཝུཏྟཾ, ཨཝིཛྫཱཔཙྩཡཱ ནུ ཁོ, བྷིཀྑཝེ, སངྑཱརཱ ནོ ཝཱ ཀཐཾ ཝཱ ཨེཏྠ ཧོཏཱི’’ཏི? ‘‘ཨཝིཛྫཱཔཙྩཡཱ, བྷནྟེ, སངྑཱརཱ; ཨེཝཾ ནོ ཨེཏྠ ཧོཏི – ཨཝིཛྫཱཔཙྩཡཱ སངྑཱརཱ’’ཏི པརིཡོསཱནཏོ པཊྛཱཡ ཡཱཝ ཨཱདིཏོཔི པཊིཙྩསམུཔྤཱདཾ དེསེཏི.

ཡཐཱ པན ཏེསུ པུརིསེསུ ཨེཀོ ཝལླིཡཱ མཛ྄ཛྷམེཝ པཋམཾ པསྶཏི, སོ མཛ྄ཛྷེ ཚིནྡིཏྭཱ ཧེཊྛཱ ཨོཏརནྟོ ཡཱཝ མཱུལཱ ¶ ཨཱདཱཡ ཀམྨེ ཨུཔནེཏི ¶ , ཨེཝཾ བྷགཝཱ ‘‘ཨིམེ, བྷིཀྑཝེ, ཙཏྟཱརོ ཨཱཧཱརཱ ཀིཾ ནིདཱནཱ, ཀིཾ སམུདཡཱ, ཀིཾ ཛཱཏིཀཱ, ཀིཾ པབྷཝཱ? ཨིམེ ཙཏྟཱརོ ཨཱཧཱརཱ ཏཎྷཱནིདཱནཱ, ཏཎྷཱསམུདཡཱ, ཏཎྷཱཛཱཏིཀཱ, ཏཎྷཱཔབྷཝཱ. ཏཎྷཱ ཙཱཡཾ, བྷིཀྑཝེ, ཀིཾ ནིདཱནཱ? ཝེདནཱ, ཕསྶོ, སལཱ༹ཡཏནཾ, ནཱམརཱུཔཾ, ཝིཉྙཱཎཾ. སངྑཱརཱ ཀིཾ ནིདཱནཱ…པེ… སངྑཱརཱ ཨཝིཛྫཱནིདཱནཱ, ཨཝིཛྫཱསམུདཡཱ, ཨཝིཛྫཱཛཱཏིཀཱ, ཨཝིཛྫཱཔབྷཝཱ’’ཏི (སཾ. ནི. ༢.༡༡) མཛ྄ཛྷཏོ པཊྛཱཡ ཡཱཝ ཨཱདིཏོ དེསེཏི.

ཀསྨཱ པནེཝཾ དེསེཏཱིཏི? པཊིཙྩསམུཔྤཱདསྶ སམནྟབྷདྡཀཏྟཱ, སཡཉྩ དེསནཱཝིལཱསཔྤཏྟཏྟཱ. སམནྟབྷདྡཀོ ཧི པཊིཙྩསམུཔྤཱདོ ཏཏོ ཏཏོ ཉཱཡཔྤཊིཝེདྷཱཡ སཾཝཏྟཏིཡེཝ. དེསནཱཝིལཱསཔྤཏྟོ ཙ བྷགཝཱ ཙཏུཝེསཱརཛྫཔྤཊིསམྦྷིདཱཡོགེན ཙཏུབྦིདྷགམྦྷཱིརབྷཱཝཔྤཏྟིཡཱ ཙ. སོ དེསནཱཝིལཱསཔྤཏྟཏྟཱ ནཱནཱནཡེཧེཝ དྷམྨཾ དེསེཏི. ཝིསེསཏོ པནསྶ ཡཱ ཨཱདིཏོ པཊྛཱཡ ཨནུལོམདེསནཱ, སཱ པཝཏྟིཀཱརཎཝིབྷཱགསམྨཱུལ༹ྷཾ ཝེནེཡྻཛནཾ སམནུཔསྶཏོ ཡཐཱསཀེཧི ཀཱརཎེཧི པཝཏྟིསནྡསྶནཏྠཾ ཨུཔྤཏྟིཀྐམསནྡསྶནཏྠཉྩ པཝཏྟིཏཱཏི ཉཱཏབྦཱ.

ཡཱ ¶ པརིཡོསཱནཏོ པཊྛཱཡ པཊིལོམདེསནཱ, སཱ ‘‘ཀིཙྪཾ ཝཏཱཡཾ ལོཀོ ཨཱཔནྣོ ཛཱཡཏི ཙ ཛཱིཡཏི ཙ མཱིཡཏི ཙཱ’’ཏི (དཱི. ནི. ༢.༥༧) ཨཱདིནཱ ནཡེན ཀིཙྪཱཔནྣཾ ལོཀམནུཝིལོཀཡཏོ པུབྦབྷཱགཔྤཊིཝེདྷཱནུསཱརེན ཏསྶ ཏསྶ ཛརཱམརཎཱདིཀསྶ དུཀྑསྶ ཨཏྟནཱདྷིགཏཀཱརཎསནྡསྶནཏྠཾ. ཡཱ པན མཛ྄ཛྷཏོ པཊྛཱཡ ཡཱཝ ཨཱདི, སཱ ཨཱཧཱརནིདཱནཝཝཏྠཱཔནཱནུསཱརེན ཡཱཝ ཨཏཱིཏཾ ཨདྡྷཱནཾ ཨཏིཧརིཏྭཱ པུན ཨཏཱིཏདྡྷཏོ པབྷུཏི ཧེཏུཕལཔཊིཔཱཊིསནྡསྶནཏྠཾ. ཡཱ པན མཛ྄ཛྷཏོ པཊྛཱཡ ཡཱཝ པརིཡོསཱནཱ པཝཏྟཱ, སཱ པཙྩུཔྤནྣེ ཨདྡྷཱནེ ཨནཱགཏདྡྷཧེཏུསམུཊྛཱནཏོ པབྷུཏི ཨནཱགཏདྡྷསནྡསྶནཏྠཾ. ཏཱསུ ཡཱ སཱ པཝཏྟིཀཱརཎསམྨཱུལ༹ྷསྶ ཝེནེཡྻཛནསྶ ཡཐཱསཀེཧི ཀཱརཎེཧི པཝཏྟིསནྡསྶནཏྠཾ ཨུཔྤཏྟིཀྐམསནྡསྶནཏྠཉྩ ཨཱདིཏོ པཊྛཱཡ ཨནུལོམདེསནཱ ཝུཏྟཱ, སཱ ཨིདྷ ནིཀྑིཏྟཱཏི ཝེདིཏབྦཱ.

ཀསྨཱ ¶ པནེཏྠ ཨཝིཛྫཱ ཨཱདིཏོ ཝུཏྟཱ? ཀིཾ པཀཏིཝཱདཱིནཾ པཀཏི ཝིཡ ཨཝིཛྫཱཔི ཨཀཱརཎཾ མཱུལཀཱརཎཾ ལོཀསྶཱཏི? ན ཨཀཱརཎཾ. ‘‘ཨཱསཝསམུདཡཱ ཨཝིཛྫཱསམུདཡོ’’ཏི ཧི ཨཝིཛྫཱཡ ཀཱརཎཾ ཝུཏྟཾ. ཨཏྠི ¶ པན པརིཡཱཡོ ཡེན མཱུལཀཱརཎཾ སིཡཱ. ཀོ པན སོཏི? ཝཊྚཀཐཱཡ སཱིསབྷཱཝོ. བྷགཝཱ ཧི ཝཊྚཀཐཾ ཀཐེནྟོ དྭེ དྷམྨེ སཱིསཾ ཀཏྭཱ ཀཐེསི – ཨཝིཛྫཾ ཝཱ བྷཝཏཎྷཾ ཝཱ. ཡཐཱཧ – ‘‘པུརིམཱ, བྷིཀྑཝེ, ཀོཊི ན པཉྙཱཡཏི ཨཝིཛྫཱཡ ‘ཨིཏོ པུབྦེ ཨཝིཛྫཱ ནཱཧོསི, ཨཐ པཙྪཱ སམབྷཝཱི’ཏི. ཨེཝཉྩེཏཾ, བྷིཀྑཝེ, ཝུཙྩཏི, ཨཐ ཙ པན པཉྙཱཡཏི ‘ཨིདཔྤཙྩཡཱ ཨཝིཛྫཱ’’ཏི (ཨ. ནི. ༡༠.༦༡); བྷཝཏཎྷཾ ཝཱ, ཡཐཱཧ – ‘‘པུརིམཱ, བྷིཀྑཝེ, ཀོཊི ན པཉྙཱཡཏི བྷཝཏཎྷཱཡ ‘ཨིཏོ པུབྦེ བྷཝཏཎྷཱ ནཱཧོསི, ཨཐ པཙྪཱ སམབྷཝཱི’ཏི. ཨེཝཉྩེཏཾ, བྷིཀྑཝེ, ཝུཙྩཏི, ཨཐ ཙ པན པཉྙཱཡཏི ‘ཨིདཔྤཙྩཡཱ བྷཝཏཎྷཱ’’ཏི (ཨ. ནི. ༡༠.༦༢).

ཀསྨཱ པན བྷགཝཱ ཝཊྚཀཐཾ ཀཐེནྟོ ཨིམེ དྭེཝ དྷམྨེ སཱིསཾ ཀཏྭཱ ཀཐེསཱིཏི? སུགཏིདུགྒཏིགཱམིནོ ཀམྨསྶ ཝིསེསཧེཏུབྷཱུཏཏྟཱ. དུགྒཏིགཱམིནོ ཧི ཀམྨསྶ ཝིསེསཧེཏུ ཨཝིཛྫཱ. ཀསྨཱ? ཡསྨཱ ཨཝིཛྫཱབྷིབྷཱུཏོ པུཐུཛྫནོ, ཨགྒིསནྟཱཔལགུལཱ༹བྷིགྷཱཏཔརིསྶམཱབྷིབྷཱུཏཱ ཝཛ྄ཛྷགཱཝཱི ཏཱཡ པརིསྶམཱཏུརཏཱཡ ནིརསྶཱདམྤི ཨཏྟནོ ཨནཏྠཱཝཧམྤི ཙ ཨུཎྷོདཀཔཱནཾ ཝིཡ, ཀིལེསསནྟཱཔཏོ ནིརསྶཱདམྤི དུགྒཏིཝིནིཔཱཏཏོ ཙ ཨཏྟནོ ཨནཏྠཱཝཧམྤི པཱཎཱཏིཔཱཏཱདིམནེཀཔྤཀཱརཾ དུགྒཏིགཱམིཀམྨཾ ཨཱརབྷཏི. སུགཏིགཱམིནོ པན ཀམྨསྶ ཝིསེསཧེཏུ བྷཝཏཎྷཱ. ཀསྨཱ? ཡསྨཱ བྷཝཏཎྷཱབྷིབྷཱུཏོ པུཐུཛྫནོ, ཡཐཱ ཝུཏྟཔྤཀཱརཱ གཱཝཱི ¶ སཱིཏུདཀཏཎྷཱཡ སཨསྶཱདཾ ཨཏྟནོ པརིསྶམཝིནོདནཉྩ སཱིཏུདཀཔཱནཾ ཝིཡ, ཀིལེསསནྟཱཔཝིརཧཏོ སཨསྶཱདཾ སུགཏིསམྤཱཔནེན ཨཏྟནོ དུགྒཏིདུཀྑཔརིསྶམཝིནོདནཉྩ པཱཎཱཏིཔཱཏཱཝེརམཎཱིཨཱདིམནེཀཔྤཀཱརཾ སུགཏིགཱམིཀམྨཾ ཨཱརབྷཏི.

ཨེཏེསུ པན ཝཊྚཀཐཱཡ སཱིསབྷཱུཏེསུ དྷམྨེསུ ཀཏྠཙི བྷགཝཱ ¶ ཨེཀདྷམྨམཱུལིཀཾ དེསནཾ དེསེཏི, སེཡྻཐིདཾ – ‘‘ཨིཏི ཁོ, བྷིཀྑཝེ, ཨཝིཛྫཱུཔནིསཱ སངྑཱརཱ, སངྑཱརཱུཔནིསཾ ཝིཉྙཱཎ’’ནྟིཨཱདི (སཾ. ནི. ༢.༢༣). ཏཐཱ ‘‘ཨུཔཱདཱནཱིཡེསུ, བྷིཀྑཝེ, དྷམྨེསུ ཨསྶཱདཱནུཔསྶིནོ ཝིཧརཏོ ཏཎྷཱ པཝཌྜྷཏི, ཏཎྷཱཔཙྩཡཱ ཨུཔཱདཱན’’ནྟིཨཱདི (སཾ. ནི. ༢.༥༢). ཀཏྠཙི ཨུབྷཡམཱུལིཀམྤི, སེཡྻཐིདཾ – ‘‘ཨཝིཛྫཱནཱིཝརཎསྶ, བྷིཀྑཝེ, བཱལསྶ ཏཎྷཱཡ སམྤཡུཏྟསྶ ཨེཝམཡཾ ཀཱཡོ སམུདཱགཏོ. ཨིཏི ཨཡཉྩེཝ ཀཱཡོ བཧིདྡྷཱ ཙ ནཱམརཱུཔཾ ཨིཏྠེཏཾ ¶ དྭཡཾ, དྭཡཾ པཊིཙྩ ཕསྶོ, སལེ༹ཝཱཡཏནཱནི ཡེཧི ཕུཊྛོ བཱལོ སུཁདུཀྑཾ པཊིསཾཝེདེཏཱི’’ཏིཨཱདི (སཾ. ནི. ༢.༡༩). ཏཱསུ ཏཱསུ དེསནཱསུ ‘‘ཨཝིཛྫཱཔཙྩཡཱ སངྑཱརཱ’’ཏི ཨཡམིདྷ ཨཝིཛྫཱཝསེན ཨེཀདྷམྨམཱུལིཀཱ དེསནཱཏི ཝེདིཏབྦཱ. ཨེཝཾ ཏཱཝེཏྠ དེསནཱབྷེདཏོ ཝིཉྙཱཏབྦོ ཝིནིཙྪཡོ.

‘ཨཏྠཏོ’ཏི ཨཝིཛྫཱདཱིནཾ པདཱནཾ ཨཏྠཏོ, སེཡྻཐིདཾ – པཱུརེཏུཾ ཨཡུཏྟཊྛེན ཀཱཡདུཙྩརིཏཱདི ཨཝིནྡིཡཾ ནཱམ; ཨལདྡྷབྦནྟི ཨཏྠོ. ཏཾ ཨཝིནྡིཡཾ ཝིནྡཏཱིཏི ཨཝིཛྫཱ. ཏབྦིཔརཱིཏཏོ ཀཱཡསུཙརིཏཱདི ཝིནྡིཡཾ ནཱམ. ཏཾ ཝིནྡིཡཾ ན ཝིནྡཏཱིཏི ཨཝིཛྫཱ. ཁནྡྷཱནཾ རཱསཊྛཾ, ཨཱཡཏནཱནཾ ཨཱཡཏནཊྛཾ, དྷཱཏཱུནཾ སུཉྙཊྛཾ, སཙྩཱནཾ ཏཐཊྛཾ, ཨིནྡྲིཡཱནཾ ཨཱདྷིཔཏེཡྻཊྛཾ ཨཝིདིཏཾ ཀརོཏཱིཏི ཨཝིཛྫཱ. དུཀྑཱདཱིནཾ པཱིལ༹ནཱདིཝསེན ཝུཏྟཾ ཙཏུབྦིདྷཾ ཙཏུབྦིདྷཾ ཨཏྠཾ ཨཝིདིཏཾ ཀརོཏཱིཏིཔི ཨཝིཛྫཱ. ཨནྟཝིརཧིཏེ སཾསཱརེ སབྦཡོནིགཏིབྷཝཝིཉྙཱཎཊྛིཏིསཏྟཱཝཱསེསུ སཏྟེ ཛཝཱཔེཏཱིཏི ཨཝིཛྫཱ. པརམཏྠཏོ ཨཝིཛྫམཱནེསུ ཨིཏྠིཔུརིསཱདཱིསུ ཛཝཏི, ཝིཛྫམཱནེསུཔི ཁནྡྷཱདཱིསུ ན ཛཝཏཱིཏི ཨཝིཛྫཱ. ཨཔིཙ ཙཀྑུཝིཉྙཱཎཱདཱིནཾ ཝཏྠཱརམྨཎཱནཾ པཊིཙྩསམུཔྤཱདཔཊིཙྩསམུཔྤནྣཱནཉྩ དྷམྨཱནཾ ཚཱདནཏོཔི ཨཝིཛྫཱ.

ཡཾ པཊིཙྩ ཕལམེཏི སོ པཙྩཡོ. པཊིཙྩཱཏི ན ཝིནཱ ཏེན; ཏཾ ཨཔཙྩཀྑིཏྭཱཏི ཨཏྠོ. ཨེཏཱིཏི ཨུཔྤཛྫཏི ཙེཝ པཝཏྟཏི ཙཱཏི ཨཏྠོ. ཨཔི ཙ ཨུཔཀཱརཀཊྛོ པཙྩཡཊྛོ. ཨཝིཛྫཱ ཙ སཱ པཙྩཡོ ཙཱཏི ཨཝིཛྫཱཔཙྩཡོ. ཏསྨཱ ཨཝིཛྫཱཔཙྩཡཱ.

སངྑཏམབྷིསངྑརོནྟཱིཏི ¶ སངྑཱརཱ. ཨཔིཙ ཨཝིཛྫཱཔཙྩཡཱ སངྑཱརཱ, སངྑཱརསདྡེན ཨཱགཏསངྑཱརཱ ཙཱཏི དུཝིདྷཱ སངྑཱརཱ. ཏཏྠ པུཉྙཱཔུཉྙཱནེཉྫཱབྷིསངྑཱརཱ ཏཡོ, ཀཱཡཝཙཱིཙིཏྟསངྑཱརཱ ཏཡོཏི ཨིམེ ཚ ཨཝིཛྫཱཔཙྩཡཱ སངྑཱརཱ ¶ . ཏེ སབྦེཔི ལོཀིཡཀུསལཱཀུསལཙེཏནཱམཏྟམེཝ ཧོནྟི.

སངྑཏསངྑཱརོ, ཨབྷིསངྑཏསངྑཱརོ, ཨབྷིསངྑརཎསངྑཱརོ, པཡོགཱབྷིསངྑཱརོཏི ཨིམེ པན ཙཏྟཱརོ སངྑཱརསདྡེན ཨཱགཏསངྑཱརཱ. ཏཏྠ ¶ ‘‘ཨནིཙྩཱ ཝཏ སངྑཱརཱ’’ཏིཨཱདཱིསུ (དཱི. ནི. ༢.༢༢༡, ༢༧༢; སཾ. ནི. ༡.༡༨༦; ༢.༡༤༣) ཝུཏྟཱ སབྦེཔི སཔྤཙྩཡཱ དྷམྨཱ ‘སངྑཏསངྑཱརཱ’ ནཱམ. ཀམྨནིབྦཏྟཱ ཏེབྷཱུམཀཱ རཱུཔཱརཱུཔདྷམྨཱ ‘ཨབྷིསངྑཏསངྑཱརཱ’ཏི ཨཊྛཀཐཱསུ ཝུཏྟཱ. ཏེཔི ‘‘ཨནིཙྩཱ ཝཏ སངྑཱརཱ’’ཏི ཨེཏྠེཝ སངྒཧཾ གཙྪནྟི. ཝིསུཾ པན ནེསཾ ཨཱགཏཊྛཱནཾ ན པཉྙཱཡཏི. ཏེབྷཱུམཀཀུསལཱཀུསལཙེཏནཱ པན ‘ཨབྷིསངྑརཎཀསངྑཱརོ’ཏི ཝུཙྩཏི. ཏསྶ ‘‘ཨཝིཛྫཱགཏོཡཾ, བྷིཀྑཝེ, པུརིསཔུགྒལོ པུཉྙཉྩེ ཨབྷིསངྑརོཏཱི’’ཏིཨཱདཱིསུ (སཾ. ནི. ༢.༥༡) ཨཱགཏཊྛཱནཾ པཉྙཱཡཏི. ཀཱཡིཀཙེཏསིཀཾ པན ཝཱིརིཡཾ ‘པཡོགཱབྷིསངྑཱརོ’ཏི ཝུཙྩཏི. སོ ‘‘ཡཱཝཏིཀཱ ཨབྷིསངྑཱརསྶ གཏི, ཏཱཝཏིཀཾ གནྟྭཱ ཨཀྑཱཧཏཾ མཉྙེ ཨཊྛཱསཱི’’ཏིཨཱདཱིསུ (ཨ. ནི. ༣.༡༥) ཨཱགཏོ.

ན ཀེཝལཉྩ ཨེཏེཡེཝ, ཨཉྙེཔི ‘‘སཉྙཱཝེདཡིཏནིརོདྷཾ སམཱཔཛྫནྟསྶ ཁོ, ཨཱཝུསོ ཝིསཱཁ, བྷིཀྑུནོ པཋམཾ ནིརུཛ྄ཛྷཏི ཝཙཱིསངྑཱརོ, ཏཏོ ཀཱཡསངྑཱརོ, ཏཏོ ཙིཏྟསངྑཱརོ’’ཏིཨཱདིནཱ (མ. ནི. ༡.༤༦༤) ནཡེན སངྑཱརསདྡེན ཨཱགཏཱ ཨནེཀསངྑཱརཱ. ཏེསུ ནཏྠི སོ སངྑཱརོ, ཡོ སངྑཏསངྑཱརེ སངྒཧཾ ན གཙྪེཡྻ. ཨིཏོ པརཾ སངྑཱརཔཙྩཡཱ ཝིཉྙཱཎནྟིཨཱདཱིསུ ཡཾ ཝུཏྟཾ ཏཾ ཝུཏྟནཡེནེཝ ཝེདིཏབྦཾ.

ཨཝུཏྟེ པན ཝིཛཱནཱཏཱིཏི ཝིཉྙཱཎཾ. ནམཏཱིཏི ནཱམཾ. རུཔྤཏཱིཏི རཱུཔཾ. ཨཱཡེ ཏནོཏི, ཨཱཡཏཉྩ ནཡཏཱིཏི ཨཱཡཏནཾ. ཕུསཏཱིཏི ཕསྶོ. ཝེདཡཏཱིཏི ཝེདནཱ. པརིཏསྶཏཱིཏི ཏཎྷཱ. ཨུཔཱདིཡཏཱིཏི ཨུཔཱདཱནཾ. བྷཝཏི བྷཱཝཡཏི ཙཱཏི བྷཝོ. ཛནནཾ ཛཱཏི. ཛཱིརཎཾ ཛརཱ. མརནྟི ¶ ཨེཏེནཱཏི མརཎཾ. སོཙནཾ སོཀོ. པརིདེཝནཾ པརིདེཝོ. དུཀྑཡཏཱིཏི དུཀྑཾ; ཨུཔྤཱདཊྛིཏིཝསེན ཝཱ དྭེདྷཱ ཁཎཏཱིཏི དུཀྑཾ. དུམྨནསྶ བྷཱཝོ དོམནསྶཾ. བྷུསོ ཨཱཡཱསོ ཨུཔཱཡཱསོ.

སམྦྷཝནྟཱིཏི ¶ ནིབྦཏྟནྟི. ན ཀེཝལཉྩ སོཀཱདཱིཧེཝ, ཨཐ ཁོ སབྦཔདེཧི ‘སམྦྷཝནྟཱི’ཏི སདྡསྶ ཡོཛནཱ ཀཱཏབྦཱ. ཨིཏརཐཱ ཧི ‘‘ཨཝིཛྫཱཔཙྩཡཱ སངྑཱརཱ’’ཏི ཝུཏྟེ ཀིཾ ཀརོནྟཱིཏི ན པཉྙཱཡེཡྻུཾ. ‘‘སམྦྷཝནྟཱི’’ཏི པན ཡོཛནཱཡ སཏི ‘‘ཨཝིཛྫཱ ཙ སཱ པཙྩཡོ ཙཱཏི ཨཝིཛྫཱཔཙྩཡོ; ཏསྨཱ ཨཝིཛྫཱཔཙྩཡཱ སངྑཱརཱ སམྦྷཝནྟཱི’’ཏི པཙྩཡཔཙྩཡུཔྤནྣཝཝཏྠཱནཾ ཀཏཾ ཧོཏི. ཨེས ནཡོ སབྦཏྠ.

ཨེཝནྟི ¶ ནིདྡིཊྛནཡནིདསྶནཾ. ཏེན ཨཝིཛྫཱདཱིཧེཝ ཀཱརཎེཧི, ན ཨིསྶརནིམྨཱནཱདཱིཧཱིཏི དསྶེཏི. ཨེཏསྶཱཏི ཡཐཱཝུཏྟསྶ. ཀེཝལསྶཱཏི ཨསམྨིསྶསྶ སཀལསྶ ཝཱ. དུཀྑཀྑནྡྷསྶཱཏི དུཀྑསམཱུཧསྶ, ན སཏྟསྶ, ན སུཁསུབྷཱདཱིནཾ. སམུདཡོཏི ནིབྦཏྟི. ཧོཏཱིཏི སམྦྷཝཏི. ཨེཝམེཏྠ ཨཏྠཏོ ཝིཉྙཱཏབྦོ ཝིནིཙྪཡོ.

‘ལཀྑཎཱདིཏོ’ཏི ཨཝིཛྫཱདཱིནཾ ལཀྑཎཱདིཏོ, སེཡྻཐིདཾ – ཨཉྙཱཎལཀྑཎཱ ཨཝིཛྫཱ, སམྨོཧནརསཱ, ཚཱདནཔཙྩུཔཊྛཱནཱ, ཨཱསཝཔདཊྛཱནཱ. ཨབྷིསངྑརཎལཀྑཎཱ སངྑཱརཱ, ཨཱཡཱུཧནརསཱ, ཙེཏནཱཔཙྩུཔཊྛཱནཱ, ཨཝིཛྫཱཔདཊྛཱནཱ. ཝིཛཱནནལཀྑཎཾ ཝིཉྙཱཎཾ, པུབྦངྒམརསཾ, པཊིསནྡྷིཔཙྩུཔཊྛཱནཾ, སངྑཱརཔདཊྛཱནཾ, ཝཏྠཱརམྨཎཔདཊྛཱནཾ ཝཱ. ནམནལཀྑཎཾ ནཱམཾ, སམྤཡོགརསཾ, ཨཝིནིབྦྷོགཔཙྩུཔཊྛཱནཾ, ཝིཉྙཱཎཔདཊྛཱནཾ. རུཔྤནལཀྑཎཾ རཱུཔཾ, ཝིཀིརཎརསཾ, ཨབྱཱཀཏཔཙྩུཔཊྛཱནཾ, ཝིཉྙཱཎཔདཊྛཱནཾ. ཨཱཡཏནལཀྑཎཾ སལཱ༹ཡཏནཾ, དསྶནཱདིརསཾ, ཝཏྠུདྭཱརབྷཱཝཔཙྩུཔཊྛཱནཾ ¶ , ནཱམརཱུཔཔདཊྛཱནཾ. ཕུསནལཀྑཎོ ཕསྶོ, སངྒྷཊྚནརསོ, སངྒཏིཔཙྩུཔཊྛཱནོ, སལཱ༹ཡཏནཔདཊྛཱནོ. ཨནུབྷཝནལཀྑཎཱ ཝེདནཱ, ཝིསཡརསསམྦྷོགརསཱ, སུཁདུཀྑཔཙྩུཔཊྛཱནཱ, ཕསྶཔདཊྛཱནཱ. ཧེཏུལཀྑཎཱ ཏཎྷཱ, ཨབྷིནནྡནརསཱ, ཨཏིཏྟིབྷཱཝཔཙྩུཔཊྛཱནཱ, ཝེདནཱཔདཊྛཱནཱ. གཧཎལཀྑཎཾ ཨུཔཱདཱནཾ, ཨམུཉྩནརསཾ, ཏཎྷཱདལ༹ྷཏྟདིཊྛིཔཙྩུཔཊྛཱནཾ, ཏཎྷཱཔདཊྛཱནཾ. ཀམྨཀམྨཕལལཀྑཎོ བྷཝོ, བྷཱཝནབྷཝནརསོ, ཀུསལཱཀུསལཱབྱཱཀཏཔཙྩུཔཊྛཱནོ, ཨུཔཱདཱནཔདཊྛཱནོ. ཛཱཏིཨཱདཱིནཾ ལཀྑཎཱདཱིནི སཙྩཝིབྷངྒེ ཝུཏྟནཡེནེཝ ཝེདིཏབྦཱནི. ཨེཝམེཏྠ ལཀྑཎཱདིཏོཔི ཝིཉྙཱཏབྦོ ཝིནིཙྪཡོ.

‘ཨེཀཝིདྷཱདིཏོ’ཏི ཨེཏྠ ཨཝིཛྫཱ ཨཉྙཱཎཱདསྶནམོཧཱདིབྷཱཝཏོ ཨེཀཝིདྷཱ, ཨཔྤཊིཔཏྟིམིཙྪཱཔཊིཔཏྟིཏོ དུཝིདྷཱ ཏཐཱ སངྑཱརཱསངྑཱརཏོ, ཝེདནཱཏྟཡསམྤཡོགཏོ ཏིཝིདྷཱ, ཙཏུསཙྩཨཔྤཊིཝེདྷཏོ ¶ ཙཏུབྦིདྷཱ, གཏིཔཉྩཀཱདཱིནཝཙྪཱདནཏོ པཉྩཝིདྷཱ, དྭཱརཱརམྨཎཏོ པན སབྦེསུཔི ཨརཱུཔདྷམྨེསུ ཚབྦིདྷཏཱ ཝེདིཏབྦཱ.

སངྑཱརཱ སཱསཝཝིཔཱཀདྷམྨདྷམྨཱདིབྷཱཝཏོ ཨེཀཝིདྷཱ, ཀུསལཱཀུསལཏོ དུཝིདྷཱ ཏཐཱ པརིཏྟམཧགྒཏཧཱིནམཛ྄ཛྷིམམིཙྪཏྟནིཡཏཱནིཡཏཏོ, ཏིཝིདྷཱ པུཉྙཱབྷིསངྑཱརཱདིབྷཱཝཏོ, ཙཏུབྦིདྷཱ ཙཏུཡོནིསཾཝཏྟནཏོ, པཉྩཝིདྷཱ པཉྩགཏིགཱམིཏོ.

ཝིཉྙཱཎཾ ¶ ལོཀིཡཝིཔཱཀཱདིབྷཱཝཏོ ཨེཀཝིདྷཾ, སཧེཏུཀཱཧེཏུཀཱདིཏོ དུཝིདྷཾ, བྷཝཏྟཡཔརིཡཱཔནྣཏོ ཝེདནཱཏྟཡསམྤཡོགཏོ ཨཧེཏུཀདུཧེཏུཀཏིཧེཏུཀཏོ ཙ ཏིཝིདྷཾ, ཡོནིགཏིཝསེན ཙཏུབྦིདྷཾ པཉྩཝིདྷཉྩ.

ནཱམརཱུཔཾ ཝིཉྙཱཎསནྣིསྶཡཏོ ཀམྨཔཙྩཡཏོ ཙ ཨེཀཝིདྷཾ, སཱརམྨཎཱནཱརམྨཎཏོ དུཝིདྷཾ, ཨཏཱིཏཱདིཏོ ཏིཝིདྷཾ, ཡོནིགཏིཝསེན ཙཏུབྦིདྷཾ པཉྩཝིདྷཉྩ.

སལཱ༹ཡཏནཾ སཉྫཱཏིསམོསརཎཊྛཱནཏོ ཨེཀཝིདྷཾ, བྷཱུཏཔྤསཱདཝིཉྙཱཎཱདིཏོ དུཝིདྷཾ, སམྤཏྟཱསམྤཏྟནོབྷཡགོཙརཏོ ཏིཝིདྷཾ, ཡོནིགཏིཔརིཡཱཔནྣཏོ ཙཏུབྦིདྷཾ པཉྩཝིདྷཉྩཱཏི ཨིམིནཱ ནཡེན ཕསྶཱདཱིནམྤི ཨེཀཝིདྷཱདིབྷཱཝོ ཝེདིཏབྦོཏི. ཨེཝམེཏྠ ཨེཀཝིདྷཱདིཏོཔི ཝིཉྙཱཏབྦོ ཝིནིཙྪཡོ.

‘ཨངྒཱནཉྩ ¶ ཝཝཏྠཱནཱ’ཏི སོཀཱདཡོ ཙེཏྠ བྷཝཙཀྐསྶ ཨཝིཙྪེདདསྶནཏྠཾ ཝུཏྟཱ. ཛརཱམརཎབྦྷཱཧཏསྶ ཧི བཱལསྶ ཏེ སམྦྷཝནྟི. ཡཐཱཧ – ‘‘ཨསྶུཏཝཱ, བྷིཀྑཝེ, པུཐུཛྫནོ སཱརཱིརིཀཱཡ དུཀྑཱཡ ཝེདནཱཡ ཕུཊྛོ སམཱནོ སོཙཏི ཀིལམཏི པརིདེཝཏི ཨུརཏྟཱལི༹ཾ ཀནྡཏི སམྨོཧམཱཔཛྫཏཱི’’ཏི (སཾ. ནི. ༤.༢༥༢). ཡཱཝ ཙ ཏེསཾ པཝཏྟི ཏཱཝ ཨཝིཛྫཱཡཱཏི པུནཔི ཨཝིཛྫཱཔཙྩཡཱ སངྑཱརཱཏི སམྦནྡྷམེཝ ཧོཏི བྷཝཙཀྐཾ. ཏསྨཱ ཏེསམྤི ཛརཱམརཎེནེཝ ཨེཀསངྑེཔཾ ཀཏྭཱ དྭཱདསེཝ པཊིཙྩསམུཔྤཱདངྒཱནཱིཏི ཝེདིཏབྦཱནི. ཨེཝམེཏྠ ཨངྒཱནཾ ཝཝཏྠཱནཏོཔི ཝིཉྙཱཏབྦོ ཝིནིཙྪཡོ. ཨཡཾ ཏཱཝེཏྠ ཨུདྡེསཝཱརཝསེན སངྑེཔཀཐཱ.

ཨུདྡེསཝཱརཝཎྞནཱ ནིཊྛིཏཱ.

ཨཝིཛྫཱཔདནིདྡེསོ

༢༢༦. ཨིདཱནི ¶ ནིདྡེསཝཱརཝསེན ཝིཏྠཱརཀཐཱ ཧོཏི. ‘‘ཨཝིཛྫཱ པཙྩཡཱ སངྑཱརཱ’’ཏི ཧི ཝུཏྟཾ. ཏཏྠ ཨཝིཛྫཱཔཙྩཡེསུ སངྑཱརེསུ དསྶེཏབྦེསུ ཡསྨཱ པུཏྟེ ཀཐེཏབྦེ པཋམཾ པིཏཱ ཀཐཱིཡཏི. ཨེཝཉྷི སཏི ‘མིཏྟསྶ ¶ པུཏྟོ, དཏྟསྶ པུཏྟོ’ཏི པུཏྟོ སུཀཐིཏོ ཧོཏི. ཏསྨཱ དེསནཱཀུསལོ སཏྠཱ སངྑཱརཱནཾ ཛནཀཏྠེན པིཏུསདིསཾ ཨཝིཛྫཾ ཏཱཝ དསྶེཏུཾ ཏཏྠ ཀཏམཱ ཨཝིཛྫཱ? དུཀྑེ ཨཉྙཱཎནྟིཨཱདིམཱཧ.

ཏཏྠ ཡསྨཱ ཨཡཾ ཨཝིཛྫཱ དུཀྑསཙྩསྶ ཡཱཐཱཝསརསལཀྑཎཾ ཛཱནིཏུཾ པསྶིཏུཾ པཊིཝིཛ྄ཛྷིཏུཾ ན དེཏི, ཚཱདེཏྭཱ པརིཡོནནྡྷིཏྭཱ གནྠེཏྭཱ ཏིཊྛཏི, ཏསྨཱ ‘‘དུཀྑེ ཨཉྙཱཎ’’ནྟི ཝུཙྩཏི. ཏཐཱ ཡསྨཱ དུཀྑསམུདཡསྶ དུཀྑནིརོདྷསྶ དུཀྑནིརོདྷགཱམིནིཡཱ པཊིཔདཱཡ ཡཱཐཱཝསརསལཀྑཎཾ ཛཱནིཏུཾ པསྶིཏུཾ པཊིཝིཛ྄ཛྷིཏུཾ ན དེཏི, ཚཱདེཏྭཱ པརིཡོནནྡྷིཏྭཱ གནྠེཏྭཱ ཏིཊྛཏི, ཏསྨཱ དུཀྑནིརོདྷགཱམིནིཡཱ པཊིཔདཱཡ ཨཉྙཱཎནྟི ཝུཙྩཏི. ཨིམེསུ ཙཏཱུསུ ཋཱནེསུ སུཏྟནྟིཀཔརིཡཱཡེན ཨཉྙཱཎཾ ཨཝིཛྫཱཏི ཀཐིཏཾ.

ནིཀྑེཔཀཎྜེ (དྷ. ས. ༡༠༦༧) པན ཨབྷིདྷམྨཔརིཡཱཡེན ‘‘པུབྦནྟེ ཨཉྙཱཎ’’ནྟི ཨཔརེསུཔི ཙཏཱུསུ ཋཱནེསུ ཨཉྙཱཎཾ གཧིཏཾ. ཏཏྠ ¶ པུབྦནྟེཏི ཨཏཱིཏོ ཨདྡྷཱ, ཨཏཱིཏཱནི ཁནྡྷདྷཱཏུཨཱཡཏནཱནི. ཨཔརནྟེཏི ཨནཱགཏོ ཨདྡྷཱ, ཨནཱགཏཱནི ཁནྡྷདྷཱཏུཨཱཡཏནཱནི. པུབྦནྟཱཔརནྟེཏི ཏདུབྷཡཾ. ཨིདཔྤཙྩཡཏཱཏི སངྑཱརཱདཱིནཾ ཀཱརཎཱནི ཨཝིཛྫཱདཱིནི ཨངྒཱནི. པཊིཙྩསམུཔྤནྣདྷམྨཱཏི ཨཝིཛྫཱདཱིཧི ནིབྦཏྟཱ སངྑཱརཱདཡོ དྷམྨཱ. ཏཏྲཱཡཾ ཨཝིཛྫཱ ཡསྨཱ ཨཏཱིཏཱནཾ ཁནྡྷཱདཱིནཾ ཡཱཐཱཝསརསལཀྑཎཾ ཛཱནིཏུཾ པསྶིཏུཾ པཊིཝིཛ྄ཛྷིཏུཾ ན དེཏི, ཚཱདེཏྭཱ པརིཡོནནྡྷིཏྭཱ གནྠེཏྭཱ ཏིཊྛཏི, ཏསྨཱ ‘‘པུབྦནྟེ ཨཉྙཱཎ’’ནྟི ཝུཙྩཏི. ཏཐཱ ཡསྨཱ ཨནཱགཏཱནཾ ཁནྡྷཱདཱིནཾ, ཨཏཱིཏཱནཱགཏཱནཾ ཁནྡྷཱདཱིནཾ ཨིདཔྤཙྩཡཏཱཡ ཙེཝ པཊིཙྩསམུཔྤནྣདྷམྨཱནཉྩ ཡཱཐཱཝསརསལཀྑཎཾ ཛཱནིཏུཾ པསྶིཏུཾ པཊིཝིཛ྄ཛྷིཏུཾ ན དེཏི, ཚཱདེཏྭཱ པརིཡོནནྡྷིཏྭཱ གནྠེཏྭཱ ཏིཊྛཏི, ཏསྨཱ ཨིདཔྤཙྩཡཏཱཔཊིཙྩསམུཔྤནྣེསུ དྷམྨེསུ ཨཉྙཱཎནྟི ཝུཙྩཏི. ཨིམེསུ ཨཊྛསུ ཋཱནེསུ ཨབྷིདྷམྨཔརིཡཱཡེན ཨཉྙཱཎཾ ཨཝིཛྫཱཏི ཀཐིཏཾ.

ཨེཝཾ ཀིཾ ཀཐིཏཾ ཧོཏི? ཀིཙྩཏོ ཙེཝ ཛཱཏིཏོ ཙ ཨཝིཛྫཱ ཀཐིཏཱ ནཱམ ཧོཏི. ཀཐཾ ¶ ? ཨཡཉྷི ཨཝིཛྫཱ ཨིམཱནི ཨཊྛ ཋཱནཱནི ཛཱནིཏུཾ པསྶིཏུཾ པཊིཝིཛ྄ཛྷིཏུཾ ན དེཏཱིཏི ཀིཙྩཏོ ཀཐིཏཱ; ཨུཔྤཛྫམཱནཱཔི ཨིམེསུ ཨཊྛསུ ཋཱནེསུ ཨུཔྤཛྫཏཱིཏི ཛཱཏིཏོཔི ཀཐིཏཱ. ཨེཝཾ ཀཐེཏྭཱ པུན ‘‘ཡཾ ¶ ཨེཝརཱུཔཾ ཨཉྙཱཎཾ ཨདསྶན’’ནྟིཨཱདཱིནི པཉྩཝཱིསཏི པདཱནི ཨཝིཛྫཱཡ ལཀྑཎཾ དསྶེཏུཾ གཧིཏཱནི.

ཏཏྠ ཡསྨཱ ཨཡཾ ཨཝིཛྫཱ ཨིམེཧི ཨཊྛཧི པདེཧི ཀཐིཏཱཔི པུན པཉྩཝཱིསཏིཡཱ པདེཧི ལཀྑཎེ ཨཀཐིཏེ སུཀཐིཏཱ ནཱམ ན ཧོཏི, ལཀྑཎེ པན ཀཐིཏེཡེཝ སུཀཐིཏཱ ནཱམ ཧོཏི. ཡཐཱ པུརིསོ ནཊྛཾ གོཎཾ པརིཡེསམཱནོ མནུསྶེ པུཙྪེཡྻ – ‘‘ཨཔི, ཨཡྻཱ, སེཏཾ གོཎཾ པསྶཐ, རཏྟཾ གོཎཾ པསྶཐཱ’’ཏི? ཏེ ཨེཝཾ ཝདེཡྻུཾ – ‘‘ཨིམསྨིཾ རཊྛེ སེཏརཏྟཱནཾ གོཎཱནཾ ཨནྟོ ནཏྠི, ཀིཾ ཏེ གོཎསྶ ལཀྑཎ’’ནྟི? ཨཐ ཏེན ‘སངྒྷཱཊི’ ཝཱ ‘ནངྒལཾ’ ཝཱཏི ཝུཏྟེ གོཎོ སུཀཐིཏོ ནཱམ བྷཝེཡྻ; ཨེཝམེཝ ཡསྨཱ ཨཡཾ ཨཝིཛྫཱ ཨཊྛཧི པདེཧི ཀཐིཏཱཔི པུན པཉྩཝཱིསཏིཡཱ པདེཧི ལཀྑཎེ ཨཀཐིཏེ སུཀཐིཏཱ ¶ ནཱམ ན ཧོཏི, ལཀྑཎེ པན ཀཐིཏེཡེཝ སུཀཐིཏཱ ནཱམ ཧོཏི. ཏསྨཱ ཡཱནསྶཱ ལཀྑཎདསྶནཏྠཾ པཉྩཝཱིསཏི པདཱནི ཀཐིཏཱནི, ཏེསམྤི ཝསེན ཝེདིཏབྦཱ.

སེཡྻཐིདཾ – ཉཱཎཾ ནཱམ པཉྙཱ. སཱ ཨཏྠཏྠཾ ཀཱརཎཀཱརཎཾ ཙཏུསཙྩདྷམྨཾ ཝིདིཏཾ པཱཀཊཾ ཀརོཏི. ཨཡཾ པན ཨཝིཛྫཱ ཨུཔྤཛྫིཏྭཱ ཏཾ ཝིདིཏཾ པཱཀཊཾ ཀཱཏུཾ ན དེཏཱིཏི ཉཱཎཔཙྩནཱིཀཏོ ཨཉྙཱཎཾ. དསྶནནྟིཔི པཉྙཱ. སཱཔི ཏཾ ཨཱཀཱརཾ པསྶཏི. ཨཝིཛྫཱ པན ཨུཔྤཛྫིཏྭཱ ཏཾ པསྶིཏུཾ ན དེཏཱིཏི ཨདསྶནཾ. ཨབྷིསམཡོཏིཔི པཉྙཱ. སཱ ཏཾ ཨཱཀཱརཾ ཨབྷིསམེཏི. ཨཝིཛྫཱ པན ཨུཔྤཛྫིཏྭཱ ཏཾ ཨབྷིསམེཏུཾ ན དེཏཱིཏི ཨནབྷིསམཡོ. ཨནུབོདྷོ སམྦོདྷོ པཊིཝེདྷོཏིཔི པཉྙཱ. སཱ ཏཾ ཨཱཀཱརཾ ཨནུབུཛ྄ཛྷཏི སམྦུཛ྄ཛྷཏི པཊིཝིཛ྄ཛྷཏི. ཨཝིཛྫཱ པན ཨུཔྤཛྫིཏྭཱ ཏཾ ཨནུབུཛ྄ཛྷིཏུཾ སཾབུཛ྄ཛྷིཏུཾ པཊིཝིཛ྄ཛྷིཏུཾ ན དེཏཱིཏི ཨནནུབོདྷོ ཨསམྦོདྷོ ཨཔྤཊིཝེདྷོ. སངྒཱཧནཱཏིཔི པཉྙཱ. སཱ ཏཾ ཨཱཀཱརཾ གཧེཏྭཱ གྷཾསིཏྭཱ གཎྷཱཏི. ཨཝིཛྫཱ པན ཨུཔྤཛྫིཏྭཱ ཏཾ གཧེཏྭཱ གྷཾསིཏྭཱ གཎྷིཏུཾ ན དེཏཱིཏི ཨསངྒཱཧནཱ. པརིཡོགཱཧནཱཏིཔི པཉྙཱ. སཱ ཏཾ ཨཱཀཱརཾ ཨོགཱཧིཏྭཱ ཨནུཔཝིསིཏྭཱ གཎྷཱཏི. ཨཝིཛྫཱ པན ཨུཔྤཛྫིཏྭཱ ཏཾ ཨོགཱཧིཏྭཱ ཨནུཔཝིསིཏྭཱ གཎྷིཏུཾ ན དེཏཱིཏི ཨཔརིཡོགཱཧནཱ. སམཔེཀྑནཱཏིཔི པཉྙཱ ¶ . སཱ ཏཾ ཨཱཀཱརཾ སམཾ སམྨཱ ཙ པེཀྑཏི. ཨཝིཛྫཱ པན ཨུཔྤཛྫིཏྭཱ ཏཾ སམཾ སམྨཱ ཙ པེཀྑིཏུཾ ན དེཏཱིཏི ཨསམཔེཀྑནཱ. པཙྩཝེཀྑཎཱཏིཔི པཉྙཱ. སཱ ཏཾ ཨཱཀཱརཾ པཙྩཝེཀྑཏི. ཨཝིཛྫཱ པན ཨུཔྤཛྫིཏྭཱ ཏཾ པཙྩཝེཀྑིཏུཾ ན དེཏཱིཏི ཨཔཙྩཝེཀྑཎཱ. ནཱསྶཱ ¶ ཀིཉྩི ཀམྨཾ པཙྩཀྑཾ ཨཏྠི, སཡཉྩ ཨཔཙྩཝེཀྑིཏྭཱ ཀཏཾ ཀམྨནྟི ཨཔཙྩཀྑཀམྨཾ. དུམྨེདྷབྷཱཝཏཱཡ དུམྨེཛ྄ཛྷཾ. བཱལབྷཱཝཏཱཡ བཱལྱཾ.

སམྤཛཉྙནྟིཔི པཉྙཱ. སཱ ཨཏྠཏྠཾ ཀཱརཎཀཱརཎཾ ཙཏུསཙྩདྷམྨཾ སམྨཱ པཛཱནཱཏི. ཨཝིཛྫཱ པན ཨུཔྤཛྫིཏྭཱ ཏཾ ཨཱཀཱརཾ པཛཱནིཏུཾ ན དེཏཱིཏི ཨསམྤཛཉྙཾ. མོཧནཝསེན མོཧོ. པམོཧནཝསེན པམོཧོ. སམྨོཧནཝསེན སམྨོཧོ. ཨཝིནྡིཡཾ ཝིནྡཏཱིཏིཨཱདིཝསེན ཨཝིཛྫཱ. ཝཊྚསྨིཾ ཨོཧནཏི ཨོསཱིདཱཔེཏཱིཏི ཨཝིཛྫོགྷོ. ཝཊྚསྨིཾ ཡོཛེཏཱིཏི ཨཝིཛྫཱཡོགོ. ཨཔྤཧཱིནཝསེན ¶ པུནཔྤུནཾ ཨུཔྤཛྫནཏོ ཙ ཨཝིཛྫཱནུསཡོ. མགྒེ པརིཡུཊྛིཏཙོརཱ ཨདྡྷིཀེ ཝིཡ ཀུསལཙིཏྟཾ པརིཡུཊྛཱཏི གཎྷཱཏི ཝིལུམྤཏཱིཏི ཨཝིཛྫཱཔརིཡུཊྛཱནཾ. ཡཐཱ ནགརདྭཱརེ པལིགྷསངྑཱཏཱཡ ལངྒིཡཱ པཏིཏཱཡ ཨནྟོནགརེ མནུསྶཱནཾ བཧིནགརགམནམྤི བཧིནགརེ མནུསྶཱནཾ ཨནྟོནགརཔཝེསནམྤི པཙྪིཛྫཏི, ཨེཝམེཝ ཡསྶ སཀྐཱཡནགརེ ཨཡཾ པཏིཏཱ ཏསྶ ནིབྦཱནསམྤཱཔཀཾ ཉཱཎགམནཾ པཙྪིཛྫཏཱིཏི ཨཝིཛྫཱལངྒཱི ནཱམ ཧོཏི. ཨཀུསལཉྩ ཏཾ མཱུལཉྩ, ཨཀུསལཱནཾ ཝཱ མཱུལནྟི ཨཀུསལམཱུལཾ. ཏཾ པན ན ཨཉྙཾ, ཨིདྷཱདྷིཔྤེཏོ མོཧོཏི མོཧོ ཨཀུསལམཱུལཾ. ཨཡཾ ཝུཙྩཏི ཨཝིཛྫཱཏི ཨཡཾ ཨེཝཾལཀྑཎཱ ཨཝིཛྫཱ ནཱམཱཏི ཝུཙྩཏི. ཨེཝཾ པཉྩཝཱིསཏིཔདཝསེན ཨཝིཛྫཱཡ ལཀྑཎཾ ཝེདིཏབྦཾ.

ཨེཝཾལཀྑཎཱ པནཱཡཾ ཨཝིཛྫཱ དུཀྑཱདཱིསུ ཨཉྙཱཎནྟི ཝུཏྟཱཔི དུཀྑསཙྩསྶ ཨེཀདེསོ ཧོཏི, སཧཛཱཏཱ ཧོཏི, ཏཾ ཨཱརམྨཎཾ ཀརོཏི, ཚཱདེཏི; སམུདཡསཙྩསྶ ན ཨེཀདེསོ ཧོཏི, སཧཛཱཏཱ ཧོཏི, ཏཾ ཨཱརམྨཎཾ ཀརོཏི, ཚཱདེཏི; ནིརོདྷསཙྩསྶ ནེཝ ཨེཀདེསོ ཧོཏི, ན སཧཛཱཏཱ, ན ཏཾ ཨཱརམྨཎཾ ཀརོཏི, ཀེཝལཾ ཚཱདེཏི; མགྒསཙྩསྶཱཔི ན ཨེཀདེསོ, ན སཧཛཱཏཱ, ན ཏཾ ཨཱརམྨཎཾ ཀརོཏི, ཀེཝལཾ ཚཱདེཏི. དུཀྑཱརམྨཎཏཱ ཨཝིཛྫཱ ཨུཔྤཛྫཏི, ཏཉྩ ཚཱདེཏི. སམུདཡཱརམྨཎཏཱ ཨཝིཛྫཱ ཨུཔྤཛྫཏི, ཏཉྩ ཚཱདེཏི. ནིརོདྷཱརམྨཎཏཱ ཨཝིཛྫཱ ནུཔྤཛྫཏི, ཏཉྩ ཚཱདེཏི. མགྒཱརམྨཎཏཱ ཨཝིཛྫཱ ནཱུཔྤཛྫཏི, ཏཉྩ ཚཱདེཏི.

དྭེ སཙྩཱ དུདྡསཏྟཱ གམྦྷཱིརཱ. དྭེ སཙྩཱ གམྦྷཱིརཏྟཱ དུདྡསཱ. ཨཔིཙ ཁོ པན དུཀྑནིརོདྷཾ ཨརིཡསཙྩཾ གམྦྷཱིརཉྩེཝ དུདྡསཉྩ. ཏཏྠ དུཀྑཾ ནཱམ པཱཀཊཾ, ལཀྑཎསྶ པན དུདྡསཏྟཱ ¶ གམྦྷཱིརཾ ནཱམ ཛཱཏཾ. སམུདཡེཔི ཨེསེཝ ནཡོ. ཡཐཱ པན མཧཱསམུདྡཾ མནྠེཏྭཱ ཨོཛཱཡ ནཱིཧརཎཾ ནཱམ བྷཱརོ, སིནེརུཔཱདཏོ ¶ ཝཱལིཀཱཡ ཨུདྡྷརཎཾ ནཱམ བྷཱརོ, པབྦཏཾ པཱིལེ༹ཏྭཱ རསསྶ ནཱིཧརཎཾ ནཱམ བྷཱརོ; ཨེཝམེཝ དྭེ སཙྩཱནི གམྦྷཱིརཏཱཡ ཨེཝ དུདྡསཱནི, ནིརོདྷསཙྩཾ པན ཨཏིགམྦྷཱིརཉྩ ཨཏིདུདྡསཉྩཱཏི. ཨེཝཾ དུདྡསཏྟཱ གམྦྷཱིརཱནཾ གམྦྷཱིརཏྟཱ ཙ དུདྡསཱནཾ ཙཏུནྣཾ ཨརིཡསཙྩཱནཾ པཊིཙྪཱདཀཾ མོཧནྡྷཀཱརཾ ཨཡཾ ཝུཙྩཏི ཨཝིཛྫཱཏི.

ཨཝིཛྫཱཔདནིདྡེསོ.

སངྑཱརཔདནིདྡེསོ

སངྑཱརཔདེ ¶ ཧེཊྛཱ ཝུཏྟསངྑཱརེསུ སངྑཱརསདྡེན ཨཱགཏསངྑཱརེ ཨནཱམསིཏྭཱ ཨཝིཛྫཱཔཙྩཡཱ སངྑཱརེཡེཝ དསྶེནྟོ ཏཏྠ ཀཏམེ ཨཝིཛྫཱཔཙྩཡཱ སངྑཱརཱ? པུཉྙཱབྷིསངྑཱརོཏིཨཱདིམཱཧ. ཏཏྠ པུནཱཏི ཨཏྟནོ ཀཱརཀཾ, པཱུརེཏི ཙསྶ ཨཛ྄ཛྷཱསཡཾ, པུཛྫཉྩ བྷཝཾ ནིབྦཏྟེཏཱིཏི པུཉྙོ. ཨབྷིསངྑརོཏི ཝིཔཱཀཾ ཀཊཏྟཱརཱུཔཉྩཱཏི ཨབྷིསངྑཱརོ. པུཉྙོཝ ཨབྷིསངྑཱརོ པུཉྙཱབྷིསངྑཱརོ. པུཉྙཔཊིཔཀྑཏོ ཨཔུཉྙོ. ཨཔུཉྙོཝ ཨབྷིསངྑཱརོ ཨཔུཉྙཱབྷིསངྑཱརོ. ན ཨིཉྫཏཱིཏི ཨཱནེཉྫཾ. ཨཱནེཉྫམེཝ ཨབྷིསངྑཱརོ, ཨཱནེཉྫཉྩ བྷཝཾ ཨབྷིསངྑརོཏཱིཏི ཨཱནེཉྫཱབྷིསངྑཱརོ. ཀཱཡེན པཝཏྟིཏོ, ཀཱཡཏོ ཝཱ པཝཏྟོ, ཀཱཡསྶ ཝཱ སངྑཱརོཏི ཀཱཡསངྑཱརོ. ཝཙཱིསངྑཱརཙིཏྟསངྑཱརེསུཔི ཨེསེཝ ནཡོ.

ཏཏྠ པཋམཏྟིཀོ པརིཝཱིམཾསནསུཏྟཝསེན གཧིཏོ. ཏཏྠ ཧི ‘‘པུཉྙཉྩེ སངྑཱརཾ ཨབྷིསངྑརོཏི, པུཉྙཱུཔགཾ ཧོཏི ཝིཉྙཱཎཾ. ཨཔུཉྙཉྩེ སངྑཱརཾ ཨབྷིསངྑརོཏི, ཨཔུཉྙུཔགཾ ཧོཏི ཝིཉྙཱཎཾ. ཨཱནེཉྫཉྩེ སངྑཱརཾ ཨབྷིསངྑརོཏི, ཨཱནེཉྫུཔགཾ ཧོཏི ཝིཉྙཱཎ’’ནྟི (སཾ. ནི. ༢.༥༡) ཝུཏྟཾ. དུཏིཡཏྟིཀོ ཏདནནྟརསྶ ཝིབྷངྒསུཏྟསྶ ཝསེན གཧིཏོ, སམྨཱདིཊྛིསུཏྟཔརིཡཱཡེན (མ. ནི. ༡.༡༠༢) གཧིཏོཏིཔི ཝཏྟུཾ ཝཊྚཏིཡེཝ. ཏཏྠ ཧི ‘‘ཏཡོམེ, བྷིཀྑཝེ, སངྑཱརཱ. ཀཏམེ ཏཡོ? ཀཱཡསངྑཱརོ, ཝཙཱིསངྑཱརོ, ཙིཏྟསངྑཱརོ’’ཏི (སཾ. ནི. ༢.༢) ཝུཏྟཾ. ཀསྨཱ པནེཏེསཾ སུཏྟཱནཾ ཝསེན ཏེ གཧིཏཱཏི? ཨཡཾ ཨབྷིདྷམྨོ ནཱམ ¶ ན ཨདྷུནཱཀཏོ, ནཱཔི བཱཧིརཀཨིསཱིཧི ཝཱ སཱཝཀེཧི ཝཱ དེཝཏཱཧི ¶ ཝཱ བྷཱསིཏོ. སབྦཉྙུཛིནབྷཱསིཏོ པན ཨཡཾ. ཨབྷིདྷམྨེཔི ཧི སུཏྟེཔི ཨེཀསདིསཱཝ ཏནྟི ནིདྡིཊྛཱཏི ཨིམསྶཏྠསྶ དཱིཔནཏྠཾ.

ཨིདཱནི ཏེ སངྑཱརེ པབྷེདཏོ དསྶེཏུཾ ཏཏྠ ཀཏམོ པུཉྙཱབྷིསངྑཱརོཏིཨཱདིམཱཧ. ཏཏྠ ཀུསལཱ ཙེཏནཱཏི ཨནིཡམཏོ ཙཏུབྷཱུམིཀཙེཏནཱཔི ཝུཏྟཱ. ཀཱམཱཝཙརཱ རཱུཔཱཝཙརཱཏི ནིཡམིཏཏྟཱ པན ཨཊྛ ཀཱམཱཝཙརཀུསལཙེཏནཱ, པཉྩ རཱུཔཱཝཙརཀུསལཙེཏནཱཏི ཏེརས ཙེཏནཱ པུཉྙཱབྷིསངྑཱརོ ¶ ནཱམ. དཱནམཡཱཏིཨཱདཱིཧི ཏཱསཾཡེཝ ཙེཏནཱནཾ པུཉྙཀིརིཡཝཏྠུཝསེན པཝཏྟི དསྶིཏཱ. ཏཏྠ ཨཊྛ ཀཱམཱཝཙརཱཝ དཱནསཱིལམཡཱ ཧོནྟི. བྷཱཝནཱམཡཱ པན ཏེརསཔི. ཡཐཱ ཧི པགུཎཾ དྷམྨཾ སཛ྄ཛྷཱཡམཱནོ ཨེཀཾ དྭེ ཨནུསནྡྷིགཏེཔི ན ཛཱནཱཏི, པཙྪཱ ཨཱཝཛྫནྟོ ཛཱནཱཏི; ཨེཝམེཝ ཀསིཎཔརིཀམྨཾ ཀརོནྟསྶ པགུཎཛ྄ཛྷཱནཾ པཙྩཝེཀྑནྟསྶ པགུཎཀམྨཊྛཱནཉྩ མནསིཀརོནྟསྶ ཉཱཎཝིཔྤཡུཏྟཱཔི བྷཱཝནཱ ཧོཏི. ཏེན ཝུཏྟཾ ‘‘བྷཱཝནཱམཡཱ པན ཏེརསཔཱི’’ཏི.

ཏཏྠ དཱནམཡཱདཱིསུ ‘‘དཱནཾ ཨཱརབྦྷ དཱནམདྷིཀིཙྩ ཡཱ ཨུཔྤཛྫཏི ཙེཏནཱ སཉྩེཏནཱ ཙེཏཡིཏཏྟཾ – ཨཡཾ ཝུཙྩཏི དཱནམཡོ པུཉྙཱབྷིསངྑཱརོཏི. སཱིལཾ ཨཱརབྦྷ…པེ… བྷཱཝནཾ ཨཱརབྦྷ བྷཱཝནམདྷིཀིཙྩ ཡཱ ཨུཔྤཛྫཏི ཙེཏནཱ སཉྩེཏནཱ ཙེཏཡིཏཏྟཾ – ཨཡཾ ཝུཙྩཏི བྷཱཝནཱམཡོ པུཉྙཱབྷིསངྑཱརོ’’ཏི (ཝིབྷ. ༧༦༩) ཨཡཾ སངྑེཔདེསནཱ.

ཙཱིཝརཱདཱིསུ པན ཙཏཱུསུ པཙྩཡེསུ རཱུཔཱདཱིསུ ཝཱ ཚསུ ཨཱརམྨཎེསུ ཨནྣཱདཱིསུ ཝཱ དསསུ དཱནཝཏྠཱུསུ ཏཾ ཏཾ དེནྟསྶ ཏེསཾ ཨུཔྤཱདནཏོ པཊྛཱཡ པུབྦབྷཱགེ པརིཙྩཱགཀཱལེ པཙྪཱ སོམནསྶཙིཏྟེན ཨནུསྶརཎེ ཙཱཏི ཏཱིསུ ཀཱལེསུ པཝཏྟཱ ཙེཏནཱ དཱནམཡཱ ནཱམ. སཱིལཾ པརིཔཱུརཎཏྠཱཡ པན ‘པབྦཛིསྶཱམཱི’ཏི ཝིཧཱརཾ གཙྪནྟསྶ པབྦཛནྟསྶ མནོརཐཾ མཏྠཀཾ པཱཔེཏྭཱ ‘པབྦཛིཏོ ཝཏམྷི, སཱདྷུ སུཊྛཱུ’ཏི ཨཱཝཛྫནྟསྶ པཱཏིམོཀྑཾ སཾཝརནྟསྶ ཙཱིཝརཱདཡོ པཙྩཡེ པཙྩཝེཀྑནྟསྶ ཨཱཔཱཐགཏེསུ རཱུཔཱདཱིསུ ཙཀྑུདྭཱརཱདཱིནི སཾཝརནྟསྶ ཨཱཛཱིཝཾ སོདྷེནྟསྶ ཙ པཝཏྟཱ ཙེཏནཱ སཱིལམཡཱ ནཱམ. པཊིསམྦྷིདཱཡཾ ཝུཏྟེན ཝིཔསྶནཱམགྒེན ཙཀྑུཾ ཨནིཙྩཏོ ¶ དུཀྑཏོ ཨནཏྟཏོ བྷཱཝེནྟསྶ རཱུཔེ…པེ… དྷམྨེ, ཙཀྑུཝིཉྙཱཎཾ…པེ… མནོཝིཉྙཱཎཾ, ཙཀྑུསམྥསྶཾ…པེ… མནོསམྥསྶཾ, ཙཀྑུསམྥསྶཛཾ ཝེདནཾ…པེ… མནོསམྥསྶཛཾ ཝེདནཾ, རཱུཔསཉྙཾ ¶ …པེ… དྷམྨསཉྙཾ ཛརཱམརཎཾ ཨནིཙྩཏོ དུཀྑཏོ ཨནཏྟཏོ བྷཱཝེནྟསྶ པཝཏྟཱ ཙེཏནཱ བྷཱཝནཱམཡཱ ནཱམཱཏི ཨཡཾ ཝིཏྠཱརཀཐཱ.

ཨཔུཉྙཱབྷིསངྑཱརནིདྡེསེ ཨཀུསལཱ ཙེཏནཱཏི དྭཱདསཨཀུསལཙིཏྟསམྤཡུཏྟཱ ཙེཏནཱ. ཀཱམཱཝཙརཱཏི ཀིཉྩཱཔི ཏཏྠ ¶ ཋཔེཏྭཱ དྭེ དོམནསྶསཧགཏཙེཏནཱ སེསཱ རཱུཔཱརཱུཔབྷཝེཔི ཨུཔྤཛྫནྟི, ཏཏྠ པན པཊིསནྡྷིཾ ན ཨཱཀཌྜྷནྟི, ཀཱམཱཝཙརེཡེཝ པཊིསནྡྷིཝསེན ཝིཔཱཀཾ ཨཝཙཱརེནྟཱིཏི ཀཱམཱཝཙརཱཏྭེཝ ཝུཏྟཱ.

ཨཱནེཉྫཱབྷིསངྑཱརནིདྡེསེ ཀུསལཱ ཙེཏནཱ ཨརཱུཔཱཝཙརཱཏི ཙཏསྶོ ཨརཱུཔཱཝཙརཀུསལཙེཏནཱ. ཨེཏཱ ཧི ཙཏསྶོ ཨནིཉྫནཊྛེན ཨནིཉྫནསྶ ཙ ཨབྷིསངྑརཎཊྛེན ཨཱནེཉྫཱབྷིསངྑཱརོཏི ཝུཙྩནྟི. རཱུཔཱཝཙརཙཏུཏྠཛ྄ཛྷཱནཏོ ཧི ཏིསྶོ ཀུསལཝིཔཱཀཀིརིཡཱཙེཏནཱ དྭཱདས ཨརཱུཔཱཝཙརཙེཏནཱཏི པཉྩདས དྷམྨཱ ཨནིཙྩལཊྛེན ཨཕནྡནཊྛེན ཨཱནེཉྫཱ ནཱམ. ཏཏྠ རཱུཔཱཝཙརཱ ཀུསལཱ ཙེཏནཱ ཨནིཉྫཱ སམཱནཱཔི ཨཏྟནཱ སརིཀྑཀམྤི ཨསརིཀྑཀམྤི སཨིཉྫནམྤི ཨནིཉྫནམྤི རཱུཔཱརཱུཔཾ ཛནེཏཱིཏི ཨཱནེཉྫཱབྷིསངྑཱརོ ནཱམ ན ཧོཏི. ཝིཔཱཀཀིརིཡཙེཏནཱ པན ཨཝིཔཱཀཏྟཱ ཝིཔཱཀཾ ན ཨབྷིསངྑརོནྟི, ཏཐཱ ཨརཱུཔཱཝཙརཱ ཝིཔཱཀཀིརིཡཙེཏནཱཔཱིཏི ཨེཀཱདསཱཔི ཨེཏཱ ཙེཏནཱ ཨཱནེཉྫཱཝ ན ཨབྷིསངྑཱརཱ. ཙཏུབྦིདྷཱ པན ཨརཱུཔཱཝཙརཀུསལཙེཏནཱ ཡཐཱ ཧཏྠིཨསྶཱདཱིནཾ སདིསཱཝ ཚཱཡཱ ཧོནྟི, ཨེཝཾ ཨཏྟནཱ སདིསཾ ནིཙྩལཾ ཨརཱུཔམེཝ ཛནེཏཱིཏི ཨཱནེཉྫཱབྷིསངྑཱརོཏི ཝུཙྩཏཱིཏི.

ཨེཝཾ པུཉྫཱབྷིསངྑཱརཝསེན ཏེརས, ཨཔུཉྙཱབྷིསངྑཱརཝསེན དྭཱདས, ཨཱནེཉྫཱབྷིསངྑཱརཝསེན ཙཏསྶོཏི སབྦཱཔེཏཱ པརིཔིཎྜིཏཱ ཨེཀཱུནཏིཾས ཙེཏནཱ ཧོནྟི. ཨིཏི བྷགཝཱ ཨཔརིམཱཎེསུ ཙཀྐཝཱལེ༹སུ ཨཔརིམཱཎཱནཾ སཏྟཱནཾ ཨུཔྤཛྫནཀཀུསལཱཀུསལཙེཏནཱ མཧཱཏུལཱཡ དྷཱརཡམཱནོ ཝིཡ, ནཱལི༹ཡཾ པཀྑིཔིཏྭཱ མིནམཱནོ ཝིཡ ཙ སབྦཉྙུཏཉཱཎེན པརིཙྪིནྡིཏྭཱ ཨེཀཱུནཏིཾསམེཝ དསྶེསི.

ཨིདཱནི ¶ ཨཔརིམཱཎེསུ ཙཀྐཝཱལེ༹སུ ཨཔརིམཱཎཱ སཏྟཱ ཀུསལཱཀུསལཀམྨཾ ཨཱཡཱུཧམཱནཱ ཡེཧི དྭཱརེཧི ཨཱཡཱུཧནྟི, ཏཱནི ཏཱིཎི ཀམྨདྭཱརཱནི དསྶེནྟོ ཏཏྠ ཀཏམོ ཀཱཡསངྑཱརོ? ཀཱཡསཉྩེཏནཱཏིཨཱདིམཱཧ. ཏཏྠ ཀཱཡསཉྩེཏནཱཏི ཀཱཡཝིཉྙཏྟིཾ སམུཊྛཱཔེཏྭཱ ཀཱཡདྭཱརཏོ པཝཏྟཱ ¶ ཨཊྛ ཀཱམཱཝཙརཀུསལཙེཏནཱ དྭཱདས ཨཀུསལཙེཏནཱཏི སམཝཱིསཏི ཙེཏནཱ; ཀཱཡདྭཱརེ ཨཱདཱནགྒཧཎཙོཔནཾ པཱཔཡམཱནཱ ཨུཔྤནྣཱ ཝཱིསཏི ཀུསལཱཀུསལཙེཏནཱཏིཔི ཝཏྟུཾ ཝཊྚཏི.

ཝཙཱིསཉྩེཏནཱཏི ¶ ཝཙཱིཝིཉྙཏྟིཾ སམུཊྛཱཔེཏྭཱ ཝཙཱིདྭཱརཏོ པཝཏྟཱ ཏཱཡེཝ ཝཱིསཏི ཙེཏནཱ; ཝཙཱིདྭཱརེ ཧནུསཉྩོཔནཾ ཝཱཀྱབྷེདཾ པཱཔཡམཱནཱ ཨུཔྤནྣཱ ཝཱིསཏི ཙེཏནཱཏིཔི ཝཏྟུཾ ཝཊྚཏི. ཨབྷིཉྙཱཙེཏནཱ པནེཏྠ པརཏོ ཝིཉྙཱཎསྶ པཙྩཡོ ན ཧོཏཱིཏི ན གཧིཏཱ. ཡཐཱ ཙ ཨབྷིཉྙཱཙེཏནཱ, ཨེཝཾ ཨུདྡྷཙྩཙེཏནཱཔི ན ཧོཏི. ཏསྨཱ སཱཔི ཝིཉྙཱཎསྶ པཙྩཡབྷཱཝེ ཨཔནེཏབྦཱ. ཨཝིཛྫཱཔཙྩཡཱ པན སབྦཱཔེཏཱ ཧོནྟི.

མནོསཉྩེཏནཱཏི ཨུབྷོཔི ཝིཉྙཏྟིཡོ ཨསམུཊྛཱཔེཏྭཱ མནོདྭཱརེ ཨུཔྤནྣཱ སབྦཱཔི ཨེཀཱུནཏིཾས ཙེཏནཱ. ཨིཏི བྷགཝཱ ཨཔརིམཱཎེསུ ཙཀྐཝཱལེ༹སུ ཨཔརིམཱཎཱ སཏྟཱ ཀུསལཱཀུསལཀམྨཾ ཨཱཡཱུཧམཱནཱ ཨིམེཧི ཏཱིཧི དྭཱརེཧི ཨཱཡཱུཧནྟཱིཏི ཨཱཡཱུཧནཀམྨདྭཱརཾ དསྶེསི.

ཨིམེསཾ པན དྭིནྣམྤི ཏིཀཱནཾ ཨཉྙམཉྙཾ སམྤཡོགོ ཝེདིཏབྦོ. ཀཐཾ? པུཉྙཱབྷིསངྑཱརོ ཧི ཀཱཡདུཙྩརིཏཱ ཝིརམནྟསྶ སིཡཱ ཀཱཡསངྑཱརོ, ཝཙཱིདུཙྩརིཏཱ ཝིརམནྟསྶ སིཡཱ ཝཙཱིསངྑཱརོ. ཨེཝཾ ཨཊྛ ཀུསལཙེཏནཱ ཀཱམཱཝཙརཱ པུཉྙཱབྷིསངྑཱརོ ཙ ཧོཏི ཀཱཡསངྑཱརོ ཙ ཝཙཱིསངྑཱརོ ཙ. མནོདྭཱརེ ཨུཔྤནྣཱ པན ཏེརས ཙེཏནཱ པུཉྙཱབྷིསངྑཱརོ ཙ ཧོཏི ཙིཏྟསངྑཱརོ ཙ. ཨཔུཉྙཱབྷིསངྑཱརོཔི ཀཱཡདུཙྩརིཏཝསེན པཝཏྟིཡཾ སིཡཱ ཀཱཡསངྑཱརོ, ཝཙཱིདུཙྩརིཏཝསེན པཝཏྟིཡཾ སིཡཱ ཝཙཱིསངྑཱརོ, དྭེ དྭཱརཱནི མུཉྩིཏྭཱ མནོདྭཱརེ པཝཏྟིཡཾ སིཡཱ ཙིཏྟསངྑཱརོཏི. ཨེཝཾ ཨཔུཉྙཱབྷིསངྑཱརོ ཀཱཡསངྑཱརོཔི ཧོཏི ཝཙཱིསངྑཱརོཔི ཙིཏྟསངྑཱརོཔི.

ཀཱཡསངྑཱརོ པན སིཡཱ པུཉྙཱབྷིསངྑཱརོ, སིཡཱ ཨཔུཉྙཱབྷིསངྑཱརོ, ན ཨཱནེཉྫཱབྷིསངྑཱརོ. ཏཐཱ ཝཙཱིསངྑཱརོ. ཙིཏྟསངྑཱརོ པན སིཡཱ པུཉྙཱབྷིསངྑཱརོ ¶ , སིཡཱ ཨཔུཉྙཱབྷིསངྑཱརོ, སིཡཱ ཨཱནེཉྫཱབྷིསངྑཱརོཏི. ཨིམེ ཨཝིཛྫཱཔཙྩཡཱ སངྑཱརཱ ནཱམ.

ཀཐཾ པནེཏཾ ཛཱནིཏབྦཾ – ཨིམེ སངྑཱརཱ ཨཝིཛྫཱཔཙྩཡཱ ཧོནྟཱིཏི? ཨཝིཛྫཱབྷཱཝེ བྷཱཝཏོ. ཡསྶ ཧི དུཀྑཱདཱིསུ ཨཝིཛྫཱསངྑཱཏཾ ཨཉྙཱཎཾ ཨཔྤཧཱིནཾ ཧོཏི, སོ དུཀྑེ ཏཱཝ པུབྦནྟཱདཱིསུ ཙ ཨཉྙཱཎེན སཾསཱརདུཀྑཾ སུཁསཉྙཱཡ གཧེཏྭཱ ཏསྶ ཧེཏུབྷཱུཏེ ཏིཝིདྷེཔི སངྑཱརེ ཨཱརབྷཏི ¶ , སམུདཡེ ཨཉྙཱཎེན དུཀྑཧེཏུབྷཱུཏེཔི ཏཎྷཱཔརིཀྑཱརེ སངྑཱརེ སུཁཧེཏུཏོ མཉྙམཱནོ ཨཱརབྷཏི, ནིརོདྷེ པན མགྒེ ཙ ཨཉྙཱཎེན དུཀྑསྶ ཨནིརོདྷབྷཱུཏེཔི གཏིཝིསེསེ དུཀྑནིརོདྷསཉྙཱི ¶ ཧུཏྭཱ ནིརོདྷསྶ ཙ ཨམགྒབྷཱུཏེསུཔི ཡཉྙཱམརཏཔཱདཱིསུ ནིརོདྷམགྒསཉྙཱི ཧུཏྭཱ དུཀྑནིརོདྷཾ པཏྠཡམཱནོ ཡཉྙཱམརཏཔཱདིམུཁེན ཏིཝིདྷེཔི སངྑཱརེ ཨཱརབྷཏི.

ཨཔིཙ སོ ཏཱཡ ཙཏཱུསུ སཙྩེསུ ཨཔྤཧཱིནཱཝིཛྫཏཱཡ ཝིསེསཏོ ཛཱཏིཛརཱརོགམརཎཱདིཨནེཀཱདཱིནཝཝོཀིཎྞཾ པུཉྙཕལསངྑཱཏཾ དུཀྑཾ དུཀྑཏོ ཨཛཱནནྟོ ཏསྶ ཨདྷིགམཱཡ ཀཱཡཝཙཱིཙིཏྟསངྑཱརབྷེདཾ པུཉྙཱབྷིསངྑཱརཾ ཨཱརབྷཏི དེཝཙྪརཀཱམཀོ ཝིཡ མརུཔཔཱཏཾ; སུཁསམྨཏསྶཱཔི ཙ ཏསྶ པུཉྙཕལསྶ ཨནྟེ མཧཱཔརིལཱ༹ཧཛནཀཾ ཝིཔརིཎཱམདུཀྑཏཾ ཨཔྤསྶཱདཏཉྩ ཨཔསྶནྟོཔི ཏཔྤཙྩཡཾ ཝུཏྟཔྤཀཱརམེཝ པུཉྙཱབྷིསངྑཱརཾ ཨཱརབྷཏི སལབྷོ ཝིཡ དཱིཔསིཁཱབྷིནིཔཱཏཾ, མདྷུབིནྡུགིདྡྷོ ཝིཡ ཙ མདྷུལིཏྟསཏྠདྷཱརཱལེཧནཾ.

ཀཱམཱུཔསེཝནཱདཱིསུ ཙ སཝིཔཱཀེསུ ཨཱདཱིནཝཾ ཨཔསྶནྟོ སུཁསཉྙཱཡ ཙེཝ ཀིལེསཱབྷིབྷཱུཏཏཱཡ ཙ དྭཱརཏྟཡཔྤཝཏྟམྤི ཨཔུཉྙཱབྷིསངྑཱརཾ ཨཱརབྷཏི བཱལོ ཝིཡ གཱུཐཀཱིལ༹ནཾ, མརིཏུཀཱམོ ཝིཡ ཙ ཝིསཁཱདནཾ. ཨཱརུཔྤཝིཔཱཀེསུ ཙཱཔི སངྑཱརཝིཔརིཎཱམདུཀྑཏཾ ཨནཝབུཛ྄ཛྷམཱནོ སསྶཏཱདིཝིཔལླཱསེན ཙིཏྟསངྑཱརབྷཱུཏཾ ཨཱནེཉྫཱབྷིསངྑཱརཾ ཨཱརབྷཏི དིསཱམཱུལ༹ྷོ ཝིཡ པིསཱཙནགརཱབྷིམུཁམགྒགམནཾ.

ཨེཝཾ ཡསྨཱ ཨཝིཛྫཱབྷཱཝཏོཝ སངྑཱརབྷཱཝོ, ན ཨབྷཱཝཏོ; ཏསྨཱ ཛཱནིཏབྦམེཏཾ – ཨིམེ སངྑཱརཱ ཨཝིཛྫཱཔཙྩཡཱ ཧོནྟཱིཏི. ཝུཏྟམྤི ཙེཏཾ – ‘‘ཨཝིདྭཱ, བྷིཀྑཝེ, ཨཝིཛྫཱགཏོ པུཉྙཱབྷིསངྑཱརམྤི ཨབྷིསངྑརོཏི, ཨཔུཉྙཱབྷིསངྑཱརམྤི ཨབྷིསངྑརོཏི, ཨཱནེཉྫཱབྷིསངྑཱརམྤི ཨབྷིསངྑརོཏི. ཡཏོ ¶ ཁོ, བྷིཀྑཝེ, བྷིཀྑུནོ ཨཝིཛྫཱ པཧཱིནཱ, ཝིཛྫཱ ཨུཔྤནྣཱ, སོ ཨཝིཛྫཱཝིརཱགཱ ཝིཛྫུཔྤཱདཱ ནེཝ པུཉྙཱབྷིསངྑཱརཾ ཨབྷིསངྑརོཏཱི’’ཏི.

ཨེཏྠཱཧ – གཎྷཱམ ཏཱཝ ཨེཏཾ ‘ཨཝིཛྫཱ སངྑཱརཱནཾ པཙྩཡོ’ཏི. ཨིདཾ པན ཝཏྟབྦཾ – ‘ཀཏམེསཾ སངྑཱརཱནཾ ཀཐཾ པཙྩཡོ ཧོཏཱི’ཏི? ཏཏྲིདཾ ཝུཙྩཏི –

པཙྩཡོ ¶ ཧོཏི པུཉྙཱནཾ, དུཝིདྷཱནེཀདྷཱ པན;

པརེསཾ པཙྪིམཱནཾ སཱ, ཨེཀདྷཱ པཙྩཡོ མཏཱ.

ཏཏྠ ¶ ‘པུཉྙཱནཾ དུཝིདྷཱ’ཏི ཨཱརམྨཎཔཙྩཡེན ཙ ཨུཔནིསྶཡཔཙྩཡེན ཙཱཏི དྭེདྷཱ པཙྩཡོ ཧོཏི. སཱ ཧི ཨཝིཛྫཾ ཁཡཏོ ཝཡཏོ སམྨསནཀཱལེ ཀཱམཱཝཙརཱནཾ པུཉྙཱབྷིསངྑཱརཱནཾ ཨཱརམྨཎཔཙྩཡེན པཙྩཡོ ཧོཏི, ཨབྷིཉྙཱཙིཏྟེན སམོཧཙིཏྟཛཱནནཀཱལེ རཱུཔཱཝཙརཱནཾ, ཨཝིཛྫཱསམཏིཀྐམནཏྠཱཡ པན དཱནཱདཱིནི ཙེཝ ཀཱམཱཝཙརཔུཉྙཀིརིཡཝཏྠཱུནི པཱུརེནྟསྶ རཱུཔཱཝཙརཛ྄ཛྷཱནཱནི ཙ ཨུཔྤཱདེནྟསྶ དྭིནྣམྤི ཏེསཾ ཨུཔནིསྶཡཔཙྩཡེན པཙྩཡོ ཧོཏི; ཏཐཱ ཨཝིཛྫཱསམྨཱུལ༹ྷཏྟཱ ཀཱམབྷཝརཱུཔབྷཝསམྤཏྟིཡོ པཏྠེཏྭཱ ཏཱནེཝ པུཉྙཱནི ཀརོནྟསྶ.

‘ཨནེཀདྷཱ པན པརེས’ནྟི ཨཔུཉྙཱབྷིསངྑཱརཱནཾ ཨནེཀདྷཱ པཙྩཡོ ཧོཏི. ཀཐཾ? ཨེསཱ ཧི ཨཝིཛྫཾ ཨཱརབྦྷ རཱགཱདཱིནཾ ཨུཔྤཛྫནཀཱལེ ཨཱརམྨཎཔཙྩཡེན, གརུཾ ཀཏྭཱ ཨསྶཱདནཀཱལེ ཨཱརམྨཎཱདྷིཔཏིཨཱརམྨཎཱུཔནིསྶཡེཧི, ཨཝིཛྫཱསམྨཱུལ༹ྷསྶ ཨནཱདཱིནཝདསྶཱཝིནོ པཱཎཱཏིཔཱཏཱདཱིནི ཀརོནྟསྶ ཨུཔནིསྶཡཔཙྩཡེན, དུཏིཡཛཝནཱདཱིནཾ ཨནནྟརསམནནྟརཱནནྟརཱུཔནིསྶཡཱསེཝནནཏྠིཝིགཏཔཙྩཡེཧི, ཡཾ ཀིཉྩི ཨཀུསལཾ ཀརོནྟསྶ ཧེཏུསཧཛཱཏཨཉྙམཉྙནིསྶཡསམྤཡུཏྟཨཏྠིཨཝིགཏཔཙྩཡེཧཱིཏི ཨནེཀདྷཱ པཙྩཡོ ཧོཏི.

‘པཙྪིམཱནཾ སཱ ཨེཀདྷཱ པཙྩཡོ མཏཱ’ཏི ཨཱནེཉྫཱབྷིསངྑཱརཱནཾ ཨུཔནིསྶཡཔཙྩཡེནེཝ ཨེཀདྷཱ པཙྩཡོ མཏཱ. སོ པནསྶཱ ཨུཔནིསྶཡབྷཱཝོ པུཉྙཱབྷིསངྑཱརེ ཝུཏྟནཡེནེཝ ཝེདིཏབྦོཏི.

ཨེཏྠཱཧ – ‘ཀིཾ པནཱཡམེཀཱཝ ཨཝིཛྫཱ སངྑཱརཱནཾ པཙྩཡོ ཨུདཱཧུ ཨཉྙེཔི པཙྩཡཱ ཧོནྟཱི’ཏི? ཀིཉྩེཏྠ ཡདི ཏཱཝ ཨེཀཱཝ ཨེཀཀཱརཎཝཱདོ ཨཱཔཛྫཏི. ཨཐ ‘ཨཉྙེཔི སནྟི ཨཝིཛྫཱཔཙྩཡཱ སངྑཱརཱ’ཏི ཨེཀཀཱརཎནིདྡེསོ ནུཔཔཛྫཏཱིཏི? ན ནུཔཔཛྫཏི. ཀསྨཱ? ཡསྨཱ –

ཨེཀཾ ¶ ན ཨེཀཏོ ཨིདྷ, ནཱནེཀམནེཀཏོཔི ནོ ཨེཀཾ;

ཕལམཏྠི ཨཏྠི པན ཨེཀ-ཧེཏུཕལདཱིཔནེ ཨཏྠོ.

ཨེཀཏོ ¶ ཧི ཀཱརཎཏོ ན ཨིདྷ ཀིཉྩི ཨེཀཾ ཕལམཏྠི, ན ཨནེཀཾ. ནཱཔི ཨནེཀེཧི ཀཱརཎེཧི ཨེཀཾ. ཨནེཀེཧི པན ཀཱརཎེཧི ཨནེཀམེཝ ཧོཏི. ཏཐཱ ཧི ཨནེཀེཧི ཨུཏུཔཐཝཱིབཱིཛསལིལསངྑཱཏེཧི ཀཱརཎེཧི ཨནེཀམེཝ རཱུཔགནྡྷརསཱདིཨངྐུརསངྑཱཏཾ ཕལམུཔྤཛྫམཱནཾ དིསྶཏི. ཡཾ པནེཏཾ ‘‘ཨཝིཛྫཱཔཙྩཡཱ ¶ སངྑཱརཱ, སངྑཱརཔཙྩཡཱ ཝིཉྙཱཎ’’ནྟི ཨེཀེཀཧེཏུཕལདཱིཔནཾ ཀཏཾ, ཏཏྠ ཨཏྠོ ཨཏྠི, པཡོཛནཾ ཝིཛྫཏི.

བྷགཝཱ ཧི ཀཏྠཙི པདྷཱནཏྟཱ, ཀཏྠཙི པཱཀཊཏྟཱ, ཀཏྠཙི ཨསཱདྷཱརཎཏྟཱ, དེསནཱཝིལཱསསྶ ཙ ཝེནེཡྻཱནཉྩ ཨནུརཱུཔཏོ ཨེཀམེཝཧེཏུཾ ཝཱ ཕལཾ ཝཱ དཱིཔེཏི; ‘‘ཕསྶཔཙྩཡཱ ཝེདནཱ’’ཏི (དཱི. ནི. ༢.༩༧) ཧི ཨེཀམེཝ ཧེཏུཾ ཕལཉྩཱཧ. ཕསྶོ ཧི ཝེདནཱཡ པདྷཱནཧེཏུ ཡཐཱཕསྶཾ ཝེདནཱཝཝཏྠཱནཏོ. ཝེདནཱ ཙ ཕསྶསྶ པདྷཱནཕལཾ ཡཐཱཝེདནཾ ཕསྶཝཝཏྠཱནཏོ.

‘‘སེམྷསམུཊྛཱནཱ ཨཱབཱདྷཱ’’ཏི (མཧཱནི. ༥) པཱཀཊཏྟཱ ཨེཀཾ ཧེཏུམཱཧ. པཱཀཊོ ཧེཏྠ སེམྷོ, ན ཀམྨཱདཡོ. ‘‘ཡེ ཀེཙི, བྷིཀྑཝེ, ཨཀུསལཱ དྷམྨཱ, སབྦེཏེ ཨཡོནིསོམནསིཀཱརམཱུལཀཱ’’ཏི ཨསཱདྷཱརཎཏྟཱ ཨེཀཾ ཧེཏུམཱཧ; ཨསཱདྷཱརཎོ ཧི ཨཡོནིསོམནསིཀཱརོ ཨཀུསལཱནཾ, སཱདྷཱརཎཱནི ཝཏྠཱརམྨཎཱདཱིནཱིཏི.

ཏསྨཱ ཨཡམིདྷ ཨཝིཛྫཱ ཝིཛྫམཱནེསུཔི ཨཉྙེསུ ཝཏྠཱརམྨཎསཧཛཱཏདྷམྨཱདཱིསུ སངྑཱརཀཱརཎེསུ ‘‘ཨསྶཱདཱནུཔསྶིནོ ཏཎྷཱ པཝཌྜྷཏཱི’’ཏི (སཾ. ནི. ༢.༥༢) ཙ ‘‘ཨཝིཛྫཱསམུདཡཱ ཨཱསཝསམུདཡོ’’ཏི (མ. ནི. ༡.༡༠༤) ཙ ཝཙནཏོ ཨཉྙེསམྤི ཏཎྷཱདཱིནཾ སངྑཱརཧེཏཱུནཾ ཧེཏཱུཏི པདྷཱནཏྟཱ, ‘‘ཨཝིདྭཱ, བྷིཀྑཝེ, ཨཝིཛྫཱགཏོ པུཉྙཱབྷིསངྑཱརམྤི ཨབྷིསངྑརོཏཱི’’ཏི པཱཀཊཏྟཱ ཨསཱདྷཱརཎཏྟཱ ཙ སངྑཱརཱནཾ ཧེཏུབྷཱཝེན དཱིཔིཏཱཏི ཝེདིཏབྦཱ. ཨེཏེནེཝ ཙ ཨེཀེཀཧེཏུཕལདཱིཔནཔརིཧཱརཝཙནེན སབྦཏྠ ཨེཀེཀཧེཏུཕལདཱིཔནེ པཡོཛནཾ ཝེདིཏབྦནྟི.

ཨེཏྠཱཧ ¶ – ཨེཝཾ སནྟེཔི ཨེཀནྟཱནིཊྛཕལཱཡ སཱཝཛྫཱཡ ཨཝིཛྫཱཡ ཀཐཾ པུཉྙཱནེཉྫཱབྷིསངྑཱརཔཙྩཡཏྟཾ ཡུཛྫཏི? ན ཧི ནིམྦབཱིཛཏོ ཨུཙྪུ ཨུཔྤཛྫཏཱིཏི. ཀཐཾ ན ཡུཛྫིསྶཏི? ལོཀསྨིཉྷི –

ཝིརུདྡྷོ ¶ ཙཱཝིརུདྡྷོ ཙ, སདིསཱསདིསོ ཏཐཱ;

དྷམྨཱནཾ པཙྩཡོ སིདྡྷོ, ཝིཔཱཀཱ ཨེཝ ཏེ ཙ ན.

དྷམྨཱནཉྷི ཋཱནསབྷཱཝཀིཙྩཱདིཝིརུདྡྷོ ཙ ཨཝིརུདྡྷོ ཙ པཙྩཡོ ལོཀེ སིདྡྷོ. པུརིམཙིཏྟཉྷི ཨཔརཙིཏྟསྶ ཋཱནཝིརུདྡྷོ པཙྩཡོ, པུརིམསིཔྤཱདིསིཀྑཱ ཙ པཙྪཱཔཝཏྟམཱནཱནཾ སིཔྤཱདིཀིརིཡཱནཾ. ཀམྨཾ རཱུཔསྶ སབྷཱཝཝིརུདྡྷོ པཙྩཡོ, ཁཱིརཱདཱིནི ཙ དདྷིཨཱདཱིནཾ. ཨཱལོཀོ ཙཀྑུཝིཉྙཱཎསྶ ཀིཙྩཝིརུདྡྷོ, གུལཱ༹དཡོ ཙ ཨཱསཝཱདཱིནཾ. ཙཀྑུརཱུཔཱདཡོ པན ཙཀྑུཝིཉྙཱཎཱདཱིནཾ ཋཱནཱཝིརུདྡྷཱ པཙྩཡཱ ¶ . པུརིམཛཝནཱདཡོ པཙྪིམཛཝནཱདཱིནཾ སབྷཱཝཱཝིརུདྡྷཱ ཀིཙྩཱཝིརུདྡྷཱ ཙ.

ཡཐཱ ཙ ཝིརུདྡྷཱཝིརུདྡྷཱ པཙྩཡཱ སིདྡྷཱ, ཨེཝཾ སདིསཱསདིསཱཔི. སདིསམེཝ ཧི ཨུཏུཨཱཧཱརསངྑཱཏཾ རཱུཔཾ རཱུཔསྶ པཙྩཡོ ཧོཏི, སཱལིབཱིཛཱདཱིནི ཙ སཱལིཕལཱདཱིནཾ. ཨསདིསམྤི རཱུཔཾ ཨརཱུཔསྶ, ཨརཱུཔཉྩ རཱུཔསྶ པཙྩཡོ ཧོཏི; གོལོམཱཝིལོམཝིསཱཎདདྷིཏིལཔིཊྛཱདཱིནི ཙ དབྦབྷཱུཏིཎཀཱདཱིནཾ. ཡེསཉྩ དྷམྨཱནཾ ཡེ ཝིརུདྡྷཱཝིརུདྡྷཱ སདིསཱསདིསཱ པཙྩཡཱ, ན ཏེ དྷམྨཱ ཏེསཾ དྷམྨཱནཾ ཝིཔཱཀཱཡེཝ. ཨིཏི ཨཡཾ ཨཝིཛྫཱ ཝིཔཱཀཝསེན ཨེཀནྟཱནིཊྛཕལསབྷཱཝཝསེན ཙ སཱཝཛྫཱཔི སམཱནཱ སབྦེསམྤི ཨེཏེསཾ པུཉྙཱབྷིསངྑཱརཱདཱིནཾ ཡཐཱནུརཱུཔཾ ཋཱནཀིཙྩསབྷཱཝཝིརུདྡྷཱཝིརུདྡྷཔཙྩཡཝསེན སདིསཱསདིསཔཙྩཡཝསེན ཙ པཙྩཡོ ཧོཏཱིཏི ཝེདིཏབྦཱ.

སོ ཙསྶཱ པཙྩཡབྷཱཝོ ‘‘ཡསྶ ཧི དུཀྑཱདཱིསུ ཨཝིཛྫཱསངྑཱཏཾ ཨཉྙཱཎཾ ཨཔྤཧཱིནཾ ཧོཏི, སོ དུཀྑེ ཏཱཝ པུབྦནྟཱདཱིསུ ཙ ཨཉྙཱཎེན སཾསཱརདུཀྑཾ སུཁསཉྙཱཡ གཧེཏྭཱ ཏསྶ ཧེཏུབྷཱུཏེ ཏིཝིདྷེཔི སངྑཱརེ ཨཱརབྷཏཱི’’ཏིཨཱདིནཱ ནཡེན ཝུཏྟོ ཨེཝ.

ཨཔིཙ ཨཡཾ ཨཉྙོཔི པརིཡཱཡོ –

ཙུཏཱུཔཔཱཏེ སཾསཱརེ, སངྑཱརཱནཉྩ ལཀྑཎེ;

ཡོ པཊིཙྩསམུཔྤནྣ-དྷམྨེསུ ཙ ཝིམུཡ྄ཧཏི.

ཨབྷིསངྑརོཏི ¶ སོ ཨེཏེ, སངྑཱརེ ཏིཝིདྷེ ཡཏོ;

ཨཝིཛྫཱ པཙྩཡོ ཏེསཾ, ཏིཝིདྷཱནམྤི ཡཾ ཏཏོཏི.

ཀཐཾ ¶ པན ཡོ ཨེཏེསུ ཝིམུཡ྄ཧཏི, སོ ཏིཝིདྷེཔེཏེ སངྑཱརེ ཀརོཏཱིཏི ཙེ? ཙུཏིཡཱ ཏཱཝ ཝིམཱུལ༹ྷོ སབྦཏྠ ‘‘ཁནྡྷཱནཾ བྷེདོ མརཎ’’ནྟི ཙུཏིཾ ཨགཎྷནྟོ ‘སཏྟོ མརཏི, སཏྟསྶ དེསནྟརསངྐམན’ནྟིཨཱདཱིནི ཝིཀཔྤེཏི. ཨུཔཔཱཏེ ཝིམཱུལ༹ྷོ སབྦཏྠ ‘‘ཁནྡྷཱནཾ པཱཏུབྷཱཝོ ཛཱཏཱི’’ཏི ཨུཔཔཱཏཾ ཨགཎྷནྟོ ‘སཏྟོ ཨུཔཔཛྫཏི, སཏྟསྶ ནཝསརཱིརཔཱཏུབྷཱཝོ’ཏིཨཱདཱིནི ཝིཀཔྤེཏི. སཾསཱརེ ཝིམཱུལ༹ྷོ ཡོ ཨེས –

‘‘ཁནྡྷཱནཉྩ པཊིཔཱཊི, དྷཱཏུཨཱཡཏནཱན ཙ;

ཨབྦོཙྪིནྣཾ ཝཏྟམཱནཱ, སཾསཱརོཏི པཝུཙྩཏཱི’’ཏི.

ཨེཝཾ ¶ ཝཎྞིཏོ སཾསཱརོ. ཏཾ ཨེཝཾ ཨགཎྷནྟོ ‘ཨཡཾ སཏྟོ ཨསྨཱ ལོཀཱ པརཾ ལོཀཾ གཙྪཏི, པརསྨཱ ལོཀཱ ཨིམཾ ལོཀཾ ཨཱགཙྪཏཱི’ཏིཨཱདཱིནི ཝིཀཔྤེཏི. སངྑཱརཱནཾ ལཀྑཎེ ཝིམཱུལ༹ྷོ སངྑཱརཱནཾ སབྷཱཝལཀྑཎཾ སཱམཉྙལཀྑཎཉྩ ཨགཎྷནྟོ སངྑཱརེ ཨཏྟཏོ ཨཏྟནིཡཏོ དྷུཝཏོ སུབྷཏོ སུཁཏོ ཙ ཝིཀཔྤེཏི. པཊིཙྩསམུཔྤནྣདྷམྨེསུ ཝིམཱུལ༹ྷོ ཨཝིཛྫཱདཱིཧི སངྑཱརཱདཱིནཾ པཝཏྟིཾ ཨགཎྷནྟོ ‘‘ཨཏྟཱ ཛཱནཱཏི ཝཱ ན ཛཱནཱཏི ཝཱ, སོ ཨེཝ ཀརོཏི ཙ ཀཱརེཏི ཙ སོ པཊིསནྡྷིཡཾ ཨུཔཔཛྫཏི, ཏསྶ ཨཎུཨིསྶརཱདཡོ ཀལལཱདིབྷཱཝེན སརཱིརཾ སཎྛཔེཏྭཱ ཨིནྡྲིཡཱནི སམྤཱདེནྟི, སོ ཨིནྡྲིཡསམྤནྣོ ཕུསཏི ཝེདིཡཏི ཏཎྷིཡཏི ཨུཔཱདིཡཏི གྷཊིཡཏི, སོ པུན བྷཝནྟརེ བྷཝཏཱི’’ཏི ཝཱ ‘‘སབྦེ སཏྟཱ ནིཡཏིསངྒཏིབྷཱཝཔརིཎཏཱ’’ཏི (དཱི. ནི. ༡.༡༦༨) ཝཱ ཝིཀཔྤེཏི. སོ ཨེཝཾ ཨཝིཛྫཱཡ ཨནྡྷཱིཀཏོ ཨེཝཾ ཝིཀཔྤེནྟོ ཡཐཱ ནཱམ ཨནྡྷོ པཐཝིཡཾ ཝིཙརནྟོ མགྒམྤི ཨམགྒམྤི ཐལམྤི ནིནྣམྤི སམམྤི ཝིསམམྤི པཊིཔཛྫཏི, ཨེཝཾ པུཉྙམྤི ཨཔུཉྙམྤི ཨཱནེཉྫམྤི སངྑཱརཾ ཨབྷིསངྑརོཏཱིཏི. ཏེནེཏཾ ཝུཙྩཏི –

ཡཐཱཔི ནཱམ ཛཙྩནྡྷོ, ནརོ ཨཔརིནཱཡཀོ;

ཨེཀདཱ ཡཱཏི མགྒེན, ཀུམྨགྒེནཱཔི ཨེཀདཱ.

སཾསཱརེ ¶ སཾསརཾ བཱལོ, ཏཐཱ ཨཔརིནཱཡཀོ;

ཀརོཏི ཨེཀདཱ པུཉྙཾ, ཨཔུཉྙམཔི ཨེཀདཱ.

ཡདཱ ¶ ཉཏྭཱ ཙ སོ དྷམྨཾ, སཙྩཱནི ཨབྷིསམེསྶཏི;

ཏདཱ ཨཝིཛྫཱུཔསམཱ, ཨུཔསནྟོ ཙརིསྶཏཱིཏི.

ཨཡཾ ཨཝིཛྫཱཔཙྩཡཱ སངྑཱརཱཏི པདསྨིཾ ཝིཏྠཱརཀཐཱ.

ཨཝིཛྫཱཔཙྩཡཱ སངྑཱརཔདནིདྡེསོ.

ཝིཉྙཱཎཔདནིདྡེསོ

༢༢༧. སངྑཱརཔཙྩཡཱ ཝིཉྙཱཎཔདནིདྡེསེ ཙཀྑུཝིཉྙཱཎནྟིཨཱདཱིསུ ཙཀྑུཝིཉྙཱཎཾ ཀུསལཝིཔཱཀཾ ཨཀུསལཝིཔཱཀནྟི དུཝིདྷཾ ཧོཏི. ཏཐཱ སོཏགྷཱནཛིཝ྄ཧཱཀཱཡཝིཉྙཱཎཱནི. མནོཝིཉྙཱཎཾ པན ཀུསལཱཀུསལཝིཔཱཀཱ དྭེ མནོདྷཱཏུཡོ, ཏིསྶོ ཨཧེཏུཀམནོཝིཉྙཱཎདྷཱཏུཡོ, ཨཊྛ སཧེཏུཀཱནི ཀཱམཱཝཙརཝིཔཱཀཙིཏྟཱནི, པཉྩ རཱུཔཱཝཙརཱནི, ཙཏྟཱརི ཨརཱུཔཱཝཙརཱནཱིཏི བཱཝཱིསཏིཝིདྷཾ ¶ ཧོཏི. ཨིཏི ཨིམེཧི ཚཧི ཝིཉྙཱཎེཧི སབྦཱནིཔི བཱཏྟིཾས ལོཀིཡཝིཔཱཀཝིཉྙཱཎཱནི སངྒཧིཏཱནི ཧོནྟི. ལོཀུཏྟརཱནི པན ཝཊྚཀཐཱཡཾ ན ཡུཛྫནྟཱིཏི ན གཧིཏཱནི.

ཏཏྠ སིཡཱ – ཀཐཾ པནེཏཾ ཛཱནིཏབྦཾ ‘ཨིདཾ ཝུཏྟཔྤཀཱརཾ ཝིཉྙཱཎཾ སངྑཱརཔཙྩཡཱ ཧོཏཱི’ཏི? ཨུཔཙིཏཀམྨཱབྷཱཝེ ཝིཔཱཀཱབྷཱཝཏོ. ཝིཔཱཀཉྷེཏཾ, ཝིཔཱཀཉྩ ན ཨུཔཙིཏཀམྨཱབྷཱཝེ ཨུཔྤཛྫཏི. ཡདི ཨུཔྤཛྫེཡྻ, སབྦེསཾ སབྦཝིཔཱཀཱནི ཨུཔྤཛྫེཡྻུཾ; ན ཙ ཨུཔྤཛྫནྟཱིཏི ཛཱནིཏབྦམེཏཾ – ‘སངྑཱརཔཙྩཡཱ ཨིདཾ ཝིཉྙཱཎཾ ཧོཏཱི’ཏི.

ཀཏརསངྑཱརཔཙྩཡཱ ཀཏརཝིཉྙཱཎནྟི ཙེ? ཀཱམཱཝཙརཔུཉྙཱབྷིསངྑཱརཔཙྩཡཱ ཏཱཝ ཀུསལཝིཔཱཀཱནི ¶ པཉྩ ཙཀྑུཝིཉྙཱཎཱདཱིནི, མནོཝིཉྙཱཎེ ཨེཀཱ མནོདྷཱཏུ, དྭེ མནོཝིཉྙཱཎདྷཱཏུཡོ, ཨཊྛ ཀཱམཱཝཙརམཧཱཝིཔཱཀཱནཱིཏི སོལ༹ས. ཡཐཱཧ –

‘‘ཀཱམཱཝཙརསྶ ཀུསལསྶ ཀམྨསྶ ཀཏཏྟཱ ཨུཔཙིཏཏྟཱ ཝིཔཱཀཾ ཙཀྑུཝིཉྙཱཎཾ ཨུཔྤནྣཾ ཧོཏི. ཏཐཱ སོཏགྷཱནཛིཝ྄ཧཱཀཱཡཝིཉྙཱཎཾ ཨུཔྤནྣཾ ཧོཏི, ཝིཔཱཀཱ མནོདྷཱཏུ ཨུཔྤནྣཱ ཧོཏི, མནོཝིཉྙཱཎདྷཱཏུ ཨུཔྤནྣཱ ཧོཏི སོམནསྶསཧགཏཱ, མནོཝིཉྙཱཎདྷཱཏུ ཨུཔྤནྣཱ ཧོཏི ཨུཔེཀྑཱསཧགཏཱ, མནོཝིཉྙཱཎདྷཱཏུ ཨུཔྤནྣཱ ཧོཏི སོམནསྶསཧགཏཱ ཉཱཎསམྤཡུཏྟཱ, སོམནསྶསཧགཏཱ ¶ ཉཱཎསམྤཡུཏྟཱ སསངྑཱརེན, སོམནསྶསཧགཏཱ ཉཱཎཝིཔྤཡུཏྟཱ, སོམནསྶསཧགཏཱ ཉཱཎཝིཔྤཡུཏྟཱ སསངྑཱརེན, ཨུཔེཀྑཱསཧགཏཱ ཉཱཎསམྤཡུཏྟཱ, ཨུཔེཀྑཱསཧགཏཱ ཉཱཎསམྤཡུཏྟཱ སསངྑཱརེན, ཨུཔེཀྑཱསཧགཏཱ ཉཱཎཝིཔྤཡུཏྟཱ, ཨུཔེཀྑཱསཧགཏཱ ཉཱཎཝིཔྤཡུཏྟཱ སསངྑཱརེནཱ’’ཏི (དྷ. ས. ༤༣༡, ༤༩༨).

རཱུཔཱཝཙརཔུཉྙཱབྷིསངྑཱརཔཙྩཡཱ པན པཉྩ རཱུཔཱཝཙརཝིཔཱཀཱནི. ཡཐཱཧ –

‘‘ཏསྶེཝ རཱུཔཱཝཙརསྶ ཀུསལསྶ ཀམྨསྶ ཀཏཏྟཱ ཨུཔཙིཏཏྟཱ ཝིཔཱཀཾ ཝིཝིཙྩེཝ ཀཱམེཧི…པེ… པཋམཾ ཛྷཱནཾ…པེ… པཉྩམཾ ཛྷཱནཾ ཨུཔསམྤཛྫ ཝིཧརཏཱི’’ཏི (དྷ. ས. ༤༩༩).

ཨེཝཾ པུཉྙཱབྷིསངྑཱརཔཙྩཡཱ ཨེཀཝཱིསཏིཝིདྷཾ ཝིཉྙཱཎཾ ཧོཏི.

ཨཔུཉྙཱབྷིསངྑཱརཔཙྩཡཱ པན ཨཀུསལཝིཔཱཀཱནི པཉྩ ཙཀྑུཝིཉྙཱཎཱདཱིནི, ཨེཀཱ མནོདྷཱཏུ, ཨེཀཱ མནོཝིཉྙཱཎདྷཱཏཱུཏི ཨེཝཾ སཏྟཝིདྷཾ ཝིཉྙཱཎཾ ཧོཏི. ཡཐཱཧ –

‘‘ཨཀུསལསྶ ཀམྨསྶ ཀཏཏྟཱ ཨུཔཙིཏཏྟཱ ཝིཔཱཀཾ ཙཀྑུཝིཉྙཱཎཾ ཨུཔྤནྣཾ ཧོཏི. ཏཐཱ སོཏགྷཱནཛིཝ྄ཧཱཀཱཡཝིཉྙཱཎཾ ¶ , ཝིཔཱཀཱ མནོདྷཱཏུ, ཝིཔཱཀཱ མནོཝིཉྙཱཎདྷཱཏུ ཨུཔྤནྣཱ ཧོཏཱི’’ཏི (དྷ. ས. ༥༥༦).

ཨཱནེཉྫཱབྷིསངྑཱརཔཙྩཡཱ ¶ པན ཙཏྟཱརི ཨརཱུཔཝིཔཱཀཱནཱིཏི ཨེཝཾ ཙཏུབྦིདྷཾ ཝིཉྙཱཎཾ ཧོཏཱིཏི. ཡཐཱཧ –

‘‘ཏསྶེཝ ཨརཱུཔཱཝཙརསྶ ཀུསལསྶ ཀམྨསྶ ཀཏཏྟཱ ཨུཔཙིཏཏྟཱ ཝིཔཱཀཾ སབྦསོ རཱུཔསཉྙཱནཾ སམཏིཀྐམཱ ཨཱཀཱསཱནཉྩཱཡཏནསཉྙཱསཧགཏཾ…པེ… ཝིཉྙཱཎཉྩཱཡཏནསཉྙཱསཧགཏཾ…པེ… ཨཱཀིཉྩཉྙཱཡཏནསཉྙཱསཧགཏཾ…པེ… ནེཝསཉྙཱནཱསཉྙཱཡཏནསཉྙཱསཧགཏཾ སུཁསྶ ཙ པཧཱནཱ…པེ… ཙཏུཏྠཾ ཛྷཱནཾ ཨུཔསམྤཛྫ ཝིཧརཏཱི’’ཏི (དྷ. ས. ༥༠༡).

ཨེཝཾ ཡཾ སངྑཱརཔཙྩཡཱ ཝིཉྙཱཎཾ ཧོཏི, ཏཾ ཉཏྭཱ ཨིདཱནིསྶ ཨེཝཾ པཝཏྟི ཝེདིཏབྦཱ – སབྦམེཝ ཧི ཨིདཾ པཝཏྟིཔཊིསནྡྷིཝསེན དྭིདྷཱ པཝཏྟཏི. ཏཏྠ ¶ དྭེ པཉྩཝིཉྙཱཎཱནི, དྭེ མནོདྷཱཏུཡོ, སོམནསྶསཧགཏཱཧེཏུཀམནོཝིཉྙཱཎདྷཱཏཱུཏི ཨིམཱནི ཏེརས པཉྩཝོཀཱརབྷཝེ པཝཏྟིཡཾཡེཝ པཝཏྟནྟི. སེསཱནི ཨེཀཱུནཝཱིསཏི ཏཱིསུ བྷཝེསུ ཡཐཱནུརཱུཔཾ པཝཏྟིཡམྤི པཊིསནྡྷིཡམྤི པཝཏྟནྟི.

ཀཐཾ? ཀུསལཝིཔཱཀཱནི ཏཱཝ ཙཀྑུཝིཉྙཱཎཱདཱིནི པཉྩ ཀུསལཝིཔཱཀེན ཝཱ ཨཀུསལཝིཔཱཀེན ཝཱ ནིབྦཏྟསྶ ཡཐཱཀྐམཾ པརིཔཱཀམུཔགཏིནྡྲིཡསྶ ཙཀྑཱདཱིནཾ ཨཱཔཱཐགཏཾ ཨིཊྛཾ ཝཱ ཨིཊྛམཛ྄ཛྷཏྟཾ ཝཱ རཱུཔཱདིཨཱརམྨཎཾ ཨཱརབྦྷ ཙཀྑཱདིཔསཱདཾ ནིསྶཱཡ དསྶནསཝནགྷཱཡནསཱཡནཕུསནཀིཙྩཾ སཱདྷཡམཱནཱནི པཝཏྟནྟི. ཏཐཱ ཨཀུསལཝིཔཱཀཱནི པཉྩ. ཀེཝལཉྷི ཏེསཾ ཨནིཊྛཾ ཨནིཊྛམཛ྄ཛྷཏྟཾ ཝཱ རཱུཔཱདིཨཱརམྨཎཾ ཧོཏི, ཨཡམེཝ ཝིསེསོ. དསཱཔི ཙེཏཱནི ནིཡཏདྭཱརཱརམྨཎཝཏྠུཊྛཱནཱནི ནིཡཏཀིཙྩཱནེཝ ཙ བྷཝནྟི.

ཏཏོ ཀུསལཝིཔཱཀཱནཾ ཙཀྑུཝིཉྙཱཎཱདཱིནཾ ཨནནྟརཾ ཀུསལཝིཔཱཀམནོདྷཱཏུ ཏེསཉྙེཝ ཨཱརམྨཎམཱརབྦྷ ཧདཡཝཏྠུཾ ནིསྶཱཡ སམྤཊིཙྪནཀིཙྩཾ སཱདྷཡམཱནཱ པཝཏྟཏི. ཏཐཱ ཨཀུསལཝིཔཱཀཱནཾ ཨནནྟརཾ ཨཀུསལཝིཔཱཀཱ ¶ . ཨིདཉྩ པན དྭཡཾ ཨནིཡཏདྭཱརཱརམྨཎཾ ནིཡཏཝཏྠུཊྛཱནཾ ནིཡཏཀིཙྩཉྩ ཧོཏི.

སོམནསྶསཧགཏཱ པན ཨཧེཏུཀམནོཝིཉྙཱཎདྷཱཏུ ཀུསལཝིཔཱཀམནོདྷཱཏུཡཱ ཨནནྟརཾ ཏསྶཱ ཨེཝ ¶ ཨཱརམྨཎཾ ཨཱརབྦྷ ཧདཡཝཏྠུཾ ནིསྶཱཡ སནྟཱིརཎཀིཙྩཾ སཱདྷཡམཱནཱ ཙ ཚསུ དྭཱརེསུ བལཝཱརམྨཎེ ཀཱམཱཝཙརསཏྟཱནཾ ཡེབྷུཡྻེན ལོབྷསམྤཡུཏྟཛཝནཱཝསཱནེ བྷཝངྒཝཱིཐིཾ པཙྪིནྡིཏྭཱ ཛཝནེན གཧིཏཱརམྨཎེ ཏདཱརམྨཎཝསེན ཙ སཀིཾ ཝཱ དྭིཀྑཏྟུཾ ཝཱ པཝཏྟཏི. ཙིཏྟཔྤཝཏྟིགཎནཱཡཾ པན སབྦདྭཱརེསུ ཏདཱརམྨཎེ དྭེ ཨེཝ ཙིཏྟཝཱརཱ ཨཱགཏཱ. ཨིདཾ པན ཙིཏྟཾ ཏདཱརམྨཎནྟི ཙ པིཊྛིབྷཝངྒནྟི ཙཱཏི དྭེ ནཱམཱནི ལབྷཏི, ཨནིཡཏདྭཱརཱརམྨཎཾ ནིཡཏཝཏྠུཀཾ ཨནིཡཏཊྛཱནཀིཙྩཉྩ ཧོཏཱིཏི. ཨེཝཾ ཏཱཝ ཏེརས པཉྩཝོཀཱརབྷཝེ པཝཏྟིཡཾཡེཝ པཝཏྟནྟཱིཏི ཝེདིཏབྦཱནི. སེསེསུ ཨེཀཱུནཝཱིསཏིཡཱ ཙིཏྟེསུ ན ཀིཉྩི ཨཏྟནོ ཨནུརཱུཔཱཡ པཊིསནྡྷིཡཱ ན པཝཏྟཏི.

པཝཏྟིཡཾ པན ཀུསལཱཀུསལཝིཔཱཀཱ ཏཱཝ དྭེ ཨཧེཏུཀམནོཝིཉྙཱཎདྷཱཏུཡོ པཉྩདྭཱརེ ཀུསལཱཀུསལཝིཔཱཀམནོདྷཱཏཱུནཾ ཨནནྟརཾ སནྟཱིརཎཀིཙྩཾ ¶ , ཚསུ དྭཱརེསུ པུབྦེ ཝུཏྟནཡེནེཝ ཏདཱརམྨཎཀིཙྩཾ, ཨཏྟནཱ དིནྣཔཊིསནྡྷིཏོ ཨུདྡྷཾ ཨསཏི བྷཝངྒུཔཙྪེདཀེ ཙིཏྟུཔྤཱདེ བྷཝངྒཀིཙྩཾ, ཨནྟེ ཙུཏིཀིཙྩཉྩཱཏི ཙཏྟཱརི ཀིཙྩཱནི སཱདྷཡམཱནཱ ནིཡཏཝཏྠུཀཱ ཨནིཡཏདྭཱརཱརམྨཎཊྛཱནཀིཙྩཱ ཧུཏྭཱ པཝཏྟནྟི.

ཨཊྛ ཀཱམཱཝཙརསཧེཏུཀཙིཏྟཱནི པཝཏྟིཡཾ ཝུཏྟནཡེནེཝ ཚསུ དྭཱརེསུ ཏདཱརམྨཎཀིཙྩཾ, ཨཏྟནཱ དིནྣཔཊིསནྡྷིཏོ ཨུདྡྷཾ ཨསཏི བྷཝངྒུཔཙྪེདཀེ ཙིཏྟུཔྤཱདེ བྷཝངྒཀིཙྩཾ, ཨནྟེ ཙུཏིཀིཙྩཉྩཱཏི ཏཱིཎི ཀིཙྩཱནི སཱདྷཡམཱནཱནི ནིཡཏཝཏྠུཀཱནི ཨནིཡཏདྭཱརཱརམྨཎཊྛཱནཀིཙྩཱནི ཧུཏྭཱ པཝཏྟནྟི.

པཉྩ རཱུཔཱཝཙརཱནི ཙཏྟཱརི ཙ ཨརཱུཔཱཝཙརཱནི ཨཏྟནཱ དིནྣཔཊིསནྡྷིཏོ ཨུདྡྷཾ ཨསཏི བྷཝངྒུཔཙྪེདཀེ ཙིཏྟུཔྤཱདེ བྷཝངྒཀིཙྩཾ, ཨནྟེ ཙུཏིཀིཙྩཉྩཱཏི ཀིཙྩདྭཡཾ སཱདྷཡམཱནཱནི པཝཏྟནྟི. ཏེསུ རཱུཔཱཝཙརཱནི ནིཡཏཝཏྠཱརམྨཎཱནི ཨནིཡཏཊྛཱནཀིཙྩཱནི, ཨིཏརཱནི ཨཝཏྠུཀཱནི ནིཡཏཱརམྨཎཱནི ཨནིཡཏཊྛཱནཀིཙྩཱནི ¶ ཧུཏྭཱ པཝཏྟནྟཱིཏི. ཨེཝཾ ཏཱཝ བཱཏྟིཾསཝིདྷམྤི ཝིཉྙཱཎཾ པཝཏྟིཡཾ སངྑཱརཔཙྩཡཱ པཝཏྟཏི. ཏཏྲསྶ ཏེ ཏེ སངྑཱརཱ ཀམྨཔཙྩཡེན ཙ ཨུཔནིསྶཡཔཙྩཡེན ཙ པཙྩཡཱ ཧོནྟི.

ཏཏྠ ཡཱནེཏཱནི ཨེཀཱདས ཏདཱརམྨཎཙིཏྟཱནི ཝུཏྟཱནི, ཏེསུ ཨེཀམྤི རཱུཔཱརཱུཔབྷཝེ ཏདཱརམྨཎཾ ¶ ཧུཏྭཱ ན པཝཏྟཏི. ཀསྨཱ? བཱིཛཱབྷཱཝཱ. ཏཏྠ ཧི ཀཱམཱཝཙརཝིཔཱཀསངྑཱཏཾ པཊིསནྡྷིབཱིཛཾ ནཏྠི, ཡཾ རཱུཔཱདཱིསུ ཨཱརམྨཎེསུ པཝཏྟིཡཾ ཏསྶ ཛནཀཾ བྷཝེཡྻ. ཙཀྑུཝིཉྙཱཎཱདཱིནམྤི རཱུཔབྷཝེ ཨབྷཱཝོ ཨཱཔཛྫཏཱིཏི ཙེ? ན; ཨིནྡྲིཡཔྤཝཏྟིཨཱནུབྷཱཝཏོ དྭཱརཝཱིཐིབྷེདེ ཙིཏྟནིཡམཏོ ཙ.

ཡཐཱ ཙེཏཾ ཏདཱརམྨཎཾ ཨེཀནྟེན རཱུཔཱརཱུཔབྷཝེ ནཔྤཝཏྟཏི ཏཐཱ སབྦེཔི ཨཀཱམཱཝཙརེ དྷམྨེ ནཱནུབནྡྷཏི. ཀསྨཱ? ཨཛནཀཏྟཱ ཙེཝ ཛནཀསྶ ཙ ཨསདིསཏྟཱ. ཏཉྷི ཡཐཱ ནཱམ གེཧཱ ནིཀྑམིཏྭཱ བཧི གནྟུཀཱམོ ཏརུཎདཱརཀོ ཨཏྟནོ ཛནཀཾ པིཏརཾ ཝཱ ཨཉྙཾ ཝཱ པིཏུསདིསཾ ཧིཏཀཱམཾ ཉཱཏིཾ ཨངྒུལིཡཾ གཧེཏྭཱ ཨནུབནྡྷཏི, ན ཨཉྙཾ རཱཛཔུརིསཱདིཾ, ཏཐཱ ཨེཏམྤི བྷཝངྒཱརམྨཎཏོ བཧི ནིཀྑམིཏུཀཱམཾ སབྷཱགཏཱཡ ཨཏྟནོ ཛནཀཾ པིཏརཾ ཝཱ པིཏུསདིསཾ ཝཱ ཀཱམཱཝཙརཛཝནམེཝ ཨནུབནྡྷཏི, ན ཨཉྙཾ མཧགྒཏཾ ཨནུཏྟརཾ ཝཱ.

ཡཐཱ ¶ ཙེཏཾ མཧགྒཏལོཀུཏྟརེ དྷམྨེ ནཱནུབནྡྷཏི, ཏཐཱ ཡདཱ ཨེཏེ ཀཱམཱཝཙརདྷམྨཱཔི མཧགྒཏཱརམྨཎཱ ཧུཏྭཱ པཝཏྟནྟི ཏདཱ ཏེཔི ནཱནུབནྡྷཏི. ཀསྨཱ? ཨཔརིཙིཏདེསཏྟཱ ཨཙྩནྟཔརིཏྟཱརམྨཎཏྟཱ ཙ. ཏཉྷི ཡཐཱ པིཏརཾ ཝཱ པིཏུསདིསཾ ཝཱ ཉཱཏིཾ ཨནུབནྡྷནྟོཔི ཏརུཎདཱརཀོ གྷརདྭཱརཨནྟརཝཱིཐིཙཏུཀྐཱདིམྷི པརིཙིཏེཡེཝ དེསེ ཨནུབནྡྷཏི, ན ཨརཉྙཾ ཝཱ ཡུདྡྷབྷཱུམིཾ ཝཱ གཙྪནྟཾ; ཨེཝཾ ཀཱམཱཝཙརདྷམྨེ ཨནུབནྡྷནྟམྤི ཨམཧགྒཏཱདིམྷི པརིཙིཏེཡེཝ དེསེ པཝཏྟམཱནེ དྷམྨེ ཨནུབནྡྷཏི, ན མཧགྒཏལོཀུཏྟརདྷམྨེ ཨཱརབྦྷ པཝཏྟམཱནེཏི.

ཡསྨཱ ཙསྶ ‘‘སབྦོ ཀཱམཱཝཙརཝིཔཱཀོ ཀིརིཡམནོདྷཱཏུ ཀིརིཡཨཧེཏུཀམནོཝིཉྙཱཎདྷཱཏུ སོམནསྶསཧགཏཱ ཨིམེ དྷམྨཱ པརིཏྟཱརམྨཎཱ’’ཏི ཨེཝཾ ཨཙྩནྟཔརིཏྟམེཝ ཨཱརམྨཎཾ ཝུཏྟཾ, ཏསྨཱཔེཏཾ མཧགྒཏལོཀུཏྟརཱརམྨཎེ ¶ ཀཱམཱཝཙརདྷམྨེཔི ནཱནུབནྡྷཏཱིཏི ཝེདིཏབྦཾ.

ཀིཾ ཝཱ ཨིམཱཡ ཡུཏྟིཀཐཱཡ? ཨཊྛཀཐཱཡཉྷི ཨེཀནྟེནེཝ ཝུཏྟཾ – ཨེཀཱདས ཏདཱརམྨཎཙིཏྟཱནི ནཱམགོཏྟཾ ཨཱརབྦྷ ཛཝནེ ཛཝིཏེ ཏདཱརམྨཎཾ ན གཎྷནྟི. པཎྞཏྟིཾ ཨཱརབྦྷ ཛཝནེ ཛཝིཏེ ཏདཱརམྨཎཾ ན ལབྦྷཏི. ཏིལཀྑཎཱརམྨཎིཀཝིཔསྶནཱཡ ཏདཱརམྨཎཾ ན ལབྦྷཏི. ཝུཊྛཱནགཱམིནིཡཱ བལཝཝིཔསྶནཱཡ ཏདཱརམྨཎཾ ན ལབྦྷཏི. རཱུཔཱརཱུཔདྷམྨེ ཨཱརབྦྷ ཛཝནེ ཛཝིཏེ ཏདཱརམྨཎཾ ན ལབྦྷཏི. མིཙྪཏྟནིཡཏདྷམྨེསུ ཏདཱརམྨཎཾ ན ལབྦྷཏི. སམྨཏྟནིཡཏདྷམྨེསུ ¶ ཏདཱརམྨཎཾ ན ལབྦྷཏི. ལོཀུཏྟརདྷམྨེ ཨཱརབྦྷ ཛཝནེ ཛཝིཏེ ཏདཱརམྨཎཾ ན ལབྦྷཏི. ཨབྷིཉྙཱཉཱཎཾ ཨཱརབྦྷ ཛཝནེ ཛཝིཏེ ཏདཱརམྨཎཾ ན ལབྦྷཏི. པཊིསམྦྷིདཱཉཱཎཾ ཨཱརབྦྷ ཛཝནེ ཛཝིཏེ ཏདཱརམྨཎཾ ན ལབྦྷཏི. ཀཱམཱཝཙརེ དུབྦལཱརམྨཎེ ཏདཱརམྨཎཾ ན ལབྦྷཏི, ཚསུ དྭཱརེསུ བལཝཱརམྨཎེ ཨཱཔཱཐགཏེཡེཝ ལབྦྷཏི, ལབྦྷམཱནཉྩ ཀཱམཱཝཙརེཡེཝ ལབྦྷཏི. རཱུཔཱརཱུཔབྷཝེ ཏདཱརམྨཎཾ ནཱམ ནཏྠཱིཏི.

ཡཾ པན ཝུཏྟཾ ‘‘སེསེསུ ཨེཀཱུནཝཱིསཏིཡཱ ཙིཏྟེསུ ན ཀིཉྩི ཨཏྟནོ ཨནུརཱུཔཱཡ པཊིསནྡྷིཡཱ ན པཝཏྟཏཱི’’ཏི, ཏཾ ཨཏིསཾཁིཏྟཏྟཱ དུབྦིཛཱནཾ. ཏེནསྶ ཝིཏྠཱརནཡདསྶནཏྠཾ ཝུཙྩཏི – ‘‘ཀཏི པཊིསནྡྷིཡོ? ཀཏི པཊིསནྡྷིཙིཏྟཱནི? ཀེན ཀཏྠ པཊིསནྡྷི ཧོཏི? ཀིཾ པཊིསནྡྷིཡཱ ཨཱརམྨཎ’’ནྟི?

ཨསཉྙཔཊིསནྡྷིཡཱ ¶ སདྡྷིཾ ཝཱིསཏི པཊིསནྡྷིཡོ. ཝུཏྟཔྤཀཱརཱནེཝ ཨེཀཱུནཝཱིསཏི པཊིསནྡྷིཙིཏྟཱནི. ཏཏྠ ཨཀུསལཝིཔཱཀཱཡ ཨཧེཏུཀམནོཝིཉྙཱཎདྷཱཏུཡཱ ཨཔཱཡེསུ པཊིསནྡྷི ཧོཏི, ཀུསལཝིཔཱཀཱཡ མནུསྶལོཀེ ཛཙྩནྡྷཛཱཏིབདྷིརཛཱཏིཨུམྨཏྟཀཨེལ༹མཱུགནཔུཾསཀཱདཱིནཾ. ཨཊྛཧི སཧེཏུཀམཧཱཝིཔཱཀེཧི ཀཱམཱཝཙརདེཝེསུ ཙེཝ མནུསྶེསུ ཙ པུཉྙཝནྟཱནཾ པཊིསནྡྷི ཧོཏི, པཉྩཧི རཱུཔཱཝཙརཝིཔཱཀེཧི རཱུཔཱིབྲཧྨལོཀེ, ཙཏཱུཧི ཨརཱུཔཱཝཙརཝིཔཱཀེཧི ཨརཱུཔལོཀེཏི. ཡེན ཙ ཡཏྠ པཊིསནྡྷི ཧོཏི, སཱ ཨེཝ ཏསྶཱ ཨནུརཱུཔཔཊིསནྡྷི ནཱམ.

སངྑེཔཏོ པཊིསནྡྷིཡཱ ཏཱིཎི ཨཱརམྨཎཱནི ཧོནྟི – ཀམྨཾ, ཀམྨནིམིཏྟཾ ¶ , གཏིནིམིཏྟནྟི. ཏཏྠ ཀམྨཾ ནཱམ ཨཱཡཱུཧིཏཱ ཀུསལཱཀུསལཙེཏནཱ. ཀམྨནིམིཏྟཾ ནཱམ ཡཾ ཝཏྠུཾ ཨཱརམྨཎཾ ཀཏྭཱ ཀམྨཾ ཨཱཡཱུཧཏི. ཏཏྠ ཨཏཱིཏེ ཀཔྤཀོཊིསཏསཧསྶམཏྠཀསྨིམྤི ཀམྨེ ཀཏེ ཏསྨིཾ ཁཎེ ཀམྨཾ ཝཱ ཀམྨནིམིཏྟཾ ཝཱ ཨཱགནྟྭཱ ཨུཔཊྛཱཏི.

ཏཏྲིདཾ ཀམྨནིམིཏྟསྶ ཨུཔཊྛཱནེ ཝཏྠུ – གོཔཀསཱིཝལཱི ཀིར ནཱམ ཏཱལཔིཊྛིཀཝིཧཱརེ ཙེཏིཡཾ ཀཱརེསི. ཏསྶ མརཎམཉྩེ ནིཔནྣསྶ ཙེཏིཡཾ ཨུཔཊྛཱསི. སོ ཏདེཝ ནིམིཏྟཾ གཎྷིཏྭཱ ཀཱལཾཀཏྭཱ དེཝལོཀེ ནིབྦཏྟི. ཨཉྙཱ སམྨཱུལ༹ྷཀཱལཀིརིཡཱ ནཱམ ཧོཏི. པརམྨུཁཾ གཙྪནྟསྶ ཧི པཙྪཏོ ཏིཁིཎེན ཨསིནཱ སཱིསཾ ཚིནྡནྟི. ནིཔཛྫིཏྭཱ ནིདྡཱཡནྟསྶཱཔི ཏིཁིཎེན ཨསིནཱ སཱིསཾ ཚིནྡནྟི. ཨུདཀེ ཨོསཱིདཱཔེཏྭཱ མཱརེནྟི. ཨེཝརཱུཔེཔི ཀཱལེ ཨཉྙཏརཾ ¶ ཀམྨཾ ཝཱ ཀམྨནིམིཏྟཾ ཝཱ ཨུཔཊྛཱཏི. ཨཉྙཾ ལཧུཀམརཎཾ ནཱམ ཨཏྠི. ནིཁཱདནདཎྜཀམཏྠཀསྨིཉྷི ནིལཱིནམཀྑིཀཾ མུགྒརེན པཧརིཏྭཱ པིསནྟི. ཨེཝརཱུཔེཔི ཀཱལེ ཀམྨཾ ཝཱ ཀམྨནིམིཏྟཾ ཝཱ ཨུཔཊྛཱཏི. ཨེཝཾ པིསིཡམཱནཱཡ པན མཀྑིཀཱཡ པཋམཾ ཀཱཡདྭཱརཱཝཛྫནཾ བྷཝངྒཾ ནཱཝཊྚེཏི, མནོདྭཱརཱཝཛྫནམེཝ ཨཱཝཊྚེཏི. ཨཐ ཛཝནཾ ཛཝིཏྭཱ བྷཝངྒཾ ཨོཏརཏི. དུཏིཡཝཱརེ ཀཱཡདྭཱརཱཝཛྫནཾ བྷཝངྒཾ ཨཱཝཊྚེཏི. ཏཏོ ཀཱཡཝིཉྙཱཎཾ, སམྤཊིཙྪནཾ, སནྟཱིརཎཾ, ཝོཊྛཔནནྟི ཝཱིཐིཙིཏྟཱནི པཝཏྟནྟི. ཛཝནཾ ཛཝིཏྭཱ བྷཝངྒཾ ཨོཏརཏི. ཏཏིཡཝཱརེ མནོདྭཱརཱཝཛྫནཾ བྷཝངྒཾ ཨཱཝཊྚེཏི. ཨཐ ཛཝནཾ ཛཝིཏྭཱ བྷཝངྒཾ ཨོཏརཏི. ཨེཏསྨིཾ ཋཱནེ ཀཱལཀིརིཡཾ ཀརོཏི. ཨིདཾ ཀིམཏྠཾ ཨཱབྷཏཾ? ཨརཱུཔདྷམྨཱནཾ ཝིསཡོ ནཱམ ཨེཝཾ ལཧུཀོཏི དཱིཔནཏྠཾ.

གཏིནིམིཏྟཾ ¶ ནཱམ ནིབྦཏྟནཀཨོཀཱསེ ཨེཀོ ཝཎྞོ ཨུཔཊྛཱཏི. ཏཏྠ ནིརཡེ ཨུཔཊྛཧནྟེ ལོཧཀུམྦྷིསདིསོ ཧུཏྭཱ ཨུཔཊྛཱཏི. མནུསྶལོཀེ ཨུཔཊྛཧནྟེ མཱཏུཀུཙྪིཀམྦལཡཱནསདིསཱ ཧུཏྭཱ ཨུཔཊྛཱཏི. དེཝལོཀེ ཨུཔཊྛཧནྟེ ཀཔྤརུཀྑཝིམཱནསཡནཱདཱིནི ཨུཔཊྛཧནྟི. ཨེཝཾ ཀམྨཾ, ཀམྨནིམིཏྟཾ, གཏིནིམིཏྟནྟི སངྑེཔཏོ པཊིསནྡྷིཡཱ ཏཱིཎི ཨཱརམྨཎཱནི ཧོནྟི.

ཨཔརོ ནཡོ – པཊིསནྡྷིཡཱ ཏཱིཎི ཨཱརམྨཎཱནི ཧོནྟི? ཨཏཱིཏཾ, པཙྩུཔྤནྣཾ ¶ , ནཝཏྟབྦཉྩ. ཨསཉྙཱིཔཊིསནྡྷི ཨནཱརམྨཎཱཏི. ཏཏྠ ཝིཉྙཱཎཉྩཱཡཏནནེཝསཉྙཱནཱསཉྙཱཡཏནཔཊིསནྡྷཱིནཾ ཨཏཱིཏམེཝ ཨཱརམྨཎཾ. དསནྣཾ ཀཱམཱཝཙརཱནཾ ཨཏཱིཏཾ ཝཱ པཙྩུཔྤནྣཾ ཝཱ. སེསཱནཾ ནཝཏྟབྦཾ. ཨེཝཾ ཏཱིསུ ཨཱརམྨཎེསུ པཝཏྟམཱནཱ པན པཊིསནྡྷི ཡསྨཱ ཨཏཱིཏཱརམྨཎསྶ ཝཱ ནཝཏྟབྦཱརམྨཎསྶ ཝཱ ཙུཏིཙིཏྟསྶ ཨནནྟརམེཝ ཧོཏི. པཙྩུཔྤནྣཱརམྨཎཾ པན ཙུཏྟིཙིཏྟཾ ནཱམ ནཏྠི. ཏསྨཱ དྭཱིསུ ཨཱརམྨཎེསུ ཨཉྙཏརཱརམྨཎཱཡ ཙུཏིཡཱ ཨནནྟརཾ ཏཱིསུ ཨཱརམྨཎེསུ ཨཉྙཏརཱརམྨཎཱཡ པཊིསནྡྷིཡཱ སུགཏིདུགྒཏིཝསེན པཝཏྟནཱཀཱརོ ཝེདིཏབྦོ.

སེཡྻཐིདཾ – ཀཱམཱཝཙརསུགཏིཡཾ ཏཱཝ ཋིཏསྶ པཱཔཀམྨིནོ པུགྒལསྶ ‘‘ཏཱནིསྶ ཏམྷི སམཡེ ཨོལམྦནྟཱི’’ཏིཨཱདིཝཙནཏོ (མ. ནི. ༣.༢༤༨) མརཎམཉྩེ ནིཔནྣསྶ ཡཐཱུཔཙིཏཾ པཱཔཀམྨཾ ཝཱ ཀམྨནིམིཏྟཾ ཝཱ མནོདྭཱརེ ཨཱཔཱཐམཱགཙྪཏི. ཏཾ ཨཱརབྦྷ ཨུཔྤནྣཱཡ ཏདཱརམྨཎཔརིཡོསཱནཱཡ སུདྡྷཱཡ ཝཱ ཛཝནཝཱིཐིཡཱ ཨནནྟརཾ བྷཝངྒཝིསཡཾ ཨཱརམྨཎཾ ཀཏྭཱ ཙུཏིཙིཏྟཾ ཨུཔྤཛྫཏི. ཏསྨིཾ ནིརུདྡྷེ ཏདེཝ ཨཱཔཱཐགཏཾ ཀམྨཾ ཝཱ ཀམྨནིམིཏྟཾ ཝཱ ཨཱརབྦྷ ཨནུཔཙྪིནྣཀིལེསབལཝིནཱམིཏཾ ¶ དུགྒཏིཔརིཡཱཔནྣཾ པཊིསནྡྷིཙིཏྟཾ ཨུཔྤཛྫཏི. ཨཡཾ ཨཏཱིཏཱརམྨཎཱཡ ཙུཏིཡཱ ཨནནྟརཱ ཨཏཱིཏཱརམྨཎཱ པཊིསནྡྷི.

ཨཔརསྶ མརཎསམཡེ ཝུཏྟཔྤཀཱརཀམྨཝསེན ནརཀཱདཱིསུ ཨགྒིཛཱལཝཎྞཱདིཀཾ དུགྒཏིནིམིཏྟཾ མནོདྭཱརེ ཨཱཔཱཐམཱགཙྪཏི. ཏསྶ དྭིཀྑཏྟུཾ བྷཝངྒེ ཨུཔྤཛྫིཏྭཱ ནིརུདྡྷེ ཏཾ ཨཱརམྨཎཾ ཨཱརབྦྷ ཨེཀཾ ཨཱཝཛྫནཾ, མརཎསྶ ཨཱསནྣབྷཱཝེན མནྡཱིབྷཱུཏཝེགཏྟཱ པཉྩ ཛཝནཱནི, དྭེ ཏདཱརམྨཎཱནཱིཏི ཏཱིཎི ཝཱིཐིཙིཏྟཱནི ཨུཔྤཛྫནྟི. ཏཏོ བྷཝངྒཝིསཡཾ ཨཱརམྨཎཾ ཀཏྭཱ ¶ ཨེཀཾ ཙུཏིཙིཏྟཾ. ཨེཏྟཱཝཏཱ ཨེཀཱདས ཙིཏྟཀྑཎཱ ཨཏཱིཏཱ ཧོནྟི. ཨཐཱཝསེསཔཉྩཙིཏྟཀྑཎཱཡུཀེ ཏསྨིཾཡེཝ ཨཱརམྨཎེ པཊིསནྡྷིཙིཏྟཾ ཨུཔྤཛྫཏི. ཨཡཾ ཨཏཱིཏཱརམྨཎཱཡ ཙུཏིཡཱ ཨནནྟརཱ པཙྩུཔྤནྣཱརམྨཎཱ པཊིསནྡྷི.

ཨཔརསྶ མརཎསམཡེ པཉྩནྣཾ དྭཱརཱནཾ ཨཉྙཏརསྨིཾ དྭཱརེ ¶ རཱགཱདིཧེཏུབྷཱུཏཾ ཧཱིནཱརམྨཎཾ ཨཱཔཱཐམཱགཙྪཏི. ཏསྶ ཡཐཱཀྐམེན ཨུཔྤནྣཝོཊྛབྦནཱཝསཱནེ མརཎསྶ ཨཱསནྣབྷཱཝེན མནྡཱིབྷཱུཏཝེགཏྟཱ པཉྩ ཛཝནཱནི དྭེ ཏདཱརམྨཎཱནི ཙ ཨུཔྤཛྫནྟི. ཏཏོ བྷཝངྒཝིསཡམཱརམྨཎཾ ཀཏྭཱ ཨེཀཾ ཙུཏིཙིཏྟཾ. ཨེཏྟཱཝཏཱ དྭེ བྷཝངྒཱནི, ཨཱཝཛྫནཾ, དསྶནཾ, སམྤཊིཙྪནཾ, སནྟཱིརཎཾ, ཝོཊྛབྦནཾ, པཉྩ ཛཝནཱནི, དྭེ ཏདཱརམྨཎཱནི, ཨེཀཾ ཙུཏིཙིཏྟནྟི པཉྩདས ཙིཏྟཀྑཎཱ ཨཏཱིཏཱ ཧོནྟི. ཨཐཱཝསེསཨེཀཙིཏྟཀྑཎཱཡུཀེ ཏསྨིཾ ཡེཝ ཨཱརམྨཎེ པཊིསནྡྷིཙིཏྟཾ ཨུཔྤཛྫཏི. ཨཡམྤི ཨཏཱིཏཱརམྨཎཱཡ ཙུཏིཡཱ ཨནནྟརཱ པཙྩུཔྤནྣཱརམྨཎཱ པཊིསནྡྷི. ཨེས ཏཱཝ ཨཏཱིཏཱརམྨཎཱཡ སུགཏིཙུཏིཡཱ ཨནནྟརཱ ཨཏཱིཏཔཙྩུཔྤནྣཱརམྨཎཱཡ དུགྒཏིཔཊིསནྡྷིཡཱ པཝཏྟནཱཀཱརོ.

དུགྒཏིཡཾ ཋིཏསྶ པན ཨུཔཙིཏཱནཝཛྫཀམྨསྶ ཝུཏྟནཡེནེཝ ཏཾ ཨནཝཛྫཀམྨཾ ཝཱ ཀམྨནིམིཏྟཾ ཝཱ མནོདྭཱརེ ཨཱཔཱཐམཱགཙྪཏཱིཏི ཀཎྷཔཀྑེ སུཀྐཔཀྑཾ ཋཔེཏྭཱ སབྦཾ པུརིམནཡེནེཝ ཝེདིཏབྦཾ. ཨཡཾ ཨཏཱིཏཱརམྨཎཱཡ དུགྒཏིཙུཏིཡཱ ཨནནྟརཱ ཨཏཱིཏཔཙྩུཔྤནྣཱརམྨཎཱཡ སུགཏིཔཊིསནྡྷིཡཱ པཝཏྟནཱཀཱརོ.

སུགཏིཡཾ ཋིཏསྶ པན ཨུཔཙིཏཱནཝཛྫཀམྨསྶ ‘‘ཏཱནིསྶ ཏམྷི སམཡེ ཨོལམྦནྟཱི’’ཏིཨཱདིཝཙནཏོ མརཎམཉྩེ ནིཔནྣསྶ ཡཐཱུཔཙིཏཾ ཨནཝཛྫཀམྨཾ ཝཱ ཀམྨནིམིཏྟཾ ཝཱ མནོདྭཱརེ ཨཱཔཱཐམཱགཙྪཏི. ཏཉྩ ཁོ ཨུཔཙིཏཀཱམཱཝཙརཱནཝཛྫཀམྨསྶེཝ. ཨུཔཙིཏམཧགྒཏཀམྨསྶ ¶ པན ཀམྨནིམིཏྟམེཝ ཨཱཔཱཐམཱགཙྪཏི. ཏཾ ཨཱརབྦྷ ཨུཔྤནྣཱཡ ཏདཱརམྨཎཔརིཡོསཱནཱཡ སུདྡྷཱཡ ཝཱ ཛཝནཝཱིཐིཡཱ ཨནནྟརཾ བྷཝངྒཝིསཡཾ ཨཱརམྨཎཾ ཀཏྭཱ ཙུཏིཙིཏྟམུཔྤཛྫཏི. ཏསྨིཾ ནིརུདྡྷེ ཏདེཝ ཨཱཔཱཐགཏཾ ཀམྨཾ ཝཱ ཀམྨནིམིཏྟཾ ཝཱ ཨཱརབྦྷ ཨནུཔཙྪིནྣཀིལེསབལཝིནཱམིཏཾ སུགཏིཔརིཡཱཔནྣཾ པཊིསནྡྷིཙིཏྟམུཔྤཛྫཏི. ཨཡཾ ཨཏཱིཏཱརམྨཎཱཡ ཙུཏིཡཱ ཨནནྟརཱ ཨཏཱིཏཱརམྨཎཱ ནཝཏྟབྦཱརམྨཎཱ ཝཱ པཊིསནྡྷི.

ཨཔརསྶ ¶ མརཎསམཡེ ཀཱམཱཝཙརཱནཝཛྫཀམྨཝསེན མནུསྶལོཀེ མཱཏུཀུཙྪིཝཎྞསངྑཱཏཾ ཝཱ དེཝལོཀེ ཨུཡྻཱནཀཔྤརུཀྑཱདིཝཎྞསངྑཱཏཾ ཝཱ སུགཏིནིམིཏྟཾ མནོདྭཱརེ ¶ ཨཱཔཱཐམཱགཙྪཏི. ཏསྶ དུགྒཏིནིམིཏྟེ དསྶིཏཱནུཀྐམེནེཝ ཙུཏིཙིཏྟཱནནྟརཾ པཊིསནྡྷིཙིཏྟཾ ཨུཔྤཛྫཏི. ཨཡཾ ཨཏཱིཏཱརམྨཎཱཡ ཙུཏིཡཱ ཨནནྟརཱ པཙྩུཔྤནྣཱརམྨཎཱ པཊིསནྡྷི.

ཨཔརསྶ མརཎསམཡེ ཉཱཏཀཱ ‘ཨཡཾ, ཏཱཏ, ཏཝཏྠཱཡ བུདྡྷཔཱུཛཱ ཀརཱིཡཏི, ཙིཏྟཾ པསཱདེཧཱི’ཏི ཝཏྭཱ པུཔྥདཱམདྷཛཔཊཱཀཱདིཝསེན རཱུཔཱརམྨཎཾ ཝཱ དྷམྨསྶཝནཏཱུརིཡཔཱུཛཱདིཝསེན སདྡཱརམྨཎཾ ཝཱ དྷཱུམཝཱསགནྡྷཱདིཝསེན གནྡྷཱརམྨཎཾ ཝཱ ‘ཨིདཾ, ཏཱཏ, སཱཡསྶུ, ཏཝཏྠཱཡ དཱཏབྦཾ དེཡྻདྷམྨ’ནྟི ཝཏྭཱ མདྷུཕཱཎིཏཱདིཝསེན རསཱརམྨཎཾ ཝཱ ‘ཨིདཾ, ཏཱཏ, ཕུསསྶུ, ཏཝཏྠཱཡ དཱཏབྦཾ དེཡྻདྷམྨ’ནྟི ཝཏྭཱ ཙཱིནཔཊསོམཱརཔཊཱདིཝསེན ཕོཊྛབྦཱརམྨཎཾ ཝཱ པཉྩདྭཱརེ ཨུཔསཾཧརནྟི. ཏསྶ ཏསྨིཾ ཨཱཔཱཐགཏེ རཱུཔཱདིཨཱརམྨཎེ ཡཐཱཀྐམེན ཨུཔྤནྣཝོཊྛཔནཱཝསཱནེ མརཎསྶ ཨཱསནྣབྷཱཝེན མནྡཱིབྷཱུཏཝེགཏྟཱ པཉྩ ཛཝནཱནི དྭེ ཏདཱརམྨཎཱནི ཙ ཨུཔྤཛྫནྟི. ཏཏོ བྷཝངྒཝིསཡཾ ཨཱརམྨཎཾ ཀཏྭཱ ཨེཀཾ ཙུཏིཙིཏྟཾ, ཏདཝསཱནེ ཏསྨིཉྙེཝ ཨེཀཙིཏྟཀྑཎཊྛིཏིཀེ ཨཱརམྨཎེ པཊིསནྡྷིཙིཏྟཾ ཨུཔྤཛྫཏི. ཨཡམྤི ཨཏཱིཏཱརམྨཎཱཡ ཙུཏིཡཱ ཨནནྟརཱ པཙྩུཔྤནྣཱརམྨཎཱ པཊིསནྡྷི.

ཨཔརསྶ པན པཐཝཱིཀསིཎཛ྄ཛྷཱནཱདིཝསེན པཊིལདྡྷམཧགྒཏསྶ སུགཏིཡཾ ཋིཏསྶ མརཎསམཡེ ཀཱམཱཝཙརཀུསལཀམྨ-ཀམྨནིམིཏྟ-གཏིནིམིཏྟཱནཾ ཨཉྙཏརཾ པཐཝཱིཀསིཎཱདིཀཾ ཝཱ ནིམིཏྟཾ མཧགྒཏཙིཏྟཾ ཝཱ མནོདྭཱརེ ཨཱཔཱཐམཱགཙྪཏི. ཙཀྑུསོཏཱནཾ ཝཱ ཨཉྙཏརསྨིཾ ཀུསལུཔྤཏྟིཧེཏུབྷཱུཏཾ པཎཱིཏམཱརམྨཎཾ ཨཱཔཱཐམཱགཙྪཏི. ཏསྶ ཡཐཱཀྐམེན ཨུཔྤནྣཝོཊྛབྦནཱཝསཱནེ མརཎསྶ ཨཱསནྣབྷཱཝེན མནྡཱིབྷཱུཏཝེགཏྟཱ པཉྩ ཛཝནཱནི ཨུཔྤཛྫནྟི. མཧགྒཏགཏིཀཱནཾ པན ཏདཱརམྨཎཾ ནཏྠི. ཏསྨཱ ཛཝནཱནནྟརཾཡེཝ བྷཝངྒཝིསཡཾ ཨཱརམྨཎཾ ཀཏྭཱ ཨེཀཾ ཙུཏིཙིཏྟཾ ཨུཔྤཛྫཏི ¶ . ཏསྶཱཝསཱནེ ཀཱམཱཝཙརམཧགྒཏསུགཏཱིནཾ ཨཉྙཏརསུགཏིཔརིཡཱཔནྣཾ ཡཐཱུཔཊྛིཏེསུ ཨཱརམྨཎེསུ ཨཉྙཏརཱརམྨཎཾ པཊིསནྡྷིཙིཏྟཾ ¶ ཨུཔྤཛྫཏི. ཨཡཾ ནཝཏྟབྦཱརམྨཎཱཡ སུགཏིཙུཏིཡཱ ཨནནྟརཱ ཨཏཱིཏཔཙྩུཔྤནྣནཝཏྟབྦཱནཾ ཨཉྙཏརཱརམྨཎཱ པཊིསནྡྷི.

ཨེཏེནཱནུསཱརེན ཨཱརུཔྤཙུཏིཡཱཔི ཨནནྟརཱ པཊིསནྡྷི ཝེདིཏབྦཱ. ཨཡཾ ཨཏཱིཏནཝཏྟབྦཱརམྨཎཱཡ སུགཏིཙུཏིཡཱ ཨནནྟརཱ ཨཏཱིཏནཝཏྟབྦཔཙྩུཔྤནྣཱརམྨཎཱཡ པཊིསནྡྷིཡཱ པཝཏྟནཱཀཱརོ.

དུགྒཏིཡཾ ¶ ཋིཏསྶ པན པཱཔཀམྨིནོ ཝུཏྟནཡེནེཝ ཏཾ ཀམྨཾ ཀམྨནིམིཏྟཾ གཏིནིམིཏྟཾ ཝཱ མནོདྭཱརེ, པཉྩདྭཱརེ པན ཨཀུསལུཔྤཏྟིཧེཏུབྷཱུཏཾ ཨཱརམྨཎཾ ཨཱཔཱཐམཱགཙྪཏི. ཨཐསྶ ཡཐཱཀྐམེན ཙུཏིཙིཏྟཱཝསཱནེ དུགྒཏིཔརིཡཱཔནྣཾ ཏེསུ ཨཱརམྨཎེསུ ཨཉྙཏརཱརམྨཎཾ པཊིསནྡྷིཙིཏྟཾ ཨུཔྤཛྫཏི. ཨཡཾ ཨཏཱིཏཱརམྨཎཱཡ དུགྒཏིཙུཏིཡཱ ཨནནྟརཱ ཨཏཱིཏཔཙྩུཔྤནྣཱརམྨཎཱཡ པཊིསནྡྷིཡཱ པཝཏྟནཱཀཱརོཏི. ཨེཏྟཱཝཏཱ ཨེཀཱུནཝཱིསཏིཝིདྷསྶཱཔི ཝིཉྙཱཎསྶ པཊིསནྡྷིཝསེན པཝཏྟི དཱིཔིཏཱ ཧོཏི.

ཏཡིདཾ སབྦམྤི ཨེཝཾ –

པཝཏྟམཱནཾ སནྡྷིམྷི, དྭིདྷཱ ཀམྨེན ཝཏྟཏི;

མིསྶཱདཱིཧི ཙ བྷེདེཧི, བྷེདསྶ དུཝིདྷཱདིཀོ.

ཨིདཉྷི ཨེཀཱུནཝཱིསཏིཝིདྷམྤི ཝིཔཱཀཝིཉྙཱཎཾ པཊིསནྡྷིམྷི པཝཏྟམཱནཾ དྭིདྷཱ ཀམྨེན ཝཏྟཏི. ཡཐཱསཀཉྷི ཨེཏསྶ ཛནཀཾ ཀམྨཾ ནཱནཱཀྑཎིཀཀམྨཔྤཙྩཡེན ཙེཝ ཨུཔནིསྶཡཔཙྩཡེན ཙ པཙྩཡོ ཧོཏི. ཝུཏྟཉྷེཏཾ ‘‘ཀུསལཱཀུསལཾ ཀམྨཾ ཝིཔཱཀསྶ ཨུཔནིསྶཡཔཙྩཡེན པཙྩཡོ’’ཏི (པཊྛཱ. ༡.༡.༤༢༣). ཨེཝཾ ཝཏྟམཱནསྶ པནསྶ མིསྶཱདཱིཧི བྷེདེཧི དུཝིདྷཱདིཀོཔི བྷེདོ ཝེདིཏབྦོ, སེཡྻཐིདཾ – ཨིདཉྷི པཊིསནྡྷིཝསེན ཨེཀདྷཱ ཝཏྟམཱནམྤི རཱུཔེན སཧ མིསྶཱམིསྶབྷེདཏོ དུཝིདྷཾ, ཀཱམརཱུཔཱརཱུཔབྷཝབྷེདཏོ ཏིཝིདྷཾ, ཨཎྜཛཛལཱབུཛསཾསེདཛཨོཔཔཱཏིཀཡོནིཝསེན ཙཏུབྦིདྷཾ, གཏིཝསེན པཉྩཝིདྷཾ, ཝིཉྙཱཎཊྛིཏིཝསེན སཏྟཝིདྷཾ, སཏྟཱཝཱསཝསེན ཨཊྛཝིདྷཾ ཧོཏི. ཏཏྠ –

མིསྶཾ ¶ དྭིདྷཱ བྷཱཝབྷེདཱ, སབྷཱཝཾ ཏཏྠ ཙ དྭིདྷཱ;

དྭེ ཝཱ ཏཡོ ཝཱ དསཀཱ, ཨོམཏོ ཨཱདིནཱ སཧ.

‘མིསྶཾ ¶ དྭིདྷཱ བྷཱཝབྷེདཱ’ཏི ཡཉྷེཏམེཏྠ ཨཉྙཏྲ ཨརཱུཔབྷཝཱ རཱུཔམིསྶཾ པཊིསནྡྷིཝིཉྙཱཎཾ ཨུཔྤཛྫཏི, ཏཾ རཱུཔབྷཝེ ཨིཏྠིནྡྲིཡཔུརིསིནྡྲིཡསངྑཱཏེན བྷཱཝེན ཝིནཱ ཨུཔྤཏྟིཏོ ཀཱམབྷཝེ ཨཉྙཏྲ ཛཱཏིཔཎྜཀཔཊིསནྡྷིཡཱ བྷཱཝེན སཧ ཨུཔྤཏྟིཏོ སབྷཱཝཾ ཨབྷཱཝནྟི དུཝིདྷཾ ཧོཏི.

‘སབྷཱཝཾ ཏཏྠ ཙ དྭིདྷཱ’ཏི ཏཏྠཱཔི ཙ ཡཾ སབྷཱཝཾ ཏཾ ཨིཏྠིཔུརིསབྷཱཝཱནཾ ཨཉྙཏརེན སཧ ཨུཔྤཏྟིཏོ དུཝིདྷམེཝ ཧོཏི.

‘དྭེ ¶ ཝཱ ཏཡོ ཝཱ དསཀཱ, ཨོམཏོ ཨཱདིནཱ སཧཱ’ཏི ཡཉྷེཏམེཏྠ མིསྶཾ ཨམིསྶནྟི དྭཡེ ཨཱདིབྷཱུཏཾ རཱུཔམིསྶཾ པཊིསནྡྷིཝིཉྙཱཎཾ, ཏེན སཧ ཝཏྠུཀཱཡདསཀཝསེན དྭེ ཝཱ ཝཏྠུཀཱཡབྷཱཝདསཀཝསེན ཏཡོ ཝཱ དསཀཱ ཨོམཏོ ཨུཔྤཛྫནྟི, ནཏྠི ཨིཏོ པརཾ རཱུཔཔརིཧཱནཱིཏི. ཏཾ པནེཏཾ ཨེཝཾ ཨོམཀཔརིམཱཎཾ ཨུཔྤཛྫམཱནཾ ཨཎྜཛཛལཱབུཛནཱམིཀཱསུ དྭཱིསུ ཡོནཱིསུ ཛཱཏིཨུཎྞཱཡ ཨེཀེན ཨཾསུནཱ ཨུདྡྷཏཏེལསཔྤིམཎྜཔྤམཱཎཾ ཀལལནྟི ལདྡྷསངྑཾ ཧུཏྭཱ ཨུཔྤཛྫཏི. ཏཏྠ ཡོནཱིནཾ གཏིཝསེན སམྦྷཝབྷེདོ ཝེདིཏབྦོ. ཨེཏཱསུ ཧི –

ནིརཡེ བྷུམྨཝཛྫེསུ, དེཝེསུ ཙ ན ཡོནིཡོ;

ཏིསྶོ པུརིམིཀཱ ཧོནྟི, ཙཏསྶོཔི གཏིཏྟཡེ.

ཏཏྠ དེཝེསུ ཙཱཏི ཙསདྡེན ཡཐཱ ནིརཡེ ཙ བྷུམྨཝཛྫེསུ ཙ དེཝེསུ, ཨེཝཾ ནིཛ྄ཛྷཱམཏཎྷིཀཔེཏེསུ ཙ པུརིམིཀཱ ཏིསྶོ ཡོནིཡོ ན སནྟཱིཏི ཝེདིཏབྦཱ. ཨོཔཔཱཏིཀཱ ཨེཝ ཧི ཏེ ཧོནྟི. སེསེ པན ཏིརཙྪཱནཔེཏྟིཝིསཡམནུསྶསངྑཱཏེ གཏིཏྟཡེ པུབྦེ ཝཛྫིཏབྷུམྨདེཝེསུ ཙ ཙཏསྶོ ཡོནིཡོ ཧོནྟི. ཏཏྠ –

ཏིཾས ནཝ ཙེཝ རཱུཔཱིསུ, སཏྟཏི ཨུཀྐཾསཏོཝ རཱུཔཱནི;

སཾསེདཛོཔཔཱཏཱིསུ, ཨཐ ཝཱ ཨཝཀཾསཏོ ཏིཾས.

རཱུཔཱིབྲཧྨེསུ ¶ ཏཱཝ ཨོཔཔཱཏིཀཡོནིཀེསུ ཙཀྑུསོཏཝཏྠུདསཀཱནཾ ཛཱིཝིཏནཝཀསྶ ཙཱཏི ཙཏུནྣཾ ཀལཱཔཱནཾ ཝསེན ཏིཾས ཙ ནཝ ཙ པཊིསནྡྷིཝིཉྙཱཎེན སཧ རཱུཔཱནི ཨུཔྤཛྫནྟི. རཱུཔཱིབྲཧྨེ པན ཋཔེཏྭཱ ཨཉྙེསུ སཾསེདཛཨོཔཔཱཏིཀེསུ ཨུཀྐཾསཏོ ཙཀྑུསོཏགྷཱནཛིཝ྄ཧཱཀཱཡབྷཱཝཝཏྠུདསཀཱནཾ ¶ ཝསེན སཏྟཏི. ཏཱནི ཙ ནིཙྩཾ དེཝེསུ. ཏཏྠ ཝཎྞོ གནྡྷོ རསོ ཨོཛཱ ཙཏསྶོ ཙཱཔི དྷཱཏུཡོ ཙཀྑུཔསཱདོ ཛཱིཝིཏིནྡྲིཡནྟི ཨཡཾ དསརཱུཔཔརིམཱཎོ རཱུཔཔུཉྫོ ཙཀྑུདསཀོ ནཱམ. ཨེཝཾ སེསཱ ཝེདིཏབྦཱ. ཨཝཀཾསཏོ པན ཛཙྩནྡྷབདྷིརཨགྷཱནཀནཔུཾསཀསྶ ཛིཝ྄ཧཱཀཱཡཝཏྠུདསཀཱནཾ ཝསེན ཏིཾས རཱུཔཱནི ཨུཔྤཛྫནྟི. ཨུཀྐཾསཱཝཀཾསཱནཾ པན ཨནྟརེ ཨནུརཱུཔཏོ ཝིཀཔྤོ ཝེདིཏབྦོ.

ཨེཝཾ ཝིདིཏྭཱ པུན –

ཁནྡྷཱརམྨཎགཏིཧེཏུ-ཝེདནཱཔཱིཏིཝིཏཀྐཝིཙཱརེཧི;

བྷེདཱབྷེདཝིསེསོ, ཙུཏིསནྡྷཱིནཾ པརིཉྙེཡྻོ.

ཡཱཧེསཱ ¶ མིསྶཱམིསྶཏོ དུཝིདྷཱ པཊིསནྡྷི, ཡཱ ཙསྶཱ ཨཏཱིཏཱནནྟརཱ ཙུཏི, ཏཱསཾ ཨིམེཧི ཁནྡྷཱདཱིཧི བྷེདཱབྷེདཝིསེསོ ཉཱཏབྦོཏི ཨཏྠོ.

ཀཐཾ? ཀདཱཙི ཙཏུཀྑནྡྷཱཡ ཨཱརུཔྤཙུཏིཡཱ ཨནནྟརཱ ཙཏུཀྑནྡྷཱཝ ཨཱརམྨཎཏོཔི ཨབྷིནྣཱ པཊིསནྡྷི ཧོཏི, ཀདཱཙི ཨམཧགྒཏབཧིདྡྷཱརམྨཎཱཡ མཧགྒཏཨཛ྄ཛྷཏྟཱརམྨཎཱ. ཨཡཾ ཏཱཝ ཨརཱུཔབྷཱུམཱིསུཡེཝ ནཡོ. ཀདཱཙི པན ཙཏུཀྑནྡྷཱཡ ཨཱརུཔྤཙུཏིཡཱ ཨནནྟརཱ པཉྩཀྑནྡྷཱ ཀཱམཱཝཙརཱ པཊིསནྡྷི. ཀདཱཙི པཉྩཀྑནྡྷཱཡ ཀཱམཱཝཙརཙུཏིཡཱ རཱུཔཱཝཙརཙུཏིཡཱ ཝཱ ཨནནྟརཱ ཙཏུཀྑནྡྷཱ ཨཱརུཔྤཔཊིསནྡྷི. ཨེཝཾ ཨཏཱིཏཱརམྨཎཙུཏིཡཱ ཨཏཱིཏནཝཏྟབྦཔཙྩུཔྤནྣཱརམྨཎཱ པཊིསནྡྷི, ཨེཀཙྩསུགཏིཙུཏིཡཱ ཨེཀཙྩདུགྒཏིཔཊིསནྡྷི, ཨཧེཏུཀཙུཏིཡཱ སཧེཏུཀཔཊིསནྡྷི, དུཧེཏུཀཙུཏིཡཱ ཏིཧེཏུཀཔཊིསནྡྷི, ཨུཔེཀྑཱསཧགཏཙུཏིཡཱ སོམནསྶསཧགཏཔཊིསནྡྷི, ཨཔྤཱིཏིཀཙུཏིཡཱ སཔྤཱིཏིཀཔཊིསནྡྷི, ཨཝིཏཀྐཙུཏིཡཱ སཝིཏཀྐཔཊིསནྡྷི, ཨཝིཙཱརཙུཏིཡཱ སཝིཙཱརཔཊིསནྡྷི, ཨཝིཏཀྐཨཝིཙཱརཙུཏིཡཱ སཝིཏཀྐསཝིཙཱརཔཊིསནྡྷཱིཏི ཏསྶ ཏསྶ ཝིཔརཱིཏཏོ ཙ ཡཐཱཡོགཾ ཡོཛེཏབྦཾ.

ལདྡྷཔྤཙྩཡམིཏིདྷམྨ-མཏྟམེཏཾ ¶ བྷཝནྟརམུཔེཏི;

ནཱསྶ ཏཏོ སངྐནྟི, ན ཏཏོ ཧེཏུཾ ཝིནཱ ཧོཏི.

ཨིཏི ¶ ཧེཏཾ ལདྡྷཔཙྩཡཾ རཱུཔཱརཱུཔདྷམྨམཏྟཾ ཨུཔྤཛྫམཱནཾ བྷཝནྟརཾ ཨུཔེཏཱིཏི ཝུཙྩཏི, ན སཏྟོ, ན ཛཱིཝོ. ཏསྶ ནཱཔི ཨཏཱིཏབྷཝཏོ ཨིདྷ སངྐནྟི ཨཏྠི, ནཱཔི ཏཏོ ཧེཏུཾ ཝིནཱ ཨིདྷ པཱཏུབྷཱཝོ. ཏཡིདཾ པཱཀཊེན མནུསྶཙུཏིཔཊིསནྡྷིཀྐམེན པཀཱསཡིསྶཱམ –

ཨཏཱིཏབྷཝསྨིཉྷི སརསེན ཨུཔཀྐམེན ཝཱ སམཱསནྣམརཎསྶ ཨསཡ྄ཧཱནཾ སབྦངྒཔཙྩངྒསནྡྷིབནྡྷནཙྪེདཀཱནཾ མཱརཎནྟིཀཝེདནཱསཏྟཱནཾ སནྣིཔཱཏཾ ཨསཧནྟསྶ ཨཱཏཔེ པཀྑིཏྟཧརིཏཏཱལཔཎྞམིཝ ཀམེན ཨུཔསུསྶམཱནེ སརཱིརེ ནིརུདྡྷེསུ ཙཀྑཱདཱིསུ ཨིནྡྲིཡེསུ ཧདཡཝཏྠུམཏྟེ པཏིཊྛིཏེསུ ཀཱཡིནྡྲིཡམནིནྡྲིཡཛཱིཝིཏིནྡྲིཡེསུ ཏངྑཎཱཝསེསཾ ཧདཡཝཏྠུསནྣིསྶིཏཾ ཝིཉྙཱཎཾ གརུསམཱསེཝིཏཱསནྣཔུབྦཀཏཱནཾ ཨཉྙཏརཾ ལདྡྷཱཝསེསཔཙྩཡསངྑཱརསངྑཱཏཾ ཀམྨཾ ཝཱ ཏདུཔཊྛཱཔིཏཾ ཝཱ ཀམྨནིམིཏྟགཏིནིམིཏྟསངྑཱཏཾ ཝིསཡམཱརབྦྷ པཝཏྟཏི. ཏདེཝཾ པཝཏྟམཱནཾ ཏཎྷཱཨཝིཛྫཱནཾ ཨཔྤཧཱིནཏྟཱ ཨཝིཛྫཱཔཊིཙྪཱདིཏཱདཱིནཝེ ཏསྨིཾ ཝིསཡེ ཏཎྷཱ ནཱམེཏི ¶ , སཧཛཱཏསངྑཱརཱ ཁིཔནྟི. ཏཾ སནྟཏིཝསེན ཏཎྷཱཡ ནཱམིཡམཱནཾ སངྑཱརེཧི ཁིཔྤམཱནཾ ཨོརིམཏཱིརརུཀྑཝིནིབདྡྷརཛྫུམཱལམྦིཏྭཱ མཱཏིཀཱཏིཀྐམཀོ ཝིཡ པུརིམཉྩ ནིསྶཡཾ ཛཧཏི, ཨཔརཉྩ ཀམྨསམུཊྛཱཔིཏཾ ནིསྶཡཾ ཨསྶཱདཡམཱནཾ ཝཱ ཨནསྶཱདཡམཱནཾ ཝཱ ཨཱརམྨཎཱདཱིཧིཡེཝ པཙྩཡེཧི པཝཏྟཏི.

ཨེཏྠ ཙ པུརིམཾ ཙཝནཏོ ཙུཏི, པཙྪིམཾ བྷཝནྟརཱདིཔཊིསནྡྷཱནཏོ པཊིསནྡྷཱིཏི ཝུཙྩཏི. ཏདེཏཾ ནཱཔི པུརིམབྷཝཱ ཨིདྷ ཨཱགཏཾ, ནཱཔི ཏཏོ ཀམྨསངྑཱརནཏིཝིསཡཱདིཧེཏུཾ ཝིནཱ པཱཏུབྷཱུཏནྟི ཝེདིཏབྦཾ.

སིཡུཾ ནིདསྶནཱནེཏྠ, པཊིགྷོསཱདིཀཱ ཨཐ;

སནྟཱནབནྡྷཏོ ནཏྠི, ཨེཀཏཱ ནཱཔི ནཱནཏཱ.

ཨེཏྠ ¶ ཙེཏསྶ ཝིཉྙཱཎསྶ པུརིམབྷཝཏོ ཨིདྷ ཨནཱགམནེ ཨཏཱིཏབྷཝཔརིཡཱཔནྣཧེཏཱུཧི ཙ ཨུཔྤཱདེ པཊིགྷོསཔདཱིཔམུདྡཱཔཊིབིམྦཔྤཀཱརཱ དྷམྨཱ ནིདསྶནཱནི སིཡུཾ. ཡཐཱ ཧི པཊིགྷོསཔདཱིཔམུདྡཙྪཱཡཱ ¶ སདྡཱདིཧེཏུཀཱ ཨཉྙཏྲ ཨགནྟྭཱ ཧོནྟི, ཨེཝམེཝ ཨིདཾ ཙིཏྟཾ. ཨེཏྠ ཙ ‘སནྟཱནབནྡྷཏོ ནཏྠི ཨེཀཏཱ ནཱཔི ནཱནཏཱ’. ཡདི ཧི སནྟཱནབནྡྷེ སཏི ཨེཀནྟམེཀཏཱ བྷཝེཡྻ, ན ཁཱིརཏོ དདྷི སམྦྷཱུཏཾ སིཡཱ. ཨཐཱཔི ཨེཀནྟནཱནཏཱ བྷཝེཡྻ, ན ཁཱིརསྶཱདྷཱིནོ དདྷི སིཡཱ. ཨེས ནཡོ སབྦཧེཏུཧེཏུསམུཔྤནྣེསུ. ཨེཝཉྩ སཏི སབྦལོཀཝོཧཱརལོཔོ སིཡཱ. སོ ཙ ཨནིཊྛོ. ཏསྨཱ ཨེཏྠ ན ཨེཀནྟམེཀཏཱ ཝཱ ནཱནཏཱ ཝཱ ཨུཔགནྟབྦཱཏི.

ཨེཏྠཱཧ – ནནུ ཨེཝཾ ཨསངྐནྟིཔཱཏུབྷཱཝེ སཏི ཡེ ཨིམསྨིཾ མནུསྶཏྟབྷཱཝེ ཁནྡྷཱ, ཏེསཾ ནིརུདྡྷཏྟཱ ཕལཔཙྩཡསྶ ཙ ཀམྨསྶ ཏཏྠ ཨགམནཏོ ཨཉྙསྶ ཨཉྙཏོ ཙ ཏཾ ཕལཾ སིཡཱ? ཨུཔབྷུཉྫཀེ ཙ ཨསཏི ཀསྶ ཏཾ ཕལཾ སིཡཱ? ཏསྨཱ ན སུནྡརམིདཾ ཝིདྷཱནནྟི. ཏཏྲིདཾ ཝུཙྩཏི –

སནྟཱནེ ཡཾ ཕལཾ ཨེཏཾ, ནཱཉྙསྶ ན ཙ ཨཉྙཏོ;

བཱིཛཱནཾ ཨབྷིསངྑཱརོ, ཨེཏསྶཏྠསྶ སཱདྷཀོ.

ཨེཀསནྟཱནསྨིཉྷི ཕལམུཔྤཛྫམཱནཾ ཏཏྠ ཨེཀནྟཾ ཨེཀཏྟནཱནཏྟཱནཾ པཊིསིདྡྷཏྟཱ ཨཉྙསྶཱཏི ཝཱ ཨཉྙཏོཏི ཝཱ ན ཧོཏི. ཨེཏསྶ ཙ པནཏྠསྶ བཱིཛཱནཾ ཨབྷིསངྑཱརོ སཱདྷཀོ. ཨམྦབཱིཛཱདཱིནཉྷི ཨབྷིསངྑཱརེསུ ཀཏེསུ ཏསྶ བཱིཛསྶ སནྟཱནེ ལདྡྷཔཙྩཡོ ཀཱལནྟརེ ཕལཝིསེསོ ཨུཔྤཛྫམཱནོ ན ཨཉྙབཱིཛཱནཾ ནཱཔི ཨཉྙཱབྷིསངྑཱརཔཙྩཡཱ ཨུཔྤཛྫཏི, ན ཙ ཏཱནི བཱིཛཱནི ¶ ཏེ ཨབྷིསངྑཱརཱ ཝཱ ཕལཊྛཱནཾ པཱཔུཎནྟི. ཨེཝཾ སམྤདམིདཾ ཝེདིཏབྦཾ. ཝིཛྫཱསིཔྤོསདྷཱདཱིཧི ཙཱཔི བཱལསརཱིརེ ཨུཔཡུཏྟེཧི ཀཱལནྟརེ ཝུཌྜྷསརཱིརཱདཱིསུ ཕལདེཧི ཨཡམཏྠོ ཝེདིཏབྦོ.

ཡམྤི ཝུཏྟཾ ‘ཨུཔབྷུཉྫཀེ ཙ ཨསཏི ཀསྶ ཏཾ ཕལཾ སིཡཱ’ཏི? ཏཏྠ –

ཕལསྶུཔྤཏྟིཡཱ ཨེཝ, སིདྡྷཱ བྷུཉྫཀསམྨུཏི;

ཕལུཔྤཱདེན རུཀྑསྶ, ཡཐཱ ཕལཏི སམྨུཏི.

ཡཐཱ ¶ ཧི རུཀྑསངྑཱཏཱནཾ དྷམྨཱནཾ ཨེཀདེསབྷཱུཏསྶ རུཀྑཕལསྶ ཨུཔྤཏྟིཡཱ ཨེཝ རུཀྑོ ཕལཏཱིཏི ¶ ཝཱ ཕལིཏོཏི ཝཱ ཝུཙྩཏི, ཏཐཱ དེཝམནུསྶསངྑཱཏཱནཾ ཁནྡྷཱནཾ ཨེཀདེསབྷཱུཏསྶ ཨུཔབྷོགསངྑཱཏསྶ སུཁདུཀྑཕལསྶ ཨུཔྤཱདེནེཝ དེཝོ ཝཱ མནུསྶོ ཝཱ ཨུཔབྷུཉྫཏཱིཏི ཝཱ སུཁིཏོཏི ཝཱ དུཀྑིཏོཏི ཝཱ ཝུཙྩཏི. ཏསྨཱ ན ཨེཏྠ ཨཉྙེན ཨུཔབྷུཉྫཀེན ནཱམ ཀོཙི ཨཏྠོ ཨཏྠཱིཏི.

ཡོཔི ཝདེཡྻ – ‘ཨེཝཾ སནྟེཔི ཨེཏེ སངྑཱརཱ ཝིཛྫམཱནཱ ཝཱ ཕལསྶ པཙྩཡཱ སིཡུཾ, ཨཝིཛྫམཱནཱ ཝཱ. ཡདི ཙ ཝིཛྫམཱནཱ པཝཏྟིཀྑཎེཡེཝ ནེསཾ ཝིཔཱཀེན བྷཝིཏབྦཾ. ཨཐ ཨཝིཛྫམཱནཱ, པཝཏྟིཏོ པུབྦེ ཙ པཙྪཱ ཙ ནིཙྩཾ ཕལཱཝཧཱ སིཡུ’ནྟི. སོ ཨེཝཾ ཝཏྟབྦོ –

ཀཏཏྟཱ པཙྩཡཱ ཨེཏེ, ན ཙ ནིཙྩཾ ཕལཱཝཧཱ;

པཱཊིབྷོགཱདིཀཾ ཏཏྠ, ཝེདིཏབྦཾ ནིདསྶནཾ.

ཀཏཏྟཱ ཨེཝ ཧི སངྑཱརཱ ཨཏྟནོ ཕལསྶ པཙྩཡཱ ཧོནྟི, ན ཝིཛྫམཱནཏྟཱ ཝཱ ཨཝིཛྫམཱནཏྟཱ ཝཱ. ཡཐཱཧ ‘‘ཀཱམཱཝཙརསྶ ཀུསལསྶ ཀམྨསྶ ཀཏཏྟཱ ཨུཔཙིཏཏྟཱ ཝིཔཱཀཾ ཙཀྑུཝིཉྙཱཎཾ ཨུཔྤནྣཾ ཧོཏཱི’’ཏིཨཱདི (དྷ. ས. ༤༣༡). ཡཐཱརཧསྶ ཨཏྟནོ ཕལསྶ ཙ པཙྩཡཱ ཧུཏྭཱ ན པུན ཕལཱཝཧཱ ཧོནྟི ཝིཔཀྐཝིཔཱཀཏྟཱ. ཨེཏསྶ ཙཏྠསྶ ཝིབྷཱཝནེ ཨིདཾ པཱཊིབྷོགཱདིཀཾ ནིདསྶནཾ ཝེདིཏབྦཾ.

ཡཐཱ ཧི ལོཀེ ཡོ ཀསྶཙི ཨཏྠསྶ ནིཡྻཱཏནཏྠཾ པཱཊིབྷོགོ ཧོཏི, བྷཎྜཾ ཝཱ ཀིཎཱཏི, ཨིཎཾ ཝཱ གཎྷཱཏི. ཏསྶ ཏཾ ཀིརིཡཱཀརཎམཏྟམེཝ ཏདཏྠནིཡྻཱཏནཱདིམྷི པཙྩཡོ ཧོཏི, ན ཀིརིཡཱཡ ཝིཛྫམཱནཏཱ ཝཱ ཨཝིཛྫམཱནཏཱ ཝཱ. ན ཙ ཏདཏྠནིཡྻཱཏནཱདིཏོ པརམྤི དྷཱརཀོཝ ¶ ཧོཏི. ཀསྨཱ? ནིཡྻཱཏནཱདཱིནཾ ཀཏཏྟཱ. ཨེཝཾ ཀཏཏྟཱཝ སངྑཱརཱཔི ཨཏྟནོ ཕལསྶ པཙྩཡཱ ཧོནྟི, ན ཙ ཡཐཱརཧཾ ཕལདཱནཏོ པརམྤི ཕལཱཝཧཱ ཧོནྟཱིཏི. ཨེཏྟཱཝཏཱ མིསྶཱམིསྶཝསེན དྭིདྷཱཔི པཝཏྟམཱནསྶ པཊིསནྡྷིཝིཉྙཱཎསྶ སངྑཱརཔཙྩཡཱ པཝཏྟི དཱིཔིཏཱ ཧོཏི.

ཨིདཱནི སབྦེསྭེཏེསུ བཏྟིཾསཝིཉྙཱཎེསུ སམྨོཧཝིགྷཱཏཏྠཾ –

པཊིསནྡྷིཔྤཝཏྟཱིནཾ ¶ , ཝསེནེཏེ བྷཝཱདིསུ;

ཝིཛཱནིཏབྦཱ སངྑཱརཱ, ཡཐཱ ཡེསཉྩ པཙྩཡཱ.

ཏཏྠ ¶ ཏཡོ བྷཝཱ, ཙཏསྶོ ཡོནིཡོ, པཉྩ གཏིཡོ, སཏྟ ཝིཉྙཱཎཊྛིཏིཡོ, ནཝ སཏྟཱཝཱསཱཏི ཨེཏེ བྷཝཱདཡོ ནཱམ. ཨེཏེསུ བྷཝཱདཱིསུ པཊིསནྡྷིཡཾ པཝཏྟེ ཙ ཨེཏེ ཡེསཾ ཝིཔཱཀཝིཉྙཱཎཱནཾ པཙྩཡཱ ཡཐཱ ཙ པཙྩཡཱ ཧོནྟི ཏཐཱ ཝིཛཱནིཏབྦཱཏི ཨཏྠོ.

ཏཏྠ – པུཉྙཱབྷིསངྑཱརེ ཏཱཝ ཀཱམཱཝཙརཨཊྛཙེཏནཱབྷེདོ པུཉྙཱབྷིསངྑཱརོ ཨཝིསེསེན ཀཱམབྷཝེ སུགཏིཡཾ ནཝནྣཾ ཝིཔཱཀཝིཉྙཱཎཱནཾ པཊིསནྡྷིཡཾ ནཱནཱཀྑཎིཀཀམྨཔཙྩཡེན ཙེཝ ཨུཔནིསྶཡཔཙྩཡེན ཙཱཏི དྭིདྷཱ པཙྩཡོ. རཱུཔཱཝཙརཔཉྩཀུསལཙེཏནཱབྷེདོ པུཉྙཱབྷིསངྑཱརོ རཱུཔབྷཝེ པཊིསནྡྷིཡཾ ཨེཝ པཉྩནྣཾ. ཝུཏྟཔྤབྷེདཀཱམཱཝཙརོ པན ཀཱམབྷཝེ སུགཏིཡཾ ཨུཔེཀྑཱསཧགཏཱཧེཏུཀམནོཝིཉྙཱཎདྷཱཏུཝཛྫཱནཾ སཏྟནྣཾ པརིཏྟཝིཔཱཀཝིཉྙཱཎཱནཾ ཝུཏྟནཡེནེཝ དྭིདྷཱ པཙྩཡོ པཝཏྟེ, ནོ པཊིསནྡྷིཡཾ. སྭེཝ རཱུཔབྷཝེ པཉྩནྣཾ ཝིཔཱཀཝིཉྙཱཎཱནཾ ཏཐེཝ པཙྩཡོ པཝཏྟེ, ནོ པཊིསནྡྷིཡཾ. ཀཱམབྷཝེ པན དུགྒཏིཡཾ ཨཊྛནྣམྤི པརིཏྟཝིཔཱཀཝིཉྙཱཎཱནཾ ཏཐེཝ པཙྩཡོ པཝཏྟེ, ནོ པཊིསནྡྷིཡཾ.

ཏཏྠ ནིརཡེ མཧཱམོགྒལླཱནཏྠེརསྶ ནརཀཙཱརིཀཱདཱིསུ ཨིཊྛཱརམྨཎསམཱཡོགེ སོ པཙྩཡོ ཧོཏི. ཏིརཙྪཱནེསུ པན ནཱགསུཔཎྞཔེཏམཧིདྡྷིཀེསུ ཙ ཨིཊྛཱརམྨཎཾ ལབྦྷཏིཡེཝ. སྭེཝ ཀཱམབྷཝེ སུགཏིཡཾ སོལ༹སནྣམྤི ཀུསལཝིཔཱཀཝིཉྙཱཎཱནཾ ཏཐེཝ པཙྩཡོ པཝཏྟེ ཙ པཊིསནྡྷིཡཉྩ. ཨཝིསེསེན པུཉྙཱབྷིསངྑཱརོ རཱུཔབྷཝེ དསནྣཾ ཝིཔཱཀཝིཉྙཱཎཱནཾ ཏཐེཝ པཙྩཡོ པཝཏྟེ ཙ པཊིསནྡྷིཡཉྩ.

དྭཱདསཱཀུསལཙེཏནཱབྷེདོ ཨཔུཉྙཱབྷིསངྑཱརོ ཀཱམབྷཝེ དུགྒཏིཡཾ ཨེཀསྶ ཝིཉྙཱཎསྶ ཏཐེཝ པཙྩཡོ པཊིསནྡྷིཡཾ, ནོ པཝཏྟེ; ཚནྣཾ པཝཏྟེ, ནོ པཊིསནྡྷིཡཾ; སཏྟནྣམྤི ཨཀུསལཝིཔཱཀཝིཉྙཱཎཱནཾ པཝཏྟེ ཙ པཊིསནྡྷིཡཉྩ ¶ . ཀཱམབྷཝེ པན སུགཏིཡཾ ཏེསཾཡེཝ སཏྟནྣཾ ཏཐེཝ པཙྩཡོ པཝཏྟེ, ནོ པཊིསནྡྷིཡཾ; རཱུཔབྷཝེ ཙཏུནྣཾ ཝིཔཱཀཝིཉྙཱཎཱནཾ ཏཐེཝ པཙྩཡོ པཝཏྟེ, ནོ པཊིསནྡྷིཡཾ. སོ ཙ ཁོ ཀཱམཱཝཙརེ ཨནིཊྛརཱུཔདསྶནསདྡསཝནཝསེན ¶ . བྲཧྨལོཀེ པན ཨནིཊྛཱ རཱུཔཱདཡོ ནཱམ ནཏྠི, ཏཐཱ ཀཱམཱཝཙརདེཝལོཀེཔི.

ཨཱནེཉྫཱབྷིསངྑཱརོ ¶ ཨརཱུཔབྷཝེ ཙཏུནྣཾ ཝིཔཱཀཝིཉྙཱཎཱནཾ ཏཐེཝ པཙྩཡོ པཝཏྟེ ཙ པཊིསནྡྷིཡཉྩ.

ཀཱམཱཝཙརཀུསལཱཀུསལཏོ པན སབྦསངྒཱཧིཀནཡེན ཝཱིསཏིཙེཏནཱབྷེདོཔི ཀཱཡསངྑཱརོ ཀཱམབྷཝེ དསནྣཾ ཝིཔཱཀཝིཉྙཱཎཱནཾ པཊིསནྡྷིཡཾ ནཱནཱཀྑཎིཀཀམྨཔཙྩཡེན ཙེཝ ཨུཔནིསྶཡཔཙྩཡེན ཙཱཏི དྭིདྷཱ པཙྩཡོ. སྭེཝ ཀཱམབྷཝེ ཏེརསནྣཾ, རཱུཔབྷཝེ ནཝནྣཾ ཝིཔཱཀཝིཉྙཱཎཱནཾ ཏཐེཝ པཙྩཡོ པཝཏྟེ, ནོ པཊིསནྡྷིཡཾ. སྭེཝ ཀཱམབྷཝེ ཏེཝཱིསཏིཡཱ ཝིཔཱཀཝིཉྙཱཎཱནཾ ཏཐེཝ པཙྩཡོ པཝཏྟེ ཙ པཊིསནྡྷིཡཉྩ. ཝཙཱིསངྑཱརེཔི ཨེསེཝ ནཡོ.

ཨཊྛཝཱིསཏིཨེཀཱུནཏིཾསཙེཏནཱབྷེདོཔི པན ཙིཏྟསངྑཱརོ ཏཱིསུ བྷཝེསུ ཨེཀཱུནཝཱིསཏིཡཱ ཝིཔཱཀཝིཉྙཱཎཱནཾ ཏཐེཝ པཙྩཡོ པཊིསནྡྷིཡཾ, ནོ པཝཏྟེ. སྭེཝ དྭཱིསུ བྷཝེསུ ཧེཊྛཱཝུཏྟཱནཾ ཏེརསནྣཉྩ ནཝནྣཉྩཱཏི དྭཱཝཱིསཏིཡཱ ཝིཔཱཀཝིཉྙཱཎཱནཾ ཏཐེཝ པཙྩཡོ པཝཏྟེ, ནོ པཊིསནྡྷིཡཾ. ཏཱིསུ པན བྷཝེསུ དྭཏྟིཾསཱཡཔི ཝིཔཱཀཝིཉྙཱཎཱནཾ ཏཐེཝ པཙྩཡོ པཝཏྟེ ཙེཝ པཊིསནྡྷིཡཉྩ. ཨེཝཾ ཏཱཝ བྷཝེསུ པཊིསནྡྷིཔཝཏྟཱིནཾ ཝསེན ཏེ སངྑཱརཱ ཡེསཾ པཙྩཡཱ, ཡཐཱ ཙ པཙྩཡཱ ཧོནྟི ཏཐཱ ཝིཛཱནིཏབྦཱ. ཨེཏེནེཝ ནཡེན ཡོནིཨཱདཱིསུཔི ཝེདིཏབྦཱ.

ཏཏྲིདཾ ཨཱདིཏོ པཊྛཱཡ མུཁམཏྟཔྤཀཱསནཾ – ཨིམེསུ ཧི སངྑཱརེསུ ཡསྨཱ པུཉྙཱབྷིསངྑཱརོ ཏཱཝ དྭཱིསུ བྷཝེསུ པཊིསནྡྷིཾ དཏྭཱ སབྦཾ ཨཏྟནོ ཝིཔཱཀཾ ཛནེཏི, ཏཐཱ ཨཎྜཛཱདཱིསུ ཙཏཱུསུ ཡོནཱིསུ, དེཝམནུསྶསངྑཱཏཱསུ དྭཱིསུ གཏཱིསུ, ནཱནཏྟཀཱཡནཱནཏྟསཉྙཱིནཱནཏྟཀཱཡཨེཀཏྟསཉྙཱིཨེཀཏྟཀཱཡནཱནཏྟསཉྙཱིཨེཀཏྟཀཱཡཨེཀཏྟསཉྙཱིསངྑཱཏཱསུ མནུསྶཱནཉྩེཝ པཋམདུཏིཡཏཏིཡཛ྄ཛྷཱནབྷཱུམཱིནཉྩ ཝསེན ཙཏཱུསུ ཝིཉྙཱཎཊྛིཏཱིསུ. ཨསཉྙསཏྟཱཝཱསེ པནེས རཱུཔམཏྟམེཝཱབྷིསངྑརོཏཱིཏི ཙཏཱུསུཡེཝ སཏྟཱཝཱསེསུ ཙ པཊིསནྡྷིཾ དཏྭཱ སབྦཾ ཨཏྟནོ ཝིཔཱཀཾ ཛནེཏི. ཏསྨཱ ཨེས ¶ ཨེཏེསུ དྭཱིསུ བྷཝེསུ, ཙཏཱུསུ ཡོནཱིསུ, དྭཱིསུ གཏཱིསུ, ཙཏཱུསུ ཝིཉྙཱཎཊྛིཏཱིསུ, ཙཏཱུསུ ¶ སཏྟཱཝཱསེསུ ཙ ཨེཀཝཱིསཏིཡཱ ཝིཔཱཀཝིཉྙཱཎཱནཾ ཝུཏྟནཡེནེཝ པཙྩཡོ ཧོཏི ཡཐཱསམྦྷཝཾ པཊིསནྡྷིཡཾ པཝཏྟེ ཙ.

ཨཔུཉྙཱབྷིསངྑཱརོ པན ཡསྨཱ ཨེཀསྨིཉྙེཝ ཀཱམབྷཝེ, ཙཏཱུསུ ཡོནཱིསུ, ཨཝསེསཱསུ ཏཱིསུ གཏཱིསུ, ནཱནཏྟཀཱཡཨེཀཏྟསཉྙཱིསངྑཱཏཱཡ ཨེཀིསྶཱ ཝིཉྙཱཎཊྛིཏིཡཱ, ཏཱདིསེཡེཝ ཙ ཨེཀསྨིཾ ¶ སཏྟཱཝཱསེ པཊིསནྡྷིཝསེན ཝིཔཙྩཏི, ཏསྨཱ ཨེས ཨེཀསྨིཾ བྷཝེ ཙཏཱུསུ ཡོནཱིསུ, ཏཱིསུ གཏཱིསུ, ཨེཀིསྶཱ ཝིཉྙཱཎཊྛིཏིཡཱ, ཨེཀམྷི ཙ སཏྟཱཝཱསེ སཏྟནྣཾ ཝིཔཱཀཝིཉྙཱཎཱནཾ ཝུཏྟནཡེནེཝ པཙྩཡོ ཧོཏི པཊིསནྡྷིཡཾ པཝཏྟེ ཙ.

ཨཱནེཉྫཱབྷིསངྑཱརོ པན ཡསྨཱ ཨེཀསྨིཾ ཨརཱུཔབྷཝེ, ཨེཀིསྶཱ ཨོཔཔཱཏིཀཡོནིཡཱ, ཨེཀིསྶཱ དེཝགཏིཡཱ, ཨཱཀཱསཱནཉྩཱཡཏནཱདཱིསུ ཏཱིསུ ཝིཉྙཱཎཊྛིཏཱིསུ, ཨཱཀཱསཱནཉྩཱཡཏནཱདཱིསུ ཙ ཙཏཱུསུ སཏྟཱཝཱསེསུ པཊིསནྡྷིཝསེན ཝིཔཙྩཏི, ཏསྨཱ ཨེས ཨེཀསྨིཾཡེཝ བྷཝེ, ཨེཀིསྶཱ ཡོནིཡཱ, ཨེཀིསྶཱ དེཝགཏིཡཱ, ཏཱིསུ ཝིཉྙཱཎཊྛིཏཱིསུ ཙཏཱུསུ སཏྟཱཝཱསེསུ, ཙཏུནྣཾ ཝིཉྙཱཎཱནཾ ཝུཏྟནཡེནེཝ པཙྩཡོ ཧོཏི པཊིསནྡྷིཡཾ པཝཏྟེ ཙ.

ཀཱཡསངྑཱརོཔི ཡསྨཱ ཨེཀསྨིཾ ཀཱམབྷཝེ, ཙཏཱུསུ ཡོནཱིསུ, པཉྩསུ གཏཱིསུ, དྭཱིསུ ཝིཉྙཱཎཊྛིཏཱིསུ, དྭཱིསུ ཙ སཏྟཱཝཱསེསུ པཊིསནྡྷིཾ དཏྭཱ སབྦཾ ཨཏྟནོ ཝིཔཱཀཾ ཛནེཏི, ཏསྨཱ ཨེས ཨེཀསྨིཾ བྷཝེ, ཙཏཱུསུ ཡོནཱིསུ, པཉྩསུ གཏཱིསུ, དྭཱིསུ ཝིཉྙཱཎཊྛིཏཱིསུ, དྭཱིསུ ཙ སཏྟཱཝཱསེསུ ཏེཝཱིསཏིཡཱ ཝིཔཱཀཝིཉྙཱཎཱནཾ ཏཐེཝ པཙྩཡོ པཊིསནྡྷིཡཾ པཝཏྟེ ཙ. ཝཙཱིསངྑཱརེཔི ཨེསེཝ ནཡོ.

ཙིཏྟསངྑཱརོ པན ཡསྨཱ ཨེཀཾ སཏྟཱཝཱསཾ ཋཔེཏྭཱ ན ཀཏྠཙི ན ཝིཔཙྩཏི, ཏསྨཱ ཨེས ཏཱིསུ བྷཝེསུ, ཙཏཱུསུ ཡོནཱིསུ, པཉྩསུ གཏཱིསུ, སཏྟསུ ཝིཉྙཱཎཊྛིཏཱིསུ, ཨཊྛསུ སཏྟཱཝཱསེསུ ཡཐཱཡོགཾ དྭཏྟིཾསཱཡ ཝིཔཱཀཝིཉྙཱཎཱནཾ ཏཐེཝ པཙྩཡོ པཊིསནྡྷིཡཾ པཝཏྟེ ཙ. ཨཝིཉྙཱཎཀེ པན སཏྟཱཝཱསེ སངྑཱརཔཙྩཡཱ ཝིཉྙཱཎཾ ནཏྠི.

ཨཔིཙ པུཉྙཱབྷིསངྑཱརོ ཨསཉྙསཏྟེསུ ཀཊཏྟཱརཱུཔཱནཾ ནཱནཱཀྑཎིཀཀམྨཔཙྩཡེན པཙྩཡོཏི. ཨེཝཾ –

པཊིསནྡྷིཔཝཏྟཱིནཾ ¶ , ཝསེནེཏེ བྷཝཱདིསུ;

ཝིཛཱནིཏབྦཱ སངྑཱརཱ, ཡཐཱ ཡེསཉྩ པཙྩཡཱཏི.

སངྑཱརཔཙྩཡཱ ཝིཉྙཱཎཔདནིདྡེསོ.

ནཱམརཱུཔཔདནིདྡེསོ

༢༢༨. ཝིཉྙཱཎཔཙྩཡཱ ¶ ¶ ནཱམརཱུཔནིདྡེསེ –

དེསནཱབྷེདཏོ སབྦ-བྷཝཱདཱིསུ པཝཏྟིཏོ;

སངྒཧཱ པཙྩཡནཡཱ, ཝིཉྙཱཏབྦོ ཝིནིཙྪཡོ.

‘དེསནཱབྷེདཏོ’ཏི ‘‘ཏཏྠ ཀཏམཾ རཱུཔཾ? ཙཏྟཱརོ ཙ མཧཱབྷཱུཏཱ ཙཏུནྣཉྩ མཧཱབྷཱུཏཱནཾ ཨུཔཱདཱཡ རཱུཔ’’ནྟི (སཾ. ནི. ༢.༢; མ. ནི. ༡.༡༠༠) ཨེཝཾ ཏཱཝ སུཏྟནྟེ ཙ ཨིདྷ རཱུཔཔདསྶ ཨབྷེདཏོ ཨེཀསདིསཱ དེསནཱ ཀཏཱ; ནཱམཔདསྶ པན བྷེདཏོ.

སུཏྟནྟསྨིཉྷི ‘‘ཏཏྠ ཀཏམཾ ནཱམཾ? ཝེདནཱ སཉྙཱ ཙེཏནཱ ཕསྶོ མནསིཀཱརོ’’ཏི ཝུཏྟཾ. ཨིདྷ ‘‘ཝེདནཱཀྑནྡྷོ སཉྙཱཀྑནྡྷོ སངྑཱརཀྑནྡྷོ’’ཏི. ཏཏྠ ཧི ཡམྤི ཙཀྑུཝིཉྙཱཎཔཙྩཡཱ ནཱམཾ ཨུཔྤཛྫཏི, ཨུཔྤནྣཉྩ ཙིཏྟསྶ ཋིཏི ཨརཱུཔཱིནཾ དྷམྨཱནཾ ཨཱཡཱུཏི ཨེཝཾ ཨཉྙདྷམྨསནྣིསྶཡེན ཨགྒཧེཏབྦཏོ པཱཀཊཾ, ཏཾ དསྶེནྟོ ཙེཏནཱཕསྶམནསིཀཱརཝསེན སངྑཱརཀྑནྡྷཾ ཏིདྷཱ བྷིནྡིཏྭཱ དྭཱིཧི ཁནྡྷེཧི སདྡྷིཾ དེསེསི. ཨིདྷ པན ཏཏྠ ཝུཏྟཉྩ ཨཝུཏྟཉྩ སབྦཾ ནཱམཾ སངྒཎྷནྟོ ‘‘ཏཡོ ཁནྡྷཱ – ཝེདནཱཀྑནྡྷོ སཉྙཱཀྑནྡྷོ སངྑཱརཀྑནྡྷོ’’ཏི ཨཱཧ.

ཀིཾ པན ཨིམེ ཏཡོ ཁནྡྷཱཝ ནཱམཾ, ཝིཉྙཱཎཾ ནཱམཾ ནཱམ ན ཧོཏཱིཏི? ནོ ན ཧོཏི. ཏསྨིཾ པན ཝིཉྙཱཎེ གཡ྄ཧམཱནེ ནཱམཝིཉྙཱཎསྶ ཙ པཙྩཡཝིཉྙཱཎསྶ ཙཱཏི དྭིནྣཾ ཝིཉྙཱཎཱནཾ སཧབྷཱཝོ ཨཱཔཛྫཏི. ཏསྨཱ ཝིཉྙཱཎཾ པཙྩཡཊྛཱནེ ཋཔེཏྭཱ པཙྩཡནིབྦཏྟཾ ནཱམཾ དསྶེཏུཾ ཏཡོཝ ཁནྡྷཱ ཝུཏྟཱཏི. ཨེཝཾ ཏཱཝ ‘དེསནཱབྷེདཏོ’ ཝིཉྙཱཏབྦོ ཝིནིཙྪཡོ.

‘སབྦབྷཝཱདཱིསུ པཝཏྟིཏོ’ཏི ཨེཏྠ པན ནཱམཾ ཨེཀཾ སཏྟཱཝཱསཾ ཋཔེཏྭཱ སབྦབྷཝཡོནིགཏིཝིཉྙཱཎཊྛིཏིསེསསཏྟཱཝཱསེསུ པཝཏྟཏི. རཱུཔཾ ¶ དྭཱིསུ བྷཝེསུ, ཙཏཱུསུ ཡོནཱིསུ, པཉྩསུ གཏཱིསུ, པུརིམཱསུ ཙཏཱུསུ ཝིཉྙཱཎཊྛིཏཱིསུ, པཉྩསུ ཙ སཏྟཱཝཱསེསུ པཝཏྟཏི. ཨེཝཾ པཝཏྟམཱནེ ཙེཏསྨིཾ ནཱམརཱུཔེ ཡསྨཱ ཨབྷཱཝཀགབྦྷསེཡྻཀཱནཾ ཨཎྜཛཱནཉྩ པཊིསནྡྷིཀྑཎེ ཝཏྠུཀཱཡཝསེན རཱུཔཏོ དྭེ སནྟཏིསཱིསཱནི ཏཡོ ཙ ཨརཱུཔིནོ ཁནྡྷཱ པཱཏུབྷཝནྟི, ཏསྨཱ ཏེསཾ ཝིཏྠཱརེན ¶ རཱུཔརཱུཔཏོ ཝཱིསཏི དྷམྨཱ ཏཡོ ཙ ཨརཱུཔིནོ ཁནྡྷཱཏི ¶ ཨེཏེ ཏེཝཱིསཏི དྷམྨཱ ཝིཉྙཱཎཔཙྩཡཱ ནཱམརཱུཔནྟི ཝེདིཏབྦཱ. ཨགྒཧིཏགྒཧཎེན པན ཨེཀསནྟཏིསཱིསཏོ ནཝ རཱུཔདྷམྨེ ཨཔནེཏྭཱ ཙུདྡས, སབྷཱཝཀཱནཾ བྷཱཝདསཀཾ པཀྑིཔིཏྭཱ ཏེཏྟིཾས. ཏེསམྤི ཨགཧིཏགྒཧཎེན སནྟཏིསཱིསདྭཡཏོ ཨཊྛཱརས རཱུཔདྷམྨེ ཨཔནེཏྭཱ པནྣརས.

ཡསྨཱ ཙ ཨོཔཔཱཏིཀསཏྟེསུ བྲཧྨཀཱཡིཀཱདཱིནཾ པཊིསནྡྷིཀྑཎེ ཙཀྑུསོཏཝཏྠུདསཀཱནཾ ཛཱིཝིཏིནྡྲིཡནཝཀསྶ ཙ ཝསེན རཱུཔརཱུཔཏོ ཙཏྟཱརི སནྟཏིསཱིསཱནི ཏཡོ ཙ ཨརཱུཔིནོ ཁནྡྷཱ པཱཏུབྷཝནྟི, ཏསྨཱ ཏེསཾ ཝིཏྠཱརེན རཱུཔརཱུཔཏོ ཨེཀཱུནཙཏྟཱལཱིས དྷམྨཱ ཏཡོ ཙ ཨརཱུཔིནོ ཁནྡྷཱཏི ཨེཏེ དྭཱཙཏྟཱལཱིས དྷམྨཱ ཝིཉྙཱཎཔཙྩཡཱ ནཱམརཱུཔནྟི ཝེདིཏབྦཱ. ཨགཧིཏགྒཧཎེན པན སནྟཏིསཱིསཏྟཡཏོ སཏྟཝཱིསཏི དྷམྨེ ཨཔནེཏྭཱ པནྣརས.

ཀཱམབྷཝེ པན ཡསྨཱ སེསཨོཔཔཱཏིཀཱནཾ ཝཱ སཾསེདཛཱནཾ ཝཱ སབྷཱཝཀཔརིཔུཎྞཱཡཏནཱནཾ པཊིསནྡྷིཀྑཎེ རཱུཔརཱུཔཏོ སཏྟ སནྟཏིསཱིསཱནི ཏཡོ ཙ ཨརཱུཔིནོ ཁནྡྷཱ པཱཏུབྷཝནྟི, ཏསྨཱ ཏེསཾ ཝིཏྠཱརེན རཱུཔརཱུཔཏོ སཏྟཏི དྷམྨཱ ཏཡོ ཙ ཨརཱུཔིནོ ཁནྡྷཱཏི ཨེཏེ ཏེསཏྟཏི དྷམྨཱ ཝིཉྙཱཎཔཙྩཡཱ ནཱམརཱུཔནྟི ཝེདིཏབྦཱ. ཨགྒཧིཏགྒཧཎེན པན སནྟཏིསཱིསཚཀྐཏོ ཙཏུཔཉྙཱས དྷམྨེ ཨཔནེཏྭཱ ཨེཀཱུནཝཱིསཏི. ཨེས ཨུཀྐཾསཏོ. ཨཝཀཾསེན པན ཏཾཏཾརཱུཔསནྟཏིསཱིསཝིཀལཱནཾ ཏསྶ ཏསྶ ཝསེན ཧཱཔེཏྭཱ ཧཱཔེཏྭཱ སངྑེཔཏོ ཙ ཝིཏྠཱརཏོ ཙ པཊིསནྡྷིཝིཉྙཱཎཔཙྩཡཱ ནཱམརཱུཔསངྑཱཏཱ ཝེདིཏབྦཱ. ཨརཱུཔཱིནཾ པན ཏཡོཝ ཨརཱུཔིནོ ཁནྡྷཱ. ཨསཉྙཱིནཾ རཱུཔཏོ ཛཱིཝིཏིནྡྲིཡནཝཀམེཝཱཏི. ཨེས ཏཱཝ པཊིསནྡྷིཡཾ ནཡོ.

པཝཏྟེ པན སབྦཏྠ རཱུཔཔྤཝཏྟིདེསེ པཊིསནྡྷིཙིཏྟསྶ ཋིཏིཀྑཎེ པཊིསནྡྷིཙིཏྟེན སཧ པཝཏྟཨུཏུཏོ ཨུཏུསམུཊྛཱནཾ སུདྡྷཊྛཀཾ པཱཏུབྷཝཏི. པཊིསནྡྷིཙིཏྟཾ པན རཱུཔཾ ན སམུཊྛཱཔེཏི. ཏཉྷི ཡཐཱ པཔཱཏེ པཏིཏཔུརིསོ པརསྶ ¶ པཙྩཡོ ཧོཏུཾ ན སཀྐོཏི, ཨེཝཾ ཝཏྠུདུབྦལཏཱཡ དུབྦལཏྟཱ རཱུཔཾ སམུཊྛཱཔེཏུཾ ན སཀྐོཏི. པཊིསནྡྷིཙིཏྟཏོ པན ཨུདྡྷཾ པཋམབྷཝངྒཏོ པབྷུཏི ཙིཏྟསམུཊྛཱནཀཾ ¶ སུདྡྷཊྛཀཾ. སདྡཔཱཏུབྷཱཝཀཱལེ པཊིསནྡྷིཀྑཎཏོ ཨུདྡྷཾ པཝཏྟཨུཏུཏོ ཙེཝ ཙིཏྟཏོ ཙ སདྡནཝཀཾ. ཡེ པན ཀབལི༹ཀཱརཱཧཱརཱུཔཛཱིཝིནོ གབྦྷསེཡྻཀསཏྟཱ ཏེསཾ –

‘‘ཡཉྩསྶ ¶ བྷུཉྫཏཱི མཱཏཱ, ཨནྣཾ པཱནཉྩ བྷོཛནཾ;

ཏེན སོ ཏཏྠ ཡཱཔེཏི, མཱཏུཀུཙྪིགཏོ ནརོ’’ཏི. (སཾ. ནི. ༡.༢༣༥);

ཝཙནཏོ མཱཏརཱ ཨཛ྄ཛྷོཧརིཏཱཧཱརེན ཨནུགཏེ སརཱིརེ, ཨོཔཔཱཏིཀཱནཾ སབྦཔཋམཾ ཨཏྟནོ མུཁགཏཾ ཁེལ༹ཾ ཨཛ྄ཛྷོཧརཎཀཱལེ ཨཱཧཱརསམུཊྛཱནཾ སུདྡྷཊྛཀནྟི ཨིདཾ ཨཱཧཱརསམུཊྛཱནསྶ སུདྡྷཊྛཀསྶ ཨུཏུཙིཏྟསམུཊྛཱནཱནཉྩ ཨུཀྐཾསཏོ དྭིནྣཾ ནཝཀཱནཾ ཝསེན ཚབྦཱིསཏིཝིདྷཾ, པུབྦེ ཨེཀེཀཙིཏྟཀྑཎེ ཏིཀྑཏྟུཾ ཨུཔྤཛྫམཱནཾ ཝུཏྟཾ ཀམྨསམུཊྛཱནཾ སཏྟཏིཝིདྷནྟི ཚནྣཝུཏིཝིདྷཾ རཱུཔཾ ཏཡོ ཙ ཨརཱུཔིནོ ཁནྡྷཱཏི སམཱསཏོ ནཝནཝུཏི དྷམྨཱ. ཡསྨཱ ཝཱསདྡོ ཨནིཡཏོ ཀདཱཙིདེཝ པཱཏུབྷཱཝཏོ, ཏསྨཱ དུཝིདྷམྤི ཏཾ ཨཔནེཏྭཱ ཨིམེ སཏྟནཝུཏི དྷམྨཱ ཡཐཱསམྦྷཝཾ སབྦསཏྟཱནཾ ཝིཉྙཱཎཔཙྩཡཱ ནཱམརཱུཔནྟི ཝེདིཏབྦཱ. ཏེསཉྷི སུཏྟཱནམྤི པམཏྟཱནམྤི ཙརནྟཱནམྤི ཁཱདནྟཱནམྤི པིཝནྟཱནམྤི དིཝཱ ཙ རཏྟིཉྩ ཨེཏེ ཝིཉྙཱཎཔཙྩཡཱ པཝཏྟནྟི. ཏཉྩ ཏེསཾ ཝིཉྙཱཎཔཙྩཡབྷཱཝཾ པརཏོ ཝཎྞཡིསྶཱམ.

ཡཾ པནེཏམེཏྠ ཀམྨཛརཱུཔཾ ཏཾ བྷཝཡོནིགཏིཝིཉྙཱཎཊྛིཏིསཏྟཱཝཱསེསུ སབྦཔཋམཾ པཏིཊྛཧནྟམྤི ཏིསམུཊྛཱནིཀརཱུཔེན ཨནུཔཏྠདྡྷཾ ན སཀྐོཏི སཎྛཱཏུཾ, ནཱཔི ཏིསམུཊྛཱནིཀཾ ཏེན ཨནུཔཏྠདྡྷཾ. ཨཐ ཁོ ཝཱཏབྦྷཱཧཏཱཔི ཙཏུདྡིསཝཝཏྠཱཔིཏཱ ནལ༹ཀལཱཔིཡོ ཝིཡ, ཨཱུམིཝེགབྦྷཱཧཏཱཔི མཧཱསམུདྡེ ཀཏྠཙི ལདྡྷཔཏིཊྛཱ བྷིནྣཝཱཧནིཀཱ ཝིཡ ཙ ཨཉྙམཉྙཱུཔཏྠདྡྷཱནེཝེཏཱནི ཨཔཏམཱནཱནི སཎྛཧིཏྭཱ ཨེཀམྤི ཝསྶཾ དྭེཔི ཝསྶཱནི…པེ… ཝསྶསཏམྤི ཡཱཝ ཏེསཾ སཏྟཱནཾ ཨཱཡུཀྑཡོ ཝཱ པུཉྙཀྑཡོ ཝཱ ཏཱཝ པཝཏྟནྟཱིཏི. ཨེཝཾ ‘སབྦབྷཝཱདཱིསུ པཝཏྟིཏོ’པེཏྠ ཝིཉྙཱཏབྦོ ཝིནིཙྪཡོ.

‘སངྒཧཱ’ཏི ¶ ¶ ཨེཏྠ ཙ ཡཾ ཨཱརུཔྤེ པཝཏྟིཔཊིསནྡྷཱིསུ པཉྩཝོཀཱརབྷཝེ ཙ པཝཏྟིཡཱ ཝིཉྙཱཎཔཙྩཡཱ ནཱམམེཝ, ཡཉྩ ཨསཉྙཱིསུ སབྦཏྠ པཉྩཝོཀཱརབྷཝེ ཙ པཝཏྟིཡཱ ཝིཉྙཱཎཔཙྩཡཱ རཱུཔམེཝ, ཡཉྩ པཉྩཝོཀཱརབྷཝེ སབྦཏྠ ཝིཉྙཱཎཔཙྩཡཱ ནཱམརཱུཔཾ, ཏཾ སབྦཾ ནཱམཉྩ རཱུཔཉྩ ནཱམརཱུཔཉྩ ནཱམརཱུཔནྟི ཨེཝཾ ཨེཀདེསསརཱུཔེཀསེསནཡེན སངྒཧེཏྭཱ ཝིཉྙཱཎཔཙྩཡཱ ནཱམརཱུཔནྟི ཝེདིཏབྦཾ. ཨསཉྙཱིསུ ཝིཉྙཱཎཱབྷཱཝཱ ཨཡུཏྟནྟི ཙེ ནཱཡུཏྟཾ. ཨིདཉྷི –

ནཱམརཱུཔསྶ ¶ ཡཾ ཧེཏུ, ཝིཉྙཱཎཾ ཏཾ དྭིདྷཱ མཏཾ;

ཝིཔཱཀམཝིཔཱཀཉྩ, ཡུཏྟམེཝ ཡཏོ ཨིདཾ.

ཡཉྷི ནཱམརཱུཔསྶ ཧེཏུ ཝིཉྙཱཎཾ ཏཾ ཝིཔཱཀཱཝིཔཱཀབྷེདཏོ དྭིདྷཱ མཏཾ. ཨིདཉྩ ཨསཉྙསཏྟེསུ ཀམྨསམུཊྛཱནཏྟཱ པཉྩཝོཀཱརབྷཝེ པཝཏྟཨབྷིསངྑཱརཝིཉྙཱཎཔཙྩཡཱ རཱུཔཾ, ཏཐཱ པཉྩཝོཀཱརེ པཝཏྟིཡཾ ཀུསལཱདིཙིཏྟཀྑཎེ ཀམྨསམུཊྛཱནནྟི ཡུཏྟམེཝ ཨིདཾ. ཨེཝཾ ‘སངྒཧཏོ’པེཏྠ ཝིཉྙཱཏབྦོ ཝིནིཙྪཡོ.

‘པཙྩཡནཡཱ’ཏི ཨེཏྠ ཧི –

ནཱམསྶ པཱཀཝིཉྙཱཎཾ, ནཝདྷཱ ཧོཏི པཙྩཡོ;

ཝཏྠུརཱུཔསྶ ནཝདྷཱ, སེསརཱུཔསྶ ཨཊྛདྷཱ.

ཨབྷིསངྑཱརཝིཉྙཱཎཾ, ཧོཏི རཱུཔསྶ ཨེཀདྷཱ;

ཏདཉྙཾ པན ཝིཉྙཱཎཾ, ཏསྶ ཏསྶ ཡཐཱརཧཾ.

ཡཉྷེཏཾ པཊིསནྡྷིཡཾ པཝཏྟིཡཾ ཝཱ ཝིཔཱཀསངྑཱཏཾ ནཱམཾ, ཏསྶ རཱུཔམིསྶསྶ ཝཱ རཱུཔཨམིསྶསྶ ཝཱ པཊིསནྡྷིཀཾ ཝཱ ཨཉྙཾ ཝཱ ཝིཔཱཀཝིཉྙཱཎཾ སཧཛཱཏཨཉྙམཉྙནིསྶཡསམྤཡུཏྟཝིཔཱཀཨཱཧཱརཨིནྡྲིཡཨཏྠིཨཝིགཏཔཙྩཡེཧི ནཝདྷཱ པཙྩཡོ ཧོཏི. ཝཏྠུརཱུཔསྶ པཊིསནྡྷིཡཾ སཧཛཱཏཨཉྙམཉྙནིསྶཡཝིཔཱཀཨཱཧཱརཨིནྡྲིཡཝིཔྤཡུཏྟཨཏྠིཨཝིགཏཔཙྩཡེཧི ནཝདྷཱ པཙྩཡོ ཧོཏི. ཋཔེཏྭཱ པན ཝཏྠུརཱུཔཾ སེསརཱུཔསྶ ཨིམེསུ ནཝསུ ཨཉྙམཉྙཔཙྩཡཾ ཨཔནེཏྭཱ སེསེཧི ཨཊྛཧི པཙྩཡེཧི པཙྩཡོ ཧོཏི. ཨབྷིསངྑཱརཝིཉྙཱཎཾ པན ཨསཉྙསཏྟརཱུཔསྶ ཝཱ པཉྩཝོཀཱརེ ཝཱ ཀམྨཛསྶ སུཏྟནྟིཀཔརིཡཱཡེན ཨུཔནིསྶཡཝསེན ¶ ཨེཀདྷཱཝ པཙྩཡོ ཧོཏི. ཨཝསེསཾ པཋམབྷཝངྒཏོ པབྷུཏི སབྦམྤི ཝིཉྙཱཎཾ ཏསྶ ཏསྶ ནཱམརཱུཔསྶ ཡཐཱརཧཾ ¶ པཙྩཡོ ཧོཏཱིཏི ཝེདིཏབྦཾ. ཝིཏྠཱརཏོ པན ཏསྶ པཙྩཡནཡེ དསྶིཡམཱནེ སབྦཱཔི པཊྛཱནཀཐཱ ཝིཏྠཱརེཏབྦཱ ཧོཏཱིཏི ན ཏཾ ཨཱརབྷཱམ.

ཏཏྠ སིཡཱ – ཀཐཾ པནེཏཾ ཛཱནིཏབྦཾ ‘‘པཊིསནྡྷིནཱམརཱུཔཾ ཝིཉྙཱཎཔཙྩཡཱ ཧོཏཱི’’ཏི? སུཏྟཏོ ¶ ཡུཏྟིཏོ ཙ. སུཏྟེ ཧི ‘‘ཙིཏྟཱནུཔརིཝཏྟིནོ དྷམྨཱ’’ཏིཨཱདིནཱ (དྷ. ས. དུཀམཱཏིཀཱ ༦༢) ནཡེན བཧུདྷཱ ཝེདནཱདཱིནཾ ཝིཉྙཱཎཔཙྩཡཏཱ སིདྡྷཱ. ཡུཏྟིཏོ པན –

ཙིཏྟཛེན ཧི རཱུཔེན, ཨིདྷ དིཊྛེན སིཛ྄ཛྷཏི;

ཨདིཊྛསྶཱཔི རཱུཔསྶ, ཝིཉྙཱཎཾ པཙྩཡོ ཨིཏི.

ཙིཏྟེ ཧི པསནྣེ ཨཔྤསནྣེ ཝཱ ཏདནུརཱུཔཱནི རཱུཔཱནི ཨུཔྤཛྫམཱནཱནི དིཊྛཱནི. དིཊྛེན ཙ ཨདིཊྛསྶ ཨནུམཱནཾ ཧོཏཱིཏི ཨིམིནཱ ཨིདྷ དིཊྛེན ཙིཏྟཛརཱུཔེན ཨདིཊྛསྶཱཔི པཊིསནྡྷིརཱུཔསྶ ཝིཉྙཱཎཾ པཙྩཡོ ཧོཏཱིཏི ཛཱནིཏབྦམེཏཾ. ཀམྨསམུཊྛཱནསྶཱཔི ཧི ཏསྶ ཙིཏྟསམུཊྛཱནསྶེཝ ཝིཉྙཱཎཔཙྩཡཏཱ པཊྛཱནེ (པཊྛཱ. ༡.༡.༥༣, ༤༡༩) ཨཱགཏཱཏི. ཨེཝཾ པཙྩཡནཡཏོ པེཏྠ ཝིཉྙཱཏབྦོ ཝིནིཙྪཡོ.

ཨེཏྠ ཙ ‘‘ཝིཉྙཱཎཔཙྩཡཱ ནཱམརཱུཔ’’ནྟི བྷཱསམཱནེན བྷགཝཏཱ ཡསྨཱ ཨུཔཔརིཀྑམཱནཱནཾ པཎྜིཏཱནཾ པརམཏྠཏོ ནཱམརཱུཔམཏྟམེཝ པཝཏྟམཱནཾ དིསྶཏི, ན སཏྟོ, ན པོསོ; ཏསྨཱ ཨཔྤཊིཝཏྟིཡཾ སམཎེན ཝཱ བྲཱཧྨཎེན ཝཱ དེཝེན ཝཱ མཱརེན ཝཱ བྲཧྨུནཱ ཝཱ ཀེནཙི ཝཱ ལོཀསྨིཾ ཨནུཏྟརཾ དྷམྨཙཀྐཾ པཝཏྟིཏཾ ཧོཏཱིཏི.

ཝིཉྙཱཎཔཙྩཡཱ ནཱམརཱུཔཔདནིདྡེསོ.

སལཱ༹ཡཏནཔདནིདྡེསོ

༢༢༩. ནཱམརཱུཔཔཙྩཡཱ སལཱ༹ཡཏནནིདྡེསེ –

ནཱམཾ ཁནྡྷཏྟཡཾ རཱུཔཾ, བྷཱུཏཝཏྠཱདིཀཾ མཏཾ;

ཀཏེཀསེསཾ ཏཾ ཏསྶ, ཏཱདིསསྶེཝ པཙྩཡོ.

ཡཉྷེཏཾ ¶ ¶ སལཱ༹ཡཏནསྶ པཙྩཡབྷཱུཏཾ ནཱམརཱུཔཾ, ཏཏྠ ནཱམནྟི ཝེདནཱདིཀྑནྡྷཏྟཡཾ, རཱུཔཾ པན སཀསནྟཏིཔརིཡཱཔནྣཾ ནིཡམཏོ ཙཏྟཱརི བྷཱུཏཱནི ཚ ཝཏྠཱུནི ¶ ཛཱིཝིཏིནྡྲིཡནྟི ཨེཝཾ བྷཱུཏཝཏྠཱདིཀཾ མཏནྟི ཝེདིཏབྦཾ. ཏཾ པན ‘‘ནཱམཉྩ རཱུཔཉྩ ནཱམརཱུཔཉྩ ནཱམརཱུཔ’’ནྟི ཨེཝཾ ཀཏེཀསེསཾ ‘‘ཚཊྛཱཡཏནཉྩ སལཱ༹ཡཏནཉྩ སལཱ༹ཡཏན’’ནྟི ཨེཝཾ ཀཏེཀསེསསྶེཝ སལཱ༹ཡཏནསྶ པཙྩཡོཏི ཝེདིཏབྦཾ. ཀསྨཱ? ཡསྨཱ ཨཱརུཔྤེ ནཱམམེཝ པཙྩཡོ. ཏཉྩ ཚཊྛཱཡཏནསྶེཝ, ན ཨཉྙསྶ. ‘‘ནཱམཔཙྩཡཱ ཚཊྛཱཡཏན’’ནྟི ཧི ཨབྱཱཀཏཝཱརེ ཝཀྑཏི. ཨིདྷ སངྒཧིཏམེཝ ཧི ཏཏྠ ཝིབྷཏྟནྟི ཝེདིཏབྦཾ.

ཏཏྠ སིཡཱ – ཀཐཾ པནེཏཾ ཛཱནིཏབྦཾ ‘‘ནཱམརཱུཔཾ སལཱ༹ཡཏནསྶ པཙྩཡོ’’ཏི? ནཱམརཱུཔབྷཱཝེ བྷཱཝཏོ. ཏསྶ ཏསྶ ཧི ནཱམསྶ རཱུཔསྶ ཙ བྷཱཝེ ཏཾ ཏཾ ཨཱཡཏནཾ ཧོཏི, ན ཨཉྙཐཱ. སཱ པནསྶ ཏབྦྷཱཝབྷཱཝཱིབྷཱཝཏཱ པཙྩཡནཡསྨིཉྙེཝ ཨཱཝིབྷཝིསྶཏི. ཏསྨཱ –

པཊིསནྡྷིཡཾ པཝཏྟེ ཝཱ, ཧོཏི ཡཾ ཡསྶ པཙྩཡོ;

ཡཐཱ ཙ པཙྩཡོ ཧོཏི, ཏཐཱ ནེཡྻཾ ཝིབྷཱཝིནཱ.

ཏཏྲཱཡཾ ཨཏྠདཱིཔནཱ –

ནཱམམེཝ ཧི ཨཱརུཔྤེ, པཊིསནྡྷིཔཝཏྟིསུ;

པཙྩཡོ སཏྟདྷཱ ཚཊྛཱ, ཧོཏི ཏཾ ཨཝཀཾསཏོ.

ཀཐཾ? ‘པཊིསནྡྷིཡཾ’ ཏཱཝ ཨཝཀཾསཏོ སཧཛཱཏཨཉྙམཉྙནིསྶཡསམྤཡུཏྟཝིཔཱཀཨཏྠིཨཝིགཏཔཙྩཡེཧི སཏྟདྷཱ ནཱམཾ ཚཊྛཱཡཏནསྶ པཙྩཡོ ཧོཏི. ཀིཉྩི པནེཏྠ ཧེཏུཔཙྩཡེན, ཀིཉྩི ཨཱཧཱརཔཙྩཡེནཱཏི ཨེཝཾ ཨཉྙཐཱཔི པཙྩཡོ ཧོཏི. ཏསྶ ཝསེན ཨུཀྐཾསཱཝཀཾསོ ཝེདིཏབྦོ.

‘པཝཏྟེ’པི ཝིཔཱཀཾ ཝུཏྟནཡེནེཝ པཙྩཡོ ཧོཏི. ཨིཏརཾ པན ཨཝཀཾསཏོ ཝུཏྟཔྤཀཱརེསུ པཙྩཡེསུ ཝིཔཱཀཔཙྩཡཝཛྫེཧི ཚཧི པཙྩཡོ ཧོཏི. ཀིཉྩི པནེཏྠ ཧེཏུཔཙྩཡེན, ཀིཉྩི ཨཱཧཱརཔཙྩཡེནཱཏི ཨེཝཾ ཨཉྙཐཱཔི པཙྩཡོ ཧོཏི. ཏསྶ ཝསེན ཨུཀྐཾསཱཝཀཾསོ ཝེདིཏབྦོ.

ཨཉྙསྨིམྤི ¶ བྷཝེ ནཱམཾ, ཏཐེཝ པཊིསནྡྷིཡཾ;

ཚཊྛསྶ ཨིཏརེསཾ ཏཾ, ཚཧཱཀཱརེཧི པཙྩཡོ.

ཨཱརུཔྤཏོ ¶ ཧི ཨཉྙསྨིམྤི པཉྩཝོཀཱརབྷཝེ ཏཾ ཝིཔཱཀནཱམཾ ཧདཡཝཏྠུནོ སཧཱཡཾ ཧུཏྭཱ ཚཊྛསྶ མནཱཡཏནསྶ ¶ ཡཐཱ ཨཱརུཔྤེ ཝུཏྟཾ ཏཐེཝ ཨཝཀཾསཏོ སཏྟདྷཱ པཙྩཡོ ཧོཏི. ཨིཏརེསཾ པནེཏཾ པཉྩནྣཾ ཙཀྑཱཡཏནཱདཱིནཾ ཙཏུམཧཱབྷཱུཏསཧཱཡཾ ཧུཏྭཱ སཧཛཱཏ ནིསྶཡཝིཔཱཀཝིཔྤཡུཏྟཨཏྠིཨཝིགཏཝསེན ཚཧཱཀཱརེཧི པཙྩཡོ ཧོཏི. ཀིཉྩི པནེཏྠ ཧེཏུཔཙྩཡེན, ཀིཉྩི ཨཱཧཱརཔཙྩཡེནཱཏི ཨེཝཾ ཨཉྙཐཱཔི པཙྩཡོ ཧོཏི. ཏསྶ ཝསེན ཨུཀྐཾསཱཝཀཾསོ ཝེདིཏབྦོ.

པཝཏྟེཔི ཏཐཱ ཧོཏི, པཱཀཾ པཱཀསྶ པཙྩཡོ;

ཨཔཱཀཾ ཨཝིཔཱཀསྶ, ཚདྷཱ ཚཊྛསྶ པཙྩཡོ.

པཝཏྟེཔི ཧི པཉྩཝོཀཱརབྷཝེ ཡཐཱ པཊིསནྡྷིཡཾ, ཏཐེཝ ཝིཔཱཀནཱམཾ ཝིཔཱཀསྶ ཚཊྛཱཡཏནསྶ ཨཝཀཾསཏོ སཏྟདྷཱ པཙྩཡོ ཧོཏི. ཨཝིཔཱཀཾ པན ཨཝིཔཱཀསྶ ཚཊྛསྶ ཨཝཀཾསཏོཝ ཏཏོ ཝིཔཱཀཔཙྩཡཾ ཨཔནེཏྭཱ ཚདྷཱཝ པཙྩཡོ ཧོཏི. ཝུཏྟནཡེནེཝ པནེཏྠ ཨུཀྐཾསཱཝཀཾསོ ཝེདིཏབྦོ.

ཏཏྠེཝ སེསཔཉྩནྣཾ, ཝིཔཱཀཾ པཙྩཡོ བྷཝེ;

ཙཏུདྷཱ ཨཝིཔཱཀམྤི, ཨེཝམེཝ པཀཱསིཏཾ.

ཏཏྠེཝ ཧི པཝཏྟེ སེསཱནཾ ཙཀྑཱཡཏནཱདཱིནཾ པཉྩནྣཾ ཙཀྑུཔྤསཱདཱདིཝཏྠུཀམྤི ཨིཏརམྤི ཝིཔཱཀནཱམཾ པཙྪཱཛཱཏཝིཔྤཡུཏྟཨཏྠིཨཝིགཏཔཙྩཡེཧི ཙཏུདྷཱ པཙྩཡོ ཧོཏི. ཡཐཱ ཙ ཝིཔཱཀཾ, ཨཝིཔཱཀམྤི ཨེཝམེཝ པཀཱསིཏཾ. ཏསྨཱ ཀུསལཱདིབྷེདམྤི ཏེསཾ ཙཏུདྷཱ པཙྩཡོ ཧོཏཱིཏི ཝེདིཏབྦཾ. ཨེཝཾ ཏཱཝ ནཱམམེཝ པཊིསནྡྷིཡཾ པཝཏྟེ ཝཱ ཡསྶ ཡསྶ ཨཱཡཏནསྶ པཙྩཡོ ཧོཏི, ཡཐཱ ཙ ཧོཏི, ཏཐཱ ཝེདིཏབྦཾ.

རཱུཔཾ པནེཏྠ ཨཱརུཔྤ-བྷཝེ བྷཝཏི པཙྩཡོ;

ན ཨེཀཱཡཏནསྶཱཔི, པཉྩཀྑནྡྷབྷཝེ པན.

རཱུཔཏོ ¶ སནྡྷིཡཾ ཝཏྠུ, ཚདྷཱ ཚཊྛསྶ པཙྩཡོ;

བྷཱུཏཱནི ཙཏུདྷཱ ཧོནྟི, པཉྩནྣཾ ཨཝིསེསཏོ.

རཱུཔཏོ ཧི པཊིསནྡྷིཡཾ ཝཏྠུརཱུཔཾ ཚཊྛསྶ མནཱཡཏནསྶ སཧཛཱཏཨཉྙམཉྙནིསྶཡཝིཔྤཡུཏྟཨཏྠིཨཝིགཏཔཙྩཡེཧི ཚདྷཱ པཙྩཡོ ཧོཏི. ཙཏྟཱརི པན བྷཱུཏཱནི ཨཝིསེསཏོ པཊིསནྡྷིཡཾ པཝཏྟེ ཙ ཡཾ ཡཾ ཨཱཡཏནཾ ¶ ཨུཔྤཛྫཏི, ཏསྶ ཏསྶ ཝསེན པཉྩནྣམྤི ཙཀྑཱཡཏནཱདཱིནཾ སཧཛཱཏནིསྶཡཨཏྠིཨཝིགཏཔཙྩཡེཧི ¶ ཙཏུདྷཱ པཙྩཡཱ ཧོནྟི.

ཏིདྷཱ ཛཱིཝིཏམེཏེསཾ, ཨཱཧཱརོ ཙ པཝཏྟིཡཾ;

ཏཱནེཝ ཚདྷཱ ཚཊྛསྶ, ཝཏྠུ ཏསྶེཝ པཉྩདྷཱ.

ཨེཏེསཾ པན ཙཀྑཱདཱིནཾ པཉྩནྣཾ པཊིསནྡྷིཡཾ པཝཏྟེ ཙ ཨཏྠིཨཝིགཏཨིནྡྲིཡཝསེན རཱུཔཛཱིཝིཏཾ ཏིདྷཱ པཙྩཡོ ཧོཏི.

‘ཨཱཧཱརོ ཙཱ’ཏི ཨཱཧཱརོ ཙ ཨཏྠིཨཝིགཏཨཱཧཱརཝསེན ཏིདྷཱ པཙྩཡོ ཧོཏི. སོ ཙ ཁོ ཡེ སཏྟཱ ཨཱཧཱརཱུཔཛཱིཝིནོ, ཏེསཾ ཨཱཧཱརཱནུགཏེ ཀཱཡེ པཝཏྟིཡཾཡེཝ, ནོ པཊིསནྡྷིཡཾ. ཏཱནི པན པཉྩ ཙཀྑཱཡཏནཱདཱིནི ཚཊྛསྶ ཙཀྑུསོཏགྷཱནཛིཝ྄ཧཱཀཱཡཝིཉྙཱཎསངྑཱཏསྶ མནཱཡཏནསྶ ནིསྶཡཔུརེཛཱཏཨིནྡྲིཡཝིཔྤཡུཏྟཨཏྠིཨཝིགཏཝསེན ཚཧཱཀཱརེཧི པཙྩཡཱ ཧོནྟི པཝཏྟེ, ནོ པཊིསནྡྷིཡཾ. ཋཔེཏྭཱ པན པཉྩ ཝིཉྙཱཎཱནི ཏསྶེཝ ཨཝསེསམནཱཡཏནསྶ ཝཏྠུརཱུཔཾ ནིསྶཡཔུརེཛཱཏཝིཔྤཡུཏྟཨཏྠིཨཝིགཏཝསེན པཉྩདྷཱ པཙྩཡོ ཧོཏི པཝཏྟེ, ནོ པཊིསནྡྷིཡཾ. ཨེཝཾ རཱུཔམེཝ པཊིསནྡྷིཡཾ པཝཏྟེ ཝཱ ཡསྶ ཡསྶ ཨཱཡཏནསྶ པཙྩཡོ ཧོཏི ཡཐཱ ཙ ཧོཏི ཏཐཱ ཝེདིཏབྦཾ.

ནཱམརཱུཔཾ པནུབྷཡཾ, ཧོཏི ཡཾ ཡསྶ པཙྩཡོ;

ཡཐཱ ཙ ཏམྤི སབྦཏྠ, ཝིཉྙཱཏབྦཾ ཝིབྷཱཝིནཱ.

སེཡྻཐིདཾ – པཊིསནྡྷིཡཾ ཏཱཝ པཉྩཝོཀཱརབྷཝེ ཁནྡྷཏྟཡཝཏྠུརཱུཔསངྑཱཏཾ ནཱམརཱུཔཾ ཚཊྛཱཡཏནསྶ སཧཛཱཏཨཉྙམཉྙནིསྶཡཝིཔཱཀསམྤཡུཏྟཝིཔྤཡུཏྟཨཏྠིཨཝིགཏཔཙྩཡཱདཱིཧི པཙྩཡོ ¶ ཧོཏཱིཏི ཨིདམེཏྠ མུཁམཏྟཾ. ཝུཏྟནཡཱནུསཱརེན པན སཀྐཱ སབྦཾ ཡོཛེཏུནྟི ན ཨེཏྠ ཝིཏྠཱརོ དསྶིཏོཏི.

ནཱམརཱུཔཔཙྩཡཱ སལཱ༹ཡཏནཔདནིདྡེསོ.

ཕསྶཔདནིདྡེསོ

༢༣༠. སལཱ༹ཡཏནཔཙྩཡཱ ¶ ཕསྶནིདྡེསེ –

ཚལེ༹ཝ ཕསྶཱ སངྑེཔཱ, ཙཀྑུསམྥསྶཨཱདཡོ;

ཝིཉྙཱཎམིཝ བཏྟིཾས, ཝིཏྠཱརེན བྷཝནྟི ཏེ.

‘སངྑེཔཏོ’ ¶ ཧི པཱལི༹ཡཾ ཙཀྑུསམྥསྶོཏི ཨཱདཡོ ཚལེ༹ཝ ཕསྶཱ ཨཱགཏཱ. ཝིཏྠཱརེན པན ཙཀྑུསམྥསྶཱདཡོ པཉྩ ཀུསལཝིཔཱཀཱ པཉྩ ཨཀུསལཝིཔཱཀཱཏི དས, སེསཱ བཱཝཱིསཏི ལོཀིཡཝིཔཱཀཝིཉྙཱཎསམྤཡུཏྟཱ ཙ བཱཝཱིསཏཱིཏི ཨེཝཾ སབྦེཔི སངྑཱརཔཙྩཡཱ ཝུཏྟཝིཉྙཱཎམིཝ བཱཏྟིཾས ཧོནྟི. ཡཾ པནེཏསྶ བཱཏྟིཾསཝིདྷསྶཱཔི ཕསྶསྶ པཙྩཡོ སལཱ༹ཡཏནཾ. ཏཏྠ –

ཚཊྛེན སཧ ཨཛ྄ཛྷཏྟཾ, ཙཀྑཱདིཾ བཱཧིརེཧིཔི;

སལཱ༹ཡཏནམིཙྪནྟི, ཚཧི སདྡྷིཾ ཝིཙཀྑཎཱ.

ཏཏྠ ཡེ ཏཱཝ ‘‘ཨུཔཱདིནྣཀཔཝཏྟིཀཐཱ ཨཡ’’ནྟི ཨེཀསནྟཏིཔརིཡཱཔནྣམེཝ པཙྩཡཾ པཙྩཡུཔྤནྣཉྩ དཱིཔེནྟི, ཏེ ཚཊྛཱཡཏནཔཙྩཡཱ ཕསྶོཏི པཱལི༹ཨནུསཱརཏོ ཨཱརུཔྤེ ཚཊྛཱཡཏནཉྩ ཨཉྙཏྠ སབྦསངྒཧཏོ སལཱ༹ཡཏནཉྩ ཕསྶསྶ པཙྩཡོཏི ཨེཀདེསསརཱུཔེཀསེསཾ ཀཏྭཱ ཚཊྛེན སཧ ཨཛ྄ཛྷཏྟཾ ཙཀྑཱདིཾ སལཱ༹ཡཏནནྟི ཨིཙྪནྟི. ཏཉྷི ཚཊྛཱཡཏནཉྩ སལཱ༹ཡཏནཉྩ སལཱ༹ཡཏནནྟྭེཝ སངྒྷཾ གཙྪཏི. ཡེ པན པཙྩཡུཔྤནྣམེཝ ཨེཀསནྟཏིཔརིཡཱཔནྣཾ དཱིཔེནྟི, པཙྩཡཾ པན བྷིནྣསནྟཱནམྤི, ཏེ ཡཾ ཡཾ ཨཱཡཏནཾ ཕསྶསྶ པཙྩཡོ ཧོཏི ཏཾ སབྦཾ དཱིཔེནྟཱ ¶ བཱཧིརམྤི པརིགྒཧེཏྭཱ ཏདེཝ ཚཊྛེན སཧ ཨཛ྄ཛྷཏྟཾ བཱཧིརེཧིཔི རཱུཔཱཡཏནཱདཱིཧི སདྡྷིཾ སལཱ༹ཡཏནནྟི ཨིཙྪནྟི. ཏམྤི ཧི ཚཊྛཱཡཏནཉྩ སལཱ༹ཡཏནཉྩ སལཱ༹ཡཏནནྟི ཨེཏེསཾ ཨེཀསེསེ ཀཏེ སལཱ༹ཡཏནནྟྭེཝ སངྑཾ གཙྪཏི.

ཨེཏྠཱཧ – ན སབྦཱཡཏནེཧི ཨེཀོ ཕསྶོ སམྦྷོཏི, ནཱཔི ཨེཀམྷཱ ཨཱཡཏནཱ སབྦེ ཕསྶཱ, ཨཡཉྩ སལཱ༹ཡཏནཔཙྩཡཱ ཕསྶོཏི ཨེཀོཝ ཝུཏྟོ, སོ ཀསྨཱཏི? ཏཏྲིདཾ ཝིསྶཛྫནཾ – སཙྩམེཏཾ. སབྦེཧི ཨེཀོ ཨེཀམྷཱ ཝཱ སབྦེ ན སམྦྷོནྟི, སམྦྷོཏི པན ཨནེཀེཧི ཨེཀོ; ཡཐཱ ཙཀྑུསམྥསྶོ ཙཀྑཱཡཏནཱ རཱུཔཱཡཏནཱ ཙཀྑུཝིཉྙཱཎསངྑཱཏཱ མནཱཡཏནཱ ཨཝསེསཱ སམྤཡུཏྟདྷམྨཱཡཏནཱ ཙཱཏི ཨེཝཾ སབྦཏྠ ཡཐཱནུརཱུཔཾ ཡོཛེཏབྦཾ. ཏསྨཱ ཨེཝ ཧི –

ཨེཀོ ¶ པནེཀཱཡཏན-པྤབྷཝོ ཨིཏི དཱིཔིཏོ;

ཕསྶོཡཾ ཨེཀཝཙན-ནིདྡེསེནིདྷ ཏཱདིནཱ.

‘ཨེཀཝཙནནིདྡེསེནཱ’ཏི ¶ སལཱ༹ཡཏནཔཙྩཡཱ ཕསྶོཏི ཨིམིནཱ ཧི ཨེཀཝཙནནིདྡེསེན ཨནེཀེཧི ཨཱཡཏནེཧི ཨེཀོ ཕསྶོ ཧོཏཱིཏི ཏཱདིནཱ དཱིཔིཏོཏི ཨཏྠོ. ཨཱཡཏནེསུ པན –

ཚདྷཱ པཉྩ ཏཏོ ཨེཀཾ, ནཝདྷཱ བཱཧིརཱནི ཚ;

ཡཐཱསམྦྷཝམེཏསྶ, པཙྩཡཏྟེ ཝིབྷཱཝཡེ.

ཏཏྲཱཡཾ ཝིབྷཱཝནཱ – ཙཀྑཱཡཏནཱདཱིནི ཏཱཝ པཉྩ ཙཀྑུསམྥསྶཱདིབྷེདཏོ པཉྩཝིདྷསྶ ཕསྶསྶ ནིསྶཡཔུརེཛཱཏཨིནྡྲིཡཝིཔྤཡུཏྟཨཏྠིཨཝིགཏཝསེན ཚདྷཱ པཙྩཡཱ ཧོནྟི. ཏཏོ པརཾ ཨེཀཾ ཝིཔཱཀམནཱཡཏནཾ ཨནེཀབྷེདསྶ ཝིཔཱཀམནོསམྥསྶསྶ སཧཛཱཏཨཉྙམཉྙནིསྶཡཝིཔཱཀཨཱཧཱརཨིནྡྲིཡསམྤཡུཏྟཨཏྠིཨཝིགཏཝསེན ནཝདྷཱ པཙྩཡོ ཧོཏི. བཱཧིརེསུ པན རཱུཔཱཡཏནཾ ཙཀྑུསམྥསྶསྶ ཨཱརམྨཎཔུརེཛཱཏཨཏྠིཨཝིགཏཝསེན ཙཏུདྷཱ པཙྩཡོ ཧོཏི. ཏཐཱ སདྡཱཡཏནཱདཱིནི སོཏསམྥསྶཱདཱིནཾ. མནོསམྥསྶསྶ པན ཏཱནི དྷམྨཱཡཏནཉྩ ཏཐཱ ཙ ཨཱརམྨཎཔཙྩཡམཏྟེནེཝ ཙཱཏི ཨེཝཾ བཱཧིརཱནི ཚ ཡཐཱསམྦྷཝམེཏསྶ པཙྩཡཏྟེ ཝིབྷཱཝཡེཏི.

སལཱ༹ཡཏནཔཙྩཡཱ ཕསྶཔདནིདྡེསོ.

ཝེདནཱཔདནིདྡེསོ

༢༣༡. ཕསྶཔཙྩཡཱ ¶ ཝེདནཱནིདྡེསེ –

དྭཱརཏོ ཝེདནཱ ཝུཏྟཱ, ཙཀྑུསམྥསྶཛཱདིཀཱ;

ཚལེ༹ཝ ཏཱ པབྷེདེན, ཨེཀཱུནནཝུཏཱི མཏཱ.

ཙཀྑུསམྥསྶཛཱཝེདནཱཏིཨཱདིནཱ ཧི ནཡེན པཱལི༹ཡཾ ཨིམཱ ཙཀྑུསམྥསྶཛཱདིཀཱ དྭཱརཏོ ཚལེ༹ཝ ཝེདནཱ ཝུཏྟཱ. ཏཱ པན པབྷེདེན ཨེཀཱུནནཝུཏིཡཱ ཙིཏྟེཧི སམྤཡུཏྟཏྟཱ ཨེཀཱུནནཝུཏཱིཏི མཏཱ.

ཝེདནཱསུ པནེཏཱསུ, ཨིདྷ བཱཏྟིཾས ཝེདནཱ;

ཝིཔཱཀཙིཏྟཡུཏྟཱཝ, ཨདྷིཔྤེཏཱཏི བྷཱསིཏཱ.

ཨཊྛདྷཱ ¶ ཏཏྠ པཉྩནྣཾ, པཉྩདྭཱརམྷི པཙྩཡོ;

སེསཱནཾ ཨེཀདྷཱ ཕསྶོ, མནོདྭཱརེཔི སོ ཏཐཱ.

ཏཏྠ ཧི པཉྩདྭཱརེ ཙཀྑུཔསཱདཱདིཝཏྠུཀཱནཾ པཉྩནྣཾ ཝེདནཱནཾ ཙཀྑུསམྥསྶཱདིཀོ ཕསྶོ སཧཛཱཏཨཉྙམཉྙནིསྶཡཝིཔཱཀཨཱཧཱརསམྤཡུཏྟཨཏྠིཨཝིགཏཝསེན ¶ ཨཊྛདྷཱ པཙྩཡོ ཧོཏི. སེསཱནཾ པན ཨེཀེཀསྨིཾ དྭཱརེ སམྤཊིཙྪནསནྟཱིརཎཏདཱརམྨཎཝསེན པཝཏྟཱནཾ ཀཱམཱཝཙརཝིཔཱཀཝེདནཱནཾ ཙཀྑུསམྥསྶཱདིཀོ ཕསྶོ ཨུཔནིསྶཡཝསེན ཨེཀདྷཱཝ པཙྩཡོ ཧོཏི.

‘མནོདྭཱརེཔི སོ ཏཐཱ’ཏི མནོདྭཱརེཔི ཧི ཏདཱརམྨཎཝསེན པཝཏྟཱནཾ ཀཱམཱཝཙརཝིཔཱཀཝེདནཱནཾ སོ སཧཛཱཏམནོསམྥསྶསངྑཱཏོ ཕསྶོ ཏཐེཝ ཨཊྛདྷཱ པཙྩཡོ ཧོཏི, པཊིསནྡྷིབྷཝངྒཙུཏིཝསེན ཙ པཝཏྟཱནཾ ཏེབྷཱུམཀཝིཔཱཀཝེདནཱནམྤི. ཡཱ པནེཏཱ མནོདྭཱརེ ཏདཱརམྨཎཝསེན པཝཏྟཱ ཀཱམཱཝཙརཝེདནཱ, ཏཱསཾ མནོདྭཱརེ ཨཱཝཛྫནསམྤཡུཏྟོ མནོསམྥསྶོ ཨུཔནིསྶཡཝསེན ཨེཀདྷཱ པཙྩཡོ ཧོཏཱིཏི.

ཕསྶཔཙྩཡཱ ཝེདནཱཔདནིདྡེསོ.

ཏཎྷཱཔདནིདྡེསོ

༢༣༢. ཝེདནཱཔཙྩཡཱ ¶ ཏཎྷཱནིདྡེསེ –

རཱུཔཏཎྷཱདིབྷེདེན, ཚ ཏཎྷཱ ཨིདྷ དཱིཔིཏཱ;

ཨེཀེཀཱ ཏིཝིདྷཱ ཏཏྠ, པཝཏྟཱཀཱརཏོ མཏཱ.

ཨིམསྨིཉྷི ཝེདནཱཔཙྩཡཱ ཏཎྷཱནིདྡེསེ ‘སེཊྛིཔུཏྟོ བྲཱཧྨཎཔུཏྟོ’ཏི པིཏིཏོ ནཱམཝསེན པུཏྟོ ཝིཡ ཨིམཱ རཱུཔཏཎྷཱ…པེ… དྷམྨཏཎྷཱཏི ཨཱརམྨཎཏོ ནཱམཝསེན ཚ ཏཎྷཱ དཱིཔིཏཱ པཀཱསིཏཱ ཀཐིཏཱཏི ཨཏྠོ. ཏཏྠ རཱུཔེ ཏཎྷཱ རཱུཔཏཎྷཱཏི ཨིམིནཱ ནཡེན པདཏྠོ ཝེདིཏབྦོ.

ཏཱསུ ཙ པན ཏཎྷཱསུ ཨེཀེཀཱ ཏཎྷཱ པཝཏྟིཨཱཀཱརཏོ ཀཱམཏཎྷཱ, བྷཝཏཎྷཱ, ཝིབྷཝཏཎྷཱཏི ཨེཝཾ ཏིཝིདྷཱ མཏཱ. རཱུཔཏཎྷཱ ཨེཝ ཧི ཡདཱ ཙཀྑུསྶ ཨཱཔཱཐགཏཾ རཱུཔཱརམྨཎཾ ཀཱམསྶཱདཝསེན ཨསྶཱདཡམཱནཱ ¶ པཝཏྟཏི, ཏདཱ ཀཱམཏཎྷཱ ནཱམ ཧོཏི. ཡདཱ ཏདེཝཱརམྨཎཾ དྷུཝཾ སསྶཏནྟི པཝཏྟཱཡ སསྶཏདིཊྛིཡཱ སདྡྷིཾ པཝཏྟཏི, ཏདཱ བྷཝཏཎྷཱ ནཱམ ཧོཏི. སསྶཏདིཊྛིསཧགཏོ ཧི རཱགོ བྷཝཏཎྷཱཏི ཝུཙྩཏི. ཡདཱ པན ཏདེཝཱརམྨཎཾ ‘‘ཨུཙྪིཛྫཏི ཝིནསྶཏཱི’’ཏི པཝཏྟཱཡ ཨུཙྪེདདིཊྛིཡཱ སདྡྷིཾ པཝཏྟཏི, ཏདཱ ཝིབྷཝཏཎྷཱ ནཱམ ཧོཏི. ཨུཙྪེདདིཊྛིསཧགཏོ ཧི ¶ རཱགོ ཝིབྷཝཏཎྷཱཏི ཝུཙྩཏི. ཨེསེཝ ནཡོ སདྡཏཎྷཱདཱིསུཔཱིཏི ཨེཏཱ ཨཊྛཱརས ཏཎྷཱ ཧོནྟི.

ཏཱ ཨཛ྄ཛྷཏྟརཱུཔཱདཱིསུ ཨཊྛཱརས, བཧིདྡྷཱ ཨཊྛཱརསཱཏི ཚཏྟིཾས. ཨིཏི ཨཏཱིཏཱ ཚཏྟིཾས, ཨནཱགཏཱ ཚཏྟིཾས, པཙྩུཔྤནྣཱ ཚཏྟིཾསཱཏི ཨཊྛསཏཾ ཏཎྷཱ ཧོནྟི. ཏཱ པན སཾངྑིཔྤམཱནཱ རཱུཔཱདིཨཱརམྨཎཝསེན ཚ, ཀཱམཏཎྷཱདིཝསེན ཝཱ ཏིསྶོཝ ཏཎྷཱ ཧོནྟཱིཏི ཝེདིཏབྦཱ. ཡསྨཱ པནིམེ སཏྟཱ པུཏྟཾ ཨསྶཱདེཏྭཱ པུཏྟེ མམཏྟེན དྷཱཏིཡཱ ཝིཡ རཱུཔཱདིཨཱརམྨཎཝསེན ཨུཔྤཛྫམཱནཾ ཝེདནཾ ཨསྶཱདེཏྭཱ ཝེདནཱཡ མམཏྟེན རཱུཔཱདིཨཱརམྨཎདཱཡཀཱནཾ ཙིཏྟཀཱརགནྡྷབྦགནྡྷིཀསཱུདཏནྟཝཱཡརསཱཡནཝིདྷཱཡཀཝེཛྫཱདཱིནཾ མཧཱསཀྐཱརཾ ཀརོནྟི, ཏསྨཱ སབྦཱཔེསཱ ཝེདནཱཔཙྩཡཱ ཏཎྷཱ ཧོཏཱིཏི ཝེདིཏབྦཱ.

ཡསྨཱ ཙེཏྠ ¶ ཨདྷིཔྤེཏཱ, ཝིཔཱཀསུཁཝེདནཱ;

ཨེཀཱཝ ཨེཀདྷཱ ཙེསཱ, ཏསྨཱ ཏཎྷཱཡ པཙྩཡོ.

‘ཨེཀདྷཱ’ཏི ཨུཔནིསྶཡཔཙྩཡེན པཙྩཡོ ཧོཏི. ཡསྨཱ ཝཱ –

དུཀྑཱི སུཁཾ པཏྠཡཏི, སུཁཱི བྷིཡྻོཔི ཨིཙྪཏི;

ཨུཔེཀྑཱ པན སནྟཏྟཱ, སུཁམིཙྩེཝ བྷཱསིཏཱ.

ཏཎྷཱཡ པཙྩཡཱ ཏསྨཱ, ཧོནྟི ཏིསྶོཔི ཝེདནཱ;

ཝེདནཱཔཙྩཡཱ ཏཎྷཱ, ཨིཏི ཝུཏྟཱ མཧེསིནཱ.

ཝེདནཱ པཙྩཡཱ ཙཱཔི, ཡསྨཱ ནཱནུསཡཾ ཝིནཱ;

ཧོཏི ཏསྨཱ ན སཱ ཧོཏི, བྲཱཧྨཎསྶ ཝུསཱིམཏོཏི.

ཝེདནཱཔཙྩཡཱ ཏཎྷཱཔདནིདྡེསོ.

ཨུཔཱདཱནཔདནིདྡེསོ

༢༣༣. ཏཎྷཱཔཙྩཡཱ ¶ ཨུཔཱདཱནནིདྡེསེ –

ཨུཔཱདཱནཱནི ཙཏྟཱརི, ཏཱནི ཨཏྠཝིབྷཱགཏོ;

དྷམྨསངྑེཔཝིཏྠཱརཱ, ཀམཏོ ཙ ཝིབྷཱཝཡེ.

