📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཨབྷིདྷམྨཔིཊཀེ

ཝིབྷངྒ-མཱུལཊཱིཀཱ

༡. ཁནྡྷཝིབྷངྒོ

༡. སུཏྟནྟབྷཱཛནཱིཡཝཎྞནཱ

ཙཏུསཙྩདསོཏི ¶ ¶ ཙཏྟཱརི སཙྩཱནི སམཱཧཊཱནི ཙཏུསཙྩཾ, ཙཏུསཙྩཾ པསྶཱིཏི ཙཏུསཙྩདསོ. སཏིཔི སཱཝཀཱནཾ པཙྩེཀབུདྡྷཱནཉྩ ཙཏུསཙྩདསྶནབྷཱཝེ ཨནཉྙཔུབྦཀཏྟཱ བྷགཝཏོ ཙཏུསཙྩདསྶནསྶ ཏཏྠ ཙ སབྦཉྙུཏཱཡ དསབལེསུ ཙ ཝསཱིབྷཱཝསྶ པཏྟིཏོ པརསནྟཱནེསུ ཙ པསཱརིཏབྷཱཝེན སུཔཱཀཊཏྟཱ བྷགཝཱཝ ཝིསེསེན ‘‘ཙཏུསཙྩདསོ’’ཏི ཐོམནཾ ཨརཧཏཱིཏི ¶ . ནཱཐཏཱིཏི ནཱཐོ, ཝེནེཡྻཱནཾ ཧིཏསུཁཾ ཨཱསཱིསཏི པཏྠེཏི, པརསནྟཱནགཏཾ ཝཱ ཀིལེསབྱསནཾ ཨུཔཏཱཔེཏི, ‘‘སཱདྷུ, བྷིཀྑཝེ, བྷིཀྑུ ཀཱལེན ཀཱལཾ ཨཏྟསམྤཏྟིཾ པཙྩཝེཀྑིཏཱ’’ཏིཨཱདིནཱ (ཨ. ནི. ༨.༧) ཝཱ ཏཾ ཏཾ ཧིཏཔཊིཔཏྟིཾ ཡཱཙཏཱིཏི ཨཏྠོ. པརམེན ཙིཏྟིསྶརིཡེན སམནྣཱགཏོ, སབྦསཏྟེ ཝཱ གུཎེཧི ཨཱིསཏི ཨབྷིབྷཝཏཱིཏི པརམིསྶརོ བྷགཝཱ ‘‘ནཱཐོ’’ཏི ཝུཙྩཏི. ‘‘སདྡྷམྨེ གཱརཝཾ ཀཏྭཱ ཀརིསྶཱམཱི’’ཏི སོཏབྦབྷཱཝེ ཀཱརཎཾ ཝཏྭཱ པུན སཝནེ ནིཡོཛེནྟོ ཨཱཧ ‘‘ཏཾ སུཎཱཐ སམཱཧིཏཱ’’ཏི. ‘‘པོརཱཎཊྛཀཐཱནཡཾ ཝིགཱཧིཏྭཱ ཀརིསྶཱམཱི’’ཏི ཝཱ ཨེཏེན སཀྐཙྩསཝནེ ཙ ཀཱརཎཾ ཝཏྭཱ ཏཏྠ ནིཡོཛེནྟོ ཨཱཧ ‘‘སདྡྷམྨེ གཱརཝཾ ཀཏྭཱ ཏཾ སུཎཱཐཱ’’ཏི.

ཨེཏྠ ¶ ཙ ‘‘ཙཏུསཙྩདསོ’’ཏི ཝཙནཾ ཐོམནམེཝ ཙཏུཔྤབྷེདཱཡ དེསནཱཡ སམཱནགཎནདསྶནགུཎེན, ‘‘ཨཊྛཱརསཧི བུདྡྷདྷམྨེཧི ཨུཔེཏོ’’ཏི ཙ ཨཊྛཱརསཔྤབྷེདཱཡ དེསནཱཡ སམཱནགཎནགུཎེཧཱིཏི དཊྛབྦཾ. ཡཐཱཝུཏྟེན ཝཱ ནིརཏིསཡེན ཙཏུསཙྩདསྶནེན བྷགཝཱ ཙཏུདྷཱ དྷམྨསངྒཎིཾ དེསེཏུཾ སམཏྠོ ཨཧོསི, ཨཊྛཱརསབུདྡྷདྷམྨསམནྣཱགམེན ཨཊྛཱརསདྷཱ ཝིབྷངྒནྟི ཡཐཱཝུཏྟདེསནཱསམཏྠཏཱསམྤཱདཀགུཎནིདསྶནམེཏཾ ‘‘ཙཏུསཙྩདསོ ཨུཔེཏོ བུདྡྷདྷམྨེཧི ཨཊྛཱརསཧཱི’’ཏི. ཏེན ཡཐཱཝུཏྟཱཡ དེསནཱཡ སབྦཉྙུབྷཱསིཏཏྟཱ ཨཝིཔརཱིཏཏཾ དསྶེནྟོ ཏཏྠ སཏྟེ ཨུགྒཧཱདཱིསུ ནིཡོཛེཏི, ནིཊྛཱནགམནཉྩ ཨཏྟནོ ཝཱཡཱམཾ དསྶེནྟོ ཨཊྛཀཐཱསཝནེ ཙ ཨཱདརཾ ཨུཔྤཱདཡཏི, ཡཐཱཝུཏྟགུཎརཧིཏེན ཨསབྦཉྙུནཱ དེསེཏུཾ ཨསཀྐུཎེཡྻཏཾ དྷམྨསངྒཎཱིཝིབྷངྒཔྤཀརཎཱནཾ དསྶེནྟོ ཏཏྠ ཏདཊྛཀཐཱཡ ཙ སཱཏིསཡཾ གཱརཝཾ ཛནཡཏི, བུདྡྷཱདཱིནཉྩ རཏནཱནཾ སམྨཱསམྦུདྡྷཏཱདིགུཎེ ཝིབྷཱཝེཏི.

ཏཏྠ ཙཏྟཱརི སཙྩཱནི པཱཀཊཱནེཝ, ཨཊྛཱརས པན བུདྡྷདྷམྨཱ ཨེཝཾ ཝེདིཏབྦཱ – ‘‘ཨཏཱིཏཾསེ བུདྡྷསྶ བྷགཝཏོ ཨཔྤཊིཧཏཾ ཉཱཎཾ, ཨནཱགཏཾསེ…པེ… པཙྩུཔྤནྣཾསེ…པེ… ཨིམེཧི ཏཱིཧི དྷམྨེཧི སམནྣཱགཏསྶ བུདྡྷསྶ བྷགཝཏོ སབྦཾ ཀཱཡཀམྨཾ ཉཱཎཔུབྦངྒམཾ ཉཱཎཱནུཔརིཝཏྟཾ, སབྦཾ ཝཙཱིཀམྨཾ…པེ. … སབྦཾ མནོཀམྨཾ…པེ… ཨིམེཧི ཚཧི དྷམྨེཧི སམནྣཱགཏསྶ བུདྡྷསྶ བྷགཝཏོ ནཏྠི ཚནྡསྶ ཧཱནི, ནཏྠི དྷམྨདེསནཱཡ, ནཏྠི ཝཱིརིཡསྶ, ནཏྠི སམཱདྷིསྶ, ནཏྠི པཉྙཱཡ, ནཏྠི ཝིམུཏྟིཡཱ ཧཱནི. ཨིམེཧི དྭཱདསཧི དྷམྨེཧི སམནྣཱགཏསྶ བུདྡྷསྶ བྷགཝཏོ ནཏྠི དཝཱ, ནཏྠི རཝཱ, ནཏྠི ཨཕུཊཾ, ནཏྠི ཝེགཱཡིཏཏྟཾ, ནཏྠི ཨབྱཱཝཊམནོ, ནཏྠི ཨཔྤཊིསངྑཱནུཔེཀྑཱ’’ཏི.

ཏཏྠ ¶ ནཏྠི དཝཱཏི ཁིཌྜཱདྷིཔྤཱཡེན ཀིརིཡཱ ནཏྠི. ནཏྠི རཝཱཏི སཧསཱ ཀིརིཡཱ ནཏྠི. ནཏྠི ཨཕུཊནྟི ཉཱཎེན ཨཕུསིཏཾ ནཏྠི. ནཏྠི ཝེགཱཡིཏཏྟནྟི ཏུརིཏཀིརིཡཱ ནཏྠི. ནཏྠི ཨབྱཱཝཊམནོཏི ནིརཏྠཀོ ཙིཏྟསམུདཱཙཱརོ ནཏྠི. ནཏྠི ཨཔྤཊིསངྑཱནུཔེཀྑཱཏི ཨཉྙཱཎུཔེཀྑཱ ནཏྠི. ཀཏྠཙི པན ‘‘ནཏྠི དྷམྨདེསནཱཡ ཧཱནཱི’’ཏི ཨལིཁིཏྭཱ ‘‘ནཏྠི ཚནྡསྶ ཧཱནི, ནཏྠི ཝཱིརིཡསྶ, ནཏྠི སཏྟིཡཱ’’ཏི ལིཁནྟི.

༡. དྷམྨསངྒཧེ དྷམྨེ ཀུསལཱདིཀེ ཏིཀདུཀེཧི སངྒཧེཏྭཱ ཏེ ཨེཝ དྷམྨེ སུཏྟནྟེ ཁནྡྷཱདིཝསེན ཝུཏྟེ ཝིབྷཛིཏུཾ ཝིབྷངྒཔྤཀརཎཾ ཝུཏྟཾ. ཏཏྠ ¶ སངྑེཔེན ཝུཏྟཱནཾ ཁནྡྷཱདཱིནཾ ཝིབྷཛནཾ ཝིབྷངྒོ. སོ སོ ཝིབྷངྒོ པཀཏོ ཨདྷིཀཏོ ཡསྶཱ པཱལི༹ཡཱ, སཱ ‘‘ཝིབྷངྒཔྤཀརཎ’’ནྟི ཝུཙྩཏི. ཨདྷིཀཏོཏི ཙ ཝཏྟབྦབྷཱཝེན པརིགྒཧིཏོཏི ཨཏྠོ. ཏཏྠ ཝིབྷངྒཔྤཀརཎསྶ ཨཱདིབྷཱུཏེ ཁནྡྷཝིབྷངྒེ ‘‘པཉྩཀྑནྡྷཱ རཱུཔཀྑནྡྷོ…པེ… ཝིཉྙཱཎཀྑནྡྷོ’’ཏི ཨིདཾ སུཏྟནྟབྷཱཛནཱིཡཾ ནཱམ. ནནུ ན ཨེཏྟཀམེཝ སུཏྟནྟབྷཱཛནཱིཡནྟི? སཙྩཾ, ཨིཏི-སདྡེན པན ཨཱདི-སདྡཏྠཛོཏཀེན པཀཱརཏྠཛོཏཀེན ཝཱ སབྦཾ སུཏྟནྟབྷཱཛནཱིཡཾ སངྒཧེཏྭཱ ཝིཉྙཱཎཀྑནྡྷོཏི ཨེཝམཱདི ཨེཝཾཔཀཱརཾ ཝཱ ཨིདཾ སུཏྟནྟབྷཱཛནཱིཡནྟི ཝེདིཏབྦཾ. ཨཐ ཝཱ ཨེཀདེསེན སམུདཱཡཾ ནིདསྶེཏི པབྦཏསམུདྡཱདིནིདསྶཀོ ཝིཡ. ཏཏྠ ནིབྦཱནཝཛྫཱནཾ སབྦདྷམྨཱནཾ སངྒཱཧཀཏྟཱ སབྦསངྒཱཧཀེཧི ཙ ཨཱཡཏནཱདཱིཧི ཨཔྤཀཏརཔདཏྟཱ ཁནྡྷཱནཾ ཁནྡྷཝིབྷངྒོ ཨཱདིམྷི ཝུཏྟོ.

ན ཏཏོ ཧེཊྛཱཏི རཱུཔཱདཱིནཾ ཝེདཡིཏཱདིསབྷཱཝཏྟཱབྷཱཝཱ ཡསྨིཾ སབྷཱཝེ ཨཏཱིཏཱདཡོ རཱསཱི ཀཏྭཱ ཝཏྟབྦཱ, ཏསྶ རུཔྤནཱདིཏོ ཨཉྙསྶཱབྷཱཝཱ ཙ ཧེཊྛཱ གཎནེསུ སངྑཏདྷམྨཱནཾ ཨནིཊྛཱནཾ སཱཝསེསབྷཱཝཾ, ན ཧེཊྛཱ གཎནམཏྟཱབྷཱཝཾ སནྡྷཱཡ ཝུཏྟཾ. ཚཊྛསྶ པན ཁནྡྷསྶ ཨབྷཱཝཱ ‘‘ན ཨུདྡྷ’’ནྟི ཨཱཧ. ན ཧི སཝིབྷཱགདྷམྨེཧི ནིསྶཊསྶ ཨཏཱིཏཱདིབྷཱཝརཧིཏསྶ ཨེཀསྶ ནིབྦཱནསྶ རཱསཊྛོ ཨཏྠཱིཏི. ‘‘རཱསིམྷཱི’’ཏི སདྡཏྠསཧིཏཾ ཁནྡྷ-སདྡསྶ ཝིསཡཾ དསྶེཏི. ‘‘གུཎེ པཎྞཏྟིཡཾ རུལ༹ྷིཡ’’ནྟི ཝིསཡམེཝ ཁནྡྷ-སདྡསྶ དསྶེཏི, ན སདྡཏྠཾ. ལོཀིཡལོཀུཏྟརབྷེདཉྷི སཱིལཱདིགུཎཾ ནིཔྤདེསེན གཧེཏྭཱ པཝཏྟམཱནོ ཁནྡྷ-སདྡོ སཱིལཱདིགུཎཝིསིཊྛཾ རཱསཊྛཾ དཱིཔེཏཱིཏི. ཀེཙི པན ‘‘གུཎཊྛོ ཨེཏྠ ཁནྡྷཊྛོ’’ཏི ཝདནྟི. དཱརུཀྑནྡྷོཏི ཨེཏྠ པན ན ཁནྡྷ-སདྡོ པཉྙཏྟི-སདྡསྶ ཨཏྠེ ཝཏྟཏི, ཏཱདིསེ པན པུཐུལཱཡཏེ དཱརུམྷི དཱརུཀྑནྡྷོཏི པཉྙཏྟི ཧོཏཱིཏི པཉྙཏྟིཡཾ ནིཔཏཏཱིཏི ཝུཏྟཾ. ཏཐཱ ཨེཀསྨིམྤི ཝིཉྙཱཎེ ¶ པཝཏྟོ ཝིཉྙཱཎཀྑནྡྷོཏི ཁནྡྷ-སདྡོ ན རུལ༹ྷཱི-སདྡསྶ ཨཏྠཾ ཝདཏི, སམུདཱཡེ པན ནིརུལ༹ྷོ ཁནྡྷ-སདྡོ ཏདེཀདེསེ པཝཏྟམཱནོ ཏཱཡ ཨེཝ རུལ༹ྷིཡཱ པཝཏྟཏཱིཏི ཁནྡྷ-སདྡོ རུལ༹ྷིཡཾ ནིཔཏཏཱིཏི ཝུཏྟཾ.

རཱསིཏོ གུཎཏོཏི སབྦཏྠ ནིསྶཀྐཝཙནཾ ཝིསཡསྶེཝ ཁནྡྷ-སདྡཔྤཝཏྟིཡཱ ཀཱརཎབྷཱཝཾ སནྡྷཱཡ ཀཏནྟི ཝེདིཏབྦཾ. ‘‘རཱསིཏོ’’ཏི ཨིམམཏྠཾ སདྡཏྠཝསེནཔི ¶ ནིཡམེཏྭཱ དསྶེཏུཾ ‘‘ཨཡཉྷི ཁནྡྷཊྛོ ནཱམ པིཎྜཊྛོ’’ཏིཨཱདིམཱཧ. ཀོཊྛཱསཊྛེ ཁནྡྷཊྛེ ཚཊྛེནཔི ཁནྡྷེན བྷཝིཏབྦཾ. ནིབྦཱནམྤི ཧི ཚཊྛོ ཀོཊྛཱསོཏི. ཏསྨཱ ‘‘ཁནྡྷཊྛོ ནཱམ རཱསཊྛོ’’ཏི ཡུཏྟཾ. ཡེསཾ ཝཱ ཨཏཱིཏཱདིཝསེན བྷེདོ ཨཏྠི, ཏེསཾ རུཔྤནཱདིལཀྑཎཝསེན ཏཾཏཾཀོཊྛཱསཏཱ ཝུཙྩཏཱིཏི བྷེདརཧིཏསྶ ནིབྦཱནསྶ ཀོཊྛཱསཊྛེན ཙ ཁནྡྷབྷཱཝོ ན ཝུཏྟོཏི ཝེདིཏབྦོ.

ཨེཏྟཱཝཏཱཏི ཨུདྡེསམཏྟེནཱཏི ཨཏྠོ. ཙཏྟཱརོ ཙ མཧཱབྷཱུཏཱ…པེ… རཱུཔནྟི ཨེཝཾ ཝིབྷཏྟོ. ཀཏྠཱཏི ཙེ? ཨེཀཱདསསུ ཨོཀཱསེསུ. ཨིཏི-སདྡེན ནིདསྶནཏྠེན སབྦོ ཝིབྷཛནནཡོ དསྶིཏོ. ཨིདཉྩ ཝིབྷཛནཾ ཨོལཱ༹རིཀཱདཱིསུ ཙཀྑཱཡཏནནྟིཨཱདིཝིབྷཛནཉྩ ཡཐཱསམྦྷཝཾ ཨེཀཱདསསུ ཨོཀཱསེསུ ཡོཛེཏབྦཾ, ཨེཝཾ ཝེདནཱཀྑནྡྷཱདཱིསུཔི. ཝིཉྙཱཎཀྑནྡྷོ པན ཨེཀཱདསོཀཱསེསུ པུརིམེ ཨོཀཱསཔཉྩཀེ ‘‘ཙཀྑུཝིཉྙཱཎཾ…པེ… མནོཝིཉྙཱཎ’’ནྟི ཚཝིཉྙཱཎཀཱཡཝིསེསེན ཝིབྷཏྟོ, ན ཏཏྠ མནོདྷཱཏུ མནོཝིཉྙཱཎདྷཱཏཱུཏི ཝིབྷཛནཾ ཨཏྠི. ཏཾ པན དྭཡཾ མནོཝིཉྙཱཎནྟི ཝུཏྟནྟི ཨིམམཏྠཾ དསྶེཏུཾ ཨཊྛཀཐཱཡཾ ‘‘མནོདྷཱཏུ མནོཝིཉྙཱཎདྷཱཏཱུ’’ཏི ཝུཏྟནྟི དཊྛབྦཾ.

ཨེཝཾ པཱལི༹ནཡེན པཉྩསུ ཁནྡྷེསུ དྷམྨཔརིཙྪེདཾ དསྶེཏྭཱ པུན ཨཉྙེན པཀཱརེན དསྶེཏུཾ ‘‘ཨཔིཙཱ’’ཏིཨཱདིམཱཧ. ཨེཏྠཱཏི ཨེཏསྨིཾ ཁནྡྷནིདྡེསེ.

༡. རཱུཔཀྑནྡྷནིདྡེསཝཎྞནཱ

༢. ཡཾ ཀིཉྩཱིཏི ཨེཏྠ ཡནྟི སཱམཉྙེན ཨནིཡམནིདསྶནཾ, ཀིཉྩཱིཏི པཀཱརནྟརབྷེདཾ ཨཱམསིཏྭཱ ཨནིཡམནིདསྶནཾ. ཨུབྷཡེནཔི ཨཏཱིཏཾ ཝཱ…པེ… སནྟིཀེ ཝཱ ཨཔྤཾ ཝཱ བཧུཾ ཝཱ ཡཱདིསཾ ཝཱ ཏཱདིསཾ ཝཱ ཡཾ ཀིཉྩཱིཏི ནཔུཾསཀནིདྡེསཱརཧཾ སབྦཾ བྱཱཔེཏྭཱ སངྒཎྷཱཏཱིཏི ཨཉྙེསུཔི ¶ ནཔུཾསཀནིདྡེསཱརཧེསུ པསངྒཾ དིསྭཱ ཏསྶ ཨདྷིཔྤེཏཏྠཾ ཨཏིཙྩ པཝཏྟིཏོ ཨཏིཔྤསངྒསྶ ནིཡམནཏྠཾ ‘‘རཱུཔ’’ནྟི ཨཱཧ. ཡཾཀིཉྩཱིཏི སནིཔཱཏཾ ཡཾ-སདྡཾ ཀིཾ-སདྡཉྩ ཨནིཡམེཀཏྠདཱིཔནཝསེན ཨེཀཾ པདནྟི གཧེཏྭཱ ‘‘པདདྭཡེནཔཱི’’ཏི ཝུཏྟཾ.

ཀིཉྩ, བྷིཀྑཝེ, རཱུཔཾ ཝདེཐཱཏི ཏུམྷེཔི རཱུཔཾ རཱུཔནྟི ཝདེཐ, ཏཾ ཀེན ཀཱརཎེན ཝདེཐཱཏི ཨཏྠོ, ཨཐ ཝཱ ཀེན ཀཱརཎེན རཱུཔཾ, ཏཾ ཀཱརཎཾ ¶ ཝདེཐཱཏི ཨཏྠོ. ཨཐེཏེསུ བྷིཀྑཱུསུ ཏུཎྷཱིབྷཱུཏེསུ བྷགཝཱ ཨཱཧ ‘‘རུཔྤཏཱིཏི ཁོ’’ཏིཨཱདི.

བྷིཛྫཏཱིཏི སཱིཏཱདིསནྣིཔཱཏེ ཝིསདིསསནྟཱནུཔྤཏྟིདསྶནཏོ པུརིམསནྟཱནསྶ བྷེདཾ སནྡྷཱཡཱཧ. བྷེདོ ཙ ཝིསདིསཏཱཝིཀཱརཱཔཏྟཱིཏི བྷིཛྫཏཱིཏི ཝིཀཱརཾ ཨཱཔཛྫཏཱིཏི ཨཏྠོ. ཝིཀཱརཱཔཏྟི ཙ སཱིཏཱདིསནྣིཔཱཏེ ཝིསདིསརཱུཔུཔྤཏྟིཡེཝ. ཨརཱུཔཀྑནྡྷཱནཾ པན ཨཏིལཧུཔརིཝཏྟིཏོ ཡཐཱ རཱུཔདྷམྨཱནཾ ཋིཏིཀྑཎེ སཱིཏཱདཱིཧི སམཱགམོ ཧོཏི, ཡེན ཏཏྠ ཨུཏུནོ ཋིཏིཔྤཏྟསྶ པུརིམསདིསསནྟཱནུཔྤཱདནསམཏྠཏཱ ན ཧོཏི ཨཱཧཱརཱདིཀསྶ ཝཱ, ཨེཝཾ ཨཉྙེཧི སམཱགམོ ནཏྠི. སངྒྷཊྚནེན ཙ ཝིཀཱརཱཔཏྟིཡཾ རུཔྤན-སདྡོ ནིརུལ༹ྷོ, ཏསྨཱ ཨརཱུཔདྷམྨཱནཾ སངྒྷཊྚནཝིརཧིཏཏྟཱ རཱུཔདྷམྨཱནཾ ཝིཡ པཱཀཊསྶ ཝིཀཱརསྶ ཨབྷཱཝཏོ ཙ ‘‘རུཔྤནྟཱི’’ཏི ‘‘རུཔྤནལཀྑཎཱ’’ཏི ཙ ན ཝུཙྩནྟི. ཛིགྷཙྪཱཔིཔཱསཱཧི རུཔྤནཉྩ ཨུདརགྒིསནྣིཔཱཏེན ཧོཏཱིཏི དཊྛབྦཾ. ཨེཏྠ ཙ ཀུཔྤཏཱིཏི ཨེཏེན ཀཏྟུཨཏྠེ རཱུཔཔདསིདྡྷིཾ དསྶེཏི, གྷཊྚཱིཡཏི པཱིལཱི༹ཡཏཱིཏི ཨེཏེཧི ཀམྨཏྠེ. ཀོཔཱདིཀིརིཡཱཡེཝ ཧི རུཔྤནཀིརིཡཱཏི. སོ པན ཀཏྟུབྷཱུཏོ ཀམྨབྷཱུཏོ ཙ ཨཏྠོ བྷིཛྫམཱནོ ཧོཏཱིཏི ཨིམསྶཏྠསྶ དསྶནཏྠཾ ‘‘བྷིཛྫཏཱིཏི ཨཏྠོ’’ཏི ཝུཏྟཾ. ཨཐ ཝཱ རུཔྤཏཱིཏི རཱུཔནྟི ཀམྨཀཏྟུཏྠེ རཱུཔཔདསིདྡྷི ཝུཏྟཱ. ཝིཀཱརོ ཧི རུཔྤནནྟི. ཏེནེཝ ‘‘བྷིཛྫཏཱིཏི ཨཏྠོ’’ཏི ཀམྨཀཏྟུཏྠེན བྷིཛྫཏི-སདྡེན ཨཏྠཾ དསྶེཏི. ཡཾ པན རུཔྤཏི བྷིཛྫཏི, ཏཾ ཡསྨཱ ཀུཔྤཏི གྷཊྚཱིཡཏི པཱིལཱི༹ཡཏི, ཏསྨཱ ཨེཏེཧི ཙ པདེཧི པདཏྠོ པཱཀཊོ ཀཏོཏི. ‘‘ཀེནཊྛེནཱ’’ཏི པུཙྪཱསབྷཱགཝསེན ‘‘རུཔྤནཊྛེནཱ’’ཏི ཝུཏྟཾ. ན ཀེཝལཾ སདྡཏྠོཡེཝ རུཔྤནཾ, ཏསྶ པནཏྠསྶ ལཀྑཎཉྩ ཧོཏཱིཏི ཨཏྠལཀྑཎཝསེན ‘‘རུཔྤནལཀྑཎེན རཱུཔནྟིཔི ཝཏྟུཾ ཝཊྚཏཱི’’ཏི ཨཱཧ.

ཚིཛྫིཏྭཱཏི མུཙྪཱཔཏྟིཡཱ མུཙྩིཏྭཱ ཨངྒཔཙྩངྒཱནཾ ཚེདནཝསེན ཝཱ ཚིཛྫིཏྭཱ. ཨཙྩནྟཁཱརེན སཱིཏོདཀེནཱཏི ཨཏིསཱིཏབྷཱཝམེཝ སནྡྷཱཡ ཨཙྩནྟཁཱརཏཱ ཝུཏྟཱ སིཡཱ. ན ཧི ཏཾ ¶ ཀཔྤསཎྛཱནཾ ཨུདཀཾ སམྤཏྟིཀརཾ པཐཝཱིསནྡྷཱརཀཾ ཀཔྤཝིནཱསཨུདཀཾ ཝིཡ ཁཱརཾ བྷཝིཏུཾ ཨརཧཏི. ཏཐཱ ཧི སཏི པཐཝཱི ཝིལཱིཡེཡྻཱཏི. ཨཝཱིཙིམཧཱནིརཡེཏི སཨུསྶདཾ ཨཝཱིཙིནིརཡཾ ཝུཏྟཾ. ཏེནེཝ ‘‘ཏཏྠ ཧཱི’’ཏིཨཱདི ཝུཏྟཾ. པེཏྟི…པེ… ན ཧོནྟཱིཏི ཨེཝཾཝིདྷཱཔི སཏྟཱ ཨཏྠཱིཏི ཨདྷིཔྤཱཡོ ཨེཝཾཝིདྷཱཡེཝ ཧོནྟཱིཏི ནིཡམཱབྷཱཝཏོ. ཨེཝཾ ཀཱལཀཉྫིཀཱདཱིསུཔཱིཏི. སརནྟཱ གཙྪནྟཱིཏི སརཱིསཔ-སདྡསྶ ཨཏྠཾ ཝདཏི.

ཨབྷིསཉྙཱུཧིཏྭཱཏི ¶ ཨེཏྠ སམཱུཧཾ ཀཏྭཱཏིཔི ཨཏྠོ. ཨེཏེན སབྦཾ རཱུཔཾ…པེ… དསྶིཏཾ ཧོཏཱིཏི ཨེཏེན རཱུཔཀྑནྡྷ-སདྡསྶ སམཱནཱདྷིཀརཎསམཱསབྷཱཝཾ དསྶེཏི. ཏེནེཝཱཧ ‘‘ན ཧི རཱུཔཏོ…པེ… ཨཏྠཱི’’ཏི.

༣. པཀྑིཔིཏྭཱཏི ཨེཏྠ ཨེཀཱདསོཀཱསེསུ རཱུཔཾ པཀྑིཔིཏྭཱཏི ཨཏྠོ. ན ཧི ཏཏྠ མཱཏིཀཾཡེཝ པཀྑིཔིཏྭཱ མཱཏིཀཱ ཋཔིཏཱ, ཨཐ ཁོ པཀརཎཔྤཏྟཾ རཱུཔནྟི.

ཨཔརོ ནཡོ…པེ… ཨེཏྠེཝ གཎནཾ གཏནྟི ཨེཏེན ཨཏཱིཏཾསེནཱཏི བྷུམྨཏྠེ ཀརཎཝཙནནྟི དསྶེཏི. ཡེན པཀཱརེན གཎནཾ གཏཾ, ཏཾ དསྶེཏུཾ ‘‘ཙཏྟཱརོ ཙ མཧཱབྷཱུཏཱ’’ཏིཨཱདི ཝུཏྟནྟི ཨིམསྨིཾ ཨཏྠེ སཏི མཧཱབྷཱུཏུཔཱདཱཡརཱུཔབྷཱཝོ ཨཏཱིཏཀོཊྛཱསེ གཎནསྶ ཀཱརཎནྟི ཨཱཔཛྫཏི. ན ཧི ཨཏཱིཏཾསཱནཾ ཝེདནཱདཱིནཾ ནིཝཏྟནཏྠཾ ཨིདཾ ཝཙནཾ ‘‘ཡཾ རཱུཔ’’ནྟི ཨེཏེནེཝ ཏེསཾ ནིཝཏྟིཏཏྟཱ, ནཱཔི རཱུཔསྶ ཨཉྙཔྤཀཱརནིཝཏྟནཏྠཾ སབྦཔྤཀཱརསྶ ཏཏྠ གཎིཏཏྟཱ, ན ཙ ཨནཱགཏཔཙྩུཔྤནྣཱཀཱརནིཝཏྟནཏྠཾ ཨཏཱིཏཾསཝཙནེན ཏཾནིཝཏྟནཏོཏི. ཨཐ པན ཡཾ ཨཏཱིཏཾསེན གཎིཏཾ, ཏཾ ཙཏྟཱརོ ཙ…པེ… རཱུཔནྟི ཨེཝཾ གཎིཏནྟི ཨཡམཏྠོ ཨདྷིཔྤེཏོ, ཨེཝཾ སཏི གཎནནྟརདསྶནཾ ཨིདཾ སིཡཱ, ན ཨཏཱིཏཾསེན གཎིཏཔྤཀཱརདསྶནཾ, ཏཾདསྶནེ པན སཏི བྷཱུཏུཔཱདཱཡརཱུཔཔྤཀཱརེན ཨཏཱིཏཾསེ གཎིཏཾ ཏཾསབྷཱཝཏྟཱཏི ཨཱཔནྣམེཝ ཧོཏི, ན ཙ ཨེཝཾསབྷཱཝཏཱ ཨཏཱིཏཾསེ གཎིཏཏཱཡ ཀཱརཎཾ བྷཝིཏུཾ ཨརཧཏི ཨེཝཾསབྷཱཝསྶེཝ པཙྩུཔྤནྣཱནཱགཏེསུ གཎིཏཏྟཱ སུཁཱདིསབྷཱཝསྶ ཙ ཨཏཱིཏཾསེ གཎིཏཏྟཱ, ཏསྨཱ པུརིམནཡོ ཨེཝ ཡུཏྟོ. ཨཛ྄ཛྷཏྟབཧིདྡྷཱནིདྡེསེསུཔི ཏཱདིསོ ཨེཝཏྠོ ལབྦྷཏཱིཏི.

སུཏྟནྟཔརིཡཱཡཏོཏི པརིཡཱཡདེསནཏྟཱ སུཏྟསྶ ཝུཏྟཾ. ཨབྷིདྷམྨནིདྡེསཏོཏི ནིཔྤརིཡཱཡདེསནཏྟཱ ཨབྷིདྷམྨསྶ ནིཙྪཡེན དེསོ ནིདྡེསོཏི ཀཏྭཱ ཝུཏྟཾ. ཀིཉྩཱཔཱིཏིཨཱདཱིསུ ཨཡམདྷིཔྤཱཡོ ¶ – སུཏྟནྟབྷཱཛནཱིཡཏྟཱ ཡཐཱ ‘‘ཨཏཱིཏཾ ནནྭཱགམེཡྻཱ’’ཏིཨཱདཱིསུ ཨདྡྷཱནཝསེན ཨཏཱིཏཱདིབྷཱཝོཝ ཝུཏྟོ, ཏཐཱ ཨིདྷཱཔི ནིདྡིསིཏབྦོ (མ. ནི. ༣.༢༧༢, ༢༧༥; ཨཔ. ཐེར ༢.༥༥.༢༤༤) སིཡཱ. ཨེཝཾ སནྟེཔི སུཏྟནྟབྷཱཛནཱིཡམྤི ཨབྷིདྷམྨདེསནཱཡེཝ སུཏྟནྟེ ཝུཏྟདྷམྨེ ཝིཙིནིཏྭཱ ཝིབྷཛནཝསེན པཝཏྟཱཏི ཨབྷིདྷམྨནིདྡེསེནེཝ ཨཏཱིཏཱདིབྷཱཝོ ནིདྡིཊྛོཏི.

ཨདྡྷཱསནྟཏིསམཡཁཎཝསེནཱཏི ¶ ཨེཏྠ ཙུཏིཔཊིསནྡྷིཔརིཙྪིནྣེ ཀཱལེ ཨདྡྷཱ-སདྡོ ཝཏྟཏཱིཏི ‘‘ཨཧོསིཾ ནུ ཁོ ཨཧམཏཱིཏམདྡྷཱན’’ནྟིཨཱདིསུཏྟཝསེན (མ. ནི. ༡.༡༨; སཾ. ནི. ༢.༢༠) ཝིཉྙཱཡཏི. ‘‘ཏཡོམེ, བྷིཀྑཝེ, ཨདྡྷཱ. ཀཏམེ ཏཡོ? ཨཏཱིཏོ ཨདྡྷཱ, ཨནཱགཏོ ཨདྡྷཱ, པཙྩུཔྤནྣོ ཨདྡྷཱ’’ཏི (ཨིཏིཝུ. ༦༣; དཱི. ནི. ༣.༣༠༥) ཨེཏྠ པན པརམཏྠཏོ པརིཙྪིཛྫམཱནོ ཨདྡྷཱ ནིརུཏྟིཔཐསུཏྟཝསེན (སཾ. ནི. ༣.༦༢) ཁཎཔརིཙྪིནྣོ ཡུཏྟོ. ཏཏྠ ཧི ‘‘ཡཾ, བྷིཀྑཝེ, རཱུཔཾ ཛཱཏཾ པཱཏུབྷཱུཏཾ, ‘ཨཏྠཱི’ཏི ཏསྶ སངྑཱ’’ཏི (སཾ. ནི. ༣.༦༢) ཝིཛྫམཱནསྶ པཙྩུཔྤནྣཏཱ ཏཏོ པུབྦེ པཙྪཱ ཙ ཨཏཱིཏཱནཱགཏཏཱ ཝུཏྟཱཏི. ཡེབྷུཡྻེན པན ཙུཏིཔཊིསནྡྷིཔརིཙྪིནྣོ (དཱི. ནི. ༣.༣༠༥; ཨིཏིཝུ. ༦༣) སུཏྟེསུ ཨཏཱིཏཱདིཀོ ཨདྡྷཱ ཝུཏྟོཏི སོ ཨེཝ ཨིདྷཱཔི ‘‘ཨདྡྷཱཝསེནཱ’’ཏི ཝུཏྟོ. སཱིཏཾ སཱིཏསྶ སབྷཱགོ, ཏཐཱ ཨུཎྷཾ ཨུཎྷསྶ. ཡཾ པན སཱིཏཾ ཨུཎྷཾ ཝཱ སརཱིརེ སནྣིཔཏིཏཾ སནྟཱནཝསེན པཝཏྟམཱནཾ ཨནཱུནཾ ཨནདྷིཀཾ ཨེཀཱཀཱརཾ, ཏཾ ཨེཀོ ཨུཏཱུཏི ཝུཙྩཏི. སབྷཱགཨུཏུནོ ཨནེཀནྟསབྷཱཝཏོ ཨེཀགཧཎཾ ཀཏཾ, ཨེཝཾ ཨཱཧཱརེཔི. ཨེཀཝཱིཐིཨེཀཛཝནསམུཊྛཱནནྟི པཉྩཚཊྛདྭཱརཝསེན ཝུཏྟཾ. སནྟཏིསམཡཀཐཱ ཝིཔསྶཀཱནཾ ཨུཔཀཱརཏྠཱཡ ཨཊྛཀཐཱསུ ཀཐིཏཱ.

ནིཊྛིཏཧེཏུཔཙྩཡཀིཙྩཾ, ནིཊྛིཏཧེཏུཀིཙྩམནིཊྛིཏཔཙྩཡཀིཙྩཾ, ཨུབྷཡཀིཙྩམསམྤཏྟཾ, སཀིཙྩཀྑཎེ པཙྩུཔྤནྣཾ. ཛནཀོ ཧེཏུ, ཨུཔཏྠམྦྷཀོ པཙྩཡོ, ཏེསཾ ཨུཔྤཱདནཾ ཨུཔཏྠམྦྷནཉྩ ཀིཙྩཾ. ཡཐཱ བཱིཛསྶ ཨངྐུརུཔྤཱདནཾ པཐཝཱིཨཱདཱིནཉྩ ཏདུཔཏྠམྦྷནཾ ཀམྨསྶ ཀཊཏྟཱརཱུཔཝིཔཱཀུཔྤཱདནཾ ཨཱཧཱརཱདཱིནཾ ཏདུཔཏྠམྦྷནཾ, ཨེཝཾ ཨེཀེཀསྶ ཀལཱཔསྶ ཙིཏྟུཔྤཱདསྶ ཙ ཛནཀཱནཾ ཀམྨཱནནྟརཱདིཔཙྩཡབྷཱུཏཱནཾ ཨུཔཏྠམྦྷཀཱནཉྩ སཧཛཱཏཔུརེཛཱཏཔཙྪཱཛཱཏཱནཾ ཀིཙྩཾ ཡཐཱསམྦྷཝཾ ཡོཛེཏབྦཾ. ཏཏྠ ཨུཔྤཱདཀྑཎེ ཧེཏུཀིཙྩཾ དཊྛབྦཾ, ཏཱིསུཔི ཁཎེསུ པཙྩཡཀིཙྩཾ. པཐཝཱིཨཱདཱིནཾ སནྡྷཱརཎཱདིཀཾ ཕསྶཱདཱིནཾ ཕུསནཱདིཀཉྩ ཨཏྟནོ ཨཏྟནོ ཀིཙྩཾ སཀིཙྩཾ, ཏསྶ ཀརཎཀྑཎོ སཀིཙྩཀྑཎོ. སཧ ཝཱ ཀིཙྩེན སཀིཙྩཾ, ཡསྨིཾ ཁཎེ སཀིཙྩཾ རཱུཔཾ ཝཱ ཨརཱུཔཾ ཝཱ ཧོཏི, སོ སཀིཙྩཀྑཎོ, ཏསྨིཾ ཁཎེ པཙྩུཔྤནྣཾ.

༦. ཨེཏྟཀམེཝཱཏི ¶ ‘‘ཏེསཾ ཏེས’’ནྟི ཨིམིནཱ ཨཱམེཌིཏཝཙནེན ཨབྷིབྱཱཔནཏྠེན ཝུཏྟཏྠམེཝ. ‘‘ཨཔརསྶ ཨཔརསྶཱ’’ཏི དཱིཔནཾ ཨཔརདཱིཔནཾ. པརིཡེསཏཱུཏི ¶ ཨེཏེན པརིཡེསནཱཡ ཨནིཊྛནཱམནིཝཏྟནསྶ ཨཀཱརཎབྷཱཝཾ དསྶེཏི. ཀམྨདོསེན ཧི ཙིཏྟཝིཔལླཱསདོསེན ཙ གཱུཐབྷཀྑཔཱཎཱདཡོ ཨུམྨཏྟཀཱདཡོ ཙ པརིཡེསེཡྻུཾ དིཊྛིཝིཔལླཱསེན ཙ ཡོནཀཱདཡོ ན ཨཱརམྨཎསྶ པརིཡེསིཏབྦསབྷཱཝཏྟཱ, ཨཔརིཡེསིཏབྦསབྷཱཝཏྟཱ པན ཨེཏསྶ ཨནིཊྛམིཙྩེཝ ནཱམནྟི ཨཏྠོ.

སམྤཏྟིཝིརཧཏོཏི རཱུཔཱདཱིནཾ དེཝམནུསྶསམྤཏྟིབྷཝེ ཀུསལཀམྨཕལཏཱ སམིདྡྷསོབྷནཏཱ ཙ སམྤཏྟི, ཏབྦིརཧཏོཏི ཨཏྠོ. ཏཏོ ཨེཝ ཏཾ ན པརིཡེསིཏབྦནྟི. སོབྷནཱནི ཙ ཀཱནིཙི ཧཏྠིརཱུཔཱདཱིནི ཨཀུསལཀམྨནིབྦཏྟཱནི ན ཏེསཾཡེཝ ཧཏྠིཨཱདཱིནཾ སུཁསྶ ཧེཏུབྷཱཝཾ གཙྪནྟཱིཏི ཏེསཾ སངྒཎྷནཏྠཾ ‘‘ཨཀནྟ’’ནྟི ཝུཏྟཾ. ཏསྶ ཏསྶེཝ ཧི སཏྟསྶ ཨཏྟནཱ ཀཏེན ཀུསལེན ནིབྦཏྟཾ སུཁསྶ པཙྩཡོ ཧོཏི, ཨཀུསལེན ནིབྦཏྟཾ དུཀྑསྶ. ཏསྨཱ ཀམྨཛཱནཾ ཨིཊྛཱནིཊྛཏཱ ཀམྨཀཱརཀསཏྟསྶ ཝསེན ཡོཛནཱརཧཱ སིཡཱ. ཨཊྛཀཐཱཡཾ པན ‘‘ཀུསལཀམྨཛཾ ཨནིཊྛཾ ནཱམ ནཏྠཱི’’ཏི ཨིདམེཝ ཝུཏྟཾ, ན ཝུཏྟཾ ‘‘ཨཀུསལཀམྨཛཾ ཨིཊྛཾ ནཱམ ནཏྠཱི’’ཏི. ཏེན ཨཀུསལཀམྨཛམྤི སོབྷནཾ པརསཏྟཱནཾ ཨིཊྛནྟི ཨནུཉྙཱཏཾ བྷཝིསྶཏི. ཀུསལཀམྨཛཾ པན སབྦེསཾ ཨིཊྛམེཝཱཏི ཝདནྟི. ཏིརཙྪཱནགཏཱནཾ པན ཀེསཉྩི མནུསྶརཱུཔཾ ཨམནཱཔཾ, ཡཏོ ཏེ དིསྭཱཝ པལཱཡནྟི. མནུསྶཱ ཙ དེཝཏཱརཱུཔཾ དིསྭཱ བྷཱཡནྟི, ཏེསམྤི ཝིཔཱཀཝིཉྙཱཎཾ ཏཾ རཱུཔཾ ཨཱརབྦྷ ཀུསལཝིཔཱཀཾ ཨུཔྤཛྫཏི, ཏཱདིསསྶ པན པུཉྙསྶ ཨབྷཱཝཱ ན ཏེསཾ ཏཏྠ ཨབྷིརཏི ཧོཏཱིཏི ཨདྷིཔྤཱཡོ. ཀུསལཀམྨཛསྶ པན ཨནིཊྛསྶཱབྷཱཝོ ཝིཡ ཨཀུསལཀམྨཛསྶ སོབྷནསྶ ཨིཊྛསྶ ཨབྷཱཝོ ཝཏྟབྦོ. ཧཏྠིཨཱདཱིནམྤི ཧི ཨཀུསལཀམྨཛཾ མནུསྶཱནཾ ཨཀུསལཝིཔཱཀསྶེཝ ཨཱརམྨཎཾ, ཀུསལཀམྨཛཾ པན པཝཏྟེ སམུཊྛིཏཾ ཀུསལཝིཔཱཀསྶ. ཨིཊྛཱརམྨཎེན པན ཝོམིསྶཀཏྟཱ ཨཔྤཀཾ ཨཀུསལཀམྨཛཾ བཧུལཾ ཨཀུསལཝིཔཱཀུཔྤཏྟིཡཱ ཀཱརཎཾ ན བྷཝིསྶཏཱིཏི སཀྐཱ ཝཏྟུནྟི. ཝིཔཱཀཾ པན ཀཏྠཙི ན སཀྐཱ ཝཉྩེཏུནྟི ཝིཔཱཀཝསེན ཨིཊྛཱནིཊྛཱརམྨཎཝཝཏྠཱནཾ སུཊྛུ ཝུཏྟཾ. ཏསྨཱ ཏཾ ཨནུགནྟྭཱ སབྦཏྠ ཨིཊྛཱནིཊྛཏཱ ཡོཛེཏབྦཱ.

ཨནིཊྛཱ པཉྩ ཀཱམགུཎཱཏི ཀསྨཱ ཝུཏྟཾ, ནནུ ‘‘ཙཀྑུཝིཉྙེཡྻཱནི རཱུཔཱནི ཨིཊྛཱནཱི’’ཏི (མ. ནི. ༡.༡༦༦; ༢.༡༥༥; ༣.༡༩༠; སཾ. ནི. ༥.༣༠) ཨེཝམཱདིནཱ ཨིཊྛཱནེཝ རཱུཔཱདཱིནི ‘‘ཀཱམགུཎཱ’’ཏི ཝུཏྟཱནཱིཏི? ཀཱམགུཎསདིསེསུ ¶ ཀཱམགུཎཝོཧཱརཏོ, སདིསཏཱ ཙ རཱུཔཱདིབྷཱཝོཡེཝ ¶ , ན ཨིཊྛཏཱ. ‘‘ཨནིཊྛཱ’’ཏི ཝཱ ཝཙནེན ཨཀཱམགུཎཏཱ དསྶིཏཱཏི ཀཱམགུཎཝིསབྷཱགཱ རཱུཔཱདཡོ ‘‘ཀཱམགུཎཱ’’ཏི ཝུཏྟཱ ཨསིཝེ ‘‘སིཝཱ’’ཏི ཝོཧཱརོ ཝིཡ. སབྦཱནི ཝཱ ཨིཊྛཱནིཊྛཱནི རཱུཔཱདཱིནི ཏཎྷཱཝཏྠུབྷཱཝཏོ ཀཱམགུཎཱཡེཝ. ཝུཏྟཉྷི ‘‘རཱུཔཱ ལོཀེ པིཡརཱུཔཾ སཱཏརཱུཔ’’ནྟིཨཱདི (དཱི. ནི. ༢.༤༠༠; མ. ནི. ༡.༡༣༣; ཝིབྷ. ༢༠༣). ཨཏིསཡེན པན ཀཱམནཱིཡཏྟཱ སུཏྟེསུ ‘‘ཀཱམགུཎཱ’’ཏི ཨིཊྛཱནི རཱུཔཱདཱིནི ཝུཏྟཱནཱིཏི.

དྭཱིསུཔི ཧཱིནཔཎཱིཏཔདེསུ ‘‘ཨཀུསལཀམྨཛཝསེན ཀུསལཀམྨཛཝསེནཱ’’ཏི ཝཙནཾ ‘‘ཏེསཾ ཏེསཾ སཏྟཱན’’ནྟི སཏྟཝསེན ནིཡམེཏྭཱ ཝིབྷཛིཏཏྟཱ, ཨཡཉྩཏྠོ ‘‘ཏེསཾ ཏེས’’ནྟི ཨཝཡཝཡོགེ སཱམིཝཙནཾ ཀཏྭཱ ཝུཏྟོཏི ཝེདིཏབྦོ. སཏྟསནྟཱནཔརིཡཱཔནྣེསུ ཀམྨཛཾ ཝིསིཊྛནྟི ‘‘ཀམྨཛཝསེནཱ’’ཏི ཝུཏྟཾ. ཡདི པན ཏེཧི ཏེཧཱིཏི ཨེཏསྨིཾ ཨཏྠེ ཏེསཾ ཏེསནྟི སཱམིཝཙནཾ, ཝིསཡཝིསཡཱིསམྦནྡྷེ ཝཱ, ན ཀམྨཛཝསེནེཝ རཱུཔཱདཱིནི ཝིབྷཏྟཱནི, སབྦེསཾ པན ཨིནྡྲིཡབདྡྷཱནཾ ཝསེན ཝིབྷཏྟཱནཱིཏི ཝིཉྙཱཡནྟི. ཨེཏྠ ཙ པཱཀཊེཧི རཱུཔཱདཱིཧི ནཡོ དསྶིཏོཏི ཙཀྑཱདཱིསུཔི ཧཱིནཔཎཱིཏཏཱ ཡོཛེཏབྦཱ.

མནཱཔཔརིཡནྟནྟི མནཱཔཾ པརིཡནྟཾ མརིཡཱདཱབྷཱུཏཾ པཉྩསུ ཀཱམགུཎེསུ ཝདཱམཱིཏི ཨཏྠོ. ཀིཾ ཀཱརཎནྟི? ཡསྨཱ ཏེ ཨེཀཙྩསྶ མནཱཔཱ ཧོནྟི, ཨེཀཙྩསྶ ཨམནཱཔཱ, ཡསྶ ཡེཝ མནཱཔཱ, ཏསྶ ཏེཝ པརམཱ, ཏསྨཱ ཏསྶ ཏསྶ ཨཛ྄ཛྷཱསཡཝསེན ཀཱམགུཎཱནཾ པརམཏཱ ཧོཏི, ན ཏེསཾཡེཝ སབྷཱཝཏོ.

ཨེཝནྟི ཨིམསྨིཾ སུཏྟེ ཝུཏྟནཡེན. ཨེཀསྨིཾཡེཝ ཨསྶཱདནཀུཛ྄ཛྷནཏོ ཨཱརམྨཎསབྷཱཝསྶེཝ ཨིཊྛཱནིཊྛཱབྷཱཝཏོ ཨནིཊྛཾ ‘‘ཨིཊྛ’’ནྟི གཧཎཏོ ཙ, ཨིཊྛཾ ‘‘ཨནིཊྛ’’ནྟི གཧཎཏོ ཙ ཨིཊྛཱནིཊྛཾ ནཱམ པཱཊིཡེཀྐཾ པཊིཝིབྷཏྟཾ ནཏྠཱིཏི ཨཏྠོ. སཉྙཱཝིཔལླཱསེན ཙཱཏིཨཱདིནཱ ནིབྦཱནེ ཝིཡ ཨཉྙེསུ ཨཱརམྨཎེསུ སཉྙཱཝིཔལླཱསེན ཨིཊྛཱནིཊྛགྒཧཎཾ ཧོཏི. པིཏྟུམྨཏྟཱདཱིནཾ ཁཱིརསཀྐརཱདཱིསུ དོསུསྶདསམུཊྛིཏསཉྙཱཝིཔལླཱསཝསེན ཏིཏྟགྒཧཎཾ ཝིཡཱཏི ཨིམམཏྠཾ སནྡྷཱཡ མནཱཔཔརིཡནྟཏཱ ཝུཏྟཱཏི དསྶེཏི.

ཝིབྷཏྟཾ ¶ ཨཏྠཱིཏི ཙ ཝཝཏྠིཏཾ ཨཏྠཱིཏི ཨཏྠོ, ཨཊྛཀཐཱཙརིཡེཧི ཝིབྷཏྟཾ པཀཱསིཏནྟི ཝཱ. ཏཉྩ མཛ྄ཛྷིམཀསཏྟསྶ ཝསེན ཝཝཏྠིཏཾ པཀཱསིཏཉྩ, ཨཉྙེསཉྩ ཝིཔལླཱསཝསེན ཨིདཾ ཨིཊྛཾ ¶ ཨནིཊྛཉྩ ཧོཏཱིཏི ཨདྷིཔྤཱཡོ. ཨེཝཾ ཝཝཏྠིཏསྶ པནིཊྛཱནིཊྛསྶ ཨནིཊྛཾ ཨིཊྛནྟི ཙ གཧཎེ ན ཀེཝལཾ སཉྙཱཝིཔལླཱསོཝ ཀཱརཎཾ, དྷཱཏུཀྑོབྷཝསེན ཨིནྡྲིཡཝིཀཱརཱཔཏྟིཨཱདིནཱ ཀུསལཱཀུསལཝིཔཱཀུཔྤཏྟིཧེཏུབྷཱཝོཔཱིཏི སཀྐཱ ཝཏྟུཾ. ཏཐཱ ཧི སཱིཏུདཀཾ གྷམྨཱབྷིཏཏྟཱནཾ ཀུསལཝིཔཱཀསྶ ཀཱཡཝིཉྙཱཎསྶ ཧེཏུ ཧོཏི, སཱིཏཱབྷིབྷཱུཏཱནཾ ཨཀུསལཝིཔཱཀསྶ. ཏཱུལཔིཙུསམྥསྶོ ཝཎེ དུཀྑོ ནིཝཎེ སུཁོ, མུདུཏརུཎཧཏྠསམྦཱཧནཉྩ སུཁཾ ཨུཔྤཱདེཏི, ཏེནེཝ ཧཏྠེན པཧརཎཾ དུཀྑཾ, ཏསྨཱ ཝིཔཱཀཝསེན ཨཱརམྨཎཝཝཏྠཱནཾ ཡུཏྟཾ.

ཀིཉྩཱཔཱིཏིཨཱདིནཱ སཏིཔི སཉྙཱཝིཔལླཱསེ བུདྡྷརཱུཔདསྶནཱདཱིསུ ཀུསལཝིཔཱཀསྶེཝ གཱུཐདསྶནཱདཱིསུ ཙ ཨཀུསལཝིཔཱཀསྶ ཨུཔྤཏྟིཾ དསྶེནྟོ ཏེན ཝིཔཱཀེན ཨཱརམྨཎསྶ ཨིཊྛཱནིཊྛཏཾ དསྶེཏི. ཝིཛྫམཱནེཔི སཉྙཱཝིཔལླཱསེ ཨཱརམྨཎེན ཝིཔཱཀནིཡམདསྶནཾ ཨཱརམྨཎནིཡམདསྶནཏྠམེཝ ཀཏནྟི.

ཨཔིཙ དྭཱརཝསེནཔཱིཏིཨཱདིནཱ དྭཱརནྟརེ དུཀྑསྶ སུཁསྶ ཙ པཙྩཡབྷཱུཏསྶ དྭཱརནྟརེ སུཁདུཀྑཝིཔཱཀུཔྤཱདནཏོ ཝིཔཱཀེན ཨཱརམྨཎནིཡམདསྶནེན ཨེཀསྨིཾཡེཝ ཙ དྭཱརེ སམཱནསྶེཝ མཎིརཏནཱདིཕོཊྛབྦསྶ སཎིཀཾ ཕུསནེ པོཐནེ ཙ སུཁདུཀྑུཔྤཱདནཏོ ཝིཔཱཀཝསེན ཨིཊྛཱནིཊྛཏཱ དསྶིཏཱཏི ཝིཉྙཱཡཏི.

ཧེཊྛིམནཡོཏི མཛ྄ཛྷིམཀསཏྟསྶ ཝིཔཱཀསྶ ཙ ཝསེན ཝཝཏྠིཏཾ ཨཱརམྨཎཾ གཧེཏྭཱ ‘‘ཏེསཾ ཏེསཾ སཏྟཱནཾ ཨུཉྙཱཏ’’ནྟི (ཝིབྷ. ༦) ཙ ཨཱདིནཱ ཝུཏྟནཡོ. སམྨུཏིམནཱཔནྟི མཛ྄ཛྷིམཀསཏྟསྶ ཝིཔཱཀསྶ ཙ ཝསེན སམྨཏཾ ཝཝཏྠིཏཾ མནཱཔཾ, ཏཾ པན སབྷཱཝེནེཝ ཝཝཏྠིཏནྟི ཨབྷིནྡིཏབྦཏོཝ ན བྷིནྡཏཱིཏི ཨདྷིཔྤཱཡོ. སཉྙཱཝིཔལླཱསེན ནེརཡིཀཱདཱིཧིཔི པུགྒལེཧི མནཱཔནྟི གཧིཏཾ པུགྒལམནཱཔཾ ‘‘ཏཾ ཏཾ ཝཱ པནཱ’’ཏིཨཱདིནཱ བྷིནྡཏི. ཝེམཱནིཀཔེཏརཱུཔམྤི ཨཀུསལཀམྨཛཏྟཱ ཀམྨཀཱརཎཱདིདུཀྑཝཏྠུབྷཱཝཏོ ཙ ‘‘མནུསྶརཱུཔཏོ ཧཱིན’’ནྟི ཝུཏྟཾ.

༧. ཨོལཱ༹རིཀརཱུཔཱནཾ ¶ ཝཏྠཱརམྨཎཔཊིགྷཱཏཝསེན སུཔརིགྒཧིཏཏཱ, སུཁུམཱནཾ ཏཐཱ ཨབྷཱཝཏོ དུཔྤརིགྒཧིཏཏཱ ཙ ཡོཛེཏབྦཱ. དུཔྤརིགྒཧཊྛེནེཝ ལཀྑཎདུཔྤཊིཝིཛ྄ཛྷནཏཱ དཊྛབྦཱ. དསཝིདྷནྟི ‘‘དཱུརེ’’ཏི ཨཝུཏྟསྶ དསྶནཏྠཾ ཝུཏྟཾ. ཝུཏྟམྤི པན ཨོཀཱསཏོ དཱུརེ ཧོཏིཡེཝ.

ཧེཊྛིམནཡོཏི ¶ ‘‘ཨིཏྠིནྡྲིཡཾ…པེ… ཨིདཾ ཝུཙྩཏི རཱུཔཾ སནྟིཀེ’’ཏི (ཝིབྷ. ༧) ཨེཝཾ ལཀྑཎཏོ དྭཱདསཧཏྠཝསེན ཝཝཏྠིཏཨོཀཱསཏོ ཙ དསྶེཏྭཱ ནིཡྻཱཏིཏནཡོ. སོ ལཀྑཎོཀཱསཝསེན དཱུརསནྟིཀེན སཧ གཧེཏྭཱ ནིཡྻཱཏིཏཏྟཱ བྷིནྡམཱནོ མིསྶཀཾ ཀརོནྟོ གཏོ. ཨཐ ཝཱ བྷིནྡམཱནོཏི སརཱུཔདསྶནེན ལཀྑཎཏོ ཡེཝཱཔནཀེན ཨོཀཱསཏོཏི ཨེཝཾ ལཀྑཎཏོ ཨོཀཱསཏོ ཙ ཝིསུཾ ཀརོནྟོ གཏོཏི ཨཏྠོ. ཨཐ ཝཱ ལཀྑཎཏོ སནྟིཀདཱུརཱནཾ ཨོཀཱསཏོ དཱུརསནྟིཀབྷཱཝཀརཎེན སནྟིཀབྷཱཝཾ བྷིནྡིཏྭཱ དཱུརབྷཱཝཾ, དཱུརབྷཱཝཉྩ བྷིནྡིཏྭཱ སནྟིཀབྷཱཝཾ ཀརོནྟོ པཝཏྟོཏི ‘‘བྷིནྡམཱནོ གཏོ’’ཏི ཝུཏྟཾ. ཨིདྷ པནཱཏི ‘‘ཏཾ ཏཾ ཝཱ པན རཱུཔཾ ཨུཔཱདཱཡ ཨུཔཱདཱཡཱ’’ཏི ཨིདྷ པུརིམནཡེན ལཀྑཎཏོ དཱུརཾ ཨོཀཱསཏོ སནྟིཀབྷཱཝཀརཎེན ན བྷིནྡཏི བྷགཝཱ, ན ཙ ཨོཀཱསདཱུརཏོ ཝིསུཾ ཀརཎེན, ནཱཔི ཨོཀཱསདཱུརེན ཝོམིསྶཀཀརཎེནཱཏི ཨཏྠོ. ཀིཾ པན ཀརོཏཱིཏི? ཨོཀཱསཏོ དཱུརམེཝ བྷིནྡཏི. ཨེཏྠ པན ན པུབྦེ ཝུཏྟནཡེན ཏིདྷཱ ཨཏྠོ དཊྛབྦོ. ན ཧི ཨོཀཱསཏོ དཱུརཾ ལཀྑཎཏོ སནྟིཀཾ ཀརོཏི, ལཀྑཎཏོ ཝཱ ཝིསུཾ ཏེན ཝཱ ཝོམིསྶཀནྟི. ཨོཀཱསཏོ དཱུརསྶ པན ཨོཀཱསཏོཝ སནྟིཀབྷཱཝཀརཎཾ ཨིདྷ ‘‘བྷེདན’’ནྟི ཝེདིཏབྦཾ. ཨིདྷ པན ན ལཀྑཎཏོ དཱུརཾ བྷིནྡཏཱིཏི ཨེཏྠཱཔི ཝཱ ན པུབྦེ ཝུཏྟནཡེན ཏིདྷཱ བྷེདསྶ ཨཀརཎཾ ཝུཏྟཾ, ལཀྑཎཏོ སནྟིཀདཱུརཱནཾ པན ལཀྑཎཏོ ཨུཔཱདཱཡུཔཱདཱཡ དཱུརསནྟིཀབྷཱཝོ ནཏྠཱིཏི ལཀྑཎཏོ དཱུརསྶ ལཀྑཎཏོཝ སནྟིཀབྷཱཝཱཀརཎཾ ལཀྑཎཏོ དཱུརསྶ ཨབྷེདནནྟི དཊྛབྦཾ. པུརིམནཡོ ཝིཡ ཨཡཾ ནཡོ ན ཧོཏཱིཏི ཨེཏྟཀམེཝ ཧི ཨེཏྠ དསྶེཏཱིཏི བྷིནྡམཱནོཏི ཨེཏྠ ཙ ཨཉྙཐཱ བྷེདནཾ ཝུཏྟཾ, བྷེདནཾ ཨིདྷ ཙ ཨཉྙཐཱ ཝུཏྟནྟི.

རཱུཔཀྑནྡྷནིདྡེསཝཎྞནཱ ནིཊྛིཏཱ.

༢. ཝེདནཱཀྑནྡྷནིདྡེསཝཎྞནཱ

༨. ཙཀྑཱདཡོ ¶ པསཱདཱ ཨོལཱ༹རིཀམནོམཡཏྟབྷཱཝཔརིཡཱཔནྣཱ ཀཱཡཝོཧཱརཾ ཨརཧནྟཱིཏི ཏབྦཏྠུཀཱ ཨདུཀྑམསུཁཱ ‘‘ཀཱཡིཀཱ’’ཏི པརིཡཱཡེན ཝུཏྟཱ, ན ཀཱཡཔསཱདཝཏྠུཀཏྟཱ. ན ཧི ཙཀྑཱདཡོ ཀཱཡཔསཱདཱ ཧོནྟཱིཏི. སནྟཏིཝསེན ཁཎཱདིཝསེན ཙཱཏི ཨེཏྠ ཨདྡྷཱསམཡཝསེན ཨཏཱིཏཱདིབྷཱཝསྶ ¶ ཨཝཙནཾ སུཁཱདིཝསེན བྷིནྣཱཡ ཨཏཱིཏཱདིབྷཱཝཝཙནཏོ. ན ཧི སུཁཱཡེཝ ཨདྡྷཱཝསེན སམཡཝསེན ཙ ཨཏཱིཏཱདིཀཱ ཧོཏི, ཏཐཱ དུཀྑཱ ཨདུཀྑམསུཁཱ ཙ ཀཱཡིཀཙེཏསིཀཱདིབྷཱཝེན བྷིནྣཱ. ཏེན ཝེདནཱསམུདཡོ ཨདྡྷཱསམཡཝསེན ཨཏཱིཏཱདིབྷཱཝེན ཝཏྟབྦཏཾ ཨརཧཏི སམུདཱཡསྶ ཏེཧི པརིཙྪིནྡིཏབྦཏྟཱ, ཝེདནེཀདེསཱ པན ཨེཏྠ གཧིཏཱཏི ཏེ སནྟཏིཁཎེཧི པརིཙྪེདཾ ཨརཧནྟི ཏཏྠ ཏཐཱཔརིཙྪིནྡིཏབྦཱནཾ གཧིཏཏྟཱཏི. ཨེཀསནྟཏིཡཾ པན སུཁཱདིཨནེཀབྷེདསབྦྷཱཝེན ཏེསུ ཡོ བྷེདོ པརིཙྪིནྡིཏབྦབྷཱཝེན གཧིཏོ, ཏསྶ ཨེཀཔྤཀཱརསྶ པཱཀཊསྶ པརིཙྪེདིཀཱ ཏཾསཧིཏདྭཱརཱལམྦནཔྤཝཏྟཱ, ཨཝིཙྪེདེན ཏདུཔྤཱདཀེཀཝིདྷཝིསཡསམཱཡོགཔྤཝཏྟཱ ཙ སནྟཏི བྷཝིཏུཾ ཨརཧཏཱིཏི ཏསྶ བྷེདནྟརཾ ཨནཱམསིཏྭཱ པརིཙྪེདཀབྷཱཝེན གཧཎཾ ཀཏཾ. ལཧུཔརིཝཏྟིནོ ཝཱ དྷམྨཱ པརིཝཏྟནེནེཝ པརིཙྪེདཾ ཨརཧནྟཱིཏི སནྟཏིཁཎཝསེན པརིཙྪེདོ ཝུཏྟོ. པུབྦནྟཱཔརནྟམཛ྄ཛྷགཏཱཏི ཨེཏེན ཧེཏུཔཙྩཡཀིཙྩཝསེན ཝུཏྟནཡཾ དསྶེཏི.

༡༡. ཀིལེསགྒིསམྤཡོགཏོ སདརཐཱ. ཨེཏེན སབྷཱཝཏོ ཨོལཱ༹རིཀཏཾ དསྶེཏི, དུཀྑཝིཔཱཀཊྛེནཱཏི ཨེཏེན ཨོལཱ༹རིཀཝིཔཱཀནིཔྥཱདནེན ཀིཙྩཏོ. ཀམྨཝེགཀྑིཏྟཱ ཀམྨཔཊིབདྡྷབྷཱུཏཱ ཙ ཀཱཡཀམྨཱདིབྱཱཔཱརཝིརཧཏོ ནིརུསྶཱཧཱ ཝིཔཱཀཱ, སཨུསྶཱཧཱ ཙ ཀིརིཡཱ ཨཝིཔཱཀཱ. སཝིཔཱཀཱ ཙ སགབྦྷཱ ཝིཡ ཨོལཱ༹རིཀཱཏི ཏབྦིཔཀྑཏོ ཨཝིཔཱཀཱ སུཁུམཱཏི ཝུཏྟཱ.

ཨསཱཏཊྛེནཱཏི ཨམདྷུརཊྛེན. ཏེན སཱཏཔཊིཔཀྑཾ ཨནིཊྛསབྷཱཝཾ དསྶེཏི. དུཀྑཊྛེནཱཏི དུཀྑམཊྛེན. ཏེན དུཀྑཱནཾ སནྟཱཔནཀིཙྩཾ དསྶེཏི. ‘‘ཡཱཡཾ, བྷནྟེ, ཨདུཀྑམསུཁཱ ཝེདནཱ, སནྟསྨིཾ ཨེསཱ པཎཱིཏེ སུཁེ ཝུཏྟཱ བྷགཝཏཱ’’ཏི (མ. ནི. ༢.༨༨; སཾ. ནི. ༤.༢༦༧) ཝཙནཏོ ཨདུཀྑམསུཁཱ ཕརཎསབྷཱཝཝིརཧཏོ ཨསནྟཱནཾ ཀཱམརཱགཔཊིགྷཱནུསཡཱནཾ ¶ ཨནུསཡནསྶ ཨཊྛཱནཏྟཱ སནྟཱ, སུཁེ ནིཀནྟིཾ པརིཡཱདཱཡ ཨདྷིགནྟབྦཏྟཱ པདྷཱནབྷཱཝཾ ནཱིཏཱཏི པཎཱིཏཱཏི. ཏཐཱ ཨནདྷིགནྟབྦཱ ཙ ཀཱམཱཝཙརཛཱཏིཨཱདིསངྐརཾ ཨཀཏྭཱ སམཱནཛཱཏིཡཾ ཉཱཎསམྤཡུཏྟཝིཔྤཡུཏྟཱདིཀེ སམཱནབྷེདེ སུཁཏོ པཎཱིཏཱཏི ཡོཛེཏབྦཱ. ཨུཔབྲཱུཧིཏཱནཾ དྷཱཏཱུནཾ པཙྩཡབྷཱཝེན སུཁཱ ཁོབྷེཏི ཝིབཱདྷིཏཱནཾ པཙྩཡབྷཱཝེན དུཀྑཱ ཙ. ཨུབྷཡམྤི ཀཱཡཾ བྱཱཔེནྟཾ ཝིཡ ཨུཔྤཛྫཏཱིཏི ཕརཏི. མདཡམཱནནྟི མདཾ ཀརོནྟཾ. ཚཱདཡམཱནནྟི ཨིཙྪཾ ཨུཔྤཱདེནྟཾ, ཨཝཏྠརམཱནཾ ཝཱ. གྷམྨཱབྷིཏཏྟསྶ སཱིཏོདཀགྷཊེན ཨཱསིཏྟསྶ ཡཐཱ ཀཱཡོ ཨུཔབྲཱུཧིཏོ ཧོཏི, ཨེཝཾ སུཁསམངྒིནོཔཱིཏི ཀཏྭཱ ‘‘ཨཱསིཉྩམཱནཾ ཝིཡཱ’’ཏི ཝུཏྟཾ. ཨེཀཏྟནིམིཏྟེཡེཝཱཏི པཐཝཱིཀསིཎཱདིཀེ ¶ ཨེཀསབྷཱཝེ ཨེཝ ནིམིཏྟེ. ཙརཏཱིཏི ནཱནཱཝཛྫནེ ཛཝནེ ཝེདནཱ ཝིཡ ཝིཔྥནྡནརཧིཏཏྟཱ སུཁུམཱ.

ཨདྷིཔྤཱཡེ ཨཀུསལཏཱཡ ཨཀོཝིདོ. ཀུསལཏྟིཀེ…པེ… ཨཱགཏཏྟཱཏི ‘‘ཀུསལཱཀུསལཱ ཝེདནཱ ཨོལཱ༹རིཀཱ, ཨབྱཱཀཏཱ ཝེདནཱ སུཁུམཱ’’ཏི ཨེཝཾ ཨཱགཏཏྟཱ. བྷཱུམནྟརབྷེདེ དསྶེཏུཾ ‘‘ཡམྤཱི’’ཏིཨཱདི ཨཱརདྡྷཾ. ཨིམིནཱ ནཱིཧཱརེནཱཏི ཨེཏེན ‘‘ཀཱམཱཝཙརསུཁཏོ ཀཱམཱཝཙརུཔེཀྑཱ སུཁུམཱ’’ཏིཨཱདིནཱ སབྷཱཝཱདིབྷེདེན ཙ ཨོལཱ༹རིཀསུཁུམབྷཱཝཾ ཏཏྲ ཏཏྲེཝ ཀཐེནྟོ ན བྷིནྡཏཱིཏི ནཡཾ དསྶེཏི.

ལོཀིཡལོཀུཏྟརམིསྶཀཱ ཀཐིཏཱ, ཏསྨཱ ཨེཀནྟཔཎཱིཏེ ཧཱིནཔཎཱིཏཱནཾ ཨུདྡྷཊཏྟཱ ཨེཝམེཝ ཨེཀནྟཧཱིནེ ཙ ཡཐཱསམྦྷཝཾ ཧཱིནཔཎཱིཏཏཱ ཨུདྡྷརིཏབྦཱཏི ཨནུཉྙཱཏཾ ཧོཏཱིཏི ཨུབྷཡཏྠ ཏདུདྡྷརཎེ ན ཀུཀྐུཙྩཱཡིཏབྦནྟི ཨཏྠོ.

ཨཀུསལཱནཾ ཀུསལཱདཱིཧི སུཁུམཏྟཱབྷཱཝཏོ པཱལི༹ཡཱ ཨཱགཏསྶ ཨཔརིཝཏྟནཱིཡབྷཱཝེན ‘‘ཧེཊྛིམནཡོ ན ཨོལོཀེཏབྦོ’’ཏི ཝུཏྟནྟི ཝདནྟི, ཏཾཏཾཝཱཔནཝསེན ཀཐནེཔི པརིཝཏྟནཾ ནཏྠཱིཏི ན པརིཝཏྟནཾ སནྡྷཱཡ ‘‘ཧེཊྛིམནཡོ ན ཨོལོཀེཏབྦོ’’ཏི ཝུཏྟཾ, ཧེཊྛིམནཡསྶ པན ཝུཏྟཏྟཱ ཨཝུཏྟནཡཾ གཧེཏྭཱ ‘‘ཏཾ ཏཾ ཝཱ པནཱ’’ཏི ཝཏྟུཾ ཡུཏྟནྟི ‘‘ཧེཊྛིམནཡོ ན ཨོལོཀེཏབྦོ’’ཏི ཝུཏྟནྟི ཝེདིཏབྦོ. བཧུཝིཔཱཀཱ ཨཀུསལཱ དོསུསྶནྣཏཱཡ ཨོལཱ༹རིཀཱ, ཏཐཱ ཨཔྤཝིཔཱཀཱ ཀུསལཱ. མནྡདོསཏྟཱ ཨཔྤཝིཔཱཀཱ ཨཀུསལཱ སུཁུམཱ, ཏཐཱ བཧུཝིཔཱཀཱ ཀུསལཱ ཙ. ཨོལཱ༹རིཀསུཁུམནིཀནྟིཝཏྠུབྷཱཝཏོ ཀཱམཱཝཙརཱདཱིནཾ ཨོལཱ༹རིཀསུཁུམཏཱ ¶ . སཱཔཱིཏི བྷཱཝནཱམཡཱཡ བྷེདནེན དཱནམཡསཱིལམཡཱནཉྩ པཙྩེཀཾ བྷེདནཾ ནཡཏོ དསྶིཏནྟི ཝེདིཏབྦཾ. སཱཔཱིཏི ཝཱ ཏིཝིདྷཱཔཱིཏི ཡོཛེཏབྦཾ.

༡༣. ཛཱཏིཨཱདིཝསེན ཨསམཱནཀོཊྛཱསཏཱ ཝིསབྷཱགཊྛོ. དུཀྑཝིཔཱཀཏཱདིཝསེན ཨསདིསཀིཙྩཏཱ, ཨསདིསསབྷཱཝཏཱ ཝཱ ཝིསཾསཊྛོ, ན ཨསམྤཡོགོ. ཡདི སིཡཱ, དཱུརཝིཔརིཡཱཡེན སནྟིཀཾ ཧོཏཱིཏི སཾསཊྛཊྛེན སནྟིཀཏཱ ཨཱཔཛྫཏི, ན ཙ ཝེདནཱཡ ཝེདནཱསམྤཡོགོ ཨཏྠི. སནྟིཀཔདཝཎྞནཱཡ ཙ ‘‘སབྷཱགཊྛེན སརིཀྑཊྛེན ཙཱ’’ཏི ཝཀྑཏཱིཏི ཝུཏྟནཡེནེཝ ཨཏྠོ ཝེདིཏབྦོ.

ན ¶ དཱུརཏོ སནྟིཀཾ ཨུདྡྷརིཏབྦནྟི ཀསྨཱ ཝུཏྟཾ, ཀིཾ ཡཐཱ སནྟིཀཏོ ཨཀུསལཏོ ཨཀུསལཱ དཱུརེཏི ཨུདྡྷརཱིཡཏི, ཏཐཱ ཏཏོ དཱུརཏོ ཀུསལཏོ ཀུསལཱ སནྟིཀེཏི ཨུདྡྷརིཏུཾ ན སཀྐཱཏི? ན སཀྐཱ. ཏཐཱ ཧི སཏི ཀུསལཱ ཀུསལཱཡ སནྟིཀེཏི ཀཏྭཱ སནྟིཀཏོ སནྟིཀཏཱ ཨེཝ ཨུདྡྷརིཏཱ སིཡཱ, ཏཐཱ ཙ སཏི སནྟིཀསནྟིཀཏརཏཱཝཙནམེཝ ཨཱཔཛྫཏི, ཨུཔཱདཱཡུཔཱདཱཡ དཱུརསནྟིཀཏཱཝ ཨིདྷ ཝུཙྩཏི, ཏསྨཱ དཱུརཏོ དཱུརུདྡྷརཎཾ ཝིཡ སནྟིཀཏོ སནྟིཀུདྡྷརཎཉྩ ན སཀྐཱ ཀཱཏུཾ དཱུརདཱུརཏརཏཱཡ ཝིཡ སནྟིཀསནྟིཀཏརཏཱཡ ཙ ཨནདྷིཔྤེཏཏྟཱ. ཨཐ པན ཝདེཡྻ ‘‘ན ཀུསལཱ ཀུསལཱཡ ཨེཝ སནྟིཀེཏི ཨུདྡྷརིཏབྦཱ, ཨཐ ཁོ ཡཏོ སཱ དཱུརེ, ཏསྶཱ ཨཀུསལཱཡཱ’’ཏི, ཏཉྩ ནཏྠི. ན ཧི ཨཀུསལཱཡ ཀུསལཱ ཀདཱཙི སནྟིཀེ ཨཏྠཱིཏི. ཨཐཱཔི ཝདེཡྻ ‘‘ཡཱ ཨཀུསལཱ ཀུསལཱཡ སནྟིཀེ, སཱ ཏཏོ དཱུརཏོ ཀུསལཏོ ཨུདྡྷརིཏབྦཱ’’ཏི, ཏདཔི ནཏྠི. ན ཧི ཀུསལེ ཨཀུསལཱ ཨཏྠི, ཡཱ ཏཏོ སནྟིཀེཏི ཨུདྡྷརིཡེཡྻ, ཏསྨཱ ཨིདྷ ཝུཏྟསྶ དཱུརསྶ དཱུརཏོ ཨཙྩནྟཝིསབྷཱགཏྟཱ དཱུརེ སནྟིཀཾ ནཏྠཱིཏི ན སཀྐཱ དཱུརཏོ སནྟིཀཾ ཨུདྡྷརིཏུཾ, སནྟིཀེ པནིདྷ ཝུཏྟེ བྷིནྣེ ཏཏྠེཝ དཱུརཾ ལབྦྷཏཱིཏི ཨཱཧ ‘‘སནྟིཀཏོ པན དཱུརཾ ཨུདྡྷརིཏབྦ’’ནྟི.

ཨུཔཱདཱཡུཔཱདཱཡ དཱུརཏོ ཙ སནྟིཀཾ ན སཀྐཱ ཨུདྡྷརིཏུཾ. ལོབྷསཧགཏཱཡ དོསསཧགཏཱ དཱུརེ ལོབྷསཧགཏཱ སནྟིཀེཏི ཧི ཝུཙྩམཱནེ སནྟིཀཏོཝ སནྟིཀཾ ཨུདྡྷརིཏཾ ཧོཏི. ཏཐཱ དོསསཧགཏཱཡ ལོབྷསཧགཏཱ དཱུརེ དོསསཧགཏཱ སནྟིཀེཏི ཨེཏྠཱཔི ¶ སབྷཱགཏོ སབྷཱགནྟརསྶ ཨུདྡྷཊཏྟཱ, ན ཙ སཀྐཱ ‘‘ལོབྷསཧགཏཱཡ དོསསཧགཏཱ དཱུརེ སཱ ཨེཝ ཙ སནྟིཀེ’’ཏི ཝཏྟུཾ དོསསཧགཏཱཡ སནྟིཀབྷཱཝསྶ ཨཀཱརཎཏྟཱ, ཏསྨཱ ཝིསབྷཱགཏཱ བྷེདཾ ཨགྒཧེཏྭཱ ན པཝཏྟཏཱིཏི སབྷཱགཱབྱཱཔཀཏྟཱ དཱུརཏཱཡ དཱུརཏོ སནྟིཀུདྡྷརཎཾ ན སཀྐཱ ཀཱཏུཾ. ན ཧི དོསསཧགཏཱ ཨཀུསལསབྷཱགཾ སབྦཾ བྱཱཔེཏྭཱ པཝཏྟཏཱིཏི. སབྷཱགཏཱ པན བྷེདཾ ཨནྟོགདྷཾ ཀཏྭཱ པཝཏྟཏཱིཏི ཝིསབྷཱགབྱཱཔཀཏྟཱ སནྟིཀཏཱཡ སནྟིཀཏོ དཱུརུདྡྷརཎཾ སཀྐཱ ཀཱཏུཾ. ཨཀུསལཏཱ ཧི ལོབྷསཧགཏཱདིསབྦཝིསབྷཱགབྱཱཔིཀཱཏི. ཏེནཱཧ ‘‘ན དཱུརཏོ སནྟིཀཾ ཨུདྡྷརིཏབྦ’’ནྟིཨཱདི.

ཝེདནཱཀྑནྡྷནིདྡེསཝཎྞནཱ ནིཊྛིཏཱ.

༣. སཉྙཱཀྑནྡྷནིདྡེསཝཎྞནཱ

༡༧. ཙཀྑུསམྥསྶཛཱ ¶ སཉྙཱཏི ཨེཏྠ ཡདིཔི ཝཏྠུཏོ ཕསྶསྶ ནཱམཾ ཕསྶཏོ ཙ སཉྙཱཡ, ཝཏྠུཝིསིཊྛཕསྶེན པན ཝིསིཊྛསཉྙཱ ཝཏྠུནཱ ཙ ཝིསིཊྛཱ ཧོཏི ཕསྶསྶ ཝིཡ ཏསྶཱཔི ཏབྦཏྠུཀཏྟཱཏི ‘‘ཝཏྠུཏོ ནཱམ’’ནྟི ཝུཏྟཾ. པཊིགྷསམྥསྶཛཱ སཉྙཱཏི ཨེཏྠཱཔི ཡཐཱ ཕསྶོ ཝཏྠཱརམྨཎཔཊིགྷཊྚནེན ཨུཔྤནྣོ, ཏཐཱ ཏཏོ ཛཱཏསཉྙཱཔཱིཏི ‘‘ཝཏྠཱརམྨཎཏོ ནཱམ’’ནྟི ཝུཏྟཾ. ཨེཏྠ ཙ པཊིགྷཛོ སམྥསྶོ, པཊིགྷཝིཉྙེཡྻོ ཝཱ སམྥསྶོ པཊིགྷསམྥསྶོཏི ཨུཏྟརཔདལོཔཾ ཀཏྭཱ ཝུཏྟནྟི ཝེདིཏབྦཾ.

ཝིཉྙེཡྻབྷཱཝེ ཝཙནཾ ཨདྷིཀིཙྩ པཝཏྟཱ, ཝཙནཱདྷཱིནཱ ཝཱ ཨརཱུཔཀྑནྡྷཱ, ཨདྷིཝཙནཾ ཝཱ ཨེཏེསཾ པཀཱསནཾ ཨཏྠཱིཏི ‘‘ཨདྷིཝཙནཱ’’ཏི ཝུཙྩནྟི, ཏཏོཛོ སམྥསྶོ ཨདྷིཝཙནསམྥསྶོ, སམྥསྶོཡེཝ ཝཱ ཡཐཱཝུཏྟེཧི ཨཏྠེཧི ཨདྷིཝཙནོ ཙ སམྥསྶོ ཙཱཏི ཨདྷིཝཙནསམྥསྶོ, ཨདྷིཝཙནཝིཉྙེཡྻོ ཝཱ སམྥསྶོ ཨདྷིཝཙནསམྥསྶོ, ཏཏོ ཏསྨིཾ ཝཱ ཛཱཏཱ ཨདྷིཝཙནསམྥསྶཛཱ. པཉྩདྭཱརིཀསམྥསྶེཔི ཡཐཱཝུཏྟོ ཨཏྠོ སམྦྷཝཏཱིཏི ཏེན པརིཡཱཡེན ཏཏོཛཱཔི སཉྙཱ ‘‘ཨདྷིཝཙནསམྥསྶཛཱ’’ཏི ཝུཏྟཱ. ཡཐཱ པན ཨཉྙཔྤཀཱརཱསམྦྷཝཏོ མནོསམྥསྶཛཱ ནིཔྤརིཡཱཡེན ‘‘ཨདྷིཝཙནསམྥསྶཛཱ’’ཏི ཝུཙྩཏི, ན ཨེཝཾ ཨཡཾ པཊིགྷསམྥསྶཛཱ ཨཱཝེཎིཀཔྤཀཱརནྟརསམྦྷཝཏོཏི ཨདྷིཔྤཱཡོ.

ཡདི ¶ ཨེཝཾ ཙཏྟཱརོ ཁནྡྷཱཔི ཡཐཱཝུཏྟསམྥསྶཏོ ཛཱཏཏྟཱ ‘‘ཨདྷིཝཙནསམྥསྶཛཱ’’ཏི ཝཏྟུཾ ཡུཏྟཱ, སཉྙཱཝ ཀསྨཱ ཨེཝཾ ཝུཏྟཱཏི? ཏིཎྞཾ ཁནྡྷཱནཾ ཨཏྠཝསེན ཨཏྟནོ པཏྟམྤི ནཱམཾ ཡཏྠ པཝཏྟམཱནོ ཨདྷིཝཙནསམྥསྶཛ-སདྡོ ནིརུལ༹ྷཏཱཡ དྷམྨཱབྷིལཱཔོ ཧོཏི, ཏསྶཱ སཉྙཱཡ ཨེཝ ཨཱརོཔེཏྭཱ སཡཾ ནིཝཏྟནཾ ཧོཏི. ཏེནཱཧ ‘‘ཏཡོ ཧི ཨརཱུཔིནོ ཁནྡྷཱ’’ཏིཨཱདི. ཨཐ ཝཱ སཉྙཱཡ པཊིགྷསམྥསྶཛཱཏི ཨཉྙམྤི ཝིསིཊྛཾ ནཱམཾ ཨཏྠཱིཏི ཨདྷིཝཙནསམྥསྶཛཱནཱམཾ ཏིཎྞཾཡེཝ ཁནྡྷཱནཾ བྷཝིཏུཾ ཨརཧཏི. ཏེ པན ཨཏྟནོ ནཱམཾ སཉྙཱཡ དཏྭཱ ནིཝཏྟཱཏི ཨིམམཏྠཾ སནྡྷཱཡཱཧ ‘‘ཏཡོ ཧི ཨརཱུཔིནོ ཁནྡྷཱ’’ཏིཨཱདི. པཉྩདྭཱརིཀསཉྙཱ ཨོལོཀེཏྭཱཔི ཛཱནིཏུཾ སཀྐཱཏི ཨིདཾ ཏེན ཏེནཱདྷིཔྤཱཡེན ཧཏྠཝིཀཱརཱདིཀརཎེ ཏདདྷིཔྤཱཡཝིཛཱནནནིམིཏྟབྷཱུཏཱ ཝིཉྙཏྟི ཝིཡ རཛྫིཏྭཱ ཨོལོཀནཱདཱིསུ རཏྟཏཱདིཝིཛཱནནནིམིཏྟཾ ཨོལོཀནཾ ཙཀྑུཝིཉྙཱཎཝིསཡསམཱགམེ པཱཀཊཾ ཧོཏཱིཏི ཏཾསམྤཡུཏྟཱཡ སཉྙཱཡཔི ཏཐཱཔཱཀཊབྷཱཝཾ སནྡྷཱཡ ཝུཏྟཾ.

རཛྫིཏྭཱ ¶ ཨོལོཀནཱདིཝསེན པཱཀཊཱ ཛཝནཔྤཝཏྟཱ བྷཝིཏུཾ ཨརཧཏཱིཏི ཨེཏིསྶཱ ཨཱསངྐཱཡ ནིཝཏྟནཏྠཾ ‘‘པསཱདཝཏྠུཀཱ ཨེཝཱ’’ཏི ཨཱཧ. ཨཉྙཾ ཙིནྟེནྟནྟི ཡཾ པུབྦེ ཏེན ཙིནྟིཏཾ ཉཱཏཾ, ཏཏོ ཨཉྙཾ ཙིནྟེནྟནྟི ཨཏྠོ.

སཉྙཱཀྑནྡྷནིདྡེསཝཎྞནཱ ནིཊྛིཏཱ.

༤. སངྑཱརཀྑནྡྷནིདྡེསཝཎྞནཱ

༢༠. ཧེཊྛིམཀོཊིཡཱཏི ཨེཏྠ བྷུམྨནིདྡེསོཝ. ཏཏྠ ཧི པདྷཱནཾ དསྶིཏནྟི. ཡདི ཨེཝཾ ཨུཔརིམཀོཊིཡཱ ཏཾ ན དསྶིཏནྟི ཨཱཔཛྫཏཱིཏི? ནཱཔཛྫཏི, ཨུཔརིམཀོཊིགཏབྷཱཝེན ཝིནཱ ཧེཊྛིམཀོཊིགཏབྷཱཝཱབྷཱཝཏོ. ཧེཊྛིམཀོཊི ཧི སབྦབྱཱཔིཀཱཏི. དུཏིཡེ ཀརཎནིདྡེསོ, ཧེཊྛིམཀོཊིཡཱ ཨཱགཏཱཏི སམྦནྡྷོ. པུརིམེཔི ཝཱ ‘‘ཧེཊྛིམཀོཊིཡཱ’’ཏི ཡཾ ཝུཏྟཾ, ཏཉྩ པདྷཱནསངྑཱརདསྶནཝསེནཱཏི སམྦནྡྷཀརཎེན ཀརཎནིདྡེསོཝ. ཏཾསམྤཡུཏྟཱ སངྑཱརཱཏི ཨེཀཱུནཔཉྙཱསཔྤབྷེདེ སངྑཱརེ ཨཱཧ. གཧིཏཱཝ ཧོནྟི ཏཔྤཊིབདྡྷཏྟཱ.

སངྑཱརཀྑནྡྷནིདྡེསཝཎྞནཱ ནིཊྛིཏཱ.

པཀིཎྞཀཀཐཱཝཎྞནཱ

སམུགྒམ-སདྡོ ¶ སཉྫཱཏིཡཾ ཨཱདིཨུཔྤཏྟིཡཾ ནིརུལ༹ྷོ. ཏཾཏཾཔཙྩཡསམཱཡོགེ ཧི པུརིམབྷཝསངྑཱཏཱ པུརིམནྟཏོ ཨུདྡྷངྒམནཾ སམུགྒམོ, སནྡྷིཡཾ ཝཱ པཊིསནྡྷིཡཾ ཨུགྒམོ སམུགྒམོ. སོ པན ཡཏྠ པཉྩཀྑནྡྷཱ པརིཔུཎྞཱ སམུགྒཙྪནྟི, ཏཏྠེཝ དསྶིཏོ. ཨེཏེན ནཡེན ཨཔརིཔུཎྞཁནྡྷསམུགྒམོ ཨེཀཝོཀཱརཙཏུཝོཀཱརེསུ སཀྐཱ ཝིཉྙཱཏུནྟི. ཨཐ ཝཱ ཡཐཱདྷིགཏཱནཾ པཉྩནྣམྤི ཁནྡྷཱནཾ སཧ ཨུགྒམོ ཨུཔྤཏྟི སམུགྒམོ. ཨེཏསྨིཾ ཨཏྠེ ཝིཀལུཔྤཏྟི ཨསངྒཧིཏཱ ཧོཏི. ཧིམཝནྟཔྤདེསེ ཛཱཏིམནྟཨེལ༹ཀལོམཾ ཛཱཏིཨུཎྞཱ. སཔྤིམཎྜབིནྡཱུཏི ཨེཝཾ ཨེཏྠཱཔི བིནྡུ-སདྡོ ¶ ཡོཛེཏབྦོ. ཨེཝཾཝཎྞཔྤཊིབྷཱགནྟི ཨེཝཾཝཎྞཾ ཨེཝཾསཎྛཱནཉྩ. པཊིབྷཛནཾ ཝཱ པཊིབྷཱགོ, སདིསཏཱབྷཛནཾ སདིསཏཱཔཏྟཱིཏི ཨཏྠོ. ཨེཝཾཝིདྷོ ཝཎྞཔྤཊིབྷཱགོ ཨེཏསྶཱཏི ཨེཝཾཝཎྞཔྤཊིབྷཱགཾ.

སནྟཏིསཱིསཱནཱིཏི སནྟཏིམཱུལཱནི, སནྟཏིཀོཊྛཱསཱ ཝཱ. ཨནེཀིནྡྲིཡསམཱཧཱརབྷཱཝཏོ ཧི པདྷཱནངྒཾ ‘‘སཱིས’’ནྟི ཝུཙྩཏི, ཨེཝཾ ཝཏྠུདསཀཱདིཀོཊྛཱསཱ ཨནེཀརཱུཔསམུདཱཡབྷཱུཏཱ ‘‘སཱིསཱནཱི’’ཏི ཝུཏྟཱནཱིཏི.

པཉྩཀྑནྡྷཱ པརིཔུཎྞཱ ཧོནྟཱིཏི གཎནཱཔཱརིཔཱུརིཾ སནྡྷཱཡ ཝུཏྟཾ, ན ཏསྶ ཏསྶ ཁནྡྷསྶ པརིཔུཎྞཏཾ. ཀམྨསམུཊྛཱནཔཝེཎིཡཱ ཝུཏྟཏྟཱ ‘‘ཨུཏུཙིཏྟཱཧཱརཛཔཝེཎཱི ཙ ཨེཏྟཀཾ ཀཱལཾ ཨཏིཀྐམིཏྭཱ ཧོཏཱི’’ཏིཨཱདིནཱ ཝཏྟབྦཱ སིཡཱ, ཏཾ པན ‘‘པུབྦཱཔརཏོ’’ཏི ཨེཏྠ ཝཀྑཏཱིཏི ཨཀཐེཏྭཱ ཀམྨཛཔཝེཎཱི ཙ ན སབྦཱ ཝུཏྟཱཏི ཨཝུཏྟཾ དསྶེཏུཾ ཨོཔཔཱཏིཀསམུགྒམོ ནཱམ དསྶིཏོ. ཨེཝཾ…པེ… པཉྩཀྑནྡྷཱ པརིཔུཎྞཱ ཧོནྟཱིཏི པརིཔུཎྞཱཡཏནཱནཾ ཝསེན ནཡོ དསྶིཏོ, ཨཔརིཔུཎྞཱཡཏནཱནཾ པན ཀཱམཱཝཙརཱནཾ རཱུཔཱཝཙརཱནཾ པརིཧཱིནཱཡཏནསྶ ཝསེན སནྟཏིསཱིསཧཱནི ཝེདིཏབྦཱ.

པུབྦཱཔརཏོཏི ཨཡཾ ཝིཙཱརཎཱ ན པཉྩནྣཾ ཁནྡྷཱནཾ ཨུཔྤཏྟིཡཾ, ཨཐ ཁོ ཏེསཾ རཱུཔསམུཊྛཱཔནེཏི དཊྛབྦཱ. ཏཾ དསྶེནྟོ ཨཱཧ ‘‘ཨེཝཾ པནཱ’’ཏིཨཱདི. ཨཔཙྪཱཨཔུརེ ཨུཔྤནྣེསཱུཏི ཨེཏེན སཾསཡཀཱརཎཾ དསྶེཏི. སཧུཔྤནྣེསུ ཧི ཨིདམེཝ པཋམཾ རཱུཔཾ སམུཊྛཱཔེཏི, ཨིདཾ པཙྪཱཏི ཨདསྶིཏཾ ན སཀྐཱ ཝིཉྙཱཏུཾ. ཨེཏྠ ཙ ‘‘པུབྦཱཔརཏོ’’ཏི ཨེཏིསྶཱ ཝིཙཱརཎཱཡ ཝཏྠུབྷཱཝེན པཊིསནྡྷིཡཾ ཨུཔྤནྣཱ པཝཏྟཱ པཉྩཀྑནྡྷཱ གཧིཏཱ. ཏཏྠ ཙ ནིདྡྷཱརཎེ ¶ བྷུམྨནིདྡེསོཏི ‘‘རཱུཔཾ པཋམཾ རཱུཔཾ སམུཊྛཱཔེཏཱི’’ཏི ཨཱཧ. ཨཉྙཐཱ བྷཱཝེནབྷཱཝལཀྑཎཏྠེ བྷུམྨནིདྡེསེ སཏི རཱུཔསྶ རཱུཔསམུཊྛཱཔནཀྑཎེ ཀམྨསྶཔི རཱུཔསམུཊྛཱནཾ ཝདནྟཱིཏི ཨུབྷཡནྟི ཝཏྟབྦཾ སིཡཱཏི. རཱུཔཱརཱུཔསནྟཏིཉྩ གཧེཏྭཱ ཨཡཾ ཝིཙཱརཎཱ པཝཏྟཱཏི ‘‘རཱུཔཾ པཋམཾ རཱུཔཾ སམུཊྛཱཔེཏཱི’’ཏི ཝུཏྟཾ. ཨཉྙཐཱ པཊིསནྡྷིཀྑཎེ ཨེཝ ཝིཛྫམཱནེ གཧེཏྭཱ ཝིཙཱརཎཱཡ ཀརིཡམཱནཱཡ ཨརཱུཔསྶ རཱུཔསམུཊྛཱཔནམེཝ ནཏྠཱིཏི པུབྦཱཔརསམུཊྛཱཔནཝིཙཱརཎཱཝ ཨིདྷ ན ཨུཔཔཛྫཏཱིཏི ཝཏྟབྦཾ སིཡཱཏི. ཝཏྠུ ཨུཔྤཱདཀྑཎེ དུབྦལཾ ཧོཏཱིཏི སབྦརཱུཔཱནཾ ཨུཔྤཱདཀྑཎེ དུབྦལཏཾ སནྡྷཱཡ ཝུཏྟཾ. ཏདཱ ཧི ཏཾ པཙྪཱཛཱཏཔཙྩཡརཧིཏཾ ཨཱཧཱརཱདཱིཧི ཙ ཨནུཔཏྠདྡྷནྟི ‘‘དུབྦལ’’ནྟི ཝུཏྟཾ. ཀམྨཝེགཀྑིཏྟཏྟཱཏི ¶ ཨིདཾ སཏིཔི བྷཝངྒསྶ ཀམྨཛབྷཱཝེ སཱཡཾ ཝིཔཱཀསནྟཏི པཊིསནྡྷིཀྑཎེ པུརིམབྷཝངྒསམུཊྛཱཔཀཏོ ཨཉྙེན ཀམྨུནཱ ཁིཏྟཱ ཝིཡ ཨཔྤཏིཊྛིཏཱ, ཏཏོ པརཉྩ སམཱནསནྟཏིཡཾ ཨནནྟརཔཙྩཡཾ པུརེཛཱཏཔཙྩཡཉྩ ལབྷིཏྭཱ པཏིཊྛིཏཱཏི ཨིམམཏྠཾ སནྡྷཱཡ ཝུཏྟཾ.

པཝེཎཱི གྷཊིཡཏཱིཏི ཙཀྑཱདིཝཏྠུསནྟཏི ཨེཀསྨིཾ ཝིཛྫམཱནེ ཨེཝ ཨཉྙསྶ ནིརོདྷུཔྤཏྟིཝསེན གྷཊིཡཏི, ན ཙུཏིཔཊིསནྡྷིནིསྶཡཝཏྠཱུནཾ ཝིཡ ཝིཙྪེདཔྤཝཏྟཱིཏི ཨཏྠོ. ཨངྒཏོཏི ཛྷཱནངྒཏོ. ཛྷཱནངྒཱནི ཧི ཙིཏྟེན སཧ རཱུཔསམུཊྛཱཔཀཱནི, ཏེསཾ ཨནུབལདཱཡཀཱནི མགྒངྒཱདཱིནི ཏེསུ ཝིཛྫམཱནེསུ ཝིསེསརཱུཔཔྤཝཏྟིདསྶནཏོ. ཨཐ ཝཱ ཡཱནི ཙིཏྟངྒཱནི ཙེཏནཱདཱིནི ཙིཏྟསྶ རཱུཔསམུཊྛཱཔནེ ཨངྒབྷཱཝཾ སཧཱཡབྷཱཝཾ གཙྪནྟི, ཏེསཾ བལདཱཡཀེཧི ཛྷཱནངྒཱདཱིཧི ཨཔརིཧཱིནནྟི ཨཏྠོ. ཏཏོ པརིཧཱིནཏྟཱ ཧི ཙཀྑུཝིཉྙཱཎཱདཱིནི རཱུཔཾ ན སམུཊྛཱཔེནྟཱིཏི. ཡོ པན ཝདེཡྻ ‘‘པཊིསནྡྷིཙིཏྟེན སཧཛཱཏཝཏྠུ ཏསྶ ཋིཏིཀྑཎེ ཙ བྷངྒཀྑཎེ ཙ པུརེཛཱཏནྟི ཀཏྭཱ པཙྩཡཝེཀལླཱབྷཱཝཏོ ཏསྨིཾ ཁཎདྭཡེ རཱུཔཾ སམུཊྛཱཔེཏཱུ’’ཏི, ཏཾ ནིཝཱརེནྟོ ཨཱཧ ‘‘ཡདི ཧི ཙིཏྟ’’ནྟིཨཱདི. ཏཏྠ ཋིཏིབྷངྒཀྑཎེསུཔི ཏེསཾ དྷམྨཱནཾ ཝཏྠུ པུརེཛཱཏཾ ན ཧོཏཱིཏི ན ཝཏྟབྦམེཝེཏནྟི ཨནུཛཱནི, ཏཏྠཱཔི དོསཾ དསྶེཏི. ཡདི ཏདཱ རཱུཔཾ སམུཊྛཱཔེཡྻ, ཏཝ མཏེན པཊིསནྡྷིཙིཏྟམྤི སམུཊྛཱཔེཡྻ, ཏདཱ པན རཱུཔུཔྤཱདནམེཝ ནཏྠི. ཡདཱ ཙ རཱུཔུཔྤཱདནཾ, ཏདཱ ཨུཔྤཱདཀྑཎེ ཏཝ མཏེནཔི པཙྩཡཝེཀལླམེཝ པཊིསནྡྷིཀྑཎེ པུརེཛཱཏནིསྶཡཱབྷཱཝཏོ, ཏསྨཱ པཊིསནྡྷིཙིཏྟཾ རཱུཔཾ ན སམུཊྛཱཔེཏཱིཏི ཨཡམེཏྠ ཨདྷིཔྤཱཡོ. ཨུཔྤཱདཀྑཎེ ཨཊྛ རཱུཔཱནི གཧེཏྭཱ ¶ ཨུཊྛཧཏི. ཀསྨཱ? ཨརཱུཔདྷམྨཱནཾ ཨནནྟརཱདིཔཙྩཡཝསེན སཝེགཱནཾ པརིཔུཎྞབལཱནམེཝ ཨུཔྤཏྟིཏོ.

ཨཝིསཡཏཱཡཱཏི ཨགཏཔུབྦསྶ གཱམསྶ ཨཱགནྟུཀསྶ ཨཝིསཡབྷཱཝཏོ. ཨཔྤཧུཏཏཱཡཱཏི ཏཏྠ ཏསྶ ཨནིསྶརབྷཱཝཏོ. ཙིཏྟསམུཊྛཱན…པེ… ཋིཏཱནཱིཏི ཨིདཾ ཡེཧཱཀཱརེཧི ཙིཏྟསམུཊྛཱནརཱུཔཱནཾ ཙིཏྟཙེཏསིཀཱ པཙྩཡཱ ཧོནྟི, ཏེཧི སབྦེཧི པཊིསནྡྷིཡཾ ཙིཏྟཙེཏསིཀཱ སམཏིཾསཀམྨཛརཱུཔཱནཾ ཡཐཱསམྦྷཝཾ པཙྩཡཱ ཧོནྟཱིཏི ཀཏྭཱ ཝུཏྟཾ.

ཝཊྚམཱུལནྟི ཏཎྷཱ ཨཝིཛྫཱ ཝུཙྩཏི. ཙུཏིཙིཏྟེན ཨུཔྤཛྫམཱནཾ རཱུཔཾ ཏཏོ པུརིམཏརེཧི ཨུཔྤཛྫམཱནཾ ཝིཡ ན བྷཝནྟརེ ཨུཔྤཛྫཏཱིཏི ཝཊྚམཱུལསྶ ཝཱུཔསནྟཏྟཱ ཨནུཔྤཏྟི ཝིཙཱརེཏབྦཱ.

རཱུཔསྶ ¶ ནཏྠིཏཱཡཱཏི རཱུཔཱནཾ ནིསྶརཎཏྟཱ ཨརཱུཔསྶ, ཝིརཱགཝསེན པཧཱིནཏྟཱ ཨུཔྤཱདེཏབྦསྶ ཨབྷཱཝཾ སནྡྷཱཡ ཝུཏྟཾ. རཱུཔོཀཱསེ ཝཱ རཱུཔཾ ཨཏྠཱིཏི ཀཏྭཱ རཱུཔཔཙྩཡཱནཾ རཱུཔུཔྤཱདནཾ ཧོཏི, ཨརཱུཔཾ པན རཱུཔསྶ ཨོཀཱསོ ན ཧོཏཱིཏི ཡསྨིཾ རཱུཔེ སཏི ཙིཏྟཾ ཨཉྙཾ རཱུཔཾ ཨུཔྤཱདེཡྻ, ཏདེཝ ཏཏྠ ནཏྠཱིཏི ཨཏྠོ. པུརིམརཱུཔསྶཔི ཧི པཙྩཡབྷཱཝོ ཨཏྠི པུཏྟསྶ པིཏིསདིསཏཱདསྶནཏོཏི.

ཨུཏུ པན པཋམཾ རཱུཔཾ སམུཊྛཱཔེཏི པཊིསནྡྷིཙིཏྟསྶ ཋིཏིཀྑཎེ སམུཊྛཱཔནཏོཏི ཨདྷིཔྤཱཡོ. ཨུཏུ ནཱམ ཙེས དནྡྷནིརོདྷོཏིཨཱདི ཨུཏུསྶ ཋཱནཀྑཎེ ཨུཔྤཱདནེ ཀཱརཎདསྶནཏྠཾ ཨརཱུཔཱནཾ ཨུཔྤཱདཀཱལདསྶནཏྠཉྩ ཝུཏྟཾ. དནྡྷནིརོདྷཏྟཱ ཧི སོ ཋིཏིཀྑཎེ བལཝཱཏི ཏདཱ རཱུཔཾ སམུཊྛཱཔེཏི, ཏསྨིཾ དྷརནྟེ ཨེཝ ཁིཔྤནིརོདྷཏྟཱ སོལ༹སསུ ཙིཏྟེསུ ཨུཔྤནྣེསུ པཊིསནྡྷིཨནནྟརཾ ཙིཏྟཾ ཨུཏུནཱ སམུཊྛིཏེ རཱུཔེ པུན སམུཊྛཱཔེཏཱིཏི ཨདྷིཔྤཱཡོ. ཏསྨིཾ དྷརནྟེ ཨེཝ སོལ༹ས ཙིཏྟཱནི ཨུཔྤཛྫིཏྭཱ ནིརུཛ྄ཛྷནྟཱིཏི ཨེཏེན པན ཝཙནེན ཡདི ཨུཔྤཱདནིརོདྷཀྑཎཱ དྷརམཱནཀྑཎེ ཨེཝ གཧིཏཱ, ‘‘སོལ༹སཙིཏྟཀྑཎཱཡུཀཾ རཱུཔ’’ནྟི ཝུཏྟཾ ཧོཏི, ཨཐུཔྤཱདཀྑཎཾ ཨགྒཧེཏྭཱ ནིརོདྷཀྑཎོཝ གཧིཏོ, ‘‘སཏྟརསཙིཏྟཀྑཎཱཡུཀ’’ནྟི, སཙེ ནིརོདྷཀྑཎཾ ཨགྒཧེཏྭཱ ཨུཔྤཱདཀྑཎོ གཧིཏོ, ‘‘ཨདྷིཀསོལ༹སཙིཏྟཀྑཎཱཡུཀ’’ནྟི, ཡདི པན ཨུཔྤཱདནིརོདྷཀྑཎཱ དྷརམཱནཀྑཎེ ན གཧིཏཱ, ‘‘ཨདྷིཀསཏྟརསཙིཏྟཀྑཎཱཡུཀ’’ནྟི. ཡསྨཱ པན ‘‘ཏེསུ པཊིསནྡྷིཨནནྟར’’ནྟི ¶ པཊིསནྡྷིཔི ཏསྶ དྷརམཱནཀྑཎེ ཨུཔྤནྣེསུ གཧིཏཱ, ཏསྨཱ ཨུཔྤཱདཀྑཎོ དྷརམཱནཀྑཎེ གཧིཏོཏི ནིརོདྷཀྑཎེ ཨགྒཧིཏེ ཨདྷིཀསོལ༹སཙིཏྟཀྑཎཱཡུཀཏཱ ཝཀྑམཱནཱ, གཧིཏེ ཝཱ སོལ༹སཙིཏྟཀྑཎཱཡུཀཏཱ ཨདྷིཔྤེཏཱཏི ཝེདིཏབྦཱ.

ཨོཛཱ ཁརཱཏི སཝཏྠུཀཾ ཨོཛཾ སནྡྷཱཡཱཧ. སབྷཱཝཏོ སུཁུམཱཡ ཧི ཨོཛཱཡ ཝཏྠུཝསེན ཨཏྠི ཨོལཱ༹རིཀསུཁུམཏཱཏི.

ཙིཏྟཉྩེཝཱཏི ཙིཏྟསྶ པུབྦངྒམཏཱཡ ཝུཏྟཾ, ཏཾསམྤཡུཏྟཀཱཔི པན རཱུཔསམུཊྛཱཔཀཱ ཧོནྟཱིཏི. ཡཐཱཧ ‘‘ཧེཏཱུ ཧེཏུསམྤཡུཏྟཀཱནཾ དྷམྨཱནཾ ཏཾསམུཊྛཱནཱནཉྩ རཱུཔཱནཾ ཧེཏུཔཙྩཡེན པཙྩཡོ’’ཏིཨཱདི (པཊྛཱ. ༡.༡.༡). ཙིཏྟནྟི ཝཱ ཙིཏྟུཔྤཱདཾ གཎྷཱཏི, ན ཀམྨཙེཏནཾ ཝིཡ ཨེཀདྷམྨམེཝ ཨཝིཛྫམཱནཾ. ཀམྨསམུཊྛཱནཉྩ ཏཾསམྤཡུཏྟེཧིཔི སམུཊྛིཏཾ ཧོཏཱུཏི ཙེ? ན, ཏེཧི སམུཊྛིཏབྷཱཝསྶ ཨཝུཏྟཏྟཱ, ཨཝཙནཉྩ ཏེསཾ ཀེནཙི པཙྩཡེན པཙྩཡབྷཱཝཱབྷཱཝཏོ.

ཨདྡྷཱནཔརིཙྪེདཏོཏི ¶ ཀཱལཔརིཙྪེདཏོ. ཏཏྠ ‘‘སཏྟརས ཙིཏྟཀྑཎཱ རཱུཔསྶ ཨདྡྷཱ, རཱུཔསྶ སཏྟརསམོ བྷཱགོ ཨརཱུཔསྶཱ’’ཏི ཨེསོ ཨདྡྷཱནཔརིཙྪེདོ ཨདྷིཔྤེཏོ. པཊིསནྡྷིཀྑཎེཏི ཨིདཾ ནཡདསྶནམཏྟཾ དཊྛབྦཾ ཏཏོ པརམྤི རཱུཔཱརཱུཔཱནཾ སཧུཔྤཏྟིསབྦྷཱཝཏོ, ན པནེཏཾ པཊིསནྡྷིཀྑཎེ ཨསཧུཔྤཏྟིཨབྷཱཝཾ སནྡྷཱཡ ཝུཏྟནྟི དཊྛབྦཾ, པཊིསནྡྷིཙིཏྟསྶ ཋིཏིབྷངྒཀྑཎེསུཔི རཱུཔུཔྤཏྟིཾ སཡམེཝ ཝཀྑཏཱིཏི. ཕལཔྤཏྟནིདསྶནེན ཙ རཱུཔཱརཱུཔཱནཾ ཨསམཱནཀཱལཏཾ ནིདསྶེཏི, ན སཧུཔྤཱདཾ ཏདཏྠཾ ཨནཱརདྡྷཏྟཱ. སཧུཔྤཱདེན པན ཨསམཱནཀཱལཏཱ སུཁདཱིཔནཱ ཧོཏཱིཏི ཏཾདཱིཔནཏྠམེཝ སཧུཔྤཱདགྒཧཎཾ.

ཡདི ཨེཝཾ རཱུཔཱརཱུཔཱནཾ ཨསམཱནདྡྷཏྟཱ ཨརཱུཔཾ ཨོཧཱཡ རཱུཔསྶ པཝཏྟི ཨཱཔཛྫཏཱིཏི ཨེཏསྶཱ ནིཝཱརཎཏྠམཱཧ ‘‘ཏཏྠ ཀིཉྩཱཔཱི’’ཏིཨཱདི. ཨེཀཔྤམཱཎཱཝཱཏི ནིརནྟརཾ པཝཏྟམཱནེསུ རཱུཔཱརཱུཔདྷམྨེསུ ནིཙྪིདྡེསུ ཨརཱུཔརཧིཏཾ རཱུཔཾ, རཱུཔརཧིཏཾ ཝཱ ཨརཱུཔཾ ནཏྠཱིཏི ཀཏྭཱ ཝུཏྟཾ. ཨཡཉྩ ཀཐཱ པཉྩཝོཀཱརེ ཀམྨཛརཱུཔཔྤཝཏྟིཾ ནིབྦཱནཔཊིབྷཱགནིརོདྷསམཱཔཏྟིརཧིཏཾ སནྡྷཱཡ ཀཏཱཏི དཊྛབྦཱ. པདེ པདནྟི ཨཏྟནོ པདེ ཨེཝ པདཾ ནིཀྑིཔནྟོ ཝིཡ ལཧུཾ ལཧུཾ ཨཀྐམིཏྭཱཏི ཨཏྠོ. ཨནོཧཱཡཱཏི ཡཱཝ ཙུཏི, ཏཱཝ ¶ ཨཝིཛཧིཏྭཱ, ཙུཏིཀྑཎེ པན སཧེཝ ནིརུཛ྄ཛྷནྟཱིཏི. ཡསྨིཉྩདྡྷཱནེ ཨཉྙམཉྙཾ ཨནོཧཱཡ པཝཏྟི, སོ ཙ པཊིསནྡྷིཙུཏིཔརིཙྪིནྣོ ཨུཀྐཾསཏོ ཨེཏེསཾ ཨདྡྷཱཏི. ཨེཝནྟི ཨེཏེན པུབྦེ ཝུཏྟཾ ཨཝཀཾསཏོ ཨདྡྷཱཔཀཱརཾ ཨིམཉྩ སངྒཎྷཱཏཱིཏི དཊྛབྦཾ.

ཨེཀུཔྤཱདནཱནཱནིརོདྷཏོཏི ཨེཏཾ དྭཡམཔི སཧ གཧེཏྭཱ རཱུཔཱརཱུཔཱནཾ ‘‘ཨེཀུཔྤཱདནཱནཱནིརོདྷཏོ’’ཏི ཨེཀོ དཊྛབྦཱཀཱརོ ཝུཏྟོཏི དཊྛབྦོ. ཨེཝཾ ཨིཏོ པརེསུཔི. པཙྪིམཀམྨཛཾ ཋཔེཏྭཱཏི ཏསྶ ཙུཏིཙིཏྟེན སཧ ནིརུཛ྄ཛྷནཏོ ནཱནཱནིརོདྷོ ནཏྠཱིཏི ཀཏྭཱ ཝུཏྟནྟི ཝདནྟི. ཏསྶ པན ཨེཀུཔྤཱདོཔི ནཏྠི ཧེཊྛཱ སོལ༹སཀེ པཙྪིམསྶ བྷངྒཀྑཎེ ཨུཔྤཏྟིཝཙནཏོ. ཡདི པན ཡསྶ ཨེཀུཔྤཱདནཱནཱནིརོདྷཱ དྭེཔི ན སནྟི, ཏཾ ཋཔེཏབྦཾ. སབྦམྤི ཙིཏྟསྶ བྷངྒཀྑཎེ ཨུཔྤནྣཾ ཋཔེཏབྦཾ སིཡཱ, པཙྪིམཀམྨཛསྶ པན ཨུཔྤཏྟིཏོ པརཏོ ཙིཏྟེསུ པཝཏྟམཱནེསུ ཀམྨཛརཱུཔསྶ ཨནུཔྤཏྟིཏོ ཝཛྫེཏབྦཾ གཧེཏབྦཉྩ ཏདཱ ནཏྠཱིཏི ‘‘པཙྪིམཀམྨཛཾ ཋཔེཏྭཱ’’ཏི ཝུཏྟནྟི ཝེདིཏབྦཾ. ཏཏོ པུབྦེ པན ཨཊྛཙཏྟཱལཱིསཀམྨཛརཱུཔཔཝེཎཱི ཨཏྠཱིཏི ཏཏྠ ཡཾ ཙིཏྟསྶ ཨུཔྤཱདཀྑཎེ ཨུཔྤནྣཾ, ཏཾ ཨཉྙསྶ ཨུཔྤཱདཀྑཎེ ནིརུཛ྄ཛྷཏཱིཏི ‘‘ཨེཀུཔྤཱདནཱནཱནིརོདྷ’’ནྟི གཧེཏྭཱ ཋིཏིབྷངྒཀྑཎེསུ ཨུཔྤནྣརཱུཔཱནི ཝཛྫེཏྭཱ ཨེཝཾ ཨེཀུཔྤཱདནཱནཱནིརོདྷཏོ ཝེདིཏབྦཱཏི ཡོཛནཱ ¶ ཀཏཱཏི དཊྛབྦཱ. ཏཉྷི རཱུཔཾ ཨརཱུཔེན, ཨརཱུཔཉྩ ཏེན ཨེཀུཔྤཱདནཱནཱནིརོདྷནྟི. ཏཏྠ སངྑལིཀསྶ ཝིཡ སམྦནྡྷོ པཝེཎཱིཏི ཀཏྭཱ ཨཊྛཙཏྟཱལཱིསཀམྨཛིཡཝཙནཾ ཀཏཾ, ཨཉྙཐཱ ཨེཀཱུནཔཉྙཱསཀམྨཛིཡཝཙནཾ ཀཏྟབྦཾ སིཡཱ.

ནཱནུཔྤཱད…པེ… པཙྪིམཀམྨཛེན དཱིཔེཏབྦཱཏི ཏེན སུདཱིཔནཏྟཱ ཝུཏྟཾ. ཨེཏེན ཧི ནཡེན སཀྐཱ ཏཏོ པུབྦེཔི ཨེཀསྶ ཙིཏྟསྶ བྷངྒཀྑཎེ ཨུཔྤནྣརཱུཔཾ ཨཉྙསྶཔི བྷངྒཀྑཎེ ཨེཝ ནིརུཛ྄ཛྷཏཱིཏི ཏཾ ཨརཱུཔེན, ཨརཱུཔཉྩ ཏེན ནཱནུཔྤཱདཾ ཨེཀནིརོདྷནྟི ཝིཉྙཱཏུནྟི. ཨུབྷཡཏྠཱཔི པན ཨཉྙསྶ ཙིཏྟསྶ ཋིཏིཀྑཎེ ཨུཔྤནྣཾ རཱུཔཾ ཨཉྙསྶ ཋིཏིཀྑཎེ, ཏསྶ ཋིཏིཀྑཎེ ཨུཔྤཛྫིཏྭཱ ཋིཏིཀྑཎེ ཨེཝ ནིརུཛ྄ཛྷནཀཾ ཨརཱུཔཉྩ ན སངྒཧིཏཾ, ཏཾ ‘‘ནཱནུཔྤཱདཏོ ནཱནཱནིརོདྷཏོ’’ཏི ཨེཏྠེཝ སངྒཧཾ གཙྪཏཱིཏི ཝེདིཏབྦཾ. ཙཏུསནྟཏིཀརཱུཔེན ཧི ནཱནུཔྤཱདནཱནཱནིརོདྷཏཱདཱིཔནཱ ཨེཏྠ ཋིཏིཀྑཎེ ཨུཔྤནྣསྶ དསྶིཏཏྟཱ ཨདསྶིཏསྶ ཝསེན ནཡདསྶནཾ ཧོཏཱིཏི. སམཏིཾསཀམྨཛརཱུཔེསུ ཨེཝ ཋིཏསྶཔི གབྦྷེ གཏསྶ མརཎཾ ཨཏྠཱིཏི ཏེསཾ ཨེཝ ཝསེན པཙྪིམཀམྤི ཡོཛིཏཾ. ཨམརཱ ནཱམ བྷཝེཡྻུཾ, ཀསྨཱ? ཡཐཱ ཚནྣཾ ཝཏྠཱུནཾ པཝཏྟི ¶ , ཨེཝཾ ཏདུཔྤཱདཀཀམྨེནེཝ བྷཝངྒཱདཱིནཉྩ ཏབྦཏྠུཀཱནཾ པཝཏྟིཡཱ བྷཝིཏབྦནྟི. ན ཧི ཏཾ ཀཱརཎཾ ཨཏྠི, ཡེན ཏཾ ཀམྨཛེསུ ཨེཀཙྩཾ པཝཏྟེཡྻ, ཨེཀཙྩཾ ན པཝཏྟེཡྻཱཏི. ཏསྨཱ ཨཱཡུཨུསྨཱཝིཉྙཱཎཱདཱིནཾ ཛཱིཝིཏསངྑཱརཱནཾ ཨནཱུནཏྟཱ ཝུཏྟཾ ‘‘ཨམརཱ ནཱམ བྷཝེཡྻུ’’ནྟི.

‘‘ཨུཔྤཱདཀྑཎེ ཨུཔྤནྣཾ ཨཉྙསྶ ཨུཔྤཱདཀྑཎེ ནིརུཛ྄ཛྷཏི, ཋིཏིཀྑཎེ ཨུཔྤནྣཾ ཨཉྙསྶ ཋིཏིཀྑཎེ, བྷངྒཀྑཎེ ཨུཔྤནྣཾ ཨཉྙསྶ བྷངྒཀྑཎེ ནིརུཛ྄ཛྷཏཱི’’ཏི ཨིདཾ ཨཊྛཀཐཱཡཾ ཨཱགཏཏྟཱ ཝུཏྟནྟི ཨདྷིཔྤཱཡོ. ཨཏྟནོ པནཱདྷིཔྤཱཡཾ ཨུཔྤཱདཀྑཎེ ཨུཔྤནྣཾ ནིརོདྷཀྑཎེ, ཋིཏིཀྑཎེ ཨུཔྤནྣཉྩ ཨུཔྤཱདཀྑཎེ, བྷངྒཀྑཎེ ཨུཔྤནྣཾ ཋིཏིཀྑཎེ ནིརུཛ྄ཛྷཏཱིཏི དཱིཔེཏིཡེཝ. ཨེཝཉྩ ཀཏྭཱ ཨདྡྷཱནཔརིཙྪེདེ ‘‘ཏཾ པན སཏྟརསམེན ཙིཏྟེན སདྡྷིཾ ནིརུཛ྄ཛྷཏཱི’’ཏི (ཝིབྷ. ཨཊྛ. ༢༦ པཀིཎྞཀཀཐཱ) ཝུཏྟཾ. ཨིམཱཡ པཱལི༹ཡཱ ཝིརུཛ྄ཛྷཏི, ཀསྨཱ? ཙཏུསམུཊྛཱནིཀརཱུཔསྶཔི སམཱནཱཡུཀཏཱཡ བྷཝིཏབྦཏྟཱཏི ཨདྷིཔྤཱཡོ. ཡཐཱ པན ཨེཏེཧི ཡོཛིཏཾ, ཏཐཱ རཱུཔསྶ ཨེཀུཔྤཱདནཱནཱནིརོདྷཏཱ ནཱནུཔྤཱདེཀནིརོདྷཏཱ ཙ ནཏྠིཡེཝ.