པཱལི༹ཡཉྷི ཨུཔཱདཱནནྟི ཀཱམུཔཱདཱནཾ…པེ… ཨཏྟཝཱདུཔཱདཱནནྟི ཨིམཱནི ཙཏྟཱརི ཨུཔཱདཱནཱནི ཨཱགཏཱནི. ཏེསཾ ཨཡཾ ཨཏྠཝིབྷཱགོ – ཝཏྠུསངྑཱཏཾ ཀཱམཾ ཨུཔཱདིཡཏཱིཏི ཀཱམུཔཱདཱནཾ. ཀཱམོ ཙ སོ ཨུཔཱདཱནཉྩཱཏིཔི ཀཱམུཔཱདཱནཾ. ཨུཔཱདཱནནྟི ¶ དལ༹ྷགྒཧཎཾ. དལ༹ྷཏྠོ ཧེཏྠ ཨུཔསདྡོ ཨུཔཱཡཱས-ཨུཔཀཊྛཱདཱིསུ ཝིཡ. ཏཐཱ དིཊྛི ཙ སཱ ཨུཔཱདཱནཉྩཱཏི དིཊྛུཔཱདཱནཾ. དིཊྛིཾ ཨུཔཱདིཡཏཱིཏི ཝཱ དིཊྛུཔཱདཱནཾ ¶ . སསྶཏོ ཨཏྟཱ ཙ ལོཀོ ཙཱཏིཨཱདཱིསུ ཧི པུརིམདིཊྛིཾ ཨུཏྟརདིཊྛི ཨུཔཱདིཡཏི. ཏཐཱ སཱིལབྦཏཾ ཨུཔཱདིཡཏཱིཏི སཱིལབྦཏུཔཱདཱནཾ. སཱིལབྦཏཉྩ ཏཾ ཨུཔཱདཱནཉྩཱཏིཔི སཱིལབྦཏུཔཱདཱནཾ. གོསཱིལགོཝཏཱདཱིནི ཧི ཨེཝཾ སུདྡྷཱིཏི ཨབྷིནིཝེསཏོ སཡམེཝ ཨུཔཱདཱནཱནཱིཏི. ཏཐཱ ཝདནྟི ཨེཏེནཱཏི ཝཱདོ, ཨུཔཱདིཡནྟི ཨེཏེནཱཏི ཨུཔཱདཱནཾ. ཀིཾ ཝདནྟི ཨུཔཱདིཡནྟི ཝཱ? ཨཏྟཱནཾ. ཨཏྟནོ ཝཱདུཔཱདཱནཾ ཨཏྟཝཱདུཔཱདཱནཾ. ཨཏྟཝཱདམཏྟམེཝ ཝཱ ཨཏྟཱཏི ཨུཔཱདིཡནྟི ཨེཏེནཱཏི ཨཏྟཝཱདུཔཱདཱནཾ. ཨཡཾ ཏཱཝ ཏེསཾ ཨཏྠཝིབྷཱགོ.

‘དྷམྨསངྑེཔཝིཏྠཱརེ’ པན ཀཱམུཔཱདཱནཾ ཏཱཝ ‘‘ཏཏྠ ཀཏམཾ ཀཱམུཔཱདཱནཾ? ཡོ ཀཱམེསུ ཀཱམཙྪནྡོ ཀཱམརཱགོ ཀཱམནནྡཱི ཀཱམཏཎྷཱ ཀཱམསྣེཧོ ཀཱམཔརིལཱ༹ཧོ ཀཱམམུཙྪཱ ཀཱམཛ྄ཛྷོསཱནཾ – ཨིདཾ ཝུཙྩཏི ཀཱམུཔཱདཱན’’ནྟི ཨཱགཏཏྟཱ སངྑེཔཏོ ཏཎྷཱདལ༹ྷཏྟཾ ཝུཏྟཾ. ཏཎྷཱདལ༹ྷཏྟཾ ནཱམ པུརིམཏཎྷཱཨུཔནིསྶཡཔཙྩཡེན དལ༹ྷསམྦྷཱུཏཱ ཨུཏྟརཏཎྷཱ ཨེཝ. ཀེཙི པནཱཧུ – ཨཔྤཏྟཝིསཡཔཏྠནཱ ཏཎྷཱ, ཨནྡྷཀཱརེ ཙོརསྶ ཧཏྠཔྤསཱརཎཾ ཝིཡ. སམྤཏྟཝིསཡགྒཧཎཾ ཨུཔཱདཱནཾ, ཏསྶེཝ བྷཎྜགྒཧཎཾ ཝིཡ. ཨཔྤིཙྪཏཱསནྟུཊྛིཏཱཔཊིཔཀྑཱ ཙ ཏེ དྷམྨཱ. ཏཐཱ པརིཡེསནཱརཀྑདུཀྑམཱུལཱཏི. སེསུཔཱདཱནཏྟཡཾ པན སངྑེཔཏོ དིཊྛིམཏྟམེཝ.

ཝིཏྠཱརཏོ པན པུབྦེ རཱུཔཱདཱིསུ ཝུཏྟཱཡ ཨཊྛསཏཔྤབྷེདཱཡཔི ཏཎྷཱཡ དལ༹ྷབྷཱཝོ ཀཱམུཔཱདཱནཾ. དསཝཏྠུཀཱ མིཙྪཱདིཊྛི དིཊྛུཔཱདཱནཾ. ཡཐཱཧ – ‘‘ཏཏྠ ཀཏམཾ དིཊྛུཔཱདཱནཾ? ནཏྠི དིནྣཾ, ནཏྠི ཡིཊྛཾ…པེ… སཙྪིཀཏྭཱ པཝེདེནྟཱིཏི ཡཱ ¶ ཨེཝརཱུཔཱ དིཊྛི…པེ… ཝིཔརིཡེསགྒཱཧོ – ཨིདཾ ཝུཙྩཏི དིཊྛུཔཱདཱན’’ནྟི (དྷ. ས. ༡༢༢༡; ཝིབྷ. ༩༣༨) སཱིལཝཏེཧི སུདྡྷིཔརཱམསནཾ པན སཱིལབྦཏུཔཱདཱནཾ. ཡཐཱཧ – ‘‘ཏཏྠ ¶ ཀཏམཾ སཱིལབྦཏུཔཱདཱནཾ? ཨིཏོ བཧིདྡྷཱ སམཎབྲཱཧྨཎཱནཾ སཱིལེན སུདྡྷི, ཝཏེན སུདྡྷི, སཱིལབྦཏེན སུདྡྷཱིཏི ཡཱ ཨེཝརཱུཔཱ དིཊྛི…པེ… ཝིཔརིཡེསགྒཱཧོ – ཨིདཾ ཝུཙྩཏི སཱིལབྦཏུཔཱདཱན’’ནྟི (དྷ. ས. ༡༢༢༢; ཝིབྷ. ༩༣༨). ཝཱིསཏིཝཏྠུཀཱ སཀྐཱཡདིཊྛི ཨཏྟཝཱདུཔཱདཱནཾ. ཡཐཱཧ – ‘‘ཏཏྠ ཀཏམཾ ཨཏྟཝཱདུཔཱདཱནཾ? ཨིདྷ ཨསྶུཏཝཱ པུཐུཛྫནོ…པེ… སཔྤུརིསདྷམྨེ ཨཝིནཱིཏོ རཱུཔཾ ཨཏྟཏོ སམནུཔསྶཏི…པེ… ཝིཔརིཡེསགྒཱཧོ – ཨིདཾ ཝུཙྩཏི ཨཏྟཝཱདུཔཱདཱན’’ནྟི (དྷ. ས. ༡༢༢༣; ཝིབྷ. ༩༣༨). ཨཡམེཏྠ དྷམྨསངྑེཔཝིཏྠཱརོ.

‘ཀམཏོ’ཏི ¶ ཨེཏྠ པན ཏིཝིདྷོ ཀམོ – ཨུཔྤཏྟིཀྐམོ, པཧཱནཀྐམོ, དེསནཱཀྐམོ ཙ. ཏཏྠ ཨནམཏགྒེ སཾསཱརེ ཨིམསྶ པཋམཾ ཨུཔྤཏྟཱིཏི ཨབྷཱཝཏོ ཀིལེསཱནཾ ནིཔྤརིཡཱཡེན ཨུཔྤཏྟིཀྐམོ ན ཝུཙྩཏི. པརིཡཱཡེན པན ཡེབྷུཡྻེན ཨེཀསྨིཾ བྷཝེ ཨཏྟགྒཱཧཔུབྦངྒམོ སསྶཏུཙྪེདཱབྷིནིཝེསོ. ཏཏོ ‘‘སསྶཏོ ཨཡཾ ཨཏྟཱ’’ཏི གཎྷཏོ ཨཏྟཝིསུདྡྷཏྠཾ སཱིལབྦཏུཔཱདཱནཾ, ཨུཙྪིཛྫཏཱིཏི གཎྷཏོ པརལོཀནིརཔེཀྑསྶ ཀཱམུཔཱདཱནནྟི ཨེཝཾ པཋམཾ ཨཏྟཝཱདུཔཱདཱནཾ, ཏཏོ དིཊྛིསཱིལབྦཏཀཱམུཔཱདཱནཱནཱིཏི ཨཡམེཏེསཾ ཨེཀསྨིཾ བྷཝེ ཨུཔྤཏྟིཀྐམོ.

དིཊྛུཔཱདཱནཱདཱིནི ཙེཏྠ པཋམཾ པཧཱིཡནྟི སོཏཱཔཏྟིམགྒཝཛ྄ཛྷཏྟཱ. ཀཱམུཔཱདཱནཾ པཙྪཱ ཨརཧཏྟམགྒཝཛ྄ཛྷཏྟཱཏི. ཨཡམེཏེསཾ པཧཱནཀྐམོ.

མཧཱཝིསཡཏྟཱ པན པཱཀཊཏྟཱ ཙ ཨེཏེསུ ཀཱམུཔཱདཱནཾ པཋམཾ དེསིཏཾ. མཧཱཝིསཡཉྷི ཏཾ ཨཊྛཙིཏྟསམྤཡོགཱ. ཨཔྤཝིསཡཱནི ཨིཏརཱནི ཙཏུཙིཏྟསམྤཡོགཱ. ཡེབྷུཡྻེན ཙ ཨཱལཡརཱམཏཱཡ པཛཱཡ པཱཀཊཾ ཀཱམུཔཱདཱནཾ, ན ཨིཏརཱནི. ཀཱམུཔཱདཱནཝཱ ཝཏྠུཀཱམཱནཾ སམདྷིགམཏྠཾ ཀོཏཱུཧལམངྒལཱདིབཧུལོ ཧོཏི, ན སསྶཏདིཊྛཱིཏི ཏདནནྟརཾ དིཊྛུཔཱདཱནཾ. ཏཾ པབྷིཛྫམཱནཾ སཱིལབྦཏཨཏྟཝཱདུཔཱདཱནཝསེན དུཝིདྷཾ ཧོཏི. ཏསྨིཾ དྭཡེ གོཀིརིཡཾ ཝཱ ཀུཀྐུརཀིརིཡཾ ཝཱ དིསྭཱཔི ཝེདིཏབྦཏོ ཨོལཱ༹རིཀནྟི སཱིལབྦཏུཔཱདཱནཾ པཋམཾ དེསིཏཾ, སུཁུམཏྟཱ ཨནྟེ ཨཏྟཝཱདུཔཱདཱནནྟི ཨཡམེཏེསཾ དེསནཱཀྐམོ.

ཏཎྷཱ ¶ ཙ པུརིམསྶེཏྠ, ཨེཀདྷཱ ཧོཏི པཙྩཡོ;

སཏྟདྷཱ ཨཊྛདྷཱ ཝཱཔི, ཧོཏི སེསཏྟཡསྶ སཱ.

ཨེཏྠ ¶ ཙ ཨེཝཾ དེསིཏེ ཨུཔཱདཱནཙཏུཀྐེ པུརིམསྶ ཀཱམུཔཱདཱནསྶ ཀཱམཏཎྷཱ ཨུཔནིསྶཡཝསེན ཨེཀདྷཱཝ པཙྩཡོ ཧོཏི ཏཎྷཱབྷིནནྡིཏེསུ ཝིསཡེསུ ཨུཔྤཏྟིཏོ. སེསཏྟཡསྶ པན སཧཛཱཏཨཉྙམཉྙནིསྶཡསམྤཡུཏྟཨཏྠིཨཝིགཏཧེཏུཝསེན སཏྟདྷཱ ཝཱ ཨུཔནིསྶཡེན སཧ ཨཊྛདྷཱ ཝཱཔི པཙྩཡོ ཧོཏི. ཡདཱ ཙ སཱ ཨུཔནིསྶཡཝསེན པཙྩཡོ ཧོཏི ཏདཱ ཨསཧཛཱཏཱཝ ཧོཏཱིཏི.

ཏཎྷཱཔཙྩཡཱ ཨུཔཱདཱནཔདནིདྡེསོ.

བྷཝཔདནིདྡེསོ

༢༣༤. ཨུཔཱདཱནཔཙྩཡཱ ¶ བྷཝནིདྡེསེ –

ཨཏྠཏོ དྷམྨཏོ ཙེཝ, སཱཏྠཏོ བྷེདསངྒཧཱ;

ཡཾ ཡསྶ པཙྩཡོ ཙེཝ, ཝིཉྙཱཏབྦོ ཝིནིཙྪཡོ.

ཏཏྠ བྷཝཏཱིཏི བྷཝོ. དུཝིདྷེནཱཏི དྭཱིཧི ཨཱཀཱརེཧི པཝཏྟིཏོཏི ཨཏྠོ. ཨཐཝཱ དུཝིདྷེནཱཏི པཙྩཏེ ཀརཎཝཙནཾ, དུཝིདྷོཏི ཝུཏྟཾ ཧོཏི. ཨཏྠཱིཏི སཾཝིཛྫཏི. ཀམྨམེཝ བྷཝོ ཀམྨབྷཝོ. ཨུཔཔཏྟིཡེཝ བྷཝོ ཨུཔཔཏྟིབྷཝོ. ཨེཏྠ ཙ ཨུཔཔཏྟི བྷཝཏཱིཏི བྷཝོ. ཀམྨཾ པན ཡཐཱ སུཁཀཱརཎཏྟཱ ‘‘སུཁོ བུདྡྷཱནམུཔྤཱདོ’’ཏི (དྷ. པ. ༡༩༤) ཝུཏྟོ, ཨེཝཾ བྷཝཀཱརཎཏྟཱ ཕལཝོཧཱརེན བྷཝོཏི ཝེདིཏབྦཾ. ཏཏྠ ཀཏམོ ཀམྨབྷཝོཏི ཏེསུ དྭཱིསུ བྷཝེསུ ཡོ ཀམྨབྷཝོཏི ཝུཏྟོ, སོ ཀཏམོཏི ཨཏྠོ. པུཉྙཱབྷིསངྑཱརཱདཡོ ཝུཏྟཏྠཱ ཨེཝ. སབྦནྟི ཨནཝསེསཾ. བྷཝཾ གཙྪཏི གམེཏི ཙཱཏི བྷཝགཱམི. ཨིམིནཱ ལོཀུཏྟརཾ པཊིཀྑིཔཏི. ཨཡཉྷི ཝཊྚཀཐཱ, ཏཉྩ ཝིཝཊྚནིསྶིཏནྟི. ཀརཱིཡཏཱིཏི ཀམྨཾ.

ཀཱམབྷཝཱདཱིསུ ཀཱམསངྑཱཏོ བྷཝོ ཀཱམབྷཝོ. ཨེས ནཡོ རཱུཔཱརཱུཔབྷཝེསུ. སཉྙཱཝཏཾ བྷཝོ, སཉྙཱ ཝཱ ཨེཏྠ བྷཝེ ཨཏྠཱིཏི སཉྙཱབྷཝོ. ཝིཔརིཡཱཡེན ¶ ཨསཉྙཱབྷཝོ. ཨོལཱ༹རིཀསཉྙཱཡ ཨབྷཱཝཱ ¶ སུཁུམཱཡ ཙ བྷཱཝཱ ནེཝ སཉྙཱ ནཱསཉྙཱ ཨསྨིཾ བྷཝེཏི ནེཝསཉྙཱནཱསཉྙཱབྷཝོ. ཨེཀེན རཱུཔཀྑནྡྷེན ཝོཀིཎྞོ བྷཝོ ཨེཀཝོཀཱརབྷཝོ. ཨེཀོ ཝཱ ཝོཀཱརོ ཨསྶ བྷཝསྶཱཏི ཨེཀཝོཀཱརབྷཝོ. ཨེསེཝ ནཡོ ཙཏུཝོཀཱརཔཉྩཝོཀཱརབྷཝེསུ. ཨཡཾ ཝུཙྩཏི ཨུཔཔཏྟིབྷཝོཏི ཨེས ནཝཝིདྷོཔི ཨུཔཔཏྟིབྷཝོ ནཱམ ཝུཙྩཏཱིཏི. ཨེཝཾ ཏཱཝེཏྠ ‘ཨཏྠཏོ’ ཝིཉྙཱཏབྦོ ཝིནིཙྪཡོ.

‘དྷམྨཏོ’ པན ཨེཏྠ ཧི པུཉྙཱབྷིསངྑཱརོ དྷམྨཏོ ཏེརས ཙེཏནཱ, ཨཔུཉྙཱབྷིསངྑཱརོ དྭཱདས, ཨཱནེཉྫཱབྷིསངྑཱརོ ཙཏསྶོ. ‘‘སབྦམྤི བྷཝགཱམིཀམྨ’’ནྟི ཨེཏེན སབྦེཔེཏེ དྷམྨཱ ཙེཏནཱ སམྤཡུཏྟཱ ཝཱ ཀམྨསངྑཱཏཱ ཨཱཙཡགཱམིནོ དྷམྨཱ སངྒཧིཏཱ. ཀཱམབྷཝོ པཉྩ ཨུཔཱདིནྣཀྑནྡྷཱ, ཏཐཱ རཱུཔབྷཝོ, ཨརཱུཔབྷཝོ ཙཏྟཱརོ, སཉྙཱབྷཝོ ཙཏུཔཉྩ, ཨསཉྙཱབྷཝོ ཨེཀོ ¶ ཨུཔཱདིནྣཀྑནྡྷོ, ནེཝསཉྙཱནཱསཉྙཱབྷཝོ ཙཏྟཱརོ. ཨེཀཝོཀཱརབྷཝཱདཡོ ཨེཀཙཏུཔཉྩཀྑནྡྷཱ ཨུཔཱདིནྣཀྑནྡྷེཧཱིཏི ཨེཝམེཏྠ ‘དྷམྨཏོ’པི ཝིཉྙཱཏབྦོ ཝིནིཙྪཡོ.

‘སཱཏྠཏོ’ཏི ཡཐཱ ཙ བྷཝནིདྡེསེ ཏཐེཝ ཀཱམཉྩ སངྑཱརནིདྡེསེཔི པུཉྙཱབྷིསངྑཱརཱདཡོཝ ཝུཏྟཱ, ཨེཝཾ སནྟེཔི པུརིམཱ ཨཏཱིཏཀམྨཝསེན ཨིདྷ པཊིསནྡྷིཡཱ པཙྩཡཏྟཱ ཝུཏྟཱ. ཨིམེ པཙྩུཔྤནྣཀམྨཝསེན ཨཱཡཏིཾ པཊིསནྡྷིཡཱ པཙྩཡཏྟཱཏི པུནཝཙནཾ སཱཏྠཀམེཝ. པུབྦེ ཝཱ ‘‘ཏཏྠ ཀཏམོ པུཉྙཱབྷིསངྑཱརོ? ཀུསལཙེཏནཱ ཀཱམཱཝཙརཱ’’ཏི ཨེཝམཱདིནཱ ནཡེན ཙེཏནཱཝ སངྑཱརཱཏི ཝུཏྟཱ. ཨིདྷ པན ‘‘སབྦམྤི བྷཝགཱམིཀམྨ’’ནྟི ཝཙནཏོ ཙེཏནཱསམྤཡུཏྟཱཔི. པུབྦེ ཙ ཝིཉྙཱཎཔཙྩཡམེཝ ཀམྨཾ སངྑཱརཱཏི ཝུཏྟཾ, ཨིདཱནི ཨསཉྙཱབྷཝནིབྦཏྟཀམྤི. ཀིཾ ཝཱ བཧུནཱ? ‘‘ཨཝིཛྫཱཔཙྩཡཱ སངྑཱརཱ’’ཏི ཨེཏྠ པུཉྙཱབྷིསངྑཱརཱདཡོཝ ཀུསལཱཀུསལདྷམྨཱ ཝུཏྟཱ. ‘‘ཨུཔཱདཱནཔཙྩཡཱ བྷཝོ’’ཏི ཨིདྷ པན ཨུཔཔཏྟིབྷཝསྶཱཔི སངྒཧིཏཏྟཱ ཀུསལཱཀུསལཱབྱཱཀཏཱ དྷམྨཱ ཝུཏྟཱ. ཏསྨཱ སབྦཐཱཔི ¶ སཱཏྠཀམེཝིདཾ པུནཝཙནནྟི. ཨེཝམེཏྠ ‘སཱཏྠཏོ’པི ཝིཉྙཱཏབྦོ ཝིནིཙྪཡོ.

‘བྷེདསངྒཧཱ’ཏི ཨུཔཱདཱནཔཙྩཡཱ བྷཝསྶ བྷེདཏོ ཙེཝ སངྒཧཏོ ཙ. ཡཉྷི ཀཱམུཔཱདཱནཔཙྩཡཱ ཀཱམབྷཝནིབྦཏྟཀཾ ཀམྨཾ ཀརིཡཏི, སོ ཀམྨབྷཝོ. ཏདབྷིནིབྦཏྟཱ ཁནྡྷཱ ཨུཔཔཏྟིབྷཝོ. ཨེས ནཡོ རཱུཔཱརཱུཔབྷཝེསུ. ཨེཝཾ ཀཱམུཔཱདཱནཔཙྩཡཱ ¶ དྭེ ཀཱམབྷཝཱ, ཏདནྟོགདྷཱཝ སཉྙཱབྷཝཔཉྩཝོཀཱརབྷཝཱ; དྭེ རཱུཔབྷཝཱ, ཏདནྟོགདྷཱཝ སཉྙཱབྷཝཨསཉྙཱབྷཝཨེཀཝོཀཱརབྷཝཔཉྩཝོཀཱརབྷཝཱ; དྭེ ཨརཱུཔབྷཝཱ, ཏདནྟོགདྷཱཝ སཉྙཱབྷཝནེཝསཉྙཱནཱསཉྙཱབྷཝཙཏུཝོཀཱརབྷཝཱཏི སདྡྷིཾ ཨནྟོགདྷེཧི ཚ བྷཝཱ. ཡཐཱ ཙ ཀཱམུཔཱདཱནཔཙྩཡཱ སདྡྷིཾ ཨནྟོགདྷེཧི ཚ བྷཝཱ ཏཐཱ སེསུཔཱདཱནཔཙྩཡཱཔཱིཏི ཨེཝཾ ཨུཔཱདཱནཔཙྩཡཱ བྷེདཏོ སདྡྷིཾ ཨནྟོགདྷེཧི ཙཏུཝཱིསཏི བྷཝཱ.

སངྒཧཏོ པན ཀམྨབྷཝཾ ཨུཔཔཏྟིབྷཝཉྩ ཨེཀཏོ ཀཏྭཱ ཀཱམུཔཱདཱནཔཙྩཡཱ སདྡྷིཾ ཨནྟོགདྷེཧི ཨེཀོ ཀཱམབྷཝོ, ཏཐཱ རཱུཔཱརཱུཔབྷཝཱཏི ཏཡོ བྷཝཱ. ཏཐཱ སེསུཔཱདཱནཔཙྩཡཱཔཱིཏི ཨེཝཾ ཨུཔཱདཱནཔཙྩཡཱ སངྒཧཏོ སདྡྷིཾ ཨནྟོགདྷེཧི དྭཱདས བྷཝཱ. ཨཔིཙ ཨཝིསེསེན ཨུཔཱདཱནཔཙྩཡཱ ཀཱམབྷཝཱུཔགཾ ཀམྨཾ ཀམྨབྷཝོ. ཏདབྷིནིབྦཏྟཱ ཁནྡྷཱ ཨུཔཔཏྟིབྷཝོ. ཨེས ནཡོ རཱུཔཱརཱུཔབྷཝེསུ. ཨེཝཾ ཨུཔཱདཱནཔཙྩཡཱ སདྡྷིཾ ཨནྟོགདྷེཧི དྭེ ཀཱམབྷཝཱ, དྭེ རཱུཔབྷཝཱ, དྭེ ¶ ཨརཱུཔབྷཝཱཏི ཨཔརེནཔི པརིཡཱཡེན སངྒཧཏོ ཚ བྷཝཱ. ཀམྨབྷཝཨུཔཔཏྟིབྷཝབྷེདཾ ཝཱ ཨནུཔགམྨ སདྡྷིཾ ཨནྟོགདྷེཧི ཀཱམབྷཝཱདིཝསེན ཏཡོ བྷཝཱ ཧོནྟི. ཀཱམབྷཝཱདིབྷེདཉྩཱཔི ཨནུཔགམྨ ཀམྨབྷཝཨུཔཔཏྟིབྷཝཝསེན དྭེ བྷཝཱ ཧོནྟི. ཀམྨུཔཔཏྟིབྷེདཉྩ ཨནུཔགམྨ ཨུཔཱདཱནཔཙྩཡཱ བྷཝོཏི བྷཝཝསེན ཨེཀོ བྷཝོ ཧོཏཱིཏི. ཨེཝམེཏྠ ཨུཔཱདཱནཔཙྩཡསྶ བྷཝསྶ བྷེདསངྒཧཱཔི ཝིཉྙཱཏབྦོ ཝིནིཙྪཡོ.

‘ཡཾ ཡསྶ པཙྩཡོ ཙེཝཱ’ཏི ཡཉྩེཏྠ ཨུཔཱདཱནཾ ཡསྶ པཙྩཡོ ཧོཏི, ཏཏོཔི ཝིཉྙཱཏབྦོ ཝིནིཙྪཡོཏི ཨཏྠོ. ཀིཾ པནེཏྠ ཀསྶ པཙྩཡོ ཧོཏི? ཡཾ ཀིཉྩི ཡསྶ ཀསྶཙི པཙྩཡོ ¶ ཧོཏིཡེཝ. ཨུམྨཏྟཀོ ཝིཡ ཧི པུཐུཛྫནོ. སོ ‘ཨིདཾ ཡུཏྟཾ, ཨིདཾ ཨཡུཏྟ’ནྟི ཨཝིཙཱརེཏྭཱ ཡསྶ ཀསྶཙི ཨུཔཱདཱནསྶ ཝསེན ཡཾ ཀིཉྩི བྷཝཾ པཏྠེཏྭཱ ཡཾ ཀིཉྩི ཀམྨཾ ཀརོཏིཡེཝ. ཏསྨཱ ཡདེཀཙྩེ ‘‘སཱིལབྦཏུཔཱདཱནེན རཱུཔཱརཱུཔབྷཝཱ ན ཧོནྟཱི’’ཏི ཝདནྟི, ཏཾ ན གཧེཏབྦཾ. སབྦེན པན སབྦོ ཧོཏཱིཏི གཧེཏབྦཾ, སེཡྻཐིདཾ – ཨིདྷེཀཙྩོ ཨནུསྶཝཝསེན ཝཱ དིཊྛཱནུསཱརེན ཝཱ ‘‘ཀཱམཱ ནཱམེཏེ མནུསྶལོཀེ ཙེཝ ཁཏྟིཡམཧཱསཱལཀུལཱདཱིསུ ཚཀཱམཱཝཙརདེཝལོཀེ ཙ སམིདྡྷཱ’’ཏི ཙིནྟེཏྭཱ ཏེསཾ ཨདྷིགམཏྠཾ ཨསདྡྷམྨསཝནཱདཱིཧི ཝཉྩིཏོ ‘ཨིམིནཱ ཀམྨེན ཀཱམཱ སམྤཛྫནྟཱི’ཏི མཉྙམཱནོ ¶ ཀཱམུཔཱདཱནཝསེན ཀཱཡདུཙྩརིཏཱདཱིནིཔི ཀརོཏི. སོ དུཙྩརིཏཔཱརིཔཱུརིཡཱ ཨཔཱཡེ ཨུཔྤཛྫཏི; སནྡིཊྛིཀེ ཝཱ པན ཀཱམེ པཏྠཡམཱནོ པཊིལདྡྷེ ཝཱ གོཔཡམཱནོ ཀཱམུཔཱདཱནཝསེན ཀཱཡདུཙྩརིཏཱདཱིནིཔི ཀརོཏི. སོ དུཙྩརིཏཔཱརིཔཱུརིཡཱ ཨཔཱཡེ ཨུཔྤཛྫཏི. ཏཏྲཱསྶ ཨུཔཔཏྟིཧེཏུབྷཱུཏཾ ཀམྨཾ ཀམྨབྷཝོ, ཀམྨཱབྷིནིབྦཏྟཱ ཁནྡྷཱ ཨུཔཔཏྟིབྷཝོ སཉྙཱབྷཝཔཉྩཝོཀཱརབྷཝཱ པན ཏདནྟོགདྷཱ ཨེཝ.

ཨཔརོ པན སདྡྷམྨསཝནཱདཱིཧི ཨུཔབྲཱུཧིཏཉཱཎོ ‘‘ཨིམིནཱ ཀམྨེན ཀཱམཱ སམྤཛྫནྟཱི’’ཏི མཉྙམཱནོ ཀཱམུཔཱདཱནཝསེན ཀཱཡསུཙརིཏཱདཱིནི ཀརོཏི. སོ སུཙརིཏཔཱརིཔཱུརིཡཱ དེཝེསུ ཝཱ མནུསྶེསུ ཝཱ ཨུཔྤཛྫཏི. ཏཏྲཱསྶ ཨུཔཔཏྟིཧེཏུབྷཱུཏཾ ཀམྨཾ ཀམྨབྷཝོ, ཀམྨཱབྷིནིབྦཏྟཱ ཁནྡྷཱ ཨུཔཔཏྟིབྷཝོ. སཉྙཱབྷཝཔཉྩཝོཀཱརབྷཝཱ པན ཏདནྟོགདྷཱ ཨེཝ. ཨིཏི ཀཱམུཔཱདཱནཾ སཔྤབྷེདསྶ སཱནྟོགདྷསྶ ཀཱམབྷཝསྶ པཙྩཡོ ཧོཏི.

ཨཔརོ ‘‘རཱུཔཱརཱུཔབྷཝེསུ ཏཏོ སམིདྡྷཏརཱ ཀཱམཱ’’ཏི སུཏྭཱ ཝཱ པརིཀཔྤེཏྭཱ ཝཱ ཀཱམུཔཱདཱནཝསེནེཝ ¶ རཱུཔཱརཱུཔསམཱཔཏྟིཡོ ནིབྦཏྟེཏྭཱ སམཱཔཏྟིབལེན རཱུཔཱརཱུཔབྲཧྨལོཀེ ཨུཔྤཛྫཏི. ཏཏྲཱསྶ ཨུཔཔཏྟིཧེཏུབྷཱུཏཾ ཀམྨཾ ཀམྨབྷཝོ, ཀམྨཱབྷིནིབྦཏྟཱ ཁནྡྷཱ ཨུཔཔཏྟིབྷཝོ. སཉྙཱཨསཉྙཱ ནེཝསཉྙཱ ནཱསཉྙཱཨེཀཝོཀཱརཙཏུཝོཀཱརཔཉྩཝོཀཱརབྷཝཱ པན ཏདནྟོགདྷཱ ཨེཝ. ཨིཏི ཀཱམུཔཱདཱནཾ སཔྤབྷེདཱནཾ སཱནྟོགདྷཱནཾ རཱུཔཱརཱུཔབྷཝཱནམྤི པཙྩཡོ ཧོཏི ¶ .

ཨཔརོ ‘‘ཨཡཾ ཨཏྟཱ ནཱམ ཀཱམཱཝཙརསམྤཏྟིབྷཝེ ཝཱ རཱུཔཱརཱུཔབྷཝཱནཾ ཝཱ ཨཉྙཏརསྨིཾ ཨུཙྪིནྣོ སུཨུཙྪིནྣོ ཧོཏཱི’’ཏི ཨུཙྪེདདིཊྛིཾ ཨུཔཱདཱཡ ཏདུཔགཾ ཀམྨཾ ཀརོཏི. ཏསྶ ཏཾ ཀམྨཾ ཀམྨབྷཝོ, ཀམྨཱབྷིནིབྦཏྟཱ ཁནྡྷཱ ཨུཔཔཏྟིབྷཝོ. སཉྙཱབྷཝཱདཡོ པན ཏདནྟོགདྷཱ ཨེཝ. ཨིཏི དིཊྛུཔཱདཱནཾ སཔྤབྷེདཱནཾ སཱནྟོགདྷཱནཾ ཏིཎྞམྤི ཀཱམརཱུཔཱརཱུཔབྷཝཱནཾ པཙྩཡོ ཧོཏི.

ཨཔརོ ‘‘ཨཡཾ ཨཏྟཱ ནཱམ ཀཱམཱཝཙརསམྤཏྟིབྷཝེ ཝཱ རཱུཔཱརཱུཔབྷཝཱནཾ ཝཱ ཨཉྙཏརསྨིཾ སུཁཱི ཧོཏི, ཝིགཏཔརིལཱ༹ཧོ ཧོཏཱི’’ཏི ཨཏྟཝཱདུཔཱདཱནེན ཏདུཔགཾ ཀམྨཾ ཀརོཏི. ཏསྶ ཏཾ ཀམྨཾ ཀམྨབྷཝོ, ཏདབྷིནིབྦཏྟཱ ཁནྡྷཱ ཨུཔཔཏྟིབྷཝོ. སཉྙཱབྷཝཱདཡོ པན ཏདནྟོགདྷཱ ཨེཝ ¶ . ཨིཏི ཨཏྟཝཱདུཔཱདཱནཾ སཔྤབྷེདཱནཾ སཱནྟོགདྷཱནཾ ཏིཎྞཾ བྷཝཱནཾ པཙྩཡོ ཧོཏི.

ཨཔརོ ‘‘ཨིདཾ སཱིལབྦཏཾ ནཱམ ཀཱམཱཝཙརསམྤཏྟིབྷཝེ ཝཱ རཱུཔཱརཱུཔབྷཝཱནཾ ཝཱ ཨཉྙཏརསྨིཾ པརིཔཱུརེནྟསྶ སུཁཾ པཱརིཔཱུརིཾ གཙྪཏཱི’’ཏི སཱིལབྦཏུཔཱདཱནཝསེན ཏདུཔགཾ ཀམྨཾ ཀརོཏི. ཏསྶ ཏཾ ཀམྨཾ ཀམྨབྷཝོ, ཏདབྷིནིབྦཏྟཱ ཁནྡྷཱ ཨུཔཔཏྟིབྷཝོ. སཉྙཱབྷཝཱདཡོ པན ཏདནྟོགདྷཱ ཨེཝ. ཨིཏི སཱིལབྦཏུཔཱདཱནམྤི སཔྤབྷེདཱནཾ སཱནྟོགདྷཱནཾ ཏིཎྞཾ བྷཝཱནཾ པཙྩཡོ ཧོཏཱིཏི ཨེཝམེཏྠ ཡཾ ཡསྶ པཙྩཡོ ཧོཏི ཏཏོཔི ཝིཉྙཱཏབྦོ ཝིནིཙྪཡོ.

ཀིཾ པནེཏྠ ཀསྶ བྷཝསྶ ཀཐཾ པཙྩཡོ ཧོཏཱིཏི ཙེ?

རཱུཔཱརཱུཔབྷཝཱནཾ, ཨུཔནིསྶཡཔཙྩཡོ ཨུཔཱདཱནཾ;

སཧཛཱཏཱདཱིཧིཔི ཏཾ, ཀཱམབྷཝསྶཱཏི ཝིཉྙེཡྻཾ.

རཱུཔཱརཱུཔབྷཝཱནཉྷི ཀཱམབྷཝཔརིཡཱཔནྣསྶ ཙ ཀཱམབྷཝེ ཀུསལཀམྨསྶེཝ ཨུཔཔཏྟིབྷཝསྶ ཙེཏཾ ཙཏུབྦིདྷམྤི ཨུཔཱདཱནཾ ཨུཔནིསྶཡཔཙྩཡེན ཨེཀདྷཱ པཙྩཡོ ཧོཏི. ཀཱམབྷཝེ ཨཏྟནཱ སམྤཡུཏྟཨཀུསལཀམྨབྷཝསྶ ¶ སཧཛཱཏཨཉྙམཉྙནིསྶཡསམྤཡུཏྟཨཏྠིཨཝིགཏཧེཏུཔཙྩཡཔྤབྷེདེཧི སཧཛཱཏཱདཱིཧི པཙྩཡོ ཧོཏི. ཝིཔྤཡུཏྟསྶ པན ཨུཔནིསྶཡཔཙྩཡེནེཝཱཏི.

ཨུཔཱདཱནཔཙྩཡཱ བྷཝཔདནིདྡེསོ.

ཛཱཏིཛརཱམརཎཱདིཔདནིདྡེསོ

༢༣༥. བྷཝཔཙྩཡཱ ¶ ཛཱཏིནིདྡེསཱདཱིསུ ཛཱཏིཨཱདཱིནཾ ཝིནིཙྪཡོ སཙྩཝིབྷངྒེ ཝུཏྟནཡེནེཝ ཝེདིཏབྦོ. བྷཝོཏི པནེཏྠ ཀམྨབྷཝོཝ ཨདྷིཔྤེཏོ. སོ ཧི ཛཱཏིཡཱ པཙྩཡོ, ན ཨུཔཔཏྟིབྷཝོ. སོ པན ཀམྨཔཙྩཡཨུཔནིསྶཡཔཙྩཡཝསེན དྭིདྷཱཝ པཙྩཡོ ཧོཏཱིཏི.

ཏཏྠ སིཡཱ – ཀཐཾ པནེཏཾ ཛཱནིཏབྦཾ ‘‘བྷཝོ ཛཱཏིཡཱ པཙྩཡོ’’ཏི ཙེ? བཱཧིརཔཙྩཡསམཏྟེཔི ཧཱིནཔཎཱིཏཏཱདིཝིསེསདསྶནཏོ. བཱཧིརཱནཉྷི ཛནཀཛནེཏྟིསུཀྐསོཎིཏཱཧཱརཱདཱིནཾ པཙྩཡཱནཾ སམཏྟེཔི སཏྟཱནཾ ཡམཀཱནམྤི སཏཾ ཧཱིནཔཎཱིཏཏཱདིཝིསེསོ དིསྶཏི. སོ ཙ ན ཨཧེཏུཀོ ¶ , སབྦདཱ ཙ སབྦེསཉྩ ཨབྷཱཝཏོ; ན ཀམྨབྷཝཏོ ཨཉྙཧེཏུཀོ, ཏདབྷིནིབྦཏྟཀསཏྟཱནཾ ཨཛ྄ཛྷཏྟསནྟཱནེ ཨཉྙསྶ ཀཱརཎསྶ ཨབྷཱཝཏོཏི ཀམྨབྷཝཧེཏུཀོཝ. ཀམྨཉྷི སཏྟཱནཾ ཧཱིནཔཎཱིཏཱདིཝིསེསཧེཏུ. ཏེནཱཧ བྷགཝཱ – ‘‘ཀམྨཾ སཏྟེ ཝིབྷཛཏི ཡདིདཾ ཧཱིནཔྤཎཱིཏཏཱཡཱ’’ཏི (མ. ནི. ༣.༢༨༩). ཏསྨཱ ཛཱནིཏབྦམེཏཾ – ‘‘བྷཝོ ཛཱཏིཡཱ པཙྩཡོ’’ཏི.

ཡསྨཱ ཙ ཨསཏི ཛཱཏིཡཱ ཛརཱམརཎཾ ནཱམ ན ཧོཏི, སོཀཱདཡོ ཙ དྷམྨཱ ན ཧོནྟི, ཛཱཏིཡཱ པན སཏི ཛརཱམརཎཉྩེཝ ཛརཱམརཎསངྑཱཏདུཀྑདྷམྨཕུཊྛསྶ ཙ བཱལསྶ ཛརཱམརཎཱབྷིསམྦནྡྷཱ ཝཱ ཏེན ཏེན དུཀྑདྷམྨེན ཕུཊྛསྶ ཨནབྷིསམྦནྡྷཱ ཝཱ སོཀཱདཡོ ཙ དྷམྨཱ ཧོནྟི, ཏསྨཱ ཨཡཾ ཛཱཏིཛརཱམརཎསྶ ཙེཝ སོཀཱདཱིནཉྩ པཙྩཡོ ཧོཏཱིཏི ཝེདིཏབྦཱ. སཱ པན ཨུཔནིསྶཡཀོཊིཡཱ ཨེཀདྷཱཝ པཙྩཡོ ཧོཏཱིཏི.

བྷཝཔཙྩཡཱ ཛཱཏིཨཱདིཔདནིདྡེསོ.

༢༤༢. ཨེཝམེཏསྶཱཏིཨཱདཱིནཾ ¶ ཨཏྠོ ཨུདྡེསཝཱརེ ཝུཏྟནཡེནེཝ ཝེདིཏབྦོ. སངྒཏིཨཱདཱིནི སམུདཡཝེཝཙནཱནེཝ.

ཡསྨཱ པནེཏྠ སོཀཱདཡོ ཨཝསཱནེ ཝུཏྟཱ, ཏསྨཱ ཡཱ སཱ ཨཝིཛྫཱ ‘‘ཨཝིཛྫཱཔཙྩཡཱ ¶ སངྑཱརཱ’’ཏི ཨེཝམེཏསྶ བྷཝཙཀྐསྶ ཨཱདིམྷི ཝུཏྟཱ, སཱ –

སོཀཱདཱིཧི ཨཝིཛྫཱ, སིདྡྷཱ བྷཝཙཀྐམཝིདིཏཱདིམིདཾ;

ཀཱརཀཝེདཀརཧིཏཾ, དྭཱདསཝིདྷསུཉྙཏཱསུཉྙཾ.

སཏཏཾ སམིཏཾ པཝཏྟཏཱིཏི ཝེདིཏབྦཾ. ཀཐཾ པནེཏྠ སོཀཱདཱིཧི ཨཝིཛྫཱ སིདྡྷཱ? ཀཐམིདཾ བྷཝཙཀྐཾ ཨཝིདིཏཱདི? ཀཐཾ ཀཱརཀཝེདཀརཧིཏཾ? ཀཐཾ དྭཱདསཝིདྷསུཉྙཏཱསུཉྙནྟི ཙེ? ཨེཏྠ ཧི སོཀདུཀྑདོམནསྶུཔཱཡཱསཱ ཨཝིཛྫཱཡ ཨཝིཡོགིནོ, པརིདེཝོ ཙ ནཱམ མཱུལ༹ྷསྶཱཏི ཏེསུ ཏཱཝ སིདྡྷེསུ སིདྡྷཱཝ ཧོཏི ཨཝིཛྫཱ. ཨཔིཙ ‘‘ཨཱསཝསམུདཡཱ ཨཝིཛྫཱསམུདཡོ’’ཏི ཧི ཝུཏྟཾ. ཨཱསཝསམུདཡཱ ཙེཏེ སོཀཱདཡོ ཧོནྟི. ཀཐཾ? ཝཏྠུཀཱམཝིཡོགེ ཏཱཝ སོཀོ ཀཱམཱསཝསམུདཡོ ཧོཏི? ཡཐཱཧ –

‘‘ཏསྶ ¶ ཙེ ཀཱམཡཱནསྶ, ཚནྡཛཱཏསྶ ཛནྟུནོ;

ཏེ ཀཱམཱ པརིཧཱཡནྟི, སལླཝིདྡྷོཝ རུཔྤཏཱི’’ཏི. (སུ. ནི. ༧༧༣);

ཡཐཱ ཙཱཧ – ‘‘ཀཱམཏོ ཛཱཡཏཱི སོཀོ’’ཏི (དྷ. པ. ༢༡༥). སབྦེཔི ཙེཏེ དིཊྛཱསཝསམུདཡཱ ཧོནྟི, ཡཐཱཧ – ‘‘ཏསྶ ཨཧཾ རཱུཔཾ, མམ རཱུཔནྟི པརིཡུཊྛཊྛཱཡིནོ ཏཾ རཱུཔཾ ཝིཔརིཎམཏི ཨཉྙཐཱ ཧོཏི. ཏསྶ རཱུཔཝིཔརིཎཱམཉྙཐཱབྷཱཝཱ ཨུཔྤཛྫནྟི སོཀཔརིདེཝདུཀྑདོམནསྶུཔཱཡཱསཱ’’ཏི (སཾ. ནི. ༣.༡). ཡཐཱ ཙ དིཊྛཱསཝསམུདཡཱ ཨེཝཾ བྷཝཱསཝསམུདཡཱཔི, ཡཐཱཧ – ‘‘ཡེཔི ཏེ དེཝཱ དཱིགྷཱཡུཀཱ ཝཎྞཝནྟོ སུཁབཧུལཱ ཨུཙྩེསུ ཝིམཱནེསུ ཙིརཊྛིཏིཀཱ ཏེཔི ཏཐཱགཏསྶ དྷམྨདེསནཾ སུཏྭཱ ཡེབྷུཡྻེན བྷཡཾ སཾཝེགཾ སནྟཱསཾ ཨཱཔཛྫ’’ནྟི (སཾ. ནི. ༣.༧༨; ཨ. ནི. ༤.༣༣) པཉྩ པུབྦནིམིཏྟཱནི དིསྭཱ མརཎབྷཡེན སནྟཛྫིཏཱནཾ དེཝཱནཾ ཝིཡཱཏི. ཡཐཱ ཙ བྷཝཱསཝསམུདཡཱ ཨེཝཾ ཨཝིཛྫཱསཝསམུདཡཱཔི ¶ , ཡཐཱཧ – ‘‘ས ཁོ སོ, བྷིཀྑཝེ, བཱལོ དིཊྛེཝ དྷམྨེ ཏིཝིདྷཾ དུཀྑདོམནསྶཾ པཊིསཾཝེདེཏཱི’’ཏི (མ. ནི. ༣.༢༤༦).

ཨིཏི ཡསྨཱ ཨཱསཝསམུདཡཱ ཨེཏེ ཧོནྟི, ཏསྨཱ ཨེཏེ སིཛ྄ཛྷམཱནཱ ཨཝིཛྫཱཡ ཧེཏུབྷཱུཏེ ཨཱསཝེ སཱདྷེནྟི. ཨཱསཝེསུ ཙ སིདྡྷེསུ པཙྩཡབྷཱཝེ བྷཱཝཏོ ཨཝིཛྫཱཔི སིདྡྷཱཝ ཧོཏཱིཏི. ཨེཝཾ ཏཱཝེཏྠ ‘སོཀཱདཱིཧི ཨཝིཛྫཱ སིདྡྷཱ’ ཧོཏཱིཏི ཝེདིཏབྦཱ.

ཡསྨཱ པན ཨེཝཾ པཙྩཡབྷཱཝེ བྷཱཝཏོ ཨཝིཛྫཱཡ སིདྡྷཱཡ པུན ‘‘ཨཝིཛྫཱཔཙྩཡཱ སངྑཱརཱ, སངྑཱརཔཙྩཡཱ ཝིཉྙཱཎ’’ནྟི ཨེཝཾ ཧེཏུཕལཔརམྤརཱཡ ¶ པརིཡོསཱནཾ ནཏྠི, ཏསྨཱ ཏཾ ཧེཏུཕལསམྦནྡྷཝསེན པཝཏྟཾ དྭཱདསངྒཾ ‘བྷཝཙཀྐཾ ཨཝིདིཏཱདཱི’ཏི སིདྡྷཾ ཧོཏི.

ཨེཝཾ སཏི ‘‘ཨཝིཛྫཱཔཙྩཡཱ སངྑཱརཱ’’ཏི ཨིདཾ ཨཱདིམཏྟཀཐནཾ ཝིརུཛ྄ཛྷཏཱིཏི ཙེ? ནཡིདཾ ཨཱདིམཏྟཀཐནཾ, པདྷཱནདྷམྨཀཐནཾ པནེཏཾ. ཏིཎྞཉྷི ཝཊྚཱནཾ ཨཝིཛྫཱ པདྷཱནཱ. ཨཝིཛྫཱགྒཧཎེན ཧི ཨཝསེསཾ ཀིལེསཝཊྚཉྩ ཀམྨཱདཱིནི ཙ བཱལཾ པལིཝེཋེནྟི, སཔྤསིརགྒཧཎེན སེསཾ སཔྤསརཱིརཾ ཝིཡ བཱཧཾ. ཨཝིཛྫཱསམུཙྪེདེ པན ཀཏེ ཏེཧི ཝིམོཀྑོ ཧོཏི, སཔྤསིརཙྪེདེ ཀཏེ པལིཝེཋིཏབཱཧཱཝིམོཀྑོ ཝིཡ. ཡཐཱཧ – ‘‘ཨཝིཛྫཱཡཏྭེཝ ཨསེསཝིརཱགནིརོདྷཱ ¶ སངྑཱརནིརོདྷོ’’ཏིཨཱདི (སཾ. ནི. ༢.༡; མཧཱཝ. ༡). ཨིཏི ཡཾ གཎྷཏོ བནྡྷོ མུཉྩཏོ ཙ མོཀྑོ ཧོཏི, ཏསྶ པདྷཱནདྷམྨསྶ ཀཐནམིདཾ, ན ཨཱདིམཏྟཀཐནནྟི ཨེཝམིདཾ བྷཝཙཀྐཾ ཨཝིདིཏཱདཱིཏི ཝེདིཏབྦཾ. ཏཡིདཾ ཡསྨཱ ཨཝིཛྫཱདཱིཧི ཀཱརཎེཧི སངྑཱརཱདཱིནཾ པཝཏྟི, ཏསྨཱ ཏཏོ ཨཉྙེན ‘‘བྲཧྨཱ མཧཱབྲཧྨཱ སེཊྛོ སཛིཏཱ’’ཏི ཨེཝཾ པརིཀཔྤིཏེན བྲཧྨཱདིནཱ ཝཱ སཾསཱརསྶ ཀཱརཀེན ‘‘སོ ཁོ པན མེ ཨཡཾ ཨཏྟཱ ཝདོ ཝེདེཡྻོ’’ཏི ཨེཝཾ པརིཀཔྤིཏེན ཨཏྟནཱ ཝཱ སུཁདུཀྑཱནཾ ཝེདཀེན རཧིཏཾ. ཨིཏི ‘ཀཱརཀཝེདཀརཧིཏ’ནྟི ཝེདིཏབྦཾ.

ཡསྨཱ པནེཏྠ ཨཝིཛྫཱ ཨུདཡབྦཡདྷམྨཀཏྟཱ དྷུཝབྷཱཝེན, སཾཀིལིཊྛཏྟཱ སཾཀིལེསིཀཏྟཱ ཙ སུབྷབྷཱཝེན, ཨུདཡབྦཡཔཊིཔཱིལི༹ཏཏྟཱ སུཁབྷཱཝེན, པཙྩཡཱཡཏྟཝུཏྟིཏྟཱ ཝསཝཏྟནབྷཱུཏེན ཨཏྟབྷཱཝེན ཙ སུཉྙཱ, ཏཐཱ སངྑཱརཱདཱིནིཔི ཨངྒཱནི; ཡསྨཱ ཝཱ ཨཝིཛྫཱ ན ཨཏྟཱ, ན ཨཏྟནོ ¶ , ན ཨཏྟནི, ན ཨཏྟཝཏཱི, ཏཐཱ སངྑཱརཱདཱིནིཔི ཨངྒཱནི; ཏསྨཱ ‘དྭཱདསཝིདྷསུཉྙཏཱསུཉྙམིདཾ’ བྷཝཙཀྐནྟི ཝེདིཏབྦཾ.

ཨེཝཉྩ ཝིདིཏྭཱ པུན –

ཏསྶ ཨཝིཛྫཱཏཎྷཱ, མཱུལམཏཱིཏཱདཡོ ཏཡོ ཀཱལཱ;

དྭེ ཨཊྛ དྭེ ཨེཝ ཙ, སརཱུཔཏོ ཏེསུ ཨངྒཱནི.

ཏསྶ ¶ ཁོ པནེཏསྶ བྷཝཙཀྐསྶ ཨཝིཛྫཱ ཏཎྷཱ ཙཱཏི དྭེ དྷམྨཱ མཱུལནྟི ཝེདིཏབྦཱ. ཏདེཏཾ པུབྦནྟཱཧརཎཏོ ཨཝིཛྫཱམཱུལཾ ཝེདནཱཝསཱནཾ, ཨཔརནྟསནྟཱནཏོ ཏཎྷཱམཱུལཾ ཛརཱམརཎཱཝསཱནནྟི དུཝིདྷཾ ཧོཏི. ཏཏྠ པུརིམཾ དིཊྛིཙརིཏཝསེན ཝུཏྟཾ, པཙྪིམཾ ཏཎྷཱཙརིཏཝསེན. དིཊྛིཙརིཏཱནཉྷི ཨཝིཛྫཱ, ཏཎྷཱཙརིཏཱནཾ ཏཎྷཱ སཾསཱརནཱཡིཀཱ. ཨུཙྪེདདིཊྛིསམུགྒྷཱཏཱཡ ཝཱ པཋམཾ, ཕལུཔྤཏྟིཡཱ ཧེཏཱུནཾ ཨནུཔཙྪེདཔཀཱསནཏོ; སསྶཏདིཊྛིསམུགྒྷཱཏཱཡ དུཏིཡཾ, ཨུཔྤནྣཱནཾ ཛརཱམརཎཔཀཱསནཏོ; གབྦྷསེཡྻཀཝསེན ཝཱ པུརིམཾ, ཨནུཔུབྦཔཝཏྟིདཱིཔནཏོ; ཨོཔཔཱཏིཀཝསེན པཙྪིམཾ སཧུཔྤཏྟིདཱིཔནཏོ.

ཨཏཱིཏཔཙྩུཔྤནྣཱནཱགཏཱ ཙསྶ ཏཡོ ཀཱལཱ. ཏེསུ པཱལི༹ཡཾ སརཱུཔཏོ ཨཱགཏཝསེན ཨཝིཛྫཱ སངྑཱརཱ ཙཱཏི དྭེ ཨངྒཱནི ཨཏཱིཏཀཱལཱནི ¶ , ཝིཉྙཱཎཱདཱིནི བྷཝཱཝསཱནཱནི ཨཊྛ པཙྩུཔྤནྣཀཱལཱནི, ཛཱཏི ཙེཝ ཛརཱམརཎཉྩ དྭེ ཨནཱགཏཀཱལཱནཱིཏི ཝེདིཏབྦཱནི. པུན –

ཧེཏུཕལཧེཏུཔུབྦཀ-ཏིསནྡྷིཙཏུབྷེདསངྒཧཉྩེཏཾ;

ཝཱིསཏིཨཱཀཱརཱརཾ, ཏིཝཊྚམནཝཊྛིཏཾ བྷམཏི.

ཨིཏིཔི ཝེདིཏབྦཾ. ཏཏྠ སངྑཱརཱནཉྩ པཊིསནྡྷིཝིཉྙཱཎསྶ ཙ ཨནྟརཱ ཨེཀོ ཧེཏུཕལསནྡྷི ནཱམ. ཝེདནཱཡ ཙ ཏཎྷཱཡ ཙ ཨནྟརཱ ཨེཀོ ཕལཧེཏུསནྡྷི ནཱམ. བྷཝསྶ ཙ ཛཱཏིཡཱ ཙ ཨནྟརཱ ཨེཀོ ཧེཏུཕལསནྡྷཱིཏི. ཨེཝམིདཾ ཧེཏུཕལཧེཏུཔུབྦཀཏིསནྡྷཱིཏི ཝེདིཏབྦཾ. སནྡྷཱིནཾ ཨཱདིཔརིཡོསཱནཝཝཏྠིཏཱ པནསྶ ཙཏྟཱརོ སངྒཧཱ ཧོནྟི, སེཡྻཐིདཾ – ཨཝིཛྫཱསངྑཱརཱ ཨེཀོ ¶ སངྒཧོ, ཝིཉྙཱཎནཱམརཱུཔསལཱ༹ཡཏནཕསྶཝེདནཱ དུཏིཡོ, ཏཎྷུཔཱདཱནབྷཝཱ ཏཏིཡོ, ཛཱཏིཛརཱམརཎཾ ཙཏུཏྠོཏི. ཨེཝམིདཾ ཙཏུབྷེདསངྒཧནྟི ཝེདིཏབྦཾ.

ཨཏཱིཏེ ཧེཏཝོ པཉྩ, ཨིདཱནི ཕལཔཉྩཀཾ;

ཨིདཱནི ཧེཏཝོ པཉྩ, ཨཱཡཏིཾ ཕལཔཉྩཀནྟི.

ཨེཏེཧི པན ཝཱིསཏིཡཱ ཨཱཀཱརེཧི ཨརེཧི ཝཱིསཏིཨཱཀཱརཱརནྟི ཝེདིཏབྦཾ. ཏཏྠ ‘ཨཏཱིཏེ ཧེཏཝོ པཉྩཱ’ཏི ཨཝིཛྫཱ སངྑཱརཱ ཙཱཏི ཨིམེ ཏཱཝ དྭེ ཝུཏྟཱ ¶ ཨེཝ. ཡསྨཱ པན ཨཝིདྭཱ པརིཏསྶཏི, པརིཏསིཏོ ཨུཔཱདིཡཏི, ཏསྶ ཨུཔཱདཱནཔཙྩཡཱ བྷཝོ, ཏསྨཱ ཏཎྷུཔཱདཱནབྷཝཱཔི གཧིཏཱ ཧོནྟི. ཏེནཱཧ ‘‘པུརིམཀམྨབྷཝསྨིཾ མོཧོ ཨཝིཛྫཱ, ཨཱཡཱུཧནཱ སངྑཱརཱ, ནིཀནྟི ཏཎྷཱ, ཨུཔགམནཾ ཨུཔཱདཱནཾ, ཙེཏནཱ བྷཝོ, ཨིམེ པཉྩ དྷམྨཱ པུརིམཀམྨབྷཝསྨིཾ ཨིདྷ པཊིསནྡྷིཡཱ པཙྩཡཱ’’ཏི (པཊི. མ. ༡.༤༧).

ཏཏྠ པུརིམཀམྨབྷཝསྨིནྟི པུརིམེ ཀམྨབྷཝེ, ཨཏཱིཏཛཱཏིཡཾ ཀམྨབྷཝེ ཀརིཡམཱནེཏི ཨཏྠོ. མོཧོ ཨཝིཛྫཱཏི ཡོ ཏདཱ དུཀྑཱདཱིསུ མོཧོ, ཡེན མཱུལ༹ྷོ ཀམྨཾ ཀརོཏི, སཱ ཨཝིཛྫཱ. ཨཱཡཱུཧནཱ སངྑཱརཱཏི ཏཾ ཀམྨཾ ཀརོཏོ པུརིམཙེཏནཱཡོ, ཡཐཱ ‘དཱནཾ དསྶཱམཱི’ཏི ཙིཏྟཾ ཨུཔྤཱདེཏྭཱ མཱསམྤི སཾཝཙྪརམྤི དཱནཱུཔཀརཎཱནི སཛྫེནྟསྶ ཨུཔྤནྣཱ པུརིམཙེཏནཱཡོ. པཊིགྒཱཧཀཱནཾ པན ཧཏྠེ དཀྑིཎཾ པཏིཊྛཱཔཡཏོ ཙེཏནཱ བྷཝོཏི ཝུཙྩཏི. ཨེཀཱཝཛྫནེསུ ཝཱ ཚསུ ཛཝནེསུ ཙེཏནཱ ཨཱཡཱུཧནསངྑཱརཱ ནཱམ. སཏྟམཱ ཙེཏནཱ བྷཝོ. ཡཱ ཀཱཙི ཝཱ པན ཙེཏནཱ ¶ བྷཝོ, ཏཾསམྤཡུཏྟཱ ཨཱཡཱུཧནསངྑཱརཱ ནཱམ. ནིཀནྟི ཏཎྷཱཏི ཡཱ ཀམྨཾ ཀརོནྟསྶ ཏསྶ ཕལེ ཨུཔྤཏྟིབྷཝེ ནིཀཱམནཱ པཏྠནཱ སཱ ཏཎྷཱ ནཱམ. ཨུཔགམནཾ ཨུཔཱདཱནནྟི ཡཾ ཀམྨཾ བྷཝསྶ པཙྩཡབྷཱུཏཾ; ‘ཨིདཾ ཀཏྭཱ ཨསུཀསྨིཾ ནཱམ ཋཱནེ ཀཱམེ སེཝིསྶཱམི ཨུཙྪིཛྫིསྶཱམཱི’ཏིཨཱདིནཱ ནཡེན པཝཏྟཾ ཨུཔགམནཾ གཧཎཾ པརཱམསནཾ – ཨིདཾ ཨུཔཱདཱནཾ ནཱམ. ཙེཏནཱ བྷཝོཏི ཨཱཡཱུཧནཱཝསཱནེ ཝུཏྟཙེཏནཱ བྷཝོཏི ཨེཝམཏྠོ ཝེདིཏབྦོ.

‘ཨིདཱནི ཕལཔཉྩཀ’ནྟི ཝིཉྙཱཎཱདི ཝེདནཱཝསཱནཾ པཱལི༹ཡཾ ཨཱགཏམེཝ. ཡཐཱཧ ‘‘ཨིདྷ པཊིསནྡྷི ཝིཉྙཱཎཾ, ཨོཀྐནྟི ནཱམརཱུཔཾ, པསཱདོ ཨཱཡཏནཾ, ཕུཊྛོ ཕསྶོ, ཝེདཡིཏཾ ཝེདནཱ ཨིམེ པཉྩ དྷམྨཱ ཨིདྷཱུཔཔཏྟིབྷཝསྨིཾ པུརེཀཏསྶ ཀམྨསྶ པཙྩཡཱ’’ཏི (པཊི. མ. ༡.༤༧). ཏཏྠ ¶ པཊིསནྡྷི ཝིཉྙཱཎནྟི ཡཾ བྷཝནྟརཔཊིསནྡྷཱནཝསེན ཨུཔྤནྣཏྟཱ པཊིསནྡྷཱིཏི ཝུཙྩཏི, ཏཾ ཝིཉྙཱཎཾ. ཨོཀྐནྟི ནཱམརཱུཔནྟི ཡཱ གབྦྷེ རཱུཔཱརཱུཔདྷམྨཱནཾ ཨོཀྐནྟི, ཨཱགནྟྭཱ པཝིསནཾ ཝིཡ – ཨིདཾ ནཱམརཱུཔཾ. པསཱདོ ཨཱཡཏནནྟི ཨིདཾ ཙཀྑཱདིཔཉྩཱཡཏནཝསེན ¶ ཝུཏྟཾ. ཕུཊྛོ ཕསྶོཏི ཡོ ཨཱརམྨཎཾ ཕུཊྛོ ཕུསནྟོ ཨུཔྤནྣོ – ཨཡཾ ཕསྶོ. ཝེདཡིཏཾ ཝེདནཱཏི ཡཾ པཊིསནྡྷིཝིཉྙཱཎེན ཝཱ སལཱ༹ཡཏནཔཙྩཡེན ཝཱ ཕསྶེན སཧུཔྤནྣཾ ཝིཔཱཀཝེདཡིཏཾ, སཱ ཝེདནཱཏི ཨེཝམཏྠོ ཝེདིཏབྦོ.

‘ཨིདཱནི ཧེཏཝོ པཉྩཱ’ཏི ཏཎྷཱདཡོ པཱལི༹ཡཾ ཨཱགཏཱཝ ཏཎྷུཔཱདཱནབྷཝཱ. བྷཝེ པན གཧིཏེ ཏསྶ པུབྦབྷཱགཱ ཏཾསམྤཡུཏྟཱ ཝཱ སངྑཱརཱ གཧིཏཱཝ ཧོནྟི, ཏཎྷུཔཱདཱནགྒཧཎེན ཙ ཏཾསམྤཡུཏྟཱ, ཡཱཡ ཝཱ མཱུལ༹ྷོ ཀམྨཾ ཀརོཏི སཱ ཨཝིཛྫཱ གཧིཏཱཝ ཧོཏཱིཏི ཨེཝཾ པཉྩ. ཏེནཱཧ ‘‘ཨིདྷ པརིཔཀྐཏྟཱ ཨཱཡཏནཱནཾ མོཧོ ཨཝིཛྫཱ, ཨཱཡཱུཧནཱ སངྑཱརཱ, ནིཀནྟི ཏཎྷཱ, ཨུཔགམནཾ ཨུཔཱདཱནཾ, ཙེཏནཱ བྷཝོ. ཨིམེ པཉྩ དྷམྨཱ ཨིདྷ ཀམྨབྷཝསྨིཾ ཨཱཡཏིཾ པཊིསནྡྷིཡཱ པཙྩཡཱ’’ཏི (པཊི. མ. ༡.༤༧). ཏཏྠ ཨིདྷ པརིཔཀྐཏྟཱ ཨཱཡཏནཱནནྟི པརིཔཀྐཱཡཏནསྶ ཀམྨཀརཎཀཱལེ སམྨོཧོ དསྶིཏོ. སེསཾ ཨུཏྟཱནམེཝ.

‘ཨཱཡཏིཾ ཕལཔཉྩཀ’ནྟི ཝིཉྙཱཎཱདཱིནི པཉྩ. ཏཱནི ཛཱཏིགྒཧཎེན ཝུཏྟཱནི. ཛརཱམརཎཾ པན ཏེསཾཡེཝ ཛརཱམརཎཾ. ཏེནཱཧ ‘‘ཨཱཡཏིཾ པཊིསནྡྷི ¶ ཝིཉྙཱཎཾ, ཨོཀྐནྟི ནཱམརཱུཔཾ, པསཱདོ ཨཱཡཏནཾ, ཕུཊྛོ ཕསྶོ, ཝེདཡིཏཾ ཝེདནཱ. ཨིམེ པཉྩ དྷམྨཱ ཨཱཡཏིཾ ཨུཔཔཏྟིབྷཝསྨིཾ ཨིདྷ ཀཏསྶ ཀམྨསྶ པཙྩཡཱ’’ཏི (པཊི. མ. ༡.༤༧). ཨེཝམིདཾ ཝཱིསཏིཨཱཀཱརཱརཾ ཧོཏི.

ཏཏྠ པུརིམབྷཝསྨིཾ པཉྩ ཀམྨསམྦྷཱརཱ, ཨེཏརཧི པཉྩ ཝིཔཱཀསམྦྷཱརཱ, ཨེཏརཧི པཉྩ ཀམྨསམྦྷཱརཱ, ཨནཱགཏེ པཉྩ ཝིཔཱཀདྷམྨཱཏི དས དྷམྨཱ ཀམྨཾ, དས ཝིཔཱཀོཏི. དྭཱིསུ ཋཱནེསུ ཀམྨཾ ཀམྨཾ ནཱམ, དྭཱིསུ ཋཱནེསུ ཝིཔཱཀོ ཝིཔཱཀོ ནཱམཱཏི སབྦམྤེཏཾ བྷཝཙཀྐཾ པཙྩཡཱཀཱརཝཊྚཾ ཀམྨཉྩེཝ ཀམྨཝིཔཱཀོ ཙ. ཏཐཱ དྭཱིསུ ཋཱནེསུ ཀམྨཾ ཀམྨསངྑེཔོ, དྭཱིསུ ཋཱནེསུ ཝིཔཱཀོ ཝིཔཱཀསངྑེཔོཏི སབྦམྤེཏཾ ཀམྨསངྑེཔོ ཙེཝ ཝིཔཱཀསངྑེཔོ ཙ. དྭཱིསུ ཋཱནེསུ ཀམྨཾ ཀམྨཝཊྚཾ, དྭཱིསུ ཋཱནེསུ ཝིཔཱཀོ ཝིཔཱཀཝཊྚནྟི སབྦམྤེཏཾ ཀམྨཝཊྚཉྩེཝ ཝིཔཱཀཝཊྚཉྩ. ཏཐཱ དྭཱིསུ ཋཱནེསུ ཀམྨཾ ཀམྨབྷཝོ, དྭཱིསུ ཋཱནེསུ ཝིཔཱཀོ ཝིཔཱཀབྷཝོཏི སབྦམྤེཏཾ ¶ ཀམྨབྷཝོ ཙེཝ ཝིཔཱཀབྷཝོ ཙ. དྭཱིསུ ཋཱནེསུ ཀམྨཾ ཀམྨཔཝཏྟཾ ¶ , དྭཱིསུ ཋཱནེསུ ཝིཔཱཀོ ཝིཔཱཀཔཝཏྟནྟི སབྦམྤེཏཾ ཀམྨཔཝཏྟཉྩེཝ ཝིཔཱཀཔཝཏྟཉྩ. ཏཐཱ དྭཱིསུ ཋཱནེསུ ཀམྨཾ ཀམྨསནྟཏི, དྭཱིསུ ཝིཔཱཀོ ཝིཔཱཀསནྟཏཱིཏི སབྦམྤེཏཾ ཀམྨསནྟཏི ཙེཝ ཝིཔཱཀསནྟཏི ཙ. དྭཱིསུ ཋཱནེསུ ཀམྨཾ ཀིརིཡཱ ནཱམ, དྭཱིསུ ཝིཔཱཀོ ཀིརིཡཱཕལཾ ནཱམཱཏི སབྦམྤེཏཾ ཀིརིཡཱ ཙེཝ ཀིརིཡཱཕལཉྩཱཏི.

ཨེཝཾ སམུཔྤནྣམིདཾ སཧེཏུཀཾ,

དུཀྑཾ ཨནིཙྩཾ ཙལམིཏྟརདྡྷུཝཾ;

དྷམྨེཧི དྷམྨཱ པབྷཝནྟི ཧེཏུསོ,

ན ཧེཏྠ ཨཏྟཱཝ པརོཝ ཝིཛྫཏི.

དྷམྨཱ དྷམྨེ སཉྫནེནྟི, ཧེཏུསམྦྷཱརཔཙྩཡཱ;

ཧེཏཱུནཉྩ ནིརོདྷཱཡ, དྷམྨོ བུདྡྷེན དེསིཏོ;

ཧེཏཱུསུ ཨུཔརུདྡྷེསུ, ཚིནྣཾ ཝཊྚཾ ན ཝཊྚཏི.

ཨེཝཾ དུཀྑནྟཀིརིཡཱཡ, བྲཧྨཙརིཡཱིདྷ ཝིཛྫཏི;

སཏྟེ ཙ ནཱུཔལབྦྷནྟེ, ནེཝུཙྪེདོ ན སསྶཏཾ.

ཏིཝཊྚམནཝཊྛིཏཾ བྷམཏཱིཏི ཨེཏྠ པན སངྑཱརབྷཝཱ ཀམྨཝཊྚཾ, ཨཝིཛྫཱཏཎྷཱུཔཱདཱནཱནི ཀིལེསཝཊྚཾ, ཝིཉྙཱཎནཱམརཱུཔསལཱ༹ཡཏནཕསྶཝེདནཱ ཝིཔཱཀཝཊྚནྟི ཨིམེཧི ཏཱིཧི ཝཊྚེཧི ཏིཝཊྚམིདཾ བྷཝཙཀྐཾ ཡཱཝ ཀིལེསཝཊྚཾ ན ཨུཔཙྪིཛྫཏི ¶ ཏཱཝ ཨནུཔཙྪིནྣཔཙྩཡཏྟཱ ཨནཝཊྛིཏཾ པུནཔྤུནཾ པརིཝཊྚནཏོ བྷམཏིཡེཝཱཏི ཝེདིཏབྦཾ.

ཏཡིདམེཝཾ བྷམམཱནཾ –

སཙྩཔྤབྷཝཏོ ཀིཙྩཱ, ཝཱརཎཱ ཨུཔམཱཧི ཙ;

གམྦྷཱིརནཡབྷེདཱ ཙ, ཝིཉྙཱཏབྦཾ ཡཐཱརཧཾ.

ཏཏྠ ¶ ཡསྨཱ ཀུསལཱཀུསལཀམྨཾ ཨཝིསེསེན སམུདཡསཙྩནྟི སཙྩཝིབྷངྒེ ཝུཏྟཾ, ཏསྨཱ ཨཝིཛྫཱཔཙྩཡཱ སངྑཱརཱཏི ཨཝིཛྫཱཡ སངྑཱརཱ དུཏིཡསཙྩཔྤབྷཝཾ དུཏིཡསཙྩཾ, སངྑཱརེཧི ཝིཉྙཱཎཾ དུཏིཡསཙྩཔྤབྷཝཾ པཋམསཙྩཾ, ཝིཉྙཱཎཱདཱིཧི ནཱམརཱུཔཱདཱིནི ཝིཔཱཀཝེདནཱཔརིཡོསཱནཱནི པཋམསཙྩཔྤབྷཝཾ པཋམསཙྩཾ, ཝེདནཱཡ ཏཎྷཱ པཋམསཙྩཔྤབྷཝཾ དུཏིཡསཙྩཾ, ཏཎྷཱཡ ཨུཔཱདཱནཾ དུཏིཡསཙྩཔྤབྷཝཾ དུཏིཡསཙྩཾ, ཨུཔཱདཱནཏོ བྷཝོ དུཏིཡསཙྩཔྤབྷཝཾ པཋམདུཏིཡསཙྩདྭཡཾ, བྷཝཏོ ཛཱཏི ¶ དུཏིཡསཙྩཔྤབྷཝཾ པཋམསཙྩཾ, ཛཱཏིཡཱ ཛརཱམརཎཾ པཋམསཙྩཔྤབྷཝཾ པཋམསཙྩནྟི. ཨེཝཾ ཏཱཝིདཾ ‘སཙྩཔྤབྷཝཏོ’ ཝིཉྙཱཏབྦཾ ཡཐཱརཧཾ.

ཡསྨཱ པནེཏྠ ཨཝིཛྫཱ ཝཏྠཱུསུ ཙ སཏྟེ སམྨོཧེཏི པཙྩཡོ ཙ ཧོཏི སངྑཱརཱནཾ པཱཏུབྷཱཝཱཡ, ཏཐཱ སངྑཱརཱ སངྑཏཉྩ ཨབྷིསངྑརོནྟི པཙྩཡཱ ཙ ཧོནྟི ཝིཉྙཱཎསྶ, ཝིཉྙཱཎམྤི ཝཏྠུཉྩ པཊིཛཱནཱཏི པཙྩཡོ ཙ ཧོཏི ནཱམརཱུཔསྶ, ནཱམརཱུཔམྤི ཨཉྙམཉྙཉྩ ཨུཔཏྠམྦྷེཏི པཙྩཡོ ཙ ཧོཏི སལཱ༹ཡཏནསྶ, སལཱ༹ཡཏནམྤི སཝིསཡེ ཙ ཝཏྟཏི པཙྩཡོ ཙ ཧོཏི ཕསྶསྶ, ཕསྶོཔི ཨཱརམྨཎཉྩ ཕུསཏི པཙྩཡོ ཙ ཧོཏི ཝེདནཱཡ, ཝེདནཱཔི ཨཱརམྨཎརསཉྩ ཨནུབྷཝཏི པཙྩཡོ ཙ ཧོཏི ཏཎྷཱཡ, ཏཎྷཱཔི རཛྫནཱིཡེ ཙ དྷམྨེ རཛྫཏི པཙྩཡོ ཙ ཧོཏི ཨུཔཱདཱནསྶ, ཨུཔཱདཱནམྤི ཨུཔཱདཱནཱིཡེ ཙ དྷམྨེ ཨུཔཱདིཡཏི པཙྩཡོ ཙ ཧོཏི བྷཝསྶ, བྷཝོཔི ནཱནཱགཏཱིསུ ཙ ཝིཀྑིཔཏི པཙྩཡོ ཙ ཧོཏི ཛཱཏིཡཱ, ཛཱཏིཔི ཁནྡྷེ ཙ ཛནེཏི ཏེསཾ ཨབྷིནིབྦཏྟིབྷཱཝེན པཝཏྟཏཱ པཙྩཡོ ཙ ཧོཏི ཛརཱམརཎསྶ, ཛརཱམརཎམྤི ཁནྡྷཱནཾ པཱཀབྷེདབྷཱཝཉྩ ཨདྷིཏིཊྛཏི པཙྩཡོ ཙ ཧོཏི བྷཝནྟརཔཱཏུབྷཱཝཱཡ སོཀཱདཱིནཾ ཨདྷིཊྛཱནཏྟཱ, ཏསྨཱ སབྦཔདེསུ དྭིདྷཱ པཝཏྟ‘ཀིཙྩཏོ’པི ཨིདཾ ཝིཉྙཱཏབྦཾ ཡཐཱརཧཾ.

ཡསྨཱ ¶ ཙེཏྠ ‘‘ཨཝིཛྫཱཔཙྩཡཱ སངྑཱརཱ’’ཏི ཨིདཾ ཀཱརཀདསྶནནིཝཱརཎཾ, ‘‘སངྑཱརཔཙྩཡཱ ཝིཉྙཱཎ’’ནྟི ཨཏྟསངྐནྟིདསྶནནིཝཱརཎཾ, ‘‘ཝིཉྙཱཎཔཙྩཡཱ ནཱམརཱུཔ’’ནྟི ཨཏྟཱཏིཔརིཀཔྤིཏཝཏྠུབྷེདདསྶནཏོ གྷནསཉྙཱནིཝཱརཎཾ, ‘‘ནཱམརཱུཔཔཙྩཡཱ སལཱ༹ཡཏན’’ནྟིཨཱདཱིསུ ‘‘ཨཏྟཱ པསྶཏི…པེ… ཝིཛཱནཱཏི ཕུསཏི ཝེདཡཏི ཏཎྷིཡཏི ཨུཔཱདིཡཏི བྷཝཏི ཛཱཡཏི ཛཱིཡཏི མཱིཡཏཱི’’ཏི ཨེཝམཱདིདསྶནནིཝཱརཎཾ, ཏསྨཱ མིཙྪཱདསྶནནིཝཱརཎཏོཔེཏཾ བྷཝཙཀྐཾ ‘ནིཝཱརཎཏོ’ ཝིཉྙཱཏབྦཾ ཡཐཱརཧཾ.

ཡསྨཱ པནེཏྠ སལཀྑཎསཱམཉྙལཀྑཎཝསེན དྷམྨཱནཾ ཨདསྶནཏོ ཨནྡྷོ ཝིཡ ཨཝིཛྫཱ ¶ , ཨནྡྷསྶ ཨུཔཀྑལནཾ ཝིཡ ཨཝིཛྫཱཔཙྩཡཱ སངྑཱརཱ, ཨུཔཀྑལིཏསྶ པཏནཾ ¶ ཝིཡ སངྑཱརཔཙྩཡཱ ཝིཉྙཱཎཾ, པཏིཏསྶ གཎྜཔཱཏུབྷཱཝོ ཝིཡ ཝིཉྙཱཎཔཙྩཡཱ ནཱམརཱུཔཾ, གཎྜབྷེདཔཱིལ༹ཀཱ ཝིཡ ནཱམརཱུཔཔཙྩཡཱ སལཱ༹ཡཏནཾ, གཎྜཔཱིལ༹ཀཱགྷཊྚནཾ ཝིཡ སལཱ༹ཡཏནཔཙྩཡཱ ཕསྶོ, གྷཊྚནདུཀྑཾ ཝིཡ ཕསྶཔཙྩཡཱ ཝེདནཱ, དུཀྑསྶ པཊིཀཱརཱབྷིལཱསོ ཝིཡ ཝེདནཱཔཙྩཡཱ ཏཎྷཱ, པཊིཀཱརཱབྷིལཱསེན ཨསཔྤཱཡགྒཧཎཾ ཝིཡ ཏཎྷཱཔཙྩཡཱ ཨུཔཱདཱནཾ, ཨུཔཱདིནྣཨསཔྤཱཡཱལེཔནཾ ཝིཡ ཨུཔཱདཱནཔཙྩཡཱ བྷཝོ, ཨསཔྤཱཡཱལེཔནེན གཎྜཝིཀཱརཔཱཏུབྷཱཝོ ཝིཡ བྷཝཔཙྩཡཱ ཛཱཏི, གཎྜཝིཀཱརཏོ གཎྜབྷེདོ ཝིཡ ཛཱཏིཔཙྩཡཱ ཛརཱམརཎཾ.

ཡསྨཱ ཝཱ པནེཏྠ ཨཝིཛྫཱ ཨཔྤཊིཔཏྟིམིཙྪཱཔཊིཔཏྟིབྷཱཝེན སཏྟེ ཨབྷིབྷཝཏི པཊལཾ ཝིཡ ཨཀྑཱིནི, ཏདབྷིབྷཱུཏོ ཙ བཱལོ པོནོབྦྷཝིཀེཧི སངྑཱརེཧི ཨཏྟཱནཾ ཝེཋེཏི ཀོསཀཱརཀིམི ཝིཡ ཀོསཔྤདེསེཧི, སངྑཱརཔརིགྒཧིཏཾ ཝིཉྙཱཎཾ གཏཱིསུ པཏིཊྛཾ ལབྷཏི པརིཎཱཡཀཔརིགྒཧིཏོ ཝིཡ རཱཛཀུམཱརོ རཛྫེ, ཨུཔཔཏྟིནིམིཏྟཾ པརིཀཔྤནཏོ ཝིཉྙཱཎཾ པཊིསནྡྷིཡཾ ཨནེཀཔྤཀཱརཾ ནཱམརཱུཔཾ ཨབྷིནིབྦཏྟེཏི མཱཡཱཀཱརོ ཝིཡ མཱཡཾ, ནཱམརཱུཔེ པཏིཊྛིཏཾ སལཱ༹ཡཏནཾ ཝུདྡྷིཾ ཝིརཱུལ༹ྷིཾ ཝེཔུལླཾ པཱཔུཎཱཏི སུབྷཱུམིཡཾ པཏིཊྛིཏོ ཝནཔྤགུམྦོ ཝིཡ, ཨཱཡཏནགྷཊྚནཏོ ཕསྶོ ཛཱཡཏི ཨརཎཱིསཧིཏཱབྷིམདྡནཏོ ཨགྒི ཝིཡ, ཕསྶེན ཕུཊྛསྶ ཝེདནཱ པཱཏུབྷཝཏི ཨགྒིནཱ ཕུཊྛསྶ ཌཱཧོ ཝིཡ, ཝེདཡམཱནསྶ ཏཎྷཱ ཝཌྜྷཏི ལོཎཱུདཀཾ པིཝཏོ པིཔཱསཱ ཝིཡ, ཏསིཏོ བྷཝེསུ ཨབྷིལཱསཾ ཀརོཏི པིཔཱསིཏོ ཝིཡ པཱནཱིཡེ, ཏདསྶུཔཱདཱནཾ ཨུཔཱདཱནེན བྷཝཾ ཨུཔཱདིཡཏི ཨཱམིསལོབྷེན མཙྪོ བལི༹སཾ ཝིཡ, བྷཝེ སཏི ཛཱཏི ཧོཏི བཱིཛེ སཏི ཨངྐུརོ ཝིཡ, ཛཱཏསྶ ཨཝསྶཾ ཛརཱམརཎཾ ཨུཔྤནྣསྶ ¶ རུཀྑསྶ པཏནཾ ཝིཡ, ཏསྨཱ ཨེཝཾ ‘ཨུཔམཱཧི’ པེཏཾ བྷཝཙཀྐཾ ཝིཉྙཱཏབྦཾ ཡཐཱརཧཾ.

ཡསྨཱ ཙ བྷགཝཏཱ ཨཏྠཏོཔི དྷམྨཏོཔི དེསནཱཏོཔི པཊིཝེདྷཏོཔི གམྦྷཱིརབྷཱཝཾ སནྡྷཱཡ ‘‘གམྦྷཱིརོ ཙཱཡཾ, ཨཱནནྡ, པཊིཙྩསམུཔྤཱདོ གམྦྷཱིརཱཝབྷཱསོ ཙཱ’’ཏི (དཱི. ནི. ༢.༩༥; སཾ. ནི. ༢.༦༠) ཝུཏྟཾ, ཏསྨཱ ¶ ‘གམྦྷཱིརབྷེདཏོ’པེཏཾ བྷཝཙཀྐཾ ཝིཉྙཱཏབྦཾ ཡཐཱརཧཾ.

ཏཏྠ ཡསྨཱ ན ཛཱཏིཏོ ཛརཱམརཎཾ ན ཧོཏི, ན ཙ ཛཱཏིཾ ཝིནཱ ཨཉྙཏོ ཧོཏི, ཨིཏྠཉྩ ཛཱཏིཏོ སམུདཱགཙྪཏཱིཏི ཨེཝཾ ཛཱཏིཔཙྩཡསམུདཱགཏཊྛསྶ དུརཝབོདྷནཱིཡཏོ ཛརཱམརཎསྶ ཛཱཏིཔཙྩཡསམྦྷཱུཏསམུདཱགཏཊྛོ གམྦྷཱིརོ, ཏཐཱ ཛཱཏིཡཱ བྷཝཔཙྩཡ…པེ… སངྑཱརཱནཾ ¶ ཨཝིཛྫཱཔཙྩཡསམྦྷཱུཏསམུདཱགཏཊྛོ གམྦྷཱིརོ, ཏསྨཱ ཨིདཾ བྷཝཙཀྐཾ ཨཏྠགམྦྷཱིརནྟི. ཨཡཾ ཏཱཝེཏྠ ‘ཨཏྠགམྦྷཱིརཏཱ’ ཧེཏུཕལཉྷི ཨཏྠོཏི ཝུཙྩཏི, ཡཐཱཧ ‘‘ཧེཏུཕལེ ཉཱཎཾ ཨཏྠཔཊིསམྦྷིདཱ’’ཏི (ཝིབྷ. ༧༢༠).

ཡསྨཱ པན ཡེནཱཀཱརེན ཡདཝཏྠཱ ཙ ཨཝིཛྫཱ ཏེསཾ ཏེསཾ སངྑཱརཱནཾ པཙྩཡོ ཧོཏི, ཏསྶ དུརཝབོདྷནཱིཡཏོ ཨཝིཛྫཱཡ སངྑཱརཱནཾ པཙྩཡཊྛོ གམྦྷཱིརོ, ཏཐཱ སངྑཱརཱནཾ…པེ… ཛཱཏིཡཱ ཛརཱམརཎསྶ པཙྩཡཊྛོ གམྦྷཱིརོ, ཏསྨཱ ཨིདཾ བྷཝཙཀྐཾ དྷམྨགམྦྷཱིརནྟི ཨཡམེཏྠ ‘དྷམྨགམྦྷཱིརཏཱ’ ཧེཏུནོ ཧི དྷམྨོཏི ནཱམཾ, ཡཐཱཧ ‘‘ཧེཏུམྷི ཉཱཎཾ དྷམྨཔཊིསམྦྷིདཱ’’ཏི.

ཡསྨཱ ཙསྶ ཏེན ཏེན ཀཱརཎེན ཏཐཱ ཏཐཱ པཝཏྟེཏབྦཏྟཱ དེསནཱཔི གམྦྷཱིརཱ, ན ཏཏྠ སབྦཉྙུཏཉཱཎཏོ ཨཉྙཾ ཉཱཎཾ པཏིཊྛཾ ལབྷཏི, ཏཐཱ ཧེཏཾ ཀཏྠཙི སུཏྟེ ཨནུལོམཏོ, ཀཏྠཙི པཊིལོམཏོ; ཀཏྠཙི ཨནུལོམཔཊིལོམཏོ, ཀཏྠཙི ཝེམཛ྄ཛྷཏོ པཊྛཱཡ ཨནུལོམཏོ ཝཱ པཊིལོམཏོ ཝཱ, ཀཏྠཙི ཏིསནྡྷིཙཏུསངྑེཔཾ, ཀཏྠཙི དྭིསནྡྷིཏིསངྑེཔཾ, ཀཏྠཙི ཨེཀསནྡྷིདྭིསངྑེཔཾ དེསིཏཾ, ཏསྨཱ ཨིདཾ བྷཝཙཀྐཾ དེསནཱགམྦྷཱིརནྟི ཨཡཾ དེསནཱགམྦྷཱིརཏཱ.

ཡསྨཱ པནེཏྠ ཡོ ཨཝིཛྫཱདཱིནཾ སབྷཱཝོ, ཡེན པཊིཝིདྡྷེན ཨཝིཛྫཱདཡོ དྷམྨཱ སལཀྑཎཏོ པཊིཝིདྡྷཱ ཧོནྟི, སོ དུཔྤརིཡོགཱཧཏྟཱ གམྦྷཱིརོ, ཏསྨཱ ཨིདཾ བྷཝཙཀྐཾ པཊིཝེདྷགམྦྷཱིརཾ. ཏཐཱ ཧེཏྠ ཨཝིཛྫཱཡ ཨཉྙཱཎཱདསྶནསཙྩཱསམྤཊིཝེདྷཊྛོ ¶ གམྦྷཱིརོ, སངྑཱརཱནཾ ཨབྷིསངྑརཎཱཡཱུཧནསརཱགཝིརཱགཊྛོ, ཝིཉྙཱཎསྶ སུཉྙཏཨབྱཱཔཱརཨསངྐནྟིཔཊིསནྡྷིཔཱཏུབྷཱཝཊྛོ ¶ , ནཱམརཱུཔསྶ ཨེཀུཔྤཱདཝིནིབྦྷོགཱཝིནིབྦྷོགནམནརུཔྤནཊྛོ, སལཱ༹ཡཏནསྶ ཨདྷིཔཏིལོཀདྭཱརཁེཏྟཝིསཡཝིསཡཱིབྷཱཝཊྛོ, ཕསྶསྶ ཕུསནསངྒྷཊྚནསངྒཏིསནྣིཔཱཏཊྛོ, ཝེདནཱཡ ཨཱརམྨཎརསཱནུབྷཝནསུཁདུཀྑམཛ྄ཛྷཏྟབྷཱཝནིཛྫཱིཝཝེདཡིཏཊྛོ, ཏཎྷཱཡ ཨབྷིནནྡིཏཛ྄ཛྷོསཱནསརིཏཱལཏཱནདཱིཏཎྷཱསམུདྡདུཔྤཱུརཎཊྛོ, ཨུཔཱདཱནསྶ ཨཱདཱནགྒཧཎཱབྷིནིཝེསཔརཱམཱསདུརཏིཀྐམནཊྛོ, བྷཝསྶ ཨཱཡཱུཧནཱབྷིསངྑརཎཡོནིགཏིཋིཏིནིཝཱསེསུ ཁིཔནཊྛོ, ཛཱཏིཡཱ ཛཱཏིསཉྫཱཏིཨོཀྐནྟིནིབྦཏྟིཔཱཏུབྷཱཝཊྛོ, ཛརཱམརཎསྶ ཁཡཝཡབྷེདཝིཔརིཎཱམཊྛོ གམྦྷཱིརོཏི ཨཡམེཏྠ པཊིཝེདྷགམྦྷཱིརཏཱ.

ཡསྨཱ པནེཏྠ ཨེཀཏྟནཡོ, ནཱནཏྟནཡོ, ཨབྱཱཔཱརནཡོ, ཨེཝཾདྷམྨཏཱནཡོཏི ཙཏྟཱརོ ཨཏྠནཡཱ ཧོནྟི ¶ , ཏསྨཱ ‘ནཡབྷེདཏོ’པེཏཾ བྷཝཙཀྐཾ ཝིཉྙཱཏབྦཾ ཡཐཱརཧཾ. ཏཏྠ ‘‘ཨཝིཛྫཱཔཙྩཡཱ སངྑཱརཱ, སངྑཱརཔཙྩཡཱ ཝིཉྙཱཎ’’ནྟི ཨེཝཾ བཱིཛསྶ ཨངྐུརཱདིབྷཱཝེན རུཀྑབྷཱཝཔྤཏྟི ཝིཡ སནྟཱནཱནུཔཙྪེདོ ‘ཨེཀཏྟནཡོ’ ནཱམ; ཡཾ སམྨཱ པསྶནྟོ ཧེཏུཕལསམྦནྡྷེན པཝཏྟམཱནསྶ སནྟཱནསྶ ཨནུཔཙྪེདཱཝབོདྷཏོ ཨུཙྪེདདིཊྛིཾ པཛཧཏི, མིཙྪཱ པསྶནྟོ ཧེཏུཕལསམྦནྡྷེན པཝཏྟམཱནསྶ སནྟཱནཱནུཔཙྪེདསྶ ཨེཀཏྟགྒཧཎཏོ སསྶཏདིཊྛིཾ ཨུཔཱདིཡཏི.

ཨཝིཛྫཱདཱིནཾ པན ཡཐཱསཀལཀྑཎཝཝཏྠཱནཾ ‘ནཱནཏྟནཡོ’ ནཱམ; ཡཾ སམྨཱ པསྶནྟོ ནཝནཝཱནཾ ཨུཔྤཱདདསྶནཏོ སསྶཏདིཊྛིཾ པཛཧཏི, མིཙྪཱ པསྶནྟོ ཨེཀསནྟཱནཔཏིཏསྶ བྷིནྣསནྟཱནསྶེཝ ནཱནཏྟགྒཧཎཏོ ཨུཙྪེདདིཊྛིཾ ཨུཔཱདིཡཏི.

ཨཝིཛྫཱཡ ‘སངྑཱརཱ མཡཱ ཨུཔྤཱདེཏབྦཱ’, སངྑཱརཱནཾ ཝཱ ‘ཝིཉྙཱཎཾ ཨམྷེཧཱི’ཏི ཨེཝམཱདིབྱཱཔཱརཱབྷཱཝོ ‘ཨབྱཱཔཱརནཡོ’ ནཱམ; ཡཾ སམྨཱ པསྶནྟོ ཀཱརཀསྶ ཨབྷཱཝཱཝབོདྷཏོ ཨཏྟདིཊྛིཾ པཛཧཏི, མིཙྪཱ པསྶནྟོ ཡོ ཨསཏིཔི བྱཱཔཱརེ ཨཝིཛྫཱདཱིནཾ སབྷཱཝནིཡམསིདྡྷོ ཧེཏུབྷཱཝོ ཏསྶ ཨགྒཧཎཏོ ཨཀིརིཡདིཊྛིཾ ཨུཔཱདིཡཏི.

ཨཝིཛྫཱདཱིཧི པན ཀཱརཎེཧི སངྑཱརཱདཱིནཾཡེཝ སམྦྷཝོ ཁཱིརཱདཱིཧི ¶ དདྷིཨཱདཱིནཾ ཝིཡ, ན ཨཉྙེསནྟི ཨཡཾ ‘ཨེཝཾདྷམྨཏཱནཡོ’ ནཱམ; ཡཾ སམྨཱ པསྶནྟོ ¶ པཙྩཡཱནུརཱུཔཏོ ཕལཱཝབོདྷཏོ ཨཧེཏུཀདིཊྛིཉྩ ཨཀིརིཡདིཊྛིཉྩ པཛཧཏི, མིཙྪཱ པསྶནྟོ པཙྩཡཱནུརཱུཔཾ ཕལཔྤཝཏྟིཾ ཨགྒཧེཏྭཱ ཡཏོ ཀུཏོཙི ཡསྶ ཀསྶཙི ཨསམྦྷཝགྒཧཎཏོ ཨཧེཏུཀདིཊྛིཉྩེཝ ནིཡཏཝཱདཉྩ ཨུཔཱདིཡཏཱིཏི ཨེཝམིདཾ བྷཝཙཀྐཾ –

སཙྩཔྤབྷཝཏོ ཀིཙྩཱ, ཝཱརཎཱ ཨུཔམཱཧི ཙ;

གམྦྷཱིརནཡབྷེདཱ ཙ, ཝིཉྙཱཏབྦཾ ཡཐཱརཧཾ.

ཨིདཉྷི གམྦྷཱིརཏོ ཨགཱདྷཾ ནཱནཱནཡགྒཧཎཏོ དུརབྷིཡཱནཾ ཉཱཎཱསིནཱ སམཱདྷིཔཝརསིལཱཡཾ སུནིསིཏེན –

བྷཝཙཀྐམཔདཱལེཏྭཱ ¶ ,

ཨསནིཝིཙཀྐམིཝ ནིཙྩནིམྨཐནཾ;

སཾསཱརབྷཡམཏཱིཏོ,

ན ཀོཙི སུཔིནནྟརེཔྱཏྠི.

ཝུཏྟམྤི ཙེཏཾ བྷགཝཏཱ – ‘‘གམྦྷཱིརོ ཙཱཡཾ, ཨཱནནྡ, པཊིཙྩསམུཔྤཱདོ གམྦྷཱིརཱཝབྷཱསོ ཙ. ཨེཏསྶ, ཨཱནནྡ, དྷམྨསྶ ཨནནུབོདྷཱ ཨཔྤཊིཝེདྷཱ ཨེཝམཡཾ པཛཱ ཏནྟཱཀུལཀཛཱཏཱ ཀུལགཎྛིཀཛཱཏཱ མུཉྫཔབྦཛབྷཱུཏཱ ཨཔཱཡཾ དུགྒཏིཾ ཝིནིཔཱཏཾ སཾསཱརཾ ནཱཏིཝཏྟཏཱི’’ཏི (དཱི. ནི. ༢.༩༥; སཾ. ནི. ༢.༦༠). ཏསྨཱ ཨཏྟནོ ཝཱ པརེསཾ ཝཱ ཧིཏཱཡ སུཁཱཡ པཊིཔནྣོ ཨཝསེསཀིཙྩཱནི པཧཱཡ –

གམྦྷཱིརེ པཙྩཡཱཀཱར-པྤབྷེདེ ཨིདྷ པཎྜིཏོ;

ཡཐཱ གཱདྷཾ ལབྷེཐེཝ-མནུཡུཉྫེ སདཱ སཏོཏི.

སུཏྟནྟབྷཱཛནཱིཡཝཎྞནཱ.

༢. ཨབྷིདྷམྨབྷཱཛནཱིཡཝཎྞནཱ

༢༤༣. ཨེཝཾ མཧཱཔཐཝིཾ པཏྠརནྟོ ཝིཡ ཨཱཀཱསཾ ཝིཏྠཱརཡནྟོ ཝིཡ ཙ སབྦདྷམྨེསུ ཨཔྤཊིཧཏཉཱཎོ སཏྠཱ སུཏྟནྟབྷཱཛནཱིཡེ ནིགྒཎྛིཾ ནིཛྫཊཾ པཙྩཡཱཀཱརཾ ནཱནཱཙིཏྟཝསེན དསྶེཏྭཱ ཨིདཱནི ཡསྨཱ ན ཀེཝལཾ ཨཡཾ པཙྩཡཱཀཱརོ ནཱནཱཙིཏྟེསུཡེཝ ¶ ཧོཏི, ཨེཀཙིཏྟེཔི ཧོཏིཡེཝ, ཏསྨཱ ཨབྷིདྷམྨབྷཱཛནཱིཡཝསེན ཨེཀཙིཏྟཀྑཎིཀཾ པཙྩཡཱཀཱརཾ ནཱནཔྤཀཱརཏོ ¶ དསྶེཏུཾ ཨཝིཛྫཱཔཙྩཡཱ སངྑཱརོཏིཨཱདིནཱ ནཡེན མཱཏིཀཾ ཏཱཝ ཋཔེསི. ཨེཝཾ ཋཔིཏཱཡ པན མཱཏིཀཱཡ –

ཨཝིཛྫཱདཱིཧི ¶ མཱུལེཧི, ནཝ མཱུལཔདཱ ནཝ;

ནཡཱ ཏཏྠ ཙཏུཀྐཱནི, ཝཱརབྷེདཉྩ དཱིཔཡེ.

ཏཏྲཱཡཾ དཱིཔནཱ – ཨེཏྠ ཧི ཨཝིཛྫཱསངྑཱརཝིཉྙཱཎནཱམཚཊྛཱཡཏནཕསྶཝེདནཱཏཎྷཱཨུཔཱདཱནཔྤབྷེདེཧི ཨཝིཛྫཱདཱིཧི ནཝཧི མཱུལཔདེཧི ཨཝིཛྫཱདིཀོ, སངྑཱརཱདིཀོ, ཝིཉྙཱཎཱདིཀོ, ནཱམཱདིཀོ, ཚཊྛཱཡཏནཱདིཀོ, ཕསྶཱདིཀོ, ཝེདནཱདིཀོ, ཏཎྷཱདིཀོ, ཨུཔཱདཱནཱདིཀོཏི ཨིམེ ནཝ མཱུལཔདཱ ནཝ ནཡཱ ཧོནྟི.

ཏེསུ ཡོ ཏཱཝ ཨཡཾ ཨཝིཛྫཱདིཀོ ནཡོ, ཏཏྠ པཙྩཡཙཏུཀྐཾ, ཧེཏུཙཏུཀྐཾ, སམྤཡུཏྟཙཏུཀྐཾ, ཨཉྙམཉྙཙཏུཀྐནྟི ཙཏྟཱརི ཙཏུཀྐཱནི ཧོནྟི. ཡཐཱ ཙེཏྠ ཨེཝཾ སེསེསུཔཱིཏི ཨེཀེཀསྨིཾ ནཡེ ཙཏུནྣཾ ཙཏུནྣཾ ཙཏུཀྐཱནཾ ཝསེན ཚཏྟིཾས ཙཏུཀྐཱནི. ཏཏྠ ཨེཀེཀེན ཙཏུཀྐེན ཙཏུནྣཾ ཙཏུནྣཾ ཝཱརཱནཾ སངྒཧིཏཏྟཱ ཙཏུནྣམྤི ཙཏུཀྐཱནཾ ཝསེན ཨེཀེཀསྨིཾ ནཡེ སོལ༹ས སོལ༹ས ཝཱརཱཏི ཙཏུཙཏྟཱལཱིསཱདྷིཀཾ ཝཱརསཏཾ ཧོཏཱིཏི ཝེདིཏབྦཾ.

༡. པཙྩཡཙཏུཀྐཾ

ཏཏྠ ཡདེཏཾ སབྦཔཋམེ ཨཝིཛྫཱམཱུལཀེ ནཡེ པཙྩཡཙཏུཀྐཾ, ཏསྨིཾ པཋམོ ནཱམརཱུཔཊྛཱནེ ནཱམསྶ, སལཱ༹ཡཏནཊྛཱནེ ཚཊྛཱཡཏནསྶ ཙ ཝུཏྟཏྟཱ ཨཔརིཔུཎྞཨངྒདྭཡཡུཏྟོ དྭཱདསངྒིཀཝཱརོ ནཱམ. དུཏིཡོ ནཱམརཱུཔཊྛཱནེ ནཱམསྶེཝ, སལཱ༹ཡཏནཊྛཱནེ ཙ ན ཀསྶཙི ཝུཏྟཏྟཱ ཨཔརིཔུཎྞཨེཀངྒཡུཏྟོ ཨེཀཱདསངྒིཀཝཱརོ ནཱམ. ཏཏིཡོ སལཱ༹ཡཏནཊྛཱནེ ཚཊྛཱཡཏནསྶ ཝུཏྟཏྟཱ པརིཔུཎྞཨེཀངྒཡུཏྟོ དྭཱདསངྒིཀཝཱརོ ནཱམ. ཙཏུཏྠོ པན པརིཔུཎྞདྭཱདསངྒིཀོཡེཝ.

ཏཏྠ སིཡཱ – ཨཡམྤི ཚཊྛཱཡཏནཔཙྩཡཱ ཕསྶོཏི ཝུཏྟཏྟཱ ཨཔརིཔུཎྞེཀངྒཡུཏྟོཡེཝཱཏི? ན, ཏསྶ ཨནངྒཏྟཱ. ཕསྶོཡེཝ ཧེཏྠ ཨངྒཾ, ན ཚཊྛཱཡཏནཾ. ཏསྨཱ ཏསྶ ཨནངྒཏྟཱ ནཱཡཾ ཨཔརིཔུཎྞེཀངྒཡུཏྟོཏི. ཨཊྛཀཐཱཡཾ པན ཝུཏྟཾ – ‘‘པཋམོ སབྦསངྒཱཧིཀཊྛེན ¶ , དུཏིཡོ པཙྩཡཝིསེསཊྛེན, ཏཏིཡོ གབྦྷསེཡྻཀསཏྟཱནཾ ཝསེན, ཙཏུཏྠོ ཨོཔཔཱཏིཀསཏྟཱནཾ ¶ ཝསེན གཧིཏོ. ཏཐཱ པཋམོ སབྦསངྒཱཧིཀཊྛེན, དུཏིཡོ པཙྩཡཝིསེསཊྛེན, ཏཏིཡོ ཨཔརིཔུཎྞཱཡཏནཝསེན, ཙཏུཏྠོ པརིཔུཎྞཱཡཏནཝསེན གཧིཏོ. ཏཐཱ པཋམོ སབྦསངྒཱཧིཀཊྛེན, དུཏིཡོ ¶ མཧཱནིདཱནསུཏྟནྟཝསེན (དཱི. ནི. ༢.༩༥ ཨཱདཡོ), ཏཏིཡོ རཱུཔབྷཝཝསེན, ཙཏུཏྠོ ཀཱམབྷཝཝསེན གཧིཏོ’’ཏི.

ཏཏྠ པཋམོ ཨིམེསུ དུཏིཡཱདཱིསུ ཏཱིསུ ཝཱརེསུ ན ཀཏྠཙི ན པཝིསཏཱིཏི སབྦསངྒཱཧིཀོཏི ཝུཏྟོ. སེསཱནཾ ཝིསེསོ པརཏོ ཨཱཝིབྷཝིསྶཏི. ཏསྶཱཝིབྷཱཝཏྠཾ –

ཡཾ ཡཏྠ ཨཉྙཐཱ ཝུཏྟཾ, ཨཝུཏྟཉྩཱཔི ཡཾ ཡཧིཾ;

ཡཾ ཡཐཱ པཙྩཡོ ཡསྶ, ཏཾ སབྦམུཔལཀྑཡེ.

ཏཏྲཱཡཾ ནཡོ – ཨཝིསེསེན ཏཱཝ ཙཏཱུསུཔི ཨེཏེསུ སུཏྟནྟབྷཱཛནིཡེ ཝིཡ སངྑཱརཱཏི ཨཝཏྭཱ སངྑཱརོཏི ཝུཏྟཾ, ཏཾ ཀསྨཱཏི? ཨེཀཙིཏྟཀྑཎིཀཏྟཱ. ཏཏྲ ཧི ནཱནཱཙིཏྟཀྑཎིཀོ པཙྩཡཱཀཱརོ ཝིབྷཏྟོ. ཨིདྷ ཨེཀཙིཏྟཀྑཎིཀོ ཨཱརདྡྷོ. ཨེཀཙིཏྟཀྑཎེ ཙ བཧཱུ ཙེཏནཱ ན སནྟཱིཏི སངྑཱརཱཏི ཨཝཏྭཱ སངྑཱརོཏི ཝུཏྟཾ.

པཋམཝཱརེ པནེཏྠ ཨེཀཙིཏྟཀྑཎཔརིཡཱཔནྣདྷམྨསངྒཧཎཏོ སབྦཊྛཱནསཱདྷཱརཎཏོ ཙ རཱུཔཾ ཚཌྜེཏྭཱ ‘‘ཝིཉྙཱཎཔཙྩཡཱ ནཱམ’’ནྟྭེཝ ཝུཏྟཾ. ཏཉྷི ཨེཀཙིཏྟཀྑཎཔརིཡཱཔནྣཾ སབྦཊྛཱནསཱདྷཱརཎཉྩ, ན ཀཏྠཙི ཝིཉྙཱཎཔྤཝཏྟིཊྛཱནེ ན པཝཏྟཏི. ཡསྨཱ ཙ ཨེཀཙིཏྟཀྑཎཔརིཡཱཔནྣོ ཨེཀོཝེཏྠ ཕསྶོ, ཏསྨཱ ཏསྶཱནུརཱུཔཾ པཙྩཡབྷཱུཏཾ ཨཱཡཏནཾ གཎྷནྟོ སལཱ༹ཡཏནཊྛཱནེ ‘‘ནཱམཔཙྩཡཱ ཚཊྛཱཡཏན’’ནྟི ཨེཀཾ མནཱཡཏནཾཡེཝ ཨཱཧ. ཏཉྷི ཨེཀསྶ ཨཀུསལཕསྶསྶ ཨནུརཱུཔཾ པཙྩཡབྷཱུཏཾ. ཀཱམཉྩེཏཾ སངྑཱརཔཙྩཡཱ ཝིཉྙཱཎནྟི ཨེཏྠཱཔི ཝུཏྟཾ, ཧེཏུཕལཝིསེསདསྶནཏྠཾ པན ཨངྒཔུཎྞཏྠཉྩ པུན ཨིདྷ གཧིཏཾ. ཏཏྲ ཧི ཨེཏསྶ ཝིསེསེན སངྑཱརོ ཧེཏུ, ཨཝིསེསེན ནཱམཾ ཕལཾ. ཨིདྷ པནསྶ ཨཝིསེསེན ནཱམཾ ཧེཏུ, ཝིསེསེན ཕསྶོ ཕལནྟི. སོཀཱདཡོ པན ཡསྨཱ སབྦེ ཨེཀཙིཏྟཀྑཎེ ན སམྦྷཝནྟི, སབྦསྨིཉྩ ཙིཏྟཔྤཝཏྟིཊྛཱནེ ཙེཝ ཙིཏྟེ ཙ ན པཝཏྟནྟི, ཏསྨཱ ན གཧིཏཱ. ཛཱཏིཛརཱམརཎཱནི ¶ པན ཨཙིཏྟཀྑཎམཏྟཱནིཔི སམཱནཱནི ཙིཏྟཀྑཎེ ཨནྟོགདྷཏྟཱ ཨངྒཔརིཔཱུརཎཏྠཾ ¶ གཧིཏཱནི. ཨེཝཾ ཏཱཝེཏྠ ‘ཡཾ ཨཉྙཐཱ ཝུཏྟཾ. ཡཉྩ ཨཝུཏྟཾ’ ཏཾ ཝེདིཏབྦཾ.

ཡཾ ¶ པནེཏྠ ཨིཏོ པརེསུ ཝཱརེསུ ཝུཏྟཾ, ཏསྶཏྠོ ཝུཏྟནཡེནེཝ ཝེདིཏབྦོ. ཡསྨིཾ ཡསྨིཾ པན ཝཱརེ ཡོ ཡོ ཝིསེསོ ཨཱགཏོ, ཏཾ ཏཾ ཏཏྠ ཏཏྠེཝ པཀཱསཡིསྶཱམ.

‘ཡཾ ཡཐཱ པཙྩཡོ ཡསྶཱ’ཏི ཨེཏྠ པན སངྑཱརསྶ ཨཝིཛྫཱ སམྤཡུཏྟདྷམྨསཱདྷཱརཎེཧི སཧཛཱཏཨཉྙམཉྙནིསྶཡསམྤཡུཏྟཨཏྠིཨཝིགཏཔཙྩཡེཧི ཚཧི ཧེཏུཔཙྩཡེན ཙཱཏི སཏྟདྷཱ པཙྩཡོ. ཏཏྠ ཡསྨཱ པརཏོ ཧེཏུཙཏུཀྐཱདཱིནི ཏཱིཎི ཙཏུཀྐཱནི ཨཝིགཏསམྤཡུཏྟཨཉྙམཉྙཔཙྩཡཝསེན ཝུཏྟཱནི, ཏསྨཱ ཨིདྷ ཏཱནི ཨཔནེཏྭཱ ཨཝསེསཱནཾ ཝསེན ཨཝིཛྫཱ སངྑཱརསྶ ཙཏུདྷཱ པཙྩཡོཏི ཝེདིཏབྦོ.

སངྑཱརོ ཝིཉྙཱཎསྶ སཱདྷཱརཎེཧི ཚཧི, ཀམྨཱཧཱརཔཙྩཡེཧི ཙཱཏི ཨཊྛདྷཱ པཙྩཡོ. ཨིདྷ པན ཏེཡེཝ ཏཡོ ཨཔནེཏྭཱ པཉྩདྷཱ. ཝིཉྙཱཎཾ ནཱམསྶ སཱདྷཱརཎེཧི ཚཧི, ཨིནྡྲིཡཱཧཱརཱདྷིཔཏཱིཧི ཙཱཏི ནཝདྷཱ. ཨིདྷ པན ཏཡོ ཨཔནེཏྭཱ ཚདྷཱ. ནཱམཾ ཚཊྛཱཡཏནསྶ སཱདྷཱརཎེཧི ཚཧི. ཀིཉྩི པནེཏྠ ཨདྷིཔཏིཔཙྩཡེན, ཀིཉྩི ཨཱཧཱརཔཙྩཡཱདཱིཧཱིཏི ཨནེཀདྷཱ. ཨིདྷ པན ཏེཡེཝ ཏཡོ ཨཔནེཏྭཱ ཏིདྷཱ ཙཏུདྷཱ པཉྩདྷཱ ཝཱ. ཚཊྛཱཡཏནཾ ཕསྶསྶ ཡཐཱ ཝིཉྙཱཎཾ ནཱམསྶ. ཨེཝཾ ཕསྶོ ཝེདནཱཡ སཱདྷཱརཎེཧི ཚཧི ཨཱཧཱརཔཙྩཡེན ཙཱཏི སཏྟདྷཱ. ཨིདྷ པན ཏེཡེཝ ཏཡོ ཨཔནེཏྭཱ ཙཏུདྷཱ. ཝེདནཱ ཏཎྷཱཡ སཱདྷཱརཎེཧི ཚཧི ཛྷཱནིནྡྲིཡཔཙྩཡེཧི ཙཱཏི ཨཊྛདྷཱ. ཨིདྷ པན ཏེཡེཝ ཏཡོ ཨཔནེཏྭཱ པཉྩདྷཱ. ཏཎྷཱ ཨུཔཱདཱནསྶ, ཡཐཱ ཨཝིཛྫཱ སངྑཱརསྶ. ཨེཝཾ ཨུཔཱདཱནཾ བྷཝསྶ སཱདྷཱརཎེཧི ཚཧི མགྒཔཙྩཡེན ཙཱཏི སཏྟདྷཱ. ཨིདྷ པན ཏེཡེཝ ཏཡོ ཨཔནེཏྭཱ ཙཏུདྷཱ. བྷཝོ ཛཱཏིཡཱ, ཡསྨཱ ཛཱཏཱིཏི ཨིདྷ སངྑཏལཀྑཎཾ ཨདྷིཔྤེཏཾ, ཏསྨཱ པརིཡཱཡེན ཨུཔནིསྶཡཔཙྩཡེནེཝ པཙྩཡོ. ཏཐཱ ཛཱཏི ཛརཱམརཎསྶཱཏི.

ཡེ པན ཨེཝཾ ཝདནྟི – ‘‘ཨིམསྨིཾ ཙཏུཀྐེ སབྦེསམྤི སངྑཱརཱདཱིནཾ ཨཝིཛྫཱདཡོ སཧཛཱཏཔཙྩཡེན པཙྩཡཱ ཧོནྟི. སཧཛཱཏཔཙྩཡཝསེནེཝ ཧི པཋམཝཱརོ ཨཱརདྡྷོ’’ཏི, ཏེ བྷཝཱདཱིནཾ ཏཐཱ ཨབྷཱཝཾ སེསཔཙྩཡཱནཉྩ སམྦྷཝཾ ¶ དསྶེཏྭཱ པཊིཀྑིཔིཏབྦཱ. ན ཧི བྷཝོ ཛཱཏིཡཱ སཧཛཱཏཔཙྩཡོ ¶ ཧོཏི, ན ཛཱཏི ཛརཱམརཎསྶ. ཡེ ཙེཏེསཾ སངྑརཱདཱིནཾ ཨཝསེསཱ པཙྩཡཱ ཝུཏྟཱ, ཏེཔི སམྦྷཝནྟིཡེཝ. ཏསྨཱ ན སཀྐཱ ཚཌྜེཏུནྟི. ཨེཝཾ ཏཱཝ པཋམཝཱརེ ཡཾ ཡཏྠ ཨཉྙཐཱ ཝུཏྟཾ, ཨཝུཏྟཉྩཱཔི ཡཾ ཡཧིཾ, ཡཉྩ ཡཐཱ ཡསྶ པཙྩཡོ ཧོཏི, ཏཾ ཝེདིཏབྦཾ. དུཏིཡཝཱརཱདཱིསུཔི ཨེསེཝ ནཡོ.

ཨཡཾ ¶ པན ཝིསེསོ – དུཏིཡཝཱརེ ‘‘ནཱམཔཙྩཡཱ ཕསྶོ’’ཏི ཝཏྭཱ སལཱ༹ཡཏནཊྛཱནེ ན ཀིཉྩི ཝུཏྟཾ, ཏཾ ཀིམཏྠནྟི? པཙྩཡཝིསེསདསྶནཏྠཉྩེཝ མཧཱནིདཱནདེསནཱསངྒཧཏྠཉྩ. ཕསྶསྶ ཧི ན ཀེཝལཉྩ ཚཊྛཱཡཏནམེཝ པཙྩཡོ, ཝེདནཱཀྑནྡྷཱདཡོ པན ཏཡོ ཁནྡྷཱཔི པཙྩཡཱཡེཝ. མཧཱནིདཱནསུཏྟནྟེ ཙསྶ ‘‘ཨཏྠི ཨིདཔྤཙྩཡཱ ཕསྶོཏི ཨིཏི པུཊྛེན སཏཱ, ཨཱནནྡ, ཨཏྠཱིཏིསྶ ཝཙནཱིཡཾ. ཀིཾ པཙྩཡཱ ཕསྶོཏི? ཨིཏི ཙེ ཝདེཡྻ, ནཱམཔཙྩཡཱ ཕསྶོཏི ཨིཙྩསྶ ཝཙནཱིཡ’’ནྟི (དཱི. ནི. ༢.༩༦). ཨེཝཾ སལཱ༹ཡཏནཾ ཚཌྜེཏྭཱ ཨེཀཱདསངྒིཀོ པཊིཙྩསམུཔྤཱདོ ཝུཏྟོ. ཏསྨཱ ཨིམསྶ པཙྩཡཝིསེསསྶ དསྶནཏྠཾ ཨིམིསྶཱ ཙ མཧཱནིདཱནསུཏྟནྟདེསནཱཡ པརིགྒཧཏྠཾ དུཏིཡཝཱརེ ‘‘ནཱམཔཙྩཡཱ ཕསྶོ’’ཏི ཝཏྭཱ སལཱ༹ཡཏནཊྛཱནེ ན ཀིཉྩི ཝུཏྟནྟི. ཨེས ཏཱཝ དུཏིཡཝཱརེ ཝིསེསོ.

ཏཏིཡཝཱརེ པན ‘‘ཝིཉྙཱཎཔཙྩཡཱ ནཱམརཱུཔ’’ནྟི སུཏྟནྟབྷཱཛནཱིཡེ ཨཱགཏམེཝ ཙཏུཏྠམངྒཾ ཝུཏྟཾ, ཏཾ ཨེཀཙིཏྟཀྑཎིཀཏྟཱ པཙྩཡཱཀཱརསྶ ཨིདྷ ཨཡུཏྟནྟི ཙེ? ཏཾ ནཱཡུཏྟཾ. ཀསྨཱ? སཀཀྑཎེ པཙྩཡབྷཱཝཏོ. སཙེཔི ཧི ཏཏྠ རཱུཔཾ ཙིཏྟཀྑཎཏོ ཨུདྡྷཾ ཏིཊྛཏི, ཏཐཱཔིསྶ ཏཾ ཝིཉྙཱཎཾ སཀཀྑཎེ པཙྩཡོ ཧོཏི. ཀཐཾ? པུརེཛཱཏསྶ ཏཱཝ ཙིཏྟསམུཊྛཱནསྶ ཨཉྙསྶ ཝཱ པཙྪཱཛཱཏཔཙྩཡེན. ཝུཏྟཉྩེཏཾ ‘‘པཙྪཱཛཱཏཱ ཙིཏྟཙེཏསིཀཱ དྷམྨཱ པུརེཛཱཏསྶ ཨིམསྶ ཀཱཡསྶ པཙྪཱཛཱཏཔཙྩཡེན པཙྩཡོ’’ཏི (པཊྛཱ. ༡.༡.༡༡). སཧཛཱཏསྶ པན ཙིཏྟསམུཊྛཱནསྶ ནིསྶཡཔཙྩཡེན པཙྩཡོ. ཡཐཱཧ ‘‘ཙིཏྟཙེཏསིཀཱ དྷམྨཱ ཙིཏྟསམུཊྛཱནཱནཾ རཱུཔཱནཾ ནིསྶཡཔཙྩཡེན པཙྩཡོ’’ཏི (པཊྛཱ. ༡.༡.༨).

ཡདི ¶ ཨེཝཾ, པུརིམཝཱརེསུ ཀསྨཱ ཨེཝཾ ན ཝུཏྟནྟི ¶ ? རཱུཔཔྤཝཏྟིདེསཾ སནྡྷཱཡ དེསིཏཏྟཱ. ཨཡཉྷི པཙྩཡཱཀཱརོ རཱུཔཔྤཝཏྟིདེསེ ཀཱམབྷཝེ གབྦྷསེཡྻཀཱནཉྩེཝ ཨཔརིཔུཎྞཱཡཏནཨོཔཔཱཏིཀཱནཉྩ རཱུཔཱཝཙརདེཝཱནཉྩ ཝསེན དེསིཏོ. ཏེནེཝེཏྠ ‘‘ནཱམརཱུཔཔཙྩཡཱ སལཱ༹ཡཏན’’ནྟི ཨཝཏྭཱ ཚཊྛཱཡཏནནྟི ཝུཏྟཾ. ཏཏྠ ནཱམཾ ཧེཊྛཱ ཝུཏྟནཡམེཝ. རཱུཔཾ པན ཧདཡརཱུཔཾ ཝེདིཏབྦཾ. ཏཾ པནེཏསྶ ཚཊྛཱཡཏནསྶ ནིསྶཡཔཙྩཡེན ཙེཝ པུརེཛཱཏཔཙྩཡེན ཙཱཏི དྭིདྷཱ པཙྩཡོ ཧོཏཱིཏི ཨེས ཏཏིཡཝཱརེ ཝིསེསོ.

ཙཏུཏྠཝཱརོ པན ཡོནིཝསེན ཨོཔཔཱཏིཀཱནཾ, ཨཱཡཏནཝསེན པརིཔུཎྞཱཡཏནཱནཾ, བྷཝཝསེན ཀཱམཱཝཙརསཏྟཱནཾ ཝསེན ཝུཏྟོ. ཏེནེཝེཏྠ ‘‘ནཱམརཱུཔཔཙྩཡཱ སལཱ༹ཡཏན’’ནྟི ཝུཏྟཾ. ཏཏྠ ནཱམཾ ཚཊྛཱཡཏནསྶ ¶ སཧཛཱཏཱདཱིཧི, ཙཀྑཱཡཏནཱདཱིནཾ པཙྪཱཛཱཏཔཙྩཡེན. རཱུཔེ ཧདཡརཱུཔཾ ཚཊྛཱཡཏནསྶ ནིསྶཡཔཙྩཡཔུརེཛཱཏཔཙྩཡེཧི, ཙཏྟཱརི མཧཱབྷཱུཏཱནི ཙཀྑཱཡཏནཱདཱིནཾ སཧཛཱཏནིསྶཡཨཏྠིཨཝིགཏེཧི. ཡསྨཱ པནེས ཨེཀཙིཏྟཀྑཎིཀོ པཙྩཡཱཀཱརོ, ཏསྨཱ ཨེཏྠ སལཱ༹ཡཏནཔཙྩཡཱཏི ཨཝཏྭཱ ‘‘ཚཊྛཱཡཏནཔཙྩཡཱ ཕསྶོ’’ཏི ཝུཏྟོཏི ཨཡཾ ཙཏུཏྠཝཱརེ ཝིསེསོ.

ཨེཝམེཏེསཾ ནཱནཱཀརཎཾ ཉཏྭཱ པུན སབྦེསྭེཝ ཏེསུ ཝིསེསེན པཋམཀཱ དྭེ ཝཱརཱ ཨརཱུཔབྷཝེ པཙྩཡཱཀཱརདསྶནཏྠཾ ཝུཏྟཱཏི ཝེདིཏབྦཱ. ཨརཱུཔབྷཝསྨིཉྷི རཱུཔེན ཨསམྨིསྶཱནི པཊིཙྩསམུཔྤཱདངྒཱནི པཝཏྟནྟི. ཏཏིཡོ རཱུཔབྷཝེ པཙྩཡཱཀཱརདསྶནཏྠཾ ཝུཏྟོ. རཱུཔབྷཝསྨིཉྷི སཏིཔི རཱུཔསམྨིསྶཏྟེ སལཱ༹ཡཏནཾ ན པཝཏྟཏི. ཙཏུཏྠོ ཀཱམབྷཝེ པཙྩཡཱཀཱརདསྶནཏྠཾ ཝུཏྟོ. ཀཱམབྷཝསྨིཉྷི སཀལཾ སལཱ༹ཡཏནཾ པཝཏྟཏི. ཏཏིཡོ ཝཱ རཱུཔབྷཝེ ཙེཝ ཀཱམབྷཝེ ཙ ཨཔརིཔུཎྞཱཡཏནཱནཾ ཨཀུསལཔྤཝཏྟིཀྑཎཾ སནྡྷཱཡ ཝུཏྟོ. ཙཏུཏྠོ ཝཱ ཀཱམབྷཝེ པརིཔུཎྞཱཡཏནཱནཾ. པཋམོ ཝཱ སབྦཏྠགཱམིཏཾ སནྡྷཱཡ ཝུཏྟོ. སོ ཧི ན ཀཏྠཙི ཙིཏྟཔྤཝཏྟིདེསེ ན པཝཏྟཏི. དུཏིཡོ པཙྩཡཝིསེསཾ སནྡྷཱཡ ཝུཏྟོ. ཨེཀཱདསངྒིཀཏྟཉྷེཏྠ ཕསྶསྶ ཙ ནཱམཔཙྩཡཏྟཾ པཙྩཡཝིསེསོ. ཏཏིཡོ པུརིམཡོནིདྭཡཾ སནྡྷཱཡ ཝུཏྟོ. པུརིམཱསུ ཧི དྭཱིསུ ཡོནཱིསུ ¶ སོ སམྦྷཝཏི, ཏཏྠ སདཱ སལཱ༹ཡཏནསྶ ཨསམྦྷཝཏོ. ཙཏུཏྠོ པཙྪིམཡོནིདྭཡཾ སནྡྷཱཡ ཝུཏྟོ. པཙྪིམཱསུ ཧི སོ དྭཱིསུ ཡོནཱིསུ སམྦྷཝཏི, ཏཏྠ སདཱ སལཱ༹ཡཏནསྶ སམྦྷཝཏོཏི.

ཨེཏྟཱཝཏཱ ¶ ཙ ཡཾ ཝུཏྟཾ ཙཏཱུསུཔི ཝཱརེསུ –

ཡཾ ཡཏྠ ཨཉྙཐཱ ཝུཏྟཾ, ཨཝུཏྟཉྩཱཔི ཡཾ ཡཧིཾ;

ཡཾ ཡཐཱ པཙྩཡོ ཡསྶ, ཏཾ སབྦམུཔལཀྑཡེཏི.

གཱཐཱཡ ཨཏྠདཱིཔནཱ ཀཏཱ ཧོཏི.

ཨེཏེནེཝཱནུསཱརེན, སབྦམེཏཾ ནཡཾ ཨིཏོ;

ཝིསེསོ ཡོ ཙ ཏཾ ཛཉྙཱ, ཙཏུཀྐེསུ པརེསུཔི.

༢. ཧེཏུཙཏུཀྐཾ

༢༤༤. ཏཏྠ ¶ ཡོ ཏཱཝ ཨིདྷ ཝུཏྟོ ནཡོ, སོ སབྦཏྠ པཱཀཊོཡེཝ. ཝིསེསོ པན ཨེཝཾ ཝེདིཏབྦོ – ཧེཏུཙཏུཀྐེ ཏཱཝ ཨཝིཛྫཱ ཧེཏུ ཨསྶཱཏི ཨཝིཛྫཱཧེཏུཀོ. ཨཝིཛྫཱ ཨསྶ སཧཝཏྟནཏོ ཡཱཝབྷངྒཱ པཝཏྟིཀཱ གམིཀཱཏི ཝུཏྟཾ ཧོཏི. ‘‘ཨཝིཛྫཱཔཙྩཡཱ’’ཏི ཙ ཨེཏྟཱཝཏཱ སཧཛཱཏཱདིཔཙྩཡཝསེན སཱདྷཱརཎཏོ སངྑཱརསྶ ཨཝིཛྫཱ པཙྩཡོཏི དསྶེཏྭཱ, པུན ‘‘ཨཝིཛྫཱཧེཏུཀོ’’ཏི ཨེཏེནེཝ ཝིསེསཏོ ཨཝིགཏཔཙྩཡཏཱ དསྶིཏཱ. སངྑཱརཔཙྩཡཱ ཝིཉྙཱཎཾ སངྑཱརཧེཏུཀནྟིཨཱདཱིསུཔི ཨེསེཝ ནཡོ.

ཀསྨཱ པན བྷཝཱདཱིསུ ཧེཏུཀགྒཧཎཾ ན ཀཏནྟི? ཨཝིགཏཔཙྩཡནིཡམཱབྷཱཝཏོ ཨབྷཱཝཏོ ཙ ཨཝིགཏཔཙྩཡསྶ. ‘‘ཏཏྠ ཀཏམོ ཨུཔཱདཱནཔཙྩཡཱ བྷཝོ? ཋཔེཏྭཱ ཨུཔཱདཱནཾ ཝེདནཱཀྑནྡྷོ སཉྙཱཀྑནྡྷོ སངྑཱརཀྑནྡྷོ ཝིཉྙཱཎཀྑནྡྷོ – ཨཡཾ ཝུཙྩཏི ཨུཔཱདཱནཔཙྩཡཱ བྷཝོ’’ཏི ཝཙནཏོ ཨུཔཱདཱནཔཙྩཡཱ ཙཏུནྣཾ ཁནྡྷཱནཾ ཨིདྷ བྷཝོཏི ནཱམཾ. སངྑཱརཀྑནྡྷེ ཙ ‘‘ཛཱཏི དྭཱིཧི ཁནྡྷེཧི སངྒཧིཏཱ’’ཏིཨཱདིཝཙནཏོ (དྷཱཏུ. ༧༡) ཛཱཏིཛརཱམརཎཱནི ཨནྟོགདྷཱནི.

ཏཏྠ ཡཱཝ ཨུཔཱདཱནཾ ཏཱཝ ཛཱཏིཛརཱམརཎཱནཾ ཨནུཔལབྦྷནཏོ ཨུཔཱདཱནཾ བྷཝསྶ ན ནིཡམཏོ ཨཝིགཏཔཙྩཡོ ཧོཏི. ‘‘ཡཱ ཏེསཾ ཏེསཾ དྷམྨཱནཾ ཛཱཏཱི’’ཏི ཨཱདིཝཙནཏོ སངྑཏལཀྑཎེསུ ཛཱཏིཡཱ ཛརཱམརཎསངྑཱཏསྶ བྷཝསྶ ཛཱཏིཀྑཎམཏྟེཡེཝ ཨབྷཱཝཏོ ཨཝིགཏཔཙྩཡབྷཱཝོ ན སམྦྷཝཏི. ཏཐཱ ཛཱཏིཡཱ ཛརཱམརཎཀྑཎེ ཨབྷཱཝཏོ ¶ . ཨུཔནིསྶཡཔཙྩཡེནེཝ པན བྷཝོ ཛཱཏིཡཱ. ཛཱཏི ཛརཱམརཎསྶ པཙྩཡོཏི སབྦཐཱཔི ཨཝིགཏཔཙྩཡནིཡམཱབྷཱཝཏོ ཨབྷཱཝཏོ ཙ ཨཝིགཏཔཙྩཡསྶ བྷཝཱདཱིསུ ཧེཏུཀགྒཧཎཾ ན ཀཏནྟི ཝེདིཏབྦཾ.

ཀེཙི ¶ པནཱཧུ – ‘‘བྷཝོ དུཝིདྷེནཱ’’ཏི ཝཙནཏོ ཨུཔཔཏྟིམིསྶཀོ བྷཝོ, ན ཙ ཨུཔཔཏྟིབྷཝསྶ ཨུཔཱདཱནཾ ཨཝིགཏཔཙྩཡོ ཧོཏཱིཏི ‘‘ཨུཔཱདཱནཔཙྩཡཱ བྷཝོ ཨུཔཱདཱནཧེཏུཀོ’’ཏི ཨཝཏྭཱ ‘‘ཨུཔཱདཱནཔཙྩཡཱ བྷཝོ’’ཏི ཝུཏྟོ. ཨིདྷ པཙྪིནྣཏྟཱ པརཏོཔི ན ཝུཏྟནྟི. ཏཾ ཨིདྷ ཨུཔཔཏྟིམིསྶཀསྶ བྷཝསྶ ཨནདྷིཔྤེཏཏྟཱ ཨཡུཏྟཾ. ཨརཱུཔཀྑནྡྷཱ ཧི ཨིདྷ བྷཝོཏི ཨཱགཏཱ.

བྷཝཔཙྩཡཱ ¶ ཛཱཏཱིཏི ཨེཏྠ ཙ ཋཔེཏྭཱ ཛཱཏིཛརཱམརཎཱནི ཨཝསེསོ བྷཝོ ཛཱཏིཡཱ པཙྩཡོཏི ཝེདིཏབྦོ. ཀསྨཱ? ཛཱཏིཨཱདཱིནཾ ཛཱཏིཡཱ ཨཔྤཙྩཡཏྟཱ. ཡདི ཨེཝཾ, ཋཔེཏྭཱ ཛཱཏིཛརཱམརཎཱནི བྷཝོ ཛཱཏིཡཱ པཙྩཡོཏི ཝཏྟབྦོཏི? ཨཱམ ཝཏྟབྦོ, ཝཏྟབྦཔདེསཱབྷཱཝཏོ པན ན ཝུཏྟོ. དསམངྒནིདྡེསེ ཧི ཨུཔཱདཱནཔཙྩཡསམྦྷཱུཏོ བྷཝོ ཝཏྟབྦོ. ཨེཀཱདསམངྒནིདྡེསེ ཛཱཏི ཝཏྟབྦཱ. ཡོ པན བྷཝོ ཛཱཏིཡཱ པཙྩཡོ, ཏསྶ ཝཏྟབྦཔདེསོ ནཏྠཱིཏི ཝཏྟབྦཔདེསཱབྷཱཝཏོ ན ཝུཏྟོ. ཨཝུཏྟོཔི པན ཡུཏྟིཏོ གཧེཏབྦོཏི. ཝིཉྙཱཎཔཙྩཡཱ ནཱམརཱུཔནྟིཨཱདཱིསུ ཙ ཝིཉྙཱཎཱདཱིནཾ ཨཝིགཏཔཙྩཡབྷཱཝསམྦྷཝཏོ ཝིཉྙཱཎཧེཏུཀཱདིཝཙནཾ ཀཏནྟི ཨེས ཧེཏུཙཏུཀྐེ ཝིསེསོ.

༣. སམྤཡུཏྟཙཏུཀྐཾ

༢༤༥. སམྤཡུཏྟཙཏུཀྐེཔི ཨཝིཛྫཱཔཙྩཡཱཏི ཨེཏྟཱཝཏཱ སཧཛཱཏཱདིཔཙྩཡཝསེན སངྑཱརསྶ ཨཝིཛྫཱཔཙྩཡཏཾ དསྶེཏྭཱ པུན ‘‘ཨཝིཛྫཱསམྤཡུཏྟོ’’ཏི སམྤཡུཏྟཔཙྩཡཏཱ དསྶིཏཱ. སེསཔདེསུཔི ཨེསེཝ ནཡོ. ཡསྨཱ པན ཨརཱུཔཱིནཾ དྷམྨཱནཾ རཱུཔདྷམྨེཧི སམྤཡོགོ ནཏྠི, ཏསྨཱ ཝིཉྙཱཎཔཙྩཡཱ ནཱམརཱུཔནྟིཨཱདཱིསུ ཏཏིཡཙཏུཏྠཝཱརཔདེསུ ‘‘ཝིཉྙཱཎསམྤཡུཏྟཾ ནཱམ’’ནྟིཨཱདིནཱ ནཡེན ཡཾ ལབྦྷཏི, ཏདེཝ གཧིཏནྟི ཨེས སམྤཡུཏྟཙཏུཀྐེ ཝིསེསོ.

༤. ཨཉྙམཉྙཙཏུཀྐཾ

༢༤༦. ཨཉྙམཉྙཙཏུཀྐེཔི ¶ ཨཝིཛྫཱཔཙྩཡཱཏི སཧཛཱཏཱདིཔཙྩཡཝསེན སངྑཱརསྶ ཨཝིཛྫཱཔཙྩཡཏཾ དསྶེཏྭཱ ‘‘སངྑཱརཔཙྩཡཱཔི ཨཝིཛྫཱ’’ཏི ཨཉྙམཉྙཔཙྩཡཏཱ དསྶིཏཱ. སེསཔདེསུཔི ཨེསེཝ ནཡོ. ཡསྨཱ པན བྷཝོ ནིཔྤདེསོ, ཨུཔཱདཱནཾ སཔྤདེསཾ, སཔྤདེསདྷམྨོ ཙ ནིཔྤདེསདྷམྨསྶ པཙྩཡོ ཧོཏི, ན ནིཔྤདེསདྷམྨོ སཔྤདེསདྷམྨསྶ, ཏསྨཱ ཨེཏྠ ‘‘བྷཝཔཙྩཡཱཔི ཨུཔཱདཱན’’ནྟི ན ཝུཏྟཾ; ཧེཊྛཱ ཝཱ དེསནཱཡ པཙྪིནྣཏྟཱ ཨེཝཾ ན ཝུཏྟཾ ¶ . ཡསྨཱ ཙ ནཱམརཱུཔཔཙྩཡཱ སལཱ༹ཡཏནཾ ཨཏྠི, སལཱ༹ཡཏནཔཙྩཡཱ ཨེཀཙིཏྟཀྑཎེ ནཱམརཱུཔཾ ནཏྠི, ཡསྶ སལཱ༹ཡཏནཾ ཨཉྙམཉྙཔཙྩཡོ བྷཝེཡྻ, ཏསྨཱ ཙཏུཏྠཝཱརེ ‘‘ཚཊྛཱཡཏནཔཙྩཡཱཔི ནཱམརཱུཔ’’ནྟི ཡཾ ལབྦྷཏི ཏདེཝ གཧིཏནྟི ཨེས ཨཉྙམཉྙཙཏུཀྐེ ཝིསེསོ.

ཨཝིཛྫཱམཱུལཀནཡམཱཏིཀཱ.

སངྑཱརཱདིམཱུལཀནཡམཱཏིཀཱ

༢༤༧. ཨིདཱནི ¶ སངྑཱརཔཙྩཡཱ ཨཝིཛྫཱཏི སངྑཱརམཱུལཀནཡོ ཨཱརདྡྷོ. ཏཏྠཱཔི ཡཐཱ ཨཝིཛྫཱམཱུལཀེ ཨེཝཾ ཙཏྟཱརི ཙཏུཀྐཱནི སོལ༹ས ཙ ཝཱརཱ ཝེདིཏབྦཱ. པཋམཙཏུཀྐེ པན པཋམཝཱརམེཝ དསྶེཏྭཱ དེསནཱ སཾཁིཏྟཱ. ཡཐཱ ཙེཏྠ ཨེཝཾ ཝིཉྙཱཎམཱུལཀཱདཱིསུཔི. ཏཏྠ སབྦེསྭེཝ ཏེསུ སངྑཱརམཱུལཀཱདཱིསུ ཨཊྛསུ ནཡེསུ ‘‘སངྑཱརཔཙྩཡཱ ཨཝིཛྫཱ’’ཏིཨཱདིནཱ ནཡེན སཧཛཱཏཱདིཔཙྩཡཝསེན ཨཝིཛྫཱཡ སངྑཱརཱདིཔཙྩཡཏཾ དསྶེཏྭཱ པུན ‘‘ཨཝིཛྫཱཔཙྩཡཱ སངྑཱརཱ’’ཏིཨཱདིནཱ ནཡེན ཨེཀཙིཏྟཀྑཎེཔི པཙྩཡཱཀཱརཙཀྐསྶ པཝཏྟི དསྶིཏཱ.

ཀསྨཱ པན བྷཝམཱུལཀཱ ཛཱཏིཛརཱམརཎམཱུལཀཱ ཝཱ ནཡཱ ན ཝུཏྟཱ? ཀིཾ བྷཝཔཙྩཡཱ ཨཝིཛྫཱ ན ཧོཏཱིཏི? ནོ ན ཧོཏི. ‘‘སངྑཱརཔཙྩཡཱ ཨཝིཛྫཱ’’ཏི ཨེཝམཱདཱིསུ པན ཝུཙྩམཱནེསུ ན ཀོཙི བྷཝཔརིཡཱཔནྣོ དྷམྨོ ཨཝིཛྫཱཡ པཙྩཡོ ན ཝུཏྟོ. ཏསྨཱ ཨཔུབྦསྶ ཨཉྙསྶ ཨཝིཛྫཱཔཙྩཡསྶ ཝཏྟབྦསྶ ཨབྷཱཝཏོ བྷཝམཱུལཀོ ནཡོ ན ཝུཏྟོ. བྷཝགྒཧཎེན ཙ ཨཝིཛྫཱཔི སངྒཧཾ གཙྪཏི. ཏསྨཱ ‘‘བྷཝཔཙྩཡཱ ཨཝིཛྫཱ’’ཏི ཝུཙྩམཱནེ ‘‘ཨཝིཛྫཱཔཙྩཡཱ ཨཝིཛྫཱ’’ཏིཔི ཝུཏྟཾ སིཡཱ. ན ཙ ཨེཀཙིཏྟཀྑཎེ ཨཝིཛྫཱ ཨཝིཛྫཱཡ ¶ པཙྩཡོ ནཱམ ཧོཏི. ཏཏྠ པཙྪིནྣཏྟཱཝ ཛཱཏིཛརཱམརཎམཱུལཀཱཔི ནཡཱ ན གཧིཏཱ. ཨཔིཙ བྷཝེ ཛཱཏིཛརཱམརཎཱནིཔི ཨནྟོགདྷཱནི. ན ཙེཏཱནི ཨེཀཙིཏྟཀྑཎེ ཨཝིཛྫཱཡ པཙྩཡཱ ཧོནྟཱིཏི བྷཝམཱུལཀཱ ཛཱཏིཛརཱམརཎམཱུལཀཱ ཝཱ ནཡཱ ན ཝུཏྟཱཏི.

མཱཏིཀཱཝཎྞནཱ.

ཨཀུསལནིདྡེསཝཎྞནཱ

༢༤༨-༢༤༩. ཨིདཱནི ཡཐཱ ཧེཊྛཱ ཙིཏྟུཔྤཱདཀཎྜེ ཀུསལཏྟིཀཾ ཨཱདིཾ ཀཏྭཱ ནིཀྑིཏྟམཱཏིཀཱཡ པཊིཔཱཊིཡཱ པཋམཾ ཀུསལཾ བྷཱཛིཏཾ, ཏཐཱ ཨིདྷ མཱཏིཀཱཡ ཨནིཀྑིཏྟཏྟཱ པཋམཾ ཀུསལཾ ཨནཱམསིཏྭཱ ‘‘ཨཝིཛྫཱཔཙྩཡཱ སངྑཱརོ’’ཏི ཨཀུསལདྷམྨཝསེན མཱཏིཀཱཡ ནིཀྑིཏྟཏྟཱ ནིཀྑེཔཔཊིཔཱཊིཡཱཝ ཨཝིཛྫཱདཱིནི པཊིཙྩསམུཔྤཱདངྒཱནི ¶ བྷཱཛེཏྭཱ དསྶེཏུཾ ཀཏམེ དྷམྨཱ ¶ ཨཀུསལཱཏིཨཱདིམཱཧ. ཏསྶཏྠོ ཧེཊྛཱ ཙིཏྟུཔྤཱདཀཎྜེ (དྷ. ས. ཨཊྛ. ༣༦༥) ཝུཏྟནཡེནེཝ ཝེདིཏབྦོ. ཡསྨཱ པན ཨེཀཙིཏྟཀྑཎེ ཏཎྷཱཡ ཙ ཀཱམུཔཱདཱནསྶ ཙ སམྦྷཝོ ནཏྠི, ཏསྨཱ ཡཾ ཨེཏྠ ཏཎྷཱཔཙྩཡཱ ཨུཔཱདཱནཾ ལབྦྷཏི, ཏདེཝ དསྶེཏུཾ དིཊྛི དིཊྛིགཏནྟིཨཱདི ཝུཏྟཾ.

བྷཝནིདྡེསེ ཙ ཡསྨཱ ཨུཔཱདཱནཾ སངྑཱརཀྑནྡྷེ སངྒཧཾ གཙྪཏི, ཏསྨཱ ‘‘ཋཔེཏྭཱ ཨུཔཱདཱནཾ ཝེདནཱཀྑནྡྷོ སཉྙཱཀྑནྡྷོ སངྑཱརཀྑནྡྷོ ཝིཉྙཱཎཀྑནྡྷོ’’ཏི ཝུཏྟཾ. ཨེཝཉྷི ཝུཙྩམཱནེ ཨུཔཱདཱནསྶ ཨུཔཱདཱནཔཙྩཡཏྟཾ ཨཱཔཛྫེཡྻ. ན ཙ ཏདེཝ ཏསྶ པཙྩཡོ ཧོཏི. ཛཱཏིཨཱདིནིདྡེསེསུ ཡསྨཱ ཨེཏེ ཨརཱུཔདྷམྨཱནཾ ཛཱཏིཨཱདཡོ, ཏསྨཱ ‘‘ཁཎྜིཙྩཾ, པཱལིཙྩཾ, ཝལིཏྟཙཏཱ, ཙུཏི, ཙཝནཏཱ’’ཏི ན ཝུཏྟཾ.

༢༥༠. ཨེཝཾ པཋམཝཱརཾ ནིཊྛཔེཏྭཱ པུན དུཏིཡཝཱརེ ཡསྨིཾ སམཡེ པཋམཝཱརེན པཙྩཡཱཀཱརོ དསྶིཏོ, ཏསྨིཾཡེཝ སམཡེ ཨཔརེནཔི ནཡེན པཙྩཡཱཀཱརཾ དསྶེཏུཾ ཝིསུཾ སམཡཝཝཏྠཱནཝཱརཾ ཨཝཏྭཱ ཏསྨིཾ སམཡེ ཨཝིཛྫཱཔཙྩཡཱ སངྑཱརོཏིཨཱདིནཱཝ ནཡེན དེསནཱ ཀཏཱ. ཏཏྠ ཋཔེཏྭཱ ཕསྶནྟི ཨིདཾ ཡསྨཱ ཕསྶོཔི ནཱམཔརིཡཱཔནྣོ, ཏསྨཱ ཕསྶསྶ ནཱམཏོ ནཱིཧརཎཏྠཾ ཝུཏྟཾ.

༢༥༢. ཏཏིཡཝཱརེ ¶ ཡསྶ ཙིཏྟསམུཊྛཱནརཱུཔསྶ ཝིཉྙཱཎཾ པཙྩཡོ, ཏསྨིཾ པཝཏྟམཱནེ ཡསྨཱ ཏེནུཔཏྠདྡྷཱནཾ ཙཀྑཱཡཏནཱདཱིནཾ ཨུཔཙིཏཏྟཾ པཉྙཱཡཏི, ཏསྨཱ ཙཀྑཱཡཏནསྶ ཨུཔཙཡོཏིཨཱདི ཝུཏྟཾ. ཡསྨཱ ཙ ཀམྨཛརཱུཔསྶཔི ཏསྨིཾ སམཡེ ཝཏྟམཱནསྶ ཝིཉྙཱཎཾ པཙྪཱཛཱཏཔཙྩཡེན པཙྩཡོ ཧོཏི, ཏསྨཱཔི ཨེཝཾ ཝུཏྟཾ. ཏཏྠ ཀིཉྩཱཔི ཀམྨཛཾ ཙིཏྟསམུཊྛཱནནྟི དྭེཝ སནྟཏིཡོ གཧིཏཱ, ཨིཏརཱཔི པན དྭེ སནྟཏིཡོ གཧེཏབྦཱ. ཏཱསམྤི ཧི ཝིཉྙཱཎཾ པཙྩཡོ ཧོཏིཡེཝ.

༢༥༤. ཙཏུཏྠཝཱརེ པན ཡསྨཱ ཨེཀཙིཏྟཀྑཎེཔི མཧཱབྷཱུཏརཱུཔཔཙྩཡཱ ཙཀྑཱཡཏནཱདཱིནི, ཧདཡརཱུཔཔཙྩཡཱ ཚཊྛཱཡཏནཾ, ནཱམཔཙྩཡཱ ཙ པཙྪཱཛཱཏསཧཛཱཏཱདིཝསེན ཡཐཱནུརཱུཔཾ སབྦཱནིཔི པཝཏྟནྟི, ཏསྨཱ ཏཏྠ ཀཏམཾ ནཱམརཱུཔཔཙྩཡཱ སལཱ༹ཡཏནཾ? ཙཀྑཱཡཏནནྟིཨཱདི ཝུཏྟཾ.

༢༥༦. དུཏིཡཙཏུཀྐེ ¶ ¶ སབྦཾ ཨུཏྟཱནམེཝ.

༢༦༤. ཏཏིཡཙཏུཀྐེ ཡསྶ སམྤཡུཏྟཔཙྩཡབྷཱཝོ ན ཧོཏི, ཡསྶ ཙ ཧོཏི, ཏཾ ཝིསུཾ ཝིསུཾ དསྶེཏུཾ ཨིདཾ ཝུཙྩཏི ཝིཉྙཱཎཔཙྩཡཱ ནཱམརཱུཔཾ ཝིཉྙཱཎསམྤཡུཏྟཾ ནཱམནྟིཨཱདི ཝུཏྟཾ.

༢༧༢. ཙཏུཏྠཙཏུཀྐེ ཕསྶཔཙྩཡཱ ནཱམནིདྡེསེ ཀིཉྩཱཔི ‘‘ཋཔེཏྭཱ ཕསྶཾ ཝེདནཱཀྑནྡྷོ…པེ… ཝིཉྙཱཎཀྑནྡྷོ – ཨིདཾ ཝུཙྩཏི ཕསྶཔཙྩཡཱ ནཱམ’’ནྟི ན ཝུཏྟཾ, ཏཐཱཔི ཨནནྟརཱཏཱིཏཔདནིདྡེསེ ‘‘ཋཔེཏྭཱ ཕསྶཾ ཝེདནཱཀྑནྡྷོ…པེ… ཝིཉྙཱཎཀྑནྡྷོ’’ཏི ཝུཏྟཏྟཱ ཨཝུཏྟམྤི ཏཾ ཝུཏྟམེཝ ཧོཏི. ཡདེཝ ཧི ནཱམཾ ཕསྶསྶ པཙྩཡོ, ཕསྶོཔི ཏསྶེཝ པཙྩཡོཏི.

ཡཐཱ ཙཱཡཾ ཙཏུཙཏུཀྐོ སོལ༹སཝཱརཔྤབྷེདོ ཨཝིཛྫཱམཱུལཀོ པཋམནཡོ ཨེཏསྨིཾ པཋམཱཀུསལཙིཏྟེ པཀཱསིཏོ, ཨེཝཾ སངྑཱརམཱུལཀཱདཡོ ཨཊྛ ནཡཱཔི ཝེདིཏབྦཱ. པཱལི༹ པན སཾཁིཏྟཱ. ཨེཝམེཝ ཏསྨིཾ པཋམཱཀུསལཙིཏྟེཡེཝ ནཝ ནཡཱ, ཚཏྟིཾས ཙཏུཀྐཱནི, ཙཏུཙཏྟཱལཱིསཱདྷིཀཉྩ ཝཱརསཏཾ ཧོཏཱིཏི ཝེདིཏབྦཾ.

༢༨༠. ཨིདཱནི ཨིམིནཱཝ ནཡེན སེསཱཀུསལཙིཏྟེསུཔི པཙྩཡཱཀཱརཾ དསྶེཏུཾ ཀཏམེ དྷམྨཱ ཨཀུསལཱཏིཨཱདི ཨཱརདྡྷཾ. ཏཏྠ ཡསྨཱ དིཊྛིཝིཔྤཡུཏྟེསུ ཏཎྷཱཔཙྩཡཱ ཨུཔཱདཱནཾ ནཏྠི, ཏསྨཱ ཨུཔཱདཱནཊྛཱནེ ཨུཔཱདཱནཾ ཝིཡ ¶ དལ༹ྷནིཔཱཏིནཱ ཨདྷིམོཀྑེན པདཾ པཱུརིཏཾ. དོམནསྶསཧགཏེསུ ཙ ཡསྨཱ ཝེདནཱཔཙྩཡཱ ཏཎྷཱཔི ནཏྠི, ཏསྨཱ ཏཎྷཱཊྛཱནེ ཏཎྷཱ ཝིཡ བལཝཀིལེསེན པཊིགྷེན པདཾ པཱུརིཏཾ. ཨུཔཱདཱནཊྛཱནེ ཨདྷིམོཀྑེནེཝ. ཝིཙིཀིཙྪཱསམྤཡུཏྟེ པན ཡསྨཱ སནྣིཊྛཱནཱབྷཱཝཏོ ཨདྷིམོཀྑོཔི ནཏྠི, ཏསྨཱ ཏཎྷཱཊྛཱནེ བལཝཀིལེསབྷཱུཏཱཡ ཝིཙིཀིཙྪཱཡ པདཾ པཱུརིཏཾ. ཨུཔཱདཱནཊྛཱནཾ པརིཧཱིནམེཝ. ཨུདྡྷཙྩསམྤཡུཏྟེ པན ཡསྨཱ ཨདྷིམོཀྑོ ཨཏྠི, ཏསྨཱ ཏཎྷཱཊྛཱནེ བལཝཀིལེསེན ཨུདྡྷཙྩེན པདཾ པཱུརིཏཾ. ཨུཔཱདཱནཊྛཱནེ ཨདྷིམོཀྑེནེཝ. སབྦཏྠེཝ ཙ ཝིསེསམཏྟཾ དསྶེཏྭཱ པཱལི༹ སཾཁིཏྟཱ. ཡོ ¶ ཙཱཡཾ ཝིསེསོ དསྶིཏོ, ཏཏྠ ཀེཝལཾ ཨདྷིམོཀྑནིདྡེསོཝ ཨཔུབྦོ. སེསཾ ཧེཊྛཱ ཨཱགཏམེཝ.

ཨདྷིམོཀྑནིདྡེསེ པན ཨདྷིམུཙྩནཝསེན ཨདྷིམོཀྑོ. ཨདྷིམུཙྩཏི ཝཱ ཏེན ཨཱརམྨཎེ ཙིཏྟཾ ¶ ནིབྦིཙིཀིཙྪཏཱཡ སནྣིཊྛཱནཾ གཙྪཏཱིཏི ཨདྷིམོཀྑོ. ཨདྷིམུཙྩནཱཀཱརོ ཨདྷིམུཙྩནཱ. ཏསྶ ཙིཏྟསྶ, ཏསྨིཾ ཝཱ ཨཱརམྨཎེ ཨདྷིམུཏྟཏྟཱཏི ཏདདྷིམུཏྟཏཱ. སབྦཙིཏྟེསུ ཙ པཋམཙིཏྟེ ཝུཏྟནཡེནེཝ ནཡཙཏུཀྐཝཱརཔྤབྷེདོ ཝེདིཏབྦོ. ཀེཝལཉྷི ཝིཙིཀིཙྪཱསམྤཡུཏྟེ ཨུཔཱདཱནམཱུལཀསྶ ནཡསྶ ཨབྷཱཝཱ ཨཊྛ ནཡཱ, དྭཏྟིཾས ཙཏུཀྐཱནི, ཨཊྛཝཱིསཱདྷིཀཉྩ ཝཱརསཏཾ ཧོཏཱིཏི.

ཨཀུསལནིདྡེསཝཎྞནཱ.

ཀུསལནིདྡེསཝཎྞནཱ

༢༩༢. ཨིདཱནི ཨིམིནཱཝ ནཡེན ཀུསལཙིཏྟཱདཱིསུཔི པཙྩཡཱཀཱརཾ དསྶེཏུཾ ཀཏམེ དྷམྨཱ ཀུསལཱཏིཨཱདི ཨཱརདྡྷཾ. ཡཐཱ པན ཨཀུསལེ པཋམཾ མཱཏིཀཾ ནིཀྑིཔིཏྭཱ པཙྪཱ ནིདྡེསོ ཀཏོ, ན ཏཐཱ ཨིདྷ. ཀསྨཱ? ཨཔྤནཱཝཱརེ ནཱནཏྟསམྦྷཝཏོ. ལོཀིཡཀུསལཱདཱིསུ ཧི ཏེསཾ དྷམྨཱནཾ དུཀྑསཙྩཔརིཡཱཔནྣཏྟཱ ‘‘ཨེཝམེཏསྶ ཀེཝལསྶ དུཀྑཀྑནྡྷསྶཱ’’ཏི ཨཔྤནཱ ཧོཏི, ལོཀུཏྟརཀུསལཱདཱིསུ ‘‘ཨེཝམེཏེསཾ དྷམྨཱན’’ནྟི. ཏསྨཱ ཨེཏྠ སཱདྷཱརཎཏོ མཱཏིཀཾ ཋཔེཏུཾ ན སཀྐཱཏི པཱཊིཡེཀྐཾ ཏེསཾ ཏེསཾ ཀུསལཱདཱིནཾ མཱཏིཀཾ ཨུདྡིསིཏྭཱཝ ནིདྡེསོ ཀཏོཏི.

ཏཏྠ ཡསྨཱ ཨེཀཙིཏྟཀྑཎེ ཀུསལསངྑཱརེན སདྡྷིཾ ཨཝིཛྫཱ ནཏྠི, ཏསྨཱ ཏཾ ཨཝཏྭཱ, ཨཝིཛྫཱ ཝིཡ ཨཀུསལཱནཾ, ཀུསལཱནཾ མཱུལཏོ ཀུསལམཱུལཾ, ཏཎྷུཔཱདཱནཱནཉྩ ¶ ཨབྷཱཝཏོ ཏཎྷཱཊྛཱནེ ཏཎྷཱ ཝིཡ ཨཱརམྨཎེ ཨཛ྄ཛྷོགཱལ༹ྷོ པསཱདོ, ཨུཔཱདཱནཊྛཱནེ ཨུཔཱདཱནཾ ཝིཡ དལ༹ྷནིཔཱཏཱི ནཱམ ཨདྷིམོཀྑོ ཝུཏྟོ. སེསཾ ཧེཊྛཱ ཝུཏྟནཡེནེཝ ཝེདིཏབྦནྟི.

ཀུསལནིདྡེསཝཎྞནཱ.

ཨབྱཱཀཏནིདྡེསཝཎྞནཱ

༣༠༦. ཨབྱཱཀཏཾ ¶ ཧེཊྛཱ ཙིཏྟུཔྤཱདཀཎྜེ ཨཱགཏཔཊིཔཱཊིཡཱཝ ཝིབྷཏྟཾ. སབྦཝཱརེསུ ཙ ཨཝིཛྫཱམཱུལཀཱ ནཡཱ པརིཧཱིནཱ. ཀསྨཱ? ཨཝིཛྫཱཊྛཱནེ ཋཔེཏབྦསྶ ཨབྷཱཝཏོ. ཀུསལཙིཏྟེསུ ¶ ཧི ཨཝིཛྫཱཊྛཱནེ ཋཔེཏབྦཾ ཀུསལམཱུལཾ ཨཏྠི, ཙཀྑུཝིཉྙཱཎཱདཱིསུ ནཏྠི. སཧེཏུཀེསུ པན ཀིཉྩཱཔི ཨཏྠི, ཨེཝཾ སནྟེཔི ཨིདྷ པཙྪིནྣཏྟཱ ཏཏྠ ན གཧིཏཾ. པཉྩཝིཉྙཱཎསོཏེ སོཏཔཏིཏཱཝ ཧུཏྭཱ དེསནཱ ཀཏཱཏི ཝེདིཏབྦཱ.

ཝིསེསཏོ པནེཏྠ ཙཀྑུཝིཉྙཱཎཱདཱིསུ ཏཎྷཱཊྛཱནཾ ཨུཔཱདཱནཊྛཱནཉྩ པརིཧཱིནཾ. ཀསྨཱ? ཏཎྷཱཊྛཱནཱརཧསྶ བལཝདྷམྨསྶ ཨབྷཱཝཱ ཨདྷིམོཀྑརཧིཏཏྟཱ ཙ. སེསཱཧེཏུཀེསུ ཏཎྷཱཊྛཱནམེཝ པརིཧཱིནཾ. སཧེཏུཀེསུ པསཱདསབྦྷཱཝཏོ ཏཎྷཱཊྛཱནེ པསཱདེན པདཾ པཱུརིཏཾ. ཨེཝམེཏྠ ཀུསལཱཀུསལཝིཔཱཀེསུ ཙཀྑུཝིཉྙཱཎཱདཱིསུ སངྑཱརཝིཉྙཱཎནཱམཚཊྛཱཡཏནཕསྶཝེདནཱམཱུལཀཱ ཚ ཚ, སེསཱཧེཏུཀེསུ ཨདྷིམོཀྑམཱུལཀེན སདྡྷིཾ སཏྟ སཏྟ, སཧེཏུཀེསུ པསཱདམཱུལཀེན སདྡྷིཾ ཨཊྛ ཨཊྛ ནཡཱ ཝེདིཏབྦཱ.

ཏཏྠ ཙཀྑུཝིཉྙཱཎཱདཱིསུཔི ཙཏུནྣམྤི ཙཏུཀྐཱནཾ ཨཱདིཝཱརོཝ ཝུཏྟོ. དུཏིཡཝཱརོ པཙྩཡཝིསེསཊྛེན ལབྦྷམཱནོཔི ན ཝུཏྟོ. ཏཏིཡཙཏུཏྠཝཱརཱ ཨསམྦྷཝཏོཡེཝ. རཱུཔམིསྶཀཱ ཧི ཏེ, ན ཙ ཙཀྑུཝིཉྙཱཎཱདཱིནི རཱུཔཾ སམུཊྛཱཔེནྟི. ཡཐཱ ཙ པཋམཙཏུཀྐེ དྭེ ཝཱརཱ ལབྦྷནྟི, ཨེཝཾ སེསཙཏུཀྐེསུཔི. ཏསྨཱ པཋམཙཏུཀྐེ དུཏིཡཝཱརོ, སེསཙཏུཀྐེསུ ཙ དྭེ དྭེ ཝཱརཱ ཨཝུཏྟཱཔི ཝུཏྟཱཝ ཧོནྟཱིཏི ཝེདིཏབྦཱ. སེསཱཧེཏུཀཱབྱཱཀཏེ སབྦཙཏུཀྐེསུ སབྦེཔི ཝཱརཱ ལབྦྷནྟི. ཨིདྷ པཙྪིནྣཏྟཱ པན པརཏོ ན གཧིཏཱ. སོཏཔཏིཏཱཝ ཧུཏྭཱ དེསནཱ ཀཏཱཏི. སེསསཧེཏུཀཝིཔཱཀེསུཔི ¶ ཨེསེཝ ནཡོ ཨཉྙཏྲ ཨརཱུཔཱཝཙརཝིཔཱཀཱ. ཨརཱུཔཱཝཙརཝིཔཱཀསྨིཉྷི ཝཱརདྭཡམེཝ ལབྦྷཏཱིཏི.

ཨབྱཱཀཏནིདྡེསཝཎྞནཱ.

ཨཝིཛྫཱམཱུལཀཀུསལནིདྡེསཝཎྞནཱ

༣༣༤. ཨིདཱནི ཨཔརེན པརིཡཱཡེན ཨེཀཙིཏྟཀྑཎེ པཙྩཡཱཀཱརཾ དསྶེཏུཾ པུན ཀཏམེ དྷམྨཱ ¶ ཀུསལཱཏིཨཱདི ཨཱརདྡྷཾ. ཏཏྠ ཨཝིཛྫཱཔཙྩཡཱཏི ཨུཔནིསྶཡཔཙྩཡཏཾ སནྡྷཱཡ ཝུཏྟཾ. ཏེནེཝ ནིདྡེསཝཱརེ ‘‘ཏཏྠ ཀཏམཱ ཨཝིཛྫཱ’’ཏི ཨཝིབྷཛིཏྭཱ ‘‘ཏཏྠ ཀཏམོ ཨཝིཛྫཱཔཙྩཡཱ སངྑཱརོ’’ཏི ཝིབྷཏྟཾ. ཀུསལཙེཏནཱསངྑཱཏོ ¶ ཧི སངྑཱརོཡེཝ ཏསྨིཾ སམཡེ ཙིཏྟེན སཧཛཱཏོ ཧོཏི, ན ཨཝིཛྫཱ.

ཏཏྠ ལོཀིཡཀུསལསྶ ཧེཊྛཱ སུཏྟནྟབྷཱཛནཱིཡེ ཝུཏྟནཡེནེཝ ཨཝིཛྫཱ པཙྩཡོ ཧོཏི. ཡསྨཱ པན ཨཔྤཧཱིནཱཝིཛྫོ ཨཝིཛྫཱཡ པཧཱནཏྠཾ ལོཀུཏྟརཾ བྷཱཝེཏི, ཏསྨཱ ཏསྶཱཔི སམཏིཀྐམཝསེན པཙྩཡོ ཧོཏི. ཨཝིཛྫཱཝཏོཡེཝ ཧི ཀུསལཱཡཱུཧནཾ ཧོཏི, ན ཨིཏརསྶ. ཏཏྠ ཏེབྷཱུམཀཀུསལེ སམྨོཧཝསེནཔི སམཏིཀྐམབྷཱཝནཱཝསེནཔི ཨཱཡཱུཧནཾ ལབྦྷཏི; ལོཀུཏྟརེ སམུཙྪེདབྷཱཝནཱཝསེནཱཏི. སེསཾ ཝུཏྟནཡམེཝ.

ཨཡཾ པན ཝིསེསོ – ཡཐཱ ཧེཊྛཱ ཨེཀེཀཀུསལེ ཙཏུནྣཾ ཙཏུཀྐཱནཾ ཝསེན ནཝ སོལ༹སཀཱ ལདྡྷཱ, ཏཐཱ ཨིདྷ ན ལབྦྷནྟི. ཀསྨཱ? ཨཝིཛྫཱཡ ཨཝིགཏསམྤཡུཏྟཨཉྙམཉྙཔཙྩཡཱབྷཱཝཏོ. ཨུཔནིསྶཡཝསེན པནེཏྠ པཋམཙཏུཀྐམེཝ ལབྦྷཏི. ཏམྤི པཋམཝཱརམེཝ དསྶེཏྭཱ སཾཁིཏྟཾ. ནཱིཧརིཏྭཱ པན དསྶེཏབྦནྟི.

ཨཝིཛྫཱམཱུལཀཀུསལནིདྡེསཝཎྞནཱ.

ཀུསལམཱུལཀཝིཔཱཀནིདྡེསཝཎྞནཱ

༣༤༣. ཨིདཱནི ཨབྱཱཀཏེསུཔི ཨཔརེནེཝ ནཡེན པཙྩཡཱཀཱརཾ དསྶེཏུཾ ཀཏམེ དྷམྨཱ ཨབྱཱཀཏཱཏིཨཱདི ཨཱརདྡྷཾ. ཏཏྠ ཀུསལམཱུལཔཙྩཡཱཏི ཨིདམྤི ཨུཔནིསྶཡཔཙྩཡཏཾ སནྡྷཱཡ ཝུཏྟཾ. ཀུསལཝིཔཱཀསྶ ཧི ཀུསལམཱུལཾ ¶ , ཨཀུསལཝིཔཱཀསྶ ཙ ཨཀུསལམཱུལཾ ཨུཔནིསྶཡཔཙྩཡོ ཧོཏི; ནཱནཱཀྑཎིཀཀམྨཔཙྩཡེ པན ཝཏྟབྦམེཝ ནཏྠི. ཏསྨཱ ཨེས ཨུཔནིསྶཡཔཙྩཡེན ཙེཝ ནཱནཱཀྑཎིཀཀམྨཔཙྩཡེན ཙ པཙྩཡོ ཧོཏི. ཏེནེཝ ནིདྡེསཝཱརེ ‘‘ཏཏྠ ¶ ཀཏམཾ ཀུསལམཱུལ’’ནྟི ཨཝིབྷཛིཏྭཱ ‘‘ཏཏྠ ཀཏམོ ཀུསལམཱུལཔཙྩཡཱ སངྑཱརོ’’ཏི ཝིབྷཏྟཾ. ཨཀུསལཝིཔཱཀེཔི ཨེསེཝ ནཡོ.

ཨཝིཛྫཱམཱུལཀཀུསལནིདྡེསེ ཝིཡ ཙ ཨིམསྨིམྤི ཝིཔཱཀནིདྡེསེ པཋམཾ པཙྩཡཙཏུཀྐམེཝ ལབྦྷཏི. ཏམྤི པཋམཝཱརཾ དསྶེཏྭཱ སཾཁིཏྟཾ. ཏསྨཱ ཨེཀེཀསྨིཾ ཝིཔཱཀཙིཏྟེ ཨེཀམེཀསྶེཝ ཙཏུཀྐསྶ ཝསེན ཀུསལམཱུལམཱུལཀེ ཨཀུསལམཱུལམཱུལཀེ ཙ ནཡེ ཝཱརཔྤབྷེདོ ཝེདིཏབྦོ. ཀིརིཡཱདྷམྨཱནཾ པན ཡསྨཱ ནེཝ ཨཝིཛྫཱ ན ཀུསལཱཀུསལམཱུལཱནི ཨུཔནིསྶཡཔཙྩཡཏཾ ལབྷནྟི, ཏསྨཱ ཀིརིཡཝསེན པཙྩཡཱཀཱརོ ན ཝུཏྟོཏི.

ཨེཝམེས ¶ –

ཨཀུསལཀུསལཱབྱཱཀཏ-དྷམྨེསུ ཨནེཀབྷེདཏོ ཝཏྭཱ;

ཀུསལཱཀུསལཱནཾ པན, ཝིཔཱཀེ ཙ ཨུཔནིསྶཡཝསེན.

པུན ཨེཀདྷཱཝ ཝུཏྟོ, ཝཱདིཔྤཝརེན པཙྩཡཱཀཱརོ;

དྷམྨཔྤཙྩཡབྷེདེ, ཉཱཎསྶ པབྷེདཛནནཏྠཾ.

པརིཡཏྟིསཝནཙིནྟན-པཊིཔཏྟིཀྐམཝིཝཛྫིཏཱནཉྩ;

ཡསྨཱ ཉཱཎཔབྷེདོ, ན ཀདཱཙིཔི ཧོཏི ཨེཏསྨིཾ.

པརིཡཏྟིསཝནཙིནྟན-པཊིཔཏྟིཀྐམཏོ སདཱ དྷཱིརོ;

ཏཏྠ ཀཡིརཱ ན ཧཉྙཾ, ཀརཎཱིཡཏརཾ ཏཏོ ཨཏྠཱིཏི.

ཨཡཾ པན པཙྩཡཱཀཱརོ སུཏྟནྟཨབྷིདྷམྨབྷཱཛནཱིཡཝསེན དྭེཔརིཝཊྚམེཝ ནཱིཧརིཏྭཱ བྷཱཛེཏྭཱ དསྶིཏོ ཧོཏི.

ཨབྷིདྷམྨབྷཱཛནཱིཡཝཎྞནཱ.

སམྨོཧཝིནོདནིཡཱ ཝིབྷངྒཊྛཀཐཱཡ

པཊིཙྩསམུཔྤཱདཝིབྷངྒཝཎྞནཱ ནིཊྛིཏཱ.

༧. སཏིཔཊྛཱནཝིབྷངྒོ

༡. སུཏྟནྟབྷཱཛནཱིཡཾ ཨུདྡེསཝཱརཝཎྞནཱ

༣༥༥. ཨིདཱནི ¶ ¶ ¶ ཏདནནྟརེ སཏིཔཊྛཱནཝིབྷངྒེ ཙཏྟཱརོཏི གཎནཔརིཙྪེདོ. ཏེན ན ཏཏོ ཧེཊྛཱ ན ཨུདྡྷནྟི སཏིཔཊྛཱནཔརིཙྪེདཾ དཱིཔེཏི. སཏིཔཊྛཱནཱཏི ཏཡོ སཏིཔཊྛཱནཱ – སཏིགོཙརོཔི, ཏིདྷཱ པཊིཔནྣེསུ སཱཝཀེསུ སཏྠུནོ པཊིདྷཱནུནཡཝཱིཏིཝཏྟཏཱཔི, སཏིཔི. ‘‘ཙཏུནྣཾ, བྷིཀྑཝེ, སཏིཔཊྛཱནཱནཾ སམུདཡཉྩ ཨཏྠངྒམཉྩ དེསེསྶཱམི. ཏཾ སུཎཱཐ…པེ… ཀོ ཙ, བྷིཀྑཝེ, ཀཱཡསྶ སམུདཡོ? ཨཱཧཱརསམུདཡཱ ཀཱཡསྶ སམུདཡོ’’ཏིཨཱདཱིསུ (སཾ. ནི. ༥.༤༠༨) ཧི སཏིགོཙརོ སཏིཔཊྛཱནནྟི ཝུཙྩཏི. ཏཐཱ ‘‘ཀཱཡོ ཨུཔཊྛཱནཾ, ནོ སཏི. སཏི ཨུཔཊྛཱནཉྩེཝ སཏི ཙཱ’’ཏིཨཱདཱིསུ (པཊི. མ. ༣.༣༥). ཏསྶཏྠོ – པཏིཊྛཱཏི ཨསྨིནྟི པཊྛཱནཾ. ཀཱ པཏིཊྛཱཏི? སཏི. སཏིཡཱ པཊྛཱནཾ སཏིཔཊྛཱནཾ, པདྷཱནཾ ཋཱནནྟི ཝཱ པཊྛཱནཾ; སཏིཡཱ པཊྛཱནཾ སཏིཔཊྛཱནཾ ཧཏྠིཊྛཱནཨསྶཊྛཱནཱདཱིནི ཝིཡ.

‘‘ཏཡོ སཏིཔཊྛཱནཱ ཡདརིཡོ སེཝཏི, ཡདརིཡོ སེཝམཱནོ སཏྠཱ གཎཾ ཨནུསཱསིཏུམརཧཏཱི’’ཏི (མ. ནི. ༣.༣༠༤, ༣༡༡) ཨེཏྠ ཏིདྷཱ པཊིཔནྣེསུ སཱཝཀེསུ སཏྠུནོ པཊིགྷཱནུནཡཝཱིཏིཝཏྟཏཱ སཏིཔཊྛཱནནྟི ཝུཏྟཱ. ཏསྶཏྠོ – པཊྛཔེཏབྦཏོ པཊྛཱནཾ, པཝཏྟཡིཏབྦཏོཏི ཨཏྠོ. ཀེན པཊྛཔེཏབྦཏོཏི? སཏིཡཱ; སཏིཡཱ པཊྛཱནཾ སཏིཔཊྛཱནཾ. ‘‘ཙཏྟཱརོ སཏིཔཊྛཱནཱ བྷཱཝིཏཱ བཧུལཱིཀཏཱ སཏྟ བོཛ྄ཛྷངྒེ པརིཔཱུརེནྟཱི’’ཏིཨཱདཱིསུ (མ. ནི. ༣.༡༤༧) པན སཏིཡེཝ སཏིཔཊྛཱནནྟི ཝུཙྩཏི. ཏསྶཏྠོ – པཏིཊྛཱཏཱིཏི པཊྛཱནཾ, ཨུཔཊྛཱཏི ཨོཀྐནྡིཏྭཱ པཀྑནྡིཏྭཱ པཝཏྟཏཱིཏི ཨཏྠོ; སཏིཡེཝ པཊྛཱནཊྛེན སཏིཔཊྛཱནཾ; ཨཐཝཱ སརཎཊྛེན སཏི, ཨུཔཊྛཱནཊྛེན ¶ པཊྛཱནཾ. ཨིཏི སཏི ཙ སཱ པཊྛཱནཉྩཱཏིཔི སཏིཔཊྛཱནཾ. ཨིདམིདྷ ¶ ཨདྷིཔྤེཏཾ. ཡདི ཨེཝཾ, ཀསྨཱ སཏིཔཊྛཱནཱཏི བཧུཝཙནཾ ཀཏནྟི? སཏིཡཱ བཧུཏྟཱ; ཨཱརམྨཎབྷེདེན ཧི བཧུཀཱ ཏཱ སཏིཡོཏི.

ཀསྨཱ ¶ པན བྷགཝཏཱ ཙཏྟཱརོཝ སཏིཔཊྛཱནཱ ཝུཏྟཱ, ཨནཱུནཱ ཨནདྷིཀཱཏི? ཝེནེཡྻཧིཏཏྟཱ. ཏཎྷཱཙརིཏདིཊྛིཙརིཏསམཐཡཱནིཀཝིཔསྶནཱཡཱནིཀེསུ ཧི མནྡཏིཀྑཝསེན དྭིདྷཱ པཝཏྟེསུ མནྡསྶ ཏཎྷཱཙརིཏསྶ ཨོལཱ༹རིཀཾ ཀཱཡཱནུཔསྶནཱསཏིཔཊྛཱནཾ ཝིསུདྡྷིམགྒོ, ཏིཀྑསྶ སུཁུམཾ ཝེདནཱནུཔསྶནཱསཏིཔཊྛཱནཾ. དིཊྛིཙརིཏསྶཔི མནྡསྶ ནཱཏིཔྤབྷེདགཏཾ ཙིཏྟཱནུཔསྶནཱསཏིཔཊྛཱནཾ ཝིསུདྡྷིམགྒོ, ཏིཀྑསྶ ཨཏིཔྤབྷེདགཏཾ དྷམྨཱནུཔསྶནཱསཏིཔཊྛཱནཾ. སམཐཡཱནིཀསྶ ཙ མནྡསྶ ཨཀིཙྪེན ཨདྷིགནྟབྦནིམིཏྟཾ པཋམཾ སཏིཔཊྛཱནཾ ཝིསུདྡྷིམགྒོ, ཏིཀྑསྶ ཨོལཱ༹རིཀཱརམྨཎེ ཨསཎྛཧནཏོ དུཏིཡཾ. ཝིཔསྶནཱཡཱནིཀསྶཱཔི མནྡསྶ ནཱཏིཔྤབྷེདགཏཱརམྨཎཾ ཏཏིཡཾ, ཏིཀྑསྶ ཨཏིཔྤབྷེདགཏཱརམྨཎཾ ཙཏུཏྠཾ. ཨིཏི ཙཏྟཱརོཝ ཝུཏྟཱ, ཨནཱུནཱ ཨནདྷིཀཱཏི.

སུབྷསུཁནིཙྩཨཏྟབྷཱཝཝིཔལླཱསཔྤཧཱནཏྠཾ ཝཱ. ཀཱཡོ ཧི ཨསུབྷོ. ཏཏྠ སུབྷཝིཔལླཱསཝིཔལླཏྠཱ སཏྟཱ. ཏེསཾ ཏཏྠ ཨསུབྷབྷཱཝདསྶནེན ཏསྶ ཝིཔལླཱསསྶ པཧཱནཏྠཾ པཋམཾ སཏིཔཊྛཱནཾ ཝུཏྟཾ. སུཁཾ, ནིཙྩཾ, ཨཏྟཱཏི གཧིཏེསུཔི ཙ ཝེདནཱདཱིསུ ཝེདནཱ དུཀྑཱ, ཙིཏྟཾ ཨནིཙྩཾ, དྷམྨཱ ཨནཏྟཱ. ཨེཏེསུ ཙ སུཁནིཙྩཨཏྟབྷཱཝཝིཔལླཱསཝིཔལླཏྠཱ སཏྟཱ. ཏེསཾ ཏཏྠ དུཀྑཱདིབྷཱཝདསྶནེན ཏེསཾ ཝིཔལླཱསཱནཾ པཧཱནཏྠཾ སེསཱནི ཏཱིཎི ཝུཏྟཱནཱིཏི. ཨེཝཾ སུབྷསུཁནིཙྩཨཏྟབྷཱཝཝིཔལླཱསཔྤཧཱནཏྠཾ ཝཱ ཙཏྟཱརོཝ ཝུཏྟཱ ཨནཱུནཱ ཨནདྷིཀཱཏི ཝེདིཏབྦཱ. ན ཀེཝལཉྩ ཝིཔལླཱསཔཧཱནཏྠམེཝ, ཨཐ ཁོ ཙཏུརོགྷཡོགཱསཝགནྠཨུཔཱདཱནཨགཏིཔྤཧཱནཏྠམྤི ཙཏུབྦིདྷཱཧཱརཔརིཉྙཏྠཉྩ ཙཏྟཱརོཝ ཝུཏྟཱཏི ཝེདིཏབྦཱ. ཨཡཾ ཏཱཝ པཀརཎནཡོ.

ཨཊྛཀཐཱཡཾ པན ‘‘སརཎཝསེན ཙེཝ ཨེཀཏྟསམོསརཎཝསེན ཙ ཨེཀམེཝ སཏིཔཊྛཱནཾ ཨཱརམྨཎཝསེན ཙཏྟཱརོཏི ཨེཏདེཝ ཝུཏྟཾ. ཡཐཱ ¶ ཧི ཙཏུདྭཱརེ ནགརེ པཱཙཱིནཏོ ཨཱགཙྪནྟཱ པཱཙཱིནདིསཱཡ ཨུཊྛཱནཀཾ བྷཎྜཾ གཧེཏྭཱ པཱཙཱིནདྭཱརེན ནགརམེཝ པཝིསནྟི, དཀྑིཎཏོ, པཙྪིམཏོ, ཨུཏྟརཏོ ཨཱགཙྪནྟཱ ཨུཏྟརདིསཱཡ ཨུཊྛཱནཀཾ བྷཎྜཾ གཧེཏྭཱ ཨུཏྟརདྭཱརེན ནགརམེཝ པཝིསནྟི, ཨེཝཾ སམྤདམིདཾ ཝེདིཏབྦཾ. ནགརཾ ཝིཡ ཧི ནིབྦཱནམཧཱནགརཾ, དྭཱརཾ ཝིཡ ཨཊྛངྒིཀོ ལོཀུཏྟརམགྒོ. པཱཙཱིནདིསཱདཡོ ཝིཡ ཀཱཡཱདཡོ.

ཡཐཱ ¶ པཱཙཱིནཏོ ཨཱགཙྪནྟཱ པཱཙཱིནདིསཱཡ ཨུཊྛཱནཀཾ བྷཎྜཾ གཧེཏྭཱ པཱཙཱིནདྭཱརེན ནགརམེཝ པཝིསནྟི, ཨེཝཾ ཀཱཡཱནུཔསྶནཱམུཁེན ཨཱགཙྪནྟཱ ¶ ཙུདྡསཝིདྷེན ཀཱཡཱནུཔསྶནཾ བྷཱཝེཏྭཱ ཀཱཡཱནུཔསྶནཱབྷཱཝནཱནུབྷཱཝནིབྦཏྟེན ཨརིཡམགྒེན ཨེཀཾ ནིབྦཱནམེཝ ཨོསརནྟི. ཡཐཱ དཀྑིཎཏོ ཨཱགཙྪནྟཱ དཀྑིཎདིསཱཡ ཨུཊྛཱནཀཾ བྷཎྜཾ གཧེཏྭཱ དཀྑིཎདྭཱརེན ནགརམེཝ པཝིསནྟི, ཨེཝཾ ཝེདནཱནུཔསྶནཱམུཁེན ཨཱགཙྪནྟཱ ནཝཝིདྷེན ཝེདནཱནུཔསྶནཾ བྷཱཝེཏྭཱ ཝེདནཱནུཔསྶནཱབྷཱཝནཱནུབྷཱཝནིབྦཏྟེན ཨརིཡམགྒེན ཨེཀཾ ནིབྦཱནམེཝ ཨོསརནྟི. ཡཐཱ པཙྪིམཏོ ཨཱགཙྪནྟཱ པཙྪིམདིསཱཡ ཨུཊྛཱནཀཾ བྷཎྜཾ གཧེཏྭཱ པཙྪིམདྭཱརེན ནགརམེཝ པཝིསནྟི, ཨེཝཾ ཙིཏྟཱནུཔསྶནཱམུཁེན ཨཱགཙྪནྟཱ སོལ༹སཝིདྷེན ཙིཏྟཱནུཔསྶནཾ བྷཱཝེཏྭཱ ཙིཏྟཱནུཔསྶནཱབྷཱཝནཱནུབྷཱཝནིབྦཏྟེན ཨརིཡམགྒེན ཨེཀཾ ནིབྦཱནམེཝ ཨོསརནྟི. ཡཐཱ ཨུཏྟརཏོ ཨཱགཙྪནྟཱ ཨུཏྟརདིསཱཡ ཨུཊྛཱནཀཾ བྷཎྜཾ གཧེཏྭཱ ཨུཏྟརདྭཱརེན ནགརམེཝ པཝིསནྟི, ཨེཝཾ དྷམྨཱནུཔསྶནཱམུཁེན ཨཱགཙྪནྟཱ པཉྩཝིདྷེན དྷམྨཱནུཔསྶནཾ བྷཱཝེཏྭཱ དྷམྨཱནུཔསྶནཱབྷཱཝནཱནུབྷཱཝནིབྦཏྟེན ཨརིཡམགྒེན ཨེཀཾ ནིབྦཱནམེཝ ཨོསརནྟཱིཏི. ཨེཝཾ སརཎཝསེན ཙེཝ ཨེཀཏྟསམོསརཎཝསེན ཙ ཨེཀམེཝ སཏིཔཊྛཱནཾ ཨཱརམྨཎཝསེན ཙཏྟཱརོཏི ཝུཏྟཱཏི ཝེདིཏབྦཱ.

ཨིདྷ བྷིཀྑཱུཏི ཨེཏྠ ཀིཉྩཱཔི བྷགཝཏཱ དེཝལོཀེ ནིསཱིདིཏྭཱ ཨཡཾ སཏིཔཊྛཱནཝིབྷངྒོ ཀཐིཏོ, ཨེཀབྷིཀྑུཔི ཏཏྠ བྷགཝཏོ སནྟིཀེ ནིསིནྣཀོ ནཱམ ནཏྠི. ཨེཝཾ སནྟེཔི ཡསྨཱ ཨིམེ ཙཏྟཱརོ སཏིཔཊྛཱནེ བྷིཀྑཱུ བྷཱཝེནྟི, བྷིཀྑུགོཙརཱ ཧི ཨེཏེ, ཏསྨཱ ཨིདྷ བྷིཀྑཱུཏི ཨཱལཔཏི. ཀིཾ པནེཏེ སཏིཔཊྛཱནེ བྷིཀྑཱུཡེཝ བྷཱཝེནྟི, ན བྷིཀྑུནཱིཨཱདཡོཏི? བྷིཀྑུནཱིཨཱདཡོཔི ¶ བྷཱཝེནྟི. བྷིཀྑཱུ པན ཨགྒཔརིསཱ. ཨིཏི ཨགྒཔརིསཏྟཱ ཨིདྷ བྷིཀྑཱུཏི ཨཱལཔཏི. པཊིཔཏྟིཡཱ ཝཱ བྷིཀྑུབྷཱཝདསྶནཏོ ཨེཝམཱཧ. ཡོ ཧི ཨིམཾ པཊིཔཏྟིཾ པཊིཔཛྫཏི, སོ བྷིཀྑུ ནཱམ ཧོཏི. པཊིཔནྣཀོ ཧི དེཝོ ཝཱ ཧོཏུ མནུསྶོ ཝཱ, བྷིཀྑཱུཏི སངྑཾ གཙྪཏིཡེཝ. ཡཐཱཧ –

‘‘ཨལངྐཏོ ཙེཔི སམཉྩརེཡྻ,

སནྟོ དནྟོ ནིཡཏོ བྲཧྨཙཱརཱི;

སབྦེསུ བྷཱུཏེསུ ནིདྷཱཡ དཎྜཾ,

སོ བྲཱཧྨཎོ སོ སམཎོ ས བྷིཀྑཱུ’’ཏི. (དྷ. པ. ༡༤༢);

ཀཱཡཱནུཔསྶནཱཨུདྡེསཝཎྞནཱ

ཨཛ྄ཛྷཏྟནྟི ¶ ¶ ནིཡཀཛ྄ཛྷཏྟཾ ཨདྷིཔྤེཏཾ. ཏསྨཱ ཨཛ྄ཛྷཏྟཾ ཀཱཡེཏི ཨཏྟནོ ཀཱཡེཏི ཨཏྠོ. ཏཏྠ ཀཱཡེཏི རཱུཔཀཱཡེ. རཱུཔཀཱཡོ ཧི ཨིདྷ ཨངྒཔཙྩངྒཱནཾ ཀེསཱདཱིནཉྩ དྷམྨཱནཾ སམཱུཧཊྛེན, ཧཏྠིཀཱཡཨསྶཀཱཡརཐཀཱཡཱདཡོ ཝིཡ, ཀཱཡོཏི ཨདྷིཔྤེཏོ. ཡཐཱ ཙ སམཱུཧཊྛེན ཨེཝཾ ཀུཙྪིཏཱནཾ ཨཱཡཊྛེན. ཀུཙྪིཏཱནཉྷི པརམཛེགུཙྪཱནཾ སོ ཨཱཡོཏིཔི ཀཱཡོ. ཨཱཡོཏི ཨུཔྤཏྟིདེསོ. ཏཏྲཱཡཾ ཝཙནཏྠོ – ཨཱཡནྟི ཏཏོཏི ཨཱཡོ. ཀེ ཨཱཡནྟི? ཀུཙྪིཏཱ ཀེསཱདཡོ. ཨིཏི ཀུཙྪིཏཱནཾ ཀེསཱདཱིནཾ ཨཱཡོཏི ཀཱཡོ.

ཀཱཡཱནུཔསྶཱིཏི ཀཱཡཾ ཨནུཔསྶནསཱིལོ, ཀཱཡཾ ཝཱ ཨནུཔསྶམཱནོ ཀཱཡེཏི ཙ ཝཏྭཱཔི པུན ཀཱཡཱནུཔསྶཱིཏི དུཏིཡཾ ཀཱཡགྒཧཎཾ ཨསམྨིསྶཏོ ཝཝཏྠཱནགྷནཝིནིབྦྷོགཱདིདསྶནཏྠཾ ཀཏནྟི ཝེདིཏབྦཾ. ཏེན ན ཀཱཡེ ཝེདནཱནུཔསྶཱི ཙིཏྟདྷམྨཱནུཔསྶཱི ཝཱ; ཨཐ ཁོ ཀཱཡེ ཀཱཡཱནུཔསྶཱི ཡེཝཱཏི ཀཱཡསངྑཱཏེ ཝཏྠུསྨིཾ ཀཱཡཱནུཔསྶནཱཀཱརསྶེཝ དསྶནེན ཨསམྨིསྶཏོ ཝཝཏྠཱནཾ དསྶིཏཾ ཧོཏི. ཏཐཱ ན ཀཱཡེ ཨངྒཔཙྩངྒཝིནིམུཏྟཨེཀདྷམྨཱནུཔསྶཱི, ནཱཔི ཀེསལོམཱདིཝིནིམུཏྟཨིཏྠིཔུརིསཱནུཔསྶཱི. ཡོཔི ཙེཏྠ ཀེསལོམཱདིཀོ བྷཱུཏུཔཱདཱཡསམཱུཧསངྑཱཏོ ཀཱཡོ, ཏཏྠཱཔི ན བྷཱུཏུཔཱདཱཡཝིནིམུཏྟཨེཀདྷམྨཱནུཔསྶཱི; ཨཐ ཁོ རཐསམྦྷཱརཱནུཔསྶཀོ ཝིཡ ཨངྒཔཙྩངྒསམཱུཧཱནུཔསྶཱི, ནགརཱཝཡཝཱནུཔསྶཀོ ཝིཡ ཀེསལོམཱདིསམཱུཧཱནུཔསྶཱི, ཀདལིཀྑནྡྷཔཏྟཝཊྚིཝིནིབྷུཉྫཀོ ཝིཡ རིཏྟམུཊྛིཝིནིཝེཋཀོ ¶ ཝིཡ ཙ བྷཱུཏུཔཱདཱཡསམཱུཧཱནུཔསྶཱིཡེཝཱཏི ནཱནཔྤཀཱརཏོ སམཱུཧཝསེན ཀཱཡསངྑཱཏསྶ ཝཏྠུནོ དསྶནེན གྷནཝིནིབྦྷོགོ དསྶིཏོ ཧོཏི. ན ཧེཏྠ ཡཐཱཝུཏྟསམཱུཧཝིནིམུཏྟོ ཀཱཡོ ཝཱ ཨིཏྠཱི ཝཱ པུརིསོ ཝཱ ཨཉྙོ ཝཱ ཀོཙི དྷམྨོ དིསྶཏི. ཡཐཱཝུཏྟདྷམྨསམཱུཧམཏྟེཡེཝ པན ཏཐཱ ཏཐཱ སཏྟཱ མིཙྪཱབྷིནིཝེསཾ ཀརོནྟི. ཏེནཱཧུ པོརཱཎཱ –

‘‘ཡཾ པསྶཏི ན ཏཾ དིཊྛཾ, ཡཾ དིཊྛཾ ཏཾ ན པསྶཏི;

ཨཔསྶཾ བཛ྄ཛྷཏེ མཱུལ༹ྷོ, བཛ྄ཛྷམཱནོ ན མུཙྩཏཱི’’ཏི.

གྷནཝིནིབྦྷོགཱདིདསྶནཏྠནྟི ¶ ཝུཏྟཾ. ཨཱདིསདྡེན ཙེཏྠ ཨཡམྤི ཨཏྠོ ཝེདིཏབྦོ – ཨཡཉྷི ཨེཏསྨིཾ ཀཱཡེ ཀཱཡཱནུཔསྶཱིཡེཝ, ན ཨཉྙདྷམྨཱནུཔསྶཱི. ཀིཾ ཝུཏྟཾ ཧོཏི? ཡཐཱ ཨནུདཀབྷཱུཏཱཡཔི མརཱིཙིཡཱ ཨུདཀཱནུཔསྶིནོ ཧོནྟི, ན ཨེཝཾ ཨནིཙྩདུཀྑཱནཏྟཨསུབྷབྷཱུཏེཡེཝ ཨིམསྨིཾ ¶ ཀཱཡེ ནིཙྩསུཁཨཏྟསུབྷབྷཱཝཱནུཔསྶཱི; ཨཐ ཁོ ཀཱཡཱནུཔསྶཱི ཨནིཙྩདུཀྑཱནཏྟཨསུབྷཱཀཱརསམཱུཧཱནུཔསྶཱིཡེཝཱཏི ཝུཏྟཾ ཧོཏི. ཨཐ ཝཱ ཡྭཱཡཾ མཧཱསཏིཔཊྛཱནེ ‘‘ཨིདྷ, བྷིཀྑཝེ, བྷིཀྑུ ཨརཉྙགཏོ ཝཱ…པེ… སོ སཏོཝ ཨསྶསཏཱི’’ཏིཨཱདིནཱ (དཱི. ནི. ༢.༣༧༤; མ. ནི. ༡.༡༠༧) ནཡེན ཨསྶཱསཔསྶཱསཱདིཙུཎྞཀཛཱཏཨཊྛིཀཔརིཡོསཱནོ ཀཱཡོ ཝུཏྟོ, ཡོ ཙ ‘‘ཨིདྷེཀཙྩོ པཐཝཱིཀཱཡཾ ཨནིཙྩཏོ ཨནུཔསྶཏི, ཏཐཱ ཨཱཔོཀཱཡཾ, ཏེཛོཀཱཡཾ, ཝཱཡོཀཱཡཾ, ཀེསཀཱཡཾ, ལོམཀཱཡཾ, ཚཝིཀཱཡཾ, ཙམྨཀཱཡཾ, མཾསཀཱཡཾ, རུདྷིརཀཱཡཾ, ནྷཱརུཀཱཡཾ, ཨཊྛིཀཱཡཾ, ཨཊྛིམིཉྫཀཱཡ’’ནྟི པཊིསམྦྷིདཱཡཾ ཀཱཡོ ཝུཏྟོ, ཏསྶ སབྦསྶ ཨིམསྨིཾཡེཝ ཀཱཡེ ཨནུཔསྶནཏོ ཀཱཡེ ཀཱཡཱནུཔསྶཱིཏི ཨེཝམྤི ཨཏྠོ དཊྛབྦོ.

ཨཐ ཝཱ ཀཱཡེ ཨཧནྟི ཝཱ མམནྟི ཝཱ ཨེཝཾ གཧེཏབྦསྶ ཀསྶཙི ཨནནུཔསྶནཏོ, ཏསྶ ཏསྶེཝ པན ཀེསལོམཱདིཀསྶ ནཱནཱདྷམྨསམཱུཧསྶ ཨནུཔསྶནཏོ ཀཱཡེ ཀེསཱདིདྷམྨསམཱུཧསངྑཱཏེ ཀཱཡཱནུཔསྶཱིཏི ཨེཝམཏྠོ དཊྛབྦོ. ཨཔིཙ ‘‘ཨིམསྨིཾ ཀཱཡེ ཨནིཙྩཏོ ཨནུཔསྶཏི, ནོ ནིཙྩཏོ’’ཏིཨཱདིནཱ (པཊི. མ. ༣.༣༥) ཨནུཀྐམེན པཊིསམྦྷིདཱཡཾ ཨཱགཏནཡསྶ སབྦསྶེཝ ཨནིཙྩལཀྑཎཱདིནོ ཨཱཀཱརསམཱུཧསངྑཱཏསྶ ཀཱཡསྶ ¶ ཨནུཔསྶནཏོཔི ཀཱཡེ ཀཱཡཱནུཔསྶཱིཏི ཨེཝམྤི ཨཏྠོ དཊྛབྦོ.

ཏཐཱ ཧི ཨཡཾ ཀཱཡེ ཀཱཡཱནུཔསྶནཱཔཊིཔདཾ པཊིཔནྣོ བྷིཀྑུ ཨིམཾ ཀཱཡཾ ཨནིཙྩཱནུཔསྶནཱདཱིནཾ སཏྟནྣཾ ཨནུཔསྶནཱནཾ ཝསེན ཨནིཙྩཏོ ཨནུཔསྶཏི ནོ ནིཙྩཏོ, དུཀྑཏོ ཨནུཔསྶཏི ནོ སུཁཏོ, ཨནཏྟཏོ ཨནུཔསྶཏི ནོ ཨཏྟཏོ, ནིབྦིནྡཏི ནོ ནནྡཏི, ཝིརཛྫཏི ནོ རཛྫཏི, ནིརོདྷེཏི ནོ སམུདེཏི, པཊིནིསྶཛྫཏི ནོ ཨཱདིཡཏི. སོ ཏཾ ཨནིཙྩཏོ ཨནུཔསྶནྟོ ནིཙྩསཉྙཾ པཛཧཏི, དུཀྑཏོ ཨནུཔསྶནྟོ སུཁསཉྙཾ པཛཧཏི, ཨནཏྟཏོ ཨནུཔསྶནྟོ ཨཏྟསཉྙཾ པཛཧཏི ¶ , ནིབྦིནྡནྟོ ནནྡིཾ པཛཧཏི, ཝིརཛྫནྟོ རཱགཾ པཛཧཏི, ནིརོདྷེནྟོ སམུདཡཾ པཛཧཏི, པཊིནིསྶཛྫནྟོ ཨཱདཱནཾ པཛཧཏཱིཏི (པཊི. མ. ༣.༣༥) ཝེདིཏབྦོ.

ཝིཧརཏཱིཏི ཙཏཱུསུ ཨིརིཡཱཔཐཝིཧཱརེསུ ཨཉྙཏརཝིཧཱརསམཱཡོགཔརིདཱིཔནམེཏཾ, ཨེཀཾ ཨིརིཡཱཔཐབཱདྷནཾ ཨཔརེན ཨིརིཡཱཔཐེན ཝིཙྪིནྡིཏྭཱ ཨཔཏམཱནཾ ཨཏྟབྷཱཝཾ ཧརཏི པཝཏྟེཏཱིཏི ཨཏྠོ.

བཧིདྡྷཱ ¶ ཀཱཡེཏི པརསྶ ཀཱཡེ. ཨཛ྄ཛྷཏྟབཧིདྡྷཱ ཀཱཡེཏི ཀཱལེན ཨཏྟནོ ཀཱཡེ, ཀཱལེན པརསྶ ཀཱཡེ. པཋམནཡེན ཧི ཨཏྟནོ ཀཱཡེ ཀཱཡཔརིགྒཧོ ཝུཏྟོ, དུཏིཡནཡེན པརསྶ ཀཱཡེ, ཏཏིཡནཡེན ཀཱལེན ཨཏྟནོ ཀཱལེན པརསྶ ཀཱཡེ. ཨཛ྄ཛྷཏྟབཧིདྡྷཱ པན གྷཊིཏཱརམྨཎཾ ནཱམ ནཏྠི. པགུཎཀམྨཊྛཱནསྶ པན ཨཔརཱཔརཾ སཉྩརཎཀཱལོ ཨེཏྠ ཀཐིཏོ. ཨཱཏཱཔཱིཏི ཀཱཡཔརིགྒཱཧཀཝཱིརིཡསམཱཡོགཔརིདཱིཔནམེཏཾ. སོ ཧི ཡསྨཱ ཏསྨིཾ སམཡེ ཡཾ ཏཾ ཝཱིརིཡཾ ཏཱིསུ བྷཝེསུ ཀིལེསཱནཾ ཨཱཏཱཔནཏོ ཨཱཏཱཔོཏི ཝུཙྩཏི, ཏེན སམནྣཱགཏོ ཧོཏི, ཏསྨཱ ཨཱཏཱཔཱིཏི ཝུཙྩཏི.

སམྤཛཱནོཏི ཀཱཡཔརིགྒཱཧཀེན སམྤཛཉྙསངྑཱཏེན ཉཱཎེན སམནྣཱགཏོ. སཏིམཱཏི ཀཱཡཔརིགྒཱཧིཀཱཡ སཏིཡཱ སམནྣཱགཏོ. ཨཡཾ པན ཡསྨཱ སཏིཡཱ ཨཱརམྨཎཾ པརིགྒཧེཏྭཱ པཉྙཱཡ ཨནུཔསྶཏི, ན ཧི སཏིཝིརཧིཏསྶ ཨནུཔསྶནཱ ནཱམ ཨཏྠི, ཏེནེཝཱཧ – ‘‘སཏིཉྩ ཁྭཱཧཾ, བྷིཀྑཝེ, སབྦཏྠིཀཾ ཝདཱམཱི’’ཏི (སཾ. ནི. ༥.༢༣༤), ཏསྨཱ ཨེཏྠ ‘‘ཀཱཡེ ཀཱཡཱནུཔསྶཱི ཝིཧརཏཱི’’ཏི ཨེཏྟཱཝཏཱ ཀཱཡཱནུཔསྶནཱསཏིཔཊྛཱནཀམྨཊྛཱནཾ ¶ ཝུཏྟཾ ཧོཏི. ཨཐ ཝཱ ཡསྨཱ ཨནཱཏཱཔིནོ ཨནྟོསངྑེཔོ ཨནྟརཱཡཀརོ ཧོཏི, ཨསམྤཛཱནོ ཨུཔཱཡཔརིགྒཧེ ཨནུཔཱཡཔརིཝཛྫནེ ཙ སམྨུཡ྄ཧཏི, མུཊྛསྶཏཱི ཨུཔཱཡཱཔརིཙྩཱགེ ཨནུཔཱཡཱཔརིགྒཧེ ཙ ཨསམཏྠོཝ ཧོཏི, ཏེནསྶ ཏཾ ཀམྨཊྛཱནཾ ན སམྤཛྫཏི; ཏསྨཱ ཡེསཾ དྷམྨཱནཾ ཨཱནུབྷཱཝེན ཏཾ སམྤཛྫཏི ཏེསཾ དསྶནཏྠཾ ‘‘ཨཱཏཱཔཱི སམྤཛཱནོ སཏིམཱ’’ཏི ཨིདཾ ཝུཏྟནྟི ཝེདིཏབྦཾ.

ཨིཏི ¶ ཀཱཡཱནུཔསྶནཱསཏིཔཊྛཱནཾ སམྤཡོགངྒཉྩ དསྶེཏྭཱ ཨིདཱནི པཧཱནངྒཾ དསྶེཏུཾ ཝིནེཡྻ ལོཀེ ཨབྷིཛ྄ཛྷཱདོམནསྶནྟི ཝུཏྟཾ. ཏཏྠ ཝིནེཡྻཱཏི ཏདངྒཝིནཡེན ཝཱ ཝིཀྑམྦྷནཝིནཡེན ཝཱ ཝིནཡིཏྭཱ. ལོཀེཏི ཨེཏྠ ཡྭཱཡཾ ཨཛ྄ཛྷཏྟཱདིབྷེདོ ཀཱཡོ པརིགྒཧིཏོ སྭེཝ ཨིདྷ ལོཀོ ནཱམ. ཏསྨིཾ ལོཀེ ཨབྷིཛ྄ཛྷཱདོམནསྶཾ ཝིནཡིཏྭཱཏི ཨཏྠོ. ཡསྨཱ པནེཏྠ ཨབྷིཛ྄ཛྷཱགཧཎེན ཀཱམཙྪནྡོ, དོམནསྶགྒཧཎེན བྱཱཔཱདོ སངྒཧཾ གཙྪཏི, ཏསྨཱ ནཱིཝརཎཔརིཡཱཔནྣབལཝདྷམྨདྭཡདསྶནེན ནཱིཝརཎཔྤཧཱནཾ ཝུཏྟཾ ཧོཏཱིཏི ཝེདིཏབྦཾ.

ཝིསེསེན ཙེཏྠ ཨབྷིཛ྄ཛྷཱཝིནཡེན ཀཱཡསམྤཏྟིམཱུལཀསྶ ཨནུརོདྷསྶ, དོམནསྶཝིནཡེན ཀཱཡཝིཔཏྟིམཱུལཀསྶ ཝིརོདྷསྶ, ཨབྷིཛ྄ཛྷཱཝིནཡེན ཙ ཀཱཡེ ཨབྷིརཏིཡཱ, དོམནསྶཝིནཡེན ཀཱཡབྷཱཝནཱཡ ཨནབྷིརཏིཡཱ, ཨབྷིཛ྄ཛྷཱཝིནཡེན ཀཱཡེ ཨབྷཱུཏཱནཾ སུབྷསུཁབྷཱཝཱདཱིནཾ པཀྑེཔསྶ, དོམནསྶཝིནཡེན ¶ ཀཱཡེ བྷཱུཏཱནཾ ཨསུབྷཱསུཁབྷཱཝཱདཱིནཾ ཨཔནཡནསྶ ཙ པཧཱནཾ ཝུཏྟཾ. ཏེན ཡོགཱཝཙརསྶ ཡོགཱནུབྷཱཝོ ཡོགསམཏྠཏཱ ཙ དཱིཔིཏཱ ཧོཏི. ཡོགཱནུབྷཱཝོ ཧི ཨེས ཡདིདཾ ཨནུརོདྷཝིརོདྷཝིཔྤམུཏྟོ, ཨརཏིརཏིསཧོ, ཨབྷཱུཏཔཀྑེཔབྷཱུཏཱཔནཡནཝིརཧིཏོ ཙ ཧོཏི. ཨནུརོདྷཝིརོདྷཝིཔྤམུཏྟོ ཙེས ཨརཏིརཏིསཧོ ཨབྷཱུཏཾ ཨཔཀྑིཔནྟོ བྷཱུཏཉྩ ཨནཔནེནྟོ ཡོགསམཏྠོ ཧོཏཱིཏི.

ཨཔརོ ནཡོ – ‘‘ཀཱཡེ ཀཱཡཱནུཔསྶཱི’’ཏི ཨེཏྠ ཨནུཔསྶནཱཡ ཀམྨཊྛཱནཾ ཝུཏྟཾ. ཝིཧརཏཱིཏི ཨེཏྠ ཝུཏྟཝིཧཱརེན ཀམྨཊྛཱནིཀསྶ ཀཱཡཔརིཧརཎཾ. ཨཱཏཱཔཱིཏིཨཱདཱིསུ ཨཱཏཱཔེན སམྨཔྤདྷཱནཾ, སཏིསམྤཛཉྙེན སབྦཏྠིཀཀམྨཊྛཱནཾ, ཀམྨཊྛཱནཔརིཧརཎཱུཔཱཡོ ཝཱ; སཏིཡཱ ཝཱ ཀཱཡཱནུཔསྶནཱཝསེན པཊིལདྡྷསམཐོ, སམྤཛཉྙེན ཝིཔསྶནཱ ¶ , ཨབྷིཛ྄ཛྷཱདོམནསྶཝིནཡེན བྷཱཝནཱཕལཾ ཝུཏྟནྟི ཝེདིཏབྦཾ. ཨཡཾ ཏཱཝ ཀཱཡཱནུཔསྶནཱསཏིཔཊྛཱནུདྡེསསྶ ཨཏྠཝཎྞནཱ.

ཝེདནཱནུཔསྶནཱདིཨུདྡེསཝཎྞནཱ

ཝེདནཱནུཔསྶནཱསཏིཔཊྛཱནུདྡེསཱདཱིསུཔི ཨཛ྄ཛྷཏྟཱདཱིནི ཝུཏྟནཡེནེཝ ཝེདིཏབྦཱནི. ཨེཏེསུཔི ཧི ཨཏྟནོ ཝེདནཱདཱིསུ, པརསྶ ཝེདནཱདཱིསུ, ཀཱལེན ཨཏྟནོ ཀཱལེན པརསྶ ཝེདནཱདཱིསཱུཏི ཏིཝིདྷོ པརིགྒཧོ ¶ ཝུཏྟོ. ཝེདནཱསུ ཝེདནཱནུཔསྶཱིཏིཨཱདཱིསུ ཙ ཝེདནཱདཱིནཾ པུནཝཙནེ པཡོཛནཾ ཀཱཡཱནུཔསྶནཱཡཾ ཝུཏྟནཡེནེཝ ཝེདིཏབྦཾ. ཝེདནཱསུ ཝེདནཱནུཔསྶཱི, ཙིཏྟེ ཙིཏྟཱནུཔསྶཱི, དྷམྨེསུ དྷམྨཱནུཔསྶཱིཏི ཨེཏྠ པན ཝེདནཱཏི ཏིསྶོ ཝེདནཱ. ཏཱ ཙ ལོཀིཡཱ ཨེཝ; ཙིཏྟམྤི ལོཀིཡཾ, ཏཐཱ དྷམྨཱ. ཏེསཾ ཝིབྷཱགོ ནིདྡེསཝཱརེ པཱཀཊོ བྷཝིསྶཏི. ཀེཝལཾ པནིདྷ ཡཐཱ ཝེདནཱ ཨནུཔསྶིཏབྦཱ ཏཐཱ ཨནུཔསྶནྟོ ‘‘ཝེདནཱསུ ཝེདནཱནུཔསྶཱི’’ཏི ཝེདིཏབྦོ. ཨེས ནཡོ ཙིཏྟདྷམྨེསུ. ཀཐཉྩ ཝེདནཱ ཨནུཔསྶིཏབྦཱཏི? སུཁཱ ཏཱཝ ཝེདནཱ དུཀྑཏོ, དུཀྑཱ སལླཏོ, ཨདུཀྑམསུཁཱ ཨནིཙྩཏོ. ཡཐཱཧ –

‘‘ཡོ སུཁཾ དུཀྑཏོ ཨདྡ, དུཀྑམདྡཀྑི སལླཏོ;

ཨདུཀྑམསུཁཾ སནྟཾ, ཨདྡཀྑི ནཾ ཨནིཙྩཏོ;

ས ཝེ སམྨདསོ བྷིཀྑུ, ཨུཔསནྟོ ཙརིསྶཏཱི’’ཏི. (སཾ. ནི. ༤.༢༥༣);

སབྦཱ ¶ ཨེཝ ཙེཏཱ དུཀྑཱཏིཔི ཨནུཔསྶིཏབྦཱ. ཝུཏྟཉྩེཏཾ – ‘‘ཡཾ ཀིཉྩི ཝེདཡིཏཾ ཏཾ དུཀྑསྨིནྟི ཝདཱམཱི’’ཏི (སཾ. ནི. ༤.༢༥༩). སུཁདུཀྑཏོཔི ཙ ཨནུཔསྶིཏབྦཱ, ཡཐཱཧ – ‘‘སུཁཱ ཁོ, ཨཱཝུསོ ཝིསཱཁ, ཝེདནཱ ཋིཏིསུཁཱ, ཝིཔརིཎཱམདུཀྑཱ’’ཏི (མ. ནི. ༡.༤༦༥) སབྦཾ ཝིཏྠཱརེཏབྦཾ. ཨཔིཙ ཨནིཙྩཱདིསཏྟཱནུཔསྶནཱཝསེནཔི (པཊི. མ. ༣.༣༥) ཨནུཔསྶིཏབྦཱ. སེསཾ ནིདྡེསཝཱརེཡེཝ པཱཀཊཾ བྷཝིསྶཏི.

ཙིཏྟདྷམྨེསུཔི ཙིཏྟཾ ཏཱཝ ཨཱརམྨཎཱདྷིཔཏིསཧཛཱཏབྷཱུམིཀམྨཝིཔཱཀཀིརིཡཱདིནཱནཏྟབྷེདཱནཾ ཨནིཙྩཱདིནུཔསྶནཱནཾ ནིདྡེསཝཱརེ ཨཱགཏསརཱགཱདིབྷེདཱནཉྩ ཝསེན ¶ ཨནུཔསྶིཏབྦཾ. དྷམྨཱ སལཀྑཎསཱམཉྙལཀྑཎཱནཾ སུཉྙཏཱདྷམྨསྶ ཨནིཙྩཱདིསཏྟཱནུཔསྶནཱནཾ ནིདྡེསཝཱརེ ཨཱགཏསནྟཱསནྟཱདིབྷེདཱནཉྩ ཝསེན ཨནུཔསྶིཏབྦཱ. སེསཾ ཝུཏྟནཡམེཝ. ཀཱམཉྩེཏྠ ཡསྶ ཀཱཡསངྑཱཏེ ལོཀེ ཨབྷིཛ྄ཛྷཱདོམནསྶཾ པཧཱིནཾ, ཏསྶ ཝེདནཱདིལོཀེསུཔི ཏཾ པཧཱིནམེཝ. ནཱནཱཔུགྒལཝསེན པན ནཱནཱཙིཏྟཀྑཎིཀསཏིཔཊྛཱནབྷཱཝནཱཝསེན ཙ སབྦཏྠ ཝུཏྟཾ. ཡཏོ ཝཱ ཨེཀཏྠ པཧཱིནཾ, སེསེསུཔི པཧཱིནཾ ཧོཏི. ཏེནེཝསྶ ཏཏྠ པཧཱནདསྶནཏྠམྤི ཨེཝཾ ཝུཏྟནྟི ཝེདིཏབྦནྟི.

ཨུདྡེསཝཱརཝཎྞནཱ ནིཊྛིཏཱ.

ཀཱཡཱནུཔསྶནཱནིདྡེསཝཎྞནཱ

༣༥༦. ཨིདཱནི ¶ སེཡྻཐཱཔི ནཱམ ཚེཀོ ཝིལཱིཝཀཱརཀོ ཐཱུལཀིལཉྫསཎྷཀིལཉྫཙངྐོཊཀཔེལཱ༹པུཊཱདཱིནི ཨུཔཀརཎཱནི ཀཏྟུཀཱམོ ཨེཀཾ མཧཱཝེལུ༹ཾ ལབྷིཏྭཱ ཙཏུདྷཱ ཚིནྡིཏྭཱ ཏཏོ ཨེཀེཀཾ ཝེལུ༹ཁཎྜཾ གཧེཏྭཱ ཕཱལེཏྭཱ ཏཾ ཏཾ ཨུཔཀརཎཾ ཀརེཡྻ, ཡཐཱ ཝཱ པན ཚེཀོ སུཝཎྞཀཱརོ ནཱནཱཝིཧིཏཾ པིལ༹ནྡྷནཝིཀཏིཾ ཀཏྟུཀཱམོ སུཔརིསུདྡྷཾ སུཝཎྞགྷཊིཀཾ ལབྷིཏྭཱ ཙཏུདྷཱ བྷིནྡིཏྭཱ ཏཏོ ཨེཀེཀཾ ཀོཊྛཱསཾ གཧེཏྭཱ ཏཾ ཏཾ པིལ༹ནྡྷནཾ ཀརེཡྻ, ཨེཝམེཝ བྷགཝཱ སཏིཔཊྛཱནདེསནཱཡ སཏྟཱནཾ ཨནེཀཔྤཀཱརཾ ཝིསེསཱདྷིགམཾ ཀཏྟུཀཱམོ ཨེཀམེཝ སམྨཱསཏིཾ ‘‘ཙཏྟཱརོ སཏིཔཊྛཱནཱ – ཨིདྷ བྷིཀྑུ ཨཛ྄ཛྷཏྟཾ ཀཱཡེ ཀཱཡཱནུཔསྶཱི ཝིཧརཏཱི’’ཏིཨཱདིནཱ ནཡེན ཨཱརམྨཎཝསེན ¶ ཙཏུདྷཱ བྷིནྡིཏྭཱ ཏཏོ ཨེཀེཀཾ སཏིཔཊྛཱནཾ གཧེཏྭཱ ཝིབྷཛནྟོ ཀཐཉྩ བྷིཀྑུ ཨཛ྄ཛྷཏྟཾ ཀཱཡེཏིཨཱདིནཱ ནཡེན ནིདྡེསཝཱརཾ ཝཏྟུམཱརདྡྷོ.

ཏཏྠ ཀཐཉྩཱཏིཨཱདི ཝིཏྠཱརེཏུཾ ཀཐེཏུཀམྱཏཱཔུཙྪཱ. ཨཡཾ པནེཏྠ སངྑེཔཏྠོ – ཀེན ཙ ཨཱཀཱརེན ཀེན པཀཱརེན བྷིཀྑུ ཨཛ྄ཛྷཏྟཾ ཀཱཡེ ཀཱཡཱནུཔསྶཱི ཝིཧརཏཱིཏི? སེསཔུཙྪཱཝཱརེསུཔི ཨེསེཝ ནཡོ. ཨིདྷ བྷིཀྑཱུཏི ཨིམསྨིཾ སཱསནེ བྷིཀྑུ. ཨཡཉྷེཏྠ ཨིདྷ-སདྡོ ཨཛ྄ཛྷཏྟཱདིཝསེན སབྦཔྤཀཱརཀཱཡཱནུཔསྶནཱནིབྦཏྟཀསྶ པུགྒལསྶ སནྣིསྶཡབྷཱུཏསཱསནཔརིདཱིཔནོ ཨཉྙསཱསནསྶ ཏཐཱབྷཱཝཔཊིསེདྷནོ ཙ. ཝུཏྟཉྷེཏཾ – ‘‘ཨིདྷེཝ, བྷིཀྑཝེ, སམཎོ…པེ… སུཉྙཱ པརཔྤཝཱདཱ སམཎེབྷི ¶ ཨཉྙེཧཱི’’ཏི (མ. ནི. ༡.༡༣༩; ཨ. ནི. ༤.༢༤༡). ཏེན ཝུཏྟཾ ‘‘ཨིམསྨིཾ སཱསནེ བྷིཀྑཱུ’’ཏི.

ཨཛ྄ཛྷཏྟཾ ཀཱཡནྟི ཨཏྟནོ ཀཱཡཾ. ཨུདྡྷཾ པཱདཏལཱཏི པཱདཏལཏོ ཨུཔརི. ཨདྷོ ཀེསམཏྠཀཱཏི ཀེསགྒཏོ ཧེཊྛཱ. ཏཙཔརིཡནྟནྟི ཏིརིཡཾ ཏཙཔརིཙྪིནྣཾ. པཱུརཾ ནཱནཔྤཀཱརསྶ ཨསུཙིནོ པཙྩཝེཀྑཏཱིཏི ནཱནཔྤཀཱརཀེསཱདིཨསུཙིབྷརིཏོ ཨཡཾ ཀཱཡོཏི པསྶཏི. ཀཐཾ? ཨཏྠི ཨིམསྨིཾ ཀཱཡེ ཀེསཱ…པེ… མུཏྟནྟི. ཏཏྠ ཨཏྠཱིཏི སཾཝིཛྫནྟི. ཨིམསྨིནྟི ཡྭཱཡཾ ཨུདྡྷཾ པཱདཏལཱ ཨདྷོ ཀེསམཏྠཀཱ ཏིརིཡཾ ཏཙཔརིཡནྟོ པཱུརོ ནཱནཔྤཀཱརསྶ ཨསུཙིནོཏི ཝུཙྩཏི ཏསྨིཾ. ཀཱཡེཏི སརཱིརེ. སརཱིརཉྷི ¶ ཨསུཙིསཉྩཡཏོ ཀུཙྪིཏཱནཾ ཀེསཱདཱིནཉྩེཝ ཙཀྑུརོགཱདཱིནཉྩ རོགསཏཱནཾ ཨཱཡབྷཱུཏཏོ ཀཱཡོཏི ཝུཙྩཏི.

ཀེསཱ ལོམཱཏི ཨེཏེ ཀེསཱདཡོ དྭཏྟིཾསཱཀཱརཱ. ཏཏྠ ཨཏྠི ཨིམསྨིཾ ཀཱཡེ ཀེསཱ, ཨཏྠི ཨིམསྨིཾ ཀཱཡེ ལོམཱཏི ཨེཝཾ སམྦནྡྷོ ཝེདིཏབྦོ. ཨིམསྨིཉྷི པཱདཏལཏོ པཊྛཱཡ ཨུཔརི, ཀེསམཏྠཀཱ པཊྛཱཡ ཧེཊྛཱ, ཏཙཏོ པཊྛཱཡ ཏིརིཡནྟཏོཏི ཨེཏྟཀེ བྱཱམམཏྟེ ཀལེ༹ཝརེ སབྦཱཀཱརེནཔི ཝིཙིནནྟོ ན ཀོཙི ཀིཉྩི མུཏྟཾ ཝཱ མཎིཾ ཝཱ ཝེལུ༹རིཡཾ ཝཱ ཨགརུཾ ཝཱ ཀུངྐུམཾ ཝཱ ཀཔྤཱུརཾ ཝཱ ཝཱསཙུཎྞཱདིཾ ཝཱ ཨཎུམཏྟམྤི སུཙིབྷཱཝཾ པསྶཏི, ཨཐ ཁོ པརམདུགྒནྡྷཛེགུཙྪཾ ཨསྶིརཱིཀདསྶནཾ ནཱནཔྤཀཱརཾ ཀེསལོམཱདིབྷེདཾ ཨསུཙིཾཡེཝ པསྶཏི. ཏེན ཝུཏྟཾ – ཨཏྠི ཨིམསྨིཾ ཀཱཡེ ཀེསཱ ལོམཱ…པེ… མུཏྟནྟི. ཨཡམེཏྠ པདསམྦནྡྷཏོ ཝཎྞནཱ.

ཨིམཾ པན ཀམྨཊྛཱནཾ བྷཱཝེཏྭཱ ཨརཧཏྟཾ པཱཔུཎིཏུཀཱམེན ཀུལཔུཏྟེན ཨཱདིཏོཝ ཙཏུབྦིདྷཾ སཱིལཾ ¶ སོདྷེཏྭཱ སུཔརིསུདྡྷསཱིལེ པཏིཊྛིཏེན, ཡྭཱཡཾ དསསུ པལིབོདྷེསུ པལིབོདྷོ ཨཏྠི ཏཾ ཨུཔཙྪིནྡིཏྭཱ, པཊིཀྐཱུལམནསིཀཱརཀམྨཊྛཱནབྷཱཝནཱཡ པཋམཛ྄ཛྷཱནཾ ནིབྦཏྟེཏྭཱ, ཛྷཱནཾ པཱདཀཾ ཀཏྭཱ ཝིཔསྶནཾ པཊྛཔེཏྭཱ, ཨརཧཏྟཾ ཨནཱགཱམིཕལཱདཱིསུ ཝཱ ཨཉྙཏརཾ པཏྟསྶ སབྦནྟིམེན པརིཙྪེདེན སཱཊྛཀཐཱཡ པཱལི༹ཡཱ ཀཏཔརིཙཡསྶ ཏནྟིཨཱཙརིཡསྶཱཔི ཀལྱཱཎམིཏྟསྶ སནྟིཀེ ཨུགྒཧེཏབྦཾ. ཝིསུདྡྷཾ ཏཐཱརཱུཔཾ ¶ ཀལྱཱཎམིཏྟཾ ཨེཀཝིཧཱརེ ཨལབྷནྟེན ཏསྶ ཝསནཊྛཱནཾ གནྟྭཱ ཨུགྒཧེཏབྦཾ. ཏཏྠ ཙཏུབྦིདྷསཱིལཝིསོདྷནཉྩེཝ (ཝིསུདྡྷི. ༡.༡༩) པལིབོདྷོ (ཝིསུདྡྷི. ༡.༤༡) ཙ པལིབོདྷུཔཙྪེདོ ཙ ཨཱཙརིཡསྶ སནྟིཀཾ ཨུཔསངྐམནཝིདྷཱནཉྩ སབྦམྤི ཝིསུདྡྷིམགྒེ ཝིཏྠཱརཏོ ཀཐིཏཾ. ཏསྨཱ ཏཾ ཏཏྠ ཀཐིཏནཡེནེཝ ཝེདིཏབྦཾ.

ཨཱཙརིཡེན པན ཀམྨཊྛཱནཾ ཀཐེནྟེན ཏིཝིདྷེན ཀཐེཏབྦཾ. ཨེཀོ བྷིཀྑུ པཀཏིཡཱ ཨུགྒཧིཏཀམྨཊྛཱནོ ཧོཏི. ཏསྶ ཨེཀཾ དྭེ ནིསཛྫཝཱརེ སཛ྄ཛྷཱཡཾ ཀཱརེཏྭཱ ཀཐེཏབྦཾ. ཨེཀོ སནྟིཀེ ཝསིཏྭཱ ཨུགྒཎྷིཏུཀཱམོ ཧོཏི. ཏསྶ ཨཱགཏཱགཏཝེལཱཡ ཀཐེཏབྦཾ. ཨེཀོ ཨུགྒཎྷིཏྭཱ ཨཉྙཏྠ གནྟུཀཱམོ ཧོཏི. ཏསྶ ནཱཏིཔཔཉྩཾ ནཱཏིསངྑེཔཾ ཀཏྭཱ ¶ ནིཛྫཊཾ ནིགྒཎྛིཀཾ ཀམྨཊྛཱནཾ ཀཐེཏབྦཾ. ཀཐེནྟེན ཀིཾ ཨཱཙིཀྑིཏབྦནྟི? སཏྟདྷཱ ཨུགྒཧཀོསལླཾ དསདྷཱ ཙ མནསིཀཱརཀོསལླཾ ཨཱཙིཀྑིཏབྦཾ.

ཏཏྠ ཝཙསཱ མནསཱ ཝཎྞཏོ སཎྛཱནཏོ དིསཏོ ཨོཀཱསཏོ པརིཙྪེདཏོཏི ཨེཝཾ སཏྟདྷཱ ཨུགྒཧཀོསལླཾ ཨཱཙིཀྑིཏབྦཾ. ཨིམསྨིཉྷི པཊིཀྐཱུལམནསིཀཱརཀམྨཊྛཱནེ ཡོཔི ཏིཔིཊཀོ ཧོཏི, ཏེནཔི མནསིཀཱརཀཱལེ པཋམཾ ཝཱཙཱཡ སཛ྄ཛྷཱཡོ ཀཱཏབྦོ. ཨེཀཙྩསྶ ཧི སཛ྄ཛྷཱཡཾ ཀརོནྟསྶེཝ ཀམྨཊྛཱནཾ པཱཀཊཾ ཧོཏི, མལཡཝཱསཱིམཧཱདེཝཏྠེརསྶ སནྟིཀེ ཨུགྒཧིཏཀམྨཊྛཱནཱནཾ དྭིནྣཾ ཐེརཱནཾ ཝིཡ. ཐེརོ ཀིར ཏེཧི ཀམྨཊྛཱནཾ ཡཱཙིཏོ ‘ཙཏྟཱརོ མཱསེ ཨིམཾ ཨེཝཾ སཛ྄ཛྷཱཡཾ ཀརོཐཱ’ཏི དྭཏྟིསཱཀཱརཔཱལི༹ཾ ཨདཱསི. ཏེ, ཀིཉྩཱཔི ཏེསཾ དྭེ ཏཡོ ནིཀཱཡཱ པགུཎཱ, པདཀྑིཎགྒཱཧིཏཱཡ པན ཙཏྟཱརོ མཱསེ དྭཏྟིཾསཱཀཱརཾ སཛ྄ཛྷཱཡནྟཱཝ སོཏཱཔནྣཱ ཨཧེསུཾ.

ཏསྨཱ ཀམྨཊྛཱནཾ ཀཐེནྟེན ཨཱཙརིཡེན ཨནྟེཝཱསིཀོ ཝཏྟབྦོ – ‘པཋམཾ ཏཱཝ ཝཱཙཱཡ སཛ྄ཛྷཱཡཾ ཀརོཧཱི’ཏི. ཀརོནྟེན ཙ ཏཙཔཉྩཀཱདཱིནི པརིཙྪིནྡིཏྭཱ ཨནུལོམཔཊིལོམཝསེན སཛ྄ཛྷཱཡོ ཀཱཏབྦོ. ‘‘ཀེསཱ ལོམཱ ནཁཱ དནྟཱ ཏཙོ’’ཏི ཧི ཝཏྭཱ པུན པཊིལོམཏོ ‘‘ཏཙོ དནྟཱ ནཁཱ ལོམཱ ཀེསཱ’’ཏི ཝཏྟབྦཾ. ཏདནནྟརཾ ཝཀྐཔཉྩཀེ ‘‘མཾསཾ ནྷཱརུ ཨཊྛི ཨཊྛིམིཉྫཾ ¶ ཝཀྐ’’ནྟི ཝཏྭཱ པུན པཊིལོམཏོ ‘‘ཝཀྐཾ ¶ ཨཊྛིམིཉྫཾ ཨཊྛི ནྷཱརུ མཾསཾ ཏཙོ དནྟཱ ནཁཱ ལོམཱ ཀེསཱ’’ཏི ཝཏྟབྦཾ. ཏཏོ པཔྥཱསཔཉྩཀེ ‘‘ཧདཡཾ ཡཀནཾ ཀིལོམཀཾ པིཧཀཾ པཔྥཱས’’ནྟི ཝཏྭཱ པུན པཊིལོམཏོ ‘‘པཔྥཱསཾ པིཧཀཾ ཀིལོམཀཾ ཡཀནཾ ཧདཡཾ ཝཀྐཾ ཨཊྛིམིཉྫཾ ཨཊྛི ནྷཱརུ མཾསཾ ཏཙོ དནྟཱ ནཁཱ ལོམཱ ཀེསཱ’’ཏི ཝཏྟབྦཾ.

ཏཏོ ཨིམཾ ཏནྟིཾ ཨནཱརུལ༹ྷམྤི པཊིསམྦྷིདཱམགྒེ (པཊི. མ. ༡.༤) ཨཱགཏཾ མཏྠལུངྒཾ ཀརཱིསཱཝསཱནེ ཏནྟིཾ ཨཱརོཔེཏྭཱ ཨིམསྨིཾ མཏྠལུངྒཔཉྩཀེ ‘‘ཨནྟཾ ཨནྟགུཎཾ ཨུདརིཡཾ ཀརཱིསཾ མཏྠལུངྒ’’ནྟི ཝཏྭཱ པུན པཊིལོམཏོ ‘‘མཏྠལུངྒཾ ཀརཱིསཾ ཨུདརིཡཾ ཨནྟགུཎཾ ཨནྟཾ པཔྥཱསཾ པིཧཀཾ ཀིལོམཀཾ ཡཀནཾ ཧདཡཾ ཝཀྐཾ ཨཊྛིམིཉྫཾ ཨཊྛི ནྷཱརུ མཾསཾ ཏཙོ དནྟཱ ནཁཱ ལོམཱ ཀེསཱ’’ཏི ཝཏྟབྦཾ.

ཏཏོ ¶ མེདཚཀྐེ ‘‘པིཏྟཾ སེམྷཾ པུབྦོ ལོཧིཏཾ སེདོ མེདོ’’ཏི ཝཏྭཱ པུན པཊིལོམཏོ ‘‘མེདོ སེདོ ལོཧིཏཾ པུབྦོ སེམྷཾ པིཏྟཾ མཏྠལུངྒཾ ཀརཱིསཾ ཨུདརིཡཾ ཨནྟགུཎཾ ཨནྟཾ པཔྥཱསཾ པིཧཀཾ ཀིལོམཀཾ ཡཀནཾ ཧདཡཾ ཝཀྐཾ ཨཊྛིམིཉྫཾ ཨཊྛི ནྷཱརུ མཾསཾ ཏཙོ དནྟཱ ནཁཱ ལོམཱ ཀེསཱ’’ཏི ཝཏྟབྦཾ.

ཏཏོ མུཏྟཚཀྐེ ‘‘ཨསྶུ ཝསཱ ཁེལོ༹ སིངྒྷཱཎིཀཱ ལསིཀཱ མུཏྟ’’ནྟི ཝཏྭཱ པུན པཊིལོམཏོ ‘‘མུཏྟཾ ལསིཀཱ སིངྒྷཱཎིཀཱ ཁེལོ༹ ཝསཱ ཨསྶུ མེདོ སེདོ ལོཧིཏཾ པུབྦོ སེམྷཾ པིཏྟཾ མཏྠལུངྒཾ ཀརཱིསཾ ཨུདརིཡཾ ཨནྟགུཎཾ ཨནྟཾ པཔྥཱསཾ པིཧཀཾ ཀིལོམཀཾ ཡཀནཾ ཧདཡཾ ཝཀྐཾ ཨཊྛིམིཉྫཾ ཨཊྛི ནྷཱརུ མཾསཾ ཏཙོ དནྟཱ ནཁཱ ལོམཱ ཀེསཱ’’ཏི ཨེཝཾ ཀཱལསཏམྤི ཀཱལསཧསྶམྤི ཀཱལསཏསཧསྶམྤི ཝཱཙཱཡ སཛ྄ཛྷཱཡོ ཀཱཏབྦོ. ཝཙསཱ སཛ྄ཛྷཱཡེན ཧི ཀམྨཊྛཱནཏནྟི པགུཎཱ ཧོཏི; ན ཨིཏོ ཙིཏོ ཙ ཙིཏྟཾ ཝིདྷཱཝཏི; ཀོཊྛཱསཱ པཱཀཊཱ ཧོནྟི, ཧཏྠསངྑལིཀཱ ཝིཡ ཁཱཡནྟི, ཝཏིཔཱདཔནྟི ཝིཡ ཙ ཁཱཡནྟི. ཡཐཱ ཙ པན ཝཙསཱ, ཏཐེཝ མནསཱཔི སཛ྄ཛྷཱཡོ ཀཱཏབྦོ. ཝཙསཱ སཛ྄ཛྷཱཡོ ཧི མནསཱ སཛ྄ཛྷཱཡསྶ པཙྩཡོ ཧོཏི. མནསཱ སཛ྄ཛྷཱཡོ ལཀྑཎཔཊིཝེདྷསྶ པཙྩཡོ ཧོཏི. ལཀྑཎཔཊིཝེདྷོ མགྒཕལཔཊིཝེདྷསྶ པཙྩཡོ ཧོཏི.

‘ཝཎྞཏོ’ཏི ཀེསཱདཱིནཾ ཝཎྞོ ཝཝཏྠཔེཏབྦོ. ‘སཎྛཱནཏོ’ཏི ཏེསཾཡེཝ སཎྛཱནཾ ཝཝཏྠཔེཏབྦཾ ¶ . ‘དིསཏོ’ཏི ¶ ཨིམསྨིཾ སརཱིརེ ནཱབྷིཏོ ཨུདྡྷཾ ཨུཔརིམཱ དིསཱ, ཨདྷོ ཧེཊྛིམཱ དིསཱ. ཏསྨཱ ‘‘ཨཡཾ ཀོཊྛཱསོ ཨིམིསྶཱ ནཱམ དིསཱཡཱ’’ཏི དིསཱ ཝཝཏྠཔེཏབྦཱ. ‘ཨོཀཱསཏོ’ཏི ‘‘ཨཡཾ ཀོཊྛཱསོ ཨིམསྨིཾ ནཱམ ཨོཀཱསེ པཏིཊྛིཏོ’’ཏི ཨེཝཾ ཏསྶ ཏསྶ ཨོཀཱསོ ཝཝཏྠཔེཏབྦོ. ‘པརིཙྪེདཏོ’ཏི སབྷཱགཔརིཙྪེདོ ཝིསབྷཱགཔརིཙྪེདོཏི དྭེ པརིཙྪེདཱ. ཏཏྠ ‘‘ཨཡཾ ཀོཊྛཱསོ ཧེཊྛཱ ཙ ཨུཔརི ཙ ཏིརིཡཉྩ ཨིམིནཱ ནཱམ པརིཙྪིནྣོ’’ཏི ཨེཝཾ སབྷཱགཔརིཙྪེདོ ཝེདིཏབྦོ. ‘‘ཀེསཱ ན ལོམཱ, ལོམཱཔི ན ཀེསཱ’’ཏི ཨེཝཾ ཨམིསྶཱིཀཏཝསེན ཝིསབྷཱགཔརིཙྪེདོ ཝེདིཏབྦོ.

ཨེཝཾ ¶ སཏྟདྷཱ ཨུགྒཧཀོསལླཾ ཨཱཙིཀྑནྟེན པན ‘‘ཨིདཾ ཀམྨཊྛཱནཾ ཨསུཀསྨིཾ སུཏྟེ པཊིཀྐཱུལཝསེན ཀཐིཏཾ, ཨསུཀསྨིཾ དྷཱཏུཝསེནཱ’’ཏི ཉཏྭཱ ཨཱཙིཀྑིཏབྦཾ. ཨིདཉྷི མཧཱསཏིཔཊྛཱནེ (དཱི. ནི. ༢.༣༧༢; མ. ནི. ༡.༡༠༥ ཨཱདཡོ) པཊིཀྐཱུལཝསེནེཝ ཀཐིཏཾ, མཧཱཧཏྠིཔདོཔམ (མ. ནི. ༡.༣༠༠ ཨཱདཡོ) -མཧཱརཱཧུལོཝཱད (མ. ནི. ༢.༡༡༣ ཨཱདཡོ) -དྷཱཏུཝིབྷངྒེསུ (མ. ནི. ༣.༣༤༢ ཨཱདཡོ) དྷཱཏུཝསེན ཀཐིཏཾ. ཀཱཡགཏཱསཏིསུཏྟེ (མ. ནི. ༣.༡༥༣ ཨཱདཡོ) པན ཡསྶ ཝཎྞཏོ ཨུཔཊྛཱཏི, ཏཾ སནྡྷཱཡ ཙཏྟཱརི ཛྷཱནཱནི ཝིབྷཏྟཱནི. ཏཏྠ དྷཱཏུཝསེན ཀཐིཏཾ ཝིཔསྶནཱཀམྨཊྛཱནཾ ཧོཏི, པཊིཀྐཱུལཝསེན ཀཐིཏཾ སམཐཀམྨཊྛཱནཾ. ཏདེཏཾ ཨིདྷ སམཐཀམྨཊྛཱནཾ ཨཝིསེསཏོ སབྦསཱདྷཱརཎཝསེན ཀཐིཏནྟི ཝདནྟིཡེཝཱཏི.

ཨེཝཾ སཏྟདྷཱ ཨུགྒཧཀོསལླཾ ཨཱཙིཀྑིཏྭཱ ‘‘ཨནུཔུབྦཏོ, ནཱཏིསཱིགྷཏོ, ནཱཏིསཎིཀཏོ, ཝིཀྑེཔཔཊིབཱཧནཏོ, པཎྞཏྟིསམཏིཀྐམནཏོ, ཨནུཔུབྦམུཉྩནཏོ, ཨཔྤནཱཏོ, ཏཡོ ཙ སུཏྟནྟཱ’’ཏི ཨེཝཾ དསདྷཱ མནསིཀཱརཀོསལླཾ ཨཱཙིཀྑིཏབྦཾ. ཏཏྠ ‘ཨནུཔུབྦཏོ’ཏི ཨིདཉྷི སཛ྄ཛྷཱཡཀརཎཏོ པཊྛཱཡ ཨནུཔཊིཔཱཊིཡཱ མནསིཀཱཏབྦཾ, ན ཨེཀནྟརིཀཱཡ. ཨེཀནྟརིཀཱཡ ཧི མནསིཀརོནྟོ ཡཐཱ ནཱམ ཨཀུསལོ པུརིསོ དྭཏྟིཾསཔདཾ ནིསྶེཎིཾ ཨེཀནྟརིཀཱཡ ཨཱརོཧནྟོ ཀིལནྟཀཱཡོ པཏཏི, ན ཨཱརོཧནཾ སམྤཱདེཏི; ཨེཝམེཝ བྷཱཝནཱསམྤཏྟིཝསེན ཨདྷིགནྟབྦསྶ ཨསྶཱདསྶ ཨནདྷིགམཱ ཀིལནྟཙིཏྟོ པཏཏི, ན བྷཱཝནཾ སམྤཱདེཏི.

ཨནུཔུབྦཏོ མནསིཀརོནྟེནཱཔི ཙ ‘ནཱཏིསཱིགྷཏོ’ མནསིཀཱཏབྦཾ. ཨཏིསཱིགྷཏོ མནསིཀརོཏོ ཧི ¶ ཡཐཱ ནཱམ ཏིཡོཛནཾ མགྒཾ པཊིཔཛྫིཏྭཱ ཨོཀྐམནཝིསྶཛྫནཾ ཨསལླཀྑེཏྭཱ ¶ སཱིགྷེན ཛཝེན སཏྟཀྑཏྟུམྤི གམནཱགམནཾ ཀརོཏོ པུརིསསྶ ཀིཉྩཱཔི ཨདྡྷཱནཾ པརིཀྑཡཾ གཙྪཏི, ཨཐ ཁོ པུཙྪིཏྭཱཝ གནྟབྦཾ ཧོཏི; ཨེཝམེཝ ཀེཝལཾ ཀམྨཊྛཱནཾ པརིཡོསཱནཾ པཱཔུཎཱཏི, ཨཝིབྷཱུཏཾ པན ཧོཏི, ན ཝིསེསཾ ཨཱཝཧཏི. ཏསྨཱ ནཱཏིསཱིགྷཏོ མནསིཀཱཏབྦཾ.

ཡཐཱ ཙ ནཱཏིསཱིགྷཏོ ཨེཝཾ ‘ནཱཏིསཎིཀཏོ’པི. ཨཏིསཎིཀཏོ མནསིཀརོཏོ ཧི ཡཐཱ ནཱམ ཏདཧེཝ ཏིཡོཛནཾ མགྒཾ གནྟུཀཱམསྶ པུརིསསྶ ¶ ཨནྟརཱམགྒེ རུཀྑཔབྦཏགཧནཱདཱིསུ ཝིལམྦམཱནསྶ མགྒོ པརིཀྑཡཾ ན གཙྪཏི, དྭཱིཧཏཱིཧེན པརིཡོསཱཔེཏབྦོ ཧོཏི; ཨེཝམེཝ ཀམྨཊྛཱནཾ པརིཡོསཱནཾ ན གཙྪཏི, ཝིསེསཱདྷིགམསྶ པཙྩཡོ ན ཧོཏི.

‘ཝིཀྑེཔཔཊིབཱཧནཏོ’ཏི ཀམྨཊྛཱནཾ ཝིསྶཛྫེཏྭཱ བཧིདྡྷཱ པུཐུཏྟཱརམྨཎེ ཙེཏསོ ཝིཀྑེཔོ པཊིབཱཧིཏབྦོ. ཨཔྤཊིབཱཧཏོ ཧི ཡཐཱ ནཱམ ཨེཀཔདིཀཾ པཔཱཏམགྒཾ པཊིཔནྣསྶ པུརིསསྶ ཨཀྐམནཔདཾ ཨསལླཀྑེཏྭཱ ཨིཏོ ཙིཏོ ཙ ཝིལོཀཡཏོ པདཝཱརོ ཝིརཛ྄ཛྷཏི, ཏཏོ སཏཔོརིསེ པཔཱཏེ པཏིཏབྦཾ ཧོཏི; ཨེཝམེཝ བཧིདྡྷཱ ཝིཀྑེཔེ སཏི ཀམྨཊྛཱནཾ པརིཧཱཡཏི, པརིདྷཾསཏི. ཏསྨཱ ཝིཀྑེཔཔཊིབཱཧནཏོ མནསིཀཱཏབྦཾ.

‘པཎྞཏྟིསམཏིཀྐམནཏོ’ཏི ཡཱ ཨཡཾ ‘‘ཀེསཱ ལོམཱ’’ཏི ཨཱདིཀཱ པཎྞཏྟི ཏཾ ཨཏིཀྐམིཏྭཱ པཊིཀྐཱུལནྟི ཙིཏྟཾ ཋཔེཏབྦཾ. ཡཐཱ ཧི ཨུདཀདུལླབྷཀཱལེ མནུསྶཱ ཨརཉྙེ ཨུདཔཱནཾ དིསྭཱ ཏཏྠ ཏཱལཔཎྞཱདིཀཾ ཀིཉྩིདེཝ སཉྙཱཎཾ བནྡྷིཏྭཱ ཏེན སཉྙཱཎེན ཨཱགནྟྭཱ ནྷཱཡནྟི ཙེཝ པིཝནྟི ཙ, ཡདཱ པན ཏེསཾ ཨབྷིཎྷསཉྩཱརེན ཨཱགཏཱགཏཔདཾ པཱཀཊཾ ཧོཏི, ཏདཱ སཉྙཱཎེན ཀིཙྩཾ ན ཧོཏི, ཨིཙྪིཏིཙྪིཏཀྑཎེ གནྟྭཱ ནྷཱཡནྟི ཙེཝ པིཝནྟི ཙ; ཨེཝམེཝ པུབྦབྷཱགེ ‘ཀེསཱ ལོམཱ’ཏི པཎྞཏྟིཝསེན མནསིཀརོཏོ པཊིཀྐཱུལབྷཱཝོ པཱཀཊོ ཧོཏི. ཨཐ ‘ཀེསཱ ལོམཱ’ཏི པཎྞཏྟིཾ སམཏིཀྐམིཏྭཱ པཊིཀྐཱུལབྷཱཝེཡེཝ ཙིཏྟཾ ཋཔེཏབྦཾ.

‘ཨནུཔུབྦམུཉྩནཏོ’ཏི ཡོ ཡོ ཀོཊྛཱསོ ན ཨུཔཊྛཱཏི, ཏཾ ཏཾ མུཉྩནྟེན ཨནུཔུབྦམུཉྩནཏོ མནསིཀཱཏབྦཾ. ཨཱདིཀམྨིཀསྶ ཧི ‘ཀེསཱ’ཏི མནསིཀརོཏོ མནསིཀཱརོ གནྟྭཱ ‘མུཏྟ’ནྟི ¶ ཨིམཾ པརིཡོསཱནཀོཊྛཱསམེཝ ཨཱཧཙྩ ཏིཊྛཏི. ‘མུཏྟ’ནྟི ཙ མནསིཀརོཏོ མནསིཀཱརོ གནྟྭཱ ‘ཀེསཱ’ཏི ཨིམཾ ཨཱདིཀོཊྛཱསམེཝ ཨཱཧཙྩ ཏིཊྛཏི. ཨཐསྶ མནསིཀརོཏོ ཀེཙི ¶ ཀོཊྛཱསཱ ཨུཔཊྛཧནྟི, ཀེཙི ན ཨུཔཊྛཧནྟི. ཏེན ཡེ ཡེ ཨུཔཊྛཧནྟི ཏེསུ ཏེསུ ཏཱཝ ཀམྨཾ ཀཱཏབྦཾ, ཡཱཝ དྭཱིསུ ཨུཔཊྛིཏེསུ ཏེསམྤི ཨེཀོ སུཊྛུཏརཾ ཨུཔཊྛཧཏི. ཨེཝཾ ཨུཔཊྛིཏཾ པན ཏམེཝ པུནཔྤུནཾ མནསིཀརོནྟེན ཨཔྤནཱ ཨུཔྤཱདེཏབྦཱ.

ཏཏྲཱཡཾ ཨུཔམཱ – ཡཐཱ ཧི དྭཏྟིཾསཏཱལཀེ ཏཱལཝནེ ཝསནྟཾ མཀྐཊཾ གཧེཏུཀཱམོ ལུདྡོ ཨཱདིམྷི ཋིཏཏཱལསྶ པཎྞཾ སརེན ཝིཛ྄ཛྷིཏྭཱ ཨུཀྐུཊྛིཾ ཀརེཡྻ; ཨཐ སོ མཀྐཊོ པཊིཔཱཊིཡཱ ཏསྨིཾ ཏསྨིཾ ཏཱལེ ¶ པཏིཏྭཱ པརིཡནྟཏཱལམེཝ གཙྪེཡྻ; ཏཏྠཔི གནྟྭཱ ལུདྡེན ཏཐེཝ ཀཏེ པུན ཏེནེཝ ནཡེན ཨཱདིཏཱལཾ ཨཱགཙྪེཡྻ; སོ ཨེཝཾ པུནཔྤུནཾ པཊིཔཱཊིཡཱ གཙྪནྟོ ཨུཀྐུཊྛུཀྐུཊྛིཊྛཱནེཡེཝ ཨུཊྛཧིཏྭཱ པུན ཨནུཀྐམེན ཨེཀསྨིཾ ཏཱལེ ནིཔཏིཏྭཱ ཏསྶ ཝེམཛ྄ཛྷེ མཀུལ༹ཏཱལཔཎྞསཱུཙིཾ དལ༹ྷཾ གཧེཏྭཱ ཝིཛ྄ཛྷིཡམཱནོཔི ན ཨུཊྛཧེཡྻ, ཨེཝཾསམྤདམིདཾ དཊྛབྦཾ.

ཏཏྲིདཾ ཨོཔམྨསཾསནྡནཾ – ཡཐཱ ཧི ཏཱལཝནེ དྭཏྟིཾསཏཱལཱ, ཨེཝཾ ཨིམསྨིཾ ཀཱཡེ དྭཏྟིཾས ཀོཊྛཱསཱ; མཀྐཊོ ཝིཡ ཙིཏྟཾ; ལུདྡོ ཝིཡ ཡོགཱཝཙརོ; མཀྐཊསྶ དྭཏྟིཾསཏཱལཀེ ཏཱལཝནེ ནིཝཱསོ ཝིཡ ཡོགིནོ ཙིཏྟསྶ དྭཏྟིཾསཀོཊྛཱསཀེ ཀཱཡེ ཨཱརམྨཎཝསེན ཨནུསཾཙརཎཾ; ལུདྡེན ཨཱདིམྷི ཋིཏཏཱལསྶ པཎྞཾ སརེན ཝིཛ྄ཛྷིཏྭཱ ཨུཀྐུཊྛིཡཱ ཀཏཱཡ མཀྐཊསྶ ཏསྨིཾ ཏསྨིཾ ཏཱལེ པཏིཏྭཱ པརིཡནྟཏཱལགམནཾ ཝིཡ ཡོགིནོ ‘ཀེསཱ’ཏི མནསིཀཱརེ ཨཱརདྡྷེ པཊིཔཱཊིཡཱ གནྟྭཱ པརིཡོསཱནཀོཊྛཱསེ ཨེཝ ཙིཏྟསྶ སཎྛཱནཾ; པུན པཙྩཱགམནེཔི ཨེསེཝ ནཡོ; པུནཔྤུནཾ པཊིཔཱཊིཡཱ གཙྪམཱནསྶ མཀྐཊསྶ ཨུཀྐུཊྛུཀྐུཊྛིཊྛཱནེ ཨུཊྛཱནཾ ཝིཡ པུནཔྤུནཾ མནསིཀརོཏོ ཀེསུཙི ཀེསུཙི ཨུཔཊྛིཏེསུ ཨནུཔཊྛཧནྟེ ཝིསྶཛྫེཏྭཱ ཨུཔཊྛིཏེསུ པརིཀམྨཀརཎཾ; ཨནུཀྐམེན ཨེཀསྨིཾ ཏཱལེ ནིཔཏིཏྭཱ ཏསྶ ཝེམཛ྄ཛྷེ མཀུལ༹ཏཱལཔཎྞསཱུཙིཾ དལ༹ྷཾ གཧེཏྭཱ ཝིཛ྄ཛྷིཡམཱནསྶཱཔི ¶ ཨནུཊྛཱནཾ ཝིཡ ཨཝསཱནེ དྭཱིསུ ཨུཔཊྛིཏེསུ ཡོ སུཊྛུཏརཾ ཨུཔཊྛཱཏི ཏམེཝ པུནཔྤུནཾ མནསིཀརིཏྭཱ ཨཔྤནཱཡ ཨུཔྤཱདནཾ.

ཨཔརཱཔི ཨུཔམཱ – ཡཐཱ ནཱམ པིཎྜཔཱཏིཀོ བྷིཀྑུ དྭཏྟིཾསཀུལཾ གཱམཾ ཨུཔནིསྶཱཡ ཝསནྟོ པཋམགེཧེ ཨེཝ དྭེ བྷིཀྑཱ ལབྷིཏྭཱ པརཏོ ཨེཀཾ ཝིསྶཛྫེཡྻ; པུནདིཝསེ ཏིསྶོ ལབྷིཏྭཱ པརཏོ དྭེ ཝིསྶཛྫེཡྻ; ཏཏིཡདིཝསེ ཨཱདིམྷིཡེཝ པཏྟཔཱུརཾ ལབྷིཏྭཱ ཨཱསནསཱལཾ གནྟྭཱ པརིབྷུཉྫེཡྻ, ཨེཝཾསམྤདམིདཾ དཊྛབྦཾ. དྭཏྟིཾསཀུལགཱམོ ཝིཡ ཧི དྭཏྟིཾསཱཀཱརོ; པིཎྜཔཱཏིཀོ ཝིཡ ཡོགཱཝཙརོ; ཏསྶ ཏཾ གཱམཾ ཨུཔནིསྶཱཡ ཝཱསོ ཝིཡ ཡོགིནོ དྭཏྟིཾསཱཀཱརེ པརིཀམྨཀརཎཾ; པཋམགེཧེ ¶ དྭེ བྷིཀྑཱ ལབྷིཏྭཱ པརཏོ ཨེཀིསྶཱ ཝིསྶཛྫནཾ ཝིཡ དུཏིཡདིཝསེ ཏིསྶོ ལབྷིཏྭཱ པརཏོ དྭིནྣཾ ཝིསྶཛྫནཾ ཝིཡ ཙ མནསིཀརོཏོ མནསིཀརོཏོ ཨནུཔཊྛཧནྟེ ཨནུཔཊྛཧནྟེ ཝིསྶཛྫེཏྭཱ ཨུཔཊྛིཏེསུ ཨུཔཊྛིཏེསུ ¶ ཡཱཝ ཀོཊྛཱསདྭཡེ པརིཀམྨཀརཎཾ; ཏཏིཡདིཝསེ ཨཱདིམྷིཡེཝ པཏྟཔཱུརཾ ལབྷིཏྭཱ ཨཱསནསཱལཱཡཾ ནིསཱིདིཏྭཱ པརིབྷོགོ ཝིཡ དྭཱིསུ ཡོ སུཊྛུཏརཾ ཨུཔཊྛཧཏི ཏམེཝ པུནཔྤུནཾ མནསིཀརིཏྭཱ ཨཔྤནཱཡ ཨུཔྤཱདནཾ.

‘ཨཔྤནཱཏོ’ཏི ཨཔྤནཱཀོཊྛཱསཏོ. ཀེསཱདཱིསུ ཨེཀེཀསྨིཾ ཀོཊྛཱསེ ཨཔྤནཱ ཧོཏཱིཏི ཝེདིཏབྦཱཏི ཨཡམེཏྠ ཨདྷིཔྤཱཡོ.

‘ཏཡོ ཙ སུཏྟནྟཱ’ཏི ཨདྷིཙིཏྟཾ, སཱིཏིབྷཱཝོ, བོཛ྄ཛྷངྒཀོསལླནྟི ཨིམེ ཏཡོ སུཏྟནྟཱ ཝཱིརིཡསམཱདྷིཡོཛནཏྠཾ ཝེདིཏབྦཱཏི ཨཡམེཏྠ ཨདྷིཔྤཱཡོ. ཏཏྠ –

‘‘ཨདྷིཙིཏྟམནུཡུཏྟེན, བྷིཀྑཝེ, བྷིཀྑུནཱ ཏཱིཎི ནིམིཏྟཱནི ཀཱལེན ཀཱལཾ མནསིཀཱཏབྦཱནི…ཀཱལེན ཀཱལཾ སམཱདྷིནིམིཏྟཾ མནསིཀཱཏབྦཾ, ཀཱལེན ཀཱལཾ པགྒཧནིམིཏྟཾ མནསིཀཱཏབྦཾ, ཀཱལེན ཀཱལཾ ཨུཔེཀྑཱནིམིཏྟཾ མནསིཀཱཏབྦཾ. སཙེ, བྷིཀྑཝེ, ཨདྷིཙིཏྟམནུཡུཏྟོ བྷིཀྑུ ཨེཀནྟཾ སམཱདྷིནིམིཏྟཾཡེཝ མནསིཀརེཡྻ, ཋཱནཾ ཏཾ ཙིཏྟཾ ཀོསཛྫཱཡ སཾཝཏྟེཡྻ. སཙེ, བྷིཀྑཝེ, ཨདྷིཙིཏྟམནུཡུཏྟོ བྷིཀྑུ ཨེཀནྟཾ པགྒཧནིམིཏྟཾཡེཝ མནསིཀརེཡྻ, ཋཱནཾ ཏཾ ཙིཏྟཾ ཨུདྡྷཙྩཱཡ སཾཝཏྟེཡྻ. སཙེ, བྷིཀྑཝེ, ཨདྷིཙིཏྟམནུཡུཏྟོ བྷིཀྑུ ཨེཀནྟཾ ཨུཔེཀྑཱནིམིཏྟཾཡེཝ མནསིཀརེཡྻ, ཋཱནཾ ཏཾ ཙིཏྟཾ ན སམྨཱསམཱདྷིཡེཡྻ ¶ ཨཱསཝཱནཾ ཁཡཱཡ. ཡཏོ ཙ ཁོ, བྷིཀྑཝེ, ཨདྷིཙིཏྟམནུཡུཏྟོ བྷིཀྑུ ཀཱལེན ཀཱལཾ སམཱདྷིནིམིཏྟཾ, པགྒཧནིམིཏྟཾ, ཨུཔེཀྑཱནིམིཏྟཾ མནསིཀརོཏི, ཏཾ ཧོཏི ཙིཏྟཾ མུདུ ཙ ཀམྨནིཡཉྩ པབྷསྶརཉྩ, ན ཙ པབྷངྒུ, སམྨཱ སམཱདྷིཡཏི ཨཱསཝཱནཾ ཁཡཱཡ.

‘‘སེཡྻཐཱཔི, བྷིཀྑཝེ, སུཝཎྞཀཱརོ ཝཱ སུཝཎྞཀཱརནྟེཝཱསཱི ཝཱ ཨུཀྐཾ བནྡྷཏི, ཨུཀྐཾ བནྡྷིཏྭཱ ཨུཀྐཱམུཁཾ ཨཱལིམྤེཏི, ཨུཀྐཱམུཁཾ ཨཱལིམྤེཏྭཱ སཎྜཱསེན ཛཱཏརཱུཔཾ གཧེཏྭཱ ཨུཀྐཱམུཁེ པཀྑིཔེཡྻ, ཨུཀྐཱམུཁེ པཀྑིཔིཏྭཱ ཀཱལེན ཀཱལཾ ཨབྷིདྷམཏི, ཀཱལེན ཀཱལཾ ཨུདཀེན པརིཔྥོསེཏི, ཀཱལེན ཀཱལཾ ཨཛ྄ཛྷུཔེཀྑཏི ¶ . སཙེ, བྷིཀྑཝེ, སུཝཎྞཀཱརོ ¶ ཝཱ སུཝཎྞཀཱརནྟེཝཱསཱི ཝཱ ཏཾ ཛཱཏརཱུཔཾ ཨེཀནྟཾ ཨབྷིདྷམེཡྻ, ཋཱནཾ ཏཾ ཛཱཏརཱུཔཾ ཌཧེཡྻ. སཙེ, བྷིཀྑཝེ, སུཝཎྞཀཱརོ ཝཱ སུཝཎྞཀཱརནྟེཝཱསཱི ཝཱ ཏཾ ཛཱཏརཱུཔཾ ཨེཀནྟཾ ཨུདཀེན པརིཔྥོསེཡྻ, ཋཱནཾ ཏཾ ཛཱཏརཱུཔཾ ནིབྦཱཡེཡྻ. སཙེ, བྷིཀྑཝེ, སུཝཎྞཀཱརོ ཝཱ སུཝཎྞཀཱརནྟེཝཱསཱི ཝཱ ཏཾ ཛཱཏརཱུཔཾ ཨེཀནྟཾ ཨཛ྄ཛྷུཔེཀྑེཡྻ, ཋཱནཾ ཏཾ ཛཱཏརཱུཔཾ ན སམྨཱ པརིཔཱཀཾ གཙྪེཡྻ.

‘‘ཡཏོ ཙ ཁོ, བྷིཀྑཝེ, སུཝཎྞཀཱརོ ཝཱ སུཝཎྞཀཱརནྟེཝཱསཱི ཝཱ ཏཾ ཛཱཏརཱུཔཾ ཀཱལེན ཀཱལཾ ཨབྷིདྷམཏི, ཀཱལེན ཀཱལཾ ཨུདཀེན པརིཔྥོསེཏི, ཀཱལེན ཀཱལཾ ཨཛ྄ཛྷུཔེཀྑཏི, ཏཾ ཧོཏི ཛཱཏརཱུཔཾ མུདུ ཙ ཀམྨནིཡཉྩ པབྷསྶརཉྩ, ན ཙ པབྷངྒུ, སམྨཱ ཨུཔེཏི ཀམྨཱཡ; ཡསྶཱ ཡསྶཱ ཙ པིལ༹ནྡྷནཝིཀཏིཡཱ ཨཱཀངྑཏི – ཡདི པཊྚིཀཱཡ ཡདི ཀུཎྜལཱཡ ཡདི གཱིཝེཡྻཀཱཡ ཡདི སུཝཎྞམཱལཱཡ, ཏཉྩསྶ ཨཏྠཾ ཨནུབྷོཏི.

‘‘ཨེཝམེཝ ཁོ, བྷིཀྑཝེ, ཨདྷིཙིཏྟམནུཡུཏྟེན…པེ… སམྨཱ སམཱདྷིཡཏི ཨཱསཝཱནཾ ཁཡཱཡ; ཡསྶ ཡསྶ ཙ ཨབྷིཉྙཱསཙྪིཀརཎཱིཡསྶ དྷམྨསྶ ཙིཏྟཾ ཨབྷིནིནྣཱམེཏི ཨབྷིཉྙཱ སཙྪིཀིརིཡཱཡ, ཏཏྲ ཏཏྲེཝ སཀྑིབྷབྦཏཾ པཱཔུཎཱཏི སཏི སཏིཨཱཡཏནེ’’ཏི (ཨ. ནི. ༣.༡༠༣) ཨིདཾ སུཏྟཾ ཨདྷིཙིཏྟནྟི ཝེདིཏབྦཾ.

‘‘ཚཧི, བྷིཀྑཝེ, དྷམྨེཧི སམནྣཱགཏོ བྷིཀྑུ བྷབྦོ ཨནུཏྟརཾ སཱིཏིབྷཱཝཾ སཙྪིཀཱཏུཾ. ཀཏམེཧི ཚཧི? ཨིདྷ, བྷིཀྑཝེ, བྷིཀྑུ ཡསྨིཾ སམཡེ ཙིཏྟཾ ནིགྒཧེཏབྦཾ ཏསྨིཾ སམཡེ ཙིཏྟཾ ནིགྒཎྷཱཏི, ཡསྨིཾ སམཡེ ཙིཏྟཾ པགྒཧེཏབྦཾ ཏསྨིཾ སམཡེ ཙིཏྟཾ པགྒཎྷཱཏི, ཡསྨིཾ སམཡེ ¶ ཙིཏྟཾ སམྤཧཾསིཏབྦཾ ཏསྨིཾ སམཡེ ཙིཏྟཾ སམྤཧཾསེཏི, ཡསྨིཾ སམཡེ ཙིཏྟཾ ཨཛ྄ཛྷུཔེཀྑིཏབྦཾ ཏསྨིཾ སམཡེ ཙིཏྟཾ ཨཛ྄ཛྷུཔེཀྑཏི, པཎཱིཏཱདྷིམུཏྟིཀོ ཙ ཧོཏི ནིབྦཱནཱབྷིརཏོ ཙ. ཨིམེཧི ཁོ, བྷིཀྑཝེ, ཚཧི དྷམྨེཧི སམནྣཱགཏོ བྷིཀྑུ བྷབྦོ ཨནུཏྟརཾ སཱིཏིབྷཱཝཾ སཙྪིཀཱཏུ’’ནྟི (ཨ. ནི. ༦.༨༥) ཨིདཾ སུཏྟཾ སཱིཏིབྷཱཝོཏི ཝེདིཏབྦཾ.

བོཛ྄ཛྷངྒཀོསལླཾ ¶ པན ‘‘ཨེཝམེཝ ཁོ, བྷིཀྑཝེ, ཡསྨིཾ སམཡེ ལཱིནཾ ཙིཏྟཾ ཧོཏི, ཨཀཱལོ ¶ ཏསྨིཾ སམཡེ པསྶདྡྷིསམྦོཛ྄ཛྷངྒསྶ བྷཱཝནཱཡཱ’’ཏི (སཾ. ནི. ༥.༢༣༤) སཾཡུཏྟམཧཱཝགྒེ བོཛ྄ཛྷངྒསཾཡུཏྟེ ཨཱགཏམེཝ.

ཨིཏི ཨིདཾ སཏྟཝིདྷཾ ཨུགྒཧཀོསལླཾ སུགྒཧིཏཾ ཀཏྭཱ ཨིམཉྩ དསཝིདྷཾ མནསིཀཱརཀོསལླཾ སུཊྛུ ཝཝཏྠཔེཏྭཱ ཏེན ཡོགིནཱ ཨུབྷཡཀོསལླཝསེན ཀམྨཊྛཱནཾ སཱདྷུཀཾ ཨུགྒཧེཏབྦཾ. སཙེ པནསྶ ཨཱཙརིཡེན སདྡྷིཾ ཨེཀཝིཧཱརེཡེཝ ཕཱསུ ཧོཏི, ཨེཝཾ ཝིཏྠཱརེན ཨཀཐཱཔེཏྭཱ ཀམྨཊྛཱནམནུཡུཉྫནྟེན ཝིསེསཾ ལབྷིཏྭཱ ཨུཔརཱུཔརི ཀཐཱཔེཏབྦཾ. ཨཉྙཏྠ ཝསིཏུཀཱམེན ཡཐཱཝུཏྟེན ཝིདྷིནཱ ཝིཏྠཱརཏོ ཀཐཱཔེཏྭཱ པུནཔྤུནཾ པརིཝཏྟེཏྭཱ སབྦཾ གཎྛིཊྛཱནཾ ཚིནྡིཏྭཱ ཀམྨཊྛཱནབྷཱཝནཱཡ ཨནནུརཱུཔཾ སེནཱསནཾ པཧཱཡ མཧཱཝཱསཏཱདིཨཊྛཱརསདོསཝཛྫིཏེ ཨནུརཱུཔེ ཝིཧཱརེ ཝིཧརནྟེན ཁུདྡཀཔལིབོདྷུཔཙྪེདཾ ཀཏྭཱ ཡོ ཏཱཝ རཱགཙརིཏོ ཧོཏི, ཏེན ཡསྨཱ རཱགོ པཧཱཏབྦོ, ཏསྨཱ པཊིཀྐཱུལམནསིཀཱརེ པརིཀམྨཾ ཀཱཏབྦཾ.

ཀརོནྟེན པན ཀེསེསུ ཏཱཝ ནིམིཏྟཾ གཧེཏབྦཾ. ཀཐཾ? ཨེཀཾ ཝཱ དྭེ ཝཱ ཀེསེ ལུཉྩིཏྭཱ ཧཏྠཏལེ ཋཔེཏྭཱ ཝཎྞོ ཏཱཝ ཝཝཏྠཔེཏབྦོ. ཚིནྣཊྛཱནེཔི ཀེསེ ཨོལོཀེཏུཾ ཝཊྚཏི; ཨུདཀཔཏྟེ ཝཱ ཡཱགུཔཏྟེ ཝཱ ཨོལོཀེཏུམྤི ཝཊྚཏིཡེཝ. ཀཱལ༹ཀཀཱལེ དིསྭཱ ཀཱལ༹ཀཱཏི མནསིཀཱཏབྦཱ; སེཏཀཱལེ སེཏཱཏི. མིསྶཀཀཱལེ པན ཨུསྶདཝསེན མནསིཀཱཏབྦཱ ཧོནྟི. ཡཐཱ ཙ ཀེསེསུ, ཨེཝཾ སཀལེཔི ཏཙཔཉྩཀེ དིསྭཱཝ ནིམིཏྟཾ གཧེཏབྦཾ. ཨེཝཾ ནིམིཏྟཾ གཧེཏྭཱ སབྦཀོཊྛཱསེསུ ཝཎྞསཎྛཱནདིསོཀཱསཔརིཙྪེདཝསེན ཝཝཏྠཔེཏྭཱ ཝཎྞསཎྛཱནགནྡྷཨཱསཡོཀཱསཝསེན པཉྩདྷཱ པཊིཀྐཱུལཏོ ཝཝཏྠཔེཏབྦཱ.

ཏཏྲཱཡཾ ¶ སབྦཀོཊྛཱསེསུ ཨནུཔུབྦཀཐཱ – ཀེསཱ ཏཱཝ པཀཏིཝཎྞེན ཀཱལ༹ཀཱ ཨདྡཱརིཊྛཀཝཎྞཱ, སཎྛཱནཏོ དཱིགྷཝཊྚལིཀཱ ཏུལཱདཎྜསཎྛཱནཱ, དིསཏོ ཨུཔརིམདིསཱཡ ཛཱཏཱ, ཨོཀཱསཏོ ཨུབྷོསུ པསྶེསུ ཀཎྞཙཱུལི༹ཀཱཧི, པུརཏོ ནལཱཊནྟེན, པཙྪཏོ གལཝཱཊཀེན ¶ པརིཙྪིནྣཱ. སཱིསཀཊཱཧཝེཋནཾ ཨལླཙམྨཾ ཀེསཱནཾ ཨོཀཱསོ. པརིཙྪེདཏོ ཀེསཱ སཱིསཝེཋནཙམྨེ ཝཱིཧགྒམཏྟཾ པཝིསིཏྭཱ པཏིཊྛིཏེན ཧེཊྛཱ ཨཏྟནོ མཱུལཏལེན, ཨུཔརི ཨཱཀཱསེན, ཏིརིཡཾ ཨཉྙམཉྙེན པརིཙྪིནྣཱ. དྭེ ཀེསཱ ཨེཀཏོ ནཏྠཱིཏི ཨཡཾ སབྷཱགཔརིཙྪེདོ.

‘ཀེསཱ ན ལོམཱ, ལོམཱ ན ཀེསཱ’ཏི ཨེཝཾ ཨཝསེསེཧི ཨེཀཏིཾསཀོཊྛཱསེཧི ཨམིསྶཱིཀཏཱ ¶ ཀེསཱ ནཱམ པཱཊིཡེཀྐོ ཀོཊྛཱསོཏི ཨཡཾ ཝིསབྷཱགཔརིཙྪེདོ. ཨིདཾ ཀེསཱནཾ ཝཎྞཱདིཏོ ཝཝཏྠཱཔནཾ.

ཨིདཾ པན ཏེསཾ ཝཎྞཱདིཝསེན པཉྩདྷཱ པཊིཀྐཱུལཏོ ཝཝཏྠཱཔནཾ – ཀེསཱ ཙ ནཱམེཏེ ཝཎྞཏོཔི པཊིཀྐཱུལཱ, སཎྛཱནཏོཔི གནྡྷཏོཔི ཨཱསཡཏོཔི ཨོཀཱསཏོཔི པཊིཀྐཱུལཱ. མནུཉྙེཔི ཧི ཡཱགུཔཏྟེ ཝཱ བྷཏྟཔཏྟེ ཝཱ ཀེསཝཎྞཾ ཀིཉྩི དིསྭཱ ‘ཀེསམིསྶཀམིདཾ, ཧརཐ ན’ནྟི ཛིགུཙྪནྟི. ཨེཝཾ ཀེསཱ ཝཎྞཏོ པཊིཀྐཱུལཱ. རཏྟིཾ བྷུཉྫནྟཱཔི ཀེསསཎྛཱནཾ ཨཀྐཝཱཀཾ ཝཱ མཀཙིཝཱཀཾ ཝཱ ཚུཔིཏྭཱཔི ཏཐེཝ ཛིགུཙྪནྟི. ཨེཝཾ སཎྛཱནཏོ པཊིཀྐཱུལཱ.

ཏེལམཀྑནཔུཔྥདྷཱུམཱདིསངྑཱརཝིརཧིཏཱནཉྩ ཀེསཱནཾ གནྡྷོ པརམཛེགུཙྪོ ཧོཏི, ཏཏོ ཛེགུཙྪཏརོ ཨགྒིམྷི པཀྑིཏྟཱནཾ. ཀེསཱ ཧི ཝཎྞསཎྛཱནཏོ ཨཔྤཊིཀྐཱུལཱཔི སིཡུཾ, གནྡྷེན པན པཊིཀྐཱུལཱཡེཝ. ཡཐཱ ཧི དཧརསྶ ཀུམཱརསྶ ཝཙྩཾ ཝཎྞཏོ ཧལི༹དྡིཝཎྞཾ, སཎྛཱནཏོཔི ཧལིདྡིཔིཎྜསཎྛཱནཾ; སངྑཱརཊྛཱནེ ཚཌྜིཏཉྩ ཨུདྡྷུམཱཏཀཀཱལ༹སུནཁསརཱིརཾ ཝཎྞཏོ ཏཱལཔཀྐཝཎྞཾ, སཎྛཱནཏོ ཝཊྚེཏྭཱ ཝིསྶཊྛམུདིངྒསཎྛཱནཾ, དཱཋཱཔིསྶ སུམནམཀུལ༹སདིསཱཏི ¶ ཨུབྷཡམྤི ཝཎྞསཎྛཱནཏོ སིཡཱ ཨཔྤཊིཀྐཱུལཾ, གནྡྷེན པན པཊིཀྐཱུལམེཝ; ཨེཝཾ ཀེསཱཔི སིཡུཾ ཝཎྞསཎྛཱནཏོ ཨཔྤཊིཀྐཱུལཱ, གནྡྷེན པན པཊིཀྐཱུལཱ ཨེཝཱཏི.

ཡཐཱ པན ཨསུཙིཊྛཱནེ གཱམནིསྶནྡེན ཛཱཏཱནི སཱུཔེཡྻཔཎྞཱནི ནཱགརིཀམནུསྶཱནཾ ཛེགུཙྪཱནི ཧོནྟི ཨཔརིབྷོགཱནི, ཨེཝཾ ཀེསཱཔི པུབྦལོཧིཏམུཏྟཀརཱིསཔིཏྟསེམྷཱདིནིསྶནྡེན ཛཱཏཏྟཱ ཨཏིཛེགུཙྪཱཏི ཨིདཾ ནེསཾ ‘ཨཱསཡཏོ’ པཱཊིཀུལྱཾ. ཨིམེ ཙ ཀེསཱ ནཱམ གཱུཐརཱསིམྷི ཨུཊྛིཏཀཎྞིཀཾ ¶ ཝིཡ ཨེཀཏྟིཾསཀོཊྛཱསརཱསིམྷི ཛཱཏཱ. ཏེ སུསཱནསངྐཱརཊྛཱནཱདཱིསུ ཛཱཏསཱཀཾ ཝིཡ, པརིཁཱདཱིསུ ཛཱཏཀམལཀུཝལཡཱདིཔུཔྥཾ ཝིཡ ཙ ཨསུཙིཊྛཱནེ ཛཱཏཏྟཱ པརམཛེགུཙྪཱཏི ཨིདཾ ཏེསཾ ‘ཨོཀཱསཏོ’ པཱཊིཀྐཱུལྱཾ.

ཡཐཱ ཙ ཀེསཱནཾ, ཨེཝཾ སབྦཀོཊྛཱསཱནཾ ཝཎྞསཎྛཱནགནྡྷཱསཡོཀཱསཝསེན པཉྩདྷཱ པཊིཀྐཱུལཏཱ ཝཝཏྠཔེཏབྦཱ. ཝཎྞསཎྛཱནདིསོཀཱསཔརིཙྪེདཝསེན པན སབྦེཔི ཝིསུཾ ཝིསུཾ ཝཝཏྠཔེཏབྦཱ.

ཏཏྠ ¶ ལོམཱ ཏཱཝ པཀཏིཝཎྞཏོ ན ཀེསཱ ཝིཡ ཨསམྦྷིནྣཀཱལ༹ཀཱ, ཀཱལ༹པིངྒལཱ པན ཧོནྟི; སཎྛཱནཏོ ཨོནཏགྒཏཱལམཱུལསཎྛཱནཱ; དིསཏོ དྭཱིསུ དིསཱསུ ཛཱཏཱ; ཨོཀཱསཏོ ཋཔེཏྭཱ ཀེསཱནཾ པཏིཊྛིཏོཀཱསཉྩ ཧཏྠཔཱདཏལཱནི ཙ ཡེབྷུཡྻེན ཨཝསེསསརཱིརཝེཋནཙམྨེ ཛཱཏཱ; པརིཙྪེདཏོ སརཱིརཝེཋནཙམྨེ ལིཀྑཱམཏྟཾ པཝིསིཏྭཱ པཏིཊྛིཏེན ཧེཊྛཱ ཨཏྟནོ མཱུལཏལེན, ཨུཔརི ཨཱཀཱསེན, ཏིརིཡཾ ཨཉྙམཉྙེན པརིཙྪིནྣཱ. དྭེ ལོམཱ ཨེཀཏོ ནཏྠི. ཨཡཾ ཏེསཾ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཡེཝ.

ནཁཱཏི ཝཱིསཏིཡཱ ནཁཔཊྚཱནཾ ནཱམཾ. ཏེ སབྦེཔི ཝཎྞཏོ སེཏཱ; སཎྛཱནཏོ མཙྪསཀལིཀསཎྛཱནཱ; དིསཏོ པཱདནཁཱ ཧེཊྛིམདིསཱཡ ཛཱཏཱ, ཧཏྠནཁཱ ཨུཔརིམདིསཱཡཱཏི དྭཱིསུ དིསཱསུ ཛཱཏཱ; ཨོཀཱསཏོ ཨངྒུལཱིནཾ ཨགྒཔིཊྛེསུ པཏིཊྛིཏཱ; པརིཙྪེདཏོ དྭཱིསུ དིསཱསུ ཨངྒུལིཀོཊིམཾསེཧི, ཨནྟོ ཨངྒུལིཔིཊྛིམཾསེན, བཧི ཙེཝ ཨགྒེ ཙ ཨཱཀཱསེན, ཏིརིཡཾ ཨཉྙམཉྙེན པརིཙྪིནྣཱ. དྭེ ནཁཱ ཨེཀཏོ ནཏྠི. ཨཡཾ ¶ ནེསཾ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཡེཝ.

དནྟཱཏི པརིཔུཎྞདནྟསྶ དྭཏྟིཾས དནྟཊྛིཀཱནི. ཏེཔི ཝཎྞཏོ སེཏཱ; སཎྛཱནཏོ ཨནེཀསཎྛཱནཱ. ཏེསཉྷི ཧེཊྛིམཱཡ ཏཱཝ དནྟཔཱལི༹ཡཱ མཛ྄ཛྷེ ཙཏྟཱརོ དནྟཱ མཏྟིཀཱཔིཎྜེ པཊིཔཱཊིཡཱ ཋཔིཏཨལཱབུབཱིཛསཎྛཱནཱ. ཏེསཾ ཨུབྷོསུ པསྶེསུ ཨེཀེཀོ ཨེཀམཱུལཀོ ཨེཀཀོཊིཀོ མལླིཀམཀུལ༹སཎྛཱནོ. ཏཏོ ཨེཀེཀོ དྭིམཱུལཀོ དྭིཀོཊིཀོ ཡཱནཀཨུཔཏྠམྦྷནིཀསཎྛཱནོ. ཏཏོ དྭེ དྭེ ཏིམཱུལཱ ཏིཀོཊིཀཱ. ཏཏོ དྭེ དྭེ ཙཏུམཱུལཱ ཙཏུཀོཊིཀཱཏི. ཨུཔརིམཔཱལི༹ཡཱཔི ཨེསེཝ ནཡོ ¶ . དིསཏོ ཨུཔརིམདིསཱཡ ཛཱཏཱ. ཨོཀཱསཏོ དྭཱིསུ ཧནུཀཊྛིཀེསུ པཏིཊྛིཏཱ. པརིཙྪེདཏོ ཧེཊྛཱ ཧནུཀཊྛིཀེ པཏིཊྛིཏེན ཨཏྟནོ མཱུལཏལེན, ཨུཔརི ཨཱཀཱསེན, ཏིརིཡཾ ཨཉྙམཉྙེན པརིཙྪིནྣཱ. དྭེ དནྟཱ ཨེཀཏོ ནཏྠི. ཨཡཾ ནེསཾ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཡེཝ.

ཏཙོཏི སཀལསརཱིརཾ ཝེཋེཏྭཱ ཋིཏཙམྨཾ. ཏསྶ ཨུཔརི ཀཱལ༹སཱམཔཱིཏཱདིཝཎྞཱ ཚཝི ནཱམ, ཡཱ སཀལསརཱིརཏོཔི སངྐཌྜྷིཡམཱནཱ བདརཊྛིམཏྟཱ ཧོཏི. ཏཙོ པན ཝཎྞཏོ སེཏོཡེཝ. སོ ཙསྶ སེཏབྷཱཝོ ཨགྒིཛཱལཱབྷིགྷཱཏཔཧརཎཔཧཱརཱདཱིཧི ཝིདྡྷཾསིཏཱཡ ཚཝིཡཱ པཱཀཊོ ཧོཏི. སཎྛཱནཏོ སརཱིརསཎྛཱནོཝ ཧོཏི. ཨཡམེཏྠ སངྑེཔོ.

ཝིཏྠཱརཏོ ¶ པན པཱདངྒུལིཏྟཙོ ཀོསཀཱརཀཀོསསཎྛཱནོ. པིཊྛིཔཱདཏྟཙོ པུཊབནྡྷཨུཔཱཧནསཎྛཱནོ. ཛངྒྷཏྟཙོ བྷཏྟཔུཊཀཏཱལཔཎྞསཎྛཱནོ. ཨཱུརུཏྟཙོ ཏཎྜུལབྷརིཏདཱིགྷཏྠཝིཀསཎྛཱནོ. ཨཱནིསདཏྟཙོ ཨུདཀཔཱུརིཏཔཊཔརིསྶཱཝནསཎྛཱནོ. པིཊྛིཏྟཙོ ཕལཀོནདྡྷཙམྨསཎྛཱནོ. ཀུཙྪིཏྟཙོ ཝཱིཎཱདོཎིཀོནདྡྷཙམྨསཎྛཱནོ. ཨུརཏྟཙོ ཡེབྷུཡྻེན ཙཏུརསྶསཎྛཱནོ. ཨུབྷཡབཱཧུཏྟཙོ ཏཱུཎཱིརོནདྡྷཙམྨསཎྛཱནོ. པིཊྛིཧཏྠཏྟཙོ ཁུརཀོསཀསཎྛཱནོ, ཕཎཀཏྠཝིཀསཎྛཱནོ ཝཱ. ཧཏྠངྒུལིཏྟཙོ ཀུཉྩིཀཱཀོསཀསཎྛཱནོ. གཱིཝཏྟཙོ གལཀཉྩུཀསཎྛཱནོ. མུཁཏྟཙོ ཚིདྡཱཝཙྪིདྡོ ཀཱིཊཀུལཱཝཀསཎྛཱནོ. སཱིསཏྟཙོ པཏྟཏྠཝིཀསཎྛཱནོཏི.

ཏཙཔརིགྒཎྷཀེན ཙ ཡོགཱཝཙརེན ཨུཏྟརོཊྛཏོ པཊྛཱཡ ¶ ཨུཔརི མུཁཾ ཉཱཎཾ པེསེཏྭཱ པཋམཾ ཏཱཝ མུཁཾ པརིཡོནནྡྷིཏྭཱ ཋིཏཙམྨཾ ཝཝཏྠཔེཏབྦཾ. ཏཏོ ནལཱཊཊྛིཙམྨཾ. ཏཏོ ཐཝིཀཱཡ པཀྑིཏྟཔཏྟསྶ ཙ ཐཝིཀཱཡ ཙ ཨནྟརེན ཧཏྠམིཝ སཱིསཊྛིཀསྶ ཙ སཱིསཙམྨསྶ ཙ ཨནྟརེན ཉཱཎཾ པེསེཏྭཱ ཨཊྛིཀེན སདྡྷིཾ ཙམྨསྶ ཨེཀཱབདྡྷབྷཱཝཾ ཝིཡོཛེནྟེན སཱིསཙམྨཾ ཝཝཏྠཔེཏབྦཾ. ཏཏོ ཁནྡྷཙམྨཾ. ཏཏོ ཨནུལོམེན པཊིལོམེན ཙ དཀྑིཎཧཏྠཙམྨཾ. ཨཐ ཏེནེཝ ནཡེན ཝཱམཧཏྠཙམྨཾ. ཏཏོ པིཊྛིཙམྨཾ. ཏཾ ཏཾ ཝཝཏྠཔེཏྭཱ ཨནུལོམེན ཙ པཊིལོམེན ཙ དཀྑིཎཔཱདཙམྨཾ. ཨཐ ཏེནེཝ ¶ ནཡེན ཝཱམཔཱདཙམྨཾ. ཏཏོ ཨནུཀྐམེནེཝ ཝཏྠིཨུདརཧདཡགཱིཝཙམྨཱནི ཝཝཏྠཔེཏབྦཱནི. ཨཐ གཱིཝཱཙམྨཱནནྟརཾ ཧེཊྛིམཧནུཙམྨཾ ཝཝཏྠཔེཏྭཱ ཨདྷརོཊྛཔརིཡོསཱནཾ པཱཔེཏྭཱ ནིཊྛཔེཏབྦཾ. ཨེཝཾ ཨོལཱ༹རིཀོལཱ༹རིཀཾ པརིགྒཎྷནྟསྶ སུཁུམམྤི པཱཀཊཾ ཧོཏི.

དིསཏོ དྭཱིསུ དིསཱསུ ཛཱཏོ. ཨོཀཱསཏོ སཀལསརཱིརཾ པརིཡོནནྡྷིཏྭཱ ཋིཏོ. པརིཙྪེདཏོ ཧེཊྛཱ པཏིཊྛིཏཏལེན, ཨུཔརི ཨཱཀཱསེན པརིཙྪིནྣོ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཡེཝ.

མཾསནྟི ནཝ མཾསཔེསིསཏཱནི. ཏཾ སབྦམྤི ཝཎྞཏོ རཏྟཾ ཀིཾསུཀཔུཔྥསདིསཾ; སཎྛཱནཏོ ཛངྒྷཔིཎྜིཀམཾསཾ ཏཱལཔཎྞཔུཊབྷཏྟསཎྛཱནཾ, ཨཱུརུམཾསཾ ནིསདཔོཏཀསཎྛཱནཾ, ཨཱནིསདམཾསཾ ཨུདྡྷནཀོཊིསཎྛཱནཾ, པིཊྛིམཾསཾ ཏཱལགུལ༹པཊལསཎྛཱནཾ, ཕཱསུཀདྭཡམཾསཾ པོཏྠལིཀཱཡ ཀུཙྪིཡཾ ཏནུམཏྟིཀཱལེཔནསཎྛཱནཾ, ཐནམཾསཾ ཝཊྚེཏྭཱ ཨཝཀྑིཏྟམཏྟིཀཱཔིཎྜསཎྛཱནཾ, བཱཧུདྭཡམཾསཾ ¶ དིགུཎཾ ཀཏྭཱ ཋཔིཏནིཙྩམྨམཧཱམཱུསིཀསཎྛཱནཾ. ཨེཝཾ ཨོལཱ༹རིཀོལཱ༹རིཀཾ མཾསཾ པརིགྒཎྷནྟསྶ སུཁུམམྤི པཱཀཊཾ ཧོཏི. དིསཏོ དྭཱིསུ དིསཱསུ ཛཱཏཾ. ཨོཀཱསཏོ སཱདྷིཀཱནི ཏཱིཎི ཨཊྛིསཏཱནི ཨནུལིམྤེཏྭཱ ཋིཏཾ. པརིཙྪེདཏོ ཧེཊྛཱ ཨཊྛིསངྒྷཱཏེ པཏིཊྛིཏཏལེན, ཨུཔརི ཏཙེན, ཏིརིཡཾ ཨཉྙམཉྙེན ¶ པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

‘ནྷཱརཱུ’ཏི ནཝ ནྷཱརུསཏཱནི. ཝཎྞཏོ སབྦེཔི ནྷཱརཱུ སེཏཱ; སཎྛཱནཏོ ནཱནཱསཎྛཱནཱ. ཨེཏེསུ ཧི གཱིཝཱཡ ཨུཔརིབྷཱགཏོ པཊྛཱཡ པཉྩ མཧཱནྷཱརཱུ སརཱིརཾ ཝིནདྡྷམཱནཱ ཧདཡསྶ པུརིམཔསྶེན ཨོཏིཎྞཱ, པཉྩ པཙྪིམཔསྶེན, པཉྩ དཀྑིཎཔསྶེན, པཉྩ ཝཱམཔསྶེན, དཀྑིཎཧཏྠཾ ཝིནདྡྷམཱནཱཔི ཧཏྠསྶ པུརིམཔསྶེན པཉྩ, པཙྪིམཔསྶེན པཉྩ, ཏཐཱ ཝཱམཧཏྠཾ ཝིནདྡྷམཱནཱཔི. དཀྑིཎཔཱདཾ ཝིནདྡྷམཱནཱཔི པཱདསྶ པུརིམཔསྶེན པཉྩ, པཙྪིམཔསྶེན པཉྩ, ཏཐཱ ཝཱམཔཱདཾ ཝིནདྡྷམཱནཱཔཱིཏི. ཨེཝཾ སརཱིརདྷཱརཀཱ ནཱམ སཊྛི མཧཱནྷཱརཱུ ཀཱཡཾ ཝིནདྡྷམཱནཱ ཨོཏིཎྞཱ, ཡེ ཀཎྜརཱཏིཔི ཝུཙྩནྟི. ཏེ སབྦེཔི ཀནྡལམཀུལ༹སཎྛཱནཱ.

ཨཉྙེ ¶ པན ཏཾ ཏཾ པདེསཾ ཨཛ྄ཛྷོཏྠརིཏྭཱ ཋིཏཱ ཏཏོ སུཁུམཏརཱ སུཏྟརཛྫུཀསཎྛཱནཱ. ཨཉྙེ ཏཏོ སུཁུམཏརཱ པཱུཏིལཏཱསཎྛཱནཱ. ཨཉྙེ ཏཏོ སུཁུམཏརཱ མཧཱཝཱིཎཱཏནྟིསཎྛཱནཱ. ཨཉྙེ ཐཱུལསུཏྟཀསཎྛཱནཱ. ཧཏྠཔཱདཔིཊྛིཡཾ ནྷཱརཱུ སཀུཎཔཱདསཎྛཱནཱ. སཱིསནྷཱརཱུ དཱརཀཱནཾ སཱིསཛཱལཀསཎྛཱནཱ. པིཊྛིནྷཱརཱུ ཨཱཏཔེ པསཱརིཏཨལླཛཱལསཎྛཱནཱ. ཨཝསེསཱ ཏཾཏཾཨངྒཔཙྩངྒཱནུགཏཱ ནྷཱརཱུ སརཱིརེ པཊིམུཀྐཛཱལཀཉྩུཀསཎྛཱནཱ. དིསཏོ དྭཱིསུ དིསཱསུ ཛཱཏཱ. ཨོཀཱསཏོ སཀལསརཱིརེ ཨཊྛཱིནི ཨཱབནྡྷིཏྭཱ ཋིཏཱ. པརིཙྪེདཏོ ཧེཊྛཱ ཏིཎྞཾ ཨཊྛིསཏཱནཾ ཨུཔརི པཏིཊྛིཏཏལེཧི, ཨུཔརི མཾསཙམྨཱནི ཨཱཧཙྩ ཋིཏཔདེསེཧི, ཏིརིཡཾ ཨཉྙམཉྙེན པརིཙྪིནྣཱ. ཨཡཾ ནེསཾ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཡེཝ.

ཨཊྛཱིཏི ཋཔེཏྭཱ དྭཏྟིཾས དནྟཊྛཱིནི ཨཝསེསཱནི ཙཏུསཊྛི ཧཏྠཊྛཱིནི, ཙཏུསཊྛི པཱདཊྛཱིནི, ཙཏུསཊྛི མཾསནིསྶིཏཱནི མུདུཨཊྛཱིནི, དྭེ པཎྷིཀཊྛཱིནི, ཨེཀེཀསྨིཾ པཱདེ དྭེ གོཔྥཀཊྛཱིནི, དྭེ ཛངྒྷཊྛཱིནི, དྭེ ཛཎྞུཀཊྛཱིནི, དྭེ ¶ ཨཱུརུཊྛཱིནི, དྭེ ཀཊིཊྛཱིནི, ཨཊྛཱརས པིཊྛིཀཎྚཀཊྛཱིནི, ཙཏུཝཱིསཏི ¶ ཕཱསུཀཊྛཱིནི, ཙུདྡས ཨུརཊྛཱིནི, ཨེཀཾ ཧདཡཊྛི, དྭེ ཨཀྑཀཊྛཱིནི, དྭེ ཀོཊྛཊྛཱིནི, དྭེ བཱཧཊྛཱིནི, དྭེ དྭེ ཨགྒབཱཧཊྛཱིནི, སཏྟ གཱིཝཊྛཱིནི, དྭེ ཧནུཀཊྛཱིནི, ཨེཀཾ ནཱསིཀཊྛི, དྭེ ཨཀྑིཊྛཱིནི, དྭེ ཀཎྞཊྛཱིནི, ཨེཀཾ ནལཱཊཊྛི, ཨེཀཾ མུདྡྷཊྛི, ནཝ སཱིསཀཔཱལཊྛཱིནཱིཏི ཨེཝཾ ཏིམཏྟཱནི ཨཊྛིསཏཱནི.

ཏཱནི སབྦཱནིཔི ཝཎྞཏོ སེཏཱནི, སཎྛཱནཏོ ནཱནཱསཎྛཱནཱནི. ཏཏྠ ཧི ཨགྒཔཱདངྒུལིཊྛཱིནི ཀཏཀབཱིཛསཎྛཱནཱནི. ཏདནནྟརཱནི མཛ྄ཛྷཔབྦཊྛཱིནི པནསཊྛིསཎྛཱནཱནི. མཱུལཔབྦཊྛཱིནི པཎཝསཎྛཱནཱནི. པིཊྛིཔཱདཊྛཱིནི ཀོཊྛིཏཀནྡལཀནྡརཱསིསཎྛཱནཱནི. པཎྷིཀཊྛི ཨེཀཊྛིཏཱལཕལབཱིཛསཎྛཱནཾ. གོཔྥཀཊྛཱིནི བནྡྷཀཱིལཱ༹གོལ༹ཀསཎྛཱནཱནི. ཛངྒྷཊྛཱིནཾ གོཔྥཀཊྛཱིསུ པཏིཊྛིཏཊྛཱནཾ ཨནཔནཱིཏཏཙསིནྡིཀལཱི༹རསཎྛཱནཾ. ཁུདྡཀཛངྒྷཊྛིཀཾ དྷནུཀདཎྜསཎྛཱནཾ, མཧནྟཾ མིལཱཏསཔྤཔིཊྛིསཎྛཱནཾ. ཛཎྞུཀཊྛི ཨེཀཏོ པརིཀྑཱིཎཕེཎཀསཎྛཱནཾ.

ཏཏྠ ཛངྒྷཊྛིཀསྶ པཏིཊྛིཏཊྛཱནཾ ཨཏིཁིཎགྒགོསིངྒསཎྛཱནཾ. ཨཱུརུཊྛི དུཏྟཙྪིཏཝཱསིཕརསུདཎྜཀསཎྛཱནཾ. ཏསྶ ཀཊིཊྛིམྷི པཏིཊྛིཏཊྛཱནཾ ཀཱིལཱ༹གོལ༹ཀསཎྛཱནཾ. ཏེན ཀཊིཊྛིནོ པཏིཊྛིཏཊྛཱནཾ ཨགྒཙྪིནྣམཧཱཔུནྣཱགཕལསཎྛཱནཾ. ཀཊིཊྛཱིནི དྭེཔི ཨེཀཱབདྡྷཱནི ཧུཏྭཱ ཀུམྦྷཀཱརཀཨུདྡྷནསཎྛཱནཱནི, པཱཊིཡེཀྐཾ ཀམྨཱརཀཱུཊཡོཏྟཀསཎྛཱནཱནི. ཀོཊིཡཾ ཋིཏཨཱནིསདཊྛི ¶ ཨདྷོམུཁཾ ཀཏྭཱ གཧིཏསཔྤཕཎསཎྛཱནཾ སཏྟསུ ཋཱནེསུ ཚིདྡཱཝཚིདྡཾ. པིཊྛིཀཎྚཀཊྛཱིནི ¶ ཨབྦྷནྟརཏོ ཨུཔརཱུཔརི ཋཔིཏསཱིསཀཔཊྚཝེཋཀསཎྛཱནཱནི, བཱཧིརཏོ ཝཊྚནཱཝལི༹སཎྛཱནཱནི. ཏེསཾ ཨནྟརནྟརཱ ཀཀཙདནྟསདིསཱ དྭེ ཏཡོ ཀཎྚཀཱ ཧོནྟི. ཙཏུཝཱིསཏིཡཱ ཕཱསུཀཊྛཱིསུ ཨཔརིཔུཎྞཱནི ཨཔརིཔུཎྞཱསིཏསཎྛཱནཱནི, པརིཔུཎྞཱནི པརིཔུཎྞཱསིཏསཎྛཱནཱནི. སབྦཱནིཔི ཨོདཱཏཀུཀྐུཊསྶ པསཱརིཏཔཀྑསཎྛཱནཱནི.

ཙུདྡས ཨུརཊྛཱིནི ཛིཎྞསནྡམཱནིཀཔཉྫརསཎྛཱནཱནི. ཧདཡཊྛི དབྦིཕཎསཎྛཱནཾ. ཨཀྑཀཊྛཱིནི ཁུདྡཀལོཧཝཱསིདཎྜསཎྛཱནཱནི. ཀོཊྛཊྛཱིནི ཨེཀཏོ པརིཀྑཱིཎསཱིཧལ༹ཀུདཱལསཎྛཱནཱནི. བཱཧུཊྛཱིནི ཨཱདཱསདཎྜཀསཎྛཱནཱནི. ཨགྒབཱཧུཊྛཱིནི ཡམཀཏཱལཀནྡསཎྛཱནཱནི. མཎིབནྡྷཊྛཱིནི ཨེཀཏོ ཨལླཱིཡཱཔེཏྭཱ ཋཔིཏསཱིསཀཔཊྚཝེཋཀསཎྛཱནཱནི. པིཊྛིཧཏྠཊྛཱིནི ཀོཊྚིཏཀནྡལཀནྡརཱསིསཎྛཱནཱནི. ཧཏྠངྒུལཱིསུ མཱུལཔབྦཊྛཱིནི པཎཝསཎྛཱནཱནི; མཛ྄ཛྷཔབྦཊྛཱིནི ཨཔརིཔུཎྞཔནསཊྛིསཎྛཱནཱནི; ཨགྒཔབྦཊྛཱིནི ཀཏཀབཱིཛསཎྛཱནཱནི. སཏྟ གཱིཝཊྛཱིནི ¶ དཎྜེན ཝིཛ྄ཛྷིཏྭཱ པཊིཔཱཊིཡཱ ཋཔིཏཝཾསཀལཱི༹རཙཀྐལིཀསཎྛཱནཱནི. ཧེཊྛིམཧནུཀཊྛི ཀམྨཱརཱནཾ ཨཡོཀཱུཊཡོཏྟཀསཎྛཱནཾ, ཨུཔརིམཾ ཨཝལེཁནསཏྠཀསཎྛཱནཾ.

ཨཀྑིཀཱུཔནཱསཱཀཱུཔཊྛཱིནི ཨཔནཱིཏམིཉྫཏརུཎཏཱལཊྛིསཎྛཱནཱནི. ནལཱཊཊྛི ཨདྷོམུཁཋཔིཏསངྑཐཱལཀཀཔཱལསཎྛཱནཾ. ཀཎྞཙཱུལི༹ཀཊྛཱིནི ནྷཱཔིཏཁུརཀོསཀསཎྛཱནཱནི. ནལཱཊཀཎྞཙཱུལི༹ཀཱནཾ ཨུཔརི པཊྚབནྡྷནོཀཱསེ ཨཊྛི སངྐུཊིཏགྷཊཔུཎྞཔཊལཁཎྜསཎྛཱནཾ. མུདྡྷཊྛི མུཁཙྪིནྣཝངྐནཱལི༹ཀེརསཎྛཱནཾ. སཱིསཊྛཱིནི སིབྦེཏྭཱ ཋཔིཏཛཛྫརལཱབུཀཊཱཧསཎྛཱནཱནི.

དིསཏོ དྭཱིསུ དིསཱསུ ཛཱཏཱནི. ཨོཀཱསཏོ ཨཝིསེསེན སཀལསརཱིརེ ¶ ཋིཏཱནི. ཝིསེསེན པནེཏྠ སཱིསཊྛཱིནི གཱིཝཊྛཱིསུ པཏིཊྛིཏཱནི, གཱིཝཊྛཱིནི པིཊྛིཀཎྚཀཊྛཱིསུ, པིཊྛིཀཎྚཀཊྛཱིནི ཀཊིཊྛཱིསུ, ཀཊིཊྛཱིནི ཨཱུརུཊྛཱིསུ, ཨཱུརུཊྛཱིནི ཛཎྞུཀཊྛཱིསུ, ཛཎྞུཀཊྛཱིནི ཛངྒྷཊྛཱིསུ, ཛངྒྷཊྛཱིནི གོཔྥཀཊྛཱིསུ, གོཔྥཀཊྛཱིནི པིཊྛིཔཱདཊྛཱིསུ པཏིཊྛིཏཱནི. པརིཙྪེདཏོ ཨནྟོ ཨཊྛིམིཉྫེན, ཨུཔརི མཾསེན, ཨགྒེ མཱུལེ ཙ ཨཉྙམཉྙེན པརིཙྪིནྣཱནི. ཨཡཾ ནེསཾ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

ཨཊྛིམིཉྫནྟི ¶ ཏེསཾ ཏེསཾ ཨཊྛཱིནཾ ཨབྦྷནྟརགཏཾ མིཉྫཾ. ཏཾ ཝཎྞཏོ སེཏཾ. སཎྛཱནཏོ མཧནྟམཧནྟཱནཾ ཨཊྛཱིནཾ ཨབྦྷནྟརགཏཾ ཝེལུ༹ནཱལི༹ཡཾ པཀྑིཏྟསེདིཏམཧཱཝེཏྟགྒསཎྛཱནཾ, ཁུདྡཱནུཁུདྡཀཱནཾ ཨབྦྷནྟརགཏཾ ཝེལུ༹ཡཊྛིཔབྦེསུ པཀྑིཏྟསེདིཏཏནུཝེཏྟགྒསཎྛཱནཾ. དིསཏོ དྭཱིསུ དིསཱསུ ཛཱཏཾ. ཨོཀཱསཏོ ཨཊྛཱིནཾ ཨབྦྷནྟརེ པཏིཊྛིཏཾ. པརིཙྪེདཏོ ཨཊྛཱིནཾ ཨབྦྷནྟརཏལེཧི པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

ཝཀྐནྟི ཨེཀབནྡྷནཱ དྭེ མཾསཔིཎྜཱ. ཏཾ ཝཎྞཏོ མནྡརཏྟཾ པཱལི༹བྷདྡཀཊྛིཝཎྞཾ. སཎྛཱནཏོ དཱརཀཱནཾ ཡམཀཀཱིལཱ༹གོལ༹ཀསཎྛཱནཾ, ཨེཀཝཎྚཔཊིབདྡྷཨམྦཕལདྭཡསཎྛཱནཾ ཝཱ. དིསཏོ ཨུཔརིམཱཡ དིསཱཡ ཛཱཏཾ. ཨོཀཱསཏོ གལཝཱཊཀཱ ནིཀྑནྟེན ཨེཀམཱུལེན ཐོཀཾ གནྟྭཱ དྭིདྷཱ བྷིནྣེན ཐཱུལནྷཱརུནཱ ཝིནིབདྡྷཾ ཧུཏྭཱ ཧདཡམཾསཾ པརིཀྑིཔིཏྭཱ ཋིཏཾ. པརིཙྪེདཏོ ཝཀྐཾ ཝཀྐབྷཱགེན པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

ཧདཡནྟི ཧདཡམཾསཾ. ཏཾ ཝཎྞཏོ རཏྟཾ པདུམཔཏྟཔིཊྛིཝཎྞཾ. སཎྛཱནཏོ བཱཧིརཔཏྟཱནི ཨཔནེཏྭཱ ¶ ཨདྷོམུཁཋཔིཏཔདུམམཀུལ༹སཎྛཱནཾ. བཧི མཊྛཾ; ཨནྟོ ཀོསཱཏཀཱིཕལསྶ ཨབྦྷནྟརསདིསཾ. པཉྙཝནྟཱནཾ ཐོཀཾ ཝིཀསིཏཾ, མནྡཔཉྙཱནཾ མཀུལི༹ཏམེཝ. ཨནྟོ ཙསྶ པུནྣཱགཊྛིཔཏིཊྛཱནམཏྟོ ཨཱཝཱཊཀོ ཧོཏི, ཡཏྠ ཨཌྜྷཔསཏམཏྟཾ ལོཧིཏཾ སཎྛཱཏི; ཡཾ ནིསྶཱཡ མནོདྷཱཏུ མནོཝིཉྙཱཎདྷཱཏུ ཙ ཝཏྟནྟི. ཏཾ པནེཏཾ རཱགཙརིཏསྶ ¶ རཏྟཾ ཧོཏི, དོསཙརིཏསྶ ཀཱལ༹ཀཾ, མོཧཙརིཏསྶ མཾསདྷོཝནུདཀསདིསཾ, ཝིཏཀྐཙརིཏསྶ ཀུལཏྠཡཱུསཝཎྞཾ, སདྡྷཱཙརིཏསྶ ཀཎིཀཱརཔུཔྥཝཎྞཾ, པཉྙཱཙརིཏསྶ ཨཙྪཾ ཝིཔྤསནྣཾ ཨནཱཝིལཾ པཎྜརཾ པརིསུདྡྷཾ ནིདྡྷོཏཛཱཏིམཎི ཝིཡ ཛུཏིམནྟཾ ཁཱཡཏི. དིསཏོ ཨུཔརིམཱཡ དིསཱཡ ཛཱཏཾ. ཨོཀཱསཏོ སརཱིརབྦྷནྟརེ དྭིནྣཾ ཐནཱནཾ མཛ྄ཛྷེ པཏིཊྛིཏཾ. པརིཙྪེདཏོ ཧདཡཾ ཧདཡབྷཱགེན པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

ཡཀནནྟི ཡམཀམཾསཔཊལཾ. ཏཾ ཝཎྞཏོ རཏྟཔཎྜུཀདྷཱཏུཀཾ, ནཱཏིརཏྟཀུམུདསྶ པཏྟཔིཊྛིཝཎྞཾ. སཎྛཱནཏོ མཱུལེ ཨེཀཾ, ཨགྒེ ཡམཀཾ ཀོཝིལཱ༹རཔཏྟསཎྛཱནཾ ¶ . ཏཉྩ དནྡྷཱནཾ ཨེཀམེཝ ཧོཏི མཧནྟཾ, པཉྙཝནྟཱནཾ དྭེ ཝཱ ཏཱིཎི ཝཱ ཁུདྡཀཱནི. དིསཏོ ཨུཔརིམདིསཱཡ ཛཱཏཾ. ཨོཀཱསཏོ དྭིནྣཾ ཐནཱནཾ ཨབྦྷནྟརེ དཀྑིཎཔསྶཾ ནིསྶཱཡ ཋིཏཾ. པརིཙྪེདཏོ ཡཀནཾ ཡཀནབྷཱགེན པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

ཀིལོམཀནྟི པཊིཙྪནྣཱཔཊིཙྪནྣབྷེདཏོ དུཝིདྷཾ པརིཡོནཧནམཾསཾ. ཏཾ དུཝིདྷམྤི ཝཎྞཏོ སེཏཾ, དུཀཱུལཔིལོཏིཀཝཎྞཾ. སཎྛཱནཏོ ཨཏྟནོ ཨོཀཱསསཎྛཱནཾ. དིསཏོ པཊིཙྪནྣཀིལོམཀཾ ཨུཔརིམཱཡ དིསཱཡ ཛཱཏཾ. ཨིཏརཾ དྭཱིསུ དིསཱསུ ཛཱཏཾ. ཨོཀཱསཏོ པཊིཙྪནྣཀིལོམཀཾ ཧདཡཉྩ ཝཀྐཉྩ པཊིཙྪཱདེཏྭཱ ཋིཏཾ. ཨཔཊིཙྪནྣཀིལོམཀཾ སཀལསརཱིརེ ཙམྨསྶ ཧེཊྛཏོ མཾསཾ པརིཡོནདྡྷིཏྭཱ ཋིཏཾ. པརིཙྪེདཏོ ཧེཊྛཱ མཾསེན, ཨུཔརི ཙམྨེན, ཏིརིཡཾ ཀིལོམཀབྷཱགེན པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

པིཧཀནྟི ཨུདརཛིཝ྄ཧཱམཾསཾ. ཏཾ ཝཎྞཏོ ནཱིལཾ ནིགྒུཎྜིཀཔུཔྥཝཎྞཾ. སཎྛཱནཏོ སཏྟངྒུལཔྤམཱཎཾ ཨབནྡྷནཾ ཀཱལ༹ཝཙྪཀཛིཝ྄ཧཱསཎྛཱནཾ. དིསཏོ ཨུཔརིམཱཡ དིསཱཡ ཛཱཏཾ. ཨོཀཱསཏོ ཧདཡསྶ ཝཱམཔསྶེ ཨུདརཔཊལསྶ མཏྠཀཔསྶཾ ནིསྶཱཡ ཋིཏཾ, ཡསྨིཾ པཧརཎཔྤཧཱརེན བཧི ནིཀྑནྟེ སཏྟཱནཾ ཛཱིཝིཏཀྑཡོ ཧོཏི. པརིཙྪེདཏོ ¶ པིཧཀབྷཱགེན པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

པཔྥཱསནྟི ¶ དྭཏྟིཾསམཾསཁཎྜཔྤབྷེདཾ པཔྥཱསམཾསཾ. ཏཾ ཝཎྞཏོ རཏྟཾ ནཱཏིཔཀྐཨུདུམྦརཕལཝཎྞཾ. སཎྛཱནཏོ ཝིསམཙྪིནྣབཧལཔཱུཝཁཎྜསཎྛཱནཾ. ཨབྦྷནྟརེ ཨསིཏཔཱིཏཱནཾ ཨབྷཱཝེ ཨུགྒཏེན ཀམྨཛཏེཛུསྨནཱ ཨབྦྷཱཧཏཏྟཱ སངྑཱདིཏཔལཱལཔིཎྜམིཝ ནིརསཾ ནིརོཛཾ. དིསཏོ ཨུཔརིམཱཡ དིསཱཡ ཛཱཏཾ. ཨོཀཱསཏོ སརཱིརབྦྷནྟརེ དྭིནྣཾ ཐནཱནམནྟརེ ཧདཡཉྩ ཡཀནཉྩ པཊིཙྪཱདེཏྭཱ ཨོལམྦནྟཾ ཋིཏཾ. པརིཙྪེདཏོ ཕཔྥཱསབྷཱགེན པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

ཨནྟནྟི པུརིསསྶ དྭཏྟིཾས ཧཏྠཱ, ཨིཏྠིཡཱ ཨཊྛཝཱིསཏིཧཏྠཱ ཨེཀཝཱིསཏིཡཱ ཋཱནེསུ ཨོབྷགྒཱ ཨནྟཝཊྚི. ཏདེཏཾ ཝཎྞཏོ སེཏཾ སཀྑརསུདྷཱཝཎྞཾ ¶ . སཎྛཱནཏོ ལོཧིཏདོཎིཡཾ ཨཱབྷུཛིཏྭཱ ཋཔིཏསཱིསཙྪིནྣསཔྤསཎྛཱནཾ. དིསཏོ དྭཱིསུ དིསཱསུ ཛཱཏཾ. ཨོཀཱསཏོ ཨུཔརི གལཝཱཊཀེ ཧེཊྛཱ ཙ ཀརཱིསམགྒེ ཝིནིབནྡྷཏྟཱ གལཝཱཊཀཀརཱིསམགྒཔརིཡནྟེ སརཱིརབྦྷནྟརེ ཋིཏཾ. པརིཙྪེདཏོ ཨནྟབྷཱགེན པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

ཨནྟགུཎནྟི ཨནྟབྷོགཊྛཱནེསུ བནྡྷནཾ. ཏཾ ཝཎྞཏོ སེཏཾ དཀསཱིཏལིཀམཱུལཝཎྞཾ. སཎྛཱནཏོ དཀསཱིཏལིཀམཱུལསཎྛཱནམེཝ. དིསཏོ དྭཱིསུ དིསཱསུ ཛཱཏཾ. ཨོཀཱསཏོ ཀུདཱལ༹ཕརསུཀམྨཱདཱིནི ཀརོནྟཱནཾ ཡནྟཱཀཌྜྷནཀཱལེ ཡནྟསུཏྟམིཝ, ཡནྟཕལཀཱནི ཨནྟབྷོགེ ཨེཀཏོ ཨགལ༹ནྟེ ཨཱབནྡྷིཏྭཱ པཱདཔུཉྪནརཛྫུམཎྜལཀསྶ ཨནྟརཱ ཏཾ སིབྦེཏྭཱ ཋིཏརཛྫུཀཱ ཝིཡ ཨེཀཝཱིསཏིཡཱ ཋཱནེསུ ཨནྟབྷོགཱནཾ ཨནྟརཱ ཋིཏཾ. པརིཙྪེདཏོ ཨནྟགུཎབྷཱགེན པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

ཨུདརིཡནྟི ཨུདརེ བྷཝཾ ཨསིཏཔིཏཁཱཡིཏསཱཡིཏཾ. ཏཾ ཝཎྞཏོ ཨཛ྄ཛྷོཧཊཱཧཱརཝཎྞཾ. སཎྛཱནཏོ པརིསྶཱཝནེ སིཐིལབནྡྷཏཎྜུལསཎྛཱནཾ. དིསཏོ ཨུཔརིམཱཡ དིསཱཡ ཛཱཏཾ. ཨོཀཱསཏོ ཨུདརེ ཋིཏཾ. ཨུདརཾ ནཱམ ཨུབྷཏོ ནིཔྤཱིལི༹ཡམཱནསྶ ¶ ཨལླསཱཊཀསྶ མཛ྄ཛྷེ སཉྫཱཏཕོཊཀསདིསཾ ཨནྟཔཊལཾ; བཧི མཊྛཾ, ཨནྟོ མཾསཀསམྦུཀཔལིཝེཋནཀིལིཊྛཔཱཝཱརཀཔུཔྥཀསདིསཾ, ཀུཐིཏཔནསཏཙསྶ ཨབྦྷནྟརསདིསནྟིཔི ཝཏྟུཾ ཝཊྚཏི; ཡཏྠ ཏཀྐོཊཀཱ, གཎྜུཔྤཱདཀཱ, ཏཱལཧཱིརཀཱ, སཱུཙིམུཁཀཱ, པཊཏནྟསུཏྟཀཱ ཨིཙྩེཝམཱདིདྭཏྟིཾསཀུལཔྤབྷེདཱ ཀིམཡོ ཨཱཀུལབྱཱཀུལཱ སཎྜསཎྜཙཱརིནོ ཧུཏྭཱ ནིཝསནྟི; ཡེ པཱནབྷོཛནཱདིམྷི ཨཝིཛྫམཱནེ ཨུལླངྒྷིཏྭཱ ཝིརཝནྟཱ ཧདཡམཾསཾ ཨབྷིཧནནྟི, པཱནབྷོཛནཱདིཨཛ྄ཛྷོཧརཎཝེལཱཡ ཙ ཨུདྡྷཾམུཁཱ ཧུཏྭཱ པཋམཛ྄ཛྷོཧཊེ དྭེ ཏཡོ ¶ ཨཱལོཔེ ཏུརིཏཏུརིཏཱ ཝིལུམྤནྟི; ཡཾ ཏེསཾ ཀིམཱིནཾ སཱུཏིགྷརཾ, ཝཙྩཀུཊི, གིལཱནསཱལཱ, སུསཱནཉྩ ཧོཏི.

ཡཏྠ སེཡྻཐཱཔི ནཱམ ཙཎྜཱལགཱམདྭཱརེ ཙནྡནིཀཱཡ ནིདཱགྷསམཡེ ཐཱུལཕུསིཏཀེ དེཝེ ཝསྶནྟེ ཨུདཀེན ཝུཡ྄ཧམཱནཾ མུཏྟཀརཱིསཙམྨཨཊྛིནྷཱརུཁཎྜཁེལ༹སིངྒྷཱཎིཀལོཧིཏཔྤབྷུཏི ནཱནཱཀུཎཔཛཱཏཾ ནིཔཏིཏྭཱ ཀདྡམོདཀཱལུལི༹ཏཾ ¶ དྭཱིཧཏཱིཧཙྩཡེན སཉྫཱཏཀིམིཀུལཾ སཱུརིཡཱཏཔཝེགསནྟཱཔཀུཐིཏཾ ཨུཔརི ཕེཎཔུབྦུལཀེ མུཉྩནྟཾ ཨབྷིནཱིལཝཎྞཾ པརམདུགྒནྡྷཛེགུཙྪཾ ནེཝ ཨུཔགནྟུཾ ན དཊྛུཾ ཨརཧརཱུཔཏཾ ཨཱཔཛྫིཏྭཱ ཏིཊྛཏི, པགེཝ གྷཱཡིཏུཾ ཝཱ སཱཡིཏུཾ ཝཱ; ཨེཝམེཝ ནཱནཔྤཀཱརཔཱནབྷོཛནཱདིདནྟམུསལསཉྩུཎྞིཏཾ ཛིཝ྄ཧཱཧཏྠཔརིཝཏྟིཏཁེལ༹ལཱལཱཔལིབུདྡྷཾ ཏངྑཎཝིགཏཝཎྞགནྡྷརསཱདིསམྤདཾ ཏནྟཝཱཡཁལིསུཝཱནཝམཐུསདིསཾ ནིཔཏིཏྭཱ པིཏྟསེམྷཝཱཏཔལིཝེཋིཏཾ ཧུཏྭཱ ཨུདརགྒིསནྟཱཔཝེགཀུཐིཏཾ ཀིམིཀུལཱཀུལཾ ཨུཔརཱུཔརི ཕེཎཔུབྦུལཀཱནི མུཉྩནྟཾ པརམཀསམྦུདུགྒནྡྷཛེགུཙྪབྷཱཝཾ ཨཱཔཛྫིཏྭཱ ཏིཊྛཏི; ཡཾ སུཏྭཱཔི པཱནབྷོཛནཱདཱིསུ ཨམནུཉྙཏཱ སཎྛཱཏི, པགེཝ པཉྙཱཙཀྑུནཱ ཨཝལོཀེཏྭཱ, ཡཏྠ ཙ པཏིཏཾ པཱནབྷོཛནཱདི པཉྩདྷཱ ཝིབྷཱགཾ གཙྪཏི – ཨེཀཾ བྷཱགཾ པཱཎཀཱ ཁཱདནྟི, ཨེཀཾ བྷཱགཾ ཨུདརགྒི ཛྷཱཔེཏི, ཨེཀོ བྷཱགོ མུཏྟཾ ཧོཏི, ཨེཀོ ཀརཱིསཾ, ཨེཀོ རསབྷཱཝཾ ཨཱཔཛྫིཏྭཱ སོཎིཏམཾསཱདཱིནི ཨུཔབྲཱུཧཡཏི. པརིཙྪེདཏོ ཨུདརཔཊལེན ¶ ཙེཝ ཨུདརིཡབྷཱགེན ཙ པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

ཀརཱིསནྟི ཝཙྩཾ. ཏཾ ཝཎྞཏོ ཡེབྷུཡྻེན ཨཛ྄ཛྷོཧཊཱཧཱརཝཎྞམེཝ ཧོཏི. སཎྛཱནཏོ ཨོཀཱསསཎྛཱནཾ. དིསཏོ ཧེཊྛིམཱཡ དིསཱཡ ཛཱཏཾ. ཨོཀཱསཏོ པཀྐཱསཡེ ཋིཏཾ. པཀྐཱསཡོ ནཱམ ཧེཊྛཱ ནཱབྷིཔིཊྛིཀཎྚཀམཱུལཱནམནྟརེ ཨནྟཱཝསཱནེ ཨུབྦེདྷེན ཨཊྛངྒུལམཏྟོ ཝེལུ༹ནཱལི༹ཀསདིསོ, ཡཏྠ སེཡྻཐཱཔི ནཱམ ཨུཔརཱུཔརི བྷཱུམིབྷཱགེ པཏིཏཾ ཝསྶོདཀཾ ཨོགལི༹ཏྭཱ ཧེཊྛཱ བྷཱུམིབྷཱགཾ པཱུརེཏྭཱ ཏིཊྛཏི; ཨེཝམེཝ ཡཾ ཀིཉྩི ཨཱམཱསཡེ པཏིཏཾ པཱནབྷོཛནཱདིཀཾ ཨུདརགྒིནཱ ཕེཎུདྡེཧཀཾ པཀྐཾ པཀྐཾ ནིསདཱཡ པིསིཏམིཝ སཎྷབྷཱཝཾ ཨཱཔཛྫིཏྭཱ ཨནྟབིལེན ཨོགལི༹ཏྭཱ ཨོགལི༹ཏྭཱ མདྡིཏྭཱ ཝེལུ༹པབྦེ པཀྑིཔམཱནཔཎྜུམཏྟིཀཱ ཝིཡ སནྣིཙིཏཾ ཧུཏྭཱ ཏིཊྛཏི. པརིཙྪེདཏོ པཀྐཱསཡཔཊལེན ཙེཝ ཀརཱིསབྷཱགེན ཙ པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

མཏྠལུངྒནྟི ¶ སཱིསཀཊཱཧབྦྷནྟརེ ཋིཏམིཉྫརཱསི. ཏཾ ཝཎྞཏོ སེཏཾ ཨཧིཙྪཏྟཀཔིཎྜིཀཝཎྞཾ, དདྷིབྷཱཝཾ ཨསམྤཏྟདུཊྛཁཱིརཝཎྞནྟིཔི ཝཏྟུཾ ཝཊྚཏི. སཎྛཱནཏོ ཨོཀཱསསཎྛཱནཾ. དིསཏོ ཨུཔརིམཱཡ དིསཱཡ ཛཱཏཾ. ཨོཀཱསཏོ ¶ སཱིསཀཊཱཧབྦྷནྟརེ ཙཏྟཱརོ སིབྦིནིམགྒེ ནིསྶཱཡ སམོདྷཱནེཏྭཱ ཋཔིཏཱ ཙཏྟཱརོ པིཊྛཔིཎྜཱ ཝིཡ སམོཧིཏཾ ཏིཊྛཏི. པརིཙྪེདཏོ སཱིསཀཊཱཧསྶ ཨབྦྷནྟརཏལེཧི ཙེཝ མཏྠལུངྒབྷཱགེན ཙ པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

པིཏྟནྟི དྭེ པིཏྟཱནི – བདྡྷཔིཏྟཉྩ ཨབདྡྷཔིཏྟཉྩ. ཏཏྠ བདྡྷཔིཏྟཾ ཝཎྞཏོ བཧལམདྷུཀཏེལཝཎྞཾ, ཨབདྡྷཔིཏྟཾ མིལཱཏཨཱཀུལིཏཔུཔྥཝཎྞཾ. ཏཾ སཎྛཱནཏོ ཨུབྷཡམྤི ཨོཀཱསསཎྛཱནཾ. དིསཏོ བདྡྷཔིཏྟཾ ཨུཔརིམཱཡ དིསཱཡ ཛཱཏཾ, ཨིཏརཾ དྭཱིསུ དིསཱསུ ཛཱཏཾ. ཨོཀཱསཏོ ཨབདྡྷཔིཏྟཾ ཋཔེཏྭཱ ཀེསལོམདནྟནཁཱནཾ མཾསཝིནིམུཏྟཊྛཱནཉྩེཝ ཐདྡྷསུཀྑཙམྨཉྩ ཨུདཀམིཝ ཏེལབིནྡུཾ ཨཝསེསསརཱིརཾ བྱཱཔེཏྭཱ ཋིཏཾ, ཡམྷི ཀུཔིཏེ ཨཀྑཱིནི པཱིཏཀཱནི ཧོནྟི བྷམནྟི, གཏྟཾ ཀམྤཏི ཀཎྜུཡཏི. བདྡྷཔིཏྟཾ ཧདཡཔཔྥཱསཱནམནྟརེ ཡཀནམཾསཾ ¶ ནིསྶཱཡ པཏིཊྛིཏེ མཧཱཀོསཱཏཀཱིཀོསཀསདིསེ པིཏྟཀོསཀེ ཋིཏཾ, ཡམྷི ཀུཔིཏེ སཏྟཱ ཨུམྨཏྟཀཱ ཧོནྟི, ཝིཔལླཏྠཙིཏྟཱ ཧིརོཏྟཔྤཾ ཚཌྜེཏྭཱ ཨཀཏྟབྦཾ ཀརོནྟི, ཨབྷཱསིཏབྦཾ བྷཱསནྟི, ཨཙིནྟེཏབྦཾ ཙིནྟེནྟི. པརིཙྪེདཏོ པིཏྟབྷཱགེན པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

སེམྷནྟི སརཱིརབྦྷནྟརེ ཨེཀཔཏྟཔཱུརཔྤམཱཎཾ སེམྷཾ. ཏཾ ཝཎྞཏོ སེཏཾ ནཱགབལཔཎྞརསཝཎྞཾ. སཎྛཱནཏོ ཨོཀཱསསཎྛཱནཾ. དིསཏོ ཨུཔརིམཱཡ དིསཱཡ ཛཱཏཾ. ཨོཀཱསཏོ ཨུདརཔཊལེ ཋིཏཾ, ཡཾ པཱནབྷོཛནཱདཱིནི ཨཛ྄ཛྷོཧརཎཀཱལེ སེཡྻཐཱཔི ནཱམ ཨུདཀེ སེཝཱལཔཎཀཾ ཀཊྛེ ཝཱ ཀཔཱལེ ཝཱ པཏནྟེ ཚིཛྫིཏྭཱ དྭིདྷཱ ཧུཏྭཱ པུན ཨཛ྄ཛྷོཏྠརིཏྭཱ ཏིཊྛཏི, ཨེཝམེཝ པཱནབྷོཛནཱདིམྷི ནིཔཏནྟེ ཚིཛྫིཏྭཱ དྭིདྷཱ ཧུཏྭཱ པུན ཨཛ྄ཛྷོཏྠརིཏྭཱ ཏིཊྛཏི; ཡམྷི ཙ མནྡཱིབྷཱུཏེ པཀྐགཎྜོ ཝིཡ པཱུཏིཀུཀྐུཊཎྜམིཝ ཙ ཨུདརཾ པརམཛེགུཙྪཾ ཀུཎཔགནྡྷཾ ཧོཏི; ཏཏོ ཨུགྒཏེན ཙ གནྡྷེན ཨུདྡེཀོཔི མུཁམྤི དུགྒནྡྷཾ པཱུཏིཀུཎཔསདིསཾ ཧོཏི; སོ ཙ པུརིསོ ‘ཨཔེཧི, དུགྒནྡྷཾ ཝཱཡསཱི’ཏི ཝཏྟབྦཏཾ ཨཱཔཛྫཏི; ཡཉྩ ཝཌྜྷིཏྭཱ བཧལཏྟམཱཔནྣཾ པིདྷཱནཕལཀམིཝ ཝཙྩཀུཊིཡཱ ཨུདརཔཊལསྶ ཨབྦྷནྟརེཡེཝ ཀུཎཔགནྡྷཾ སནྣིརུཛ྄ཛྷིཏྭཱ ཏིཊྛཏི. པརིཙྪེདཏོ ¶ སེམྷབྷཱགེན པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

པུབྦོཏི ¶ པཱུཏིལོཧིཏཝསེན པཝཏྟཔུབྦོ. སོ ཝཎྞཏོ པཎྜུཔལཱསཝཎྞོ, མཏཀསརཱིརེ པན པཱུཏིབཧལཱཙཱམཝཎྞོ ཧོཏི. སཎྛཱནཏོ ཨོཀཱསསཎྛཱནོ. དིསཏོ དྭཱིསུ དིསཱསུ ཛཱཏོ. ཨོཀཱསཏོ པན པུབྦསྶ ཨོཀཱསོ ནཱམ ནིབདྡྷོ ནཏྠི ཡཏྠ སོ སནྣིཙིཏོ ཏིཊྛེཡྻ; ཡཏྲ ཡཏྲ པན ཁཱཎུཀཎྚཀཔྤཧརཎགྒིཛཱལཱདཱིཧི ཨབྷིཧཏེ སརཱིརཔྤདེསེ ལོཧིཏཾ སཎྛཧིཏྭཱ པཙྩཏི, གཎྜཔིལ༹ཀཱདཡོ ཝཱ ཨུཔྤཛྫནྟི, ཏཏྲ ཏཏྲེཝ ཏིཊྛཏི. པརིཙྪེདཏོ པུབྦབྷཱགེན པརིཙྪིནྣོ ¶ . ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

ལོཧིཏནྟི དྭེ ལོཧིཏཱནི – སནྣིཙིཏལོཧིཏཉྩ སཾསརཎལོཧིཏཉྩ. ཏཏྠ སནྣིཙིཏལོཧིཏཾ ཝཎྞཏོ ནིཔཀྐབཧལལཱཁཱརསཝཎྞཾ, སཾསརཎལོཧིཏཾ ཨཙྪལཱཁཱརསཝཎྞཾ. སཎྛཱནཏོ ཨུབྷཡམྤི ཨོཀཱསསཎྛཱནཾ. དིསཏོ སནྣིཙིཏལོཧིཏཾ ཨུཔརིམཱཡ དིསཱཡ ཛཱཏཾ, ཨིཏརཾ དྭཱིསུ དིསཱསུ ཛཱཏཾ. ཨོཀཱསཏོ སཾསརཎལོཧིཏཾ, ཋཔེཏྭཱ ཀེསལོམདནྟནཁཱནཾ མཾསཝིནིམྨུཏྟཊྛཱནཉྩེཝ ཐདྡྷསུཀྑཙམྨཉྩ, དྷམནིཛཱལཱནུསཱརེན སབྦཾ ཨུཔཱདིནྣཀསརཱིརཾ ཕརིཏྭཱ ཋིཏཾ; སནྣིཙིཏལོཧིཏཾ ཡཀནཊྛཱནསྶ ཧེཊྛཱབྷཱགཾ པཱུརེཏྭཱ ཨེཀཔཏྟཔཱུརམཏྟཾ ཧདཡཝཀྐཔཔྥཱསཱནཾ ཨུཔརི ཐོཀཾ ཐོཀཾ པགྒྷརནྟཾ ཝཀྐཧདཡཡཀནཔཔྥཱསེ ཏེམཡམཱནཾ ཋིཏཾ. ཏསྨིཉྷི ཝཀྐཧདཡཱདཱིནི ཨཏེམེནྟེ སཏྟཱ པིཔཱསིཏཱ ཧོནྟི. པརིཙྪེདཏོ ལོཧིཏབྷཱགེན པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

སེདོཏི ལོམཀཱུཔཱདཱིཧི པགྒྷརཎཀཨཱཔོདྷཱཏུ. སོ ཝཎྞཏོ ཝིཔྤསནྣཏིལཏེལཝཎྞོ. སཎྛཱནཏོ ཨོཀཱསསཎྛཱནོ. དིསཏོ དྭཱིསུ དིསཱསུ ཛཱཏོ. ཨོཀཱསཏོ སེདསྶོཀཱསོ ནཱམ ནིབདྡྷོ ནཏྠི, ཡཏྠ སོ ལོཧིཏཾ ཝིཡ སདཱ ཏིཊྛེཡྻ; ཡདཱ པན ཨགྒིསནྟཱཔསཱུརིཡསནྟཱཔཨུཏུཝིཀཱརཱདཱིཧི སརཱིརཾ སནྟཔྤཏི ཏདཱ ཨུདཀཏོ ཨབྦུལ༹ྷམཏྟཝིསམཙྪིནྣབྷིསམཱུལཱ༹ལཀུམུདནཱལ༹ཀལཱཔོ ཝིཡ སབྦཀེསལོམཀཱུཔཝིཝརེཧི པགྒྷརཏི. ཏསྨཱ ཏསྶ སཎྛཱནམྤི ཀེསལོམཀཱུཔཝིཝརཱནཾཡེཝ ཝསེན ཝེདིཏབྦཾ. སེདཔརིགྒཎྷཀེན ཙ ཡོགིནཱ ཀེསལོམཀཱུཔཝིཝརེ པཱུརེཏྭཱ ཋིཏཝསེནེཝ སེདོ མནསིཀཱཏབྦོ. པརིཙྪེདཏོ སེདབྷཱགེན པརིཙྪིནྣོ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

མེདོཏི ¶ ¶ ཐིནསིནེཧོ. སོ ཝཎྞཏོ ཕཱལིཏཧལིདྡིཝཎྞོ. སཎྛཱནཏོ ཐཱུལསརཱིརསྶ ཏཱཝ ཙམྨམཾསནྟརེ ཋཔིཏཧལིདྡིཝཎྞདུཀཱུལཔིལོཏིཀསཎྛཱནོ ཧོཏི, ཀིསསརཱིརསྶ ཛངྒྷམཾསཾ ཨཱུརུམཾསཾ པིཊྛིཀཎྚཀནིསྶིཏཾ པིཊྛམཾསཾ ཨུདརཝཊྚིམཾསནྟི ཨེཏཱནི ནིསྶཱཡ དིགུཎཾ ཏིགུཎཾ ཀཏྭཱ ཋཔིཏཧལིདྡིཝཎྞདུཀཱུལཔིལོཏིཀསཎྛཱནོ. དིསཏོ དྭཱིསུ ¶ དིསཱསུ ཛཱཏོ. ཨོཀཱསཏོ ཐཱུལསྶ སཀལསརཱིརཾ ཕརིཏྭཱ, ཀིསསྶ ཛངྒྷམཾསཱདཱིནི ནིསྶཱཡ ཋིཏོ, ཡཾ སིནེཧསངྑཾ གཏམྤི པརམཛེགུཙྪཏྟཱ ནེཝ མུདྡྷནི ཏེལཏྠཱཡ, ན ནཱསཱཏེལཱདཱིནཾ ཨཏྠཱཡ གཎྷནྟི. པརིཙྪེདཏོ ཧེཊྛཱ མཾསེན, ཨུཔརི ཙམྨེན, ཏིརིཡཾ མེདབྷཱགེན པརིཙྪིནྣོ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

ཨསྶཱུཏི ཨཀྑཱིཧི པགྡྷརཎཀཨཱཔོདྷཱཏུ. ཏཾ ཝཎྞཏོ ཝིཔྤསནྣཏིལཏེལཝཎྞཾ. སཎྛཱནཏོ ཨོཀཱསསཎྛཱནཾ. དིསཏོ ཨུཔརིམཱཡ དིསཱཡ ཛཱཏཾ. ཨོཀཱསཏོ ཨཀྑིཀཱུཔཀེསུ ཋིཏཾ. ན ཙེཏཾ པིཏྟཀོསཀེ པིཏྟམིཝ ཨཀྑིཀཱུཔཀེསུ སདཱ སནྣིཙིཏཾ ཏིཊྛཏི; ཡདཱ པན སཏྟཱ སོམནསྶཛཱཏཱ མཧཱཧསིཏཾ ཧསནྟི, དོམནསྶཛཱཏཱ རོདནྟི པརིདེཝནྟི ཏཐཱརཱུཔཾ ཝིསབྷཱགཱཧཱརཾ ཨཱཧརནྟི, ཡདཱ ཙ ནེསཾ ཨཀྑཱིནི དྷཱུམརཛཔཾསུཀཱདཱིཧི ཨབྷིཧཉྙནྟི, ཏདཱ ཨེཏེཧི སོམནསྶདོམནསྶཝིསབྷཱགཱཧཱརཨུཏཱུཧི སམུཊྛཧིཏྭཱ ཨཀྑིཀཱུཔཀེ པཱུརེཏྭཱ ཏིཊྛཏི ཝཱ པགྒྷརཏི ཝཱ. ཨསྶུཔརིགྒཎྷཀེན པན ཡོགིནཱ ཨཀྑིཀཱུཔཀེ པཱུརེཏྭཱ ཋིཏཝསེནེཝ པརིགྒཎྷིཏབྦཾ. པརིཙྪེདཏོ ཨསྶུབྷཱགེན པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

ཝསཱཏི ཝིལཱིནསྣེཧོ. སཱ ཝཎྞཏོ ནཱལི༹ཀེརཏེལཝཎྞཱ, ཨཱཙཱམེ ཨཱསིཏྟཏེལཝཎྞཱཏིཔི ཝཏྟུཾ ཝཊྚཏི. སཎྛཱནཏོ ནྷཱནཀཱལེ པསནྣཨུདཀསྶ ཨུཔརི པརིབྦྷམནྟསིནེཧབིནྡུཝིསཊསཎྛཱནཱ. དིསཏོ དྭཱིསུ དིསཱསུ ཛཱཏཱ. ཨོཀཱསཏོ ཡེབྷུཡྻེན ཧཏྠཏལཧཏྠཔིཊྛིཔཱདཏལཔཱདཔིཊྛིནཱསཱཔུཊནལཱཊཨཾསཀཱུཊེསུ ཋིཏཱ. ན ཙེསཱ ཨེཏེསུ ཨོཀཱསེསུ སདཱ ཝིལཱིནཱཝ ཧུཏྭཱ ཏིཊྛཏི; ཡདཱ པན ཨགྒིསནྟཱཔསཱུརིཡསནྟཱཔཨུཏུཝིསབྷཱགདྷཱཏུཝིསབྷཱགེཧི ཏེ པདེསཱ ཨུསྨཱ ཛཱཏཱ ཧོནྟི, ཏདཱ ཏཏྠ ནྷཱནཀཱལེ པསནྣཨུདཀཱུཔརི སིནེཧབིནྡུཝིསཊོ ཝིཡ ཨིཏོ ཙིཏོ ཙ སཾསརཏི. པརིཙྪེདཏོ ཝསཱབྷཱགེན པརིཙྪིནྣཱ ¶ . ཨཡམསྶཱ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

ཁེལོ༹ཏི ¶ ཨནྟོམུཁེ ཕེཎམིསྶཱ ཨཱཔོདྷཱཏུ. སོ ཝཎྞཏོ སེཏོ ཕེཎཝཎྞོ. སཎྛཱནཏོ ཨོཀཱསསཎྛཱནོ, ཕེཎསཎྛཱནཏོཏིཔི ¶ ཝཏྟུཾ ཝཊྚཏི. དིསཏོ ཨུཔརིམཱཡ དིསཱཡ ཛཱཏོ. ཨོཀཱསཏོ ཨུབྷོཧི ཀཔོལཔསྶེཧི ཨོརུཡ྄ཧ ཛིཝ྄ཧཱཡ ཋིཏོ. ན ཙེས ཨེཏྠ སདཱ སནྣིཙིཏོ ཧུཏྭཱ ཏིཊྛཏི. ཡདཱ པན སཏྟཱ ཏཐཱརཱུཔཾ ཨཱཧཱརཾ པསྶནྟི ཝཱ སརནྟི ཝཱ ཨུཎྷཏིཏྟཀཊུཀལོཎམྦིལཱནཾ ཝཱ ཀིཉྩི མུཁེ ཋཔེནྟི, ཡདཱ ཝཱ ནེསཾ ཧདཡཾ ཨཱཀིལཱཡཏི, ཀིསྨིཉྩིདེཝ ཝཱ ཛིགུཙྪཱ ཨུཔྤཛྫཏི, ཏདཱ ཁེལོ༹ ཨུཔྤཛྫིཏྭཱ ཨུབྷོཧི ཀཔོལཔསྶེཧི ཨོརུཡ྄ཧ ཛིཝ྄ཧཱཡ སཎྛཱཏི. ཨགྒཛིཝ྄ཧཱཡ ཙེས ཏནུཀོ ཧོཏི, མཱུལཛིཝ྄ཧཱཡ བཧལོ; མུཁེ པཀྑིཏྟཉྩ པུཐུཀཾ ཝཱ ཏཎྜུལཾ ཝཱ ཨཉྙཾ ཝཱ ཀིཉྩི ཁཱདནཱིཡཾ, ནདཱིཔུལི༹ནེ ཁཏཀཱུཔཀསལིལཾ ཝིཡ, པརིཀྑཡཾ ཨགཙྪནྟོཝ ཏེམེཏུཾ སམཏྠོ ཧོཏི. པརིཙྪེདཏོ ཁེལ༹བྷཱགེན པརིཙྪིནྣོ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

སིངྒྷཱཎིཀཱཏི མཏྠལུངྒཏོ པགྒྷརཎཀཨསུཙི. སཱ ཝཎྞཏོ ཏརུཎཏཱལཊྛིམིཉྫཝཎྞཱ. སཎྛཱནཏོ ཨོཀཱསསཎྛཱནཱ. དིསཏོ ཨུཔརིམཱཡ དིསཱཡ ཛཱཏཱ. ཨོཀཱསཏོ ནཱསཱཔུཊེ པཱུརེཏྭཱ ཋིཏཱ. ན ཙེསཱ ཨེཏྠ སདཱ སནྣིཙིཏཱ ཧུཏྭཱ ཏིཊྛཏི; ཨཐ ཁོ ཡཐཱ ནཱམ པུརིསོ པདུམིནཱིཔཏྟེན དདྷིཾ བནྡྷིཏྭཱ ཧེཊྛཱ ཀཎྚཀེན ཝིཛ྄ཛྷེཡྻ, ཨཐ ཏེན ཚིདྡེན དདྷིམཏྠུ གལི༹ཏྭཱ བཧི པཏེཡྻ, ཨེཝམེཝ ཡདཱ སཏྟཱ རོདནྟི ཝཱ ཝིསབྷཱགཱཧཱརཨུཏུཝསེན ཝཱ སཉྫཱཏདྷཱཏུཀྑོབྷཱ ཧོནྟི, ཏདཱ ཨནྟོསཱིསཏོ པཱུཏིསེམྷབྷཱཝཾ ཨཱཔནྣཾ མཏྠལུངྒཾ གལི༹ཏྭཱ ཏཱལུམཏྠཀཝིཝརེན ཨོཏརིཏྭཱ ནཱསཱཔུཊེ པཱུརེཏྭཱ ཏིཊྛཏི ཝཱ པགྒྷརཏི ཝཱ. སིངྒྷཱཎིཀཱ པརིགྒཎྷཀེན པན ཡོགིནཱ ནཱསཱཔུཊེ པཱུརེཏྭཱ ཋིཏཝསེནེཝ པརིགྒཎྷིཏབྦཱ. པརིཙྪེདཏོ སིངྒྷཱཎིཀཱབྷཱགེན པརིཙྪིནྣཱ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

ལསིཀཱཏི སརཱིརསནྡྷཱིནཾ ཨབྦྷནྟརེ པིཙྪིལཀུཎཔཾ. སཱ ཝཎྞཏོ ཀཎིཀཱརནིཡྻཱསཝཎྞཱ. སཎྛཱནཏོ ཨོཀཱསསཎྛཱནཱ. དིསཏོ དྭཱིསུ དིསཱསུ ཛཱཏཱ. ཨོཀཱསཏོ ཨཊྛིསནྡྷཱིནཾ ཨབྦྷཉྫནཀིཙྩཾ སཱདྷཡམཱནཱ ཨསཱིཏིསཏསནྡྷཱིནཾ ཨབྦྷནྟརེ ཋིཏཱ. ཡསྶ ཙེསཱ མནྡཱ ཧོཏི, ཏསྶ ཨུཊྛཧནྟསྶ ¶ ནིསཱིདནྟསྶ ཨབྷིཀྐམནྟསྶ པཊིཀྐམནྟསྶ སམྨིཉྫནྟསྶ པསཱརེནྟསྶ ཨཊྛིཀཱནི ཀཊཀཊཱཡནྟི, ཨཙྪརཱསདྡཾ ཀརོནྟོ ཝིཡ ཝིཙརཏི, ཨེཀཡོཛནདྭིཡོཛནམཏྟམྤི ཨདྡྷཱནཾ གཏསྶ ¶ ཝཱཡོདྷཱཏུ ཀུཔྤཏི, གཏྟཱནི དུཀྑནྟི. ཡསྶ པན བཧུཀཱ ཧོཏི ཏསྶ ཨུཊྛཱནནིསཛྫཱདཱིསུ ན ཨཊྛཱིནི ཀཊཀཊཱཡནྟི, དཱིགྷམྤི ཨདྡྷཱནཾ གཏསྶ ¶ ན ཝཱཡོདྷཱཏུ ཀུཔྤཏི, ན གཏྟཱནི དུཀྑནྟི. པརིཙྪེདཏོ ལསིཀཱབྷཱགེན པརིཙྪིནྣཱ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

མུཏྟནྟི ཝཎྞཏོ མཱསཁཱརོདཀཝཎྞཾ. སཎྛཱནཏོ ཨདྷོམུཁཋཔིཏཨུདཀཀུམྦྷནྟརགཏཨུདཀསཎྛཱནཾ. དིསཏོ ཧེཊྛིམཱཡ དིསཱཡ ཛཱཏཾ. ཨོཀཱསཏོ ཝཏྠིསྶ ཨབྦྷནྟརེ ཋིཏཾ. ཝཏྠི ནཱམ ཝཏྠིཔུཊོ ཝུཙྩཏི, ཡཏྠ སེཡྻཐཱཔི ནཱམ ཙནྡནིཀཱཡ པཀྑིཏྟེ ཨམུཁེ རཝཎགྷཊེ ཙནྡནིཀརསོ པཝིསཏི, ན ཙསྶ པཝིསནམགྒོ པཉྙཱཡཏི; ཨེཝམེཝ སརཱིརཏོ མུཏྟཾ པཝིསཏི, ན ཙསྶ པཝིསནམགྒོ པཉྙཱཡཏི, ནིཀྑམནམགྒོ པན པཱཀཊོ ཧོཏི; ཡམྷི ཙ མུཏྟསྶ བྷརིཏེ ‘པསྶཱཝཾ ཀརོམཱ’ཏི སཏྟཱནཾ ཨཱཡཱུཧནཾ ཧོཏི. པརིཙྪེདཏོ ཝཏྠིཨབྦྷནྟརེན ཙེཝ མུཏྟབྷཱགེན ཙ པརིཙྪིནྣཾ. ཨཡམསྶ སབྷཱགཔརིཙྪེདོ. ཝིསབྷཱགཔརིཙྪེདོ པན ཀེསསདིསོཝ.

ཨེཝཉྷི ཀེསཱདིཀེ ཀོཊྛཱསེ ཝཎྞསཎྛཱནདིསོཀཱསཔརིཙྪེདཝསེན ཝཝཏྠཔེཏྭཱ ཨནུཔུབྦཏོ ནཱཏིསཱིགྷཏོ ནཱཏིསཎིཀཏོཏིཨཱདིནཱ ནཡེན ཝཎྞསཎྛཱནགནྡྷཱསཡོཀཱསཝསེན པཉྩདྷཱ ‘པཊིཀྐཱུལཱ པཊིཀྐཱུལཱ’ཏི མནསིཀརོཏོ པཎྞཏྟིསམཏིཀྐམཝསེན, སེཡྻཐཱཔི ཙཀྑུམཏོ པུརིསསྶ དྭཏྟིཾསཝཎྞཱནཾ ཀུསུམཱནཾ ཨེཀསུཏྟགཎྛིཏཾ མཱལཾ ཨོལོཀེནྟསྶ སབྦཔུཔྥཱནི ཨཔུབྦཱཔརིཡམིཝ པཱཀཊཱནི ཧོནྟི, ཨེཝམེཝ ‘‘ཨཏྠི ཨིམསྨིཾ ཀཱཡེ ཀེསཱ’’ཏི ཨིམཾ ཀཱཡཾ ཨོལོཀེནྟསྶ སབྦེ ཏེ དྷམྨཱ ཨཔུབྦཱཔརིཡམིཝ པཱཀཊཱ ཧོནྟི. ཏེན ཝུཏྟཾ མནསིཀཱརཀོསལླཀཐཱཡཾ ‘‘ཨཱདིཀམྨིཀསྶ ཧི ‘ཀེསཱ’ཏི མནསིཀརོཏོ མནསིཀཱརོ གནྟྭཱ ‘མུཏྟ’ནྟི ཨིམཾ པརིཡོསཱནཀོཊྛཱསམེཝ ཨཱཧཙྩ ཏིཊྛཏཱི’’ཏི.

སཙེ པན བཧིདྡྷཱཔི མནསིཀཱརཾ ཨུཔསཾཧརཏི, ཨཐསྶ ཨེཝཾ སབྦཀོཊྛཱསེསུ པཱཀཊཱིབྷཱུཏེསུ ཨཱཧིཎྜནྟཱ མནུསྶཏིརཙྪཱནཱདཡོ སཏྟཱཀཱརཾ ཝིཛཧིཏྭཱ ཀོཊྛཱསརཱསིཝསེནེཝ ཨུཔཊྛཧནྟི; ཏེཧི ཙ ཨཛ྄ཛྷོཧརིཡམཱནཾ པཱནབྷོཛནཱདི ཀོཊྛཱསརཱསིམྷི པཀྑིཔིཡམཱནམིཝ ཨུཔཊྛཱཏི. ཨཐསྶ ཨནུཔུབྦམུཉྩནཱདིཝསེན ¶ ¶ ‘པཊིཀཱུལཱ པཊིཀཱུལཱ’ཏི པུནཔྤུནཾ མནསིཀརོཏོ ཨནུཀྐམེན ཨཔྤནཱ ཨུཔྤཛྫཏི.

ཏཏྠ ཀེསཱདཱིནཾ ཝཎྞསཎྛཱནདིསོཀཱསཔརིཙྪེདཝསེན ཨུཔཊྛཱནཾ ཨུགྒཧནིམིཏྟཾ, སབྦཱཀཱརཏོ པཊིཀཱུལཝསེན ཨུཔཊྛཱནཾ པཊིབྷཱགནིམིཏྟཾ. ཏཾ པུནཔྤུནཾ ཨཱཝཛྫེནྟསྶ མནསིཀརོནྟསྶ ¶ ཏཀྐཱཧཏཾ ཝིཏཀྐཱཧཏཾ ཀརོནྟསྶ ཙཏྟཱརོ ཁནྡྷཱ པཊིཀཱུལཱརམྨཎཱ ཧོནྟི, པཋམཛ྄ཛྷཱནཝསེན ཨཔྤནཱ པཝཏྟཏི. པུབྦབྷཱགེ པརིཀམྨཨུཔཙཱརཙིཏྟཱནི སཝིཏཀྐསཝིཙཱརཱནི སཔྤཱིཏིཀཱནི སོམནསྶསཧགཏཱནི པཊིཀཱུལནིམིཏྟཱརམྨཎཱནི; ཨཔྤནཱཔི སཝིཏཀྐསཝིཙཱརཱ སཔྤཱིཏིཀཱ སོམནསྶསཧགཏཱཝ. བྷཱུམནྟརེན པན མཧགྒཏཱ རཱུཔཱཝཙརཱ ཧོནྟི. པཊིཀྐཱུལེཔི ཙ ཨེཏསྨིཾ ཨཱརམྨཎེ ཨཱནིསཾསདསྶཱཝིཏཱཡ སོམནསྶཾ ཨུཔྤཛྫཏི, ཨེཀཏྟཱརམྨཎབལེནེཝ ཝཱ ཏཾ ཨུཔྤཛྫཏི. དུཏིཡཛ྄ཛྷཱནཱདཱིནི པནེཏྠ ན ནིབྦཏྟནྟི. ཀསྨཱ? ཨོལཱ༹རིཀཏྟཱ. ཨིདཉྷི ཨཱརམྨཎཾ ཨོལཱ༹རིཀཾ. ཝིཏཀྐབལེནེཝེཏྠ ཙིཏྟེཀགྒཏཱ ཛཱཡཏི, ན ཝིཏཀྐསམཏིཀྐམེནཱཏི. ཨཡཾ ཏཱཝ སམཐཝསེན ཀམྨཊྛཱནཀཐཱ.

ཨཝིསེསཏོ པན སཱདྷཱརཎཝསེན ཨེཝཾ ཝེདིཏབྦཾ – ཨིདཉྷི ཀམྨཊྛཱནཾ བྷཱཝེཏུཀཱམེན ཀམྨཊྛཱནཾ ཨུགྒཧེཏྭཱ སཛ྄ཛྷཱཡཀཱལེ ཨེཝ ཀེསཱདཱིནཾ ཝཎྞནིམིཏྟསཎྛཱནནིམིཏྟདིསཱནིམིཏྟཨོཀཱསནིམིཏྟཔརིཙྪེདནིམིཏྟཱནི ཝཱཙཱཡ པོཐེཏྭཱ པོཐེཏྭཱ ཨེཀེཀཀོཊྛཱསེ ‘ཨཡཾ ཨེཏཾསརིཀྑཀོ’ཏི ཏིཝིདྷེན སཛ྄ཛྷཱཡོ ཀཱཏབྦོ. ཀཐཾ? ཏཙཔཉྩཀེ ཏཱཝ ཧེཊྛཱ ཝུཏྟནཡེནེཝ ཨནུལོམཏོ པཉྩཱཧཾ, པཊིལོམཏོ པཉྩཱཧཾ, ཨནུལོམཔཊིལོམཏོ པཉྩཱཧནྟི ཨདྡྷམཱསཾ སཛ྄ཛྷཱཡོ ཀཱཏབྦོ. ཏཏོ ཨཱཙརིཡསྶ སནྟིཀཾ གནྟྭཱ ཝཀྐཔཉྩཀཾ ཨུགྒཎྷིཏྭཱ ཏཐེཝ ཨདྡྷམཱསཾ སཛ྄ཛྷཱཡོ ཀཱཏབྦོ. ཏཏོ ཏེ དསཔི ཀོཊྛཱསེ ཨེཀཏོ ཀཏྭཱ ཨདྡྷམཱསཾ. པུན པཔྥཱསཔཉྩཀཱདཱིསུཔི ཨེཀེཀཾ ཨུགྒཎྷིཏྭཱ ཨདྡྷམཱསཾ. ཏཏོ ཏེ པཉྩདསཔི ཀོཊྛཱསེ ཨདྡྷམཱསཾ. མཏྠལུངྒཔཉྩཀཾ ཨདྡྷམཱསཾ. ཏཏོ ཏེཝཱིསཏི ཀོཊྛཱསེ ཨདྡྷམཱསཾ. མེདཚཀྐཾ ཨདྡྷམཱསཾ. ཏཏོ ཏེ ཚབྦཱིསཏིཔི ཀོཊྛཱསེ ཨེཀཏོ ཀཏྭཱ ཨདྡྷམཱསཾ. མུཏྟཚཀྐཾ ཨདྡྷམཱསཾ. ཏཏོ སབྦེཔི ¶ དྭཏྟིཾས ཀོཊྛཱསེ ཨེཀཏོ ཀཏྭཱ ཨདྡྷམཱསནྟི ཨེཝཾ ཚ མཱསེ སཛ྄ཛྷཱཡོ ཀཱཏབྦོ.

ཏཏྠ – ཨུཔནིསྶཡསམྤནྣསྶ སཔྤཉྙསྶ བྷིཀྑུནོ ཀམྨཊྛཱནཾ ཨུགྒཎྷནྟསྶེཝ ཀོཊྛཱསཱ ཨུཔཊྛཧནྟི, ཨེཀཙྩསྶ ན ཨུཔཊྛཧནྟི. ཏེན ‘ན ཨུཔཊྛཧནྟཱི’ཏི ཝཱིརིཡཾ ¶ ན ཝིསྶཛྫེཏབྦཾ. ཡཏྟཀཱ ཀོཊྛཱསཱ ཨུཔཊྛཧནྟི ཏཏྟཀེ གཧེཏྭཱ སཛ྄ཛྷཱཡོ ཀཱཏབྦོ. ཨེཝཾ ཀམྨཊྛཱནཾ ཀཐེནྟེན པན ནེཝ པཉྙཝཏོ ན མནྡཔཉྙསྶ ཝསེན ཀཐེཏབྦཾ, མཛ྄ཛྷིམཔཉྙསྶ ཝསེན ཀཐེཏབྦཾ. མཛ྄ཛྷིམཔཉྙསྶ ཧི ཝསེན ཨཱཙརིཡཱ ཚཧི མཱསེཧི པརིཙྪིནྡིཏྭཱ ཏནྟིཾ ཋཔཡིཾསུ. ཡསྶ པན ཨེཏྟཱཝཏཱཔི ཀོཊྛཱསཱ པཱཀཊཱ ན ཧོནྟི, ཏེན ཏཏོ པརམྤི སཛ྄ཛྷཱཡོ ཀཱཏབྦོ ཨེཝ; ནོ ཙ ཁོ ཨཔརིཙྪིནྡིཏྭཱ, ཚ ཚ མཱསེ པརིཙྪིནྡིཏྭཱཝ ཀཱཏབྦོ.

སཛ྄ཛྷཱཡཾ ¶ ཀརོནྟེན ཝཎྞོ ན པཙྩཝེཀྑིཏབྦོ, ན ལཀྑཎཾ མནསིཀཱཏབྦཾ, ཀོཊྛཱསཝསེནེཝ སཛ྄ཛྷཱཡོ ཀཱཏབྦོ. ཨཱཙརིཡེནཱཔི ‘ཝཎྞཝསེན སཛ྄ཛྷཱཡཾ ཀརོཧཱི’ཏི ནིཡམེཏྭཱ ན ཀཐེཏབྦཾ. ནིཡམེཏྭཱ ཀཐིཏེ ཀོ དོསོཏི? སམྤཏྟིཡམྤི ཝིཔཏྟིསཉྙཱཨཱཔཛྫནཾ. སཙེ ཧི ཨཱཙརིཡེན ‘ཝཎྞཝསེན སཛ྄ཛྷཱཡཾ ཀརོཧཱི’ཏི ཝུཏྟེ ཨིམསྶ བྷིཀྑུནོ ཏཐཱ ཀརོནྟསྶ ཀམྨཊྛཱནཾ ཝཎྞཏོ ན ཨུཔཊྛཱཏི, པཊིཀཱུལཝསེན ཝཱ དྷཱཏུཝསེན ཝཱ ཨུཔཊྛཱཏི, ཨཐེས ‘ན ཨིདཾ ཀམྨཊྛཱནཾ ཝིལཀྑཎ’ནྟི སཉྙཱི ཧོཏི, ཨཱཙརིཡེན ཀཐིཏམེཝ ཀཔྤེཏྭཱ གཎྷཱཏི. ‘པཊིཀཱུལཝསེན སཛ྄ཛྷཱཡཾ ཀརོཧཱི’ཏི ཝུཏྟེཔི སཙེ ཏསྶ ཏཐཱ ཀརོནྟསྶ པཊིཀྐཱུལཏོ ན ཨུཔཊྛཱཏི, ཝཎྞཝསེན ཝཱ དྷཱཏུཝསེན ཝཱ ཨུཔཊྛཱཏི, ཨཐེས ‘ནཡིདཾ ཀམྨཊྛཱནཾ ཝིལཀྑཎ’ནྟི སཉྙཱི ཧོཏི, ཨཱཙརིཡེན ཀཐིཏམེཝ ཀཔྤེཏྭཱ གཎྷཱཏི. ‘དྷཱཏུཝསེན ཏཾ སཛ྄ཛྷཱཡཾ ཀརོཧཱི’ཏི ཝུཏྟེཔི སཙེ ཏསྶ ཏཐཱ ཀརོནྟསྶ དྷཱཏུཏོ ན ཨུཔཊྛཱཏི, ཝཎྞཝསེན ཝཱ པཊིཀཱུལཝསེན ཝཱ ཨུཔཊྛཱཏི, ཨཐེས ‘ནཡིདཾ ཀམྨཊྛཱནཾ ཝིལཀྑཎ’ནྟི སཉྙཱི ཧོཏི, ཨཱཙརིཡེན ཀཐིཏམེཝ ཀཔྤེཏྭཱ གཎྷཱཏི. ཨཡཾ ཨཱཙརིཡེན ནིཡམེཏྭཱ ཀཐིཏེ དོསོ.

ཀིནྟི པན ཝཏྟབྦོ ཧོཏཱིཏི? ‘ཀོཊྛཱསཝསེན སཛ྄ཛྷཱཡཾ ཀརོཧཱི’ཏི ཝཏྟབྦོ. ཀཐཾ? ‘ཀེསཀོཊྛཱསོ ལོམཀོཊྛཱསོཏི སཛ྄ཛྷཱཡཾ ཀརོཧཱི’ཏི ཝཏྟབྦོ. སཙེ པནསྶ ཨེཝཾ ཀོཊྛཱསཝསེན སཛ྄ཛྷཱཡཾ ཀརོནྟསྶ ཝཎྞཏོ ¶ ཨུཔཊྛཱཏི, ཨཐཱནེན ཨོཝཱདཱཙརིཡསྶ ཨཱཙིཀྑིཏབྦཾ – ‘ཨཧཾ དྭཏྟིཾསཱཀཱརཾ ཀོཊྛཱསཝསེན སཛ྄ཛྷཱཡཾ ཀརོམི; མཡ྄ཧཾ པན ཝཎྞཏོ ཨུཔཊྛཱཏཱི’ཏི. ཨཱཙརིཡེན ‘ཀམྨཊྛཱནཾ ཝིཡ ཨཀམྨཊྛཱནཾ, ཝིལཀྑཎཾ ཨེཏ’ནྟི ན ཝིསཾཝཱདེཏབྦཾ. ‘སཱདྷུ, སཔྤུརིས, པུབྦེ ཏཡཱ ཝཎྞཀསིཎེ པརིཀམྨཾ ཀཏཔུབྦཾ བྷཝིསྶཏི. ཨེཏདེཝ ཀམྨཊྛཱནཾ ཏུཡ྄ཧཾ སཔྤཱཡཾ. ཝཎྞཝསེནེཝ ¶ སཛ྄ཛྷཱཡཾ ཀརོཧཱི’ཏི ཝཏྟབྦོ. ཏེནཔི ཝཎྞཝསེནེཝ སཛ྄ཛྷཱཡོ ཀཱཏབྦོ.

སོ ཨེཝཾ ཀརོནྟོ ཨཛ྄ཛྷཏྟཾ ནཱིལཀཾ པཱིཏཀཾ ལོཧིཏཀཾ ཨོདཱཏཀནྟི ཙཏྟཱརི ཝཎྞཀསིཎཱནི ལབྷཏི. ཀཐཾ? ཏསྶ ཧི ཀེསལོམཔིཏྟེསུ ཙེཝ ཨཀྑཱིནཉྩ ཀཱལ༹ཀཊྛཱནེ ཝཎྞཾ ‘ནཱིལཾ ནཱིལ’ནྟི མནསིཀརོནྟསྶ ཙཏུཀྐཔཉྩཀཛ྄ཛྷཱནཱནི ཨུཔྤཛྫནྟི; ཛྷཱནཾ པཱདཀཾ ཀཏྭཱ ཝིཔསྶནཾ པཊྛཔེཏྭཱ ཨརཧཏྟཾ པཱཔུཎཱཏི. མེདསྨིཾ པན ཨཀྑཱིནཉྩ པཱིཏཀཊྛཱནེ ཝཎྞཾ ‘པཱིཏཀཾ པཱིཏཀ’ནྟི མནསིཀརོནྟསྶ ཙཏུཀྐཔཉྩཀཛ྄ཛྷཱནཱནི ཨུཔྤཛྫནྟི; ཛྷཱནཾ པཱདཀཾ ཀཏྭཱ ཝིཔསྶནཾ པཊྛཔེཏྭཱ ཨརཧཏྟཾ པཱཔུཎཱཏི. མཾསལོཧིཏེསུ པན ཨཀྑཱིནཉྩ རཏྟཊྛཱནེ ཝཎྞཾ ‘ལོཧིཏཀཾ ལོཧིཏཀ’ནྟི མནསིཀརོནྟསྶ ཙཏུཀྐཔཉྩཀཛ྄ཛྷཱནཱནི ཨུཔྤཛྫནྟི; ཛྷཱནཾ པཱདཀཾ ཀཏྭཱ ¶ ཝིཔསྶནཾ པཊྛཔེཏྭཱ ཨརཧཏྟཾ པཱཔུཎཱཏི. ནཁདནྟཙམྨཨཊྛཱིསུ པན ཨཀྑཱིནཉྩ པཎྜརཊྛཱནེ ཝཎྞཾ ‘ཨོདཱཏཾ ཨོདཱཏ’ནྟི མནསིཀརོནྟསྶ ཙཏུཀྐཔཉྩཀཛ྄ཛྷཱནཱནི ཨུཔྤཛྫནྟི, ཛྷཱནཾ པཱདཀཾ ཀཏྭཱ ཝིཔསྶནཾ པཊྛཔེཏྭཱ ཨརཧཏྟཾ པཱཔུཎཱཏི. ཨིདཾ ཝཎྞཝསེན ཨབྷིནིཝིཊྛསྶ བྷིཀྑུནོ ཡཱཝ ཨརཧཏྟཱ ནིགམནཾ.

ཨཔརསྶ ཀོཊྛཱསཝསེན སཛ྄ཛྷཱཡཾ ཀརོནྟསྶ པཊིཀཱུལཏོ ཨུཔཊྛཱཏི. ཨཐཱནེན ཨོཝཱདཱཙརིཡསྶ ཨཱཙིཀྑིཏབྦཾ. ཨཱཙརིཡེན ‘ཀམྨཊྛཱནཾ ཝིཡ ཨཀམྨཊྛཱནཾ, ཝིལཀྑཎཾ ཨེཏ’ནྟི ན ཝིསཾཝཱདེཏབྦཾ. ‘སཱདྷུ, སཔྤུརིས, པུབྦེ ཏཡཱ པཊིཀཱུལམནསིཀཱརེ ཡོགོ ཀཏོ བྷཝིསྶཏི. ཨེཏདེཝ ཀམྨཊྛཱནཾ ཏུཡ྄ཧཾ སཔྤཱཡཾ. པཊིཀཱུལཝསེནེཝ སཛ྄ཛྷཱཡཾ ཀརོཧཱི’ཏི ཝཏྟབྦོ. ཏེནཔི པཊིཀཱུལཝསེན སཛ྄ཛྷཱཡོ ཀཱཏབྦོ. ཏསྶ ཀེསཱ ནཱམ ‘ཨཛཉྙཱ དུགྒནྡྷཱ ཛེགུཙྪཱ པཊིཀཱུལཱ’ཏི ཨེཝཾ པཊིཀཱུལཝསེན སཛ྄ཛྷཱཡཾ ཀརོནྟསྶ པཊིཀཱུལཱརམྨཎེ པཋམཛ྄ཛྷཱནཾ ནིབྦཏྟཏི. སོ ཛྷཱནཾ པཱདཀཾ ཀཏྭཱ ཝིཔསྶནཾ པཊྛཔེཏྭཱ ཨརཧཏྟཾ པཱཔུཎཱཏི. ཨིདཾ ¶ པཊིཀཱུལཝསེན ཨབྷིནིཝིཊྛསྶ བྷིཀྑུནོ ཡཱཝ ཨརཧཏྟཱ ནིགམནཾ.

ཨཔརསྶ ཀོཊྛཱསཝསེན སཛ྄ཛྷཱཡཾ ཀརོནྟསྶ དྷཱཏུཏོ ཨུཔཊྛཱཏི. དྷཱཏུཏོ ཨུཔཊྛཧནྟཾ ཀཱིདིསཾ ཧུཏྭཱ ཨུཔཊྛཱཏཱིཏི? ཀེསཱ ཏཱཝ ཝམྨིཀམཏྠཀེ ཛཱཏཀུནྠཏིཎཀཱནི ཝིཡ ཧུཏྭཱ ཨུཔཊྛཧནྟི. ལོམཱ པུརཱཎགཱམཊྛཱནེ ཛཱཏདབྦཏིཎཀཱནི ཝིཡ. ནཁཱ དཎྜཀེསུ ཋཔིཏམདྷུཀཕལཊྛིཀོསཀཱ ཝིཡ. དནྟཱ མཏྟིཀཱཔིཎྜེ པཝེསེཏྭཱ ཋཔིཏཨལཱབུབཱིཛཱནི ཝིཡ. ཏཙོ ཝཱིཎཱཔབྦཀེ པརིཡོནདྡྷཨལླགོཙམྨཾ ཝིཡ, མཾསཾ བྷིཏྟིཡཾ ཨནུལིཏྟམཏྟིཀཱ ¶ ཝིཡ. ནྷཱརུ དབྦསམྦྷཱརབདྡྷཝལླཱི ཝིཡ. ཨཊྛི ཨུསྶཱཔེཏྭཱ ཋཔིཏབྷིཏྟིདབྦསམྦྷཱརོ ཝིཡ. ཨཊྛིམིཉྫཾ མཧཱཝེལུ༹མྷི པཀྑིཏྟསེདིཏཝེཏྟགྒཾ ཝིཡ. ཝཀྐཾ, ཧདཡཾ, ཡཀནཾ, ཀིལོམཀཾ, པིཧཀཾ, པཔྥཱསནྟི ཨིམེ ཚ ཀོཊྛཱསཱ སཱུནཀཱརགྷརཾ ཝིཡ ཧུཏྭཱ ཨུཔཊྛཧནྟི. དྭཏྟིཾསཧཏྠཾ ཨནྟཾ ལོཧིཏདོཎིཡཾ སཾཝེལླིཏྭཱ ཋཔིཏགྷརསཔྤོ ཝིཡ. ཨནྟགུཎཾ པཱདཔུཉྪནཀེ སིབྦིཏརཛྫུཀཱ ཝིཡ. ཨུདརིཡཾ པརིསྶཱཝནེ སིཐིལབནྡྷཏཎྜུལཾ ཝིཡ. ཀརཱིསཾ ཝེཎུཔབྦེ པཀྑིཏྟཔཎྜུམཏྟིཀཱ ཝིཡ. མཏྠལུངྒཾ ཨོམདྡིཏྭཱ ཋཔིཏཱ ཙཏྟཱརོ ཏཎྜུལཔིཊྛཔིཎྜཱ ཝིཡ. དྭཱདསཝིདྷཱ ཨཱཔོདྷཱཏུ པཊིཔཱཊིཡཱ ཋཔིཏེསུ དྭཱདསསུ ཨུདཀསརཱཝཀེསུ པཱུརིཏཨུདཀཾ ཝིཡ ཧུཏྭཱ ཨུཔཊྛཱཏི.

ཨཐཱནེན ཨོཝཱདཱཙརིཡསྶ ཨཱཙིཀྑིཏབྦཾ. ཨཱཙརིཡེན ‘ཀམྨཊྛཱནཾ ཝིཡ ཨཀམྨཊྛཱནཾ, ཝིལཀྑཎཾ ¶ ཨེཏ’ནྟི ན ཝིསཾཝཱདེཏབྦཾ. ‘སཱདྷུ, སཔྤུརིས, པུབྦེ ཏཡཱ དྷཱཏུམནསིཀཱརེ ཡོགོ ཀཏོ བྷཝིསྶཏི. ཨེཏདེཝ ཀམྨཊྛཱནཾ ཏུཡ྄ཧཾ སཔྤཱཡཾ. དྷཱཏུཝསེནེཝ སཛ྄ཛྷཱཡཾ ཀརོཧཱི’ཏི ཝཏྟབྦོ. ཏེནཔི དྷཱཏུཝསེན སཛ྄ཛྷཱཡོ ཀཱཏབྦོ.

ཏཏྲིདཾ མནསིཀཱརམུཁེནེཝ སཛ྄ཛྷཱཡཝིདྷཱནཾ – ཨིདྷ བྷིཀྑུ ‘ཀེསཱ སཱིསཾ པརིཡོནདྡྷིཏྭཱ ཋིཏཙམྨེ ཛཱཏཱ. ཏེ ན ཛཱནནྟི ‘མཡཾ སཱིསཾ པརིཡོནདྡྷིཏྭཱ ཋིཏཙམྨེ ཛཱཏཱ’ཏི; སཱིསཾ པརིཡོནདྡྷིཏྭཱ ཋིཏཙམྨམྤི ན ཛཱནཱཏི ‘ཀེསཱ མཡི ཛཱཏཱ’ཏི; ཨཙེཏནཱ ཨེཏེ ཨབྱཱཀཏཱ སུཉྙཱ ཐདྡྷཱ པཏྠིནྣཱ པཐཝཱིདྷཱཏུ ཨེསཱ’ཏི མནསིཀརོཏི. ‘ལོམཱ སརཱིརཾ པརིཡོནཧནཙམྨེ ཛཱཏཱ. ཏེ ན ཛཱནནྟི ‘མཡཾ སརཱིརཾ པརིཡོནཧནཙམྨེ ¶ ཛཱཏཱ’ཏི. སརཱིརཾ པརིཡོནཧནཙམྨམྤི ན ཛཱནཱཏི ‘ལོམཱ མཡི ཛཱཏཱ’ཏི ཨེཏེཔི ཨཙེཏནཱ. ནཁཱ ཨངྒུལཱིནཾ ཨགྒེསུ ཛཱཏཱ. ཏེ ན ཛཱནནྟི ‘མཡཾ ཨངྒུལཱིནཾ ཨགྒེསུ ཛཱཏཱ’ཏི. ཨངྒུལཱིནཾ ཨགྒཱནིཔི ན ཛཱནནྟི ‘ནཁཱ ཨམྷེསུ ཛཱཏཱ’ཏི. ཨེཏེཔི ཨཙེཏནཱ. དནྟཱ ཧནུཀཊྛིཀེ ཛཱཏཱ. ཏེ ན ཛཱནནྟི ‘མཡཾ ཧནུཀཊྛིཀེ ཛཱཏཱ’ཏི. ཧནུཀཊྛིཀམྤི ན ཛཱནཱཏི ‘དནྟཱ མཡི ཛཱཏཱ’ཏི. ཨེཏེཔི ཨཙེཏནཱ. ཏཙོ ན ཛཱནཱཏི ‘སརཱིརཾ མཡཱ པརིཡོནདྡྷ’ནྟི. སརཱིརམྤི ན ཛཱནཱཏི ‘ཨཧཾ ཏཙེན པརིཡོནདྡྷ’ནྟི. ཨཡམྤི ཨཙེཏནོ. མཾསཾ ན ཛཱནཱཏི ‘མཡཱ སརཱིརཾ ཨནུལིཏྟ’ནྟི. སརཱིརམྤི ན ཛཱནཱཏི ‘ཨཧཾ མཾསེན ཨནུལིཏྟ’ནྟི. ཨིདམྤི ཨཙེཏནཾ. ནྷཱརུ ན ཛཱནཱཏི ‘ཨཧཾ ¶ ཨཊྛིཔུཉྫཾ ཨཱབནྡྷིཏྭཱ ཋིཏ’ནྟི. ཨཊྛིཔུཉྫོཔི ན ཛཱནཱཏི ‘ནྷཱརུཛཱལེནཱཧཾ ཨཱབདྡྷོ’ཏི. ཨིདམྤི ཨཙེཏནཾ.

སཱིསཊྛི ན ཛཱནཱཏི ‘ཨཧཾ གཱིཝཊྛིཀེ པཏིཊྛིཏ’ནྟི. གཱིཝཊྛིཀམྤི ན ཛཱནཱཏི ‘མཡི སཱིསཊྛིཀཾ པཏིཊྛིཏ’ནྟི. གཱིཝཊྛི ན ཛཱནཱཏི ‘ཨཧཾ པིཊྛིཀཎྚཀེ ཋིཏ’ནྟི. པིཊྛིཀཎྚཊྛིཀོཔི ཀཊིཊྛིཀཾ ཨཱུརུཊྛིཀཾ ཛངྒྷཊྛིཀཾ གོཔྥཀཊྛིཀཾ ན ཛཱནཱཏི ‘ཨཧཾ པཎྷིཀཊྛིཀེ པཏིཊྛིཏ’ནྟི. པཎྷིཀཊྛིཀམྤི ན ཛཱནཱཏི ‘ཨཧཾ གོཔྥཀཊྛིཀཾ ཨུཀྑིཔིཏྭཱ ཋིཏནྟི…པེ… གཱིཝཊྛིཀཾ ན ཛཱནཱཏི ‘ཨཧཾ སཱིསཊྛིཀཾ ཨུཀྑིཔིཏྭཱ ཋིཏ’ནྟི.

པཊིཔཱཊིཡཱ ཨཊྛཱིནི ཋིཏཱནི ཀོཊིཡཱ,

ཨནེཀསནྡྷིཡམིཏོ ན ཀེཧིཙི;

བདྡྷོ ¶ ནཧཱརཱུཧི ཛརཱཡ ཙོདིཏོ,

ཨཙེཏནོ ཀཊྛཀལིངྒརཱུཔམོ.

‘ཨིདམྤི ཨཙེཏནཾ. ཨཊྛིམིཉྫཾ; ཝཀྐཾ…པེ… མཏྠལུངྒཾ ཨཙེཏནཾ ཨབྱཱཀཏཾ སུཉྙཾ ཐདྡྷཾ པཏྠིནྣཾ པཐཝཱིདྷཱཏཱུ’ཏི མནསིཀརོཏི. ‘པིཏྟཾ སེམྷཾ…པེ… མུཏྟཾ ཨཙེཏནཾ ཨབྱཱཀཏཾ སུཉྙཾ ཡཱུསགཏཾ ཨཱཔོདྷཱཏཱུ’ཏི མནསིཀརོཏི.

ཨིམེ དྭེ མཧཱབྷཱུཏེ པརིགྒཎྷནྟསྶ ཨུདརེ ཨུསྶདཱ ཏེཛོདྷཱཏུ པཱཀཊཱ ཧོཏི, ནཱསཱཡ ཨུསྶདཱ ཝཱཡོདྷཱཏུ པཱཀཊཱ ཧོཏི. ཨིམེ ཙཏྟཱརོ མཧཱབྷཱུཏེ པརིགྒཎྷནྟསྶ ཨུཔཱདཱརཱུཔཾ པཱཀཊཾ ཧོཏི. མཧཱབྷཱུཏཾ ནཱམ ཨུཔཱདཱརཱུཔེན པརིཙྪིནྣཾ, ཨུཔཱདཱརཱུཔཾ མཧཱབྷཱུཏེན. ཡཐཱ ཨཱཏཔོ ནཱམ ཚཱཡཱཡ པརིཙྪིནྣོ, ཚཱཡཱ ཨཱཏཔེན; ཨེཝམེཝ མཧཱབྷཱུཏཾ ཨུཔཱདཱརཱུཔེན པརིཙྪིནྣཾ ¶ , ཨུཔཱདཱརཱུཔཾ མཧཱབྷཱུཏེན. ཨཐསྶ ཨེཝཾ ‘‘ཙཏྟཱརི མཧཱབྷཱུཏཱནི ཏེཝཱིསཏི ཨུཔཱདཱརཱུཔཱནི རཱུཔཀྑནྡྷོ’’ཏི རཱུཔཀྑནྡྷཾ པརིགྒཎྷནྟསྶ ཨཱཡཏནདྭཱརཝསེན ཨརཱུཔིནོ ཁནྡྷཱ པཱཀཊཱ ཧོནྟི. ཨིཏི རཱུཔཱརཱུཔཔརིགྒཧོ པཉྩཀྑནྡྷཱ ཧོནྟི, པཉྩཀྑནྡྷཱ དྭཱདསཱཡཏནཱནི ཧོནྟི, དྭཱདསཱཡཏནཱནི ཨཊྛཱརས དྷཱཏུཡོ ཧོནྟཱིཏི ཁནྡྷཱཡཏནདྷཱཏུཝསེན ཡམཀཏཱལཀནྡྷཾ ཕཱལེནྟོ ཝིཡ དྭེ ཀོཊྛཱསེ ཀཏྭཱ ནཱམརཱུཔཾ ཝཝཏྠཔེཏི.

སོ ‘‘ཨིདཾ ནཱམརཱུཔཾ ན ཨཧེཏུ ན ཨཔྤཙྩཡཱ ནིབྦཏྟཾ, སཧེཏུ སཔྤཙྩཡཱ ནིབྦཏྟཾ. ཀོ པནསྶ ཧེཏུ? ཀོ པན པཙྩཡོ’’ཏི ཨུཔཔརིཀྑནྟོ ‘‘ཨཝིཛྫཱཔཙྩཡཱ ¶ ཏཎྷཱཔཙྩཡཱ ཀམྨཔཙྩཡཱ ཨཱཧཱརཔཙྩཡཱ ཙཱ’’ཏི ཏསྶ པཙྩཡཾ ཝཝཏྠཔེཏྭཱ ‘‘ཨཏཱིཏེཔི པཙྩཡཱ ཙེཝ པཙྩཡསམུཔྤནྣདྷམྨཱ ཙ ཨནཱགཏེཔི ཨེཏརཧིཔི པཙྩཡཱ ཙེཝ པཙྩཡསམུཔྤནྣདྷམྨཱ ཙ, ཏཏོ ཨུདྡྷཾ སཏྟོ ཝཱ པུགྒལོ ཝཱ ནཏྠི, སུདྡྷསངྑཱརཔུཉྫོ ཨེཝཱ’’ཏི – ཨེཝཾ ཏཱིསུ ཨདྡྷཱསུ ཀངྑཾ ཝིཏརཏི. ཨཡཾ པན ཝིཔསྶནཱསངྑཱརསལླཀྑཎཱ ཉཱཏཔརིཉྙཱ ནཱམ.

ཨེཝཾ སངྑཱརེ སལླཀྑེཏྭཱ ཋིཏསྶ པན བྷིཀྑུསྶ དསབལསྶ སཱསནེ མཱུལཾ ཨོཏིཎྞཾ ནཱམ ཧོཏི, པཏིཊྛཱ ལདྡྷཱ ནཱམ, ཙཱུལ༹སོཏཱཔནྣོ ནཱམ ཧོཏི ནིཡཏགཏིཀོ. ཏཐཱརཱུཔཾ པན ཨུཏུསཔྤཱཡཾ, པུགྒལསཔྤཱཡཾ, བྷོཛནསཔྤཱཡཾ, དྷམྨསཝཎསཔྤཱཡཾ ལབྷིཏྭཱ ཨེཀཱསནེ ཨེཀཔལླངྐཝརགཏོ ¶ ཏཱིཎི ལཀྑཎཱནི ཨཱརོཔེཏྭཱ ཝིཔསྶནཱཔཊིཔཱཊིཡཱ སངྑཱརེ སམྨསནྟོ ཨརཧཏྟཾ གཎྷཱཏཱིཏི ཨིདཾ དྷཱཏུཝསེན ཨབྷིནིཝིཊྛསྶ བྷིཀྑུནོ ཡཱཝ ཨརཧཏྟཱ ནིགམནཾ.

ཡསྶ པན ནེཝ ཝཎྞཏོ ཨུཔཊྛཱཏི ན པཊིཀཱུལཏོ ན སུཉྙཏོ ཏེན ‘ན མེ ཨུཔཊྛཱཏཱི’ཏི ན ཀམྨཊྛཱནཾ ཝིསྶཛྫེཏྭཱ ནིསཱིདིཏབྦཾ, ཀོཊྛཱསམནསིཀཱརེཡེཝ པན ཡོགོ ཀཱཏབྦོ. པོརཱཎཀཏྠེརཱ ཀིར ‘ཀོཊྛཱསམནསིཀཱརོཝ པམཱཎ’ནྟི ཨཱཧཾསུ. ཨིཙྩསྶ པུནཔྤུནཾ ཀོཊྛཱསཝསེན སཛ྄ཛྷཱཡཾ ཀརོནྟསྶ ཀོཊྛཱསཱ པགུཎཱ ཧོནྟི. ཀདཱ པན པགུཎཱ ནཱམ ཧོནྟཱིཏི? ཡདཱ ‘ཀེསཱ’ཏི ཨཱཝཛྫིཏམཏྟེ མནསིཀཱརོ གནྟྭཱ ‘མཏྠལུངྒ’ནྟི ཨནྟིམཀོཊྛཱསེ པཏིཊྛཱཏི, ‘མཏྠལུངྒ’ནྟི ཨཱཝཛྫིཏམཏྟེ མནསིཀཱརོ ཨཱགནྟྭཱ ‘ཀེསཱ’ཏི ཨཱདིཀོཊྛཱསེ པཏིཊྛཱཏི.

ཨཐསྶ ཡཐཱ ནཱམ ཙཀྑུམཏོ པུརིསསྶ དྭཏྟིཾསཝཎྞཱནཾ ¶ པུཔྥཱནཾ ཨེཀསུཏྟགནྠིཏཾ མཱལཾ ཨོལོཀེནྟསྶ པཊིཔཱཊིཡཱ ཝཱ པན ནིཁཱཏེ དྭཏྟིཾསཝཏིཔཱདེ པཊིཀྐམིཏྭཱ ཨོལོཀེནྟསྶ པཊིཔཱཊིཡཱཝ དྭཏྟིཾསཝཎྞཱནི པུཔྥཱནི ཝཏིཔཱདཱ ཝཱ པཱཀཊཱ ཧོནྟི, ཨེཝམེཝ དྭཏྟིཾས ཀོཊྛཱསཱ ཨུཔཊྛཧནྟི, ཝིཙརནྟཱ ཏིརཙྪཱནགཏཱཔི མནུསྶཱཔི སཏྟཱཏི ན ཨུཔཊྛཧནྟི, ཀོཊྛཱསཱཏི ཨུཔཊྛཧནྟི, ཁཱདནཱིཡབྷོཛནཱིཡཾ ཀོཊྛཱསནྟརེ པཀྑིཔྤམཱནཾ ཝིཡ ཧོཏི.

ཀོཊྛཱསཱནཾ པགུཎཀཱལཏོ པཊྛཱཡ ཏཱིསུ མུཁེསུ ཨེཀེན མུཁེན ཝིམུཙྩིསྶཏི. ཀམྨཊྛཱནཾ ཝཎྞཏོ ཝཱ པཊིཀཱུལཏོ ཝཱ སུཉྙཏོ ཝཱ ཨུཔཊྛཱཏི ¶ . ཡཐཱ ནཱམ པཱུཝེ པཙིཏུཀཱམཱ ཨིཏྠཱི མདྡིཏྭཱ ཋཔིཏཔིཊྛཏོ ཡཾ ཡཾ ཨིཙྪཏི ཏཾ ཏཾ པཙཏི, ཡཐཱ ཝཱ པན སམེ བྷཱུམིཔྤདེསེ ཋཔིཏཾ ཨུདཀཔཱུརཾ ཀུམྦྷཾ ཡཏོ ཡཏོ ཨཱཝིཛ྄ཛྷནྟི ཏཏོ ཏཏོཝ ཨུདཀཾ ནིཀྑམཏི; ཨེཝམེཝ ཀོཊྛཱསཱནཾ པགུཎཀཱལཏོ པཊྛཱཡ ཏཱིསུ མུཁེསུ ཨེཀེན མུཁེན ཝིམུཙྩིསྶཏི. ཨཱཀངྑམཱནསྶ ཝཎྞཏོ, ཨཱཀངྑམཱནསྶ པཊིཀཱུལཏོ, ཨཱཀངྑམཱནསྶ སུཉྙཏོ ཀམྨཊྛཱནཾ ཨུཔཊྛཧིསྶཏིཡེཝ. ཨཡཾ ཨེཏྟཀོ ཨུགྒཧསནྡྷི ནཱམ. ཨིམསྨིཾ ཨུགྒཧསནྡྷིསྨིཾ ཋཏྭཱ ཨརཧཏྟཾ པཏྟཱ བྷིཀྑུ གཎནཔཐཾ ཝཱིཏིཝཏྟཱ.

ཡསྶ པན ཨུགྒཧསནྡྷིསྨིཾ ཀམྨཊྛཱནཾ ན ཨུཔཊྛཱཏི, ཏེན ཀམྨཊྛཱནཾ ཨུགྒཧེཏྭཱ, སཙེ ཡཏྠ ཨཱཙརིཡོ ཝསཏི, སོ ཨཱཝཱསོ སཔྤཱཡོ ཧོཏི, ཨིཙྩེཏཾ ཀུསལཾ; ནོ ཙེ, སཔྤཱཡཊྛཱནེ ཝསིཏབྦཾ. ཝསནྟེན ཨཊྛཱརས ཝིཧཱརདོསེ (ཝིསུདྡྷི. ༡.༥༢) ཝཛྫེཏྭཱ པཉྩངྒསམནྣཱགཏེ སེནཱསནེ ¶ ཝསིཏབྦཾ, སཡམྤི པཉྩངྒསམནྣཱགཏེན བྷཝིཏབྦཾ. ཏཏོ པཙྪཱབྷཏྟཾ པིཎྜཔཱཏཔཊིཀྐནྟེན རཏྟིཊྛཱནཾ ཝཱ དིཝཱཊྛཱནཾ ཝཱ པཝིསིཏྭཱ ཀམྨཊྛཱནཾ མནསིཀཱཏབྦཾ.

ཀཐཾ? ཨཱདིཏོ ཏཱཝ ཧེཊྛཱ ཝུཏྟནཡེནེཝ ཨནུཔུབྦཏོ མནསིཀཱཏབྦཾ, ན ཨེཀནྟརིཀཱ. ཨནུཔུབྦཏོ མནསིཀརོནྟོ ཧི དྭཏྟིཾསཔདཾ ནིསྶེཎིཾ པདཔཊིཔཱཊིཡཱ ཨཀྐམནྟོ པཱསཱདཾ ཨཱརུཡ྄ཧ པཱསཱདཱནིསཾསཾ ཨནུབྷཝནཀཔུརིསོ ཝིཡ ‘ཀེསཱ ལོམཱ’ཏི པཊིཔཱཊིཡཱ ཀམྨཊྛཱནཾ མནསིཀརོནྟོ ཀམྨཊྛཱནཏོ ཙ ན པརིཧཱཡཏི, པཱསཱདཱནིསཾསསདིསེ ཙ ནཝ ལོཀུཏྟརདྷམྨེ ཨནུབྷཝཏི. ཨནུཔུབྦཏོ མནསིཀརོནྟེནཱཔི ཙ ནཱཏིསཱིགྷཏོ ནཱཏིསཎིཀཏོ ¶ མནསིཀཱཏབྦཾ. ཨཏིསཱིགྷཏོ མནསིཀརོནྟསྶ ཧི ཀིཉྩཱཔི ཀམྨཊྛཱནཾ པགུཎཾ ཧོཏི, ཨཝིབྷཱུཏཾ པན ཧོཏི. ཏཏྠ ཨོཔམྨཾ ཧེཊྛཱ ཝུཏྟམེཝ.

ཨཏིསཎིཀཏོ མནསིཀརོནྟསྶ ཀམྨཊྛཱནཾ པརིཡོསཱནཾ ན གཙྪཏི, ཨནྟརཱཝ ཨོསཀྐིཏབྦཾ ཧོཏི. ཡཐཱ ཧི པུརིསོ ཏིཡོཛནཾ མགྒཾ སཱཡཾ ཀཙྪཾ བནྡྷིཏྭཱ པཊིཔནྣོ ནིཀྑནྟཊྛཱནཏོ པཊྛཱཡ སཱིཏལཙྪཱཡཾ དིསྭཱ ཝིསྶམཏི, རམཎཱིཡཾ ཝཱལིཀཏལཾ དིསྭཱ པིཊྛིཾ པསཱརེཏི, ཝནཔོཀྑརཎིཾ དིསྭཱ པཱནཱིཡཾ པིཝཏི ནྷཱཡཏི, པབྦཏཾ དིསྭཱ ཨཱརུཡ྄ཧ པབྦཏརཱམཎེཡྻཀཾ པསྶཏི, ཏཾ ཨནྟརཱཡེཝ སཱིཧོ ཝཱ བྱགྒྷོ ཝཱ དཱིཔི ཝཱ ཧནཏི, ཙོརཱ ཝཱ པན ¶ ཝིལུཔྤནྟི ཙེཝ ཧནནྟི ཙ; ཨེཝམེཝ ཨཏིསཎིཀཾ མནསིཀརོནྟསྶ ཀམྨཊྛཱནཾ པརིཡོསཱནཾ ན གཙྪཏི, ཨནྟརཱཝ ཨོསཀྐིཏབྦཾ ཧོཏི.

ཏསྨཱ ནཱཏིསཱིགྷཾ ནཱཏིསཎིཀཾ ཨེཀདིཝསཾ ཏིཾསཝཱརེ མནསིཀཱཏབྦཾ; པཱཏོཝ དས ཝཱརེ, མཛ྄ཛྷནྷིཀེ དསཝཱརེ, སཱཡནྷེ དས ཝཱརེ སཛ྄ཛྷཱཡོ ཀཱཏབྦོ, ནོ ཀཱཏུཾ ན ཝཊྚཏི. ཡཐཱ ཧི པཱཏོཝ ཨུཊྛཱཡ མུཁཾ ནོ དྷོཝིཏུཾ ན ཝཊྚཏི, ཁཱདནཱིཡཾ བྷོཛནཱིཡཾ ནོ ཁཱདིཏུཾ ནོ བྷུཉྫིཏུཾ ན ཝཊྚཏི; ཨེཏཾ པན ཝཊྚེཡྻ; ཨིདམེཝ ཨེཀནྟེན ནོ ཀཱཏུཾ ན ཝཊྚཏི; ཀརོནྟོ མཧནྟཾ ཨཏྠཾ གཧེཏྭཱ ཏིཊྛཏི. ཡཐཱ ཧི ཨེཀསྶ པུརིསསྶ ཏཱིཎི ཁེཏྟཱནི; ཨེཀཾ ཁེཏྟཾ ཨཊྛཀུམྦྷཾ དེཏི, ཨེཀཾ སོལ༹ས, ཨེཀཾ དྭཏྟིཾས; ཏེན ཏཱིཎིཔི ཁེཏྟཱནི པཊིཛགྒིཏུཾ ཨསཀྐོནྟེན དྭེ ཚཌྜེཏྭཱ ཨེཀཾ དྭཏྟིཾསཀུམྦྷདཱཡཀམེཝ པཊིཛགྒིཏབྦཾ; ཏཏྠེཝ ཀསནཝཔནནིདྡཱནཱདཱིནི ཀཱཏབྦཱནི; ཏདེཝསྶ ཨིཏརེསུ དྭཱིསུ ཨུཊྛཱནཀདཱཡཾ དསྶཏི; ཨེཝམེཝ སེསཾ མུཁདྷོཝནཱདིཀམྨཾ ཚཌྜེཏྭཱཔི ཨེཏྠེཝ ¶ ཀམྨཾ ཀཱཏབྦཾ, ནོ ཀཱཏུཾ ན ཝཊྚཏི. ཀརོནྟོ མཧནྟཾ ཨཏྠཾ གཎྷིཏྭཱ ཏིཊྛཏཱིཏི ཨེཏྟཱཝཏཱ མཛ྄ཛྷིམཱ པཊིཔདཱ ནཱམ ཀཐིཏཱ.

ཨེཝཾ པཊིཔནྣེནཱཔི ཝིཀྑེཔོ པཊིབཱཧིཏབྦོ. ཀམྨཊྛཱནཉྷི ཝིསྶཛྫེཏྭཱ ཙིཏྟེ བཧིདྡྷཱ ཝིཀྑེཔཾ གཙྪནྟེ ཀམྨཊྛཱནཏོ པརིཧཱཡཏི, ཝཊྚབྷཡཾ སམཏིཀྐམིཏུཾ ན སཀྐོཏི. ཡཐཱ ཧི ཨེཀོ པུརིསོ སཧསྶུདྡྷཱརཾ སཱདྷེཏྭཱ ཝཌྜྷིཾ ལབྷིཏྭཱ ཨདྡྷཱནཾ པཊིཔནྣོ ཨནྟརཱམགྒེ ཀུམྦྷཱིལམཀརགཱཧརཀྑསསམུཊྛིཏཱཡ ¶ གམྦྷཱིརགིརིཀནྡརཱཡ ཨུཔརི ཨཏྠཏཾ ཨེཀཔདིཀཾ དཎྜཀསེཏུཾ ཨཱརུཡ྄ཧ གཙྪནྟོ ཨཀྐམནཔདཾ ཝིསྶཛྫེཏྭཱ ཨིཏོ ཙིཏོ ཙ ཨོལོཀེནྟོ པརིཔཏིཏྭཱ ཀུམྦྷཱིལཱདིབྷཏྟཾ ཧོཏི, ཨེཝམེཝ ཨཡམྤི ཀམྨཊྛཱནཾ ཝིསྶཛྫེཏྭཱ སཙིཏྟེ བཧིདྡྷཱ ཝིཀྑེཔཾ གཙྪནྟེ ཀམྨཊྛཱནཏོ པརིཧཱཡཏི, ཝཊྚབྷཡཾ སམཏིཀྐམིཏུཾ ན སཀྐོཏི.

ཏཏྲིདཾ ཨོཔམྨསཾསནྡནཾ – པུརིསསྶ སཧསྶུདྡྷཱརཾ སཱདྷེཏྭཱ ཝཌྜྷིཾ ལདྡྷཀཱལོ ཝིཡ ཧི ཨིམསྶ བྷིཀྑུནོ ཨཱཙརིཡསནྟིཀེ ཀམྨཊྛཱནསྶ ཨུགྒཧིཏཀཱལོ; ཨནྟརཱ གམྦྷཱིརགིརིཀནྡརཱ ཝིཡ སཾསཱརོ; ཏསྶ ཀུམྦྷཱིལཱདཱིཧི དཊྛཀཱལོ ཝིཡ ཝཊྚམཱུལཀཱནི མཧཱདུཀྑཱནི; ཨེཀཔདིཀདཎྜཀསེཏུ ཝིཡ ཨིམསྶ བྷིཀྑུནོ སཛ྄ཛྷཱཡཝཱིཐི; ཏསྶ པུརིསསྶ ཨེཀཔདིཀཾ ¶ དཎྜཀསེཏུཾ ཨཱརུཡ྄ཧ ཨཀྐམནཔདཾ ཝིསྶཛྫེཏྭཱ ཨིཏོ ཙིཏོ ཙ ཨོལོཀེནྟསྶ པརིཔཏིཏྭཱ ཀུམྦྷཱིལཱདཱིནཾ བྷཏྟབྷཱཝཾ ཨཱཔནྣཀཱལོ ཝིཡ ཨིམསྶ བྷིཀྑུནོ ཀམྨཊྛཱནཾ ཝིསྶཛྫེཏྭཱ བཧིདྡྷཱ ཝིཀྑིཏྟཙིཏྟསྶ ཀམྨཊྛཱནཏོ པརིཧཱཡིཏྭཱ ཝཊྚབྷཡཾ སམཏིཀྐམིཏུཾ ཨསམཏྠབྷཱཝོ ཝེདིཏབྦོ.

ཏསྨཱ ཀེསཱ མནསིཀཱཏབྦཱ. ཀེསེ མནསིཀརིཏྭཱ ཙིཏྟུཔྤཱདསྶ བཧིདྡྷཱ ཝིཀྑེཔཾ པཊིབཱཧིཏྭཱ སུདྡྷཙིཏྟེནེཝ ‘ལོམཱ ནཁཱ དནྟཱ ཏཙོ’ཏི མནསིཀཱཏབྦཾ. ཨེཝཾ མནསིཀརོནྟོ ཀམྨཊྛཱནཏོ ན པརིཧཱཡཏི, ཝཊྚབྷཡཾ སམཏིཀྐམཏི. ཨོཔམྨཾ པནེཏྠ ཏདེཝ པརིཝཏྟེཏྭཱ ཝེདིཏབྦཾ. སཧསྶུདྡྷཱརཾ སཱདྷེཏྭཱ ཝཌྜྷིཾ ལབྷིཏྭཱ ཚེཀསྶ པུརིསསྶ དཎྜཀསེཏུཾ ཨཱརུཡ྄ཧ ནིཝཱསནཔཱརུཔནཾ སཾཝིདྷཱཡ དྷཱཏུཔཏྠདྡྷཀཱཡཾ ཀཏྭཱ སོཏྠིནཱ པརཏཱིརགམནཾ ཝིཡ ཚེཀསྶ བྷིཀྑུནོ ཀེསེ མནསིཀརིཏྭཱ ཙིཏྟུཔྤཱདསྶ བཧིདྡྷཱ ཝིཀྑེཔཾ པཊིབཱཧིཏྭཱ སུདྡྷཙིཏྟེནེཝ ‘ལོམཱ ནཁཱ དནྟཱ ཏཙོ’ཏི མནསིཀརོནྟསྶ ཀམྨཊྛཱནཏོ ཨཔརིཧཱཡིཏྭཱ ཝཊྚབྷཡཾ སམཏིཀྐམནཾ ཝེདིཏབྦཾ.

ཨེཝཾ ¶ བཧིདྡྷཱ ཝིཀྑེཔཾ པཊིབཱཧནྟེནཱཔི ཧེཊྛཱ ཝུཏྟནཡེནེཝ པཎྞཏྟིཾ སམཏིཀྐམནཏོ མནསིཀཱཏབྦཾ. ‘ཀེསཱ ལོམཱ’ཏི པཎྞཏྟིཾ ཝིསྶཛྫེཏྭཱ ‘པཊིཀཱུལཾ པཊིཀཱུལ’ནྟི སཏི ཋཔེཏབྦཱ. པཋམཾཡེཝ པན པཊིཀཱུལཏོ ན ཨུཔཊྛཱཏི ¶ . ཡཱཝ ན ཨུཔཊྛཱཏི ཏཱཝ པཎྞཏྟི ན ཝིསྶཛྫེཏབྦཱ. ཡདཱ ཨུཔཊྛཱཏི ཏདཱ པཎྞཏྟིཾ ཝིསྶཛྫེཏྭཱ ‘པཊིཀཱུལ’ནྟི མནསིཀཱཏབྦཾ. ཀརོནྟེན ཙ ཧེཊྛཱ ཝུཏྟནཡེནེཝ པཉྩཧཱཀཱརེཧི པཊིཀཱུལཏོ མནསིཀཱཏབྦཱ. ཏཙཔཉྩཀསྨིཉྷི ཝཎྞསཎྛཱནགནྡྷཱསཡོཀཱསཝསེནེཝ པཉྩཝིདྷམྤི པཱཊིཀཱུལྱཾ ལབྦྷཏི. སེསེསུཔི ཡཾ ཡཾ ལབྦྷཏི, ཏསྶ ཏསྶ ཝསེན མནསིཀཱརོ པཝཏྟེཏབྦོ.

ཏཏྠ ཀེསཱདཡོ པཉྩ ཀོཊྛཱསཱ སུབྷནིམིཏྟཾ རཱགཊྛཱནིཡཾ ཨིཊྛཱརམྨཎནྟི སངྑཾ གཏཱ. ཡེ ཀེཙི རཛྫནཀསཏྟཱ ནཱམ, སབྦེ ཏེ ཨིམེསུ པཉྩསུ ཀོཊྛཱསེསུ རཛྫནྟི. ཨཡཾ པན བྷིཀྑུ མཧཱཛནསྶ རཛྫནཊྛཱནེ ‘པཊིཀཱུལ’ནྟི ཨཔྤནཾ པཱཔེཏི. ཏཏྠ ཨཔྤནཱཔྤཏྟིཏོ པཊྛཱཡ པརཏོ ཨཀིལམནྟོཝ ཨཔྤནཾ པཱཔུཎཱཏི.

ཏཏྲིདཾ ཨོཔམྨཾ – ཡཐཱ ཧི ཚེཀོ དྷནུགྒཧོ རཱཛཱནཾ ཨཱརཱདྷེཏྭཱ སཏསཧསྶུཊྛཱནཀཾ གཱམཝརཾ ལབྷིཏྭཱ སནྣདྡྷཔཉྩཱཝུདྷོ ཏཏྠ གཙྪནྟོ ཨནྟརཱམགྒེ ¶ དྭཏྟིཾས ཙོརེ དིསྭཱ ཏེསུ པཉྩཙོརཛེཊྛཀེ གྷཱཏེཡྻ; ཏེསཾ གྷཱཏིཏཀཱལཏོ པཊྛཱཡ ཏེསུ དྭེ ཨེཀམགྒཾ པཊིཔཛྫམཱནཱ ནཱམ ན ཧོནྟི; ཨེཝཾསམྤདམིདཾ དཊྛབྦཾ. དྷནུགྒཧསྶ རཱཛཱནཾ ཨཱརཱདྷེཏྭཱ གཱམཝརཾ ལདྡྷཀཱལོ ཝིཡ ཧི ཨིམསྶ བྷིཀྑུནོ ཨཱཙརིཡསནྟིཀེ ཀམྨཊྛཱནཾ ཨུགྒཧེཏྭཱ ཋིཏཀཱལོ; དྭཏྟིཾས ཙོརཱ ཝིཡ དྭཏྟིཾས ཀོཊྛཱསཱ; པཉྩ ཙོརཛེཊྛཀཱ ཝིཡ ཀེསཱདཡོ པཉྩ; ཙོརཛེཊྛཀཱནཾ གྷཱཏིཏཀཱལོ ཝིཡ ཨིམསྶ བྷིཀྑུནོ སབྦསཏྟཱནཾ རཛྫནཊྛཱནེ ཏཙཔཉྩཀེ ‘པཊིཀཱུལ’ནྟི ཨཔྤནཱཡ པཱཔིཏཀཱལོ; སེསཙོརཱནཾ པཱཎིཔྤཧཱརེནེཝ པལཱཡིཏཀཱལོ ཝིཡ སེསཀོཊྛཱསེསུ ཨཀིལམནྟསྶེཝ ཨཔྤནཱཔྤཏྟི ཝེདིཏབྦཱ.

ཨེཝཾ པཎྞཏྟིཾ སམཏིཀྐམནྟེན ཙ ཨནུཔུབྦམུཉྩནཏོ མནསིཀཱརོ པཝཏྟེཏབྦོ – ཀེསེ མནསིཀརོནྟེན མནསིཀརོནྟེནེཝ ཀེསེསུ སཱཔེཀྑེན ཧུཏྭཱ ལོམེསུ སཏི པེསེཏབྦཱ. ཡཱཝ ལོམཱ ན ཨུཔཊྛཧནྟི ཏཱཝ ‘ཀེསཱ ཀེསཱ’ཏི མནསིཀཱཏབྦཱ. ཡདཱ པན ལོམཱ ཨུཔཊྛཧནྟི ཏདཱ ཀེསེ ཝིསྶཛྫེཏྭཱ ལོམེསུ སཏི ཨུཔཊྛཔེཏབྦཱ. ཨེཝཾ ནཁཱདཱིསུཔི མནསིཀཱརོ པཝཏྟེཏབྦོ.

ཏཏྲིདཾ ¶ ཨོཔམྨཾ – ཡཐཱ ཧི ཛལཱུཀཱ གཙྪམཱནཱ ཡཱཝ པུརཏོ ¶ པཏིཊྛཾ ན ལབྷཏི ཏཱཝ པཙྪཏོ ནངྒུཊྛེན གཧིཏཊྛཱནཾ ན མུཉྩཏི; ཡདཱ པན པུརཏོ པཏིཊྛཾ ལབྷཏི ཏདཱ ནངྒུཊྛཾ ཨུཀྑིཔིཏྭཱ མུཁེན གཧིཏཊྛཱནེ ཋཔེཏི; ཨེཝམེཝ ཀེསེ མནསིཀརོནྟེན མནསིཀརོནྟེནེཝ ཀེསེསུ སཱཔེཀྑེན ཧུཏྭཱ ལོམེསུ སཏི པེསེཏབྦཱ. ཡཱཝ ལོམཱ ན ཨུཔཊྛཧནྟི ཏཱཝ ‘ཀེསཱ ཀེསཱ’ཏི མནསིཀཱཏབྦཱ. ཡདཱ ལོམཱ ཨུཔཊྛཧནྟི ཏདཱ ཀེསེ ཝིསྶཛྫེཏྭཱ ལོམེསུ སཏི ཨུཔཊྛཔེཏབྦཱ. ཨེཝཾ ནཁཱདཱིསུཔི མནསིཀཱརོ པཝཏྟེཏབྦོ.

ཨེཝཾ པཝཏྟེནྟེན ཨཔྤནཱ ཧོཏཱིཏི ཝུཏྟམནསིཀཱརཀོསལླཾ སམྤཱདེཏབྦཾ. ཀཐཾ? ཨིདཉྷི ཨཔྤནཱཀམྨཊྛཱནཾ མནསིཀརོནྟསྶ ཨཔྤནཾ པཱཔུཎཱཏི; པཋམཾཡེཝ ཏཱཝ ན ཨུཔཊྛཱཏི; ཨནམཏགྒསྨིཉྷི སཾསཱརཝཊྚེ ཙ ནཱནཱརམྨཎེསུ ཝཌྜྷིཏཾ ཙིཏྟཾ ‘ཀེསཱ’ཏི ཨཱཝཛྫིཏམཏྟེ སཛ྄ཛྷཱཡསོཏཱནུསཱརེན གནྟྭཱ མཏྠལུངྒེ པཏིཊྛཱཏི. ‘མཏྠལུངྒ’ནྟི ཨཱཝཛྫིཏམཏྟེ སཛ྄ཛྷཱཡསོཏཱནུསཱརེན ཨཱགནྟྭཱ ཀེསེསུ པཏིཊྛཱཏི. མནསིཀརོནྟསྶ མནསིཀརོནྟསྶ པན སོ སོ ཀོཊྛཱསོ ཨུཔཊྛཱཏི. སཏི ¶ སམཱདྷིནཱཔི ཏིཊྛམཱནཱ པཝཏྟཏི. ཏེན ཡོ ཡོ ཀོཊྛཱསོ ཨདྷིཀཏརཾ ཨུཔཊྛཱཏི ཏཏྠ ཏཏྠ དྭིགུཎེན ཡོགཾ ཀཏྭཱ ཨཔྤནཱ པཱཔེཏབྦཱ. ཨེཝཾ ཨཔྤནཱཡ པཱཔིཏཀཱལཏོ པཊྛཱཡ སེསཀོཊྛཱསེསུ ཨཀིལམནྟོ ཨཔྤནཾ པཱཔེཏི. ཏཏྠ ཏཱལཝནམཀྐཊོཝ ཨོཔམྨཾ.

ཨཔིཙེཏྠ ཨེཝམྤི ཡོཛནཱ ཝེདིཏབྦཱ – དྭཏྟིཾསཏཱལཀསྨིཉྷི ཏཱལཝནེ མཀྐཊོ པཊིཝསཏི. ཏཾ གཧེཏུཀཱམོ ལུདྡོ ཀོཊིཡཾ ཋིཏཏཱལམཱུལེ ཋཏྭཱ ཨུཀྐུཊྛིམཀཱསི. མཱནཛཱཏིཀོ མཀྐཊོ ཏཾ ཏཾ ཏཱལཾ ལངྒྷིཏྭཱ པརིཡནྟཏཱལེ ཨཊྛཱསི. ལུདྡོ ཏཏྠཔི གནྟྭཱ ཨུཀྐུཊྛིམཀཱསི. མཀྐཊོ པུན ཏཐེཝ པུརིམཏཱལེ པཏིཊྛཱསི. སོ ཨཔརཱཔརཾ ཨནུབནྡྷིཡམཱནོ ཀིལམནྟོ ཏསྶ ཏསྶེཝ ཏཱལསྶ མཱུལེ ཋཏྭཱ ཨུཀྐུཊྛུཀྐུཊྛིཀཱལེ ཨུཊྛཧིཏྭཱ གཙྪནྟོ གཙྪནྟོ ཨཏིཀིལམནྟོ ཨེཀསྶ ཏཱལསྶ མཀུལ༹པཎྞསཱུཙིཾ དལ༹ྷཾ གཧེཏྭཱ དྷནུཀོཊིཡཱ ཝིཛ྄ཛྷིཏྭཱ གཎྷནྟོཔི ན པལཱཡཏི.

ཏཏྠ དྭཏྟིཾས ཏཱལཱ ཝིཡ དྭཏྟིཾས ཀོཊྛཱསཱ; མཀྐཊོ ཝིཡ ཙིཏྟཾ; ལུདྡོ ཝིཡ ཡོགཱཝཙརོ; ལུདྡེན ཏཱལམཱུལེ ཋཏྭཱ ¶ ཨུཀྐུཊྛིཀཱལེ མཱནཛཱཏིཀསྶ མཀྐཊསྶ པལཱཡིཏྭཱ པརིཡནྟཀོཊིཡཾ ཋིཏཀཱལོ ཝིཡ ཨནམཏགྒེ སཾསཱརཝཊྚེ ཙ ནཱནཱརམྨཎེསུ ཝཌྜྷིཏཙིཏྟསྶ ‘ཀེསཱ’ཏི ཨཱཝཛྫིཏམཏྟེ སཛ྄ཛྷཱཡསོཏཱནུསཱརེན གནྟྭཱ མཏྠལུངྒེ པཏིཊྛཱནཾ; པརིཡནྟཀོཊིཡཾ ཋཏྭཱ ¶ ཨུཀྐུཊྛེ ཨོརིམཀོཊིཾ ཨཱགམནཀཱལོ ཝིཡ ‘མཏྠལུངྒ’ནྟི ཨཱཝཛྫིཏམཏྟེ སཛ྄ཛྷཱཡསོཏཱནུསཱརེན གནྟྭཱ ཀེསེསུ པཏིཊྛཱནཾ; ཨཔརཱཔརཾ ཨནུབནྡྷིཡམཱནསྶ ཀིལམནྟསྶ ཨུཀྐུཊྛུཀྐུཊྛིཊྛཱནེ ཨུཊྛཱནཀཱལོ ཝིཡ མནསིཀརོནྟསྶ མནསིཀརོནྟསྶ ཏསྨིཾ ཏསྨིཾ ཀོཊྛཱསེ ཨུཔཊྛཧནྟེ སཏིཡཱ པཏིཊྛཱཡ པཏིཊྛཱཡ གམནཾ; དྷནུཀོཊིཡཱ ཝིཛ྄ཛྷིཏྭཱ གཎྷནྟསྶཱཔི ཨཔལཱཡནཀཱལོ ཝིཡ ཡོ ཀོཊྛཱསོ ཨདྷིཀཏརཾ ཨུཔཊྛཱཏི, ཏསྨིཾ དྭིགུཎཾ མནསིཀཱརཾ ཀཏྭཱ ཨཔྤནཱཡ པཱཔནཾ.

ཏཏྠ ཨཔྤནཱཡ པཱཔིཏཀཱལཏོ པཊྛཱཡ སེསཀོཊྛཱསེསུ ཨཀིལམནྟོཝ ཨཔྤནཾ པཱཔེསྶཏི. ཏསྨཱ ‘པཊིཀཱུལཾ པཊིཀཱུལ’ནྟི པུནཔྤུནཾ ཨཱཝཛྫིཏབྦཾ སམནྣཱཧརིཏབྦཾ, ཏཀྐཱཧཏཾ ཝིཏཀྐཱཧཏཾ ཀཱཏབྦཾ. ཨེཝཾ ཀརོནྟསྶ ཙཏྟཱརོ ཁནྡྷཱ པཊིཀཱུལཱརམྨཎཱ ཧོནྟི, ཨཔྤནཾ པཱཔུཎཱཏི. པུབྦབྷཱགཙིཏྟཱནི པརིཀམྨཨུཔཙཱརསངྑཱཏཱནི སཝིཏཀྐསཝིཙཱརཱནཱིཏི སབྦཾ ཧེཊྛཱ ཝུཏྟསདིསམེཝ. ཨེཀཾ པན ཀོཊྛཱསཾ མནསིཀརོནྟསྶ ཨེཀམེཝ ¶ པཋམཛ྄ཛྷཱནཾ ནིབྦཏྟཏི. པཱཊིཡེཀྐཾ མནསིཀརོནྟསྶ དྭཏྟིཾས པཋམཛ྄ཛྷཱནཱནི ནིབྦཏྟནྟི. ཧཏྠེ གཧིཏཔཉྷཱཝཏྠུ པཱཀཏིཀམེཝ.

སོ ཏཾ ནིམིཏྟནྟི སོ བྷིཀྑུ ཏཾ ཀམྨཊྛཱནནིམིཏྟཾ. ཨཱསེཝཏཱིཏི སེཝཏི བྷཛཏི. བྷཱཝེཏཱིཏི ཝཌྜྷེཏི. བཧུལཱིཀརོཏཱིཏི པུནཔྤུནཾ ཀརོཏི. སྭཱཝཏྠིཏཾ ཝཝཏྠཔེཏཱིཏི སུཝཝཏྠིཏཾ ཀརོཏི. བཧིདྡྷཱ ཀཱཡེ ཙིཏྟཾ ཨུཔསཾཧརཏཱིཏི ཨེཝཾ ཀཏྭཱ བཧིདྡྷཱ པརསྶ ཀཱཡེ ཨཏྟནོ ཙིཏྟཾ ཨུཔསཾཧརཏི ཋཔེཏི པེསེཏི.

ཨཏྠིསྶ ཀཱཡེཏི ཨཏྠི ཨསྶ ཀཱཡེ. ཨཛ྄ཛྷཏྟབཧིདྡྷཱཀཱཡེ ཙིཏྟཾ ཨུཔསཾཧརཏཱིཏི ཀཱལེན ཨཏྟནོ ཀཱལེན པརེསཾ ཀཱཡེ ཙིཏྟཾ ཨུཔནཱམེཏི. ཨཏྠི ¶ ཀཱཡེཏི ཨིདཾ ཡསྨཱ ན ཨེཀནྟེན ཨཏྟནོ ཀཱཡོ ནཱཔི པརསྶེཝ ཀཱཡོ ཨདྷིཔྤེཏོ, ཏསྨཱ ཝུཏྟཾ. ཨེཏྠ པན ཨཏྟནོ ཛཱིཝམཱནཀསརཱིརེ ‘པཊིཀཱུལ’ནྟི པརིཀམྨཾ ཀརོནྟསྶ ཨཔྤནཱཔི ཨུཔཙཱརམྤི ཛཱཡཏི. པརསྶ ཛཱིཝམཱནཀསརཱིརེ ‘པཊིཀཱུལ’ནྟི མནསིཀརོནྟསྶ ནེཝ ཨཔྤནཱ ཛཱཡཏི, ན ཨུཔཙཱརཾ. ནནུ ཙ དསསུ ཨསུབྷེསུ ཨུབྷཡམྤེཏཾ ཛཱཡཏཱིཏི? ཨཱམ, ཛཱཡཏི. ཏཱནི ཧི ཨནུཔཱདིནྣཀཔཀྑེ ཋིཏཱནི. ཏསྨཱ ཏཏྠ ཨཔྤནཱཔི ཨུཔཙཱརམྤི ཛཱཡཏི. ཨིདཾ པན ཨུཔཱདིནྣཀཔཀྑེ ཋིཏཾ. ཏེནེཝེཏྠ ཨུབྷཡམྤེཏཾ ན ཛཱཡཏི. ཨསུབྷཱནུཔསྶནཱསངྑཱཏཱ པན ཝིཔསྶནཱབྷཱཝནཱ ཧོཏཱིཏི ཝེདིཏབྦཱ. ཨིམསྨིཾ པབྦེ ཀིཾ ཀཐིཏནྟི? སམཐཝིཔསྶནཱ ཀཐིཏཱ.

ཨིདཱནེཏྠ ¶ ཨེཝཾ སབྦཾ མནསིཀཱརསཱདྷཱརཎཾ པཀིཎྞཀཾ ཝེདིཏབྦཾ. ཨེཏེསཉྷི –

ནིམིཏྟཏོ ལཀྑཎཏོ, དྷཱཏུཏོ ཨཐ སུཉྙཏོ;

ཁནྡྷཱདིཏོ ཙ ཝིཉྙེཡྻོ, ཀེསཱདཱིནཾ ཝིནིཙྪཡོ.

ཏཏྠ ‘ནིམིཏྟཏོ’ཏི དྭཏྟིཾསཱཀཱརེ སཊྛིསཏཾ ནིམིཏྟཱནི, ཡེསཾ ཝསེན ཡོགཱཝཙརོ དྭཏྟིཾསཱཀཱརཾ ཀོཊྛཱསཏོ པརིགྒཎྷཱཏི, སེཡྻཐིདཾ – ཀེསསྶ ཝཎྞནིམིཏྟཾ, སཎྛཱནནིམིཏྟཾ, དིསཱནིམིཏྟཾ, ཨོཀཱསནིམིཏྟཾ, པརིཙྪེདནིམིཏྟནྟི པཉྩ ནིམིཏྟཱནི ཧོནྟི. ལོམཱདཱིསུཔི ཨེསེཝ ནཡོ.

‘ལཀྑཎཏོ’ཏི དྭཏྟིཾསཱཀཱརེ ཨཊྛཝཱིསཏིསཏཾ ལཀྑཎཱནི ཧོནྟི, ཡེསཾ ཝསེན ཡོགཱཝཙརོ དྭཏྟིཾསཱཀཱརཾ ལཀྑཎཏོ མནསིཀརོཏི, སེཡྻཐིདཾ ¶ – ཀེསེ ཐདྡྷཏྟལཀྑཎཾ, ཨཱབནྡྷཏྟལཀྑཎཾ, ཨུཎྷཏྟལཀྑཎཾ, ཝིཏྠམྦྷནལཀྑཎནྟི ཙཏྟཱརི ལཀྑཎཱནི ཧོནྟི. ལོམཱདཱིསུཔི ཨེསེཝ ནཡོ.

‘དྷཱཏུཏོ’ཏི དྭཏྟིཾསཱཀཱརེ ‘‘ཙཏུདྷཱཏུརོ ཨཡཾ, བྷིཀྑུ, པུརིསོ’’ཏི ཝུཏྟཱསུ དྷཱཏཱུསུ ཨཊྛཝཱིསཏིསཏཾ དྷཱཏུཡོ ཧོནྟི, ཡཱསཾ ཝསེན ཡོགཱཝཙརོ དྭཏྟིཾསཱཀཱརཾ དྷཱཏུཏོ པརིགྒཎྷཱཏི, སེཡྻཐིདཾ – ཀེསེ ཀཀྑལ༹ཏཱ པཐཝཱིདྷཱཏུ, ཨཱབནྡྷནཏཱ ཨཱཔོདྷཱཏུ, ཨུཎྷཏཱ ཏེཛོདྷཱཏུ, ཝིཏྠམྦྷནཏཱ ཝཱཡོདྷཱཏཱུཏི ཙཏསྶོ དྷཱཏུཡོ ཧོནྟི. ལོམཱདཱིསུཔི ཨེསེཝ ནཡོ.

‘སུཉྙཏོ’ཏི དྭཏྟིཾསཱཀཱརེ ཚནྣཝུཏི སུཉྙཏཱ ཧོནྟི, ཡཱསཾ ཝསེན ¶ ཡོགཱཝཙརོ དྭཏྟིཾསཱཀཱརཾ སུཉྙཏོ ཝིཔསྶཏི, སེཡྻཐིདཾ – ཀེསཱ སུཉྙཱ ཨཏྟེན ཝཱ ཨཏྟནིཡེན ཝཱ ནིཙྩེན ཝཱ དྷུཝེན ཝཱ སསྶཏེན ཝཱ ཨཝིཔརིཎཱམདྷམྨེན ཝཱཏི. ཀེསེ ཏཱཝ ཨཏྟསུཉྙཏཱ, ཨཏྟནིཡསུཉྙཏཱ, ནིཙྩབྷཱཝསུཉྙཏཱཏི ཏིསྶོ སུཉྙཏཱ ཧོནྟི. ལོམཱདཱིསུཔི ཨེསེཝ ནཡོ.

‘ཁནྡྷཱདིཏོ’ཏི དྭཏྟིཾསཱཀཱརེ ཀེསཱདཱིསུ ཁནྡྷཱདིཝསེན པརིགྒཡ྄ཧམཱནེསུ ཀེསཱ ཀཏི ཁནྡྷཱ ཧོནྟི, ཀཏི ཨཱཡཏནཱནི, ཀཏི དྷཱཏུཡོ, ཀཏི སཙྩཱནི, ཀཏི སཏིཔཊྛཱནཱནཱིཏིཨཱདིནཱ ནཡེན པེཏྠ ཝིནིཙྪཡོ ཝིཉྙཱཏབྦོ.

༣༥༧. ཨེཝཾ ¶ ཨཛ྄ཛྷཏྟཱདིབྷེདཏོ ཏིཝིདྷེན ཀཱཡཱནུཔསྶནཾ ཝིཏྠཱརཏོ དསྶེཏྭཱ ཨིདཱནི ‘‘ཀཱཡཱནུཔསྶཱི ཝིཧརཏི ཨཱཏཱཔཱི སམྤཛཱནོ’’ཏིཨཱདཱིནི པདཱནི བྷཱཛེཏྭཱ དསྶེཏུཾ ཨནུཔསྶཱིཏིཨཱདི ཨཱརདྡྷཾ. ཏཏྠ ཡཱཡ ཨནུཔསྶནཱཡ ཀཱཡཱནུཔསྶཱི ནཱམ ཧོཏི, ཏཾ དསྶེཏུཾ ཏཏྠ ཀཏམཱ ཨནུཔསྶནཱ? ཡཱ པཉྙཱ པཛཱནནཱཏིཨཱདི ཝུཏྟཾ. ཨཱཏཱཔཱིཏིཨཱདཱིསུཔི ཨེསེཝ ནཡོ.

ཏཏྠ པཉྙཱ པཛཱནནཱཏིཨཱདཱིནི ཧེཊྛཱ ཙིཏྟུཔྤཱདཀཎྜཝཎྞནཱཡཾ (དྷ. ས. ཨཊྛ. ༡༦) ཝུཏྟནཡེནེཝ ཝེདིཏབྦཱནི. ཨུཔེཏོཏིཨཱདཱིནི སབྦཱནི ཨཉྙམཉྙཝེཝཙནཱནི. ཨཔིཙ ཨཱསེཝནཝསེན ཨུཔེཏོ, བྷཱཝནཱཝསེན སུཊྛུ ཨུཔེཏོཏི སམུཔེཏོ ¶ . ཨུཔཱགཏོ སམུཔཱགཏོ, ཨུཔཔནྣོ སམྤནྣོཏི ཨིམེསུཔི དྭཱིསུ དུཀེསུ ཨཡམེཝ ནཡོ. བཧུལཱིཀཱརཝསེན པན སམནྣཱགཏོཏི ཨེཝམེཏྠ ཡོཛནཱ ཝེདིཏབྦཱ. ཨིམིནཱ ཨཱཏཱཔེན ཨུཔེཏོཏི ཨཱདཱིསུཔི ཨེསེཝ ནཡོ.

ཝིཧརཏཱིཏི པདེ ‘ཏཏྠ ཀཏམོ ཝིཧཱརོ’ཏི པུཙྪཾ ཨཀཏྭཱ པུགྒལཱདྷིཊྛཱནཱཡ དེསནཱཡ དེསེནྟོ ཨིརིཡཏཱིཏིཨཱདིམཱཧ. ཏསྶཏྠོ – ཙཏུནྣཾ ཨིརིཡཱཔཐཱནཾ ཨཉྙཏརསམངྒཱིབྷཱཝཏོ ཨིརིཡཏི. ཏེཧི ཨིརིཡཱཔཐཙཏུཀྐེཧི ཀཱཡསཀཊཝཏྟནེན ཝཏྟཏི. ཨེཀཾ ཨིརིཡཱཔཐདུཀྑཾ ཨཔརེན ཨིརིཡཱཔཐེན བཱདྷིཏྭཱ ཙིརཊྛིཏིཀབྷཱཝེན སརཱིརཀྑནཏོ པཱལེཏི. ཨེཀསྨིཾ ཨིརིཡཱཔཐེ ཨསཎྛཧིཏྭཱ སབྦིརིཡཱཔཐཝཏནཏོ ཡཔེཏི. ཏེན ཏེན ཨིརིཡཱཔཐེན ཏཐཱ ཏཐཱ ཀཱཡསྶ ཡཱཔནཏོ ཡཱཔེཏི. ཙིརཀཱལཝཏྟཱཔནཏོ ཙརཏི. ཨིརིཡཱཔཐེན ཨིརིཡཱཔཐཾ ཝིཙྪིནྡིཏྭཱ ཛཱིཝིཏཧརཎཏོ ཝིཧརཏི.

༣༦༢. སྭེཝ ཀཱཡོ ལོཀོཏི ཡསྨིཾ ཀཱཡེ ཀཱཡཱནུཔསྶཱི ཝིཧརཏི, སྭེཝ ཀཱཡོ ལུཛྫནཔལུཛྫནཊྛེན ལོཀོ. ཡསྨཱ པནསྶ ཀཱཡེ པཧཱིཡམཱནཾ ཨབྷིཛ྄ཛྷཱདོམནསྶཾ ཝེདནཱདཱིསུཔི པཧཱིཡཏི ཨེཝ, ཏསྨཱ པཉྩཔི ཨུཔཱདཱནཀྑནྡྷཱ ལོཀོཏི ཝུཏྟཾ.

སནྟཱཏིཨཱདཱིསུཔི ¶ ནིརོདྷཝསེན སནྟཏཱཡ སནྟཱ. བྷཱཝནཱཡ སམིཏཏྟཱ སམིཏཱ. ཝཏྠུཔརིཉྙཱཡ ཨཔྤཝཏྟིཝཱུཔསམཝསེན ཝཱུཔསནྟཱ. ནིརོདྷསངྑཱཏཾ ཨཏྠཾ གཏཱཏི ཨཏྠངྒཏཱ. པུནཔྤུནཾ ནིབྦཏྟིཡཱ པཊིབཱཧིཏཏྟཱ ཨཏིཝིཡ ཨཏྠཾ གཏཱཏི ཨབྦྷཏྠངྒཏཱ. ཨཔྤིཏཱཏི ཝིནཱསིཏཱ, ཨཔྤཝཏྟིཡཾ ཋཔིཏཱཏིཔི ཨཏྠོ. བྱཔྤིཏཱཏི སུཝིནཱསིཏཱ, ཨཏིཝིཡ ཨཔྤཝཏྟིཡཾ ཋཔིཏཱཏིཔི ཨཏྠོ. ཡཐཱ པུན ན ཨནྭསྶཝནྟི ཨེཝཾ སོསིཏཏྟཱ སོསིཏཱ. སུཊྛུ སོསིཏཱཏི ཝིསོསིཏཱ ¶ , སུཀྑཱཔིཏཱཏི ཨཏྠོ. ཝིགཏནྟཱ ཀཏཱཏི བྱནྟཱི ཀཏཱ. ཨེཏྠ ཙ ཨནུཔསྶནཱཡ ཀམྨཊྛཱནཝིཧཱརེན ཀམྨཊྛཱནིཀསྶ ཀཱཡཔརིཧརཎཾ, ཨཱཏཱཔེན སམྨཔྤདྷཱནཾ, སཏིསམྤཛཉྙེན ཀམྨཊྛཱནཔརིཧརཎཱུཔཱཡོ; སཏིཡཱ ཝཱ ཀཱཡཱནུཔསྶནཱཝསེན པཊིལདྡྷོ སམཐོ, སམྤཛཉྙེན ཝིཔསྶནཱ, ཨབྷིཛ྄ཛྷཱདོམནསྶཝིནཡེན བྷཱཝནཱཕལཾ ཝུཏྟནྟི ཝེདིཏབྦཾ.

ཀཱཡཱནུཔསྶནཱནིདྡེསཝཎྞནཱ ནིཊྛིཏཱ.

ཝེདནཱནུཔསྶནཱནིདྡེསཝཎྞནཱ

༣༦༣. ཝེདནཱནུཔསྶནཱནིདྡེསེཔི ¶ ཧེཊྛཱ ཝུཏྟསདིསཾ ཝུཏྟནཡེནེཝ ཝེདིཏབྦཾ. སུཁཾ ཝེདནཾ ཝེདཡམཱནོཏིཨཱདཱིསུ པན སུཁཾ ཝེདནནྟི ཀཱཡིཀཾ ཝཱ ཙེཏསིཀཾ ཝཱ སུཁཾ ཝེདནཾ ཝེདཡམཱནོ ‘ཨཧཾ སུཁཾ ཝེདནཾ ཝེདཡཱམཱི’ཏི པཛཱནཱཏཱིཏི ཨཏྠོ. ཏཏྠ ཀཱམཾ ཨུཏྟཱནསེཡྻཀཱཔི དཱརཀཱ ཐཉྙཔིཝནཱདིཀཱལེ སུཁཾ ཝེདཡམཱནཱ ‘སུཁཾ ཝེདནཾ ཝེདཡཱམཱ’ཏི པཛཱནནྟི, ན པནེཏཾ ཨེཝརཱུཔཾ ཛཱནནཾ སནྡྷཱཡ ཝུཏྟཾ. ཨེཝརཱུཔཉྷི ཛཱནནཾ སཏྟཱུཔལདྡྷིཾ ནཔྤཛཧཏི, སཏྟསཉྙཾ ན ཨུགྒྷཱཊེཏི, ཀམྨཊྛཱནཾ ཝཱ སཏིཔཊྛཱནབྷཱཝནཱ ཝཱ ན ཧོཏི. ཨིམསྶ པན བྷིཀྑུནོ ཛཱནནཾ སཏྟཱུཔལདྡྷིཾ པཛཧཏི, སཏྟསཉྙཾ ཨུགྒྷཱཊེཏི, ཀམྨཊྛཱནཉྩེཝ སཏིཔཊྛཱནབྷཱཝནཱ ཙ ཧོཏི. ‘ཨིདཉྷི ཀོ ཝེདཡཏི, ཀསྶ ཝེདནཱ, ཀིཾ ཀཱརཎཱ ཝེདནཱ’ཏི ཨེཝཾ སམྤཛཱནཝེདིཡནཾ སནྡྷཱཡ ཝུཏྟཾ.

ཏཏྠ ཀོ ཝེདཡཏཱིཏི? ན ཀོཙི སཏྟོ ཝཱ པུགྒལོ ཝཱ ཝེདཡཏི. ཀསྶ ཝེདནཱཏི? ན ཀསྶཙི སཏྟསྶ ཝཱ པུགྒལསྶ ཝཱ ཝེདནཱ. ཀིཾ ཀཱརཎཱ ཝེདནཱཏི? ཝཏྠུཨཱརམྨཎཱ ཙ པནེསཱ ཝེདནཱ. ཏསྨཱ ཨེས ཨེཝཾ པཛཱནཱཏི – ‘ཏཾ ཏཾ སུཁཱདཱིནཾ ཝཏྠུཾ ཨཱརམྨཎཾ ཀཏྭཱ ཝེདནཱཝ ཝེདཡཏི; ཏཾ པན ཝེདནཱཔཝཏྟིཾ ¶ ཨུཔཱདཱཡ ‘ཨཧཾ ཝེདཡཱམཱི’ཏི ཝོཧཱརམཏྟཾ ཧོཏཱི’ཏི. ཨེཝཾ ཝཏྠུཾ ཨཱརམྨཎཾ ཀཏྭཱ ཝེདནཱཝ ཝེདཡཏཱིཏི སལླཀྑེནྟོ ‘ཨེས སུཁཾ ཝེདནཾ ཝེདཡཱམཱི’ཏི པཛཱནཱཏཱིཏི ཝེདིཏབྦོ, ཙིཏྟལཔབྦཏེ ཨཉྙཏརོ ཐེརོ ཝིཡ.

ཐེརོ ཀིར ཨཕཱསུཀཀཱལེ བལཝཝེདནཱཡ ནིཏྠུནནྟོ ཨཔརཱཔརཾ པརིཝཏྟཏི. ཏམེཀོ དཧརོ ཨཱཧ ¶ – ‘‘ཀཏརཾ ཝོ, བྷནྟེ, ཋཱནཾ རུཛཏཱི’’ཏི? ‘‘ཨཱཝུསོ, པཱཊིཡེཀྐཾ རུཛནཊྛཱནཾ ནཱམ ནཏྠི; ཝཏྠུཾ ཨཱརམྨཎཾ ཀཏྭཱ ཝེདནཱཝ ཝེདཡཏཱི’’ཏི. ‘‘ཨེཝཾ ཛཱནནཀཱལཏོ པཊྛཱཡ ཨདྷིཝཱསེཏུཾ ཝཊྚཏི ནོ, བྷནྟེ’’ཏི. ‘‘ཨདྷིཝཱསེམི, ཨཱཝུསོ’’ཏི. ‘‘ཨདྷིཝཱསནཱ, བྷནྟེ, སེཡྻོ’’ཏི. ཐེརོ ཨདྷིཝཱསེསི. ཝཱཏོ ཡཱཝ ཧདཡཱ ཕཱལེསི. མཉྩཀེ ཨནྟཱནི རཱསཱིཀཏཱནི ཨཧེསུཾ. ཐེརོ དཧརསྶ དསྶེསི – ‘‘ཝཊྚཏཱཝུསོ, ཨེཏྟཀཱ ཨདྷིཝཱསནཱ’’ཏི? དཧརོ ཏུཎྷཱི ཨཧོསི. ཐེརོ ཝཱིརིཡསམཱདྷིཾ ཡོཛེཏྭཱ སཧཔཊིསམྦྷིདཱཧི ཨརཧཏྟཾ པཱཔུཎིཏྭཱ སམསཱིསཱི ཧུཏྭཱ པརིནིབྦཱཡི.

ཡཐཱ ¶ ཙ སུཁཾ, ཨེཝཾ དུཀྑཾ…པེ… ནིརཱམིསཾ ཨདུཀྑམསུཁཾ ཝེདནཾ ཝེདཡམཱནོ ‘ནིརཱམིསཾ ཨདུཀྑམསུཁཾ ཝེདནཾ ཝེདཡཱམཱི’’ཏི པཛཱནཱཏི. ཨིཏི བྷགཝཱ རཱུཔཀམྨཊྛཱནཾ ཀཐེཏྭཱ ཨརཱུཔཀམྨཊྛཱནཾ ཀཐེནྟོ ཝེདནཱཝསེན ཀཐེསི. དུཝིདྷཉྷི ཀམྨཊྛཱནཾ – རཱུཔཀམྨཊྛཱནཾ ཨརཱུཔཀམྨཊྛཱནཉྩ; རཱུཔཔརིགྒཧོ ཨརཱུཔཔརིགྒཧོཏིཔི ཨེཏདེཝ ཝུཙྩཏི. ཏཏྠ བྷགཝཱ རཱུཔཀམྨཊྛཱནཾ ཀཐེནྟོ སངྑེཔམནསིཀཱརཝསེན ཝཱ ཝིཏྠཱརམནསིཀཱརཝསེན ཝཱ ཙཏུདྷཱཏུཝཝཏྠཱནཾ ཀཐེསི. ཏདུབྷཡམྤི ཝིསུདྡྷིམགྒེ སབྦཱཀཱརཏོ དསྶིཏམེཝ.

ཨརཱུཔཀམྨཊྛཱནཾ པན ཀཐེནྟོ ཡེབྷུཡྻེན ཝེདནཱཝསེན ཀཐེསི. ཏིཝིདྷོ ཧི ཨརཱུཔཀམྨཊྛཱནེ ཨབྷིནིཝེསོ – ཕསྶཝསེན, ཝེདནཱཝསེན, ཙིཏྟཝསེནཱཏི. ཀཐཾ? ཨེཀཙྩསྶ ཧི སཾཁིཏྟེན ཝཱ ཝིཏྠཱརེན ཝཱ པརིགྒཧིཏེ རཱུཔཀམྨཊྛཱནེ ཏསྨིཾ ཨཱརམྨཎེ ཙིཏྟཙེཏསིཀཱནཾ པཋམཱབྷིནིཔཱཏོ ཏཾ ཨཱརམྨཎཾ ཕུསནྟོ ཨུཔྤཛྫམཱནོ ཕསྶོ པཱཀཊོ ཧོཏི. ཨེཀཙྩསྶ ཏཾ ཨཱརམྨཎཾ ཨནུབྷཝནྟཱི ཨུཔྤཛྫམཱནཱ ཝེདནཱ པཱཀཊཱ ཧོཏི. ཨེཀཙྩསྶ ཏཾ ཨཱརམྨཎཾ པརིགྒཧེཏྭཱ ཝིཛཱནནྟཾ ཨུཔྤཛྫམཱནཾ ཝིཉྙཱཎཾ པཱཀཊཾ ཧོཏི.

ཏཏྠ ¶ ཡསྶ ཕསྶོ པཱཀཊོ ཧོཏི, སོཔི ‘ན ཀེཝལཾ ཕསྶོཝ ཨུཔྤཛྫཏི; ཏེན སདྡྷིཾ ཏདེཝཱརམྨཎཾ ཨནུབྷཝམཱནཱ ཝེདནཱཔི ཨུཔྤཛྫཏི, སཉྫཱནམཱནཱ སཉྙཱཔི, ཙེཏཡམཱནཱ ཙེཏནཱཔི, ཝིཛཱནནམཱནཾ ཝིཉྙཱཎམྤི ཨུཔྤཛྫཏཱི’ཏི ཕསྶཔཉྩམཀེཡེཝ པརིགྒཎྷཱཏི. ཡསྶ ཝེདནཱ པཱཀཊཱ ཧོཏི, སོཔི ‘ན ཀེཝལཾ ཝེདནཱཝ ཨུཔྤཛྫཏི; ཏཱཡ སདྡྷིཾ ཏདེཝཱརམྨཎཾ ཕུསམཱནོ ཕསྶོཔི ཨུཔྤཛྫཏི, སཉྫཱནནམཱནཱ སཉྙཱཔི, ཙེཏཡམཱནཱ ཙེཏནཱཔི, ཝིཛཱནནམཱནཾ ཝིཉྙཱཎམྤི ཨུཔྤཛྫཏཱི’ཏི ཕསྶཔཉྩམཀེཡེཝ པརིགྒཎྷཱཏི. ཡསྶ ཝིཉྙཱཎཾ པཱཀཊཾ ཧོཏི, སོཔི ‘ན ཀེཝལཾ ཝིཉྙཱཎམེཝ ཨུཔྤཛྫཏི; ཏེན སདྡྷིཾ ཏདེཝཱརམྨཎཾ ཕུསམཱནོ ཕསྶོཔི ¶ ཨུཔྤཛྫཏི, ཨནུབྷཝམཱནཱ ཝེདནཱཔི, སཉྫཱནནམཱནཱ སཉྙཱཔི, ཙེཏཡམཱནཱ ཙེཏནཱཔི ཨུཔྤཛྫཏཱི’ཏི ཕསྶཔཉྩམཀེཡེཝ པརིགྒཎྷཱཏི.

སོ ‘ཨིམེ ཕསྶཔཉྩམཀཱ དྷམྨཱ ཀིཾནིསྶིཏཱ’ཏི ཨུཔདྷཱརེནྟོ ‘ཝཏྠུནིསྶིཏཱ’ཏི པཛཱནཱཏི. ཝཏྠུ ནཱམ ཀརཛཀཱཡོ; ཡཾ སནྡྷཱཡ ཝུཏྟཾ ‘‘ཨིདཉྩ པན མེ ཝིཉྙཱཎཾ ཨེཏྠསིཏཾ, ཨེཏྠཔཊིབདྡྷ’’ནྟི (དཱི. ནི. ༡.༢༣༥). སོ ཨཏྠཏོ བྷཱུཏཱནི ¶ ཙེཝ ཨུཔཱདཱརཱུཔཱནི ཙ. ཨེཝམེཏྠ ཝཏྠུ རཱུཔཾ, ཕསྶཔཉྩམཀཱ ནཱམནྟི ནཱམརཱུཔམེཝ པསྶཏི. རཱུཔཉྩེཏྠ རཱུཔཀྑནྡྷོ, ནཱམཾ ཙཏྟཱརོ ཨརཱུཔིནོ ཁནྡྷཱཏི པཉྩཀྑནྡྷམཏྟཾ ཧོཏི. ནཱམརཱུཔཝིནིམུཏྟཱ ཧི པཉྩཀྑནྡྷཱ པཉྩཀྑནྡྷཝིནིམུཏྟཾ ཝཱ ནཱམརཱུཔཾ ནཏྠི.

སོ ‘ཨིམེ པཉྩཀྑནྡྷཱ ཀིཾཧེཏུཀཱ’ཏི ཨུཔཔརིཀྑནྟོ ‘ཨཝིཛྫཱདིཧེཏུཀཱ’ཏི པསྶཏི; ཏཏོ པཙྩཡོ ཙེཝ པཙྩཡུཔྤནྣཉྩ ཨིདཾ; ཨཉྙོ སཏྟོ ཝཱ པུགྒལོ ཝཱ ནཏྠི; སུདྡྷསངྑཱརཔུཉྫམཏྟམེཝཱཏི སཔྤཙྩཡནཱམརཱུཔཝསེནཝ ཏིལཀྑཎཾ ཨཱརོཔེཏྭཱ ཝིཔསྶནཱཔཊིཔཱཊིཡཱ ‘ཨནིཙྩཾ དུཀྑཾ ཨནཏྟཱ’ཏི སམྨསནྟོ ཝིཙརཏི. སོ ‘ཨཛྫ ཨཛྫཱ’ཏི པཊིཝེདྷཾ ཨཱཀངྑམཱནོ ཏཐཱརཱུཔེ དིཝསེ ཨུཏུསཔྤཱཡཾ, པུགྒལསཔྤཱཡཾ, བྷོཛནསཔྤཱཡཾ, དྷམྨསཝནསཔྤཱཡཾ ཝཱ ལབྷིཏྭཱ ཨེཀཔལླངྐེན ནིསིནྣོཝ ཝིཔསྶནཾ མཏྠཀཾ པཱཔེཏྭཱ ཨརཧཏྟེ པཏིཊྛཱཏི. ཨེཝཾ ཨིམེསཾ ཏིཎྞམྤི ཛནཱནཾ ཡཱཝ ཨརཧཏྟཱ ཀམྨཊྛཱནཾ ཀཐིཏཾ ཧོཏི.

ཨིདྷ པན བྷགཝཱ ཨརཱུཔཀམྨཊྛཱནཾ ཀཐེནྟོ ཝེདནཱཝསེན ¶ ཀཐེསི. ཕསྶཝསེན ཝཱ ཧི ཝིཉྙཱཎཝསེན ཝཱ ཀཐིཡམཱནཾ ན པཱཀཊཾ ཧོཏི, ཨནྡྷཀཱརཾ ཝིཡ ཁཱཡཏི. ཝེདནཱཝསེན པན པཱཀཊཾ ཧོཏི. ཀསྨཱ? ཝེདནཱནཾ ཨུཔྤཏྟིཔཱཀཊཏཱཡ. སུཁདུཀྑཝེདནཱནཉྷི ཨུཔྤཏྟི པཱཀཊཱ. ཡདཱ སུཁཾ ཨུཔྤཛྫཏི, སཀལསརཱིརཾ ཁོབྷེནྟཾ མདྡནྟཾ ཕརམཱནཾ ཨབྷིསནྡཡམཱནཾ སཏདྷོཏསཔྤིཾ ཁཱདཱཔཡནྟཾ ཝིཡ, སཏཔཱཀཏེལཾ མཀྑཱཔཡམཱནཾ ཝིཡ, ཨུདཀགྷཊསཧསྶེན པརིལཱ༹ཧཾ ནིབྦཱཔཡམཱནཾ ཝིཡ, ‘ཨཧོ སུཁཾ! ཨཧོ སུཁནྟི’! ཝཱཙཾ ནིཙྪཱརཡམཱནམེཝ ཨུཔྤཛྫཏི. ཡདཱ དུཀྑཾ ཨུཔྤཛྫཏི, སཀལསརཱིརཾ ཁོབྷེནྟཾ མདྡནྟཾ ཕརམཱནཾ ཨབྷིསནྡཡམཱནཾ ཏཏྟཕཱལཾ པཝེསེནྟཾ ཝིཡ, ཝིལཱིནཏམྦལོཧེན ཨཱསིཉྩནྟཾ ཝིཡ, སུཀྑཏིཎཝནཔྤཏིམྷི ཨརཉྙེ དཱརུཨུཀྐཱཀལཱཔཾ པཀྑིཔམཱནཾ ཝིཡ ‘ཨཧོ དུཀྑཾ! ཨཧོ དུཀྑནྟི!’ ཝིཔྤལཱཔཡམཱནམེཝ ཨུཔྤཛྫཏི. ཨིཏི སུཁདུཀྑཝེདནཱནཾ ཨུཔྤཏྟི པཱཀཊཱ ཧོཏི.

ཨདུཀྑམསུཁཱ ¶ པན དུདྡཱིཔནཱ ཨནྡྷཀཱརཱ ཨཝིབྷཱུཏཱ. སཱ སུཁདུཀྑཱནཾ ཨཔགམེ སཱཏཱསཱཏཔཊིཀྑེཔཝསེན མཛ྄ཛྷཏྟཱཀཱརབྷཱུཏཱ ཨདུཀྑམསུཁཱ ཝེདནཱཏི ནཡཏོ གཎྷནྟསྶ པཱཀཊཱ ཧོཏི. ཡཐཱ ཀིཾ? ཨནྟརཱ པིཊྛིཔཱསཱཎཾ ཨཱརུཧིཏྭཱ པལཱཡནྟསྶ མིགསྶ ཨནུཔཐཾ གཙྪནྟོ མིགལུདྡཀོ པིཊྛིཔཱསཱཎསྶ ཨོརབྷཱགེ ཨཔརབྷཱགེཔི པདཾ དིསྭཱ མཛ྄ཛྷེ ཨཔསྶནྟོཔི ¶ ‘ཨིཏོ ཨཱརུལ༹ྷོ, ཨིཏོ ཨོརུལ༹ྷོ, མཛ྄ཛྷེ པིཊྛིཔཱསཱཎེ ཨིམིནཱ པདེསེན གཏོ བྷཝིསྶཏཱི’ཏི ནཡཏོ ཛཱནཱཏི. ཨེཝཾ ཨཱརུལ༹ྷཊྛཱནེ པདཾ ཝིཡ ཧི སུཁཱཡ ཝེདནཱཡ ཨུཔྤཏྟི པཱཀཊཱ ཧོཏི; ཨོརུལ༹ྷཊྛཱནེ པདཾ ཝིཡ དུཀྑཱཡ ཝེདནཱཡ ཨུཔྤཏྟི པཱཀཊཱ ཧོཏི. ‘ཨིཏོ ཨཱརུལ༹ྷོ, ཨིཏོ ཨོརུལ༹ྷོ, མཛ྄ཛྷེ ཨེཝཾ གཏོ’ཏི ནཡཏོ གཧཎཾ ཝིཡ སུཁདུཀྑཱནཾ ཨཔགམེ སཱཏཱསཱཏཔཊིཀྑེཔཝསེན མཛ྄ཛྷཏྟཱཀཱརབྷཱུཏཱ ཨདུཀྑམསུཁཱ ཝེདནཱཏི ནཡཏོ གཎྷནྟསྶ པཱཀཊཱ ཧོཏི.

ཨེཝཾ བྷགཝཱ པཋམཾ རཱུཔཀམྨཊྛཱནཾ ཀཐེཏྭཱ པཙྪཱ ཨརཱུཔཀམྨཊྛཱནཾ ཀཐེནྟོ ཝེདནཱཝསེན ཝིནིཝཏྟེཏྭཱ དསྶེསི; ན ཀེཝལཉྩ ཨིདྷེཝ ཨེཝཾ དསྶེཏི, དཱིགྷནིཀཱཡམྷི མཧཱནིདཱནེ, སཀྐཔཉྷེ, མཧཱསཏིཔཊྛཱནེ ¶ , མཛ྄ཛྷིམནིཀཱཡམྷི སཏིཔཊྛཱནེ ཙ ཙཱུལ༹ཏཎྷཱསངྑཡེ, མཧཱཏཎྷཱསངྑཡེ, ཙཱུལ༹ཝེདལླེ, མཧཱཝེདལླེ, རཊྛཔཱལསུཏྟེ, མཱགཎྜིཡསུཏྟེ, དྷཱཏུཝིབྷངྒེ, ཨཱནེཉྫསཔྤཱཡེ, སཾཡུཏྟནིཀཱཡམྷི ཙཱུལ༹ནིདཱནསུཏྟེ, རུཀྑོཔམེ, པརིཝཱིམཾསནསུཏྟེ, སཀལེ ཝེདནཱསཾཡུཏྟེཏི ཨེཝཾ ཨནེཀེསུ སུཏྟེསུ པཋམཾ རཱུཔཀམྨཊྛཱནཾ ཀཐེཏྭཱ པཙྪཱ ཨརཱུཔཀམྨཊྛཱནཾ ཝེདནཱཝསེན ཝིནིཝཏྟེཏྭཱ དསྶེསི. ཡཐཱ ཙ ཏེསུ ཏེསུ, ཨེཝཾ ཨིམསྨིམྤི སཏིཔཊྛཱནཝིབྷངྒེ པཋམཾ རཱུཔཀམྨཊྛཱནཾ ཀཐེཏྭཱ པཙྪཱ ཨརཱུཔཀམྨཊྛཱནཾ ཝེདནཱཝསེན ཝིནིཝཏྟེཏྭཱ དསྶེསི.

ཏཏྠ སུཁཾ ཝེདནནྟིཨཱདཱིསུ ཨཡཾ ཨཔརོཔི པཛཱནནཔརིཡཱཡོ – སུཁཾ ཝེདནཾ ཝེདཡཱམཱིཏི པཛཱནཱཏཱིཏི སུཁཝེདནཱཀྑཎེ དུཀྑཱཡ ཝེདནཱཡ ཨབྷཱཝཏོ སུཁཾ ཝེདནཾ ཝེདཡམཱནོ ‘སུཁཾ ཝེདནཾ ཝེདཡཱམཱི’ཏི པཛཱནཱཏི. ཏེན ཡཱ པུབྦེ བྷཱུཏཔུབྦཱ དུཀྑཱ ཝེདནཱ, ཏསྶཱ ཨིདཱནི ཨབྷཱཝཏོ ཨིམིསྶཱ ཙ སུཁཱཡ ཨིཏོ པཋམཾ ཨབྷཱཝཏོ ཝེདནཱ ནཱམ ཨནིཙྩཱ ཨདྡྷུཝཱ ཝིཔརིཎཱམདྷམྨཱཏི ཨིཏིཧ ཏཏྠ སམྤཛཱནོ ཧོཏི. ཝུཏྟམྤི ཙེཏཾ བྷགཝཏཱ –

‘‘ཡསྨིཾ, ཨགྒིཝེསྶན, སམཡེ སུཁཾ ཝེདནཾ ཝེདེཏི, ནེཝ ཏསྨིཾ སམཡེ དུཀྑཾ ཝེདནཾ ཝེདེཏི, ན ཨདུཀྑམསུཁཾ ཝེདནཾ ཝེདེཏི, སུཁཾཡེཝ ཏསྨིཾ སམཡེ ཝེདནཾ ཝེདེཏི. ཡསྨིཾ ¶ , ཨགྒིཝེསྶན, སམཡེ དུཀྑཾ…པེ… ཨདུཀྑམསུཁཾ ཝེདནཾ ཝེདེཏི, ནེཝ ཏསྨིཾ སམཡེ སུཁཾ ཝེདནཾ ཝེདེཏི, ན དུཀྑཾ ཝེདནཾ ཝེདེཏི, ཨདུཀྑམསུཁཾཡེཝ ཏསྨིཾ སམཡེ ཝེདནཾ ཝེདེཏི. སུཁཱཔི ཁོ, ཨགྒིཝེསྶན ¶ , ཝེདནཱ ཨནིཙྩཱ སངྑཏཱ པཊིཙྩསམུཔྤནྣཱ ཁཡདྷམྨཱ ཝཡདྷམྨཱ ཝིརཱགདྷམྨཱ ནིརོདྷདྷམྨཱ. དུཀྑཱཔི ཁོ…པེ… ཨདུཀྑམསུཁཱཔི ཁོ, ཨགྒིཝེསྶན, ཝེདནཱ ཨནིཙྩཱ སངྑཏཱ…པེ… ནིརོདྷདྷམྨཱ. ཨེཝཾ པསྶཾ, ཨགྒིཝེསྶན, སུཏཝཱ ཨརིཡསཱཝཀོ སུཁཱཡཔི ཝེདནཱཡ ནིབྦིནྡཏི, དུཀྑཱཡཔི ཝེདནཱཡ ནིབྦིནྡཏི, ཨདུཀྑམསུཁཱཡཔི ཝེདནཱཡ ནིབྦིནྡཏི, ནིབྦིནྡཾ ཝིརཛྫཏི, ཝིརཱགཱ ཝིམུཙྩཏི, ཝིམུཏྟསྨིཾ ཝིམུཏྟམིཏི ཉཱཎཾ ཧོཏི; ‘ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱ’ཏི པཛཱནཱཏཱི’’ཏི (མ. ནི. ༢.༢༠༥).

སཱམིསཾ ¶ ཝཱ སུཁནྟིཨཱདཱིསུ སཱམིསཱ སུཁཱ ནཱམ པཉྩཀཱམགུཎཱམིསནིསྶིཏཱ ཚ གེཧསྶིཏསོམནསྶཝེདནཱ; ནིརཱམིསཱ སུཁཱ ནཱམ ཚ ནེཀྑམྨསྶིཏསོམནསྶཝེདནཱ; སཱམིསཱ དུཀྑཱ ནཱམ ཚ གེཧསྶིཏདོམནསྶཝེདནཱ; ནིརཱམིསཱ དུཀྑཱ ནཱམ ཚ ནེཀྑམྨསྶིཏདོམནསྶཝེདནཱ; སཱམིསཱ ཨདུཀྑམསུཁཱ ནཱམ ཚ གེཧསིཏཨུཔེཀྑཱཝེདནཱ; ནིརཱམིསཱ ཨདུཀྑམསུཁཱ ནཱམ ཚ ནེཀྑམྨསྶིཏཨུཔེཀྑཱཝེདནཱ. ཏཱསཾ ཝིབྷཱགོ ཨུཔརིཔཎྞཱསེ པཱལི༹ཡཾ (མ. ནི. ༣.༣༠༤ ཨཱདཡོ) ཨཱགཏོཡེཝ. སོ ཏཾ ནིམིཏྟནྟི སོ ཏཾ ཝེདནཱནིམིཏྟཾ. བཧིདྡྷཱ ཝེདནཱསཱུཏི པརཔུགྒལསྶ ཝེདནཱསུ. སུཁཾ ཝེདནཾ ཝེདཡམཱནནྟི པརཔུགྒལཾ སུཁཝེདནཾ ཝེདཡམཱནཾ. ཨཛ྄ཛྷཏྟབཧིདྡྷཱཏི ཀཱལེན ཨཏྟནོ ཀཱལེན པརསྶ ཝེདནཱསུ ཙིཏྟཾ ཨུཔསཾཧརཏི. ཨིམསྨིཾ ཝཱརེ ཡསྨཱ ནེཝ ཨཏྟཱ, ན པརོ ནིཡམིཏོ; ཏསྨཱ ཝེདནཱཔརིགྒཧམཏྟམེཝ དསྶེཏུཾ ‘‘ཨིདྷ བྷིཀྑུ སུཁཾ ཝེདནཾ སུཁཱ ཝེདནཱ’’ཏིཨཱདི ཝུཏྟཾ. སེསམེཏྠ ཨུཏྟཱནམེཝ. ཨིམསྨིཾ པན པབྦེ སུདྡྷཝིཔསྶནཱཝ ཀཐིཏཱཏི.

ཝེདནཱནུཔསྶནཱནིདྡེསཝཎྞནཱ ནིཊྛིཏཱ.

ཙིཏྟཱནུཔསྶནཱནིདྡེསཝཎྞནཱ

༣༦༥. ཙིཏྟཱནུཔསྶནཱནིདྡེསེཔི ¶ ཧེཊྛཱ ཝུཏྟསདིསཾ ཝུཏྟནཡེནེཝ ཝེདིཏབྦཾ. སརཱགཾ ཝཱ ཙིཏྟནྟིཨཱདཱིསུ པན སརཱགནྟི ཨཊྛཝིདྷཾ ལོབྷསཧགཏཾ. ཝཱིཏརཱགནྟི ལོཀིཡཀུསལཱབྱཱཀཏཾ. ཨིདཾ པན ཡསྨཱ སམྨསནཾ ན ¶ དྷམྨསམོདྷཱནཾ, ཏསྨཱ ཨིདྷ ཨེཀཔདེཔི ལོཀུཏྟརཾ ན ལབྦྷཏི. ཡསྨཱ པཧཱནེཀཊྛཝསེན རཱགཱདཱིཧི སཧ ཝཏྟནྟི པཧཱིཡནྟི, ཏསྨཱ དྭཱིསུ པདེསུ ནིཔྤརིཡཱཡེན ན ལབྦྷནྟཱིཏི ན གཧིཏཱནི. སེསཱནི ཙཏྟཱརི ཨཀུསལཙིཏྟཱནི ནེཝ པུརིམཔདཾ, ན པཙྪིམཔདཾ བྷཛནྟི. སདོསནྟི དུཝིདྷཾ དོམནསྶསཧགཏཾ. ཝཱིཏདོསནྟི ལོཀིཡཀུསལཱབྱཱཀཏཾ. སེསཱནི དས ཨཀུསལཙིཏྟཱནི ནེཝ པུརིམཔདཾ, ན པཙྪིམཔདཾ བྷཛནྟི. སམོཧནྟི ཝིཙིཀིཙྪཱསཧགཏཉྩེཝ ཨུདྡྷཙྩསཧགཏཉྩཱཏི དུཝིདྷཾ. ཡསྨཱ པན མོཧོ སབྦཱཀུསལེསུ ཨུཔྤཛྫཏི, ཏསྨཱ ¶ སེསཱནིཔི ཨིདྷ ཝཊྚནྟི ཨེཝ. ཨིམསྨིཾ ཡེཝ ཧི དུཀེ དྭཱདསཱཀུསལཙིཏྟཱནི པརིཡཱདིཎྞཱནཱིཏི. ཝཱིཏམོཧནྟི ལོཀིཡཀུསལཱབྱཱཀཏཾ. སཾཁིཏྟནྟི ཐིནམིདྡྷཱནུཔཏིཏཾ. ཨེཏཉྷི སངྐུཊིཏཙིཏྟཾ ནཱམ. ཝིཀྑིཏྟནྟི ཨུདྡྷཙྩསཧགཏཾ. ཨེཏཉྷི པསཊཙིཏྟཾ ནཱམ.

མཧགྒཏནྟི རཱུཔཱཝཙརཾ ཨརཱུཔཱཝཙརཉྩ. ཨམཧགྒཏནྟི ཀཱམཱཝཙརཾ. སཨུཏྟརནྟི ཀཱམཱཝཙརཾ. ཨནུཏྟརནྟི རཱུཔཱཝཙརཉྩ ཨརཱུཔཱཝཙརཉྩ. ཏཏྲཱཔི སཨུཏྟརཾ རཱུཔཱཝཙརཾ, ཨནུཏྟརཾ ཨརཱུཔཱཝཙརམེཝ. སམཱཧིཏནྟི ཡསྶ ཨཔྤནཱསམཱདྷི ཨུཔཙཱརསམཱདྷི ཝཱ ཨཏྠི. ཨསམཱཧིཏནྟི ཨུབྷཡསམཱདྷིཝིརཧིཏཾ. ཝིམུཏྟནྟི ཏདངྒཝིཀྑམྦྷནཝིམུཏྟཱིཧི ཝིནིམུཏྟཾ. ཨཝིམུཏྟནྟི ཨུབྷཡཝིམུཏྟིརཧིཏཾ; སམུཙྪེདཔཊིཔྤསྶདྡྷིནིསྶརཎཝིམུཏྟཱིནཾ པན ཨིདྷ ཨོཀཱསོཝ ནཏྠི. སརཱགམསྶ ཙིཏྟནྟི སརཱགཾ ཨསྶ ཙིཏྟཾ. སེསཾ ཧེཊྛཱ ཝུཏྟནཡཏྟཱ ཨུཏྟཱནཏྠམེཝ. ཨིམསྨིམྤི པབྦེ སུདྡྷཝིཔསྶནཱཝ ཀཐིཏཱཏི.

ཙིཏྟཱནུཔསྶནཱནིདྡེསཝཎྞནཱ ནིཊྛིཏཱ.

དྷམྨཱནུཔསྶནཱནིདྡེསཝཎྞནཱ

ནཱིཝརཎཔབྦཝཎྞནཱ

༣༦༧. ཨེཏྟཱཝཏཱ ¶ ཡསྨཱ ཀཱཡཱནུཔསྶནཱཡ རཱུཔཀྑནྡྷཔརིགྒཧོཝ ཀཐིཏོ, ཝེདནཱནུཔསྶནཱཡ ཝེདནཱཀྑནྡྷཔརིགྒཧོཝ ཙིཏྟཱནུཔསྶནཱཡ ཝིཉྙཱཎཀྑནྡྷཔརིགྒཧོཝ ཏསྨཱ ཨིདཱནི སམྤཡུཏྟདྷམྨསཱིསེན སཉྙཱསངྑཱརཀྑནྡྷཔརིགྒཧམྤི ཀཐེཏུཾ དྷམྨཱནུཔསྶནཾ དསྶེནྟོ ཀཐཉྩ བྷིཀྑཱུཏིཨཱདིམཱཧ. ཏཏྠ སནྟནྟི ཨབྷིཎྷསམུདཱཙཱརཝསེན སཾཝིཛྫམཱནཾ. ཨསནྟནྟི ཨསམུདཱཙཱརཝསེན ¶ ཝཱ པཧཱིནཏྟཱ ཝཱ ཨཝིཛྫམཱནཾ. ཡཐཱ ཙཱཏི ཡེན ཀཱརཎེན ཀཱམཙྪནྡསྶ ཨུཔྤཱདོ ཧོཏི. ཏཉྩ པཛཱནཱཏཱིཏི ཏཉྩ ཀཱརཎཾ པཛཱནཱཏི. ཨིམིནཱ ནཡེན སབྦཔདེསུ ཨཏྠོ ཝེདིཏབྦོ.

ཏཏྠ སུབྷནིམིཏྟེ ཨཡོནིསོམནསིཀཱརེན ¶ ཀཱམཙྪནྡསྶ ཨུཔྤཱདོ ཧོཏི. སུབྷནིམིཏྟཾ ནཱམ སུབྷམྤི སུབྷནིམིཏྟཾ, སུབྷཱརམྨཎམྤི སུབྷནིམིཏྟཾ. ཨཡོནིསོམནསིཀཱརོ ནཱམ ཨནུཔཱཡམནསིཀཱརོ ཨུཔྤཐམནསིཀཱརོ, ཨནིཙྩེ ནིཙྩནྟི ཝཱ དུཀྑེ སུཁནྟི ཝཱ ཨནཏྟནི ཨཏྟཱཏི ཝཱ ཨསུབྷེ སུབྷནྟི ཝཱ མནསིཀཱརོ. ཏཾ ཏཏྠ བཧུལཾ པཝཏྟཡཏོ ཀཱམཙྪནྡོ ཨུཔྤཛྫཏི. ཏེནཱཧ བྷགཝཱ –

‘‘ཨཏྠི, བྷིཀྑཝེ, སུབྷནིམིཏྟཾ. ཏཏྠ ཨཡོནིསོམནསིཀཱརབཧུལཱིཀཱརོ – ཨཡམཱཧཱརོ ཨནུཔྤནྣསྶ ཝཱ ཀཱམཙྪནྡསྶ ཨུཔྤཱདཱཡ, ཨུཔྤནྣསྶ ཝཱ ཀཱམཙྪནྡསྶ བྷིཡྻོབྷཱཝཱཡ ཝེཔུལླཱཡཱ’’ཏི (སཾ. ནི. ༥.༢༣༢).

ཨསུབྷནིམིཏྟེ པན ཡོནིསོམནསིཀཱརེནསྶ པཧཱནཾ ཧོཏི. ཨསུབྷནིམིཏྟཾ ནཱམ ཨསུབྷམྤི ཨསུབྷནིམིཏྟཾ, ཨསུབྷཱརམྨཎམྤི ཨསུབྷནིམིཏྟཾ. ཡོནིསོམནསིཀཱརོ ནཱམ ཨུཔཱཡམནསིཀཱརོ པཐམནསིཀཱརོ, ཨནིཙྩེ ཨནིཙྩནྟི ཝཱ དུཀྑེ དུཀྑནྟི ཝཱ ཨནཏྟནི ཨནཏྟཱཏི ཝཱ ཨསུབྷེ ཨསུབྷནྟི ཝཱ མནསིཀཱརོ. ཏཾ ཏཏྠ བཧུལཾ པཝཏྟཡཏོ ཀཱམཙྪནྡོ པཧཱིཡཏི. ཏེནཱཧ བྷགཝཱ –

‘‘ཨཏྠི, བྷིཀྑཝེ, ཨསུབྷནིམིཏྟཾ. ཏཏྠ ཡོནིསོམནསིཀཱརབཧུལཱིཀཱརོ ཨཡམནཱཧཱརོ ¶ ཨནུཔྤནྣསྶ ཝཱ ཀཱམཙྪནྡསྶ ཨུཔྤཱདཱཡ, ཨུཔྤནྣསྶ ཝཱ ཀཱམཙྪནྡསྶ བྷིཡྻོབྷཱཝཱཡ, ཝེཔུལླཱཡཱ’’ཏི (སཾ. ནི. ༥.༢༣༢).

ཨཔིཙ ཚ དྷམྨཱ ཀཱམཙྪནྡསྶ པཧཱནཱཡ སཾཝཏྟནྟི – ཨསུབྷནིམིཏྟསྶ ཨུགྒཧོ, ཨསུབྷབྷཱཝནཱནུཡོགོ, ཨིནྡྲིཡེསུ གུཏྟདྭཱརཏཱ, བྷོཛནེ མཏྟཉྙུཏཱ, ཀལྱཱཎམིཏྟཏཱ, སཔྤཱཡཀཐཱཏི. དསཝིདྷཉྷི ཨསུབྷནིམིཏྟཾ ཨུགྒཎྷནྟསྶཱཔི ཀཱམཙྪནྡོ པཧཱིཡཏི, བྷཱཝེནྟསྶཱཔི; ཨིནྡྲིཡེསུ པིཧིཏདྭཱརསྶཱཔི ¶ ; ཙཏུནྣཾ པཉྩནྣཾ ཨཱལོཔཱནཾ ཨོཀཱསེ སཏི ཨུདཀཾ པིཝིཏྭཱ ཡཱཔནསཱིལཏཱཡ བྷོཛནེ མཏྟཉྙུནོཔི. ཏེན ཝུཏྟཾ –

‘‘ཙཏྟཱརོ པཉྩ ཨཱལོཔེ, ཨབྷུཏྭཱ ཨུདཀཾ པིཝེ;

ཨལཾ ཕཱསུཝིཧཱརཱཡ, པཧིཏཏྟསྶ བྷིཀྑུནོ’’ཏི. (ཐེརགཱ. ༩༨༣);

ཨསུབྷཀམྨིཀཏིསྶཏྠེརསདིསེ ཨསུབྷབྷཱཝནཱརཏེ ཀལྱཱཎམིཏྟེ སེཝནྟསྶཱཔི ཀཱམཙྪནྡོ པཧཱིཡཏི; ཋཱནནིསཛྫཱདཱིསུ དསཨསུབྷནིསྶིཏསཔྤཱཡཀཐཱཡཔི པཧཱིཡཏི. ཏེན ¶ ཝུཏྟཾ ‘‘ཚ དྷམྨཱ ཀཱམཙྪནྡསྶ པཧཱནཱཡ སཾཝཏྟནྟཱི’’ཏི. ཨིམེཧི པན ཚཧི དྷམྨེཧི པཧཱིནསྶ ཀཱམཙྪནྡསྶ ཨརཧཏྟམགྒེན ཨཱཡཏིཾ ཨནུཔྤཱདོ ཧོཏཱིཏི པཛཱནཱཏི.

པཊིགྷནིམིཏྟེ ཨཡོནིསོམནསིཀཱརེན པན བྱཱཔཱདསྶ ཨུཔྤཱདོ ཧོཏི. ཏཏྠ པཊིགྷམྤི པཊིགྷནིམིཏྟཾ ནཱམ; པཊིགྷཱརམྨཎམྤི པཊིགྷནིམིཏྟཾ. ཨཡོནིསོམནསིཀཱརོ སབྦཏྠ ཨེཀལཀྑཎོཝ. ཏཾ ཏསྨིཾ ནིམིཏྟེ བཧུལཾ པཝཏྟཡཏོ བྱཱཔཱདོ ཨུཔྤཛྫཏི. ཏེནཱཧ བྷགཝཱ –

‘‘ཨཏྠི, བྷིཀྑཝེ, པཊིགྷནིམིཏྟཾ. ཏཏྠ ཨཡོནིསོམནསིཀཱརབཧུལཱིཀཱརོ – ཨཡམཱཧཱརོ ཨནུཔྤནྣསྶ ཝཱ བྱཱཔཱདསྶ ཨུཔྤཱདཱཡ, ཨུཔྤནྣསྶ ཝཱ བྱཱཔཱདསྶ བྷིཡྻོབྷཱཝཱཡ ཝེཔུལླཱཡཱ’’ཏི (སཾ. ནི. ༥.༢༣༢).

མེཏྟཱཡ པན ཙེཏོཝིམུཏྟིཡཱ ཡོནིསོམནསིཀཱརེནསྶ པཧཱནཾ ཧོཏི. ཏཏྠ མེཏྟཱཏི ཝུཏྟེ ཨཔྤནཱཔི ཨུཔཙཱརོཔི ཝཊྚཏི; ཙེཏོཝིམུཏྟཱིཏི ཨཔྤནཱཝ. ཡོནིསོམནསིཀཱརོ ཝུཏྟལཀྑཎོཝ. ཏཾ ཏཏྠ བཧུལཾ པཝཏྟཡཏོ བྱཱཔཱདོ པཧཱིཡཏི. ཏེནཱཧ བྷགཝཱ –

‘‘ཨཏྠི ¶ , བྷིཀྑཝེ, མེཏྟཱཙེཏོཝིམུཏྟི. ཏཏྠ ཡོནིསོམནསིཀཱརབཧུལཱིཀཱརོ – ཨཡམཱཧཱརོ ཨནུཔྤནྣསྶ ཝཱ བྱཱཔཱདསྶ ཨུཔྤཱདཱཡ, ཨུཔྤནྣསྶ ཝཱ བྱཱཔཱདསྶ བྷིཡྻོབྷཱཝཱཡ, ཝེཔུལླཱཡཱ’’ཏི (སཾ. ནི. ༥.༢༣༢ ཐོཀཾ ཝིསདིསཾ).

ཨཔིཙ ཚ དྷམྨཱ བྱཱཔཱདསྶ པཧཱནཱཡ སཾཝཏྟནྟི – མེཏྟཱནིམིཏྟསྶ ཨུགྒཧོ, མེཏྟཱབྷཱཝནཱནུཡོགོ, ཀམྨསྶཀཏཱཔཙྩཝེཀྑཎཱ, པཊིསངྑཱནབཧུལཱིཀཏཱ ¶ , ཀལྱཱཎམིཏྟཏཱ, སཔྤཱཡཀཐཱཏི. ཨོདིསྶཀཱནོདིསྶཀདིསཱཕརཎཱནཉྷི ཨཉྙཏརཝསེན མེཏྟཾ ཨུགྒཎྷནྟསྶཱཔི བྱཱཔཱདོ པཧཱིཡཏི. ཨོདྷིསོ ཨནོདྷིསོ དིསཱཕརཎཝསེན མེཏྟཾ བྷཱཝེནྟསྶཱཔི. ‘ཏྭཾ ཨེཏསྶ ཀུདྡྷོ ཀིཾ ཀརིསྶསི, ཀིམསྶ སཱིལཱདཱིནི ཝིནཱསེཏུཾ སཀྑིསྶསི? ནནུ ཏྭཾ ཨཏྟནོ ཀམྨེན ཨཱགནྟྭཱ ཨཏྟནོ ཀམྨེནེཝ གམིསྶསི? པརསྶ ཀུཛ྄ཛྷནཾ ནཱམ ཝཱིཏཙྩིཏངྒཱརཏཏྟཨཡོསལཱཀགཱུཐཱདཱིནི གཧེཏྭཱ པརསྶ པཧརིཏུཀཱམཏཱསདིསཾ ཧོཏི. ཨེསོཔི ཏཝ ཀུདྡྷོ ཀིཾ ཀརིསྶཏི? ཀིཾ ཏེ སཱིལཱདཱིནི ཝིནཱསེཏུཾ སཀྑིསྶཏི? ཨེས ཨཏྟནོ ཀམྨེནཱགནྟྭཱ ཨཏྟནོ ཀམྨེནེཝ གམིསྶཏི; ཨཔྤཊིཙྪིཏཔཧེཎཀཾ ཝིཡ པཊིཝཱཏཁིཏྟརཛོམུཊྛི ཝིཡ ¶ ཙ ཨེཏསྶེཝེས ཀོདྷོ མཏྠཀེ པཏིསྶཏཱི’ཏི. ཨེཝཾ ཨཏྟནོ ཙ པརསྶ ཙ ཀམྨསྶཀཏཾ པཙྩཝེཀྑཏོཔི, ཨུབྷཡཀམྨསྶཀཏཾ པཙྩཝེཀྑིཏྭཱ པཊིསངྑཱནེ ཋིཏསྶཱཔི, ཨསྶགུཏྟཏྠེརསདིསེ མེཏྟཱབྷཱཝནཱརཏེ ཀལྱཱཎམིཏྟེ སེཝནྟསྶཱཔི བྱཱཔཱདོ པཧཱིཡཏི; ཋཱནནིསཛྫཱདཱིསུ མེཏྟཱནིསྶིཏསཔྤཱཡཀཐཱཡཔི པཧཱིཡཏི. ཏེན ཝུཏྟཾ ‘‘ཚ དྷམྨཱ བྱཱཔཱདསྶ པཧཱནཱཡ སཾཝཏྟནྟཱི’’ཏི. ཨིམེཧི པན ཚཧི དྷམྨེཧི པཧཱིནསྶ བྱཱཔཱདསྶ ཨནཱགཱམིམགྒེན ཨཱཡཏིཾ ཨནུཔྤཱདོ ཧོཏཱིཏི པཛཱནཱཏི.

ཨརཏཱིཏིཨཱདཱིསུ ཨཡོནིསོམནསིཀཱརེན ཐིནམིདྡྷསྶ ཨུཔྤཱདོ ཧོཏི. ཨརཏི ནཱམ ཨུཀྐཎྛིཏཏཱ. ཏནྡཱི ནཱམ ཀཱཡཱལསིཡཏཱ. ཝིཛམྦྷིཀཱ ནཱམ ཀཱཡཝིནཱམནཱ. བྷཏྟསམྨདོ ནཱམ བྷཏྟམུཙྪཱ བྷཏྟཔརིལཱ༹ཧོ. ཙེཏསོ ལཱིནཏྟཾ ནཱམ ཙིཏྟསྶ ལཱིནཱཀཱརོ. ཨིམེསུ ཨརཏིཨཱདཱིསུ ཨཡོནིསོམནསིཀཱརཾ བཧུལཾ པཝཏྟཡཏོ ཐིནམིདྡྷཾ ཨུཔྤཛྫཏི. ཏེནཱཧ བྷགཝཱ –

‘‘ཨཏྠི, བྷིཀྑཝེ, ཨརཏི ཏནྡཱི ཝིཛམྦྷིཀཱ བྷཏྟསམྨདོ ཙེཏསོ ཙ ལཱིནཏྟཾ. ཏཏྠ ཨཡོནིསོམནསིཀཱརབཧུལཱིཀཱརོ – ཨཡམཱཧཱརོ ཨནུཔྤནྣསྶ ཝཱ ཐིནམིདྡྷསྶ ཨུཔྤཱདཱཡ ¶ , ཨུཔྤནྣསྶ ཝཱ ཐིནམིདྡྷསྶ བྷིཡྻོབྷཱཝཱཡ ཝེཔུལླཱཡཱ’’ཏི (སཾ. ནི. ༥.༢༣༢).

ཨཱརམྦྷདྷཱཏུཨཱདཱིསུ པན ཡོནིསོམནསིཀཱརེནསྶ པཧཱནཾ ཧོཏི. ཨཱརམྦྷདྷཱཏུ ནཱམ པཋམཱརམྦྷཝཱིརིཡཾ. ནིཀྐམདྷཱཏུ ནཱམ ཀོསཛྫཏོ ¶ ནིཀྑནྟཏྟཱ ཏཏོ བལཝཏརཾ. པརཀྐམདྷཱཏུ ནཱམ པརཾ པརཾ ཋཱནཾ ཨཀྐམནཏོ ཏཏོཔི བལཝཏརཾ. ཨིམསྨིཾ ཏིཔྤབྷེདེ ཝཱིརིཡེ ཡོནིསོམནསིཀཱརཾ བཧུལཾ པཝཏྟཡཏོ ཐིནམིདྡྷཾ པཧཱིཡཏི. ཏེནཱཧ བྷགཝཱ –

‘‘ཨཏྠི, བྷིཀྑཝེ, ཨཱརམྦྷདྷཱཏུ, ནིཀྐམདྷཱཏུ, པརཀྐམདྷཱཏུ. ཏཏྠ ཡོནིསོམནསིཀཱརབཧུལཱིཀཱརོ – ཨཡམནཱཧཱརོ ཨནུཔྤནྣསྶ ཝཱ ཐིནམིདྡྷསྶ ཨུཔྤཱདཱཡ, ཨུཔྤནྣསྶ ཝཱ ཐིནམིདྡྷསྶ བྷིཡྻོབྷཱཝཱཡ, ཝེཔུལླཱཡཱ’’ཏི (སཾ. ནི. ༥.༢༣༢).

ཨཔིཙ ཚ དྷམྨཱ ཐིནམིདྡྷསྶ པཧཱནཱཡ སཾཝཏྟནྟི – ཨཏིབྷོཛནེ ¶ ནིམིཏྟགྒཱཧོ, ཨིརིཡཱཔཐསམྤརིཝཏྟནཏཱ, ཨཱལོཀསཉྙཱམནསིཀཱརོ, ཨབྦྷོཀཱསཝཱསོ, ཀལྱཱཎམིཏྟཏཱ, སཔྤཱཡཀཐཱཏི. ཨཱཧརཧཏྠཀ བྷུཏྟཝམིཏཀ ཏཏྲཝཊྚཀ ཨལཾསཱཊཀ ཀཱཀམཱསཀབྷོཛནཾ བྷུཉྫིཏྭཱ རཏྟིཊྛཱནདིཝཱཊྛཱནེ ནིསིནྣསྶ ཧི སམཎདྷམྨཾ ཀརོཏོ ཐིནམིདྡྷཾ མཧཱཧཏྠཱི ཝིཡ ཨོཏྠརནྟཾ ཨཱགཙྪཏི. ཙཏུཔཉྩཨཱལོཔཨོཀཱསཾ པན ཋཔེཏྭཱ པཱནཱིཡཾ པིཝིཏྭཱ ཡཱཔནསཱིལསྶ བྷིཀྑུནོ ཏཾ ན ཧོཏཱིཏི ཨཏིབྷོཛནེ ནིམིཏྟཾ གཎྷནྟསྶཱཔི ཐིནམིདྡྷཾ པཧཱིཡཏི. ཡསྨིཾ ཨིརིཡཱཔཐེ ཐིནམིདྡྷཾ ཨོཀྐམཏི ཏཏོ ཨཉྙཾ པརིཝཏྟེནྟསྶཱཔི, རཏྟིཾ ཙནྡཱལོཀདཱིཔཱལོཀཨུཀྐཱལོཀེ དིཝཱ སཱུརིཡཱལོཀཾ མནསིཀརོནྟསྶཱཔི, ཨབྦྷོཀཱསེ ཝསནྟསྶཱཔི, མཧཱཀསྶཔཏྠེརསདིསེ པཧཱིནཐིནམིདྡྷེ ཀལྱཱཎམིཏྟེ སེཝནྟསྶཱཔི ཐིནམིདྡྷཾ པཧཱིཡཏི; ཋཱནནིསཛྫཱདཱིསུ དྷུཏངྒནིསྶིཏསཔྤཱཡཀཐཱཡཔི པཧཱིཡཏི. ཏེན ཝུཏྟཾ ‘‘ཚ དྷམྨཱ ཐིནམིདྡྷསྶ པཧཱནཱཡ སཾཝཏྟནྟཱི’’ཏི. ཨིམེཧི པན ཚཧི དྷམྨེཧི པཧཱིནསྶ ཐིནམིདྡྷསྶ ཨརཧཏྟམགྒེན ཨཱཡཏིཾ ཨནུཔྤཱདོ ཧོཏཱིཏི པཛཱནཱཏི.

ཙེཏསོ ཨཝཱུཔསམེ ཨཡོནིསོམནསིཀཱརེན ཨུདྡྷཙྩཀུཀྐུཙྩསྶ ཨུཔྤཱདོ ཧོཏི. ཨཝཱུཔསམོ ནཱམ ཨཝཱུཔསནྟཱཀཱརོ; ཨུདྡྷཙྩཀུཀྐུཙྩམེཝེཏཾ ཨཏྠཏོ. ཏཏྠ ཨཡོནིསོམནསིཀཱརཾ བཧུལཾ པཝཏྟཡཏོ ཨུདྡྷཙྩཀུཀྐུཙྩཾ ཨུཔྤཛྫཏི. ཏེནཱཧ བྷགཝཱ –

‘‘ཨཏྠི ¶ , བྷིཀྑཝེ, ཙེཏསོ ཨཝཱུཔསམོ. ཏཏྠ ཨཡོནིསོམནསིཀཱརབཧུལཱིཀཱརོ – ཨཡམཱཧཱརོ ཨནུཔྤནྣསྶ ཝཱ ཨུདྡྷཙྩཀུཀྐུཙྩསྶ ¶ ཨུཔྤཱདཱཡ, ཨུཔྤནྣསྶ ཝཱ ཨུདྡྷཙྩཀུཀྐུཙྩསྶ བྷིཡྻོབྷཱཝཱཡ ཝེཔུལླཱཡཱ’’ཏི (སཾ. ནི. ༥.༢༣༢).

སམཱདྷིསངྑཱཏེ པན ཙེཏསོ ཝཱུཔསམེ ཡོནིསོམནསིཀཱརེནསྶ པཧཱནཾ ཧོཏི. ཏེནཱཧ བྷགཝཱ –

‘‘ཨཏྠི, བྷིཀྑཝེ, ཙེཏསོ ཝཱུཔསམོ. ཏཏྠ ཡོནིསོམནསིཀཱརབཧུལཱིཀཱརོ – ཨཡམནཱཧཱརོ ཨནུཔྤནྣསྶ ཝཱ ཨུདྡྷཙྩཀུཀྐུཙྩསྶ ཨུཔྤཱདཱཡ, ཨུཔྤནྣསྶ ཝཱ ཨུདྡྷཙྩཀུཀྐུཙྩསྶ བྷིཡྻོབྷཱཝཱཡ, ཝེཔུལླཱཡཱ’’ཏི (སཾ. ནི. ༥.༢༣༢).

ཨཔིཙ ཚ དྷམྨཱ ཨུདྡྷཙྩཀུཀྐུཙྩསྶ པཧཱནཱཡ སཾཝཏྟནྟི – བཧུསྶུཏཏཱ, པརིཔུཙྪཀཏཱ, ཝིནཡེ པཀཏཉྙུཏཱ, ཝུཌྜྷསེཝིཏཱ ¶ , ཀལྱཱཎམིཏྟཏཱ, སཔྤཱཡཀཐཱཏི. བཱཧུསཙྩེནཔི ཧི ཨེཀཾ ཝཱ དྭེ ཝཱ ཏཡོ ཝཱ ཙཏྟཱརོ ཝཱ པཉྩ ཝཱ ནིཀཱཡེ པཱལི༹ཝསེན ཙ ཨཏྠཝསེན ཙ ཨུགྒཎྷནྟསྶཱཔི ཨུདྡྷཙྩཀུཀྐུཙྩཾ པཧཱིཡཏི. ཀཔྤིཡཱཀཔྤིཡཔརིཔུཙྪཱབཧུལསྶཱཔི, ཝིནཡཔཉྙཏྟིཡཾ ཙིཎྞཝསཱིབྷཱཝཏཱཡ པཀཏཉྙུནོཔི, ཝུཌྜྷེ མཧལླཀཏྠེརེ ཨུཔསངྐམནྟསྶཱཔི, ཨུཔཱལིཏྠེརསདིསེ ཝིནཡདྷརེ ཀལྱཱཎམིཏྟེ སེཝནྟསྶཔི ཨུདྡྷཙྩཀུཀྐུཙྩཾ པཧཱིཡཏི; ཋཱནནིསཛྫཱདཱིསུ ཀཔྤིཡཱཀཔྤིཡནིསྶིཏསཔྤཱཡཀཐཱཡཔི པཧཱིཡཏི. ཏེན ཝུཏྟཾ ‘‘ཚ དྷམྨཱ ཨུདྡྷཙྩཀུཀྐུཙྩསྶ པཧཱནཱཡ སཾཝཏྟནྟཱི’’ཏི. ཨིམེཧི པན ཚཧི དྷམྨེཧི པཧཱིནེ ཨུདྡྷཙྩཀུཀྐུཙྩེ ཨུདྡྷཙྩསྶ ཨརཧཏྟམགྒེན ཀུཀྐུཙྩསྶ ཨནཱགཱམིམགྒེན ཨཱཡཏིཾ ཨནུཔྤཱདོ ཧོཏཱིཏི པཛཱནཱཏི.

ཝིཙིཀིཙྪཱཋཱནཱིཡེསུ དྷམྨེསུ ཨཡོནིསོམནསིཀཱརེན ཝིཙིཀིཙྪཱཡ ཨུཔྤཱདོ ཧོཏི. ཝིཙིཀིཙྪཱཋཱནཱིཡཱ དྷམྨཱ ནཱམ པུནཔྤུནཾ ཝིཙིཀིཙྪཱཡ ཀཱརཎཏྟཱ ཝིཙིཀིཙྪཱཝ. ཏཏྠ ཨཡོནིསོམནསིཀཱརཾ བཧུལཾ པཝཏྟཡཏོ ཝིཙིཀིཙྪཱ ཨུཔྤཛྫཏི. ཏེནཱཧ བྷགཝཱ –

‘‘ཨཏྠི, བྷིཀྑཝེ, ཝིཙིཀིཙྪཱཋཱནཱིཡཱ དྷམྨཱ. ཏཏྠ ཨཡོནིསོམནསིཀཱརབཧུལཱིཀཱརོ ¶ – ཨཡམཱཧཱརོ ཨནུཔྤནྣཱཡ ཝཱ ཝིཙིཀིཙྪཱཡ ཨུཔྤཱདཱཡ, ཨུཔྤནྣཱཡ ཝཱ ཝིཙིཀིཙྪཱཡ བྷིཡྻོབྷཱཝཱཡ ཝེཔུལླཱཡཱ’’ཏི (སཾ. ནི. ༥.༢༣༢).

ཀུསལཱདིདྷམྨེསུ ¶ ཡོནིསོམནསིཀཱརེན པནསྶཱ པཧཱནཾ ཧོཏི. ཏེནཱཧ བྷགཝཱ –

‘‘ཨཏྠི, བྷིཀྑཝེ, ཀུསལཱཀུསལཱ དྷམྨཱ, སཱཝཛྫཱནཝཛྫཱ དྷམྨཱ, ཧཱིནཔྤཎཱིཏཱ དྷམྨཱ, ཀཎྷསུཀྐསཔྤཊིབྷཱགཱ དྷམྨཱ. ཏཏྠ ཡོནིསོམནསིཀཱརབཧུལཱིཀཱརོ – ཨཡམནཱཧཱརོ ཨནུཔྤནྣཱཡ ཝཱ ཝིཙིཀིཙྪཱཡ ཨུཔྤཱདཱཡ, ཨུཔྤནྣཱཡ ཝཱ ཝིཙིཀིཙྪཱཡ བྷིཡྻོབྷཱཝཱཡ, ཝེཔུལླཱཡཱ’’ཏི (སཾ. ནི. ༥.༢༣༢).

ཨཔིཙ ཚ དྷམྨཱ ཝིཙིཀིཙྪཱཡ པཧཱནཱཡ སཾཝཏྟནྟི – བཧུསྶུཏཏཱ, པརིཔུཙྪཀཏཱ, ཝིནཡེ པཀཏཉྙུཏཱ, ཨདྷིམོཀྑབཧུལཏཱ, ཀལྱཱཎམིཏྟཏཱ, སཔྤཱཡཀཐཱཏི. བཱཧུསཙྩེནཔི ཧི ཨེཀཾ ཝཱ…པེ… པཉྩ ཝཱ ནིཀཱཡེ པཱལི༹ཝསེན ཙ ཨཏྠཝསེན ཙ ཨུགྒཎྷནྟསྶཱཔི ཝིཙིཀིཙྪཱ པཧཱིཡཏི. ཏཱིཎི རཏནཱནི ཨཱརབྦྷ པརིཔུཙྪཱབཧུལསྶཱཔི, ཝིནཡེ ཙིཎྞཝསཱིབྷཱཝསྶཱཔི, ཏཱིསུ རཏནེསུ ཨོཀཔྤནིཡསདྡྷཱསངྑཱཏཨདྷིམོཀྑབཧུལསྶཱཔི ¶ , སདྡྷཱདྷིམུཏྟེ ཝཀྐལིཏྠེརསདིསེ ཀལྱཱཎམིཏྟེ སེཝནྟསྶཱཔི ཝིཙིཀིཙྪཱ པཧཱིཡཏི. ཋཱནནིསྶཛྫཱདཱིསུ ཏིཎྞཾ རཏནཱནཾ གུཎནིསྶིཏསཔྤཱཡཀཐཱཡཔི པཧཱིཡཏི. ཏེན ཝུཏྟཾ ‘‘ཚ དྷམྨཱ ཝིཙིཀིཙྪཱཡ པཧཱནཱཡ སཾཝཏྟནྟཱི’’ཏི. ཨིམེཧི པན ཚཧི དྷམྨེཧི པཧཱིནཱཡ ཝིཙིཀིཙྪཱཡ སོཏཱཔཏྟིམགྒེན ཨཱཡཏིཾ ཨནུཔྤཱདོ ཧོཏཱིཏི པཛཱནཱཏི.

ནཱིཝརཎཔབྦཝཎྞནཱ.

བོཛ྄ཛྷངྒཔབྦཝཎྞནཱ

བོཛ྄ཛྷངྒཔབྦེ སནྟནྟི པཊིལཱབྷཝསེན ཝིཛྫམཱནཾ. ཨསནྟནྟི ཨཔྤཊིལཱབྷཝསེན ཨཝིཛྫམཱནཾ. ཡཐཱ ཙ ཨནུཔྤནྣསྶཱཏིཨཱདཱིསུ པན སཏིསམྦོཛ྄ཛྷངྒསྶ ཏཱཝ –

‘‘ཨཏྠི ¶ , བྷིཀྑཝེ, སཏིསམྦོཛ྄ཛྷངྒཊྛཱནཱིཡཱ དྷམྨཱ. ཏཏྠ ཡོནིསོམནསིཀཱརབཧུལཱིཀཱརོ – ཨཡམཱཧཱརོ ཨནུཔྤནྣསྶ ཝཱ སཏིསམྦོཛ྄ཛྷངྒསྶ ཨུཔྤཱདཱཡ, ཨུཔྤནྣསྶ ཝཱ སཏིསམྦོཛ྄ཛྷངྒསྶ ¶ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ སཾཝཏྟཏཱི’’ཏི (སཾ. ནི. ༥.༡༨༣) – ཨེཝཾ ཨུཔྤཱདོ ཧོཏི. ཏཏྠ སཏིཡེཝ སཏིསམྦོཛ྄ཛྷངྒཊྛཱནཱིཡཱ དྷམྨཱ. ཡོནིསོམནསིཀཱརོ ཝུཏྟལཀྑཎོཡེཝ. ཏཾ ཏཏྠ བཧུལཾ པཝཏྟཡཏོ སཏིསམྦོཛ྄ཛྷངྒོ ཨུཔྤཛྫཏི.

ཨཔིཙ ཙཏྟཱརོ དྷམྨཱ སཏིསམྦོཛ྄ཛྷངྒསྶ ཨུཔྤཱདཱཡ སཾཝཏྟནྟི – སཏིསམྤཛཉྙཾ, མུཊྛསྶཏིཔུགྒལཔརིཝཛྫནཏཱ, ཨུཔཊྛིཏསྶཏིཔུགྒལསེཝནཏཱ, ཏདདྷིམུཏྟཏཱཏི. ཨབྷིཀྐནྟཱདཱིསུ ཧི སཏྟསུ ཋཱནེསུ སཏིསམྤཛཉྙེན, བྷཏྟནིཀྑིཏྟཀཱཀསདིསེ མུཊྛསྶཏིཔུགྒལེ པརིཝཛྫནེན, ཏིསྶདཏྟཏྠེརཨབྷཡཏྠེརསདིསེ ཨུཔཊྛིཏསྶཏིཔུགྒལེ སེཝནེན, ཋཱནནིསཛྫཱདཱིསུ སཏིསམུཊྛཱཔནཏྠཾ ནིནྣཔོཎཔབྦྷཱརཙིཏྟཏཱཡ ཙ སཏིསམྦོཛ྄ཛྷངྒོ ཨུཔྤཛྫཏི. ཨེཝཾ ཙཏཱུཧི ཀཱརཎེཧི ཨུཔྤནྣསྶ པནསྶ ཨརཧཏྟམགྒེན བྷཱཝནཱཔཱརིཔཱུརི ཧོཏཱིཏི པཛཱནཱཏི.

དྷམྨཝིཙཡསམྦོཛ྄ཛྷངྒསྶ པན –

‘‘ཨཏྠི, བྷིཀྑཝེ, ཀུསལཱཀུསལཱ དྷམྨཱ…པེ… ཀཎྷསུཀྐསཔྤཊིབྷཱགཱ དྷམྨཱ. ཏཏྠ ཡོནིསོམནསིཀཱརབཧུལཱིཀཱརོ – ཨཡམཱཧཱརོ ཨནུཔྤནྣསྶ ཝཱ དྷམྨཝིཙཡསམྦོཛ྄ཛྷངྒསྶ ཨུཔྤཱདཱཡ, ཨུཔྤནྣསྶ ཝཱ དྷམྨཝིཙཡསམྦོཛ྄ཛྷངྒསྶ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ སཾཝཏྟཏཱི’’ཏི (སཾ. ནི. ༥.༢༣༢) –

ཨེཝཾ ཨུཔྤཱདོ ཧོཏི.

ཨཔིཙ ¶ སཏྟ དྷམྨཱ དྷམྨཝིཙཡསམྦོཛ྄ཛྷངྒསྶ ཨུཔྤཱདཱཡ སཾཝཏྟནྟི – པརིཔུཙྪཀཏཱ, ཝཏྠུཝིསདཀིརིཡཱ, ཨིནྡྲིཡསམཏྟཔཊིཔཱདནཱ, དུཔྤཉྙཔུགྒལཔརིཝཛྫནཱ, པཉྙཝནྟཔུགྒལསེཝནཱ, གམྦྷཱིརཉཱཎཙརིཡཔཙྩཝེཀྑཎཱ, ཏདདྷིམུཏྟཏཱཏི. ཏཏྠ པརིཔུཙྪཀཏཱཏི ཁནྡྷདྷཱཏུཨཱཡཏནཨིནྡྲིཡབལབོཛ྄ཛྷངྒམགྒངྒཛྷཱནསམཐཝིཔསྶནཱནཾ ཨཏྠསནྣིསྶིཏཔརིཔུཙྪཱབཧུལཏཱ. ཝཏྠུཝིསདཀིརིཡཱཏི ཨཛ྄ཛྷཏྟིཀབཱཧིརཱནཾ ཝཏྠཱུནཾ ཝིསདབྷཱཝཀརཎཾ. ཡདཱ ཧིསྶ ཀེསནཁལོམཱནི དཱིགྷཱནི ཧོནྟི, སརཱིརཾ ¶ ཝཱ ཨུསྶནྣདོསཉྩེཝ སེདམལམཀྑིཏཉྩ, ཏདཱ ཨཛ྄ཛྷཏྟིཀཾ ཝཏྠུ ཨཝིསདཾ ཧོཏི ཨཔརིསུདྡྷཾ. ཡདཱ ¶ པན ཙཱིཝརཾ ཛིཎྞཾ ཀིལིཊྛཾ དུགྒནྡྷཾ ཧོཏི, སེནཱསནཾ ཝཱ ཨུཀླཱཔཾ, ཏདཱ བཱཧིརཾ ཝཏྠུ ཨཝིསདཾ ཧོཏི ཨཔརིསུདྡྷཾ. ཏསྨཱ ཀེསཱདིཚེདནེན ཨུདྡྷཾཝིརེཙནཨདྷོཝིརེཙནཱདཱིཧི སརཱིརསལླཧུཀབྷཱཝཀརཎེན, ཨུཙྪཱདནནྷཱཔནེན ཙ ཨཛ྄ཛྷཏྟིཀཝཏྠུ ཝིསདཾ ཀཱཏབྦཾ. སཱུཙིཀམྨདྷོཝནརཛནཔརིབྷཎྜཀརཎཱདཱིཧི བཱཧིརཝཏྠུ ཝིསདཾ ཀཱཏབྦཾ. ཨེཏསྨིཉྷི ཨཛ྄ཛྷཏྟིཀབཱཧིརཝཏྠུམྷི ཨཝིསདེ ཨུཔྤནྣེསུ ཙིཏྟཙེཏསིཀེསུ ཉཱཎམྤི ཨཝིསདཾ ཧོཏི ཨཔརིསུདྡྷཾ; ཨཔརིསུདྡྷཱནི དཱིཔཀཔལླཀཝཊྚིཏེལཱནི ནིསྶཱཡ ཨུཔྤནྣདཱིཔསིཁཱཡ ཨོབྷཱསོ ཝིཡ. ཝིསདེ པན ཨཛ྄ཛྷཏྟིཀབཱཧིརཝཏྠུམྷི ཨུཔྤནྣེསུ ཙིཏྟཙེཏསིཀེསུ ཉཱཎམྤི ཝིསདཾ ཧོཏི པརིསུདྡྷཱནི དཱིཔཀཔལླཀཝཊྚིཏེལཱནི ནིསྶཱཡ ཨུཔྤནྣདཱིཔསིཁཱཡ ཨོབྷཱསོ ཝིཡ. ཏེན ཝུཏྟཾ ‘‘ཝཏྠུཝིསདཀིརིཡཱ དྷམྨཝིཙཡསམྦོཛ྄ཛྷངྒསྶ ཨུཔྤཱདཱཡ སཾཝཏྟཏཱི’’ཏི.

ཨིནྡྲིཡསམཏྟཔཊིཔཱདནཱ ནཱམ སདྡྷཱདཱིནཾ ཨིནྡྲིཡཱནཾ སམབྷཱཝཀརཎཾ. སཙེ ཧིསྶ སདྡྷིནྡྲིཡཾ བལཝཾ ཧོཏི, ཨིཏརཱནི མནྡཱནི, ཏཏོ ཝཱིརིཡིནྡྲིཡཾ པགྒཧཀིཙྩཾ, སཏིནྡྲིཡཾ ཨུཔཊྛཱནཀིཙྩཾ, སམཱདྷིནྡྲིཡཾ ཨཝིཀྑེཔཀིཙྩཾ, པཉྙིནྡྲིཡཾ དསྶནཀིཙྩཾ ཀཱཏུཾ ན སཀྐོཏི. ཏསྨཱ ཏཾ དྷམྨསབྷཱཝཔཙྩཝེཀྑཎེན ཝཱ ཡཐཱ ཝཱ མནསིཀརོཏོ བལཝཾ ཛཱཏཾ, ཏཐཱ ཨམནསིཀཱརེན ཧཱཔེཏབྦཾ. ཝཀྐལིཏྠེརཝཏྠུ ཙེཏྠ ནིདསྶནཾ. སཙེ པན ཝཱིརིཡིནྡྲིཡཾ ¶ བལཝཾ ཧོཏི, ཨཐ ནེཝ སདྡྷིནྡྲིཡཾ ཨདྷིམོཀྑཀིཙྩཾ ཀཱཏུཾ སཀྐོཏི, ན ཨིཏརཱནི ཨིཏརཀིཙྩབྷེདཾ. ཏསྨཱ ཏཾ པསྶདྡྷཱདིབྷཱཝནཱཡ ཧཱཔེཏབྦཾ. ཏཏྲཱཔི སོཎཏྠེརཝཏྠུ དསྶེཏབྦཾ. ཨེཝཾ སེསེསུཔི ཨེཀསྶ བལཝབྷཱཝེ སཏི ཨིཏརེསཾ ཨཏྟནོ ཀིཙྩེསུ ཨསམཏྠཏཱ ཝེདིཏབྦཱ.

ཝིསེསཏོ པནེཏྠ སདྡྷཱཔཉྙཱནཾ སམཱདྷིཝཱིརིཡཱནཉྩ སམཏཾ པསཾསནྟི. བལཝསདྡྷོ ཧི མནྡཔཉྙོ མུདྡྷཔྤསནྣོ ཧོཏི, ཨཝཏྠུསྨིཾ པསཱིདཏི. བལཝཔཉྙོ མནྡསདྡྷོ ཀེརཱཊིཀཔཀྑཾ བྷཛཏི, བྷེསཛྫསམུཊྛིཏོ ཝིཡ རོགོ ཨཏེཀིཙྪོ ཧོཏི ‘ཙིཏྟུཔྤཱདམཏྟེནེཝ ཀུསལཾ ཧོཏཱི’ཏི ཨཏིདྷཱཝིཏྭཱ དཱནཱདཱིནི པུཉྙཱནི ཨཀརོནྟོ ནིརཡེ ཨུཔྤཛྫཏི. ཨུབྷིནྣཾ པན སམཏཱཡ ཝཏྠུསྨིཾཡེཝ པསཱིདཏི. བལཝསམཱདྷིཾ པན མནྡཝཱིརིཡཾ, སམཱདྷིསྶ ཀོསཛྫཔཀྑཏྟཱ, ཀོསཛྫཾ ཨདྷིབྷཝཏི. བལཝཝཱིརིཡཾ མནྡསམཱདྷིཾ, ཝཱིརིཡསྶ ཨུདྡྷཙྩཔཀྑཏྟཱ, ཨུདྡྷཙྩཾ ཨདྷིབྷཝཏི. སམཱདྷི པན ཝཱིརིཡེན སཾཡོཛིཏོ ཀོསཛྫེ པཏིཏུཾ ན ལབྷཏི. ཝཱིརིཡཾ སམཱདྷིནཱ སཾཡོཛིཏཾ ཨུདྡྷཙྩེ པཏིཏུཾ ན ལབྷཏི. ཏསྨཱ ཏདུབྷཡམྤི སམཾ ཀཱཏབྦཾ. ཨུབྷཡསམཏཱཡ ཧི ཨཔྤནཱ ཧོཏི ¶ ¶ . ཨཔིཙ སམཱདྷིཀམྨིཀསྶ བལཝཏཱིཔི སདྡྷཱ ཝཊྚཏི. ཨེཝཾ སོ སདྡཧནྟོ ཨོཀཔྤེནྟོ ཨཔྤནཾ པཱཔུཎིསྶཏི.

སམཱདྷིཔཉྙཱསུ པན སམཱདྷིཀམྨིཀསྶ ཨེཀགྒཏཱ བལཝཏཱི ཝཊྚཏི. ཨེཝཉྷི སོ ཨཔྤནཾ པཱཔུཎཱཏི. ཝིཔསྶནཱཀམྨིཀསྶ པཉྙཱ བལཝཏཱི ཝཊྚཏི. ཨེཝཉྷི སོ ལཀྑཎཔཊིཝེདྷཾ པཱཔུཎཱཏི. ཨུབྷིནྣཾ པན སམཏཱཡ ཨཔྤནཱ ཧོཏིཡེཝ. སཏི པན སབྦཏྠ བལཝཏཱི ཝཊྚཏི. སཏི ཧི ཙིཏྟཾ ཨུདྡྷཙྩཔཀྑིཀཱནཾ སདྡྷཱཝཱིརིཡཔཉྙཱནཾ ཝསེན ཨུདྡྷཙྩཔཱཏཏོ, ཀོསཛྫཔཀྑིཀེན ཙ སམཱདྷིནཱ ཀོསཛྫཔཱཏཏོ རཀྑཏི. ཏསྨཱ སཱ, ལོཎདྷཱུཔནཾ ཝིཡ སབྦབྱཉྫནེསུ, སབྦཀམྨིཀཨམཙྩོ ཝིཡ ཙ སབྦརཱཛཀིཙྩེསུ, སབྦཏྠ ཨིཙྪིཏབྦཱ. ཏེནཱཧ ‘‘སཏི ཙ པན སབྦཏྠིཀཱ ཝུཏྟཱ བྷགཝཏཱ. ཀིཾ ཀཱརཎཱ? ཙིཏྟཉྷི སཏིཔཊིསརཎཾ, ཨཱརཀྑཔཙྩུཔཊྛཱནཱ ¶ ཙ སཏི; ན ཝིནཱ སཏིཡཱ ཙིཏྟསྶ པགྒཧནིགྒཧོ ཧོཏཱི’’ཏི.

དུཔྤཉྙཔུགྒལཔརིཝཛྫནཱ ནཱམ ཁནྡྷཱདིབྷེདེ ཨནོགཱལ༹ྷཔཉྙཱནཾ དུམྨེདྷཔུགྒལཱནཾ ཨཱརཀཱ པརིཝཛྫནཾ. པཉྙཝནྟཔུགྒལསེཝནཱ ནཱམ སམཔཉྙཱསལཀྑཎཔརིགྒཱཧིཀཱཡ ཨུདཡབྦཡཔཉྙཱཡ སམནྣཱགཏཔུགྒལསེཝནཱ. གམྦྷཱིརཉཱཎཙརིཡཔཙྩཝེཀྑཎཱ ནཱམ གམྦྷཱིརེསུ ཁནྡྷཱདཱིསུ པཝཏྟཱཡ གམྦྷཱིརཔཉྙཱཡ པབྷེདཔཙྩཝེཀྑཎཱ. ཏདདྷིམུཏྟཏཱ ནཱམ ཋཱནནིསཛྫཱདཱིསུ དྷམྨཝིཙཡསམྦོཛ྄ཛྷངྒསམུཊྛཱཔནཏྠཾ ནིནྣཔོཎཔབྦྷཱརཙིཏྟཏཱ. ཨེཝཾ ཨུཔྤནྣསྶ པནསྶ ཨརཧཏྟམགྒེན བྷཱཝནཱཔཱརིཔཱུརི ཧོཏཱིཏི པཛཱནཱཏི.

ཝཱིརིཡསམྦོཛ྄ཛྷངྒསྶ –

‘‘ཨཏྠི, བྷིཀྑཝེ, ཨཱརམྦྷདྷཱཏུ ནིཀྐམདྷཱཏུ པརཀྐམདྷཱཏུ. ཏཏྠ ཡོནིསོམནསིཀཱརབཧུལཱིཀཱརོ – ཨཡམཱཧཱརོ ཨནུཔྤནྣསྶ ཝཱ ཝཱིརིཡསམྦོཛ྄ཛྷངྒསྶ ཨུཔྤཱདཱཡ, ཨུཔྤནྣསྶ ཝཱ ཝཱིརིཡསམྦོཛ྄ཛྷངྒསྶ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ སཾཝཏྟཏཱི’’ཏི (སཾ. ནི. ༥.༢༣༢) –

ཨེཝཾ ཨུཔྤཱདོ ཧོཏི.

ཨཔིཙ ¶ ཨེཀཱདས དྷམྨཱ ཝཱིརིཡསམྦོཛ྄ཛྷངྒསྶ ཨུཔྤཱདཱཡ སཾཝཏྟནྟི – ཨཔཱཡབྷཡཔཙྩཝེཀྑཎཏཱ, ཨཱནིསཾསདསྶཱཝིཏཱ, གམནཝཱིཐིཔཙྩཝེཀྑཎཏཱ, པིཎྜཔཱཏཱཔཙཱཡནཏཱ ¶ , དཱཡཛྫམཧཏྟཔཙྩཝེཀྑཎཏཱ, སཏྠུམཧཏྟཔཙྩཝེཀྑཎཏཱ, ཛཱཏིམཧཏྟཔཙྩཝེཀྑཎཏཱ, སབྲཧྨཙཱརིམཧཏྟཔཙྩཝེཀྑཎཏཱ, ཀུསཱིཏཔུགྒལཔརིཝཛྫནཏཱ, ཨཱརདྡྷཝཱིརིཡཔུགྒལསེཝནཏཱ, ཏདདྷིམུཏྟཏཱཏི.