ཡཱ པན ཨེཏེཧི རཱུཔསྶ སཏྟརསཙིཏྟཀྑཎཱཡུཀཏཱ ཝུཏྟཱ, ཡཱ ཙ ཨཊྛཀཐཱཡཾ ཏཏིཡབྷཱགཱདྷིཀསོལ༹སཙིཏྟཀྑཎཱཡུཀཏཱ, སཱ པཊིཙྩསམུཔྤཱདཝིབྷངྒཊྛཀཐཱཡཾ (ཝིབྷ. ཨཊྛ. ༢༢༧) ཨཏཱིཏཱརམྨཎཱཡ ¶ ཙུཏིཡཱ ཨནནྟརཱ པཙྩུཔྤནྣཱརམྨཎཾ པཊིསནྡྷིཾ དསྶེཏུཾ ‘‘ཨེཏྟཱཝཏཱ ཨེཀཱདས ཙིཏྟཀྑཎཱ ཨཏཱིཏཱ ཧོནྟི, ཏཐཱ པཉྩདས ཙིཏྟཀྑཎཱ ཨཏཱིཏཱ ཧོནྟི, ཨཐཱཝསེསཔཉྩཙིཏྟཨེཀཙིཏྟཀྑཎཱཡུཀེ ཏསྨིཾ ཡེཝཱརམྨཎེ པཊིསནྡྷིཙིཏྟཾ ཨུཔྤཛྫཏཱི’’ཏི དསྶིཏེན སོལ༹སཙིཏྟཀྑཎཱཡུཀབྷཱཝེན ཝིརུཛ྄ཛྷཏི. ན ཧི སཀྐཱ ‘‘ཋིཏིཀྑཎེ ཨེཝ རཱུཔཾ ཨཱཔཱཐམཱགཙྪཏཱི’’ཏི ཝཏྟུཾ. ཏཐཱ ཧི སཏི ན རཱུཔསྶ ཨེཀཱདས ཝཱ པཉྩདསེཝ ཝཱ ཙིཏྟཀྑཎཱ ཨཏཱིཏཱ, ཨཐ ཁོ ཨཏིརེཀཨེཀཱདསཔཉྩདསཙིཏྟཀྑཎཱ. ཏསྨཱ ཡདིཔི པཉྩདྭཱརེ ཋིཏིཔྤཏྟམེཝ རཱུཔཾ པསཱདཾ གྷཊྚེཏཱིཏི ཡུཛྫེཡྻ, མནོདྭཱརེ པན ཨུཔྤཱདཀྑཎེཔི ཨཱཔཱཐམཱགཙྪཏཱིཏི ཨིཙྪིཏབྦམེཏཾ. ན ཧི མནོདྭཱརེ ཨཏཱིཏཱདཱིསུ ཀིཉྩི ཨཱཔཱཐཾ ནཱགཙྪཏཱིཏི. མནོདྭཱརེ ཙ ཨེཝཾ ཝུཏྟཾ ‘‘ཨེཀཱདས ཙིཏྟཀྑཎཱ ཨཏཱིཏཱ, ཨཐཱཝསེསཔཉྩཙིཏྟཀྑཎཱཡུཀེ’’ཏི (ཝིབྷ. ཨཊྛ. ༢༢༧).

ཡོ ཙེཏྠ ཙིཏྟསྶ ཋིཏིཀྑཎོ ཝུཏྟོ, སོ ཙ ཨཏྠི ནཏྠཱིཏི ཝིཙཱརེཏབྦོ. ཙིཏྟཡམཀེ (ཡམ. ༢.ཙིཏྟཡམཀ.༡༠༢) ཧི ‘‘ཨུཔྤནྣཾ ཨུཔྤཛྫམཱནནྟི? བྷངྒཀྑཎེ ཨུཔྤནྣཾ, ནོ ¶ ཙ ཨུཔྤཛྫམཱན’’ནྟི ཨེཏྟཀམེཝ ཝུཏྟཾ, ན ཝུཏྟཾ ‘‘ཋིཏིཀྑཎེ བྷངྒཀྑཎེ ཙཱ’’ཏི. ཏཐཱ ‘‘ནུཔྤཛྫམཱནཾ ནུཔྤནྣནྟི? བྷངྒཀྑཎེ ནུཔྤཛྫམཱནཾ, ནོ ཙ ནུཔྤནྣ’’ནྟི ཨེཏྟཀམེཝ ཝུཏྟཾ, ན ཝུཏྟཾ ‘‘ཋིཏིཀྑཎེ བྷངྒཀྑཎེ ཙཱ’’ཏི. ཨེཝཾ ‘‘ན ནིརུདྡྷཾ ན ནིརུཛ྄ཛྷམཱནཾ, ན ནིརུཛ྄ཛྷམཱནཾ ན ནིརུདྡྷ’’ནྟི ཨེཏེསཾ པརིཔུཎྞཝིསྶཛྫནེ ‘‘ཨུཔྤཱདཀྑཎེ ཨནཱགཏཉྩཱ’’ཏི ཝཏྭཱ ‘‘ཋིཏིཀྑཎེ’’ཏི ཨཝཙནཾ, ཨཏིཀྐནྟཀཱལཝཱརེ ཙ ‘‘བྷངྒཀྑཎེ ཙིཏྟཾ ཨུཔྤཱདཀྑཎཾ ཝཱིཏིཀྐནྟ’’ནྟི ཝཏྭཱ ‘‘ཋིཏིཀྑཎེ’’ཏི ཨཝཙནཾ ཋིཏིཀྑཎཱབྷཱཝཾ ཙིཏྟསྶ དཱིཔེཏི. སུཏྟེསུཔི ཧི ‘‘ཋིཏསྶ ཨཉྙཐཏྟཾ པཉྙཱཡཏཱི’’ཏི ཏསྶེཝ (སཾ. ནི. ༣.༣༨; ཨ. ནི. ༣.༤༧) ཨེཀསྶ ཨཉྙཐཏྟཱབྷཱཝཏོ ‘‘ཡསྶཱ ཨཉྙཐཏྟཾ པཉྙཱཡཏི, སཱ སནྟཏིཋིཏཱི’’ཏི ན ན སཀྐཱ ཝཏྟུནྟི, ཝིཛྫམཱནཾ ཝཱ ཁཎདྭཡསམངྒིཾ ཋིཏནྟི.

ཡོ ཙེཏྠ ཙིཏྟནིརོདྷཀྑཎེ རཱུཔུཔྤཱདོ ཝུཏྟོ, སོ ཙ ཝིཙཱརེཏབྦོ ‘‘ཡསྶ ཝཱ པན སམུདཡསཙྩཾ ནིརུཛ྄ཛྷཏི, ཏསྶ དུཀྑསཙྩཾ ཨུཔྤཛྫཏཱིཏི? ནོཏི ཝུཏྟ’’ནྟི (ཡམ. ༡.སཙྩཡམཀ.༡༣༦). ཡོ ཙ ཙིཏྟསྶ ཨུཔྤཱདཀྑཎེ རཱུཔནིརོདྷོ ཝུཏྟོ, སོ ཙ ཝིཙཱརེཏབྦོ ‘‘ཡསྶ ཀུསལཱ དྷམྨཱ ཨུཔྤཛྫནྟི, ཏསྶ ཨབྱཱཀཏཱ དྷམྨཱ ནིརུཛ྄ཛྷནྟཱིཏི? ནོཏིཨཱདི (ཡམ. ༣.དྷམྨཡམཀ.༡༦༣) ཝུཏྟ’’ནྟི. ན ཙ ཙིཏྟསམུཊྛཱནརཱུཔམེཝ སནྡྷཱཡ པཊིཀྑེཔོ ཀཏོཏི སཀྐཱ ཝཏྟུཾ ¶ ཙིཏྟསམུཊྛཱནརཱུཔཱདྷིཀཱརསྶ ཨབྷཱཝཱ, ཨབྱཱཀཏསདྡསྶ ཙ ཙིཏྟསམུཊྛཱནརཱུཔེསྭེཝ ཨཔྤཝཏྟིཏོ. ཡདི སངྑཱརཡམཀེ ཀཱཡསངྑཱརསྶ ཙིཏྟསངྑཱརེན སཧུཔྤཱདེཀནིརོདྷཝཙནཏོ ཨབྱཱཀཏ-སདྡེན ཙིཏྟསམུཊྛཱནམེཝེཏྠ གཧིཏནྟི ཀཱརཎཾ ཝདེཡྻ, ཏམྤི ཨཀཱརཎཾ. ན ཧི ཏེན ཝཙནེན ཨཉྙརཱུཔཱནཾ ཙིཏྟེན སཧུཔྤཱདསཧནིརོདྷཔཊིཀྑེཔོ ཀཏོ, ནཱཔི ནཱནུཔྤཱདནཱནཱནིརོདྷཱནུཛཱནནཾ, ནེཝ ཙིཏྟསམུཊྛཱནཏོ ཨཉྙསྶ ཨབྱཱཀཏབྷཱཝནིཝཱརཎཉྩ ཀཏཾ, ཏསྨཱ ཏཐཱ ཨཔྤཊིཀྑིཏྟཱནཱནུཉྙཱཏཱནིཝཱརིཏཱབྱཱཀཏབྷཱཝཱནཾ སཧུཔྤཱདསཧནིརོདྷཱདིཀཱནཾ ཀམྨཛཱདཱིནཾ ཨེཏེན ཙིཏྟསྶ ཨུཔྤཱདཀྑཎེ ནིརོདྷོ པཊིཀྑིཏྟོཏི ན སཀྐཱ ཀམྨཛཱདཱིནཾ ཙིཏྟསྶ ཨུཔྤཱདཀྑཎེ ནིརོདྷཾ ཝཏྟུཾ. ཡམཀཔཱལི༹ཨནུསྶརཎེ ཙ སཏི ཨུཔྤཱདཱནནྟརཾ ཙིཏྟསྶ བྷིཛྫམཱནཏཱཏི ཏསྨིཾ ཁཎེ ཙིཏྟཾ ན ཙ རཱུཔཾ སམུཊྛཱཔེཏི ཝིནསྶམཱནཏྟཱ, ནཱཔི ཙ ཨཉྙསྶ རཱུཔསམུཊྛཱཔཀསྶ སཧཱཡབྷཱཝཾ གཙྪཏཱིཏི པཊིསནྡྷིཙིཏྟེན སཧུཔྤནྣོ ཨུཏུ ཏདནནྟརསྶ ཙིཏྟསྶ ཨུཔྤཱདཀྑཎེ རཱུཔཾ སམུཊྛཱཔེཡྻ. ཨེཝཉྩ སཏི རཱུཔཱརཱུཔཱནཾ ཨཱདིམྷི སཧ རཱུཔསམུཊྛཱཔནཏོ པུབྦཱཔརཏོཏི ཨིདམྤི ནཏྠི, ཨཏིལཧུཔརིཝཏྟཉྩ ¶ ཙིཏྟནྟི ཡེན སཧུཔྤཛྫཏི, ཏཾ ཙིཏྟཀྑཎེ རཱུཔཾ ཨུཔྤཛྫམཱནམེཝཱཏི སཀྐཱ ཝཏྟུཾ. ཏེནེཝ ཧི ཏཾ པཊིསནྡྷིཏོ ཨུདྡྷཾ ཨཙིཏྟསམུཊྛཱནཱནཾ ཨཏྟནཱ སཧ ཨུཔྤཛྫམཱནཱནཾ ན ཀེནཙི པཙྩཡེན པཙྩཡོ ཧོཏི, ཏདནནྟརཉྩ ཏཾ ཋིཏིཔྤཏྟནྟི ཏདནནྟརཾ ཙིཏྟཾ ཏསྶ པཙྪཱཛཱཏཔཙྩཡོ ཧོཏི, ན སཧཛཱཏཔཙྩཡོཏི. ཡདི ཨེཝཾ ‘‘ཡསྶ ཀཱཡསངྑཱརོ ཨུཔྤཛྫཏི, ཏསྶ ཝཙཱིསངྑཱརོ ནིརུཛ྄ཛྷཏཱིཏི? ནོ’’ཏི (ཡམ. ༢.སངྑཱརཡམཀ.༡༢༨), ཝཏྟབྦནྟི ཙེ? ན, ཙིཏྟནིརོདྷཀྑཎེ རཱུཔུཔྤཱདཱརམྦྷཱབྷཱཝཏོཏི. ནིཔྤརིཡཱཡེན ཧི ཙིཏྟསྶ ཨུཔྤཱདཀྑཎེ ཨེཝ རཱུཔཾ ཨུཔྤཛྫམཱནཾ ཧོཏི, ཙིཏྟཀྑཎེ པན ཨཝཱིཏིཝཏྟེ ཏཾ ཨཏྟནོ རཱུཔསམུཊྛཱཔནཔུརེཛཱཏཔཙྩཡཀིཙྩཾ ན ཀརོཏི, ཨརཱུཔཉྩ ཏསྶ པཙྪཱཛཱཏཔཙྩཡོ ན ཧོཏཱིཏི ཋིཏིཔྤཏྟིཝིསེསཱལཱབྷཾ སནྡྷཱཡ པརིཡཱཡེན ཨིདཾ ཝུཏྟནྟི.

ཏཏོ པརཾ པནཱཏི ཨེཏསྶ ‘‘ཨེཏྠ པན ཡདེཏ’’ནྟིཨཱདིཀཱཡཔི སངྒཧཀཐཱཡ ནིཊྛིཏཱཡ པུརིམཀཐཱཡ སནྣིཊྛཱནཏོ ‘‘ཏཏོ པཊྛཱཡ ཀམྨཛརཱུཔཔཝེཎཱི ན པཝཏྟཏཱི’’ཏི ཨེཏེན སཧ སམྦནྡྷོཏི ཙུཏིཏོ པརནྟི ཨཏྠོ.

རཱུཔཾ པན རཱུཔེན སཧཱཏིཨཱདིནཱ ཡཐཱ ཨཊྛཀཐཱཡཾ ཝུཏྟཾ, ཏཐཱ ཨེཀུཔྤཱདེཀནིརོདྷཏཱ རཱུཔཱནཾ ཨརཱུཔེཧི, ཨརཱུཔཱནཾ རཱུཔེཧི ཙ ནཏྠཱིཏི ཀཏྭཱ རཱུཔཱནཾ རཱུཔེཧེཝ, ཨརཱུཔཱནཉྩ ཨརཱུཔེཧི ཡོཛིཏཱ.

སརཱིརསྶ ¶ རཱུཔཾ ཨཝཡཝབྷཱུཏནྟི ཨཏྠོ, གྷནབྷཱུཏོ པུཉྫབྷཱཝོ གྷནཔུཉྫབྷཱཝོ, ན ཏིལམུགྒཱདིཔུཉྫཱ ཝིཡ སིཐིལསམྦནྡྷནཱནཾ པུཉྫོཏི ཨཏྠོ. ཨེཀུཔྤཱདཱདིཏཱཏི ཡཐཱཝུཏྟེ ཏཡོ པཀཱརེ ཨཱཧ.

ཧེཊྛཱཏི རཱུཔཀཎྜཝཎྞནཱཡཾ. པརིནིཔྥནྣཱཝ ཧོནྟཱིཏི ཝིཀཱརརཱུཔཱདཱིནཉྩ རཱུཔཀཎྜཝཎྞནཱཡཾ པརིནིཔྥནྣཏཱཔརིཡཱཡོ ཝུཏྟོཏི ཀཏྭཱ ཝུཏྟཾ. པརིནིཔྥནྣནིཔྥནྣཱནཾ ཀོ ཝིསེསོཏི? པུབྦནྟཱཔརནྟཔརིཙྪིནྣོ པཙྩཡེཧི ནིཔྥཱདིཏོ ཏིལཀྑཎཱཧཏོ སབྷཱཝདྷམྨོ པརིནིཔྥནྣོ, ནིཔྥནྣོ པན ཨསབྷཱཝདྷམྨོཔི ཧོཏི ནཱམགྒཧཎསམཱཔཛྫནཱདིཝསེན ནིཔྥཱདིཡམཱནོཏི. ནིརོདྷསམཱཔཏྟི པནཱཏི ཨེཏེན སབྦམྤི ཨུཔཱདཱཔཉྙཏྟིཾ ཏདེཀདེསེན དསྶེཏཱིཏི ཝེདིཏབྦཾ.

པཀིཎྞཀཀཐཱཝཎྞནཱ ནིཊྛིཏཱ.

ཀམཱདིཝིནིཙྪཡཀཐཱཝཎྞནཱ

དསྶནེན ¶ པཧཱཏབྦཱཏིཨཱདིནཱ པཋམཾ པཧཱཏབྦཱ པཋམཾ ཝུཏྟཱ, དུཏིཡཾ པཧཱཏབྦཱ དུཏིཡནྟི ཨཡཾ པཧཱནཀྐམོ. ཨནུཔུབྦཔཎཱིཏཱ བྷཱུམིཡོ ཨནུཔུབྦེན ཝཝཏྠིཏཱཏི ཏཱསཾ ཝསེན དེསནཱཡ བྷཱུམིཀྐམོ. ‘‘ཙཏྟཱརོ སཏིཔཊྛཱནཱ’’ཏིཨཱདིཀོ (སཾ. ནི. ༥.༣༧༢, ༣༨༢, ༣༨༣; ཝིབྷ. ༣༥༥) ཨེཀཀྑཎེཔི སཏིཔཊྛཱནཱདིསམྦྷཝཏོ དེསནཱཀྐམོཝ. དཱནཀཐཱདཡོ ཨནུཔུབྦུཀྐཾསཏོ ཀཐིཏཱ, ཨུཔྤཏྟིཨཱདིཝཝཏྠཱནཱབྷཱཝཏོ པན དཱནཱདཱིནཾ ཨིདྷ དེསནཱཀྐམཝཙནཾ. དེསནཱཀྐམོཏི ཙ ཡཐཱཝུཏྟཝཝཏྠཱནཱབྷཱཝཏོ ཨནེཀེསཾ ཝཙནཱནཾ སཧ པཝཏྟིཡཱ ཨསམྦྷཝཏོ ཡེན ཀེནཙི པུབྦཱཔརིཡེན དེསེཏབྦཏྟཱ ཏེན ཏེནཱདྷིཔྤཱཡེན དེསནཱམཏྟསྶེཝ ཀམོ ཝུཙྩཏི. ཨབྷེདེན ཧཱིཏི རཱུཔཱདཱིནཾ བྷེདཾ ཨཀཏྭཱ པིཎྜགྒཧཎེནཱཏི ཨཏྠོ. ཙཀྑུཨཱདཱིནམྤི ཝིསཡབྷཱུཏནྟི ཨེཀདེསེན རཱུཔཀྑནྡྷཾ སམུདཱཡབྷཱུཏཾ ཝདཏི. ཨེཝནྟི ཨེཏྠ ཝུཏྟནཡེནཱཏི ཨདྷིཔྤཱཡོ. ‘‘ཚདྭཱརཱདྷིཔཏི རཱཛཱ’’ཏི (དྷ. པ. ཨཊྛ. ༢.ཨེརཀཔཏྟནཱགརཱཛཝཏྠུ) ‘‘མནོཔུབྦངྒམཱ དྷམྨཱ’’ཏི (དྷ. པ. ༡-༢) ཙ ཝཙནཏོ ཝིཉྙཱཎཾ ཨདྷིཔཏི.

རཱུཔཀྑནྡྷེ ¶ ‘‘སཱསཝཾ ཨུཔཱདཱནིཡ’’ནྟི ཝཙནཾ ཨནཱསཝཱནཾ དྷམྨཱནཾ སབྦྷཱཝཏོ རཱུཔཀྑནྡྷསྶ ཏཾསབྷཱཝཏཱནིཝཏྟནཏྠཾ, ན ཨནཱསཝརཱུཔནིཝཏྟནཏྠནྟི. ཨནཱསཝཱཝ ཁནྡྷེསུ ཝུཏྟཱཏི ཨེཏྠ ཨཊྛཱནཔྤཡུཏྟོ ཨེཝ-སདྡོ དཊྛབྦོ, ཨནཱསཝཱ ཁནྡྷེསྭེཝ ཝུཏྟཱཏི ཨཏྠོ.

སབྦསངྑཏཱནཾ སབྷཱགེན ཨེཀཛ྄ཛྷཾ སངྒཧོ སབྦསངྑཏསབྷཱགེཀསངྒཧོ. སབྷཱགསབྷཱགེན ཧི སངྒཡ྄ཧམཱནཱ སབྦསངྑཏཱ ཕསྶཱདཡོ པཉྩཀྑནྡྷཱ ཧོནྟི. ཏཏྠ རུཔྤནཱདིསཱམཉྙེན སམཱནཀོཊྛཱསཱ ‘‘སབྷཱགཱ’’ཏི ཝེདིཏབྦཱ. ཏེསུ སངྑཏཱབྷིསངྑརཎཀིཙྩཾ ཨཱཡཱུཧནརསཱཡ ཙེཏནཱཡ བལཝནྟི སཱ ‘‘སངྑཱརཀྑནྡྷོ’’ཏི ཝུཏྟཱ, ཨཉྙེ ཙ རུཔྤནཱདིཝིསེསལཀྑཎརཧིཏཱ ཕསྶཱདཡོ སངྑཏཱབྷིསངྑརཎསཱམཉྙེནཱཏི དཊྛབྦཱ. ཕུསནཱདཡོ པན སབྷཱཝཱ ཝིསུཾ ཁནྡྷ-སདྡཝཙནཱིཡཱ ན ཧོནྟཱིཏི དྷམྨསབྷཱཝཝིཉྙུནཱ ཏཐཱགཏེན ཕསྶཁནྡྷཱདཡོ ན ཝུཏྟཱཏི དཊྛབྦཱཏི. ‘‘ཡེ ཀེཙི, བྷིཀྑཝེ, སམཎཱ ཝཱ བྲཱཧྨཎཱ ཝཱ སསྶཏཝཱདཱ སསྶཏཾ ལོཀཉྩ པཉྙཔེནྟི ཨཏྟཱནཉྩ, སབྦེ ཏེ ཨིམེཡེཝ པཉྩུཔཱདཱནཀྑནྡྷེ ནིསྶཱཡ པཊིཙྩ, ཨེཏེསཾ ཝཱ ཨཉྙཏར’’ནྟིཨཱདཱིནཉྩ སུཏྟཱནཾ ཝསེན ཨཏྟཏྟནིཡགཱཧཝཏྠུསྶ ཨེཏཔརམཏཱ དཊྛབྦཱ, ཨེཏེན ཙ ཝཀྑམཱནསུཏྟཝསེན ཙ ཁནྡྷེ ཨེཝ ནིསྶཱཡ ¶ པརིཏྟཱརམྨཎཱདིཝསེན ན ཝཏྟབྦཱ ཙ དིཊྛི ཨུཔྤཛྫཏི, ཁནྡྷནིབྦཱནཝཛྫསྶ སབྷཱཝདྷམྨསྶ ཨབྷཱཝཏོཏི ཝུཏྟཾ ཧོཏི. ཨཉྙེསཉྩ ཁནྡྷ-སདྡཝཙནཱིཡཱནཾ སཱིལཀྑནྡྷཱདཱིནཾ སབྦྷཱཝཏོ ན པཉྩེཝཱཏི ཨེཏཾ ཙོདནཾ ནིཝཏྟེཏུམཱཧ ‘‘ཨཉྙེསཉྩ ཏདཝརོདྷཏོ’’ཏི.

དུཀྑདུཀྑཝིཔརིཎཱམདུཀྑསངྑཱརདུཀྑཏཱཝསེན ཝེདནཱཡ ཨཱབཱདྷཀཏྟཾ དཊྛབྦཾ. རཱགཱདིསམྤཡུཏྟསྶ ཝིཔརིཎཱམཱདིདུཀྑསྶ ཨིཏྠིཔུརིསཱདིཨཱཀཱརགྒཱཧིཀཱ ཏཾཏཾསངྐཔྤམཱུལབྷཱུཏཱ སཉྙཱ སམུཊྛཱནཾ. རོགསྶ པིཏྟཱདཱིནི ཝིཡ ཨཱསནྣཀཱརཎཾ སམུཊྛཱནཾ, ཨུཏུབྷོཛནཝེསམཱདཱིནི ཝིཡ མཱུལཀཱརཎཾ ནིདཱནཾ. ‘‘ཙིཏྟསྶངྒབྷཱུཏཱ ཙེཏསིཀཱ’’ཏི ཙིཏྟཾ གིལཱནཱུཔམཾ ཝུཏྟཾ, སུཁསཉྙཱདིཝསེན ཝེདནཱཀཱརཎཱཡ ཧེཏུབྷཱཝཏོ ཝེདནཱབྷོཛནསྶ ཚཱདཱཔནཏོ ཙ སཉྙཱ ཨཔརཱདྷཱུཔམཱ བྱཉྫནཱུཔམཱ ཙ, ‘‘པཉྩ ཝདྷཀཱ པཙྩཏྠིཀཱཏི ཁོ, བྷིཀྑཝེ, པཉྩནྣེཏཾ ཨུཔཱདཱནཀྑནྡྷཱནཾ ཨདྷིཝཙན’’ནྟི ཨཱསིཝིསཱུཔམེ (སཾ. ནི. ༤.༢༣༨) ཝདྷཀཱཏི ཝུཏྟཱ, ‘‘བྷཱརོཏི ཁོ, བྷིཀྑཝེ, པཉྩནྣེཏཾ ཨུཔཱདཱནཀྑནྡྷཱནཾ ཨདྷིཝཙན’’ནྟི བྷཱརསུཏྟེ (སཾ. ནི. ༣.༢༢) བྷཱརཱཏི, ‘‘ཨཏཱིཏཾཔཱཧཾ ཨདྡྷཱནཾ རཱུཔེན ཁཛྫིཾ, སེཡྻཐཱཔཱཧཾ ཨེཏརཧི པཙྩུཔྤནྣེན རཱུཔེན ཁཛྫཱམི, ཨཧཉྩེཝ ཁོ པན ཨནཱགཏཾ རཱུཔཾ ཨབྷིནནྡེཡྻཾ, ཨནཱགཏེནཔཱཧཾ རཱུཔེན ཁཛྫེཡྻཾ. སེཡྻཐཱཔེཏརཧི ཁཛྫཱམཱི’’ཏིཨཱདིནཱ ཁཛྫནཱིཡཔརིཡཱཡེན (སཾ. ནི. ༣.༧༩) ཁཱདཀཱཏི ¶ , ‘‘སོ ཨནིཙྩཾ རཱུཔཾ ‘ཨནིཙྩཾ རཱུཔ’ནྟི ཡཐཱབྷཱུཏཾ ནཔྤཛཱནཱཏཱི’’ཏིཨཱདིནཱ ཡམཀསུཏྟེ (སཾ. ནི. ༣.༨༥) ཨནིཙྩཱདིཀཱཏི. ཡདིཔི ཨིམསྨིཾ ཝིབྷངྒེ ཨཝིསེསེན ཁནྡྷཱ ཝུཏྟཱ, བཱཧུལླེན པན ཨུཔཱདཱནཀྑནྡྷཱནཾ ཏདནྟོགདྷཱནཾ དཊྛབྦཏཱ ཝུཏྟཱཏི ཝེདིཏབྦཱཏི.

དེསིཏཱདིཙྩབནྡྷུནཱཏི དེསིཏཾ ཨཱདིཙྩབནྡྷུནཱ, དེསིཏཱནི ཝཱ. གཱཐཱསུཁཏྠཾ ཨནུནཱསིཀལོཔོ, ནིཀཱརལོཔོ ཝཱ ཀཏོ.

གཧེཏུཾ ན སཀྐཱཏི ནིཙྩཱདིཝསེན གཧེཏུཾ ན ཡུཏྟནྟི ཨཏྠོ.

རཱུཔེན སཎྛཱནེན ཕལཀསདིསོ དིསྶམཱནོ ཁརབྷཱཝཱབྷཱཝཱ ཕལཀཀིཙྩཾ ན ཀརོཏཱིཏི ‘‘ན སཀྐཱ ཏཾ གཧེཏྭཱ ཕལཀཾ ཝཱ ཨཱསནཾ ཝཱ ཀཱཏུ’’ནྟི ཨཱཧ. ན ཏཐཱ ཏིཊྛཏཱིཏི ནིཙྩཱདིཀཱ ན ཧོཏཱིཏི ཨཏྠོ, ཏཎྷཱདིཊྛཱིཧི ཝཱ ནིཙྩཱདིགྒཧཎཝསེན ཨུཔྤཱདཱདིཨནནྟརཾ བྷིཛྫནཏོ གཧིཏཱཀཱརཱ ཧུཏྭཱ ན ཏིཊྛཏཱིཏི ཨཏྠོ. ཀོཊིསཏསཧསྶསངྑྱཱཏི ཨིདཾ ¶ ན གཎནཔརིཙྪེདདསྶནཾ, བཧུབྷཱཝདསྶནམེཝ པནེཏཾ དཊྛབྦཾ. ཨུདཀཛལླཀནྟི ཨུདཀལསིཀཾ. ཡཐཱ ཨུདཀཏལེ བིནྡུནིཔཱཏཛནིཏོ ཝཱཏོ ཨུདཀཛལླཀཾ སངྐཌྜྷིཏྭཱ པུཊཾ ཀཏྭཱ པུཔྥུལ༹ཾ ནཱམ ཀརོཏི, ཨེཝཾ ཝཏྠུམྷི ཨཱརམྨཎཱཔཱཐགམནཛནིཏོ ཕསྶོ ཨནུཔཙྪིནྣཾ ཀིལེསཛལླཾ སཧཀཱརཱིཔཙྩཡནྟརབྷཱཝེན སངྐཌྜྷིཏྭཱ ཝེདནཾ ནཱམ ཀརོཏི. ཨིདཉྩ ཀིལེསེཧི མཱུལཀཱརཎབྷཱུཏེཧི ཨཱརམྨཎསྶཱདནབྷཱུཏེཧི ཙ ནིབྦཏྟཾ ཝཊྚགཏཝེདནཾ སནྡྷཱཡ ཝུཏྟནྟི ཝེདིཏབྦཾ. ཨུཀྐཊྛཔརིཙྪེདེན ཝཱ ཙཏྟཱརོ པཙྩཡཱ ཝུཏྟཱ, ཨཱུནེཧིཔི པན ཨུཔྤཛྫཏེཝ.

ནཱནཱལཀྑཎོཏི ཝཎྞགནྡྷརསཕསྶཱདཱིཧི ནཱནཱསབྷཱཝོ. མཱཡཱཡ དསྶིཏཾ རཱུཔཾ ‘‘མཱཡཱ’’ཏི ཨཱཧ. པཉྩཔི ཨུཔཱདཱནཀྑནྡྷཱ ཨསུབྷཱདིསབྷཱཝཱ ཨེཝ ཀིལེསཱསུཙིཝཏྠུབྷཱཝཱདིཏོཏི ཨསུབྷཱདིཏོ དཊྛབྦཱ ཨེཝ. ཏཐཱཔི ཀཏྠཙི ཀོཙི ཝིསེསོ སུཁགྒཧཎཱིཡོ ཧོཏཱིཏི ཨཱཧ ‘‘ཝིསེསཏོ ཙཱ’’ཏིཨཱདི. ཏཏྠ ཙཏྟཱརོ སཏིཔཊྛཱནཱ ཙཏུཝིཔལླཱསཔྤཧཱནཀརཱཏི ཏེསཾ གོཙརབྷཱཝེན རཱུཔཀྑནྡྷཱདཱིསུ ཨསུབྷཱདིཝསེན དཊྛབྦཏཱ ཝུཏྟཱ.

ཁནྡྷེཧི ན ཝིཧཉྙཏི པརིཝིདིཏསབྷཱཝཏྟཱ. ཝིཔསྶཀོཔི ཧི ཏེསཾ ཝིཔཏྟིཡཾ ན དུཀྑམཱཔཛྫཏི, ཁཱིཎཱསཝེསུ པན ཝཏྟབྦམེཝ ནཏྠི. ཏེ ཧི ཨཱཡཏིམྤི ཁནྡྷེཧི ན བཱདྷཱིཡནྟཱིཏི ¶ . ཀབལཱི༹ཀཱརཱཧཱརཾ པརིཛཱནཱཏཱིཏི ‘‘ཨཱཧཱརསམུདཡཱ རཱུཔསམུདཡོ’’ཏི (སཾ. ནི. ༣.༥༦-༥༧) ཝུཏྟཏྟཱ ཨཛ྄ཛྷཏྟིཀརཱུཔེ ཚནྡརཱགཾ པཛཧནྟོ ཏསྶ སམུདཡབྷཱུཏེ ཀབལཱི༹ཀཱརཱཧཱརེཔི ཚནྡརཱགཾ པཛཧཏཱིཏི ཨཏྠོ, ཨཡཾ པཧཱནཔརིཉྙཱ. ཨཛ྄ཛྷཏྟིཀརཱུཔཾ པན པརིགྒཎྷནྟོ ཏསྶ པཙྩཡབྷཱུཏཾ ཀབལཱི༹ཀཱརཱཧཱརམྤི པརིགྒཎྷཱཏཱིཏི ཉཱཏཔརིཉྙཱ. ཏསྶ ཙ ཨུདཡཝཡཱནུཔསྶཱི ཧོཏཱིཏི ཏཱིརཎཔརིཉྙཱ ཙ ཡོཛེཏབྦཱ. ཀཱམརཱགབྷཱུཏཾ ཨབྷིཛ྄ཛྷཾ སནྡྷཱཡ ‘‘ཨབྷིཛ྄ཛྷཱཀཱཡགནྠ’’ནྟི ཨཱཧ. ཨསུབྷཱནུཔསྶནཱཡ ཧི ཀཱམརཱགཔྤཧཱནཾ ཧོཏཱིཏི. ཀཱམརཱགམུཁེན ཝཱ སབྦལོབྷཔྤཧཱནཾ ཝདཏི. ‘‘ཕསྶཔཙྩཡཱ ཝེདནཱ’’ཏི ཝུཏྟཏྟཱ ཨཱཧཱརཔརིཛཱནནེ ཝུཏྟནཡེན ཕསྶཔརིཛཱནནཉྩ ཡོཛེཏབྦཾ.

སུཁཏྠམེཝ བྷཝཔཏྠནཱ ཧོཏཱིཏི ཝེདནཱཡ ཏཎྷཾ པཛཧནྟོ བྷཝོགྷཾ ཨུཏྟརཏི. སབྦཾ ཝེདནཾ དུཀྑཏོ པསྶནྟོ ཨཏྟནོ པརེན ཨཔུབྦཾ དུཀྑཾ ཨུཔྤཱདིཏཾ, སུཁཾ ¶ ཝཱ ཝིནཱསིཏཾ ན པསྶཏི, ཏཏོ ‘‘ཨནཏྠཾ མེ ཨཙརཱི’’ཏིཨཱདིཨཱགྷཱཏཝཏྠུཔྤཧཱནཏོ བྱཱཔཱདཀཱཡགནྠཾ བྷིནྡཏི. ‘‘སུཁབཧུལེ སུགཏིབྷཝེ སུདྡྷཱི’’ཏི གཧེཏྭཱ གོསཱིལགོཝཏཱདཱིཧི སུདྡྷིཾ པརཱམསནྟོ སུཁཔཏྠནཱཝསེནེཝ པརཱམསཏཱིཏི ཝེདནཱཡ ཏཎྷཾ པཛཧནྟོ སཱིལབྦཏུཔཱདཱནཾ ན ཨུཔཱདིཡཏི. མནོསཉྩེཏནཱ སངྑཱརཀྑནྡྷོཝ, སཉྙཱ པན ཏཾསམྤཡུཏྟཱཏི སཉྙཱསངྑཱརེ ཨནཏྟཏོ པསྶནྟོ མནོསཉྩེཏནཱཡ ཚནྡརཱགཾ པཛཧཏི ཨེཝ, ཏཉྩ པརིགྒཎྷཱཏི ཏཱིརེཏི ཙཱཏི ‘‘སཉྙཾ སངྑཱརེ…པེ… པརིཛཱནཱཏཱི’’ཏི ཝུཏྟཾ.

ཨཝིཛྫཱཡ ཝིཉྙཱཎེ གྷནགྒཧཎཾ ཧོཏཱིཏི གྷནཝིནིབྦྷོགཾ ཀཏྭཱ ཏཾ ཨནིཙྩཏོ པསྶནྟོ ཨཝིཛྫོགྷཾ ཨུཏྟརཏི. མོཧབལེནེཝ སཱིལབྦཏཔརཱམཱསཾ ཧོཏཱིཏི ཏཾ པཛཧནྟོ སཱིལབྦཏཔརཱམཱསཀཱཡགནྠཾ བྷིནྡཏི.

‘‘ཡཉྩ ཁོ ཨེཏཾ, བྷིཀྑཝེ, ཝུཙྩཏི ཙིཏྟཾ ཨིཏིཔི མནོ ཨིཏིཔི ཝིཉྙཱཎཾ ཨིཏིཔི, ཏཏྲཱསྶུཏཝཱ པུཐུཛྫནོ ནཱལཾ ནིབྦིནྡིཏུཾ, ནཱལཾ ཝིརཛྫིཏུཾ, ནཱལཾ ཝིམུཙྩིཏུཾ. ཏཾ ཀིསྶ ཧེཏུ? དཱིགྷརཏྟཾཧེཏཾ, བྷིཀྑཝེ, ཨསྶུཏཝཏོ པུཐུཛྫནསྶ ཨཛ྄ཛྷོསིཏཾ མམཱཡིཏཾ པརཱམཊྛཾ ‘ཨེཏཾ མམ, ཨེསོཧམསྨི, ཨེསོ མེ ཨཏྟཱ’’ཏི (སཾ. ནི. ༢.༦༡) –

ཝཙནཏོ ¶ ཝིཉྙཱཎཾ ནིཙྩཏོ པསྶནྟོ དིཊྛུཔཱདཱནཾ ཨུཔཱདིཡཏཱིཏི ཨནིཙྩཏོ པསྶནྟོ ཏཾ ན ཨུཔཱདིཡཏཱིཏི.

ཀམཱདིཝིནིཙྪཡཀཐཱཝཎྞནཱ ནིཊྛིཏཱ.

སུཏྟནྟབྷཱཛནཱིཡཝཎྞནཱ ནིཊྛིཏཱ.

༢. ཨབྷིདྷམྨབྷཱཛནཱིཡཝཎྞནཱ

༣༤. ཨེཝཾ ཡཱ ཨེཀཝིདྷཱདིནཱ ཝུཏྟཝེདནཱནཾ བྷཱུམིཝསེན ཛཱནིཏབྦཏཱ, ཏཾ ཝཏྭཱ པུན སམྤཡུཏྟཏོ དསྶིཏཏཱདིཛཱནིཏབྦཔྤཀཱརཾ ཝཏྟུམཱཧ ‘‘ཨཔིཙཱ’’ཏིཨཱདི. ཨཊྛཝིདྷེན ཏཏྠཱཏི ཏཏྠ-སདྡསྶ སཏྟཝིདྷབྷེདེནེཝ ཡོཛནཱ ཚབྦིདྷབྷེདེན ཡོཛནཱཡ སཏི ཨཊྛཝིདྷཏྟཱབྷཱཝཏོ.

པཱུརཎཏྠམེཝ ཝུཏྟོཏི དསཝིདྷཏཱཔཱུརཎཏྠམེཝ ཝུཏྟོ, ན ནཝཝིདྷབྷེདེ ཝིཡ ནཡདཱནཏྠཾ. ཀསྨཱ? ཏཏྠ ནཡསྶ དིནྣཏྟཱ. བྷིནྡིཏབྦསྶ ཧི བྷེདནཾ ནཡདཱནཾ, ཏཉྩ ཏཏྠ ཀཏནྟི. ཡཐཱ ཙ ཀུསལཏྟིཀོ, ཨེཝཾ ‘‘ཀཱཡསམྥསྶཛཱ ¶ ཝེདནཱ ཨཏྠི སུཁཱ, ཨཏྠི དུཀྑཱ’’ཏི ཨིདམྤི པཱུརཎཏྠམེཝཱཏི དཱིཔིཏཾ ཧོཏི ཨཊྛཝིདྷབྷེདེ ནཡསྶ དིནྣཏྟཱ.

པུབྦེ གཧིཏཏོ ཨཉྙསྶ གཧཎཾ ཝཌྜྷནཾ གཧཎཝཌྜྷནཝསེན, ན པུརིམགཧིཏེ ཋིཏེ ཨཉྙུཔཙཡཝསེན. ཝཌྜྷན-སདྡོ ཝཱ ཚེདནཏྠོ ཀེསཝཌྜྷནཱདཱིསུ ཝིཡཱཏི པུབྦེ གཧིཏསྶ ཨགྒཧཎཾ ཚིནྡནཾ ཝཌྜྷནཾ, དུཀཏིཀཱནཾ ཨུབྷཡེསཾ ཝཌྜྷནཾ ཨུབྷཡཝཌྜྷནཾ, ཨུབྷཡཏོ ཝཱ པཝཏྟཾ ཝཌྜྷནཾ ཨུབྷཡཝཌྜྷནཾ, ཏདེཝ ཨུབྷཏོཝཌྜྷནཀཾ, ཏེན ནཡནཱིཧརཎཾ ཨུབྷཏོཝཌྜྷནཀནཱིཧཱརོ. ཝཌྜྷནཀནཡོ ཝཱ ཝཌྜྷནཀནཱིཧཱརོ, ཨུབྷཡཏོ པཝཏྟོ ཝཌྜྷནཀནཱིཧཱརོ ཨུབྷཏོཝཌྜྷནཀནཱིཧཱརོ. ཏཏྠ དུཀམཱུལཀཏིཀམཱུལཀཨུབྷཏོཝཌྜྷནཀེསུ དུཝིདྷཏིཝིདྷབྷེདཱནཾཡེཝ ཧི ཝིསེསོ. ཨཉྙེ བྷེདཱ ཨཝིསིཊྛཱ, ཏཐཱཔི པཉྙཱཔྤབྷེདཛནནཏྠཾ དྷམྨཝིཏཀྐེན ཉཱཏིཝིཏཀྐཱདིནིརཏྠཀཝིཏཀྐནིཝཱརཎཏྠཾ ཨིམཉྩ པཱལི༹ཾ ཝིཏཀྐེནྟསྶ དྷམྨུཔསཾཧིཏཔཱམོཛྫཛནནཏྠཾ ཨེཀེཀསྶ ཝཱརསྶ གཧིཏསྶ ནིཡྻཱནམུཁབྷཱཝཏོ ཙ དུཝིདྷཏིཝིདྷབྷེདནཱནཏྟཝསེན ཨིཏརེཔི བྷེདཱ ཝུཏྟཱཏི ཝེདིཏབྦཱ ཨཉྙམཉྙཱཔེཀྑེསུ ¶ ཨེཀསྶ ཝིསེསེན ཨིཏརེསམྤི ཝིསིཊྛབྷཱཝཏོ. ན ཀེཝལཾ ཨེཀཝིདྷོཝ, ཨཐ ཁོ དུཝིདྷོ ཙ. ན ཙ ཨེཀདུཝིདྷོཝ, ཨཐ ཁོ ཏིཝིདྷོཔི. ནཱཔི ཨེཀ…པེ… ནཝཝིདྷོཝ, ཨཐ ཁོ དསཝིདྷོཔཱིཏི ཧི ཨེཝཉྩ ཏེ བྷེདཱ ཨཉྙམཉྙཱཔེཀྑཱ, ཏསྨཱ ཨེཀོ བྷེདོ ཝིསིཊྛོ ཨཏྟནཱ ཨཔེཀྑིཡམཱནེ, ཨཏྟཱནཉྩ ཨཔེཀྑམཱནེ ཨཉྙབྷེདེ ཝིསེསེཏཱིཏི ཏསྶ ཝསེན ཏེཔི ཝཏྟབྦཏཾ ཨརཧནྟཱིཏི ཝུཏྟཱཏི དཊྛབྦཱ.

སཏྟཝིདྷེནཱཏིཨཱདཡོ ཨཉྙཔྤབྷེདནིརཔེཀྑཱ ཀེཝལཾ བཧུཔྤཀཱརཏཱདསྶནཏྠཾ ཝུཏྟཱཏི སབྦེཧི ཏེཧི པཀཱརེཧི ‘‘བཧུཝིདྷེན ཝེདནཱཀྑནྡྷཾ དསྶེསཱི’’ཏི ཝུཏྟཾ. མཧཱཝིསཡོ རཱཛཱ ཝིཡ སཝིསཡེ བྷགཝཱཔི མཧཱཝིསཡཏཱཡ ཨཔྤཊིཧཏོ ཡཐཱ ཡཐཱ ཨིཙྪཏི, ཏཐཱ ཏཐཱ དེསེཏུཾ སཀྐོཏི སབྦཉྙུཏཱནཱཝརཎཉཱཎཡོགཏོཏི ཨཏྠོ. དུཀེ ཝཏྭཱ ཏིཀཱ ཝུཏྟཱཏི ཏིཀཱ དུཀེསུ པཀྑིཏྟཱཏི ཡུཏྟཾ, དུཀཱ པན ཀཐཾ ཏིཀེསུ པཀྑིཏྟཱཏི? པརཏོ ཝུཏྟེཔི ཏསྨིཾ ཏསྨིཾ ཏིཀེ ཨཔེཀྑཀཱཔེཀྑིཏབྦཝསེན དུཀཱནཾ ཡོཛིཏཏྟཱ.

ཀིརིཡམནོདྷཱཏུ ཨཱཝཛྫནཝསེན ལབྦྷཏཱིཏི ཝུཏྟཾ, ཨཱཝཛྫནཱ པན ཙཀྑུསམྥསྶཔཙྩཡཱ ན ཧོཏི. ན ཧི སམཱནཝཱིཐིཡཾ པཙྪིམོ དྷམྨོ པུརིམསྶ ¶ ཀོཙི པཙྩཡོ ཧོཏི. ཡེ ཙ ཝདནྟི ‘‘ཨཱཝཛྫནཝེདནཱཝ ཙཀྑུསངྒྷཊྚནཱཡ ཨུཔྤནྣཏྟཱ ཨེཝཾ ཝུཏྟཱ’’ཏི, ཏཉྩ ན ཡུཏྟཾ. ན ཧི ‘‘ཙཀྑུརཱུཔཔཊིགྷཱཏོ ཙཀྑུསམྥསྶོ’’ཏི ཀཏྠཙི སུཏྟེ ཝཱ ཨཊྛཀཐཱཡཾ ཝཱ ཝུཏྟཾ. ཡདི སོ ཙ ཙཀྑུསམྥསྶོ སིཡཱ, ཙཀྑུཝིཉྙཱཎསཧཛཱཏཱཔི ཝེདནཱ ཙཀྑུསམྥསྶཔཙྩཡཱཏི སཱ ཨིདྷ ཨཊྛཀཐཱཡཾ ན ཝཛྫེཏབྦཱ སིཡཱ. པཱལི༹ཡཉྩ ‘‘ཙཀྑུསམྥསྶཔཙྩཡཱ ཝེདནཱ ཨཏྠི ཨབྱཱཀཏཱ’’ཏི ཨེཏྠ སངྒཧིཏཏྟཱ པུན ‘‘ཙཀྑུསམྥསྶཛཱ ཝེདནཱ’’ཏི ན ཝཏྟབྦཾ སིཡཱཏི. ཨཡཾ པནེཏྠཱདྷིཔྤཱཡོ – ཨཱཝཛྫནཝེདནཾ ཝིནཱ ཙཀྑུསམྥསྶསྶ ཨུཔྤཏྟི ནཏྠཱིཏི ཏདུཔྤཱདིཀཱ སཱ ཏཔྤཡོཛནཏྟཱ པརིཡཱཡེན ཙཀྑུསམྥསྶཔཙྩཡཱཏི ཝཏྟུཾ ཡུཏྟཱཏི, ནིཔྤརིཡཱཡེན པན ཙཀྑུསམྥསྶསྶ པརཏོཝ ཝེདནཱ ལབྦྷནྟི.

ཙཏུཏྟིཾསཙིཏྟུཔྤཱདཝསེནཱཏི ཨེཏྠ རཱུཔཱརཱུཔཱཝཙརཱནཾ ཨགྒཧཎཾ ཏེསཾ སཡམེཝ མནོདྭཱརབྷཱུཏཏྟཱ. སབྦབྷཝངྒམནོ ཧི མནོདྭཱརཾ, ཙུཏིཔཊིསནྡྷིཡོ ཙ ཏཏོ ཨནཉྙཱཏི. ཨིམསྨིཾ པན ཙཏུཝཱིསཏིཝིདྷབྷེདེ ཙཀྑུསམྥསྶཔཙྩཡཱདིཀུསལཱདཱིནཾ སམཱནཝཱིཐིཡཾ ལབྦྷམཱནཏཱ ཨཊྛཀཐཱཡཾ ཝུཏྟཱ, པཱལི༹ཡཾ པན ཨེཀཱུནཝཱིསཏིཙཏུཝཱིསཏིཀཱ སངྑིཔིཏྭཱ ཨཱགཏཱཏི ‘‘ཙཀྑུསམྥསྶཔཙྩཡཱ ¶ ཝེདནཱཀྑནྡྷོ ཨཏྠི ཨནུཔཱདིནྣཨནུཔཱདཱནིཡོ ཨསཾཀིལིཊྛཨསཾཀིལེསིཀོ ཨཝིཏཀྐཨཝིཙཱརོ’’ཏིཨཱདིནཱ ནཱནཱཝཱིཐིགཏཱནཾ ལབྦྷམཱནཏཱཡ ཝུཏྟཏྟཱ ཀུསལཏྟིཀསྶཔི ནཱནཱཝཱིཐིཡཾ ལབྦྷམཱནཏཱ ཡོཛེཏབྦཱ. ཨཊྛཀཐཱཡཾ པན སམཱནཝཱིཐིཡཾ ཙཀྑུསམྥསྶཔཙྩཡཱདིཀཏཱ ཨེཀནྟིཀཱཏི ཀཏྭཱ ཨེཏྠ ལབྦྷམཱནཏཱ དསྶིཏཱ, ན པན ཨསམཱནཝཱིཐིཡཾ ལབྦྷམཱནཏཱ པཊིཀྑིཏྟཱ. ཏེནེཝ ‘‘ཏཱནི སཏྟཝིདྷཱདཱིསུ ཡཏྠ ཀཏྠཙི ཋཏྭཱ ཀཐེཏུཾ ཝཊྚནྟཱི’’ཏི ཨཱཧ. ན ཧི སམཱནཝཱིཐིཡཾཡེཝ ཨུཔནིསྶཡཀོཊིསམཏིཀྐམབྷཱཝནཱཧི ལབྦྷམཱནཏཱ ཧོཏི. ཏིདྷཱཔི ཙ ལབྦྷམཱནཏཾ སནྡྷཱཡ ‘‘ཡཏྠ ཀཏྠཙི ཋཏྭཱ ཀཐེཏུཾ ཝཊྚནྟཱི’’ཏི ཝུཙྩཏི.

ཨེཏཱནཱིཏི ཡཐཱདསྶིཏཱནི ཀུསལཱདཱིནི ཙིཏྟཱནི ཝདཏི, ཝེདནཱནིདྡེསེཔི ཙ ཨེཏསྨིཾ པུབྦངྒམསྶ ཙིཏྟསྶ ཝསེན ཀཐེཏུཾ སུཁནྟི ཙིཏྟསམྦནྡྷོ ཀཏོ. ཏེནེཝ པན ཙིཏྟཱནི སཏྟཝིདྷབྷེདེ ཏིཀབྷཱུམིཝསེན, ཙཏུཝཱིསཏིཝིདྷབྷེདེ དྭཱརཏིཀཝསེན, ཏིཾསཝིདྷབྷེདེ དྭཱརབྷཱུམིཝསེན, བཧུཝིདྷབྷེདེ དྭཱརཏིཀབྷཱུམིཝསེན དཱིཔིཏཱནཱིཏི ‘‘ཏེསུ ཡཏྠ ¶ ཀཏྠཙི ཋཏྭཱ ཀཐེཏུཾ ཝཊྚནྟཱི’’ཏི ཝུཏྟཾ. ཀུསལཱདཱིནཾ དཱིཔནཱ ཀཱམཱཝཙརཱདིབྷཱུམིཝསེན ཀཱཏབྦཱ, ཏཱ ཙ བྷཱུམིཡོ ཏིཾསཝིདྷབྷེདེ སཡམེཝཱགཏཱ, ན ཙ སཏྟཝིདྷབྷེདེ ཝིཡ དྭཱརཾ ཨནཱམཊྛཾ, ཨཏིབྱཏྟཱ ཙ ཨེཏྠ སམཱནཱསམཱནཝཱིཐཱིསུ ལབྦྷམཱནཏཱཏི ཏིཾསཝིདྷེ…པེ… སུཁདཱིཔནཱནི ཧོནྟཱི’’ཏི ཝུཏྟཾ. ཀསྨཱ པན ཏིཾསཝིདྷསྨིཾཡེཝ ཋཏྭཱ དཱིཔཡིཾསུ, ནནུ དྭཱརཏིཀབྷཱུམཱིནཾ ཨཱམཊྛཏྟཱ བཧུཝིདྷབྷེདེ ཋཏྭཱ དཱིཔེཏབྦཱནཱིཏི? ན, དཱིཔེཏབྦཊྛཱནཱཏིཀྐམཏོ. སཏྟཝིདྷབྷེདོ ཧི དྭཱརསྶ ཨནཱམཊྛཏྟཱ དཱིཔནཱཡ ཨཊྛཱནཾ, ཙཏུཝཱིསཏིཝིདྷབྷེདེ ཨཱམཊྛདྭཱརཏིཀཱ ན བྷཱུམིཡོ ཨཔེཀྑིཏྭཱ ཋཔིཏཱ, ཏིཾསཝིདྷབྷེདེ ཨཱམཊྛདྭཱརབྷཱུམིཡོ ཝུཏྟཱ. ཡེ ཙ ཋཔིཏཱ, ཏེ ཙེཏྠ ཏིཀཱ ཨཔེཀྑིཏབྦརཧིཏཱ ཀེཝལཾ བྷཱུམཱིཧི སཧ དཱིཔེཏབྦཱཝ. ཏེནེདཾ དཱིཔནཱཡ ཋཱནཾ, ཏདཏིཀྐམེ པན ཋཱནཱཏིཀྐམོ ཧོཏཱིཏི.

ཨུཔནིསྶཡཀོཊིཡཱཏི ཨེཏྠ ‘‘སདྡྷཾ ཨུཔནིསྶཱཡ དཱནཾ དེཏཱི’’ཏིཨཱདིནཱ (པཊྛཱ. ༡.༡.༤༢༣) ནཱནཱཝཱིཐིཡཾ པཀཏཱུཔནིསྶཡོ ཝུཏྟོཏི ཨེཀཝཱིཐིཡཾ ཀུསལཱདཱིནཾ ཙཀྑུསམྥསྶཱདཡོ ཏདབྷཱཝེ ཨབྷཱཝཏོ ཛཱཏི ཝིཡ ཛརཱམརཎསྶ ཨུཔནིསྶཡལེསེན པཙྩཡོཏི ཝཏྟུཾ ཡུཛྫེཡྻ, ཨིདྷ པན ‘‘ཀསིཎརཱུཔདསྶནཧེཏུཨུཔྤནྣཱ པརིཀམྨཱདིཝེདནཱ ཙཀྑུསམྥསྶཔཙྩཡཱ’’ཏི ཝཀྑཏི, ཏསྨཱ ནཱནཱཝཱིཐིཡཾ གཏཱནི ཨེཏཱནི ཙིཏྟཱནི ཙཀྑུསམྥསྶཔཙྩཡཱ ལབྦྷམཱནཱནཱིཏི ན ཨུཔནིསྶཡལེསོ ཨུཔནིསྶཡཀོཊི, བལཝབལཝཱནཾ པན པརིཀམྨཱདཱིནཾ ཨུཔནིསྶཡཱནཾ སབྦེསཾ ཨཱདིབྷཱུཏོ ¶ ཨུཔནིསྶཡོ ཨུཔནིསྶཡཀོཊི. ‘‘ཝཱལཀོཊི ན པཉྙཱཡཏཱི’’ཏིཨཱདཱིསུ ཝིཡ ཧི ཨཱདི, ཨཝཡཝོ ཝཱ ཀོཊི. ཀསིཎརཱུཔདསྶནཏོ པབྷུཏི ཙ ཀཱམཱཝཙརཀུསལཱདཱིནཾ ཝེདནཱནཾ ཨུཔནིསྶཡོ པཝཏྟོཏི ཏཾ དསྶནཾ ཨུཔནིསྶཡཀོཊི. པརིཀམྨཱདཱིནི ཝིཡ ཝཱ ན བལཝཨུཔནིསྶཡོ དསྶནནྟི ཏསྶ ཨུཔནིསྶཡནྟབྷཱཝེན ཨུཔནིསྶཡཀོཊིཏཱ ཝུཏྟཱ. གྷཱནཱདིདྭཱརེསུ ཏཱིསུ ཨུཔནིསྶཡཀོཊིཡཱ ལབྦྷམཱནཏྟཱབྷཱཝཾ ཝདནྟོ ཨིདྷ སམཱནཝཱིཐི ན གཧིཏཱཏི དཱིཔེཏི. དསྶནསཝནཱནི ཝིཡ ཧི ཀསིཎཔརིཀམྨཱདཱིནཾ གྷཱཡནཱདཱིནི ཨུཔནིསྶཡཱ ན ཧོནྟཱིཏི ཏདལཱབྷོ དཱིཔིཏོཏི. ཡདིཔི ཝཱཡོཀསིཎཾ ཕུསིཏྭཱཔི གཧེཏབྦཾ, པུརིམེན པན སཝནེན ཝིནཱ ཏཾ ཕུསནཾ སཡམེཝ མཱུལུཔནིསྶཡོ ཡེབྷུཡྻེན ན ཧོཏཱིཏི ཏསྶ ཨུཔནིསྶཡཀོཊིཏཱ ན ཝུཏྟཱ.

ཨཛ྄ཛྷཱསཡེན ¶ སམྤཏྟིགཏོ ཨཛ྄ཛྷཱསཡསམྤནྣོ, སམྤནྣཛ྄ཛྷཱསཡོཏི ཝུཏྟཾ ཧོཏི. ཝཏྟཔྤཊིཝཏྟནྟི ཁུདྡཀཉྩེཝ མཧནྟཉྩ ཝཏྟཾ, པུབྦེ ཝཱ ཀཏཾ ཝཏྟཾ, པཙྪཱ ཀཏཾ པཊིཝཏྟཾ. ཨེཝཾ ཙཀྑུཝིཉྙཱཎནྟི ཨཱདིམྷི ཨུཔྤནྣཾ ཨཱཧ, ཏཏོ པརཾ ཨུཔྤནྣཱནིཔི པན ཀསིཎརཱུཔདསྶནཀལྱཱཎམིཏྟདསྶནསཾཝེགཝཏྠུདསྶནཱདཱིནི ཨུཔནིསྶཡཔཙྩཡཱ ཧོནྟིཡེཝཱཏི. ཏེན ཏདུཔནིསྶཡཾ ཙཀྑུཝིཉྙཱཎཾ དསྶེཏཱིཏི ཝེདིཏབྦཾ.

ཡཐཱབྷཱུཏསབྷཱཝཱདསྶནཾ ཨསམཔེཀྑནཱ. ‘‘ཨསྨཱི’’ཏི རཱུཔཱདཱིསུ ཝིནིབནྡྷསྶ. སབྷཱཝནྟརཱམསནཝསེན པརཱམཊྛསྶ, པརཱམཊྛཝཏོཏི ཨཏྠོ. ཨཱརམྨཎཱདྷིགཧཎཝསེན ཨནུ ཨནུ ཨུཔྤཛྫནདྷམྨཏཱཡ ཐིརབྷཱཝཀིལེསསྶ ཐཱམགཏསྶ, ཨཔྤཧཱིནཀཱམརཱགཱདིཀསྶ ཝཱ. པརིགྒཧེ ཋིཏོཏི ཝཱིམཾསཱཡ ཋིཏོ. ཨེཏྠ ཙ ཨསམཔེཀྑནཱཡཱཏིཨཱདིནཱ མོཧཱདཱིནཾ ཀིཙྩེན པཱཀཊེན ཏེསཾ ཨུཔྤཏྟིཝསེན ཝིཙཱརཎཱ དཊྛབྦཱ. རཱུཔདསྶནེན ཨུཔྤནྣཀིལེསསམཏིཀྐམཝསེན པཝཏྟཱ རཱུཔདསྶནཧེཏུཀཱ ཧོཏཱིཏི ‘‘ཙཀྑུསམྥསྶཔཙྩཡཱ ནཱམ ཛཱཏཱ’’ཏི ཨཱཧ. ཨེཏྠ ཙ ཙཀྑུསམྥསྶསྶ ཙཏུབྷཱུམིཀཝེདནཱཡ ཨུཔནིསྶཡབྷཱཝོ ཨེཝ པཀཱརནྟརེན ཀཐིཏོ, ཏཐཱ ‘‘བྷཱཝནཱཝསེནཱ’’ཏི ཨེཏྠ ཙ.

ཀལཱཔསམྨསནེན ཏཱིཎི ལཀྑཎཱནི ཨཱརོཔེཏྭཱ ཨུདཡབྦཡཱནུཔསྶནཱདིཀཱཡ ཝིཔསྶནཱཔཊིཔཱཊིཡཱ ཨཱདིམྷི རཱུཔཱརམྨཎཔརིགྒཧེན རཱུཔཱརམྨཎཾ སམྨསིཏྭཱ, ཏཾམཱུལཀཾ ཝཱ སབྦཾ སམྨསནཾ ཨཱདིབྷཱུཏེ རཱུཔཱརམྨཎེ པཝཏྟཏཱིཏི ཀཏྭཱ ཨཱཧ ‘‘རཱུཔཱརམྨཎཾ སམྨསིཏྭཱ’’ཏི. ཨེཏྠ ཙ ¶ ནཱམརཱུཔཔརིགྒཧཱདི སབྦཾ སམྨསནཾ བྷཱཝནཱཏི ཝེདིཏབྦཱ. རཱུཔཱརམྨཎཾ སམྨསིཏྭཱཏི ཙ ཡཐཱཝུཏྟཙཀྑུཝིཉྙཱཎསྶ ཨཱརམྨཎབྷཱུཏཾ རཱུཔཱརམྨཎཾ ཝུཏྟཾ, ན ཡཾ ཀིཉྩི. ཨཱརམྨཎེན ཧི ཙཀྑུསམྥསྶཾ དསྶེཏཱིཏི. ཨེཝཾ ‘‘རཱུཔཱརམྨཎེ ཨུཔྤནྣཾ ཀིལེས’’ནྟི ཨེཏྠཱཔི ཝེདིཏབྦཾ.

ཨིདཾ ཕོཊྛབྦཾ ཀིཾནིསྶིཏནྟི ཙཀྑུདྭཱརེ ཝིཡ ཡོཛནཱཡ ཡཐཱསམྦྷཝཾ ཨཱཔོདྷཱཏུཡཱ ཨཉྙམཉྙསྶ ཙ ཝསེན མཧཱབྷཱུཏནིསྶིཏཏཱ ཡོཛེཏབྦཱ.

ཛཱཏི…པེ… བལཝཔཙྩཡོ ཧོཏཱིཏི ཡཐཱཝུཏྟཱནཾ བྷཡཏོ དིསྶམཱནཱནཾ ཛཱཏིཨཱདཱིནཾ བལཝཔཙྩཡབྷཱཝེན ཏེསཾ བྷཡཏོ དསྶནེན སཧཛཱཏསྶ མནོསམྥསྶསྶ, ཏསྶ ཝཱ དསྶནསྶ དྭཱརབྷཱུཏསྶ བྷཝངྒམནོསམྥསྶསྶ བལཝཔཙྩཡབྷཱཝཾ དསྶེཏི.

དྷམྨཱརམྨཎེཏི ¶ ན པུབྦེ ཝུཏྟེ ཛཱཏིཨཱདིཨཱརམྨཎེཝ, ཨཐ ཁོ སབྦསྨིཾ རཱགཱདིཝཏྠུབྷཱུཏེ དྷམྨཱརམྨཎེ. ཝཏྠུནིསྶིཏནྟི ཨེཏྠ ཝེདནཱདིསངྑཱཏསྶ དྷམྨཱརམྨཎེཀདེསསྶ པརིགྒཧམུཁེན དྷམྨཱརམྨཎཔརིགྒཧཾ དསྶེཏི.

མནོསམྥསྶོཏི ཝིཉྙཱཎཾ སམྥསྶསྶ ཀཱརཎབྷཱཝེན གཧིཏཾ, ཏདེཝ ཨཏྟནོ ཕལསྶེཝ ཕལབྷཱཝེན ཝཏྟུཾ ན ཡུཏྟཾ ཀཱརཎཕལསངྐརབྷཱཝེན སོཏཱུནཾ སམྨོཧཛནཀཏྟཱཏི ཨཱཧ ‘‘ན ཧི སཀྐཱ ཝིཉྙཱཎཾ མནོསམྥསྶཛནྟི ནིདྡིསིཏུ’’ནྟི, ན པན ཝིཉྙཱཎསྶ མནོསམྥསྶེན སཧཛཱཏབྷཱཝསྶ ཨབྷཱཝཱ. ཡསྨཱ ཝཱ ཡཐཱ ‘‘ཏིཎྞཾ སངྒཏི ཕསྶོ’’ཏི (མ. ནི. ༡.༢༠༤; ༣.༤༢༠, ༤༢༥-༤༢༦; སཾ. ནི. ༤.༦༠) ཝཙནཏོ ཨིནྡྲིཡཝིསཡཱ ཝིཡ ཝིཉྙཱཎམྤི ཕསྶསྶ ཝིསེསཔཙྩཡོ, ན ཏཐཱ ཕསྶོ ཝིཉྙཱཎསྶ, ཏསྨཱ ཨིནྡྲིཡཝིསཡཱ ཝིཡ ཝིཉྙཱཎམྤི ཙཀྑུསམྥསྶཛཱདིཝཙནཾ ན ཨརཧཏཱིཏི ཙཀྑུསམྥསྶཛཱདིབྷཱཝོ ན ཀཏོཏི ཝེདིཏབྦོ.

ཨབྷིདྷམྨབྷཱཛནཱིཡཝཎྞནཱ ནིཊྛིཏཱ.

༣. པཉྷཔུཙྪཀཝཎྞནཱ

༡༥༠. ཙིཏྟུཔྤཱདརཱུཔཝསེན ¶ ཏཾ ཏཾ སམུདཱཡཾ ཨེཀེཀཾ དྷམྨཾ ཀཏྭཱ ‘‘པཉྩཔཎྞཱས ཀཱམཱཝཙརདྷམྨེ’’ཏི ཨཱཧ. རཛྫནྟསྶཱཏིཨཱདཱིསུ རཱགཱདཡོ ཚསུ དྭཱརེསུ སཱིལཱདཡོ ཙ པཉྩ སཾཝརཱ ཡཐཱསམྦྷཝཾ ཡོཛེཏབྦཱ, སམྨསནཾ པན མནོདྭཱརེ ཨེཝ. རཱུཔཱརཱུཔཱཝཙརདྷམྨེསུ ཨབྷིཛ྄ཛྷཱདོམནསྶཱདིཨུཔྤཏྟི ཨཏྠཱིཏི ཏཏོ སཏིསཾཝརོ ཉཱཎཝཱིརིཡསཾཝརཱ ཙ ཡཐཱཡོགཾ ཡོཛེཏབྦཱ. པརིགྒཧཝཙནེན སམྨསནཔཙྩཝེཀྑཎཱནི སངྒཎྷཱཏི. ཏེཡེཝཱཏི ཙཏྟཱརོ ཁནྡྷཱ ཝུཏྟཱ.

སམཱནེ དེསིཏབྦེ དེསནཱམཏྟསྶ པརིཝཊྚནཾ པརིཝཊྚོ. ཏཱིསུཔི པརིཝཊྚེསུ ཀཏྠཙི ཀིཉྩི ཨཱུནཾ ཨདྷིཀཾ ཝཱ ནཏྠཱིཏི ཀཏྭཱ ཨཱཧ ‘‘ཨེཀོཝ པརིཙྪེདོ’’ཏི.

པཉྷཔུཙྪཀཝཎྞནཱ ནིཊྛིཏཱ.

ཁནྡྷཝིབྷངྒཝཎྞནཱ ནིཊྛིཏཱ.

༢. ཨཱཡཏནཝིབྷངྒོ

༡. སུཏྟནྟབྷཱཛནཱིཡཝཎྞནཱ

༡༥༢. ཝིསེསཏོཏི ¶ ¶ ཨཱཡཏན-སདྡཏྠོ ཝིཡ ཨསཱདྷཱརཎཏོ ཙཀྑཱདིསདྡཏྠཏོཏི ཨཏྠོ. ཨསྶཱདེཏཱིཏི ཙཀྑཏི-སདྡོ ‘‘མདྷུཾ ཙཀྑཏི བྱཉྫནཾ ཙཀྑཏཱི’’ཏི རསསཱཡནཏྠོ ཨཏྠཱིཏི ཏསྶ ཝསེན ཨཏྠཾ ཝདཏི. ‘‘ཙཀྑུཾ ཁོ, མཱགཎྜིཡ, རཱུཔཱརཱམཾ རཱུཔརཏཾ རཱུཔསམྨུདིཏ’’ནྟི (མ. ནི. ༢.༢༠༩) ཝཙནཏོ ཙཀྑུ རཱུཔཾ ཨསྶཱདེཏི. སཏིཔི སོཏཱདཱིནཾ སདྡཱརམྨཎཱདིརཏིབྷཱཝེ ནིརུལ༹ྷཏྟཱ ཙཀྑུམྷིཡེཝ ཙཀྑུ-སདྡོ པཝཏྟཏི པདུམཱདཱིསུ པངྐཛཱདིསདྡཱ ཝིཡཱཏི དཊྛབྦཾ. ཝིབྷཱཝེཏི ཙཱཏི སདྡལཀྑཎསིདྡྷསྶ ཙཀྑཏི-སདྡསྶ ཝསེན ཨཏྠཾ ཝདཏི. ཙཀྑཏཱིཏི ཧི ཨཱཙིཀྑཏི, ཨབྷིབྱཏྟཾ ཝདཏཱིཏི ཨཏྠོ. ནཡནསྶ ཙ ཝདནྟསྶ ཝིཡ སམཝིསམཝིབྷཱཝནམེཝ ཨཱཙིཀྑནནྟི ཀཏྭཱ ཨཱཧ ‘‘ཝིབྷཱཝེཏི ཙཱཏི ཨཏྠོ’’ཏི. ཨནེཀཏྠཏྟཱ ཝཱ དྷཱཏཱུནཾ ཝིབྷཱཝནཏྠཏཱ ཙཀྑུ-སདྡསྶ དཊྛབྦཱ. རཏྟདུཊྛཱདིཀཱལེསུ ཀཀཎྚཀརཱུཔཾ ཝིཡ ཨུདྡརཱུཔཾ ཝིཡ ཙ ཝཎྞཝིཀཱརཾ ཨཱཔཛྫམཱནཾ རཱུཔཾ ཧདཡངྒཏབྷཱཝཾ རཱུཔཡཏི རཱུཔམིཝ པཀཱསཾ ཀརོཏི, སཝིགྒཧམིཝ ཀཏྭཱ དསྶེཏཱིཏི ཨཏྠོ. ཝིཏྠཱརཎཾ ཝཱ རཱུཔ-སདྡསྶ ཨཏྠོ, ཝིཏྠཱརཎཉྩ པཀཱསནམེཝཱཏི ཨཱཧ ‘‘པཀཱསེཏཱི’’ཏི. ཨནེཀཏྠཏྟཱ ཝཱ དྷཱཏཱུནཾ པཀཱསནཏྠོཡེཝ རཱུཔ-སདྡོ དཊྛབྦོ, ཝཎྞཝཱཙཀསྶ རཱུཔ-སདྡསྶ རཱུཔཡཏཱིཏི ནིབྦཙནཾ, རཱུཔཝཱཙཀསྶ རུཔྤཏཱིཏི ཨཡཾ ཝིསེསོ.

ཨུདཱཧརཱིཡཏཱིཏི ཝུཙྩཏཱིཏི-ཨཏྠེ ཝཙནམེཝ གཧིཏཾ སིཡཱ, ན ཙ ཝཙན-སདྡོཡེཝ ཨེཏྠ སདྡོ, ཨཐ ཁོ སབྦོཔི སོཏཝིཉྙེཡྻོཏི སཔྤཏཱིཏི སཀེཧི པཙྩཡེཧི སཔྤཱིཡཏི སོཏཝིཉྙེཡྻབྷཱཝཾ གམཱིཡཏཱིཏི ཨཏྠོ. སཱུཙཡཏཱིཏི ཨཏྟནོ ཝཏྠུཾ གནྡྷཝསེན ཨཔཱཀཊཾ ‘‘ཨིདཾ སུགནྡྷཾ ¶ དུགྒནྡྷ’’ནྟི པཀཱསེཏི, པཊིཙྪནྣཾ ཝཱ པུཔྥཱདིཝཏྠུཾ ‘‘ཨེཏྠ པུཔྥཾ ཨཏྠི ཙམྤཀཱདི, ཕལམཏྠི ཨམྦཱདཱི’’ཏི པེསུཉྙཾ ཀརོནྟཾ ཝིཡ ཧོཏཱིཏི ཨཏྠོ. རསགྒཧཎམཱུལཀཏྟཱ ཨཱཧཱརཛ྄ཛྷོཧརཎསྶ ཛཱིཝིཏཧེཏུམྷི ཨཱཧཱརརསེ ནིནྣཏཱཡ ཛཱིཝིཏཾ ཨཝ྄ཧཱཡཏཱིཏི ཛིཝ྄ཧཱ ཝུཏྟཱ ནིརུཏྟིལཀྑཎེན. ཀུཙྪིཏཱནཾ སཱསཝདྷམྨཱནཾ ཨཱཡོཏི ཝིསེསེན ཀཱཡོ ཝུཏྟོ ཨནུཏྟརིཡཧེཏུབྷཱཝཾ ཨནཱགཙྪནྟེསུ ཀཱམརཱགནིདཱནཀམྨཛནིཏེསུ ཀཱམརཱགསྶ ཙ ཝིསེསཔཙྩཡེསུ ¶ གྷཱནཛིཝ྄ཧཱཀཱཡེསུ ཀཱཡསྶ ཝིསེསཏརསཱསཝཔཙྩཡཏྟཱ. ཏེན ཧི ཕོཊྛབྦཾ ཨསྶཱདེནྟཱ སཏྟཱ མེཐུནམྤི སེཝནྟི. ཨུཔྤཏྟིདེསོཏི ཨུཔྤཏྟིཀཱརཎནྟི ཨཏྠོ. ཀཱཡིནྡྲིཡཝཏྠུཀཱ ཝཱ ཙཏྟཱརོ ཁནྡྷཱ བལཝཀཱམཱསཝཱདིཧེཏུབྷཱཝཏོ ཝིསེསེན ‘‘སཱསཝཱ’’ཏི ཝུཏྟཱ, ཏེསཾ ཨུཔྤཛྫནཊྛཱནནྟི ཨཏྠོ. ཨཏྟནོ ལཀྑཎཾ དྷཱརཡནྟཱིཏི ཡེ ཝིསེསལཀྑཎེན ཨཱཡཏནསདྡཔརཱ ཝཏྟབྦཱ, ཏེ ཙཀྑཱདཡོ ཏཐཱ ཝུཏྟཱཏི ཨཉྙེ མནོགོཙརབྷཱུཏཱ དྷམྨཱ སཱམཉྙལཀྑཎེནེཝ ཨེཀཱཡཏནཏྟཾ ཨུཔནེཏྭཱ ཝུཏྟཱ. ཨོལཱ༹རིཀཝཏྠཱརམྨཎམནནསངྑཱཏེཧི ཝིསཡཝིསཡིབྷཱཝེཧི པུརིམཱནི པཱཀཊཱནཱིཏི ཏཐཱ ཨཔཱཀཊཱ ཙ ཨཉྙེ མནོགོཙརཱ ན ཨཏྟནོ སབྷཱཝཾ ན དྷཱརེནྟཱིཏི ཨིམསྶཏྠསྶ དཱིཔནཏྠོ དྷམྨ-སདྡོཏི.

ཝཱཡམནྟཱིཏི ཨཏྟནོ ཀིཙྩཾ ཀརོནྟིཙྩེཝ ཨཏྠོ. ཨིམསྨིཉྩ ཨཏྠེ ཨཱཡཏནྟི ཨེཏྠཱཏི ཨཱཡཏནནྟི ཨདྷིཀརཎཏྠོ ཨཱཡཏན-སདྡོ, དུཏིཡཏཏིཡེསུ ཀཏྟུཨཏྠོ. ཏེ ཙཱཏི ཙིཏྟཙེཏསིཀདྷམྨེ. ཏེ ཧི ཏཾཏཾདྭཱརཱརམྨཎེསུ ཨཱཡནྟི ཨཱགཙྪནྟི པཝཏྟནྟཱིཏི ཨཱཡཱཏི. ཝིཏྠཱརེནྟཱིཏི པུབྦེ ཨནུཔྤནྣཏྟཱ ལཱིནཱནི ཨཔཱཀཊཱནི པུབྦནྟཏོ ཨུདྡྷཾ པསཱརེནྟི པཱཀཊཱནི ཀརོནྟི ཨུཔྤཱདེནྟཱིཏི ཨཏྠོ.

རུལ༹ྷཱིཝསེན ཨཱཡཏན-སདྡསྶཏྠཾ ཝཏྟུཾ ‘‘ཨཔིཙཱ’’ཏིཨཱདི ཨཱརདྡྷཾ. ཏཾ ནིསྶིཏཏྟཱཏི ཨེཏྠ མནོ མནོཝིཉྙཱཎཱདཱིནཾ ཙིཏྟཙེཏསིཀཱནཾ ནིསྶཡཔཙྩཡོ ན ཧོཏཱིཏི ཏསྶ ནེསཾ དྭཱརབྷཱཝོ ནིསྶཡབྷཱཝོཏི དཊྛབྦོ. ཨཏྠཏོཏི ཝཙནཏྠཏོ, ན ཝཙནཱིཡཏྠཏོ. ཝཙནཏྠོ ཧེཏྠ ཝུཏྟོ ‘‘ཙཀྑཏཱི’’ཏིཨཱདིནཱ, ན ཝཙནཱིཡཏྠོ ‘‘ཡཾ ཙཀྑུ ཙཏུནྣཾ མཧཱབྷཱུཏཱནཾ ཨུཔཱདཱཡ པསཱདོ’’ཏིཨཱདིནཱ (དྷ. ས. ༥༩༧) ཝིཡཱཏི.

ཏཱཝཏྭཏོཏི ཨནཱུནཱདྷིཀབྷཱཝཾ དསྶེཏི. ཏཏྠ དྭཱདསཱཡཏནཝིནིམུཏྟསྶ ཀསྶཙི དྷམྨསྶ ཨབྷཱཝཱ ཨདྷིཀབྷཱཝཏོ ཙོདནཱ ནཏྠི, སལཀྑཎདྷཱརཎཾ པན སབྦེསཾ སཱམཉྙལཀྑཎནྟི ཨཱུནཙོདནཱ ¶ སམྦྷཝཏཱིཏི དསྶེནྟོ ཨཱཧ ‘‘ཙཀྑཱདཡོཔི ཧཱི’’ཏིཨཱདི. ཨསཱདྷཱརཎནྟི ཙཀྑུཝིཉྙཱཎཱདཱིནཾ ཨསཱདྷཱརཎཾ. སཏིཔི ཨསཱདྷཱརཎཱརམྨཎབྷཱཝེ ཙཀྑཱདཱིནཾ དྭཱརབྷཱཝེན གཧིཏཏྟཱ དྷམྨཱཡཏནེ ཨགྒཧཎཾ དཊྛབྦཾ. དྭཱརཱརམྨཎབྷཱཝེཧི ཝཱ ཨསཱདྷཱརཎཏཾ སནྡྷཱཡ ‘‘ཨསཱདྷཱརཎ’’ནྟི ཝུཏྟཾ.

ཡེབྷུཡྻསཧུཔྤཏྟིཨཱདཱིཧི ¶ ཨུཔྤཏྟིཀྐམཱདིཨཡུཏྟི ཡོཛེཏབྦཱ. ཨཛ྄ཛྷཏྟིཀེསུ ཧཱིཏི ཨེཏེན ཨཛ྄ཛྷཏྟིཀབྷཱཝེན ཝིསཡིབྷཱཝེན ཙ ཨཛ྄ཛྷཏྟིཀཱནཾ པཋམཾ དེསེཏབྦཏཾ དསྶེཏི. ཏེསུ ཧི པཋམཾ དེསེཏབྦེསུ པཱཀཊཏྟཱ པཋམཏརཾ ཙཀྑཱཡཏནཾ དེསིཏནྟི. ཏཏོ གྷཱནཱཡཏནཱདཱིནཱིཏི ཨེཏྠ བཧཱུཔཀཱརཏྟཱབྷཱཝེན ཙཀྑུསོཏེཧི པུརིམཏརཾ ཨདེསེཏབྦཱནི སཧ ཝཏྟུཾ ཨསཀྐུཎེཡྻཏྟཱ ཨེཀེན ཀམེན དེསེཏབྦཱནཱིཏི གྷཱནཱདིཀྐམེན དེསིཏཱནཱིཏི ཨདྷིཔྤཱཡོ. ཨཉྙཐཱཔི ཧི དེསིཏེསུ ན ན སཀྐཱ ཙོདེཏུཾ, ན ཙ སཀྐཱ སོདྷེཏབྦཱནི ན དེསེཏུནྟི. གོཙརོ ཝིསཡོ ཨེཏསྶཱཏི གོཙརཝིསཡོ, མནོ. ཀསྶ པན གོཙརོ ཨེཏསྶ ཝིསཡོཏི? ཙཀྑཱདཱིནཾ པཉྩནྣམྤི. ཝིཉྙཱཎུཔྤཏྟིཀཱརཎཝཝཏྠཱནཏོཏི ཨེཏེན ཙ ཙཀྑཱདིཨནནྟརཾ རཱུཔཱདིཝཙནསྶ ཀཱརཎམཱཧ.

པཙྩཡབྷེདོ ཀམྨཱདིབྷེདོ. ནིརཡཱདིཀོ ཨཔདཱདིགཏིནཱནཱཀརཎཉྩ གཏིབྷེདོ. ཧཏྠིཨསྶཱདིཀོ ཁཏྟིཡཱདིཀོ ཙ ནིཀཱཡབྷེདོ. ཏཾཏཾསཏྟསནྟཱནབྷེདོ པུགྒལབྷེདོ. ཡཱ ཙ ཙཀྑཱདཱིནཾ ཝཏྠཱུནཾ ཨནནྟབྷེདཏཱ ཝུཏྟཱ, སོཡེཝ ཧདཡཝཏྠུསྶ ཙ བྷེདོ ཧོཏི. ཏཏོ མནཱཡཏནསྶ ཨནནྟཔྤབྷེདཏཱ ཡོཛེཏབྦཱ དུཀྑཱཔཊིཔདཱདིཏོ ཨཱརམྨཎཱདྷིཔཏིཨཱདིབྷེདཏོ ཙ. ཨིམསྨིཾ སུཏྟནྟབྷཱཛནཱིཡེ ཝིཔསྶནཱ ཝུཏྟཱཏི ཝིཔསྶནུཔགམནཉྩ ཝིཉྙཱཎཾ གཧེཏྭཱ ཨེཀཱསཱིཏིབྷེདཏཱ མནཱཡཏནསྶ ཝུཏྟཱ ནིདྡེསཝསེན. ནཱིལཾ ནཱིལསྶེཝ སབྷཱགཾ, ཨཉྙཾ ཝིསབྷཱགཾ, ཨེཝཾ ཀུསལསམུཊྛཱནཱདིབྷེདེསུ ཡོཛེཏབྦཾ. ཏེབྷཱུམཀདྷམྨཱརམྨཎཝསེནཱཏི པུབྦེ ཝུཏྟཾ ཙཀྑཱདིཝཛྫཾ དྷམྨཱརམྨཎཾ སནྡྷཱཡ ཝུཏྟཾ.

སཔརིཔྥནྡཀིརིཡཱཝསེན ཨཱིཧནཾ ཨཱིཧཱ. ཙིནྟནཝསེན བྱཱཔཱརཀརཎཾ བྱཱཔཱརོ. ཏཏྠ བྱཱཔཱརཾ དསྶེནྟོ ཨཱཧ ‘‘ན ཧི ཙཀྑུ རཱུཔཱདཱིནཾ ཨེཝཾ ཧོཏཱི’’ཏི. ཨཱིཧཾ དསྶེནྟོ ཨཱཧ ‘‘ན ཙ ཏཱནཱི’’ཏིཨཱདི. ཨུབྷཡམྤི པན ཨཱིཧཱ ཙ ཧོཏི བྱཱཔཱརོ ཙཱཏི ཨུཔྤཊིཔཱཊིཝཙནཾ. དྷམྨཏཱཝཱཏི སབྷཱཝོཝ, ཀཱརཎསམཏྠཏཱ ཝཱ. ཨཱིཧཱབྱཱཔཱརརཧིཏཱནཾ དྭཱརཱདིབྷཱཝོ དྷམྨཏཱ. ཨིམསྨིཉྩ ཨཏྠེ ཡནྟི ཨེཏསྶ ཡསྨཱཏི ཨཏྠོ. པུརིམསྨིཾ སམྦྷཝནཝིསེསནཾ ཡཾ-སདྡོ. ‘‘སུཉྙོ ¶ གཱམོཏི ཁོ, བྷིཀྑཝེ, ཚནྣེཏཾ ཨཛ྄ཛྷཏྟིཀཱནཾ ཨཱཡཏནཱནཾ ཨདྷིཝཙན’’ནྟི (སཾ. ནི. ༤.༢༣༨) ཝཙནཏོ སུཉྙགཱམོ ཝིཡ དཊྛབྦཱནི. ཨནྣཔཱནསམོཧིཏནྟི ¶ གཧིཏེ སུཉྙགཱམེ ཡཉྙདེཝ བྷཱཛནཾ པརཱམསཱིཡཏི, ཏཾ ཏཾ རིཏྟཀཾཡེཝ པརཱམསཱིཡཏི, ཨེཝཾ དྷུཝཱདིབྷཱཝེན གཧིཏཱནི ཨུཔཔརིཀྑིཡམཱནཱནི རིཏྟཀཱནེཝ ཨེཏཱནི དིསྶནྟཱིཏི. ཙཀྑཱདིདྭཱརེསུ ཨབྷིཛ྄ཛྷཱདོམནསྶུཔྤཱདཀབྷཱཝེན རཱུཔཱདཱིནི ཙཀྑཱདཱིནཾ ཨབྷིགྷཱཏཀཱནཱིཏི ཝུཏྟཱནི. ཨཧིསུསུམཱརཔཀྑིཀུཀྐུརསིངྒཱལམཀྐཊཱ ཚ པཱཎཀཱ. ཝིསམབིལཱཀཱསགཱམསུསཱནཝནཱནི ཏེསཾ གོཙརཱ. ཏཏྠ ཝིསམཱདིཨཛ྄ཛྷཱསཡེཧི ཙཀྑཱདཱིཧི ཝིསམབྷཱཝབིལཱཀཱསགཱམསུསཱནསནྣིསྶིཏསདིསུཔཱདིནྣདྷམྨཝནབྷཱཝེཧི ཨབྷིརམིཏཏྟཱ རཱུཔཱདཱིནམྤི ཝིསམཱདིསདིསཏཱ ཡོཛེཏབྦཱ.

ཧུཏྭཱ ཨབྷཱཝཊྛེནཱཏི ཨིདཾ ཨིཏརེསཾ ཙཏུནྣཾ ཨཱཀཱརཱནཾ སངྒཧཀཏྟཱ ཝིསུཾ ཝུཏྟཾ. ཧུཏྭཱ ཨབྷཱཝཱཀཱརོ ཨེཝ ཧི ཨུཔྤཱདཝཡཏྟཱཀཱརཱདཡོཏི. ཏཏྠ ཧུཏྭཱཏི ཨེཏེན པུརིམནྟཝིཝིཏྟཏཱཔུབྦཀཾ མཛ྄ཛྷེ ཝིཛྫམཱནཏཾ དསྶེཏི, ཏཾ ཝཏྭཱ ཨབྷཱཝཝཙནེན མཛ྄ཛྷེ ཝིཛྫམཱནཏཱཔུབྦཀཾ, ཨཔརནྟེ ཨཝིཛྫམཱནཏཾ, ཨུབྷཡེནཔི སདཱ ཨབྷཱཝོ ཨནིཙྩལཀྑཎནྟི དསྶེཏི. སབྷཱཝཝིཛཧནཾ ཝིཔརིཎཱམོ, ཛརཱབྷངྒེཧི ཝཱ པརིཝཏྟནཾ, སནྟཱནཝིཀཱརཱཔཏྟི ཝཱ. སདཱ ཨབྷཱཝེཔི ཙིརཊྛཱནཾ སིཡཱཏི ཏཾནིཝཱརཎཏྠཾ ‘‘ཏཱཝཀཱལིཀཏོ’’ཏི ཨཱཧ. ཨུཔྤཱདཝཡཉྙཐཏྟརཧིཏཾ ནིཙྩཾ, ན ཨིཏརཐཱཏི ནིཙྩཔཊིཀྑེཔཏོ ཨནིཙྩཾ, ནིཙྩཔཊིཔཀྑཏོཏི ཨདྷིཔྤཱཡོ.

ཛཱཏིདྷམྨཏཱདཱིཧི ཨནིཊྛཏཱ པཊིཔཱིལ༹ནཾ. པཊིཔཱིལ༹ནཊྛེནཱཏི ཙ ཡསྶ ཏཾ པཝཏྟཏི, ཏཾ པུགྒལཾ པཊིཔཱིལ༹ནཏོ, སཡཾ ཝཱ ཛརཱདཱིཧི པཊིཔཱིལ༹ནཏྟཱཏི ཨཏྠོ. པརིཏྟཊྛིཏིཀསྶཔི ཨཏྟནོ ཝིཛྫམཱནཀྑཎེ ཨུཔྤཱདཱདཱིཧི ཨབྷིཎྷཾ སམྤཊིཔཱིལ༹ནཏྟཱ ‘‘ཨབྷིཎྷསམྤཊིཔཱིལ༹ནཏོ’’ཏི པུརིམཾ སཱམཉྙལཀྑཎཾ ཝིསེསེཏྭཱ ཝདཏི, པུགྒལསྶ པཱིལ༹ནཏོ དུཀྑམཾ. སུཁཔཊིཔཀྑབྷཱཝཏོ དུཀྑཾ སུཁཾ པཊིཀྑིཔཏི ནིཝཱརེཏི, དུཀྑཝཙནཾ ཝཱ ཨཏྠཏོ སུཁཾ པཊིཀྑིཔཏཱིཏི ཨཱཧ ‘‘སུཁཔཊིཀྑེཔཏོ’’ཏི.

ནཏྠི ཨེཏསྶ ཝསཝཏྟནཀོ, ནཱཔི ཨིདཾ ཝསཝཏྟནཀནྟི ཨཝསཝཏྟནཀཾ, ཨཏྟནོ པརསྨིཾ པརསྶ ཙ ཨཏྟནི ཝསཝཏྟནབྷཱཝོ ཝཱ ཝསཝཏྟནཀཾ, ཏཾ ཨེཏསྶ ནཏྠཱིཏི ཨཝསཝཏྟནཀཾ, ཨཝསཝཏྟནཀསྶ ཨཝསཝཏྟནཀོ ཝཱ ཨཏྠོ སབྷཱཝོ ཨཝསཝཏྟནཀཊྛོ, ཨིདཉྩ སཱམཉྙལཀྑཎཾ. ཏེནཱཏི པརསྶ ཨཏྟནི ཝསཝཏྟནཱཀཱརེན སུཉྙཾ. ཨིམསྨིཉྩ ཨཏྠེ སུཉྙཏོཏི ཨེཏསྶེཝ ¶ ཝིསེསནཾ ‘‘ཨསྶཱམིཀཏོ’’ཏི. ཨཐ ཝཱ ‘‘ཡསྨཱ ¶ ཝཱ ཨེཏཾ…པེ… མཱ པཱཔུཎཱཏཱུ’’ཏི ཨེཝཾ ཙིནྟཡམཱནསྶ ཀསྶཙི ཏཱིསུ ཋཱནེསུ ཝསཝཏྟནབྷཱཝོ ནཏྠི, སུཉྙཾ ཏཾ ཏེན ཨཏྟནོཡེཝ ཝསཝཏྟནཱཀཱརེནཱཏི ཨཏྠོ. ན ཨིདཾ ཀསྶཙི ཀཱམཀཱརིཡཾ, ནཱཔི ཨེཏསྶ ཀིཉྩི ཀཱམཀཱརིཡཾ ཨཏྠཱིཏི ཨཀཱམཀཱརིཡཾ. ཨེཏེན ཨཝསཝཏྟནཏྠཾ ཝིསེསེཏྭཱ དསྶེཏི.

ཝིབྷཝགཏི ཝིནཱསགམནཾ. སནྟཏིཡཾ བྷཝནྟརུཔྤཏྟིཡེཝ བྷཝསངྐནྟིགམནཾ. སནྟཏིཡཱ ཡཐཱཔཝཏྟཱཀཱརཝིཛཧནཾ པཀཏིབྷཱཝཝིཛཧནཾ. ‘‘ཙཀྑུ ཨནིཙྩ’’ནྟི ཝུཏྟེ ཙཀྑུཨནིཙྩ-སདྡཱནཾ ཨེཀཏྠཏྟཱ ཨནིཙྩཱནཾ སེསདྷམྨཱནམྤི ཙཀྑུབྷཱཝོ ཨཱཔཛྫཏཱིཏི ཨེཏིསྶཱ ཙོདནཱཡ ནིཝཱརཎཏྠཾ ཝིསེསསཱམཉྙལཀྑཎཝཱཙཀཱནཉྩ སདྡཱནཾ ཨེཀདེསསམུདཱཡབོདྷནཝིསེསཾ དཱིཔེཏུཾ ‘‘ཨཔིཙཱ’’ཏིཨཱདིམཱཧ.

ཀིཾ དསྶིཏནྟི ཝིཔསྶནཱཙཱརཾ ཀཐེནྟེན ཀིཾ ལཀྑཎཾ དསྶིཏནྟི ཨདྷིཔྤཱཡོ. ‘‘ཀཏམཱ ཙཱནནྡ, ཨནཏྟསཉྙཱ? ཨིདྷཱནནྡ, བྷིཀྑུ ཨརཉྙགཏོ ཝཱ རུཀྑམཱུལགཏོ ཝཱ སུཉྙཱགཱརགཏོ ཝཱ ཨིཏི པཊིསཉྩིཀྑཏི ‘ཙཀྑུ ཨནཏྟཱ’ཏི…པེ… ‘དྷམྨཱ ཨནཏྟཱ’ཏི. ཨིཏི ཨིམེསུ ཚསུ ཨཛ྄ཛྷཏྟིཀབཱཧིརེསུ ཨཱཡཏནེསུ ཨནཏྟཱནུཔསྶཱི ཝིཧརཏཱི’’ཏི (ཨ. ནི. ༡༠.༦༠) ཨཝིསེསེསུ ཨཱཡཏནེསུ ཨནཏྟཱནུཔསྶནཱ ཝུཏྟཱཏི ཀཱརཎབྷཱུཏཱནཾ ཙཀྑཱདཱིནཾ, ཕལབྷཱུཏཱནཉྩ ཙཀྑུཝིཉྙཱཎཱདཱིནཾ ཀཱརཎཕལམཏྟཏཱཡ ཨནཏྟཏཱཡ ཨནཏྟལཀྑཎཝིབྷཱཝནཏྠཱཡ ཨཱཡཏནདེསནཱཏི ཨཱཧ ‘‘དྭཱདསནྣཾ…པེ… ཨནཏྟལཀྑཎ’’ནྟི. ཡདིཔི ཨནིཙྩདུཀྑལཀྑཎཱནི ཨེཏྠ དསྶིཏཱནི, ཏེཧི ཙ ཨནཏྟལཀྑཎམེཝ ཝིསེསེན དསྶིཏནྟི ཨདྷིཔྤཱཡོ. ཝེཏི ཙཱཏི ཨེཏྠ ཨིཏི-སདྡོ སམཱཔནཏྠོ. ཨིཙྩསྶཱཏི ཨེཏྠ ཨིཏི-སདྡོ ཡཐཱསམཱཔིཏསྶ ཨཱརོཔེཏབྦདོསསྶ ནིདསྶནཏྠོ. ཨེཝནྟི ‘‘ཙཀྑུ ཨཏྟཱ’’ཏི ཨེཝཾ ཝཱདེ སཏཱིཏི ཨཏྠོ. ཨིཙྩསྶཱཏི ཝཱ ཨིཏི-སདྡོ ‘‘ཨིཏི ཝདནྟསྶཱ’’ཏི པརཝཱདིསྶ དོསལཀྑཎཱཀཱརནིདསྶནཏྠོ. ཨེཝནྟི དོསགམནཔྤཀཱརནིདསྶནཏྠོ. རཱུཔེ ཨཏྟནི ‘‘ཨེཝཾ མེ རཱུཔཾ ཧོཏཱུ’’ཏི ཨཏྟནིཡེ ཝིཡ སཱམིནིདྡེསཱཔཏྟཱིཏི ཙེ? ན, ‘‘མམ ཨཏྟཱ’’ཏི གཧིཏཏྟཱ. ‘‘མམ ཨཏྟཱ’’ཏི ཧི གཧིཏཾ རཱུཔཾ ཝསཝཏྟིཏཱཡ ‘‘ཨེཝཾ མེ ཧོཏཱུ’’ཏི ཨིཙྪིཡམཱནཉྩ ཏཐེཝ བྷཝེཡྻ, ཨིཙྪཏོཔི ཧི ཏསྶ རཱུཔསངྑཱཏོ ཨཏྟཱ ཨཝསཝཏྟི ཙཱཏི. ཨཱབཱདྷཱཡཱཏི ཨེཝཾ དུཀྑེན. པཉྙཱཔནནྟི ¶ པརེསཾ ཉཱཔནཾ. ཨནཏྟལཀྑཎཔཉྙཱཔནསྶ ཨཉྙེསཾ ཨཝིསཡཏྟཱ ཨནཏྟལཀྑཎདཱིཔཀཱནཾ ཨནིཙྩདུཀྑལཀྑཎཱནཉྩ པཉྙཱཔནསྶ ཨཝིསཡཏཱ དསྶིཏཱ ཧོཏི.

ཨེཝཾ ¶ པན དུཔྤཉྙཱཔནཏཱ ཨེཏེསཾ དུརཱུཔཊྛཱནཏཱཡ ཧོཏཱིཏི ཏེསཾ ཨནུཔཊྛཧནཀཱརཎཾ པུཙྪནྟོ ཨཱཧ ‘‘ཨིམཱནི པནཱ’’ཏིཨཱདི. ཋཱནཱདཱིསུ ནིརནྟརཾ པཝཏྟམཱནསྶ ཧེཊྛཱ ཝུཏྟསྶ ཨབྷིཎྷསམྤཊིཔཱིལ༹ནསྶ. དྷཱཏུམཏྟཏཱཡ ཙཀྑཱདཱིནཾ སམཱུཧཏོ ཝིནིབྦྷུཛྫནཾ ནཱནཱདྷཱཏུཝིནིབྦྷོགོ. གྷནེནཱཏི ཙཏྟཱརིཔི གྷནཱནི གྷནབྷཱཝེན ཨེཀཏྟཾ ཨུཔནེཏྭཱ ཝདཏི. པཉྙཱཡེཝ སནྟཏིཝིཀོཔནཱཏི དཊྛབྦཾ. ཡཱཐཱཝསརསཏོཏི ཨཝིཔརཱིཏསབྷཱཝཏོ. སབྷཱཝོ ཧི རསིཡམཱནོ ཨཝིརདྡྷཔཊིཝེདྷེན ཨསྶཱདིཡམཱནོ ‘‘རསོ’’ཏི ཝུཙྩཏི. ཨནིཙྩཱདཱིཧི ཨནིཙྩལཀྑཎཱདཱིནཾ ཨཉྙཏྠ ཝཙནཾ རུཔྤནཱདིཝསེན པཝཏྟརཱུཔཱདིགྒཧཎཏོ ཝིསིཊྛསྶ ཨནིཙྩཱདིགྒཧཎསྶ སབྦྷཱཝཱ. ན ཧི ནཱམརཱུཔཔརིཙྪེདམཏྟེན ཀིཙྩསིདྡྷི ཧོཏི, ཨནིཙྩཱདཡོ ཙ རཱུཔཱདཱིནཾ ཨཱཀཱརཱ དཊྛབྦཱ. ཏེ པནཱཀཱརཱ པརམཏྠཏོ ཨཝིཛྫམཱནཱ རཱུཔཱདཱིནཾ ཨཱཀཱརམཏྟཱཡེཝཱཏི ཀཏྭཱ ཨཊྛསཱལིནིཡཾ (དྷ. ས. ཨཊྛ. ༣༥༠) ལཀྑཎཱརམྨཎིཀཝིཔསྶནཱཡ ཁནྡྷཱརམྨཎཏཱ ཝུཏྟཱཏི ཨདྷིཔྤཱཡམཏྟེ ཋཱཏུཾ ཡུཏྟཾ, ནཱཏིདྷཱཝིཏུཾ. ‘‘ཨནིཙྩ’’ནྟི ཙ གཎྷནྟོ ‘‘དུཀྑཾ ཨནཏྟཱ’’ཏི ན གཎྷཱཏི, ཏཐཱ དུཀྑཱདིགྒཧཎེ ཨིཏརསྶཱགཧཎཾ. ཨནིཙྩཱདིགྒཧཎཱནི ཙ ནིཙྩསཉྙཱདིནིཝཏྟནཀཱནི སདྡྷཱསམཱདྷིཔཉྙིནྡྲིཡཱདྷིཀཱནི ཏིཝིདྷཝིམོཀྑམུཁབྷཱུཏཱནི. ཏསྨཱ ཨེཏེསཾ ཨཱཀཱརཱནཾ པརིགྒཡ྄ཧམཱནཱནཾ ཨཉྙམཉྙཾ ཝིསེསོ ཙ ཨཏྠཱིཏི ཏཱིཎི ལཀྑཎཱནི ཝུཏྟཱནི.

སུཏྟནྟབྷཱཛནཱིཡཝཎྞནཱ ནིཊྛིཏཱ.

༢. ཨབྷིདྷམྨབྷཱཛནཱིཡཝཎྞནཱ

༡༦༧. ནཱམརཱུཔཔརིཙྪེདཀཐཱ ཨབྷིདྷམྨཀཐཱཏི སུཏྟནྟེ ཝིཡ པཙྩཡཡུགལ༹ཝསེན ཨཀཐེཏྭཱ ཨཛ྄ཛྷཏྟིཀབཱཧིརཝསེན ཨབྷིཉྙེཡྻཱནི ཨཱཡཏནཱནི ཨབྦོཀཱརཏོ ཨབྷིདྷམྨབྷཱཛནཱིཡེ ཀཐིཏཱནི. ཨཱགམྨཱཏི སབྦསངྑཱརེཧི ནིབྦིནྡསྶ ཝིསངྑཱརནིནྣསྶ གོཏྲབྷུནཱ ཝིཝཊྚིཏམཱནསསྶ མགྒེན སཙྪིཀརཎེནཱཏི ཨཏྠོ. སཙྪིཀིརིཡམཱནཉྷི ཏཾ ཨདྷིགནྟྭཱ ཨཱརམྨཎཔཙྩཡབྷཱུཏཉྩ ¶ པཊིཙྩ ཨདྷིཔཏིཔཙྩཡབྷཱུཏེ ཙ ཏམྷི པརམསྶཱསབྷཱཝེན ཝིནིམུཏྟསངྑཱརསྶ ཙ གཏིབྷཱཝེན པཏིཊྛཱནབྷཱུཏེ པཏིཊྛཱཡ ཁཡསངྑཱཏོ མགྒོ རཱགཱདཡོ ཁེཔེཏཱིཏི ཏཾསཙྪིཀརཎཱབྷཱཝེ རཱགཱདཱིནཾ ཨནུཔྤཏྟིནིརོདྷགམནཱབྷཱཝཱ ‘‘ཏཾ ཨཱགམྨ རཱགཱདཡོ ཁཱིཡནྟཱི’’ཏི ¶ ཝུཏྟཾ. སུཏྟཏོ མུཉྩིཏྭཱཏི སུཏྟཔདཱནི མུཉྩིཏྭཱ. ཨཉྙོ སུཏྟསྶ ཨཏྠོ ‘‘མཱཏརཾ པིཏརཾ ཧནྟྭཱ’’ཏིཨཱདཱིསུ (དྷ. པ. ༢༩༤-༢༩༥) ཝིཡ ཨཱཧརིཏབྦོ, ནཏྠི སུཏྟཔདེཧེཝ ནཱིཏོ ཨཏྠོཏི ཨཏྠོ.

ཨེཀཾ ནཱནནྟི ཙུཎྞིཏཾ ཁུདྡཀཾ ཝཱ ཀརཎཾ, ཙུཎྞཱིཀརཎནྟི ཨབཧུམཱནེན ཝདཏི. ན ཏྭཾ ཨེཀཾ ནཱནཾ ཛཱནཱསཱིཏི ཀིཾ ཨེཏྟཀཾ ཏྭམེཝ ན ཛཱནཱསཱིཏི ཨཏྠོ. ནནུ ཉཱཏེཏི ‘‘ཡདིཔི པུབྦེ ན ཉཱཏཾ, ཨདྷུནཱཔི ཉཱཏེ ནནུ སཱདྷུ ཧོཏཱི’’ཏི ཨཏྟནོ ཛཱནནཾ པཊིཙྪཱདེཏྭཱ ཝིཀྑེཔཾ ཀརོནྟཾ ནིབནྡྷཏི. ཝིབྷཛིཏྭཱཏི ཨཀྑརཏྠམཏྟེ ཨཊྛཏྭཱ ལཱིནཾ ཨཏྠཾ ཝིབྷཛིཏྭཱ ཨུདྡྷརིཏྭཱ ནཱིཧརིཏྭཱ ཀཐིཏནྟི ཨཏྠོ. རཱགཱདཱིནཾ ཁཡོ ནཱམ ཨབྷཱཝམཏྟོ, ན ཙ ཨབྷཱཝསྶ བཧུབྷཱཝོ ཨཏྠི ཨཏྟནོ ཨབྷཱཝཏྟཱཏི ཝདནྟསྶ ཝཙནཔཙྪིནྡནཏྠཾ པུཙྪཏི ‘‘རཱགཀྑཡོ ནཱམ རཱགསྶེཝ ཁཡོ’’ཏིཨཱདི. ཡདི ཧི རཱགཀྑཡོ དོསཱདཱིནཾ ཁཡོ ན ཧོཏི, དོསཀྑཡཱདཡོ ཙ རཱགཱདཱིནཾ ཁཡཱ, ཨཉྙམཉྙཝིསིཊྛཱ བྷིནྣཱ ཨཱཔནྣཱ ཧོནྟཱིཏི བཧུནིབྦཱནཏཱ ཨཱཔནྣཱ ཨེཝ ཧོཏི, ཨཉྙམཉྙཝིསེསོ ཙ ནཱམ ནིསྶབྷཱཝསྶ ནཏྠཱིཏི སསབྷཱཝཏཱ ཙ ནིབྦཱནསྶ. ནཝ ཏཎྷཱམཱུལཀཱ ‘‘ཏཎྷཾ པཊིཙྩ པརིཡེསནཱ’’ཏི (དཱི. ནི. ༢.༡༠༣; ༣.༣༥༩; ཨ. ནི. ༩.༢༣; ཝིབྷ. ༩༦༣) ཨཱདཡོ, ཏེསུ པརིཡེསནཱདཡོ ཙ པརིཡེསནཱདིཀརཀིལེསཱ དཊྛབྦཱ. དིཡཌྜྷཀིལེསསཧསྶཾ ནིདཱནཀཐཱཡཾ ཝུཏྟཾ.

ཨོལཱ༹རིཀཏཱཡ ཀཱརེཏབྦོཏི ཨཏིསུཁུམསྶ ནིབྦཱནསྶ ཨོལཱ༹རིཀབྷཱཝདོསཱཔཏྟིཡཱ བོདྷེཏབྦོ, ནིགྒཧེཏབྦོ ཝཱ. ཝཏྠུནྟི ཨུཔཱདིནྣཀཕོཊྛབྦཾ མེཐུནཾ. ཨཙྪཱདཱིནམྤི ནིབྦཱནཔྤཏྟི ཀསྨཱ ཝུཏྟཱ, ནནུ ‘‘ཀིལེསཱནཾ ཨཙྩནྟཾ ཨནུཔྤཏྟིནིརོདྷོ ནིབྦཱན’’ནྟི ཨིཙྪནྟསྶ ཀིལེསཱནཾ ཝིནཱསོ ཀཉྩི ཀཱལཾ ཨཔྤཝཏྟི ནིབྦཱནཾ ན ཧོཏཱིཏི? ན, ཨབྷཱཝསཱམཉྙཏོ. ཨཙྩནྟཱཔཝཏྟི ཧི ཀཉྩི ཀཱལཉྩ ཨཔྤཝཏྟི ཨབྷཱཝོཡེཝཱཏི ནཏྠི ཝིསེསོ. སཝིསེསཾ ཝཱ ཝདནྟསྶ ཨབྷཱཝཏཱ ཨཱཔཛྫཏཱིཏི. ཏིརཙྪཱནགཏེཧིཔི པཱཔུཎིཏབྦཏྟཱ ཏེསམྤི པཱཀཊཾ པིལ༹ནྡྷནཾ ཝིཡ ཨོལཱ༹རིཀཾ ཐཱུལཾ. ཀེཝལཾ པན ཀཎྞེ པིལ༹ནྡྷིཏུཾ ན སཀྐོཏི, པིལ༹ནྡྷནཏོཔི ཝཱ ཐཱུལཏྟཱ ན སཀྐཱཏི ཨུཔྤཎྜེནྟོ ཝིཡ ནིགྒཎྷཱཏི.

ནིབྦཱནཱརམྨཎཀརཎེན ¶ གོཏྲབྷུཀྑཎེ ཀིལེསཀྑཡཔྤཏྟི པནསྶ ཨཱཔནྣཱཏི མཉྙམཱནོ ཨཱཧ ‘‘ཏྭཾ ཨཁཱིཎེསུཡེཝཱ’’ཏིཨཱདི. ནནུ ཨཱརམྨཎཀརཎམཏྟེན ཀིལེསཀྑཡོ ཨནུཔྤཏྟོཏི ན སཀྐཱ ¶ ཝཏྟུཾ. ཙིཏྟཉྷི ཨཏཱིཏཱནཱགཏཱདིསབྦཾ ཨཱལམྦེཏི, ན ནིཔྥནྣམེཝཱཏི གོཏྲབྷུཔི མགྒེན ཀིལེསཱནཾ ཡཱ ཨནུཔྤཏྟིདྷམྨཏཱ ཀཱཏབྦཱ, ཏཾ ཨཱརབྦྷ པཝཏྟིསྶཏཱིཏི? ན, ཨཔྤཏྟནིབྦཱནསྶ ནིབྦཱནཱརམྨཎཉཱཎཱབྷཱཝཏོ. ན ཧི ཨཉྙདྷམྨཱ ཝིཡ ནིབྦཱནཾ, ཏཾ པན ཨཏིགམྦྷཱིརཏྟཱ ཨཔྤཏྟེན ཨཱལམྦིཏུཾ ན སཀྐཱ. ཏསྨཱ ཏེན གོཏྲབྷུནཱ པཏྟབྦེན ཏིཀཱལིཀསབྷཱཝཱཏིཀྐནྟགམྦྷཱིརབྷཱཝེན བྷཝིཏབྦཾ, ཀིལེསཀྑཡམཏྟཏཾ ཝཱ ཨིཙྪཏོ གོཏྲབྷུཏོ པུརེཏརཾ ནིཔྥནྣེན ཀིལེསཀྑཡེན. ཏེནཱཧ ‘‘ཏྭཾ ཨཁཱིཎེསུཡེཝ ཀིལེསེསུ ཀིལེསཀྑཡཾ ནིབྦཱནཾ པཉྙཔེསཱི’’ཏི. ཨཔྤཏྟཀིལེསཀྑཡཱརམྨཎཀརཎེ ཧི སཏི གོཏྲབྷུཏོ པུརེཏརཙིཏྟཱནིཔི ཨཱལམྦེཡྻུནྟི.

མགྒསྶ ཀིལེསཀྑཡཾ ནིབྦཱནནྟི མགྒསྶ ཨཱརམྨཎབྷཱུཏཾ ནིབྦཱནཾ ཀཏམནྟི ཨཏྠོ. མགྒོཏིཨཱདིནཱ པུརིམཔུཙྪཱདྭཡམེཝ ཝིཝརཏི.

ན ཙ ཀིཉྩཱིཏི རཱུཔཱདཱིསུ ནིབྦཱནཾ ཀིཉྩི ན ཧོཏི, ན ཙ ཀདཱཙི ཧོཏི, ཨཏཱིཏཱདིབྷཱཝེན ན ཝཏྟབྦནྟི ཝདནྟི, ཏཾ ཨཱགམྨ ཨཝིཛྫཱཏཎྷཱནཾ ཀིཉྩི ཨེཀདེསམཏྟམྤི ན ཧོཏི, ཏདེཝ ཏཾ ཨཱགམྨ ཀདཱཙི ན ཙ ཧོཏཱིཏི ཨཏྠོ ཡུཏྟོ.

ཨབྷིདྷམྨབྷཱཛནཱིཡཝཎྞནཱ ནིཊྛིཏཱ.

༣. པཉྷཔུཙྪཀཝཎྞནཱ

༡༦༨. ན…པེ… ནཝཏྟབྦདྷམྨཱརམྨཎཏྟཱཏི ཡཐཱ སཱརམྨཎཱ པརིཏྟཱདིབྷཱཝེན ནཝཏྟབྦཾ ཀིཉྩི ཨཱརམྨཎཾ ཀརོནྟི, ཨེཝཾ ཀིཉྩི ཨཱལམྦནཏོ ན ནཝཏྟབྦཀོཊྛཱསཾ བྷཛཏཱིཏི ཨཏྠོ.

པཉྷཔུཙྪཀཝཎྞནཱ ནིཊྛིཏཱ.

ཨཱཡཏནཝིབྷངྒཝཎྞནཱ ནིཊྛིཏཱ.

༣. དྷཱཏུཝིབྷངྒོ

༡. སུཏྟནྟབྷཱཛནཱིཡཝཎྞནཱ

༡༧༢. ཡདིཔི ¶ ¶ དྷཱཏུསཾཡུཏྟཱདཱིསུ ‘‘དྷཱཏུནཱནཏྟཾ ཝོ, བྷིཀྑཝེ, དེསེསྶཱམི, ཀཏམཉྩ, བྷིཀྑཝེ, དྷཱཏུནཱནཏྟཾ? ཙཀྑུདྷཱཏུ…པེ… མནོཝིཉྙཱཎདྷཱཏཱུ’’ཏིཨཱདིནཱ (སཾ. ནི. ༢.༨༥) ཨཊྛཱརས དྷཱཏུཡོ ཨཱགཏཱ, ཏཱ པན ཨབྷིདྷམྨེ ཙ ཨཱགཏཱཏི སཱདྷཱརཎཏྟཱ ཨགྒཧེཏྭཱ སུཏྟནྟེསྭེཝ ཨཱགཏེ ཏཡོ དྷཱཏུཚཀྐེ གཧེཏྭཱ སུཏྟནྟབྷཱཛནཱིཡཾ ཝིབྷཏྟནྟི ཝེདིཏབྦཾ. སབྦཱ དྷཱཏུཡོཏི ཨཊྛཱརསཔི. སུཉྙེ སབྷཱཝམཏྟེ ནིརུལ༹ྷོ དྷཱཏུ-སདྡོ དཊྛབྦོ. ཨསམྥུཊྛདྷཱཏཱུཏི ཙཏཱུཧི མཧཱབྷཱུཏེཧི ཨབྱཱཔིཏབྷཱཝོཏི ཨཏྠོ.

༡༧༣. པཐཝཱིདྷཱཏུདྭཡནྟི ཨཊྛཀཐཱཡཾ པདུདྡྷཱརོ ཀཏོ, པཱལི༹ཡཾ པན ‘‘དྭེཡ’’ནྟི ཨཱགཙྪཏི, ཨཏྠོ པན ཡཐཱཝུཏྟོཝ. དྭཡནྟི པན པཱཋེ སཏི ཨཡམྤི ཨཏྠོ སམྦྷཝཏི. དྭེ ཨཝཡཝཱ ཨེཏསྶཱཏི དྭཡཾ, པཐཝཱིདྷཱཏཱུནཾ དྭཡཾ པཐཝཱིདྷཱཏུདྭཡཾ, དྭིནྣཾ པཐཝཱིདྷཱཏཱུནཾ སམུདཱཡོཏི ཨཏྠོ. དྭེ ཨེཝ ཝཱ ཨཝཡཝཱ སམུདིཏཱ དྭཡཾ, པཐཝཱིདྷཱཏུདྭཡནྟི. ‘‘ཏཏྠ ཀཏམཱ པཐཝཱིདྷཱཏུ? པཐཝཱིདྷཱཏུདྭཡཾ, ཨེསཱ པཐཝཱིདྷཱཏཱུ’’ཏི སངྑེཔེན ཝིསྶཛྫེཏི. ཨཏྠི ཨཛ྄ཛྷཏྟིཀཱ ཨཏྠི བཱཧིརཱཏི ཨེཏྠ ཨཛ྄ཛྷཏྟིཀབཱཧིར-སདྡཱ ན ཨཛ྄ཛྷཏྟིཀདུཀེ ཝིཡ ཨཛ྄ཛྷཏྟིཀབཱཧིརཱཡཏནཝཱཙཀཱ, ནཱཔི ཨཛ྄ཛྷཏྟཏྟིཀེ ཝུཏྟེཧི ཨཛ྄ཛྷཏྟབཧིདྡྷཱ-སདྡེཧི སམཱནཏྠཱ, ཨིནྡྲིཡབདྡྷཱནིནྡྲིཡབདྡྷཝཱཙཀཱ པན ཨེཏེ. ཏེན ‘‘སཏྟསནྟཱནཔརིཡཱཔནྣཱ’’ཏིཨཱདི ཝུཏྟཾ. ནིཡཀཛ྄ཛྷཏྟཱཏི ཙ ན པཙྩཏྟཾ ཨཏྟནི ཛཱཏཏཾ སནྡྷཱཡ ཝུཏྟཾ, ཨཐ ཁོ སབྦསཏྟསནྟཱནེསུ ཛཱཏཏནྟི དཊྛབྦཾ. ཨཛ྄ཛྷཏྟཾ པཙྩཏྟནྟི ཝཙནེན ཧི སཏྟསནྟཱནཔརིཡཱཔནྣཏཱཡ ཨཛ྄ཛྷཏྟིཀབྷཱཝཾ དསྶེཏི, ན པཱཊིཔུགྒལིཀཏཱཡ. སབྷཱཝཱཀཱརཏོཏི ཨཱཔཱདཱིཧི ཝིསིཊྛེན ཨཏྟནོ ཨེཝ སབྷཱཝབྷཱུཏེན གཧེཏབྦཱཀཱརེན.

ཀེསཱ ¶ ཀཀྑལ༹ཏྟལཀྑཎཱཏི ཀཀྑལ༹ཏཱདྷིཀཏཱཡ ཝུཏྟཱ. པཱཊིཡེཀྐོ ཀོཊྛཱསོཏི པཐཝཱིཀོཊྛཱསམཏྟོ སུཉྙོཏི ཨཏྠོ. མཏྠལུངྒཾ ཨཊྛིམིཉྫགྒཧཎེན གཧིཏནྟི ཨིདྷ ཝིསུཾ ན ཝུཏྟནྟི ཝེདིཏབྦཾ.

ཨིམིནཱཏི ¶ ‘‘སེཡྻཐིདཾ ཀེསཱ’’ཏིཨཱདིནཱ. ཀམྨཾ ཀཏྭཱཏི པཡོགཾ ཝཱིརིཡཾ ཨཱཡཱུཧནཾ ཝཱ ཀཏྭཱཏི ཨཏྠོ. བྷོགཀཱམེན ཀསིཡཱདཱིསུ ཝིཡ ཨརཧཏྟཀཱམེན ཙ ཨིམསྨིཾ མནསིཀཱརེ ཀམྨཾ ཀཏྟབྦནྟི. པུབྦཔལིབོདྷཱཏི ཨཱཝཱསཱདཡོ དཱིགྷཀེསཱདིཀེ ཁུདྡཀཔལིབོདྷེ ཨཔརཔལིབོདྷཱཏི ཨཔེཀྑིཏྭཱ ཝུཏྟཱ.

ཝཎྞཱདཱིནཾ པཉྩནྣཾ ཝསེན མནསིཀཱརོ དྷཱཏུཔཊིཀཱུལཝཎྞམནསིཀཱརཱནཾ སཱདྷཱརཎོ པུབྦབྷཱགོཏི ནིབྦཏྟིཏདྷཱཏུམནསིཀཱརཾ དསྶེཏུཾ ‘‘ཨཝསཱནེ ཨེཝཾ མནསིཀཱརོ པཝཏྟེཏབྦོ’’ཏི ཨཱཧ. ཨཉྙམཉྙཾ ཨཱབྷོགཔཙྩཝེཀྑཎརཧིཏཱཏི ཀཱརཎསྶ ཙ ཕལསྶ ཙ ཨབྱཱཔཱརཏཱཡ དྷཱཏུམཏྟཏཾ དསྶེཏི. ཨཱབྷོགཔཙྩཝེཀྑཎཱདཱིནམྤི ཨེཝམེཝ ཨབྱཱཔཱརཏཱ དཊྛབྦཱ. ན ཧི ཏཱནི, ཏེསཉྩ ཀཱརཎཱནི ཨཱབྷུཛིཏྭཱ པཙྩཝེཀྑིཏྭཱ ཙ ཨུཔྤཛྫནྟི ཀརོནྟི ཙཱཏི. ལཀྑཎཝསེནཱཏི ‘‘ཀཀྑལ༹ཾ ཁརིགཏ’’ནྟིཨཱདིཝཙནཾ སནྡྷཱཡ ཝུཏྟཾ.

ཝེཀནྟཀཾ ཨེཀཱ ལོཧཛཱཏི. ནཱགནཱསིཀལོཧཾ ལོཧསདིསཾ ལོཧཝིཛཱཏི ཧལིདྡིཝིཛཱཏི ཝིཡ. ཏིཔུཏམྦཱདཱིཧི མིསྶེཏྭཱ ཀཏཾ ཀརཎེན ནིབྦཏྟཏྟཱ ཀིཏྟིམལོཧཾ. མོརཀྑཱདཱིནི ཨེཝཾནཱམཱནེཝེཏཱནི. སཱམུདྡིཀམུཏྟཱཏི ནིདསྶནམཏྟམེཏཾ, སབྦཱཔི པན མུཏྟཱ མུཏྟཱ ཨེཝ.