ཏཏྠ ནིརཡེསུ པཉྩཝིདྷབནྡྷནཀམྨཀཱརཎཏོ པཊྛཱཡ མཧཱདུཀྑཾ ཨནུབྷཝནཀཱལེཔི, ཏིརཙྪཱནཡོནིཡཾ ཛཱལཀྑིཔཀུམཱིནཱདཱིཧི གཧིཏཀཱལེཔི, པཱཙནཀཎྚཀཱདིཔྤཧཱརཱཝིཏུནྣསྶ པན སཀཊཝཧནཱདིཀཱལེཔི, པེཏྟིཝིསཡེ ཨནེཀཱནིཔི ཝསྶསཧསྶཱནི ཨེཀཾ བུདྡྷནྟརམྤི ཁུཔྤིཔཱསཱཧི ཨཱཏུརཱིབྷཱུཏཀཱལེཔི, ཀཱལཀཉྫིཀཨསུརེསུ སཊྛིཧཏྠཨསཱིཏིཧཏྠཔྤམཱཎེན ¶ ཨཊྛིཙམྨམཏྟེནེཝ ཨཏྟབྷཱཝེན ཝཱཏཱཏཔཱདིདུཀྑཱནུབྷཝནཀཱལེཔི ན སཀྐཱ ཝཱིརིཡསམྦོཛ྄ཛྷངྒཾ ཨུཔྤཱདེཏུཾ. ‘ཨཡམེཝ ཏེ, བྷིཀྑུ, ཀཱལོ ཝཱིརིཡཀརཎཱཡཱ’ཏི ཨེཝཾ ཨཔཱཡབྷཡཾ པཙྩཝེཀྑནྟསྶཱཔི ཝཱིརིཡསམྦོཛ྄ཛྷངྒོ ཨུཔྤཛྫཏི. ‘ན སཀྐཱ ཀུསཱིཏེན ནཝ ལོཀུཏྟརདྷམྨཱ ལདྡྷུཾ; ཨཱརདྡྷཝཱིརིཡེནེཝ སཀྐཱ; ཨཡམཱནིསཾསོ ཝཱིརིཡསྶཱ’ཏི ཨེཝཾ ཨཱནིསཾསདསྶཱཝིནོཔི ཨུཔྤཛྫཏི. ‘སབྦབུདྡྷཔཙྩེཀབུདྡྷམཧཱསཱཝཀེཧེཝ ཏེ གཏམགྒོ གནྟབྦོ; སོ ཙ ན སཀྐཱ ཀུསཱིཏེན གནྟུ’ནྟི ཨེཝཾ གམནཝཱིཐིཾ པཙྩཝེཀྑནྟསྶཱཔི ཨུཔྤཛྫཏི. ‘ཡེ ཏཾ པིཎྜཔཱཏཱདཱིཧི ཨུཔཊྛཧནྟི, ཨིམེ ཏེ མནུསྶཱ ནེཝ ཉཱཏཀཱ, ན དཱསཀམྨཀརཱ, ནཱཔི ཏཾ ནིསྶཱཡ ‘ཛཱིཝིསྶཱམཱ’ཏི ཏེ པཎཱིཏཱནི པིཎྜཔཱཏཱདཱིནི དེནྟི; ཨཐ ཁོ ཨཏྟནོ ཀཱརཱནཾ མཧཔྥལཏཾ པཙྩཱསིཾསམཱནཱ དེནྟི. སཏྠཱརཱཔི ‘ཨཡཾ ཨིམེ པཙྩཡེ པརིབྷུཉྫིཏྭཱ ཀཱཡདལ༹ྷཱིབཧུལོ སུཁཾ ཝིཧརིསྶཏཱི’ཏི ན ཨེཝཉྩ སམྤསྶཏཱ ཏུཡ྄ཧཾ པཙྩཡཱ ཨནུཉྙཏཱ; ཨཐ ཁོ ‘ཨཡཾ ཨིམེ པརིབྷུཉྫམཱནོ སམཎདྷམྨཾ ཀཏྭཱ ཝཊྚདུཀྑཏོ མུཙྩིསྶཏཱི’ཏི ཏེ པཙྩཡཱ ཨནུཉྙཱཏཱ. སོ དཱནི ཏྭཾ ཀུསཱིཏོ ཝིཧརནྟོ ན ཏཾ པིཎྜཔཱཏཾ ཨཔཙཱཡིསྶསི. ཨཱརདྡྷཝཱིརིཡསྶེཝ ཧི པིཎྜཔཱཏཱཔཙཱཡནཾ ནཱམ ཧོཏཱི’ཏི ཨེཝཾ པིཎྜཔཱཏཱཔཙཱཡནཾ པཙྩཝེཀྑནྟསྶཱཔི ཨུཔྤཛྫཏི, མཧཱམིཏྟཏྠེརསྶ ཝིཡ.

ཐེརོ ཀིར ཀསྶཀལེཎེ ནཱམ པཊིཝསཏི. ཏསྶ ཙ གོཙརགཱམེ ཨེཀཱ མཧཱཨུཔཱསིཀཱ ཐེརཾ པུཏྟཾ ཀཏྭཱ པཊིཛགྒཏི. སཱ ཨེཀདིཝསཾ ཨརཉྙཾ གཙྪནྟཱི དྷཱིཏརཾ ཨཱཧ – ‘‘ཨམྨ, ཨསུཀསྨིཾ ཋཱནེ པུརཱཎཏཎྜུལཱ, ཨསུཀསྨིཾ ཁཱིརཾ, ཨསུཀསྨིཾ སཔྤི, ཨསུཀསྨིཾ ཕཱཎིཏཾ. ཏཝ ¶ བྷཱཏིཀསྶ ཨཡྻམིཏྟསྶ ཨཱགཏཀཱལེ བྷཏྟཾ པཙིཏྭཱ ཁཱིརསཔྤིཕཱཎིཏེཧི སདྡྷིཾ དེཧི ¶ , ཏྭཉྩ བྷུཉྫེཡྻཱསཱི’’ཏི. ‘‘ཏྭཾ པན ཀིཾ བྷུཉྫིསྶསི, ཨམྨཱ’’ཏི? ‘‘ཨཧཾ པན ཧིཡྻོ པཀྐཾ པཱརིཝཱསིཀབྷཏྟཾ ཀཉྫིཡེན བྷུཏྟམྷཱི’’ཏི. ‘‘དིཝཱ ཀིཾ བྷུཉྫིསྶསི, ཨམྨཱ’’ཏི? ‘‘སཱཀཔཎྞཾ པཀྑིཔིཏྭཱ ཀཎཏཎྜུལེཧི ཨམྦིལཡཱགུཾ པཙིཏྭཱ ཋཔེཧི, ཨམྨཱ’’ཏི.

ཐེརོ ཙཱིཝརཾ པཱརུཔིཏྭཱ པཏྟཾ ནཱིཧརནྟོཝ ཏཾ སདྡཾ སུཏྭཱ ཨཏྟཱནཾ ཨོཝདི – ‘མཧཱཨུཔཱསིཀཱ ཀིར ཀཉྫིཡེན ¶ པཱརིཝཱསིཀབྷཏྟཾ བྷུཉྫི; དིཝཱཔི ཀཎཔཎྞམྦིལཡཱགུཾ བྷུཉྫིསྶཏི; ཏུཡ྄ཧཾ ཨཏྠཱཡ པན པུརཱཎཏཎྜུལཱདཱིནི ཨཱཙིཀྑཏི. ཏཾ ནིསྶཱཡ ཁོ པནེསཱ ནེཝ ཁེཏྟཾ, ན ཝཏྠུཾ, ན བྷཏྟཾ, ན ཝཏྠཾ པཙྩཱསཱིསཏི; ཏིསྶོ པན སམྤཏྟིཡོ པཏྠཡམཱནཱ དེཏི. ཏྭཾ ཨེཏིསྶཱ ཏཱ སམྤཏྟིཡོ དཱཏུཾ སཀྑིསྶསི, ན སཀྑིསྶསཱིཏི? ཨཡཾ ཁོ པན པིཎྜཔཱཏོ ཏཡཱ སརཱགེན སདོསེན སམོཧེན ན སཀྐཱ བྷུཉྫིཏུ’ནྟི པཏྟཾ ཐཝིཀཱཡ པཀྑིཔིཏྭཱ གཎྛིཀཾ མུཉྩིཏྭཱ ནིཝཏྟིཏྭཱ ཀསྶཀལེཎམེཝ གནྟྭཱ པཏྟཾ ཧེཊྛཱམཉྩེ ཙཱིཝརཾ ཙཱིཝརཝཾསེ ཋཔེཏྭཱ ‘ཨརཧཏྟཾ ཨཔཱཔུཎིཏྭཱ ན ནིཀྑམིསྶཱམཱི’ཏི ཝཱིརིཡཾ ཨདྷིཊྛཧིཏྭཱ ནིསཱིདི. དཱིགྷརཏྟཾ ཨཔྤམཏྟོ ཧུཏྭཱ ནིཝུཏྠབྷིཀྑུ ཝིཔསྶནཾ ཝཌྜྷེཏྭཱ པུརེབྷཏྟམེཝ ཨརཧཏྟཾ པཏྭཱ ཝིཀསམཱནམིཝ པདུམཾ མཧཱཁཱིཎཱསཝོ སིཏཾ ཀརོནྟོཝ ནིསཱིདི. ལེཎདྭཱརེ རུཀྑམྷི ཨདྷིཝཏྠཱ དེཝཏཱ –

‘‘ནམོ ཏེ པུརིསཱཛཉྙ, ནམོ ཏེ པུརིསུཏྟམ;

ཡསྶ ཏེ ཨཱསཝཱ ཁཱིཎཱ, དཀྑིཎེཡྻོསི མཱརིསཱ’’ཏི.

ཨུདཱནཾ ཨུདཱནེཏྭཱ – ‘བྷནྟེ, པིཎྜཱཡ པཝིཊྛཱནཾ ཏུམྷཱདིསཱནཾ ཨརཧནྟཱནཾ བྷིཀྑཾ དཏྭཱ མཧལླཀིཏྠིཡོ དུཀྑཱ མུཙྩིསྶནྟཱི’ཏི ཨཱཧ.

ཐེརོ ཨུཊྛཧིཏྭཱ དྭཱརཾ ཝིཝརིཏྭཱ ཀཱལཾ ཨོལོཀེནྟོ ‘པཱཏོཡེཝཱ’ཏི ཉཏྭཱ པཏྟཙཱིཝརམཱདཱཡ གཱམཾ པཱཝིསི. དཱརིཀཱཔི བྷཏྟཾ སམྤཱདེཏྭཱ ‘ཨིདཱནི མེ བྷཱཏཱ ཨཱགམིསྶཏི, ཨིདཱནི མེ བྷཱཏཱ ཨཱགམིསྶཏཱིཏི དྭཱརཾ ཝིཝརིཏྭཱ ཨོལོཀཡམཱནཱ ནིསཱིདི. སཱ, ཐེརེ གྷརདྭཱརཾ སམྤཏྟེ, པཏྟཾ གཧེཏྭཱ སཔྤིཕཱཎིཏཡོཛིཏསྶ ཁཱིརཔིཎྜཔཱཏསྶ པཱུརེཏྭཱ ཧཏྠེ ཋཔེསི. ཐེརོ ‘སུཁཾ ཧོཏཱུ’ཏི ཨནུམོདནཾ ཀཏྭཱ པཀྐཱམི. སཱཔི ཏཾ ཨོལོཀཡམཱནཱ ཨཊྛཱསི.

ཐེརསྶ ¶ ¶ ཧི ཏདཱ ཨཏིཝིཡ པརིསུདྡྷོ ཚཝིཝཎྞོ ཨཧོསི, ཝིཔྤསནྣཱནི ཨིནྡྲིཡཱནི, མུཁཾ བནྡྷནཱ མུཏྟཏཱལཔཀྐཾ ཝིཡ ཨཏིཝིཡ ཝིརོཙིཏྠ. མཧཱཨུཔཱསིཀཱ ཨརཉྙཱ ཨཱགནྟྭཱ – ‘‘ཀིཾ, ཨམྨ, བྷཱཏིཀོ ཏེ ཨཱགཏོ’’ཏི པུཙྪི. སཱ སབྦཾ ཏཾ པཝཏྟིཾ ཨཱརོཙེསི. ཨུཔཱསིཀཱ ‘ཨཛྫ མེ པུཏྟསྶ པབྦཛིཏཀིཙྩཾ མཏྠཀཾ པཏྟ’ནྟི ཉཏྭཱ ‘‘ཨབྷིརམཏི ཏེ, ཨམྨ, བྷཱཏཱ བུདྡྷསཱསནེ, ན ཨུཀྐཎྛཏཱི’’ཏི ཨཱཧ.

མཧནྟཾ ཁོ པནེཏཾ སཏྠུ དཱཡཛྫཾ ཡདིདཾ སཏྟ ཨརིཡདྷནཱནི ནཱམ. ཏཾ ན སཀྐཱ ཀུསཱིཏེན གཧེཏུཾ. ཡཐཱ ཧི ¶ ཝིཔྤཊིཔནྣཾ པུཏྟཾ མཱཏཱཔིཏརོ ‘ཨཡཾ ཨམྷཱཀཾ ཨཔུཏྟོ’ཏི པརིབཱཧིརཾ ཀརོནྟི; སོ ཏེསཾ ཨཙྩཡེན དཱཡཛྫཾ ན ལབྷཏི; ཨེཝཾ ཀུསཱིཏོཔི ཨིདཾ ཨརིཡདྷནདཱཡཛྫཾ ན ལབྷཏི, ཨཱརདྡྷཝཱིརིཡོཝ ལབྷཏཱིཏི དཱཡཛྫམཧཏྟཾ པཙྩཝེཀྑཏོཔི ཨུཔྤཛྫཏི. ‘མཧཱ ཁོ པན ཏེ སཏྠཱ. སཏྠུནོ ཧི ཏེ མཱཏུཀུཙྪིསྨིཾ པཊིསནྡྷིགཎྷནཀཱལེཔི ཨབྷིནིཀྑམནེཔི ཨབྷིསམྦོདྷིཡམྤི དྷམྨཙཀྐཔཝཏྟནཡམཀཔཱཊིཧཱརིཡདེཝོརོཧནཨཱཡུསངྑཱརཝོསྶཛྫནེསུཔི པརིནིབྦཱནཀཱལེཔི དསསཧསྶིལོཀདྷཱཏུ ཀམྤིཏྠ. ཡུཏྟཾ ནུ ཏེ ཨེཝརཱུཔསྶ སཏྠུནོ སཱསནེ པབྦཛིཏྭཱ ཀུསཱིཏེན བྷཝིཏུ’ནྟི ཨེཝཾ སཏྠུམཧཏྟཾ པཙྩཝེཀྑཏོཔི ཨུཔྤཛྫཏི.

‘ཛཱཏིཡཱཔི ཏྭཾ ཨིདཱནི ན ལཱམཀཛཱཏིཀོསི; ཨསམྦྷིནྣཱཡ མཧཱསམྨཏཔཝེཎིཡཱ ཨཱགཏེ ཨོཀྐཱཀརཱཛཝཾསེ ཛཱཏོ; སིརིསུདྡྷོདནམཧཱརཱཛསྶ ཙ མཧཱམཱཡཱདེཝིཡཱ ཙ ནཏྟཱ; རཱཧུལབྷདྡསྶ ཀནིཊྛོ. ཏཡཱ ནཱམ ཨེཝརཱུཔེན ཛིནཔུཏྟེན ཧུཏྭཱ ན ཡུཏྟཾ ཀུསཱིཏེན ཝིཧརིཏུ’ནྟི ཨེཝཾ ཛཱཏིམཧཏྟཾ པཙྩཝེཀྑཏོཔི ཨུཔྤཛྫཏི. ‘སཱརིཔུཏྟམོགྒལླཱནཱ ཙེཝ ཨསཱིཏིམཧཱསཱཝཀཱ ཙ ཝཱིརིཡེནེཝ ལོཀུཏྟརདྷམྨཾ པཊིཝིཛ྄ཛྷིཾསུ. ཏྭཾ ཨེཏེསཾ སབྲཧྨཙཱརཱིནཾ མགྒཾ པཊིཔཛྫསི, ནཔྤཊིཔཛྫསཱི’ཏི ཨེཝཾ སབྲཧྨཙཱརིམཧཏྟཾ པཙྩཝེཀྑཏོཔི ཨུཔྤཛྫཏི.

ཀུཙྪིཾ པཱུརེཏྭཱ ཋིཏཨཛགརསདིསེ ཝིསྶཊྛཀཱཡིཀཙེཏསིཀཝཱིརིཡེ ཀུསཱིཏཔུགྒལེ པརིཝཛྫེནྟསྶཱཔི ཨཱརདྡྷཝཱིརིཡེ པཧིཏཏྟེ པུགྒལེ སེཝནྟསྶཱཔི ཋཱནནིསཛྫཱདཱིསུ ཝིརིཡུཔྤཱདནཏྠཾ ནིནྣཔོཎཔབྦྷཱརཙིཏྟསྶཱཔི ཨུཔྤཛྫཏི. ཨེཝཾ ཨུཔྤནྣསྶ པནསྶ ཨརཧཏྟམགྒེན བྷཱཝནཱཔཱརིཔཱུརི ཧོཏཱིཏི པཛཱནཱཏི.

པཱིཏིསམྦོཛ྄ཛྷངྒསྶ ¶ –

‘‘ཨཏྠི ¶ , བྷིཀྑཝེ, པཱིཏིསམྦོཛ྄ཛྷངྒཊྛཱནཱིཡཱ དྷམྨཱ. ཏཏྠ ཡོནིསོམནསིཀཱརབཧུལཱིཀཱརོ – ཨཡམཱཧཱརོ ཨནུཔྤནྣསྶ ཝཱ པཱིཏིསམྦོཛ྄ཛྷངྒསྶ ཨུཔྤཱདཱཡ, ཨུཔྤནྣསྶ ཝཱ པཱིཏིསམྦོཛ྄ཛྷངྒསྶ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ སཾཝཏྟཏཱི’’ཏི (སཾ. ནི. ༥.༢༣༢) –

ཨེཝཾ ཨུཔྤཱདོ ཧོཏི. ཏཏྠ པཱིཏིཡེཝ པཱིཏིསམྦོཛ྄ཛྷངྒཊྛཱནཱིཡཱ དྷམྨཱ ནཱམ. ཏསྶཱ ཨུཔྤཱདཀམནསིཀཱརོ ¶ ཡོནིསོམནསིཀཱརོ ནཱམ.

ཨཔིཙ ཨེཀཱདས དྷམྨཱ པཱིཏིསམྦོཛ྄ཛྷངྒསྶ ཨུཔྤཱདཱཡ སཾཝཏྟནྟི – བུདྡྷཱནུསྶཏི, དྷམྨསངྒྷསཱིལཙཱགདེཝཏཱནུསྶཏི, ཨུཔསམཱནུསྶཏི, ལཱུཁཔུགྒལཔརིཝཛྫནཏཱ, སིནིདྡྷཔུགྒལསེཝནཏཱ, པསཱདནཱིཡསུཏྟནྟཔཙྩཝེཀྑཎཏཱ, ཏདདྷིམུཏྟཏཱཏི.

བུདྡྷགུཎེ ཨནུསྶརནྟསྶཱཔི ཧི ཡཱཝ ཨུཔཙཱརཱ སཀལསརཱིརཾ ཕརམཱནོ པཱིཏིསམྦོཛ྄ཛྷངྒོ ཨུཔྤཛྫཏི; དྷམྨསངྒྷགུཎེ ཨནུསྶརནྟསྶཱཔི, དཱིགྷརཏྟཾ ཨཀྑཎྜཾ ཀཏྭཱ རཀྑིཏཾ ཙཏུཔཱརིསུདྡྷིསཱིལཾ པཙྩཝེཀྑནྟསྶཱཔི, གིཧིནོ དསསཱིལཾ པཉྩསཱིལཾ པཙྩཝེཀྑནྟསྶཱཔི, དུབྦྷིཀྑབྷཡཱདཱིསུ པཎཱིཏཾ བྷོཛནཾ སབྲཧྨཙཱརཱིནཾ དཏྭཱ ‘ཨེཝཾ ནཱམ ཨདམྷཱ’ཏི ཙཱགཾ པཙྩཝེཀྑནྟསྶཱཔི, གིཧིནོཔི ཨེཝརཱུཔེ ཀཱལེ སཱིལཝནྟཱནཾ དིནྣདཱནཾ པཙྩཝེཀྑནྟསྶཱཔི, ཡེཧི གུཎེཧི སམནྣཱགཏཱ དེཝཏཱ དེཝཏྟཾ པཏྟཱ ཏཐཱརཱུཔཱནཾ གུཎཱནཾ ཨཏྟནི ཨཏྠིཏཾ པཙྩཝེཀྑནྟསྶཱཔི, སམཱཔཏྟིཡཱ ཝིཀྑམྦྷིཏེ ཀིལེསེ སཊྛིཔི སཏྟཏིཔི ཝསྶཱནི ན སམུདཱཙརནྟཱིཏི པཙྩཝེཀྑནྟསྶཱཔི, ཙེཏིཡདསྶནབོདྷིདསྶནཐེརདསྶནེསུ ཨསཀྐཙྩཀིརིཡཱཡ སཾསཱུཙིཏལཱུཁབྷཱཝེ བུདྡྷཱདཱིསུ པསཱདསིནེཧཱབྷཱཝེན གདྲབྷཔིཊྛེ རཛསདིསེ ལཱུཁཔུགྒལེ པརིཝཛྫེནྟསྶཱཔི, བུདྡྷཱདཱིསུ པསཱདབཧུལེ མུདུཙིཏྟེ སིནིདྡྷཔུགྒལེ སེཝནྟསྶཱཔི, རཏནཏྟཡགུཎཔརིདཱིཔཀེ པསཱདནཱིཡསུཏྟནྟེ པཙྩཝེཀྑནྟསྶཱཔི, ཋཱནནིསཛྫཱདཱིསུ པཱིཏིཨུཔྤཱདནཏྠཾ ནིནྣཔོཎཔབྦྷཱརཙིཏྟསྶཱཔི ཨུཔྤཛྫཏི. ཨེཝཾ ཨུཔྤནྣསྶ པནསྶ ཨརཧཏྟམགྒེན བྷཱཝནཱཔཱརིཔཱུརི ཧོཏཱིཏི པཛཱནཱཏི.

པསྶདྡྷིསམྦོཛ྄ཛྷངྒསྶ ¶ –

‘‘ཨཏྠི ¶ , བྷིཀྑཝེ, ཀཱཡཔསྶདྡྷི ཙིཏྟཔསྶདྡྷི. ཏཏྠ ཡོནིསོམནསིཀཱརབཧུལཱིཀཱརོ – ཨཡམཱཧཱརོ ཨནུཔྤནྣསྶ ཝཱ པསྶདྡྷིསམྦོཛ྄ཛྷངྒསྶ ཨུཔྤཱདཱཡ, ཨུཔྤནྣསྶ ཝཱ པསྶདྡྷིསམྦོཛ྄ཛྷངྒསྶ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ སཾཝཏྟཏཱི’’ཏི (སཾ. ནི. ༥.༢༣༢) –

ཨེཝཾ ཨུཔྤཱདོ ཧོཏི. ཨཔིཙ སཏྟ དྷམྨཱ པསྶདྡྷིསམྦོཛ྄ཛྷངྒསྶ ཨུཔྤཱདཱཡ སཾཝཏྟནྟི – པཎཱིཏབྷོཛནསེཝནཏཱ, ཨུཏུསུཁསེཝནཏཱ ¶ , ཨིརིཡཱཔཐསུཁསེཝནཏཱ, མཛ྄ཛྷཏྟཔཡོགཏཱ, སཱརདྡྷཀཱཡཔུགྒལཔརིཝཛྫནཏཱ, པསྶདྡྷིཀཱཡཔུགྒལསེཝནཏཱ, ཏདདྷིམུཏྟཏཱཏི. པཎཱིཏཉྷི སིནིདྡྷཾ སཔྤཱཡབྷོཛནཾ བྷུཉྫནྟསྶཱཔི, སཱིཏུཎྷེསུ ཨུཏཱུསུ ཋཱནཱདཱིསུ ཙ ཨིརིཡཱཔཐེསུ སཔྤཱཡཾ ཨུཏུཉྩ ཨིརིཡཱཔཐཉྩ སེཝནྟསྶཱཔི པསྶདྡྷི ཨུཔྤཛྫཏི. ཡོ པན མཧཱཔུརིསཛཱཏིཀོ སབྦཨུཏུཨིརིཡཱཔཐཀྑམོཝ ཧོཏི, ན ཏཾ སནྡྷཱཡེཏཾ ཝུཏྟཾ. ཡསྶ སབྷཱགཝིསབྷཱགཏཱ ཨཏྠི, ཏསྶེཝ ཝིསབྷཱགེ ཨུཏུཨིརིཡཱཔཐེ ཝཛྫེཏྭཱ སབྷཱགེ སེཝནྟསྶཱཔི ཨུཔྤཛྫཏི. མཛ྄ཛྷཏྟཔཡོགོ ཝུཙྩཏི ཨཏྟནོ ཙ པརསྶ ཙ ཀམྨསྶཀཏཔཙྩཝེཀྑཎཱ; ཨིམིནཱ མཛ྄ཛྷཏྟཔཡོགེན ཨུཔྤཛྫཏི. ཡོ ལེཌྜུདཎྜཱདཱིཧི པརཾ ཝིཧེཋཡམཱནོཝ ཝིཙརཏི, ཨེཝརཱུཔཾ སཱརདྡྷཀཱཡཾ པུགྒལཾ པརིཝཛྫེནྟསྶཱཔི, སཾཡཏཔཱདཔཱཎིཾ པསྶདྡྷཀཱཡཾ པུགྒལཾ སེཝནྟསྶཱཔི, ཋཱནནིསཛྫཱདཱིསུ པསྶདྡྷིཨུཔྤཱདནཏྠཱཡ ནིནྣཔོཎཔབྦྷཱརཙིཏྟསྶཱཔི ཨུཔྤཛྫཏི. ཨེཝཾ ཨུཔྤནྣསྶ པནསྶ ཨརཧཏྟམགྒེན བྷཱཝནཱཔཱརིཔཱུརི ཧོཏཱིཏི པཛཱནཱཏི.

སམཱདྷིསམྦོཛ྄ཛྷངྒསྶ –

‘‘ཨཏྠི, བྷིཀྑཝེ, སམཐནིམིཏྟཾ ཨབྱགྒནིམིཏྟཾ. ཏཏྠ ཡོནིསོམནསིཀཱརབཧུལཱིཀཱརོ – ཨཡམཱཧཱརོ ཨནུཔྤནྣསྶ ཝཱ སམཱདྷིསམྦོཛ྄ཛྷངྒསྶ ཨུཔྤཱདཱཡ, ཨུཔྤནྣསྶ ཝཱ སམཱདྷིསམྦོཛ྄ཛྷངྒསྶ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ སཾཝཏྟཏཱི’’ཏི (སཾ. ནི. ༥.༢༣༢) –

ཨེཝཾ ཨུཔྤཱདོ ཧོཏི. ཏཏྠ སམཐོཝ སམཐནིམིཏྟཾ, ཨཝིཀྑེཔཊྛེན ཙ ཨབྱགྒནིམིཏྟནྟི.

ཨཔིཙ ¶ ཨེཀཱདས དྷམྨཱ སམཱདྷིསམྦོཛ྄ཛྷངྒསྶ ཨུཔྤཱདཱཡ སཾཝཏྟནྟི – ཝཏྠུཝིསདཀིརིཡཏཱ ¶ , ཨིནྡྲིཡསམཏྟཔཊིཔཱདནཏཱ, ནིམིཏྟཀུསལཏཱ, སམཡེ ཙིཏྟསྶ པགྒཎྷནཏཱ, སམཡེ ཙིཏྟསྶ ནིགྒཧཎནཏཱ, སམཡེ སམྤཧཾསནཏཱ, སམཡེ ཨཛ྄ཛྷུཔེཀྑཎཏཱ, ཨསམཱཧིཏཔུགྒལཔརིཝཛྫནཏཱ, སམཱཧིཏཔུགྒལསེཝནཏཱ, ཛྷཱནཝིམོཀྑཔཙྩཝེཀྑཎཏཱ, ཏདདྷིམུཏྟཏཱཏི. ཏཏྠ ཝཏྠུཝིསདཀིརིཡཏཱ ཙ ཨིནྡྲིཡསམཏྟཔཊིཔཱདནཏཱ ཙ ཝུཏྟནཡེནེཝ ཝེདིཏབྦཱ.

ནིམིཏྟཀུསལཏཱ ནཱམ ཀསིཎནིམིཏྟསྶ ཨུགྒཧཎཀུསལཏཱ. སམཡེ ཙིཏྟསྶ པགྒཧཎནཏཱཏི ཡསྨིཾ སམཡེ ཨཏིསིཐིལཝཱིརིཡཏཱདཱིཧི ¶ ལཱིནཾ ཙིཏྟཾ ཧོཏི, ཏསྨིཾ སམཡེ དྷམྨཝིཙཡཝཱིརིཡཔཱིཏིསམྦོཛ྄ཛྷངྒསམུཊྛཱཔནེན ཏསྶ པགྒཎྷནཾ. སམཡེ ཙིཏྟསྶ ནིགྒཧཎནཏཱཏི ཡསྨིཾ སམཡེ ཨཙྩཱརདྡྷཝཱིརིཡཏཱདཱིཧི ཨུདྡྷཊཾ ཙིཏྟཾ ཧོཏི, ཏསྨིཾ སམཡེ པསྶདྡྷིསམཱདྷིཨུཔེཀྑཱསམྦོཛ྄ཛྷངྒསམུཊྛཱཔནེན ཏསྶ ནིགྒཎྷནཾ. སམཡེ སམྤཧཾསནཏཱཏི ཡསྨིཾ སམཡེ ཙིཏྟཾ པཉྙཱཔཡོགམནྡཏཱཡ ཝཱ ཨུཔསམསུཁཱནདྷིགམེན ཝཱ ནིརསྶཱདཾ ཧོཏི, ཏསྨིཾ སམཡེ ཨཊྛསཾཝེགཝཏྠུཔཙྩཝེཀྑཎེན སཾཝེཛེཏི. ཨཊྛ སཾཝེགཝཏྠཱུནི ནཱམ ཛཱཏིཛརཱབྱཱདྷིམརཎཱནི ཙཏྟཱརི, ཨཔཱཡདུཀྑཾ པཉྩམཾ, ཨཏཱིཏེ ཝཊྚམཱུལཀཾ དུཀྑཾ, ཨནཱགཏེ ཝཊྚམཱུལཀཾ དུཀྑཾ, པཙྩུཔྤནྣེ ཨཱཧཱརཔརིཡེཊྛིམཱུལཀཾ དུཀྑནྟི. རཏནཏྟཡགུཎཱནུསྶརཎེན ཙ པསཱདཾ ཛནེཏི. ཨཡཾ ཝུཙྩཏི སམཡེ སམྤཧཾསནཏཱཏི.

སམཡེ ཨཛ྄ཛྷུཔེཀྑནཏཱ ནཱམ ཡསྨིཾ སམཡེ སམྨཱཔཊིཔཏྟིཾ ཨཱགམྨ ཨལཱིནཾ ཨནུདྡྷཊཾ ཨནིརསྶཱདཾ ཨཱརམྨཎེ སམཔྤཝཏྟཾ སམཐཝཱིཐིཔཊིཔནྣཾ ཙིཏྟཾ ཧོཏི, ཏདཱཡཾ པགྒཧནིགྒཧསམྤཧཾསནེསུ ན བྱཱཔཱརཾ ཨཱཔཛྫཏི སཱརཐཱི ཝིཡ སམཔྤཝཏྟེསུ ཨསྶེསུ. ཨཡཾ ཝུཙྩཏི སམཡེ ཨཛ྄ཛྷུཔེཀྑནཏཱཏི. ཨསམཱཧིཏཔུགྒལཔརིཝཛྫནཏཱ ནཱམ ཨུཔཙཱརཾ ཝཱ ཨཔྤནཾ ཝཱ ཨཔྤཏྟཱནཾ ཝིཀྑིཏྟཙིཏྟཱནཾ པུགྒལཱནཾ ཨཱརཀཱ པརིཝཛྫནཾ. སམཱཧིཏཔུགྒལསེཝནཏཱ ནཱམ ཨུཔཙཱརེན ཝཱ ཨཔྤནཱཡ ཝཱ སམཱཧིཏཙིཏྟཱནཾ སེཝནཱ བྷཛནཱ པཡིརུཔཱསནཱ. ཏདདྷིམུཏྟཏཱ ནཱམ ཋཱནནིསཛྫཱདཱིསུ སམཱདྷིཨུཔྤཱདནཏྠཾཡེཝ ནིནྣཔོཎཔབྦྷཱརཙིཏྟཏཱ. ཨེཝཉྷི པཊིཔཛྫཏོ ཨེས ཨུཔྤཛྫཏི. ཨེཝཾ ཨུཔྤནྣསྶ པནསྶ ཨརཧཏྟམགྒེན བྷཱཝནཱཔཱརིཔཱུརི ཧོཏཱིཏི པཛཱནཱཏི.

ཨུཔེཀྑཱསམྦོཛ྄ཛྷངྒསྶ –

‘‘ཨཏྠི, བྷིཀྑཝེ, ཨུཔེཀྑཱསམྦོཛ྄ཛྷངྒཊྛཱནཱིཡཱ དྷམྨཱ. ཏཏྠ ཡོནིསོམནསིཀཱརབཧུལཱིཀཱརོ ¶ – ཨཡམཱཧཱརོ ཨནུཔྤནྣསྶ ¶ ཝཱ ཨུཔེཀྑཱསམྦོཛ྄ཛྷངྒསྶ ¶ ཨུཔྤཱདཱཡ, ཨུཔྤནྣསྶ ཝཱ ཨུཔེཀྑཱསམྦོཛ྄ཛྷངྒསྶ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ སཾཝཏྟཏཱི’’ཏི (སཾ. ནི. ༥.༢༣༢) –

ཨེཝཾ ཨུཔྤཱདོ ཧོཏི. ཏཏྠ ཨུཔེཀྑཱཝ ཨུཔེཀྑཱསམྦོཛ྄ཛྷངྒཊྛཱནཱིཡཱ དྷམྨཱ ནཱམ. ཨཔིཙ པཉྩ དྷམྨཱ ཨུཔེཀྑཱསམྦོཛ྄ཛྷངྒསྶ ཨུཔྤཱདཱཡ སཾཝཏྟནྟི – སཏྟམཛ྄ཛྷཏྟཏཱ, སངྑཱརམཛ྄ཛྷཏྟཏཱ, སཏྟསངྑཱརཀེལཱཡནཔུགྒལཔརིཝཛྫནཏཱ, སཏྟསངྑཱརམཛ྄ཛྷཏྟཔུགྒལསེཝནཏཱ, ཏདདྷིམུཏྟཏཱཏི.

ཏཏྠ དྭཱིཧཱཀཱརེཧི སཏྟམཛ྄ཛྷཏྟཏཾ སམུཊྛཱཔེཏི – ‘ཏྭཾ ཨཏྟནོ ཀམྨེན ཨཱགནྟྭཱ ཨཏྟནོཝ ཀམྨེན གམིསྶསི. ཨེསོཔི ཨཏྟནོ ཀམྨེན ཨཱགནྟྭཱ ཨཏྟནོཝ ཀམྨེན གམིསྶཏི. ཏྭཾ ཀཾ ཀེལཱཡསཱི’ཏི ཨེཝཾ ཀམྨསྶཀཏཔཙྩཝེཀྑཎེན ཙ ‘པརམཏྠཏོ སཏྟོཡེཝ ནཏྠི. སོ ཏྭཾ ཀཾ ཀེལཱཡསཱི’ཏི ཨེཝཾ ནིསྶཏྟཔཙྩཝེཀྑཎེན ཙ. དྭཱིཧེཝཱཀཱརེཧི སངྑཱརམཛ྄ཛྷཏྟཏཾ སམུཊྛཱཔེཏི – ‘ཨིདཾ ཙཱིཝརཾ ཨནུཔུབྦེན ཝཎྞཝིཀཱརཉྩེཝ ཛིཎྞབྷཱཝཉྩ ཨུཔགནྟྭཱ པཱདཔུཉྪནཙོལ༹ཀཾ ཧུཏྭཱ ཡཊྛིཀོཊིཡཱ ཚཌྜནཱིཡཾ བྷཝིསྶཏི. སཙེ པནསྶ སཱམིཀོ བྷཝེཡྻ, ནཱསྶ ཨེཝཾ ཝིནསྶིཏུཾ དདེཡྻཱ’ཏི ཨེཝཾ ཨསྶཱམིཀབྷཱཝཔཙྩཝེཀྑཎེན ཙ. ‘ཨནདྡྷནིཡཾ ཨིདཾ ཏཱཝཀཱལིཀ’ནྟི ཨེཝཾ ཏཱཝཀཱལིཀབྷཱཝཔཙྩཝེཀྑཎེན ཙ. ཡཐཱ ཙ ཙཱིཝརེ, ཨེཝཾ པཏྟཱདཱིསུཔི ཡོཛནཱ ཀཱཏབྦཱ.

སཏྟསངྑཱརཀེལཱཡནཔུགྒལཔརིཝཛྫནཏཱཏི ཨེཏྠ ཡོ པུགྒལོ གིཧཱི ཝཱ ཨཏྟནོ པུཏྟདྷཱིཏཱདིཀེ, པབྦཛིཏོ ཝཱ ཨཏྟནོ ཨནྟེཝཱསིཀསམཱནུཔཛ྄ཛྷཱཡཀཱདིཀེ མམཱཡཏི, སཧཏྠེནེཝ ནེསཾ ཀེསཙྪེདནསཱུཙིཀམྨཙཱིཝརདྷོཝནརཛནཔཏྟཔཙནཱདཱིནི ཀརོཏི, མུཧུཏྟམྤི ཨཔསྶནྟོ ‘ཨསུཀོ སཱམཎེརོ ཀུཧིཾ? ཨསུཀོ དཧརོ ཀུཧི’ནྟི? བྷནྟམིགོ ཝིཡ ཨིཏོ ཙིཏོ ཙ ཨཱལོཀེཏི; ཨཉྙེན ཀེསཙྪེདནཱདཱིནཾ ཨཏྠཱཡ ‘མུཧུཏྟཾ ཏཱཝ ཨསུཀཾ པེསེཐཱ’ཏི ཡཱཙིཡམཱནོཔི ‘ཨམྷེཔི ཏཾ ཨཏྟནོ ཀམྨཾ ན ཀཱརེམ, ཏུམྷེ ནཾ གཧེཏྭཱ ཀིལམེསྶཐཱ’ཏི ན དེཏི – ཨཡཾ སཏྟཀེལཱཡནོ ནཱམ.

ཡོ ¶ པན ཙཱིཝརཔཏྟཐཱལཀཀཏྟརཡཊྛིཨཱདཱིནི ¶ མམཱཡཏི, ཨཉྙསྶ ཧཏྠེན པརཱམསིཏུམྤི ན དེཏི, ཏཱཝཀཱལིཀཾ ཡཱཙིཏོཔི ‘མཡམྤི ཨིམཾ མམཱཡནྟཱ ན པརིབྷུཉྫཱམ, ཏུམྷཱཀཾ ཀིཾ དསྶཱམཱ’ཏི ཝདཏི – ཨཡཾ སངྑཱརཀེལཱཡནོ ནཱམ. ཡོ པན ཏེསུ དྭཱིསུཔི ཝཏྠཱུསུ མཛ྄ཛྷཏྟོ ཨུདཱསཱིནོ – ཨཡཾ སཏྟསངྑཱརམཛ྄ཛྷཏྟོ ནཱམ. ཨིཏི ཨཡཾ ཨུཔེཀྑཱསམྦོཛ྄ཛྷངྒོ ཨེཝརཱུཔེ སཏྟསངྑཱརཀེལཱཡནཔུགྒལེ ¶ ཨཱརཀཱ པརིཝཛྫེནྟསྶཱཔི, སཏྟསངྑཱརམཛ྄ཛྷཏྟཔུགྒལེ སེཝནྟསྶཱཔི, ཋཱནནིསཛྫཱདཱིསུ ཏདུཔྤཱདནཏྠཾ ནིནྣཔོཎཔབྦྷཱརཙིཏྟསྶཱཔི ཨུཔྤཛྫཏི. ཨེཝཾ ཨུཔྤནྣསྶ པནསྶ ཨརཧཏྟམགྒེན བྷཱཝནཱཔཱརིཔཱུརི ཧོཏཱིཏི པཛཱནཱཏི. སེསཾ སབྦཏྠ ཨུཏྟཱནཏྠམེཝཱཏི.

བོཛ྄ཛྷངྒཔབྦཝཎྞནཱ.

ཨིམེསུཔི དྭཱིསུ པབྦེསུ སུདྡྷཝིཔསྶནཱཝ ཀཐིཏཱ. ཨིཏི ཨིམེ ཙཏྟཱརོ སཏིཔཊྛཱནཱ པུབྦབྷཱགེ ནཱནཱཙིཏྟེསུ ལབྦྷནྟི. ཨཉྙེནེཝ ཧི ཙིཏྟེན ཀཱཡཾ པརིགྒཎྷཱཏི, ཨཉྙེན ཝེདནཾ, ཨཉྙེན ཙིཏྟཾ, ཨཉྙེན དྷམྨེ པརིགྒཎྷཱཏི; ལོཀུཏྟརམགྒཀྑཎེ པན ཨེཀཙིཏྟེཡེཝ ལབྦྷནྟི. ཨཱདིཏོ ཧི ཀཱཡཾ པརིགྒཎྷིཏྭཱ ཨཱགཏསྶ ཝིཔསྶནཱསམྤཡུཏྟཱ སཏི ཀཱཡཱནུཔསྶནཱ ནཱམ. ཏཱཡ སཏིཡཱ སམནྣཱགཏོ པུགྒལོ ཀཱཡཱནུཔསྶཱི ནཱམ. ཝིཔསྶནཾ ཨུསྶུཀྐཱཔེཏྭཱ ཨརིཡམགྒཾ པཏྟསྶ མགྒཀྑཎེ མགྒསམྤཡུཏྟཱ སཏི ཀཱཡནུཔསྶནཱ ནཱམ. ཏཱཡ སཏིཡཱ སམནྣཱགཏོ པུགྒལོ ཀཱཡཱནུཔསྶཱི ནཱམ. ཝེདནཾ པརིགྒཎྷིཏྭཱ…. ཙིཏྟཾ པརིགྒཎྷིཏྭཱ…. དྷམྨེ པརིགྒཎྷིཏྭཱ ཨཱགཏསྶ ཝིཔསྶནཱསམྤཡུཏྟཱ སཏི དྷམྨཱནུཔསྶནཱ ནཱམ. ཏཱཡ སཏིཡཱ སམནྣཱགཏོ པུགྒལོ དྷམྨཱནུཔསྶཱི ནཱམ. ཝིཔསྶནཾ ཨུསྶུཀྐཱཔེཏྭཱ ཨརིཡམགྒཾ པཏྟསྶ མགྒཀྑཎེ མགྒསམྤཡུཏྟཱ སཏི དྷམྨཱནུཔསྶནཱ ནཱམ. ཏཱཡ སཏིཡཱ སམནྣཱགཏོ པུགྒལོ དྷམྨཱནུཔསྶཱི ནཱམ. ཨེཝཾ ཏཱཝ དེསནཱ པུགྒལེ ཏིཊྛཏི. ཀཱཡེ པན ‘སུབྷ’ནྟི ཝིཔལླཱསཔྤཧཱནཱ ཀཱཡཔརིགྒཱཧིཀཱ སཏི མགྒེན སམིཛ྄ཛྷཏཱིཏི ཀཱཡཱནུཔསྶནཱ ནཱམ. ཝེདནཱཡ ‘སུཁ’ནྟི ཝིཔལླཱསཔྤཧཱནཱ ཝེདནཱཔརིགྒཱཧིཀཱ སཏི མགྒེན སམིཛ྄ཛྷཏཱིཏི ཝེདནཱནུཔསྶནཱ ནཱམ. ཙིཏྟེ ‘ནིཙྩ’ནྟི ཝིཔལླཱསཔྤཧཱནཱ ཙིཏྟཔརིགྒཱཧིཀཱ སཏི མགྒེན སམིཛ྄ཛྷཏཱིཏི ཙིཏྟཱནུཔསྶནཱ ནཱམ. དྷམྨེསུ ‘ཨཏྟཱ’ཏི ཝིཔལླཱསཔྤཧཱནཱ དྷམྨཔརིགྒཱཧིཀཱ ¶ སཏི མགྒེན སམིཛ྄ཛྷཏཱིཏི དྷམྨཱནུཔསྶནཱ ནཱམ. ཨིཏི ཨེཀཱཝ མགྒསམྤཡུཏྟཱ སཏི ཙཏུཀིཙྩསཱདྷནཊྛེན ཙཏྟཱརི ¶ ནཱམཱནི ལབྷཏི. ཏེན ཝུཏྟཾ – ‘ལོཀུཏྟརམགྒཀྑཎེ པན ཨེཀཙིཏྟེཡེཝ ལབྦྷནྟཱི’ཏི.

སུཏྟནྟབྷཱཛནཱིཡཝཎྞནཱ.

༢. ཨབྷིདྷམྨབྷཱཛནཱིཡཝཎྞནཱ

༣༧༤. ཨབྷིདྷམྨབྷཱཛནཱིཡེ ¶ ལོཀུཏྟརསཏིཔཊྛཱནཝསེན དེསནཱཡ ཨཱརདྡྷཏྟཱ ཡཐཱ ཀཱཡཱདིཨཱརམྨཎེསུ ལོཀིཡསཏིཔཊྛཱནེསུ ཏནྟི ཋཔིཏཱ, ཨེཝཾ ཨཊྛཔེཏྭཱ སབྦཱནིཔི ཀཱཡཱནུཔསྶཱདཱིནི སཏིཔཊྛཱནཱནི དྷམྨསངྒཎིཡཾ (དྷ. ས. ༣༥༥ ཨཱདཡོ) ཝིབྷཏྟསྶ དེསནཱནཡསྶ མུཁམཏྟམེཝ དསྶེནྟེན ནིདྡིཊྛཱནི.

ཏཏྠ ནཡབྷེདོ ཝེདིཏབྦོ. ཀཐཾ? ཀཱཡཱནུཔསྶནཱཡ ཏཱཝ སོཏཱཔཏྟིམགྒེ ཛྷཱནཱབྷིནིཝེསེ སུདྡྷིཀཔཊིཔདཱ, སུདྡྷིཀསུཉྙཏཱ, སུཉྙཏཔཊིཔདཱ, སུདྡྷིཀཨཔྤཎིཧིཏཾ, ཨཔྤཎིཧིཏཔཊིཔདཱཏི ཨིམེསུ པཉྩསུ ཋཱནེསུ དྭིནྣཾ དྭིནྣཾ ཙཏུཀྐཔཉྩཀནཡཱནཾ ཝསེན དས ནཡཱ ཧོནྟི. ཨེཝཾ སེསེསུཔཱིཏི ཝཱིསཏིཡཱ ཨབྷིནིཝེསེསུ དྭེ ནཡསཏཱནི. ཏཱནི ཙཏཱུཧི ཨདྷིཔཏཱིཧི ཙཏུགུཎིཏཱནི ཨཊྛ. ཨིཏི སུདྡྷིཀཱནི དྭེ སཱདྷིཔཏཱིནི ཨཊྛཱཏི སབྦམྤི ནཡསཧསྶཾ ཧོཏི. ཏཐཱ ཝེདནཱནུཔསྶནཱདཱིསུ སུདྡྷིཀསཏིཔཊྛཱནེ ཙཱཏི སོཏཱཔཏྟིམགྒེ པཉྩ ནཡསཧསྶཱནི. ཡཐཱ ཙ སོཏཱཔཏྟིམགྒེ, ཨེཝཾ སེསམགྒེསུཔཱིཏི ཀུསལེ ཝཱིསཏི ནཡསཧསྶཱནི; སུཉྙཏཱཔཎིཧིཏཱནིམིཏྟཱདིབྷེདེསུ པན ཏཏོ ཏིགུཎེ ཝིཔཱཀེ སཊྛི ནཡསཧསྶཱནཱིཏི. ཨེཝམེཝ སཀིཙྩསཱདྷཀཱནཉྩེཝ སཾསིདྡྷིཀཀིཙྩཱནཉྩ ཀུསལཝིཔཱཀསཏིཔཊྛཱནཱནཾ ནིདྡེསཝསེན དུཝིདྷོ ཀཱཡཱནུཔསྶནཱདིཝསེན ཙ སུདྡྷིཀཝསེན ཙ ཀུསལེ པཉྩནྣཾ ཝིཔཱཀེ པཉྩནྣནྟི དསནྣཾ ནིདྡེསཝཱརཱནཾ ཝསེན དསཔྤབྷེདོ ཨསཱིཏིནཡསཧསྶཔཏིམཎྜིཏོ ཨབྷིདྷམྨབྷཱཛནཱིཡནིདྡེསོ.

༣. པཉྷཱཔུཙྪཀཝཎྞནཱ

༣༨༦. པཉྷཱཔུཙྪཀེ པཱལི༹ཨནུསཱརེནེཝ སཏིཔཊྛཱནཱནཾ ཀུསལཱདིབྷཱཝོ ཝེདིཏབྦོ. ཨཱརམྨཎཏྟིཀེསུ པན སབྦཱནིཔི ཨེཏཱནི ཨཔྤམཱཎཾ ནིབྦཱནཾ ¶ ཨཱརབྦྷ པཝཏྟནཏོ ཨཔྤམཱཎཱརམྨཎཱནེཝ, ན མགྒཱརམྨཎཱནི; སཧཛཱཏཧེཏུཝསེན པན མགྒཧེཏུཀཱནི; ཝཱིརིཡཾ ཝཱ ཝཱིམཾསཾ ཝཱ ཛེཊྛཀཾ ཀཏྭཱ མགྒབྷཱཝནཱཀཱལེ མགྒཱདྷིཔཏཱིནི; ཚནྡཙིཏྟཛེཊྛཀཱཡ ¶ མགྒབྷཱཝནཱཡ ནཝཏྟབྦཱནི མགྒཱདྷིཔཏཱིནཱིཏི ཕལཀཱལེཔི ནཝཏྟབྦཱནེཝ; ཨཏཱིཏཱདཱིསུ ཨེཀཱརམྨཎབྷཱཝེནཔི ནཝཏྟབྦཱནི; ནིབྦཱནསྶ པན བཧིདྡྷཱདྷམྨཏྟཱ བཧིདྡྷཱརམྨཎཱནི ནཱམ ཧོནྟཱིཏི. ཨེཝམེཏསྨིཾ པཉྷཱཔུཙྪཀེ ནིབྦཏྟིཏལོཀུཏྟརཱནེཝ སཏིཔཊྛཱནཱནི ཀཐིཏཱནི. སམྨཱསམྦུདྡྷེན ཧི སུཏྟནྟབྷཱཛནཱིཡསྨིཾཡེཝ ¶ ལོཀིཡལོཀུཏྟརམིསྶཀཱ སཏིཔཊྛཱནཱ ཀཐིཏཱ; ཨབྷིདྷམྨབྷཱཛནཱིཡཔཉྷཱཔུཙྪཀེསུ པན ལོཀུཏྟརཱཡེཝཱཏི. ཨེཝམཡཾ སཏིཔཊྛཱནཝིབྷངྒོཔི ཏེཔརིཝཊྚཾ ནཱིཧརིཏྭཱ བྷཱཛེཏྭཱ དསྶིཏོཏི.

སམྨོཧཝིནོདནིཡཱ ཝིབྷངྒཊྛཀཐཱཡ

སཏིཔཊྛཱནཝིབྷངྒཝཎྞནཱ ནིཊྛིཏཱ.

༨. སམྨཔྤདྷཱནཝིབྷངྒོ

༡. སུཏྟནྟབྷཱཛནཱིཡཝཎྞནཱ

༣༩༠. ཨིདཱནི ¶ ¶ ¶ ཏདནནྟརེ སམྨཔྤདྷཱནཝིབྷངྒེ ཙཏྟཱརོཏི གཎནཔརིཙྪེདོ. ཏེན ན ཏཏོ ཧེཊྛཱ ན ཨུདྡྷནྟི སམྨཔྤདྷཱནཔརིཙྪེདཾ དཱིཔེཏི. སམྨཔྤདྷཱནཱཏི ཀཱརཎཔྤདྷཱནཱ ཨུཔཱཡཔྤདྷཱནཱ ཡོནིསོཔདྷཱནཱ. ཨིདྷ བྷིཀྑཱུཏི ཨིམསྨིཾ སཱསནེ པཊིཔནྣཀོ བྷིཀྑུ. ཨནུཔྤནྣཱནནྟི ཨནིབྦཏྟཱནཾ. པཱཔཀཱནནྟི ལཱམཀཱནཾ. ཨཀུསལཱནཾ དྷམྨཱནནྟི ཨཀོསལླསམྦྷཱུཏཱནཾ དྷམྨཱནཾ. ཨནུཔྤཱདཱཡཱཏི ན ཨུཔྤཱདནཏྠཱཡ. ཚནྡཾ ཛནེཏཱིཏི ཀཏྟུཀམྱཏཱསངྑཱཏཾ ཀུསལཙྪནྡཾ ཛནེཏི ཨུཔྤཱདེཏི. ཝཱཡམཏཱིཏི པཡོགཾ པརཀྐམཾ ཀརོཏི. ཝཱིརིཡཾ ཨཱརབྷཏཱིཏི ཀཱཡིཀཙེཏསིཀཾ ཝཱིརིཡཾ ཀརོཏི. ཙིཏྟཾ པགྒཎྷཱཏཱིཏི ཏེནེཝ སཧཛཱཏཝཱིརིཡེན ཙིཏྟཾ ཨུཀྑིཔཏི. པདཧཏཱིཏི པདྷཱནཝཱིརིཡཾ ཀརོཏི. པཊིཔཱཊིཡཱ པནེཏཱནི ཙཏྟཱརིཔི པདཱནི ཨཱསེཝནཱབྷཱཝནཱབཧུལཱིཀམྨསཱཏཙྩཀིརིཡཱཧི ཡོཛེཏབྦཱནི.

ཨུཔྤནྣཱནཾ པཱཔཀཱནནྟི ཨནུཔྤནྣནྟི ཨཝཏྟབྦཏཾ ཨཱཔནྣཱནཾ པཱཔདྷམྨཱནཾ. པཧཱནཱཡཱཏི པཛཧནཏྠཱཡ. ཨནུཔྤནྣཱནཾ ཀུསལཱནཾ དྷམྨཱནནྟི ཨནིབྦཏྟཱནཾ ཀོསལླསམྦྷཱུཏཱནཾ དྷམྨཱནཾ. ཨུཔྤཱདཱཡཱཏི ཨུཔྤཱདནཏྠཱཡ. ཨུཔྤནྣཱནནྟི ནིབྦཏྟཱནཾ. ཋིཏིཡཱཏི ཋིཏཏྠཱཡ. ཨསམྨོསཱཡཱཏི ཨནསྶནཏྠཾ. བྷིཡྻོབྷཱཝཱཡཱཏི པུནཔྤུནཾ བྷཱཝཱཡ. ཝེཔུལླཱཡཱཏི ¶ ཝིཔུལབྷཱཝཱཡ. བྷཱཝནཱཡཱཏི ཝཌྜྷིཡཱ. པཱརིཔཱུརིཡཱཏི པརིཔཱུརཎཏྠཱཡ. ཨཡཾ ཏཱཝ ཙཏུནྣཾ སམྨཔྤདྷཱནཱནཾ ཨུདྡེསཝཱརཝསེན ཨེཀཔདིཀོ ཨཏྠུདྡྷཱརོ.

༣༩༡. ཨིདཱནི པཊིཔཱཊིཡཱ ཏཱནི པདཱནི བྷཱཛེཏྭཱ དསྶེཏུཾ ཀཐཉྩ བྷིཀྑུ ཨནུཔྤནྣཱནནྟིཨཱདིནཱ ¶ ནཡེན ནིདྡེསཝཱརོ ཨཱརདྡྷོ. ཏཏྠ ཡཾ ཧེཊྛཱ དྷམྨསངྒཧེ ཨཱགཏསདིསཾ, ཏཾ ཏསྶ ཝཎྞནཱཡཾ ཝུཏྟནཡེནེཝ ཝེདིཏབྦཾ. ཡཾ པན ཏསྨིཾ ཨནཱགཏཾ, ཏཏྠ ཚནྡནིདྡེསེ ཏཱཝ ཡོ ཚནྡོཏི ཡོ ཚནྡནིཡཝསེན ཚནྡོ. ཚནྡིཀཏཱཏི ཚནྡིཀབྷཱཝོ, ཚནྡཀརཎཱཀཱརོ ཝཱ. ཀཏྟུཀམྱཏཱཏི ཀཏྟུཀཱམཏཱ. ཀུསལོཏི ཚེཀོ. དྷམྨཙྪནྡོཏི སབྷཱཝཙྪནྡོ. ཨཡཉྷི ཚནྡོ ནཱམ ཏཎྷཱཚནྡོ, དིཊྛིཚནྡོ, ཝཱིརིཡཚནྡོ, དྷམྨཙྪནྡོཏི བཧུཝིདྷོ ནཱནཔྤཀཱརཀོ. ཏེསུ ¶ དྷམྨཙྪནྡོཏི ཨིམསྨིཾ ཋཱནེ ཀཏྟུཀམྱཏཱཀུསལདྷམྨཙྪནྡོ ཨདྷིཔྤེཏོ.

ཨིམཾ ཚནྡཾ ཛནེཏཱིཏི ཚནྡཾ ཀུརུམཱནོཝ ཚནྡཾ ཛནེཏི ནཱམ. སཉྫནེཏཱིཏི ཨུཔསགྒེན པདཾ ཝཌྜྷིཏཾ. ཨུཊྛཔེཏཱིཏི ཚནྡཾ ཀུརུམཱནོཝ ཏཾ ཨུཊྛཔེཏི ནཱམ. སམུཊྛཔེཏཱིཏི ཨུཔསགྒེན པདཾ ཝཌྜྷིཏཾ. ནིབྦཏྟེཏཱིཏི ཚནྡཾ ཀུརུམཱནོཝ ཏཾ ནིབྦཏྟེཏི ནཱམ. ཨབྷིནིབྦཏྟེཏཱིཏི ཨུཔསགྒེན པདཾ ཝཌྜྷིཏཾ. ཨཔིཙ ཚནྡཾ ཀརོནྟོཝ ཚནྡཾ ཛནེཏི ནཱམ. ཏམེཝ སཏཏཾ ཀརོནྟོ སཉྫནེཏི ནཱམ. ཀེནཙིདེཝ ཨནྟརཱཡེན པཏིཏཾ པུན ཨུཀྑིཔནྟོ ཨུཊྛཔེཏི ནཱམ. པབནྡྷཊྛིཏིཾ པཱཔེནྟོ སམུཊྛཔེཏི ནཱམ. ཏཾ པཱཀཊཾ ཀརོནྟོ ནིབྦཏྟེཏི ནཱམ. ཨནོསཀྐནཏཱཡ ཨལཱིནཝུཏྟིཏཱཡ ཨནོལཱིནཝུཏྟིཏཱཡ ཨབྷིམུཁབྷཱཝེན ནིབྦཏྟེནྟོ ཨབྷིནིབྦཏྟེཏི ནཱམ.

༣༩༤. ཝཱིརིཡནིདྡེསེ ཝཱིརིཡཾ ཀརོནྟོཝ ཝཱིརིཡཾ ཨཱརབྷཏི ནཱམ. དུཏིཡཔདཾ ཨུཔསགྒེན ཝཌྜྷིཏཾ. ཝཱིརིཡཾ ¶ ཀརོནྟོཡེཝ ཙ ཨཱསེཝཏི བྷཱཝེཏི ནཱམ. པུནཔྤུནཾ ཀརོནྟོ ཝཧུལཱིཀརོཏི. ཨཱདིཏོཝ ཀརོནྟོ ཨཱརབྷཏི. པུནཔྤུནཾ ཀརོནྟོ སམཱརབྷཏི. བྷཱཝནཱཝསེན བྷཛནྟོ ཨཱསེཝཏི. ཝཌྜྷེནྟོ བྷཱཝེཏི. སབྦཀིཙྩེསུ ཏདེཝ བཧུལཱིཀརོནྟོ བཧུལཱིཀརོཏཱིཏི ཝེདིཏབྦོ.

༣༩༥. ཙིཏྟཔགྒཧནིདྡེསེ ཝཱིརིཡཔགྒཧེན ཡོཛེནྟོ ཙིཏྟཾ པགྒཎྷཱཏི, ཨུཀྑིཔཏཱིཏི ཨཏྠོ. པུནཔྤུནཾ པགྒཎྷནྟོ སམྤགྒཎྷཱཏི. ཨེཝཾ སམྤགྒཧིཏཾ ཡཐཱ ན པཏཏི ཏཐཱ ནཾ ཝཱིརིཡུཔཏྠམྦྷེན ཨུཔཏྠམྦྷེནྟོ ཨུཔཏྠམྦྷེཏི. ཨུཔཏྠམྦྷིཏམྤི ཐིརབྷཱཝཏྠཱཡ པུནཔྤུནཾ ཨུཔཏྠམྦྷེནྟོ པཙྩུཔཏྠམྦྷེཏི ནཱམ.

༤༠༦. ཋིཏིཡཱཏིཔདསྶ ནིདྡེསེ སབྦེསམྤི ཨསམྨོསཱདཱིནཾ ཋིཏིཝེཝཙནབྷཱཝཾ དསྶེཏུཾ ཡཱ ཋིཏི སོ ཨསམྨོསོཏིཨཱདི ཝུཏྟཾ. ཨེཏྠ ཧི ཧེཊྛིམཾ ཧེཊྛིམཾ པདཾ ཨུཔརིམསྶ ཨུཔརིམསྶ པདསྶ ¶ ཨཏྠོ, ཨུཔརིམཾ ཨུཔརིམཾ པདཾ ཧེཊྛིམསྶ ཧེཊྛིམསྶ ཨཏྠོཏིཔི ཝཏྟུཾ ཝཊྚཏི. སེསཾ སབྦཏྠ ཨུཏྟཱནཏྠམེཝཱཏི. ཨཡཾ ཏཱཝ པཱལི༹ཝཎྞནཱ.

ཨཡཾ པནེཏྠ ཝིནིཙྪཡཀཐཱ. ཨཡཉྷི སམྨཔྤདྷཱནཀཐཱ ནཱམ དུཝིདྷཱ – ལོཀིཡཱ ལོཀུཏྟརཱ ཙ. ཏཏྠ ལོཀིཡཱ སབྦཔུབྦབྷཱགེ ཧོཏི. སཱ ¶ ཀསྶཔསཾཡུཏྟཔརིཡཱཡེན ལོཀིཡམགྒཀྑཎེ ཝེདིཏབྦཱ. ཝུཏྟཉྷི ཏཏྠ –

‘‘ཙཏྟཱརོ མེ, ཨཱཝུསོ, སམྨཔྤདྷཱནཱ. ཀཏམེ ཙཏྟཱརོ?

ཨིདྷཱཝུསོ, བྷིཀྑུ ‘ཨནུཔྤནྣཱ མེ པཱཔཀཱ ཨཀུསལཱ དྷམྨཱ ཨུཔྤཛྫམཱནཱ ཨནཏྠཱཡ སཾཝཏྟེཡྻུ’ནྟི ཨཱཏཔྤཾ ཀརོཏི; ‘ཨུཔྤནྣཱ མེ པཱཔཀཱ ཨཀུསལཱ དྷམྨཱ ཨཔྤཧཱིཡམཱནཱ ཨནཏྠཱཡ སཾཝཏྟེཡྻུ’ནྟི ཨཱཏཔྤཾ ཀརོཏི; ‘ཨནུཔྤནྣཱ མེ ཀུསལཱ དྷམྨཱ ཨནུཔྤཛྫམཱནཱ ཨནཏྠཱཡ སཾཝཏྟེཡྻུ’ནྟི ཨཱཏཔྤཾ ཀརོཏི. ‘ཨུཔྤནྣཱ མེ ཀུསལཱ དྷམྨཱ ནིརུཛ྄ཛྷམཱནཱ ཨནཏྠཱཡ སཾཝཏྟེཡྻུ’ནྟི ཨཱཏཔྤཾ ཀརོཏཱི’’ཏི (སཾ. ནི. ༢.༡༤༥).

ཨེཏྠ ཙ ‘ཨནུཔྤནྣཱ མེ ཀུསལཱ དྷམྨཱ’ཏི སམཐཝིཔསྶནཱ ཙེཝ མགྒོ ཙ. ཨུཔྤནྣཱ ¶ ཀུསལཱ ནཱམ སམཐཝིཔསྶནཱཝ. མགྒོ པན སཀིཾ ཨུཔྤཛྫིཏྭཱ ནིརུཛ྄ཛྷམཱནོ ཨནཏྠཱཡ སཾཝཏྟནཀོ ནཱམ ནཏྠི. སོ ཧི ཕལསྶ པཙྩཡཾ དཏྭཱཝ ནིརུཛ྄ཛྷཏི. པུརིམསྨིཾ ཝཱ སམཐཝིཔསྶནཱཝ གཧེཏབྦཱཏི ཝུཏྟཾ, ཏཾ པན ན ཡུཏྟཾ.

ཏཏྠ ‘‘ཨུཔྤནྣཱ སམཐཝིཔསྶནཱ ནིརུཛ྄ཛྷམཱནཱ ཨནཏྠཱཡ སཾཝཏྟནྟཱི’’ཏི ཨཏྠསྶ ཨཱཝིབྷཱཝཏྠཾ ཨིདཾ ཝཏྠུ – ཨེཀོ ཀིར ཁཱིཎཱསཝཏྠེརོ ‘མཧཱཙེཏིཡཉྩ མཧཱབོདྷིཉྩ ཝནྡིསྶཱམཱི’ཏི སམཱཔཏྟིལཱབྷིནཱ བྷཎྜགཱཧཀསཱམཎེརེན སདྡྷིཾ ཛནཔདཏོ མཧཱཝིཧཱརཾ ཨཱགནྟྭཱ ཝིཧཱརཔརིཝེཎཾ པཱཝིསི; སཱཡནྷསམཡེ མཧཱབྷིཀྑུསངྒྷེ ཙེཏིཡཾ ཝནྡམཱནེ ཙེཏིཡཾ ཝནྡནཏྠཱཡ ན ནིཀྑམི. ཀསྨཱ? ཁཱིཎཱསཝཱནཉྷི ཏཱིསུ རཏནེསུ མཧནྟཾ གཱརཝཾ ཧོཏི. ཏསྨཱ བྷིཀྑུསངྒྷེ ཝནྡིཏྭཱ པཊིཀྐནྟེ མནུསྶཱནཾ སཱཡམཱསབྷུཏྟཝེལཱཡ སཱམཎེརམྤི ཨཛཱནཱཔེཏྭཱ ‘ཙེཏིཡཾ ཝནྡིསྶཱམཱི’ཏི ཨེཀཀོཝ ནིཀྑམི. སཱམཎེརོ ‘ཀིཾ ནུ ཁོ ཐེརོ ཨཝེལཱཡ ཨེཀཀོཝ གཙྪཏི, ཛཱནིསྶཱམཱི’ཏི ཨུཔཛ྄ཛྷཱཡསྶ པདཱནུཔདིཀོཝ ནིཀྑམི. ཐེརོ ཨནཱཝཛྫནེན ཏསྶ ཨཱགམནཾ ¶ ཨཛཱནནྟོ དཀྑིཎདྭཱརེན མཧཱཙེཏིཡངྒཎཾ ཨཱརུལ༹ྷོ. སཱམཎེརོཔི ཨནུཔདཾཡེཝ ཨཱརུལ༹ྷོ.

མཧཱཐེརོ ¶ མཧཱཙེཏིཡཾ ཨུལློཀེཏྭཱ བུདྡྷཱརམྨཎཾ པཱིཏིཾ གཧེཏྭཱ སབྦཾ ཙེཏསོ སམནྣཱཧརིཏྭཱ ཧཊྛཔཧཊྛོ མཧཱཙེཏིཡཾ ཝནྡཏི. སཱམཎེརོ ཐེརསྶ ཝནྡནཱཀཱརཾ དིསྭཱ ‘ཨུཔཛ྄ཛྷཱཡོ མེ ཨཏིཝིཡ པསནྣཙིཏྟོ ཝནྡཏི; ཀིཾ ནུ ཁོ པུཔྥཱནི ལབྷིཏྭཱ པཱུཛཾ ཀརེཡྻཱ’ཏི ཙིནྟེསི. ཐེརེ ཝནྡིཏྭཱ ཨུཊྛཱཡ སིརསི ཨཉྫལིཾ ཋཔེཏྭཱ མཧཱཙེཏིཡཾ ཨུལློཀེཏྭཱ ཋིཏེ སཱམཎེརོ ཨུཀྐཱསིཏྭཱ ཨཏྟནོ ཨཱགཏབྷཱཝཾ ཛཱནཱཔེསི. ཐེརོ པརིཝཏྟེཏྭཱ ཨོལོཀེནྟོ ‘‘ཀདཱ ཨཱགཏོསཱི’’ཏི པུཙྪི. ‘‘ཏུམྷཱཀཾ ཙེཏིཡཾ ཝནྡནཀཱལེ, བྷནྟེ; ཨཏིཝིཡ པསནྣཱ ཙེཏིཡཾ ཝནྡིཏྠ; ཀིནྣུ ཁོ པུཔྥཱནི ལབྷིཏྭཱ པཱུཛེཡྻཱཐཱ’’ཏི? ‘‘ཨཱམ, སཱམཎེར, ཨིམསྨིཾ ཙེཏིཡེ ཝིཡ ཨཉྙཏྲ ཨེཏྟཀཾ དྷཱཏུནིདྷཱནཾ ནཱམ ནཏྠི. ཨེཝརཱུཔཾ ཨསདིསཾ མཧཱཐཱུཔཾ པུཔྥཱནི ལབྷིཏྭཱ ཀོ ན པཱུཛེཡྻཱ’’ཏི? ‘‘ཏེན ཧི, བྷནྟེ, ཨདྷིཝཱསེཐ, ཨཱཧརིསྶཱམཱི’’ཏི ཏཱཝདེཝ ཛྷཱནཾ སམཱཔཛྫིཏྭཱ ཨིདྡྷིཡཱ ཧིམཝནྟཾ གནྟྭཱ ཝཎྞགནྡྷསམྤནྣཱནི པུཔྥཱནི གཧེཏྭཱ པརིསྶཱཝནཾ པཱུརེཏྭཱ མཧཱཐེརེ ¶ དཀྑིཎམུཁཏོ པཙྪིམམུཁེ ཨསམྤཏྟེཡེཝ ཨཱགནྟྭཱ པུཔྥཔརིསྶཱཝནཾ ཧཏྠེ ཋཔེཏྭཱ ‘‘པཱུཛེཐ བྷནྟེ’’ཏི ཨཱཧ. ཐེརོ ‘‘ཨཏིམནྡཱནི ནོ, སཱམཎེར, པུཔྥཱནཱི’’ཏི ཨཱཧ. ‘‘གཙྪཐ, བྷནྟེ, བྷགཝཏོ གུཎེ ཨཱཝཛྫེཏྭཱ པཱུཛེཐཱ’’ཏི.

ཐེརོ པཙྪིམམུཁནིསྶིཏེན སོཔཱནེན ཨཱརུཡ྄ཧ ཀུཙྪིཝེདིཀཱབྷཱུམིཡཾ པུཔྥཔཱུཛཾ ཀཱཏུཾ ཨཱརདྡྷོ. ཝེདིཀཱབྷཱུམི པརིཔུཎྞཱ; པུཔྥཱནི པཏིཏྭཱ དུཏིཡབྷཱུམིཡཾ ཛཎྞུཔྤམཱཎེན ཨོདྷིནཱ པཱུརཡིཾསུ. ཏཏོ ཨོཏརིཏྭཱ པཱདཔིཊྛིཀཔནྟིཾ པཱུཛེསི; སཱཔི པརིཔཱུརི; པརིཔུཎྞབྷཱཝཾ ཉཏྭཱ ཧེཊྛིམཏལེ ཝིཀིརནྟོ ཨགམཱསི; སབྦཾ ཙེཏིཡངྒཎཾ པརིཔཱུརི; ཏསྨིཾ པརིཔུཎྞེ ‘‘སཱམཎེར, པུཔྥཱནི ན ཁཱིཡནྟཱི’’ཏི ཨཱཧ. ‘‘པརིསྶཱཝནཾ, བྷནྟེ, ཨདྷོམུཁཾ ཀརོཐཱ’’ཏི. ཨདྷོམུཁཾ ཀཏྭཱ ཙཱལེསི. ཏདཱ པུཔྥཱནི ཁཱིཎཱནི. ཐེརོ པརིསྶཱཝནཾ སཱམཎེརསྶ དཏྭཱ སདྡྷིཾ ཧཏྠིཔཱཀཱརེན ཙེཏིཡཾ ཏིཀྑཏྟུཾ པདཀྑིཎཾ ཀཏྭཱ ཙཏཱུསུ ཋཱནེསུ ཝནྡིཏྭཱ པརིཝེཎཾ གཙྪནྟོ ཙིནྟེསི – ‘ཡཱཝ མཧིདྡྷིཀོ ཝཏཱཡཾ སཱམཎེརོ; སཀྑིསྶཏི ནུ ཁོ ཨིམཾ ཨིདྡྷཱནུབྷཱཝཾ རཀྑིཏུནྟི? ཏཏོ ‘ན སཀྑིསྶཏཱི’ཏི དིསྭཱ སཱམཎེརཾ ཨཱཧ – ‘‘སཱམཎེར, ཏྭཾ ཨིདཱནི མཧིདྡྷིཀོ; ཨེཝརཱུཔཾ པན ཨིདྡྷིཾ ནཱསེཏྭཱ པཙྪིམཀཱལེ ¶ ཀཱཎཔེསཀཱརིཡཱ ཧཏྠེན མདྡིཏཾཀཉྫིཡཾ པིཝིསྶསཱི’’ཏི. དཧརཀབྷཱཝསྶ ནཱམེས དོསོ ཡཾ སོ ཨུཔཛ྄ཛྷཱཡསྶ ཀཐཱཡ སཾཝེཛེཏྭཱ ‘ཀམྨཊྛཱནཾ ¶ མེ, བྷནྟེ, ཨཱཙིཀྑཐཱ’ཏི ན ཡཱཙི; ‘ཨམྷཱཀཾ ཨུཔཛ྄ཛྷཱཡོ ཀིཾ ཝདཏཱི’ཏི ཏཾ པན ཨསུཎནྟོ ཝིཡ ཨགམཱསི.

ཐེརོ མཧཱཙེཏིཡཉྩ མཧཱབོདྷིཉྩ ཝནྡིཏྭཱ སཱམཎེརཾ པཏྟཙཱིཝརཾ གཱཧཱཔེཏྭཱ ཨནུཔུབྦེན ཀུཊེལི༹ཏིསྶམཧཱཝིཧཱརཾ ཨགམཱསི. སཱམཎེརོ ཨུཔཛ྄ཛྷཱཡསྶ པདཱནུཔདིཀོ ཧུཏྭཱ བྷིཀྑཱཙཱརཾ ན གཙྪཏི. ‘‘ཀཏརཾ གཱམཾ པཝིསཐ, བྷནྟེ’’ཏི པུཙྪིཏྭཱ པན ‘ཨིདཱནི མེ ཨུཔཛ྄ཛྷཱཡོ གཱམདྭཱརཾ སམྤཏྟོ བྷཝིསྶཏཱི’ཏི ཉཏྭཱ ཨཏྟནོ ཙ ཨུཔཛ྄ཛྷཱཡསྶ ཙ པཏྟཙཱིཝརཾ གཧེཏྭཱ ཨཱཀཱསེནཱགནྟྭཱ ཐེརསྶ པཏྟཙཱིཝརཾ དཏྭཱ ¶ པིཎྜཱཡ པཝིསཏི. ཐེརོ སབྦཀཱལཾ ཨོཝདཏི – ‘‘སཱམཎེར, མཱ ཨེཝམཀཱསི; པུཐུཛྫནིདྡྷི ནཱམ ཙལཱ ཨནིབདྡྷཱ; ཨསཔྤཱཡཾ རཱུཔཱདིཨཱརམྨཎཾ ལབྷིཏྭཱ ཨཔྤམཏྟཀེནེཝ བྷིཛྫཏི; སནྟཱཡ སམཱཔཏྟིཡཱ པརིཧཱིནཱ བྲཧྨཙརིཡཝཱསེ སནྠམྦྷིཏུཾ ན སཀྐོནྟཱི’’ཏི. སཱམཎེརོ ‘ཀིཾ ཀཐེཏི མཡ྄ཧཾ ཨུཔཛ྄ཛྷཱཡོ’ཏི སོཏུཾ ན ཨིཙྪཏི, ཏཐེཝ ཀརོཏི. ཐེརོ ཨནུཔུབྦེན ཙེཏིཡཝནྡནཾ ཀརོནྟོ ཀམྨུཔེནྡཝིཧཱརཾ ནཱམ གཏོ. ཏཏྠ ཝསནྟེཔི ཐེརེ སཱམཎེརོ ཏཐེཝ ཀརོཏི.

ཨཐེཀདིཝསཾ ཨེཀཱ པེསཀཱརདྷཱིཏཱ ཨབྷིརཱུཔཱ པཋམཝཡེ ཋིཏཱ ཀམྨུཔེནྡགཱམཏོ ནིཀྑམིཏྭཱ པདུམསྶརཾ ཨོརུཡ྄ཧ གཱཡམཱནཱ པུཔྥཱནི བྷཉྫཏི. ཏསྨིཾ སམཡེ སཱམཎེརོ པདུམསྶརམཏྠཀེན གཙྪཏི གཙྪནྟོ པན, སཀྐརལསིཀཱཡ ཀཱཎམཀྑིཀཱ ཝིཡ, ཏསྶཱ གཱིཏསདྡེ བཛ྄ཛྷི; ཏཱཝདེཝ ཨིདྡྷི ཨནྟརཧིཏཱ, ཚིནྣཔཀྑོ ཀཱཀོ ཝིཡ ཨཧོསི. སནྟསམཱཔཏྟིབལེན པན ཏཏྠེཝ ཨུདཀཔིཊྛེ ཨཔཏིཏྭཱ སིམྦལིཏཱུལཾ ཝིཡ པཏམཱནཾ ཨནུཔུབྦེན པདུམསྶརཏཱིརེ ཨཊྛཱསི. སོ ཝེགེན གནྟྭཱ ཨུཔཛ྄ཛྷཱཡསྶ པཏྟཙཱིཝརཾ དཏྭཱ ནིཝཏྟི. མཧཱཐེརོ ‘པགེཝེཏཾ མཡཱ དིཊྛཾ, ནིཝཱརིཡམཱནོཔི ན ནིཝཏྟིསྶཏཱི’ཏི ཀིཉྩི ཨཝཏྭཱ པིཎྜཱཡ པཱཝིསི.

སཱམཎེརོ གནྟྭཱ པདུམསྶརཏཱིརེ ཨཊྛཱསི ཏསྶཱ པཙྩུཏྟརཎཾ ཨཱགམཡམཱནོ. སཱཔི སཱམཎེརཾ ཨཱཀཱསེན གཙྪནྟཉྩ པུནཱགནྟྭཱ ཋིཏཉྩ དིསྭཱ ‘ཨདྡྷཱ ¶ ཨེས མཾ ནིསྶཱཡ ཨུཀྐཎྛིཏོ’ཏི ཉཏྭཱ ‘པཊིཀྐམ སཱམཎེརཱ’ཏི ཨཱཧ. སོཔི པཊིཔཀྐམི. ཨིཏརཱ པཙྩུཏྟརིཏྭཱ སཱཊཀཾ ནིཝཱསེཏྭཱ ཏཾ ཨུཔསངྐམིཏྭཱ ‘ཀིཾ, བྷནྟེ’ཏི པུཙྪི. སོ ཏམཏྠཾ ཨཱརོཙེསི. སཱ བཧཱུཧི ཀཱརཎེཧི གྷརཱཝཱསེ ཨཱདཱིནཝཾ བྲཧྨཙརིཡཝཱསེ ཨཱནིསཾསཉྩ དསྶེཏྭཱ ཨོཝདམཱནཱཔི ¶ ཏསྶ ཨུཀྐཎྛཾ ཝིནོདེཏུཾ ཨསཀྐོནྟཱི ‘ཨཡཾ མམ ཀཱརཎཱ ཨེཝརཱུཔཱཡ ཨིདྡྷིཡཱ པརིཧཱིནོ; ན དཱནི ཡུཏྟཾ པརིཙྩཛིཏུ’ནྟི. ‘ཨིདྷེཝ ཏིཊྛཱ’ཏི ཝཏྭཱ གྷརཾ གནྟྭཱ མཱཏཱཔིཏཱུནཾ ཏཾ པཝཏྟིཾ ཨཱརོཙེསི. ཏེཔི ཨཱགནྟྭཱ ནཱནཔྤཀཱརཾ ཨོཝདམཱནཱ ཝཙནཾ ཨགྒཎྷནྟཾ ཨཱཧཾསུ – ‘‘ཏྭཾ ཨམྷེ ཨུཙྩཱཀུལཱཏི མཱ སལླཀྑེསི. མཡཾ པེསཀཱརཱ. སཀྑིསྶསི པེསཀཱརཀམྨཾ ཀཱཏུ’’ནྟི? སཱམཎེརོ ཨཱཧ – ‘‘ཨུཔཱསཀ, གིཧཱིབྷཱུཏོ ནཱམ པེསཀཱརཀམྨཾ ཝཱ ཀརེཡྻ ནལ༹ཀཱརཀམྨཾ ཝཱ, ཀིཾ ཨིམིནཱ, མཱ སཱཊཀམཏྟེ ལོབྷཾ ཀརོཐཱ’’ཏི ¶ . པེསཀཱརཀོ ཨུདརེ བདྡྷསཱཊཀཾ དཏྭཱ གྷརཾ ནེཏྭཱ དྷཱིཏརཾ ཨདཱསི.

སོ པེསཀཱརཀམྨཾ ཨུགྒཎྷིཏྭཱ པེསཀཱརེཧི སདྡྷིཾ སཱལཱཡ ཀམྨཾ ཀརོཏི. ཨཉྙེསཾ ཨིཏྠིཡོ པཱཏོཝ བྷཏྟཾ སམྤཱདེཏྭཱ ཨཱཧརིཾསུ. ཏསྶ བྷརིཡཱ ན ཏཱཝ ཨཱགཙྪཏི. སོ ཨིཏརེསུ ཀམྨཾ ཝིསྶཛྫེཏྭཱ བྷུཉྫམཱནེསུ ཏསརཾ ཝཊྚེནྟོ ནིསཱིདི. སཱ པཙྪཱ ཨཱགམཱསི. ཨཐ ནཾ སོ ‘ཨཏིཙིརེན ཨཱགཏཱསཱི’ཏི ཏཛྫེསི. མཱཏུགཱམོ ཙ ནཱམ ཨཔི ཙཀྐཝཏྟིརཱཛཱནཾ ཨཏྟནི པཊིབདྡྷཙིཏྟཾ ཉཏྭཱ དཱསཾ ཝིཡ སལླཀྑེཏི. ཏསྨཱ སཱ ཨེཝམཱཧ – ‘‘ཨཉྙེསཾ གྷརེ དཱརུཔཎྞལོཎཱདཱིནི སནྣིཧིཏཱནི; བཱཧིརཏོ ཨཱཧརིཏྭཱ དཱཡཀཱ པེསཀཱརཀཱཔི ཨཏྠི. ཨཧཾ པན ཨེཀིཀཱ; ཏྭམྤི ‘མཡ྄ཧཾ གྷརེ ཨིདཾ ཨཏྠི, ཨིདཾ ནཏྠཱི’ཏི ན ཛཱནཱསི. སཙེ ཨིཙྪསི བྷུཉྫ, ནོ ཙེ ཨིཙྪསི མཱ བྷུཉྫཱ’’ཏི. སོ ‘ན ཀེཝལཾ ཨུསྶཱུརེ བྷཏྟཾ ཨཱཧརསི, ཝཱཙཱཡཔི མཾ གྷཊྚེསཱི’ཏི ཀུཛ྄ཛྷིཏྭཱ ཨཉྙཾ པཧརཎཾ ཨཔསྶནྟོ ཏམེཝ ཏསརདཎྜཀཾ ཏསརཏོ ལུཉྩིཏྭཱ ཁིཔི. སཱ ཏཾ ཨཱགཙྪནྟཾ དིསྭཱ ཨཱིསཀཾ པརིཝཏྟི. ཏསརདཎྜཀསྶ ཙ ཀོཊི ནཱམ ཏིཁིཎཱ ཧོཏི. སཱ ཏསྶཱ པརིཝཏྟམཱནཱཡ ཨཀྑིཀོཊིཡཾ པཝིསིཏྭཱ ཨཊྛཱསི. སཱ ཨུབྷོཧི ཧཏྠེཧི ཝེགེན ཨཀྑིཾ ཨགྒཧེསི. བྷིནྣཊྛཱནཏོ ལོཧིཏཾ པགྒྷརཏི.

སོ ¶ ཏསྨིཾ ཀཱལེ ཨུཔཛ྄ཛྷཱཡསྶ ཝཙནཾ ཨནུསྶརི ‘ཨིདཾ སནྡྷཱཡ མཾ ཨུཔཛ྄ཛྷཱཡོ ‘‘ཨནཱགཏེ ཀཱལེ ཀཱཎཔེསཀཱརིཡཱ ཧཏྠེན མདྡིཏཾ ཀཉྫིཡཾ པིཝིསྶསཱི’’ཏི ཨཱཧ. ཨིདཾ ཐེརེན དིཊྛཾ བྷཝིསྶཏི. ཨཧོ དཱིགྷདསྶཱི ཨཡྻོ’ཏི མཧཱསདྡེན རོདིཏུཾ ཨཱརབྷི. ཏམེནཾ ཨཉྙེ ‘‘ཨལཾ, ཨཱཝུསོ, མཱ རོདི; ཨཀྑི ནཱམ བྷིནྣཾ ན སཀྐཱ རོདནེན པཊིཔཱཀཏིཀཾ ཀཱཏུ’’ནྟི ཨཱཧཾསུ. སོ ‘‘ནཱཧཾ ཨེཏམཏྠཾ རོདཱམི; ཨཔིཙ ཁོ ཨིདཾ སནྡྷཱཡ རོདཱམཱི’’ཏི སབྦཾ པཝཏྟིཾ པཊིཔཱཊིཡཱ ཀཐེསི. ཨེཝཾ ཨུཔྤནྣཱ སམཐཝིཔསྶནཱ ནིརུཛ྄ཛྷམཱནཱ ཨནཏྠཱཡ སཾཝཏྟནྟི.

ཨཔརམྤི ¶ ཝཏྠུ – ཏིཾསམཏྟཱ བྷིཀྑཱུ ཀལྱཱཎིཡཾ མཧཱཙེཏིཡཾ ཝནྡིཏྭཱ ཨཊཝིམགྒེན མཧཱམགྒཾ ཨོཏརམཱནཱ ཨནྟརཱམགྒེ ཛྷཱམཀྑེཏྟེ ཀམྨཾ ཀཏྭཱ ཨཱགཙྪནྟཾ ཨེཀཾ མནུསྶཾ ཨདྡསཾསུ. ཏསྶ སརཱིརཾ མསིམཀྑིཏཾ ཧོཏི, མསིམཀྑིཏམེཝ ཙ ཨེཀཾ ཀཱསཱཝཾ ཀཙྪཾ པཱིལེ༹ཏྭཱ ནིཝཏྠཾ. ཨོལོཀིཡམཱནོ ཛྷཱམཁཱཎུཀོ ཝིཡ ཁཱཡཏི. སོ དིཝསབྷཱགེ ¶ ཀམྨཾ ཀཏྭཱ ཨུཔཌྜྷཛྷཱཡམཱནཱནཾ དཱརཱུནཾ ཀལཱཔཾ ཨུཀྑིཔིཏྭཱ པིཊྛིཡཾ ཝིཔྤཀིཎྞེཧི ཀེསེཧི ཀུམྨགྒེན ཨཱགནྟྭཱ བྷིཀྑཱུནཾ སམྨུཁེ ཨཊྛཱསི. སཱམཎེརཱ དིསྭཱ ཨཉྙམཉྙཾ ཨོལོཀཡམཱནཱ ‘‘ཨཱཝུསོ, ཏུཡ྄ཧཾ པིཏཱ, ཏུཡ྄ཧཾ མཧཱཔིཏཱ, ཏུཡ྄ཧཾ མཱཏུལོ’’ཏི ཧསམཱནཱ གནྟྭཱ ‘‘ཀོ ནཱམོསི ཏྭཾ, ཨུཔཱསཀཱ’’ཏི ནཱམཾ པུཙྪིཾསུ. སོ ནཱམཾ པུཙྪིཏོ ཝིཔྤཊིསཱརཱི ཧུཏྭཱ དཱརུཀལཱཔཾ ཚཌྜེཏྭཱ ཝཏྠཾ སཾཝིདྷཱཡ ནིཝཱསེཏྭཱ མཧཱཐེརེ ཝནྡིཏྭཱ ‘‘ཏིཊྛཐ ཏཱཝ, བྷནྟེ’’ཏི ཨཱཧ. མཧཱཐེརཱ ཨཊྛཾསུ.

དཧརསཱམཎེརཱ ཨཱགནྟྭཱ མཧཱཐེརཱནཾ སམྨུཁཱཔི པརིཧཱསཾ ཀརོནྟི. ཨུཔཱསཀོ ཨཱཧ – ‘‘བྷནྟེ, ཏུམྷེ མཾ པསྶིཏྭཱ པརིཧསཐ; ཨེཏྟཀེནེཝ མཏྠཀཾ པཏྟམྷཱཏི སལླཀྑེཐ. ཨཧམྤི པུབྦེ ཏུམྷཱདིསོཝ སམཎོ ཨཧོསིཾ. ཏུམྷཱཀཾ པན ཙིཏྟེཀགྒཏཱམཏྟམྤི ནཏྠི. ཨཧཾ ཨིམསྨིཾ སཱསནེ མཧིདྡྷིཀོ མཧཱནུབྷཱཝོ ཨཧོསིཾ; ཨཱཀཱསཾ གཧེཏྭཱ པཐཝིཾ ཀརོམི, པཐཝིཾ ཨཱཀཱསཾ; དཱུརཾ གཎྷིཏྭཱ སནྟིཀཾ ཀརོམི, སནྟིཀཾ དཱུརཾ; ཙཀྐཝཱལ༹སཧསྶཾ ཁཎེན ཝིནིཝིཛ྄ཛྷཱམི. ཧཏྠེ མེ པསྶཐ; ཨིདཱནི པན མཀྐཊཧཏྠསདིསཱ. ཨཧཾ ཨིམེཧེཝ ཧཏྠེཧི ཨིདྷ ནིསིནྣོཝ ཙནྡིམསཱུརིཡེ པརཱམསིཾ. ཨིམེསཾཡེཝ པཱདཱནཾ ཙནྡིམསཱུརིཡེ པཱདཀཐལིཀཾ ཀཏྭཱ ནིསཱིདིཾ. ཨེཝརཱུཔཱ མེ ཨིདྡྷི པམཱདེན ཨནྟརཧིཏཱ. ཏུམྷེ མཱ པམཛྫིཏྠ. པམཱདེན ཧི ཨེཝརཱུཔཾ ¶ བྱསནཾ པཱཔུཎནྟི. ཨཔྤམཏྟཱ ཝིཧརནྟཱ ཛཱཏིཛརཱམརཎསྶ ཨནྟཾ ཀརོནྟི. ཏསྨཱ ཏུམྷེ མཉྙེཝ ཨཱརམྨཎཾ ཀརིཏྭཱ ཨཔྤམཏྟཱ ཧོཐ, བྷནྟེ’’ཏི ཏཛྫེཏྭཱ ཨོཝཱདམདཱསི. ཏེ ཏསྶ ཀཐེནྟསྶེཝ སཾཝེགཾ ཨཱཔཛྫིཏྭཱ ཝིཔསྶམཱནཱ ཏིཾས ཛནཱ ཏཏྠེཝ ཨརཧཏྟཾ པཱཔུཎིཾསཱུཏི. ཨེཝམྤི ཨུཔྤནྣཱ སམཐཝིཔསྶནཱ ནིརུཛ྄ཛྷམཱནཱ ཨནཏྠཱཡ སཾཝཏྟནྟཱིཏི ཝེདིཏབྦཱ. ཨཡཾ ཏཱཝ ལོཀིཡསམྨཔྤདྷཱནཀཐཱཡ ཝིནིཙྪཡོ.

ལོཀུཏྟརམགྒཀྑཎེ པནེཏཾ ཨེཀམེཝ ཝཱིརིཡཾ ཙཏུཀིཙྩསཱདྷནཝསེན ཙཏྟཱརི ནཱམཱནི ལབྷཏི. ཏཏྠ ཨནུཔྤནྣཱནནྟི ཨསམུདཱཙཱརཝསེན ཝཱ ཨནནུབྷཱུཏཱརམྨཎཝསེན ཝཱ ཨནུཔྤནྣཱནཾ; ཨཉྙཐཱ ཧི ཨནམཏགྒེ སཾསཱརེ ཨནུཔྤནྣཱ པཱཔཀཱ ཨཀུསལཱ དྷམྨཱ ནཱམ ནཏྠི. ཨནུཔྤནྣཱ པན ཨུཔྤཛྫམཱནཱཔི ཨེཏེཡེཝ ཨུཔྤཛྫནྟི ¶ , པཧཱིཡམཱནཱཔི ཨེཏེཡེཝ པཧཱིཡནྟི.

ཏཏྠ ¶ ཨེཀཙྩསྶ ཝཏྟཝསེན ཀིལེསཱ ན སམུདཱཙརནྟི. ཨེཀཙྩསྶ གནྠདྷུཏངྒསམཱདྷིཝིཔསྶནཱ ནཝཀམྨིཀཱནཾ ཨཉྙཏརཝསེན. ཀཐཾ? ཨེཀཙྩོ ཧི ཝཏྟསམྤནྣོ ཧོཏི. ཏསྶ དྭཱསཱིཏིཁུདྡཀཝཏྟཱནི (ཙཱུལ༹ཝ. ༢༤༣ ཨཱདཡོ), ཙུདྡས མཧཱཝཏྟཱནི (ཙཱུལ༹ཝ. ༣༥༦ ཨཱདཡོ), ཙེཏིཡངྒཎབོདྷིཡངྒཎཔཱནཱིཡམཱལ༹ཨུཔོསཐཱགཱརཨཱགནྟུཀགམིཀཝཏྟཱནི ཙ ཀརོནྟསྶེཝ ཀིལེསཱ ཨོཀཱསཾ ན ལབྷནྟི; ཨཔརབྷཱགེ པནསྶ ཝཏྟཾ ཝིསྶཛྫེཏྭཱ བྷིནྣཝཏྟསྶ ཝིཙརཏོ ཨཡོནིསོམནསིཀཱརཉྩེཝ སཏིཝོསྶགྒཉྩ ཨཱགམྨ ཨུཔྤཛྫནྟི. ཨེཝཾ ཨསམུདཱཙཱརཝསེན ཨནུཔྤནྣཱ ཨུཔྤཛྫནྟི ནཱམ.

ཨེཀཙྩོ གནྠཡུཏྟོ ཧོཏི; ཨེཀམྤི ནིཀཱཡཾ གཎྷཱཏི, དྭེཔི, ཏཡོཔི, ཙཏྟཱརོཔི, པཉྩཔི. ཏསྶེཝ ཏེཔིཊཀཾ བུདྡྷཝཙནཾ ཨཏྠཝསེན པཱལི༹ཝསེན ཨནུསནྡྷིཝསེན པུབྦཱཔརཝསེན གཎྷནྟསྶ སཛ྄ཛྷཱཡནྟསྶ ཙིནྟེནྟསྶ ཝཱཙེནྟསྶ དེསེནྟསྶ པཀཱསེནྟསྶ ཀིལེསཱ ཨོཀཱསཾ ན ལབྷནྟི; ཨཔརབྷཱགེ པནསྶ གནྠཀམྨཾ པཧཱཡ ཀུསཱིཏསྶ ཝིཙརཏོ ཨཡོནིསོམནསིཀཱརསཏིཝོསྶགྒེ ཨཱགམྨ ཨུཔྤཛྫནྟི. ཨེཝམྤི ཨསམུདཱཙཱརཝསེན ཨནུཔྤནྣཱ ཨུཔྤཛྫནྟི ནཱམ.

ཨེཀཙྩོ པན དྷུཏངྒདྷརོ ཧོཏི, ཏེརས དྷུཏངྒགུཎེ སམཱདཱཡ ཝཏྟཏི. ཏསྶ དྷུཏངྒགུཎེ པརིཧརནྟསྶ ཀིལེསཱ ཨོཀཱསཾ ན ལབྷནྟི; ཨཔརབྷཱགེ ¶ པནསྶ དྷུཏངྒཱནི ཝིསྶཛྫེཏྭཱ བཱཧུལླཱཡ ཨཱཝཊྚསྶ ཝིཙརཏོ ཨཡོནིསོམནསིཀཱརསཏིཝོསྶགྒེ ཨཱགམྨ ཨུཔྤཛྫནྟི. ཨེཝམྤི ཨསམུདཱཙཱརཝསེན ཨནུཔྤནྣཱ ཨུཔྤཛྫནྟི ནཱམ.

ཨེཀཙྩོ པན ཨཊྛསུ སམཱཔཏྟཱིསུ ཙིཎྞཝསཱི ཧོཏི. ཏསྶ པཋམཛ྄ཛྷཱནཱདཱིསུ ཨཱཝཛྫནཝསཱིཨཱདཱིནཾ ཝསེན ཝིཧརནྟསྶ ཀིལེསཱ ཨོཀཱསཾ ན ལབྷནྟི; ཨཔརབྷཱགེ པནསྶ པརིཧཱིནཛ྄ཛྷཱནསྶ ཝཱ ཝིསྶཊྛཛ྄ཛྷཱནསྶ ཝཱ བྷསྶཱདཱིསུ ཨནུཡུཏྟསྶ ཝིཧརཏོ ཨཡོནིསོམནསིཀཱརསཏིཝོསྶགྒེ ཨཱགམྨ ཨུཔྤཛྫནྟི. ཨེཝམྤི ཨསམུདཱཙཱརཝསེན ཨནུཔྤནྣཱ ཀིལེསཱ ཨུཔྤཛྫནྟི ནཱམ.

ཨེཀཙྩོ པན ཝིཔསྶཀོ ཧོཏི; སཏྟསུ ཝཱ ཝིཔསྶནཱསུ ཨཊྛཱརསསུ ¶ ཝཱ མཧཱཝིཔསྶནཱསུ ཀམྨཾ ཀརོནྟོ ཝིཧརཏི. ཏསྶེཝཾ ཝིཧརཏོ ཀིལེསཱ ཨོཀཱསཾ ན ལབྷནྟི; ཨཔརབྷཱགེ པནསྶ ཝིཔསྶནཱཀམྨཾ པཧཱཡ ཀཱཡདལ༹ྷཱིབཧུལསྶ ཝིཧརཏོ ཨཡོནིསོམནསིཀཱརསཏིཝོསྶགྒེ ¶ ཨཱགམྨ ཨུཔྤཛྫནྟི. ཨེཝམྤི ཨསམུདཱཙཱརཝསེན ཨནུཔྤནྣཱ ཀིལེསཱ ཨུཔྤཛྫནྟི ནཱམ.

ཨེཀཙྩོ པན ནཝཀམྨིཀོ ཧོཏི, ཨུཔོསཐཱགཱརབྷོཛནསཱལཱདཱིནི ཀརོཏི. ཏསྶ ཏེསཾ ཨུཔཀརཎཱནི ཙིནྟེནྟསྶ ཀིལེསཱ ཨོཀཱསཾ ན ལབྷནྟི; ཨཔརབྷཱགེ པནསྶ ནཝཀམྨེ ནིཊྛིཏེ ཝཱ ཝིསྶཊྛེ ཝཱ ཨཡོནིསོམནསིཀཱརསཏིཝོསྶགྒེ ཨཱགམྨ ཨུཔྤཛྫནྟི. ཨེཝམྤི ཨསམུདཱཙཱརཝསེན ཨནུཔྤནྣཱ ཀིལེསཱ ཨུཔྤཛྫནྟི ནཱམ.

ཨེཀཙྩོ པན བྲཧྨལོཀཱ ཨཱགཏོ སུདྡྷསཏྟོ ཧོཏི. ཏསྶ ཨནཱསེཝནཱཡ ཀིལེསཱ ཨོཀཱསཾ ན ལབྷནྟི; ཨཔརབྷཱགེ པནསྶ ལདྡྷཱསེཝནསྶ ཨཡོནིསོམནསིཀཱརསཏིཝོསྶགྒེ ཨཱགམྨ ཨུཔྤཛྫནྟི. ཨེཝམྤི ཨསམུདཱཙཱརཝསེན ཨནུཔྤནྣཱ ཀིལེསཱ ཨུཔྤཛྫནྟི ནཱམ. ཨེཝཾ ཏཱཝ ཨསམུཙཱརཝསེན ཨནུཔྤནྣཏཱ ཝེདིཏབྦཱ.

ཀཐཾ ཨནནུབྷཱུཏཱརམྨཎཝསེན? ཨིདྷེཀཙྩོ ཨནནུབྷཱུཏཔུབྦཾ མནཱཔིཡཱདིབྷེདཾ ཨཱརམྨཎཾ ལབྷཏི. ཏསྶ ཏཏྠ ཨཡོནིསོམནསིཀཱརསཏིཝོསྶགྒེ ཨཱགམྨ རཱགཱདཡོ ཀིལེསཱ ཨུཔྤཛྫནྟི. ཨེཝཾ ཨནནུབྷཱུཏཱརམྨཎཝསེན ¶ ཨནུཔྤནྣཱ ཨུཔྤཛྫནྟི ནཱམ. ལོཀུཏྟརམགྒཀྑཎེ པན ཨེཀམེཝ ཝཱིརིཡཾ.

ཡེ ཙ ཨེཝཾ ཨནུཔྤནྣཱ ཨུཔྤཛྫེཡྻུཾ, ཏེ ཡཐཱ ནེཝ ཨུཔྤཛྫནྟི, ཨེཝཾ ནེསཾ ཨནུཔྤཱདཀིཙྩཾ ཨུཔྤནྣཱནཉྩ པཧཱནཀིཙྩཾ སཱདྷེཏི. ཏསྨཱ ཨུཔྤནྣཱནཾ པཱཔཀཱནནྟི ཨེཏྠ པན ཙཏུབྦིདྷཾ ཨུཔྤནྣཾ – ཝཏྟམཱནུཔྤནྣཾ, བྷུཏྭཱ ཝིགཏུཔྤནྣཾ, ཨོཀཱསཀཏུཔྤནྣཾ, བྷཱུམིལདྡྷུཔྤནྣནྟི. ཏཏྠ ཡེ ཀིལེསཱ ཝིཛྫམཱནཱ ཨུཔྤཱདཱདིསམངྒིནོ – ཨིདཾ ཝཏྟམཱནུཔྤནྣཾ ནཱམ. ཀམྨེ པན ཛཝིཏེ ཨཱརམྨཎརསཾ ཨནུབྷཝིཏྭཱ ནིརུདྡྷཝིཔཱཀོ བྷུཏྭཱ ཝིགཏཾ ནཱམ. ཀམྨཾ ཨུཔྤཛྫིཏྭཱ ནིརུདྡྷཾ བྷུཏྭཱ ཝིགཏཾ ནཱམ. ཏདུབྷཡམྤི བྷུཏྭཱ ཝིགཏུཔྤནྣནྟི སངྑཾ གཙྪཏི. ཀུསལཱཀུསལཀམྨཾ ཨཉྙསྶ ཀམྨསྶ ཝིཔཱཀཾ པཊིབཱཧིཏྭཱ ཨཏྟནོ ཝིཔཱཀསྶ ཨོཀཱསཾ ཀརོཏི. ཨེཝཾ ¶ ཀཏེ ཨོཀཱསེ ཝིཔཱཀོ ཨུཔྤཛྫམཱནོ ཨོཀཱསཀརཎཏོ པཊྛཱཡ ཨུཔྤནྣོཏི ཝུཙྩཏི. ཨིདཾ ཨོཀཱསཀཏུཔྤནྣཾ ནཱམ.

པཉྩཀྑནྡྷཱ ¶ པན ཝིཔསྶནཱཡ བྷཱུམི ནཱམ. ཏེ ཨཏཱིཏཱདིབྷེདཱ ཧོནྟི. ཏེསུ ཨནུསཡིཏཀིལེསཱ པན ཨཏཱིཏཱ ཝཱ ཨནཱགཏཱ ཝཱ པཙྩུཔྤནྣཱ ཝཱཏི ན ཝཏྟབྦཱ. ཨཏཱིཏཀྑནྡྷེསུ ཨནུསཡིཏཱཔི ཧི ཨཔྤཧཱིནཱཝ ཧོནྟི. ཨནཱགཏཀྑནྡྷེསུ, པཙྩུཔྤནྣཀྑནྡྷེསུ ཨནུསཡིཏཱཔི ཨཔྤཧཱིནཱཝ ཧོནྟི. ཨིདཾ བྷཱུམིལདྡྷུཔྤནྣཾ ནཱམ. ཏེནཱཧུ པོརཱཎཱ – ‘‘ཏཱསུ ཏཱསུ བྷཱུམཱིསུ ཨསམུགྒྷཱཏིཏཱ ཀིལེསཱ བྷཱུམིལདྡྷུཔྤནྣཱཏི སངྑཾ གཙྪནྟཱི’’ཏི.

ཨཔརམྤི ཙཏུབྦིདྷཾ ཨུཔྤནྣཾ – སམུདཱཙཱརུཔྤནྣཾ, ཨཱརམྨཎཱདྷིགཧིཏུཔྤནྣཾ, ཨཝིཀྑམྦྷིཏུཔྤནྣཾ, ཨསམུགྡྷཱཏིཏུཔྤནྣནྟི. ཏཏྠ སམྤཏི ཝཏྟམཱནཾཡེཝ ‘སམུདཱཙཱརུཔྤནྣཾ’ ནཱམ. སཀིཾ ཙཀྑཱུནི ཨུམྨཱིལེཏྭཱ ཨཱརམྨཎེ ནིམིཏྟེ གཧིཏེ ཨནུསྶརིཏཱནུསྶརིཏཀྑཎེ ཀིལེསཱ ནུཔྤཛྫིསྶནྟཱིཏི ན ཝཏྟབྦཱ. ཀསྨཱ? ཨཱརམྨཎསྶ ཨདྷིགཧིཏཏྟཱ. ཡཐཱ ཀིཾ? ཡཐཱ ཁཱིརརུཀྑསྶ ཀུཋཱརིཡཱ ཨཱཧཏཱཧཏཊྛཱནེ ཁཱིརཾ ན ནིཀྑམིསྶཏཱིཏི ན ཝཏྟབྦཾ, ཨེཝཾ. ཨིདཾ ‘ཨཱརམྨཎཱདྷིགཧིཏུཔྤནྣཾ’ ནཱམ. སམཱཔཏྟིཡཱ ཨཝིཀྑམྦྷིཏཀིལེསཱ པན ཨིམསྨིཾ ནཱམ ཋཱནེ ནུཔྤཛྫིསྶནྟཱིཏི ན ཝཏྟབྦཱ. ཀསྨཱ? ཨཝིཀྑམྦྷིཏཏྟཱ. ཡཐཱ ཀིཾ? ཡཐཱ སཙེ ཁཱིརརུཀྑཾ ཀུཋཱརིཡཱ ཨཱཧནེཡྻུཾ, ‘ཨིམསྨིཾ ནཱམ ཋཱནེ ཁཱིརཾ ན ནིཀྑམེཡྻཱ’ཏི ¶ ན ཝཏྟབྦཾ, ཨེཝཾ. ཨིདཾ ‘ཨཝིཀྑམྦྷིཏུཔྤནྣཾ’ ནཱམ. མགྒེན ཨསམུགྒྷཱཏིཏཀིལེསཱ པན བྷཝགྒེ ནིབྦཏྟསྶཱཔི ནུཔྤཛྫིསྶནྟཱིཏི པུརིམནཡེནེཝ ཝིཏྠཱརེཏབྦཾ. ཨིདཾ ‘ཨསམུགྒྷཱཏིཏུཔྤནྣཾ’ ནཱམ.

ཨིམེསུ ཨུཔྤནྣེསུ ཝཏྟམཱནུཔྤནྣཾ, བྷུཏྭཱཝིགཏུཔྤནྣཾ, ཨོཀཱསཀཏུཔྤནྣཾ, སམུདཱཙཱརུཔྤནྣནྟི ཙཏུབྦིདྷཾ ཨུཔྤནྣཾ ན མགྒཝཛ྄ཛྷཾ; བྷཱུམིལདྡྷུཔྤནྣཾ, ཨཱརམྨཎཱདྷིགྒཧིཏུཔྤནྣཾ, ཨཝིཀྑམྦྷིཏུཔྤནྣཾ, ཨསམུགྒྷཱཏིཏུཔྤནྣནྟི ཙཏུབྦིདྷཾ མགྒཝཛ྄ཛྷཾ. མགྒོ ཧི ཨུཔྤཛྫམཱནོ ཨེཏེ ཀིལེསེ པཛཧཏི. སོ ཡེ ཀིལེསེ པཛཧཏི, ཏེ ཨཏཱིཏཱ ཝཱ ཨནཱགཏཱ ཝཱ པཙྩུཔྤནྣཱ ཝཱཏི ན ཝཏྟབྦཱ. ཝུཏྟམྤི ཙེཏཾ –

‘‘ཧཉྩི ཨཏཱིཏེ ཀིལེསེ པཛཧཏི, ཏེན ཧི ཁཱིཎཾ ཁེཔེཏི, ནིརུདྡྷཾ ¶ ནིརོདྷེཏི, ཝིགཏཾ ཝིགམེཏི, ཨཏྠངྒཏཾ ཨཏྠཾ གམེཏི, ཨཏཱིཏཾ ཡཾ ནཏྠི ཏཾ པཛཧཏི. ཧཉྩི ཨནཱགཏེ ཀིལེསེ པཛཧཏི, ཏེན ཧི ཨཛཱཏཾ པཛཧཏི, ཨནིབྦཏྟཾ ཨནུཔྤནྣཾ ཨཔཱཏུབྷཱུཏཾ པཛཧཏི, ཨནཱགཏཾ ཡཾ ནཏྠི ཏཾ པཛཧཏི. ཧཉྩི པཙྩུཔྤནྣེ ཀིལེསེ པཛཧཏི, ཏེན ཧི རཏྟོ རཱགཾ པཛཧཏི, དུཊྛོ དོསཾ, མཱུལ༹ྷོ མོཧཾ, ཝིནིབདྡྷོ མཱནཾ, པརཱམཊྛོ དིཊྛིཾ, ཝིཀྑེཔགཏོ ¶ ཨུདྡྷཙྩཾ, ཨནིཊྛངྒཏོ ཝིཙིཀིཙྪཾ, ཐཱམགཏོ ཨནུསཡཾ པཛཧཏི; ཀཎྷསུཀྐདྷམྨཱ ཡུགནདྡྷཱ སམམེཝ ཝཏྟནྟི; སཾཀིལེསིཀཱ མགྒབྷཱཝནཱ ཧོཏི…པེ… ཏེན ཧི ནཏྠི མགྒབྷཱཝནཱ, ནཏྠི ཕལསཙྪིཀིརིཡཱ, ནཏྠི ཀིལེསཔྤཧཱནཾ, ནཏྠི དྷམྨཱབྷིསམཡོ’ཏི. ‘ཨཏྠི མགྒབྷཱཝནཱ…པེ… ཨཏྠི དྷམྨཱབྷིསམཡོ’ཏི. ཡཐཱ ཀཐཾ ཝིཡ? སེཡྻཐཱཔི ཏརུཎོ རུཀྑོ…པེ… ཨཔཱཏུབྷཱུཏཱནེཝ ན པཱཏུབྷཝནྟི’’ཏི (པཊི. མ. ༣.༢༡).

ཨིཏི པཱལི༹ཡཾ ཨཛཱཏཕལརུཀྑོ ཨཱགཏོ; ཛཱཏཕལརུཀྑེན པན དཱིཔེཏབྦཾ. ཡཐཱ ཧི སཕལོ ཏརུཎཨམྦརུཀྑོ. ཏསྶ ཕལཱནི མནུསྶཱ པརིབྷུཉྫེཡྻུཾ, སེསཱནི པཱཏེཏྭཱ པཙྪིཡོ པཱུརེཡྻུཾ. ཨཐཉྙོ པུརིསོ ཏཾ ཕརསུནཱ ཚིནྡེཡྻ. ཏེནསྶ ནེཝ ཨཏཱིཏཱནི ཕལཱནི ནཱསིཏཱནི ཧོནྟི, ན ཨནཱགཏཔཙྩུཔྤནྣཱནི ཙ ནཱསིཏཱནི; ཨཏཱིཏཱནི ཧི མནུསྶེཧི པརིབྷུཏྟཱནི, ཨནཱགཏཱནི ཨནིབྦཏྟཱནི ན སཀྐཱ ནཱསེཏུཾ ¶ . ཡསྨིཾ པན སམཡེ སོ ཚིནྣོ ཏདཱ ཕལཱནིཡེཝ ནཏྠཱིཏི པཙྩུཔྤནྣཱནིཔི ཨནཱསིཏཱནི. སཙེ པན རུཀྑོ ཨཙྪིནྣོ ཨསྶ, ཨཐསྶ པཐཝཱིརསཉྩ ཨཱཔོརསཉྩ ཨཱགམྨ ཡཱནི ཕལཱནི ནིབྦཏྟེཡྻུཾ, ཏཱནི ནཱསིཏཱནི ཧོནྟི. ཏཱནི ཧི ཨཛཱཏཱནེཝ ན ཛཱཡནྟི, ཨནིབྦཏྟཱནེཝ ན ནིབྦཏྟནྟི, ཨཔཱཏུབྷཱུཏཱནེཝ ན པཱཏུབྷཝནྟི. ཨེཝམེཝ མགྒོ ནཱཔི ཨཏཱིཏཱདིབྷེདེ ཀིལེསེ པཛཧཏི, ནཱཔི ན པཛཧཏི. ཡེསཉྷི ཀིལེསཱནཾ མགྒེན ཁནྡྷེསུ ཨཔརིཉྙཱཏེསུ ཨུཔྤཏྟི སིཡཱ, མགྒེན ཨུཔྤཛྫིཏྭཱ ཁནྡྷཱནཾ པརིཉྙཱཏཏྟཱ ཏེ ཀིལེསཱ ཨཛཱཏཱཝ ན ཛཱཡནྟི, ཨནིབྦཏྟཱཝ ན ནིབྦཏྟནྟི, ཨཔཱཏུབྷཱུཏཱཝ ན པཱཏུབྷཝནྟི. ཏརུཎཔུཏྟཱཡ ཨིཏྠིཡཱ པུན ཨཝིཛཱཡནཏྠཾ བྱཱདྷིཏཱནཾ ¶ རོགཝཱུཔསམཏྠཾ པཱིཏབྷེསཛྫེཧི ཙཱཔི ཨཡམཏྠོ ཝིབྷཱཝེཏབྦོ. ཨེཝཾ མགྒོ ཡེ ཀིལེསེ པཛཧཏི, ཏེ ཨཏཱིཏཱ ཝཱ ཨནཱགཏཱ ཝཱ པཙྩུཔྤནྣཱ ཝཱཏི ན ཝཏྟབྦཱ. ན ཙ མགྒོ ཀིལེསེ ན པཛཧཏི. ཡེ པན མགྒོ ཀིལེསེ པཛཧཏི, ཏེ སནྡྷཱཡ ‘ཨུཔྤནྣཱནཾ པཱཔཀཱན’ནྟིཨཱདི ཝུཏྟཾ.

ན ཀེཝལཉྩ མགྒོ ཀིལེསེཡེཝ པཛཧཏི, ཀིལེསཱནཾ པན ཨཔྤཧཱིནཏྟཱ ཡེ ཨུཔྤཛྫེཡྻུཾ ཨུཔཱདིནྣཀྑནྡྷཱ, ཏེཔི པཛཧཏིཡེཝ. ཝུཏྟམྤི ཙེཏཾ ‘‘སོཏཱཔཏྟིམགྒཉཱཎེན ཨབྷིསངྑཱརཝིཉྙཱཎསྶ ནིརོདྷེན སཏྟ བྷཝེ ཋཔེཏྭཱ ཨནམཏགྒེ སཾསཱརེ ཡེ ཨུཔྤཛྫེཡྻུཾ ནཱམཉྩ རཱུཔཉྩ ཨེཏྠེཏེ ནིརུཛ྄ཛྷནྟཱི’’ཏི (ཙཱུལ༹ནི. ཨཛིཏམཱཎཝཔུཙྪཱནིདྡེས ༦) ཝིཏྠཱརོ. ཨིཏི མགྒོ ཨུཔཱདིནྣཏོ ཨནུཔཱདིནྣཏོ ཙ ཝུཊྛཱཏི. བྷཝཝསེན པན སོཏཱཔཏྟིམགྒོ ཨཔཱཡབྷཝཏོ ཝུཊྛཱཏི ¶ . སཀདཱགཱམིམགྒོ སུགཏིབྷཝེཀདེསཏོ; ཨནཱགཱམིམགྒོ སུགཏིཀཱམབྷཝཏོ; ཝུཊྛཱཏི ཨརཧཏྟམགྒོ རཱུཔཱརཱུཔབྷཝཏོ ཝུཊྛཱཏི, སབྦབྷཝེཧི ཝུཊྛཱཏིཡེཝཱཏིཔི ཝདནྟི.

ཨཐ མགྒཀྑཎེ ཀཐཾ ཨནུཔྤནྣཱནཾ ཨུཔྤཱདཱཡ བྷཱཝནཱ ཧོཏི? ཀཐཾ ཝཱ ཨུཔྤནྣཱནཾ ཋིཏིཡཱཏི? མགྒཔྤཝཏྟིཡཱ ཨེཝ. མགྒོ ཧི པཝཏྟམཱནོ པུབྦེ ཨནུཔྤནྣཔུབྦཏྟཱ ཨནུཔྤནྣོ ནཱམ ཝུཙྩཏི. ཨནཱགཏཔུབྦཉྷི ཋཱནཾ གནྟྭཱ ཨནནུབྷཱུཏཔུབྦཾ ཝཱ ཨཱརམྨཎཾ ཨནུབྷཝིཏྭཱ ཝཏྟཱརོ བྷཝནྟི – ‘ཨནཱགཏཊྛཱནཾ ཨཱགཏམྷ, ཨནནུབྷཱུཏཾ ཨཱརམྨཎཾ ཨནུབྷཝཱམཱ’ཏི. ཡཱ ཙསྶ པཝཏྟི, ཨཡམེཝ ཋིཏི ནཱམཱཏི ཋིཏིཡཱ བྷཱཝེཏཱིཏི ཝཏྟུཾ ཝཊྚཏི. ཨེཝམེཏསྶ བྷིཀྑུནོ ཨིདཾ ལོཀུཏྟརམགྒཀྑཎེ ཝཱིརིཡཾ ‘‘ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡཱ’’ཏིཨཱདཱིནི ¶ ཙཏྟཱརི ནཱམཱནི ལབྷཏི. ཨཡཾ ལོཀུཏྟརམགྒཀྑཎེ སམྨཔྤདྷཱནཀཐཱ. ཨེཝམེཏྠ ལོཀིཡལོཀུཏྟརམིསྶཀཱ སམྨཔྤདྷཱནཱ ནིདྡིཊྛཱཏི.

སུཏྟནྟབྷཱཛནཱིཡཝཎྞནཱ.

༢. ཨབྷིདྷམྨབྷཱཛནཱིཡཝཎྞནཱ

༤༠༨. ཨབྷིདྷམྨབྷཱཛནཱིཡེ སབྦཱནིཔི སམྨཔྤདྷཱནཱནི དྷམྨསངྒཎིཡཾ ཝིབྷཏྟསྶ དེསནཱནཡསྶ མུཁམཏྟམེཝ དསྶེནྟེན ནིདྡིཊྛཱནི. ཏཏྠ ནཡབྷེདོ ཝེདིཏབྦོ. ཀཐཾ? པཋམསམྨཔྤདྷཱནེ ¶ ཏཱཝ སོཏཱཔཏྟིམགྒེ ཛྷཱནཱབྷིནིཝེསེ སུདྡྷིཀཔཊིཔདཱ, སུདྡྷིཀསུཉྙཏཱ, སུཉྙཏཔཊིཔདཱ, སུདྡྷིཀཨཔྤཎིཧིཏཱ, ཨཔྤཎིཧིཏཔཊིཔདཱཏི ཨིམེསུ པཉྩསུ ཋཱནེསུ དྭིནྣཾ དྭིནྣཾ ཙཏུཀྐཔཉྩཀནཡཱནཾ ཝསེན དས ནཡཱ ཧོནྟི. ཨེཝཾ སེསེསུཔཱིཏི ཝཱིསཏིཡཱ ཨབྷིནིཝེསེསུ དྭེ ནཡསཏཱནི. ཏཱནི ཙཏཱུཧི ཨདྷིཔཏཱིཧི ཙཏུགྒུཎིཏཱནི ཨཊྛ. ཨིཏི སུདྡྷིཀཱནི དྭེ སཱདྷིཔཏཱིནི ཨཊྛཱཏི སབྦམྤི ནཡསཧསྶཾ ཧོཏི. ཏཐཱདུཏིཡསམྨཔྤདྷཱནཱདཱིསུ སུདྡྷིཀསམྨཔྤདྷཱནེ ཙཱཏི སོཏཱཔཏྟིམགྒེ པཉྩནཡསཧསྶཱནི. ཡཐཱ ཙ སོཏཱཔཏྟིམགྒེ, ཨེཝཾ སེསམགྒེསུཔཱིཏི ཀུསལཝསེནེཝ ཝཱིསཏི ནཡསཧསྶཱནི. ཝིཔཱཀེ པན སམྨཔྤདྷཱནེཧི ཀཏྟབྦཀིཙྩཾ ¶ ནཏྠཱིཏི ཝིཔཱཀཝཱརོ ན གཧིཏོཏི. སམྨཔྤདྷཱནཱནི པནེཏྠ ནིབྦཏྟིཏལོཀུཏྟརཱནེཝ ཀཐིཏཱནཱིཏི ཝེདིཏབྦཱནི.

ཨབྷིདྷམྨབྷཱཛནཱིཡཝཎྞནཱ.

༣. པཉྷཱཔུཙྪཀཝཎྞནཱ

༤༢༧. པཉྷཱཔུཙྪཀེ པཱལི༹ཨནུསཱརེནེཝ སམྨཔྤདྷཱནཱནཾ ཀུསལཱདིབྷཱཝོ ཝེདིཏབྦོ. ཨཱརམྨཎཏྟིཀེསུ པན སབྦཱནིཔི ཨེཏཱནི ཨཔྤམཱཎཾ ནིབྦཱནཾ ཨཱརབྦྷ པཝཏྟིཏོ ཨཔྤམཱཎཱརམྨཎཱནེཝ, ན མགྒཱརམྨཎཱནི; སཧཛཱཏཧེཏུཝསེན པན མགྒཧེཏུཀཱནི; ཝཱིམཾསཾ ཛེཊྛཀཾ ཀཏྭཱ མགྒབྷཱཝནཱཀཱལེ ¶ མགྒཱདྷིཔཏཱིནི; ཚནྡཙིཏྟཛེཊྛིཀཱཡ མགྒབྷཱཝནཱཡ ན ཝཏྟབྦཱནི མགྒཱདྷིཔཏཱིནཱིཏི; ཝཱིརིཡཛེཊྛིཀཱཡ པན ཨཉྙསྶ ཝཱིརིཡསྶ ཨབྷཱཝཱ ན ཝཏྟབྦཱནི མགྒཱདྷིཔཏཱིནཱིཏི ཝཱ ན མགྒཱདྷིཔཏཱིནཱིཏི ཝཱ; ཨཏཱིཏཱདཱིསུ ཨེཀཱརམྨཎབྷཱཝེནཔི ན ཝཏྟབྦཱནི; ནིབྦཱནསྶ པན བཧིདྡྷཱདྷམྨཏྟཱ བཧིདྡྷཱརམྨཎཱནི ནཱམ ཧོནྟཱིཏི. ཨེཝམེཏསྨིཾ པཉྷཱཔུཙྪཀེ ནིབྦཏྟིཏལོཀུཏྟརཱནེཝ སམྨཔྤདྷཱནཱནི ཀཐིཏཱནི. སམྨཱསམྦུདྡྷེན ཧི སུཏྟནྟབྷཱཛནཱིཡསྨིཾཡེཝ ལོཀིཡལོཀུཏྟརམིསྶཀཱ སམྨཔྤདྷཱནཱ ཀཐིཏཱ; ཨབྷིདྷམྨབྷཱཛནཱིཡཔཉྷཱཔུཙྪཀེསུ པན ལོཀུཏྟརཱཡེཝཱཏི. ཨེཝམཡཾ སམྨཔྤདྷཱནཝིབྷངྒོཔི ཏེཔརིཝཊྚཾ ནཱིཧརིཏྭཱཝ བྷཱཛེཏྭཱ དསྶིཏོཏི.

སམྨོཧཝིནོདནིཡཱ ཝིབྷངྒཊྛཀཐཱཡ

སམྨཔྤདྷཱནཝིབྷངྒཝཎྞནཱ ནིཊྛིཏཱ.

༩. ཨིདྡྷིཔཱདཝིབྷངྒོ

༡. སུཏྟནྟབྷཱཛནཱིཡཝཎྞནཱ

༤༣༡. ཨིདཱནི ¶ ¶ ¶ ཏདནནྟརེ ཨིདྡྷིཔཱདཝིབྷངྒེ ཙཏྟཱརོཏི གཎནཔརིཙྪེདོ. ཨིདྡྷིཔཱདཱཏི ཨེཏྠ ཨིཛ྄ཛྷཏཱིཏི ཨིདྡྷི, སམིཛ྄ཛྷཏི ནིཔྥཛྫཏཱིཏི ཨཏྠོ. ཨིཛ྄ཛྷནྟི ཝཱ ཨེཏཱཡ སཏྟཱ ཨིདྡྷཱ ཝུདྡྷཱ ཨུཀྐཾསགཏཱ ཧོནྟཱིཏིཔི ཨིདྡྷི. པཋམེནཏྠེན ཨིདྡྷི ཨེཝ པཱདོ ཨིདྡྷིཔཱདོ, ཨིདྡྷིཀོཊྛཱསོཏི ཨཏྠོ. དུཏིཡེནཏྠེན ཨིདྡྷིཡཱ པཱདོཏི ཨིདྡྷིཔཱདོ; པཱདོཏི པཏིཊྛཱ, ཨདྷིགམུཔཱཡོཏི ཨཏྠོ. ཏེན ཧི ཡསྨཱ ཨུཔརཱུཔརིཝིསེསསངྑཱཏཾ ཨིདྡྷིཾ པཛྫནྟི པཱཔུཎནྟི, ཏསྨཱ པཱདོཏི ཝུཙྩཏི. ཨེཝཾ ཏཱཝ ‘‘ཙཏྟཱརོ ཨིདྡྷིཔཱདཱ’’ཏི ཨེཏྠ ཨཏྠོ ཝེདིཏབྦོ.

ཨིདཱནི ཏེ བྷཱཛེཏྭཱ དསྶེཏུཾ ཨིདྷ བྷིཀྑཱུཏིཨཱདི ཨཱརདྡྷཾ. ཏཏྠ ཨིདྷ བྷིཀྑཱུཏི ཨིམསྨིཾ སཱསནེ བྷིཀྑུ. ཚནྡསམཱདྷིཔདྷཱནསངྑཱརསམནྣཱགཏནྟི ཨེཏྠ ཚནྡཧེཏུཀོ ཚནྡཱདྷིཀོ ཝཱ སམཱདྷི ཚནྡསམཱདྷི. ཀཏྟུཀམྱཏཱཚནྡཾ ཨདྷིཔཏིཾ ཀརིཏྭཱ པཊིལདྡྷསམཱདྷིསྶེཏཾ ཨདྷིཝཙནཾ. པདྷཱནབྷཱུཏཱ སངྑཱརཱ པདྷཱནསངྑཱརཱ. ཙཏུཀིཙྩསཱདྷཀསྶ སམྨཔྤདྷཱནཝཱིརིཡསྶེཏཾ ཨདྷིཝཙནཾ. སམནྣཱགཏནྟི ཚནྡསམཱདྷིནཱ ཙ པདྷཱནསངྑཱརེཧི ཙ ཨུཔེཏཾ. ཨིདྡྷིཔཱདནྟི ནིཔྥཏྟིཔརིཡཱཡེན ཝཱ ཨིཛ྄ཛྷནཀཊྛེན ཨིཛ྄ཛྷནྟི ཨེཏཱཡ སཏྟཱ ཨིདྡྷཱ ཝུདྡྷཱ ཨུཀྐཾསགཏཱ ཧོནྟཱིཏི ཨིམིནཱ ཝཱ པརིཡཱཡེན ཨིདྡྷཱིཏི སངྑཾ གཏཱནཾ ཨུཔཙཱརཛ྄ཛྷཱནཱདིཀུསལཙིཏྟསམྤཡུཏྟཱནཾ ཚནྡསམཱདྷིཔདྷཱནསངྑཱརཱནཾ ཨདྷིཊྛཱནཊྛེན པཱདབྷཱུཏཾ སེསཙིཏྟཙེཏསིཀརཱསིནྟི ཨཏྠོ. ཡཉྷི པརཏོ ‘‘ཨིདྡྷིཔཱདོཏི ཏཐཱབྷཱུཏསྶ ཝེདནཱཀྑནྡྷོ…པེ… ཝིཉྙཱཎཀྑནྡྷོ’’ཏི ཝུཏྟཾ, ཏཾ ཨིམིནཱ ཨཏྠེན ཡུཛྫཏི. ཨིམིནཱ ནཡེན སེསེསུཔི ཨཏྠོ ཝེདིཏབྦོ. ཡཐེཝ ཧི ཚནྡཾ ཨདྷིཔཏིཾ ཀརིཏྭཱ པཊིལདྡྷསམཱདྷི ¶ ཚནྡསམཱདྷཱིཏི ¶ ཝུཏྟོ, ཨེཝཾ ཝཱིརིཡཾ…པེ… ཙིཏྟཾ. ཝཱིམཾསཾ ཨདྷིཔཏིཾ ཀརིཏྭཱ པཊིལདྡྷསམཱདྷི ཝཱིམཾསསམཱདྷཱིཏི ཝུཙྩཏི.

ཨིདཱནི ཚནྡསམཱདྷིཨཱདཱིནི པདཱནི བྷཱཛེཏྭཱ དསྶེཏུཾ ཀཐཉྩ བྷིཀྑཱུཏིཨཱདི ཨཱརདྡྷཾ. ཏཏྠ ཚནྡཉྩེ བྷིཀྑུ ཨདྷིཔཏིཾ ཀརིཏྭཱཏི ཡདི བྷིཀྑུ ཚནྡཾ ཨདྷིཔཏིཾ ཚནྡཾ ཛེཊྛཀཾ ཚནྡཾ དྷུརཾ ཚནྡཾ པུབྦངྒམཾ ཀཏྭཱ སམཱདྷིཾ པཊིལབྷཏི ནིབྦཏྟེཏི, ཨེཝཾ ནིབྦཏྟིཏོ ཨཡཾ སམཱདྷི ཚནྡསམཱདྷི ནཱམ ཝུཙྩཏཱིཏི ཨཏྠོ. ཝཱིརིཡཉྩེཏིཨཱདཱིསུཔི ¶ ཨེསེཝ ནཡོ. ཨིམེ ཝུཙྩནྟི པདྷཱནསངྑཱརཱཏི ཨེཏྟཱཝཏཱ ཚནྡིདྡྷིཔཱདཾ བྷཱཝཡམཱནསྶ བྷིཀྑུནོ པདྷཱནཱབྷིསངྑཱརསངྑཱཏཙཏུཀིཙྩསཱདྷཀཾ ཝཱིརིཡཾ ཀཐིཏཾ. ཏདེཀཛ྄ཛྷཾ ཨབྷིསཉྙཱུཧིཏྭཱཏི ཏཾ སབྦཾ ཨེཀཏོ རཱསིཾ ཀཏྭཱཏི ཨཏྠོ. སངྑྱཾ གཙྪཏཱིཏི ཨེཏཾ ཝོཧཱརཾ གཙྪཏཱིཏི ཝེདིཏབྦནྟི ཨཏྠོ.

༤༣༣. ཨིདཱནི ‘‘ཚནྡསམཱདྷིཔདྷཱནསངྑཱརོ’’ཏི ཨེཏསྨིཾ པདསམཱུཧེ ཚནྡཱདིདྷམྨེ བྷཱཛེཏྭཱ དསྶེཏུཾ ཏཏྠ ཀཏམོ ཚནྡོཏིཨཱདི ཨཱརདྡྷཾ. ཏཾ ཨུཏྟཱནཏྠམེཝ.

ཨུཔེཏོ ཧོཏཱིཏི ཨིདྡྷིཔཱདསངྑཱཏོ དྷམྨརཱསི ཨུཔེཏོ ཧོཏི. ཏེསཾ དྷམྨཱནནྟི ཏེསཾ སམྤཡུཏྟཱནཾ ཚནྡཱདིདྷམྨཱནཾ. ཨིདྡྷི སམིདྡྷཱིཏིཨཱདཱིནི སབྦཱནི ནིཔྥཏྟིཝེཝཙནཱནེཝ. ཨེཝཾ སནྟེཔི ཨིཛ྄ཛྷནཀཊྛེན ཨིདྡྷི. སམྤུཎྞཱ ཨིདྡྷི སམིདྡྷི; ཨུཔསགྒེན ཝཱ པདཾ ཝཌྜྷིཏཾ. ཨིཛ྄ཛྷནཱཀཱརོ ཨིཛ྄ཛྷནཱ. སམིཛ྄ཛྷནཱཏི ཨུཔསགྒེན པདཾ ཝཌྜྷིཏཾ. ཨཏྟནོ སནྟཱནེ པཱཏུབྷཱཝཝསེན ལབྷནཾ ལཱབྷོ. པརིཧཱིནཱནམྤི ཝཱིརིཡཱརམྦྷཝསེན པུན ལཱབྷོ པཊིལཱབྷོ; ཨུཔསགྒེན ཝཱ པདཾ ཝཌྜྷིཏཾ. པཏྟཱིཏི ཨདྷིགམོ. ཨཔརིཧཱནཝསེན སམྨཱ པཏྟཱིཏི སམྤཏྟི. ཕུསནཱཏི པཊིལཱབྷཕུསནཱ. སཙྪིཀིརིཡཱཏི ¶ པཊིལཱབྷསཙྪིཀིརིཡཱཝ. ཨུཔསམྤདཱཏི པཊིལཱབྷཨུཔསམྤདཱ ཨེཝཱཏི ཝེདིཏབྦཱ.

ཏཡཱབྷཱུཏསྶཱཏི ཏེན ཨཱཀཱརེན བྷཱུཏསྶ; ཏེ ཚནྡཱདིདྷམྨེ པཊིལབྷིཏྭཱ ཋིཏསྶཱཏི ཨཏྠོ. ཝེདནཱཀྑནྡྷོཏིཨཱདཱིཧི ཚནྡཱདཡོ ཨནྟོ ཀཏྭཱ ཙཏྟཱརོཔི ཁནྡྷཱ ཀཐིཏཱ. ཏེ དྷམྨེཏི ཏེ ཙཏྟཱརོ ཨརཱུཔཀྑནྡྷེ; ཚནྡཱདཡོ ཝཱ ཏཡོ དྷམྨེཏིཔི ཝུཏྟཾ. ཨཱསེཝཏཱིཏིཨཱདཱིནི ཝུཏྟཏྠཱནེཝ. སེསཨིདྡྷིཔཱདནིདྡེསེསུཔི ཨིམིནཱཝ ནཡེན ཨཏྠོ ཝེདིཏབྦོ.

ཨེཏྟཱཝཏཱ ¶ ཀིཾ ཀཐིཏནྟི? ཙཏུནྣཾ བྷིཀྑཱུནཾ མཏྠཀཔྤཏྟཾ ཀམྨཊྛཱནཾ ཀཐིཏཾ. ཨེཀོ ཧི བྷིཀྑུ ཚནྡཾ ཨཝསྶཡཏི; ཀཏྟུཀམྱཏཱཀུསལདྷམྨཙྪནྡེན ཨཏྠནིཔྥཏྟིཡཾ སཏི ‘ཨཧཾ ལོཀུཏྟརདྷམྨཾ ནིབྦཏྟེསྶཱམི, ནཏྠི མཡ྄ཧཾ ཨེཏསྶ ནིབྦཏྟནེ བྷཱརོ’ཏི ཚནྡཾ ཛེཊྛཀཾ ཚནྡཾ དྷུརཾ ཚནྡཾ པུབྦངྒམཾ ཀཏྭཱ ལོཀུཏྟརདྷམྨཾ ནིབྦཏྟེཏི. ཨེཀོ ཝཱིརིཡཾ ཨཝསྶཡཏི. ཨེཀོ ཙིཏྟཾ, ཨེཀོ པཉྙཾ ཨཝསྶཡཏི. པཉྙཱཡ ཨཏྠནིཔྥཏྟིཡཾ སཏི ‘ཨཧཾ ལོཀུཏྟརདྷམྨཾ ནིབྦཏྟེསྶཱམི ¶ , ནཏྠི མཡ྄ཧཾ ཨེཏསྶ ནིབྦཏྟནེ བྷཱརོ’ཏི པཉྙཾ ཛེཊྛཀཾ པཉྙཾ དྷུརཾ པཉྙཾ པུབྦངྒམཾ ཀཏྭཱ ལོཀུཏྟརདྷམྨཾ ནིབྦཏྟེཏི.

ཀཐཾ? ཡཐཱ ཧི ཙཏཱུསུ ཨམཙྩཔུཏྟེསུ ཋཱནནྟརཾ པཏྠེཏྭཱ ཝིཙརནྟེསུ ཨེཀོ ཨུཔཊྛཱནཾ ཨཝསྶཡི, ཨེཀོ སཱུརབྷཱཝཾ, ཨེཀོ ཛཱཏིཾ, ཨེཀོ མནྟཾ. ཀཐཾ? ཏེསུ ཧི པཋམོ ‘ཨུཔཊྛཱནེ ཨཔྤམཱདཀཱརིཏཱཡ ཨཏྠནིཔྥཏྟིཡཱ སཏི ལབྦྷམཱནཾ ལཙྪཱམེཏཾ ཋཱནནྟར’ནྟི ཨུཔཊྛཱནཾ ཨཝསྶཡི. དུཏིཡོ ‘ཨུཔཊྛཱནེ ཨཔྤམཏྟོཔི ཨེཀཙྩོ སངྒཱམེ པཙྩུཔཊྛིཏེ སཎྛཱཏུཾ ན སཀྐོཏི; ཨཝསྶཾ ཁོ པན རཉྙོ པཙྩནྟོ ཀུཔྤིསྶཏི; ཏསྨིཾ ཀུཔྤིཏེ རཐདྷུརེ ཀམྨཾ ཀཏྭཱ རཱཛཱནཾ ཨཱརཱདྷེཏྭཱ ཨཱཧརཱཔེསྶཱམེཏཾ ཋཱནནྟར’ནྟི སཱུརབྷཱཝཾ ཨཝསྶཡི. ཏཏིཡོ ‘སཱུརབྷཱཝེཔི སཏི ཨེཀཙྩོ ཧཱིནཛཱཏིཀོ ཧོཏི; ཛཱཏིཾ སོདྷེཏྭཱ ཋཱནནྟརཾ དདནྟཱ མཡ྄ཧཾ དསྶནྟཱི’ཏི ཛཱཏིཾ ཨཝསྶཡི. ཙཏུཏྠོ ‘ཛཱཏིམཱཔི ཨེཀོ ཨམནྟནཱིཡོ ཧོཏི; མནྟེན ཀཏྟབྦཀིཙྩེ ཨུཔྤནྣེ ཨཱཧརཱཔེསྶཱམེཏཾ ཋཱནནྟར’ནྟི མནྟཾ ¶ ཨཝསྶཡི. ཏེ སབྦེཔི ཨཏྟནོ ཨཏྟནོ ཨཝསྶཡབལེན ཋཱནནྟརཱནི པཱཔུཎིཾསུ.

ཏཏྠ ཨུཔཊྛཱནེ ཨཔྤམཏྟོ ཧུཏྭཱ ཋཱནནྟརཾ པཏྟོ ཝིཡ ཚནྡཾ ཨཝསྶཱཡ ཀཏྟུཀམྱཏཱཀུསལདྷམྨཙྪནྡེན ཨཏྠནིབྦཏྟིཡཾ སཏི ‘ཨཧཾ ལོཀུཏྟརདྷམྨཾ ནིབྦཏྟེསྶཱམི, ནཏྠི མཡ྄ཧཾ ཨེཏསྶ ནིབྦཏྟནེ བྷཱརོ’ཏི ཚནྡཾ ཛེཊྛཀཾ ཚནྡཾ དྷུརཾ ཚནྡཾ པུབྦངྒམཾ ཀཏྭཱ ལོཀུཏྟརདྷམྨནིབྦཏྟཀོ དཊྛབྦོ, རཊྛཔཱལཏྠེརོ (མ. ནི. ༢.༢༩༣ ཨཱདཡོ) ཝིཡ. སོ ཧི ཨཱཡསྨཱ ཚནྡཾ དྷུརཾ ཀཏྭཱ ལོཀུཏྟརདྷམྨཾ ནིབྦཏྟེསི. སཱུརབྷཱཝེན རཱཛཱནཾ ཨཱརཱདྷེཏྭཱ ཋཱནནྟརཾ པཏྟོ ཝིཡ ཝཱིརིཡཾ ཛེཊྛཀཾ ཝཱིརིཡཾ དྷུརཾ ཝཱིརིཡཾ པུབྦངྒམཾ ཀཏྭཱ ལོཀུཏྟརདྷམྨནིབྦཏྟཀོ དཊྛབྦོ, སོཎཏྠེརོ (མཧཱཝ. ༢༤༣) ཝིཡ. སོ ཧི ཨཱཡསྨཱ ཝཱིརིཡཾ དྷུརཾ ཀཏྭཱ ལོཀུཏྟརདྷམྨཾ ནིབྦཏྟེསི.

ཛཱཏིསམྤཏྟིཡཱ ¶ ཋཱནནྟརཾ པཏྟོ ཝིཡ ཙིཏྟཾ ཛེཊྛཀཾ ཙིཏྟཾ དྷུརཾ ཙིཏྟཾ པུབྦངྒམཾ ཀཏྭཱ ལོཀུཏྟརདྷམྨནིབྦཏྟཀོ དཊྛབྦོ, སམྦྷཱུཏཏྠེརོ ཝིཡ. སོ ཧི ཨཱཡསྨཱ ཙིཏྟཾ དྷུརཾ ཀཏྭཱ ལོཀུཏྟརདྷམྨཾ ནིབྦཏྟེསི. མནྟཾ ཨཝསྶཱཡ ཋཱནནྟརཔྤཏྟོ ཝིཡ ཝཱིམཾསཾ ཛེཊྛཀཾ ཝཱིམཾསཾ དྷུརཾ ཝཱིམཾསཾ པུབྦངྒམཾ ཀཏྭཱ ¶ ལོཀུཏྟརདྷམྨནིབྦཏྟཀོ དཊྛབྦོ, ཐེརོ མོགྷརཱཛཱ ཝིཡ. སོ ཧི ཨཱཡསྨཱ ཝཱིམཾསཾ དྷུརཾ ཀཏྭཱ ལོཀུཏྟརདྷམྨཾ ནིབྦཏྟེསི.

ཨེཏྠ ཙ ཏཡོ ཚནྡསམཱདྷིཔདྷཱནསངྑཱརསངྑཱཏཱ དྷམྨཱ ཨིདྡྷཱིཔི ཧོནྟི ཨིདྡྷིཔཱདཱཔི. སེསཱ པན སམྤཡུཏྟཀཱ ཙཏྟཱརོ ཁནྡྷཱ ཨིདྡྷིཔཱདཱཡེཝ. ཝཱིརིཡཙིཏྟཝཱིམཾསསམཱདྷིཔདྷཱནསངྑཱརསངྑཱཏཱཔི ཏཡོ དྷམྨཱ ཨིདྡྷཱིཔི ཧོནྟི ཨིདྡྷིཔཱདཱཔི. སེསཱ པན སམྤཡུཏྟཀཱ ཙཏྟཱརོ ཁནྡྷཱ ཨིདྡྷིཔཱདཱཡེཝ. ཨཡཾ ཏཱཝ ཨབྷེདཏོ ཀཐཱ.

བྷེདཏོ པན ‘ཚནྡོ’ ཨིདྡྷི ནཱམ. ཚནྡདྷུརེན བྷཱཝིཏཱ ཙཏྟཱརོ ཁནྡྷཱ ཚནྡིདྡྷིཔཱདོ ནཱམ. སམཱདྷི པདྷཱནསངྑཱརོཏི དྭེ དྷམྨཱ སངྑཱརཀྑནྡྷཝསེན ཚནྡིདྡྷིཔཱདེ པཝིསནྟི; པཱདེ པཝིཊྛཱཏིཔི ཝཏྟུཾ ཝཊྚཏིཡེཝ. ཏཏྠེཝ ‘སམཱདྷི’ ཨིདྡྷི ནཱམ. སམཱདྷིདྷུརེན བྷཱཝིཏཱ ཙཏྟཱརོ ཁནྡྷཱ སམཱདྷིདྡྷིཔཱདོ ནཱམ. ཚནྡོ ¶ པདྷཱནསངྑཱརོཏི དྭེ དྷམྨཱ སངྑཱརཀྑནྡྷཝསེན སམཱདྷིདྡྷིཔཱདེ པཝིསནྟི; པཱདེ པཝིཊྛཱཏིཔི ཝཏྟུཾ ཝཊྚཏི ཨེཝ. ཏཏྠེཝ ‘པདྷཱནསངྑཱརོ’ ཨིདྡྷི ནཱམ. པདྷཱནསངྑཱརབྷཱཝིཏཱ ཙཏྟཱརོ ཁནྡྷཱ པདྷཱནསངྑཱརིདྡྷིཔཱདོ ནཱམ. ཚནྡོ སམཱདྷཱིཏི དྭེ དྷམྨཱ སངྑཱརཀྑནྡྷཝསེན པདྷཱནསངྑཱརིདྡྷིཔཱདེ པཝིསནྟི; པཱདེ པཝིཊྛཱཏིཔི ཝཏྟུཾ ཝཊྚཏི ཨེཝ. ཏཏྠེཝ ‘ཝཱིརིཡཾ’ ཨིདྡྷི ནཱམ, ‘ཙིཏྟཾ’ ཨིདྡྷི ནཱམ, ‘ཝཱིམཾསཱ’ ཨིདྡྷི ནཱམ…པེ… པཱདེ པཝིཊྛཱཏིཔི ཝཏྟུཾ ཝཊྚཏི ཨེཝ. ཨཡཾ བྷེདཏོ ཀཐཱ ནཱམ.

ཨེཏྠ པན ཨབྷིནཝཾ ནཏྠི; གཧིཏམེཝ ཝིབྷཱུཏདྷཱཏུཀཾ ཀཏཾ. ཀཐཾ? ཚནྡོ, སམཱདྷི, པདྷཱནསངྑཱརོཏི ཨིམེ ཏཡོ དྷམྨཱ ཨིདྡྷཱིཔི ཧོནྟི ཨིདྡྷིཔཱདཱཔི. སེསཱ སམྤཡུཏྟཀཱ ཙཏྟཱརོ ཁནྡྷཱ ཨིདྡྷིཔཱདཱཡེཝ. ཨིམེ ཧི ཏཡོ དྷམྨཱ ཨིཛ྄ཛྷམཱནཱ སམྤཡུཏྟཀེཧི ཙཏཱུཧི ཁནྡྷེཧི སདྡྷིཾཡེཝ ཨིཛ྄ཛྷནྟི, ན ཝིནཱ. སམྤཡུཏྟཀཱ པན ཙཏྟཱརོ ཁནྡྷཱ ཨིཛ྄ཛྷནཀཊྛེན ཨིདྡྷི ནཱམ ཧོནྟི, པཏིཊྛཱནཊྛེན པཱདོ ནཱམ. ‘ཨིདྡྷཱི’ཏི ཝཱ ‘ཨིདྡྷིཔཱདོ’ཏི ཝཱ ན ཨཉྙསྶ ཀསྶཙི ཨདྷིཝཙནཾ, སམྤཡུཏྟཀཱནཾ ཙཏུནྣཾ ཁནྡྷཱནཾཡེཝ ཨདྷིཝཙནཾ. ཝཱིརིཡཾ, ཙིཏྟཾ, ཝཱིམཾསཱསམཱདྷིཔདྷཱནསངྑཱརོཏི ཏཡོ དྷམྨཱ…པེ… ཙཏུནྣཾ ཁནྡྷཱནཾཡེཝ ཨདྷིཝཙནཾ.

ཨཔིཙ ¶ པུབྦབྷཱགོ པུབྦབྷཱགོ ཨིདྡྷིཔཱདོ ནཱམ; པཊིལཱབྷོ པཊིལཱབྷོ ཨིདྡྷི ནཱམཱཏི ཝེདིཏབྦོ. ཨཡམཏྠོ ཨུཔཙཱརེན ཝཱ ཝིཔསྶནཱཡ ཝཱ དཱིཔེཏབྦོ. པཋམཛ྄ཛྷཱནཔརིཀམྨཉྷི ཨིདྡྷིཔཱདོ ནཱམ, པཋམཛ྄ཛྷཱནཾ ཨིདྡྷི ནཱམ. དུཏིཡཏཏིཡཙཏུཏྠཨཱཀཱསཱནཉྩཱཡཏན, ཝིཉྙཱཎཉྩཱཡཏནཨཱཀིཉྩཉྙཱཡཏནནེཝསཉྙཱནཱསཉྙཱཡཏནཔརིཀམྨཾ ¶ ཨིདྡྷིཔཱདོ ནཱམ, ནེཝསཉྙཱནཱསཉྙཱཡཏནཾ ཨིདྡྷི ནཱམ. སོཏཱཔཏྟིམགྒསྶ ཝིཔསྶནཱ ཨིདྡྷིཔཱདོ ནཱམ, སོཏཱཔཏྟིམགྒོ ཨིདྡྷི ནཱམ. སཀདཱགཱམི, ཨནཱགཱམི, ཨརཧཏྟམགྒསྶ ཝིཔསྶནཱ ཨིདྡྷིཔཱདོ ནཱམ, ཨརཧཏྟམགྒོ ཨིདྡྷི ནཱམ. པཊིལཱབྷེནཱཔི དཱིཔེཏུཾ ཝཊྚཏིཡེཝ. པཋམཛ྄ཛྷཱནཉྷི ཨིདྡྷིཔཱདོ ནཱམ, དུཏིཡཛ྄ཛྷཱནཾ ཨིདྡྷི ནཱམ; དུཏིཡཛ྄ཛྷཱནཾ ཨིདྡྷིཔཱདོ ནཱམ, ཏཏིཡཛ྄ཛྷཱནཾ ཨིདྡྷི ནཱམ…པེ… ཨནཱགཱམིམགྒོ ཨིདྡྷིཔཱདོ ནཱམ, ཨརཧཏྟམགྒོ ཨིདྡྷི ནཱམ.

ཀེནཊྛེན ¶ ཨིདྡྷི? ཀེནཊྛེན པཱདོཏི? ཨིཛ྄ཛྷནཀཊྛེནེཝ ཨིདྡྷི. པཏིཊྛཱནཊྛེནེཝ པཱདོ. ཨེཝམིདྷཱཔི ཨིདྡྷཱིཏི ཝཱ པཱདོཏི ཝཱ ན ཨཉྙསྶ ཀསྶཙི ཨདྷིཝཙནཾ, སམྤཡུཏྟཀཱནཾ ཙཏུནྣཾ ཁནྡྷཱནཾཡེཝ ཨདྷིཝཙནནྟི. ཨེཝཾ ཝུཏྟེ པན ཨིདམཱཧཾསུ – ཙཏུནྣཾ ཁནྡྷཱནམེཝ ཨདྷིཝཙནཾ བྷཝེཡྻ, ཡདི སཏྠཱ པརཏོ ཨུཏྟརཙཱུལ༹བྷཱཛནཱིཡཾ ནཱམ ན ཨཱཧརེཡྻ. ཨུཏྟརཙཱུལ༹བྷཱཛནཱིཡེ པན ‘‘ཚནྡོཡེཝ ཚནྡིདྡྷིཔཱདོ, ཝཱིརིཡམེཝ, ཙིཏྟམེཝ, ཝཱིམཾསཱཝ ཝཱིམཾསིདྡྷིཔཱདོ’’ཏི ཀཐིཏཾ. ཀེཙི པན ‘‘ཨིདྡྷི ནཱམ ཨནིཔྥནྣཱ, ཨིདྡྷིཔཱདོ ནིཔྥནྣོ’’ཏི ཝདིཾསུ. ཏེསཾ ཝཙནཾ པཊིཀྑིཔིཏྭཱ ཨིདྡྷཱིཔི ཨིདྡྷིཔཱདོཔི ‘ནིཔྥནྣོ ཏིལཀྑཎབྦྷཱཧཏོ’ཏི སནྣིཊྛཱནཾ ཀཏཾ. ཨིཏི ཨིམསྨིཾ སུཏྟནྟབྷཱཛནཱིཡེ ལོཀིཡལོཀུཏྟརམིསྶཀཱ ཨིདྡྷིཔཱདཱ ཀཐིཏཱཏི.

སུཏྟནྟབྷཱཛནཱིཡཝཎྞནཱ.

༢. ཨབྷིདྷམྨབྷཱཛནཱིཡཝཎྞནཱ

༤༤༤. ཨབྷིདྷམྨབྷཱཛནཱིཡཾ ཨུཏྟཱནཏྠམེཝ. ནཡཱ པནེཏྠ གཎེཏབྦཱ. ‘‘ཚནྡསམཱདྷིཔདྷཱནསངྑཱརསམནྣཱགཏཾ ཨིདྡྷིཔཱདཾ བྷཱཝེཏཱི’’ཏི ཝུཏྟཊྛཱནསྨིཉྷི ལོཀུཏྟརཱནི ཙཏྟཱརི ནཡསཧསྶཱནི ཝིབྷཏྟཱནི. ཝཱིརིཡསམཱདྷིཨཱདཱིསུཔི ཨེསེཝ ནཡོ. ཏཐཱ ཨུཏྟརཙཱུལ༹བྷཱཛནཱིཡེ ཚནྡིདྡྷིཔཱདེ ¶ ཙཏྟཱརི ནཡསཧསྶཱནི ཝིབྷཏྟཱནི, ཝཱིརིཡཙིཏྟཝཱིམཾསིདྡྷིཔཱདེ ཙཏྟཱརི ཙཏྟཱརཱིཏི སབྦཱནིཔི ཨཊྛནྣཾ ཙཏུཀྐཱནཾ ཝསེན དྭཏྟིཾས ནཡསཧསྶཱནི ཝིབྷཏྟཱནི. ཨེཝམེཏཾ ནིབྦཏྟིཏལོཀུཏྟརཱནཾཡེཝ ཨིདྡྷིཔཱདཱནཾ ཝསེན དྭཏྟིཾསནཡསཧསྶཔྤཊིམཎྜིཏཾ ཨབྷིདྷམྨབྷཱཛནཱིཡཾ ཀཐིཏནྟི ཝེདིཏབྦཾ.

༣. པཉྷཱཔུཙྪཀཝཎྞནཱ

༤༦༢. པཉྷཱཔུཙྪཀེ ¶ པཱལི༹ཨནུསཱརེནེཝ ཨིདྡྷིཔཱདཱནཾ ཀུསལཱདིབྷཱཝོ ཝེདིཏབྦོ. ཨཱརམྨཎཏྟིཀེསུ པན སབྦེཔེཏེ ཨཔྤམཱཎཾ ནིབྦཱནཾ ཨཱརབྦྷ པཝཏྟིཏོ ཨཔྤམཱཎཱརམྨཎཱ ཨེཝ, ན མགྒཱརམྨཎཱ; སཧཛཱཏཧེཏུཝསེན པན མགྒཧེཏུཀཱ, ན མགྒཱདྷིཔཏིནོ. ཙཏྟཱརོ ཧི ཨདྷིཔཏཡོ ཨཉྙམཉྙཾ གརུཾ ན ཀརོནྟི. ཀསྨཱ? སཡཾ ཛེཊྛཀཏྟཱ. ཡཐཱ ཧི སམཛཱཏིཀཱ སམཝཡཱ སམཐཱམཱ སམསིཔྤཱ ཙཏྟཱརོ རཱཛཔུཏྟཱ ཨཏྟནོ ཨཏྟནོ ཛེཊྛཀཏཱཡ ཨཉྙམཉྙསྶ ¶ ཨཔཙིཏིཾ ན ཀརོནྟི, ཨེཝམིམེཔི ཙཏྟཱརོ ཨདྷིཔཏཡོ པཱཊིཡེཀྐཾ པཱཊིཡེཀྐཾ ཛེཊྛཀདྷམྨཏཱཡ ཨཉྙམཉྙཾ གརུཾ ན ཀརོནྟཱིཏི ཨེཀནྟེནེཝ ན མགྒཱདྷིཔཏིནོ. ཨཏཱིཏཱདཱིསུ ཨེཀཱརམྨཎབྷཱཝེཔི ན ཝཏྟབྦཱ. ནིབྦཱནསྶ པན བཧིདྡྷཱདྷམྨཏྟཱ བཧིདྡྷཱརམྨཎཱ ནཱམ ཧོནྟཱིཏི. ཨེཝམེཏསྨིཾ པཉྷཱཔུཙྪཀེ ནིབྦཏྟིཏལོཀུཏྟརཱཝ ཨིདྡྷིཔཱདཱ ཀཐིཏཱ. སམྨཱསམྦུདྡྷེན ཧི སུཏྟནྟབྷཱཛནཱིཡསྨིཾཡེཝ ལོཀིཡལོཀུཏྟརམིསྶཀཱ ཨིདྡྷིཔཱདཱ ཀཐིཏཱ, ཨབྷིདྷམྨབྷཱཛནཱིཡཔཉྷཱཔུཙྪཀེསུ པན ལོཀུཏྟརཱཡེཝཱཏི. ཨེཝམཡཾ ཨིདྡྷིཔཱདཝིབྷངྒོཔི ཏེཔརིཝཊྚཾ ནཱིཧརིཏྭཱཝ དསྶིཏོཏི.

སམྨོཧཝིནོདནིཡཱ ཝིབྷངྒཊྛཀཐཱཡ

ཨིདྡྷིཔཱདཝིབྷངྒཝཎྞནཱ ནིཊྛིཏཱ.

༡༠. བོཛ྄ཛྷངྒཝིབྷངྒོ

༡. སུཏྟནྟབྷཱཛནཱིཡཝཎྞནཱ

༤༦༦. ཨིདཱནི ¶ ¶ ¶ ཏདནནྟརེ བོཛ྄ཛྷངྒཝིབྷངྒེ སཏྟཱཏི གཎནཔརིཙྪེདོ. བོཛ྄ཛྷངྒཱཏི བོདྷིཡཱ བོདྷིསྶ ཝཱ ཨངྒཱཏི བོཛ྄ཛྷངྒཱ. ཨིདཾ ཝུཏྟཾ ཧོཏི – ཡཱ ཨེསཱ དྷམྨསཱམགྒཱི ཡཱཡ ལོཀུཏྟརམགྒཀྑཎེ ཨུཔྤཛྫམཱནཱཡ ལཱིནུདྡྷཙྩཔཏིཊྛཱནཱཡཱུཧནཀཱམསུཁཏྟཀིལམཐཱནུཡོགཨུཙྪེདསསྶཏཱབྷིནིཝེསཱདཱིནཾ ཨནེཀེསཾ ཨུཔདྡཝཱནཾ པཊིཔཀྑབྷཱུཏཱཡ སཏིདྷམྨཝིཙཡཝཱིརིཡཔཱིཏིཔསྶདྡྷིསམཱདྷིཨུཔེཀྑཱསངྑཱཏཱཡ དྷམྨསཱམགྒིཡཱ ཨརིཡསཱཝཀོ བུཛ྄ཛྷཏཱིཏི ཀཏྭཱ བོདྷཱིཏི ཝུཙྩཏི, བུཛ྄ཛྷཏི ཀིལེསསནྟཱནནིདྡཱཡ ཨུཊྛཧཏི, ཙཏྟཱརི ཝཱ ཨརིཡསཙྩཱནི པཊིཝིཛ྄ཛྷཏི, ནིབྦཱནམེཝ ཝཱ སཙྪིཀརོཏི, ཏསྶཱ དྷམྨསཱམགྒཱིསངྑཱཏཱཡ བོདྷིཡཱ ཨངྒཱཏིཔི བོཛ྄ཛྷངྒཱ, ཛྷཱནངྒམགྒངྒཱདཱིནི ཝིཡ. ཡོ པནེས ཡཐཱཝུཏྟཔྤཀཱརཱཡ ཨེཏཱཡ དྷམྨསཱམགྒིཡཱ བུཛ྄ཛྷཏཱིཏི ཀཏྭཱ ཨརིཡསཱཝཀོ བོདྷཱིཏི ཝུཙྩཏི, ཏསྶ བོདྷིསྶ ཨངྒཱཏིཔི བོཛ྄ཛྷངྒཱ, སེནངྒརཐངྒཱདཡོ ཝིཡ. ཏེནཱཧུ ཨཊྛཀཐཱཙརིཡཱ – ‘‘བུཛ྄ཛྷནཀསྶ པུགྒལསྶ ཨངྒཱཏི ཝཱ བོཛ྄ཛྷངྒཱ’’ཏི.

ཨཔིཙ ‘‘བོཛ྄ཛྷངྒཱཏི ཀེནཊྛེན བོཛ྄ཛྷངྒཱ? བོདྷཱཡ སཾཝཏྟནྟཱིཏི བོཛ྄ཛྷངྒཱ, བུཛ྄ཛྷནྟཱིཏི བོཛ྄ཛྷངྒཱ, ཨནུབུཛ྄ཛྷནྟཱིཏི བོཛ྄ཛྷངྒཱ, པཊིབུཛ྄ཛྷནྟཱིཏི བོཛ྄ཛྷངྒཱ, སམྦུཛ྄ཛྷནྟཱིཏི བོཛ྄ཛྷངྒཱ’’ཏི ཨིམིནཱ པཊིསམྦྷིདཱནཡེནཱཔི བོཛ྄ཛྷངྒཏྠོ ཝེདིཏབྦོ.

སཏིསམྦོཛ྄ཛྷངྒོཏིཨཱདཱིསུ པསཏྠོ སུནྡརོ ཙ བོཛ྄ཛྷངྒོ སམྦོཛ྄ཛྷངྒོ, སཏིཡེཝ སམྦོཛ྄ཛྷངྒོ སཏིསམྦོཛ྄ཛྷངྒོ. ཏཏྠ ཨུཔཊྛཱནལཀྑཎོ སཏིསམྦོཛ྄ཛྷངྒོ, པཝིཙཡལཀྑཎོ དྷམྨཝིཙཡསམྦོཛ྄ཛྷངྒོ, པགྒཧལཀྑཎོ ཝཱིརིཡསམྦོཛ྄ཛྷངྒོ, ཕརཎལཀྑཎོ པཱིཏིསམྦོཛ྄ཛྷངྒོ, ཨུཔསམལཀྑཎོ ¶ པསྶདྡྷིསམྦོཛ྄ཛྷངྒོ, ཨཝིཀྑེཔལཀྑཎོ སམཱདྷིསམྦོཛ྄ཛྷངྒོ, པཊིསངྑཱནལཀྑཎོ ¶ ཨུཔེཀྑཱསམྦོཛ྄ཛྷངྒོ. ཏེསུ ‘‘སཏིཉྩ ཁྭཱཧཾ, བྷིཀྑཝེ, སབྦཏྠིཀཾ ཝདཱམཱི’’ཏི (སཾ. ནི. ༥.༢༣༤) ཝཙནཏོ སབྦེསཾ བོཛ྄ཛྷངྒཱནཾ ཨུཔཀཱརཀཏྟཱ སཏིསམྦོཛ྄ཛྷངྒོ པཋམཾ ཝུཏྟོ. ཏཏོ པརཾ ‘‘སོ ཏཐཱ སཏོ ཝིཧརནྟོ ¶ ཏཾ དྷམྨཾ པཉྙཱཡ པཝིཙིནཏཱི’’ཏིཨཱདིནཱ (མ. ནི. ༡༥༠) ནཡེན ཨེཝཾ ཨནུཀྐམེནེཝ ནིཀྑེཔཔཡོཛནཾ པཱལི༹ཡཾ ཨཱགཏམེཝ.

ཀསྨཱ པནེཏེ སཏྟེཝ ཝུཏྟཱ, ཨནཱུནཱ ཨནདྷིཀཱཏི? ལཱིནུདྡྷཙྩཔཊིཔཀྑཏོ སབྦཏྠིཀཏོ ཙ. ཨེཏྠ ཧི ཏཡོ བོཛ྄ཛྷངྒཱ ལཱིནསྶ པཊིཔཀྑཱ, ཡཐཱཧ – ‘‘ཡསྨིཉྩ ཁོ, བྷིཀྑཝེ, སམཡེ ལཱིནཾ ཙིཏྟཾ ཧོཏི, ཀཱལོ ཏསྨིཾ སམཡེ དྷམྨཝིཙཡསམྦོཛ྄ཛྷངྒསྶ བྷཱཝནཱཡ, ཀཱལོ ཝཱིརིཡསམྦོཛ྄ཛྷངྒསྶ བྷཱཝནཱཡ, ཀཱལོ པཱིཏིསམྦོཛ྄ཛྷངྒསྶ བྷཱཝནཱཡཱ’’ཏི (སཾ. ནི. ༥.༢༣༤). ཏཡོ ཨུདྡྷཙྩསྶ པཊིཔཀྑཱ, ཡཐཱཧ – ‘‘ཡསྨིཉྩ ཁོ, བྷིཀྑཝེ, སམཡེ ཨུདྡྷཏཾ ཙིཏྟཾ ཧོཏི, ཀཱལོ ཏསྨིཾ སམཡེ པསྶདྡྷིསམྦོཛ྄ཛྷངྒསྶ བྷཱཝནཱཡ, ཀཱལོ སམཱདྷིསམྦོཛ྄ཛྷངྒསྶ བྷཱཝནཱཡ, ཀཱལོ ཨུཔེཀྑཱསམྦོཛ྄ཛྷངྒསྶ བྷཱཝནཱཡཱ’’ཏི (སཾ. ནི. ༥.༢༣༤). ཨེཀོ པནེཏྠ ལོཎདྷཱུཔནཾ ཝིཡ སབྦབྱཉྫནེསུ, སབྦཀམྨིཀཨམཙྩོ ཝིཡ ཙ སབྦེསུ རཱཛཀིཙྩེསུ, སབྦབོཛ྄ཛྷངྒེསུ ཨིཙྪིཏབྦཏོ སབྦཏྠིཀོ, ཡཐཱཧ – ‘‘སཏིཉྩ ཁྭཱཧཾ, བྷིཀྑཝེ, སབྦཏྠིཀཾ ཝདཱམཱི’’ཏི. ‘‘སབྦཏྠཀ’’ནྟིཔི པཱལི༹. དྭིནྣམྤི སབྦཏྠ ཨིཙྪིཏབྦནྟི ཨཏྠོ. ཨེཝཾ ལཱིནུདྡྷཙྩཔཊིཔཀྑཏོ སབྦཏྠིཀཏོ ཙ སཏྟེཝ ཝུཏྟཱཏི ཝེདིཏབྦཱ.

༤༦༧. ཨིདཱནི ནེསཾ ཨེཀསྨིཾཡེཝཱརམྨཎེ ཨཏྟནོ ཨཏྟནོ ཀིཙྩཝསེན ནཱནཱཀརཎཾ དསྶེཏུཾ ཏཏྠ ཀཏམོ སཏིསམྦོཛ྄ཛྷངྒོཏིཨཱདི ཨཱརདྡྷཾ. ཏཏྠ ཨིདྷ བྷིཀྑཱུཏི ཨིམསྨིཾ སཱསནེ བྷིཀྑུ. སཏིམཱ ཧོཏཱིཏི པཉྙཱཡ པཉྙཝཱ, ཡསེན ཡསཝཱ, དྷནེན དྷནཝཱ ཝིཡ སཏིཡཱ སཏིམཱ ཧོཏི, སཏིསམྤནྣོཏི ཨཏྠོ. པརམེནཱཏི ཨུཏྟམེན; ཏཉྷི པརམཏྠསཙྩསྶ ནིབྦཱནསྶ ཙེཝ མགྒསྶ ཙ ཨནུལོམཏོ པརམཾ ནཱམ ཧོཏི ཨུཏྟམཾ སེཊྛཾ. སཏིནེཔཀྐེནཱཏི ནེཔཀྐཾ ཝུཙྩཏི པཉྙཱ; སཏིཡཱ ཙེཝ ནེཔཀྐེན ¶ ཙཱཏི ཨཏྠོ.

ཀསྨཱ པན ཨིམསྨིཾ སཏིབྷཱཛནཱིཡེ པཉྙཱ སངྒཧིཏཱཏི? སཏིཡཱ བལཝབྷཱཝདཱིཔནཏྠཾ. སཏི ཧི པཉྙཱཡ སདྡྷིམྤི ཨུཔྤཛྫཏི ཝིནཱཔི, པཉྙཱཡ སདྡྷིཾ ཨུཔྤཛྫམཱནཱ བལཝཏཱི ཧོཏི, ཝིནཱ ཨུཔྤཛྫམཱནཱ དུབྦལཱ. ཏེནསྶཱ བལཝབྷཱཝདཱིཔནཏྠཾ པཉྙཱ སངྒཧིཏཱ. ཡཐཱ ཧི དྭཱིསུ ¶ དིསཱསུ དྭེ རཱཛམཧཱམཏྟཱ ཏིཊྛེཡྻུཾ; ཏེསུ ཨེཀོ རཱཛཔུཏྟཾ གཧེཏྭཱ ཏིཊྛེཡྻ, ཨེཀོ ཨཏྟནོ དྷམྨཏཱཡ ཨེཀཀོཝ ཏེསུ རཱཛཔུཏྟཾ གཧེཏྭཱ ཋིཏོ ཨཏྟནོཔི ¶ ཏེཛེན རཱཛཔུཏྟསྶཔི ཏེཛེན ཏེཛཝཱ ཧོཏི; ཨཏྟནོ དྷམྨཏཱཡ ཋིཏོ ན ཏེན སམཏེཛོ ཧོཏི; ཨེཝམེཝ རཱཛཔུཏྟཾ གཧེཏྭཱ ཋིཏམཧཱམཏྟོ ཝིཡ པཉྙཱཡ སདྡྷིཾ ཨུཔྤནྣཱ སཏི, ཨཏྟནོ དྷམྨཏཱཡ ཋིཏོ ཝིཡ ཝིནཱ པཉྙཱཡ ཨུཔྤནྣཱ. ཏཏྠ ཡཐཱ རཱཛཔུཏྟཾ གཧེཏྭཱ ཋིཏོ ཨཏྟནོཔི ཏེཛེན རཱཛཔུཏྟསྶཔི ཏེཛེན ཏེཛཝཱ ཧོཏི, ཨེཝཾ པཉྙཱཡ སདྡྷིཾ ཨུཔྤནྣཱ སཏི བལཝཏཱི ཧོཏི; ཡཐཱ ཨཏྟནོ དྷམྨཏཱཡ ཋིཏོ ན ཏེན སམཏེཛོ ཧོཏི, ཨེཝཾ ཝིནཱ པཉྙཱཡ ཨུཔྤནྣཱ དུབྦལཱ ཧོཏཱིཏི བལཝབྷཱཝདཱིཔནཏྠཾ པཉྙཱ གཧིཏཱཏི.

ཙིརཀཏམྤཱིཏི ཨཏྟནོ ཝཱ པརསྶ ཝཱ ཀཱཡེན ཙིརཀཏཾ ཝཏྟཾ ཝཱ ཀསིཎམཎྜལཾ ཝཱ ཀསིཎཔརིཀམྨཾ ཝཱ. ཙིརབྷཱསིཏམྤཱིཏི ཨཏྟནཱ ཝཱ པརེན ཝཱ ཝཱཙཱཡ ཙིརབྷཱསིཏཾ བཧུཀམྤི, ཝཏྟསཱིསེ ཋཏྭཱ དྷམྨཀཐཾ ཝཱ ཀམྨཊྛཱནཝིནིཙྪཡཾ ཝཱ, ཝིམུཏྟཱཡཏནསཱིསེ ཝཱ ཋཏྭཱ དྷམྨཀཐམེཝ. སརིཏཱ ཧོཏཱིཏི ཏཾ ཀཱཡཝིཉྙཏྟིཾ ཝཙཱིཝིཉྙཏྟིཉྩ སམུཊྛཱཔེཏྭཱ པཝཏྟཾ ཨརཱུཔདྷམྨཀོཊྛཱསཾ ‘ཨེཝཾ ཨུཔྤཛྫིཏྭཱ ཨེཝཾ ནིརུདྡྷོ’ཏི སརིཏཱ ཧོཏི. ཨནུསྶརིཏཱཏི པུནཔྤུནཾ སརིཏཱ. ཨཡཾ ཝུཙྩཏི སཏིསམྦོཛ྄ཛྷངྒོཏི ཨཡཾ ཨེཝཾ ཨུཔྤནྣཱ སེསབོཛ྄ཛྷངྒསམུཊྛཱཔིཀཱ ཝིཔསྶནཱསམྤཡུཏྟཱ སཏི སཏིསམྦོཛ྄ཛྷངྒོ ནཱམ ཀཐཱིཡཏི.

སོ ཏཐཱ སཏོ ཝིཧརནྟོཏི སོ བྷིཀྑུ ཏེནཱཀཱརེན ཨུཔྤནྣཱཡ སཏིཡཱ སཏོ ཧུཏྭཱ ཝིཧརནྟོ. ཏཾ དྷམྨནྟི ཏཾ ཙིརཀཏཾ ཙིརབྷཱསིཏཾ ཧེཊྛཱ ཝུཏྟཔྤཀཱརཾ དྷམྨཾ. པཉྙཱཡ པཝིཙིནཏཱིཏི པཉྙཱཡ ‘ཨནིཙྩཾ དུཀྑཾ ཨནཏྟཱ’ཏི པཝིཙིནཏི. པཝིཙརཏཱིཏི ¶ ‘ཨནིཙྩཾ དུཀྑཾ ཨནཏྟཱ’ཏི ཏཏྠ པཉྙཾ ཙརཱཔེནྟོ པཝིཙརཏི. པརིཝཱིམཾསཾ ཨཱཔཛྫཏཱིཏི ཨོལོཀནཾ གཝེསནཾ ཨཱཔཛྫཏི. ཨཡཾ ཝུཙྩཏཱིཏི ཨིདཾ ཝུཏྟཔྤཀཱརཾ བོཛ྄ཛྷངྒསམུཊྛཱཔཀཾ ཝིཔསྶནཱཉཱཎཾ དྷམྨཝིཙཡསམྦོཛ྄ཛྷངྒོ ནཱམ ཝུཙྩཏི.

ཏསྶ ཏཾ དྷམྨནྟི ཏསྶ བྷིཀྑུནོ ཏཾ ཧེཊྛཱ ཝུཏྟཔྤཀཱརཾ དྷམྨཾ. ཨཱརདྡྷཾ ཧོཏཱིཏི པརིཔུཎྞཾ ཧོཏི པགྒཧིཏཾ. ཨསལླཱིནནྟི ཨཱརདྡྷཏྟཱཡེཝ ཨསལླཱིནཾ. ཨཡཾ ཝུཙྩཏཱིཏི ཨིདཾ བོཛ྄ཛྷངྒསམུཊྛཱཔཀཾ ཝིཔསྶནཱསམྤཡུཏྟཾ ཝཱིརིཡཾ ཝཱིརིཡསམྦོཛ྄ཛྷངྒོ ནཱམ ཝུཙྩཏི.

ནིརཱམིསཱཏི ¶ ¶ ཀཱམཱམིསལོཀཱམིསཝཊྚཱམིསཱནཾ ཨབྷཱཝེན ནིརཱམིསཱ པརིསུདྡྷཱ. ཨཡཾ ཝུཙྩཏཱིཏི ཨཡཾ བོཛ྄ཛྷངྒསམུཊྛཱཔིཀཱ ཝིཔསྶནཱསམྤཡུཏྟཱ པཱིཏི པཱིཏིསམྦོཛ྄ཛྷངྒོ ནཱམ ཝུཙྩཏི.

པཱིཏིམནསྶཱཏི པཱིཏིསམྤཡུཏྟཙིཏྟསྶ. ཀཱཡོཔི པསྶམྦྷཏཱིཏི ཁནྡྷཏྟཡསངྑཱཏོ ནཱམཀཱཡོ ཀིལེསདརཐཔཊིཔྤསྶདྡྷིཡཱ པསྶམྦྷཏི. ཙིཏྟམྤཱིཏི ཝིཉྙཱཎཀྑནྡྷོཔི ཏཐེཝ པསྶམྦྷཏི. ཨཡཾ ཝུཙྩཏཱིཏི ཨཡཾ བོཛ྄ཛྷངྒསམུཊྛཱཔིཀཱ ཝིཔསྶནཱསམྤཡུཏྟཱ པསྶདྡྷི པསྶདྡྷིསམྦོཛ྄ཛྷངྒོ ནཱམ ཝུཙྩཏི.

པསྶདྡྷཀཱཡསྶ སུཁིནོཏི པསྶདྡྷཀཱཡཏཱཡ ཨུཔྤནྣསུཁེན སུཁིཏསྶ. སམཱདྷིཡཏཱིཏི སམྨཱ ཨཱདྷིཡཏི, ནིཙྩལཾ ཧུཏྭཱ ཨཱརམྨཎེ ཋཔཱིཡཏི, ཨཔྤནཱཔྤཏྟཾ ཝིཡ ཧོཏི. ཨཡཾ ཝུཙྩཏཱིཏི ཨཡཾ བོཛ྄ཛྷངྒསམུཊྛཱཔིཀཱ ཝིཔསྶནཱསམྤཡུཏྟཱ ཙིཏྟེཀགྒཏཱ སམཱདྷིསམྦོཛ྄ཛྷངྒོ ནཱམ ཝུཙྩཏི.

ཏཐཱ སམཱཧིཏནྟི ཏེན ཨཔྤནཱཔྤཏྟེན ཝིཡ སམཱདྷིནཱ སམཱཧིཏཾ. སཱདྷུཀཾ ཨཛ྄ཛྷུཔེཀྑིཏཱ ཧོཏཱིཏི སུཊྛུ ཨཛ྄ཛྷུཔེཀྑིཏཱ ཧོཏི; ཏེསཾ དྷམྨཱནཾ པཧཱནཝཌྜྷནེ ཨབྱཱཝཊོ ཧུཏྭཱ ཨཛ྄ཛྷུཔེཀྑཏི. ཨཡཾ ¶ ཝུཙྩཏཱིཏི ཨཡཾ ཚནྣཾ བོཛ྄ཛྷངྒཱནཾ ཨནོསཀྐནཨནཏིཝཏྟནབྷཱཝསཱདྷཀོ མཛ྄ཛྷཏྟཱཀཱརོ ཨུཔེཀྑཱསམྦོཛ྄ཛྷངྒོ ནཱམ ཝུཙྩཏི.

ཨེཏྟཱཝཏཱ ཀིཾ ཀཐིཏཾ ནཱམ ཧོཏི? ཨཔུབྦཾ ཨཙརིམཾ ཨེཀཙིཏྟཀྑཎེ ནཱནཱརསལཀྑཎཱ པུབྦབྷཱགཝིཔསྶནཱ བོཛ྄ཛྷངྒཱ ཀཐིཏཱ ཧོནྟཱིཏི.

པཋམོ ནཡོ.

༤༦༨-༤༦༩. ཨིདཱནི ཡེན པརིཡཱཡེན སཏྟ བོཛ྄ཛྷངྒཱ ཙུདྡས ཧོནྟི, ཏསྶ པཀཱསནཏྠཾ དུཏིཡནཡཾ དསྶེནྟོ པུན སཏྟ བོཛ྄ཛྷངྒཱཏིཨཱདིམཱཧ. ཏཏྲཱཡཾ ཨནུཔུབྦཔདཝཎྞནཱ – ཨཛ྄ཛྷཏྟཾ དྷམྨེསུ སཏཱིཏི ཨཛ྄ཛྷཏྟིཀསངྑཱརེ པརིགྒཎྷནྟསྶ ཨུཔྤནྣཱ སཏི. བཧིདྡྷཱ དྷམྨེསུ སཏཱིཏི བཧིདྡྷཱསངྑཱརེ པརིགྒཎྷནྟསྶ ཨུཔྤནྣཱ སཏི. ཡདཔཱིཏི ཡཱཔི. ཏདཔཱིཏི སཱཔི. ཨབྷིཉྙཱཡཱཏི ཨབྷིཉྙེཡྻདྷམྨེ ཨབྷིཛཱནནཏྠཱཡ. སམྦོདྷཱཡཱཏི སམྦོདྷི ཝུཙྩཏི མགྒོ, མགྒཏྠཱཡཱཏི ཨཏྠོ. ནིབྦཱནཱཡཱཏི ¶ ཝཱནཾ ཝུཙྩཏི ཏཎྷཱ; སཱ ཏཏྠ ¶ ནཏྠཱིཏི ནིབྦཱནཾ, ཏདཏྠཱཡ, ཨསངྑཏཱཡ ཨམཏདྷཱཏུཡཱ སཙྪིཀིརིཡཏྠཱཡ སཾཝཏྟཏཱིཏི ཨཏྠོ. དྷམྨཝིཙཡསམྦོཛ྄ཛྷངྒེཔི ཨེསེཝ ནཡོ.

ཀཱཡིཀཾ ཝཱིརིཡནྟི ཙངྐམཾ ཨདྷིཊྛཧནྟསྶ ཨུཔྤནྣཝཱིརིཡཾ. ཙེཏསིཀཾ ཝཱིརིཡནྟི ‘‘ན ཏཱཝཱཧཾ ཨིམཾ པལླངྐཾ བྷིནྡིསྶཱམི ཡཱཝ མེ ན ཨནུཔཱདཱཡ ཨཱསཝེཧི ཙིཏྟཾ ཝིམུཙྩིསྶཏཱི’’ཏི ཨེཝཾ ཀཱཡཔཡོགཾ ཝིནཱ ཨུཔྤནྣཝཱིརིཡཾ. ཀཱཡཔསྶདྡྷཱིཏི ཏིཎྞཾ ཁནྡྷཱནཾ དརཐཔསྶདྡྷི. ཙིཏྟཔསྶདྡྷཱིཏི ཝིཉྙཱཎཀྑནྡྷསྶ དརཐཔསྶདྡྷི. ཨུཔེཀྑཱསམྦོཛ྄ཛྷངྒེ སཏིསམྦོཛ྄ཛྷངྒསདིསོཝ ཝིནིཙྪཡོ. ཨིམསྨིཾ ནཡེ སཏྟ བོཛ྄ཛྷངྒཱ ལོཀིཡལོཀུཏྟརམིསྶཀཱ ཀཐིཏཱ.

པོརཱཎཀཏྠེརཱ པན ‘ཨེཏྟཀེན པཱཀཊཾ ན ཧོཏཱི’ཏི ཝིབྷཛིཏྭཱ དསྶེསུཾ. ཨེཏེསུ ཧི ཨཛ྄ཛྷཏྟདྷམྨེསུ སཏི པཝིཙཡོ ཨུཔེཀྑཱཏི ཨིམེ ཏཡོ ཨཏྟནོ ཁནྡྷཱརམྨཎཏྟཱ ལོཀིཡཱཝ ཧོནྟི. ཏཐཱ མགྒཾ ཨཔྤཏྟཾ ཀཱཡིཀཝཱིརིཡཾ. ཨཝིཏཀྐཨཝིཙཱརཱ ¶ པན པཱིཏིསམཱདྷིཡོ ལོཀུཏྟརཱ ཧོནྟི. སེསཱ ལོཀིཡལོཀུཏྟརམིསྶཀཱཏི.

ཏཏྠ ཨཛ྄ཛྷཏྟཾ ཏཱཝ དྷམྨེསུ སཏིཔཝིཙཡཨུཔེཀྑཱ ཨཛ྄ཛྷཏྟཱརམྨཎཱ, ལོཀུཏྟརཱ པན བཧིདྡྷཱརམྨཎཱཏི ཏེསཾ ལོཀུཏྟརབྷཱཝོ མཱ ཡུཛྫིཏྠ. ཙངྐམཔྤཡོགེན ནིབྦཏྟཝཱིརིཡམྤི ལོཀིཡནྟི ཝདནྟོ ན ཀིལམཏི. ཨཝིཏཀྐཨཝིཙཱརཱ པན པཱིཏིསམཱདྷིཡོ ཀདཱ ལོཀུཏྟརཱ ཧོནྟཱིཏི? ཀཱམཱཝཙརེ ཏཱཝ པཱིཏིསམྦོཛ྄ཛྷངྒོ ལབྦྷཏི, ཨཝིཏཀྐཨཝིཙཱརཱ པཱིཏི ན ལབྦྷཏི. རཱུཔཱཝཙརེ ཨཝིཏཀྐཨཝིཙཱརཱ པཱིཏི ལབྦྷཏི, པཱིཏིསམྦོཛ྄ཛྷངྒོ པན ན ལབྦྷཏི. ཨརཱུཔཱཝཙརེ སབྦེན སབྦཾ ན ལབྦྷཏི. ཨེཏྠ པན ཨལབྦྷམཱནཀཾ ཨུཔཱདཱཡ ལབྦྷམཱནཀཱཔི པཊིཀྑིཏྟཱ. ཨེཝམཡཾ ཨཝིཏཀྐཨཝིཙཱརོ པཱིཏིསམྦོཛ྄ཛྷངྒོ ཀཱམཱཝཙརཏོཔི ནིཀྑནྟོ རཱུཔཱཝཙརཏོཔི ཨརཱུཔཱཝཙརཏོཔཱིཏི ནིབྦཏྟིཏལོཀུཏྟརོ ཡེཝཱཏི ཀཐིཏོ.

ཏཐཱ ཀཱམཱཝཙརེ སམཱདྷིསམྦོཛ྄ཛྷངྒོ ལབྦྷཏི, ཨཝིཏཀྐཨཝིཙཱརོ པན སམཱདྷི ན ལབྦྷཏི. རཱུཔཱཝཙརཨརཱུཔཱཝཙརེསུ ཨཝིཏཀྐཨཝིཙཱརོ སམཱདྷི ལབྦྷཏི, སམཱདྷིསམྦོཛ྄ཛྷངྒོ པན ན ལབྦྷཏི. ཨེཏྠ པན ཨལབྦྷམཱནཀཾ ཨུཔཱདཱཡ ལབྦྷམཱནཀོཔི པཊིཀྑིཏྟོ. ཨེཝམཡཾ ཨཝིཏཀྐཨཝིཙཱརོ སམཱདྷི ཀཱམཱཝཙརཏོཔི ནིཀྑནྟོ རཱུཔཱཝཙརཏོཔི ཨརཱུཔཱཝཙརཏོཔཱིཏི ནིབྦཏྟིཏལོཀུཏྟརོ ཡེཝཱཏི ཀཐིཏོ.

ཨཔིཙ ¶ ¶ ལོཀིཡཾ གཧེཏྭཱ ལོཀུཏྟརོ ཀཱཏབྦོ; ལོཀུཏྟརཾ གཧེཏྭཱ ལོཀིཡོ ཀཱཏབྦོ. ཨཛ྄ཛྷཏྟདྷམྨེསུ ཧི སཏིཔཝིཙཡཨུཔེཀྑཱནཾ ལོཀུཏྟརབྷཱཝནཱཀཱལོཔི ཨཏྠི. ཏཏྲིདཾ སུཏྟཾ – ‘‘ཨཛ྄ཛྷཏྟཝིམོཀྑཾ ཁྭཱཧཾ, ཨཱཝུསོ, སབྦུཔཱདཱནཀྑཡཾ ཝདཱམི; ཨེཝམསྶིམེ ཨཱསཝཱ ནཱནུསེནྟཱི’’ཏི (སཾ. ནི. ༢.༣༢ ཐོཀཾ ཝིསདིསཾ) ཨིམིནཱ སུཏྟེན ལོཀུཏྟརཱ ཧོནྟི. ཡདཱ པན ཙངྐམཔཡོགེན ནིབྦཏྟེ ཀཱཡིཀཝཱིརིཡེ ཨནུཔསནྟེཡེཝ ཝིཔསྶནཱ མགྒེན གྷཊཱིཡཏི, ཏདཱ ཏཾ ལོཀུཏྟརཾ ཧོཏི. ཡེ པན ཐེརཱ ‘‘ཀསིཎཛ྄ཛྷཱནེ, ཨཱནཱཔཱནཛ྄ཛྷཱནེ, བྲཧྨཝིཧཱརཛ྄ཛྷཱནེ ཙ བོཛ྄ཛྷངྒོ ཨུདྡྷརནྟོ ན ཝཱརེཏབྦོ’’ཏི ཝདནྟི, ཏེསཾ ཝཱདེ ཨཝིཏཀྐཨཝིཙཱརཱ པཱིཏིསམཱདྷིསམྦོཛ྄ཛྷངྒཱ ལོཀིཡཱ ཧོནྟཱིཏི.

དུཏིཡོ ནཡོ.

༤༧༠-༤༧༡. ཨིདཱནི ¶ བོཛ྄ཛྷངྒཱནཾ བྷཱཝནཱཝསེན པཝཏྟཾ ཏཏིཡནཡཾ དསྶེནྟོ པུན སཏྟ བོཛ྄ཛྷངྒཱཏིཨཱདིམཱཧ. ཏཏྠཱཔི ཨཡཾ ཨནུཔུབྦཔདཝཎྞནཱ – བྷཱཝེཏཱིཏི ཝཌྜྷེཏི; ཨཏྟནོ སནྟཱནེ པུནཔྤུནཾ ཛནེཏི ཨབྷིནིབྦཏྟེཏི. ཝིཝེཀནིསྶིཏནྟི ཝིཝེཀེ ནིསྶིཏཾ. ཝིཝེཀོཏི ཝིཝིཏྟཏཱ. སོ ཙཱཡཾ ཏདངྒཝིཝེཀོ, ཝིཀྑམྦྷནསམུཙྪེདཔཊིཔྤསྶདྡྷིནིསྶརཎཝིཝེཀོཏི པཉྩཝིདྷོ. ཏཏྠ ཏདངྒཝིཝེཀོ ནཱམ ཝིཔསྶནཱ. ཝིཀྑམྦྷནཝིཝེཀོ ནཱམ ཨཊྛ སམཱཔཏྟིཡོ. སམུཙྪེདཝིཝེཀོ ནཱམ མགྒོ. པཊིཔྤསྶདྡྷིཝིཝེཀོ ནཱམ ཕལཾ. ནིསྶརཎཝིཝེཀོ ནཱམ སབྦནིམིཏྟནིསྶཊཾ ནིབྦཱནཾ. ཨེཝམེཏསྨིཾ པཉྩཝིདྷེ ཝིཝེཀེ ནིསྶིཏཾ ཝིཝེཀནིསྶིཏནྟི ཏདངྒཝིཝེཀནིསྶིཏཾ སམུཙྪེདཝིཝེཀནིསྶིཏཾ ནིསྶརཎཝིཝེཀནིསྶིཏཉྩ སཏིསམྦོཛ྄ཛྷངྒཾ བྷཱཝེཏཱིཏི ཨཡམཏྠོ ཝེདིཏབྦོ.

ཏཐཱ ཧི ཨཡཾ སཏིསམྦོཛ྄ཛྷངྒབྷཱཝནཱནུཡོགམནུཡུཏྟོ ཡོགཱི ཝིཔསྶནཱཀྑཎེ ཀིཙྩཏོ ཏདངྒཝིཝེཀནིསྶིཏཾ, ཨཛ྄ཛྷཱསཡཏོ ནིསྶརཎཝིཝེཀནིསྶིཏཾ, མགྒཀཱལེ པན ཀིཙྩཏོ སམུཙྪེདཝིཝེཀནིསྶིཏཾ, ཨཱརམྨཎཏོ ནིསྶརཎཝིཝེཀནིསྶིཏཾ, སཏིསམྦོཛ྄ཛྷངྒཾ བྷཱཝེཏི. པཉྩཝིཝེཀནིསྶིཏམྤཱིཏི ཨེཀེ. ཏེ ཧི ན ཀེཝལཾ བལཝཝིཔསྶནཱམགྒཕལཀྑཎེསུ ཨེཝ བོཛ྄ཛྷངྒཾ ཨུདྡྷརནྟི, ཝིཔསྶནཱཔཱདཀཀསིཎཛ྄ཛྷཱནཨཱནཱཔཱནཱསུབྷབྲཧྨཝིཧཱརཛ྄ཛྷཱནེསུཔི ཨུདྡྷརནྟི, ན ཙ པཊིསིདྡྷཱ ཨཊྛཀཐཱཙརིཡེཧི ¶ . ཏསྨཱ ཏེསཾ མཏེན ཨེཏེསཾ ཛྷཱནཱནཾ པཝཏྟིཀྑཎེ ཀིཙྩཏོ ཨེཝ ཝིཀྑམྦྷནཝིཝེཀནིསྶིཏཾ. ཡཐཱ ཙ ཝིཔསྶནཱཀྑཎེ ‘‘ཨཛ྄ཛྷཱསཡཏོ ནིསྶརཎཝིཝེཀནིསྶིཏ’’ནྟི ¶ ཝུཏྟཾ, ཨེཝཾ ‘‘པཊིཔྤསྶདྡྷིཝིཝེཀནིསྶིཏམྤི བྷཱཝེཏཱི’’ཏི ཝཏྟུཾ ཝཊྚཏི. ཨེས ནཡོ ཝིརཱགནིསྶིཏཱདཱིསུ. ཝིཝེཀཏྠཱ ཨེཝ ཧི ཝིརཱགཱདཡོ.

ཀེཝལཉྩེཏྠ ཝོསྶགྒོ དུཝིདྷོ – པརིཙྩཱགཝོསྶགྒོ ཙ པཀྑནྡནཝོསྶགྒོ ཙཱཏི. ཏཏྠ ‘པརིཙྩཱགཝོསྶགྒོ’ཏི ཝིཔསྶནཱཀྑཎེ ཙ ཏདངྒཝསེན མགྒཀྑཎེ ཙ སམུཙྪེདཝསེན ཀིལེསཔྤཧཱནཾ. ‘པཀྑནྡནཝོསྶགྒོ’ཏི ཝིཔསྶནཱཀྑཎེ ཏནྣིནྣབྷཱཝེན, མགྒཀྑཎེ པན ཨཱརམྨཎཀརཎེན ནིབྦཱནཔཀྑནྡནཾ. ཏདུབྷཡམྤི ཨིམསྨིཾ ལོཀིཡལོཀུཏྟརམིསྶཀེ ¶ ཨཏྠཝཎྞནཱནཡེ ཝཊྚཏི. ཏཐཱ ཧི ཨཡཾ སཏི སམྦོཛ྄ཛྷངྒོ ཡཐཱཝུཏྟེན པཀཱརེན ཀིལེསེ པརིཙྩཛཏི, ནིབྦཱནཉྩ པཀྑནྡཏི.

ཝོསྶགྒཔརིཎཱམིནྟི ཨིམིནཱ པན སཀལེན ཝཙནེན ཝོསྶགྒཏྠཾ པརིཎམནྟཾ པརིཎཏཉྩ, པརིཔཙྩནྟཾ པརིཔཀྐཉྩཱཏི ཨིདཾ ཝུཏྟཾ ཧོཏི. ཨཡཉྷི བོཛ྄ཛྷངྒབྷཱཝནམནུཡུཏྟོ བྷིཀྑུ ཡཐཱ སཏིསམྦོཛ྄ཛྷངྒོ ཀིལེསཔརིཙྩཱགཝོསྶགྒཏྠཾ ནིབྦཱནཔཀྑནྡནཝོསྶགྒཏྠཉྩ པརིཔཙྩཏི, ཡཐཱ ཙ པརིཔཀྐོ ཧོཏི, ཏཐཱ ནཾ བྷཱཝེཏཱིཏི. ཨེས ནཡོ སེསབོཛ྄ཛྷངྒེསུཔི. ཨིམསྨིམྤི ནཡེ ལོཀིཡལོཀུཏྟརམིསྶཀཱ བོཛ྄ཛྷངྒཱ ཀཐིཏཱཏི.

སུཏྟནྟབྷཱཛནཱིཡཝཎྞནཱ.

༢. ཨབྷིདྷམྨབྷཱཛནཱིཡཝཎྞནཱ

༤༧༢. ཨབྷིདྷམྨབྷཱཛནཱིཡེ སཏྟཔི བོཛ྄ཛྷངྒེ ཨེཀཏོ པུཙྪིཏྭཱ ཝིསྶཛྫནསྶ ཙ པཱཊིཡེཀྐཾ པུཙྪིཏྭཱ ཝིསྶཛྫནསྶ ཙ ཝསེན དྭེ ནཡཱ. ཏེསཾ ཨཏྠཝཎྞནཱ ཧེཊྛཱ ཝུཏྟནཡེནེཝ ཝེདིཏབྦཱ.

ཨུཔེཀྑཱསམྦོཛ྄ཛྷངྒནིདྡེསེ པན ཨུཔེཀྑནཝསེན ཨུཔེཀྑཱ. ཨུཔེཀྑནཱཀཱརོ ཨུཔེཀྑནཱ. ཨུཔེཀྑིཏབྦཡུཏྟེ སམཔྤཝཏྟེ དྷམྨེ ཨིཀྑཏི, ན ཙོདེཏཱིཏི ¶ ཨུཔེཀྑཱ. པུགྒལཾ ཨུཔེཀྑཱཔེཏཱིཏི ཨུཔེཀྑནཱ ¶ . བོཛ྄ཛྷངྒབྷཱཝཔྤཏྟིཡཱ ལོཀིཡཨུཔེཀྑནཱཡ ཨདྷིཀཱ ཨུཔེཀྑནཱ ཨཛ྄ཛྷུཔེཀྑནཱ. ཨབྱཱཔཱརཱཔཛྫནེན མཛ྄ཛྷཏྟབྷཱཝོ མཛ྄ཛྷཏྟཏཱ. སཱ པན ཙིཏྟསྶ, ན སཏྟསྶཱཏི དཱིཔེཏུཾ མཛ྄ཛྷཏྟཏཱ ཙིཏྟསྶཱཏི ཝུཏྟནྟི. ཨཡམེཏྠ ཨནུཔུབྦཔདཝཎྞནཱ.

ནཡཱ པནེཏྠ གཎེཏབྦཱ – སཏྟནྣམྤི ཧི བོཛ྄ཛྷངྒཱནཾ ཨེཀཏོ པུཙྪིཏྭཱ ཝིསྶཛྫནེ ཨེཀེཀམགྒེ ནཡསཧསྶཾ ནཡསཧསྶནྟི ཙཏྟཱརི ནཡསཧསྶཱནི ཝིབྷཏྟཱནི. པཱཊིཡེཀྐཾ པུཙྪིཏྭཱ ཝིསྶཛྫནེ ཨེཀེཀབོཛ྄ཛྷངྒཝསེན ཙཏྟཱརི ཙཏྟཱརཱིཏི སཏྟ ཙཏུཀྐཱ ཨཊྛཝཱིསཏི. ཏཱནི པུརིམེཧི ཙཏཱུཧི སདྡྷིཾ དྭཏྟིཾསཱཏི སབྦཱནིཔི ཨབྷིདྷམྨབྷཱཛནཱིཡེ དྭཏྟིཾས ནཡསཧསྶཱནི ཝིབྷཏྟཱནི ཀུསལཱནེཝ. ཡསྨཱ པན ཕལཀྑཎེཔི བོཛ྄ཛྷངྒཱ ལབྦྷནྟི, ཀུསལཧེཏུཀཱནི ཙ སཱམཉྙཕལཱནི, ཏསྨཱ ཏེསུཔི བོཛ྄ཛྷངྒདསྶནཏྠཾ ཀུསལནིདྡེསཔུབྦངྒམཱཡ ཨེཝ ཏནྟིཡཱ ཝིཔཱཀནཡོ ཨཱརདྡྷོ. སོཔི ¶ ཨེཀཏོ པུཙྪིཏྭཱ ཝིསྶཛྫནསྶ ཙ, པཱཊིཡེཀྐཾ པུཙྪིཏྭཱ ཝིསྶཛྫནསྶ ཙ ཝསེན དུཝིདྷོ ཧོཏི. སེསམེཏྠ ཧེཊྛཱ ཝུཏྟནཡེནེཝ ཝེདིཏབྦཾ. ཝིཔཱཀེ པན ཀུསལཏོ ཏིགུཎཱ ནཡཱ ཀཱཏབྦཱཏི.

ཨབྷིདྷམྨབྷཱཛནཱིཡཝཎྞནཱ.

༣. པཉྷཱཔུཙྪཀཝཎྞནཱ

༤༨༢. པཉྷཱཔུཙྪཀེ པཱལི༹ཨནུསཱརེནེཝ བོཛ྄ཛྷངྒཱནཾ ཀུསལཱདིབྷཱཝོ ཝེདིཏབྦོ. ཨཱརམྨཎཏྟིཀེསུ པན སབྦེཔེཏེ ཨཔྤམཱཎཾ ནིབྦཱནཾ ཨཱརབྦྷ པཝཏྟིཏོ ཨཔྤམཱཎཱརམྨཎཱ ཨེཝ, ན མགྒཱརམྨཎཱ. སཧཛཱཏཧེཏུཝསེན པནེཏྠ ཀུསལཱ མགྒཧེཏུཀཱ, ཝཱིརིཡཾ ཝཱ ཝཱིམཾསཾ ཝཱ ཛེཊྛཀཾ ཀཏྭཱ མགྒབྷཱཝནཱཀཱལེ མགྒཱདྷིཔཏིནོ, ཚནྡཙིཏྟཛེཊྛིཀཱཡ མགྒབྷཱཝནཱཡ ན ཝཏྟབྦཱ མགྒཱདྷིཔཏིནོཏི, ཕལཀཱལེཔི ན ཝཏྟབྦཱ ཨེཝ.

ཨཏཱིཏཱདཱིསུ ཨེཀཱརམྨཎབྷཱཝེནཔི ན ཝཏྟབྦཱ, ནིབྦཱནསྶ པན བཧིདྡྷཱདྷམྨཏྟཱ བཧིདྡྷཱརམྨཎཱ ནཱམ ཧོནྟཱིཏི. ཨེཝམེཏསྨིཾ པཉྷཱཔུཙྪཀེཔི ནིབྦཏྟིཏལོཀུཏྟརཱཝ ¶ བོཛ྄ཛྷངྒཱ ཀཐིཏཱ ¶ . སམྨཱསམྦུདྡྷེན ཧི སུཏྟནྟབྷཱཛནཱིཡསྶེཝ པཋམནཡསྨིཾ ལོཀིཡཱ, དུཏིཡཏཏིཡེསུ ལོཀིཡལོཀུཏྟརམིསྶཀཱ བོཛ྄ཛྷངྒཱ ཀཐིཏཱ. ཨབྷིདྷམྨབྷཱཛནཱིཡསྶ པན ཙཏཱུསུཔི ནཡེསུ ཨིམསྨིཉྩ པཉྷཱཔུཙྪཀེ ལོཀུཏྟརཱཡེཝཱཏི ཨེཝམཡཾ བོཛ྄ཛྷངྒཝིབྷངྒོཔི ཏེཔརིཝཊྚཾ ནཱིཧརིཏྭཱཝ བྷཱཛེཏྭཱ དསྶིཏོཏི.

སམྨོཧཝིནོདནིཡཱ ཝིབྷངྒཊྛཀཐཱཡ

བོཛ྄ཛྷངྒཝིབྷངྒཝཎྞནཱ ནིཊྛིཏཱ.

༡༡. མགྒངྒཝིབྷངྒོ

༡. སུཏྟནྟབྷཱཛནཱིཡཝཎྞནཱ

༤༨༦. ཨིདཱནི ¶ ¶ ¶ ཏདནནྟརེ མགྒཝིབྷངྒེ ཨརིཡོ ཨཊྛངྒིཀོ མགྒོཏིཨཱདི སབྦཾ སཙྩཝིབྷངྒེ དུཀྑནིརོདྷགཱམིནཱིཔཊིཔདཱནིདྡེསེ ཝུཏྟནཡེནེཝ ཝེདིཏབྦཾ. བྷཱཝནཱཝསེན པཱཊིཡེཀྐཾ དསྶིཏེ དུཏིཡནཡེཔི སམྨཱདིཊྛིཾ བྷཱཝེཏི ཝིཝེཀནིསྶིཏནྟིཨཱདི སབྦཾ བོཛ྄ཛྷངྒཝིབྷངྒེ ཝུཏྟནཡེནེཝ ཝེདིཏབྦཾ. ཨེཝམིདཾ དྭིནྣམྤི ནཡཱནཾ ཝསེན སུཏྟནྟབྷཱཛནཱིཡཾ ལོཀིཡལོཀུཏྟརམིསྶཀམེཝ ཀཐིཏཾ.

༢. ཨབྷིདྷམྨབྷཱཛནཱིཡཝཎྞནཱ

༤༩༠. ཨབྷིདྷམྨབྷཱཛནཱིཡེ ‘ཨརིཡོ’ཏི ཨཝཏྭཱ ཨཊྛངྒིཀོ མགྒོཏི ཝུཏྟཾ. ཨེཝཾ ཨཝུཏྟེཔི ཨཡཾ ཨརིཡོ ཨེཝ. ཡཐཱ ཧི མུདྡྷཱབྷིསིཏྟསྶ རཉྙོ མུདྡྷཱབྷིསིཏྟཱཡ དེཝིཡཱ ཀུཙྪིསྨིཾ ཛཱཏོ པུཏྟོ རཱཛཔུཏྟོཏི ཨཝུཏྟེཔི རཱཛཔུཏྟོཡེཝ ཧོཏི, ཨེཝམཡམྤི ཨརིཡོཏི ཨཝུཏྟེཔི ཨརིཡོ ཨེཝཱཏི ཝེདིཏབྦོ. སེསམིདྷཱཔི སཙྩཝིབྷངྒེ ཝུཏྟནཡེནེཝ ཝེདིཏབྦཾ.

༤༩༣. པཉྩངྒིཀཝཱརེཔི ཨཊྛངྒིཀོཏི ཨཝུཏྟེཔི ཨཊྛངྒིཀོ ཨེཝ ཝེདིཏབྦོ. ལོཀུཏྟརམགྒོ ཧི པཉྩངྒིཀོ ནཱམ ནཏྠི. ཨཡམེཏྠ ཨཱཙརིཡཱནཾ སམཱནཏྠཀཐཱ. ཝིཏཎྜཝཱདཱི པནཱཧ – ‘‘ལོཀུཏྟརམགྒོ ཨཊྛངྒིཀོ ནཱམ ནཏྠི, པཉྩངྒིཀོཡེཝ ཧོཏཱི’’ཏི. སོ ‘‘སུཏྟཾ ཨཱཧརཱཧཱི’’ཏི ཝུཏྟོ ཨདྡྷཱ ཨཉྙཾ ཨཔསྶནྟོ ཨིམཾ མཧཱསལཱ༹ཡཏནཏོ སུཏྟཔྤདེསཾ ཨཱཧརིསྶཏི ‘‘ཡཱ ཏཐཱབྷཱུཏསྶ དིཊྛི, སཱསྶ ཧོཏི སམྨཱདིཊྛི. ཡོ ཏཐཱབྷཱུཏསྶ སངྐཔྤོ, ཝཱཡཱམོ, སཏི, ཡོ ¶ ཏཐཱབྷཱུཏསྶ སམཱདྷི, སྭཱསྶ ཧོཏི སམྨཱསམཱདྷི. པུབྦེཝ ཁོ པནསྶ ཀཱཡཀམྨཾ ཝཙཱིཀམྨཾ ཨཱཛཱིཝོ སུཔརིསུདྡྷོ ཧོཏཱི’’ཏི.

ཏཏོ ‘‘ཨེཏསྶ ཨནནྟརཾ སུཏྟཔདཾ ཨཱཧརཱ’’ཏི ཝཏྟབྦོ. སཙེ ཨཱཧརཏི ཨིཙྩེཏཾ ཀུསལཾ, ནོ ཙེ ཨཱཧརཏི སཡཾ ཨཱཧརིཏྭཱ ‘‘ཨེཝམསྶཱཡཾ ཨརིཡོ ཨཊྛངྒིཀོ མགྒོ བྷཱཝནཱཔཱརིཔཱུརིཾ གཙྪཏཱི’’ཏི (མ. ནི. ༣.༤༣༡) ‘‘ཨིམིནཱ ¶ ¶ ཏེ སཏྠུསཱསནེན ཝཱདོ བྷིནྣོ; ལོཀུཏྟརམགྒོ པཉྩངྒིཀོ ནཱམ ནཏྠི, ཨཊྛངྒིཀོཝ ཧོཏཱི’’ཏི ཝཏྟབྦོ.

ཨིམཱནི པན ཏཱིཎི ཨངྒཱནི པུབྦེ པརིསུདྡྷཱནི ཝཏྟནྟི, ལོཀུཏྟརམགྒཀྑཎེ པརིསུདྡྷཏརཱནི ཧོནྟི. ཨཐ ‘པཉྩངྒིཀོ མགྒོ’ཏི ཨིདཾ ཀིམཏྠཾ གཧིཏནྟི? ཨཏིརེཀཀིཙྩདསྶནཏྠཾ. ཡསྨིཉྷི སམཡེ མིཙྪཱཝཱཙཾ པཛཧཏི, སམྨཱཝཱཙཾ པཱུརེཏི, ཏསྨིཾ སམཡེ སམྨཱཀམྨནྟསམྨཱཨཱཛཱིཝཱ ནཏྠི. ཨིམཱནི པཉྩཀཱརཱཔཀངྒཱནེཝ མིཙྪཱཝཱཙཾ པཛཧནྟི; སམྨཱཝཱཙཱ པན སཡཾ ཝིརཏིཝསེན པཱུརེཏི. ཡསྨིཾ སམཡེ མིཙྪཱཀམྨནྟཾ པཛཧཏི, སམྨཱཀམྨནྟཾ པཱུརེཏི, ཏསྨིཾ སམཡེ སམྨཱཝཱཙཱསམྨཱཨཱཛཱིཝཱ ནཏྠི. ཨིམཱནི པཉྩ ཀཱརཱཔཀངྒཱནེཝ མིཙྪཱཀམྨནྟཾ པཛཧནྟི; སམྨཱཀམྨནྟོ པན སཡཾ ཝིརཏིཝསེན པཱུརེཏི. ཡསྨིཾ སམཡེ མིཙྪཱཨཱཛཱིཝཾ པཛཧཏི, སམྨཱཨཱཛཱིཝཾ པཱུརེཏི, ཏསྨིཾ སམཡེ སམྨཱཝཱཙཱསམྨཱཀམྨནྟཱ ནཏྠི. ཨིམཱནི པཉྩ ཀཱརཱཔཀངྒཱནེཝ མིཙྪཱཨཱཛཱིཝཾ པཛཧནྟི; སམྨཱཨཱཛཱིཝོ པན སཡཾ ཝིརཏིཝསེན པཱུརེཏི. ཨིམཾ ཨེཏེསཾ པཉྩནྣཾ ཀཱརཱཔཀངྒཱནཾ ཀིཙྩཱཏིརེཀཏཾ དསྶེཏུཾ པཉྩངྒིཀོ མགྒོཏི གཧིཏཾ. ལོཀུཏྟརམགྒོ པན ཨཊྛངྒིཀོཝ ཧོཏི, པཉྩངྒིཀོ ནཱམ ནཏྠི.

‘‘ཡདི སམྨཱཝཱཙཱདཱིཧི སདྡྷིཾ ཨཊྛངྒིཀོཏི ཝདཐ, ཙཏསྶོ སམྨཱཝཱཙཱཙེཏནཱ, ཏིསྶོ སམྨཱཀམྨནྟཙེཏནཱ, སཏྟ སམྨཱཨཱཛཱིཝཙེཏནཱཏི ཨིམམྷཱ ཙེཏནཱབཧུཏྟཱ ཀཐཾ མུཙྩིསྶཐ? ཏསྨཱ པཉྩངྒིཀོཝ ལོཀུཏྟརམགྒོ’’ཏི. ‘‘ཙེཏནཱབཧུཏྟཱ ཙ པམུཙྩིསྶཱམ; ཨཊྛངྒིཀོཝ ལོཀུཏྟརམགྒོཏི ཙ ཝཀྑཱམ’’. ‘‘ཏྭཾ ཏཱཝ མཧཱཙཏྟཱརཱིསཀབྷཱཎཀོ ཧོསི, ན ཧོསཱི’’ཏི པུཙྪིཏབྦོ. སཙེ ‘‘ན ཧོམཱི’’ཏི ཝདཏི, ‘‘ཏྭཾ ཨབྷཱཎཀཏྟཱ ན ཛཱནཱསཱི’’ཏི ཝཏྟབྦོ. སཙེ ‘‘བྷཱཎཀོསྨཱི’’ཏི ཝདཏི, ‘‘སུཏྟཾ ཨཱཧརཱ’’ཏི ཝཏྟབྦོ. སཙེ སུཏྟཾ ཨཱཧརཏི ཨིཙྩེཏཾ ཀུསལཾ, ནོ ཙེ ཨཱཧརཏི སཡཾ ཨུཔརིཔཎྞཱསཏོ ཨཱཧརིཏབྦཾ –

‘‘ཀཏམཱ ¶ ཙ, བྷིཀྑཝེ, སམྨཱཝཱཙཱ? སམྨཱཝཱཙཾཔཧཾ, བྷིཀྑཝེ, དྭཱཡཾ ཝདཱམི – ཨཏྠི, བྷིཀྑཝེ, སམྨཱཝཱཙཱ སཱསཝཱ པུཉྙབྷཱགིཡཱ ཨུཔདྷིཝེཔཀྐཱ; ཨཏྠི, བྷིཀྑཝེ, སམྨཱཝཱཙཱ ཨརིཡཱ ཨནཱསཝཱ ལོཀུཏྟརཱ མགྒངྒཱ.

‘‘ཀཏམཱ ཙ, བྷིཀྑཝེ, སམྨཱཝཱཙཱ སཱསཝཱ ¶ པུཉྙབྷཱགིཡཱ ཨུཔདྷིཝེཔཀྐཱ? མུསཱཝཱདཱ ཝེརམཎཱི, པིསུཎཱཡ ཝཱཙཱཡ ཝེརམཎཱི, ཕརུསཱཡ ¶ ཝཱཙཱཡ ཝེརམཎཱི, སམྥཔྤལཱཔཱ ཝེརམཎཱི – ཨཡཾ, བྷིཀྑཝེ, སམྨཱཝཱཙཱ སཱསཝཱ པུཉྙབྷཱགིཡཱ ཨུཔདྷིཝེཔཀྐཱ.

‘‘ཀཏམཱ ཙ, བྷིཀྑཝེ, སམྨཱཝཱཙཱ ཨརིཡཱ ཨནཱསཝཱ ལོཀུཏྟརཱ མགྒངྒཱ? ཡཱ ཁོ, བྷིཀྑཝེ, ཨརིཡཙིཏྟསྶ ཨནཱསཝཙིཏྟསྶ ཨརིཡམགྒསམངྒིནོ ཨརིཡམགྒཾ བྷཱཝཡཏོ ཙཏཱུཧི ཝཙཱིདུཙྩརིཏེཧི ཨཱརཏི ཝིརཏི པཊིཝིརཏི ཝེརམཎཱི – ཨཡཾ, བྷིཀྑཝེ, སམྨཱཝཱཙཱ ཨརིཡཱ ཨནཱསཝཱ ལོཀུཏྟརཱ མགྒངྒཱ…པེ….

‘‘ཀཏམོ ཙ, བྷིཀྑཝེ, སམྨཱཀམྨནྟོ? སམྨཱཀམྨནྟཾཔཧཾ, བྷིཀྑཝེ, དྭཡཾ ཝདཱམི…པེ… ཨུཔདྷིཝེཔཀྐོ.

‘‘ཀཏམོ ཙ, བྷིཀྑཝེ, སམྨཱཀམྨནྟོ ཨརིཡོ ཨནཱསཝོ ལོཀུཏྟརོ…པེ….

‘‘ཀཏམོ ཙ, བྷིཀྑཝེ, སམྨཱཨཱཛཱིཝོ? སམྨཱཨཱཛཱིཝཾཔཧཾ, བྷིཀྑཝེ, དྭཱཡཾ ཝདཱམི…པེ… ཨུཔདྷིཝེཔཀྐོ.

‘‘ཀཏམོ ཙ, བྷིཀྑཝེ, སམྨཱཨཱཛཱིཝོ ཨརིཡོ ཨནཱསཝོ ལོཀུཏྟརོ མགྒངྒོ? ཡཱ ཁོ, བྷིཀྑཝེ, ཨརིཡཙིཏྟསྶ ཨནཱསཝཙིཏྟསྶ ཨརིཡམགྒསམངྒིནོ ཨརིཡམགྒཾ བྷཱཝཡཏོ མིཙྪཱཨཱཛཱིཝཱ ཨཱརཏི ཝིརཏི པཊིཝིརཏི ཝེརམཎཱི – ཨཡཾ, བྷིཀྑཝེ, སམྨཱཨཱཛཱིཝོ ཨརིཡོ ཨནཱསཝོ ལོཀུཏྟརོ མགྒངྒོ’’ཏི (མ. ནི. ༣.༡༣༨ ཨཱདཡོ).

ཨེཝམེཏྠ ¶ ཙཏཱུཧི ཝཙཱིདུཙྩརིཏེཧི, ཏཱིཧི ཀཱཡདུཙྩརིཏེཧི, མིཙྪཱཛཱིཝཏོ ཙཱཏི ཨེཀེཀཱཝ ཝིརཏི ཨརིཡཱ ཨནཱསཝཱ ལོཀུཏྟརཱ མགྒངྒཱཏི ཝུཏྟཱ. ‘‘ཀུཏོ ཨེཏྠ ཙེཏནཱབཧུཏྟཾ? ཀུཏོ པཉྩངྒིཀོ མགྒོ? ཨིདཾ ཏེ སུཏྟཾ ཨཀཱམཀསྶ ལོཀུཏྟརམགྒོ ཨཊྛངྒིཀོཏི དཱིཔེཏི’’. སཙེ ཨེཏྟཀེན སལླཀྑེཏི ཨིཙྩེཏཾ ཀུསལཾ, ནོ ཙེ སལླཀྑེཏི ཨཉྙཱནིཔི ཀཱརཎཱནི ཨཱཧརིཏྭཱ སཉྙཱཔེཏབྦོ. ཝུཏྟཉྷེཏཾ བྷགཝཏཱ –

‘‘ཡསྨིཾ ཁོ, སུབྷདྡ, དྷམྨཝིནཡེ ཨརིཡོ ཨཊྛངྒིཀོ མགྒོ ན ཨུཔལབྦྷཏི, སམཎོཔི ཏཏྠ ན ཨུཔལབྦྷཏི…པེ… ཨིམསྨིཾ ཁོ, སུབྷདྡ, དྷམྨཝིནཡེ ཨརིཡོ ཨཊྛངྒིཀོ མགྒོ ཨུཔལབྦྷཏི; ཨིདྷེཝ ¶ , སུབྷདྡ, སམཎོ…པེ… སུཉྙཱ པརཔྤཝཱདཱ སམཎེཧི ཨཉྙེཧཱིཏི (དཱི. ནི. ༢.༢༡༤).

ཨཉྙེསུཔི ཨནེཀེསུ སུཏྟསཏེསུ ཨཊྛངྒིཀོཝ མགྒོ ཨཱགཏོ. ཀཐཱཝཏྠུཔྤཀརཎེཔི ཝུཏྟཾ –

‘‘མགྒཱནཾ ཨཊྛངྒིཀོ སེཊྛོ, སཙྩཱནཾ ཙཏུརོ པདཱ;

ཝིརཱགོ སེཊྛོ དྷམྨཱནཾ, དྭིཔདཱནཉྩ ཙཀྑུམཱ’’ཏི (ཀཐཱ. ༨༧༢) –

‘‘ཨཏྠེཝ ¶ སུཏྟནྟོཏི’’? ‘‘ཨཱམནྟཱ’’‘‘ཏེན ཧི ཨཊྛངྒིཀོ མགྒོ’’ཏི. སཙེ པན ཨེཏྟཀེནཱཔི སཉྙཏྟིཾ ན གཙྪཏི, ‘‘གཙྪ, ཝིཧཱརཾ པཝིསིཏྭཱ ཡཱགུཾ པིཝཱཧཱི’’ཏི ཨུཡྻོཛེཏབྦོ. ཨུཏྟརིམྤན ཀཱརཎཾ ཝཀྑཏཱིཏི ཨཊྛཱནམེཏཾ. སེསམེཏྠ ཨུཏྟཱནཏྠམེཝ.

ནཡཱ པནེཏྠ གཎེཏབྦཱ. ཨཊྛངྒིཀམགྒསྨིཉྷི ཨེཀཏོ པུཙྪིཏྭཱ ཨེཀཏོ ཝིསྶཛྫནེ ཙཏཱུསུ མགྒེསུ ཙཏྟཱརི ནཡསཧསྶཱནི ཝིབྷཏྟཱནི. པཉྩངྒིཀམགྒེ ཨེཀཏོ པུཙྪིཏྭཱ ཨེཀཏོ ཝིསྶཛྫནེ ཙཏྟཱརི; པཱཊིཡེཀྐཾ པུཙྪིཏྭཱ པཱཊིཡེཀྐཾ ཝིསྶཛྫནེ ཙཏྟཱརི ཙཏྟཱརཱིཏི པཉྩསུ ཨངྒེསུ ཝཱིསཏི. ཨིཏི པུརིམཱནི ཨཊྛ ཨིམཱནི ཙ ཝཱིསཏཱིཏི སབྦཱནིཔི མགྒཝིབྷངྒེ ཨཊྛཝཱིསཏི ནཡསཧསྶཱནི ཝིབྷཏྟཱནི. ཏཱནི ཙ ཁོ ནིབྦཏྟིཏལོཀུཏྟརཱནི ཀུསལཱནེཝ. ཝིཔཱཀེ པན ཀུསལཏོ ཏིགུཎཱ ནཡཱ ཀཱཏབྦཱཏི.

ཨབྷིདྷམྨབྷཱཛནཱིཡཝཎྞནཱ.

༣. པཉྷཱཔུཙྪཀཝཎྞནཱ

༥༠༤. པཉྷཱཔུཙྪཀེ ¶ པཱལི༹ཨནུསཱརེནེཝ མགྒངྒཱནཾ ཀུསལཱདིབྷཱཝོ ཝེདིཏབྦོ. ཨཱརམྨཎཏྟིཀེསུ པན སབྦཱནིཔེཏཱནི ཨཔྤམཱཎཾ ནིབྦཱནཾ ཨཱརབྦྷ པཝཏྟིཏོ ཨཔྤམཱཎཱརམྨཎཱནེཝ, ན མགྒཱརམྨཎཱནི. ནེཝ ཧི མགྒོ ན ཕལཾ མགྒཾ ཨཱརམྨཎཾ ཀརོཏི. སཧཛཱཏཧེཏུཝསེན པནེཏྠ ཀུསལཱནི མགྒཧེཏུཀཱནི; ཝཱིརིཡཾ ཝཱ ཝཱིམཾསཾ ཝཱ ཛེཊྛཀཾ ཀཏྭཱ མགྒབྷཱཝནཱཀཱལེ མགྒཱདྷིཔཏཱིནི; ཚནྡཙིཏྟཛེཊྛིཀཱཡ མགྒབྷཱཝནཱཡ ན ཝཏྟབྦཱནི མགྒཱདྷིཔཏཱིནཱིཏི; ཕལཀཱལེཔི ན ཝཏྟབྦཱནེཝ.

ཨཏཱིཏཱདཱིསུ ¶ ཨེཀཱརམྨཎབྷཱཝེནཔི ན ཝཏྟབྦཱནི; ནིབྦཱནསྶ པན བཧིདྡྷཱདྷམྨཏྟཱ བཧིདྡྷཱརམྨཎཱནི ནཱམ ཧོནྟཱིཏི ཨེཝམེཏསྨིཾ པཉྷཱཔུཙྪཀེཔི ནིབྦཏྟིཏལོཀུཏྟརཱནེཝ མགྒངྒཱནི ཀཐིཏཱནི. སམྨཱསམྦུདྡྷེན ཧི སུཏྟནྟབྷཱཛནཱིཡསྨིཾཡེཝ ལོཀིཡལོཀུཏྟརཱནི མགྒངྒཱནི ཀཐིཏཱནི; ཨབྷིདྷམྨབྷཱཛནཱིཡེ པན པཉྷཱཔུཙྪཀེ ཙ ལོཀུཏྟརཱནེཝཱཏི ཨེཝམཡཾ མགྒཝིབྷངྒོཔི ཏེཔརིཝཊྚཾ ནཱིཧརིཏྭཱཝ བྷཱཛེཏྭཱ དསྶིཏོཏི.

སམྨོཧཝིནོདནིཡཱ ཝིབྷངྒཊྛཀཐཱཡ

མགྒངྒཝིབྷངྒཝཎྞནཱ ནིཊྛིཏཱ.

༡༢. ཛྷཱནཝིབྷངྒོ

༡. སུཏྟནྟབྷཱཛནཱིཡཾ

མཱཏིཀཱཝཎྞནཱ

༥༠༨. ཨིདཱནི ¶ ¶ ¶ ཏདནནྟརེ ཛྷཱནཝིབྷངྒེ ཡཱ ཏཱཝ ཨཡཾ སཀལསྶཱཔི སུཏྟནྟབྷཱཛནཱིཡསྶ པཋམཾ མཱཏིཀཱ ཋཔིཏཱ, ཏཏྠ ཨིདྷཱཏི ཝཙནཾ པུབྦབྷཱགཀརཎཱིཡསམྤདཱཡ སམྤནྣསྶ སབྦཔྤཀཱརཛ྄ཛྷཱནནིབྦཏྟཀསྶ པུགྒལསྶ སནྣིསྶཡབྷཱུཏསཱསནཔརིདཱིཔནཾ, ཨཉྙསཱསནསྶ ཙ ཏཐཱབྷཱཝཔཊིསེདྷནཾ. ཝུཏྟཉྷེཏཾ – ‘‘ཨིདྷེཝ, བྷིཀྑཝེ, སམཎོ…པེ… སུཉྙཱ པརཔྤཝཱདཱ སམཎེཧི ཨཉྙེཧཱི’’ཏི (ཨ. ནི. ༤.༢༤༡). བྷིཀྑཱུཏི ཏེསཾ ཛྷཱནཱནཾ ནིབྦཏྟཀཔུགྒལཔརིདཱིཔནཾ. པཱཏིམོཀྑསཾཝརསཾཝུཏོཏི ཨིདམསྶ པཱཏིམོཀྑསཾཝརེ པཏིཊྛིཏབྷཱཝཔརིདཱིཔནཾ. ཝིཧརཏཱིཏི ཨིདམསྶ ཏདནུརཱུཔཝིཧཱརསམངྒཱིབྷཱཝཔརིདཱིཔནཾ. ཨཱཙཱརགོཙརསམྤནྣོཏི ཨིདམསྶ ཧེཊྛཱ པཱཏིམོཀྑསཾཝརསྶ ཨུཔརི ཛྷཱནཱནུཡོགསྶ ཙ ཨུཔཀཱརདྷམྨཔརིདཱིཔནཾ. ཨཎུམཏྟེསུ ཝཛྫེསུ བྷཡདསྶཱཝཱིཏི ཨིདམསྶ པཱཏིམོཀྑཏོ ཨཙཝནདྷམྨཏཱཔརིདཱིཔནཾ. སམཱདཱཡཱཏི ཨིདམསྶ སིཀྑཱཔདཱནཾ ཨནཝསེསཏོ ཨཱདཱནཔརིདཱིཔནཾ. སིཀྑཏཱིཏི ཨིདམསྶ སིཀྑཱཡ སམངྒཱིབྷཱཝཔརིདཱིཔནཾ. སིཀྑཱཔདེསཱུཏི ཨིདམསྶ སིཀྑིཏབྦདྷམྨཔརིདཱིཔནཾ.

ཨིནྡྲིཡེསཱུཏི ཨིདམསྶ གུཏྟདྭཱརཏཱཡ བྷཱུམིཔརིདཱིཔནཾ; རཀྑིཏབྦོཀཱསཔརིདཱིཔནནྟིཔི ཝདནྟི ཨེཝ. གུཏྟདྭཱརོཏི ཨིདམསྶ ཚསུ དྭཱརེསུ སཾཝིཧིཏཱརཀྑབྷཱཝཔརིདཱིཔནཾ. བྷོཛནེ མཏྟཉྙཱུཏི ཨིདམསྶ སནྟོསཱདིགུཎཔརིདཱིཔནཾ. པུབྦརཏྟཱཔརརཏྟཾ ཛཱགརིཡཱནུཡོགམནུཡུཏྟོཏི ཨིདམསྶ ཀཱརཎབྷཱཝཔརིདཱིཔནཾ. སཱཏཙྩཾ ¶ ནེཔཀྐནྟི ཨིདམསྶ པཉྙཱཔརིགྒཧིཏེན ཝཱིརིཡེན སཱཏཙྩཀཱརིཏཱཔརིདཱིཔནཾ ¶ . བོདྷིཔཀྑིཀཱནཾ དྷམྨཱནཾ བྷཱཝནཱནུཡོགམནུཡུཏྟོཏི ཨིདམསྶ པཊིཔཏྟིཡཱ ནིབྦེདྷབྷཱགིཡཏྟཔརིདཱིཔནཾ.

སོ ཨབྷིཀྐནྟེ…པེ… ཏུཎྷཱིབྷཱཝེ སམྤཛཱནཀཱརཱི ཧོཏཱིཏི ཨིདམསྶ སབྦཏྠ སཏིསམྤཛཉྙསམནྣཱགཏཏྟཔརིདཱིཔནཾ. སོ ཝིཝིཏྟཾ སེནཱསནཾ བྷཛཏཱིཏི ཨིདམསྶ ཨནུརཱུཔསེནཱསནཔརིགྒཧཔརིདཱིཔནཾ. ཨརཉྙཾ…པེ… པཊིསལླཱནསཱརུཔྤནྟི ཨིདམསྶ སེནཱསནཔྤབྷེདནིརཱདཱིནཝཏཱནིསཾསཔརིདཱིཔནཾ. སོ ¶ ཨརཉྙགཏོ ཝཱཏི ཨིདམསྶ ཝུཏྟཔྤཀཱརེན སེནཱསནེན ཡུཏྟབྷཱཝཔརིདཱིཔནཾ. ནིསཱིདཏཱིཏི ཨིདམསྶ ཡོགཱནུརཱུཔཨིརིཡཱཔཐཔརིདཱིཔནཾ. པརིམུཁཾ སཏིཾ ཨུཔཊྛཔེཏྭཱཏི ཨིདམསྶ ཡོགཱརམྦྷཔརིདཱིཔནཾ. སོ ཨབྷིཛ྄ཛྷཾ ལོཀེ པཧཱཡཱཏིཨཱདི པནསྶ ཀམྨཊྛཱནཱནུཡོགེན ནཱིཝརཎཔྤཧཱནཔརིདཱིཔནཾ. ཏསྶེཝ པཧཱིནནཱིཝརཎསྶ ཝིཝིཙྩེཝ ཀཱམེཧཱིཏིཨཱདི པཊིཔཱཊིཡཱ ཛྷཱནུཔྤཏྟིཔརིདཱིཔནཾ.

ཨཔི ཙ ཨིདྷ བྷིཀྑཱུཏི ཨིམསྨིཾ སཱསནེ ཛྷཱནུཔྤཱདཀོ བྷིཀྑུ. ཨིདཱནི ཡསྨཱ ཛྷཱནུཔྤཱདཀེན བྷིཀྑུནཱ ཙཏྟཱརི སཱིལཱནི སོདྷེཏབྦཱནི, ཏསྨཱསྶ པཱཏིམོཀྑསཾཝརསཾཝུཏོཏི ཨིམིནཱ པཱཏིམོཀྑསཾཝརསཱིལཝིསུདྡྷིཾ ཨུཔདིསཏི. ཨཱཙཱརགོཙརསམྤནྣོཏིཨཱདིནཱ ཨཱཛཱིཝཔཱརིསུདྡྷིསཱིལཾ. སམཱདཱཡ སིཀྑཏི སིཀྑཱཔདེསཱུཏི ཨིམིནཱ ཏེསཾ དྭིནྣཾ སཱིལཱནཾ ཨནཝསེསཏོ ཨཱདཱནཾ. ཨིནྡྲིཡེསུ གུཏྟདྭཱརོཏི ཨིམིནཱ ཨིནྡྲིཡསཾཝརསཱིལཾ. བྷོཛནེ མཏྟཉྙཱུཏི ཨིམིནཱ པཙྩཡསནྣིསྶིཏསཱིལཾ. པུབྦརཏྟཱཔརརཏྟནྟིཨཱདིནཱ སཱིལེ པཏིཊྛིཏསྶ ཛྷཱནབྷཱཝནཱཡ ཨུཔཀཱརཀེ དྷམྨེ. སོ ཨབྷིཀྐནྟེཏིཨཱདིནཱ ཏེསཾ དྷམྨཱནཾ ཨཔརིཧཱནཱཡ ཀམྨཊྛཱནསྶ ཙ ཨསམྨོསཱཡ སཏིསམྤཛཉྙསམཱཡོགཾ. སོ ཝིཝིཏྟནྟིཨཱདིནཱ བྷཱཝནཱནུརཱུཔསེནཱསནཔརིགྒཧཾ. སོ ¶ ཨརཉྙགཏོ ཝཱཏིཨཱདིནཱ ཏཾ སེནཱསནཾ ཨུཔགཏསྶ ཛྷཱནཱནུརཱུཔཨིརིཡཱཔཐཉྩེཝ ཛྷཱནབྷཱཝནཱརམྦྷཉྩ. སོ ཨབྷིཛ྄ཛྷནྟིཨཱདིནཱ ཛྷཱནབྷཱཝནཱརམྦྷེན ཛྷཱནཔཙྩནཱིཀདྷམྨཔྤཧཱནཾ. སོ ཨིམེ པཉྩ ནཱིཝརཎེ པཧཱཡཱཏིཨཱདིནཱ ཨེཝཾ པཧཱིནཛ྄ཛྷཱནཔཙྩནཱིཀདྷམྨསྶ སབྦཛ྄ཛྷཱནཱནཾ ཨུཔྤཏྟིཀྐམཾ ཨུཔདིསཏཱིཏི.

མཱཏིཀཱཝཎྞནཱ.

ནིདྡེསཝཎྞནཱ

༥༠༩. ཨིདཱནི ¶ ཡཐཱནིཀྑིཏྟཾ མཱཏིཀཾ པཊིཔཱཊིཡཱ བྷཱཛེཏྭཱ དསྶེཏུཾ ཨིདྷཱཏི ཨིམིསྶཱ དིཊྛིཡཱཏིཨཱདི ཨཱརདྡྷཾ. ཏཏྠ ཨིམིསྶཱ དིཊྛིཡཱཏིཨཱདཱིཧི དསཧི པདེཧི སིཀྑཏྟཡསངྑཱཏཾ སབྦཉྙུབུདྡྷསཱསནམེཝ ཀཐིཏཾ. ཏཉྷི བུདྡྷེན བྷགཝཏཱ དིཊྛཏྟཱ དིཊྛཱིཏི ཝུཙྩཏི. ཏསྶེཝ ཁམནཝསེན ཁནྟི, རུཙྩནཝསེན རུཙི, གཧཎཝསེན ཨཱདཱཡོ, སབྷཱཝཊྛེན དྷམྨོ, སིཀྑིཏབྦཊྛེན ¶ ཝིནཡོ, ཏདུབྷཡེནཱཔི དྷམྨཝིནཡོ, པཝུཏྟཝསེན པཱཝཙནཾ, སེཊྛཙརིཡཊྛེན བྲཧྨཙརིཡཾ, ཨནུསིཊྛིདཱནཝསེན སཏྠུསཱསནནྟི ཝུཙྩཏི. ཏསྨཱ ཨིམིསྶཱ དིཊྛིཡཱཏིཨཱདཱིསུ ཨིམིསྶཱ བུདྡྷདིཊྛིཡཱ, ཨིམིསྶཱ བུདྡྷཁནྟིཡཱ, ཨིམིསྶཱ བུདྡྷརུཙིཡཱ, ཨིམསྨིཾ བུདྡྷཨཱདཱཡེ, ཨིམསྨིཾ བུདྡྷདྷམྨེ, ཨིམསྨིཾ བུདྡྷཝིནཡེ.

‘‘ཡེ ཙ ཁོ ཏྭཾ, གོཏམི, དྷམྨེ ཛཱནེཡྻཱསི – ‘ཨིམེ དྷམྨཱ སརཱགཱཡ སཾཝཏྟནྟི ནོ ཝིརཱགཱཡ, སཾཡོགཱཡ སཾཝཏྟནྟི ནོ ཝིསཾཡོགཱཡ, ཨཱཙཡཱཡ སཾཝཏྟནྟི ནོ ཨཔཙཡཱཡ, ཨུཔཱདཱཡ སཾཝཏྟནྟི ནོ པཊིནིསྶགྒིཡཱ, མཧིཙྪཏཱཡ སཾཝཏྟནྟི ནོ ཨཔྤིཙྪཏཱཡ, ཨསནྟུཊྛིཡཱ སཾཝཏྟནྟི ནོ སནྟུཊྛིཡཱ, སངྒཎིཀཱཡ སཾཝཏྟནྟི ནོ པཝིཝེཀཱཡ, ཀོསཛྫཱཡ སཾཝཏྟནྟི ནོ ཝཱིརིཡཱརམྦྷཱཡ, དུབྦྷརཏཱཡ སཾཝཏྟནྟི ནོ སུབྷརཏཱཡཱ’ཏི ཨེཀཾསེན ཧི, གོཏམི, དྷཱརེཡྻཱསི – ‘ནེསོ དྷམྨོ, ནེསོ ཝིནཡོ, ནེཏཾ སཏྠུསཱསན’ནྟི. ཡེ ཙ ཁོ ཏྭཾ, གོཏམི, དྷམྨེ ཛཱནེཡྻཱསི – ‘ཨིམེ དྷམྨཱ ཝིརཱགཱཡ སཾཝཏྟནྟི ནོ སརཱགཱཡ…པེ… སུབྷརཏཱཡ སཾཝཏྟནྟི ནོ དུབྦྷརཏཱཡཱ’ཏི. ཨེཀཾསེན ཧི, གོཏམི, དྷཱརེཡྻཱསི – ‘ཨེསོ དྷམྨོ, ཨེསོ ཝིནཡོ, ཨེཏཾ སཏྠུསཱསན’’ནྟི (ཨ. ནི. ༨.༥༣; ཙཱུལ༹ཝ. ༤༠༦).

ཨེཝཾ ཝུཏྟེ ཨིམསྨིཾ བུདྡྷདྷམྨཝིནཡེ ¶ , ཨིམསྨིཾ བུདྡྷཔཱཝཙནེ, ཨིམསྨིཾ བུདྡྷབྲཧྨཙརིཡེ, ཨིམསྨིཾ བུདྡྷསཏྠུསཱསནེཏི ཨེཝམཏྠོ ཝེདིཏབྦོ.

ཨཔིཙེཏཾ སིཀྑཱཏྟཡསངྑཱཏཾ སཀལཾ སཱསནཾ བྷགཝཏཱ དིཊྛཏྟཱ སམྨཱདིཊྛིཔཙྩཡཏྟཱ སམྨཱདིཊྛིཔུབྦངྒམཏྟཱ ཙ དིཊྛི, བྷགཝཏོ ཁམནཝསེན ཁནྟི, རུཙྩནཝསེན རུཙི, གཧཎཝསེན ཨཱདཱཡོ. ཨཏྟནོ ཀཱརཀཾ ཨཔཱཡེསུ ཨཔཏམཱནཾ དྷཱརེཏཱིཏི དྷམྨོ. སོཝ སཾཀིལེསཔཀྑཾ ཝིནཏཱིཏི ¶ ཝིནཡོ. དྷམྨོ ཙ སོ ཝིནཡོ ཙཱཏི དྷམྨཝིནཡོ. ཀུསལདྷམྨེཧི ཝཱ ཨཀུསལདྷམྨཱནཾ ཨེས ཝིནཡོཏི དྷམྨཝིནཡོ. ཏེནེཝ ཝུཏྟཾ – ‘‘ཡེ ཙ ཁོ ཏྭཾ, གོཏམི, དྷམྨེ ཛཱནེཡྻཱསི – ‘ཨིམེ དྷམྨཱ ཝིརཱགཱཡ སཾཝཏྟནྟི ནོ སརཱགཱཡ…པེ… ཨེཀཾསེན, གོཏམི, དྷཱརེཡྻཱསི ‘ཨེསོ དྷམྨོ, ཨེསོ ཝིནཡོ, ཨེཏཾ སཏྠུསཱསན’ནྟི.

དྷམྨེན ¶ ཝཱ ཝིནཡོ, ན དཎྜཱདཱིཧཱིཏི དྷམྨཝིནཡོ, ཝུཏྟམྤི ཙེཏཾ –

‘‘དཎྜེནེཀེ དམཡནྟི, ཨངྐུསེཧི ཀསཱཧི ཙ;

ཨདཎྜེན ཨསཏྠེན, ནཱགོ དནྟོ མཧེསིནཱ’’ཏི. (ཙཱུལ༹ཝ. ༣༤༢; མ. ནི. ༢.༣༥༢);

ཏཐཱ –

‘‘དྷམྨེན ནཱིཡམཱནཱནཾ, ཀཱ ཨུསཱུཡཱ ཝིཛཱནཏ’’ནྟི; (མཧཱཝ. ༦༣);

དྷམྨཱཡ ཝཱ ཝིནཡོ དྷམྨཝིནཡོ. ཨནཝཛྫདྷམྨཏྠཉྷེས ཝིནཡོ, ན བྷཝབྷོགཱམིསཏྠཾ. ཏེནཱཧ བྷགཝཱ – ‘‘ནཡིདཾ, བྷིཀྑཝེ, བྲཧྨཙརིཡཾ ཝུསྶཏི ཛནཀུཧནཏྠ’’ནྟི (ཨ. ནི. ༤.༢༥) ཝིཏྠཱརོ. པུཎྞཏྠེརོཔི ཨཱཧ – ‘‘ཨནུཔཱདཱཔརིནིབྦཱནཏྠཾ ཁོ, ཨཱཝུསོ, བྷགཝཏི བྲཧྨཙརིཡཾ ཝུསྶཏཱི’’ཏི (མ. ནི. ༡.༢༥༩). ཝིསིཊྛཾ ཝཱ ནཡཏཱིཏི ཝིནཡོ. དྷམྨཏོ ཝིནཡོ དྷམྨཝིནཡོ. སཾསཱརདྷམྨཏོ ཧི སོཀཱདིདྷམྨཏོ ཝཱ ཨེས ཝིསིཊྛཾ ནིབྦཱནཾ ནཡཏི. དྷམྨསྶ ཝཱ ཝིནཡོ, ན ཏིཏྠཀརཱནནྟི དྷམྨཝིནཡོ; དྷམྨབྷཱུཏོ ཧི བྷགཝཱ, ཏསྶེཝ ཝིནཡོ. ཡསྨཱ ཝཱ དྷམྨཱཡེཝ ཨབྷིཉྙེཡྻཱ པརིཉྙེཡྻཱ པཧཱཏབྦཱ བྷཱཝེཏབྦཱ སཙྪིཀཱཏབྦཱ ཙ, ཏསྨཱ ཨེས དྷམྨེསུ ཝིནཡོ, ན སཏྟེསུ, ན ཛཱིཝེསུ ཙཱཏི དྷམྨཝིནཡོ. སཱཏྠསབྱཉྫནཏཱདཱིཧི ཨཉྙེསཾ ཝཙནཏོ པདྷཱནཾ ཝཙནནྟི པཝཙནཾ; པཝཙནམེཝ པཱཝཙནཾ. སབྦཙརིཡཱཧི ཝིསིཊྛཙརིཡཱབྷཱཝེན བྲཧྨཙརིཡཾ. དེཝམནུསྶཱནཾ ¶ སཏྠུབྷཱུཏསྶ བྷགཝཏོ སཱསནནྟི སཏྠུསཱསནཾ; སཏྠུབྷཱུཏཾ ཝཱ སཱསནནྟིཔི སཏྠུསཱསནཾ. ‘‘སོ ཝོ མམཙྩཡེན སཏྠཱ’’ཏི (དཱི. ནི. ༢.༢༡༦) ཧི དྷམྨཝིནཡོཝ སཏྠཱཏི ཝུཏྟོཏི ཨེཝམེཏེསཾ པདཱནཾ ཨཏྠོ ཝེདིཏབྦོ.

ཡསྨཱ ¶ པན ཨིམསྨིཾཡེཝ སཱསནེ སབྦཔཀཱརཛ྄ཛྷཱནནིབྦཏྟཀོ བྷིཀྑུ དིསྶཏི, ན ཨཉྙཏྲ, ཏསྨཱ ཏཏྠ ཏཏྠ ‘ཨིམིསྶཱ’ཏི ཙ ‘ཨིམསྨི’ནྟི ཙ ཨཡཾ ནིཡམོ ཀཏོཏི ཝེདིཏབྦོཏི. ཨཡཾ ‘ཨིདྷཱ’ཏི མཱཏིཀཱཔདནིདྡེསསྶ ཨཏྠོ.

༥༡༠. བྷིཀྑུནིདྡེསེ སམཉྙཱཡཱཏི པཉྙཏྟིཡཱ, ཝོཧཱརེནཱཏི ཨཏྠོ. སམཉྙཱཡ ཨེཝ ཧི ཨེཀཙྩོ བྷིཀྑཱུཏི པཉྙཱཡཏི. ཏཐཱ ཧི ནིམནྟནཱདིམྷི བྷིཀྑཱུསུ གཎཱིཡམཱནེསུ སཱམཎེརེཔི གཧེཏྭཱ ‘སཏཾ བྷིཀྑཱུ, སཧསྶཾ བྷིཀྑཱུ’ཏི ཝདནྟི. པཊིཉྙཱཡཱཏི ཨཏྟནོ པཊིཛཱནནེན. པཊིཉྙཱཡཔི ¶ ཧི ཨེཀཙྩོ བྷིཀྑཱུཏི པཉྙཱཡཏི. ཏསྶ ‘‘ཀོ ཨེཏྠ ཨཱཝུསོ’’ཏི? ‘‘ཨཧཾ, ཨཱཝུསོ, བྷིཀྑཱུ’’ཏི ཨེཝམཱདཱིསུ (ཨ. ནི. ༡༠.༩༦) སམྦྷཝོ དཊྛབྦོ. ཨཡཾ པན ཨཱནནྡཏྠེརེན ཝུཏྟཏྟཱ དྷམྨིཀཱ པཊིཉྙཱ. རཏྟིབྷཱགེ པན དུསྶཱིལཱཔི པཊིཔཐཾ ཨཱགཙྪནྟཱ ‘‘ཀོ ཨེཏྠཱ’’ཏི ཝུཏྟེ ཨདྷམྨིཀཱཡ པཊིཉྙཱཡ ཨབྷཱུཏཏྠཱཡ ‘‘མཡཾ བྷིཀྑཱུ’’ཏི ཝདནྟི.

བྷིཀྑཏཱིཏི ཡཱཙཏི. ཡོ ཧི ཀོཙི བྷིཀྑཏི, བྷིཀྑཾ ཨེསཏི གཝེསཏི, སོ ཏཾ ལབྷཏུ ཝཱ མཱ ཝཱ, ཨཐ ཁོ བྷིཀྑཏཱིཏི བྷིཀྑུ. བྷིཀྑཀོཏི བྱཉྫནེན པདཾ ཝཌྜྷིཏཾ; བྷིཀྑནདྷམྨཏཱཡ བྷིཀྑཱུཏི ཨཏྠོ. བྷིཀྑཱཙརིཡཾ ཨཛ྄ཛྷུཔགཏོཏི བུདྡྷཱདཱིཧི ཨཛ྄ཛྷུཔགཏཾ བྷིཀྑཱཙརིཡཾ ཨཛ྄ཛྷུཔགཏཏྟཱ བྷིཀྑཱཙརིཡཾ ཨཛ྄ཛྷུཔགཏོ ནཱམ. ཡོ ཧི ཀོཙི ཨཔྤཾ ཝཱ མཧནྟཾ ཝཱ བྷོགཀྑནྡྷཾ པཧཱཡ ཨགཱརསྨཱ ཨནགཱརིཡཾ པབྦཛིཏོ, ཀསིགོརཀྑཱདཱིཧི ཛཱིཝིཏཀཔྤནཾ ཧིཏྭཱ ལིངྒསམྤཊིཙྪནེནེཝ བྷིཀྑཱཙརིཡཾ ཨཛ྄ཛྷུཔགཏོཏི བྷིཀྑུ. པརཔྤཊིབདྡྷཛཱིཝིཀཏྟཱ ཝཱ ཝིཧཱརམཛ྄ཛྷེ ཀཱཛབྷཏྟཾ བྷུཉྫམཱནོཔི བྷིཀྑཱཙརིཡཾ ཨཛ྄ཛྷུཔགཏོཏི བྷིཀྑུ. པིཎྜིཡཱལོཔབྷོཛནཾ ནིསྶཱཡ པབྦཛྫཱཡ ཨུསྶཱཧཛཱཏཏྟཱ ཝཱ བྷིཀྑཱཙརིཡཾ ཨཛ྄ཛྷུཔགཏོཏི བྷིཀྑུ.

ཨགྒྷཕསྶཝཎྞབྷེདེན བྷིནྣཾ པཊཾ དྷཱརེཏཱིཏི བྷིནྣཔཊདྷརོ. ཏཏྠ སཏྠཀཙྪེདནེན ཨགྒྷབྷེདོ ཝེདིཏབྦོ. སཧསྶགྒྷནཀོཔི ཧི པཊོ སཏྠཀེན ཁཎྜཱཁཎྜིཀཾ ¶ ཚིནྣོ བྷིནྣགྒྷོ ཧོཏི, པུརིམགྒྷཏོ ཨུཔཌྜྷམྤི ན ཨགྒྷཏི. སུཏྟསཾསིབྦནེན ཕསྶབྷེདོ ཝེདིཏབྦོ. སུཁསམྥསྶོཔི ཧི པཊོ སུཏྟེཧི སཾསིབྦིཏོ བྷིནྣཕསྶོ ཧོཏི, ཁརསམྥསྶཏཾ པཱཔུཎཱཏི. སཱུཙིམལཱདཱིཧི ཝཎྞབྷེདོ ཝེདིཏབྦོ. སུཔརིསུདྡྷོཔི ཧི པཊོ སཱུཙིཀམྨཏོ པཊྛཱཡ སཱུཙིམལེན, ཧཏྠསེདམལཛལླིཀཱདཱིཧི ¶ , ཨཝསཱནེ རཛནཀཔྤཀརཎེཧི ཙ བྷིནྣཝཎྞོ ཧོཏི, པཀཏིཝཎྞཾ ཝིཛཧཏི. ཨེཝཾ ཏཱིཧཱཀཱརེཧི བྷིནྣཔཊདྷཱརཎཏོ བྷིནྣཔཊདྷརོཏི བྷིཀྑུ. གིཧཱིཝཏྠཝིསབྷཱགཱནཾ ཝཱ ཀཱསཱཝཱནཾ དྷཱརཎམཏྟེནེཝ བྷིནྣཔཊདྷརོཏི བྷིཀྑུ.

བྷིནྡཏི པཱཔཀེ ཨཀུསལེ དྷམྨེཏི བྷིཀྑུ. སོཏཱཔཏྟིམགྒེན པཉྩ ཀིལེསེ བྷིནྡཏཱིཏི བྷིཀྑུ. སཀདཱགཱམིམགྒེན ཙཏྟཱརོ, ཨནཱགཱམིམགྒེན ཙཏྟཱརོ, ཨརཧཏྟམགྒེན ཨཊྛ ཀིལེསེ བྷིནྡཏཱིཏི བྷིཀྑུ. ཨེཏྟཱཝཏཱ ¶ ཙཏྟཱརོ མགྒཊྛཱ དསྶིཏཱ. བྷིནྣཏྟཱཏི ཨིམིནཱ པན ཙཏྟཱརོ ཕལཊྛཱ. སོཏཱཔནྣོ ཧི སོཏཱཔཏྟིམགྒེན པཉྩ ཀིལེསེ བྷིནྡིཏྭཱ ཋིཏོ. སཀདཱགཱམཱི སཀདཱགཱམིམགྒེན ཙཏྟཱརོ, ཨནཱགཱམཱི ཨནཱགཱམིམགྒེན ཙཏྟཱརོ, ཨརཧཱ ཨརཧཏྟམགྒེན ཨཊྛ ཀིལེསེ བྷིནྡིཏྭཱ ཋིཏོ. ཨེཝམཡཾ ཙཏུབྦིདྷོ ཕལཊྛོ བྷིནྣཏྟཱ པཱཔཀཱནཾ ཨཀུསལཱནཾ དྷམྨཱནཾ བྷིཀྑུ ནཱམ.

ཨོདྷིསོ ཀིལེསཱནཾ པཧཱནཱཏི ཨེཏྠ དྭེ ཨོདྷཱི – མགྒོདྷི ཙ ཀིལེསོདྷི ཙ. ཨོདྷི ནཱམ སཱིམཱ, མརིཡཱདཱ. ཏཏྠ སོཏཱཔནྣོ མགྒོདྷིནཱ ཨོདྷིསོ ཀིལེསཱནཾ པཧཱནཱ བྷིཀྑུ. ཏསྶ ཧི ཙཏཱུསུ མགྒེསུ ཨེཀེནེཝ ཨོདྷིནཱ ཀིལེསཱ པཧཱིནཱ, ན སཀལེན མགྒཙཏུཀྐེན. སཀདཱགཱམཱིཨནཱགཱམཱིསུཔི ཨེསེཝ ནཡོ. སོཏཱཔནྣོ ཙ ཀིལེསོདྷིནཱཔི ཨོདྷིསོ ཀིལེསཱནཾ པཧཱནཱ བྷིཀྑུ. ཏསྶ ཧི པཧཱཏབྦཀིལེསེསུ ཨོདྷིནཱཝ ཀིལེསཱ པཧཱིནཱ, ན སབྦེན སབྦཾ. ཨརཧཱ པན ཨནོདྷིསོཝ ཀིལེསཱནཾ པཧཱནཱ བྷིཀྑུ. ཏསྶ ཧི མགྒཙཏུཀྐེན ཨནོདྷིནཱཝ ཀིལེསཱ པཧཱིནཱ, ན ཨེཀཱཡ མགྒསཱིམཱཡ. པཧཱཏབྦཀིལེསེསུ ཙ ཨནོདྷིསོཝ ཀིལེསཱ པཧཱིནཱ. ཨེཀཱཔི ཧི ཀིལེསསཱིམཱ ཋིཏཱ ནཱམ ནཏྠི. ཨེཝཾ སོ ཨུབྷཡཐཱཔི ཨནོདྷིསོ ཀིལེསཱནཾ པཧཱནཱ བྷིཀྑུ.

སེཀྑོཏི པུཐུཛྫནཀལྱཱཎཀེན སདྡྷིཾ སཏྟ ཨརིཡཱ. ཏིསྶོ སིཀྑཱ སིཀྑནྟཱིཏི སེཀྑཱ. ཏེསུ ཡོ ཀོཙི སེཀྑོ བྷིཀྑུཏི ཝེདིཏབྦོ. ན ¶ སིཀྑཏཱིཏི ཨསེཀྑོ. སེཀྑདྷམྨེ ཨཏིཀྐམྨ ཨགྒཕལེ ཋིཏོ ཏཏོ ཨུཏྟརི སིཀྑིཏབྦཱབྷཱཝཏོ ཁཱིཎཱསཝོ ཨསེཀྑོཏི ཝུཙྩཏི. ཨཝསེསོ པུཐུཛྫནབྷིཀྑུ ཏིསྶོ སིཀྑཱ ནེཝ སིཀྑཏི, ན སིཀྑིཏྭཱ ཋིཏོཏི ནེཝསེཀྑནཱསེཀྑོཏི ཝེདིཏབྦོ.

སཱིལགྒཾ ¶ སམཱདྷིགྒཾ པཉྙགྒཾ ཝིམུཏྟགྒནྟི ཨིདཾ ཨགྒཾ པཏྭཱ ཋིཏཏྟཱ ཨགྒོ བྷིཀྑུ ནཱམ. བྷདྲོཏི ཨཔཱཔཀོ. ཀལྱཱཎཔུཐུཛྫནཱདཡོ ཧི ཡཱཝ ཨརཧཱ ཏཱཝ བྷདྲེན སཱིལེན སམཱདྷིནཱ པཉྙཱཡ ཝིམུཏྟིཡཱ ཝིམུཏྟིཉཱཎདསྶནེན ཙ སམནྣཱགཏཏྟཱ བྷདྲོ བྷིཀྑཱུཏི སངྑྱཾ གཙྪནྟི. མཎྜོ བྷིཀྑཱུཏི པསནྣོ བྷིཀྑུ; སཔྤིམཎྜོ ཝིཡ ཨནཱཝིལོ ཝིཔྤསནྣོཏི ཨཏྠོ. སཱརོཏི ཏེཧིཡེཝ སཱིལསཱརཱདཱིཧི སམནྣཱགཏཏྟཱ, ནཱིལསམནྣཱགམེན ནཱིལོ པཊོ ཝིཡ, སཱརོ བྷིཀྑཱུཏི ཝེདིཏབྦོ. ཝིགཏཀིལེསཕེགྒུབྷཱཝཏོ ཝཱ ཁཱིཎཱསཝོཝ སཱརོཏི ཝེདིཏབྦོ.