༡༧༤. ཨཔྤེཏཱིཏི ཨཱཔོ, ཨཱབནྡྷནཝསེན སེསབྷཱུཏཏྟཡཾ པཱཔུཎཱཏི སིལེསཏཱིཏི ཨཏྠོ. ཡཱུསབྷཱུཏོཏི རསབྷཱུཏོ. ཝཀྐཧདཡཡཀནཔཔྥཱསཱནི ཏེམེནྟནྟི ཨེཏྠ ཡཀནཾ ཧེཊྛཱབྷཱགཔཱུརཎེན, ཨིཏརཱནི ཏེསཾ ཨུཔརི ཐོཀཾ ཐོཀཾ པགྒྷརཎེན ཏེམེཏི. ཧེཊྛཱ ལེཌྜུཁཎྜཱནི ཏེམཡམཱནེཏི ཏེམཀཏེམིཏབྦཱནཾ ཨབྱཱཔཱརསཱམཉྙནིདསྶནཏྠཱཡེཝ ཨུཔམཱ དཊྛབྦཱ, ན ཋཱནསཱམཉྙནིདསྶནཏྠཱཡ. སནྣིཙིཏལོཧིཏེན ཏེམེཏབྦཱནཾ ཀེསཉྩི ཧེཊྛཱ, ཀསྶཙི ཨུཔརི ཋིཏཏཉྷི སཏིཔཊྛཱནཝིབྷངྒེ ཝཀྑཏཱིཏི, ཡཀནསྶ ཧེཊྛཱབྷཱགོ ‘‘ཋིཏཾ མཡི ལོཧིཏ’’ནྟི ན ཛཱནཱཏི, ཝཀྐཱདཱིནི ‘‘ཨམྷེ ཏེམཡམཱནཾ ལོཧིཏཾ ཋིཏ’’ནྟི ན ཛཱནནྟཱིཏི ཨེཝཾ ཡོཛནཱ ཀཱཏབྦཱ. ཡཐཱ ¶ པན བྷེསཛྫསིཀྑཱཔདེ ནིཡམོ ཨཏྠི ‘‘ཡེསཾ མཾསཾ ཀཔྤཏི, ཏེསཾ ཁཱིར’’ནྟི, ཨེཝམིདྷ ནཏྠི.

༡༧༥. ཏེཛནཝསེནཱཏི ནིསིཏབྷཱཝེན ཏིཀྑབྷཱཝེན. སརཱིརསྶ པཀཏིཾ ཨཏིཀྐམིཏྭཱ ཨུཎྷབྷཱཝོ སནྟཱཔོ, སརཱིརདཧནཝསེན པཝཏྟོ ¶ མཧཱདཱཧོ པརིདཱཧོ. ཨཡམེཏེསཾ ཝིསེསོ. ཡེན ཛཱིརཱིཡཏཱིཏི ཨེཀཱཧིཀཱདིཛརརོགེན ཛཱིརཱིཡཏཱིཏིཔི ཨཏྠོ ཡུཛྫཏི. སཏཝཱརཾ ཏཱཔེཏྭཱ ཨུདཀེ པཀྑིཔིཏྭཱ ཨུདྡྷཊསཔྤི སཏདྷོཏསཔྤཱིཏི ཝདནྟི. རསསོཎིཏམེདམཾསནྷཱརུཨཊྛིཨཊྛིམིཉྫཱ རསཱདཡོ. ཀེཙི ནྷཱརུཾ ཨཔནེཏྭཱ སུཀྐཾ སཏྟམདྷཱཏུཾ ཨཝོཙུནྟི. པཱཀཏིཀོཏི ཁོབྷཾ ཨཔྤཏྟོ སདཱ ཝིཛྫམཱནོ. པེཏགྒི མུཁཏོ བཧི ནིགྒཏོཝ ཨིདྷ གཧིཏོ.

༡༧༦. ཝཱཡནཝསེནཱཏི སཝེགགམནཝསེན, སམུདཱིརཎཝསེན ཝཱ.

༡༧༧. ཨིམིནཱ ཡསྨིཾ ཨཱཀཱསེ…པེ… ཏཾ ཀཐིཏནྟི ཨིདཾ ཀསིཎུགྒྷཱཊིམཱཀཱསསྶ ཨཀཐིཏཏཾ, ཨཛཊཱཀཱསསྶ ཙ ཀཐིཏཏཾ དསྶེཏུཾ ཝུཏྟཾ.

༡༧༩. སུཁདུཀྑཱནཾ ཕརཎབྷཱཝོ སརཱིརཊྛཀཨུཏུསྶ སུཁདུཀྑཕོཊྛབྦསམུཊྛཱནཔཙྩཡབྷཱཝེན ཡཐཱབལཾ སརཱིརེཀདེསསཀལསརཱིརཕརཎསམཏྠཏཱཡ ཝུཏྟོ, སོམནསྶདོམནསྶཱནཾ ཨིཊྛཱནིཊྛཙིཏྟཛསམུཊྛཱཔནེན ཏཐེཝ ཕརཎསམཏྠཏཱཡ. ཨེཝཾ ཨེཏེསཾ སརཱིརཕརཎཏཱཡ ཨེཀསྶ ཋཱནཾ ཨིཏརཾ པཧརཏི, ཨིཏརསྶ ཙ ཨཉྙནྟི ཨཉྙམཉྙེན སཔྤཊིཔཀྑཏཾ དསྶེཏི, ཨཉྙམཉྙཔཊིཔཀྑཨོལཱ༹རིཀཔྤཝཏྟི ཨེཝ ཝཱ ཨེཏེསཾ ཕརཎཾ. ཝཏྠཱརམྨཎཱནི ཙ པབནྡྷེན པཝཏྟིཧེཏུབྷཱུཏཱནི ཕརཎཊྛཱནཾ དཊྛབྦཾ, ཨུབྷཡཝཏོ ཙ པུགྒལསྶ ཝསེན ཨཡཾ སཔྤཊིཔཀྑཏཱ དསྶིཏཱ སུཁདསྶནཱིཡཏྟཱ.

༡༨༡. ཀིལེསཀཱམཾ སནྡྷཱཡཱཏི ‘‘སངྐཔྤོ ཀཱམོ རཱགོ ཀཱམོ’’ཏི (མཧཱནི. ༡; ཙཱུལ༹ནི. ཨཛིཏམཱཎཝཔུཙྪཱནིདྡེས ༨) ཨེཏྠ ཝུཏྟཾ སངྐཔྤཾ སནྡྷཱཡཱཏི ཨདྷིཔྤཱཡོ. སོཔི ཧི ཝིབཱདྷཏི ཨུཔཏཱཔེཏི ཙཱཏི ཀིལེསསནྠཝསམྦྷཝཏོ ཀིལེསཀཱམོ ཝིབྷཏྟོ ཀིལེསཝཏྠུསམྦྷཝཏོ ཝཱ. ཀཱམཔཊིསཾཡུཏྟཱཏི ཀཱམརཱགསངྑཱཏེན ཀཱམེན སམྤཡུཏྟཱ, ཀཱམཔཊིབདྡྷཱ ཝཱ. ཨཉྙེསུ ཙ ཀཱམཔཊིསཾཡུཏྟདྷམྨེསུ ཝིཛྫམཱནེསུ ཝིཏཀྐེཡེཝ ཀཱམོཔཔདོ དྷཱཏུསདྡོ ནིརུལ༹ྷོ ཝེདིཏབྦོ ཝིཏཀྐསྶ ¶ ཀཱམཔྤསངྒཔྤཝཏྟིཡཱ སཱཏིསཡཏྟཱ. ཨེས ནཡོ བྱཱཔཱདདྷཱཏུཨཱདཱིསུ. པརསྶ ཨཏྟནོ ཙ དུཀྑཱཡནཾ ཝིཧིཾསཱ. ཝིཧིཾསནྟཱིཏི ཧནྟུཾ ཨིཙྪནྟི.

༡༨༢. ཨུབྷཡཏྠ ཨུཔྤནྣོཔི ཨབྷིཛ྄ཛྷཱསཾཡོགེན ཀམྨཔཐཛནནཏོ ཨནབྷིཛ྄ཛྷཱཀམྨཔཐབྷིནྡནཏོ ཙ ཀཱམཝིཏཀྐོ ‘‘ཀམྨཔཐབྷེདོ’’ཏི ཝུཏྟོ ¶ . བྱཱཔཱདོ པནཱཏི བྱཱཔཱདཝཙནེན བྱཱཔཱདཝིཏཀྐཾ དསྶེཏི. སོ ཧི བྱཱཔཱདདྷཱཏཱུཏི. ཏཐཱ ཝིཧིཾསཱཡ ཝིཧིཾསཱདྷཱཏུཡཱ ཙ བྱཱཔཱདཝསེན ཡཐཱསམྦྷཝཾ པཱཎཱཏིཔཱཏཱདིཝསེན ཙ ཀམྨཔཐབྷེདོ ཡོཛེཏབྦོ. ཨེཏྠཱཏི དྭཱིསུ ཏིཀེསུ. སབྦཀཱམཱཝཙརསབྦཀུསལསངྒཱཧཀེཧི ཨིཏརེ དྭེ དྭེ སངྒཧེཏྭཱ ཀཐནཾ སབྦསངྒཱཧིཀཀཐཱ. ཨེཏྠཱཏི པན ཨེཏསྨིཾ ཚཀྐེཏི ཝུཙྩམཱནེ ཀཱམདྷཱཏུཝཙནེན ཀཱམཱཝཙརཱནཾ ནེཀྑམྨདྷཱཏུཨཱདཱིནཉྩ གཧཎཾ ཨཱཔཛྫཏི.

ལབྷཱཔེཏབྦཱཏི ཙཀྑུདྷཱཏཱདིབྷཱཝཾ ལབྷམཱནཱ དྷམྨཱ ནཱིཧརིཏྭཱ དསྶནེན ལབྷཱཔེཏབྦཱ. ཙརཏི ཨེཏྠཱཏི ཙཱརོ, ཀིཾ ཙརཏི? སམྨསནཾ, སམྨསནསྶ ཙཱརོ སམྨསནཙཱརོ, ཏེབྷཱུམཀདྷམྨཱནཾ ཨདྷིཝཙནཾ.

སུཏྟནྟབྷཱཛནཱིཡཝཎྞནཱ ནིཊྛིཏཱ.

༢. ཨབྷིདྷམྨབྷཱཛནཱིཡཝཎྞནཱ

༡༨༣. ཙཀྑུསྶཱཏི ཝིསེསཀཱརཎཾ ཨསཱདྷཱརཎསཱམིབྷཱཝེན ནིདྡིཊྛཾ. ཏཉྷི པུགྒལནྟརཱསཱདྷཱརཎཾ ནཱིལཱདིསབྦརཱུཔསཱདྷཱརཎཉྩ. ཝིདཧཏཱིཏི ཨེཝཾ ཨེཝཉྩ ཏཡཱ པཝཏྟིཏབྦནྟི ཝིནིཡུཛྫམཱནཾ ཝིཡ ཨུཔྤཱདེཏཱིཏི ཨཏྠོ. ཝིདཧཏཱིཏི ཙ དྷཱཏུཨཏྠོ ཨེཝ ཝིསིཊྛོ ཨུཔསགྒེན དཱིཔིཏོཏི ཝིནཱཔི ཨུཔསགྒེན དྷཱཏཱུཏི ཨེསོ སདྡོ ཏམཏྠཾ ཝདཏཱིཏི དཊྛབྦོ. ཀཏྟུཀམྨབྷཱཝཀརཎཨདྷིཀརཎེསུ དྷཱཏུཔདསིདྡྷི ཧོཏཱིཏི པཉྩཔི ཨེཏེ ཨཏྠཱ ཝུཏྟཱ. སུཝཎྞརཛཏཱདིདྷཱཏུཡོ སུཝཎྞཱདཱིནཾ བཱིཛབྷཱུཏཱ སེལཱདཡོ.

ཨཏྟནོ སབྷཱཝཾ དྷཱརེནྟཱིཏི དྷཱཏུཡོཏི ཨེཏྠཱཔི དྷཱཏཱིཏི དྷཱཏཱུཏི པདསིདྡྷི ཝེདིཏབྦཱ. དྷཱཏུ-སདྡོ ¶ ཨེཝ ཧི དྷཱརཎཏྠོཔི ཧོཏཱིཏི. ཀཏྟུཨཏྠོཔི ཙཱཡཾ པུརིམེན ཨསདིསོཏི ནིསྶཏྟསབྷཱཝམཏྟདྷཱརཎཉྩ དྷཱཏུ-སདྡསྶ པདྷཱནོ ཨཏྠོཏི ཝིསུཾ ཝུཏྟོ. དྷཱཏུཡོ ཝིཡ དྷཱཏུཡོཏི ཨེཏྠ སཱིཧ-སདྡོ ཝིཡ ཀེསརིམྷི ནིརུལ༹ྷོ པུརིསེསུ, སེལཱཝཡཝེསུ ནིརུལ༹ྷོ དྷཱཏུ-སདྡོ ཙ ཙཀྑཱདཱིསུ ཨུཔཙརིཏོ དཊྛབྦོ. ཉཱཎཉྩ ཉེཡྻཉྩ ཉཱཎཉེཡྻཱནི, ཏེསཾ ཨཝཡཝཱ ཏཔྤབྷེདབྷཱུཏཱ དྷཱཏུཡོ ཉཱཎཉེཡྻཱཝཡཝཱ. ཏཏྠ ཉཱཎཔྤབྷེདཱ དྷམྨདྷཱཏུཨེཀདེསོ, ཉེཡྻཔྤབྷེདཱ ཨཊྛཱརསཱཔཱིཏི ཉཱཎཉེཡྻཱཝཡཝམཏྟཱ དྷཱཏུཡོ ¶ ཧོནྟི. ཨཐ ཝཱ ཉཱཎེན ཉཱཏབྦོ སབྷཱཝོ དྷཱཏུསདྡེན ཝུཙྩམཱནོ ཨཝིཔརཱིཏཏོ ཉཱཎཉེཡྻོ, ན དིཊྛིཨཱདཱིཧི ཝིཔརཱིཏགྒཱཧཀེཧི ཉེཡྻོཏི ཨཏྠོ. ཏསྶ ཉཱཎཉེཡྻསྶ ཨཝཡཝཱ ཙཀྑཱདཡོ. ཝིསབྷཱགལཀྑཎཱཝཡཝེསུ རསཱདཱིསུ ནིརུལ༹ྷོ དྷཱཏུ-སདྡོ ཏཱདིསེསུ ཨཉྙཱཝཡཝེསུ ཙཀྑཱདཱིསུ ཨུཔཙརིཏོ དཊྛབྦོ, རསཱདཱིསུ ཝིཡ ཝཱ ཙཀྑཱདཱིསུ ནིརུལ༹ྷོཝ. ནིཛྫཱིཝམཏྟསྶེཏཾ ཨདྷིཝཙནནྟི ཨེཏེན ནིཛྫཱིཝམཏྟཔདཏྠེ དྷཱཏུ-སདྡསྶ ནིརུལ༹ྷཏཾ དསྶེཏི. ཚ དྷཱཏུཡོ ཨེཏསྶཱཏི ཚདྷཱཏུཡོ, ཡོ ལོཀེ ‘‘པུརིསོ’’ཏི དྷམྨསམུདཱཡོ ཝུཙྩཏི, སོ ཚདྷཱཏུརོ ཚནྣཾ པཐཝཱིཨཱདཱིནཾ ནིཛྫཱིཝམཏྟསབྷཱཝཱནཾ སམུདཱཡམཏྟོ, ན ཨེཏྠ ཛཱིཝོ པུརིསོ ཝཱ ཨཏྠཱིཏི ཨཏྠོ.

ཙཀྑཱདཱིནཾ ཀམོ པུབྦེ ཝུཏྟོཏི ཨིདྷ ཨེཀེཀསྨིཾ ཏིཀེ ཏིཎྞཾ ཏིཎྞཾ དྷཱཏཱུནཾ ཀམཾ དསྶེནྟོ ཨཱཧ ‘‘ཧེཏུཕལཱནུཔུབྦཝཝཏྠཱནཝསེནཱ’’ཏི. ཧེཏུཕལཱནཾ ཨནུཔུབྦཝཝཏྠཱནཾ ཧེཏུཕལབྷཱཝོཝ. ཏཏྠ ཧེཏཱུཏི པཙྩཡོ ཨདྷིཔྤེཏོ. ཕལནྟི པཙྩཡུཔྤནྣནྟི ཨཱཧ ‘‘ཙཀྑུདྷཱཏཱུ’’ཏིཨཱདི. མནོདྷཱཏུདྷམྨདྷཱཏཱུནཉྩ མནོཝིཉྙཱཎསྶ ཧེཏུབྷཱཝོ ཡཐཱསམྦྷཝཾ ཡོཛེཏབྦོ, དྭཱརབྷཱུཏམནོཝསེན ཝཱ ཏསྶཱ མནོདྷཱཏུཡཱ.

སབྦཱསཾ ཝསེནཱཏི ཡཐཱཝུཏྟཱནཾ ཨཱབྷཱདྷཱཏུཨཱདཱིནཾ པཉྩཏིཾསཱཡ དྷཱཏཱུནཾ ཝསེན. ཨཔརམཏྠསབྷཱཝསྶ པརམཏྠསབྷཱཝེསུ ན ཀདཱཙི ཨནྟོགདྷཏཱ ཨཏྠཱིཏི ཨཱཧ ‘‘སབྷཱཝཏོ ཝིཛྫམཱནཱན’’ནྟི. ཙནྡཱབྷཱསཱུརིཡཱབྷཱདིཀཱ ཝཎྞནིབྷཱ ཨེཝཱཏི ཨཱཧ ‘‘རཱུཔདྷཱཏུཡེཝ ཧི ཨཱབྷཱདྷཱཏཱུ’’ཏི. རཱུཔཱདིཔཊིབདྡྷཱཏི རཱགཝཏྠུབྷཱཝེན གཧེཏབྦཱཀཱརོ སུབྷནིམིཏྟནྟི སནྡྷཱཡ ‘‘རཱུཔཱདཡོཝཱ’’ཏི ཨཝཏྭཱ པཊིབདྡྷཝཙནཾ ཨཱཧ. ཨསཏིཔི རཱགཝཏྠུབྷཱཝེ ‘‘ཀུསལཝིཔཱཀཱརམྨཎཱ སུབྷཱ དྷཱཏཱུ’’ཏི དུཏིཡོ ཝིཀཔྤོ ཝུཏྟོ. ཝིཧིཾསཱདྷཱཏུ ཙེཏནཱ, པརཝིཧེཋནཚནྡོ ཝཱ. ཨཝིཧིཾསཱ ཀརུཎཱ.

ཨུབྷོཔཱིཏི ¶ དྷམྨདྷཱཏུམནོཝིཉྙཱཎདྷཱཏུཡོ. ཧཱིནཱདཱིསུ པུརིམནཡེན ཧཱིལི༹ཏཱ ཙཀྑཱདཡོ ཧཱིནཱ, སམྦྷཱཝིཏཱ པཎཱིཏཱ, ནཱཏིཧཱིལི༹ཏཱ ནཱཏིསམྦྷཱཝིཏཱ མཛ྄ཛྷིམཱཏི ཁནྡྷཝིབྷངྒེ ཨཱགཏཧཱིནདུཀཏོཡེཝ ནཱིཧརིཏྭཱ མཛ྄ཛྷིམཱ དྷཱཏུ ཝུཏྟཱཏི ཝེདིཏབྦཱ. ཝིཉྙཱཎདྷཱཏུ ཡདིཔི ཚཝིཉྙཱཎདྷཱཏུཝསེན ཝིབྷཏྟཱ, ཏཐཱཔི ‘‘ཝིཉྙཱཎདྷཱཏུགྒཧཎེན ཏསྶཱ པུརེཙཱརིཀཔཙྪཱཙཱརིཀཏྟཱ མནོདྷཱཏུ གཧིཏཱཝ ཧོཏཱི’’ཏི ཝུཏྟཏྟཱ ཨཱཧ ¶ ‘‘ཝིཉྙཱཎདྷཱཏུ…པེ… སཏྟཝིཉྙཱཎསངྑེཔོཡེཝཱ’’ཏི. ཨནེཀེསཾ ཙཀྑུདྷཱཏུཨཱདཱིནཾ, ཏཱསུ ཙ ཨེཀེཀིསྶཱ ནཱནཔྤཀཱརཏཱཡ ནཱནཱདྷཱཏཱུནཾ ཝསེན ཨནེཀདྷཱཏུནཱནཱདྷཱཏུལོཀོ ཝུཏྟོཏི ཨཱཧ ‘‘ཨཊྛཱརསདྷཱཏུཔྤབྷེདམཏྟམེཝཱ’’ཏི.

‘‘ཙཀྑུསོཏགྷཱནཛིཝ྄ཧཱཀཱཡམནོམནོཝིཉྙཱཎདྷཱཏུབྷེདེནཱ’’ཏི ཨཊྛཀཐཱཡཾ ལིཁིཏཾ. ཏཏྠ ན ཙཀྑཱདཱིནཾ ཀེཝལེན དྷཱཏུ-སདྡེན སམྦནྡྷོ ཨདྷིཔྤེཏོ ཝིཛཱནནསབྷཱཝསྶ པབྷེདཝཙནཏོ. ཝིཉྙཱཎདྷཱཏུ-སདྡེན སམྦནྡྷེ ཀརིཡམཱནེ དྭེ མནོགཧཎཱནི ན ཀཏྟབྦཱནི. ན ཧི དྭེ མནོཝིཉྙཱཎདྷཱཏུཡོ ཨཏྠཱིཏི. ‘‘ཙཀྑུ…པེ… ཀཱཡམནོཝིཉྙཱཎམནོདྷཱཏཱུ’’ཏི ཝཱ ཝཏྟབྦཾ ཨཏུལྱཡོགེ དྭནྡསམཱསཱབྷཱཝཏོ. ཨཡཾ པནེཏྠ པཱཋོ སིཡཱ ‘‘ཙཀྑུ…པེ… ཀཱཡཝིཉྙཱཎམནོམནོཝིཉྙཱཎདྷཱཏུབྷེདེནཱ’’ཏི.

ཁནྡྷཱཡཏནདེསནཱ སངྑེཔདེསནཱ, ཨིནྡྲིཡདེསནཱ ཝིཏྠཱརདེསནཱཏི ཏདུབྷཡཾ ཨཔེཀྑིཏྭཱ ནཱཏིསངྑེཔཝིཏྠཱརཱ དྷཱཏུདེསནཱ. ཨཐ ཝཱ སུཏྟནྟབྷཱཛནཱིཡེ ཝུཏྟདྷཱཏུདེསནཱ ཨཏིསངྑེཔདེསནཱ, ཨཱབྷཱདྷཱཏུཨཱདཱིནཾ ཨནེཀདྷཱཏུནཱནཱདྷཱཏུཨནྟཱནཾ ཝསེན དེསེཏབྦཱ ཨཏིཝིཏྠཱརདེསནཱཏི ཏདུབྷཡཾ ཨཔེཀྑིཏྭཱ ཨཡཾ ‘‘ནཱཏིསངྑེཔཝིཏྠཱརཱ’’ཏི.

བྷེརཱིཏལཾ ཝིཡ ཙཀྑུདྷཱཏུ སདྡསྶ ཝིཡ ཝིཉྙཱཎསྶ ནིསྶཡབྷཱཝཏོ. ཨེཏཱཧི ཙ ཨུཔམཱཧི ནིཛྫཱིཝཱནཾ བྷེརཱིཏལདཎྜཱདཱིནཾ སམཱཡོགེ ནིཛྫཱིཝཱནཾ སདྡཱདཱིནཾ ཝིཡ ནིཛྫཱིཝཱནཾ ཙཀྑུརཱུཔཱདཱིནཾ སམཱཡོགེ ནིཛྫཱིཝཱནཾ ཙཀྑུཝིཉྙཱཎཱདཱིནཾ པཝཏྟཱིཏི ཀཱརཎཕལཱནཾ དྷཱཏུམཏྟཏྟཱ ཀཱརཀཝེདཀབྷཱཝཝིརཧཾ དསྶེཏི.

པུརེཙརཱནུཙརཱ ཝིཡཱཏི ནིཛྫཱིཝསྶ ཀསྶཙི ཀེཙི ནིཛྫཱིཝཱ པུརེཙརཱནུཙརཱ ཝིཡཱཏི ཨཏྠོ. མནོདྷཱཏུཡེཝ ཝཱ ཨཏྟནོ ཁཎཾ ཨནཏིཝཏྟནྟཱི ཨཏྟནོ ཁཎཾ ཨནཏིཝཏྟནྟཱནཾཡེཝ ཙཀྑུཝིཉྙཱཎཱདཱིནཾ ཨཝིཛྫམཱནེཔི པུརེཙརཱནུཙརབྷཱཝེ པུབྦཀཱལཱཔརཀཱལཏཱཡ པུརེཙརཱནུཙརཱ ཝིཡ དཊྛབྦཱཏི ¶ ཨཏྠོ. སལླམིཝ སཱུལམིཝ ཏིཝིདྷདུཀྑཏཱསམཱཡོགཏོ དཊྛབྦོ. ཨཱསཱཡེཝ དུཀྑཾ ཨཱསཱདུཀྑཾ, ཨཱསཱཝིགྷཱཏཾ དུཀྑཾ ཝཱ. སཉྙཱ ཧི ཨབྷཱུཏཾ དུཀྑདུཀྑམྤི སུབྷཱདིཏོ སཉྫཱནནྟཱི ཏཾ ཨཱསཾ ཏསྶཱ ཙ ཝིགྷཱཏཾ ¶ ཨཱསཱིསིཏསུབྷཱདིཨསིདྡྷིཡཱ ཛནེཏཱིཏི. ཀམྨཔྤདྷཱནཱ སངྑཱརཱཏི ‘‘པཊིསནྡྷིཡཾ པཀྑིཔནཏོ’’ཏིཨཱདིམཱཧ. ཛཱཏིདུཀྑཱནུབནྡྷནཏོཏི ཨཏྟནཱ ནིབྦཏྟིཡམཱནེན ཛཱཏིདུཀྑེན ཨནུབནྡྷཏྟཱ. བྷཝཔཙྩཡཱ ཛཱཏི ཧི ཛཱཏིདུཀྑནྟི. པདུམཾ ཝིཡ དིསྶམཱནཾ ཁུརཙཀྐཾ ཝིཡ རཱུཔམྤི ཨིཏྠིཡཱདིབྷཱཝེན དིསྶམཱནཾ ནཱནཱཝིདྷུཔདྡཝཾ ཛནེཏི. སབྦེ ཨནཏྠཱ རཱགཱདཡོ ཛཱཏིཨཱདཡོ ཙ ཝིསབྷཱུཏཱ ཨསནྟཱ སཔྤཊིབྷཡཱ ཙཱཏི ཏཔྤཊིཔཀྑབྷཱུཏཏྟཱ ཨམཏཱདིཏོ དཊྛབྦཱ.

མུཉྩིཏྭཱཔི ཨཉྙཾ གཧེཏྭཱཝཱཏི ཨེཏེན མཀྐཊསྶ གཧིཏཾ སཱཁཾ མུཉྩིཏྭཱཔི ཨཱཀཱསེ ཋཱཏུཾ ཨསམཏྠཏཱ ཝིཡ གཧིཏཱརམྨཎཾ མུཉྩིཏྭཱཔི ཨཉྙཾ ཨགྒཧེཏྭཱ པཝཏྟིཏུཾ ཨསམཏྠཏཱཡ མཀྐཊསམཱནཏཾ དསྶེཏི. ཨཊྛིཝེདྷཝིདྡྷོཔི དམཐཾ ཨནུཔགཙྪནྟོ དུཊྛསྶོ ཨསྶཁལུ༹ངྐོ. རངྒགཏོ ནཊོ རངྒནཊོ.

༡༨༤. ཙཀྑུཉྩ པཊིཙྩ རཱུཔེ ཙཱཏིཨཱདིནཱ དྭཱརཱརམྨཎེསུ ཨེཀཝཙནབཧུཝཙནནིདྡེསཱ ཨེཀནཱནཱསནྟཱནགཏཱནཾ ཨེཀསནྟཱནགཏཝིཉྙཱཎཔཙྩཡབྷཱཝཏོ ཨེཀནཱནཱཛཱཏིཀཏྟཱ ཙ.

སབྦདྷམྨེསཱུཏི ཨེཏྠ སབྦ-སདྡོ ཨདྷིཀཱརཝསེན ཡཐཱཝུཏྟཝིཉྙཱཎསངྑཱཏེ ཨཱརམྨཎསངྑཱཏེ ཝཱ པདེསསབྦསྨིཾ ཏིཊྛཏཱིཏི དཊྛབྦོ. མནོཝིཉྙཱཎདྷཱཏུནིདྡེསེ ‘‘ཙཀྑུཝིཉྙཱཎདྷཱཏུཡཱ ཨུཔྤཛྫིཏྭཱ ནིརུདྡྷསམནནྟརཱ ཨུཔྤཛྫཏི མནོདྷཱཏུ, མནོདྷཱཏུཡཱཔི ཨུཔྤཛྫིཏྭཱ ནིརུདྡྷསམནནྟརཱ ཨུཔྤཛྫཏི ཙིཏྟ’’ནྟི ཙཀྑུཝིཉྙཱཎདྷཱཏཱནནྟརཾ མནོདྷཱཏུ ཝིཡ མནོདྷཱཏཱནནྟརམྤི ཨུཔྤཛྫཏི ཙིཏྟནྟི ཡཱཝ ཨཉྙཱ མནོདྷཱཏུ ཨུཔྤཛྫིསྶཏི, ཏཱཝ པཝཏྟཾ སབྦཾ ཙིཏྟཾ ཨེཀཏྟེན གཧེཏྭཱ ཝུཏྟནྟི ཨེཝམྤི ཨཏྠོ ལབྦྷཏི. ཨེཝཉྷི སཏི མནོཝིཉྙཱཎདྷཱཏཱནནྟརཾ ཨུཔྤནྣཱཡ མནོདྷཱཏུཡཱ མནོཝིཉྙཱཎདྷཱཏུབྷཱཝཔྤསངྒོ ན ཧོཏིཡེཝ. པཉྩཝིཉྙཱཎདྷཱཏུམནོདྷཱཏུཀྐམནིདསྶནཉྷི ཏབྦིདྷུརསབྷཱཝེན ཨུཔྤཏྟིཊྛཱནེན ཙ པརིཙྪིནྣསྶ ཙིཏྟསྶ མནོཝིཉྙཱཎདྷཱཏུབྷཱཝདསྶནཏྠཾ, ན ཨནནྟརུཔྤཏྟིམཏྟེནཱཏི ཏབྦིདྷུརསབྷཱཝེ ཨེཀཏྟཾ ཨུཔནེཏྭཱ དསྶནཾ ཡུཛྫཏི. ཨནུཔནཱིཏེཔི ཨེཀཏྟེ ཏབྦིདྷུརསབྷཱཝེ ཨེཀསྨིཾ དསྶིཏེ སཱམཉྙཝསེན ཨཉྙམྤི སབྦཾ ཏཾ སབྷཱཝཾ དསྶིཏཾ ཧོཏཱིཏི དཊྛབྦཾ. པི-སདྡེན མནོཝིཉྙཱཎདྷཱཏུསམྤིཎྜནེ ¶ ཙ སཏི ‘‘མནོཝིཉྙཱཎདྷཱཏུཡཱཔི སམནནྟརཱ ཨུཔྤཛྫཏི ཙིཏྟཾ…པེ… ཏཛྫཱ མནོཝིཉྙཱཎདྷཱཏཱུ’’ཏི ¶ མནོཝིཉྙཱཎདྷཱཏུགྒཧཎེན བྷཝངྒཱནནྟརཾ ཨུཔྤནྣཾ མནོདྷཱཏུཙིཏྟཾ ནིཝཏྟིཏཾ ཧོཏཱིཏི ཙེ? ན, ཏསྶཱ མནོཝིཉྙཱཎདྷཱཏུབྷཱཝཱསིདྡྷིཏོ. ན ཧི ཡཾ ཙོདཱིཡཏི, ཏདེཝ པརིཧཱརཱཡ ཧོཏཱིཏི.

མནོདྷཱཏུཡཱཔི མནོཝིཉྙཱཎདྷཱཏུཡཱཔཱིཏི མནདྭཡཝཙནེན དྭིནྣཾ ཨཉྙམཉྙཝིདྷུརསབྷཱཝཏཱ དསྶིཏཱཏི ཏེནེཝ མནོདྷཱཏཱཝཛྫནསྶ མནོཝིཉྙཱཎདྷཱཏུབྷཱཝོ ནིཝཏྟིཏོཏི དཊྛབྦོ. ཝུཏྟོ ཧི ཏསྶ མནོཝིཉྙཱཎདྷཱཏུཝིདྷུརོ མནོདྷཱཏུསབྷཱཝོ ‘‘སབྦདྷམྨེསུ ཝཱ པན པཋམསམནྣཱཧཱརོ ཨུཔྤཛྫཏཱི’’ཏིཨཱདིནཱ. སཱ སབྦཱཔཱིཏི ཨེཏཾ མུཁམཏྟནིདསྶནཾ. ན ཧི ཛཝནཔརིཡོསཱནཱ ཨེཝ མནོཝིཉྙཱཎདྷཱཏུ, ཏདཱརམྨཎཱདཱིནིཔི པན ཧོནྟིཡེཝཱཏི. ཨེཝཾ པཉྩཝིཉྙཱཎདྷཱཏུམནོདྷཱཏུཝིསིཊྛསབྷཱཝཝསེན སབྦཾ མནོཝིཉྙཱཎདྷཱཏུཾ དསྶེཏྭཱ པུན མནོདྭཱརཝསེན སཱཏིསཡཾ ཛཝནམནོཝིཉྙཱཎདྷཱཏུཾ དསྶེནྟོ ‘‘མནཉྩ པཊིཙྩཱ’’ཏིཨཱདིམཱཧ. ཡདི པན ཚནྣཾ དྭཱརཱནཾ ཝསེན ཛཝནཱཝསཱནཱནེཝ ཙིཏྟཱནི ཨིདྷ ‘‘མནོཝིཉྙཱཎདྷཱཏཱུ’’ཏི དསྶིཏཱནཱིཏི ཨཡམཏྠོ གཡ྄ཧེཡྻ, ཙུཏིཔཊིསནྡྷིབྷཝངྒཱནཾ ཨགྒཧིཏཏྟཱ སཱཝསེསཱ དེསནཱ ཨཱཔཛྫཏི, ཏསྨཱ ཡཐཱཝུཏྟེན ནཡེན ཨཏྠོ ཝེདིཏབྦོ. ཚདྭཱརིཀཙིཏྟེཧི ཝཱ སམཱནལཀྑཎཱནི ཨཉྙཱནིཔི ‘‘མནོཝིཉྙཱཎདྷཱཏཱུ’’ཏི དསྶིཏཱནཱིཏི ཝེདིཏབྦཱནི.

པཊིཙྩཱཏི ཨཱགཏཊྛཱནེཏི ཨེཏྠ ‘‘མནོ ཙ ནེསཾ གོཙརཝིསཡཾ པཙྩནུབྷོཏཱི’’ཏིཨཱདཱིསུ (མ. ནི. ༡.༤༥༥) ཝིསུཾ ཀཱཏུཾ ཡུཏྟཾ, ཨིདྷ པན ‘‘ཙཀྑུཉྩ པཊིཙྩཱ’’ཏིཨཱདཱིསུ ཙ-སདྡེན སམྤིཎྜེཏྭཱ ཨཱཝཛྫནསྶཔི ཙཀྑཱདིསནྣིསྶིཏཏཱཀརཎཾ ཝིཡ མནཉྩ པཊིཙྩཱཏི ཨཱགཏཊྛཱནེ མནོདྭཱརསངྑཱཏབྷཝངྒསནྣིསྶིཏམེཝ ཨཱཝཛྫནཾ ཀཱཏབྦནྟི ཨདྷིཔྤཱཡོ.

ཨབྷིདྷམྨབྷཱཛནཱིཡཝཎྞནཱ ནིཊྛིཏཱ.

༣. པཉྷཔུཙྪཀཝཎྞནཱ

པཉྷཔུཙྪཀཾ ཧེཊྛཱ ཝུཏྟནཡཏྟཱ ཨུཏྟཱནམེཝཱཏི.

པཉྷཔུཙྪཀཝཎྞནཱ ནིཊྛིཏཱ.

དྷཱཏུཝིབྷངྒཝཎྞནཱ ནིཊྛིཏཱ.

༤. སཙྩཝིབྷངྒོ

༡. སུཏྟནྟབྷཱཛནཱིཡཾ

ཨུདྡེསཝཎྞནཱ

༡༨༩. སཱསནཀྐམོཏི ¶ ¶ ཨརིཡསཙྩཱནི ཝུཙྩནྟི ཨརིཡསཙྩདེསནཱ ཝཱ. སཀལཉྷི སཱསནཾ བྷགཝཏོ ཝཙནཾ སཙྩཝིནིམུཏྟཾ ནཏྠཱིཏི སཙྩེསུ ཀམཏི, སཱིལསམཱདྷིཔཉྙཱསངྑཱཏཾ ཝཱ སཱསནཾ ཨེཏེསུ ཀམཏི, ཏསྨཱ ཀམཏི ཨེཏྠཱཏི ཀམོ, ཀིཾ ཀམཏི? སཱསནཾ, སཱསནསྶ ཀམོ སཱསནཀྐམོཏི སཙྩཱནི སཱསནཔཝཏྟིཊྛཱནཱནི ཝུཙྩནྟི, ཏཾདེསནཱ ཙ ཏབྦོཧཱརེནཱཏི.

ཏཐཱཏི ཏཾསབྷཱཝཱཝ. ཨཝིཏཐཱཏི ཨམུསཱསབྷཱཝཱ. ཨནཉྙཐཱཏི ཨཉྙཱཀཱརརཧིཏཱ. དུཀྑདུཀྑཏཱཏཾནིམིཏྟཏཱཧི ཨནིཊྛཏཱ པཱིལ༹ནཊྛོ, དྭིདྷཱཔི པརིདཧནཾ, ཀིལེསདཱཧསམཱཡོགོ ཝཱ སནྟཱཔཊྛོཏི ཨཡམེཏེསཾ ཝིསེསོ. པུགྒལཧིཾསནཾ ཝཱ པཱིལ༹ནཾ, ཨཏྟནོ ཨེཝ ཏིཁིཎབྷཱཝོ སནྟཱཔནཾ སནྟཱཔོཏི. ཨེཏྠ ཙ པཱིལ༹ནཊྛོ དུཀྑསྶ སརསེནེཝ ཨཱཝིབྷཝནཱཀཱརོ, ཨིཏརེ ཡཐཱཀྐམཾ སམུདཡམགྒནིརོདྷདསྶནེཧི ཨཱཝིབྷཝནཱཀཱརཱཏི ཨཡཾ ཙཏུནྣམྤི ཝིསེསོ. ཏཏྲཏཏྲཱབྷིནནྡནཝསེན བྱཱཔེཏྭཱ ཨཱུཧནཾ རཱསིཀརཎཾ དུཀྑནིབྦཏྟནཾ ཨཱཡཱུཧནཾ, སམུདཡཏོ ཨཱགཙྪཏཱིཏི ཝཱ ཨཱཡཾ, དུཀྑཾ. ཏསྶ ཨཱུཧནཾ པཝཏྟནཾ ཨཱཡཱུཧནཾ, སརསཱཝིབྷཱཝནཱཀཱརོ ཨེསོ. ནིདདཱཏི དུཀྑནྟི ནིདཱནཾ, ‘‘ཨིདཾ ཏཾ དུཀྑ’’ནྟི སམྤཊིཙྪཱཔེནྟཾ ཝིཡ སམུཊྛཱཔེཏཱིཏི ཨཏྠོ. དུཀྑདསྶནེན ཙཱཡཾ ནིདཱནཊྛོ ཨཱཝི བྷཝཏི. སཾཡོགཔལིབོདྷཊྛཱ ནིརོདྷམགྒདསྶནེཧི, ཏེ ཙ སཾསཱརསཾཡོཛནམགྒནིཝཱརཎཱཀཱརཱ དཊྛབྦཱ.

ནིསྶརནྟི ¶ ཨེཏྠ སཏྟཱ, སཡམེཝ ཝཱ ནིསྶཊཾ ཝིསཾཡུཏྟཾ སབྦསངྑཏེཧི སབྦུཔདྷིཔཊིནིསྶགྒབྷཱཝཏོཏི ནིསྶརཎཾ. ཨཡམསྶ སབྷཱཝེན ཨཱཝིབྷཝནཱཀཱརོ. ཝིཝེཀཱསངྑཏཱམཏཊྛཱ སམུདཡམགྒདུཀྑདསྶནཱཝིབྷཝནཱཀཱརཱ, སམུདཡཀྑཡཨཔྤཙྩཡཨཝིནཱསིཏཱ ཝཱ. སཾསཱརཏོ ནིགྒམནཾ ནིཡྻཱནཾ. ཨཡམསྶ སརསེན པཀཱསནཱཀཱརོ, ཨིཏརེ སམུདཡནིརོདྷདུཀྑདསྶནེཧི. ཏཏྠ པལིབོདྷུཔཙྪེདཝསེན ནིབྦཱནཱདྷིགམོཝ ནིབྦཱནནིམིཏྟཏཱ ¶ ཧེཏྭཊྛོ. པཉྙཱཔདྷཱནཏྟཱ མགྒསྶ ནིབྦཱནདསྶནཾ, ཙཏུསཙྩདསྶནཾ ཝཱ དསྶནཊྛོ. ཙཏུསཙྩདསྶནེ ཀིལེསདུཀྑསནྟཱཔཝཱུཔསམནེ ཙ ཨཱདྷིཔཙྩཾ ཀརོནྟི མགྒངྒདྷམྨཱ སམྤཡུཏྟདྷམྨེསཱུཏི སོ མགྒསྶ ཨདྷིཔཏེཡྻཊྛོཏི. ཝིསེསཏོ ཝཱ ཨཱརམྨཎཱདྷིཔཏིབྷཱུཏཱ མགྒངྒདྷམྨཱ ཧོནྟི ‘‘མགྒཱདྷིཔཏིནོ དྷམྨཱ’’ཏི ཝཙནཏོཏི སོ ཏེསཾ ཨཱཀཱརོ ཨདྷིཔཏེཡྻཊྛོ. ཨེཝམཱདི ཨཱཧཱཏི སམྦནྡྷོ. ཏཏྠ ཨབྷིསམཡཊྛོཏི ཨབྷིསམེཏབྦཊྛོ, ཨབྷིསམཡསྶ ཝཱ ཝིསཡབྷཱུཏོ ཨཏྠོ ཨབྷིསམཡཊྛོ, ཨབྷིསམཡསྶེཝ ཝཱ པཝཏྟིཨཱཀཱརོ ཨབྷིསམཡཊྛོ, སོ ཙེཏྠ ཨབྷིསམེཏབྦེན པཱིལ༹ནཱདིནཱ དསྶིཏོཏི དཊྛབྦོ.

ཀུཙྪིཏཾ ཁཾ དུཀྑཾ. ‘‘སམཱགམོ སམེཏ’’ནྟིཨཱདཱིསུ ཀེཝལསྶ ཨཱགམ-སདྡསྶ ཨེཏ-སདྡསྶ ཙ པཡོགེ སཾཡོགཏྠསྶ ཨནུཔལབྦྷནཏོ སཾ-སདྡསྶ ཙ པཡོགེ ཨུཔལབྦྷནཏོ ‘‘སཾཡོགཾ དཱིཔེཏཱི’’ཏི ཨཱཧ, ཨེཝཾ ‘‘ཨུཔྤནྣཾ ཨུདིཏ’’ནྟི ཨེཏྠཱཔི. ཨཡ-སདྡོ གཏིཨཏྠསིདྡྷོ ཧེཏུ-སདྡོ ཝིཡ ཀཱརཎཾ དཱིཔེཏི ཨཏྟནོ ཕལནིཔྥཱདནེན ཨཡཏི པཝཏྟཏི, ཨེཏི ཝཱ ཨེཏསྨཱ ཕལནྟི ཨཡོཏི, སཾཡོགེ ཨུཔྤཏྟིཀཱརཎཾ སམུདཡོཏི ཨེཏྠ ཝིསུཾ པཡུཛྫམཱནཱཔི ཨུཔསགྒ-སདྡཱ སདྷཱཏུཀཾ སཾཡོགཏྠཾ ཨུཔྤཱདཏྠཉྩ དཱིཔེནྟི ཀིརིཡཱཝིསེསཀཏྟཱཏི ཝེདིཏབྦཱ.

ཨབྷཱཝོ ཨེཏྠ རོདྷསྶཱཏི ནིརོདྷོཏི ཨེཏེན ནིབྦཱནསྶ དུཀྑཝིཝེཀབྷཱཝཾ དསྶེཏི. སམདྷིགཏེ ཏསྨིཾ ཏདདྷིགམཝཏོ པུགྒལསྶ རོདྷཱབྷཱཝོ པཝཏྟིསངྑཱཏསྶ རོདྷསྶ པཊིཔཀྑབྷཱུཏཱཡ ནིཝཏྟིཡཱ ཨདྷིགཏཏྟཱཏི ཨེཏསྨིཉྩཏྠེ ཨབྷཱཝོ ཨེཏསྨིཾ རོདྷསྶཱཏི ནིརོདྷོཨིཙྩེཝ པདསམཱསོ. དུཀྑཱབྷཱཝོ པནེཏྠ པུགྒལསྶ, ན ནིབྦཱནསྶེཝ. ཨནུཔྤཱདོ ཨེཝ ནིརོདྷོ ཨནུཔྤཱདནིརོདྷོ. ཨཱཡཏིབྷཝཱདཱིསུ ཨཔྤཝཏྟི, ན པན བྷངྒོཏི བྷངྒཝཱཙཀཾ ནིརོདྷ-སདྡཾ ནིཝཏྟེཏྭཱ ཨནུཔྤཱདཝཱཙཀཾ གཎྷཱཏི. ཨེཏསྨིཾ ཨཏྠེ ཀཱརཎེ ཕལོཔཙཱརཾ ཀཏྭཱ ནིརོདྷཔཙྩཡོ ནིརོདྷོཏི ཝུཏྟོ. པཊིཔདཱ ཙ ཧོཏི པུགྒལསྶ དུཀྑནིརོདྷཔྤཏྟིཡཱ. ནནུ སཱ ཨེཝ དུཀྑནིརོདྷཔྤཏྟཱིཏི ཏསྶཱ ཨེཝ སཱ པཊིཔདཱཏི ན ཡུཛྫཏཱིཏི? ན, པུགྒལཱདྷིགམསྶ ཡེཧི སོ ཨདྷིགཙྪཏི, ཏེསཾ ¶ ཀཱརཎབྷཱུཏདྷམྨཱནཉྩ པཏྟིབྷཱཝེན པཊིཔདཱབྷཱཝེན ཙ ཝུཏྟཏྟཱ. སཙྪིཀིརིཡཱསཙྪིཀརཎདྷམྨཱནཾ ཨཉྙཏྟཱབྷཱཝེཔི ཧི པུགྒལསཙྪིཀིརིཡདྷམྨབྷཱཝེཧི ནཱནཏྟཾ ཀཏྭཱ ནིདྡེསོ ¶ ཀཏོ. ཨཐ ཝཱ དུཀྑནིརོདྷཔྤཏྟིཡཱ ནིཊྛཱནཾ ཕལནྟི ཏསྶཱ དུཀྑནིརོདྷཔྤཏྟིཡཱ པཊིཔདཏཱ དཊྛབྦཱ.

བུདྡྷཱདཡོ ཨརིཡཱ པཊིཝིཛ྄ཛྷནྟཱིཏི ཨེཏྠ པཊིཝིདྡྷཀཱལེ པཝཏྟཾ བུདྡྷཱདིཝོཧཱརཾ ‘‘ཨགམཱ རཱཛགཧཾ བུདྡྷོ’’ཏིཨཱདཱིསུ (སུ. ནི. ༤༡༠) ཝིཡ པུརིམཀཱལེཔི ཨཱརོཔེཏྭཱ ‘‘བུདྡྷཱདཡོ’’ཏི ཝུཏྟཾ. ཏེ ཧི བུདྡྷཱདཡོ ཙཏཱུཧི མགྒེཧི པཊིཝིཛ྄ཛྷནྟཱིཏི. ཨརིཡཔཊིཝིཛ྄ཛྷིཏབྦཱནི སཙྩཱནི ཨརིཡསཙྩཱནཱིཏི ཙེཏྠ པུརིམཔདེ ཨུཏྟརཔདལོཔོ དཊྛབྦོ. ཨརིཡཱ ཨིམནྟི པཊིཝིཛ྄ཛྷིཏབྦཊྛེན ཨེཀཏྟཾ ཨུཔནེཏྭཱ ‘‘ཨིམ’’ནྟི ཝུཏྟཾ. ཏསྨཱཏི ཏཐཱགཏསྶ ཨརིཡཏྟཱ ཏསྶ སཙྩཱནཱིཏི ཨརིཡསཙྩཱནཱིཏི ཝུཙྩནྟཱིཏི ཨཏྠོ. ཏཐཱགཏེན ཧི སཡཾ ཨདྷིགཏཏྟཱ, ཏེནེཝ པཀཱསིཏཏྟཱ, ཏཏོ ཨེཝ ཙ ཨཉྙེཧི ཨདྷིགམནཱིཡཏྟཱ ཏཱནི ཏསྶ ཧོནྟཱིཏི. ཨརིཡབྷཱཝསིདྡྷིཏོཔཱིཏི ཨེཏྠ ཨརིཡསཱདྷཀཱནི སཙྩཱནི ཨརིཡསཙྩཱནཱིཏི པུབྦེ ཝིཡ ཨུཏྟརཔདལོཔོ དཊྛབྦོ. ཨརིཡཱནི སཙྩཱནཱིཏིཔཱིཏི ཨེཏྠ ཨཝིཏཐབྷཱཝེན ཨརཎཱིཡཏྟཱ ཨདྷིགནྟབྦཏྟཱ ཨརིཡཱནི, ཨརིཡཝོཧཱརོ ཝཱ ཨཡཾ ཨཝིསཾཝཱདཀོ ཨཝིཏཐརཱུཔོ དཊྛབྦོ.

བཱདྷནལཀྑཎནྟི ཨེཏྠ དུཀྑདུཀྑཏནྣིམིཏྟབྷཱཝོ བཱདྷནཱ, ཨུདཡབྦཡཔཱིལི༹ཏཏཱ ཝཱ. བྷཝཱདཱིསུ ཛཱཏིཨཱདིཝསེན ཙཀྑུརོགཱདིཝསེན ཙ ཨནེཀདྷཱ དུཀྑསྶ པཝཏྟནམེཝ པུགྒལསྶ སནྟཱཔནཾ, ཏདསྶ ཀིཙྩཾ རསོ. པཝཏྟིནིཝཏྟཱིསུ སཾསཱརམོཀྑེསུ པཝཏྟི ཧུཏྭཱ གཡ྄ཧཏཱིཏི པཝཏྟིཔཙྩུཔཊྛཱནཾ. པབྷཝཏི ཨེཏསྨཱ དུཀྑཾ པཊིསནྡྷིཡཾ ནིབྦཏྟཏི པུརིམབྷཝེན པཙྪིམབྷཝོ གྷཊིཏོ སཾཡུཏྟོ ཧུཏྭཱ པཝཏྟཏཱིཏི པབྷཝོ. ‘‘ཨེཝམྤི ཏཎྷཱནུསཡེ ཨནཱུཧཏེ ནིབྦཏྟཏཱི དུཀྑམིདཾ པུནཔྤུན’’ནྟི (དྷ. པ. ༣༣༨) ཨེཝཾ པུནཔྤུནཾ ཨུཔྤཱདནཾ ཨནུཔཙྪེདཀརཎཾ. བྷཝནིསྶརཎནིཝཱརཎཾ པལིབོདྷོ. རཱགཀྑཡཱདིབྷཱཝེན སབྦདུཀྑསནྟཏཱ སནྟི. ཨཙྩུཏིརསནྟི ཨཙྩུཏིསམྤཏྟིཀཾ. ཙཝནཾ ཝཱ ཀིཙྩནྟི ཏདབྷཱཝཾ ཀིཙྩམིཝ ཝོཧརིཏྭཱ ཨཙྩུཏིཀིཙྩནྟི ཨཏྠོ. ཨཙཝནཉྩ སབྷཱཝསྶཱཔརིཙྩཛནཾ ཨཝིཀཱརཏཱ དཊྛབྦཱ. པཉྩཀྑནྡྷནིམིཏྟསུཉྙཏཱཡ ཨཝིགྒཧཾ ཧུཏྭཱ གཡ྄ཧཏཱིཏི ཨནིམིཏྟཔཙྩུཔཊྛཱནཾ. ཨནུསཡུཔཙྪེདནཝསེན སཾསཱརཙཱརཀཏོ ནིགྒམནཱུཔཱཡབྷཱཝོ ནིཡྻཱནཾ. ནིམིཏྟཏོ པཝཏྟཏོ ཙ ཙིཏྟསྶ ཝུཊྛཱནཾ ཧུཏྭཱ གཡ྄ཧཏཱིཏི ཝུཊྛཱནཔཙྩུཔཊྛཱནཾ.

ཨསུཝཎྞཱདི ¶ ¶ སུཝཎྞཱདི ཝིཡ དིསྶམཱནཾ མཱཡཱཏི ཝཏྠུསབྦྷཱཝཱ ཏསྶཱ ཝིཔརཱིཏཏཱ ཝུཏྟཱ. ཨུདཀཾ ཝིཡ དིསྶམཱནཱ པན མརཱིཙི ཨུཔགཏཱནཾ ཏུཙྪཱ ཧོཏི, ཝཏྠུམཏྟམྤི ཏསྶཱ ན དིསྶཏཱིཏི ཝིསཾཝཱདིཀཱ ཝུཏྟཱ. མརཱིཙིམཱཡཱཨཏྟཱནཾ ཝིཔཀྑོ བྷཱཝོ ཏཙྪཱཝིཔརཱིཏབྷཱུཏབྷཱཝོ. ཨརིཡཉཱཎསྶཱཏི ཨཝིཏཐགཱཧཀསྶ ཉཱཎསྶ, ཏེན པཊིཝེདྷཔཙྩཝེཀྑཎཱནི གཡ྄ཧནྟི, ཏེསཉྩ གོཙརབྷཱཝོ པཊིཝིཛ྄ཛྷིཏབྦཏཱཨཱརམྨཎབྷཱཝོ ཙ དཊྛབྦོ. ཨགྒིལཀྑཎཾ ཨུཎྷཏྟཾ. ཏཉྷི ཀཏྠཙི ཀཊྛཱདིཨུཔཱདཱནབྷེདེཔི ཝིསཾཝཱདཀཾ ཝིཔརཱིཏཾ ཨབྷཱུཏཾ ཝཱ ཀདཱཙི ན ཧོཏི. ‘‘བྱཱདྷིདྷམྨཱ ཛརཱདྷམྨཱ, ཨཐོ མརཎདྷམྨིནོ’’ཏི (ཨ. ནི. ༣.༣༩; ༥.༥༧) ཨེཏྠ ཝུཏྟཱ ཛཱཏིཨཱདིཀཱ ལོཀཔཀཏི. མནུསྶཱནཾ ཨུདྡྷཾ དཱིགྷཏཱ, ཨེཀཙྩཱནཾ ཏིརཙྪཱནཱནཾ ཏིརིཡཾ དཱིགྷཏཱ, ཝུདྡྷིནིཊྛཾ པཏྟཱནཾ པུན ཨཝཌྜྷནཾ ཨེཝམཱདིཀཱ ཙཱཏི ཝདནྟི. ཏཙྪཱཝིཔརཱིཏབྷཱུཏབྷཱཝེསུ པཙྪིམོ ཏཐཏཱ, པཋམོ ཨཝིཏཐཏཱ, མཛ྄ཛྷིམོ ཨནཉྙཐཏཱཏི ཨཡམེཏེསཾ ཝིསེསོ.

དུཀྑཱ ཨཉྙཾ ན བཱདྷཀནྟི ཀསྨཱ ཝུཏྟཾ, ནནུ ཏཎྷཱཔི ཛཱཏི ཝིཡ དུཀྑནིམིཏྟཏཱཡ བཱདྷིཀཱཏི? ན, བཱདྷཀཔབྷཝབྷཱཝེན ཝིསུཾ གཧིཏཏྟཱ. ཛཱཏིཨཱདཱིནཾ ཝིཡ ཝཱ དུཀྑསྶ ཨདྷིཊྛཱནབྷཱཝོ དུཀྑདུཀྑཏཱ ཙ བཱདྷཀཏཱ, ན དུཀྑསྶ པབྷཝཀཏཱཏི ནཏྠི ཏཎྷཱཡ པབྷཝཀབྷཱཝེན གཧིཏཱཡ བཱདྷཀཏྟཔྤསངྒོ. ཏེནཱཧ ‘‘དུཀྑཱ ཨཉྙཾ ན བཱདྷཀ’’ནྟི. བཱདྷཀཏྟནིཡཱམེནཱཏི དུཀྑཾ བཱདྷཀམེཝ, དུཀྑམེཝ བཱདྷཀནྟི ཨེཝཾ དྭིདྷཱཔི བཱདྷཀཏྟཱཝདྷཱརཎེནཱཏི ཨཏྠོ. ཏཾ ཝིནཱ ནཱཉྙཏོཏི སཏིཔི ཨཝསེསཀིལེསཨཝསེསཱཀུསལསཱསཝཀུསལམཱུལཱཝསེསསཱསཝཀུསལདྷམྨཱནཾ དུཀྑཧེཏུབྷཱཝེ ན ཏཎྷཱཡ ཝིནཱ ཏེསཾ དུཀྑཧེཏུབྷཱཝོ ཨཏྠི, ཏེཧི པན ཝིནཱཔི ཏཎྷཱཡ དུཀྑཧེཏུབྷཱཝོ ཨཏྠི ཀུསལེཧི ཝིནཱ ཨཀུསལེཧི, རཱུཔཱཝཙརཱདཱིཧི ཝིནཱ ཀཱམཱཝཙརཱདཱིཧི ཙ ཏཎྷཱཡ དུཀྑནིབྦཏྟཀཏྟཱ. ཏཙྪནིཡྻཱནབྷཱཝཏྟཱཏི དྭིདྷཱཔི ནིཡམེན ཏཙྪོ ནིཡྻཱནབྷཱཝོ ཨེཏསྶ, ན མིཙྪཱམགྒསྶ ཝིཡ ཝིཔརཱིཏཏཱཡ, ལོཀིཡམགྒསྶ ཝིཡ ཝཱ ཨནེཀནྟིཀཏཱཡ ཨཏཙྪོཏི ཏཙྪནིཡྻཱནབྷཱཝོ, མགྒོ. ཏསྶ བྷཱཝོ ཏཙྪནིཡྻཱནབྷཱཝཏྟཾ, ཏསྨཱ ཏཙྪནིཡྻཱནབྷཱཝཏྟཱ. སབྦཏྠ དྭིདྷཱཔི ནིཡམེན ཏཙྪཱཝིཔརཱིཏབྷཱུཏབྷཱཝོ ཝུཏྟོཏི ཨཱཧ ‘‘ཨིཏི ཏཙྪཱཝིཔལླཱསཱ’’ཏིཨཱདི.

སཙྩ-སདྡསྶ ¶ སམྦྷཝནྟཱནཾ ཨཏྠཱནཾ ཨུདྡྷརཎཾ, སམྦྷཝནྟེ ཝཱ ཨཏྠེ ཝཏྭཱ ཨདྷིཔྤེཏཏྠསྶ ཨུདྡྷརཎཾ ཨཏྠུདྡྷཱརོ. ཝིརཏིསཙྩེཏི མུསཱཝཱདཝིརཏིཡཾ. ན ཧི ཨཉྙཝིརཏཱིསུ སཙྩ-སདྡོ ནིརུལ༹ྷོཏི. ‘‘ཨིདམེཝ སཙྩཾ, མོགྷམཉྙ’’ནྟི གཧིཏཱ དིཊྛི དིཊྛིསཙྩཾ. ‘‘ཨམོསདྷམྨཾ ནིབྦཱནཾ ¶ , ཏདརིཡཱ སཙྩཏོ ཝིདཱུ’’ཏི (སུ. ནི. ༧༦༣) ཨམོསདྷམྨཏྟཱ ནིབྦཱནཾ པརམཏྠསཙྩཾ ཝུཏྟཾ. ཏསྶ པན ཏཾསམྤཱཔཀསྶ ཙ མགྒསྶ པཛཱནནཱ པཊིཝེདྷོ ཨཝིཝཱདཀཱརཎནྟི དྭཡམྤི ‘‘ཨེཀཉྷི སཙྩཾ ན དུཏིཡམཏྠི, ཡསྨིཾ པཛཱ ནོ ཝིཝདེ པཛཱན’’ནྟི (སུ. ནི. ༨༩༠; མཧཱནི. ༡༡༩) མིསྶཱ གཱཐཱཡ སཙྩནྟི ཝུཏྟཾ.

ནེཏཾ དུཀྑཾ ཨརིཡསཙྩནྟི ཨཱགཙྪེཡྻ, ནེཏཾ ཋཱནཾ ཝིཛྫཏཱིཏི ཨེཏེན ཛཱཏིཨཱདཱིནཾ དུཀྑཨརིཡསཙྩབྷཱཝེ ཨཝིཔརཱིཏཏཾ དསྶེཏི, ཨཉྙཾ དུཀྑཾ ཨརིཡསཙྩནྟི ཨཱགཙྪེཡྻ, ནེཏཾ ཋཱནཾ ཝིཛྫཏཱིཏི ཨིམིནཱ དུཀྑཨརིཡསཙྩབྷཱཝསྶ ཛཱཏིཨཱདཱིསུ ནིཡཏཏཾ. སཙེཔི ཀཐཉྩི ཀོཙི ཨེཝཾཙིཏྟོ ཨཱགཙྪེཡྻ, པཉྙཱཔནེ པན སཧདྷམྨེན པཉྙཱཔནེ ཨཏྟནོ ཝཱདསྶ ཙ པཉྙཱཔནེ སམཏྠོ ནཏྠཱིཏི དསྶེཏུཾ ‘‘ཨཧམེཏཾ…པེ… པཉྙཱཔེསྶཱམཱིཏི ཨཱགཙྪེཡྻ, ནེཏཾ ཋཱནཾ ཝིཛྫཏཱི’’ཏི ཝུཏྟཾ. ཛཱཏིཨཱདཱིནཾ ཨནཉྙཐཏཱ ཨཉྙསྶ ཙ ཏཐཱབྷཱུཏསྶ ཨབྷཱཝོཡེཝེཏྠ ཋཱནཱབྷཱཝོ. སཙེཔི ཀོཙི ཨཱགཙྪེཡྻ, ཨཱགཙྪཏུ, ཋཱནཾ པན ནཏྠཱིཏི ཨཡམེཏྠ སུཏྟཏྠོ. ཨེས ནཡོ དུཏིཡསུཏྟེཔི. ཏཏྠ པན སམྤཏྟཏཱ པཙྩཀྑཏཱ ཙ པཋམཏཱ, ཏཾནིམིཏྟཏཱ དུཏིཡཏཱ, ཏདུཔསམཏཱ ཏཏིཡཏཱ, ཏཾསམྤཱཔཀཏཱ ཙཏུཏྠཏཱཏི དཊྛབྦཱ.

ནིབྦུཏིཀཱམེན པརིཛཱནནཱདཱིཧི ཨཉྙཾ ཀིཉྩི ཀིཙྩཾ ཀཱཏབྦཾ ནཏྠི, དྷམྨཉཱཎཀིཙྩཾ ཝཱ ཨིཏོ ཨཉྙཾ ནཏྠི, པརིཉྙེཡྻཱདཱིནི ཙ ཨེཏཔྤརམཱནེཝཱཏི ཙཏྟཱརེཝ ཝུཏྟཱནི. ཏཎྷཱཡ ཨཱདཱིནཝདསྶཱཝཱིནཾ ཝསེན ‘‘ཏཎྷཱཝཏྠུཨཱདཱིནཾ ཨེཏཾཔརམཏཱཡཱ’’ཏི ཝུཏྟཾ. ཏཐཱ ཨཱལཡེ པཉྩཀཱམགུཎསངྑཱཏེ, སཀལཝཏྠུཀཱམསངྑཱཏེ, བྷཝཏྟཡསངྑཱཏེ ཝཱ དུཀྑེ དོསདསྶཱཝཱིནཾ ཝསེན ‘‘ཨཱལཡཱདཱིནཾ ཨེཏཾཔརམཏཱཡཱ’’ཏི ཝུཏྟཾ.

སཧེཏུཀེན དུཀྑེནཱཏི ཨེཏེན དུཀྑསྶ ཨབྦོཙྪིནྣཏཱདསྶནེན ཨཏིསཾཝེགཝཏྠུཏཾ དསྶེཏི.

ན ¶ པཊིཝེདྷཉཱཎཾ ཝིཡ སཀིདེཝ བུཛ྄ཛྷཏི, ཨཐ ཁོ ཨནུ ཨནུ བུཛ྄ཛྷནཏོ ཨནུབོདྷོ, ཨནུསྶཝཱཀཱརཔརིཝིཏཀྐདིཊྛིནིཛ྄ཛྷཱནཀྑནྟིཨནུགཏོ ཝཱ བོདྷོ ཨནུབོདྷོ. ན ཧི སོ པཙྩཀྑཏོ བུཛ྄ཛྷཏི, ཨནུསྶཝཱདིཝསེན པན ཀཔྤེཏྭཱ གཎྷཱཏཱིཏི. ཀིཙྩཏོཏི པརིཛཱནནཱདིཏོ. ཏཾཀིཙྩཀརཎེནེཝ ཧི ཏཱནི ཏསྶ པཱཀཊཱནི. ཝིཝཊྚཱནུཔསྶནཱཡ ཧི སངྑཱརེཧི པཏིལཱིཡམཱནམཱནསསྶ ཨུཔྤཛྫམཱནཾ མགྒཉཱཎཾ ཝིསངྑཱརཾ དུཀྑནིསྶརཎཾ ཨཱརམྨཎཾ ཀཏྭཱ ¶ དུཀྑཾ པརིཙྪིནྡཏི, དུཀྑགཏཉྩ ཏཎྷཾ པཛཧཏི, ནིརོདྷཉྩ ཕུསཏི ཨཱདིཙྩོ ཝིཡ པབྷཱཡ, སམྨཱསངྐཔྤཱདཱིཧི སཧ ཨུཔྤནྣཾ ཏཾ མགྒཾ བྷཱཝེཏི, ན ཙ སངྑཱརེ ཨམུཉྩིཏྭཱ པཝཏྟམཱནེན ཉཱཎེན ཨེཏཾ སབྦཾ སཀྐཱ ཀཱཏུཾ ནིམིཏྟཔཝཏྟེཧི ཨཝུཊྛིཏཏྟཱ, ཏསྨཱ ཨེཏཱནི ཀིཙྩཱནི ཀརོནྟཾ ཏཾ ཉཱཎཾ དུཀྑཱདཱིནི ཝིབྷཱཝེཏི ཏཏྠ སམྨོཧནིཝཏྟནེནཱཏི ‘‘ཙཏྟཱརིཔི སཙྩཱནི པསྶཏཱི’’ཏི ཝུཏྟཾ.

དུཀྑསམུདཡམྤི སོ པསྶཏཱིཏི ཀཱལནྟརདསྶནཾ སནྡྷཱཡ ཝུཏྟནྟི ཙེ? ན, ‘‘ཡོ ནུ ཁོ, ཨཱཝུསོ, དུཀྑཾ པསྶཏི, དུཀྑསམུདཡམྤི སོ པསྶཏཱི’’ཏིཨཱདིནཱ (སཾ. ནི. ༥.༡༡༠༠) ཨེཀདསྶིནོ ཨཉྙཏྟཡདསྶིཏཱཝིཙཱརཎཱཡ ཏསྶཱ སཱདྷནཏྠཾ གཝཾཔཏིཏྠེརེན ཨིམསྶ སུཏྟསྶ ཨཱཧརིཏཏྟཱ པཙྩེཀཉྩ སཙྩེསུ དིསྶམཱནེསུ ཨཉྙཏྟཡདསྶནསྶ ཡོཛིཏཏྟཱ. ཨཉྙཐཱ ཨནུཔུབྦཱབྷིསམཡེ པུརིམདིཊྛསྶ པཙྪཱ ཨདསྶནཏོ སམུདཡཱདིདསྶིནོ དུཀྑཱདིདསྶནཏཱ ན ཡོཛེཏབྦཱ སིཡཱཏི. སུདྡྷསངྑཱརཔུཉྫམཏྟདསྶནཏོ སཀྐཱཡདིཊྛིཔརིཡུཊྛཱནཾ ནིཝཱརེཏི. ‘‘ལོཀསམུདཡཾ ཁོ, ཀཙྩཱན, ཡཐཱབྷཱུཏཾ སམྨཔྤཉྙཱཡ པསྶཏོ ཡཱ ལོཀེ ནཏྠིཏཱ, སཱ ན ཧོཏཱི’’ཏི ཝཙནཏོ སམུདཡདསྶནཾ ཧེཏུཕལཔྤབནྡྷཱཝིཙྪེདདསྶནཝསེན ཨུཙྪེདདིཊྛིཔརིཡུཊྛཱནཾ ནིཝཏྟེཏི. ‘‘ལོཀནིརོདྷཾ ཁོ…པེ… པསྶཏོ ཡཱ ལོཀེ ཨཏྠིཏཱ, སཱ ན ཧོཏཱི’’ཏི (སཾ. ནི. ༢.༡༥) ཝཙནཏོ ནིརོདྷདསྶནཾ ཧེཏུནིརོདྷཱ ཕལནིརོདྷདསྶནཝསེན སསྶཏདིཊྛིཔརིཡུཊྛཱནཾ ནིཝཱརེཏི. ཨཏྟཀཱརསྶ པཙྩཀྑདསྶནཏོ མགྒདསྶནེན ‘‘ནཏྠི ཨཏྟཀཱརེ, ནཏྠི པརཀཱརེ, ནཏྠི པུརིསཀཱརེ’’ཏིཨཱདིཀཾ (དཱི. ནི. ༡.༡༦༨) ཨཀིརིཡདིཊྛིཔརིཡུཊྛཱནཾ པཛཧཏི. ‘‘ནཏྠི ཧེཏུ, ནཏྠི པཙྩཡོ སཏྟཱནཾ སཾཀིལེསཱཡ, ཨཧེཏཱུ ཨཔྤཙྩཡཱ སཏྟཱ སཾཀིལིསྶནྟི. ནཏྠི ཧེཏུ…པེ… ཝིསུདྡྷིཡཱ, ཨཧེཏཱུ ཨཔྤཙྩཡཱ སཏྟཱ ཝིསུཛ྄ཛྷནྟཱི’’ཏིཨཱདིཀཱ ཨཧེཏུཀདིཊྛི ཙ ཨིདྷ ཨཀིརིཡདིཊྛིགྒཧཎེན གཧིཏཱཏི དཊྛབྦཱ. སཱཔི ཧི ཝིསུདྡྷིམགྒདསྶནེན པཧཱིཡཏཱིཏི.

དུཀྑཉཱཎཾ ¶ སམུདཡཕལསྶ དུཀྑསྶ ཨདྷུཝཱདིབྷཱཝཾ པསྶཏཱིཏི ཕལེ ཝིཔྤཊིཔཏྟིཾ ནིཝཏྟེཏི. ‘‘ཨིསྶརོ ལོཀཾ པཝཏྟེཏི ནིཝཏྟེཏི ཙཱ’’ཏི ཨིསྶརཀཱརཎིནོ ཝདནྟི, པདྷཱནཏོ ཨཱཝི བྷཝཏི, ཏཏྠེཝ ཙ པཏིལཱིཡཏཱིཏི པདྷཱནཀཱརཎིནོ. ‘‘ཀཱལཝསེནེཝ པཝཏྟཏི ནིཝཏྟཏི ཙཱ’’ཏི ཀཱལཝཱདིནོ. ‘‘སབྷཱཝེནེཝ སམྦྷོཏི ཝིབྷོཏི ཙཱ’’ཏི སབྷཱཝཝཱདིནོ. ཨཱདི-སདྡེན ཨཎཱུཧི ལོཀོ པཝཏྟཏི, སབྦཾ པུབྦེཀཏཧེཏཱུཏི ཨེཝམཱདི ཨཀཱརཎཔརིགྒཧོ དཊྛབྦོ. རཱམུདཀཱལཱ༹རཱདཱིནཾ ཝིཡ ཨརཱུཔལོཀེ, ནིགཎྛཱདཱིནཾ ཝིཡ ལོཀཐུཔིཀཱཡ ཨཔཝགྒོ མོཀྑོཏི གཧཎཾ ¶ . ཨཱདི-སདྡེན པདྷཱནསྶ ཨཔྤཝཏྟི, གུཎཝིཡུཏྟསྶ ཨཏྟནོ སཀཏྟནི ཨཝཊྛཱནཾ, བྲཧྨུནཱ སལོཀཏཱ, དིཊྛདྷམྨནིབྦཱནཝཱདཱཏི ཨེཝམཱདིགྒཧཎཉྩ དཊྛབྦཾ. ཨེཏྠ གུཎཝིཡུཏྟསྶཱཏི བུདྡྷིསུཁདུཀྑཨིཙྪཱདོསཔཡཏྟདྷམྨཱདྷམྨསངྑཱརེཧི ནཝཧི ཨཏྟགུཎེཧི ཝིཔྤཡུཏྟསྶཱཏི ཀཎཱདབྷཀྑཝཱདོ. ཨིནྡྲིཡཏཔྤནཔུཏྟམུཁདསྶནཱདཱིཧི ཝིནཱ ཨཔཝགྒོ ནཏྠཱིཏི གཧེཏྭཱ ཏཐཱཔཝཏྟནཾ ཀཱམསུཁལླིཀཱནུཡོགོ.

ཨཛ྄ཛྷཏྟིཀབཱཧིརེསུ དྭཱདསསུ ཨཱཡཏནེསུ ཀཱམབྷཝཝིབྷཝཏཎྷཱཝསེན དྭཱདས ཏིཀཱ ཚཏྟིཾས ཏཎྷཱཝིཙརིཏཱནི. ཁུདྡཀཝཏྠུཝིབྷངྒེ ཝཱ ཨཱགཏནཡེན ཀཱལཝིབྷཱགཾ ཨནཱམསིཏྭཱ ཝུཏྟཱནི. ཝཱིམཾསིདྡྷིཔཱདཱདཡོ བོདྷིཔཀྑིཡཱ ཀིཙྩནཱནཏྟེན ཝུཏྟཱ, ཨཏྠཏོ ཨེཀཏྟཱ སམྨཱདིཊྛིམུཁེན ཏཏྠ ཨནྟོགདྷཱ. ཏཡོ ནེཀྑམྨཝིཏཀྐཱདཡོཏི ལོཀིཡཀྑཎེ ཨལོབྷམེཏྟཱཀརུཎཱསམྤཡོགཝསེན བྷིནྣཱ མགྒཀྑཎེ ལོབྷབྱཱཔཱདཝིཧིཾསཱསམུཙྪེདཝསེན ཏཡོཏི ཨེཀོཔི ཝུཏྟོ. ཨེས ནཡོ སམྨཱཝཱཙཱདཱིསུ. ཨཔྤིཙྪཏཱསནྟུཊྛིཏཱནཾ པན བྷཱཝེ སམྨཱཨཱཛཱིཝསམྦྷཝཏོ ཏེན ཏེསཾ སངྒཧོ དཊྛབྦོ. བྷཝནྟརེཔི ཛཱིཝིཏཧེཏུཔི ཨརིཡེཧི ཨཝཱིཏིཀྐམནཱིཡཏྟཱ ཨརིཡཀནྟཱནཾ སམྨཱཝཱཙཱདིསཱིལཱནཾ གཧཎེན ཡེན སདྡྷཱཧཏྠེན ཏཱནི པརིགྒཧེཏབྦཱནི, སོ སདྡྷཱཧཏྠོ གཧིཏོཡེཝ ཧོཏཱིཏི ཏཏོ ཨནཉྙཱནི སདྡྷིནྡྲིཡསདྡྷཱབལཱནི ཏཏྠ ཨནྟོགདྷཱནི ཧོནྟི. ཏེསཾ ཨཏྠིཏཱཡཱཏི སདྡྷིནྡྲིཡསདྡྷཱབལཚནྡིདྡྷིཔཱདཱནཾ ཨཏྠིཏཱཡ སཱིལསྶ ཨཏྠིབྷཱཝཏོ ཏིཝིདྷེནཔི སཱིལེན ཏེ ཏཡོཔི གཧིཏཱཏི ཏཏྠ ཨནྟོགདྷཱ. ཙིཏྟསམཱདྷཱིཏི ཙིཏྟིདྡྷིཔཱདཾ ཝདཏི. ‘‘ཙིཏྟཾ པཉྙཉྩ བྷཱཝཡ’’ནྟི (སཾ. ནི. ༡.༢༣, ༡༩༢) ཧི ཙིཏྟམུཁེན སམཱདྷི ¶ ཝུཏྟོཏི སམཱདྷིམུཁེན ཙིཏྟམྤི ཝཏྟབྦཏཾ ཨརཧཏི. ཙིཏྟིདྡྷིཔཱདབྷཱཝནཱཡ པན སམཱདྷིཔི ཨདྷིམཏྟོ ཧོཏཱིཏི ཝཱིམཾསིདྡྷིཔཱདཱདིཝཙནཾ ཝིཡ ཙིཏྟིདྡྷིཔཱདཝཙནཾ ཨཝཏྭཱ ཨིདྷ ‘‘ཙིཏྟསམཱདྷཱི’’ཏི ཝུཏྟཾ. ‘‘པཱིཏིམནསྶ ཀཱཡོ པསྶམྦྷཏི, པསྶདྡྷཀཱཡོ སུཁཾ ཝེདེཏི, སུཁིནོ ཙིཏྟཾ སམཱདྷིཡཏཱི’’ཏི (དཱི. ནི. ༣.༣༥༩; སཾ. ནི. ༥.༣༧༦; ཨ. ནི. ༣.༩༦; ༡༡.༡༢) ཝཙནཏོ སམཱདྷིཨུཔཀཱརཱ པཱིཏིཔསྶདྡྷིཡོ, ཏསྨཱ སམཱདྷིགྒཧཎེན གཧིཏཱ, ཨུཔེཀྑཱ པན སམཱདྷིཨུཔཀཱརཀཏོ ཏཾསདིསཀིཙྩཏོ ཙ, ཏསྨཱ སམྨཱསམཱདྷིཝསེན ཨེཏེསཾ ཨནྟོགདྷཏཱ དཊྛབྦཱ.

བྷཱརོ ཝིཡ ཝིགྷཱཏཀཏྟཱ. དུབྦྷིཀྑམིཝ བཱདྷཀཏྟཱ. ‘‘ནིབྦཱནཔརམཾ སུཁ’’ནྟི (མ. ནི. ༢.༢༡༥, ༢༡༧; དྷ. པ. ༢༠༣, ༢༠༤) སུཁབྷཱཝཏོ ¶ སུབྷིཀྑམིཝ. ཨནིཊྛབྷཱཝཏོ སཱསངྐསཔྤཊིབྷཡཏོ ཙ དུཀྑཾ ཝེརཱིཝིསརུཀྑབྷཡཨོརིམཏཱིརཱུཔམཾ.

ཏཐཏྠེནཱཏི ཏཐསབྷཱཝེན, པརིཉྙེཡྻབྷཱཝེནཱཏི ཨཏྠོ. ཨེཏེན ཨརིཡསཙྩདྭཡཾ སིཡཱ དུཀྑཾ, ན ཨརིཡསཙྩཾ, སིཡཱ ཨརིཡསཙྩཾ, ན དུཀྑནྟི ཨིམམཏྠཾ དསྶེཏི. ཨརིཡསཙྩ-སདྡཔརཱ ཧི དུཀྑཱདིསདྡཱ པརིཉྙེཡྻཱདིབྷཱཝཾ ཝདནྟི. ཏེནེཝ ཨརིཡསཙྩ-སདྡཱནཔེཀྑཾ དུཀྑ-སདྡཾ སནྡྷཱཡ མགྒསམྤཡུཏྟསཱམཉྙཕལདྷམྨཱནཾ ཨཱདིཔདསངྒཧོ ཝུཏྟོ, ཏདཔེཀྑཾ སནྡྷཱཡ ཙཏུཏྠཔདསངྒཧོ. སམུདཡཱདཱིསུ ཨཝསེསཀིལེསཱདཡོ སམུདཡོ, ན ཨརིཡསཙྩཾ, སངྑཱརནིརོདྷོ ནིརོདྷསམཱཔཏྟི ཙ ནིརོདྷོ, ན ཨརིཡསཙྩཾ, ཨརིཡམགྒཏོ ཨཉྙཱནི མགྒངྒཱནི མགྒོ, ན ཨརིཡསཙྩནྟི ཨིམིནཱ ནཡེན ཡོཛནཱ ཀཱཏབྦཱ. དུཀྑཾ ཝེདནཱིཡམྤི སནྟཾ ཝེདཀརཧིཏཾ, ཀེཝལཾ པན ཏསྨིཾ ཨཏྟནོ པཙྩཡེཧི པཝཏྟམཱནེ དུཀྑཾ ཝེདེཏཱིཏི ཝོཧཱརམཏྟཾ ཧོཏི. ཨེཝཾ ཨིཏརེསུཔི.

ཀིརིཡཱཝ ཝིཛྫཏཱིཏི སམུདཡམེཝ ཝདཏི, ཏསྶ ཝཱ དུཀྑཔཙྩཡབྷཱཝཾ. མགྒོ ཨཏྠཱིཏི ཝཏྟབྦེ ‘‘མགྒམཏྠཱི’’ཏི ཨོཀཱརསྶ ཨབྷཱཝོ ཀཏོཏི དཊྛབྦོ. གམཀོཏི གནྟཱ. སཱསཝཏཱ ཨསུབྷཏཱཏི ཀཏྭཱ ནིརོདྷམགྒཱ སུབྷཱ ཨེཝ. དུཀྑཱདཱིནཾ པརིཡཱཡེན སམུདཡཱདིབྷཱཝོ ཙ ཨཏྠི, ན པན ནིརོདྷབྷཱཝོ, ནིརོདྷསྶ ཝཱ དུཀྑཱདིབྷཱཝོཏི ན ཨཉྙམཉྙསམངྒིཏཱཏི ཨཱཧ ‘‘ནིརོདྷསུཉྙཱནི ཝཱ’’ཏིཨཱདི. སམུདཡེ དུཀྑསྶཱབྷཱཝཏོཏི པོནོབྦྷཝིཀཱཡ ཏཎྷཱཡ པུནབྦྷཝསྶ ཨབྷཱཝཏོ. ཡཐཱ ཝཱ པཀཏིཝཱདཱིནཾ ཝིཀཱརཱཝིབྷཱཝཏོ པུབྦེ པཊིཔྤལཱིནཱ ཙ པཀཏིབྷཱཝེནེཝ ཏིཊྛནྟི, ན ཨེཝཾ ¶ སམུདཡསམྤཡུཏྟམྤི དུཀྑཾ སམུདཡབྷཱཝེན ཏིཊྛཏཱིཏི ཨཱཧ ‘‘སམུདཡེ དུཀྑསྶཱབྷཱཝཏོ’’ཏི. ཡཐཱ ཨཝིབྷཏྟེཧི ཝིཀཱརེཧི མཧནྟཱ ཝིསེསིནྡྲིཡབྷཱུཏཝིསེསེཧི པཀཏིབྷཱཝེནེཝ ཋིཏེཧི པཀཏི སགབྦྷཱ པཀཏིཝཱདཱིནཾ, ཨེཝཾ ན ཕལེན སགབྦྷོ ཧེཏཱུཏི ཨཏྠོ. དུཀྑསམུདཡཱནཾ ནིརོདྷམགྒཱནཉྩ ཨསམཝཱཡཱཏི ཨེཏཾ ཝིཝརནྟོ ཨཱཧ ‘‘ན ཧེཏུསམཝེཏཾ ཧེཏུཕལ’’ནྟིཨཱདི. ཏཏྠ ཨིདྷ ཏནྟཱུསུ པཊོ, ཀཔཱལེསུ གྷཊོ, བིརཎེསུ ཀཊོ, དྭཱིསུ ཨཎཱུསུ དྭིཨཎུཀནྟིཨཱདིནཱ ཨིདྷ བུདྡྷིཝོཧཱརཛནཀོ ཨཝིསུཾ སིདྡྷཱནཾ སམྦནྡྷོ སམཝཱཡོ, ཏེན སམཝཱཡེན ཀཱརཎེསུ དྭཱིསུ ཨཎཱུསུ དྭིཨཎུཀཾ ཕལཾ སམཝེཏཾ ཨེཀཱིབྷཱུཏམིཝ སམྦནྡྷཾ, ཏཱིསུ ཨཎཱུསུ ཏིཨཎུཀནྟི ཨེཝཾ མཧཱཔཐཝིམཧཱཨུདཀམཧཱཨགྒིམཧཱཝཱཏཀྑནྡྷཔརིཡནྟཾ ཕལཾ ཨཏྟནོ ཀཱརཎེསུ སམཝེཏནྟི སམཝཱཡཝཱདིནོ ཝདནྟི. ཨེཝཾ པན ཝདནྟེཧི ཨཔརིམཱཎེསུ ཀཱརཎེསུ མཧཱཔརིམཱཎཾ ¶ ཨེཀཾ ཕལཾ སམཝེཏཾ ཨཏྟནོ ཨནྟོགདྷེཧི ཀཱརཎེཧི སགབྦྷཾ ཨསུཉྙནྟི ཝུཏྟཾ ཧོཏི, ཨེཝམིདྷ སམཝཱཡཱབྷཱཝཱ ཕལེ ཧེཏུ ནཏྠཱིཏི ཧེཏུསུཉྙཾ ཕལནྟི ཨཏྠོ.

པཝཏྟིབྷཱཝཏོཏི སཾསཱརསྶ པཝཏྟིབྷཱཝཏོ. ཙཏུཨཱཧཱརབྷེདཏོཏི ཨིམིནཱ ཙཏྟཱརོ ཨཱཧཱརབྷེདེ ཏེཧི བྷིནྣེ ཏཔྤཙྩཡདྷམྨབྷེདེ ཙ སངྒཎྷཱཏི. རཱུཔཱབྷིནནྡནཱདིབྷེདོ རཱུཔཱདིཁནྡྷཝསེན, ཨཱརམྨཎཝསེན ཝཱ. ཨུཔཱདཱནེཧི ཨུཔཱདཱིཡཏཱིཏི ཨུཔཱདི, ཨུཔཱདཱནཀྑནྡྷཔཉྩཀཾ. ནིབྦཱནཉྩ ཏཾནིསྶརཎབྷཱུཏཾ ཏསྶ ཝཱུཔསམོ ཏཾསནྟཱིཏི ཀཏྭཱ ཏསྶ ཡཱཝ པཙྪིམཾ ཙིཏྟཾ, ཏཱཝ སེསཏཾ, ཏཏོ པརཉྩ ཨནཝསེསཏཾ ཨུཔཱདཱཡ ‘‘སཨུཔཱདིསེསནིབྦཱནདྷཱཏུ ཨནུཔཱདིསེསནིབྦཱནདྷཱཏཱུ’’ཏི དྭིདྷཱ ཝོཧརཱིཡཏཱིཏི. ‘‘སམྨཱདིཊྛི སམྨཱསངྐཔྤོ ཝིཔསྶནཱ, ཨིཏརེ སམཐོ’’ཏི ཝདནྟི. སཱིལམྤི ཧི སམཐསྶ ཨུཔཀཱརཀཏྟཱ སམཐགྒཧཎེན གཡ྄ཧཏཱིཏི ཏེསཾ ཨདྷིཔྤཱཡོ. ཨཐ ཝཱ ཡཱནདྭཡཝསེན ལདྡྷོ མགྒོ སམཐོ ཝིཔསྶནཱཏི ཨཱགམནཝསེན ཝུཏྟོཏི དཊྛབྦོ. སཔྤདེསཏྟཱཏི སཱིལཀྑནྡྷཱདཱིནཾ ཨེཀདེསཏྟཱཏི ཨཏྠོ. སཱིལཀྑནྡྷཱདཡོ ཧི སབྦལོཀིཡལོཀུཏྟརསཱིལཱདིསངྒཱཧཀཱ, ཨརིཡམགྒོ ལོཀུཏྟརོཡེཝཱཏི ཏདེཀདེསོ ཧོཏི.

ཨོནཏསཧཱཡོ ཝིཡ ཝཱཡཱམོ པགྒཧཀིཙྩསཱམཉྙཏོ. ཨཾསཀཱུཊཾ དཏྭཱ ཋིཏསཧཱཡོ ཝིཡ སཏི ཨཔིལཱཔནཝསེན ནིཙྩལབྷཱཝཀརཎསཱམཉྙཏོ. སཛཱཏིཏོཏི སཝིཏཀྐསཝིཙཱརཱདིབྷེདེསུ སམཱནཱཡ སམཱདྷིཛཱཏིཡཱཏི ¶ ཨཏྠོ. ཀིརིཡཏོཏི སམཱདྷིཨནུརཱུཔཀིརིཡཏོ. ཏཏོ ཨེཝ ཧི ‘‘ཙཏྟཱརོ སཏིཔཊྛཱནཱ སམཱདྷིནིམིཏྟཱ, ཙཏྟཱརོ སམྨཔྤདྷཱནཱ སམཱདྷིཔརིཀྑཱརཱ’’ཏི (མ. ནི. ༡.༤༦༢) སཏིཝཱཡཱམཱནཾ སམཱདྷིསྶ ནིམིཏྟཔརིཀྑཱརབྷཱཝོ ཝུཏྟོཏི.

ཨཱཀོཊེནྟེན ཝིཡཱཏི ‘‘ཨནིཙྩཾ ཨནིཙྩ’’ནྟིཨཱདིནཱ པཉྙཱསདིསེན ཀིཙྩེན སམནྟཏོ ཨཱཀོཊེནྟེན ཝིཡ ‘‘ཨནིཙྩཾ ཁཡཊྛེན, དུཀྑཾ བྷཡཊྛེནཱ’’ཏིཨཱདིནཱ པརིཝཏྟནྟེན ཝིཡ ཙ ཨཱདཱཡ ཨཱུཧིཏྭཱ དིནྣམེཝ པཉྙཱ པཊིཝིཛ྄ཛྷཏི. དྭིནྣཾ སམཱནཀཱལཏྟེཔི པཙྩཡབྷཱཝེན སངྐཔྤསྶ པུརིམཀཱལསྶ ཝིཡ ནིདྡེསོ ཀཏོ. སཛཱཏིཏོཏི ‘‘དུཀྑེ ཉཱཎ’’ནྟིཨཱདཱིསུ སམཱནཱཡ པཉྙཱཛཱཏིཡཱ. ཀིརིཡཏོཏི ཨེཏྠ པཉྙཱསདིསཀིཙྩཾ ཀིརིཡཱཏི ཝུཏྟཾ, པུབྦེ པན སམཱདྷིཨུཔཀཱརཀཾ ཏདནུརཱུཔཾ ཀིཙྩནྟི ཨཡམེཏྠ ཝིསེསོ. ‘‘སབྦཾ, བྷིཀྑཝེ, ཨབྷིཉྙེཡྻ’’ནྟི (སཾ. ནི. ༤.༤༦) ཝཙནཏོ ¶ ཙཏྟཱརིཔི ཨབྷིམུཁཾ པཙྩཀྑཏོ ཉཱཏབྦཱནི, ཨབྷིཝིསིཊྛེན ཝཱ ཉཱཎེན ཉཱཏབྦཱནཱིཏི ཨབྷིཉྙེཡྻཱནི.

དུརབྷིསམྦྷཝཏརནྟི ཨབྷིསམྦྷཝིཏུཾ སཱདྷེཏུཾ ཨསཀྐུཎེཡྻཏརཾ, སཏྟིཝིགྷཱཏེན དུརདྷིགམནྟི ཨཏྠོ. བཱདྷཀཔབྷཝསནྟིནིཡྻཱནལཀྑཎེཧི ཝཝཏྠཱནཾ སལཀྑཎཝཝཏྠཱནཾ. དུརཝགཱཧཏྠེན གམྦྷཱིརཏྟཱཏི ཨོལཱ༹རིཀཱ དུཀྑསམུདཡཱ. ཏིརཙྪཱནགཏཱནམྤི ཧི དུཀྑཾ ཨཱཧཱརཱདཱིསུ ཙ ཨབྷིལཱསོ པཱཀཊོ, པཱིལ༹ནཱདིཨཱཡཱུཧནཱདིཝསེན པན ‘‘ཨིདཾ དུཀྑཾ, ཨིདམསྶ ཀཱརཎ’’ནྟི ཡཱཐཱཝཏོ ཨོགཱཧིཏུཾ ཨསཀྐུཎེཡྻཏྟཱ གམྦྷཱིརཱ, སཎྷསུཁུམདྷམྨཏྟཱ ནིརོདྷམགྒཱ སབྷཱཝཏོ ཨེཝ གམྦྷཱིརཏྟཱ དུརཝགཱཧཱ, ཏེནེཝ ཨུཔྤནྣེ མགྒེ ནཏྠི ནིརོདྷམགྒཱནཾ ཡཱཐཱཝཏོ ཨནཝགཱཧོཏི. ནིབྦཱནམྤི མགྒེན ཨདྷིགནྟབྦཏྟཱ ཏསྶ ཕལནྟི ཨཔདིསྶཏཱིཏི ཨཱཧ ‘‘ཕལཱཔདེསཏོ’’ཏི. ཝུཏྟཉྷི ‘‘དུཀྑནིརོདྷེ ཉཱཎཾ ཨཏྠཔཊིསམྦྷིདཱ’’ཏི (ཝིབྷ. ༧༡༩). མགྒོཔི ནིརོདྷསྶ སམྤཱཔཀབྷཱཝཏོ ཧེཏཱུཏི ཨཔདིསྶཏཱིཏི ཨཱཧ ‘‘ཧེཏུཨཔདེསཏོ’’ཏི. ཝུཏྟམྤི ཙེཏཾ ‘‘དུཀྑནིརོདྷགཱམིནིཡཱ པཊིཔདཱཡ ཉཱཎཾ དྷམྨཔཊིསམྦྷིདཱ’’ཏི (ཝིབྷ. ༧༡༩). ཨིཏི ཝིཛཉྙཱཏི ཨིཏི-སདྡེན ཝིཛཱནནཀྐམཾ དསྶེཏི. ཨེཝཾ པཀཱརེཧཱིཏི ཨེཝཾ-སདྡེན ཝིཛཱནནཀཱརཎབྷཱུཏེ ནཡེ.

ཨུདྡེསཝཎྞནཱ ནིཊྛིཏཱ.

༡. དུཀྑསཙྩནིདྡེསོ

ཛཱཏིནིདྡེསཝཎྞནཱ

༡༩༠. ཏཏྠ ¶ …པེ… ཨཡཾ མཱཏིཀཱཏི ནིདྡེསཝཱརཨཱདིམྷི ཝུཏྟེ ཛཱཏིཨཱདིནིདྡེསེ ཏེསཾ ཛཱཏིཨཱདཱིནཾ ནིདྡེསཝསེན དུཀྑསྶ ཨརིཡསཙྩསྶ ཀཐནཏྠཱཡ, ཏེསུ ཝཱ ཛཱཏིཨཱདཱིསུ ཏེསཉྩ དུཀྑཊྛེ ཝེདིཏབྦེ ཛཱཏིཨཱདཱིནཾ ནིདྡེསཝསེན དུཀྑསྶ ཨརིཡསཙྩསྶ ཀཐནཏྠཱཡ དུཀྑདུཀྑནྟིཨཱདིཀཱ དུཀྑམཱཏིཀཱ ཝེདིཏབྦཱཏི ཨཏྠོ. ཨཐ ཝཱ ཏཏྠཱཏི ཏསྨིཾ ནིདྡེསཝཱརེ. ‘‘ཛཱཏིཔི དུཀྑཱ…པེ… སཾཁིཏྟེན པཉྩུཔཱདཱནཀྑནྡྷཱ དུཀྑཱ’’ཏི ཨཡཾ དུཀྑསྶ ཨརིཡསཙྩསྶ ཀཐནཏྠཱཡ མཱཏིཀཱཏི ཡཐཱདསྶིཏསྶ ཛཱཏིཨཱདིནིདྡེསསྶ མཱཏིཀཱབྷཱཝཾ ¶ དཱིཔེཏི. ཏཾ དཱིཔེཏྭཱ པུན ཡསྨིཾ པདདྭཡེ ཋཏྭཱ དུཀྑཾ ཨརིཡསཙྩཾ ཀཐེཏབྦཾ, ཏསྶ ནིདྡྷཱརཎཏྠཾ སབྦཾ དུཀྑཾ སངྐཌྜྷེནྟོ ཨཱཧ ‘‘ཨིདཉྷི དུཀྑཾ ནཱམཱ’’ཏིཨཱདི.

སབྷཱཝཏོཏི དུཀྑཝེདཡིཏསབྷཱཝཏོ. ནཱམཏོཏི ཏེནེཝ སབྷཱཝེན ལདྡྷནཱམཏོ. ཏེན ན ཨཉྙེན པརིཡཱཡེན ཨིདཾ དུཀྑཾ ནཱམ, ཨཐ ཁོ དུཀྑཏྟཱཡེཝཱཏི སབྷཱཝེན ནཱམཾ ཝིསེསེཏི. ཨཐ ཝཱ ནཱམཏོཏི ཨུདཡབྦཡཝནྟཏཱཡ ལདྡྷནཱམཏོ. ཡཐཱ ཨཉྙེ ཨུདཡབྦཡཝནྟོ དྷམྨཱ ན སབྷཱཝཏོ དུཀྑཱ, ན ཨེཝཾ ཨིདཾ, ཨཐ ཁོ སབྷཱཝཏོ དུཀྑཱ, བྷཱུཏམེཝེདཾ དུཀྑནྟི པུརིམེན དུཀྑ-སདྡེན པཙྪིམཾ ཝིསེསེཏི. ཝིཔརིཎཱམཝནྟཏཱཡ སུཁཾ ཨནིཊྛམེཝ ཧོཏཱིཏི དུཀྑཾ ནཱམ ཛཱཏཾ. ཏེནེཝཱཧ ‘‘དུཀྑུཔྤཏྟིཧེཏུཏོ’’ཏི. ཀཎྞསཱུལཱདཱིཧི ཨབྷིབྷཱུཏསྶ ནིཏྠུནནཱདཱིཧི དུཀྑཱབྷིབྷཱུཏཏཱཡ ཝིཉྙཱཡམཱནཱཡཔི ཀིཾ ཏཝ རུཛྫཏཱིཏི པུཙྪིཏྭཱཝ ཀཎྞསཱུལཱདིདུཀྑཾ ཛཱནིཏབྦཾ ཧོཏཱིཏི པཊིཙྪནྣདུཀྑཏཱ ཏསྶ ཝུཏྟཱ. ཨུཔཀྐམསྶ ཙ པཱཀཊབྷཱཝཏོཏི ཀཱརཎཱཝསེན དུཀྑཝིསེསསྶ པཱཀཊབྷཱཝཾ དསྶེཏི.

སབྷཱཝཾ མུཉྩིཏྭཱ པཀཱརནྟརེན དུཀྑནྟི ཝུཙྩམཱནཾ པརིཡཱཡདུཀྑཾ. ཀཐེཏབྦཏྟཱ པཊིཉྙཱཏཾ ཡཐཱ ཀཐེཏབྦཾ, ཏཾཔཀཱརདསྶནཏྠཾ ‘‘ཨརིཡསཙྩཉྩ ནཱམེཏ’’ནྟིཨཱདིམཱཧ. སངྑེཔོ སཱམཉྙཾ, སཱམཉྙཉྩ ཝིསེསེ ཨནྟོཀརིཏྭཱ པཝཏྟཏཱིཏི ཏཏྠ ཨུབྷཡཐཱཔི ཀཐེཏུཾ ཝཊྚཏི. ཝིཏྠཱརོ པན ཝིསེསོ ཛཱཏིཨཱདིཀོ, ཝིསེསོ ཙ ཝིསེསནྟརནིཝཏྟཀོཏི ཛཱཏིཨཱདཱིསུ ཛརཱདཱིནཾ སངྑིཔནཾ ན སཀྐཱ ཀཱཏུནྟི ཏཏྠ ཝིཏྠཱརེནེཝ ཀཐེཏབྦཾ.

༡༩༡. ‘‘ཨཔརསྶ ¶ ཨཔརསྶཱ’’ཏི དཱིཔནཾ ཨཔརཏྠདཱིཔནཾ. སཱམིཨཏྠེཔི ཧི ཨཔརཏྠ-སདྡོ སིཛ྄ཛྷཏཱིཏི. ཏེསཾ ཏེསནྟི ཝཱ སཱམིཝསེན ཝུཏྟཾ ཨཏྠཾ བྷུམྨཝསེན ཝཏྟུཀཱམཏཱཡ ཨཱཧ ‘‘ཨཔརཏྠདཱིཔན’’ནྟི, ཨཔརསྨིཾ ཨཔརསྨིཾ དཱིཔནནྟི ཨཏྠོ. ཨཔརསྶ ཨཔརསྶ ཝཱ ཛཱཏིསངྑཱཏསྶ ཨཏྠསྶ དཱིཔནཾ ཨཔརཏྠདཱིཔནཾ. པཉྩགཏིཝསེན ཨེཀེཀཱཡཔི གཏིཡཱ ཁཏྟིཡཱདིབྷུམྨདེཝཱདིཧཏྠིཨཱདིཛཱཏིཝསེན ཙཱཏི གཏིཛཱཏིཝསེན.

ཏིཎཱཀཱརོ ཏིཎཛཱཏི, སོ ཙ ཨུཔཱདཱཔཉྙཏྟཱིཏི ‘‘པཉྙཏྟིཡ’’ནྟི ཨཱཧ. ཏདུཔཱདཱཡཱཏི ཏཾ པཋམཾ ཝིཉྙཱཎཾ ཨུཔཱདཱཡ ཨཡཾ ཛཱཏི, ནཱསྶ ཀུཏོཙི ནིགྒམནཾ ཨུཔཱདཱཡ. ཡསྨཱ ཙ ཨེཝཾ, ཏསྨཱ སཱཝསྶ ཛཱཏི པཋམཝིཉྙཱཎསངྑཱཏཱཏི ཨཏྠོ. ཨཐ ཝཱ ཏདུཔཱདཱཡ སཛཱཏོཏི ཝུཙྩཏཱིཏི ¶ སཱཝསྶ ཛཱཏི པཋམཝིཉྙཱཎསངྑཱཏཱཏི ཨཏྠོ. ཝིཉྙཱཎམུཁེན ཙ པཉྩཔི ཁནྡྷཱ ཝུཏྟཱ ཧོནྟཱིཏི ‘‘པཊིསནྡྷིཡ’’ནྟི ཨཱཧ. ཨརིཡབྷཱཝཀརཎཏྟཱ ཨརིཡསཱིལནྟི པཱཏིམོཀྑསཾཝརོ ཝུཙྩཏི. ཛཱཏིཨཱདཱིནིཔི ལཀྑཎཱནི དྷམྨཱནཾ ཨཱཀཱརཝིཀཱརཱཏི ཀཏྭཱ སཧུཔྤཱདཀཱ སཧཝིཀཱརཀཱཏི ཝུཏྟཱ. ཛཱཡནཊྛེནཱཏིཨཱདི ཨཱཡཏནཝསེན ཡོནིཝསེན ཙ དྭཱིཧི དྭཱིཧི པདེཧི སབྦསཏྟེ པརིཡཱདིཡིཏྭཱ ཛཱཏིཾ དསྶེཏུཾ ཝུཏྟཾ. པུརིམནཡེ པན ཨེཀེཀེནེཝ པདེན སབྦསཏྟེ པརིཡཱདིཡིཏྭཱ ཛཱཏི དསྶིཏཱཏི ཨཡཾ ཝིསེསོ. ཀེཙི པན ‘‘པུརིམནཡེ ཀཏྟུནིདྡེསོ, པཙྪིམནཡེ བྷཱཝནིདྡེསོ ཀཏོ’’ཏི ཝདནྟི, ‘‘ཏེསཾ ཏེསཾ སཏྟཱནཾ ཛཱཏཱི’’ཏི པན ཀཏྟརི སཱམིནིདྡེསསྶ ཀཏཏྟཱ ཨུབྷཡཏྠཱཔི བྷཱཝནིདྡེསོཝ ཡུཏྟོ. སམྤུཎྞཱ ཛཱཏི སཉྫཱཏི. པཱཀཊཱ ནིབྦཏྟི ཨབྷིནིབྦཏྟི. ‘‘ཏེསཾ ཏེསཾ སཏྟཱནཾ…པེ… ཨབྷིནིབྦཏྟཱི’’ཏི སཏྟཝསེན པཝཏྟཏྟཱ སམྨུཏིཀཐཱ.

ཏཏྲ ཏཏྲཱཏི ཨེཀཙཏུཝོཀཱརབྷཝེསུ དྭིནྣཾ དྭིནྣཾ, སེསེ རཱུཔདྷཱཏུཡཾ པཊིསནྡྷིཀྑཎེ ཨུཔྤཛྫམཱནཱནཾ པཉྩནྣཾ, ཀཱམདྷཱཏུཡཾ ཝིཀལཱཝིཀལིནྡྲིཡཱནཾ ཝསེན སཏྟནྣཾ ནཝནྣཾ དསནྣཾ པུན དསནྣཾ ཨེཀཱདསནྣཉྩ ཨཱཡཏནཱནཾ ཝསེན སངྒཧོ ཝེདིཏབྦོ. ཨེཀབྷཝཔརིཡཱཔནྣསྶ ཁནྡྷསནྟཱནསྶ པཋམཱབྷིནིབྦཏྟིབྷཱུཏཱ པཊིསནྡྷིཀྑནྡྷཱཏི ཨཱཧ ‘‘པཋམཱབྷིནིབྦཏྟིལཀྑཎཱ’’ཏི. ཏམེཝ སནྟཱནཾ ནིཡྻཱཏེནྟཾ ཝིཡ ‘‘ཧནྡ གཎྷཐཱ’’ཏི པཊིཙྪཱཔེནྟཾ ཝིཡ པཝཏྟཏཱིཏི ནིཡྻཱཏནརསཱ. སནྟཏིཡཱ ཨེཝ ཨུམྨུཛྫནཾ ཧུཏྭཱ གཡ྄ཧཏཱིཏི ཨུམྨུཛྫནཔཙྩུཔཊྛཱནཱ. དུཀྑརཱསིསྶ ཝིཙིཏྟཏཱ དུཀྑཝིཙིཏྟཏཱ, དུཀྑཝིསེསཱ ཝཱ ཏདཝཡཝཱ, ཏཾ པཙྩུཔཊྛཱཔེཏི ཕལཏཱིཏི དུཀྑཝིཙིཏྟཏཱཔཙྩུཔཊྛཱནཱ.

པརིཡཱཡནིཔྤརིཡཱཡདུཀྑེསུ ¶ ཡཾ དུཀྑཾ ཛཱཏི ཧོཏི, ཏཾ དུཀྑབྷཱཝོཡེཝ ཏསྶཱ དུཀྑཊྛོ. ཡདི ཨཀྑཱནེན པཱཔུཎིཏབྦཾ སིཡཱ, བྷགཝཱ ཨཱཙིཀྑེཡྻ. བྷགཝཏཱཔི –

‘‘ཏཾ ཀིཾ མཉྙཐ, བྷིཀྑཝེ, ཀཏམོ ནུ ཁོ མཧནྟཏརོ? ཡོ ཙཱཡཾ མཡཱ པརིཏྟོ པཱཎིམཏྟོ པཱསཱཎོ གཧིཏོ, ཡོ ཙ ཧིམཝཱ པབྦཏརཱཛཱཏི. ཨཔྤམ…པེ… གཧིཏོ, ཧིམཝནྟཾ པབྦཏརཱཛཱནཾ ཨུཔནིདྷཱཡ སངྑམྤི ན ཨུཔེཏི, ཀལབྷཱགམྤི ན ཨུཔེཏི, ཨུཔནིདྷམྤི ན ཨུཔེཏི. ཨེཝམེཝ ཁོ, བྷིཀྑཝེ, ཡཾ སོ པུརིསོ ཏཱིཧི སཏྟིསཏེཧི ཧཉྙམཱནོ ¶ ཏཏོནིདཱནཾ དུཀྑཾ དོམནསྶཾ པཊིསཾཝེདེཏི, ཏཾ ནེརཡིཀསྶ དུཀྑསྶ ཨུཔནིདྷཱཡ སངྑམྤི…པེ… ཨུཔནིདྷམྤི ན ཨུཔེཏཱི’’ཏི (མ. ནི. ༣.༢༥༠) –

ཨུཔམཱཝསེན པཀཱསིཏཾ ཨཱཔཱཡིཀདུཀྑཾ. སུཁུཔྤཏྟིཀཱརཎཱནི སུཙཱིནི ཨུཔྤལཱདཱིནཱིཏི ཀཏྭཱ ཏཏྠ ནིབྦཏྟིནིཝཱརཎེན ཛཱཏིཡཱ དུཀྑཝཏྠུབྷཱཝཾ དསྶེཏི ‘‘ཨཐ ཁོ’’ཏིཨཱདིནཱ. དུཀྑུཔྤཏྟིཀཱརཎེ ནིབྦཏྟནེན གབྦྷཔརིཧརཎཱུཔཀྐམེན ཝིནཱ མཱཏུཀུཙྪིསམྦྷཝམེཝ དུཀྑཾ གབྦྷོཀྐནྟིམཱུལཀཾ ཨཉྙཱནཔེཀྑཏྟཱ, ཨུཔཀྐམནིབྦཏྟཾ པན པརིཧརཎམཱུལཀཾ ཨོཀྐནྟིམཏྟཱནཔེཀྑཏྟཱ. ཨཡམེཏེསཾ ཝིསེསོ.

ཨཏྟནོ ཨབྷིམུཁཾ ཀཌྜྷནཾ ཨཱཀཌྜྷནཾ, པརིཏོ སབྦཏོབྷཱགེན ཀཌྜྷནཾ པརིཀཌྜྷནཾ. ཨདྷོ དྷུནནཾ ཨོདྷུནནཾ, ཏིརིཡཾ, སབྦཏོ ཝཱ དྷུནནཾ ནིདྷུནནཾ. ཏཙྪེཏྭཱ ཁཱརཔཀྑིཔནཾ ཁཱརཱཔཊིཙྪཀཾ.

སཀལསརཱིརནྷཱཔནཾ ནྷཱཔནཾ, ཨེཀདེསདྷོཝནཾ དྷོཝནཾ, སཱུརིཡཱབྷིམུཁཔཝཏྟནེན ཨཱཏཱཔནཾ, པཉྩགྒིཏཱཔེན པརིཏཱཔནཾ དཊྛབྦཾ. སབྦོཡེཝ ཝཱ ཏཱཔོ དྭིདྷཱཔི ཝུཏྟོ.

ཀུཧིཾ ནུ པཏིཊྛཾ ལབྷེཐ, ཛཱཏིཡཱ ཝིནཱ ན ཏསྶ དུཀྑསྶ པཏིཊྛཱནཾ ཨཏྠཱིཏི ཨཏྠོ, ཛཱཏིཡཱ ཝཱ ཝིནཱ སོ སཏྟོ ཀུཧིཾ ནུ པཏིཊྛཾ, ཀཏྠ ནུ པཏིཊྛནྟོ ཏཾ དུཀྑཾ ལབྷེཐཱཏི ཨཏྠོ. ཏཏྠ ཏིརཙྪཱནེསུ ཀཐཾ དུཀྑཾ བྷཝེཡྻ ཏཧིཾ ཏིརཙྪཱནེསུ ཛཱཏིཾ ཝིནཱ. ན ཙསྶཱཏི ན ཙེ ཨསྶ. ནནུ ནེཝཏྠཱིཏི སམྦནྡྷོ ཀཱཏབྦོ, ནནུ ཨཱཧཱཏི ཝཱ. ཡདཏོཏི ཡསྨཱ ནེཝཏྠི, ཏསྨཱ ཨཱཧཱཏི ཨཏྠོ.

ཛརཱནིདྡེསཝཎྞནཱ

༡༩༢. ཛཱིརཎམེཝ ¶ ཛཱིརཎཏཱ, ཛཱིརཎསྶ ཝཱ ཨཱཀཱརོ ཏཱ-སདྡེན ཝུཏྟོ.

ཡཐཱཔུརེ ཨསལླཀྑེནྟེཏི གཱརཝཀརཎཨུཔཊྛཱནཱདཱིནི ཨསལླཀྑེནྟེ ཏཾནིམིཏྟཾ དོམནསྶཾ ཨུཔྤཛྫཏཱིཏི ཨཏྠོ.

སཏཱདཱིནནྟི ¶ སཏིསུཏཝཱིརིཡཔཉྙཱདཱིནཾ ཝིཔྤཝཱསནིམིཏྟཾ ཨཏྟནཱ ཨཔསཱདེཏབྦེཧིཔི ཨཏྟནོ པུཏྟདཱརེཧི ཨཔསཱདནཱིཡཏོ. ཨཝསཝཏྟངྒཔཙྩངྒཏཱཡ སུཙིཨསུཙིཨཱདིཝིཙཱརཎཝིརཧེན ཙ བཱལཀུམཱརཀཀཱལོ ཝིཡ ཛིཎྞཀཱལོ ཧོཏཱིཏི ཨཱཧ ‘‘བྷིཡྻོ བཱལཏྟཔྤཏྟིཡཱ’’ཏི.

མརཎནིདྡེསཝཎྞནཱ

༡༩༣. ‘‘ཀཱལསྶ ཨནྟཀསྶ ཀིརིཡཱ’’ཏི ཡཱ ལོཀེ ཝུཙྩཏི, སཱ ཙུཏི, མརཎནྟི ཨཏྠོ. ཙཝནཀཱལོཡེཝ ཝཱ ཨནཏིཀྐམནཱིཡཏྟཱ ཝིསེསེན ཀཱལོཏི ཝུཏྟོ, ཏསྶ ཀིརིཡཱ ཙུཏིཀྑནྡྷཱནཾ བྷེདཔྤཏྟིཡེཝ. མཙྩུ མརཎནྟི ཨེཏྠཱཔི སམཱསཾ ཨཀཏྭཱ ཡོ མཙྩུ ཝུཙྩཏི བྷེདོ, ཡཉྩ མརཎཾ པཱཎཙཱགོ, ཨིདཾ ཝུཙྩཏི མརཎནྟི ཝིསུཾ སམྦནྡྷོ ན ན ཡུཛྫཏི.

ཡསྶ ཁནྡྷབྷེདསྶ པཝཏྟཏྟཱ ‘‘ཏིསྶོ མཏོ, ཕུསྶོ མཏོ’’ཏི ཝོཧཱརོ ཧོཏི, སོ ཁནྡྷཔྤབནྡྷསྶ ཨནུཔཙྪིནྣཏཱཡ ‘‘སམྨུཏིམརཎ’’ནྟི ཝུཏྟོ, པབནྡྷསམུཙྪེདོ ཙ ‘‘སམུཙྪེདམརཎ’’ནྟི. མརཎམྤི དུཀྑནྟི ཨིམསྨིཾ པནཏྠེ དུཀྑསཙྩཀཐཱ ཝཊྚཀཐཱཏི ཀཏྭཱ ‘‘སམྨུཏིམརཎཾ ཨདྷིཔྤེཏ’’ནྟི ཨཱཧ. ཏསྶེཝ ནཱམནྟི ཏབྦྷཱཝཏོ ཏདེཀདེསབྷཱཝཏོ ཙ མརཎ-སདྡབཧུཏྟེ ཨསམྨོཧཏྠཾ ཝུཏྟཾ. ཙུཏིལཀྑཎནྟི ‘‘ཙཝནཏཱ’’ཏི ནིདསྶིཏཙཝནལཀྑཎམེཝ ཝདཏི. སམྤཏྟིབྷཝཁནྡྷེཧི ཝིཡོཛེཏཱིཏི ཝིཡོགརསཾ, ཝིཡོགཀིརིཡཱབྷཱུཏཏཱཡ ཝཱ ‘‘ཝིཡོགརས’’ནྟི ཝུཏྟཾ. སཏྟསྶ པུརིམབྷཝཏོ ཝིཔྤཝཱསོ ཧུཏྭཱ ཨུཔཊྛཱཏཱིཏི ཝིཔྤཝཱསཔཙྩུཔཊྛཱནཾ.

མརཎནྟིཀཱཏི མརཎསྶ ཨཱསནྣཱ. ཡདི མརཎཾ ན བྷཝིསྶཏི, ཡཐཱཝུཏྟཾ ཀཱཡིཀཾ ཙེཏསིཀཉྩ དུཀྑཾ ན བྷཝིསྶཏཱིཏི ཨཱཧ ‘‘དྭིནྣམྤི དུཀྑཱནཾ ཝཏྠུབྷཱཝེནཱ’’ཏི.

པཱཔཀམྨཱདིནིམིཏྟནྟི ¶ པཱཔཀམྨནིམིཏྟཾ པཱཔགཏིནིམིཏྟཉྩཱཏི ཨཏྠོ, ཀམྨམྤི ཝཱ ཨེཏྠ ‘‘ནིམིཏྟ’’ནྟི ཝུཏྟཾ ཨུཔཔཏྟིནིམིཏྟབྷཱཝེན ཨུཔཊྛཱནཏོ. ཏདུཔཊྛཱནེཔི ཧི ‘‘ཨཀཏཾ ཝཏ མེ ཀལྱཱཎ’’ནྟིཨཱདིནཱ ཨནཔྤཀཾ དོམནསྶཾ ཨུཔྤཛྫཏཱིཏི. བྷདྡསྶཱཏི ཀལྱཱཎཀམྨསྶཱཏི ཨཏྠོ. ཨཝིསེསཏོཏི ‘‘སབྦེས’’ནྟི ཨེཏེན ཡོཛེཏབྦཾ. སབྦེསནྟི ཙ ཡེསཾ ཀཱཡིཀཾ དུཀྑཾ ཨུཔྤཛྫཏི, ཏེཡེཝ སབྦེ གཧིཏཱ ‘‘ཝིཏུཛྫམཱནམམྨཱན’’ནྟི ཝིསེསིཏཏྟཱ. སནྡྷཱིནཾ བནྡྷནཱནི སནྡྷིབནྡྷནཱནི ¶ , ཏེསཾ ཚེདནེན ནིབྦཏྟཾ དུཀྑཾ ‘‘སནྡྷིབནྡྷནཙྪེདན’’ནྟི ཝུཏྟཾ. ཨཱདི-སདྡོ ཝཱ ཀཱརཎཏྠོ, སནྡྷིབནྡྷནཙྪེདནམཱུལཀནྟི ཨཏྠོ.

ཨནཡབྱསནཱཔཱདནཾ ཝིཡཱཏི ཨནཡབྱསནཱཔཏྟི ཝིཡཱཏི ཨཏྠོ. ཝཱལཱ༹དཱིཧི ཀཏེ ཧི ཨནཡབྱསནཱཔཱདནེ ཨནྟོགདྷཱ ཨནཡབྱསནཱཔཏྟི ཨེཏྠ ནིདསྶནནྟི.

སོཀནིདྡེསཝཎྞནཱ

༡༩༤. སུཁཀཱརཎཾ ཧིཏཾ, ཏསྶ ཕལཾ སུཁཾ. ཉཱཏིཀྑཡོཏི བྷོགཱདཱིཧི ཉཱཏཱིནཾ པརིཧཱནི མརཎཉྩ. ཨཡཾ པན ཝིསེསོཏི བྷོགབྱསནཱདིཔདཏྠཝིསེསཾ རོགབྱསནཱདཱིསུ སམཱསཝིསེསཉྩ སནྡྷཱཡཱཧ. ཉཱཏིབྷོགཱ པཉྙཏྟིམཏྟཱ ཏབྦིནཱསཱཝཱཏི ཨིམིནཱ ཨདྷིཔྤཱཡེན ཨཔརིནིཔྥནྣཏཾ སནྡྷཱཡ ‘‘ཨནིཔྥནྣཱནཱི’’ཏི ཨཱཧ. ཨཔརིནིཔྥནྣཏཾཡེཝ ཧི སནྡྷཱཡ ཝིསུདྡྷིམགྒེ (ཝིསུདྡྷི. ༢.༤༤༧ ཨཱདཡོ) ཙ ‘‘དས རཱུཔཱནི ཨནིཔྥནྣཱནཱི’’ཏི ཝུཏྟཾ. རཱུཔཀཎྜཝཎྞནཱཡཉྷི (དྷ. ས. ཨཊྛ. ༩༧༥ པཀིཎྞཀཀཐཱ) ནི ‘‘ཨཔརིནིཔྥནྣཱནཱི’’ཏི ཝུཏྟཱནི. ཁནྡྷཝིབྷངྒེ ཙ ནིཔྥཱདེཏབྦསྶ ནིརོདྷསམཱཔཏྟིཨཱདིཀསྶ ནིཔྥནྣཏཱ ཝུཏྟཱཏི ཨསབྷཱཝདྷམྨསྶ ཙ ནིཔྥནྣཏཱ, ནིབྦཱནསྶེཝ ཨནིཔྥནྣཏཱཏི.

དྷམྨ-སདྡོ ཧེཏུཨཏྠོཏི ཨཱཧ ‘‘དུཀྑསྶ ཨུཔྤཏྟིཧེཏུནཱ’’ཏི. ཛྷཱམནྟི དཌྜྷཾ. པུབྦེ ཝུཏྟལཀྑཎཱདིཀཱ དོམནསྶཝེདནཱ སོཀོཏི ཏསྶ པུན ལཀྑཎཱདཡོ ན ཝཏྟབྦཱ སིཡུཾ, ཏཐཱཔི དོམནསྶཝིསེསཏྟཱ སོཀསྶ ཙ ཝིསིཊྛཱ ལཀྑཎཱདཡོ ཝཏྟབྦཱཏི ‘‘ཀིཉྩཱཔཱི’’ཏིཨཱདིམཱཧ. ཝིསཱརརཧིཏཾ ཨནྟོ ཨེཝ སངྐུཙིཏཾ ཙིནྟནཾ, སུཀྑནཾ ཝཱ ཨནྟོནིཛ྄ཛྷཱནཾ. པརིནིཛ྄ཛྷཱཡནཾ དཧནཾ. ཉཱཏིབྱསནཱདིཨནུརཱུཔཾ སོཙནཾ ཨནུསོཙནཾ, ཏཾ ཏཾ ཝཱ གུཎཾ དོསཉྩ ཨནུགནྟྭཱ སོཙནཾ ཏཔྤནཾ ཨནུསོཙནཾ.

ཛཝནཀྑཎེཏི ¶ མནོདྭཱརཛཝནཀྑཎེ. ཏཐཱ ཧི ཏཾ དསྶེནྟོ ‘‘ཨེཏྟཀཱ མེ’’ཏིཨཱདིམཱཧ. ཀཱཡཝིཉྙཱཎཱདིཝཱིཐིཡམྤི པན ཛཝནཀྑཎེ དོམནསྶསྶ པཙྩཡོ ཧོཏི ཨེཝ. ཏེནེཝ ‘‘ཛཝནཀྑཎེ ཙཱ’’ཏི ཨཱཧ. ཨཉྙཐཱ ཀཱཡིཀཙེཏསིཀདུཀྑཱནཾ ཀཱཡཝཏྠུཀམནོདྭཱརཔྤཝཏྟཱནམེཝ པཙྩཡོཏི གཎྷེཡྻ ཏཏྠ ཝིསེསེན ཀཱཡིཀཙེཏསིཀསདྡཔྤཝཏྟིཏོ.

ཏུཛྫཏཱིཏི ¶ ‘‘ཏུདཏཱི’’ཏི ཝཏྟབྦེ བྱཏྟཡཝསེན ཝུཏྟནྟི ཝེདིཏབྦཾ.

པརིདེཝནིདྡེསཝཎྞནཱ

༡༩༥. ཨཱདེཝནྟི ཨེཏེནཱཏི ཨཱདེཝོཏི ཨཱདེཝན-སདྡཾ ཀཏྭཱ ཨསྶུཝིམོཙནཱདིཝིཀཱརཾ ཨཱཔཛྫནྟཱནཾ ཏབྦིཀཱརཱཔཏྟིཡཱ སོ སདྡོ ཀརཎབྷཱཝེན ཝུཏྟོཏི. ཝཱིཧིཔལཱཔཱདཡོ ཝིཡ ཏུཙྪཾ ཝཙནཾ པལཱཔོ. གུཎདོསེ ཀིཏྟེཏི བོདྷེཏཱིཏི གུཎདོསཀིཏྟནརསོ ལཱལཔྤ-སདྡོ. ཨཏྠཱནཏྠེ ཧིརིཡིཏབྦཛནེ ཙ ཨཝིཙཱརེཏྭཱ པུགྒལསྶ སམྦྷམབྷཱཝོ ཧུཏྭཱ པརིདེཝན-སདྡོ ཨུཔཊྛཱཏཱིཏི ‘‘སམྦྷམཔཙྩུཔཊྛཱནོ’’ཏི ཝུཏྟོ, སོཀཝཏྠུཨཝིགྷཱཏེན ཝཱ སམྦྷམོ, ན ཨུཏྟཱསསམྦྷམོ, སོ ཙ པརིདེཝན-སདྡེན པཱཀཊོ ཧོཏཱིཏི པརིདེཝོ ‘‘སམྦྷམཔཙྩུཔཊྛཱནོ’’ཏི ཝུཏྟོ.

སོཀཱབྷིབྷཱུཏོ པརིདེཝནནིམིཏྟཾ མུཊྛིཔོཐནཱདཱིནི ཀརོཏི, པརིདེཝནནིམིཏྟམེཝ ཙ ཉཱཏིཨབྦྷཏྠངྒམནཱདཱིནི ཙིནྟེཏཱིཏི པརིདེཝསྶ དུཀྑདོམནསྶཱནཾ ཝཏྠུབྷཱཝོ ཝུཏྟོ.

བྷིཡྻོཏི ཡེན ཝིནཱ ན ཧོཏི, ཏཏོ པརིདེཝསམུཊྛཱཔཀདོམནསྶཏོ, པུབྦེ ཝུཏྟདུཀྑཏོ ཝཱ བྷིཡྻོ, ཀཎྛོཊྛཏཱལུཨཱདིསོསཛཏོཔི ཝཱ བྷིཡྻོཏི ཨཉྙཉྩ ཀཱཡིཀཾ ཙེཏསིཀཾ ཏཾནིདཱནདུཀྑཾ སངྒཎྷཱཏི.

དུཀྑདོམནསྶནིདྡེསཝཎྞནཱ

༡༩༦-༧. ཀཱཡིཀཾ དུཀྑཾ ཀཱཡིཀསྶ དུཀྑསྶ ཨུཔནིསྶཡཔཙྩཡོཏི ‘‘དུཀྑིཏསྶ དུཀྑཾ ཨུཔྤཛྫཏཱི’’ཏི ཝུཏྟཾ. ཨེཏེན དུཀྑེན ཨབྷིབྷཱུཏཏྟཱ ནཀྑཏྟཾ ཀཱིལི༹ཏུཾ ¶ ན ལབྷཱམཱིཏི བལཝདོམནསྶཾ ཨུཔྤཛྫཏཱིཏི དུཀྑསྶ དོམནསྶཝཏྠུཏཱ ཧོཏི.

ཨཏྟནོ པཝཏྟིཀྑཎཾ སནྡྷཱཡ ‘‘པཱིལེ༹ཏཱི’’ཏི ཝུཏྟཾ ཀཱཡིཀདུཀྑཾ, ཏདུཔནིསྶཡཏོ ཝཱ.

ཨཱཝཊྚནྟཱིཏི པརིཝཊྚནྟི. ཝིཝཊྚནྟཱིཏི པབྦྷཱརེ ཁིཏྟཏྠམྦྷོ ཝིཡ ལུདྷནྟི. མཱུལཙྪིནྣརུཀྑོ ཝིཡ ཚིནྣཔཔཱཏཾ པཔཏནྟི, པརིདཡ྄ཧམཱནཙིཏྟཱ པུརིམདོམནསྶུཔནིསྶཡཝསེན ཙིནྟེནྟི, ཝིགཏེ དོམནསྶེ ཏཐཱཙིནྟནཾ ནཏྠཱིཏི.

ཨུཔཱཡཱསནིདྡེསཝཎྞནཱ

༡༩༨. སབྦཝིསཡཔྤཊིཔཏྟིནིཝཱརཎཝསེན ¶ སམནྟཏོ སཱིདནཾ སཾསཱིདནཾ, ཨུཊྛེཏུམྤི ཨསཀྐུཎེཡྻཏཱཀརཎཝསེན ཨཏིབལཝཾ, ཝིརཱུཔཾ ཝཱ སཱིདནཾ ཝིསཱིདནཾ. ཨཉྙཾ ཝིསཡཾ ཨགནྟྭཱ ཉཱཏིབྱསནཱདཱིསུ ཝིརཱུཔོ ཨཱསངྒོ ཏཏྠེཝ ཨཝབནྡྷཏཱ བྱཱསཏྟི. ནིཏྠུནནཀརཎཏོ ནིཏྠུནནརསོ. ཝིསཱིདནཾ ཝིསཱདོ.

སཡཾ ན དུཀྑོ དོསཏྟཱ སངྑཱརཀྑནྡྷཔརིཡཱཔནྣདྷམྨནྟརཏྟཱ ཝཱ. ཡེ པན དོམནསྶམེཝ ཨུཔཱཡཱསོཏི ཝདེཡྻུཾ, ཏེ ‘‘ཨུཔཱཡཱསོ ཏཱིཧི ཁནྡྷེཧི ཨེཀེནཱཡཏནེན ཨེཀཱཡ དྷཱཏུཡཱ སམྤཡུཏྟོ, ཨེཀེན ཁནྡྷེན ཨེཀེནཱཡཏནེན ཨེཀཱཡ དྷཱཏུཡཱ ཀེཧིཙི སམྤཡུཏྟོ’’ཏི (དྷཱཏུ. ༢༤༩) ཨིམཱཡ པཱལི༹ཡཱ པཊིཀྑིཔིཏབྦཱ. ཝིསཱདཔྤཏྟིཡཱ སུཁདུཀྑཀཱརཎཾ ཨགཎཡིཏྭཱ དུཀྑཊྛཱནཱདཱིནི ཀརོནྟཱནཾ ཨུཔཱཡཱསོ ཀཱཡིཀདུཀྑསྶ ཝཏྠུ ཧོཏི, ཝིསཱདནཝསེནེཝ ཉཱཏིཝིནཱསཱདཱིནི ཙིནྟེནྟཱནཾ དོམནསྶསྶ. ཨཏྟནོ པཝཏྟིཀྑཎེཡེཝ ཨུཔཱཡཱསོ དོམནསྶསམྤཡོགཏོ ཙིཏྟཾ པརིདཧཏི, ཨཝིཔྥཱརིཀཏཱཀརཎཝསེན ཀཱཡཾ ཝིསཱདེཏི, ཏདུབྷཡཀརཎེནེཝ ཏཏོ པརཾ ཏཾནིམིཏྟཾ ཀཱཡིཀཾ ཙེཏསིཀཉྩ ཨདྷིམཏྟཾ དུཀྑཾ ཛནཡཏཱིཏི དུཀྑོ ཝུཏྟོ.

ཨཔྤིཡསམྤཡོགནིདྡེསཝཎྞནཱ

༡༩༩. ན ཨཔྤིཡནྟཱིཏི ན གམིཡནྟི, ན པཝེསཱིཡནྟཱིཏི ཨཏྠོ. ཨནཏྠནྟི བྱསནཾ, དུཀྑཾ ཝཱ. ཨཧིཏནྟི ཏསྶ ཧེཏུཾ. དུཏིཡེ ཨཏྠཝིཀཔྤེ ཨཏྠཾ ན ཀཱམེནྟཱིཏི ¶ ཨནཏྠཀཱམཱཏིཨཱདི ཨསམཏྠསམཱསོཔི ཡོཛིཏོ. ‘‘ཨསཱུརིཡཔསྶཱནི མུཁཱནཱི’’ཏིཨཱདཱིསུ ཝིཡ ཧི ཡེན སམཱསོ, ན ཏསྶཱཡཾ པཊིསེདྷཀོ ཨ-ཀཱརོཏི. ཡསྨིཾ ཀིསྨིཉྩི ནིབྦྷཡེ ཡོགཀྑེམ-སདྡོ ནིརུལ༹ྷོ དུཀྑཡོགཏོ ཁེམཏྟཱ.

སངྒཏིཨཱདཱིསུ སངྑཱརཝསེན ཡཾ ལབྦྷཏི, ཏཾ གཧེཏབྦཾ. ན ཧི སངྑཱརཱནཾ ཋཱནནིསཛྫཱདཡོ བྷོཛནཱདིཀིཙྩེསུ ཝཱ སཧཀརཎཾ ཝིཛྫཏཱིཏི པཙྪིམདྭཡཾ ཏདཏྠཝསེན ལབྦྷཏཱིཏི ན སཀྐཱ ཝཏྟུནྟི. ཡཾ ལབྦྷཏཱིཏི ཝཱ ཡཾ ཨཏྠཛཱཏཾ ལབྦྷཏཱིཏི ཨཏྠོ. ཏེན ཡཐཱ ལབྦྷཏི སངྒཏིཨཱདཱིསུ ཨཏྠོ, ཏཐཱ ཡོཛེཏབྦོ. པུགྒལསྶ ཧི སངྒཏི གནྟྭཱ སངྑཱརེཧི སཾཡོགོ ¶ ཧོཏི, ཨཱགཏེཧི ཙ ཏེཧི, པུགྒལསྶ ཙ ཨཏྟནོ ཋཱནཱདཱིསུ སངྑཱརེཧི སཧབྷཱཝོ ཧོཏི, སབྦཀིརིཡཱསུ ཙ མིསྶཱིབྷཱཝོཏི. ཨནཏྠབྷཱཝོ ཨུཔདྡཝབྷཱཝོ.

ཨནིཊྛཱནཾ ཨཱཔཱཐགམནམཏྟཾ ཏཾགཧཎམཏྟཉྩ ཨཔྤིཡསམྤཡོགོ, ན པན པཐཝིཕསྶཱདཡོ ཝིཡ ཨཔྤིཡསམྤཡོགོ ནཱམ ཨེཀོ དྷམྨོ ཨཏྠཱིཏི ཨཱཧ ‘‘སོ ཨཏྠཏོ ཨེཀོ དྷམྨོ ནཱམ ནཏྠཱི’’ཏི. ཨནིཊྛཱནི ཀཎྚཀཱདཱིནི ཨམིཏྟཱ ཙ ཨུསུཨཱདཱིཧི ཝིཛ྄ཛྷནཱདིདུཀྑཾ ཨུཔྤཱདེནྟི.

ཨིདྷཱཏི ཨིམསྨིཾ ལོཀེ དུཀྑཾ ཧོཏཱིཏི ཝཱ ཨིདྷ ཨིམསྨིཾ དུཀྑསཙྩནིདྡེསེ དུཀྑོ ཝུཏྟོཏི ཝཱ ཡོཛེཏབྦཾ.

པིཡཝིཔྤཡོགནིདྡེསཝཎྞནཱ

༢༠༠. མིནནྟཱིཏི ནཱལི༹ཡཱདཱིསུ དྷཉྙཾ ཝིཡ ཨནྟོ པཀྑིཔནྟི, ན བཧི ཀརོནྟཱིཏི ཨཏྠོ. ཨམཱ-སདྡོ སཧབྷཱཝདཱིཔཀོ. ཉཱཡནྟི ཝཱ ཨཛ྄ཛྷཏྟིཀཱཨིཙྩེཝ. ཉཱཏིབྱསནཱདིཀོ ཧུཏྭཱ ཨུཔཊྛཱཏཱིཏི བྱསནཔཙྩུཔཊྛཱནོ. སོཀུཔྤཱདནེནེཝ སརཱིརཾ སོསེནྟི, ཀིསཾ ཀརོནྟི, ཨཀིསམྤི ནིརོཛཏཱཀརཎེན མིལཱཔེནྟི, ཏཏོ ཙ ཀཱཡིཀཾ དུཀྑཾ ཨུཔྤཛྫཏཱིཏི ཏདུཔྤཱདཀཏཱ ཝུཏྟཱ.

སོཀསརསམཔྤིཏཱཏི ཨེཏེན ཙེཏསིཀདུཀྑཾ དསྶེཏི, ཝིཏུཛྫནྟཱིཏི ཨེཏེན ཀཱཡིཀཾ དུཀྑཾ.

ཨིཙྪཱནིདྡེསཝཎྞནཱ

༢༠༡. ཡསྨིཾ ¶ ཀཱལེ ཛཱཏིཡཱ ན ཨཱགནྟབྦཾ, ཏཾ ཀཱལཾ གཧེཏྭཱ ཨཱཧ ‘‘པརིནིབྦུཏེསུ ཙ ཝིཛྫམཱནཾ ཛཱཏིཡཱ ཨནཱགམན’’ནྟི. ཡམྤཱིཏི ཡེནཔཱིཏི ཨཏྠོ ཝུཏྟོ. ཡདཱཔི པན ཡཾ-སདྡོ ‘‘ཨིཙྪ’’ནྟི ཨེཏཾ ཨཔེཀྑཏི, ཏདཱཔི ཨལཱབྷཝིསིཊྛཱ ཨིཙྪཱ ཝུཏྟཱ ཧོཏི. ཡདཱ ‘‘ན ལབྷཏཱི’’ཏི ཨེཏཾ ཨཔེཀྑཏི, ཏདཱ ཨིཙྪཱཝིསིཊྛོ ཨལཱབྷོ ཝུཏྟོ ཧོཏི. སོ པནཏྠཏོ ཨཉྙོ དྷམྨོ ནཏྠི, ཏཐཱཔི ཨལབྦྷནེཡྻཨིཙྪཱཝ ཝུཏྟཱ ཧོཏི. ཨཔཱཔུཎིཏབྦེསུ པཝཏྟཏྟཱ ཨེཝ ‘‘ཨཔྤཏྟིཔཙྩུཔཊྛཱནཱ’’ཏི ཝུཏྟཱ. ཡཏྠ ཧི སཱ ཨིཙྪཱ པཝཏྟཱ, ཏཾ ཝཏྠུཾ ཨཔཱཔུཎནྟཱི ཧུཏྭཱ གཡ྄ཧཏཱིཏི.

ཚིནྣབྷིནྣགཎེནཱཏི ནིལླཛྫེན དྷུཏྟགཎེན, ཀཔྤཊིཀགཎེན ཝཱ.

ཝིགྷཱཏམཡནྟི ¶ ཙིཏྟཝིགྷཱཏམཡཾ དོམནསྶཾ ཙིཏྟཝིགྷཱཏཏོ ཨེཝ ཨུཔྤནྣཾ ཨུབྦནྡྷནཛརཱཏིསཱརཱདིཀཱཡིཀཾ དུཀྑཉྩ. ཨིཙྪིཏཱལཱབྷནྟི ཨལབྦྷནེཡྻཨིཙྪམེཝ ཝདཏི.

ཨུཔཱདཱནཀྑནྡྷནིདྡེསཝཎྞནཱ

༢༠༢. ཝིཏྠིཎྞསྶ དུཀྑསྶ ཨེཏྟཀནྟི དསྶནཾ དུཀྑསྶ སངྑེཔོ, ཏཾ ཀཱཏུཾ ན སཀྐཱ ཝིཏྠཱརསྶ ཨནནྟཏྟཱ. དུཀྑཝིཏྠཱརགཏཾ པན དེསནཱཝིཏྠཱརཾ པཧཱཡ ཡཏྠ སབྦོ དུཀྑཝིཏྠཱརོ སམོདྷཱནཾ གཙྪཏི, ཏཏྠ དེསནཱཡ ཝཝཏྠཱནཾ སངྑེཔོ, ཏཾ ཀཱཏུཾ སཀྐཱ ཏཱདིསསྶ ཝཏྠུནོ སབྦྷཱཝཱ.

དེསཾ ཛཱནནྟོ མགྒཀྑཱཡིཀཔུརིསོ དེསཀོ. བྷགཝཱཔི དུཀྑསྶ དེསཀོ. ‘‘དུཀྑནྟདེསཀེནཱ’’ཏི ཝཱ པཱཋོ, དུཀྑནྟཀྑཱཡིཀོཏི ཨཏྠོ.

པཱཝཀཱདཡོ ཡཐཱ ཨིནྡྷནཱདཱིནི བཱདྷེནྟི, ཨེཝཾ བཱདྷཡམཱནཱ. མཱརཎནྟིཀདུཀྑཱབྷིགྷཱཏེནཱཏི ཨིམིནཱ ཨཏིཔཱཀཊེན ཛཱཏིཛརཱདུཀྑཝིགྷཱཏཛསོཀཱདཡོ དསྶེཏི. ཏཏོཏི པརིདེཝཏོ ཨུདྡྷཾ. ཀཎྛ སོསཱདི སནྡྷི བནྡྷཙྪེདནཱདི ཛནཀ དྷཱཏུཀྑོབྷ སམཱཡོགཏོ ཀཱཡསྶ ཨཱབཱདྷནདུཀྑཾ དུཀྑཾ. ཡེསུ ཀེསུཙཱིཏི ཏིསྶསྶ ཝཱ ཕུསྶསྶ ཝཱ ཨུཔཱདཱནཀྑནྡྷེསུ སབྦམྤི ཙཀྑུརོགཱདིདུཀྑཾ སབྦསཏྟགཏཾ ཨེཝཾཔཀཱརམེཝཱཏི སངྑིཔིཏྭཱ དསྶེནྟོཏི ཨཏྠོ.

དུཀྑསཙྩནིདྡེསཝཎྞནཱ ནིཊྛིཏཱ.

༢. སམུདཡསཙྩནིདྡེསཝཎྞནཱ

༢༠༣. ཨུཏྟརཔདལོཔཾ ¶ ཀཏྭཱ ‘‘པུནབྦྷཝཀརཎཾ པུནོབྦྷཝོ’’ཏིཨཱཧ. ‘‘མནོསམྥསྶོ’’ཏི ཨེཏྠ མནོ ཝིཡ ཙ པུརིམཔདསྶ ཨོཀཱརནྟཏཱ དཊྛབྦཱ. ཨཐ ཝཱ སཱིལཊྛེན ཨིཀ-སདྡེན གམིཡཏྠཏྟཱ ཀིརིཡཱཝཱཙཀསྶ སདྡསྶ ཨདསྶནཾ དཊྛབྦཾ ཡཐཱ ‘‘ཨཔཱུཔབྷཀྑནསཱིལོ ཨཱཔཱུཔིཀོ’’ཏི. ‘‘ཏདྡྷིཏཱ’’ཨིཏི བཧུཝཙནནིདྡེསཱ ཝིཙིཏྟཏྟཱ ཝཱ ཏདྡྷིཏཱནཾ ཨབྷིདྷཱནལཀྑཎཏྟཱ ¶ ཝཱ ‘‘པུནབྦྷཝཾ དེཏཱི’’ཏིཨཱདཱིསུ ཨཏྠེསུ པོནོབྦྷཝིཀསདྡསིདྡྷི དཊྛབྦཱ. ཏཏྠ ཀམྨསཧཛཱཏཱ པུནབྦྷཝཾ དེཏི, ཀམྨསཧཱཡབྷཱུཏཱ ཏདསཧཛཱཏཱ པུནབྦྷཝཱཡ སཾཝཏྟཏི, དུཝིདྷཱཔི པུནཔྤུནཾ བྷཝེ ནིབྦཏྟེཏི. ཏེནེཝཱཧ ‘‘པུནབྦྷཝསྶ དཱཡིཀཱཔཱི’’ཏིཨཱདི. པོནོབྦྷཝིཀཱཡེཝཱཏི ནཱམཾ ལབྷཏཱིཏི པུནབྦྷཝཾ དཱཡིཀཱཔི ཨདཱཡིཀཱཔི པུནབྦྷཝཾ དེཏིཙྩེཝ པོནོབྦྷཝིཀཱཏི སམཱནཝིཔཱཀཱཏི ནཱམཾ ལབྷཏི སམཱནསབྷཱཝཏྟཱ ཏདཱནུབྷཱཝཏྟཱ ཙ. ཨེཝཾ ཨིཏརེསུ དཊྛབྦཾ. ཏཏྠ ཨུཔདྷིམྷི ཡཐཱནིབྦཏྟེ ཨཏྟབྷཱཝེ ཝིཔཙྩནཀམྨཾ ཨེཏིསྶཱཏི ཨུཔདྷིཝེཔཀྐཱ. ནནྡནཊྛེན ནནྡཱི, རཉྫནཊྛེན རཱགོ. ཡོ ཙ ནནྡིརཱགོ, ཡཱ ཙ ཏཎྷཱ, ཨུབྷཡམེཏཾ ཨེཀཏྠཾ, བྱཉྫནམེཝ ནཱནནྟི ཏཎྷཱ ‘‘ནནྡིརཱགེན སདྡྷིཾ ཨཏྠཏོ ཨེཀཏྟཾ གཏཱ’’ཏི ཝུཏྟཱ. རཱགསམྦནྡྷེན ‘‘ཨུཔྤནྣསྶཱ’’ཏི ཝུཏྟཾ. རཱུཔཱརཱུཔབྷཝརཱགོ ཝིསུཾ ཝཀྑཏཱིཏི ཀཱམབྷཝེ ཨེཝ བྷཝཔཏྠནཱཨུཔྤཏྟི ཝུཏྟཱཏི ཝེདིཏབྦཱ.

ཏསྨིཾ ཏསྨིཾ པིཡརཱུཔེ པཋམུཔྤཏྟིཝསེན ‘‘ཨུཔྤཛྫཏཱི’’ཏི ཝུཏྟཱ, པུནཔྤུནཾ པཝཏྟིཝསེན ‘‘ནིཝིསཏཱི’’ཏི, པརིཡུཊྛཱནཱནུསཡཝསེན ཝཱ ཨུཔྤཏྟིནིཝེསཱ ཡོཛེཏབྦཱ. སམྤཏྟིཡནྟི མནུསྶསོབྷགྒེ དེཝཏྟེ ཙ. ཨཏྟནོ ཙཀྑུནྟི སཝཏྠུཀཾ ཙཀྑུམཱཧ, སཔསཱདཾ ཝཱ མཾསཔིཎྜཾ. ཝིཔྤསནྣཔཉྩཔསཱདནྟི པརིསུདྡྷནཱིལཔཱིཏལོཧིཏཀཎྷཨོདཱཏཝཎྞཔསཱདཾ. རཛཏཔནཱལི༹ཀཾ ཝིཡ ཚིདྡཾ ཨབྦྷནྟརེ ཨོདཱཏཏྟཱ. པཱམངྒསུཏྟཾ ཝིཡ ལམྦཀཎྞབདྡྷཾ. ཏུངྒཱ ཨུཙྩཱ དཱིགྷཱ ནཱསིཀཱ ཏུངྒནཱསིཀཱ, ཨེཝཾ ལདྡྷཝོཧཱརཾ ཨཏྟནོ གྷཱནཾ. ‘‘ལདྡྷཝོཧཱརཱ’’ཏི ཝཱ པཱཋོ. ཏསྨིཾ སཏི ཏུངྒཱ ནཱསིཀཱ ཡེསཾ, ཏེ ཏུངྒནཱསིཀཱ. ཨེཝཾ ལདྡྷཝོཧཱརཱ སཏྟཱ ཨཏྟནོ གྷཱནནྟི ཡོཛནཱ ཀཱཏབྦཱ. ཛིཝ྄ཧཾ…པེ… མཉྙནྟི ཝཎྞཱ སཎྛཱནཏོ ཀིཙྩཏོ ཙ. མནཾ…པེ… ཨུལཱ༹རཾ མཉྙནྟི ཨཏཱིཏཱདིཨཏྠཝིཙིནནསམཏྠཾ. ཨཏྟནཱ པཊིལདྡྷཱནཱིཏི ཨཛ྄ཛྷཏྟཉྩ སརཱིརགནྡྷཱདཱིནི ¶ བཧིདྡྷཱ ཙ ཝིལེཔནགནྡྷཱདཱིནི. ཨུཔྤཛྫམཱནཱ ཨུཔྤཛྫཏཱིཏི ཡདཱ ཨུཔྤཛྫམཱནཱ ཧོཏི, ཏདཱ ཨེཏྠ ཨུཔྤཛྫཏཱིཏི སཱམཉྙེན གཧིཏཱ ཨུཔྤཱདཀིརིཡཱ ལཀྑཎབྷཱཝེན ཝུཏྟཱ, ཝིསཡཝིསིཊྛཱ ལཀྑིཏབྦབྷཱཝེན. ན ཧི སཱམཉྙཝིསེསེཧི ནཱནཏྟཝོཧཱརོ ན ཧོཏཱིཏི. ཨུཔྤཛྫམཱནཱཏི ཝཱ ཨནིཙྪིཏོ ཨུཔྤཱདོ ཧེཏུབྷཱཝེན ཝུཏྟོ. ཨུཔྤཛྫཏཱིཏི ནིཙྪིཏོ ཕལབྷཱཝེན ‘‘ཡདི ཨུཔྤཛྫམཱནཱ ཧོཏི, ཨེཏྠ ཨུཔྤཛྫཏཱི’’ཏི. སོ ཧི ཏེན ཨུཔཡོཛིཏོ ཝིཡ ཧོཏི.

སམུདཡསཙྩནིདྡེསཝཎྞནཱ ནིཊྛིཏཱ.

༣. ནིརོདྷསཙྩནིདྡེསཝཎྞནཱ

༢༠༤. ཨནཱུཧཏེཏི ¶ ཨནུདྡྷཏེ, ཨཔྤཧཱིནེཏི ཨཏྠོ.

སཱིཧོ ཝེདྷཀེ པཊིཔཛྫཏི, ན ཨུསུམྷི, སུཝཱནོ ལེཌྜུམྷི པཊིཔཛྫཏི, ན པཧཱརཀེ. ཁཡགམནཝསེན ཝིརཛྫཏི, ཨཔྤཝཏྟིགམནཝསེན ནིརུཛ྄ཛྷཏི. ཨནཔེཀྑཏཱཡ ཙཛནཝསེན ཧཱནིཝསེན ཙ ཙཛཱིཡཏི, པུན ཡཐཱ ན པཝཏྟཏི, ཏཐཱ དཱུརཁིཔནཝསེན པཊིནིསྶཛྫཱིཡཏི, བནྡྷནབྷཱུཏཱཡ མོཙནཝསེན མུཙྩཏི, ཨསཾཀིལེསཝསེན ན ཨལླཱིཡཏི. ཨཱཡཱུཧནཾ སམུདཡོ, ཏཔྤཊིཔཀྑཝསེན ཨནཱཡཱུཧནཾ.

ཨཔཉྙཏྟིནྟི ཨཔཉྙཱཔནཾ, ‘‘ཏིཏྟཨལཱབུ ཨཏྠཱི’’ཏི ཝོཧཱརཱབྷཱཝཾ ཝཱ. ཏིཏྟཨལཱབུཝལླིཡཱ ཨཔྤཝཏྟིཾ ཨིཙྪནྟོ པུརིསོ ཝིཡ མགྒོ དཊྛབྦོ, ཏསྶ ཏསྶཱ ཨཔྤཝཏྟིནིནྣཙིཏྟསྶ མཱུལཙྪེདནཾ ཝིཡ མགྒསྶ ནིབྦཱནཱརམྨཎསྶ ཏཎྷཱཔཧཱནཾ. ཏདཱཔྤཝཏྟི ཝིཡ ཏཎྷཱཡ ཨཔྤཝཏྟིབྷཱུཏཾ ནིབྦཱནཾ དཊྛབྦཾ. དུཏིཡཱུཔམཱཡ དཀྑིཎདྭཱརཾ ཝིཡ ནིབྦཱནཾ, ཙོརགྷཱཏཀཱ ཝིཡ མགྒོ དཊྛབྦོ, པུརིམཱ ཝཱ ཨུཔམཱ མགྒེན ནིརུདྡྷཱཡ པིཡརཱུཔསཱཏརཱུཔེསུ ནིརུདྡྷཱཏི ཝཏྟབྦཏཱདསྶནཏྠཾ ཝུཏྟཱ, པཙྪིམཱ ནིབྦཱནཾ ཨཱགམྨ ནིརུདྡྷཱཡཔི.

ནིརོདྷསཙྩནིདྡེསཝཎྞནཱ ནིཊྛིཏཱ.

༤. མགྒསཙྩནིདྡེསཝཎྞནཱ

༢༠༥. ཨཉྙམགྒཔཊིཀྑེཔནཏྠནྟི ¶ ཏིཏྠིཡེཧི ཀཔྤིཏསྶ མགྒསྶ དུཀྑནིརོདྷགཱམིནིཔཊིཔདཱབྷཱཝཾ པཊིཀྑེཔེཏུནྟི ཨཏྠོ, ཨཉྙསྶ ཝཱ མགྒབྷཱཝཔཊིཀྑེཔོ ཨཉྙམགྒཔཊིཀྑེཔོ. པུགྒལསྶ ཨརིཡབྷཱཝཀརཏྟཱ ཨརིཡཾ ཀརོཏཱིཏི ཨརིཡོ, ཨརིཡཕལཔཊིལཱབྷཀརཏྟཱ ཨརིཡཾ ལབྷཱཔེཏི ཛནེཏཱིཏི ཨརིཡོ. ཨཏྟནོ ཀིཙྩཝསེན ཕལཝསེན ཙ ཨརིཡནཱམལཱབྷོ ཨེཝ ཝུཏྟོཏི དཊྛབྦོ. ཨཊྛ ཨངྒཱནི ཨསྶཱཏི ཨཉྙཔདཏྠསམཱསཾ ཨཀཏྭཱ ‘‘ཨཊྛངྒཱནི ཨསྶ སནྟཱིཏི ཨཊྛངྒིཀོ’’ཏི པདསིདྡྷི དཊྛབྦཱ.

ཙཏུརངྒསམནྣཱགཏཱ ¶ ཝཱཙཱ ཛནཾ སངྒཎྷཱཏཱིཏི ཏབྦིཔཀྑཝིརཏིསབྷཱཝཱ སམྨཱཝཱཙཱ བྷེདཀརམིཙྪཱཝཱཙཱཔཧཱནེན ཛནེ སམྤཡུཏྟེ ཙ པརིགྒཎྷནཀིཙྩཝཏཱི ཧོཏཱིཏི ‘‘པརིགྒཧལཀྑཎཱ’’ཏི ཝུཏྟཱ. ཡཐཱ ཙཱིཝརཀམྨཱདིཀོ ཀམྨནྟོ ཨེཀཾ ཀཱཏབྦཾ སམུཊྛཱཔེཏི ནིཔྥཱདེཏི, ཏཾཏཾཀིརིཡཱནིཔྥཱདཀོ ཝཱ ཙེཏནཱསངྑཱཏོ ཀམྨནྟོ ཧཏྠཔཱདཙལནཱདིཀཾ ཀིརིཡཾ སམུཊྛཱཔེཏི, ཨེཝཾ སཱཝཛྫཀཏྟབྦཀིརིཡཱསམུཊྛཱཔཀམིཙྪཱཀམྨནྟཔྤཧཱནེན སམྨཱཀམྨནྟོ ནིརཝཛྫསམུཊྛཱཔནཀིཙྩཝཱ ཧོཏི, སམྤཡུཏྟདྷམྨེ ཙ སམུཊྛཱཔེནྟོ ཨེཝ པཝཏྟཏཱིཏི ‘‘སམུཊྛཱཔནལཀྑཎོ’’ཏི ཝུཏྟོ. ཀཱཡཝཱཙཱནཾ ཁནྡྷསནྟཱནསྶ ཙ སཾཀིལེསབྷཱུཏམིཙྪཱཨཱཛཱིཝཔྤཧཱནེན སམྨཱཨཱཛཱིཝོ ‘‘ཝོདཱཔནལཀྑཎོ’’ཏི ཝུཏྟོ.

ཨཏྟནོ པཙྩནཱིཀཀིལེསཱ དིཊྛེཀཊྛཱ ཨཝིཛྫཱདཡོ. པསྶཏཱིཏི པཀཱསེཏཱིཏི ཨཏྠོ. ཏེནེཝ ཧི ཨངྒེན ཏཏྠ པཙྩཝེཀྑཎཱ པཝཏྟཏཱིཏི. ཏཐེཝཱཏི ཨཏྟནོ པཙྩནཱིཀཀིལེསེཧི སདྡྷིནྟི ཨཏྠོ.

ཀིཙྩཏོཏི པུབྦབྷཱགེཧི དུཀྑཱདིཉཱཎེཧི ཀཏྟབྦཀིཙྩསྶ ཨིདྷ ནིཔྥཏྟིཏོ, ཨིམསྶེཝ ཝཱ ཉཱཎསྶ དུཀྑཱདིཔྤཀཱསནཀིཙྩཏོ. ཏཱིཎི ནཱམཱནི ལབྷཏི ཀཱམསངྐཔྤཱདིཔྤཧཱནཀིཙྩནིཔྥཏྟིཏོ. སིཀྑཱཔདཝིབྷངྒེ (ཝིབྷ. ༧༠༣ ཨཱདཡོ) ‘‘ཝིརཏིཙེཏནཱ སབྦེ སམྤཡུཏྟདྷམྨཱ ཙ སིཀྑཱཔདཱནཱི’’ཏི ཝུཏྟཱཏི ཏཏྠ པདྷཱནཱནཾ ཝིརཏིཙེཏནཱནཾ ཝསེན ‘‘ཝིརཏིཡོཔི ཧོནྟི ཙེཏནཱཡོཔཱི’’ཏི ཨཱཧ. མུསཱཝཱདཱདཱིཧི ཝིརམཎཀཱལེ ཝཱ ཝིརཏིཡོ སུབྷཱསིཏཱདིཝཱཙཱབྷཱསནཱདིཀཱལེ ཙ ཙེཏནཱཡོ ཡོཛེཏབྦཱ, མགྒཀྑཎེ ཝིརཏིཡོཝ ¶ ཙེཏནཱནཾ ཨམགྒངྒཏྟཱ ཨེཀསྶ ཉཱཎསྶ དུཀྑཱདིཉཱཎཏཱ ཝིཡ ཨེཀཱཡ ཝིརཏིཡཱ མུསཱཝཱདཱདིཝིརཏིབྷཱཝོ ཝིཡ ཙ ཨེཀཱཡ ཙེཏནཱཡ སམྨཱཝཱཙཱདིཀིཙྩཏྟཡསཱདྷནསབྷཱཝཱབྷཱཝཱ སམྨཱཝཱཙཱདིབྷཱཝཱསིདྡྷིཏོ, ཏཾསིདྡྷིཡཉྩ ཨངྒཏྟཡཏྟཱསིདྡྷིཏོ ཙ.

པུབྦབྷཱགེཔི མགྒཀྑཎེཔི སམྨཱསམཱདྷི ཨེཝཱཏི ཡདིཔི སམཱདྷིཨུཔཀཱརཀཱནཾ ཨབྷིནིརོཔནཱནུམཛྫནསམྤིཡཱཡནབྲཱུཧནསནྟསུཁཱནཾ ཝིཏཀྐཱདཱིནཾ ཝསེན ཙཏཱུཧི ཛྷཱནེཧི སམྨཱསམཱདྷི ཝིབྷཏྟོ, ཏཐཱཔི ཝཱཡཱམོ ཝིཡ ཨནུཔྤནྣཱཀུསལཱནུཔྤཱདནཱདིཙཏུཝཱཡཱམཀིཙྩཾ, སཏི ཝིཡ ཙ ཨསུབྷཱསུཁཱནིཙྩཱནཏྟེསུ ཀཱཡཱདཱིསུ སུབྷཱདིསཉྙཱཔཧཱནཙཏུསཏིཀིཙྩཾ, ཨེཀོ སམཱདྷི ཙཏུཀྐཛ྄ཛྷཱནསམཱདྷིཀིཙྩཾ ན སཱདྷེཏཱིཏི པུབྦབྷཱགེཔི པཋམཛ྄ཛྷཱནསམཱདྷིཙིཏྟེ ཛྷཱནསམཱདྷི ¶ པཋམཛ྄ཛྷཱནསམཱདྷི ཨེཝ མགྒཀྑཎེཔི, ཏཐཱ པུབྦབྷཱགེཔི ཙཏུཏྠཛ྄ཛྷཱནསམཱདྷིཙིཏྟེ ཛྷཱནསམཱདྷི ཙཏུཏྠཛ྄ཛྷཱནསམཱདྷི ཨེཝ མགྒཀྑཎེཔཱིཏི ཨཏྠོ.

ཝཙཱིབྷེདསྶ ཨུཔཀཱརཀོ ཝིཏཀྐོ སཱཝཛྫཱནཝཛྫཝཙཱིབྷེདནིཝཏྟནཔཝཏྟནཀརཱཡ སམྨཱཝཱཙཱཡཔི ཨུཔཀཱརཀོ ཨེཝཱཏི ‘‘སྭཱཡ’’ནྟིཨཱདིམཱཧ. ཝཙཱིབྷེདནིཡཱམིཀཱ ཝཱཙཱ ཀཱཡིཀཀིརིཡཱནིཡཱམཀསྶ སམྨཱཀམྨནྟསྶ ཨུཔཀཱརིཀཱ. ཨིདཾ ཝཱིརིཡནྟི ཙཏུསམྨཔྤདྷཱནཝཱིརིཡཾ. གཏིཡོཏི ནིཔྥཏྟིཡོ, ཀིཙྩཱདིསབྷཱཝེ ཝཱ. སམནྭེསིཏྭཱཏི ཨུཔདྷཱརེཏྭཱ.

པུརིམཱནི དྭེ སཙྩཱནི ཨུགྒཎྷིཏྭཱཏི སམྦནྡྷོ. ཨིཊྛཾ ཀནྟནྟི ནིརོདྷམགྒེསུ ནིནྣབྷཱཝཾ དསྶེཏི, ན ཨབྷིནནྡནཾ, ཏནྣིནྣབྷཱཝོཡེཝ ཙ ཏཏྠ ཀམྨཀརཎཾ དཊྛབྦཾ.

ཀིཙྩཏོཏི པརིཉྙཱདིཏོ. ཨཱརམྨཎཔཊིཝེདྷོཏི སཙྪིཀིརིཡཱཔཊིཝེདྷམཱཧ. སབྦམྤི པཊིཝེདྷཉཱཎཾ ལོཀུཏྟརནྟི ཀསྨཱ ཝུཏྟཾ, ནནུ ཨུགྒཧཱདིཔཊིཝེདྷོ ཙ པཊིཝེདྷོཝ, ན ཙ སོ ལོཀུཏྟརོཏི? ན, ཀེཝལེན པཊིཝེདྷ-སདྡེན ཨུགྒཧཱདིཔཊིཝེདྷཱནཾ ཨཝཙནཱིཡཏྟཱ, པཊིཝེདྷནིམིཏྟཏྟཱ ཝཱ ཨུགྒཧཱདིཝསེན པཝཏྟཾ དུཀྑཱདཱིསུ པུབྦབྷཱགེ ཉཱཎཾ ‘‘པཊིཝེདྷོ’’ཏི ཝུཏྟཾ, ན པཊིཝེདྷཏྟཱ, པཊིཝེདྷབྷཱུཏམེཝ པན ཉཱཎཾ སནྡྷཱཡཱཧ ‘‘སབྦམྤི པཊིཝེདྷཉཱཎཾ ལོཀུཏྟར’’ནྟི. ཨུགྒཧཔརིཔུཙྪཱཉཱཎཱནིཔི སཝནཉཱཎེ ཨེཝ ཨཝརོདྷཾ གཙྪནྟཱིཏི ‘‘སཝནདྷཱརཎསམྨསནཉཱཎཾ ལོཀིཡ’’ནྟི ཏིཝིདྷམེཝ ཉཱཎམཱཧ. ཨུགྒཧཱདཱིཧི སཙྩཔརིགྒཎྷནཾ པརིགྒཧོ.

པཡོགོཏི ¶ ཀིརིཡཱ, ཝཱཡཱམོ ཝཱ. ཏསྶ མཧནྟཏརསྶ ཨིཙྪིཏབྦཏཾ དུཀྐརཏརཏཉྩ ཨུཔམཱཧི དསྶེཏི ‘‘བྷཝགྒགཧཎཏྠ’’ནྟིཨཱདིནཱ.

པདགྷཱཏནྟི ཨེཏྠ གཏམགྒོ ‘‘པད’’ནྟི ཝུཙྩཏི. ཡེན ཙུཔཱཡེན ཀཱརཎེན ཀཱམཝིཏཀྐོ ཨུཔྤཛྫཏི, སོ ཏསྶ གཏམགྒོཏི ཏསྶ གྷཱཏོ པདགྷཱཏོ. ཨུསྶུཀྐཱཔེཏྭཱཏི ཨུདྡྷཾ ཨུདྡྷཾ སནྟིཝིསེསཡུཏྟཾ ཀཏྭཱ, ཝཌྜྷེཏྭཱཏི ཨཏྠོ.

པཱལི༹ཡཾ ཝིབྷཏྟེསཱུཏི ཀཏརཔཱལི༹ཡཾ? དྷམྨསངྒཧེ ཏཱཝ ཨཊྛ ཀསིཎཱནི དས ཨསུབྷཱ ཙཏྟཱརོ བྲཧྨཝིཧཱརཱ ཙཏྟཱརི ཨཱརུཔྤཱནི ཝིབྷཏྟཱནི, ཨཱགམེསུ དས ཨནུསྶཏིཡོ ཨཱཧཱརེ པཊིཀཱུལསཉྙཱ ¶ ཙཏུདྷཱཏུཝཝཏྠཱནནྟི ཨིམཱནི ཙཱཏི ཏཏྠ ཏཏྠ ཝིབྷཏྟཾ. ཨིམེསུ ཏཱིསཱུཏི ཀཱམཱདཱིསུ ཏཱིསུ ཋཱནེསུ.

མིཙྪཱཝཱཙཱསངྑཱཏཱཡཱཏི ཨེཏེན ཨེཀཱཡ ཙེཏནཱཡ པཧཱཏབྦཨེཀཏྟཾ དསྶེཏི. ཨིདྷ ཨརིཡསཱཝཀོ སཀལྱཱཎཔུཐུཛྫནཀོ སེཀྑོ. ཀཱཡདྭཱརཝཱིཏིཀྐམཱཏི ཨཱཛཱིཝཧེཏུཀཏོ པཱཎཱཏིཔཱཏཱདིཏོ ཝིསུཾ ཝིསུཾ ཝིརམཎཾ ཡོཛེཏབྦཾ.

ཨཡཾ པནསྶཱཏི མགྒབྷཱཝེན ཙཏུབྦིདྷམྤི ཨེཀཏྟེན གཧེཏྭཱ ཨསྶ མགྒསྶ ཨཡཾ ཛྷཱནཝསེན སབྦསདིསསབྦཱསདིསཨེཀཙྩསདིསཏཱ ཝིསེསོ. པཱདཀཛ྄ཛྷཱནནིཡཱམེན ཧོཏཱིཏི ཨིདྷ པཱདཀཛ྄ཛྷཱནནིཡཱམཾ དྷུརཾ ཀཏྭཱ ཨཱཧ, ཨཊྛསཱལིནིཡཾ པན ཝིཔསྶནཱནིཡཱམཾ ཏཏྠ སབྦཝཱདཱཝིརོདྷཏོ, ཨིདྷ པན སམྨསིཏཛ྄ཛྷཱནཔུགྒལཛ྄ཛྷཱསཡཝཱདནིཝཏྟནཏོ པཱདཀཛ྄ཛྷཱནནིཡཱམཾ. ཝིཔསྶནཱནིཡཱམོ པན སཱདྷཱརཎཏྟཱ ཨིདྷཱཔི ན པཊིཀྑིཏྟོཏི དཊྛབྦོ. ཨཉྙེ ཙཱཙརིཡཝཱདཱ ཝཀྑམཱནཱ ཝིབྷཛིཏབྦཱཏི ཡཐཱཝུཏྟམེཝ ཏཱཝ པཱདཀཛ྄ཛྷཱནནིཡཱམཾ ཝིབྷཛནྟོ ཨཱཧ ‘‘པཱདཀཛ྄ཛྷཱནནིཡཱམེན ཏཱཝཱ’’ཏི.

ཨཱརུཔྤེ ཙཏུཀྐཔཉྩཀ…པེ… ཝུཏྟཾ ཨཊྛསཱལིནིཡནྟི ཨདྷིཔྤཱཡོ. ནནུ ཏཏྠ ‘‘ཨཱརུཔྤེ ཏིཀཙཏུཀྐཛ྄ཛྷཱནཾ ཨུཔྤཛྫཏཱི’’ཏི ཝུཏྟཾ, ན ‘‘ཙཏུཀྐཔཉྩཀཛ྄ཛྷཱན’’ནྟི? སཙྩཾ, ཡེསུ པན སཾསཡོ ཨཏྠི, ཏེསཾ ཨུཔྤཏྟིདསྶནེན, ཏེནཏྠཏོ ཙཏུཀྐཔཉྩཀཛ྄ཛྷཱནཾ ཨུཔྤཛྫཏཱིཏི ཝུཏྟམེཝ ཧོཏཱིཏི ཨེཝམཱཧཱཏི ཝེདིཏབྦཾ. སམུདཱཡཉྩ ཨཔེཀྑིཏྭཱ ‘‘ཏཉྩ ལོཀུཏྟརཾ, ན ལོཀིཡ’’ནྟི ཨཱཧ. ཙཏུཏྠཛ྄ཛྷཱནམེཝ ཧི ལོཀིཡཾ ཏཏྠ ཨུཔྤཛྫཏི, ན ཙཏུཀྐཾ པཉྩཀཉྩཱཏི. ཨེཏྠ ¶ ཀཐནྟི པཱདཀཛ྄ཛྷཱནསྶ ཨབྷཱཝཱ ཀཐཾ དཊྛབྦནྟི ཨཏྠོ. ཏཾཛྷཱནིཀཱཝ ཏསྶ ཏཏྠ ཏཡོ མགྒཱ ཨུཔྤཛྫནྟི ཏཛ྄ཛྷཱནིཀཾ པཋམཕལཱདིཾ པཱདཀཾ ཀཏྭཱ ཨུཔརིམགྒབྷཱཝནཱཡཱཏི ཨདྷིཔྤཱཡོ, ཏིཀཙཏུཀྐཛ྄ཛྷཱནིཀཾ པན མགྒཾ བྷཱཝེཏྭཱ ཏཏྠུཔྤནྣསྶ ཨརཱུཔཛ྄ཛྷཱནཾ ཏཛ྄ཛྷཱནིཀཾ ཕལཉྩ པཱདཀཾ ཀཏྭཱ ཨུཔརིམགྒབྷཱཝནཱཡ ཨཉྙཛྷཱནིཀཱཔི ཨུཔྤཛྫནྟཱིཏི ཛྷཱནངྒཱདིནིཡཱམིཀཱ པུབྦཱབྷིསངྑཱརསམཱཔཏྟི པཱདཀཾ, ན སམྨསིཏབྦཱཏི ཕལསྶཔི པཱདཀཏཱ དཊྛབྦཱ.

དུཀྑཉཱཎཱདཱིནཾ རཱུཔཱདིཚལཱ༹རམྨཎཏྟཱ ནེཀྑམྨསངྐཔྤཱདཱིནཾ ཀསིཎཱདིཏཾཏཾཀུསལཱརམྨཎཱརམྨཎཏྟཱ ¶ སམྨཱཝཱཙཱདཱིནཾ ཨངྒཱནཾ ཏཾཏཾཝིརམིཏབྦཱདིཨཱརམྨཎཏྟཱ ‘‘ཡཐཱནུརཱུཔ’’ནྟི ཨཱཧ. ཏདནུརཱུཔོཏི ཨཝིཔྤཊིསཱརཀརསཱིལཾ ཝཱཡཱམསྶ ཝིསེསཔཙྩཡོཏི སཱིལཱནུརཱུཔཏཱ ཝཱཡཱམསྶ ཝུཏྟཱ སམྤཡུཏྟསྶཔི, སམྤཡུཏྟསྶེཝ ཙ ཝཙནཏོ ‘‘སཱིལབྷཱུམིཡཾ པཏིཊྛིཏསྶཱ’’ཏི ཨཝཏྭཱ ‘‘པཏིཊྛམཱནསྶཱ’’ཏི ཝུཏྟཾ. ཙེཏསོ ཨསམྨོསོཏི ‘‘ཨེཀཱརཀྑོ’’ཏི ཨེཏྠ ཝུཏྟེན སཏཱརཀྑེན ཙེཏསོ རཀྑིཏཏཱ. ཏེནཱཧ ‘‘ཨིཏི…པེ… སུཝིཧིཏཙིཏྟཱརཀྑསྶཱ’’ཏི.

ཨཱསཝཀྑཡཉཱཎསྶ ཝིཛྫཱབྷཱཝོ ཝུཏྟོཏི ཨཱསཝཀྑཡསངྑཱཏེ མགྒེ ཏཱིཧི ཁནྡྷེཧི སངྒཧིཏེ པཉྙཱཀྑནྡྷོ ཝིཛྫཱ, སཱིལསྶ ཙཏུནྣཉྩ ཛྷཱནཱནཾ ཙརཎབྷཱཝོ ཝུཏྟོཏི ཨིཏརེ དྭེ ཁནྡྷཱ ཙརཎཾ. ཡནྟི ཨེཏེན ནིབྦཱནཾ གཙྪནྟཱིཏི ཡཱནཾ, ཝིཔསྶནཱཝ ཡཱནཾ ཝིཔསྶནཱཡཱནཾ. སཱིལཾ སམཱདྷིསྶ ཝིསེསཔཙྩཡོ, སམཱདྷི ཝིཔསྶནཱཡཱཏི སམཐསྶ ཨུཔཀཱརཏྟཱ སཱིལཀྑནྡྷོ ཙ སམཐཡཱནེན སངྒཧིཏོ. ཝིཔསྶནཱཡཱནེན ཀཱམེསུ ཨཱདཱིནཝཾ ཝིབྷཱཝེནྟོ སམཐཡཱནེན ནིརཱམིསཾ ཛྷཱནསུཁཾ ཨཔརིཙྩཛནྟོ ཨནྟདྭཡཀུམྨགྒཾ ཝིཝཛྫེཏི. པཉྙཱ ཝིཡ མོཧསྶ, སཱིལསམཱདྷཡོ ཙ དོསལོབྷཱནཾ ཨུཛུཝིཔཙྩནཱིཀཱ ཨདོསཱལོབྷེཧི སཱདྷེཏབྦཏྟཱ. སཱིལསམཱདྷིཔཉྙཱཡོགཏོ ཨཱདིམཛ྄ཛྷཔརིཡོསཱནཀལྱཱཎཾ. སཱིལཱདཱིནི ཧི སཱསནསྶ ཨཱདིམཛ྄ཛྷཔརིཡོསཱནནྟི. ཡསྨིཾ ཋིཏོ མགྒཊྛོ ཕལཊྛོ ཙ ཨརིཡོ ཧོཏི, ཏཾ མགྒཕལསངྑཱཏཾ ཁནྡྷཏྟཡསངྒཧིཏཾ སཱསནཾ ཨརིཡབྷཱུམི.

མགྒསཙྩནིདྡེསཝཎྞནཱ ནིཊྛིཏཱ.

སུཏྟནྟབྷཱཛནཱིཡཝཎྞནཱ ནིཊྛིཏཱ.

༢. ཨབྷིདྷམྨབྷཱཛནཱིཡཝཎྞནཱ

༢༠༦-༢༡༤. ཨརིཡསཙྩ-སདྡོ ¶ སམུདཡེ ཝཏྟམཱནོ པརིཉྙེཡྻབྷཱཝརཧིཏེ ཨེཀནྟཔཧཱཏབྦེ ཏཎྷཱསངྑཱཏེ སམུདཡེ པཝཏྟཏི, ན པཧཱཏབྦཔརིཉྙེཡྻེསུ ཨཝསེསཀིལེསཱཝསེསཱཀུསལེསུ ཨཔྤཧཱཏབྦེསུ ཙ སཱསཝཀུསལམཱུལཱཝསེསསཱསཝཀུསལེསཱུཏི སཔྤདེསོ ཏཏྠ སམུདཡོ ཧོཏི, ཀེཝལཾ སཙྩསདྡེ ནིཔྤདེསོཏི ཨཱཧ ‘‘ནིཔྤདེསཏོ སམུདཡཾ དསྶེཏུ’’ནྟི. དུཀྑནིརོདྷཱ པན ཨརིཡསཙྩདེསནཱཡཾ དྷམྨཏོ ནིཔྤདེསཱ ཨེཝ. ན ཧི ཏཏོ ཨཉྙོ དྷམྨོ ཨཏྠི, ཡོ སཙྩདེསནཱཡཾ ¶ དུཀྑཾ ནིརོདྷོཏི ཙ ཝཏྟབྦོ སིཡཱ, མགྒོཔི ཨཊྛངྒིཀཔཉྩངྒིཀཝཱརེསུ ཨཔུབྦོ ནཏྠི, ཏསྨཱ སམུདཡམེཝ ‘‘ནིཔྤདེསཏོ དསྶེཏུ’’ནྟི ཝདཏི ཏསྶ སབྦཏྠ ཏཱིསུཔི ཝཱརེསུ ཨཔུབྦསྶ དསྶིཏཏྟཱ. ཨཔུབྦསམུདཡདསྶནཏྠཱཡཔི ཧི སཙྩདེསནཱཡཾ ‘‘ཏཏྠ ཀཏམོ དུཀྑསམུདཡོ? ཏཎྷཱ’’ཏི ཝཙནཾ ཀེཝལཱཡ ཏཎྷཱཡ སཙྩ-སདྡསྶ པཝཏྟིདསྶནཏྠནྟི. དེསནཱཝསེན པན ཏཾ ཏཾ སམུདཡཾ ཋཔེཏྭཱ དུཀྑཾ ཏསྶ ཏསྶ པཧཱནཝསེན ནིརོདྷོ ཨཊྛངྒིཀཔཉྩངྒིཀསབྦལོཀུཏྟརཀུསལཝསེན མགྒོ ཙ ཨརིཡསཙྩདེསནཱཡཾ ན ཝུཏྟོཏི དུཀྑཱདཱིནི ཙ ཏཏྠ སཔྤདེསཱནི དསྶིཏཱནི ཧོནྟཱིཏི ཏཱནི ཙ ནིཔྤདེསཱནི དསྶེཏུཾ སཙྩདེསནཱ ཝུཏྟཱཏི ཝཏྟུཾ ཝཊྚཏི. པཙྩཡསངྑཱཏནྟི ཀམྨཀིལེསཝསེན ཛཱཏིཨཱདིདུཀྑསྶ མཱུལབྷཱུཏནྟི ཨཏྠོ.

ནིརོདྷསཙྩཾ…པེ… པཉྩཧཱཀཱརེཧི ནིདྡིཊྛནྟི ཨརིཡསཙྩདེསནཏོ སཙྩདེསནཱཡ ཝིསེསཾ དསྶེཏི. ཏཏྠ ‘‘ཏིཎྞནྣཉྩ ཀུསལམཱུལཱནཾ ཨཝསེསཱནཉྩ སཱསཝཀུསལཱནཾ པཧཱན’’ནྟི ཨིདཾ ཏེསཾ པཙྩཡཱནཾ ཨཝིཛྫཱཏཎྷཱཨུཔཱདཱནཱནཾ པཧཱནཝསེན, ཨཝིཛྫཱདཱིསུ ཝཱ པཧཱིནེསུ ཏེསཾ ཨཔྤཝཏྟིཝསེན ཝུཏྟནྟི ཝེདིཏབྦཾ. ན ཧི ཀུསལཱ པཧཱཏབྦཱཏི. པཧཱནནྟི ཙ མགྒཀིཙྩཝསེན ཏདདྷིགམནཱིཡཾ ནིརོདྷཾ དསྶེཏི, ནིརོདྷསྶེཝ ཝཱ ཏཎྷཱདཱིནཾ ཨཔྤཝཏྟིབྷཱཝོ པཧཱནནྟི དཊྛབྦཾ.

ཡདིཔི ‘‘པུབྦེཝ ཁོ པནསྶ ཀཱཡཀམྨཾ ཝཙཱིཀམྨཾ ཨཱཛཱིཝོ སུཔརིསུདྡྷོ ཧོཏི, ཨེཝམསྶཱཡཾ ཨརིཡོ ཨཊྛངྒིཀོ མགྒོ བྷཱཝནཱཔཱརིཔཱུརིཾ གཙྪཏཱི’’ཏི (མ. ནི. ༣.༤༣༡) ལོཀུཏྟརམགྒཀྑཎེ ཨཊྛངྒིཀམགྒཔཱརིཔཱུརིཡཱ ཨུཔནིསྶཡདསྶནཏྠཾ ཨིདཾ ¶ ཝུཏྟཾ, ཏཐཱཔི ‘‘པུབྦེཝ ཁོ པནཱ’’ཏི ཝཙནཾ ཀཱཡཀམྨཱདིསུདྡྷིཡཱ དཱུརཏརུཔནིསྶཡཏཾ, ཙཀྑཱདཱིསུ ཨསཱརཛྫནྟསྶ ཨསཾཡུཏྟསྶ ཨསམྨཱུལ༹ྷསྶ ཨཱདཱིནཝཱནུཔསྶིནོ ཝིཧརཏོ ཏཱཡེཝ ཝུཊྛཱནགཱམིནིཡཱ ཝིཔསྶནཱཡ ཨཱཡཏིཾ པཉྩུཔཱདཱནཀྑནྡྷེསུ ཨཔཙཡཾ གཙྪནྟེསུ སབྦསངྑཱརེསུ ཝིཝཊྚནཝསེན, པོནོབྦྷཝིཀཏཎྷཱཡ པཧཱིཡམཱནཱཡ ཀིལེསདཱུརཱིབྷཱཝེན, ཀཱཡིཀཙེཏསིཀདརཐསནྟཱཔཔརིལཱ༹ཧེསུ པཧཱིཡམཱནེསུ པསྶདྡྷཀཱཡཙིཏྟཝསེན ཀཱཡིཀཙེཏསིཀསུཁེ པཊིསཾཝེདིཡམཱནེ ‘‘ཡཱ ཏཐཱབྷཱུཏསྶ དིཊྛི, སཱསྶ ཧོཏི སམྨཱདིཊྛཱི’’ཏིཨཱདིནཱ (མ. ནི. ༣.༤༣༡) ཝུཏྟཱནཾ ཝུཊྛཱནགཱམིནིཝིཔསྶནཱཀྑཎེ པཝཏྟཱནཾ པཉྩནྣཾ སམྨཱདིཊྛཱདཱིནཾ ཨངྒཱནཾ ཨཱསནྣཏརུཔནིསྶཡཏཉྩ དསྶེཏཱིཏི ཨཱསནྣཏརུཔནིསྶཡཝསེན པཉྩངྒིཀཾ མགྒཾ སུཁཾ བུཛ྄ཛྷནྟཱནཾ པུགྒལཱནཾ ཨཛ྄ཛྷཱསཡཝསེན ¶ པཉྩངྒིཀམགྒདེསནཱཡ པཝཏྟཏཾ དཱིཔེཏི. ཏེནཱཧ ‘‘པུབྦེཝ ཁོ…པེ… སུཔརིསུདྡྷོ ཧོཏཱིཏི ཝཙནཏོ’’ཏིཨཱདི. ཨེཝམིདཾ ཝཙནཏོཏི ནིསྶཀྐཝཙནཾ དེསནུཔཱཡསྶ ཉཱཔཀནིདསྶནཾ ཧོཏི, ཝཙནཏོཏི ཝཱ ཨཏྟནོ ཝཙནཱནུརཱུཔཾ པཉྩངྒིཀོཔི མགྒོ པཊིཔདཱ ཨེཝཱཏི བྷགཝཏཱ དེསིཏོཏི ཨཏྠོ. ཀཏྠཱཏི? དེཝཔུརེ, ཏསྨཱ ཏཾ དེསིཏནཡཾ དསྶེཏུཾ པཉྩངྒིཀཝཱརོཔི ནིདྡིཊྛོ དྷམྨསངྒཱཧཀེཧི. ཨཐ ཝཱ ‘‘པུབྦེཝ ཁོ པནསྶཱ’’ཏི ཝཙནེནེཝ ཨཛ྄ཛྷཱསཡཝིསེསཀཱརཎནིདསྶཀེན པུགྒལཛ྄ཛྷཱསཡཝསེན པཉྩངྒིཀོ མགྒོཔི པཊིཔདཱ ཨེཝཱཏི དེསིཏོ ཧོཏཱིཏི ཨཱཧ ‘‘པུབྦེཝ ཁོ པན…པེ… ཝཙནཏོ པན…པེ… དེསིཏོ’’ཏི, ཏསྨཱ ཏཾ སུཏྟནྟེ དེསིཏནཡཾ དསྶེཏུཾ པཉྩངྒིཀཝཱརོཔི ནིདྡིཊྛོ བྷགཝཏཱ དེཝཔུརེཏི ཨཏྠོ.

ཛྷཱནེཧི དེསནཱཔཝེསོ, བྷཱཝནཱཔཝེསོ ཝཱ ཛྷཱནཱབྷིནིཝེསོ. ཨེཀེཀསྨིཾ ཀོཊྛཱསེ ཙཏུནྣཾ ཙཏུནྣཾ ནཡསཧསྶཱནཾ དསྶནཾ གཎནཱསུཁཏྠནྟི ཝེདིཏབྦཾ. ཡཐཱ པན པཱལི༹ ཋིཏཱ, ཏཐཱ ཨེཀེཀིསྶཱ པཊིཔདཱཡ སུཉྙཏཱདཱིསུ ཙ པཉྩ པཉྩ ཀོཊྛཱསེ ཡོཛེཏྭཱ པཱལི༹གམནཾ ཀཏནྟི ཝིཉྙཱཡཏི. ཏཏྠ ཨཊྛངྒིཀཝཱརེ དུཏིཡཛ྄ཛྷཱནཱདཱིསུ ཏསྨིཾ སམཡེ སཏྟངྒིཀོ མགྒོ ཧོཏཱིཏི ཡོཛནཱ ཀཱཏབྦཱ, སབྦསངྒཱཧིཀཝཱརེ ཙ ཡཐཱ ཝིཛྫམཱནདྷམྨཝསེནཱཏི.

ཨབྷིདྷམྨབྷཱཛནཱིཡཝཎྞནཱ ནིཊྛིཏཱ.

༣. པཉྷཔུཙྪཀཝཎྞནཱ

༢༡༥. ཨེཝཾ ¶ པུརིམེསུཔི དྭཱིསཱུཏི ཀསྨཱ ཝུཏྟཾ, ནནུ སུཏྟནྟབྷཱཛནཱིཡེ དུཀྑནིརོདྷགཱམིནིཔཊིཔདཱནིདྡེསེ ལོཀིཡལོཀུཏྟརམིསྶཀོ མགྒོ ཝུཏྟོ. ཏསྶ ཧི ཨཊྛཀཐཱཡཾ (ཝིབྷ. ཨཊྛ. ༢༠༥) ‘‘ཙཏཱུསུ སཙྩེསུ ཨུགྒཧཱདིཝསེན པུབྦབྷཱགཉཱཎུཔྤཏྟིཾ སནྡྷཱཡ ཨིདཾ ‘དུཀྑེ ཉཱཎ’ནྟིཨཱདི ཝུཏྟཾ, པཊིཝེདྷཀྑཎེ པན ཨེཀམེཝ ཉཱཎཾ ཧོཏཱི’’ཏི སམྨཱདིཊྛིཡཱ, ཏཐཱ སམྨཱསངྐཔྤཱདཱིནཉྩ ལོཀིཡལོཀུཏྟརམིསྶཀཏཱ དསྶིཏཱ ‘‘ཨཔིཙེསཱ སམྨཱདིཊྛི ནཱམ པུབྦབྷཱགེ ནཱནཱཀྑཎཱ ནཱནཱརམྨཎཱ ཧོཏི, མགྒཀྑཎེ ཨེཀཀྑཎཱ ཨེཀཱརམྨཎཱ’’ཏིཨཱདིནཱ ཙཱཏི? སཙྩམེཏཾ, ཨེཝཾ པན ཨཱགམནཝསེན ཏཏྠཱཔི ཙཏུསཙྩཀམྨཊྛཱནདསྶནཱདིམུཁེན ཨརིཡོཝ ¶ ཨཊྛངྒིཀོ མགྒོ དསྶིཏོ. ཨེཝཉྩ ཀཏྭཱ ‘‘པཊིཝེདྷཀྑཎེ པན ཨེཀམེཝ ཉཱཎཾ ཧོཏཱི’’ཏི མགྒཉཱཎསྶ ཨེཀསྶེཝ དུཀྑཉཱཎཱདིཏཱ, ‘‘མགྒཀྑཎེ པན…པེ… ཨེཀོཝ ཀུསལསངྐཔྤོ ཨུཔྤཛྫཏི, ཨཡཾ སམྨཱསངྐཔྤོ ནཱམཱ’’ཏིཨཱདིནཱ མགྒསངྐཔྤཱདཱིནཾ སམྨཱསངྐཔྤཱདིཏཱ ཙ ནིདྡྷཱརིཏཱ, པཱལི༹ཡཉྩ ཨཊྛངྒིཀཾ མགྒཾ ཨུདྡིསིཏྭཱ ཏམེཝ ནིདྡིསིཏུཾ ‘‘དུཀྑེ ཉཱཎ’’ནྟིཨཱདི ཝུཏྟཾ. ཏེན སུཏྟནྟབྷཱཛནཱིཡེཔི དྭིནྣཾ ལོཀིཡཏཱ, དྭིནྣཾ ལོཀུཏྟརཏཱ ཝུཏྟཱ ‘‘ཨེཝཾ པུརིམེསུཔི དྭཱིསཱུཏི ཨེཏེནཱཏི.

པཉྷཔུཙྪཀཝཎྞནཱ ནིཊྛིཏཱ.

སཙྩཝིབྷངྒཝཎྞནཱ ནིཊྛིཏཱ.

༥. ཨིནྡྲིཡཝིབྷངྒོ

༡. ཨབྷིདྷམྨབྷཱཛནཱིཡཝཎྞནཱ

༢༡༩. ཙཀྑུདྭཱརེ ¶ ¶ ཨིནྡཊྛཾ ཀཱརེཏཱིཏི ཙཀྑུདྭཱརབྷཱཝེ ཏཾདྭཱརིཀེཧི ཨཏྟནོ ཨིནྡབྷཱཝཾ པརམིསྶརབྷཱཝཾ ཀཱརཡཏཱིཏི ཨཏྠོ. ཏཉྷི ཏེ རཱུཔགྒཧཎེ ཨཏྟཱནཾ ཨནུཝཏྟེཏི, ཏེ ཙ ཏཾ ཨནུཝཏྟནྟཱིཏི. ཨེས ནཡོ ཨིཏརེསུཔི. ཡེན ཏཾསམངྒཱིཔུགྒལོ ཏཾསམྤཡུཏྟདྷམྨཱ ཝཱ ཨཉྙཱཏཱཝིནོ ཧོནྟི, སོ ཨཉྙཱཏཱཝིབྷཱཝོ པརིནིཊྛིཏཀིཙྩཛཱནནཾ.

ཀཏྠཙི དྭེཏི ‘‘དྭིནྣཾ ཁོ, བྷིཀྑཝེ, ཨིནྡྲིཡཱནཾ བྷཱཝིཏཏྟཱ བཧུལཱིཀཏཏྟཱ ཁཱིཎཱསཝོ བྷིཀྑུ ཨཉྙཾ བྱཱཀརོཏི…པེ… ཨརིཡཱཡ ཙ པཉྙཱཡ ཨརིཡཱཡ ཙ ཝིམུཏྟིཡཱ. ཡཱ ཧིསྶ, བྷིཀྑཝེ, ཨརིཡཱ པཉྙཱ, ཏདསྶ པཉྙིནྡྲིཡཾ. ཡཱ ཧིསྶ ཨརིཡཱ ཝིམུཏྟི, ཏདསྶ སམཱདྷིནྡྲིཡ’’ནྟིཨཱདཱིསུ (སཾ. ནི. ༥.༥༡༦) དྭེ, ‘‘ཏིཎྞཾ ཁོ, བྷིཀྑཝེ, ཨིནྡྲིཡཱནཾ བྷཱཝིཏཏྟཱ བཧུལཱིཀཏཏྟཱ པིཎྜོལབྷཱརདྭཱཛེན བྷིཀྑུནཱ ཨཉྙཱ བྱཱཀཏཱ…པེ… སཏིནྡྲིཡསྶ སམཱདྷིནྡྲིཡསྶ པཉྙིནྡྲིཡསྶཱ’’ཏི (སཾ. ནི. ༥.༥༡༩), ‘‘ཏཱིཎིམཱནི, བྷིཀྑཝེ, ཨིནྡྲིཡཱནི. ཀཏམཱནི ཏཱིཎི? ཨནཉྙཱཏཉྙསྶཱམཱིཏིནྡྲིཡཾ ཨཉྙིནྡྲིཡཾ ཨཉྙཱཏཱཝིནྡྲིཡ’’ནྟི (སཾ. ནི. ༥.༤༩༣), ‘‘ཏཱིཎིམཱནི…པེ… ཨིཏྠིནྡྲིཡཾ པུརིསིནྡྲིཡཾ ཛཱིཝིཏིནྡྲིཡ’’ནྟི (སཾ. ནི. ༥.༤༩༢) ཙ ཨེཝམཱདཱིསུ ཏཱིཎི, ‘‘པཉྩིམཱནི, བྲཱཧྨཎ, ཨིནྡྲིཡཱནི ནཱནཱཝིསཡཱནི…པེ… ཙཀྑུནྡྲིཡཾ…པེ… ཀཱཡིནྡྲིཡ’’ནྟི (སཾ. ནི. ༥.༥༡༢), ‘‘པཉྩི…པེ… སུཁིནྡྲིཡཾ…པེ… ཨུཔེཀྑིནྡྲིཡ’’ནྟི (སཾ. ནི. ༥.༥༠༡ ཨཱདཡོ), ‘‘པཉྩི…པེ… སདྡྷིནྡྲིཡཾ…པེ… པཉྙིནྡྲིཡ’’ནྟི (སཾ. ནི. ༥.༤༨༦ ཨཱདཡོ) ཙ ཨེཝམཱདཱིསུ པཉྩ. ཏཏྠ སུཏྟནྟེ དུཀཱདིཝཙནཾ ནིསྶརཎུཔཱཡཱདིབྷཱཝཏོ དུཀཱདཱིནཾ. སབྦཱནི པན ¶ ཨིནྡྲིཡཱནི ཨབྷིཉྙེཡྻཱནི, ཨབྷིཉྙེཡྻདྷམྨདེསནཱ ཙ ཨབྷིདྷམྨོཏི ཨིདྷ སབྦཱནི ཨེཀཏོ ཝུཏྟཱནི.

ཁཱིཎཱསཝསྶ བྷཱཝབྷཱུཏོ ཧུཏྭཱ ཨུཔྤཏྟིཏོ ‘‘ཁཱིཎཱསཝསྶེཝ ཨུཔྤཛྫནཏོ’’ཏི ཝུཏྟཾ.

ལིངྒེཏི གམེཏི ཉཱཔེཏཱིཏི ལིངྒཾ, ལིངྒཱིཡཏི ཝཱ ཨེཏེནཱཏི ལིངྒཾ, ཀིཾ ལིངྒེཏི, ཀིཉྩ ཝཱ ལིངྒཱིཡཏཱིཏི? ཨིནྡཾ ཨིནྡོ ཝཱ, ཨིནྡསྶ ལིངྒཾ ཨིནྡལིངྒཾ, ཨིནྡལིངྒསྶ ཨཏྠོ ཏཾསབྷཱཝོ ཨིནྡལིངྒཊྛོ, ཨིནྡལིངྒམེཝ ཝཱ ¶ ཨིནྡྲིཡ-སདྡསྶ ཨཏྠོ ཨིནྡལིངྒཊྛོ. སཛྫིཏཾ ཨུཔྤཱདིཏནྟི སིཊྛཾ, ཨིནྡེན སིཊྛཾ ཨིནྡསིཊྛཾ. ཛུཊྛཾ སེཝིཏཾ. ཀམྨསངྑཱཏསྶ ཨིནྡསྶ ལིངྒཱནི, ཏེན ཙ སིཊྛཱནཱིཏི ཀམྨཛཱནེཝ ཡོཛེཏབྦཱནི, ན ཨཉྙཱནི. ཏེ ཙ དྭེ ཨཏྠཱ ཀམྨེ ཨེཝ ཡོཛེཏབྦཱ, ཨིཏརེ ཙ བྷགཝཏི ཨེཝཱཏི ‘‘ཡཐཱཡོག’’ནྟི ཨཱཧ. ཏེནཱཏི བྷགཝཏོ ཀམྨསྶ ཙ ཨིནྡཏྟཱ. ཨེཏྠཱཏི ཨེཏེསུ ཨིནྡྲིཡེསུ. ཨུལླིངྒེནྟི པཀཱསེནྟི ཕལསམྤཏྟིཝིཔཏྟཱིཧི ཀཱརཎསམྤཏྟིཝིཔཏྟིཨཝབོདྷཏོ. ‘‘སོ ཏཾ ནིམིཏྟཾ ཨཱསེཝཏཱི’’ཏིཨཱདཱིསུ (ཨ. ནི. ༩.༣༥) གོཙརཀརཎམྤི ཨཱསེཝནཱཏི ཝུཏྟཱཏི ཨཱཧ ‘‘ཀཱནིཙི གོཙརཱསེཝནཱཡཱ’’ཏི. ཏཏྠ སབྦེསཾ གོཙརཱིཀཱཏབྦཏྟེཔི ‘‘ཀཱནིཙཱི’’ཏི ཝཙནཾ ཨཝིཔསྶིཏབྦཱནཾ བཧུལཱིམནསིཀརཎེན ཨནཱསེཝནཱིཡཏྟཱ. པཙྩཝེཀྑཎཱམཏྟམེཝ ཧི ཏེསུ ཧོཏཱིཏི. ‘‘ཏསྶ ཏཾ མགྒཾ ཨཱསེཝཏོ’’ཏིཨཱདཱིསུ (ཨ. ནི. ༤.༡༧༠) བྷཱཝནཱ ‘‘ཨཱསེཝནཱ’’ཏི ཝུཏྟཱཏི བྷཱཝེཏབྦཱནི སདྡྷཱདཱིནི སནྡྷཱཡཱཧ ‘‘ཀཱནིཙི བྷཱཝནཱསེཝནཱཡཱ’’ཏི. ཨཱདྷིཔཙྩཾ ཨིནྡྲིཡཔཙྩཡབྷཱཝོ, ཨསཏི ཙ ཨིནྡྲིཡཔཙྩཡབྷཱཝེ ཨིཏྠིཔུརིསིནྡྲིཡཱནཾ ཨཏྟནོ པཙྩཡཝསེན པཝཏྟམཱནེཧི ཏཾསཧིཏསནྟཱནེ ཨཉྙཱཀཱརེན ཨནུཔྤཛྫམཱནེཧི ལིངྒཱདཱིཧི ཨནུཝཏྟནཱིཡབྷཱཝོ, ཨིམསྨིཉྩཏྠེ ཨིནྡནྟི པརམིསྶརིཡཾ ཀརོནྟིཙྩེཝ ཨིནྡྲིཡཱནི. ཙཀྑཱདཱིསུ དསྶིཏེན ནཡེན ཨཉྙེསཉྩ ཏདནུཝཏྟཱིསུ ཨཱདྷིཔཙྩཾ ཡཐཱརཧཾ ཡོཛེཏབྦཾ.

ཧེཊྛཱཏི ཨཊྛསཱལིནིཡཾ. ཨམོཧོ ཨེཝ, ན ཝིསུཾ ཙཏྟཱརོ དྷམྨཱ, ཏསྨཱ ཨམོཧསྶ པཉྙིནྡྲིཡཔདེ ཝིབྷཱཝིཏཱནི ལཀྑཎཱདཱིནི ཏེསཉྩ ཝེདིཏབྦཱནཱིཏི ཨདྷིཔྤཱཡོ. སེསཱནི ཨཊྛསཱལིནིཡཾ ལཀྑཎཱདཱིཧི སརཱུཔེནེཝ ཨཱགཏཱནི. ནནུ ཙ སུཁིནྡྲིཡདུཀྑིནྡྲིཡཱནཾ ཏཏྠ ལཀྑཎཱདཱིནི ན ཝུཏྟཱནཱིཏི? ཀིཉྩཱཔི ན ཝུཏྟཱནི, སོམནསྶདོམནསྶིནྡྲིཡཱནཾ པན ཝུཏྟལཀྑཎཱདིཝསེན ཝིཉྙེཡྻཏོ ཨེཏེསམྤི ཝུཏྟཱནེཝ ཧོནྟི. ཀཐཾ? ཨིཊྛཕོཊྛབྦཱནུབྷཝནལཀྑཎཾ སུཁིནྡྲིཡཾ, ཨིཊྛཱཀཱརསམྦྷོགརསཾ, ཀཱཡིཀསྶཱདཔཙྩུཔཊྛཱནཾ, ཀཱཡིནྡྲིཡཔདཊྛཱནཾ ¶ . ཨནིཊྛཕོཊྛབྦཱནུབྷཝནལཀྑཎཾ དུཀྑིནྡྲིཡཾ, ཨནིཊྛཱཀཱརསམྦྷོགརསཾ, ཀཱཡིཀཱབཱདྷཔཙྩུཔཊྛཱནཾ, ཀཱཡིནྡྲིཡཔདཊྛཱནནྟི. ཨེཏྠ ཙ ཨིཊྛཱནིཊྛཱཀཱརཱནམེཝ ཨཱརམྨཎཱནཾ སམྦྷོགརསཏཱ ཝེདིཏབྦཱ, ན ཝིཔརཱིཏེཔི ཨིཊྛཱཀཱརེན ཨནིཊྛཱཀཱརེན ཙ སམྦྷོགརསཏཱཏི.

སཏྟཱནཾ ¶ ཨརིཡབྷཱུམིཔཊིལཱབྷོ བྷགཝཏོ དེསནཱཡ སཱདྷཱརཎཾ པདྷཱནཉྩ པཡོཛནནྟི ཨཱཧ ‘‘ཨཛ྄ཛྷཏྟདྷམྨཾ པརིཉྙཱཡཱ’’ཏིཨཱདི. ཨཊྛཀཐཱཡཾ ཨིཏྠིཔུརིསིནྡྲིཡཱནནྟརཾ ཛཱིཝིཏིནྡྲིཡདེསནཀྐམོ ཝུཏྟོ, སོ ཨིནྡྲིཡཡམཀདེསནཱཡ སམེཏི. ཨིདྷ པན ཨིནྡྲིཡཝིབྷངྒེ མནིནྡྲིཡཱནནྟརཾ ཛཱིཝིཏིནྡྲིཡཾ ཝུཏྟཾ, ཏཾ པུརིམཔཙྪིམཱནཾ ཨཛ྄ཛྷཏྟིཀབཱཧིརཱནཾ ཨནུཔཱལཀཏྟེན ཏེསཾ མཛ྄ཛྷེ ཝུཏྟནྟི ཝེདིཏབྦཾ. ཡཉྩ ཀིཉྩི ཝེདཡིཏཾ, སབྦཾ ཏཾ དུཀྑཾ. ཡཱཝ ཙ དུཝིདྷཏྟབྷཱཝཱནུཔཱལཀསྶ ཛཱིཝིཏིནྡྲིཡསྶ པཝཏྟི, ཏཱཝ དུཀྑབྷཱུཏཱནཾ ཨེཏེསཾ ཝེདཡིཏཱནཾ ཨནིཝཏྟཱིཏི ཉཱཔནཏྠཾ. ཏེན ཙ ཙཀྑཱདཱིནཾ དུཀྑཱནུབནྡྷཏཱཡ པརིཉྙེཡྻཏཾ ཉཱཔེཏི. ཏཏོ ཨནནྟརཾ བྷཱཝེཏབྦཏྟཱཏི བྷཱཝནཱམགྒསམྤཡུཏྟཾ ཨཉྙིནྡྲིཡཾ སནྡྷཱཡ ཝུཏྟཾ. དསྶནཱནནྟརཱ ཧི བྷཱཝནཱཏི.

སཏིཔི པུརེཛཱཏཱདིཔཙྩཡབྷཱཝེ ཨིནྡྲིཡཔཙྩཡབྷཱཝེན སཱདྷེཏབྦམེཝ ཀིཙྩཾ ‘‘ཀིཙྩ’’ནྟི ཨཱཧ ཏསྶ ཨནཉྙསཱདྷཱརཎཏྟཱ ཨིནྡྲིཡཀཐཱཡ ཙ པཝཏྟཏྟཱ. པུབྦངྒམབྷཱཝེན མནིནྡྲིཡསྶ ཝསཝཏྟཱཔནཾ ཧོཏི, ནཱཉྙེསཾ. ཏཾསམྤཡུཏྟཱནིཔི ཧི ཨིནྡྲིཡཱནི སཱདྷེཏབྦབྷཱུཏཱནེཝ ཨཏྟནོ ཨཏྟནོ ཨིནྡྲིཡཀིཙྩཾ སཱདྷེནྟི ཙེཏསིཀཏྟཱཏི. ‘‘སབྦཏྠ ཙ ཨིནྡྲིཡཔཙྩཡབྷཱཝེན སཱདྷེཏབྦ’’ནྟི ཨཡཾ ཨདྷིཀཱརོ ཨནུཝཏྟཏཱིཏི དཊྛབྦོ. ཨནུཔྤཱདནེ ཨནུཔཏྠམྦྷེ ཙ ཏཔྤཙྩཡཱནཾ ཏཔྤཝཏྟནེ ནིམིཏྟབྷཱཝོ ཨནུཝིདྷཱནཾ. ཚཱདེཏྭཱ ཕརིཏྭཱ ཨུཔྤཛྫམཱནཱ སུཁདུཀྑཝེདནཱ སཧཛཱཏེ ཨབྷིབྷཝིཏྭཱ སཡམེཝ པཱཀཊཱ ཧོཏི, སཧཛཱཏཱ ཙ ཏབྦསེན སུཁདུཀྑབྷཱཝཔྤཏྟཱ ཝིཡཱཏི ཨཱཧ ‘‘ཡཐཱསཀཾ ཨོལཱ༹རིཀཱཀཱརཱནུཔཱཔན’’ནྟི. ཨསནྟསྶ ཨཔཎཱིཏསྶཔི ཨཀུསལཏབྦིཔཱཀཱདིསམྤཡུཏྟསྶ མཛ྄ཛྷཏྟཱཀཱརཱནུཔཱཔནཾ ཡོཛེཏབྦཾ, སམཱནཛཱཏིཡཾ ཝཱ སུཁདུཀྑེཧི སནྟཔཎཱིཏཱཀཱརཱནུཔཱཔནཉྩ. པསནྣཔགྒཧིཏཨུཔཊྛིཏསམཱཧིཏདསྶནཱཀཱརཱནུཔཱཔནཾ ཡཐཱཀྐམཾ སདྡྷཱདཱིནཾ. ཨཱདི-སདྡེན ཨུདྡྷམྦྷཱགིཡསཾཡོཛནཱནི གཧིཏཱནི, མགྒསམྤཡུཏྟསྶེཝ ཙ ཨིནྡྲིཡསྶ ཀིཙྩཾ དསྶིཏཾ, ཏེནེཝ ཕལསམྤཡུཏྟསྶ ཏཾཏཾསཾཡོཛནཱནཾཡེཝ པཊིཔྤསྶདྡྷིཔཧཱནཀིཙྩཏཱ དསྶིཏཱ ཧོཏཱིཏི. སབྦཀཏཀིཙྩཾ ཨཉྙཱཏཱཝིནྡྲིཡཾ ཨཉྙསྶ ཀཱཏབྦསྶ ཨབྷཱཝཱ ཨམཏཱབྷིམུཁམེཝ ཏབྦྷཱཝཔཙྩཡོ ཙ ཧོཏི, ན ཨིཏརཱནི ཝིཡ ཀིཙྩནྟརཔསུཏཉྩ. ཏེནཱཧ ‘‘ཨམཏཱབྷིམུཁབྷཱཝཔཙྩཡཏཱ ཙཱ’’ཏི.

༢༢༠. ཨེཝཾ ¶ ¶ སནྟེཔཱིཏི སཏིཔི སབྦསངྒཱཧཀཏྟེ ཝཱིརིཡིནྡྲིཡཔདཱདཱིཧི སངྒཧེཏབྦཱནི ཀུསལཱཀུསལཝཱིརིཡཱདཱིནི, ཙཀྑུནྡྲིཡཔདཱདཱིཧི སངྒཧེཏབྦཱནི ཀཱལཔུགྒལཔཙྩཡཱདིབྷེདེན བྷིནྣཱནི ཙཀྑཱདཱིནི སངྒཎྷནྟིཙྩེཝ སབྦསངྒཱཧཀཱནི, ན ཡསྶཱ བྷཱུམིཡཱ ཡཱནི ན ཝིཛྫནྟི, ཏེསཾ སངྒཱཧཀཏྟཱཏི ཨཏྠོ. ཏེན ཙ ཨཝིསེསིཏཏྟཱ སབྦེསཾ སབྦབྷཱུམིཀཏྟགཧཎཔྤསངྒེ ཏཾནིཝཏྟནེན སབྦསངྒཱཧཀཝཙནཾ ཨཝིཛྫམཱནསྶ སངྒཱཧཀཏྟདཱིཔཀཾ ན ཧོཏཱིཏི དསྶེཏི.

ཨབྷིདྷམྨབྷཱཛནཱིཡཝཎྞནཱ ནིཊྛིཏཱ.

༢. པཉྷཔུཙྪཀཝཎྞནཱ

༢༢༣. ཨིདྷ ཨནཱབྷཊྛནྟི ཨེཀནྟཱནཱརམྨཎཏྟེན བྷཱསིཏཾ. ‘‘རཱུཔམིསྶཀཏྟཱ ཨནཱརམྨཎེསུ རཱུཔདྷམྨེསུ སངྒཧིཏ’’ནྟི ཀསྨཱ ཝུཏྟཾ, ནནུ མིསྶཀཏྟཱ ཨེཝ ཛཱིཝིཏིནྡྲིཡཾ ཨནཱརམྨཎེསུ ཨསངྒཧིཏཾ. ན ཧི ཨཊྛིནྡྲིཡཱ ཨནཱརམྨཎཱཏི ཝུཏྟཱཏི? སཙྩམེཏཾ, ཛཱིཝིཏིནྡྲིཡཨེཀདེསསྶ པན ཨནཱརམྨཎེསུ རཱུཔདྷམྨེསུ སངྒཧིཏཏཾ སནྡྷཱཡེཏཾ ཝུཏྟཾ, ཨརཱུཔཀོཊྛཱསེན པརིཏྟཱརམྨཎཱདིཏཱ ཨཏྠཱིཏི སིཡཱཔཀྑེ སངྒཧིཏནྟི ཨདྷིཔྤཱཡོ. ཨརཱུཔཀོཊྛཱསེན པན པརིཏྟཱརམྨཎཱདིཏཱ, རཱུཔཀོཊྛཱསེན ཙ ནཝཏྟབྦཏཱ ཨཏྠཱིཏི མིསྶཀསྶ སམུདཱཡསྶེཝ ཝསེན སིཡཱཔཀྑེ སངྒཧིཏཾ, ན ཨེཀདེསཝསེནཱཏི དཊྛབྦཾ. ན ཧི ཨནཱརམྨཎཾ པརིཏྟཱརམྨཎཱདིབྷཱཝེན ནཝཏྟབྦཾ ན ཧོཏཱིཏི. ‘‘རཱུཔཉྩ ནིབྦཱནཉྩ ཨནཱརམྨཎཱ, སཏྟིནྡྲིཡཱ ཨནཱརམྨཎཱ’’ཏིཨཱདིཝཙནཉྩ ཨཝིཛྫམཱནཱརམྨཎཱནཱརམྨཎེསུ ནཝཏྟབྦེསུ ཨནཱརམྨཎཏྟཱ ནཝཏྟབྦཏཾ དསྶེཏི, ན སཱརམྨཎསྶེཝ ནཝཏྟབྦཏཾ, ནཝཏྟབྦསྶ ཝཱ སཱརམྨཎཏཾ. ན ཧི ནཝཏྟབྦ-སདྡོ སཱརམྨཎེ ནིརུལ༹ྷོ. ཡདིཔི སིཡཱ, ‘‘ཏིསྶོ ཙ ཝེདནཱ རཱུཔཉྩ ནིབྦཱནཉྩ ཨིམེ དྷམྨཱ ནཝཏྟབྦཱ སུཁཱཡ ཝེདནཱཡ སམྤཡུཏྟཱ’’ཏིཨཱདི ན ཝུཙྩེཡྻ, ཨཐཱཔི པརིཏྟཱརམྨཎཱདིསམྦནྡྷོ ནཝཏྟབྦ-སདྡོ སཱརམྨཎེསྭེཝ ཝཏྟཏི, ‘‘དྭཱཡཏནཱ སིཡཱ པརིཏྟཱརམྨཎཱ’’ཏིཨཱདིཾ ཨཝཏྭཱ ‘‘མནཱཡཏནཾ སིཡཱ པརིཏྟཱརམྨཎཾ…པེ… ཨཔྤམཱཎཱརམྨཎ’’ནྟིཔི, ‘‘དྷམྨཱཡཏནཾ སིཡཱ པརིཏྟཱརམྨཎཾ…པེ… ཨཔྤམཱཎཱརམྨཎ’’ནྟིཔི, ‘‘སིཡཱ ཨནཱརམྨཎ’’ནྟིཔི ཝཏྟབྦཾ སིཡཱ. ན ཧི པཉྷཔུཙྪཀེ སཱཝསེསཱ དེསནཱ ཨཏྠཱིཏི ¶ . ‘‘ཨཊྛིནྡྲིཡཱ སིཡཱ ཨཛ྄ཛྷཏྟཱརམྨཎཱ’’ཏི ཨེཏྠ ཙ ཛཱིཝིཏིནྡྲིཡསྶ ¶ ཨཱཀིཉྩཉྙཱཡཏནཀཱལེ ཨརཱུཔསྶ རཱུཔསྶ ཙ ཨནཱརམྨཎཏྟཱ ནཝཏྟབྦཏཱ ཝེདིཏབྦཱ.

པཉྷཔུཙྪཀཝཎྞནཱ ནིཊྛིཏཱ.

ཨིནྡྲིཡཝིབྷངྒཝཎྞནཱ ནིཊྛིཏཱ.

༦. པཊིཙྩསམུཔྤཱདཝིབྷངྒོ

༡. སུཏྟནྟབྷཱཛནཱིཡཾ

ཨུདྡེསཝཱརཝཎྞནཱ

༢༢༥. ‘‘‘ཀིཾཝཱདཱི ¶ ¶ བྷནྟེ སམྨཱསམྦུདྡྷོ’ཏི? ‘ཝིབྷཛྫཝཱདཱི མཧཱརཱཛཱ’’’ཏི (པཱརཱ. ཨཊྛ. ༡.ཏཏིཡསངྒཱིཏིཀཐཱ) མོགྒལིཔུཏྟཏིསྶཏྠེརེན ཝུཏྟཏྟཱ སམྨཱསམྦུདྡྷསཱཝཀཱ ཝིབྷཛྫཝཱདིནོ. ཏེ ཧི ཝེནཡིཀཱདིབྷཱཝཾ ཝིབྷཛྫ ཝདནྟི, ཙཱིཝརཱདཱིནཾ སེཝིཏབྦཱསེཝིཏབྦབྷཱཝཾ ཝཱ སསྶཏུཙྪེདཝཱདེ ཝཱ ཝིབྷཛྫ ཝདནྟི ‘‘སསྶཏོ ཨཏྟཱ ཙ ལོཀོ ཙཱ’’ཏིཨཱདཱིནཾ ཋཔནཱིཡཱནཾ ཋཔནཏོ རཱགཱདིཀྑཡསྶ སསྶཏསྶ རཱགཱདིཀཱཡདུཙྩརིཏཱདིཨུཙྪེདསྶ ཙ ཝཙནཏོ, ན པན ཨེཀཾསབྱཱཀརཎཱིཡཱདཡོ ཏཡོ པཉྷེ ཨཔནེཏྭཱ ཝིབྷཛྫབྱཱཀརཎཱིཡམེཝ ཝདནྟཱིཏི. ཝིབྷཛྫཝཱདཱིནཾ མཎྜལཾ སམཱུཧོ ཝིབྷཛྫཝཱདིམཎྜལཾ, ཝིབྷཛྫཝཱདིནོ ཝཱ བྷགཝཏོ པརིསཱ ཝིབྷཛྫཝཱདིམཎྜལནྟིཔི ཝདནྟི. ཨཱཙརིཡེཧི ཝུཏྟཨཝིཔརཱིཏཏྠདཱིཔནེན ཏེ ཨནབྦྷཱཙིཀྑནྟེན. ‘‘ཨཝིཛྫཱ པུཉྙཱནེཉྫཱབྷིསངྑཱརཱནཾ ཧེཏུཔཙྩཡོ ཧོཏཱི’’ཏིཨཱདིཾ ཝདནྟོ ཀཐཱཝཏྠུམྷི པཊིཀྑིཏྟེ པུགྒལཝཱདཱདིཀེ ཙ ཝདནྟོ སཀསམཡཾ ཝོཀྐམཏི ནཱམ, ཏཐཱ ཨཝོཀྐམནྟེན. པརསམཡཾ དོསཱརོཔནབྱཱཔཱརཝིརཧེན ཨནཱཡཱུཧནྟེན. ‘‘ཨིདམྤི ཡུཏྟཾ གཧེཏབྦ’’ནྟི པརསམཡཾ ཨསམྤིཎྜེནྟེནཱཏི ཀེཙི ཝདནྟི.

‘‘ཏཐཱཧཾ བྷགཝཏཱ དྷམྨཾ དེསིཏཾ ཨཱཛཱནཱམི, ཡཐཱ ཏདེཝིདཾ ཝིཉྙཱཎཾ སནྡྷཱཝཏི སཾསརཏི ཨནཉྙ’’ནྟིཨཱདིཾ (མ. ནི. ༡.༣༩༦) ཝདནྟོ སུཏྟཾ པཊིབཱཧཏི ནཱམ, ཏཐཱ ཨཔྤཊིབཱཧནྟེན. ‘‘ཏཐཱཧཾ བྷགཝཏཱ དྷམྨཾ དེསིཏཾ ཨཱཛཱནཱམི, ཡཐཱ ཡེམེ ཨནྟརཱཡིཀཱ དྷམྨཱ ཝུཏྟཱ ¶ བྷགཝཏཱ, ཏེ པཊིསེཝཏོ ནཱལཾ ཨནྟརཱཡཱཡཱ’’ཏི (མ. ནི. ༡.༢༣༤; པཱཙི. ༤༡༨, ༤༢༩), ‘‘སུཔིནནྟེ ཀཏོ ཝཱིཏིཀྐམོ ཨཱཔཏྟིཀརོ ཧོཏཱི’’ཏི ཙ ཨེཝམཱདིཾ ཝདནྟོ ཝིནཡཾ པཊིལོམེཏི ནཱམ, ཏབྦིཔརིཡཱཡེན ཏཾ ཨནུལོམེནྟེན. པཊིལོམེནྟོ ཧི ཀམྨནྟརཾ བྷིནྡནྟོ དྷམྨཏཉྩ ཝིལོམེཏི. སུཏྟནྟེ ཝུཏྟེ ཙཏྟཱརོ མཧཱཔདེསེ, ཨཊྛཀཐཱཡཉྩ ཝུཏྟེ སུཏྟསུཏྟཱནུལོམཨཱཙརིཡཝཱདཨཏྟནོམཏིམཧཱཔདེསེ ཨོལོཀེནྟེན. ཏཾཨོལོཀནེན ཧི སུཏྟེ ¶ ཝིནཡེ ཙ སནྟིཊྛཏི ནཱཏིདྷཱཝཏི. དྷམྨནྟི པཊིཙྩསམུཔྤཱདཔཱལི༹ཾ. ཨཏྠནྟི ཏདཏྠཾ. ཧེཏུཧེཏུཕལཱནི ཨིདྷ ནཱདྷིཔྤེཏཱནི. ‘‘དུཀྑཱདཱིསུ ཨཉྙཱཎཾ ཨཝིཛྫཱ’’ཏི ཝུཏྟམཏྠཾ པརིཝཏྟིཏྭཱ པུན ‘‘པུབྦནྟེ ཨཉྙཱཎ’’ནྟིཨཱདཱིཧི ཨཔརེཧིཔི པརིཡཱཡེཧི ནིདྡིསནྟེན. ‘‘སངྑཱརཱ ཨིམིནཱ པརིཡཱཡེན བྷཝོཏི ཝུཙྩནྟི, ཏཎྷཱ ཨིམིནཱ པརིཡཱཡེན ཨུཔཱདཱན’’ནྟིཨཱདིནཱ ནིདྡིསནྟེནཱཏི ཝདནྟི.

སཏྟོཏི སཏྟསུཉྙཏཱཏི ཝདནྟི, སཏྟསུཉྙེསུ ཝཱ སངྑཱརེསུ སཏྟཝོཧཱརོ. པཙྩཡཱཀཱརམེཝ ཙཱཏི པཙྩཡཱཀཱརོ ཨེཝ ཙ, མ-ཀཱརོ པདསནྡྷིཀརོ.

ཏསྨཱཏི ཝུཏྟནཡེན ཨཏྠཝཎྞནཱཡ ཀཱཏབྦཏྟཱ དུཀྐརཏྟཱ ཙ.

པཏིཊྛཾ ནཱདྷིགཙྪཱམཱིཏི ཡཏྠ ཋིཏསྶ ཝཎྞནཱ སུཀརཱ ཧོཏི, ཏཾ ནཡཾ ཨཏྟནོཡེཝ ཉཱཎབལེན ནཱདྷིགཙྪཱམཱིཏི ཨཏྠོ. ནིསྶཡཾ པན ཨཱཙིཀྑནྟོ ཨཱཧ ‘‘སཱསནཾ པནིད’’ནྟིཨཱདི. ཨིདྷ སཱསནནྟི པཱལི༹དྷམྨམཱཧ, པཊིཙྩསམུཔྤཱདམེཝ ཝཱ. སོ ཧི ཨནུལོམཔཊིལོམཱདིནཱནཱདེསནཱནཡམཎྜིཏོ ཨབྦོཙྪིནྣོ ཨཛྫཱཔི པཝཏྟཏཱིཏི ནིསྶཡོ ཧོཏི. ཏདཊྛཀཐཱསངྑཱཏོ ཙ པུབྦཱཙརིཡམགྒོཏི.

‘‘ཏཾ སུཎཱཐ སམཱཧིཏཱ’’ཏི ཨཱདརཛནནེ ཀིཾ པཡོཛནནྟི ཏཾ དསྶེནྟོ ཨཱཧ ‘‘ཝུཏྟཉྷེཏ’’ནྟིཨཱདི. ཨཊྛིཾ ཀཏྭཱཏི ཨཏྠཾ ཀཏྭཱ, ཡཐཱ ཝཱ ན ནསྶཏི, ཨེཝཾ ཨཊྛིགཏཾ ཝིཡ ཀརོནྟོ ཨཊྛིཾ ཀཏྭཱ. པུབྦཀཱལཏོ ཨཔརཀཱལེ བྷཝཾ པུབྦཱཔརིཡཾ. པཋམཱརམྦྷཱདིཏོ པབྷུཏི ཁཎེ ཁཎེ ཉཱཎཝིསེསཾ ཀིལེསཀྑཡཝིསེསཉྩ ལབྷཏཱིཏི ཨཏྠོ.

ཀམྨཝིཔཱཀཀིལེསཝཊྚཱནཾ མཱུལཀཱརཎཏྟཱ ཨཱདིཏོ ཝུཏྟཏྟཱ ཙ ཨཝིཛྫཱ པཊིཙྩསམུཔྤཱདསྶ མཱུལཾ. ཏཏྠ ཝལླིཡཱ མཱུལེ དིཊྛེ ཏཏོ པབྷུཏི ཝལླིཡཱ ཧརཎཾ ཝིཡ པཊིཙྩསམུཔྤཱདསྶ ¶ མཱུལེ དིཊྛེ ཏཏོ པབྷུཏི པཊིཙྩསམུཔྤཱདདེསནཱཏི ཨུཔམཱསཾསནྡནཱ ན ཀཱཏབྦཱ. ན ཧི བྷགཝཏོ ‘‘ཨིདམེཝ དིཊྛཾ, ཨིཏརཾ ཨདིཊྛ’’ནྟི ཝིབྷཛནཱིཡཾ ཨཏྠི སབྦསྶ དིཊྛཏྟཱ. མཱུལཏོ པབྷུཏི པན ཝལླིཡཱ ཧརཎཾ ཝིཡ མཱུལཏོ པབྷུཏི པཊིཙྩསམུཔྤཱདདེསནཱ ཀཏཱཏི ཨིདམེཏྠ སཱམཉྙམདྷིཔྤེཏཾ, བོདྷནེཡྻཛ྄ཛྷཱསཡཝསེན ཝཱ བོདྷེཏབྦབྷཱཝེན མཱུལཱདིདསྶནསཱམཉྙཉྩ ཡོཛེཏབྦཾ.

ཏསྶཱཏི ¶ –

‘‘ས ཁོ སོ, བྷིཀྑཝེ, ཀུམཱརོ ཝུདྡྷིམནྭཱཡ ཨིནྡྲིཡཱནཾ པརིཔཱཀམནྭཱཡ པཉྩཧི ཀཱམགུཎེཧི སམཔྤིཏོ…པེ… རཛནཱིཡེཧི, སོ ཙཀྑུནཱ རཱུཔཾ དིསྭཱ པིཡརཱུཔེ རཱུཔེ སཱརཛྫཏི, ཨཔིཡརཱུཔེ རཱུཔེ བྱཱཔཛྫཏི, ཨནུཔཊྛིཏཀཱཡསཏཱི ཙ ཝིཧརཏི པརིཏྟཙེཏསོ. སོ ཏཉྩ ཙེཏོཝིམུཏྟིཾ པཉྙཱཝིམུཏྟིཾ ཡཐཱབྷཱུཏཾ ནཔྤཛཱནཱཏི. ཡཏྠསྶ ཏེ ཨུཔྤནྣཱ པཱཔཀཱ ཨཀུསལཱ དྷམྨཱ ཨཔརིསེསཱ ནིརུཛ྄ཛྷནྟི, སོ ཨེཝཾ ཨནུརོདྷཝིརོདྷཾ སམཱཔནྣོ ཡཾ ཀིཉྩི ཝེདནཾ ཝེདེཏི སུཁཾ ཝཱ དུཀྑཾ ཝཱ ཨདུཀྑམསུཁཾ ཝཱ, སོ ཏཾ ཝེདནཾ ཨབྷིནནྡཏི ཨབྷིཝདཏི ཨཛ྄ཛྷོསཱཡ ཏིཊྛཏཱི’’ཏི (མ. ནི. ༡.༤༠༨) –

ཨེཝཾ ཝུཏྟསྶ. ཨེཝཾ སོཏདྭཱརཱདཱིསུཔི. ཨབྷིཝདཏོཏི ‘‘ཨཧོ སུཁཾ, ཨཧོ སུཁ’’ནྟི ཝཙཱིབྷེདཀརཔྤཏྟཱཡ བལཝཏཎྷཱཡ ‘‘ཨཧཾ མམཱ’’ཏི ཨབྷིཝདཏོ. ཏཏོ བལཝཏིཡཱ མོཙེཏུཾ ཨསཀྐུཎེཡྻབྷཱཝེན ཨཛ྄ཛྷོསཱཡ ཏིཊྛཏོ. ཏཏོཔི བལཝཏཱི ཨུཔཱདཱནབྷཱུཏཱ ཏཎྷཱ ནནྡཱི. ཨེཏྠ ཙ ཨབྷིནནྡནཱདིནཱ ཏཎྷཱ ཝུཏྟཱ, ནནྡཱིཝཙནེན ཏཔྤཙྩཡཾ ཨུཔཱདཱནཾ ཙཏུབྦིདྷམྤི ནནྡིཏཱཏདཝིཔྤཡོགཏཱཧི ཏཎྷཱདིཊྛཱབྷིནནྡནབྷཱཝེཧི ཙཱཏི ཝེདིཏབྦཾ. ‘‘ཛཱཏིཔཙྩཡཱ ཛརཱམརཎ’’ནྟིཨཱདིཀཉྩ ཏཏྠེཝ མཧཱཏཎྷཱསངྑཡཝིམུཏྟིསུཏྟེ (མ. ནི. ༡.༤༠༢-༤༠༣) ཝུཏྟཾ.

ཝིཔཱཀཝཊྚབྷཱུཏེ པཊིསནྡྷིཔཝཏྟིཕསྶཱདཡོ ཀམྨསམུཊྛཱནཉྩ ཨོཛཾ སནྡྷཱཡ ‘‘ཙཏྟཱརོ ཨཱཧཱརཱ ཏཎྷཱནིདཱནཱ’’ཏིཨཱདི ཝུཏྟཾ, ཝཊྚཱུཔཏྠམྦྷཀཱ པན ཨིཏརེཔི ཨཱཧཱརཱ ཏཎྷཱཔབྷཝེ ཏསྨིཾ ཨཝིཛྫམཱནེ ན ཝིཛྫནྟཱིཏི ‘‘ཏཎྷཱནིདཱནཱ’’ཏི ཝཏྟུཾ ཝཊྚནྟི.

ཏཏོ ཏཏོཏི ཙཏུབྦིདྷཱསུ དེསནཱསུ ཏཏོ ཏཏོ དེསནཱཏོ. ཉཱཡཔྤཊིཝེདྷཱཡ སཾཝཏྟཏཱིཏི ཉཱཡོཏི ¶ མགྒོ, སོཡེཝ ཝཱ པཊིཙྩསམུཔྤཱདོ ‘‘ཨརིཡོ ཙསྶ ཉཱཡོ པཉྙཱཡ སུདིཊྛོ ཧོཏཱི’’ཏི (སཾ. ནི. ༢.༤༡) ཝཙནཏོ. སཡམེཝ ཧི སམནྟབྷདྲཀཏྟཱ ཏཐཱ ཏཐཱ པཊིཝིཛ྄ཛྷིཏབྦཏྟཱ ཏཱཡ ཏཱཡ དེསནཱཡ ཨཏྟནོ པཊིཝེདྷཱཡ སཾཝཏྟཏཱིཏི. སམནྟབྷདྲཀཏྟཾ དེསནཱཝིལཱསཔྤཏྟི ཙ ཙཏུནྣམྤི དེསནཱནཾ སམཱནཾ ཀཱརཎནྟི ཝིསེསཀཱརཎཾ ¶ ཝཏྟུཀཱམོ ཨཱཧ ‘‘ཝིསེསཏོ’’ཏི. ཨསྶ བྷགཝཏོ དེསནཱ, ཨསྶ ཝཱ པཊིཙྩསམུཔྤཱདསྶ དེསནཱཏི ཡོཛེཏབྦཾ. པཝཏྟིཀཱརཎཝིབྷཱགོ ཨཝིཛྫཱདིཀོཝ, ཀཱརཎནྟི ཝཱ གཧིཏཱནཾ པཀཏིཨཱདཱིནཾ ཨཝིཛྫཱདཱིནཉྩ ཨཀཱརཎཏཱ ཀཱརཎཏཱ ཙ. ཏཏྠ སམྨཱུལ༹ྷཱ ཀེཙི ཨཀཱརཎཾ ‘‘ཀཱརཎ’’ནྟི གཎྷནྟི, ཀེཙི ན ཀིཉྩི ཀཱརཎཾ བུཛ྄ཛྷནྟཱིཏི ཏེསཾ ཡཐཱསཀེཧི ཨནུརཱུཔེཧི ཀཱརཎེཧི སངྑཱརཱདིཔཝཏྟིསནྡསྶནཏྠཾ ཨནུལོམདེསནཱ པཝཏྟཱ, ཨིཏརཱསཾ ཏདཏྠཏཱསམྦྷཝེཔི ན ཏཱསཾ ཏདཏྠམེཝ པཝཏྟི ཨཏྠནྟརསབྦྷཱཝཏོ. ཨཡཾ པན ཏདཏྠཱ ཨེཝཱཏི ཨེཏིསྶཱ ཏདཏྠཏཱ ཝུཏྟཱ. པཝཏྟིཨཱདཱིནཝཔཊིཙྪཱདིཀཱ ཨཝིཛྫཱ ཨཱདི, ཏཏོ སངྑཱརཱ ཨུཔྤཛྫནྟི ཏཏོ ཝིཉྙཱཎནྟི ཨེཝཾ པཝཏྟིཡཱ ཨུཔྤཏྟིཀྐམསནྡསྶནཏྠཉྩ.

ཨནུཝིལོཀཡཏོ ཡོ སམྦོདྷིཏོ པུབྦབྷཱགེ ཏཾཏཾཕལཔཊིཝེདྷོ པཝཏྟོ, ཏདནུསཱརེན ཏདནུགམེན ཛརཱམརཎཱདིཀསྶ ཛཱཏིཨཱདིཀཱརཎཾ ཡཾ ཨདྷིགཏཾ, ཏསྶ སནྡསྶནཏྠཾ ཨསྶ པཊིལོམདེསནཱ པཝཏྟཱ, ཨནུཝིལོཀཡཏོ པཊིལོམདེསནཱ པཝཏྟཱཏི ཝཱ སམྦནྡྷོ. དེསེནྟོཔི ཧི བྷགཝཱ ཀིཙྪཱཔནྣཾ ལོཀཾ ཨནུཝིལོཀེཏྭཱ པུབྦབྷཱག…པེ… སནྡསྶནཏྠཾ དེསེཏཱིཏི. ཨཱཧཱརཏཎྷཱདཡོ པཙྩུཔྤནྣདྡྷཱ, སངྑཱརཱཝིཛྫཱ ཨཏཱིཏདྡྷཱཏི ཨིམིནཱ ཨདྷིཔྤཱཡེནཱཧ ‘‘ཡཱཝ ཨཏཱིཏཾ ཨདྡྷཱནཾ ཨཏིཧརིཏྭཱ’’ཏི, ཨཱཧཱརཱ ཝཱ ཏཎྷཱཡ པབྷཱཝེཏབྦཱ ཨནཱགཏོ ཨདྡྷཱ, ཏཎྷཱདཡོ པཙྩུཔྤནྣོ, སངྑཱརཱཝིཛྫཱ ཨཏཱིཏོཏི. པཙྩཀྑཾ པན ཕལཾ དསྶེཏྭཱ ཏཾནིདཱནདསྶནཝསེན ཕལཀཱརཎཔརམྤརཱཡ དསྶནཾ ཡུཛྫཏཱིཏི ཨཱཧཱརཱ པུརིམཏཎྷཱཡ ཨུཔྤཱདིཏཱ པཙྩུཔྤནྣོ ཨདྡྷཱ, ཏཎྷཱདཡོ ཨཏཱིཏོ, སངྑཱརཱཝིཛྫཱ ཏཏོཔི ཨཏཱིཏཏརོ སཾསཱརསྶ ཨནཱདིབྷཱཝདསྶནཏྠཾ ཝུཏྟོཏི ཡཱཝ ཨཏཱིཏཾ ཨདྡྷཱནནྟི ཡཱཝ ཨཏཱིཏཏརཾ ཨདྡྷཱནནྟི ཨཏྠོ ཡུཏྟོ.

ཨཱཡཏིཾ པུནབྦྷཝཱབྷིནིབྦཏྟིཨཱཧཱརཀཱ ཝཱ ཙཏྟཱརོ ཨཱཧཱརཱ –

‘‘ཨཱཧཱརེཏཱིཏི ཨཧཾ ན ཝདཱམི, ཨཱཧཱརེཏཱིཏི ཙཱཧཾ ཝདེཡྻུཾ, ཏཏྲསྶ ཀལློ པཉྷོ ¶ ‘ཀོ ནུ ཁོ, བྷནྟེ, ཨཱཧཱརེཏཱི’ཏི. ཨེཝཾ ཙཱཧཾ ན ཝདཱམི, ཨེཝཾ པན ཨཝདནྟཾ མཾ ཡོ ཨེཝཾ པུཙྪེཡྻ ‘ཀིསྶ ནུ ཁོ, བྷནྟེ, ཝིཉྙཱཎཱཧཱརོ’ཏི. ཨེས ཀལློ ¶ པཉྷོ, ཏཏྲ ཀལླཾ ཝེཡྻཱཀརཎཾ, ཝིཉྙཱཎཱཧཱརོ ཨཱཡཏིཾ པུནབྦྷཝཱབྷིནིབྦཏྟིཡཱ’’ཏི (སཾ. ནི. ༢.༡༢) –

ཝཙནཏོ ཏཾསམྤཡུཏྟཏྟཱ ཕསྶཙེཏནཱནཾ ཏཔྤཝཏྟིཧེཏུཏྟཱ ཙ ཀབལཱི༹ཀཱརཱཧཱརསྶ. ཏེན ཧི ཨུཔཏྠམྦྷིཏརཱུཔཀཱཡསྶ, ཏཉྩ ཨིཙྪནྟསྶ ཀམྨཝིཉྙཱཎཱཡཱུཧནཾ ཧོཏི. བྷོཛནཉྷི སདྡྷཱདཱིནཾ རཱགཱདཱིནཉྩ ཨུཔནིསྶཡོཏི ཝུཏྟནྟི. ཏསྨཱ ‘‘ཏེ ཀམྨཝཊྚསངྒཧིཏཱ ཨཱཧཱརཱ པཙྩུཔྤནྣོ ཨདྡྷཱ’’ཏི ཨིམསྨིཾ པརིཡཱཡེ པུརིམོཡེཝཏྠོ ཡུཏྟོ. ཨཏཱིཏདྡྷུཏོ པབྷུཏི ‘‘ཨིཏི ཁོ, བྷིཀྑཝེ, ཨཝིཛྫཱཔཙྩཡཱ སངྑཱརཱ’’ཏིཨཱདིནཱ (སཾ. ནི. ༢.༣) ཨཏཱིཏེ ཏཏོ པརཉྩ ཧེཏུཕལཔཊིཔཱཊིཾ པཙྩཀྑཱནཾ ཨཱཧཱརཱནཾ ནིདཱནདསྶནཝསེན ཨཱརོཧིཏྭཱ ནིཝཏྟནེན ཝིནཱ ཨབུཛ྄ཛྷནྟཱནཾ ཏཾསནྡསྶནཏྠཾ སཱ ཨཡཾ དེསནཱ པཝཏྟཱཏི ཨཏྠོ. ཨནཱགཏདྡྷུནོ སནྡསྶནཏྠནྟི ཨནཱགཏདྡྷུནོ དུཔྤཊིཝིཛ྄ཛྷནྟཱནཾ ཨཔསྶནྟཱནཾ པཙྩཀྑཾ པཙྩུཔྤནྣཾ ཧེཏུཾ དསྶེཏྭཱ ཧེཏུཕལཔརམྤརཱཡ ཏསྶ སནྡསྶནཏྠནྟི ཨཏྠོ.

མཱུལཀཱརཎསདྡཾ ཨཔེཀྑིཏྭཱ ‘‘ན ཨཀཱརཎ’’ནྟི ནཔུཾསཀནིདྡེསོ ཀཏོ. ཨཀཱརཎཾ ཡདི སིཡཱ, སུཏྟཾ པཊིབཱཧིཏཾ སིཡཱཏི དསྶེནྟོ སུཏྟཾ ཨཱཧརཏི. ཝཊྚཀཐཱཡ སཱིསབྷཱཝོ ཝཊྚཧེཏུནོ ཀམྨསྶཔི ཧེཏུབྷཱཝོ. ཏཏྠ བྷཝཏཎྷཱཡཔི ཧེཏུབྷཱུཏཱ ཨཝིཛྫཱ, ཏཱཡ པཊིཙྪཱདིཏཱདཱིནཝེ བྷཝེ ཏཎྷུཔྤཏྟིཏོཏི ཨཝིཛྫཱ ཝིསེསེན སཱིསབྷཱུཏཱཏི ‘‘མཱུལཀཱརཎ’’ནྟི ཝུཏྟཱ. པུརིམཱཡ ཀོཊིཡཱ ཨཔཉྙཱཡམཱནཱཡ ཨུཔྤཱདཝིརཧཏོ ནིཙྩཏཾ གཎྷེཡྻཱཏི ཨཱཧ ‘‘ཨེཝཉྩེཏཾ, བྷིཀྑཝེ, ཝུཙྩཏཱི’’ཏིཨཱདི. ཏེན ཨིཏོ པུབྦེ ཨུཔྤནྣཔུབྦཏཱ ནཏྠཱིཏི ཨཔཉྙཱཡནཏོ པུརིམཀོཊིཨཔཉྙཱཡནཾ ཝུཏྟནྟི ཨིམམཏྠཾ དསྶེཏི.

ཨཝིཛྫཱཏཎྷཱཧེཏུཀྐམེན ཕལེསུ ཝཏྟབྦེསུ ‘‘སུགཏིདུགྒཏིགཱམིནོ’’ཏི ཝཙནཾ སདྡལཀྑཎཱཝིརོདྷནཏྠཾ. དྭནྡེ ཧི པཱུཛིཏསྶ པུབྦནིཔཱཏོཏི. སཝརཱ ཀིར མཾསསྶ ཨཊྛིནཱ ཨལགྒནཏྠཾ པུནཔྤུནཾ ཏཱཔེཏྭཱ ཀོཊྚེཏྭཱ ཨུཎྷོདཀཾ པཱཡེཏྭཱ ཝིརིཏྟཾ སཱུནཾ ཨཊྛིཏོ མུཏྟམཾསཾ གཱཝིཾ མཱརེནྟི. ཏེནཱཧ ‘‘ཨགྒིསནྟཱཔི’’ཙྩཱདི. ཏཏྠ ཡཐཱ ཝཛ྄ཛྷཱ གཱཝཱི ཙ ཨཝིཛྫཱབྷིབྷཱུཏཏཱཡ ཡཐཱཝུཏྟཾ ཨུཎྷོདཀཔཱནཾ ཨཱརབྷཏི, ཨེཝཾ པུཐུཛྫནོ ཡཐཱཝུཏྟཾ དུགྒཏིགཱམིཀམྨཾ. ཡཐཱ པན སཱ ཨུཎྷོདཀཔཱནེ ¶ ཨཱདཱིནཝཾ དིསྭཱ ¶ ཏཎྷཱཝསེན སཱིཏུདཀཔཱནཾ ཨཱརབྷཏི, ཨེཝམཡཾ ཨཝིཛྫཱཡ མནྡཏྟཱ དུགྒཏིགཱམིཀམྨེ ཨཱདཱིནཝཾ དིསྭཱ ཏཎྷཱཝསེན སུགཏིགཱམིཀམྨཾ ཨཱརབྷཏི. དུཀྑེ ཧི ཨཝིཛྫཾ ཏཎྷཱ ཨནུཝཏྟཏི, སུཁེ ཏཎྷཾ ཨཝིཛྫཱཏི.

ཨེཝནྟི ཨཝིཛྫཱཡ ནིཝུཏཏྟཱ ཏཎྷཱཡ སཾཡུཏྟཏྟཱ ཙ. ཨཡཾ ཀཱཡོཏི སཝིཉྙཱཎཀཀཱཡོ ཁནྡྷཔཉྩཀཾ, ‘‘སལཱ༹ཡཏནཔཙྩཡཱ ཕསྶོ’’ཏི ཝཙནཏོ ཕསྶཀཱརཎཉྩེཏཾ ཝུཙྩཏཱིཏི ཨཱཡཏནཚཀྐཾ ཝཱ. སམུདཱགཏོཏི ཨུཔྤནྣོ. བཧིདྡྷཱ ཙ ནཱམརཱུཔནྟི བཧིདྡྷཱ སཝིཉྙཱཎཀཀཱཡོ ཁནྡྷཔཉྩཀཾ, སལཱ༹ཡཏནཱནི ཝཱ. ཨིཏྠེཏནྟི ཨིཏྠཾ ཨེཏཾ. ཨཏྟནོ ཙ པརེསཉྩ པཉྩཀྑནྡྷཱ དྭཱདསཱཡཏནཱནི ཙ དྭཱརཱརམྨཎབྷཱཝེན ཝཝཏྠིཏཱནི དྭཡནཱམཱནཱིཏི ཨཏྠོ. ‘‘དྭཡཾ པཊིཙྩ ཕསྶོཏི ཨཉྙཏྠ ཙཀྑུརཱུཔཱདཱིནི དྭཡཱནི པཊིཙྩ ཙཀྑུསམྥསྶཱདཡོ ཝུཏྟཱ, ཨིདྷ པན ཨཛ྄ཛྷཏྟིཀབཱཧིརཱནི ཨཱཡཏནཱནི. མཧཱདྭཡཾ ནཱམ ཀིརེཏ’’ནྟི (སཾ. ནི. ཨཊྛ. ༢.༢.༡༩) ཝུཏྟཾ. ཨཡམེཏྠ ཨདྷིཔྤཱཡོ – ཨཉྙཏྠ ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎཾ, ཏིཎྞཾ སངྒཏི ཕསྶོ’’ཏིཨཱདིནཱ (སཾ. ནི. ༢.༤༣) ‘‘ཙཀྑུ ཙེཝ རཱུཔཱ ཙ…པེ… མནོ ཙེཝ དྷམྨཱ ཙཱ’’ཏི ཝུཏྟཱནི དྭཡཱནི པཊིཙྩ ཙཀྑུསམྥསྶཱདཡོ ཝུཏྟཱ, ཨིདྷ པན ‘‘ཨཡཉྩེཝ ཀཱཡོ’’ཏི ཙཀྑཱདིནིསྶཡེ སེསདྷམྨེ ཙཀྑཱདིནིསྶིཏེ ཨེཝ ཀཏྭཱ ཝུཏྟཾ, ཙཀྑཱདིཀཱཡཾ ཨེཀཏྟེན ‘‘ཨཛ྄ཛྷཏྟིཀཱཡཏན’’ནྟི གཧེཏྭཱ ‘‘བཧིདྡྷཱ ནཱམརཱུཔ’’ནྟི ཝུཏྟཾ, རཱུཔཱདིཨཱརམྨཎཾ ཨེཀཏྟེནེཝ བཱཧིརཱཡཏནནྟི ཏཱནི ཨཛ྄ཛྷཏྟིཀབཱཧིརཱནི ཨཱཡཏནཱནི པཊིཙྩ ཕསྶོ ཝུཏྟོ, ཏསྨཱ མཧཱདྭཡཾ ནཱམེཏནྟི. ཨེཝཉྩ ཀཏྭཱ ‘‘ཨཏྟནོ ཙ པརསྶ ཙ པཉྩཧི ཁནྡྷེཧི ཚཧཱཡཏནེཧི ཙཱཔི ཨཡམཏྠོ དཱིཔེཏབྦོཝཱ’’ཏི (སཾ. ནི. ཨཊྛ. ༢.༢.༡༩) ཝུཏྟཾ. ‘‘ཨཡཾ ཀཱཡོ’’ཏི ཧི ཝུཏྟཱནི སནིསྶཡཱནི ཙཀྑཱདཱིནི ཨཏྟནོ པཉྩཀྑནྡྷཱ, ‘‘བཧིདྡྷཱ ནཱམརཱུཔ’’ནྟི ཝུཏྟཱནི རཱུཔཱདཱིནི པརེསཾ. ཏཐཱ ཨཡཾ ཀཱཡོ ཨཏྟནོཝ ཨཛ྄ཛྷཏྟིཀཱནི ཨཱཡཏནཱནི, བཧིདྡྷཱ ནཱམརཱུཔཾ པརེསཾ བཱཧིརཱནཱིཏི. ཨཉྙཐཱ ཨཛ྄ཛྷཏྟིཀཱཡཏནམཏྟེ ཨེཝ ‘‘ཨཡཾ ཀཱཡོ’’ཏི ཝུཏྟེ ན ཨཛ྄ཛྷཏྟིཀཱཡཏནཱནེཝ ཨཏྟནོ པཉྩཀྑནྡྷཱ ཧོནྟཱིཏི ཨཏྟནོ ཙ པརེསཉྩ པཉྩཀྑནྡྷེཧི དཱིཔནཱ ན སམྦྷཝེཡྻཱཏི. སལེ༹ཝཱཡཏནཱནཱིཏི སལེ༹ཝ སམྥསྶཀཱརཎཱནི, ཡེཧི ཀཱརཎབྷཱུཏེཧི ཨཱཡཏནེཧི ཨུཔྤནྣེན ཕསྶེན ཕུཊྛོ བཱལོ སུཁདུཀྑཾ པཊིསཾཝེདེཏི.