ཏཏྠ ¶ ཙ ‘‘བྷིནྡཏི པཱཔཀེ ཨཀུསལེ དྷམྨེཏི བྷིཀྑུ, ཨོདྷིསོ ཀིལེསཱནཾ པཧཱནཱ བྷིཀྑུ, སེཀྑོ བྷིཀྑཱུ’’ཏི ཨིམེསུ ཏཱིསུ ཋཱནེསུ སཏྟ སེཀྑཱ ཀཐིཏཱ. ‘‘བྷིནྣཏྟཱ པཱཔཀཱནཾ ཨཀུསལཱནཾ དྷམྨཱནནྟི བྷིཀྑུ, ཨནོདྷིསོ ཀིལེསཱནཾ པཧཱནཱ བྷིཀྑུ, ཨསེཀྑོ བྷིཀྑུ, ཨགྒོ བྷིཀྑུ, མཎྜོ བྷིཀྑཱུ’’ཏི ཨིམེསུ པཉྩསུ ཋཱནེསུ ཁཱིཎཱསཝོཝ ཀཐིཏོ. ‘‘ནེཝསེཀྑནཱསེཀྑོ’’ཏི ཨེཏྠ པུཐུཛྫནོཝ ཀཐིཏོ. སེསཊྛཱནེསུ པུཐུཛྫནཀལྱཱཎཀོ, སཏྟ སེཀྑཱ, ཁཱིཎཱསཝོཏི ཨིམེ སབྦེཔི ཀཐིཏཱ.

ཨེཝཾ སམཉྙཱདཱིཧི བྷིཀྑུཾ དསྶེཏྭཱ ཨིདཱནི ཨུཔསམྤདཱཝསེན དསྶེཏུཾ སམགྒེན སངྒྷེནཱཏིཨཱདིམཱཧ. ཏཏྠ སམགྒེན སངྒྷེནཱཏི སབྦནྟིམེན པརིཙྪེདེན པཉྩཝགྒཀརཎཱིཡེ ཀམྨེ ཡཱཝཏིཀཱ བྷིཀྑཱུ ཀམྨཔྤཏྟཱ, ཏེསཾ ཨཱགཏཏྟཱ ཚནྡཱརཧཱནཾ ཚནྡསྶ ཨཱཧཊཏྟཱ སམྨུཁཱིབྷཱུཏཱནཉྩ ཨཔྤཊིཀྐོསནཏོ ཨེཀསྨིཾ ཀམྨེ སམགྒབྷཱཝཾ ཨུཔགཏེན. ཉཏྟིཙཏུཏྠེནཱཏི ཏཱིཧི ཨནུསྶཱཝནཱཧི ཨེཀཱཡ ཙ ཉཏྟིཡཱ ཀཱཏབྦེན. ཀམྨེནཱཏི དྷམྨིཀེན ཝིནཡཀམྨེན. ཨཀུཔྤེནཱཏི ¶ ཝཏྠུཉཏྟིཨནུསྶཱཝནསཱིམཱཔརིསསམྤཏྟིསམྤནྣཏྟཱ ཨཀོཔེཏབྦཏཾ ཨཔྤཊིཀྐོསིཏབྦཏཾ ཨུཔགཏེན. ཋཱནཱརཧེནཱཏི ཀཱརཎཱརཧེན སཏྠུསཱསནཱརཧེན.

ཨུཔསམྤནྣོ ནཱམ ཨུཔརིབྷཱཝཾ སམཱཔནྣོ, པཏྟོཏི ཨཏྠོ. བྷིཀྑུབྷཱཝོ ཧི ཨུཔརིབྷཱཝོ. ཏཉྩེས ཡཐཱཝུཏྟེན ཀམྨེན སམཱཔནྣཏྟཱ ཨུཔསམྤནྣོཏི ཝུཙྩཏི. ཨེཏེན ཡཱ ཨིམཱ ཨེཧིབྷིཀྑཱུཔསམྤདཱ, སརཎཱགམནཱུཔསམྤདཱ, ཨོཝཱདཔཊིགྒཧཎཱུཔསམྤདཱ, པཉྷབྱཱཀརཎཱུཔསམྤདཱ, གརུདྷམྨཔཊིགྒཧཎཱུཔསམྤདཱ, དཱུཏེནཱུཔསམྤདཱ, ཨཊྛཝཱཙིཀཱུཔསམྤདཱ, ཉཏྟིཙཏུཏྠཀམྨཱུཔསམྤདཱཏི ཨཊྛ ཨུཔསམྤདཱ ཝུཏྟཱ, ཏཱསཾ ཉཏྟིཙཏུཏྠཀམྨཱུཔསམྤདཱ, དཱུཏེནཱུཔསམྤདཱ, ཨཊྛཝཱཙིཀཱུཔསམྤདཱཏི ཨིམཱ ¶ ཏིསྶོཝ ཐཱཝརཱ. སེསཱ བུདྡྷེ དྷརམཱནེཡེཝ ཨཧེསུཾ. ཏཱསུ ཨུཔསམྤདཱསུ ཨིམསྨིཾ ཋཱནེ ཨཡཾ ཉཏྟིཙཏུཏྠཀམྨཱུཔསམྤདཱཝ ཨདྷིཔྤེཏཱ.

༥༡༡. པཱཏིམོཀྑསཾཝརནིདྡེསེ པཱཏིམོཀྑནྟི སིཀྑཱཔདསཱིལཾ. ཏཉྷི, ཡོ ནཾ པཱཏི རཀྑཏི, ཏཾ མོཀྑེཏི མོཙཡཏི ཨཱཔཱཡིཀཱདཱིཧི དུཀྑེཧི, ཏསྨཱ པཱཏིམོཀྑནྟི ཝུཏྟཾ. སཱིལཾ པཏིཊྛཱཏིཨཱདཱིནི ཏསྶེཝ ཝེཝཙནཱནི. ཏཏྠ སཱིལནྟི ཀཱམཉྩེཏཾ སཧ ཀམྨཝཱཙཱཔརིཡོསཱནེན ཨིཛ྄ཛྷནཀསྶ ¶ པཱཏིམོཀྑསྶ ཝེཝཙནཾ, ཨེཝཾ སནྟེཔི དྷམྨཏོ ཨེཏཾ སཱིལཾ ནཱམ པཱཎཱཏིཔཱཏཱདཱིཧི ཝཱ ཝིརམནྟསྶ ཝཏྟཔྤཊིཔཏྟིཾ ཝཱ པཱུརེནྟསྶ ཙེཏནཱདཡོ དྷམྨཱ ཝེདིཏབྦཱ. ཝུཏྟཉྷེཏཾ པཊིསམྦྷིདཱཡཾ ‘‘ཀིཾ སཱིལ’’ནྟི? ཙེཏནཱ སཱིལཾ, ཙེཏསིཀཾ སཱིལཾ, སཾཝརོ སཱིལཾ, ཨཝཱིཏིཀྐམོ སཱིལ’’ནྟི (པཊི. མ. ༡.༣༩).

ཏཏྠ ཙེཏནཱ སཱིལཾ ནཱམ པཱཎཱཏིཔཱཏཱདཱིཧི ཝཱ ཝིརམནྟསྶ ཝཏྟཔཊིཔཏྟིཾ ཝཱ པཱུརེནྟསྶ ཙེཏནཱ. ཙེཏསིཀཾ སཱིལཾ ནཱམ པཱཎཱཏིཔཱཏཱདཱིཧི ཝིརམནྟསྶ ཝིརཏི. ཨཔིཙ ཙེཏནཱ སཱིལཾ ནཱམ པཱཎཱཏིཔཱཏཱདཱིནི པཛཧནྟསྶ སཏྟ ཀམྨཔཐཙེཏནཱ. ཙེཏསིཀཾ སཱིལཾ ནཱམ ‘‘ཨབྷིཛ྄ཛྷཾ པཧཱཡ ཝིགཏཱབྷིཛ྄ཛྷེན ཙེཏསཱ ཝིཧརཏཱི’’ཏིཨཱདིནཱ ནཡེན སཾཡུཏྟམཧཱཝགྒེ ཝུཏྟཱ ཨནབྷིཛ྄ཛྷཱཨབྱཱཔཱདསམྨཱདིཊྛིདྷམྨཱ. སཾཝརོ སཱིལནྟི ཨེཏྠ པཉྩཝིདྷེན སཾཝརོ ཝེདིཏབྦོ – པཱཏིམོཀྑསཾཝརོ, སཏིསཾཝརོ, ཉཱཎསཾཝརོ ¶ , ཁནྟིསཾཝརོ, ཝཱིརིཡསཾཝརོཏི. ཏསྶ ནཱནཱཀརཎཾ ཝིསུདྡྷིམགྒེ (ཝིསུདྡྷི. ༡.༦) ཝུཏྟཾ. ཨཝཱིཏིཀྐམོ སཱིལནྟི སམཱདིཎྞསཱིལསྶ ཀཱཡིཀཝཱཙསིཀོ ཨཝཱིཏིཀྐམོ. ཨེཏྠ ཙ སཾཝརསཱིལཾ ཨཝཱིཏིཀྐམསཱིལནྟི ཨིདམེཝ ནིཔྤརིཡཱཡཏོ སཱིལཾ; ཙེཏནཱ སཱིལཾ ཙེཏསིཀཾ སཱིལནྟི པརིཡཱཡཏོ སཱིལནྟི ཝེདིཏབྦཾ.

ཡསྨཱ པན པཱཏིམོཀྑསཾཝརསཱིལེན བྷིཀྑུ སཱསནེ པཏིཊྛཱཏི ནཱམ, ཏསྨཱ ཏཾ ‘པཏིཊྛཱ’ཏི ཝུཏྟཾ; པཏིཊྛཧཏི ཝཱ ཨེཏྠ བྷིཀྑུ, ཀུསལདྷམྨཱ ཨེཝ ཝཱ ཨེཏྠ པཏིཊྛཧནྟཱིཏི པཏིཊྛཱ. ཨཡམཏྠོ –

‘‘སཱིལེ པཏིཊྛཱཡ ནརོ སཔཉྙོ, ཙིཏྟཾ པཉྙཉྩ བྷཱཝཡཾ;

ཨཱཏཱཔཱི ནིཔཀོ བྷིཀྑུ, སོ ཨིམཾ ཝིཛཊཡེ ཛཊ’’ནྟི ཙ. (སཾ. ནི. ༡.༢༣);

‘‘པཏིཊྛཱ ¶ , མཧཱརཱཛ, སཱིལཾ སབྦེསཾ ཀུསལདྷམྨཱན’’ནྟི ཙ ‘‘སཱིལེ པཏིཊྛིཏསྶ ཁོ, མཧཱརཱཛ, སབྦེ ཀུསལཱ དྷམྨཱ ན པརིཧཱཡནྟཱི’’ཏི (མི. པ. ༢.༡.༩) ཙ ཨཱདིསུཏྟཝསེན ཝེདིཏབྦོ.

ཏདེཏཾ པུབྦུཔྤཏྟིཨཏྠེན ཨཱདི. ཝུཏྟམྤི ཙེཏཾ –

‘‘ཏསྨཱཏིཧ ཏྭཾ, ཨུཏྟིཡ, ཨཱདིམེཝ ཝིསོདྷེཧི ཀུསལེསུ དྷམྨེསུ. ཀོ ཙཱདི ཀུསལཱནཾ དྷམྨཱནཾ? སཱིལཉྩ སུཝིསུདྡྷཾ དིཊྛི ཙ ཨུཛུཀཱ’’ཏི (སཾ. ནི. ༥.༣༨༢).

ཡཐཱ ¶ ཧི ནགརཝཌྜྷཀཱི ནགརཾ མཱཔེཏུཀཱམོ པཋམཾ ནགརཊྛཱནཾ སོདྷེཏི, ཏཏོ ཨཔརབྷཱགེ ཝཱིཐིཙཏུཀྐསིངྒྷཱཊཀཱདིཔརིཙྪེདེན ཝིབྷཛིཏྭཱ ནགརཾ མཱཔེཏི; ཨེཝམེཝ ཡོགཱཝཙརོ ཨཱདིཏོཝ སཱིལཾ ཝིསོདྷེཏི, ཏཏོ ཨཔརབྷཱགེ སམཐཝིཔསྶནཱམགྒཕལནིབྦཱནཱནི སཙྪིཀརོཏི. ཡཐཱ ཝཱ པན རཛཀོ པཋམཾ ཏཱིཧི ཁཱརེཧི ཝཏྠཾ དྷོཝིཏྭཱ པརིསུདྡྷེ ཝཏྠེ ཡདིཙྪཀཾ རངྒཛཱཏཾ ཨུཔནེཏི; ཡཐཱ ཝཱ པན ཚེཀོ ཙིཏྟཀཱརོ རཱུཔཾ ལིཁིཏུཀཱམོ ཨཱདིཏོཝ བྷིཏྟིཔརིཀམྨཾ ཀརོཏི, ཏཏོ ཨཔརབྷཱགེ རཱུཔཾ སམུཊྛཱཔེཏི; ཨེཝམེཝ ཡོགཱཝཙརོ ཨཱདིཏོཝ སཱིལཾ ཝིསོདྷེཏྭཱ ཨཔརབྷཱགེ སམཐཝིཔསྶནཱདཡོ དྷམྨེ སཙྪིཀརོཏི. ཏསྨཱ སཱིལཾ ‘‘ཨཱདཱི’’ཏི ཝུཏྟཾ.

ཏདེཏཾ ཙརཎསརིཀྑཏཱཡ ཙརཎཾ. ཙརཎཱཏི ཧི པཱདཱ ཝུཙྩནྟི. ཡཐཱ ཧི ཚིནྣཙརཎསྶ པུརིསསྶ དིསཾགམནཱབྷིསངྑཱརོ ན ཛཱཡཏི, པརིཔུཎྞཔཱདསྶེཝ ཛཱཡཏི; ཨེཝམེཝ ཡསྶ སཱིལཾ བྷིནྣཾ ཧོཏི ཁཎྜཾ ཨཔརིཔུཎྞཾ, ཏསྶ ནིབྦཱནགམནཱཡ ¶ ཉཱཎགམནཾ ན སམྤཛྫཏི. ཡསྶ པན ཏཾ ཨབྷིནྣཾ ཧོཏི ཨཀྑཎྜཾ པརིཔུཎྞཾ ཏསྶ ནིབྦཱནགམནཱཡ ཉཱཎགམནཾ སམྤཛྫཏི. ཏསྨཱ སཱིལཾ ‘‘ཙརཎ’’ནྟི ཝུཏྟཾ.

ཏདེཏཾ སཾཡམནཝསེན སཾཡམོ, སཾཝརཎཝསེན སཾཝརོ. ཨུབྷཡེནཱཔི སཱིལསཾཡམོ ཙེཝ སཱིལསཾཝརོ ཙ ཀཐིཏོ. ཝཙནཏྠོ པནེཏྠ སཾཡམེཏི ཝཱིཏིཀྐམཝིཔྥནྡནཾ, པུགྒལཾ ཝཱ སཾཡམེཏི, ཝཱིཏིཀྐམཝསེན ཏསྶ ཝིཔྥནྡིཏུཾ ན དེཏཱིཏི སཾཡམོ. ཝཱིཏིཀྐམསྶ པཝེསནདྭཱརཾ སཾཝརཏི པིདཧཏཱིཏིཔི སཾཝརོ. མོཀྑནྟི ཨུཏྟམཾ མུཁབྷཱུཏཾ ཝཱ. ཡཐཱ ཧི སཏྟཱནཾ ཙཏུབྦིདྷོ ཨཱཧཱརོ མུཁེན ¶ པཝིསིཏྭཱ ཨངྒམངྒཱནི ཕརཏི, ཨེཝཾ ཡོགིནོཔི ཙཏུབྷཱུམཀཀུསལཾ སཱིལམུཁེན པཝིསིཏྭཱ ཨཏྠསིདྡྷིཾ སམྤཱདེཏི. ཏེན ཝུཏྟཾ ‘‘མོཀྑ’’ནྟི. པམུཁེ སཱདྷཱུཏི པཱམོཀྑཾ; པུབྦངྒམཾ སེཊྛཾ པདྷཱནནྟི ཨཏྠོ. ཀུསལཱནཾ དྷམྨཱནཾ སམཱཔཏྟིཡཱཏི ཙཏུབྷཱུམཀཀུསལཱནཾ པཊིལཱབྷཏྠཱཡ པཱམོཀྑཾ པུབྦངྒམཾ སེཊྛཾ པདྷཱནནྟི ཝེདིཏབྦཾ.

ཀཱཡིཀོ ཨཝཱིཏིཀྐམོཏི ཏིཝིདྷཾ ཀཱཡསུཙརིཏཾ. ཝཱཙསིཀོཏི ཙཏུབྦིདྷཾ ཝཙཱིསུཙརིཏཾ. ཀཱཡིཀཝཱཙསིཀོཏི ཏདུབྷཡཾ. ཨིམིནཱ ཨཱཛཱིཝཊྛམཀསཱིལཾ པརིཡཱདཱཡ དསྶེཏི. སཾཝུཏོཏི པིཧིཏོ; སཾཝུཏིནྡྲིཡོ པིཧིཏིནྡྲིཡོཏི ¶ ཨཏྠོ. ཡཐཱ ཧི སཾཝུཏདྭཱརཾ གེཧཾ ‘‘སཾཝུཏགེཧཾ པིཧིཏགེཧ’’ནྟི ཝུཙྩཏི, ཨེཝམིདྷ སཾཝུཏིནྡྲིཡོ ‘‘སཾཝུཏོ’’ཏི ཝུཏྟོ. པཱཏིམོཀྑསཾཝརེནཱཏི པཱཏིམོཀྑེན ཙ སཾཝརེན ཙ, པཱཏིམོཀྑསངྑཱཏེན ཝཱ སཾཝརེན. ཨུཔེཏོཏིཨཱདཱིནི ཝུཏྟཏྠཱནེཝ.

༥༡༢. ཨིརིཡཏཱིཏིཨཱདཱིཧི སཏྟཧིཔི པདེཧི པཱཏིམོཀྑསཾཝརསཱིལེ ཋིཏསྶ བྷིཀྑུནོ ཨིརིཡཱཔཐཝིཧཱརོ ཀཐིཏོ.

༥༡༣. ཨཱཙཱརགོཙརནིདྡེསེ ཀིཉྩཱཔི བྷགཝཱ སམཎཱཙརཾ སམཎགོཙརཾ ཀཐེཏུཀཱམོ ‘‘ཨཱཙཱརགོཙརསམྤནྣོཏི ཨཏྠི ཨཱཙཱརོ, ཨཏྠི ཨནཱཙཱརོ’’ཏི པདཾ ཨུདྡྷརི. ཡཐཱ པན མགྒཀུསལོ པུརིསོ མགྒཾ ཨཙིཀྑནྟོ ‘ཝཱམཾ མུཉྩ དཀྑིཎཾ གཎྷཱ’ཏི པཋམཾ མུཉྩིཏབྦཾ སབྷཡམགྒཾ ཨུཔྤཐམགྒཾ ཨཱཙིཀྑཏི ¶ , པཙྪཱ གཧེཏབྦཾ ཁེམམགྒཾ ཨུཛུམགྒཾ; ཨེཝམེཝ མགྒཀུསལཔུརིསསདིསོ དྷམྨརཱཛཱ པཋམཾ པཧཱཏབྦཾ བུདྡྷཔྤཊིཀུཊྛཾ ཨནཱཙཱརཾ ཨཱཙིཀྑིཏྭཱ པཙྪཱ ཨཱཙཱརཾ ཨཱཙིཀྑིཏུཀཱམོ ‘‘ཏཏྠ ཀཏམོ ཨནཱཙཱརོ’’ཏིཨཱདིམཱཧ. པུརིསེན ཧི ཨཱཙིཀྑིཏམགྒོ སམྤཛྫེཡྻ ཝཱ ན ཝཱ, ཏཐཱགཏེན ཨཱཙིཀྑིཏམགྒོ ཨཔཎྞཀོ, ཨིནྡེན ཝིསྶཊྛཾ ཝཛིརཾ ཝིཡ, ཨཝིརཛ྄ཛྷནཀོ ནིབྦཱནནགརཾཡེཝ སམོསརཏི. ཏེན ཝུཏྟཾ – ‘‘པུརིསོ མགྒཀུསལོཏི ཁོ, ཏིསྶ, ཏཐཱགཏསྶེཏཾ ཨདྷིཝཙནཾ ཨརཧཏོ སམྨཱསམྦུདྡྷསྶཱ’’ཏི (སཾ. ནི. ༣.༨༤).

ཡསྨཱ ཝཱ སསཱིསཾ ནཧཱནེན པཧཱིནསེདམལཛལླིཀསྶ པུརིསསྶ མཱལཱགནྡྷཝིལེཔནཱདིཝིབྷཱུསནཝིདྷཱནཾ ཝིཡ པཧཱིནཔཱཔདྷམྨསྶ ཀལྱཱཎདྷམྨསམཱཡོགོ སམྤནྣརཱུཔོ ཧོཏི, ཏསྨཱ སེདམལཛལླིཀྐཾ ཝིཡ པཧཱཏབྦཾ པཋམཾ ཨནཱཙཱརཾ ཨཱཙིཀྑིཏྭཱ, པཧཱིནསེདམལཛལླིཀསྶ མཱལཱགནྡྷཝིལེཔནཱདིཝིབྷཱུསནཝིདྷཱནཾ ¶ ཝིཡ པཙྪཱ ཨཱཙཱརཾ ཨཱཙིཀྑིཏུཀཱམོཔི ཏཏྠ ཀཏམོ ཨནཱཙཱརོཏིཨཱདིམཱཧ. ཏཏྠ ཀཱཡིཀོ ཝཱིཏིཀྐམོཏི ཏིཝིདྷཾ ཀཱཡདུཙྩརིཏཾ; ཝཱཙསིཀོ ཝཱིཏིཀྐམོཏི ཙཏུབྦིདྷཾ ཝཙཱིདུཙྩརིཏཾ; ཀཱཡིཀཝཱཙསིཀོ ཝཱིཏིཀྐམོཏི ཏདུབྷཡཾ. ཨེཝཾ ཨཱཛཱིཝཊྛམཀསཱིལསྶེཝ ཝཱིཏིཀྐམཾ དསྶེསི.

ཡསྨཱ པན ན ཀེཝལཾ ཀཱཡཝཱཙཱཧི ཨེཝ ཨནཱཙཱརཾ ཨཱཙརཏི, མནསཱཔི ཨཱཙརཏི ཨེཝ, ཏསྨཱ ཏཾ དསྶེཏུཾ ‘‘སབྦམྤི དུསྶཱིལྱཾ ཨནཱཙཱརོ’’ཏི ཝུཏྟཾ. ཏཏྠ ¶ ཨེཀཙྩིཡཾ ཨནཱཙཱརཾ ཝིབྷཛིཏྭཱ དསྶེནྟོ ཨིདྷེཀཙྩོ ཝེལུ༹དཱནེནཱཏིཨཱདིམཱཧ. ཏཏྠ ཝེལུ༹དཱནེནཱཏི པཙྩཡཧེཏུཀེན ཝེལུ༹དཱནེན. ཝིཧཱརེ ཨུཊྛིཏཉྷི ཨརཉྙཏོ ཝཱ ཨཱཧརིཏྭཱ རཀྑིཏགོཔིཏཾ ཝེལུ༹ཾ ‘ཨེཝཾ མེ པཙྩཡཾ དསྶནྟཱི’ཏི ཨུཔཊྛཱཀཱནཾ དཱཏུཾ ན ཝཊྚཏི. ཨེཝཉྷི ཛཱིཝིཏཾ ཀཔྤེནྟོ ཨནེསནཱཡ མིཙྪཱཛཱིཝེན ཛཱིཝཏི. སོ དིཊྛེཝ དྷམྨེ གརཧཾ པཱཔུཎཱཏི, སམྤརཱཡེ ཙ ཨཔཱཡཔརིཔཱུརཀོ ཧོཏི. ཨཏྟནོ པུགྒལིཀཝེལུ༹ཾ ཀུལསངྒཧཏྠཱཡ དདནྟོ ཀུལདཱུསཀདུཀྐཊམཱཔཛྫཏི; པརཔུགྒལིཀཾ ཐེཡྻཙིཏྟེན དདམཱནོ བྷཎྜགྒྷེན ཀཱརེཏབྦོ. སངྒྷིཀེཔི ཨེསེཝ ནཡོ. སཙེ པན ཏཾ ཨིསྶརཝཏཱཡ དེཏི གརུབྷཎྜཝིསྶཛྫནམཱཔཛྫཏི ¶ .

ཀཏརོ པན ཝེལུ༹ གརུབྷཎྜཾ ཧོཏི, ཀཏརོ ན ཧོཏཱིཏི? ཡོ ཏཱཝ ཨརོཔིམོ སཡཾཛཱཏཀོ, སོ སངྒྷེན པརིཙྪིནྣཊྛཱནེཡེཝ གརུབྷཎྜཾ, ཏཏོ པརཾ ན གརུབྷཎྜཾ; རོཔིཏཊྛཱནེ སབྦེན སབྦཾ གརུབྷཎྜཾ. སོ པན པམཱཎེན པརིཙྪིནྣོ ཏེལནཱལི༹པྤམཱཎོཔི གརུབྷཎྜཾ, ན ཏཏོ ཧེཊྛཱ. ཡསྶ པན བྷིཀྑུནོ ཏེལནཱལི༹ཡཱ ཝཱ ཀཏྟརདཎྜེན ཝཱ ཨཏྠོ, ཏེན ཕཱཏིཀམྨཾ ཀཏྭཱ གཧེཏབྦོ. ཕཱཏིཀམྨཾ ཏདགྒྷནཀཾ ཝཱ ཨཏིརེཀཾ ཝཱ ཝཊྚཏི, ཨཱུནཀཾ ན ཝཊྚཏི. ཧཏྠཀམྨམྤི ཨུདཀཱཧརཎམཏྟཾ ཝཱ ཨཔྤཧརིཏཀརཎམཏྟཾ ཝཱ ན ཝཊྚཏི, ཏཾ ཐཱཝརཾ ཀཱཏུཾ ཝཊྚཏི. ཏསྨཱ པོཀྑརཎིཏོ ཝཱ པཾསུཾ ཨུདྡྷརིཏྭཱ སོཔཱནཾ ཝཱ ཨཏྠརཱཔེཏྭཱ ཝིསམཊྛཱནཾ ཝཱ སམཾ ཀཏྭཱ གཧེཏུཾ ཝཊྚཏི. ཕཱཏིཀམྨཾ ཨཀཏྭཱ གཧིཏོ ཏཏྠ ཝསནྟེནེཝ པརིབྷུཉྫིཏབྦོ; པཀྐམནྟེན སངྒྷིཀཾ ཀཏྭཱ ཋཔེཏྭཱ གནྟབྦཾ. ཨསཏིཡཱ གཧེཏྭཱ གཏེན ཡཏྠ གཏོ སརཏི, ཏཏོ པཙྩཱཧརིཏབྦོ. སཙེ ཨནྟརཱ བྷཡཾ ཧོཏི, སམྤཏྟཝིཧརེ ཋཔེཏྭཱ གནྟབྦཾ.

མནུསྶཱ ཝིཧཱརཾ གནྟྭཱ ཝེལུ༹ཾ ཡཱཙནྟི. བྷིཀྑཱུ ‘སངྒྷིཀོ’ཏི དཱཏུཾ ན ཝིསཧནྟི. མནུསྶཱ པུནཔྤུནཾ ཡཱཙནྟི ཝཱ ཏཛྫེནྟི ཝཱ. ཏདཱ བྷིཀྑཱུཧི ‘དཎྜཀམྨཾ ཀཏྭཱ གཎྷཐཱ’ཏི ཝཏྟུཾ ¶ ཝཊྚཏི; ཝེལུ༹དཱནཾ ནཱམ ན ཧོཏི. སཙེ ཏེ དཎྜཀམྨཏྠཱཡ ཝཱསིཕརསུཨཱདཱིནི ཝཱ ཁཱདནཱིཡབྷོཛནཱིཡཾ ཝཱ དེནྟི, གཧེཏུཾ ན ཝཊྚཏི. ཝིནཡཊྛཀཐཱཡཾ པན ‘‘དཌྜྷགེཧཱ མནུསྶཱ གཎྷིཏྭཱ གཙྪནྟཱ ན ཝཱརེཏབྦཱ’’ཏི ཝུཏྟཾ.

སཙེ ¶ སངྒྷསྶ ཝེལུ༹གུམྦེ ཝེལུ༹དཱུསིཀཱ ཨུཔྤཛྫནྟི, ཏཾ ཨཀོཊྚཱཔེནྟཱནཾ ཝེལུ༹ ནསྶཏི, ཀིཾ ཀཱཏབྦནྟི? བྷིཀྑཱཙཱརེ མནུསྶཱནཾ ཨཱཙིཀྑིཏབྦཾ. སཙེ ཀོཊྚེཏུཾ ན ཨིཙྪནྟི ‘སམབྷཱགཾ ལབྷིསྶཐཱ’ཏི ཝཏྟབྦཱ; ན ཨིཙྪནྟིཡེཝ ‘དྭེ ཀོཊྛཱསེ ལབྷིསྶཐཱ’ཏི ཝཏྟབྦཱ. ཨེཝམྤི ཨནིཙྪནྟེསུ ‘ནཊྛེན ཨཏྠོ ནཏྠི, ཏུམྷཱཀཾ ཁཎེ སཏི དཎྜཀམྨཾ ཀརིསྶཐ, ཀོཊྚེཏྭཱ གཎྷཐཱ’ཏི ཝཏྟབྦཱ; ཝེལུ༹དཱནཾ ནཱམ ན ཧོཏི. ཝེལུ༹གུམྦེ ཨགྒིམྷི ཨུཊྛིཏེཔི, ཨུདཀེན ཝུཡ྄ཧམཱནཝེལཱུ༹སུཔི ཨེསེཝ ནཡོ. རུཀྑེསུཔི ཨཡམེཝ ཀཐཱམགྒོ. རུཀྑོ པན སཱུཙིདཎྜཀཔྤམཱཎོ གརུབྷཎྜཾ ཧོཏི. སངྒྷིཀེ རུཀྑེ ཀོཊྚཱཔེཏྭཱ སངྒྷཾ ཨནཱཔུཙྪིཏྭཱཔི སངྒྷིཀཾ ཨཱཝཱསཾ ཀཱཏུཾ ¶ ལབྦྷཏི. ཝཙནཔཐཙྪེདནཏྠཾ པན ཨཱཔུཙྪིཏྭཱཝ ཀཱཏབྦོ.

པུགྒལིཀཾ ཀཱཏུཾ ལབྦྷཏི, ན ལབྦྷཏཱིཏི? ན ལབྦྷཏི. ཧཏྠཀམྨསཱིསེན པན ཨེཀསྨིཾ གེཧེ མཉྩཊྛཱནམཏྟཾ ལབྦྷཏི, ཏཱིསུ གེཧེསུ ཨེཀཾ གེཧཾ ལབྷཏི. སཙེ དབྦྷསམྦྷཱརཱ པུགྒལིཀཱ ཧོནྟི, བྷཱུམི སངྒྷིཀཱ, ཨེཀཾ གེཧཾ ཀཏྭཱ སམབྷཱགཾ ལབྷཏི, དྭཱིསུ གེཧེསུ ཨེཀཾ གེཧཾ ལབྷཏི. སངྒྷིཀརུཀྑེ སངྒྷིཀཾ ཨཱཝཱསཾ བཱདྷེནྟེ སངྒྷཾ ཨནཱཔུཙྪཱ ཧཱརེཏུཾ ཝཊྚཏི, ན ཝཊྚཏཱིཏི? ཝཊྚཏི. ཝཙནཔཐཙྪེདནཏྠཾ པན ཨཱཔུཙྪིཏྭཱཝ ཧཱརེཏབྦོ. སཙེ རུཀྑཾ ནིསྶཱཡ སངྒྷསྶ མཧནྟོ ལཱབྷོ ཧོཏི, ན ཧཱརེཏབྦོ. པུགྒལིཀརུཀྑེ སངྒྷིཀཾ ཨཱཝཱསཾ བཱདྷེནྟེ རུཀྑསཱམིཀསྶ ཨཱཙིཀྑིཏབྦཾ. སཙེ ཧརིཏུཾ ན ཨིཙྪཏི, ཚེདཱཔེཏྭཱ ཧཱརེཏབྦོ. ‘རུཀྑཾ མེ དེཐཱ’ཏི ཙོདེནྟསྶ རུཀྑཾ ཨགྒྷཱཔེཏྭཱ མཱུལཾ དཱཏབྦཾ. སངྒྷིཀེ རུཀྑེ པུགྒལིཀཱཝཱསཾ, པུགྒལིཀེ ཙ པུགྒལིཀཱཝཱསཾ བཱདྷེནྟེཔི ཨེསེཝ ནཡོ. ཝལླིཡམྤི ཨཡམེཝ ཀཐཱམགྒོ. ཝལླི པན ཡཏྠ ཝིཀྐཱཡཏི, དུལླབྷཱ ཧོཏི, ཏཏྠ གརུབྷཎྜཾ. སཱ ཙ ཁོ ཨུཔཌྜྷབཱཧུཔྤམཱཎཏོ པཊྛཱཡ; ཏཏོ ཧེཊྛཱ ཝལླིཁཎྜཾ གརུབྷཎྜཾ ན ཧོཏི.

པཏྟདཱནཱདཱིསུཔི པཏྟདཱནེནཱཏི པཙྩཡཧེཏུཀེན པཏྟདཱནེནཱཏིཨཱདི སབྦཾ ཝེལུ༹དཱནེ ཝུཏྟནཡེནེཝ ཝེདིཏབྦཾ. གརུབྷཎྜཏཱཡ པནེཏྠ ཨཡཾ ཝིནིཙྪཡོ. པཏྟམྤི ཧི ཡཏྠ ཝིཀྐཱཡཏི, གནྡྷིཀཱདཡོ ¶ གནྡྷཔལིཝེཋནཱདཱིནཾ ཨཏྠཱཡ གཎྷནྟི, ཏཱདིསེ དུལླབྷཊྛཱནེཡེཝ གརུབྷཎྜཾ ཧོཏི. ཨེས ཏཱཝ ཀིཾསུཀཔཏྟཀཎྞཔིལ༹ནྡྷནཏཱལཔཏྟཱདཱིསུ ཝིནིཙྪཡོ.

ཏཱལཔཎྞམྤི ¶ ཨིམསྨིཾཡེཝ ཋཱནེ ཀཐེཏབྦཾ. ཏཱལཔཎྞམྤི ཧི སཡཾཛཱཏེ ཏཱལཝནེ སངྒྷེན པརིཙྪིནྣཊྛཱནེཡེཝ གརུབྷཎྜཾ, ན ཏཏོ པརཾ. རོཔིམཏཱལེསུ སབྦམྤི གརུབྷཎྜཾ. ཏསྶ པམཱཎཾ ཧེཊྛིམཀོཊིཡཱ ཨཊྛངྒུལཔྤམཱཎོཔི རིཏྟཔོཏྠཀོ. ཏིཎམྤི ཨེཏྠེཝ པཀྑིཔིཏྭཱ ཀཐེཏབྦཾ. ཡཏྠ པན ཏིཎཾ ནཏྠི ཏཏྠ མུཉྫཔལཱལནཱལི༹ཀེརཔཎྞཱདཱིཧིཔི ཚཱདེནྟི. ཏསྨཱ ཏཱནིཔི ཏིཎེནེཝ སངྒཧིཏཱནི. ཨིཏི མུཉྫཔལཱལཱདཱིསུ ཡཾཀིཉྩི མུཊྛིཔྤམཱཎཾ ཏིཎཾ, ནཱལི༹ཀེརཔཎྞཱདཱིསུ ཙ ཨེཀཔཎྞམྤི ¶ སངྒྷསྶ དིནྣཾ ཝཱ ཏཏྠཛཱཏཀཾ ཝཱ བཧིཨཱརཱམེ སངྒྷསྶ ཏིཎཝཏྠུམྷི ཛཱཏཏིཎཾ ཝཱ རཀྑིཏགོཔིཏཾ གརུབྷཎྜཾ ཧོཏི. ཏཾ པན སངྒྷཀམྨེ ཙ ཙེཏིཡཀམྨེ ཙ ཀཏེ ཨཏིརེཀཾ པུགྒལིཀཀམྨེ དཱཏུཾ ཝཊྚཏི. ཧེཊྛཱ ཝུཏྟཝེལུ༹མྷིཔི ཨེསེཝ ནཡོ.

པུཔྥདཱནེ ‘‘ཨེཏྟཀེསུ རུཀྑེསུ པུཔྥཱནི ཝིསྶཛྫེཏྭཱ ཡཱགུབྷཏྟཝཏྠེ ཨུཔནེནྟུ, ཨེཏྟཀེསུ སེནཱསནཔཊིསངྑརཎེ ཨུཔནེནྟཱུ’’ཏི ཨེཝཾ ནིཡམིཏཊྛཱནེ ཨེཝ པུཔྥཱནི གརུབྷཎྜཱནི ཧོནྟི. པརཏཱིརེ སཱམཎེརཱ པུཔྥཱནི ཨོཙིནིཏྭཱ རཱསིཾ ཀརོནྟི, པཉྩངྒསམནྣཱགཏོ པུཔྥབྷཱཛཀོ བྷིཀྑུསངྒྷཾ གཎེཏྭཱ ཀོཊྛཱསེ ཀརོཏི, སོ སམྤཏྟཔརིསཱཡ སངྒྷཾ ཨནཱཔུཙྪིཏྭཱཝ དཱཏུཾ ལབྷཏི; ཨསམྨཏེན པན ཨཱཔུཙྪིཏྭཱཝ དཱཏབྦཾ. བྷིཀྑུ པན ཀསྶ པུཔྥཱནི དཱཏུཾ ལབྷཏི, ཀསྶ ན ལབྷཏཱིཏི? མཱཏཱཔིཏཱུནཾ གེཧཾ ཧརིཏྭཱཔི གེཧཏོ པཀྐོསཱཔེཏྭཱཔི ‘ཝཏྠུཔཱུཛཾ ཀརོཐཱ’ཏི དཱཏུཾ ལབྷཏི, པིལ༹ནྡྷནཏྠཱཡ དཱཏུཾ ན ལབྷཏི; སེསཉཱཏཱིནཾ པན ཧརིཏྭཱ ན དཱཏབྦཾ, པཀྐོསཱཔེཏྭཱ ‘པཱུཛཾ ཀརོཐཱ’ཏི དཱཏབྦཾ; སེསཛནསྶ པཱུཛནཊྛཱནཾ སམྤཏྟསྶ ཨཔཙྩཱསཱིསནྟེན དཱཏབྦཾ; པུཔྥདཱནཾ ནཱམ ན ཧོཏི. ཝིཧཱརེ བཧཱུནི པུཔྥཱནི པུཔྥནྟི. བྷིཀྑུནཱ པིཎྜཱཡ ཙརནྟེན མནུསྶེ དིསྭཱ ‘ཝིཧཱརེ བཧཱུནི པུཔྥཱནི, པཱུཛེཐཱ’ཏི ཝཏྟབྦཾ. ཝཙནམཏྟེ དོསོ ནཏྠི. ‘མནུསྶཱ ཁཱདནཱིཡབྷོཛནཱིཡཾ ཨཱདཱཡ ཨཱགམིསྶནྟཱི’ཏི ཙིཏྟེན པན ན ཝཏྟབྦཾ. སཙེ ཝདཏི, ཁཱདནཱིཡབྷོཛནཱིཡཾ ན པརིབྷུཉྫིཏབྦཾ. མནུསྶཱ ཨཏྟནོ དྷམྨཏཱཡ ‘ཝིཧཱརེ པུཔྥཱནི ཨཏྠཱི’ཏི པུཙྪིཏྭཱ ‘ཨསུཀདིཝསེ ཝིཧཱརཾ ཨཱགམིསྶཱམ, སཱམཎེརཱནཾ པུཔྥཱནི ཨོཙིནིཏུཾ མཱ དེཐཱ’ཏི ཝདནྟི. བྷིཀྑཱུ སཱམཎེརཱནཾ ཀཐེཏུཾ པམུཊྛཱ. སཱམཎེརེཧི པུཔྥཱནི ཨོཙིནིཏྭཱ ཋཔིཏཱནི. མནུསྶཱ བྷིཀྑཱུ ཨུཔསངྐམིཏྭཱ ‘‘བྷནྟེ, མཡཾ ཏུམྷཱཀཾ ཨསུཀདིཝསེཡེཝ ཨཱརོཙཡིམྷ ¶ – ‘སཱམཎེརཱནཾ པུཔྥཱནི ཨོཙིནིཏུཾ མཱ དེཐཱ’ཏི. ཀསྨཱ ན ཝཱརཡིཏྠཱ’’ཏི? ‘‘སཏི ¶ མེ པམུཊྛཱ, པུཔྥཱནི ཨོཙིནིཏམཏྟཱནེཝ, ཏཱཝ ན པཱུཛཱ ཀཏཱ’’ཏི ཝཏྟབྦཾ. ‘‘གཎྷཐ པཱུཛེཐཱ’’ཏི ན ཝཏྟབྦཾ. སཙེ ཝདཏི, ཨཱམིསཾ ན པརིབྷུཉྫིཏབྦཾ.

ཨཔརོ བྷིཀྑུ སཱམཎེརཱནཾ ཨཱཙིཀྑཏི ‘‘ཨསུཀགཱམཝཱསིནོ པུཔྥཱནི མཱ ཨོཙིནིཏྠཱ’’ཏི ཨཱཧཾསཱུཏི. མནུསྶཱཔི ¶ ཨཱམིསཾ ཨཱཧརིཏྭཱ དཱནཾ དཏྭཱ ཝདནྟི – ‘‘ཨམྷཱཀཾ མནུསྶཱ ན བཧུཀཱ, སཱམཎེརེ ཨམྷེཧི སཧ པུཔྥཱནི ཨོཙིནིཏུཾ ཨཱཎཱཔེཐཱ’’ཏི. ‘‘སཱམཎེརེཧི བྷིཀྑཱ ལདྡྷཱ; ཡེ བྷིཀྑཱཙཱརཾ ན གཙྪནྟི, ཏེ སཡམེཝ ཛཱནིསྶནྟི, ཨུཔཱསཀཱ’’ཏི ཝཏྟབྦཾ. ཨེཏྟཀཾ ནཡཾ ལབྷིཏྭཱ སཱམཎེརེ པུཏྟེ ཝཱ བྷཱཏིཀེ ཝཱ ཀཏྭཱ པུཔྥཱནི ཨོཙིནཱཔེཏུཾ དོསོ ནཏྠི; པུཔྥདཱནཾ ནཱམ ན ཧོཏི.

ཕལདཱནེ ཕལམྤི པུཔྥཾ ཝིཡ ནིཡམིཏམེཝ གརུབྷཎྜཾ ཧོཏི. ཝིཧཱརེ བཧུཀམྷི ཕལཱཕལེ སཏི ཨཕཱསུཀམནུསྶཱ ཨཱགནྟྭཱ ཡཱཙནྟི. བྷིཀྑཱུ ‘སངྒྷིཀ’ནྟི དཱཏུཾ ན ཨུསྶཧནྟི. མནུསྶཱ ཝིཔྤཊིསཱརིནོ ཨཀྐོསནྟི པརིབྷཱསནྟི. ཏཏྠ ཀིཾ ཀཱཏབྦནྟི? ཕལེཧི ཝཱ རུཀྑེཧི ཝཱ པརིཙྪིནྡིཏྭཱ ཀཏིཀཱ ཀཱཏབྦཱ – ‘ཨསུཀེསུ ཙ རུཀྑེསུ ཨེཏྟཀཱནི ཕལཱནི གཎྷནྟཱ, ཨེཏྟཀེསུ ཝཱ རུཀྑེསུ ཕལཱནི གཎྷནྟཱ ན ཝཱརེཏབྦཱ’ཏི. ཙོརཱ པན ཨིསྶརཱ ཝཱ བལཀྐཱརེན གཎྷནྟཱ ན ཝཱརེཏབྦཱ; ཀུདྡྷཱ ཏེ སཀལཝིཧཱརམྤི ནཱསེཡྻུཾ. ཨཱདཱིནཝོ པན ཀཐེཏབྦོཏི.

སིནཱནདཱནེ སིནཱནཙུཎྞཱནི ཀོཊྚིཏཱནི ན གརུབྷཎྜཱནི. ཨཀོཊྚིཏོ རུཀྑཏྟཙོཝ གརུབྷཎྜཾ. ཙུཎྞཾ པན ཨགིལཱནསྶ རཛནནིཔཀྐཾ ཝཊྚཏི. གིལཱནསྶ ཡཾཀིཉྩི ཙུཎྞཾ ཝཊྚཏིཡེཝ. མཏྟིཀཱཔི ཨེཏྠེཝ པཀྑིཔིཏྭཱ ཀཐེཏབྦཱ. མཏྟིཀཱཔི ཡཏྠ དུལླབྷཱ ཧོཏི, ཏཏྠེཝ གརུབྷཎྜཾ. སཱཔི ཧེཊྛིམཀོཊིཡཱ ཏིཾསཔལགུལ༹པིཎྜཔྤམཱཎཱཝ ཏཏོ ཧེཊྛཱ ན གརུབྷཎྜནྟི.

དནྟཀཊྛདཱནེ དནྟཀཊྛཾ ཨཙྪིནྣཀམེཝ གརུབྷཎྜཾ. ཡེསཾ སཱམཎེརཱནཾ སངྒྷཏོ དནྟཀཊྛཝཱརོ པཱཔུཎཱཏི, ཏེ ཨཏྟནོ ཨཱཙརིཡུཔཛ྄ཛྷཱཡཱནཾ པཱཊིཡེཀྐཾ དཱཏུཾ ན ལབྷནྟི. ཡེཧི པན ‘ཨེཏྟཀཱནི དནྟཀཊྛཱནི ཨཱཧརིཏབྦཱནཱི’ཏི པརིཙྪིནྡིཏྭཱ ཝཱརཾ གཧིཏཱནི, ཏེ ཨཏིརེཀཱནི ཨཱཙརིཡུཔཛ྄ཛྷཱཡཱནཾ དཱཏུཾ ལབྷནྟི. ཨེཀེན བྷིཀྑུནཱ དནྟཀཊྛམཱལ༹ཀཏོ བཧཱུནི དནྟཀཊྛཱནི ¶ ན གཧེཏབྦཱནི, དེཝསིཀཾ ཨེཀེཀམེཝ གཧེཏབྦཾ. པཱཊིཡེཀྐཾ ཝསནྟེནཱཔི བྷིཀྑུསངྒྷཾ གཎཡིཏྭཱ ཡཏྟཀཱནི ¶ ཨཏྟནོ པཱཔུཎནྟི ཏཏྟཀཱནེཝ གཧེཏྭཱ གནྟབྦཾ; ཨནྟརཱ ཨཱགནྟུཀེསུ ཝཱ ཨཱགཏེསུ ¶ དིསཾ ཝཱ པཀྐམནྟེན ཨཱཧརིཏྭཱ གཧིཏཊྛཱནེཡེཝ ཋཔེཏབྦཱནི.

ཙཱཊུཀམྱཏཱཡཱཏིཨཱདཱིསུ ཙཱཊུཀམྱཏཱ ཝུཙྩཏི ཨཏྟཱནཾ དཱསཾ ཝིཡ ནཱིཙཊྛཱནེ ཋཔེཏྭཱ པརསྶ ཁལིཏཝཙནམྤི སཎྛཔེཏྭཱ པིཡཀཱམཏཱཡ པགྒཡ྄ཧཝཙནཾ. མུགྒསཱུཔྱཏཱཡཱཏི མུགྒསཱུཔསམཱནཱཡ སཙྩཱལིཀེན ཛཱིཝིཏཀཔྤནཏཱཡེཏཾ ཨདྷིཝཙནཾ. ཡཐཱ ཧི མུགྒསཱུཔེ པཙྩནྟེ བཧཱུ མུགྒཱ པཱཀཾ གཙྪནྟི, ཐོཀཱ ན གཙྪནྟི; ཨེཝམེཝ སཙྩཱལིཀེན ཛཱིཝིཏཀཔྤཀེ པུགྒལེ བཧུ ཨལིཀཾ ཧོཏི, ཨཔྤཀཾ སཙྩཾ. ཡཐཱ ཝཱ མུགྒསཱུཔསྶ ཨཔྤཝིསནཊྛཱནཾ ནཱམ ནཏྠི, ཨེཝམེཝ སཙྩཱལིཀཝུཏྟིནོ པུགྒལསྶ ཨཔྤཝིཊྛཝཱཙཱ ནཱམ ནཏྠི; སིངྒྷཱཊཀཾ ཝིཡ ཨིཙྪིཏིཙྪིཏདྷཱརཱཡ པཏིཊྛཱཏི. ཏེནསྶ སཱ མུསཱཝཱདིཏཱ མུགྒསཱུཔྱཏཱཏི ཝུཏྟཱ. པཱརིབྷཊཡཏཱཏི པརིབྷཊཀམྨབྷཱཝོ. པརིབྷཊསྶ ཧི ཀམྨཾ པཱརིབྷཊཡཾ, ཏསྶ བྷཱཝོ པཱརིབྷཊཡཏཱ; ཨལངྐཱརཀརཎཱདཱིཧི དཱརཀཀཱིལཱ༹པནསྶེཏཾ ཨདྷིཝཙནཾ.

ཛངྒྷཔེསནིཀནྟི གཱམནྟརདེསནྟརཱདཱིསུ ཏེསཾ ཏེསཾ གིཧཱིནཾ སཱསནཔཊིསཱསནཧརཎཾ. ཨིདཉྷི ཛངྒྷཔེསནིཀཾ ནཱམ ཨཏྟནོ མཱཏཱཔིཏཱུནཾ, ཡེ ཙསྶ མཱཏཱཔིཏརོ ཨུཔཊྛཧནྟི, ཏེསཾ སཱསནཾ གཧེཏྭཱ ཀཏྠཙི གམནཝསེན ཝཊྚཏི. ཙེཏིཡསྶ ཝཱ སངྒྷསྶ ཝཱ ཨཏྟནོ ཝཱ ཀམྨཾ ཀརོནྟཱནཾ ཝཌྜྷཀཱིནམྤི སཱསནཾ ཧརིཏུཾ ཝཊྚཏི. མནུསྶཱ ‘‘དཱནཾ དསྶཱམ, པཱུཛཾ ཀརིསྶཱམ, བྷིཀྑུསངྒྷསྶ ཨཱཙིཀྑཐཱ’’ཏི ཝདནྟི; ‘‘ཨསུཀཏྠེརསྶ ནཱམ དེཐཱ’’ཏི པིཎྜཔཱཏཾ ཝཱ བྷེསཛྫཾ ཝཱ ཙཱིཝརཾ ཝཱ དེནྟི; ‘‘ཝིཧཱརེ པཱུཛཾ ཀརོཐཱ’’ཏི མཱལཱགནྡྷཝིལེཔནཱདཱིནི ཝཱ དྷཛཔཏཱཀཱདཱིནི ཝཱ ནཱིཡྻཱདེནྟི, སབྦཾ ཧརིཏུཾ ཝཊྚཏི; ཛངྒྷཔེསནིཀཾ ནཱམ ན ཧོཏི. སེསཱནཾ སཱསནཾ གཧེཏྭཱ གཙྪནྟསྶ པདཝཱརེ པདཝཱརེ དོསོ.

ཨཉྙཏརཉྙཏརེནཱཏི ཨེཏེསཾ ཝཱ ཝེལུ༹དཱནཱདཱིནཾ ཨཉྙཏརཉྙཏརེན ཝེཛྫཀམྨབྷཎྜཱགཱརིཀཀམྨཾ པིཎྜཔཊིཔིཎྜཀམྨཾ ¶ སངྒྷུཔྤཱདཙེཏིཡུཔྤཱདཨུཔཊྛཱཔནཀམྨནྟི ཨེཝརཱུཔཱནཾ ཝཱ མིཙྪཱཛཱིཝེན ཛཱིཝིཏཀཔྤནཀཀམྨཱནཾ ཡེན ཀེནཙི. བུདྡྷཔཊིཀུཊྛེནཱཏི བུདྡྷེཧི གརཧིཏེན པཊིསིདྡྷེན. ཨཡཾ ཝུཙྩཏཱིཏི ཨཡཾ སབྦོཔི ཨནཱཙཱརོ ནཱམ ཀཐཱིཡཏི. ཨཱཙཱརནིདྡེསོ ཝུཏྟཔཊིཔཀྑནཡེནེཝ ཝེདིཏབྦོ.

༥༡༤. གོཙརནིདྡེསེཔི ¶ ¶ པཋམཾ ཨགོཙརསྶ ཝཙནེ ཀཱརཎཾ ཧེཊྛཱ ཝུཏྟནཡེནེཝ ཝེདིཏབྦཾ. ཏཏྠ ཙ གོཙརོཏི པིཎྜཔཱཏཱདཱིནཾ ཨཏྠཱཡ ཨུཔསངྐམིཏུཾ ཡུཏྟཊྛཱནཾ གོཙརོ, ཨཡུཏྟཊྛཱནཾ ཨགོཙརོ. ཝེསིཡཱ གོཙརོ ཨསྶཱཏི ཝེསིཡགོཙརོ; མིཏྟསནྠཝཝསེན ཨུཔསངྐམིཏཊྛཱནནྟི ཨཏྠོ. ཏཏྠ ཝེསིཡཱ ནཱམ རཱུཔཱུཔཛཱིཝིནིཡོ ཡེན ཀེནཙིདེཝ སུལབྷཛ྄ཛྷཱཙཱརཏཱམིཏྟསཏྠཝསིནེཧཝསེན ཨུཔསངྐམནྟོ ཝེསིཡཱགོཙརོ ནཱམ ཧོཏི. ཏསྨཱ ཨེཝཾ ཨུཔསངྐམིཏུཾ ན ཝཊྚཏི. ཀིཾ ཀཱརཎཱ? ཨཱརཀྑཝིཔཏྟིཏོ. ཨེཝཾ ཨུཔསངྐམནྟསྶ ཧི ཙིརཾ རཀྑིཏགོཔིཏོཔི སམཎདྷམྨོ ཀཏིཔཱཧེནེཝ ནསྶཏི; སཙེཔི ན ནསྶཏི གརཧཾ ལབྷཏི. དཀྑིཎཱཝསེན པན ཨུཔསངྐམནྟེན སཏིཾ ཨུཔཊྛཱཔེཏྭཱ ཨུཔསངྐམིཏབྦཾ. ཝིདྷཝཱ ཝུཙྩནྟི མཏཔཏིཀཱ ཝཱ པཝུཏྠཔཏིཀཱ ཝཱ. ཐུལླཀུམཱརིཡོཏི མཧལླིཀཱ ཨནིཝིཊྛཀུམཱརིཡོ. པཎྜཀཱཏི ལོཀཱམིསནིསྶིཏཀཐཱབཧུལཱ ཨུསྶནྣཀིལེསཱ ཨཝཱུཔསནྟཔརིལཱ༹ཧཱ ནཔུཾསཀཱ. ཏེསཾ སབྦེསམྤི ཨུཔསངྐམནེ ཨཱདཱིནཝོ ཝུཏྟནཡེནེཝ ཝེདིཏབྦོ. བྷིཀྑུནཱིསུཔི ཨེསེཝ ནཡོ. ཨཔིཙ བྷིཀྑཱུ ནཱམ ཨུསྶནྣབྲཧྨཙརིཡཱ ཧོནྟི, ཏཐཱ བྷིཀྑུནིཡོ. ཏེ ཨཉྙམཉྙཾ སནྠཝཝསེན ཀཏིཔཱཧེནེཝ རཀྑིཏགོཔིཏསམཎདྷམྨཾ ནཱསེནྟི. གིལཱནཔུཙྪཀེན པན གནྟུཾ ཝཊྚཏི. བྷིཀྑུནཱ པུཔྥཱནི ལབྷིཏྭཱ པཱུཛནཏྠཱཡཔི ཨོཝཱདདཱནཏྠཱཡཔི གནྟུཾ ཝཊྚཏིཡེཝ.

པཱནཱགཱརནྟི སུརཱཔཱནགྷརཾ. ཏཾ བྲཧྨཙརིཡནྟརཱཡཀརེཧི སུརཱསོཎྜེཧི ཨཝིཝིཏྟཾ ཧོཏི. ཏཏྠ ཏེཧི སདྡྷིཾ སཧ སོཎྜཝསེན ¶ ཨུཔསངྐམིཏུཾ ན ཝཊྚཏི; བྲཧྨཙརིཡནྟརཱཡོ ཧོཏི. སཾསཊྛོ ཝིཧརཏི རཱཛཱུཧཱིཏིཨཱདཱིསུ རཱཛཱནོཏི ཨབྷིསིཏྟཱ ཝཱ ཧོནྟུ ཨནབྷིསིཏྟཱ ཝཱ ཡེ རཛྫཾ ཨནུསཱསནྟི. རཱཛམཧཱམཏྟཱཏི རཱཛཱུནཾ ཨིསྶརིཡསདིསཱཡ མཧཏིཡཱ ཨིསྶརིཡམཏྟཱཡ སམནྣཱགཏཱ. ཏིཏྠིཡཱཏི ཝིཔརཱིཏདསྶནཱ བཱཧིརཔརིབྦཱཛཀཱ. ཏིཏྠིཡསཱཝཀཱཏི བྷཏྟིཝསེན ཏེསཾ པཙྩཡདཱཡཀཱ. ཨེཏེཧི སདྡྷིཾ སཾསགྒཛཱཏོ ཧོཏཱིཏི ཨཏྠོ.

ཨནནུལོམིཀེན སཾསགྒེནཱཏི ཨནནུལོམིཀསཾསགྒོ ནཱམ ཏིསྶནྣཾ སིཀྑཱནཾ ཨནནུལོམོ པཙྩནཱིཀསཾསགྒོ, ཡེན བྲཧྨཙརིཡནྟརཱཡཾ པཉྙཏྟིཝཱིཏིཀྐམཾ སལླེཁཔརིཧཱནིཉྩ པཱཔུཎཱཏི, སེཡྻཐིདཾ – རཱཛརཱཛམཧཱམཏྟེཧི སདྡྷིཾ སཧསོཀིཏཱ, སཧནནྡིཏཱ, སམསུཁདུཀྑཏཱ, ཨུཔྤནྣེསུ ¶ ཀིཙྩཀརཎཱིཡེསུ ཨཏྟནཱཝ ཡོགཾ ཨཱཔཛྫནཏཱ, ཏིཏྠིཡཏིཏྠིཡསཱཝཀེཧི སདྡྷིཾ ཨེཀཙྪནྡརུཙིསམཱཙཱརཏཱ ཨེཀཙྪནྡརུཙིསམཱཙཱརབྷཱཝཱཝཧོ ཝཱ སིནེཧབཧུམཱནསནྠཝོ. ཏཏྠ རཱཛརཱཛམཧཱམཏྟེཧི ¶ སདྡྷིཾ སཾསགྒོ བྲཧྨཙརིཡནྟརཱཡཾ ཀརོཏི. ཨིཏརེཧི ཏིཏྠིཡསཱཝཀེཧི ཏེསཾ ལདྡྷིགཧཎཾ. ཏེསཾ པན ཝཱདཾ བྷིནྡིཏྭཱ ཨཏྟནོ ལདྡྷིཾ གཎྷཱཔེཏུཾ སམཏྠེན ཨུཔསངྐམིཏུཾ ཝཊྚཏི.

ཨིདཱནི ཨཔརེནཔི པརིཡཱཡེན ཨགོཙརཾ དསྶེཏུཾ ཡཱནི ཝཱ པན ཏཱནི ཀུལཱནཱིཏིཨཱདི ཨཱརདྡྷཾ. ཏཏྠ ཨསྶདྡྷཱནཱིཏི བུདྡྷཱདཱིསུ སདྡྷཱཝིརཧིཏཱནི; བུདྡྷོ སབྦཉྙཱུ, དྷམྨོ ནིཡྻཱནིཀོ, སངྒྷོ སུཔྤཊིཔནྣོཏི ན སདྡཧནྟི. ཨཔྤསནྣཱནཱིཏི ཙིཏྟཾ པསནྣཾ ཨནཱཝིལཾ ཀཱཏུཾ ན སཀྐོནྟི. ཨཀྐོསཀཔརིབྷཱསཀཱནཱིཏི ཨཀྐོསཀཱནི ཙེཝ པརིབྷཱསཀཱནི ཙ; ‘ཙོརོསི, བཱལོསི, མཱུལ༹ྷོསི, ཨོཊྛོསི, གོཎོསི, གདྲབྷོསི, ཨཱཔཱཡིཀོསི, ནེརཡིཀོསི, ཏིརཙྪཱནགཏོསི, ནཏྠི ཏུཡ྄ཧཾ སུགཏི, དུགྒཏིཡེཝ པཱཊིཀངྑཱ’ཏི ཨེཝཾ དསཧི ཨཀྐོསཝཏྠཱུཧི ཨཀྐོསནྟི; ‘ཧོཏུ, ཨིདཱནི ཏཾ པཧརིསྶཱམ, བནྡྷིསྶཱམ ¶ , ཝདྷིསྶཱམཱ’ཏི ཨེཝཾ བྷཡདསྶནེན པརིབྷཱསནྟི ཙཱཏི ཨཏྠོ. ཨནཏྠཀཱམཱནཱིཏི ཨཏྠཾ ན ཨིཙྪནྟི, ཨནཏྠམེཝ ཨིཙྪནྟི. ཨཧིཏཀཱམཱནཱིཏི ཨཧིཏམེཝ ཨིཙྪནྟི, ཧིཏཾ ན ཨིཙྪནྟི. ཨཕཱསུཀཀཱམཱནཱིཏི ཕཱསུཀཾ ན ཨིཙྪནྟི, ཨཕཱསུཀམེཝ ཨིཙྪནྟི. ཨཡོགཀྑེམཀཱམཱནཱིཏི ཙཏཱུཧི ཡོགེཧི ཁེམཾ ནིབྦྷཡཾ ན ཨིཙྪནྟི, སབྷཡམེཝ ཨིཙྪནྟི. བྷིཀྑཱུནནྟི ཨེཏྠ སཱམཎེརཱཔི སངྒཧཾ གཙྪནྟི. བྷིཀྑུནཱིནནྟི ཨེཏྠ སིཀྑམཱནསཱམཎེརིཡོཔི. སབྦེསམྤི ཧི བྷགཝནྟཾ ཨུདྡིསྶ པབྦཛིཏཱནཉྩེཝ སརཎགཏཱནཉྩ ཙཏུནྣམྤི པརིསཱནཾ ཏཱནི ཨནཏྠཀཱམཱནིཡེཝ. ཏཐཱརཱུཔཱནི ཀུལཱནཱིཏི ཨེཝརཱུཔཱནི ཁཏྟིཡཀུལཱདཱིནི ཀུལཱནི. སེཝཏཱིཏི ནིསྶཱཡ ཛཱིཝཏི. བྷཛཏཱིཏི ཨུཔསངྐམཏི. པཡིརུཔཱསཏཱིཏི པུནཔྤུནཾ ཨུཔསངྐམཏི. ཨཡཾ ཝུཙྩཏཱིཏི ཨཡཾ ཝེསིཡཱདིགོཙརསྶ ཝེསིཡཱདིཀོ, རཱཛཱདིསཾསཊྛསྶ རཱཛཱདིཀོ, ཨསྶདྡྷཀུལཱདིསེཝཀསྶ ཨསྶདྡྷཀུལཱདིཀོ ཙཱཏི ཏིཔྤཀཱརོཔི ཨཡུཏྟགོཙརོ ཨགོཙརོཏི ཝེདིཏབྦོ.

ཏསྶ ཨིམིནཱ པརིཡཱཡེན ཨགོཙརཏཱ ཝེདིཏབྦཱ. ཝེསིཡཱདིཀོ ཏཱཝ པཉྩཀཱམགུཎནིསྶཡཏོ ཨགོཙརོཏི ཝེདིཏབྦོ, ཡཐཱཧ – ‘‘ཀོ ཙ, བྷིཀྑཝེ, བྷིཀྑུནོ ཨགོཙརོ པརཝིསཡོ? ཡདིདཾ པཉྩ ཀཱམགུཎཱ’’ཏི ¶ (སཾ. ནི. ༥.༣༧༢) རཱཛཱདིཀོ ཛྷཱནཱནུཡོགསྶ ཨནུཔནིསྶཡཏོ ལཱབྷསཀྐཱརཱསནིཙཀྐནིཔྥཱདནཏོ དིཊྛིཝིཔཏྟིཧེཏུཏོ ཙ, ཨསྶདྡྷཀུལཱདིཀོ སདྡྷཱཧཱནིཙིཏྟསནྟཱསཱཝཧནཏོ ཨགོཙརོཏི.

གོཙརནིདྡེསེ ན ཝེསིཡགོཙརོཏིཨཱདཱིནི ཝུཏྟཔཊིཔཀྑཝསེན ཝེདིཏབྦཱནི. ཨོཔཱནབྷཱུཏཱནཱིཏིཨཱདཱིསུ ¶ པན ཨོཔཱནབྷཱུཏཱནཱིཏི ཨུདཔཱནབྷཱུཏཱནི; བྷིཀྑུསངྒྷསྶ, ཙཱཏུམཧཱཔཐེ ཁཏཔོཀྑརཎཱི ཝིཡ, ཡཐཱསུཁཾ ཨོགཱཧནཀྑམཱནི ཙིཏྟམཧཱམཏྟསྶ གེཧསདིསཱནི. ཏསྶ ཀིར གེཧེ ཀཱལཏྠམྦྷོ ཡུཏྟོཡེཝ ¶ . གྷརདྭཱརཾ སམྤཏྟཱནཾ བྷིཀྑཱུནཾ པཙྩཡཝེཀལླཾ ནཱམ ནཏྠི. ཨེཀདིཝསཾ བྷེསཛྫཝཏྟམེཝ སཊྛི ཀཧཱཔཎཱནི ནིཀྑམནྟི. ཀཱསཱཝཔཛྫོཏཱནཱིཏི བྷིཀྑུབྷིཀྑུནཱིཧི ནིཝཏྠཔཱརུཏཱནཾ ཀཱསཱཝཱནཾཡེཝ པབྷཱཡ ཨེཀོབྷཱསཱནི བྷཱུཏཔཱལསེཊྛིཀུལསདིསཱནི. ཨིསིཝཱཏཔཊིཝཱཏཱནཱིཏི གེཧཾ པཝིསནྟཱནཾ ནིཀྑམནྟཱནཉྩ བྷིཀྑུབྷིཀྑུནཱིསངྑཱཏཱནཾ ཨིསཱིནཾ ཙཱིཝརཝཱཏེན ཙེཝ སམིཉྫནཔསཱརཎཱདིཛནིཏསརཱིརཝཱཏེན ཙ པཊིཝཱཏཱནི པཝཱཡིཏཱནི ཝིནིདྡྷུཏཀིབྦིསཱནི ཝཱ.

༥༡༥. ཨཎུམཏྟེསུ ཝཛྫེསུ བྷཡདསྶཱཝིཏཱནིདྡེསེ ཨཎུམཏྟཱནཱིཏི ཨཎུཔྤམཱཎཱ. ཝཛྫཱཏི དོསཱ. ཡཱནི ཏཱནི ཝཛྫཱནཱིཏི ཡཱནི ཏཱནི གརཧིཏབྦཊྛེན ཝཛྫཱནི. ཨཔྤམཏྟཀཱནཱིཏི པརིཏྟམཏྟཀཱནི ཁུདྡཀཔྤམཱཎཱནི. ཨོརམཏྟཀཱནཱིཏི པརིཏྟཏོཔི ཨོརིམཔྤམཱཎཏྟཱ ཨོརམཏྟཀཱནི. ལཧུསཱནཱིཏི ལཧུཀཱནི. ལཧུསམྨཏཱནཱིཏི ལཧཱུཏི སམྨཏཱནི. སཾཡམཀརཎཱིཡཱནཱིཏི སཾཡམེན ཀཏྟབྦཔཊིཀམྨཱནི. སཾཝརཀརཎཱིཡཱནཱིཏི སཾཝརེན ཀཱཏབྦཱནི སཾཝརེན ཀཏྟབྦཔཊིཀམྨཱནི. ཙིཏྟུཔྤཱདཀརཎཱིཡཱནཱིཏི ཙིཏྟུཔྤཱདམཏྟེན ཀཏྟབྦཔཊིཀམྨཱནི. མནསིཀཱརཔཊིབདྡྷཱནཱིཏི མནསཱ ཨཱཝཛྫིཏམཏྟེནེཝ ཀཏྟབྦཔཊིཀམྨཱནི. ཀཱནི པན ཏཱནཱིཏི? དིཝཱཝིཧཱརཝཱསཱི སུམཏྠེརོ ཏཱཝ ཨཱཧ – ‘‘ཨནཱཔཏྟིགམནཱིཡཱནི ཙིཏྟུཔྤཱདམཏྟཀཱནི ཡཱནི ‘ན པུན ཨེཝརཱུཔཾ ཀརིསྶཱམཱི’ཏི མནསཱ ཨཱཝཛྫིཏམཏྟེནེཝ སུཛ྄ཛྷནྟི. ཨདྷིཊྛཱནཱཝིཀམྨཾ ནཱམེཏཾ ཀཐིཏ’’ནྟི. ཨནྟེཝཱསིཀོ པནསྶ ཏིཔིཊཀཙཱུལ༹ནཱགཏྠེརོ པནཱཧ – ‘‘ཨིདཾ པཱཏིམོཀྑསཾཝརསཱིལསྶེཝ བྷཱཛནཱིཡཾ. ཏསྨཱ སབྦལཧུཀཾ དུཀྐཊདུབྦྷཱསིཏཾ ཨིདྷ ཝཛྫནྟི ཝེདིཏབྦཾ. ཝུཊྛཱནཱཝིཀམྨཾ ནཱམེཏཾ ཀཐིཏ’’ནྟི. ཨིཏིཨིམེསཱུཏི ¶ ཨེཝཾཔཀཱརེསུ ཨིམེསུ. ཝཛྫདསྶཱཝཱིཏི ཝཛྫཏོ དོསཏོ དསྶནསཱིལོ. བྷཡདསྶཱཝཱིཏི ¶ ཙཏུབྦིདྷསྶ བྷཡསྶ ཀཱརཎཏྟཱ བྷཡཏོ དསྶནསཱིལོ. ཨཱདཱིནཝདསྶཱཝཱིཏི ཨིདྷ ནིནྡཱཝཧནཏོ, ཨཱཡཏིཾ དུཀྑཝིཔཱཀཏོ, ཨུཔརིགུཎཱནཾ ཨནྟརཱཡཀརཎཏོ, ཝིཔྤཊིསཱརཛནནཏོ ཙ ཨེཏེན ནཱནཔྤཀཱརེན ཨཱདཱིནཝཏོ དསྶནསཱིལོ.

ནིསྶརཎདསྶཱཝཱིཏི ཡཾ ཏཏྠ ནིསྶརཎཾ ཏསྶ དསྶནསཱིལོ. ཀིཾ པནེཏྠ ནིསྶརཎནྟི? ཨཱཙརིཡཏྠེརཝཱདེ ¶ ཏཱཝ ‘‘ཨནཱཔཏྟིགམནཱིཡཏཱཡ སཏི ཨདྷིཊྛཱནཱཝིཀམྨཾ ནིསྶརཎ’’ནྟི ཀཐིཏཾ. ཨནྟེཝཱསིཀཏྠེརཝཱདེ ཏཱཝ ‘‘ཨཱཔཏྟིགམནཱིཡཏཱཡ སཏི ཝུཊྛཱནཱཝིཀམྨཾ ནིསྶརཎ’’ནྟི ཀཐིཏཾ.

ཏཏྠ ཏཐཱརཱུཔོ བྷིཀྑུ ཨཎུམཏྟཱནི ཝཛྫཱནི ཝཛྫཏོ བྷཡཏོ པསྶཏི ནཱམ. ཏཾ དསྶེཏུཾ ཨཡཾ ནཡོ ཀཐིཏོ – པརམཱཎུ ནཱམ, ཨཎུ ནཱམ, ཏཛྫཱརཱི ནཱམ, རཐརེཎུ ནཱམ, ལིཀྑཱ ནཱམ, ཨཱུཀཱ ནཱམ, དྷཉྙམཱསོ ནཱམ, ཨངྒུལཾ ནཱམ, ཝིདཏྠི ནཱམ, རཏནཾ ནཱམ, ཡཊྛི ནཱམ, ཨུསབྷཾ ནཱམ, གཱཝུཏཾ ནཱམ, ཡོཛནཾ ནཱམ. ཏཏྠ ‘པརམཱཎུ’ ནཱམ ཨཱཀཱསཀོཊྛཱསིཀོ མཾསཙཀྑུསྶ ཨཱཔཱཐཾ ནཱགཙྪཏི, དིབྦཙཀྑུསྶེཝ ཨཱགཙྪཏི. ‘ཨཎུ’ ནཱམ བྷིཏྟིཙྪིདྡཏཱལཙྪིདྡེཧི པཝིཊྛསཱུརིཡརསྨཱིསུ ཝཊྚི ཝཊྚི ཧུཏྭཱ པརིབྦྷམནྟོ པཉྙཱཡཏི. ‘ཏཛྫཱརཱི’ ནཱམ གོཔཐམནུསྶཔཐཙཀྐཔཐེསུ ཚིཛྫིཏྭཱ ཨུབྷོསུ པསྶེསུ ཨུགྒནྟྭཱ ཏིཊྛཏི. ‘རཐརེཎུ’ ནཱམ ཏཏྠ ཏཏྠེཝ ཨལླཱིཡཏི. ལིཀྑཱདཡོ པཱཀཊཱ ཨེཝ. ཨེཏེསུ པན ཚཏྟིཾས པརམཱཎཝོ ཨེཀསྶ ཨཎུནོ པམཱཎཾ. ཚཏྟིཾས ཨཎཱུ ཨེཀཱཡ ཏཛྫཱརིཡཱ པམཱཎཾ. ཚཏྟིཾས ཏཛྫཱརིཡོ ཨེཀོ རཐརེཎུ. ཚཏྟིཾས རཐརེཎཱུ ཨེཀཱ ལིཀྑཱ. སཏྟ ལིཀྑཱ ཨེཀཱ ཨཱུཀཱ. སཏྟ ཨཱུཀཱ ཨེཀོ དྷཉྙམཱསོ. སཏྟདྷཉྙམཱསཔྤམཱཎཾ ཨེཀཾ ཨངྒུལཾ. ཏེནངྒུལེན དྭཱདསངྒུལཱནི ཝིདཏྠི. དྭེ ཝིདཏྠིཡོ རཏནཾ. སཏྟ རཏནཱནི ཡཊྛི. ཏཱཡ ཡཊྛིཡཱ ཝཱིསཏི ཡཊྛིཡོ ཨུསབྷཾ. ཨསཱིཏི ཨུསབྷཱནི གཱཝུཏཾ. ཙཏྟཱརི གཱཝུཏཱནི ཡོཛནཾ. ཏེན ཡོཛནེན ཨཊྛསཊྛིཡོཛནསཏསཧསྶུབྦེདྷོ སིནེརུཔབྦཏརཱཛཱ. ཡོ བྷིཀྑུ ཨཎུམཏྟཾ ཝཛྫཾ ཨཊྛསཊྛིཡོཛནསཏསཧསྶུབྦེདྷསིནེརུཔབྦཏསདིསཾ ཀཏྭཱ དཊྛུཾ སཀྐོཏི – ཨཡཾ བྷིཀྑུ ཨཎུམཏྟཱནི ¶ ཝཛྫཱནི བྷཡཏོ པསྶཏི ནཱམ. ཡོཔི བྷིཀྑུ སབྦལཧུཀཾ ¶ དུཀྐཊདུབྦྷཱསིཏམཏྟཾ པཋམཔཱརཱཛིཀསདིསཾ ཀཏྭཱ དཊྛུཾ སཀྐོཏི – ཨཡཾ ཨཎུམཏྟཱནི ཝཛྫཱནི ཝཛྫཏོ བྷཡཏོ པསྶཏི ནཱམཱཏི ཝེདིཏབྦོ.

༥༡༦. སམཱདཱཡ སིཀྑཏི སིཀྑཱཔདེསཱུཏིཔདནིདྡེསེ བྷིཀྑུསིཀྑཱཏི བྷིཀྑཱུཧི སིཀྑིཏབྦསིཀྑཱ. སཱ བྷིཀྑུནཱིཧི སཱདྷཱརཎཱཔི ཨསཱདྷཱརཎཱཔི བྷིཀྑུསིཀྑཱ ཨེཝ ནཱམ. བྷིཀྑུནཱིསིཀྑཱཏི བྷིཀྑུནཱིཧི སིཀྑིཏབྦསིཀྑཱ. སཱཔི བྷིཀྑཱུཧི སཱདྷཱརཎཱཔི ཨསཱདྷཱརཎཱཔི བྷིཀྑུནཱིསིཀྑཱ ཨེཝ ནཱམ. སཱམཎེརསིཀྑམཱནསཱམཎེརཱིནཾ སིཀྑཱཔི ཨེཏྠེཝ པཝིཊྛཱ. ཨུཔཱསཀསིཀྑཱཏི ཨུཔཱསཀེཧི སིཀྑིཏབྦསིཀྑཱ. སཱ པཉྩསཱིལདསསཱིལཝསེན ཝཊྚཏི. ཨུཔཱསིཀཱསིཀྑཱཏི ཨུཔཱསིཀཱཧི སིཀྑིཏབྦསིཀྑཱ. སཱཔི པཉྩསཱིལདསསཱིལཝསེན ཝཊྚཏི. ཏཏྠ བྷིཀྑུབྷིཀྑུནཱིནཾ སིཀྑཱ ཡཱཝ ཨརཧཏྟམགྒཱ ཝཊྚཏི. ཨུཔཱསཀཨུཔཱསིཀཱནཾ སིཀྑཱ ¶ ཡཱཝ ཨནཱགཱམིམགྒཱ. ཏཏྲཱཡཾ བྷིཀྑུ ཨཏྟནཱ སིཀྑིཏབྦསིཀྑཱཔདེསུ ཨེཝ སིཀྑཏི. སེསསིཀྑཱ པན ཨཏྠུདྡྷཱརཝསེན སིཀྑཱཔདསྶ ཨཏྠདསྶ དསྶནཏྠཾ ཝུཏྟཱ. ཨིཏི ཨིམཱསུ སིཀྑཱསཱུཏི ཨེཝཾཔཀཱརཱསུ ཨེཏཱསུ སིཀྑཱསུ. སབྦེན སབྦནྟི སབྦེན སིཀྑཱསམཱདཱནེན སབྦཾ སིཀྑཾ. སབྦཐཱ སབྦནྟི སབྦེན སིཀྑིཏབྦཱཀཱརེན སབྦཾ སིཀྑཾ. ཨསེསཾ ནིསྶེསནྟི སེསཱབྷཱཝཏོ ཨསེསཾ; སཏིསམྨོསེན བྷིནྣསྶཱཔི སིཀྑཱཔདསྶ པུན པཱཀཏིཀཀརཎཏོ ནིསྶེསཾ. སམཱདཱཡ ཝཏྟཏཱིཏི སམཱདིཡིཏྭཱ གཧེཏྭཱ ཝཏྟཏི. ཏེན ཝུཙྩཏཱིཏི ཡེན ཀཱརཎེན ཨེཏཾ སབྦཾ སིཀྑཱཔདཾ སབྦེན སིཀྑིཏབྦཱཀཱརེན སམཱདིཡིཏྭཱ སིཀྑཏི པཱུརེཏི, ཏེན ཝུཙྩཏི ‘‘སམཱདཱཡ སིཀྑཏི སིཀྑཱཔདེསཱུ’’ཏི.

༥༡༧-༨. ཨིནྡྲིཡེསུ གུཏྟདྭཱརོ བྷོཛནེ མཏྟཉྙཱུཏིཔདདྭཡསྶ ནིདྡེསེ ཀཎྷཔཀྑསྶ པཋམཝཙནེ པཡོཛནཾ ཨཱཙཱརནིདྡེསེ ཝུཏྟནཡེནེཝ ཝེདིཏབྦཾ. ཏཏྠ ཀཏམཱ ཨིནྡྲིཡེསུ ཨགུཏྟདྭཱརཏཱཏིཨཱདཱིསུ པན ཡཾ ཝཏྟབྦཾ, ཏཾ སབྦཾ ནིཀྑེཔཀཎྜཝཎྞནཱཡཾ ཝུཏྟམེཝ.

༥༡༩. ཛཱགརིཡཱནུཡོགནིདྡེསེ ¶ པུབྦརཏྟཱཔརརཏྟནྟི ཨེཏྠ ཨཌྜྷརཏྟསངྑཱཏཱཡ རཏྟིཡཱ པུབྦེ པུབྦརཏྟཾ; ཨིམིནཱ པཋམཡཱམཉྩེཝ པཙྪཱབྷཏྟཉྩ གཎྷཱཏི ¶ . རཏྟིཡཱ པཙྪཱ ཨཔརརཏྟཾ; ཨིམིནཱ པཙྪིམཡཱམཉྩེཝ པུརེབྷཏྟཉྩ གཎྷཱཏི. མཛ྄ཛྷིམཡཱམོ པནསྶ བྷིཀྑུནོ ནིདྡཱཀིལམཐཝིནོདནོཀཱསོཏི ན གཧིཏོ. ཛཱགརིཡཱནུཡོགནྟི ཛཱགརིཡསྶ ཨསུཔནབྷཱཝསྶ ཨནུཡོགཾ. ཨནུཡུཏྟོ ཧོཏཱིཏི ཏཾ ཨནུཡོགསངྑཱཏཾ ཨཱསེཝནཾ བྷཱཝནཾ ཨནུཡུཏྟོ ཧོཏི སམྤཡུཏྟོ. ནིདྡེསེ པནསྶ ཨིདྷ བྷིཀྑུ དིཝསནྟི པུབྦཎྷོ, མཛ྄ཛྷནྷོ, སཱཡནྷོཏི ཏཡོཔི དིཝསཀོཊྛཱསཱ གཧིཏཱ. ཙངྐམེན ནིསཛྫཱཡཱཏི སཀལམྤི དིཝསཾ ཨིམིནཱ ཨིརིཡཱཔཐདྭཡེནེཝ ཝིཧརནྟོ. ཙིཏྟསྶ ཨཱཝརཎཏོ ཨཱཝརཎཱིཡེཧི དྷམྨེཧི པཉྩཧིཔི ནཱིཝརཎེཧི སབྦཱཀུསལདྷམྨེཧི ཝཱ ཙིཏྟཾ པརིསོདྷེཏི. ཏེཧི དྷམྨེཧི ཝིསོདྷེཏི པརིམོཙེཏི. ཋཱནཾ པནེཏྠ ཀིཉྩཱཔི ན གཧིཏཾ, ཙངྐམནིསཛྫཱསནྣིསྶིཏཾ པན ཀཏྭཱ གཧེཏབྦམེཝ. པཋམཡཱམནྟི སཀལསྨིམྤི པཋམཡཱམེ. མཛ྄ཛྷིམཡཱམནྟི རཏྟིནྡིཝསྶ ཚཊྛཀོཊྛཱསསངྑཱཏེ མཛ྄ཛྷིམཡཱམེ.

སཱིཧསེཡྻནྟི ཨེཏྠ ཀཱམབྷོགཱིསེཡྻཱ, པེཏསེཡྻཱ, སཱིཧསེཡྻཱ, ཏཐཱགཏསེཡྻཱཏི ཙཏསྶོ སེཡྻཱ. ཏཏྠ ‘‘ཡེབྷུཡྻེན, བྷིཀྑཝེ, ཀཱམབྷོགཱི ཝཱམེན པསྶེན སེནྟཱི’’ཏི ཨཡཾ ཀཱམབྷོགཱིསེཡྻཱ. ཏེསུ ཧི ཡེབྷུཡྻེན དཀྑིཎཔསྶེན སཡཱནོ ནཱམ ནཏྠི. ‘‘ཡེབྷུཡྻེན, བྷིཀྑཝེ ¶ , པེཏཱ ཨུཏྟཱནཱ སེནྟཱི’’ཏི ཨཡཾ པེཏསེཡྻཱ; ཨཔྤམཾསལོཧིཏཏྟཱ ཧི ཨཊྛིསངྒྷཱཊཛཊིཏཱ ཨེཀེན པསྶེན སཡིཏུཾ ན སཀྐོནྟི, ཨུཏྟཱནཱཝ སེནྟི. སཱིཧོ, བྷིཀྑཝེ, མིགརཱཛཱ དཀྑིཎེན པསྶེན སེཡྻཾ ཀཔྤེཏི…པེ… ཨཏྟམནོ ཧོཏཱི’’ཏི (ཨ. ནི. ༤.༢༤༦) ཨཡཾ སཱིཧསེཡྻཱ; ཏེཛུསྶདཏྟཱ ཧི སཱིཧོ མིགརཱཛཱ དྭེ པུརིམཔཱདེ ཨེཀསྨིཾ ཋཱནེ དྭེ པཙྪིམཔཱདེ ཨེཀསྨིཾ ཋཱནེ ཋཔེཏྭཱ ནངྒུཊྛཾ ཨནྟརསཏྠིམྷི པཀྑིཔིཏྭཱ ¶ པུརིམཔཱདཔཙྪིམཔཱདནངྒུཊྛཱནཾ ཋིཏོཀཱསཾ སལླཀྑེཏྭཱ དྭིནྣཾ པུརིམཔཱདཱནཾ མཏྠཀེ སཱིསཾ ཋཔེཏྭཱ སཡཏི; དིཝསམྤི སཡིཏྭཱ པབུཛ྄ཛྷམཱནོ ན ཨུཏྟསནྟོ པབུཛ྄ཛྷཏི, སཱིསཾ པན ཨུཀྑིཔིཏྭཱ པུརིམཔཱདཱདཱིནཾ ཋིཏོཀཱསཾ སལླཀྑེཏི; སཙེ ཀིཉྩི ཋཱནཾ ཝིཛཧིཏྭཱ ཋིཏཾ ཧོཏི ‘ནཡིདཾ ཏུཡ྄ཧཾ ཛཱཏིཡཱ ན སཱུརབྷཱཝསྶ ཨནུརཱུཔ’ནྟི ཨནཏྟམནོ ཧུཏྭཱ ཏཏྠེཝ སཡཏི, ན གོཙརཱཡ པཀྐམཏི; ཨཝིཛཧིཏྭཱ ཋིཏེ པན ‘ཏུཡ྄ཧཾ ཛཱཏིཡཱ ཙ སཱུརབྷཱཝསྶ ཙ ཨནུརཱུཔམིད’ནྟི ཧཊྛཏུཊྛོ ཨུཊྛཱཡ སཱིཧཝིཛམྦྷིཏཾ ཝིཛམྦྷིཏྭཱ ཀེསརབྷཱརཾ ¶ ཝིདྷུནིཏྭཱ ཏིཀྑཏྟུཾ སཱིཧནཱདཾ ནདིཏྭཱ གོཙརཱཡ པཀྐམཏི. ཙཏུཏྠཛ྄ཛྷཱནསེཡྻཱ པན ཏཐཱགཏསེཡྻཱཏི ཝུཙྩཏི. ཏཱསུ ཨིདྷ སཱིཧསེཡྻཱ ཨཱགཏཱ. ཨཡཉྷི ཏེཛུསྶདཨིརིཡཱཔཐཏྟཱ ཨུཏྟམསེཡྻཱ ནཱམ.

པཱདེ པཱདནྟི དཀྑིཎཔཱདེ ཝཱམཔཱདཾ. ཨཙྩཱདྷཱཡཱཏི ཨཏིཨཱདྷཱཡ ཨཱིསཀཾ ཨཏིཀྐམྨ ཋཔེཏྭཱ གོཔྥཀེན ཧི གོཔྥཀེ ཛཱཎུནཱ ཝཱ ཛཱཎུམྷི སངྒྷཊྚིཡམཱནེ ཨབྷིཎྷཾ ཝེདནཱ ཨུཔྤཛྫཏི, ཙིཏྟཾ ཨེཀགྒཾ ན ཧོཏི, སེཡྻཱ ཨཕཱསུཀཱ ཧོཏི; ཡཐཱ པན ན སངྒྷཊྚེཏི, ཨེཝཾ ཨཏིཀྐམྨ ཋཔིཏེ ཝེདནཱ ནུཔྤཛྫཏི, ཙིཏྟཾ ཨེཀགྒཾ ཧོཏི, སེཡྻཱ ཕཱསུཀཱ ཧོཏི. ཏེན ཝུཏྟཾ ‘‘པཱདེ པཱདཾ ཨཙྩཱདྷཱཡཱ’’ཏི. སཏོ སམྤཛཱནོཏི སཏིཡཱ ཙེཝ སམྤཛཱནཔཉྙཱཡ ཙ སམནྣཱགཏོ ཧུཏྭཱ. ཨིམིནཱ སུཔརིགྒཱཧཀཾ སཏིསམྤཛཉྙཾ ཀཐིཏཾ. ཨུཊྛཱནསཉྙཾ མནསིཀརིཏྭཱཏི ཨསུཀཝེལཱཡ ནཱམ ཨུཊྛཧིསྶཱམཱི’ཏི ཨེཝཾ ཨུཊྛཱནཝེལཱཔརིཙྪེདཀཾ ཨུཊྛཱནསཉྙཾ ཙིཏྟེ ཨུཔེཏྭཱ. ཨེཝཾ ཀཏྭཱ ནིཔནྣོ ཧི ཡཐཱཔརིཙྪིནྣཀཱལེཡེཝ ཨུཊྛཱཏུཾ ཡུཏྟོ.

༥༢༠-༥༢༡. སཱཏཙྩཾ ནེཔཀྐནྟི སཏཏཾ པཝཏྟཡིཏབྦཏོ སཱཏཙྩསངྑཱཏཾ ཝཱིརིཡཉྩེཝ པརིཔཱཀགཏཏྟཱ ནེཔཀྐསངྑཱཏཾ པཉྙཉྩ ཡུཏྟོ ཨནུཡུཏྟོ པཝཏྟཡམཱནོཡེཝ ཛཱགརིཡཱནུཡོགཾ ཨནུཡུཏྟོ ཝིཧརཏཱིཏི ཨཏྠོ. ཨེཏྠ ཙ ཝཱིརིཡཾ ལོཀིཡལོཀུཏྟརམིསྶཀཾ ཀཐིཏཾ, པཉྙཱཔི ཝཱིརིཡགཏིཀཱ ཨེཝ; ཝཱིརིཡེ ལོཀིཡམྷི ལོཀིཡཱ, ལོཀུཏྟརེ ལོཀུཏྟརཱཏི ཨཏྠོ.

༥༢༢. བོདྷིཔཀྑིཡཱནཾ ¶ དྷམྨཱནནྟི ཙཏུསཙྩབོདྷིསངྑཱཏསྶ ¶ མགྒཉཱཎསྶ པཀྑེ བྷཝཱནཾ དྷམྨཱནཾ. ཨེཏྟཱཝཏཱ སབྦེཔི སཏྟཏིཾས བོདྷིཔཀྑིཡདྷམྨེ སམཱུཧཏོ གཧེཏྭཱ ལོཀིཡཱཡཔི བྷཱཝནཱཡ ཨེཀཱརམྨཎེ ཨེཀཏོ པཝཏྟནསམཏྠེ བོཛ྄ཛྷངྒེཡེཝ དསྶེནྟོ སཏྟ བོཛ྄ཛྷངྒཱཏིཨཱདིམཱཧ. ཏེ ལོཀིཡལོཀུཏྟརམིསྶཀཱཝ ཀཐིཏཱཏི ཝེདིཏབྦཱ. སེསམེཏྠ ཧེཊྛཱ ཝུཏྟནཡཏྟཱ ཨུཏྟཱནཏྠམེཝ.

༥༢༣. ཨབྷིཀྐནྟེཏིཨཱདིནིདྡེསེ ཨབྷིཀྐནྟེ པཊིཀྐནྟེཏི ཨེཏྠ ཏཱཝ ཨབྷིཀྐནྟཾ ཝུཙྩཏི པུརཏོ གམནཾ. པཊིཀྐནྟནྟི ནིཝཏྟནཾ. ཏདུབྷཡམྤི ཙཏཱུསུ ཨིརིཡཱཔཐེསུ ¶ ལབྦྷཏི. གམནེ ཏཱཝ པུརཏོ ཀཱཡཾ ཨབྷིཧརནྟོ ཨབྷིཀྐམཏི ནཱམ, པཊིནིཝཏྟནྟོ པཊིཀྐམཏི ནཱམ. ཋཱནེཔི ཋིཏཀོཝ ཀཱཡཾ པུརཏོ ཨོནཱམེནྟོ ཨབྷིཀྐམཏི ནཱམ, པཙྪཏོ ཨཔནཱམེནྟོ པཊིཀྐམཏི ནཱམ. ནིསཛྫཱཡཔི ནིསིནྣཀོཝ ཨཱསནྣསྶ པུརིམཨངྒཱབྷིམུཁོ སཾསརནྟོ ཨབྷིཀྐམཏི ནཱམ, པཙྪིམཨངྒཔྤདེསཾ པཙྩཱསཾསརནྟོ པཊིཀྐམཏི ནཱམ. ནིཔཛྫཱཡཔི ཨེསེཝ ནཡོ.

སམྤཛཱནཀཱརཱི ཧོཏཱིཏི སམྤཛཉྙེན སབྦཀིཙྩཀཱརཱི, སམྤཛཉྙསྶེཝ ཝཱ ཀཱརཱི. སོ ཧི ཨབྷིཀྐནྟཱདཱིསུ སམྤཛཉྙཾ ཀརོཏེཝ, ན ཀཏྠཙི སམྤཛཉྙཝིརཧིཏོ ཧོཏི. ཏཾ པན སམྤཛཉྙཾ ཡསྨཱ སཏིསམྤཡུཏྟམེཝ ཧོཏི, ཏེནསྶ ནིདྡེསེ ‘‘སཏོ སམྤཛཱནོ ཨབྷིཀྐམཏི, སཏོ སམྤཛཱནོ པཊིཀྐམཏཱི’’ཏི ཝུཏྟཾ.

ཨཡཉྷི ཨབྷིཀྐམནྟོ ཝཱ པཊིཀྐམནྟོ ཝཱ ན མུཊྛསྶཏཱི ཨསམྤཛཱནོ ཧོཏི; སཏིཡཱ པན སམནྣཱགཏོ པཉྙཱཡ ཙ སམྤཛཱནོཡེཝ ཨབྷིཀྐམཏི ཙེཝ པཊིཀྐམཏི ཙ; སབྦེསུ ཨབྷིཀྐམཱདཱིསུ ཙཏུབྦིདྷཾ སམྤཛཉྙཾ ཨོཏཱརེཏི. ཙཏུབྦིདྷཉྷི སམྤཛཉྙཾ – སཱཏྠཀསམྤཛཉྙཾ, སཔྤཱཡསམྤཛཉྙཾ, གོཙརསམྤཛཉྙཾ, ཨསམྨོཧསམྤཛཉྙནྟི. ཏཏྠ ཨབྷིཀྐམནཙིཏྟེ ཨུཔྤནྣེ ཙིཏྟཝསེནེཝ ཨགནྟྭཱ ‘ཀིནྣུ མེ ཨེཏྠ གཏེན ཨཏྠོ ཨཏྠི, ནཏྠཱི’ཏི ཨཏྠཱནཏྠཾ པརིགྒཧེཏྭཱ ཨཏྠཔརིགྒཎྷནཾ ‘སཱཏྠཀསམྤཛཉྙཾ’. ཏཏྠ ཙ ‘ཨཏྠོ’ཏི ཙེཏིཡདསྶནབོདྷིདསྶནསངྒྷདསྶནཐེརདསྶནཨསུབྷདསྶནཱདིཝསེན དྷམྨཏོ ཝཌྜྷི. ཙེཏིཡཾ ཝཱ བོདྷིཾ ཝཱ དིསྭཱཔི ཧི བུདྡྷཱརམྨཎཾ ¶ པཱིཏིཾ, སངྒྷདསྶནེན སངྒྷཱརམྨཎཾ པཱིཏིཾ ཨུཔྤཱདེཏྭཱ ཏདེཝ ཁཡཝཡཏོ སམྨསནྟོ ཨརཧཏྟཾ པཱཔུཎཱཏི. ཐེརེ དིསྭཱ ཏེསཾ ཨོཝཱདེ པཏིཊྛཱཡ, ཨསུབྷཾ དིསྭཱ ཏཏྠ པཋམཛ྄ཛྷཱནཾ ཨུཔྤཱདེཏྭཱ ཏདེཝ ཁཡཝཡཏོ སམྨསནྟོ ཨརཧཏྟཾ པཱཔུཎཱཏི. ཏསྨཱ ཨེཏེསཾ དསྶནཾ ¶ སཱཏྠཾ. ཀེཙི པན ‘‘ཨཱམིསཏོཔི ཝཌྜྷི ཨཏྠོཡེཝ; ཏཾ ནིསྶཱཡ བྲཧྨཙརིཡཱནུགྒཧཱཡ པཊིཔནྣཏྟཱ’’ཏི ཝདནྟི.

ཏསྨིཾ པན གམནེ སཔྤཱཡཱསཔྤཱཡཾ པརིགྒཧེཏྭཱ སཔྤཱཡཔརིགྒཎྷནཾ ‘སཔྤཱཡསམྤཛཉྙཾ’, སེཡྻཐིདཾ – ཙེཏིཡདསྶནཾ ཏཱཝ སཱཏྠཾ. སཙེ པན ཙེཏིཡསྶ མཧཏིཡཱ པཱུཛཱཡ དསདྭཱདསཡོཛནནྟརེ པརིསཱ སནྣིཔཏནྟི ¶ , ཨཏྟནོ ཝིབྷཝཱནུརཱུཔཾ ཨིཏྠིཡོཔི པུརིསཱཔི ཨལངྐཏཔཊིཡཏྟཱ ཙིཏྟཀམྨརཱུཔཀཱནི ཝིཡ སཉྩརནྟི, ཏཏྲ ཙསྶ ཨིཊྛེ ཨཱརམྨཎེ ལོབྷོ, ཨནིཊྛེ པཊིགྷོ, ཨསམཔེཀྑནེ མོཧོ ཨུཔྤཛྫཏི, ཀཱཡསཾསགྒཱཔཏྟིཾ ཝཱ ཨཱཔཛྫཏི, ཛཱིཝིཏབྲཧྨཙརིཡཱནཾ ཝཱ ཨནྟརཱཡོ ཧོཏི. ཨེཝཾ ཏཾ ཋཱནཾ ཨསཔྤཱཡཾ ཧོཏི. ཝུཏྟཔྤཀཱརཨནྟརཱཡཱབྷཱཝེ སཔྤཱཡཾ. བོདྷིདསྶནེཔི ཨེསེཝ ནཡོ. སངྒྷདསྶནམྤི སཱཏྠཾ. སཙེ པན ཨནྟོགཱམེ མཧཱམཎྜཔཾ ཀཱརེཏྭཱ སབྦརཏྟིཾ དྷམྨསྶཝནཾ ཀརོནྟེསུ མནུསྶེསུ ཝུཏྟཔྤཀཱརེནེཝ ཛནསནྣིཔཱཏོ ཙེཝ ཨནྟརཱཡོ ཙ ཧོཏི. ཨེཝཾ ཏཾ ཋཱནཾ ཨསཔྤཱཡཾ ཧོཏི; ཨནྟརཱཡཱབྷཱཝེ སཔྤཱཡཾ ཧོཏི. མཧཱཔརིསཔརིཝཱརཱནཾ ཐེརཱནཾ དསྶནེཔི ཨེསེཝ ནཡོ.

ཨསུབྷདསྶནམྤི སཱཏྠཾ. ཏདཏྠདཱིཔནཏྠཉྩ ཨིདཾ ཝཏྠུ – ཨེཀོ ཀིར དཧརབྷིཀྑུ སཱམཎེརཾ གཧེཏྭཱ དནྟཀཊྛཏྠཱཡ གཏོ. སཱམཎེརོ མགྒཱ ཨོཀྐམིཏྭཱ པུརཏོ གཙྪནྟོ ཨསུབྷཾ དིསྭཱ པཋམཛ྄ཛྷཱནཾ ནིབྦཏྟེཏྭཱ ཏདེཝ པཱདཀཾ ཀཏྭཱ སངྑཱརེ སམྨསནྟོ ཏཱིཎི ཕལཱནི སཙྪིཀཏྭཱ ཨུཔརིམགྒཏྠཱཡ ཀམྨཊྛཱནཾ པརིགྒཧེཏྭཱ ཨཊྛཱསི. དཧརོ ཏཾ ཨཔསྶནྟོ ‘‘སཱམཎེརཱ’’ཏི པཀྐོསི. སོ ‘མཡཱ པབྦཛིཏདིཝསཏོ པཊྛཱཡ བྷིཀྑུནཱ སདྡྷིཾ དྭེ ཀཐཱ ནཱམ ན ཀཐིཏཔུབྦཱ, ཨཉྙསྨིཾ དིཝསེ ཨུཔརིཝིསེསཾ ནིབྦཏྟེསྶཱམཱི’ཏི ཙིནྟེཏྭཱ ‘‘ཀིཾ, བྷནྟེ’’ཏི པཊིཝཙནཾ ཨདཱསི. ‘‘ཨེཧཱི’’ཏི ཙ ཝུཏྟོ ཨེཀཝཙནེནེཝ ཨཱགནྟྭཱ ‘‘བྷནྟེ, ཨིམིནཱ ཏཱཝ མགྒེན གནྟྭཱ མཡཱ ཋིཏོཀཱསེ མུཧུཏྟཾ པུརཏྠཱབྷིམུཁོ ¶ ཋཏྭཱ ཨོལོཀེཐཱ’’ཏི ཨཱཧ. སོ ཏཐཱ ཀཏྭཱ ཏེན པཏྟཝིསེསམེཝ པཱཔུཎི. ཨེཝཾ ཨེཀཾ ཨསུབྷཾ དྭིནྣཾ ཛནཱནཾ ཨཏྠཱཡ ཛཱཏཾ. ཨེཝཾ སཱཏྠམྤི པནེཏཾ པུརིསསྶ མཱཏུགཱམཱསུབྷཾ ཨསཔྤཱཡཾ, མཱཏུགཱམསྶ ཙ པུརིསཱསུབྷཾ, སབྷཱགམེཝ སཔྤཱཡནྟི. ཨེཝཾ སཔྤཱཡཔརིགྒཎྷནཾ སཔྤཱཡསམྤཛཉྙཾ ནཱམ.

ཨེཝཾ པརིགྒཧིཏསཱཏྠསཔྤཱཡསྶ པན ཨཊྛཏིཾསཱཡ ཀམྨཊྛཱནེསུ ཨཏྟནོ ཙིཏྟརུཙིཡཾ ཀམྨཊྛཱནསངྑཱཏཾ ¶ གོཙརཾ ཨུགྒཧེཏྭཱ བྷིཀྑཱཙཱརགོཙརེ ཏཾ གཧེཏྭཱཝ གམནཾ ‘གོཙརསམྤཛཉྙཾ’ ནཱམ. ཏསྶཱཝིབྷཱཝནཏྠཾ ཨིདཾ ཙཏུཀྐཾ ཝེདིཏབྦཾ –

ཨིདྷེཀཙྩོ བྷིཀྑུ ཧརཏི ན པཙྩཱཧརཏི, ཨེཀཙྩོ ན ཧརཏི པཙྩཱཧརཏི, ཨེཀཙྩོ པན ནེཝ ཧརཏི ན པཙྩཱཧརཏི, ཨེཀཙྩོ ཧརཏི ཙ པཙྩཱཧརཏི ¶ ཙ. ཏཏྠ ཡོ བྷིཀྑུ དིཝསཾ ཙངྐམེན ནིསཛྫཱཡ ཨཱཝརཎཱིཡེཧི དྷམྨེཧི ཙིཏྟཾ པརིསོདྷེཏྭཱ, ཏཐཱ རཏྟིཡཱ པཋམཡཱམེ མཛ྄ཛྷིམཡཱམེ སེཡྻཾ ཀཔྤེཏྭཱ པཙྪིམཡཱམེཔི ནིསཛྫཱཙངྐམེཧི ཝཱིཏིནཱམེཏྭཱ པགེཝ ཙེཏིཡངྒཎབོདྷིཡངྒཎཝཏྟཾ ཀཏྭཱ བོདྷིརུཀྑེ ཨུདཀཾ ཨཱསིཉྩིཏྭཱ པཱནཱིཡཾ པརིབྷོཛནཱིཡཾ པཙྩུཔཊྛཱཔེཏྭཱ ཨཱཙརིཡུཔཛ྄ཛྷཱཡཝཏྟཱདཱིནི སབྦཱནི ཁནྡྷཀཝཏྟཱནི སམཱདཱཡ ཝཏྟཏི, སོ སརཱིརཔརིཀམྨཾ ཀཏྭཱ སེནཱསནཾ པཝིསིཏྭཱ དྭེ ཏཡོ པལླངྐེ ཨུསུམཾ གཱཧཱཔེནྟོ ཀམྨཊྛཱནཾ ཨནུཡུཉྫིཏྭཱ, བྷིཀྑཱཙཱརཝེལཱཡ ཨུཊྛཧིཏྭཱ ཀམྨཊྛཱནསཱིསེནེཝ པཏྟཙཱིཝརམཱདཱཡ སེནཱསནཏོ ནིཀྑམིཏྭཱ ཀམྨཊྛཱནཾ མནསིཀརོནྟོཝ ཙེཏིཡངྒཎཾ གནྟྭཱ, སཙེ བུདྡྷཱནུསྶཏིཀམྨཊྛཱནཾ ཧོཏི ཏཾ ཨཝིསྶཛྫེཏྭཱཝ ཙེཏིཡངྒཎཾ པཝིསཏི, ཨཉྙཾ ཙེ ཀམྨཊྛཱནཾ ཧོཏི སོཔཱནམཱུལེ ཋཏྭཱ ཧཏྠེན གཧིཏབྷཎྜཾ ཝིཡ ཏཾ ཋཔེཏྭཱ བུདྡྷཱརམྨཎཾ པཱིཏིཾ གཧེཏྭཱ ཙེཏིཡངྒཎཾ ཨཱརུཡ྄ཧ མཧནྟཾ ཙེཏིཡཾ ཙེ, ཏིཀྑཏྟུཾ པདཀྑིཎཾ ཀཏྭཱ ཙཏཱུསུ ཋཱནེསུ ཝནྡིཏབྦཾ, ཁུདྡཀཾ ཙེ, ཏཐེཝ པདཀྑིཎཾ ཀཏྭཱ ཨཊྛསུ ཋཱནེསུ ཝནྡིཏབྦཾ. ཙེཏིཡཾ ཝནྡིཏྭཱ བོདྷིཡངྒཎཾ པཏྟེནཱཔི བུདྡྷསྶ བྷགཝཏོ སམྨུཁཱ ཝིཡ ནིཔཙྩཱཀཱརཾ དསྶེཏྭཱ བོདྷི ཝནྡིཏབྦཱ.

སོ ཨེཝཾ ཙེཏིཡཉྩ བོདྷིཉྩ ཝནྡིཏྭཱ པཊིསཱམིཏཊྛཱནཾ གནྟྭཱ, པཊིསཱམིཏཾ བྷཎྜཀཾ ཧཏྠེན གཎྷནྟོ ¶ ཝིཡ, ནིཀྑིཏྟཀམྨཊྛཱནཾ གཧེཏྭཱ གཱམསམཱིཔེ ཀམྨཊྛཱནསཱིསེནེཝ ཙཱིཝརཾ པཱརུཔིཏྭཱ གཱམཾ པིཎྜཱཡ པཝིསཏི. ཨཐ ནཾ མནུསྶཱ དིསྭཱ ‘ཨཡྻོ ནོ ཨཱགཏོ’ཏི པཙྩུགྒནྟྭཱ པཏྟཾ གཧེཏྭཱ ཨཱསནསཱལཱཡ ཝཱ གེཧེ ཝཱ ནིསཱིདཱཔེཏྭཱ ཡཱགུཾ དཏྭཱ ཡཱཝ བྷཏྟཾ ན ནིཊྛཱཏི ཏཱཝ པཱདེ དྷོཝིཏྭཱ ཏེལེན མཀྑེཏྭཱ པུརཏོ ནིསཱིདིཏྭཱ པཉྷཾ ཝཱ པུཙྪནྟི དྷམྨཾ ཝཱ སོཏུཀཱམཱ ཧོནྟི. སཙེཔི ན ཀཐཱཔེནྟི ‘‘ཛནསངྒཧཏྠཾ དྷམྨཀཐཱ ནཱམ ཀཱཏབྦཱཡེཝཱ’’ཏི ཨཊྛཀཐཱཙརིཡཱ ཝདནྟི. དྷམྨཀཐཱ ཧི ཀམྨཊྛཱནཝིནིམུཏྟཱ ནཱམ ནཏྠི. ཏསྨཱ ཀམྨཊྛཱནསཱིསེནེཝ ཨཱཧཱརཾ པརིབྷུཉྫིཏྭཱ ཨནུམོདནཾ ཝཏྭཱ ནིཝཏྟིཡམཱནེཧིཔི མནུསྶེཧི ཨནུགཏོཝ གཱམཏོ ནིཀྑམིཏྭཱ ཏཏྠ ཏེ ནིཝཏྟེཏྭཱ མགྒཾ པཊིཔཛྫཏི.

ཨཐ ¶ ནཾ པུརེཏརཾ ནིཀྑམིཏྭཱ བཧིགཱམེ ཀཏབྷཏྟཀིཙྩཱ སཱམཎེརདཧརབྷིཀྑཱུ དིསྭཱ པཙྩུགྒནྟྭཱ པཏྟཙཱིཝརམསྶ གཎྷནྟི. པོརཱཎཀབྷིཀྑཱུ ཀིར ‘ཨམྷཱཀཾ ཨུཔཛ྄ཛྷཱཡོ, ཨམྷཱཀཾ ཨཱཙརིཡོ’ཏི ན མུཁཾ ཨོལོཀེཏྭཱ ཝཏྟཾ ཀརོནྟི, སམྤཏྟཔརིཙྪེདེནེཝ ཀརོནྟི. ཏེ ཏཾ པུཙྪནྟི ‘‘བྷནྟེ, ཨེཏེ མནུསྶཱ ¶ ཏུམྷཱཀཾ ཀིཾ ཧོནྟི? མཱཏིཔཀྑཏོ སམྦནྡྷཱ པིཏིཔཀྑཏོ’’ཏི? ‘‘ཀིཾ དིསྭཱ པུཙྪཐཱ’’ཏི? ‘‘ཏུམྷེསུ ཨེཏེསཾ པེམཾ བཧུམཱན’’ནྟི. ‘‘ཨཱཝུསོ, ཡཾ མཱཏཱཔིཏཱུཧིཔི དུཀྐརཾ ཏཾ ཨེཏེ མནུསྶཱ ཨམྷཱཀཾ ཀརོནྟི. པཏྟཙཱིཝརམྤི ནོ ཨེཏེསཾ སནྟཀམེཝ, ཨེཏེསཾ ཨཱནུབྷཱཝེན ནེཝ བྷཡེ བྷཡཾ, ན ཚཱཏཀེ ཚཱཏཀཾ ཛཱནཱམ. ཨེདིསཱ ནཱམ ཨམྷཱཀཾ ཨུཔཀཱརིནོ ནཏྠཱི’’ཏི ཏེསཾ གུཎེ ཀཐེནྟོ གཙྪཏི. ཨཡཾ ཝུཙྩཏི ‘ཧརཏི ན པཙྩཱཧརཏཱི’ཏི.

ཡསྶ པན པགེཝ ཝུཏྟཔྤཀཱརཾ ཝཏྟཔཊིཔཏྟིཾ ཀརོནྟསྶ ཀམྨཛཏེཛོ པཛྫལཏི, ཨནུཔཱདིནྣཀཾ མུཉྩིཏྭཱ ཨུཔཱདིནྣཀཾ གཎྷཱཏི, སརཱིརཏོ སེདཱ མུཙྩནྟི, ཀམྨཊྛཱནཾ ཝཱིཐིཾ ནཱརོཧཏི, སོ པགེཝ པཏྟཙཱིཝརམཱདཱཡ ཝེགསཱཝ ཙེཏིཡཾ ཝནྡིཏྭཱ གོརཱུཔཱནཾ ནིཀྑམནཝེལཱཡམེཝ གཱམཾ ཡཱགུབྷིཀྑཱཡ པཝིསིཏྭཱ ཡཱགུཾ ལབྷིཏྭཱ ཨཱསནསཱལཾ གནྟྭཱ པིཝཏི. ཨཐསྶ དྭཏྟིཀྑཏྟུཾ ཨཛ྄ཛྷོཧརཎམཏྟེནེཝ ཀམྨཛཏེཛོདྷཱཏུ ཨུཔཱདིནྣཀཾ མུཉྩིཏྭཱ ཨནུཔཱདིནྣཀཾ ¶ གཎྷཱཏི, གྷཊསཏེན ནྷཱཏོ ཝིཡ ཏེཛོདྷཱཏུཔརིལཱ༹ཧནིབྦཱནཾ པཏྭཱ ཀམྨཊྛཱནསཱིསེན ཡཱགུཾ པརིབྷུཉྫིཏྭཱ པཏྟཉྩ མུཁཉྩ དྷོཝིཏྭཱ ཨནྟརཱབྷཏྟེ ཀམྨཊྛཱནཾ མནསིཀཏྭཱ ཨཝསེསཊྛཱནེ པིཎྜཱཡ ཙརིཏྭཱ ཀམྨཊྛཱནསཱིསེན ཨཱཧཱརཾ པརིབྷུཉྫིཏྭཱ ཏཏོ པཊྛཱཡ པོངྑཱནུཔོངྑཾ ཨུཔཊྛཧམཱནཾ ཀམྨཊྛཱནཾ གཧེཏྭཱཝ ཨཱགཙྪཏི. ཨཡཾ ཝུཙྩཏི ‘ན ཧརཏི པཙྩཱཧརཏཱི’ཏི. ཨེདིསཱ ཙ བྷིཀྑཱུ ཡཱགུཾ པིཝིཏྭཱ ཝིཔསྶནཾ ཨཱརབྷིཏྭཱ བུདྡྷསཱསནེ ཨརཧཏྟཾ པཏྟཱ ནཱམ གཎནཔཐཾ ཝཱིཏིཝཏྟཱ. སཱིཧལ༹དཱིཔེཡེཝ ཏེསུ ཏེསུ གཱམེསུ ཨཱསནསཱལཱཡ ན ཏཾ ཨཱསནཾ ཨཏྠི, ཡཏྠ ཡཱགུཾ པིཝིཏྭཱ ཨརཧཏྟཾ པཏྟཱ བྷིཀྑཱུ ནཏྠཱིཏི.

ཡོ པམཱདཝིཧཱརཱི ཧོཏི ནིཀྑིཏྟདྷུརོ སབྦཝཏྟཱནི བྷིནྡིཏྭཱ པཉྩཝིདྷཙེཏོཁཱིལཝིནིབནྡྷབདྡྷཙིཏྟོ ཝིཧརནྟོ ‘ཀམྨཊྛཱནཾ ནཱམ ཨཏྠཱི’ཏིཔི སཉྙཾ ཨཀཏྭཱ གཱམཾ པིཎྜཱཡ པཝིསིཏྭཱ ཨནནུལོམིཀེན གིཧཱིསཾསགྒེན སཾསཊྛོ ཙརིཏྭཱ ཙ བྷུཉྫིཏྭཱ ཙ ཏུཙྪོ ནིཀྑམཏི – ཨཡཾ ཝུཙྩཏི ‘ནེཝ ཧརཏི ན པཙྩཱཧརཏཱི’ཏི.

ཡོ ¶ པནཱཡཾ ‘‘ཧརཏི ཙ པཙྩཱཧརཏི ཙཱ’’ཏི ཝུཏྟོ, སོ གཏཔཙྩཱགཏིཀཝཏྟཝསེན ཝེདིཏབྦོ – ཨཏྠཀཱམཱ ཧི ཀུལཔུཏྟཱ སཱསནེ པབྦཛིཏྭཱ ¶ དསམྤི ཝཱིསམྤི ཏིཾསམྤི ཙཏྟཱརཱིསམྤི པཉྙཱསམྤི སཏམྤི ཨེཀཏོ ཝསནྟཱ ཀཏིཀཝཏྟཾ ཀཏྭཱ ཝིཧརནྟི – ‘‘ཨཱཝུསོ, ཏུམྷེ ན ཨིཎཊྚཱ, ན བྷཡཊྚཱ, ན ཨཱཛཱིཝིཀཱཔཀཏཱ པབྦཛིཏཱ; དུཀྑཱ མུཉྩིཏུཀཱམཱ པནེཏྠ པབྦཛིཏཱ. ཏསྨཱ གམནེ ཨུཔྤནྣཀིལེསཾ གམནེཡེཝ ནིགྒཎྷཐ. ཋཱནེ, ནིསཛྫཱཡ, སཡནེ ཨུཔྤནྣཀིལེསཾ སཡནེཡེཝ ནིགྒཎྷཐཱ’’ཏི.

ཏེ ཨེཝཾ ཀཏིཀཝཏྟཾ ཀཏྭཱ བྷིཀྑཱཙཱརཾ གཙྪནྟཱ, ཨཌྜྷཨུསབྷཨུསབྷཨཌྜྷགཱཝུཏགཱཝུཏནྟརེསུ པཱསཱཎཱ ཧོནྟི, ཏཱཡ སཉྙཱཡ ཀམྨཊྛཱནཾ མནསིཀརོནྟཱཝ གཙྪནྟི. སཙེ ཀསྶཙི གམནེ ཀིལེསོ ཨུཔྤཛྫཏི, ཏཏྠེཝ ནཾ ནིགྒཎྷཱཏི. ཏཐཱ ཨསཀྐོནྟོ ཏིཊྛཏི. ཨཐསྶ པཙྪཏོ ཨཱགཙྪནྟོཔི ཏིཊྛཏི. སོ ‘ཨཡཾ བྷིཀྑུ ཏུཡ྄ཧཾ ཨུཔྤནྣཾ ཝིཏཀྐཾ ཛཱནཱཏི, ཨནནུཙྪཝིཀཾ ཏེ ཨེཏ’ནྟི ཨཏྟཱནཾ པཊིཙོདེཏྭཱ ཝིཔསྶནཾ ཝཌྜྷེཏྭཱ ཨརིཡབྷཱུམིཾ ཨོཀྐམཏི. ཏཐཱ ཨསཀྐོནྟོ ནིསཱིདཏི. ཨཐསྶ པཙྪཏོ ཨཱགཙྪནྟོཔི ནིསཱིདཏཱིཏི སོ ཨེཝ ནཡོ. ཨརིཡབྷཱུམིཾ ¶ ཨོཀྐམིཏུཾ ཨསཀྐོནྟོཔི ཏཾ ཀིལེསཾ ཝིཀྑམྦྷེཏྭཱ ཀམྨཊྛཱནཾ མནསིཀརོནྟོཝ གཙྪཏི, ན ཀམྨཊྛཱནཝིཔྤཡུཏྟེན ཙིཏྟེན པཱདཾ ཨུདྡྷརཏི, ཨུདྡྷརཏི ཙེ པཊིནིཝཏྟིཏྭཱ པུརིམཔདེསཉྙེཝ ཨེཏི, ཨཱལིནྡཀཝཱསཱི མཧཱཕུསྶདེཝཏྠེརོ ཝིཡ. སོ ཀིར ཨེཀཱུནཝཱིསཏི ཝསྶཱནི གཏཔཙྩཱགཏཝཏྟཾ པཱུརེནྟོ ཨེཝ ཝིཧཱསི. མནུསྶཱཔི ཨནྟརཱམགྒེ ཀསནྟཱ ཙ ཝཔནྟཱ ཙ མདྡནྟཱ ཙ ཀམྨཱནི ཙ ཀརོནྟཱ ཐེརཾ ཏཐཱགཙྪནྟཾ དིསྭཱ ‘‘ཨཡཾ ཐེརོ པུནཔྤུནཾ ནིཝཏྟིཏྭཱ གཙྪཏི, ཀིཾ ནུ ཁོ མགྒམཱུལ༹ྷོ ཨུདཱཧུ ཀིཉྩི པམུཊྛོ’’ཏི སམུལླཔནྟི. སོ ཏཾ ཨནཱདིཡིཏྭཱ ཀམྨཊྛཱནཡུཏྟཙིཏྟེནེཝ སམཎདྷམྨཾ ཀརོནྟོ ཝཱིསཏིཝསྶབྦྷནྟརེ ཨརཧཏྟཾ པཱཔུཎི. ཨརཧཏྟཔཏྟདིཝསེ ཙསྶ ཙངྐམནཀོཊིཡཾ ཨདྷིཝཏྠཱ དེཝཏཱ ཨངྒུལཱིཧི དཱིཔཾ ཨུཛྫཱལེཏྭཱ ཨཊྛཱསི. ཙཏྟཱརོཔི མཧཱརཱཛཱནོ སཀྐོ ཙ དེཝཱནམིནྡོ བྲཧྨཱ ཙ སཧམྤཏི ཨུཔཊྛཱནཾ ཨཱགམིཾསུ. ཏཉྩ ཨོབྷཱསཾ དིསྭཱ ཝནཝཱསཱི མཧཱཏིསྶཏྠེརོ ཏཾ དུཏིཡདིཝསེ པུཙྪི – ‘‘རཏྟིབྷཱགེ ཨཱཡསྨཏོ སནྟིཀེ ཨོབྷཱསོ ཨཧོསི. ཀིཾ སོ ཨོབྷཱསོ’’ཏི? ཐེརོ ཝིཀྑེཔཾ ཀརོནྟོ ‘‘ཨོབྷཱསོ ནཱམ དཱིཔོབྷཱསོཔི ཧོཏི, མཎིཨོབྷཱསོཔཱི’’ཏི ཨེཝམཱདིམཱཧ. ཏཏོ ‘‘པཊིཙྪཱདེཐ ཏུམྷེ’’ཏི ནིབདྡྷོ ‘‘ཨཱམཱ’’ཏི པཊིཛཱནིཏྭཱ ཨཱརོཙེསི.

ཀཱལ༹ཝལླིམཎྜཔཝཱསཱི ¶ མཧཱནཱགཏྠེརོ ཝིཡ ཙ. སོཔི ཀིར གཏཔཙྩཱགཏཝཏྟཾ པཱུརེནྟོ ‘པཋམཾ ¶ ཏཱཝ བྷགཝཏོ མཧཱཔདྷཱནཾ པཱུཛེསྶཱམཱི’ཏི སཏྟ ཝསྶཱནི ཋཱནཙངྐམམེཝ ཨདྷིཊྛཱསི; པུན སོལ༹ས ཝསྶཱནི གཏཔཙྩཱགཏཝཏྟཾ པཱུརེཏྭཱ ཨརཧཏྟཾ པཱཔུཎི. སོ ཀམྨཊྛཱནཡུཏྟེནེཝ ཙིཏྟེན པཱདཾ ཨུདྡྷརནྟོ ཝིཔྤཡུཏྟེན ཙིཏྟེན ཨུདྡྷཏེ པཱདེ པཊིནིཝཏྟེནྟོ གཱམསཱིམཾ གནྟྭཱ ‘གཱཝཱི ནུ ཁོ, པབྦཛིཏོ ནུ ཁོ’ཏི ཨཱསངྐནཱིཡཔྤདེསེ ཋཏྭཱ ཙཱིཝརཾ པཱརུཔིཏྭཱ ཀཙྪཀནྟརཏོ ཨུདཀེན པཏྟཾ དྷོཝིཏྭཱ ཨུདཀགཎྜཱུསཾ ཀརོཏི. ཀིཾ ཀཱརཎཱ? ‘མཱ མེ བྷིཀྑཾ དཱཏུཾ ཝཱ ཝནྡིཏུཾ ཝཱ ཨཱགཏེ མནུསྶེ ‘དཱིགྷཱཡུཀཱ ཧོཐཱ’ཏི ཝཙནམཏྟེནཱཔི ཀམྨཊྛཱནཝིཀྑེཔོ ཨཧོསཱི’ཏི. ‘ཨཛྫ, བྷནྟེ, ཀཏིམཱི’ཏི དིཝསཾ ཝཱ བྷིཀྑུགཎནཾ ཝཱ པཉྷཾ ཝཱ པུཙྪིཏོ པན ཨུདཀཾ གིལིཏྭཱ ཨཱརོཙེཏི; སཙེ དིཝསཱདིཔུཙྪཀཱ ན ཧོནྟི, ནིཀྑམནཝེལཱཡཾ གཱམདྭཱརེ ནིཊྛུབྷིཏྭཱཝ ¶ ཡཱཏི.

ཀལམྦཏིཏྠཝིཧཱརེ ཝསྶཱུཔགཏཱ པཉྙཱས བྷིཀྑཱུ ཝིཡ ཙ. ཏེ ཀིར ཨཱསཱལ༹ྷིཔུཎྞིམཱཡཾ ཀཏིཀཝཏྟཾ ཨཀཾསུ – ‘‘ཨརཧཏྟཾ ཨཔྤཏྭཱ ཨཉྙམཉྙཾ ནཱལཔིསྶཱམཱ’’ཏི. གཱམཉྩ པིཎྜཱཡ པཝིསནྟཱ ཨུདཀགཎྜཱུསཾ ཀཏྭཱ པཝིསིཾསུ, དིཝསཱདཱིསུ པུཙྪིཏེསུ ཝུཏྟནཡེན པཊིཔཛྫིཾསུ. ཏཏྠ མནུསྶཱ ནིཊྛུབྷནཊྛཱནཾ དིསྭཱ ཛཱནིཾསུ – ‘ཨཛྫ ཨེཀོ ཨཱགཏོ, ཨཛྫ དྭེ’ཏི; ཨེཝཉྩ ཙིནྟེསུཾ – ‘ཀིནྣུ ཁོ ཨེཏེ ཨམྷེཧེཝ སདྡྷིཾ ན སལླཔནྟི ཨུདཱཧུ ཨཉྙམཉྙམྤི? ཡདི ཨཉྙམཉྙམྤི ན སལླཔནྟི, ཨདྡྷཱ ཝིཝཱདཛཱཏཱ བྷཝིསྶནྟི; ཨེཐ ནེ ཨཉྙམཉྙཾ ཁམཱཔེསྶཱམཱ’ཏི སབྦེ ཝིཧཱརཾ གནྟྭཱ པཉྙཱསཱཡ བྷིཀྑཱུསུ དྭེཔི བྷིཀྑཱུ ཨེཀོཀཱསེ ནཱདྡསཾསུ. ཏཏོ ཡོ ཏེསུ ཙཀྑུམཱ པུརིསོ སོ ཨཱཧ – ‘‘ན, བྷོ, ཀལཧཀཱརཀཱནཾ ཝསནོཀཱསོ ཨཱིདིསོ ཧོཏི. སུསམྨཊྛཾ ཙེཏིཡངྒཎབོདྷིཡངྒཎཾ, སུནིཀྑིཏྟཱ སམྨཛྫནིཡོ, སཱུཔཊྛིཏཾ པཱནཱིཡཔརིབྷོཛནཱིཡ’’ནྟི. ཏེ ཏཏོཝ ནིཝཏྟཱ. ཏེཔི བྷིཀྑཱུ ཨནྟོཏེམཱསེཡེཝ ཨརཧཏྟཾ པཏྭཱ མཧཱཔཝཱརཎཱཡ ཝིསུདྡྷིཔཝཱརཎཾ པཝཱརེསུཾ.

ཨེཝཾ ཀཱལ༹ཝལླིམཎྜཔཝཱསཱི མཧཱནཱགཏྠེརོ ཝིཡ, ཀལམྦུཏིཏྠཝིཧཱརེ ཝསྶཱུཔགཏབྷིཀྑཱུ ཝིཡ ཙ ཀམྨཊྛཱནཡུཏྟེནེཝ ཙིཏྟེན པཱདཾ ཨུདྡྷརནྟོ གཱམསམཱིཔཾ ¶ གནྟྭཱ ཨུདཀགཎྜཱུསཾ ཀཏྭཱ ཝཱིཐིཡོ སལླཀྑེཏྭཱ ཡཏྠ སུརཱསོཎྜདྷུཏྟཱདཡོ ཀལཧཀཱརཀཱ ཙཎྜཧཏྠིཨསྶཱདཡོ ཝཱ ནཏྠི, ཏཾ ཝཱིཐིཾ པཊིཔཛྫཏི. ཏཏྠ པིཎྜཱཡ ཙརམཱནོ ན ཏུརིཏཏུརིཏོ ཝིཡ ཛཝེན གཙྪཏི, ན ཧི ཛཝནཔིཎྜཔཱཏིཀདྷུཏངྒཾ ནཱམ ཀིཉྩི ཨཏྠི, ཝིསམབྷཱུམིབྷཱགཔྤཏྟཾ པན ཨུདཀསཀཊཾ ཝིཡ ནིཙྩལོ ཧུཏྭཱ གཙྪཏི, ཨནུགྷརཾ པཝིཊྛོ ཙ དཱཏུཀཱམཾ ཝཱ ཨདཱཏུཀཱམཾ ཝཱ སལླཀྑེཏུཾ ཏདནུརཱུཔཾ ཀཱལཾ ཨཱགམེནྟོ བྷིཀྑཾ གཧེཏྭཱ ཨནྟོགཱམེ ཝཱ བཧིགཱམེ ཝཱ ཝིཧཱརམེཝ ཝཱ ཨཱགནྟྭཱ ¶ , ཡཐཱཕཱསུཀེ པཏིརཱུཔེ ཨོཀཱསེ ནིསཱིདིཏྭཱ, ཀམྨཊྛཱནཾ མནསིཀརོནྟོ ཨཱཧཱརེ པཊིཀཱུལསཉྙཾ ཨུཔཊྛཔེཏྭཱ, ཨཀྑབྦྷཉྫནཝཎཱལེཔནཔུཏྟམཾསཱུཔམཝསེན པཙྩཝེཀྑནྟོ ཨཊྛངྒསམནྣཱགཏཾ ཨཱཧཱརཾ ཨཱཧཱརེཏི ནེཝ དཝཱཡ, ན མདཱཡ, ན མཎྜནཱཡ, ན ཝིབྷཱུསནཱཡ…པེ… ཕཱསུཝིཧཱརོ ཙཱཏི. བྷུཏྟཱཝཱི ཙ ཨུདཀཀིཙྩཾ ཀཏྭཱ མུཧུཏྟཾ ¶ བྷཏྟཀིལམཐཾ པཊིཔྤསྶམྦྷེཏྭཱ ཡཐཱ པུརེབྷཏྟཾ, ཨེཝཾ པཙྪཱབྷཏྟཾ པུརིམཡཱམཾ པཙྪིམཡཱམཉྩ ཀམྨཊྛཱནམེཝ མནསིཀརོཏི. ཨཡཾ ཝུཙྩཏི ‘ཧརཏི ཙ པཙྩཱཧརཏི ཙཱ’ཏི.

ཨིམཾ པན ཧརཎཔཙྩཱཧརཎསངྑཱཏཾ གཏཔཙྩཱགཏཝཏྟཾ པཱུརེནྟོ, ཡདི ཨུཔནིསྶཡསམྤནྣོ ཧོཏི, པཋམཝཡེ ཨེཝ ཨརཧཏྟཾ པཱཔུཎཱཏི, ནོ ཙེ པཋམཝཡེ པཱཔུཎཱཏི ཨཐ མཛ྄ཛྷིམཝཡེ, ནོ ཙེ མཛ྄ཛྷིམཝཡེ པཱཔུཎཱཏི ཨཐ པཙྪིམཝཡེ, ནོ ཙེ པཙྪིམཝཡེ པཱཔུཎཱཏི ཨཐ མརཎསམཡེ, ནོ ཙེ མརཎསམཡེ པཱཔུཎཱཏི ཨཐ དེཝཔུཏྟོ ཧུཏྭཱ, ནོ ཙེ དེཝཔུཏྟོ ཧུཏྭཱ པཱཔུཎཱཏི ཨནུཔྤནྣེ བུདྡྷེ ནིབྦཏྟོ པཙྩེཀབོདྷིཾ སཙྪིཀརོཏི, ནོ ཙེ པཙྩེཀབོདྷིཾ སཙྪིཀརོཏི ཨཐ བུདྡྷཱནཾ སམྨུཁཱིབྷཱཝེ ཁིཔྤཱབྷིཉྙོ ཝཱ ཧོཏི – སེཡྻཐཱཔི ཐེརོ བཱཧིཡོ དཱརུཙཱིརིཡོ, མཧཱཔཉྙོ ཝཱ – སེཡྻཐཱཔི ཐེརོ སཱརིཔུཏྟོ, མཧིདྡྷིཀོ ཝཱ – སེཡྻཐཱཔི ཐེརོ མཧཱམོགྒལླཱནོ, དྷུཏངྒདྷརོ ཝཱ – སེཡྻཐཱཔི ཐེརོ མཧཱཀསྶཔོ, དིབྦཙཀྑུཀོ ཝཱ – སེཡྻཐཱཔི ཐེརོ ཨནུརུདྡྷོ, ཝིནཡདྷརོ ཝཱ – སེཡྻཐཱཔི ཐེརོ ཨུཔཱལི, དྷམྨཀཐིཀོ ཝཱ – སེཡྻཐཱཔི ཐེརོ པུཎྞོ མནྟཱཎིཔུཏྟོ, ཨཱརཉྙིཀོ ཝཱ – སེཡྻཐཱཔི ཐེརོ རེཝཏོ, བཧུསྶུཏོ ཝཱ – སེཡྻཐཱཔི ཐེརོ ཨཱནནྡོ, སིཀྑཱཀཱམོ ཝཱ – སེཡྻཐཱཔི ཐེརོ རཱཧུལོ བུདྡྷཔུཏྟོཏི. ཨིཏི ཨིམསྨིཾ ཙཏུཀྐེ ཡྭཱཡཾ ཧརཏི ཙ པཙྩཱཧརཏི ཙ, ཏསྶ གོཙརསམྤཛཉྙཾ སིཁཱཔྤཏྟཾ ཧོཏི.

ཨབྷིཀྐམཱདཱིསུ ¶ པན ཨསམྨུཡ྄ཧནཾ ཨསམྨོཧསམྤཛཉྙཾ. ཏཾ ཨེཝཾ ཝེདིཏབྦཾ – ཨིདྷ བྷིཀྑུ ཨབྷིཀྐམནྟོ ཝཱ པཊིཀྐམནྟོ ཝཱ ཡཐཱ ཨནྡྷབཱལཔུཐུཛྫནཱ ཨབྷིཀྐམཱདཱིསུ ‘ཨཏྟཱ ཨབྷིཀྐམཏི, ཨཏྟནཱ ཨབྷིཀྐམོ ནིབྦཏྟིཏོ’ཏི ཝཱ ‘ཨཧཾ ཨབྷིཀྐམཱམི, མཡཱ ཨབྷིཀྐམོ ནིབྦཏྟིཏོ’ཏི ཝཱ སམྨུཡ྄ཧནྟི, ཏཐཱ ཨསམྨུཡ྄ཧནྟོ ‘ཨབྷིཀྐམཱམཱི’ཏི ཙིཏྟེ ཨུཔྤཛྫམཱནེ ཏེནེཝ ཙིཏྟེན སདྡྷིཾ ཙིཏྟསམུཊྛཱནཝཱཡོདྷཱཏུ ཝིཉྙཏྟིཾ ཛནཡམཱནཱ ཨུཔྤཛྫཏི. ཨིཏི ཙིཏྟཀིརིཡཱཝཱཡོདྷཱཏུཝིཔྥཱརཝསེན ཨཡཾ ཀཱཡསམྨཏོ ཨཊྛིསངྒྷཱཏོ ཨབྷིཀྐམཏི. ཏསྶེཝཾ ཨབྷིཀྐམཏོ ཨེཀེཀཔཱདུདྡྷརཎེ པཐཝཱིདྷཱཏུ ཨཱཔོདྷཱཏཱུཏི དྭེ དྷཱཏུཡོ ཨོམཏྟཱ ཧོནྟི མནྡཱ, ཨིཏརཱ དྭེ ཨདྷིམཏྟཱ ¶ ཧོནྟི བལཝཏིཡོ; ཏཐཱ ཨཏིཧརཎཝཱིཏིཧརཎེསུ. ཝོསྶཛྫནེ ཏེཛོདྷཱཏུ ཝཱཡོདྷཱཏཱུཏི ¶ དྭེ དྷཱཏུཡོ ཨོམཏྟཱ ཧོནྟི མནྡཱ, ཨིཏརཱ དྭེ ཨདྷིམཏྟཱ ཧོནྟི བལཝཏིཡོ; ཏཐཱ སནྣིཀྑེཔནསནྣིརུཛ྄ཛྷནེསུ ཏཏྠ ཨུདྡྷརཎེ པཝཏྟཱ རཱུཔཱརཱུཔདྷམྨཱ ཨཏིཧརཎཾ ན པཱཔུཎནྟི; ཏཐཱ ཨཏིཧརཎེ པཝཏྟཱ ཝཱིཏིཧརཎཾ, ཝཱིཏིཧརཎེ པཝཏྟཱ ཝོསྶཛྫནཾ, ཝོསྶཛྫནེ པཝཏྟཱ སནྣིཀྑེཔནཾ, སནྣིཀྑེཔནེ པཝཏྟཱ སནྣིརུཛ྄ཛྷནཾ ན པཱཔུཎནྟི; ཏཏྠ ཏཏྠེཝ པབྦཾ པབྦཾ སནྡྷི སནྡྷི ཨོདྷི ཨོདྷི ཧུཏྭཱ ཏཏྟཀཔཱལེ པཀྑིཏྟཏིལཾ ཝིཡ པཊཔཊཱཡནྟཱ བྷིཛྫནྟི. ཏཏྠ ཀོ ཨེཀོ ཨབྷིཀྐམཏི? ཀསྶ ཝཱ ཨེཀསྶ ཨབྷིཀྐམནཾ? པརམཏྠཏོ ཧི དྷཱཏཱུནཾཡེཝ གམནཾ, དྷཱཏཱུནཾ ཋཱནཾ, དྷཱཏཱུནཾ ནིསཛྫཱ, དྷཱཏཱུནཾ སཡནཾ, ཏསྨིཾ ཏསྨིཉྷི ཀོཊྛཱསེ སདྡྷིཾ རཱུཔེཧི –

ཨཉྙཾ ཨུཔྤཛྫཏེ ཙིཏྟཾ, ཨཉྙཾ ཙིཏྟཾ ནིརུཛ྄ཛྷཏི;

ཨཝཱིཙིམནུསམྦནྡྷོ, ནདཱིསོཏོཝ ཝཏྟཏཱིཏི.

ཨེཝཾ ཨབྷིཀྐམཱདཱིསུ ཨསམྨུཡ྄ཧནཾ ཨསམྨོཧསམྤཛཉྙཾ ནཱམཱཏི.

ནིཊྛིཏོ ཨབྷིཀྐནྟེ པཊིཀྐནྟེ སམྤཛཱནཀཱརཱི ཧོཏཱིཏིཔདསྶ ཨཏྠོ.

ཨཱལོཀིཏེ ཝིལོཀིཏེཏི ཨེཏྠ པན ཨཱལོཀིཏཾ ནཱམ པུརཏོ པེཀྑནཾ, ཝིལོཀིཏཾ ནཱམ ཨནུདིསཱཔེཀྑནཾ. ཨཉྙཱནིཔི ཧེཊྛཱ ཨུཔརི པཙྪཏོ པེཀྑནཝསེན ཨོལོཀིཏཨུལློཀིཏཱཔལོཀིཏཱནི ནཱམ ¶ ཧོནྟི. ཏཱནི ཨིདྷ ན གཧིཏཱནི. སཱརུཔྤཝསེན པན ཨིམཱནེཝ དྭེ གཧིཏཱནི. ཨིམིནཱ ཝཱ མུཁེན སབྦཱནིཔི ཏཱནི གཧིཏཱནེཝཱཏི.

ཏཏྠ ‘ཨཱལོཀེསྶཱམཱི’ཏི ཙིཏྟེ ཨུཔྤནྣེ ཙིཏྟཝསེནེཝ ཨནོལོཀེཏྭཱ ཨཏྠཔརིགྒཎྷནཾ ‘སཱཏྠཀསམྤཛཉྙཾ’. ཏཾ ཨཱཡསྨནྟཾ ནནྡཾ ཀཱཡསཀྑིཾ ཀཏྭཱ ཝེདིཏབྦཾ. ཝུཏྟཉྷེཏཾ བྷགཝཏཱ –

‘‘སཙེ, བྷིཀྑཝེ, ནནྡསྶ པུརཏྠིམཱ དིསཱ ཨཱལོཀེཏབྦཱ ཧོཏི, སབྦཾ ཙེཏསཱ སམནྣཱཧརིཏྭཱ ནནྡོ པུརཏྠིམཾ དིསཾ ཨཱལོཀེཏི – ‘ཨེཝཾ མེ པུརཏྠིམཾ དིསཾ ཨཱལོཀཡཏོ ན ཨབྷིཛ྄ཛྷཱདོམནསྶཱ པཱཔཀཱ ཨཀུསལཱ དྷམྨཱ ཨནྭཱསྶཝིསྶནྟཱི’ཏི. ཨིཏིཧ སཱཏྠཀསམྤཛཱནོ ¶ ཧོཏི. ‘‘སཙེ, བྷིཀྑཝེ, ནནྡསྶ པཙྪིམཱ དིསཱ, ཨུཏྟརཱ དིསཱ, དཀྑིཎཱ དིསཱ, ཨུདྡྷཾ, ཨདྷོ, ཨནུདིསཱ ཨནུཝིལོཀེཏབྦཱ ཧོཏི, སབྦཾ ཙེཏསཱ སམནྣཱཧརིཏྭཱ ¶ ནནྡོ ཨནུདིསཾ ཨནུཝིལོཀེཏི – ཨེཝཾ མེ ཨནུདིསཾ ཨནུཝིལོཀཡཏོ…པེ… སམྤཛཱནོ ཧོཏཱི’’ཏི (ཨ. ནི. ༨.༩).

ཨཔིཙ ཨིདྷཱཔི པུབྦེ ཝུཏྟཙེཏིཡདསྶནཱདིཝསེནེཝ སཱཏྠཀཏཱ ཙ སཔྤཱཡཏཱ ཙ ཝེདིཏབྦཱ.

ཀམྨཊྛཱནསྶ པན ཨཝིཛཧནམེཝ ‘གོཙརསམྤཛཉྙཾ’. ཏསྨཱ ཁནྡྷདྷཱཏུཨཱཡཏནཀམྨཊྛཱནིཀེཧི ཨཏྟནོ ཀམྨཊྛཱནཝསེནེཝ, ཀསིཎཱདིཀམྨཊྛཱནིཀེཧི ཝཱ པན ཀམྨཊྛཱནསཱིསེནེཝ ཨཱལོཀནཝིལོཀནཾ ཀཱཏབྦཾ.

ཨབྦྷནྟརེ ཨཏྟཱ ནཱམ ཨཱལོཀེཏཱ ཝཱ ཝིལོཀེཏཱ ཝཱ ནཏྠི. ‘ཨཱལོཀེསྶཱམཱི’ཏི པན ཙིཏྟེ ཨུཔྤཛྫམཱནེ ཏེནེཝ ཙིཏྟེན སདྡྷིཾ ཙིཏྟསམུཊྛཱནཱ ཝཱཡོདྷཱཏུ ཝིཉྙཏྟིཾ ཛནཡམཱནཱ ཨུཔྤཛྫཏི. ཨིཏི ཙིཏྟཀིརིཡཱཝཱཡོདྷཱཏུཝིཔྥཱརཝསེན ཧེཊྛིམཾ ཨཀྑིདལཾ ཨདྷོ སཱིདཏི, ཨུཔརིམཾ ཨུདྡྷཾ ལངྒྷེཏི. ཀོཙི ཡནྟཀེན ཝིཝརནྟོ ནཱམ ནཏྠི. ཏཏོ ཙཀྑུཝིཉྙཱཎཾ དསྶནཀིཙྩཾ སཱདྷེནྟཾ ཨུཔྤཛྫཏཱི’ཏི ཨེཝཾ པཛཱནནཾ པནེཏྠ ‘ཨསམྨོཧསམྤཛཉྙཾ’ ནཱམ.

ཨཔིཙ ¶ མཱུལཔརིཉྙཱཨཱགནྟུཀཏཱཝཀཱལིཀབྷཱཝཝསེན པནེཏྠ ཨསམྨོཧསམྤཛཉྙཾ ཝེདིཏབྦཾ. མཱུལཔརིཉྙཱཝསེན ཏཱཝ –

བྷཝངྒཱཝཛྫནཉྩེཝ, དསྶནཾ སམྤཊིཙྪནཾ;

སནྟཱིརཎཾ ཝོཊྛབྦནཾ, ཛཝནཾ བྷཝཏི སཏྟམཾ.

ཏཏྠ བྷཝངྒཾ ཨུཔཔཏྟིབྷཝསྶ ཨངྒཀིཙྩཾ སཱདྷཡམཱནཾ པཝཏྟཏི; ཏཾ ཨཱཝཏྟེཏྭཱ ཀིརིཡམནོདྷཱཏུ ཨཱཝཛྫནཀིཙྩཾ སཱདྷཡམཱནཱ; ཏནྣིརོདྷཱ ཙཀྑུཝིཉྙཱཎཾ དསྶནཀིཙྩཾ སཱདྷཡམཱནཾ; ཏནྣིརོདྷཱ ཝིཔཱཀམནོདྷཱཏུ སམྤཊིཙྪནཀིཙྩཾ སཱདྷཡམཱནཱ; ཏནྣིརོདྷཱ ཝིཔཱཀམནོཝིཉྙཱཎདྷཱཏུ སནྟཱིརཎཀིཙྩཾ སཱདྷཡམཱནཱ; ཏནྣིརོདྷཱ ཀིརིཡམནོཝིཉྙཱཎདྷཱཏུ ཝོཊྛབྦནཀིཙྩཾ སཱདྷཡམཱནཱ; ཏནྣིརོདྷཱ སཏྟཀྑཏྟུཾ ཛཝནཾ ཛཝཏི. ཏཏྠ པཋམཛཝནེཔི ‘ཨཡཾ ཨིཏྠཱི, ཨཡཾ པུརིསོ’ཏི རཛྫནདུསྶནམུཡ྄ཧནཝསེན ཨཱལོཀིཏཝིལོཀིཏཾ ན ཧོཏི; དུཏིཡཛཝནེཔི…པེ… སཏྟམཛཝནེཔི. ཨེཏེསུ པན, ཡུདྡྷམཎྜལེ ¶ ཡོདྷེསུ ཝིཡ, ཧེཊྛུཔརིཡཝསེན ¶ བྷིཛྫིཏྭཱ པཏིཏེསུ ‘ཨཡཾ ཨིཏྠཱི, ཨཡཾ པུརིསོ’ཏི རཛྫནཱདིཝསེན ཨཱལོཀིཏཝིལོཀིཏཾ ཧོཏི. ཨེཝཾ ཏཱཝེཏྠ ‘མཱུལཔརིཉྙཱཝསེན’ ཨསམྨོཧསམྤཛཉྙཾ ཝེདིཏབྦཾ.

ཙཀྑུདྭཱརེ པན རཱུཔེ ཨཱཔཱཐགཏེ བྷཝངྒཙལནཏོ ཨུདྡྷཾ སཀསཀཀིཙྩནིཔྥཱདནཝསེན ཨཱཝཛྫནཱདཱིསུ ཨུཔྤཛྫིཏྭཱ ནིརུདྡྷེསུ ཨཝསཱནེ ཛཝནཾ ཨུཔྤཛྫཏི. ཏཾ པུབྦེ ཨུཔྤནྣཱནཾ ཨཱཝཛྫནཱདཱིནཾ གེཧབྷཱུཏེ ཙཀྑུདྭཱརེ ཨཱགནྟུཀཔུརིསོ ཝིཡ ཧོཏི. ཏསྶ ཡཐཱ པརགེཧེ ཀིཉྩི ཡཱཙིཏུཾ པཝིཊྛསྶ ཨཱགནྟུཀཔུརིསསྶ གེཧསཱམིཀེསུཔི ཏུཎྷཱིམཱསིནེསུ ཨཱཎཱཀརཎཾ ན ཡུཏྟཾ, ཨེཝཾ ཨཱཝཛྫནཱདཱིནཾ གེཧབྷཱུཏེ ཙཀྑུདྭཱརེ ཨཱཝཛྫནཱདཱིསུཔི ཨརཛྫནྟེསུ ཨདུསྶནྟེསུ ཨམུཡ྄ཧནྟེསུ ཙ རཛྫནདུསྶནམུཡ྄ཧནཾ ཨཡུཏྟནྟི. ཨེཝཾ ‘ཨཱགནྟུཀབྷཱཝཝསེན’ ཨསམྨོཧསམྤཛཉྙཾ ཝེདིཏབྦཾ.

ཡཱནི པནེཏཱནི ཙཀྑུདྭཱརེ ཝོཊྛབྦནཔརིཡོསཱནཱནི ཙིཏྟཱནི ཨུཔྤཛྫནྟི, ཏཱནི སདྡྷིཾ སམྤཡུཏྟདྷམྨེཧི ཏཏྠ ཏཏྠེཝ བྷིཛྫནྟི, ཨཉྙམཉྙཾ ན པསྶནྟཱིཏི ཨིཏྟརཱནི ཏཱཝཀཱལིཀཱནི ཧོནྟི. ཏཏྠ ཡཐཱ ཨེཀསྨིཾ གྷརེ སབྦེསུ མཱནུསཀེསུ མཏེསུ ཨཝསེསསྶ ཨེཀཀསྶ ཏངྑཎཾཡེཝ མརཎདྷམྨསྶ ན ཡུཏྟཱ ནཙྩགཱིཏཱདཱིསུ ཨབྷིརཏི ནཱམ, ཨེཝམེཝ ཨེཀདྭཱརེ སསམྤཡུཏྟེསུ ཨཱཝཛྫནཱདཱིསུ ¶ ཏཏྠ ཏཏྠེཝ མཏེསུ ཨཝསེསསྶ ཏངྑཎཾཉྙེཝ མརཎདྷམྨསྶ ཛཝནསྶཱཔི རཛྫནདུསྶནམུཡ྄ཧནཝསེན ཨབྷིརཏི ནཱམ ན ཡུཏྟཱཏི. ཨེཝཾ ‘ཏཱཝཀཱལིཀབྷཱཝཝསེན’ ཨསམྨོཧསམྤཛཉྙཾ ཝེདིཏབྦཾ.

ཨཔིཙ ཁནྡྷཱཡཏནདྷཱཏུཔཙྩཡཔཙྩཝེཀྑཎཝསེནཔེཏཾ ཝེདིཏབྦཾ. ཨེཏྠ ཧི ཙཀྑུ ཙེཝ རཱུཔཱནི ཙ རཱུཔཀྑནྡྷོ, དསྶནཾ ཝིཉྙཱཎཀྑནྡྷོ, ཏཾསམྤཡུཏྟཱ ཝེདནཱ ཝེདནཱཀྑནྡྷོ, སཉྙཱ སཉྙཱཀྑནྡྷོ, ཕསྶཱདིཀཱ སངྑཱརཀྑནྡྷོ. ཨེཝམེཏེསཾ པཉྩནྣཾ ཁནྡྷཱནཾ སམཝཱཡེ ཨཱལོཀནཝིལོཀནཾ པཉྙཱཡཏི. ཏཏྠ ཀོ ཨེཀོ ཨཱལོཀེཏི? ཀོ ཝིལོཀེཏི?

ཏཐཱ ཙཀྑུ ཙཀྑཱཡཏནཾ, རཱུཔཾ རཱུཔཱཡཏནཾ, དསྶནཾ མནཱཡཏནཾ, ཝེདནཱདཡོ ཏཾསམྤཡུཏྟཱ དྷམྨཱ དྷམྨཱཡཏནཾ. ཨེཝམེཏེསཾ ཙཏུནྣཾ ཨཱཡཏནཱནཾ སམཝཱཡེ ¶ ཨཱལོཀནཝིལོཀནཾ པཉྙཱཡཏི. ཏཏྠ ཀོ ཨེཀོ ཨཱལོཀེཏི? ཀོ ཝིལོཀེཏི?

ཏཐཱ ཙཀྑུ ཙཀྑུདྷཱཏུ, རཱུཔཾ རཱུཔདྷཱཏུ, དསྶནཾ ཙཀྑུཝིཉྙཱཎདྷཱཏུ, ཏཾསམྤཡུཏྟཱ ཝེདནཱདཡོ ¶ དྷམྨཱ དྷམྨདྷཱཏུ. ཨེཝམེཏཱསཾ ཙཏུནྣཾ དྷཱཏཱུནཾ སམཝཱཡེ ཨཱལོཀནཝིལོཀནཾ པཉྙཱཡཏི. ཏཏྠ ཀོ ཨེཀོ ཨཱལོཀེཏི? ཀོ ཝིལོཀེཏི?

ཏཐཱ ཙཀྑུ ནིསྶཡཔཙྩཡོ, རཱུཔཾ ཨཱརམྨཎཔཙྩཡོ, ཨཱཝཛྫནཾ ཨནནྟརསམནནྟརཨནནྟརཱུཔནིསྶཡནཏྠིཝིགཏཔཙྩཡོ, ཨཱལོཀོ ཨུཔནིསྶཡཔཙྩཡོ, ཝེདནཱདཡོ སཧཛཱཏཱདིཔཙྩཡཱ. ཨེཝམེཏེསཾ པཙྩཡཱནཾ སམཝཱཡེ ཨཱལོཀནཝིལོཀནཾ པཉྙཱཡཏི. ཏཏྠ ཀོ ཨེཀོ ཨཱལོཀེཏི? ཀོ ཝིལོཀེཏཱིཏི? ཨེཝམེཏྠ ཁནྡྷཱཡཏནདྷཱཏུཔཙྩཡཔཙྩཝེཀྑཎཝསེནཱཔི ཨསམྨོཧསམྤཛཉྙཾ ཝེདིཏབྦཾ.

སམིཉྫིཏེ པསཱརིཏེཏི པབྦཱནཾ སམིཉྫནཔསཱརཎེ. ཏཏྠ ཙིཏྟཝསེནེཝ སམིཉྫནཔསཱརཎཾ ཨཀཏྭཱ ཧཏྠཔཱདཱནཾ སམིཉྫནཔསཱརཎཔཙྩཡཱ ཨཏྠཱནཏྠཾ པརིགྒཧེཏྭཱ ཏཏྠ ཨཏྠཔརིགྒཎྷནཾ ‘སཱཏྠཀསམྤཛཉྙཾ’. ཏཏྠ ཧཏྠཔཱདེ ཨཏིཙིརཾ སམིཉྫིཏྭཱ ཝཱ པསཱརེཏྭཱ ཨེཝ ཝཱ ཋིཏསྶ ཁཎེ ཁཎེ ཝེདནཱ ཨུཔྤཛྫནྟི, ཙིཏྟཾ ཨེཀགྒཏཾ ན ལབྷཏི, ཀམྨཊྛཱནཾ པརིཔཏཏི, ཝིསེསཾ ནཱདྷིགཙྪཏི; ཀཱལེ སམིཉྫནྟསྶ ཀཱལེ པསཱརེནྟསྶ པན ཏཱ ཝེདནཱ ནུཔྤཛྫནྟི, ཙིཏྟཾ ཨེཀགྒཾ ཧོཏི, ཀམྨཊྛཱནཾ ཕཱཏིཾ གཙྪཏི, ཝིསེསམདྷིགཙྪཏཱིཏི. ཨེཝཾ ‘ཨཏྠཱནཏྠཔརིགྒཎྷནཾ’ ཝེདིཏབྦཾ.

ཨཏྠེ ¶ པན སཏིཔི སཔྤཱཡཱསཔྤཱཡཾ པརིགྒཧེཏྭཱ སཔྤཱཡཔརིགྒཎྷནཾ ‘སཔྤཱཡསམྤཛཉྙཾ’.

ཏཏྲཱཡཾ ནཡོ – མཧཱཙེཏིཡངྒཎེ ཀིར དཧརབྷིཀྑཱུ སཛ྄ཛྷཱཡཾ གཎྷནྟི. ཏེསཾ པིཊྛིཔསྶེ དཧརབྷིཀྑུནིཡོ དྷམྨཾ སུཎནྟི. ཏཏྲེཀོ དཧརོ ཧཏྠཾ པསཱརེནྟོ ཀཱཡསཾསགྒཾ པཏྭཱ ཏེནེཝ ཀཱརཎེན གིཧཱི ཛཱཏོ. ཨཔརོ བྷིཀྑུ པཱདཾ པསཱརེནྟོ ཨགྒིམྷི པསཱརེསི. ཨཊྛིཾ ཨཱཧཙྩ པཱདོ ཛྷཱཡི. ཨཔརོ བྷིཀྑུ ཝམྨིཀེ པསཱརེསི. སོ ཨཱསཱིཝིསེན དཊྛོ. ཨཔརོ བྷིཀྑུ ཙཱིཝརཀུཊིདཎྜཀེ པསཱརེསི. ཏཾ མཎིསཔྤོ ཌཾསི. ཏསྨཱ ཨེཝརཱུཔེ ¶ ཨསཔྤཱཡེ ཨཔསཱརེཏྭཱ སཔྤཱཡེ པསཱརེཏབྦཾ. ཨིདམེཏྠ སཔྤཱཡསམྤཛཉྙཾ.

‘གོཙརསམྤཛཉྙཾ’ པན མཧཱཐེརཝཏྠུནཱ དཱིཔེཏབྦཾ – མཧཱཐེརོ ཀིར དིཝཱཊྛཱནེ ནིསིནྣོ ཨནྟེཝཱསིཀེཧི སདྡྷིཾ ཀཐཡམཱནོ སཧསཱ ཧཏྠཾ སམིཉྫིཏྭཱ པུན ཡཐཱཋཱནེ ¶ ཋཔེཏྭཱ སཎིཀཾ སམིཉྫེསི. ཏཾ ཨནྟེཝཱསིཀཱ པུཙྪིཾསུ – ‘‘ཀསྨཱ, བྷནྟེ, སཧསཱ ཧཏྠཾ སམིཉྫིཏྭཱ པུན ཡཐཱཋཱནེ ཋཔེཏྭཱ སཎིཀཾ སམིཉྫིཏྠཱ’’ཏི? ‘‘ཡཏོ པཊྛཱཡ མཡཱ, ཨཱཝུསོ, ཀམྨཊྛཱནཾ མནསིཀཱཏུཾ ཨཱརདྡྷོ, ན མེ ཀམྨཊྛཱནཾ མུཉྩིཏྭཱ ཧཏྠོ སམིཉྫིཏཔུབྦོ. ཨིདཱནི པན མེ ཏུམྷེཧི སདྡྷིཾ ཀཐཡམཱནེན ཀམྨཊྛཱནཾ མུཉྩིཏྭཱ སམིཉྫིཏོ. ཏསྨཱ པུན ཡཐཱཋཱནེ ཋཔེཏྭཱ སམིཉྫེསི’’ནྟི. ‘‘སཱདྷུ, བྷནྟེ, བྷིཀྑུནཱ ནཱམ ཨེཝརཱུཔེན བྷཝིཏབྦ’’ནྟི. ཨེཝམེཏྠཱཔི ཀམྨཊྛཱནཱཝིཛཧནམེཝ ‘གོཙརསམྤཛཉྙ’ནྟི ཝེདིཏབྦཾ.

‘ཨབྦྷནྟརེ ཨཏྟཱ ནཱམ ཀོཙི སམིཉྫེནྟོ ཝཱ པསཱརེནྟོ ཝཱ ནཏྠི. ཝུཏྟཔྤཀཱརཙིཏྟཀིརིཡཱཝཱཡོདྷཱཏུཝིཔྥཱརེན པན, སུཏྟཱཀཌྜྷནཝསེན དཱརུཡནྟསྶ ཧཏྠཔཱདཙལནཾ ཝིཡ, སམིཉྫནཔསཱརཎཾ ཧོཏཱི’ཏི པརིཛཱནནཾ པནེཏྠ ‘ཨསམྨོཧསམྤཛཉྙ’ནྟི ཝེདིཏབྦཾ.

སངྒྷཱཊིཔཏྟཙཱིཝརདྷཱརཎེཏི ཨེཏྠ སངྒྷཱཊིཙཱིཝརཱནཾ ནིཝཱསནཔཱརུཔནཝསེན པཏྟསྶ བྷིཀྑཱཔཊིགྒཧཎཱདིཝསེན པརིབྷོགོ ‘དྷཱརཎཾ’ ནཱམ. ཏཏྠ སངྒྷཱཊིཙཱིཝརདྷཱརཎེ ཏཱཝ ནིཝཱསེཏྭཱ པཱརུཔིཏྭཱ ཙ པིཎྜཱཡ ཙརཏོ ‘‘ཨཱམིསལཱབྷོ སཱིཏསྶ པཊིགྷཱཏཱཡཱ’’ཏིཨཱདིནཱ ནཡེན བྷགཝཏཱ ཝུཏྟཔྤཀཱརོཡེཝ ཙ ཨཏྠོ ‘ཨཏྠོ’ ནཱམ. ཏསྶ ཝསེན ‘སཱཏྠཀསམྤཛཉྙཾ’ ཝེདིཏབྦཾ.

ཨུཎྷཔཀཏིཀསྶ ¶ པན དུབྦལསྶ ཙ ཙཱིཝརཾ སུཁུམཾ སཔྤཱཡཾ, སཱིཏཱལུཀསྶ གྷནཾ དུཔཊྚཾ; ཝིཔརཱིཏཾ ཨསཔྤཱཡཾ. ཡསྶ ཀསྶཙི ཛིཎྞཾ ཨསཔྤཱཡམེཝ. ཨགྒལཱ༹དིདཱནེན ཧིསྶ ཏཾ པལིབོདྷཀརཾ ཧོཏི. ཏཐཱ པཊྚུཎྞདུཀཱུལཱདིབྷེདཾ ཙོརཱནཾ ལོབྷནཱིཡཙཱིཝརཾ. ཏཱདིསཉྷི ཨརཉྙེ ཨེཀཀསྶ ནིཝཱསནྟརཱཡཀརཾ ཛཱིཝིཏནྟརཱཡཀརཉྩཱཔི ཧོཏི. ནིཔྤརིཡཱཡེན པན ཡཾ ནིམིཏྟཀམྨཱདིམིཙྪཱཛཱིཝཝསེན ཨུཔྤནྣཾ, ཡཉྩསྶ སེཝམཱནསྶ ཨཀུསལཱ དྷམྨཱ ཨབྷིཝཌྜྷནྟི, ཀུསལཱ དྷམྨཱ པརིཧཱཡནྟི, ཏཾ ཨསཔྤཱཡཾ ¶ ; ཝིཔརཱིཏཾ སཔྤཱཡཾ. ཏསྶ ཝསེནེཏྠ ‘སཔྤཱཡསམྤཛཉྙཾ’ ཀམྨཊྛཱནཱཝིཛཧནཝསེནེཝ ཙ ‘གོཙརསམྤཛཉྙཾ’ ཝེདིཏབྦཾ.

ཨབྦྷནྟརེ ཨཏྟཱ ནཱམ ཀོཙི ཙཱིཝརཾ པཱརུཔནྟོ ནཏྠི. ཝུཏྟཔྤཀཱརཙིཏྟཀིརིཡཱཝཱཡོདྷཱཏུཝིཔྥཱརེནེཝ པན ཙཱིཝརཔཱརུཔནཾ ཧོཏི. ཏཏྠ ཙཱིཝརམྤི ཨཙེཏནཾ, ཀཱཡོཔི ཨཙེཏནོ. ཙཱིཝརཾ ན ཛཱནཱཏི – ‘མཡཱ ཀཱཡོ པཱརུཔིཏོ’ཏི, ཀཱཡོཔི ན ཛཱནཱཏི – ‘ཨཧཾ ཙཱིཝརེན པཱརུཔིཏོ’ཏི. དྷཱཏུཡོཝ དྷཱཏུསམཱུཧཾ པཊིཙྪཱདེནྟི, པཊཔིལོཏིཀཱཡ པོཏྠཀརཱུཔཔཊིཙྪཱདནེ ཝིཡ. ཏསྨཱ ནེཝ སུནྡརཾ ཙཱིཝརཾ ལབྷིཏྭཱ སོམནསྶཾ ཀཱཏབྦཾ ¶ , ན ཨསུནྡརཾ ལབྷིཏྭཱ དོམནསྶཾ. ནཱགཝམྨིཀཙེཏིཡརུཀྑཱདཱིསུ ཧི ཀེཙི མཱལཱགནྡྷདྷཱུཔཝཏྠཱདཱིཧི སཀྐཱརཾ ཀརོནྟི, ཀེཙི གཱུཐམུཏྟཀདྡམདཎྜསཏྠཔྤཧཱརཱདཱིཧི ཨསཀྐཱརཾ. ན ཏེཧི ནཱགཝམྨིཀརུཀྑཱདཡོ སོམནསྶཾ ཝཱ དོམནསྶཾ ཝཱ ཀརོནྟི. ཨེཝམེཝ ནེཝ སུནྡརཾ ཙཱིཝརཾ ལབྷིཏྭཱ སོམནསྶཾ ཀཱཏབྦཾ, ན ཨསུནྡརཾ ལབྷིཏྭཱ དོམནསྶནྟི. ཨེཝཾ པཝཏྟཔཊིསངྑཱནཝསེནེཏྠ ‘ཨསམྨོཧསམྤཛཉྙཾ’ ཝེདིཏབྦཾ.

པཏྟདྷཱརཎེཔི པཏྟཾ སཧསཱཝ ཨགྒཧེཏྭཱ ‘ཨིམཾ གཧེཏྭཱ པིཎྜཱཡ ཙརམཱནོ བྷིཀྑཾ ལབྷིསྶཱམཱི’ཏི ཨེཝཾ པཏྟགྒཧཎཔཙྩཡཱ པཊིལབྷིཏབྦཨཏྠཝསེན ‘སཱཏྠཀསམྤཛཉྙཾ’ ཝེདིཏབྦཾ. ཀིསདུབྦལསརཱིརསྶ པན གརུཔཏྟོ ཨསཔྤཱཡོ; ཡསྶ ཀསྶཙི ཙཏུཔཉྩགཎྛིཀཱཧཏོ དུབྦིསོདྷནཱིཡོ ཨསཔྤཱཡོཝ. དུདྡྷོཏཔཏྟོ ཧི ན ཝཊྚཏི; ཏཾ དྷོཝནྟསྶེཝ ཙསྶ པལིབོདྷོ ཧོཏི. མཎིཝཎྞཔཏྟོ པན ལོབྷནཱིཡོཝ ཙཱིཝརེ ཝུཏྟནཡེནེཝ ཨསཔྤཱཡོ. ནིམིཏྟཀམྨཱདིཝསེན པན ལདྡྷོ, ཡཉྩསྶ སེཝམཱནསྶ ཨཀུསལཱ དྷམྨཱ ཨབྷིཝཌྜྷནྟི, ཀུསལཱ དྷམྨཱ པརིཧཱཡནྟི, ཨཡཾ ཨེཀནྟཱསཔྤཱཡོཝ ཝིཔརཱིཏོ སཔྤཱཡོ. ཏསྶ ཝསེནེཏྠ ‘སཔྤཱཡསམྤཛཉྙཾ’ ཀམྨཊྛཱནཱཝིཛཧནཝསེནེཝ ‘གོཙརསམྤཛཉྙཾ’ ཝེདིཏབྦཾ.

ཨབྦྷནྟརེ ¶ ཨཏྟཱ ནཱམ ཀོཙི པཏྟཾ གཎྷནྟོ ནཏྠི. ཝུཏྟཔྤཀཱརཙིཏྟཀིརིཡཱཝཱཡོདྷཱཏུཝིཔྥཱརཝསེནེཝ པན པཏྟགྒཧཎཾ ནཱམ ཧོཏི. ཏཏྠ པཏྟོཔི ཨཙེཏནོ, ཧཏྠཱཔི ཨཙེཏནཱ. པཏྟོ ན ཛཱནཱཏི – ‘ཨཧཾ ཧཏྠེཧི གཧིཏོ’ཏི. ཧཏྠཱཔི ན ཛཱནནྟི – ‘པཏྟོ ཨམྷེཧི ¶ གཧིཏོ’ཏི. དྷཱཏུཡོཝ དྷཱཏུསམཱུཧཾ གཎྷནྟི, སཎྜཱསེན ཨགྒིཝཎྞཔཏྟགཧཎེ ཝིཡཱཏི. ཨེཝཾ པཝཏྟཔཊིསངྑཱནཝསེནེཏྠ ‘ཨསམྨོཧསམྤཛཉྙཾ’ ཝེདིཏབྦཾ.

ཨཔིཙ ཡཐཱ ཚིནྣཧཏྠཔཱདེ ཝཎམུཁེཧི པགྒྷརིཏཔུབྦལོཧིཏཀིམིཀུལེ ནཱིལམཀྑིཀསམྤརིཀིཎྞེ ཨནཱཐསཱལཱཡཾ ཨནཱཐམནུསྶེ དིསྭཱ དཡཱལུཀཱ པུརིསཱ ཏེསཾ ཝཎབནྡྷཔཊྚཙོལ༹ཀཱནི ཙེཝ ཀཔཱལཱདཱིཧི ཙ བྷེསཛྫཱནི ཨུཔནཱམེནྟི. ཏཏྠ ཙོལ༹ཀཱནིཔི ཀེསཉྩི སཎྷཱནི ཀེསཉྩི ཐཱུལཱནི པཱཔུཎནྟི. བྷེསཛྫཀཔཱལཀཱནིཔི ཀེསཉྩི སུསཎྛཱནཱནི ཀེསཉྩི དུསྶཎྛཱནཱནི པཱཔུཎནྟི. ན ཏེ ཏཏྠ སུམནཱ ཝཱ ཧོནྟི དུམྨནཱ ཝཱ. ཝཎཔཊིཙྪཱདནམཏྟེནེཝ ཧི ཙོལ༹ཀེན, བྷེསཛྫཔརིགྒཧཎམཏྟེནེཝ ཙ ཀཔཱལཀེན ཏེསཾ ཨཏྠོ. ཨེཝམེཝ ཡོ བྷིཀྑུ ཝཎཙོལ༹ཀཾ ཝིཡ ཙཱིཝརཾ, བྷེསཛྫཀཔཱལཀཾ ཝིཡ ཙ པཏྟཾ, ཀཔཱལེ བྷེསཛྫམིཝ ¶ ཙ པཏྟེ ལདྡྷབྷིཀྑཾ སལླཀྑེཏི – ཨཡཾ སངྒྷཱཊིཔཏྟཙཱིཝརདྷཱརཎེ ཨསམྨོཧསམྤཛཉྙེན ཨུཏྟམསམྤཛཱནཀཱརཱིཏི ཝེདིཏབྦོ.

ཨསིཏཱདཱིསུ ཨསིཏེཏི པིཎྜཔཱཏཱདིབྷོཛནེ. པཱིཏེཏི ཡཱགུཨཱདིཔཱནེ. ཁཱཡིཏེཏི པིཊྛཁཛྫཀཱདིཁཱདནེ. སཱཡིཏེཏི མདྷུཕཱཎིཏཱདིསཱཡནེ. ཏཏྠ ‘‘ནེཝ དཝཱཡཱ’’ཏིཨཱདིནཱ ནཡེན ཝུཏྟོ ཨཊྛཝིདྷོཔི ཨཏྠོ ‘ཨཏྠོ’ ནཱམ. ཏསྶ ཝསེན ‘སཱཏྠཀསམྤཛཉྙཾ’ ཝེདིཏབྦཾ.

ལཱུཁཔཎཱིཏཏིཏྟམདྷུརཱདཱིསུ པན ཡེན བྷོཛནེན ཡསྶ ཨཕཱསུ ཧོཏི, ཏཾ ཏསྶ ཨསཔྤཱཡཾ. ཡཾ པན ནིམིཏྟཀམྨཱདིཝསེན པཊིལདྡྷཾ, ཡཉྩསྶ བྷུཉྫཏོ ཨཀུསལཱ དྷམྨཱ ཨབྷིཝཌྜྷནྟི, ཀུསལཱ དྷམྨཱ པརིཧཱཡནྟི, ཏཾ ཨེཀནྟཾ ཨསཔྤཱཡམེཝ; ཝིཔརཱིཏཾ སཔྤཱཡཾ. ཏསྶ ཝསེནེཏྠ ‘སཔྤཱཡསམྤཛཉྙཾ’ ཀམྨཊྛཱནཱཝིཛཧནཝསེནེཝ ཙ ‘གོཙརསམྤཛཉྙཾ’ ཝེདིཏབྦཾ.

ཨབྦྷནྟརེ ཨཏྟཱ ནཱམ ཀོཙི བྷུཉྫཀོ ནཏྠི. ཝུཏྟཔྤཀཱརཙིཏྟཀིརིཡཱཝཱཡོདྷཱཏུཝིཔྥཱརེནེཝ པན པཏྟཔཊིགྒཧཎཾ ནཱམ ཧོཏི. ཙིཏྟཀིརིཡཱཝཱཡོདྷཱཏུཝིཔྥཱརེནེཝ ཧཏྠསྶ པཏྟེ ཨོཏཱརཎཾ ནཱམ ཧོཏི. ཙིཏྟཀིརིཡཱཝཱཡོདྷཱཏུཝིཔྥཱརེནེཝ ཨཱལོཔཀརཎཾ, ཨཱལོཔཨུདྡྷརཎཾ, མུཁཝིཝརཎཉྩ ¶ ཧོཏི. ན ཀོཙི ཀུཉྩིཀཱཡ, ན ཡནྟཀེན ཧནུཀཊྛིཾ ཝིཝརཏི. ཙིཏྟཀིརིཡཱཝཱཡོདྷཱཏུཝིཔྥཱརེནེཝ ¶ ཨཱལོཔསྶ མུཁེ ཋཔནཾ, ཨུཔརིདནྟཱནཾ མུསལཀིཙྩསཱདྷནཾ, ཧེཊྛཱདནྟཱནཾ ཨུདུཀྑལཀིཙྩསཱདྷནཾ, ཛིཝ྄ཧཱཡ ཧཏྠཀིཙྩསཱདྷནཉྩ ཧོཏི. ཨིཏི ནཾ ཏཏྠ ཨགྒཛིཝ྄ཧཱཡ ཏནུཀཁེལོ༹ མཱུལཛིཝ྄ཧཱཡ བཧལཁེལོ༹ མཀྑེཏི. ཏཾ ཧེཊྛཱདནྟཨུདུཀྑལེ ཛིཝ྄ཧཱཧཏྠཔརིཝཏྟིཏཾ ཁེལ༹ཨུདཀཏེམིཏཾ ཨུཔརིདནྟམུསལསཉྩུཎྞིཏཾ ཀོཙི ཀཊཙྪུནཱ ཝཱ དབྦིཡཱ ཝཱ ཨནྟོ པཝེསེནྟོ ནཱམ ནཏྠི; ཝཱཡོདྷཱཏུཡཱཝ པཝིསཏི. པཝིཊྛཾ པཝིཊྛཾ ཀོཙི པལཱལསནྠཱརཾ ཀཏྭཱ དྷཱརེནྟོ ནཱམ ནཏྠི; ཝཱཡོདྷཱཏུཝསེནེཝ ཏིཊྛཏི. ཋིཏཾ ཋིཏཾ ཀོཙི ཨུདྡྷནཾ ཀཏྭཱ ཨགྒིཾ ཛཱལེཏྭཱ པཙནྟོ ནཱམ ནཏྠི; ཏེཛོདྷཱཏུཡཱཝ པཙྩཏི. པཀྐཾ པཀྐཾ ཀོཙི དཎྜཀེན ཝཱ ཡཊྛིཡཱ ཝཱ བཧི ནཱིཧཱརཀོ ནཱམ ནཏྠི; ཝཱཡོདྷཱཏུཡེཝ ནཱིཧརཏི. ཨིཏི ཝཱཡོདྷཱཏུ ཨཏིཧརཏི ཙ ཝཱིཏིཧརཏི ཙ དྷཱརེཏི ཙ པརིཝཏྟེཏི ཙ སཉྩུཎྞེཏི ཙ ཝིསོསེཏི ཙ ནཱིཧརཏི ཙ. པཐཝཱིདྷཱཏུ དྷཱརེཏི ཙ པརིཝཏྟེཏི ཙ སཉྩུཎྞེཏི ཙ ཝིསོསེཏི ཙ ནཱིཧརཏི ཙ. ཨཱཔོདྷཱཏུ སིནེཧེཏི ཙ ཨལླཏྟཉྩ ཨནུཔཱལེཏི. ཏེཛོདྷཱཏུ ཨནྟོཔཝིཊྛཾ པརིཔཱཙེཏི. ཨཱཀཱསདྷཱཏུ ¶ ཨཉྫསོ ཧོཏི. ཝིཉྙཱཎདྷཱཏུ ཏཏྠ ཏཏྠ སམྨཱཔཡོགམནྭཱཡ ཨཱབྷུཛཏཱིཏི. ཨེཝཾ པཝཏྟཔཊིསངྑཱནཝསེནེཏྠ ‘ཨསམྨོཧསམྤཛཉྙཾ’ ཝེདིཏབྦཾ.

ཨཔིཙ གམནཏོ, པརིཡེསནཏོ, པརིབྷོགཏོ, ཨཱསཡཏོ, ནིདྷཱནཏོ, ཨཔརིཔཀྐཏོ, པརིཔཀྐཏོ, ཕལཏོ, ནིསྶནྡནཏོ, སམྨཀྑནཏོཏི ཨེཝཾ དསཝིདྷཔཊིཀཱུལབྷཱཝཔཙྩཝེཀྑཎཏོཔེཏྠ ‘ཨསམྨོཧསམྤཛཉྙཾ’ ཝེདིཏབྦཾ. ཝིཏྠཱརཀཐཱ པནེཏྠ ཝིསུདྡྷིམགྒེ ཨཱཧཱརཔཊིཀཱུལསཉྙཱནིདྡེསཏོ གཧེཏབྦཱ.

ཨུཙྩཱརཔསྶཱཝཀམྨེཏི ཨུཙྩཱརསྶ ཙ པསྶཱཝསྶ ཙ ཀརཎེ. ཏཏྠ པཀྐཀཱལེ ཨུཙྩཱརཔསྶཱཝཾ ཨཀརོནྟསྶ སཀལསརཱིརཏོ སེདཱ མུཙྩནྟི, ཨཀྑཱིནི བྷམནྟི, ཙིཏྟཾ ན ཨེཀགྒཾ ཧོཏི, ཨཉྙེ ཙ རོགཱ ཨུཔྤཛྫནྟི; ཀརོནྟསྶ པན སབྦཾ ཏཾ ན ཧོཏཱིཏི ཨཡམེཏྠ ཨཏྠོ. ཏསྶ ཝསེན ‘སཱཏྠཀསམྤཛཉྙཾ’ ཝེདིཏབྦཾ.

ཨཊྛཱནེ ཨུཙྩཱརཔསྶཱཝཾ ཀརོནྟསྶ པན ཨཱཔཏྟི ཧོཏི, ཨཡསོ ཝཌྜྷཏི, ཛཱིཝིཏནྟརཱཡོ ཧོཏི; པཏིརཱུཔེ ཋཱནེ ཀརོནྟསྶ སབྦཾ ཏཾ ¶ ན ཧོཏཱིཏི ཨིདམེཏྠ སཔྤཱཡཾ. ཏསྶ ཝསེན ‘སཔྤཱཡསམྤཛཉྙཾ’ ཀམྨཊྛཱནཱཝིཛཧནཝསེནེཝ ¶ ཙ ‘གོཙརསམྤཛཉྙཾ’ ཝེདིཏབྦཾ.

ཨབྦྷནྟརེ ཨཏྟཱ ནཱམ ཀོཙི ཨུཙྩཱརཔསྶཱཝཀམྨཾ ཀརོནྟོ ནཏྠི. ཙིཏྟཀིརིཡཱཝཱཡོདྷཱཏུཝིཔྥཱརེནེཝ པན ཨུཙྩཱརཔསྶཱཝཀམྨཾ ཧོཏི. ཡཐཱ པན པཀྐེ གཎྜེ གཎྜབྷེདེན པུབྦལོཧིཏཾ ཨཀཱམཏཱཡ ནིཀྑམཏི, ཡཐཱ ཙ ཨཏིབྷརིཏཱ ཨུདཀབྷཱཛནཱ ཨུདཀཾ ཨཀཱམཏཱཡ ནིཀྑམཏི, ཨེཝཾ པཀྐཱསཡམུཏྟཝཏྠཱིསུ སནྣིཙིཏཱ ཨུཙྩཱརཔསྶཱཝཱ ཝཱཡུཝེགསམུཔྤཱིལི༹ཏཱ ཨཀཱམཏཱཡཔི ནིཀྑམནྟི. སོ པནཱཡཾ ཨེཝཾ ནིཀྑམནྟོ ཨུཙྩཱརཔསྶཱཝོ ནེཝ ཏསྶ བྷིཀྑུནོ ཨཏྟནོ ཧོཏི ན པརསྶ; ཀེཝལཾ པན སརཱིརནིསྶནྡོཝ ཧོཏི. ཡཐཱ ཀིཾ? ཡཐཱ ཨུདཀཏུམྦྷཏོ པུརཱཎཨུདཀཾ ཚཌྜེནྟསྶ ནེཝ ཏཾ ཨཏྟནོ ཧོཏི ན པརེསཾ, ཀེཝལཾ པཊིཛགྒནམཏྟམེཝ ཧོཏི, ཨེཝནྟི. ཨེཝཾ པཝཏྟཔཊིསངྑཱནཝསེནེཏྠ ‘ཨསམྨོཧསམྤཛཉྙཾ’ ཝེདིཏབྦཾ.

གཏཱདཱིསུ ¶ གཏེཏི གམནེ. ཋིཏེཏི ཋཱནེ. ནིསིནྣེཏི ནིསཛྫཱཡ. སུཏྟེཏི སཡནེ. ཏཏྠ ཨབྷིཀྐནྟཱདཱིསུ ཝུཏྟནཡེནེཝ སམྤཛཱནཀཱརིཏཱ ཝེདིཏབྦཱ.

ཨཡཾ པནེཏྠ ཨཔརོཔི ནཡོ – ཨེཀོ ཧི བྷིཀྑུ གཙྪནྟོ ཨཉྙཾ ཙིནྟེནྟོ ཨཉྙཾ ཝིཏཀྐེནྟོ གཙྪཏི. ཨེཀོ ཀམྨཊྛཱནཾ ཨཝིསྶཛྫེཏྭཱཝ གཙྪཏི. ཏཐཱ ཨེཀོ བྷིཀྑུ ཏིཊྛནྟོ, ནིསཱིདནྟོ, སཡནྟོ ཨཉྙཾ ཙིནྟེནྟོ ཨཉྙཾ ཝིཏཀྐེནྟོ སཡཏི. ཨེཀོ ཀམྨཊྛཱནཾ ཨཝིསྶཛྫེཏྭཱཝ སཡཏི.

ཨེཏྟཀེན པན ན པཱཀཊཾ ཧོཏཱིཏི ཙངྐམེན དཱིཔཡིཾསུ. ཡོ ཧི བྷིཀྑུ ཙངྐམནཾ ཨོཏརིཏྭཱ ཙངྐམནཀོཊིཡཾ ཋིཏོ པརིགྒཎྷཱཏི; ‘པཱཙཱིནཙངྐམནཀོཊིཡཾ པཝཏྟཱ རཱུཔཱརཱུཔདྷམྨཱ པཙྪིམཙངྐམནཀོཊིཾ ཨཔྤཏྭཱ ཨེཏྠེཝ ནིརུདྡྷཱ, པཙྪིམཙངྐམནཀོཊིཡཾ པཝཏྟཱཔི པཱཙཱིནཙངྐམནཀོཊིཾ ཨཔྤཏྭཱ ཨེཏྠེཝ ནིརུདྡྷཱ, ཙངྐམནཝེམཛ྄ཛྷེ པཝཏྟཱ ཨུབྷོ ཀོཊིཡོ ཨཔྤཏྭཱ ཨེཏྠེཝ ནིརུདྡྷཱ, ཙངྐམནེ པཝཏྟཱ རཱུཔཱརཱུཔདྷམྨཱ ཋཱནཾ ཨཔྤཏྭཱ ཨེཏྠེཝ ནིརུདྡྷཱ, ཋཱནེ པཝཏྟཱ ནིསཛྫཾ, ནིསཛྫཱཡ པཝཏྟཱ སཡནཾ ཨཔྤཏྭཱ ཨེཏྠེཝ ནིརུདྡྷཱ’ཏི ཨེཝཾ པརིགྒཎྷནྟོ པརིགྒཎྷནྟོཡེཝ བྷཝངྒཾ ཨོཏཱརེཏི; ཨུཊྛཧནྟོ ¶ ཀམྨཊྛཱནཾ གཧེཏྭཱཝ ཨུཊྛཱཏི – ཨཡཾ བྷིཀྑུ གཏཱདཱིསུ སམྤཛཱནཀཱརཱི ནཱམ ཧོཏཱིཏི.

ཨེཝཾ ¶ པན སུཏྟེ ཀམྨཊྛཱནཾ ཨཝིབྷཱུཏཾ ཧོཏི. ཀམྨཊྛཱནཾ ཨཝིབྷཱུཏཾ ན ཀཱཏབྦཾ. ཏསྨཱ ཡོ བྷིཀྑུ ཡཱཝ སཀྐོཏི ཏཱཝ ཙངྐམིཏྭཱ ཋཏྭཱ ནིསཱིདིཏྭཱ སཡམཱནོ ཨེཝཾ པརིགྒཧེཏྭཱ སཡཏི – ‘ཀཱཡོ ཨཙེཏནོ, མཉྩོ ཨཙེཏནོ. ཀཱཡོ ན ཛཱནཱཏི – ཨཧཾ མཉྩེ སཡིཏོཏི. མཉྩོཔི ན ཛཱནཱཏི – མཡི ཀཱཡོ སཡིཏོཏི. ཨཙེཏནོ ཀཱཡོ ཨཙེཏནེ མཉྩེ སཡིཏོ’ཏི. ཨེཝཾ པརིགྒཎྷནྟོ པརིགྒཎྷནྟོཡེཝ ཙིཏྟཾ བྷཝངྒཾ ཨོཏཱརེཏི, པབུཛ྄ཛྷམཱནོ ཀམྨཊྛཱནཾ གཧེཏྭཱཝ པབུཛ྄ཛྷཏི. ཨཡཾ སུཏྟེ སམྤཛཱནཀཱརཱི ནཱམ ཧོཏཱིཏི.

ཛཱགརིཏེཏི ཛཱགརཎེ. ཏཏྠ ‘ཀིརིཡཱམཡཔཝཏྟསྶ ཨཔྤཝཏྟིཡཱ སཏི ཛཱགརིཏཾ ནཱམ ན ཧོཏི; ཀིརིཡཱམཡཔཝཏྟཝལ༹ཉྫེ པཝཏྟནྟེ ཛཱགརིཏཾ ནཱམ ཧོཏཱི’ཏི པརིགྒཎྷནྟོ བྷིཀྑུ ཛཱགརིཏེ སམྤཛཱནཀཱརཱི ནཱམ ཧོཏི. ཨཔིཙ རཏྟིནྡིཝཾ ཚ ཀོཊྛཱསེ ཀཏྭཱ པཉྩ ཀོཊྛཱསེ ཛགྒནྟོཔི ཛཱགརིཏེ སམྤཛཱནཀཱརཱི ནཱམ ཧོཏི.

བྷཱསིཏེཏི ¶ ཀཐནེ. ཏཏྠ ‘ཨུཔཱདཱརཱུཔསྶ སདྡཱཡཏནསྶ ཨཔྤཝཏྟེ སཏི བྷཱསིཏཾ ནཱམ ན ཧོཏི; ཏསྨིཾ པཝཏྟནྟེ ཧོཏཱི’ཏི པརིགྒཱཧཀོ བྷིཀྑུ བྷཱསིཏེ སམྤཛཱནཀཱརཱི ནཱམ ཧོཏི. ཝིམུཏྟཱཡཏནསཱིསེན དྷམྨཾ དེསེནྟོཔི བཱཏྟིཾས ཏིརཙྪཱནཀཐཱ པཧཱཡ དསཀཐཱཝཏྠུནིསྶིཏཾ ཀཐཾ ཀཐེནྟོཔི བྷཱསིཏེ སམྤཛཱནཀཱརཱི ནཱམ ཧོཏི.

ཏུཎྷཱིབྷཱཝེཏི ཨཀཐནེ. ཏཏྠ ‘ཨུཔཱདཱརཱུཔསྶ སདྡཱཡཏནསྶ པཝཏྟིཡཾ སཏི ཏུཎྷཱིབྷཱཝོ ནཱམ ནཏྠི; ཨཔྤཝཏྟིཡཾ ཧོཏཱི’ཏི པརིགྒཱཧཀོ བྷིཀྑུ ཏུཎྷཱིབྷཱཝེ སམྤཛཱནཀཱརཱི ནཱམ ཧོཏི. ཨཊྛཏིཾསཱཡ ཨཱརམྨཎེསུ ཙིཏྟརུཙིཡཾ ཀམྨཊྛཱནཾ གཧེཏྭཱ ནིསིནྣོཔི དུཏིཡཛ྄ཛྷཱནཾ སམཱཔནྣོཔི ཏུཎྷཱིབྷཱཝེ སམྤཛཱནཀཱརཱིཡེཝ ནཱམ ཧོཏི.

ཨེཏྠ ཙ ཨེཀོ ཨིརིཡཱཔཐོ དྭཱིསུ ཋཱནེསུ ཨཱགཏོ. སོ ཧེཊྛཱ ཨབྷིཀྐནྟེ པཊིཀྐནྟེཏི ཨེཏྠ བྷིཀྑཱཙཱརགཱམཾ གཙྪཏོ ཙ ཨཱགཙྪཏོ ཙ ཨདྡྷཱནགམནཝསེན ཀཐིཏོ. གཏེ ཋིཏེ ནིསིནྣེཏི ཨེཏྠ ཝིཧཱརེ ཙུཎྞིཀཔཱདུདྡྷཱརཨིརིཡཱཔཐཝསེན ཀཐིཏོཏི ཝེདིཏབྦོ.

༥༢༤. ཏཏྠ ཀཏམཱ སཏཱིཏིཨཱདི སབྦཾ ཨུཏྟཱནཏྠམེཝ.

༥༢༦. སོ ¶ ¶ ཝིཝིཏྟནྟི ཨིམིནཱ ཀིཾ དསྶེཏི? ཨེཏསྶ བྷིཀྑུནོ ཨུཔཱསནཊྛཱནཾ ཡོགཔཐཾ སཔྤཱཡསེནཱསནཾ དསྶེཏི. ཡསྶ ཧི ཨབྦྷནྟརེ ཨེཏྟཀཱ གུཎཱ ཨཏྠི, ཏསྶ ཨནུཙྪཝིཀོ ཨརཉྙཝཱསོ. ཡསྶ པནེཏེ ནཏྠི, ཏསྶ ཨནནུཙྪཝིཀོ. ཨེཝརཱུཔསྶ ཧི ཨརཉྙཝཱསོ ཀཱལ༹མཀྐཊཨཙྪཏརཙྪདཱིཔིམིགཱདཱིནཾ ཨཊཝཱིཝཱསསདིསོ ཧོཏི. ཀསྨཱ? ཨིཙྪཱཡ ཋཏྭཱ པཝིཊྛཏྟཱ. ཏསྶ ཧི ཨརཉྙཝཱསམཱུལཀོ ཀོཙི ཨཏྠོ ནཏྠི; ཨརཉྙཝཱསཉྩེཝ ཨཱརཉྙཀེ ཙ དཱུསེཏི; སཱསནེ ཨཔྤསཱདཾ ཨུཔྤཱདེཏི. ཡསྶ པན ཨབྦྷནྟརེ ཨེཏྟཀཱ གུཎཱ ཨཏྠི, ཏསྶེཝ སོ ཨནུཙྪཝིཀོ. སོ ཧི ཨརཉྙཝཱསཾ ནིསྶཱཡ ཝིཔསྶནཾ པཊྛཔེཏྭཱ ཨརཧཏྟཾ གཎྷིཏྭཱ པརིནིབྦཱཏི, སཀལཨརཉྙཝཱསཾ ཨུཔསོབྷེཏི, ཨཱརཉྙིཀཱནཾ སཱིསཾ དྷོཝཏི, སཀལསཱསནཾ པསཱརེཏི. ཏསྨཱ སཏྠཱ ཨེཝརཱུཔསྶ བྷིཀྑུནོ ཨུཔཱསནཊྛཱནཾ ཡོགཔཐཾ སཔྤཱཡསེནཱསནཾ དསྶེནྟོ སོ ཝིཝིཏྟཾ སེནཱསནཾ བྷཛཏཱིཏིཨཱདིམཱཧ. ཏཏྠ ཝིཝིཏྟནྟི སུཉྙཾ ཨཔྤསདྡཾ ཨཔྤནིགྒྷོསཾ. ཨེཏམེཝ ཧི ཨཏྠཾ དསྶེཏུཾ ཏཉྩ ཨནཱཀིཎྞནྟིཨཱདི ཝུཏྟཾ. ཏཏྠ ཨནཱཀིཎྞནྟི ཨསངྐིཎྞཾ ཨསམྦཱདྷཾ. ཏཏྠ ཡསྶ སེནཱསནསྶ སཱམནྟཱ གཱཝུཏམྤི ཨཌྜྷཡོཛནམྤི ¶ པབྦཏགཧནཾ ཝནགཧནཾ ནདཱིགཧནཾ ཧོཏི, ན ཀོཙི ཨཝེལཱཡ ཨུཔསངྐམིཏུཾ སཀྐོཏི – ཨིདཾ སནྟིཀེཔི ཨནཱཀིཎྞཾ ནཱམ. ཡཾ པན ཨཌྜྷཡོཛནིཀཾ ཝཱ ཡོཛནིཀཾ ཝཱ ཧོཏི – ཨིདཾ དཱུརཏཱཡ ཨེཝ ཨནཱཀིཎྞཾ ནཱམ ཧོཏི.

༥༢༧. སེཏི ཙེཝ ཨཱསཏི ཙ ཨེཏྠཱཏི སེནཱསནཾ. ཏསྶ པབྷེདཾ དསྶེཏུཾ མཉྩོ པཱིཋནྟིཨཱདི ཝུཏྟཾ. ཏཏྠ མཉྩོཏི ཙཏྟཱརོ མཉྩཱ – མསཱརཀོ, བུནྡིཀཱབདྡྷོ, ཀུལཱི༹རཔཱདཀོ, ཨཱཧཙྩཔཱདཀོཏི. ཏཐཱ པཱིཋཾ. བྷིསཱིཏི པཉྩ བྷིསིཡོ – ཨུཎྞཱབྷིསི, ཙོལ༹བྷིསི, ཝཱཀབྷིསི, ཏིཎབྷིསི, པཎྞབྷིསཱིཏི. བིམྦོཧནནྟི སཱིསུཔདྷཱནཾ ཝུཏྟཾ. ཏཾ ཝིཏྠཱརཏོ ཝིདཏྠིཙཏུརངྒུལཾ ཝཊྚཏི, དཱིགྷཏོ མཉྩཝིཏྠཱརཔྤམཱཎཾ. ཝིཧཱརོཏི སམནྟཱ པརིཧཱརཔཐཾ ཨནྟོཡེཝ རཏྟིཊྛཱནདིཝཱཊྛཱནཱནི དསྶེཏྭཱ ཀཏསེནཱསནཾ. ཨཌྜྷཡོགོཏི ¶ སུཔཎྞཝངྐགེཧཾ. པཱསཱདོཏི དྭེ ཀཎྞིཀཱནི གཧེཏྭཱ ཀཏོ དཱིགྷཔཱསཱདོ. ཨཊྚོཏི པཊིརཱཛཱདིཔཊིབཱཧནཏྠཾ ཨིཊྛཀཱཧི ཀཏོ བཧལབྷིཏྟིཀོ ཙཏུཔཉྩབྷཱུམིཀོ པཏིསྶཡཝིསེསོ. མཱལོ༹ཏི བྷོཛནསཱལསདིསོ མཎྜལམཱལོ༹; ཝིནཡཊྛཀཐཱཡཾ པན ཨེཀཀཱུཊསངྒཧིཏོ ¶ ཙཏུརསྶཔཱསཱདོཏི ཝུཏྟཾ. ལེཎནྟི པབྦཏཾ ཁཎིཏྭཱ ཝཱ པབྦྷཱརསྶ ཨཔྤཧོནཀཊྛཱནེ ཀུཊྚཾ ཨུཊྛཱཔེཏྭཱ ཝཱ ཀཏསེནཱསནཾ. གུཧཱཏི བྷཱུམིདརི ཝཱ ཡཏྠ རཏྟིནྡིཝཾ དཱིཔཾ ལདྡྷུཾ ཝཊྚཏི, པབྦཏགུཧཱ ཝཱ བྷཱུམིགུཧཱ ཝཱ. རུཀྑམཱུལནྟི རུཀྑསྶ ཧེཊྛཱ པརིཀྑིཏྟཾ ཝཱ ཨཔརིཀྑིཏྟཾ ཝཱ. ཝེལུ༹གུམྦོཏི ཝེལུ༹གཙྪོ. ཡཏྠ ཝཱ པན བྷིཀྑཱུ པཊིཀྐམནྟཱིཏི ཋཔེཏྭཱ ཝཱ ཨེཏཱནི མཉྩཱདཱིནི ཡཏྠ བྷིཀྑཱུ སནྣིཔཏནྟི, ཡཾ ཏེསཾ སནྣིཔཱཏཱརཧཊྛཱནཾ, སབྦམེཏཾ སེནཱསནཾ.

༥༢༨. བྷཛཏཱིཏི ཨུཔེཏི. སམྦྷཛཏཱིཏི ཏཏྠ ཨབྷིརཏིཝསེན ཨནུཀྐཎྛིཏོ སུཊྛུ ཨུཔེཏི. སེཝཏཱིཏི ནིཝཱསནཝསེན སེཝཏི ནིསེཝཏཱིཏི ཨནུཀྐཎྛམཱནོ སནྣིསིཏོ ཧུཏྭཱ སེཝཏི. སཾསེཝཏཱིཏི སེནཱསནཝཏྟཾ སམྤཱདེནྟོ སམྨཱ སེཝཏི.

༥༢༩. ཨིདཱནི ཡཾ ཏཾ ཝིཝིཏྟནྟི ཝུཏྟཾ, ཏསྶ པབྷེདཾ དསྶེཏུཾ ཨརཉྙཾ རུཀྑམཱུལནྟིཨཱདི ཨཱརདྡྷཾ. ཏཏྠ ཨརཉྙནྟི ཝིནཡཔརིཡཱཡེན ཏཱཝ ‘‘ཋཔེཏྭཱ གཱམཉྩ གཱམཱུཔཙཱརཉྩ ཨཝསེསཾ ཨརཉྙ’’ནྟི (པཱརཱ. ༡༢) ཨཱགཏཾ. སུཏྟནྟཔརིཡཱཡེན ཨཱརཉྙིཀཾ བྷིཀྑུཾ སནྡྷཱཡ ‘‘ཨཱརཉྙཀཾ ནཱམ སེནཱསནཾ པཉྩདྷནུསཏིཀཔཙྪིམ’’ནྟི (པཱཙི. ༥༧༣) ཨཱགཏཾ. ཝིནཡསུཏྟནྟཱ པན ཨུབྷོཔི པརིཡཱཡདེསནཱ ནཱམ. ཨབྷིདྷམྨོ ནིཔྤརིཡཱཡདེསནཱཏི ཨབྷིདྷམྨཔརིཡཱཡེན ¶ ཨརཉྙཾ དསྶེཏུཾ ནིཀྑམིཏྭཱ བཧི ཨིནྡཁཱིལཱཏི ཝུཏྟཾ; ཨིནྡཁཱིལཏོ བཧི ནིཀྑམིཏྭཱཏི ཨཏྠོ.

༥༣༠. རུཀྑམཱུལཱདཱིནཾ པཀཏིཡཱ ཙ སུཝིཉྙེཡྻབྷཱཝཏོ རུཀྑམཱུལཾཡེཝ རུཀྑམཱུལནྟིཨཱདི ཝུཏྟཾ. ཨཔིཙེཏྠ རུཀྑམཱུལནྟི ཡཾཀིཉྩི སཱིཏཙྪཱཡཾ ཝིཝིཏྟཾ རུཀྑམཱུལཾ. པབྦཏནྟི སེལཾ. ཏཏྠ ཧི ཨུདཀསོཎྜཱིསུ ཨུདཀཀིཙྩཾ ཀཏྭཱ ¶ སཱིཏཱཡ རུཀྑཙྪཱཡཱཡ ནིསིནྣསྶ ནཱནཱདིསཱསུ ཁཱཡམཱནཱསུ སཱིཏེན ཝཱཏེན བཱིཛིཡམཱནསྶ ཙིཏྟཾ ཨེཀགྒཾ ཧོཏི. ཀནྡརནྟི ཀཾ ཝུཙྩཏི ཨུདཀཾ, ཏེན དརིཏཾ ཨུདཀེན བྷིནྣཾ པབྦཏཔྤདེསཾ; ཡཾ ནིཏུམྦནྟིཔི ནདཱིཀུཉྫནྟིཔི ཝདནྟི. ཏཏྠ ཧི རཛཏཔཊྚསདིསཱ ཝཱལིཀཱ ཧོནྟི, མཏྠཀེ མཎིཝིཏཱནཾ ཝིཡ ཝནགཧནཾ, མཎིཀྑནྡྷསདིསཾ ཨུདཀཾ སནྡཏི. ཨེཝརཱུཔཾ ཀནྡརཾ ཨོརུཡ྄ཧ པཱནཱིཡཾ པིཝིཏྭཱ གཏྟཱནི སཱིཏཾ ཀཏྭཱ ཝཱལིཀཾ ཨུསྶཱཔེཏྭཱ པཾསུཀཱུལཙཱིཝརཾ པཉྙཔེཏྭཱ ¶ ནིསིནྣསྶ སམཎདྷམྨཾ ཀརོཏོ ཙིཏྟཾ ཨེཀགྒཾ ཧོཏི. གིརིགུཧནྟི དྭིནྣཾ པབྦཏཱནཾ ཨནྟརཾ, ཨེཀསྨིཾཡེཝ ཝཱ ཨུམངྒསདིསཾ མཧཱཝིཝརཾ. སུསཱནལཀྑཎཾ ཝིསུདྡྷིམགྒེ (ཝིསུདྡྷི. ༡.༣༤) ཝུཏྟཾ.

༥༣༡. ཝནཔཏྠནྟི གཱམནྟཾ ཨཏིཀྐམིཏྭཱ མནུསྶཱནཾ ཨནུཔཙཱརཊྛཱནཾ, ཡཏྠ ན ཀསནྟི ན ཝཔནྟི. ཏེནེཝསྶ ནིདྡེསེ ‘‘ཝནཔཏྠནྟི དཱུརཱནམེཏཾ སེནཱསནཱནཾ ཨདྷིཝཙན’’ནྟིཨཱདི ཝུཏྟཾ. ཡསྨཱ ཝཱ རུཀྑམཱུལཱདཱིསུ ཨིདམེཝེཀཾ བྷཱཛེཏྭཱ དསྶིཏཾ, ཏསྨཱསྶ ནིཀྑེཔཔཊིཔཱཊིཡཱ ནིདྡེསཾ ཨཀཏྭཱ སབྦཔརིཡནྟེ ནིདྡེསོ ཀཏོཏི ཝེདིཏབྦོ. ཨབྦྷོཀཱསནྟི ཨཙྪནྣཾ. ཨཱཀངྑམཱནོ པནེཏྠ ཙཱིཝརཀུཊིཾ ཀཏྭཱ ཝསཏི. པལཱལཔུཉྫནྟི པལཱལརཱསི. མཧཱཔལཱལཔུཉྫཏོ ཧི པལཱལཾ ནིཀྐཌྜྷིཏྭཱ པབྦྷཱརལེཎསདིསེ ཨཱལཡེ ཀརོནྟི, གཙྪགུམྦཱདཱིནམྤི ཨུཔརི པལཱལཾ པཀྑིཔིཏྭཱ ཧེཊྛཱ ནིསིནྣཱ སམཎདྷམྨཾ ཀརོནྟི; ཏཾ སནྡྷཱཡེཏཾ ཝུཏྟཾ. ཝནཔཏྠནིདྡེསེ སལོམཧཾསཱནནྟི ཡཏྠ པཝིཊྛསྶ ལོམཧཾསོ ཨུཔྤཛྫཏི; ཨེཝརཱུཔཱནཾ བྷཱིསནཀསེནཱསནཱནཾ. པརིཡནྟཱནནྟི དཱུརབྷཱཝེན པརིཡནྟེ ཋིཏཱནཾ. ན མནུསྶཱུཔཙཱརཱནནྟི ཀསནཝཔནཝསེན མནུསྶེཧི ཨུཔཙརིཏབྦཾ ཝནནྟཾ ཨཏིཀྐམིཏྭཱ ཋིཏཱནཾ. དུརབྷིསམྦྷཝཱནནྟི ཨལདྡྷཝིཝེཀསྶཱདེཧི ཨབྷིབྷུཡྻ ཝསིཏུཾ ནསཀྐུཎེཡྻཱནཾ.

༥༣༢. ཨཔྤསདྡཱདིནིདྡེསེ ཨཔྤསདྡནྟི ཝཙནསདྡེན ཨཔྤསདྡཾ.

༥༣༣. ཨཔྤནིགྒྷོསནྟི ¶ ནགརནིགྒྷོསསདྡེན ཨཔྤནིགྒྷོསཾ. ཡསྨཱ ¶ པན ཨུབྷཡམྤེཏཾ སདྡཊྛེན ཨེཀཾ, ཏསྨཱསྶ ནིདྡེསེ ‘‘ཡདེཝ ཏཾ ཨཔྤསདྡཾ ཏདེཝ ཏཾ ཨཔྤནིགྒྷོས’’ནྟི ཝུཏྟཾ. ཝིཛནཝཱཏནྟི ཨནུསཉྩརཎཛནསྶ སརཱིརཝཱཏེན ཝིརཧིཏཾ. ཝིཛནཝཱདནྟིཔི པཱཋོ; ཨནྟོཛནཝཱདེན ཝིརཧིཏནྟི ཨཏྠོ. ཡསྨཱ པན ཡཾ ཨཔྤནིགྒྷོསཾ, ཏདེཝ ཛནསཉྩརཎེན ཙ ཛནཝཱདེན ཙ ཝིརཧིཏཾ ཧོཏི, ཏསྨཱསྶ ནིདྡེསེ ‘‘ཡདེཝ ཏཾ ཨཔྤནིགྒྷོསཾ ཏདེཝ ཏཾ ཝིཛནཝཱཏ’’ནྟི ཝུཏྟཾ. མནུསྶརཱཧསེཡྻཀནྟི མནུསྶཱནཾ རཧསྶཀིརིཡཊྛཱནིཡཾ. ཡསྨཱ པན ཏཾ ཛནསཉྩརཎརཧིཏཾ ཧོཏི, ཏེནསྶ ནིདྡེསེ ‘‘ཡདེཝ ཏཾ ཝིཛནཝཱཏཾ ཏདེཝ ཏཾ མནུསྶརཱཧསེཡྻཀ’’ནྟི ཝུཏྟཾ. པཊིསལླཱནསཱརུཔྤནྟི ཝིཝེཀཱནུརཱུཔཾ. ཡསྨཱ པན ཏཾ ནིཡམེནེཝ ¶ མནུསྶརཱཧསེཡྻཀཾ ཧོཏི, ཏསྨཱསྶ ནིདྡེསེ ‘‘ཡདེཝ ཏཾ མནུསྶརཱཧསེཡྻཀཾ ཏདེཝ ཏཾ པཊིསལླཱནསཱརུཔྤ’’ནྟི ཝུཏྟཾ.

༥༣༤. ཨརཉྙགཏཱདིནིདྡེསེ ཨརཉྙཾ ཝུཏྟམེཝ. ཏཐཱ རུཀྑམཱུལཾ. ཨཝསེསཾ པན སབྦམྤི སེནཱསནཾ སུཉྙཱགཱརེན སངྒཧིཏཾ.

༥༣༥. པལླངྐཾ ཨཱབྷུཛིཏྭཱཏི སམནྟཏོ ཨཱུརུབདྡྷཱསནཾ བནྡྷིཏྭཱ. ཨུཛུཾ ཀཱཡཾ པཎིདྷཱཡཱཏི ཨུཔརིམཾ སརཱིརཾ ཨུཛུཾ ཋཔེཏྭཱ ཨཊྛཱརས པིཊྛིཀཎྚཀེ ཀོཊིཡཱ ཀོཊིཾ པཊིཔཱདེཏྭཱ. ཨེཝཉྷི ནིསིནྣསྶ ཙམྨམཾསནྷཱརཱུནི ན པཎམནྟི. ཨཐསྶ ཡཱ ཏེསཾ པཎམནཔཙྩཡཱ ཁཎེ ཁཎེ ཝེདནཱ ཨུཔྤཛྫེཡྻུཾ, ཏཱ ནུཔྤཛྫནྟི. ཏཱསུ ན ཨུཔྤཛྫམཱནཱསུ ཙིཏྟཾ ཨེཀགྒཾ ཧོཏི, ཀམྨཊྛཱནཾ ན པརིཔཏཏི, ཝུཌྜྷིཾ ཕཱཏིཾ ཨུཔགཙྪཏི.

༥༣༦. ཨུཛུཀོ ཧོཏི ཀཱཡོ ཋིཏོ པཎིཧིཏོཏི ཨིདམྤི ཧི ཨིམམེཝཏྠཾ སནྡྷཱཡ ཝུཏྟཾ.

༥༣༧. པརིམུཁཾ སཏིཾ ཨུཔཊྛཔེཏྭཱཏི ཀམྨཊྛཱནཱབྷིམུཁཾ སཏིཾ ཋཔཡིཏྭཱ, མུཁསམཱིཔེ ཝཱ ཀཏྭཱཏི ཨཏྠོ. ཏེནེཝ ཝུཏྟཾ ‘‘ཨཡཾ སཏི ཨུཔཊྛིཏཱ ཧོཏི སཱུཔཊྛིཏཱ ནཱསིཀགྒེ ཝཱ མུཁནིམིཏྟེ ཝཱ’’ཏི. མུཁནིམིཏྟནྟི ཙེཏྠ ཨུཏྟརོཊྛསྶ ཝེམཛ྄ཛྷཔྤདེསོ དཊྛབྦོ, ཡཏྠ ནཱསིཀཝཱཏོ པཊིཧཉྙཏི; ཨཐ ཝཱ ¶ པརཱིཏི པརིགྒཧཊྛོ, མུཁནྟི ནིཡྻཱནཊྛོ, སཏཱིཏི ཨུཔཊྛཱནཊྛོ; ཏེན ཝུཙྩཏི ‘‘པརིམུཁཾ སཏི’’ནྟི ཨེཝཾ པཊིསམྦྷིདཱཡཾ (པཊི. མ. ༡.༡༦༤) ཝུཏྟནཡེནཔེཏྠ ཨཏྠོ དཊྛབྦོ. ཏཏྲཱཡཾ སངྑེཔོ ‘‘པརིགྒཧིཏནིཡྻཱནཾ སཏིཾ ཀཏྭཱ’’ཏི.

༥༣༨. ཨབྷིཛ྄ཛྷཱནིདྡེསོ ¶ ཨུཏྟཱནཏྠོཡེཝ. ཨཡཾ པནེཏྠ སངྑེཔཝཎྞནཱ – ཨབྷིཛ྄ཛྷཾ ལོཀེ པཧཱཡཱཏི ལུཛྫནཔལུཛྫནཊྛེན པཉྩུཔཱདཱནཀྑནྡྷཱ ལོཀོ. ཏསྨཱ པཉྩསུ ཨུཔཱདཱནཀྑནྡྷེསུ རཱགཾ པཧཱཡ ཀཱམཙྪནྡཾ ཝིཀྑམྦྷེཏྭཱཏི ཨཡམེཏྠ ཨཏྠོ.

༥༣༩. ཝིགཏཱབྷིཛ྄ཛྷེནཱཏི ཝིཀྑམྦྷནཝསེན པཧཱིནཏྟཱ ཝིགཏཱབྷིཛ྄ཛྷེན, ན ཙཀྑུཝིཉྙཱཎསདིསེནཱཏི ཨཏྠོ.

༥༤༡. ཨབྷིཛ྄ཛྷཱཡ ¶ ཙིཏྟཾ པརིསོདྷེཏཱིཏི ཨབྷིཛ྄ཛྷཱཏོ ཙིཏྟཾ པརིསོདྷེཏི; ཡཐཱ ནཾ སཱ མུཉྩཏི ཙེཝ, མུཉྩིཏྭཱ ཙ ན པུན གཎྷཱཏི, ཨེཝཾ ཀརོཏཱིཏི ཨཏྠོ. ནིདྡེསཔདེསུ པནསྶ ཨཱསེཝནྟོ སོདྷེཏི, བྷཱཝེནྟོ ཝིསོདྷེཏི, བཧུལཱིཀརོནྟོ པརིསོདྷེཏཱིཏི ཨེཝམཏྠོ ཝེདིཏབྦོ. མོཙེཏཱིཏིཨཱདཱིསུཔི ཨེསེཝ ནཡོ.

༥༤༢-༥༤༣. བྱཱཔཱདདོསཾ པཧཱཡཱཏིཨཱདཱིནམྤི ཨིམིནཱཝ ནཡེན ཨཏྠོ ཝེདིཏབྦོ. བྱཱཔཛྫཏི ཨིམིནཱ ཙིཏྟཾ པཱུཏིཀུམྨཱསཱདཡོ ཝིཡ པཀཏིཾ ཛཧཏཱིཏི བྱཱཔཱདོ. ཝིཀཱརཔྤཏྟིཡཱ པདུསྶཏི, པརཾ ཝཱ པདཱུསེཏི ཝིནཱསེཏཱིཏི པདོསོ. ཨུབྷཡམེཏཾ ཀོདྷསྶེཝཱདྷིཝཙནཾ. ཏེནེཝ ཝུཏྟཾ ‘‘ཡོ བྱཱཔཱདོ སོ པདོསོ; ཡོ པདོསོ སོ བྱཱཔཱདོ’’ཏི. ཡསྨཱ ཙེས སབྦསངྒཱཧིཀཝསེན ནིདྡིཊྛོ, ཏསྨཱ ‘‘སབྦཔཱཎབྷཱུཏཧིཏཱནུཀམྤཱི’’ཏི ཨཝཏྭཱ ‘‘ཨབྱཱཔནྣཙིཏྟོ’’ཏི ཨེཏྟཀམེཝ ཝུཏྟཾ.

༥༤༦. ཐིནཾ ཙིཏྟགེལཉྙཾ, མིདྡྷཾ ཙེཏསིཀགེལཉྙཾ; ཐིནཉྩ མིདྡྷཉྩ ཐིནམིདྡྷཾ. སནྟཱ ཧོནྟཱིཏི ཨིམེ དྭེཔི དྷམྨཱ ནིརོདྷསནྟཏཱཡ སནྟཱ ཧོནྟཱིཏི. ཨིདཾ སནྡྷཱཡེཏྠ ཝཙནབྷེདོ ཀཏོ.

༥༤༩. ཨཱལོཀསཉྙཱིཏི རཏྟིམྤི དིཝཱཔི དིཊྛཱལོཀསཉྫཱནནསམཏྠཱཡ ཝིགཏནཱིཝརཎཱཡ པརིསུདྡྷཱཡ སཉྙཱཡ སམནྣཱགཏོ.

༥༥༠. སཏོ སམྤཛཱནོཏི སཏིཡཱ ཙ ཉཱཎེན ཙ སམནྣཱགཏོ. ཨིདཾ ཨུབྷཡཾ ཨཱལོཀསཉྙཱཡ ཨུཔཀཱརཀཏྟཱ ཝུཏྟཾ.

༥༥༣. ཝིགཏཐིནམིདྡྷཏཱཡ ¶ པན ཨཱལོཀསཉྙཱཡ ནིདྡེསཔདེསུ ཙཏྟཏྟཱཏིཨཱདཱིནི ཨཉྙམཉྙཝེཝཙནཱནེཝ ¶ . ཏཏྠ ཙཏྟཏྟཱཏི ཙཏྟཀཱརཎཱ. སེསཔདེསུཔི ཨེསེཝ ནཡོ. ཙཏྟཏྟཱཏི ཨིདཾ པནེཏྠ སཀབྷཱཝཔརིཙྩཛནཝསེན ཝུཏྟཾ. ཝནྟཏྟཱཏི ཨིདཾ པུན ཨནཱདིཡནབྷཱཝདསྶནཝསེན. མུཏྟཏྟཱཏི ཨིདཾ སནྟཏིཏོ ཝིནིམོཙནཝསེན. པཧཱིནཏྟཱཏི ཨིདཾ མུཏྟསྶཱཔི ཀཏྠཙི ཋཱནཱབྷཱཝཝསེན. པཊིནིསྶཊྛཏྟཱཏི ཨིདཾ པུབྦེ ཨཱདིནྣཔུབྦསྶ ནིསྶགྒདསྶནཝསེན. པཊིམུཉྩཏོ ཝཱ ནིསྶཊྛཏྟཱ བྷཱཝནཱབལེན ཨབྷིབྷུཡྻ ¶ ནིསྶཊྛཏྟཱཏི ཨཏྠོ. པཧཱིནཔཊིནིསྶཊྛཏྟཱཏི ཡཐཱཝིཀྑམྦྷནཝསེནེཝ པཧཱནཾ ཧོཏི, པུནཔྤུནཾ སནྟཏིཾ ན ཨཛ྄ཛྷཱརུཧཏི, ཏཐཱ པཊིནིསྶཊྛཏྟཱཏི. ཨཱལོཀཱ ཧོཏཱིཏི སཔྤབྷཱ ཧོཏི. ནིརཱཝརཎཊྛེན ཝིཝཊཱ. ནིརུཔཀྐིལེསཊྛེན པརིསུདྡྷཱ. པབྷསྶརཊྛེན པརིཡོདཱཏཱ.

༥༥༦. ཨུདྡྷཙྩཀུཀྐུཙྩནྟི ཨེཏྠ ཨུདྡྷཏཱཀཱརོ ཨུདྡྷཙྩཾ, ཨཱརམྨཎེ ཨནིཙྪཡཏཱཡ ཝཏྠུཛ྄ཛྷཱཙཱརོ ཀུཀྐུཙྩཾ. ཨིདྷཱཔི ‘‘སནྟཱ ཧོནྟཱི’’ཏི པུརིམནཡེནེཝ ཝཙནབྷེདོ ཝེདིཏབྦོ.

༥༥༨. ཏིཎྞཝིཙིཀིཙྪོཏི ཝིཙིཀིཙྪཾ ཏརིཏྭཱ ཨཏིཀྐམིཏྭཱ ཋིཏོ. ནིདྡེསེཔིསྶ ཏིཎྞོཏི ཨིདཾ ཝིཙིཀིཙྪཱཡ ཨནིམུགྒབྷཱཝདསྶནཝསེན ཝུཏྟཾ. ཨུཏྟིཎྞོཏི ཨིདཾ ཏསྶཱ ཨཏིཀྐམདསྶནཝསེན. ནིཏྟིཎྞོཏི ཨིདཾ བྷཱཝནཱབལེན ཨབྷིབྷུཡྻ ཨུཔདྡཝེ ཏིཎྞབྷཱཝདསྶནཝསེན. པཱརངྒཏོཏི ནིབྦིཙིཀིཙྪཱབྷཱཝསངྑཱཏཾ ཝིཙིཀིཙྪཱཔཱརཾ གཏོ. པཱརམནུཔྤཏྟོཏི ཏདེཝ པཱརཾ བྷཱཝནཱནུཡོགེན པཏྟོཏི. ཨེཝམསྶ པཊིཔཏྟིཡཱ སཕལཏཾ དསྶེཏི.

༥༥༩. ཨཀཐཾཀཐཱིཏི ‘ཀཐམིདཾ ཀཐམིད’ནྟི ཨེཝཾ པཝཏྟཱཡ ཀཐཾཀཐཱཡ ཝིརཧིཏོ. ཀུསལེསུ དྷམྨེསཱུཏི ཨནཝཛྫདྷམྨེསུ. ན ཀངྑཏཱིཏི ‘ཨིམེ ནུ ཁོ ཀུསལཱ’ཏི ཀངྑཾ ན ཨུཔྤཱདེཏི. ན ཝིཙིཀིཙྪཏཱིཏི ཏེ དྷམྨེ སབྷཱཝཏོ ཝིནིཙྪེཏུཾ ན ཀིཙྪཏི, ན ཀིལམཏི. ཨཀཐཾཀཐཱི ཧོཏཱིཏི ‘ཀཐཾ ནུ ཁོ ཨིམེ ཀུསལཱ’ཏི ¶ ཀཐཾཀཐཱཡ རཧིཏོ ཧོཏི. ནིཀྐཐཾཀཐཱི ཝིགཏཀཐཾཀཐོཏི ཏསྶེཝ ཝེཝཙནཾ. ཝཙནཏྠོ པནེཏྠ ཀཐཾཀཐཱཏོ ནིཀྑནྟོཏི ནིཀྐཐཾཀཐོ. ཝིགཏཱ ཀཐཾཀཐཱ ཨསྶཱཏི ཝིགཏཀཐཾཀཐོ.

༥༦༢. ཨུཔཀྐིལེསེཏི ཨུཔཀྐིལེསབྷཱུཏེ. ཏེ ཧི ཙིཏྟཾ ཨུཔགནྟྭཱ ཀིལིསྶནྟི. ཏསྨཱ ཨུཔཀྐིལེསཱཏི ཝུཙྩནྟི.

༥༦༣. པཉྙཱཡ ¶ དུབྦལཱིཀརཎེཏི ཡསྨཱ ཨིམེ ནཱིཝརཎཱ ཨུཔྤཛྫམཱནཱ ཨནུཔྤནྣཱཡ ལོཀིཡལོཀུཏྟརཱཡ པཉྙཱཡ ཨུཔྤཛྫིཏུཾ ན དེནྟི, ཨུཔྤནྣཱ ཨཔི ཨཊྛ སམཱཔཏྟིཡོ པཉྩ ཝཱ ཨབྷིཉྙཱཡོ ཨུཔཙྪིནྡིཏྭཱ པཱཏེནྟི, ཏསྨཱ ‘པཉྙཱཡ དུབྦལཱིཀརཎཱ’ཏི ཝུཙྩནྟི. ‘ཨནུཔྤནྣཱ ཙེཝ པཉྙཱ ན ཨུཔྤཛྫཏི, ཨུཔྤནྣཱ ¶ ཙ པཉྙཱ ནིརུཛ྄ཛྷཏཱི’ཏི ཨིདམྤི ཧི ཨིམམེཝཏྠཾ སནྡྷཱཡ ཝུཏྟཾ. སེསམེཏྠ སབྦཾ ཧེཊྛཱ ཏཏྠ ཏཏྠ པཀཱསིཏཏྟཱ ཨུཏྟཱནཏྠམེཝ.

༥༦༤. ཝིཝིཙྩེཝ ཀཱམེཧཱིཏིཨཱདཱིསུཔི ནིདྡེསེསུ ཡཾ ཝཏྟབྦཾ སིཡཱ, ཏཾ ཧེཊྛཱ ཙིཏྟུཔྤཱདཀཎྜེ (དྷ. ས. ཨཊྛ. ༡༦༠) རཱུཔཱཝཙརནིདྡེསེ ཨིདྷེཝ ཙ ཏཏྠ ཏཏྠ ཝུཏྟམེཝ. ཀེཝལཉྷི དུཏིཡཏཏིཡཙཏུཏྠཛ྄ཛྷཱནནིདྡེསེསུཔི ཡཐཱ ཏཱནི ཛྷཱནཱནི ཧེཊྛཱ ‘ཏིཝངྒིཀཾ ཛྷཱནཾ ཧོཏི, དུཝངྒིཀཾ ཛྷཱནཾ ཧོཏཱི’ཏི ཝུཏྟཱནི, ཨེཝཾ ཨཝཏྭཱ ‘‘ཨཛ྄ཛྷཏྟཾ སམྤསཱདན’’ནྟིཨཱདིཝཙནཏོ པརིཡཱཡེན སམྤསཱདཱདཱིཧི སདྡྷིཾ ཏཱནི ཨངྒཱནི གཧེཏྭཱ ‘‘ཛྷཱནནྟི སམྤསཱདོ པཱིཏིསུཁཾ ཙིཏྟསྶེཀགྒཏཱ’’ཏིཨཱདིནཱ ནཡེན ཏཾ ཏཾ ཛྷཱནཾ ནིདྡིཊྛནྟི ཨཡམེཏྠ ཝིསེསོ.

༥༨༨. ཡཾ ཏཾ ཨརིཡཱ ཨཱཙིཀྑནྟཱིཏིཔདནིདྡེསེ པན ཀིཉྩཱཔི ‘ཨཱཙིཀྑནྟི དེསེནྟཱི’ཏིཨཱདཱིནི སབྦཱནེཝ ཨཉྙམཉྙཝེཝཙནཱནི, ཨེཝཾ སནྟེཔི ‘ཨུཔེཀྑཀོ སཏིམཱ སུཁཝིཧཱརཱི’ཏིཨཱདིཨུདྡེསཝསེན ཨཱཙིཀྑནྟི, ནིདྡེསཝསེན དེསེནྟི, པཊིནིདྡེསཝསེན པཉྙཱཔེནྟི, ཏེན ཏེན པཀཱརེན ཨཏྠཾ ཋཔེཏྭཱ པཊྛཔེནྟི, ཏསྶ ཏསྶཏྠསྶ ཀཱརཎཾ དསྶེནྟཱ ཝིཝརནྟི, བྱཉྫནཝིབྷཱགཾ དསྶེནྟཱ ཝིབྷཛནྟི, ནིཀྐུཛྫིཏབྷཱཝཾ གམྦྷཱིརབྷཱཝཉྩ ནཱིཧརིཏྭཱ ཝཱ སོཏཱུནཾ ཉཱཎསྶ པཏིཊྛཾ ཛནཡནྟཱ ཨུཏྟཱནིཾ ཀརོནྟི, སབྦེཧིཔི ཨིམེཧི ཨཱཀཱརེཧི སོཏཱུནཾ ཨཉྙཱཎནྡྷཀཱརཾ ཝིདྷམེནྟཱ པཀཱསེནྟཱིཏི ཨེཝམཏྠོ དཊྛབྦོ.

སམཏིཀྐམནིདྡེསེཔི ཏཏྠ ཏཏྠ ཏེཧི ཏེཧི དྷམྨེཧི ཝུཊྛིཏཏྟཱ ཨཏིཀྐམནྟོ, ཨུཔརིབྷཱུམིཔྤཏྟིཡཱ ¶ ཝཱིཏིཀྐནྟོ, ཏཏོ ཨཔརིཧཱནིབྷཱཝེན སམཏིཀྐནྟོཏི ཨེཝམཏྠོ དཊྛབྦོ.

སུཏྟནྟབྷཱཛནཱིཡཝཎྞནཱ.

༢. ཨབྷིདྷམྨབྷཱཛནཱིཡཝཎྞནཱ

༦༢༣. ཨབྷིདྷམྨབྷཱཛནཱིཡེ ¶ ཧེཊྛཱ ཙིཏྟུཔྤཱདཀཎྜེ ཨཱགཏནཡེནེཝ ཏནྟི ཋཔིཏཱ. ཏསྨཱ ཏཏྠ སབྦེསམྤི ཀུསལཝིཔཱཀཀིརིཡཝསེན ནིདྡིཊྛཱནཾ ཛྷཱནཱནཾ ¶ ཏཏྠ ཝུཏྟནཡེནེཝ ཨཏྠོ ཝེདིཏབྦོ. སུདྡྷིཀནཝཀཱདིབྷེདོཔི སབྦོ ཏཏྠ ཝུཏྟསདིསོཡེཝཱཏི.

ཨབྷིདྷམྨབྷཱཛནཱིཡཝཎྞནཱ.

༣. པཉྷཱཔུཙྪཀཝཎྞནཱ

༦༣༨. པཉྷཱཔུཙྪཀེ པཱལི༹ཨནུསཱརེནེཝ ཛྷཱནཱནཾ ཀུསལཱདིབྷཱཝོ ཝེདིཏབྦོ. ཨཱརམྨཎཏྟིཀེསུ པན ཏིཎྞཾ ཛྷཱནཱནཾ ནིམིཏྟཱརམྨཎཏྟཱ པརིཏྟཱརམྨཎཱདིབྷཱཝེན ནཝཏྟབྦཏཱ ཝེདིཏབྦཱ. ལོཀུཏྟརཱ པནེཏྠ མགྒཀཱལེ ཕལཀཱལེ ཝཱ སིཡཱ ཨཔྤམཱཎཱརམྨཎཱ. ཙཏུཏྠཾ ཛྷཱནཾ སིཡཱ པརིཏྟཱརམྨཎནྟི ཨེཏྠ ཀུསལཏོ ཏེརས ཙཏུཏྠཛ྄ཛྷཱནཱནི སབྦཏྠཔཱདཀཙཏུཏྠཾ, ཨིདྡྷིཝིདྷཙཏུཏྠཾ, དིབྦསོཏཉཱཎཙཏུཏྠཾ, ཙེཏོཔརིཡཉཱཎཙཏུཏྠཾ, པུབྦེནིཝཱསཉཱཎཙཏུཏྠཾ, དིབྦཙཀྑུཉཱཎཙཏུཏྠཾ, ཡཐཱཀམྨཱུཔགཉཱཎཙཏུཏྠཾ, ཨནཱགཏཾསཉཱཎཙཏུཏྠཾ, ཨཱཀཱསཱནཉྩཱཡཏནཱདིཙཏུཏྠཾ, ལོཀུཏྟརཙཏུཏྠནྟི.

ཏཏྠ སབྦཏྠཔཱདཀཙཏུཏྠཾ ནཝཏྟབྦཱརམྨཎམེཝ ཧོཏི.

ཨིདྡྷིཝིདྷཙཏུཏྠཾ ཙིཏྟཝསེན ཀཱཡཾ པརིཎཱམེནྟསྶ ཨདིསྶམཱནེན ཀཱཡེན པཱཊིཧཱརིཡཀརཎེ ཀཱཡཱརམྨཎཏྟཱ པརིཏྟཱརམྨཎཾ, ཀཱཡཝསེན ཙིཏྟཾ པརིཎཱམེནྟསྶ དིསྶམཱནེན ཀཱཡེན པཱཊིཧཱརིཡཾ ཀཏྭཱ བྲཧྨལོཀཾ གཙྪནྟསྶ སམཱཔཏྟིཙིཏྟཱརམྨཎཏྟཱ མཧགྒཏཱརམྨཎཾ.

དིབྦསོཏཉཱཎཙཏུཏྠཾ སདྡཱརམྨཎཏྟཱ པརིཏྟཱརམྨཎཾ.

ཙེཏོཔརིཡཉཱཎཙཏུཏྠཾ ¶ ཀཱམཱཝཙརཙིཏྟཛཱནནཀཱལེ པརིཏྟཱརམྨཎཾ, རཱུཔཱཝཙརཱརཱུཔཱཝཙརཙིཏྟཛཱནནཀཱལེ མཧགྒཏཱརམྨཎཾ, ལོཀུཏྟརཙིཏྟཛཱནནཀཱལེ ཨཔྤམཱཎཱརམྨཎཾ. ཙེཏོཔརིཡཉཱཎལཱབྷཱི པན པུཐུཛྫནོ པུཐུཛྫནཱནཾཡེཝ ཙིཏྟཾ ཛཱནཱཏི, ན ཨརིཡཱནཾ. སོཏཱཔནྣོ སོཏཱཔནྣསྶ ཙེཝ པུཐུཛྫནསྶ ཙ; སཀདཱགཱམཱི སཀདཱགཱམིནོ ཙེཝ ཧེཊྛིམཱནཉྩ ¶ དྭིནྣཾ; ཨནཱགཱམཱི ཨནཱགཱམིནོ ཙེཝ ཧེཊྛིམཱནཉྩ ཏིཎྞཾ; ཁཱིཎཱསཝོ སབྦེསམྤི ཛཱནཱཏི.

པུབྦེནིཝཱསཉཱཎཙཏུཏྠཾ ¶ ཀཱམཱཝཙརཀྑནྡྷཱནུསྶརཎཀཱལེ པརིཏྟཱརམྨཎཾ, རཱུཔཱཝཙརཱརཱུཔཱཝཙརཀྑནྡྷཱནུསྶརཎཀཱལེ མཧགྒཏཱརམྨཎཾ, ‘‘ཨཏཱིཏེ བུདྡྷཔཙྩེཀབུདྡྷཁཱིཎཱསཝཱ མགྒཾ བྷཱཝཡིཾསུ, ཕལཾ སཙྪིཀརིཾསཱུ’’ཏི ཨནུསྶརཎཀཱལེ ཨཔྤམཱཎཱརམྨཎཾ, ནཱམགོཏྟཱནུསྶརཎཀཱལེ ནཝཏྟབྦཱརམྨཎཾ.

དིབྦཙཀྑུཉཱཎཙཏུཏྠཾ ཝཎྞཱརམྨཎཏྟཱ པརིཏྟཱརམྨཎཾ.

ཡཐཱཀམྨཱུཔགཉཱཎཙཏུཏྠཾ ཀཱམཱཝཙརཀམྨཱནུསྶརཎཀཱལེ པརིཏྟཱརམྨཎཾ, རཱུཔཱཝཙརཱརཱུཔཱཝཙརཀམྨཱནུསྶརཎཀཱལེ མཧགྒཏཱརམྨཎཾ.

ཨནཱགཏཾསཉཱཎཙཏུཏྠཾ ཨནཱགཏེ ཀཱམདྷཱཏུཡཱ ནིབྦཏྟིཛཱནནཀཱལེ པརིཏྟཱརམྨཎཾ, རཱུཔཱརཱུཔབྷཝེསུ ནིབྦཏྟིཛཱནནཀཱལེ མཧགྒཏཱརམྨཎཾ, ‘‘ཨནཱགཏེ བུདྡྷཔཙྩེཀབུདྡྷཁཱིཎཱསཝཱ མགྒཾ བྷཱཝེསྶནྟི, ཕལཾ སཙྪིཀརིསྶནྟཱི’’ཏི ཛཱནནཀཱལེ ཨཔྤམཱཎཱརམྨཎཾ, ‘‘ཨནཱགཏེ སངྑོ ནཱམ རཱཛཱ བྷཝིསྶཏཱི’’ཏིཨཱདིནཱ (དཱི. ནི. ༣.༡༠༨) ནཡེན ནཱམགོཏྟཱནུསྶརཎཀཱལེ ནཝཏྟབྦཱརམྨཎཾ.

ཨཱཀཱསཱནཉྩཱཡཏནཨཱཀིཉྩཉྙཱཡཏནཙཏུཏྠཾ ནཝཏྟབྦཱརམྨཎཾ. ཝིཉྙཱཎཉྩཱཡཏནནེཝསཉྙཱནཱསཉྙཱཡཏནཙཏུཏྠཾ མཧགྒཏཱརམྨཎཾ.

ལོཀུཏྟརཙཏུཏྠཾ ཨཔྤམཱཎཱརམྨཎཾ.

ཀིརིཡཏོཔི ཏེསཾ དྭཱདསནྣཾ ཛྷཱནཱནཾ ཨིདམེཝ ཨཱརམྨཎཝིདྷཱནཾ. ཏཱིཎི ཛྷཱནཱནི ནམགྒཱརམྨཎཱཏི ¶ པཙྩཝེཀྑཎཉཱཎཾ ཝཱ ཙེཏོཔརིཡཱདིཉཱཎཾ ཝཱ མགྒཾ ཨཱརམྨཎཾ ཀརེཡྻ, ཏཱིཎི ཛྷཱནཱནི ཏཐཱ ཨཔྤཝཏྟིཏོ ནམགྒཱརམྨཎཱ, སཧཛཱཏཧེཏུཝསེན པན སིཡཱ མགྒཧེཏུཀཱ; ཝཱིརིཡཛེཊྛིཀཱཡ ཝཱ ཝཱིམཾསཱཛེཊྛིཀཱཡ ཝཱ མགྒབྷཱཝནཱཡ མགྒཱདྷིཔཏིནོ; ཚནྡཙིཏྟཛེཊྛཀཀཱལེ ཕལཀཱལེ ཙ ནཝཏྟབྦཱ.

ཙཏུཏྠཾ ཛྷཱནནྟི ཨིདྷཱཔི ཀུསལཏོ ཏེརསསུ ཙཏུཏྠཛ྄ཛྷཱནེསུ སབྦཏྠཔཱདཀཨིདྡྷིཝིདྷདིབྦསོཏདིབྦཙཀྑུཡཐཱཀམྨཱུཔགཉཱཎཙཏུཏྠཉྩེཝ ཙཏུབྦིདྷཉྩ ཨཱརུཔྤཙཏུཏྠཾ མགྒཱརམྨཎཱདིབྷཱཝེན ན ཝཏྟབྦཾ. ཙེཏོཔརིཡཔུབྦེནིཝཱསཨནཱགཏཾསཉཱཎཙཏུཏྠཾ པན མགྒཱརམྨཎཾ ¶ ཧོཏི. ན ཝཏྟབྦཾ མགྒཧེཏུཀཾ མགྒཱདྷིཔཏཱིཏི ཝཱ; ལོཀུཏྟརཙཏུཏྠཾ མགྒཱརམྨཎཾ ན ཧོཏི; མགྒཀཱལེ པན ¶ སཧཛཱཏཧེཏུཝསེན མགྒཧེཏུཀཾ; ཝཱིརིཡཝཱིམཾསཱཛེཊྛིཀཱཡ མགྒབྷཱཝནཱཡ མགྒཱདྷིཔཏི; ཚནྡཙིཏྟཛེཊྛིཀཱཡ ཙེཝ མགྒབྷཱཝནཱཡ ཕལཀཱལེ ཙ ན ཝཏྟབྦཾ. ཀིརིཡཏོཔི དྭཱདསསུ ཛྷཱནེསུ ཨཡམེཝ ནཡོ.

ཏཱིཎི ཛྷཱནཱནི ན ཝཏྟབྦཱཏི ཨཏཱིཏཱདཱིསུ ཨེཀདྷམྨམྤི ཨཱརབྦྷ ཨཔྤཝཏྟིཏོ ནཝཏྟབྦཱཏི ཝེདིཏབྦཱ.

ཙཏུཏྠཾ ཛྷཱནནྟི ཀུསལཏོ ཏེརསསུ ཙཏུཏྠཛ྄ཛྷཱནེསུ སབྦཏྠཔཱདཀཙཏུཏྠཾ ནཝཏྟབྦཱརམྨཎམེཝ. ཨིདྡྷིཝིདྷཙཏུཏྠཾ ཀཱཡཝསེན ཙིཏྟཔརིཎཱམནེ སམཱཔཏྟིཙིཏྟཱརམྨཎཏྟཱ ཨཏཱིཏཱརམྨཎཾ; ‘‘ཨནཱགཏེ ཨིམཱནི པུཔྥཱནི མཱ མིལཱཡིཾསུ, དཱིཔཱ མཱ ནིབྦཱཡིཾསུ, ཨེཀོ ཨགྒིཀྑནྡྷོ སམུཊྛཱཏུ, པབྦཏོ སམུཊྛཱཏཱུ’’ཏི ཨདྷིཊྛཱནཀཱལེ ཨནཱགཏཱརམྨཎཾ; ཙིཏྟཝསེན ཀཱཡཔརིཎཱམནཀཱལེ ཀཱཡཱརམྨཎཏྟཱ པཙྩུཔྤནྣཱརམྨཎཾ. དིབྦསོཏཉཱཎཙཏུཏྠཾ སདྡཱརམྨཎཏྟཱ པཙྩུཔྤནཱརམྨཎཾ. ཙེཏོཔརིཡཉཱཎཙཏུཏྠཾ ཨཏཱིཏེ སཏྟདིཝསབྦྷནྟརེ ཨུཔྤཛྫིཏྭཱ ནིརུདྡྷཙིཏྟཛཱནནཀཱལེ ཨཏཱིཏཱརམྨཎཾ; ཨནཱགཏེ སཏྟདིཝསབྦྷནྟརེ ཨུཔྤཛྫནཀཙིཏྟཛཱནནཀཱལེ ཨནཱགཏཱརམྨཎཾ. ‘‘ཡཐཱ ཨིམསྶ བྷོཏོ མནོསངྑཱརཱ པཎིཧིཏཱ ཨིམསྶ ཙིཏྟསྶ ཨནནྟརཱ ཨམུཾ ནཱམ ཝིཏཀྐཾ ཝིཏཀྐེསྶཏཱིཏི. སོ བཧུཉྩེཔི ཨཱདིསཏི, ཏཐེཝ ཏཾ ཧོཏི ནོ ཨཉྙཐཱ’’ཏི ཨིམིནཱ ཧི སུཏྟེན (ཨ. ནི. ༣.༦༡) ཙེཏོཔརིཡཉཱཎསྶེཝ པཝཏྟི པཀཱསིཏཱ. ཨདྡྷཱནཔཙྩུཔྤནྣསནྟཏིཔཙྩུཔྤནྣཝསེནེཝ པཙྩུཔྤནྣཾ ཨཱརབྦྷ པཝཏྟིཀཱལེ པཙྩུཔྤནྣཱརམྨཎཾ. ཝིཏྠཱརཀཐཱ པནེཏྠ ཧེཊྛཱཨཊྛཀཐཱཀཎྜཝཎྞནཱཡཾ ཝུཏྟནཡེནེཝ ཝེདིཏབྦཱ.

པུབྦེནིཝཱསཉཱཎཙཏུཏྠཾ ¶ ཨཏཱིཏཀྑནྡྷཱནུསྶརཎཀཱལེ ཨཏཱིཏཱརམྨཎཾ, ནཱམགོཏྟཱནུསྶརཎཀཱལེ ནཝཏྟབྦཱརམྨཎཾ. དིབྦཙཀྑུཉཱཎཙཏུཏྠཾ ཝཎྞཱརམྨཎཏྟཱ པཙྩུཔྤནྣཱརམྨཎཾ. ཡཐཱཀམྨཱུཔགཉཱཎཙཏུཏྠཾ ཨཏཱིཏཀམྨམེཝ ཨཱརམྨཎཾ ཀརོཏཱིཏི ཨཏཱིཏཱརམྨཎཾ. ཨནཱགཏཾསཉཱཎཙཏུཏྠཾ ཨནཱགཏཀྑནྡྷཱནུསྶརཎཀཱལེ ཨནཱགཏཱརམྨཎཾ, ནཱམགོཏྟཱནུསྶརཎཀཱལེ ¶ ནཝཏྟབྦཱརམྨཎཾ. ཨཱཀཱསཱནཉྩཱཡཏནཨཱཀིཉྩཉྙཱཡཏནཙཏུཏྠཾ ནཝཏྟབྦཱརམྨཎམེཝ. ཝིཉྙཱཎཉྩཱཡཏནནེཝསཉྙཱནཱསཉྙཱཡཏནཙཏུཏྠཾ ཨཏཱིཏཱརམྨཎམེཝ. ལོཀུཏྟརཙཏུཏྠཾ ནཝཏྟབྦཱརམྨཎམེཝ. ཀིརིཡཏོཔི དྭཱདསསུ ཙཏུཏྠཛ྄ཛྷཱནེསུ ཨེསེཝ ནཡོ.

ཏཱིཎི ¶ ཛྷཱནཱནི བཧིདྡྷཱརམྨཎཱཏི ཨཛ྄ཛྷཏྟཏོ བཧིདྡྷཱབྷཱུཏཾ ནིམིཏྟཾ ཨཱརབྦྷ པཝཏྟིཏོ བཧིདྡྷཱརམྨཎཱ.

ཙཏུཏྠཾ ཛྷཱནནྟི ཨིདྷཱཔི ཀུསལཏོ ཏེརསསུ ཙཏུཏྠཛ྄ཛྷཱནེསུ སབྦཏྠཔཱདཀཙཏུཏྠཾ བཧིདྡྷཱརམྨཎམེཝ.

ཨིདྡྷིཝིདྷཙཏུཏྠཾ ཀཱཡཝསེན ཙིཏྟཔརིཎཱམནེཔི ཙིཏྟཝསེན ཀཱཡཔརིཎཱམནེཔི ཨཏྟནོཝ ཀཱཡཙིཏྟཱརམྨཎཏྟཱ ཨཛ྄ཛྷཏྟཱརམྨཎཾ; ‘‘བཧིདྡྷཱ ཧཏྠིམྤི དསྶེཏཱི’’ཏིཨཱདིནཱ ནཡེན པཝཏྟཀཱལེ བཧིདྡྷཱརམྨཎཾ.

དིབྦསོཏཉཱཎཙཏུཏྠཾ ཨཏྟནོ ཀུཙྪིགཏསདྡཱརམྨཎཀཱལེ ཨཛ྄ཛྷཏྟཱརམྨཎཾ, པརསྶ སདྡཱརམྨཎཀཱལེ བཧིདྡྷཱརམྨཎཾ, ཨུབྷཡཝསེནཱཔི ཨཛ྄ཛྷཏྟབཧིདྡྷཱརམྨཎཾ.

ཙེཏོཔརིཡཉཱཎཙཏུཏྠཾ བཧིདྡྷཱརམྨཎམེཝ.

པུབྦེནིཝཱསཉཱཎཙཏུཏྠཾ ཨཏྟནོ ཁནྡྷཱནུསྶརཎཀཱལེ ཨཛ྄ཛྷཏྟཱརམྨཎཾ, པརསྶ ཁནྡྷཱནཉྩེཝ ནཱམགོཏྟསྶ ཙ ཨནུསྶརཎཀཱལེ བཧིདྡྷཱརམྨཎཾ.

དིབྦཙཀྑུཉཱཎཙཏུཏྠཾ ཨཏྟནོ རཱུཔཱརམྨཎཀཱལེ ཨཛ྄ཛྷཏྟཱརམྨཎཾ, པརསྶ རཱུཔཱརམྨཎཀཱལེ བཧིདྡྷཱརམྨཎཾ, ཨུབྷཡཝསེནཱཔི ཨཛ྄ཛྷཏྟབཧིདྡྷཱརམྨཎཾ.

ཡཐཱཀམྨཱུཔགཉཱཎཙཏུཏྠཾ ¶ ཨཏྟནོ ཀམྨཛཱནནཀཱལེ ཨཛ྄ཛྷཏྟཱརམྨཎཾ, པརསྶ ཀམྨཛཱནནཀཱལེ བཧིདྡྷཱརམྨཎཾ, ཨུབྷཡཝསེནཱཔི ཨཛ྄ཛྷཏྟབཧིདྡྷཱརམྨཎཾ.

ཨནཱགཏཾསཉཱཎཙཏུཏྠཾ ཨཏྟནོ ཨནཱགཏེ ནིབྦཏྟིཛཱནནཀཱལེ ཨཛ྄ཛྷཏྟཱརམྨཎཾ, པརསྶ ཁནྡྷཱནུསྶརཎཀཱལེ ཙེཝ ནཱམགོཏྟཱནུསྶརཎཀཱལེ ཙ བཧིདྡྷཱརམྨཎཾ, ཨུབྷཡཝསེནཱཔི ཨཛ྄ཛྷཏྟབཧིདྡྷཱརམྨཎཾ.

ཨཱཀཱསཱནཉྩཱཡཏནཙཏུཏྠཾ བཧིདྡྷཱརམྨཎཾ. ཨཱཀིཉྩཉྙཱཡཏནཙཏུཏྠཾ ནཝཏྟབྦཱརམྨཎཾ. ཝིཉྙཱཎཉྩཱཡཏནནེཝསཉྙཱནཱསཉྙཱཡཏནཙཏུཏྠཾ ཨཛ྄ཛྷཏྟཱརམྨཎཾ.

ལོཀུཏྟརཙཏུཏྠཾ བཧིདྡྷཱརམྨཎམེཝ. ཀིརིཡཏོཔི དྭཱདསསུ ཛྷཱནེསུ ཨཡམེཝ ནཡོཏི.

ཨིམསྨིཾ ¶ ¶ པན ཛྷཱནཝིབྷངྒེ སམྨཱསམྦུདྡྷེན སུཏྟནྟབྷཱཛནཱིཡེཔི ལོཀིཡལོཀུཏྟརམིསྶཀཱནེཝ ཛྷཱནཱནི ཀཐིཏཱནི; ཨབྷིདྷམྨབྷཱཛནཱིཡེཔི པཉྷཱཔུཙྪཀེཔི. ཏཡོཔི ཧི ཨེཏེ ནཡཱ ཏེབྷཱུམཀདྷམྨམིསྶཀཏྟཱ ཨེཀཔརིཙྪེདཱ ཨེཝ. ཨེཝམཡཾ ཛྷཱནཝིབྷངྒོཔི ཏེཔརིཝཊྚཾ ནཱིཧརིཏྭཱཝ བྷཱཛེཏྭཱ དསྶིཏོཏི.

སམྨོཧཝིནོདནིཡཱ ཝིབྷངྒཊྛཀཐཱཡ

ཛྷཱནཝིབྷངྒཝཎྞནཱ ནིཊྛིཏཱ.

༡༣. ཨཔྤམཉྙཱཝིབྷངྒོ

༡. སུཏྟནྟབྷཱཛནཱིཡཝཎྞནཱ

༦༤༢. ཨིདཱནི ¶ ¶ ¶ ཏདནནྟརེ ཨཔྤམཉྙཱཝིབྷངྒེ ཙཏསྶོཏི གཎནཔརིཙྪེདོ. ཨཔྤམཉྙཱཡོཏི ཕརཎཨཔྤམཱཎཝསེན ཨཔྤམཉྙཱཡོ. ཨེཏཱ ཧི ཨཱརམྨཎཝསེན ཨཔྤམཱཎེ ཝཱ སཏྟེ ཕརནྟི, ཨེཀསཏྟམྤི ཝཱ ཨནཝསེསཕརཎཝསེན ཕརནྟཱིཏི ཕརཎཨཔྤམཱཎཝསེན ཨཔྤམཉྙཱཡོཏི ཝུཙྩནྟི. ཨིདྷ བྷིཀྑཱུཏི ཨིམསྨིཾ སཱསནེ བྷིཀྑུ. མེཏྟཱསཧགཏེནཱཏི མེཏྟཱཡ སམནྣཱགཏེན. ཙེཏསཱཏི ཙིཏྟེན. ཨེཀཾ དིསནྟི ཨེཀིསྶཱ དིསཱཡ. པཋམཔརིགྒཧིཏཾ སཏྟཾ ཨུཔཱདཱཡ ཨེཀདིསཱཔརིཡཱཔནྣསཏྟཕརཎཝསེན ཝུཏྟཾ. ཕརིཏྭཱཏི ཕུསིཏྭཱ ཨཱརམྨཎཾ ཀཏྭཱ. ཝིཧརཏཱིཏི བྲཧྨཝིཧཱརཱདྷིཊྛིཏཾ ཨིརིཡཱཔཐཝིཧཱརཾ པཝཏྟེཏི. ཏཐཱ དུཏིཡནྟི ཡཐཱ པུརཏྠིམཱདཱིསུ དིསཱསུ ཡཾ ཀིཉྩི ཨེཀཾ དིསཾ ཕརིཏྭཱ ཝིཧརཏི, ཏཐེཝ ཏདནནྟརཾ དུཏིཡཾ ཏཏིཡཾ ཙཏུཏྠཉྩཱཏི ཨཏྠོ.

ཨིཏི ཨུདྡྷནྟི ཏེནེཝ ཙ ནཡེན ཨུཔརིམཾ དིསནྟི ཝུཏྟཾ ཧོཏི. ཨདྷོ ཏིརིཡནྟི ཨདྷོདིསམྤི ཏིརིཡཾདིསམྤི ཨེཝམེཝ. ཨེཏྠ ཙ ཨདྷོཏི ཧེཊྛཱ, ཏིརིཡནྟི ཨནུདིསཱ. ཨེཝཾ སབྦདིསཱསུ ཨསྶམཎྜལེ ཨསྶམིཝ མེཏྟཱསཧགཏཾ ཙིཏྟཾ སཱརེཏིཔི པཙྩཱསཱརེཏིཔཱིཏི ཨེཏྟཱཝཏཱ ཨེཀམེཀཾ དིསཾ པརིགྒཧེཏྭཱ ཨོདྷིསོ མེཏྟཱཕརཎཾ དསྶིཏཾ. སབྦདྷཱིཏིཨཱདི པན ཨནོདྷིསོ དསྶནཏྠཾ ཝུཏྟཾ. ཏཏྠ སབྦདྷཱིཏི སབྦཏྠ. སབྦཏྟཏཱཡཱཏི སབྦེསུ ཧཱིནམཛ྄ཛྷིམུཀྐཊྛམིཏྟསཔཏྟམཛ྄ཛྷཏྟཱདིཔྤབྷེདེསུ ཨཏྟཏཱཡ ‘ཨཡཾ པརསཏྟོ’ཏི ཝིབྷཱགཾ ཨཀཏྭཱ ཨཏྟསམཏཱཡཱཏི ཝུཏྟཾ ཧོཏི; ཨཐ ཝཱ སབྦཏྟཏཱཡཱཏི སབྦེན ཙིཏྟབྷཱཝེན ཨཱིསཀམྤི ¶ བཧི ཨཝིཀྑིཔམཱནོཏི ¶ ཝུཏྟཾ ཧོཏི. སབྦཱཝནྟནྟི སབྦསཏྟཝནྟཾ, སབྦསཏྟཡུཏྟནྟི ཨཏྠོ. ལོཀནྟི སཏྟལོཀཾ.

ཝིཔུལེནཱཏིཨེཝམཱདིཔརིཡཱཡདསྶནཏོ པནེཏྠ པུན ‘‘མེཏྟཱསཧགཏེནཱ’’ཏི ཝུཏྟཾ. ཡསྨཱ ཝཱ ཨེཏྠ ཨོདྷིསོ ཕརཎེ ཝིཡ པུན ‘ཏཐཱ’སདྡོ ‘ཨིཏི’སདྡོ ཝཱ ན ཝུཏྟོ, ཏསྨཱ པུན ‘‘མེཏྟཱསཧགཏེན ཙེཏསཱ’’ཏི ཝུཏྟཾ; ནིགམནཝསེན ཝཱ ཨེཏཾ ཝུཏྟཾ. ཝིཔུལེནཱཏི ཨེཏྠ ཙ ཕརཎཝསེན ཝིཔུལཏཱ དཊྛབྦཱ. བྷཱུམིཝསེན པན ཏཾ མཧགྒཏཾ, པགུཎཝསེན ཨཔྤམཱཎཾ ¶ , སཏྟཱརམྨཎཝསེན ཙ ཨཔྤམཱཎཾ, བྱཱཔཱདཔཙྩཏྠིཀཔྤཧཱནེན ཨཝེརཾ, དོམནསྶཔྤཧཱནཏོ ཨབྱཱཔཛ྄ཛྷཾ, ནིདྡུཀྑནྟི ཝུཏྟཾ ཧོཏི. ཨཡཾ ཏཱཝ ‘‘མེཏྟཱསཧགཏེན ཙེཏསཱ’’ཏིཨཱདིནཱ ནཡེན ཋཔིཏཱཡ མཱཏིཀཱཡ ཨཏྠོ.

༦༤༣. ཨིདཱནི ཡདེཏཾ ‘‘ཀཐཉྩ, བྷིཀྑཝེ, མེཏྟཱསཧགཏེན ཙེཏསཱ’’ཏིཨཱདིནཱ ནཡེན ཝུཏྟཾ པདབྷཱཛནཱིཡཾ, ཏཏྠ ཡསྨཱ ཨིདཾ ཀམྨཊྛཱནཾ དོསཙརིཏསྶ སཔྤཱཡཾ, ཏསྨཱ ཡཐཱརཱུཔེ པུགྒལེ ཨཡཾ མེཏྟཱ ཨཔྤནཾ པཱཔུཎཱཏི, ཏཾ མེཏྟཱཡ ཝཏྠུབྷཱུཏཾ པུགྒལཾ ཏཱཝ དསྶེཏུཾ སེཡྻཐཱཔི ནཱམ ཨེཀཾ པུགྒལནྟིཨཱདི ཝུཏྟཾ. ཏཏྠ སེཡྻཐཱཔི ནཱམཱཏི ཨོཔམྨཏྠེ ནིཔཱཏོ, ཡཐཱ ཨེཀཾ པུགྒལནྟི ཨཏྠོ. པིཡནྟི པེམནཱིཡཾ. མནཱཔནྟི ཧདཡཝུཌྜྷིཀརཾ. ཏཏྠ པུབྦེཝ སནྣིཝཱསེན པཙྩུཔྤནྣཧིཏེན ཝཱ པིཡོ ནཱམ ཧོཏི, སཱིལཱདིགུཎསམཱཡོགེན མནཱཔོ ནཱམ; དཱནསམཱནཏྟཏཱཧི ཝཱ པིཡཏཱ, པིཡཝཙནཨཏྠཙརིཡཏཱཧི མནཱཔཏཱ ཝེདིཏབྦཱ. ཡསྨཱ ཙེཏྠ པིཡཏཱཡ ཨིམསྶ བྱཱཔཱདསྶ པཧཱནཾ ཧོཏི, ཏཏོ མེཏྟཱ སུཁཾ ཕརཏི, མནཱཔཏཱཡ ཨུདཱསཱིནཏཱ ན སཎྛཱཏི, ཧིརོཏྟཔྤཉྩ པཙྩུཔཊྛཱཏི, ཏཏོ ཧིརོཏྟཔྤཱནུཔཱལིཏཱ མེཏྟཱ ན པརིཧཱཡཏི, ཏསྨཱ ཏཾ ཨུཔམཾ ཀཏྭཱ ཨིདཾ ཝུཏྟཾ – པིཡཾ མནཱཔནྟི. མེཏྟཱཡེཡྻཱཏི མེཏྟཱཡ ཕརེཡྻ; ཏསྨིཾ པུགྒལེ མེཏྟཾ ཀརེཡྻ པཝཏྟེཡྻཱཏི ཨཏྠོ. ཨེཝམེཝ ¶ སབྦེ སཏྟེཏི ཡཐཱ པིཡཾ པུགྒལཾ མེཏྟཱཡེཡྻ, ཨེཝཾ ཏསྨིཾ པུགྒལེ ཨཔྤནཱཔྤཏྟཱཡ ཝསཱིབྷཱཝཾ ཨུཔགཏཱཡ མེཏྟཱཡ མཛ྄ཛྷཏྟཝེརིསངྑཱཏེཔི སབྦེ སཏྟེ ཨནུཀྐམེན ཕརཏཱིཏི ཨཏྠོ. མེཏྟི མེཏྟཱཡནཱཏིཨཱདཱིནི ཝུཏྟཏྠཱནེཝ.

༦༤༤. ཝིདིསཾ ཝཱཏི པདཾ ཏིརིཡཾ ཝཱཏི ཨེཏསྶ ཨཏྠཝིབྷཱཝནཏྠཾ ཝུཏྟཾ.

༦༤༥. ཕརིཏྭཱཏི ¶ ཨཱརམྨཎཀརཎཝསེན ཕུསིཏྭཱ. ཨདྷིམུཉྩིཏྭཱཏི ཨདྷིཀབྷཱཝེན མུཉྩིཏྭཱ, ཡཐཱ མུཏྟཾ སུམུཏྟཾ ཧོཏི སུཔྤསཱརིཏཾ སུཝིཏྠཏཾ ཏཐཱ མུཉྩིཏྭཱཏི ཨཏྠོ.

༦༤༨. སབྦདྷིཨཱདིནིདྡེསེ ཡསྨཱ ཏཱིཎིཔི ཨེཏཱནི པདཱནི སབྦསངྒཱཧིཀཱནི, ཏསྨཱ ནེསཾ ཨེཀཏོཝ ཨཏྠཾ དསྶེཏུཾ སབྦེན སབྦནྟིཨཱདི ཝུཏྟཾ. ཏསྶཏྠོ ཧེཊྛཱ ཝུཏྟོཡེཝ.

༦༥༠. ཝིཔུལཱདིནིདྡེསེ ¶ ཡསྨཱ ཡཾ ཨཔྤནཱཔྤཏྟཾ ཧུཏྭཱ ཨནནྟསཏྟཕརཎཝསེན ཝིཔུལཾ, ཏཾ ནིཡམཏོ བྷཱུམིཝསེན མཧགྒཏཾ ཧོཏི. ཡཉྩ མཧགྒཏཾ ཏཾ ཨཔྤམཱཎགོཙརཝསེན ཨཔྤམཱཎཾ. ཡཾ ཨཔྤམཱཎཾ ཏཾ པཙྩཏྠིཀཝིགྷཱཏཝསེན ཨཝེརཾ. ཡཉྩ ཨཝེརཾ ཏཾ ཝིཧཏབྱཱཔཛྫཏཱཡ ཨབྱཱཔཛྫཾ. ཏསྨཱ ‘‘ཡཾ ཝིཔུལཾ ཏཾ མཧགྒཏ’’ནྟིཨཱདི ཝུཏྟཾ. ཨཝེརོ ཨབྱཱཔཛྫོཏི ཙེཏྠ ལིངྒཝིཔརིཡཱཡེན ཝུཏྟཾ. མནེན ཝཱ སདྡྷིཾ ཡོཛནཱ ཀཱཏབྦཱ – ཡཾ ཨཔྤམཱཎཾ ཙིཏྟཾ, སོ ཨཝེརོ མནོ; ཡོ ཨཝེརོ སོ ཨབྱཱཔཛྫོཏི. ཨཔིཙེཏྠ ཧེཊྛིམཾ ཧེཊྛིམཾ པདཾ ཨུཔརིམསྶ ཨུཔརིམསྶ, ཨུཔརིམཾ ཝཱ ཨུཔརིམཾ ཧེཊྛིམསྶ ཧེཊྛིམསྶ ཨཏྠོཏིཔི ཝེདིཏབྦོ.

༦༥༣. སེཡྻཐཱཔི ནཱམ ཨེཀཾ པུགྒལཾ དུགྒཏཾ དུརུཔེཏནྟི ཨིདམྤི ཀརུཎཱཡ ཝཏྠུབྷཱུཏཾ པུགྒལཾ དསྶེཏུཾ ཝུཏྟཾ. ཨེཝརཱུཔསྨིཉྷི པུགྒལེ བལཝཀཱརུཉྙཾ ཨུཔྤཛྫཏི. ཏཏྠ དུགྒཏནྟི དུཀྑེན སམངྒཱིབྷཱཝཾ གཏཾ. དུརུཔེཏནྟི ཀཱཡདུཙྩརིཏཱདཱིཧི ཨུཔེཏཾ. གཏིཀུལབྷོགཱདིཝསེན ཝཱ ཏམབྷཱཝེ ཋིཏོ པུགྒལོ དུགྒཏོ, ཀཱཡདུཙྩརིཏཱདཱིཧི ཨུཔེཏཏྟཱ ཏམཔརཱཡཎབྷཱཝེ ཋིཏོ དུརུཔེཏོཏི ཨེཝམེཏྠ ཨཏྠོ ཝེདིཏབྦོ.

༦༦༣. ཨེཀཾ པུགྒལཾ པིཡཾ མནཱཔནྟི ཨིདམྤི མུདིཏཱཡ ཝཏྠུབྷཱུཏཾ པུགྒལཾ དསྶེཏུཾ ཝུཏྟཾ. ཏཏྠ ¶ གཏིཀུལབྷོགཱདིཝསེན ཛོཏིབྷཱཝེ ཋིཏོ པིཡོ, ཀཱཡསུཙརིཏཱདཱིཧི ཨུཔེཏཏྟཱ ཛོཏིཔརཱཡཎབྷཱཝེ ཋིཏོ མནཱཔོཏི ཝེདིཏབྦོ.

༦༧༣. ནེཝ མནཱཔཾ ན ཨམནཱཔནྟི ཨིདམྤི ཨུཔེཀྑཱཡ ཝཏྠུབྷཱུཏཾ པུགྒལཾ དསྶེཏུཾ ཝུཏྟཾ. ཏཏྠ མིཏྟབྷཱཝཾ ཨསམྤཏྟཏཱཡ ནེཝ མནཱཔོ, ཨམིཏྟབྷཱཝཾ ཨསམྤཏྟཏཱཡ ན ཨམནཱཔོཏི ཝེདིཏབྦོ. སེསམེཏྠ ཡཾ ཝཏྟབྦཾ སིཡཱ, ཏཾ སབྦཾ ཧེཊྛཱ ཙིཏྟུཔྤཱདཀཎྜེ ཝུཏྟམེཝ. བྷཱཝནཱཝིདྷཱནམྤི ཨེཏེསཾ ཀམྨཊྛཱནཱནཾ ཝིསུདྡྷིམགྒེ ཝིཏྠཱརཏོ ཀཐིཏམེཝཱཏི.

སུཏྟནྟབྷཱཛནཱིཡཝཎྞནཱ.

༢. ཨབྷིདྷམྨབྷཱཛནཱིཡཝཎྞནཱ

ཨབྷིདྷམྨབྷཱཛནཱིཡཾ ¶ ¶ ཀུསལཏོཔི ཝིཔཱཀཏོཔི ཀིརིཡཏོཔི ཧེཊྛཱ ཙིཏྟུཔྤཱདཀཎྜེ བྷཱཛིཏནཡེནེཝ བྷཱཛིཏཾ. ཨཏྠོཔིསྶ ཏཏྠ ཝུཏྟནཡེནེཝ ཝེདིཏབྦོ.

༣. པཉྷཱཔུཙྪཀཝཎྞནཱ

པཉྷཱཔུཙྪཀེ པཱལི༹ཨནུསཱརེནེཝ མེཏྟཱདཱིནཾ ཀུསལཱདིབྷཱཝོ ཝེདིཏབྦོ. ཨཱརམྨཎཏྟིཀེསུ པན སབྦཱཔི ཏཱིསུ ཏིཀེསུ ནཝཏབྦཱརམྨཎཱ ཨེཝ. ཨཛ྄ཛྷཏྟཱརམྨཎཏྟིཀེ བཧིདྡྷཱརམྨཎཱཏི. ཨིམསྨིཾ པན ཨཔྤམཉྙཱཝིབྷངྒེ སམྨཱསམྦུདྡྷེན སུཏྟནྟབྷཱཛནཱིཡེཔི ལོཀིཡཱ ཨེཝ ཨཔྤམཉྙཱཡོ ཀཐིཏཱ, ཨབྷིདྷམྨབྷཱཛནཱིཡེཔི པཉྷཱཔུཙྪཀེཔི. ཏཡོཔི ཧི ཨེཏེ ནཡཱ ལོཀིཡཏྟཱ ཨེཀཔརིཙྪེདཱ ཨེཝ. ཨེཝམཡཾ ཨཔྤམཉྙཱཝིབྷངྒོཔི ཏེཔརིཝཊྚཾ ནཱིཧརིཏྭཱཝ བྷཱཛེཏྭཱ དསྶིཏོཏི.

སམྨོཧཝིནོདནིཡཱ ཝིབྷངྒཊྛཀཐཱཡ

ཨཔྤམཉྙཱཝིབྷངྒཝཎྞནཱ ནིཊྛིཏཱ.

༡༤. སིཀྑཱཔདཝིབྷངྒོ

༡. ཨབྷིདྷམྨབྷཱཛནཱིཡཝཎྞནཱ

༧༠༣. ཨིདཱནི ¶ ¶ ¶ ཏདནནྟརེ སིཀྑཱཔདཝིབྷངྒེ པཉྩཱཏི གཎནཔརིཙྪེདོ. སིཀྑཱཔདཱནཱིཏི སིཀྑིཏབྦཔདཱནི; སིཀྑཱཀོཊྛཱསཱཏི ཨཏྠོ. ཨཔིཙ ཨུཔརི ཨཱགཏཱ སབྦེཔི ཀུསལཱ དྷམྨཱ སིཀྑིཏབྦཏོ སིཀྑཱ. པཉྩསུ པན སཱིལངྒེསུ ཡཾཀིཉྩི ཨངྒཾ ཏཱསཾ སིཀྑཱནཾ པཏིཊྛཱནཊྛེན པདནྟི སིཀྑཱནཾ པདཏྟཱ སིཀྑཱཔདཱནི. པཱཎཱཏིཔཱཏཱཏི པཱཎསྶ ཨཏིཔཱཏཱ གྷཱཏནཱ མཱརཎཱཏི ཨཏྠོ. ཝེརམཎཱིཏི ཝིརཏི. ཨདིནྣཱདཱནཱཏི ཨདིནྣསྶ ཨཱདཱནཱ; པརཔརིགྒཧིཏསྶ ཧརཎཱཏི ཨཏྠོ. ཀཱམེསཱུཏི ཝཏྠུཀཱམེསུ. མིཙྪཱཙཱརཱཏི ཀིལེསཀཱམཝསེན ལཱམཀཱཙཱརཱ. མུསཱཝཱདཱཏི ཨབྷཱུཏཝཱདཏོ. སུརཱམེརཡམཛྫཔམཱདཊྛཱནཱཏི ཨེཏྠ སུརཱཏི པིཊྛསུརཱ, པཱུཝསུརཱ, ཨོདནསུརཱ, ཀིཎྞཔཀྑིཏྟཱ, སམྦྷཱརསཾཡུཏྟཱཏི པཉྩ སུརཱ. མེརཡནྟི པུཔྥཱསཝོ, ཕལཱསཝོ, གུལཱ༹སཝོ, མདྷྭཱསཝོ, སམྦྷཱརསཾཡུཏྟོཏི པཉྩ ཨཱསཝཱ. ཏདུབྷཡམྤི མདནཱིཡཊྛེན མཛྫཾ. ཡཱཡ ཙེཏནཱཡ ཏཾ པིཝནྟི, སཱ པམཱདཀཱརཎཏྟཱ པམཱདཊྛཱནཾ; ཏསྨཱ སུརཱམེརཡམཛྫཔམཱདཊྛཱནཱ. ཨཡཾ ཏཱཝེཏྠ མཱཏིཀཱནིཀྑེཔསྶ ཨཏྠོ.

༧༠༤. པདབྷཱཛནཱིཡེ པན ཡསྨིཾ སམཡེ ཀཱམཱཝཙརནྟིཨཱདི སབྦཾ ཧེཊྛཱ ཝུཏྟནཡཏྟཱ ཨུཏྟཱནཏྠམེཝ. ཡསྨཱ པན ན ཀེཝལཾ ཝིརཏིཡེཝ སིཀྑཱཔདཾ, ཙེཏནཱཔི སིཀྑཱཔདམེཝ, ཏསྨཱ ཏཾ དསྶེཏུཾ དུཏིཡནཡོ དསྶིཏོ. ཡསྨཱ ཙ ན ཀེཝལཾ ཨེཏེཡེཝ དྭེ དྷམྨཱ སིཀྑཱཔདཾ, ཙེཏནཱསམྤཡུཏྟཱ པན པརོཔཎྞཱསདྷམྨཱཔི སིཀྑིཏབྦཀོཊྛཱསཏོ སིཀྑཱཔདམེཝ, ཏསྨཱ ཏཏིཡནཡོཔི དསྶིཏོ.

ཏཏྠ ¶ དུཝིདྷཾ སིཀྑཱཔདཾ པརིཡཱཡསིཀྑཱཔདཾ ནིཔྤརིཡཱཡསིཀྑཱཔདཉྩ. ཏཏྠ ཝིརཏི ནིཔྤརིཡཱཡསིཀྑཱཔདཾ. སཱ ཧི ‘‘པཱཎཱཏིཔཱཏཱ ཝེརམཎཱི’’ཏི ¶ པཱལི༹ཡཾ ཨཱགཏཱ, ནོ ཙེཏནཱ. ཝིརམནྟོ ཙ ཏཱཡ ཨེཝ ཏཏོ ཏཏོ ཝིརམཏི, ན ཙེཏནཱཡ. ཙེཏནཾ པན ཨཱཧརིཏྭཱ དསྶེསི. ཏཐཱ སེསཙེཏནཱསམྤཡུཏྟདྷམྨེ. ཝཱིཏིཀྐམཀཱལེ ཧི ཝེརཙེཏནཱ དུསྶཱིལྱཾ ནཱམ. ཏསྨཱ སཱ ཝིརཏིཀཱལེཔི སུསཱིལྱཝསེན ཝུཏྟཱ. ཕསྶཱདཡོ ཏཾསམྤཡུཏྟཏྟཱ གཧིཏཱཏི.

ཨིདཱནི ¶ ཨེཏེསུ སིཀྑཱཔདེསུ ཉཱཎསམུཏྟེཛནཏྠཾ ཨིམེསཾ པཱཎཱཏིཔཱཏཱདཱིནཾ དྷམྨཏོ, ཀོཊྛཱསཏོ, ཨཱརམྨཎཏོ, ཝེདནཱཏོ, མཱུལཏོ, ཀམྨཏོ, སཱཝཛྫཏོ, པཡོགཏོ ཙ ཝིནིཙྪཡོ ཝེདིཏབྦོ.

ཏཏྠ ‘དྷམྨཏོ’ཏི པཉྩཔེཏེ པཱཎཱཏིཔཱཏཱདཡོ ཙེཏནཱདྷམྨཱཝ ཧོནྟི. ‘ཀོཊྛཱསཏོ’ པཉྩཔི ཀམྨཔཐཱ ཨེཝ.

‘ཨཱརམྨཎཏོ’ པཱཎཱཏིཔཱཏོ ཛཱིཝིཏིནྡྲིཡཱརམྨཎོ. ཨདིནྣཱདཱནཾ སཏྟཱརམྨཎཾ ཝཱ སངྑཱརཱརམྨཎཾ ཝཱ. མིཙྪཱཙཱརོ ཨིཏྠིཔུརིསཱརམྨཎོ. མུསཱཝཱདོ སཏྟཱརམྨཎོ ཝཱ སངྑཱརཱརམྨཎོ ཝཱ. སུརཱཔཱནཾ སངྑཱརཱརམྨཎཾ.

‘ཝེདནཱཏོ’ པཱཎཱཏིཔཱཏོ དུཀྑཝེདནོ. ཨདིནྣཱདཱནཾ ཏིཝེདནཾ. ཏཉྷི ཧཊྛཏུཊྛསྶ ཨདིནྣཾ ཨཱདིཡཏོ སུཁཝེདནཾ ཧོཏི, བྷཱིཏཀཱལེ དུཀྑཝེདནཾ, མཛ྄ཛྷཏྟསྶ ཧུཏྭཱ གཎྷཏོ ཨདུཀྑམསུཁཝེདནཾ. མིཙྪཱཙཱརོ སུཁཝེདནོ ཝཱ ཨདུཀྑམསུཁཝེདནོ ཝཱ. མུསཱཝཱདོ ཨདིནྣཱདཱནཾ ཝིཡ ཏིཝེདནོ. སུརཱཔཱནཾ སུཁམཛ྄ཛྷཏྟཝེདནཾ.

‘མཱུལཏོ’ པཱཎཱཏིཔཱཏོ དོསམོཧམཱུལོ. ཨདིནྣཱདཱནཾ ཀིཉྩིཀཱལེ ལོབྷམོཧམཱུལཾ, ཀིཉྩིཀཱལེ དོསམོཧམཱུལཾ. མིཙྪཱཙཱརོ ལོབྷམོཧམཱུལོ. མུསཱཝཱདོ ཀིཉྩིཀཱལེ ལོབྷམོཧམཱུལོ, ཀིཉྩིཀཱལེ དོསམོཧམཱུལོ. སུརཱཔཱནཾ ལོབྷམོཧམཱུལཾ.

‘ཀམྨཏོ’ མུསཱཝཱདོ ཙེཏྠ ཝཙཱིཀམྨཾ. སེསཱ ཀཱཡཀམྨམེཝ.

‘སཱཝཛྫཏོ’ ¶ པཱཎཱཏིཔཱཏོ ཨཏྠི ཨཔྤསཱཝཛྫོ, ཨཏྠི མཧཱསཱཝཛྫོ. ཏཐཱ ཨདིནྣཱདཱནཱདཱིནི. ཏེསཾ ནཱནཱཀརཎཾ ཧེཊྛཱ དསྶིཏམེཝ.

ཨཡཾ པན ཨཔརོ ནཡོ – ཀུནྠཀིཔིལླིཀསྶ ཧི ཝདྷོ ཨཔྤསཱཝཛྫོ, ཏཏོ མཧནྟཏརསྶ མཧཱསཱཝཛྫོ; སོཔི ཨཔྤསཱཝཛྫོ, ཏཏོ མཧནྟཏརཱཡ སཀུཎིཀཱཡ མཧཱསཱཝཛྫོ; ཏཏོ གོདྷཱཡ, ཏཏོ སསཀསྶ, ཏཏོ མིགསྶ, ཏཏོ གཝཡསྶ, ཏཏོ ཨསྶསྶ, ཏཏོ ཧཏྠིསྶ ཝདྷོ མཧཱསཱཝཛྫོ, ཏཏོཔི དུསྶཱིལམནུསྶསྶ ¶ , ཏཏོ གོརཱུཔསཱིལཀམནུསྶསྶ, ཏཏོ སརཎགཏསྶ, ཏཏོ པཉྩསིཀྑཱཔདིཀསྶ, ཏཏོ སཱམཎེརསྶ, ཏཏོ པུཐུཛྫནབྷིཀྑུནོ ¶ , ཏཏོ སོཏཱཔནྣསྶ, ཏཏོ སཀདཱགཱམིསྶ, ཏཏོ ཨནཱགཱམིསྶ, ཏཏོ ཁཱིཎཱསཝསྶ ཝདྷོ ཨཏིམཧཱསཱཝཛྫོཡེཝ.

ཨདིནྣཱདཱནཾ དུསྶཱིལསྶ སནྟཀེ ཨཔྤསཱཝཛྫཾ, ཏཏོ གོརཱུཔསཱིལཀསྶ སནྟཀེ མཧཱསཱཝཛྫཾ; ཏཏོ སརཎགཏསྶ, ཏཏོ པཉྩསིཀྑཱཔདིཀསྶ, ཏཏོ སཱམཎེརསྶ, ཏཏོ པུཐུཛྫནབྷིཀྑུནོ, ཏཏོ སོཏཱཔནྣསྶ, ཏཏོ སཀདཱགཱམིསྶ, ཏཏོ ཨནཱགཱམིསྶ སནྟཀེ མཧཱསཱཝཛྫཾ, ཏཏོ ཁཱིཎཱསཝསྶ སནྟཀེ ཨཏིམཧཱསཱཝཛྫཾཡེཝ.

མིཙྪཱཙཱརོ དུསྶཱིལཱཡ ཨིཏྠིཡཱ ཝཱིཏིཀྐམེ ཨཔྤསཱཝཛྫོ, ཏཏོ གོརཱུཔསཱིལཀཱཡ མཧཱསཱཝཛྫོ; ཏཏོ སརཎགཏཱཡ, པཉྩསིཀྑཱཔདིཀཱཡ, སཱམཎེརིཡཱ, པུཐུཛྫནབྷིཀྑུནིཡཱ, སོཏཱཔནྣཱཡ, སཀདཱགཱམིནིཡཱ, ཏཏོ ཨནཱགཱམིནིཡཱ ཝཱིཏིཀྐམེ མཧཱསཱཝཛྫོ, ཁཱིཎཱསཝཱཡ པན བྷིཀྑུནིཡཱ ཨེཀནྟམཧཱསཱཝཛྫོཝ.

མུསཱཝཱདོ ཀཱཀཎིཀམཏྟསྶ ཨཏྠཱཡ མུསཱཀཐནེ ཨཔྤསཱཝཛྫོ, ཏཏོ ཨཌྜྷམཱསཀསྶ, མཱསཀསྶ, པཉྩམཱསཀསྶ, ཨཌྜྷཀཧཱཔཎསྶ, ཀཧཱཔཎསྶ, ཏཏོ ཨནགྒྷནིཡབྷཎྜསྶ ཨཏྠཱཡ མུསཱཀཐནེ མཧཱསཱཝཛྫོ, མུསཱ ཀཐེཏྭཱ པན སངྒྷཾ བྷིནྡནྟསྶ ཨེཀནྟམཧཱསཱཝཛྫོཝ.

སུརཱཔཱནཾ པསཏམཏྟསྶ པཱནེ ཨཔྤསཱཝཛྫཾ, ཨཉྫལིམཏྟསྶ པཱནེ མཧཱསཱཝཛྫཾ; ཀཱཡཙཱལནསམཏྠཾ པན བཧུཾ པིཝིཏྭཱ གཱམགྷཱཏནིགམགྷཱཏཀམྨཾ ཀརོནྟསྶ ཨེཀནྟམཧཱསཱཝཛྫམེཝ.

པཱཎཱཏིཔཱཏཉྷི ¶ པཏྭཱ ཁཱིཎཱསཝསྶ ཝདྷོ མཧཱསཱཝཛྫོ; ཨདིནྣཱདཱནཾ པཏྭཱ ཁཱིཎཱསཝསནྟཀསྶ ཧརཎཾ, མིཙྪཱཙཱརཾ པཏྭཱ ཁཱིཎཱསཝཱཡ བྷིཀྑུནིཡཱ ཝཱིཏིཀྐམནཾ, མུསཱཝཱདཾ པཏྭཱ མུསཱཝཱདེན སངྒྷབྷེདོ, སུརཱཔཱནཾ པཏྭཱ ཀཱཡཙཱལནསམཏྠཾ བཧུཾ པིཝིཏྭཱ གཱམནིགམགྷཱཏནཾ མཧཱསཱཝཛྫཾ. སབྦེཧིཔི པནེཏེཧི མུསཱཝཱདེན སངྒྷབྷེདནམེཝ མཧཱསཱཝཛྫཾ. ཏཉྷི ཀཔྤཾ ནིརཡེ པཱཙནསམཏྠཾ མཧཱཀིབྦིསཾ.

‘པཡོགཏོ’ཏི ¶ པཱཎཱཏིཔཱཏོ སཱཧཏྠིཀོཔི ཧོཏི ཨཱཎཏྟིཀོཔི. ཏཐཱ ཨདིནྣཱདཱནཾ. མིཙྪཱཙཱརམུསཱཝཱདསུརཱཔཱནཱནི སཱཧཏྠིཀཱནེཝཱཏི.

ཨེཝམེཏྠ ¶ པཱཎཱཏིཔཱཏཱདཱིནཾ དྷམྨཱདིཝསེན ཝིནིཙྪཡཾ ཉཏྭཱ པཱཎཱཏིཔཱཏཱ ཝེརམཎཱིཏིཨཱདཱིནམྤི དྷམྨཏོ, ཀོཊྛཱསཏོ, ཨཱརམྨཎཏོ, ཝེདནཱཏོ, མཱུལཏོ, ཀམྨཏོ, ཁཎྜཏོ, སམཱདཱནཏོ, པཡོགཏོ ཙ ཝིནིཙྪཡོ ཝེདིཏབྦོ.

ཏཏྠ ‘དྷམྨཏོ’ཏི པརིཡཱཡསཱིལཝསེན པཊིཔཱཊིཡཱ པཉྩ ཙེཏནཱདྷམྨཱཝ. ‘ཀོཊྛཱསཏོ’ཏི པཉྩཔི ཀམྨཔཐཱ ཨེཝ. ‘ཨཱརམྨཎཏོ’ཏི པཱཎཱཏིཔཱཏཱ ཝེརམཎཱི པརསྶ ཛཱིཝིཏིནྡྲིཡཾ ཨཱརམྨཎཾ ཀཏྭཱ ཨཏྟནོ ཝེརཙེཏནཱཡ ཝིརམཏི. ཨིཏརཱསུཔི ཨེསེཝ ནཡོ. སབྦཱཔི ཧི ཨེཏཱ ཝཱིཏིཀྐམིཏབྦཝཏྠུཾ ཨཱརམྨཎཾ ཀཏྭཱ ཝེརཙེཏནཱཧིཡེཝ ཝིརམནྟི. ‘ཝེདནཱཏོ’ཏི སབྦཱཔི སུཁཝེདནཱ ཝཱ ཧོནྟི མཛ྄ཛྷཏྟཝེདནཱ ཝཱ. ‘མཱུལཏོ’ཏི ཉཱཎསམྤཡུཏྟཙིཏྟེན ཝིརམནྟསྶ ཨལོབྷཨདོསཨམོཧམཱུལཱ ཧོནྟི, ཉཱཎཝིཔྤཡུཏྟཙིཏྟེན ཝིརམནྟསྶ ཨལོབྷཨདོསམཱུལཱ ཧོནྟི. ‘ཀམྨཏོ’ཏི མུསཱཝཱདཱ ཝེརམཎཱིཡེཝེཏྠ ཝཙཱིཀམྨཾ; སེསཱ ཀཱཡཀམྨཾ. ‘ཁཎྜཏོ’ཏི གཧཊྛཱ ཡཾ ཡཾ ཝཱིཏིཀྐམནྟི, ཏཾ ཏདེཝ ཁཎྜཾ ཧོཏི བྷིཛྫཏི, ཨཝསེསཾ ན བྷིཛྫཏི. ཀསྨཱ? གཧཊྛཱ ཧི ཨནིབདྡྷསཱིལཱ ཧོནྟི, ཡཾ ཡཾ སཀྐོནྟི ཏཾ ཏདེཝ གོཔེནྟི. སཱམཎེརཱནཾ པན ཨེཀསྨིཾ ཝཱིཏིཀྐམནྟེ སབྦཱནི བྷིཛྫནྟི. ན ཀེཝལཉྩ ཨེཏཱནི, སེསསཱིལཱནིཔི བྷིཛྫནྟིཡེཝ. ཏེསཾ པན ཝཱིཏིཀྐམོ དཎྜཀམྨཝཏྠུཀོ. ‘པུན ཨེཝརཱུཔཾ ན ཀརིསྶཱམཱི’ཏི དཎྜཀམྨེ ཀཏེ སཱིལཾ པརིཔུཎྞཾ ཧོཏི. ‘སམཱདཱནཏོ’ཏི སཡམེཝ ‘པཉྩ སཱིལཱནི ཨདྷིཊྛཧཱམཱི’ཏི ཨདྷིཊྛཧནྟེནཔི, པཱཊིཡེཀྐཾ པཱཊིཡེཀྐཾ སམཱདིཡནྟེནཔི སམཱདིཎྞཱནི ཧོནྟི. ཨཉྙསྶ སནྟིཀེ ནིསཱིདིཏྭཱ ‘པཉྩ སཱིལཱནི སམཱདིཡཱམཱི’ཏི སམཱདིཡནྟེནཔི, པཱཊིཡེཀྐཾ པཱཊིཡེཀྐཾ སམཱདིཡནྟེནཔི ¶ སམཱདིནྣཱནེཝ ཧོནྟི. ‘པཡོགཏོ’ སབྦཱནིཔི སཱཧཏྠིཀཔཡོགཱནེཝཱཏི ཝེདིཏབྦཱནི.

༧༡༢. ཨིདཱནི ཡཱསཾ སིཀྑཱནཾ ཀོཊྛཱསབྷཱཝེན ཨིམཱནི པཉྩ སིཀྑཱཔདཱནི ཝུཏྟཱནི, ཏཱནི དསྶེཏུཾ ཀཏམེ དྷམྨཱ སིཀྑཱཏི ཨཡཾ སིཀྑཱཝཱརོ ཨཱརདྡྷོ. ཏཏྠ ¶ ཡསྨཱ སབྦེཔི ཙཏུབྷཱུམཀཀུསལཱ དྷམྨཱ སིཀྑིཏབྦབྷཱཝཏོ ¶ སིཀྑཱ, ཏསྨཱ ཏེ དསྶེཏུཾ ཡསྨིཾ སམཡེ ཀཱམཱཝཙརནྟིཨཱདི ཝུཏྟཾ. ཏཏྠ ཧེཊྛཱ ཙིཏྟུཔྤཱདཀཎྜེ (དྷ. ས. ༡) ཝུཏྟནཡེནེཝ པཱལི༹ཾ ཝིཏྠཱརེཏྭཱ ཨཏྠོ ཝེདིཏབྦོ. ཨིདྷ པན མུཁམཏྟམེཝ དསྶིཏནྟི.

ཨབྷིདྷམྨབྷཱཛནཱིཡཝཎྞནཱ.

༣. པཉྷཱཔུཙྪཀཝཎྞནཱ

༧༡༤. པཉྷཱཔུཙྪཀེ པཱལི༹ཨནུསཱརེནེཝ སིཀྑཱཔདཱནཾ ཀུསལཱདིབྷཱཝོ ཝེདིཏབྦོ. ཨཱརམྨཎཏྟིཀེསུ པན ཡཱནི སིཀྑཱཔདཱནི ཨེཏྠ སཏྟཱརམྨཎཱནཱིཏི ཝུཏྟཱནི, ཏཱནི ཡསྨཱ སཏྟོཏི སངྑཾ གཏེ སངྑཱརེཡེཝ ཨཱརམྨཎཾ ཀརོནྟི, ཡསྨཱ ཙ སབྦཱནིཔི ཨེཏཱནི སམྤཏྟཝིརཏིཝསེནེཝ ནིདྡིཊྛཱནི, ཏསྨཱ ‘‘པརིཏྟཱརམྨཎཱ’’ཏི ཙ ‘‘པཙྩུཔྤནྣཱརམྨཎཱ’’ཏི ཙ ཝུཏྟཾ. ཡཏོ པན ཝིརམཏི ཏསྶ ཝཏྠུནོ ཨཙྩནྟབཧིདྡྷཏྟཱ སབྦེསམྤི བཧིདྡྷཱརམྨཎཏཱ ཝེདིཏབྦཱཏི.

ཨིམསྨིཾ པན སིཀྑཱཔདཝིབྷངྒེ སམྨཱསམྦུདྡྷེན ཨབྷིདྷམྨབྷཱཛནཱིཡེཔི པཉྷཱཔུཙྪཀེཔི ལོཀིཡཱནེཝ སིཀྑཱཔདཱནི ཀཐིཏཱནི. ཨུབྷོཔི ཧི ཨེཏེ ནཡཱ ལོཀིཡཏྟཱ ཨེཀཔརིཙྪེདཱ ཨེཝ. ཨེཝམཡཾ སིཀྑཱཔདཝིབྷངྒོ དྭེཔརིཝཊྚཾ ནཱིཧརིཏྭཱཝ བྷཱཛེཏྭཱ དསྶིཏོཏི.

སམྨོཧཝིནོདནིཡཱ ཝིབྷངྒཊྛཀཐཱཡ

སིཀྑཱཔདཝིབྷངྒཝཎྞནཱ ནིཊྛིཏཱ.

༡༥. པཊིསམྦྷིདཱཝིབྷངྒོ

༡. སུཏྟནྟབྷཱཛནཱིཡཾ

༡. སངྒཧཝཱརཝཎྞནཱ

༧༡༨. ཨིདཱནི ¶ ¶ ¶ ཏདནནྟརེ པཊིསམྦྷིདཱཝིབྷངྒེ ཙཏསྶོཏི གཎནཔརིཙྪེདོ. པཊིསམྦྷིདཱཏི པབྷེདཱ. ཡསྨཱ པན པརཏོ ཨཏྠེ ཉཱཎཾ ཨཏྠཔཊིསམྦྷིདཱཏིཨཱདིམཱཧ, ཏསྨཱ ན ཨཉྙསྶ ཀསྶཙི པབྷེདཱ, ཉཱཎསྶེཝ པབྷེདཱཏི ཝེདིཏབྦཱ. ཨིཏི ‘‘ཙཏསྶོ པཊིསམྦྷིདཱ’’ཏི པདེན ཙཏྟཱརོ ཉཱཎཔྤབྷེདཱཏི ཨཡམཏྠོ སངྒཧིཏོ. ཨཏྠཔཊིསམྦྷིདཱཏི ཨཏྠེ པཊིསམྦྷིདཱ; ཨཏྠཔྤབྷེདསྶ སལླཀྑཎཝིབྷཱཝནཱཝཝཏྠཱནཀརཎསམཏྠཾ ཨཏྠེ པབྷེདགཏཾ ཉཱཎནྟི ཨཏྠོ. སེསཔདེསུཔི ཨེསེཝ ནཡོ. དྷམྨཔྤབྷེདསྶ ཧི སལླཀྑཎཝིབྷཱཝནཱཝཝཏྠཱནཀརཎསམཏྠཾ དྷམྨེ པབྷེདགཏཾ ཉཱཎཾ དྷམྨཔཊིསམྦྷིདཱ ནཱམ. ནིརུཏྟིཔྤབྷེདསྶ སལླཀྑཎཝིབྷཱཝནཱཝཝཏྠཱནཀརཎསམཏྠཾ ནིརུཏྟཱབྷིལཱཔེ པབྷེདགཏཾ ཉཱཎཾ ནིརུཏྟིཔཊིསམྦྷིདཱ ནཱམ. པཊིབྷཱནཔྤབྷེདསྶ སལླཀྑཎཝིབྷཱཝནཱཝཝཏྠཱནཀརཎསམཏྠཾ པཊིབྷཱནེ པབྷེདགཏཾ ཉཱཎཾ པཊིབྷཱནཔཊིསམྦྷིདཱ ནཱམ.

ཨིདཱནི ཡཐཱནིཀྑིཏྟཱ པཊིསམྦྷིདཱ བྷཱཛེཏྭཱ དསྶེནྟོ ཨཏྠེ ཉཱཎཾ ཨཏྠཔཊིསམྦྷིདཱཏིཨཱདིམཱཧ. ཏཏྠ ཨཏྠོཏི སངྑེཔཏོ ཧེཏུཕལཾ. ཏཉྷི ཧེཏུཝསེན ཨརཎཱིཡཾ གནྟབྦཾ པཏྟབྦཾ, ཏསྨཱ ཨཏྠོཏི ཝུཙྩཏི. པབྷེདཏོ པན ཡཾཀིཉྩི པཙྩཡསམུཔྤནྣཾ, ནིབྦཱནཾ, བྷཱསིཏཏྠོ, ཝིཔཱཀོ, ཀིརིཡཱཏི ཨིམེ པཉྩ དྷམྨཱ ཨཏྠོཏི ཝེདིཏབྦཱ. ཏཾ ཨཏྠཾ པཙྩཝེཀྑནྟསྶ ཏསྨིཾ ཨཏྠེ པབྷེདགཏཾ ཉཱཎཾ ཨཏྠཔཊིསམྦྷིདཱ.

དྷམྨོཏི ¶ སངྑེཔཏོ པཙྩཡོ. སོ ཧི ཡསྨཱ ཏཾ ཏཾ ཝིདཧཏི པཝཏྟེཏི ཙེཝ པཱཔེཏི ཙ, ཏསྨཱ དྷམྨོཏི ཝུཙྩཏི. པབྷེདཏོ པན ཡོ ཀོཙི ཕལནིབྦཏྟཀོ ཧེཏུ, ཨརིཡམགྒོ, བྷཱསིཏཾ ¶ , ཀུསལཾ, ཨཀུསལནྟི ཨིམེ པཉྩ དྷམྨཱ དྷམྨོཏི ཝེདིཏབྦཱ. ཏཾ དྷམྨཾ པཙྩཝེཀྑནྟསྶ ཏསྨིཾ དྷམྨེ པབྷེདགཏཾ ཉཱཎཾ དྷམྨཔཊིསམྦྷིདཱ.

ཏཏྲ དྷམྨནིརུཏྟཱབྷིལཱཔེ ཉཱཎནྟི ཏསྨིཾ ཨཏྠེ ཙ དྷམྨེ ཙ ཡཱ སབྷཱཝནིརུཏྟི, ཏསྶཱ ཨབྷིལཱཔེ ཏཾ སབྷཱཝནིརུཏྟིཾ སདྡཾ ཨཱརམྨཎཾ ¶ ཀཏྭཱ པཙྩཝེཀྑནྟསྶ ཏསྨིཾ སབྷཱཝནིརུཏྟཱབྷིལཱཔེ པབྷེདགཏཾ ཉཱཎཾ ནིརུཏྟིཔཊིསམྦྷིདཱ. ཨེཝམཡཾ ནིརུཏྟིཔཊིསམྦྷིདཱ སདྡཱརམྨཎཱ ནཱམ ཛཱཏཱ, ན པཉྙཏྟིཨཱརམྨཎཱ. ཀསྨཱ? ཡསྨཱ སདྡཾ སུཏྭཱ ‘‘ཨཡཾ སབྷཱཝནིརུཏྟི, ཨཡཾ ན སབྷཱཝནིརུཏྟཱི’’ཏི ཛཱནནྟི. པཊིསམྦྷིདཱཔྤཏྟོ ཧི ‘‘ཕསྶོ’’ཏི ཝུཏྟེ ‘‘ཨཡཾ སབྷཱཝནིརུཏྟཱི’’ཏི ཛཱནཱཏི, ‘‘ཕསྶཱ’’ཏི ཝཱ ‘‘ཕསྶ’’ནྟི ཝཱ ཝུཏྟེ པན ‘‘ཨཡཾ ན སབྷཱཝནིརུཏྟཱི’’ཏི ཛཱནཱཏི. ཝེདནཱདཱིསུཔི ཨེསེཝ ནཡོ. ཨཉྙཾ པནེས ནཱམཨཱཁྱཱཏཨུཔསགྒབྱཉྫནསདྡཾ ཛཱནཱཏི ན ཛཱནཱཏཱིཏི? ཡདགྒེན སདྡཾ སུཏྭཱ ‘‘ཨཡཾ སབྷཱཝནིརུཏྟི, ཨཡཾ ན སབྷཱཝནིརུཏྟཱི’’ཏི ཛཱནཱཏི, ཏདགྒེན ཏམྤི ཛཱནིསྶཏཱིཏི. ཏཾ པན ནཡིདཾ པཊིསམྦྷིདཱཀིཙྩནྟི པཊིཀྑིཔིཏྭཱ ཨིདཾ ཝཏྠུ ཀཐིཏཾ –

ཏིསྶདཏྟཏྠེརོ ཀིར བོདྷིམཎྜེ སུཝཎྞསལཱཀཾ གཧེཏྭཱ ཨཊྛཱརསསུ བྷཱསཱསུ ‘ཀཏརབྷཱསཱཡ ཀཐེམཱི’ཏི པཝཱརེསི. ཏཾ པན ཏེན ཨཏྟནོ ཨུགྒཧེ ཋཏྭཱ པཝཱརིཏཾ, ན པཊིསམྦྷིདཱཡ ཋིཏེན. སོ ཧི མཧཱཔཉྙཏཱཡ ཏཾ ཏཾ བྷཱསཾ ཀཐཱཔེཏྭཱ ཀཐཱཔེཏྭཱ ཨུགྒཎྷི; ཏཏོ ཨུགྒཧེ ཋཏྭཱ ཨེཝཾ པཝཱརེསི.

བྷཱསཾ ནཱམ སཏྟཱ ཨུགྒཎྷནྟཱིཏི ཝཏྭཱ ཙ པནེཏྠ ཨིདཾ ཀཐིཏཾ. མཱཏཱཔིཏརོ ཧི དཧརཀཱལེ ཀུམཱརཀེ མཉྩེ ཝཱ པཱིཋེ ཝཱ ནིཔཛྫཱཔེཏྭཱ ཏཾ ཏཾ ཀཐཡམཱནཱ ཏཱནི ཏཱནི ཀིཙྩཱནི ཀརོནྟི. དཱརཀཱ ཏེསཾ ཏཾ ཏཾ བྷཱསཾ ཝཝཏྠཱཔེནྟི – ཨིམིནཱ ཨིདཾ ཝུཏྟཾ, ཨིམིནཱ ཨིདཾ ཝུཏྟནྟི. གཙྪནྟེ གཙྪནྟེ ཀཱལེ སབྦམྤི བྷཱསཾ ཛཱནནྟི. མཱཏཱ དམིལཱི༹, པིཏཱ ཨནྡྷཀོ. ཏེསཾ ཛཱཏོ དཱརཀོ སཙེ མཱཏུཀཐཾ པཋམཾ སུཎཱཏི, དམིལ༹བྷཱསཾ བྷཱསིསྶཏི; སཙེ པིཏུཀཐཾ པཋམཾ སུཎཱཏི, ཨནྡྷཀབྷཱསཾ བྷཱསིསྶཏི. ཨུབྷིནྣམྤི པན ཀཐཾ ཨསྶུཎནྟོ མཱགདྷབྷཱསཾ བྷཱསིསྶཏི.

ཡོཔི ¶ ཨགཱམཀེ མཧཱརཉྙེ ནིབྦཏྟོ, ཏཏྠ ཨཉྙོ ཀཐེནྟོ ནཱམ ནཏྠི, སོཔི ཨཏྟནོ དྷམྨཏཱཡ ཝཙནཾ སམུཊྛཱཔེནྟོ མཱགདྷབྷཱསམེཝ ¶ བྷཱསིསྶཏི. ནིརཡེ, ཏིརཙྪཱནཡོནིཡཾ, པེཏྟིཝིསཡེ, མནུསྶལོཀེ, དེཝལོཀེཏི སབྦཏྠ མཱགདྷབྷཱསཱཝ ཨུསྶནྣཱ. ཏཏྠ སེསཱ ཨོཊྚཀིརཱཏཨནྡྷཀཡོནཀདམིལ༹བྷཱསཱདིཀཱ ཨཊྛཱརས བྷཱསཱ པརིཝཏྟནྟི ¶ . ཨཡམེཝེཀཱ ཡཐཱབྷུཙྩབྲཧྨཝོཧཱརཨརིཡཝོཧཱརསངྑཱཏཱ མཱགདྷབྷཱསཱ ན པརིཝཏྟཏི. སམྨཱསབུདྡྷོཔི ཏེཔིཊཀཾ བུདྡྷཝཙནཾ ཏནྟིཾ ཨཱརོཔེནྟོ མཱགདྷབྷཱསཱཡ ཨེཝ ཨཱརོཔེསི. ཀསྨཱ? ཨེཝཉྷི ཨཏྠཾ ཨཱཧརིཏུཾ སུཁཾ ཧོཏི. མཱགདྷབྷཱསཱཡ ཧི ཏནྟིཾ ཨཱརུལ༹ྷསྶ བུདྡྷཝཙནསྶ པཊིསམྦྷིདཱཔྤཏྟཱནཾ སོཏཔཐཱགམནམེཝ པཔཉྩོ; སོཏེ པན སངྒྷཊྚིཏམཏྟེཡེཝ ནཡསཏེན ནཡསཧསྶེན ཨཏྠོ ཨུཔཊྛཱཏི. ཨཉྙཱཡ པན བྷཱསཱཡ ཏནྟིཾ ཨཱརུལ༹ྷཾ པོཐེཏྭཱ པོཐེཏྭཱ ཨུགྒཧེཏབྦཾ ཧོཏི. བཧུམྤི ཨུགྒཧེཏྭཱ པན པུཐུཛྫནསྶ པཊིསམྦྷིདཱཔྤཏྟི ནཱམ ནཏྠི. ཨརིཡསཱཝཀོ ནོ པཊིསམྦྷིདཱཔྤཏོ ནཱམ ནཏྠི.

ཉཱཎེསུ ཉཱཎནྟི སབྦཏྠཀཉཱཎཾ ཨཱརམྨཎཾ ཀཏྭཱ ཉཱཎཾ པཙྩཝེཀྑནྟསྶ པབྷེདགཏཾ ཉཱཎཾ པཊིབྷཱནཔཊིསམྦྷིདཱཏི. ཨིམཱ པན ཙཏསྶོཔི པཊིསམྦྷིདཱ དྭཱིསུ ཋཱནེསུ པབྷེདཾ གཙྪནྟི, པཉྩཧི ཀཱརཎེཧི ཝིསདཱ ཧོནྟཱིཏི ཝེདིཏབྦཱ. ཀཏམེསུ དྭཱིསུ? སེཀྑབྷཱུམིཡཉྩ ཨསེཀྑབྷཱུམིཡཉྩ. ཏཏྠ སཱརིཔུཏྟཏྠེརསྶ མཧཱམོགྒལླཱནཏྠེརསྶ མཧཱཀསྶཔཏྠེརསྶ མཧཱཀཙྩཱཡནཏྠེརསྶ མཧཱཀོཊྛིཏཏྠེརསྶཱཏི ཨསཱིཏིཡཱཔི མཧཱཐེརཱནཾ པཊིསམྦྷིདཱ ཨསེཀྑབྷཱུམིཡཾ པབྷེདཾ གཏཱ. ཨཱནནྡཏྠེརསྶ ཙིཏྟསྶ གཧཔཏིནོ དྷམྨིཀསྶ ཨུཔཱསཀསྶ ཨུཔཱལིསྶ གཧཔཏིནོ ཁུཛྫུཏྟརཱཡ ཨུཔཱསིཀཱཡཱཏི ཨེཝམཱདཱིནཾ པཊིསམྦྷིདཱ སེཀྑབྷཱུམིཡཾ པབྷེདཾ གཏཱཏི ཨིམཱསུ དྭཱིསུ བྷཱུམཱིསུ པབྷེདཾ གཙྪནྟི.

ཀཏམེཧི པཉྩཧི ཀཱརཎེཧི པཊིསམྦྷིདཱ ཝིསདཱ ཧོནྟཱིཏི? ཨདྷིགམེན, པརིཡཏྟིཡཱ, སཝནེན, པརིཔུཙྪཱཡ, པུབྦཡོགེནཱཏི. ཏཏྠ ‘ཨདྷིགམོ’ ནཱམ ཨརཧཏྟཾ. ཏཉྷི པཏྟསྶ པཊིསམྦྷིདཱ ཝིསདཱ ཧོནྟི. ‘པརིཡཏྟི’ ནཱམ བུདྡྷཝཙནཾ. ཏཉྷི ཨུགྒཎྷནྟསྶ པཊིསམྦྷིདཱ ཝིསདཱ ཧོནྟི. ‘སཝནཾ’ ནཱམ དྷམྨསྶཝནཾ. སཀྐཙྩཉྷི དྷམྨཾ སུཎནྟསྶ པཊིསམྦྷིདཱ ¶ ཝིསདཱ ཧོནྟི. ‘པརིཔུཙྪཱ’ ནཱམ ཨཊྛཀཐཱ. ཨུགྒཧིཏཔཱལི༹ཡཱ ཨཏྠཾ ཀཐེནྟསྶ ཧི པཊིསམྦྷིདཱ ཝིསདཱ ཧོནྟི. ‘པུབྦཡོགོ’ ནཱམ པུབྦཡོགཱཝཙརཏཱ, ཨཏཱིཏབྷཝེ ཧརཎཔཙྩཱཧརཎནཡེན པརིགྒཧིཏཀམྨཊྛཱནཏཱ; པུབྦཡོགཱཝཙརསྶ ཧི པཊིསམྦྷིདཱ ཝིསདཱ ཧོནྟི ¶ . ཏཏྠ ཨརཧཏྟཔྤཏྟིཡཱ པུནབྦསུཀུཊུམྦིཀཔུཏྟསྶ ཏིསྶཏྠེརསྶ པཊིསམྦྷིདཱ ཝིསདཱ ཨཧེསུཾ. སོ ཀིར ཏམྦཔཎྞིདཱིཔེ བུདྡྷཝཙནཾ ཨུགྒཎྷིཏྭཱ པརཏཱིརཾ གནྟྭཱ ཡོནཀདྷམྨརཀྑིཏཏྠེརསྶ སནྟིཀེ བུདྡྷཝཙནཾ ཨུགྒཎྷིཏྭཱ ཨཱགཙྪནྟོ ¶ ནཱཝཾ ཨབྷིརུཧནཏིཏྠེ ཨེཀསྨིཾ པདེ ཨུཔྤནྣཀངྑོ ཡོཛནསཏམགྒཾ ནིཝཏྟིཏྭཱ ཨཱཙརིཡསྶ སནྟིཀཾ གཙྪནྟོ ཨནྟརཱམགྒེ ཨེཀསྶ ཀུཊུམྦིཀསྶ པཉྷཾ ཀཐེསི. སོ པསཱིདིཏྭཱ སཏསཧསྶགྒྷནིཀཾ ཀམྦལཾ ཨདཱསི. སོཔི ཏཾ ཨཱཧརིཏྭཱ ཨཱཙརིཡསྶ ཨདཱསི. ཐེརོ ཝཱསིཡཱ ཀོཊྚེཏྭཱ ནིསཱིདནཊྛཱནེ པརིབྷཎྜཾ ཀཱརེསི. ཀིམཏྠཱཡཱཏི? པཙྪིམཱཡ ཛནཏཱཡ ཨནུགྒཧཏྠཱཡཱཏི. ཨེཝཾ ཀིརསྶ ཨཧོསི – ‘‘ཨམྷཱཀཾ གཏམགྒཾ ཨཱཝཛྫེཏྭཱ ཨནཱགཏེ སབྲཧྨཙཱརིནོ པཊིཔཏྟིཾ པཱུརེཏབྦཾ མཉྙིསྶནྟཱི’’ཏི. ཏིསྶཏྠེརོཔི ཨཱཙརིཡསྶ སནྟིཀེ ཀངྑཾ ཚིནྡིཏྭཱ ཛམྦུཀོལཔཊྚནེ ཨོརུཡ྄ཧ ཙེཏིཡངྒཎཾ སམྨཛྫནཝེལཱཡ ཝཱལིཀཝིཧཱརཾ པཏྭཱ སམྨཛྫི. ཏསྶ སམྨཛྫིཏཊྛཱནཾ དིསྭཱ ‘ཨིདཾ ཝཱིཏརཱགསྶ བྷིཀྑུནོ སམྨཊྛཊྛཱན’ནྟི ཐེརསྶ ཝཱིམཾསནཏྠཱཡ པཉྷཾ པུཙྪིཾསུ. ཐེརོ པཊིསམྦྷིདཱཔྤཏྟཏཱཡ པུཙྪིཏཔུཙྪིཏེ པཉྷེ ཀཐེསཱིཏི.

པརིཡཏྟིཡཱ པན ཏིསྶདཏྟཏྠེརསྶ ཙེཝ ནཱགསེནཏྠེརསྶ ཙ པཊིསམྦྷིདཱ ཝིསདཱ ཨཧེསུཾ. སཀྐཙྩདྷམྨསཝནེན སུདྷམྨསཱམཎེརསྶ པཊིསམྦྷིདཱ ཝིསདཱ ཨཧེསུཾ. སོ ཀིར ཏལངྒརཝཱསཱི དྷམྨདིནྣཏྠེརསྶ བྷཱགིནེཡྻོ ཁུརགྒེཡེཝ ཨརཧཏྟཾ པཏྟོ མཱཏུལཏྠེརསྶ དྷམྨཝིནིཙྪཡཊྛཱནེ ནིསཱིདིཏྭཱ སུཎནྟོཡེཝ ཏཱིཎི པིཊཀཱནི པགུཎཱནི ཨཀཱསི. ཨུགྒཧིཏཔཱལི༹ཡཱ ཨཏྠཾ ཀཐེནྟསྶ པན ཏིསྶདཏྟཏྠེརསྶ ཨེཝ པཊིསམྦྷིདཱ ཝིསདཱ ཨཧེསུཾ. གཏཔཙྩཱགཏཝཏྟཾ པན པཱུརེཏྭཱ ཡཱཝ ཨནུལོམཾ ཀམྨཊྛཱནཾ ¶ ཨུསྶུཀྐཱཔེཏྭཱ ཨཱགཏཱནཾ ཝིསདབྷཱཝཔྤཏྟཔཊིསམྦྷིདཱནཾ པུབྦཡོགཱཝཙརཱནཾ ཨནྟོ ནཏྠི.

ཨེཏེསུ པན ཀཱརཎེསུ པརིཡཏྟི, སཝནཾ, པརིཔུཙྪཱཏི ཨིམཱནི ཏཱིཎི པབྷེདསྶེཝ བལཝཀཱརཎཱནི. པུབྦཡོགོ ཨདྷིགམསྶ བལཝཔཙྩཡོ, པབྷེདསྶ ཧོཏི ན ཧོཏཱིཏི? ཧོཏི, ན པན ཏཐཱ. པརིཡཏྟིསཝནཔརིཔུཙྪཱ ཧི པུབྦེ ཧོནྟུ ཝཱ མཱ ཝཱ, པུབྦཡོགེན པུབྦེ ཙེཝ ཨེཏརཧི ཙ སངྑཱརསམྨསནཾ ཝིནཱ པཊིསམྦྷིདཱ ནཱམ ནཏྠི. ཨིམེ པན དྭེཔི ཨེཀཏོ ཧུཏྭཱ པཊིསམྦྷིདཱ ཨུཔཏྠམྦྷེཏྭཱ ཝིསདཱ ཀརོནྟཱིཏི.

སངྒཧཝཱརཝཎྞནཱ.

༢. སཙྩཝཱརཱདིཝཎྞནཱ

༧༡༩. ཨིདཱནི ¶ ¶ ཡེ སངྒཧཝཱརེ པཉྩ ཨཏྠཱ ཙ དྷམྨཱ ཙ སངྒཧིཏཱ, ཏེསཾ པབྷེདདསྶནནཡེན པཊིསམྦྷིདཱ ཝིབྷཛིཏུཾ པུན ཙཏསྶོཏིཨཱདིནཱ ནཡེན པབྷེདཝཱརོ ཨཱརདྡྷོ. སོ སཙྩཝཱརཧེཏུཝཱརདྷམྨཝཱརཔཙྩཡཱཀཱརཝཱརཔརིཡཏྟིཝཱརཝསེན པཉྩཝིདྷོ. ཏཏྠ པཙྩཡསམུཔྤནྣསྶ དུཀྑསཙྩསྶ པཙྩཡེན པཏྟབྦསྶ ནིབྦཱནསྶ ཙ ཨཏྠབྷཱཝཾ, ཕལནིབྦཏྟཀསྶ སམུདཡསྶ ནིབྦཱནསམྤཱཔཀསྶ ཨརིཡམགྒསྶ ཙ དྷམྨབྷཱཝཉྩ དསྶེཏུཾ ‘སཙྩཝཱརོ’ ཝུཏྟོ. ཡསྶ ཀསྶཙི པན ཧེཏུཕལནིབྦཏྟཀསྶ ཧེཏུནོ དྷམྨབྷཱཝཾ, ཧེཏུཕལསྶ ཙ ཨཏྠབྷཱཝཾ དསྶེཏུཾ ‘ཧེཏུཝཱརོ’ ཝུཏྟོ. ཏཏྠ ཙ ཧེཏུཕལཀྐམཝསེན ཨུཔྤཊིཔཱཊིཡཱ པཋམཾ དྷམྨཔཊིསམྦྷིདཱ ནིདྡིཊྛཱ. ཡེ པན དྷམྨཱ ཏམྷཱ ཏམྷཱ རཱུཔཱརཱུཔཔྤབྷེདཱ ཧེཏུཏོ ཛཱཏཱ, ཏེསཾ ཨཏྠབྷཱཝཾ, ཏསྶ ཏསྶ ཙ རཱུཔཱརཱུཔདྷམྨཔྤབྷེདསྶ ཧེཏུནོ དྷམྨབྷཱཝཾ དསྶེཏུཾ ‘དྷམྨཝཱརོ’ ཝུཏྟོ. ཛརཱམརཎཱདཱིནཾ པན ཨཏྠབྷཱཝཾ, ཛརཱམརཎཱདིསམུདཡསངྑཱཏཱནཾ ཛཱཏིཨཱདཱིནཉྩ དྷམྨབྷཱཝཾ དསྶེཏུཾ ‘པཙྩཡཱཀཱརཝཱརོ’ ཝུཏྟོ. ཏཏོ པརིཡཏྟིསངྑཱཏསྶ ཏསྶ ཏསྶ བྷཱསིཏསྶ དྷམྨབྷཱཝཾ, བྷཱསིཏསངྑཱཏེན པཙྩཡེན པཏྟབྦསྶ བྷཱསིཏཏྠསྶ ཙ ཨཏྠབྷཱཝཾ དསྶེཏུཾ ‘པརིཡཏྟིཝཱརོ’ ཝུཏྟོ.

ཏཏྠ ཙ ཡསྨཱ བྷཱསིཏཾ ཉཏྭཱ ཏསྶཏྠོ ཉཱཡཏི, ཏསྨཱ བྷཱསིཏབྷཱསིཏཏྠཀྐམེན ཨུཔྤཊིཔཱཊིཡཱ པཋམཾ དྷམྨཔཊིསམྦྷིདཱ ནིདྡིཊྛཱ. པརིཡཏྟིདྷམྨསྶ ཙ པབྷེདདསྶནཏྠཾ ‘‘ཏཏྠ ཀཏམཱ དྷམྨཔཊིསམྦྷིདཱ’’ཏི པུཙྪཱཔུབྦངྒམོ ¶ པཊིནིདྡེསཝཱརོ ཝུཏྟོ. ཏཏྠ སུཏྟནྟིཨཱདཱིཧི ནཝཧི ཨངྒེཧི ནིཔྤདེསཏོ ཏནྟི གཧིཏཱ. ཨཡཾ ཨིམསྶ བྷཱསིཏསྶ ཨཏྠོ, ཨཡཾ ཨིམསྶ བྷཱསིཏསྶ ཨཏྠོཏི ཨིམསྨིམྤི ཋཱནེ བྷཱསིཏཝསེན ནིཔྤདེསཏོ ཏནྟི ཨེཝ གཧིཏཱཏི.

སུཏྟནྟབྷཱཛནཱིཡཝཎྞནཱ.

༢. ཨབྷིདྷམྨབྷཱཛནཱིཡཝཎྞནཱ

༧༢༥. ཏཏྠ ཏིསྶོ པཊིསམྦྷིདཱ ལོཀིཡཱ. ཨཏྠཔཊིསམྦྷིདཱ ལོཀིཡལོཀུཏྟརམིསྶཀཱ ¶ . སཱ ཧི ནིབྦཱནཱརམྨཎཱནཾ མགྒཕལཉཱཎཱནཾ ཝསེན ¶ ལོཀུཏྟརཱཔི ཧོཏི. ཨབྷིདྷམྨབྷཱཛནཱིཡེ ཀུསལཱཀུསལཝིཔཱཀཀིརིཡཱནཾ ཝསེན ཙཏཱུཧི ཝཱརེཧི ཝིབྷཏྟཾ. ཏཏྠ ཡཏྟཀཱནི ཧེཊྛཱ ཙིཏྟུཔྤཱདཀཎྜེ (དྷ. ས. ༡ ཨཱདཡོ) ཀུསལཙིཏྟཱནི ཝིབྷཏྟཱནི, ཏེསཾ སབྦེསམྤི ཝསེན ཨེཀེཀསྨིཾ ཙིཏྟནིདྡེསེ ཙཏསྶོ ཙཏསྶོ པཊིསམྦྷིདཱ ཝིབྷཏྟཱཏི ཝེདིཏབྦཱ. ཨཀུསལཙིཏྟེསུཔི ཨེསེཝ ནཡོ. ཝིཔཱཀཀིརིཡཝཱརེསུ ཝིཔཱཀཀིརིཡཱནཾ ཨཏྠེན སངྒཧིཏཏྟཱ, དྷམྨཔཊིསམྦྷིདཾ ཚཌྜེཏྭཱ, ཨེཀེཀསྨིཾ ཝིཔཱཀཙིཏྟེ ཙ ཀིརིཡཙིཏྟེ ཙ ཏིསྶོ ཏིསྶོཝ པཊིསམྦྷིདཱ ཝིབྷཏྟཱ. པཱལི༹ པན མུཁམཏྟམེཝ དསྶེཏྭཱ སཾཁིཏྟཱ. སཱ ཧེཊྛཱ ཨཱགཏཝིཏྠཱརཝསེནེཝ ཝེདིཏབྦཱ.

ཀསྨཱ པན ཡཐཱ ཀུསལཱཀུསལཝཱརེསུ ‘‘ཏེསཾ ཝིཔཱཀེ ཉཱཎཾ ཨཏྠཔཊིསམྦྷིདཱ’’ཏི ཝུཏྟཾ, ཨེཝམིདྷ ‘‘ཡེསཾ དྷམྨཱནཾ ཨིམེ ཝིཔཱཀཱ, ཏེསུ ཉཱཎཾ དྷམྨཔཊིསམྦྷིདཱ’’ཏི ཨེཝཾ ན ཝུཏྟནྟི? ཧེཊྛཱ ཝུཏྟཏྟཱ. ཡདི ཨེཝཾ, ‘‘ཏེསཾ ཝིཔཱཀེ ཉཱཎཾ ཨཏྠཔཊིསམྦྷིདཱ’’ཏི ཧེཊྛཱ ཝུཏྟཏྟཱ ཨཡཾ ཨཏྠཔཊིསམྦྷིདཱཔི ཨིདྷ ན ཝཏྟབྦཱ སིཡཱཏི? ནོ ན ཝཏྟབྦཱ. ཀསྨཱ? ཧེཊྛཱ ཝིཔཱཀཀིརིཡཙིཏྟུཔྤཱདཝསེན ཨཝུཏྟཏྟཱ. ཀིརིཡཝཱརེ ཙ ‘‘ཡེསཾ དྷམྨཱནཾ ཨིམེ ཀིརིཡཱ’’ཏི ཝཙནམེཝ ན ཡུཛྫཏཱིཏི དྭཱིསུཔི ཨིམེསུ ཝཱརེསུ ཏིསྶོ ཏིསྶོཝ པཊིསམྦྷིདཱ ཝིབྷཏྟཱ.

ཏཏྠ ཡཱཡ ནིརུཏྟིཡཱ ཏེསཾ དྷམྨཱནཾ པཉྙཏྟི ཧོཏཱིཏི ཡཱཡ ནིརུཏྟིཡཱ ཏེསཾ ཕསྶོ ཧོཏཱིཏིཨཱདིནཱ ནཡེན ཝུཏྟཱནཾ དྷམྨཱནཾ ‘‘ཨཡཾ ཕསྶོ, ཨཡཾ ཝེདནཱ’’ཏི ཨེཝཾ པཉྙཏྟི ཧོཏི. ཏཏྠ དྷམྨནིརུཏྟཱབྷིལཱཔེ ཉཱཎནྟི ཏསྨིཾ ཨཏྠེ དྷམྨེ ཙ པཝཏྟམཱནཱཡ ཏསྶཱ དྷམྨནིརུཏྟིཡཱ སབྷཱཝཔཉྙཏྟིཡཱ ཨབྷིལཱཔེ ཉཱཎཾ. ཨབྷིལཱཔསདྡཾ ཨཱརམྨཎཾ ཀཏྭཱ ཨུཔྤནྣཉཱཎམེཝ ཨིདྷཱཔི ཀཐིཏཾ. ཡེན ཉཱཎེནཱཏི ཡེན པཊིབྷཱནཔཊིསམྦྷིདཱཉཱཎེན. ཏཱནི ¶ ཉཱཎཱནི ཛཱནཱཏཱིཏི ཨིཏརཱནི ཏཱིཎི པཊིསམྦྷིདཱཉཱཎཱནི ཛཱནཱཏི.

ཨིདཱནི ཡཐཱ ཡཾ ཉཱཎཾ ཏཱནི ཉཱཎཱནི ཛཱནཱཏི, ཏཐཱ ཏསྶ ཏེསུ པཝཏྟིཾ དསྶེཏུཾ ཨིམཱནི ཉཱཎཱནི ཨིདམཏྠཛོཏཀཱནཱིཏི ཝུཏྟཾ. ཏཏྠ ཨིདམཏྠཛོཏཀཱནཱིཏི ཨིམསྶ ཨཏྠསྶ ཛོཏཀཱནི པཀཱསཀཱནི; ཨིམཾ ནཱམ ཨཏྠཾ ཛོཏེནྟི པཀཱསེནྟི པརིཙྪིནྡནྟཱིཏི ཨཏྠོ. ཨིཏི ཉཱཎེསུ ཉཱཎནྟི ཨིམིནཱ ཨཱཀཱརེན པཝཏྟཾ ཏཱིསུ ཉཱཎེསུ ཉཱཎཾ པཊིབྷཱནཔཊིསམྦྷིདཱ ནཱམ.

ཏཏྠ ¶ ¶ ཀིཉྩཱཔི ཨཡཾ པཊིབྷཱནཔཊིསམྦྷིདཱ ‘ཨིམིསྶཱ ཨིདཾ ཀིཙྩཾ, ཨིམིསྶཱ ཨིདཾ ཀིཙྩ’ནྟི ཨིཏརཱསཾ པཊིསམྦྷིདཱནཾ ཀིཙྩཾ ཛཱནཱཏི, སཡཾ པན ཏཱསཾ ཀིཙྩཾ ཀཱཏུཾ ན སཀྐོཏི, བཧུསྶུཏདྷམྨཀཐིཀོ ཝིཡ ཨཔྤསྶུཏདྷམྨཀཐིཀསྶ. དྭེ ཀིར བྷིཀྑཱུ. ཨེཀོ བཧུསྶུཏོ, ཨེཀོ ཨཔྤསྶུཏོ. ཏེ ཨེཀཏོཝ ཨེཀཾ དྷམྨཀཐཱམགྒཾ ཨུགྒཎྷིཾསུ. ཏཏྠ ཨཔྤསྶུཏོ སརསམྤནྣོ ཨཧོསི, ཨིཏརོ མནྡསྶརོ. ཏེསུ ཨཔྤསྶུཏོ གཏགཏཊྛཱནེ ཨཏྟནོ སརསམྤཏྟིཡཱ སཀལཔརིསཾ ཁོབྷེཏྭཱ དྷམྨཾ ཀཐེསི. དྷམྨཾ སུཎམཱནཱ ཧཊྛཏུཊྛམཱནསཱ ཧུཏྭཱ – ‘ཡཐཱ ཨེས དྷམྨཾ ཀཐེསི, ཨེཀོ ཏིཔིཊཀདྷརོ མཉྙེ བྷཝིསྶཏཱི’ཏི ཝདནྟི. བཧུསྶུཏབྷིཀྑུ པན – ‘དྷམྨསཝནེ ཛཱནིསྶཐ ཨཡཾ ཏིཔིཊཀདྷརོ ཝཱ ནོ ཝཱ’ཏི ཨཱཧ. སོ ཀིཉྩཱཔི ཨེཝམཱཧ, ཡཐཱ པན སཀལཔརིསཾ ཁོབྷེཏྭཱ དྷམྨཾ ཀཐེཏུཾ སཀྐོཏི, ཨེཝམསྶ ཀཐནསམཏྠཏཱ ནཏྠི. ཏཏྠ ཀིཉྩཱཔི པཊིབྷཱནཔཊིསམྦྷིདཱ, བཧུསྶུཏོ ཝིཡ ཨཔྤསྶུཏསྶ, ཨིཏརཱསཾ ཀིཙྩཾ ཛཱནཱཏི, སཡཾ པན ཏཾ ཀིཙྩཾ ཀཱཏུཾ ན སཀྐོཏཱིཏི ཝེདིཏབྦཾ. སེསཾ ཨུཏྟཱནཏྠམེཝ.

༧༤༦. ཨེཝཾ ཀུསལཙིཏྟུཔྤཱདཱདིཝསེན པཊིསམྦྷིདཱ ཝིབྷཛིཏྭཱ ཨིདཱནི ཏཱསཾ ཨུཔྤཏྟིཊྛཱནབྷཱུཏཾ ཁེཏྟཾ དསྶེཏུཾ པུན ཙཏསྶོ པཊིསམྦྷིདཱཏིཨཱདིམཱཧ. ཏཏྠ ཏིསྶོ པཊིསམྦྷིདཱ ཀཱམཱཝཙརཀུསལཏོ ཙཏཱུསུ ཉཱཎསམྤཡུཏྟེསུ ཙིཏྟུཔྤཱདེསཱུཏི ཨིདཾ སེཀྑཱནཾ ཝསེན ཝུཏྟཾ. ཏེསཉྷིཔི དྷམྨཔཙྩཝེཀྑཎཀཱལེ ཧེཊྛཱ ཝུཏྟཾ པཉྩཔྤཀཱརཾ དྷམྨཾ ཨཱརམྨཎཾ ཀཏྭཱ ཙཏཱུསུ ཉཱཎསམྤཡུཏྟཀུསལཙིཏྟེསུ དྷམྨཔཊིསམྦྷིདཱ ཨུཔྤཛྫཏི. ཏཐཱ ནིརུཏྟིཔཙྩཝེཀྑཎཀཱལེ སདྡཾ ཨཱརམྨཎཾ ཀཏྭཱ ནིརུཏྟིཔཊིསམྦྷིདཱ; ཉཱཎཾ པཙྩཝེཀྑཎཀཱལེ ¶ སབྦཏྠཀཉཱཎཾ ཨཱརམྨཎཾ ཀཏྭཱ པཊིབྷཱནཔཊིསམྦྷིདཱཏི.

ཀིརིཡཏོ ཙཏཱུསཱུཏི ཨིདཾ པན ཨསེཀྑཱནཾ ཝསེན ཝུཏྟཾ. ཏེསཉྷི དྷམྨཾ པཙྩཝེཀྑཎཀཱལེ ཧེཊྛཱ ཝུཏྟཾ པཉྩཔྤཀཱརཾ དྷམྨཾ ཨཱརམྨཎཾ ཀཏྭཱ ཙཏཱུསུ ཉཱཎསམྤཡུཏྟཀིརིཡཙིཏྟེསུ དྷམྨཔཊིསམྦྷིདཱ ཨུཔྤཛྫཏི. ཏཐཱ ནིརུཏྟིཔཙྩཝེཀྑཎཀཱལེ སདྡཾ ཨཱརམྨཎཾ ཀཏྭཱ ནིརུཏྟིཔཊིསམྦྷིདཱ; ཉཱཎཾ པཙྩཝེཀྑཎཀཱལེ སབྦཏྠཀཉཱཎཾ ཨཱརམྨཎཾ ཀཏྭཱ པཊིབྷཱནཔཊིསམྦྷིདཱཏི.

ཨཏྠཔཊིསམྦྷིདཱ ཨེཏེསུ ཙེཝ ཨུཔྤཛྫཏཱིཏི ཨིདཾ པན སེཀྑཱསེཀྑཱནཾ ཝསེན ཝུཏྟཾ. ཏཐཱ ཧི སེཀྑཱནཾ ཨཏྠཔཙྩཝེཀྑཎཀཱལེ ཧེཊྛཱ ཝུཏྟཔྤབྷེདཾ ཨཏྠཾ ཨཱརམྨཎཾ ཀཏྭཱ ཙཏཱུསུ ཉཱཎསམྤཡུཏྟཀུསལཙིཏྟེསུ ཨཡཾ ¶ ཨུཔྤཛྫཏི, མགྒཕལཀཱལེ ཙ མགྒཕལེསུ. ཨསེཀྑསྶ པན ཨཏྠཾ ¶ པཙྩཝེཀྑཎཀཱལེ ཧེཊྛཱ ཝུཏྟཔྤབྷེདམེཝ ཨཏྠཾ ཨཱརམྨཎཾ ཀཏྭཱ ཙཏཱུསུ ཉཱཎསམྤཡུཏྟཀིརིཡཙིཏྟེསུ ཨུཔྤཛྫཏི, ཕལཀཱལེ ཙ ཨུཔརིམེ སཱམཉྙཕལེཏི. ཨེཝམེཏཱ སེཀྑཱསེཀྑཱནཾ ཨུཔྤཛྫམཱནཱ ཨིམཱསུ བྷཱུམཱིསུ ཨུཔྤཛྫནྟཱིཏི བྷཱུམིདསྶནཏྠཾ ཨཡཾ ནཡོ དསྶིཏོཏི.

ཨབྷིདྷམྨབྷཱཛནཱིཡཝཎྞནཱ.

༣. པཉྷཱཔུཙྪཀཝཎྞནཱ

༧༤༧. པཉྷཱཔུཙྪཀེ པཱལི༹ཨནུསཱརེནེཝ ཙཏུནྣཾ པཊིསམྦྷིདཱནཾ ཀུསལཱདིབྷཱཝོ ཝེདིཏབྦོ. ཨཱརམྨཎཏྟིཀེསུ པན ནིརུཏྟིཔཊིསམྦྷིདཱ སདྡམེཝ ཨཱརམྨཎཾ ཀརོཏཱིཏི པརིཏྟཱརམྨཎཱ. ཨཏྠཔཊིསམྦྷིདཱ ཀཱམཱཝཙརཝིཔཱཀཀིརིཡསངྑཱཏཉྩེཝ པཙྩཡསམུཔྤནྣཉྩ ཨཏྠཾ པཙྩཝེཀྑནྟསྶ པརིཏྟཱརམྨཎཱ; ཝུཏྟཔྤབྷེདམེཝ རཱུཔཱཝཙརཱརཱུཔཱཝཙརཾ ཨཏྠཾ པཙྩཝེཀྑནྟསྶ མཧགྒཏཱརམྨཎཱ; ལོཀུཏྟརཝིཔཱཀཏྠཉྩེཝ པརམཏྠཉྩ ནིབྦཱནཾ པཙྩཝེཀྑནྟསྶ ཨཔྤམཱཎཱརམྨཎཱ. དྷམྨཔཊིསམྦྷིདཱ ཀཱམཱཝཙརཾ ཀུསལདྷམྨཾ ཨཀུསལདྷམྨཾ པཙྩཡདྷམྨཉྩ པཙྩཝེཀྑནྟསྶ པརིཏྟཱརམྨཎཱ; རཱུཔཱཝཙརཱརཱུཔཱཝཙརཾ ཀུསལཾ དྷམྨཾ པཙྩཡདྷམྨཉྩ པཙྩཝེཀྑནྟསྶ མཧགྒཏཱརམྨཎཱ ¶ ; ལོཀུཏྟརཾ ཀུསལཾ དྷམྨཾ པཙྩཡདྷམྨཉྩ པཙྩཝེཀྑནྟསྶ ཨཔྤམཱཎཱརམྨཎཱ. པཊིབྷཱནཔཊིསམྦྷིདཱ ཀཱམཱཝཙརཀུསལཝིཔཱཀཀིརིཡཉཱཎཱནི པཙྩཝེཀྑནྟསྶ པརིཏྟཱརམྨཎཱ; རཱུཔཱཝཙརཱརཱུཔཱཝཙརཱནི ཀུསལཝིཔཱཀཀིརིཡཉཱཎཱནི པཙྩཝེཀྑནྟསྶ ཏེསཾ ཨཱརམྨཎཱནི ཝིཛཱནནྟསྶ མཧགྒཏཱརམྨཎཱ; ལོཀུཏྟརཱནི ཀུསལཝིཔཱཀཉཱཎཱནི པཙྩཝེཀྑནྟསྶ ཨཔྤམཱཎཱརམྨཎཱ.

ཨཏྠཔཊིསམྦྷིདཱ སཧཛཱཏཧེཏུཝསེན སིཡཱ མགྒཧེཏུཀཱ, ཝཱིརིཡཛེཊྛིཀཱཡ མགྒབྷཱཝནཱཡ སིཡཱ མགྒཱདྷིཔཏི, ཚནྡཙིཏྟཛེཊྛིཀཱཡ ནཝཏྟབྦཱ, ཕལཀཱལེཔི ནཝཏྟབྦཱ ཨེཝ. དྷམྨཔཊིསམྦྷིདཱ མགྒཾ པཙྩཝེཀྑཎཀཱལེ མགྒཱརམྨཎཱ, མགྒཾ གརུཾ ཀཏྭཱ པཙྩཝེཀྑནྟསྶ ཨཱརམྨཎཱདྷིཔཏིཝསེན མགྒཱདྷིཔཏི. པཊིབྷཱནཔཊིསམྦྷིདཱ མགྒཉཱཎཾ པཙྩཝེཀྑཎཀཱལེ མགྒཱརམྨཎཱ, མགྒཾ གརུཾ ཀཏྭཱ པཙྩཝེཀྑནྟསྶ མགྒཱདྷིཔཏི, སེསཉཱཎཾ པཉྩཝེཀྑཎཀཱལེ ནཝཏྟབྦཱརམྨཎཱ ¶ ¶ . ནིརུཏྟིཔཊིསམྦྷིདཱ པཙྩུཔྤནྣམེཝ སདྡཾ ཨཱརམྨཎཾ ཀརོཏཱིཏི པཙྩུཔྤནྣཱརམྨཎཱ.

ཨཏྠཔཊིསམྦྷིདཱ ཨཏཱིཏཾ ཝིཔཱཀཏྠཾ ཀིརིཡཏྠཾ པཙྩཡསམུཔྤནྣཉྩ པཙྩཝེཀྑནྟསྶ ཨཏཱིཏཱརམྨཎཱ, ཨནཱགཏཾ པཙྩཝེཀྑནྟསྶ ཨནཱགཏཱརམྨཎཱ, པཙྩུཔྤནྣཾ པཙྩཝེཀྑནྟསྶ པཙྩུཔྤནྣཱརམྨཎཱ, ལོཀུཏྟརཾ པརམཏྠཾ པཙྩཝེཀྑནྟསྶ ནཝཏྟབྦཱརམྨཎཱ. དྷམྨཔཊིསམྦྷིདཱ ཨཏཱིཏཾ ཀུསལཾ ཨཀུསལཾ པཙྩཡདྷམྨཉྩ པཙྩཝེཀྑནྟསྶ ཨཏཱིཏཱརམྨཎཱ, ཨནཱགཏཾ པཙྩཝེཀྑནྟསྶ ཨནཱགཏཱརམྨཎཱ, པཙྩུཔྤནྣཾ པཙྩཝེཀྑནྟསྶ པཙྩུཔྤནྣཱརམྨཎཱ. པཊིབྷཱནཔཊིསམྦྷིདཱ ཨཏཱིཏཾ ཀུསལཉཱཎཾ ཝིཔཱཀཉཱཎཾ ཀིརིཡཉཱཎཉྩ པཙྩཝེཀྑནྟསྶ ཨཏཱིཏཱརམྨཎཱ, ཨནཱགཏཾ པཙྩཝེཀྑནྟསྶ ཨནཱགཏཱརམྨཎཱ, པཙྩུཔྤནྣཾ པཙྩཝེཀྑནྟསྶ པཙྩུཔྤནྣཱརམྨཎཱ.

ནིརུཏྟིཔཊིསམྦྷིདཱ སདྡཱརམྨཎཏྟཱ བཧིདྡྷཱརམྨཎཱ. ཨིཏརཱསུ ཏཱིསུ ཨཏྠཔཊིསམྦྷིདཱ ཨཛ྄ཛྷཏྟཾ ཝིཔཱཀཏྠཾ ཀིརིཡཏྠཾ པཙྩཡསམུཔྤནྣཉྩ པཙྩཝེཀྑནྟསྶ ཨཛ྄ཛྷཏྟཱརམྨཎཱ, བཧིདྡྷཱ པཙྩཝེཀྑནྟསྶ བཧིདྡྷཱརམྨཎཱ, ཨཛ྄ཛྷཏྟབཧིདྡྷཱ པཙྩཝེཀྑནྟསྶ ཨཛ྄ཛྷཏྟབཧིདྡྷཱརམྨཎཱ ¶ , པརམཏྠཾ པཙྩཝེཀྑནྟསྶ བཧིདྡྷཱརམྨཎཱ ཨེཝ. དྷམྨཔཊིསམྦྷིདཱ ཨཛ྄ཛྷཏྟཾ ཀུསལཱཀུསལཾ པཙྩཡདྷམྨཾ པཙྩཝེཀྑཎཀཱལེ ཨཛ྄ཛྷཏྟཱརམྨཎཱ, བཧིདྡྷཱ ཀུསལཱཀུསལཾ པཙྩཡདྷམྨཾ པཙྩཝེཀྑཎཀཱལེ བཧིདྡྷཱརམྨཎཱ, ཨཛ྄ཛྷཏྟབཧིདྡྷཱ ཀུསལཱཀུསལཾ པཙྩཡདྷམྨཾ པཙྩཝེཀྑཎཀཱལེ ཨཛ྄ཛྷཏྟབཧིདྡྷཱརམྨཎཱ. པཊིབྷཱནཔཊིསམྦྷིདཱ ཨཛ྄ཛྷཏྟཾ ཀུསལཝིཔཱཀཀིརིཡཉཱཎཾ པཙྩཝེཀྑཎཀཱལེ ཨཛ྄ཛྷཏྟཱརམྨཎཱ, བཧིདྡྷཱ…པེ… ཨཛ྄ཛྷཏྟབཧིདྡྷཱ ཀུསལཝིཔཱཀཀིརིཡཉཱཎཾ པཙྩཝེཀྑཎཀཱལེ ཨཛ྄ཛྷཏྟབཧིདྡྷཱརམྨཎཱཏི.

ཨིདྷཱཔི ཏིསྶོ པཊིསམྦྷིདཱ ལོཀིཡཱ; ཨཏྠཔཊིསམྦྷིདཱ ལོཀིཡལོཀུཏྟརཱ. ཨིམསྨིཉྷི པཊིསམྦྷིདཱཝིབྷངྒེ སམྨཱསམྦུདྡྷེན ཏཡོཔི ནཡཱ ལོཀིཡལོཀུཏྟརམིསྶཀཏྟཱ ཨེཀཔརིཙྪེདཱཝ ཀཐིཏཱ. ཏཱིསུཔི ཧི ཨེཏཱསུ ཏིསྶོ པཊིསམྦྷིདཱ ལོཀིཡཱ, ཨཏྠཔཊིསམྦྷིདཱ ལོཀིཡལོཀུཏྟརཱཏི. ཨེཝམཡཾ པཊིསམྦྷིདཱཝིབྷངྒོཔི ཏེཔརིཝཊྚཾ ནཱིཧརིཏྭཱཝ བྷཱཛེཏྭཱ དསྶིཏོཏི.

སམྨོཧཝིནོདནིཡཱ ཝིབྷངྒཊྛཀཐཱཡ

པཊིསམྦྷིདཱཝིབྷངྒཝཎྞནཱ ནིཊྛིཏཱ.

༡༦. ཉཱཎཝིབྷངྒོ

༡. ཨེཀཀམཱཏིཀཱདིཝཎྞནཱ

༧༥༡. ཨིདཱནི ¶ ¶ ¶ ཏདནནྟརེ ཉཱཎཝིབྷངྒེ ཨེཀཝིདྷེན ཉཱཎཝཏྠཱུཏིཨཱདིནཱ ནཡེན པཋམཾ ཨེཀཝིདྷཱདཱིཧི དསཝིདྷཔརིཡོསཱནེཧི དསཧི པརིཙྪེདེཧི མཱཏིཀཾ ཋཔེཏྭཱ ནིཀྑིཏྟཔདཱནུཀྐམེན ནིདྡེསོ ཀཏོ.

ཏཏྠ ཨེཀཝིདྷེནཱཏི ཨེཀཔྤཀཱརེན, ཨེཀཀོཊྛཱསེན ཝཱ. ཉཱཎཝཏྠཱུཏི ཨེཏྠ པན ཉཱཎཉྩ ཏཾ ཝཏྠུ ཙ ནཱནཔྤཀཱརཱནཾ སམྤཏྟཱིནནྟི ཉཱཎཝཏྠུ; ཨོཀཱསཊྛེན ཉཱཎསྶ ཝཏྠཱུཏིཔི ཉཱཎཝཏྠུ. ཨིདྷ པན པུརིམེནེཝཏྠེན ཉཱཎཝཏྠུ ཝེདིཏབྦཾ. ཏེནེཝ ཨེཀཝིདྷཔརིཙྪེདཱཝསཱནེ ‘‘ཡཱཐཱཝཀཝཏྠུཝིབྷཱཝནཱ པཉྙཱ – ཨེཝཾ ཨེཀཝིདྷེན ཉཱཎཝཏྠཱུ’’ཏི ཝུཏྟཾ. པཉྩ ཝིཉྙཱཎཱཏི ཙཀྑུཝིཉྙཱཎཱདཱིནི པཉྩ. ན ཧེཏཱུཏིཨཱདཱིནི ཧེཊྛཱ དྷམྨསངྒཧཊྛཀཐཱཡཾ (དྷ. ས. ཨཊྛ. ༡.༦) ཝུཏྟནཡེནེཝ ཝེདིཏབྦཱནི. སངྑེཔཏོ པནེཏྠ ཡཾ ཝཏྟབྦཾ ཏཾ ནིདྡེསཝཱརེ ཨཱཝི བྷཝིསྶཏི. ཡཐཱ ཙེཏྠ, ཨེཝཾ དུཀམཱཏིཀཱདིཔདེསུཔི ཡཾ ཝཏྟབྦཾ ཏཾ ཏཏྠེཝ ཨཱཝི བྷཝིསྶཏི. ནིཀྑེཔཔརིཙྪེདམཏྟཾ པནེཏྠ ཨེཝཾ ཝེདིཏབྦཾ. ཨེཏྠ ཧི ‘‘ན ཧེཏུ ཨཧེཏུཀཱ’’ཏིཨཱདཱིཧི ཏཱཝ དྷམྨསངྒཧམཱཏིཀཱཝསེན, ‘‘ཨནིཙྩཱ ཛརཱབྷིབྷཱུཏཱ’’ཏིཨཱདཱིཧི ཨམཱཏིཀཱཝསེནཱཏི སངྑེཔཏོ དུཝིདྷེཧི པབྷེདཏོ ཨཊྛསཏྟཏིཡཱ པདེཧི ཨེཀཀམཱཏིཀཱ ནིཀྑིཏྟཱ.

དུཀཱནུརཱུཔེཧི པན པཉྩཏིཾསཱཡ དུཀེཧི དུཀམཱཏིཀཱ ནིཀྑིཏྟཱ.

ཏིཀཱནུརཱུཔེཧི ‘‘ཙིནྟཱམཡཱ པཉྙཱ’’ཏིཨཱདཱིཧི ཙཏཱུཧི བཱཧིརཏྟིཀེཧི, ‘‘ཝིཔཱཀཱ པཉྙཱ’’ཏིཨཱདཱིཧི ¶ ཨནིཡམིཏཔཉྙཱཝསེན ཝུཏྟེཧི ཙུདྡསཧི མཱཏིཀཱཏིཀེཧི, ཝིཏཀྐཏྟིཀེ པཋམཔདེན ནིཡམིཏཔཉྙཱཝསེན ཝུཏྟེཧི ཏེརསཧི, དུཏིཡཔདེན ནིཡམིཏཔཉྙཱཝསེན ཝུཏྟེཧི སཏྟཧི, ཏཏིཡཔདེན ནིཡམིཏཔཉྙཱཝསེན ཝུཏྟེཧི དྭཱདསཧི, པཱིཏིཏྟིཀེ ཙ པཋམཔདེན ནིཡམིཏཔཉྙཱཝསེན ཝུཏྟེཧི ཏེརསཧི, ཏཐཱ དུཏིཡཔདེན, ཏཏིཡཔདེན ནིཡམིཏཔཉྙཱཝསེན ཝུཏྟེཧི དྭཱདསཧཱིཏི ཨཊྛཱསཱིཏིཡཱ ཏིཀེཧི ཏིཀམཱཏིཀཱ ནིཀྑིཏྟཱ.

ཙཏུཀྐམཱཏིཀཱ ¶ ¶ པན ‘ཀམྨསྶཀཏཉཱཎ’ནྟིཨཱདཱིཧི ཨེཀཝཱིསཏིཡཱ ཙཏུཀྐེཧི, པཉྩཀམཱཏིཀཱ དྭཱིཧི པཉྩཀེཧི, ཚཀྐམཱཏིཀཱ ཨེཀེན ཚཀྐེན, སཏྟཀམཱཏིཀཱ ‘‘སཏྟསཏྟཏི ཉཱཎཝཏྠཱུནཱི’’ཏི ཨེཝཾ སངྑེཔཏོ ཝུཏྟེཧི ཨེཀཱདསཧི སཏྟཀེཧི, ཨཊྛཀམཱཏིཀཱ ཨེཀེན ཨཊྛཀེན, ནཝཀམཱཏིཀཱ ཨེཀེན ནཝཀེན.

༡༠. དསཀམཱཏིཀཱཝཎྞནཱ

༧༦༠. དསཀམཱཏིཀཱ ‘‘དས ཏཐཱགཏསྶ ཏཐཱགཏབལཱནཱི’’ཏིཨཱདིནཱ ཨེཀེནེཝ དསཀེན ནིཀྑིཏྟཱ. ཏཏྠ དསཱཏི གཎནཔརིཙྪེདོ. ཏཐཱགཏསྶཱཏི ཡཐཱ ཝིཔསྶཱིཨཱདཡོ པུབྦཀཱ ཨིསཡོ ཨཱགཏཱ ཏཐཱ ཨཱགཏསྶ; ཡཐཱ ཙ ཏེ གཏཱ ཏཐཱ གཏསྶ. ཏཐཱགཏབལཱནཱིཏི ཨཉྙེཧི ཨསཱདྷཱརཎཱནི ཏཐཱགཏསྶེཝ བལཱནི; ཡཐཱ ཝཱ པུབྦབུདྡྷཱནཾ བལཱནི པུཉྙུསྶཡསམྤཏྟིཡཱ ཨཱགཏཱནི ཏཐཱ ཨཱགཏབལཱནཱིཏིཔི ཨཏྠོ. ཏཏྠ དུཝིདྷཾ ཏཐཱགཏསྶ བལཾ – ཀཱཡབལཉྩ ཉཱཎབལཉྩ. ཏེསུ ཀཱཡབལཾ ཧཏྠིཀུལཱནུསཱརེནེཝ ཝེདིཏབྦཾ. ཝུཏྟཉྷེཏཾ པོརཱཎེཧི –

ཀཱལཱ༹ཝཀཉྩ གངྒེཡྻཾ, པཎྜརཾ ཏམྦཔིངྒལཾ;

གནྡྷམངྒལཧེམཉྩ, ཨུཔོསཐཚདྡནྟིམེ དསཱཏི. –

ཨིམཱནི ཧི དས ཧཏྠིཀུལཱནི.

ཏཏྠ ‘ཀཱལཱ༹ཝཀ’ནྟི པཀཏིཧཏྠིཀུལཾ དཊྛབྦཾ. ཡཾ དསནྣཾ པུརིསཱནཾ ཀཱཡབལཾ ཏཾ ཨེཀསྶ ཀཱལཱ༹ཝཀཧཏྠིནོ. ཡཾ དསནྣཾ ཀཱལཱ༹ཝཀཱནཾ བལཾ ཏཾ ཨེཀསྶ གངྒེཡསྶ. ཡཾ དསནྣཾ གངྒེཡྻཱནཾ ཏཾ ཨེཀསྶ པཎྜརསྶ. ཡཾ དསནྣཾ པཎྜརཱནཾ ཏཾ ཨེཀསྶ ཏམྦསྶ. ཡཾ དསནྣཾ ཏམྦཱནཾ ཏཾ ཨེཀསྶ ¶ པིངྒལསྶ. ཡཾ དསནྣཾ པིངྒལཱནཾ ཏཾ ཨེཀསྶ གནྡྷཧཏྠིནོ. ཡཾ དསནྣཾ གནྡྷཧཏྠཱིནཾ ཏཾ ཨེཀསྶ མངྒལསྶ. ཡཾ དསནྣཾ མངྒལཱནཾ ཏཾ ཨེཀསྶ ཧེམཝཏསྶ. ཡཾ དསནྣཾ ཧེམཝཏཱནཾ ཏཾ ཨེཀསྶ ཨུཔོསཐསྶ. ཡཾ དསནྣཾ ཨུཔོསཐཱནཾ ཏཾ ཨེཀསྶ ཚདྡནྟསྶ. ཡཾ དསནྣཾ ཚདྡནྟཱནཾ ཏཾ ཨེཀསྶ ཏཐཱགཏསྶ. ནཱརཱཡནསངྑཱཏབལནྟིཔི ཨིདམེཝ ཝུཙྩཏི. ཏདེཏཾ པཀཏིཧཏྠཱིནཾ ¶ གཎནཱཡ ཧཏྠིཀོཊིསཧསྶཱནཾ, པུརིསགཎནཱཡ དསནྣཾ པུརིསཀོཊིསཧསྶཱནཾ བལཾ ཧོཏི. ཨིདཾ ཏཱཝ ཏཐཱགཏསྶ ཀཱཡབལཾ.

ཉཱཎབལཾ ¶ པན ཨིདྷ ཏཱཝ པཱལི༹ཡཾ ཨཱགཏམེཝ དསབལཉཱཎཾ. མཧཱསཱིཧནཱདེ (མ. ནི. ༡.༡༤༦ ཨཱདཡོ) དསབལཉཱཎཾ, ཙཏུཝེསཱརཛྫཉཱཎཾ, ཨཊྛསུ པརིསཱསུ ཨཀམྤནཉཱཎཾ, ཙཏུཡོནིཔརིཙྪེདཀཉཱཎཾ, པཉྩགཏིཔརིཙྪེདཀཉཱཎཾ, སཾཡུཏྟཀེ (སཾ. ནི. ༢.༣༣-༣༤) ཨཱགཏཱནི ཏེསཏྟཏི ཉཱཎཱནི, སཏྟསཏྟཏི ཉཱཎཱནཱིཏི ཨེཝཾ ཨཉྙཱནིཔི ཨནེཀཱནི ཉཱཎསཧསྶཱནི – ཨེཏཾ ཉཱཎབལཾ ནཱམ. ཨིདྷཱཔི ཉཱཎབལམེཝ ཨདྷིཔྤེཏཾ ཉཱཎཉྷི ཨཀམྤིཡཊྛེན ཨུཔཏྠམྦྷཀཊྛེན ཙ བལནྟི ཝུཏྟཾ.

ཡེཧི བལེཧི སམནྣཱགཏོཏི ཡེཧི དསཧི ཉཱཎབལེཧི ཨུཔེཏོ སམུཔེཏོ. ཨཱསབྷཾ ཋཱནནྟི སེཊྛཊྛཱནཾ ཨུཏྟམཊྛཱནཾ; ཨཱསབྷཱ ཝཱ པུབྦབུདྡྷཱ, ཏེསཾ ཋཱནནྟི ཨཏྠོ. ཨཔི ཙ གཝསཏཛེཊྛཀོ ཨུསབྷོ, གཝསཧསྶཛེཊྛཀོ ཝསབྷོ; ཝཛསཏཛེཊྛཀོ ཝཱ ཨུསབྷོ, ཝཛསཧསྶཛེཊྛཀོ ཝསབྷོ; སབྦགཝསེཊྛོ སབྦཔརིསྶཡསཧོ སེཏོ པཱསཱདིཀོ མཧཱབྷཱརཝཧོ ཨསནིསཏསདྡེཧིཔི ཨཀམྤནཱིཡོ ནིསབྷོ. སོ ཨིདྷ ཨུསབྷོཏི ཨདྷིཔྤེཏོ. ཨིདམྤི ཧི ཏསྶ པརིཡཱཡཝཙནཾ. ཨུསབྷསྶ ཨིདནྟི ཨཱསབྷཾ. ཋཱནནྟི ཙཏཱུཧི པཱདེཧི པཐཝིཾ ཨུཔྤཱིལེ༹ཏྭཱ ཨཙལཊྛཱནཾ. ཨིདཾ པན ཨཱསབྷཾ ཝིཡཱཏི ཨཱསབྷཾ. ཡཐེཝ ཧི ནིསབྷསངྑཱཏོ ཨུསབྷོ ཨུསབྷབལེན སམནྣཱགཏོ ཙཏཱུཧི པཱདེཧི པཐཝིཾ ཨུཔྤཱིལེ༹ཏྭཱ ཨཙལཊྛཱནེན ཏིཊྛཏི, ཨེཝཾ ཏཐཱགཏོཔི དསཧི ཏཐཱགཏབལེཧི སམནྣཱགཏོ ཙཏཱུཧི ཝེསཱརཛྫཔཱདེཧི ཨཊྛཔརིསཔཐཝིཾ ཨུཔྤཱིལེ༹ཏྭཱ སདེཝཀེ ལོཀེ ཀེནཙི པཙྩཏྠིཀེན པཙྩཱམིཏྟེན ཨཀམྤིཡོ ཨཙལཊྛཱནེན ཏིཊྛཏི. ཨེཝཾ ཏིཊྛམཱནོ ཙ ཏཾ ཨཱསབྷཾ ཋཱནཾ པཊིཛཱནཱཏི, ཨུཔགཙྪཏི, ན པཙྩཀྑཱཏི, ཨཏྟནི ཨཱརོཔེཏི. ཏེན ཝུཏྟཾ ‘‘ཨཱསབྷཾ ཋཱནཾ པཊིཛཱནཱཏཱི’’ཏི.

པརིསཱསཱུཏི ཨཊྛསུ པརིསཱསུ. སཱིཧནཱདཾ ནདཏཱིཏི སེཊྛནཱདཾ ཨབྷཱིཏནཱདཾ ནདཏི, སཱིཧནཱདསདིསཾ ¶ ཝཱ ནཱདཾ ནདཏི. ཨཡམཏྠོ སཱིཧནཱདསུཏྟེན དཱིཔེཏབྦོ. ཡཐཱ ཝཱ སཱིཧོ སཧནཏོ ཙ ཧནནཏོ ཙ སཱིཧོཏི ཝུཙྩཏི, ཨེཝཾ ཏཐཱགཏོ ལོཀདྷམྨཱནཾ སཧནཏོ ¶ པརཔྤཝཱདཱནཉྩ ཧནནཏོ སཱིཧོཏི ཝུཙྩཏི. ཨེཝཾ ཝུཏྟསྶ སཱིཧསྶ ནཱདཾ སཱིཧནཱདཾ. ཏཏྠ ¶ ཡཐཱ སཱིཧོ སཱིཧབལེན སམནྣཱགཏོ སབྦཏྠ ཝིསཱརདོ ཝིགཏལོམཧཾསོ སཱིཧནཱདཾ ནདཏི, ཨེཝཾ ཏཐཱགཏསཱིཧོཔི ཏཐཱགཏབལེཧི སམནྣཱགཏོ ཨཊྛསུ པརིསཱསུ ཝིསཱརདོ ཝིགཏལོམཧཾསོ ‘‘ཨིཏི རཱུཔ’’ནྟིཨཱདིནཱ ནཡེན ནཱནཱཝིདྷདེསནཱཝིལཱསསམྤནྣཾ སཱིཧནཱདཾ ནདཏི. ཏེན ཝུཏྟཾ ‘‘པརིསཱསུ སཱིཧནཱདཾ ནདཏཱི’’ཏི.

བྲཧྨཙཀྐཾ པཝཏྟེཏཱིཏི ཨེཏྠ བྲཧྨནྟི སེཊྛཾ ཨུཏྟམཾ ཝིསུདྡྷཾ. ཙཀྐསདྡོ ཙ པནཱཡཾ –

སམྤཏྟིཡཾ ལཀྑཎེ ཙ, རཐངྒེ ཨིརིཡཱཔཐེ;

དཱནེ རཏནདྷམྨཱུར, ཙཀྐཱདཱིསུ ཙ དིསྶཏི;

དྷམྨཙཀྐེ ཨིདྷ མཏོ, ཏཉྩ དྭེདྷཱ ཝིབྷཱཝཡེ.

‘‘ཙཏྟཱརིམཱནི, བྷིཀྑཝེ, ཙཀྐཱནི ཡེཧི སམནྣཱགཏཱནཾ དེཝམནུསྶཱན’’ནྟིཨཱདཱིསུ (ཨ. ནི. ༤.༣༡) ཧི ཨཡཾ སམྤཏྟིཡཾ དིསྶཏི. ‘‘ཧེཊྛཱ པཱདཏལེསུ ཙཀྐཱནི ཛཱཏཱནཱི’’ཏི (དཱི. ནི. ༢.༣༥) ཨེཏྠ ལཀྑཎེ. ‘‘ཙཀྐཾཝ ཝཧཏོ པད’’ནྟི (དྷ. པ. ༡) ཨེཏྠ རཐངྒེ. ‘‘ཙཏུཙཀྐཾ ནཝདྭཱར’’ནྟི (སཾ. ནི. ༡.༢༩) ཨེཏྠ ཨིརིཡཱཔཐེ. ‘‘དདཾ བྷུཉྫ མཱ ཙ པམཱདོ, ཙཀྐཾ པཝཏྟཡ སབྦཔཱཎིན’’ནྟི (ཛཱ. ༡.༧.༡༤༩) ཨེཏྠ དཱནེ. ‘‘དིབྦཾ ཙཀྐརཏནཾ པཱཏུརཧོསཱི’’ཏི ཨེཏྠ རཏནཙཀྐེ. ‘‘མཡཱ པཝཏྟིཏཾ ཙཀྐ’’ནྟི (སུ. ནི. ༥༦༢) ཨེཏྠ དྷམྨཙཀྐེ. ‘‘ཨིཙྪཱཧཏསྶ པོསསྶ ཙཀྐཾ བྷམཏི མཏྠཀེ’’ཏི (ཛཱ. ༡.༡.༡༠༤; ༡.༥.༡༠༣) ཨེཏྠ ཨུརཙཀྐེ. ‘‘ཁུརཔརིཡནྟེན ཙེཔི ཙཀྐེནཱ’’ཏི (དཱི. ནི. ༡.༡༦༦) ཨེཏྠ པཧརཎཙཀྐེ. ‘‘ཨསནིཝིཙཀྐ’’ནྟི (དཱི. ནི. ༣.༦༡; སཾ. ནི. ༢.༡༦༢) ཨེཏྠ ཨསནིམཎྜལེ. ཨིདྷ པནཱཡཾ དྷམྨཙཀྐེ མཏོ.

ཏཾ པན དྷམྨཙཀྐཾ དུཝིདྷཾ ཧོཏི – པཊིཝེདྷཉཱཎཉྩ དེསནཱཉཱཎཉྩ. ཏཏྠ པཉྙཱཔབྷཱཝིཏཾ ཨཏྟནོ ཨརིཡཕལཱཝཧཾ པཊིཝེདྷཉཱཎཾ; ཀརུཎཱཔབྷཱཝིཏཾ སཱཝཀཱནཾ ཨརིཡཕལཱཝཧཾ དེསནཱཉཱཎཾ. ཏཏྠ པཊིཝེདྷཉཱཎཾ ཨུཔྤཛྫམཱནཾ ཨུཔྤནྣནྟི དུཝིདྷཾ. ཏཉྷི ཨབྷིནིཀྑམནཏོ ¶ ཡཱཝ ཨརཧཏྟམགྒཱ ཨུཔྤཛྫམཱནཾ ¶ , ཕལཀྑཎེ ཨུཔྤནྣཾ ནཱམ; ཏུསིཏབྷཝནཏོ ཝཱ ཡཱཝ མཧཱབོདྷིཔལླངྐེ ཨརཧཏྟམགྒཱ ཨུཔྤཛྫམཱནཾ, ཕལཀྑཎེ ཨུཔྤནྣཾ ནཱམ; དཱིཔངྐརབྱཱཀརཎཏོ པཊྛཱཡ ཝཱ ཡཱཝ ཨརཧཏྟམགྒཱ ཨུཔྤཛྫམཱནཾ ¶ , ཕལཀྑཎེ ཨུཔྤནྣཾ ནཱམ. དེསནཱཉཱཎམྤི པཝཏྟམཱནཾ པཝཏྟནྟི དུཝིདྷཾ. ཏཉྷི ཡཱཝ ཨཉྙཱཀོཎྜཉྙསྶ སོཏཱཔཏྟིམགྒཱ པཝཏྟམཱནཾ, ཕལཀྑཎེ པཝཏྟཾ ནཱམ. ཏེསུ པཊིཝེདྷཉཱཎཾ ལོཀུཏྟརཾ, དེསནཱཉཱཎཾ ལོཀིཡཾ. ཨུབྷཡམྤི པནེཏཾ ཨཉྙེཧི ཨསཱདྷཱརཎཾ བུདྡྷཱནཾཡེཝ ཨོརསཉཱཎཾ.

ཨིདཱནི ཡེཧི དསཧི བལེཧི སམནྣཱགཏོ ཏཐཱགཏོ ཨཱསབྷཾ ཋཱནཾ པཊིཛཱནཱཏི, ཡཱནི ཨཱདིཏོཝ ‘‘དས ཏཐཱགཏསྶ ཏཐཱགཏབལཱནཱི’’ཏི ནིཀྑིཏྟཱནི, ཏཱནི ཝིཏྠཱརཏོ དསྶེཏུཾ ཀཏམཱནི དས? ཨིདྷ ཏཐཱགཏོ ཋཱནཉྩ ཋཱནཏོཏིཨཱདིམཱཧ. ཏཏྠ ཋཱནཉྩ ཋཱནཏོཏི ཀཱརཎཉྩ ཀཱརཎཏོ. ཀཱརཎཉྷི ཡསྨཱ ཏཏྠ ཕལཾ ཏིཊྛཏི ཏདཱཡཏྟཝུཏྟིཏཱཡ ཨུཔྤཛྫཏི ཙེཝ པཝཏྟཏི ཙ, ཏསྨཱ ཋཱནནྟི ཝུཙྩཏི. ཏཾ བྷགཝཱ ‘‘ཡེ ཡེ དྷམྨཱ ཡེསཾ ཡེསཾ དྷམྨཱནཾ ཧེཏཱུ པཙྩཡཱ ཨུཔྤཱདཱཡ ཏཾ ཏཾ ཋཱན’’ནྟི ཙ ‘ཡེ ཡེ དྷམྨཱ ཡེསཾ ཡེསཾ དྷམྨཱནཾ ན ཧེཏཱུ ན པཙྩཡཱ ཨུཔྤཱདཱཡ ཏཾ ཏཾ ཨཊྛཱན’ནྟི ཙ པཛཱནནྟོ ཋཱནཉྩ ཋཱནཏོ ཨཊྛཱནཉྩ ཨཊྛཱནཏོ ཡཐཱབྷཱུཏཾ པཛཱནཱཏི. ཡམྤཱིཏི ཡེན ཉཱཎེན. ཨིདམྤི ཏཐཱགཏསྶཱཏི ཨིདམྤི ཋཱནཱཊྛཱནཉཱཎཾ ཏཐཱགཏསྶ ཏཐཱགཏབལཾ ནཱམ ཧོཏཱིཏི ཨཏྠོ. ཨེཝཾ སབྦཔདེསུ ཡོཛནཱ ཝེདིཏབྦཱ.

ཀམྨསམཱདཱནཱནནྟི སམཱདིཡིཏྭཱ ཀཏཱནཾ ཀུསལཱཀུསལཀམྨཱནཾ; ཀམྨམེཝ ཝཱ ཀམྨསམཱདཱནཾ. ཋཱནསོ ཧེཏུསོཏི པཙྩཡཏོ ཙེཝ ཧེཏུཏོ ཙ. ཏཏྠ གཏིཨུཔདྷིཀཱལཔཡོགཱ ཝིཔཱཀསྶ ཋཱནཾ, ཀམྨཾ ཧེཏུ.

སབྦཏྠ གཱམིནིནྟི སབྦགཏིགཱམིནིཉྩ ཨགཏིགཱམིནིཉྩ. པཊིཔདནྟི མགྒཾ. ཡཐཱབྷཱུཏཾ པཛཱནཱཏཱིཏི བཧཱུསུཔི མནུསྶེསུ ཨེཀམེཝ པཱཎཾ གྷཱཏེནྟེསུ ‘ཨིམསྶ ཙེཏནཱ ནིརཡགཱམིནཱི བྷཝིསྶཏི, ཨིམསྶ ཏིརཙྪཱནཡོནིགཱམིནཱི’ཏི ཨིམིནཱ ནཡེན ཨེཀཝཏྠུསྨིམྤི ཀུསལཱཀུསལཙེཏནཱསངྑཱཏཱནཾ པཊིཔཏྟཱིནཾ ཨཝིཔརཱིཏཏོ སབྷཱཝཾ པཛཱནཱཏི.

ཨནེཀདྷཱཏུནྟི ¶ ¶ ཙཀྑུདྷཱཏུཨཱདཱིཧི ཀཱམདྷཱཏུཨཱདཱིཧི ཝཱ དྷཱཏཱུཧི བཧུདྷཱཏུཾ. ནཱནཱདྷཱཏུནྟི ཏཱསཾཡེཝ ¶ དྷཱཏཱུནཾ ཝིལཀྑཎཏཱཡ ནཱནཔྤཀཱརདྷཱཏུཾ. ལོཀནྟི ཁནྡྷཱཡཏནདྷཱཏུལོཀཾ. ཡཐཱབྷཱུཏཾ པཛཱནཱཏཱིཏི ཏཱསཾ ཏཱསཾ དྷཱཏཱུནཾ ཨཝིཔརཱིཏཏོ སབྷཱཝཾ པཊིཝིཛ྄ཛྷཏི.

ནཱནཱདྷིམུཏྟིཀཏནྟི ཧཱིནཱདཱིཧི ཨདྷིམུཏྟཱིཧི ནཱནཱདྷིམུཏྟིཀབྷཱཝཾ.

པརསཏྟཱནནྟི པདྷཱནསཏྟཱནཾ. པརཔུགྒལཱནནྟི ཏཏོ པརེསཾ ཧཱིནསཏྟཱནཾ; ཨེཀཏྠམེཝ ཝཱ ཨེཏཾ པདདྭཡཾ ཝེནེཡྻཝསེན པན དྭེདྷཱ ཝུཏྟཾ. ཨིནྡྲིཡཔརོཔརིཡཏྟནྟི སདྡྷཱདཱིནཾ ཨིནྡྲིཡཱནཾ པརབྷཱཝཉྩ ཨཔརབྷཱཝཉྩ ཝུཌྜྷིཉྩ ཧཱནིཉྩཱཏི ཨཏྠོ.

ཛྷཱནཝིམོཀྑསམཱདྷིསམཱཔཏྟཱིནནྟི པཋམཱདཱིནཾ ཙཏུནྣཾ ཛྷཱནཱནཾ, ‘‘རཱུཔཱི རཱུཔཱནི པསྶཏཱི’’ཏིཨཱདཱིནཾ ཨཊྛནྣཾ ཝིམོཀྑཱནཾ, སཝིཏཀྐསཝིཙཱརཱདཱིནཾ ཏིཎྞཾ སམཱདྷཱིནཾ, པཋམཛ྄ཛྷཱནསམཱཔཏྟིཨཱདཱིནཉྩ ནཝནྣཾ ཨནུཔུབྦསམཱཔཏྟཱིནཾ. སཾཀིལེསནྟི ཧཱནབྷཱགིཡདྷམྨཾ. ཝོདཱནནྟི ཝིསེསབྷཱགིཡདྷམྨཾ. ཝུཊྛཱནནྟི ཡེན ཀཱརཎེན ཛྷཱནཱདཱིཧི ཝུཊྛཧནྟི, ཏཾ ཀཱརཎཾ.

པུབྦེནིཝཱསཱནུསྶཏིནྟི པུབྦེ ནིཝུཏྠཀྑནྡྷཱནུསྶརཎཾ.

ཙུཏཱུཔཔཱཏནྟི ཙུཏིཉྩ ཨུཔཔཱཏཉྩ.

ཨཱསཝཱནཾ ཁཡནྟི ཀཱམཱསཝཱདཱིནཾ ཁཡསངྑཱཏཾ ཨཱསཝནིརོདྷཾ ནིབྦཱནཾ.

ཨིམཱནཱིཏི ཡཱནི ཧེཊྛཱ ‘‘དས ཏཐཱགཏསྶ ཏཐཱགཏབལཱནཱི’’ཏི ཨཝོཙ, ཨིམཱནི ཏཱནཱིཏི ཨཔྤནཾ ཀརོཏཱིཏི. ཨེཝམེཏྠ ཨནུཔུབྦཔདཝཎྞནཾ ཉཏྭཱ ཨིདཱནི ཡསྨཱ ཏཐཱགཏོ པཋམཾཡེཝ ཋཱནཱཊྛཱནཉཱཎེན ཝེནེཡྻསཏྟཱནཾ ཨཱསཝཀྑཡཱདྷིགམསྶ ཙེཝ ཨནདྷིགམསྶ ཙ ཋཱནཱཊྛཱནབྷཱུཏཾ ཀིལེསཱཝརཎཱབྷཱཝཾ པསྶཏི, ལོཀིཡསམྨཱདིཊྛིཋཱནདསྶནཏོ ནིཡཏམིཙྪཱདིཊྛིཋཱནཱབྷཱཝདསྶནཏོ ཙ. ཨཐ ནེསཾ ཀམྨཝིཔཱཀཉཱཎེན ཝིཔཱཀཱཝརཎཱབྷཱཝཾ པསྶཏི ¶ , ཏིཧེཏུཀཔཊིསནྡྷིདསྶནཏོ. སབྦཏྠགཱམིནཱིཔཊིཔདཱཉཱཎེན ཀམྨཱཝརཎཱབྷཱཝཾ པསྶཏི, ཨཱནནྟརིཡཀམྨཱབྷཱཝདསྶནཏོ. ཨེཝཾ ཨནཱཝརཎཱནཾ ཨནེཀདྷཱཏུནཱནཱདྷཱཏུཉཱཎེན ཨནུཀཱུལདྷམྨདེསནཏྠཾ ཙརིཡཱཝིསེསཾ པསྶཏི, དྷཱཏུཝེམཏྟདསྶནཏོ. ཨཐ ནེསཾ ¶ ནཱནཱདྷིམུཏྟིཀཏཱཉཱཎེན ཨདྷིམུཏྟིཾ པསྶཏི, པཡོགཾ ཨནཱདིཡིཏྭཱཔི ¶ ཨདྷིམུཏྟིཝསེན དྷམྨདེསནཏྠཾ. ཨཐེཝཾ དིཊྛཱདྷིམུཏྟཱིནཾ ཡཐཱསཏྟི ཡཐཱབལཾ དྷམྨཾ དེསེཏུཾ ཨིནྡྲིཡཔརོཔརིཡཏྟཉཱཎེན ཨིནྡྲིཡཔརོཔརིཡཏྟཾ པསྶཏི, སདྡྷཱདཱིནཾ ཏིཀྑམུདུབྷཱཝདསྶནཏོ. ཨེཝཾ པརིཉྙཱཏིནྡྲིཡཔརོཔརིཡཏྟཱཔི པནེཏེ སཙེ དཱུརེ ཧོནྟི, ཨཐ ཛྷཱནཱདིཔརིཉྙཱཎེན ཛྷཱནཱདཱིསུ ཝསཱིབྷཱུཏཏྟཱ ཨིདྡྷིཝིསེསེན ཁིཔྤཾ ཨུཔགཙྪཏི. ཨུཔགནྟྭཱ ཙ ནེསཾ པུབྦེནིཝཱསཱནུསྶཏིཉཱཎེན པུབྦཛཱཏིབྷཱཝནཾ, དིབྦཙཀྑཱནུབྷཱཝཏོ པཏྟབྦེན ཙེཏོཔརིཡཉཱཎེན སམྤཏྟིཙིཏྟཝིསེསཾ པསྶནྟོ ཨཱསཝཀྑཡཉཱཎཱནུབྷཱཝེན ཨཱསཝཀྑཡགཱམིནིཡཱ པཊིཔདཱཡ ཝིགཏསམྨོཧཏྟཱ ཨཱསཝཀྑཡཱཡ དྷམྨཾ དེསེཏི. ཏསྨཱ ཨིམིནཱ ཨནུཀྐམེན ཨིམཱནི དསབལཱནི ཝུཏྟཱནཱིཏི ཝེདིཏབྦཱནི. ཨཡཾ ཏཱཝ མཱཏིཀཱཡ ཨཏྠཝཎྞནཱ.

(༡.) ཨེཀཀནིདྡེསཝཎྞནཱ

༧༦༡. ཨིདཱནི ཡཐཱནིཀྑིཏྟཱཡ མཱཏིཀཱཡ ‘‘པཉྩཝིཉྙཱཎཱ ན ཧེཏུམེཝཱ’’ཏིཨཱདིནཱ ནཡེན ཨཱརདྡྷེ ནིདྡེསཝཱརེ ན ཧེཏུམེཝཱཏི སཱདྷཱརཎཧེཏུཔཊིཀྑེཔནིདྡེསོ. ཏཏྠ ‘‘ཧེཏུཧེཏུ, པཙྩཡཧེཏུ, ཨུཏྟམཧེཏུ, སཱདྷཱརཎཧེཏཱུཏི ཙཏུབྦིདྷོ ཧེཏཱུ’’ཏིཨཱདིནཱ ནཡེན ཡཾ ཝཏྟབྦཾ སིཡཱ, ཏཾ སབྦཾ རཱུཔཀཎྜེ ‘‘སབྦཾ རཱུཔཾ ན ཧེཏུམེཝཱ’’ཏིཨཱདཱིནཾ ཨཏྠཝཎྞནཱཡཾ (དྷ. ས. ཨཊྛ. ༥༩༤) ཝུཏྟམེཝ. ཨཧེཏུཀམེཝཱཏིཨཱདཱིསུ བྱཉྫནསནྡྷིཝསེན མཀཱརོ ཝེདིཏབྦོ; ཨཧེཏུཀཱ ཨེཝཱཏི ཨཏྠོ. སེསཔདེསུཔི ཨེསེཝ ནཡོ. ཨཔིཙ ‘‘ཧེཏཱུ དྷམྨཱ ནཧེཏཱུ དྷམྨཱ’’ཏིཨཱདཱིསུ (དྷ. ས. དུཀམཱཏིཀཱ ༡) དྷམྨཀོཊྛཱསེསུ པཉྩཝིཉྙཱཎཱནི ཧེཏཱུ དྷམྨཱཏི ཝཱ སཧེཏུཀཱ དྷམྨཱཏི ¶ ཝཱ ན ཧོནྟི. ཨེཀནྟེན པན ན ཧེཏཱུཡེཝ, ཨཧེཏུཀཱ ཡེཝཱཏི ཨིམཱནིཔི ནཡེནེཏྠ སབྦཔདེསུ ཨཏྠོ ཝེདིཏབྦོ. ཨབྱཱཀཏམེཝཱཏི པདཾ ཝིཔཱཀཱབྱཱཀཏཝསེན ཝུཏྟཾ. སཱརམྨཎམེཝཱཏི ཨོལུབྦྷཱརམྨཎཝསེན. པཙྩཡཱརམྨཎཾ ཨོལུབྦྷཱརམྨཎནྟི ཧི དུཝིདྷཾ ཨཱརམྨཎཾ. ཨིམསྨིཾ པན ཋཱནེ ཨོལུབྦྷཱརམྨཎམེཝ དྷུརཾ, པཙྩཡཱརམྨཎམྤི ལབྦྷཏིཡེཝ. ཨཙེཏསིཀམེཝཱཏི པདཾ ཙིཏྟཾ, རཱུཔཾ, ནིབྦཱནནྟི ཏཱིསུ ཨཙེཏསིཀེསུ ཙིཏྟམེཝ སནྡྷཱཡ ཝུཏྟཾ. ནོ ཨཔརིཡཱཔནྣམེཝཱཏི གཏིཔརིཡཱཔནྣཙུཏིཔརིཡཱཔནྣསཾསཱརཝཊྚབྷཝཔརིཡཱཔནྣབྷཱཝཏོ པརིཡཱཔནྣཱ ཨེཝ, ནོ ཨཔརིཡཱཔནྣཱ. ལོཀཏོ ཝཊྚཏོ ན ནིཡྻནྟཱིཏི ཨནིཡྻཱནིཀཱ ¶ . ཨུཔྤནྣཾ མནོཝིཉྙཱཎཝིཉྙེཡྻམེཝཱཏི རཱུཔཀཎྜེ ཙཀྑུཝིཉྙཱཎཱདཱིནཾ པཙྩུཔྤནྣཱནེཝ རཱུཔཱདཱིནི ཨཱརབྦྷ པཝཏྟིཏོ ཨཏཱིཏཱདིཝིསཡཾ མནོཝིཉྙཱཎམྤི པཉྩཝིཉྙཱཎསོཏཔཏིཏམེཝ ཀཏྭཱ ‘‘ཨུཔཔནྣཾ ཚཧི ཝིཉྙཱཎེཧི ཝིཉྙེཡྻ’’ནྟི (དྷ. ས. ༥༨༤) ཝུཏྟཾ. པཉྩཝིཉྙཱཎཱ པན ཡསྨཱ པཙྩུཔྤནྣཱཔི ཙཀྑུཝིཉྙཱཎཱདཱིནཾ ¶ ཨཱརམྨཎཱ ན ཧོནྟི, མནོཝིཉྙཱཎསྶེཝ ཧོནྟི, ཏསྨཱ ‘‘མནོཝིཉྙཱཎཝིཉྙེཡྻམེཝཱ’’ཏི ཝུཏྟཾ. ཨནིཙྩམེཝཱཏི ཧུཏྭཱ ཨབྷཱཝཊྛེན ཨནིཙྩཱཡེཝ. ཛརཱབྷིབྷཱུཏམེཝཱཏི ཛརཱཡ ཨབྷིབྷཱུཏཏྟཱ ཛརཱབྷིབྷཱུཏཱ ཨེཝ.

༧༦༢. ཨུཔྤནྣཝཏྠུཀཱ ཨུཔྤནྣཱརམྨཎཱཏི ཨནཱགཏཔཊིཀྑེཔོ. ན ཧི ཏེ ཨནཱགཏེསུ ཝཏྠཱརམྨཎེསུ ཨུཔྤཛྫནྟི.

པུརེཛཱཏཝཏྠུཀཱ པུརེཛཱཏཱརམྨཎཱཏི སཧུཔྤཏྟིཔཊིཀྑེཔོ. ན ཧི ཏེ སཧུཔྤནྣཾ ཝཏྠུཾ ཝཱ ཨཱརམྨཎཾ ཝཱ པཊིཙྩ ཨུཔྤཛྫནྟི, སཡཾ པན པཙྪཱཛཱཏཱ ཧུཏྭཱ པུརེཛཱཏེསུ ཝཏྠཱརམྨཎེསུ ཨུཔྤཛྫནྟི.

ཨཛ྄ཛྷཏྟིཀཝཏྠུཀཱཏི ཨཛ྄ཛྷཏྟཛ྄ཛྷཏྟཝསེན ཝུཏྟཾ. ཏཱནི ཧི ཨཛ྄ཛྷཏྟིཀེ པཉྩ པསཱདེ ཝཏྠུཾ ཀཏྭཱ ཨུཔྤཛྫནྟི. བཱཧིརཱརམྨཎཱཏི བཱཧིརརཱུཔཱདིཨཱརམྨཎཱ. ཏཏྠ ཙཏུཀྐཾ ཝེདིཏབྦཾ – པཉྩཝིཉྙཱཎཱ ཧི པསཱདཝཏྠུཀཏྟཱ ཨཛ྄ཛྷཏྟིཀཱ ཨཛ྄ཛྷཏྟིཀཝཏྠུཀཱ, མནོཝིཉྙཱཎཾ ཧདཡརཱུཔཾ ཝཏྠུཾ ཀཏྭཱ ཨུཔྤཛྫནཀཱལེ ཨཛ྄ཛྷཏྟིཀཾ བཱཧིརཝཏྠུཀཾ, པཉྩཝིཉྙཱཎསམྤཡུཏྟཱ ཏཡོ ཁནྡྷཱ བཱཧིརཱ ཨཛ྄ཛྷཏྟིཀཝཏྠུཀཱ ¶ , མནོཝིཉྙཱཎསམྤཡུཏྟཱ ཏཡོ ཁནྡྷཱ ཧདཡརཱུཔཾ ཝཏྠུཾ ཀཏྭཱ ཨུཔྤཛྫནཀཱལེ བཱཧིརཱ བཱཧིརཝཏྠུཀཱ.

ཨསམྦྷིནྣཝཏྠུཀཱཏི ཨནིརུདྡྷཝཏྠུཀཱ. ན ཧི ཏེ ནིརུདྡྷཾ ཨཏཱིཏཾ ཝཏྠུཾ པཊིཙྩ ཨུཔྤཛྫནྟི. ཨསམྦྷིནྣཱརམྨཎཏཱཡཔི ཨེསེཝ ནཡོ.

ཨཉྙཾ ཙཀྑུཝིཉྙཱཎསྶ ཝཏྠུ ཙ ཨཱརམྨཎཉྩཱཏིཨཱདཱིསུ ཙཀྑུཝིཉྙཱཎསྶ ཧི ཨཉྙཾ ཝཏྠུ, ཨཉྙཾ ཨཱརམྨཎཾ. ཨཉྙཾ སོཏཝིཉྙཱཎཱདཱིནཾ. ཙཀྑུཝིཉྙཱཎཾ སོཏཔསཱདཱདཱིསུ ཨཉྙཏརཾ ཝཏྠུཾ, སདྡཱདཱིསུ ཝཱ ཨཉྙཏརཾ ཨཱརམྨཎཾ ཀཏྭཱ ཀཔྤཏོ ཀཔྤཾ གནྟྭཱཔི ན ཨུཔྤཛྫཏི; ཙཀྑུཔསཱདམེཝ པན ཝཏྠུཾ ཀཏྭཱ རཱུཔཉྩ ཨཱརམྨཎཾ ཀཏྭཱ ཨུཔྤཛྫཏི. ཨེཝམསྶ ཝཏྠུཔི དྭཱརམྤི ཨཱརམྨཎམྤི ནིབདྡྷཾ, ཨཉྙཾ ཝཏྠུཾ ཝཱ དྭཱརཾ ཝཱ ཨཱརམྨཎཾ ཝཱ ན སངྐམཏི, ནིབདྡྷཝཏྠུ ¶ ནིབདྡྷདྭཱརཾ ནིབདྡྷཱརམྨཎམེཝ ཧུཏྭཱ ཨུཔྤཛྫཏི. སོཏཝིཉྙཱཎཱདཱིསུཔི ཨེསེཝ ནཡོ.

༧༦༣. ན ¶ ཨཉྙམཉྙསྶ གོཙརཝིསཡཾ པཙྩནུབྷོནྟཱིཏི ཨེཏྠ ཨཉྙམཉྙསྶ ཙཀྑུ སོཏསྶ, སོཏཾ ཝཱ ཙཀྑུསྶཱཏི ཨེཝཾ ཨེཀཾ ཨེཀསྶ གོཙརཝིསཡཾ ན པཙྩནུབྷོཏཱིཏི ཨཏྠོ. སཙེ ཧི ནཱིལཱདིབྷེདཾ རཱུཔཱརམྨཎཾ སམོདྷཱནེཏྭཱ སོཏིནྡྲིཡསྶ ཨུཔནེཡྻ ‘ཨིངྒྷ ཏཱཝ ནཾ ཝཝཏྠཱཔེཧི ཝིབྷཱཝེཧི – ཀིཾ ནཱམེཏཾ ཨཱརམྨཎ’ནྟི, ཙཀྑུཝིཉྙཱཎཾ ཝིནཱཔི མུཁེན ཨཏྟནོ དྷམྨཏཱཡ ཨེཝཾ ཝདེཡྻ – ‘ཨརེ ཨནྡྷབཱལ, ཝསྶསཏམྤི ཝསྶསཧསྶམྤི པརིདྷཱཝམཱནོ ཨཉྙཏྲ མཡཱ ཀུཧིཾ ཨེཏསྶ ཛཱནནཀཾ ལབྷིསྶསི; ཨཱཧར ནཾ ཙཀྑུཔསཱདེ ཨུཔནེཧི; ཨཧམེཏཾ ཨཱརམྨཎཾ ཛཱནིསྶཱམི – ཡདི ཝཱ ནཱིལཾ ཡདི ཝཱ པཱིཏཀཾ. ན ཧི ཨེསོ ཨཉྙསྶ ཝིསཡོ; མཡ྄ཧམེཝེསོ ཝིསཡོ’ཏི. སེསཝིཉྙཱཎེསུཔི ཨེསེཝ ནཡོ. ཨེཝམེཏེ ཨཉྙམཉྙསྶ གོཙརཝིསཡཾ ན པཙྩནུབྷོནྟི ནཱམ.

༧༦༤. སམནྣཱཧརནྟསྶཱཏི ཨཱཝཛྫནེནེཝ སམནྣཱཧརནྟསྶ.

མནསིཀརོནྟསྶཱཏི ཨཱཝཛྫནེནེཝ མནསིཀརོནྟསྶ. ཨེཏཱནི ཧི ཙིཏྟཱནི ཨཱཝཛྫནེན སམནྣཱཧཊཀཱལེ མནསིཀཏཀཱལེཡེཝ ཙ ཨུཔྤཛྫནྟི.

ན ཨབྦོཀིཎྞཱཏི ཨཉྙེན ཝིཉྙཱཎེན ཨབྦོཀིཎྞཱ ནིརནྟརཱཝ ནུཔྤཛྫནྟི. ཨེཏེན ཏེསཾ ཨནནྟརཏཱ པཊིཀྑིཏྟཱ.

༧༦༥. ན ཨཔུབྦཾ ཨཙརིམནྟི ཨེཏེན སབྦེསམྤི སཧུཔྤཏྟི པཊིཀྑིཏྟཱ. ན ¶ ཨཉྙམཉྙསྶ སམནནྟརཱཏི ཨེཏེན སམནནྟརཏཱ པཊིཀྑིཏྟཱ.

༧༦༦. ཨཱཝཊྚནཱ ཝཱཏིཨཱདཱིནི ཙཏྟཱརིཔི ཨཱཝཛྫནསྶེཝ ནཱམཱནི. ཏཉྷི བྷཝངྒསྶ ཨཱཝཊྚནཏོ ཨཱཝཊྚནཱ, ཏསྶེཝ ཨཱབྷུཛནཏོ ཨཱབྷོགོ, རཱུཔཱདཱིནཾ སམནྣཱཧརཎཏོ སམནྣཱཧཱརོ, ཏེསཾཡེཝ མནསིཀརཎཏོ མནསིཀཱརོཏི ཝུཙྩཏི. ཨེཝམེཏྠ སངྑེཔཏོ པཉྩནྣཾ ཝིཉྙཱཎཱནཾ ཨཱཝཛྫནཊྛཱནེ ཋཏྭཱ ཨཱཝཛྫནཱདིཀིཙྩཾ ཀཱཏུཾ སམཏྠབྷཱཝོ པཊིཀྑིཏྟོ.

ན ཀཉྩི དྷམྨཾ པཊིཝིཛཱནཱཏཱིཏི ‘‘མནོཔུབྦངྒམཱ དྷམྨཱ’’ཏི (དྷ. པ. ༡-༢) ཨེཝཾ ཝུཏྟཾ ཨེཀམྤི ཀུསལཾ ཝཱ ཨཀུསལཾ ཝཱ ན པཊིཝིཛཱནཱཏི.

ཨཉྙཏྲ ¶ ¶ ཨབྷིནིཔཱཏམཏྟཱཏི ཋཔེཏྭཱ རཱུཔཱདཱིནཾ ཨབྷིནིཔཱཏམཏྟཾ. ཨིདཾ ཝུཏྟཾ ཧོཏི – སུཔཎྜིཏོཔི པུརིསོ, ཋཔེཏྭཱ ཨཱཔཱཐགཏཱནི རཱུཔཱདཱིནི, ཨཉྙཾ ཀུསལཱཀུསལེསུ ཨེཀདྷམྨམྤི པཉྩཧི ཝིཉྙཱཎེཧི ན པཊིཝིཛཱནཱཏི. ཙཀྑུཝིཉྙཱཎཾ པནེཏྠ དསྶནམཏྟམེཝ ཧོཏི. སོཏཝིཉྙཱཎཱདཱིནི སཝནགྷཱཡནསཱཡནཕུསནམཏྟཱནེཝ. དསྶནཱདིམཏྟཏོ པན མུཏྟཱ ཨཉྙཱ ཨེཏེསཾ ཀུསལཱདིཔཊིཝིཉྙཏྟི ནཱམ ནཏྠི.

མནོདྷཱཏུཡཱཔཱིཏི སམྤཊིཙྪནམནོདྷཱཏུཡཱཔི. སམྤིཎྜནཏྠོ ཙེཏྠ པིཀཱརོ. ཏསྨཱ མནོདྷཱཏུཡཱཔི ཏཏོ པརཱཧི མནོཝིཉྙཱཎདྷཱཏཱུཧིཔཱིཏི སབྦེཧིཔི པཉྩདྭཱརིཀཝིཉྙཱཎེཧི ན ཀཉྩི ཀུསལཱཀུསལཾ དྷམྨཾ པཊིཝིཛཱནཱཏཱིཏི ཨེཝམེཏྠ ཨཏྠོ དཊྛབྦོ.

ན ཀཉྩི ཨིརིཡཱཔཐཾ ཀཔྤེཏཱིཏིཨཱདཱིསུཔི ཨེསེཝ ནཡོ. ན ཧི པཉྩདྭཱརིཀཝིཉྙཱཎེཧི གམནཱདཱིསུ ཀཉྩི ཨིརིཡཱཔཐཾ ཀཔྤེཏི, ན ཀཱཡཀམྨཾ ན ཝཙཱིཀམྨཾ པཊྛཔེཏི, ན ཀུསལཱཀུསལཾ དྷམྨཾ སམཱདིཡཏི, ན སམཱདྷིཾ སམཱཔཛྫཏི ལོཀིཡཾ ཝཱ ལོཀུཏྟརཾ ཝཱ, ན སམཱདྷིཏོ ཝུཊྛཱཏི ལོཀིཡཱ ཝཱ ལོཀུཏྟརཱ ཝཱ, ན བྷཝཏོ ཙཝཏི, ན བྷཝནྟརེ ཨུཔཔཛྫཏི. སབྦམྤི ཧེཏཾ ཀུསལཱཀུསལདྷམྨཔཊིཝིཛཱནནཱདིཝཙནཔརིཡོསཱནཾ ཀིཙྩཾ མནོདྭཱརིཀཙིཏྟེནེཝ ཧོཏི, ན པཉྩདྭཱརིཀེནཱཏི སབྦསྶཱཔེཏསྶ ཀིཙྩསྶ ཀརཎེ སཧཛཝནཀཱནི ཝཱིཐིཙིཏྟཱནི པཊིཀྑིཏྟཱནི. ཡཐཱ ཙེཏེསཾ ¶ ཨེཏཱནི ཀིཙྩཱནི ནཏྠི, ཨེཝཾ ནིཡཱམོཀྐམནཱདཱིནིཔི. ན ཧི པཉྩདྭཱརིཀཛཝནེན མིཙྪཏྟནིཡཱམཾ ཨོཀྐམཏི, ན སམྨཏྟནིཡཱམཾ; ན ཙེཏཾ ཛཝནཾ ནཱམགོཏྟམཱརབྦྷ ཛཝཏི, ན ཀསིཎཱདིཔཎྞཏྟིཾ; ན ལཀྑཎཱརམྨཎིཀཝིཔསྶནཱཝསེན པཝཏྟཏི, ན ཝུཊྛཱནགཱམིནཱིབལཝཝིཔསྶནཱཝསེན; ན རཱུཔཱརཱུཔདྷམྨེ ཨཱརབྦྷ ཛཝཏི, ན ནིབྦཱནཾ; ན ཙེཏེན སདྡྷིཾ པཊིསམྦྷིདཱཉཱཎཾ ཨུཔྤཛྫཏི, ན ཨབྷིཉྙཱཉཱཎཾ, ན སཱཝཀཔཱརམཱིཉཱཎཾ, ན པཙྩེཀབོདྷིཉཱཎཾ, ན སབྦཉྙུཏཉཱཎཾ. སབྦོཔི པནེས པབྷེདོ མནོདྭཱརིཀཛཝནེཡེཝ ལབྦྷཏི.

ན སུཔཏི ན པཊིབུཛ྄ཛྷཏི ན སུཔིནཾ པསྶཏཱིཏི སབྦེནཱཔི ཙ པཉྩདྭཱརིཀཙིཏྟེན ནེཝ ནིདྡཾ ཨོཀྐམཏི, ན ནིདྡཱཡཏི, ན པཊིབུཛ྄ཛྷཏི, ན ཀིཉྩ སུཔིནཾ པསྶཏཱིཏི ཨིམེསུ ཏཱིསུ ཋཱནེསུ སཧ ཛཝནེན ཝཱིཐིཙིཏྟཾ པཊིཀྑིཏྟཾ.

ནིདྡཱཡནྟསྶ ཧི མཧཱཝཊྚིཾ ཛཱལེཏྭཱ དཱིཔེ ཙཀྑུསམཱིཔེ ཨུཔནཱིཏེ པཋམཾ ཙཀྑུདྭཱརིཀཾ ཨཱཝཛྫནཾ ¶ བྷཝངྒཾ ན ཨཱཝཊྚེཏི, མནོདྭཱརིཀམེཝ ཨཱཝཊྚེཏི. ཨཐ ¶ ཛཝནཾ ཛཝིཏྭཱ བྷཝངྒཾ ཨོཏརཏི. དུཏིཡཝཱརེ ཙཀྑུདྭཱརིཀཾ ཨཱཝཛྫནཾ བྷཝངྒཾ ཨཱཝཊྚེཏི. ཏཏོ ཙཀྑུཝིཉྙཱཎཱདཱིནི ཛཝནཔརིཡོསཱནཱནི པཝཏྟནྟི. ཏདནནྟརཾ བྷཝངྒཾ པཝཏྟཏི. ཏཏིཡཝཱརེ མནོདྭཱརིཀཨཱཝཛྫནེན བྷཝངྒེ ཨཱཝཊྚིཏེ མནོདྭཱརིཀཛཝནཾ ཛཝཏི. ཏེན ཙིཏྟེན ཉཏྭཱ ‘ཀིཾ ཨཡཾ ཨིམསྨིཾ ཋཱནེ ཨཱལོཀོ’ཏི ཛཱནཱཏི.

ཏཐཱ ནིདྡཱཡནྟསྶ ཀཎྞསམཱིཔེ ཏཱུརིཡེསུ པགྒཧིཏེསུ, གྷཱནསམཱིཔེ སུགནྡྷེསུ ཝཱ དུགྒནྡྷེསུ ཝཱ པུཔྥེསུ ཨུཔནཱིཏེསུ, མུཁེ སཔྤིམྷི ཝཱ ཕཱཎིཏེ ཝཱ པཀྑིཏྟེ, པིཊྛིཡཾ པཱཎིནཱ པཧཱརེ དིནྣེ པཋམཾ སོཏདྭཱརིཀཱདཱིནི ཨཱཝཛྫནཱནི བྷཝངྒཾ ན ཨཱཝཊྚེནྟི, མནོདྭཱརིཀམེཝ ཨཱཝཊྚེཏི. ཨཐ ཛཝནཾ ཛཝིཏྭཱ བྷཝངྒཾ ཨོཏརཏི. དུཏིཡཝཱརེ སོཏདྭཱརིཀཱདཱིནི ཨཱཝཛྫནཱནི བྷཝངྒཾ ཨཱཝཊྚེནྟི. ཏཏོ སོཏགྷཱནཛིཝ྄ཧཱཀཱཡཝིཉྙཱཎཱདཱིནི ཛཝནཔརིཡོསཱནཱནི པཝཏྟནྟི. ཏདནནྟརཾ བྷཝངྒཾ པཝཏྟཏི. ཏཏིཡཝཱརེ མནོདྭཱརིཀཨཱཝཛྫནེན བྷཝངྒེ ཨཱཝཊྚིཏེ མནོདྭཱརིཀཛཝནཾ ཛཝཏི. ཏེན ཙིཏྟེན ཉཏྭཱ ‘ཀིཾ ཨཡཾ ཨིམསྨིཾ ཋཱནེ སདྡོ – སངྑསདྡོ, བྷེརིསདྡོ’ཏི ཝཱ ‘ཀིཾ ཨཡཾ ཨིམསྨིཾ ཋཱནེ གནྡྷོ – མཱུལགནྡྷོ, སཱརགནྡྷོ’ཏི ཝཱ ‘ཀིཾ ¶ ཨིདཾ མཡ྄ཧཾ མུཁེ པཀྑིཏྟརསཾ – སཔྤཱིཏི ཝཱ ཕཱཎིཏ’ནྟི ཝཱ ‘ཀེནམྷི པིཊྛིཡཾ པཧཏོ, ཨཏིཐདྡྷོ མེ པཧཱརོ’ཏི ཝཱ ཝཏྟཱརོ ཧོནྟི. ཨེཝཾ མནོདྭཱརིཀཛཝནེནེཝ པཊིབུཛ྄ཛྷཏི, ན པཉྩདྭཱརིཀེན. སུཔིནམྤི ཏེནེཝ པསྶཏི, ན པཉྩདྭཱརིཀེན.

ཏཉྩ པནེཏཾ སུཔིནཾ པསྶནྟོ ཙཏཱུཧི ཀཱརཎེཧི པསྶཏི – དྷཱཏུཀྑོབྷཏོ ཝཱ ཨནུབྷཱུཏཔུབྦཏོ ཝཱ དེཝཏོཔསཾཧཱརཏོ ཝཱ པུབྦནིམིཏྟཏོ ཝཱཏི. ཏཏྠ པིཏྟཱདཱིནཾ ཁོབྷཀརཎཔཙྩཡཡོགེན ཁུབྷིཏདྷཱཏུཀོ ‘དྷཱཏུཀྑོབྷཏོ’ སུཔིནཾ པསྶཏི. པསྶནྟོ ཙ ནཱནཱཝིདྷཾ སུཔིནཾ པསྶཏི – པབྦཏཱ པཏནྟོ ཝིཡ, ཨཱཀཱསེན གཙྪནྟོ ཝིཡ, ཝཱལ༹མིགཧཏྠིཙོརཱདཱིཧི ཨནུབདྡྷོ ཝིཡ ཙ ཧོཏི. ‘ཨནུབྷཱུཏཔུབྦཏོ’ པསྶནྟོ པུབྦེ ཨནུབྷཱུཏཔུབྦཾ ཨཱརམྨཎཾ པསྶཏི. ‘དེཝཏོཔསཾཧཱརཏོ’ པསྶནྟསྶ དེཝཏཱ ཨཏྠཀཱམཏཱཡ ཝཱ ཨནཏྠཀཱམཏཱཡ ཝཱ ཨཏྠཱཡ ཝཱ ཨནཏྠཱཡ ཝཱ ནཱནཱཝིདྷཱནི ཨཱརམྨཎཱནི ཨུཔསཾཧརནྟི. སོ ཏཱསཾ དེཝཏཱནཾ ཨཱནུབྷཱཝེན ཏཱནི ཨཱརམྨཎཱནི པསྶཏི. པུབྦནིམིཏྟཏོ པསྶནྟོ པུཉྙཱཔུཉྙཝསེན ཨུཔྤཛྫིཏུཀཱམསྶ ཨཏྠསྶ ཝཱ ཨནཏྠསྶ ཝཱ པུབྦནིམིཏྟབྷཱུཏཾ སུཔིནཾ པསྶཏི ¶ བོདྷིསཏྟམཱཏཱ ཝིཡ པུཏྟཔཊིལཱབྷནིམིཏྟཾ, བོདྷིསཏྟོ ¶ ཝིཡ པཉྩ མཧཱསུཔིནེ (ཨ. ནི. ༥.༡༩༦), ཀོསལརཱཛཱ ཝིཡ ཙ སོལ༹ས སུཔིནེཏི (ཛཱ. ༡.༡.༤༡).

ཏཏྠ ཡཾ དྷཱཏུཀྑོབྷཏོ ཨནུབྷཱུཏཔུབྦཏོ ཙ སུཔིནཾ པསྶཏི, ན ཏཾ སཙྩཾ ཧོཏི. ཡཾ དེཝཏོཔསཾཧཱརཏོ པསྶཏི, ཏཾ སཙྩཾ ཝཱ ཧོཏི ཨལིཀཾ ཝཱ. ཀུདྡྷཱ ཧི དེཝཏཱ ཨུཔཱཡེན ཝིནཱསེཏུཀཱམཱ ཝིཔརཱིཏམྤི ཀཏྭཱ དསྶེནྟི. ཏཏྲིདཾ ཝཏྠུ – རོཧཎེ ཀིར ནཱགམཧཱཝིཧཱརེ མཧཱཐེརོ བྷིཀྑུསངྒྷཾ ཨནཔལོཀེཏྭཱཝ ཨེཀཾ ནཱགརུཀྑཾ ཚིནྡཱཔེསི. རུཀྑེ ཨདྷིཝཏྠཱ དེཝཏཱ ཐེརསྶ ཀུདྡྷཱ པཋམམེཝ ནཾ པལོབྷེཏྭཱ པཙྪཱ ‘ཨིཏོ ཏེ སཏྟདིཝསམཏྠཀེ ཨུཔཊྛཱཀོ རཱཛཱ མརིསྶཏཱི’ཏི སུཔིནེ ཨཱརོཙེསི. ཐེརོ ནཾ ཀཐཾ ཨཱཧརིཏྭཱ རཱཛོརོདྷཱནཾ ཨཱཙིཀྑི. ཏཱ ཨེཀཔྤཧཱརེནེཝ མཧཱཝིརཝཾ ཝིརཝིཾསུ. རཱཛཱ ‘ཀིཾ ཨེཏ’ནྟི པུཙྪི. ཏཱ ‘ཨེཝཾ ཐེརེན ཝུཏྟ’ནྟི ཨཱརོཙཡིཾསུ. རཱཛཱ དིཝསེ གཎཱཔེཏྭཱ སཏྟཱཧེ ཝཱིཏིཝཏྟེ ཀུཛ྄ཛྷིཏྭཱ ཐེརསྶ ཧཏྠཔཱདེ ཚིནྡཱཔེསི.

ཡཾ པན པུབྦནིམིཏྟཏོ པསྶཏི ཏཾ ཨེཀནྟསཙྩམེཝ ཧོཏི. ཨེཏེསཉྩ ཙཏུནྣཾ ¶ མཱུལཀཱརཎཱནཾ སཾསགྒབྷེདཏོཔི སུཔིནབྷེདོ ཧོཏིཡེཝ. ཏཉྩ པནེཏཾ ཙཏུབྦིདྷཾ སུཔིནཾ སེཀྑཔུཐུཛྫནཱཝ པསྶནྟི ཨཔྤཧཱིནཝིཔལླཱསཏྟཱ; ཨསེཀྑཱ ན པསྶནྟི པཧཱིནཝིཔལླཱསཏྟཱ.

ཀིཾ པན ཏཾ པསྶནྟོ སུཏྟོ པསྶཏི, པཊིབུདྡྷོ? ཨུདཱཧུ ནེཝ སུཏྟོ པསྶཏི ན པཊིབུདྡྷོཏི? ཀིཉྩེཏྠ ཡདི ཏཱཝ སུཏྟོ པསྶཏི, ཨབྷིདྷམྨཝིརོདྷོ ཨཱཔཛྫཏི. བྷཝངྒཙིཏྟེན ཧི སུཔཏི. ཏཉྩ རཱུཔནིམིཏྟཱདིཨཱརམྨཎཾ རཱགཱདིསམྤཡུཏྟཾ ཝཱ ན ཧོཏི. སུཔིནཾ པསྶནྟསྶ ཙ ཨཱིདིསཱནི ཙིཏྟཱནི ཨུཔྤཛྫནྟི. ཨཐ པཊིབུདྡྷོ པསྶཏི, ཝིནཡཝིརོདྷོ ཨཱཔཛྫཏི. ཡཉྷི པཊིབུདྡྷོ པསྶཏི, ཏཾ སབྦོཧཱརིཀཙིཏྟེན པསྶཏི. སབྦོཧཱརིཀཙིཏྟེན ཙ ཀཏེ ཝཱིཏིཀྐམེ ཨནཱཔཏྟི ནཱམ ནཏྠི. སུཔིནཾ པསྶནྟེན པན ཀཏེ ཝཱིཏིཀྐམེ ཨེཀནྟཾ ཨནཱཔཏྟི ཨེཝ. ཨཐ ནེཝ སུཏྟོ ན པཊིབུདྡྷོ པསྶཏི, ན སུཔིནཾ ནཱམ པསྶཏི. ཨེཝཉྷི སཏི སུཔིནསྶ ཨབྷཱཝོཝ ཨཱཔཛྫཏི? ན ཨབྷཱཝོ ¶ . ཀསྨཱ? ཡསྨཱ ཀཔིམིདྡྷཔརེཏོ པསྶཏི. ཝུཏྟཾ ཧེཏཾ – ‘‘ཀཔིམིདྡྷཔརེཏོ ཁོ, མཧཱརཱཛ, སུཔིནཾ པསྶཏཱི’’ཏི (མི. པ. ༥.༣.༥). ‘ཀཔིམིདྡྷཔརེཏོ’ཏི མཀྐཊནིདྡཱཡ ཡུཏྟོ. ཡཐཱ ཧི མཀྐཊསྶ ནིདྡཱ ལཧུཔརིཝཏྟཱ ཧོཏི, ཨེཝཾ ཡཱ ནིདྡཱ པུནཔྤུནཾ ཀུསལཱདིཙིཏྟཝོཀིཎྞཏྟཱ ལཧུཔརིཝཏྟཱ; ཡསྶཱ པཝཏྟིཡཾ པུནཔྤུནཾ བྷཝངྒཏོ ཨུཏྟརཎཾ ཧོཏི, ཏཱཡ ཡུཏྟོ སུཔིནཾ པསྶཏི. ཏེནཱཡཾ སུཔིནོ ཀུསལོཔི ཧོཏི ཨཀུསལོཔི ཨབྱཱཀཏོཔི ༣༨༦. ཏཏྠ སུཔིནནྟེ ཙེཏིཡཝནྡནདྷམྨསྶཝནདྷམྨདེསནཱདཱིནི ཀརོནྟསྶ ཀུསལོ, པཱཎཱཏིཔཱཏཱདཱིནི ཀརོནྟསྶ ཨཀུསལོ, དྭཱིཧི ཨནྟེཧི མུཏྟོ ཨཱཝཛྫནཏདཱརམྨཎཀྑཎེ ཨབྱཱཀཏོཏི ཝེདིཏབྦོ. སུཔིནེནེཝ ‘དིཊྛཾ ཝིཡ མེ, སུཏཾ ཝིཡ མེ’ཏི ཀཐནཀཱལེཔི ཨབྱཱཀཏོཡེཝ.

ཀིཾ པན སུཔིནེ ཀཏཾ ཀུསལཱཀུསལཾ ཀམྨཾ སཝིཔཱཀཾ ཨཝིཔཱཀནྟི? སཝིཔཱཀཾ; དུབྦལཏྟཱ པན པཊིསནྡྷིཾ ཨཱཀཌྜྷིཏུཾ ན སཀྐོཏི, དིནྣཱཡ ཨཉྙཀམྨེན པཊིསནྡྷིཡཱ པཝཏྟེ ཝེདནཱིཡཾ ཧོཏི.

ཨེཝཾ ཡཱཐཱཝཀཝཏྠུཝིབྷཱཝནཱ པཉྙཱཏི པཉྩནྣཾ ཝིཉྙཱཎཱནཾ ན ཧེཏྭཊྛོ ཡཱཐཱཝཊྛོ. ཏཾ ¶ ཡཱཐཱཝཊྛཾ ཝཏྠུཾ ཝིབྷཱཝེཏཱིཏི ཡཱཐཱཝཀཝཏྠུཝིབྷཱཝནཱ. ཏཐཱ པཉྩནྣཾ ཝིཉྙཱཎཱནཾ ཨཧེཏུཀཊྛོ, ཛརཱབྷིབྷཱུཏཊྛོ, ན སུཔིནཾ པསྶནཊྛོ, ཡཱཐཱཝཊྛོ. ཏཾ ཡཱཐཱཝཊྛཾ ཝཏྠུཾ ཝིབྷཱཝེཏཱིཏི ཡཱཐཱཝཀཝཏྠུཝིབྷཱཝནཱ. ཨིཏི ཡཱ ཧེཊྛཱ ‘‘ཡཱཐཱཝཀཝཏྠུཝིབྷཱཝནཱ པཉྙཱ’’ཏི མཱཏིཀཱཡ ནིཀྑིཏྟཱ, སཱ ཨེཝཾ ཡཱཐཱཝཀཝཏྠུཝིབྷཱཝནཱ པཉྙཱཏི ཝེདིཏབྦཱ. ཏསྶཱ ཨེཝ ཙ ཝསེན ཨེཝཾ ཨེཀཝིདྷེན ཉཱཎཝཏྠཱུཏི ཨེཝཾ ཨེཀེཀཀོཊྛཱསེན ཉཱཎགཎནཱ ཨེཀེན ཝཱ ཨཱཀཱརེན ཉཱཎཔརིཙྪེདོ ཧོཏི.

ཨེཀཀནིདྡེསཝཎྞནཱ.

(༢.) དུཀནིདྡེསཝཎྞནཱ

༧༦༧. དུཝིདྷེན ཉཱཎཝཏྠུནིདྡེསེ ཙཏཱུསུ བྷཱུམཱིསུ ཀུསལེཏི སེཀྑཔུཐུཛྫནཱནཾ ཙཏུབྷཱུམཀཀུསལཔཉྙཱ. པཊིསམྦྷིདཱཝིབྷངྒེ ཝུཏྟེསུ པཉྩསུ ཨཏྠེསུ ¶ ཨཏྟནོ ཨཏྟནོ བྷཱུམིཔརིཡཱཔནྣཾ ཝིཔཱཀསངྑཱཏཾ ཨཏྠཾ ཛཱཔེཏི ཛནེཏི པཝཏྟེཏཱིཏི ཨཏྠཛཱཔིཀཱ. ཨརཧཏོ ཨབྷིཉྙཾ ཨུཔྤཱདེནྟསྶ སམཱཔཏྟིཾ ཨུཔྤཱདེནྟསྶ ཀིརིཡཱབྱཱཀཏེཏི ཨབྷིཉྙཱཡ ཙེཝ སམཱཔཏྟིཡཱ ཙ པརིཀམྨསམཡེ ཀཱམཱཝཙརཀིརིཡཔཉྙཱ. སཱ ཧི ཨབྷིཉྙཱསམཱཔཏྟིཔབྷེདཾ ཀིརིཡསངྑཱཏཾ ཨཏྠཾ ཛཱཔེཏི ཛནེཏི པཝཏྟེཏཱིཏི ཨཏྠཛཱཔིཀཱ པཉྙཱཏི ཝུཏྟཱ. ཨཡཾ པན ཨཔརོཔི པཱལི༹མུཏྟཀོ ¶ ཨཊྛཀཐཱནཡོ – ཡཱཔི ཧི པུརིམཱ ཀཱམཱཝཙརཀིརིཡཱ པཙྪིམཱཡ ཀཱམཱཝཙརཀིརིཡཱཡ ཨནནྟརཱདིཝསེན པཙྩཡོ ཧོཏི, སཱཔི ཏཾ ཀིརིཡཏྠཾ ཛཱཔེཏཱིཏི ཨཏྠཛཱཔིཀཱ པཉྙཱ ནཱམ. རཱུཔཱཝཙརཱརཱུཔཱཝཙརེསུཔི ཨེསེཝ ནཡོ.

དུཏིཡཔདནིདྡེསེ ཙཏཱུསུ བྷཱུམཱིསུ ཝིཔཱཀེཏི ཀཱམཱཝཙརཝིཔཱཀེ པཉྙཱ སཧཛཱཏཱདིཔཙྩཡཝསེན ཀཱམཱཝཙརཝིཔཱཀཏྠཾ ཛཱཔེཏྭཱ ཋིཏཱཏི ཛཱཔིཏཏྠཱ. རཱུཔཱཝཙརཱདིཝིཔཱཀཔཉྙཱསུཔི ཨེསེཝ ནཡོ. སབྦཱཔི ཝཱ ཨེསཱ ཨཏྟནོ ཨཏྟནོ ཀཱརཎེཧི ཛཱཔིཏཱ ཛནིཏཱ པཝཏྟིཏཱ སཡམྤི ཨཏྠབྷཱུཏཱཏིཔི ཛཱཔིཏཏྠཱ. ཨརཧཏོ ཨུཔྤནྣཱཡ ཨབྷིཉྙཱཡ ཨུཔྤནྣཱཡ སམཱཔཏྟིཡཱཏི ཝུཏྟཀིརིཡཔཉྙཱཡཔི ཨེསེཝ ནཡོ. ཨཡཾ པན ཨཔརོཔི པཱལི༹མུཏྟཀོ ཨཊྛཀཐཱནཡོ – ཀཱམཱཝཙརཀིརིཡཔཉྙཱཔི ཧི སཧཛཱཏཱདིཝསེན ཀཱམཱཝཙརཀིརིཡསངྑཱཏཾ ཨཏྠཾ ཛཱཔེཏྭཱ ཋིཏཱཏི ཛཱཔིཏཏྠཱ. རཱུཔཱཝཙརཱརཱུཔཱཝཙརཀིརིཡཔཉྙཱསུཔི ¶ ཨེསེཝ ནཡོ. སབྦཱཔི ཝཱ ཨེསཱ ཨཏྟནོ ཨཏྟནོ ཀཱརཎེཧི ཛཱཔིཏཱ ཛནིཏཱ པཝཏྟིཏཱ སཡཉྩ ཨཏྠབྷཱུཏཱཏིཔི ཛཱཔིཏཏྠཱ. སེསམེཏྠ སབྦཾ དྷམྨསངྒཧཊྛཀཐཱཡཾ ཝུཏྟནཡཏྟཱ པཱཀཊམེཝཱཏི.

དུཀནིདྡེསཝཎྞནཱ.

(༣.) ཏིཀནིདྡེསཝཎྞནཱ

༧༦༨. ཏིཝིདྷེན ཉཱཎཝཏྠུནིདྡེསེ ཡོགཝིཧིཏེསཱུཏི ཡོགོ ཝུཙྩཏི པཉྙཱ; པཉྙཱཝིཧིཏེསུ པཉྙཱཔརིཎཱམིཏེསཱུཏི ཨཏྠོ. ཀམྨཱཡཏནེསཱུཏི ཨེཏྠ ཀམྨམེཝ ཀམྨཱཡཏནཾ; ཨཐ ཝཱ ཀམྨཉྩ ཏཾ ཨཱཡཏནཉྩ ཨཱཛཱིཝཱདཱིནནྟིཔི ¶ ཀམྨཱཡཏནཾ. སིཔྤཱཡཏནེསུཔི ཨེསེཝ ནཡོ. ཏཏྠ དུཝིདྷཾ ཀམྨཾ – ཧཱིནཉྩ ཨུཀྐཊྛཉྩ. ཏཏྠ ཧཱིནཾ ནཱམ ཝཌྜྷཀཱིཀམྨཾ, པུཔྥཚཌྜཀཀམྨནྟི ཨེཝམཱདི. ཨུཀྐཊྛཾ ནཱམ ཀསི, ཝཎིཛྫཱ, གོརཀྑནྟི ཨེཝམཱདི. སིཔྤམྤི དུཝིདྷཾ ཧཱིནཉྩ ཨུཀྐཊྛཉྩ. ཏཏྠ ཧཱིནཾ སིཔྤཾ ནཱམ ནལ༹ཀཱརསིཔྤཾ, པེསཀཱརསིཔྤཾ, ཀུམྦྷཀཱརསིཔྤཾ, ཙམྨཀཱརསིཔྤཾ, ནྷཱཔིཏསིཔྤནྟི ཨེཝམཱདི. ཨུཀྐཊྛཾ ནཱམ སིཔྤཾ མུདྡཱ, གཎནཱ, ལེཁཉྩཱཏི ཨེཝམཱདི ཝིཛྫཱཝ ཝིཛྫཱཊྛཱནཾ. ཏཾ དྷམྨིཀམེཝ གཧིཏཾ. ནཱགམཎྜལཔརིཏྟསདིསཾ, ཕུདྷམནཀམནྟསདིསཾ, སཱལཱཀིཡཾ ¶ , སལླཀཏྟིཡནྟིཨཱདཱིནི པན ཝེཛྫསཏྠཱནི ‘‘ཨིཙྪཱམཧཾ, ཨཱཙརིཡ, སིཔྤཾ སིཀྑིཏུ’’ནྟི (མཧཱཝ. ༣༢༩) སིཔྤཱཡཏནེ པཝིཊྛཏྟཱ ན གཧིཏཱནི.

ཏཏྠ ཨེཀོ པཎྜིཏོ མནུསྶཱནཾ ཕཱསུཝིཧཱརཏྠཱཡ ཨཏྟནོ ཙ དྷམྨཏཱཡ གེཧཔཱསཱདཡཱནནཱཝཱདཱིནི ཨུཔྤཱདེཏི. སོ ཧི ‘ཨིམེ མནུསྶཱ ཝསནཊྛཱནེན ཝིནཱ དུཀྑིཏཱ’ཏི ཧིཏཀིརིཡཱཡ ཋཏྭཱ དཱིགྷཙཏུརསྶཱདིབྷེདཾ གེཧཾ ཨུཔྤཱདེཏི, སཱིཏུཎྷཔཊིགྷཱཏཏྠཱཡ ཨེཀབྷཱུམིཀདྭིབྷཱུམིཀཱདིབྷེདེ པཱསཱདེ ཀརོཏི, ‘ཡཱནེ ཨསཏི ཨནུསཉྩརཎཾ ནཱམ དུཀྑ’ནྟི ཛངྒྷཱཀིལམཐཔཊིཝིནོདནཏྠཱཡ ཝཡ྄ཧསཀཊསནྡམཱནིཀཱདཱིནི ཨུཔྤཱདེཏི, ‘ནཱཝཱཡ ཨསཏི སམུདྡཱདཱིསུ སཉྩཱརོ ནཱམ ནཏྠཱི’ཏི ནཱནཔྤཀཱརཾ ནཱཝཾ ཨུཔྤཱདེཏི. སོ སབྦམྤེཏཾ ནེཝ ཨཉྙེཧི ཀཡིརམཱནཾ པསྶཏི, ན ཀཏཾ ཨུགྒཎྷཱཏི, ན ¶ ཀཐེནྟཱནཾ སུཎཱཏི, ཨཏྟནོ པན དྷམྨཏཱཡ ཙིནྟཱཡ ཀརོཏི. པཉྙཝཏཱ ཧི ཨཏྟནོ དྷམྨཏཱཡ ཀཏམྤི ཨཉྙེཧི ཨུགྒཎྷིཏྭཱ ཀརོནྟེཧི ཀཏསདིསམེཝ ཧོཏི. ཨཡཾ ཏཱཝ ཧཱིནཀམྨེ ནཡོ.

ཨུཀྐཊྛཀམྨེཔི ‘ཀསིཀམྨེ ཨསཏི མནུསྶཱནཾ ཛཱིཝིཏཾ ན པཝཏྟཏཱི’ཏི ཨེཀོ པཎྜིཏོ མནུསྶཱནཾ ཕཱསུཝིཧཱརཏྠཱཡ ཡུགནངྒལཱདཱིནི ཀསིབྷཎྜཱནི ཨུཔྤཱདེཏི; ཏཐཱ ནཱནཔྤཀཱརཾ ཝཱཎིཛཀམྨཾ གོརཀྑཉྩ ཨུཔྤཱདེཏི. སོ སབྦམྤེཏཾ ནེཝ ཨཉྙེཧི ཀརིཡམཱནཾ པསྶཏི…པེ… ཀཏསདིསམེཝ ཧོཏི. ཨཡཾ ཨུཀྐཊྛཀམྨེ ནཡོ.

དུཝིདྷེཔི པན སིཔྤཱཡཏནེ ཨེཀོ པཎྜིཏོ མནུསྶཱནཾ ཕཱསུཝིཧཱརཏྠཱཡ ནལ༹ཀཱརསིཔྤཱདཱིནི ཧཱིནསིཔྤཱནི, ཧཏྠམུདྡཱཡ གཎནསངྑཱཏཾ མུདྡཾ, ཨཙྪིནྣཀསངྑཱཏཾ གཎནཾ, མཱཏིཀཱཔྤབྷེདཀཱདིབྷེདཉྩ ལེཁཾ ཨུཔྤཱདེཏི. སོ སབྦམྤེཏཾ ནེཝ ཨཉྙེཧི ཀརིཡམཱནཾ པསྶཏི…པེ… ཀཏསདིསམེཝ ཧོཏི. ཨཡཾ སིཔྤཱཡཏནེ ནཡོ.

ཨེཀཙྩོ ¶ པན པཎྜིཏོ ཨམནུསྶསརཱིསཔཱདཱིཧི ཨུཔདྡུཏཱནཾ མནུསྶཱནཾ ཏིཀིཙྪནཏྠཱཡ དྷམྨིཀཱནི ནཱགམཎྜལམནྟཱདཱིནི ཝིཛྫཱཊྛཱནཱནི ཨུཔྤཱདེཏི, ཏཱནི ནེཝ ཨཉྙེཧི ཀརིཡམཱནཱནི པསྶཏི, ན ཀཏཱནི ཨུགྒཎྷཱཏི, ན ཀཐེནྟཱནཾ སུཎཱཏི, ཨཏྟནོ པན དྷམྨཏཱཡ ཙིནྟཱཡ ཀརོཏི. པཉྙཝཏཱ ཧི ཨཏྟནོ དྷམྨཏཱཡ ཀཏམྤི ཨཉྙེཧི ཨུགྒཎྷིཏྭཱ ཀརོནྟེཧི ཀཏསདིསམེཝ ཧོཏི.

ཀམྨསྶཀཏཾ ¶ ཝཱཏི ‘‘ཨིདཾ ཀམྨཾ སཏྟཱནཾ སཀཾ, ཨིདཾ ནོ སཀ’’ནྟི ཨེཝཾ ཛཱནནཉཱཎཾ. སཙྩཱནུལོམིཀཾ ཝཱཏི ཝིཔསྶནཱཉཱཎཾ. ཏཉྷི ཙཏུནྣཾ སཙྩཱནཾ ཨནུལོམནཏོ སཙྩཱནུལོམིཀནྟི ཝུཙྩཏི. ཨིདཱནིསྶ པཝཏྟནཱཀཱརཾ དསྶེཏུཾ རཱུཔཾ ཨནིཙྩནྟི ཝཱཏིཨཱདི ཝུཏྟཾ. ཨེཏྠ ཙ ཨནིཙྩལཀྑཎམེཝ ཨཱགཏཾ, ན དུཀྑལཀྑཎཨནཏྟལཀྑཎཱནི, ཨཏྠཝསེན པན ཨཱགཏཱནེཝཱཏི དཊྛབྦཱནི – ཡཉྷི ཨནིཙྩཾ ཏཾ དུཀྑཾ, ཡཾ དུཀྑཾ ཏདནཏྟཱཏི.

ཡཾ ཨེཝརཱུཔིནྟི ཡཾ ཨེཝཾ ཧེཊྛཱ ནིདྡིཊྛསབྷཱཝཾ ཨནུལོམིཀཾ. ཁནྟིནྟིཨཱདཱིནི སབྦཱནི པཉྙཱཝེཝཙནཱནེཝ. སཱ ཧི ཧེཊྛཱ ཝུཏྟཱནཾ ཀམྨཱཡཏནཱདཱིནཾ པཉྩནྣཾ ཀཱརཎཱནཾ ཨཔཙྩནཱིཀདསྶནེན ཨནུལོམེཏཱིཏི ཨནུལོམིཀཱ. ཏཐཱ ¶ སཏྟཱནཾ ཧིཏཙརིཡཱཡ ཨནུལོམེཏི, མགྒསཙྩསྶ ཨནུལོམེཏི, པརམཏྠསཙྩསྶ ནིབྦཱནསྶ ཨནུལོམནཏོ ཨནུལོམེཏཱིཏིཔི ཨནུལོམིཀཱ. སབྦཱནིཔི ཨེཏཱནི ཀཱརཎཱནི ཁམཏི སཧཏི དཊྛུཾ སཀྐོཏཱིཏི ཁནྟི, པསྶཏཱིཏི དིཊྛི, རོཙེཏཱིཏི རུཙི, མུདཏཱིཏི མུདི, པེཀྑཏཱིཏི པེཀྑཱ. སབྦེཔིསྶཱ ཏེ ཀམྨཱཡཏནཱདཡོ དྷམྨཱ ནིཛ྄ཛྷཱནཾ ཁམནྟི, ཝིསེསཏོ ཙ པཉྩཀྑནྡྷསངྑཱཏཱ དྷམྨཱ པུནཔྤུནཾ ཨནིཙྩདུཀྑཱནཏྟཝསེན ནིཛ྄ཛྷཱཡམཱནཱ ཏཾ ནིཛ྄ཛྷཱནཾ ཁམནྟཱིཏི དྷམྨནིཛ྄ཛྷཱནཁནྟཱི.

པརཏོ ཨསྶུཏྭཱ པཊིལབྷཏཱིཏི ཨཉྙསྶ ཨུཔདེསཝཙནཾ ཨསྶུཏྭཱ སཡམེཝ ཙིནྟེནྟོ པཊིལབྷཏི. ཨཡཾ ཝུཙྩཏཱིཏི ཨཡཾ ཙིནྟཱམཡཱ པཉྙཱ ནཱམ ཝུཙྩཏི. སཱ པནེསཱ ན ཡེསཾ ཀེསཉྩི ཨུཔྤཛྫཏི, ཨབྷིཉྙཱཏཱནཾ པན མཧཱསཏྟཱནམེཝ ཨུཔྤཛྫཏི. ཏཏྠཱཔི སཙྩཱནུལོམིཀཉཱཎཾ དྭིནྣཾཡེཝ བོདྷིསཏྟཱནཾ ཨུཔྤཛྫཏི. སེསཔཉྙཱ སབྦེསམྤི པཱུརིཏཔཱརམཱིནཾ མཧཱཔཉྙཱནཾ ཨུཔྤཛྫཏཱིཏི ཝེདིཏབྦཱ.

པརཏོ ¶ སུཏྭཱ པཊིལབྷཏཱིཏི ཨེཏྠ ཀམྨཱཡཏནཱདཱིནི པརེན ཀརིཡམཱནཱནི ཝཱ ཀཏཱནི ཝཱ དིསྭཱཔི ཡསྶ ཀསྶཙི ཀཐཡམཱནསྶ ཝཙནཾ སུཏྭཱཔི ཨཱཙརིཡསྶ སནྟིཀེ ཨུགྒཧེཏྭཱཔི པཊིལདྡྷཱ སབྦཱ པརཏོ སུཏྭཱཡེཝ པཊིལདྡྷཱ ནཱམཱཏི ཝེདིཏབྦཱ.

སམཱཔནྣསྶཱཏི སམཱཔཏྟིསམངྒིསྶ; ཨནྟོསམཱཔཏྟིཡཾ པཝཏྟཱ པཉྙཱ བྷཱཝནཱམཡཱ ནཱམཱཏི ཨཏྠོ.

༧༦༩. དཱནཾ ¶ ཨཱརབྦྷཱཏི དཱནཾ པཊིཙྩ; དཱནཙེཏནཱཔཙྩཡཱཏི ཨཏྠོ. དཱནཱདྷིགཙྪཱཏི དཱནཾ ཨདྷིགཙྪནྟསྶ; པཱཔུཎནྟསྶཱཏི ཨཏྠོ. ཡཱ ཨུཔྤཛྫཏཱིཏི ཡཱ ཨེཝཾ དཱནཙེཏནཱསམྤཡུཏྟཱ པཉྙཱ ཨུཔྤཛྫཏི, ཨཡཾ དཱནམཡཱ པཉྙཱ ནཱམ. སཱ པནེསཱ ‘དཱནཾ དསྶཱམཱི’ཏི ཙིནྟེནྟསྶ, དཱནཾ དེནྟསྶ, དཱནཾ དཏྭཱ ཏཾ པཙྩཝེཀྑནྟསྶ ¶ པུབྦཙེཏནཱ, མུཉྩཙེཏནཱ, ཨཔརཙེཏནཱཏི ཏིཝིདྷེན ཨུཔྤཛྫཏི.

སཱིལཾ ཨཱརབྦྷ སཱིལཱདྷིགཙྪཱཏི ཨིདྷཱཔི སཱིལཙེཏནཱསམྤཡུཏྟཱཝ སཱིལམཡཱ པཉྙཱཏི ཨདྷིཔྤེཏཱ. ཨཡམྤི ‘སཱིལཾ པཱུརེསྶཱམཱི’ཏི ཙིནྟེནྟསྶ, སཱིལཾ པཱུརེནྟསྶ, སཱིལཾ པཱུརེཏྭཱ ཏཾ པཙྩཝེཀྑནྟསྶ པུབྦཙེཏནཱ, མུཉྩཙེཏནཱ, ཨཔརཙེཏནཱཏི ཏིཝིདྷེནེཝ ཨུཔྤཛྫཏི. བྷཱཝནཱམཡཱ ཧེཊྛཱ ཝུཏྟཱཡེཝ.

༧༧༠. ཨདྷིསཱིལཔཉྙཱདཱིསུ སཱིལཱདཱིནི དུཝིདྷེན ཝེདིཏབྦཱནི – སཱིལཾ, ཨདྷིསཱིལཾ; ཙིཏྟཾ, ཨདྷིཙིཏྟཾ; པཉྙཱ, ཨདྷིཔཉྙཱཏི. ཏཏྠ ‘‘ཨུཔྤཱདཱ ཝཱ ཏཐཱགཏཱནཾ ཨནུཔྤཱདཱ ཝཱ ཏཐཱགཏཱནཾ ཋིཏཱཝ སཱ དྷཱཏུ དྷམྨཊྛིཏཏཱ དྷམྨནིཡཱམཏཱ’’ཏི (སཾ. ནི. ༢.༢༠; ཨ. ནི. ༣.༡༣༧) ཨིམཱཡ ཏནྟིཡཱ སངྒཧིཏཝསེན པཉྩཔི སཱིལཱནི དསཔི སཱིལཱནི སཱིལཾ ནཱམ. ཏཉྷི ཏཐཱགཏེ ཨུཔྤནྣེཔི ཨནུཔྤནྣེཔི ཧོཏི. ཨནུཔྤནྣེ ཀེ པཉྙཱཔེནྟཱིཏི? ཏཱཔསཔརིབྦཱཛཀཱ, སབྦཉྙུབོདྷིསཏྟཱ, ཙཀྐཝཏྟིརཱཛཱནོ ཙ པཉྙཱཔེནྟི. ཨུཔྤནྣེ སམྨཱསམྦུདྡྷེ བྷིཀྑུསངྒྷོ, བྷིཀྑུནཱིསངྒྷོ, ཨུཔཱསཀཱ, ཨུཔཱསིཀཱཡོ ཙ པཉྙཱཔེནྟི. པཱཏིམོཀྑསཾཝརསཱིལཾ པན སབྦསཱིལེཧི ཨདྷིཀཾ ཨུཔྤནྣེཡེཝ ཏཐཱགཏེ ཨུཔྤཛྫཏི, ནོ ཨནུཔྤནྣེ. སབྦཉྙུབུདྡྷཱཡེཝ ཙ ནཾ པཉྙཱཔེནྟི. ‘‘ཨིམསྨིཾ ཝཏྠུསྨིཾ ཝཱིཏིཀྐམེ ཨིདཾ ནཱམ ཧོཏཱི’’ཏི པཉྙཱཔནཉྷི ཨཉྙེསཾ ཨཝིསཡོ, བུདྡྷཱནཾཡེཝ ཨེས ཝིསཡོ, བུདྡྷཱནཾ བལཾ. ཨིཏི ཡསྨཱ པཱཏིམོཀྑསཾཝརོ ཨདྷིསཱིལཾ, ཏསྨཱ ཏཾ ཨདྷིསཱིལཔཉྙཾ དསྶེཏུཾ པཱཏིམོཀྑསཾཝརཾ སཾཝརནྟསྶཱཏིཨཱདི ཝུཏྟཾ.

ཧེཊྛཱ ¶ ཝུཏྟཱཡ ཨེཝ པན ཏནྟིཡཱ སངྒཧིཏཝསེན ཝཊྚཔཱདིཀཱ ཨཊྛ སམཱཔཏྟིཡོ ཙིཏྟཾ ནཱམ. ཏཉྷི ཏཐཱགཏེ ཨུཔྤནྣེཔི ཧོཏི ཨནུཔྤནྣེཔི. ཨནུཔྤནྣེ ཀེ ནིབྦཏྟེནྟཱིཏི? ཏཱཔསཔརིབྦཱཛཀཱ ཙེཝ སབྦཉྙུབོདྷིསཏྟཱ ཙ ཙཀྐཝཏྟིརཱཛཱནོ ཙ. ཨུཔྤནྣེ བྷགཝཏི ཝིསེསཏྠིཀཱ བྷིཀྑུཨཱདཡོཔི ནིབྦཏྟེནྟིཡེཝ. ཝིཔསྶནཱཔཱདིཀཱ པན ཨཊྛ སམཱཔཏྟིཡོ སབྦཙིཏྟེཧི ¶ ཨདྷིཀཱ, ཨུཔྤནྣེཡེཝ ཏཐཱགཏེ ཨུཔྤཛྫནྟི, ནོ ཨནུཔྤནྣེ. སབྦཉྙུབུདྡྷཱ ཨེཝ ཙ ཨེཏཱ པཉྙཱཔེནྟི ¶ . ཨིཏི ཡསྨཱ ཨཊྛ སམཱཔཏྟིཡོ ཨདྷིཙིཏྟཾ, ཏསྨཱ ཨདྷིཙིཏྟཔཉྙཾ དསྶེཏུཾ རཱུཔཱཝཙརཱརཱུཔཱཝཙརསམཱཔཏྟིཾ སམཱཔཛྫནྟསྶཱཏིཨཱདི ཝུཏྟཾ.

ཧེཊྛཱ ཝུཏྟཱཡ ཨེཝ པན ཏནྟིཡཱ སངྒཧིཏཝསེན ཀམྨསྶཀཏཉཱཎཾ པཉྙཱ ནཱམ. ཏཉྷི ཏཐཱགཏེ ཨུཔྤནྣེཔི ཧོཏི ཨནུཔྤནྣེཔི. ཨནུཔྤནྣེ ཝེལཱམདཱནཝེསྶནྟརདཱནཱདིཝསེན ཨུཔྤཛྫཏི; ཨུཔྤནྣེ ཏེན ཉཱཎེན མཧཱདཱནཾ པཝཏྟེནྟཱནཾ པམཱཎཾ ནཏྠི. མགྒཕལཔཉྙཱ པན སབྦཔཉྙཱཧི ཨདྷིཀཱ, ཨུཔྤནྣེཡེཝ ཏཐཱགཏེ ཝིཏྠཱརིཀཱ ཧུཏྭཱ པཝཏྟཏི, ནོ ཨནུཔྤནྣེ. ཨིཏི ཡསྨཱ མགྒཕལཔཉྙཱ ཨདྷིཔཉྙཱ, ཏསྨཱ ཨཏིརེཀཔཉྙཱཡ པཉྙཾ དསྶེཏུཾ ཙཏཱུསུ མགྒེསཱུཏིཨཱདི ཝུཏྟཾ.

ཏཏྠ སིཡཱ – སཱིལཾ, ཨདྷིསཱིལཾ; ཙིཏྟཾ, ཨདྷིཙིཏྟཾ; པཉྙཱ, ཨདྷིཔཉྙཱཏི ཨིམེསུ ཚསུ ཀོཊྛཱསེསུ ཝིཔསྶནཱ པཉྙཱ ཀཏརསནྣིསྶིཏཱཏི? ཨདྷིཔཉྙཱསནྣིསྶིཏཱ. ཏསྨཱ ཡཐཱ ཨོམཀཏརཔྤམཱཎཾ ཚཏྟཾ ཝཱ དྷཛཾ ཝཱ ཨུཔཱདཱཡ ཨཏིརེཀཔྤམཱཎཾ ཨཏིཚཏྟཾ ཨཏིདྷཛོཏི ཝུཙྩཏི, ཨེཝམིདམྤི པཉྩསཱིལཾ དསསཱིལཾ ཨུཔཱདཱཡ པཱཏིམོཀྑསཾཝརསཱིལཾ ‘ཨདྷིསཱིལཾ’ ནཱམ; ཝཊྚཔཱདིཀཱ ཨཊྛ སམཱཔཏྟིཡོ ཨུཔཱདཱཡ ཝིཔསྶནཱཔཱདིཀཱ ཨཊྛ སམཱཔཏྟིཡོ ‘ཨདྷིཙིཏྟཾ’ ནཱམ, ཀམྨསྶཀཏཔཉྙཾ ཨུཔཱདཱཡ ཝིཔསྶནཱཔཉྙཱ ཙ མགྒཔཉྙཱ ཙ ཕལཔཉྙཱ ཙ ‘ཨདྷིཔཉྙཱ’ ནཱམཱཏི ཝེདིཏབྦཱ.

༧༧༡. ཨཱཡཀོསལླཱདིནིདྡེསེ ཡསྨཱ ཨཱཡོཏི ཝུཌྜྷི, སཱ ཨནཏྠཧཱནིཏོ ཨཏྠུཔྤཏྟིཏོ ཙ དུཝིདྷཱ; ཨཔཱཡོཏི ཨཝུཌྜྷི, སཱཔི ཨཏྠཧཱནིཏོ ཨནཏྠུཔྤཏྟིཏོ ཙ དུཝིདྷཱ; ཏསྨཱ ཏཾ དསྶེཏུཾ ཨིམེ དྷམྨེ མནསིཀརོཏོཏིཨཱདི ཝུཏྟཾ. ཨིདཾ ཝུཙྩཏཱིཏི ཡཱ ཨིམེསཾ ཨཀུསལདྷམྨཱནཾ ཨནུཔྤཏྟིཔྤཧཱནེསུ ཀུསལདྷམྨཱནཉྩ ཨུཔྤཏྟིཊྛིཏཱིསུ པཉྙཱ – ཨིདཾ ཨཱཡཀོསལླཾ ¶ ནཱམ ཝུཙྩཏི. ཡཱ པནེསཱ ཀུསལདྷམྨཱནཾ ཨནུཔྤཛྫནནིརུཛ྄ཛྷནེསུ ཨཀུསལདྷམྨཱནཉྩ ཨུཔྤཏྟིཊྛིཏཱིསུ པཉྙཱ – ཨིདཾ ཨཔཱཡཀོསལླཾ ནཱམཱཏི ཨཏྠོ. ཨཱཡཀོསལླཾ ཏཱཝ པཉྙཱ ཧོཏུ; ཨཔཱཡཀོསལླཾ ཀཐཾ པཉྙཱ ནཱམ ཛཱཏཱཏི? པཉྙཝཱཡེཝ ཧི ‘མཡ྄ཧཾ ཨེཝཾ མནསིཀརོཏོ ཨནུཔྤནྣཱ ཀུསལཱ དྷམྨཱ ནུཔྤཛྫནྟི ཨུཔྤནྣཱ ཙ ནིརུཛ྄ཛྷནྟི; ཨནུཔྤནྣཱ ཨཀུསལཱ དྷམྨཱ ཨུཔྤཛྫནྟི, ཨུཔྤནྣཱ པཝཌྜྷནྟཱི’ཏི ¶ པཛཱནཱཏི. སོ ཨེཝཾ ཉཏྭཱ ཨནུཔྤནྣཱནཾ ཨཀུསལཱནཾ དྷམྨཱནཾ ཨུཔྤཛྫིཏུཾ ན དེཏི, ཨུཔྤནྣེ པཛཧཏི; ཨནུཔྤནྣེ ཀུསལེ ཨུཔྤཱདེཏི, ཨུཔྤནྣེ བྷཱཝནཱཔཱརིཔཱུརིཾ ¶ པཱཔེཏི. ཨེཝཾ ཨཔཱཡཀོསལླམྤི པཉྙཱ ཨེཝཱཏི ཝེདིཏབྦཾ. སབྦཱཔི ཏཏྲཱུཔཱཡཱ པཉྙཱ ཨུཔཱཡཀོསལླནྟི ཨིདཾ པན ཨཙྩཱཡིཀཀིཙྩེ ཝཱ བྷཡེ ཝཱ ཨུཔྤནྣེ ཏསྶ ཏིཀིཙྪནཏྠཾ ཋཱནུཔྤཏྟིཡཀཱརཎཛཱནནཝསེནེཝ ཝེདིཏབྦཾ. སེསཾ སབྦཏྠ ཨུཏྟཱནཏྠམེཝཱཏི.

ཏིཀནིདྡེསཝཎྞནཱ.

(༤.) ཙཏུཀྐནིདྡེསཝཎྞནཱ

༧༩༣. ཙཏུབྦིདྷེན ཉཱཎཝཏྠུནིདྡེསེ ཨཏྠི དིནྣནྟིཨཱདཱིསུ དིནྣཔཙྩཡཱ ཕལཾ ཨཏྠཱིཏི ཨིམིནཱ ཨུཔཱཡེན ཨཏྠོ ཝེདིཏབྦོ. ཨིདཾ ཝུཙྩཏཱིཏི ཡཾ ཉཱཎཾ ‘ཨིདཾ ཀམྨཾ སཀཾ, ཨིདཾ ནོ སཀ’ནྟི ཛཱནཱཏི – ཨིདཾ ཀམྨསྶཀཏཉཱཎཾ ནཱམ ཝུཙྩཏཱིཏི ཨཏྠོ. ཏཏྠ ཏིཝིདྷཾ ཀཱཡདུཙྩརིཏཾ, ཙཏུབྦིདྷཾ ཝཙཱིདུཙྩརིཏཾ, ཏིཝིདྷཾ མནོདུཙྩརིཏནྟི ཨིདཾ ན སཀཀམྨཾ ནཱམ. ཏཱིསུ དྭཱརེསུ དསཝིདྷམྤི སུཙརིཏཾ སཀཀམྨཾ ནཱམ. ཨཏྟནོ ཝཱཔི ཧོཏུ པརསྶ ཝཱ སབྦམྤི ཨཀུསལཾ ན སཀཀམྨཾ ནཱམ. ཀསྨཱ? ཨཏྠབྷཉྫནཏོ ཨནཏྠཛནནཏོ ཙ. ཨཏྟནོ ཝཱ ཧོཏུ པརསྶ ཝཱ སབྦམྤི ཀུསལཾ སཀཀམྨཾ ནཱམ. ཀསྨཱ? ཨནཏྠབྷཉྫནཏོ ཨཏྠཛནནཏོ ཙ. ཨེཝཾ ཛཱནནསམཏྠེ ཨིམསྨིཾ ཀམྨསྶཀཏཉཱཎེ ཋཏྭཱ བཧུཾ དཱནཾ དཏྭཱ སཱིལཾ པཱུརེཏྭཱ ཨུཔོསཐཾ སམཱདིཡིཏྭཱ སུཁེན སུཁཾ སམྤཏྟིཡཱ སམྤཏྟིཾ ཨནུབྷཝིཏྭཱ ནིབྦཱནཾ པཏྟཱནཾ གཎནཔརིཙྪེདོ ནཏྠི. ཡཐཱ ཧི སདྷནོ པུརིསོ པཉྩསུ སཀཊསཏེསུ སཔྤིམདྷུཕཱཎིཏཱདཱིནི ཙེཝ ལོཎཏིལཏཎྜུལཱདཱིནི ཙ ཨཱརོཔེཏྭཱ ཀནྟཱརམགྒཾ པཊིཔནྣོ ཀེནཙིདེཝ ཀརཎཱིཡེན ཨཏྠེ ཨུཔྤནྣེ སབྦེསཾ ཨུཔཀརཎཱནཾ གཧིཏཏྟཱ ན ཙིནྟེཏི, ན པརིཏསྶཏི, སུཁེནེཝ ཁེམནྟཾ ¶ པཱཔུཎཱཏི; ཨེཝམེཝ ཨིམསྨིམྤི ཀམྨསྶཀཏཉཱཎེ ཋཏྭཱ བཧུཾ དཱནཾ དཏྭཱ…པེ… ནིབྦཱནཾ པཏྟཱནཾ གཎནཔཐོ ནཏྠི. ཋཔེཏྭཱ སཙྩཱནུལོམིཀཾ ཉཱཎནྟི མགྒསཙྩསྶ པརམཏྠསཙྩསྶ ཙ ཨནུལོམནཏོ སཙྩཱནུལོམིཀནྟི ལདྡྷནཱམཾ ཝིཔསྶནཱཉཱཎཾ ཋཔེཏྭཱ ཨཝསེསཱ སབྦཱཔི སཱསཝཱ ཀུསལཱ པཉྙཱ ཀམྨསྶཀཏཉཱཎམེཝཱཏི ཨཏྠོ.

༧༩༤. མགྒསམངྒིསྶ ¶ ཉཱཎཾ དུཀྑེཔེཏཾ ཉཱཎནྟི ཨེཏྠ ཨེཀམེཝ ¶ མགྒཉཱཎཾ ཙཏཱུསུ སཙྩེསུ ཨེཀཔཊིཝེདྷཝསེན ཙཏཱུསུ ཋཱནེསུ སངྒཧིཏཾ.

༧༩༦. དྷམྨེ ཉཱཎནྟི ཨེཏྠ མགྒཔཉྙཱ ཏཱཝ ཙཏུནྣཾ སཙྩཱནཾ ཨེཀཔཊིཝེདྷཝསེན དྷམྨེ ཉཱཎཾ ནཱམ ཧོཏུ; ཕལཔཉྙཱ ཀཐཾ དྷམྨེ ཉཱཎཾ ནཱམཱཏི? ནིརོདྷསཙྩཝསེན. དུཝིདྷཱཔི ཧེསཱ པཉྙཱ ཨཔརཔྤཙྩཡེ ཨཏྠཔཙྩཀྑེ ཨརིཡསཙྩདྷམྨེ ཀིཙྩཏོ ཙ ཨཱརམྨཎཏོ ཙ པཝཏྟཏྟཱ དྷམྨེ ཉཱཎནྟི ཝེདིཏབྦཱ. སོ ཨིམིནཱ དྷམྨེནཱཏི ཨེཏྠ མགྒཉཱཎཾ དྷམྨགོཙརཏྟཱ གོཙརཝོཧཱརེན དྷམྨོཏི ཝུཏྟཾ, ཨུཔཡོགཏྠེ ཝཱ ཀརཎཝཙནཾ; ཨིམཾ དྷམྨཾ ཉཱཏེནཱཏི ཨཏྠོ; ཙཏུསཙྩདྷམྨཾ ཛཱནིཏྭཱ ཋིཏེན མགྒཉཱཎེནཱཏི ཝུཏྟཾ ཧོཏི. དིཊྛེནཱཏི དསྶནེན; དྷམྨཾ པསྶིཏྭཱ ཋིཏེནཱཏི ཨཏྠོ. པཏྟེནཱཏི ཙཏྟཱརི ཨརིཡསཙྩཱནི པཏྭཱ ཋིཏཏྟཱ དྷམྨཾ པཏྟེན. ཝིདིཏེནཱཏི མགྒཉཱཎེན ཙཏྟཱརི ཨརིཡསཙྩཱནི ཝིདིཏཱནི པཱཀཊཱནི ཀཏཱནི. ཏསྨཱ ཏཾ དྷམྨཾ ཝིདིཏཾ ནཱམ ཧོཏི. ཏེན ཝིདིཏདྷམྨེན. པརིཡོགཱལ༹ྷེནཱཏི ཙཏུསཙྩདྷམྨཾ པརིཡོགཱཧེཏྭཱ ཋིཏེན. ནཡཾ ནེཏཱིཏི ཨཏཱིཏེ ཙ ཨནཱགཏེ ཙ ནཡཾ ནེཏི ཧརཏི པེསེཏི. ཨིདཾ པན ན མགྒཉཱཎསྶ ཀིཙྩཾ, པཙྩཝེཀྑཎཉཱཎསྶ ཀིཙྩཾ. སཏྠཱརཱ པན མགྒཉཱཎཾ ཨཏཱིཏཱནཱགཏེ ནཡཾ ནཡནསདིསཾ ཀཏཾ. ཀསྨཱ? མགྒམཱུལཀཏྟཱ. བྷཱཝིཏམགྒསྶ ཧི པཙྩཝེཀྑཎཱ ནཱམ ཧོཏི. ཏསྨཱ སཏྠཱ མགྒཉཱཎམེཝ ནཡཾ ནཡནསདིསཾ ཨཀཱསི. ཨཔིཙ ཨེཝམེཏྠ ཨཏྠོ དཊྛབྦོ – ཡདེཏཾ ཨིམིནཱ ཙཏུསཙྩགོཙརཾ མགྒཉཱཎཾ ཨདྷིགཏཾ, ཏེན ཉཱཎེན ཀཱརཎབྷཱུཏེན ཨཏཱིཏཱནཱགཏེ པཙྩཝེཀྑཎཉཱཎསངྑཱཏཾ ནཡཾ ནེཏི.

ཨིདཱནི ཡཐཱ ཏེན ནཡཾ ནེཏི, ཏཾ ཨཱཀཱརཾ དསྶེཏུཾ ཡེ ཧི ཀེཙི ཨཏཱིཏམདྡྷཱནནྟིཨཱདིམཱཧ. ཏཏྠ ཨབྦྷཉྙཾསཱུཏི ཛཱནིཾསུ པཊིཝིཛ྄ཛྷིཾསུ. ཨིམཉྙེཝཱཏི ཡཾ དུཀྑཾ ཨཏཱིཏེ ཨབྦྷཉྙཾསུ, ཡཉྩ ཨནཱགཏེ ཨབྷིཛཱནིསྶནྟི, ན ཏཉྙེཝ ཨིམཾ; སརིཀྑཊྛེན པན ཨེཝཾ ཝུཏྟཾ. ཨཏཱིཏེཔི ཧི ཋཔེཏྭཱ ཏཎྷཾ ཏེབྷཱུམཀཀྑནྡྷེཡེཝ ¶ དུཀྑསཙྩནྟི པཊིཝིཛ྄ཛྷིཾསུ, ཏཎྷཾཡེཝ ¶ སམུདཡསཙྩནྟི ནིབྦཱནམེཝ ནིརོདྷསཙྩནྟི ཨརིཡམགྒམེཝ མགྒསཙྩནྟི པཊིཝིཛ྄ཛྷིཾསུ, ཨནཱགཏེཔི ཨེཝམེཝ པཊིཝིཛ྄ཛྷིསྶནྟི, ཨེཏརཧིཔི ཨེཝམེཝ པཊིཝིཛ྄ཛྷནྟཱིཏི སརིཀྑཊྛེན ‘‘ཨིམཉྙེཝཱ’’ཏི ཝུཏྟཾ. ཨིདཾ ཝུཙྩཏི ཨནྭཡེ ཉཱཎནྟི ཨིདཾ ཨནུགམནཉཱཎཾ ནཡནཉཱཎཾ ཀཱརཎཉཱཎནྟི ཝུཙྩཏི.

པརིཡེ ¶ ཉཱཎནྟི ཙིཏྟཔརིཙྪེདཉཱཎཾ. པརསཏྟཱནནྟི ཋཔེཏྭཱ ཨཏྟཱནཾ སེསསཏྟཱནཾ. ཨིཏརཾ ཏསྶེཝ ཝེཝཙནཾ. ཙེཏསཱ ཙེཏོ པརིཙྩ པཛཱནཱཏཱིཏི ཨཏྟནོ ཙིཏྟེན ཏེསཾ ཙིཏྟཾ སརཱགཱདིཝསེན པརིཙྪིནྡིཏྭཱ ནཱནཔྤཀཱརཏོ ཛཱནཱཏི. སརཱགཾ ཝཱཏིཨཱདཱིསུ ཡཾ ཝཏྟབྦཾ, ཏཾ ཧེཊྛཱ སཏིཔཊྛཱནཝིབྷངྒེ ཝུཏྟམེཝ. ཨཡཾ པན ཝིསེསོ – ཨིདྷ ཨནུཏྟརཾ ཝཱ ཙིཏྟཾ ཝིམུཏྟཾ ཝཱ ཙིཏྟནྟི ཨེཏྠ ལོཀུཏྟརམྤི ལབྦྷཏི. ཨཝིཔསྶནཱུཔགམྤི ཧི པརཙིཏྟཉཱཎསྶ ཝིསཡོ ཧོཏིཡེཝ.

ཨཝསེསཱ པཉྙཱཏི དྷམྨེ ཉཱཎཱདིཀཱ ཏིསྶོ པཉྙཱ ཋཔེཏྭཱ སེསཱ སབྦཱཔི པཉྙཱ ཉཱཎནྟི སམྨཏཏྟཱ སམྨུཏིཉཱཎཾ ནཱམ ཧོཏི. ཝཙནཏྠོ པནེཏྠ སམྨུཏིམྷི ཉཱཎནྟི སམྨུཏིཉཱཎཾ.

༧༩༧. ཀཱམཱཝཙརཀུསལེ པཉྙཱཏི ཨཡཉྷི ཨེཀནྟེན ཝཊྚསྨིཾ ཙུཏིཔཊིསནྡྷིཾ ཨཱཙིནཏེཝ, ཏསྨཱ ‘‘ཨཱཙཡཱཡ ནོ ཨཔཙཡཱཡཱ’’ཏི ཝུཏྟཱ. ལོཀུཏྟརམགྒཔཉྙཱ པན ཡསྨཱ ཙུཏིཔཊིསནྡྷིཾ ཨཔཙིནཏེཝ, ཏསྨཱ ‘‘ཨཔཙཡཱཡ ནོ ཨཱཙཡཱཡཱ’’ཏི ཝུཏྟཱ. རཱུཔཱཝཙརཱརཱུཔཱཝཙརཔཉྙཱ ཙུཏིཔཊིསནྡྷིམྤི ཨཱཙིནཏི, ཝིཀྑམྦྷནཝསེན ཀིལེསེ ཙེཝ ཀིལེསམཱུལཀེ ཙ དྷམྨེ ཨཔཙིནཏི, ཏསྨཱ ‘‘ཨཱཙཡཱཡ ཙེཝ ཨཔཙཡཱཡ ཙཱ’’ཏི ཝུཏྟཱ. སེསཱ ནེཝ ཙུཏིཔཊིསནྡྷིཾ ཨཱཙིནཏི ན ཨཔཙིནཏི, ཏསྨཱ ‘‘ནེཝ ཨཱཙཡཱཡ ནོ ཨཔཙཡཱཡཱ’’ཏི ཝུཏྟཱ.

༧༩༨. ན ཙ ཨབྷིཉྙཱཡོ པཊིཝིཛ྄ཛྷཏཱིཏི ཨིདཾ པཋམཛ྄ཛྷཱནཔཉྙཾ སནྡྷཱཡ ཝུཏྟཾ. སཱ ཧིསྶ ཀཱམཝིཝེཀེན པཏྟབྦཏྟཱ ཀིལེསནིབྦིདཱཡ སཾཝཏྟཏི. ཏཱཡ ཙེས ཀཱམེསུ ཝཱིཏརཱགོ ཧོཏི, ཨབྷིཉྙཱཔཱདཀབྷཱཝཾ པན ཨཔྤཏྟཏཱཡ ནེཝ པཉྩ ཨབྷིཉྙཱཡོ པཊིཝིཛ྄ཛྷཏི, ནིམིཏྟཱརམྨཎཏྟཱ ན སཙྩཱནི པཊིཝིཛ྄ཛྷཏི. ཨེཝམཡཾ པཉྙཱ ནིབྦིདཱཡ ཧོཏི ནོ པཊིཝེདྷཱཡ. སྭེཝཱཏི ¶ པཋམཛ྄ཛྷཱནཾ པཏྭཱ ཋིཏོ. ཀཱམེསུ ཝཱིཏརཱགོ སམཱནོཏི ཏཐཱ ཝིཀྑམྦྷིཏཱནཾཡེཝ ཀཱམཱནཾ ཝསེན ཝཱིཏརཱགོ. ཨབྷིཉྙཱཡོ པཊིཝིཛ྄ཛྷཏཱིཏི ¶ པཉྩ ཨབྷིཉྙཱཡོ པཊིཝིཛ྄ཛྷཏི. ཨིདཾ ཙཏུཏྠཛ྄ཛྷཱནཔཉྙཾ སནྡྷཱཡ ཝུཏྟཾ. ཙཏུཏྠཛ྄ཛྷཱནཔཉྙཱ ཧི ཨབྷིཉྙཱཔཱདཀབྷཱཝེནཱཔི པཉྩ ཨབྷིཉྙཱཡོ པཊིཝིཛ྄ཛྷཏི, ཨབྷིཉྙཱབྷཱཝཔྤཏྟིཡཱཔི པཊིཝིཛ྄ཛྷཏི ཨེཝ. ཏསྨཱ སཱ པཊིཝེདྷཱཡ ཧོཏི. པཋམཛ྄ཛྷཱནཔཉྙཱཡ ཨེཝ པན ཀིལེསེསུཔི ནིབྦིནྡཏྟཱ ནོ ནིབྦིདཱཡ. ཡཱ པནཱཡཾ དུཏིཡཏཏིཡཛ྄ཛྷཱནཔཉྙཱ, སཱ ཀཏརཀོཊྛཱསཾ བྷཛཏཱིཏི? སོམནསྶཝསེན པཋམཛ྄ཛྷཱནམྤི བྷཛཏི, ཨཝིཏཀྐཝསེན ཙཏུཏྠཛ྄ཛྷཱནམྤི. ཨེཝམེསཱ པཋམཛ྄ཛྷཱནསནྣིསྶིཏཱ ཝཱ ཙཏུཏྠཛ྄ཛྷཱནསནྣིསྶིཏཱ ཝཱ ཀཱཏབྦཱ. ནིབྦིདཱཡ ¶ ཙེཝ པཊིཝེདྷཱཡ ཙཱཏི མགྒཔཉྙཱ སབྦསྨིམྤི ཝཊྚེ ནིབྦིནྡནཏོ ནིབྦིདཱཡ, ཚཊྛཾ ཨབྷིཉྙཾ པཊིཝིཛ྄ཛྷནཏོ པཊིཝེདྷཱཡ ཙ ཧོཏི.

༧༩༩. པཋམསྶ ཛྷཱནསྶ ལཱབྷཱིཏིཨཱདཱིསུ ཡྭཱཡཾ ཨཔྤགུཎསྶ པཋམཛ྄ཛྷཱནསྶ ལཱབྷཱི. ཏཾ ཏཏོ ཝུཊྛིཏཾ ཨཱརམྨཎཝསེན ཀཱམསཧགཏཱ ཧུཏྭཱ སཉྙཱམནསིཀཱརཱ སམུདཱཙརནྟི ཏུདནྟི ཙོདེནྟི. ཏསྶ ཀཱམཱནུཔཀྑནྡཱནཾ སཉྙཱམནསིཀཱརཱནཾ ཝསེན སཱ པཋམཛ྄ཛྷཱནཔཉྙཱ ཧཱཡཏི པརིཧཱཡཏི; ཏསྨཱ ཧཱནབྷཱགིནཱིཏི ཝུཏྟཱ. ཏདནུདྷམྨཏཱཏི ཏདནུརཱུཔསབྷཱཝཱ. སཏི སནྟིཊྛཏཱིཏི ཨིདཾ མིཙྪཱསཏིཾ སནྡྷཱཡ ཝུཏྟཾ, ན སམྨཱསཏིཾ. ཡསྶ ཧི པཋམཛ྄ཛྷཱནཱནུརཱུཔསབྷཱཝཱ པཋམཛ྄ཛྷཱནཾ སནྟཏོ པཎཱིཏཏོ དིསྭཱ ཨསྶཱདཡམཱནཱ ཨབྷིནནྡམཱནཱ ནིཀནྟི ཨུཔྤཛྫཏི, ཏསྶ ནིཀནྟིཝསེན སཱ པཋམཛ྄ཛྷཱནཔཉྙཱ ནེཝ ཧཱཡཏི, ན ཝཌྜྷཏི, ཋིཏིཀོཊྛཱསིཀཱ ཧོཏི. ཏེན ཝུཏྟཾ ཋིཏིབྷཱགིནཱི པཉྙཱཏི. ཨཝིཏཀྐསཧགཏཱཏི ཨཝིཏཀྐཾ དུཏིཡཛ྄ཛྷཱནཾ སནྟཏོ པཎཱིཏཏོ མནསིཀརོཏོ ཨཱརམྨཎཝསེན ཨཝིཏཀྐསཧགཏཱ. སམུདཱཙརནྟཱིཏི པགུཎཏོ པཋམཛ྄ཛྷཱནཏོ ཝུཊྛིཏཾ དུཏིཡཛ྄ཛྷཱནཱདྷིགམཏྠཱཡ ཏུདནྟི ཙོདེནྟི. ཏསྶ ཨུཔརི དུཏིཡཛ྄ཛྷཱནཱནུཔཀྑནྡཱནཾ སཉྙཱམནསིཀཱརཱནཾ ཝསེན སཱ པཋམཛ྄ཛྷཱནཔཉྙཱ ཝིསེསབྷཱུཏསྶ དུཏིཡཛ྄ཛྷཱནསྶ ཨུཔྤཏྟིཊྛཱནཏཱཡ ཝིསེསབྷཱགིནཱིཏི ཝུཏྟཱ. ནིབྦིདཱསཧགཏཱཏི ཏམེཝ ¶ པཋམཛ྄ཛྷཱནཏོ ཝུཊྛིཏཾ ནིབྦིདཱསངྑཱཏེན ཝིཔསྶནཱཉཱཎེན སཧགཏཱ. ཝིཔསྶནཱཉཱཎཉྷི ཛྷཱནངྒབྷེདེ ཝཏྟནྟེ ནིབྦིནྡཏི ཨུཀྐཎྛཏི, ཏསྨཱ ནིབྦིདཱཏི ཝུཙྩཏི. སམུདཱཙརནྟཱིཏི ནིབྦཱནསཙྪིཀིརིཡཏྠཱཡ ཏུདནྟི ཙོདེནྟི. ཝིརཱགཱུཔསཉྷིཏཱཏི ཝིརཱགསངྑཱཏེན ནིབྦཱནེན ཨུཔསཾཧིཏཱ. ཝིཔསྶནཱཉཱཎམྷི སཀྐཱ ཨིམིནཱ མགྒེན ཝིརཱགཾ ནིབྦཱནཾ སཙྪིཀཱཏུནྟི པཝཏྟིཏོ ‘‘ཝིརཱགཱུཔསཉྷིཏ’’ནྟི ཝུཙྩཏི. ཏཾསམྤཡུཏྟཱ སཉྙཱམནསིཀཱརཱཔི ཝིརཱགཱུཔསཉྷིཏཱ ཨེཝ ནཱམ. ཏསྶ ཏེསཾ སཉྙཱམནསིཀཱརཱནཾ ཝསེན སཱ པཋམཛ྄ཛྷཱནཔཉྙཱ ཨརིཡམགྒཔཊིཝེདྷསྶ ¶ པདཊྛཱནཏཱཡ ནིབྦེདྷབྷཱགིནཱིཏི ཝུཏྟཱ. ཨེཝཾ ཙཏཱུསུ ཋཱནེསུ པཋམཛ྄ཛྷཱནཔཉྙཱཝ ཀཐིཏཱ. དུཏིཡཛ྄ཛྷཱནཔཉྙཱདཱིསུཔི ཨིམིནཱཝ ནཡེན ཨཏྠོ ཝེདིཏབྦོ.

༨༠༡. ཀིཙྪེན ཀསིརེན སམཱདྷིཾ ཨུཔྤཱདེནྟསྶཱཏི ལོཀུཏྟརསམཱདྷིཾ ཨུཔྤཱདེནྟསྶ པུབྦབྷཱགེ ཨཱགམནཀཱལེ ཀིཙྪེན ཀསིརེན དུཀྑེན སསངྑཱརེན སཔྤཡོགེན ཀིལམནྟསྶ ཀིལེསེ ཝིཀྑམྦྷེཏྭཱ ཨཱགཏསྶ. དནྡྷཾ ཏཎྛཱནཾ ཨབྷིཛཱནནྟསྶཱཏི ཝིཀྑམྦྷིཏེསུ ཀིལེསེསུ ཝིཔསྶནཱཔརིཝཱསེ ཙིརཾ ཝསིཏྭཱ ཏཾ ལོཀུཏྟརསམཱདྷིསངྑཱཏཾ ཋཱནཾ དནྡྷཾ སཎིཀཾ ཨབྷིཛཱནནྟསྶ པཊིཝིཛ྄ཛྷནྟསྶ ¶ , པཱཔུཎནྟསྶཱཏི ཨཏྠོ. ཨཡཾ ཝུཙྩཏཱིཏི ཡཱ ཨེསཱ ཨེཝཾ ཨུཔྤཛྫཏི, ཨཡཾ ཀིལེསཝིཀྑམྦྷནཔཊིཔདཱཡ དུཀྑཏྟཱ, ཝིཔསྶནཱཔརིཝཱསཔཉྙཱཡ ཙ དནྡྷཏྟཱ མགྒཀཱལེ ཨེཀཙིཏྟཀྑཎེ ཨུཔྤནྣཱཔི པཉྙཱ ཨཱགམནཝསེན དུཀྑཔཊིཔདཱ དནྡྷཱབྷིཉྙཱ ནཱམཱཏི ཝུཙྩཏི. ཨུཔརི ཏཱིསུ པདེསུཔི ཨིམིནཱཝ ནཡེན ཨཏྠོ ཝེདིཏབྦོ.

༨༠༢. སམཱདྷིསྶ ན ནིཀཱམལཱབྷིསྶཱཏི ཡོ སམཱདྷིསྶ ན ནིཀཱམལཱབྷཱི ཧོཏི, སོ ཏསྶ ན ནིཀཱམལཱབྷཱི ནཱམ. ཡསྶ སམཱདྷི ཨུཔརཱུཔརི སམཱཔཛྫནཏྠཱཡ ཨུསྶཀྐིཏུཾ པཙྩཡོ ན ཧོཏི, ཏསྶ ཨཔྤགུཎཛ྄ཛྷཱནལཱབྷིསྶཱཏི ཨཏྠོ. ཨཱརམྨཎཾ ཐོཀཾ ཕརནྟསྶཱཏི པརིཏྟེ སུཔྤམཏྟེ ཝཱ སརཱཝམཏྟེ ཝཱ ཨཱརམྨཎེ པརིཀམྨཾ ཀཏྭཱ ཏཏྠེཝ ཨཔྤནཾ པཏྭཱ ཏཾ ཨཝཌྜྷིཏཾ ཐོཀམེཝ ཨཱརམྨཎཾ ཕརནྟསྶཱཏི ཨཏྠོ. སེསཔདེསུཔི ཨེསེཝ ནཡོ. ནནིཀཱམལཱབྷཱིཔཊིཔཀྑཏོ ཧི པགུཎཛ྄ཛྷཱནལཱབྷཱི ཨེཏྠ ནིཀཱམལཱབྷཱིཏི ཝུཏྟོ. ཨཝཌྜྷིཏཱརམྨཎཔཊིཔཀྑཏོ ཙ ཝཌྜྷིཏཱརམྨཎཾ ཝིཔུལནྟི ཝུཏྟཾ. སེསཾ ཏཱདིསམེཝ.

ཛརཱམརཎེཔེཏཾ ¶ ཉཱཎནྟི ནིབྦཱནམེཝ ཨཱརམྨཎཾ ཀཏྭཱ ཙཏུནྣཾ སཙྩཱནཾ ཨེཀཔཊིཝེདྷཝསེན ཨེཏཾ ཝུཏྟཾ.

ཛརཱམརཎཾ ཨཱརབྦྷཱཏིཨཱདཱིནི པན ཨེཀེཀཾ ཝཏྠུཾ ཨཱརབྦྷ པཝཏྟིཀཱལེ པུབྦབྷཱགེ སཙྩཝཝཏྠཱཔནཝསེན ཝུཏྟཱནི. སེསཾ སབྦཏྠ ཨུཏྟཱནཏྠམེཝཱཏི.

ཙཏུཀྐནིདྡེསཝཎྞནཱ.

(༥.) པཉྩཀནིདྡེསཝཎྞནཱ

༨༠༤. པཉྩཝིདྷེན ¶ ཉཱཎཝཏྠུནིདྡེསེ པཱིཏིཕརཎཏཱདཱིསུ པཱིཏིཾ ཕརམཱནཱ ཨུཔྤཛྫཏཱིཏི དྭཱིསུ ཛྷཱནེསུ པཉྙཱ པཱིཏིཕརཎཏཱ ནཱམ. སུཁཾ ཕརམཱནཱ ཨུཔྤཛྫཏཱིཏི ཏཱིསུ ཛྷཱནེསུ པཉྙཱ སུཁཕརཎཏཱ ནཱམ. པརེསཾ ཙེཏོཕརམཱནཱ ཨུཔྤཛྫཏཱིཏི ཙེཏོཔརིཡཔཉྙཱ ཙེཏོཕརཎཏཱ ནཱམ. ཨཱལོཀཾ ¶ ཕརམཱནཱ ཨུཔྤཛྫཏཱིཏི དིབྦཙཀྑུཔཉྙཱ ཨཱལོཀཕརཎཏཱ ནཱམ. པཙྩཝེཀྑཎཉཱཎཾ པཙྩཝེཀྑཎཱནིམིཏྟཾ ནཱམ. ཏེནེཝ ཝུཏྟཾ ‘‘དྭཱིསུ ཛྷཱནེསུ པཉྙཱ པཱིཏིཕརཎཏཱ’’ཏིཨཱདི. ཏཏྠ ཙ པཱིཏིཕརཎཏཱ སུཁཕརཎཏཱ དྭེ པཱདཱ ཝིཡ, ཙེཏོཕརཎཏཱ ཨཱལོཀཕརཎཏཱ དྭེ ཧཏྠཱ ཝིཡ, ཨབྷིཉྙཱཔཱདཀཛ྄ཛྷཱནཾ མཛ྄ཛྷིམཀཱཡོ ཝིཡ, པཙྩཝེཀྑཎཱནིམིཏྟཾ སཱིསཾ ཝིཡ. ཨིཏི བྷགཝཱ པཉྩངྒིཀཾ སམྨཱསམཱདྷིཾ ཨངྒཔཙྩངྒསམྤནྣཾ པུརིསཾ ཝིཡ ཀཏྭཱ དསྶེསི. ཨཡཾ པཉྩངྒིཀོ སམྨཱསམཱདྷཱིཏི ཨཡཾ ཧཏྠཔཱདསཱིསསདིསེཧི པཉྩཧི ཨངྒེཧི ཡུཏྟོ སམྨཱསམཱདྷཱིཏི པཱདཀཛ྄ཛྷཱནསམཱདྷིཾ ཀཐེསི.

ཨཡཾ སམཱདྷི པཙྩུཔྤནྣསུཁོ ཙེཝཱཏིཨཱདཱིསུ ཨརཧཏྟཕལསམཱདྷི ཨདྷིཔྤེཏོ. སོ ཧི ཨཔྤིཏཔྤིཏཀྑཎེ སུཁཏྟཱ པཙྩུཔྤནྣསུཁོ. པུརིམོ པུརིམོ པཙྪིམསྶ པཙྪིམསྶ སམཱདྷིསུཁསྶ པཙྩཡཏྟཱ ཨཱཡཏིཾ སུཁཝིཔཱཀོ. སནྟཾ སུཁུམཾ ཕལཙིཏྟཾ པཎཱིཏཾ མདྷུརརཱུཔཾ སམུཊྛཱཔེཏི. ཕལསམཱཔཏྟིཡཱ ཝུཊྛིཏསྶ ཧི སབྦཀཱཡཱནུགཏཾ སུཁསམྥསྶཾ ཕོཊྛབྦཾ པཊིཙྩ སུཁསཧགཏཾ ཀཱཡཝིཉྙཱཎཾ ཨུཔྤཛྫཏི. ཨིམིནཱཔི པརིཡཱཡེན ཨཱཡཏིཾ སུཁཝིཔཱཀོ. ཀིལེསེཧི ¶ ཨཱརཀཏྟཱ ཨརིཡོ. ཀཱམཱམིསཝཊྚཱམིསལོཀཱམིསཱནཾ ཨབྷཱཝཱ ནིརཱམིསོ. བུདྡྷཱདཱིཧི མཧཱཔུརིསེཧི སེཝིཏཏྟཱ ཨཀཱཔུརིསསེཝིཏོ. ཨངྒསནྟཏཱཡ ཨཱརམྨཎསནྟཏཱཡ སབྦཀིལེསདརཐསནྟཏཱཡ ཙ སནྟོ. ཨཏཔྤནཱིཡཊྛེན པཎཱིཏོ. ཀིལེསཔཊིཔྤསྶདྡྷིཡཱ ལདྡྷཏྟཱ ཀིལེསཔཊིཔྤསྶདྡྷིབྷཱཝསྶ ཝཱ ལདྡྷཏྟཱ པཊིཔྤསྶདྡྷིལདྡྷོ. པཊིཔྤསྶདྡྷཾ པཊིཔྤསྶདྡྷཱིཏི ཧི ཨིདཾ ཨཏྠཏོ ཨེཀཾ. པཊིཔྤསྶདྡྷཀིལེསེན ཝཱ ཨརཧཏཱ ལདྡྷཏྟཱཔི པཊིཔྤསྶདྡྷིལདྡྷོ. ཨེཀོདིབྷཱཝེན ཨདྷིགཏཏྟཱ ཨེཀོདིབྷཱཝམེཝ ཝཱ ཨདྷིགཏཏྟཱ ཨེཀོདིབྷཱཝཱདྷིགཏོ. ཨཔྤགུཎསཱསཝསམཱདྷི ཝིཡ སསངྑཱརེན སཔྤཡོགེན ཙིཏྟེན པཙྩནཱིཀདྷམྨེ ནིགྒཡ྄ཧ ཀིལེསེ ཝཱརེཏྭཱ ཨནདྷིགཏཏྟཱ ན སསངྑཱརནིགྒཡ྄ཧཝཱརིཏགཏོ. ཏཉྩ སམཱདྷིཾ སམཱཔཛྫནྟོ ཏཏོ ཝཱ ¶ ཝུཊྛཧནྟོ སཏིཝེཔུལླཔྤཏྟཏྟཱ སཏོཝ སམཱཔཛྫཏི སཏོཝ ཝུཊྛཧཏི. ཡཐཱཔརིཙྪིནྣཀཱལཝསེན ཝཱ སཏོ སམཱཔཛྫཏི སཏོ ཝུཊྛཧཏི. ཏསྨཱ ཡདེཏྠ ‘‘ཨཡཾ སམཱདྷི པཙྩུཔྤནྣསུཁོ ཙེཝ ཨཱཡཏིཉྩ སུཁཝིཔཱཀོ’’ཏི ཨེཝཾ པཙྩཝེཀྑམཱནསྶ པཙྩཏྟཾཡེཝ ཨཔརཔྤཙྩཡཾ ཉཱཎཾ ཨུཔྤཛྫཏི – ཏཾ ཨེཀམངྒཾ. ཨེས ནཡོ སེསེསུཔི. ཨེཝམིམེཧི པཉྩཧི པཙྩཝེཀྑཎཉཱཎེཧི ཨཡཾ སམཱདྷི པཉྩཉཱཎིཀོ སམྨཱསམཱདྷི ནཱམ ཝུཏྟོཏི.

པཉྩཀནིདྡེསཝཎྞནཱ.

(༦.) ཚཀྐནིདྡེསཝཎྞནཱ

༨༠༥. ཚབྦིདྷེན ¶ ཉཱཎཝཏྠུནིདྡེསེ ཨིདྡྷིཝིདྷེ ཉཱཎནྟི ‘‘ཨེཀོཔི ཧུཏྭཱ བཧུདྷཱ ཧོཏཱི’’ཏིཨཱདིནཡཔྤཝཏྟེ (དཱི. ནི. ༡.༤༨༤; པཊི. མ. ༡.༡༠༢) ཨིདྡྷིཝིདྷེ ཉཱཎཾ. ཨིམིནཱ ཨཝིཏཀྐཱཝིཙཱརཱ ཨུཔེཀྑཱསཧགཏཱ རཱུཔཱཝཙརཱ བཧུདྷཱབྷཱཝཱདིསཱདྷིཀཱ ཨེཀཙིཏྟཀྑཎིཀཱ ཨཔྤནཱཔཉྙཱཝ ཀཐིཏཱ. སོཏདྷཱཏུཝིསུདྡྷིཡཱ ཉཱཎནྟི དཱུརསནྟིཀཱདིབྷེདསདྡཱརམྨཎཱཡ དིབྦསོཏདྷཱཏུཡཱ ཉཱཎཾ. ཨིམིནཱཔི ཨཝིཏཀྐཱཝིཙཱརཱ ཨུཔེཀྑཱསཧགཏཱ རཱུཔཱཝཙརཱ པཀཏིསོཏཝིསཡཱཏཱིཏསདྡཱརམྨཎཱ ཨེཀཙིཏྟཀྑཎིཀཱ ཨཔྤནཱཔཉྙཱཝ ཀཐིཏཱ. པརཙིཏྟེ ¶ ཉཱཎནྟི པརསཏྟཱནཾ ཙིཏྟཔརིཙྪེདེ ཉཱཎཾ. ཨིམིནཱཔི ཡཐཱཝུཏྟཔྤཀཱརཱ པརེསཾ སརཱགཱདིཙིཏྟཱརམྨཎཱ ཨེཀཙིཏྟཀྑཎིཀཱ ཨཔྤནཱཔཉྙཱཝ ཀཐིཏཱ. པུབྦེནིཝཱསཱནུསྶཏིཡཱ ཉཱཎནྟི པུབྦེནིཝཱསཱནུསྶཏིསམྤཡུཏྟཾ ཉཱཎཾ. ཨིམིནཱཔི ཡཐཱཝུཏྟཔྤཀཱརཱ པུབྦེ ནིཝུཏྠཀྑནྡྷཱནུསྶརཎསཏིསམྤཡུཏྟཱ ཨེཀཙིཏྟཀྑཎིཀཱ ཨཔྤནཱཔཉྙཱཝ ཀཐིཏཱ. སཏྟཱནཾ ཙུཏཱུཔཔཱཏེ ཉཱཎནྟི སཏྟཱནཾ ཙུཏིཡཉྩ ཨུཔཔཱཏེ ཙ ཉཱཎཾ. ཨིམིནཱཔི ཡཐཱཝུཏྟཔྤཀཱརཱ ཙཝནཀཨུཔཔཛྫནཀཱནཾ སཏྟཱནཾ ཝཎྞདྷཱཏུཨཱརམྨཎཱ ཨེཀཙིཏྟཀྑཎིཀཱ ཨཔྤནཱཔཉྙཱཝ ཀཐིཏཱ. ཨཱསཝཱནཾ ཁཡེ ཉཱཎནྟི སཙྩཔརིཙྪེདཛཱནནཉཱཎཾ. ཨིདཾ ལོཀུཏྟརམེཝ. སེསཱནི ལོཀིཡཱནཱིཏི.

ཚཀྐནིདྡེསཝཎྞནཱ.

(༧.) སཏྟཀནིདྡེསཱདིཝཎྞནཱ

༨༠༦. སཏྟཝིདྷེན ¶ ཉཱཎཝཏྠུནིདྡེསེ ཛཱཏིཔཙྩཡཱ ཛརཱམརཎནྟིཨཱདིནཱ ནཡེན པཝཏྟིནིཝཏྟིཝསེན ཨེཀཱདསསུ པཊིཙྩསམུཔྤཱདངྒེསུ ཨེཀེཀསྨིཾ ཀཱལཏྟཡབྷེདཏོ པཙྩཝེཀྑཎཉཱཎཾ ཝཏྭཱ པུན ‘‘ཡམྤིསྶ ཏཾ དྷམྨཊྛིཏིཉཱཎ’’ནྟི ཨེཝཾ ཏདེཝ ཉཱཎཾ སངྑེཔཏོ ཁཡདྷམྨཏཱདཱིཧི པཀཱརེཧི ཝུཏྟཾ. ཏཏྠ ཛཱཏིཔཙྩཡཱ ཛརཱམརཎཾ, ཨསཏི ཛཱཏིཡཱ ནཏྠི ཛརཱམརཎནྟི ཉཱཎདྭཡཾ པཙྩུཔྤནྣདྡྷཱནཝསེན ཝུཏྟཾ. ཨཏཱིཏམྤི ཨདྡྷཱནཾ, ཨནཱགཏམྤི ཨདྡྷཱནནྟི ཨེཝཾ ཨཏཱིཏེ ཉཱཎདྭཡཾ, ཨནཱགཏེ ཉཱཎདྭཡནྟི ཚ. ཏཱནི དྷམྨཊྛིཏིཉཱཎེན སདྡྷིཾ སཏྟ. ཏཏྠ དྷམྨཊྛིཏིཉཱཎནྟི ¶ པཙྩཡཱཀཱརཉཱཎཾ. པཙྩཡཱཀཱརོ ཧི དྷམྨཱནཾ པཝཏྟིཊྛིཏིཀཱརཎཏྟཱ དྷམྨཊྛིཏཱིཏི ཝུཙྩཏི; ཏཏྠ ཉཱཎཾ དྷམྨཊྛིཏིཉཱཎཾ. ཨེཏསྶེཝ ཚབྦིདྷསྶ ཉཱཎསྶེཏཾ ཨདྷིཝཙནཾ. ཨེཝཾ ཨེཀེཀསྨིཾ ཨངྒེ ཨིམཱནི སཏྟ སཏྟ ཀཏྭཱ ཨེཀཱདསསུ ཨངྒེསུ སཏྟསཏྟཏི ཧོནྟི. ཏཏྠ ཁཡདྷམྨནྟི ཁཡགམནསབྷཱཝཾ. ཝཡདྷམྨནྟི ཝཡགམནསབྷཱཝཾ. ཝིརཱགདྷམྨནྟི ¶ ཝིརཛྫནསབྷཱཝཾ. ནིརོདྷདྷམྨནྟི ནིརུཛ྄ཛྷནསབྷཱཝཾ. ཨིམིནཱ ཀིཾ ཀཐིཏཾ? ཨཔརཝིཔསྶནཱཡ པུརིམཝིཔསྶནཱསམྨསནཾ ཀཐིཏཾ. ཏེན ཀིཾ ཀཐིཏཾ ཧོཏི? སཏྟཀྑཏྟུཾ ཝིཔསྶནཱཔཊིཝིཔསྶནཱ ཀཐིཏཱ. པཋམཉཱཎེན ཧི སབྦསངྑཱརེ ཨནིཙྩཱ དུཀྑཱ ཨནཏྟཱཏི དིསྭཱ ཏཾ ཉཱཎཾ དུཏིཡེན དཊྛུཾ ཝཊྚཏི, དུཏིཡཾ ཏཏིཡེན, ཏཏིཡཾ ཙཏུཏྠེན, ཙཏུཏྠཾ པཉྩམེན, པཉྩམཾ ཚཊྛེན, ཚཊྛཾ སཏྟམེན. ཨེཝཾ སཏྟ ཝིཔསྶནཱཔཊིཝིཔསྶནཱ ཀཐིཏཱ ཧོནྟཱིཏི.

སཏྟཀནིདྡེསཝཎྞནཱ.

༨༠༧. ཨཊྛཝིདྷེན ཉཱཎཝཏྠུནིདྡེསེ སོཏཱཔཏྟིམགྒེ པཉྙཱཏི སོཏཱཔཏྟིམགྒམྷི པཉྙཱ. ཨིམིནཱ སམྤཡུཏྟཔཉྙཱཝ ཀཐིཏཱ. སེསཔདེསུཔི ཨེསེཝ ནཡོཏི.

ཨཊྛཀནིདྡེསཝཎྞནཱ.

༨༠༨. ནཝཝིདྷེན ཉཱཎཝཏྠུནིདྡེསེ ཨནུཔུབྦཝིཧཱརསམཱཔཏྟཱིསཱུཏི ཨནུཔུབྦཝིཧཱརསངྑཱཏཱསུ སམཱཔཏྟཱིསུ. ཏཱསཾ ཨནུཔུབྦེན ཨནུཔཊིཔཱཊིཡཱ ཝིཧཱརིཏབྦཊྛེན ཨནུཔུབྦཝིཧཱརཏཱ, སམཱཔཛྫིཏབྦཊྛེན སམཱཔཏྟིཏཱ དཊྛབྦཱ. ཏཏྠ པཋམཛ྄ཛྷཱནསམཱཔཏྟིཡཱ པཉྙཱཏིཨཱདཡོ ཨཊྛ སམྤཡུཏྟཔཉྙཱ ཝེདིཏབྦཱ ¶ . ནཝམཱ པཙྩཝེཀྑཎཔཉྙཱ. སཱ ཧི ནིརོདྷསམཱཔཏྟིཾ སནྟཏོ པཎཱིཏཏོ པཙྩཝེཀྑམཱནསྶ པཝཏྟཏི. ཏེན ཝུཏྟཾ – ‘‘སཉྙཱཝེདཡིཏནིརོདྷསམཱཔཏྟིཡཱ ཝུཊྛིཏསྶ པཙྩཝེཀྑཎཉཱཎ’’ནྟི.

ནཝཀནིདྡེསཝཎྞནཱ.

(༡༠.) དསཀནིདྡེསཝཎྞནཱ

པཋམབལནིདྡེསོ

༨༠༩. དསཝིདྷེན ¶ ཉཱཎཝཏྠུནིདྡེསེ ཨཊྛཱནནྟི ཧེཏུཔཊིཀྑེཔོ. ཨནཝཀཱསོཏི པཙྩཡཔཊིཀྑེཔོ. ཨུབྷཡེནཱཔི ཀཱརཎམེཝ པཊིཀྑིཔཏི. ཀཱརཎཉྷི ཏདཱཡཏྟཝུཏྟིཏཱཡ ཨཏྟནོ ཕལསྶ ཋཱནནྟི ཙ ཨཝཀཱསོཏི ཙ ཝུཙྩཏི. ཡནྟི ཡེན ཀཱརཎེན. དིཊྛིསམྤནྣོཏི མགྒདིཊྛིཡཱ སམྤནྣོ སོཏཱཔནྣོ ཨརིཡསཱཝཀོ. ཀཉྩི ¶ སངྑཱརནྟི ཙཏུབྷཱུམཀེསུ སངྑཏསངྑཱརེསུ ཀཉྩི ཨེཀཾ སངྑཱརམྤི. ནིཙྩཏོ ཨུཔགཙྪེཡྻཱཏི ནིཙྩོཏི གཎྷེཡྻ. ནེཏཾ ཋཱནཾ ཝིཛྫཏཱིཏི ཨེཏཾ ཀཱརཎཾ ནཏྠི, ན ཨུཔལབྦྷཏི. ཡཾ པུཐུཛྫནོཏི ཡེན ཀཱརཎེན པུཐུཛྫནོ. ཋཱནམེཏཾ ཝིཛྫཏཱིཏི ཨེཏཾ ཀཱརཎཾ ཨཏྠི; སསྶཏདིཊྛིཡཱ ཧི སོ ཏེབྷཱུམཀེསུ སངྑཱརེསུ ཀཉྩི སངྑཱརཾ ནིཙྩཏོ གཎྷེཡྻཱཏི ཨཏྠོ. ཙཏུཏྠབྷཱུམཀསངྑཱརོ པན ཏེཛུསྶདཏྟཱ དིཝསཾ སནྟཏྟོ ཨཡོགུལོ༹ ཝིཡ མཀྑིཀཱནཾ དིཊྛིཡཱ ཝཱ ཨཉྙེསཾ ཝཱ ཨཀུསལཱནཾ ཨཱརམྨཎཾ ན ཧོཏི. ཨིམིནཱ ནཡེན ཀཉྩི སངྑཱརཾ སུཁཏོཏིཨཱདཱིསུཔི ཨཏྠོ ཝེདིཏབྦོ. སུཁཏོ ཨུཔགཙྪེཡྻཱཏི ‘‘ཨེཀནྟསུཁཱི ཨཏྟཱ ཧོཏི ཨརོགོ པརམྨརཎཱ’’ཏི (མ. ནི. ༣.༢༡) ཨེཝཾ ཨཏྟདིཊྛིཝསེན སུཁཏོ གཱཧཾ སནྡྷཱཡེཏཾ ཝུཏྟཾ. དིཊྛིཝིཔྤཡུཏྟཙིཏྟེན པན ཨརིཡསཱཝཀོ པརིལཱ༹ཧཱབྷིབྷཱུཏོ པརིལཱ༹ཧཝཱུཔསམཏྠཾ, མཏྟཧཏྠཱིཔརིཏཱསིཏོ ཝིཡ, སུཙིཀཱམོ པོཀྑབྲཱཧྨཎོ གཱུཐཾ ཀཉྩི སངྑཱརཾ སུཁཏོ ཨུཔགཙྪཏི. ཨཏྟཝཱདེ ཀསིཎཱདིཔཎྞཏྟིསངྒཧཏྠཾ སངྑཱརནྟི ཨཝཏྭཱ ཀཉྩི དྷམྨནྟི ཝུཏྟཾ. ཨིདྷཱཔི ཨརིཡསཱཝཀསྶ ཙཏུབྷཱུམཀཝསེན པརིཙྪེདོ ཝེདིཏབྦོ, པུཐུཛྫནསྶ ཏེབྷཱུམཀཝསེན; སབྦཝཱརེསུ ཝཱ ཨརིཡསཱཝཀསྶཱཔི ཏེབྷཱུམཀཝསེནེཝ པརིཙྪེདོ ཝཊྚཏི. ཡཾ ཡཉྷི པུཐུཛྫནོ ¶ གཎྷཱཏི, ཏཏོ ཏཏོ ཨརིཡསཱཝཀོ གཱཧཾ ཝིནིཝེཋེཏི. པུཐུཛྫནོ ཧི ཡཾ ཡཾ ནིཙྩཾ སུཁཾ ཨཏྟཱཏི གཎྷཱཏི, ཏཾ ཏཾ ཨརིཡསཱཝཀོ ཨནིཙྩཾ དུཀྑཾ ཨནཏྟཱཏི གཎྷནྟོ གཱཧཾ ཝིནིཝེཋེཏི.

མཱཏརནྟིཨཱདཱིསུ ཛནིཀཱཝ མཱཏཱ. མནུསྶབྷཱུཏོཝ ཁཱིཎཱསཝོ ཨརཧཱཏི ཨདྷིཔྤེཏོ. ཀིཾ པན ཨརིཡསཱཝཀོ ཨཉྙཾ ཛཱིཝིཏཱ ཝོརོཔེཡྻཱཏི? ཨེཏམྤི ཨཊྛཱནཾ. སཙེཔི བྷཝནྟརགཏཾ ཨརིཡསཱཝཀཾ ཨཏྟནོ ཨརིཡསཱཝཀབྷཱཝཾ ཨཛཱནནྟམྤི ཀོཙི ཨེཝཾ ཝདེཡྻ – ‘ཨིམཾ ཀུནྠཀིཔིལླིཀཾ ཛཱིཝིཏཱ ཝོརོཔེཏྭཱ སཀལཙཀྐཝཱལ༹གབྦྷེ ཙཀྐཝཏྟིརཛྫཾ པཊིཔཛྫཱཧཱི’ཏི, ནེཝ སོ ཏཾ ཛཱིཝིཏཱ ཝོརོཔེཡྻ. ཨཐ ཝཱཔི ¶ ནཾ ཨེཝཾ ཝདེཡྻུཾ – ‘སཙེ ཨིམཾ ན གྷཱཏེསྶསི, སཱིསཾ ¶ ཏེ ཚིནྡིསྶཱམཱ’ཏི, སཱིསམེཝསྶ ཚིནྡེཡྻུཾ, ནེཝ སོ ཏཾ གྷཱཏེཡྻ. པུཐུཛྫནབྷཱཝསྶ པན མཧཱསཱཝཛྫབྷཱཝདསྶནཏྠཾ ཨརིཡསཱཝཀསྶ ཙ བལདཱིཔནཏྠམེཏཾ ཝུཏྟཾ. ཨཡཉྷེཏྠ ཨདྷིཔྤཱཡོ – སཱཝཛྫོ པུཐུཛྫནབྷཱཝོ, ཡཏྲ ཧི ནཱམ པུཐུཛྫནོ མཱཏུགྷཱཏཱདཱིནིཔི ཨཱནནྟརིཡཱནི ཀརིསྶཏི. མཧཱབལོ ཨརིཡསཱཝཀོ; སོ ཨེཏཱནི ཀམྨཱནི ན ཀརོཏཱིཏི.

པདུཊྛེན ཙིཏྟེནཱཏི དོསསམྤཡུཏྟེན ཝདྷཀཙིཏྟེན. ལོཧིཏཾ ཨུཔྤཱདེཡྻཱཏི ཛཱིཝམཱནཀསརཱིརེ ཁུདྡཀམཀྑིཀཱཡ པིཝནམཏྟམྤི ལོཧིཏཾ ཨུཔྤཱདེཡྻ. སངྒྷཾ བྷིནྡེཡྻཱཏི སམཱནསཾཝཱསཀཾ སམཱནསཱིམཱཡཾ ཋིཏཾ པཉྩཧི ཀཱརཎེཧི སངྒྷཾ བྷིནྡེཡྻ, ཝུཏྟཉྷེཏཾ – ‘‘པཉྩཧུཔཱལི, ཨཱཀཱརེཧི སངྒྷོ བྷིཛྫཏི – ཀམྨེན, ཨུདྡེསེན, ཝོཧརནྟོ, ཨནུསྶཱཝནེན, སལཱཀགྒཱཧེནཱ’’ཏི (པརི. ༤༥༨).

ཏཏྠ ‘ཀམྨེནཱ’ཏི ཨཔལོཀནཱདཱིསུ ཙཏཱུསུ ཀམྨེསུ ཨཉྙཏརེན ཀམྨེན. ‘ཨུདྡེསེནཱ’ཏི པཉྩསུ པཱཏིམོཀྑུདྡེསེསུ ཨཉྙཏརེན ཨུདྡེསེན. ‘ཝོཧརནྟོ’ཏི ཀཐཡནྟོ, ཏཱཧི ཏཱཧི ཨུཔྤཏྟཱིཧི ‘ཨདྷམྨཾ དྷམྨོ’ཏིཨཱདཱིནི ཨཊྛཱརས བྷེདཀརཝཏྠཱུནི དཱིཔེནྟོ. ‘ཨནུསྶཱཝནེནཱ’ཏི ‘ནནུ ཏུམྷེ ཛཱནཱཐ མཡ྄ཧཾ ཨུཙྩཱཀུལཱ པབྦཛིཏབྷཱཝཾ བཧུསྶུཏབྷཱཝཉྩ! མཱདིསོ ནཱམ ཨུདྡྷམྨཾ ཨུབྦིནཡཾ སཏྠུསཱསནཾ གཱཧེཡྻཱཏི ཙིཏྟམྤི ཨུཔྤཱདེཏུཾ ཏུམྷཱཀཾ ན ཡུཏྟཾ. ཀིཾ མཡ྄ཧཾ ཨཝཱིཙི ནཱིལུཔྤལཝནཾ ཝིཡ སཱིཏལོ? ཀིམཧཾ ཨཔཱཡཏོ ན བྷཱཡཱམཱི’ཏིཨཱདིནཱ ནཡེན ཀཎྞམཱུལེ ཝཙཱིབྷེདཾ ཀཏྭཱ ཨནུསྶཱཝནེན ¶ . ‘སལཱཀགྒཱཧེནཱ’ཏི ཨེཝཾ ཨནུསྶཱཝེཏྭཱ ཏེསཾ ཙིཏྟཾ ཨུཔཏྠམྦྷེཏྭཱ ཨནིཝཏྟནདྷམྨེ ཀཏྭཱ ‘‘གཎྷཐ ཨིམཾ སལཱཀ’’ནྟི སལཱཀགྒཱཧེན. ཨེཏྠ ཙ ཀམྨམེཝ ཨུདྡེསོ ཝཱ པམཱཎཾ ཝོཧཱརཱནུསྶཱཝནསལཱཀགྒཱཧཱ པན པུབྦབྷཱགཱ. ཨཊྛཱརསཝཏྠུདཱིཔནཝསེན ཧི ཝོཧརནྟེན ཏཏྠ རུཙིཛནནཏྠཾ ཨནུསྶཱཝེཏྭཱ སལཱཀཱཡ གཱཧིཏཱཡཔི ཨབྷིནྣོཝ ཧོཏི སངྒྷོ. ཡདཱ པན ཨེཝཾ ཙཏྟཱརོ ཝཱ ཨཏིརེཀཱ ཝཱ སལཱཀཾ གཱཧེཏྭཱ ཨཱཝེཎིཀཾ ཀམྨཾ ཝཱ ཨུདྡེསཾ ཝཱ ཀརོནྟི, ཏདཱ སངྒྷོ ¶ བྷིནྣོ ནཱམ ཧོཏི.

ཨེཝཾ དིཊྛིསམྤནྣོ པུགྒལོ སངྒྷཾ བྷིནྡེཡྻཱཏི ནེཏཾ ཋཱནཾ ཝིཛྫཏི. ཨེཏྟཱཝཏཱ མཱཏུགྷཱཏཱདཱིནི པཉྩ ཨཱནནྟརིཡཀམྨཱནི དསྶིཏཱནི ཧོནྟི, ཡཱནི པུཐུཛྫནོ ཀརོཏི, ན ཨརིཡསཱཝཀོ. ཏེསཾ ཨཱཝིབྷཱཝཏྠཾ –

ཀམྨཏོ ¶ དྭཱརཏོ ཙེཝ, ཀཔྤཊྛིཏིཡཏོ ཏཐཱ;

པཱཀསཱདྷཱརཎཱདཱིཧི, ཝིཉྙཱཏབྦོ ཝིནིཙྪཡོ.

ཏཏྠ ‘ཀམྨཏོ’ ཏཱཝ – ཨེཏྠ ཧི མནུསྶབྷཱུཏསྶེཝ མནུསྶབྷཱུཏཾ མཱཏརཾ ཝཱ པིཏརཾ ཝཱ ཨཔི པརིཝཏྟལིངྒཾ ཛཱིཝིཏཱ ཝོརོཔེནྟསྶ ཀམྨཾ ཨཱནནྟརིཡཾ ཧོཏི. ཏསྶ ཝིཔཱཀཾ པཊིབཱཧིསྶཱམཱི’ཏི སཀལཙཀྐཝཱལ༹ཾ མཧཱཙེཏིཡཔྤམཱཎེཧི ཀཉྩནཐཱུཔེཧི པཱུརེཏྭཱཔི, སཀལཙཀྐཝཱལ༹ཾ པཱུརེཏྭཱ ནིསིནྣབྷིཀྑུསངྒྷསྶ མཧཱདཱནཾ དཏྭཱཔི, བུདྡྷསྶ བྷགཝཏོ སངྒྷཱཊིཀཎྞཾ ཨམུཉྩིཏྭཱཝ ཝིཙརིཏྭཱཔི, ཀཱཡསྶ བྷེདཱ ནིརཡམེཝ ཨུཔཔཛྫཏི. ཡོ པན སཡཾ མནུསྶབྷཱུཏོ ཏིརཙྪཱནབྷཱུཏཾ མཱཏརཾ ཝཱ པིཏརཾ ཝཱ, སཡཾ ཝཱ ཏིརཙྪཱནབྷཱུཏོ མནུསྶབྷཱུཏཾ, ཏིརཙྪཱནབྷཱུཏོཡེཝ ཝཱ ཏིརཙྪཱནབྷཱུཏཾ ཛཱིཝིཏཱ ཝོརོཔེཏི, ཏསྶ ཀམྨཾ ཨཱནནྟརིཡཾ ན ཧོཏི, ཀམྨཾ པན བྷཱརིཡཾ ཧོཏི, ཨཱནནྟརིཡཾ ཨཱཧཙྩེཝ ཏིཊྛཏི. མནུསྶཛཱཏིཀཱནཾ པན ཝསེན ཨཡཾ པཉྷོ ཀཐིཏོ.

ཨེཏྠ ཨེལ༹ཀཙཏུཀྐཾ, སངྒཱམཙཏུཀྐཾ, ཙོརཙཏུཀྐཉྩ ཀཐེཏབྦཾ. ‘ཨེལ༹ཀཾ མཱརེམཱི’ཏི ཨབྷིསནྡྷིནཱཔི ཧི ཨེལ༹ཀཊྛཱནེ ཋིཏཾ མནུསྶོ མནུསྶབྷཱུཏཾ མཱཏརཾ ཝཱ པིཏརཾ ཝཱ མཱརེནྟོ ཨཱནནྟརིཡཾ ཕུསཏི. ཨེལ༹ཀཱབྷིསནྡྷིནཱ པན མཱཏཱཔིཏིཨབྷིསནྡྷིནཱ ཝཱ ཨེལ༹ཀཾ མཱརེནྟོ ཨཱནནྟརིཡཾ ན ཕུསཏི. མཱཏཱཔིཏིཨབྷིསནྡྷིནཱ མཱཏཱཔིཏརོ མཱརེནྟོ ཕུསཏེཝ. ཨེས ནཡོ ཨིཏརསྨིམྤི ¶ ཙཏུཀྐདྭཡེ. ཡཐཱ ཙ མཱཏཱཔིཏཱུསུ, ཨེཝཾ ཨརཧནྟེཔི ཨེཏཱནི ཙཏུཀྐཱནི ཝེདིཏབྦཱནི. མནུསྶཨརཧནྟམེཝ ཙ མཱརེཏྭཱ ཨཱནནྟརིཡཾ ཕུསཏི, ན ཡཀྑབྷཱུཏཾ; ཀམྨཾ པན བྷཱརིཡཾ ཨཱནནྟརིཡསདིསམེཝ. མནུསྶཨརཧནྟསྶ ཙ པུཐུཛྫནཀཱལེཡེཝ སཏྠཔྤཧཱརེ ཝཱ ཝིསེ ཝཱ དིནྣེཔི ཡདི སོ ཨརཧཏྟཾ པཏྭཱ ཏེནེཝ མརཏི, ཨརཧནྟགྷཱཏོ ཧོཏིཡེཝ. ཡཾ པན པུཐུཛྫནཀཱལེ དིནྣཾ དཱནཾ ཨརཧཏྟཾ ¶ པཏྭཱ པརིབྷུཉྫཏི, པུཐུཛྫནསྶེཝ ཏཾ དིནྣཾ ཧོཏི. སེསཨརིཡཔུགྒལེ མཱརེནྟསྶ ཨཱནནྟརིཡཾ ནཏྠི, ཀམྨཾ པན བྷཱརིཡཾ ཨཱནནྟརིཡསདིསམེཝ.

ལོཧིཏུཔྤཱདེ ཏཐཱགཏསྶ ཨབྷེཛྫཀཱཡཏཱཡ པརཱུཔཀྐམེན ཙམྨཙྪེདཾ ཀཏྭཱ ལོཧིཏཔགྒྷརཎཾ ནཱམ ནཏྠི. སརཱིརསྶ པན ཨནྟོཡེཝ ཨེཀསྨིཾ ཋཱནེ ལོཧིཏཾ སམོསརཏི. དེཝདཏྟེན པཊིཝིདྡྷསིལཱཏོ བྷིཛྫིཏྭཱ གཏཱ སཀལིཀཱཔི ཏཐཱགཏསྶ པཱདནྟཾ པཧརི. ཕརསུནཱ པཧཊོ ཝིཡ པཱདོ ཨནྟོལོཧིཏོཡེཝ ཨཧོསི. ཏཐཱ ཀརོནྟསྶ ཨཱནནྟརིཡཾ ཧོཏི. ཛཱིཝཀོ ¶ པན ཏཐཱགཏསྶ རུཙིཡཱ སཏྠཀེན ཙམྨཾ ཚིནྡིཏྭཱ ཏམྷཱ ཋཱནཱ དུཊྛལོཧིཏཾ ནཱིཧརིཏྭཱ ཕཱསུཀམཀཱསི. ཏཐཱ ཀརོནྟསྶ པུཉྙཀམྨམེཝ ཧོཏི.

ཨཐ ཡེ ཙ པརིནིབྦུཏེ ཏཐཱགཏེ ཙེཏིཡཾ བྷིནྡནྟི, བོདྷིཾ ཚིནྡནྟི, དྷཱཏུམྷི ཨུཔཀྐམནྟི, ཏེསཾ ཀིཾ ཧོཏཱིཏི? བྷཱརིཡཾ ཀམྨཾ ཧོཏི ཨཱནནྟརིཡསདིསཾ. སདྷཱཏུཀཾ པན ཐཱུཔཾ ཝཱ པཊིམཾ ཝཱ བཱདྷཡམཱནཾ བོདྷིསཱཁཉྩ ཚིནྡིཏུཾ ཝཊྚཏི. སཙེཔི ཏཏྠ ནིལཱིནཱ སཀུཎཱ ཙེཏིཡེ ཝཙྩཾ པཱཏེནྟི, ཚིནྡིཏུཾ ཝཊྚཏིཡེཝ. པརིབྷོགཙེཏིཡཏོ ཧི སརཱིརཙེཏིཡཾ མཧནྟཏརཾ. ཙེཏིཡཝཏྠུཾ བྷིནྡིཏྭཱ གཙྪནྟཾ བོདྷིམཱུལམྤི ཚིནྡིཏྭཱ ཧརིཏུཾ ཝཊྚཏི. ཡཱ པན བོདྷིསཱཁཱ བོདྷིགྷརཾ བཱདྷཏི, ཏཾ གེཧརཀྑཎཏྠཾ ཚིནྡིཏུཾ ན ལབྦྷཏི. བོདྷིཨཏྠཉྷི གེཧཾ, ན གེཧཏྠཱཡ བོདྷི. ཨཱསནགྷརེཔི ཨེསེཝ ནཡོ. ཡསྨིཾ པན ཨཱསནགྷརེ དྷཱཏུ ནིཧིཏཱ ཧོཏི, ཏསྶ རཀྑཎཏྠཱཡ བོདྷིསཱཁཾ ཚིནྡིཏུཾ ཝཊྚཏི. བོདྷིཛགྒནཏྠཾ ཨོཛོཧརཎསཱཁཾ ཝཱ པཱུཏིཊྛཱནཾ ཝཱ ཚིནྡིཏུཾ ཝཊྚཏིཡེཝ; སརཱིརཔཊིཛགྒནེ ཝིཡ པུཉྙམྤི ཧོཏི.

སངྒྷབྷེདེ སཱིམཊྛཀསངྒྷེ ཨསནྣིཔཏིཏེ ཝིསུཾ པརིསཾ གཧེཏྭཱ ཀཏཝོཧཱརཱནུསྶཱཝནསལཱཀགྒཱཧསྶ ཀམྨཾ ཝཱ ཀརོནྟསྶ ཨུདྡེསཾ ཝཱ ཨུདྡིསནྟསྶ ¶ བྷེདོ ཙ ཧོཏི ཨཱནནྟརིཡཀམྨཉྩ. སམགྒསཉྙཱཡ པན ཝཊྚཏི. སམགྒསཉྙཱཡ ཧི ཀརོནྟསྶ ནེཝ བྷེདོ ཧོཏི ན ཨཱནནྟརིཡཀམྨཾ. ཏཐཱ ནཝཏོ ཨཱུནཔརིསཱཡཾ. སབྦནྟིམེན པན པརིཙྪེདེན ནཝནྣཾ ཛནཱནཾ ཡོ སངྒྷཾ བྷིནྡཏི, ཏསྶ ཨཱནནྟརིཡཀམྨཾ ¶ ཧོཏི. ཨནུཝཏྟཀཱནཾ ཨདྷམྨཝཱདཱིནཾ མཧཱསཱཝཛྫཾ ཀམྨཾ; དྷམྨཝཱདིནོ ཨནཝཛྫཱ. ཏཏྠ ནཝནྣམེཝ སངྒྷབྷེདེ ཨིདཾ སུཏྟཾ – ‘‘ཨེཀཏོ, ཨུཔཱལི, ཙཏྟཱརོ ཧོནྟི, ཨེཀཏོ ཙཏྟཱརོ, ནཝམོ ཨནུསྶཱཝེཏི སལཱཀཾ གཱཧེཏི – ‘ཨཡཾ དྷམྨོ, ཨཡཾ ཝིནཡོ, ཨིདཾ སཏྠུསཱསནཾ, ཨིདཾ གཎྷཐ, ཨིདཾ རོཙེཐཱ’ཏི. ཨེཝཾ ཁོ, ཨུཔཱལི, སངྒྷརཱཛི ཙེཝ ཧོཏི སངྒྷབྷེདོ ཙ. ནཝནྣཾ ཝཱ, ཨུཔཱལི, ཨཏིརེཀནཝནྣཾ ཝཱ སངྒྷརཱཛི ཙེཝ ཧོཏི སངྒྷབྷེདོ ཙཱ’’ཏི (ཙཱུལ༹ཝ. ༣༥༡).

ཨེཏེསུ ཙ པན པཉྩསུ སངྒྷབྷེདོ ཝཙཱིཀམྨཾ, སེསཱནི ཀཱཡཀམྨཱནཱིཏི. ཨེཝཾ ཀམྨཏོཔི ཝིཉྙཱཏབྦོ ཝིནིཙྪཡོ.

‘དྭཱརཏོ’ཏི སབྦཱནེཝ ཙེཏཱནི ཀཱཡདྭཱརཏོཔི ཝཙཱིདྭཱརཏོཔི སམུཊྛཧནྟི. པུརིམཱནི པནེཏྠ ¶ ཙཏྟཱརི ཨཱཎཏྟིཀཝིཛྫཱམཡཔཡོགཝསེན ཝཙཱིདྭཱརཏོ སམུཊྛཧིཏྭཱཔི ཀཱཡདྭཱརམེཝ པཱུརེནྟི. སངྒྷབྷེདོ ཧཏྠམུདྡཱཡ བྷེདཾ ཀརོནྟསྶ ཀཱཡདྭཱརཏོ སམུཊྛཧིཏྭཱཔི ཝཙཱིདྭཱརམེཝ པཱུརེཏཱིཏི. ཨེཝམེཏྠ དྭཱརཏོཔི ཝིཉྙཱཏབྦོ ཝིནིཙྪཡོ.

‘ཀཔྤཊྛིཏིཡཏོ’ཏི སངྒྷབྷེདོཡེཝ ཙེཏྠ ཀཔྤཊྛིཏིཡོ. སཎྛཧནྟེ ཧི ཀཔྤེ ཀཔྤཝེམཛ྄ཛྷེ ཝཱ སངྒྷབྷེདཾ ཀཏྭཱ ཀཔྤཝིནཱསེཡེཝ མུཙྩཏི. སཙེཔི ཧི ‘སྭེ ཀཔྤོ ཝིནསྶིསྶཏཱི’ཏི ཨཛྫ སངྒྷབྷེདཾ ཀརོཏི, སྭེཡེཝ མུཙྩཏི, ཨེཀདིཝསམེཝ ནིརཡེ པཙྩཏི. ཨེཝཾ ཀརཎཾ པན ནཏྠི. སེསཱནི ཙཏྟཱརི ཀམྨཱནི ཨཱནནྟརིཡཱནེཝ ཧོནྟི, ན ཀཔྤཊྛིཏིཡཱནཱིཏི. ཨེཝམེཏྠ ཀཔྤཊྛིཏིཡཏོཔི ཝིཉྙཱཏབྦོ ཝིནིཙྪཡོ.