ཨཱདི-སདྡེན ¶ ‘‘ཨེཏེསཾ ཝཱ ཨཉྙཏརེན ཨཝིཛྫཱནཱིཝརཎསྶ, བྷིཀྑཝེ, པཎྜིཏསྶ ཏཎྷཱཡ ¶ སཾཡུཏྟསྶཱ’’ཏིཨཱདི ཡོཛེཏབྦཾ. ཏསྨིཉྷི སུཏྟེ སངྑཱརེ ཨཝིཛྫཱཏཎྷཱནིསྶིཏེ ཨེཝ ཀཏྭཱ ཀཱཡགྒཧཎེན ཝིཉྙཱཎནཱམརཱུཔསལཱ༹ཡཏནཱནི གཧེཏྭཱ ཨེཏསྨིཉྩ ཀཱཡེ སལཱ༹ཡཏནཱནཾ ཕསྶཾ ཏཾནིསྶིཏམེཝ ཀཏྭཱ ཝེདནཱཡ ཝིསེསཔཙྩཡབྷཱཝཾ དསྶེནྟེན བྷགཝཏཱ བཱལཔཎྜིཏཱནཾ ཨཏཱིཏདྡྷཱཝིཛྫཱཏཎྷཱམཱུལཀོ ཝེདནཱནྟོ པཊིཙྩསམུཔྤཱདོ དསྶིཏོ. པུན ཙ བཱལཔཎྜིཏཱནཾ ཝིསེསཾ དསྶེནྟེན –

‘‘ཡཱཡ ཙ, བྷིཀྑཝེ, ཨཝིཛྫཱཡ ནིཝུཏསྶ བཱལསྶ ཡཱཡ ཙ ཏཎྷཱཡ སཾཡུཏྟསྶ ཨཡཾ ཀཱཡོ སམུདཱགཏོ, སཱ ཙེཝ ཨཝིཛྫཱ བཱལསྶ ཨཔྤཧཱིནཱ, སཱ ཙ ཏཎྷཱ ཨཔརིཀྑཱིཎཱ. ཏཾ ཀིསྶ ཧེཏུ? ན, བྷིཀྑཝེ, བཱལོ ཨཙརི བྲཧྨཙརིཡཾ སམྨཱ དུཀྑཀྑཡཱཡ, ཏསྨཱ བཱལོ ཀཱཡསྶ བྷེདཱ ཀཱཡཱུཔགོ ཧོཏི, སོ ཀཱཡཱུཔགོ སམཱནོ ན པརིམུཙྩཏི ཛཱཏིཡཱ…པེ… དུཀྑསྨཱཏི ཝདཱམཱི’’ཏི (སཾ. ནི. ༢.༡༩) –

ཝེདནཱཔབྷཝཾ སཱཝིཛྫཾ ཏཎྷཾ དསྶེཏྭཱ ཨུཔཱདཱནབྷཝེ ཙ ཏཾནིསྶིཏེ ཀཏྭཱ ‘‘ཀཱཡཱུཔགོ ཧོཏཱི’’ཏིཨཱདིནཱ ཛཱཏིཨཱདིཀེ དསྶེནྟེན པཙྩུཔྤནྣཧེཏུསམུཊྛཱནཏོ པབྷུཏི ཨུབྷཡམཱུལོཝ པཊིཙྩསམུཔྤཱདོ ཝུཏྟོ, ཏབྦིཔརིཡཱཡེན ཙ པཎྜིཏསྶ པཙྩུཔྤནྣཧེཏུཔརིཀྑཡཏོ པབྷུཏི ཨུབྷཡམཱུལཀོ པཊིལོམཔཊིཙྩསམུཔྤཱདོཏི.

དུགྒཏིགཱམིཀམྨསྶ ཝིསེསཔཙྩཡཏྟཱ ཨཝིཛྫཱ ‘‘ཨཝིནྡིཡཾ ཝིནྡཏཱི’’ཏི ཝུཏྟཱ, ཏཐཱ ཝིསེསཔཙྩཡོ ཝིནྡིཡསྶ ན ཧོཏཱིཏི ‘‘ཝིནྡིཡཾ ན ཝིནྡཏཱི’ཏི ཙ. ཨཏྟནི ནིསྶིཏཱནཾ ཙཀྑུཝིཉྙཱཎཱདཱིནཾ པཝཏྟནཾ ཨུཔྤཱདནཾ ཨཱཡཏནཾ. སམྨོཧབྷཱཝེནེཝ ཨནབྷིསམཡབྷཱུཏཏྟཱ ཨཝིདིཏཾ ཨཉྙཱཏཾ ཀརོཏི. ཨནྟཝིརཧིཏེ ཛཝཱཔེཏཱིཏི ཙ ཝཎྞཱགམཝིཔརིཡཱཡཝིཀཱརཝིནཱསདྷཱཏུཨཏྠཝིསེསཡོགེཧི པཉྩཝིདྷསྶ ནིརུཏྟིལཀྑཎསྶ ཝསེན ཏཱིསུཔི པདེསུ ཨ-ཀཱར ཝི-ཀཱར ཛ-ཀཱརེ གཧེཏྭཱ ཨཉྙེསཾ ཝཎྞཱནཾ ལོཔཾ ཀཏྭཱ ཛ-ཀཱརསྶ ཙ དུཏིཡསྶ ཨཱགམཾ ཀཏྭཱ ‘‘ཨཝིཛྫཱ’’ཏི ཝུཏྟཱ. བྱཉྫནཏྠཾ དསྶེཏྭཱ སབྷཱཝཏྠཾ དསྶེཏུཾ ‘‘ཨཔིཙཱ’’ཏིཨཱདིམཱཧ. ཙཀྑུཝིཉྙཱཎཱདཱིནཾ ཝཏྠཱརམྨཎཱནི ‘‘ཨིདཾ ཝཏྠུ, ཨིདམཱརམྨཎ’’ནྟི ཨཝིཛྫཱཡ ཉཱཏུཾ ¶ ན སཀྐཱཏི ཨཝིཛྫཱ ཏཔྤཊིཙྪཱདིཀཱ ཝུཏྟཱ. ཝཏྠཱརམྨཎསབྷཱཝཙྪཱདནཏོ ཨེཝ ཨཝིཛྫཱདཱིནཾ པཊིཙྩསམུཔྤཱདབྷཱཝསྶ, ཛརཱམརཎཱདཱིནཾ པཊིཙྩསམུཔྤནྣབྷཱཝསྶ ཙ ཚཱདནཏོ པཊིཙྩསམུཔྤཱདཔཊིཙྩསམུཔྤནྣཚཱདནཾ ཝེདིཏབྦཾ.

སངྑཱར-སདྡགྒཧཎེན ¶ ཨཱགཏཱ སངྑཱརཱ སངྑཱར-སདྡེན ཨཱགཏསངྑཱརཱ. ཡདིཔི ཨཝིཛྫཱཔཙྩཡཱ སངྑཱརཱཔི སངྑཱར-སདྡེན ཨཱགཏཱ, ཏེ པན ཨིམིསྶཱ དེསནཱཡ པདྷཱནཱཏི ཝིསུཾ ཝུཏྟཱ. ཏསྨཱ ‘‘དུཝིདྷཱ’’ཏི ཨེཏྠ ཨབྷིསངྑརཎཀསངྑཱརཾ སངྑཱར-སདྡེནཱགཏཾ སནྡྷཱཡ ཏཏྠ ཝུཏྟམྤི ཝཛྫེཏྭཱ སངྑཱརསདྡེན ཨཱགཏསངྑཱརཱ ཡོཛེཏབྦཱ. ‘‘སངྑཱར-སདྡེནཱགཏསངྑཱརཱ’’ཏི ཝཱ སམུདཱཡོ ཝུཏྟོ, ཏདེཀདེསོ ཙ ཨིདྷ ཝཎྞིཏབྦབྷཱཝེན ‘‘ཨཝིཛྫཱཔཙྩཡཱ སངྑཱརཱ’’ཏི, ཏསྨཱ ཝཎྞིཏབྦསབྦསངྒཧཎཝསེན དུཝིདྷཏཱ ཝུཏྟཱཏི ཝེདིཏབྦཱ. པཋམཾ ནིརུཛ྄ཛྷཏི ཝཙཱིསངྑཱརོཏིཨཱདིནཱ ཝིཏཀྐཝིཙཱརཨསྶཱསཔསྶཱསསཉྙཱཝེདནཱཝཙཱིསངྑཱརཱདཡོ ཝུཏྟཱ, ན ཨཝིཛྫཱསངྑཱརེསུ ཝུཏྟཱ ཀཱཡསཉྩེཏནཱདཡོ.

པརིཏསྶཏཱིཏི པིཔཱསཏི. བྷཝཏཱིཏི ཨུཔཔཏྟིབྷཝཾ སནྡྷཱཡ ཝུཏྟཾ, བྷཱཝཡཏཱིཏི ཀམྨབྷཝཾ. ཙུཏི ཁནྡྷཱནཾ མརཎནྟི ‘‘མརནྟི ཨེཏེནཱ’’ཏི ཝུཏྟཾ. ‘‘དུཀྑཱ ཝེདནཱ ཨུཔྤཱདདུཀྑཱ ཋིཏིདུཀྑཱ’’ཏི (མ. ནི. ༡.༤༦༥) ཝཙནཏོ དྭེདྷཱ ཁཎཏི. ཨཱཡཱསོཏི པརིསྶམོ ཝིསཱདོ. ཀེཝལ-སདྡོ ཨསམྨིསྶཝཱཙཀོ ཧོཏི ‘‘ཀེཝལཱ སཱལཡོ’’ཏི, ནིརཝསེསཝཱཙཀོ ཙ ‘‘ཀེཝལཱ ཨངྒམགདྷཱ’’ཏི, ཏསྨཱ དྭེདྷཱཔི ཨཏྠཾ ཝདཏི. ཏཏྠ ཨསམྨིསྶསྶཱཏི སུཁརཧིཏསྶ. ན ཧི ཨེཏྠ ཀིཉྩི ཨུཔྤཱདཝཡརཧིཏཾ ཨཏྠཱིཏི.

ཏཾསམྤཡུཏྟེ, པུགྒལཾ ཝཱ སམྨོཧཡཏཱིཏི སམྨོཧནརསཱ. ཨཱརམྨཎསབྷཱཝསྶ ཚཱདནཾ ཧུཏྭཱ གཡ྄ཧཏཱིཏི ཚཱདནཔཙྩུཔཊྛཱནཱ. ‘‘ཨཱསཝསམུདཡཱ ཨཝིཛྫཱསམུདཡོ’’ཏི (མ. ནི. ༡.༡༠༣) ཝཙནཏོ ཨཱསཝཔདཊྛཱནཱ. པཊིསནྡྷིཛནནཏྠཾ ཨཱཡཱུཧནྟི བྱཱཔཱརཾ ཀརོནྟཱིཏི ཨཱཡཱུཧནརསཱ, རཱསིཀརཎཾ ཝཱ ཨཱཡཱུཧནཾ. ནཱམརཱུཔསྶ པུརེཙཱརིཀབྷཱཝེན པཝཏྟཏཱིཏི པུབྦངྒམརསཾ. པུརིམབྷཝེན སདྡྷིཾ གྷཊནཾ ཧུཏྭཱ གཡ྄ཧཏཱིཏི པཊིསནྡྷིཔཙྩུཔཊྛཱནཾ. ཝིཉྙཱཎེན སཧ སམྤཡུཛྫཏཱིཏི སམྤཡོགརསཾ. ཨཉྙམཉྙཾ སམྤཡོགཱབྷཱཝཏོ རཱུཔཾ ཝིཀིརཏཱིཏི ཝིཀིརཎརསཾ. ཨེཝཉྩ ཀཏྭཱ པིསིཡམཱནཱ ཏཎྜུལཱདཡོ ཝིཀིརནྟི ཙུཎྞཱི བྷཝནྟཱིཏི. ནཱམསྶ ཀདཱཙི ཀུསལཱདིབྷཱཝོ ཙ ཨཏྠཱིཏི ཏཏོ ¶ ཝིསེསནཏྠཾ ‘‘ཨབྱཱཀཏཔཙྩུཔཊྛཱན’’ནྟི ཨཱཧ. ‘‘ཨཙེཏནཱ ཨབྱཱཀཏཱ’’ཏི ཨེཏྠ ཝིཡ ཨནཱརམྨཎཏཱ ཝཱ ཨབྱཱཀཏཏཱ དཊྛབྦཱ. ཨཱཡཏནལཀྑཎནྟི གྷཊནལཀྑཎཾ, ཨཱཡཱནཾ ཏནནལཀྑཎཾ ཝཱ. དསྶནཱདཱིནཾ ཀཱརཎབྷཱཝོ དསྶནཱདིརསཏཱ. ཨཀུསལཝིཔཱཀུཔེཀྑཱཡ ཨནིཊྛབྷཱཝཏོ དུཀྑེན ཨིཏརཱཡ ཙ ཨིཊྛབྷཱཝཏོ སུཁེན སངྒཧིཏཏྟཱ ‘‘སུཁདུཀྑཔཙྩུཔཊྛཱནཱ’’ཏི ཨཱཧ. དུཀྑསམུདཡཏྟཱ ཧེཏུལཀྑཎཱ ཏཎྷཱ. ‘‘ཏཏྲཏཏྲཱབྷིནནྡིནཱི’’ཏི (དཱི. ནི. ༢.༤༠༠; མ. ནི. ༡.༡༣༣, ༤༦༠; ཝིབྷ. ༢༠༣) ཝཙནཏོ ¶ ཨབྷིནནྡནརསཱ. ཙིཏྟསྶ, པུགྒལསྶ ཝཱ རཱུཔཱདཱིསུ ཨཏིཏྟབྷཱཝོ ཧུཏྭཱ གཡ྄ཧཏཱིཏི ཨཏིཏྟབྷཱཝཔཙྩུཔཊྛཱནཱ. ཏཎྷཱདལ༹ྷཏྟཾ ཧུཏྭཱ ཀཱམུཔཱདཱནཾ, སེསཱནི དིཊྛི ཧུཏྭཱ ཨུཔཊྛཧནྟཱིཏི ཏཎྷཱདལ༹ྷཏྟདིཊྛིཔཙྩུཔཊྛཱནཱ. ཀམྨུཔཔཏྟིབྷཝཝསེན བྷཝསྶ ལཀྑཎཱདཡོ ཡོཛེཏབྦཱ.

ཨཱདི-སདྡེན ཨནུབོདྷཱདིབྷཱཝགྒཧཎཾ. དུཀྑཱདཱིསུ ཨཉྙཱཎཾ ཨཔྤཊིཔཏྟི, ཨསུབྷཱདཱིསུ སུབྷཱདིཝིཔལླཱསཱ མིཙྪཱཔཊིཔཏྟི. དིཊྛིཝིཔྤཡུཏྟཱ ཝཱ ཨཔྤཊིཔཏྟི, དིཊྛིསམྤཡུཏྟཱ མིཙྪཱཔཊིཔཏྟི. ན ཨཝིཛྫཱཡ ཨེཝ ཚདྭཱརིཀཏཱ ཚལཱ༹རམྨཎཏཱ ཙ, ཨཐ ཁོ ཨཉྙེསུཔི པཊིཙྩསམུཔྤཱདངྒེསུ ཨརཱུཔདྷམྨཱནནྟི ཨཱཧ ‘‘སབྦེསུཔཱི’’ཏི. ནོབྷཡགོཙརནྟི མནཱཡཏནམཱཧ. ན ཧི ཨརཱུཔདྷམྨཱནཾ དེསཝསེན ཨཱསནྣཏཱ དཱུརཏཱ ཙ ཨཏྠི ཨསཎྛཱནཏྟཱ, ཏསྨཱ མནཱཡཏནསྶ གོཙརོ ན མནཱཡཏནཾ སམྤཏྟོ ཨསམྤཏྟོ ཝཱཏི ཝུཙྩཏཱིཏི.

སོཀཱདཱིནཾ སབྦྷཱཝཱ ཨངྒབཧུཏྟཔྤསངྒེ ‘‘དྭཱདསེཝཱ’’ཏི ཨངྒཱནཾ ཝཝཏྠཱནཾ ཝེདིཏབྦཾ. ན ཧི སོཀཱདཡོ ཨངྒབྷཱཝེན ཝུཏྟཱ, ཕལེན པན ཀཱརཎཾ ཨཝིཛྫཾ མཱུལངྒཾ དསྶེཏུཾ ཏེ ཝུཏྟཱཏི. ཛརཱམརཎབྦྷཱཧཏསྶ ཧི བཱལསྶ ཏེ སམྦྷཝནྟཱིཏི སོཀཱདཱིནཾ ཛརཱམརཎཀཱརཎཏཱ ཝུཏྟཱ. ‘‘སཱརཱིརིཀཱཡ དུཀྑཱཡ ཝེདནཱཡ ཕུཊྛོ’’ཏི (སཾ. ནི. ༤.༢༥༢) ཙ སུཏྟེ ཛརཱམརཎནིམིཏྟཉྩ དུཀྑཾ སངྒཧིཏནྟི ཏཾཏཾནིམིཏྟཱནཾ སཱདྷཀབྷཱཝེན ཝུཏྟཾ. ཡསྨཱ པན ཛརཱམརཎེནེཝ སོཀཱདཱིནཾ ཨེཀསངྑེཔོ ཀཏོ, ཏསྨཱ ཏེསཾ ཛཱཏིཔཙྩཡཏཱ ཡུཛྫཏི. ཛརཱམརཎཔཙྩཡབྷཱཝེ ཧི ཨཝིཛྫཱཡ ཨེཀསངྑེཔོ ཀཱཏབྦོ སིཡཱ, ཛཱཏིཔཙྩཡཱ པན ཛརཱམརཎཾ སོཀཱདཡོ ཙ སམྦྷཝནྟཱིཏི. ཏཏྠ ཛརཱམརཎཾ ཨེཀནྟིཀཾ ཨངྒབྷཱཝེནེཝ གཧིཏཾ, སོཀཱདཡོ ¶ པན རཱུཔབྷཝཱདཱིསུ ཨབྷཱཝཏོ ཨནེཀནྟིཀཱ ཀེཝལཾ པཱཀཊེན ཕལེན ཨཝིཛྫཱནིདསྶནཏྠཾ གཧིཏཱ. ཏེན ཨནཱགཏེ ཛཱཏིཡཱ སཏི ཏཏོ པརཱཡ པཊིསནྡྷིཡཱ ཧེཏུཧེཏུབྷཱུཏཱ ཨཝིཛྫཱ དསྶིཏཱཏི བྷཝཙཀྐསྶ ཨཝིཙྪེདོ དསྶིཏོ ཧོཏཱིཏི. སུཏྟཉྩ སོཀཱདཱིནཾ ཨཝིཛྫཱ ཀཱརཎནྟི ཨེཏསྶེཝཏྠསྶ སཱདྷཀཾ དཊྛབྦཾ, ན སོཀཱདཱིནཾ བཱལསྶ ཛརཱམརཎནིམིཏྟཏཱམཏྟསྶ. ‘‘ཨསྶུཏཝཱ པུཐུཛྫནོ’’ཏི (སཾ. ནི. ༤.༢༥༢) ཧི ཝཙནེན ཨཝིཛྫཱ སོཀཱདཱིནཾ ཀཱརཎནྟི དསྶིཏཱ, ན ཙ ཛརཱམརཎནིམིཏྟམེཝ དུཀྑཾ དུཀྑནྟི.

ཨུདྡེསཝཱརཝཎྞནཱ ནིཊྛིཏཱ.

ཨཝིཛྫཱཔདནིདྡེསཝཎྞནཱ

༢༢༦. ‘‘ཨཝིཛྫཱཔཙྩཡཱ ༩༢ སངྑཱརཱ’’ཏི ཧི ཝུཏྟནྟི ཨེཏེན ཨཝིཛྫཱཡ ཝིསེསནབྷཱཝེན སངྑཱརཱནཉྩ པདྷཱནབྷཱཝེན ཝུཏྟཏྟཱ སངྑཱརཱནཾ ནིདྡིསིཏབྦབྷཱཝསྶ ཀཱརཎཾ དསྶེཏི. པིཏཱ ཀཐཱིཡཏི ‘‘དཱིགྷོ སཱམོ, མིཏྟོ རསྶོ, ཨོདཱཏོ དཏྟོ’’ཏི.

རསིཏབྦོ པཊིཝིཛ྄ཛྷིཏབྦོ སབྷཱཝོ རསོ, ཨཏྟནོ རསོ སརསོ, ཡཱཐཱཝོ སརསོ ཡཱཐཱཝསརསོ, སོ ཨེཝ ལཀྑིཏབྦཏྟཱ ལཀྑཎནྟི ཡཱཐཱཝསརསལཀྑཎཾ. ‘‘ཀཏམཱ ཙ, བྷིཀྑཝེ, ཨཝིཛྫཱ? དུཀྑེ ཨཉྙཱཎ’’ནྟིཨཱདིནཱ (སཾ. ནི. ༢.༢; མ. ནི. ༡.༡༠༣) སུཏྟེ ཙཏྟཱརེཝ ཝུཏྟཱནཱིཏི ‘‘སུཏྟནྟིཀཔརིཡཱཡེནཱ’’ཏི ཨཱཧ. ནིཀྑེཔཀཎྜེ པནཱཏིཨཱདིནཱ ཨིདྷ ཙཏཱུསུ ཋཱནེསུ ཀཐིཏཱཡ ཨེཝ ཨཝིཛྫཱཡ ནིཀྑེཔཀཎྜེ ཨཊྛསུ ཋཱནེསུ ཀིཙྩཛཱཏིཏོ པཉྩཝཱིསཏིཡཱ པདེཧི ལཀྑཎཏོ ཙ ཀཐིཏཏྟཱ ཏདཏྠསཾཝཎྞནཱཝསེན ཝིབྷཱཝནཾ ཀརོཏི. ཨཧཱཔེཏྭཱ ཝིབྷཛིཏབྦཝིབྷཛནཉྷི ཨབྷིདྷམྨཔརིཡཱཡོ.

ཛཱཡཏི ཨེཏྠཱཏི ཛཱཏི, ཨུཔྤཏྟིཊྛཱནཾ. ཡདིཔི ནིརོདྷམགྒེ ཨཝིཛྫཱ ཨཱརམྨཎཾ ན ཀརོཏི, ཏེ པན ཛཱནིཏུཀཱམསྶ ཏཔྤཊིཙྪཱདནཝསེན ཨནིརོདྷམགྒེསུ ནིརོདྷམགྒགྒཧཎཀཨཱརཎཝསེན ཙ པཝཏྟམཱནཱ ཏཏྠ ཨུཔྤཛྫཏཱིཏི ཝུཙྩཏཱིཏི ཏེསམྤི ཨཝིཛྫཱཡ ཨུཔྤཏྟིཊྛཱནཏཱ ཧོཏི, ཨིཏརེསཾ ཨཱརམྨཎབྷཱཝེན ¶ ཙཱཏི. སངྒྷིཀབལདེཝགོཎཱདཱིནཾ སངྒྷཱཊིནངྒལཱདཱིནི ཝིཡ ཨཉྙསེཏཱདཱིནཾ ཨཝིཛྫཱཡ དུཀྑཱདིཝིསཡཱནཾ ཨནྡྷཏྟཀརཱནཾ ལོབྷཱདཱིནཾ ནིཝཏྟཀོ ཨཉྙཱཎཱདིསབྷཱཝོ ལཀྑཎནྟི དཊྛབྦཾ.

ཨཏྠཏྠནྟི ཕལཕལཾ. ཨཱམེཌིཏཝཙནཉྷི སབྦེསཾ ཨཏྠཱནཾ ཝིསུཾ ཝིསུཾ པཱཀཊཀརཎབྷཱཝཔྤཀཱསནཏྠཾ. ཨཏྠོ ཨེཝ ཝཱ ཨཏྠོ ཨཏྠཏྠོཏི ཨཏྠསྶ ཨཝིཔརཱིཏཏཱདསྶནཏྠཾ ཨཏྠེནེཝཏྠཾ ཝིསེསཡཏི. ན ཧི ཉཱཎཾ ཨནཏྠཾ ཨཏྠོཏི གཎྷཱཏཱིཏི. ཨེཝཾ ཀཱརཎཀཱརཎནྟི ཨེཏྠཱཔི དཊྛབྦཾ. ཏཾ ཨཱཀཱརནྟི ཨཏྠཏྠཱདིཨཱཀཱརཾ. གཧེཏྭཱཏི ཙིཏྟེ པཝེསེཏྭཱ, ཙིཏྟེན པུགྒལེན ཝཱ གཧིཏཾ ཀཏྭཱ. པཊིཝིདྡྷསྶ པུན ཨཝེཀྑཎཱ པཙྩཝེཀྑཎཱ. དུཙྩིནྟིཏཙིནྟིཏཱདིལཀྑཎསྶ བཱལསྶ བྷཱཝོ བཱལྱཾ. པཛཱནཱཏཱིཏི པཀཱརེཧི ཛཱནཱཏི. བལཝམོཧནཾ པམོཧོ. སམནྟཏོ མོཧནཾ སམྨོཧོ.

དུཀྑཱརམྨཎཏཱཏི ¶ དུཀྑཱརམྨཎཏཱཡ, ཡཱཡ ཝཱ ཨཝིཛྫཱཡ ཚཱདེནྟིཡཱ དུཀྑཱརམྨཎཱ ཏཾསམྤཡུཏྟདྷམྨཱ, སཱ ཏེསཾ བྷཱཝོཏི དུཀྑཱརམྨཎཏཱ, ཨཱརམྨཎམེཝ ཝཱ ཨཱརམྨཎཏཱ, དུཀྑཾ ཨཱརམྨཎཏཱ ཨེཏིསྶཱཏི དུཀྑཱརམྨཎཏཱ.

དུདྡསཏྟཱ གམྦྷཱིརཱ ན སབྷཱཝཏོ, ཏསྨཱ ཏདཱརམྨཎཏཱ ཨཝིཛྫཱ ཨུཔྤཛྫཏི, ཨིཏརེསཾ སབྷཱཝཏོ གམྦྷཱིརཏྟཱ ཏདཱརམྨཎཏཱ ནུཔྤཛྫཏཱིཏི ཨདྷིཔྤཱཡོ. ཨཔིཙ ཁོ པནཱཏི མགྒསྶ སངྑཏསབྷཱཝཏྟཱ ཏཏོཔི ནིརོདྷསྶ གམྦྷཱིརཏརཏཾ དསྶེཏི.

ཨཝིཛྫཱཔདནིདྡེསཝཎྞནཱ ནིཊྛིཏཱ.

སངྑཱརཔདནིདྡེསཝཎྞནཱ

པུནཱཏཱིཏི སོདྷེཏི ཨཔུཉྙཕལཏོ དུཀྑསཾཀིལེསཏོ ཙ, ཧིཏསུཁཛ྄ཛྷཱསཡེན པུཉྙཾ ཀརོཏཱིཏི ཏཾནིཔྥཱདནེན ཀཱརཀསྶཛ྄ཛྷཱསཡཾ པཱུརེཏཱིཏི པུཉྙོ, པཱུརཀོ པུཛྫནིབྦཏྟཀོ ཙ ནིརུཏྟིལཀྑཎེན ‘‘པུཉྙོ’’ཏི ཝེདིཏབྦོ. སམཱདྷིཔཙྩནཱིཀཱནཾ ཨཏིདཱུརཏཱཡ ན ཨིཉྫཏི ན ཙལཏཱིཏི ཨཏྠོ. ཀཱཡསྶཱཏི དྭཱརསྶ སཱམིབྷཱཝེན ནིདྡེསོ ཀཏོ.

པུཉྙུཔགནྟི ¶ བྷཝསམྤཏྟུཔགཾ. ཏཏྠཱཏི ཝིབྷངྒསུཏྟེ (སཾ. ནི. ༢.༢). ཏཉྷི པདྷཱནབྷཱཝེན གཧིཏནྟི. སམྨཱདིཊྛིསུཏྟེ (མ. ནི. ༡.༡༠༢) པན ‘‘ཏཡོམེ, ཨཱཝུསོ, སངྑཱརཱ’’ཏི ཨཱགཏནྟི. སབྦཉྙུཛིནབྷཱསིཏོ པན ཨཡཾ, ན པཙྩེཀཛིནབྷཱསིཏོ, ཨིམསྶཏྠསྶ དཱིཔནཏྠཾ ཨེཏེསཾ སུཏྟཱནཾ ཝསེན ཏེ གཧིཏཱ. ཀཐཾ པནེཏེན གཧཎེནཱཡམཏྠོ དཱིཔིཏོ ཧོཏཱིཏི ཏཾདསྶནཏྠམཱཧ ‘‘ཨབྷིདྷམྨེཔི ཧི སུཏྟེཔི ཨེཀསདིསཱཝ ཏནྟི ནིདྡིཊྛཱ’’ཏི. སབྦཉྙུབྷཱསིཏོཏི པཱཀཊེན སུཏྟནྟེན སདིསཏྟཱ ཨཡམྤི སབྦཉྙུབྷཱསིཏོཏི ཉཱཡཏཱིཏི ཝུཏྟཾ ཧོཏཱིཏི.

‘‘ཏེརསཱཔཱི’’ཏི ཝུཏྟཾ, ཏཏྠ ཉཱཎཝིཔྤཡུཏྟཱནཾ ན བྷཱཝནཱམཡཏཱ པཱཀཊཱཏི ‘‘ཡཐཱ ཧཱི’’ཏིཨཱདིམཱཧ ¶ . པཐཝཱི པཐཝཱིཏིཨཱདིབྷཱཝནཱ ཙ ཀསིཎཔརིཀམྨཀརཎཾ མཎྜལཀརཎཉྩ བྷཱཝནཾ བྷཛཱཔེནྟི.

དཱནཝསེན པཝཏྟཱ ཙིཏྟཙེཏསིཀཱ དྷམྨཱ དཱནཾ. ཏཏྠ བྱཱཔཱརབྷཱུཏཱ ཨཱཡཱུཧནཙེཏནཱ དཱནཾ ཨཱརབྦྷ དཱནཾ ཨདྷིཀིཙྩ ཨུཔྤཛྫཏཱིཏི ཝུཙྩཏི, ཨེཝཾ ཨིཏརེསུ. སོམནསྶཙིཏྟེནཱཏི ཨནུམོདནཱཔཝཏྟིནིདསྶནམཏྟམེཏཾ དཊྛབྦཾ. ཨུཔེཀྑཱསཧགཏེནཔི ཧི ཨནུསྶརཏི ཨེཝཱཏི.

ཨསརིཀྑཀམྤི སརིཀྑཀེན ཙཏུཏྠཛ྄ཛྷཱནཝིཔཱཀེན ཝེཧཔྥལཱདཱིསུ ཝིནཱཔི ཨསཉྙེསུ ཀཊཏྟཱརཱུཔཾ. རཱུཔམེཝ སཕནྡནཏྟཱ ‘‘སཨིཉྫན’’ནྟི ཝུཏྟཾ ཨིཉྫནཀརནཱིཝརཎཱདཱིནཾ ཨཝིཀྑམྦྷནཏོ, རཱུཔཏཎྷཱསངྑཱཏསྶ ཨིཉྫནཀསྶ ཀཱརཎཏྟཱ ཝཱ. ཏེནེཝ རཱུཔཱརམྨཎཾ ནིམིཏྟཱརམྨཎཉྩ སབྦམྤི ཙཏུཏྠཛ྄ཛྷཱནཾ ནིཔྤརིཡཱཡེན ‘‘ཨནིཉྫན’’ནྟི ན ཝུཙྩཏཱིཏི. མཧཱཏུལཱཡ དྷཱརཡམཱནོ ནཱལི༹ཡཱ མིནམཱནོ ཙ སམུདཱཡམེཝ དྷཱརེཏི མིནཏི ཙ, ན ཨེཀེཀཾ གུཉྫཾ, ཨེཀེཀཾ ཏཎྜུལཾ ཝཱ, ཨེཝཾ བྷགཝཱཔི ཨཔརིམཱཎཱ པཋམཀུསལཙེཏནཱཡོ སམུདཱཡཝསེནེཝ གཧེཏྭཱ ཨེཀཛཱཏིཀཏྟཱ ཨེཀམེཝ ཀཏྭཱ དསྶེཏི. ཨེཝཾ དུཏིཡཱདཡོཔཱིཏི.

‘‘ཀཱཡདྭཱརེ པཝཏྟཱ’’ཏི ཨཝཏྭཱ ‘‘ཨཱདཱནགྒཧཎཙོཔནཾ པཱཔཡམཱནཱ ཨུཔྤནྣཱ’’ཏིཔི ཝཏྟུཾ ཝཊྚཏཱིཏི ཝཙནཝིསེསམཏྟམེཝ དསྶེཏི. ཀཱཡདྭཱརེ པཝཏྟི ཨེཝ ཧི ཨཱདཱནཱདིཔཱཔནཱཏི. པུརིམེན ཝཱ དྭཱརསྶ ཨུཔལཀྑཎབྷཱཝོ ཝུཏྟོ, པཙྪིམེན ཙེཏནཱཡ སཝིཉྙཏྟིརཱུཔསམུཊྛཱཔནཾ. ཏཏྠ ཨཱཀཌྜྷིཏྭཱ གཧཎཾ ཨཱདཱནཾ, སམྤཡུཏྟསྶ གཧཎཾ གཧཎཾ, ཕནྡནཾ ཙོཔནཾ.

ཨེཏྠཱཏི ¶ ཀཱཡཝཙཱིསངྑཱརགྒཧཎེ, ཀཱཡཝཙཱིསཉྩེཏནཱགཧཎེ ཝཱ. ཨཊྛཀཐཱཡཾ ཨབྷིཉྙཱཙེཏནཱ ན གཧིཏཱ ཝིཉྙཱཎསྶ པཙྩཡོ ན ཧོཏཱིཏི. ཀསྨཱ པན ན ཧོཏི, ནནུ སཱཔི ཀུསལཱ ཝིཔཱཀདྷམྨཱ ཙཱཏི? སཙྩཾ, ཨནུཔཙྪིནྣཏཎྷཱཝིཛྫཱམཱནེ པན སནྟཱནེ སབྱཱཔཱརཔྤཝཏྟིཡཱ ཏསྶཱ ཀུསལཏཱ ཝིཔཱཀདྷམྨཏཱ ཙ ཝུཏྟཱ, ན ཝིཔཱཀུཔྤཱདནེན, སཱ པན ཝིཔཱཀཾ ཨུཔྤཱདཡནྟཱི རཱུཔཱཝཙརམེཝ ཨུཔྤཱདེཡྻ. ན ཧི ཨཉྙབྷཱུམིཀཾ ཀམྨཾ ཨཉྙབྷཱུམིཀཾ ཝིཔཱཀཾ ཨུཔྤཱདེཏཱིཏི. ཨཏྟནཱ སདིསཱརམྨཎཉྩ ཏིཊྛཱནིཀཾ ཏཾ ཨུཔྤཱདེཡྻ ཙིཏྟུཔྤཱདཀཎྜེ རཱུཔཱཝཙརཝིཔཱཀསྶ ཀམྨསདིསཱརམྨཎསྶེཝ ཝུཏྟཏྟཱ, ན ཙ རཱུཔཱཝཙརཝིཔཱཀོ པརིཏྟཱདིཨཱརམྨཎོ ཨཏྠི, ཨབྷིཉྙཱཙེཏནཱ ཙ པརིཏྟཱདིཨཱརམྨཎཱཝ ཧོཏི, ཏསྨཱ ཝིཔཱཀཾ ན ཨུཔྤཱདེཏཱིཏི ¶ ཝིཉྙཱཡཏི. ཀསིཎེསུ ཙ ཨུཔྤཱདིཏསྶ ཙཏུཏྠཛ྄ཛྷཱནསམཱདྷིསྶ ཨཱནིསཾསབྷཱུཏཱ ཨབྷིཉྙཱ. ཡཐཱཧ ‘‘སོ ཨེཝཾ སམཱཧིཏེ ཙིཏྟེ’’ཏིཨཱདི (དཱི. ནི. ༡.༢༤༤-༢༤༥; མ. ནི. ༡.༣༨༤-༣༨༦). ཏསྨཱ སམཱདྷིཕལསདིསཱ སཱ, ན ཙ ཕལཾ དེཏཱིཏི དཱནསཱིལཱནིསཾསོ ཏསྨིཾ བྷཝེ པཙྩཡལཱབྷོ ཝིཡ སཱཔི ཝིཔཱཀཾ ན ཨུཔྤཱདེཏི. ཡཐཱ ཙ ཨབྷིཉྙཱཙེཏནཱ, ཨེཝཾ ཨུདྡྷཙྩཙེཏནཱཔི ན ཧོཏཱིཏི ཨིདཾ ཨུདྡྷཙྩསཧགཏེ དྷམྨེ ཝིསུཾ ཨུདྡྷརིཏྭཱ ‘‘ཏེསཾ ཝིཔཱཀེ ཉཱཎཾ ཨཏྠཔཊིསམྦྷིདཱ’’ཏི (ཝིབྷ. ༧༢༥) ཝུཏྟཏྟཱ ཝིཙཱརེཏབྦཾ.

ཨཡཾ པནེཏྠ ཨམཏགྒཔཐཱནུགཏོ ཝིནིཙྪཡོ – དསྶནབྷཱཝནཱནཾ ཨབྷཱཝེཔི ཡེསཾ པུཐུཛྫནཱནཾ སེཀྑཱནཉྩ དསྶནབྷཱཝནཱཧི བྷཝིཏབྦཾ, ཏེསཾ ཏདུཔྤཏྟིཀཱལེ ཏེཧི པཧཱཏུཾ སཀྐུཎེཡྻཱ ཨཀུསལཱ ‘‘དསྶནེན པཧཱཏབྦཱ བྷཱཝནཱཡ པཧཱཏབྦཱ’’ཏི ཙ ཝུཙྩནྟི, པུཐུཛྫནཱནཾ པན བྷཱཝནཱཡ ཨབྷཱཝཱ བྷཱཝནཱཡ པཧཱཏབྦཙིནྟཱ ནཏྠི. ཏེན ཏེསཾ པཝཏྟམཱནཱ ཏེ དསྶནེན པཧཱཏུཾ ཨསཀྐུཎེཡྻཱཔི ‘‘བྷཱཝནཱཡ པཧཱཏབྦཱ’’ཏི ན ཝུཙྩནྟི. ཡདི ཝུཙྩེཡྻུཾ, དསྶནེན པཧཱཏབྦཱ བྷཱཝནཱཡ པཧཱཏབྦཱནཾ ཀེསཉྩི ཀེཙི ཀདཱཙི ཨཱརམྨཎཱརམྨཎཱདྷིཔཏིཨུཔནིསྶཡཔཙྩཡེཧི པཙྩཡོ བྷཝེཡྻུཾ, ན ཙ པཊྛཱནེ ‘‘དསྶནེན པཧཱཏབྦཱ བྷཱཝནཱཡ པཧཱཏབྦཱནཾ ཀེསཉྩི ཀེནཙི པཙྩཡེན པཙྩཡོ’’ཏི ཝུཏྟཱ. སེཀྑཱནཾ པན ཝིཛྫམཱནཱ བྷཱཝནཱཡ པཧཱཏུཾ སཀྐུཎེཡྻཱ བྷཱཝནཱཡ པཧཱཏབྦཱ. ཏེནེཝ སེཀྑཱནཾ དསྶནེན པཧཱཏབྦཱ ཙཏྟཏྟཱ ཝནྟཏྟཱ མུཏྟཏྟཱ པཧཱིནཏྟཱ པཊིནིསྶཊྛཏྟཱ ཨུཀྑེཊིཏཏྟཱ སམུཀྑེཊིཏཏྟཱ ཨསྶཱདིཏབྦཱ ཨབྷིནནྡིཏབྦཱ ¶ ཙ ན ཧོནྟི, པཧཱིནཏཱཡ ཨེཝ སོམནསྶཧེཏུབྷཱུཏཱ ཨཝིཀྑེཔཧེཏུབྷཱུཏཱ ཙ ན དོམནསྶཾ ཨུདྡྷཙྩཉྩ ཨུཔྤཱདེནྟཱིཏི ན ཏེ ཏེསཾ ཨཱརམྨཎཱརམྨཎཱདྷིཔཏིབྷཱཝཾ པཀཏཱུཔནིསྶཡབྷཱཝཉྩ གཙྪནྟི. ན ཧི པཧཱིནེ ཨུཔནིསྶཱཡ ཨརིཡོ རཱགཱདིཀིལེསེ ཨུཔྤཱདེཏི.

ཝུཏྟཉྩ ‘‘སོཏཱཔཏྟིམགྒེན ཡེ ཀིལེསཱ པཧཱིནཱ, ཏེ ཀིལེསེ ན པུནེཏི ན པཙྩེཏི ན པཙྩཱགཙྪཏི…པེ… ཨརཧཏྟམགྒེན…པེ… ན པཙྩཱགཙྪཏཱི’’ཏི (མཧཱནི. ༨༠; ཙཱུལ༹ནི. མེཏྟགཱུམཱཎཝཔུཙྪཱནིདྡེས ༢༧), ན ཙ པུཐུཛྫནཱནཾ དསྶནེན པཧཱཏུཾ སཀྐུཎེཡྻཱ ཨིཏརེསཾ ན ཀེནཙི པཙྩཡེན པཙྩཡོ ཧོནྟཱིཏི སཀྐཱ ཝཏྟུཾ ‘‘དིཊྛིཾ ཨསྶཱདེཏི ཨབྷིནནྡཏི, ཏཾ ཨཱརབྦྷ རཱགོ ཨུཔྤཛྫཏི, དིཊྛི ཝིཙིཀིཙྪཱ ཨུདྡྷཙྩཾ ཨུཔྤཛྫཏི. ཝིཙིཀིཙྪཾ ཨཱརབྦྷ ཝིཙིཀིཙྪཱ དིཊྛི ཨུདྡྷཙྩཾ ཨུཔྤཛྫཏཱི’’ཏི དིཊྛིཝིཙིཀིཙྪཱནཾ ཨུདྡྷཙྩཱརམྨཎཔཙྩཡབྷཱཝསྶ ཝུཏྟཏྟཱ. ཨེཏྠ ཧི ཨུདྡྷཙྩནྟི ཨུདྡྷཙྩསཧགཏཾ ཙིཏྟུཔྤཱདཾ སནྡྷཱཡ ཝུཏྟཾ. ཨེཝཉྩ ཀཏྭཱ ཨདྷིཔཏིཔཙྩཡནིདྡེསེ ‘‘དིཊྛིཾ གརུཾ ¶ ཀཏྭཱ ཨསྶཱདེཏི ཨབྷིནནྡཏི, ཏཾ གརུཾ ཀཏྭཱ རཱགོ ཨུཔྤཛྫཏི, དིཊྛི ཨུཔྤཛྫཏཱི’’ཏི (པཊྛཱ. ༡.༡.༤༠༩) ཨེཏྟཀམེཝ ཝུཏྟཾ, ན ཝུཏྟཾ ‘‘ཨུདྡྷཙྩཾ ཨུཔྤཛྫཏཱི’’ཏི. ཏསྨཱ དསྶནབྷཱཝནཱཧི པཧཱཏབྦཱནཾ ཨཏཱིཏཱདིབྷཱཝེན ནཝཏྟབྦཏྟེཔི ཡཱདིསཱནཾ ཏཱཧི ཨནུཔྤཏྟིདྷམྨཏཱ ཨཱཔཱདེཏབྦཱ, ཏེསུ པུཐུཛྫནེསུ ཝཏྟམཱནཱ དསྶནཾ ཨཔེཀྑིཏྭཱ ཏེན པཧཱཏུཾ སཀྐུཎེཡྻཱ དསྶནེན པཧཱཏབྦཱ, སེཀྑེསུ ཝཏྟམཱནཱ བྷཱཝནཾ ཨཔེཀྑིཏྭཱ ཏཱཡ པཧཱཏུཾ སཀྐུཎེཡྻཱ བྷཱཝནཱཡ པཧཱཏབྦཱ. ཏེསུ བྷཱཝནཱཡ པཧཱཏབྦཱ སཧཱཡཝིརཧཱ ཝིཔཱཀཾ ན ཛནཡནྟཱིཏི བྷཱཝནཱཡ པཧཱཏབྦཙེཏནཱཡ ནཱནཱཀྑཎིཀཀམྨཔཙྩཡབྷཱཝོ ན ཝུཏྟོ, ཨཔེཀྑིཏབྦདསྶནབྷཱཝནཱརཧིཏཱནཾ པན པུཐུཛྫནེསུ ཨུཔྤཛྫམཱནཱནཾ སཀབྷཎྜེ ཚནྡརཱགཱདཱིནཾ ཨུདྡྷཙྩསཧགཏཙིཏྟུཔྤཱདསྶ ཙ སཾཡོཛནཏྟཡཏདེཀཊྛཀིལེསཱནཾ ཨནུཔཙྪིནྣཏཱཡ ཨཔརིཀྑཱིཎསཧཱཡཱནཾ ཝིཔཱཀུཔྤཱདནཾ ན སཀྐཱ པཊིཀྑིཔིཏུནྟི ཨུདྡྷཙྩསཧགཏདྷམྨཱནཾ ཝིཔཱཀོ ཝིབྷངྒེ ཝུཏྟོཏི.

ཡདི ཨེཝཾ, ཨཔེཀྑིཏབྦདསྶནབྷཱཝནཱརཧིཏཱནཾ ཨཀུསལཱནཾ ནེཝདསྶནེནནབྷཱཝནཱཡཔཧཱཏབྦཏཱ ཨཱཔཛྫཏཱིཏི? ནཱཔཛྫཏི, ཨཔྤཧཱཏབྦཱནཾ ‘‘ནེཝ དསྶནེན ན བྷཱཝནཱཡ པཧཱཏབྦཱ’’ཏི (དྷ. ས. ཏིཀམཱཏིཀཱ ༨) ཝུཏྟཏྟཱ, ཨཔྤཧཱཏབྦཝིརུདྡྷསབྷཱཝཏྟཱ ཙ ཨཀུསལཱནཾ. ཨེཝམྤི ཏེསཾ ཨིམསྨིཾ ཏིཀེ ནཝཏྟབྦཏཱ ཨཱཔཛྫཏཱིཏི? ནཱཔཛྫཏི ཙིཏྟུཔྤཱདཀཎྜེ དསྶིཏཱནཾ དྭཱདསཨཀུསལཙིཏྟུཔྤཱདཱནཾ དྭཱིཧི པདེཧི སངྒཧིཏཏྟཱ. ཡཐཱ ཧི དྷམྨཝསེན སངྑཏདྷམྨཱ ¶ སབྦེ སངྒཧིཏཱཏི ཨུཔྤནྣཏྟིཀེ ཀཱལཝསེན ཨསངྒཧིཏཱཔི ཨཏཱིཏཱ ནཝཏྟབྦཱཏི ན ཝུཏྟཱ ཙིཏྟུཔྤཱདརཱུཔབྷཱཝེན གཧིཏེསུ ནཝཏྟབྦསྶ ཨབྷཱཝཱ, ཨེཝམིདྷཱཔི ཙིཏྟུཔྤཱདབྷཱཝེན གཧིཏེསུ ནཝཏྟབྦསྶ ཨབྷཱཝཱ ནཝཏྟབྦཏཱ ན ཝུཏྟཱཏི ཝེདིཏབྦཱ. ཡཏྠ ཧི ཙིཏྟུཔྤཱདོ ཀོཙི ནིཡོགཏོ ནཝཏྟབྦོ ཨཏྠི, ཏཏྠ ཏེསཾ ཙཏུཏྠོ ཀོཊྛཱསོ ཨཏྠཱིཏི ཡཐཱཝུཏྟཔདེསུ ཝིཡ ཏཏྠཱཔི བྷིནྡིཏྭཱ བྷཛཱཔེཏབྦེ ཙིཏྟུཔྤཱདེ བྷིནྡིཏྭཱ བྷཛཱཔེཏི ‘‘སིཡཱ ནཝཏྟབྦཱ པརིཏྟཱརམྨཎཱ’’ཏིཨཱདིནཱ. ཏདབྷཱཝཱ ཨུཔྤནྣཏྟིཀེ ཨིདྷ ཙ ཏཐཱ ན ཝུཏྟཱ.

ཨཐ ཝཱ ཡཐཱ སཔྤཊིགྷེཧི སམཱནསབྷཱཝཏྟཱ རཱུཔདྷཱཏུཡཾ ཏཡོ མཧཱབྷཱུཏཱ ‘‘སཔྤཊིགྷཱ’’ཏི ཝུཏྟཱ. ཡཐཱཧ ‘‘ཨསཉྙསཏྟཱནཾ ཨནིདསྶནཾ སཔྤཊིགྷཾ ཨེཀཾ མཧཱབྷཱུཏཾ པཊིཙྩ དྭེ མཧཱབྷཱུཏཱ, དྭེ མཧཱབྷཱུཏེ པཊིཙྩ ཨེཀཾ མཧཱབྷཱུཏ’’ནྟི (པཊྛཱ. ༢.༢༢.༩). ཨེཝཾ པུཐུཛྫནཱནཾ པཝཏྟམཱནཱ བྷཱཝནཱཡ པཧཱཏབྦསམཱནསབྷཱཝཱ ‘‘བྷཱཝནཱཡ པཧཱཏབྦཱ’’ཏི ཝུཙྩེཡྻུནྟི ནཏྠི ནཝཏྟབྦཏཱཔསངྒོ. ཨེཝཉྩ སཏི པུཐུཛྫནཱནཾ པཝཏྟམཱནཱཔི བྷཱཝནཱཡ པཧཱཏབྦཱ སཀབྷཎྜེ ཚནྡརཱགཱདཡོ ¶ པརབྷཎྜེ ཚནྡརཱགཱདཱིནཾ ཨུཔནིསྶཡཔཙྩཡོ, རཱགོ ཙ རཱགདིཊྛཱིནཾ ཨདྷིཔཏིཔཙྩཡོཏི ཨཡམཏྠོ ལདྡྷོ ཧོཏི. ཡཐཱ པན ཨཕོཊྛབྦཏྟཱ རཱུཔདྷཱཏུཡཾ ཏཡོ མཧཱབྷཱུཏཱ ན པརམཏྠཏོ སཔྤཊིགྷཱ, ཨེཝཾ ཨཔེཀྑིཏབྦབྷཱཝནཱརཧིཏཱ པུཐུཛྫནེསུ པཝཏྟམཱནཱ སཀབྷཎྜེ ཚནྡརཱགཱདཡོ ན པརམཏྠཏོ བྷཱཝནཱཡ པཧཱཏབྦཱཏི བྷཱཝནཱཡ པཧཱཏབྦཱནཾ ནཱནཱཀྑཎིཀཀམྨཔཙྩཡཏཱ ན ཝུཏྟཱ, ན ཙ ‘‘དསྶནེན པཧཱཏབྦཱ བྷཱཝནཱཡ པཧཱཏབྦཱནཾ ཀེནཙི པཙྩཡེན པཙྩཡོ’’ཏི ཝུཏྟཱ. ཡེ ཧི དསྶནེན པཧཱཏབྦཔཙྩཡཱ ཀིལེསཱ, ན ཏེ དསྶནཏོ ཨུདྡྷཾ པཝཏྟནྟི, དསྶནེན པཧཱཏབྦཔཙྩཡསྶཔི པན ཨུདྡྷཙྩསཧགཏསྶ སཧཱཡཝེཀལླམཏྟམེཝ དསྶནེན ཀཏཾ, ན ཏསྶ ཀོཙི བྷཱཝོ དསྶནེན ཨནུཔྤཏྟིདྷམྨཏཾ ཨཱཔཱདིཏོཏི ཏསྶ ཨེཀནྟབྷཱཝནཱཡ པཧཱཏབྦཏཱ ཝུཏྟཱ. ཏསྨཱ ཏསྶ ཏཱདིསསྶེཝ སཏི སཧཱཡེ ཝིཔཱཀུཔྤཱདནཝཙནཾ, ཨསཏི ཙ ཝིཔཱཀཱནུཔྤཱདནཝཙནཾ ན ཝིརུཛ྄ཛྷཏཱིཏི.

སཱཔི ཝིཉྙཱཎཔཙྩཡབྷཱཝེ ཡདི ཨཔནེཏབྦཱ, ཀསྨཱ ‘‘སམཝཱིསཏི ཙེཏནཱ’’ཏི ཝུཏྟནྟི ཏསྶ ཀཱརཎཾ དསྶེནྟོ ཨཱཧ ‘‘ཨཝིཛྫཱཔཙྩཡཱ པན ¶ སབྦཱཔེཏཱ ཧོནྟཱི’’ཏི. ཡདི ཨེཝཾ, ཨབྷིཉྙཱཙེཏནཱཡ སཧ ‘‘ཨེཀཝཱིསཏཱི’’ཏི ཝཏྟབྦནྟི? ན, ཨཝཙནསྶ ཝུཏྟཀཱརཎཏྟཱ, ཏཾ པན ཨིཏརཱཝཙནསྶཔི ཀཱརཎནྟི སམཱནཙེཏནཱཝཙནཀཱརཎཝཙནེན ཡཾ ཀཱརཎཾ ཨཔེཀྑིཏྭཱ ཨེཀཱ ཝུཏྟཱ, ཏེན ཀཱརཎེན ཨིཏརཱཡཔི ཝཏྟབྦཏཾ, ཡཉྩ ཀཱརཎཾ ཨཔེཀྑིཏྭཱ ཨིཏརཱ ན ཝུཏྟཱ, ཏེན ཀཱརཎེན ཝུཏྟཱཡཔི ཨཝཏྟབྦཏཾ དསྶེཏི. ཨཱནེཉྫཱབྷིསངྑཱརོ ཙིཏྟསངྑཱརོ ཨེཝཱཏི བྷེདཱབྷཱཝཱ པཱཀཊོཏི ན ཏསྶ སཾཡོགོ དསྶིཏོ.

སུཁསཉྙཱཡ གཧེཏྭཱཏི ཨེཏེན ཏཎྷཱཔཝཏྟིཾ དསྶེཏི. ཏཎྷཱཔརིཀྑཱརེཏི ཏཎྷཱཡ པརིཝཱརེ, ཏཎྷཱཡ ‘‘སུཁཾ སུབྷ’’ནྟིཨཱདིནཱ སངྑཏེ ཝཱ ཨལངྐཏེཏི ཨཏྠོ. ཏཎྷཱ ཧི དུཀྑསྶ སམུདཡོཏི ཨཛཱནནྟོ ‘‘ཨཧོ ཝཏཱཧཾ ཀཱཡསྶ བྷེདཱ པརཾ མརཎཱ ཁཏྟིཡམཧཱསཱལཱནཾ ཝཱ སཧབྱཏཾ ཨུཔཔཛྫེཡྻ’’ནྟི སངྑཱརེ པརིཀྑརོཏཱིཏི. ཨམརཎཏྠཱཏི གཧིཏཱ དུཀྐརཀིརིཡཱ ཨམརཏཔོ, དེཝབྷཱཝཏྠཾ ཏཔོ ཝཱ, དུཀྑཏྟཱ ཝཱ མརོ མཱརཀོ ཏཔོ ཨམརཏཔོ. དིཊྛེ ཨདིཊྛ-སདྡོ ཝིཡ མརེསུ ཨམར-སདྡོ དཊྛབྦོ.

ཛཱཏིཨཱདིཔཔཱཏདུཀྑཛནནཏོ མརུཔཔཱཏསདིསཏཱ པུཉྙཱབྷིསངྑཱརསྶ ཝུཏྟཱ. རམཎཱིཡབྷཱཝེན ¶ ཙ ཨསྶཱདབྷཱཝེན ཙ གཡ྄ཧམཱནཾ པུཉྙཕལཾ དཱིཔསིཁཱམདྷུལིཏྟསཏྠདྷཱརཱསདིསཾ, ཏདཏྠོ ཙ པུཉྙཱབྷིསངྑཱརོ ཏཾནིཔཱཏལེཧནསདིསོ.

‘‘སུཁོ ཨིམིསྶཱ པརིབྦཱཛིཀཱཡ ཏརུཎཱཡ མུདུཀཱཡ ལོམསཱཡ བཱཧཱཡ སམྥསྶོ’’ཏིཨཱདིནཱ (མ. ནི. ༡.༤༦༩) སུཁསཉྙཱཡ བཱལོ ཝིཡ གཱུཐཀཱིལ༹ནཾ ཀིལེསཱབྷིབྷཱུཏཏཱཡ ཀོདྷཱརཏིཨབྷིབྷཱུཏོ ཨསཝསོ མརིཏུཀཱམོ ཝིཡ ཝིསཁཱདནཾ ཀརཎཕལཀྑཎེསུ ཛིགུཙྪནཱིཡཾ དུཀྑཉྩ ཨཔུཉྙཱབྷིསངྑཱརཾ ཨཱརབྷཏི. ལོབྷསཧགཏསྶ ཝཱ གཱུཐཀཱིལ༹ནསདིསཏཱ, དོསསཧགཏསྶ ཝིསཁཱདནསདིསཏཱ ཡོཛེཏབྦཱ. ཀཱམགུཎསམིདྡྷིཡཱ སབྷཡསྶཔི པིསཱཙནགརསྶ སུཁཝིཔལླཱསཧེཏུབྷཱཝོ ཝིཡ ཨརཱུཔཝིཔཱཀཱནཾ ནིརནྟརཏཱཡ ཨནུཔལཀྑིཡམཱནཨུཔྤཱདཝཡཱནཾ, དཱིགྷསནྟཱནཏཱཡ ཨགཡ྄ཧམཱནཝིཔརིཎཱམཱནཾ, སངྑཱརཝིཔརིཎཱམདུཀྑབྷཱུཏཱནམྤི ནིཙྩཱདིཝིཔལླཱསཧེཏུབྷཱཝོཏི ཏེསཾ པིསཱཙནགརསདིསཏཱ, ཏདབྷིམུཁགམནསདིསཏཱ ཙ ཨཱནེཉྫཱབྷིསངྑཱརསྶ ཡོཛེཏབྦཱ.

ཏཱཝཱཏི ¶ ཝཏྟབྦནྟརཱཔེཀྑོ ནིཔཱཏོ, ཏསྨཱ ཨཝིཛྫཱ སངྑཱརཱནཾ པཙྩཡོཏི ཨིདཾ ཏཱཝ སིདྡྷཾ, ཨིདཾ པན ཨཔརཾ ཝཏྟབྦནྟི ཨཏྠོ. ཨཝིཛྫཱཔཙྩཡཱ པན སབྦཱཔེཏཱ ཧོནྟཱིཏི ཝུཏྟནྟི ཨབྷིཉྙཱཙེཏནཱནཾ པཙྩཡབྷཱཝཾ དསྶེཏི. ཙེཏོཔརིཡཔུབྦེནིཝཱསཨནཱགཏཾསཉཱཎེཧི པརེསཾ ཨཏྟནོ ཙ སམོཧཙིཏྟཛཱནནཀཱལེཏི ཡོཛེཏབྦཱ.

ཨཝིཛྫཱསམྨཱུལ༹ྷཏྟཱཏི བྷཝཱདཱིནཝཔཊིཙྪཱདིཀཱཡ ཨཝིཛྫཱཡ སམྨཱུལ༹ྷཏྟཱ. རཱགཱདཱིནནྟི རཱགདིཊྛིཝིཙིཀིཙྪུདྡྷཙྩདོམནསྶཱནཾ ཨཝིཛྫཱསམྤཡུཏྟརཱགཱདིཨསྶཱདནཀཱལེསུ ཨཝིཛྫཾ ཨཱརབྦྷ ཨུཔྤཏྟི ཝེདིཏབྦཱ. གརུཾ ཀཏྭཱ ཨསྶཱདནཾ རཱགདིཊྛིསམྤཡུཏྟཱཡ ཨེཝ ཨཝིཛྫཱཡ ཡོཛེཏབྦཾ, ཨསྶཱདནཉྩ རཱགོ, ཏདཝིཔྤཡུཏྟཱ ཙ དིཊྛཱིཏི ཨསྶཱདནཝཙནེནེཝ ཡཐཱཝུཏྟཾ ཨཝིཛྫཾ གརུཾ ཀརོནྟཱི དིཊྛི ཙ ཝུཏྟཱཏི ཝེདིཏབྦཱ. རཱགཱདཱིཧི ཙ པཱལི༹ཡཾ སརཱུཔེན ཝུཏྟེཧི ཏཾསམྤཡུཏྟསངྑཱརསྶ ཨཝིཛྫཱརམྨཎཱདིཏཾ དསྶེཏི. ཨནཝིཛྫཱརམྨཎསྶ པཋམཛཝནསྶ ཨཱརམྨཎཱདྷིཔཏིཨནནྟརཱདིཔཙྩཡཝཙནེསུ ཨཝུཏྟསྶ ཝུཏྟསྶ ཙ སབྦསྶ སངྒཎྷནཏྠཾ ‘‘ཡཾ ཀིཉྩཱི’’ཏི ཨཱཧ. ཝུཏྟནཡེནཱཏི སམཏིཀྐམབྷཝཔཏྠནཱཝསེན ཝུཏྟནཡེན.

ཨེཀཀཱརཎཝཱདོ ཨཱཔཛྫཏཱིཏི དོསཔྤསངྒོ ཝུཏྟོ. ཨནིཊྛོ ཧི ཨེཀཀཱརཎཝཱདོ སབྦསྶ སབྦཀཱལེ ¶ སམྦྷཝཱཔཏྟིཏོ ཨེཀསདིསསབྷཱཝཱཔཏྟིཏོ ཙ. ཡསྨཱ ཏཱིསུ པཀཱརེསུ ཨཝིཛྫམཱནེསུ པཱརིསེསེན ཙཏུཏྠེ ཨེཝ ཙ ཝིཛྫམཱནེ ཨེཀཧེཏུཕལདཱིཔནེ ཨཏྠོ ཨཏྠི, ཏསྨཱ ན ནུཔཔཛྫཏི.

ཡཐཱཕསྶཾ ཝེདནཱཝཝཏྠཱནཏོཏི ‘‘སུཁཝེདནཱིཡཾ, བྷིཀྑཝེ, ཕསྶཾ པཊིཙྩ ཨུཔྤཛྫཏི སུཁཱ ཝེདནཱ’’ཏིཨཱདིནཱ (སཾ. ནི. ༢.༦༢), ‘‘ཙཀྑུཉྩ པཊིཙྩ…པེ… ཏིཎྞཾ སངྒཏི ཕསྶོ, ཕསྶཔཙྩཡཱ ཝེདནཱ’’ཏིཨཱདིནཱ (སཾ. ནི. ༢.༤༣) ཙ སུཁཝེདནཱིཡཱདིཙཀྑུསམྥསྶཱདིཨནུརཱུཔེན སུཁཝེདནཱདིཙཀྑུསམྥསྶཛཱཝེདནཱདཱིནཾ ཝཝཏྠཱནཏོ, སམཱནེསུ ཙཀྑུརཱུཔཱདཱིསུ ཕསྶཝསེན སུཁཱདིཝིཔརིཡཱཡཱབྷཱཝཏོ, སམཱནེསུ ཙ རཱུཔམནསིཀཱརཱདཱིསུ ཙཀྑཱདིསངྒྷཊྚནཝསེན ཙཀྑུསམྥསྶཛཱདིཝིཔརིཡཱཡཱབྷཱཝཏོ, ཨཉྙཔཙྩཡསཱམཉྙེཔི ཕསྶཝསེན སུཁཱདིཙཀྑུསམྥསྶཛཱདཱིནཾ ཨོལཱ༹རིཀསུཁུམཱདིསངྐརཱབྷཱཝཏོ ཙཱཏི ཨཏྠོ. སུཁཱདཱིནཾ ཡཐཱཝུཏྟསམྥསྶསྶ ཨཝིཔརཱིཏོ པཙྩཡབྷཱཝོ ¶ ཨེཝ ཡཐཱཝེདནཾ ཕསྶཝཝཏྠཱནཾ, ཀཱརཎཕལཝིསེསེན ཝཱ ཕལཀཱརཎཝིསེསནིཙྪཡོ ཧོཏཱིཏི ཨུབྷཡཏྠཱཔི ནིཙྪཡོ ཝཝཏྠཱནནྟི ཝུཏྟོ. ཀམྨཱདཡོཏི ཀམྨཱཧཱརཨུཏུཨཱདཡོ ཨཔཱཀཊཱ སེམྷཔཊིཀཱརེན རོགཝཱུཔསམཏོ.

‘‘ཨསྶཱདཱནུཔསྶིནོ ཏཎྷཱ པཝཌྜྷཏཱི’’ཏི ཝཙནཏོཏི ‘‘སཾཡོཛནཱིཡེསུ, བྷིཀྑཝེ, དྷམྨེསུ ཨསྶཱདཱནུཔསྶིནོ ཝིཧརཏོ ཏཎྷཱ པཝཌྜྷཏི, ཏཎྷཱཔཙྩཡཱ ཨུཔཱདཱནཾ, ཨུཔཱདཱནཔཙྩཡཱ བྷཝོ’’ཏི (སཾ. ནི. ༢.༥༣-༥༤) ཨིམིནཱ སུཏྟེན ཏཎྷཱཡ སངྑཱརཀཱརཎབྷཱཝསྶ ཝུཏྟཏྟཱཏི ཨཏྠོ. པུན ཏསྶཱཔི ཨཝིཛྫཱ ཀཱརཎནྟི དསྶནཏྠཾ ‘‘ཨཝིཛྫཱསམུདཡཱ ཨཱསཝསམུདཡོཏི ཝཙནཏོ’’ཏི ཨཱཧ. ཏཎྷཱ ཝཱ ཙཏུརུཔཱདཱནབྷཱུཏཱ ཀཱམབྷཝདིཊྛཱསཝཱ ཙ སངྑཱརསྶ ཀཱརཎནྟི པཱཀཊཱཏི སུཏྟདྭཡེནཔི ཨཝིཛྫཱཡ སངྑཱརཀཱརཎབྷཱཝམེཝ དསྶེཏི. ཨསྶཱདཱནུཔསྶིནོཏི ཧི ཝཙནེན ཨཱདཱིནཝཔཊིཙྪཱདནཀིཙྩཱ ཨཝིཛྫཱ ཏཎྷཱཡ ཀཱརཎནྟི དསྶིཏཱ ཧོཏཱིཏི. ཡསྨཱ ཨཝིདྭཱ, ཏསྨཱ པུཉྙཱབྷིསངྑཱརཱདིཀེ ཨབྷིསངྑརོཏཱིཏི ཨཝིཛྫཱཡ སངྑཱརཀཱརཎབྷཱཝསྶ པཱཀཊཏྟཱ ཨཝིདྡསུབྷཱཝོ སངྑཱརཀཱརཎབྷཱཝེན ཝུཏྟོ ཁཱིཎཱསཝསྶ སངྑཱརཱབྷཱཝཏོ ཨསཱདྷཱརཎཏྟཱ ཙ. པུཉྙཱབྷིསངྑཱརཱདཱིནཾ སཱདྷཱརཎཱནི ཝཏྠཱརམྨཎཱདཱིནཱིཏི པུཉྙབྷཝཱདིཨཱདཱིནཝཔཊིཙྪཱདིཀཱ ཨཝིཛྫཱ པུཉྙཱབྷིསངྑཱརཱདཱིནཾ ཨསཱདྷཱརཎཾ ཀཱརཎནྟི ཝཱ ཨཏྠོ དཊྛབྦོ. ཋཱནཝིརུདྡྷོཏི ཨཏྠིཏཱཝིརུདྡྷོ. ཀེཙི པན ‘‘པཊིསནྡྷིཨཱདཱིནི ཋཱནཱནཱི’’ཏི ཝདནྟི, ཨེཝཾ སཏི པུརིམཙིཏྟཾ པཙྪིམཙིཏྟསྶ ཋཱནཝིརུདྡྷོ པཙྩཡོཏི ན ཨིདཾ ཨེཀནྟིཀཾ སིཡཱ. བྷཝངྒམྤི ¶ ཧི བྷཝངྒསྶ ཨནནྟརཔཙྩཡོ, ཛཝནཾ ཛཝནསྶཱཏི, ན ཙ སིཔྤཱདཱིནཾ པཊིསནྡྷིཨཱདིཋཱནཾ ཨཏྠཱིཏི ན ཏཾ ཨིདྷ ཨདྷིཔྤེཏཾ. ཀམྨཾ རཱུཔསྶ ནམནརུཔྤནཝིརོདྷཱ སཱརམྨཎཱནཱརམྨཎཝིརོདྷཱ ཙ སབྷཱཝཝིརུདྡྷོ པཙྩཡོ, ཁཱིརཱདཱིནི དདྷིཨཱདཱིནཾ མདྷུརམྦིལརསཱདིསབྷཱཝཝིརོདྷཱ. ཨཝིཛཱནནཀིཙྩོ ཨཱལོཀོ ཝིཛཱནནཀིཙྩསྶ ཝིཉྙཱཎསྶ, ཨམདནཀིཙྩཱ ཙ གུལཱ༹དཡོ མདནཀིཙྩསྶ ཨཱསཝསྶ.

གོལོམཱཝིལོམཱནི དབྦཱཡ པཙྩཡོ, དདྷིཨཱདཱིནི བྷཱུཏིཎཀསྶ. ཨེཏྠ ཙ ཨཝཱིཏི རཏྟཱ ཨེལ༹ཀཱ ཝུཙྩནྟི. ཝིཔཱཀཱཡེཝ ཏེ ཙ ན, ཏསྨཱ དུཀྑཝིཔཱཀཱཡཔི ¶ ཨཝིཛྫཱཡ ཏདཝིཔཱཀཱནཾ པུཉྙཱནེཉྫཱབྷིསངྑཱརཱནཾ པཙྩཡཏྟཾ ན ན ཡུཛྫཏཱིཏི ཨཏྠོ. ཏདཝིཔཱཀཏྟེཔི སཱཝཛྫཏཱཡ ཏདཝིརུདྡྷཱནཾ ཏཾསདིསཱནཉྩ ཨཔུཉྙཱབྷིསངྑཱརཱནམེཝ པཙྩཡོ, ན ཨིཏརེསནྟི ཨེཏསྶ པསངྒསྶ ནིཝཱརཎཏྠཾ ‘‘ཝིརུདྡྷོ ཙཱཝིརུདྡྷོ ཙ, སདིསཱསདིསོ ཏཐཱ. དྷམྨཱནཾ པཙྩཡོ སིདྡྷོ’’ཏི ཝུཏྟཾ, ཏསྨཱ ཏམཏྠཾ པཱཀཊཾ ཀརོནྟོ ‘‘ཨིཏི ཨཡཾ ཨཝིཛྫཱ’’ཏིཨཱདིམཱཧ.

ཨཙྪེཛྫསུཏྟཱཝུཏཱབྷེཛྫམཎཱིནཾ ཝིཡ པུབྦཱཔརིཡཝཝཏྠཱནཾ ནིཡཏི, ནིཡཏིཡཱ, ནིཡཏི ཨེཝ ཝཱ སངྒཏི སམཱགམོ ནིཡཏིསངྒཏི, ཏཱཡ བྷཱཝེསུ པརིཎཏཱ མནུསྶདེཝཝིཧངྒཱདིབྷཱཝཾ པཏྟཱ ནིཡཏིསངྒཏིབྷཱཝཔརིཎཏཱ. ནིཡཏིཡཱ སངྒཏིཡཱ བྷཱཝེན ཙ པརིཎཏཱ ནཱནཔྤཀཱརཏཾ པཏྟཱ ནིཡཏིསངྒཏིབྷཱཝཔརིཎཏཱཏི ཙ ཨཏྠཾ ཝདནྟི. ཨེཏེཧི ཙ ཝིཀཔྤནེཧི ཨཝིཛྫཱ ཨཀུསལཾ ཙིཏྟཾ ཀཏྭཱ པུཉྙཱདཱིསུ ཡཏྠ ཀཏྠཙི པཝཏྟཏཱིཏི ཨིམམཏྠཾ དསྶེནྟོ ཨཱཧ ‘‘སོ ཨེཝཾ ཨཝིཛྫཱཡཱ’’ཏིཨཱདི.

ཨཔརིཎཱཡཀོ བཱལོཏི ཨརཧཏྟམགྒསམྤཊིཔཱདཀཀལྱཱཎམིཏྟརཧིཏོཏི ཨཏྠོ. ཨརཧཏྟམགྒཱཝསཱནཾ ཝཱ ཉཱཎཾ སམཝིསམཾ དསྶེཏྭཱ ནིབྦཱནཾ ནཡཏཱིཏི པརིཎཱཡཀནྟི ཝུཏྟཾ, ཏེན རཧིཏོ ཨཔརིཎཱཡཀོ. དྷམྨཾ ཉཏྭཱཏི སཔྤུརིསཱུཔནིསྶཡེན ཙཏུསཙྩཔྤཀཱསཀསུཏྟཱདིདྷམྨཾ ཉཏྭཱ, མགྒཉཱཎེནེཝ ཝཱ སབྦདྷམྨཔཝརཾ ནིབྦཱནཾ ཉཏྭཱ, ཏཾཛཱནནཱཡཏྟཏྟཱ པན སེསསཙྩཱབྷིསམཡསྶ སམཱནཀཱལམྤི ཏཾ པུརིམཀཱལཾ ཝིཡ ཀཏྭཱ ཝུཏྟཾ.

སངྑཱརཔདནིདྡེསཝཎྞནཱ ནིཊྛིཏཱ.

ཝིཉྙཱཎཔདནིདྡེསཝཎྞནཱ

༢༢༧. ཡཐཱཝུཏྟསངྑཱརཔཙྩཡཱ ¶ ཨུཔྤཛྫམཱནཾ ཏཾཀམྨནིབྦཏྟམེཝ ཝིཉྙཱཎཾ བྷཝིཏུཾ ཨརཧཏཱིཏི ‘‘བཱཏྟིཾས ལོཀིཡཝིཔཱཀཝིཉྙཱཎཱནི སངྒཧིཏཱནི ཧོནྟཱི’’ཏི ཨཱཧ. དྷཱཏུཀཐཱཡཾ (དྷཱཏུ. ༤༦༦) པན ཝིཔྤཡུཏྟེནསངྒཧིཏཱསངྒཧིཏཔདནིདྡེསེ –

‘‘སངྑཱརཔཙྩཡཱ ¶ ཝིཉྙཱཎེན ཡེ དྷམྨཱ…པེ… སལཱ༹ཡཏནཔཙྩཡཱ ཕསྶེན, ཕསྶཔཙྩཡཱ ཝེདནཱཡ ཡེ དྷམྨཱ ཝིཔྤཡུཏྟཱ, ཏེ དྷམྨཱ ཀཏིཧི ཁནྡྷེཧི…པེ… སངྒཧིཏཱ? ཏེ དྷམྨཱ ཨསངྑཏཾ ཁནྡྷཏོ ཋཔེཏྭཱ ཨེཀེན ཁནྡྷེན ཨེཀཱདསཧཱཡཏནེཧི ཨེཀཱདསཧི དྷཱཏཱུཧི སངྒཧིཏཱ. ཀཏིཧི ཨསངྒཧིཏཱ? ཙཏཱུཧི ཁནྡྷེཧི ཨེཀེནཱཡཏནེན སཏྟཧི དྷཱཏཱུཧི ཨསངྒཧིཏཱ’’ཏི –

ཝཙནཏོ སབྦཝིཉྙཱཎཕསྶཝེདནཱཔརིགྒཧོ ཀཏོ. ཡདི ཧི ཨེཏྠ ཝིཉྙཱཎཕསྶཝེདནཱ སཔྤདེསཱ སིཡུཾ, ‘‘ཝིཔཱཀཱ དྷམྨཱ’’ཏི ཨིམསྶ ཝིཡ ཝིསྶཛྫནཾ སིཡཱ, ཏསྨཱ ཏཏྠ ཨབྷིདྷམྨབྷཱཛནཱིཡཝསེན སངྑཱརཔཙྩཡཱ ཝིཉྙཱཎཱདཡོ གཧིཏཱཏི ཝེདིཏབྦཱ. ཨཝིཛྫཱཔཙྩཡཱ སངྑཱརཱ ཙ ཨབྷིདྷམྨབྷཱཛནཱིཡེ ཙཏུབྷཱུམཀཀུསལསངྑཱརོ ཨཀུསལསངྑཱརོ ཙ ཝུཏྟོཏི སོ ཨེཝ དྷཱཏུཀཐཱཡཾ གཧིཏོཏི དཊྛབྦོ. བྷཝོ པན དྷཱཏུཀཐཱཡཾ ཀམྨུཔཔཏྟིབྷཝཝིསེསདསྶནཏྠཾ ན ཨབྷིདྷམྨབྷཱཛནཱིཡཝསེན གཧིཏོ. ཨེཝཉྩ ཀཏྭཱ ཏཏྠ ‘‘ཨུཔཱདཱནཔཙྩཡཱ བྷཝོ’’ཏི ཨནུདྡྷརིཏྭཱ ‘‘ཀམྨབྷཝོ’’ཏིཨཱདིནཱཝ ནཡེན བྷཝོ ཨུདྡྷཊོ. ཝིཔཱཀཉྷེཏནྟི ཝིཉྙཱཎསྶ ཝིཔཱཀཏྟཱ སངྑཱརཔཙྩཡཏྟཾ སཱདྷེཏི, ཏསྶ པན སཱདྷནཏྠཾ ‘‘ཨུཔཙིཏཀམྨཱབྷཱཝེ ཝིཔཱཀཱབྷཱཝཏོ’’ཏི ཝུཏྟནྟི ཏཾ ཝིཝརནྟོ ‘‘ཝིཔཱཀཉྩཱ’’ཏིཨཱདིམཱཧ.

ཡེབྷུཡྻེན ལོབྷསམྤཡུཏྟཛཝནཱཝསཱནེཏི ཛཝནེན ཏདཱརམྨཎནིཡམེ སོམནསྶསཧགཏཱནནྟརཾ སོམནསྶསཧགཏཏདཱརམྨཎསྶ ཝུཏྟཏྟཱ སོམནསྶསཧགཏཱནེཝ སནྡྷཱཡ ཝུཏྟནྟི ཝེདིཏབྦཾ. ཡསྨཱ པན ཏིཧེཏུཀཛཝནཱཝསཱནེ ཙ ཀདཱཙི ཨཧེཏུཀཾ ཏདཱརམྨཎཾ ཧོཏི, ཏསྨཱ ‘‘ཡེབྷུཡྻེནཱ’’ཏི ཨཱཧ. སཀིཾ ཝཱཏི ‘‘དིརཏྟཏིརཏྟཱ’’དཱིསུ ཝིཡ ཝེདིཏབྦཾ. དྭིཀྑཏྟུམེཝ པན ཨུཔྤཛྫནྟཱིཏི ཝདནྟི. ‘‘དིརཏྟཏིརཏྟ’’ནྟི ཨེཏྠ པན ཝཱ-སདྡསྶ ཨབྷཱཝཱ ཝཙནསིལིཊྛཏཱམཏྟེན དིརཏྟགྒཧཎཾ ཀཏནྟི ཡུཛྫཏི, ‘‘ནིརནྟརཏིརཏྟདསྶནཏྠཾ ཝཱ’’ཏི. ཨིདྷ པན ཝཱ-སདྡོ ཝིཀཔྤནཏྠོ ཝུཏྟོཏི སཀིཾ ¶ ཨེཝ ཙ ཀདཱཙི པཝཏྟིཾ སནྡྷཱཡ ‘‘སཀིཾ ཝཱ’’ཏི ཝུཏྟནྟི དཊྛབྦཾ. ཏེནེཝ ཧི སཀིཾ ཏདཱརམྨཎཔྤཝཏྟིཡཱ ཝིཙཱརེཏབྦཏཾ དསྶེནྟོ ‘‘ཙིཏྟཔྤཝཏྟིགཎནཱཡཾ པནཱ’’ཏིཨཱདིམཱཧ. ཏཏྠ ཙིཏྟཔྤཝཏྟིགཎནཱཡནྟི ཝིཔཱཀཀཐཱཡཾ བལཝརཱུཔཱདིཀེ ཨཱརམྨཎེ ཝུཏྟཾ ཙིཏྟཔྤཝཏྟིགཎནཾ སནྡྷཱཡཱཧ. ཏཏྠ ཧི དྭེཝ ཏདཱརམྨཎུཔྤཏྟིཝཱརཱ ཨཱགཏཱ. ཛཝནཝིསཡཱནུབྷཝནཉྷི ཏདཱརམྨཎཾ ¶ ཨཱསནྣབྷེདེ ཏསྨིཾ ཝིསཡེ ཨེཀཙིཏྟཀྑཎཱཝསིཊྛཱཡུཀེ ན ཨུཔྤཛྫེཡྻཱཏི ཨདྷིཔྤཱཡོ. ཨནུརཱུཔཱཡ པཊིསནྡྷིཡཱཏི ཨཀུསལཝིཔཱཀསྶ ཨཔཱཡཔཊིསནྡྷི, ཀཱམཱཝཙརཱདིཀུསལཝིཔཱཀཱནཾ ཀཱམརཱུཔཱརཱུཔསུགཏིཔཊིསནྡྷིཡོ ཡཐཱཀམྨཾ ཨནུརཱུཔཱ.

པཊིསནྡྷིཀཐཱ མཧཱཝིསཡཱཏི ཀཏྭཱ པཝཏྟིམེཝ ཏཱཝ དསྶེནྟོ ‘‘པཝཏྟིཡཾ པནཱ’’ཏིཨཱདིམཱཧ. ཨཧེཏུཀདྭཡཱདཱིནཾ དྭཱརནིཡམཱནིཡམཱཝཙནཾ བྷཝངྒབྷཱུཏཱནཾ སཡམེཝ དྭཱརཏྟཱ ཙུཏིཔཊིསནྡྷིབྷཱུཏཱནཉྩ བྷཝངྒསངྑཱཏེན ཨཉྙེན ཙ དྭཱརེན ཨནུཔྤཏྟིཏོ ནིཡཏཾ ཨནིཡཏཾ ཝཱ དྭཱརཾ ཨེཏེསནྟི ཝཏྟུཾ ཨསཀྐུཎེཡྻཏྟཱ. ཨེཀསྶ སཏྟསྶ པཝཏྟརཱུཔཱཝཙརཝིཔཱཀོ པཐཝཱིཀསིཎཱདཱིསུ ཡསྨིཾ ཨཱརམྨཎེ པཝཏྟོ, ཏཏོ ཨཉྙསྨིཾ ཏསྶ པཝཏྟི ནཏྠཱིཏི རཱུཔཱཝཙརཱནཾ ནིཡཏཱརམྨཎཏཱ ཝུཏྟཱ. ཏཏྲསྶཱཏི པཝཏྟིཡཾ བཱཏྟིཾསཝིདྷསྶ.

ཨིནྡྲིཡཔྤཝཏྟིཨཱནུབྷཱཝཏོ ཨེཝ ཙཀྑུསོཏདྭཱརབྷེདེན, ཏསྶ ཙ ཝིཉྙཱཎཝཱིཐིབྷེདཱཡཏྟཏྟཱ ཝཱིཐིབྷེདེན ཙ བྷཝིཏབྦཾ, ཏསྨིཉྩ སཏི ‘‘ཨཱཝཛྫནཱནནྟརཾ དསྶནཾ སཝནཾ ཝཱ ཏདནནྟརཾ སམྤཊིཙྪན’’ནྟིཨཱདིནཱ ཙིཏྟནིཡམེན བྷཝིཏབྦཾ. ཏཐཱ ཙ སཏི སམྤཊིཙྪནསནྟཱིརཎཱནམྤི བྷཱཝོ སིདྡྷོ ཧོཏི, ན ཨིནྡྲིཡཔྤཝཏྟིཨཱནུབྷཱཝེན དསྶནསཝནམཏྟསྶེཝ, ནཱཔི ཨིནྡྲིཡཱནཾ ཨེཝ དསྶནསཝནཀིཙྩཏཱཏི ཨིམམཏྠཾ དསྶེནྟོ ཨཱཧ ‘‘དྭཱརཝཱིཐིབྷེདེ ཙིཏྟནིཡམཏོ ཙཱ’’ཏི. པཋམཀུསལེན ཙེ ཏདཱརམྨཎསྶ ཨུཔྤཏྟི ཧོཏི, ཏཾ པཋམཀུསལཱནནྟརཾ ཨུཔྤཛྫམཱནཾ ཛནཀཾ ཨནུབནྡྷཏི ནཱམ, དུཏིཡཀུསལཱདིཨནནྟརཾ ཨུཔྤཛྫམཱནཾ ཛནཀསདིསཾ ཨནུབནྡྷཏི ནཱམ, ཨཀུསལཱནནྟརཾ ཨུཔྤཛྫམཱནཉྩ ཀཱམཱཝཙརཏཱཡ ཛནཀསདིསནྟི.

ཨེཀཱདས ཏདཱརམྨཎཙིཏྟཱནི…པེ… ཏདཱརམྨཎཾ ན གཎྷནྟཱིཏི ཏདཱརམྨཎབྷཱཝཏཱཡ ‘‘ཏདཱརམྨཎ’’ནྟི ལདྡྷནཱམཱནི ཏདཱརམྨཎབྷཱཝཾ ན གཎྷནྟི, ཏདཱརམྨཎབྷཱཝེན ནཔྤཝཏྟནྟཱིཏི ཨཏྠོ. ཨཐ ཝཱ ནཱམགོཏྟཾ ཨཱརབྦྷ ཛཝནེ ཛཝིཏེ ཏདཱརམྨཎཾ ཏསྶ ཛཝནསྶ ཨཱརམྨཎཾ ན གཎྷནྟི, ནཱལམྦནྟཱིཏི ཨཏྠོ. རཱུཔཱརཱུཔདྷམྨེཏི རཱུཔཱརཱུཔཱཝཙརེ དྷམྨེ. ཨིདཾ པན ཝཏྭཱ ‘‘ཨབྷིཉྙཱཉཱཎཾ ¶ ཨཱརབྦྷཱ’’ཏི ཝིསེསནཾ པརིཏྟཱདིཨཱརམྨཎཏཱཡ ཀཱམཱཝཙརསདིསེསུ ཙེཝ ཏདཱརམྨཎཱནུཔྤཏྟིདསྶནཏྠཾ. མིཙྪཏྟནིཡཏཱ དྷམྨཱ མགྒོ ཝིཡ བྷཱཝནཱཡ སིདྡྷཱ མཧཱབལཱ ཙཱཏི ཏཏྠ ཛཝནེན པཝཏྟམཱནེན སཱནུབནྡྷནེན ན བྷཝིཏབྦནྟི ཏེསུ ཏདཱརམྨཎཾ པཊིཀྑིཏྟཾ. ལོཀུཏྟརདྷམྨེ ¶ ཨཱརབྦྷཱཏི ཨེཏེནེཝ སིདྡྷེ ‘‘སམྨཏྟནིཡཏདྷམྨེསཱུ’’ཏི ཝིསུཾ ཨུདྡྷརཎཾ སམྨཏྟམིཙྪཏྟནིཡཏདྷམྨཱནཾ ཨཉྙམཉྙཔཊིཔཀྑཱཏི བལཝབྷཱཝེན ཏདཱརམྨཎསྶ ཨཝཏྠུབྷཱཝདསྶནཏྠཾ.

ཨེཝཾ པཝཏྟིཡཾ ཝིཉྙཱཎཔྤཝཏྟིཾ དསྶེཏྭཱ པཊིསནྡྷིཡཾ དསྶེཏུཾ ‘‘ཡཾ པན ཝུཏྟ’’ནྟིཨཱདིམཱཧ. ཀེན ཀཏྠཱཏི ཀེན ཙིཏྟེན ཀསྨིཾ བྷཝེ. ཨེཀཱུནཝཱིསཏི པཊིསནྡྷིཡོ ཏེན ཏེན ཙིཏྟེན པཝཏྟམཱནཱ པཊིསནྡྷིཀྑཎེ རཱུཔཱརཱུཔདྷམྨཱཏི ཏེན ཏེན ཙིཏྟེན སཱ སཱ ཏཏྠ ཏཏྠ པཊིསནྡྷི ཧོཏཱིཏི ཝུཏྟཱ. ཏསྶཱཏི ཙིཏྟསྶ.

ཨཱགནྟྭཱཏི ཨཱགཏཾ ཝིཡ ཧུཏྭཱ. གོཔཀསཱིཝལཱིཏི རཉྙོ ཧིཏཱརཀྑེ གོཔཀཀུལེ ཛཱཏོ སཱིཝལིནཱམཀོ. ཀམྨཱདིཨནུསྶརཎབྱཱཔཱརརཧིཏཏྟཱ ‘‘སམྨཱུལ༹ྷཀཱལཀིརིཡཱ’’ཏི ཝུཏྟཱ. ཨབྱཱཔཱརེནེཝ ཧི ཏཏྠ ཀམྨཱདིཨུཔཊྛཱནཾ ཧོཏཱིཏི. ‘‘པིསིཡམཱནཱཡ མཀྑིཀཱཡ པཋམཾ ཀཱཡདྭཱརཱཝཛྫནཾ བྷཝངྒཾ ནཱཝཊྚེཏི ཨཏྟནཱ ཙིནྟིཡམཱནསྶ ཀསྶཙི ཨཏྠིཏཱཡཱ’’ཏི ཀེཙི ཀཱརཎཾ ཝདནྟི, ཏདེཏཾ ཨཀཱརཎཾ བྷཝངྒཝིསཡཏོ ཨཉྙསྶ ཙིནྟིཡམཱནསྶ ཨབྷཱཝཱ ཨཉྙཙིཏྟཔྤཝཏྟཀཱལེ ཙ བྷཝངྒཱཝཊྚནསྶེཝ ཨསམྦྷཝཏོ. ཨིདཾ པནེཏྠ ཀཱརཎཾ སིཡཱ – ‘‘ཏཱནིསྶ ཏམྷི སམཡེ ཨོལམྦནྟི ཨཛ྄ཛྷོལམྦནྟི ཨབྷིཔྤལམྦནྟཱི’’ཏི (མ. ནི. ༣.༢༤༨) ཝཙནཏོ ཏཱིསུ ཛཝནཝཱརེསུ ཨཔྤཝཏྟེསྭེཝ ཀམྨཱདིཨུཔཊྛཱནེན བྷཝིཏབྦཾ. ཨནེཀཛཝནཝཱརཔྤཝཏྟིཡཱ ཧི ཨཛ྄ཛྷོལམྦནཾ ཨབྷིཔྤལམྦནཉྩ ཧོཏཱིཏི. ཏསྨཱ ཀཱཡདྭཱརཱཝཛྫནཾ ཨནཱཝཊྚེཏྭཱ མནོདྭཱརཱཝཛྫནམེཝ ཀམྨཱདིཨཱལམྦཎཾ པཋམཾ བྷཝངྒཾ ཨཱཝཊྚེཏི, ཏཏོ ཕོཊྛབྦསྶ བལཝཏྟཱ དུཏིཡཝཱརེ ཀཱཡཝིཉྙཱཎཝཱིཐི པཙྩུཔྤནྣེ ཕོཊྛབྦེ པཝཏྟཏི, ཏཏོ པུརིམཛཝནཝཱརགཧིཏེསྭེཝ ཀམྨཱདཱིསུ ཀམེན མནོདྭཱརཛཝནཾ ཛཝིཏྭཱ མཱུལབྷཝངྒསངྑཱཏཾ ཨཱགནྟུཀབྷཝངྒསངྑཱཏཾ ཝཱ ཏདཱརམྨཎཾ བྷཝངྒཾ ཨོཏརཏི, ཏདཱརམྨཎཱབྷཱཝེ ཝཱ བྷཝངྒམེཝ. ཨེཏསྨིཾ ཋཱནེ ཀཱལཾ ཀརོཏཱིཏི ཏདཱརམྨཎཱནནྟརེན ཙུཏིཙིཏྟེན, ཏདཱརམྨཎཱབྷཱཝེ ཝཱ བྷཝངྒསངྑཱཏེནེཝ ཙུཏིཙིཏྟེན ཙཝཏཱིཏི ཨཏྠོ. བྷཝངྒམེཝ ཧི ཙུཏིཙིཏྟཾ ཧུཏྭཱ པཝཏྟཏཱིཏི ཙུཏིཙིཏྟཾ ཨིདྷ ‘‘བྷཝངྒ’’ནྟི ཝུཏྟནྟི. མནོདྭཱརཝིསཡོ ལཧུཀོཏི ལཧུཀཔཙྩུཔཊྛཱནཾ སནྡྷཱཡ ཝུཏྟཾ ‘‘ཨརཱུཔདྷམྨཱནཾ…པེ… ལཧུཀོ’’ཏི. ཨརཱུཔདྷམྨསྶ ¶ ཧི མནོདྭཱརསྶ ཝིསཡོ ལཧུཀཔཙྩུཔཊྛཱནོཏི. བལཝཏི ཙ རཱུཔདྷམྨསྶ ཀཱཡདྭཱརསྶ ¶ ཝིསཡེ ཨཔྤཝཏྟིཏྭཱ མནོདྭཱརཝིསཡེ ཀམྨཱདིམྷི པཋམཾ ཙིཏྟཔྤཝཏྟིདསྶནེན ཨརཱུཔདྷམྨཱནཾ ཝིསཡསྶ ལཧུཀཏཱ དཱིཔིཏཱཏི. རཱུཔཱནཾ ཝིསཡཱབྷཱཝེཔི ཝཱ ‘‘ཨརཱུཔདྷམྨཱན’’ནྟི ཝཙནཾ ཡེསཾ ཝིསཡོ ཨཏྠི, ཏཾདསྶནཏྠམེཝཱཏི དཊྛབྦཾ. ཏེན ལཧུཀམྨཱདཱིསུ ཙིཏྟཔྤཝཏྟིཏོ ལཧུགཧཎཱིཡཏཱ ཝིསཡསྶ ལཧུཀཏཱ.

ཀམྨཱདཱིནཾ བྷཱུམིཙིཏྟུཔཱདཱདིཝསེན ཝིཏྠཱརཏོ ཨནནྟོ པབྷེདོཏི ‘‘སངྑེཔཏོ’’ཏི ཨཱཧ.

ཨཝིཛྫཱཏཎྷཱདིཀིལེསེསུ ཨནུཔཙྪིནྣེསྭེཝ ཀམྨཱདིནོ ཨུཔཊྛཱནཾ, ཏཉྩཱརབྦྷ ཙིཏྟསནྟཱནསྶ བྷཝནྟརནིནྣཔོཎཔབྦྷཱརཏཱ ཧོཏཱིཏི ཨཱཧ ‘‘ཨནུཔཙྪིནྣཀིལེསབལཝིནཱམིཏ’’ནྟི. སནྟཱནེ ཧི ཝིནཱམིཏེ ཏདེཀདེསབྷཱུཏཾ པཊིསནྡྷིཙིཏྟཉྩ ཝིནཱམིཏམེཝ ཧོཏི, ན ཙ ཨེཀདེསཝིནཱམིཏབྷཱཝེན ཝིནཱ སནྟཱནཝིནཱམིཏཏཱ ཨཏྠཱིཏི. སབྦཏྠ པན ‘‘དུགྒཏིཔཊིསནྡྷིནིནྣཱཡ ཙུཏིཡཱ པུརིམཛཝནཱནི ཨཀུསལཱནི, ཨིཏརཱཡ ཙ ཀུསལཱནཱི’’ཏི ནིཙྪིནནྟི. ‘‘ནིམིཏྟསྶཱདགདྷིཏཾ ཝཱ, བྷིཀྑཝེ, ཝིཉྙཱཎཾ ཏིཊྛམཱནཾ ཏིཊྛཏི ཨནུབྱཉྫནསྶཱདགདྷིཏཾ ཝཱ. ཏསྨིཾ ཙེ སམཡེ ཀཱལཾ ཀརོཏི, ཋཱནམེཏཾ ཝིཛྫཏི, ཡཾ དྭིནྣཾ གཏཱིནཾ ཨཉྙཏརཾ གཏིཾ ཨུཔཔཛྫེཡྻ ནིརཡཾ ཝཱ ཏིརཙྪཱནཡོནིཾ ཝཱ’’ཏི (སཾ. ནི. ༤.༢༣༥) ཝུཏྟཾ. ཏསྨཱ ཨཱསནྣཾ ཨཀུསལཾ དུགྒཏིཡཾ, ཀུསལཉྩ སུགཏིཡཾ པཊིསནྡྷིཡཱ ཨུཔནིསྶཡོ ཧོཏཱིཏི.

རཱགཱདིཧེཏུབྷཱུཏཾ ཧཱིནམཱརམྨཎནྟི ཨཀུསལཝིཔཱཀསྶ ཨཱརམྨཎཾ བྷཝིཏུཾ ཡུཏྟཾ ཨནིཊྛཱརམྨཎཾ ཨཱཧ. ཏམྤི ཧི སངྐཔྤཝསེན རཱགསྶཔི ཧེཏུ ཧོཏཱིཏི. ཨཀུསལཝིཔཱཀཛནཀཀམྨསཧཛཱཏཱནཾ ཝཱ ཏཾསདིསཱསནྣཙུཏིཛཝནཙེཏནཱསཧཛཱཏཱནཉྩ རཱགཱདཱིནཾ ཧེཏུབྷཱཝོ ཨེཝ ཧཱིནཏཱ. ཏཉྷི པཙྪཱནུཏཱཔཛནཀཀམྨཱནམཱརམྨཎཾ ཀམྨཝསེན ཨནིཊྛཾ ཨཀུསལཝིཔཱཀསྶ ཨཱརམྨཎཾ བྷཝེཡྻ, ཨཉྙཐཱ ཙ ཨིཊྛཱརམྨཎེ པཝཏྟསྶ ཨཀུསལཀམྨསྶ ཝིཔཱཀོ ཀམྨནིམིཏྟཱརམྨཎོ ན བྷཝེཡྻ. ན ཧི ཨཀུསལཝིཔཱཀོ ཨིཊྛཱརམྨཎོ བྷཝིཏུམརཧཏཱིཏི. པཉྩདྭཱརེ ཙ ཨཱཔཱཐམཱགཙྪནྟཾ པཙྩུཔྤནྣཾ ཀམྨནིམིཏྟཾ ཨཱསནྣཀཏཀམྨཱརམྨཎསནྟཏིཡཾ ཨུཔྤནྣཾ ཏཾསདིསཉྩ དཊྛབྦཾ, ཨཉྙཐཱ ཏདེཝ པཊིསནྡྷིཨཱརམྨཎཱུཔཊྛཱཔཀཾ ཏདེཝ ཙ པཊིསནྡྷིཛནཀཾ བྷཝེཡྻ, ན ཙ པཊིསནྡྷིཡཱ ཨུཔཙཱརབྷཱུཏཱནི ཝིཡ ‘‘ཨེཏསྨིཾ ཏཡཱ ¶ པཝཏྟིཏབྦ’’ནྟི པཊིསནྡྷིཡཱ ཨཱརམྨཎཾ ཨནུཔཱདེནྟཱནི ཝིཡ ¶ ཙ པཝཏྟཱནི ཙུཏིཨཱསནྣཱནི ཛཝནཱནི པཊིསནྡྷིཛནཀཱནི བྷཝེཡྻུཾ. ‘‘ཀཏཏྟཱ ཨུཔཙིཏཏྟཱ’’ཏི (དྷ. ས. ༤༣༡) ཧི ཝུཏྟཾ. ཏདཱ ཙ ཏཾསམཱནཝཱིཐིཡཾ ཝིཡ པཝཏྟམཱནཱནི ཀཐཾ ཀཏཱུཔཙིཏཱནི སིཡུཾ, ན ཙ ཨསྶཱདིཏཱནི ཏདཱ, ན ཙ ལོཀིཡཱནི ལོཀུཏྟརཱནི ཝིཡ སམཱནཝཱིཐིཕལཱནི ཧོནྟི.

‘‘པུབྦེ ཝཱསྶ ཏཾ ཀཏཾ ཧོཏི པཱཔཀམྨཾ དུཀྑཝེདནཱིཡཾ, པཙྪཱ ཝཱསྶ ཏཾ ཀཏཾ ཧོཏི པཱཔཀམྨཾ དུཀྑཝེདནཱིཡཾ, མརཎཀཱལེ ཝཱསྶ ཧོཏི མིཙྪཱདིཊྛི སམཏྟཱ སམཱདིནྣཱ, ཏེན སོ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫཏཱི’’ཏི (མ. ནི. ༣.༣༠༣) –

ཨཱདིནཱ སུཏྟེ མརཎཀཱལེ སམཏྟཱཡ སམཱདིནྣཱཡ མིཙྪཱདིཊྛིཡཱ སམྨཱདིཊྛིཡཱ ཙ སཧཛཱཏཙེཏནཱཡ པཊིསནྡྷིདཱནཾ ཝུཏྟཾ, ན ཙ དུབྦལེཧི པཉྩདྭཱརིཀཛཝནེཧི མིཙྪཱདིཊྛི སམྨཱདིཊྛི ཝཱ སམཏྟཱ ཧོཏི སམཱདིནྣཱ. ཝཀྑཏི ཙ –

‘‘སབྦམྤི ཧེཏཾ ཀུསལཱཀུསལདྷམྨཔཊིཝིཛཱནནཱདིཙཝནཔརིཡོསཱནཾ ཀིཙྩཾ མནོདྭཱརིཀཙིཏྟེནེཝ ཧོཏི, ན པཉྩདྭཱརིཀེནཱཏི སབྦསྶཔེཏསྶ ཀིཙྩསྶ ཀརཎེ སཧཛཝནཀཱནི ཝཱིཐིཙིཏྟཱནི པཊིཀྑིཏྟཱནཱི’’ཏི (ཝིབྷ. ཨཊྛ. ༧༦༦).

ཏཏྠ ཧི ‘‘ན ཀིཉྩི དྷམྨཾ པཊིཝིཛཱནཱཏཱིཏི ‘མནོཔུབྦངྒམཱ དྷམྨཱ’ཏི (དྷ. པ. ༡-༢) ཨེཝཾ ཝུཏྟཾ ཨེཀམྤི ཀུསལཾ ཝཱ ཨཀུསལཾ ཝཱ ན པཊིཝིཛཱནཱཏཱི’’ཏི (ཝིབྷ. ཨཊྛ. ༧༦༦) ཙ ཝུཏྟཾ. ཡེསཾ པཊིཝིབྷཱཝནཔྤཝཏྟིཡཱ སུཁཾ ཝཱ དུཀྑཾ ཝཱ ཨནྭེཏི, ཏེསཾ སཱ པཝཏྟི པཉྩདྭཱརེ པཊིཀྑིཏྟཱ, ཀུསལཱཀུསལཀམྨསམཱདཱནཉྩ ཏཱདིསམེཝཱཏི. ཏདཱརམྨཎཱནནྟརཾ པན ཙཝནཾ, ཏདནནྟརཱ ཙ ཨུཔཔཏྟི མནོདྭཱརིཀཱ ཨེཝ ཧོཏི, ན སཧཛཝནཀཝཱིཐིཙིཏྟེ པརིཡཱཔནྣཱཏི ཨིམིནཱ ཨདྷིཔྤཱཡེན ཨིདྷ པཉྩདྭཱརིཀཏདཱརམྨཎཱནནྟརཾ ཙུཏི, ཏདནནྟརཾ པཊིསནྡྷི ཙ ཝུཏྟཱཏི དཊྛབྦཾ. ཏཏྠ ཨཝསེསཔཉྩཙིཏྟཀྑཎཱཡུཀེ རཱུཔཱདིམྷི ཨུཔྤནྣཾ པཊིསནྡྷིཾ སནྡྷཱཡེཝ ‘‘པཙྩུཔྤནྣཱརམྨཎཾ ཨུཔཔཏྟིཙིཏྟཾ པཙྩུཔྤནྣཱརམྨཎསྶ བྷཝངྒསྶ ཨནནྟརཔཙྩཡེན པཙྩཡོ’’ཏི, ཨཝསེསེཀཙིཏྟཀྑཎཱཡུཀེ ཙ ཨུཔྤནྣཾ སནྡྷཱཡ ‘‘པཙྩུཔྤནྣཱརམྨཎཾ ¶ ཨུཔཔཏྟིཙིཏྟཾ ཨཏཱིཏཱརམྨཎསྶ ¶ བྷཝངྒསྶ ཨནནྟརཔཙྩཡེན པཙྩཡོ’’ཏི (པཊྛཱ. ༢.༡༩.༢༨) ཝུཏྟནྟི ཝེདིཏབྦཾ.

སུདྡྷཱཡ ཝཱཏི མཧགྒཏཀམྨནིམིཏྟཱརམྨཎཱཡ ཛཝནཝཱིཐིཡཱ ཏདཱརམྨཎརཧིཏཱཡཱཏི ཨཏྠོ. སཱ པན ཛཝནཝཱིཐི མཧགྒཏཝིཔཱཀསྶ ཨུཔཙཱརོ ཝིཡ དཊྛབྦཱ. ཀེཙི པན ཏཾ ཝཱིཐིཾ མཧགྒཏཱཝསཱནཾ ཝདནྟི. ཨཏཱིཏཱརམྨཎཱ ཨེཀཱདསཝིདྷཱ, ནཝཏྟབྦཱརམྨཎཱ སཏྟཝིདྷཱ.

ཨེཏེནཱནུསཱརེན ཨཱརུཔྤཙུཏིཡཱཔི ཨནནྟརཱ པཊིསནྡྷི ཝེདིཏབྦཱཏི ཨིདཾ ཀསྨཱ ཝུཏྟཾ, ནནུ ‘‘པཐཝཱིཀསིཎཛ྄ཛྷཱནཱདིཝསེན པཊིལདྡྷམཧགྒཏསུགཏིཡཾ ཋིཏསྶཱ’’ཏི ཨེཝམཱདིཀེ ཨེཝ ནཡེ ཨཡམྤི པཊིསནྡྷི ཨཝརུདྡྷཱཏི? ན, ཏཏྠ རཱུཔཱཝཙརཙུཏིཨནནྟརཱཡ ཨེཝ པཊིསནྡྷིཡཱ ཝུཏྟཏྟཱ. ཏཏྠ ཧི ‘‘པཐཝཱིཀསིཎཱདིཀཾ ཝཱ ནིམིཏྟཾ མཧགྒཏཙིཏྟཾ ཝཱ མནོདྭཱརེ ཨཱཔཱཐམཱགཙྪཏི. ཙཀྑུསོཏཱནཾ ཝཱ’’ཏིཨཱདིཀེན རཱུཔཱཝཙརཙུཏིཡཱ ཨེཝ ཨནནྟརཱ པཊིསནྡྷི ཝུཏྟཱཏི ཝིཉྙཱཡཏི. ཨཐཱཔི ཡཐཱསམྦྷཝཡོཛནཱཡ ཨཡམྤི པཊིསནྡྷི ཏཏྠེཝ ཨཝརུདྡྷཱ, ཨརཱུཔཱཝཙརཙུཏིཨནནྟརཱ པན རཱུཔཱཝཙརཔཊིསནྡྷི ནཏྠི, ཨརཱུཔཱཝཙརེ ཙ ཨུཔརཱུཔརིཙུཏིཡཱ ཧེཊྛིམཱ ཧེཊྛིམཱ པཊིསནྡྷཱིཏི ཙཏུཏྠཱརུཔྤཙུཏིཡཱ ནཝཏྟབྦཱརམྨཎཱ པཊིསནྡྷི ནཏྠི. ཏེན ཏཏོ ཏཏྠེཝ ཨཏཱིཏཱརམྨཎཱ ཀཱམཱཝཙརེ ཙ ཨཏཱིཏཔཙྩུཔྤནྣཱརམྨཎཱ པཊིསནྡྷི ཨིཏརཱཧི ཙ ཡཐཱསམྦྷཝཾ ཨཏཱིཏནཝཏྟབྦཱརམྨཎཱ ཨཱརུཔྤཔཊིསནྡྷི, ཨཏཱིཏཔཙྩུཔྤནྣཱརམྨཎཱ ཙ ཀཱམཱཝཙརཔཊིསནྡྷི ཡོཛེཏབྦཱཏི ཨིམསྶ ཝིསེསསྶ དསྶནཏྠཾ ཝིསུཾ ཨུདྡྷརཎཾ ཀཏཾ.

ཨེཝཾ ཨཱརམྨཎཝསེན ཨེཀཝིདྷཱཡ ཀཱམཱཝཙརསུགཏིཙུཏིཡཱ དུཝིདྷཱ དུགྒཏིཔཊིསནྡྷི, དུགྒཏིཙུཏིཡཱ དུཝིདྷཱ སུགཏིཔཊིསནྡྷི, ཀཱམཱཝཙརསུགཏིཙུཏིཡཱ དྭིཨེཀདྭིཔྤཀཱརཱནཾ ཀཱམརཱུཔཱརུཔྤཱནཾ ཝསེན པཉྩཝིདྷཱ སུགཏིཔཊིསནྡྷི, རཱུཔཱཝཙརཙུཏིཡཱ ཙ ཏཐེཝ པཉྩཝིདྷཱ, དུཝིདྷཱཡ ཨཱརུཔྤཙུཏིཡཱ པཙྩེཀཾ དྭིནྣཾ དྭིནྣཾ ཀཱམཱརུཔྤཱནཾ ཝསེན ཨཊྛཝིདྷཱ ཙ པཊིསནྡྷི དསྶིཏཱ, དུགྒཏིཙུཏིཡཱ པན ཨེཀཝིདྷཱཡ དུགྒཏིཔཊིསནྡྷི དུཝིདྷཱ ན དསྶིཏཱ, ཏཾ དསྶེཏུཾ ‘‘དུགྒཏིཡཾ ཋིཏསྶ པནཱ’’ཏིཨཱདིམཱཧ. ཡཐཱཝུཏྟཱ པན –

དྭིདྭིཔཉྩཔྤཀཱརཱ ཙ, པཉྩཱཊྛདུཝིདྷཱཔི ཙ;

ཙཏུཝཱིསཏི སབྦཱཔི, ཏཱ ཧོནྟི པཊིསནྡྷིཡོ.

‘‘ཀཱམཱཝཙརསྶ ¶ ¶ ཀུསལསྶ ཀམྨསྶ ཀཏཏྟཱ’’ཏིཨཱདིནཱ (དྷ. ས. ༤༣༡, ༤༥༥, ༤༩༨) ནཱནཱཀྑཎིཀཀམྨཔཙྩཡབྷཱཝོ དསྶིཏཔྤཀཱརོཏི ཨུཔནིསྶཡཔཙྩཡབྷཱཝམེཝ དསྶེནྟོ ‘‘ཝུཏྟཉྷེཏ’’ནྟིཨཱདིམཱཧ.

ཨཱདིནཱ སཧཱཏིཨཱདིནཱ ཝིམིསྶཝིཉྙཱཎེན སཧ. ཨོམཏོ དྭེ ཝཱ ཏཡོ ཝཱ དསཀཱ ཨུཔྤཛྫནྟཱིཏི གབྦྷསེཡྻཀཱནཾ ཝསེན ཝུཏྟཾ. ཨཉྙཏྠ ཧི ཨནེཀེ ཀལཱཔཱ སཧ ཨུཔྤཛྫནྟི. བྲཧྨཏྟབྷཱཝེཔི ཧི ཨནེཀགཱཝུཏཔྤམཱཎེ ཨནེཀེ ཀལཱཔཱ སཧུཔྤཛྫནྟཱིཏི ཏིཾསཏོ ཨདྷིཀཱནེཝ རཱུཔཱནི ཧོནྟི གནྡྷརསཱཧཱརཱནཾ པཊིཀྑིཏྟཏྟཱ ཙཀྑུསོཏཝཏྠུསཏྟཀཛཱིཝིཏཚཀྐབྷཱཝེཔི ཏེསཾ བཧུཏྟཱ. ཨཊྛཀཐཱཡཾ པན ཏཏྠཔི ཙཀྑུསོཏཝཏྠུདསཀཱནཾ ཛཱིཝིཏནཝཀསྶ ཙ ཨུཔྤཏྟི ཝུཏྟཱ, པཱལི༹ཡཾ པན ‘‘རཱུཔདྷཱཏུཡཱ ཨུཔཔཏྟིཀྑཎེ ཋཔེཏྭཱ ཨསཉྙསཏྟཱནཾ དེཝཱནཾ པཉྩཱཡཏནཱནི པཱཏུབྷཝནྟི, པཉྩ དྷཱཏུཡོ པཱཏུབྷཝནྟཱི’’ཏི ཝུཏྟཾ, ཏཐཱ ‘‘རཱུཔདྷཱཏུཡཱ ཚ ཨཱཡཏནཱནི ནཝ དྷཱཏུཡོ’’ཏི སབྦསངྒཧཝསེན ཏཏྠ ཝིཛྫམཱནཱཡཏནདྷཱཏུཡོ དསྶེཏུཾ ཝུཏྟཾ. ཀཐཱཝཏྠུམྷི ཙ གྷཱནཱཡཏནཱདཱིནཾ ཝིཡ གནྡྷཱཡཏནཱདཱིནཉྩ ཏཏྠ བྷཱཝོ པཊིཀྑིཏྟོ ‘‘ཨཏྠི ཏཏྠ གྷཱནཱཡཏནནྟི? ཨཱམནྟཱ, ཨཏྠི ཏཏྠ གནྡྷཱཡཏནནྟི? ན ཧེཝཾ ཝཏྟབྦེ’’ཏིཨཱདིནཱ (ཀཐཱ. ༥༡༩), ན ཙ ཨཕོཊྛབྦཱཡཏནཱནཾ པཐཝཱིདྷཱཏུཨཱདཱིནཾ ཝིཡ ཨགནྡྷརསཱཡཏནཱནཾ གནྡྷརསཱནཾ ཏཏྠ བྷཱཝོ སཀྐཱ ཝཏྟུཾ ཕུསིཏུཾ ཨསཀྐུཎེཡྻཏཱཝིནིམུཏྟསྶ པཐཝཱིཨཱདིསབྷཱཝསྶ ཝིཡ གནྡྷརསབྷཱཝཝིནིམུཏྟསྶ གནྡྷརསསབྷཱཝསྶ ཨབྷཱཝཱ.

ཡདི ཙ གྷཱནསམྥསྶཱདཱིནཾ ཀཱརཎབྷཱཝོ ནཏྠཱིཏི ཨཱཡཏནཱནཱིཏི ཏེན ཝུཙྩེཡྻུཾ, དྷཱཏུ-སདྡོ པན ནིསྶཏྟནིཛྫཱིཝཝཱཙཀོཏི གནྡྷདྷཱཏུརསདྷཱཏཱུཏི ཨཝཙནེ ནཏྠི ཀཱརཎཾ, དྷམྨབྷཱཝོ ཙ ཏེསཾ ཨེཀནྟེན ཨིཙྪིཏབྦོ སབྷཱཝདྷཱརཎཱདིལཀྑཎཏོ ཨཉྙསྶ ཨབྷཱཝཱ, དྷམྨཱནཉྩ ཨཱཡཏནབྷཱཝོ ཨེཀནྟཏོ ཡམཀེ (ཡམ. ༡. ཨཱཡཏནཡམཀ.༡༣) ཝུཏྟོ ‘‘དྷམྨོ ཨཱཡཏནནྟི? ཨཱམནྟཱ’’ཏི. ཏསྨཱ ཏེསཾ གནྡྷརསཱཡཏནབྷཱཝཱབྷཱཝེཔི ཀོཙི ཨཱཡཏནསབྷཱཝོ ཝཏྟབྦོ. ཡདི ཙ ཕོཊྛབྦབྷཱཝཏོ ཨཉྙོ པཐཝཱིདྷཱཏུཨཱདིབྷཱཝོ ཝིཡ གནྡྷརསབྷཱཝཏོ ཨཉྙོ ཏེསཾ ཀོཙི སབྷཱཝོ སིཡཱ, ཏེསཾ དྷམྨཱཡཏནེ སངྒཧོ. གནྡྷརསབྷཱཝེ པན ཨཱཡཏནབྷཱཝེ ཙ སཏི གནྡྷོ ཙ སོ ཨཱཡཏནཉྩ གནྡྷཱཡཏནཾ, རསོ ¶ ཙ སོ ཨཱཡཏནཉྩ རསཱཡཏནནྟི ཨིདམཱཔནྣམེཝཱཏི གནྡྷརསཱཡཏནབྷཱཝོ ཙ ན སཀྐཱ ནིཝཱརེཏུཾ, ‘‘ཏཡོ ཨཱཧཱརཱ’’ཏི (ཝིབྷ. ༩༩༣) ཙ ཝཙནཏོ ¶ ཀབལཱི༹ཀཱརཱཧཱརསྶ ཏཏྠ ཨབྷཱཝོ ཝིཉྙཱཡཏི. ཏསྨཱ ཡཐཱ པཱལི༹ཡཱ ཨཝིརོདྷོ ཧོཏི, ཏཐཱ རཱུཔགཎནཱ ཀཱཏབྦཱ. ཨེཝཉྷི དྷམྨཏཱ ན ཝིལོམིཏཱ ཧོཏཱིཏི.

ཛཱཏིཨུཎྞཱཡཱཏི གབྦྷཾ ཕཱལེཏྭཱ གཧིཏཨུཎྞཱཡཱཏིཔི ཝདནྟི. སམྦྷཝབྷེདོཏི ཨཏྠིཏཱབྷེདོ. ནིཛ྄ཛྷཱམཏཎྷིཀཱ ཀིར ནིཙྩཾ དུཀྑཱཏུརཏཱཡ ཀཱམཾ སེཝིཏྭཱ གབྦྷཾ ན གཎྷནྟི.

རཱུཔཱིབྲཧྨེསུ ཏཱཝ ཨོཔཔཱཏིཀཡོནིཀེསཱུཏི ཨོཔཔཱཏིཀཡོནིཀེཧི རཱུཔཱིབྲཧྨེ ནིདྡྷཱརེཏི. ‘‘སཾསེདཛོཔཔཱཏཱིསུ ཨཝཀཾསཏོ ཏིཾསཱ’’ཏི ཨེཏཾ ཝིཝརནྟོ ཨཱཧ ‘‘ཨཝཀཾསཏོ པནཱ’’ཏིཨཱདི, ཏཾ པནེཏཾ པཱལི༹ཡཱ ན སམེཏི. ན ཧི པཱལི༹ཡཾ ཀཱམཱཝཙརཱནཾ སཾསེདཛོཔཔཱཏིཀཱནཾ ཨགྷཱནཀཱནཾ ཨུཔཔཏྟི ཝུཏྟཱ. དྷམྨཧདཡཝིབྷངྒེ (ཝིབྷ. ༡༠༠༧) ཧི –

‘‘ཀཱམདྷཱཏུཡཱ ཨུཔཔཏྟིཀྑཎེ ཀསྶཙི ཨེཀཱདསཱཡཏནཱནི པཱཏུབྷཝནྟི, ཀསྶཙི དསཱཡཏནཱནི, ཀསྶཙི ཨཔརཱནི དསཱཡཏནཱནི, ཀསྶཙི ནཝཱཡཏནཱནི, ཀསྶཙི སཏྟཱཡཏནཱནི པཱཏུབྷཝནྟཱི’’ཏི –

ཝུཏྟཾ, ན ཝུཏྟཾ ‘‘ཨཊྛཱཡཏནཱནི པཱཏུབྷཝནྟཱི’’ཏི. ཏཐཱ ‘‘དསཱཡཏནཱནི པཱཏུབྷཝནྟཱི’’ཏི ཏིཀྑཏྟུཾ ཝཏྟབྦཾ སིཡཱ, ཨགྷཱནཀཨུཔཔཏྟིཡཱ ཝིཛྫམཱནཱཡ ཏིཀྑཏྟུཉྩ ‘‘ནཝཱཡཏནཱནི པཱཏུབྷཝནྟཱི’’ཏི, ན ཙ ཏཾ ཝུཏྟཾ. ཨེཝཾ དྷཱཏུཔཱཏུབྷཱཝཱདིཔཉྷེསུ ཡམཀེཔི གྷཱནཛིཝ྄ཧཱཀཱཡཱནཾ སཧཙཱརིཏཱ ཝུཏྟཱཏི.

ཙུཏིཔཊིསནྡྷཱིནཾ ཁནྡྷཱདཱིཧི ཨཉྙམཉྙཾ སམཱནཏཱ ཨབྷེདོ, ཨསམཱནཏཱ བྷེདོ. ནཡམུཁམཏྟཾ དསྶེཏྭཱ ཝུཏྟཾ ཨཝུཏྟཉྩ སབྦཾ སངྒཎྷིཏྭཱ ཨཱཧ ‘‘ཨཡཾ ཏཱཝ ཨརཱུཔབྷཱུམཱིསུཡེཝ ནཡོ’’ཏི. རཱུཔཱརཱུཔཱཝཙརཱནཾ ཨུཔཙཱརསྶ བལཝཏཱཡ ཏཏོ ཙཝིཏྭཱ དུགྒཏིཡཾ ཨུཔཔཏྟི ནཏྠཱིཏི ‘‘ཨེཀཙྩསུགཏིཙུཏིཡཱ’’ཏི ཨཱཧ. ཨེཀཙྩདུགྒཏིཔཊིསནྡྷཱིཏི ཨེཏྠ ཨེཀཙྩགྒཧཎསྶ པཡོཛནཾ མགྒིཏབྦཾ. ཨཡཾ པནེཏྠཱདྷིཔྤཱཡོ སིཡཱ – ནཱནཏྟཀཱཡནཱནཏྟསཉྙཱིསུ ཝུཏྟཱ ཨེཀཙྩེ ཝིནིཔཱཏིཀཱ ཏིཧེཏུཀཱདིཔཊིསནྡྷིཀཱ, ཏེསཾ ཏཾ པཊིསནྡྷིཾ ཝིནིཔཱཏབྷཱཝེན དུགྒཏིཔཊིསནྡྷཱིཏི གཧེཏྭཱ སབྦསུགཏིཙུཏིཡཱཝ སཱ ¶ པཊིསནྡྷི ཧོཏི, ན ཨེཀཙྩསུགཏིཙུཏིཡཱ ཨེཝཱཏི ཏཾནིཝཏྟནཏྠཾ ཨེཀཙྩདུགྒཏིགྒཧཎཾ ཀཏཾ. ཨཔཱཡཔཊིསནྡྷི ཨེཝ ཧི ཨེཀཙྩསུགཏིཙུཏིཡཱ ཧོཏི, ན ¶ སབྦསུགཏིཙུཏིཡཱ. ཨཐ ཝཱ དུགྒཏིཔཊིསནྡྷི དུཝིདྷཱ ཨེཀཙྩསུགཏིཙུཏིཡཱ ཨནནྟརཱ དུགྒཏིཙུཏིཡཱ ཙཱཏི. ཏཏྠ པཙྪིམཾ ཝཛྫེཏྭཱ པུརིམཾ ཨེཝ གཎྷིཏུཾ ཨཱཧ ‘‘ཨེཀཙྩདུགྒཏིཔཊིསནྡྷཱི’’ཏི. ཨཧེཏུཀཙུཏིཡཱ སཧེཏུཀཔཊིསནྡྷཱིཏི དུཧེཏུཀཱ ཏིཧེཏུཀཱ ཙ ཡོཛེཏབྦཱ. མཎྜཱུཀདེཝཔུཏྟཱདཱིནཾ ཝིཡ ཧི ཨཧེཏུཀཙུཏིཡཱ ཏིཧེཏུཀཔཊིསནྡྷིཔི ཧོཏཱིཏི.