‘པཱཀཏོ’ཏི ཡེན ཙ པཉྩཔེཏཱནི ཀམྨཱནི ཀཏཱནི ཧོནྟི, ཏསྶ སངྒྷབྷེདོཡེཝ པཊིསནྡྷིཝསེན ཝིཔཙྩཏི. སེསཱནི ‘‘ཨཧོསི ཀམྨཾ ནཱཧོསི ཀམྨཝིཔཱཀོ’’ཏི ཨེཝམཱདཱིསུ སངྑཾ གཙྪནྟི. སངྒྷབྷེདཱབྷཱཝེ ལོཧིཏུཔྤཱདོ, ཏདབྷཱཝེ ཨརཧནྟགྷཱཏོ, ཏདབྷཱཝེ སཙེ པིཏཱ ¶ སཱིལཝཱ ཧོཏི, མཱཏཱ དུསྶཱིལཱ ནོ ཝཱ ཏཐཱ སཱིལཝཏཱི, པིཏུགྷཱཏོ པཊིསནྡྷིཝསེན ཝིཔཙྩཏི. སཙེ མཱཏཱ མཱཏུགྷཱཏོ. དྭཱིསུཔི སཱིལེན ཝཱ དུསྶཱིལེན ཝཱ སམཱནེསུ མཱཏུགྷཱཏོཝ པཊིསནྡྷིཝསེན ཝིཔཙྩཏི; མཱཏཱ ཧི དུཀྐརཀཱརིཎཱི བཧཱུཔཀཱརཱ ཙ པུཏྟཱནནྟི. ཨེཝམེཏྠ པཱཀཏོཔི ཝིཉྙཱཏབྦོ ཝིནིཙྪཡོ.

‘སཱདྷཱརཎཱདཱིཧཱི’ཏི ¶ པུརིམཱནི ཙཏྟཱརི སབྦེསམྤི གཧཊྛཔབྦཛིཏཱནཾ སཱདྷཱརཎཱནི. སངྒྷབྷེདོ པན ‘‘ན ཁོ, ཨུཔཱལི, བྷིཀྑུནཱི སངྒྷཾ བྷིནྡཏི, ན སིཀྑམཱནཱ, ན སཱམཎེརོ, ན སཱམཎེརཱི, ན ཨུཔཱསཀོ, ན ཨུཔཱསིཀཱ སངྒྷཾ བྷིནྡཏི. བྷིཀྑུ ཁོ, ཨུཔཱལི, པཀཏཏྟོ སམཱནསཾཝཱསཀོ སམཱནསཱིམཱཡཾ ཋིཏོ སངྒྷཾ བྷིནྡཏཱི’’ཏི (ཙཱུལ༹ཝ. ༣༥༡) ཝཙནཏོ ཝུཏྟཔྤཀཱརསྶ བྷིཀྑུནོཝ ཧོཏི, ན ཨཉྙསྶ; ཏསྨཱ ཨསཱདྷཱརཎོ. ཨཱདིསདྡེན སབྦེཔེཏེ དུཀྑཝེདནཱསཧགཏཱ དོསམོཧསམྤཡུཏྟཱ ཙཱཏི ཨེཝམེཏྠ སཱདྷཱརཎཱདཱིཧིཔི ཝིཉྙཱཏབྦོ ཝིནིཙྪཡོ.

ཨཉྙཾ སཏྠཱརནྟི ‘ཨཡཾ མེ སཏྠཱ སཏྠུཀིཙྩཾ ཀཱཏུཾ སམཏྠོ’ཏི བྷཝནྟརེཔི ཨཉྙཾ ཏིཏྠཀརཾ ‘ཨཡཾ མེ སཏྠཱ’ཏི ཨེཝཾ གཎྷེཡྻ – ནེཏཾ ཋཱནཾ ཝིཛྫཏཱིཏི ཨཏྠོ. ཨཊྛམཾ བྷཝཾ ནིབྦཏྟེཡྻཱཏི སབྦམནྡཔཉྙོཔི སཏྟམཾ བྷཝཾ ཨཏིཀྐམིཏྭཱ ཨཊྛམཾ ནིབྦཏྟེཡྻ – ནེཏཾ ཋཱནཾ ཝིཛྫཏི ¶ . ཨུཏྟམཀོཊིཡཱ ཧི སཏྟམཾ བྷཝཾ སནྡྷཱཡེཝེས ‘‘ནིཡཏོ སམྦོདྷིཔརཱཡཎོ’’ཏི ཝུཏྟོ. ཀིཾ པན ཏཾ ནིཡཱམེཏི? ཀིཾ པུབྦཧེཏུ ནིཡཱམེཏི ཨུདཱཧུ པཊིལདྡྷམགྒོ ཨུདཱཧུ ཨུཔརི ཏཡོ མགྒཱཏི? སམྨཱསམྦུདྡྷེན གཧིཏཾ ནཱམམཏྟམེཏཾ. པུགྒལོ པན ནིཡཏོ ནཱམ ནཏྠི. ‘‘པུབྦཧེཏུ ནིཡཱམེཏཱི’’ཏི ཝུཏྟེ ཧི ཨུཔརི ཏིཎྞཾ མགྒཱནཾ ཨུཔནིསྶཡོ ཝུཏྟོ ཧོཏི, པཋམམགྒསྶ ཨུཔནིསྶཡཱབྷཱཝོ ཨཱཔཛྫཏི. ཨིཙྩསྶ ཨཧེཏུ ཨཔྤཙྩཡཱ ནིབྦཏྟིཾ པཱཔུཎཱཏི. ‘‘པཊིལདྡྷམགྒོ ནིཡཱམེཏཱི’’ཏི ཝུཏྟེ ཨུཔརི ཏཡོ མགྒཱ ཨཀིཙྩཀཱ ཧོནྟི, པཋམམགྒོཝ སཀིཙྩཀོ, པཋམམགྒེནེཝ ཀིལེསེ ཁེཔེཏྭཱ པརིནིབྦཱཡིཏབྦཾ ཧོཏི. ‘‘ཨུཔརི ཏཡོ མགྒཱ ནིཡཱམེནྟཱི’’ཏི ཝུཏྟེ པཋམམགྒོ ཨཀིཙྩཀོ ཧོཏི, ཨུཔརི ཏཡོ མགྒཱཝ སཀིཙྩཀཱ, པཋམམགྒཾ ཨནིབྦཏྟེཏྭཱ ཨུཔརི ཏཡོ མགྒཱ ནིབྦཏྟེཏབྦཱ ཧོནྟི, པཋམམགྒེན ཙ ཨནུཔྤཛྫིཏྭཱཝ ཀིལེསཱ ཁེཔེཏབྦཱ ཧོནྟི. ཏསྨཱ ན ཨཉྙོ ཀོཙི ནིཡཱམེཏི, ཨུཔརི ཏིཎྞཾ མགྒཱནཾ ཝིཔསྶནཱཝ ནིཡཱམེཏི. སཙེ ཧི ཏེསཾ ཝིཔསྶནཱ ¶ ཏིཀྑཱ སཱུརཱ ཧུཏྭཱ ཝཧཏི, ཨེཀཾཡེཝ བྷཝཾ ནིབྦཏྟེཏྭཱ ཨརཧཏྟཾ པཏྭཱ ¶ པརིནིབྦཱཏི. ཏཏོ མནྡཏརཔཉྙོ དུཏིཡེ ཝཱ ཏཏིཡེ ཝཱ ཙཏུཏྠེ ཝཱ པཉྩམེ ཝཱ ཚཊྛེ ཝཱ བྷཝེ ཨརཧཏྟཾ པཏྭཱ པརིནིབྦཱཏི. སབྦམནྡཔཉྙོ སཏྟམཾ བྷཝཾ ནིབྦཏྟེཏྭཱ ཨརཧཏྟཾ པཱཔུཎཱཏི, ཨཊྛམེ བྷཝེ པཊིསནྡྷི ན ཧོཏི. ཨིཏི སམྨཱསམྦུདྡྷེན གཧིཏཾ ནཱམམཏྟམེཏཾ. སཏྠཱ ཧི བུདྡྷཏུལཱཡ ཏུལེཏྭཱ སབྦཉྙུཏཉཱཎེན པརིཙྪིནྡིཏྭཱ ‘ཨཡཾ པུགྒལོ སབྦམཧཱཔཉྙོ ཏིཀྑཝིཔསྶཀོ ཨེཀམེཝ བྷཝཾ ནིབྦཏྟེཏྭཱ ཨརཧཏྟཾ གཎྷིསྶཏཱི’ཏི ‘ཨེཀབཱིཛཱི’ཏི ནཱམཾ ཨཀཱསི; ‘ཨཡཾ པུགྒལོ དུཏིཡཾ, ཏཏིཡཾ, ཙཏུཏྠཾ, པཉྩམཾ, ཚཊྛཾ བྷཝཾ ནིབྦཏྟེཏྭཱ ཨརཧཏྟཾ གཎྷིསྶཏཱི’ཏི ‘ཀོལཾཀོལོ’ཏི ནཱམཾ ཨཀཱསི; ‘ཨཡཾ པུགྒལོ སཏྟམཾ བྷཝཾ ནིབྦཏྟེཏྭཱ ཨརཧཏྟཾ གཎྷིསྶཏཱི’ཏི ‘སཏྟཀྑཏྟུཔརམོ’ཏི ནཱམཾ ཨཀཱསི.

ཀོཙི པན པུགྒལོ སཏྟནྣཾ བྷཝཱནཾ ནིཡཏོ ནཱམ ནཏྠི. ཨརིཡསཱཝཀོ པན ཡེན ཀེནཙིཔི ཨཱཀཱརེན མནྡཔཉྙོ སམཱནོ ཨཊྛམཾ བྷཝཾ ཨཔྤཏྭཱ ཨནྟརཱཝ པརིནིབྦཱཏི. སཀྐསདིསོཔི ཝཊྚཱབྷིརཏོ སཏྟམཾཡེཝ བྷཝཾ གཙྪཏི. སཏྟམེ བྷཝེ སབྦཀཱརེན པམཱདཝིཧཱརིནོཔི ཝིཔསྶནཱཉཱཎཾ པརིཔཱཀཾ གཙྪཏི. ཨཔྤམཏྟཀེཔི ཨཱརམྨཎེ ནིབྦིནྡིཏྭཱ ནིབྦུཏིཾ པཱཔུཎཱཏི. སཙེཔི ཧིསྶ སཏྟམེ བྷཝེ ནིདྡཾ ཝཱ ཨོཀྐམནྟསྶ, པརམྨུཁཾ ཝཱ གཙྪནྟསྶ, པཙྪཏོ ཋཏྭཱ ཏིཁིཎེན ཨསིནཱ ཀོཙིདེཝ སཱིསཾ པཱཏེཡྻ, ཨུདཀེ ཝཱ ཨོསཱདེཏྭཱ མཱརེཡྻ, ཨསནི ཝཱ པནསྶ སཱིསེ པཏེཡྻ, ཨེཝརཱུཔེཔི ཀཱལེ སཔྤཊིསནྡྷིཀཱ ཀཱལཾཀིརིཡཱ ¶ ནཱམ ན ཧོཏི, ཨརཧཏྟཾ པཏྭཱཝ པརིནིབྦཱཏི. ཏེན ཝུཏྟཾ – ‘‘ཨཊྛམཾ བྷཝཾ ནིབྦཏྟེཡྻ – ནེཏཾ ཋཱནཾ ཝིཛྫཏཱི’’ཏི.

ཨེཀིསྶཱ ལོཀདྷཱཏུཡཱཏི དསསཧསྶིལོཀདྷཱཏུཡཱ. ཏཱིཎི ཧི ཁེཏྟཱནི – ཛཱཏིཁེཏྟཾ, ཨཱཎཱཁེཏྟཾ, ཝིསཡཀྑེཏྟནྟི. ཏཏྠ ‘ཛཱཏིཀྑེཏྟཾ’ ནཱམ དསསཧསྶིལོཀདྷཱཏུ. སཱ ཧི ཏཐཱགཏསྶ མཱཏུཀུཙྪིཨོཀྐམནཀཱལེ, ནིཀྑམནཀཱལེ, སམྦོདྷིཀཱལེ, དྷམྨཙཀྐཔཝཏྟནེ, ཨཱཡུསངྑཱརཝོསྶཛྫནེ, པརིནིབྦཱནེ ཙ ཀམྤཏི. ཀོཊིསཏསཧསྶཙཀྐཝཱལ༹ཾ པན ‘ཨཱཎཱཁེཏྟཾ’ ནཱམ. ཨཱཊཱནཱཊིཡམོརཔརིཏྟདྷཛགྒཔརིཏྟརཏནཔརིཏྟཱདཱིནཉྷི ¶ ཨེཏྠ ཨཱཎཱ ཝཏྟཏི. ‘ཝིསཡཁེཏྟསྶ’ པན པརིམཱཎཾ ནཏྠི. བུདྡྷཱནཉྷི ‘‘ཡཱཝཏཀཾ ཉཱཎཾ ཏཱཝཏཀཾ ཉེཡྻཾ, ཡཱཝཏཀཾ ཉེཡྻཾ ཏཱཝཏཀཾ ཉཱཎཾ ¶ , ཉཱཎཔརིཡནྟིཀཾ ཉེཡྻཾ, ཉེཡྻཔརིཡནྟིཀཾ ཉཱཎ’’ནྟི (པཊི. མ. ༣.༥) ཝཙནཏོ ཨཝིསཡོ ནཱམ ནཏྠི.

ཨིམེསུ པན ཏཱིསུ ཁེཏྟེསུ, ཋཔེཏྭཱ ཨིམཾ ཙཀྐཝཱལ༹ཾ, ཨཉྙསྨིཾ ཙཀྐཝཱལེ༹ བུདྡྷཱ ཨུཔྤཛྫནྟཱིཏི སུཏྟཾ ནཏྠི, ན ཨུཔྤཛྫནྟཱིཏི པན ཨཏྠི. ཏཱིཎི པིཊཀཱནི – ཝིནཡཔིཊཀཾ, སུཏྟནྟཔིཊཀཾ, ཨབྷིདྷམྨཔིཊཀནྟི. ཏིསྶོ སངྒཱིཏིཡོ – མཧཱཀསྶཔཏྠེརསྶ སངྒཱིཏི, ཡསཏྠེརསྶ སངྒཱིཏི, མོགྒལིཔུཏྟཏིསྶཏྠེརསྶ སངྒཱིཏཱིཏི. ཨིམཱ ཏིསྶོ སངྒཱིཏིཡོ ཨཱརུལ༹ྷེ ཏེཔིཊཀེ བུདྡྷཝཙནེ ཨིམཾ ཙཀྐཝཱལ༹ཾ མུཉྩིཏྭཱ ཨཉྙཏྠ བུདྡྷཱ ཨུཔྤཛྫནྟཱིཏི སུཏྟཾ ནཏྠི, ནུཔྤཛྫནྟཱིཏི པན ཨཏྠི.

ཨཔུབྦཾ ཨཙརིམནྟི ཨཔུརེ ཨཔཙྪཱ; ཨེཀཏོ ནུཔྤཛྫནྟི, པུརེ ཝཱ པཙྪཱ ཝཱ ཨུཔྤཛྫནྟཱིཏི ཝུཏྟཾ ཧོཏི. ཏཏྠ བོདྷིཔལླངྐེ ‘‘བོདྷིཾ ཨཔྤཏྭཱ ན ཨུཊྛཧིསྶཱམཱི’’ཏི ནིསིནྣཀཱལཏོ པཊྛཱཡ ཡཱཝ མཱཏུཀུཙྪིསྨིཾ པཊིསནྡྷིགྒཧཎཾ ཏཱཝ པུབྦེནྟི ན ཝེདིཏབྦཾ. བོདྷིསཏྟསྶ ཧི པཊིསནྡྷིགྒཧཎེ དསསཧསྶཙཀྐཝཱལ༹ཀམྤནེནེཝ ཛཱཏིཀྑེཏྟཔརིགྒཧོ ཀཏོ, ཨཉྙསྶ བུདྡྷསྶ ཨུཔྤཏྟི ནིཝཱརིཏཱ ཧོཏི. པརིནིབྦཱནཏོ པཊྛཱཡ ཙ ཡཱཝ སཱསཔམཏྟཱཔི དྷཱཏུཡོ ཏིཊྛནྟི ཏཱཝ པཙྪཱཏི ན ཝེདིཏབྦཾ. དྷཱཏཱུསུ ཧི ཋིཏཱསུ བུདྡྷཱ ཋིཏཱཝ ཧོནྟི. ཏསྨཱ ཨེཏྠནྟརེ ཨཉྙསྶ བུདྡྷསྶ ཨུཔྤཏྟི ནིཝཱརིཏཱཝ ཧོཏི, དྷཱཏུཔརིནིབྦཱནེ པན ཛཱཏེ ཨཉྙསྶ བུདྡྷསྶ ཨུཔྤཏྟི ན ནིཝཱརིཏཱ.

ཏཱིཎི ¶ ཧི ཨནྟརདྷཱནཱནི ནཱམ – པརིཡཏྟིཨནྟརདྷཱནཾ, པཊིཝེདྷཨནྟརདྷཱནཾ, པཊིཔཏྟིཨནྟརདྷཱནནྟི. ཏཏྠ ‘པརིཡཏྟཱི’ཏི ཏཱིཎི པིཊཀཱནི; ‘པཊིཝེདྷོ’ཏི སཙྩཔཊིཝེདྷོ; ‘པཊིཔཏྟཱི’ཏི པཊིཔདཱ. ཏཏྠ པཊིཝེདྷོ ཙ པཊིཔཏྟི ཙ ཧོཏིཔི ན ཧོཏིཔི. ཨེཀསྨིཉྷི ཀཱལེ པཊིཝེདྷཀརཱ བྷིཀྑཱུ བཧཱུ ཧོནྟི; ‘ཨེས བྷིཀྑུ པུཐུཛྫནོ’ཏི ཨངྒུལིཾ པསཱརེཏྭཱ དསྶེཏབྦོ ཧོཏི. ཨིམསྨིཾཡེཝ དཱིཔེ ཨེཀཝཱརཾ ཀིར པུཐུཛྫནབྷིཀྑུ ¶ ནཱམ ནཱཧོསི. པཊིཔཏྟིཔཱུརཀཱཔི ཀདཱཙི བཧཱུ ཧོནྟི, ཀདཱཙི ཨཔྤཱ. ཨིཏི པཊིཝེདྷོ ཙ པཊིཔཏྟི ཙ ཧོཏིཔི ན ཧོཏིཔི.

སཱསནཊྛིཏིཡཱ པན པརིཡཏྟིཡེཝ པམཱཎཾ. པཎྜིཏོ ཧི ཏེཔིཊཀཾ སུཏྭཱ དྭེཔི པཱུརེཏི. ཡཐཱ ཨམྷཱཀཾ བོདྷིསཏྟོ ཨཱལཱ༹རསྶ སནྟིཀེ པཉྩཱབྷིཉྙཱ སཏྟ ཙ སམཱཔཏྟིཡོ ནིབྦཏྟེཏྭཱ ནེཝསཉྙཱནཱསཉྙཱཡཏནསམཱཔཏྟིཡཱ པརིཀམྨཾ པུཙྪི, སོ ‘ན ཛཱནཱམཱི’ཏི ཨཱཧ; ཏཏོ ཨུདཀསྶ ¶ སནྟིཀཾ གནྟྭཱ ཨདྷིགཏཝིསེསཾ སཾསནྡེཏྭཱ ནེཝསཉྙཱནཱསཉྙཱཡཏནསྶ པརིཀམྨཾ པུཙྪི; སོ ཨཱཙིཀྑི; ཏསྶ ཝཙནསམནནྟརམེཝ མཧཱསཏྟོ ཏཾ སམྤཱདེསི; ཨེཝམེཝ པཉྙཝཱ བྷིཀྑུ པརིཡཏྟིཾ སུཏྭཱ དྭེཔི པཱུརེཏི. ཏསྨཱ པརིཡཏྟིཡཱ ཋིཏཱཡ སཱསནཾ ཋིཏཾ ཧོཏི. ཡདཱ པན སཱ ཨནྟརདྷཱཡཏི ཏདཱ པཋམཾ ཨབྷིདྷམྨཔིཊཀཾ ནསྶཏི. ཏཏྠ པཊྛཱནཾ སབྦཔཋམཾ ཨནྟརདྷཱཡཏི. ཨནུཀྐམེན པཙྪཱ དྷམྨསངྒཧོ. ཏསྨིཾ ཨནྟརཧིཏེ ཨིཏརེསུ དྭཱིསུ པིཊཀེསུ ཋིཏེསུ སཱསནཾ ཋིཏམེཝ ཧོཏི.

ཏཏྠ སུཏྟནྟཔིཊཀེ ཨནྟརདྷཱཡམཱནེ པཋམཾ ཨངྒུཏྟརནིཀཱཡོ ཨེཀཱདསཀཏོ པཊྛཱཡ ཡཱཝ ཨེཀཀཱ ཨནྟརདྷཱཡཏི. ཏདནནྟརཾ སཾཡུཏྟནིཀཱཡོ ཙཀྐཔེཡྻཱལཏོ པཊྛཱཡ ཡཱཝ ཨོགྷཏརཎཱ ཨནྟརདྷཱཡཏི. ཏདནནྟརཾ མཛ྄ཛྷིམནིཀཱཡོ ཨིནྡྲིཡབྷཱཝནཏོ པཊྛཱཡ ཡཱཝ མཱུལཔརིཡཱཡཱ ཨནྟརདྷཱཡཏི. ཏདནནྟརཾ དཱིགྷནིཀཱཡོ དསུཏྟརཏོ པཊྛཱཡ ཡཱཝ བྲཧྨཛཱལཱ ཨནྟརདྷཱཡཏི. ཨེཀིསྶཱཔི དྭིནྣམྤི གཱཐཱནཾ པུཙྪཱ ཨདྡྷཱནཾ གཙྪཏི; སཱསནཾ དྷཱརེཏུཾ ན སཀྐོཏི སབྷིཡཔུཙྪཱ (སུ. ནི. ༥༡༥ ཨཱདཡོ) ཝིཡ ཨཱལ༹ཝཀཔུཙྪཱ (སུ. ནི. ༡༨༣ ཨཱདཡོ; སཾ. ནི. ༡.༢༤༦) ཝིཡ ཙ. ཨེཏཱ ཀིར ཀསྶཔབུདྡྷཀཱལིཀཱ ཨནྟརཱ སཱསནཾ དྷཱརེཏུཾ ནཱསཀྑིཾསུ.

དྭཱིསུ པན པིཊཀེསུ ཨནྟརཧིཏེསུཔི ཝིནཡཔིཊཀེ ཋིཏེ སཱསནཾ ཏིཊྛཏི. པརིཝཱརཁནྡྷཀེསུ ཨནྟརཧིཏེསུ ཨུབྷཏོཝིབྷངྒེ ཋིཏེ ཋིཏམེཝ ཧོཏི. ཨུབྷཏོཝིབྷངྒེ ཨནྟརཧིཏེ མཱཏིཀཱཡ ¶ ཋིཏཱཡཔི ཋིཏམེཝ ཧོཏི. མཱཏིཀཱཡ ཨནྟརཧིཏཱཡ པཱཏིམོཀྑཔབྦཛྫཱཨུཔསམྤདཱསུ ཋིཏཱསུ སཱསནཾ ཏིཊྛཏི. ལིངྒཾ ཨདྡྷཱནཾ གཙྪཏི. སེཏཝཏྠསམཎཝཾསོ པན ཀསྶཔབུདྡྷཀཱལཏོ པཊྛཱཡ སཱསནཾ དྷཱརེཏུཾ ནཱསཀྑི. པཙྪིམཀསྶ པན སཙྩཔཊིཝེདྷཏོ པཙྪིམཀསྶ སཱིལབྷེདཏོ ཙ པཊྛཱཡ སཱསནཾ ཨོསཀྐིཏཾ ནཱམ ཧོཏི. ཏཏོ པཊྛཱཡ ཨཉྙསྶ བུདྡྷསྶ ཨུཔྤཏྟི ན ཝཱརིཏཱ.

ཏཱིཎི ¶ པརིནིབྦཱནཱནི ནཱམ – ཀིལེསཔརིནིབྦཱནཾ, ཁནྡྷཔརིནིབྦཱནཾ, དྷཱཏུཔརིནིབྦཱནནྟི. ཏཏྠ ‘ཀིལེསཔརིནིབྦཱནཾ’ བོདྷིཔལླངྐེ ཨཧོསི, ‘ཁནྡྷཔརིནིབྦཱནཾ’ ཀུསིནཱརཱཡཾ, ‘དྷཱཏུཔརིནིབྦཱནཾ’ ཨནཱགཏེ བྷཝིསྶཏི. སཱསནསྶ ཀིར ཨོསཀྐནཀཱལེ ¶ ཨིམསྨིཾ ཏམྦཔཎྞིདཱིཔེ དྷཱཏུཡོ སནྣིཔཏིཏྭཱ མཧཱཙེཏིཡཾ གམིསྶནྟི, མཧཱཙེཏིཡཏོ ནཱགདཱིཔེ རཱཛཱཡཏནཙེཏིཡཾ, ཏཏོ མཧཱབོདྷིཔལླངྐཾ གམིསྶནྟི. ནཱགབྷཝནཏོཔི དེཝལོཀཏོཔི བྲཧྨལོཀཏོཔི དྷཱཏུཡོ མཧཱབོདྷིཔལླངྐམེཝ གམིསྶནྟི. སཱསཔམཏྟཱཔི དྷཱཏུ ན ཨནྟརཱ ནསྶིསྶཏི. སབྦཱ དྷཱཏུཡོ མཧཱབོདྷིཔལླངྐེ རཱསིབྷཱུཏཱ སུཝཎྞཀྑནྡྷོ ཝིཡ ཨེཀགྷནཱ ཧུཏྭཱ ཚབྦཎྞརཾསིཡོ ཝིསྶཛྫེསྶནྟི. ཏཱ དསསཧསྶིལོཀདྷཱཏུཾ ཕརིསྶནྟི. ཏཏོ དསསཧསྶཙཀྐཝཱལ༹དེཝཏཱ སནྣིཔཏིཏྭཱ ‘‘ཨཛྫ སཏྠཱ པརིནིབྦཱཏི, ཨཛྫ སཱསནཾ ཨོསཀྐཏི, པཙྪིམདསྶནཾ དཱནི ཨིདཾ ཨམྷཱཀ’’ནྟི དསབལསྶ པརིནིབྦུཏདིཝསཏོ མཧནྟཏརཾ ཀཱརུཉྙཾ ཀརིསྶནྟི. ཋཔེཏྭཱ ཨནཱགཱམིཁཱིཎཱསཝེ ཨཝསེསཱ སཀབྷཱཝེན སནྡྷཱརེཏུཾ ན སཀྑིསྶནྟི. དྷཱཏཱུསུ ཏེཛོདྷཱཏུ ཨུཊྛཧིཏྭཱ ཡཱཝ བྲཧྨལོཀཱ ཨུགྒཙྪིསྶཏི. སཱསཔམཏྟཱཡཔི དྷཱཏུཡཱ སཏི ཨེཀཛཱལཱཝ བྷཝིསྶཏི; དྷཱཏཱུསུ པརིཡཱདཱནཾ གཏཱསུ པཙྪིཛྫིསྶཏི. ཨེཝཾ མཧནྟཾ ཨཱནུབྷཱཝཾ དསྶེཏྭཱ དྷཱཏཱུསུ ཨནྟརཧིཏཱསུ སཱསནཾ ཨནྟརཧིཏཾ ནཱམ ཧོཏི. ཡཱཝ ཨེཝཾ ན ཨནྟརདྷཱཡཏི ཏཱཝ ཨཙརིམཾ ནཱམ ཧོཏི. ཨེཝཾ ཨཔུབྦཾ ཨཙརིམཾ ཨུཔྤཛྫེཡྻུཾ – ནེཏཾ ཋཱནཾ ཝིཛྫཏི.

ཀསྨཱ པན ཨཔུབྦཾ ཨཙརིམཾ ན ཨུཔྤཛྫནྟཱིཏི? ཨནཙྪརིཡཏྟཱ. བུདྡྷཱ ཧི ཨཙྪརིཡམནུསྶཱ, ཡཐཱཧ – ‘‘ཨེཀཔུགྒལོ, བྷིཀྑཝེ, ལོཀེ ཨུཔཛྫམཱནོ ཨུཔྤཛྫཏི ཨཙྪརིཡམནུསྶོ. ཀཏམོ ཨེཀཔུགྒལོ? ཏཐཱགཏོ, བྷིཀྑཝེ, ཨརཧཾ སམྨཱསམྦུདྡྷོ’’ཏི (ཨ. ནི. ༡.༡༧༢). ཡདི ཙ དྭེ ཝཱ ཙཏྟཱརོ ཝཱ ཨཊྛ ཝཱ སོལ༹ས ཝཱ ཨེཀཏོ ཨུཔྤཛྫེཡྻུཾ, ན ཨཙྪརིཡཱ བྷཝེཡྻུཾ. ཨེཀསྨིཉྷི ཝིཧཱརེ དྭིནྣཾ ཙེཏིཡཱནམྤི ལཱབྷསཀྐཱརོ ཨུལཱ༹རོ ན ཧོཏི, བྷིཀྑཱུཔི བཧུཏཱཡ ན ཨཙྪརིཡཱ ཛཱཏཱ, ཨེཝཾ བུདྡྷཱཔི བྷཝེཡྻུཾ; ཏསྨཱ ནུཔྤཛྫནྟི. དེསནཱཡ ¶ ¶ ཙ ཝིསེསཱབྷཱཝཏོ. ཡཉྷི སཏིཔཊྛཱནཱདིབྷེདཾ དྷམྨཾ ཨེཀོ དེསེཏི, ཨཉྙེན ཨུཔྤཛྫིཏྭཱཔི སོཝ དེསེཏབྦོ སིཡཱ. ཏཏོ ཨནཙྪརིཡོ སིཡཱ. ཨེཀསྨིཾ པན དྷམྨཾ དེསེནྟེ དེསནཱཔི ཨཙྪརིཡཱ ཧོཏི. ཝིཝཱདབྷཱཝཏོ ཙ. བཧཱུསུ ཙ བུདྡྷེསུ ཨུཔྤནྣེསུ བཧཱུནཾ ཨཱཙརིཡཱནཾ ཨནྟེཝཱསིཀཱ ཝིཡ ‘ཨམྷཱཀཾ བུདྡྷོ པཱསཱདིཀོ, ཨམྷཱཀཾ བུདྡྷོ མདྷུརསྶརོ ལཱབྷཱི པུཉྙཝཱ’ཏི ཝིཝདེཡྻུཾ; ཏསྨཱཔི ཨེཝཾ ནུཔྤཛྫནྟི.

ཨཔིཙེཏཾ ¶ ཀཱརཎཾ མིལིནྡརཉྙཱ པུཊྛེན ནཱགསེནཏྠེརེན ཝིཏྠཱརིཏམེཝ. ཝུཏྟཉྷི ཏཏྠ (མི. པ. ༥.༡.༡) –

‘‘བྷནྟེ ནཱགསེན, བྷཱསིཏམྤེཏཾ བྷགཝཏཱ – ‘‘ཨཊྛཱནམེཏཾ, བྷིཀྑཝེ, ཨནཝཀཱསོ ཡཾ ཨེཀིསྶཱ ལོཀདྷཱཏུཡཱ དྭེ ཨརཧནྟོ སམྨཱསམྦུདྡྷཱ ཨཔུབྦཾ ཨཙརིམཾ ཨུཔྤཛྫེཡྻུཾ – ནེཏཾ ཋཱནཾ ཝིཛྫཏཱི’’ཏི (ཨ. ནི. ༡.༢༧༧; མ. ནི. ༣.༡༢༩). དེསེནྟཱ ཙ, བྷནྟེ ནཱགསེན, སབྦེཔི ཏཐཱགཏཱ སཏྟཏིཾས བོདྷིཔཀྑིཡདྷམྨེ དེསེནྟི, ཀཐཡམཱནཱ ཙ ཙཏྟཱརི ཨརིཡསཙྩཱནི ཀཐེནྟི, སིཀྑཱཔེནྟཱ ཙ ཏཱིསུ སིཀྑཱསུ སིཀྑཱཔེནྟི, ཨནུསཱསམཱནཱ ཙ ཨཔྤམཱདཔཊིཔཏྟིཡཾ ཨནུསཱསནྟི. ཡདི, བྷནྟེ ནཱགསེན, སབྦེསམྤི ཏཐཱགཏཱནཾ ཨེཀཱ དེསནཱ ཨེཀཱ ཀཐཱ ཨེཀཱ སིཀྑཱ ཨེཀཱནུསིཊྛི, ཀེན ཀཱརཎེན དྭེ ཏཐཱགཏཱ ཨེཀཀྑཎེ ནུཔྤཛྫནྟི? ཨེཀེནཔི ཏཱཝ བུདྡྷུཔྤཱདེན ཨཡཾ ལོཀོ ཨོབྷཱསཛཱཏོ. ཡདི དུཏིཡོ བུདྡྷོ བྷཝེཡྻ, དྭིནྣཾ པབྷཱཡ ཨཡཾ ལོཀོ བྷིཡྻོསོ མཏྟཱཡ ཨོབྷཱསཛཱཏོ བྷཝེཡྻ. ཨོཝདནྟཱ ཙ དྭེ ཏཐཱགཏཱ སུཁཾ ཨོཝདེཡྻུཾ, ཨནུསཱསམཱནཱ ཙ སུཁཾ ཨནུསཱསེཡྻུཾ. ཏཏྠ མེ ཀཱརཎཾ དསྶེཧི ཡཐཱཧཾ ནིསྶཾསཡོ བྷཝེཡྻ’’ནྟི.

‘‘ཨཡཾ, མཧཱརཱཛ, དསསཧསྶཱི ལོཀདྷཱཏུ ཨེཀབུདྡྷདྷཱརཎཱི, ཨེཀསྶེཝ ཏཐཱགཏསྶ གུཎཾ དྷཱརེཏི. ཡདི དུཏིཡོ བུདྡྷོ ཨུཔྤཛྫེཡྻ, ནཱཡཾ དསསཧསྶཱི ལོཀདྷཱཏུ དྷཱརེཡྻ, ཙལེཡྻ ཀམྤེཡྻ ནམེཡྻ ཨོནམེཡྻ ཝིནམེཡྻ ཝིཀིརེཡྻ ཝིདྷམེཡྻ ཝིདྡྷཾསེཡྻ, ན ཋཱནམུཔགཙྪེཡྻ.

‘‘ཡཐཱ, མཧཱརཱཛ, ནཱཝཱ ཨེཀཔུརིསསནྡྷཱརཎཱི བྷཝེཡྻ, ཨེཀསྨིཾ པུརིསེ ཨབྷིརཱུལ༹ྷེ སཱ ¶ ནཱཝཱ སམུཔཱདིཀཱ བྷཝེཡྻ. ཨཐ དུཏིཡོ པུརིསོ ཨཱགཙྪེཡྻ ¶ ཏཱདིསོ ཨཱཡུནཱ ཝཎྞེན ཝཡེན པམཱཎེན ཀིསཐཱུལེན སབྦངྒཔཙྩངྒེན. སོ ཏཾ ནཱཝཾ ཨབྷིརཱུཧེཡྻ. ཨཔིནུ སཱ, མཧཱརཱཛ, ནཱཝཱ དྭིནྣམྤི དྷཱརེཡྻཱ’’ཏི? ‘‘ན ཧི, བྷནྟེ, ཙལེཡྻ ཀམྤེཡྻ ནམེཡྻ ཨོནམེཡྻ ཝིནམེཡྻ ཝིཀིརེཡྻ ཝིདྷམེཡྻ ཝིདྡྷཾསེཡྻ, ན ཋཱནམུཔགཙྪེཡྻ, ཨོསཱིདེཡྻ ཨུདཀེ’’ཏི ¶ . ‘‘ཨེཝམེཝ ཁོ, མཧཱརཱཛ, ཨཡཾ དསསཧསྶཱི ལོཀདྷཱཏུ ཨེཀབུདྡྷདྷཱརཎཱི ཨེཀསྶེཝ ཏཐཱགཏསྶ གུཎཾ དྷཱརེཏི. ཡདི དུཏིཡོ བུདྡྷོ ཨུཔྤཛྫེཡྻ, ནཱཡཾ དསསཧསྶཱི ལོཀདྷཱཏུ དྷཱརེཡྻ, ཙལེཡྻ…པེ… ན ཋཱནམུཔགཙྪེཡྻ.

‘‘ཡཐཱ ཝཱ པན, མཧཱརཱཛ, པུརིསོ ཡཱཝདཏྠཾ བྷོཛནཾ བྷུཉྫེཡྻ ཚཱདེནྟཾ ཡཱཝཀཎྛམབྷིཔཱུརཡིཏྭཱ. སོ ཏཏོ པཱིཎིཏོ པརིཔུཎྞོ ནིརནྟརོ ཏནྡཱིགཏོ ཨནོནམིཏདཎྜཛཱཏོ པུནདེཝ ཏཏྟཀཾ བྷོཛནཾ བྷུཉྫེཡྻ. ཨཔིནུ ཁོ སོ, མཧཱརཱཛ, པུརིསོ སུཁིཏོ བྷཝེཡྻཱ’’ཏི? ‘‘ན ཧི, བྷནྟེ, སཀིཾ བྷུཏྟོཝ མརེཡྻཱ’’ཏི. ཨེཝམེཝ ཁོ, མཧཱརཱཛ, ཨཡཾ དསསཧསྶཱི ལོཀདྷཱཏུ ཨེཀབུདྡྷདྷཱརཎཱི…པེ… ན ཋཱནམུཔགཙྪེཡྻཱ’’ཏི.

‘‘ཀིཾ ནུ ཁོ, བྷནྟེ ནཱགསེན, ཨཏིདྷམྨབྷཱརེན པཐཝཱི ཙལཏཱི’’ཏི? ‘‘ཨིདྷ, མཧཱརཱཛ, དྭེ སཀཊཱ རཏནཔརིཔཱུརིཏཱ བྷཝེཡྻུཾ ཡཱཝསྨཱ མུཁསམཱ. ཨེཀ སཀཊཏོ རཏནཾ གཧེཏྭཱ ཨེཀམྷི སཀཊེ ཨཱཀིརེཡྻུཾ. ཨཔིནུ ཏཾ, མཧཱརཱཛ, སཀཊཾ དྭིནྣམྤི སཀཊཱནཾ རཏནཾ དྷཱརེཡྻཱ’’ཏི? ‘‘ན ཧི, བྷནྟེ, ནཱབྷིཔི ཏསྶ ཙལེཡྻ, ཨརཱཔི ཏསྶ བྷིཛྫེཡྻུཾ, ནེམིཔི ཏསྶ ཨོཔཏེཡྻ, ཨཀྑོཔི ཏསྶ བྷིཛྫེཡྻཱ’’ཏི. ‘‘ཀིནྣུ ཁོ, མཧཱརཱཛ, ཨཏིརཏནབྷཱརེན སཀཊཾ བྷིཛྫཏཱི’’ཏི? ‘‘ཨཱམ, བྷནྟེ’’ཏི. ‘‘ཨེཝམེཝ ཁོ, མཧཱརཱཛ, ཨཏིདྷམྨབྷཱརེན པཐཝཱི ཙལཏཱིཏི.

‘‘ཨཔིཙ, མཧཱརཱཛ, ཨིམཾ ཀཱརཎཾ བུདྡྷབལཔརིདཱིཔནཱཡ ཨོསཱརིཏཾ. ཨཉྙམྤི ཏཏྠ པཏིརཱུཔཾ ཀཱརཎཾ སུཎོཧི ཡེན ཀཱརཎེན དྭེ སམྨཱསམྦུདྡྷཱ ཨེཀཀྑཎེ ནུཔྤཛྫནྟི. ཡདི, མཧཱརཱཛ, དྭེ སམྨཱསམྦུདྡྷཱ ཨེཀཀྑཎེ ཨུཔྤཛྫེཡྻུཾ, པརིསཱཡ ཝིཝཱདོ ཨུཔྤཛྫེཡྻ – ‘ཏུམྷཱཀཾ བུདྡྷོ, ཨམྷཱཀཾ བུདྡྷོ’ཏི ཨུབྷཏོཔཀྑཛཱཏཱ བྷཝེཡྻུཾ. ཡཐཱ, མཧཱརཱཛ, དྭིནྣཾ བལཝཱམཙྩཱནཾ པརིསཱཡ ཝིཝཱདོ ཨུཔྤཛྫེཡྻ – ‘ཏུམྷཱཀཾ ཨམཙྩོ, ཨམྷཱཀཾ ¶ ཨམཙྩོ’ཏི ཨུབྷཏོཔཀྑཛཱཏཱ ཧོནྟི; ཨེཝམེཝ ཁོ, མཧཱརཱཛ, ཡདི དྭེ སམྨཱསམྦུདྡྷཱ ཨེཀཀྑཎེ ¶ ཨུཔྤཛྫེཡྻུཾ, ཏེསཾ པརིསཱཡ ཝིཝཱདོ ཨུཔྤཛྫེཡྻ ¶ – ‘ཏུམྷཱཀཾ བུདྡྷོ, ཨམྷཱཀཾ བུདྡྷོ’ཏི ཨུབྷཏོཔཀྑཛཱཏཱ བྷཝེཡྻུཾ. ཨིདཾ ཏཱཝ མཧཱརཱཛ ཨེཀཾ ཀཱརཎཾ ཡེན ཀཱརཎེན དྭེ སམྨཱསམྦུདྡྷཱ ཨེཀཀྑཎེ ནུཔྤཛྫནྟི.

‘‘ཨཔརམྤི ཨུཏྟརིཾ ཀཱརཎཾ སུཎོཧི ཡེན ཀཱརཎེན དྭེ སམྨཱསམྦུདྡྷཱ ཨེཀཀྑཎེ ནུཔྤཛྫནྟི. ཡདི, མཧཱརཱཛ, དྭེ སམྨཱསམྦུདྡྷཱ ཨེཀཀྑཎེ ཨུཔྤཛྫེཡྻུཾ ‘ཨགྒོ བུདྡྷོ’ཏི ཡཾ ཝཙནཾ ཏཾ མིཙྪཱ བྷཝེཡྻ, ‘ཛེཊྛོ བུདྡྷོ’ཏི ‘སེཊྛོ བུདྡྷོ’ཏི ‘ཝིསིཊྛོ བུདྡྷོ’ཏི ‘ཨུཏྟམོ བུདྡྷོ’ཏི ‘པཝརོ བུདྡྷོ’ཏི ‘ཨསམོ བུདྡྷོ’ཏི ‘ཨསམསམོ བུདྡྷོ’ཏི ‘ཨཔྤཊིསམོ བུདྡྷོ’ཏི ‘ཨཔྤཊིབྷཱགཱི བུདྡྷོ’ཏི ‘ཨཔྤཊིཔུགྒལོ བུདྡྷོ’ཏི ཡཾ ཝཙནཾ ཏཾ མིཙྪཱ བྷཝེཡྻ. ཨིདམྤི ཁོ ཏྭཾ, མཧཱརཱཛ, ཀཱརཎཾ ཏཐཏོ སམྤཊིཙྪ ཡེན ཀཱརཎེན དྭེ སམྨཱསམྦུདྡྷཱ ཨེཀཀྑཎེ ནུཔྤཛྫནྟི.

‘‘ཨཔིཙ, མཧཱརཱཛ, བུདྡྷཱནཾ བྷགཝནྟཱནཾ སབྷཱཝཔཀཏི ཨེསཱ ཡཾ ཨེཀོཡེཝ བུདྡྷོ ལོཀེ ཨུཔྤཛྫཏི. ཀསྨཱ ཀཱརཎཱ? མཧནྟཏྟཱ སབྦཉྙུབུདྡྷགུཎཱནཾ. ཨཉྙམྤི, མཧཱརཱཛ, ཡཾ ལོཀེ མཧནྟཾ ཏཾ ཨེཀཾཡེཝ ཧོཏི. པཐཝཱི, མཧཱརཱཛ, མཧནྟཱ, སཱ ཨེཀཱཡེཝ; སཱགརོ མཧནྟོ, སོ ཨེཀོཡེཝ; སིནེརུ གིརིརཱཛཱ མཧནྟོ, སོ ཨེཀོཡེཝ; ཨཱཀཱསོ མཧནྟོ, སོ ཨེཀོཡེཝ; སཀྐོ མཧནྟོ, སོ ཨེཀོཡེཝ; མཧཱབྲཧྨཱ མཧནྟོ, སོ ཨེཀོཡེཝ; ཏཐཱགཏོ ཨརཧཾ སམྨཱསམྦུདྡྷོ མཧནྟོ, སོ ཨེཀོཡེཝ ལོཀསྨིཾ. ཡཏྠ ཏེ ཨུཔྤཛྫནྟི ཏཏྠ ཨཉྙེསཾ ཨོཀཱསོ ན ཧོཏི. ཏསྨཱ, མཧཱརཱཛ, ཏཐཱགཏོ ཨརཧཾ སམྨཱསམྦུདྡྷོ ཨེཀོཡེཝ ལོཀེ ཨུཔྤཛྫཏཱི’’ཏི.

‘‘སུཀཐིཏོ, བྷནྟེ ནཱགསེན, པཉྷོ ཨོཔམྨེཧི ཀཱརཎེཧཱི’’ཏི (མི. པ. ༥.༡.༡).

ཨེཀིསྶཱ ¶ ལོཀདྷཱཏུཡཱཏི ཨེཀསྨིཾ ཙཀྐཝཱལེ༹. ཧེཊྛཱ ཨིམིནཱཝ པདེན དས ཙཀྐཝཱལ༹སཧསྶཱནི གཧིཏཱནི. ཏཱནིཔི ཨེཀཙཀྐཝཱལེ༹ནེཝ པརིཙྪིནྡིཏུཾ ཝཊྚནྟི. བུདྡྷཱ ཧི ཨུཔྤཛྫམཱནཱ ཨིམསྨིཾཡེཝ ཙཀྐཝཱལེ༹ ཨུཔྤཛྫནྟི; ཨུཔྤཛྫནཊྛཱནེ པན ཝཱརིཏེ ཨིཏོ ཨཉྙེསུ ཙཀྐཝཱལེ༹སུ ¶ ན ཨུཔྤཛྫནྟཱིཏི ཝཱརིཏམེཝ ཧོཏི. ཨཔུབྦཾ ཨཙརིམནྟི ཨེཏྠ ཙཀྐརཏནཔཱཏུབྷཱཝཏོ པུབྦེ པུབྦཾ, ཏསྶེཝ ཨནྟརདྷཱནཏོ པཙྪཱ ཙརིམཾ. ཏཏྠ དྭིདྷཱ ཙཀྐརཏནསྶ ཨནྟརདྷཱནཾ ཧོཏི – ཙཀྐཝཏྟིནོ ཀཱལཀིརིཡཱཡ ཝཱ པབྦཛྫཱཡ ཝཱ. ཨནྟརདྷཱཡམཱནཉྩ པན ཏཾ ཀཱལཀིརིཡཏོ ཝཱ པབྦཛྫཏོ ཝཱ སཏྟམེ ¶ དིཝསེ ཨནྟརདྷཱཡཏི. ཏཏོ པརཾ ཙཀྐཝཏྟིནོ པཱཏུབྷཱཝོ ཨཝཱརིཏོ. ཀསྨཱ པན ཨེཀཙཀྐཝཱལེ༹ དྭེ ཙཀྐཝཏྟིནོ ནུཔྤཛྫནྟཱིཏི? ཝིཝཱདུཔཙྪེདཏོ ཨནཙྪརིཡབྷཱཝཏོ ཙཀྐརཏནསྶ མཧཱནུབྷཱཝཏོ ཙ. དྭཱིསུ ཧི ཨུཔྤཛྫནྟེསུ ‘ཨམྷཱཀཾ རཱཛཱ མཧནྟོ, ཨམྷཱཀཾ རཱཛཱ མཧནྟོ’ཏི ཝིཝཱདོ ཨུཔྤཛྫེཡྻ. ‘ཨེཀསྨིཾ དཱིཔེ ཙཀྐཝཏྟཱི, ཨེཀསྨིཾ དཱིཔེ ཙཀྐཝཏྟཱི’ཏི ཙ ཨནཙྪརིཡོ བྷཝེཡྻ. ཡོ ཙཱཡཾ ཙཀྐརཏནསྶ དྭིསཧསྶདཱིཔཔརིཝཱརེསུ ཙཏཱུསུ མཧཱདཱིཔེསུ ཨིསྶརིཡཱནུཔྤདཱནསམཏྠོ མཧཱནུབྷཱཝོ, སོ པརིཧཱཡེཡྻ. ཨིཏི ཝིཝཱདུཔཙྪེདཏོ ཨནཙྪརིཡབྷཱཝཏོ ཙཀྐརཏནསྶ མཧཱནུབྷཱཝཏོ ཙ ན ཨེཀཙཀྐཝཱལེ༹ དྭེ ཨུཔྤཛྫནྟི.

ཡཾ ཨིཏྠོ ཨརཧཾ ཨསྶ སམྨཱསམྦུདྡྷོཏི ཨེཏྠ ཏིཊྛཏུ ཏཱཝ སབྦཉྙུགུཎེ ནིབྦཏྟེཏྭཱ ལོཀཏྟཱརཎསམཏྠོ བུདྡྷབྷཱཝོ, པཎིདྷཱནམཏྟམྤི ཨིཏྠིཡཱ ན སམྤཛྫཏི.

‘‘མནུསྶཏྟཾ ལིངྒསམྤཏྟི, ཧེཏུ སཏྠཱརདསྶནཾ;

པབྦཛྫཱ གུཎསམྤཏྟི, ཨདྷིཀཱརོ ཙ ཚནྡཏཱ;

ཨཊྛདྷམྨསམོདྷཱནཱ, ཨབྷིནཱིཧཱརོ སམིཛ྄ཛྷཏཱི’’ཏི. (བུ. ཝཾ. ༢.༥༩);

ཨིམཱནི ཧི པཎིདྷཱནསམྤཏྟིཀཱརཎཱནི. ཨིཏི པཎིདྷཱནམྤི སམྤཱདེཏུཾ ཨསམཏྠཱཡ ཨིཏྠིཡཱ ཀུཏོ བུདྡྷབྷཱཝོཏི ‘‘ཨཊྛཱནམེཏཾ, ཨནཝཀཱསོ ཡཾ ཨིཏྠཱི ཨརཧཾ ཨསྶ སམྨཱསམྦུདྡྷོ’’ཏི ཝུཏྟཾ. སབྦཱཀཱརཔརིཔཱུརོ ཝཱ པུཉྙུསྶཡོ སབྦཱཀཱརཔརིཔཱུརམེཝ ཨཏྟབྷཱཝཾ ནིབྦཏྟེཏཱིཏི པུརིསོཝ ཨརཧཾ ཧོཏི སམྨཱསམྦུདྡྷོ.

ཡཾ ¶ ཨིཏྠཱི རཱཛཱ ཨསྶ ཙཀྐཝཏྟཱིཏིཨཱདཱིསུཔི ཡསྨཱ ཨིཏྠིཡཱ ཀོསོཧིཏཝཏྠགུཡ྄ཧཱདཱིནཾ ཨབྷཱཝེན ལཀྑཎཱནི ན པརིཔཱུརེནྟི, ཨིཏྠིརཏནབྷཱཝེན སཏྟརཏནསམངྒིཏཱ ན སམྤཛྫཏི, སབྦམནུསྶེཧི ཙ ཨདྷིཀོ ཨཏྟབྷཱཝོ ན ཧོཏི, ཏསྨཱ ‘‘ཨཊྛཱནམེཏཾ ཨནཝཀཱསོ ཡཾ ཨིཏྠཱི རཱཛཱ ཨསྶ ཙཀྐཝཏྟཱི’’ཏི ཝུཏྟཾ. ཡསྨཱ ཙ སཀྐཏྟཱདཱིནིཔི ཏཱིཎི ཋཱནཱནི ཨུཏྟམཱནི, ཨིཏྠིལིངྒཉྩ ཧཱིནཾ ¶ , ཏསྨཱ ཏསྶཱ སཀྐཏྟཱདཱིནིཔི པཊིསིདྡྷཱནི. ནནུ ཙ ཡཐཱ ཨིཏྠིལིངྒཾ ཨེཝཾ པུརིསལིངྒམྤི བྲཧྨལོཀེ ནཏྠི, ཏསྨཱ ‘‘ཡཾ པུརིསོ བྲཧྨཏྟཾ ཀཱརེཡྻ – ཋཱནམེཏཾ ཝིཛྫཏཱི’’ཏིཔི ན ཝཏྟབྦཾ སིཡཱཏི? ནོ ན ཝཏྟབྦཾ. ཀསྨཱ? ཨིདྷ པུརིསསྶ ཏཏྠ ནིབྦཏྟནཏོ. བྲཧྨཏྟནྟི ཧི མཧཱབྲཧྨཏྟཾ ཨདྷིཔྤེཏཾ. ཨིཏྠཱི ཙ ཨིདྷ ཛྷཱནཾ བྷཱཝེཏྭཱ ¶ ཀཱལཾ ཀཏྭཱ བྲཧྨཔཱརིསཛྫཱནཾ སཧབྱཏཾ ཨུཔཔཛྫཏི, ན མཧཱབྲཧྨཱནཾ. པུརིསོ པན ཏཏྠ ན ཨུཔྤཛྫཏཱིཏི ན ཝཏྟབྦོ. སམཱནེཔི ཙེཏྠ ཨུབྷཡལིངྒཱབྷཱཝེ པུརིསསཎྛཱནཱཝ བྲཧྨཱནོ, ན ཨིཏྠིསཎྛཱནཱ. ཏསྨཱ སུཝུཏྟམེཝེཏཾ.

ཀཱཡདུཙྩརིཏསྶཱཏིཨཱདཱིསུ ཡཐཱ ནིམྦབཱིཛཀོསཱཏཀཱིབཱིཛཱདཱིནི མདྷུརཾ ཕལཾ ན ནིབྦཏྟེནྟི, ཨསཱཏཾ ཨམདྷུརམེཝ ནིབྦཏྟེནྟི, ཨེཝཾ ཀཱཡདུཙྩརིཏཱདཱིནི མདྷུརཾ ཝིཔཱཀཾ ན ནིབྦཏྟེནྟི, ཨམདྷུརམེཝ ནིབྦཏྟེནྟི. ཡཐཱ ཙ ཨུཙྪུབཱིཛསཱལིབཱིཛཱདཱིནི མདྷུརཾ སཱདྷུརསམེཝ ཕལཾ ནིབྦཏྟེནྟི, ན ཨསཱཏཾ ཀཊུཀཾ, ཨེཝཾ ཀཱཡསུཙརིཏཱདཱིནི མདྷུརམེཝ ཝིཔཱཀཾ ནིབྦཏྟེནྟི, ན ཨམདྷུརཾ. ཝུཏྟམྤི ཙེཏཾ –

‘‘ཡཱདིསཾ ཝཔཏེ བཱིཛཾ, ཏཱདིསཾ ཧརཏེ ཕལཾ;

ཀལྱཱཎཀཱརཱི ཀལྱཱཎཾ, པཱཔཀཱརཱི ཙ པཱཔཀནྟི. (སཾ. ནི. ༡.༢༥༦);

ཏསྨཱ ‘‘ཨཊྛཱནམེཏཾ ཨནཝཀཱསོ, ཡཾ ཀཱཡདུཙྩརིཏསྶཱ’’ཏིཨཱདི ཝུཏྟཾ.

ཀཱཡདུཙྩརིཏསམངྒཱིཏིཨཱདཱིསུ སམངྒཱིཏི པཉྩཝིདྷཱ སམངྒིཏཱ – ཨཱཡཱུཧནསམངྒིཏཱ, ཙེཏནཱསམངྒིཏཱ, ཀམྨསམངྒིཏཱ, ཝིཔཱཀསམངྒིཏཱ, ཨུཔཊྛཱནསམངྒིཏཱཏི. ཏཏྠ ཀུསལཱཀུསལཀམྨཱཡཱུཧནཀྑཎེ ‘ཨཱཡཱུཧནསམངྒིཏཱ’ ཝུཙྩཏི. ཏཐཱ ‘ཙེཏནཱསམངྒིཏཱ’. ཡཱཝ པན ཨརཧཏྟཾ ན པཱཔུཎནྟི ཏཱཝ སབྦེཔི སཏྟཱ པུབྦེ ཨུཔཙིཏཾ ཝིཔཱཀཱརཧཾ ཀམྨཾ སནྡྷཱཡ ཀམྨསམངྒིནོཏི ཝུཙྩནྟི – ཨེསཱ ‘ཀམྨསམངྒིཏཱ’. ‘ཝིཔཱཀསམངྒིཏཱ’ པན ཝིཔཱཀཀྑཎེཡེཝ ཝེདིཏབྦཱ. ཡཱཝ པན སཏྟཱ ཨརཧཏྟཾ ན པཱཔུཎནྟི ཏཱཝ ཏེསཾ ¶ ཏཏོ ཏཏོ ཙཝིཏྭཱ ནིརཡེ ཏཱཝ ཨུཔྤཛྫམཱནཱནཾ ཨགྒིཛཱལལོཧཀུམྦྷཱིཨཱདཱིཧི ཨུཔཊྛཱནཱཀཱརེཧི ནིརཡོ, གབྦྷསེཡྻཀཏྟཾ ཨཱཔཛྫམཱནཱནཾ མཱཏུཀུཙྪི, དེཝེསུ ཨུཔྤཛྫམཱནཱནཾ ཀཔྤརུཀྑཝིམཱནཱདཱིཧི ཨུཔཊྛཱནཱཀཱརེཧི དེཝལོཀོཏི ¶ ཨེཝཾ ཨུཔཔཏྟིནིམིཏྟཾ ཨུཔཊྛཱཏི. ཨིཏི ནེསཾ ཨིམིནཱ ཨུཔྤཏྟིནིམིཏྟཱུཔཊྛཱནེན ཨཔརིམུཏྟཏྟཱ ‘ཨུཔཊྛཱནསམངྒིཏཱ’ ནཱམ. སཱཝ ཙལཏི, སེསཱ ནིཙྩལཱ. ནིརཡེ ཧི ཨུཔཊྛིཏེཔི དེཝལོཀོ ཨུཔཊྛཱཏི; དེཝལོཀེ ཨུཔཊྛིཏེཔི ནིརཡོ ཨུཔཊྛཱཏི; མནུསྶལོཀེ ཨུཔཊྛིཏེཔི ཏིརཙྪཱནཡོནི ཨུཔཊྛཱཏི; ཏིརཙྪཱནཡོནིཡཱ ཙ ཨུཔཊྛིཏཱཡཔི མནུསྶལོཀོ ཨུཔཊྛཱཏིཡེཝ.

ཏཏྲིདཾ ¶ ཝཏྠུ – སོཎགིརིཔཱདེ ཀིར ཨཙེལཝིཧཱརེ སོཎཏྠེརོ ནཱམ ཨེཀོ དྷམྨཀཐིཀོ. ཏསྶ པིཏཱ སུནཁཝཱཛིཀོ ནཱམ ལུདྡཀོ ཨཧོསི. ཐེརོ ཏཾ པཊིབཱཧནྟོཔི སཾཝརེ ཋཔེཏུཾ ཨསཀྐོནྟོ ‘མཱ ནསྶི ཝརཱཀོ’ཏི མཧལླཀཀཱལེ ཨཀཱམཀཾ པབྦཱཛེསི. ཏསྶ གིལཱནསེཡྻཱཡ ནིཔནྣསྶ ནིརཡོ ཨུཔཊྛཱསི. སོཎགིརིཔཱདཏོ མཧནྟཱ མཧནྟཱ སུནཁཱ ཨཱགནྟྭཱ ཁཱདིཏུཀཱམཱ ཝིཡ སམྤརིཝཱརེསུཾ. སོ མཧཱབྷཡབྷཱིཏོ ‘‘ཝཱརེཧི, ཏཱཏ སོཎ! ཝཱརེཧི, ཏཱཏ སོཎཱ’’ཏི ཨཱཧ. ‘‘ཀིཾ མཧཱཐེརཱ’’ཏི? ‘‘ན པསྶསི, ཏཱཏཱ’’ཏི ཏཾ པཝཏྟིཾ ཨཱཙིཀྑི. སོཎཏྠེརོ ‘ཀཐཉྷི ནཱམ མཱདིསསྶ པིཏཱ ནིརཡེ ནིབྦཏྟིསྶཏི, པཏིཊྛཱཧམསྶ བྷཝིསྶཱམཱི’ཏི སཱམཎེརེཧི ནཱནཱཔུཔྥཱནི ཨཱཧརཱཔེཏྭཱ ཙེཏིཡངྒཎབོདྷིཡངྒཎེསུ མཱལཱསནྠཱརཔཱུཛཉྩ ཨཱསནཔཱུཛཉྩ ཀཱརེཏྭཱ པིཏརཾ མཉྩེན ཙེཏིཡངྒཎཾ ཧརིཏྭཱ མཉྩེ ནིཔཛྫཱཔེཏྭཱ ‘‘ཨཡཾ མེ, མཧཱཐེར, པཱུཛཱ ཏུམྷཱཀཾ ཨཏྠཱཡ ཀཏཱ; ‘ཨཡཾ མེ, བྷགཝཱ, དུགྒཏཔཎྞཱཀཱརོ’ཏི ཝཏྭཱ བྷགཝནྟཾ ཝནྡིཏྭཱ ཙིཏྟཾ པསཱདེཧཱི’’ཏི ཨཱཧ. སོ མཧཱཐེརོ པཱུཛཾ དིསྭཱ ཏཐཱཀརོནྟོ ཙིཏྟཾ པསཱདེསི. ཏཱཝདེཝསྶ དེཝལོཀོ ཨུཔཊྛཱསི, ནནྡཝནཙིཏྟལཏཱཝནམིསྶཀཝནཕཱརུསཀཝནཝིམཱནཱནི ཙེཝ དེཝནཱཊཀཱནི ཙ པརིཝཱརེཏྭཱ ཋིཏཱནི ཝིཡ ཨཧེསུཾ. སོ ‘‘ཨཔེཐ, སོཎ! ཨཔེཐ, སོཎཱ’’ཏི ཨཱཧ. ‘‘ཀིམིདཾ, མཧཱཐེརཱ’’ཏི? ‘‘ཨེཏཱ ཏེ, ཏཱཏ, མཱཏརོ ཨཱགཙྪནྟཱི’’ཏི. ‘ཐེརོ སགྒོ ཨུཔཊྛིཏོ མཧཱཐེརསྶཱ’ཏི ཙིནྟེསི ¶ . ཨེཝཾ ཨུཔཊྛཱནསམངྒིཏཱ ཙལཏཱིཏི ཝེདིཏབྦཱ. ཨེཏཱསུ སམངྒིཏཱསུ ཨིདྷ ཨཱཡཱུཧནཙེཏནཱཀམྨསམངྒིཏཱཝསེན ‘‘ཀཱཡདུཙྩརིཏསམངྒཱི’’ཏིཨཱདི ཝུཏྟཾ. སེསཾ སབྦཏྠ ཨུཏྟཱནཏྠམེཝཱཏི.

པཋམབལནིདྡེསཝཎྞནཱ.

དུཏིཡབལནིདྡེསོ

༨༡༠. དུཏིཡབལནིདྡེསེ ¶ གཏིསམྤཏྟིཔཊིབཱལ༹ྷཱནཱིཏི གཏིསམྤཏྟིཡཱ པཊིབཱཧིཏཱནི ནིཝཱརིཏཱནི པཊིསེདྷིཏཱནི. སེསཔདེསུཔི ཨེསེཝ ནཡོ. ཨེཏྠ ཙ གཏིསམྤཏྟཱིཏི སམྤནྣཱ གཏི དེཝལོཀོ ཙ མནུསྶལོཀོ ཙ. གཏིཝིཔཏྟཱིཏི ཝིཔནྣཱ གཏི ཙཏྟཱརོ ཨཔཱཡཱ. ཨུཔདྷིསམྤཏྟཱིཏི ཨཏྟབྷཱཝསམིདྡྷི. ཨུཔདྷིཝིཔཏྟཱིཏི ཧཱིནཨཏྟབྷཱཝཏཱ. ཀཱལསམྤཏྟཱིཏི སུརཱཛསུམནུསྶཀཱལསངྑཱཏོ ¶ སམྤནྣཀཱལོ. ཀཱལཝིཔཏྟཱིཏི དུརཱཛདུམནུསྶཀཱལསངྑཱཏོ ཝིཔནྣཀཱལོ. པཡོགསམྤཏྟཱིཏི སམྨཱཔཡོགོ. པཡོགཝིཔཏྟཱིཏི མིཙྪཱཔཡོགོ.

ཏཏྠ ཨེཀཙྩསྶ བཧཱུནི པཱཔཀམྨཱནི ཧོནྟི. ཏཱནི གཏིཝིཔཏྟིཡཾ ཋིཏསྶ ཝིཔཙྩེཡྻུཾ. སོ པན ཨེཀེན ཀལྱཱཎཀམྨེན གཏིསམྤཏྟིཡཾ དེཝེསུ ཝཱ མནུསྶེསུ ཝཱ ནིབྦཏྟོ. ཏཱདིསེ ཙ ཋཱནེ ཨཀུསལསྶ ཝཱརོ ནཏྠི, ཨེཀནྟཾ ཀུསལསྶེཝ ཝཱརོཏི. ཨེཝམསྶ ཏཱནི ཀམྨཱནི གཏིསམྤཏྟིཔཊིབཱལ༹ྷཱནི ན ཝིཔཙྩནྟཱིཏི པཛཱནཱཏི.

ཨཔརསྶཱཔི བཧཱུནི པཱཔཀམྨཱནི ཧོནྟི. ཏཱནི ཨུཔདྷིཝིཔཏྟིཡཾ ཋིཏསྶ ཝིཔཙྩེཡྻུཾ. སོ པན ཨེཀེན ཀལྱཱཎཀམྨེན ཨུཔདྷིསམྤཏྟིཡཾ ཋིཏོ སུསཎྛིཏངྒཔཙྩངྒོ ཨབྷིརཱུཔོ དསྶནཱིཡོ བྲཧྨཝཙྪསདིསོ. སཙེཔི དཱསིཡཱ ཀུཙྪིསྨིཾ དཱསཛཱཏོ ཧོཏི ‘ཨེཝརཱུཔོ ཨཏྟབྷཱཝོ ཀིལིཊྛཀམྨསྶ ནཱནུཙྪཝིཀོ’ཏི ཧཏྠིམེཎྜཨསྶབནྡྷཀགོཔཱལཀཀམྨཱདཱིནི ཏཾ ན ཀཱརེནྟི; སུཁུམཝཏྠཱནི ནིཝཱསཱཔེཏྭཱ བྷཎྜཱགཱརིཀཊྛཱནཱདཱིསུ ཋཔེནྟི. སཙེ ཨིཏྠཱི ཧོཏི, ཧཏྠིབྷཏྟཔཙནཱདཱིནི ན ཀཱརེནྟི; ཝཏྠཱལངྐཱརཾ དཏྭཱ སཡནཔཱལིཀཾ ཝཱ ནཾ ཀརོནྟི, སོམདེཝི ཝིཡ ཝལླབྷཊྛཱནེ ཝཱ ཋཔེནྟི. བྷཱཏིཀརཱཛཀཱལེ ཀིར གོམཾསཁཱདཀེ བཧུཛནེ གཧེཏྭཱ རཉྙོ ¶ དསྶེསུཾ. ཏེ ‘དཎྜཾ དཱཏུཾ སཀྐོཐཱ’ཏི པུཊྛཱ ‘ན སཀྐོམཱ’ཏི ཝདིཾསུ. ཨཐ ནེ རཱཛངྒཎེ སོདྷཀེ ཨཀཾསུ. ཏེསཾ ཨེཀཱ དྷཱིཏཱ ཨབྷིརཱུཔཱ དསྶནཱིཡཱ པཱསཱདིཀཱ. ཏཾ དིསྭཱ རཱཛཱ ཨནྟེཔུརཾ ཨབྷིནེཏྭཱ ཝལླབྷཊྛཱནེ ཋཔེསི. སེསཉཱཏཀཱཔི ཏསྶཱ ཨཱནུབྷཱཝེན སུཁཾ ཛཱིཝིཾསུ. ཏཱདིསསྨིཉྷི ཨཏྟབྷཱཝེ པཱཔཀམྨཱནིཔི ཝིཔཱཀཾ དཱཏུཾ ན སཀྐོནྟི. ཨེཝཾ ཨུཔདྷིསམྤཏྟིཔཊིབཱལ༹ྷཱནི ན ཝིཔཙྩནྟཱིཏི པཛཱནཱཏི.

ཨེཀསྶ བཧཱུནི པཱཔཀམྨཱནི ཧོནྟི. ཏཱནི ཀཱལཝིཔཏྟིཡཾ ཋིཏསྶ ཝིཔཙྩེཡྻུཾ. སོ པན ¶ ཨེཀེན ཀལྱཱཎཀམྨེན པཋམཀཔྤིཀཱནཾ ཝཱ ཙཀྐཝཏྟིརཉྙོ ཝཱ བུདྡྷཱནཾ ཝཱ ཨུཔྤཏྟིསམཡེ སུརཱཛསུམནུསྶཀཱལེ ནིབྦཏྟོ. ཏཱདིསེ ཙ ཀཱལེ ནིབྦཏྟསྶ ཨཀུསལསྶ ཝིཔཱཀཾ དཱཏུཾ ཨོཀཱསོ ནཏྠི, ཨེཀནྟཾ ཀུསལསྶེཝ ཨོཀཱསོཏི. ཨེཝཾ ཀཱལསམྤཏྟིཔཊིབཱལ༹ྷཱནི ན ཝིཔཙྩནྟཱིཏི པཛཱནཱཏི.

ཨཔརསྶཱཔི བཧཱུནི པཱཔཀམྨཱནི ཧོནྟི. ཏཱནི པཡོགཝིཔཏྟིཡཾ ¶ ཋིཏསྶ ཝིཔཙྩེཡྻུཾ. སོ པན ཨེཀེན ཀལྱཱཎཀམྨེན པཡོགསམྤཏྟིཡཾ ཋིཏོ པཱཎཱཏིཔཱཏཱདཱིཧི ཝིརཏོ ཀཱཡཝཙཱིམནོསུཙརིཏཱནི པཱུརེཏི. ཏཱདིསེ ཋཱནེ ཨཀུསལསྶ ཝིཔཙྩནོཀཱསོ ནཏྠི, ཨེཀནྟཾ ཀུསལསྶེཝ ཨོཀཱསོཏི. ཨེཝཾ པཡོགསམྤཏྟིཔཊིབཱལ༹ྷཱནི ན ཝིཔཙྩནྟཱིཏི པཛཱནཱཏི.

ཨཔརསྶཱཔི བཧཱུནི པཱཔཀམྨཱནི ཧོནྟི. ཏཱནི གཏིསམྤཏྟིཡཾ ཋིཏསྶ ན ཝིཔཙྩེཡྻུཾ. སོ པནེཀེན པཱཔཀམྨེན གཏིཝིཔཏྟིཡཾཡེཝ ནིབྦཏྟོ. ཏཏྠསྶ ཏཱནི ཀམྨཱནི ཨུཔགནྟྭཱ ཝཱརེན ཝཱརེན ཝིཔཱཀཾ དེནྟི – ཀཱལེན ནིརཡེ ནིབྦཏྟཱཔེནྟི, ཀཱལེན ཏིརཙྪཱནཡོནིཡཾ, ཀཱལེན པེཏྟིཝིསཡེ, ཀཱལེན ཨསུརཀཱཡེ, དཱིགྷེནཱཔི ཨདྡྷུནཱ ཨཔཱཡཏོ སཱིསཾ ཨུཀྑིཔིཏུཾ ན དེནྟི. ཨེཝཾ གཏིསམྤཏྟིཔཊིབཱཧིཏཏྟཱ ཝིཔཱཀཾ དཱཏུཾ ཨསཀྐོནྟཱནི གཏིཝིཔཏྟིཾ ཨཱགམྨ ཝིཔཙྩནྟཱིཏི པཛཱནཱཏི.

ཨཔརསྶཱཔི བཧཱུནི པཱཔཀམྨཱནི ཧོནྟི. ཏཱནི ཨུཔདྷིསམྤཏྟིཡཾ ཋིཏསྶ ན ཝིཔཙྩེཡྻུཾ ¶ . སོ པན ཨེཀེན པཱཔཀམྨེན ཨུཔདྷིཝིཔཏྟིཡཾཡེཝ པཏིཊྛིཏོ དུབྦཎྞོ དུརཱུཔོ དུསྶཎྛིཏོ བཱིབྷཙྪོ པིསཱཙསདིསོ. སོ སཙེ དཱསིཡཱ ཀུཙྪིཡཾ དཱསཛཱཏོ ‘ཨིམཱནི ཨེཏསྶ ཨནུཙྪཝིཀཱནཱི’ཏི སབྦཱནི ནཾ ཀིལིཊྛཀམྨཱནི ¶ ཀཱརེནྟི ཨནྟམསོ པུཔྥཚཌྜཀཀམྨཾ ཨུཔཱདཱཡ. སཙེ ཨིཏྠཱི ཧོཏི ‘ཨིམཱནི ཨེཏིསྶཱ ཨནུཙྪཝིཀཱནཱི’ཏི སབྦཱནི ནཾ ཧཏྠིབྷཏྟཔཙནཱདཱིནི ཀིལིཊྛཀམྨཱནི ཀཱརེནྟི. ཀུལགེཧེ ཛཱཏམྤི བལིཾ སཱདྷཡམཱནཱ རཱཛཔུརིསཱ ‘གེཧདཱསཱི’ཏི སཉྙཾ ཀཏྭཱ བནྡྷིཏྭཱ གཙྪནྟི, ཀོཏལཝཱཔཱིགཱམེ མཧཱཀུཊུམྦིཀསྶ གྷརཎཱི ཝིཡ. ཨེཝཾ ཨུཔདྷིསམྤཏྟིཔཊིབཱཧིཏཏྟཱ ཝིཔཱཀཾ དཱཏུཾ ཨསཀྐོནྟཱནི ཨུཔདྷིཝིཔཏྟིཾ ཨཱགམྨ ཝིཔཙྩནྟཱིཏི པཛཱནཱཏི.

ཨཔརསྶཱཔི བཧཱུནི པཱཔཀམྨཱནི ཧོནྟི. ཏཱནི ཀཱལསམྤཏྟིཡཾ ནིབྦཱཏསྶ ན ཝིཔཙྩེཡྻུཾ. སོ པན ཨེཀེན པཱཔཀམྨེན ཀཱལཝིཔཏྟིཡཾ དུརཱཛདུམནུསྶཀཱལེ ཀསཊེ ནིརོཛེ དསཝསྶཱཡུཀཀཱལེ ནིབྦཏྟོ, ཡདཱ པཉྩ གོརསཱ པཙྪིཛྫནྟི, ཀུདྲཱུསཀཾ ཨགྒབྷོཛནཾ ཧོཏི. ཀིཉྩཱཔི མནུསྶལོཀེ ནིབྦཏྟོ, མིགཔསུསརིཀྑཛཱིཝིཀོ པན ཧོཏི. ཨེཝརཱུཔེ ཀཱལེ ཀུསལསྶ ཝིཔཙྩནོཀཱསོ ནཏྠི, ཨེཀནྟཾ ཨཀུསལསྶེཝ ཧོཏི. ཨེཝཾ ཀཱལསམྤཏྟིཔཊིབཱཧིཏཏྟཱ ཝིཔཱཀཾ ¶ དཱཏུཾ ཨསཀྐོནྟཱནི ཀཱལཝིཔཏྟིཾ ཨཱགམྨ ཝིཔཙྩནྟཱིཏི པཛཱནཱཏི.

ཨཔརསྶཱཔི བཧཱུནི པཱཔཀམྨཱནི ཧོནྟི. ཏཱནི པཡོགསམྤཏྟིཡཾ ཋིཏསྶ ན ཝིཔཙྩེཡྻུཾ. སོ པན པཡོགཝིཔཏྟིཡཾ ཋིཏོ པཱཎཱཏིཔཱཏཱདཱིནི དས ཨཀུསལཀམྨཱནི ཀརོཏི. ཏམེནཾ སཧོཌྜྷཾ གཧེཏྭཱ རཉྙོ དསྶེནྟི. རཱཛཱ བཧཱུཀམྨཀཱརཎཱནི ཀཱརེཏྭཱ གྷཱཏཱཔེཏི. ཨེཝཾ པཡོགསམྤཏྟིཔཊིབཱཧིཏཏྟཱ ཝིཔཱཀཾ དཱཏུཾ ཨསཀྐོནྟཱནི པཡོགཝིཔཏྟིཾ ཨཱགམྨ ཝིཔཙྩནྟཱིཏི པཛཱནཱཏི. ཨེཝཾ ཙཏཱུཧི སམྤཏྟཱིཧི པཊིབཱཧིཏཾ པཱཔཀམྨཾ ཝིཔཱཀཾ ཨདཏྭཱ ཙཏསྶོ ཝིཔཏྟིཡོ ཨཱགམྨ དེཏི.

ཡཐཱ ཧི ཀོཙིདེཝ པུརིསོ ཀེནཙིདེཝ ཀམྨེན རཱཛཱནཾ ཨཱརཱདྷེཡྻ. ཨཐསྶ རཱཛཱ ཋཱནནྟརཾ དཏྭཱ ཛནཔདཾ དདེཡྻ. སོ ཏཾ སམྨཱ པརིབྷུཉྫིཏུཾ ཨསཀྐོནྟོ མཀྐཊེན གཧིཏབྷཏྟཔུཊཾ ཝིཡ བྷིནྡེཡྻ; ཡསྶ ཡཾ ཡཱནཾ ཝཱ ཝཱཧནཾ ཝཱ དཱསཾ ཝཱ དཱསིཾ ཝཱ ཨཱརཱམཾ ཝཱ ཝཏྠུཾ ཝཱ སམྤནྣརཱུཔཾ པསྶཏི, སབྦཾ བལཀྐཱརེན གཎྷེཡྻ. མནུསྶཱ ‘རཱཛཝལླབྷོ’ཏི ཀིཉྩི ཝཏྟུཾ ན སཀྐུཎེཡྻུཾ. སོ ཨཉྙསྶ ཝལླབྷཏརསྶ རཱཛམཧཱམཏྟསྶ ཝིརུཛ྄ཛྷེཡྻ. སོ ཏཾ གཧེཏྭཱ སུཔོཐིཏཾ པོཐཱཔེཏྭཱ བྷཱུམིཾ པིཊྛིཡཱ གྷཾསཱཔེནྟོ ནིཀྐཌྜྷཱཔེཏྭཱ རཱཛཱནཾ ཨུཔསངྐམིཏྭཱ ‘ཨསུཀོ ནཱམ ཏེ ¶ , དེཝ, ཛནཔདཾ བྷིནྡཏཱི’ཏི གཎྷཱཔེཡྻ. རཱཛཱ བནྡྷནཱགཱརེ བནྡྷཱཔེཏྭཱ ‘ཨསུཀེན ནཱམ ཀསྶ ཀིཾ ཨཝཧཊ’ནྟི ནགརེ བྷེརིཾ ཙརཱཔེཡྻ. མནུསྶཱ ཨཱགནྟྭཱ ‘མཡ྄ཧཾ ཨིདཾ གཧིཏཾ, མཡ྄ཧཾ ཨིདཾ གཧིཏ’ནྟི ཝིརཝསཧསྶཾ ཨུཊྛཱཔེཡྻུཾ. རཱཛཱ བྷིཡྻོསོ མཏྟཱཡ ཀུདྡྷོ ནཱནཔྤཀཱརེན ཏཾ བནྡྷནཱགཱརེ ཀིལམེཏྭཱ གྷཱཏཱཔེཏྭཱ ‘གཙྪཐ ནཾ སུསཱནེ ཚཌྜེཏྭཱ སངྑལིཀཱ ཨཱཧརཐཱ’ཏི ཝདེཡྻ. ཨེཝཾསམྤདམིདཾ དཊྛབྦཾ.

ཏསྶ ཧི པུརིསསྶ ཧི ཀེནཙིདེཝ ཀམྨེན རཱཛཱནཾ ཨཱརཱདྷེཏྭཱ ཋཱནནྟརཾ ལདྡྷཀཱལོ ཝིཡ པུཐུཛྫནསྶཱཔི ཀེནཙིདེཝ པུཉྙཀམྨེན སགྒེ ནིབྦཏྟཀཱལོ. ཏསྨིཾ ཛནཔདཾ བྷིནྡིཏྭཱ མནུསྶཱནཾ སནྟཀཾ གཎྷནྟེ ཀསྶཙི ཀིཉྩི ཝཏྟུཾ ཨཝིསཧནཀཱལོ ཝིཡ ཨིམསྨིམྤི སགྒེ ནིབྦཏྟེ ¶ ཨཀུསལསྶ ཝིཔཙྩནོཀཱསཾ ཨལབྷནཀཱལོ. ཏསྶ ཨེཀདིཝསཾ ཨེཀསྨིཾ རཱཛཝལླབྷཏརེ ¶ ཝིརཛ྄ཛྷིཏྭཱ ཏེན ཀུདྡྷེན ནཾ པོཐཱཔེཏྭཱ རཉྙོ ཨཱརོཙེཏྭཱ བནྡྷནཱགཱརེ བནྡྷཱཔིཏཀཱལོ ཝིཡ ཨིམསྶ སགྒཏོ ཙཝིཏྭཱ ནིརཡེ ནིབྦཏྟཀཱལོ. མནུསྶཱནཾ ‘མཡ྄ཧཾ ཨིདཾ གཧིཏཾ, མཡ྄ཧཾ ཨིདཾ གཧིཏ’ནྟི ཝིརཝཀཱལོ ཝིཡ ཏསྨིཾ ནིརཡེ ནིབྦཏྟེ སབྦཱཀུསལཀམྨཱནཾ སནྣིཔཏིཏྭཱ གཧཎཀཱལོ. སུསཱནེ ཚཌྜེཏྭཱ སངྑལིཀཱནཾ ཨཱཧརཎཀཱལོ ཝིཡ ཨེཀེཀསྨིཾ ཀམྨེ ཁཱིཎེ ཨིཏརསྶ ཨིཏརསྶ ཝིཔཱཀེན ནིརཡཏོ སཱིསཾ ཨནུཀྑིཔིཏྭཱ སཀལཀཔྤཾ ནིརཡམྷི པཙྩནཀཱལོ. ཀཔྤཊྛིཏིཀཀམྨཉྷི ཀཏྭཱ ཨེཀཀཔྤཾ ནིརཡམྷི པཙྩནཀསཏྟཱ ནེཝ ཨེཀོ, ན དྭེ, ན སཏཾ, ན སཧསྶཾ. ཨེཝཾ པཙྩནཀསཏྟཱ ཀིར གཎནཔཐཾ ཝཱིཏིཝཏྟཱ.

ཨཏྠེཀཙྩཱནི ཀལྱཱཎཱནི ཀམྨསམཱདཱནཱནི གཏིཝིཔཏྟིཔཊིབཱལ༹ྷཱནི ན ཝིཔཙྩནྟཱིཏིཨཱདཱིསུཔི ཨེཝཾ ཡོཛནཱ ཝེདིཏབྦཱ. ཨིདྷེཀཙྩསྶ བཧཱུནི ཀལྱཱཎཀམྨཱནི ཧོནྟི. ཏཱནི གཏིསམྤཏྟིཡཾ ཋིཏསྶ ཝིཔཙྩེཡུཾ. སོ པན ཨེཀེན པཱཔཀམྨེན གཏིཝིཔཏྟིཡཾ ནིརཡེ ཝཱ ཨསུརཀཱཡེ ཝཱ ནིབྦཏྟོ. ཏཱདིསེ ཙ ཋཱནེ ཀུསལཾ ཝིཔཱཀཾ དཱཏུཾ ན སཀྐོཏི, ཨེཀནྟཾ ཨཀུསལམེཝ སཀྐོཏཱིཏི. ཨེཝམསྶ ཏཱནི ཀམྨཱནི གཏིཝིཔཏྟིཔཊིབཱལ༹ྷཱནི ན ཝིཔཙྩནྟཱིཏི པཛཱནཱཏི.

ཨཔརསྶཱཔི བཧཱུནི ཀལྱཱཎཀམྨཱནི ཧོནྟི. ཏཱནི ཨུཔདྷིསམྤཏྟིཡཾ ཋིཏསྶ ཝིཔཙྩེཡྻུཾ. སོ པན ཨེཀེན པཱཔཀམྨེན ཨུཔདྷིཝིཔཏྟིཡཾ པཏིཊྛིཏོ དུབྦཎྞོ ཧོཏི པིསཱཙསདིསོ. སོ སཙེཔི རཱཛཀུལེ ནིབྦཏྟོ པིཏུཨཙྩཡེན ¶ ‘ཀིཾ ཨིམསྶ ནིསྶིརཱིཀསྶ རཛྫེནཱ’ཏི རཛྫཾ ན ལབྷཏི. སེནཱཔཏིགེཧཱདཱིསུ ནིབྦཏྟོཔི སེནཱཔཏིཊྛཱནཱདཱིནི ན ལབྷཏི.

ཨིམསྶ པནཏྠསྶཱཝིབྷཱཝཏྠཾ དཱིཔརཱཛཝཏྠུ ཀཐེཏབྦཾ – རཱཛཱ ཀིར པུཏྟེ ཛཱཏེ དེཝིཡཱ པསཱིདིཏྭཱ ཝརཾ ཨདཱསི. སཱ ཝརཾ གཧེཏྭཱ ཋཔེསི. ཀུམཱརོ སཏྟཊྛཝསྶཀཱལེཝ རཱཛངྒཎེ ཀུཀྐུཊེ ཡུཛ྄ཛྷཱཔེསི. ཨེཀོ ཀུཀྐུཊོ ཨུཔྤཏིཏྭཱ ཀུམཱརསྶ ཨཀྑཱིནི བྷིནྡི. ཀུམཱརམཱཏཱ དེཝཱི པུཏྟསྶ པནྣརསསོལ༹སཝསྶཀཱལེ ‘རཛྫཾ ཝཱརེསྶཱམཱི’ཏི རཱཛཱནཾ ཨུཔསངྐམིཏྭཱ ཨཱཧ – ‘‘དེཝ, ཏུམྷེཧི ཀུམཱརསྶ ཛཱཏཀཱལེ ཝརོ དིནྣོ. མཡཱ སོ གཧེཏྭཱ ཋཔིཏོ; ཨིདཱནི ནཾ གཎྷཱམཱི’’ཏི. ‘‘སཱདྷུ, དེཝི, གཎྷཱཧཱི’’ཏི. ‘‘མཡཱ, དེཝ, ཏུམྷཱཀཾ སནྟིཀཱ ཀིཉྩི ཨལདྡྷཾ ནཱམ ནཏྠི ¶ . ཨིདཱནི པན མམ པུཏྟསྶ རཛྫཾ ཝཱརེམཱི’’ཏི. ‘‘དེཝི, ཏཝ པུཏྟོ ཨངྒཝིཀལོ. ན སཀྐཱ ཏསྶ རཛྫཾ དཱཏུ’’ནྟི ¶ . ‘‘ཏུམྷེ མཡ྄ཧཾ རུཙྩནཀཝརཾ ཨདཱཏུཾ ཨསཀྐོནྟཱ ཀསྨཱ ཝརཾ ཨདཏྠཱ’’ཏི? རཱཛཱ ཨཏིཝིཡ ནིཔྤཱིལི༹ཡམཱནོ ‘‘ན སཀྐཱ ཏུཡ྄ཧཾ པུཏྟསྶ སཀལལངྐཱདཱིཔེ རཛྫཾ དཱཏུཾ; ནཱགདཱིཔེ པན ཚཏྟཾ ཨསྶཱཔེཏྭཱ ཝསཏཱུ’’ཏི ནཱགདཱིཔཾ པེསེསི. སོ དཱིཔརཱཛཱ ནཱམ ཨཧོསི. སཙེ ཙཀྑུཝིཀལོ ནཱབྷཝིསྶཱ ཏིཡོཛནསཏིཀེ སཀལཏམྦཔཎྞིདཱིཔེ སབྦསམྤཏྟིཔརིཝཱརཾ རཛྫཾ ཨལབྷིསྶཱ. ཨེཝཾ ཨུཔདྷིཝིཔཏྟིཔཊིབཱལ༹ྷཱནི ན ཝིཔཙྩནྟཱིཏི པཛཱནཱཏི.

ཨཔརསྶཱཔི བཧཱུནི ཀལྱཱཎཀམྨཱནི ཧོནྟི. ཏཱནི ཀཱལསམྤཏྟིཡཾ ཋིཏསྶ ཝིཔཙྩེཡྻུཾ. སོ པན ཨེཀེན པཱཔཀམྨེན ཀཱལཝིཔཏྟིཡཾ དུརཱཛདུམནུསྶཀཱལེ ཀསཊེ ནིརོཛེ ཨཔྤཱཡུཀེ གཏིཀོཊིཀེ ནིབྦཏྟོ. ཏཱདིསེ ཙ ཀཱལེ ཀལྱཱཎཀམྨཾ ཝིཔཱཀཾ དཱཏུཾ ན སཀྐོཏཱིཏི. ཨེཝཾ ཀཱལཝིཔཏྟིཔཊིབཱལ༹ྷཱནི ན ཝིཔཙྩནྟཱིཏི པཛཱནཱཏི.

ཨཔརསྶཱཔི བཧཱུནི ཀལྱཱཎཀམྨཱནི ཧོནྟི. ཏཱནི པཡོགསམྤཏྟིཡཾ ཋིཏསྶ ཝིཔཙྩེཡྻུཾ. ཨཡཾ པན པཡོགཝིཔཏྟིཡཾ ཋིཏོ པཱཎཾ ཧནྟི…པེ… སབྦཾ དུསྶཱིལྱཾ པཱུརེཏི. ཏཐཱ ཏེན སདྡྷིཾ སམཛཱཏིཀཱནིཔི ཀུལཱནི ཨཱཝཱཧཝིཝཱཧཾ ན ཀརོནྟི; ‘ཨིཏྠིདྷུཏྟོ སུརཱདྷུཏྟོ ཨཀྑདྷུཏྟོ ཨཡཾ པཱཔཔུརིསོ’ཏི ཨཱརཀཱ པརིཝཛྫེནྟི. ཀལྱཱཎཀམྨཱནི ཝིཔཙྩིཏུཾ ན སཀྐོནྟི. ཨེཝཾ པཡོགཝིཔཏྟིཔཊིབཱལ༹ྷཱནི ན ཝིཔཙྩནྟཱིཏི པཛཱནཱཏི. ཨེཝཾ ཙཏསྶོ སམྤཏྟིཡོ ¶ ཨཱགམྨ ཝིཔཱཀདཱཡཀཾ ཀལྱཱཎཀམྨཾ ཙཏཱུཧི ཝིཔཏྟཱིཧི པཊིབཱཧིཏཏྟཱ ན ཝིཔཙྩཏི.

ཨཔརསྶཱཔི བཧཱུནི ཀལྱཱཎཀམྨཱནི ཧོནྟི. ཏཱནི གཏིཝིཔཏྟིཡཾ ཋིཏསྶ ན ཝིཔཙྩེཡྻུཾ. སོ པན ཨེཀེན ཀལྱཱཎཀམྨེན གཏིསམྤཏྟིཡཾཡེཝ ནིབྦཏྟོ. ཏཏྠསྶ ཏཱནི ཀམྨཱནི ཨུཔགནྟྭཱ ཝཱརེན ཝཱརེན ཝིཔཱཀཾ དེནྟི – ཀཱལེན མནུསྶལོཀེ ནིབྦཏྟཱཔེནྟི, ཀཱལེན དེཝལོཀེ. ཨེཝཾ གཏིཝིཔཏྟིཔཊིབཱཧིཏཏྟཱ ཝིཔཱཀཾ དཱཏུཾ ཨསཀྐོནྟཱནི གཏིམམྤཏྟིཾ ཨཱགམྨ ཝིཔཙྩནྟཱིཏི པཛཱནཱཏི.

ཨཔརསྶཱཔི བཧཱུནི ཀལྱཱཎཀམྨཱནི ཧོནྟི. ཏཱནི ཨུཔདྷིཝིཔཏྟིཡཾ ཋིཏསྶ ན ཝིཔཙྩེཡྻུཾ. སོ པན ཨེཀེན ཀལྱཱཎཀམྨེན ¶ ཨུཔདྷིསམྤཏྟིཡཾཡེཝ པཏིཊྛིཏོ ཨབྷིརཱུཔོ དསྶནཱིཡོ པཱསཱདིཀོ བྲཧྨཝཙྪསདིསོ. ཏསྶ ཨུཔདྷིསམྤཏྟིཡཾ ཋིཏཏྟཱ ཀལྱཱཎཀམྨཱནི ཝིཔཱཀཾ དེནྟི. སཙེ རཱཛཀུལེ ནིབྦཏྟཏི ཨཉྙེསུ ཛེཊྛཀབྷཱཏིཀེསུ སནྟེསུཔི ‘ཨེཏསྶ ཨཏྟབྷཱཝོ ¶ སམིདྡྷོ, ཨེཏསྶ ཚཏྟེ ཨུསྶཱཔིཏེ ལོཀསྶ ཕཱསུ བྷཝིསྶཏཱི’ཏི ཏམེཝ རཛྫེ ཨབྷིསིཉྩནྟི. ཨུཔརཱཛགེཧཱདཱིསུ ནིབྦཏྟོ པིཏུཨཙྩཡེན ཨོཔརཛྫཾ, སེནཱཔཏིཊྛཱནཾ, བྷཎྜཱགཱརིཀཊྛཱནཾ, སེཊྛིཊྛཱནཾ ལབྷཏི. ཨེཝཾ ཨུཔདྷིཝིཔཏྟིཔཊིབཱཧིཏཏྟཱ ཝིཔཱཀཾ དཱཏུཾ ཨསཀྐོནྟཱནི ཨུཔདྷིསམྤཏྟིཾ ཨཱགམྨ ཝིཔཙྩནྟཱིཏི པཛཱནཱཏི.

ཨཔརསྶཱཔི བཧཱུནི ཀལྱཱཎཀམྨཱནི ཧོནྟི. ཏཱནི ཀཱལཝིཔཏྟིཡཾ ཋིཏསྶ ན ཝིཔཙྩེཡྻུཾ. སོ པན ཨེཀེན ཀལྱཱཎཀམྨེན ཀཱལསམྤཏྟིཡཾ ནིབྦཏྟོ སུརཱཛསུམནུསྶཀཱལེ. ཏཱདིསཱཡ ཀཱལསམིདྡྷིཡཱ ནིབྦཏྟསྶ ཀལྱཱཎཀམྨཾ ཝིཔཱཀཾ དེཏི.

ཏཏྲིདཾ མཧཱསོཎཏྠེརསྶ ཝཏྠུ ཀཐེཏབྦཾ – བྲཱཧྨཎཏིསྶབྷཡེ ཀིར ཙིཏྟལཔབྦཏེ དྭཱདས བྷིཀྑུསཧསྶཱནིཾ པཊིཝསནྟི. ཏཐཱ ཏིསྶམཧཱཝིཧཱརེ. དྭཱིསུཔི མཧཱཝིཧཱརེསུ ཏིཎྞཾ ཝསྶཱནཾ ཝཊྚཾ ཨེཀརཏྟམེཝ མཧཱམཱུསིཀཱཡོ ཁཱདིཏྭཱ ཐུསམཏྟམེཝ ཋཔེསུཾ. ཙིཏྟལཔབྦཏེ བྷིཀྑུསངྒྷོ ‘ཏིསྶམཧཱཝིཧཱརེ ཝཊྚཾ ཝཏྟིསྶཏི, ཏཏྠ གནྟྭཱ ཝསིསྶཱམཱ’ཏི ཝིཧཱརཏོ ནིཀྑམི. ཏིསྶམཧཱཝིཧཱརེཔི བྷིཀྑུསངྒྷོ ‘ཙིཏྟལཔབྦཏེ ཝཊྚཾ ཝཏྟིསྶཏི, ཏཏྠ གནྟྭཱ ཝསིསྶཱམཱ’ཏི ཝིཧཱརཏོ ནིཀྑམི. ཨུབྷཏོཔི ¶ ཨེཀིསྶཱ གམྦྷཱིརཀནྡརཱཡ ཏཱིརེ སམཱགཏཱ པུཙྪིཏྭཱ ཝཊྚསྶ ཁཱིཎབྷཱཝཾ ཉཏྭཱ ‘ཏཏྠ གནྟྭཱ ཀིཾ ཀརིསྶཱམཱ’ཏི ཙཏུཝཱིསཏི བྷིཀྑུསཧསྶཱནི གམྦྷཱིརཀནྡརཝནཾ པཝིསིཏྭཱ ནིསཱིདིཏྭཱ ནིསིནྣནཱིཧཱརེནེཝ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡིཾསུ. པཙྪཱ བྷཡེ ཝཱུཔསནྟེ བྷིཀྑུསངྒྷོ སཀྐཾ དེཝརཱཛཱནཾ གཧེཏྭཱ དྷཱཏུཡོ སཾཧརིཏྭཱ ཙེཏིཡཾ ཨཀཱསི.

བྲཱཧྨཎཏིསྶཙོརོཔི ཛནཔདཾ ཝིདྡྷཾསེསི. སངྒྷོ སནྣིཔཏིཏྭཱ མནྟེཏྭཱ ‘‘ཙོརཾ པཊིབཱཧཏཱུ’’ཏི སཀྐསནྟིཀཾ ཨཊྛ ཐེརེ པེསེསི. སཀྐོ དེཝརཱཛཱ ‘‘མཡཱ, བྷནྟེ, ཨུཔྤནྣོ ཙོརོ ན ¶ སཀྐཱ པཊིབཱཧིཏུཾ. སངྒྷོ པརསམུདྡཾ གཙྪཏུ. ཨཧཾ སམུདྡཱརཀྑཾ ཀརིསྶཱམཱི’’ཏི. སངྒྷོ སབྦདིསཱཧི ནཱགདཱིཔཾ གནྟྭཱ ཛམྦུཀོལཔཊྚནེ ཏིབྷཱུམིཀཾ མཧཱཨུལུ༹མྤཾ བནྡྷཱཔེསི. ཨེཀཱ བྷཱུམིཀཱ ཨུདཀེ ཨོསཱིདི. ཨེཀིསྶཱ བྷིཀྑུསངྒྷོ ནིསིནྣོ. ཨེཀིསྶཱ པཏྟཙཱིཝརཱནི ཋཔཡིཾསུ. སཾཡུཏྟབྷཱཎཀཙཱུལ༹སཱིཝཏྠེརོ, ཨིསིདཏྟཏྠེརོ, མཧཱསོཎཏྠེརོཏི ཏཡོ ཐེརཱ ཏཱསཾ པརིསཱནཾ པཱམོཀྑཱ. ཏེསུ དྭེ ཐེརཱ མཧཱསོཎཏྠེརཾ ཨཱཧཾསུ – ‘‘ཨཱཝུསོ མཧཱསོཎ, ཨབྷིརུཧ མཧཱཨུལུ༹མྤ’’ནྟི. ‘‘ཏུམྷེ པན, བྷནྟེ’’ཏི? ‘‘ཨཱཝུསོ, ཨུདཀེ མརཎམྤི ཐལེ མརཎམྤི ཨེཀམེཝ ¶ . ན མཡཾ གམིསྶཱམ. ཏཾ ནིསྶཱཡ པན ཨནཱགཏེ སཱསནསྶ པཝེཎཱི ཋསྶཏི. གཙྪ ཏྭཾ, ཨཱཝུསོ’’ཏི. ‘‘ནཱཧཾ, བྷནྟེ, ཏུམྷེསུ ཨགཙྪནྟེསུ གམིསྶཱམཱི’’ཏི ཡཱཝཏཏིཡཾ ཀཐེཏྭཱཔི ཐེརཾ ཨཱརོཔེཏུཾ ཨསཀྐོནྟཱ ནིཝཏྟིཾསུ.

ཨཐ ཙཱུལ༹སཱིཝཏྠེརོ ཨིསིདཏྟཏྠེརཾ ཨཱཧ – ‘‘ཨཱཝུསོ ཨིསིདཏྟ, ཨནཱགཏེ མཧཱསོཎཏྠེརཾ ནིསྶཱཡ སཱསནཔཝེཎཱི ཋསྶཏི; མཱ ཁོ ཏཾ ཧཏྠཏོ ཝིསྶཛྫེཧཱི’’ཏི. ‘‘ཏུམྷེ པན, བྷནྟེ’’ཏི? ‘‘ཨཧཾ མཧཱཙེཏིཡཾ ཝནྡིསྶཱམཱི’’ཏི དྭེ ཐེརེ ཨནུསཱསིཏྭཱ ཨནུཔུབྦེན ཙཱརིཀཾ ཙརནྟོ མཧཱཝིཧཱརཾ སམྤཱཔུཎི. ཏསྨིཾ སམཡེ མཧཱཝིཧཱརོ སུཉྙོ. ཙེཏིཡངྒཎེ ཨེརཎྜཱ ཛཱཏཱ. ཙེཏིཡཾ གཙྪེཧི པརིཝཱརིཏཾ, སེཝཱལེན པརིཡོནདྡྷཾ. ཐེརོ དྷརམཱནཀབུདྡྷསྶ ནིཔཙྩཱཀཱརཾ དསྶེནྟོ ཝིཡ མཧཱཙེཏིཡཾ ཝནྡིཏྭཱ པཙྪིམདིསཱཡ སཱལཾ པཝིསིཏྭཱ ཨོལོཀེནྟོ ‘ཨེཝརཱུཔསྶ ནཱམ ལཱབྷགྒཡསགྒཔྤཏྟསྶ སརཱིརདྷཱཏུཙེཏིཡཊྛཱནཾ ཨནཱཐཾ ཛཱཏ’ནྟི ཙིནྟཡམཱནོ ནིསཱིདི.

ཨཐ ¶ ཨཝིདཱུརེ རུཀྑེ ཨདྷིཝཏྠཱ དེཝཏཱ ཨདྡྷིཀམནུསྶརཱུཔེན ཏཎྜུལནཱལི༹ཉྩ གུལ༹པིཎྜཉྩ ཨཱདཱཡ ཐེརསྶ སནྟིཀཾ གནྟྭཱ ‘‘ཀཏྠ གཙྪཐ, བྷནྟེ’’ཏི? ‘‘ཨཧཾ དཀྑིཎདིསཾ, ཨུཔཱསཀཱ’’ཏི. ‘‘ཨཧམྤི ཏཏྠེཝ གནྟུཀཱམོ, སཧ གཙྪཱམ, བྷནྟེ’’ཏི. ‘‘ཨཧཾ དུབྦལོ; ཏཝ གཏིཡཱ གནྟུཾ ན སཀྑིསྶཱམི; ཏྭཾ པུརཏོ གཙྪ, ཨུཔཱསཀཱ’’ཏི. ‘‘ཨཧམྤི ཏུམྷཱཀཾ གཏིཡཱ གམིསྶཱམཱི’’ཏི ཐེརསྶ པཏྟཙཱིཝརཾ ཨགྒཧེསི. ཏིསྶཝཱཔིཔཱལི༹ཾ ཨཱརུལ༹ྷཀཱལེ ཙ པཏྟཾ ཨཱཧརཱཔེཏྭཱ པཱནཀཾ ཀཏྭཱ ཨདཱསི. ཐེརསྶ པཱིཏམཏྟེཡེཝ བལམཏྟཱ སཎྛཱཏི. དེཝཏཱ པཐཝིཾ སངྑིཔིཏྭཱ ཝེཎུནདཱིསནྟིཀེ ཨེཀཾ ཚཌྜིཏཝིཧཱརཾ པཏྭཱ ཐེརསྶ ཝསནཊྛཱནཾ པཊིཛགྒིཏྭཱ ཨདཱསི.

པུནདིཝསེ ¶ ཐེརེན མུཁེ དྷོཝིཏམཏྟེ ཡཱགུཾ པཙིཏྭཱ ཨདཱསི; ཡཱགུཾ པཱིཏསྶ བྷཏྟཾ པཙིཏྭཱ ཨུཔནཱམེསི. ཐེརོ ‘‘ཏུཡ྄ཧཾ ཋཔེཧི, ཨུཔཱསཀཱ’’ཏི པཏྟཾ ཧཏྠེན པིདཧི. ‘‘ཨཧཾ ན དཱུརཾ གམིསྶཱམཱི’’ཏི དེཝཏཱ ཐེརསྶེཝ པཏྟེ བྷཏྟཾ པཀྑིཔིཏྭཱ ཀཏབྷཏྟཀིཙྩསྶ ཐེརསྶ པཏྟཙཱིཝརམཱདཱཡ མགྒཾ པཊིཔནྣཱ པཐཝིཾ སངྑིཔིཏྭཱ ཛཛྫརནདཱིསནྟིཀཾ ནེཏྭཱ ‘‘བྷནྟེ, ཨེཏཾ པཎྞཁཱདཀམནུསྶཱནཾ ཝསནཊྛཱནཾ, དྷཱུམོ པཉྙཱཡཏི. ཨཧཾ པུརཏོ གམིསྶཱམཱི’’ཏི ཐེརཾ ཝནྡིཏྭཱ ཨཏྟནོ བྷཝནཾ ཨགམཱསི. ཐེརོ སབྦམྤི བྷཡཀཱལཾ པཎྞཁཱདཀམནུསྶེ ནིསྶཱཡ ཝསི.

ཨིསིདཏྟཏྠེརོཔི ཨནུཔུབྦེན ཙཱརིཀཾ ཙརནྟོ ཨལ༹ཛནཔདཾ སམྤཱཔུཎི. ཏཏྠ མནུསྶཱ ནཱཏིཔཀྐཱནི ¶ མདྷུཀཕལཱནི བྷིནྡིཏྭཱ ཨཊྛིཾ ཨཱདཱཡ ཏཙཾ ཚཌྜེཏྭཱ ཨགམཾསུ. ཐེརོ ‘‘ཨཱཝུསོ མཧཱསོཎ, བྷིཀྑཱཧཱརོ པཉྙཱཡཏཱི’’ཏི ཝཏྭཱ པཏྟཙཱིཝརཾ ཨཱཧརཱཔེཏྭཱ ཙཱིཝརཾ པཱརུཔིཏྭཱ པཏྟཾ ནཱིཧརིཏྭཱ ཨཊྛཱསི. ཏརུཎདཱརཀཱ ཐེརཾ ཋིཏཾ དིསྭཱ ‘ཨིམིནཱ ཀོཙི ཨཏྠོ བྷཝིསྶཏཱི’ཏི ཝཱལུཀཾ པུཉྪིཏྭཱ མདྷུཀཕལཏྟཙཾ པཏྟེ པཀྑིཔིཏྭཱ ཨདཾསུ; ཐེརཱ པརིབྷུཉྫིཾསུ. སཏྟཱཧམཏྟཾ སོཡེཝ ཨཱཧཱརོ ཨཧོསི.

ཨནུཔུབྦེན ཙོརིཡསྶརཾ སམྤཱཔུཎིཾསུ. མནུསྶཱ ཀུམུདཱནི གཧེཏྭཱ ཀུམུདནཱལེ ཚཌྜེཏྭཱ ཨགམཾསུ. ཐེརོ ‘‘ཨཱཝུསོ མཧཱསོཎ, བྷིཀྑཱཧཱརོ པཉྙཱཡཏཱི’’ཏི ཝཏྭཱ པཏྟཙཱིཝརཾ ཨཱཧརཱཔེཏྭཱ ཙཱིཝརཾ པཱརུཔིཏྭཱ པཏྟཾ ནཱིཧརིཏྭཱ ཨཊྛཱསི. གཱམདཱརཀཱ ཀུམུདནཱལེ སོདྷེཏྭཱ པཏྟེ པཀྑིཔིཏྭཱ ཨདཾསུ; ཐེརཱ པརིབྷུཉྫིཾསུ. སཏྟཱཧམཏྟཾ སོཝ ཨཱཧཱརོ ཨཧོསི.

ཨནུཔུབྦེན ¶ ཙརནྟཱ པཎྞཁཱདཀམནུསྶཱནཾ ཝསནཊྛཱནེ ཨེཀཾ གཱམདྭཱརཾ སམྤཱཔུཎིཾསུ. ཏཏྠ ཨེཀིསྶཱ དཱརིཀཱཡ མཱཏཱཔིཏརོ ཨརཉྙཾ གཙྪནྟཱ ‘‘སཙེ ཀོཙི ཨཡྻོ ཨཱགཙྪཏི, ཀཏྠཙི གནྟུཾ མཱ ཨདཱསི; ཨཡྻསྶ ཝསནཊྛཱནཾ ཨཱཙིཀྑེཡྻཱསི, ཨམྨཱ’’ཏི ཨཱཧཾསུ. སཱ ཐེརེ དིསྭཱ པཏྟཾ གཧེཏྭཱ ནིསཱིདཱཔེསི. གེཧེ དྷཉྙཛཱཏི ནཱམ ནཏྠི. ཝཱསིཾ པན གཧེཏྭཱ གུཉྫཙོཙརུཀྑཏྟཙཾ གུཉྫལཏཱཔཏྟེཧི སདྡྷིཾ ཨེཀཏོ ཀོཊྚེཏྭཱ ཏཡོ པིཎྜེ ཀཏྭཱ ཨེཀཾ ཨིསིདཏྟཏྠེརསྶ ཨེཀཾ མཧཱསོཎཏྠེརསྶ པཏྟེ ཋཔེཏྭཱ ‘ཨཏིརེཀཔིཎྜཾ ཨིསིདཏྟཏྠེརསྶ པཏྟེ ཋཔེསྶཱམཱི’ཏི ཧཏྠཾ པསཱརེསི. ཧཏྠོ པརིཝཏྟིཏྭཱ མཧཱསོཎཏྠེརསྶ པཏྟེ ¶ པཏིཊྛཱཔེསི. ཨིསིདཏྟཏྠེརོ ‘བྲཱཧྨཎཏིསྶབྷཡེ གུཉྫཙོཙཔིཎྜེ ཝིཔཱཀདཱཡཀཀམྨཾ དེསཀཱལསམྤདཱཡ ཀཱིཝཔམཱཎཾ ཝིཔཱཀཾ དསྶཏཱི’ཏི ཨཱཧ. ཏེ ཏཾ པརིབྷུཉྫིཏྭཱ ཝསནཊྛཱནཾ ཨགམཾསུ. སཱཔི ཨརཉྙཏོ ཨཱགཏཱནཾ མཱཏཱཔིཏཱུནཾ ཨཱཙིཀྑི ‘‘དྭེ ཐེརཱ ཨཱགཏཱ. ཏེསཾ མེ ཝསནཊྛཱནཾ ཨཱཙིཀྑིཏ’’ནྟི. ཏེ ཨུབྷོཔི ཐེརཱནཾ སནྟིཀཾ གནྟྭཱ ཝནྡིཏྭཱ ‘‘བྷནྟེ, ཡཾ མཡཾ ལབྷཱམ, ཏེན ཏུམྷེ པཊིཛགྒིསྶཱམ; ཨིདྷེཝ ཝསཐཱ’’ཏི པཊིཉྙཾ གཎྷིཾསུ. ཐེརཱཔི སབྦབྷཡཀཱལཾ ཏེ ཨུཔནིསྶཱཡ ཝསིཾསུ.

བྲཱཧྨཎཏིསྶཙོརེ མཏེ པིཏུམཧཱརཱཛཱ ཚཏྟཾ ཨུསྶཱཔེསི. ‘བྷཡཾ ཝཱུཔསནྟཾ, ཛནཔདོ སམྤུཎྞོ’ཏི སུཏྭཱ པརསམུདྡཏོ བྷིཀྑུསངྒྷོ ནཱཝཱཡ མཧཱཏིཏྠཔཊྚནེ ཨོརུཡ྄ཧ ‘མཧཱསོཎཏྠེརོ ཀཧཾ ཝསཏཱི’ཏི པུཙྪིཏྭཱ ཐེརསྶ སནྟིཀཾ ཨགམཱསི. ཐེརོ པཉྩསཏབྷིཀྑུཔརིཝཱརོ ཀཱལཀགཱམེ ¶ མཎྜལཱརཱམཝིཧཱརཾ སམྤཱཔུཎི. ཏསྨིཾ སམཡེ ཀཱལཀགཱམེ སཏྟམཏྟཱནི ཀུལསཏཱནི པཊིཝསནྟི. རཏྟིབྷཱགེ དེཝཏཱ ཨཱཧིཎྜིཏྭཱ ‘‘མཧཱསོཎཏྠེརོ པཉྩབྷིཀྑུསཏཔརིཝཱརོ མཎྜལཱརཱམཝིཧཱརཾ པཏྟོ. ཨེཀེཀོ ནཝཧཏྠསཱཊཀེན སདྡྷིཾ ཨེཀེཀཀཧཱཔཎགྒྷནཀཾ པིཎྜཔཱཏཾ དེཏཱུ’’ཏི མནུསྶེ ཨཝོཙུཾ. པུནདིཝསེ ཙ ཐེརཱ ཀཱལཀགཱམཾ པིཎྜཱཡ པཝིསིཾསུ. མནུསྶཱ ནིསཱིདཱཔེཏྭཱ ཡཱགུཾ ཨདཾསུ. མཎྜལཱརཱམཝཱསཱི ཏིསྶབྷཱུཏིཏྠེརོ སངྒྷཏྠེརོ ཧུཏྭཱ ནིསཱིདི. ཨེཀོ མཧཱཨུཔཱསཀོ ཏཾ ཝནྡིཏྭཱ ‘‘བྷནྟེ, མཧཱསོཎཏྠེརོ ནཱམ ཀཏརོ’’ཏི པུཙྪི. ཏེན སམཡེན ཐེརོ ནཝཀོ ཧོཏི པརིཡནྟེ ནིསིནྣོ. ཐེརོ ཧཏྠཾ པསཱརེཏྭཱ ‘‘མཧཱསོཎོ ནཱམ ¶ ཨེས, ཨུཔཱསཀཱ’’ཏི ཨཱཧ. ཨུཔཱསཀོ ཏཾ ཝནྡིཏྭཱ པཏྟཾ གཎྷཱཏི. ཐེརོ ན དེཏི. ཏིསྶབྷཱུཏིཏྠེརོ ‘‘ཨཱཝུསོ སོཎ, ཡཐཱ ཏྭཾ ན ཛཱནཱསི, མཡམྤི ཨེཝམེཝ ན ཛཱནཱམ; པུཉྙཝནྟཱནཾ དེཝཏཱ པརིཔཱཙེནྟི; པཏྟཾ དེཧི, སབྲཧྨཙཱརཱིནཾ སངྒཧཾ ཀརོཧཱི’’ཏི ཨཱཧ. ཐེརོ པཏྟཾ ཨདཱསི. མཧཱཨུཔཱསཀོ པཏྟཾ ཨཱདཱཡ གནྟྭཱ ཀཧཱཔཎགྒྷནཀསྶ པིཎྜཔཱཏསྶ པཱུརེཏྭཱ ནཝཧཏྠསཱཊཀཾ ཨཱདྷཱརཀཾ ཀཏྭཱ ཨཱཧརིཏྭཱ ཐེརསྶ ཧཏྠེ ཋཔེསི; ཨཔརོཔི ཨུཔཱསཀོ ཐེརསྶཱཏི སཏྟ སཱཊཀསཏཱནི སཏྟ ཙ པིཎྜཔཱཏསཏཱནི ཐེརསྶེཝ ཨདཾསུ.

ཐེརོ བྷིཀྑུསངྒྷསྶ ¶ སཾཝིབྷཱགཾ ཀཏྭཱ ཨནུཔུབྦེན མཧཱཝིཧཱརཾ པཱཔུཎིཏྭཱ མུཁཾ དྷོཝིཏྭཱ མཧཱབོདྷིཾ ཝནྡིཏྭཱ མཧཱཙེཏིཡཾ ཝནྡིཏྭཱ ཐཱུཔཱརཱམེ ཋིཏོ ཙཱིཝརཾ པཱརུཔིཏྭཱ བྷིཀྑུསངྒྷཔརིཝཱརོ དཀྑིཎདྭཱརེན ནགརཾ པཝིསིཏྭཱ དྭཱརཏོ ཡཱཝ ཝལ༹ཉྫནཀསཱལཱ ཨེཏསྨིཾ ཨནྟརེ སཊྛིཀཧཱཔཎགྒྷནཀཾ པིཎྜཔཱཏཾ ལབྷི. ཏཏོ པཊྛཱཡ པན སཀྐཱརསྶ པམཱཎཾ ནཏྠི. ཨེཝཾ ཀཱལཝིཔཏྟིཡཾ མདྷུཀཕལཏྟཙོཔི ཀུམུདནཱལི༹པི དུལླབྷཱ ཛཱཏཱ. ཀཱལསམྤཏྟིཡཾ ཨེཝརཱུཔོ མཧཱལཱབྷོ ཨུདཔཱདི.

ཝཏྟབྦཀནིགྲོདྷཏྠེརསྶཱཔི སཱམཎེརཀཱལེ བྲཱཧྨཎཏིསྶབྷཡཾ ཨུདཔཱདི. སཱམཎེརོ ཙ ཨུཔཛ྄ཛྷཱཡོ ཙསྶ པརསམུདྡཾ ནཱགམིཾསུ; ‘པཎྞཁཱདཀམནུསྶེ ཨུཔནིསྶཱཡ ཝསིསྶཱམཱ’ཏི པཙྩནྟཱབྷིམུཁཱ ཨཧེསུཾ. སཱམཎེརོ སཏྟཱཧམཏྟཾ ཨནཱཧཱརོ ཧུཏྭཱ ཨེཀསྨིཾ གཱམཊྛཱནེ ཏཱལརུཀྑེ ཏཱལཔཀྐཾ དིསྭཱ ཨུཔཛ྄ཛྷཱཡཾ ཨཱཧ – ‘‘བྷནྟེ, ཐོཀཾ ཨཱགམེཐ; ཏཱལཔཀྐཾ པཱཏེསྶཱམཱི’’ཏི. ‘‘དུབྦལོསི ཏྭཾ, སཱམཎེར, མཱ ཨབྷིརུཧཱི’’ཏི. ‘‘ཨབྷིརུཧིསྶཱམི, བྷནྟེ’’ཏི ཁུདྡཀཝཱསིཾ གཧེཏྭཱ ཏཱལཾ ཨཱརུཡ྄ཧ ཏཱལཔིཎྜཾ ཚིནྡིཏུཾ ཨཱརབྷི. ཝཱསིཕལཾ ནིཀྑམིཏྭཱ བྷཱུམིཡཾ པཏི.

ཐེརོ ¶ ཙིནྟེསི ‘‘ཨཡཾ ཀིལནྟོཝ རུཀྑཾ ཨཱརུལ༹ྷོ; ཀིཾ ནུ ཁོ ཨིདཱནི ཀརིསྶཏཱི’’ཏི སཱམཎེརོ ཏཱལཔཎྞཾ ཕཱལེཏྭཱ ཕཱལེཏྭཱ ཝཱསིདཎྜཀེ བནྡྷིཏྭཱ གྷཊྚེནྟོ གྷཊྚེནྟོ བྷཱུམིཡཾ པཱཏེཏྭཱ ‘‘བྷནྟེ, སཱདྷུ ཝཏསྶ སཙེ ཝཱསིཕལཾ ཨེཏྠ པཝེསེཡྻཱཐཱ’’ཏི ཨཱཧ. ཐེརོ ‘ཨུཔཱཡསམྤནྣོ སཱམཎེརོ’ཏི ཝཱསིཕལཾ པཝེསེཏྭཱ ཨདཱསི. སོ ཝཱསིཾ ཨུཀྑིཔིཏྭཱ ཏཱལཕལཱནི པཱཏེསི. ཐེརོ ཝཱསིཾ པཱཏཱཔེཏྭཱ པཝཊྚིཏྭཱ ¶ གཏཾ ཏཱལཕལཾ བྷིནྡིཏྭཱ སཱམཎེརཾ ཨོཏིཎྞཀཱལེ ཨཱཧ ‘‘སཱམཎེར, ཏྭཾ དུབྦལོ, ཨིདཾ ཏཱཝ ཁཱདཱཧཱི’’ཏི. ‘‘ནཱཧཾ, བྷནྟེ, ཏུམྷེཧི ཨཁཱདིཏེ ཁཱདིསྶཱམཱི’’ཏི ཝཱསིཾ གཧེཏྭཱ ཏཱལཕལཱནི བྷིནྡིཏྭཱ པཏྟཾ ནཱིཧརིཏྭཱ ཏཱལམིཉྫཾ པཀྑིཔིཏྭཱ ཐེརསྶ དཏྭཱ སཡཾ ཁཱདི. ཡཱཝ ཏཱལཕལཱནི ཨཧེསུཾ, ཏཱཝ ཏཏྠེཝ ཝསིཏྭཱ ཕལེསུ ཁཱིཎེསུ ཨནུཔུབྦེན པཎྞཁཱདཀམནུསྶཱནཾ ཝསནཊྛཱནེ ཨེཀཾ ཚཌྜིཏཝིཧཱརཾ པཝིསིཾསུ. སཱམཎེརོ ཐེརསྶ ཝསནཊྛཱནཾ པཊིཛགྒི. ཐེརོ སཱམཎེརསྶ ཨོཝཱདཾ དཏྭཱ ཝིཧཱརཾ པཱཝིསི. སཱམཎེརོ ‘ཨནཱཡཏནེ ནཊྛཱནཾ ཨཏྟབྷཱཝཱནཾ པམཱཎཾ ནཏྠི, བུདྡྷཱནཾ ¶ ཨུཔཊྛཱནཾ ཀརིསྶཱམཱི’ཏི ཙེཏིཡངྒཎཾ གནྟྭཱ ཨཔྤཧརིཏཾ ཀརོཏི; སཏྟཱཧམཏྟཾ ནིརཱཧཱརཏཱཡ པཝེདྷམཱནོ པཏིཏྭཱ ནིཔནྣཀོཝ ཏིཎཱནི ཨུདྡྷརཏི. ཨེཀཙྩེ ཙ མནུསྶཱ ཨརཉྙེ ཙརནྟཱ མདྷུཾ ལབྷིཏྭཱ དཱརཱུནི ཙེཝ སཱཀཔཎྞཉྩ གཧེཏྭཱ ཏིཎཙལནསཉྙཱཡ ‘མིགོ ནུ ཁོ ཨེསོ’ཏི སཱམཎེརསྶ སནྟིཀཾ གནྟྭཱ ‘‘ཀིཾ ཀརོསི, སཱམཎེརཱ’’ཏི ཨཱཧཾསུ. ‘‘ཏིཎགཎྛིཾ གཎྷཱམི, ཨུཔཱསཀཱ’’ཏི. ‘‘ཨཉྙོཔི ཀོཙི ཨཏྠི, བྷནྟེ’’ཏི? ‘‘ཨཱམ, ཨུཔཱསཀཱ, ཨུཔཛ྄ཛྷཱཡོ མེ ཨནྟོགབྦྷེ’’ཏི. ‘‘མཧཱཐེརསྶ དཏྭཱ ཁཱདེཡྻཱསི, བྷནྟེ’’ཏི སཱམཎེརསྶ མདྷུཾ དཏྭཱ ཨཏྟནོ ཝསནཊྛཱནཾ ཨཱཙིཀྑིཏྭཱ ‘‘མཡཾ སཱཁཱབྷངྒཾ ཀརོནྟཱ གམིསྶཱམ. ཨེཏཱཡ སཉྙཱཡ ཐེརཾ གཧེཏྭཱ ཨཱགཙྪེཡྻཱསི, ཨཡྻཱ’’ཏི ཝཏྭཱ ཨགམཾསུ.

སཱམཎེརོ མདྷུཾ གཧེཏྭཱ ཐེརསྶ སནྟིཀཾ གནྟྭཱ བཧི ཋཏྭཱ ‘‘ཝནྡཱམི, བྷནྟེ’’ཏི ཨཱཧ. ཐེརོ ‘སཱམཎེརོ ཛིགྷཙྪཱཡ ཨནུཌཡ྄ཧམཱནོ ཨཱགཏོ བྷཝིསྶཏཱི’ཏི ཏུཎྷཱི ཨཧོསི. སོ པུནཔི ‘‘ཝནྡཱམི, བྷནྟེ’’ཏི ཨཱཧ. ‘‘ཀསྨཱ, སཱམཎེར, དུབྦལབྷིཀྑཱུནཾ སུཁེན ནིཔཛྫིཏུཾ ན དེསཱི’’ཏི? ‘‘དྭཱརཾ ཝིཝརིཏུཾ སཱརུཔྤཾ, བྷནྟེ’’ཏི? ཐེརོ ཨུཊྛཧིཏྭཱ དྭཱརཾ ཝིཝརིཏྭཱ ‘‘ཀིཾ ཏེ, སཱམཎེར, ལདྡྷཾ’’ཏི ཨཱཧ. མནུསྶེཧི མདྷུ དིནྣཾ, ཁཱདིཏུཾ སཱརུཔྤཾ, བྷནྟེ’’ཏི? ‘‘སཱམཎེར, ཨེཝམེཝ ཁཱདིཏུཾ ཀིལམིསྶཱམ, པཱནཀཾ ཀཏྭཱ པིཝིསྶཱམཱ’’ཏི. སཱམཎེརོ པཱནཀཾ ཀཏྭཱ ཨདཱསི. ཨཐ ནཾ ཐེརོ ‘‘མནུསྶཱནཾ ཝསནཊྛཱནཾ པུཙྪསི, སཱམཎེརཱ’’ཏི ཨཱཧ. སཡམེཝ ཨཱཙིཀྑིཾསུ, བྷནྟེ’’ཏི. ‘‘སཱམཎེར, པཱཏོཝ གཙྪནྟཱ ཀིལམིསྶཱམ; ཨཛྫེཝ གམིསྶཱམཱ’’ཏི ¶ པཏྟཙཱིཝརཾ ¶ གཎྷཱཔེཏྭཱ ནིཀྑམི. ཏེ གནྟྭཱ མནུསྶཱནཾ ཝསནཊྛཱནསྶ ཨཝིདཱུརེ ནིཔཛྫིཾསུ.

སཱམཎེརོ རཏྟིབྷཱགེ ཙིནྟེསི – ‘མཡཱ པབྦཛིཏཀཱལཏོ པཊྛཱཡ གཱམནྟེ ཨརུཎཾ ནཱམ ན ཨུཊྛཱཔིཏཔུབྦ’ནྟི. སོ པཏྟཾ གཧེཏྭཱ ཨརུཎཾ ཨུཊྛཱཔེཏུཾ ཨརཉྙཾ ཨགམཱསི. མཧཱཐེརོ སཱམཎེརཾ ནིཔནྣཊྛཱནེ ཨཔསྶནྟོ ‘མནུསྶཁཱདཀེཧི གཧིཏོ བྷཝིསྶཏཱི’ཏི ཙིནྟེསི. སཱམཎེརོ ཨརཉྙེ ཨརུཎཾ ཨུཊྛཱཔེཏྭཱ པཏྟེན ཨུདཀཉྩ དནྟཀཊྛཉྩ གཧེཏྭཱ ཨཱགམི. ‘‘སཱམཎེར, ཀུཧིཾ གཏོསི? མཧལླཀབྷིཀྑཱུནཾ ཏེ ཝིཏཀྐོ ཨུཔྤཱདིཏོ; དཎྜཀམྨཾ ཨཱཧརཱ’’ཏི. ‘‘ཨཱཧརིསྶཱམི, བྷནྟེ’’ཏི. ཐེརོ མུཁཾ དྷོཝིཏྭཱ ཙཱིཝརཾ པཱརུཔི. ཨུབྷོཔི མནུསྶཱནཾ ¶ ཝསནཊྛཱནཾ ཨགམཾསུ. མནུསྶཱཔི ཨཏྟནོ པརིབྷོགཾ ཀནྡམཱུལཕལཔཎྞཾ ཨདཾསུ. ཐེརོཔི པརིབྷུཉྫིཏྭཱ ཝིཧཱརཾ ཨགམཱསི. སཱམཎེརོ ཨུདཀཾ ཨཱཧརིཏྭཱ ‘‘པཱདེ དྷོཝཱམི, བྷནྟེ’’ཏི ཨཱཧ. ‘‘སཱམཎེར, ཏྭཾ རཏྟིཾ ཀུཧིཾ གཏོ? ཨམྷཱཀཾ ཝིཏཀྐཾ ཨུཔྤཱདེསཱི’’ཏི. ‘‘བྷནྟེ, གཱམནྟེ མེ ཨརུཎཾ ན ཨུཊྛཱཔིཏཔུབྦཾ; ཨརུཎུཊྛཱཔནཏྠཱཡ ཨརཉྙཾ ཨགམཱསི’’ནྟི. ‘‘སཱམཎེར, ན ཏུཡ྄ཧཾ དཎྜཀམྨཾ ཨནུཙྪཝིཀཾ ཨམྷཱཀམེཝ ཨནུཙྪཝིཀ’’ནྟི ཝཏྭཱ ཐེརོ ཏསྨིཾཡེཝ ཋཱནེ ཝསི; སཱམཎེརསྶ ཙ སཉྙཾ ཨདཱསི ‘‘མཡཾ ཏཱཝ མཧལླཀཱ; ‘ཨིདཾ ནཱམ བྷཝིསྶཏཱི’ཏི ན སཀྐཱ ཛཱནིཏུཾ. ཏུཝཾ ཨཏྟཱནཾ རཀྑེཡྻཱསཱི’’ཏི. ཐེརོ ཀིར ཨནཱགཱམཱི. ཏཾ ཨཔརབྷཱགེ མནུསྶཁཱདཀཱ ཁཱདིཾསུ. སཱམཎེརོ ཨཏྟཱནཾ རཀྑིཏྭཱ བྷཡེ ཝཱུཔསནྟེ ཏཐཱརཱུཔེ ཋཱནེ ཨུཔཛ྄ཛྷཾ གཱཧཱཔེཏྭཱ ཨུཔསམྤནྣོ བུདྡྷཝཙནཾ ཨུགྒཧེཏྭཱ ཏིཔིཊཀདྷརོ ཧུཏྭཱ ཝཏྟབྦཀནིགྲོདྷཏྠེརོ ནཱམ ཛཱཏོ.

པིཏུམཧཱརཱཛཱ རཛྫཾ པཊིཔཛྫི. པརསམུདྡཱ ཨཱགཏཱགཏཱ བྷིཀྑཱུ ‘‘ཀཧཾ ཝཏྟབྦཀནིགྲོདྷཏྠེརོ, ཀཧཾ ཝཏྟབྦཀནིགྲོདྷཏྠེརོ’’ཏི པུཙྪིཏྭཱ ཏསྶ སནྟིཀཾ ཨགམཾསུ. མཧཱབྷིཀྑུསངྒྷོ ཐེརཾ པརིཝཱརེསི. སོ མཧཱབྷིཀྑུསངྒྷཔརིཝུཏོ ཨནུཔུབྦེན མཧཱཝིཧཱརཾ པཏྭཱ མཧཱབོདྷིཾ མཧཱཙེཏིཡཾ ཐཱུཔཱརཱམཉྩ ཝནྡིཏྭཱ ནགརཾ པཱཡཱསི. ཡཱཝ དཀྑིཎདྭཱརཱ གཙྪནྟསྶེཝ ནཝསུ ཋཱནེསུ ཏིཙཱིཝརཾ ཨུཔཔཛྫི; ཨནྟོནགརཾ པཝིཊྛཀཱལཏོ པཊྛཱཡ མཧཱསཀྐཱརོ ཨུཔྤཛྫི. ཨིཏི ཀཱལཝིཔཏྟིཡཾ ཏཱལཕལཀནྡམཱུལཔཎྞམྤི དུལླབྷཾ ཛཱཏཾ. ཀཱལསམྤཏྟིཡཾ ཨེཝརཱུཔོ མཧཱལཱབྷོ ཨུཔྤནྣོཏི. ཨེཝཾ ཀཱལཝིཔཏྟིཔཊིབཱཧིཏཏྟཱ ¶ ཝིཔཱཀཾ དཱཏུཾ ཨསཀྐོནྟཱནི ཀཱལསམྤཏྟིཾ ཨཱགམྨ ཝིཔཙྩནྟཱིཏི པཛཱནཱཏི.

ཨཔརསྶཱཔི ¶ བཧཱུནི ཀལྱཱཎཀམྨཱནི ཧོནྟི. ཏཱནི པཡོགཝིཔཏྟིཡཾ ཋིཏསྶ ན ཝིཔཙྩེཡྻུཾ. སོ པན ཨེཀེན ཀལྱཱཎཀམྨེན སམྨཱཔཡོགེ པཏིཊྛིཏོ ཏཱིཎི སུཙརིཏཱནི པཱུརེཏི, པཉྩསཱིལཾ དསསཱིལཾ རཀྑཏི. ཀཱལསམྤཏྟིཡཾ ནིབྦཏྟསྶ རཱཛཱནོ སབྦཱལངྐཱརཔཏིམཎྜིཏཱ རཱཛཀཉྙཱཡོ ‘ཨེཏསྶ ཨནུཙྪཝིཀཱ’ཏི པེསེནྟི, ཡཱནཝཱཧནམཎིསུཝཎྞརཛཏཱདིབྷེདཾ ཏཾ ཏཾ པཎྞཱཀཱརཾ ‘ཨེཏསྶ ཨནུཙྪཝིཀ’ནྟི པེསེནྟི ¶ .

པབྦཛྫཱུཔགཏོཔི མཧཱཡསོ ཧོཏི མཧཱནུབྷཱཝོ. ཏཏྲིདཾ ཝཏྠུ – ཀཱུཊཀཎྞརཱཛཱ ཀིར གིརིགཱམཀཎྞཝཱསིཀཾ ཙཱུལ༹སུདྷམྨཏྠེརཾ མམཱཡཏི. སོ ཨུཔྤལཝཱཔིཡཾ ཝསམཱནོ ཐེརཾ པཀྐོསཱཔེསི. ཐེརོ ཨཱགནྟྭཱ མཱལཱརཱམཝིཧཱརེ ཝསཏི. རཱཛཱ ཐེརསྶ མཱཏརཾ པུཙྪི – ‘‘ཀིཾ ཐེརོ པིཡཱཡཏཱི’’ཏི? ‘‘ཀནྡཾ མཧཱརཱཛཱ’’ཏི. རཱཛཱ ཀནྡཾ གཱཧཱཔེཏྭཱ ཝིཧཱརཾ གནྟྭཱ ཐེརསྶ དདམཱནོ མུཁཾ ཨུལློཀེཏུཾ ནཱསཀྑི. སོ ནིཀྑམིཏྭཱ ཙ བཧིཔརིཝེཎེ དེཝིཾ པུཙྪི – ‘‘ཀཱིདིསོ ཐེརོ’’ཏི? ‘‘ཏྭཾ པུརིསོ ཧུཏྭཱ ཨུལློཀེཏུཾ ན སཀྐོསི; ཨཧཾ ཀཐཾ སཀྑིསྶཱམི? ནཱཧཾ ཛཱནཱམི ཀཱིདིསོ’’ཏི. རཱཛཱ ‘མམ རཊྛེ བལིཀཱརགཧཔཏིཔུཏྟཾ ཨུལློཀེཏུཾ ན ཝིསཧཱམི. མཧནྟཾ ཝཏ བྷོ བུདྡྷསཱསནཾ ནཱམཱ’ཏི ཨཔྥོཊེསི. ཏིཔིཊཀཙཱུལ༹ནཱགཏྠེརམྤི མམཱཡཏི. ཏསྶ ཨངྒུལིཡཾ ཨེཀཱ པིལ༹ཀཱ ཨུཊྛཧི. རཱཛཱ ‘ཐེརཾ པསྶིསྶཱམཱི’ཏི ཝིཧཱརཾ གནྟྭཱ བལཝཔེམེན ཨངྒུལིཾ མུཁེན གཎྷི. ཨནྟོམུཁེཡེཝ པིལ༹ཀཱ བྷིནྣཱ, པུབྦལོཧིཏཾ ཨནུཊྛུབྷིཏྭཱ ཐེརེ སིནེཧེན ཨམཏཾ ཝིཡ ཨཛ྄ཛྷོཧརི. སོཡེཝ ཐེརོ ཨཔརབྷཱགེ མརཎམཉྩེ ནིཔཛྫི. རཱཛཱ གནྟྭཱ ཨསུཙིཀཔལླཀཾ སཱིསེ ཋཔེཏྭཱ ‘དྷམྨསཀཊསྶ ཨཀྑོ བྷིཛྫཏི ཨཀྑོ བྷིཛྫཏཱི’ཏི པརིདེཝམཱནོ ཝིཙརི. པཐཝིསྶརསྶ ཨསུཙིཀཔལླཀཾ སཱིསེན ཨུཀྑིཔིཏྭཱ ཝིཙརཎཾ ནཱམ ཀསྶ གཏམགྒོ? སམྨཱཔཡོགསྶ གཏམགྒོཏི. ཨེཝཾ པཡོགཝིཔཏྟིཔཊིབཱཧིཏཏྟཱ ཝིཔཱཀཾ དཱཏུཾ ཨསཀྐོནྟཱནི པཡོགསམྤཏྟིཾ ཨཱགམྨ ཝིཔཙྩནྟཱིཏི པཛཱནཱཏི. ཨེཝཾ ཙཏཱུཧི ཝིཔཏྟཱིཧི པཊིབཱཧིཏཾ ཀལྱཱཎཀམྨཾ ཝིཔཱཀཾ ཨདཏྭཱ ཙཏསྶོ སམྤཏྟིཡོ ཨཱགམྨ དེཏི.

ཏཏྲིདཾ བྷཱུཏམཏྠཾ ཀཏྭཱ ཨོཔམྨཾ – ཨེཀོ ཀིར མཧཱརཱཛཱ ཨེཀསྶ ཨམཙྩསྶ ཨཔྤམཏྟེན ཀུཛ྄ཛྷིཏྭཱ ཏཾ བནྡྷནཱགཱརེ བནྡྷཱཔེསི. ཏསྶ ཉཱཏཀཱ རཉྙོ ¶ ཀུདྡྷབྷཱཝཾ ཉཏྭཱ ཀིཉྩི ཨཝཏྭཱ ཙཎྜཀོཔེ ཝིགཏེ རཱཛཱནཾ ཏསྶ ནིརཔརཱདྷབྷཱཝཾ ཛཱནཱཔེསུཾ. རཱཛཱ མུཉྩིཏྭཱ ཏསྶ ཋཱནནྟརཾ པཊིཔཱཀཏིཀཾ ཨཀཱསི. ཨཐསྶ ཏཏོ ཏཏོ ཨཱགཙྪནྟཱནཾ པཎྞཱཀཱརཱནཾ པམཱཎཾ ནཱཧོསི. མནུསྶཱ སམྤཊིཙྪིཏུཾ ནཱསཀྑིཾསུ. ཏཏྠ ¶ རཉྙོ ཨཔྤམཏྟཀེན ཀུཛ྄ཛྷིཏྭཱ ཏསྶ བནྡྷནཱགཱརེ ¶ བནྡྷཱཔིཏཀཱལོ ཝིཡ པུཐུཛྫནསྶ ནིརཡེ ནིབྦཏྟཀཱལོ. ཨཐསྶ ཉཱཏཀེཧི རཱཛཱནཾ སཉྙཱཔེཏྭཱ ཋཱནནྟརསྶ པཊིཔཱཀཏིཀཀརཎཀཱལོ ཝིཡ ཏསྶ སགྒེ ནིབྦཏྟཀཱལོ. པཎྞཱཀཱརཾ སམྤཊིཙྪིཏུཾ ཨསམཏྠཀཱལོ ཝིཡ ཙཏསྶོ སམྤཏྟིཡོ ཨཱགམྨ ཀལྱཱཎཀམྨཱནཾ དེཝལོཀཏོ མནུསྶལོཀཾ, མནུསྶལོཀཏོ དེཝལོཀནྟི ཨེཝཾ སུཁཊྛཱནཏོ སུཁཊྛཱནམེཝ ནེཏྭཱ ཀཔྤསཏསཧསྶམྤི སུཁཝིཔཱཀཾ དཏྭཱ ནིབྦཱནསམྤཱཔནཾ ཝེདིཏབྦཾ.

ཨེཝཾ ཏཱཝ པཱལི༹ཝསེནེཝ དུཏིཡཾ བལཾ དཱིཔེཏྭཱ པུན ‘‘ཨཧོསི ཀམྨཾ ཨཧོསི ཀམྨཝིཔཱཀོ’’ཏི (པཊི. མ. ༡.༢༣༤) ཨིམིནཱ པཊིསམྦྷིདཱནཡེནཱཔི དཱིཔེཏབྦཾ. ཏཏྠ ‘ཨཧོསི ཀམྨ’ནྟི ཨཏཱིཏེ ཨཱཡཱུཧིཏཾ ཀམྨཾ ཨཏཱིཏེཡེཝ ཨཧོསི. ཡེན པན ཨཏཱིཏེ ཝིཔཱཀོ དིནྣོ, ཏཾ སནྡྷཱཡ ‘ཨཧོསི ཀམྨཝིཔཱཀོ’ཏི ཝུཏྟཾ. དིཊྛདྷམྨཝེདནཱིཡཱདཱིསུ པན བཧཱུསུཔི ཨཱཡཱུཧིཏེསུ ཨེཀཾ དིཊྛདྷམྨཝེདནཱིཡཾ ཝིཔཱཀཾ དེཏི, སེསཱནི ཨཝིཔཱཀཱནི. ཨེཀཾ ཨུཔཔཛྫཝེདནཱིཡཾ པཊིསནྡྷིཾ ཨཱཀཌྜྷཏི, སེསཱནི ཨཝིཔཱཀཱནི. ཨེཀེནཱནནྟརིཡེན ནིརཡེ ཨུཔཔཛྫཏི, སེསཱནི ཨཝིཔཱཀཱནི. ཨཊྛསུ སམཱཔཏྟཱིསུ ཨེཀཱཡ བྲཧྨལོཀེ ནིབྦཏྟཏི, སེསཱ ཨཝིཔཱཀཱ. ཨིདཾ སནྡྷཱཡ ‘ནཱཧོསི ཀམྨཝིཔཱཀོ’ཏི ཝུཏྟཾ. ཡོ པན བཧུམྤི ཀུསལཱཀུསལཾ ཀམྨཾ ཀཏྭཱ ཀལྱཱཎམིཏྟཾ ནིསྶཱཡ ཨརཧཏྟཾ པཱཔུཎཱཏི, ཨེཏསྶ ཀམྨཝིཔཱཀོ ‘ནཱཧོསི’ ནཱམ. ཡཾ ཨཏཱིཏེ ཨཱཡཱུཧིཏཾ ཨེཏརཧི ཝིཔཱཀཾ དེཏི ཏཾ ‘ཨཧོསི ཀམྨཾ ཨཏྠི ཀམྨཝིཔཱཀོ’ ནཱམ. ཡཾ པུརིམནཡེནེཝ ཨཝིཔཱཀཏཾ ཨཱཔཛྫཏི ཏཾ ‘ཨཧོསི ཀམྨཾ ནཏྠི ཀམྨཝིཔཱཀོ’ ནཱམ. ཡཾ ཨཏཱིཏེ ཨཱཡཱུཧིཏཾ ཨནཱགཏེ ཝིཔཱཀཾ དསྶཏི ཏཾ ‘ཨཧོསི ཀམྨཾ བྷཝིསྶཏི ཀམྨཝིཔཱཀོ’ ནཱམ. ཡཾ པུརིམནཡེན ཨཝིཔཱཀཏཾ ཨཱཔཛྫིསྶཏི ཏཾ ‘ཨཧོསི ཀམྨཾ ན བྷཝིསྶཏི ཀམྨཝིཔཱཀོ’ ནཱམ.

ཡཾ ¶ ཨེཏརཧི ཨཱཡཱུཧིཏཾ ཨེཏརཧིཡེཝ ཝིཔཱཀཾ དེཏི ཏཾ ‘ཨཏྠི ཀམྨཾ ཨཏྠི ཀམྨཝིཔཱཀོ’ ནཱམ. ཡཾ པུརིམནཡེནེཝ ¶ ཨཝིཔཱཀཏཾ ཨཱཔཛྫཏི ཏཾ ‘ཨཏྠི ཀམྨཾ ནཏྠི ཀམྨཝིཔཱཀོ’ ནཱམ. ཡཾ ཨེཏརཧི ཨཱཡཱུཧིཏཾ ཨནཱགཏེ ཝིཔཱཀཾ དསྶཏི ཏཾ ‘ཨཏྠི ཀམྨཾ བྷཝིསྶཏི ཀམྨཝིཔཱཀོ’ ནཱམ. ཡཾ པུརིམནཡེནེཝ ཨཝིཔཱཀཏཾ ཨཱཔཛྫིསྶཏི ཏཾ ‘ཨཏྠི ཀམྨཾ ན བྷཝིསྶཏི ཀམྨཝིཔཱཀོ’ ནཱམ.

ཡཾ སཡམྤི ཨནཱགཏཾ, ཝིཔཱཀོཔིསྶ ཨནཱགཏོ ཏཾ ‘བྷཝིསྶཏི ཀམྨཾ བྷཝིསྶཏི ཀམྨཝིཔཱཀོ’ ¶ ནཱམ. ཡཾ སཡཾ བྷཝིསྶཏི, པུརིམནཡེནེཝ ཨཝིཔཱཀཏཾ ཨཱཔཛྫིསྶཏི ཏཾ ‘བྷཝིསྶཏི ཀམྨཾ ན བྷཝིསྶཏི ཀམྨཝིཔཱཀོ’ ནཱམ.

ཨིདཾ ཏཐཱགཏསྶཱཏི ཨིདཾ སབྦེཧིཔི ཨེཏེཧི ཨཱཀཱརེཧི ཏཐཱགཏསྶ ཀམྨནྟརཝིཔཱཀནྟརཛཱནནཉཱཎཾ ཨཀམྤིཡཊྛེན དུཏིཡབལཾ ཝེདིཏབྦནྟི.

དུཏིཡབལནིདྡེསཝཎྞནཱ.

ཏཏིཡབལནིདྡེསོ

༨༡༡. ཏཏིཡབལནིདྡེསེ མགྒོཏི ཝཱ པཊིཔདཱཏི ཝཱ ཀམྨསྶེཝེཏཾ ནཱམཾ. ནིརཡགཱམིནཱིཏིཨཱདཱིསུ ནིརསྶཱདཊྛེན ནིརཏིཨཏྠེན ཙ ནིརཡོ. ཨུདྡྷཾ ཨནུགནྟྭཱ ཏིརིཡཾ ཨཉྩིཏཱཏི ཏིརཙྪཱནཱ; ཏིརཙྪཱནཱཡེཝ ཏིརཙྪཱནཡོནི. པེཏཏཱཡ པེཏྟི; ཨིཏོ པེཙྩ གཏབྷཱཝེནཱཏི ཨཏྠོ. པེཏྟིཡེཝ པེཏྟིཝིསཡོ. མནསྶ ཨུསྶནྣཏཱཡ མནུསྶཱ; མནུསྶཱཝ མནུསྶལོཀོ. དིབྦནྟི པཉྩཧི ཀཱམགུཎེཧི ཨདྷིམཏྟཱཡ ཝཱ ཋཱནསམྤཏྟིཡཱཏི དེཝཱ; དེཝཱཝ དེཝལོཀོ. ཝཱནཾ ཝུཙྩཏི ཏཎྷཱ; ཏཾ ཏཏྠ ནཏྠཱིཏི ནིབྦཱནཾ. ནིརཡཾ གཙྪཏཱིཏི ནིརཡགཱམཱི. ཨིདཾ མགྒཾ སནྡྷཱཡ ཝུཏྟཾ. པཊིཔདཱ པན ནིརཡགཱམིནཱི ནཱམ ཧོཏི. སེསཔདེསུཔི ཨེསེཝ ནཡོ. ཨིདཾ སབྦམྤི པཊིཔདཾ ཏཐཱགཏོ པཛཱནཱཏི.

ཀཐཾ ¶ ? སཀལགཱམཝཱསིཀེསུཔི ཧི ཨེཀཏོ ཨེཀཾ སཱུཀརཾ ཝཱ མིགཾ ཝཱ ཛཱིཝིཏཱ ཝོརོཔེནྟེསུ སབྦེསམྤི ཙེཏནཱ པརསྶ ཛཱིཝིཏིནྡྲིཡཱརམྨཎཱཝ ཧོཏི. ཏཾ པན ཀམྨཾ ཏེསཾ ཨཱཡཱུཧནཀྑཎེཡེཝ ནཱནཱ ཧོཏི. ཏེསུ ཧི ཨེཀོ ཨཱདརེན ཚནྡཛཱཏོ ཀརོཏི. ཨེཀོ ‘ཨེཧི ཏྭམྤི ཀརོཧཱི’ཏི པརེཧི ནིཔྤཱིལི༹ཏཏྟཱ ཀརོཏི. ཨེཀོ སམཱནཙྪནྡོ ཝིཡ ཧུཏྭཱ ཨཔྤཊིབཱཧིཡམཱནོ ཝིཙརཏི. ཏེསུ ཨེཀོ ཏེནེཝ ཀམྨེན ནིརཡེ ནིབྦཏྟཏི, ཨེཀོ ཏིརཙྪཱནཡོནིཡཾ, ཨེཀོ པེཏྟིཝིསཡེ. ཏཾ ཏཐཱགཏོ ཨཱཡཱུཧནཀྑཎེཡེཝ ‘ཨིམིནཱ ནཱིཧཱརེན ཨཱཡཱུཧིཏཏྟཱ ཨེས ནིརཡེ ནིབྦཏྟིསྶཏི ¶ , ཨེས ཏིརཙྪཱནཡོནིཡཾ, ཨེས པེཏྟིཝིསཡེ’ཏི པཛཱནཱཏི ¶ . ནིརཡེ ནིབྦཏྟམཱནམྤི ‘ཨེས ཨཊྛསུ མཧཱནིརཡེསུ ནིབྦཏྟིསྶཏི, ཨེས སོལ༹སསུ ཨུསྶདནིརཡེསུ ནིབྦཏྟིསྶཏཱི’ཏི པཛཱནཱཏི. ཏིརཙྪཱནཡོནིཡཾ ནིབྦཏྟམཱནམྤི ‘ཨེས ཨཔཱདཀོ བྷཝིསྶཏི, ཨེས དྭིཔཱདཀོ, ཨེས ཙཏུཔྤཱདཀོ, ཨེས བཧུཔྤཱདཀོ’ཏི པཛཱནཱཏི. པེཏྟིཝིསཡེ ནིབྦཏྟམཱནམྤི ‘ཨེས ནིཛ྄ཛྷཱམཏཎྷིཀོ བྷཝིསྶཏི, ཨེས ཁུཔྤིཔཱསིཀོ, ཨེས པརདཏྟཱུཔཛཱིཝཱི’ཏི པཛཱནཱཏི. ཏེསུ ཙ ཀམྨེསུ ‘ཨིདཾ ཀམྨཾ པཊིསནྡྷིཾ ཨཱཀཌྜྷིཏུཾ ན སཀྑིསྶཏི, དུབྦལཾ དིནྣཱཡ པཊིསནྡྷིཡཱ ཨུཔདྷིཝེཔཀྐཾ བྷཝིསྶཏཱིཏི པཛཱནཱཏི.

ཏཐཱ སཀལགཱམཝཱསིཀེསུ ཨེཀཏོ པིཎྜཔཱཏཾ དདམཱནེསུ སབྦེསམྤི ཙེཏནཱ པིཎྜཔཱཏཱརམྨཎཱཝ ཧོཏི. ཏཾ པན ཀམྨཾ ཏེསཾ ཨཱཡཱུཧནཀྑཎེཡེཝ པུརིམནཡེན ནཱནཱ ཧོཏི. ཏེསུ ཀེཙི དེཝལོཀེ ནིབྦཏྟིསྶནྟི, ཀེཙི མནུསྶལོཀེ. ཏཾ ཏཐཱགཏོ ཨཱཡཱུཧནཀྑཎེཡེཝ ‘ཨིམིནཱ ནཱིཧཱརེན ཨཱཡཱུཧིཏཏྟཱ ཨེས མནུསྶལོཀེ ནིབྦཏྟིསྶཏི, ཨེས དེཝལོཀེ’ཏི པཛཱནཱཏི. དེཝལོཀེ ནིབྦཏྟམཱནཱནམྤི ‘ཨེས པརནིམྨིཏཝསཝཏྟཱིསུ ནིབྦཏྟིསྶཏི, ཨེས ནིམྨཱནརཏཱིསུ, ཨེས ཏུསིཏེསུ, ཨེས ཡཱམེསུ, ཨེས ཏཱཝཏིཾསེསུ, ཨེས ཙཱཏུམཧཱརཱཛིཀེསུ, ཨེས བྷུམྨདེཝེསུ; ཨེས པན ཛེཊྛཀདེཝརཱཛཱ ཧུཏྭཱ ནིབྦཏྟིསྶཏི, ཨེས ཨེཏསྶ དུཏིཡཾ ཝཱ ཏཏིཡཾ ཝཱ ཋཱནནྟརཾ ཀརོནྟོ པརིཙཱརཀོ ཧུཏྭཱ ནིབྦཏྟིསྶཏཱི’ཏི པཛཱནཱཏི. མནུསྶེསུ ནིབྦཏྟམཱནཱནམྤི ‘ཨེས ཁཏྟིཡཀུལེ ནིབྦཏྟིསྶཏི, ཨེས བྲཱཧྨཎཀུལེ, ཨེས ཝེསྶཀུལེ, ཨེས སུདྡཀུལེ; ཨེས པན མནུསྶེསུ རཱཛཱ ཧུཏྭཱ ནིབྦཏྟིསྶཏི, ཨེས ཨེཏསྶ དུཏིཡཾ ཝཱ ཏཏིཡཾ ཝཱ ཋཱནནྟརཾ ཀརོནྟོ པརིཙཱརཀོ ཧུཏྭཱ ནིབྦཏྟིསྶཏཱི’ཏི པཛཱནཱཏི ¶ . ཏེསུ ཙ ཀམྨེསུ ‘ཨིདཾ ཀམྨཾ པཊིསནྡྷིཾ ཨཱཀཌྜྷིཏུཾ ན སཀྑིསྶཏི, དུབྦལཾ དིནྣཱཡ པཊིསནྡྷིཡཱ ཨུཔདྷིཝེཔཀྐཾ བྷཝིསྶཏཱི’ཏི པཛཱནཱཏི.

ཏཐཱ ཝིཔསྶནཾ པཊྛཔེནྟེསུཡེཝ ཡེན ནཱིཧཱརེན ཝིཔསྶནཱ ཨཱརདྡྷཱ, ‘ཨེས ཨརཧཏྟཾ པཱཔུཎིསྶཏི, ཨེས ཨརཧཏྟཾ པཏྟུཾ ན སཀྑིསྶཏི, ཨེས ཨནཱགཱམཱིཡེཝ བྷཝིསྶཏི, ཨེས སཀདཱགཱམཱིཡེཝ, ཨེས སོཏཱཔནྣོཡེཝ; ཨེས པན མགྒཾ ཝཱ ཕལཾ ཝཱ སཙྪིཀཱཏུཾ ན སཀྑིསྶཏི, ལཀྑཎཱརམྨཎཱཡ ཝིཔསྶནཱཡམེཝ ཋསྶཏི; ཨེས པཙྩཡཔརིགྒཧེཡེཝ, ཨེས ¶ ནཱམརཱུཔཔརིགྒཧེཡེཝ, ཨེས ཨརཱུཔཔརིགྒཧེཡེཝ, ཨེས རཱུཔཔརིགྒཧེཡེཝ ཋསྶཏི, ཨེས མཧཱབྷཱུཏམཏྟམེཝ ཝཝཏྠཱཔེསྶཏི, ཨེས ཀིཉྩི སལླཀྑེཏུཾ ན སཀྑིསྶཏཱི’ཏི པཛཱནཱཏི.

ཀསིཎཔརིཀམྨཾ ཀརོནྟེསུཔི ‘ཨེཏསྶ པརིཀམྨམཏྟམེཝ བྷཝིསྶཏི, ནིམིཏྟཾ ཨུཔྤཱདེཏུཾ ¶ ན སཀྑིསྶཏི; ཨེས པན ནིམིཏྟཾ ཨུཔྤཱདེཏུཾ སཀྑིསྶཏི, ཨཔྤནཾ པཱཔེཏུཾ ན སཀྑིསྶཏི; ཨེས ཨཔྤནཾ པཱཔེཏྭཱ ཛྷཱནཾ པཱདཀཾ ཀཏྭཱ ཝིཔསྶནཾ པཊྛཔེཏྭཱ ཨརཧཏྟཾ གཎྷིསྶཏཱི’ཏི པཛཱནཱཏཱིཏི.

ཏཏིཡབལནིདྡེསཝཎྞནཱ.

ཙཏུཏྠབལནིདྡེསོ

༨༡༢. ཙཏུཏྠབལནིདྡེསེ ཁནྡྷནཱནཏྟནྟི ‘ཨཡཾ རཱུཔཀྑནྡྷོ ནཱམ…པེ… ཨཡཾ ཝིཉྙཱཎཀྑནྡྷོ ནཱམཱ’ཏི ཨེཝཾ པཉྩནྣཾ ཁནྡྷཱནཾ ནཱནཱཀརཎཾ པཛཱནཱཏི. ཏེསུཔི ‘ཨེཀཝིདྷེན རཱུཔཀྑནྡྷོ…པེ… ཨེཀཱདསཝིདྷེན རཱུཔཀྑནྡྷོ. ཨེཀཝིདྷེན ཝེདནཱཀྑནྡྷོ…པེ… བཧུཝིདྷེན ཝེདནཱཀྑནྡྷོ…པེ… ཨེཀཝིདྷེན སཉྙཱཀྑནྡྷོ…པེ… ཨེཀཝིདྷེན སངྑཱརཀྑནྡྷོ…པེ… ཨེཀཝིདྷེན ཝིཉྙཱཎཀྑནྡྷོ…པེ… བཧུཝིདྷེན ཝིཉྙཱཎཀྑནྡྷོ’ཏི ཨེཝཾ ཨེཀེཀསྶ ཁནྡྷསྶ ནཱནཏྟཾ པཛཱནཱཏི. ཨཱཡཏནནཱནཏྟནྟི ‘ཨིདཾ ཙཀྑཱཡཏནཾ ནཱམ…པེ… ཨིདཾ དྷམྨཱཡཏནཾ ནཱམ. ཏཏྠ དསཱཡཏནཱ ཀཱམཱཝཙརཱ, དྭེ ཙཏུབྷཱུམཀཱ’ཏི ཨེཝཾ ཨཱཡཏནནཱནཏྟཾ པཛཱནཱཏི. དྷཱཏུནཱནཏྟནྟི ‘ཨཡཾ ཙཀྑུདྷཱཏུ ནཱམ…པེ… ཨཡཾ མནོཝིཉྙཱཎདྷཱཏུ ནཱམ. ཏཏྠ སོལ༹ས དྷཱཏུཡོ ཀཱམཱཝཙརཱ, དྭེ ཙཏུབྷཱུམཀཱ’ཏི ཨེཝཾ དྷཱཏུནཱནཏྟཾ པཛཱནཱཏི.

པུན ¶ ཨནེཀདྷཱཏུནཱནཱདྷཱཏུལོཀནཱནཏྟནྟི ཨིདཾ ན ཀེཝལཾ ཨུཔཱདིནྣཀསངྑཱརལོཀསྶེཝ ནཱནཏྟཾ ཏཐཱགཏོ པཛཱནཱཏི, ཨནུཔཱདིནྣཀསངྑཱརལོཀསྶཱཔི ནཱནཏྟཾ ཏཐཱགཏོ པཛཱནཱཏིཡེཝཱཏི དསྶེཏུཾ གཧིཏཾ. པཙྩེཀབུདྡྷཱ ཧི དྭེ ཙ ཨགྒསཱཝཀཱ ཨུཔཱདིནྣཀསངྑཱརལོཀསྶཱཔི ནཱནཏྟཾ ཨེཀདེསཏོཝ ཛཱནནྟི ནོ ནིཔྤདེསཏོ, ཨནུཔཱདིནྣཀལོཀསྶ པན ནཱནཏྟཾ ན ཛཱནནྟི. སབྦཉྙུབུདྡྷོ པན ‘ཨིམཱཡ ནཱམ དྷཱཏུཡཱ ཨུསྶནྣཱཡ ཨིམསྶ ནཱམ རུཀྑསྶ ཁནྡྷོ སེཏོ ཧོཏི, ཨིམསྶ ཀཱལ༹ཀོ, ཨིམསྶ མཊྚོ; ཨིམསྶ བཧལཏྟཙོ, ཨིམསྶ ཏནུཏྟཙོ; ཨིམཱཡ ནཱམ དྷཱཏུཡཱ ཨུསྶནྣཱཡ ཨིམསྶ རུཀྑསྶ པཏྟཾ ཝཎྞསཎྛཱནཱདིཝསེན ཨེཝརཱུཔཾ ནཱམ ཧོཏི; ཨིམཱཡ པན དྷཱཏུཡཱ ¶ ཨུསྶནྣཱཡ ཨིམསྶ རུཀྑསྶ པུཔྥཾ ནཱིལཀཾ ཧོཏི, པཱིཏཀཾ, ལོཧིཏཀཾ, ཨོདཱཏཾ, སུགནྡྷཾ ¶ , དུགྒནྡྷཾ ཧོཏི; ཨིམཱཡ ནཱམ དྷཱཏུཡཱ ཨུསྶནྣཱཡ ཕལཾ ཁུདྡཀཾ ཧོཏི, མཧནྟཾ, དཱིགྷཾ, རསྶཾ, ཝཊྚཾ, སུསཎྛཱནཾ, དུསྶཎྛཱནཾ, མཊྛཾ, ཕརུསཾ, སུགནྡྷཾ, དུགྒནྡྷཾ, མདྷུརཾ, ཏིཏྟཀཾ, ཨམྦིལཾ, ཀཊུཀཾ, ཀསཱཝཾ ཧོཏི; ཨིམཱཡ ནཱམ དྷཱཏུཡཱ ཨུསྶནྣཱཡ ཨིམསྶ རུཀྑསྶ ཀཎྚཀོ ཏིཁིཎོ ཧོཏི, ཨཏིཁིཎོ, ཨུཛུཀོ, ཀུཊིལོ, ཏམྦོ, ཀཱལ༹ཀོ, ནཱིལོ, ཨོདཱཏོ ཧོཏཱི’ཏི ཨེཝཾ ཨནུཔཱདིནྣཀསངྑཱརལོཀསྶ ནཱནཏྟཾ པཛཱནཱཏི. སབྦཉྙུབུདྡྷཱནཾཡེཝ ཧི ཨེཏཾ བལཾ, ན ཨཉྙེསནྟི.

ཙཏུཏྠབལནིདྡེསཝཎྞནཱ.

པཉྩམབལནིདྡེསོ

༨༡༣. པཉྩམབལནིདྡེསེ ཧཱིནཱདྷིམུཏྟིཀཱཏི ཧཱིནཛ྄ཛྷཱསཡཱ. པཎཱིཏཱདྷིམུཏྟིཀཱཏི ཀལྱཱཎཛ྄ཛྷཱསཡཱ. སེཝནྟཱིཏི ནིསྶཡནྟི ཨལླཱིཡནྟི. བྷཛནྟཱིཏི ཨུཔསངྐམནྟི. པཡིརུཔཱསནྟཱིཏི པུནཔྤུནཾ ཨུཔསངྐམནྟི. སཙེ ཧི ཨཱཙརིཡུཔཛ྄ཛྷཱཡཱ ན སཱིལཝནྟོ ཧོནྟི, སདྡྷིཝིཧཱརིཀཱ སཱིལཝནྟོ ཧོནྟི, ཏེ ཨཏྟནོ ཨཱཙརིཡུཔཛ྄ཛྷཱཡེཔི ན ཨུཔསངྐམནྟི, ཨཏྟནཱ སདིསེ སཱརུཔྤབྷིཀྑཱུཡེཝ ཨུཔསངྐམནྟི. སཙེ ཨཱཙརིཡུཔཛ྄ཛྷཱཡཱ སཱརུཔྤབྷིཀྑཱུ, ཨིཏརེ ཨསཱརུཔྤཱ, ཏེཔི ན ཨཱཙརིཡུཔཛ྄ཛྷཱཡེ ཨུཔསངྐམནྟི, ཨཏྟནཱ སདིསེ ཧཱིནཱདྷིམུཏྟིཀེ ཨེཝ ཨུཔསངྐམནྟི.

ཨེཝཾ ¶ ཨུཔསངྐམནཾ པན ན ཀེཝལཾ ཨེཏརཧེཝ, ཨཏཱིཏཱནཱགཏེཔཱིཏི དསྶེཏུཾ ཨཏཱིཏམྤི ཨདྡྷཱནནྟིཨཱདིམཱཧ. ཏཾ ཨུཏྟཱནཏྠམེཝ. ཨིདཾ པན དུསྶཱིལཱནཾ དུསྶཱིལསེཝནམེཝ, སཱིལཝནྟཱནཾ སཱིལཝནྟསེཝནམེཝ, དུཔྤཉྙཱནཾ དུཔྤཉྙསེཝནམེཝ, པཉྙཝནྟཱནཾ པཉྙཝནྟསེཝནམེཝ ཀོ ནིཡཱམེཏཱིཏི? ཨཛ྄ཛྷཱསཡདྷཱཏུ ནིཡཱམེཏི. སམྦཧུལཱ ཀིར བྷིཀྑཱུ ཨེཀཾ གཱམཾ གཎབྷིཀྑཱཙཱརཾ ཙརནྟི. མནུསྶཱ བཧུབྷཏྟཾ ཨཱཧརིཏྭཱ པཏྟཱནི པཱུརེཏྭཱ ‘‘ཏུམྷཱཀཾ ཡཐཱསབྷཱགེན པརིབྷུཉྙཐཱ’’ཏི དཏྭཱ ཨུཡྻོཛེསུཾ. བྷིཀྑཱུཔི ཨཱཧཾསུ ‘‘ཨཱཝུསོ, མནུསྶཱ དྷཱཏུསཾཡུཏྟཀམྨེ པཡོཛེནྟཱི’’ཏི. ཏིཔིཊཀཙཱུལཱ༹བྷཡཏྠེརོཔི ནཱགདཱིཔེ ཙེཏིཡཾ ཝནྡནཱཡ པཉྩཧི བྷིཀྑུསཏེཧི སདྡྷིཾ གཙྪནྟོ ཨེཀསྨིཾ གཱམེ མནུསྶེཧི ནིམནྟིཏོ. ཐེརེན ཙ སདྡྷིཾ ཨེཀོ ཨསཱརུཔྤབྷིཀྑུ ཨཏྠི. དྷུརཝིཧཱརེཔི ¶ ཨེཀོ ཨསཱརུཔྤབྷིཀྑུ ཨཏྠི. དྭཱིསུ བྷིཀྑུསངྒྷེསུ གཱམཾ ¶ ཨོསརནྟེསུ ཏེ ཨུབྷོཔི ཛནཱ, ཀིཉྩཱཔི ཨཱགནྟུཀེན ནེཝཱསིཀོ ནེཝཱསིཀེན ཝཱ ཨཱགནྟུཀོ ན དིཊྛཔུབྦོ, ཨེཝཾ སནྟེཔི, ཨེཀཏོ ཧུཏྭཱ ཧསིཏྭཱ ཧསིཏྭཱ ཀཐཡམཱནཱ ཨེཀམནྟཾ ཨཊྛཾསུ. ཐེརོ དིསྭཱ ‘‘སམྨཱསམྦུདྡྷེན ཛཱནིཏྭཱ དྷཱཏུསཾཡུཏྟཾ ཀཐིཏ’’ནྟི ཨཱཧ.

ཨེཝཾ ‘ཨཛ྄ཛྷཱསཡདྷཱཏུ ནིཡཱམེཏཱི’ཏི ཝཏྭཱ དྷཱཏུསཾཡུཏྟེན ཨཡམེཝཏྠོ དཱིཔེཏབྦོ. གིཛ྄ཛྷཀཱུཊཔབྦཏསྨིཉྷི གིལཱནསེཡྻཱཡ ནིཔནྣོ བྷགཝཱ ཨཱརཀྑཎཏྠཱཡ པརིཝཱརེཏྭཱ ཝསནྟེསུ སཱརིཔུཏྟམོགྒལླཱནཱདཱིསུ ཨེཀམེཀཾ ཨཏྟནོ ཨཏྟནོ པརིསཱཡ སདྡྷིཾ ཙངྐམནྟཾ ཨོལོཀེཏྭཱ བྷིཀྑཱུ ཨཱམནྟེསི ‘‘པསྶཐ ནོ ཏུམྷེ, བྷིཀྑཝེ, སཱརིཔུཏྟཾ སམྦཧུལེཧི བྷིཀྑཱུཧི སདྡྷིཾ ཙངྐམནྟ’’ནྟི? ‘‘ཨེཝཾ, བྷནྟེ’’ཏི. ‘‘སབྦེ ཁོ ཨེཏེ, བྷིཀྑཝེ, བྷིཀྑཱུ མཧཱཔཉྙཱ’’ཏི (སཾ. ནི. ༢.༩༩) སབྦཾ ཝིཏྠཱརེཏབྦནྟི.

པཉྩམབལནིདྡེསཝཎྞནཱ.

ཚཊྛབལནིདྡེསོ

༨༡༤. ཚཊྛབལནིདྡེསེ ཨཱསཡནྟི ཡཏྠ སཏྟཱ ཨཱསཡནྟི ནིཝསནྟི, ཏཾ ཏེསཾ ནིཝཱསཊྛཱནཾ དིཊྛིགཏཾ ཝཱ ཡཐཱབྷཱུཏཾ ཉཱཎཾ ཝཱ. ཨནུསཡནྟི ཨཔྤཧཱིནཱནུསཡིཏཾ ¶ ཀིལེསཾ. ཙརིཏནྟི ཀཱཡཱདཱིཧི ཨབྷིསངྑཏཾ ཀུསལཱཀུསལཾ. ཨདྷིམུཏྟནྟི ཨཛ྄ཛྷཱསཡཾ. ཨཔྤརཛཀྑེཏིཨཱདཱིསུ པཉྙཱམཡེ ཨཀྑིམྷི ཨཔྤཾ པརིཏྟཾ རཱགདོསམོཧརཛཾ ཨེཏེསནྟི ཨཔྤརཛཀྑཱ. ཏསྶེཝ མཧནྟཏཱཡ མཧཱརཛཀྑཱ. ཨུབྷཡེནཱཔི མནྡཀིལེསེ མཧཱཀིལེསེ ཙ སཏྟེ དསྶེཏི. ཡེསཾ སདྡྷཱདཱིནི ཨིནྡྲིཡཱནི ཏིཀྑཱནི, ཏེ ཏིཀྑིནྡྲིཡཱ. ཡེསཾ ཏཱནི མུདཱུནི, ཏེ མུདིནྡྲིཡཱ. ཡེསཾ ཨཱསཡཱདཡོ ཀོཊྛཱསཱ སུནྡརཱ, ཏེ སྭཱཀཱརཱ. ཝིཔརཱིཏཱ དྭཱཀཱརཱ. ཡེ ཀཐིཏཀཱརཎཾ སལླཀྑེནྟི, སུཁེན སཀྐཱ ཧོནྟི ཝིཉྙཱཔེཏུཾ, ཏེ སུཝིཉྙཱཔཡཱ. ཝིཔརཱིཏཱ དུཝིཉྙཱཔཡཱ. ཡེ ཨརིཡམགྒཔཊིཝེདྷསྶ ཨནུཙྪཝིཀཱ ཨུཔནིསྶཡསམྤནྣཱ, ཏེ བྷབྦཱ. ཝིཔརཱིཏཱ ཨབྷབྦཱ.

༨༡༥. ཨེཝཾ ¶ ཚཊྛབལསྶ མཱཏིཀཾ ཋཔེཏྭཱ ཨིདཱནི ཡཐཱཔཊིཔཱཊིཡཱ བྷཱཛེནྟོ ཀཏམོ ཙ སཏྟཱནཾ ཨཱསཡོཏིཨཱདིམཱཧ. ཏཏྠ ¶ སསྶཏོ ལོཀོཏིཨཱདཱིནཾ ཨཏྠོ ཧེཊྛཱ ནིཀྑེཔཀཎྜཝཎྞནཱཡཾ (དྷ. ས. ཨཊྛ. ༡༡༠༥) ཝུཏྟོཡེཝ. ཨིཏི བྷཝདིཊྛིསནྣིསྶིཏཱ ཝཱཏི ཨེཝཾ སསྶཏདིཊྛིཾ ཝཱ སནྣིསྶིཏཱ. སསྶཏདིཊྛི ཧི ཨེཏྠ བྷཝདིཊྛཱིཏི ཝུཏྟཱ; ཨུཙྪེདདིཊྛི ཙ ཝིབྷཝདིཊྛཱིཏི. སབྦདིཊྛཱིནཉྷི སསྶཏུཙྪེདདིཊྛཱི ཧི སངྒཧིཏཏྟཱ སབྦེཔི དིཊྛིགཏིཀཱ སཏྟཱ ཨིམཱཝ དྭེ དིཊྛིཡོ སནྣིསྶིཏཱ ཧོནྟི. ཝུཏྟམྤི ཙེཏཾ – ‘‘དྭཡསནྣིསྶིཏོ ཁོ པནཱཡཾ, ཀཙྩཱན, ལོཀོ ཡེབྷུཡྻེན – ཨཏྠིཏཉྩེཝ ནཏྠིཏཉྩཱ’’ཏི (སཾ. ནི. ༢.༡༥). ཨེཏྠ ཧི ཨཏྠིཏཱཏི སསྶཏཾ, ནཏྠིཏཱཏི ཨུཙྪེདོ. ཨཡཾ ཏཱཝ ཝཊྚསནྣིསྶིཏཱནཾ པུཐུཛྫནསཏྟཱནཾ ཨཱསཡོ.

ཨིདཱནི ཝིཝཊྚསནྣིསྶིཏཱནཾ སུདྡྷསཏྟཱནཾ ཨཱསཡཾ དསྶེཏུཾ ཨེཏེ ཝཱ པན ཨུབྷོ ཨནྟེ ཨནུཔགམྨཱཏིཨཱདི ཝུཏྟཾ. ཏཏྠ ཨེཏེ ཝཱ པནཱཏི ཨེཏེཡེཝ. ཨུབྷོ ཨནྟེཏི སསྶཏུཙྪེདསངྑཱཏེ དྭེ ཨནྟེ. ཨནུཔགམྨཱཏི ཨནལླཱིཡིཏྭཱ. ཨིདཔྤཙྩཡཏཱ པཊིཙྩསམུཔྤནྣེསུ དྷམྨེསཱུཏི ཨིདཔྤཙྩཡཏཱཡ ཙེཝ པཊིཙྩསམུཔྤནྣདྷམྨེསུ ཙ. ཨནུལོམིཀཱ ཁནྟཱིཏི ཝིཔསྶནཱཉཱཎཾ. ཡཐཱབྷཱུཏཾ ཝཱ ཉཱཎནྟི མགྒཉཱཎཾ. ཨིདཾ ཝུཏྟཾ ཧོཏི – ཡཱ པཊིཙྩསམུཔྤཱདེ ཙེཝ པཊིཙྩསམུཔྤནྣདྷམྨེསུ ཙ ཨེཏེ ཨུབྷོ སསྶཏུཙྪེདཨནྟེ ཨནུཔགནྟྭཱ ཝིཔསྶནཱ པཊིལདྡྷཱ, ཡཉྩ ཏཏོ ཨུཏྟརིམགྒཉཱཎཾ – ཨཡཾ སཏྟཱནཾ ཨཱསཡོ, ཨཡཾ ཝཊྚསནྣིསྶིཏཱནཉྩ ཝིཝཊྚསནྣིསྶིཏཱནཉྩ སབྦེསམྤི སཏྟཱནཾ ཨཱསཡོ, ཨིདཾ ཝསནཊྛཱནནྟི. ཨཡཾ ཨཱཙརིཡཱནཾ སམཱནཏྠཀཐཱ.

ཝིཏཎྜཝཱདཱི ¶ པནཱཧ – ‘མགྒོ ནཱམ ཝཱསཾ ཝིདྡྷཾསེནྟོ གཙྪཏི, ནནུ ཏྭཾ མགྒོ ཝཱསོཏི ཝདེསཱི’ཏི? སོ ཝཏྟབྦོ ‘ཏྭཾ ཨརིཡཝཱསབྷཱཎཀོ ཧོསི ན ཧོསཱི’ཏི? སཙེ པན ‘ན ཧོམཱི’ཏི ཝདཏི, ‘ཨབྷཱཎཀཏཱཡ ན ཛཱནཱསཱི’ཏི ཝཏྟབྦོ. སཙེ ‘བྷཱཎཀོསྨཱི’ཏི ཝདཏི, ‘སུཏྟཾ ཨཱཧརཱ’ཏི ཝཏྟབྦོ. སཙེ ཨཱཧརཏི, ཨིཙྩེཏཾ ཀུསལཾ; ནོ ཙེ ཨཱཧརཏི སཡཾ ཨཱཧརིཏབྦཾ – ‘‘དསཡིམེ, བྷིཀྑཝེ, ཨརིཡཝཱསཱ, ཡེ ཨརིཡཱ ཨཱཝསིཾསུ ཝཱ ཨཱཝསནྟི ཝཱ ཨཱཝསིསྶནྟི ཝཱ’’ཏི (ཨ. ནི. ༡༠.༡༩). ཨེཏཉྷི སུཏྟཾ མགྒསྶ ཝཱསབྷཱཝཾ དཱིཔེཏི. ཏསྨཱ ¶ སུཀཐིཏམེཝེཏནྟི. ཨིདཾ པན བྷགཝཱ སཏྟཱནཾ ཨཱསཡཾ ཛཱནནྟོ ཨིམེསཉྩ དིཊྛིགཏཱནཾ ཝིཔསྶནཱཉཱཎམགྒཉཱཎཱནཾ ཨཔྤཝཏྟིཀྑཎེཔི ཛཱནཱཏི ཨེཝ. ཝུཏྟམྤི ཙེཏཾ –

‘‘ཀཱམཾ ¶ སེཝནྟཉྙེཝ ཛཱནཱཏི ‘ཨཡཾ པུགྒལོ ཀཱམགརུཀོ ཀཱམཱསཡོ ཀཱམཱདྷིམུཏྟོ’ཏི. ནེཀྑམྨཾ སེཝནྟཉྙེཝ ཛཱནཱཏི ‘ཨཡཾ པུགྒལོ ནེཀྑམྨགརུཀོ ནེཀྑམྨཱསཡོ ནེཀྑམྨཱདྷིམུཏྟོ’ཏི. བྱཱཔཱདཾ…པེ… ཨབྱཱཔཱདཾ… ཐིནམིདྡྷཾ…པེ… ཨཱལོཀསཉྙཾ ནེཀྑམྨཾ སེཝནྟཉྙེཝ ཛཱནཱཏི སེཝནྟཉྙེཝ ཛཱནཱཏི ‘ཨཡཾ པུགྒལོ ཨཱལོཀསཉྙཱགརུཀོ ཨཱལོཀསཉྙཱསཡོ ཨཱལོཀསཉྙཱདྷིམུཏྟོ’’ཏི (པཊི. མ. ༡.༡༡༣).

༨༡༦. ཨནུསཡནིདྡེསེ ཀཱམརཱགོ ཙ སོ ཨཔྤཧཱིནཊྛེན ཨནུསཡོ ཙཱཏི ཀཱམརཱགཱནུསཡོ. སེསཔདེསུཔི ཨེསེཝ ནཡོ. ཡཾ ལོཀེ པིཡརཱུཔནྟི ཡཾ ཨིམསྨིཾ ལོཀེ པིཡཛཱཏིཀཾ. སཱཏརཱུཔནྟི སཱཏཛཱཏིཀཾ ཨསྶཱདཔདཊྛཱནཾ ཨིཊྛཱརམྨཎཾ. ཨེཏྠ སཏྟཱནཾ རཱགཱནུསཡོ ཨནུསེཏཱིཏི ཨེཏསྨིཾ ཨིཊྛཱརམྨཎེ སཏྟཱནཾ ཨཔྤཧཱིནཊྛེན རཱགཱནུསཡོ ཨནུསེཏི. ཡཐཱ ནཱམ ཨུདཀེ ནིམུགྒསྶ ཧེཊྛཱ ཙ ཨུཔརི ཙ སམནྟབྷཱགེ ཙ ཨུདཀམེཝ ཧོཏི, ཨེཝམེཝ ཨིཊྛཱརམྨཎེ རཱགུཔྤཏྟི ནཱམ སཏྟཱནཾ ཨཱཙིཎྞསམཱཙིཎྞཱ. ཏཐཱ ཨནིཊྛཱརམྨཎེ པཊིགྷུཔྤཏྟི. ཨིཏི ཨིམེསུ དྭཱིསུ དྷམྨེསཱུཏི ཨེཝཾ ཨིམེསུ དྭཱིསུ ཀཱམརཱགཔཊིགྷཝནྟེསུ ཨིཊྛཱནིཊྛཱརམྨཎདྷམྨེསུ. ཨཝིཛྫཱནུཔཏིཏཱཏི ཀཱམརཱགཔཊིགྷསམྤཡུཏྟཱ ཧུཏྭཱ ཨཱརམྨཎཀརཎཝསེན ཨཝིཛྫཱ ཨནུཔཏིཏཱ. ཏདེཀཊྛོཏི ཏཱཡ ཨཝིཛྫཱཡ ¶ སམྤཡུཏྟེཀཊྛཝསེན ཨེཀཊྛོ. མཱནོ ཙ དིཊྛི ཙ ཝིཙིཀིཙྪཱ ཙཱཏི ནཝཝིདྷོ མཱནོ, དྭཱསཊྛིཝིདྷཱ དིཊྛི, ཨཊྛཝཏྠུཀཱ ཙ ཝིཙིཀིཙྪཱ. བྷཝརཱགཱནུསཡོ པནེཏྠ ཀཱམརཱགཱནུསཡེནེཝ སངྒཧིཏོཏི ཝེདིཏབྦོ.

༨༡༧. ཙརིཏནིདྡེསེ ཏེརས ཙེཏནཱ པུཉྙཱབྷིསངྑཱརོ, དྭཱདས ཨཔུཉྙཱབྷིསངྑཱརོ, ཙཏསྶོ ཨཱནེཉྫཱབྷིསངྑཱརོ. ཏཏྠ ཀཱམཱཝཙརོ པརིཏྟབྷཱུམཀོ, ཨིཏརོ མཧཱབྷཱུམཀོ. ཏཱིསུཔི ¶ ཝཱ ཨེཏེསུ ཡོ ཀོཙི ཨཔྤཝིཔཱཀོ པརིཏྟབྷཱུམཀོ, བཧུཝིཔཱཀོ མཧཱབྷཱུམཀོཏི ཝེདིཏབྦོ.

༨༡༨. ཨདྷིམུཏྟིནིདྡེསོ ཧེཊྛཱ པཀཱསིཏོཝ. ཀསྨཱ པནཱཡཾ ཨདྷིམུཏྟི ཧེཊྛཱ ཝུཏྟཱཔི པུན གཧིཏཱཏི? ཨཡཉྷི ཧེཊྛཱ པཱཊིཡེཀྐཾ བལདསྶནཝསེན གཧིཏཱ, ཨིདྷ སཏྟཱནཾ ཏིཀྑིནྡྲིཡམུདིནྡྲིཡབྷཱཝདསྶནཏྠཾ.

༨༡༩. མཧཱརཛཀྑནིདྡེསེ ¶ ཨུསྶདགཏཱནཱིཏི ཝེཔུལླགཏཱནི. པཧཱནཀྐམཝསེན ཙེས ཨུཔྤཊིཔཱཊིཡཱ ནིདྡེསོ ཀཏོ.

༨༢༠. ཨནུསྶདགཏཱནཱིཏི ཨཝེཔུལླགཏཱནིཾ. ཏིཀྑིནྡྲིཡམུདིནྡྲིཡནིདྡེསེ ཨུཔནིསྶཡཨིནྡྲིཡཱནི ནཱམ ཀཐིཏཱནི. ཨུཔྤཊིཔཱཊིཡཱ ནིདྡེསེ པནེཏྠ པཡོཛནཾ ཧེཊྛཱ ཝུཏྟནཡེནེཝ ཝེདིཏབྦཾ.

༨༢༣. ཏཐཱ དྭཱཀཱརནིདྡེསཱདཱིསུ པཱཔཱསཡཱཏི ཨཀུསལཱསཡཱ. པཱཔཙརིཏཱཏི ཨཔུཉྙཱབྷིསངྑཱརཔརིཔཱུརཀཱ. པཱཔཱདྷིམུཏྟིཀཱཏི སཀྐཱཡཱབྷིརཏཱ ཝཊྚཛ྄ཛྷཱསཡཱ.

༨༢༤. སྭཱཀཱརནིདྡེསེ ཡསྨཱ ཀལྱཱཎཀོ ནཱམ ཨནུསཡོ ནཏྠི, ཏསྨཱ ཀལྱཱཎཱནུསཡཱཏི ན ཝུཏྟཾ. སེསཾ ཝུཏྟཝིཔརིཡཱཡེན ཝེདིཏབྦཾ.

༨༢༦. བྷབྦཱབྷབྦནིདྡེསེ ཀམྨཱཝརཎེནཱཏི པཉྩཝིདྷེན ཨཱནནྟརིཡཀམྨེན. ཀིལེསཱཝརཎེནཱཏི ནིཡཏམིཙྪཱདིཊྛིཡཱ. ཝིཔཱཀཱཝརཎེནཱཏི ཨཧེཏུཀཔཊིསནྡྷིཡཱ. ཡསྨཱ པན དུཧེཏུཀཱནམྤི ཨརིཡམགྒཔཊིཝེདྷོ ནཏྠི, ཏསྨཱ དུཧེཏུཀཔཊིསནྡྷིཔི ཝིཔཱཀཱཝརཎམེཝཱཏི ཝེདིཏབྦཱ. ཨསྶདྡྷཱཏི ¶ བུདྡྷཱདཱིསུ སདྡྷཱརཧིཏཱ. ཨཙྪནྡིཀཱཏི ཀཏྟུཀམྱཏཱཀུསལཙྪནྡརཧིཏཱ. ཨུཏྟརཀུརུཀཱ མནུསྶཱ ཨཙྪནྡིཀཊྛཱནཾ པཝིཊྛཱ. དུཔྤཉྙཱཏི བྷཝངྒཔཉྙཱཡ པརིཧཱིནཱ. བྷཝངྒཔཉྙཱཡ པན པརིཔུཎྞཱཡཔི ཡསྶ བྷཝངྒཾ ལོཀུཏྟརསྶ པཱདཀཾ ན ཧོཏི, སོ དུཔྤཉྙོཡེཝ ནཱམ. ཨབྷབྦཱ ནིཡཱམཾ ཨོཀྐམིཏུཾ ཀུསལེསུ དྷམྨེསུ སམྨཏྟནྟི ཀུསལེསུ དྷམྨེསུ སམྨཏྟནིཡཱམསངྑཱཏཾ མགྒཾ ཨོཀྐམིཏུཾ ཨབྷབྦཱ.

༨༢༧. ན ཀམྨཱཝརཎེནཱཏིཨཱདཱིནི ཝུཏྟཝིཔརིཡཱཡེན ཝེདིཏབྦཱནི. ཨིདཾ དྭིནྣཾ ཉཱཎཱནཾ བྷཱཛནཱིཡཾ – ཨིནྡྲིཡཔརོཔརིཡཏྟིཉཱཎསྶ ¶ ཙ ཨཱསཡཱནུསཡཉཱཎསྶ ཙ. ཨེཏྠ ཧི ཨཱསཡཱནུསཡཉཱཎེན ཨིནྡྲིཡཔརོཔརིཡཏྟིཉཱཎམྤི བྷཱཛིཏཾ. ཨིཏི ཨིམཱནི དྭེ ཉཱཎཱནི ཨེཀཏོ ཧུཏྭཱ ཨེཀཾ བལཉཱཎཾ ནཱམ ཛཱཏནྟི.

ཚཊྛབལནིདྡེསཝཎྞནཱ.

སཏྟམབལནིདྡེསོ

༨༢༨. སཏྟམབལནིདྡེསེ ¶ ཛྷཱཡཏཱིཏི ཛྷཱཡཱི. ཙཏྟཱརོ ཛྷཱཡཱིཏི ཛྷཱཡིནོ ཙཏྟཱརོ ཛནཱ ཝུཙྩནྟི. ཏཏྠ པཋམཙཏུཀྐེ ཏཱཝ པཋམོ སམཱཔཏྟིལཱབྷཱི སམཱནོཡེཝ ‘ན ལཱབྷཱིམྷཱི’ཏི, ཀམྨཊྛཱནཾ སམཱནཾཡེཝ ‘ན ཀམྨཊྛཱན’ནྟི སཉྙཱི ཧོཏི. ཨཡཾ ཨཔྤགུཎཛ྄ཛྷཱནལཱབྷཱིཏི ཝེདིཏབྦོ. དུཏིཡོ སམཱཔཏྟིཡཱ ཨལཱབྷཱིཡེཝ ‘ལཱབྷཱིམྷཱི’ཏི, ཨཀམྨཊྛཱནཾ སམཱནཾཡེཝ ‘ཀམྨཊྛཱན’ནྟི སཉྙཱི ཧོཏི. ཨཡཾ ནིདྡཱཛྷཱཡཱི ནཱམ. ནིདྡཱཡིཏྭཱ པཊིབུདྡྷོ ཨེཝཾ མཉྙཏི. ཏཏིཡོ སམཱཔཏྟིལཱབྷཱི སམཱནོ ‘སམཱཔཏྟིལཱབྷཱིམྷཱི’ཏི, ཀམྨཊྛཱནམེཝ སམཱནཾ ‘ཀམྨཊྛཱན’ནྟི སཉྙཱི ཧོཏི. ཨཡཾ པགུཎཛ྄ཛྷཱནལཱབྷཱིཏི ཝེདིཏབྦོ. ཙཏུཏྠོ ཨལཱབྷཱིཡེཝ ‘ཨལཱབྷཱིམྷཱི’ཏི, ཨཀམྨཊྛཱནཾཡེཝ ‘ཨཀམྨཊྛཱན’ནྟི སཉྙཱི ཧོཏི. ཨེཝམེཏྠ དྭེ ཛནཱ ཨཛ྄ཛྷཱཡིནོཝ ཛྷཱཡཱིནཾ ཨནྟོ པཝིཊྛཏྟཱ ཛྷཱཡཱིཏི ཝུཏྟཱ.

དུཏིཡཙཏུཀྐེ སསངྑཱརེན སཔྤཡོགེན སམཱདྷིཔཱརིབནྡྷིཀདྷམྨེ ཝིཀྑམྦྷེནྟོ དནྡྷཾ སམཱཔཛྫཏི ནཱམ. ཨེཀཾ དྭེ ཙིཏྟཝཱརེ ཋཏྭཱ སཧསཱ ཝུཊྛཧནྟཱ ཁིཔྤཾ ཝུཊྛཧཏི ནཱམ. སུཁེནེཝ པན སམཱདྷིཔཱརིབནྡྷིཀདྷམྨེ སོདྷེནྟོ ཁིཔྤཾ སམཱཔཛྫཏི ནཱམ. ཡཐཱཔརིཙྪེདེན ཨཝུཊྛཧིཏྭཱ ཀཱལཾ ¶ ཨཏིནཱམེཏྭཱ ཝུཊྛཧནྟོ དནྡྷཾ ཝུཊྛཱཏི ནཱམ. ཨིཏརེ དྭེཔི ཨིམིནཱཝ ནཡེན ཝེདིཏབྦཱ. ཨིམེ ཙཏྟཱརོཔི ཛནཱ སམཱཔཏྟིལཱབྷིནོཝ.

ཏཏིཡཙཏུཀྐེ ‘ཨིདཾ ཛྷཱནཾ པཉྩངྒིཀཾ, ཨིདཾ ཙཏུརངྒིཀ’ནྟི ཨེཝཾ ཨངྒཝཝཏྠཱནཔརིཙྪེདེ ཚེཀོ སམཱདྷིསྨིཾ སམཱདྷིཀུསལོ ནཱམ. ནཱིཝརཎཱནི པན ཝིཀྑམྦྷེཏྭཱ ཙིཏྟམཉྫཱུསཱཡ ཙིཏྟཾ ཋཔེཏུཾ ཨཚེཀོ ནོ སམཱདྷིསྨིཾ སམཱཔཏྟིཀུསལོ ནཱམ. ཨིཏརེཔི ཏཡོ ཨིམིནཱཝ ནཡེན ཝེདིཏབྦཱ. ཨིམེཔི ཙཏྟཱརོ སམཱཔཏྟིལཱབྷིནོཡེཝ.

ཨིདཱནི ཡཱནི ཛྷཱནཱནི ནིསྶཱཡ ཨིམེ པུགྒལཱ ‘ཛྷཱཡཱི’ ནཱམ ཛཱཏཱ, ཏཱནི དསྶེཏུཾ ཙཏྟཱརི ཛྷཱནཱནཱིཏིཨཱདིམཱཧ. ཏཏྠ ཙཏྟཱརི ཛྷཱནཱནི ¶ ཏཡོ ཙ ཝིམོཀྑཱ ཨཏྠཏོ ཧེཊྛཱ དྷམྨསངྒཧཊྛཀཐཱཡམེཝ (དྷ. ས. ཨཊྛ. ༡༦༠, ༢༤༨) པཀཱསིཏཱ. སེསཱནམྤི ཝིམོཀྑཊྛོ ཏཏྠ ཝུཏྟནཡེནེཝ ཝེདིཏབྦོ. ཨཔིཙེཏྠ པཊིཔཱཊིཡཱ སཏྟ ཨཔྤིཏཔྤིཏཀྑཎེ པཙྩནཱིཀདྷམྨེཧི ཝིམུཙྩནཏོ ཙ ཨཱརམྨཎེ ཙ ཨདྷིམུཙྩནཏོ ཝིམོཀྑོ ནཱམ. ཨཊྛམོ པན སབྦསོ སཉྙཱཝེདཡིཏེཧི ¶ ཝིམུཏྟཏྟཱ ཨཔགཏཝིམོཀྑོ ནཱམ. སམཱདྷཱིསུ ཙཏུཀྐནཡཔཉྩཀནཡེསུ པཋམཛ྄ཛྷཱནསམཱདྷི སཝིཏཀྐསཝིཙཱརོ ནཱམ. པཉྩཀནཡེ དུཏིཡཛ྄ཛྷཱནསམཱདྷི ཨཝིཏཀྐཝིཙཱརམཏྟསམཱདྷི ནཱམ. ཙཏུཀྐནཡེཔི པཉྩཀནཡེཔི ཨུཔརི ཏཱིསུ ཛྷཱནེསུ སམཱདྷི ཨཝིཏཀྐ ཨཝིཙཱརསམཱདྷི ནཱམ. སམཱཔཏྟཱིསུ ཧི པཊིཔཱཊིཡཱ ཨཊྛནྣཾ སམཱཔཏྟཱིནཾ ‘སམཱདྷཱི’ཏིཔི ནཱམཾ ‘སམཱཔཏྟཱི’ཏིཔི. ཀསྨཱ? ཙིཏྟེཀགྒཏཱསབྦྷཱཝཏོ. ནིརོདྷསམཱཔཏྟིཡཱ ཏདབྷཱཝཏོ ན སམཱདྷཱིཏི ནཱམཾ.

ཧཱནབྷཱགིཡོ དྷམྨོཏི ཨཔྤགུཎེཧི པཋམཛ྄ཛྷཱནཱདཱིཧི ཝུཊྛིཏསྶ སཉྙཱམནསིཀཱརཱནཾ ཀཱམཱདིཨནུཔཀྑནྡནཾ. ཝིསེསབྷཱགིཡོ དྷམྨོཏི པགུཎེཧི པཋམཛ྄ཛྷཱནཱདཱིཧི ཝུཊྛིཏསྶ སཉྙཱམནསིཀཱརཱནཾ དུཏིཡཛ྄ཛྷཱནཱདིཨནུཔཀྑནྡནཾ. ཝོདཱནམྤི ཝུཊྛཱནནྟི ཨིམིནཱ པགུཎཝོདཱནཾ ཝུཊྛཱནཾ ནཱམ ཀཐིཏཾ. ཧེཊྛིམཾ ཧེཊྛིམཉྷི པགུཎཛ྄ཛྷཱནཾ ཨུཔརིམསྶ ཨུཔརིམསྶ པདཊྛཱནཾ ཧོཏི. ཏསྨཱ ཝོདཱནམྤི ཝུཊྛཱནནྟི ཝུཏྟཾ. ཏམྷཱ ཏམྷཱ སམཱདྷིམྷཱ ཝུཊྛཱནམྤི ཝུཊྛཱནནྟི ཨིམིནཱ བྷཝངྒཝུཊྛཱནཾ ནཱམ ཀཐིཏཾ. བྷཝངྒེན ཧི སབྦཛ྄ཛྷཱནེཧི ཝུཊྛཱནཾ ཧོཏི. ནིརོདྷཏོ པན ཕལསམཱཔཏྟིཡཱཝ ཝུཊྛཧནྟི. ཨིདཾ པཱལི༹མུཏྟཀཝུཊྛཱནཾ ནཱམཱཏི.

སཏྟམབལནིདྡེསཝཎྞནཱ.

ཨཊྛམབལཱདིནིདྡེསོ

༨༢༩. ཨཊྛམབལནིདྡེསེ ¶ ཨནེཀཝིཧིཏཾ པུབྦེནིཝཱསནྟིཨཱདི སབྦམྤི ཝིསུདྡྷིམགྒེ ཝིཏྠཱརིཏམེཝ. ནཝམབལནིདྡེསེཔི ¶ དིབྦེན ཙཀྑུནཱཏིཨཱདི སབྦཾ ཏཏྠེཝ ཝིཏྠཱརིཏཾ.

ནཝམབལནིདྡེསཝཎྞནཱ.

དསམབལནིདྡེསོ

༨༣༡. དསམབལནིདྡེསེ ¶ ཙེཏོཝིམུཏྟིནྟི ཕལསམཱདྷིཾ. པཉྙཱཝིམུཏྟིནྟི ཕལཉཱཎཾ. སེསཾ སབྦཏྠ ཨུཏྟཱནཏྠམེཝ. ཨཡཾ ཏཱཝེཏྠ ཨཱཙརིཡཱནཾ སམཱནཏྠཀཐཱ. པརཝཱདཱི པནཱཧ – ‘‘དསབལཉཱཎཾ ནཱམ པཱཊིཡེཀྐཾ ནཏྠི, སབྦཉྙུཏཉཱཎསྶེཝཱཡཾ པབྷེདོ’’ཏི. ཏཾ ན ཏཐཱ དཊྛབྦཾ. ཨཉྙམེཝ ཧི དསབལཉཱཎཾ, ཨཉྙཾ སབྦཉྙུཏཉཱཎཾ. དསབལཉཱཎཉྷི སཀསཀཀིཙྩམེཝ ཛཱནཱཏི. སབྦཉྙུཏཉཱཎཾ པན ཏམྤི ཏཏོ ཨཝསེསམྤི ཛཱནཱཏི. དསབལཉཱཎེསུཔི ཧི པཋམཾ ཀཱརཎཱཀཱརཎམེཝ ཛཱནཱཏི, དུཏིཡཾ ཀམྨནྟརཝིཔཱཀནྟརམེཝ, ཏཏིཡཾ ཀམྨཔརིཙྪེདམེཝ, ཙཏུཏྠཾ དྷཱཏུནཱནཏྟཀརཎམེཝ, པཉྩམཾ སཏྟཱནཾ ཨཛ྄ཛྷཱསཡཱདྷིམུཏྟིམེཝ, ཚཊྛཾ ཨིནྡྲིཡཱནཾ ཏིཀྑམུདུབྷཱཝམེཝ, སཏྟམཾ ཛྷཱནཱདཱིཧི སདྡྷིཾ ཏེསཾ སཾཀིལེསཱདིམེཝ, ཨཊྛམཾ པུབྦེནིཝུཏྠཁནྡྷསནྟཏིམེཝ, ནཝམཾ སཏྟཱནཾ ཙུཏིཔཊིསནྡྷིམེཝ, དསམཾ སཙྩཔརིཙྪེདམེཝ. སབྦཉྙུཏཉཱཎཾ པན ཨེཏེཧི ཛཱནིཏབྦཉྩ ཏཏོ ཨུཏྟརིཏརཉྩ པཛཱནཱཏི. ཨེཏེསཾ པན ཀིཙྩཾ ན སབྦཾ ཀརོཏི. ཏཉྷི ཛྷཱནཾ ཧུཏྭཱ ཨཔྤེཏུཾ ན སཀྐོཏི, ཨིདྡྷི ཧུཏྭཱ ཝིཀུབྦིཏུཾ ན སཀྐོཏི, མགྒོ ཧུཏྭཱ ཀིལེསེ ཁེཔེཏུཾ ན སཀྐོཏི.

ཨཔིཙ པརཝཱདཱི ཨེཝཾ པུཙྪིཏབྦོ – ‘‘དསབལཉཱཎཾ ནཱམ ཨེཏཾ སཝིཏཀྐསཝིཙཱརཾ, ཨཝིཏཀྐཝིཙཱརམཏྟཾ, ཨཝིཏཀྐཱཝིཙཱརཾ, ཀཱམཱཝཙརཾ, རཱུཔཱཝཙརཾ, ཨརཱུཔཱཝཙརཾ, ལོཀིཡཾ, ལོཀུཏྟར’’ནྟི? ཛཱནནྟོ ‘‘པཊིཔཱཊིཡཱ སཏྟ ཉཱཎཱནི སཝིཏཀྐསཝིཙཱརཱནཱི’’ཏི ཝཀྑཏི; ཏཏོ ‘‘པརཱནི དྭེ ཉཱཎཱནི ཨཝིཏཀྐཱཝིཙཱརཱནཱི’’ཏི ཝཀྑཏི; ‘‘ཨཱསཝཀྑཡཉཱཎཾ སིཡཱ སཝིཏཀྐསཝིཙཱརཾ, སིཡཱ ཨཝིཏཀྐཝིཙཱརམཏྟཾ, སིཡཱ ཨཝིཏཀྐཝིཙཱར’’ནྟི ཝཀྑཏི. ཏཐཱ ‘‘པཊིཔཱཊིཡཱ ¶ སཏྟ ཀཱམཱཝཙརཱནི, ཏཏོ དྭེ རཱུཔཱཝཙརཱནི, ཨཝསཱནེ ཨེཀཾ ལོཀུཏྟར’’ནྟི ཝཀྑཏི; ‘‘སབྦཉྙུཏཉཱཎཾ པན སཝིཏཀྐསཝིཙཱརམེཝ, ཀཱམཱཝཙརམེཝ, ལོཀིཡམེཝཱ’’ཏི ཝཀྑཏི. ཨིཏི ཨཉྙདེཝ དསབལཉཱཎཾ, ཨཉྙཾ སབྦཉྙུཏཉཱཎནྟི.

སམྨོཧཝིནོདནིཡཱ ཝིབྷངྒཊྛཀཐཱཡ

ཉཱཎཝིབྷངྒཝཎྞནཱ ནིཊྛིཏཱ.

༡༧. ཁུདྡཀཝཏྠུཝིབྷངྒོ

༡. ཨེཀཀམཱཏིཀཱདིཝཎྞནཱ

༨༣༢. ཨིདཱནི ¶ ¶ ¶ ཏདནནྟརེ ཁུདྡཀཝཏྠུཝིབྷངྒེཔི པཋམཾ མཱཏིཀཾ ཋཔེཏྭཱ ནིཀྑིཏྟཔདཱནུཀྐམེན ནིདྡེསོ ཀཏོ. ཏཏྲཱཡཾ ནིཀྑེཔཔརིཙྪེདོ. ཨཱདིཏོ ཏཱཝ ཛཱཏིམདོཏིཨཱདཡོ ཏེསཏྟཏི ཨེཀཀཱ ནིཀྑིཏྟཱ, ཏཏོ ཀོདྷོ ཙ ཨུཔནཱཧོ ཙཱཏིཨཱདཡོ ཨཊྛཱརས དུཀཱ, ཨཀུསལམཱུལཱདཡོ པཉྩཏིཾས ཏིཀཱ, ཨཱསཝཙཏུཀྐཱདཡོ ཙུདྡས ཙཏུཀྐཱ, ཨོརམྦྷཱགིཡསཾཡོཛནཱདཡོ པནྣརས པཉྩཀཱ, ཝིཝཱདམཱུལཱདཡོ ཙུདྡས ཚཀྐཱ, ཨནུསཡཱདཡོ སཏྟ སཏྟཀཱ, ཀིལེསཝཏྠུཨཱདཡོ ཨཊྛ ཨཊྛཀཱ, ཨཱགྷཱཏཝཏྠུཨཱདཡོ ནཝ ནཝཀཱ, ཀིལེསཝཏྠུཨཱདཡོ སཏྟ དསཀཱ, ཨཛ྄ཛྷཏྟིཀསྶ ཨུཔཱདཱཡ ཨཊྛཱརས ཏཎྷཱཝིཙརིཏཱནཱིཏིཨཱདཡོ ཚ ཨཊྛཱརསཀཱཏི སབྦཱནིཔི ཨེཏཱནི ཨཊྛ ཀིལེསསཏཱནི ནིཀྑིཏྟཱནཱིཏི ཝེདིཏབྦཱནི. ཨཡཾ ཏཱཝ ནིཀྑེཔཔརིཙྪེདོ.

(༡.) ཨེཀཀནིདྡེསཝཎྞནཱ

༨༤༣-༨༤༤. ཨིདཱནི ཡཐཱནིཀྑིཏྟཱཡ མཱཏིཀཱཡ ཏཏྠ ཀཏམོ ཛཱཏིམདོཏིཨཱདིནཱ ནཡེན ཨཱརདྡྷེ ནིདྡེསཝཱརེ ཛཱཏིཾ པཊིཙྩཱཏི ཛཱཏིཾ ནིསྶཱཡ. ཨེཏྠ ཙ ཨཏྠིཔཊིཙྩཾ ནཱམ ཀཐིཏཾ, ཏསྨཱ ཛཱཏིཡཱ སཏཱིཏི ཨཡམེཏྠ ཨཏྠོ. གོཏྟཾ པཊིཙྩཱཏིཨཱདཱིསུཔི ཨེསེཝ ནཡོ. མདནཝསེན མདོ. མཛྫནཱཀཱརོ མཛྫནཱ. མཛྫིཏབྷཱཝོ མཛྫིཏཏྟཾ. མཱནོ མཉྙནཱཏིཨཱདཱིནི ཧེཊྛཱ དྷམྨསངྒཧཊྛཀཐཱཡཾ (དྷ. ས. ཨཊྛ. ༡༡༢༡) ཝུཏྟཏྠཱནེཝ. ཨཡཾ ཝུཙྩཏཱིཏི ཨཡཾ ཨེཝཾ ཛཱཏིཡཱ སཏི ཏཾ ཛཱཏིཾ ནིསྶཱཡ ཨུཔྤནྣོ མཛྫནཱཀཱརཔྤཝཏྟོ མཱནོ ཛཱཏིམདོཏི ཝུཙྩཏི. སྭཱཡཾ ¶ ཁཏྟིཡཱདཱིནཾ ཙཏུནྣམྤི ཝཎྞཱནཾ ཨུཔྤཛྫཏི. ཛཱཏིསམྤནྣོ ཧི ཁཏྟིཡོ ‘མཱདིསོ ཨཉྙོ ནཏྠི. ཨཝསེསཱ ཨནྟརཱ ཨུཊྛཱཡ ཁཏྟིཡཱ ཛཱཏཱ. ཨཧཾ པན ཝཾསཱགཏཁཏྟིཡོ’ཏི མཱནཾ ཀརོཏི. བྲཱཧྨཎཱདཱིསུཔི ཨེསེཝ ནཡོ. གོཏྟམདནིདྡེསཱདཱིསུཔི ཨིམིནཱཝུཔཱཡེན ཨཏྠོ ཝེདིཏབྦོ. ཁཏྟིཡོཔི ¶ ཧི ‘ཨཧཾ ཀོཎྜཉྙགོཏྟོ, ཨཧཾ ཨཱདིཙྩགོཏྟོ’ཏི མཱནཾ ཀརོཏི. བྲཱཧྨཎོཔི ‘ཨཧཾ ཀསྶཔགོཏྟོ ¶ , ཨཧཾ བྷཱརདྭཱཛགོཏྟོ’ཏི མཱནཾ ཀརོཏི. ཝེསྶོཔི སུདྡོཔི ཨཏྟནོ ཨཏྟནོ ཀུལགོཏྟཾ ནིསྶཱཡ མཱནཾ ཀརོཏི. ཨཊྛཱརསཱཔི སེཎིཡོ ‘ཨེཀིསྶཱ སེཎིཡཱ ཛཱཏམྷཱ’ཏི མཱནཾ ཀརོནྟིཡེཝ.

ཨཱརོགྱམདཱདཱིསུ ‘ཨཧཾ ཨརོགོ, ཨཝསེསཱ རོགབཧུལཱ, གདྡུཧནམཏྟམྤི མཡ྄ཧཾ བྱཱདྷི ནཱམ ནཏྠཱི’ཏི མཛྫནཝསེན ཨུཔྤནྣོ མཱནོ ཨཱརོགྱམདོ ནཱམ.

‘ཨཧཾ ཏརུཎོ, ཨཝསེསསཏྟཱནཾ ཨཏྟབྷཱཝོ པཔཱཏེ ཋིཏརུཀྑསདིསོ, ཨཧཾ པན པཋམཝཡེ ཋིཏོ’ཏི མཛྫནཝསེན ཨུཔྤནྣོ མཱནོ ཡོབྦནམདོ ནཱམ.

‘ཨཧཾ ཙིརཾ ཛཱིཝིཾ, ཙིརཾ ཛཱིཝཱམི, ཙིརཾ ཛཱིཝིསྶཱམི; སུཁཾ ཛཱིཝིཾ, སུཁཾ ཛཱིཝཱམི, སུཁཾ ཛཱིཝིསྶཱམཱི’ཏི མཛྫནཝསེན ཨུཔྤནྣོ མཱནོ ཛཱིཝིཏམདོ ནཱམ.

‘ཨཧཾ ལཱབྷཱི, ཨཝསེསཱ སཏྟཱ ཨཔྤལཱབྷཱ, མཡ྄ཧཾ པན ལཱབྷསྶ པམཱཎཾ ནཱམ ནཏྠཱི’ཏི མཛྫནཝསེན ཨུཔྤནྣོ མཱནོ ལཱབྷམདོ ནཱམ.

‘ཨཝསེསཱ སཏྟཱ ཡཾ ཝཱ ཏཾ ཝཱ ལབྷནྟི, ཨཧཾ པན སུཀཏཾ པཎཱིཏཾ ཙཱིཝརཱདིཔཙྩཡཾ ལབྷཱམཱི’ཏི མཛྫནཝསེན ཨུཔྤནྣོ མཱནོ སཀྐཱརམདོ ནཱམ.

‘ཨཝསེསབྷིཀྑཱུནཾ པཱདཔིཊྛིཡཾ ཨཀྐམིཏྭཱ གཙྪནྟཱ མནུསྶཱ ཨཡཾ སམཎོཏིཔི ན ཝནྡནྟི, མཾ པན དིསྭཱཝ ཝནྡནྟི, པཱསཱཎཙྪཏྟཾ ཝིཡ གརུཾ ཀཏྭཱ ཨགྒིཀྑནྡྷཾ ཝིཡ ཙ དུརཱསདཾ ཀཏྭཱ མཉྙནྟཱི’ཏི མཛྫནཝསེན ཨུཔྤནྣོ མཱནོ གརུཀཱརམདོ ནཱམ.

‘ཨུཔྤནྣོ ¶ པཉྷོ མཡ྄ཧམེཝ མུཁེན ཚིཛྫཏི, བྷིཀྑཱཙཱརཾ གཙྪནྟཱཔི མམེཝ པུརཏོ ཀཏྭཱ པརིཝཱརེཏྭཱ གཙྪནྟཱི’ཏི མཛྫནཝསེན ཨུཔྤནྣོ མཱནོ པུརེཀྑཱརམདོ ནཱམ.

ཨགཱརིཀསྶ ཏཱཝ མཧཱཔརིཝཱརསྶ ‘པུརིསསཏམྤི པུརིསསཧསྶམྤི མཾ པརིཝཱརེཏི,’ ཨནགཱརིཡསྶ པན ‘སམཎསཏམྤི སམཎསཧསྶམྤི མཾ པརིཝཱརེཏི, སེསཱ ཨཔྤཔརིཝཱརཱ, ཨཧཾ མཧཱཔརིཝཱརོ ཙེཝ སུཙིཔརིཝཱརོ ཙཱ’ཏི མཛྫནཝསེན ཨུཔྤནྣོ མཱནོ པརིཝཱརམདོ ནཱམ.

བྷོགོ ¶ པན ཀིཉྩཱཔི ལཱབྷགྒཧཎེནེཝ གཧིཏོ ཧོཏི, ཨིམསྨིཾ པན ཋཱནེ ནིཀྑེཔརཱསི ནཱམ གཧིཏོ; ཏསྨཱ ‘ཨཝསེསཱ སཏྟཱ ཨཏྟནོ པརིབྷོགམཏྟམྤི ན ལབྷནྟི, མཡ྄ཧཾ པན ནིདྷཱནགཏསྶེཝ དྷནསྶ པམཱཎཾ ནཏྠཱི’ཏི མཛྫནཝསེན ཨུཔྤནྣོ མཱནོ བྷོགམདོ ནཱམ.

ཝཎྞཾ ¶ པཊིཙྩཱཏི སརཱིརཝཎྞམྤི གུཎཝཎྞམྤི པཊིཙྩ. ‘ཨཝསེསཱ སཏྟཱ དུབྦཎྞཱ དུརཱུཔཱ, ཨཧཾ པན ཨབྷིརཱུཔོ པཱསཱདིཀོ; ཨཝསེསཱ སཏྟཱ ནིགྒུཎཱ པཏྠཊཨཀིཏྟིནོ, མཡ྄ཧཾ པན ཀིཏྟིསདྡོ དེཝམནུསྶེསུ པཱཀཊོ – ཨིཏིཔི ཐེརོ བཧུསྶུཏོ, ཨིཏིཔི སཱིལཝཱ, ཨིཏིཔི དྷུཏགུཎཡུཏྟོ’ཏི མཛྫནཝསེན ཨུཔྤནྣོ མཱནོ ཝཎྞམདོ ནཱམ.

‘ཨཝསེསཱ སཏྟཱ ཨཔྤསྶུཏཱ, ཨཧཾ པན བཧུསྶུཏོ’ཏི མཛྫནཝསེན ཨུཔྤནྣོ མཱནོ སུཏམདོ ནཱམ.

‘ཨཝསེསཱ སཏྟཱ ཨཔྤཊིབྷཱནཱ, མཡ྄ཧཾ པན པཊིབྷཱནསྶ པམཱཎཾ ནཏྠཱི’ཏི མཛྫནཝསེན ཨུཔྤནྣོ མཱནོ པཊིབྷཱནམདོ ནཱམ.

‘ཨཧཾ རཏྟཉྙཱུ ཨསུཀཾ བུདྡྷཝཾསཾ, རཱཛཝཾསཾ, ཛནཔདཝཾསཾ, གཱམཝཾསཾ, རཏྟིནྡིཝཔརིཙྪེདཾ, ནཀྑཏྟམུཧུཏྟཡོགཾ ཛཱནཱམཱི’ཏི མཛྫནཝསེན ཨུཔྤནྣོ མཱནོ རཏྟཉྙུམདོ ནཱམ.

‘ཨཝསེསཱ བྷིཀྑཱུ ཨནྟརཱ པིཎྜཔཱཏིཀཱ ཛཱཏཱ, ཨཧཾ པན ཛཱཏིཔིཎྜཔཱཏིཀོ’ཏི མཛྫནཝསེན ཨུཔྤནྣོ མཱནོ པིཎྜཔཱཏིཀམདོ ནཱམ.

‘ཨཝསེསཱ ¶ སཏྟཱ ཨུཉྙཱཏཱ ཨཝཉྙཱཏཱ, ཨཧཾ པན ཨནུཉྙཱཏོ ཨནཝཉྙཱཏོ’ཏི མཛྫནཝསེན ཨུཔྤནྣོ མཱནོ ཨནཝཉྙཱཏམདོ ནཱམ.

‘ཨཝསེསཱནཾ ཨིརིཡཱཔཐོ ཨཔཱསཱདིཀོ, མཡ྄ཧཾ པན པཱསཱདིཀོ’ཏི མཛྫནཝསེན ཨུཔྤནྣོ མཱནོ ཨིརིཡཱཔཐམདོ ནཱམ.

‘ཨཝསེསཱ སཏྟཱ ཚིནྣཔཀྑཀཱཀསདིསཱ, ཨཧཾ པན མཧིདྡྷིཀོ མཧཱནུབྷཱཝོ’ཏི ཝཱ ‘ཨཧཾ ཡཾ ཡཾ ཀམྨཾ ཀརོམི, ཏཾ ཏཾ ཨིཛ྄ཛྷཏཱི’ཏི ཝཱ མཛྫནཝསེན ཨུཔྤནྣོ མཱནོ ཨིདྡྷིམདོ ནཱམ.

ཧེཊྛཱ པརིཝཱརགྒཧཎེན ཡསོ གཧིཏོཝ ཧོཏི. ཨིམསྨིཾ པན ཋཱནེ ཨུཔཊྛཱཀམདོ ནཱམ གཧིཏོ. སོ ཨགཱརིཀེནཔི ཨནགཱརིཀེནཔི དཱིཔེཏབྦོ. ཨགཱརིཀོ ཧི ཨེཀཙྩོ ཨཊྛཱརསསུ སེཎཱིསུ ཨེཀིསྶཱ ཛེཊྛཀོ ཧོཏི, ཏསྶ ‘ཨཝསེསེ པུརིསེ ཨཧཾ པཊྛཔེམི, ཨཧཾ ཝིཙཱརེམཱི’ཏི ¶ ; ཨནགཱརིཀོཔི ཨེཀཙྩོ ཀཏྠཙི ཛེཊྛཀོ ཧོཏི, ཏསྶ ‘ཨཝསེསཱ བྷིཀྑཱུ མཡ྄ཧཾ ཨོཝཱདེ ཝཏྟནྟི, ཨཧཾ ཛེཊྛཀོ’ཏི མཛྫནཝསེན ཨུཔྤནྣོ མཱནོ ཡསམདོ ནཱམ.

‘ཨཝསེསཱ སཏྟཱ དུསྶཱིལཱ, ཨཧཾ པན སཱིལཝཱ’ཏི མཛྫནཝསེན ཨུཔྤནྣོ མཱནོ སཱིལམདོ ནཱམ. ‘ཨཝསེསསཏྟཱནཾ ཀུཀྐུཊསྶ ཨུདཀཔཱནམཏྟེཔི ཀཱལེ ཙིཏྟེཀགྒཏཱ ནཏྠི, ཨཧཾ པན ཨུཔཙཱརཔྤནཱནཾ ལཱབྷཱི’ཏི མཛྫནཝསེན ཨུཔྤནྣོ མཱནོ ཛྷཱནམདོ ¶ ནཱམ.

‘ཨཝསེསཱ སཏྟཱ ནིསྶིཔྤཱ, ཨཧཾ པན སིཔྤཝཱ’ཏི མཛྫནཝསེན ཨུཔྤནྣོ མཱནོ སིཔྤམདོ ནཱམ. ‘ཨཝསེསཱ སཏྟཱ རསྶཱ, ཨཧཾ པན དཱིགྷོ’ཏི མཛྫནཝསེན ཨུཔྤནྣོ མཱནོ ཨཱརོཧམདོ ནཱམ. ‘ཨཝསེསཱ སཏྟཱ རསྶཱ ཝཱ ཧོནྟི དཱིགྷཱ ཝཱ, ཨཧཾ ནིགྲོདྷཔརིམཎྜལོ’ཏི མཛྫནཝསེན ཨུཔྤནྣོ མཱནོ པརིཎཱཧམདོ ནཱམ. ‘ཨཝསེསསཏྟཱནཾ སརཱིརསཎྛཱནཾ ཝིརཱུཔཾ བཱིབྷཙྪཾ, མཡ྄ཧཾ པན མནཱཔཾ པཱསཱདིཀ’ནྟི མཛྫནཝསེན ཨུཔྤནྣོ མཱནོ སཎྛཱནམདོ ནཱམ. ‘ཨཝསེསཱནཾ སཏྟཱནཾ སརཱིརེ བཧཱུ དོསཱ, མཡ྄ཧཾ པན སརཱིརེ ཀེསགྒམཏྟམྤི ཝཛྫཾ ནཏྠཱི’ཏི མཛྫནཝསེན ཨུཔྤནྣོ མཱནོ པཱརིཔཱུརིམདོ ནཱམ.

༨༤༥. ཨིམིནཱ ¶ ཨེཏྟཀེན ཋཱནེན སཝཏྠུཀཾ མཱནཾ ཀཐེཏྭཱ ཨིདཱནི ཨཝཏྠུཀཾ ནིབྦཏྟིཏམཱནམེཝ དསྶེནྟོ ཏཏྠ ཀཏམོ མདོཏིཨཱདིམཱཧ. ཏཾ ཨུཏྟཱནཏྠམེཝ.

༨༤༦. པམཱདནིདྡེསེ ཙིཏྟསྶ ཝོསྶགྒོཏི ཨིམེསུ ཨེཏྟཀེསུ ཋཱནེསུ སཏིཡཱ ཨནིགྒཎྷིཏྭཱ ཙིཏྟསྶ ཝོསྶཛྫནཾ; སཏིཝིརཧོཏི ཨཏྠོ. ཝོསྶགྒཱནུཔྤདཱནནྟི ཝོསྶགྒསྶ ཨནུཔྤདཱནཾ; པུནཔྤུནཾ ཝིསྶཛྫནནྟི ཨཏྠོ. ཨསཀྐཙྩཀིརིཡཏཱཏི ཨེཏེསཾ དཱནཱདཱིནཾ ཀུསལདྷམྨཱནཾ བྷཱཝནཱཡ པུགྒལསྶ ཝཱ དེཡྻདྷམྨསྶ ཝཱ ཨསཀྐཙྩཀརཎཝསེན ཨསཀྐཙྩཀིརིཡཱ. སཏཏབྷཱཝོ སཱཏཙྩཾ. ན སཏཏབྷཱཝོ ཨསཱཏཙྩཾ. ན སཱཏཙྩཀིརིཡཏཱ ཨསཱཏཙྩཀིརིཡཏཱ. ཨནཊྛིཏཀརཎཾ ཨནཊྛིཏཀིརིཡཏཱ. ཡཐཱ ནཱམ ཀཀཎྚཀོ ཐོཀཾ གནྟྭཱ ཐོཀཾ ཏིཊྛཏི, ན ནིརནྟརཾ གཙྪཏི, ཨེཝམེཝ ཡོ པུགྒལོ ཨེཀདིཝསཾ དཱནཾ ཝཱ དཏྭཱ པཱུཛཾ ཝཱ ཀཏྭཱ དྷམྨཾ ཝཱ སུཏྭཱ སམཎདྷམྨཾ ཝཱ ཀཏྭཱ པུན ཙིརསྶཾ ཀརོཏི, ན ནིརནྟརཾ པཝཏྟེཏི, ཏསྶ སཱ ¶ ཀིརིཡཱ ཨནཊྛིཏཀིརིཡཏཱཏི ཝུཙྩཏི. ཨོལཱིནཝུཏྟིཏཱཏི ནིརནྟརཀརཎསངྑཱཏསྶ ཝིཔྥཱརསྶེཝ ཨབྷཱཝེན ལཱིནཝུཏྟིཏཱ. ནིཀྑིཏྟཚནྡཏཱཏི ཀུསལཀིརིཡཱཡ ཝཱིརིཡཚནྡསྶ ནིཀྑིཏྟབྷཱཝོ. ནིཀྑིཏྟདྷུརཏཱཏི ཝཱིརིཡདྷུརསྶ ཨོརོཔནཾ, ཨོསཀྐིཏམཱནསཏཱཏི ཨཏྠོ. ཨནདྷིཊྛཱནནྟི ¶ ཀུསལཀརཎེ པཏིཊྛཱབྷཱཝོ. ཨནནུཡོགོཏི ཨནནུཡུཉྫནཾ. པམཱདོཏི པམཛྫནཾ. ཡོ ཨེཝརཱུཔོ པམཱདོཏི ཨིདཾ ཨཏྠཔརིཡཱཡསྶ བྱཉྫནཔརིཡཱཡསྶ ཙ པརིཡནྟཱབྷཱཝཏོ ཨཱཀཱརདསྶནཾ. ཨིདཾ ཝུཏྟཾ ཧོཏི – ཡྭཱཡཾ ཨཱདིཏོ པཊྛཱཡ དསྶིཏོ པམཱདོ, ཡོ ཨཉྙོཔི ཨེཝམཱཀཱརོ ཨེཝཾཛཱཏིཀོ པམཱདོ པམཛྫནཱཀཱརཝསེན པམཛྫནཱ, པམཛྫིཏབྷཱཝཝསེན པམཛྫིཏཏྟནྟི སངྑཾ གཏོ – ཨཡཾ ཝུཙྩཏི པམཱདོཏི. ལཀྑཎཏོ པནེས པཉྩསུ ཀཱམགུཎེསུ སཏིཝོསྶགྒལཀྑཎོ, ཏཏྠེཝ སཏིཡཱ ཝིསྶཊྛཱཀཱརོ ཝེདིཏབྦོ.

༨༤༧. ཐམྦྷནིདྡེསེ ཐདྡྷཊྛེན ཐམྦྷོ; ཁལིཡཱ ཐདྡྷསཱཊཀསྶ ཝིཡ ཙིཏྟསྶ ཐདྡྷཏཱ ཨེཏྠ ཀཐིཏཱ. ཐམྦྷནཱཀཱརོ ཐམྦྷནཱ. ཐམྦྷིཏསྶ བྷཱཝོ ཐམྦྷིཏཏྟཾ. ཀཀྑལ༹སྶ པུགྒལསྶ བྷཱཝོ ཀཀྑལི༹ཡཾ. ཕརུསསྶ པུགྒལསྶ བྷཱཝོ ཕཱརུསིཡཾ. ཨབྷིཝཱདནཱདིསཱམཱིཙིརཧཱནཾ ཏསྶཱ སཱམཱིཙིཡཱ ཨཀརཎཝསེན ཨུཛུམེཝ ཋཔིཏཙིཏྟབྷཱཝོ ཨུཛུཙིཏྟཏཱ. ཐདྡྷསྶ ཨམུདུནོ བྷཱཝོ ཨམུདུཏཱ. ཨཡཾ ཝུཙྩཏཱིཏི ཨཡཾ ཐམྦྷོ ནཱམ ཝུཙྩཏི, ཡེན སམནྣཱགཏོ པུགྒལོ གིལིཏནངྒལསཱིསོ ཝིཡ ཨཛགརོ, ཝཱཏབྷརིཏཱ ཝིཡ བྷསྟཱ ཙེཏིཡཾ ཝཱ ཝུཌྜྷཏརེ ཝཱ དིསྭཱ ཨོནམིཏུཾ ¶ ན སཀྐོཏི, པརིཡནྟེནེཝ ཙརཏི. སྭཱཡཾ ཙིཏྟསྶ ཨུདྡྷུམཱཏབྷཱཝལཀྑཎོཏི ཝེདིཏབྦོ.

༨༤༨. སཱརམྦྷནིདྡེསེ སཱརམྦྷནཝསེན སཱརམྦྷོ. པཊིཔྥརིཏྭཱ སཱརམྦྷོ པཊིསཱརམྦྷོ. སཱརམྦྷནཱཀཱརོ སཱརམྦྷནཱ. པཊིཔྥརིཏྭཱ སཱརམྦྷནཱ པཊིསཱརམྦྷནཱ. པཊིསཱརམྦྷིཏསྶ བྷཱཝོ པཊིསཱརམྦྷིཏཏྟཾ. ཨཡཾ ཝུཙྩཏཱིཏི ཨཡཾ སཱརམྦྷོ ནཱམ ཝུཙྩཏི. སྭཱཡཾ ལཀྑཎཏོ ཀརཎུཏྟརིཡལཀྑཎོ ནཱམ ཝུཙྩཏི, ཡེན སམནྣཱགཏོ པུགྒལོ ཏདྡིགུཎཾ ཏདྡིགུཎཾ ཀརོཏི. ཨགཱརིཀོ སམཱནོ ཨེཀེནེཀསྨིཾ གྷརཝཏྠུསྨིཾ སཛྫིཏེ ཨཔརོ དྭེ ཝཏྠཱུནི སཛྫེཏི, ཨཔརོ ཙཏྟཱརི, ཨཔརོ ¶ ཨཊྛ, ཨཔརོ སོལ༹ས. ཨནགཱརིཀོ སམཱནོ ཨེཀེནེཀསྨིཾ ནིཀཱཡེ གཧིཏེ, ‘ནཱཧཾ ཨེཏསྶ ཧེཊྛཱ བྷཝིསྶཱམཱི’ཏི ཨཔརོ དྭེ གཎྷཱཏི, ཨཔརོ ཏཡོ, ཨཔརོ ཙཏྟཱརོ, ཨཔརོ པཉྩ. སཱརམྦྷཝསེན ཧི གཎྷིཏུཾ ན ¶ ཝཊྚཏི. ཨཀུསལཔཀྑོ ཨེས ནིརཡགཱམིམགྒོ. ཀུསལཔཀྑཝསེན པན ཨེཀསྨིཾ ཨེཀཾ སལཱཀབྷཏྟཾ དེནྟེ དྭེ དཱཏུཾ, དྭེ དེནྟེ ཙཏྟཱརི དཱཏུཾ ཝཊྚཏི. བྷིཀྑུནཱཔི པརེན ཨེཀསྨིཾ ནིཀཱཡེ གཧིཏེ, ‘དྭེ ནིཀཱཡེ གཧེཏྭཱ སཛ྄ཛྷཱཡནྟསྶ མེ ཕཱསུ ཧོཏཱི’ཏི ཝིཝཊྚཔཀྑེ ཋཏྭཱ ཏདུཏྟརི གཎྷིཏུཾ ཝཊྚཏི.

༨༤༩. ཨཏྲིཙྪཏཱནིདྡེསེ ཡཐཱ ཨརིཡཝཾསསུཏྟེ (ཨ. ནི. ༤.༢༨) ‘ལཱམཀལཱམཀཊྛོ ཨིཏརཱིཏརཊྛོ’ ཨེཝཾ ཨགྒཧེཏྭཱ ཙཱིཝརཱདཱིསུ ཡཾ ཡཾ ལདྡྷཾ ཧོཏི, ཏེན ཏེན ཨསནྟུཊྛསྶ; གིཧིནོ ཝཱ པན རཱུཔསདྡགནྡྷརསཕོཊྛབྦེསུ ཡཾ ཡཾ ལདྡྷཾ ཧོཏི, ཏེན ཏེན ཨསནྟུཊྛསྶ. བྷིཡྻོཀམྱཏཱཏི ཝིསེསཀཱམཏཱ. ཨིཙྪནཀཝསེན ཨིཙྪཱ. ཨིཙྪཱཝ ཨིཙྪཱགཏཱ, ཨིཙྪནཱཀཱརོ ཝཱ. ཨཏྟནོ ལཱབྷཾ ཨཏིཙྩ ཨིཙྪནབྷཱཝོ ཨཏིཙྪཏཱ. རཱགོཏིཨཱདཱིནི ཧེཊྛཱ ཝུཏྟཏྠཱནེཝ. ཨཡཾ ཝུཙྩཏཱིཏི ཨཡཾ ཨཏིཙྪཏཱ ནཱམ ཝུཙྩཏི. ཨཏྲིཙྪཏཱཏིཔི ཨེཏིསྶཱ ཨེཝ ནཱམཾ. ལཀྑཎཏོ པན སཀལཱབྷེ ཨསནྟུཊྛི པརལཱབྷེ ཙ པཏྠནཱ – ཨེཏཾ ཨཏྲིཙྪཏཱལཀྑཎཾ. ཨཏྲིཙྪཔུགྒལསྶ ཧི ཨཏྟནཱ ལདྡྷཾ པཎཱིཏམྤི ལཱམཀཾ ཝིཡ ཁཱཡཏི, པརེན ལདྡྷཾ ལཱམཀམྤི པཎཱིཏཾ ཝིཡ ཁཱཡཏི; ཨེཀབྷཱཛནེ པཀྐཡཱགུ ཝཱ བྷཏྟཾ ཝཱ པཱུཝོ ཝཱ ཨཏྟནོ པཏྟེ པཀྑིཏྟོ ལཱམཀོ ཝིཡ, པརསྶ པཏྟེ པཎཱིཏོ ཝིཡ ཁཱཡཏི. ཨཡཾ པན ཨཏྲིཙྪཏཱ པབྦཛིཏཱནམྤི ཧོཏི གིཧཱིནམྤི ཏིརཙྪཱནགཏཱནམྤི.

ཏཏྲིམཱནི ཝཏྠཱུནི – ཨེཀོ ཀིར ཀུཊུམྦིཀོ ཏིཾས བྷིཀྑུནིཡོ ནིམནྟེཏྭཱ སཔཱུཝཾ བྷཏྟཾ ཨདཱསི ¶ . སངྒྷཏྠེརཱི སབྦབྷིཀྑཱུནཱིནཾ པཏྟེ པཱུཝཾ པརིཝཏྟཱཔེཏྭཱ པཙྪཱ ཨཏྟནཱ ལདྡྷམེཝ ཁཱདི. བཱརཱཎསིརཱཛཱཔི ‘ཨངྒཱརཔཀྐམཾསཾ ཁཱདིསྶཱམཱི’ཏི དེཝིཾ ཨཱདཱཡ ཨརཉྙཾ པཝིཊྛོ ཨེཀཾ ཀིནྣརིཾ དིསྭཱ, དེཝིཾ པཧཱཡ, ཏསྶཱནུཔདཾ གཏོ. དེཝཱི ནིཝཏྟིཏྭཱ ཨསྶམཔདཾ གནྟྭཱ ཀསིཎཔརིཀམྨཾ ཀཏྭཱ ཨཊྛ སམཱཔཏྟིཡོ པཉྩ ཙ ཨབྷིཉྙཱཡོ པཏྭཱ ནིསིནྣཱ ¶ རཱཛཱནཾ ཨཱགཙྪནྟཾ དིསྭཱ ཨཱཀཱསེ ཨུཔྤཏིཏྭཱ ཨགམཱསི. རུཀྑེ ཨདྷིཝཏྠཱ དེཝཏཱ ཨིམཾ གཱཐམཱཧ –

ཨཏྲིཙྪཾ ཨཏིལོབྷེན, ཨཏིལོབྷམདེན ཙ;

ཨེཝཾ ཧཱཡཏི ཨཏྠམྷཱ, ཨཧཾཝ ཨསིཏཱབྷུཡཱཏི. (ཛཱ. ༡.༢.༡༦༨);

ཡཐཱ ¶ ཙནྡཀིནྣརིཾ པཏྠཡནྟོ ཨསིཏཱབྷུཡཱ རཱཛདྷཱིཏཱཡ ཧཱིནོ པརིཧཱིནོ, ཨེཝཾ ཨཏྲིཙྪཾ ཨཏིལོབྷེན ཨཏྠམྷ ཧཱཡཏི ཛཱིཡཏཱིཏི དེཝཏཱ རཉྙཱ སདྡྷིཾ ཀེལི༹མཀཱསི.

ཀསྶཔབུདྡྷཀཱལེཔི མིཏྟཝིནྡཀོ ནཱམ སེཊྛིཔུཏྟོ ཨསྶདྡྷོ ཨཔྤསནྣོ མཱཏརཱ ‘ཏཱཏ, ཨཛྫ ཨུཔོསཐིཀོ ཧུཏྭཱ ཝིཧཱརེ སབྦརཏྟིཾ དྷམྨསཝནཾ སུཎ, སཧསྶཾ ཏེ དསྶཱམཱི’ཏི ཝུཏྟེ དྷནལོབྷེན ཨུཔོསཐངྒཱནི སམཱདཱཡ ཝིཧཱརཾ གནྟྭཱ ‘ཨིདཾ ཋཱནཾ ཨཀུཏོབྷཡ’ནྟི སལླཀྑེཏྭཱ དྷམྨཱསནསྶ ཧེཊྛཱ ནིཔནྣོ སབྦརཏྟིཾ ནིདྡཱཡིཏྭཱ གྷརཾ ཨགམཱསི. མཱཏཱ པཱཏོཝ ཡཱགུཾ པཙིཏྭཱ ཨུཔནཱམེསི. སོ སཧསྶཾ གཧེཏྭཱཝ ཡཱགུཾ པིཝི. ཨཐསྶ ཨེཏདཧོསི – ‘དྷནཾ སཾཧརིསྶཱམཱི’ཏི. སོ ནཱཝཱཡ སམུདྡཾ པཀྑནྡིཏུཀཱམོ ཨཧོསི. ཨཐ ནཾ མཱཏཱ ‘‘ཏཱཏ, ཨིམསྨིཾ ཀུལེ ཙཏྟཱལཱིསཀོཊིདྷནཾ ཨཏྠི; ཨལཾ གམནེནཱ’’ཏི ཝཱརེསི. སོ ཏསྶཱ ཝཙནཾ ཨནཱདིཡིཏྭཱ གཙྪཏི ཨེཝ. སཱ པུརཏོ ཨཊྛཱསི. ཨཐ ནཾ ཀུཛ྄ཛྷིཏྭཱ ‘ཨཡཾ མཡ྄ཧཾ པུརཏོ ཏིཊྛཏཱི’ཏི པཱདེན པཧརིཏྭཱ པཏིཏཾ མཱཏརཾ ཨནྟརཾ ཀཏྭཱ ཨགམཱསི. མཱཏཱ ཨུཊྛཧིཏྭཱ ‘‘མཱདིསཱཡ མཱཏརི ཨེཝརཱུཔཾ ཀམྨཾ ཀཏྭཱ གཏསྶ མེ གཏཊྛཱནེ སུཁཾ བྷཝིསྶཏཱི’’ཏི ཨེཝཾསཉྙཱི ནཱམ ཏྭཾ པུཏྟཱཏི ཨཱཧ. ཏསྶ ནཱཝཾ ཨཱརུཡ྄ཧ གཙྪཏོ སཏྟམེ དིཝསེ ནཱཝཱ ཨཊྛཱསི. ཨཐ ཏེ མནུསྶཱ ‘‘ཨདྡྷཱ ཨེཏྠ པཱཔཔུརིསོ ཨཏྠི; སལཱཀཾ དེཐཱ’’ཏི སལཱཀཱ དཱིཡམཱནཱ ཏསྶེཝ ཏིཀྑཏྟུཾ པཱཔུཎི. ཏེ ཏསྶ ཨུལུ༹མྤཾ དཏྭཱ ཏཾ སམུདྡེ པཀྑིཔིཾསུ. སོ ཨེཀཾ དཱིཔཾ གནྟྭཱ ཝིམཱནཔེཏཱིཧི སདྡྷིཾ སམྤཏྟིཾ ཨནུབྷཝནྟོ ཏཱཧི ‘‘པུརཏོ མཱ ཨགམཱསཱི’’ཏི ཝུཙྩམཱནོཔི ཏདྡིགུཎཾ སམྤཏྟིཾ པསྶནྟོ ཨནུཔུབྦེན ཁུརཙཀྐདྷརཾ ཨེཀཾ པུརིསཾ ཨདྡས. ཏསྶ ཏཾ ཙཀྐཾ པདུམཔུཔྥཾ ཝིཡ ཨུཔཊྛཱཏི. སོ ཏཾ ཨཱཧ – ‘‘ཨམྦྷོ, ཨིདཾ ཏཡཱ པིལ༹ནྡྷཔདུམཾ ¶ མཡ྄ཧཾ དེཧཱི’’ཏི. ‘‘ནཡིདཾ, སཱམི ¶ , པདུམཾ; ཁུརཙཀྐཾ ཨེཏ’’ནྟི. སོ ‘‘ཝཉྩེསི མཾ ཏྭཾ. ཀིཾ མེ པདུམཾ ན དིཊྛཔུབྦ’’ནྟི ཝཏྭཱ ‘‘ཏྭཉྷི ལོཧིཏཙནྡནཾ ལིམྤེཏྭཱ པིལ༹ནྡྷནཾ པདུམཔུཔྥཾ མཡ྄ཧཾ ན དཱཏུཀཱམོསཱི’’ཏི ཨཱཧ. སོ ཙིནྟེསི – ‘ཨཡམྤི མཡཱ ཀཏསདིསཾ ཀམྨཾ ཀཏྭཱ ཏསྶ ཕལཾ ཨནུབྷཝིཏུཀཱམོ’ཏི. ཨཐ ནཾ ‘‘ཧནྡ རེ’’ཏི ཝཏྭཱ ¶ ཏསྶ མཏྠཀེ ཙཀྐཾ པཀྑིཔིཏྭཱ པལཱཡི. ཨེཏམཏྠཾ ཝིདིཏྭཱ སཏྠཱ ཨིམཾ གཱཐམཱཧ –

‘‘ཙཏུབྦྷི ཨཊྛཛ྄ཛྷགམཱ, ཨཊྛཧི པིཙ སོལ༹ས;

སོལ༹སཱཧི ཙ བཱཏྟིཾས, ཨཏྲིཙྪཾ ཙཀྐམཱསདོ;

ཨིཙྪཱཧཏསྶ པོསསྶ, ཙཀྐཾ བྷམཏི མཏྠཀེ’’ཏི. (ཛཱ. ༡.༡.༡༠༤);

ཨཉྙཏརོཔི ཨཏྲིཙྪོ ཨམཙྩོ སཀཝིསཡཾ ཨཏིཀྐམིཏྭཱ པརཝིསཡཾ པཱཝིསི. ཏཏྠ པོཐིཏོ པལཱཡིཏྭཱ ཨེཀསྶ ཏཱཔསསྶ ཝསནཊྛཱནཾ པཝིསིཏྭཱ ཨུཔོསཐངྒཱནི ཨདྷིཊྛཱཡ ནིཔཛྫི. སོ ཏཱཔསེན ‘ཀིཾ ཏེ ཀཏ’ནྟི པུཙྪིཏོ ཨིམཱ གཱཐཱཡོ ཨབྷཱསི –

‘‘སཀཾ ནིཀེཏཾ ཨཏིཧཱིལ༹ཡཱནོ,

ཨཏྲིཙྪཏཱ མལླགཱམཾ ཨགཙྪིཾ;

ཏཏོ ཛནཱ ནིཀྑམིཏྭཱན གཱམཱ,

ཀོདཎྜཀེན པརིཔོཐཡིཾསུ མཾ.

‘‘སོ བྷིནྣསཱིསོ རུཧིརམཀྑིཏངྒོ,

པཙྩཱགམཱསིཾ སཀཾ ནིཀེཏཾ;

ཏསྨཱ ཨཧཾ པོསཐཾ པཱལཡཱམི,

ཨཏྲིཙྪཏཱ མཱ པུནརཱགམཱསཱི’’ཏི. (ཛཱ. ༡.༡༤.༡༣༨-༡༣༩);

༨༥༠. མཧིཙྪཏཱནིདྡེསེ མཧནྟཱནི ཝཏྠཱུནི ཨིཙྪཏི, མཧཏཱི ཝཱསྶ ཨིཙྪཱཏི མཧིཙྪོ, ཏསྶ བྷཱཝོ མཧིཙྪཏཱ. ལཀྑཎཏོ པན ཨསནྟགུཎསམྦྷཱཝནཏཱ པཊིགྒཧཎེ ཙ པརིབྷོགེ ཙ ཨམཏྟཉྙུཏཱ – ཨེཏཾ མཧིཙྪཏཱལཀྑཎཾ. མཧིཙྪོ ཧི པུགྒལོ ཡཐཱ ནཱམ ཀཙྪཔུཊཝཱཎིཛོ པིལ༹ནྡྷནབྷཎྜཀཾ ཧཏྠེན གཧེཏྭཱ ཨུཙྪངྒེཔི པཀྑིཔིཏབྦཡུཏྟཀཾ པཀྑིཔིཏྭཱ མཧཱཛནསྶ པསྶནྟསྶེཝ ¶ ‘‘ཨམྨཱ, ཨསུཀཾ གཎྷཐ, ཨསུཀཾ གཎྷཐཱ’’ཏི མུཁེན སཾཝིདཧཏི. ཨེཝམེཝ སོ ཨཔྤམཏྟཀམྤི ཨཏྟནོ སཱིལཾ ཝཱ གནྠཾ ཝཱ དྷུཏགུཎཾ ཝཱ ཨནྟམསོ ཨརཉྙཝཱསམཏྟཀམྤི མཧཱཛནསྶ ཛཱནནྟསྶེཝ སམྦྷཱཝེཏུཀཱམོ ¶ ཧོཏི, སམྦྷཱཝེཏྭཱ ཙ པན སཀཊེཧིཔི ཨུཔནཱིཏེ པཙྩཡེ ‘ཨལ’ནྟི ཨཝཏྭཱ གཎྷཱཏི. ཏཡོ ཧི པཱུརེཏུཾ ན སཀྐཱ – ཨགྒི ཨུཔཱདཱནེན, སམུདྡོ ཨུདཀེན, མཧིཙྪོ པཙྩཡེཧཱིཏི.

ཨགྒིཀྑནྡྷོ སམུདྡོ ཙ, མཧིཙྪོ ཙཱཔི པུགྒལོ;

བཧུཀེ པཙྩཡེ དེནྟེ, ཏཡོ པེཏེ ན པཱུརཡེ.

མཧིཙྪཔུགྒལོ ¶ ཧི ཝིཛཱཏམཱཏུཡཱཔི མནཾ གཎྷིཏུཾ ན སཀྐོཏི, པགེཝ ཨུཔཊྛཱཀཱནཾ.

ཏཏྲིམཱནི ཝཏྠཱུནི – ཨེཀོ ཀིར དཧརབྷིཀྑུ པིཊྛཔཱུཝེ པིཡཱཡཏི. ཨཐསྶ མཱཏཱ པཊིཔཏྟིཾ ཝཱིམཾསམཱནཱ ‘སཙེ མེ པུཏྟོ པཊིགྒཧཎེ མཏྟཾ ཛཱནཱཏི, སཀལམྤི ནཾ ཏེམཱསཾ པཱུཝེཧེཝ ཨུཔཊྛཧིསྶཱམཱི’ཏི ཝསྶཱུཔནཱཡིཀདིཝསེ པརིཝཱིམཾསམཱནཱ པཋམཾ ཨེཀཾ པཱུཝཾ ཨདཱསི, ཏསྨིཾ ནིཊྛིཏེ དུཏིཡཾ, ཏསྨིམྤི ནིཊྛིཏེ ཏཏིཡཾ. དཧརོ ‘ཨལ’ནྟི ཨཝཏྭཱ ཁཱདིཡེཝ. མཱཏཱ ཏསྶ ཨམཏྟཉྙུབྷཱཝཾ ཉཏྭཱ ‘ཨཛྫེཝ མེ པུཏྟེན སཀལཏེམཱསསྶ པཱུཝཱ ཁཱདིཏཱ’ཏི དུཏིཡདིཝསཏོ པཊྛཱཡ ཨེཀཔཱུཝམྤི ན ཨདཱསི.

ཏིསྶམཧཱརཱཛཱཔི དེཝསིཀཾ ཙེཏིཡཔབྦཏེ བྷིཀྑུསངྒྷསྶ དཱནཾ དདམཱནོ ‘མཧཱརཱཛ, ཀིཾ ཨེཀམེཝ ཋཱནཾ བྷཛསི? ཀིཾ ཨཉྙཏྠ དཱཏུཾ ན ཝཊྚཏཱི’ཏི ཛཱནཔདེཧི ཝུཏྟོ དུཏིཡདིཝསེ ཨནུརཱདྷཔུརེ མཧཱདཱནཾ དཱཔེསི. ཨེཀབྷིཀྑུཔི པཊིགྒཧཎེ མཏྟཾ ན ཨཉྙཱསི. ཨེཀམེཀེན པཊིགྒཧིཏཾ ཁཱདནཱིཡབྷོཛནཱིཡཾ དྭེ ཏཡོ ཛནཱ ཨུཀྑིཔིཾསུ. རཱཛཱ དུཏིཡདིཝསེ ཙེཏིཡཔབྦཏེ བྷིཀྑུསངྒྷཾ ནིམནྟཱཔེཏྭཱ རཱཛནྟེཔུརཾ ཨཱགཏཀཱལེ ‘‘པཏྟཾ དེཐཱ’’ཏི ཨཱཧ. ‘‘ཨལཾ, མཧཱརཱཛ, ཨཏྟནོ པམཱཎེན བྷིཀྑཾ གཎྷིསྶཏཱི’’ཏི ཨེཀབྷིཀྑུཔི པཏྟཾ ན ཨདཱསི. སབྦེ པམཱཎཡུཏྟཀམེཝ པཊིགྒཧེསུཾ. ཨཐ རཱཛཱ ཨཱཧ – ‘‘པསྶཐ ཏུམྷཱཀཾ བྷིཀྑཱུསུ ཨེཀོཔི མཏྟཾ ན ཛཱནཱཏི. ཧིཡྻོ ཀིཉྩི ཨཝསེསཾ ནཱཧོསི. ཨཛྫ གཧིཏཾ མནྡཾ, ཨཝསེསམེཝ བཧཱུ’’ཏི ཏེསཾ མཏྟཉྙུཏཱཡ ཨཏྟམནོ ཨིཏརེསཉྩ ཨམཏྟཉྙུཏཱཡ ཨནཏྟམནོ ཨཧོསི.

༨༥༡. པཱཔིཙྪཏཱནིདྡེསེ ¶ ཨསྶདྡྷོ སམཱནོ སདྡྷོཏི མཾ ཛནོ ཛཱནཱཏཱུཏིཨཱདཱིསུ ཨེཝཾ ཨིཙྪནྟོ ཀིཾ ཀརོཏི? ཨསྶདྡྷོ སདྡྷཱཀཱརཾ དསྶེཏི; དུསྶཱིལཱདཡོ སཱིལཝནྟཱདཱིནཾ ཨཱཀཱརཾ དསྶེནྟི. ཀཐཾ? ཨསྶདྡྷོ ¶ ཏཱཝ མཧཱམཧདིཝསེ མནུསྶཱནཾ ཝིཧཱརཾ ཨཱགམནཝེལཱཡ སམྨཛྫནིཾ ཨཱདཱཡ ཝིཧཱརཾ སམྨཛྫཏི, ཀཙཝརཾ ཚཌྜེཏི, མནུསྶེཧི དིཊྛབྷཱཝཾ ཉཏྭཱ ཙེཏིཡངྒཎཾ གཙྪཏི, ཏཏྠཱཔི སམྨཛྫིཏྭཱ ཀཙཝརཾ ཚཌྜེཏི, ཝཱལིཀཾ སམཾ ཀརོཏི, ཨཱསནཱནི དྷོཝཏི, བོདྷིམྷི ཨུདཀཾ སིཉྩཏི. མནུསྶཱ དིསྭཱ ‘ནཏྠི མཉྙེ ཨཉྙོ བྷིཀྑུ ཝིཧཱརཛགྒནཀོ, ཨཡམེཝ ཨིམཾ ཝིཧཱརཾ པཊིཛགྒཏི, སདྡྷོ ཐེརོ’ཏི གམནཀཱལེ ནིམནྟེཏྭཱ གཙྪནྟི. དུསྶཱིལོཔི ¶ ཨུཔཊྛཱཀཱནཾ སམྨུཁེ ཝིནཡདྷརཾ ཨུཔསངྐམིཏྭཱ པུཙྪཏི ‘‘བྷནྟེ, མཡི གཙྪནྟེ གོཎོ ཨུབྦིགྒོ. ཏེན དྷཱཝཏཱ ཏིཎཱནི ཚིནྣཱནི. སམྨཛྫནྟསྶ མེ ཏིཎཱནི ཚིཛྫནྟི. ཙངྐམནྟསྶ མེ པཱཎཀཱ མཱིཡནྟི. ཁེལ༹ཾ པཱཏེནྟསྶ ཨསཏིཡཱ ཏིཎམཏྠཀེ པཏཏི; ཏཏྠ ཏཏྠ ཀིཾ ཧོཏཱི’’ཏི? ‘‘ཨནཱཔཏྟི, ཨཱཝུསོ, ཨསཉྩིཙྩ ཨསཏིཡཱ ཨཛཱནནྟསྶཱ’’ཏི ཙ ཝུཏྟེ ‘‘བྷནྟེ, མཡ྄ཧཾ གརུཀཾ ཝིཡ ཨུཔཊྛཱཏི; སུཊྛུ ཝཱིམཾསཐཱ’’ཏི བྷཎཏི. ཏཾ སུཏྭཱ མནུསྶཱ ‘ཨམྷཱཀཾ ཨཡྻོ ཨེཏྟཀེཔི ཀུཀྐུཙྩཱཡཏི! ཨཉྙསྨིཾ ཨོལཱ༹རིཀེ ཀིཾ ནཱམ ཀརིསྶཏི; ནཏྠི ཨིམིནཱ སདིསོ སཱིལཝཱཏི པསནྣཱ སཀྐཱརཾ ཀརོནྟི. ཨཔྤསྶུཏོཔི ཨུཔཊྛཱཀམཛ྄ཛྷེ ནིསིནྣོ ‘‘ཨསུཀོ ཏིཔིཊཀདྷརོ, ཨསུཀོ ཙཏུནིཀཱཡིཀོ མཡ྄ཧཾ ཨནྟེཝཱསིཀོ, མམ སནྟིཀེ ཏེཧི དྷམྨོ ཨུགྒཧིཏོ’’ཏི ཝདཏི. མནུསྶཱ ‘ཨམྷཱཀཾ ཨཡྻེན སདིསོ བཧུསྶུཏོ ནཏྠི, ཨེཏསྶ ཀིར སནྟིཀེ ཨསུཀེན ཙ ཨསུཀེན ཙ དྷམྨོ ཨུགྒཧིཏོ’ཏི པསནྣཱ སཀྐཱརཾ ཀརོནྟི.

སངྒཎིཀཱརཱམོཔི མཧཱམཧདིཝསེ དཱིགྷཔཱིཋཉྩ ཨཔསྶཡཉྩ གཱཧཱཔེཏྭཱ ཝིཧཱརཔཙྩནྟེ རུཀྑམཱུལེ དིཝཱཝིཧཱརཾ ནིསཱིདཏི. མནུསྶཱ ཨཱགནྟྭཱ ‘‘ཐེརོ ཀུཧི’’ནྟི པུཙྪནྟི. ‘‘གཎྛིཀཔུཏྟཱ ནཱམ གཎྛིཀཱ ཨེཝ ཧོནྟི. ཏེན ཐེརོ ཨེཝརཱུཔེ ཀཱལེ ཨིདྷ ན ནིསཱིདཏི, ཝིཧཱརཔཙྩནྟེ དིཝཱཊྛཱནེ དཱིགྷཙངྐམེ ཝིཧརཏཱི’’ཏི ཝདནྟི. སོཔི དིཝསབྷཱགཾ ཝཱིཏིནཱམེཏྭཱ ནལཱཊེ མཀྐཊསུཏྟཾ ཨལླིཡཱཔེཏྭཱ པཱིཋཾ གཱཧཱཔེཏྭཱ ཨཱགམྨ པརིཝེཎདྭཱརེ ནིསཱིདཏི. མནུསྶཱ ‘‘ཀཧཾ, བྷནྟེ, གཏཏྠ? ཨཱགནྟྭཱ ན ཨདྡསམྷཱ’’ཏི ཝདནྟི. ‘‘ཨུཔཱསཀཱ, ཨནྟོཝིཧཱརོ ཨཱཀིཎྞོ; དཧརསཱམཎེརཱནཾ ཝིཙརཎཊྛཱནམེཏཾ སཊྛིཧཏྠཙངྐམེ དིཝཱཊྛཱནེ ནིསཱིདིམྷཱ’’ཏི ཨཏྟནོ པཝིཝིཏྟབྷཱཝཾ ཛཱནཱཔེཏི.

ཀུསཱིཏོཔི ཨུཔཊྛཱཀམཛ྄ཛྷེ ནིསིནྣོ ‘‘ཨུཔཱསཀཱ, ཏུམྷེཧི ཨུཀྐཱཔཱཏོ དིཊྛོ’’ཏི ཝདཏི. ‘‘ན ¶ པསྶཱམ, བྷནྟེ; ཀཱཡ ཝེལཱཡ ཨཧོསཱི’’ཏི ¶ ཙ པུཊྛོ ‘‘ཨམྷཱཀཾ ཙངྐམནཝེལཱཡཱ’’ཏི ཝཏྭཱ ‘‘བྷཱུམིཙཱལསདྡཾ ཨསྶུཏྠཱ’’ཏི པུཙྪཏི. ‘‘ན སུཎཱམ, བྷནྟེ; ཀཱཡ ཝེལཱཡཱ’’ཏི པུཊྛོ ‘‘མཛ྄ཛྷིམཡཱམེ ཨམྷཱཀཾ ཨཱལམྦནཕལཀཾ ཨཔསྶཱཡ ཋིཏཀཱལེ’’ཏི ཝཏྭཱ ‘‘མཧཱཨོབྷཱསོ ཨཧོསི; སོ ཝོ དིཊྛོ’’ཏི པུཙྪཏི. ‘‘ཀཱཡ ཝེལཱཡ, བྷནྟེ’’ཏི ཙ ཝུཏྟེ ‘‘མཡ྄ཧཾ ཙངྐམམྷཱ ཨོཏརཎཀཱལེ’’ཏི ཝདཏི. མནུསྶཱ ¶ ‘ཨམྷཱཀཾ ཐེརོ ཏཱིསུཔི ཡཱམེསུ ཙངྐམེཡེཝ ཧོཏི; ནཏྠི ཨཡྻེན སདིསོ ཨཱརདྡྷཝཱིརིཡོ’ཏི པསནྣཱ སཀྐཱརཾ ཀརོནྟི.