ཏསྶ ཏསྶ ཝིཔརཱིཏཏོ ཙ ཡཐཱཡོགཾ ཡོཛེཏབྦནྟི ‘‘ཨེཀཙྩསུགཏིཙུཏིཡཱ ཨེཀཙྩདུགྒཏིཔཊིསནྡྷཱི’’ཏིཨཱདཱིསུ བྷེདཝིསེསེསུ ‘‘ཨེཀཙྩདུགྒཏིཙུཏིཡཱ ཨེཀཙྩསུགཏིཔཊིསནྡྷཱི’’ཏིཨཱདིནཱ ཡཾ ཡཾ ཡུཛྫཏི, ཏཾ ཏཾ ཡོཛེཏབྦནྟི ཨཏྠོ. ཡུཛྫམཱནམཏྟཱཔེཀྑནཝསེན ནཔུཾསཀནིདྡེསོ ཀཏོ, ཡོཛེཏབྦནྟི ཝཱ བྷཱཝཏྠོ དཊྛབྦོ. ཨམཧགྒཏབཧིདྡྷཱརམྨཎཱཡ མཧགྒཏཨཛ྄ཛྷཏྟཱརམྨཎཱཏིཨཱདཱིསུ པན ཝིཔརཱིཏཡོཛནཱ ན ཀཱཏབྦཱ. ན ཧི མཧགྒཏཨཛ྄ཛྷཏྟཱརམྨཎཱཡ ཙུཏིཡཱ ཨརཱུཔབྷཱུམཱིསུ ཨམཧགྒཏབཧིདྡྷཱརམྨཎཱ པཊིསནྡྷི ཨཏྠི. ཙཏུཀྑནྡྷཱཡ ཨརཱུཔཙུཏིཡཱ པཉྩཀྑནྡྷཱ ཀཱམཱཝཙརཔཊིསནྡྷཱིཏི ཨེཏསྶ ཝིཔརིཡཱཡོ སཡམེཝ ཡོཛིཏོ. ཨཏཱིཏཱརམྨཎཙུཏིཡཱ པཙྩུཔྤནྣཱརམྨཎཱ པཊིསནྡྷཱིཏི ཨེཏསྶ ཙ ཝིཔརིཡཱཡོ ནཏྠི ཨེཝཱཏི. བྷེདཝིསེསོ ཨེཝ ཙ ཨེཝཾ ཝིཏྠཱརེན དསྶིཏོ, ཨབྷེདཝིསེསོ པན ཨེཀེཀསྨིཾ བྷེདེ ཏཏྠ ཏཏྠེཝ ཙུཏིཔཊིསནྡྷིཡོཛནཱཝསེན ཡོཛེཏབྦོ ‘‘པཉྩཀྑནྡྷཱཡ ཀཱམཱཝཙརཱཡ པཉྩཀྑནྡྷཱ ཀཱམཱཝཙརཱ…པེ… ཨཝིཏཀྐཨཝིཙཱརཱཡ ཨཝིཏཀྐཨཝིཙཱརཱ’’ཏི, ཙཏུཀྑནྡྷཱཡ པན ཙཏུཀྑནྡྷཱ སཡམེཝ ཡོཛིཏཱ. ཨེཏེནེཝ ནཡེན སཀྐཱ ཉཱཏུནྟི པཉྩཀྑནྡྷཱདཱིསུ ཨབྷེདཝིསེསོ ན དསྶིཏོཏི. ཏཏོ ཧེཏུཾ ཝིནཱཏི ཏཏྠ ཧེཏུཾ ཝིནཱ.

ཨངྒཔཙྩངྒསནྡྷཱིནཾ བནྡྷནཱནི ཨངྒཔཙྩངྒསནྡྷིབནྡྷནཱནི, ཏེསཾ ཚེདཀཱནཾ. ནིརུདྡྷེསུ ཙཀྑཱདཱིསཱུཏི ཨཏིམནྡབྷཱཝཱུཔགམནཾ སནྡྷཱཡ ཝུཏྟནྟི ཝེདིཏབྦཾ. པཉྩདྭཱརིཀཝིཉྙཱཎཱནནྟརམྤི ཧི པུབྦེ ཙུཏི དསྶིཏཱ. ཡམཀེ ཙ (ཡམ. ༡.ཨཱཡཏནཡམཀ.༡༢༠) –

‘‘ཡསྶ ¶ ཙཀྑཱཡཏནཾ ནིརུཛ྄ཛྷཏི, ཏསྶ མནཱཡཏནཾ ནིརུཛ྄ཛྷཏཱིཏི? ཨཱམནྟཱ. ཡསྶ ཝཱ པན མནཱཡཏནཾ ནིརུཛ྄ཛྷཏི, ཏསྶ ཙཀྑཱཡཏནཾ ནིརུཛ྄ཛྷཏཱིཏི? སཙིཏྟཀཱནཾ ཨཙཀྑུཀཱནཾ ཙཝནྟཱནཾ ཏེསཾ མནཱཡཏནཾ ནིརུཛ྄ཛྷཏི, ནོ ཙ ཏེསཾ ཙཀྑཱཡཏནཾ ནིརུཛ྄ཛྷཏི. སཙཀྑུཀཱནཾ ཙཝནྟཱནཾ ཏེསཾ མནཱཡཏནཉྩ ནིརུཛ྄ཛྷཏི, ཙཀྑཱཡཏནཉྩ ནིརུཛ྄ཛྷཏཱི’’ཏི –

ཨཱདིནཱ ¶ ཙཀྑཱཡཏནཱདཱིནཾ ཙུཏིཙིཏྟེན སཧ ནིརོདྷོ ཝུཏྟོཏི. ལདྡྷོ ཨཝསེསོ ཨཝིཛྫཱདིཀོ ཝིཉྙཱཎསྶ པཙྩཡོ ཨེཏེནཱཏི ལདྡྷཱཝསེསཔཙྩཡོ, སངྑཱརོ. ཨཝིཛྫཱཔཊིཙྪཱདིཏཱདཱིནཝེ ཏསྨིཾ ཀམྨཱདིཝིསཡེ པཊིསནྡྷིཝིཉྙཱཎསྶ ཨཱརམྨཎབྷཱཝེན ཨུཔྤཏྟིཊྛཱནབྷཱུཏེ ཏཎྷཱཡ ཨཔྤཧཱིནཏྟཱ ཨེཝ པུརིམུཔྤནྣཱཡ ཙ སནྟཏིཡཱ པརིཎཏཏྟཱ པཊིསནྡྷིཊྛཱནཱབྷིམུཁཾ ཝིཉྙཱཎཾ ནིནྣཔོཎཔབྦྷཱརཾ ཧུཏྭཱ པཝཏྟཏཱིཏི ཨཱཧ ‘‘ཏཎྷཱ ནཱམེཏཱི’’ཏི. སཧཛཱཏསངྑཱརཱཏི ཙུཏིཨཱསནྣཛཝནཝིཉྙཱཎསཧཛཱཏཙེཏནཱ, སབྦེཔི ཝཱ ཕསྶཱདཡོ. ཏསྨིཾ པཊིསནྡྷིཊྛཱནེ ཀམྨཱདིཝིསཡེ ཝིཉྙཱཎཾ ཁིཔནྟི, ཁིཔནྟཱ ཝིཡ ཏསྨིཾ ཝིསཡེ པཊིསནྡྷིཝསེན ཝིཉྙཱཎཔཏིཊྛཱནསྶ ཧེཏུབྷཱཝེན པཝཏྟནྟཱིཏི ཨཏྠོ.

ཏནྟི ཏཾ ཝིཉྙཱཎཾ, ཙུཏིཔཊིསནྡྷིཏདཱསནྣཝིཉྙཱཎཱནཾ སནྟཏིཝསེན ཝིཉྙཱཎནྟི ཨུཔནཱིཏེཀཏྟཾ. ཏཎྷཱཡ ནཱམིཡམཱནཾ…པེ… པཝཏྟཏཱིཏི ནམནཁིཔནཔུརིམནིསྶཡཛཧནཱཔརནིསྶཡསྶཱདནནིསྶཡརཧིཏཔཝཏྟནཱནི སནྟཏིཝསེན ཏསྶེཝེཀསྶ ཝིཉྙཱཎསྶ ཧོནྟི, ན ཨཉྙསྶཱཏི དསྶེཏི. སནྟཏིཝསེནཱཏི ཙ ཝདནྟོ ‘‘ཏདེཝིདཾ ཝིཉྙཱཎཾ སནྡྷཱཝཏི སཾསརཏི ཨནཉྙ’’ནྟི (མ. ནི. ༡.༣༩༦) ཨིདཉྩ མིཙྪཱགཱཧཾ པཊིཀྑིཔཏི. སཏི ཧི ནཱནཏྟནཡེ སནྟཏིཝསེན ཨེཀཏྟནཡོ ཧོཏཱིཏི. ཨོརིམཏཱིརརུཀྑཝིནིབདྡྷརཛྫུ ཝིཡ པུརིམབྷཝཏྟབྷཱཝཝིནིབནྡྷཾ ཀམྨཱདིཨཱརམྨཎཾ དཊྛབྦཾ, པུརིསོ ཝིཡ ཝིཉྙཱཎཾ, ཏསྶ མཱཏིཀཱཏིཀྐམནིཙྪཱ ཝིཡ ཏཎྷཱ, ཨཏིཀྐམནཔཡོགོ ཝིཡ ཁིཔནཀསངྑཱརཱ. ཡཐཱ ཙ སོ པུརིསོ པརཏཱིརེ པཏིཊྛཧམཱནོ པརཏཱིརརུཀྑཝིནིབདྡྷཾ ཀིཉྩི ཨསྶཱདཡམཱནོ ཨནསྶཱདཡམཱནོ ཝཱ ཀེཝལཾ པཐཝིཡཾ སབལཔཡོགེཧེཝ པཏིཊྛཱཏི, ཨེཝམིདམྤི བྷཝནྟརཏྟབྷཱཝཝིནིབདྡྷཾ ཧདཡཝཏྠུནིསྶཡཾ པཉྩཝོཀཱརབྷཝེ ཨསྶཱདཡམཱནཾ ཙཏུཝོཀཱརབྷཝེ ཨནསྶཱདཡམཱནཾ ཝཱ ཀེཝལཾ ཨཱརམྨཎསམྤཡུཏྟཀམྨེཧེཝ པཝཏྟཏི. ཏཏྠ ཨསྶཱདཡམཱནནྟི པཱཔུཎནྟཾ, པཊིལབྷམཱནནྟི ཨཏྠོ.

བྷཝནྟརཱདིཔཊིསནྡྷཱནཏོཏི ¶ བྷཝནྟརསྶ ཨཱདིསམྦནྡྷནཏོ, བྷཝནྟརཱདཡོ ཝཱ བྷཝཡོནིགཏིཝིཉྙཱཎཊྛིཏིསཏྟཱཝཱསནྟརཱ, ཏེསཾ པཊིསནྡྷཱནཏོཏི ཨཏྠོ. ཀམྨནྟི པཊིསནྡྷིཛནཀཾ ཀམྨཾ. སངྑཱརཱཏི ཙུཏིཨཱསནྣཛཝནཝིཉྙཱཎསཧགཏཱ ཁིཔནཀསངྑཱརཱ.

སདྡཱདིཧེཏུཀཱཏི ཨེཏྠ པཊིགྷོསོ སདྡཧེཏུཀོ, པདཱིཔོ པདཱིཔནྟརཱདིཧེཏུཀོ, མུདྡཱ ལཉྪནཧེཏུཀཱ, ཚཱཡཱ ཨཱདཱསཱདིགཏམུཁཱདིཧེཏུཀཱ. ཨཉྙཏྲ ཨགནྟྭཱ ཧོནྟཱིཏི སདྡཱདིཔཙྩཡདེསཾ ¶ ཨགནྟྭཱ སདྡཱདིཧེཏུཀཱ ཧོནྟི ཏཏོ པུབྦེ ཨབྷཱཝཱ, ཨེཝམིདམྤི པཊིསནྡྷིཝིཉྙཱཎཾ ན ཧེཏུདེསཾ གནྟྭཱ ཏཾཧེཏུཀཾ ཧོཏི ཏཏོ པུབྦེ ཨབྷཱཝཱ, ཏསྨཱ ན ཨིདཾ ཧེཏུདེསཏོ པུརིམབྷཝཏོ ཨཱགཏཾ པཊིགྷོསཱདཡོ ཝིཡ སདྡཱདིདེསཏོ, ནཱཔི ཏཏྠ ཧེཏུནཱ ཝིནཱ ཨུཔྤནྣཾ སདྡཱདཱིཧི ཝིནཱ པཊིགྷོསཱདཡོ ཝིཡཱཏི ཨཏྠོ. ཨཐ ཝཱ ཨཉྙཏྲ ཨགནྟྭཱ ཧོནྟཱིཏི པུབྦེ པཙྩཡདེསེ སནྣིཧིཏཱ ཧུཏྭཱ ཏཏོ ཨཉྙཏྲ གནྟྭཱ ཏཔྤཙྩཡཱ ན ཧོནྟི ཨུཔྤཏྟིཏོ པུབྦེ ཨབྷཱཝཱ, ནཱཔི སདྡཱདིཔཙྩཡཱ ན ཧོནྟི, ཨེཝམིདམྤཱིཏི ཝུཏྟནཡེན ཡོཛེཏབྦཾ. ཨེས ནཡོཏི བཱིཛངྐུརཱདཱིསུ སབྦཧེཏུཧེཏུསམུཔྤནྣེསུ ཡཐཱསམྦྷཝཾ ཡོཛནཱ ཀཱཏབྦཱཏི དསྶེཏི. ཨིདྷཱཔི ཧི ཧེཏུཧེཏུསམུཔྤནྣཝིཉྙཱཎཱནཾ ཨེཀནྟམེཀཏྟེ སཏི ན མནུསྶགཏིཀོ དེཝགཏིབྷཱུཏོ སིཡཱ, ཨེཀནྟནཱནཏྟེ ན ཀམྨཝཏོ ཕལཾ སིཡཱ. ཏཏོ ‘‘རཏྟསྶ བཱིཛཾ, རཏྟསྶ ཕལ’’ནྟིཨཱདིཀསྶ ཝིཡ ‘‘བྷཱུཏཔུབྦཱཧཾ, བྷནྟེ, རོཧིཏསྶོ ནཱམ ཨིསཱི’’ཏིཨཱདིཀསྶ (སཾ. ནི. ༡.༡༠༧) ཝོཧཱརསྶ ལོཔོ སིཡཱ, ཏསྨཱ ཨེཏྠ སནྟཱནབནྡྷེ སཏི ཧེཏུཧེཏུསམུཔྤནྣེསུ ན ཨེཀནྟམེཝ ཨེཀཏཱ ཝཱ ནཱནཏཱ ཝཱ ཨུཔགནྟབྦཱ. ཨེཏྠ ཙ ཨེཀནྟཨེཀཏཱཔཊིསེདྷེན ‘‘སཡཾཀཏཾ སུཁཾ དུཀྑ’’ནྟི ཨིམཾ དིཊྛིཾ ནིཝཱརེཏི, ཨེཀནྟནཱནཏཱཔཊིསེདྷེན ‘‘པརཾཀཏཾ སུཁཾ དུཀྑ’’ནྟི, ཧེཏུཧེཏུསམུཔྤནྣབྷཱཝཝཙནེན ‘‘ཨདྷིཙྩསམུཔྤནྣ’’ནྟི. ཨེཏྠཱཏི ཨེཀསནྟཱནེ.

ཙཏུམདྷུརཨལཏྟཀརསཱདིབྷཱཝནཱ ཨམྦམཱཏུལུངྒཱདིབཱིཛཱནཾ ཨབྷིསངྑཱརོ. ཨེཏྠ བཱིཛཾ ཝིཡ ཀམྨཝཱ སཏྟོ, ཨབྷིསངྑཱརོ ཝིཡ ཀམྨཾ, བཱིཛསྶ ཨངྐུརཱདིཔྤབནྡྷོ ཝིཡ སཏྟསྶ པཊིསནྡྷིཝིཉྙཱཎཱདིཔྤབནྡྷོ, ཏཏྠུཔྤནྣསྶ མདྷུརསྶ རཏྟཀེསརསྶ ཝཱ ཕལསྶ ཝཱ ཏསྶེཝ བཱིཛསྶ, ཏཏོ ཨེཝ ཙ ཨབྷིསངྑཱརཏོ བྷཱཝོ ཝིཡ ཀམྨཀཱརཀསྶེཝ སཏྟསྶ, ཏཾཀམྨཏོ ཨེཝ ¶ ཙ ཕལསྶ བྷཱཝོ ཝེདིཏབྦོ. བཱལསརཱིརེ ཀཏཾ ཝིཛྫཱཔརིཡཱཔུཎནཾ སིཔྤསིཀྑནཾ ཨོསདྷཔྤཡོགོ ཙ ན ཝུཌྜྷསརཱིརཾ གཙྪནྟི. ཨཐ ཙ ཏཾནིམིཏྟཾ ཝིཛྫཱཔཱཊཝཾ སིཔྤཛཱནནཾ ཨནཱམཡཏཱ ཙ ཝུཌྜྷསརཱིརེ ཧོཏི, ན ཙ ཏཾ ཨཉྙསྶ ཧོཏི ཏཾསནྟཏིཔརིཡཱཔནྣེ ཨེཝ ཝུཌྜྷསརཱིརེ ཨུཔྤཛྫནཏོ, ན ཙ ཡཐཱཔཡུཏྟེན ཝིཛྫཱཔརིཡཱཔུཎནཱདིནཱ ཝིནཱ ཨཉྙཏོ ཧོཏི ཏདབྷཱཝེ ཨབྷཱཝཏོ. ཨེཝམིདྷཱཔི སནྟཱནེ ཡཾ ཕལཾ, ཨེཏཾ ནཱཉྙསྶ, ན ཙ ཨཉྙཏོཏི ཡོཛེཏབྦཾ. ན ཨཉྙཏོཏི ཨེཏེན ཙ སངྑཱརཱབྷཱཝེ ཕལཱབྷཱཝམེཝ དསྶེཏི, ནཱཉྙཔཙྩཡནིཝཱརཎཾ ཀརོཏི.

ཡམྤི ཝུཏྟཾ, ཏཏྠ ཝདཱམཱཏི ཝཙནསེསོ. ཏཏྠ ཝཱ ཨུཔབྷུཉྫཀེ ཨསཏི སིདྡྷཱ བྷུཉྫཀསམྨུཏཱིཏི སམྦནྡྷོ. ཕལཏཱིཏི སམྨུཏི ཕལཏིསམྨུཏི.

ཨེཝཾ ¶ སནྟེཔཱིཏི ཨསངྐནྟིཔཱཏུབྷཱཝེ, ཏཏྠ ཙ ཡཐཱཝུཏྟདོསཔརིཧརཎེ སཏི སིདྡྷེཏི ཨཏྠོ. པཝཏྟིཏོ པུབྦེཏི ཀམྨཱཡཱུཧནཀྑཎཏོ པུབྦེ. པཙྪཱ ཙཱཏི ཝིཔཙྩནཔཝཏྟིཏོ པཙྪཱ ཙ. ཨཝིཔཀྐཝིཔཱཀཱ ཀཏཏྟཱ ཙེ པཙྩཡཱ, ཝིཔཀྐཝིཔཱཀཱནམྤི ཀཏཏྟཾ སམཱནནྟི ཏེསམྤི ཕལཱཝཧཏཱ སིཡཱཏི ཨཱསངྐཱནིཝཏྟནཏྠཾ ཨཱཧ ‘‘ན ཙ ནིཙྩཾ ཕལཱཝཧཱ’’ཏི. ན ཝིཛྫམཱནཏྟཱ ཝཱ ཨཝིཛྫམཱནཏྟཱ ཝཱཏི ཨེཏེན ཝིཛྫམཱནཏྟཾ ཨཝིཛྫམཱནཏྟཉྩ ནིསྶཱཡ ཝུཏྟདོསེཝ པརིཧརཏི.

ཏསྶཱ པཱཊིབྷོགཀིརིཡཱཡ, བྷཎྜཀཱིཎནཀིརིཡཱཡ, ཨིཎགཧཎཱདིཀིརིཡཱཡ ཝཱ ཀརཎམཏྟཾ ཏཾཀིརིཡཱཀརཎམཏྟཾ. ཏདེཝ ཏདཏྠནིཡྻཱཏནེ པཊིབྷཎྜདཱནེ ཨིཎདཱནེ ཙ པཙྩཡོ ཧོཏི, ཨཕལིཏནིཡྻཱཏནཱདིཕལནྟི ཨཏྠོ.

ཨཝིསེསེནཱཏི ‘‘ཏིཧེཏུཀོ ཏིཧེཏུཀསྶཱ’’ཏིཨཱདིཀཾ བྷེདཾ ཨཀཏྭཱཝ སཱམཉྙཏོ, པིཎྜཝསེནཱཏི ཨཏྠོ. སབྦཏྠ ཨུཔནིསྶཡཔཙྩཡོ བལཝཀམྨསྶ ཝསེན ཡོཛེཏབྦོ. ‘‘དུབྦལཉྷི ཨུཔནིསྶཡཔཙྩཡོ ན ཧོཏཱི’’ཏི ཝཀྑམཱནམེཝེཏཾ པཊྛཱནཝཎྞནཱཡནྟི. ཨཝིསེསེནཱཏི སབྦཔུཉྙཱབྷིསངྑཱརཾ སཧ སངྒཎྷཱཏི. དྭཱདསཱཀུསལཙེཏནཱབྷེདོཏི ཨེཏྠ ཨུདྡྷཙྩསཧགཏཱ ཀསྨཱ གཧིཏཱཏི ཝིཙཱརེཏབྦམེཏཾ. ཨེཀསྶ ཝིཉྙཱཎསྶ ཏཐེཝ པཙྩཡོ པཊིསནྡྷིཡཾ, ནོ པཝཏྟེཏི ཨེཀསྶེཝ པཙྩཡབྷཱཝནིཡམོ པཊིསནྡྷིཡཾ, ནོ པཝཏྟེ. པཝཏྟེ ཧི སཏྟནྣམྤི པཙྩཡོཏི ཨདྷིཔྤཱཡོ. ‘‘ཏཐཱ ཀཱམཱཝཙརདེཝལོཀེཔི ཨནིཊྛཱ རཱུཔཱདཡོ ནཏྠཱི’’ཏི ¶ ཝུཏྟཾ, དེཝཱནཾ པན པུབྦནིམིཏྟཔཱཏུབྷཱཝཀཱལེ མིལཱཏམཱལཱདཱིནཾ ཨནིཊྛཏཱ ཀཐཾ ན སིཡཱ.

སྭེཝ དྭཱིསུ བྷཝེསཱུཏི ཨེཏྠ ཨེཀཱུནཏིཾསཙེཏནཱབྷེདམྤི ཙིཏྟསངྑཱརཾ ཙིཏྟསངྑཱརབྷཱཝེན ཨེཀཏྟཾ ཨུཔནེཏྭཱ ‘‘སྭེཝཱ’’ཏི ཝུཏྟཾ. ཏདེཀདེསོ པན ཀཱམཱཝཙརཙིཏྟསངྑཱརོཝ ཏེརསནྣཾ ནཝནྣཉྩ པཙྩཡོ དཊྛབྦོ. ཨེཀདེསཔཙྩཡབྷཱཝེན ཧི སམུདཱཡོ ཝུཏྟོཏི.

ཡཏྠ ཙ ཝིཏྠཱརཔྤཀཱསནཾ ཀཏཾ, ཏཏོ བྷཝཏོ པཊྛཱཡ མུཁམཏྟཔྤཀཱསནཾ ཀཱཏུཀཱམོ ཨཱཧ ‘‘ཨཱདིཏོ པཊྛཱཡཱ’’ཏི. ཏེན ‘‘དྭཱིསུ བྷཝེསཱུ’’ཏིཨཱདི ཝུཏྟཾ. ཏཏིཡཛ྄ཛྷཱནབྷཱུམིཝསེནཱཏི ཨེཏེན ཨེཀཏྟཀཱཡཨེཀཏྟསཉྙཱིསཱམཉྙེན ཙཏུཏྠཛ྄ཛྷཱནབྷཱུམི ཙ ཨསཉྙཱརུཔྤཝཛྫཱ གཧིཏཱཏི ཝེདིཏབྦཱ. ཡཐཱསམྦྷཝནྟི ཨེཀཝཱིསཏིཡཱ ཀཱམཱཝཙརརཱུཔཱཝཙརཀུསལཝིཔཱཀེསུ ཙུདྡསནྣཾ པཊིསནྡྷིཡཾ པཝཏྟེ ཙ, སཏྟནྣཾ པཝཏྟེ ཨེཝ. ཨཡཾ ཡཐཱསམྦྷཝོ.

ཙཏུནྣཾ ¶ ཝིཉྙཱཎཱནནྟི བྷཝཱདཡོ ཨཔེཀྑིཏྭཱ ཝུཏྟཾ, ཙཏཱུསུ ཨནྟོགདྷཱནཾ པན ཏིཎྞཾ ཝིཉྙཱཎཱནཾ ཏཱིསུ ཝིཉྙཱཎཊྛིཏཱིསུ ཙ པཙྩཡབྷཱཝོ ཡོཛེཏབྦོ, ཨཝིཉྙཱཎཀེ སཏྟཱཝཱསེ སངྑཱརཔཙྩཡཱ ཝིཉྙཱཎེ ཨཝིཛྫམཱནེཔི ཏསྶ སངྑཱརཧེཏུཀཏྟཾ དསྶེཏུཾ ‘‘ཨཔིཙཱ’’ཏིཨཱདིམཱཧ. ཨེཏསྨིཉྩ མུཁམཏྟཔྤཀཱསནེ པུཉྙཱབྷིསངྑཱརཱདཱིནཾ དུགྒཏིཨཱདཱིསུ པཝཏྟིཡཾ ཀུསལཝིཔཱཀཱདིཝིཉྙཱཎཱནཾ པཙྩཡབྷཱཝོ བྷཝེསུ ཝུཏྟནཡེནེཝ ཝིཉྙཱཡཏཱིཏི ན ཝུཏྟོཏི ཝེདིཏབྦོ.

ཝིཉྙཱཎཔདནིདྡེསཝཎྞནཱ ནིཊྛིཏཱ.

ནཱམརཱུཔཔདནིདྡེསཝཎྞནཱ

༢༢༨. སུཏྟནྟཱབྷིདྷམྨེསུ ནཱམརཱུཔདེསནཱཝིསེསོ དེསནཱབྷེདོ. ཏཡོ ཁནྡྷཱཏི ཨེཏཾ ཡདིཔི པཱལི༹ཡཾ ནཏྠི, ཨཏྠཏོ པན ཝུཏྟམེཝ ཧོཏཱིཏི ཀཏྭཱ ཝུཏྟནྟི ཝེདིཏབྦཾ.

ཨཎྜཛཱནཉྩ ཨབྷཱཝཀཱནནྟི ཡོཛེཏབྦཾ. སནྟཏིསཱིསཱནཱིཏི ཀལཱཔསནྟཱནམཱུལཱནི. ཡདིཔི ཝིཀཱརརཱུཔཱནི པཊིསནྡྷིཀྑཎེ ན སནྟི, ལཀྑཎཔརིཙྪེདརཱུཔཱནི ¶ པན སནྟཱིཏི ཏཱནི ཨཔརིནིཔྥནྣཱནི པརམཏྠཏོ ཝིཝཛྫེནྟོ ཨཱཧ ‘‘རཱུཔརཱུཔཏོ’’ཏི.

ཀཱམབྷཝེ པན ཡསྨཱ སེསཨོཔཔཱཏིཀཱནནྟི ཨེཏྠ ཀིཉྩཱཔི ཀཱམབྷཝེ ‘‘ཨོཔཔཱཏིཀཱ’’ཏི ཝུཏྟཱ ན སནྟི, ཡེན སེསགྒཧཎཾ སཱཏྠཀཾ བྷཝེཡྻ, ཨཎྜཛགབྦྷསེཡྻཀེཧི པན ཨོཔཔཱཏིཀསཾསེདཛཱ སེསཱ ཧོནྟཱིཏི སེསགྒཧཎཾ ཀཏནྟི ཝེདིཏབྦཾ. ཨཐ ཝཱ བྲཧྨཀཱཡིཀཱདིཀེཧི ཨོཔཔཱཏིཀེཧི ཝུཏྟེཧི སེསེ སནྡྷཱཡ ‘‘སེསཨོཔཔཱཏིཀཱན’’ནྟི ཨཱཧ. ཏེ པན ཨརཱུཔིནོཔི སནྟཱིཏི ‘‘ཀཱམབྷཝེ’’ཏི ཝུཏྟཾ, ཨཔརིཔུཎྞཱཡཏནཱནཾ པན ནཱམརཱུཔཾ ཡཐཱསམྦྷཝཾ རཱུཔམིསྶཀཝིཉྙཱཎནིདྡེསེ ཝུཏྟནཡེན སཀྐཱ དྷམྨགཎནཱཏོ ཝིཉྙཱཏུནྟི ན ཝུཏྟནྟི དཊྛབྦཾ.

ཨཝཀཾསཏོ དྭེ ཨཊྛཀཱནེཝ ཨུཏུཙིཏྟསམུཊྛཱནཱནི ཧོནྟཱིཏི སསདྡཀཱལཾ སནྡྷཱཡ ‘‘ཨུཀྐཾསཏོ དྭིནྣཾ ནཝཀཱན’’ནྟི ཝུཏྟཾ. པུབྦེཏི ཁནྡྷཝིབྷངྒེཏི ཝདནྟི. ཏཏྠ ཧི ‘‘ཨེཀེཀཙིཏྟཀྑཎེ ¶ ཏིཀྑཏྟུཾ ཨུཔྤཛྫམཱན’’ནྟི ཝུཏྟཾ. ཨིདྷེཝ ཝཱ ཝུཏྟཾ སནྟཏིདྭཡཱདིཀཾ སཏྟཀཔརིཡོསཱནཾ སནྡྷཱཡཱཧ ‘‘པུབྦེ ཝུཏྟཾ ཀམྨསམུཊྛཱནཾ སཏྟཏིཝིདྷ’’ནྟི, ཏཾ པནུཔྤཛྫམཱནཾ ཨེཀེཀཙིཏྟཀྑཎེ ཏིཀྑཏྟུཾ ཨུཔྤཛྫཏཱིཏི ཨིམིནཱདྷིཔྤཱཡེན ཝུཏྟཾ ‘‘ཨེཀེཀཙིཏྟཀྑཎེ ཏིཀྑཏྟུཾ ཨུཔྤཛྫམཱན’’ནྟི. ཙཏུདྡིསཱ ཝཝཏྠཱཔིཏཱཏི ཨཉྙམཉྙསཾསཊྛསཱིསཱ མཱུལེན ཙཏཱུསུ དིསཱསུ ཝཝཏྠཱཔིཏཱ ཨཉྙམཉྙཾ ཨཱལིངྒེཏྭཱ ཋིཏཱ བྷིནྣཝཱཧནིཀཱ ཝིཡ.

པཉྩཝོཀཱརབྷཝེ ཙ པཝཏྟིཡནྟི རཱུཔཱཛནཀཀམྨཛཾ པཉྩཝིཉྙཱཎཔྤཝཏྟིཀཱལཾ སཧཛཱཏཝིཉྙཱཎཔཙྩཡཉྩ སནྡྷཱཡཱཧ. ཏདཱ ཧི ཏཏོ ནཱམམེཝ ཧོཏཱིཏི, ཀམྨཝིཉྙཱཎཔཙྩཡཱ པན སདཱཔི ཨུབྷཡཾ ཧོཏཱིཏི སཀྐཱ ཝཏྟུཾ, པཙྪཱཛཱཏཝིཉྙཱཎཔཙྩཡཱ ཙ རཱུཔཾ ཨུཔཏྠདྡྷཾ ཧོཏཱིཏི. ཨསཉྙེསཱུཏིཨཱདི ཀམྨཝིཉྙཱཎཔཙྩཡཾ སནྡྷཱཡ ཝུཏྟཾ, པཉྩཝོཀཱརབྷཝེ ཙ པཝཏྟིཡནྟི བྷཝངྒཱདིཛནཀཀམྨཏོ ཨཉྙེན རཱུཔུཔྤཏྟིཀཱལཾ ནིརོདྷསམཱཔཏྟིཀཱལཾ བྷཝངྒཱདིཨུཔྤཏྟིཀཱལཏོ ཨཉྙཀཱལཉྩ སནྡྷཱཡ ཝུཏྟནྟི ཡུཏྟཾ. བྷཝངྒཱདིཨུཔྤཏྟིཀཱལེ ཧི ཏཾཛནཀེནེཝ ཀམྨུནཱ ཨུཔྤཛྫམཱནཾ རཱུཔཾ, སོ ཙ ཝིཔཱཀོ ཀམྨཝིཉྙཱཎཔཙྩཡོ ཧོཏཱིཏི སཀྐཱ ཝཏྟུཾ. སཧཛཱཏཝིཉྙཱཎཔཙྩཡཱནཔེཀྑམྤི ཧི པཝཏྟིཡཾ ཀམྨེན པཝཏྟམཱནཾ རཱུཔཾ ནཱམཉྩ ན ཀམྨཝིཉྙཱཎཱནཔེཀྑཾ ཧོཏཱིཏི. སབྦཏྠཱཏི པཊིསནྡྷིཡཾ པཝཏྟེ ཙ. སཧཛཱཏཝིཉྙཱཎཔཙྩཡཱ ནཱམརཱུཔཾ, ཀམྨཝིཉྙཱཎཔཙྩཡཱ ཙ ནཱམརཱུཔཉྩ ཡཐཱསམྦྷཝཾ ཡོཛེཏབྦཾ. ནཱམཉྩ ¶ རཱུཔཉྩ ནཱམརཱུཔཉྩ ནཱམརཱུཔནྟི ཨེཏྠ ནཱམརཱུཔ-སདྡོ ཨཏྟནོ ཨེཀདེསེན ནཱམ-སདྡེན ནཱམ-སདྡསྶ སརཱུཔོ, རཱུཔ-སདྡེན ཙ རཱུཔ-སདྡསྶ, ཏསྨཱ ‘‘སརཱུཔཱནཾ ཨེཀསེསོ’’ཏི ནཱམརཱུཔ-སདྡསྶ ཋཱནཾ ཨིཏརེསཉྩ ནཱམརཱུཔ-སདྡཱནཾ ཨདསྶནཾ དཊྛབྦཾ.

ཝིཔཱཀཏོ ཨཉྙཾ ཨཝིཔཱཀཾ. ཡཏོ དྭིདྷཱ མཏཾ, ཏཏོ ཡུཏྟམེཝ ཨིདནྟི ཡོཛེཏབྦཾ. ཀུསལཱདིཙིཏྟཀྑཎེཏི ཨཱདི-སདྡེན ཨཀུསལཀིརིཡཙིཏྟཀྑཎེ ཝིཡ ཝིཔཱཀཙིཏྟཀྑཎེཔི ཝིཔཱཀཱཛནཀཀམྨསམུཊྛཱནཾ སངྒཧིཏནྟི ཝེདིཏབྦཾ. ཝིཔཱཀཙིཏྟཀྑཎེ པན ཨབྷིསངྑཱརཝིཉྙཱཎཔཙྩཡཱ པུབྦེ ཝུཏྟནཡེན ཨུབྷཡཉྩ ཨུཔལབྦྷཏཱིཏི ཏཱདིསཝིཔཱཀཙིཏྟཀྑཎཝཛྫནཏྠཾ ‘‘ཀུསལཱདིཙིཏྟཀྑཎེ’’ཏི ཝུཏྟཾ.

སུཏྟནྟིཀཔརིཡཱཡེནཱཏི པཊྛཱནེ རཱུཔཱནཾ ཨུཔནིསྶཡཔཙྩཡསྶ ཨཝུཏྟཏྟཱ ཝུཏྟཾ, སུཏྟནྟེ པན ‘‘ཡསྨིཾ སཏི ཡཾ ཧོཏི, ཨསཏི ཙ ན ཧོཏི, སོ ཏསྶ ཨུཔནིསྶཡོ ནིདཱནཾ ཧེཏུ པབྷཝོ’’ཏི ¶ ཀཏྭཱ ‘‘ཝིཉྙཱཎཱུཔནིསཾ ནཱམརཱུཔ’’ནྟི རཱུཔསྶ ཙ ཝིཉྙཱཎཱུཔནིསྶཡཏཱ ཝུཏྟཱ. ཝནཔཏྠཔརིཡཱཡེ ཙ ཝནསཎྜགཱམནིགམནགརཛནཔདཔུགྒལཱུཔནིསྶཡོ ཨིརིཡཱཔཐཝིཧཱརོ, ཏཏོ ཙ ཙཱིཝརཱདཱིནཾ ཛཱིཝིཏཔརིཀྑཱརཱནཾ ཀསིརེན ཙ ཨཔྤཀསིརེན ཙ སམུདཱགམནཾ ཝུཏྟཾ, ན ཙ ཝནསཎྜཱདཡོ ཨཱརམྨཎཱུཔནིསྶཡཱདིབྷཱཝཾ ཨིརིཡཱཔཐཱནཾ ཙཱིཝརཱདིསམུདཱགམནསྶ ཙ བྷཛནྟི, ཏསྨཱ ཝིནཱ ཨབྷཱཝོ ཨེཝ ཙ སུཏྟནྟཔརིཡཱཡཏོ ཨུཔནིསྶཡབྷཱཝོ དཊྛབྦོ. ནཱམསྶ ཨབྷིསངྑཱརཝིཉྙཱཎཾ ཀམྨཱརམྨཎཔཊིསནྡྷིཨཱདིཀཱལེ ཨཱརམྨཎཔཙྩཡོཝ ཧོཏཱིཏི ཝཏྟབྦམེཝ ནཏྠཱིཏི རཱུཔསྶེཝ སུཏྟནྟིཀཔརིཡཱཡཏོ ཨེཀདྷཱ པཙྩཡབྷཱཝོ ཝུཏྟོ. སསཾསཡསྶ ཧི རཱུཔསྶ ཏཾཔཙྩཡོ ཧོཏཱིཏི ཝུཏྟེ ནཱམསྶ ཧོཏཱིཏི ཝཏྟབྦམེཝ ནཏྠཱིཏི.

པཝཏྟསྶ པཱཀཊཏྟཱ ཨཔཱཀཊཾ པཊིསནྡྷིཾ གཧེཏྭཱ པུཙྪཏི ‘‘ཀཐཾ པནེཏ’’ནྟིཨཱདིནཱ. སུཏྟཏོ ནཱམཾ, ཡུཏྟིཏོ རཱུཔཾ ཝིཉྙཱཎཔཙྩཡཱ ཧོཏཱིཏི ཛཱནིཏབྦཾ. ཡུཏྟིཏོ སཱདྷེཏྭཱ སུཏྟེན ཏཾ དལ༹ྷཾ ཀརོནྟོ ‘‘ཀམྨསམུཊྛཱནསྶཔི ཧཱི’’ཏིཨཱདིམཱཧ. ཙིཏྟསམུཊྛཱནསྶེཝཱཏི ཙིཏྟསམུཊྛཱནསྶ ཝིཡ. ཡསྨཱ ནཱམརཱུཔམེཝ པཝཏྟམཱནཾ དིསྶཏི, ཏསྨཱ ཏདེཝ ཝདནྟེན ཨནུཏྟརཾ དྷམྨཙཀྐཾ པཝཏྟིཏཾ. སུཉྙཏཱཔཀཱསནཉྷི དྷམྨཙཀྐཔྤཝཏྟནནྟི ཨདྷིཔྤཱཡོ. ནཱམརཱུཔམཏྟཏཱཝཙནེནེཝ ཝཱ པཝཏྟིཡཱ དུཀྑསཙྩམཏྟཏཱ ཝུཏྟཱ, དུཀྑསཙྩཔྤཀཱསནེན ཙ ཏསྶ སམུདཡོ, ཏསྶ ཙ ¶ ནིརོདྷོ, ནིརོདྷགཱམཱི ཙ མགྒོ པཀཱསིཏོ ཨེཝ ཧོཏི. ཨཧེཏུཀསྶ དུཀྑསྶ ཧེཏུནིརོདྷཱ, ཨནིརུཛ྄ཛྷནཀསྶ ཙ ཨབྷཱཝཱ, ནིརོདྷསྶ ཙ ཨུཔཱཡེན ཝིནཱ ཨནདྷིགནྟབྦཏྟཱཏི ཙཏུསཙྩཔྤཀཱསནཾ དྷམྨཙཀྐཔྤཝཏྟནཾ ཡོཛེཏབྦཾ.

ནཱམརཱུཔཔདནིདྡེསཝཎྞནཱ ནིཊྛིཏཱ.

སལཱ༹ཡཏནཔདནིདྡེསཝཎྞནཱ

༢༢༩. ནིཡམཏོཏི ཙ ཨིདཾ ཙཏུནྣཾ བྷཱུཏཱནཾ, ཚནྣཾ ཝཏྠཱུནཾ, ཛཱིཝིཏསྶ ཙ ཡཐཱསམྦྷཝཾ སཧཛཱཏནིསྶཡཔུརེཛཱཏཨིནྡྲིཡཱདིནཱ ཨེཀནྟེན སལཱ༹ཡཏནསྶ པཝཏྟམཱནསྶ པཙྩཡབྷཱཝཾ སནྡྷཱཡ ཝུཏྟཾ. རཱུཔཱཡཏནཱདཱིནཾ པན སཧཛཱཏནིསྶཡཱནུཔཱལནབྷཱཝོ ནཏྠཱིཏི ཨགྒཧཎཾ ཝེདིཏབྦཾ. ཨཱརམྨཎཱརམྨཎཔུརེཛཱཏཱདིབྷཱཝོ ¶ ཙ ཏེསཾ ན སནྟཏིཔརིཡཱཔནྣཱནམེཝ, ན ཙ ཙཀྑཱདཱིནཾ ཝིཡ ཨེཀཔྤཀཱརེནེཝཱཏི ཨནིཡམཏོ པཙྩཡབྷཱཝོ. ནིཡམཏོ…པེ… ཛཱིཝིཏིནྡྲིཡནྟི ཨེཝནྟི ཨེཏྠ ཨེཝཾ-སདྡེན ཝཱ རཱུཔཱཡཏནཱདཱིནམྤི སངྒཧོ ཝེདིཏབྦོ. ཚཊྛཱཡཏནཉྩ སལཱ༹ཡཏནཉྩ སལཱ༹ཡཏནནྟི ཨེཏྠ ཡདིཔི ཚཊྛཱཡཏནསལཱ༹ཡཏན-སདྡཱནཾ སདྡཏོ སརཱུཔཏཱ ནཏྠི, ཨཏྠཏོ པན སལཱ༹ཡཏནེཀདེསོཝ ཚཊྛཱཡཏནནྟི ཨེཀདེསསརཱུཔཏཱ ཨཏྠཱིཏི ཨེཀདེསསརཱུཔེཀསེསོ ཀཏོཏི ཝེདིཏབྦོ. ཨཏྠཏོཔི ཧི སརཱུཔཱནཾ ཨེཀདེསསརཱུཔེཀསེསཾ ཨིཙྪནྟི ‘‘ཝངྐོ ཙ ཀུཊིལོ ཙ ཀུཊིལཱ’’ཏི, ཏསྨཱ ཨཏྠཏོ ཨེཀདེསསརཱུཔཱནཉྩ ཨེཀསེསེན བྷཝིཏབྦནྟི.

ཨཐ ཝཱ ཚཊྛཱཡཏནཉྩ མནཱཡཏནཉྩ ཚཊྛཱཡཏནནྟི ཝཱ, མནཱཡཏནནྟི ཝཱ, ཚཊྛཱཡཏནཉྩ ཚཊྛཱཡཏནཉྩ ཚཊྛཱཡཏནནྟི ཝཱ, མནཱཡཏནཉྩ མནཱཡཏནཉྩ མནཱཡཏནནྟི ཝཱ ཨེཀསེསཾ ཀཏྭཱ ཙཀྑཱདཱིཧི སཧ ‘‘སལཱ༹ཡཏན’’ནྟི ཝུཏྟནྟི ཏམེཝ ཨེཀསེསཾ ནཱམམཏྟཔཙྩཡསྶ, ནཱམརཱུཔཔཙྩཡསྶ ཙ མནཱཡཏནསྶ ཝསེན ཀཏཾ ཨཏྠཏོ དསྶེནྟོ ཨཱཧ ‘‘ཚཊྛཱཡཏནཉྩ སལཱ༹ཡཏནཉྩ སལཱ༹ཡཏནནྟི ཨེཝཾ ཀཏེཀསེསསྶཱ’’ཏི. ཡཐཱཝུཏྟོཔི ཧི ཨེཀསེསོ ཨཏྠཏོ ཚཊྛཱཡཏནཉྩ སལཱ༹ཡཏནཉྩཱཏི ཨེཝཾ ཀཏོ ནཱམ ཧོཏཱིཏི. སབྦཏྠ ཙ ཨེཀསེསེ ཀཏེ ཨེཀཝཙནནིདྡེསོ ¶ ཀཏེཀསེསཱནཾ སལཱ༹ཡཏནཱདིསདྡཝཙནཱིཡཏཱསཱམཉྙཝསེན ཀཏོཏི དཊྛབྦོ. ཨབྱཱཀཏཝཱརེ ཝཀྑཏཱིཏི ཀིཉྩཱཔི ཨཀུསལཝཱརེ ཀུསལཝཱརེ ཙ ‘‘ནཱམཔཙྩཡཱ ཚཊྛཱཡཏན’’ནྟི ཝུཏྟཾ, སུཏྟནྟབྷཱཛནཱིཡེ པན ཝིཔཱཀཚཊྛཱཡཏནམེཝ གཧིཏནྟི ཨདྷིཔྤཱཡེན ཨབྱཱཀཏཝཱརམེཝ སཱདྷཀབྷཱཝེན ཨུདཱཧཊནྟི དཊྛབྦཾ. པཙྩཡནཡེ པན ‘‘ཚཊྛཱ ཧོཏི ཏཾ ཨཝཀཾསཏོ’’ཏིཨཱདིནཱ ཨཝིཔཱཀསྶཔི པཙྩཡོ ཨུདྡྷཊོ, སོ ནིརཝསེསཾ ཝཏྟུཀཱམཏཱཡ ཨུདྡྷཊོཏི ཝེདིཏབྦོ. ཨིདྷ སངྒཧིཏནྟི ཨིདྷ ཨེཀསེསནཡེན སངྒཧིཏཾ, ཏཏྠ ཨབྱཱཀཏཝཱརེ ལོཀིཡཝིཔཱཀབྷཱཛནཱིཡེ ཝིབྷཏྟནྟི ཝེདིཏབྦནྟི ཨདྷིཔྤཱཡོ.

ནེཡྻནྟི ཉེཡྻཾ. ཨུཀྐཾསཱཝཀཾསོཏི ཨེཏྠ སཏྟདྷཱ པཙྩཡབྷཱཝཏོ ཨུཀྐཾསོ ཨཊྛདྷཱ པཙྩཡབྷཱཝོ, ཏཏོ པན ནཝདྷཱ ཏཏོ ཝཱ དསདྷཱཏི ཨཡཾ ཨུཀྐཾསོ, ཨཝཀཾསོ པན དསདྷཱ པཙྩཡབྷཱཝཏོ ནཝདྷཱ པཙྩཡབྷཱཝོ, ཏཏོ ཨཊྛདྷཱ, ཏཏོ སཏྟདྷཱཏི ཨེཝཾ ཝེདིཏབྦོ, ན པན སཏྟདྷཱ པཙྩཡབྷཱཝཏོ ཨེཝ དྭེཔི ཨུཀྐཾསཱཝཀཾསཱ ཡོཛེཏབྦཱ ཏཏོ ཨཝཀཾསཱབྷཱཝཏོཏི.

ཧདཡཝཏྠུནོ སཧཱཡཾ ཧུཏྭཱཏི ཨེཏེན ཨརཱུཔེ ཝིཡ ཨསཧཱཡཾ ནཱམཾ ན ཧོཏི, ཧདཡཝཏྠུ ཙ ¶ ནཱམེན སཧ ཚཊྛཱཡཏནསྶ པཙྩཡོ ཧོཏཱིཏི ཨེཏྟཀམེཝ དསྶེཏི, ན པན ཡཐཱ ཧདཡཝཏྠུ པཙྩཡོ ཧོཏི, ཏཐཱ ནཱམམྤཱིཏི ཨཡམཏྠོ ཨདྷིཔྤེཏོ. ཝཏྠུ ཧི ཝིཔྤཡུཏྟཔཙྩཡོ ཧོཏི, ན ནཱམཾ, ནཱམཉྩ ཝིཔཱཀཧེཏཱདིཔཙྩཡོ ཧོཏི, ན ཝཏྠཱུཏི. པཝཏྟེ ཨརཱུཔདྷམྨཱ ཀམྨཛརཱུཔསྶ ཋིཏིཔྤཏྟསྶེཝ པཙྩཡཱ ཧོནྟི, ན ཨུཔྤཛྫམཱནསྶཱཏི ཝིཔྤཡུཏྟཨཏྠིཨཝིགཏཱ ཙ པཙྪཱཛཱཏཝིཔྤཡུཏྟཱདཡོ ཨེཝ ཙཀྑཱདཱིནཾ ཡོཛེཏབྦཱ.

ཨཝསེསམནཱཡཏནསྶཱཏི ཨེཏྠ ‘‘པཉྩཀྑནྡྷབྷཝེ པནཱ’’ཏི ཨེཏསྶ ཨནུཝཏྟམཱནཏྟཱ པཉྩཝོཀཱརབྷཝེ ཨེཝ པཝཏྟམཱནཾ པཉྩཝིཉྙཱཎེཧི ཨཝསེསམནཱཡཏནཾ ཝུཏྟནྟི དཊྛབྦཾ. ནཱམརཱུཔསྶ སཧཛཱཏཱདིསཱདྷཱརཎཔཙྩཡབྷཱཝོ སམྤཡུཏྟཱདིཨསཱདྷཱརཎཔཙྩཡབྷཱཝོ ཙ ཡཐཱསམྦྷཝཾ ཡོཛེཏབྦོ.

སལཱ༹ཡཏནཔདནིདྡེསཝཎྞནཱ ནིཊྛིཏཱ.

ཕསྶཔདནིདྡེསཝཎྞནཱ

༢༣༠. ‘‘ཚཊྛཱཡཏནཔཙྩཡཱ ¶ ཕསྶོ’’ཏི ཨབྷིདྷམྨབྷཱཛནཱིཡཔཱལི༹ ཨཱརུཔྤཾ སནྡྷཱཡ ཝུཏྟཱཏི ‘‘ཚཊྛཱཡཏནཔཙྩཡཱ ཕསྶོཏི པཱལི༹ཨནུསཱརཏོ’’ཏི ཨཱཧ. ཨཛ྄ཛྷཏྟནྟི སསནྟཏིཔརིཡཱཔནྣམེཝ གཎྷཱཏི. ཏཉྷི སསནྟཏིཔརིཡཱཔནྣཀམྨནིབྦཏྟཾ ཏཱདིསསྶ ཕསྶསྶ པཙྩཡོ ཧོཏི, རཱུཔཱདཱིནི པན བཧིདྡྷཱ ཨནུཔཱདིནྣཱནི ཙ ཕསྶསྶ ཨཱརམྨཎཾ ཧོནྟི, ན ཏཱནི ཙཀྑཱདཱིནི ཝིཡ སསནྟཏིཔརིཡཱཔནྣཀམྨཀིལེསནིམིཏྟཔཝཏྟིབྷཱཝེན ཕསྶསྶ པཙྩཡོཏི པཋམཱཙརིཡཝཱདེ ན གཧིཏཱནི, དུཏིཡཱཙརིཡཝཱདེ པན ཡཐཱ ཏཐཱ ཝཱ པཙྩཡབྷཱཝེ སཏི ན སཀྐཱ ཝཛྫེཏུནྟི གཧིཏཱནཱིཏི.

ཡདི སབྦཱཡཏནེཧི ཨེཀོ ཕསྶོ སམྦྷཝེཡྻ, ‘‘སལཱ༹ཡཏནཔཙྩཡཱ ཕསྶོ’’ཏི ཨེཀསྶ ཝཙནཾ ཡུཛྫེཡྻ. ཨཐཱཔི ཨེཀམྷཱ ཨཱཡཏནཱ སབྦེ ཕསྶཱ སམྦྷཝེཡྻུཾ, ཏཐཱཔི སབྦཱཡཏནེཧི སབྦཕསྶསམྦྷཝཏོ ཨཱཡཏནབྷེདེན ཕསྶབྷེདོ ནཏྠཱིཏི ཏདབྷེདཝསེན ཨེཀསྶ ཝཙནཾ ཡུཛྫེཡྻ, ཏཐཱ པན ཨསམྦྷཝཏོ ན ཡུཏྟནྟི ཙོདེཏི ‘‘ན སབྦཱཡཏནེཧཱི’’ཏིཨཱདིནཱ. ཨཉྙསྶཔི ཝཱ ཨསམྦྷཝནྟསྶ ¶ ཝིདྷཱནསྶ བོདྷནཏྠམེཝ ‘‘ནཱཔི ཨེཀམྷཱ ཨཱཡཏནཱ སབྦེ ཕསྶཱ’’ཏི ཝུཏྟཾ, ‘‘ན སབྦཱཡཏནེཧི ཨེཀོ ཕསྶོ སམྦྷོཏཱི’’ཏི ཨིདམེཝ པན ཨེཀཕསྶཝཙནསྶ ཨཡུཏྟདཱིཔཀཾ ཀཱརཎནྟི ཝེདིཏབྦཾ. ནིདསྶནཝསེན ཝཱ ཨེཏཾ ཝུཏྟཾ, ནཱཔི ཨེཀམྷཱ ཨཱཡཏནཱ སབྦེ ཕསྶཱ སམྦྷོནྟི, ཨེཝཾ ན སབྦཱཡཏནེཧི ཨེཀོ ཕསྶོ སམྦྷོཏི, ཏསྨཱ ཨེཀསྶ ཝཙནཾ ཨཡུཏྟནྟི. པརིཧཱརཾ པན ཨནེཀཱཡཏནེཧི ཨེཀཕསྶསྶ སམྦྷཝཏོཏི དསྶེནྟོ ‘‘ཏཏྲིདཾ ཝིསྶཛྫན’’ནྟིཨཱདིམཱཧ. ཨེཀོཔི ཨནེཀཱཡཏནཔྤབྷཝོ ཨེཀོཔནེཀཱཡཏནཔྤབྷཝོ. ཚདྷཱཔཙྩཡཏྟེ པཉྩཝིབྷཱཝཡེཏི ཨེཝཾ སེསེསུཔི ཡོཛནཱ. ཏཐཱ ཙཱཏི པཙྩུཔྤནྣཱནི རཱུཔཱདཱིནི པཙྩུཔྤནྣཉྩ དྷམྨཱཡཏནཔརིཡཱཔནྣཾ རཱུཔརཱུཔཾ སནྡྷཱཡ ཝུཏྟཾ. ཨཱརམྨཎཔཙྩཡམཏྟེནཱཏི ཏཾ སབྦཾ ཨཔཙྩུཔྤནྣཾ ཨཉྙཉྩ དྷམྨཱཡཏནཾ སནྡྷཱཡ ཝུཏྟཾ.

ཕསྶཔདནིདྡེསཝཎྞནཱ ནིཊྛིཏཱ.

ཝེདནཱཔདནིདྡེསཝཎྞནཱ

༢༣༡. ‘‘སེསཱན’’ནྟི ¶ ཨེཏྠ སམྤཊིཙྪནསྶ ཙཀྑུསམྥསྶཱདཡོ པཉྩ ཡདིཔི ཨནནྟརཱདཱིཧིཔི པཙྩཡཱ ཧོནྟི, ཨནནྟརཱདཱིནཾ པན ཨུཔནིསྶཡེ ཨནྟོགདྷཏྟཱ སནྟཱིརཎཏདཱརམྨཎཱནཉྩ སཱདྷཱརཎསྶ ཏསྶ ཝསེན ‘‘ཨེཀདྷཱ’’ཏི ཝུཏྟཾ.

ཏེབྷཱུམཀཝིཔཱཀཝེདནཱནམྤི སཧཛཱཏམནོསམྥསྶསངྑཱཏོ སོ ཕསྶོ ཨཊྛདྷཱ པཙྩཡོ ཧོཏཱིཏི ཡོཛེཏབྦཾ. པཙྩཡཾ ཨནུཔཱདིནྣམྤི ཀེཙི ཨིཙྪནྟཱིཏི ‘‘ཡཱ པནཱ’’ཏིཨཱདིནཱ མནོདྭཱརཱཝཛྫནཕསྶསྶ པཙྩཡབྷཱཝོ ཝུཏྟོ, ཏཉྩ མུཁམཏྟདསྶནཏྠཾ དཊྛབྦཾ. ཨེཏེན ནཡེན སབྦསྶ ཨནནྟརསྶ ཨནཱནནྟརསྶ ཙ ཕསྶསྶ ཏསྶཱ ཏསྶཱ ཝིཔཱཀཝེདནཱཡ ཨུཔནིསྶཡཏཱ ཡོཛེཏབྦཱཏི.

ཝེདནཱཔདནིདྡེསཝཎྞནཱ ནིཊྛིཏཱ.

ཏཎྷཱཔདནིདྡེསཝཎྞནཱ

༢༣༢. མམཏྟེནཱཏི ¶ སམྤིཡཱཡམཱནེན, ཨསྶཱདནཏཎྷཱཡཱཏི ཝུཏྟཾ ཧོཏི. ཏཏྠ པུཏྟོ ཝིཡ ཝེདནཱ དཊྛབྦཱ, ཁཱིརཱདཡོ ཝིཡ ཝེདནཱཡ པཙྩཡབྷཱུཏཱ རཱུཔཱདཡོ, ཁཱིརཱདིདཱཡིཀཱ དྷཱཏི ཝིཡ རཱུཔཱདིཚལཱ༹རམྨཎདཱཡཀཱ ཙིཏྟཀཱརཱདཡོ ཚ. ཏཏྠ ཝེཛྫོ རསཱཡནོཛཱཝསེན ཏདུཔཏྠམྦྷིཏཛཱིཝིཏཝསེན ཙ དྷམྨཱརམྨཎསྶ དཱཡཀོཏི དཊྛབྦོ. ཨཱརམྨཎཔཙྩཡོ ཨུཔྤཛྫམཱནསྶ ཨཱརམྨཎམཏྟམེཝ ཧོཏི, ན ཨུཔནིསྶཡོ ཝིཡ ཨུཔྤཱདཀོཏི ཨུཔྤཱདཀསྶ ཨུཔནིསྶཡསྶེཝ ཝསེན ‘‘ཨེཀདྷཱཝཱ’’ཏི ཝུཏྟཾ. ཨུཔནིསྶཡེན ཝཱ ཨཱརམྨཎཱུཔནིསྶཡོ སངྒཧིཏོ, ཏེན ཙ ཨཱརམྨཎབྷཱཝེན ཏཾསབྷཱཝོ ཨཉྙོཔི ཨཱརམྨཎབྷཱཝོ དཱིཔིཏོ ཧོཏཱིཏི ཨུཔནིསྶཡཝསེནེཝ པཙྩཡབྷཱཝོ ཝུཏྟོཏི ཝེདིཏབྦོ.

ཡསྨཱ ཝཱཏིཨཱདིནཱ ན ཀེཝལཾ ཝིཔཱཀསུཁཝེདནཱ ཨེཝ, ཏིསྶོཔི པན ཝེདནཱ ཝིཔཱཀཱ ཝིསེསེན ཏཎྷཱཡ ཨུཔནིསྶཡཔཙྩཡོ, ཨཝིསེསེན ཨིཏརཱ ཙཱཏི དསྶེཏི. ཨུཔེཀྑཱ པན སནྟཏྟཱ, སུཁམིཙྩེཝ བྷཱསིཏཱཏི ཏསྨཱ སཱཔི བྷིཡྻོ ཨིཙྪནཝསེན ཏཎྷཱཡ ཨུཔནིསྶཡོཏི ཨདྷིཔྤཱཡོ ¶ . ཨུཔེཀྑཱ པན ཨཀུསལཝིཔཱཀབྷཱུཏཱ ཨནིཊྛཏྟཱ དུཀྑེ ཨཝརོདྷེཏབྦཱ, ཨིཏརཱ ཨིཊྛཏྟཱ སུཁེཏི སཱ དུཀྑཾ ཝིཡ སུཁཾ ཝིཡ ཙ ཨུཔནིསྶཡོ ཧོཏཱིཏི སཀྐཱ ཝཏྟུནྟི. ‘‘ཝེདནཱཔཙྩཡཱ ཏཎྷཱ’’ཏི ཝཙནེན སབྦསྶ ཝེདནཱཝཏོ པཙྩཡསྶ ཨཏྠིཏཱཡ ཏཎྷུཔྤཏྟིཔྤསངྒེ ཏཾནིཝཱརཎཏྠམཱཧ ‘‘ཝེདནཱཔཙྩཡཱ ཙཱཔཱི’’ཏིཨཱདི.

ནནུ ‘‘ཨནུསཡསཧཱཡཱ ཝེདནཱ ཏཎྷཱཡ པཙྩཡོ ཧོཏཱི’’ཏི ཝཙནསྶ ཨབྷཱཝཱ ཨཏིཔྤསངྒནིཝཏྟནཾ ན སཀྐཱ ཀཱཏུནྟི? ན, ཝཊྚཀཐཱཡ པཝཏྟཏྟཱ. ཝཊྚསྶ ཧི ཨནུསཡཝིརཧེ ཨབྷཱཝཏོ ཨནུསཡསཧིཏཱཡེཝ པཙྩཡོཏི ཨཏྠཏོ ཝུཏྟམེཏཾ ཧོཏཱིཏི. ཨཐ ཝཱ ‘‘ཨཝིཛྫཱཔཙྩཡཱ’’ཏི ཨནུཝཏྟམཱནཏྟཱ ཨནུསཡསཧིཏཱཝ པཙྩཡོཏི ཝིཉྙཱཡཏི. ‘‘ཝེདནཱཔཙྩཡཱ ཏཎྷཱ’’ཏི ཙ ཨེཏྠ ཝེདནཱཔཙྩཡཱ ཨེཝ ཏཎྷཱ, ན ཝེདནཱཡ ཝིནཱཏི ཨཡཾ ནིཡམོ ཝིཉྙཱཡཏི, ན ཝེདནཱཔཙྩཡཱ ཏཎྷཱ ཧོཏི ཨེཝཱཏི, ཏསྨཱ ཨཏིཔྤསངྒོ ནཏྠི ཨེཝཱཏི.

ཝུསཱིམཏོཏི ཝུསིཏཝཏོ, ཝུསིཏབྲཧྨཙརིཡཝཱསསྶཱཏི ཨཏྠོ. ཝུསྶཏཱིཏི ཝཱ ‘‘ཝུསཱི’’ཏི མགྒོ ¶ ཝུཙྩཏི, སོ ཨེཏསྶ ཝུཏྠོ ཨཏྠཱིཏི ཝུསཱིམཱ. ཨགྒཕལཾ ཝཱ པརིནིཊྛིཏཝཱསཏྟཱ ‘‘ཝུསཱི’’ཏི ཝུཙྩཏི, ཏཾ ཨེཏསྶ ཨཏྠཱིཏི ཝུསཱིམཱ.

ཏཎྷཱཔདནིདྡེསཝཎྞནཱ ནིཊྛིཏཱ.

ཨུཔཱདཱནཔདནིདྡེསཝཎྞནཱ

༢༣༣. སསྶཏོ ཨཏྟཱཏི ཨིདཾ པུརིམདིཊྛིཾ ཨུཔཱདིཡམཱནཾ ཨུཏྟརདིཊྛིཾ ནིདསྶེཏུཾ ཝུཏྟཾ. ཡཐཱ ཧི ཨེསཱ དིཊྛི དལ༹ྷཱིཀརཎཝསེན པུརིམཾ ཨུཏྟརཱ ཨུཔཱདིཡཏི, ཨེཝཾ ‘‘ནཏྠི དིནྣ’’ནྟིཨཱདིཀཱཔཱིཏི. ཨཏྟགྒཧཎཾ པན ཨཏྟཝཱདུཔཱདཱནནྟི ན ཨིདཾ དིཊྛུཔཱདཱནདསྶནནྟི དཊྛབྦཾ. ལོཀོ ཙཱཏི ཝཱ ཨཏྟགྒཧཎཝིནིམུཏྟཾ གཧཎཾ དིཊྛུཔཱདཱནབྷཱུཏཾ ཨིདྷ པུརིམདིཊྛིཨུཏྟརདིཊྛིཝཙནེཧི ཝུཏྟནྟི ཝེདིཏབྦཾ. ‘‘དྷམྨསངྑེཔཝིཏྠཱརེ པན སངྑེཔཏོ ཏཎྷཱདལ༹ྷཏྟཾ, སངྑེཔཏོ དིཊྛིམཏྟམེཝ, ཝིཏྠཱརཏོ པནཱ’’ཏི ཨེཝཾ དྷམྨསངྑེཔཝིཏྠཱརཏོ སངྑེཔཾ ཝིཏྠཱརཉྩ ནིདྡྷཱརེཏཱིཏི. དྷམྨསངྑེཔཝིཏྠཱརེཏི ནིདྡྷཱརཎེ བྷུམྨཾ དཊྛབྦཾ.

པཀཏིཨཎུཨཱདཱིནཾ ¶ སསྶཏགཱཧཔུབྦངྒམོ, སརཱིརསྶ ཨུཙྪེདགྒཱཧཔུབྦངྒམོ ཙ ཏེསཾ སཱམིབྷཱུཏོ ཀོཙི སསྶཏོ ཨུཙྪིཛྫམཱནོ ཝཱ ཨཏྟཱ ཨཏྠཱིཏི ཨཏྟགྒཱཧོ ཀདཱཙི ཧོཏཱིཏི ‘‘ཡེབྷུཡྻེནཱ’’ཏི ཝུཏྟཾ. ཡེབྷུཡྻེན པཋམཾ ཨཏྟཝཱདུཔཱདཱནནྟིཨཱདིནཱ ཝཱ སམྦནྡྷོ.

ཡདིཔི བྷཝརཱགཛཝནཝཱིཐི སབྦཔཋམཾ པཝཏྟཏི གཧིཏཔྤཊིསནྡྷིཀསྶ བྷཝནིཀནྟིཡཱ པཝཏྟིཏབྦཏྟཱ, སོ པན བྷཝརཱགོ ཏཎྷཱདལ༹ྷཏྟཾ ན ཧོཏཱིཏི མཉྙམཱནོ ན ཀཱམུཔཱདཱནསྶ པཋམུཔྤཏྟིམཱཧ. ཏཎྷཱ ཀཱམུཔཱདཱནནྟི པན ཝིབྷཱགསྶ ཨཀརཎེ སབྦཱཔི ཏཎྷཱ ཀཱམུཔཱདཱནནྟི, ཀརཎེཔི ཀཱམརཱགཏོ ཨཉྙཱཔི ཏཎྷཱ དལ༹ྷབྷཱཝཾ པཏྟཱ ཀཱམུཔཱདཱནནྟི ཏསྶ ཨརཧཏྟམགྒཝཛ྄ཛྷཏཱ ཝུཏྟཱ.

ཨུཔྤཏྟིཊྛཱནབྷཱུཏཱ ཙིཏྟུཔྤཱདཱ ཝིསཡོ. པཉྩུཔཱདཱནཀྑནྡྷཱ ཨཱལཡོ, ཏཏྠ རམཏཱིཏི ཨཱལཡརཱམཱ ¶ , པཛཱ. ཏེནེཝ སཱ ཨཱལཡརཱམཏཱ ཙ སཀསནྟཱནེ པརསནྟཱནེ ཙ པཱཀཊཱ ཧོཏཱིཏི. ཨུཔནིསྶཡཝཙནེན ཨཱརམྨཎཱནནྟརཔཀཏཱུཔནིསྶཡཱ ཝུཏྟཱཏི ཨནནྟརཔཙྩཡཱདཱིནམྤི སངྒཧོ ཀཏོ ཧོཏི.

ཨུཔཱདཱནཔདནིདྡེསཝཎྞནཱ ནིཊྛིཏཱ.

བྷཝཔདནིདྡེསཝཎྞནཱ

༢༣༤. ཕལཝོཧཱརེན ཀམྨབྷཝོ བྷཝོཏི ཝུཏྟོཏི ཨུཔཔཏྟིབྷཝནིབྦཙནམེཝ དྭཡསྶཔི སཱདྷཱརཎཾ ཀཏྭཱ ཝདནྟོ ཨཱཧ ‘‘བྷཝཏཱིཏི བྷཝོ’’ཏི. བྷཝཾ གཙྪཏཱིཏི ནིཔྥཱདནཕལཝསེན ཨཏྟནོ པཝཏྟིཀཱལེ བྷཝཱབྷིམུཁཾ ཧུཏྭཱ པཝཏྟཏཱིཏི ཨཏྠོ, ནིབྦཏྟནམེཝ ཝཱ ཨེཏྠ གམནཾ ཨདྷིཔྤེཏཾ.

སཉྙཱཝཏཾ བྷཝོ སཉྙཱབྷཝོཏི ཨེཏྠ ཝནྟུ-སདྡསྶ ལོཔོ དཊྛབྦོ, ཏསྶ ཝཱ ཨཏྠེ ཨཀཱརཾ ཀཏྭཱ ‘‘སཉྙབྷཝོ’’ཏིཔི པཱཋོ. ཝོཀིརཱིཡཏི པསཱརཱིཡཏི ཝིཏྠཱརཱིཡཏཱིཏི ཝོཀཱརོ, ཝོཀིརཎཾ ཝཱ ཝོཀཱརོ, སོ ཨེཀསྨིཾ པཝཏྟཏྟཱ ཨེཀོ ཝོཀཱརོཏི ཝུཏྟོ, པདེསཔསཊུཔྤཏྟཱིཏི ཨཏྠོ.

ཙེཏནཱསམྤཡུཏྟཱ ¶ ཝཱ…པེ… སངྒཧིཏཱཏི ཨཱཙཡགཱམིཏཱཡ ཀམྨསངྑཱཏཏཾ དསྶེཏྭཱ ཀམྨབྷཝེ སངྒཧིཏབྷཱཝཾ པརིཡཱཡེན ཝདཏི, ནིཔྤརིཡཱཡེན པན ཙེཏནཱཝ ཀམྨབྷཝོ. ཝུཏྟཉྷི ‘‘ཀམྨབྷཝོ ཏཱིཧི ཁནྡྷེཧི ཨེཀེནཱཡཏནེན ཨེཀཱཡ དྷཱཏུཡཱ སམྤཡུཏྟོ, ཨེཀེན ཁནྡྷེན ཨེཀེནཱཡཏནེན ཨེཀཱཡ དྷཱཏུཡཱ ཀེཧིཙི སམྤཡུཏྟོ’’ཏི (དྷཱཏུ. ༢༤༤). ཨུཔཔཏྟིབྷཝོ ཏཱིཧིཔི ཏིཀེཧི ཝུཏྟཱ ཨུཔཔཏྟིཀྑནྡྷཱཝ. ཡཐཱཧ ‘‘ཨུཔཔཏྟིབྷཝོ ཀཱམབྷཝོ སཉྙཱབྷཝོ པཉྩཝོཀཱརབྷཝོ པཉྩཧི ཁནྡྷེཧི ཨེཀཱདསཧཱཡཏནེཧི སཏྟརསཧི དྷཱཏཱུཧི སངྒཧིཏོ’’ཏིཨཱདི (དྷཱཏུ. ༦༧). ཡདི ཧི ཨནུཔཱདིནྣཀཱནམྤི གཧཎཾ སིཡཱ, ‘‘དྭཱདསཧཱཡཏནེཧི ཨཊྛཱརསཧི དྷཱཏཱུཧཱི’’ཏི ཝཏྟབྦཾ སིཡཱཏི.

སངྑཱརབྷཝཱནཾ དྷམྨབྷེདཏོ ན སངྑཱརཱ ཨེཝ པུན ཝུཏྟཱཏི ‘‘སཱཏྠཀམེཝིདཾ པུནཝཙན’’ནྟི ཨེཏཾ ན ¶ ཡུཏྟནྟི ཙེ? ན, བྷཝེཀདེསབྷཱཝེན སངྑཱརཱནཾ བྷཝོཏི པུན ཝུཏྟཏྟཱ. པརེན ཝཱ དྷམྨཝིསེསཾ ཨགཎེཏྭཱ པུནཝཙནཾ ཙོདིཏནྟི ཙོདཀཱབྷིལཱསཝསེན ‘‘སཱཏྠཀམེཝིདཾ པུནཝཙན’’ནྟི ཝུཏྟཾ.

ཀཱམབྷཝཱདིནིབྦཏྟནཀསྶ ཀམྨསྶ ཀཱམབྷཝཱདིབྷཱཝོ ཕལཝོཧཱརེན ཨཊྛཀཐཱཡཾ ཝུཏྟོ. ཨནྟོགདྷེ ཝིསུཾ ཨགཎེཏྭཱ ཨབྦྷནྟརགཏེ ཨེཝ ཀཏྭཱ ཀཱམབྷཝཱདིཀེ ཀམྨུཔཔཏྟིབྷཝཝསེན དུགུཎེ ཀཏྭཱ ཨཱཧ ‘‘ཚ བྷཝཱ’’ཏི.

ཨཝིསེསེནཱཏི ཨུཔཱདཱནབྷེདཾ ཨཀཏྭཱཏི ཨཏྠོ. ཨུཔཱདཱནབྷེདཱཀརཎེནེཝ ཙ དྭཱདསཔྤབྷེདསྶ སངྒཧཝསེན སངྒཧཏོ ‘‘ཚ བྷཝཱ’’ཏི ཝུཏྟཾ.

གོསཱིལེན ཀུཀྐུརསཱིལེན ཙ སམཏྟེན སམཱདིནྣེན གུནྣཾ ཀུཀྐུརཱནཉྩ སཧབྱཏཱ ཝུཏྟཱཏི སཱིལབྦཏུཔཱདཱནཝཏོ ཛྷཱནབྷཱཝནཱ ན ཨིཛ྄ཛྷཏཱིཏི མཉྙམཱནཱ ཏེན རཱུཔཱརཱུཔབྷཝཱ ན ཧོནྟཱིཏི ཀེཙི ཝདནྟི, ཝཀྑམཱནེན པན པཀཱརེན པཙྩཡབྷཱཝཏོ ‘‘ཏཾ ན གཧེཏབྦ’’ནྟི ཨཱཧ. ཨསུདྡྷིམགྒེ ཙ སུདྡྷིམགྒཔརཱམསནཾ སཱིལབྦཏུཔཱདཱནནྟི སུདྡྷིམགྒཔརཱམསནེན རཱུཔཱརཱུཔཱཝཙརཛ྄ཛྷཱནཱནཾ ནིབྦཏྟནཾ ན ཡུཛྫཏཱིཏི. པུརཱཎབྷཱརཏསཱིཏཱཧརཎཔསུབནྡྷཝིདྷིཨཱདིསཝནཾ ཨསདྡྷམྨསཝནཾ. ཨཱདི-སདྡེན ཨསཔྤུརིསཱུཔནིསྶཡཾ པུབྦེ ¶ ཙ ཨཀཏཔུཉྙཏཾ ཨཏྟམིཙྪཱཔཎིདྷིཏཉྩ སངྒཎྷཱཏི. ཏདནྟོགདྷཱ ཨེཝཱཏི ཏསྨིཾ དུཙྩརིཏནིབྦཏྟེ སུཙརིཏནིབྦཏྟེ ཙ ཀཱམབྷཝེ ཨནྟོགདྷཱ ཨེཝཱཏི ཨཏྠོ.

ཨནྟོགདྷཱཏི ཙ སཉྙཱབྷཝཔཉྩཝོཀཱརབྷཝཱནཾ ཨེཀདེསེན ཨནྟོགདྷཏྟཱ ཝུཏྟཾ. ན ཧི ཏེ ནིརཝསེསཱ ཀཱམབྷཝེ ཨནྟོགདྷཱཏི. སཔྤབྷེདསྶཱཏི སུགཏིདུགྒཏིམནུསྶཱདིཔྤབྷེདཝཏོ. ཀམེན ཙ ཨཝཏྭཱ སཱིལབྦཏུཔཱདཱནསྶ ཨནྟེ བྷཝཔཙྩཡབྷཱཝཝཙནཾ ཨཏྟཝཱདུཔཱདཱནཾ ཝིཡ ཨབྷིཎྷཾ ཨསམུདཱཙརཎཏོ ཨཏྟཝཱདུཔཱདཱནནིམིཏྟཏྟཱ ཙ.

ཧེཏུཔཙྩཡཔྤབྷེདེཧཱིཏི ཨེཏྠ མགྒཔཙྩཡོ ཙ ཝཏྟབྦོ. དིཊྛུཔཱདཱནཱདཱིནི ཧི མགྒཔཙྩཡཱ ཧོནྟཱིཏི.

བྷཝཔདནིདྡེསཝཎྞནཱ ནིཊྛིཏཱ.

ཛཱཏིཛརཱམརཎཱདིཔདནིདྡེསཝཎྞནཱ

༢༣༥. ཨུཔཔཏྟིབྷཝུཔྤཏྟིཡེཝ ¶ ཛཱཏཱིཏི ཨཱཧ ‘‘ན ཨུཔཔཏྟིབྷཝོ’’ཏི. ཛཱཡམཱནསྶ པན ཛཱཏི ཛཱཏཱིཏི ཨུཔཔཏྟིབྷཝོཔི ཨསཏི ཨབྷཱཝཱ ཛཱཏིཡཱ པཙྩཡོཏི སཀྐཱ ཝཏྟུཾ. ཛཱཡམཱནརཱུཔཔདཊྛཱནཏཱཔི ཧི རཱུཔཛཱཏིཡཱ ཝུཏྟཱ ‘‘ཨུཔཙིཏརཱུཔཔདཊྛཱནོ (དྷ. ས. ཨཊྛ. ༦༤༡) ཨུཔཙཡོ, ཨནུཔྤབནྡྷརཱུཔཔདཊྛཱནཱ སནྟཏཱི’’ཏི.

ཁནྡྷཱནཾ ཛཱཏཱནཾ ཨུཉྙཱཏཏཱནུཉྙཱཏཏཱཙ ཧཱིནཔཎཱིཏཏཱ. ཨཱདི-སདྡེན སུཝཎྞདུབྦཎྞཱདིཝིསེསཾ སངྒཎྷཱཏི. ཨཛ྄ཛྷཏྟསནྟཱནགཏཏོ ཨཉྙསྶ ཝིསེསཀཱརཀསྶ ཀཱརཎསྶ ཨབྷཱཝཱ ‘‘ཨཛ྄ཛྷཏྟསནྟཱནེ’’ཏི ཨཱཧ.

ཏེན ཏེནཱཏི ཉཱཏིབྱསནཱདིནཱ ཛརཱམརཎཏོ ཨཉྙེན དུཀྑདྷམྨེན. ཨུཔནིསྶཡཀོཊིཡཱཏི ཨུཔནིསྶཡཾསེན, ཨུཔནིསྶཡལེསེནཱཏི ཨཏྠོ. ཡོ ཧི པཊྛཱནེ ཨནཱགཏོ སཏི བྷཱཝཱ ཨསཏི ཙ ཨབྷཱཝཱ སུཏྟནྟིཀཔརིཡཱཡེན ཨུཔནིསྶཡོ, སོ ‘‘ཨུཔནིསྶཡཀོཊཱི’’ཏི ཝུཙྩཏི.

ཛཱཏིཛརཱམརཎཱདིཔདནིདྡེསཝཎྞནཱ ནིཊྛིཏཱ.

བྷཝཙཀྐཀཐཱཝཎྞནཱ

༢༤༢. སམིཏནྟི ¶ སངྒཏཾ, ཨབྦོཙྪིནྣནྟི ཨཏྠོ. ཀཱམཡཱནསྶཱཏི ཀཱམཡམཱནསྶ, ཀཱམོ ཡཱནཾ ཨེཏསྶཱཏི ཝཱ ཀཱམཡཱནོ, ཏསྶ ཀཱམཡཱནསྶ. རུཔྤཏཱིཏི སོཀེན རུཔྤཏི.

པརིཡུཊྛཱནཏཱཡ ཏིཊྛནསཱིལོ པརིཡུཊྛཱནཊྛཱཡཱི. ‘‘པརིཡུཊྛཊྛཱཡིནོ’’ཏི ཝཱ པཱཋོ, ཏཏྠ པརིཡུཊྛཱཏཱིཏི པརིཡུཊྛཾ, དིཊྛིཔརིཡུཊྛཾ, ཏེན ཏིཊྛཏཱིཏི པརིཡུཊྛཊྛཱཡཱིཏི ཨཏྠོ དཊྛབྦོ. པཉྩ པུབྦནིམིཏྟཱནཱིཏི ‘‘མཱལཱ མིལཱཡནྟི, ཝཏྠཱནི ཀིལིསྶནྟི, ཀཙྪེཧི སེདཱ མུཙྩནྟི, ཀཱཡེ ཝེཝཎྞིཡཾ ཨོཀྐམཏི, དེཝོ དེཝཱསནེ ནཱབྷིརམཏཱི’’ཏི (ཨིཏིཝུ. ༨༣) ཝུཏྟཱནི པཉྩ མརཎཔུབྦནིམིཏྟཱནཱིཏི ཨཏྠོ. ཏཱནི ཧི དིསྭཱ ཀམྨནིབྦཏྟཀྑནྡྷསངྑཱཏེ ཨུཔཔཏྟིབྷཝེ བྷཝཚནྡབལེན ¶ དེཝཱནཾ བལཝསོཀོ ཨུཔྤཛྫཏཱིཏི. བཱལོཏི ཨཝིདྭཱ. ཏེན ཨཝིཛྫཱཡ ཀཱརཎབྷཱཝཾ དསྶེཏི. ཏིཝིདྷནྟི ཏསྶཱརུཔྤཀཐཱསཝནཀམྨཀཱརཎཱདསྶནམརཎཀཱལཀམྨོཔཊྛཱནནིདཱནཾ སོཀཱདིདུཀྑཾ. ཨཱསཝེ སཱདྷེནྟཱིཏི ཨཱསཝེ གམེནྟི བོདྷེནྟཱིཏི ཨཏྠོ.

ཨེཝཾ སཏཱིཏི ཨཝིདིཏཱདིཏཱཡ ཨནཱདིབྷཱཝེ སཏི. ཨཱདིམཏྟཀཐནནྟིཨཱདི ཨེཏསྶ ཨཏྠཱིཏི ཨཱདིམཾ, བྷཝཙཀྐཾ. ཏསྶ བྷཱཝོ ཨཱདིམཏྟཾ, ཏསྶ ཀཐནཾ ཨཱདིམཏྟཀཐནཾ. ཝིསེསནིཝཏྟིཨཏྠོ ཝཱ མཏྟ-སདྡོ, སཏི ཨནཱདིབྷཱཝེ ཨཝིཛྫཱ ཨཱདིམྷི མཛ྄ཛྷེ པརིཡོསཱནེ ཙ སབྦཏྠ སིཡཱཏི ཨཱདིམཏྟཱཡ ཨཝིཛྫཱཡ ཀཐནཾ ཝིརུཛ྄ཛྷཏཱིཏི ཨཏྠོ. ཨཝིཛྫཱགྒཧཎེནཱཏི ཨཝིཛྫཱཡ ཨུཔྤཱདནེན ཀཐནེན, ཨཔྤཧཱནེན ཝཱ, ཨཏྟནོ སནྟཱནེ སནྣིཧིཏབྷཱཝཀརཎེནཱཏི ཨཏྠོ. ཀམྨཱདཱིནཱིཏི ཀམྨཝིཔཱཀཝཊྚཱནི. ཝཊྚཀཱརཎབྷཱཝེན པདྷཱནཏྟཱ ‘‘པདྷཱནདྷམྨོ’’ཏི ཨཝིཛྫཱ ཀཐིཏཱ. ཝདཏཱིཏི ཝདོ. ཝེདེཏི, ཝེདིཡཏཱིཏི ཝཱ ཝེདེཡྻོ, སུཁཱདིཾ ཨནུབྷཝཏི, སབྦཝིསཡེ ཝཱ ཛཱནཱཏི, ‘‘སུཁིཏོ’’ཏིཨཱདིནཱ ཨཏྟནཱ པརེཧི ཙ ཛཱནཱཏི ཉཱཡཏི ཙཱཏི ཨཏྠོ. བྲཧྨཱདིནཱ ཝཱ ཨཏྟནཱ ཝཱཏི ཝཱ-སདྡོ ཙ-སདྡཏྠོ. ཏེནཱཧ ‘‘ཀཱརཀཝེདཀརཧིཏ’’ནྟི ཙ-སདྡཏྠསམཱསཾ.

དྭཱདསཝིདྷསུཉྙཏཱསུཉྙནྟི ཨཝིཛྫཱདཱིནཾ དྭཱདསཝིདྷཱནཾ སུཉྙཏཱཡ སུཉྙཾ, ཙཏུབྦིདྷམྤི ཝཱ སུཉྙཏཾ ཨེཀཾ ཀཏྭཱ དྭཱདསངྒཏཱཡ དྭཱདསཝིདྷཱཏི ཏཱཡ དྭཱདསཝིདྷཱཡ སུཉྙཏཱཡ སུཉྙནྟི ཨཏྠོ.

པུབྦནྟཱཧརཎཏོཏི ¶ པུབྦནྟཏོ པཙྩུཔྤནྣཝིཔཱཀསྶ ཨཱཧརཎཏོ པརིཙྪིནྣཝེདནཱཝསཱནཾ ཨེཏཾ བྷཝཙཀྐནྟི ཨཏྠོ. བྷཝཙཀྐེཀདེསོཔི ཧི བྷཝཙཀྐནྟི ཝུཙྩཏི. ཝེདནཱ ཝཱ ཏཎྷཱསཧཱཡཱཡ ཨཝིཛྫཱཡ པཙྩཡོ ཧོཏཱིཏི ཝེདནཱཏོ ཨཝིཛྫཱ, ཏཏོ སངྑཱརཱཏི སམྦཛ྄ཛྷནཏོ ཝེདནཱཝསཱནཾ བྷཝཙཀྐནྟི ཡུཏྟམེཏཾ, ཨེཝཾ ཏཎྷཱམཱུལཀེ ཙ ཡོཛེཏབྦཾ. དྭིནྣམྤི ཧི ཨཉྙམཉྙཾ ཨནུཔྤཝེསོ ཧོཏཱིཏི. ཨཝིཛྫཱ དྷམྨསབྷཱཝཾ པཊིཙྪཱདེཏྭཱ ཝིཔརཱིཏཱབྷིནིཝེསཾ ཀརོནྟཱི དིཊྛིཙརིཏེ སཾསཱརེ ནཡཏི, ཏེསཾ ཝཱ སཾསཱརཾ སངྑཱརཱདིཔཝཏྟིཾ ནཡཏི པཝཏྟེཏཱིཏི ‘‘སཾསཱརནཱཡིཀཱ’’ཏི ཝུཏྟཱ. ཕལུཔྤཏྟིཡཱཏི ཀཏྟུནིདྡེསོ. ཝིཉྙཱཎཱདིཔཙྩུཔྤནྣཕལུཔྤཏྟི ཧི ཨིདྷ དིཊྛཱ, ཨདིཊྛཱནཉྩ པུརིམབྷཝེ ཨཏྟནོ ཧེཏཱུནཾ ཨཝིཛྫཱསངྑཱརཱནཾ ཕལཾ ཨཛནེཏྭཱ ཨནུཔཙྪིཛྫནཾ པཀཱསེཏི. ཨཐ ཝཱ པུརིམབྷཝཙཀྐཾ དུཏིཡེན སམྦནྡྷཾ ཝུཏྟནྟི ཝེདནཱསངྑཱཏསྶ ཕལསྶ ཨུཔྤཏྟིཡཱ ཏཎྷཱདཱིནཾ ཧེཏཱུནཾ ཨནུཔཙྪེདཾ པཀཱསེཏི, ཏསྨཱ ཕལུཔྤཏྟིཡཱ ཀཱརཎབྷཱུཏཱཡ པཋམསྶ བྷཝཙཀྐསྶ ཧེཏཱུནཾ ཨནུཔཙྪེདཔྤཀཱསནཏོཏི ཨཏྠོ. སངྑཱརཱདཱིནམེཝ ཝཱ ཕལཱནཾ ཨུཔྤཏྟིཡཱ ¶ ཨཝིཛྫཱདཱིནཾ ཧེཏཱུནཾ ཕལཾ ཨཛནེཏྭཱ ཨནུཔཙྪེདམེཝ, ཝིཉྙཱཎཱདིཧེཏཱུནཾ ཝཱ སངྑཱརཱདཱིནཾ ཨནུབནྡྷནམེཝ པཀཱསེཏི པཋམཾ བྷཝཙཀྐཾ, ན དུཏིཡཾ ཝིཡ པརིཡོསཱནམྤཱིཏི ‘‘ཕལུཔྤཏྟིཡཱ ཧེཏཱུནཾ ཨནུཔཙྪེདཔྤཀཱསནཏོ’’ཏི ཝུཏྟཾ. ‘‘ཝིཉྙཱཎཔཙྩཡཱ ནཱམརཱུཔ’’ནྟི ཨེཏྠ ཨཔརིཔུཎྞཱཡཏནཀལལརཱུཔཾ ཝཏྭཱ ཏཏོ ཨུདྡྷཾ ‘‘ནཱམརཱུཔཔཙྩཡཱ སལཱ༹ཡཏན’’ནྟི སལཱ༹ཡཏནཔྤཝཏྟི ཝུཏྟཱཏི ཨཱཧ ‘‘ཨནུཔུབྦཔཝཏྟིདཱིཔནཏོ’’ཏི. ‘‘བྷཝཔཙྩཡཱ ཛཱཏཱི’’ཏི ཨེཏྠ ན ཨཱཡཏནཱནཾ ཀམེན ཨུཔྤཏྟི ཝུཏྟཱཏི ཨཱཧ ‘‘སཧུཔྤཏྟིདཱིཔནཏོ’’ཏི.

ཧེཏུཨཱདིཔུབྦཀཱ ཏཡོ སནྡྷཱི ཨེཏསྶཱཏི ཧེཏུཕལཧེཏུཔུབྦཀཏིསནྡྷི, བྷཝཙཀྐཾ. ཧེཏུཕལཧེཏུཕལཝསེན ཙཏུཔྤབྷེདོ ཨངྒཱནཾ སངྒཧོ ཨེཏསྶཱཏི ཙཏུབྷེདསངྒཧཾ. སརཱུཔཏོ ཨཝུཏྟཱཔི ཏསྨིཾ ཏསྨིཾ སངྒཧེ ཨཱཀིརཱིཡནྟི ཨཝིཛྫཱསངྑཱརཱདིགྒཧཎེཧི པཀཱསཱིཡནྟཱིཏི ཨཱཀཱརཱ, ཨཏཱིཏཧེཏུཨཱདཱིནཾ ཝཱ པཀཱརཱ ཨཱཀཱརཱ. ཀིལེསཀམྨཝིཔཱཀཱ ཝིཔཱཀཀིལེསཀམྨེཧི སམྦནྡྷཱ ཧུཏྭཱ པུནཔྤུནཾ པརིཝཏྟནྟཱིཏི ཏེསུ ཝཊྚནཱམཾ ཨཱརོཔེཏྭཱ ‘‘ཏིཝཊྚ’’ནྟི ཝུཏྟཾ, ཝཊྚེཀདེསཏྟཱ ཝཱ ‘‘ཝཊྚཱནཱི’’ཏི ཝུཏྟཱནི.

སནྡྷཱིནཾ ཨཱདིཔརིཡོསཱནཝཝཏྠིཏཱཏི སནྡྷཱིནཾ པུབྦཱཔརཝཝཏྠིཏཱཏི ཨཏྠོ.

‘‘ཡཱ ¶ ཀཱཙི ཝཱ པན ཙེཏནཱ བྷཝོ, ཙེཏནཱསམྤཡུཏྟཱ ཨཱཡཱུཧནསངྑཱརཱ’’ཏི ཨིདཾ ཨིམིསྶཱ དྷམྨཊྛིཏིཉཱཎབྷཱཛནཱིཡེ ཝུཏྟཱཡ པཊིསམྦྷིདཱཔཱལི༹ཡཱ (པཊི. མ. ༡.༤༧) ཝསེན ཝུཏྟཾ. ཨེཏྠ ཧི ‘‘ཙེཏནཱ བྷཝོ’’ཏི ཨཱགཏཱཏི. བྷཝནིདྡེསེ པན ‘‘སཱཏྠཏོ’’ཏི ཨེཏྠ ‘‘ཙེཏནཱཝ སངྑཱརཱ, བྷཝོ པན ཙེཏནཱསམྤཡུཏྟཱཔཱི’’ཏི ཝིབྷངྒཔཱལི༹ཡཱ ཝསེན དསྶིཏཾ. ‘‘ཏཏྠ ཀཏམོ པུཉྙཱབྷིསངྑཱརོ? ཀུསལཱ ཙེཏནཱ ཀཱམཱཝཙརཱ’’ཏིཨཱདིནཱ ཧི སངྑཱརཱནཾ ཙེཏནཱབྷཱཝོ ཝིབྷངྒཔཱལི༹ཡཾ (ཝིབྷ. ༢༢༦) ཝུཏྟོཏི. ཏཏྠ པཊིསམྦྷིདཱཔཱལི༹ཡཾ ‘‘ཙེཏནཱསམྤཡུཏྟཱ ཝིཔཱཀདྷམྨཏྟཱ སཝིཔཱཀེན ཨཱཡཱུཧནསངྑཱཏེན སངྑཏཱབྷིསངྑརཎཀིཙྩེན སངྑཱརཱ’’ཏི ཝུཏྟཱ. ཝིབྷངྒཔཱལི༹ཡཾ (ཝིབྷ. ༢༣༤) ‘‘སབྦམྤི བྷཝགཱམིཀམྨཾ ཀམྨབྷཝོ’’ཏི བྷཝསྶ པཙྩཡབྷཱཝེན བྷཝགཱམིབྷཱཝཏོ ཀམྨསཾསཊྛསཧཱཡཏཱཡ ཀམྨབྷཱཝཏོ ཙ ཨུཔཔཏྟིབྷཝཾ བྷཱཝེནྟཱིཏི བྷཝོཏི ཝུཏྟཱ, ཨུཔཔཏྟིབྷཝབྷཱཝནཀིཙྩཾ པན ཙེཏནཱཡ སཱཏིསཡནྟི པཊིསམྦྷིདཱཔཱལི༹ཡཾ ཙེཏནཱ ‘‘བྷཝོ’’ཏི ཝུཏྟཱ, བྷཝཱབྷིསངྑརཎཀིཙྩཾ ཙེཏནཱཡ སཱཏིསཡནྟི ཝིབྷངྒཔཱལི༹ཡཾ ‘‘ཀུསལཱ ཙེཏནཱ’’ཏིཨཱདིནཱ ཙེཏནཱ ‘‘སངྑཱརཱ’’ཏི ཝུཏྟཱ, ཏསྨཱ ཏེན ཏེན པརིཡཱཡེན ཨུབྷཡཾ ཨུབྷཡཏྠ ཝཏྟུཾ ཡུཏྟནྟི ནཏྠེཏྠ ཝིརོདྷོ ¶ . གཧཎནྟི ཀཱམུཔཱདཱནཾ ཀིཙྩེནཱཧ. པརཱམསནནྟི ཨིཏརཱནི. ཨཱཡཱུཧནཱཝསཱནེཏི ཏཱིསུཔི ཨཏྠཝིཀཔྤེསུ ཝུཏྟསྶ ཨཱཡཱུཧནསྶ ཨཝསཱནེ.

དྭཱིསུ ཨཏྠཝིཀཔྤེསུ ཝུཏྟེ ཨཱཡཱུཧནསངྑཱརེ ‘‘ཏསྶ པུབྦབྷཱགཱ’’ཏི ཨཱཧ, ཏཏིཡེ ཝུཏྟེ ‘‘ཏཾསམྤཡུཏྟཱ’’ཏི. དཧརསྶ ཙིཏྟཔྤཝཏྟི བྷཝངྒབཧུལཱ ཡེབྷུཡྻེན བྷཝནྟརཛནཀཀམྨཱཡཱུཧནསམཏྠཱ ན ཧོཏཱིཏི ‘‘ཨིདྷ པརིཔཀྐཏྟཱ ཨཱཡཏནཱན’’ནྟི ཝུཏྟཾ. ཀམྨཀརཎཀཱལེ སམྨོཧོཏི ཨེཏེན ཀམྨསྶ པཙྩཡབྷཱུཏཾ སམྨོཧཾ དསྶེཏི, ན ཀམྨསམྤཡུཏྟམེཝ.

ཀམྨཱནེཝ ཝིཔཱཀཾ སམྦྷརནྟི ཝཌྜྷེནྟཱིཏི ཀམྨསམྦྷཱརཱ, ཀམྨཾ ཝཱ སངྑཱརབྷཝཱ, ཏདུཔཀཱརཀཱནི ཨཝིཛྫཱཏཎྷུཔཱདཱནཱནི ཀམྨསམྦྷཱརཱ, པཊིསནྡྷིདཱཡཀོ ཝཱ བྷཝོ ཀམྨཾ, ཏདུཔཀཱརཀཱ ཡཐཱཝུཏྟཨཱཡཱུཧནསངྑཱརཱ ཨཝིཛྫཱདཡོ ཙ ཀམྨསམྦྷཱརཱཏི ཀམྨཉྩ ཀམྨསམྦྷཱརཱ ཙ ཀམྨསམྦྷཱརཱཏི ཨེཀསེསཾ ཀཏྭཱ ‘‘ཀམྨསམྦྷཱརཱ’’ཏི ཨཱཧ. དས དྷམྨཱ ཀམྨནྟི ཨཝིཛྫཱདཡོཔི ཀམྨསཧཱཡཏཱཡ ཀམྨསརིཀྑཀཱ ཏདུཔཀཱརཀཱ ཙཱཏི ‘‘ཀམྨ’’ནྟི ཝུཏྟཱ.

སངྑིཔྤནྟི ¶ ཨེཏྠ ཨཝིཛྫཱདཡོ ཝིཉྙཱཎཱདཡོ ཙཱཏི སངྑེཔོ, ཀམྨཾ ཝིཔཱཀོ ཙ. ཀམྨཾ ཝིཔཱཀོཏི ཨེཝཾ སངྑིཔཱིཡཏཱིཏི ཝཱ སངྑེཔོ, ཨཝིཛྫཱདཡོ ཝིཉྙཱཎཱདཡོ ཙ. སངྑེཔབྷཱཝསཱམཉྙེན པན ཨེཀཝཙནཾ ཀཏནྟི དཊྛབྦཾ. སངྑེཔསདྡོ ཝཱ བྷཱགཱདྷིཝཙནནྟི ཀམྨབྷཱགོ ཀམྨསངྑེཔོ.

ཨེཝཾ སམུཔྤནྣནྟི ཀམྨཏོ ཝིཔཱཀོ. ཏཏྠཱཔི ཨཝིཛྫཱཏོ སངྑཱརཱཏི ཨེཝཾ སམུཔྤནྣཾ, ཏིསནྡྷིཨཱདིཝསེན ཝཱ སམུཔྤནྣཾ ཨིདཾ བྷཝཙཀྐནྟི ཨཏྠོ. ཨིཏྟརནྟི གམནདྷམྨཾ, ཝིནསྶདྷམྨནྟི ཨཏྠོ. ཏེན ཨུཔྤཱདཝཡཝནྟཏཱདཱིཔཀེན ཨནིཙྩ-སདྡེན ཝིཀཱརཱཔཏྟིདཱིཔཀེན ཙལ-སདྡེན ཙ ཨདཱིཔིཏཾ ཀཱལནྟརཊྛཱཡིཏཱཔཊིཀྑེཔཾ དཱིཔེཏི, ཨདྷུཝནྟི ཨེཏེན ཐིརབྷཱཝཔཊིཀྑེཔཾ ནིསྶཱརཏཾ. ཧེཏཱུ ཨེཝ སམྦྷཱརཱ ཧེཏུསམྦྷཱརཱ. ‘‘ཋཱནསོ ཧེཏུསོ’’ཏི ཨེཏྠ ཨེཝཾ ཝུཏྟཾ ཝཱ ཋཱནཾ, ཨཉྙམྤི ཏསྶ ཏསྶ སཱདྷཱརཎཾ ཀཱརཎཾ སམྦྷཱརོ, ཨསཱདྷཱརཎཾ ཧེཏུ. ཨེཝནྟི ཨེཝཾ ཧེཏུཏོ དྷམྨམཏྟསམྦྷཝེ ཧེཏུནིརོདྷཱ ཙ ཝཊྚུཔཙྪེདེ དྷམྨེ ཙ ཏཾནིརོདྷཱཡ དེསིཏེ སཏཱིཏི ཨཏྠོ. བྲཧྨཙརིཡཾ ཨིདྷ བྲཧྨཙརིཡིདྷ. སཏྟེ ཙཱཏི ཨེཏྠ ཙ-སདྡོ ཨེཝཾ བྲཧྨཙརིཡཉྩ ཝིཛྫཏི, སསྶཏུཙྪེདཱ ཙ ན ཧོནྟཱིཏི སམུཙྩཡཏྠོ. ཨེཝཉྷི ¶ ཧེཏུཨཱཡཏྟེ དྷམྨམཏྟསམྦྷཝེ སཏྟོ ནུཔལབྦྷཏི, ཏསྨིཉྩ ཨུཔལབྦྷནྟེ སསྶཏོ ཨུཙྪེདོ ཝཱ སིཡཱ, ནུཔལབྦྷནྟེ ཏསྨིཾ ནེཝུཙྪེདོ ན སསྶཏནྟི ཝུཏྟཾ ཧོཏི.

སཙྩཔྤབྷཝཏོཏི སཙྩཏོ, སཙྩཱནཾ ཝཱ པབྷཝཏོ. ཀུསལཱཀུསལཾ ཀམྨནྟི ཝཊྚཀཐཱཡ ཝཏྟམཱནཏྟཱ སཱསཝནྟི ཝིཉྙཱཡཏི. ཨཝིསེསེནཱཏི ཙེཏནཱ ཙེཏནཱསམྤཡུཏྟཀཱཏི ཝིསེསཾ ཨཀཏྭཱ སབྦམྤི ཏཾ ཀུསལཱཀུསལཾ ཀམྨཾ ‘‘སམུདཡསཙྩ’’ནྟི ཝུཏྟནྟི ཨཏྠོ. ‘‘ཏཎྷཱ ཙ…པེ… ཨཝསེསཱ ཙ སཱསཝཱ ཀུསལཱ དྷམྨཱ’’ཏི ཧི ཙེཏནཱཙེཏནཱསམྤཡུཏྟཝིསེསཾ ཨཀཏྭཱ ཝུཏྟནྟི, ཨརིཡསཙྩཝིསེསཾ ཝཱ ཨཀཏྭཱ སམུདཡསཙྩནྟི ཝུཏྟནྟི ཨཏྠོ.

ཝཏྠཱུསཱུཏི ཨཱརམྨཎེསུ, ཙཀྑཱདཱིསུ ཝཱ པཊིཙྪཱདེཏབྦེསུ ཝཏྠཱུསུ. སོཀཱདཱིནཾ ཨདྷིཊྛཱནཏྟཱཏི ཏེསཾ ཀཱརཎཏྟཱ, ཏེཧི སིདྡྷཱཡ ཨཝིཛྫཱཡ སཧིཏེཧི སངྑཱརེཧི པཙྩཡོ ཙ ཧོཏི བྷཝནྟརཔཱཏུབྷཱཝཱཡཱཏི ཨདྷིཔྤཱཡོ. ཙུཏིཙིཏྟཾ ཝཱ པཊིསནྡྷིཝིཉྙཱཎསྶ ཨནནྟརཔཙྩཡོ ཧོཏཱིཏི ‘‘པཙྩཡོ ཙ ཧོཏི བྷཝནྟརཔཱཏུབྷཱཝཱཡཱ’’ཏི ཝུཏྟཾ ¶ . ཏཾ པན ཙུཏིཙིཏྟཾ ཨཝིཛྫཱསངྑཱརརཧིཏཾ བྷཝནྟརསྶ པཙྩཡོ ན ཧོཏཱིཏི ཏསྶ སཧཱཡདསྶནཏྠམཱཧ ‘‘སོཀཱདཱིནཾ ཨདྷིཊྛཱནཏྟཱ’’ཏི. དྭིདྷཱཏི ཨཏྟནོཡེཝ སརསེན དྷམྨནྟརཔཙྩཡབྷཱཝེན ཙཱཏི དྭིདྷཱ.

ཨཝིཛྫཱཔཙྩཡཱ སངྑཱརཱཏི ཨེཏེན སངྑཱརཱནཾ པཙྩཡུཔྤནྣཏཱདསྶནེན ‘‘ཀོ ནུ ཁོ ཨབྷིསངྑརོཏཱིཏི ཨེས ནོ ཀལློ པཉྷོ’’ཏི དསྶེཏི. ཏེནེཏཾ ཀཱརཀདསྶནནིཝཱརཎནྟི. ཨེཝམཱདིདསྶནནིཝཱརཎནྟི ཨེཏེན ‘‘སོཙཏི པརིདེཝཏི དུཀྑིཏོ’’ཏིཨཱདིདསྶནནིཝཱརཎམཱཧ. སོཀཱདཡོཔི ཧི པཙྩཡཱཡཏྟཱ ཨཝསཝཏྟིནོཏི ‘‘ཛཱཏིཔཙྩཡཱ ཛརཱམརཎཾ སོཀ…པེ… སམྦྷཝནྟཱི’’ཏི ཨེཏེན ཝུཏྟནྟི.

གཎྜབྷེདཔཱིལ༹ཀཱ ཝིཡཱཏི གཎྜབྷེདནཏྠཾ པཙྩམཱནེ གཎྜེ ཏསྶཔི ཨུཔརི ཛཱཡམཱནཁུདྡཀཔཱིལ༹ཀཱ ཝིཡ, གཎྜསྶ ཝཱ ཨནེཀདྷཱབྷེདེ པཱིལ༹ཀཱ ཝིཡ. གཎྜཝིཀཱརཱ སཱུནཏཱསརཱགཔུབྦགཧཎཱདཡོ.

པཊལཱབྷིབྷཱུཏཙཀྑུཀོ རཱུཔཱནི ན པསྶཏི, ཀིཉྩིཔི པསྶནྟོ ཙ ཝིཔརཱིཏཾ པསྶཏི, ཨེཝཾ ཨཝིཛྫཱབྷིབྷཱུཏོ དུཀྑཱདཱིནི ན པཊིཔཛྫཏི ན པསྶཏི, མིཙྪཱ ཝཱ པཊིཔཛྫཏཱིཏི པཊལཾ ཝིཡ ཨཝིཛྫཱ ¶ , ཀིམིནཱ ཝིཡ ཨཏྟནཱ ཀཏཏྟཱ ཝཊྚསྶ ཨཏྟནོཡེཝ པརིབྦྷམནཀཱརཎཏྟཱ ཙ ཀོསཔྤདེསཱ ཝིཡ སངྑཱརཱ, སངྑཱརཔརིགྒཧཾ ཝིནཱ པཏིཊྛཾ ཨལབྷམཱནཾ ཝིཉྙཱཎཾ པརིཎཱཡཀཔརིགྒཧཾ ཝིནཱ པཏིཊྛཾ ཨལབྷམཱནོ རཱཛཀུམཱརོ ཝིཡཱཏི པརིགྒཧེན ཝིནཱ པཏིཊྛཱལཱབྷོ ཨེཏྠ སཱམཉྙཾ. ཨུཔཔཏྟིནིམིཏྟནྟི ཀམྨཱདིཨཱརམྨཎམཱཧ. པརིཀཔྤནཏོཏི ཨཱརམྨཎཀརཎཏོ, སམྤཡུཏྟེན ཝཱ ཝིཏཀྐེན ཝིཏཀྐནཏོ. དེཝམནུསྶམིགཝིཧངྒཱདིཝིཝིདྷཔྤཀཱརཏཱཡ མཱཡཱ ཝིཡ ནཱམརཱུཔཾ, པཏིཊྛཱཝིསེསེན ཝུཌྜྷིཝིསེསཱཔཏྟིཏོ ཝནཔྤགུམྦོ ཝིཡ སལཱ༹ཡཏནཾ. ཨཱཡཏནཱནཾ ཝིསཡིཝིསཡབྷཱུཏཱནཾ ཨཉྙམཉྙཱབྷིམུཁབྷཱཝཏོ ཨཱཡཏནགྷཊྚནཏོ. ཨེཏྠ ཙ སངྑཱརཱདཱིནཾ ཀོསཔྤདེསཔརིཎཱཡཀཱདཱིཧི དྭཱིཧི དྭཱིཧི སདིསཏཱཡ དྭེ དྭེ ཨུཔམཱ ཝུཏྟཱཏི དཊྛབྦཱ.

གམྦྷཱིརོ ཨེཝ ཧུཏྭཱ ཨོབྷཱསཏི པཀཱསཏི དིསྶཏཱིཏི གམྦྷཱིརཱཝབྷཱསོ. ཛཱཏིཔཙྩཡསམྦྷཱུཏསམུདཱགཏཊྛོཏི ཛཱཏིཔཙྩཡཱ སམྦྷཱུཏཾ ཧུཏྭཱ སཧིཏསྶ ཨཏྟནོ པཙྩཡཱནུརཱུཔསྶ ཨུདྡྷཾ ཨུདྡྷཾ ཨཱགཏབྷཱཝོ, ཨནུཔྤབནྡྷོཏི ཨཏྠོ. ཨཐ ཝཱ སམྦྷཱུཏཊྛོ ཙ སམུདཱགཏཊྛོ ཙ སམྦྷཱུཏསམུདཱགཏཊྛོ. ‘‘ན ཛཱཏིཏོ ཛརཱམརཎཾ ན ཧོཏི, ན ཙ ཛཱཏིཾ ཝིནཱ ¶ ཨཉྙཏོ ཧོཏཱི’’ཏི ཧི ཛཱཏིཔཙྩཡསམྦྷཱུཏཊྛོ ཝུཏྟོ. ཨིཏྠཉྩ ཛཱཏིཏོ སམུདཱགཙྪཏཱིཏི པཙྩཡསམུདཱགཏཊྛོ, ཡཱ ཡཱ ཛཱཏི ཡཐཱ ཡཐཱ པཙྩཡོ ཧོཏི, ཏདནུརཱུཔཔཱཏུབྷཱཝོཏི ཨཏྠོ.

ཨནུལོམཔཊིལོམཏོཏི ཨིདྷ པན པཙྩཡུཔྤཱདཱ པཙྩཡུཔྤནྣུཔྤཱདསངྑཱཏཾ ཨནུལོམཾ, ནིརོདྷཱ ནིརོདྷསངྑཱཏཾ པཊིལོམཉྩཱཧ. ཨཱདིཏོ པན ཨནྟགམནཾ ཨནུལོམཾ, ཨནྟཏོ ཙ ཨཱདིགམནཾ པཊིལོམམཱཧཱཏི. ‘‘ཨིམེ ཙཏྟཱརོ ཨཱཧཱརཱ ཀིཾནིདཱནཱ’’ཏིཨཱདིཀཱཡ (སཾ. ནི. ༢.༡༡) ཝེམཛ྄ཛྷཏོ པཊྛཱཡ པཊིལོམདེསནཱཡ, ‘‘ཙཀྑུཾ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎཾ, ཏིཎྞཾ སངྒཏི ཕསྶོ, ཕསྶཔཙྩཡཱ ཝེདནཱ’’ཏིཨཱདིཀཱཡ (སཾ. ནི. ༢.༤༣-༤༤; ༢.༤.༦༠) ཨནུལོམདེསནཱཡ ཙ དྭིསནྡྷིཏིསངྑེཔཾ, ‘‘སཾཡོཛནཱིཡེསུ, བྷིཀྑཝེ, དྷམྨེསུ ཨསྶཱདཱནུཔསྶིནོ ཝིཧརཏོ ཏཎྷཱ པཝཌྜྷཏི, ཏཎྷཱཔཙྩཡཱ ཨུཔཱདཱན’’ནྟིཨཱདཱིསུ (སཾ. ནི. ༢.༥༣-༥༤) ཨེཀསནྡྷིདྭིསངྑེཔཾ.

ཨཝིཛྫཱདཱིནཾ སབྷཱཝོ པཊིཝིཛ྄ཛྷཱིཡཏཱིཏི པཊིཝེདྷོ. ཝུཏྟཉྷི ‘‘ཏེསཾ ཏེསཾ ཝཱ ཏཏྠ ཏཏྠ ཝུཏྟདྷམྨཱནཾ པཊིཝིཛ྄ཛྷིཏབྦོ སལཀྑཎསངྑཱཏོ ཨཝིཔརཱིཏསབྷཱཝོ པཊིཝེདྷོ’’ཏི (དྷ. ས. ཨཊྛ. ནིདཱནཀཐཱ). ཨཔུཉྙཱབྷིསངྑཱརེཀདེསོ སརཱགོ, ཨཉྙོ ཝིརཱགོ, རཱགསྶ ཝཱ ཨཔཊིཔཀྑབྷཱཝཏོ ¶ རཱགཔྤཝཌྜྷཀོ སབྦོཔི ཨཔུཉྙཱབྷིསངྑཱརོ སརཱགོ, ཨིཏརོ པཊིཔཀྑབྷཱཝཏོ ཝིརཱགོ. ‘‘དཱིགྷརཏྟཉྷེཏཾ, བྷིཀྑཝེ, ཨསྶུཏཝཏོ པུཐུཛྫནསྶ ཨཛ྄ཛྷོསིཏཾ མམཱཡིཏཾ པརཱམཊྛཾ ‘ཨེཏཾ མམ, ཨེསོཧམསྨི, ཨེསོ མེ ཨཏྟཱ’’ཏི (སཾ. ནི. ༢.༦༢) ཨཏྟཔརཱམཱསསྶ ཝིཉྙཱཎཾ ཝིསིཊྛཾ ཝཏྠུ ཝུཏྟནྟི ཝིཉྙཱཎསྶ སུཉྙཏཊྛོ གམྦྷཱིརོ, ཨཏྟཱ ཝིཛཱནཱཏི སཾསརཏཱིཏི སབྱཱཔཱརཏཱསངྐནྟིཨབྷིནིཝེསབལཝཏཱཡ ཨབྱཱཔཱརཊྛཨསངྐནྟིཔཊིསནྡྷིཔཱཏུབྷཱཝཊྛཱ ཙ གམྦྷཱིརཱ, ནཱམསྶ རཱུཔེན, རཱུཔསྶ ཙ ནཱམེན ཨསམྤཡོགཏོ ཝིནིབྦྷོགོ, ནཱམསྶ ནཱམེན ཨཝིནིབྦྷོགོ ཡོཛེཏབྦོ. ཨེཀུཔྤཱདེཀནིརོདྷེཧི ཨཝིནིབྦྷོགེ ཨདྷིཔྤེཏེ རཱུཔསྶ ཙ རཱུཔེན ལབྦྷཏི. ཨཐ ཝཱ ཨེཀཙཏུཝོཀཱརབྷཝེསུ ནཱམརཱུཔཱནཾ ཨསཧཝཏྟནཏོ ཨཉྙམཉྙཝིནིབྦྷོགོ, པཉྩཝོཀཱརབྷཝེ སཧཝཏྟནཏོ ཨཝིནིབྦྷོགོ ཙ ཝེདིཏབྦོ.

ཨདྷིཔཏིཡཊྛོ ¶ ནཱམ ཨིནྡྲིཡཔཙྩཡབྷཱཝོ. ‘‘ལོཀོཔེསོ དྭཱརཱཔེསཱ ཁེཏྟམྤེཏ’’ནྟི (དྷ. ས. ༥༩༨-༥༩༩) ཝུཏྟཱ ལོཀཱདིཨཏྠཱ ཙཀྑཱདཱིསུ པཉྩསུ ཡོཛེཏབྦཱ. མནཱཡཏནསྶཔི ལུཛྫནཏོ མནོསམྥསྶཱདཱིནཾ དྭཱརཁེཏྟབྷཱཝཏོ ཙ ཨེཏེ ཨཏྠཱ སམྦྷཝནྟེཝ. ཨཱཔཱཐགཏཱནཾ རཱུཔཱདཱིནཾ པཀཱསནཡོགྱཏཱལཀྑཎཾ ཨོབྷཱསནཾ ཙཀྑཱདཱིནཾ ཝིསཡིབྷཱཝོ, མནཱཡཏནསྶ ཝིཛཱནནཾ. སངྒྷཊྚནཊྛོ ཝིསེསེན ཙཀྑུསམྥསྶཱདཱིནཾ པཉྩནྣཾ, ཨིཏརེ ཚནྣམྤི ཡོཛེཏབྦཱ. ཕུསནཉྩ ཕསྶསྶ སབྷཱཝོ, སངྒྷཊྚནཾ རསོ, ཨིཏརེ ཨུཔཊྛཱནཱཀཱརཱ. ཨཱརམྨཎརསཱནུབྷཝནཊྛོ རསཝསེན ཝུཏྟོ, ཝེདཡིཏཊྛོ ལཀྑཎཝསེན. ཨཏྟཱ ཝེདཡཏཱིཏི ཨབྷིནིཝེསསྶ བལཝཏཱཡ ནིཛྫཱིཝཊྛོ ཝེདནཱཡ གམྦྷཱིརོ. ནིཛྫཱིཝཱཡ ཝེདནཱཡ ཝེདཡིཏཾ ནིཛྫཱིཝཝེདཡིཏཾ, ནིཛྫཱིཝཝེདཡིཏམེཝ ཨཏྠོ ནིཛྫཱིཝཝེདཡིཏཊྛོ.

ཨཱདཱནཊྛོ ཙཏུནྣམྤི ཨུཔཱདཱནཱནཾ སམཱནོ, གཧཎཊྛོ ཀཱམུཔཱདཱནསྶ, ཨིཏརེསཾ ཏིཎྞཾ ཨབྷིནིཝེསཱདིཨཏྠོ. ‘‘དིཊྛིཀནྟཱརོ’’ཏི ཧི ཝཙནཏོ དིཊྛཱིནཾ དུརཏིཀྐམནཊྛོཔཱིཏི. དལ༹ྷགཧཎཏྟཱ ཝཱ ཙཏུནྣམྤི དུརཏིཀྐམནཊྛོ ཡོཛེཏབྦོ. ཡོནིགཏིཋིཏིནིཝཱསེསུཁིཔནནྟི སམཱསེ བྷུམྨཝཙནསྶ ཨལོཔོ དཊྛབྦོ, ཏསྨཱ ཏེན ཨཱཡཱུཧནཱབྷིསངྑརཎཔདཱནཾ སམཱསོ ཧོཏི. ཛརཱམརཎངྒཾ མརཎཔྤདྷཱནནྟི མརཎཊྛཱ ཨེཝ ཁཡཱདཡོ གམྦྷཱིརཱ དསྶིཏཱ. ནཝནཝཱནཉྷི པརིཀྑཡེན ཁཎྜིཙྩཱདིཔརིཔཀྐཔྤཝཏྟི ཛརཱཏི, ཁཡཊྛོ ཝཱ ཛརཱཡ ཝུཏྟོཏི དཊྛབྦོ. ནཝབྷཱཝཱཔགམོ ཧི ཁཡོཏི ཝཏྟུཾ ཡུཏྟོཏི. ཝིཔརིཎཱམཊྛོ དྭིནྣམྤི. སནྟཏིཝསེན ཝཱ ཛརཱཡ ཁཡཝཡབྷཱཝོ, སམྨུཏིཁཎིཀཝསེན མརཎསྶ བྷེདཝིཔརིཎཱམཏཱ ཡོཛེཏབྦཱ.

ཨཏྠནཡཱཏི ¶ ཨཏྠཱནཾ ནཡཱ. ཨཝིཛྫཱདིཨཏྠེཧི ཨེཀཏྟཱདཱི སེན བྷཱཝེན ནཱིཡནྟི གམྨེནྟཱིཏི ཨེཀཏྟཱདཡོ ཏེསཾ ནཡཱཏི ཝུཏྟཱ. ནཱིཡནྟཱིཏི ཧི ནཡཱཏི. ཨཏྠཱ ཨེཝ ཝཱ ཨེཀཏྟཱདིབྷཱཝེན ནཱིཡམཱནཱ ཉཱཡམཱནཱ ‘‘ཨཏྠནཡཱ’’ཏི ཝུཏྟཱ. ནཱིཡནྟི ཨེཏེཧཱིཏི ཝཱ ནཡཱ, ཨེཀཏྟཱདཱིཧི ཙ ཨཏྠཱ ‘‘ཨེཀ’’ནྟིཨཱདིནཱ ནཱིཡནྟི, ཏསྨཱ ཨེཀཏྟཱདཡོ ཨཏྠཱནཾ ནཡཱཏི ཨཏྠནཡཱ. སནྟཱནཱནུཔཙྪེདེན བཱིཛཾ རུཀྑབྷཱཝཾ པཏྟཾ རུཀྑབྷཱཝེན པཝཏྟནྟི ཨེཀཏྟེན ཝུཙྩཏཱིཏི སནྟཱནཱནུཔཙྪེདོ ཨེཀཏྟཾ, ཨེཝམིདྷཱཔི ཨཝིཛྫཱདཱིནཾ སནྟཱནཱནུཔཙྪེདོ ཨེཀཏྟནྟི དསྶེཏི.

བྷིནྣསནྟཱནསྶེཝཱཏི ¶ སམྦནྡྷརཧིཏསྶ ནཱནཏྟསྶ གཧཎཏོ སཏྟནྟརོ ཨུཙྪིནྣོ སཏྟནྟརོ ཨུཔྤནྣོཏི གཎྷནྟོ ཨུཙྪེདདིཊྛིམུཔཱདིཡཏི.

ཡཏོ ཀུཏོཙཱིཏི ཡདི ཨཉྙསྨཱ ཨཉྙསྶུཔྤཏྟི སིཡཱ, ཝཱལིཀཏོ ཏེལསྶ, ཨུཙྪུཏོ ཁཱིརསྶ ཀསྨཱ ཨུཔྤཏྟི ན སིཡཱ, ཏསྨཱ ན ཀོཙི ཀསྶཙི ཧེཏུ ཨཏྠཱིཏི ཨཧེཏུཀདིཊྛིཾ, ཨཝིཛྫམཱནེཔི ཧེཏུམྷི ནིཡཏཏཱཡ ཏིལགཱཝཱིསུཀྐསོཎིཏཱདཱིཧི ཏེལཁཱིརསརཱིརཱདཱིནི པཝཏྟནྟཱིཏི ནིཡཏིཝཱདཉྩ ཨུཔཱདིཡཏཱིཏི ཝིཉྙཱཏབྦཾ ཡཐཱརཧཾ.

ཀསྨཱ? ཡསྨཱ ཨིདཉྷི བྷཝཙཀྐཾ ཨཔདཱལེཏྭཱ སཾསཱརབྷཡམཏཱིཏོ ན ཀོཙི སུཔིནནྟརེཔི ཨཏྠཱིཏི སམྦནྡྷོ. དུརབྷིཡཱནནྟི དུརཏིཀྐམཾ. ཨསནིཝིཙཀྐམིཝཱཏི ཨསནིམཎྜལམིཝ. ཏཉྷི ནིམྨཐནམེཝ, ནཱནིམྨཐནཾ པཝཏྟམཱནཾ ཨཏྠི, ཨེཝཾ བྷཝཙཀྐམྤི ཨེཀནྟཾ དུཀྑུཔྤཱདནཏོ ‘‘ནིཙྩནིམྨཐན’’ནྟི ཝུཏྟཾ.

ཉཱཎཱསིནཱ ཨཔདཱལེཏྭཱ སཾསཱརབྷཡཾ ཨཏཱིཏོ ནཏྠཱིཏི ཨེཏསྶ སཱདྷཀཾ དསྶེནྟོ ཨཱཧ ‘‘ཝུཏྟམྤི ཙེཏ’’ནྟིཨཱདི. ཏནྟཱུནཾ ཨཱཀུལཀཾ ཏནྟཱཀུལཀཾ, ཏནྟཱཀུལཀམིཝ ཛཱཏཱ ཏནྟཱཀུལཀཛཱཏཱ, ཀིལེསཀམྨཝིཔཱཀེཧི ཨཏཱིཝ ཛཊིཏཱཏི ཨཏྠོ. གུཎཱཡ སཀུཎིཡཱ ནཱིཌཾ གུཎཱགུཎྜིཀཾ. ཝཌྜྷིཨབྷཱཝཏོ ཨཔཱཡཾ དུཀྑགཏིབྷཱཝཏོ དུགྒཏིཾ སུཁསམུསྶཡཏོ ཝིནིཔཱཏཏྟཱ ཝིནིཔཱཏཉྩ ཙཏུབྦིདྷཾ ཨཔཱཡཾ, ‘‘ཁནྡྷཱནཉྩ པཊིཔཱཊཱི’’ཏིཨཱདིནཱ ཝུཏྟཾ སཾསཱརཉྩ ནཱཏིཝཏྟཏི. སཾསཱརོ ཨེཝ ཝཱ སབྦོ ཨིདྷ ཝཌྜྷིཨཔགམཱདཱིཧི ཨཏྠེཧི ཨཔཱཡཱདིནཱམཀོ ཝུཏྟོ ཀེཝལཾ དུཀྑཀྑནྡྷབྷཱཝཏོ.

བྷཝཙཀྐཀཐཱཝཎྞནཱ ནིཊྛིཏཱ.

སུཏྟནྟབྷཱཛནཱིཡཝཎྞནཱ ནིཊྛིཏཱ.

༢. ཨབྷིདྷམྨབྷཱཛནཱིཡཝཎྞནཱ

༢༤༣. པཐཝཱིཨཱཀཱསཱ ¶ ཝིཡ པཊིཙྩསམུཔྤཱདོ མཧཱཔཏྠཊཝིཏྠཱརིཏཱནཾ ཨཏྠཱནཾ པརིཀཔྤཝསེན ཀཐིཏོ. ཏཉྷི ཨཔཏྠཊཾ ཨཝིཏྠཏཉྩ པཐཝིཾ ཨཱཀཱསཉྩ པཏྠརནྟོ ཝིཏྠཱརཡནྟོ ཝིཡ ཙ ཨེཀེཀཙིཏྟཱཝརུདྡྷཾ ཨཀཏྭཱ ¶ སབྦསཏྟསབྦཙིཏྟསཱདྷཱརཎཝསེན པཏྠཊཝིཏྠཏཾ ཀཏྭཱ སུཏྟནྟབྷཱཛནཱིཡེན བྷགཝཱ དསྶེཏི. ཏཏྠ ནཱནཱཙིཏྟཝསེནཱཏི ཨསཧཛཱཏཱནཾ སཧཛཱཏཱནཉྩ པཙྩཡཔཙྩཡུཔྤནྣཱནཾ ནཱནཱཙིཏྟགཏཱནཾ དསྶིཏབྷཱཝཾ སནྡྷཱཡ ཝུཏྟཾ. ནཝ མཱུལཔདཱནི ཨེཏེསནྟི ནཝམཱུལཔདཱ, ནཡཱ. ‘‘ཨེཀེཀེན ནཡེན ཙཏུནྣཾ ཙཏུནྣཾ ཝཱརཱནཾ སངྒཧིཏཏྟཱ’’ཏི ཝུཏྟཾ, ཨེཏྠ ‘‘ཨེཀེཀེན ཙཏུཀྐེནཱ’’ཏི ཝཏྟབྦཾ. ནཡཙཏུཀྐཝཱརཱ ཧི ཨེཏྠ ཝཝཏྠིཏཱ དསྶིཏཱནཾ ཙཏུཀྐཱནཾ ནཡབྷཱཝཱཏི.

༡. པཙྩཡཙཏུཀྐཝཎྞནཱ

ཨཝིཛྫཾ ཨངྒཾ ཨགྒཧེཏྭཱ ཏཏོ པརཾ ‘‘ཨཝིཛྫཱཔཙྩཡཱ སངྑཱརོ’’ཏིཨཱདཱིནི པཙྩཡསཧིཏཱནི པཙྩཡུཔྤནྣཱནི ཨངྒབྷཱཝེན ཝུཏྟཱནཱིཏི ཨཱཧ ‘‘ན, ཏསྶ ཨནངྒཏྟཱ’’ཏི. ཨེཝཉྩ ཀཏྭཱ ནིདྡེསེ (ཝིབྷ. ༢༢༦) ‘‘ཏཏྠ ཀཏམཱ ཨཝིཛྫཱ’’ཏི ཨཝིཛྫཾ ཝིསུཾ ཝིསྶཛྫེཏྭཱ ‘‘ཏཏྠ ཀཏམོ ཨཝིཛྫཱཔཙྩཡཱ སངྑཱརོ’’ཏིཨཱདིནཱ ཏཾཏཾཔཙྩཡཝནྟོ སངྑཱརཱདཡོ ཝིསྶཛྫིཏཱཏི. ཏཱིསུ པཀཱརེསུ པཋམཔཋམཝཱརོ དུཏིཡཝཱརཱདཱིསུ པཝིསནྟོ པཙྩཡཝིསེསཱདིསབྦནཱནཏྟསཱདྷཱརཎཏྟཱ ཏེ ཝཱརཝིསེསེ གཎྷཱཏཱིཏི ‘‘སབྦསངྒཱཧཀོ’’ཏི ཝུཏྟོ. པཋམཝཱརོ ཨེཝ ཧི ན ཀེཝལཾ ཚཊྛཱཡཏནམེཝ, ཨཐ ཁོ ནཱམཉྩ ཕསྶསྶ པཙྩཡོ, ནཱམཾ ཝཱ ན ཀེཝལཾ ཚཊྛཱཡཏནསྶེཝ, ཨཐ ཁོ ཕསྶསྶཱཔཱིཏི པཙྩཡཝིསེསདསྶནཏྠཾ, ཡེན ཨཏྠཝིསེསེན མཧཱནིདཱནསུཏྟདེསནཱ པཝཏྟཱ, ཏཾདསྶནཏྠཉྩ ཚཊྛཱཡཏནངྒཾ པརིཧཱཔེཏྭཱ ཝུཏྟོཏི ཏསྶ དུཏིཡཝཱརེ ཙ པཝེསོ ཝུཏྟོ, ན སབྦངྒསམོརོདྷཏོ.

ཡཏྠཱཏི ཝཱརཙཏུཀྐེ ཨེཀེཀཝཱརེ ཙ. ཨཉྙཐཱཏི སུཏྟནྟབྷཱཛནཱིཡཏོ ཨཉྙཐཱ སངྑཱརོཏི ཝུཏྟཾ. ཨཝུཏྟནྟི ‘‘རཱུཔཾ སལཱ༹ཡཏན’’ནྟི, ཏེསུཔི ཙ ཝཱརེསུ ཙཏཱུསུཔི སོཀཱདཡོ ཨཝུཏྟཱ སུཏྟནྟབྷཱཛནཱིཡེསུ ཝུཏྟཱ. ཏཏྠ ཙ ཝུཏྟམེཝ ཨིདྷ ‘‘ཚཊྛཱཡཏན’’ནྟི ཨཉྙཐཱ ཝུཏྟནྟི དཊྛབྦཾ.

སབྦཊྛཱནསཱདྷཱརཎཏོཏི ¶ ཝུཏྟནཡེན སབྦཝཱརསཱདྷཱརཎཏོ, སབྦཝིཉྙཱཎཔཝཏྟིཊྛཱནབྷཝསཱདྷཱརཎཏོ ཝཱ. ཝིནཱ ཨབྷཱཝེན ཝིཉྙཱཎསྶ ཁནྡྷཏྟཡམྤི སམཱནཾ ཕལཾ པཙྩཡོ ཙཱཏི ཨཱཧ ‘‘ཨཝིསེསེནཱ’’ཏི. ‘‘ཏིཎྞཾ སངྒཏི ཕསྶོ’’ཏི (མ. ནི. ༡.༢༠༤; སཾ. ནི. ༢.༤༣) ཝཙནཏོ པན ཝིཉྙཱཎཾ ཕསྶསྶ ཝིསེསཔཙྩཡོཏི ཏསྶ ཕསྶོ ཝིསིཊྛཾ ཕལཾ, སཏིཔི པཙྩཡསམྤཡུཏྟཱནཾ ཨཱཧཱརཔཙྩཡབྷཱཝེ མནོསཉྩེཏནཱཡ ཝིཉྙཱཎཱཧརཎཾ ཝིསིཊྛཾ ཀིཙྩནྟི སངྑཱརོ ཙསྶ ཝིསིཊྛོ པཙྩཡོ. ཨཙིཏྟཀྑཎམཏྟཱནཱིཏི ¶ ཙིཏྟཀྑཎཔྤམཱཎརཧིཏཱནི. ཏསྶཏྠོཏི ཏསྶ ཝུཏྟསྶ ཨཝིཛྫཱདིཀསྶ ཨཏྠོ སུཏྟནྟབྷཱཛནཱིཡཝཎྞནཱཡཾ ཝུཏྟནཡེནེཝ ཝེདིཏབྦོ.

ཧེཏུཀཱདཱིནཱིཏི ཨེཏྠ ཡསྨིཾ ཙཏུཀྐེ ཧེཏུཀ-སདྡོ ཝུཏྟོ, ཏཾ ཧེཏུཀ-སདྡསཧཙརིཏཏྟཱ ‘‘ཧེཏུཀ’’ནྟི ཝུཏྟནྟི ཝེདིཏབྦཾ. ཧེཏུ-སདྡོ གཏིསཱུཙཀོ ཨཝིགཏཏཱ ཙ ཝིགཏཏཱནིཝཱརཎཝསེན གཏི ཨེཝ ཧོཏཱིཏི ཧེཏུཀཙཏུཀྐཾ ཨཝིགཏཔཙྩཡཝསེན ཝུཏྟནྟི ཝུཏྟཾ.

ཏིདྷཱ ཙཏུདྷཱ པཉྩདྷཱ ཝཱཏི ཝཱ-སདྡོ ‘‘ཚདྷཱ ཝཱ’’ཏིཔི ཝིཀཔྤེཏཱིཏི དཊྛབྦོ. སམཱདྷི ཧི སཱདྷཱརཎེཧི ཏཱིཧི ཛྷཱནིནྡྲིཡམགྒཔཙྩཡེཧི ཙ པཙྩཡོཏི. ཨུཔཱདཱནཾ བྷཝསྶ མགྒཔཙྩཡེན ཙཱཏི སཏྟདྷཱཏི ཀཱམུཔཱདཱནཝཛྫཱནཾ ཝསེན ཝདཏི. ཀཱམུཔཱདཱནཾ པན ཡཐཱ བྷཝསྶ པཙྩཡོ ཧོཏི, སོ པཀཱརོ ཏཎྷཱཡཾ ཝུཏྟོ ཨེཝཱཏི ན ཝུཏྟོ.

ཨིམསྨིཾ ཙཏུཀྐེ སཧཛཱཏཔཙྩཡེན པཙྩཡཱ ཧོནྟཱིཏི ཝཙནཝསེནཱཏི ཨདྷིཔྤཱཡོ. ཨཏྠོ ཧི ན ཀཏྠཙི ཨཏྟནོ པཙྩཡུཔྤནྣསྶ ཡཐཱསཀེཧི པཙྩཡོ ན ཧོཏི, སཧཛཱཏཔཙྩཡཝསེནེཝ པན ཨིམསྶ ཙཏུཀྐསྶ ཝུཏྟཏྟཱ སོཡེཝེཏྠ ཧོཏཱིཏི ཝདནྟི. པཋམཝཱརོཏི པཋམཙཏུཀྐོཏི ཨེཝཾ ཝཏྟབྦཾ. བྷཝཱདཱིནཾ ཏཐཱ ཨབྷཱཝནྟི ཡདི སཧཛཱཏཔཙྩཡཝསེནེཝ པཋམཙཏུཀྐོ ཝུཏྟོ, བྷཝོ ཛཱཏིཡཱ, ཛཱཏི ཙ མརཎསྶ སཧཛཱཏཔཙྩཡོ ན ཧོཏཱིཏི ཡཐཱ ཨཝིགཏཙཏུཀྐཱདཱིསུ ‘‘བྷཝཔཙྩཡཱ ཛཱཏི བྷཝཧེཏུཀཱ’’ཏིཨཱདི ན ཝུཏྟཾ བྷཝཱདཱིནཾ ཨཝིགཏཱདིཔཙྩཡཏཱཡ ཨབྷཱཝཏོ, ཨེཝམིདྷཱཔི ‘‘བྷཝཔཙྩཡཱ ཛཱཏཱི’’ཏིཨཱདི ན ཝཏྟབྦཾ སིཡཱ. པཙྩཡཝཙནམེཝ ཧི ཏེསཾ སཧཛཱཏསཱུཙཀཾ ཨཱཔནྣཾ ཨཝིགཏཙཏུཀྐཱདཱིསུ ཝིཡ ཨིདྷ པཙྩཡཝིསེསསཱུཙཀསྶ ཝཙནནྟརསྶ ཨབྷཱཝཱ, ན ཙ ཏཾ ན ཝུཏྟཾ, ན ཙ བྷཝཱདཡོ སཧཛཱཏཔཙྩཡཱ ཧོནྟི, ཏསྨཱ ན སཧཛཱཏཔཙྩཡཝསེནེཝཱཡཾ ཙཏུཀྐོ ཝུཏྟོ. སེསཔཙྩཡཱནཉྩ སམྦྷཝནྟི ཨིདཾ ‘‘བྷཝཱདཱིན’’ནྟི ཨེཏེན ¶ སཧ ཨཡོཛེཏྭཱ སཱམཉྙེན ཨཝིཛྫཱདཱིནཾ སཧཛཱཏེན སཧ སེསཔཙྩཡབྷཱཝཱནཉྩ སམྦྷཝཾ སནྡྷཱཡ ཝུཏྟཾ. ཨཡཉྷེཏྠ ཨཏྠོ – པཙྩཡཝིསེསསཱུཙཀསྶ ཝཙནནྟརསྶ ཨབྷཱཝཱ སཧཛཱཏཏོ ཨཉྙེ པཙྩཡབྷཱཝཱ ཨཝིཛྫཱདཱིནཾ ན སམྦྷཝནྟཱིཏི སཧཛཱཏཔཙྩཡཝསེནེཝཱཡཾ ཙཏུཀྐོ ¶ ཨཱརདྡྷོཏི ཝུཙྩེཡྻ, ན ཙ ཏེ ན སམྦྷཝནྟི, ཏསྨཱ ནཱཡཾ ཏཐཱ ཨཱརདྡྷོཏི.

‘‘མཧཱནིདཱནསུཏྟནྟེ ཨེཀཱདསངྒིཀོ པཊིཙྩསམུཔྤཱདོ ཝུཏྟོ’’ཏི ཝུཏྟཾ, ཏཏྠ པན ‘‘ནཱམརཱུཔཔཙྩཡཱ ཝིཉྙཱཎཾ, ཝིཉྙཱཎཔཙྩཡཱ ནཱམརཱུཔཾ, ནཱམཔཙྩཡཱ ཕསྶོ’’ཏིཨཱདིནཱ (དཱི. ནི. ༢.༩༧) དྭིཀྑཏྟུཾ ཨཱགཏེ ནཱམརཱུཔེ ཨེཀདྷཱ གཧིཏེ ནཝངྒིཀོ, དྭིདྷཱ གཧིཏེ དསངྒིཀོ ཝུཏྟོ, ཨཉྙཏྠ པན ཝུཏྟེསུ ཨཝིཛྫཱསངྑཱརེསུ ཨདྡྷཏྟཡདསྶནཏྠཾ ཡོཛིཡམཱནེསུ ཨེཀཱདསངྒིཀོ ཧོཏཱིཏི ཀཏྭཱ ཨེཝཾ ཝུཏྟནྟི དཊྛབྦཾ. མཧཱནིདཱནསུཏྟནྟདེསནཱཡ པརིགྒཧཏྠནྟི ཏཏྠ ཧི ཙཀྑཱཡཏནཱདཱིནི ཝིཡ རཱུཔེ ཚཊྛཱཡཏནཉྩ ནཱམེ ཨནྟོགདྷཾ ཀཏྭཱ ཕསྶསྶ ནིརཝསེསརཱུཔཔཙྩཡཾ ཝིཡ ནིརཝསེསནཱམཔཙྩཡཉྩ དསྶེཏུཾ ‘‘ནཱམརཱུཔཔཙྩཡཱ ཕསྶོ’’ཏི ཝུཏྟཾ, ཨེཝམིདྷཱཔི ཏཏྠ དསྶིཏཝིསེསདསྶནེན ཏཾདེསནཱཔརིགྒཧཏྠཾ ཨེཀཙིཏྟཀྑཎིཀེ པཊིཙྩསམུཔྤཱདེ ཚཊྛཱཡཏནཾ ནཱམནྟོགདྷཾ ཀཏྭཱ ‘‘ནཱམཔཙྩཡཱ ཕསྶོ’’ཏི ཝུཏྟནྟི ཨཏྠོ.

རཱུཔཔྤཝཏྟིདེསཾ སནྡྷཱཡ དེསིཏཏྟཱ ‘‘ཨིམསྶཱ’’ཏི ཝཙནསེསོ, ན པུརིམཱནནྟི, ཏེནེཝ ‘‘ཨཡཉྷཱི’’ཏིཨཱདིམཱཧ.

ཡོནིཝསེན ཨོཔཔཱཏིཀཱནནྟི ཙེཏྠ སཾསེདཛཡོནིཀཱཔི པརིཔུཎྞཱཡཏནབྷཱཝེན ཨོཔཔཱཏིཀསངྒཧཾ ཀཏྭཱ ཝུཏྟཱཏི དཊྛབྦཱ. པདྷཱནཱཡ ཝཱ ཡོནིཡཱ སབྦཔརིཔུཎྞཱཡཏནཡོནིཾ དསྶེཏུཾ ‘‘ཨོཔཔཱཏིཀཱན’’ནྟི ཝུཏྟཾ. ཨེཝཾ སངྒཧནིདསྶནཝསེནེཝ ཧི དྷམྨཧདཡཝིབྷངྒེཔི (ཝིབྷ. ༡༠༠༩) ‘‘ཨོཔཔཱཏིཀཱནཾ པེཏཱན’’ནྟིཨཱདིནཱ ཨོཔཔཱཏིཀགྒཧཎམེཝ ཀཏཾ, ན སཾསེདཛགྒཧཎནྟི. ཨེཀཙིཏྟཀྑཎེ ཚཧཱཡཏནེཧི ཕསྶསྶ པཝཏྟི ནཏྠི, ན ཙེཀསྶ ཨཀུསལཕསྶསྶ ཚཊྛཱཡཏནཝཛྫཾ ཨཱཡཏནཾ སམཱནཀྑཎེ པཝཏྟམཱནཾ པཙྩཡབྷཱུཏཾ ཨཏྠི, ཨཱརམྨཎཔཙྩཡོ ཙེཏྠ པཝཏྟཀོ ན ཧོཏཱིཏི ན གཡ྄ཧཏི, ཏསྨཱ ‘‘སལཱ༹ཡཏནཔཙྩཡཱ ཕསྶོ’’ཏི ན སཀྐཱ ཝཏྟུནྟི དསྶནཏྠཾ ‘‘ཡསྨཱ པནེསོ’’ཏིཨཱདིམཱཧ.

པུརིམཡོནིདྭཡེ སམྦྷཝནྟམྤི ཀེསཉྩི སལཱ༹ཡཏནཾ ཀལལཱདིཀཱལེ ན སམྦྷཝཏཱིཏི ‘‘སདཱ ཨསམྦྷཝཏོ’’ཏི ¶ ཨཱཧ. པཙྪིམཡོནིདྭཡེ པན ཡེསཾ ¶ སམྦྷཝཏི, ཏེསཾ སདཱ སམྦྷཝཏཱིཏི. ཨིཏོཏི ཨིམསྨཱ ཙཏུཀྐཏོ, ནཡཏོ ཝཱ, ཡོ ཝིསེསོ.

པཙྩཡཙཏུཀྐཝཎྞནཱ ནིཊྛིཏཱ.

༢. ཧེཏུཙཏུཀྐཝཎྞནཱ

༢༤༤. ཛཱཏིཀྑཎམཏྟེ ཨེཝ ཨབྷཱཝཏོཏི ཏཏོ ཨུདྡྷཾ བྷཱཝཏོཏི ཨཏྠོ. ཨཝིགཏཔཙྩཡནིཡམཱབྷཱཝཏོ བྷཝེ ཨུཔཱདཱནཧེཏུཀགྒཧཎཾ ན ཀཏཾ, ཨབྷཱཝཏོ ཨཝིགཏཔཙྩཡསྶ ཛཱཏིཨཱདཱིསུ བྷཝཧེཏུཀཱདིགྒཧཎཾ ན ཀཏནྟི ཡོཛེཏབྦཾ. ཡཐཱ པན ཡཱཝ ཝཏྠུ, ཏཱཝ ཨནུཔལབྦྷམཱནསྶ ཝིཉྙཱཎསྶ ཝཏྠུ ཨཝིགཏཔཙྩཡོ ཧོཏི ཝིཉྙཱཎཏོ ཨུདྡྷཾ པཝཏྟནཀམྤི, ཨེཝཾ ཨུཔཱདཱནཾ བྷཝསངྒཧིཏཱནཾ ཛཱཏིཨཱདཱིནཾ, བྷཝོ ཙ ཛཱཏིཡཱ ཨཝིགཏཔཙྩཡོ སིཡཱ. ཨཐ ན སིཡཱ, སངྑཱརཀྑནྡྷེ ཛཱཏིཨཱདཱིནཾ སངྒཧིཏཏྟཱ ཝིཉྙཱཎཾ ནཱམསྶ, ནཱམཉྩ ཨཏཀྑཎིཀསམྦྷཝཱ ཚཊྛཱཡཏནསྶ ཨཝིགཏཔཙྩཡོ ན སིཡཱཏི ཨིདྷ ཝིཡ ཏཏྠཱཔི ཧེཏུཀགྒཧཎཾ ན ཀཏྟབྦཾ སིཡཱ, ཏསྨཱ ཡཱཝ ཨུཔཱདཱནཾ, ཏཱཝ ཛཱཏིཨཱདཱིནཾ ཨནུཔལབྦྷོ, ཛཱཏིཀྑཎམཏྟེ ཨེཝ བྷཝསྶ ཨབྷཱཝོ ཙ ཀཱརཎནྟི ན སཀྐཱ ཀཱཏུཾ. སངྑཏལཀྑཎཱནཾ པན ཛཱཏིཨཱདཱིནཾ ཨསབྷཱཝདྷམྨཱནཾ བྷཝེན སངྒཧིཏཏྟཱ ཨསབྷཱཝདྷམྨསྶ ཙ པརམཏྠཏོ བྷཝནྟརསྶ ཨབྷཱཝཏོ ཧེཏུཨཱདིཔཙྩཡཱ ན སནྟཱིཏི བྷཝསྶ ཨུཔཱདཱནཾ ན ནིཡམེན ཨཝིགཏཔཙྩཡོ, བྷཝོ པན ཛཱཏིཡཱ, ཛཱཏི ཛརཱམརཎསྶ ནེཝ ཨཝིགཏཔཙྩཡོཏི ཨཝིགཏཔཙྩཡནིཡམཱབྷཱཝཏོ ཨབྷཱཝཏོ ཙ ཨཝིགཏཔཙྩཡསྶ བྷཝཱདཱིསུ ཧེཏུཀགྒཧཎཾ ན ཀཏནྟི ཡུཏྟཾ.

ནནུ ཨེཝཾ ‘‘ནཱམཾ ཝིཉྙཱཎཧེཏུཀཾ ཚཊྛཱཡཏནཾ ནཱམཧེཏུཀ’’ནྟི ཝཙནཾ ན ཝཏྟབྦཾ. ན ཧི ནཱམསངྒཧིཏཱནཾ ཛཱཏིཨཱདཱིནཾ ཨཝིགཏཔཙྩཡོ ཨཉྙསྶ ཨཝིགཏཔཙྩཡབྷཱཝོ ཙ ཨཏྠི ཨསབྷཱཝདྷམྨཏྟཱཏི? ན, ཏེསཾ ནཱམེན ཨསངྒཧིཏཏྟཱ. ནམནཀིཙྩཔརིཙྪིནྣཉྷི ནཱམཾ, ཏཉྩ ཀིཙྩཾ སབྷཱཝདྷམྨཱནམེཝ ཧོཏཱིཏི སབྷཱཝདྷམྨབྷཱུཏཱ ཨེཝ ཏཡོ ཁནྡྷཱ ‘‘ནཱམ’’ནྟི ཝུཏྟཱ, ཏསྨཱ ཏཏྠ ཧེཏུཀགྒཧཎཾ ཡུཏྟཾ, ཨིདྷ པན བྷཝཏཱིཏི བྷཝོ, ན ཙ ཛཱཏིཨཱདཱིནི ན བྷཝནྟི ‘‘བྷཝཔཙྩཡཱ ¶ ཛཱཏི སམྦྷཝཏི, ཛཱཏིཔཙྩཡཱ ཛརཱམརཎཾ སམྦྷཝཏཱི’’ཏི ཡོཛནཏོ ¶ , ཏསྨཱ སངྑརཎཏོ སངྑཱརེ ཝིཡ བྷཝནཏོ བྷཝེ ཛཱཏིཨཱདཱིནི སངྒཧིཏཱནཱིཏི ནིཡམཱབྷཱཝཱབྷཱཝེཧི ཡཐཱཝུཏྟེཧི ཧེཏུཀགྒཧཎཾ ན ཀཏནྟི.

ཀེཙི པནཱཏིཨཱདིནཱ རེཝཏཏྠེརམཏཾ ཝདཏི. ཨརཱུཔཀྑནྡྷཱ ཧི ཨིདྷ བྷཝོཏི ཨཱགཏཱ. ཝུཏྟཉྷི ‘‘ཏཏྠ ཀཏམོ ཨུཔཱདཱནཔཙྩཡཱ བྷཝོ, ཋཔེཏྭཱ ཨུཔཱདཱནཾ ཝེདནཱཀྑནྡྷོ…པེ… ཝིཉྙཱཎཀྑནྡྷོ’’ཏི (ཝིབྷ. ༢༤༩).

‘‘ཝཏྟབྦཔདེསཱབྷཱཝཏོ’’ཏི ཝུཏྟཾ, སཏིཔི པན པདེསེ ཨུཔཱདཱནཾ ཝིཡ སབྷཱཝཱནི ཛཱཏིཨཱདཱིནི ན ཧོནྟཱིཏི ཋཔེཏབྦསྶ བྷཱཝནྟརསྶ ཨབྷཱཝཏོ ཨེཝ ཋཔནཾ ན ཀཱཏབྦནྟི ཡུཏྟཾ. ཛཱཡམཱནཱནཾ པན ཛཱཏི, ཛཱཏཱནཉྩ ཛརཱམརཎནྟི ‘‘བྷཝཔཙྩཡཱ ཛཱཏི, ཛཱཏིཔཙྩཡཱ ཛརཱམརཎ’’ནྟི (ཝིབྷ. ༢༢༥) ཝུཏྟཾ. ཡཐཱ པན ‘‘ནཱམཔཙྩཡཱ ཕསྶོཏི ཏཏྠ ཀཏམཾ ནཱམཾ? ཋཔེཏྭཱ ཕསྶཾ ཝེདནཱཀྑནྡྷོ…པེ… ཝིཉྙཱཎཀྑནྡྷོ. ཨིདཾ ཝུཙྩཏི ནཱམ’’ནྟི (ཝིབྷ. ༢༥༩), ‘‘ནཱམརཱུཔཔཙྩཡཱ སལཱ༹ཡཏནནྟི ཨཏྠི ནཱམཾ ཨཏྠི རཱུཔཾ. ཏཏྠ ཀཏམཾ ནཱམཾ? ཝེདནཱཀྑནྡྷོ སཉྙཱཀྑནྡྷོ སངྑཱརཀྑནྡྷོ. ཨིདཾ ཝུཙྩཏི ནཱམཾ. ཏཏྠ ཀཏམཾ རཱུཔཾ? ཙཏྟཱརོ མཧཱབྷཱུཏཱ ཡཉྩ རཱུཔཾ ནིསྶཱཡ མནོདྷཱཏུ མནོཝིཉྙཱཎདྷཱཏུ ཝཏྟཏི, ཨིདཾ ཝུཙྩཏི རཱུཔ’’ནྟི (ཝིབྷ. ༢༦༡) ཙ ཡཾ ནཱམརཱུཔཉྩ ཕསྶསྶ སལཱ༹ཡཏནསྶ པཙྩཡོ, ཏསྶ ཝཏྟབྦཔདེསོ ནིདྡིཊྛོ, ཨེཝཾ ཡོ བྷཝོ ཛཱཏིཡཱ པཙྩཡོ, ཏསྶཔི ཋཔེཏབྦགཧེཏབྦཝིསེསེ སཏི ན སཀྐཱ ཝཏྟབྦཔདེསོ ནཏྠཱིཏི ཝཏྟུནྟི.

ཧེཏུཙཏུཀྐཝཎྞནཱ ནིཊྛིཏཱ.

༤. ཨཉྙམཉྙཙཏུཀྐཝཎྞནཱ

༢༤༦. ནིཔྤདེསཏྟཱ བྷཝེན ཨུཔཱདཱནཾ སངྒཧིཏནྟི པཙྩཡུཔྤནྣསྶ ཨུཔཱདཱནསྶ ཝིསུཾ ཋིཏསྶ ཨབྷཱཝཱ ‘‘བྷཝཔཙྩཡཱཔི ཨུཔཱདཱན’’ནྟི ན སཀྐཱ ཝཏྟུནྟི དསྶེཏུཾ ‘‘ཡསྨཱ པན བྷཝོ ¶ ནིཔྤདེསོ’’ཏིཨཱདིམཱཧ. ཨེཝཾ སཏི ‘‘ནཱམཔཙྩཡཱཔི ཝིཉྙཱཎ’’ནྟི ན ཝཏྟབྦཾ སིཡཱ, ནཱམཾ པན པཙྩཡུཔྤནྣབྷཱུཏཾ པཙྩཡབྷཱུཏཉྩ སཔྤདེསམེཝ གཧིཏནྟི ཨདྷིཔྤཱཡོ. ཡཐཱ པན ‘‘ནཱམཔཙྩཡཱ ཚཊྛཱཡཏནཾ, ནཱམཔཙྩཡཱ ཕསྶོ’’ཏིཨཱདཱིསུ (ཝིབྷ. ༡༥༠-༡༥༤) པཙྩཡུཔྤནྣཾ ཋཔེཏྭཱ ནཱམཾ ¶ གཧིཏཾ, ཨེཝཾ ‘‘བྷཝཔཙྩཡཱཔི ཨུཔཱདཱན’’ནྟི ཨིདྷཱཔི པཙྩཡུཔྤནྣཾ ཋཔེཏྭཱ བྷཝསྶ གཧཎཾ ན ན སཀྐཱ ཀཱཏུཾ, ཏསྨཱ ཨུཔཱདཱནསྶ ཨཝིགཏཔཙྩཡནིཡམཱབྷཱཝོ ཝིཡ ཨཉྙམཉྙཔཙྩཡནིཡམཱབྷཱཝོ བྷཝེ པུབྦེ ཝུཏྟནཡེན ཨཏྠཱིཏི ‘‘བྷཝཔཙྩཡཱཔི ཨུཔཱདཱན’’ནྟི ན ཝུཏྟནྟི ཝེདིཏབྦཾ.

ཨཉྙམཉྙཔཙྩཡོཏི ཙེཏྠ སམྤཡུཏྟཝིཔྤཡུཏྟཨཏྠིཔཙྩཡོ ཨདྷིཔྤེཏོ སིཡཱ. ‘‘ནཱམརཱུཔཔཙྩཡཱཔི ཝིཉྙཱཎ’’ནྟི ཧི ཝུཏྟཾ, ན ཙ ཝཏྠུ ཨཀུསལཝིཉྙཱཎསྶ ཨཉྙམཉྙཔཙྩཡོ ཧོཏི, པུརེཛཱཏཝིཔྤཡུཏྟོ པན ཧོཏཱིཏི. ཏཐཱ ‘‘ཚཊྛཱཡཏནཔཙྩཡཱཔི ནཱམརཱུཔ’’ནྟི ཝུཏྟཾ, ན ཙ ཚཊྛཱཡཏནཾ ཙཀྑཱཡཏནུཔཙཡཱདཱིནཾ ཙིཏྟསམུཊྛཱནརཱུཔསྶ ཙ ཨཉྙམཉྙཔཙྩཡོ ཧོཏི, པཙྪཱཛཱཏཝིཔྤཡུཏྟོ པན ཧོཏཱིཏི.

ཨཉྙམཉྙཙཏུཀྐཝཎྞནཱ ནིཊྛིཏཱ.

སངྑཱརཱདིམཱུལཀནཡམཱཏིཀཱཝཎྞནཱ

༢༤༧. ‘‘ཨཔུབྦསྶ ཨཉྙསྶ ཨཝིཛྫཱཔཙྩཡསྶ ཝཏྟབྦསྶ ཨབྷཱཝཏོ བྷཝམཱུལཀནཡོ ན ཝུཏྟོ’’ཏི ཝུཏྟཾ, ཨེཝཾ སཏི ‘‘ཚཊྛཱཡཏནཔཙྩཡཱ ཨཝིཛྫཱ’’ཏིཨཱདིཀཱ ཚཊྛཱཡཏནཱདིམཱུལཀཱ ཙ ན ཝཏྟབྦཱ སིཡུཾ. ‘‘ནཱམཔཙྩཡཱ ཨཝིཛྫཱ’’ཏི ཨེཏྠ ཧི ཨཝིཛྫཱཔཙྩཡཱ སབྦེ ཙཏྟཱརོ ཁནྡྷཱ ནཱམནྟི ཝུཏྟཱཏི. ཏཏྠཱཡཾ ཨདྷིཔྤཱཡོ སིཡཱ – ནཱམཝིསེསཱནཾ ཚཊྛཱཡཏནཱདཱིནཾ ཨཝིཛྫཱཡ པཙྩཡབྷཱཝོ ཝཏྟབྦོཏི ཚཊྛཱཡཏནཱདིམཱུལཀཱ ཝུཏྟཱ. ཡདེཝ པན ནཱམཾ ཨཝིཛྫཱཡ པཙྩཡོ, ཏདེཝ བྷཝཔཙྩཡཱ ཨཝིཛྫཱཏི ཨེཏྠཱཔི ཝུཙྩེཡྻ, ན ཝཏྟབྦཝིསེསོ ཀོཙི, ཏསྨཱ ཨཔུབྦཱབྷཱཝཏོ ན ཝུཏྟོཏི. བྷཝགྒཧཎེན ཙ ཨིདྷ ཨཝིཛྫཱཡ པཙྩཡབྷཱུཏཱ སབྷཱཝདྷམྨཱ གཎྷེཡྻཾཨུ, ན ཛཱཏིཨཱདཱིནཱིཏི ཨཔུབྦཱབྷཱཝཏོ ན ཝུཏྟོཏི དཊྛབྦོ. ‘‘ཨཝིཛྫཱཔཙྩཡཱ ཨཝིཛྫཱཏིཔི ¶ ཝུཏྟཾ སིཡཱ’’ཏི ཝུཏྟཾ, ཡཐཱ པན ‘‘ནཱམཔཙྩཡཱ ཕསྶོ’’ཏི ཝུཏྟེ ‘‘ཕསྶཔཙྩཡཱ ཕསྶོ’’ཏི ཝུཏྟཾ ན ཧོཏི པཙྩཡུཔྤནྣཾ ཋཔེཏྭཱ པཙྩཡསྶ གཧཎཏོ, ཨེཝམིདྷཱཔི ན སིཡཱ, ཏསྨཱ བྷཝནཝསེན སབྷཱཝདྷམྨཱསབྷཱཝདྷམྨེསུ སཱམཉྙེན པཝཏྟོ བྷཝ-སདྡོཏི ན སོ ཨཝིཛྫཱཡ པཙྩཡོཏི སཀྐཱ ཝཏྟུཾ. ཏེན བྷཝམཱུལཀནཡོ ན ཝུཏྟོཏི ཝེདིཏབྦོ.

‘‘ཨུཔཱདཱནཔཙྩཡཱ ¶ བྷཝོ’’ཏི ཨེཏྠ ཝིཡ བྷཝེཀདེསེ ཝིསུཾ པུབྦེ ཨགྒཧིཏེ བྷཝ-སདྡོ པཙྩཡསོདྷནཏྠཾ ཨཱདིཏོ ཝུཙྩམཱནོ ནིརཝསེསབོདྷཀོ ཧོཏི, ན ནཱམ-སདྡོ. ཨེཝཾསབྷཱཝཱ ཧི ཨེཏཱ ནིརུཏྟིཡོཏི ཨིམིནཱཝཱ ཨདྷིཔྤཱཡེན ‘‘ཨཝིཛྫཱཔཙྩཡཱ ཨཝིཛྫཱཏིཔི ཝུཏྟཾ སིཡཱ’’ཏི ཨཱཧཱཏི དཊྛབྦཾ, ཨིམིནཱཝ ཨདྷིཔྤཱཡེན ‘‘བྷཝསྶ ནིཔྤདེསཏྟཱ བྷཝཔཙྩཡཱཔི ཨུཔཱདཱནནྟི ན ཝུཏྟ’’ནྟི ཨཡམཏྠོ ཨཉྙམཉྙཔཙྩཡཝཱརེ ཝུཏྟོཏི དཊྛབྦོ. ཏཏྠ པཙྪིནྣཏྟཱཏི ཨེཏེན ཛཱཏིཛརཱམརཎཱནཾ ཨཝིཛྫཱཡ པཙྩཡབྷཱཝོ ཨནུཉྙཱཏོ ཝིཡ ཧོཏི. ཛཱཡམཱནཱནཾ པན ཛཱཏི, ན ཛཱཏིཡཱ ཛཱཡམཱནཱ, ཛཱིཡམཱནམཱིཡམཱནཉྩ ཛརཱམརཎཾ, ན ཛརཱམརཎསྶ ཛཱིཡམཱནམཱིཡམཱནཱཏི ཛཱཏིཨཱདཱིནི ཨེཀཙིཏྟཀྑཎེ ན ཨཝིཛྫཱཡ པཙྩཡོ ཧོནྟི, ཏསྨཱ ཨསམྦྷཝཏོ ཨེཝ ཏམྨཱུལཀཱ ནཡཱ ན གཧིཏཱ, པཙྪེདོཔི པན ཨཏྠཱིཏི ‘‘ཏཏྠ པཙྪིནྣཏྟཱ’’ཏི ཝུཏྟནྟི དཊྛབྦཾ. ཏེནེཝ ‘‘ཨཔིཙཱ’’ཏིཨཱདིམཱཧ.

མཱཏིཀཱཝཎྞནཱ ནིཊྛིཏཱ.

ཨཀུསལནིདྡེསཝཎྞནཱ

༢༤༨-༢༤༩. ཨུཔཱདཱནསྶ ཨུཔཱདཱནཔཙྩཡཏྟཾ ཨཱཔཛྫེཡྻཱཏི ནནུ ནཱཡཾ དོསོ. ཀཱམུཔཱདཱནཉྷི དིཊྛུཔཱདཱནསྶ, ཏཉྩ ཨིཏརསྶ པཙྩཡོ ཧོཏཱིཏི? སཙྩཾ, ཀཱམུཔཱདཱནསྶ པན ཏཎྷཱགཧཎེན གཧིཏཏྟཱ ནཱམེ ཝིཡ ཝིསེསཔཙྩཡཏྟཱབྷཱཝཱ ཙ ཨུཔཱདཱནགྒཧཎེན ཏཎྷཱཔཙྩཡཱ བྷཝསྶ ཙ པཙྩཡབྷཱུཏཱ དིཊྛི ཨེཝ གཧིཏཱཏི ཨཡཾ དོསོ ཝུཏྟོཏི དཊྛབྦོ. ཡསྨཱ ཙ ཨུཔཱདཱནཊྛཱནེ པཙྩཡུཔྤནྣཾ པཙྩཡོ ཙ ཨེཀམེཝ, ཏསྨཱ ‘‘ནཱམཔཙྩཡཱ ཕསྶོ, ནཱམརཱུཔཔཙྩཡཱ སལཱ༹ཡཏན’’ནྟི ཨེཏེསཾ ནིདྡེསེསུ ཝིཡ ‘‘ཨུཔཱདཱནཔཙྩཡཱ བྷཝོ’’ཏི ཨེཏསྶ ནིདྡེསེ པཙྩཡོ ཝིསུཾ ¶ ན ཝིབྷཏྟོ. སཏིཔི ཝཱ བྷཝསྶ པཙྩཡབྷཱཝེན ཀཱམུཔཱདཱནསྶཔི གཧཎེ ‘‘ཋཔེཏྭཱ ཨུཔཱདཱན’’ནྟི ཨཝུཙྩམཱནེ ཀཱམུཔཱདཱནཾ ཀཱམུཔཱདཱནསྶ, དིཊྛི ཙ དིཊྛིཡཱ པཙྩཡོཏི ཨཱཔཛྫེཡྻཱཏི པཙྩཡཔཙྩཡུཔྤནྣཏཱནིཝཱརཎཏྠཾ ‘‘ཋཔེཏྭཱ ཨུཔཱདཱན’’ནྟི ཝུཏྟནྟི དསྶེཏི.

༢༥༢. ཙཀྑཱཡཏནཱདིཨུཔཏྠམྦྷཀསྶ ¶ ཙིཏྟསམུཊྛཱནརཱུཔསྶ ཛནཀཾ ཝིཉྙཱཎཾ ཙཀྑཱཡཏནུཔཙཡཱདཱིནཾ པཙྩཡོཏི ཝུཏྟཾ ཏདཛནཀམྤཱིཏི ཨདྷིཔྤཱཡེན ‘‘ཡསྶ ཙིཏྟསམུཊྛཱནརཱུཔསྶཱ’’ཏིཨཱདིམཱཧ. ཏཱསམྤི ཧཱིཏི ཨུཏུཨཱཧཱརཛསནྟཏཱིནམྤི ཧི ཨུཔཏྠམྦྷཀསམུཊྛཱཔནཔཙྪཱཛཱཏཔཙྩཡཝསེན ཝིཉྙཱཎཾ པཙྩཡོ ཧོཏི ཨེཝཱཏི ཨཏྠོ.

༢༥༤. ཡཐཱནུརཱུཔནྟི མཧཱབྷཱུཏསངྑཱཏཾ པཉྩནྣཾ སཧཛཱཏཱདིཔཙྩཡོ, ཝཏྠུསངྑཱཏཾ ཚཊྛསྶ པུརེཛཱཏཱདིཔཙྩཡོ, ནཱམཾ པཉྩནྣཾ པཙྪཱཛཱཏཱདིཔཙྩཡོ, ཚཊྛསྶ སཧཛཱཏཱདིཔཙྩཡོཏི ཨེསཱ ཡཐཱནུརཱུཔཏཱ.

༢༦༤. ཡསྶཱཏི ཡསྶ པཙྩཡུཔྤནྣསྶ ནཱམསྶ ཝིཉྙཱཎསྶ སམྤཡུཏྟཔཙྩཡབྷཱཝོ ཧོཏཱིཏི ཡོཛེཏབྦཾ.

༢༧༢. ‘‘ཕསྶཔཙྩཡཱཔི ནཱམ’’ནྟི ཕསྶཔཙྩཡབྷཱཝེན ཝཏྟབྦསྶེཝ ནཱམསྶ ཨཏྟནོ པཙྩཡུཔྤནྣེན པཝཏྟི དསྶིཏཱཏི ‘‘ཋཔེཏྭཱ ཕསྶ’’ནྟི པུན ཝཙནེ ཀོཙི ཨཏྠོ ཨཏྠཱིཏི ན ཝུཏྟནྟི དསྶེནྟོ ‘‘ཏཐཱཔཱི’’ཏིཨཱདིམཱཧ.

༢༨༠. ཡསྨཱ ཨདྷིམོཀྑོཔི ནཏྠི, ཏསྨཱ ཨུཔཱདཱནཊྛཱནཾ པརིཧཱིནམེཝཱཏི སམྦནྡྷོ. བལཝཀིལེསེན པན པདཔཱུརཎསྶ ཀཱརཎཾ ཏཎྷཱཡ ཨབྷཱཝོ དོམནསྶསཧགཏེསུ ཝུཏྟོ ཨེཝཱཏི ཏསྶ ཏེན སམྦནྡྷོ ཡོཛེཏབྦོ. སབྦཏྠཱཏི ཏཏིཡཙིཏྟཱདཱིསུ ‘‘ཏཎྷཱཔཙྩཡཱ ཨདྷིམོཀྑོ’’ཏིཨཱདིམྷི ཝིསྶཛྫནམེཝ ཝིསེསཾ དསྶེཏྭཱ པཱལི༹ སཾཁིཏྟཱ. ཧེཊྛཱཏི ཙིཏྟུཔྤཱདཀཎྜཱདཱིསུ.

ཨཀུསལནིདྡེསཝཎྞནཱ ནིཊྛིཏཱ.

ཀུསལཱབྱཱཀཏནིདྡེསཝཎྞནཱ

༢༩༢. པསཱདོཏི ¶ སདྡྷཱ.

༣༠༦. ‘‘ཨལོབྷོ ནིདཱནཾ ཀམྨཱནཾ སམུདཡཱཡཱ’’ཏིཨཱདིཝཙནཏོ (ཨ. ནི. ༣.༣༤) སབྱཱཔཱརཱནི ཀུསལམཱུལཱནི སངྑཱརཱནཾ ནིདཱནཱནི ཧོནྟི, ན ཀམྨཝེགཀྑིཏྟེསུ ¶ ཝིཔཱཀེསུ ཨལོབྷཱདིསཧགཏཀམྨཔཊིབིམྦབྷཱུཏཱ ཝིཡ པཝཏྟམཱནཱ ཨལོབྷཱདཡོཏི པཉྩཝིཉྙཱཎེསུ ཝིཡ ནིདཱནརཧིཏཏཱ སོཏཔཏིཏཏཱཏི དཊྛབྦཱ. ཀིརིཡདྷམྨཱ ཀིརིཡམཏྟཏྟཱ ཀམྨནིདཱནརཧིཏཱཨིཙྩེཝ པརིཧཱིནཱཝིཛྫཱཊྛཱནཱ ཝེདིཏབྦཱ.

ཏཏིཡཙཏུཏྠཝཱརཱ ཨསམྦྷཝཏོ ཨེཝཱཏི ཀསྨཱ ཝུཏྟཾ, ཀིཾ ཙཀྑུཝིཉྙཱཎཱདཱིནི ཙཀྑཱཡཏནུཔཙཡཱདཱིནཾ པཙྪཱཛཱཏཔཙྩཡཱ ན ཧོནྟཱིཏི? ཧོནྟི, ཏདུཔཏྠམྦྷཀསྶ པན ཙིཏྟསམུཊྛཱནསྶ ཨསམུཊྛཱཔནཾ སནྡྷཱཡ ‘‘ཨསམྦྷཝཏོ’’ཏི ཝུཏྟནྟི དཊྛབྦཾ. སཧཛཱཏཔཙྪཱཛཱཏཝིཉྙཱཎསྶ པན ཝསེན ཏདཱཔི ཝིཉྙཱཎཔཙྩཡཱ ནཱམརཱུཔཾ, པཙྪཱཛཱཏསཧཛཱཏནཱམསྶ སཧཛཱཏཔུརེཛཱཏབྷཱུཏཙཀྑཱདིརཱུཔསྶ ཙ ཝསེན ནཱམརཱུཔཔཙྩཡཱ སལཱ༹ཡཏནཉྩ ལབྦྷཏཱིཏི ཏཏིཡཙཏུཏྠཝཱརཱ ན ན སམྦྷཝནྟཱིཏི.

ཀུསལཱབྱཱཀཏནིདྡེསཝཎྞནཱ ནིཊྛིཏཱ.

ཨཝིཛྫཱམཱུལཀཀུསལནིདྡེསཝཎྞནཱ

༣༣༤. སམྨོཧཝསེནཱཏི ཀུསལཕལེ ཨནིཙྩཱདིཏཱཡ སབྷཡེ སཱདུརསཝིསརུཀྑབཱིཛསདིསེ ཏཾནིབྦཏྟཀཀུསལེ ཙ ཨནཱདཱིནཝདསྶིཏཱཝསེན. སམཏིཀྐམཏྠཾ བྷཱཝནཱ སམཏིཀྐམབྷཱཝནཱ, ཏདངྒཝིཀྑམྦྷནཝསེན སམཏིཀྐམབྷཱུཏཱ ཝཱ བྷཱཝནཱ སམཏིཀྐམབྷཱཝནཱ.

ཏཐཱ ཨིདྷ ན ལབྦྷནྟཱིཏི ཨཝིཛྫཱཡ ཨེཝ སངྑཱརཱནཾ ཨཝིགཏཱདིཔཙྩཡཏྟཱབྷཱཝཾ སནྡྷཱཡ ཝུཏྟཾ, ཝིཉྙཱཎཱདཱིནཾ པན སངྑཱརཱདཡོ ཨཝིགཏཱདིཔཙྩཡཱ ཧོནྟཱིཏི ཨཝིཛྫཱཔཙྩཡཱ སངྑཱརོ, སངྑཱརཔཙྩཡཱ ¶ ཝིཉྙཱཎཾ སངྑཱརཧེཏུཀནྟིཨཱདིནཱ ཡོཛནཱ ན ན སཀྐཱ ཀཱཏུནྟི ཨཝིགཏཙཏུཀྐཱདཱིནིཔི ན ཨིདྷ ལབྦྷནྟི. ཝིཉྙཱཎཔཙྩཡཱ ནཱམརཱུཔཾ ཝིཉྙཱཎསམྤཡུཏྟཾ ནཱམནྟིཨཱདིནཱ ཧི ཡཐཱལཱབྷཡོཛནཱཡ ནཡོ དསྶིཏོཏི.

ཨཝིཛྫཱམཱུལཀཀུསལནིདྡེསཝཎྞནཱ ནིཊྛིཏཱ.

ཀུསལམཱུལཀཝིཔཱཀནིདྡེསཝཎྞནཱ

༣༤༣. ‘‘ནཱནཱཀྑཎིཀཀམྨཔཙྩཡེ ¶ པན ཝཏྟབྦམེཝ ནཏྠཱི’’ཏི ཝུཏྟཾ, ཀིཾ ཀུསལམཱུལཾ ཨཀུསལམཱུལཉྩ ཀམྨཔཙྩཡོ ཧོཏཱིཏི? ན ཧོཏི, ཀམྨཔཙྩཡབྷཱུཏཱཡ པན ཙེཏནཱཡ སཾསཊྛཾ ཀམྨཾ ཝིཡ པཙྩཡོ ཧོཏི. ཏེན ཨེཀཱིབྷཱཝམིཝ གཏཏྟཱཏི ཨེཝཾ ཝུཏྟནྟི དཊྛབྦཾ. ཡཐཱ ཀུསལཱཀུསལམཱུལེཧི ཝིནཱ ཀམྨཾ ཝིཔཱཀཾ ན ཛནེཏཱིཏི ཏཱནི ཝིཔཱཀསྶ པརིཡཱཡེན ཨུཔནིསྶཡོཏི ཝུཏྟཱནི, ཨེཝཾ ཀམྨེན ཨེཀཱིབྷཱུཏཱནི སཾསཊྛཱནི ཧུཏྭཱ ཀམྨཛཱནཾ པཙྩཡཱ ཧོནྟཱིཏི པརིཡཱཡེན ཏེསཾ ཀམྨཔཙྩཡཏཱ ཝུཏྟཱ. ཨེསཱཏི ཨེས ཀུསལམཱུལཔཙྩཡོ ཨཀུསལམཱུལཔཙྩཡོ ཙཱཏི ཡོཛེཏབྦཾ.

ཀུསལཱཀུསལཝིཔཱཀཱནཾ ཝིཡ ཀིརིཡཱནཾ ཨུཔྤཱདཀཱནི ཨཝིཛྫཱཀུསལཱཀུསལམཱུལཱནི ཙ ན ཧོནྟཱིཏི ཨཱཧ ‘‘ཨུཔནིསྶཡཏཾ ན ལབྷནྟཱི’’ཏི. མནསིཀཱརོཔི ཛཝནཝཱིཐིཔཊིཔཱདཀམཏྟཏྟཱ ཀུསལཱཀུསལཱནི ཝིཡ ཨཝིཛྫཾ ཨུཔནིསྶཡཾ ན ཀརོཏི, ཨཝིཛྫཱུཔནིསྶཡཱནཾ པན པཝཏྟིཨཏྠཾ བྷཝངྒཱཝཊྚནམཏྟཾ ཧོཏི, པཧཱིནཱཝིཛྫཱནཉྩ ཀིརིཡཱནཾ ཨཝིཛྫཱ ནེཝུཔྤཱདིཀཱ, ཨཱརམྨཎམཏྟམེཝ པན ཧོཏི. ཨེཝཉྩ ཀཏྭཱ ‘‘ཀུསལོ དྷམྨོ ཨབྱཱཀཏསྶ དྷམྨསྶ ཨུཔནིསྶཡཔཙྩཡེན པཙྩཡོ’’ཏི (པཊྛཱ. ༡.༡.༤༢༣), ‘‘ཝིཔཱཀདྷམྨདྷམྨོ ནེཝཝིཔཱཀནཝིཔཱཀདྷམྨདྷམྨསྶ ཨུཔནིསྶཡཔཙྩཡེན པཙྩཡོ’’ཏི (པཊྛཱ. ༡.༣.༡༠༣) ཙ ཨེཝམཱདཱིསུ ཀིརིཡཱནཾ ཨཀུསལཱ ཨུཔནིསྶཡཔཙྩཡབྷཱཝེན ན ཨུདྡྷཊཱཏི. ཨཔིཙ ‘‘ཨཝིཛྫཱཔཙྩཡཱ སངྑཱརཱ’’ཏི ཨེཏསྶ ཝསེན ཨཝིཛྫཱམཱུལཀོ ཀུསལནཡོ ཝུཏྟོ, ‘‘སངྑཱརཔཙྩཡཱ ཝིཉྙཱཎ’’ནྟི ཨེཏསྶ ཝསེན ཀུསལཱཀུསལམཱུལཀོ ¶ ཝིཔཱཀནཡོ, ཀིརིཡཱནཾ པན ནེཝ སངྑཱརགྒཧཎེན, ན ཙ ཝིཉྙཱཎགྒཧཎེན གཧཎཾ གཙྪཏཱིཏི ཏཾམཱུལཀོ ཀིརིཡཱནཡོ ན ལབྦྷཏཱིཏི ན ཝུཏྟོཏི དཊྛབྦོ.

ཨནེཀབྷེདཏོཏི ཨཝིཛྫཱདཱིནཾ མཱུལཔདཱནཾ ཨེཀཙིཏྟཀྑཎིཀཱནཾ ཀིརིཡནྟེ པཋམནཡེ སཧཛཱཏཱདིཨནེཀཔཙྩཡབྷཱཝེན གཧིཏཏྟཱ ཏེསཾ པཙྩཡཱནཾ ཝསེན ནཝཱདིམཱུལཔདཱནཾ ནཡཱནཾ ཝསེན, ཨནེཀཔྤཀཱརཏོ ཙཏུནྣཾ ཙཏུཀྐཱནཾ ཝསེནཱཏི ཝཱ ཨདྷིཔྤཱཡོ. ཀུསལཱཀུསལཱནཾ པན ཝིཔཱཀེ ཙཱཏི ཨེཏྠ ཀུསལཱཀུསལེསུ ཀུསལཱཀུསལཱནཾ ཝིཔཱཀེ ཙཱཏི ཝཏྟབྦཾ. པུརིམཔཙྪིམེསུ ཧི ནཡེསུ ཡཐཱ པཙྩཡཱཀཱརོ ཝུཏྟོ, ཏཾདསྶནཏྠཾ ¶ ‘‘ཨནེཀབྷེདཏོ ཨེཀདྷཱཝཱ’’ཏི ཝུཏྟཾ, ན ཙ པཙྪིམནཡེ ཀུསལེ ཨནེཀབྷེདཏོ པཙྩཡཱཀཱརོ ཝུཏྟོ, ཨཐ ཁོ ‘‘ཨེཀདྷཱཝཱ’’ཏི. ཨེཀདྷཱཝཱཏི ཙ མཱུལཔདེཀཔཙྩཡཏཱཝསེན, ཨེཀསྶེཝ ཝཱ ནཡསྶ ཝསེན ཨེཀཔྤཀཱརེནཱཏི ཨཏྠོ, པཋམཙཏུཀྐསྶེཝ ཝསེནཱཏི ཝཱ ཨདྷིཔྤཱཡོ. དྷམྨཔཙྩཡབྷེདེཏི ཨཝིཛྫཱདཱིནཾ དྷམྨཱནཾ པཙྩཡབྷཱཝབྷེདེ ཛརཱམརཎཱདཱིནཾ དྷམྨཱནཾ ཛཱཏིཨཱདིཔཙྩཡབྷེདེ, ཏཾཏཾཙིཏྟུཔྤཱདསམཡཔརིཙྪིནྣཱནཾ ཝཱ ཕསྶཱདཱིནཾ དྷམྨཱནཾ ཨེཀཀྑཎིཀཱཝིཛྫཱདིཔཙྩཡབྷེདེ. པརིཡཏྟིཨཱདཱིནཾ ཀམོ པརིཡཏྟི…པེ… པཊིཔཏྟིཀྐམོ. པཙྩཡཱཀཱརེ ཧི པཱལི༹པརིཡཱཔུཎནཏདཏྠསཝནཔཱལི༹ཨཏྠཙིནྟནཱནི ‘‘ཛརཱམརཎཾ ཨནིཙྩཾ སངྑཏཾ…པེ… ནིརོདྷདྷམྨ’’ནྟིཨཱདིནཱ བྷཱཝནཱཔཊིཔཏྟི ཙ ཀམེན ཀཱཏབྦཱཏི ཀམ-གྒཧཎཾ ཀརོཏི. ཏཏོཏི ཉཱཎཔྤབྷེདཛནཀཏོ ཀམཏོ. ཨཉྙཾ ཀརཎཱིཡཏརཾ ནཏྠི. ཏདཱཡཏྟཱ ཧི དུཀྑནྟཀིརིཡཱཏི.

ཀུསལམཱུལཀཝིཔཱཀནིདྡེསཝཎྞནཱ ནིཊྛིཏཱ.

ཨབྷིདྷམྨབྷཱཛནཱིཡཝཎྞནཱ ནིཊྛིཏཱ.

པཊིཙྩསམུཔྤཱདཝིབྷངྒཝཎྞནཱ ནིཊྛིཏཱ.

༧. སཏིཔཊྛཱནཝིབྷངྒོ

༡. སུཏྟནྟབྷཱཛནཱིཡཾ

ཨུདྡེསཝཱརཝཎྞནཱ

༣༥༥. ཏཡོ ¶ ¶ སཏིཔཊྛཱནཱཏི སཏིཔཊྛཱན-སདྡསྶ ཨཏྠུདྡྷཱརཾ ཀརོཏི, ན ཨིདྷ པཱལི༹ཡཾ ཝུཏྟསྶ སཏིཔཊྛཱན-སདྡསྶ ཨཏྠདསྶནཾ. ཨཱདཱིསུ ཧི སཏིགོཙརོཏི ཨཱདི-སདྡེན ‘‘ཕསྶསམུདཡཱ ཝེདནཱནཾ སམུདཡོ, ནཱམརཱུཔསམུདཡཱ ཙིཏྟསྶ སམུདཡོ, མནསིཀཱརསམུདཡཱ དྷམྨཱནཾ སམུདཡོ’’ཏི (སཾ. ནི. ༥.༤༠༨) སཏིཔཊྛཱནནྟི ཝུཏྟཱནཾ སཏིགོཙརཱནཾ དཱིཔཀེ སུཏྟཔྤདེསེ སངྒཎྷཱཏི. ཨེཝཾ པཊིསམྦྷིདཱཔཱལི༹ཡམྤི ཨཝསེསཔཱལི༹པྤདེསདསྶནཏྠོ ཨཱདི-སདྡོ དཊྛབྦོ. དཱནཱདཱིནིཔི ཀརོནྟསྶ རཱུཔཱདཱིནི ཀསིཎཱདཱིནི ཙ སཏིཡཱ ཋཱནཾ ཧོཏཱིཏི ཏཾནིཝཱརཎཏྠམཱཧ ‘‘པདྷཱནཾ ཋཱན’’ནྟི. པ-སདྡོ ཧི པདྷཱནཏྠདཱིཔཀོཏི ཨདྷིཔྤཱཡོ.

ཨརིཡོཏི ཨརིཡཾ སེཊྛཾ སམྨཱསམྦུདྡྷམཱཧ. ཨེཏྠཱཏི ཨེཏསྨིཾ སལཱ༹ཡཏནཝིབྷངྒསུཏྟེཏི ཨཏྠོ. སུཏྟེཀདེསེན ཧི སུཏྟཾ དསྶེཏི. ཏཏྠ ཧི –

‘‘ཏཡོ སཏིཔཊྛཱནཱ ཡདརིཡོ…པེ… ཨརཧཏཱིཏི ཨིཏི ཁོ པནེཏཾ ཝུཏྟཾ, ཀིཉྩེཏཾ པཊིཙྩ ཝུཏྟཾ? ཨིདྷ, བྷིཀྑཝེ, སཏྠཱ སཱཝཀཱནཾ དྷམྨཾ དེསེཏི ཨནུཀམྤཀོ ཧིཏེསཱི ཨནུཀམྤཾ ཨུཔཱདཱཡ ‘ཨིདཾ ཝོ ཧིཏཱཡ ཨིདཾ ཝོ སུཁཱཡཱ’ཏི. ཏསྶ སཱཝཀཱ ན སུསྶཱུསནྟི, ན སོཏཾ ཨོདཧནྟི, ན ཨཉྙཱ ཙིཏྟཾ ཨུཔཊྛཱཔེནྟི, ཝོཀྐམྨ ཙ སཏྠུསཱསནཱ ཝཏྟནྟི. ཏཏྲ, བྷིཀྑཝེ, ཏཐཱགཏོ ན ཙེཝ ཨནཏྟམནོ ཧོཏི, ན ཙ ཨནཏྟམནཏཾ ¶ པཊིསཾཝེདེཏི, ཨནཝསྶུཏོ ཙ ཝིཧརཏི སཏོ སམྤཛཱནོ. ཨིདཾ, བྷིཀྑཝེ, པཋམཾ སཏིཔཊྛཱནཾ. ཡདརིཡོ…པེ… ཨརཧཏི.

‘‘པུན ཙཔརཾ བྷིཀྑཝེ སཏྠཱ…པེ… ཨིདཾ ཝོ སུཁཱཡཱཏི. ཏསྶ ཨེཀཙྩེ སཱཝཀཱ ན སུསྶཱུསནྟི…པེ… ཝཏྟནྟི. ཨེཀཙྩེ སཱཝཀཱ སུསྶཱུསནྟི ¶ …པེ… ན ཙ ཝོཀྐམྨ སཏྠུསཱསནཱ ཝཏྟནྟི. ཏཏྲ, བྷིཀྑཝེ, ཏཐཱགཏོ ན ཙེཝ ཨཏྟམནོ ཧོཏི, ན ཙ ཨཏྟམནཏཾ པཊིསཾཝེདེཏི. ན ཙེཝ ཨནཏྟམནོ ཧོཏི, ན ཙ ཨནཏྟམནཏཾ པཊིསཾཝེདེཏི. ཨཏྟམནཏཉྩ ཨནཏྟམནཏཉྩ ཏདུབྷཡཾ ཨབྷིནིཝཛྫེཏྭཱ ཨུཔེཀྑཀོ ཙ ཝིཧརཏི སཏོ སམྤཛཱནོ. ཨིདཾ, བྷིཀྑཝེ, དུཏིཡཾ…པེ….

‘‘པུན ཙཔརཾ…པེ… སུཁཱཡཱཏི. ཏསྶ སཱཝཀཱ སུསྶཱུསནྟི…པེ… ཝཏྟནྟི. ཏཏྲ, བྷིཀྑཝེ, ཏཐཱགཏོ ཨཏྟམནོ ཙེཝ ཧོཏི, ཨཏྟམནཏཉྩ པཊིསཾཝེདེཏི, ཨནཝསྶུཏོ ཙ ཝིཧརཏི སཏོ སམྤཛཱནོ. ཨིདཾ, བྷིཀྑཝེ, ཏཏིཡ’’ནྟི (མ. ནི. ༣.༣༡༡) –

ཨེཝཾ པཊིགྷཱནུནཡེཧི ཨནཝསྶུཏཏཱ, ནིཙྩཾ ཨུཔཊྛིཏསཏིཏཱ, ཏདུབྷཡཝཱིཏིཝཏྟཏཱ སཏིཔཊྛཱནནྟི ཝུཏྟཱ. བུདྡྷཱནམེཝ ཀིར ནིཙྩཾ ཨུཔཊྛིཏསཏིཏཱ ཧོཏི, ན པཙྩེཀབུདྡྷཱདཱིནནྟི.

པ-སདྡོ ཨཱརམྦྷཾ ཛོཏེཏི, ཨཱརམྦྷོ ཙ པཝཏྟཱིཏི ཀཏྭཱ ཨཱཧ ‘‘པཝཏྟཡིཏབྦཏོཏི ཨཏྠོ’’ཏི. སཏིཡཱ ཀརཎབྷཱུཏཱཡ པཊྛཱནཾ པཊྛཱཔེཏབྦཾ སཏིཔཊྛཱནཾ. ཨན-སདྡཉྷི བཧུལཾ-ཝཙནེན ཀམྨཏྠཾ ཨིཙྪནྟི སདྡཝིདཱུ, ཏཐེཝ ཀཏྟུཨཏྠམྤི ཨིཙྪནྟཱིཏི པུན ཏཏིཡནཡེ ‘‘པཏིཊྛཱཏཱིཏི པཊྛཱན’’ནྟི ཝུཏྟཾ. ཏཏྠ པ-སདྡོ བྷུསཏྠཾ པཀྑནྡནཾ དཱིཔེཏཱིཏི ‘‘ཨོཀྐནྟིཏྭཱ པཀྑནྡིཏྭཱ ཝཏྟཏཱིཏི ཨཏྠོ’’ཏི ཨཱཧ. པུན བྷཱཝཏྠེ སཏི-སདྡཾ པཊྛཱན-སདྡཉྩ ཝཎྞེནྟོ ‘‘ཨཐ ཝཱ’’ཏིཨཱདིམཱཧ. ཏེན པུརིམཏྠེ སཏི-སདྡོ པཊྛཱན-སདྡོ ཙ ཀཏྟུཨཏྠོཏི ཝིཉྙཱཡཏི.

ཝིསེསེན ཀཱཡོ ཙ ཝེདནཱ ཙ ཨསྶཱདསྶ ཀཱརཎནྟི ཏཔྤཧཱནཏྠཾ ཏེསཾ ཏཎྷཱཝཏྠཱུནཾ ཨོལཱ༹རིཀསུཁུམཱནཾ ཨསུབྷདུཀྑཏཱདསྶནཱནི མནྡཏིཀྑཔཉྙེཧི ཏཎྷཱཙརིཏེཧི སུཀརཱནཱིཏི ཏཱནི ཏེསཾ ཝིསུདྡྷིམགྒོཏི ཝུཏྟཱནི, ཨེཝཾ དིཊྛིཡཱ ཝིསེསཀཱརཎེསུ ཙིཏྟདྷམྨེསུ ཨནིཙྩཱནཏྟཏཱདསྶནཱནི ནཱཏིཔབྷེདཱཏིཔབྷེདགཏེསུ ཏེསུ ཏཔྤཧཱནཏྠཾ མནྡཏིཀྑཱནཾ དིཊྛིཙརིཏཱནཾ སུཀརཱནཱིཏི ¶ ཏེསཾ ཏཱནི ཝིསུདྡྷིམགྒོཏི. ཏིཀྑོ སམཐཡཱནིཀོ ཨོལཱ༹རིཀཱརམྨཎཾ པརིགྒཎྷནྟོ ཏཏྠ ཨཊྛཏྭཱ ཛྷཱནཾ སམཱཔཛྫིཏྭཱ ཝུཊྛཱཡ ཝེདནཾ པརིགྒཎྷཱཏཱིཏི ཨཱཧ ‘‘ཨོལཱ༹རིཀཱརམྨཎེ ཨསཎྛཧནཏོ’’ཏི. ཝིཔསྶནཱཡཱནིཀསྶ ¶ སུཁུམེ ཙིཏྟེ དྷམྨེསུ ཙ ཙིཏྟཾ པཀྑནྡཏཱིཏི ཏདནུཔསྶནཱནཾ ཏཾཝིསུདྡྷིམགྒཏཱ ཝུཏྟཱ.

ཏེསཾ ཏཏྠཱཏི ཨེཏྠ ཏཏྠ-སདྡསྶ པཧཱནཏྠནྟི ཨེཏེན ཡོཛནཱ. པཉྩ ཀཱམགུཎཱ སཝིསེསཱ ཀཱཡེ ལབྦྷནྟཱིཏི ཝིསེསེན ཀཱཡོ ཀཱམོགྷསྶ ཝཏྠུ, བྷཝེ སུཁགྒཧཎཝསེན བྷཝསྶཱདོ ཧོཏཱིཏི བྷཝོགྷསྶ ཝེདནཱ, སནྟཏིགྷནགྒཧཎཝསེན ཙིཏྟེ ཨཏྟཱབྷིནིཝེསོ ཧོཏཱིཏི དིཊྛོགྷསྶ ཙིཏྟཾ, དྷམྨཝིནིབྦྷོགསྶ དྷམྨཱནཾ དྷམྨམཏྟཏཱཡ ཙ དུཔྤཊིཝིཛ྄ཛྷཏྟཱ སམྨོཧོ ཧོཏཱིཏི ཨཝིཛྫོགྷསྶ དྷམྨཱ, ཏསྨཱ ཏེསུ ཏེསཾ པཧཱནཏྠཾ ཙཏྟཱརོཝ ཝུཏྟཱ, དུཀྑཱཡ ཝེདནཱཡ པཊིགྷཱནུསཡོ ཨནུསེཏཱིཏི དུཀྑདུཀྑཝིཔརིཎཱམདུཀྑསངྑཱརདུཀྑབྷཱུཏཱ ཝེདནཱ ཝིསེསེན བྱཱཔཱདཀཱཡགནྠསྶ ཝཏྠུ, ཙིཏྟེ ནིཙྩགྒཧཎཝསེན སསྶཏསྶ ཨཏྟནོ སཱིལེན སུདྡྷཱིཏིཨཱདིཔརཱམསནཾ ཧོཏཱིཏི སཱིལབྦཏཔརཱམཱསསྶ ཙིཏྟཾ, ནཱམརཱུཔཔརིཙྪེདེན བྷཱུཏཾ བྷཱུཏཏོ ཨཔསྶནྟསྶ བྷཝཝིབྷཝདིཊྛིསངྑཱཏོ ཨིདཾསཙྩཱབྷིནིཝེསོ ཧོཏཱིཏི ཏསྶ དྷམྨཱ…པེ… སུཁཝེདནཱསྶཱདཝསེན པརལོཀནིརཔེཀྑོ ‘‘ནཏྠི དིནྣ’’ནྟིཨཱདིཔརཱམཱསཾ ཨུཔྤཱདེཏཱིཏི དིཊྛུཔཱདཱནསྶ ཝེདནཱ. སནྟཏིགྷནགྒཧཎཝསེན སརཱགཱདིཙིཏྟེ སམྨོཧོ ཧོཏཱིཏི མོཧཱགཏིཡཱ ཙིཏྟཾ, དྷམྨསབྷཱཝཱནཝབོདྷེན བྷཡཾ ཧོཏཱིཏི བྷཡཱགཏིཡཱ དྷམྨཱ…པེ… ཨཝུཏྟཱནཾ ཝུཏྟནཡེན ཝཏྠུབྷཱཝོ ཡོཛེཏབྦོ.

‘‘ཨཱཧཱརསམུདཡཱ ཀཱཡསམུདཡོ, ཕསྶསམུདཡཱ ཝེདནཱསམུདཡོ (སཾ. ནི. ༥.༤༠༨), སངྑཱརཔཙྩཡཱ ཝིཉྙཱཎཾ, ཝིཉྙཱཎཔཙྩཡཱ ནཱམརཱུཔ’’ནྟི (མ. ནི. ༣.༡༢༦; སཾ. ནི. ༢.༡; ཨུདཱ. ༡) ཝཙནཏོ ཀཱཡཱདཱིནཾ སམུདཡབྷཱུཏཱ ཀབལཱི༹ཀཱརཱཧཱརཕསྶམནོསཉྩེཏནཱཝིཉྙཱཎཱཧཱརཱ ཀཱཡཱདིཔརིཛཱནནེན པརིཉྙཱཏཱ ཧོནྟཱིཏི ཨཱཧ ‘‘ཙཏུབྦིདྷཱཧཱརཔརིཉྙཏྠ’’ནྟི. པཀརཎནཡོཏི ཏམྦཔཎྞིབྷཱསཱཡ ཝཎྞནཱནཡོ. ནེཏྟིཔེཊཀཔྤཀརཎེ དྷམྨཀཐིཀཱནཾ ཡོཛནཱནཡོཏིཔི ཝདནྟི.

སརཎཝསེནཱཏི ཀཱཡཱདཱིནཾ ཀུསལཱདིདྷམྨཱནཉྩ དྷཱརཎཏཱཝསེན. སརནྟི གཙྪནྟི ཨེཏཱཡཱཏི སཏཱིཏི ཨིམསྨིཾ ཨཏྠེ ཨེཀཏྟེ ནིབྦཱནེ སམཱགམོ ཨེཀཏྟསམོསརཎཾ. ཨེཏདེཝ ཧི དསྶེཏུཾ ‘‘ཡཐཱ ཧཱི’’ཏིཨཱདིམཱཧ. ཨེཀནིབྦཱནཔྤཝེསཧེཏུབྷཱུཏོ ཝཱ སམཱནཏཱཡ ཨེཀོ སཏིཔཊྛཱནསབྷཱཝོ ¶ ¶ ཨེཀཏྟཾ, ཏཏྠ སམོསརཎཾ ཏཾསབྷཱགཏཱ ཨེཀཏྟསམོསརཎཾ. ཨེཀནིབྦཱནཔྤཝེསཧེཏུབྷཱཝཾ པན དསྶེཏུཾ ‘‘ཡཐཱ ཧཱི’’ཏིཨཱདིམཱཧ. ཨེཏསྨིཾ ཨཏྠེ སརཎེཀཏྟསམོསརཎཱནི སཧ སཏིཔཊྛཱནེཀབྷཱཝསྶ ཀཱརཎཏྟེན ཝུཏྟཱནཱིཏི དཊྛབྦཱནི, པུརིམསྨིཾ ཝིསུཾ. སརཎཝསེནཱཏི ཝཱ གམནཝསེནཱཏི ཨཏྠེ སཏི ཏདེཝ གམནཾ སམོསརཎནྟི སམོསརཎེ ཝཱ སཏི-སདྡཏྠཝསེན ཨཝུཙྩམཱནེ དྷཱརཎཏཱཝ སཏཱིཏི སཏི-སདྡཏྠནྟརཱབྷཱཝཱ པུརིམཾ སཏིབྷཱཝསྶ ཀཱརཎཾ, པཙྪིམཾ ཨེཀབྷཱཝསྶཱཏི ནིབྦཱནསམོསརཎེཔི སཧིཏཱནེཝ ཏཱནི སཏིཔཊྛཱནེཀབྷཱཝསྶ ཀཱརཎཱནི.

ཙུདྡསཝིདྷེནཱཏི ཨིདཾ མཧཱསཏིཔཊྛཱནསུཏྟེ (དཱི. ནི. ༢.༣༧༢ ཨཱདཡོ; མ. ནི. ༡.༡༠༥ ཨཱདཡོ) ཝུཏྟཱནཾ ཨཱནཱཔཱནཔབྦཱདཱིནཾ ཝསེན. ཏཐཱ པཉྩཝིདྷེན དྷམྨཱནུཔསྶནནྟི ཨེཏྠཱཔི དཊྛབྦཾ. ཨེཏྠ ཙ ཨུཊྛཱནཀབྷཎྜསདིསཏཱ ཏཾཏཾསཏིཔཊྛཱནབྷཱཝནཱནུབྷཱཝསྶ དཊྛབྦཱ. བྷིཀྑུགོཙརཱ ཧི ཨེཏེ. ཝུཏྟཉྷི ‘‘གོཙརེ, བྷིཀྑཝེ, ཙརཐ སཀེ པེཏྟིཀེ ཝིསཡེ’’ཏིཨཱདི (སཾ. ནི. ༥.༣༧༢; དཱི. ནི. ༣.༨༠).

ཀཱཡཱནུཔསྶནཱདིཔཊིཔཏྟིཡཱ བྷིཀྑུ ཧོཏཱིཏི བྷིཀྑུཾ ‘‘ཀཱཡཱནུཔསྶཱི ཝིཧརཏཱི’’ཏིཨཱདིནཱ དསྶེཏི བྷིཀྑུམྷི ཏཾནིཡམཏོ. ཏེནཱཧ ‘‘པཊིཔཏྟིཡཱ ཝཱ བྷིཀྑུབྷཱཝདསྶནཏོ’’ཏི.

སམཾ ཙརེཡྻཱཏི ཀཱཡཱདིཝིསམཙརིཡཾ པཧཱཡ ཀཱཡཱདཱིཧི སམཾ ཙརེཡྻ. རཱགཱདིཝཱུཔསམེན སནྟོ, ཨིནྡྲིཡདམནེན དནྟོ, ཙཏུམགྒནིཡམེན ནིཡཏོ, སེཊྛཙཱརིཏཱཡ བྲཧྨཙཱརཱི. ཀཱཡདཎྜཱདིཨོརོཔནེན ནིདྷཱཡ དཎྜཾ. སོ ཨེཝརཱུཔོ བཱཧིཏཔཱཔསམིཏཔཱཔབྷིནྣཀིལེསཏཱཧི བྲཱཧྨཎཱདིསམཉྙོ ཝེདིཏབྦོ.

ཀཱཡཱནུཔསྶནཱཨུདྡེསཝཎྞནཱ

ཨསམྨིསྶཏོཏི ཝེདནཱདཡོཔི ཨེཏྠ སིཏཱ, ཨེཏྠ པཊིབདྡྷཱཏི ཀཱཡེ ཝེདནཱདིཨནུཔསྶནཱཔསངྒེཔི ཨཱཔནྣེ ཏདམིསྶཏོཏི ཨཏྠོ. ཨཝཡཝཱིགཱཧསམཉྙཱཏིདྷཱཝནསཱརཱདཱནཱབྷིནིཝེསནིསེདྷནཏྠཾ ཀཱཡཾ ཨངྒཔཙྩངྒེཧི, ཏཱནི ཙ ཀེསཱདཱིཧི, ཀེསཱདིཀེ ཙ བྷཱུཏུཔཱདཱཡརཱུཔེཧི ¶ ཝིནིབྦྷུཛྫནྟོ ¶ ‘‘ཏཐཱ ན ཀཱཡེ’’ཏིཨཱདིམཱཧ. པཱསཱདཱདིནགརཱཝཡཝསམཱུཧེ ཨཝཡཝཱིཝཱདིནོཔི ཨཝཡཝཱིགཱཧཾ ན ཀརོནྟི. ནགརཾ ནཱམ ཀོཙི ཨཏྠོ ཨཏྠཱིཏི པན ཀེསཉྩི སམཉྙཱཏིདྷཱཝནཾ སིཡཱཏི ཨིཏྠིཔུརིསཱདིསམཉྙཱཏིདྷཱཝནེ ནགརནིདསྶནཾ ཝུཏྟཾ.

ཡཾ པསྶཏི ཨིཏྠིཾ ཝཱ པུརིསཾ ཝཱ, ནནུ ཙཀྑུནཱ ཨིཏྠིཔུརིསདསྶནཾ ནཏྠཱིཏི? སཙྩཾ ནཏྠི, ‘‘ཨིཏྠིཾ པསྶཱམི, པུརིསཾ པསྶཱམཱི’’ཏི པན པཝཏྟསཉྙཱཡ ཝསེན ‘‘ཡཾ པསྶཏཱི’’ཏི ཝུཏྟཾ. མིཙྪཱདསྶནེ ཝཱ དིཊྛིཡཱ ཡཾ པསྶཏི, ན ཏཾ དིཊྛཾ, ཏཾ རཱུཔཱཡཏནཾ ན ཧོཏི, རཱུཔཱཡཏནཾ ཝཱ ཏཾ ན ཧོཏཱིཏི ཨཏྠོ. ཨཐ ཝཱ ཏཾ ཀེསཱདིབྷཱུཏུཔཱདཱཡསམཱུཧསངྑཱཏཾ དིཊྛཾ ན ཧོཏི, དིཊྛཾ ཝཱ ཡཐཱཝུཏྟཾ ན ཧོཏཱིཏི ཨཏྠོ. ཡཾ དིཊྛཾ ཏཾ ན པསྶཏཱིཏི ཡཾ རཱུཔཱཡཏནཾ, ཀེསཱདིབྷཱུཏུཔཱདཱཡསམཱུཧསངྑཱཏཾ ཝཱ དིཊྛཾ, ཏཾ པཉྙཱཙཀྑུནཱ བྷཱུཏཏོ ན པསྶཏཱིཏི ཨཏྠོ.

ན ཨཉྙདྷམྨཱནུཔསྶཱིཏི ན ཨཉྙསབྷཱཝཱནུཔསྶཱི, ཨསུབྷཱདིཏོ ཨཉྙཱཀཱརཱནུཔསྶཱི ན ཧོཏཱིཏི ཝུཏྟཾ ཧོཏི. པཐཝཱིཀཱཡནྟི ཀེསཱདིཔཐཝིཾ དྷམྨསམཱུཧཏྟཱ ཀཱཡོཏི ཝདཏི, ལཀྑཎཔཐཝིམེཝ ཝཱ ཨནེཀཔྤབྷེདསཀལསརཱིརགཏཾ པུབྦཱཔརིཡབྷཱཝེན པཝཏྟམཱནཾ སམཱུཧཝསེན གཧེཏྭཱ ཀཱཡོཏི ཝདཏི, ཨེཝཾ ཨཉྙཏྠཱཔི.

ཨཛ྄ཛྷཏྟབཧིདྡྷཱཏི ཨཛ྄ཛྷཏྟབཧིདྡྷཱདྷམྨཱནཾ གྷཊིཏཱརམྨཎཾ ཨེཀཏོ ཨཱརམྨཎབྷཱཝོ ནཏྠཱིཏི ཨཏྠོ, ཨཛ྄ཛྷཏྟབཧིདྡྷཱ དྷམྨཱ ཝཱ གྷཊིཏཱརམྨཎཾ ཨིདཾ ནཏྠཱིཏི ཨཏྠོ. ཏཱིསུ བྷཝེསུ ཀིལེསཱནནྟི བྷཝཏྟཡཝིསཡཱནཾ ཀིལེསཱནནྟི ཨཏྠོ.

སབྦཏྠིཀནྟི སབྦཏྠ བྷཝཾ. སབྦསྨིཾ ལཱིནེ ཨུདྡྷཊེ ཙ ཙིཏྟེ ཨིཙྪིཏབྦཏྟཱ, སབྦེ ཝཱ ལཱིནེ ཨུདྡྷཊེ ཙ བྷཱཝེཏབྦཱ བོཛ྄ཛྷངྒཱ ཨཏྠིཀཱ ཨེཏཱཡཱཏི སབྦཏྠིཀཱ. ཨནྟོསངྑེཔོཏི ཨནྟོཨོལཱིཡནཱ ཀོསཛྫནྟི ཨཏྠོ.

ཨཝིསེསེན དྭཱིཧིཔི ནཱིཝརཎཔྤཧཱནཾ ཝུཏྟནྟི ཀཏྭཱ པུན ཨེཀེཀེན ཝུཏྟཔྤཧཱནཝིསེསཾ དསྶེཏུཾ ‘‘ཝིསེསེནཱ’’ཏི ཨཱཧ, ‘‘ཝིནེཡྻ ནཱིཝརཎཱནཱི’’ཏི ཨཝཏྭཱ ཨབྷིཛ྄ཛྷཱདོམནསྶཝིནཡསྶ ཝཱ པཡོཛནཾ དསྶེནྟོ ‘‘ཝིསེསེནཱ’’ཏིཨཱདིམཱཧ. ཀཱཡཱནུཔསྶནཱབྷཱཝནཱཡ ཨུཛུཝིཔཙྩནཱིཀཱནཾ ཨནུརོདྷཝིརོདྷཱདཱིནཾ ¶ པཧཱནདསྶནཉྷི ཨེཏསྶ པཡོཛནནྟི. ཀཱཡབྷཱཝནཱཡཱཏི ¶ ཀཱཡཱནུཔསྶནཱབྷཱཝནཱ ཨདྷིཔྤེཏཱ. ཏེནཱཏི ཨནུརོདྷཱདིཔྤཧཱནཝཙནེན.

སབྦཏྠིཀཀམྨཊྛཱནཾ བུདྡྷཱནུསྶཏི མེཏྟཱ མརཎསྶཏི ཨསུབྷབྷཱཝནཱ ཙ. སཏིསམྤཛཉྙེན ཨེཏེན ཡོགིནཱ པརིཧརིཡམཱནཾ ཏཾ སབྦཏྠིཀཀམྨཊྛཱནཾ ཝུཏྟཾ སཏིསམྤཛཉྙབལེན ཨཝིཙྪིནྣསྶ ཏསྶ པརིཧརིཏབྦཏྟཱ, སཏིཡཱ ཝཱ སམཐོ ཝུཏྟོ སམཱདྷིཀྑནྡྷསངྒཧིཏཏྟཱ.

ཀཱཡཱནུཔསྶནཱཨུདྡེསཝཎྞནཱ ནིཊྛིཏཱ.

ཝེདནཱནུཔསྶནཱདིཨུདྡེསཝཎྞནཱ

ཀེཝལཾ པནིདྷཱཏིཨཱདིནཱ ཨིདྷ ཨེཏྟཀཾ ཝེདིཏབྦནྟི ཝེདིཏབྦཾ པརིཙྪེདཾ དསྶེཏི. ཨདྡམདཀྑཱིཏི དྭེཔི ཨེཀཏྠཱ. སམྨདྡསོཏི སམྨཱ པསྶཀོ.

སུཁདུཀྑཏོཔི ཙཱཏི སུཁཱདཱིནཾ ཋིཏིཝིཔརིཎཱམཉཱཎསུཁཏཱཡ, ཝིཔརིཎཱམཊྛིཏིཨཉྙཱཎདུཀྑཏཱཡ ཙ ཝུཏྟཏྟཱ ཏིསྶོཔི ཙ སུཁཏོ ཏིསྶོཔི ཙ དུཀྑཏོ ཨནུཔསྶིཏབྦཱཏི ཨཏྠོ.

རཱུཔཱདིཨཱརམྨཎཚནྡཱདིཨདྷིཔཏིཉཱཎཱདིསཧཛཱཏཀཱམཱཝཙརཱདིབྷཱུམིནཱནཏྟབྷེདཱནཾ ཀུསལཱཀུསལཏབྦིཔཱཀཀིརིཡཱནཱནཏྟབྷེདསྶ ཙ ཨཱདི-སདྡེན སསངྑཱརིཀཱསངྑཱརིཀསཝཏྠུཀཱཝཏྠུཀཱདིནཱནཏྟབྷེདཱནཉྩ ཝསེནཱཏི ཡོཛེཏབྦཾ. སུཉྙཏཱདྷམྨསྶཱཏི ‘‘དྷམྨཱ ཧོནྟི, ཁནྡྷཱ ཧོནྟཱི’’ཏིཨཱདིནཱ (དྷ. ས. ༡༢༡) སུཉྙཏཱཝཱརེ ཨཱགཏསུཉྙཏཱསབྷཱཝསྶ ཝསེན. ཀཱམཉྩེཏྠཱཏིཨཱདིནཱ པུབྦེ པཧཱིནཏྟཱ པུན པཧཱནཾ ན ཝཏྟབྦནྟི ཙོདནཾ དསྶེཏི, མགྒཙིཏྟཀྑཎེ ཝཱ ཨེཀཏྠ པཧཱིནཾ སབྦཏྠ པཧཱིནཾ ཧོཏཱིཏི ཝིསུཾ ཝིསུཾ ན ཝཏྟབྦནྟི. ཏཏྠ པུརིམཙོདནཱཡ ནཱནཱཔུགྒལཔརིཧཱརོ, པཙྪིམཱཡ ནཱནཱཙིཏྟཀྑཎིཀཔརིཧཱརོ. ལོཀིཡབྷཱཝནཱཡ ཧི ཀཱཡེ པཧཱིནཾ ན ཝེདནཱདཱིསུ ཝིཀྑམྦྷིཏཾ ཧོཏི. ཡདིཔི ན པཝཏྟེཡྻ, ན པཊིཔཀྑབྷཱཝནཱཡ ¶ ཏཏྠ སཱ ཨབྷིཛ྄ཛྷཱདོམནསྶསྶ ཨཔྤཝཏྟི ཧོཏཱིཏི པུན ཏཔྤཧཱནཾ ཝཏྟབྦམེཝཱཏི. ཨུབྷཡཏྠ ཝཱ ཨུབྷཡཾ སམྦྷཝཏོ ཡོཛེཏབྦཾ. ཨེཀཏྠ པཧཱིནཾ ¶ སེསེསུཔི པཧཱིནཾ ཧོཏཱིཏི མགྒསཏིཔཊྛཱནབྷཱཝནཾ, ལོཀིཡབྷཱཝནཱཡ ཝཱ སབྦཏྠ ཨཔྤཝཏྟིམཏྟཾ སནྡྷཱཡ ཝུཏྟཾ. ‘‘པཉྩཔི ཁནྡྷཱ ལོཀོ’’ཏི ཧི ཙཏཱུསུཔི ཝུཏྟནྟི.

ཝེདནཱནུཔསྶནཱདིཨུདྡེསཝཎྞནཱ ནིཊྛིཏཱ.

ཨུདྡེསཝཱརཝཎྞནཱ ནིཊྛིཏཱ.

ཀཱཡཱནུཔསྶནཱནིདྡེསཝཎྞནཱ

༣༥༦. སབྦཔྤཀཱརཝཙནེན ཨུདྡེསེ དསྶིཏཱ ཨཛ྄ཛྷཏྟཱདིཨནུཔསྶནཱ པཀཱརཱ ཙ གཧིཏཱ. ཏཏྠ ཨནྟོགདྷཱ ཙུདྡས པཀཱརཱ, ཀཱཡགཏཱསཏིསུཏྟེ ཝུཏྟཱ ཀེསཱདིཝཎྞཀསིཎཱརམྨཎཙཏུཀྐཛ྄ཛྷཱནཔྤཀཱརཱ, ལོཀིཡཱདིཔྤཀཱརཱ ཙཱཏི ཏེཔི གཧིཏཱ ཨེཝ. ནིདྡེསེ ཧི ཨེཀཔྤཀཱརནིདྡེསེན ནིདསྶནམཏྟཾ ཀཏནྟི, སབྦཔྤཀཱརགྒཧཎཉྩ བཱཧིརེསུཔི ཨེཀདེསསམྦྷཝཏོ ཀཏནྟི དཊྛབྦཾ.

ཏིརིཡཾ ཏཙཔརིཙྪིནྣནྟི ཨེཏྠ ནནུ ཀེསལོམནཁཱནཾ ཨཏཙཔརིཙྪིནྣཏཱ ཏཙསྶ ཙ ཨཏྠཱིཏི? ཡདིཔི ཨཏྠི, ཏཙཔརིཙྪིནྣབཧུལཏཱཡ པན ཏཙཔརིཙྪིནྣཏཱ ན ན ཧོཏི ཀཱཡསྶཱཏི ཨེཝཾ ཝུཏྟཾ. ཏཙོ པརིཡནྟོ ཨསྶཱཏི ཏཙཔརིཡནྟོཏི ཝུཏྟོཏི ཨེཏེན པན ཝཙནེན ཀཱཡེཀདེསབྷཱུཏོ ཏཙོ གཧིཏོ ཨེཝ. ཏཔྤཊིབདྡྷཱ ཙ ཀེསཱདཡོ ཏདནུཔཝིཊྛམཱུལཱ ཏཙཔརིཡནྟཱཝ ཧོནྟཱིཏི དྭཏྟིཾསཱཀཱརསམཱུཧོ སབྦོཔི ཀཱཡོ ཏཙཔརིཡནྟོཏི ཝུཏྟོཏི ཝེདིཏབྦོ.

‘‘པཱུརཾ ནཱནཔྤཀཱརསྶཱ’’ཏི ཝུཏྟཾ, ཀེ པན ཏེ པཀཱརཱ? ཡེཧི ནཱནཔྤཀཱརཾ ཨསུཙི ཝུཏྟནྟི ཀེསཱ ལོམཱཏིཨཱདི ཝུཏྟནྟི ཨིམམཏྠཾ དཱིཔེནྟོ ཨཱཧ ‘‘ཨེཏེ ཀེསཱདཡོ ཨཱཀཱརཱ’’ཏི. ཨཱཀཱརཱ པཀཱརཱཏི ཧི ཨེཀོ ཨཏྠོ.

ནིསིནྣསྶ ¶ ཡཱཝ ཨཔརིཔྥནྡནིསཛྫཱམཱུལཀཾ དུཀྑཾ ཨུཔྤཛྫཏི, ཡཱཝཏཱ ཨུཊྛཱཏི ཝཱ, ཏཱཝ ཨེཀོ ནིསཛྫཝཱརོ. ཡེན ཝིདྷིནཱ ཨུགྒཧེ ཀུསལོ ཧོཏི, སོ སཏྟཝིདྷོ ཝིདྷི ‘‘ཨུགྒཧཀོསལླ’’ནྟི ཝུཙྩཏི, ཏཾནིབྦཏྟཾ ཝཱ ཉཱཎཾ.

པཐཝཱིདྷཱཏུབཧུལབྷཱཝཏོ མཏྠལུངྒསྶ ཀརཱིསཱཝསཱནེ ཏནྟིཨཱརོཔནམཱཧ. ཨེཏྠ པན མཾསཾ…པེ… ཝཀྐཾ…པེ… ཀེསཱཏི ཨེཝཾ ཝཀྐཔཉྩཀཱདཱིསུ ¶ ཨནུལོམསཛ྄ཛྷཱཡཾ ཝཏྭཱ པཊིལོམསཛ྄ཛྷཱཡོ པུརིམེཧི སམྦནྡྷོ ཝུཏྟོ. སྭཱཡཾ ཡེ པརཏོ ཝིསུཾ ཏིཔཉྩཱཧཾ, པུརིམེཧི ཨེཀཏོ ཏིཔཉྩཱཧནྟི ཚཔཉྩཱཧཾ སཛ྄ཛྷཱཡཱ ཝཀྑམཱནཱ, ཏེསུ ཨཱདིཨནྟདསྶནཝསེན ཝུཏྟོཏི དཊྛབྦོ. ཨནུལོམཔཊིལོམསཛ྄ཛྷཱཡེཔི ཧི པཊིལོམསཛ྄ཛྷཱཡོ ཨནྟིམོཏི. སཛ྄ཛྷཱཡཔྤཀཱརནྟརཾ ཝཱ ཨེཏམྤཱིཏི ཝེདིཏབྦཾ. ཧཏྠསངྑལིཀཱ ཨངྒུལིཔནྟི. ལཀྑཎཔཊིཝེདྷསྶཱཏི ཨསུབྷལཀྑཎཔཊིཝེདྷསྶ, དྷཱཏུལཀྑཎཔཊིཝེདྷསྶ ཝཱ.

ཨཏྟནོ བྷཱགོ སབྷཱགོ, སབྷཱགེན པརིཙྪེདོ སབྷཱགཔརིཙྪེདོ, ཧེཊྛུཔརིཏིརིཡནྟེཧི སཀཀོཊྛཱསིཀཀེསནྟརཱདཱིཧི ཙ པརིཙྪེདོཏི ཨཏྠོ.

དྷཱཏུཝིབྷངྒོ (མ. ནི. ༣.༣༤༢ ཨཱདཡོ) པུཀྐུསཱཏིསུཏྟཾ. སཱདྷཱརཎཝསེནཱཏི ཨེཏྟཀེནེཝ སིདྡྷེ སབྦ-གྒཧཎཾ ཝཎྞཀསིཎཝསེན ཙཏུཀྐཛ྄ཛྷཱནིཀསམཐསཱདྷཱརཎཏྟསྶ ཙ དསྶནཏྠཾ.

ཨོཀྐམནཝིསྶཛྫནནྟི པཊིཔཛྫིཏབྦཝཛྫེཏབྦེ མགྒེཏི ཨཏྠོ. བཧིདྡྷཱ པུཐུཏྟཱརམྨཎེཏི ཨེཏྠ ཀཱཡཱནུཔསྶནཾ ཧིཏྭཱ སུབྷཱདིཝསེན གཡ྄ཧམཱནཱ ཀེསཱདཡོཔི བཧིདྡྷཱ པུཐུཏྟཱརམྨཎཱནེཝཱཏི ཝེདིཏབྦཱ. ཨུཀྐུཊྛུཀྐཊྛིཊྛཱནེཡེཝ ཨུཊྛཧིཏྭཱཏི པུབྦེ ཝིཡ ཨེཀཏྠ ཀཏཱཡ ཨུཀྐུཊྛིཡཱ ཀམེན སབྦཏཱལེསུ པཏིཏྭཱ ཨུཊྛཧིཏྭཱ པརིཡནྟཏཱལཾ ཨཱདིཏཱལཉྩ ཨགནྟྭཱ ཏཏོ ཏཏོ ཏཏྠ ཏཏྠེཝ ཀཏཱཡ ཨུཀྐུཊྛིཡཱ ཨུཊྛཧིཏྭཱཏི ཨཏྠོ.

ཨདྷིཙིཏྟནྟི སམཐཝིཔསྶནཱཙིཏྟཾ. ཨནུཡུཏྟེནཱཏི ཡུཏྟཔཡུཏྟེན, བྷཱཝེནྟེནཱཏི ཨཏྠོ. སམཱདྷིནིམིཏྟཾ ཨུཔལཀྑཎཱཀཱརོ སམཱདྷིཡེཝ. མནསི ཀཱཏབྦནྟི ཙིཏྟེ ཀཱཏབྦཾ, ཨུཔྤཱདེཏབྦནྟི ཨཏྠོ. སམཱདྷིཀཱརཎཾ ཝཱ ཨཱརམྨཎཾ སམཱདྷིནིམིཏྟཾ ཨཱཝཛྫིཏབྦནྟི ཨཏྠོ. ཋཱནཾ ཨཏྠཱིཏི ཝཙནསེསོ, ཏཾ ཙིཏྟཾ ཀོསཛྫཱཡ སཾཝཏྟེཡྻ, ཨེཏསྶ སཾཝཏྟནསྶ ཀཱརཎཾ ཨཏྠཱིཏི ¶ ཨཏྠོ. ཏཾ ཝཱ མནསིཀརཎཾ ཙིཏྟཾ ཀོསཛྫཱཡ སཾཝཏྟེཡྻཱཏི ཨེཏསྶ ཋཱནཾ ཀཱརཎནྟི ཨཏྠོ. ན ཙ པབྷངྒཱུཏི ཀམྨནིཡབྷཱཝཱུཔགམནེན ཙ པབྷིཛྫནསབྷཱཝནྟི ཨཏྠོ.

ཨཱལིམྤེཏཱིཏི ཨཱདཱིཔེཏི ཛཱལེཏི. ཏཉྩཱཏི ཏཾ པིལ༹ནྡྷནཝིཀཏིསངྑཱཏཾ ཨཏྠཾ པཡོཛནཾ. ཨསྶཱཏི སུཝཎྞཀཱརསྶ ཨནུབྷོཏི སམྦྷོཏི སཱདྷེཏི ¶ . ཨསྶ ཝཱ སུཝཎྞསྶ ཏཾ ཨཏྠཾ སུཝཎྞཀཱརོ ཨནུབྷོཏི པཱཔུཎཱཏི.

ཨབྷིཉྙཱཡ ཨིདྡྷིཝིདྷཱདིཉཱཎེན སཙྪིཀརཎཱིཡསྶ ཨིདྡྷིཝིདྷཔཙྩནུབྷཝནཱདིཀསྶ ཨབྷིཉྙཱསཙྪིཀརཎཱིཡསྶ. པཙྩཀྑཾ ཡསྶ ཨཏྠི, སོ སཀྑི, སཀྑིནོ བྷབྦཏཱ སཀྑིབྷབྦཏཱ, སཀྑིབྷཝནཏཱཏི ཝུཏྟཾ ཧོཏི. སཀྑི ཙ སོ བྷབྦོ ཙཱཏི ཝཱ སཀྑིབྷབྦོ. ཨཡཉྷི ཨིདྡྷིཝིདྷཱདཱིནཾ བྷབྦོ, ཏཏྠ ཙ སཀྑཱིཏི སཀྑིབྷབྦོ, ཏསྶ བྷཱཝོ སཀྑིབྷབྦཏཱ, ཏཾ པཱཔུཎཱཏི. ཨཱཡཏནེཏི པུབྦཧེཏཱདིཀེ ཀཱརཎེ སཏི.

སཱིཏིབྷཱཝནྟི ནིབྦཱནཾ, ཀིལེསདརཐཝཱུཔསམཾ ཝཱ. སམྤཧཾསེཏཱིཏི སམཔཝཏྟཾ ཙིཏྟཾ ཏཐཱཔཝཏྟིཡཱ པཉྙཱཡ ཏོསེཏི ཨུཏྟེཛེཏི. ཡདཱ ཝཱ ནིརསྶཱདཾ ཙིཏྟཾ བྷཱཝནཱཡ ན པཀྑནྡཏི, ཏདཱ ཛཱཏིཨཱདཱིནི སཾཝེགཝཏྠཱུནི པཙྩཝེཀྑིཏྭཱ སམྤཧཾསེཏི སམུཏྟེཛེཏི.

ཏིརིཡཾ ཨཉྙམཉྙེན པརིཙྪིནྣཱ, ཀཐཾ? དྭེ ཀེསཱ ཨེཀཏོ ནཏྠཱིཏི. ཨཱསཡོཏི ནིསྶཡོ, པཙྩཡོཏི ཨཏྠོ.

ནཁཱ ཏིརིཡཾ ཨཉྙམཉྙེན པརིཙྪིནྣཱཏི ཝིསུཾ ཝཝཏྠིཏཏཾ སནྡྷཱཡ ཝུཏྟཾ. ཏམེཝ ཧི ཨཏྠཾ དསྶེཏུཾ ‘‘དྭེ ནཁཱ ཨེཀཏོ ནཏྠཱི’’ཏི ཨཱཧཱཏི.

སུཁུམམྤཱིཏི ཡཐཱཝུཏྟཨོལཱ༹རིཀཙམྨཏོ སུཁུམཾ ཨནྟོམུཁཙམྨཱདི. ཀོཊྛཱསེསུ ཝཱ ཏཙེན པརིཙྪིནྣཏྟཱ ཡཾ དུརུཔལཀྑཎཱིཡཾ, ཏཾ ‘‘སུཁུམ’’ནྟི ཝུཏྟཾ. ཏཉྷི ཝུཏྟནཡེན ཏཙཾ ཝིཝརིཏྭཱ པསྶནྟསྶ པཱཀཊཾ ཧོཏཱིཏི.

ཏཱལགུལ༹པཊལཾ ¶ ནཱམ པཀྐཏཱལཕལལསིཀཾ ཏཱལཔཊྚིཀཱཡ ལིམྤིཏྭཱ སུཀྑཱཔེཏྭཱ ཨུདྡྷརིཏྭཱ གཧིཏཔཊལཾ.

ཨེཝཾ ཏིམཏྟཱནཱིཏི ཨེཝཾ-མཏྟ-སདྡེཧི གོཔྥཀཊྛིཀཱདཱིནི ཨཝུཏྟཱནིཔི དསྶེཏཱིཏི ཝེདིཏབྦཾ. ཀཱིལཱ༹གོལ༹ཀཱནི སུཏྟེན བནྡྷིཏྭཱ ཨཉྙམཉྙཾ གྷཊྚེཏྭཱ ཀཱིལ༹ནགོལ༹ཀཱནི.

ཏཏྠ ཛངྒྷཊྛིཀསྶ པཏིཊྛིཏཊྛཱནནྟི ཛཎྞུཀཊྛིམྷི པཝིསིཏྭཱ ཋིཏཊྛཱནནྟི ཨདྷིཔྤཱཡོ. ཏེན ཨཊྛིནཱ པཏིཊྛིཏཊྛཱནཾ ཡཾ ཀཊིཊྛིནོ, ཏཾ ཨགྒཚིནྣམཧཱཔུནྣཱགཕལསདིསཾ. སཱིསཀཔཊྚཝེཋཀཾ ཝེཋེཏྭཱ ཋཔིཏསཱིསམཡཾ པཊྚཀཾ. སུཏྟཀནྟནསལཱཀཱཝིདྡྷཱ ¶ གོལ༹ཀཱ ཝཊྚནཱཏི ཝུཙྩནྟི, ཝཊྚནཱནཾ ཨཱཝལི ཝཊྚནཱཝལི. ཨཝལེཁནསཏྠཀཾ ཨུཙྪུཏཙཱཝལེཁནསཏྠཀཾ.

ཝཀྐབྷཱགེན པརིཙྪིནྣནྟི ཝཀྐཔརིཡནྟབྷཱགེན པརིཙྪིནྣཾ.

སཀྑརསུདྷཱཝཎྞནྟི མརུམྤེཧི ཀཏསུདྷཱཝཎྞཾ. ‘‘སེཏསཀྑརསུདྷཱཝཎྞ’’ནྟི ཙ པཱཋཾ ཝདནྟི, སེཏསཀྑརཱཝཎྞཾ སུདྷཱཝཎྞཉྩཱཏི ཨཏྠོ.

ཡཏྠ ཨནྣཔཱནཾ ནིཔཏིཏྭཱ ཏིཊྛཏཱིཏི སམྦནྡྷོ.

ཝིསམཙྪིནྣཀལཱཔོ ཝིསམཾ ཨུདཀཾ པགྒྷརཏི, ཨེཝམེཝ སརཱིརཾ ཀེསཀཱུཔཱདིཝིཝརེཧི ཨུཔརི ཧེཊྛཱ ཏིརིཡཉྩ ཝིསམཾ པགྒྷརཏཱིཏི དསྶེཏུཾ ཝིསམཙྪིནྣ-གྒཧཎཾ ཀརོཏི.

ཨཏིཀཊུཀཨཙྩུཎྷཱདིཀོ ཝིསབྷཱགཱཧཱརོ ཨུཎྷཀཱལེ པཝཏྟམཱནཱནཾ དྷཱཏཱུནཾ ཝིསབྷཱགཏྟཱ.

ཨེཀཏྟཱརམྨཎབལེནེཝ ཝཱཏི ཝིཀྑམྦྷིཏནཱིཝརཎེན སུསམཱཧིཏཙིཏྟེན ཨུཔཊྛིཏསྶ ནཱནཱརམྨཎཝིཔྥནྡནཝིརཧེན ཨེཀསབྷཱཝསྶ ཨཱརམྨཎསྶ ཝསེན. ཏཉྷི ཨེཀཏྟཱརམྨཎཾ ཨུཔཊྛཧམཱནམེཝ ཨཏྟནི ཨབྷིརཏིཾ, སཱཏིསཡཾ ཕརཎཔཱིཏིཾ, ཨིཊྛཱཀཱརཱནུབྷཝནཉྩ སོམནསྶཾ ཨུཔྤཱདེཏི. ན ཧི ཨབྷིརཏིསོམནསྶེཧི ཝིནཱ ཨནཏིཀྐནྟཔཱིཏིསུཁསྶ ཨེཀཏྟུཔཊྛཱནཾ ཨཏྠཱིཏི.

ཨཝིསེསཏོ ¶ པན སཱདྷཱརཎཝསེནཱཏི པཊིཀཱུལདྷཱཏུཝཎྞཝིསེསཾ ཨཀཏྭཱ སམཐཝིཔསྶནཱསཱདྷཱརཎཝསེནཱཏི ཨཏྠོ. ཏིཝིདྷེནཱཏི ཨནུལོམཱདིནཱ ཝཀྑམཱནེན. ཚ མཱསེཏི ཨདྡྷམཱསེ ཨཱུནེཔི མཱསཔརིཙྪེདེན པརིཙྪིཛྫམཱནེ སཛ྄ཛྷཱཡེ ཚ མཱསཱ པརིཙྪེདཀཱ ཧོནྟཱིཏི ཀཏྭཱ ཝུཏྟནྟི ཝེདིཏབྦཾ. པརིཙྪིཛྫམཱནསྶ མཱསནྟརགམནནིཝཱརཎཉྷི ཚམཱསགྒཧཎཾ, ན སཀལཚམཱསེ པརིཝཏྟདསྶནཏྠཾ. ཨཱཙརིཡཱཏི ཨཊྛཀཐཱཙརིཡཱ.

ལཀྑཎནྟི དྷཱཏུཔཊིཀཱུལལཀྑཎཾ. ཛནཾ ན ཨརཧནྟཱིཏི ཨཛཉྙཱ, ཛནེ པཝེསེཏུཾ ཨཡུཏྟཱ ཛིགུཙྪནཱིཡཱཏི ཝུཏྟཾ ཧོཏི.

པཊིཔཱཊིཡཱ ཨཊྛཱིནཱིཏི པཊིཔཱཊིཡཱ ཨཊྛཱིནི ཀོཊིཡཱ ཋིཏཱནི. ན ཨེཏྠ ཀོཙི ཨཏྟཱ ནཱམ ཨཏྠི, ཨཊྛཱིནི ཨེཝ ཨཊྛིཔུཉྫམཏྟོ ཨེཝཱཡཾ སངྒྷཱཊོཏི དསྶེཏི ¶ . ཨནེཀསནྡྷིཡམིཏོཏི ཨནེཀེཧི སནྡྷཱིཧི ཡམིཏོ སམྦདྡྷོ སོ ཨཊྛིཔུཉྫོཏི དསྶེཏི. ན ཀེཧིཙཱིཏི ཡམེནྟཾ ཨཏྟཱནཾ པཊིསེདྷེཏི. ཙོདིཏོ ཛརཱཡ མརཎཱབྷིམུཁགམནེན ཙོདིཏོ.

མཧཱབྷཱུཏཾ ཨུཔཱདཱརཱུཔེན པརིཙྪིནྣཾ ‘‘ནཱིལཾ པཱིཏཾ སུགནྡྷཾ དུགྒནྡྷ’’ནྟིཨཱདིནཱ. ཨུཔཱདཱརཱུཔཾ མཧཱབྷཱུཏེན ཏནྣིསྶིཏསྶ ཏསྶ ཏཏོ བཧི ཨབྷཱཝཱ. ཚཱཡཱཏཔཱནཾ ཨཱཏཔཔཙྩཡཚཱཡུཔྤཱདཀབྷཱཝོ ཨཉྙམཉྙཔརིཙྪེདཀཏཱ. རཱུཔཀྑནྡྷསྶ པརིགྒཧིཏཏྟཱ ཏདནྟོགདྷཱནཾ ཙཀྑཱདིཨཱཡཏནདྭཱརཱནཾ ཝསེན ཏཾཏཾདྭཱརིཀཱ ཨརཱུཔིནོ ཁནྡྷཱ པཱཀཊཱ ཧོནྟི, ཨཱཡཏནཱནི ཙ དྭཱརཱནི ཙ ཨཱཡཏནདྭཱརཱནཱིཏི ཝཱ ཨཏྠོ. ཏེན རཱུཔཱཡཏནཱདཱིནཉྩ ཝསེནཱཏི ཝུཏྟཾ ཧོཏི.

སཔྤཙྩཡཱཏི སཔྤཙྩཡབྷཱཝཱ, པཙྩཡཱཡཏྟཾ ཧུཏྭཱ ནིབྦཏྟནྟི ཝུཏྟཾ ཧོཏི. སམཱནོ ཝཱ སདིསོ ཡུཏྟོ པཙྩཡོ སཔྤཙྩཡོ, ཏསྨཱ སཔྤཙྩཡཱ.

ཨེཏྟཀོཏི ཡཐཱཝུཏྟེན ཨཱཀཱརེན པགུཎོ ཀོཊྛཱསོ. ཨུགྒཧོཝ ཨུགྒཧསནྡྷི. ཝཎྞཱདིམུཁེན ཧི ཨུཔཊྛཱནཾ ཨེཏྠ སནྡྷཱིཡཏི སམྦཛ྄ཛྷཏཱིཏི ‘‘སནྡྷཱི’’ཏི ཝུཙྩཏི.

ཨུཔཊྛཱཏཱིཏི ཝཎྞཱདིཝསེན ཨུཔཊྛཱཏཱིཏི ཨཏྠོ. པཉྩངྒསམནྣཱགཏེཏི ནཱཏིདཱུརནཱཙྩཱསནྣགམནཱགམནསམྤནྣནྟི ཨེཀངྒཾ, དིཝཱ ཨབྦོཀིཎྞཾ རཏྟིཾ ཨཔྤསདྡཾ ཨཔྤནིགྒྷོསནྟི ཨེཀཾ, ཨཔྤཌཾསམཀསཝཱཏཱཏཔསརཱིསཔསམྥསྶནྟི ¶ ཨེཀཾ, ཏསྨིཾ ཁོ པན སེནཱསནེ ཝིཧརནྟསྶ ཨཔྤཀསིརེན ཨུཔྤཛྫཏི ཙཱིཝར…པེ… པརིཀྑཱརོཏི ཨེཀཾ, ཏསྨིཾ པན སེནཱསནེ ཐེརཱ བྷིཀྑཱུ ཝིཧརནྟི བཧུསྶུཏཱཏི ཨེཀཾ (ཨ. ནི. ༡༠.༡༡). པཉྩངྒསམནྣཱགཏེནཱཏི ཨཔྤཱབཱདྷཱསཱཋེཡྻསདྡྷཱཔཉྙཱཝཱིརིཡེཧི པདྷཱནིཡངྒེཧི སམནྣཱགཏེན.

ཨུཊྛཱནཀདཱཡནྟི ཏེཧི ཁེཏྟེཧི ཨུཊྛཱནཀཾ, ཏེཧི དཱཏབྦདྷཉྙནྟི ཨཏྠོ. ཨེཏྠ ཙ ཨཊྛཀུམྦྷདཱཡཀཁེཏྟཾ ཝིཡ མུཁདྷོཝནཀིཙྩཾ, སོལ༹སཀུམྦྷདཱཡཀཾ ཝིཡ ཁཱདནབྷུཉྫནཀིཙྩཾ དཊྛབྦཾ ལཧུཀགརུཀབྷཱཝཏོ. ཏཏོ པན ཡཾ དུཀྑཾ ནིབྦཏྟཏི, ཏཾ ཨཉྙཉྩ དྭཏྟིཾསཱཀཱརམནསིཀཱརེན ཙ ནིཝཏྟཏཱིཏི ཨཱཧ ‘‘ཨེཏྠེཝ ཀམྨཾ ཀཱཏབྦ’’ནྟི. ཨེཏྟཱཝཏཱཏི ཨེཀདིཝསཾ ཏིཾས ཝཱརེ མནསིཀཱརཊྛཔནེན.

སཧསྶུདྡྷཱརཾ ¶ སཱདྷེཏྭཱཏི སཧསྶཝཌྜྷིཏཾ ཨིཎཾ ཡོཛེཏྭཱ. ཨུདྡྷརིཏབྦོཏི ཨུདྡྷཱརོཏི ཧི ཝཌྜྷི ཝུཙྩཏཱིཏི. སུདྡྷཙིཏྟེནཱཏི ཝིཀྑེཔཱདིཀིལེསཝིརཧིཏཙིཏྟེན. ཀེསཱདཱིསུ ཏཙེ རཛྫནྟཱ སུཙྪཝིཙམྨཾ ཏཙོཏི གཧེཏྭཱ ‘‘སུཝཎྞཱདིཝཎྞོ མེ ཏཙོ’’ཏིཨཱདིནཱ རཛྫནྟི.

ཏེསུ དྭེ ཨེཀམགྒཾ པཊིཔཛྫམཱནཱ ནཱམ ན ཧོནྟཱིཏི ཡཐཱ ཏཐཱ ཝཱ པལཱཡནྟཱིཏི ཨཏྠོ. ཏཏྠ རཱགཱདིཝཏྠུབྷཱཝེན དྭཏྟིཾསཱཀཱརཱནཾ ཙོརསདིསཏཱ ཨནཏྠཱཝཧཏཱ དཊྛབྦཱ.

ཀམྨམེཝ ཝིསེསཱདྷིགམསྶ ཋཱནནྟི ཀམྨཊྛཱནཾ བྷཱཝནཱ ཝུཙྩཏི. ཏེནཱཧ ‘‘མནསིཀརོནྟསྶ ཨཔྤནཾ པཱཔུཎཱཏཱི’’ཏི. ཀམྨསྶ ཝཱ བྷཱཝནཱཡ ཋཱནཾ ཨཱརམྨཎཾ ཨཔྤནཱརམྨཎབྷཱཝཱུཔགམནེན ཨཔྤནཾ པཱཔུཎཱཏཱིཏི ཝུཏྟཾ.

མཱནཛཱཏིཀོཏི ཨེཏེན ལངྒྷནསམཏྠཏཱཡོགེན ཨུཔསམརཧིཏཏཾ དསྶེཏི. ཙིཏྟམྤི ཧི ཏཐཱ ནཱནཱརམྨཎེསུ ཝཌྜྷིཏཾ ཨུཔསམརཧིཏནྟི དསྶེཏབྦནྟི.

ཧཏྠེ གཧིཏཔཉྷཝཏྠུ པཱཀཏིཀམེཝཱཏི ཝིསུདྡྷིམགྒེ ཝུཏྟཏཾ སནྡྷཱཡཱཧ. ཏཏྠ ཧི ཝུཏྟཾ –

‘‘མཱལཀཏྠེརོ ཀིར དཱིགྷབྷཱཎཀཨབྷཡཏྠེརཾ ཧཏྠེ གཧེཏྭཱ ‘ཨཱཝུསོ ཨབྷཡ, ཨིམཾ ཏཱཝ ¶ པཉྷཾ ཨུགྒཎྷཱཧཱི’ཏི ཝཏྭཱ ཨཱཧ ‘མཱལཀཏྠེརོ དྭཏྟིཾསཀོཊྛཱསེསུ དྭཏྟིཾསཔཋམཛ྄ཛྷཱནལཱབྷཱི, སཙེ རཏྟིཾ ཨེཀཾ, དིཝཱ ཨེཀཾ སམཱཔཛྫཏི, ཨཏིརེཀཌྜྷམཱསེན པུན སམྤཛྫཏི. སཙེ པན དེཝསིཀཾ ཨེཀམེཝ སམཱཔཛྫཏི, ཨཏིརེཀམཱསེན པུན སམྤཛྫཏཱི’’’ཏི.

ཨིདཾ པན ཨེཀཾ མནསིཀརོནྟསྶ ཨེཀཾ པཱཊིཡེཀྐཾ མནསིཀརོནྟསྶ དྭཏྟིཾསཱཏི ཨེཏསྶ སཱདྷནཏྠཾ ནིདསྶནཝསེན ཨཱནཱིཏནྟི དཊྛབྦཾ.

ཨནུཔཱདིནྣཀཔཀྑེ ཋིཏཱནཱིཏི ཨེཏེན ཙེཏིཡཔབྦཏཝཱསཱི མཧཱཏིསྶཏྠེརོ ཝིཡ, སངྒྷརཀྑིཏཏྠེརུཔཊྛཱཀསཱམཎེརོ ཝིཡ ཙ ཨནུཔཱདིནྣཀཔཀྑེ ཋཔེཏྭཱ གཧེཏུཾ སཀྐོནྟསྶ དསཝིདྷཱསུབྷཝསེན ཛཱིཝམཱནཀསརཱིརེཔི ཨུཔཊྛིཏེ ཨུཔཙཱརཔྤཏྟི དསྶིཏཱ ཧོཏཱིཏི ཝེདིཏབྦཱ. ‘‘ཨཏྠིསྶ ཀཱཡེ’’ཏི པན སཏྟཝསེན ཀེསཱདཱིསུ གཡ྄ཧམཱནེསུ ཡཐཱ ‘‘ཨིམསྨིཾ ¶ ཀཱཡེ’’ཏི སཏྟ-གྒཧཎརཧིཏེ ཨཧཾཀཱརཝཏྠུམྷི ཝིདྡྷསྟཱཧཾཀཱརེ སདཱ སནྣིཧིཏེ པཱཀཊེ ཙ ཨཏྟནོ ཀཱཡེ ཨུཔཊྛཱནཾ ཧོཏི, ན ཏཐཱ ཏཏྠཱཏི ཨཔྤནཾ ཨཔྤཏྟཱ ཨཱདཱིནཝཱནུཔསྶནཱཝ ཏཏྠ ཧོཏཱིཏི ཨདྷིཔྤཱཡེནཱཧ ‘‘ཨསུབྷཱནུཔསྶནཱསངྑཱཏཱ པན ཝིཔསྶནཱབྷཱཝནཱ ཧོཏཱིཏི ཝེདིཏབྦཱ’’ཏི.

༣༥༧. ཨཱདིམྷི སེཝནཱ ཨཱསེཝནཱ, ཝཌྜྷནཾ བྷཱཝནཱ, པུནཔྤུནཾ ཀརཎཾ བཧུལཱིཀམྨནྟི ཨཡམེཏེསཾ ཝིསེསོ.

༣༦༢. ཝཏྠུཔརིཉྙཱཡཱཏི ཨབྷིཛ྄ཛྷཱདོམནསྶཱནཾ ཝཏྠུབྷཱུཏསྶ ཀཱཡསྶ པརིཛཱནནེན. ཨཔྤིཏཱཏི གམིཏཱ, སཱ ཙ ཝིནཱསིཏཏཱཏི ཨཱཧ ‘‘ཝིནཱསིཏཱ’’ཏི. ཨཔྤཝཏྟིཡཾ ཋཔིཏཱཏིཔི ཨཔྤིཏཱཏི ཨཡམཏྠོ ནིརུཏྟིསིདྡྷིཡཱ ཝུཏྟོཏི དཊྛབྦོ. ཝིགཏནྟཱ ཀཏཱཏི ཨིདཱནི ཀཱཏབྦོ ཨནྟོ ཨེཏེསཾ ནཏྠཱིཏི ཝིགཏནྟཱ, ཨེཝཾབྷཱུཏཱ ཀཏཱཏི ཨཏྠོ. ཀམྨམེཝ ཝིསེསཱདྷིགམསྶ ཋཱནཾ ཀམྨཊྛཱནཾ, ཀམྨེ ཝཱ ཋཱནཾ བྷཱཝནཱརམྦྷོ ཀམྨཊྛཱནཾ, ཏཉྩ ཨནུཔསྶནཱཏི ཨཱཧ ‘‘ཨནུཔསྶནཱཡ ཀམྨཊྛཱན’’ནྟི, ཨནུཔསྶནཱཡ ཝུཏྟནྟི ཨདྷིཔྤཱཡོ.