མུཊྛསྶཏཱིཔི ཨུཔཊྛཱཀམཛ྄ཛྷེ ནིསིནྣོ ‘‘མཡཱ ཨསུཀཀཱལེ ནཱམ དཱིགྷནིཀཱཡོ ཨུགྒཧིཏོ, ཨསུཀཀཱལེ མཛ྄ཛྷིམོ, སཾཡུཏྟཀོ, ཨངྒུཏྟརིཀོ; ཨནྟརཱ ཨོལོཀནཾ ནཱམ ནཏྠི, ཨིཙྪིཏིཙྪཏཊྛཱནེ མུཁཱརུལ༹ྷོཝ ཏནྟི ཨཱགཙྪཏི; ཨིམེ པནཉྙེ བྷིཀྑཱུ ཨེལ༹ཀཱ ཝིཡ མུཁཾ ཕནྡཱཔེནྟཱ ཝིཧརནྟཱི’’ཏི ཝདཏི. མནུསྶཱ ‘ནཏྠི ཨཡྻེན སདིསོ ཨུཔཊྛིཏསཏཱི’ཏི པསནྣཱ སཀྐཱརཾ ཀརོནྟི.

ཨསམཱཧིཏོཔི ཨུཔཊྛཱཀཱནཾ སམྨུཁེ ཨཊྛཀཐཱཙརིཡེ པཉྷཾ པུཙྪཏི – ‘ཀསིཎཾ ནཱམ ཀཐཾ བྷཱཝེཏི? ཀིཏྟཀེན ནིམིཏྟཾ ཨུཔྤནྣཾ ནཱམ ཧོཏི? ཀིཏྟཀེན ཨུཔཙཱརོ? ཀིཏྟཀེན ཨཔྤནཱ? པཋམསྶ ཛྷཱནསྶ ཀཏི ཨངྒཱནི? དུཏིཡསྶ ཏཏིཡསྶ ཙཏུཏྠསྶ ཛྷཱནསྶ ཀཏི ཨངྒཱནི’’ཏི པུཙྪཏི. ཏེཧི ཨཏྟནོ ཨུགྒཧིཏཱནུརཱུཔེན ཀཐིཏཀཱལེ སིཏཾ ཀཏྭཱ ‘ཀིཾ, ཨཱཝུསོ, ཨེཝཾ ན ཧོསཱི’ཏི ཝུཏྟེ ‘ཝཊྚཏི, བྷནྟེ’ཏི ཨཏྟནོ སམཱཔཏྟིལཱབྷིཏཾ སཱུཙེཏི. མནུསྶཱ ‘སམཱཔཏྟིལཱབྷཱི ཨཡྻོ’ཏི པསནྣཱ སཀྐཱརཾ ཀརོནྟི.

དུཔྤཉྙོཔི ཨུཔཊྛཱཀཱནཾ མཛ྄ཛྷེ ནིསིནྣོ ‘མཛ྄ཛྷིམནིཀཱཡེ མེ པཉྩཏྟཡཾ ཨོལོཀེནྟསྶ སཧིདྡྷིཡཱཝ མགྒོ ཨཱགཏོ. པརིཡཏྟི ནཱམ ཨམྷཱཀཾ ན དུཀྐརཱ. པརིཡཏྟིཝཱཝཊོ པན དུཀྑཏོ ན མུཙྩཏཱིཏི པརིཡཏྟིཾ ཝིསྶཛྫཡིམྷཱ’ཏིཨཱདཱིནི ཝདནྟོ ཨཏྟནོ མཧཱཔཉྙཏཾ དཱིཔེཏི. ཨེཝཾ ཝདནྟོ པནསྶ སཱསནེ པཧཱརཾ དེཏི. ཨིམིནཱ སདིསོ མཧཱཙོརོ ནཱམ ནཏྠི. ན ཧི པརིཡཏྟིདྷརོ དུཀྑཏོ ན མུཙྩཏཱིཏི. ཨཁཱིཎཱསཝོཔི གཱམདཱརཀེ དིསྭཱ ‘ཏུམྷཱཀཾ མཱཏཱཔིཏརོ ཨམྷེ ཀིཾ ཝདནྟཱི’’ཏི? ‘‘ཨརཧཱཏི ¶ ཝདནྟི, བྷནྟེ’’ཏི. ‘ཡཱཝ ཚེཀཱ གཧཔཏིཀཱ, ན སཀྐཱ ཝཉྩེཏུ’ནྟི ཨཏྟནོ ཁཱིཎཱསཝབྷཱཝཾ དཱིཔེཏི.

ཨཉྙེཔི ¶ ཙེཏྠ ཙཱཊིཨརཧནྟཔཱརོཧཨརཧནྟཱདཡོ ཝེདིཏབྦཱ – ཨེཀོ ཀིར ཀུཧཀོ ཨནྟོགབྦྷེ ཙཱཊིཾ ནིཁཎིཏྭཱ མནུསྶཱནཾ ཨཱགམནཀཱལེ པཝིསཏི. མནུསྶཱ ‘ཀཧཾ ཐེརོ’ཏི པུཙྪནྟི. ‘ཨནྟོགབྦྷེ’ཏི ཙ ཝུཏྟེ པཝིསིཏྭཱ ཝིཙིནནྟཱཔི ཨདིསྭཱ ¶ ནིཀྑམིཏྭཱ ‘ནཏྠི ཐེརོ’ཏི ཝདནྟི. ‘ཨནྟོགབྦྷེཡེཝ ཐེརོ’ཏི ཙ ཝུཏྟེ པུན པཝིསནྟི. ཐེརོ ཙཱཊིཏོ ནིཀྑམིཏྭཱ པཱིཋེ ནིསིནྣོ ཧོཏི. ཏཏོ ཏེཧི ‘མཡཾ, བྷནྟེ, པུབྦེ ཨདིསྭཱ ནིཀྑནྟཱ, ཀཧཾ ཏུམྷེ གཏཏྠཱ’’ཏི ཝུཏྟེ ‘སམཎཱ ནཱམ ཨཏྟནོ ཨིཙྪིཏིཙྪིཏཊྛཱནཾ གཙྪནྟཱི’ཏི ཝཙནེན ཨཏྟནོ ཁཱིཎཱསཝབྷཱཝཾ དཱིཔེཏི.

ཨཔརོཔི ཀུཧཀོ ཨེཀསྨིཾ པབྦཏེ པཎྞསཱལཱཡཾ ཝསཏི. པཎྞསཱལཱཡ ཙ པཙྪཏོ པཔཱཏཊྛཱནེ ཨེཀོ ཀཙྪཀརུཀྑོ ཨཏྠི. ཏསྶ པཱརོཧོ གནྟྭཱ པརབྷཱགེ བྷཱུམིཡཾ པཏིཊྛིཏོ. མནུསྶཱ མགྒེནཱགནྟྭཱ ནིམནྟེནྟི. སོ པཏྟཙཱིཝརམཱདཱཡ པཱརོཧེན ཨོཏརིཏྭཱ གཱམདྭཱརེ ཨཏྟཱནཾ དསྶེཏི. ཏཏོ མནུསྶེཧི པཙྪཱ ཨཱགནྟྭཱ ‘ཀཏརེན མགྒེན ཨཱགཏཏྠ, བྷནྟེ’ཏི པུཊྛོ ‘སམཎཱནཾ ཨཱགཏམགྒོ ནཱམ པུཙྪིཏུཾ ན ཝཊྚཏི, ཨཏྟནོ ཨིཙྪིཏིཙྪིཏཊྛཱནེནེཝ ཨཱགཙྪནྟཱི’ཏི ཝཙནེན ཁཱིཎཱསཝབྷཱཝཾ དཱིཔེཏི. ཏཾ པན ཀུཧཀཾ ཨེཀོ ཝིདྡྷཀཎྞོ ཉཏྭཱ ‘པརིགྒཧེསྶཱམི ན’ནྟི ཨེཀདིཝསཾ པཱརོཧེན ཨོཏརནྟཾ དིསྭཱ པཙྪཏོ ཚིནྡིཏྭཱ ཨཔྤམཏྟཀེན ཋཔེསི. སོ ‘པཱརོཧཏོ ཨོཏརིསྶཱམཱི’ཏི ‘ཋ’ནྟི པཏིཏོ, མཏྟིཀཱ པཏྟོ བྷིཛྫི. སོ ‘ཉཱཏོམྷཱི’ཏི ནིཀྑམིཏྭཱ པལཱཡི. པཱཔིཙྪསྶ བྷཱཝོ པཱཔིཙྪཏཱ. ལཀྑཎཏོ པན ཨསནྟགུཎསམྦྷཱཝནཏཱ, པཊིགྒཧཎེ ཙ ཨམཏྟཉྙུཏཱ; ཨེཏཾ པཱཔིཙྪཏཱལཀྑཎནྟི ཝེདིཏབྦཾ.

༨༥༢. སིངྒནིདྡེསེ ཝིཛ྄ཛྷནཊྛེན སིངྒཾ; ནཱགརིཀབྷཱཝསངྑཱཏསྶ ཀིལེསསིངྒསྶེཏཾ ནཱམཾ. སིངྒཱརབྷཱཝོ སིངྒཱརཏཱ, སིངྒཱརཀརཎཱཀཱརོ ཝཱ. ཙཏུརབྷཱཝོ ཙཏུརཏཱ. ཏཐཱ ཙཱཏུརིཡཾ. པརིཀྑཏབྷཱཝོ པརིཀྑཏཏཱ; པརིཁཎིཏྭཱ ཋཔིཏསྶེཝ དལ༹ྷསིངྒཱརབྷཱཝསྶེཏཾ ནཱམཾ ¶ . ཨིཏརཾ ཏསྶེཝ ཝེཝཙནཾ. ཨེཝཾ སབྦེཧིཔི པདེཧི ཀིལེསསིངྒཱརཏཱཝ ཀཐིཏཱ.

༨༥༣. ཏིནྟིཎནིདྡེསེ ཏིནྟིཎནྟི ཁཱིཡནཾ. ཏིནྟིཎཱཡནཱཀཱརོ ཏིནྟིཎཱཡནཱ. ཏིནྟིཎེན ཨཡིཏསྶ ཏིནྟིཎསམངྒིནོ བྷཱཝོ ཏིནྟིཎཱཡིཏཏྟཾ. ལོལུཔབྷཱཝོ ལོལུཔྤཾ. ཨིཏརེ དྭེ ¶ ཨཱཀཱརབྷཱཝནིདྡེསཱ. པུཙྪཉྫིཀཏཱཏི ¶ ལཱབྷལབྷནཀཊྛཱནེ ཝེདྷནཱཀམྤནཱ ནཱིཙཝུཏྟིཏཱ. སཱདྷུཀམྱཏཱཏི པཎཱིཏཔཎཱིཏཱནཾ པཏྠནཱ. ཨེཝཾ སབྦེཧིཔི པདེཧི སུཝཱནདོཎིཡཾ ཀཉྫིཡཾ པིཝནཀསུནཁསྶ ཨཉྙཾ སུནཁཾ དིསྭཱ བྷུབྷུཀྐརཎཾ ཝིཡ ‘ཏཝ སནྟཀཾ, མམ སནྟཀ’ནྟི ཀིལེསཝསེན ཁཱིཡནཱཀཱརོ ཀཐིཏོ.

༨༥༤. ཙཱཔལྱནིདྡེསེ ཨཱཀོཊིཏཔཙྩཱཀོཊིཏབྷཱཝཱདཱིཧི ཙཱིཝརསྶ མཎྜནཱ ཙཱིཝརམཎྜནཱ. མཎིཝཎྞཙྪཝིཀརཎཱདཱིཧི པཏྟསྶ མཎྜནཱ པཏྟམཎྜནཱ. ཙིཏྟཀམྨཱདཱིཧི པུགྒལིཀསེནཱསནསྶ མཎྜནཱ སེནཱསནམཎྜནཱ. ཨིམསྶ ཝཱ པཱུཏིཀཱཡསྶཱཏི ཨིམསྶ མནུསྶསརཱིརསྶ. ཡཐཱ ཧི ཏདཧུཛཱཏོཔི སིངྒཱལོ ཛརསིངྒཱལོཏྭེཝ ཨཱུརུཔྤམཱཎཱཔི ཙ གལོ༹ཙིལཏཱ པཱུཏིལཏཱཏྭེཝ སངྑཾ གཙྪཏི, ཨེཝཾ སུཝཎྞཝཎྞོཔི མནུསྶཀཱཡོ པཱུཏིཀཱཡོཏྭེཝ ཝུཙྩཏི. ཏསྶ ཨནྟརནྟརཱ རཏྟཝཎྞཔཎྜུཝཎྞཱདཱིཧི ནིཝཱསནཔཱརུཔནཱདཱིཧི སཛྫནཱ མཎྜནཱ ནཱམ. བཱཧིརཱནཾ ཝཱ པརིཀྑཱརཱནནྟི ཋཔེཏྭཱ པཏྟཙཱིཝརཾ སེསཔརིཀྑཱརཱནཾ; ཨཐཝཱ ཡཱ ཨེསཱ ཙཱིཝརམཎྜནཱ པཏྟམཎྜནཱཏི ཝུཏྟཱ, སཱ ཏེཧི ཝཱ པརིཀྑཱརེཧི ཀཱཡསྶ མཎྜནཱ ཏེསཾ ཝཱ བཱཧིརཔརིཀྑཱརཱནཾ མཎྜེཏྭཱ ཋཔནཝསེན མཎྜནཱཏི ཨེཝམེཏྠ ཨཏྠོ ཝེདིཏབྦོ. མཎྜནཱ ཝིབྷཱུསནཱཏི ཨེཏྠ ཨཱུནཊྛཱནསྶ པཱུརཎཝསེན མཎྜནཱ, ཚཝིརཱགཱདིཝསེན ཝིབྷཱུསནཱཏི ཝེདིཏབྦཱ. ཀེལ༹ནཱཏི ཀཱིལ༹ནཱ. པརིཀེལ༹ནཱཏི པརིཀཱིལ༹ནཱ. གིདྡྷིཀཏཱཏི གེདྷཡུཏྟཏཱ. གིདྡྷིཀཏྟནྟི ཏསྶེཝ ཝེཝཙནཾ. ཙཔལབྷཱཝོ ཙཔལཏཱ. ཏཐཱ ཙཱཔལྱཾ. ཨིདཾ ཝུཙྩཏཱིཏི ཨིདཾ ཙཱཔལྱཾ ནཱམ ཝུཙྩཏི, ཡེན སམནྣཱགཏོ པུགྒལོ ཝསྶསཏིཀོཔི སམཱནོ ཏདཧུཛཱཏདཱརཀོ ཝིཡ ཧོཏི.

༨༥༥. ཨསབྷཱགཝུཏྟིནིདྡེསེ ཝིཔྤཊིཀཱུལགྒཱཧིཏཱཏི ཨནནུལོམགྒཱཧིཏཱ. ཝིཔཙྩནཱིཀསཱཏཏཱཏི ¶ ཝིཔཙྩནཱིཀེན པཊིཝིརུདྡྷཀརཎེན སུཁཱཡནཱ. ཨནཱདརབྷཱཝོ ཨནཱདརིཡཾ. ཏཐཱ ཨནཱདརིཡཏཱ. ཨགཱརཝསྶ བྷཱཝོ ཨགཱརཝཏཱ. ཛེཊྛཀབྷཱཝསྶ ཨཀརཎཾ ཨཔྤཏིསྶཝཏཱ. ཨཡཾ ¶ ཝུཙྩཏཱིཏི ཨཡཾ ཨསབྷཱགཝུཏྟི ནཱམ ཝུཙྩཏི; ཝིསབྷཱགཛཱིཝིཀཏཱཏི ཨཏྠོ; ཡཱཡ སམནྣཱགཏོ པུགྒལོ མཱཏརཾ པིཏརཾ ཝཱ གིལཱནཾ པཊིཝཏྟིཏྭཱཔི ན ཨོལོཀེཏི; པིཏུསནྟཀསྶ ཀཱརཎཱ མཱཏརཱ སདྡྷིཾ, མཱཏུསནྟཀསྶ ཀཱརཎཱ པིཏརཱ སདྡྷིཾ ཀལཧཾ ཀརོཏི; ཝིསབྷཱགཛཱིཝིཏཾ ཛཱིཝཏི, མཱཏཱཔིཏཱུནཾ སནྟཀསྶ ཀཱརཎཱ ཛེཊྛེན ཝཱ ཀནིཊྛེན ཝཱ བྷཱཏརཱ སདྡྷིཾ ཀལཧཾ ཀརོཏི, ནིལླཛྫཝཙནཾ ཝདཏི, ཨཱཙརིཡསྶ ཝཱ ཨུཔཛ྄ཛྷཱཡསྶ ཝཱ ཝཏྟཔཊིཝཏྟཾ ན ཀརོཏི, གིལཱནཾ ན ཨུཔཊྛཱཏི, བུདྡྷསྶ བྷགཝཏོ ཙེཏིཡདསྶནཊྛཱནེ ཨུཙྩཱརཾ ཝཱ པསྶཱཝཾ ཝཱ ཀརོཏི, ཁེལ༹མྤི ¶ སིངྒྷཱཎིཀམྤི ཚཌྜེཏི, ཚཏྟཾ དྷཱརེཏི, ཨུཔཱཧནཱ ཨཱརུཡ྄ཧ གཙྪཏི, བུདྡྷསཱཝཀེསུ ན ལཛྫཏི, སངྒྷེ ཙིཏྟཱིཀཱརཾ ན ཀརོཏི, མཱཏིམཏྟཔིཏིམཏྟཱདཱིསུ གརུཊྛཱནཱིཡེསུ ཧིརོཏྟཔྤཾ ན པཙྩུཔཊྛཱཔེཏི. ཏསྶེཝཾ པཝཏྟམཱནསྶ སབྦཱ པེསཱ ཀིརིཡཱ མཱཏརཱིཏིཨཱདཱིསུཔི ཝཏྠཱུསུ ཨསབྷཱགཝུཏྟིཏཱ ནཱམ ཧོཏི.

༨༥༦. ཨརཏིནིདྡེསེ པནྟེསཱུཏི དཱུརེསུ ཝིཝིཏྟེསུ ཝཱ. ཨདྷིཀུསལེསཱུཏི སམཐཝིཔསྶནཱདྷམྨེསུ. ཨརཏཱིཏི རཏིཔཊིཀྑེཔོ. ཨརཏིཏཱཏི ཨརམཎཱཀཱརོ. ཨནབྷིརཏཱིཏི ཨནབྷིརཏབྷཱཝོ. ཨནབྷིརམཎཱཏི ཨནབྷིརམཎཱཀཱརོ. ཨུཀྐཎྛིཏཱཏི ཨུཀྐཎྛནཱཀཱརོ. པརིཏསྶིཏཱཏི ཨུཀྐཎྛནཝསེནེཝ པརིཏསྶནཱ.

༨༥༧. ཏནྡཱིནིདྡེསེ ཏནྡཱིཏི ཛཱཏིཨཱལསིཡཾ. ཏནྡིཡནཱཏི ཏནྡིཡནཱཀཱརོ. ཏནྡིམནཀཏཱཏི ཏནྡིཡཱ ཨབྷིབྷཱུཏཙིཏྟཏཱ. ཨལསསྶ བྷཱཝོ ཨཱལསྱཾ. ཨཱལསྱཱཡནཱཀཱརོ ཨཱལསྱཱཡནཱ. ཨལསྱཱཡིཏསྶ བྷཱཝོ ཨཱལསྱཱཡིཏཏྟཾ. ཨིཏི སབྦེཧིཔི ཨིམེཧི པདེཧི ཀིལེསཝསེན ཀཱཡཱལསིཡཾ ཀཐིཏཾ.

༨༥༨. ཝིཛམྦྷིཏཱནིདྡེསེ ཛམྦྷནཱཏི ཕནྡནཱ. པུནཔྤུནཾ ཛམྦྷནཱ ཝིཛམྦྷནཱ. ཨཱནམནཱཏི ¶ པུརཏོ ནམནཱ. ཝིནམནཱཏི པཙྪཏོ ནམནཱ. སནྣམནཱཏི སམནྟཏོ ནམནཱ. པཎམནཱཏི ཡཐཱ ཧི ཏནྟཏོ ཨུཊྛིཏཔེསཀཱརོ ཀིསྨིཉྩིདེཝ གཧེཏྭཱ ཨུཛུཀཾ ཀཱཡཾ ཨུསྶཱཔེཏི, ཨེཝཾ ཀཱཡསྶ ཨུདྡྷཾ ཋཔནཱ. བྱཱདྷིཡཀནྟི ཨུཔྤནྣབྱཱདྷིཏཱ. ཨིཏི སབྦེཧིཔི ཨིམེཧི པདེཧི ཀིལེསཝསེན ཀཱཡཕནྡནམེཝ ཀཐིཏཾ.

༨༥༩. བྷཏྟསམྨདནིདྡེསེ ¶ བྷུཏྟཱཝིསྶཱཏི བྷུཏྟཝཏོ. བྷཏྟམུཙྪཱཏི བྷཏྟགེལཉྙཾ; བལཝབྷཏྟེན ཧི མུཙྪཱཔཏྟོ ཝིཡ ཧོཏི. བྷཏྟཀིལམཐོཏི བྷཏྟེན ཀིལནྟབྷཱཝོ. བྷཏྟཔརིལཱ༹ཧོཏི བྷཏྟདརཐོ. ཏསྨིཉྷི སམཡེ པརིལཱ༹ཧུཔྤཏྟིཡཱ ཨུཔཧཏིནྡྲིཡོ ཧོཏི, ཀཱཡོ ཛཱིརཏི. ཀཱཡདུཊྛུལླནྟི བྷཏྟཾ ནིསྶཱཡ ཀཱཡསྶ ཨཀམྨཉྙཏཱ.

༨༦༠. ཙེཏསོ ལཱིནཏྟནིདྡེསོ ཧེཊྛཱ དྷམྨསངྒཧཊྛཀཐཱཡཾ ཝུཏྟཏྠོཡེཝ. ཨིམེཧི པན སབྦེཧིཔི པདེཧི ཀིལེསཝསེན ཙིཏྟསྶ གིལཱནཱཀཱརོ ཀཐིཏོཏི ཝེདིཏབྦོ.

༨༦༡. ཀུཧནཱནིདྡེསེ ¶ ལཱབྷསཀྐཱརསིལོཀསནྣིསྶིཏསྶཱཏི ལཱབྷཉྩ སཀྐཱརཉྩ ཀིཏྟིསདྡཉྩ ནིསྶིཏསྶ, པཏྠཡནྟསྶཱཏི ཨཏྠོ. པཱཔིཙྪསྶཱཏི ཨསནྟགུཎདཱིཔནཀཱམསྶ. ཨིཙྪཱཔཀཏསྶཱཏི ཨིཙྪཱཡ ཨཔཀཏསྶ, ཨུཔདྡུཏསྶཱཏི ཨཏྠོ.

ཨིཏོ པརཾ ཡསྨཱ པཙྩཡཔཊིསེཝན སཱམནྟཛཔྤནཨིརིཡཱཔཐསནྣིསྶིཏཝསེན མཧཱནིདྡེསེ ཏིཝིདྷཾ ཀུཧནཝཏྠུ ཨཱགཏཾ, ཏསྨཱ ཏིཝིདྷམྤི ཏཾ དསྶེཏུཾ པཙྩཡཔཊིསེཝནསངྑཱཏེན ཝཱཏི ཨེཝམཱདི ཨཱརདྡྷཾ. ཏཏྠ ཙཱིཝརཱདཱིཧི ནིམནྟིཏསྶ ཏདཏྠིཀསྶེཝ སཏོ པཱཔིཙྪཏཾ ནིསྶཱཡ པཊིཀྑིཔནེན, ཏེ ཙ གཧཔཏིཀེ ཨཏྟནི སུཔྤཏིཊྛིཏསདྡྷེ ཉཏྭཱ པུན ཏེསཾ ‘ཨཧོ ཨཡྻོ ཨཔྤིཙྪོ, ན ཀིཉྩི པཊིགྒཎྷིཏུཾ ཨིཙྪཏི, སུལདྡྷཾ ཝཏ ནོ ཨསྶ སཙེ ཨཔྤམཏྟཀཾ ཀིཉྩི པཊིགྒཎྷེཡྻཱ’ཏི ནཱནཱཝིདྷེཧི ཨུཔཱཡེཧི པཎཱིཏཱནི ཙཱིཝརཱདཱིནི ཨུཔནེནྟཱནཾ ཏདནུགྒཧཀཱམཏཾཡེཝ ཨཱཝིཀཏྭཱ པཊིགྒཧཎེན ཙ ཏཏོ པབྷུཏི ཨསཱིཏིསཀཊབྷཱརེཧི ཨུཔནཱམནཧེཏུབྷཱུཏཾ ཝིམྷཱཔནཾ པཙྩཡཔཊིསེཝནསངྑཱཏཾ ཀུཧནཝཏྠཱུཏི ཝེདིཏབྦཾ. ཝུཏྟམྤི ཙེཏཾ མཧཱནིདྡེསེ (མཧཱནི. ༨༧) –

‘‘ཀཏམཾ པཙྩཡཔཊིསེཝནསངྑཱཏཾ ཀུཧནཝཏྠུ? ཨིདྷ གཧཔཏིཀཱ བྷིཀྑུཾ ནིམནྟེནྟི ¶ ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརེཧི. སོ པཱཔིཙྪོ ཨིཙྪཱཔཀཏོ ཨཏྠིཀོ ཙཱིཝར ¶ …པེ… པརིཀྑཱརཱནཾ བྷིཡྻོཀམྱཏཾ ཨུཔཱདཱཡ ཙཱིཝརཾ པཙྩཀྑཱཏི, པིཎྜཔཱཏཾ པཙྩཀྑཱཏི, སེནཱསནཾ པཙྩཀྑཱཏི, གིལཱནཔཙྩཡབྷེསཛྫཔརིཀྑཱརཾ པཙྩཀྑཱཏི. སོ ཨེཝམཱཧ – ‘‘ཀིཾ སམཎསྶ མཧགྒྷེན ཙཱིཝརེན? ཨེཏཾ སཱརུཔྤཾ ཡཾ སམཎོ སུསཱནཱ ཝཱ སངྐཱརཀཱུཊཱ ཝཱ པཱཔཎིཀཱ ཝཱ ནནྟཀཱནི ཨུཙྩིནིཏྭཱ སངྒྷཱཊིཾ ཀཏྭཱ དྷཱརེཡྻ. ཀིཾ སམཎསྶ མཧགྒྷེན པིཎྜཔཱཏེན? ཨེཏཾ སཱརུཔྤཾ ཡཾ སམཎོ ཨུཉྪཱཙརིཡཱཡ པིཎྜིཡཱལོཔེན ཛཱིཝིཀཾ ཀཔྤེཡྻ. ཀིཾ སམཎསྶ མཧགྒྷེན སེནཱསནེན? ཨེཏཾ སཱརུཔྤཾ ཡཾ སམཎོ རུཀྑམཱུལིཀོ ཝཱ ཨསྶ སོསཱནིཀོ ཝཱ ཨབྦྷོཀཱསིཀོ ཝཱ. ཀིཾ སམཎསྶ མཧགྒྷེན གིལཱནཔཙྩཡབྷེསཛྫཔརིཀྑཱརེན? ཨེཏཾ སཱརུཔྤཾ ཡཾ སམཎོ པཱུཏིམུཏྟེན ཝཱ ཧརཱིཏཀཱིཁཎྜེན ཝཱ ཨོསདྷཾ ཀརེཡྻཱཏི. ཏདུཔཱདཱཡ ལཱུཁཾ ཙཱིཝརཾ དྷཱརེཏི, ལཱུཁཾ པིཎྜཔཱཏཾ པརིབྷུཉྫཏི, ལཱུཁཾ སེནཱསནཾ པཊིསེཝཏི, ལཱུཁཾ གིལཱནཔཙྩཡབྷེསཛྫཔརིཀྑཱརཾ པཊིསེཝཏི. ཏམེནཾ གཧཔཏིཀཱ ཨེཝཾ ཛཱནནྟི – ‘ཨཡཾ སམཎོ ¶ ཨཔྤིཙྪོ སནྟུཊྛོ པཝིཝིཏྟོ ཨསཾསཊྛོ ཨཱརདྡྷཝཱིརིཡོ དྷུཏཝཱདོ’ཏི བྷིཡྻོ བྷིཡྻོ ནིམནྟེནྟི ཙཱིཝར…པེ… པརིཀྑཱརེཧི. སོ ཨེཝམཱཧ – ‘ཏིཎྞཾ སམྨུཁཱིབྷཱཝཱ སདྡྷོ ཀུལཔུཏྟོ བཧུཾ པུཉྙཾ པསཝཏི – སདྡྷཱཡ སམྨུཁཱིབྷཱཝཱ སདྡྷོ ཀུལཔུཏྟོ བཧུཾ པུཉྙཾ པསཝཏི, དེཡྻདྷམྨསྶ…པེ… དཀྑིཎེཡྻཱནཾ སམྨུཁཱིབྷཱཝཱ སདྡྷོ ཀུལཔུཏྟོ བཧུཾ པུཉྙཾ པསཝཏི. ཏུམྷཱཀཉྩེཝཱཡཾ སདྡྷཱ ཨཏྠི, དེཡྻདྷམྨོ ཙ སཾཝིཛྫཏི, ཨཧཉྩ པཊིགྒཱཧཀོ. སཙཱཧཾ ན པཊིགྒཧེསྶཱམི, ཨེཝཾ ཏུམྷེ པུཉྙེན པརིབཱཧིརཱ བྷཝིསྶཐ; ན མཡ྄ཧཾ ཨིམིནཱ ཨཏྠོ, ཨཔིཙ ཏུམྷཱཀཾ ཨེཝ ཨནུཀམྤཱཡ པཊིགྒཎྷཱམཱི’ཏི. ཏདུཔཱདཱཡ བཧུམྤི ཙཱིཝརཾ པཊིགྒཎྷཱཏི, བཧུམྤི པིཎྜཔཱཏཾ…པེ… བྷེསཛྫཔརིཀྑཱརཾ པཊིགྒཎྷཱཏི. ཡཱ ཨེཝརཱུཔཱ བྷཱཀུཊིཀཱ བྷཱཀུཊིཡཾ ཀུཧནཱ ཀུཧཱཡནཱ ཀུཧིཏཏྟཾ – ཨིདཾ ཝུཙྩཏི པཙྩཡཔཊིསེཝནསངྑཱཏཾ ཀུཧནཝཏྠཱུ’’ཏི.

པཱཔིཙྪསྶེཝ པན སཏོ ཨུཏྟརིམནུསྶདྷམྨཱདྷིགམཔརིདཱིཔནཝཱཙཱཡ ¶ ཏཐཱ ཏཐཱ ཝིམྷཱཔནཾ སཱམནྟཛཔྤནསངྑཱཏཾ ཀུཧནཝཏྠཱུཏི ཝེདིཏབྦཾ. ཡཐཱཧ – ‘‘ཀཏམཾ སཱམནྟཛཔྤནསངྑཱཏཾ ཀུཧནཝཏྠུ ¶ ? ཨིདྷེཀཙྩོ པཱཔིཙྪོ ཨིཙྪཱཔཀཏོ སམྦྷཱཝནཱདྷིཔྤཱཡོ ‘ཨེཝཾ མཾ ཛནོ སམྦྷཱཝེསྶཏཱི’ཏི ཨརིཡདྷམྨསནྣིསྶིཏཾ ཝཱཙཾ བྷཱསཏི – ‘ཡོ ཨེཝརཱུཔཾ ཙཱིཝརཾ དྷཱརེཏི, སོ སམཎོ མཧེསཀྑོ’ཏི བྷཎཏི; ‘ཡོ ཨེཝརཱུཔཾ པཏྟཾ, ལོཧཐཱལཀཾ, དྷམཀརཎཾ, པརིསཱཝནཾ, ཀུཉྩིཀཾ, ཨུཔཱཧནཾ, ཀཱཡབནྡྷནཾ, ཨཱཡོགཾ དྷཱརེཏི, སོ སམཎོ མཧེསཀྑོ’ཏི བྷཎཏི; ‘ཡསྶ ཨེཝརཱུཔོ ཨུཔཛ྄ཛྷཱཡོ, ཨཱཙརིཡོ, སམཱནུཔཛ྄ཛྷཱཡོ, སམཱནཱཙརིཡཀོ, མིཏྟོ སནྡིཊྛོ, སམྦྷཏྟོ, སཧཱཡོ; ཡོ ཨེཝརཱུཔེ ཝིཧཱརེ ཝསཏི – ཨཌྜྷཡོགེ, པཱསཱདེ, ཧམྨིཡེ, གུཧཱཡཾ, ལེཎེ, ཀུཊིཡཱ, ཀཱུཊཱགཱརེ, ཨཊྚེ, མཱལེ༹, ཨུདོསིཏེ, ཨུདྡཎྜེ, ཨུཔཊྛཱནསཱལཱཡཾ, མཎྜཔེ, རུཀྑམཱུལེ ཝསཏི, སོ སམཎོ མཧེསཀྑོ’ཏི བྷཎཏི.

‘‘ཨཐ ཝཱ ཀོརཛིཀཀོརཛིཀོ བྷཱཀུཊིཀབྷཱཀུཊིཀོ ཀུཧཀཀུཧཀོ ལཔཀལཔཀོ མུཁསམྦྷཱཝིཏོ ‘ཨཡཾ སམཎོ ཨིམཱསཾ ཨེཝརཱུཔཱནཾ སནྟཱནཾ ཝིཧཱརསམཱཔཏྟཱིནཾ ལཱབྷཱི’ཏི ཏཱདིསཾ གམྦྷཱིརཾ གཱུལ༹ྷཾ ནིཔུཎཾ པཊིཙྪནྣཾ ལོཀུཏྟརཾ སུཉྙཏཱཔཊིསཾཡུཏྟཾ ཀཐཾ ཀཐེཏི. ཡཱ ཨེཝརཱུཔཱ བྷཱཀུཊིཀཱ བྷཱཀུཊིཡཾ ཀུཧནཱ ཀུཧཱཡནཱ ཀུཧིཏཏྟཾ – ཨིདཾ ཝུཙྩཏི སཱམནྟཛཔྤནསངྑཱཏཾ ཀུཧནཝཏྠཱུ’’ཏི.

པཱཔིཙྪསྶེཝ ¶ པན སཏོ སམྦྷཱཝནཱདྷིཔྤཱཡཀཏེན ཨིརིཡཱཔཐེན ཝིམྷཱཔནཾ ཨིརིཡཱཔཐསནྣིསྶིཏཾ ཀུཧནཝཏྠཱུཏི ཝེདིཏབྦཾ. ཡཐཱཧ – ‘‘ཀཏམཾ ཨིརིཡཱཔཐསངྑཱཏཾ ཀུཧནཝཏྠུ? ཨིདྷེཀཙྩོ པཱཔིཙྪོ ཨིཙྪཱཔཀཏོ སམྦྷཱཝནཱདྷིཔྤཱཡོ ‘ཨེཝཾ མཾ ཛནོ སམྦྷཱཝེསྶཏཱི’ཏི གམནཾ སཎྛཔེཏི, སཡནཾ སཎྛཔེཏི, པཎིདྷཱཡ གཙྪཏི, པཎིདྷཱཡ ཏིཊྛཏི, པཎིདྷཱཡ ནིསཱིདཏི, པཎིདྷཱཡ སེཡྻཾ ཀཔྤེཏི, སམཱཧིཏོ ཝིཡ གཙྪཏི, སམཱཧིཏོ ཝིཡ ཏིཊྛཏི, ནིསཱིདཏི, སེཡྻཾ ཀཔྤེཏི, ཨཱཔཱཐཀཛ྄ཛྷཱཡཱིཝ ཧོཏི. ཡཱ ཨེཝརཱུཔཱ ཨིརིཡཱཔཐསྶ ཨཱཋཔནཱ ཋཔནཱ སཎྛཔནཱ བྷཱཀུཊིཀཱ བྷཱཀུཊིཡཾ ཀུཧནཱ ཀུཧཱཡནཱ ཀུཧིཏཏྟཾ – ཨིདཾ ཝུཙྩཏི ཨིརིཡཱཔཐསངྑཱཏཾ ཀུཧནཝཏྠཱུ’’ཏི.

ཏཏྠ ¶ ¶ པཙྩཡཔཊིསེཝནསངྑཱཏེནཱཏི པཙྩཡཔཊིསེཝནནྟི ཨེཝཾ སངྑཱཏེན པཙྩཡཔཊིསེཝནེན. སཱམནྟཛཔྤིཏེནཱཏི སམཱིཔེ བྷཎིཏེན. ཨིརིཡཱཔཐསྶཱཏི ཙཏུཨིརིཡཱཔཐསྶ. ཨཱཋཔནཱཏི ཨཱདིཋཔནཱ, ཨཱདརེན ཝཱ ཋཔནཱ. ཋཔནཱཏི ཋཔནཱཀཱརོ. སཎྛཔནཱཏི ཨབྷིསངྑརཎཱ, པཱསཱདིཀབྷཱཝཀརཎནྟི ཝུཏྟཾ ཧོཏི. བྷཱཀུཊིཀཱཏི པདྷཱནཔུརིམཊྛིཏབྷཱཝདསྶནེན བྷཱཀུཊིཀརཎཾ, མུཁསངྐོཙོཏི ཝུཏྟཾ ཧོཏི. བྷཱཀུཊིཀརཎཾ སཱིལམསྶཱཏི བྷཱཀུཊིཀོ; བྷཱཀུཊིཀསྶ བྷཱཝོ བྷཱཀུཊིཡཾ. ཀུཧནཱཏི ཝིམྷཱཔནཾ, ཀུཧསྶ ཨཱཡནཱ ཀུཧཱཡནཱ. ཀུཧིཏསྶ བྷཱཝོ ཀུཧིཏཏྟནྟི.

༨༦༢. ལཔནཱནིདྡེསེ ཨཱལཔནཱཏི ཝིཧཱརཾ ཨཱགཏམནུསྶེ དིསྭཱ ཀིམཏྠཱཡ བྷོནྟོ ཨཱགཏཱ? ཀིཾ བྷིཀྑཱུ ནིམནྟེཏུཾ? ཡདི ཨེཝཾ གཙྪཐ; ཨཧཾ པཙྪཏོ བྷིཀྑཱུ གཧེཏྭཱ ཨཱགཙྪཱམཱི’ཏི ཨེཝཾ ཨཱདིཏོཝ ལཔནཱ. ཨཐ ཝཱ ཨཏྟཱནཾ ཨུཔནེཏྭཱ ‘ཨཧཾ ཏིསྶོ, མཡི རཱཛཱ པསནྣོ, མཡི ཨསུཀོ ཙ ཨསུཀོ ཙ རཱཛམཧཱམཏྟོ པསནྣོ’ཏི ཨེཝཾ ཨཏྟུཔནཱཡིཀཱ ལཔནཱ ཨཱལཔནཱ. ལཔནཱཏི པུཊྛསྶ སཏོ ཝུཏྟཔྤཀཱརམེཝ ལཔནཾ. སལླཔནཱཏི གཧཔཏིཀཱནཾ ཨུཀྐཎྛནེ བྷཱིཏསྶ ཨོཀཱསཾ དཏྭཱ སུཊྛུ ལཔནཱ. ཨུལླཔནཱཏི ‘མཧཱཀུཊུམྦིཀོ, མཧཱནཱཝིཀོ, མཧཱདཱནཔཏཱི’ཏི ཨེཝཾ ཨུདྡྷཾ ཀཏྭཱ ལཔནཱ. སམུལླཔནཱཏི སབྦཏོབྷཱགེན ཨུདྡྷཾ ཀཏྭཱ ལཔནཱ. ཨུནྣཧནཱཏི ‘ཨུཔཱསཀཱ, པུབྦེ ཨཱིདིསེ ཀཱལེ དཱནཾ དེཐ; ཨིདཱནི ཀིཾ ན དེཐཱ’ཏི ཨེཝཾ ཡཱཝ ‘དསྶཱམ, བྷནྟེ, ཨོཀཱསཾ ན ལབྷཱམཱ’ཏིཨཱདཱིནི ཝདནྟི ཏཱཝ ཨུདྡྷཾ ནཧནཱ, ཝེཋནཱཏི ཝུཏྟཾ ཧོཏི. ཨཐ ཝཱ ཨུཙྪུཧཏྠཾ དིསྭཱ ‘ཀུཏོ ཨཱགཏཱ, ཨུཔཱསཀཱ’ཏི པུཙྪཏི. ‘ཨུཙྪུཁེཏྟཏོ, བྷནྟེ’ཏི. ‘ཀིཾ ཏཏྠ ཨུཙྪུ མདྷུར’ནྟི? ‘ཁཱདིཏྭཱ, བྷནྟེ, ཛཱནིཏབྦ’ནྟི. ‘ན, ཨུཔཱསཀཱ, བྷིཀྑུསྶ ‘ཨུཙྪུཾ དེཐཱ’ཏི ཝཏྟུཾ ཝཊྚཏཱི’ཏི ཡཱ ཨེཝརཱུཔཱ ནིབྦེཋེནྟསྶཱཔི ¶ ཝེཋནཀཀཐཱ, སཱ ཨུནྣཧནཱ ¶ . སབྦཏོབྷཱགེན པུནཔྤུནཾ ཨུནྣཧནཱ སམུནྣཧནཱ. ཨུཀྐཱཙནཱཏི ‘ཨེཏཾ ཀུལཾ མཾཡེཝ ཛཱནཱཏི, སཙེ ཨེཏྠ དེཡྻདྷམྨོ ཨུཔྤཛྫཏི, མཡ྄ཧམེཝ དེཏཱི’ཏི ཨེཝཾ ཨུཀྑིཔིཏྭཱ ཀཱཙནཱ ཨུཀྐཱཙནཱ; ཨུདྡཱིཔནཱཏི ཝུཏྟཾ ཧོཏི.

ཏེལཀནྡརིཀཝཏྠུ ཙེཏྠ ཝཏྟབྦཾ. དྭེ ཀིར བྷིཀྑཱུ ཨེཀཾ གཱམཾ པཝིསིཏྭཱ ཨཱསནསཱལཱཡ ནིསཱིདིཏྭཱ ཨེཀཾ ཀུམཱརིཀཾ དིསྭཱ པཀྐོསིཾསུ. ཏཱཡ ¶ ཨཱགཏཱཡ ཏཏྲེཀོ ཨེཀཾ པུཙྪི – ‘ཨཡཾ, བྷནྟེ, ཀསྶ ཀུམཱརིཀཱ’ཏི? ‘ཨམྷཱཀཾ ཨུཔཊྛཱཡིཀཱཡ ཏེལཀནྡརིཀཱཡ དྷཱིཏཱ, ཨཱཝུསོ. ཨིམིསྶཱ མཱཏཱ མཡི གེཧཾ གཏེ སཔྤིཾ དདམཱནཱ གྷཊེནེཝ དེཏི, ཨཡམྤི མཱཏཱ ཝིཡ གྷཊེནེཝ དེཏཱི’ཏི ཨུཀྐཱཙེཏི.

སབྦཏོབྷཱགེན པུནཔྤུནཾ ཨུཀྐཱཙནཱ སམུཀྐཱཙནཱ. ཨནུཔྤིཡབྷཱཎིཏཱཏི སཙྩཱནུརཱུཔཾ ཝཱ དྷམྨཱནུརཱུཔཾ ཝཱ ཨནཔལོཀེཏྭཱ པུནཔྤུནཾ པིཡབྷཎནམེཝ. ཙཱཊུཀམྱཏཱཏི ནཱིཙཝུཏྟིཏཱ; ཨཏྟཱནཾ ཧེཊྛཏོ ཋཔེཏྭཱ ཝཏྟནཾ. མུགྒསཱུཔྱཏཱཏི མུགྒསཱུཔསདིསཏཱ. ཡཐཱ མུགྒེསུ པཙྩམཱནེསུ ཀོཙིདེཝ ན པཙྩཏི, ཨཝསེསཱ པཙྩནྟི; ཨེཝཾ ཡསྶ པུགྒལསྶ ཝཙནེ ཀིཉྩིདེཝ སཙྩཾ ཧོཏི, སེསཾ ཨལིཀཾ – ཨཡཾ པུགྒལོ མུགྒསཱུཔྱོཏི ཝུཙྩཏི. ཏསྶ བྷཱཝོ མུགྒསཱུཔྱཏཱ. པཱརིབྷཊཡཏཱཏི པཱརིབྷཊཡབྷཱཝོ. ཡོ ཧི ཀུལདཱརཀེ དྷཱཏཱི ཝིཡ ཨངྐེན ཝཱ ཁནྡྷེན ཝཱ པརིབྷཊཏི, དྷཱརེཏཱིཏི ཨཏྠོ; ཏསྶ པརིབྷཊསྶ ཀམྨཾ པཱརིབྷཊཡཾ; པཱརིབྷཊཡསྶ བྷཱཝོ པཱརིབྷཊཡཏཱཏི.

༨༦༣. ནེམིཏྟིཀཏཱནིདྡེསེ ནིམིཏྟནྟི ཡཾཀིཉྩི པརེསཾ པཙྩཡདཱནསཾཡོཛནཀཾ ཀཱཡཝཙཱིཀམྨཾ. ནིམིཏྟཀམྨནྟི ནིམིཏྟསྶ ཀརཎཀོསལླཾ.

ཏཏྲིདཾ ཝཏྠུ – ཨེཀོ ཀིར པིཎྜཔཱཏིཀོ ཨུཔཊྛཱཀཀམྨཱརསྶ གེཧདྭཱརཾ གནྟྭཱ ‘ཀིཾ བྷནྟེ’ཏི པུཙྪིཏོ ཙཱིཝརནྟརེན ཧཏྠཾ ནཱིཧརིཏྭཱ ¶ ཝཱསིཔཧརཎཱཀཱརཾ ཨཀཱསི. ཀམྨཱརོ ‘སལླཀྑིཏཾ མེ, བྷནྟེ’ཏི ཝཱསིཾ ཀཏྭཱ ཨདཱསི. ཨོབྷཱསོཏི པཙྩཡཔཊིསཾཡུཏྟཀཐཱ. ཨོབྷཱསཀམྨནྟི ཝཙྪཀཔཱལཀེ དིསྭཱ ‘ཀིཾ ཨིམེ ཝཙྪཱ ཁཱིརགོཝཙྪཱ, ཏཀྐགོཝཙྪཱ’ཏི པུཙྪིཏྭཱ ‘ཁཱིརགོཝཙྪཱ, བྷནྟེ’ཏི ཝུཏྟེ ‘ན ཁཱིརགོཝཙྪཱ, ཡདི ཁཱིརགོཝཙྪཱ སིཡུཾ བྷིཀྑཱུཔི ཁཱིརཾ ལབྷེཡྻུ’ནྟི ཨེཝམཱདིནཱ ནཡེན ཏེསཾ དཱརཀཱནཾ མཱཏཱཔིཏཱུནཾ ནིཝེདེཏྭཱ ཁཱིརདཱཔནཱདིཀཾ ཨོབྷཱསཀརཎཾ. སཱམནྟཛཔྤཱཏི སམཱིཔཾ ཀཏྭཱ ཛཔྤནཾ.

ཛཱཏཀབྷཱཎཀཝཏྠུ ¶ ཙེཏྠ ཀཐེཏབྦཾ. ཨེཀོ ཀིར ཛཱཏཀབྷཱཎཀཏྠེརོ བྷུཉྫིཏུཀཱམོ ཨུཔཊྛཱཡིཀཱཡ གེཧཾ པཝིསིཏྭཱ ནིསཱིདི. སཱ ཨདཱཏུཀཱམཱ ‘ཏཎྜུལཱ ནཏྠཱི’ཏི བྷཎནྟཱི ཏཎྜུལེ ཨཱཧརིཏུཀཱམཱ ཝིཡ པཊིཝིསྶཀགྷརཾ གཏཱ. བྷིཀྑུ ཨནྟོགབྦྷཾ པཝིསིཏྭཱ ཨོལོཀེནྟོ ཀཝཱཊཀོཎེ ¶ ཨུཙྪུཾ, བྷཱཛནེ གུལ༹ཾ, པིཊཀེ ལོཎམཙྪཕཱལཾ, ཀུམྦྷིཡཾ ཏཎྜུལེ, གྷཊེ གྷཏཾ དིསྭཱ ནིཀྑམིཏྭཱ ནིསཱིདི. གྷརཎཱི ‘ཏཎྜུལཾ ནཱལཏྠ’ནྟི ཨཱགཏཱ. ཐེརོ ‘ཨུཔཱསིཀེ, ཨཛྫ བྷིཀྑཱ ན སམྤཛྫིསྶཏཱི’ཏི པཊིཀཙྩེཝ ནིམིཏྟཾ ཨདྡས’ནྟི ཨཱཧ. ‘ཀིཾ, བྷནྟེ’ཏི? ‘ཀཝཱཊཀོཎེ ནིཀྑིཏྟཾ ཨུཙྪུཾ ཝིཡ སཔྤཾ ཨདྡསཾ; ‘ཏཾ པཧརིསྶཱམཱི’ཏི ཨོལོཀེནྟོ བྷཱཛནེ ཋཔིཏཾ གུལ༹པིཎྜཾ ཝིཡ པཱསཱཎཾ ལེཌྜུཀེན; པཧཊེན སཔྤེན ཀཏཾ, པིཊཀེ ནིཀྑིཏྟལོཎམཙྪཕཱལསདིསཾ, ཕཎཾ; ཏསྶ ཏཾ ལེཌྜུཾ ཌཾསིཏུཀཱམསྶ, ཀུམྦྷིཡཱ ཏཎྜུལསདིསེ དནྟེ; ཨཐསྶ ཀུཔིཏསྶ, གྷཊེ པཀྑིཏྟགྷཏསདིསཾ, མུཁཏོ ནིཀྑམནྟཾ ཝིསམིསྶཀཾ ཁེལ༹’ནྟི. སཱ ‘ན སཀྐཱ མུཎྜཀཾ ཝཉྩེཏུ’ནྟི ཨུཙྪུཾ དཏྭཱ ཨོདནཾ པཙིཏྭཱ གྷཏགུལ༹མཙྪེཧི སདྡྷིཾ ཨདཱསཱིཏི. ཨེཝཾ སམཱིཔཾ ཀཏྭཱ ཛཔྤནཾ སཱམནྟཛཔྤཱཏི ཝེདིཏབྦཾ. པརིཀཐཱཏི ཡཐཱ ཏཾ ལབྷཏི ཏཐཱ པརིཝཏྟེཏྭཱ པརིཝཏྟེཏྭཱ ཀཐནཾ.

༨༦༤. ནིཔྤེསིཀཏཱནིདྡེསེ ཨཀྐོསནཱཏི དསཧི ཨཀྐོསཝཏྠཱུཧི ཨཀྐོསནཱ. ཝམྦྷནཱཏི པརིབྷཝིཏྭཱ ཀཐནཾ. གརཧནཱཏི ¶ ‘ཨསྶདྡྷོ ཨཔྤསནྣོ’ཏིཨཱདིནཱ ནཡེན དོསཱརོཔནཱ. ཨུཀྑེཔནཱཏི ‘མཱ ཨེཏཾ ཨེཏྠ ཀཐེཐཱ’ཏི ཝཱཙཱཡ ཨུཀྑིཔནཾ. སབྦཏོབྷཱགེན སཝཏྠུཀཾ སཧེཏུཀཾ ཀཏྭཱ ཨུཀྑེཔནཱ སམུཀྑེཔནཱ. ཨཐཝཱ ཨདེནྟཾ ‘ཨཧོ དཱནཔཏཱི’ཏི ཨེཝཾ ཨུཀྑིཔནཾ ཨུཀྑེཔནཱ. ‘མཧཱདཱནཔཏཱི’ཏི ཨེཝཾ སུཊྛུ ཨུཀྑེཔནཱ སམུཀྑེཔནཱ. ཁིཔནཱཏི ‘ཀིཾ ཨིམསྶ ཛཱིཝིཏཾ བཱིཛབྷོཛིནོ’ཏི ཨེཝཾ ཨུཔྤཎྜནཱ. སངྑིཔནཱཏི ‘ཀིཾ ཨིམཾ ཨདཱཡཀོཏི བྷཎཐ ཡོ ནིཙྩཀཱལཾ སབྦེསམྤི ནཏྠཱིཏི ཝཙནཾ དེཏཱི’ཏི ཨེཝཾ སུཊྛུཏརཾ ཨུཔྤཎྜནཱ. པཱཔནཱཏི ཨདཱཡཀཏྟསྶ ཨཝཎྞསྶ ཝཱ པཱཔནཾ. སབྦཏོབྷཱགེན པཱཔནཱ སམྤཱཔནཱ. ཨཝཎྞཧཱརིཀཱཏི ‘ཨེཝཾ མེ ཨཝཎྞབྷཡཱཔི དསྶཏཱི’ཏི གེཧཏོ གེཧཾ, གཱམཏོ གཱམཾ, ཛནཔདཏོ ཛནཔདཾ ཨཝཎྞཧརཎཾ. པརཔིཊྛིམཾསིཀཏཱཏི པུརཏོ མདྷུརཾ བྷཎིཏྭཱ པརམྨུཁེ ཨཝཎྞབྷཱསིཏཱ. ཨེསཱ ཧི ཨབྷིམུཁཾ ཨོལོཀེཏུཾ ཨསཀྐོནྟསྶ པརམྨུཁཱནཾ པིཊྛིམཾསཁཱདནཾ ཝིཡ ཧོཏི. ཏསྨཱ པརཔིཊྛིམཾསིཀཏཱཏི ཝུཏྟཱ. ཨཡཾ ཝུཙྩཏི ནིཔྤེསིཀཏཱཏི ཨཡཾ ཡསྨཱ ཝེལུ༹པེསིཀཱ ཝིཡ ཨབྦྷངྒཾ པརསྶ གུཎཾ ནིཔྤེསེཏི ནིཔུཉྪཏི, ཡསྨཱ ཝཱ གནྡྷཛཱཏཾ ནིཔིསིཏྭཱ གནྡྷམགྒནཱ ཝིཡ ¶ པརགུཎེ ¶ ནིཔིསིཏྭཱ ཝིཙུཎྞེཏྭཱ ཨེསཱ ལཱབྷམགྒནཱ ཧོཏི, ཏསྨཱ ནིཔྤེསིཀཏཱཏི ཝུཙྩཏཱིཏི.

༨༦༥. ལཱབྷེན ལཱབྷཾ ནིཛིགཱིསནཏཱནིདྡེསེ ནིཛིགཱིསནཏཱཏི མགྒནཱ. ཨིཏོ ལདྡྷནྟི ཨིམམྷཱ གེཧཱ ལདྡྷཾ. ཨམུཏྲཱཏི ཨམུཀམྷི གེཧེ. ཨེཊྛཱིཏི ཨིཙྪནཱ. གཝེཊྛཱིཏི མགྒནཱ. པརིཡེཊྛཱིཏི པུནཔྤུནཾ མགྒནཱ. ཨཱདིཏོ པཊྛཱཡ ལདྡྷཾ ལདྡྷཾ བྷིཀྑཾ ཏཏྲ ཏཏྲ ཀུལདཱརཀཱནཾ དཏྭཱ ཨནྟེ ཁཱིརཡཱགུཾ ལབྷིཏྭཱ གཏབྷིཀྑུཝཏྠུ ཙེཏྠ ཀཐེཏབྦཾ. ཨེསནཱཏིཨཱདཱིནི ཨེཊྛཱིཏིཨཱདཱིནཾ ཝེཝཙནཱནི, ཏསྨཱ ཨེཊྛཱིཏི ཨེསནཱ, གཝེཊྛཱིཏི གཝེསནཱ, པརིཡེཊྛཱིཏི པརིཡེསནཱ. ཨིཙྩེཝམེཏྠ ཡོཛནཱ ཝེདིཏབྦཱ.

༨༦༦. སེཡྻམཱནནིདྡེསེ ¶ ཛཱཏིཡཱཏི ཁཏྟིཡབྷཱཝཱདིཛཱཏིསམྤཏྟིཡཱ. གོཏྟེནཱཏི གོཏམགོཏྟཱདིནཱ ཨུཀྐཊྛགོཏྟེན. ཀོལཔུཏྟིཡེནཱཏི མཧཱཀུལབྷཱཝེན. ཝཎྞཔོཀྑརཏཱཡཱཏི ཝཎྞསམྤནྣསརཱིརཏཱཡ. སརཱིརཉྷི པོཀྑརནྟི ཝུཙྩཏི, ཏསྶ ཝཎྞསམྤཏྟིཡཱ ཨབྷིརཱུཔབྷཱཝེནཱཏི ཨཏྠོ. དྷནེནཱཏིཨཱདཱིནི ཨུཏྟཱནཏྠཱནེཝ. མཱནཾ ཛཔྤེཏཱིཏི ཨེཏེསུ ཡེན ཀེནཙི ཝཏྠུནཱ ‘སེཡྻོཧམསྨཱི’ཏི མཱནཾ པཝཏྟེཏི ཀརོཏི.

༨༦༧. སདིསམཱནནིདྡེསེ མཱནཾ ཛཔྤེཏཱིཏི ཨེཏེསུ ཡེན ཀེནཙི ཝཏྠུནཱ ‘སདིསོཧམསྨཱི’ཏི མཱནཾ པཝཏྟེཏི. ཨཡམེཏྠ ཨཏྠཏོ ཝིསེསོ. པཱལི༹ཡཾ པན ནཱནཱཀརཎཾ ནཏྠི.

༨༦༨. ཧཱིནམཱནནིདྡེསེ ཨོམཱནཾ ཛཔྤེཏཱིཏི ཧེཊྛཱམཱནཾ པཝཏྟེཏི. ཨོམཱནོཏི ལཱམཀོ ཧེཊྛཱམཱནོ. ཨོམཉྙནཱ ཨོམཉྙིཏཏྟནྟི ཨཱཀཱརབྷཱཝནིདྡེསོ. ཧཱིལ༹ནཱཏི ཛཱཏིཨཱདཱིཧི ཨཏྟཛིགུཙྪནཱ. ཨོཧཱིལ༹ནཱཏི ཨཏིརེཀཏོ ཧཱིལ༹ནཱ. ཨོཧཱིལི༹ཏཏྟནྟི ཏསྶེཝ བྷཱཝནིདྡེསོ. ཨཏྟུཉྙཱཏི ཨཏྟཱནཾ ཧཱིནཾ ཀཏྭཱ ཛཱནནཱ. ཨཏྟཱཝཉྙཱཏི ཨཏྟཱནཾ ཨཝཛཱནནཱ. ཨཏྟཔརིབྷཝོཏི ཛཱཏིཨཱདིསམྤཏྟིནཱམམེཝ ཛཱཏཱཏི ཨཏྟཱནཾ པརིབྷཝིཏྭཱ མཉྙནཱ. ཨེཝམིམེ ཏཡོ མཱནཱ པུགྒལཾ ཨནིསྶཱཡ ཛཱཏིཨཱདིཝཏྠུཝསེནེཝ ཀཐིཏཱ. ཏེསུ ཨེཀེཀོ ཏིཎྞམྤི སེཡྻསདིསཧཱིནཱནཾ ཨུཔྤཛྫཏི. ཏཏྠ ‘སེཡྻོཧམསྨཱི’ཏི མཱནོ སེཡྻསྶེཝ ཡཱཐཱཝམཱནོ, སེསཱནཾ ཨཡཱཐཱཝམཱནོ. ‘སདིསོཧམསྨཱི’ཏི ¶ མཱནོ ¶ སདིསསྶེཝ ཡཱཐཱཝམཱནོ, སེསཱནཾ ཨཡཱཐཱཝམཱནོ. ‘ཧཱིནོཧམསྨཱི’ཏི མཱནོ ཧཱིནསྶེཝ ཡཱཐཱཝམཱནོ, སེསཱནཾ ཨཡཱཐཱཝམཱནོ.

༨༦༩. ཏཏྠ ཀཏམོ སེཡྻསྶ སེཡྻོཧམསྨཱིཏིཨཱདཡོ པན ནཝ མཱནཱ པུགྒལཾ ནིསྶཱཡ ཀཐིཏཱ. ཏེསུ ཏཡོ ཏཡོ ཨེཀེཀསྶ ཨུཔྤཛྫནྟི. ཏཏྠ དཧཏཱིཏི ཋཔེཏི. ཏཾ ནིསྶཱཡཱཏི ཏཾ སེཡྻཏོ དཧནཾ ནིསྶཱཡ. ཨེཏྠ པན སེཡྻསྶ སེཡྻོཧམསྨཱིཏི མཱནོ རཱཛཱུནཉྩེཝ པབྦཛིཏཱནཉྩ ཨུཔྤཛྫཏི. རཱཛཱ ཧི ‘རཊྛེན ཝཱ དྷནེན ཝཱ ཝཱཧནེཧི ཝཱ ཀོ མཡཱ སདིསོ ཨཏྠཱི’ཏི ཨེཏཾ མཱནཾ ཀརོཏི. པབྦཛིཏོཔི ‘སཱིལདྷུཏངྒཱདཱིཧི ¶ ཀོ མཡཱ སདིསོ ཨཏྠཱི’ཏི ཨེཏཾ མཱནཾ ཀརོཏི.

༨༧༠. སེཡྻསྶ སདིསོཧམསྨཱིཏི མཱནོཔི ཨེཏེསཾཡེཝ ཨུཔྤཛྫཏི. རཱཛཱ ཧི ‘རཊྛེན ཝཱ དྷནེན ཝཱ ཝཱཧནེཧི ཝཱ ཨཉྙརཱཛཱུཧི སདྡྷིཾ མཡ྄ཧཾ ཀིཾ ནཱནཱཀརཎ’ནྟི ཨེཏཾ མཱནཾ ཀརོཏི. པབྦཛིཏོཔི ‘སཱིལདྷུཏངྒཱདཱིཧི ཨཉྙེན བྷིཀྑུནཱ སདྡྷིཾ མཡ྄ཧཾ ཀིཾ ནཱནཱཀརཎ’ནྟི ཨེཏཾ མཱནཾ ཀརོཏི.

༨༧༡. སེཡྻསྶ ཧཱིནོཧམསྨཱིཏི མཱནོཔི ཨེཏེསཾཡེཝ ཨུཔྤཛྫཏི. ཡསྶ ཧི རཉྙོ རཊྛཾ ཝཱ དྷནཾ ཝཱ ཝཱཧནཱནི ཝཱ སམྤནྣཱནི ན ཧོནྟི, སོ ‘མཡ྄ཧཾ རཱཛཱཏི ཝོཧཱརསུཁམཏྟམེཝ; ཀིཾ རཱཛཱ ནཱམ ཨཧ’ནྟི ཨེཏཾ མཱནཾ ཀརོཏི. པབྦཛིཏོཔི ‘ཨཔྤལཱབྷསཀྐཱརོ ཨཧཾ. དྷམྨཀཐིཀོ བཧུསྶུཏོ མཧཱཐེརོཏི ཀཐཱམཏྟམེཝ. ཀིཾ དྷམྨཀཐིཀོ ནཱམཱཧཾ, ཀིཾ བཧུསྶུཏོ ནཱམཱཧཾ, ཀིཾ མཧཱཐེརོ ནཱམཱཧཾ ཡསྶ མེ ལཱབྷསཀྐཱརོ ནཏྠཱི’ཏི ཨེཏཾ མཱནཾ ཀརོཏི.

༨༧༢. སདིསསྶ སེཡྻོཧམསྨཱིཏི མཱནཱདཡོ ཨམཙྩཱདཱིནཾ ཨུཔྤཛྫནྟི. ཨམཙྩོ ཧི རཊྛིཡོ ཝཱ ‘བྷོགཡཱནཝཱཧནཱདཱིཧི ཀོ མཡཱ སདིསོ ཨཉྙོ རཱཛཔུརིསོ ཨཏྠཱི’ཏི ཝཱ ‘མཡ྄ཧཾ ཨཉྙེཧི སདྡྷིཾ ཀིཾ ནཱནཱཀརཎ’ནྟི ཝཱ ‘ཨམཙྩོཏི ནཱམམཏྟམེཝ མཡ྄ཧཾ; གྷཱསཙྪཱདནམཏྟམྤི མེ ནཏྠི. ཀིཾ ཨམཙྩོ ནཱམཱཧ’ནྟི ཨེཏེ མཱནེ ཀརོཏི.

༨༧༥. ཧཱིནསྶ སེཡྻོཧམསྨཱིཏི མཱནཱདཡོ དཱསཱདཱིནཾ ཨུཔྤཛྫནྟི. དཱསོ ཧི ‘མཱཏིཏོ ཝཱ པིཏིཏོ ཝཱ ཀོ མཡཱ སདིསོ ཨཉྙོ དཱསོ ¶ ནཱམ ཨཏྠི’ ཨཉྙེ ཛཱིཝིཏུཾ ཨསཀྐོནྟཱ ཀུཙྪིཧེཏུ ¶ དཱསཱ ནཱམ ཛཱཏཱ. ཨཧཾ པན པཝེཎཱིཨཱགཏཏྟཱ སེཡྻོ’ཏི ཝཱ ‘པཝེཎཱིཨཱགཏབྷཱཝེན ཨུབྷཏོསུདྡྷིཀདཱསཏྟེན ཨསུཀདཱསེན ནཱམ སདྡྷིཾ ཀིཾ མཡ྄ཧཾ ནཱནཱཀརཎ’ནྟི ཝཱ ‘ཀུཙྪིཝསེནཱཧཾ དཱསབྱཾ ཨུཔགཏོ. མཱཏཱཔིཏུཀོཊིཡཱ པན མེ དཱསཊྛཱནཾ ནཏྠི. ཀིཾ དཱསོ ནཱམ ཨཧ’ནྟི ཝཱ ཨེཏེ མཱནེ ཀརོཏི. ཡཐཱ ཙ དཱསོ ཨེཝཾ པུཀྐུསཙཎྜཱལཱདཡོཔི ཨེཏེ མཱནེ ཀརོནྟིཡེཝ.

ཨེཏྠ ཙ ‘སེཡྻསྶ སེཡྻོཧམསྨཱི’ཏི ཨུཔྤནྣམཱནོཝ ཡཱཐཱཝམཱནོ, ཨིཏརེ དྭེ ཨཡཱཐཱཝམཱནཱ. ཏཐཱ ‘སདིསསྶ སདིསོཧམསྨཱི’ཏི ‘ཧཱིནསྶ ཧཱིནོཧམསྨཱི’ཏི ཨུཔྤནྣམཱནོཝ ཡཱཐཱཝམཱནོ, ཨིཏརེ དྭེ ཨཡཱཐཱཝམཱནཱ. ཏཏྠ ཡཱཐཱཝམཱནཱ ཨརཧཏྟམགྒཝཛ྄ཛྷཱ, ཨཡཱཐཱཝམཱནཱ སོཏཱཔཏྟིམགྒཝཛ྄ཛྷཱ.

༨༧༨. ཨེཝཾ སཝཏྠུཀེ མཱནེ ཀཐེཏྭཱ ཨིདཱནི ཨཝཏྠུཀཾ ནིབྦཏྟིཏམཱནམེཝ ¶ དསྶེཏུཾ ཏཏྠ ཀཏམོ མཱནོཏིཨཱདི ཝུཏྟཾ.

༨༧༩. ཨཏིམཱནནིདྡེསེ སེཡྻཱདིཝསེན པུགྒལཾ ཨནཱམསིཏྭཱ ཛཱཏིཨཱདཱིནཾ ཝཏྠུཝསེནེཝ ནིདྡིཊྛོ. ཏཏྠ ཨཏིམཉྙཏཱིཏི ‘ཛཱཏིཨཱདཱིཧི མཡཱ སདིསོ ནཏྠཱི’ཏི ཨཏིཀྐམིཏྭཱ མཉྙཏི.

༨༨༠. མཱནཱཏིམཱནནིདྡེསེ ཡོ ཨེཝརཱུཔོཏི ཡོ ཨེསོ ‘ཨཡཾ པུབྦེ མཡཱ སདིསོ, ཨིདཱནི ཨཧཾ སེཊྛོ, ཨཧཾ ཧཱིནཏརོ’ཏི ཨུཔྤནྣོ མཱནོ. ཨཡཾ བྷཱརཱཏིབྷཱརོ ཝིཡ པུརིམཾ སདིསམཱནཾ ཨུཔཱདཱཡ མཱནཱཏིམཱནོཏི དསྶེཏུཾ ཨེཝམཱཧ.

༨༨༡. ཨོམཱནནིདྡེསོ ཧཱིནམཱནནིདྡེསསདིསོཡེཝ. ཝེནེཡྻཝསེན པན སོ ‘ཧཱིནོཧམསྨཱི’ཏི མཱནོ ནཱམ ཝུཏྟོ – ཨཡཾ ཨོམཱནོ ནཱམ. ཨཔིཙེཏྠ ‘ཏྭཾ ཛཱཏིམཱ, ཀཱཀཛཱཏི ཝིཡ ཏེ ཛཱཏི; ཏྭཾ གོཏྟཝཱ, ཙཎྜཱལགོཏྟཾ ཝིཡ ཏེ གོཏྟཾ; ཏུཡ྄ཧཾ སརོ ཨཏྠི, ཀཱཀསྶརོ ཝིཡ ཏེ སརོ’ཏི ཨེཝཾ ཨཏྟཱནཾ ཧེཊྛཱ ཀཏྭཱ པཝཏྟནཝསེན ཨཡཾ ཨོམཱནོཏི ཝེདིཏབྦོ.

༨༨༢. ཨདྷིམཱནནིདྡེསེ ¶ ཨཔྤཏྟེ པཏྟསཉྙིཏཱཏི ཙཏྟཱརི སཙྩཱནི ཨཔྤཏྭཱ པཏྟསཉྙིཏཱཡ ¶ . ཨཀཏེཏི ཙཏཱུཧི མགྒེཧི ཀཏྟབྦཀིཙྩེ ཨཀཏེཡེཝ. ཨནདྷིགཏེཏི ཙཏུསཙྩདྷམྨེ ཨནདྷིགཏེ. ཨསཙྪིཀཏེཏི ཨརཧཏྟེན ཨཔཙྩཀྑཀཏེ. ཨཡཾ ཝུཙྩཏི ཨདྷིམཱནོཏི ཨཡཾ ཨདྷིགཏམཱནོ ནཱམ ཝུཙྩཏི.

ཨཡཾ པན ཀསྶ ཨུཔྤཛྫཏི, ཀསྶ ནུཔྤཛྫཏཱིཏི? ཨརིཡསཱཝཀསྶ ཏཱཝ ནུཔྤཛྫཏི. སོ ཧི མགྒཕལནིབྦཱནཔཧཱིནཀིལེསཱཝསིཊྛཀིལེསཔཙྩཝེཀྑཎེན སཉྫཱཏསོམནསྶོ ཨརིཡགུཎཔཊིཝེདྷེ ནིཀྐངྑོ. ཏསྨཱ སོཏཱཔནྣཱདཱིནཾ ‘ཨཧཾ སཀདཱགཱམཱི’ཏིཨཱདིཝསེན མཱནོ ནུཔྤཛྫཏི; དུསྶཱིལསྶཱཔི ནུཔྤཛྫཏི; སོ ཧི ཨརིཡགུཎཱདྷིགམེ ནིརཱསོཝ. སཱིལཝཏོཔི པརིཙྩཏྟཀམྨཊྛཱནསྶ ནིདྡཱརཱམཏཱདིམནུཡུཏྟསྶ ནུཔྤཛྫཏི.

པརིསུདྡྷསཱིལསྶ པན ཀམྨཊྛཱནེ ཨཔྤམཏྟསྶ ནཱམརཱུཔཾ ཝཝཏྠཔེཏྭཱ པཙྩཡཔརིགྒཧེན ཝིཏིཎྞཀངྑསྶ ཏིལཀྑཎཾ ཨཱརོཔེཏྭཱ སངྑཱརེ སམྨསནྟསྶ ཨཱརདྡྷཝིཔསྶཀསྶ ཨུཔྤཛྫཏི; ཨུཔྤནྣེ ཙ སུདྡྷསམཐལཱབྷཱི ཝཱ སུདྡྷཝིཔསྶནཱལཱབྷཱི ཝཱ ཨནྟརཱ ཋཔེཏི. སོ ཧི དསཔི ཝཱིསམྤི ཏིཾསམྤི ཝསྶཱནི ཀིལེསསམུདཱཙཱརཾ ¶ ཨཔསྶནྟོ ‘ཨཧཾ སོཏཱཔནྣོ’ཏི ཝཱ ‘སཀདཱགཱམཱི’ཏི ཝཱ ‘ཨནཱགཱམཱི’ཏི ཝཱ མཉྙཏི. སམཐཝིཔསྶནཱལཱབྷཱི པན ཨརཧཏྟེཡེཝ ཋཔེཏི. ཏསྶ ཧི སམཱདྷིབལེན ཀིལེསཱ ཝིཀྑམྦྷིཏཱ, ཝིཔསྶནཱབལེན སངྑཱརཱ སུཔརིགྒཧིཏཱ. ཏསྨཱ སཊྛིཔི ཝསྶཱནི ཨསཱིཏིཔི ཝསྶཱནི ཝསྶསཏམྤི ཀིལེསཱ ན སམུདཱཙརནྟི; ཁཱིཎཱསཝསྶེཝ ཙིཏྟཙཱརོ ཧོཏི. སོ ཨེཝཾ དཱིགྷརཏྟཾ ཀིལེསསམུདཱཙཱརཾ ཨཔསྶནྟོ ཨནྟརཱ ཨཊྛཏྭཱཝ ‘ཨརཧཱ ཨཧ’ནྟི མཉྙཏི, ཨུཙྩམཱལངྐཝཱསཱི མཧཱནཱགཏྠེརོ ཝིཡ, ཧངྐནཀཝཱསཱི མཧཱདཏྟཏྠེརོ ཝིཡ, ཙིཏྟལཔབྦཏེ ནིངྐཔོཎྞཔདྷཱནགྷརཝཱསཱི ཙཱུལ༹སུམཏྠེརོ ཝིཡ ཙ.

ཏཏྲིདཾ ཨེཀཝཏྠུཔརིདཱིཔནཾ – ཏལངྒརཝཱསཱི དྷམྨདིནྣཏྠེརོ ཀིར ནཱམ ཨེཀོ པབྷིནྣཔཊིསམྦྷིདོ མཧཱཁཱིཎཱསཝོ མཧཏོ བྷིཀྑུསངྒྷསྶ ཨོཝཱདདཱཡཀོ ཨཧོསི. སོ ཨེཀདིཝསཾ ཨཏྟནོ དིཝཱཊྛཱནེ ནིསཱིདིཏྭཱ ‘ཀིནྣུ ཁོ ཨམྷཱཀཾ ཨཱཙརིཡསྶ ཨུཙྩཏལིངྐཝཱསཱིམཧཱནཱགཏྠེརསྶ སམཎཀིཙྩཾ ¶ མཏྠཀཾ པཏྟོ, ནོ’ཏི ཨཱཝཛྫནྟོ པུཐུཛྫནབྷཱཝམེཝསྶ དིསྭཱ ‘མཡི ཨགཙྪནྟེ པུཐུཛྫནཀཱལཀིརིཡམེཝ ཀརིསྶཏཱི’ཏི ཙ ཉཏྭཱ ཨིདྡྷིཡཱ ཝེཧཱསཾ ཨུཔྤཏིཏྭཱ དིཝཱཊྛཱནེ ནིསིནྣསྶ ཐེརསྶ སམཱིཔེ ཨོརོཧིཏྭཱ ཝནྡིཏྭཱ ཝཏྟཾ དསྶེཏྭཱ ¶ ཨེཀམནྟཾ ནིསཱིདི. ‘ཀིཾ, ཨཱཝུསོ དྷམྨདིནྣ, ཨཀཱལེ ཨཱགཏོསཱི’ཏི ཙ ཝུཏྟོ ‘པཉྷཾ, བྷནྟེ, པུཙྪིཏུཾ ཨཱགཏོམྷཱི’ཏི ཨཱཧ.

ཏཏོ ‘པུཙྪཱཝུསོ, ཛཱནམཱནོ ཀཐཡིསྶཱམཱི’ཏི ཝུཏྟོ པཉྷཱསཧསྶཾ པུཙྪི. ཐེརོ པུཙྪིཏཔུཙྪིཏཾ པཉྷཾ ཨསཛྫམཱནོཝ ཀཐེསི. ཏཏོ ‘ཨཏིཏིཀྑཾ ཏེ, བྷནྟེ, ཉཱཎཾ. ཀདཱ ཏུམྷེཧི ཨཡཾ དྷམྨོ ཨདྷིགཏོ’ཏི ཝུཏྟོ ‘ཨིཏོ སཊྛིཝསྶཀཱལེ, ཨཱཝུསོ’ཏི ཨཱཧ. ‘སམཱདྷིམྤི, བྷནྟེ, ཝལ༹ཉྫེཐཱ’ཏི? ‘ན ཨིདཾ, ཨཱཝུསོ, བྷཱརིཡ’ནྟི. ‘ཏེན ཧི, བྷནྟེ, ཨེཀཾ ཧཏྠིཾ མཱཔེཐཱ’ཏི. ཐེརོ སབྦསེཏཾ ཧཏྠིཾ མཱཔེསི. ‘ཨིདཱནི, བྷནྟེ, ཡཐཱ ཨཡཾ ཧཏྠཱི ཨཉྩིཏཀཎྞོ པསཱརིཏནངྒུཊྛོ སོཎྜཾ མུཁེ པཀྑིཔིཏྭཱ བྷེརཝཾ ཀོཉྩནཱདཾ ཀརོནྟོ ཏུམྷཱཀཾ ཨབྷིམུཁོ ཨཱགཙྪཏི ཏཐཱ ཏཾ ཀརོཐཱ’ཏི. ཐེརོ ཏཐཱ ཀཏྭཱ ཝེགེན ཨཱགཙྪཏོ ཧཏྠིསྶ བྷེརཝཾ ཨཱཀཱརཾ དིསྭཱ ཨུཊྛཱཡ པལཱཡིཏུཾ ཨཱརདྡྷོ. ཏམེནཾ ཁཱིཎཱསཝཏྠེརོ ཧཏྠཾ ¶ པསཱརེཏྭཱ ཙཱིཝརཀཎྞེ གཧེཏྭཱ ‘བྷནྟེ, ཁཱིཎཱསཝསྶ སཱརཛྫཾ ནཱམ ཧོཏཱི’ཏི ཨཱཧ. སོ ཏསྨིཾ ཀཱལེ ཨཏྟནོ པུཐུཛྫནབྷཱཝཾ ཉཏྭཱ ‘ཨཝསྶཡོ མེ, ཨཱཝུསོ དྷམྨདིནྣ, ཧོཧཱི’ཏི ཝཏྭཱ པཱདམཱུལེ ཨུཀྐུཊིཀཾ ནིསཱིདི. ‘བྷནྟེ, ཏུམྷཱཀཾ ཨཝསྶཡོ བྷཝིསྶཱམིཙྩེཝཱཧཾ ཨཱགཏོ, མཱ ཙིནྟཡིཏྠཱ’ཏི ཀམྨཊྛཱནཾ ཀཐེསི. ཐེརོ ཀམྨཊྛཱནཾ གཧེཏྭཱ ཙངྐམཾ ཨཱརུཡ྄ཧ ཏཏིཡེ པདཝཱརེ ཨགྒཕལཾ ཨརཧཏྟཾ པཱཔུཎི. ཐེརོ ཀིར དོསཙརིཏོ ཨཧོསི.

༨༨༣. ཨསྨིམཱནནིདྡེསེ རཱུཔཾ ཨསྨཱིཏི མཱནོཏི ‘ཨཧཾ རཱུཔ’ནྟི ཨུཔྤནྣམཱནོ. ཚནྡོཏི མཱནཾ ཨནུགཏཙྪནྡོཝ. ཏཐཱ ཨནུསཡོ. ཝེདནཱདཱིསུཔི ཨེསེཝ ནཡོ.

༨༨༤. མིཙྪཱམཱནནིདྡེསེ པཱཔཀེན ཝཱ ཀམྨཱཡཏནེནཱཏི ཨཱདཱིསུ པཱཔཀཾ ཀམྨཱཡཏནཾ ནཱམ ཀེཝཊྚམཙྪབནྡྷནེསཱདཱདཱིནཾ ཀམྨཾ. པཱཔཀཾ སིཔྤཱཡཏནཾ ¶ ནཱམ མཙྪཛཱལཁིཔནཀུམིནཀརཎེསུ ཙེཝ པཱསཨོཌྜནསཱུལཱརོཔནཱདཱིསུ ཙ ཚེཀཏཱ. པཱཔཀཾ ཝིཛྫཱཊྛཱནཾ ནཱམ ཡཱ ཀཱཙི པརཱུཔགྷཱཏཝིཛྫཱ. པཱཔཀཾ སུཏཾ ནཱམ བྷཱརཏཡུདྡྷསཱིཏཱཧརཎཱདིཔཊིསཾཡུཏྟཾ. པཱཔཀཾ པཊིབྷཱནཾ ནཱམ དུབྦྷཱསིཏཡུཏྟཾ ཀཔྤནཱཊཀཝིལཔྤནཱདིཔཊིབྷཱནཾ. པཱཔཀཾ སཱིལཾ ནཱམ ཨཛསཱིལཾ གོསཱིལཾ. ཝཏམྤི ཨཛཝཏགོཝཏམེཝ. པཱཔིཀཱ དིཊྛི པན དྭཱསཊྛིཡཱ དིཊྛིགཏེསུ ཡཱ ཀཱཙི དིཊྛི.

༨༨༥. ཉཱཏིཝིཏཀྐནིདྡེསཱདཱིསུ ‘མཡ྄ཧཾ ཉཱཏཡོ སུཁཛཱིཝིནོ སམྤཏྟིཡུཏྟཱ’ཏི ཨེཝཾ པཉྩཀཱམགུཎསནྣིསྶིཏེན ¶ གེཧསིཏཔེམེན ཉཱཏཀེ ཨཱརབྦྷ ཨུཔྤནྣཝིཏཀྐོཝ ཉཱཏིཝིཏཀྐོ ནཱམ. ‘ཁཡཾ གཏཱ ཝཡཾ གཏཱ སདྡྷཱ པསནྣཱ’ཏི ཨེཝཾ པཝཏྟོ པན ཉཱཏིཝིཏཀྐོ ནཱམ ན ཧོཏི.

༨༨༦. ‘ཨམྷཱཀཾ ཛནཔདོ སུབྷིཀྑོ སམྤནྣསསྶོ’ཏི ཏུཊྛམཱནསྶ གེཧསིཏཔེམཝསེནེཝ ཨུཔྤནྣཝིཏཀྐོ ཛནཔདཝིཏཀྐོ ནཱམ. ‘ཨམྷཱཀཾ ཛནཔདེ མནུསྶཱ སདྡྷཱ པསནྣཱ ཁཡཾ གཏཱ ཝཡཾ གཏཱ’ཏི ཨེཝཾ པཝཏྟོ པན ཛནཔདཝིཏཀྐོ ནཱམ ན ཧོཏི.

༨༨༧. ཨམརཏྠཱཡ ཝིཏཀྐོ, ཨམརོ ཝཱ ཝིཏཀྐོཏི ཨམརཝིཏཀྐོ. ཏཏྠ ‘ཨུཀྐུཊིཀཔྤདྷཱནཱདཱིཧི དུཀྑེ ནིཛྫིཎྞེ སམྤརཱཡེ ཨཏྟཱ ¶ སུཁཱི ཧོཏི ཨམརོ’ཏི དུཀྐརཀཱརིཀཾ ཀརོནྟསྶ ཏཱཡ དུཀྐརཀཱརིཀཱཡ པཊིསཾཡུཏྟོ ཝིཏཀྐོ ཨམརཏྠཱཡ ཝིཏཀྐོ ནཱམ. དིཊྛིགཏིཀོ པན ‘སསྶཏཾ ཝདེསཱི’ཏིཨཱདཱིནི པུཊྛོ ‘ཨེཝནྟིཔི མེ ནོ, ཏཐཱཏིཔི མེ ནོ’ ཨཉྙཐཱཏིཔི མེ ནོ, ནོཏིཔི མེ ནོ, ནོ ནོཏིཔི མེ ནོ’ཏི (དཱི. ནི. ༡.༦༢) ཝིཀྑེཔཾ ཨཱཔཛྫཏི, ཏསྶ སོ དིཊྛིགཏཔཊིསཾཡུཏྟོ ཝིཏཀྐོ. ཡཐཱ ཨམརོ ནཱམ མཙྪོ ཨུདཀེ གཧེཏྭཱ མཱརེཏུཾ ན སཀྐཱ, ཨིཏོ ཙིཏོ ཙ དྷཱཝཏི, གཱཧཾ ན གཙྪཏི; ཨེཝམེཝ ཨེཀསྨིཾ པཀྑེ ཨསཎྛཧནཏོ ན མརཏཱིཏི ཨམརོ ནཱམ ཧོཏི. ཏཾ དུཝིདྷམྤི ཨེཀཏོ ཀཏྭཱ ཨཡཾ ཝུཙྩཏི ཨམརཝིཏཀྐོཏི ཝུཏྟཾ.

༨༨༨. པརཱནུདྡཡཏཱཔཊིསཾཡུཏྟོཏི ཨནུདྡཡཏཱཔཏིརཱུཔཀེན གེཧསིཏཔེམེན པཊིསཾཡུཏྟོ. སཧནནྡཱིཏིཨཱདཱིསུ ཨུཔཊྛཱཀེསུ ནནྡནྟེསུ སོཙནྟེསུ ཙ ཏེཧི སདྡྷིཾ དིགུཎཾ ནནྡཏི, དིགུཎཾ སོཙཏི; ཏེསུ སུཁིཏེསུ ¶ དིགུཎཾ སུཁིཏོ ཧོཏི, དུཀྑིཏེསུ དིགུཎཾ དུཀྑིཏོ ཧོཏི. ཨུཔྤནྣེསུ ཀིཙྩཀརཎཱིཡེསཱུཏི ཏེསུ མཧནྟེསུ ཝཱ ཁུདྡཀེསུ ཝཱ ཀམྨེསུ ཨུཔྤནྣེསུ. ཨཏྟནཱ ཝཱ ཡོགཾ ཨཱཔཛྫཏཱིཏི ཏཱནི ཏཱནི ཀིཙྩཱནི སཱདྷེནྟོ པཉྙཏྟིཾ ཝཱིཏིཀྐམཏི, སལླེཁཾ ཀོཔེཏི. ཡོ ཏཏྠཱཏི ཡོ ཏསྨིཾ སཾསཊྛཝིཧཱརེ, ཏསྨིཾ ཝཱ ཡོགཱཔཛྫནེ གེཧསིཏོ ཝིཏཀྐོ – ཨཡཾ པརཱནུདྡཡཏཱཔཊིསཾཡུཏྟོ ཝིཏཀྐོ ནཱམ.

༨༨༩. ལཱབྷསཀྐཱརསིལོཀཔཊིསཾཡུཏྟོཏི ཙཱིཝརཱདིལཱབྷེན ཙེཝ སཀྐཱརེན ཙ ཀིཏྟིསདྡེན ཙ སདྡྷིཾ ཨཱརམྨཎཀརཎཝསེན པཊིསཾཡུཏྟོ.

༨༩༠. ཨནཝཉྙཏྟིཔཊིསཾཡུཏྟོཏི ¶ ‘ཨཧོ ཝཏ མཾ པརེ ན ཨཝཛཱནེཡྻུཾ, ན པོཐེཏྭཱ ཝིཧེཋེཏྭཱ ཀཐེཡྻུ’ནྟི ཨེཝཾ ཨནཝཉྙཱཏབྷཱཝཔཏྠནཱཡ སདྡྷིཾ ཨུཔྤཛྫནཝིཏཀྐོ. ཡོ ཏཏྠ གེཧསིཏོཏི ཡོ ཏསྨིཾ ‘མཱ མཾ པརེ ཨཝཛཱནིཾསཱུ’ཏི ཨུཔྤནྣེ ཙིཏྟེ པཉྩཀཱམགུཎསངྑཱཏགེཧནིསྶིཏོ ཧུཏྭཱ ཨུཔྤནྣཝིཏཀྐོ. སེསཾ སབྦཏྠ པཱཀཊམེཝཱཏི.

ཨེཀཀནིདྡེསཝཎྞནཱ.

(༢.) དུཀནིདྡེསཝཎྞནཱ

༨༩༡. དུཀེསུ ཀོདྷནིདྡེསཱདཡོ ཧེཊྛཱ ཝུཏྟནཡེནེཝ ཝེདིཏབྦཱ. ཧེཊྛཱ ཨནཱགཏེསུ པན ཨུཔནཱཧནིདྡེསཱདཱིསུ པུབྦཀཱལཾ ཀོདྷཾ ཨུཔནཡ྄ཧཏཱིཏི ཨཔརཀཱལཀོདྷོ ཨུཔནཱཧོ ནཱམ. ཨུཔནཡ྄ཧནཱཀཱརོ ¶ ཨུཔནཡ྄ཧནཱ. ཨུཔནཡ྄ཧིཏསྶ བྷཱཝོ ཨུཔནཡ྄ཧིཏཏྟཾ. ཨཊྛཔནཱཏི པཋམུཔྤནྣསྶ ཨནནྟརཊྛཔནཱ མརིཡཱདཊྛཔནཱ ཝཱ. ཋཔནཱཏི པཀཏིཋཔནཱ. སཎྛཔནཱཏི སབྦཏོབྷཱགེན པུནཔྤུནཾ ཨཱགྷཱཏཊྛཔནཱ. ཨནུསཾསནྡནཱཏི པཋམུཔྤནྣེན ཀོདྷེན སདྡྷིཾ ཨནྟརཾ ཨདསྶེཏྭཱ ཨེཀཱིབྷཱཝཀརཎཱ. ཨནུཔྤབནྡྷནཱཏི པུརིམེན སདྡྷིཾ པཙྪིམསྶ གྷཊནཱ. དལ༹ྷཱིཀམྨནྟི ཐིརཀརཎཾ. ཨཡཾ ཝུཙྩཏཱིཏི ཨཡཾ ཨུཔནནྡྷནལཀྑཎོ ཝེརཾ ཨཔྤཊིནིསྶཛྫནརསོ ཨུཔནཱཧོཏི ཝུཙྩཏི; ཡེན སམནྣཱགཏོ པུགྒལོ ཝེརཾ ནིསྶཛྫིཏུཾ ན སཀྐོཏི; ‘ཨེཝཾ ནཱམ མཾ ཨེས ཝཏྟུཾ ཨནནུཙྪཝིཀོ’ཏི ཨཔརཱཔརཾ ཨནུབནྡྷཏི; ཨཱདིཏྟཔཱུཏིཨལཱཏཾ ཝིཡ ཛལཏེཝ ¶ ; དྷོཝིཡམཱནཾ ཨཙྪཙམྨཾ ཝིཡ, ཝསཱཏེལམཀྑིཏཔིལོཏིཀཱ ཝིཡ ཙ ན པརིསུཛ྄ཛྷཏི.

༨༩༢. མཀྑནབྷཱཝཝསེན མཀྑོ; པརགུཎམཀྑནཱཡ པཝཏྟེནྟོཔི ཨཏྟནོ ཀཱརཎཾ, གཱུཐཔཧརཎཀཾ གཱུཐོ ཝིཡ, པཋམཏརཾ མཀྑེཏཱིཏི ཨཏྠོ. ཏཏོ པརཱ དྭེ ཨཱཀཱརབྷཱཝནིདྡེསཱ. ནིཊྛུརབྷཱཝོ ནིཊྛུརིཡཾ; ‘ཏཾ ནིསྶཱཡ ཨེཏྟཀམྤི ནཏྠཱི’ཏི ཁེལ༹པཱཏནནྟི ཨཏྠོ. ནིཊྛུརིཡཀམྨནྟི ནིཊྛུརིཡཀརཎཾ. གཧཊྛོ ཝཱ ཧི གཧཊྛཾ, བྷིཀྑུ ཝཱ བྷིཀྑུཾ ནིསྶཱཡ ཝསནྟོ ཨཔྤམཏྟཀེནེཝ ཀུཛ྄ཛྷིཏྭཱ ‘ཏཾ ནིསྶཱཡ ཨེཏྟཀམྤི ནཏྠཱི’ཏི ཁེལ༹ཾ པཱཏེཏྭཱ པཱདེན མདྡནྟོ ཝིཡ ནིཊྛུརིཡཾ ནཱམ ཀརོཏི. ཏསྶ ཏཾ ཀམྨཾ ནིཊྛུརིཡཀམྨནྟི ཝུཙྩཏི. ལཀྑཎཱདིཏོ པནེས པརགུཎམཀྑནལཀྑཎོ ¶ མཀྑོ, ཏེསཾ ཝིནཱསནརསོ, པརེན སུཀཏཱནཾ ཀིརིཡཱནཾ ཨཝཙྪཱདནཔཙྩུཔཊྛཱནོ.

པལཱ༹སཏཱིཏི པལཱ༹སོ; པརསྶ གུཎེ དསྶེཏྭཱ ཨཏྟནོ གུཎེཧི སམཾ ཀརོཏཱིཏི ཨཏྠོ. པལཱ༹སསྶ ཨཱཡནཱ པལཱ༹སཱཡནཱ. པལཱ༹སོ ཙ སོ ཨཏྟནོ ཛཡཱཧརཎཏོ ཨཱཧཱརོ ཙཱཏི པལཱ༹སཱཧཱརོ. ཝིཝཱདཊྛཱནནྟི ཝིཝཱདཀཱརཎཾ. ཡུགགྒཱཧོཏི སམདྷུརགྒཧཎཾ. ཨཔྤཊིནིསྶགྒོཏི ཨཏྟནཱ གཧིཏསྶ ཨཔྤཊིནིསྶཛྫནཾ. ལཀྑཎཱདིཏོ ¶ པནེས ཡུགགྒཱཧལཀྑཎོ པལཱ༹སོ, པརགུཎེཧི ཨཏྟནོ གུཎཱནཾ སམཀརཎརསོ, པརེསཾ གུཎཔྤམཱཎེན ཨུཔཊྛཱནཔཙྩུཔཊྛཱནོ. པལཱ༹སཱི ཧི པུགྒལོ དུཏིཡསྶ དྷུརཾ ན དེཏི, སམཾ པསཱརེཏྭཱ ཏིཊྛཏི, སཱཀཙྪམཎྜལེ ཨཉྙེན བྷིཀྑུནཱ བཧཱུསུ སུཏྟེསུ ཙ ཀཱརཎེསུ ཙ ཨཱབྷཏེསུཔི ‘ཏཝ ཙ མམ ཙ ཝཱདེ ཀིཾ ནཱམ ནཱནཱཀརཎཾ? ནནུ མཛ྄ཛྷེ བྷིནྣསུཝཎྞཾ ཝིཡ ཨེཀསདིསམེཝ ཨམྷཱཀཾ ཝཙན’ནྟི ཝདཏི. ཨིསྶཱམཙྪརིཡནིདྡེསཱ ཝུཏྟཏྠཱ ཨེཝ.

༨༩༤. མཱཡཱནིདྡེསེ ¶ ཝཱཙཾ བྷཱསཏཱིཏི ཛཱནཾཡེཝ ‘པཎྞཏྟིཾ ཝཱིཏིཀྐམནྟཱ བྷིཀྑཱུ བྷཱརིཡཾ ཀརོནྟི, ཨམྷཱཀཾ པན ཝཱིཏིཀྐམཊྛཱནཾ ནཱམ ནཏྠཱི’ཏི ཨུཔསནྟོ ཝིཡ བྷཱསཏི. ཀཱཡེན པརཀྐམཏཱིཏི ‘མཡཱ ཀཏཾ ཨིདཾ པཱཔཀམྨཾ མཱ ཀེཙི ཛཱནིཾསཱུ’ཏི ཀཱཡེན ཝཏྟཾ ཀརོཏི. ཝིཛྫམཱནདོསཔཊིཙྪཱདནཏོ ཙཀྑུམོཧནམཱཡཱ ཝིཡཱཏི མཱཡཱ. མཱཡཱཝིནོ བྷཱཝོ མཱཡཱཝིཏཱ. ཀཏྭཱ པཱཔཾ པུན པཊིཙྪཱདནཏོ ཨཏིཙྩ ཨཱསརནྟི ཨེཏཱཡ ¶ སཏྟཱཏི ཨཙྩཱསརཱ. ཀཱཡཝཱཙཱཀིརིཡཱཧི ཨཉྙཐཱ དསྶནཏོ ཝཉྩེཏཱིཏི ཝཉྩནཱ. ཨེཏཱཡ སཏྟཱ ནིཀརོནྟཱིཏི ནིཀཏི; མིཙྪཱཀརོནྟཱིཏི ཨཏྠོ. ‘ནཱཧཾ ཨེཝཾ ཀརོམཱི’ཏི པཱཔཱནཾ ཝིཀྑིཔནཏོ ཝིཀིརཎཱ. ‘ནཱཧཾ ཨེཝཾ ཀརོམཱི’ཏི པརིཝཛྫནཏོ པརིཧརཎཱ. ཀཱཡཱདཱིཧི སཾཝརཎཏོ གཱུཧནཱ. སབྦཏོབྷཱགེན གཱུཧནཱ པརིགཱུཧནཱ. ཏིཎཔཎྞེཧི ཝིཡ གཱུཐཾ ཀཱཡཝཙཱིཀམྨེཧི པཱཔཾ ཚཱདེཏཱིཏི ཚཱདནཱ. སབྦཏོབྷཱགེན ཚཱདནཱ པཊིཙྪཱདནཱ. ན ཨུཏྟཱནཾ ཀཏྭཱ དསྶེཏཱིཏི ཨནུཏྟཱནཱིཀམྨཾ. ན པཱཀཊཾ ཀཏྭཱ དསྶེཏཱིཏི ཨནཱཝིཀམྨཾ. སུཊྛུ ཚཱདནཱ ཝོཙྪཱདནཱ. ཀཏཔཊིཙྪཱདནཝསེན པུནཔི པཱཔསྶ ཀརཎཏོ པཱཔཀིརིཡཱ. ཨཡཾ ཝུཙྩཏཱིཏི ཨཡཾ ཀཏཔཊིཙྪཱདནལཀྑཎཱ མཱཡཱ ནཱམ ཝུཙྩཏི; ཡཱཡ སམནྣཱགཏོ པུགྒལོ བྷསྨཱཔཊིཙྪནྣོ ཝིཡ ཨངྒཱརོ, ཨུདཀཔཊིཙྪནྣོ ཝིཡ ཁཱཎུ, པིལོཏིཀཱཔལིཝེཋིཏཾ ཝིཡ ཙ སཏྠཾ ཧོཏི.

སཱཋེཡྻནིདྡེསེ ¶ སཋོཏི ཨསནྟགུཎཔརིདཱིཔནཏོ ན སམྨཱ བྷཱསིཏཱ. སབྦཏོབྷཱགེན སཋོ པརིསཋོ. ཡཾ ཏཏྠཱཏི ཡཾ ཏསྨིཾ པུགྒལེ. སཋནྟི ཨསནྟགུཎདཱིཔནཾ ཀེརཱཊིཡཾ. སཋཏཱཏི སཋཱཀཱརོ. ཀཀྐརཏཱཏི པདུམནཱལིསྶ ཝིཡ ཨཔརཱམསནཀྑམོ ཁརཕརུསབྷཱཝོ. ཀཀྐརིཡནྟིཔི ཏསྶེཝ ཝེཝཙནཾ. པརིཀྑཏྟཏཱ པཱརིཀྑཏྟིཡནྟི པདདྭཡེན ནིཁཎིཏྭཱ ཋཔིཏཾ ཝིཡ དལ༹ྷཀེརཱཊིཡཾ ཝུཏྟཾ. ཨིདཾ ཝུཙྩཏཱིཏི ཨིདཾ ཨཏྟནོ ཨཝིཛྫམཱནགུཎཔྤཀཱསནལཀྑཎཾ སཱཋེཡྻཾ ནཱམ ཝུཙྩཏི; ཡེན སམནྣཱགཏསྶ པུགྒལསྶ ཀུཙྪིཾ ཝཱ པིཊྛིཾ ཝཱ ཛཱནིཏུཾ ན སཀྐཱ.

ཝཱམེན སཱུཀརོ ཧོཏི, དཀྑིཎེན ཨཛཱམིགོ;

སརེན ནེལཀོ ཧོཏི, ཝིསཱཎེན ཛརགྒཝོཏི.

ཨེཝཾ ཝུཏྟཡཀྑསཱུཀརསདིསོ ཧོཏི. ཨཝིཛྫཱདིནིདྡེསཱ ཝུཏྟཏྠཱ ཨེཝ.

༩༠༢. ཨནཛྫཝནིདྡེསེ ཨནཛྫཝོཏི ཨནུཛུཏཱཀཱརོ. ཨནཛྫཝབྷཱཝོ ཨནཛྫཝཏཱ. ཛིམྷཏཱཏི ཙནྡཝངྐཏཱ. ཝངྐཏཱཏི གོམུཏྟཝངྐཏཱ. ཀུཊིལཏཱཏི ནངྒལཀོཊིཝངྐཏཱ. སབྦེཧིཔི ཨིམེཧི པདེཧི ཀཱཡཝཙཱིཙིཏྟཝངྐཏཱཝ ཀཐིཏཱ.

ཨམདྡཝནིདྡེསེ ན མུདུབྷཱཝོ ཨམུདུཏཱ. ཨམདྡཝཱཀཱརོ ཨམདྡཝཏཱ. ཀཀྑལ༹བྷཱཝོ ཀཀྑལི༹ཡཾ. མདྡཝཀརསྶ སིནེཧསྶ ཨབྷཱཝཏོ ཕརུསབྷཱཝོ ཕཱརུསིཡཾ. ཨནཱིཙཝུཏྟིཏཱཡ ཨུཛུཀམེཝ ཋིཏཙིཏྟབྷཱཝོ ཨུཛུཙིཏྟཏཱ ¶ . པུན ཨམུདུཏཱགཧཎཾ ཏསྶཱ ཝིསེསནཏྠཾ ‘ཨམུདུཏཱསངྑཱཏཱ ཨུཛུཙིཏྟཏཱ, ན ཨཛྫཝསངྑཱཏཱ ཨུཛུཙིཏྟཏཱ’ཏི.

༩༠༣. ཨཀྑནྟིནིདྡེསཱདཡོ ཁནྟིནིདྡེསཱདིཔཊིཔཀྑཏོ ཝེདིཏབྦཱ.

༩༠༨. སཾཡོཛནནིདྡེསེ ཨཛ྄ཛྷཏྟནྟི ཀཱམབྷཝོ. བཧིདྡྷཱཏི རཱུཔཱརཱུཔབྷཝོ. ཀིཉྩཱཔི ཧི སཏྟཱ ཀཱམབྷཝེ ཨཔྤཾ ¶ ཀཱལཾ ཝསནྟི ཀཔྤསྶ ཙཏུཏྠམེཝ ཀོཊྛཱསཾ, ཨིཏརེསུ ཏཱིསུ ཀོཊྛཱསེསུ ཀཱམབྷཝོ སུཉྙོ ཧོཏི ཏུཙྪོ, རཱུཔཱརཱུཔབྷཝེ བཧུཾ ཀཱལཾ ཝསནྟི, ཏཐཱཔི ནེསཾ ཡསྨཱ ཀཱམབྷཝེ ཙུཏིཔཊིསནྡྷིཡོ བཧུཀཱ ཧོནྟི, ཨཔྤཱ རཱུཔཱརཱུཔབྷཝེསུ, ཡཏྠ ཙ ཙུཏིཔཊིསནྡྷིཡོ བཧུཀཱ ཏཏྠ ཨཱལཡོཔི པཏྠནཱཔི ཨབྷིལཱསོཔི བཧུ ཧོཏི, ཡཏྠ ཨཔྤཱ ཏཏྠ ཨཔྤོ, ཏསྨཱ ཀཱམབྷཝོ ¶ ཨཛ྄ཛྷཏྟཾ ནཱམ ཛཱཏོ, རཱུཔཱརཱུཔབྷཝཱ བཧིདྡྷཱ ནཱམ. ཨིཏི ཨཛ྄ཛྷཏྟསངྑཱཏེ ཀཱམབྷཝེ བནྡྷནཾ ཨཛ྄ཛྷཏྟསཾཡོཛནཾ ནཱམ, བཧིདྡྷཱསངྑཱཏེསུ རཱུཔཱརཱུཔབྷཝེསུ བནྡྷནཾ བཧིདྡྷཱསཾཡོཛནཾ ནཱམ. ཏཏྠ ཨེཀེཀཾ པཉྩཔཉྩཝིདྷཾ ཧོཏི. ཏེན ཝུཏྟཾ ‘‘པཉྩོརམྦྷཱགིཡཱནི པཉྩུདྡྷམྦྷཱགིཡཱནཱི’’ཏི. ཏཏྲཱཡཾ ཝཙནཏྠོ – ཨོརཾ ཝུཙྩཏི ཀཱམདྷཱཏུ, ཏཏྠ ཨུཔཔཏྟིནིཔྥཱདནཏོ ཏཾ ཨོརཾ བྷཛནྟཱིཏི ཨོརམྦྷཱགིཡཱནི. ཨུདྡྷཾ ཝུཙྩཏི རཱུཔཱརཱུཔདྷཱཏུ, ཏཏྠ ཨུཔཔཏྟིནིཔྥཱདནཏོ ཏཾ ཨུདྡྷཾ བྷཛནྟཱིཏི ཨུདྡྷམྦྷཱགིཡཱནཱིཏི.

དུཀནིདྡེསཝཎྞནཱ.

(༣.) ཏིཀནིདྡེསཝཎྞནཱ

༩༠༩. ཏིཀནིདྡེསེ ཏཱིཧི ཨཀུསལམཱུལེཧི ཝཊྚམཱུལསམུདཱཙཱརོ ཀཐིཏོ. ཨཀུསལཝིཏཀྐཱདཱིསུ ཝིཏཀྐནཝསེན ཝིཏཀྐོ, སཉྫཱནནཝསེན སཉྙཱ, སབྷཱཝཊྛེན དྷཱཏཱུཏི ཝེདིཏབྦཱ. དུཙྩརིཏནིདྡེསེ པཋམནཡོ ཀམྨཔཐཝསེན ཝིབྷཏྟོ, དུཏིཡོ སབྦསངྒཱཧིཀཀམྨཝསེན, ཏཏིཡོ ནིབྦཏྟིཏཙེཏནཱཝསེནེཝ.

༩༡༤. ཨཱསཝནིདྡེསེ སུཏྟནྟཔརིཡཱཡེན ཏཡོཝ ཨཱསཝཱ ཀཐིཏཱ.

༩༡༩. ཨེསནཱནིདྡེསེ ¶ སངྑེཔཏོ ཏཏྠ ཀཏམཱ ཀཱམེསནཱཏི ཨཱདིནཱ ནཡེན ཝུཏྟོ ཀཱམགཝེསནརཱགོ ཀཱམེསནཱ. ཡོ བྷཝེསུ བྷཝཙྪནྡོཏིཨཱདིནཱ ནཡེན ཝུཏྟོ བྷཝགཝེསནརཱགོ བྷཝེསནཱ. སསྶཏོ ལོཀོཏིཨཱདིནཱ ནཡེན ཝུཏྟཱ དིཊྛིགཏིཀསམྨཏསྶ བྲཧྨཙརིཡསྶ གཝེསནཱ དིཊྛི བྲཧྨཙརིཡེསནཱཏི ཝེདིཏབྦཱ. ཡསྨཱ ཙ ན ཀེཝལཾ རཱགདིཊྛིཡོ ཨེཝ ཨེསནཱ, ཏདེཀཊྛཾ པན ཀམྨམྤི ཨེསནཱ ཨེཝ, ཏསྨཱ ཏཾ དསྶེཏུཾ དུཏིཡནཡོ ཝིབྷཏྟོ. ཏཏྠ ཏདེཀཊྛནྟི སམྤཡུཏྟེཀཊྛཾ ཝེདིཏབྦཾ. ཏཏྠ ¶ ཀཱམརཱགེཀཊྛཾ ཀཱམཱཝཙརསཏྟཱནམེཝ པཝཏྟཏི; བྷཝརཱགེཀཊྛཾ པན མཧཱབྲཧྨཱནཾ. སམཱཔཏྟིཏོ ཝུཊྛཱཡ ཙངྐམནྟཱནཾ ཛྷཱནངྒཱནཾ ཨསྶཱདནཀཱལེ ཨཀུསལཀཱཡཀམྨཾ ཧོཏི, ‘ཨཧོ སུཁཾ ཨཧོ སུཁ’ནྟི ཝཱཙཾ བྷིནྡིཏྭཱ ཨསྶཱདནཀཱལེ ཝཙཱིཀམྨཾ, ཀཱཡངྒཝཱཙངྒཱནི ¶ ཨཙོཔེཏྭཱ མནསཱཝ ཨསྶཱདནཀཱལེ མནོཀམྨཾ. ཨནྟགྒཱཧིཀདིཊྛིཝསེན སབྦེསམྤི དིཊྛིགཏིཀཱནཾ ཙངྐམནཱདིཝསེན ཏཱནི ཧོནྟིཡེཝ.

༩༢༠. ཝིདྷཱནིདྡེསེ ‘‘ཀཐཾཝིདྷཾ སཱིལཝནྟཾ ཝདནྟི, ཀཐཾཝིདྷཾ པཉྙཝནྟཾ ཝདནྟཱི’’ཏིཨཱདཱིསུ (སཾ. ནི. ༡.༩༥) ཨཱཀཱརསཎྛཱནཾ ཝིདྷཱ ནཱམ. ‘‘ཨེཀཝིདྷེན ཉཱཎཝཏྠཱུ’’ཏིཨཱདཱིསུ (ཝིབྷ. ༧༥༡) ཀོཊྛཱསོ. ‘‘ཝིདྷཱསུ ན ཝིཀམྤཏཱི’’ཏིཨཱདཱིསུ (ཐེརགཱ. ༡༠༧༩) མཱནོ. ཨིདྷཱཔི མཱནོཝ ཝིདྷཱ ནཱམ. སོ ཧི སེཡྻཱདིཝསེན ཝིདཧནཏོ ཝིདྷཱཏི ཝུཙྩཏི. ཋཔནཊྛེན ཝཱ ཝིདྷཱ. ཏསྨཱ ‘སེཡྻོཧམསྨཱི’ཏི ཨེཝཾ ཨུཔྤནྣཱ མཱནཝིདྷཱ མཱནཋཔནཱ སེཡྻོཧམསྨཱིཏི ཝིདྷཱཏི ཝེདིཏབྦཱ. སེསཔདདྭཡེསུཔི ཨེསེཝ ནཡོ.

༩༢༡. བྷཡནིདྡེསེ ཛཱཏིཾ པཊིཙྩ བྷཡནྟི ཛཱཏིཔཙྩཡཱ ཨུཔྤནྣབྷཡཾ. བྷཡཱནཀནྟི ཨཱཀཱརནིདྡེསོ. ཚམྦྷིཏཏྟནྟི བྷཡཝསེན གཏྟཙལནཾ. ལོམཧཾསོཏི ལོམཱནཾ ཧཾསནཾ, ཨུདྡྷགྒབྷཱཝོ. ཨིམིནཱ པདདྭཡེན ཀིཙྩཏོ བྷཡཾ དསྶེཏྭཱ པུན ཙེཏསོ ཨུཏྲཱསོཏི སབྷཱཝཏོ དསྶིཏཾ.

༩༢༢. ཏམནིདྡེསེ ཝིཙིཀིཙྪཱསཱིསེན ཨཝིཛྫཱ ཀཐིཏཱ. ‘‘ཏམནྡྷཀཱརོ སམྨོཧོ, ཨཝིཛྫོགྷོ མཧབྦྷཡོ’’ཏི ཝཙནཏོ ཧི ཨཝིཛྫཱ ཏམོ ¶ ནཱམ. ཏིཎྞཾ པན ཨདྡྷཱནཾ ཝསེན དེསནཱསུཁཏཱཡ ཝིཙིཀིཙྪཱསཱིསེན དེསནཱ ཀཏཱ. ཏཏྠ ‘ཀིཾ ནུ ཁོ ཨཧཾ ཨཏཱིཏེ ཁཏྟིཡོ ཨཧོསིཾ ཨུདཱཧུ བྲཱཧྨཎོ ཝེསྶོ སུདྡོ ཀཱལོ༹ ཨོདཱཏོ རསྶོ དཱིགྷོ’ཏི ཀངྑནྟོ ཨཏཱིཏཾ ཨདྡྷཱནཾ ཨཱརབྦྷ ཀངྑཏི ནཱམ. ‘ཀིཾ ནུ ཁོ ཨཧཾ ཨནཱགཏེ ཁཏྟིཡོ བྷཝིསྶཱམི ཨུདཱཧུ བྲཱཧྨཎོ ཝེསྶོ…པེ… དཱིགྷོ’ཏི ཀངྑནྟོ ཨནཱགཏཾ ཨདྡྷཱནཾ ཨཱརབྦྷ ཀངྑཏི ནཱམ. ‘ཀིཾ ནུ ཁོ ཨཧཾ ཨེཏརཧི ཁཏྟིཡོ ཨུདཱཧུ བྲཱཧྨཎོ ཝེསྶོ སུདྡོ; ཀིཾ ཝཱ ཨཧཾ རཱུཔཾ ཨུདཱཧུ ཝེདནཱ སཉྙཱ སངྑཱརཱ ཝིཉྙཱཎ’ནྟི ཀངྑནྟོ པཙྩུཔྤནྣཾ ཨདྡྷཱནཾ ཨཱརབྦྷ ཀངྑཏི ནཱམ.

ཏཏྠ ཀིཉྩཱཔི ཁཏྟིཡོ ཝཱ ཨཏྟནོ ཁཏྟིཡབྷཱཝཾ, བྲཱཧྨཎོ ཝཱ བྲཱཧྨཎབྷཱཝཾ, ཝེསྶོ ཝཱ ཝེསྶབྷཱཝཾ, སུདྡོ ཝཱ སུདྡབྷཱཝཾ ཨཛཱནནཀོ ནཱམ ནཏྠི, ཛཱིཝལདྡྷིཀོ ¶ པན སཏྟོ ཁཏྟིཡཛཱིཝཱདཱིནཾ ཝཎྞཱདིབྷེདཾ སུཏྭཱ ‘ཀཱིདིསོ ནུ ཁོ ཨམྷཱཀཾ ཨབྦྷནྟརེ ཛཱིཝོ – ཀིཾ ནུ ཁོ ¶ ནཱིལཀོ ཨུདཱཧུ པཱིཏཀོ ལོཧིཏཀོ ཨོདཱཏོ ཙཏུརཾསོ ཚལ༹ཾསོ ཨཊྛཾསོ’ཏི ཀངྑནྟོ ཨེཝཾ ཀངྑཏི ནཱམ.

༩༢༣. ཏིཏྠཱཡཏནཱནཱིཏི ཏིཏྠབྷཱུཏཱནི ཨཱཡཏནཱནི, ཏིཏྠིཡཱནཾ ཝཱ ཨཱཡཏནཱནི. ཏཏྠ ཏིཏྠཾ ནཱམ དྭཱསཊྛི དིཊྛིཡོ. ཏིཏྠིཡཱ ནཱམ ཡེསཾ ཏཱ དིཊྛིཡོ རུཙྩནྟི ཁམནྟི. ཨཱཡཏནཊྛོ ཧེཊྛཱ ཝུཏྟོཡེཝ. ཏཏྠ ཡསྨཱ སབྦེཔི དིཊྛིགཏིཀཱ སཉྫཱཡམཱནཱ ཨིམེསུཡེཝ ཏཱིསུ ཋཱནེསུ སཉྫཱཡནྟི, སམོསརམཱནཱཔི ཨེཏེསུཡེཝ སམོསརནྟི སནྣིཔཏནྟི, དིཊྛིགཏིཀབྷཱཝེ ཙ ནེསཾ ཨེཏཱནིཡེཝ ཀཱརཎཱནི, ཏསྨཱ ཏིཏྠཱནི ཙ ཏཱནི སཉྫཱཏཱནཱིཏིཨཱདིནཱ ཨཏྠེན ཨཱཡཏནཱནི ཙཱཏི ཏིཏྠཱཡཏནཱནི; ཏེནེཝཏྠེན ཏིཏྠིཡཱནཾ ཨཱཡཏནཱནཱིཏིཔི ཏིཏྠཱཡཏནཱནི. པུརིསཔུགྒལོཏི སཏྟོ. ཀཱམཉྩ པུརིསོཏིཔི པུགྒལོཏིཔི ཝུཏྟེ སཏྟོཡེཝ ཝུཏྟོ, ཨཡཾ པན སམྨུཏིཀཐཱ ནཱམ ཡོ ཡཐཱ ཛཱནཱཏི ཏསྶ ཏཐཱ ཝུཙྩཏི. པཊིསཾཝེདེཏཱིཏི ཨཏྟནོ སནྟཱནེ ཨུཔྤནྣཾ ཛཱནཱཏི, པཊིསཾཝིདིཏཾ ཀརོཏི ཨནུབྷཝཏི ཝཱ. པུབྦེཀཏཧེཏཱུཏི པུབྦེ ཀཏཀཱརཎཱ, པུབྦེ ཀཏཀམྨཔཙྩཡེནེཝ པཊིསཾཝེདེཏཱིཏི ཨཏྠོ. ཨཡཾ ནིགཎྛསམཡོ. ཨེཝཾཝཱདིནོ པན ཏེ ཀམྨཝེདནཉྩ ཀིརིཡཝེདནཉྩ པཊིཀྑིཔིཏྭཱ ཨེཀཾ ཝིཔཱཀཝེདནམེཝ སམྤཊིཙྪནྟི. པིཏྟསམུཊྛཱནཱདཱིསུ (མཧཱནི. ༥) ཙ ཨཊྛསུ ཨཱབཱདྷེསུ ¶ སཏྟ པཊིཀྑིཔིཏྭཱ ཨཊྛམཾཡེཝ སམྤཊིཙྪནྟི, དིཊྛདྷམྨཝེདནཱིཡཱདཱིསུ ཙ ཏཱིསུ ཀམྨེསུ དྭེ པཊིཀྑིཔིཏྭཱ ཨེཀཾ ཨཔརཱཔརིཡཝེདནཱིཡམེཝ སམྤཊིཙྪནྟི, ཀུསལཱཀུསལཝིཔཱཀཀིརིཡསངྑཱཏཱསུ ཙ ཙཏཱུསུ ཙེཏནཱསུ ཝིཔཱཀཙེཏནཾཡེཝ སམྤཊིཙྪནྟི.

ཨིསྶརནིམྨཱནཧེཏཱུཏི ཨིསྶརནིམྨཱནཀཱརཎཱ; བྲཧྨུནཱ ཝཱ པཛཱཔཏིནཱ ཝཱ ཨིསྶརེན ནིམྨིཏཏྟཱ པཊིསཾཝེདེཏཱིཏི ཨཏྠོ. ཨཡཾ བྲཱཧྨཎསམཡོ. ཨཡཉྷི ནེསཾ ཨདྷིཔྤཱཡོ – ཨིམཱ ཏིསྶོ ཝེདནཱ པཙྩུཔྤནྣེ ཨཏྟནཱ ཀཏམཱུལཀེན ཝཱ ཨཱཎཏྟིམཱུལཀེན ཝཱ པུབྦེ ཀཏེན ཝཱ ཨཧེཏུཨཔྤཙྩཡཱ ཝཱ པཊིསཾཝེདེཏུཾ ནཱམ ན སཀྐཱ; ཨིསྶརནིམྨཱནཀཱརཎཱ ཨེཝ པན ཨིམཱ པཊིསཾཝེདེཏཱིཏི. ཨེཝཾཝཱདིནོ པནེཏེ ཧེཊྛཱ ཝུཏྟེསུ ཨཊྛསུ ཨཱབཱདྷེསུ ཨེཀམྤི ཨསམྤཊིཙྪིཏྭཱ སབྦཾ པཊིབཱཧནྟི. ཏཐཱ དིཊྛདྷམྨཝེདནཱིཡཱདཱིསུཔི སབྦཀོཊྛཱསེསུ ¶ ཨེཀམྤི ཨསམྤཊིཙྪིཏྭཱ སབྦཾ པཊིབཱཧནྟི.

ཨཧེཏུ ཨཔྤཙྩཡཱཏི ཧེཏུཉྩ པཙྩཡཉྩ ཝིནཱ ཨཀཱརཎེནེཝ པཊིསཾཝེདེཏཱིཏི ཨཏྠོ. ཨཡཾ ¶ ཨཱཛཱིཝཀསམཡོ. ཨེཝཾ ཝཱདིནོ ཨེཏེཔི ཧེཊྛཱ ཝུཏྟེསུ ཀཱརཎེསུ ཙ བྱཱདྷཱིསུ ཙ ཨེཀམྤི ཨསམྤཊིཙྪིཏྭཱ སབྦཾ པཊིཀྑིཔནྟི.

༩༢༤. ཀིཉྩནཱཏི པལིབོདྷཱ. རཱགོ ཀིཉྩནནྟི རཱགོ ཨུཔྤཛྫམཱནོ སཏྟེ བནྡྷཏི པལིབུནྡྷེཏི, ཏསྨཱ ཀིཉྩནནྟི ཝུཙྩཏི. དོསམོཧེསུཔི ཨེསེཝ ནཡོ. ཨངྒཎཱནཱིཏི ‘‘ཨུདངྒཎེ ཏཏྠ པཔཾ ཨཝིནྡུ’’ནྟི (ཛཱ. ༡.༡.༢) ཨཱགཏཊྛཱནེ བྷཱུམིཔྤདེསོ ཨངྒཎཾ. ‘‘ཏསྶེཝ རཛསྶ ཝཱ ཨངྒཎསྶ ཝཱ པཧཱནཱཡ ཝཱཡམཏཱི’’ཏི (མ. ནི. ༡.༡༨༤; ཨ. ནི. ༡༠.༥༡) ཨཱགཏཊྛཱནེ ཡཾ ཀིཉྩི མལཾ ཝཱ པངྐོ ཝཱ. ‘‘སཱངྒཎོཝ སམཱནོ’’ཏི (མ. ནི. ༡.༥༧) ཨཱགཏཊྛཱནེ ནཱནཔྤཀཱརོ ཏིབྦཀིལེསོ. ཨིདྷཱཔི ཏདེཝ ཀིལེསངྒཎཾ ཨདྷིཔྤེཏཾ. ཏེནེཝ རཱགོ ཨངྒཎནྟིཨཱདིམཱཧ.

མལཱནཱིཏི མལིནབྷཱཝཀརཎཱནི. རཱགོ མལནྟི རཱགོ ཨུཔྤཛྫམཱནོ ཙིཏྟཾ མལིནཾ ཀརོཏི, མལཾ གཱཧཱཔེཏི, ཏསྨཱ མལནྟི ཝུཙྩཏི. ཨིཏརེསུཔི དྭཱིསུ ཨེསེཝ ནཡོ.

ཝིསམནིདྡེསེ ¶ ཡསྨཱ རཱགཱདཱིསུ ཙེཝ ཀཱཡདུཙྩརིཏཱདཱིསུ ཙ སཏྟཱ པཀྑལནྟི, པཀྑལིཏཱ ཙ པན སཱསནཏོཔི སུགཏིཏོཔི པཏནྟི, ཏསྨཱ པཀྑལནཔཱཏཧེཏུཏོ རཱགོ ཝིསམནྟིཨཱདི ཝུཏྟཾ.

ཨགྒཱིཏི ཨནུདཧནཊྛེན ཨགྒི. རཱགགྒཱིཏི རཱགོ ཨུཔྤཛྫམཱནོ སཏྟེ ཨནུདཧཏི ཛྷཱཔེཏི, ཏསྨཱ ཨགྒཱིཏི ཝུཙྩཏི. དོསམོཧེསུཔི ཨེསེཝ ནཡོ. ཏཏྠ ཝཏྠཱུནི – ཨེཀཱ ཀིར དཧརབྷིཀྑུནཱི ཙིཏྟལཔབྦཏཝིཧཱརེ ཨུཔོསཐཱགཱརཾ གནྟྭཱ དྭཱརཔཱལཀརཱུཔཾ ཨོལོཀཡམཱནཱ ཋིཏཱ. ཨཐསྶཱ ཨནྟོ རཱགོ ཨུཔྤནྣོ. སཱ ཏེནེཝ ཛྷཱཡིཏྭཱ ཀཱལམཀཱསི. བྷིཀྑུནིཡོ གཙྪམཱནཱ ‘ཨཡཾ དཧརཱ ཋིཏཱ, པཀྐོསཐ ན’ནྟི ཨཱཧཾསུ. ཨེཀཱ གནྟྭཱ ‘ཀསྨཱ ཋིཏཱསཱི’ཏི ཧཏྠེ གཎྷི. གཧིཏམཏྟཱ པརིཝཏྟིཏྭཱ པཏིཏཱ. ཨིདཾ ཏཱཝ རཱགསྶ ཨནུདཧནཏཱཡ ཝཏྠུ. དོསསྶ པན ཨནུདཧནཏཱཡ མནོཔདོསིཀཱ དེཝཱ དཊྛབྦཱ. མོཧསྶ ཨནུདཧནཏཱཡ ཁིཌྜཱཔདོསིཀཱ དེཝཱ དཊྛབྦཱ. མོཧནཝསེན ཧི ཏེསཾ སཏིསམྨོསོ ཧོཏི. ཏསྨཱ ཁིཌྜཱཝསེན ཨཱཧཱརཀཱལཾ ཨཏིཝཏྟིཏྭཱ ཀཱལཾ ཀརོནྟི. ཀསཱཝཱཏི ¶ ཀསཊཱ ནིརོཛཱ. རཱགཱདཱིསུ ཙ ཀཱཡདུཙྩརིཏཱདཱིསུ ཙ ཨེཀམྤི པཎཱིཏཾ ཨོཛཝནྟཾ ནཏྠི, ཏསྨཱ རཱགོ ཀསཱཝོཏིཨཱདི ཝུཏྟཾ.

༩༢༥. ཨསྶཱདདིཊྛཱིཏི ¶ ཨསྶཱདསམྤཡུཏྟཱ དིཊྛི. ནཏྠི ཀཱམེསུ དོསོཏི ཀིལེསཀཱམེན ཝཏྠུཀཱམཔཊིསེཝནདོསོ ནཏྠཱིཏི ཝདཏི. པཱཏབྱཏནྟི པཱཏབྦབྷཱཝཾ པརིབྷུཉྫནཾ ཨཛ྄ཛྷོཧརཎཾ. ཨེཝཾཝཱདཱི ཧི སོ ཝཏྠུཀཱམེསུ ཀིལེསཀཱམཾ པིཝནྟོ ཝིཡ ཨཛ྄ཛྷོཧརནྟོ ཝིཡ པརིབྷུཉྫཏི. ཨཏྟཱནུདིཊྛཱིཏི ཨཏྟཱནཾ ཨནུགཏཱ དིཊྛི. མིཙྪཱདིཊྛཱིཏི ལཱམཀཱ དིཊྛི. ཨིདཱནི ཡསྨཱ ཨེཏྠ པཋམཱ སསྶཏདིཊྛི ཧོཏི, དུཏིཡཱ སཀྐཱཡདིཊྛི, ཏཏིཡཱ ཨུཙྪེདདིཊྛི, ཏསྨཱ ཏམཏྠཾ དསྶེཏུཾ སསྶཏདིཊྛི ཨསྶཱདདིཊྛཱིཏིཨཱདིམཱཧ.

༩༢༦. ཨརཏིནིདྡེསོ ཙ ཝིཧེསཱནིདྡེསོ ཙ ཝུཏྟཏྠོཡེཝ. ཨདྷམྨསྶ ཙརིཡཱ ཨདྷམྨཙརིཡཱ, ཨདྷམྨཀརཎནྟི ཨཏྠོ. ཝིསམཱ ཙརིཡཱ, ཝིསམསྶ ཝཱ ཀམྨསྶ ཙརིཡཱཏི ཝིསམཙརིཡཱ. དོཝཙསྶཏཱཔཱཔམིཏྟཏཱ ནིདྡེསཱ ཝུཏྟཏྠཱ ཨེཝ. པུཐུནིམིཏྟཱརམྨཎེསུ པཝཏྟིཏོ ནཱནཏྟེསུ སཉྙཱ ནཱནཏྟསཉྙཱ. ཡསྨཱ ཝཱ ཨཉྙཱཝ ཀཱམསཉྙཱ, ཨཉྙཱ བྱཱཔཱདཱདིསཉྙཱ, ཏསྨཱ ¶ ནཱནཏྟཱ སཉྙཱཏིཔི ནཱནཏྟསཉྙཱ. ཀོསཛྫཔམཱདནིདྡེསེསུ པཉྩསུ ཀཱམགུཎེསུ ཝིསྶཊྛཙིཏྟསྶ ཀུསལདྷམྨབྷཱཝནཱཡ ཨནནུཡོགཝསེན ལཱིནཝུཏྟིཏཱ ཀོསཛྫཾ, པམཛྫནཝསེན པམཏྟབྷཱཝོ པམཱདོཏི ཝེདིཏབྦོ. ཨསནྟུཊྛིཏཱདིནིདྡེསཱ ཝུཏྟཏྠཱ ཨེཝ.

༩༣༡. ཨནཱདརིཡནིདྡེསེ ཨོཝཱདསྶ ཨནཱདིཡནཝསེན ཨནཱདརབྷཱཝོ ཨནཱདརིཡཾ. ཨནཱདརིཡནཱཀཱརོ ཨནཱདརཏཱ. སགརུཝཱསཾ ཨཝསནཊྛེན ཨགཱརཝབྷཱཝོ ཨགཱརཝཏཱ. སཛེཊྛཀཝཱསཾ ཨཝསནཊྛེན ཨཔྤཏིསྶཝཏཱ. ཨནདྡཱཏི ཨནཱདིཡནཱ. ཨནདྡཱཡནཱཏི ཨནཱདིཡནཱཀཱརོ. ཨནདྡཱཡ ཨཡིཏསྶ བྷཱཝོ ཨནདྡཱཡིཏཏྟཾ. ཨསཱིལསྶ བྷཱཝོ ཨསཱིལྱཾ. ཨཙིཏྟཱིཀཱརོཏི གརུཙིཏྟཱིཀཱརསྶ ཨཀརཎཾ.

༩༣༢. ཨསྶདྡྷབྷཱཝོ ཨསྶདྡྷིཡཾ. ཨསདྡཧནཱཀཱརོ ཨསདྡཧནཱ. ཨོཀཔྤེཏྭཱ ཨནུཔཝིསིཏྭཱ ཨགྒཧཎཾ ཨནོཀཔྤནཱ. ཨཔྤསཱིདནཊྛེན ཨནབྷིཔྤསཱདོ.

ཨཝདཉྙུཏཱཏི ཐདྡྷམཙྪརིཡཝསེན ‘དེཧི, ཀརོཧཱི’ཏི ཝཙནསྶ ཨཛཱནཏཱ.

༩༣༤. བུདྡྷཱ ¶ ཙ བུདྡྷསཱཝཀཱ ཙཱཏི ཨེཏྠ བུདྡྷགྒཧཎེན པཙྩེཀབུདྡྷཱཔི གཧིཏཱཝ. ཨསམེཏུཀམྱཏཱཏི ¶ ཏེསཾ སམཱིཔཾ ཨགནྟུཀཱམཏཱ. སདྡྷམྨཾ ཨསོཏུཀམྱཏཱཏི སཏྟཏིཾས བོདྷིཔཀྑིཡདྷམྨཱ སདྡྷམྨོ ནཱམ, ཏཾ ཨསུཎིཏུཀཱམཏཱ. ཨནུགྒཧེཏུཀམྱཏཱཏི ན ཨུགྒཧེཏུཀཱམཏཱ.

ཨུཔཱརམྦྷཙིཏྟཏཱཏི ཨུཔཱརམྦྷཙིཏྟབྷཱཝོ. ཡསྨཱ པན སོ ཨཏྠཏོ ཨུཔཱརམྦྷོཝ ཧོཏི, ཏསྨཱ ཏཾ དསྶེཏུཾ ཏཏྠ ཀཏམོ ཨུཔཱརམྦྷོཏིཨཱདི ཝུཏྟཾ. ཏཏྠ ཨུཔཱརམྦྷནཝསེན ཨུཔཱརམྦྷོ. པུནཔྤུནཾ ཨུཔཱརམྦྷོ ཨནུཔཱརམྦྷོ ཨུཔཱརམྦྷནཱཀཱརོ ཨུཔཱརམྦྷནཱ. པུནཔྤུནཾ ཨུཔཱརམྦྷནཱ ཨནུཔཱརམྦྷནཱ. ཨནུཔཱརམྦྷིཏསྶ བྷཱཝོ ཨནུཔཱརམྦྷིཏཏྟཾ. ཨུཉྙཱཏི ཧེཊྛཱ ཀཏྭཱ ཛཱནནཱ. ཨཝཉྙཱཏི ཨཝཛཱནནཱ. པརིབྷཝནཾ པརིབྷཝོ. རནྡྷསྶ གཝེསིཏཱ རནྡྷགཝེསིཏཱ. རནྡྷཾ ཝཱ གཝེསཏཱིཏི རནྡྷགཝེསཱི, ཏསྶ བྷཱཝོ རནྡྷགཝེསིཏཱ. ཨཡཾ ཝུཙྩཏཱིཏི ཨཡཾ པརཝཛྫཱནུཔསྶནལཀྑཎོ ཨུཔཱརམྦྷོ ནཱམ ཝུཙྩཏི, ཡེན སམནྣཱགཏོ པུགྒལོ, ཡཐཱ ནཱམ ཏུནྣཀཱརོ ¶ སཱཊཀཾ པསཱརེཏྭཱ ཚིདྡམེཝ ཨོལོཀེཏི, ཨེཝམེཝ པརསྶ སབྦེཔི གུཎེ མཀྑེཏྭཱ ཨགུཎེསུཡེཝ པཏིཊྛཱཏི.

༩༣༦. ཨཡོནིསོ མནསིཀཱརོཏི ཨནུཔཱཡམནསིཀཱརོ. ཨནིཙྩེ ནིཙྩནྟི ཨནིཙྩེཡེཝ ཝཏྠུསྨིཾ ‘ཨིདཾ ནིཙྩ’ནྟི ཨེཝཾ པཝཏྟོ. དུཀྑེ སུཁནྟིཨཱདཱིསུཔི ཨེསེཝ ནཡོ. སཙྩཝིཔྤཊིཀུལེན ཙཱཏི ཙཏུནྣཾ སཙྩཱནཾ ཨནནུལོམཝསེན. ཙིཏྟསྶ ཨཱཝཊྚནཱཏིཨཱདཱིནི སབྦཱནིཔི ཨཱཝཛྫནསྶེཝ ཝེཝཙནཱནེཝ. ཨཱཝཛྫནཉྷི བྷཝངྒཙིཏྟཾ ཨཱཝཊྚེཏཱིཏི ཙིཏྟསྶ ཨཱཝཊྚནཱ. ཨནུཨནུ ཨཱཝཊྚེཏཱིཏི ཨནཱཝཊྚནཱ. ཨཱབྷུཛཏཱིཏི ཨཱབྷོགོ. བྷཝངྒཱརམྨཎཏོ ཨཉྙཾ ཨཱརམྨཎཾ སམནྣཱཧརཏཱིཏི སམནྣཱཧཱརོ. ཏདེཝཱརམྨཎཾ ཨཏྟཱནཾ ཨནུབནྡྷིཏྭཱ ཨུཔྤཛྫམཱནེ མནསིཀརོཏཱིཏི མནསིཀཱརོ. ཀརོཏཱིཏི ཋཔེཏི. ཨཡཾ ཝུཙྩཏཱིཏི ཨཡཾ ཨནུཔཱཡམནསིཀཱརོ ཨུཔྤཐམནསིཀཱརལཀྑཎོ ཨཡོནིསོམནསིཀཱརོ ནཱམ ཝུཙྩཏི. ཏསྶ ཝསེན པུགྒལོ དུཀྑཱདཱིནི སཙྩཱནི ཡཱཐཱཝཏོ ཨཱཝཛྫིཏུཾ ན སཀྐོཏི.

ཀུམྨགྒསེཝནཱནིདྡེསེ ཡཾ ཀུམྨགྒཾ སེཝཏོ སེཝནཱ ཀུམྨགྒསེཝནཱཏི ཝུཙྩཏི, ཏཾ དསྶེཏུཾ ཏཏྠ ཀཏམོ ཀུམྨགྒོཏི ¶ དུཏིཡཔུཙྪཱ ཀཏཱ. སེསཾ སབྦཏྠ ཨུཏྟཱནམེཝཱཏི.

ཏིཀནིདྡེསཝཎྞནཱ ནིཊྛིཏཱ.

(༤.) ཙཏུཀྐནིདྡེསཝཎྞནཱ

༩༣༩. ཙཏུཀྐནིདྡེསེ ¶ ཏཎྷུཔྤཱདེསུ ཙཱིཝརཧེཏཱུཏི ‘ཀཏྠ མནཱཔཾ ཙཱིཝརཾ ལབྷིསྶཱམཱི’ཏི ཙཱིཝརཀཱརཎཱ ཨུཔྤཛྫཏི. ཨིཏིབྷཝཱབྷཝཧེཏཱུཏི ཨེཏྠ ཨིཏཱིཏི ནིདསྶནཏྠེ ནིཔཱཏོ; ཡཐཱ ཙཱིཝརཱདིཧེཏུ ཨེཝཾ བྷཝཱབྷཝཧེཏཱུཏིཔི ཨཏྠོ. བྷཝཱབྷཝོཏི ཙེཏྠ པཎཱིཏཔཎཱིཏཏརཱནི ཏེལམདྷུཕཱཎིཏཱདཱིནི ཨདྷིཔྤེཏཱནི. ཨིམེསཾ པན ཙཏུནྣཾ ཏཎྷུཔྤཱདཱནཾ པཧཱནཏྠཱཡ པཊིཔཱཊིཡཱཝ ཙཏྟཱརོ ཨརིཡཝཾསཱ དེསིཏཱཏི ཝེདིཏབྦཱ.

ཨགཏིགམནེསུ ¶ ཚནྡཱགཏིཾ གཙྪཏཱིཏི ཚནྡེན པེམེན ཨགཏིཾ གཙྪཏི, ཨཀཏྟབྦཾ ཀརོཏི. པརཔདེསུཔི ཨེསེཝ ནཡོ. ཏཏྠ ཡོ ‘ཨཡཾ མེ མིཏྟོ ཝཱ སནྡིཊྛོ ཝཱ སམྦྷཏྟོ ཝཱ ཉཱཏཀོ ཝཱ ལཉྫཾ ཝཱ པན མེ དེཏཱི’ཏི ཚནྡཝསེན ཨསྶཱམིཀཾ སཱམིཀཾ ཀརོཏི – ཨཡཾ ཚནྡཱགཏིཾ གཙྪཏི ནཱམ. ཡོ ‘ཨཡཾ མེ ཝེརཱི’ཏི པཀཏིཝེརཝསེན ཝཱ ཏངྑཎུཔྤནྣཀོདྷཝསེན ཝཱ སཱམིཀཾ ཨསྶཱམིཀཾ ཀརོཏི – ཨཡཾ དོསཱགཏིཾ གཙྪཏི ནཱམ. ཡོ པན མནྡཏྟཱ མོམཱུཧཏྟཱ ཡཾ ཝཱ ཏཾ ཝཱ ཝཏྭཱ ཨསྶཱམིཀཾ སཱམིཀཾ ཀརོཏི – ཨཡཾ མོཧཱགཏིཾ གཙྪཏི ནཱམ. ཡོ པན ‘ཨཡཾ རཱཛཝལླབྷོ ཝཱ ཝིསམནིསྶིཏོ ཝཱ ཨནཏྠམྤི མེ ཀརེཡྻཱ’ཏི བྷཱིཏོ ཨསྶཱམིཀཾ སཱམིཀཾ ཀརོཏི – ཨཡཾ བྷཡཱགཏིཾ གཙྪཏི ནཱམ. ཡོ ཝཱ པན བྷཱཛིཡཊྛཱནེ ཀིཉྩི བྷཱཛེནྟོ ‘ཨཡཾ མེ མིཏྟོ ཝཱ སནྡིཊྛོ ཝཱ སམྦྷཏྟོ ཝཱ’ཏི པེམཝསེན ཨཏིརེཀཾ དེཏི, ‘ཨཡཾ མེ ཝེརཱི’ཏི དོསཝསེན ཨཱུནཀཾ དེཏི, མོམཱུཧཏྟཱ དིནྣཱདིནྣཾ ཨཛཱནམཱནོ ཀསྶཙི ཨཱུནཀཾ ཀསྶཙི ཨདྷིཀཾ དེཏི, ‘ཨཡཾ ཨིམསྨིཾ ཨདཱིཡམཱནེ མཡ྄ཧཾ ཨནཏྠམྤི ཀརེཡྻཱ’ཏི བྷཱིཏོ ཀསྶཙི ཨཏིརེཀཾ དེཏི, སོ ཙཏུབྦིདྷོཔི ཡཐཱནུཀྐམེན ཚནྡཱགཏིཨཱདཱིནི གཙྪཏི ནཱམ. ཨརིཡཱ ཨེཏཱཡ ན གཙྪནྟཱིཏི ཨགཏི, ཨནརིཡཱ ཨིམིནཱ ཨགཏིཾ གཙྪནྟཱིཏི ཨགཏིགམནཾ. ཨིམཾ དྭཡཾ ཙཏུནྣམྤི སཱདྷཱརཎཝསེན ཝུཏྟཾ. ཚནྡེན གམནཾ ཚནྡགམནཾ. ཨིདཾ དོསཱདཱིནཾ ཨསཱདྷཱརཎཝསེན ཝུཏྟཾ. སཀཔཀྑརཱགཉྩ པརཔཀྑདོསཉྩ པུརཀྑཏྭཱ ཨསམགྒབྷཱཝེན གམནཾ ཝགྒགམནཾ. ཨིདཾ ཚནྡདོསསཱདྷཱརཎཝསེན ཝུཏྟཾ. ཝཱརིནོ ཝིཡ ཡཐཱནིནྣཾ གམནནྟི ཝཱརིགམནཾ. ཨིདཾ ཙཏུནྣམྤི སཱདྷཱརཎཝསེན ཝུཏྟཾ.

ཝིཔརིཡཱསེསུ ¶ ཨནིཙྩཱདཱིནི ཝཏྠཱུནི ནིཙྩནྟིཨཱདིནཱ ནཡེན ཝིཔརཱིཏཏོ ཨེསནྟཱིཏི ཝིཔརིཡཱསཱ, སཉྙཱཡ ཝིཔརིཡཱསོ སཉྙཱཝིཔརིཡཱསོ. ཨིཏརེསུཔི དྭཱིསུ ཨེསེཝ ནཡོ. ཨེཝམེཏེ ཙཏུནྣཾ ¶ ཝཏྠཱུནཾ ཝསེན ཙཏྟཱརོ, ཡེསུ ཝཏྠཱུསུ སཉྙཱདཱིནཾ ཝསེན དྭཱདས ཧོནྟི. ཏེསུ ཨཊྛ སོཏཱཔཏྟིམགྒེན པཧཱིཡནྟི. ཨསུབྷེ སུབྷནྟི སཉྙཱཙིཏྟཝིཔལླཱསཱ སཀདཱགཱམིམགྒེན ཏནུཀཱ ཧོནྟི, ཨནཱགཱམིམགྒེན པཧཱིཡནྟི. དུཀྑེ སུཁནྟི སཉྙཱཙིཏྟཝིཔལླཱསཱ ཨརཧཏྟམགྒེན པཧཱིཡནྟཱིཏི ཝེདིཏབྦཱ.

ཨནརིཡཝོཧཱརེསུ ¶ ཨནརིཡཝོཧཱརཱཏི ཨནརིཡཱནཾ ལཱམཀཱནཾ ཝོཧཱརཱ. དིཊྛཝཱདིཏཱཏི ‘དིཊྛཾ མཡཱ’ཏི ཨེཝཾ ཝཱདིཏཱ. ཨེཏྠ ཙ ཏཾ ཏཾ སམུཊྛཱཔིཀཙེཏནཱཝསེན ཨཏྠོ ཝེདིཏབྦོ. སཧ སདྡེན ཙེཏནཱ ཀཐིཏཱཏིཔི ཝུཏྟམེཝ. དུཏིཡཙཏུཀྐེཔི ཨེསེཝ ནཡོ. ཨརིཡོ ཧི ཨདིསྭཱ ཝཱ ‘དིཊྛཾ མཡཱ’ཏི དིསྭཱ ཝཱ ‘ན དིཊྛཾ མཡཱ’ཏི ཝཏྟཱ ནཱམ ནཏྠི; ཨནརིཡོཝ ཨེཝཾ ཝདཏི. ཏསྨཱ ཨེཝཾ ཝདནྟསྶ ཨེཏཱ སཧ སདྡེན ཨཊྛ ཙེཏནཱ ཨནརིཡཝོཧཱརཱཏི ཝེདིཏབྦཱ.

དུཙྩརིཏེསུ པཋམཙཏུཀྐཾ ཝེརཙེཏནཱཝསེན ཝུཏྟཾ, དུཏིཡཾ ཝཙཱིདུཙྩརིཏཝསེན.

བྷཡེསུ པཋམཙཏུཀྐེ ཛཱཏིཾ པཊིཙྩ ཨུཔྤནྣཾ བྷཡཾ ཛཱཏིབྷཡཾ. སེསེསུཔི ཨེསེཝ ནཡོ. དུཏིཡཙཏུཀྐེ རཱཛཏོ ཨུཔྤནྣཾ བྷཡཾ རཱཛབྷཡཾ. སེསེསུཔི ཨེསེཝ ནཡོ.

ཏཏིཡཙཏུཀྐེ ཙཏྟཱརི བྷཡཱནཱིཏི མཧཱསམུདྡེ ཨུདཀཾ ཨོརོཧནྟསྶ ཝུཏྟབྷཡཱནི. མཧཱསམུདྡེ ཀིར མཧིནྡཝཱིཙི ནཱམ སཊྛི ཡོཛནཱནི ཨུགྒཙྪཏི. གངྒཱཝཱིཙི ནཱམ པཎྞཱས. རོཧཎཝཱིཙི ནཱམ ཙཏྟཱལཱིས ཡོཛནཱནི ཨུགྒཙྪཏི. ཨེཝརཱུཔཱ ཨཱུམིཡོ པཊིཙྩ ཨུཔྤནྣཾ བྷཡཾ ཨཱུམིབྷཡཾ ནཱམ. ཀུམྦྷཱིལཏོ ཨུཔྤནྣཾ བྷཡཾ ཀུམྦྷཱིལབྷཡཾ. ཨུདཀཱཝཊྚཏོ བྷཡཾ ཨཱཝཊྚབྷཡཾ. སུསུཀཱ ཝུཙྩཏི ཙཎྜམཙྪོ; ཏཏོ བྷཡཾ སུསུཀཱབྷཡཾ.

ཙཏུཏྠཙཏུཀྐེ ཨཏྟཱནུཝཱདབྷཡནྟི པཱཔཀམྨིནོ ཨཏྟཱནཾ ཨནུཝདནྟསྶ ཨུཔྤཛྫནཀབྷཡཾ. པརཱནུཝཱདབྷཡནྟི པརསྶ ཨནུཝཱདཏོ ཨུཔྤཛྫནཀབྷཡཾ. དཎྜབྷཡནྟི ཨགཱརིཀསྶ རཉྙཱ པཝཏྟིཏདཎྜཾ, ཨནགཱརིཀསྶ ཝིནཡདཎྜཾ པཊིཙྩ ཨུཔྤཛྫནཀབྷཡཾ. དུགྒཏིབྷཡནྟི ཙཏྟཱརོ ཨཔཱཡེ པཊིཙྩ ཨུཔྤཛྫནཀབྷཡཾ. ཨིཏི ¶ ཨིམེཧི ཙཏཱུཧི ཙཏུཀྐེཧི སོལ༹ས མཧཱབྷཡཱནི ནཱམ ཀཐིཏཱནི.

དིཊྛིཙཏུཀྐེ ¶ ཏིམྦརུཀདིཊྛི (སཾ. ནི. ༢.༡༨) ནཱམ ཀཐིཏཱ. ཏཏྠ སཡཾཀཏཾ སུཁདུཀྑནྟི ཝེདནཾ ཨཏྟཏོ སམནུཔསྶཏོ ཝེདནཱཡ ཨེཝ ཝེདནཱ ཀཏཱཏི ཨུཔྤནྣཱ དིཊྛི. ཨེཝཉྩ སཏི ཏསྶཱ ཝེདནཱཡ པུབྦེཔི ཨཏྠིཏཱ ཨཱཔཛྫཏཱིཏི ཨཡཾ སསྶཏདིཊྛི ནཱམ ཧོཏི. སཙྩཏོ ཐེཏཏོཏི སཙྩཏོ ཐིརཏོ. པརཾཀཏནྟི ¶ པཙྩུཔྤནྣཝེདནཏོ ཨཉྙཾ ཝེདནཱཀཱརཎཾ ཝེདནཏྟཱནཾ སམནུཔསྶཏོ ‘ཨཉྙཱཡ ཝེདནཱཡ ཨཡཾ ཝེདནཱ ཀཏཱ’ཏི ཨུཔྤནྣཱ དིཊྛི. ཨེཝཾ སཏི པུརིམཱཡ ཀཱརཎཝེདནཱཡ ཨུཙྪེདོ ཨཱཔཛྫཏཱིཏི ཨཡཾ ཨུཙྪེདདིཊྛི ནཱམ ཧོཏི. སཡཾཀཏཉྩ པརཾཀཏཉྩཱཏི ཡཐཱཝུཏྟེནེཝ ཨཏྠེན ‘ཨུཔཌྜྷཾ སཡཾཀཏཾ, ཨུཔཌྜྷཾ པརེན ཀཏ’ནྟི གཎྷཏོ ཨུཔྤནྣཱ དིཊྛི – ཨཡཾ སསྶཏུཙྪེདདིཊྛི ནཱམ. ཙཏུཏྠཱ ཨཀཱརཎཱ ཨེཝ སུཁདུཀྑཾ ཧོཏཱིཏི གཎྷཏོ ཨུཔྤནྣཱ དིཊྛི. ཨེཝཾ སཏི ཨཡཾ ཨཧེཏུཀདིཊྛི ནཱམ. སེསམེཏྠ ཧེཊྛཱ ཝུཏྟནཡཏྟཱ ཨུཏྟཱནཏྠམེཝཱཏི.

ཙཏུཀྐནིདྡེསཝཎྞནཱ ནིཊྛིཏཱ.

(༥.) པཉྩཀནིདྡེསཝཎྞནཱ

༩༤༠. པཉྩཀནིདྡེསེ ཡསྨཱ ཡེསཾ སཀྐཱཡདིཊྛིཨཱདཱིནི ཨཔྤཧཱིནཱནི, ཏེ བྷཝགྒེཔི ནིབྦཏྟེ ཨེཏཱནི ཨཱཀཌྜྷིཏྭཱ ཀཱམབྷཝེཡེཝ པཱཏེནྟི, ཏསྨཱ ཨོརམྦྷཱགིཡཱནི སཾཡོཛནཱནཱིཏི ཝུཏྟཱནི. ཨིཏི ཨེཏཱནི པཉྩ གཙྪནྟཾ ན ཝཱརེནྟི, གཏཾ པན ཨཱནེནྟི. རཱུཔརཱགཱདཱིནིཔི པཉྩ གཙྪནྟཾ ན ཝཱརེནྟི, ཨཱགནྟུཾ པན ན དེནྟི. རཱགཱདཡོ པཉྩ ལགྒནཊྛེན སངྒཱ, ཨནུཔཝིཊྛཊྛེན པན སལླཱཏི ཝུཏྟཱ.

༩༤༡. ཙེཏོཁིལཱཏི ཙིཏྟསྶ ཐདྡྷབྷཱཝཱ ཀཙཝརབྷཱཝཱ ཁཱཎུཀབྷཱཝཱ. སཏྠརི ཀངྑཏཱིཏི སཏྠུ སརཱིརེ ཝཱ གུཎེ ཝཱ ཀངྑཏི. སརཱིརེ ཀངྑམཱནོ ‘དྭཏྟིཾསཝརལཀྑཎཔཊིམཎྜིཏཾ ནཱམ སརཱིརཾ ཨཏྠི ནུ ཁོ ནཏྠཱི’ཏི ཀངྑཏི. གུཎེ ཀངྑམཱནོ ‘ཨཏཱིཏཱནཱགཏཔཙྩུཔྤནྣཛཱནནསམཏྠཾ སབྦཉྙུཏཉཱཎཾ ཨཏྠི ནུ ཁོ ནཏྠཱི’ཏི ཀངྑཏི. ཝིཙིཀིཙྪཏཱིཏི ཝིཙིནནྟོ ཀིཙྪཏི, དུཀྑཾ ཨཱཔཛྫཏི, ཝིནིཙྪེཏུཾ ན སཀྐོཏི. ནཱདྷིམུཙྩཏཱིཏི ¶ ‘ཨེཝམེཏ’ནྟི ཨདྷིམོཀྑཾ ན པཊིལབྷཏི ¶ . ན སམྤསཱིདཏཱིཏི གུཎེསུ ཨོཏརིཏྭཱ ནིབྦིཙིཀིཙྪབྷཱཝེན པསཱིདིཏུཾ ཨནཱཝིལོ བྷཝིཏུཾ ན སཀྐོཏི.

དྷམྨེཏི པརིཡཏྟིདྷམྨེ ཙ པཊིཝེདྷདྷམྨེ ཙ. པརིཡཏྟིདྷམྨེ ཀངྑམཱནོ ‘ཏེཔིཊཀཾ བུདྡྷཝཙནཾ ཙཏུརཱསཱིཏིདྷམྨཀྑནྡྷསཧསྶཱནཱིཏི ཝདནྟི, ཨཏྠི ནུ ཁོ ཨེཏཾ ནཏྠཱི’ཏི ཀངྑཏི. པཊིཝེདྷདྷམྨེ ཀངྑམཱནོ ‘ཝིཔསྶནཱནིསྶནྡོ མགྒོ ནཱམ ¶ , མགྒནིསྶནྡོ ཕལཾ ནཱམ, སབྦསངྑཱརཔཊིནིསྶགྒོ ནིབྦཱནཾ ནཱམཱཏི ཝདནྟི, ཏཾ ཨཏྠི ནུ ཁོ ནཏྠཱིཏི ཀངྑཏི’.

སངྒྷེ ཀངྑཏཱིཏི ‘ཨུཛུཔྤཊིཔནྣོཏིཨཱདཱིནཾ པདཱནཾ ཝསེན ཨེཝརཱུཔཾ པཊིཔདཾ པཊིཔནྣཱ ཙཏྟཱརོ མགྒཊྛཱ ཙཏྟཱརོ ཕལཊྛཱཏི ཨཊྛནྣཾ པུགྒལཱནཾ སམཱུཧབྷཱུཏོ སངྒྷོ ནཱམ ཨཏྠི ནུ ཁོ ནཏྠཱི’ཏི ཀངྑཏི. སིཀྑཱཡ ཀངྑམཱནོ ‘ཨདྷིསཱིལསིཀྑཱ ནཱམ ཨདྷིཙིཏྟསིཀྑཱ ནཱམ ཨདྷིཔཉྙཱ སིཀྑཱ ནཱམཱཏི ཝདནྟི, སཱ ཨཏྠི ནུ ཁོ ནཏྠཱི’ཏི ཀངྑཏི.

ཙེཏསོཝིནིབནྡྷཱཏི ཙིཏྟཾ བནྡྷིཏྭཱ མུཊྛིཡཾ ཀཏྭཱ ཝིཡ གཎྷནྟཱིཏི ཙེཏསོཝིནིབནྡྷཱ. ཀཱམེཏི ཝཏྠུཀཱམེཔི ཀིལེསཀཱམེཔི. ཀཱཡེཏི ཨཏྟནོ ཀཱཡེ. རཱུཔེཏི བཧིདྡྷཱ རཱུཔེ. ཡཱཝདཏྠནྟི ཡཏྟཀཾ ཨིཙྪཏི ཏཏྟཀཾ. ཨུདརཱཝདེཧཀནྟི ཨུདརཔཱུརཾ. ཏཉྷི ཨུདརཾ ཨཝདེཧནཏོ ཨུདརཱཝདེཧཀནྟི ཝུཙྩཏི. སེཡྻསུཁནྟི མཉྩཔཱིཋསུཁཾ ཨུཏུསུཁཾ ཝཱ. པསྶསུཁནྟི ཡཐཱ སམྤརིཝཏྟཀཾ སཡནྟསྶ དཀྑིཎཔསྶཝཱམཔསྶཱནཾ སུཁཾ ཧོཏི, ཨེཝཾ ཨུཔྤནྣསུཁཾ. མིདྡྷསུཁནྟི ནིདྡཱསུཁཾ. ཨནུཡུཏྟོཏི ཡུཏྟཔཡུཏྟོ ཝིཧརཏི. པཎིདྷཱཡཱཏི པཏྠཡིཏྭཱ. སཱིལེནཱཏིཨཱདཱིསུ སཱིལནྟི ཙཏུཔཱརིསུདྡྷིསཱིལཾ. ཝཏནྟི ཝཏསམཱདཱནཾ. ཏཔོཏི ཏཔཙརཎཾ. བྲཧྨཙརིཡནྟི མེཐུནཝིརཏི. དེཝོ ཝཱ བྷཝིསྶཱམཱིཏི མཧེསཀྑདེཝོ ཝཱ བྷཝིསྶཱམི. དེཝཉྙཏརོ ཝཱཏི ཨཔྤེསཀྑདེཝེསུ ཝཱ ཨཉྙཏརོ. ཀུསལདྷམྨེ ཨཱཝརནྟི ནིཝཱརེནྟཱིཏི ནཱིཝརཎཱནི.

མཱཏཱ ཛཱིཝིཏཱ ཝོརོཔིཏཱ ཧོཏཱིཏི མནུསྶེནེཝ སཀཛནིཀཱ མནུསྶམཱཏཱ ཛཱིཝིཏཱ ཝོརོཔིཏཱ ཧོཏི. པིཏཱཔི ¶ མནུསྶཔིཏཱཝ. ཨརཧཱཔི མནུསྶཨརཧཱཝ. དུཊྛེན ཙིཏྟེནཱཏི ཝདྷཀཙིཏྟེན.

སཉྙཱིཏི སཉྙཱསམངྒཱི. ཨརོགོཏི ནིཙྩོ. ཨིཏྠེཀེ ཨབྷིཝདནྟཱིཏི ཨིཏྠཾ ཨེཀེ ཨབྷིཝདནྟི, ཨེཝམེཀེ ཨབྷིཝདནྟཱིཏི ཨཏྠོ. ཨེཏྟཱཝཏཱ སོལ༹ས སཉྙཱིཝཱདཱ ཀཐིཏཱ. ཨསཉྙཱིཏི ¶ སཉྙཱཝིརཧིཏོ. ཨིམིནཱ པདེན ཨཊྛ ཨསཉྙཱིཝཱདཱ ཀཐིཏཱ. ཏཏིཡཔདེན ཨཊྛ ནེཝསཉྙཱིནཱསཉྙཱིཝཱདཱ ཀཐིཏཱ. སཏོ ཝཱ པན སཏྟསྶཱཏི ཨཐཝཱ པན ཝིཛྫམཱནསྶེཝ སཏྟསྶ. ཨུཙྪེདནྟི ཨུཔཙྪེདཾ. ཝིནཱསནྟི ཨདསྶནཾ. ཝིབྷཝནྟི བྷཱཝཝིགམཾ. སབྦཱནེཏཱནི ཨཉྙམཉྙཝེཝཙནཱནེཝ. ཏཏྠ དྭེ ཛནཱ ཨུཙྪེདདིཊྛིཾ གཎྷནྟི – ལཱབྷཱི ¶ ཙ ཨལཱབྷཱི ཙ. ཏཏྠ ལཱབྷཱི ཨརཧཏོ དིབྦེན ཙཀྑུནཱ ཙུཏིཾ དིསྭཱ ཨུཔཔཏྟིཾ ཨཔསྶནྟོ, ཡོ ཝཱ ཙུཏིམཏྟམེཝ དཊྛུཾ སཀྐོཏི ན ཨུཔཔཱཏཾ, སོ ཨུཙྪེདདིཊྛིཾ གཎྷཱཏི. ཨལཱབྷཱི ‘ཀོ པརལོཀཾ ཛཱནཱཏཱི’ཏི ཀཱམསུཁགིདྡྷཏཱཡ ཝཱ ‘ཡཐཱ རུཀྑཏོ པཎྞཱནི པཏིཏཱནི ན པུན ཝིརུཧནྟི, ཨེཝཾ སཏྟཱ’ཏིཨཱདིནཱ ཝིཏཀྐེན ཝཱ ཨུཙྪེདཾ གཎྷཱཏི. ཨིདྷ པན ཏཎྷཱདིཊྛཱིནཾ ཝསེན ཏཐཱ ཙ ཨཉྙཐཱ ཙ ཝིཀཔྤེཏྭཱཝ ཨུཔྤནྣཱ སཏྟ ཨུཙྪེདཝཱདཱ ཀཐིཏཱ. ཏེསཉྷི ཨིདཾ སངྒཧཝཙནཾ. དིཊྛདྷམྨནིབྦཱནཾ ཝཱ པནེཀེཏི ཨེཏྠ དིཊྛདྷམྨོཏི པཙྩཀྑདྷམྨོ ཝུཙྩཏི. ཏཏྠ ཏཏྠ པཊིལདྡྷཏྟབྷཱཝསྶེཏཾ ཨདྷིཝཙནཾ. དིཊྛདྷམྨེ ནིབྦཱནཾ དིཊྛདྷམྨནིབྦཱནཾ; ཨིམསྨིཾཡེཝ ཨཏྟབྷཱཝེ དུཀྑཱ ཝཱུཔསམྨནྟི ཨཏྠོ. ཨིདཾ པཉྩནྣཾ དིཊྛདྷམྨནིབྦཱནཝཱདཱནཾ སངྒཧཝཙནཾ.

༩༤༢. ཝེརཱཏི ཝེརཙེཏནཱ. བྱསནཱཏི ཝིནཱསཱ. ཨཀྑནྟིཡཱཏི ཨནདྷིཝཱསནཱཡ. ཨཔྤིཡོཏི དསྶནསཝནཔཊིཀཱུལཏཱཡ ན པིཡཱཡིཏབྦོ. ཙིནྟེཏུམྤི པཊིཀཱུལཏྟཱ མནོ ཨེཏསྨིཾ ན ཨཔྤེཏཱིཏི ཨམནཱཔོ. ཝེརབཧུལོཏི བཧུཝེརོ. ཝཛྫབཧུལོཏི བཧུདོསོ.

ཨཱཛཱིཝཀབྷཡནྟི ཨཱཛཱིཝཾ ཛཱིཝིཏཝུཏྟིཾ པཊིཙྩ ཨུཔྤནྣཾ བྷཡཾ ¶ . ཏཾ ཨགཱརིཀསྶཔི ཧོཏི ཨནགཱརིཀསྶཔི. ཏཏྠ ཨགཱརིཀེན ཏཱཝ ཨཱཛཱིཝཧེཏུ བཧུཾ ཨཀུསལཾ ཀཏཾ ཧོཏི. ཨཐསྶ མརཎསམཡེ ནིརཡེ ཨུཔཊྛཧནྟེ བྷཡཾ ཨུཔྤཛྫཏི. ཨནགཱརིཀེནཱཔི བཧུ ཨནེསནཱ ཀཏཱ ཧོཏི. ཨཐསྶ མརཎཀཱལེ ནིརཡེ ཨུཔཊྛཧནྟེ བྷཡཾ ཨུཔྤཛྫཏི. ཨིདཾ ཨཱཛཱིཝཀབྷཡཾ ནཱམ. ཨསིལོཀབྷཡནྟི གརཧབྷཡཾ པརིསསཱརཛྫབྷཡནྟི ཀཏཔཱཔསྶ པུགྒལསྶ སནྣིཔཏིཏཾ པརིསཾ ཨུཔསངྐམནྟསྶ སཱརཛྫསངྑཱཏཾ བྷཡཾ ཨུཔྤཛྫཏི. ཨིདཾ པརིསསཱརཛྫབྷཡཾ ནཱམ. ཨིཏརདྭཡཾ པཱཀཊམེཝ.

༩༤༣. དིཊྛདྷམྨནིབྦཱནཝཱརེསུ པཉྩཧི ཀཱམགུཎེཧཱིཏི མནཱཔིཡརཱུཔཱདཱིཧི པཉྩཧི ཀཱམཀོཊྛཱསེཧི བནྡྷནེཧི ཝཱ. སམཔྤིཏོཏི སུཊྛུ ཨཔྤིཏོ ཨལླཱིནོ ཧུཏྭཱ. སམངྒཱིབྷཱུཏོཏི སམནྣཱགཏོ. པརིཙཱརེཏཱིཏི ཏེསུ ཀཱམགུཎེསུ ཡཐཱསུཁཾ ཨིནྡྲིཡཱནི ཙཱརེཏི སཉྩཱརེཏི ཨིཏོ ཙིཏོ ¶ ཙ ཨུཔནེཏི; ཨཐ ཝཱ པན ལལ༹ཏི རམཏི ཀཱིལ༹ཏཱིཏི. ཨེཏྠ ཙ དུཝིདྷཱ ཀཱམགུཎཱ – མཱནུསྶཀཱ ཙེཝ དིབྦཱ ཙ. མཱནུསྶཀཱ མནྡྷཱཏུཀཱམགུཎསདིསཱ དཊྛབྦཱ; དིབྦཱ པརནིམྨིཏཝསཝཏྟིདེཝརཱཛསྶ ཀཱམགུཎསདིསཱཏི. ཨེཝརཱུཔེ ཀཱམེ ¶ ཨུཔགཏཉྷི ཏེ པརམདིཊྛདྷམྨནིབྦཱནཔྤཏྟོ ཧོཏཱིཏི ཝདནྟི. ཏཏྠ པརམདིཊྛདྷམྨནིབྦཱནནྟི པརམཾ དིཊྛདྷམྨནིབྦཱནཾ, ཨུཏྟམནྟི ཨཏྠོ.

དུཏིཡཝཱརེ ཧུཏྭཱ ཨབྷཱཝཊྛེན ཨནིཙྩཱ; པཊིཔཱིལ༹ནཊྛེན དུཀྑཱ; པཀཏིཛཧནཊྛེན ཝིཔརིཎཱམདྷམྨཱཏི ཝེདིཏབྦཱ. ཏེསཾ ཝིཔརིཎཱམཉྙཐཱབྷཱཝཱཏི ཏེསཾ ཀཱམཱནཾ ཝིཔརིཎཱམསངྑཱཏཱ ཨཉྙཐཱབྷཱཝཱ. ‘ཡམྤི མེ ཨཧོསི ཏམྤི མེ ནཏྠཱི’ཏི ཝུཏྟནཡེན ཨུཔྤཛྫནྟི སོཀཔརིདེཝདུཀྑདོམནསྶུཔཱཡཱསཱ. ཏཏྠ ཨནྟོནིཛ྄ཛྷཱཡནལཀྑཎོ སོཀོ; ཏནྣིསྶིཏལཱལཔྤལཀྑཎོ པརིདེཝོ; ཀཱཡཔཊིཔཱིལ༹ནལཀྑཎཾ དུཀྑཾ; མནོཝིགྷཱཏལཀྑཎཾ དོམནསྶཾ; ཝིགྷཱཏལཀྑཎོ ཨུཔཱཡཱསོ.

ཝིཏཀྐིཏནྟི ཨབྷིནིརོཔནཝསེན པཝཏྟོ ཝིཏཀྐོ. ཝིཙཱརིཏནྟི ཨནུམཛྫནཝསེན པཝཏྟོ ཝིཙཱརོ. ཨེཏེན ཨེཏནྟི ཨེཏེན ཝིཏཀྐེན ཙ ཝིཙཱརེན ཙ ཨེཏཾ པཋམཛ྄ཛྷཱནཾ ཨོལཱ༹རིཀཾ སཀཎྚཀཾ ཝིཡ ཁཱཡཏི.

པཱིཏིགཏནྟི པཱིཏིམེཝ. ཙེཏསོ ཨུཔྤིལཱཝིཏནྟི ཙིཏྟསྶ ཨུཔྤིལབྷཱཝཀརཎཾ. ཙེཏསོ ཨཱབྷོགོཏི ཛྷཱནཱ ཝུཊྛཱཡ ¶ ཏསྨིཾ སུཁེ པུནཔྤུནཾ ཙིཏྟསྶ ཨཱབྷོགོ མནསིཀཱརོཏི. སེསཾ སབྦཏྠ ཨུཏྟཱནཏྠམེཝཱཏི.

པཉྩཀནིདྡེསཝཎྞནཱ ནིཊྛིཏཱ.

(༦.) ཚཀྐནིདྡེསཝཎྞནཱ

༩༤༤. ཚཀྐནིདྡེསེ ཡསྨཱ ཀུདྡྷོ ཝཱ ཀོདྷཝསེན, སནྡིཊྛིཔརཱམཱསཱི ཝཱ སནྡིཊྛིཔརཱམཱསིཏཱཡ ¶ ཀལཧཾ ཝིགྒཧཾ ཝིཝཱདཾ ཨཱཔཛྫཏི, ཏསྨཱ ཀོདྷཱདཡོ ‘ཝིཝཱདམཱུལཱནཱི’ཏི ཝུཏྟཱ.

ཚནྡརཱགནིདྡེསེ ཀཱམགེཧསིཏཏྟཱ ཚནྡརཱགཱ གེཧསྶིཏཱ དྷམྨཱཏི སངྒཧཏོ ཝཏྭཱ པུན པབྷེདཏོ དསྶེཏུཾ མནཱཔིཡེསུ རཱུཔེསཱུཏིཨཱདི ཝུཏྟཾ. ཏཏྠ མནཱཔིཡེསཱུཏི མནཝཌྜྷནཀེསུ ཨིཊྛེསུ. ཝིརོདྷཱ ཨེཝ ཝིརོདྷཝཏྠཱུནི. ཨམནཱཔིཡེསཱུཏི ཨནིཊྛེསུ.

༩༤༥. ཨགཱརཝེསུ ཨགཱརཝོཏི གཱརཝཝིརཧིཏོ. ཨཔྤཏིསྶོཏི ཨཔྤཏིསྶཡོ ཨནཱིཙཝུཏྟི. ཨེཏྠ པན ཡོ བྷིཀྑུ སཏྠརི དྷརམཱནེ ཏཱིསུ ཀཱལེསུ ཨུཔཊྛཱནཾ ན ཡཱཏི, སཏྠརི ཨནུཔཱཧནེ ཙངྐམནྟེ སཨུཔཱཧནོ ཙངྐམཏི ¶ , ནཱིཙེ ཙངྐམེ ཙངྐམནྟེ ཨུཙྩེ ཙངྐམེ ཙངྐམཏི, ཧེཊྛཱ ཝསནྟེ ཨུཔརི ཝསཏི, སཏྠུདསྶནཊྛཱནེ ཨུབྷོ ཨཾསེ པཱརུཔཏི, ཚཏྟཾ དྷཱརེཏི, ཨུཔཱཧནཾ དྷཱརེཏི, ནྷཱཡཏི, ཨུཙྩཱརཾ ཝཱ པསྶཱཝཾ ཝཱ ཀརོཏི, པརིནིབྦུཏེ ཝཱ པན ཙེཏིཡཾ ཝནྡིཏུཾ ན གཙྪཏི, ཙེཏིཡསྶ པཉྙཱཡནཊྛཱནེ སཏྠུདསྶནཊྛཱནེ ཝུཏྟཾ སབྦཾ ཀརོཏི – ཨཡཾ སཏྠརི ཨགཱརཝོ ནཱམ. ཡོ པན དྷམྨསཝནེ སངྒྷུཊྛེ སཀྐཙྩཾ ན གཙྪཏི, སཀྐཙྩཾ དྷམྨཾ ན སུཎཱཏི, སམུལླཔནྟོ ནིསཱིདཏི, ན སཀྐཙྩཾ གཎྷཱཏི, ན སཀྐཙྩཾ ཝཱཙེཏི – ‘ཨཡཾ དྷམྨེ ཨགཱརཝོ ནཱམ. ཡོ པན ཐེརེན བྷིཀྑུནཱ ཨནཛ྄ཛྷིཊྛོ དྷམྨཾ དེསེཏི, པཉྷཾ ཀཐེཏི, ཝུཌྜྷེ བྷིཀྑཱུ གྷཊྚེནྟོ གཙྪཏི, ཏིཊྛཏི, ནིསཱིདཏི, དུསྶཔལླཏྠིཀཾ ཝཱ ཧཏྠཔལླཏྠིཀཾ ཝཱ ཀརོཏི, སངྒྷམཛ྄ཛྷེ ཨུབྷོ ཨཾསེ པཱརུཔཏི, ཚཏྟུཔཱཧནཾ དྷཱརེཏི – ཨཡཾ སངྒྷེ ཨགཱརཝོ ནཱམ. ཨེཀབྷིཀྑུསྨིམྤི ཧི ཨགཱརཝེ ཀཏེ སངྒྷེ ཨགཱརཝོ ཀཏོཝ ཧོཏི. ཏིསྶོ སིཀྑཱ པན ཨཔཱུརཡམཱནོཝ སིཀྑཱཡ ཨགཱརཝོ ནཱམ. ཨཔྤམཱདལཀྑཎཾ ཨནནུབྲཱུཧཡམཱནོ ཨཔྤམཱདེ ཨགཱརཝོ ནཱམ. དུཝིདྷཾ པཊིསནྠཱརཾ ཨཀརོནྟོ པཊིསནྠཱརེ ཨགཱརཝོ ནཱམ.

པརིཧཱནིཡཱ དྷམྨཱཏི པརིཧཱནཀརཱ དྷམྨཱ. ཀམྨཱརཱམཏཱཏི ¶ ནཝཀམྨེ ཝཱ ཙཱིཝརཝིཙཱརཎཱདཱིསུ ཝཱ ཀམྨེསུ ཨབྷིརཏི ཡུཏྟཔཡུཏྟཏཱ. བྷསྶཱརཱམཏཱཏི ཏིརཙྪཱནཀཐཱཝསེན བྷསྶེ ཡུཏྟཔཡུཏྟཏཱ. ནིདྡཱརཱམཏཱཏི ནིདྡཱཡ ཡུཏྟཔཡུཏྟཏཱ. སངྒཎིཀཱརཱམཏཱཏི སངྒཎིཀཱཡ ཡུཏྟཔཡུཏྟཏཱ. སཾསགྒཱརཱམཏཱཏི སཝནསཾསགྒེ, དསྶནསཾསགྒེ, སམུལླཱཔསཾསགྒེ, པརིབྷོགསཾསགྒེ, ཀཱཡསཾསགྒེཏི པཉྩཝིདྷེ སཾསགྒེ ཡུཏྟཔཡུཏྟཏཱ. པཔཉྩཱརཱམཏཱཏི ཏཎྷཱམཱནདིཊྛིཔཔཉྩེསུ ཡུཏྟཔཡུཏྟཏཱ.

༩༤༦. སོམནསྶུཔཝིཙཱརཱདཱིསུ ¶ སོམནསྶེན སདྡྷིཾ ཨུཔཝིཙརནྟཱིཏི སོམནསྶུཔཝིཙཱརཱ. ཙཀྑུནཱ རཱུཔཾ དིསྭཱཏི ཙཀྑུཝིཉྙཱཎེན རཱུཔཾ པསྶིཏྭཱ. སོམནསྶཊྛཱནིཡནྟི སོམནསྶསྶ ཨཱརམྨཎཝསེན ཀཱརཎབྷཱུཏཾ. ཨུཔཝིཙརཏཱིཏི ཏཏྠ ཝིཙཱརཔྤཝཏྟནེན ཨུཔཝིཙརཏི. ཝིཏཀྐོ པན ཏཾསམྤཡུཏྟོ ཝཱཏི ཨིམིནཱ ནཡེན ཏཱིསུཔི ཚཀྐེསུ ཨཏྠོ ཝེདིཏབྦོ.

༩༤༧. གེཧསིཏཱནཱིཏི ཀཱམགུཎནིསྶིཏཱནི. སོམནསྶཱནཱིཏི ཙེཏསིཀསུཁཱནི. དོམནསྶཱནཱིཏི ཙེཏསིཀདུཀྑཱནི. ཨུཔེཀྑཱཏི ཨཉྙཱཎསམྤཡུཏྟཱ ¶ ཨུཔེཀྑཱ ཝེདནཱ, ཨཉྙཱཎུཔེཀྑཱཏིཔི ཨེཏཱསཾཡེཝ ནཱམཾ.

༩༤༨. ཨཏྠི མེ ཨཏྟཱཏི ཝཱཏི སབྦཔདེསུ ཝཱ-སདྡོ ཝིཀཔྤཏྠོ; ཨེཝཾ ཝཱ དིཊྛི ཨུཔྤཛྫཏཱིཏི ཝུཏྟཾ ཧོཏི. ཨཏྠི མེ ཨཏྟཱཏི ཙེཏྠ སསྶཏདིཊྛི སབྦཀཱལེསུ ཨཏྟནོ ཨཏྠིཏཾ གཎྷཱཏི. སཙྩཏོ ཐེཏཏོཏི བྷཱུཏཏོ ཙ ཐིརཏོ ཙ; ཨིདཾ སཙྩནྟི སུཊྛུ དལ༹ྷབྷཱཝེནཱཏི ཝུཏྟཾ ཧོཏི. ནཏྠི མེ ཨཏྟཱཏི ཨཡཾ པན ཨུཙྪེདདིཊྛི, སཏོ སཏྟསྶ ཏཏྠ ཏཏྠ ཝིབྷཝགྒཧཎཏོ. ཨཐ ཝཱ པུརིམཱཔི ཏཱིསུ ཀཱལེསུ ཨཏྠཱིཏི གཧཎཏོ སསྶཏདིཊྛི, པཙྩུཔྤནྣམེཝ ཨཏྠཱིཏི གཎྷནྟཱི ཨུཙྪེདདིཊྛི. པཙྪིམཱཔི ཨཏཱིཏཱནཱགཏེསུ ནཏྠཱིཏི གཧཎཏོ ‘བྷསྨནྟཱ ཨཱཧུཏིཡོ’ཏི གཧིཏདིཊྛིཀཱནཾ ཝིཡ ཨུཙྪེདདིཊྛི, ཨཏཱིཏེཡེཝ ནཏྠཱིཏི གཎྷནྟཱི ཨདྷིཙྩསམུཔྤནྣིཀསྶེཝ སསྶཏདིཊྛི. ཨཏྟནཱ ཝཱ ཨཏྟཱནཾ སཉྫཱནཱམཱིཏི སཉྙཱཀྑནྡྷསཱིསེན ཁནྡྷེ ཨཏྟཱཏི གཧེཏྭཱ སཉྙཱཡ ཨཝསེསཀྑནྡྷེ སཉྫཱནནཏོ ‘ཨིམིནཱ ཨཏྟནཱ ཨིམཾ ཨཏྟཱནཾ སཉྫཱནཱམཱི’ཏི ཨེཝཾ ཧོཏི. ཨཏྟནཱ ཝཱ ཨནཏྟཱནནྟི སཉྙཱཀྑནྡྷཾཡེཝ ཨཏྟཱཏི གཧེཏྭཱ ཨིཏརེ ཙཏྟཱརོ ཁནྡྷེ ཨནཏྟཱཏི གཧེཏྭཱ སཉྙཱཡ ཏེསཾ ཛཱནནཏོ ཨེཝཾ ཧོཏི. ཨནཏྟནཱ ཝཱ ཨཏྟཱནནྟི སཉྙཱཀྑནྡྷཾ ཨནཏྟཱཏི ¶ ཨིཏརེ ཙ ཙཏྟཱརོ ཁནྡྷེ ཨཏྟཱཏི གཧེཏྭཱ སཉྙཱཡ ཏེསཾ ཛཱནནཏོ ཨེཝཾ ཧོཏི. སབྦཱཔི སསྶཏུཙྪེདདིཊྛིཡོཝ.

ཝདོ ཝེདེཡྻོཏི ཨཱདཡོ པན སསྶཏདིཊྛིཡཱ ཨེཝ ཨབྷིནིཝེསཱཀཱརཱ. ཏཏྠ ཝདཏཱིཏི ཝདོ; ཝཙཱིཀམྨསྶ ཀཱརཀོཏི ཝུཏྟཾ ཧོཏི. ཝེདཡཏཱིཏི ཝེདེཡྻོ; ཛཱནཱཏི ཨནུབྷཝཏི ཙཱཏི ཝུཏྟཾ ཧོཏི. ཨིདཱནི ཡཾ སོ ཝེདེཏི ཏཾ དསྶེཏུཾ ཏཏྲ ཏཏྲ དཱིགྷརཏྟཾ ཀལྱཱཎཔཱཔཀཱནནྟིཨཱདི ཝུཏྟཾ. ཏཏྠ ཏཏྲ ཏཏྲཱཏི ཏེསུ ཏེསུ ཡོནིགཏིཋིཏིནིཝཱསནིཀཱཡེསུ ཨཱརམྨཎེསུ ཝཱ. དཱིགྷརཏྟནྟི ཙིརརཏྟཾ. པཙྩནུབྷོཏཱིཏི པཊིསཾཝེདཡཏི. ན སོ ཛཱཏོ ནཱཧོསཱིཏི སོ ཨཏྟཱ ཨཛཱཏིདྷམྨཏོ ¶ ན ཛཱཏོ ནཱམ; སདཱ ཝིཛྫམཱནོ ཡེཝཱཏི ཨཏྠོ. ཏེནེཝ ཨཏཱིཏེ ནཱཧོསི, ཨནཱགཏེཔི ན བྷཝིསྶཏི. ཡོ ཧི ཛཱཏོ སོ ཨཧོསི, ཡོ ཙ ཛཱཡིསྶཏི སོ བྷཝིསྶཏཱིཏི. ཨཐཝཱ ‘ན སོ ཛཱཏོ ནཱཧོསཱི’ཏི སོ སདཱ ཝིཛྫམཱནཏྟཱ ཨཏཱིཏེཔི ན ཛཱཏུ ནཱཧོསི ¶ , ཨནཱགཏེཔི ན ཛཱཏུ ན བྷཝིསྶཏི. ནིཙྩོཏི ཨུཔྤཱདཝཡརཧིཏོ. དྷུཝོཏི ཐིརོ སཱརབྷཱུཏོ. སསྶཏོཏི སབྦཀཱལིཀོ. ཨཝིཔརིཎཱམདྷམྨོཏི ཨཏྟནོ པཀཏིབྷཱཝཾ ཨཝིཛཧནདྷམྨོ ཀཀཎྚཀོ ཝིཡ ནཱནཔྤཀཱརཏྟཾ ནཱཔཛྫཏི. ཨེཝམཡཾ སབྦཱསཝདིཊྛི (མ. ནི. ༡.༡༧ ཨཱདཡོ) ནཱམ ཀཐིཏཱ. སེསཾ སབྦཏྠ ཨུཏྟཱནཏྠམེཝཱཏི.

ཚཀྐནིདྡེསཝཎྞནཱ.

(༧.) སཏྟཀནིདྡེསཝཎྞནཱ

༩༤༩. སཏྟཀནིདྡེསེ ཐཱམགཏཊྛེན ཨཔྤཧཱིནཊྛེན ཙ ཨནུསེནྟཱིཏི ཨནུསཡཱ. ཝཊྚསྨིཾ སཏྟེ སཾཡོཛེནྟི གྷཊེནྟཱིཏི སཾཡོཛནཱནི. སམུདཱཙཱརཝསེན པརིཡུཊྛཧནྟཱིཏི པརིཡུཊྛཱནཱནི. ཀཱམརཱགོཝ པརིཡུཊྛཱནཾ ཀཱམརཱགཔརིཡུཊྛཱནཾ. སེསེསུཔི ཨེསེཝ ནཡོ.

༩༥༠. ཨསཏཾ དྷམྨཱ, ལཱམཀཊྛེན ཝཱ ཨསནྟཱ དྷམྨཱཏི ཨསདྡྷམྨཱ. རཱགཱདཱིཧི དོསེཧི དུཊྛཱནི ཙརིཏཱནཱིཏི དུཙྩརིཏཱནི. ཏེན ཏེནཱཀཱརེན མཉྙནྟཱིཏི མཱནཱ.

༩༥༡. དིཊྛིནིདྡེསེ རཱུཔཱིཏི རཱུཔཝཱ. ཙཱཏུམཧཱབྷཱུཏིཀོཏི ཙཏུམཧཱབྷཱུཏམཡོ. མཱཏཱཔིཏཱུནཾ ཨེཏནྟི མཱཏཱཔེཏྟིཀཾ. ཀིནྟཾ? སུཀྐསོཎིཏཾ. མཱཏཱཔེཏྟིཀེ སམྦྷཱུཏོ ཛཱཏོཏི མཱཏཱཔེཏྟིཀསམྦྷཝོ. ཨིདྷ རཱུཔཀཱཡསཱིསེན མནུསྶཏྟབྷཱཝཾ ཨཏྟཱཏི ཝདཏི. དུཏིཡོ ཏཾ པཊིཀྑིཔིཏྭཱ དིབྦཏྟབྷཱཝཾ ཝདཏི. དིབྦོཏི དེཝལོཀེ སམྦྷཱུཏོ. ཀཱམཱཝཙརོཏི ཚཀཱམཱཝཙརདེཝཔརིཡཱཔནྣོ ¶ . ཀབལཱི༹ཀཱརཾ བྷཀྑཡཏཱིཏི ཀབལཱི༹ཀཱརབྷཀྑོ. མནོམཡོཏི ཛྷཱནམནེན ནིབྦཏྟོ. སབྦངྒཔཙྩངྒཱིཏི སབྦངྒཔཙྩངྒཡུཏྟོ. ཨཧཱིནིནྡྲིཡོཏི པརིཔུཎྞིནྡྲིཡོ; ཡཱནི བྲཧྨལོཀེ ཨཏྠི ཏེསཾ ཝསེན, ཨིཏརེསཉྩ སཎྛཱནཝསེནེཏཾ ཝུཏྟཾ. ཨཱཀཱསཱནཉྩཱཡཏནཱུཔགོཏི ¶ ཨཱཀཱསཱནཉྩཱཡཏནབྷཱཝཾ ཨུཔགཏོ. ཨིཏརེསུཔི ཨེསེཝ ནཡོ. སེསཾ སབྦཏྠ ཨུཏྟཱནཏྠམེཝཱཏི.

སཏྟཀནིདྡེསཝཎྞནཱ.

(༨.) ཨཊྛཀནིདྡེསཝཎྞནཱ

༩༥༢. ཨཊྛཀནིདྡེསེ ¶ ཀིལེསཱཡེཝ ཀིལེསཝཏྠཱུནི. ཀུསཱིཏཝཏྠཱུནཱིཏི ཀུསཱིཏསྶ ཨལསསྶ ཝཏྠཱུནི, པཏིཊྛཱ, ཀོསཛྫཀཱརཎཱནཱིཏི ཨཏྠོ. ཀམྨཾ ཀཱཏབྦཾ ཧོཏཱིཏི ཙཱིཝརཝིཙཱརཎཱདིཀམྨཾ ཀཱཏབྦཾ ཧོཏི. ན ཝཱིརིཡཾ ཨཱརབྷཏཱིཏི དུཝིདྷམྤི ཝཱིརིཡཾ ནཱརབྷཏི. ཨཔྤཏྟསྶཱཏི ཛྷཱནཝིཔསྶནཱམགྒཕལདྷམྨསྶ ཨཔྤཏྟསྶ པཏྟིཡཱ. ཨནདྷིགཏསྶཱཏི ཏསྶེཝ ཨནདྷིགཏསྶ ཨདྷིགམཏྠཱཡ. ཨསཙྪིཀཏསྶཱཏི ཏསྶེཝ ཨསཙྪིཀཏསྶ སཙྪིཀརཎཏྠཱཡ. ཨིདཾ པཋམནྟི ‘ཨིདཾ ཧནྡཱཧཾ ནིཔཛྫཱམཱི’ཏི ཨེཝཾ ཨོསཱིདནཾ པཋམཾ ཀུསཱིཏཝཏྠུ. ཨིམིནཱ ནཡེན སབྦཏྠ ཨཏྠོ ཝེདིཏབྦོ.

མཱསཱཙིཏཾ མཉྙེཏི ཨེཏྠ པན མཱསཱཙིཏཾ ནཱམ ཏིནྟམཱསོ; ཡཐཱ ཏིནྟམཱསོ གརུཀོ ཧོཏི, ཨེཝཾ གརུཀོཏི ཨདྷིཔྤཱཡོ. གིལཱནཱ ཝུཊྛིཏོ ཧོཏཱིཏི གིལཱནོ ཧུཏྭཱ པཙྪཱ ཝུཊྛིཏོ ཧོཏི.

༩༥༤. ཨཊྛསུ ལོཀདྷམྨེསཱུཏི ཨེཏྠ ལོཀསྶ དྷམྨཱཏི ལོཀདྷམྨཱ. ཨེཏེཧི ཝིམུཏྟོ ནཱམ ནཏྠི, བུདྡྷཱནམྤི ཧོནྟི ཨེཝ. ཏསྨཱ ‘ལོཀདྷམྨཱ’ཏི ཝུཙྩནྟི. པཊིགྷཱཏོཏི པཊིཧཉྙནཱཀཱརོ. ལཱབྷེ སཱརཱགོཏི ‘ཨཧཾ ལཱབྷཾ ལབྷཱམཱི’ཏི ཨེཝཾ གེཧསིཏསོམནསྶཝསེན ཨུཔྤནྣོ སཱརཱགོ; སོ ཙིཏྟཾ པཊིཧནཏི. ཨལཱབྷེ པཊིཝིརོདྷོཏི ‘ཨཧཾ ལཱབྷཾ ན ལབྷཱམཱི’ཏི དོམནསྶཝསེན ཨུཔྤནྣཝིརོདྷོ; སོཔི ཙིཏྟཾ པཊིཧནཏི. ཏསྨཱ ‘པཊིགྷཱཏོ’ཏི ཝུཏྟོ. ཡསཱདཱིསུཔི ‘ཨཧཾ མཧཱཔརིཝཱརོ, ཨཧཾ ཨཔྤཔརིཝཱརོ, ཨཧཾ པསཾསཔྤཏྟོ, ཨཧཾ གརཧཔྤཏྟོ, ཨཧཾ སུཁཔྤཏྟོ, ཨཧཾ དུཀྑཔྤཏོ’ཏི ཨེཝམེཏེསཾ ཨུཔྤཏྟི ཝེདིཏབྦཱ. ཨནརིཡཝོཧཱརཱཏི ཨནརིཡཱནཾ ཝོཧཱརཱ.

༩༥༧. པུརིསདོསཱཏི ¶ པུརིསཱནཾ དོསཱ. ན སརཱམཱིཏི ‘མཡཱ ཨེཏསྶ ཀམྨསྶ ཀཏཊྛཱནཾ ན སརཱམི ན སལླཀྑེམཱི’ཏི ¶ ཨེཝཾ ཨསྶཏིབྷཱཝེན ནིབྦེཋེཏི མོཙེཏི. ཙོདཀཾཡེཝ པཊིཔྥརཏཱིཏི པཊིཝིརུདྡྷོ ཧུཏྭཱ ཕརཏི, པཊིབྷཱཎིཏབྷཱཝེན ཏིཊྛཏི. ཀིཾ ནུ ཁོ ཏུཡ྄ཧནྟི ‘ཏུཡ྄ཧཾ བཱལསྶ ཨབྱཏྟསྶ བྷཎིཏེན ནཱམ ཀིཾ’ ཡོ ཏྭཾ ནེཝ ཝཏྠུནཱ ཨཱཔཏྟིཾ, ན ཙོདནཾ ཛཱནཱསཱི’ཏི དཱིཔེཏི; ‘ཏྭཾ པི ནཱམ ཨེཝཾ ཀིཉྩི ཨཛཱནནྟོ བྷཎིཏབྦཾ མཉྙིསྶསཱི’ཏི ¶ ཨཛ྄ཛྷོཏྠརཏི. པཙྩཱརོཔེཏཱིཏི ‘ཏྭཾ པི ཁོསཱི’ཏིཨཱདཱིནི ཝདནྟོ པཊིཨཱརོཔེཏི. པཊིཀརོཧཱིཏི དེསནཱགཱམིནིཾ དེསེཧི, ཝུཊྛཱནགཱམིནིཏོ ཝུཊྛཱཧི ཏཏོ སུདྡྷནྟེ པཏིཊྛིཏོ ཨཉྙཾ ཙོདེསྶསཱི’ཏི དཱིཔེཏི.

ཨཉྙེནཱཉྙཾ པཊིཙརཏཱིཏི ཨཉྙེན ཀཱརཎེན ཝཙནེན ཝཱ ཨཉྙཾ ཀཱརཎཾ ཝཙནཾ ཝཱ པཊིཙྪཱདེཏི. ‘ཨཱཔཏྟིཾ ཨཱཔནྣོསཱི’ཏི ཝུཏྟོ ‘ཀོ ཨཱཔནྣོ? ཀིཾ ཨཱཔནྣོ? ཀཐཾ ཨཱཔནྣོ? ཀིསྨིཾ ཨཱཔནྣོ? ཀཾ བྷཎཐ? ཀིཾ བྷཎཐཱ’ཏི ཝདཏི. ‘ཨེཝརཱུཔཾ ཀིཉྩི ཏཡཱ དིཊྛ’ནྟི ཝུཏྟེ ‘ན སུཎཱམཱི’ཏི སོཏཾ ཝཱ ཨུཔནེཏི. བཧིདྡྷཱ ཀཐཾ ཨཔནཱམེཏཱིཏི ‘ཨིཏྠནྣཱམཾ ཨཱཔཏྟིཾ ཨཱཔནྣོསཱི’ཏི པུཊྛོ ‘པཱཊལིཔུཏྟཾ གཏོམྷཱི’ཏི ཝཏྭཱ པུན ‘ཏཝ པཱཊལིཔུཏྟགམནཾ ན པུཙྪཱམཱ’ཏི ཝུཏྟེ ‘ཏཏོ རཱཛགཧཾ གཏོམྷཱི’ཏི ‘རཱཛགཧཾ ཝཱ ཡཱཧི, བྲཱཧྨཎགེཧཾ ཝཱ; ཨཱཔཏྟིཾ ཨཱཔནྣོསཱི’ཏི? ‘ཏཏྠ མེ སཱུཀརམཾསཾ ལདྡྷ’ནྟིཨཱདཱིནི ཝདནྟོ ཀཐཾ བཧིདྡྷཱ ཝིཀྑིཔཏི. ཀོཔནྟི ཀུཔིཏབྷཱཝཾ. དོསནྟི དུཊྛབྷཱཝཾ. ཨུབྷཡམྤེཏཾ ཀོདྷསྶེཝ ནཱམཾ. ཨཔྤཙྩཡནྟི ཨསནྟུཊྛཱཀཱརཾ; དོམནསྶསྶེཏཾ ནཱམཾ. པཱཏུཀརོཏཱིཏི དསྶེཏི པཀཱསེཏི. བཱཧཱཝིཀྑེཔཀཾ བྷཎཏཱིཏི བཱཧཱ ཝིཀྑིཔིཏྭཱ ཨལཛྫིཝཙནཾ ཝདཏི. ཝིཧེསེཏཱིཏི ཝིཧེཋེཏི བཱདྷཏི. ཨནཱདིཡིཏྭཱཏི ཙིཏྟཱིཀཱརེན ཨགྒཧེཏྭཱ ཨཝཛཱནིཏྭཱ; ཨནཱདརོ ཧུཏྭཱཏི ཨཏྠོ.

ཨཏིབཱལ༹ྷནྟི ཨཏིདལ༹ྷཾ ཨཏིཔྤམཱཎཾ. མཡི བྱཱཝཊཱཏི མཡི བྱཱཔཱརཾ ཨཱཔནྣཱ. ཧཱིནཱཡཱཝཏྟིཏྭཱཏི ཧཱིནསྶ གིཧིབྷཱཝསྶ ཨཏྠཱཡ ཨཱཝཏྟིཏྭཱ; གིཧཱི ཧུཏྭཱཏི ཨཏྠོ. ཨཏྟམནཱ ཧོཐཱཏི ཏུཊྛཙིཏྟཱ ཧོཐ, ‘མཡཱ ལབྷིཏབྦཾ ལབྷཐ, མཡཱ ཝསིཏབྦཊྛཱནེ ཝསཐ, ཕཱསུཝིཧཱརོ ཝོ མཡཱ ཀཏོ’ཏི ཨདྷིཔྤཱཡེན ཝདཏི.

༩༥༨. ཨསཉྙཱིཏི པཝཏྟོ ཝཱདོ ཨསཉྙཱིཝཱདོ; སོ ཏེསཾ ཨཏྠཱིཏི ཨསཉྙཱིཝཱདཱ. རཱུཔཱི ཨཏྟཱཏིཨཱདཱིསུ ལཱབྷིནོ ཀསིཎརཱུཔཾ ཨཏྟཱཏི གཧེཏྭཱ རཱུཔཱིཏི དིཊྛི ཨུཔྤཛྫཏི; ཨལཱབྷིནོ ཏཀྐམཏྟེནེཝ ¶ ¶ , ཨཱཛཱིཝཀཱནཾ ཝིཡ. ལཱབྷིནོཡེཝ ཙ པན ཨརཱུཔསམཱཔཏྟིནིམིཏྟཾ ཨཏྟཱཏི གཧེཏྭཱ ཨརཱུཔཱིཏི དིཊྛི ཨུཔྤཛྫཏི; ཨལཱབྷིནོ ཏཀྐམཏྟེནེཝ, ནིགཎྛཱནཾ ཝིཡ. ཨསཉྙཱིབྷཱཝེ པནེཏྠ ཨེཀནྟེནེཝ ཀཱརཎཾ ན པརིཡེསིཏབྦཾ. དིཊྛིགཏིཀོ ¶ ཧི ཨུམྨཏྟཀོ ཝིཡ ཡཾ ཝཱ ཏཾ ཝཱ གཎྷཱཏི. རཱུཔཱི ཙ ཨརཱུཔཱི ཙཱཏི རཱུཔཱརཱུཔམིསྶཀགཱཧཝསེན ཝུཏྟཾ. ཨཡཾ དིཊྛི རཱུཔཱཝཙརཱརཱུཔཱཝཙརསམཱཔཏྟིལཱབྷིནོཔི ཏཀྐིཀསྶཱཔི ཨུཔྤཛྫཏི. ནེཝ རཱུཔཱི ནཱརཱུཔཱིཏི པན ཨེཀནྟཏོ ཏཀྐིཀདིཊྛིཡེཝ. ཨནྟཝཱཏི པརིཏྟཀསིཎཾ ཨཏྟཏོ གཎྷནྟསྶ དིཊྛི. ཨནནྟཝཱཏི ཨཔྤམཱཎཀསིཎཾ. ཨནྟཝཱ ཙ ཨནནྟཝཱ ཙཱཏི ཨུདྡྷམདྷོ སཔརིཡནྟཾ ཏིརིཡཾ ཨཔརིཡནྟཾ ཀསིཎཾ ཨཏྟཱཏི གཧེཏྭཱ ཨུཔྤནྣདིཊྛི. ནེཝནྟཝཱ ནཱནནྟཝཱཏི ཏཀྐིཀདིཊྛིཡེཝ. སེསཾ སབྦཏྠ ཨུཏྟཱནཏྠམེཝཱཏི.

ཨཊྛཀནིདྡེསཝཎྞནཱ.

(༩.) ནཝཀནིདྡེསཝཎྞནཱ

༩༦༠. ནཝཀནིདྡེསེ ནཝ ཨཱགྷཱཏཝཏྠཱུནཱིཏི སཏྟེསུ ཨུཔྤཏྟིཝསེནེཝ ཀཐིཏཱནི. པུརིསཱནཾ མལཱནཱིཏི པུརིསམལཱནི. ནཝཝིདྷཱཏི ནཝཀོཊྛཱསཱ ནཝཔྤབྷེདཱ ཝཱ.

༩༦༣. ཏཎྷཾ པཊིཙྩཱཏི ཏཎྷཾ ནིསྶཱཡ. པརིཡེསནཱཏི རཱུཔཱདིཨཱརམྨཎཔརིཡེསནཱ. སཱ ཧི ཏཎྷཱཡ སཏི ཧོཏི. ལཱབྷོཏི རཱུཔཱདིཨཱརམྨཎཔཊིལཱབྷོ. སོ ཧི པརིཡེསནཱཡ སཏི ཧོཏི. ཝིནིཙྪཡོ པན ཉཱཎཏཎྷཱདིཊྛིཝིཏཀྐཝསེན ཙཏུབྦིདྷོ. ཏཏྠ ‘‘སུཁཝིནིཙྪཡཾ ཛཉྙཱ, སུཁཝིནིཙྪཡཾ ཉཏྭཱ ཨཛ྄ཛྷཏྟཾ སུཁམནུཡུཉྫེཡྻཱ’’ཏི (མ. ནི. ༣.༣༢༣) ཨཡཾ ཉཱཎཝིནིཙྪཡོ. ‘‘ཝིནིཙྪཡོཏི དྭེ ཝིནིཙྪཡཱ – ཏཎྷཱཝིནིཙྪཡོ ཙ དིཊྛིཝིནིཙྪཡོ ཙཱ’’ཏི (མཧཱནི. ༡༠༢) ཨེཝཾ ཨཱགཏཱནི ཨཊྛསཏཏཎྷཱཝིཙརིཏཱནི ཏཎྷཱཝིནིཙྪཡོ. དྭཱསཊྛི དིཊྛིཡོ དིཊྛིཝིནིཙྪཡོ. ‘‘ཚནྡོ ཁོ, དེཝཱནམིནྡ, ཝིཏཀྐནིདཱནོ’’ཏི (དཱི. ནི. ༢.༣༥༨) ཨིམསྨིཾ པན སུཏྟེ ཨིདྷ ཝིནིཙྪཡོཏི ཝུཏྟོ ཝིཏཀྐོཡེཝ ཨཱགཏོ. ལཱབྷཾ ལབྷིཏྭཱ ཧི ཨིཊྛཱནིཊྛཾ སུནྡརཱསུནྡརཉྩ ཝིཏཀྐེནེཝ ཝིནིཙྪིནཱཏི – ‘ཨེཏྟཀཾ མེ རཱུཔཱརམྨཎཏྠཱཡ བྷཝིསྶཏི ¶ , ཨེཏྟཀཾ སདྡཱདིཨཱརམྨཎཏྠཱཡ ¶ , ཨེཏྟཀཾ མཡ྄ཧཾ བྷཝིསྶཏི, ཨེཏྟཀཾ པརསྶ, ཨེཏྟཀཾ པརིབྷུཉྫིསྶཱམི, ཨེཏྟཀཾ ནིདཧིསྶཱམཱི’ཏི. ཏེན ཝུཏྟཾ ‘‘ལཱབྷཾ པཊིཙྩ ཝིནིཙྪཡོ’’ཏི.

ཚནྡརཱགོཏི ཨེཝཾ ཨཀུསལཝིཏཀྐེན ཝིཏཀྐིཏེ ཝཏྠུསྨིཾ དུབྦལརཱགོ ཙ བལཝརཱགོ ཙ ཨུཔྤཛྫཏི. ཨིདཉྷི ཨིདྷ ཚནྡོཏི དུབྦལརཱགསྶཱདྷིཝཙནཾ ¶ . ཨཛ྄ཛྷོསཱནནྟི ཨཧཾ མམནྟི བལཝསནྣིཊྛཱནཾ. པརིགྒཧོཏི ཏཎྷཱདིཊྛིཝསེན པརིགྒཧཀརཎཾ. མཙྪརིཡནྟི པརེཧི སཱདྷཱརཎབྷཱཝསྶ ཨསཧནཏཱ. ཏེནེཝསྶ པོརཱཎཱ ཨེཝཾ ཝཙནཏྠཾ ཝདནྟི – ‘‘ཨིདཾ ཨཙྪརིཡཾ མཡ྄ཧམེཝ ཧོཏུ, མཱ ཨཉྙསྶ ཨཙྪརིཡཾ ཧོཏཱུཏི པཝཏྟཏྟཱ མཙྪརིཡནྟི ཝུཙྩཏཱི’’ཏི. ཨཱརཀྑོཏི དྭཱརཔིདཧནམཉྫུསགོཔནཱདིཝསེན སུཊྛུ རཀྑཎཾ. ཨདྷིཀརོཏཱིཏི ཨདྷིཀརཎཾ; ཀཱརཎསྶེཏཾ ནཱམཾ. ཨཱརཀྑཱདྷིཀརཎནྟི བྷཱཝནཔུཾསཀཾ; ཨཱརཀྑཧེཏཱུཏི ཨཏྠོ. དཎྜཱདཱནཱདཱིསུ པརནིསེདྷནཏྠཾ དཎྜསྶ ཨཱདཱནཾ དཎྜཱདཱནཾ. ཨེཀཏོདྷཱརཱདིནོ སཏྠསྶ ཨཱདཱནཾ སཏྠཱདཱནཾ. ཀལཧོཏི ཀཱཡཀལཧོཔི ཝཱཙཱཀལཧོཔི. པུརིམོ པུརིམོ ཝིརོདྷོ ཝིགྒཧོ, པཙྪིམོ པཙྪིམོ ཝིཝཱདོ. ཏུཝཾ ཏུཝནྟི ཨགཱརཝཝཙནཾ, ཏྭཾ ཏྭནྟི ཨཏྠོ.

༩༦༤. ཨིཉྫིཏཱནཱིཏི ཨིཉྫནཱནི ཙལནཱནི. ཨསྨཱིཏི ཨིཉྫིཏམེཏནྟིཨཱདཱིཧི སབྦཔདེཧི མཱནོཝ ཀཐིཏོ. ཨཧནྟི པཝཏྟོཔི ཧི མཱནོ ཨིཉྫིཏམེཝ, ཨཡམཧནྟི པཝཏྟོཔི, ནེཝསཉྙཱིནཱསཉྙཱི བྷཝིསྶནྟི པཝཏྟོཔི. སེསནཝཀེཧིཔི མཱནོཝ ཀཐིཏོ. མཱནོ ཧི ཨིཉྫནཏོ ཨིཉྫིཏཾ, མཉྙནཏོ མཉྙིཏཾ, ཕནྡནཏོ ཕནྡིཏཾ, པཔཉྩནཏོ པཔཉྩིཏཾ. ཏེཧི ཏེཧི ཀཱརཎེཧི སངྑཏཏྟཱ སངྑཏནྟི ཙ ཝུཙྩཏི. སེསཾ སབྦཏྠ ཨུཏྟཱནཏྠམེཝཱཏི.

ནཝཀནིདྡེསཝཎྞནཱ.

(༡༠.) དསཀནིདྡེསཝཎྞནཱ

༩༦༦. དསཀནིདྡེསེ ཀིལེསཱ ཨེཝ ཀིལེསཝཏྠཱུནི. ཨཱགྷཱཏཝཏྠཱུནི པནེཏྠ ‘‘ཨནཏྠཾ མེ ཨཙརཱི’’ཏིཨཱདཱིནཾ ¶ ཝསེན ཨཝིཀོཔེཏབྦེ ཁཱཎུཀཎྚཀཱདིམྷིཔི ཨཊྛཱནེ ཨུཔྤནྣཱགྷཱཏེན སདྡྷིཾ ཝུཏྟཱནི.

༩༧༠. མིཙྪཏྟེསུ མིཙྪཱཉཱཎནྟི པཱཔཀིརིཡཱསུ ཨུཔཱཡཙིནྟཱཝསེན པཱཔཾ ཀཏྭཱ ‘སུཀཏཾ མཡཱ’ཏི པཙྩཝེཀྑཎཱཀཱརེན ཨུཔྤནྣོ མོཧོ. མིཙྪཱཝིམུཏྟཱིཏི ¶ ཨཝིམུཏྟསྶེཝ སཏོ ཝིམུཏྟསཉྙིཏཱ. སེསཾ སབྦཏྠ ཨུཏྟཱནཏྠམེཝཱཏི.

དསཀནིདྡེསཝཎྞནཱ.

ཏཎྷཱཝིཙརིཏནིདྡེསཝཎྞནཱ

༩༧༣. ཏཎྷཱཝིཙརིཏནིདྡེསེ ཏཎྷཱཝིཙརིཏཱནཱིཏི ཏཎྷཱསམུདཱཙཱརཱ ཏཎྷཱཔཝཏྟིཡོ. ཨཛ྄ཛྷཏྟིཀསྶ ཨུཔཱདཱཡཱཏི ཨཛ྄ཛྷཏྟིཀཾ ཁནྡྷཔཉྩཀཾ ཨུཔཱདཱཡ. ཨིདཉྷི ཨུཔཡོགཏྠེ སཱམིཝཙནཾ. ཨསྨཱིཏི ཧོཏཱིཏི ཡདེཏཾ ཨཛ྄ཛྷཏྟཾ ཁནྡྷཔཉྩཀཾ ཨུཔཱདཱཡ ཏཎྷཱམཱནདིཊྛིཝསེན སམཱུཧགཱཧཏོ ‘ཨསྨཱི’ཏི ཧོཏི, ཏསྨིཾ སཏཱིཏི ¶ ཨཏྠོ. ཨིཏྠསྨཱིཏི ཧོཏཱིཏིཨཱདཱིསུ པན ཨེཝཾ སམཱུཧཏོ ‘ཨཧ’ནྟི གཧཎེ སཏི ཏཏོ ཨནུཔནིདྷཱཡ ཙ ཨུཔནིདྷཱཡ ཙཱཏི དྭིདྷཱ གཧཎཾ ཧོཏི. ཏཏྠ ཨནུཔནིདྷཱཡཱཏི ཨཉྙཾ ཨཱཀཱརཾ ཨནུཔགམྨ སཀབྷཱཝམེཝ ཨཱརམྨཎཾ ཀཏྭཱ ‘ཨིཏྠསྨཱི’ཏི ཧོཏི; ཁཏྟིཡཱདཱིསུ ‘ཨིདཾཔཀཱརོ ཨཧ’ནྟི ཨེཝཾ ཏཎྷཱམཱནདིཊྛིཝསེན ཧོཏཱིཏི ཨཏྠོ. ཨིདཾ ཏཱཝ ཨནུཔནིདྷཱཡ གཧཎཾ. ཨུཔནིདྷཱཡ གཧཎཾ པན དུཝིདྷཾ ཧོཏི – སམཏོ ཙ ཨསམཏོ ཙ. ཏཾ དསྶེཏུཾ ཨེཝསྨཱིཏི ཙ ཨཉྙཐཱསྨཱིཏི ཙ ཝུཏྟཾ. ཏཏྠ ཨེཝསྨཱིཏི ཨིདཾ སམཏོ ཨུཔནིདྷཱཡ གཧཎཾ; ཡཐཱ ཨཡཾ ཁཏྟིཡོ, ཡཐཱ ཨཡཾ བྲཱཧྨཎོ, ཨེཝཾ ཨཧམྤཱིཏི ཨཏྠོ. ཨཉྙཐཱསྨཱིཏི ཨིདཾ པན ཨསམཏོ གཧཎཾ; ཡཐཱཡཾ ཁཏྟིཡོ, ཡཐཱཡཾ བྲཱཧྨཎོ, ཏཏོ ཨཉྙཐཱ ཨཧཾ ཧཱིནོ ཝཱ ཨདྷིཀོ ཝཱཏི ཨཏྠོ. ཨིམཱནི ཏཱཝ པཙྩུཔྤནྣཝསེན ཙཏྟཱརི ཏཎྷཱཝིཙརིཏཱནི. བྷཝིསྶནྟིཨཱདཱིནི པན ཙཏྟཱརི ཨནཱགཏཝསེན ཝུཏྟཱནི. སེསཾ པུརིམཙཏུཀྐེ ཝུཏྟནཡེནེཝ ཨཏྠོ ཝེདིཏབྦོ. ཨསྨཱིཏི སསྶཏོ ཨསྨི. སཱཏསྨཱིཏི ཨསསྶཏོ ཨསྨི. ཨསསྨཱིཏི སཏསྨཱིཏི ཝཱ པཱཋོ. ཏཏྠ ཨཏྠཱིཏི ཨསཾ; ནིཙྩསྶེཏཾ ཨདྷིཝཙནཾ. སཱིདཏཱིཏི སཏཾ; ཨནིཙྩསྶེཏཾ ཨདྷིཝཙནཾ. ཨིཏི ཨིམཱནི ¶ དྭེ སསྶཏུཙྪེདཝསེན ཝུཏྟཱནཱིཏི ཝེདིཏབྦཱནི. ཨིཏོ པརཱནི སིཡནྟིཨཱདཱིནི ཙཏྟཱརི སཾསཡཔརིཝིཏཀྐཝསེན ཝུཏྟཱནི. ཏཱནི པུརིམཙཏུཀྐེ ཝུཏྟནཡེནེཝ ཨཏྠཏོ ཝེདིཏབྦཱནི. ཨཔཱཧཾ སིཡནྟིཨཱདཱིནི པན ཙཏྟཱརི ‘‘ཨཔི ནཱམཱཧཾ བྷཝེཡྻ’’ནྟི ཨེཝཾ པཏྠནཱཀཔྤནཝསེན ཝུཏྟཱནི. ཏཱནི པུརིམཙཏུཀྐེ ཝུཏྟནཡེནེཝ ཝེདིཏབྦཱནི. ཨེཝམེཏེསུ –

དྭེ ¶ དིཊྛིསཱིསཱ ཙཏྟཱརོ, སུདྡྷསཱིསཱ སཱིསམཱུལཀཱ;

ཏཡོ ཏཡོཏི ཨེཏཱནི, ཨཊྛཱརས ཝིབྷཱཝཡེ.

ཨེཏེསུ ཧི སསྶཏུཙྪེདཝསེན ཝུཏྟཱ དྭེ དིཊྛིསཱིསཱ ནཱམ. ཨསྨཱིཏི, བྷཝིསྶནྟི, སིཡནྟི, ཨཔཱཧཾ སིཡནྟི ཨེཏེ ཙཏྟཱརོ སུདྡྷསཱིསཱཨེཝ. ཨིཏྠསྨཱིཏི ཨཱདཡོ ཏཡོ ཏཡོཏི དྭཱདས སཱིསམཱུལཀཱ ནཱམཱཏི. ཨེཝམེཏེ དྭེ དིཊྛིསཱིསཱ, ཙཏྟཱརོ སུདྡྷསཱིསཱ, དྭཱདས སཱིསམཱུལཀཱཏི ཨཊྛཱརས ཏཎྷཱཝིཙརིཏདྷམྨཱ ཝེདིཏབྦཱ.

༩༧༤. ཨིདཱནི པཊིཔཱཊིཡཱཝ ཏེ དྷམྨེ བྷཱཛེཏྭཱ དསྶེཏུཾ ཀཐཉྩ ཨསྨཱིཏི ཧོཏཱིཏིཨཱདི ཨཱརདྡྷཾ. ཏཏྠ ཀཉྩི དྷམྨཾ ཨནཝཀཱརིཾ ཀརིཏྭཱཏི རཱུཔཝེདནཱདཱིསུ ཀཉྩི ཨེཀདྷམྨམྤི ཨཝིནིབྦྷོགཾ ¶ ཀཏྭཱ, ཨེཀེཀཏོ ཨགྒཧེཏྭཱ, སམཱུཧཏོཝ གཧེཏྭཱཏི ཨཏྠོ. ཨསྨཱིཏི ཚནྡཾ པཊིལབྷཏཱིཏི པཉྩཀྑནྡྷེ ནིརཝསེསཏོ གཧེཏྭཱ ‘ཨཧ’ནྟི ཏཎྷཾ པཊིལབྷཏི. མཱནདིཊྛཱིསུཔི ཨེསེཝ ནཡོ. ཏཏྠ ཀིཉྩཱཔི ཨཡཾ ཏཎྷཱཝིཙརིཏནིདྡེསོ, མཱནདིཊྛིཡོ པན ན ཝིནཱ ཏཎྷཱཡ, ཏསྨཱ ཏདེཀཊྛཝསེན ཨིདྷ ཝུཏྟཱ. ཏཎྷཱསཱིསེན ཝཱ པཔཉྩཏྟཡམྤི ཨུདྡིཊྛཾ. ཏཾ ཨུདྡེསཱནུརཱུཔེནེཝ ནིདྡིསིཏུམྤི མཱནདིཊྛིཡོ གཧིཏཱ. ཏཎྷཱཔཔཉྩཾ ཝཱ དསྶེནྟོ ཏེནེཝ སདྡྷིཾ སེསཔཔཉྩེཔི དསྶེཏུཾ ཨེཝམཱཧ.

ཏསྨིཾ སཏི ཨིམཱནི པཔཉྩིཏཱནཱིཏི ཏསྨིཾ ‘‘ཨསྨཱིཏི ཚནྡཾ པཊིལབྷཏཱི’’ཏིཨཱདིནཱ ནཡེན ཝུཏྟེ པཔཉྩཏྟཡེ སཏི པུན ཨིམཱནི ‘‘ཨིཏྠསྨཱིཏི ཝཱ’’ཏིཨཱདཱིནི པཔཉྩིཏཱནི ཧོནྟཱིཏི ཨཏྠོ.

ཁཏྟིཡོསྨཱིཏིཨཱདཱིསུ ཨབྷིསེཀསེནཱམཙྩཱདིནཱ ‘ཁཏྟིཡོ ཨཧཾ’, མནྟཛ྄ཛྷེན པོརོཧིཙྩཱདིནཱ ‘བྲཱཧྨཎོ ཨཧཾ’, ཀསིགོརཀྑཱདིནཱ ‘ཝེསྶོ ཨཧཾ’, ཨསིཏབྱཱབྷངྒིཏཱཡ ‘སུདྡོ ཨཧཾ’ ¶ , གིཧིབྱཉྫནེན ‘གཧཊྛོ ཨཧ’ནྟི ཨིམིནཱ ནཡེན ཨཏྠོ ཝེདིཏབྦོ. ཨེཝཾ ཨིཏྠསྨཱིཏི ཧོཏཱིཏི ཨེཝཾ ཁཏྟིཡཱདཱིསུ ཁཏྟིཡཱདིཔྤཀཱརཾ ཨཏྟནི ཨུཔྤཱདཡིཏྭཱ ‘ཨིཏྠཾཔཀཱརོ ཨཧ’ནྟི ཧོཏི.

ཡཐཱ སོ ཁཏྟིཡོཏིཨཱདཱིསུ ‘ཡཐཱ སོ ཨབྷིསེཀསེནཱམཙྩཱདིནཱ ཁཏྟིཡོ, ཏཐཱ ‘ཨཧམྤི ཁཏྟིཡོ’ཏི ཨིམིནཱ ནཡེན ཨཏྠོ ཝེདིཏབྦོ. དུཏིཡནཡེ ‘ཡཐཱ སོ ཨབྷིསེཀསེནཱམཙྩཱདིནཱ ཁཏྟིཡོ, ནཱཧཾ ཏཐཱ ཁཏྟིཡོ; ཨཧཾ པན ཏཏོ ཧཱིནོ ཝཱ སེཊྛོ ཝཱ’ཏི ¶ ཨིམིནཱ ནཡེན ཨཏྠོ ཝེདིཏབྦོ. བྷཝིསྶནྟིཨཱདིནིདྡེསཱདཱིསུཔི ཨེསེཝ ནཡོ.

༩༧༥. ཨེཝཾ ཨཛ྄ཛྷཏྟིཀསྶ ཨུཔཱདཱཡ ཏཎྷཱཝིཙརིཏཱནི བྷཱཛེཏྭཱ ཨིདཱནི བཱཧིརསྶ ཨུཔཱདཱཡ ཏཎྷཱཝིཙརིཏཱནི བྷཱཛེཏུཾ ཏཏྠ ཀཏམཱནཱིཏིཨཱདིམཱཧ. ཏཏྠ བཱཧིརསྶ ཨུཔཱདཱཡཱཏི བཱཧིརཾ ཁནྡྷཔཉྩཀཾ ཨུཔཱདཱཡ. ཨིདམྤི ཧི ཨུཔཡོགཏྠེ སཱམིཝཙནཾ. ཨིམིནཱཏི ཨིམིནཱ རཱུཔེན ཝཱ…པེ… ཝིཉྙཱཎེན ཝཱ. ཨཝསེསཾ པན ཨུདྡེསཝཱརེ ཏཱཝ ཝུཏྟནཡེནེཝ ཝེདིཏབྦཾ.

༩༧༦. ནིདྡེསཝཱརེ པན ཨཝཀཱརིཾ ཀརིཏྭཱཏི ཝིནིབྦྷོགཾ ཀཏྭཱ. ཨིམིནཱ ཨསྨཱིཏི ཚནྡཾ པཊིལབྷཏཱིཏིཨཱདཱིསུ ཨིམིནཱ རཱུཔེན ཝཱ…པེ… ཝིཉྙཱཎེན ཝཱཏི ཨེཝཾ པཉྩཀྑནྡྷེ ཨེཀདེསཏོ གཧེཏྭཱ ཨིམིནཱ ‘ཨཧ’ནྟི ཚནྡཱདཱིནི པཊིལབྷཏཱིཏི ཨེཝམཏྠོ ཝེདིཏབྦོ.

ཨིམིནཱ ཁཏྟིཡོསྨཱིཏིཨཱདཱིསུ ‘ཨིམིནཱ ཚཏྟེན ¶ ཝཱ ཁགྒེན ཝཱ ཨབྷིསེཀསེནཱམཙྩཱདིནཱ ཝཱ ཁཏྟིཡོ ཨཧ’ནྟི ཨེཝཾ པུརིམནཡེནེཝ ཨཏྠོ ཝེདིཏབྦོ. ཨིམིནཱཏི པདམཏྟམེཝ ཧེཏྠ ཝིསེསོ.

ཡཐཱ སོ ཁཏྟིཡོཏིཨཱདཱིསུཔི ཨིམིནཱཏི ཝུཏྟཔདམེཝ ཝིསེསོ. ཏསྨཱ ཏསྶ ཝསེན ཡཐཱ ཁཏྟིཡོ, ཨེཝཾ ཨཧམྤི ཨིམིནཱ ཁགྒེན ཝཱ ཚཏྟེན ཝཱ ཨབྷིསེཀསེནཱམཙྩཱདིནཱ ཝཱ ཁཏྟིཡོཏི ཨེཝཾ ཡོཛེཏྭཱ སབྦཔདེསུ ཨཏྠོ ཝེདིཏབྦོ. ཨིམིནཱ ནིཙྩོསྨཱིཏི པཉྩཀྑནྡྷེ ཨནཝཀཱརིཾ ཀཏྭཱ རཱུཔཱདཱིསུ ཨེཀམེཝ དྷམྨཾ ‘ཨཧ’ནྟི གཧེཏྭཱ ‘ཨིམིནཱ ཁགྒེན ཝཱ ཚཏྟེན ཝཱ ཨཧཾ ནིཙྩོ དྷུཝོ’ཏི མཉྙཏི. ཨུཙྪེདདིཊྛིཡམྤི ཨེསེཝ ནཡོ. སེསཾ སབྦཏྠ ཝུཏྟནཡེནེཝ ཝེདིཏབྦཾ.

ཨིཏི ཨེཝརཱུཔཱནི ཨཏཱིཏཱནི ཚཏྟིཾསཱཏི ཨེཀེཀསྶ པུགྒལསྶ ཨཏཱིཏེ ཚཏྟིཾས. ཨནཱགཏཱནི ཚཏྟིཾསཱཏི ཨེཀེཀསྶེཝ ཨནཱགཏེ ཚཏྟིཾས. པཙྩུཔྤནྣཱནི ཚཏྟིཾསཱཏི ཨེཀེཀསྶ ཝཱ པུགྒལསྶ ¶ ཡཐཱལཱབྷཝསེན བཧུནཾ ཝཱ པཙྩུཔྤནྣེ ཚཏྟིཾས. སབྦསཏྟཱནཾ པན ཨེཀཾསེནེཝ ཨཏཱིཏེ ཚཏྟིཾས, ཨནཱགཏེ ཚཏྟིཾས, པཙྩུཔྤནྣེ ཚཏྟིཾསཱཏི ཝེདིཏབྦཱནི. ཨནནྟཱ ཧི ཨསདིསཏཎྷཱམཱནདིཊྛིབྷེདཱ སཏྟཱ. ཨཊྛཏཎྷཱཝིཙརིཏསཏཾ ཧོཏཱིཏི ཨེཏྠ པན ཨཊྛསཏསངྑཱཏཾ ཏཎྷཱཝིཙརིཏཾ ཧོཏཱིཏི ཨེཝམཏྠོ དཊྛབྦོ. སེསཾ སབྦཏྠ ཨུཏྟཱནཏྠམེཝཱཏི.

ཏཎྷཱཝིཙརིཏནིདྡེསཝཎྞནཱ.

དིཊྛིགཏནིདྡེསཝཎྞནཱ

༩༧༧. དིཊྛིགཏནིདྡེསེ ¶ བྲཧྨཛཱལེ ཝེཡྻཱཀརཎེཏི བྲཧྨཛཱལནཱམཀེ ཝེཡྻཱཀརཎེ, དཱིགྷནིཀཱཡསྶ པཋམསུཏྟནྟེ. ཝུཏྟཱནི བྷགཝཏཱཏི སཏྠཱརཱ སཡཾ ཨཱཧཙྩ བྷཱསིཏཱནི. ཙཏྟཱརོ སསྶཏཝཱདཱཏིཨཱདཱིསུ ‘‘ཏེ ཙ བྷོནྟོ སམཎབྲཱཧྨཎཱ ཀིམཱགམྨ ཀིམཱརབྦྷ སསྶཏཝཱདཱ སསྶཏཾ ཨཏྟཱནཉྩ ལོཀཉྩ པཉྙཱཔེནྟི ཙཏཱུཧི ཝཏྠཱུཧཱི’’ཏིཨཱདིནཱ (དཱི. ནི. ༡.༢༩-༣༠) བྲཧྨཛཱལེ ཝུཏྟནཡེནེཝ པབྷེདོ ཙ ཨཏྠོ ཙ ཝེདིཏབྦོཏི.

སམྨོཧཝིནོདནིཡཱ ཝིབྷངྒཊྛཀཐཱཡ

ཁུདྡཀཝཏྠུཝིབྷངྒཝཎྞནཱ ནིཊྛིཏཱ.

༡༨. དྷམྨཧདཡཝིབྷངྒོ

༡. སབྦསངྒཱཧིཀཝཱརཝཎྞནཱ

༩༧༨. ཨིདཱནི ¶ ¶ ¶ ཏདནནྟརེ དྷམྨཧདཡཝིབྷངྒེ པཱལི༹པརིཙྪེདོ ཏཱཝ ཨེཝཾ ཝེདིཏབྦོ – ཨེཏྠ ཧི ཨཱདིཏོཝ ཁནྡྷཱདཱིནཾ དྭཱདསནྣཾ ཀོཊྛཱསཱནཾ ཝསེན སབྦསངྒཱཧིཀཝཱརོ ནཱམ ཝུཏྟོ. དུཏིཡོ ཏེསཾཡེཝ དྷམྨཱནཾ ཀཱམདྷཱཏུཨཱདཱིསུ ཨུཔྤཏྟཱནུཔྤཏྟིདསྶནཝཱརོ ནཱམ. ཏཏིཡོ ཏཏྠེཝ པརིཡཱཔནྣཱཔརིཡཱཔནྣདསྶནཝཱརོ ནཱམ. ཙཏུཏྠོ ཏཱིསུ བྷཱུམཱིསུ ཨུཔྤཏྟིཀྑཎེ ཝིཛྫམཱནཱཝིཛྫམཱནདྷམྨདསྶནཝཱརོ ནཱམ. པཉྩམོ ཏེསཾ དྷམྨཱནཾ བྷཱུམནྟརཝསེན དསྶནཝཱརོ ནཱམ. ཚཊྛོ གཏཱིསུ ཨུཔྤཱདཀཀམྨཨཱཡུཔྤམཱཎདསྶནཝཱརོ ནཱམ. སཏྟམོ ཨབྷིཉྙེཡྻཱདིཝཱརོ ནཱམ. ཨཊྛམོ སཱརམྨཎཱནཱརམྨཎཝཱརོ ནཱམ. ནཝམོ ཏེསཾ ཁནྡྷཱདིདྷམྨཱནཾ དིཊྛསུཏཱདིཝསེན སངྒཧེཏྭཱ དསྶནཝཱརོ ནཱམ. དསམོ ཀུསལཏྟིཀཱདིཝསེན སངྒཧེཏྭཱ དསྶནཝཱརོ ནཱམ.

༩༧༩. ཨེཝཾ དསཧི ཝཱརེཧི པརིཙྪིནྣཱཡ པཱལི༹ཡཱ པཋམེ ཏཱཝ སབྦསངྒཱཧིཀཝཱརེ ‘‘ཨཝཱིཙིཏོ ཡཱཝ བྷཝགྒཾ ཨེཏྠནྟརེ ཀཏི ཁནྡྷཱ’’ཏི པུཙྪིཏེ ‘‘ཨེཀོཏི ཝཱ…པེ… ཙཏྟཱརོཏི ཝཱ ཚཱཏི ཝཱ ཨཝཏྭཱ པཉྩཱཏི ཝཏྟུཾ སམཏྠོ ཨཉྙོ ནཏྠཱི’’ཏི ཨཏྟནོ ཉཱཎབལཾ དཱིཔེནྟོ པཉྩཀྑནྡྷཱཏི པུཙྪཱནུརཱུཔཾ ཝིསྶཛྫནཾ ཨཱཧ. ཡཐཱཔུཙྪཾ ཝིསྶཛྫནཉྷི སབྦཉྙུབྱཱཀརཎཾ ནཱམཱཏི ཝུཙྩཏི. དྭཱདསཱཡཏནཱནཱིཏིཨཱདཱིསུཔི ཨེསེཝ ནཡོ. རཱུཔཀྑནྡྷཱདཱིནཾ པབྷེདོ ཁནྡྷཝིབྷངྒཱདཱིསུ ཝུཏྟནཡེནེཝ ཝེདིཏབྦོ.

༢. ཨུཔྤཏྟཱནུཔྤཏྟིཝཱརཝཎྞནཱ

༩༩༡. དུཏིཡཝཱརེ ¶ ཡེ དྷམྨཱ ཀཱམབྷཝེ ཀཱམདྷཱཏུསམྦྷཱུཏཱནཉྩ སཏྟཱནཾ ཨུཔྤཛྫནྟི – ཀཱམདྷཱཏུཡཾ པརིཡཱཔནྣཱ ཝཱ ཨཔརིཡཱཔནྣཱ ཝཱ – ཏེ སབྦེ སངྒཧེཏྭཱ ཀཱམདྷཱཏུཡཱ པཉྩཀྑནྡྷཱཏིཨཱདི ཝུཏྟཾ. རཱུཔདྷཱཏུཨཱདཱིསུཔི ཨེསེཝ ནཡོ. ཡསྨཱ པན རཱུཔདྷཱཏུཔརིཡཱཔནྣཱནཾ སཏྟཱནཾ གྷཱནཱཡཏནཱདཱིནཾ ཨབྷཱཝེན གནྡྷཱཡཏནཱདཱིནི ཨཱཡཏནཱདིཀིཙྩཾ ན ཀརོནྟི, ཏསྨཱ རཱུཔདྷཱཏུཡཱ ཚ ཨཱཡཏནཱནི, ནཝ དྷཱཏུཡོཏིཨཱདི ཝུཏྟཾ ¶ . ཡསྨཱ ཙ ཨོཀཱསཝསེན ཝཱ སཏྟུཔྤཏྟིཝསེན ¶ ཝཱ ཨཔརིཡཱཔནྣདྷཱཏུ ནཱམ ནཏྠི, ཏསྨཱ ཨཔརིཡཱཔནྣདྷཱཏུཡཱཏི ཨཝཏྭཱ ཡཾ ཡཾ ཨཔརིཡཱཔནྣཾ ཏཾ ཏདེཝ དསྶེཏུཾ ཨཔརིཡཱཔནྣེ ཀཏི ཁནྡྷཱཏིཨཱདི ཝུཏྟཾ.

༣. པརིཡཱཔནྣཱཔརིཡཱཔནྣཝཱརཝཎྞནཱ

༩༩༩. ཏཏིཡཝཱརེ ཀཱམདྷཱཏུཔརིཡཱཔནྣཱཏི ཀཱམདྷཱཏུབྷཛནཊྛེན པརིཡཱཔནྣཱ; ཏཾནིསྶིཏཱ ཏདནྟོགདྷཱ ཀཱམདྷཱཏུཏྭེཝ སངྑཾ གཏཱཏི ཨཏྠོ. སེསཔདེསུཔི ཨེསེཝ ནཡོ. པརིཡཱཔནྣཱཏི བྷཝཝསེན ཨོཀཱསཝསེན ཙ པརིཙྪིནྣཱ. ཨཔརིཡཱཔནྣཱཏི ཏཐཱ ཨཔརིཙྪིནྣཱ.

༤. དྷམྨདསྶནཝཱརཝཎྞནཱ

༡༠༠༧. ཙཏུཏྠཝཱརེ ཨེཀཱདསཱཡཏནཱནཱིཏི སདྡཱཡཏནཝཛྫཱནི. ཏཉྷི ཨེཀནྟེན པཊིསནྡྷིཡཾ ནུཔྤཛྫཏི. ཨིམིནཱ ནཡེན སབྦཏྠ ཨཏྠོ ཝེདིཏབྦོ. སཏྟཀེ ‘‘དེཝཱནཾ ཨསུརཱན’’ནྟི གཏིཝསེན ཨཝཏྭཱ ཨཝིསེསེན གབྦྷསེཡྻཀཱནནྟི ཝུཏྟཾ. ཏསྨཱ ཡཏྠ ཡཏྠ གབྦྷསེཡྻཀཱ སམྦྷཝནྟི ཏཏྠ ཏཏྠ ཏེསཾ སཏྟཱཡཏནཱནི ཝེདིཏབྦཱནི. ཏཐཱ དྷཱཏུཡོ. སེསམེཏྠ ཨུཏྟཱནཏྠམེཝ. པཉྩམཝཱརེ ཡཾ ཝཏྟབྦཾ ཏཾ དྷམྨསངྒཧཊྛཀཐཱཡཾ ཝུཏྟམེཝ.

༦. ཨུཔྤཱདཀཀམྨཨཱཡུཔྤམཱཎཝཱརཝཎྞནཱ

(༡.) ཨུཔྤཱདཀཀམྨཾ

༡༠༢༡. ཚཊྛཝཱརེ ¶ པཉྩཧི ཀཱམགུཎེཧི ནཱནཔྤཀཱརེཧི ཝཱ ཨིདྡྷིཝིསེསེཧི དིབྦནྟཱིཏི དེཝཱ. སམྨུཏིདེཝཱཏི ‘དེཝོ, དེཝཱི’ཏི ཨེཝཾ ལོཀསམྨུཏིཡཱ དེཝཱ. ཨུཔཔཏྟིདེཝཱཏི དེཝལོཀེ ཨུཔྤནྣཏྟཱ ཨུཔཔཏྟིཡཱ དེཝཱ. ཝིསུདྡྷིདེཝཱཏི སབྦེསཾ དེཝཱནཾ པཱུཛཱརཧཱ སབྦཀིལེསཝིསུདྡྷིཡཱ དེཝཱ. རཱཛཱནོཏི མུདྡྷཱབྷིསིཏྟཁཏྟིཡཱ. དེཝིཡོཏི ཏེསཾ མཧེསིཡོ. ཀུམཱརཱཏི ཨབྷིསིཏྟརཱཛཱུནཾ ཨབྷིསིཏྟདེཝིཡཱ ཀུཙྪིསྨིཾ ཨུཔྤནྣཀུམཱརཱ.

ཨུཔོསཐཀམྨཾ ¶ ཀཏྭཱཏི ཙཱཏུདྡསཱདཱིསུ ཨཊྛངྒསམནྣཱགཏཾ ཨུཔོསཐཾ ཨུཔཝསིཏྭཱ. ཨིདཱནི ཡསྨཱ པརིཏྟདཱནཱདིཔུཉྙཀམྨཾ མནུསྶསོབྷགྱཏཱཡ པཙྩཡོ, མཏྟསོ ཀཏཾ མནུསྶསོབྷགྱཏཱཡ ཨདྷིམཏྟཾ, ཨདྷིམཏྟབྷཱཝེཔི ནཱནཔྤཀཱརབྷེདཏོ ནཱནཔྤཀཱརསྶ ཁཏྟིཡམཧཱསཱལཱདིབྷཱཝསྶ པཙྩཡོ, ཏསྨཱ ཏསྶ ཝསེན ཨུཔཔཏྟིབྷེདཾ དསྶེནྟོ ཨཔྤེཀཙྩེ གཧཔཏིམཧཱསཱལཱནནྟིཨཱདིམཱཧ. ཏཏྠ ¶ མཧཱསཱརོ ཨེཏེསནྟི མཧཱསཱརཱ; ར-ཀཱརསྶ པན ལ-ཀཱརཾ ཀཏྭཱ མཧཱསཱལཱཏི ཝུཏྟཾ. གཧཔཏིཡོཝ མཧཱསཱལཱ, གཧཔཏཱིསུ ཝཱ མཧཱསཱལཱཏི གཧཔཏིམཧཱསཱལཱ. སེསེསུཔི ཨེསེཝ ནཡོ. ཏཏྠ ཡསྶ གེཧེ པཙྪིམནྟེན ཙཏྟཱལཱིསཀོཊིདྷནཾ ནིདྷཱནགཏཾ ཧོཏི, ཀཧཱཔཎཱནཉྩ པཉྩ ཨམྦཎཱནི དིཝསཝལ༹ཉྫོ ནིཀྑམཏི – ཨཡཾ གཧཔཏིམཧཱསཱལོ ནཱམ. ཡསྶ པན གེཧེ པཙྪིམནྟེན ཨསཱིཏིཀོཊིདྷནཾ ནིདྷཱནགཏཾ ཧོཏི, ཀཧཱཔཎཱནཉྩ དསཨམྦཎཱནི དིཝསཝལ༹ཉྫོ ནིཀྑམཏི – ཨཡཾ བྲཱཧྨཎམཧཱསཱལོ ནཱམ. ཡསྶ པན གེཧེ པཙྪིམནྟེན ཀོཊིསཏདྷནཾ ནིདྷཱནགཏཾ ཧོཏི, ཀཧཱཔཎཱནཉྩ ཝཱིསཏི ཨམྦཎཱནི དིཝསཝལ༹ཉྫོ ནིཀྑམཏི – ཨཡཾ ཁཏྟིཡམཧཱསཱལོ ནཱམ.

སཧབྱཏནྟི སཧབྷཱཝཾ; སབྷཱགཱ ཧུཏྭཱ ནིབྦཏྟནྟཱིཏི ཨཏྠོ. ཙཱཏུམཧཱརཱཛིཀཱནནྟིཨཱདཱིསུ ཙཱཏུམཧཱརཱཛིཀཱ ནཱམ སིནེརུཔབྦཏསྶ ཝེམཛ྄ཛྷེ ཧོནྟི. ཏེསུ པབྦཏཊྛཀཱཔི ཨཏྠི, ཨཱཀཱསཊྛཱཔི; ཏེསཾ པརམྤརཱ ཙཀྐཝཱལ༹པབྦཏཾ པཏྟཱ. ཁིཌྜཱཔདོསིཀཱ, མནོཔདོསིཀཱ, སཱིཏཝལཱཧཀཱ, ཨུཎྷཝལཱཧཀཱ, ཙནྡིམཱ དེཝཔུཏྟོ, སཱུརིཡོ དེཝཔུཏྟོཏི ཨེཏེ སབྦེཔི ཙཱཏུམཧཱརཱཛིཀདེཝལོཀཊྛཀཱ ཨེཝ.

ཏེཏྟིཾས ¶ ཛནཱ ཏཏྠ ཨུཔཔནྣཱཏི ཏཱཝཏིཾསཱ. ཨཔིཙ ཏཱཝཏིཾསཱཏི ཏེསཾ དེཝཱནཾ ནཱམམེཝཱཏི ཝུཏྟཾ. ཏེཔི ཨཏྠི པབྦཏཊྛཀཱ, ཨཏྠི ཨཱཀཱསཊྛཀཱ. ཏེསཾ པརམྤརཱ ཙཀྐཝཱལ༹པབྦཏཾ པཏྟཱ. ཏཐཱ ཡཱམཱདཱིནཾ. ཨེཀདེཝལོཀེཔི ཧི དེཝཱནཾ པརམྤརཱ ཙཀྐཝཱལ༹པབྦཏཾ ཨཔྤཏྟཱ ནཱམ ནཏྠི. ཏཏྠ དིབྦཾ སུཁཾ ཡཱཏཱ པཡཱཏཱ སམྤཏྟཱཏི ཡཱམཱ. ཏུཊྛཱ པཧཊྛཱཏི ཏུསིཏཱ. པཀཏིཔཊིཡཏྟཱརམྨཎཏོ ཨཏིརེཀེན རམིཏུཀཱམཀཱལེ ཡཐཱརུཙིཏེ བྷོགེ ནིམྨིནིཏྭཱ རམནྟཱིཏི ནིམྨཱནརཏཱི. ཙིཏྟཱཙཱརཾ ཉཏྭཱ པརེཧི ནིམྨིཏེསུ བྷོགེསུ ཝསཾ ཝཏྟེནྟཱིཏི པརནིམྨིཏཝསཝཏྟཱི.

(༢.) ཨཱཡུཔྤམཱཎཾ

༡༠༢༢. ཨཔྤཾ ¶ ཝཱ བྷིཡྻོཏི དུཏིཡཾ ཝསྶསཏཾ ཨཔྤཏྭཱ ཝཱིསཱཡ ཝཱ ཏིཾསཱཡ ཝཱ ཙཏྟཱལཱིསཱཡ ཝཱ པཉྙཱསཱཡ ཝཱ སཊྛིཡཱ ཝཱ ཝསྶེཧི ཨདྷིཀམྤི ཝསྶསཏནྟི ཨཏྠོ. སབྦམྤི ཧེཏཾ དུཏིཡཾ ཝསྶསཏཾ ཨཔྤཏྟཏྟཱ ཨཔྤནྟི ཝུཏྟཾ.

༡༠༢༤. བྲཧྨཔཱརིསཛྫཱདཱིསུ མཧཱབྲཧྨཱནཾ པཱརིསཛྫཱ པརིཙཱརིཀཱཏི བྲཧྨཔཱརིསཛྫཱ. ཏེསཾ པུརོཧིཏབྷཱཝེ ཋིཏཱཏི བྲཧྨཔུརོཧིཏཱ. ཝཎྞཝནྟཏཱཡ ¶ ཙེཝ དཱིགྷཱཡུཀཏཱཡ ཙ མཧནྟོ བྲཧྨཱཏི མཧཱབྲཧྨཱ, ཏེསཾ མཧཱབྲཧྨཱནཾ. ཨིམེ ཏཡོཔི ཛནཱ པཋམཛ྄ཛྷཱནབྷཱུམིཡཾ ཨེཀཏལེ ཝསནྟི; ཨཱཡུཨནྟརཾ པན ནེསཾ ནཱནཱ.

༡༠༢༥. པརིཏྟཱ ཨཱབྷཱ ཨེཏེསནྟི པརིཏྟཱབྷཱ. ཨཔྤམཱཎཱ ཨཱབྷཱ ཨེཏེསནྟི ཨཔྤམཱཎཱབྷཱ. དཎྜདཱིཔིཀཱཡ ཨཙྩི ཝིཡ ཨེཏེསཾ སརཱིརཏོ ཨཱབྷཱ ཚིཛྫིཏྭཱ ཚིཛྫིཏྭཱ པཏནྟཱི ཝིཡ སརཏི ཝིསརཏཱིཏི ཨཱབྷསྶརཱ. ཨིམེཔི ཏཡོ ཛནཱ དུཏིཡཛ྄ཛྷཱནབྷཱུམིཡཾ ཨེཀཏལེ ཝསནྟི; ཨཱཡུཨནྟརཾ པན ནེསཾ ནཱནཱ.

༡༠༢༦. པརིཏྟཱ སུབྷཱ ཨེཏེསནྟི པརིཏྟསུབྷཱ. ཨཔྤམཱཎཱ སུབྷཱ ཨེཏེསནྟི ཨཔྤམཱཎསུབྷཱ. སུབྷེན ཨོཀིཎྞཱ ཝིཀིཎྞཱ, སུབྷེན སརཱིརཔྤབྷཱཝཎྞེན ཨེཀགྒྷནཱ, སུཝཎྞམཉྫུསཱཡ ཋཔིཏསམྤཛྫལིཏཀཉྩནཔིཎྜསསྶིརཱིཀཱཏི སུབྷཀིཎྷཱ. ཨིམེཔི ཏཡོ ཛནཱ ཏཏིཡཛ྄ཛྷཱནབྷཱུམིཡཾ ཨེཀཏལེ ཝསནྟི; ཨཱཡུཨནྟརཾ པན ནེསཾ ནཱནཱ.

༡༠༢༧. ཨཱརམྨཎནཱནཏྟཏཱཏི ¶ ཨཱརམྨཎསྶ ནཱནཏྟབྷཱཝོ. མནསིཀཱརནཱནཏྟཏཱདཱིསུཔི ཨེསེཝ ནཡོ. ཨེཏྠ ཨེཀསྶ པཐཝཱིཀསིཎཾ ཨཱརམྨཎཾ ཧོཏི…པེ… ཨེཀསྶ ཨོདཱཏཀསིཎནྟི ཨིདཾ ཨཱརམྨཎནཱནཏྟཾ. ཨེཀོ པཐཝཱིཀསིཎཾ མནསི ཀརོཏི…པེ… ཨེཀོ ཨོདཱཏཀསིཎནྟི ཨིདཾ མནསིཀཱརནཱནཏྟཾ. ཨེཀསྶ པཐཝཱིཀསིཎེ ཚནྡོ ཧོཏི…པེ… ཨེཀསྶ ཨོདཱཏཀསིཎེཏི ཨིདཾ ཚནྡནཱནཏྟཾ. ཨེཀོ པཐཝཱིཀསིཎེ པཏྠནཾ ཀརོཏི…པེ… ཨེཀོ ཨོདཱཏཀསིཎེཏི ཨིདཾ པཎིདྷིནཱནཏྟཾ. ཨེཀོ པཐཝཱིཀསིཎཝསེན ཨདྷིམུཙྩཏི…པེ… ཨེཀོ ཨོདཱཏཀསིཎཝསེནཱཏི ཨིདཾ ཨདྷིམོཀྑནཱནཏྟཾ. ཨེཀོ པཐཝཱིཀསིཎཝསེན ཙིཏྟཾ ཨབྷིནཱིཧརཏི…པེ… ཨེཀོ ¶ ཨོདཱཏཀསིཎཝསེནཱཏི ཨིདཾ ཨབྷིནཱིཧཱརནཱནཏྟཾ. ཨེཀསྶ པཐཝཱིཀསིཎཔརིཙྪིནྡནཀཔཉྙཱ ཧོཏི…པེ… ཨེཀསྶ ཨོདཱཏཀསིཎཔརིཙྪིནྡནཀཔཉྙཱཏི ཨིདཾ པཉྙཱནཱནཏྟཾ. ཏཏྠ ཨཱརམྨཎམནསིཀཱརཱ པུབྦབྷཱགེན ཀཐིཏཱ. ཚནྡཔཎིདྷིཨདྷིམོཀྑཱབྷིནཱིཧཱརཱ ཨཔྤནཱཡཔི ཝཏྟནྟི ཨུཔཙཱརེཔི. པཉྙཱ པན ལོཀིཡལོཀུཏྟརམིསྶཀཱ ཀཐིཏཱ.

ཨསཉྙསཏྟཱནནྟི སཉྙཱཝིརཧིཏཱནཾ སཏྟཱནཾ. ཨེཀཙྩེ ཧི ཏིཏྠཱཡཏནེ པབྦཛིཏྭཱ ‘ཙིཏྟཾ ནིསྶཱཡ རཛྫནདུསྶནམུཡ྄ཧནཱནི ནཱམ ཧོནྟཱི’ཏི ཙིཏྟེ དོསཾ དིསྭཱ ‘ཨཙིཏྟཀབྷཱཝོ ནཱམ སོབྷནོ, དིཊྛདྷམྨནིབྦཱནམེཏ’ནྟི ¶ སཉྙཱཝིརཱགཾ ཛནེཏྭཱ ཏཏྲཱུཔགཾ པཉྩམཾ སམཱཔཏྟིཾ བྷཱཝེཏྭཱ ཏཏྠ ནིབྦཏྟནྟི. ཏེསཾ ཨུཔཔཏྟིཀྑཎེ ཨེཀོ རཱུཔཀྑནྡྷོཡེཝ ནིབྦཏྟཏི. ཋཏྭཱ ནིབྦཏྟོ ཋིཏཀོ ཨེཝ ཧོཏི, ནིསཱིདིཏྭཱ ནིབྦཏྟོ ནིསིནྣཀོཝ ནིཔཛྫིཏྭཱ ནིབྦཏྟོ ནིཔནྣོཝ. ཙིཏྟཀམྨརཱུཔཀསདིསཱ ཧུཏྭཱ པཉྩ ཀཔྤསཏཱནི ཏིཊྛནྟི. ཏེསཾ པརིཡོསཱནེ སོ རཱུཔཀཱཡོ ཨནྟརདྷཱཡཏི, ཀཱམཱཝཙརསཉྙཱ ཨུཔྤཛྫཏི; ཏེན ཨིདྷ སཉྙུཔྤཱདེན ཏེ དེཝཱ ཏམྷཱ ཀཱཡཱ ཙུཏཱཏི པཉྙཱཡནྟི.

ཝིཔུལཱ ཕལཱ ཨེཏེསནྟི ཝེཧཔྥལཱ. ཨཏྟནོ སམྤཏྟིཡཱ ན ཧཱཡནྟི ན ཝིཧཱཡནྟཱིཏི ཨཝིཧཱ. ན ཀཉྩི སཏྟཾ ཏཔྤནྟཱིཏི ཨཏཔྤཱ. སུནྡརཱ དསྶནཱ ཨབྷིརཱུཔཱ པཱསཱདིཀཱཏི སུདསྶཱ. སུཊྛ པསྶནྟི, སུནྡརམེཏེསཾ ཝཱ དསྶནནྟི སུདསྶཱི. སབྦེཧི ཨེཝ གུཎེཧི ཙ བྷཝསམྤཏྟིཡཱ ཙ ཛེཊྛཱ, ནཏྠེཏྠ ཀནིཊྛཱཏི ཨཀནིཊྛཱ.

༡༠༢༨. ཨཱཀཱསཱནཉྩཱཡཏནཾ ཨུཔགཏཱཏི ཨཱཀཱསཱནཉྩཱཡཏནཱུཔགཱ. ཨིཏརེསུཔི ཨེསེཝ ནཡོ ¶ . ཨིཏི ཚ ཀཱམཱཝཙརཱ, ནཝ བྲཧྨལོཀཱ, པཉྩ སུདྡྷཱཝཱསཱ, ཙཏྟཱརོ ཨརཱུཔཱ ཨསཉྙསཏྟཝེཧཔྥལེཧི སདྡྷིཾ ཚབྦཱིསཏི དེཝལོཀཱ; མནུསྶལོཀེན སདྡྷིཾ སཏྟཝཱིསཏི.

ཏཏྠ སམྨཱསམྦུདྡྷེན མནུསྶཱནཾ དེཝཱནཉྩ ཨཱཡུཾ པརིཙྪིནྡམཱནེན ཙཏཱུསུ ཨཔཱཡེསུ བྷུམྨདེཝེསུ ཙ ཨཱཡུ པརིཙྪིནྣཾ ཏཾ ཀསྨཱཏི? ནིརཡེ ཏཱཝ ཀམྨམེཝ པམཱཎཾ. ཡཱཝ ཀམྨཾ ན ཁཱིཡཏི, ན ཏཱཝ ཙཝནྟི. ཏཐཱ སེསཨཔཱཡེསུ. བྷུམྨདེཝཱནམྤི ཀམྨམེཝ པམཱཎཾ. ཏཏྠ ནིབྦཏྟཱ ཧི ཀེཙི ¶ སཏྟཱཧམཏྟཾ ཏིཊྛནྟི, ཀེཙི ཨདྡྷམཱསཾ, ཀེཙི མཱསཾ, ཀཔྤཾ ཏིཊྛམཱནཱཔི ཨཏྠིཡེཝ.

ཏཏྠ མནུསྶེསུ གིཧིབྷཱཝེ ཋིཏཱཡེཝ སོཏཱཔནྣཱཔི ཧོནྟི, སཀདཱགཱམིཕལམྤི ཨནཱགཱམིཕལམྤི ཨརཧཏྟཕལམྤི པཱཔུཎནྟི. ཏེསུ སོཏཱཔནྣཱདཡོ ཡཱཝཛཱིཝཾ ཏིཊྛནྟི. ཁཱིཎཱསཝཱ པན པརིནིབྦཱཡནྟི ཝཱ པབྦཛནྟི ཝཱ. ཀསྨཱ? ཨརཧཏྟཾ ནཱམ སེཊྛགུཎོ, གིཧིལིངྒཾ ཧཱིནཾ, ཏཾ ཧཱིནཏཱཡ ཨུཏྟམཾ གུཎཾ དྷཱརེཏུཾ ན སཀྐོཏི. ཏསྨཱ ཏེ པརིནིབྦཱཏུཀཱམཱ ཝཱ པབྦཛིཏུཀཱམཱ ཝཱ ཧོནྟི.

བྷུམྨདེཝཱ པན ཨརཧཏྟཾ པཏྭཱཔི ཡཱཝཛཱིཝཾ ཏིཊྛནྟི. ཚསུ ཀཱམཱཝཙརདེཝེསུ སོཏཱཔནྣསཀདཱགཱམིནོ ཡཱཝཛཱིཝཾ ཏིཊྛནྟི; ཨནཱགཱམིནཱ རཱུཔབྷཝཾ གནྟུཾ ཝཊྚཏི, ཁཱིཎཱསཝེན པརིནིབྦཱཏུཾ. ཀསྨཱ ¶ ? ནིལཱིཡནོཀཱསསྶ ཨབྷཱཝཱ. རཱུཔཱཝཙརཱརཱུཔཱཝཙརེསུ སབྦེཔི ཡཱཝཛཱིཝཾ ཏིཊྛནྟི. ཏཏྠ རཱུཔཱཝཙརེ ནིབྦཏྟཱ སོཏཱཔནྣསཀདཱགཱམིནོ ན པུན ཨིདྷཱགཙྪནྟི, ཏཏྠེཝ པརིནིབྦཱཡནྟི. ཨེཏེ ཧི ཛྷཱནཨནཱགཱམིནོ ནཱམ.

ཨཊྛསམཱཔཏྟིལཱབྷཱིནཾ པན ཀིཾ ནིཡམེཏི? པགུཎཛ྄ཛྷཱནཾ. ཡདེཝསྶ པགུཎཾ ཧོཏི, ཏེན ཨུཔྤཛྫཏི. སབྦེསུ པན པགུཎེསུ ཀིཾ ནིཡམེཏི? པཏྠནཱ. ཡཏྠ ཨུཔཔཏྟིཾ པཏྠེཏི ཏཏྠེཝ ཨུཔཔཛྫཏི. པཏྠནཱཡ ཨསཏི ཀིཾ ནིཡམེཏི? མརཎསམཡེ སམཱཔནྣཱ སམཱཔཏྟི. མརཎསམཡེ སམཱཔནྣཱ ནཏྠི, ཀིཾ ནིཡམེཏི? ནེཝསཉྙཱནཱསཉྙཱཡཏནསམཱཔཏྟི. ཨེཀཾསེན ཧི སོ ནེཝསཉྙཱནཱསཉྙཱཡཏནེ ཨུཔཔཛྫཏི. ནཝསུ བྲཧྨལོཀེསུ ནིབྦཏྟཨརིཡསཱཝཀཱནཾ ཏཏྲཱུཔཔཏྟིཔི ཧོཏི ཨུཔརཱུཔཔཏྟིཔི ན ཧེཊྛཱུཔཔཏྟི. པུཐུཛྫནཱནཾ པན ཏཏྲཱུཔཔཏྟིཔི ཧོཏི ཨུཔརཱུཔཔཏྟིཔི ¶ ཧེཊྛཱུཔཔཏྟིཔི. པཉྩསུ སུདྡྷཱཝཱསེསུ ཙཏཱུསུ ཙ ཨརཱུཔེསུ ཨརིཡསཱཝཀཱནཾ ཏཏྲཱུཔཔཏྟིཔི ཧོཏི ཨུཔརཱུཔཔཏྟིཔི. པཋམཛ྄ཛྷཱནབྷཱུམིཡཾ ནིབྦཏྟོ ཨནཱགཱམཱི ནཝ བྲཧྨལོཀེ སོདྷེཏྭཱ མཏྠཀེ ཋིཏོ པརིནིབྦཱཏི. ཝེཧཔྥལཱ, ཨཀནིཊྛཱ, ནེཝསཉྙཱནཱསཉྙཱཡཏནནྟི ཨིམེ ཏཡོ དེཝལོཀཱ སེཊྛབྷཝཱ ནཱམ. ཨིམེསུ ཏཱིསུ ཋཱནེསུ ནིབྦཏྟཨནཱགཱམིནོ ནེཝ ཨུདྡྷཾ གཙྪནྟི, ན ཨདྷོ, ཏཏྠ ཏཏྠེཝ པརིནིབྦཱཡནྟཱིཏི. ཨིདམེཏྠ པཀིཎྞཀཾ.