ཀཱཡཱནུཔསྶནཱནིདྡེསཝཎྞནཱ ནིཊྛིཏཱ.

ཝེདནཱནུཔསྶནཱནིདྡེསཝཎྞནཱ

༣༦༣. སམྤཛཱནསྶ ¶ ཝེདིཡནཾ སམྤཛཱནཝེདིཡནཾ. ཝཏྠུནྟི སུཁཱདཱིནཾ ཨཱརམྨཎམཱཧ, ཏེན ཝཏྠུ ཨཱརམྨཎཾ ཨེཏིསྶཱཏི ཝཏྠུཨཱརམྨཎཱཏི སམཱསོ དཊྛབྦོ. ཝོཧཱརམཏྟཾ ཧོཏཱིཏི ཨེཏེན ‘‘སུཁཾ ཝེདནཾ ཝེདཡཱམཱི’’ཏི ཨིདཾ ཝོཧཱརམཏྟེན ཝུཏྟནྟི དསྶེཏི.

ཝཱིརིཡསམཱདྷིཾ ཡོཛེཏྭཱཏི ཨདྷིཝཱསནཝཱིརིཡསྶ ཨདྷིམཏྟཏཱཡ ཏསྶ སམཏཱཡ ཨུབྷཡཾ སཧ ཡོཛེཏྭཱ. སཧ པཊིསམྦྷིདཱཧཱིཏི ལོཀུཏྟརཔཊིསམྦྷིདཱཧི སཧ. ལོཀིཡཱནམྤི ཝཱ སཏི ཨུཔྤཏྟིཀཱལེ ཏཏྠ སམཏྠཏཾ སནྡྷཱཡ ‘‘སཧ པཊིསམྦྷིདཱཧཱི’’ཏི ཝུཏྟནྟི དཊྛབྦཾ. སམསཱིསཱིཏི ཝཱརསམསཱིསཱི ཧུཏྭཱ པཙྩཝེཀྑཎཝཱརསྶ ཨནནྟརཝཱརེ པརིནིབྦཱཡཱིཏི ¶ ཨཏྠོ. སངྑེཔམནསིཀཱརཝསེན མཧཱསཏིཔཊྛཱནེ, ཝིཏྠཱརམནསིཀཱརཝསེན རཱཧུལོཝཱདདྷཱཏུཝིབྷངྒཱདཱིསུ.

ཕསྶཔཉྩམཀེཡེཝཱཏི ཨེཝ-སདྡེན ཝུཏྟེསུ ཏཱིསུཔི མུཁེསུ པརིགྒཧསྶ སམཱནཏཾ དསྶེཏི. ནཱམརཱུཔཝཝཏྠཱནསྶ ཨདྷིཔྤེཏཏྟཱ ནིརཝསེསརཱུཔཔརིགྒཧསྶ དསྶནཏྠཾ ‘‘ཝཏྠུ ནཱམ ཀརཛཀཱཡོ’’ཏི ཨཱཧ, ན ཙཀྑཱདཱིནི ཚཝཏྠཱུནཱིཏི. ཀརཛཀཱཡསྶ པན ཝཏྠུབྷཱཝསཱདྷནཏྠཾ ‘‘ཨིདཉྩ པན མེ ཝིཉྙཱཎཾ ཨེཏྠ སིཏཾ, ཨེཏྠ པཊིབདྡྷ’’ནྟི (དཱི. ནི. ༡.༢༣༥; མ. ནི. ༢.༢༥༢) སུཏྟཾ ཨཱབྷཏཾ.

ཕསྶཝིཉྙཱཎཱནཾ པཱཀཊཏཱ ཀེསཉྩི ཧོཏཱིཏི ཡེསཾ ན ཧོཏི, ཏེ སནྡྷཱཡཱཧ ‘‘ཕསྶཝསེན ཝཱ ཧི…པེ… ན པཱཀཊཾ ཧོཏཱི’’ཏི. ཏེསཾ པན ཨཉྙེསཉྩ སབྦེསཾ ཝེནེཡྻཱནཾ ཝེདནཱ པཱཀཊཱཏི ཨཱཧ ‘‘ཝེདནཱཝསེན པན པཱཀཊཾ ཧོཏཱི’’ཏི. སཏདྷོཏསཔྤི ནཱམ སཏཝཱརཾ ཝིལཱཔེཏྭཱ ཝིལཱཔེཏྭཱ ཨུདཀེ པཀྑིཔིཏྭཱ ཨུདྡྷརིཏྭཱ གཧིཏསཔྤི.

ཝིནིཝཏྟེཏྭཱཏི ཙཏུཀྑནྡྷསམུདཱཡཏོ ཝིསུཾ ཨུདྡྷརིཏྭཱ. མཧཱསཏིཔཊྛཱནསུཏྟཱདཱིསུ ཀཏྠཙི པཋམཾ རཱུཔཀམྨཊྛཱནཾ ཝཏྭཱ པཙྪཱ ཨརཱུཔཀམྨཊྛཱནཾ ཝེདནཱཝསེན ཝིནིཝཏྟེཏྭཱ དསྶིཏཾ. ཀཏྠཙི ཨརཱུཔཀམྨཊྛཱནཾ ཨེཝ ཝེདནཱཝསེན ཨརཱུཔརཱསིཏོ, ཉཱཏཔརིཉྙཱཡ པརིཉྙཱཏཏོ ཝཱ རཱུཔཱརཱུཔརཱསིཏོ ཝཱ ཝིནིཝཏྟེཏྭཱ དསྶིཏཾ. ཏཏྠཱཔི ཡེསུ པཋམཾ ཉཱཏཔརིཉྙཱ ཝུཏྟཱ, ཏེསུ ཏདནྟོགདྷཾ ¶ . ཡེསུ ན ཝུཏྟཱ, ཏེསུ ཙ ཝེདནཱཡ ཨཱརམྨཎམཏྟཾ སཾཁིཏྟཾ པཱལི༹ཨནཱརུལ༹ྷཾ རཱུཔཀམྨཊྛཱནཾ སནྡྷཱཡ རཱུཔཀམྨཊྛཱནསྶ པཋམཾ ཀཐིཏཏཱ ཝུཏྟཱཏི ཝེདིཏབྦཱ.

‘‘མནོཝིཉྙེཡྻཱནཾ དྷམྨཱནཾ ཨིཊྛཱནཾ ཀནྟཱན’’ནྟིཨཱདིནཱ (མ. ནི. ༣.༣༠༦) ནཡེན ཝུཏྟཾ ཚགེཧསྶིཏསོམནསྶཾ པཉྩཀཱམགུཎེསུ ཨསྶཱདཱནུཔསྶིནོ ཨེཝ ཧོཏཱིཏི ཨཱཧ ‘‘པཉྩཀཱམགུཎཱམིསནིསྶིཏཱ ཚ གེཧསྶིཏསོམནསྶཝེདནཱ’’ཏི.

ཝེདནཱནུཔསྶནཱནིདྡེསཝཎྞནཱ ནིཊྛིཏཱ.

ཙིཏྟཱནུཔསྶནཱནིདྡེསཝཎྞནཱ

༣༦༥. ཀིལེསསམྤཡུཏྟཱནཾ ¶ དྷམྨཱནཾ ཀེཧིཙི ཀིལེསེཧི ཝིཔྤཡོགེཔི སཏི ཡེཧི སམྤཡུཏྟཱ, ཏེཧི སཾཀིལེསབྷཱཝེན སདིསེཧི སཾཀིལིཊྛཏྟཱ ཨིཏརེཧིཔི ན ཝིསུདྡྷཏཱ ཧོཏཱིཏི ཨཱཧ ‘‘ན པཙྪིམཔདཾ བྷཛནྟཱི’’ཏི. དུཝིདྷནྟི ཝིསུཾ ཝཙནཾ སརཱགསདོསེཧི ཝིསིཊྛགྒཧཎཏྠཾ. ཨཝིཔསྶནུཔགཏྟཱ ‘‘ཨིདྷ ཨོཀཱསོཝ ནཏྠཱི’’ཏི ཝུཏྟཾ.

ཙིཏྟཱནུཔསྶནཱནིདྡེསཝཎྞནཱ ནིཊྛིཏཱ.

དྷམྨཱནུཔསྶནཱནིདྡེསོ

ཀ. ནཱིཝརཎཔབྦཝཎྞནཱ

༣༦༧. ཀཎྷསུཀྐཱནཾ ཡུགནདྡྷཏཱ ནཏྠཱིཏི པཛཱནནཀཱལེ ཨབྷཱཝཱ ‘‘ཨབྷིཎྷསམུདཱཙཱརཝསེནཱ’’ཏི ཨཱཧ.

སུབྷམྤཱིཏི ¶ ཀཱམཙྪནྡོཔི. སོ ཧི ཨཏྟནོ གཧཎཱཀཱརེན ‘‘སུབྷ’’ནྟི ཝུཙྩཏི, ཏེནཱཀཱརེན པཝཏྟམཱནཀསྶ ཨཉྙསྶ ཀཱམཙྪནྡསྶ ནིམིཏྟཏྟཱ ‘‘ནིམིཏྟ’’ནྟི ཙཱཏི. ཨཱཀངྑིཏསྶ ཧིཏསུཁསྶ ཨནུཔཱཡབྷཱུཏོ མནསིཀཱརོ ཨནུཔཱཡམནསིཀཱརོ. ཏཏྠཱཏི ནིཔྥཱདེཏབྦེ ཨཱརམྨཎབྷཱུཏེ ཙ དུཝིདྷེཔི སུབྷནིམིཏྟེ.

ཨསུབྷམྤཱིཏི ཨསུབྷཛ྄ཛྷཱནམྤི. ཏཾ པན དསསུ ཨསུབྷེསུ ཀེསཱདཱིསུ ཙ པཝཏྟཾ དཊྛབྦཾ. ཀེསཱདཱིསུ ཧི སཉྙཱ ཨསུབྷསཉྙཱཏི གིརིམཱནནྡསུཏྟེ ཝུཏྟཱཏི. ཨེཏྠ ཙཏུབྦིདྷསྶཔི ཨཡོནིསོམནསིཀཱརསྶ ཡོནིསོམནསིཀཱརསྶ ཙ དསྶནཾ ནིརཝསེསདསྶནཏྠཾ ཀཏནྟི ཝེདིཏབྦཾ. ཏེསུ པན ཨསུབྷེ སུབྷནྟི ཨསུབྷནྟི ཙ མནསིཀཱརོ ཨིདྷཱདྷིཔྤེཏོ, ཏདནུཀུལཏྟཱ ཝཱ ཨིཏརེཔཱིཏི.

བྷོཛནེ མཏྟཉྙུནོ ཐིནམིདྡྷཱབྷིབྷཝཱབྷཱཝཱ ཨོཏཱརཾ ཨལབྷམཱནོ ཀཱམརཱགོ པཧཱིཡཏཱིཏི ཝདནྟི. བྷོཛནནིསྶིཏཾ པན ཨཱཧཱརེཔཊིཀཱུལསཉྙཾ, ཏབྦིཔརིཎཱམསྶ ཏདཱདྷཱརསྶ ཏསྶ ཙ ཨུཔནིསྶཡབྷཱུཏསྶ ཨསུབྷཏཱདིདསྶནཾ, ཀཱཡསྶ ཙ ཨཱཧཱརཊྛིཏིཀཏཱདིདསྶནཾ སོ ¶ ཨུཔྤཱདེཏཱིཏི ཏསྶ ཀཱམཙྪནྡོ པཧཱིཡཏེཝ, ཨབྷིདྷམྨཔརིཡཱཡེན སབྦོཔི ལོབྷོ ཀཱམཙྪནྡནཱིཝརཎནྟི ཨཱཧ ‘‘ཨརཧཏྟམགྒེནཱ’’ཏི.

ཨོདིསྶཀཱནོདིསྶཀདིསཱཕརཎཱནནྟི ཨཏྟགརུཨཏིཔྤིཡསཧཱཡམཛ྄ཛྷཏྟཝསེན ཨོདིསྶཀཏཱ, སཱིམཱབྷེདེ ཀཏེ ཨནོདིསྶཀཏཱ, ཨེཀདིསཱཕརཎཝསེན དིསཱཕརཎཏཱ མེཏྟཱཡ ཨུགྒཧཎེ ཝེདིཏབྦཱ. ཝིཧཱརརཙྪཱགཱམཱདིཝསེན ཝཱ ཨོདིསྶཀདིསཱཕརཎཾ, ཝིཧཱརཱདིཨུདྡེསརཧིཏཾ པུརཏྠིམཱདིདིསཱཝསེན ཨནོདིསྶཀདིསཱཕརཎནྟི ཨེཝཾ ཝཱ དྭིདྷཱ ཨུགྒཧཾ སནྡྷཱཡ ‘‘ཨོདིསྶཀཱནོདིསྶཀདིསཱཕརཎཱན’’ནྟི ཝུཏྟཾ. ཨུགྒཧོ ཙ ཡཱཝ ཨུཔཙཱརཱ དཊྛབྦོ, ཨུགྒཧིཏཱཡ ཨཱསེཝནཱ བྷཱཝནཱ. ཏཏྠ ‘‘སབྦེ སཏྟཱ པཱཎཱ བྷཱུཏཱ པུགྒལཱ ཨཏྟབྷཱཝཔརིཡཱཔནྣཱ’’ཏི ཨེཏེསཾ ཝསེན པཉྩཝིདྷཱ, ཨེཀེཀསྨིཾ ‘‘ཨཝེརཱ ཧོནྟུ, ཨབྱཱཔཛྫཱ, ཨནཱིགྷཱ, སུཁཱི ཨཏྟཱནཾ པརིཧརནྟཱུ’’ཏི ཙཏུདྷཱ པཝཏྟིཏོ ཝཱིསཏིཝིདྷཱ ཝཱ ཨནོདྷིསོཕརཎཱ མེཏྟཱ, ‘‘སབྦཱ ཨིཏྠིཡོ པུརིསཱ ཨརིཡཱ ཨནརིཡཱ དེཝཱ མནུསྶཱ ཝིནིཔཱཏིཀཱ’’ཏི སཏྟོདྷིཀརཎཝསེན པཝཏྟཱ སཏྟཝིདྷཱ, ཨཊྛཝཱིསཏིཝིདྷཱ ཝཱ ཨོདྷིསོཕརཎཱ མེཏྟཱ, དསཧི དིསཱཧི དིསོདྷིཀརཎཝསེན པཝཏྟཱ དསཝིདྷཱ ཙ དིསཱཕརཎཱ མེཏྟཱ, ཨེཀེཀཱཡ ཝཱ དིསཱཡ སཏྟཱདིཨིཏྠིཨཱདིཨཝེརཱདིཡོགེན ཨསཱིཏཱདྷིཀཙཏུསཏཔྤབྷེདཱ ཨནོདྷིསོཨོདྷིསོཕརཎཱ ཝེདིཏབྦཱ.

ཀཱཡཝིནཱམནཱཏི ¶ ཀཱཡསྶ ཝིཝིདྷེན ཨཱཀཱརེན ནཱམནཱ.

ཨཏིབྷོཛནེ ནིམིཏྟགྒཱཧོཏི ཨཏིབྷོཛནེ ཐིནམིདྡྷསྶ ནིམིཏྟགྒཱཧོ, ‘‘ཨེཏྟཀེ བྷུཏྟེ ཐིནམིདྡྷསྶ ཀཱརཎཾ ཧོཏི, ཨེཏྟཀེ ན ཧོཏཱི’’ཏི ཐིནམིདྡྷསྶ ཀཱརཎཱཀཱརཎགྒཱཧོཏི ཨཏྠོ. དྷུཏངྒཱནཾ ཝཱིརིཡནིསྶིཏཏྟཱ ཨཱཧ ‘‘དྷུཏངྒནིསྶིཏསཔྤཱཡཀཐཱཡཔཱི’’ཏི.

ཀུཀྐུཙྩམྤི ཀཏཱཀཏཱནུསོཙནཝསེན པཝཏྟམཱནཾ ཨུདྡྷཙྩེན སམཱནལཀྑཎཾ ཨཝཱུཔསམསབྷཱཝམེཝཱཏི ཙེཏསོ ཨཝཱུཔསམོ ‘‘ཨུདྡྷཙྩཀུཀྐུཙྩམེཝཱ’’ཏི ཝུཏྟོ.

བཧུསྶུཏསྶ གནྠཏོ ཙ ཨཏྠཏོ ཙ ཨཏྠཱདཱིནི ཝིཙིནནྟསྶ ཙེཏསོ ཝིཀྑེཔོ ན ཧོཏི ཡཐཱཝིདྷིཔཊིཔཏྟིཡཱ ཡཐཱནུརཱུཔཔཏིཀཱརཔྤཝཏྟིཡཱ ཀཏཱཀཏཱནུསོཙནཉྩཱཏི ‘‘བཱཧུསཙྩེནཔི ཨུདྡྷཙྩཀུཀྐུཙྩཾ པཧཱིཡཏཱི’’ཏི ཨཱཧ. ཝུཌྜྷསེཝིཏཱ ཙ ཝུཌྜྷསཱིལིཏཾ ཨཱཝཧཏཱིཏི ཙེཏོཝཱུཔསམཀརཏྟཱ ཨུདྡྷཙྩཀུཀྐུཙྩཔྤཧཱནཀཱརིཏཱ ¶ ཝུཏྟཱ. ཝུཌྜྷཏཾ པན ཨནཔེཀྑིཏྭཱ ཝིནཡདྷརཱ ཀུཀྐུཙྩཝིནོདཀཱ ཀལྱཱཎམིཏྟཱ ཝུཏྟཱཏི དཊྛབྦཱ.

ཏིཊྛཏི ཨེཏྠཱཏི ཋཱནཱིཡཱ, ཝིཙིཀིཙྪཱཡ ཋཱནཱིཡཱ ཝིཙིཀིཙྪཱཋཱནཱིཡཱ. ཋཱཏབྦཱཏི ཝཱ ཋཱནཱིཡཱ, ཝིཙིཀིཙྪཱ ཋཱནཱིཡཱ ཨེཏེསཱུཏི ཝིཙིཀིཙྪཱཋཱནཱིཡཱ.

ཀཱམཾ བཧུསྶུཏཏཱཔརིཔུཙྪཀཏཱཧི ཨཊྛཝཏྠུཀཱཔི ཝིཙིཀིཙྪཱ པཧཱིཡཏི, ཏཐཱཔི རཏནཏྟཡཝིཙིཀིཙྪཱམཱུལིཀཱ སེསཝིཙིཀིཙྪཱཏི ཀཏྭཱ ཨཱཧ ‘‘ཏཱིཎི རཏནཱནི ཨཱརབྦྷཱ’’ཏི. ཝིནཡེ པཀཏཉྙུཏཱ ‘‘སིཀྑཱཡ ཀངྑཏཱི’’ཏི (དྷ. ས. ༡༠༠༨; ཝིབྷ. ༩༡༥) ཝུཏྟཱཡ ཝིཙིཀིཙྪཱཡ པཧཱནཾ ཀརོཏཱིཏི ཨཱཧ ‘‘ཝིནཡེ ཙིཎྞཝསཱིབྷཱཝསྶཔཱི’’ཏི. ཨོཀཔྤནིཡསདྡྷཱསངྑཱཏཨདྷིམོཀྑབཧུལསྶཱཏི ཨནུཔཝིསནསདྡྷཱསངྑཱཏཨདྷིམོཀྑེན ཨདྷིམུཙྩནབཧུལསྶ. ཨདྷིམུཙྩནཉྩ ཨདྷིམོཀྑུཔྤཱདནམེཝཱཏི དཊྛབྦཾ. སདྡྷཱཡ ཝཱ ནིནྣཏཱ ཨདྷིམུཏྟི.

ནཱིཝརཎཔབྦཝཎྞནཱ ནིཊྛིཏཱ.

ཁ. བོཛ྄ཛྷངྒཔབྦཝཎྞནཱ

ཁནྡྷཱདིཔཱལི༹ཡཱ ¶ ཨཏྠོ ཁནྡྷཱདཱིནཾ ཨཏྠོཏི ཀཏྭཱ ཨཱཧ ‘‘ཁནྡྷ…པེ… ཝིཔསྶནཱནཾ ཨཏྠསནྣིསྶིཏཔརིཔུཙྪཱབཧུལཏཱ’’ཏི. ཏེན པཱལི༹མུཏྟཀཔུཙྪཱ ན ཏཐཱ པཉྙཱསཾཝཏྟནིཀཱ, ཡཐཱ ཨཏྠཔཊིཔུཙྪཱཏི དསྶེཏི.

མནྡཏྟཱ ཨགྒིཛཱལཱདཱིསུ ཨཱཔོདྷཱཏུཨཱདཱིནཾ ཝིཡ ཝཱིརིཡཱདཱིནཾ སཀིཙྩེ ཨསམཏྠཏཱ ཝུཏྟཱ.

པཏྟཾ ནཱིཧརནྟོཝ ཏཾ སུཏྭཱཏི ཨེཏྠ པཉྩཱབྷིཉྙཏྟཱ དིབྦསོཏེན ཨསྶོསཱིཏི ཝདནྟི.

པསཱདསིནེཧཱབྷཱཝེནཱཏི པསཱདསངྑཱཏསྶ སིནེཧསྶ ཨབྷཱཝེན. གདྲབྷཔིཊྛེ ལཱུཁརཛོ ལཱུཁཏརོ ཧུཏྭཱ དིསྶཏཱིཏི ཨཏིལཱུཁཏཱཡ ཏཾསདིསེ.

སཾཝེཛནཔསཱདནེཧི ཏེཛནཾ ཏོསནཉྩ སམྤཧཾསནཱཏི.

བོཛ྄ཛྷངྒཔབྦཝཎྞནཱ ནིཊྛིཏཱ.

སམཐཝིཔསྶནཱསུདྡྷཝིཔསྶནཱཝསེན ¶ པཋམསྶ ཨིཏརེསཉྩ ཀཐིཏཏྟཱཏི ཨཏྠོ. མགྒསམྤཡུཏྟཱ སཏི ཀཱཡཱནུཔསྶནཱ ནཱམཱཏི ཨཱགམནཝསེན ཝུཏྟཾ. ཨེཝཾ ཏཱཝ དེསནཱ པུགྒལེ ཏིཊྛཏཱིཏི ཀཱཡཱནུཔསྶཱིཨཱདཱིནཾ ཨཱགམནཝསེན ཝིསེསེཏྭཱ ཝུཏྟཱ སཏིཔཊྛཱནདེསནཱ པུགྒལེ ཏིཊྛཏཱིཏི ཨཏྠོ. ན ཧི སཀྐཱ ཨེཀསྶ ཨནེཀསམངྒིཏཱ ཝཏྟུཾ ཨེཀཀྑཎེ ཨནེཀསཏིསམྦྷཝཱཝབོདྷཔསངྒཱ, པུགྒལཾ པན ཨཱམསིཏྭཱ སཀིཙྩཔརིཙྪིནྣེ དྷམྨེ ཝུཙྩམཱནེ ཀིཙྩབྷེདེན ཨེཀིསྶཱཔི སཏིཡཱ ཨནེཀནཱམཏཱ ཧོཏཱིཏི དསྶེནྟོ ‘‘ཀཱཡེ པནཱ’’ཏིཨཱདིམཱཧ. ཡཐཱ ཧི པུགྒལཀིཙྩཾ དྷམྨཱ ཨེཝཱཏི དྷམྨབྷེདེན ཀཱཡཱནུཔསྶཱིཨཱདིཔུགྒལབྷེདོཝ ཧོཏི, ན ཨེཝཾ དྷམྨསྶ དྷམྨོ ཀིཙྩནྟི ན དྷམྨབྷེདེན ཏསྶ བྷེདོ, ཏསྨཱ ཨེཀཱཝ སཏི ཙཏུཝིཔལླཱསཔྤཧཱནབྷཱུཏཱ མགྒེ སམིདྡྷཱ ཨནཏྠནྟརེན ཏཔྤཧཱནཀིཙྩབྷེདེན ཙཏྟཱརི ནཱམཱནི ལབྷཏཱིཏི ཨཡམེཏྠ ཨདྷིཔྤཱཡོ.

སུཏྟནྟབྷཱཛནཱིཡཝཎྞནཱ ནིཊྛིཏཱ.

༢. ཨབྷིདྷམྨབྷཱཛནཱིཡཝཎྞནཱ

༣༧༤. ཨབྷིདྷམྨབྷཱཛནཱིཡེ ¶ ‘‘ཀཐཉྩ བྷིཀྑུ ཀཱཡེ ཀཱཡཱནུཔསྶཱི ཝིཧརཏི? ཨིདྷ བྷིཀྑུ ཡསྨིཾ སམཡེ…པེ… དནྡྷཱབྷིཉྙཾ ཀཱཡེ ཀཱཡཱནུཔསྶཱི, ཡཱ ཏསྨིཾ སམཡེ སཏཱི’’ཏིཨཱདིནཱ ཨཱགམནཝསེན ཝིསེསིཏཱནི སཏིཔཊྛཱནཱནི པུགྒལེ ཋཔེཏྭཱ དེསེཏྭཱ པུན ‘‘ཏཏྠ ཀཏམཾ སཏིཔཊྛཱནཾ? ཨིདྷ བྷིཀྑུ ཡསྨིཾ སམཡེ…པེ… དནྡྷཱབྷིཉྙཾ…པེ… ཡཱ ཏསྨིཾ སམཡེ སཏཱི’’ཏིཨཱདིནཱ པུགྒལཾ ཨནཱམསིཏྭཱ ཨཱགམཝིསེསནཉྩ ཨཀཏྭཱ ཙཏུཀིཙྩསཱདྷཀེཀསཏིཝསེན སུདྡྷིཀསཏིཔཊྛཱནནཡོ ཝུཏྟོཏི ཨཡམེཏྠ ནཡདྭཡེ ཝིསེསོ.

ཨབྷིདྷམྨབྷཱཛནཱིཡཝཎྞནཱ ནིཊྛིཏཱ.

སཏིཔཊྛཱནཝིབྷངྒཝཎྞནཱ ནིཊྛིཏཱ.

༨. སམྨཔྤདྷཱནཝིབྷངྒོ

༡. སུཏྟནྟབྷཱཛནཱིཡཝཎྞནཱ

༣༩༠. ཀཱརཎཔྤདྷཱནཱཏི ¶ ¶ ‘‘ཨནུཔྤནྣཔཱཔཀཱནུཔྤཱདཱདིཨཏྠཱ’’ཏི གཧིཏཱ ཏཐེཝ ཏེ ཧོནྟཱིཏི ཏཾ ཨཏྠཾ སཱདྷེནྟིཡེཝཱཏི ཨེཏསྶ ཨཏྠསྶ དཱིཔཀོ སམྨཱ-སདྡོཏི ཡཐཱདྷིཔྤེཏཏྠསྶ ཨནུཔྤནྣཔཱཔཀཱནུཔྤཱདཱདིནོ ཀཱརཎབྷཱུཏཱ, པདྷཱནཀཱརཎབྷཱུཏཱཏི ཨཏྠོ. སམྨཱསདྡསྶ ཨུཔཱཡཡོནིསོཨཏྠདཱིཔཀཏཾ སནྡྷཱཡ ‘‘ཨུཔཱཡཔྤདྷཱནཱ ཡོནིསོཔདྷཱནཱ’’ཏི ཝུཏྟཾ. པཊིཔནྣཀོཏི བྷཱཝནམནུཡུཏྟོ. བྷུསཾ ཡོགོ པཡོགོ, པཡོགོཝ པརཀྐམོ པཡོགཔརཀྐམོ. ཨེཏཱནཱིཏི ‘‘ཝཱཡམཏཱི’’ཏིཨཱདཱིནི ‘‘ཨཱསེཝམཱནོ ཝཱཡམཏཱི’’ཏིཨཱདིནཱ ཡོཛེཏབྦཱནི.

ཨནུཔྤནྣཱཏི ཨཝཏྟབྦཏཾ ཨཱཔནྣཱནནྟི བྷཱུམིལདྡྷཱརམྨཎཱདྷིགྒཧིཏཱཝིཀྑམྦྷིཏཱསམུགྒྷཱཏིཏུཔྤནྣཱནཾ.

༣༩༡. དྷམྨཙྪནྡོཏི ཏཎྷཱདིཊྛིཝཱིརིཡཙྪནྡཱ ཝིཡ ན ཨཉྙོ དྷམྨོ, ཨཐ ཁོ ཚནྡནིཡསབྷཱཝོ ཨེཝཱཏི དསྶེནྟོ ཨཱཧ ‘‘སབྷཱཝཙྪནྡོ’’ཏི. ཏཏྠ ‘‘ཡོ ཀཱམེསུ ཀཱམཙྪནྡོ’’ཏིཨཱདཱིསུ (དྷ. ས. ༡༡༠༣) ཏཎྷཱ ཚནྡོཏི ཝུཏྟཱཏི ཝེདིཏབྦོ, ‘‘སབྦེཝ ནུ ཁོ, མཱརིས, སམཎབྲཱཧྨཎཱ ཨེཀནྟཝཱདཱ ཨེཀནྟསཱིལཱ ཨེཀནྟཚནྡཱ ཨེཀནྟཨཛ྄ཛྷོསཱནཱ’’ཏི (དཱི. ནི. ༢.༣༦༦) ཨེཏྠ དིཊྛི, པམཱདནིདྡེསེ ‘‘ནིཀྑིཏྟཚནྡཏཱ ནིཀྑིཏྟདྷུརཏཱ’’ཏི ཝཱིརིཡནྟི ཝཎྞེཏི.

༣༩༤. ཝཱཡམཏི ¶ ཝཱིརིཡཾ ཨཱརབྷཏཱིཏི པདདྭཡསྶཔི ནིདྡེསོ ཝཱིརིཡནིདྡེསོཡེཝཱཏི ཨདྷིཔྤཱཡེནཱཧ ‘‘ཝཱིརིཡནིདྡེསེ’’ཏི.

༤༠༦. སབྦཔུབྦབྷཱགེཏི སབྦམགྒཱནཾ པུབྦབྷཱགེ. པུརིམསྨིནྟི ‘‘ཨནུཔྤནྣཱ མེ ཀུསལཱ དྷམྨཱ ཨནུཔྤཛྫམཱནཱ ཨནཏྠཱཡ སཾཝཏྟེཡྻུ’’ནྟི ཨེཏྠཱཔི ‘‘སམཐཝིཔསྶནཱཝ གཧེཏབྦཱ’’ཏི ཝུཏྟཾ ཨཊྛཀཐཱཡཾ, ཏཾ པན མགྒཱནུཔྤནྣཏཱཡ བྷཱཝཏོ ཨནུཔྤཛྫམཱནེ ཙ ཏསྨིཾ ཝཊྚཱནཏྠསཾཝཏྟནཏོ ན ཡུཏྟནྟི པཊིཀྑིཔཏི.

མཧནྟཾ ¶ གཱརཝཾ ཧོཏི, ཏསྨཱ ‘‘སངྒྷགཱརཝེན ཡཐཱརུཙི ཝིནྡིཏུཾ ན སཀྐཱ’’ཏི སངྒྷེན སཧ ན ནིཀྑམི. ཨཏིམནྡཱནི ནོཏི ནནུ ཨཏིམནྡཱནཱིཏི ཨཏྠོ. སནྟསམཱཔཏྟིཏོ ཨཉྙཾ སནྠམྦྷནཀཱརཎཾ བལཝཾ ནཏྠཱིཏི ‘‘ཏཏོ པརིཧཱིནཱ སནྠམྦྷིཏུཾ ན སཀྐོནྟཱི’’ཏི ཨཱཧ. ན ཧི མཧཱརཛྫུམྷི ཚིནྣེ སུཏྟཏནྟཱུ སནྡྷཱརེཏུཾ སཀྐོནྟཱིཏི. སམཐེ ཝཏྠུཾ དསྶེཏྭཱ ཏེན སམཱནགཏིཀཱ ཝིཔསྶནཱ ཙཱཏི ཨིམིནཱ ཨདྷིཔྤཱཡེནཱཧ ‘‘ཨེཝཾ ཨུཔྤནྣཱ སམཐཝིཔསྶནཱ…པེ… སཾཝཏྟནྟཱི’’ཏི.

ཏཏྠ ཨནུཔྤནྣཱནནྟི ཨེཏྠ ཏཏྠ དུཝིདྷཱཡ སམྨཔྤདྷཱནཀཐཱཡ, ཏཏྠ ཝཱ པཱལི༹ཡཾ ‘‘ཨནུཔྤནྣཱན’’ནྟི ཨེཏསྶ ཨཡཾ ཝིནིཙྪཡོཏི ཨདྷིཔྤཱཡོ. ཨེཏེཡེཝཱཏི ཨནམཏགྒེ སཾསཱརེ ཨུཔྤནྣཱཡེཝ.

ཙུདྡས མཧཱཝཏྟཱནི ཁནྡྷཀེ ཝུཏྟཱནི ཨཱགནྟུཀཨཱཝཱསིཀགམིཀཨནུམོདན བྷཏྟགྒ པིཎྜཙཱརིཀ ཨཱརཉྙིཀ སེནཱསན ཛནྟཱགྷརཝཙྩཀུཊི ཨཱཙརིཡཨུཔཛ྄ཛྷཱཡསདྡྷིཝིཧཱརིཀཨནྟེཝཱསིཀཝཏྟཱནི ཙུདྡས. ཏཏོ ཨཉྙཱནི པན ཀདཱཙི ཏཛྫནཱིཡཀམྨཀཏཱདིཀཱལེ པཱརིཝཱསིཀཱདིཀཱལེ ཙ ཙརིཏབྦཱནི དྭཱསཱིཏི ཁུདྡཀཝཏྟཱནཱིཏི ཀཐིཏཱནི དཊྛབྦཱནི. ན ཧི ཏཱནི སབྦཱསུ ཨཝཏྠཱསུ ཙརིཏབྦཱནི, ཏསྨཱ མཧཱཝཏྟེ ཨགཎིཏཱནི. ཏཏྠ ‘‘པཱརིཝཱསིཀཱནཾ བྷིཀྑཱུནཾ ཝཏྟཾ པཉྙཱཔེསྶཱམཱི’’ཏི ཨཱརབྷིཏྭཱ ‘‘ན ཨུཔསམྤཱདེཏབྦཾ…པེ… ན ཚམཱཡཾ ཙངྐམནྟེ ཙངྐམེ ཙངྐམིཏབྦ’’ནྟི (ཙཱུལ༹ཝ. ༧༦) ཝུཏྟཱནི པཀཏཏྟེ ཙརིཏབྦཝཏྟཱཝསཱནཱནི ཚསཊྛི, ཏཏོ པརཾ ‘‘ན, བྷིཀྑཝེ, པཱརིཝཱསིཀེན བྷིཀྑུནཱ པཱརིཝཱསིཀཝུཌྜྷཏརེན བྷིཀྑུནཱ སདྡྷིཾ, མཱུལཱཡཔཊིཀསྶནཱརཧེན, མཱནཏྟཱརཧེན, མཱནཏྟཙཱརིཀེན, ཨབྦྷཱནཱརཧེན བྷིཀྑུནཱ སདྡྷིཾ ཨེཀཙྪནྣེ ཨཱཝཱསེ ཝཏྠབྦ’’ནྟིཨཱདཱིནི (ཙཱུལ༹ཝ. ༨༢) པཀཏཏྟེ ཙརིཏབྦེཧི ཨནཉྙཏྟཱ ཝིསུཾ ཝིསུཾ ¶ ཨགཎེཏྭཱ པཱརིཝཱསིཀཝུཌྜྷཏརཱདཱིསུ པུགྒལནྟརེསུ ཙརིཏབྦཏྟཱ ཏེསཾ ཝསེན སམྤིཎྜེཏྭཱ ཨེཀེཀཾ ཀཏྭཱ གཎེཏབྦཱནི པཉྩཱཏི ཨེཀསཏྟཏི ཝཏྟཱནི, ཨུཀྑེཔནཱིཡཀམྨཀཏཝཏྟེསུ ཝཏྟཔཉྙཱཔནཝསེན ཝུཏྟཾ ‘‘ན པཀཏཏྟསྶ བྷིཀྑུནོ ཨབྷིཝཱདནཾ པཙྩུཊྛཱནཾ…པེ… ནཧཱནེ པིཊྛིཔརིཀམྨཾ སཱདིཏབྦ’’ནྟི (ཙཱུལ༹ཝ. ༧༥) ཨིདཾ ཨབྷིཝཱདནཱདཱིནཾ ཨསྶཱདིཡནཾ ཨེཀཾ, ‘‘ན པཀཏཏྟོ བྷིཀྑུ སཱིལཝིཔཏྟིཡཱ ཨནུདྡྷཾསེཏབྦོ’’ཏིཨཱདཱིནི (ཙཱུལ༹ཝ. ༥༡) ཙ དསཱཏི ཨེཝཾ དྭཱསཱིཏི ཧོནྟི. ཨེཏེསྭེཝ ཀཱནིཙི ཏཛྫནཱིཡཀམྨཀཏཱདིཝཏྟཱནི, ཀཱནིཙི པཱརིཝཱསིཀཱདིཝཏྟཱནཱིཏི ཨགྒཧིཏགྒཧཎེན དྭཱསཱིཏིཝཏྟནྟི དཊྛབྦཾ.

ཨིདྷ ¶ ཝིཔཱཀཱནུབྷཝནཝསེན ཏདཱརམྨཎཾ, ཨཝིཔཀྐཝིཔཱཀསྶ སབྦཐཱ ཨཝིགཏཏྟཱ བྷཝིཏྭཱ ཝིགཏམཏྟཝསེན ཀམྨཉྩ ‘‘བྷུཏྭཱ ཝིགཏུཔྤནྣ’’ནྟི ཝུཏྟཾ, ན ཨཊྛསཱལིནིཡཾ (དྷ. ས. ཨཊྛ. ༡) ཝིཡ རཛྫནཱདིཝསེན ཨནུབྷུཏྭཱཔགཏཾ ཛཝནཾ, ཨུཔྤཛྫིཏྭཱ ནིརུདྡྷཏཱཝསེན བྷཱུཏཱཔགཏསངྑཱཏཾ སེསསངྑཏཉྩ ‘‘བྷཱུཏཱཔགཏུཔྤནྣ’’ནྟི, ཏསྨཱ ཨིདྷ ཨོཀཱསཀཏུཔྤནྣཾ ཝིཔཱཀམེཝ ཝདཏི, ན ཏཏྠ ཝིཡ ཀམྨམྤཱིཏི. ཨནུསཡིཏཀིལེསཱཏི ཨཔྤཧཱིནཱ མགྒེན པཧཱཏབྦཱ ཨདྷིཔྤེཏཱ. ཏེནཱཧ ‘‘ཨཏཱིཏཱ ཝཱ…པེ… ན ཝཏྟབྦཱ’’ཏི. ཏེསཉྷི ཨམྦཏརུཎོཔམཱཡ ཝཏྟམཱནཱདིཏཱ ན ཝཏྟབྦཱཏི.

ཨཱཧཏཁཱིརརུཀྑོ ཝིཡ ནིམིཏྟགྒཱཧཝསེན ཨདྷིགཏཾ ཨཱརམྨཎཾ, ཨནཱཧཏཁཱིརརུཀྑོ ཝིཡ ཨཝིཀྑམྦྷིཏཏཱཡ ཨནྟོགདྷཀིལེསཾ ཨཱརམྨཎཾ དཊྛབྦཾ, ནིམིཏྟགྒཱཧཀཱཝིཀྑམྦྷིཏཀིལེསཱ ཝཱ པུགྒལཱ ཨཱཧཏཱནཱཧཏཁཱིརརུཀྑསདིསཱ. པུརིམནཡེནེཝཱཏི ཨཝིཀྑམྦྷིཏུཔྤནྣེ ཝིཡ ‘‘ཨིམསྨིཾ ནཱམ ཋཱནེ ནུཔྤཛྫིསྶནྟཱིཏི ན ཝཏྟབྦཱ ཨསམུགྒྷཱཊིཏཏྟཱ’’ཏི ཡོཛེཏྭཱ ཝིཏྠཱརེཏབྦཾ.

པཱལི༹ཡནྟི པཊིསམྦྷིདཱཔཱལི༹ཡཾ (པཊི. མ. ༣.༢༡). མགྒེན པཧཱིནཀིལེསཱནམེཝ ཏིདྷཱ ནཝཏྟབྦཏཾ ཨཔཱཀཊཾ པཱཀཊཾ ཀཱཏུཾ ཨཛཱཏཕལརུཀྑོ ཨཱབྷཏོ, ཨཏཱིཏཱདཱིནཾ ཨཔྤཧཱིནཏཱདསྶནཏྠམྤི ‘‘ཛཱཏཕལརུཀྑེན དཱིཔེཏབྦ’’ནྟི ཨཱཧ. ཏཏྠ ཡཐཱ ཨཙྪིནྣེ རུཀྑེ ནིབྦཏྟིརཧཱནི ཕལཱནི ཚིནྣེ ཨནུཔྤཛྫམཱནཱནི ན ཀདཱཙི སསབྷཱཝཱནི ཨཧེསུཾ ཧོནྟི བྷཝིསྶནྟི ཙཱཏི ཨཏཱིཏཱདིབྷཱཝེན ན ཝཏྟབྦཱནི, ཨེཝཾ མགྒེན པཧཱིནཀིལེསཱ ཙ དཊྛབྦཱ. ཡཐཱ ཙ ཚེདེ ཨསཏི ཕལཱནི ཨུཔྤཛྫིསྶནྟི, སཏི ཙ ནུཔྤཛྫིསྶནྟཱིཏི ཚེདསྶ སཱཏྠཀཏཱ, ཨེཝཾ མགྒབྷཱཝནཱཡ ཙ སཱཏྠཀཏཱ ཡོཛེཏབྦཱ.

སུཏྟནྟབྷཱཛནཱིཡཝཎྞནཱ ནིཊྛིཏཱ.

༣. པཉྷཔུཙྪཀཝཎྞནཱ

༤༢༧. པཉྷཔུཙྪཀེ ¶ ཡཾ ཝུཏྟཾ ‘‘ཝཱིརིཡཛེཊྛིཀཱཡ པན ཨཉྙསྶ ཝཱིརིཡསྶ ཨབྷཱཝཱ ན ཝཏྟབྦཱནི མགྒཱདྷིཔཏཱིནཱིཏི ཝཱ ན མགྒཱདྷིཔཏཱིནཱིཏི ཝཱ’’ཏི, ཨེཏྠ ‘‘མགྒཱདྷིཔཏཱིནཱི’’ཏི ¶ ན ཝཏྟབྦཏཱཡ ཨེཝ ཨཉྙསྶ ཝཱིརིཡསྶ ཨབྷཱཝོ ཀཱརཎནྟི དཊྛབྦཾ. ཚནྡསྶ པན ཙིཏྟསྶ ཝཱ ནམགྒབྷཱུཏསྶ ཨདྷིཔཏིནོ ཏདཱ ཨབྷཱཝཱ ‘‘ན མགྒཱདྷིཔཏཱིནཱི’’ཏི ན ཝཏྟབྦཱནཱིཏི ཝུཏྟཾ. ཚནྡཙིཏྟཱནཾ ཝིཡ ནམགྒབྷཱུཏསྶ ཨཉྙསྶ ཝཱིརིཡཱདྷིཔཏིནོ ཨབྷཱཝཱཏི ཝཱ ཨདྷིཔྤཱཡོ. སམྨཔྤདྷཱནཱནཾ ཏདཱ མགྒསངྑཱཏཨདྷིཔཏིབྷཱཝཏོ ཝཱ ‘‘ན མགྒཱདྷིཔཏཱིནཱི’’ཏི ནཝཏྟབྦཏཱ ཝུཏྟཱཏི ཝེདིཏབྦཱ.

པཉྷཔུཙྪཀཝཎྞནཱ ནིཊྛིཏཱ.

སམྨཔྤདྷཱནཝིབྷངྒཝཎྞནཱ ནིཊྛིཏཱ.

༩. ཨིདྡྷིཔཱདཝིབྷངྒོ

༡. སུཏྟནྟབྷཱཛནཱིཡཝཎྞནཱ

༤༣༡. ཨིདྡྷི-སདྡསྶ ¶ ¶ པཋམོ ཀཏྟུཨཏྠོ, དུཏིཡོ ཀརཎཏྠོ ཝུཏྟོ, པཱད-སདྡསྶ ཨེཀོ ཀརཎམེཝཏྠོ ཝུཏྟོ. པཛྫིཏབྦཱཝ ཨིདྡྷི ཝུཏྟཱ, ན ཙ ཨིཛ྄ཛྷནྟཱི པཛྫིཏབྦཱ ཙ ཨིདྡྷི པཛྫནཀརཎེན པཱདེན སམཱནཱདྷིཀརཎཱ ཧོཏཱིཏི ‘‘པཋམེནཏྠེན ཨིདྡྷི ཨེཝ པཱདོ ཨིདྡྷིཔཱདོ’’ཏི ན སཀྐཱ ཝཏྟུཾ, ཏཐཱ ཨིདྡྷིཀིརིཡཱཀརཎེན སཱདྷེཏབྦཱ ཙ ཝུདྡྷིསངྑཱཏཱ ཨིདྡྷི པཛྫནཀིརིཡཱཀརཎེན པཛྫིཏབྦཱཏི དྭིནྣཾ ཀརཎཱནཾ ན ཨསམཱནཱདྷིཀརཎཏཱ སམྦྷཝཏཱིཏི ‘‘དུཏིཡེནཏྠེན ཨིདྡྷིཡཱ པཱདོ ཨིདྡྷིཔཱདོ’’ཏི ཙ ན སཀྐཱ ཝཏྟུཾ, ཏསྨཱ པཋམེནཏྠེན ཨིདྡྷིཡཱ པཱདོ ཨིདྡྷིཔཱདོ, དུཏིཡེནཏྠེན ཨིདྡྷི ཨེཝ པཱདོ ཨིདྡྷིཔཱདོཏི ཨེཝཾ ཡོཛནཱ ཡུཛྫཏི.

‘‘ཚནྡཾ ཙེ…པེ… ཨཡཾ ཝུཙྩཏི ཚནྡསམཱདྷཱི’’ཏི ཨིམཱཡ པཱལི༹ཡཱ ཚནྡཱདྷིཔཏི སམཱདྷི ཚནྡསམཱདྷཱིཏི ཨདྷིཔཏི-སདྡལོཔཾ ཀཏྭཱ སམཱསོ ཝུཏྟོཏི ཝིཉྙཱཡཏི, ཨདྷིཔཏི-སདྡཏྠདསྶནཝསེན པན ‘‘ཚནྡཧེཏུཀོ ཚནྡཱདྷིཀོ ཝཱ སམཱདྷི ཚནྡསམཱདྷཱི’’ཏི ཨཊྛཀཐཱཡཾ ཝུཏྟནྟི ཝེདིཏབྦཾ. པདྷཱནབྷཱུཏཱཏི ཝཱིརིཡབྷཱུཏཱཏི ཀེཙི ཝདནྟི. སངྑཏསངྑཱརཱདིནིཝཏྟནཏྠཉྷི པདྷཱནགྒཧཎནྟི. ཨཐ ཝཱ ཏཾ ཏཾ ཝིསེསཾ སངྑརོཏཱིཏི སངྑཱརོ, སབྦཾ ཝཱིརིཡཾ. ཏཏྠ ཙཏུཀིཙྩསཱདྷཀཏོ ཨཉྙསྶ ནིཝཏྟནཏྠཾ པདྷཱནགྒཧཎནྟི པདྷཱནབྷཱུཏཱ སེཊྛབྷཱུཏཱཏི ཨཏྠོ. ཙཏུབྦིདྷསྶ པན ཝཱིརིཡསྶ ཨདྷིཔྤེཏཏྟཱ བཧུཝཙནནིདྡེསོ ཀཏོ. ཨདྷིཊྛཱནཊྛེནཱཏི དུཝིདྷཏྠཱཡཔི ཨིདྡྷིཡཱ ཨདྷིཊྛཱནཏྠེན. པཱདབྷཱུཏནྟི ཨིམིནཱ ཝིསུཾ སམཱསཡོཛནཱཝསེན པན ཡོ པུབྦེ ཨིདྡྷིཔཱདཏྠོ པཱད-སདྡསྶ ཨུཔཱཡཏྠཏཾ གཧེཏྭཱ ཡཐཱཡུཏྟོ ཝུཏྟོ, སོ ཝཀྑམཱནཱནཾ པཊིལཱབྷཔུབྦབྷཱགཱནཾ ཀཏྟུཀརཎིདྡྷིབྷཱཝཾ, ཨུཏྟརཙཱུལ༹བྷཱཛནཱིཡེ ཝཱ ཝུཏྟེཧི ¶ ཚནྡཱདཱིཧི ཨིདྡྷིཔཱདེཧི སཱདྷེཏབྦཱཡ ཨིདྡྷིཡཱ ཀཏྟིདྡྷིབྷཱཝཾ, ཚནྡཱདཱིནཉྩ ཀརཎིདྡྷིབྷཱཝཾ སནྡྷཱཡ ཝུཏྟོཏི ཝེདིཏབྦོ.

ཝཱིརིཡིདྡྷིཔཱདནིདྡེསེ ‘‘ཝཱིརིཡསམཱདྷིཔདྷཱནསངྑཱརསམནྣཱགཏ’’ནྟི དྭིཀྑཏྟུཾ ཝཱིརིཡཾ ཨཱགཏཾ. ཏཏྠ པུརིམཾ སམཱདྷིཝིསེསནཾ ‘‘ཝཱིརིཡཱདྷིཔཏི སམཱདྷི ཝཱིརིཡསམཱདྷཱི’’ཏི, དུཏིཡཾ སམནྣཱགམངྒདསྶནཾ. དྭེཡེཝ ཧི སབྦཏྠ སམནྣཱགམངྒཱནི སམཱདྷི པདྷཱནསངྑཱརོ ཙ, ཚནྡཱདཡོ སམཱདྷིཝིསེསནཱནི, པདྷཱནསངྑཱརོ ¶ པན པདྷཱནཝཙནེནེཝ ཝིསེསིཏོ, ན ཚནྡཱདཱིཧཱིཏི ན ཨིདྷ ཝཱིརིཡཱདྷིཔཏིཏཱ པདྷཱནསངྑཱརསྶ ཝུཏྟཱ ཧོཏི. ཝཱིརིཡཉྩ སམཱདྷིཾ ཝིསེསེཏྭཱ ཋིཏམེཝ སམནྣཱགམངྒཝསེན པདྷཱནསངྑཱརཝཙནེན ཝུཏྟནྟི ནཱཔི དྭཱིཧི ཝཱིརིཡེཧི སམནྣཱགམོ ཝུཏྟོ ཧོཏཱིཏི. ཡསྨཱ པན ཚནྡཱདཱིཧི ཝིསིཊྛོ སམཱདྷི, ཏཐཱ ཝིསིཊྛེནེཝ ཙ ཏེན སམྤཡུཏྟོ པདྷཱནསངྑཱརོ སེསདྷམྨཱ ཙ, ཏསྨཱ སམཱདྷིཝིསེསནཱནཾ ཝསེན ཙཏྟཱརོ ཨིདྡྷིཔཱདཱ ཝུཏྟཱ. ཝིསེསནབྷཱཝོ ཙ ཚནྡཱདཱིནཾ ཏཾཏཾཨཝསྶཡནཝསེན ཧོཏཱིཏི ‘‘ཚནྡསམཱདྷི…པེ… ཨིདྡྷིཔཱད’’ནྟི ཨེཏྠ ནིསྶཡཏྠེཔི པཱད-སདྡེ ཨུཔཱཡཏྠེན ཚནྡཱདཱིནཾ ཨིདྡྷིཔཱདཏཱ ཝུཏྟཱ ཧོཏི. ཏེནེཝ ཨུཏྟརཙཱུལ༹བྷཱཛནཱིཡེ ‘‘ཙཏྟཱརོ ཨིདྡྷིཔཱདཱ ཚནྡིདྡྷིཔཱདོ’’ཏིཨཱདིནཱ ཚནྡཱདཱིནམེཝ ཨིདྡྷིཔཱདཏཱ ཝུཏྟཱ. པཉྷཔུཙྪཀེ ཙ ‘‘ཙཏྟཱརོ ཨིདྡྷིཔཱདཱ ཨིདྷ བྷིཀྑུ ཚནྡསམཱདྷཱི’’ཏིཨཱདིནཱཝ (ཝིབྷ. ༤༦༢) ཨུདྡེསཾ ཀཏྭཱཔི པུན ཚནྡཱདཱིནཾཡེཝ ཀུསལཱདིབྷཱཝོ ཝིབྷཏྟོཏི. ཨུཔཱཡིདྡྷིཔཱདདསྶནཏྠམེཝ ཧི ནིསྶཡིདྡྷིཔཱདདསྶནཾ ཀཏཾ, ཨཉྙཐཱ ཙཏུབྦིདྷཏཱ ན ཧོཏཱིཏི ཨཡམེཏྠ པཱལི༹ཝསེན ཨཏྠཝིནིཙྪཡོ ཝེདིཏབྦོ.

༤༣༣. རཐདྷུརེཏི རཐསྶ པུརཏོ. ཧཱིནཛཱཏིཀོ ཙཎྜཱལོ ཨུཔཊྛཱནཱདིགུཎཡོགེཔི སེནཱཔཏིཊྛཱནཱདཱིནི ན ལབྷཏཱིཏི ཨཱཧ ‘‘ཛཱཏིཾ སོདྷེཏྭཱ…པེ… ཛཱཏིཾ ཨཝསྶཡཏཱི’’ཏི. ཨམནྟནཱིཡོཏི ཧིཏཱཧིཏམནྟནེ ན ཨརཧོ.

རཊྛཔཱལཏྠེརོ ཚནྡེ སཏི ཀཐཾ ནཱནུཛཱནིསྶནྟཱིཏི སཏྟཔི བྷཏྟཱནི ཨབྷུཉྫིཏྭཱ མཱཏཱཔིཏརོ ཨནུཛཱནཱཔེཏྭཱ པབྦཛིཏྭཱ ཚནྡམེཝ ཨཝསྶཱཡ ལོཀུཏྟརདྷམྨཾ ནིབྦཏྟེསཱིཏི ཨཱཧ ‘‘རཊྛཔཱལཏྠེརོ ཝིཡཱ’’ཏི.

མོགྷརཱཛཏྠེརོ ཝཱིམཾསཾ ཨཝསྶཡཱིཏི ཏསྶ བྷགཝཱ ‘‘སུཉྙཏོ ལོཀཾ ཨཝེཀྑསྶཱུ’’ཏི (སུ. ནི. ༡༡༢༥) སུཉྙཏཱཀཐཾ ¶ ཀཐེསི, པཉྙཱནིསྶིཏམཱནནིགྒཧཏྠཉྩ དྭིཀྑཏྟུཾ པུཙྪིཏོ པཉྷཾ ན ཀཐེསི. ཏཏྠ པུནཔྤུནཾ ཚནྡུཔྤཱདནཾ ཏོསནཾ ཝིཡ ཧོཏཱིཏི ཚནྡསྶ ཨུཔཊྛཱནསདིསཏཱ ཝུཏྟཱ, ཐཱམབྷཱཝཏོ ཝཱིརིཡསྶ སཱུརཏྟསདིསཏཱ, ‘‘ཚདྭཱརཱདྷིཔཏི རཱཛཱ’’ཏི (དྷ. པ. ཨཊྛ. ༢.༡༨༡ ཨེརཀཔཏྟནཱགརཱཛཝཏྠུ) ཝཙནཏོ པུབྦངྒམཏྟཱ ཙིཏྟསྶ ཝིསིཊྛཛཱཏིསདིསཏཱ.

ཨབྷེདཏོཏི ¶ ཚནྡཱདིཀེ ཏཡོ ཏཡོ དྷམྨེ སམྤིཎྜེཏྭཱ, ཨིདྡྷིཨིདྡྷིཔཱདེ ཨམིསྶེཏྭཱ ཝཱ ཀཐནནྟི ཨཏྠོ. ཏཏྠ ཚནྡཝཱིརིཡཱདཡོ ཝིསེསེན ཨིཛ྄ཛྷནྟི ཨེཏཱཡཱཏི ཨིདྡྷཱིཏི ཝུཙྩནྟི, ཨིཛ྄ཛྷཏཱིཏི ཨིདྡྷཱིཏི ཨཝིསེསེན སམཱདྷིཔདྷཱནསངྑཱརཱཔཱིཏི.

ཚནྡིདྡྷིཔཱདསམཱདྷིདྡྷིཔཱདཱདཡོ ཝིསིཊྛཱ, པཱདོ སབྦིདྡྷཱིནཾ སཱདྷཱརཎཏྟཱ ཨཝིསིཊྛོ, ཏསྨཱ ཝིསིཊྛེསྭེཝ པཝེསཾ ཨཝཏྭཱ ཨཝིསིཊྛེ ཙ པཝེསཾ ཝཏྟུཾ ཡུཏྟནྟི དསྶེཏུཾ སབྦཏྠ ‘‘པཱདེ པཏིཊྛཱཏིཔི ཝཏྟུཾ ཝཊྚཏཱི’’ཏི ཨཱཧ. ཏཏྠེཝཱཏི ཚནྡསམཱདྷིཔདྷཱནསངྑཱརཨིདྡྷིཔཱདེསུ, ཙཏཱུསུ ཚནྡཱདིཀེསྭེཝཱཏི ཨཏྠོ. ‘‘ཚནྡཝཏོ ཀོ སམཱདྷི ན ཨིཛ྄ཛྷིསྶཏཱི’’ཏི སམཱདྷིབྷཱཝནཱམུཁེན བྷཱཝིཏཱ སམཱདྷིབྷཱཝིཏཱ.

ཨེཏྠ པནཱཏི བྷེདཀཐཱཡཾ ཨབྷེདཀཐནཏོ ཨབྷིནཝཾ ནཏྠཱིཏི ཨཏྠོ. ཡེ ཧི ཏཡོ དྷམྨཱ ཨབྷེདཀཐཱཡཾ ཨིདྡྷིཨིདྡྷིཔཱདོཏྭེཝ ཝུཏྟཱ, ཏེ ཨེཝ བྷེདཀཐཱཡཾ ཨིདྡྷཱིཔི ཧོནྟི ཨིདྡྷིཔཱདཱཔི, སེསཱ ཨིདྡྷིཔཱདཱ ཨེཝཱཏི ཨེཝཾ ཨབྷིནཝཱབྷཱཝཾ དསྶེནྟོ ‘‘ཚནྡོ སམཱདྷཱི’’ཏིཨཱདིམཱཧ. ཨིམེ ཧི ཏཡོ…པེ… ན ཝིནཱ, ཏསྨཱ སེསཱ སམྤཡུཏྟཀཱ ཙཏྟཱརོ ཁནྡྷཱ ཏེསཾ ཏིཎྞཾ ཨིཛ྄ཛྷནེན ཨིདྡྷི ནཱམ བྷཝེཡྻུཾ, ན ཨཏྟནོ སབྷཱཝེནཱཏི ཏེ ཨིདྡྷིཔཱདཱ ཨེཝ ཧོནྟི, ན ཨིདྡྷཱིཏི ཨེཝམིདཾ པུརིམསྶ ཀཱརཎབྷཱཝེན ཝུཏྟནྟི ཝེདིཏབྦཾ. ཨཐ ཝཱ ཏིཎྞཾ ཨིདྡྷིཏཱ ཨིདྡྷིཔཱདཏཱ ཙ ཝུཏྟཱ, སེསཱནཉྩ ཨིདྡྷིཔཱདཏཱཝ, ཏཾ སབྦཾ སཱདྷེཏུཾ ‘‘ཨིམེ ཧི ཏཡོ…པེ… ན ཝིནཱ’’ཏི ཨཱཧ. ཏེན ཡསྨཱ ཨིཛ྄ཛྷནྟི, ཏསྨཱ ཨིདྡྷི. ཨིཛ྄ཛྷམཱནཱ ཙ ཡསྨཱ སམྤཡུཏྟཀེཧི སཧེཝ ཨིཛ྄ཛྷནྟི, ན ཝིནཱ, ཏསྨཱ སམྤཡུཏྟཀཱ ཨིདྡྷིཔཱདཱ, ཏདནྟོགདྷཏྟཱ པན ཏེ ཏཡོ དྷམྨཱ ཨིདྡྷིཔཱདཱཔི ཧོནྟཱིཏི དསྶེཏི. སམྤཡུཏྟཀཱནམྤི པན ཁནྡྷཱནཾ ཨིདྡྷིབྷཱཝཔརིཡཱཡོ ཨཏྠཱིཏི དསྶེཏུཾ ‘‘སམྤཡུཏྟཀཱ པནཱ’’ཏིཨཱདིམཱཧ. ཙཏཱུསུ ཁནྡྷེསུ ཨེཀདེསསྶ ཨིདྡྷིཏཱ, ཙཏུནྣམྤི ‘‘ཨིདྡྷིཡཱ པཱདོ ཨིདྡྷིཔཱདོ’’ཏི ཨིམིནཱ ཨཏྠེན ཨིདྡྷིཔཱདཏཱ, པུནཔི ཙཏུནྣཾ ཁནྡྷཱནཾ ‘‘ཨིདྡྷི ཨེཝ པཱདོ ཨིདྡྷིཔཱདོ’’ཏི ཨིམིནཱ ཨཏྠེན ཨིདྡྷིཔཱདཏཱ ཙ དསྶིཏཱ, ན ཨཉྙསྶཱཏི ཀཏྭཱ ཨཱཧ ‘‘ན ཨཉྙསྶ ¶ ཀསྶཙི ཨདྷིཝཙན’’ནྟི. ཨིམིནཱ ‘‘ཨིདྡྷི ནཱམ ཨནིཔྥནྣཱ’’ཏི ཨིདཾ ཝཱདཾ པཊིསེདྷེཏི.

པཊིལཱབྷཔུབྦབྷཱགཱནཾ པཊིལཱབྷསྶེཝ ཙ ཨིདྡྷིཨིདྡྷིཔཱདཏཱཝཙནཾ ཨཔུབྦནྟི ཀཏྭཱ པུཙྪཏི ‘‘ཀེནཊྛེན ཨིདྡྷི, ཀེནཊྛེན པཱདོ’’ཏི. པཊིལཱབྷོ པུབྦབྷཱགོ ¶ ཙཱཏི ཝཙནསེསོ. ཨུཔཱཡོ ཙ ཨུཔཱཡབྷཱཝེནེཝ ཨཏྟནོ ཕལསྶ པཏིཊྛཱ ཧོཏཱིཏི ཨཱཧ ‘‘པཏིཊྛཱནཊྛེནེཝ པཱདོ’’ཏི. ཚནྡོཡེཝ…པེ… ཝཱིམཾསཱཝ ཝཱིམཾསིདྡྷིཔཱདོཏི ཀཐིཏཾ, ཏསྨཱ ན ཙཏྟཱརོ ཁནྡྷཱ ཨིདྡྷིཡཱ སམཱནཀཱལིཀཱ ནཱནཱཀྑཎིཀཱ ཝཱ ཨིདྡྷིཔཱདཱ, ཛེཊྛཀབྷཱུཏཱ པན ཚནྡཱདཡོ ཨེཝ སབྦཏྠ ཨིདྡྷིཔཱདཱཏི ཨཡམེཝ ཏེསཾ ཨཊྛཀཐཱཙརིཡཱནཾ ཨདྷིཔྤཱཡོ. སུཏྟནྟབྷཱཛནཱིཡེ ཧི ཨབྷིདྷམྨབྷཱཛནཱིཡེ ཙ སམཱདྷིཝིསེསནཝསེན དསྶིཏཱནཾ ཨུཔཱཡབྷཱུཏཱནཾ ཨིདྡྷིཔཱདཱནཾ པཱཀཊཀརཎཏྠཾ ཨུཏྟརཙཱུལ༹བྷཱཛནཱིཡཾ ཝུཏྟནྟི. ཀེཙཱིཏི ཨུཏྟརཝིཧཱརཝཱསིཐེརཱ ཀིར.

སུཏྟནྟབྷཱཛནཱིཡཝཎྞནཱ ནིཊྛིཏཱ.

༢. ཨབྷིདྷམྨབྷཱཛནཱིཡཝཎྞནཱ

༤༤༤. ཨབྷིདྷམྨབྷཱཛནཱིཡེ ‘‘ཨིདྡྷིཔཱདོཏི ཏཐཱབྷཱུཏསྶ ཕསྶོ…པེ… པགྒཱཧོ ཨཝིཀྑེཔོ’’ཏི (ཝིབྷ. ༤༤༧) ཨིདྡྷིཨིདྡྷིཔཱདཏྠདསྶནཏྠཾ པགྒཱཧཱཝིཀྑེཔཱ ཝུཏྟཱ, ཙིཏྟཔཉྙཱ ཙ སངྑིཔིཏྭཱཏི. ཙཏྟཱརི ནཡསཧསྶཱནི ཝིབྷཏྟཱནཱིཏི ཨིདཾ སཱདྷིཔཏིཝཱརཱནཾ པརིཔུཎྞཱནཾ ཨབྷཱཝཱ ཝིཙཱརེཏབྦཾ. ན ཧི ཨདྷིཔཏཱིནཾ ཨདྷིཔཏཡོ ཝིཛྫནྟི, ཨེཀེཀསྨིཾ པན ཨིདྡྷིཔཱདནིདྡེསེ ཨེཀེཀོ ཨདྷིཔཏིཝཱརོ ལབྦྷཏཱིཏི སོལ༹ས སོལ༹ས ནཡསཏཱནི ལབྦྷནྟི.

ཨབྷིདྷམྨབྷཱཛནཱིཡཝཎྞནཱ ནིཊྛིཏཱ.

༣. པཉྷཔུཙྪཀཝཎྞནཱ

ནནུ ¶ ཙ ཙཏྟཱརོཔི ཨདྷིཔཏཡོ ཨེཀཀྑཎེ ལབྦྷནྟི, ཨཉྙམཉྙསྶ པན ཨདྷིཔཏཡོ ན བྷཝནྟི ‘‘ཙཏྟཱརོ ཨིདྡྷིཔཱདཱ ན མགྒཱདྷིཔཏིནོ’’ཏི ཝུཏྟཏྟཱ. རཱཛཔུཏྟོཔམཱཔི ཧི ཨེཏམཏྠཾ དཱིཔེཏཱིཏི? ན, ཨེཀཀྑཎེ དུཏིཡསྶ ཨདྷིཔཏིནོ ཨབྷཱཝཏོ ཨེཝ, ‘‘ན མགྒཱདྷིཔཏིནོ’’ཏི ཝུཏྟཏྟཱ རཱཛཔུཏྟོཔམཱ ཨདྷིཔཏིཾ ན ཀརོནྟཱིཏི ཨིམམེཝཏྠཾ དཱིཔེཏི, ན ཨདྷིཔཏཱིནཾ སཧབྷཱཝཾ. ཏཾ ཀཐཾ ཛཱནིཏབྦནྟི? པཊིཀྑིཏྟཏྟཱ. ཨདྷིཔཏིཔཙྩཡནིདྡེསེ ¶ ཧི ཨཊྛཀཐཱཡཾ (པཊྛཱ. ཨཊྛ. ༡.༣) ཝུཏྟཱ ‘‘ཀསྨཱ པན ཡཐཱ ཧེཏུཔཙྩཡནིདྡེསེ ‘ཧེཏཱུ ཧེཏུསམྤཡུཏྟཀཱན’ནྟི ཝུཏྟཾ, ཨེཝམིདྷ ‘ཨདྷིཔཏཱི ཨདྷིཔཏིསམྤཡུཏྟཀཱན’ནྟི ཨཝཏྭཱ ‘ཚནྡཱདྷིཔཏི ཚནྡསམྤཡུཏྟཀཱན’ནྟིཨཱདིནཱ ནཡེན དེསནཱ ཀཏཱཏི? ཨེཀཀྑཎེ ཨབྷཱཝཏོ’’ཏི. སཏི ཙ ཙཏུནྣཾ ཨདྷིཔཏཱིནཾ སཧབྷཱཝེ ‘‘ཨརིཡམགྒསམངྒིསྶ ཝཱིམཾསཱདྷིཔཏེཡྻཾ མགྒཾ བྷཱཝེནྟསྶཱ’’ཏི ཝིསེསནཾ ན ཀཏྟབྦཾ སིཡཱ ཨཝཱིམཾསཱདྷིཔཏིཀསྶ མགྒསྶ ཨབྷཱཝཱ. ཚནྡཱདཱིནཾ ཨཉྙམཉྙཱདྷིཔཏིཀརཎབྷཱཝེ ཙ ‘‘ཝཱིམཾསཾ ཋཔེཏྭཱ ཏཾསམྤཡུཏྟོ’’ཏིཨཱདིནཱ ཚནྡཱདཱིནཾ ཝཱིམཾསཱདྷིཔཏིཀཏྟཝཙནཾ ན ཝཏྟབྦཾ སིཡཱ. ཏཐཱ ‘‘ཙཏྟཱརོ ཨརིཡམགྒཱ སིཡཱ མགྒཱདྷིཔཏིནོ, སིཡཱ ན ཝཏྟབྦཱ མགྒཱདྷིཔཏིནོ’’ཏི (དྷ. ས. ༡༤༢༩) ཨེཝམཱདཱིཧིཔི ཨདྷིཔཏཱིནཾ སཧབྷཱཝོ པཊིཀྑིཏྟོ ཨེཝཱཏི.

པཉྷཔུཙྪཀཝཎྞནཱ ནིཊྛིཏཱ.

ཨིདྡྷིཔཱདཝིབྷངྒཝཎྞནཱ ནིཊྛིཏཱ.

༡༠. བོཛ྄ཛྷངྒཝིབྷངྒོ

༡. སུཏྟནྟབྷཱཛནཱིཡཾ

པཋམནཡཝཎྞནཱ

༤༦༦. པཏིཊྛཱནཱཡཱུཧནཱ ¶ ¶ ཨོགྷཏརཎསུཏྟཝཎྞནཱཡཾ (སཾ. ནི. ཨཊྛ. ༡.༡.༡) –

‘‘ཀིལེསཝསེན པཏིཊྛཱནཾ, ཨབྷིསངྑཱརཝསེན ཨཱཡཱུཧནཱ. ཏཐཱ ཏཎྷཱདིཊྛཱིཧི པཏིཊྛཱནཾ, ཨཝསེསཀིལེསཱབྷིསངྑཱརེཧི ཨཱཡཱུཧནཱ. ཏཎྷཱཝསེན པཏིཊྛཱནཾ, དིཊྛིཝསེན ཨཱཡཱུཧནཱ. སསྶཏདིཊྛིཡཱ པཏིཊྛཱནཾ, ཨུཙྪེདདིཊྛིཡཱ ཨཱཡཱུཧནཱ. ལཱིནཝསེན པཏིཊྛཱནཾ, ཨུདྡྷཙྩཝསེན ཨཱཡཱུཧནཱ. ཀཱམསུཁཱནུཡོགཝསེན པཏིཊྛཱནཾ, ཨཏྟཀིལམཐཱནུཡོགཝསེན ཨཱཡཱུཧནཱ. སབྦཱཀུསལཱབྷིསངྑཱརཝསེན པཏིཊྛཱནཾ, སབྦལོཀིཡཀུསལཱབྷིསངྑཱརཝསེན ཨཱཡཱུཧནཱ’’ཏི –

ཝུཏྟེསུ པཀཱརེསུ ཨིདྷ ཨཝུཏྟཱནཾ ཝསེན ཝེདིཏབྦཱ.

སམྨཔྤཝཏྟེ དྷམྨེ པཊིསཉྩིཀྑཏི, ཨུཔཔཏྟིཏོ ཨིཀྑཏི, ཏདཱཀཱརོ ཧུཏྭཱ པཝཏྟཏཱིཏི པཊིསངྑཱནལཀྑཎོ ཨུཔེཀྑཱསམྦོཛ྄ཛྷངྒོ. ཨེཝཉྩ ཀཏྭཱ ‘‘པཊིསངྑཱ སནྟིཊྛནཱ གཧཎེ མཛ྄ཛྷཏྟཏཱ’’ཏི ཨུཔེཀྑཱཀིཙྩཱདྷིམཏྟཏཱཡ སངྑཱརུཔེཀྑཱ ཝུཏྟཱ. ཨནུཀྐམནིཀྑེཔེ པཡོཛནཾ པུརིམསྶ པུརིམསྶ པཙྪིམཔཙྪིམཀཱརཎབྷཱཝོ.

༤༦༧. བལཝཏཱི ¶ ཨེཝ སཏི སཏིསམྦོཛ྄ཛྷངྒོཏི ཀཏྭཱ བལཝབྷཱཝདཱིཔནཏྠཾ པཉྙཱ གཧིཏཱ, ན ཡསྶ ཀསྶཙི སམྤདྷཱརཎསཏི, ཀུསལུཔྤཏྟིཀཱརཎསྶ པན སརཎཾ སཏཱིཏི དསྶེནྟོ ‘‘ཝཏྟཾ ཝཱ’’ཏིཨཱདིམཱཧ. ཝཏྟསཱིསེ ཋཏྭཱཏི ‘‘ཨཧོ ཝཏ མེ དྷམྨཾ སུཎེཡྻུཾ, སུཏྭཱ ཙ དྷམྨཾ པསཱིདེཡྻུཾ, པསནྣཱ ཙ མེ པསནྣཱཀཱརཾ ཀརེཡྻུ’’ནྟི ཨེཝཾཙིཏྟོ ཨཧུཏྭཱ ‘‘སྭཱཀྑཱཏོ བྷགཝཏཱ དྷམྨོ…པེ… ཝིཉྙཱུཧི, ཨཧོ ཝཏ མེ དྷམྨཾ སུཎེཡྻུཾ, སུཏྭཱ ཙ དྷམྨཾ ཨཱཛཱནེཡྻུཾ, ཨཱཛཱནིཏྭཱ ཙ པན ཏཐཏྠཱཡ པཊིཔཛྫེཡྻུ’’ནྟི དྷམྨསུདྷམྨཏཾ པཊིཙྩ ཀཱརུཉྙཾ ཨནུདྡཡཾ ཨནུཀམྤཾ ཨུཔཱདཱཡ མཧཱཀསྶཔཏྠེརེན ཝིཡ བྷཱསིཏནྟི ཨཏྠོ. ཝིམུཏྟཱཡཏནསཱིསེཏི ‘‘ན ཧེཝ ཁོ ¶ སཏྠཱ, ཨཔིཙ ཁོ ཡཐཱསུཏཾ ཡཐཱཔརིཡཏྟཾ དྷམྨཾ ཝིཏྠཱརེན པརེསཾ དེསེསྶཱམཱི’’ཏི ཨེཝཾ ཝིམུཏྟིཀཱརཎཔདྷཱནབྷཱཝེ ཋཏྭཱ. ཙིརཀཏཝཏྟཱདིཝསེན ཏཾསམུཊྛཱཔཀོ ཨརཱུཔཀོཊྛཱསོ ཝུཏྟོ, བྷཱཝཏྠཏྟཱ ཨེཝ ཝཱ ཀཏབྷཱསིཏ-སདྡཱ ཀིརིཡཱབྷཱུཏསྶ ཨརཱུཔཀོཊྛཱསསྶ ཝཱཙཀཱཏི ཀཏྭཱ ཨཱཧ ‘‘ཀཱཡཝིཉྙཏྟིཾ…པེ… ཀོཊྛཱས’’ནྟི.

བོཛ྄ཛྷངྒསམུཊྛཱཔཀཏཱ པུརིམཱནཾ ཚནྣཾ ཨཏྟནོ ཨཏྟནོ ཨནནྟརིཀསྶ, པརེསཾ སབྦེསཾ ཝཱ ཏཾཏཾཔརིཡཱཡེན སམུཊྛཱཔནཝསེན ཡོཛེཏབྦཱ. ཀཱམལོཀཝཊྚཱམིསཱཏི ཏཎྷཱ ཏདཱརམྨཎཱ ཁནྡྷཱཏི ཝདནྟི, པཉྩཀཱམགུཎིཀོ ཙ རཱགོ ཏདཱརམྨཎཉྩ ཀཱམཱམིསཾ, ‘‘སསྶཏོ ཨཏྟཱ ཙ ལོཀོ ཙཱ’’ཏིཨཱདིནཱ ལོཀགྒཧཎཝསེན པཝཏྟོ སསྶཏུཙྪེདསཧགཏོ རཱགོ ཏདཱརམྨཎཉྩ ལོཀཱམིསཾ, ལོཀདྷམྨཱ ཝཱ, ཝཊྚསྶཱདཝསེན ཨུཔྤནྣོ སཾསཱརཛནཀོ རཱགོ ཏདཱརམྨཎཉྩ ཝཊྚཱམིསཾ. མགྒསྶ པུབྦབྷཱགཏྟཱ པུབྦབྷཱགཱ.

པཋམནཡཝཎྞནཱ ནིཊྛིཏཱ.

དུཏིཡནཡཝཎྞནཱ

༤༦༨-༤༦༩. ཨབྷིཉྙེཡྻཱ དྷམྨཱ ནཱམ ‘‘སབྦེ སཏྟཱ ཨཱཧཱརཊྛིཏིཀཱ, དྭེ དྷཱཏུཡོ, ཏིསྶོ དྷཱཏུཡོ, ཙཏྟཱརི ཨརིཡསཙྩཱནི, པཉྩ ཝིམུཏྟཱཡཏནཱནི, ཚ ཨནུཏྟརིཡཱནི, སཏྟ ནིདྡསཝཏྠཱུནི, ཨཊྛཱབྷིབྷཱཡཏནཱནི, ནཝཱནུཔུབྦཝིཧཱརཱ, དས ནིཛྫརཝཏྠཱུནཱི’’ཏི ཨེཝཾཔབྷེདཱ དྷམྨཱ ¶ , ‘‘སབྦཾ, བྷིཀྑཝེ, ཨབྷིཉྙེཡྻ’’ནྟི (སཾ. ནི. ༤.༤༦) དསྶིཏཱ ཁནྡྷཱདཡོ ཙ. ཝཱནནྟི ཝིནནྡྷནཾ བྷཝཱདཱིནཾ, གམནཾ ཝཱ པིཡརཱུཔསཱཏརཱུཔེསུ.

ཙངྐམཾ ཨདྷིཊྛཧནྟསྶ ཨུཔྤནྣཝཱིརིཡཾ ཝིཔསྶནཱསཧགཏནྟི ཝེདིཏབྦཾ. ཨེཏྟཀེནཱཏི ‘‘ལོཀིཡལོཀུཏྟརམིསྶཀཱ ཀཐིཏཱ’’ཏི ཨེཏྟཱཝཏཱ. ལོཀིཡནྟི ཝདནྟོ ན ཀིལམཏཱིཏི ཀཱཡཝིཉྙཏྟིསམུཊྛཱཔཀསྶ ལོཀིཡཏྟཱ ཨཙོདནཱིཡོཏི ཨཏྠོ. ཨལབྦྷ…པེ… པཊིཀྑིཏྟཱཏི རཱུཔཱཝཙརེ ཨལབྦྷམཱནཀཾ པཱིཏིསམྦོཛ྄ཛྷངྒཾ ཨུཔཱདཱཡ ལབྦྷམཱནཱཔི ཨཝིཏཀྐཨཝིཙཱརཱ པཱིཏི པཊིཀྑིཏྟཱ, ‘‘པཱིཏིསམྦོཛ྄ཛྷངྒོ’’ཏི ན ཝུཏྟོཏི ཨཏྠོ. ཀཱམཱཝཙརེ ¶ ཝཱ ཨལབྦྷམཱནཀཾ ཨཝིཏཀྐཨཝིཙཱརཾ པཱིཏིཾ ཨུཔཱདཱཡ ལབྦྷམཱནཀཱཝ པཱིཏིབོཛ྄ཛྷངྒབྷཱུཏཱ པཊིཀྑིཏྟཱ, ཨཝིཏཀྐཨཝིཙཱརོ པཱིཏིསམྦོཛ྄ཛྷངྒོ ན ཝུཏྟོཏི ཨཏྠོ.

ཨཛ྄ཛྷཏྟཝིམོཀྑནྟི ཨཛ྄ཛྷཏྟདྷམྨེ ཨབྷིནིཝིསིཏྭཱ ཏཏོ ཝུཊྛིཏམགྒོ ‘‘ཨཛ྄ཛྷཏྟཝིམོཀྑོ’’ཏི ཨིདྷ ཝུཏྟོཏི ཨདྷིཔྤཱཡོ. ན ཝཱརེཏབྦོཏི ཝིཔསྶནཱཔཱདཀེསུ ཀསིཎཱདིཛྷཱནེསུ སཏིཨཱདཱིནཾ ནིབྦེདྷབྷཱགིཡཏྟཱ ན པཊིཀྑིཔིཏབྦོཏི ཨཏྠོ. ཨནུདྡྷརནྟཱ པན ཝིཔསྶནཱ ཝིཡ བོདྷིཡཱ མགྒསྶ ཨཱསནྣཀཱརཎཾ ཛྷཱནཾ ན ཧོཏི, ན ཙ ཏཐཱ ཨེཀནྟིཀཾ ཀཱརཎཾ, ན ཙ ཝིཔསྶནཱཀིཙྩསྶ ཝིཡ ཛྷཱནཀིཙྩསྶ ནིཊྛཱནཾ མགྒོཏི ཀཏྭཱ ན ཨུདྡྷརནྟི. ཏཏྠ ཀསིཎཛ྄ཛྷཱནགྒཧཎེན ཏདཱཡཏྟཱནི ཨཱརུཔྤཱནིཔི གཧིཏཱནཱིཏི དཊྛབྦཱནི. ཨསུབྷཛ྄ཛྷཱནཱནཾ ཨཝཙནཾ ཨཝིཏཀྐཱཝིཙཱརསྶ ཨདྷིཔྤེཏཏྟཱ.

དུཏིཡནཡཝཎྞནཱ ནིཊྛིཏཱ.

ཏཏིཡནཡཝཎྞནཱ

༤༧༠-༤༧༡. ཏདངྒསམུཙྪེདནིསྶརཎཝིཝེཀནིསྶིཏཏཾ ཝཏྭཱ པཊིཔྤསྶདྡྷིཝིཝེཀནིསྶིཏཏྟསྶ ཨཝཙནཾ ‘‘སཏིསམྦོཛ྄ཛྷངྒཾ བྷཱཝེཏཱི’’ཏིཨཱདིནཱ (སཾ. ནི. ༥.༡༨༢; ཝིབྷ. ༤༧༡) ཨིདྷ བྷཱཝེཏབྦཱནཾ བོཛ྄ཛྷངྒཱནཾ ཝུཏྟཏྟཱ. བྷཱཝིཏབོཛ྄ཛྷངྒསྶ ཧི སཙྪིཀཱཏབྦཱ ཕལབོཛ྄ཛྷངྒཱ ¶ ཨབྷིདྷམྨབྷཱཛནཱིཡེ ཝུཏྟཱཏི. ཝོསྶགྒ-སདྡོ པརིཙྩཱགཏྠོ པཀྑནྡནཏྠོ ཙཱཏི ཝོསྶགྒསྶ དུཝིདྷཏཱ ཝུཏྟཱ. ཡཐཱཝུཏྟེནཱཏི ཏདངྒསམུཙྪེདཔྤཀཱརེན ཏནྣིནྣབྷཱཝཱརམྨཎཀརཎཔྤཀཱརེན ཙ. པརིཎཱམེནྟཾ ཝིཔསྶནཱཀྑཎེ, པརིཎཏཾ མགྒཀྑཎེ.

ཏཏིཡནཡཝཎྞནཱ ནིཊྛིཏཱ.

སུཏྟནྟབྷཱཛནཱིཡཝཎྞནཱ ནིཊྛིཏཱ.

༢. ཨབྷིདྷམྨབྷཱཛནཱིཡཝཎྞནཱ

༤༧༢. ཨུཔེཀྑནཝསེནཱཏི ¶ སབྷཱཝནིདྡེསཏཾ དསྶེཏི, ཧཱཔནཝཌྜྷནེསུ བྱཱཔཱརཾ ཨཀཏྭཱ ཨུཔཔཏྟིཏོ ཨིཀྑནཝསེནཱཏི ཨཏྠོ. ལོཀིཡཨུཔེཀྑནཱཡ ཨདྷིཀཱ ཨུཔེཀྑནཱ ཨཛ྄ཛྷུཔེཀྑནཱཏི ཨཡམཏྠོ ཨིདྷ ལོཀུཏྟརཱ ཨེཝ ཨདྷིཔྤེཏཱཏི ཡུཏྟོཏི.

ཨབྷིདྷམྨབྷཱཛནཱིཡཝཎྞནཱ ནིཊྛིཏཱ.

བོཛ྄ཛྷངྒཝིབྷངྒཝཎྞནཱ ནིཊྛིཏཱ.

༡༡. མགྒངྒཝིབྷངྒོ

༢. ཨབྷིདྷམྨབྷཱཛནཱིཡཝཎྞནཱ

༤༩༠. ཨབྷིདྷམྨེ ¶ ¶ ལོཀུཏྟརཙིཏྟབྷཱཛནཱིཡེཔི ‘‘ཏསྨིཾ ཁོ པན སམཡེ ཙཏྟཱརོ ཁནྡྷཱ ཧོནྟི…པེ… ཨཊྛངྒིཀོ མགྒོ ཧོཏཱི’’ཏི (དྷ. ས. ༣༣༧) ཝུཏྟཏྟཱ ཨིདྷཱཔི ཨབྷིདྷམྨབྷཱཛནཱིཡེ ཨབྷིདྷམྨཱནུརཱུཔཾ དེསནཾ ཀརོནྟོ ‘‘ཨཊྛངྒིཀོ མགྒོ’’ཏི ཨརིཡོཔཔདཏཾ ན ཀརོཏི.

༤༩༣. ཏསྨིཾ སམཡེཏི ལོཀིཡཀཱལེན ཨེཏེསཾ ཨཏིརེཀཀིཙྩཾ དསྶེཏི. ཝིརཏིཨུཔྤཱདནེན མིཙྪཱཝཱཙཱདཱིནི པུགྒལཾ པཛཧཱཔེནྟཱིཏི སམྨཱདིཊྛཱདཱིནི པཉྩ ‘‘ཀཱརཱཔཀངྒཱནཱི’’ཏི ཝུཏྟཱནི. སམྨཱཝཱཙཱདིཀིརིཡཱ ཧི ཝིརཏི, ཏཉྩ ཨེཏཱནི ཀཱརཱཔེནྟཱིཏི. ཝིརཏིཝསེནཱཏི ཝིརམཎཀིརིཡཱཝསེན, ན ཀཱརཱཔཀབྷཱཝེན ཀཏྟུབྷཱཝེན ཙཱཏི ཨཏྠོ. ཨིམཾ…པེ… ཀིཙྩཱཏིརེཀཏཾ དསྶེཏུནྟི ལོཀུཏྟརཀྑཎེཔི ཨིམཱནེཝ པཉྩ སམྨཱཝཱཙཱདིཏྟཡསྶ ཨེཀཀྑཎེ ཀཱརཱཔཀཱནཱིཏི དསྶེཏུནྟི ཨཏྠོ. མིཙྪཱདིཊྛཱདིཀཱ དས, ཏཔྤཙྩཡཱ ཨཀུསལཱ ཙ དསཱཏི ཝཱིསཏི ཨཀུསལཔཀྑིཡཱ, སམྨཱདིཊྛཱདིཀཱ དས, ཏཔྤཙྩཡཱ ཙ ཀུསལཱ དསཱཏི ཝཱིསཏི ཀུསལཔཀྑིཡཱ ཙ མཧཱཙཏྟཱརཱིསཀསུཏྟེ (མ. ནི. ༣.༡༣༦) ཝུཏྟཱཏི ཏསྶ ཨེཏཾ ནཱམཾ.

པུཉྙབྷཱགིཡཱཏི པུཉྙཀོཊྛཱསེ བྷཝཱ, པུཉྙཱབྷིསངྑཱརེཀདེསབྷཱུཏཱཏི ཨཏྠོ. ཁནྡྷོཔདྷིཾ ཝིཔཙྩཏི, ཏཏྠ ཝཱ ཝིཔཙྩཏཱིཏི ཨུཔདྷིཝེཔཀྐཱ.

པཉྩངྒིཀམགྒཾ ཨུདྡིསིཏྭཱ ཏཏྠ ཨེཀེཀཾ པུཙྪིཏྭཱ ཏསྶ ཏསྶེཝ སམཡཝཝཏྠཱནཾ ཀཏྭཱ ཝིསྶཛྫནཾ ¶ ‘‘པཱཊིཡེཀྐཾ པུཙྪིཏྭཱ པཱཊིཡེཀྐཾ ཝིསྶཛྫན’’ནྟི ཝུཏྟཾ. སཧ པན པུཙྪིཏྭཱ པཉྩནྣམྤི སམཡཝཝཏྠཱནཾ ཀཏྭཱ ཝིསྶཛྫནེ ‘‘ཏཏྠ ཀཏམཱ སམྨཱདིཊྛིཡཱ པཉྙཱ’’ཏིཨཱདིཀོ པཊིནིདྡེསོ ཨེཀཏོ ཝིསྶཛྫནཔཊིནིདྡེསཏྟཱ ན པཱཊིཡེཀྐཾ པུཙྪཱཝིསྶཛྫནཾ ནཱམ ཧོཏཱིཏི. ཏཏྠ པཉྩངྒིཀཝཱརེ ཨེཝ པཱཊིཡེཀྐཾ པུཙྪཱཝིསྶཛྫནཾ སམྨཱདིཊྛཱདཱིསུ ཀཱརཱཔཀངྒེསུ ཨེཀེཀམུཁཱཡ བྷཱཝནཱཡ མགྒུཔྤཏྟིཾ སནྡྷཱཡ ཀཏནྟི ཝེདིཏབྦཾ. ཝཱཙཱདཱིནི ཧི པུབྦསུདྡྷིཡཱ སིཛ྄ཛྷནྟི, ན མགྒསྶ ཨུཔཙཱརེནཱཏི.

ཨབྷིདྷམྨབྷཱཛནཱིཡཝཎྞནཱ ནིཊྛིཏཱ.

མགྒངྒཝིབྷངྒཝཎྞནཱ ནིཊྛིཏཱ.

༡༢. ཛྷཱནཝིབྷངྒོ

༡. སུཏྟནྟབྷཱཛནཱིཡཾ

མཱཏིཀཱཝཎྞནཱ

༥༠༨. ཛྷཱནསྶ ¶ ¶ པུབྦབྷཱགཀརཎཱིཡསམྤདཱ པཱཏིམོཀྑསཾཝརཱདི. ཨསུབྷཱནུསྶཏིཡོ ལོཀུཏྟརཛ྄ཛྷཱནཱནི ཙ ཨིཏོ བཧིདྡྷཱ ནཏྠཱིཏི སབྦཔྤཀཱར-གྒཧཎཾ ཀརོཏི, སུཉྙཱ པརཔྤཝཱདཱ སམཎེབྷཱིཏི (མ. ནི. ༡.༡༣༩; ཨ. ནི. ༤.༢༤༡) ཝཙནེན སམཎབྷཱཝཀརཔུབྦབྷཱགཀརཎཱིཡསམྤདཱསམྤནྣསྶཔི ཨབྷཱཝཾ དསྶེཏི. སིཀྑཱཔདེསུ ནཱམཀཱཡཱདིཝསེན ཝུཏྟེསུ ཝཙནཱནཏིཀྐམཝསེན སིཀྑིཏབྦེསུ, ཨཝཱིཏིཀྐམནཝིརཏིཙེཏནཱསངྑཱཏེསུ ཝཱ སིཀྑཱཀོཊྛཱསེསུ པརིཔཱུརཎཝསེན སིཀྑིཏབྦེསུ སཱ སཱ བྷིཀྑུསིཀྑཱདིཀཱ སིཀྑཱཔདེཀདེསབྷཱུཏཱ སིཀྑིཏབྦཱཏི ཨཱཧ ‘‘སིཀྑཱཔདེསཱུཏི ཨིདམསྶ སིཀྑིཏབྦདྷམྨཔརིདཱིཔན’’ནྟི.

སནྟོསཱདིཝསེན ཨིཏརཱིཏརསནྟོསཾ, ཏསྶ ཙ ཝཎྞཝཱདིཏཾ, ཨལདྡྷཱ ཙ ཨཔརིཏསྶནཾ, ལདྡྷཱ ཙ ཨགདྷིཏཔརིབྷོགནྟི ཨེཏེ གུཎེ དསྶེཏི. ཛྷཱནབྷཱཝནཱཡ ཀཱརཀོཏི པརིདཱིཔནཾ ཀཱརཀབྷཱཝཔརིདཱིཔནཾ. ཨརཉྙནྟིཨཱདིནཱ སེནཱསནསྶ པབྷེདཾ, ཨཔྤསདྡནྟིཨཱདིནཱ ནིརཱདཱིནཝཏཾ, པཊིསལླཱནསཱརུཔྤནྟི ཨཱནིསཾསཾ དཱིཔེཏཱིཏི ཨཱཧ ‘‘སེནཱསནཔྤབྷེདེ…པེ… པརིདཱིཔན’’ནྟི.

མཱཏིཀཱཝཎྞནཱ ནིཊྛིཏཱ.

ནིདྡེསཝཎྞནཱ

༥༠༩. ཀམྨཏྠེཧི ¶ དིཊྛི-སདྡཱདཱིཧི སཱསནཾ ཝུཏྟནྟི ‘‘དིཊྛཏྟཱ དིཊྛཱི’’ཏིཨཱདི ཝུཏྟཾ. སབྷཱཝཊྛེནཱཏི ཨཝིཔརཱིཏཊྛེན. སིཀྑིཡམཱནོ ཀཱཡཱདཱིནི ཝིནེཏི, ན ཨཉྙཐཱཏི ཨཱཧ ‘‘སིཀྑིཏབྦཊྛེན ཝིནཡོ’’ཏི, ཝིནཡོ ཝཱ སིཀྑིཏབྦཱནི ¶ སིཀྑཱཔདཱནི, ཁནྡྷཏྟཡཾ སིཀྑིཏབྦནྟི ཝིནཡོ ཝིཡཱཏི ཝིནཡོཏི དསྶེཏི. སཏྠུ ཨནུསཱསནདཱནབྷཱུཏཾ སིཀྑཏྟཡནྟི ཨཱཧ ‘‘ཨནུསིཊྛིདཱནཝསེནཱ’’ཏི.

སམྨཱདིཊྛིཔཙྩཡཏྟཱཏི སམྨཱདིཊྛིཡཱ པཙྩཡཏྟཱ. ཏིསྶོ ཧི སིཀྑཱ སིཀྑནྟསྶ སམྨཱདིཊྛི པརིཔཱུརཏཱིཏི. ‘‘ཏསྨཱཏིཧ ཏྭཾ བྷིཀྑུ ཨཱདིམེཝ ཝིསོདྷེཧི ཀུསལེསུ དྷམྨེསུ, ཀོ ཙཱདི ཀུསལཱནཾ དྷམྨཱནཾ? སཱིལཉྩ སུཝིསུདྡྷཾ དིཊྛི ཙ ཨུཛུཀཱ’’ཏི (སཾ. ནི. ༥.༣༦༩) ཝཙནཏོ སམྨཱདིཊྛིཔུབྦངྒམཾ སིཀྑཏྟཡཾ. ཨེཏསྨིཉྩ ཨཏྠདྭཡེ ཕལཀཱརཎོཔཙཱརེཧི སིཀྑཏྟཡཾ ‘‘དིཊྛཱི’’ཏི ཝུཏྟཾ, ཀུསལདྷམྨེཧི ཝཱ ཨཏྟནོ ཨེཀདེསབྷཱུཏེཧཱིཏི ཨདྷིཔྤཱཡོ. བྷགཝཏོ ཝིནཡནཀིརིཡཏྟཱ ཝིནཡོ སིཀྑཏྟཡཾ, ཏཾ པན ཝིནཡནཾ དྷམྨེནེཝ ཨཝིསམསབྷཱཝེན, དེསནཱདྷམྨེན ཝཱ པཝཏྟཾ, ན དཎྜཱདིནཱཏི ‘‘དྷམྨཝིནཡོ’’ཏི ཝུཏྟཾ.

ཨནཝཛྫདྷམྨཏྠནྟི པརམཱནཝཛྫནིབྦཱནཏྠཾ, ཨཀུཔྤཙེཏོཝིམུཏྟིཨཏྠཾ ཝཱ. དྷམྨེསུ ཨབྷིཉྙེཡྻཱདཱིསུ ཨབྷིཛཱནནཱདིཀཱརཎཾ སིཀྑཏྟཡནྟི ཏཾ ‘‘དྷམྨཝིནཡོ’’ཏི ཝུཏྟཾ. ‘‘ཨིམིསྶཱ ཨིམསྨི’’ནྟི པུནཔྤུནཾ ཝུཙྩམཱནཾ ནིཡམཀརཎཾ ཧོཏི, ཨེཝ-སདྡལོཔོ ཝཱ ཀཏོཏི ཨདྷིཔྤཱཡེནཱཧ ‘‘ནིཡམོ ཀཏོ’’ཏི.

༥༡༠. བྷིཀྑུཀོཏི ཨནཉྙཏྠེན ཀ-ཀཱརེན པདཾ ཝཌྜྷིཏནྟི ‘‘བྷིཀྑནདྷམྨཏཱཡཱ’’ཏི ཨཏྠམཱཧ. བྷིཀྑཀོཏི པན པཱཋེ བྷིཀྑཏཱིཏི བྷིཀྑཀོཏི ཨཏྠོ. ཛལླིཀཾ རཛམིསྶཾ མལཾ, ཨམིསྶཾ མལམེཝ. བྷིནྣཔཊདྷརོཏི ནིབྦཙནཾ བྷིནྣཔཊདྷརེ བྷིཀྑུ-སདྡསྶ ནིརུལ༹ྷཏྟཱ ཝུཏྟཾ.

ཡསྶ བྷཱཝེཏབྦོ པཧཱཏབྦོ ཙ ཨོདྷི ཨཝསིཊྛོ ཨཏྠི, སོ ཨོདྷིསོ, ཨརཧཱ པན ཏདབྷཱཝཱ ཨོདྷིརཧིཏོཏི ‘‘ཨནོདྷིསོ ཀིལེསཱནཾ པཧཱནཱ བྷིཀྑཱུ’’ཏི ཝུཏྟོ. ཨོདྷི-སདྡོ ཝཱ ཨེཀདེསེ ¶ ནིརུལ༹ྷོཏི སབྦམགྒཱ སབྦཀིལེསཱ ཙ ཨརཧཏཱ བྷཱཝིཏཱ པཧཱིནཱ ཙ ‘‘ཨོདྷཱི’’ཏི ན ཝུཙྩནྟི. པཧཱནཱཏི ཨིདཉྩ ནིབྦཙནཾ བྷེདནཔརིཡཱཡཝསེན ཝུཏྟནྟི ཝེདིཏབྦཾ.

སེཀྑོཏིཨཱདིནཱ ¶ བྷིཀྑུ-སདྡེན ཝུཙྩམཱནཾ ཨཏྠཾ གུཎཝསེན དསྶེཏི, ཧེཊྛཱ པན ‘‘སམཉྙཱཡ པཊིཉྙཱཡཱ’’ཏི པཉྙཱཡནཝསེན, ‘‘བྷིཀྑཏཱི’’ཏིཨཱདིནཱ ནིབྦཙནཝསེན དསྶིཏོ.

སེཀྑོ བྷིཀྑཱུཏི སཏྟ སེཀྑཱ ཀཐིཏཱ, བྷིནྣཏྟཱ པཱཔཀཱནཾ…པེ… བྷིཀྑཱུཏི ཁཱིཎཱསཝོཝ ཀཐིཏོཏི ཨིདཾ དྭཡཾ ‘‘སེཀྑོཏི པུཐུཛྫནཀལྱཱཎཀེན སདྡྷིཾ སཏྟ ཨརིཡཱ, བྷིནྣཏྟཱཏི ཨིམིནཱ པན ཙཏྟཱརོ ཕལཊྛཱ’’ཏི ཨིམིནཱ དྭཡེན ན སམེཏི, ཏདིདཾ ནིཔྤརིཡཱཡདསྶནཾ ཝུཏྟནྟི ཝེདིཏབྦཾ. ‘‘སེསཊྛཱནེསུ པུཐུཛྫནཀལྱཱཎཀཱདཡོ ཀཐིཏཱ’’ཏི ཝུཏྟཾ, ནནུ པཊིཉྙཱཡ བྷིཀྑུསཱིལོཔི ཝུཏྟོཏི? ཝུཏྟོ, ན པན ཨིདྷཱདྷིཔྤེཏོ སབྦཔྤཀཱརཛ྄ཛྷཱནནིབྦཏྟཀསྶ ཨདྷིཔྤེཏཏྟཱ.

བྷགཝཏོ ཝཙནཾ ཨུཔསམྤདཱཀམྨཀརཎསྶ ཀཱརཎཏྟཱ ཋཱནཾ, ཏདནུརཱུཔཾ ཋཱནཱརཧཾ, ཨནཱུནཉཏྟིཨནུསྶཱཝནཾ ཨུཔྤཊིཔཱཊིཡཱ ཙ ཨཝུཏྟནྟི ཨཏྠོ.

༥༡༡. ནིཔྤརིཡཱཡཏོ སཱིལཾ སམཱདཱནཝིརཏིཨཝཱིཏིཀྐམནཝིརཏིབྷཱཝཏོཏི ཨདྷིཔྤཱཡོ. ཨནབྷིཛ྄ཛྷཱདཱིནི སནྡྷཱཡ ཙེཏསིཀསཱིལསྶ པརིཡཱཡསཱིལཏཱ ཝུཏྟཱ. ནགརཝཌྜྷཀཱི ཝཏྠུཝིཛྫཱཙརིཡོཏི ཝདནྟི. ཙཏུབྦིདྷོ ཨཱཧཱརོ ཨསིཏཱདཱིནི, བྷཀྑིཏབྦབྷུཉྫིཏབྦལེཧིཏབྦཙུབིཏབྦཱནི ཝཱ.

པཱཏིམོཀྑསཾཝརེན ཨུཔེཏོ པིཧིཏིནྡྲིཡོ ཧོཏི ཏིཎྞཾ སུཙརིཏཱནཾ ཨིནྡྲིཡསཾཝརཱཧཱརཏྟཱ, པཱཏིམོཀྑསཾཝརོ ཝཱ ཨིནྡྲིཡསཾཝརསྶ ཨུཔནིསྶཡོ ཧོཏི. ཨིཏི པཱཏིམོཀྑསཾཝརེན པིཧིཏིནྡྲིཡོ ‘‘པཱཏིམོཀྑསཾཝརསཾཝུཏོ’’ཏི ཝུཏྟོ. ཨིམིནཱ ཨདྷིཔྤཱཡེན ‘‘སཾཝུཏོ’’ཏི ཨེཏསྶ པིཧིཏིནྡྲིཡོཏི ཨཏྠམཱཧ. པཱཏིམོཀྑེན ཙ སཾཝརེན ཙཱཏི ཨིདཾ པཱཏིམོཀྑཏོ ཨཉྙཾ སཱིལཾ ཀཱཡིཀཨཝཱིཏིཀྐམཱདིགྒཧཎེན གཧིཏནྟི ཨིམིནཱ ཨདྷིཔྤཱཡེན ཝུཏྟནྟི དཊྛབྦཾ. དུཏིཡོ པནཏྠོ དྭིནྣམྤི ཨེཀཏྠཏཾ སནྡྷཱཡ ཝུཏྟོ.

༥༡༣. སབྦམྤི ¶ དུསྶཱིལྱནྟི ཨིམིནཱ ཨབྷིཛ྄ཛྷཱདཡོ ཙ གཧིཏཱཏི སནྡྷཱཡཱཧ ‘‘མནསཱཔི ཨཱཙརཏི ཨེཝ, ཏསྨཱ ཏཾ དསྶེཏུ’’ནྟི. ཏཏྠཱཏི ཀཱཡིཀཝཱིཏིཀྐམཱདིཝསེན ཝུཏྟེསུ ཨནཱཙཱརེསུ. གརུབྷཎྜཝིསྶཛྫནམཱཔཛྫཏཱིཏི ཐུལླཙྩཡཾ ཨཱཔཛྫཏཱིཏི ཨཏྠོ.

ཨརོཔིམོཏི ¶ སངྒྷིཀབྷཱུམིཡཾ ཨུཊྛིཏོ ཝུཏྟོ. ཕཱཏིཀམྨནྟི གརུབྷཎྜནྟརབྷཱུཏཾ ཀམྨཾ. དཎྜཀམྨནྟི ཡཐཱཝུཏྟཾ ཧཏྠཀམྨམཱཧ. སིནཱཡནྟི ཨེཏེནཱཏི སིནཱནཾ, ཙུཎྞཱདི.

སཙྩཱལཱིཀེན པིཡཝཱདཱི ‘‘ཙཱཊཱུ’’ཏི ཝུཙྩཏི, ཙཱཊུཾ ཨཏྟཱནཾ ཨིཙྪཏཱིཏི ཙཱཊུཀཱམོ, ཏསྶ བྷཱཝོ ཙཱཊུཀམྱཏཱ. མུགྒསཱུཔསྶ ཨཔྤཝིསནཊྛཱནཾ ནཱམ ནཏྠི སབྦཱཧཱརེཧི ཨཝིརུདྡྷཏྟཱཏི ཨདྷིཔྤཱཡོ. པརིབྷཊཏི དྷཱརེཏི, པོསེཏི ཝཱཏི པརིབྷཊོ, ཨཐ ཝཱ པརིཝཱརབྷཱུཏོ བྷཊོ སེཝཀོ པརིབྷཊོ.

བྷཎྜཱགཱརིཀཀམྨཾ གིཧཱིནཾ ཀརིཡམཱནཾ ཝུཏྟཾ. པིཎྜཏྠཾ པཊིཔིཎྜདཱནཾ, པིཎྜཾ དཏྭཱ པཊིཔིཎྜགྒཧཎཾ ཝཱ པིཎྜཔཊིཔིཎྜཾ. སངྒྷབྷོགཙེཏིཡབྷོགཱནཾ ཨཡོནིསོ ཝིཙཱརཎཾ སངྒྷུཔྤཱདཙེཏིཡུཔྤཱདཔཊྛཔནཾ, ཨཏྟནོ སནྟཀེ ཝིཡ པཊིཔཛྫནནྟི ཀེཙི.

༥༡༤. གཱཝོ ཙརནྟི ཨེཏྠཱཏི གོཙརོ, གོཙརོ ཝིཡཱཏི གོཙརོ, ཨབྷིཎྷཾ ཙརིཏབྦཊྛཱནཾ. གཱཝོ ཝཱ ཙཀྑཱདཱིནི ཨིནྡྲིཡཱནི, ཏེཧི ཙརིཏབྦཊྛཱནཾ གོཙརོ. ཨཡུཏྟོ གོཙརོ ཨགོཙརོཏི ཏདཉྙོ ཡུཏྟོ ‘‘གོཙརོ’’ཏི ཝུཏྟོ.

ཝཱ-སདྡོ ཝིདྷུནནཏྠོཔི ཧོཏཱིཏི ཀཏྭཱ ཨཱཧ ‘‘ཝིནིདྡྷུཏཀིབྦིསཱནི ཝཱ’’ཏི.

༥༡༥. ཨཝརཱ པཙྪིམཱ མཏྟཱ ཨེཏེསནྟི ཨོརམཏྟཀཱནི. སཾཡམཀརཎཱིཡཱནཱིཏི ཀཱཡཝཱཙཱསཾཡམམཏྟེན ཀཏྟབྦཔཊིཀམྨཱནི, ཝིཀྑིཔིཏབྦཱནི ཝཱ. ‘‘པུན ན ཨེཝཾ ཀརོམཱི’’ཏི ཙིཏྟེན སཾཝརམཏྟེན, ཨིནྡྲིཡསཾཝརེནེཝ ཝཱ ཀརཎཱིཡཱནི སཾཝརཀརཎཱིཡཱནི. དིཝིཝིཧཱརཛནཔདཝཱསཱི དིཝིཝིཧཱརཝཱསཱི. མནསྶ ཨདྷིཊྛཱནམེཝ ཨདྷིཊྛཱནཱཝིཀམྨཾ. དེསནཱ ཨིདྷ ‘‘ཝུཊྛཱནཱཝིཀམྨ’’ནྟི ཨདྷིཔྤེཏཱ. ཏཏྠ ‘‘ཙིཏྟུཔྤཱདཀརཎཱིཡཱནི མནསིཀཱརཔཊིབདྡྷཱནཱི’’ཏི ཝཙནཏོ པཱཏིམོཀྑསཾཝརཝིསུདྡྷཏྠཾ ¶ ཨནཏིཀྐམནཱིཡཱནི ཨནཱཔཏྟིགམནཱིཡཱནི ཝཛྫཱནི ཝུཏྟཱནཱིཏི ཨཱཙརིཡསྶ ཨདྷིཔྤཱཡོ. ཙཏུབྦིདྷསྶཱཏི ཨཏྟཱནུཝཱདཔརཱནུཝཱདདཎྜདུགྒཏིབྷཡསྶ.

༥༡༦. ‘‘ཨིདྷ བྷིཀྑཱུ’’ཏི བྷིཀྑུ ཨེཝ ཨདྷིཔྤེཏོཏི སནྡྷཱཡ ‘‘སེསསིཀྑཱ པན ཨཏྠུདྡྷཱརཝསེན སིཀྑཱ-སདྡསྶ ཨཏྠདསྶནཏྠཾ ཝུཏྟཱ’’ཏི ཨཱཧ. བྷིཀྑུགྒཧཎཾ ¶ པན ཨགྒཔརིསཱམུཁེན སབྦཛ྄ཛྷཱནནིབྦཏྟཀཱནཾ ཙཏུནྣམྤི པརིསཱནཾ དསྶནཏྠཾ ཀཏཾ. གུཎཏོ ཝཱ བྷིཀྑུ ཨདྷིཔྤེཏོཏི སབྦཱཔི སིཀྑཱ ཨིདྷཱདྷིཔྤེཏཱཏི དཊྛབྦཱ. སབྦེན སིཀྑཱསམཱདཱནེནཱཏི ཨེཏྠ ཡེན སམཱདཱནེན སབྦཱཔི སིཀྑཱ སམཱདིནྣཱ ཧོནྟི, ཏཾ ཨེཀམྤི སབྦསམཱདཱནཀིཙྩཀརཏྟཱ སབྦསམཱདཱནཾ ནཱམ ཧོཏི, ཨནེཀེསུ པན ཝཏྟབྦམེཝ ནཏྠི. སབྦེན སིཀྑིཏབྦཱཀཱརེནཱཏི ཨཝཱིཏིཀྐམདེསནཱཝུཊྛཱནཝཏྟཙརཎཱདིཨཱཀཱརེན. ཝཱིཏིཀྐམནཝསེན སེསསྶཔི ནིསྶེསཏཱཀརཎཾ སནྡྷཱཡ ‘‘བྷིནྣསྶཔཱི’’ཏིཨཱདིམཱཧ.

༥༡༩. ཨཱཝརཎཱིཡེཧི ཙིཏྟཔརིསོདྷནབྷཱཝནཱ ཛཱགརིཡཱནུཡོགོཏི ཀཏྭཱ ཨཱཧ ‘‘བྷཱཝན’’ནྟི. སུཔྤཔརིགྒཱཧཀནྟི ‘‘སུཔྤཔརིགྒཱཧཀཾ ནཱམ ཨིདཾ ཨིཏོ པུབྦེ ཨིཏོ པརཉྩ ནཏྠི, ཨཡམེཏསྶ པཙྩཡོ’’ཏིཨཱདིནཱ པརིགྒཱཧཀཾ.

༥༢༠-༥༢༡. ཡུཏྟོཏི ཨཱརམྦྷམཱནོ. སཱཏཙྩཾ ནེཔཀྐཉྩ པཝཏྟཡམཱནོ ཛཱགརིཡཱནུཡོགཾ ཨནུཡུཏྟོ ཧོཏཱིཏི སམྦནྡྷཾ དསྶེཏི.

༥༢༢. ལོཀིཡཱཡཔི…པེ… ཨཱཧཱཏི ཨིདཾ ཝིཔསྶནཱབྷཱཝནཱཡ སཏིཔཊྛཱནཱདཡོ ཨེཀསྨིཾ ཨཱརམྨཎེ སཧ ནཔྤཝཏྟནྟི, པཝཏྟམཱནཱནིཔི ཨིནྡྲིཡབལཱནི བོཛ྄ཛྷངྒེསྭེཝ ཨནྟོགདྷཱནི ཧོནྟི. པཱིཏིསམྦོཛ྄ཛྷངྒགྒཧཎེན ཧི ཏདུཔནིསྶཡབྷཱུཏཾ སདྡྷིནྡྲིཡཾ སདྡྷཱབལཉྩ གཧིཏམེཝ ཧོཏི ‘‘སདྡྷཱུཔནིསཾ པཱམོཛྫ’’ནྟི (སཾ. ནི. ༢.༢༣) ཝུཏྟཏྟཱ. མགྒངྒཱནི པཉྩེཝ ཝིཔསྶནཱཀྑཎེ པཝཏྟནྟཱིཏི ཨིམམཏྠཾ སནྡྷཱཡ ཝུཏྟནྟི དཊྛབྦཾ.

༥༢༣. སམནྟཏོ, སམྨཱ, སམཾ ཝཱ སཱཏྠཀཱདིཔཛཱནནཾ སམྤཛཱནཾ, ཏདེཝ སམྤཛཉྙཾ. ཏེནཱཏི སཏིསམྤཡུཏྟཏྟཱ ཨེཝ ཨུདྡེསེ ཨཝུཏྟཱཔི སཏི ནིདྡེསེ ‘‘སཏོ’’ཏི ཨིམིནཱ ཝུཏྟཱཏི ཨདྷིཔྤཱཡོ.

སཱཏྠཀཱནཾ ¶ ཨབྷིཀྐམཱདཱིནཾ སམྤཛཱནནཾ སཱཏྠཀསམྤཛཉྙཾ. ཨེཝཾ སཔྤཱཡསམྤཛཉྙཾ. ཨབྷིཀྐམཱདཱིསུ པན བྷིཀྑཱཙཱརགོཙརེ ཨཉྙཏྠཱཔི ཙ པཝཏྟེསུ ཨཝིཛཧིཏེ ཀམྨཊྛཱནསངྑཱཏེ གོཙརེ སམྤཛཉྙཾ གོཙརསམྤཛཉྙཾ. ཨབྷིཀྐམཱདཱིསུ ཨསམྨུཡ྄ཧནམེཝ སམྤཛཉྙཾ ཨསམྨོཧསམྤཛཉྙཾ.

དྭེ ¶ ཀཐཱཏི ཝཙནཀརཎཱཀརཎཀཐཱ ན ཀཐིཏཔུབྦཱ. ཝཙནཾ ཀརོམི ཨེཝ, ཏསྨཱ སུབྦཙཏྟཱ པཊིཝཙནཾ དེམཱིཏི ཨཏྠོ.

ཀམྨཊྛཱནསཱིསེནེཝཱཏི ཀམྨཊྛཱནགྒེནེཝ, ཀམྨཊྛཱནཾ པདྷཱནཾ ཀཏྭཱ ཨེཝཱཏི ཨཏྠོ. ཏེན ‘‘པཏྟམྤི ཨཙེཏན’’ནྟིཨཱདིནཱ ཝཀྑམཱནཾ ཀམྨཊྛཱནཾ, ཡཐཱཔརིཧརིཡམཱནཾ ཝཱ ཨཝིཛཧིཏྭཱཏི དསྶེཏི. ‘‘ཏསྨཱ’’ཏི ཨེཏསྶ ‘‘དྷམྨཀཐཱ ཀཐེཏབྦཱཡེཝཱཏི ཝདནྟཱི’’ཏི ཨེཏེན སམྦནྡྷོ. བྷཡེཏི པརཙཀྐཱདིབྷཡེ.

ཨཝསེསཊྛཱནེཏི ཡཱགུཨགྒཧིཏཊྛཱནེ. ཋཱནཙངྐམནམེཝཱཏི ཨདྷིཊྛཱཏབྦིརིཡཱཔཐཝསེན ཝུཏྟཾ, ན བྷོཛནཱདིཀཱལེ ཨཝསྶཾ ཀཏྟབྦནིསཛྫཱཡཔི པཊིཀྑེཔཝསེན.

ཐེརོ དཱརུཙཱིརིཡོ –

‘‘ཏསྨཱཏིཧ ཏེ, བཱཧིཡ, ཨེཝཾ སིཀྑིཏབྦཾ. དིཊྛེ དིཊྛམཏྟཾ བྷཝིསྶཏི, སུཏེ མུཏེ ཝིཉྙཱཏེ. ཡཏོ ཁོ ཏེ, བཱཧིཡ, དིཊྛེ དིཊྛམཏྟཾ བྷཝིསྶཏི, སུཏེ མུཏེ ཝིཉྙཱཏེ ཝིཉྙཱཏམཏྟཾ བྷཝིསྶཏི, ཏཏོ ཏྭཾ, བཱཧིཡ, ན ཏེན, ཡཏོ ཏྭཾ, བཱཧིཡ, ན ཏེན. ཏཏོ ཏྭཾ, བཱཧིཡ, ན ཏཏྠ, ཡཏོ ཏྭཾ, བཱཧིཡ, ན ཏཏྠ. ཏཏོ ཏྭཾ, བཱཧིཡ, ནེཝིདྷ ན ཧུརཾ ན ཨུབྷཡམནྟརེན. ཨེསེཝནྟོ དུཀྑསྶཱ’’ཏི (ཨུདཱ. ༡༠) –

ཨེཏྟཀེན ཨརཧཏྟཾ སཙྪཱཀཱསི.

ཁཱཎུཨཱདིཔརིཧརཎཏྠཾ, པཏིཊྛིཏཔཱདཔརིཧརཎཏྠཾ ཝཱ པསྶེན ཧརཎཾ ཝཱིཏིཧརཎནྟི ཝདནྟི. ཡཱཝ ¶ པཏིཊྛིཏཔཱདོ, ཏཱཝ ཨཱཧརཎཾ ཨཏིཧརཎཾ, ཏཏོ པརཾ ཧརཎཾ ཝཱིཏིཧརཎནྟི ཨཡཾ ཝཱ ཨེཏེསཾ ཝིསེསོ. ཨཝཱིཙིནྟི ནིརནྟརཾ.

པཋམཛཝནེཔི…པེ… ན ཧོཏཱིཏི ཨིདཾ པཉྩཝིཉྙཱཎཝཱིཐིཡཾ ཨིཏྠིཔུརིསོཏི རཛྫནཱདཱིནཾ ཨབྷཱཝཾ སནྡྷཱཡ ཝུཏྟཾ. ཏཏྠ ཧི ཨཱཝཛྫནཝོཊྛབྦནཱནཾ ཨཡོནིསོ ཨཱཝཛྫནཝོཊྛབྦནཝསེན ཨིཊྛེ ཨིཏྠིརཱུཔཱདིམྷི ལོབྷོ, ཨནིཊྛེ ཙ པཊིགྷོ ཨུཔྤཛྫཏི. མནོདྭཱརེ པན ཨིཏྠིཔུརིསོཏི རཛྫནཱདི ཧོཏི, ཏསྶ ¶ པཉྩདྭཱརཛཝནཾ མཱུལཾ, ཡཐཱཝུཏྟཾ ཝཱ སབྦཾ བྷཝངྒཱདི. ཨེཝཾ མནོདྭཱརཛཝནསྶ མཱུལཝསེན མཱུལཔརིཉྙཱ ཝུཏྟཱ. ཨཱགནྟུཀཏཱཝཀཱལིཀཏཱ པན པཉྩདྭཱརཛཝནསྶེཝ ཨཔུབྦཏིཏྟརཏཱཝསེན. མཎིསཔྤོ སཱིཧལ༹དཱིཔེ ཝིཛྫམཱནཱ ཨེཀཱ སཔྤཛཱཏཱིཏི ཝདནྟི. ཙལནནྟི ཀམྤནཾ.

ཨཏིཧརཏཱིཏི ཡཱཝ མུཁཱ ཨཱཧརཏི. ཝཱིཏིཧརཏཱིཏི ཏཏོ ཡཱཝ ཀུཙྪི, ཏཱཝ ཧརཏི, ཀུཙྪིགཏཾ ཝཱ པསྶཏོ ཧརཏི. ཨལླཏྟཉྩ ཨནུཔཱལེཏཱིཏི ཝཱཡུཨཱདཱིཧི ཨཏིཝིསོསནཾ ཡཐཱ ན ཧོཏི, ཏཐཱ པཱལེཏི. ཨཱབྷུཛཏཱིཏི པརིཡེསནཛ྄ཛྷོཧརཎཛིཎྞཱཛིཎྞཏཱདིཾ ཨཱཝཛྫེཏི, ཝིཛཱནཱཏཱིཏི ཨཏྠོ. ཏཾཏཾཝིཛཱནནནིཔྥཱདཀོཡེཝ ཧི པཡོགོ ‘‘སམྨཱཔཡོགོ’’ཏི ཝུཏྟོཏི. ཨཐ ཝཱ ‘‘སམྨཱཔཊིཔཏྟིམཱགམྨ ཨབྦྷནྟརེ ཨཏྟཱ ནཱམ ཀོཙི བྷུཛནཀོ ནཏྠཱི’’ཏིཨཱདིནཱ ཝིཛཱནནཾ ཨཱབྷུཛནཾ.

ཨཊྛཱནེཏི མནུསྶཱམནུསྶཔརིགྒཧིཏེ ཨཡུཏྟེ ཋཱནེ ཁེཏྟདེཝཱཡཏནཱདིཀེ. ཏུམྦཏོ ཝེལུ༹ནཱལི༹ཨཱདིཨུདཀབྷཱཛནཏོ. ཏནྟི ཚཌྜིཏཾ ཨུདཀཾ.

གཏེཏི གམནེཏི པུབྦེ ཨབྷིཀྐམཔཊིཀྐམགྒཧཎེན གམནེཔི པུརཏོ པཙྪཏོ ཙ ཀཱཡསྶ ཨཏིཧརཎཾ ཝུཏྟནྟི ཨིདྷ གམནམེཝ གཧིཏནྟི ཝེདིཏབྦཾ, ཝཀྑམཱནོ ཝཱ ཨེཏེསཾ ཝིསེསོ.

ཨེཏྟཀེནཱཏི ཀམྨཊྛཱནཾ ཨཝིསྶཛྫེཏྭཱ ཙཏུནྣཾ ཨིརིཡཱཔཐཱནཾ པཝཏྟནཝཙནམཏྟེན གོཙརསམྤཛཉྙཾ ན པཱཀཊཾ ཧོཏཱིཏི ཨཏྠོ. ཨེཝཾ པན སུཏྟེ ཀམྨཊྛཱནཾ ཨཝིབྷཱུཏཾ ཧོཏཱིཏི ཙངྐམནཊྛཱནནིསཛྫཱསུ ཨེཝ པཝཏྟེ པརིགྒཎྷནྟསྶ སུཏྟེ པཝཏྟཱ ཨཔཱཀཊཱ ཧོནྟཱིཏི ཨཏྠོ.

ཀཱཡཱདིཀིརིཡཱམཡཏྟཱ ¶ ཨཱཝཛྫནཀིརིཡཱསམུཊྛིཏཏྟཱ ཙ ཛཝནཾ, སབྦམྤི ཝཱ ཚདྭཱརཔྤཝཏྟཾ ཀིརིཡཱམཡཔཝཏྟཾ ནཱམ, དུཏིཡཛ྄ཛྷཱནཾ ཝཙཱིསངྑཱརཝིརཧཱ ‘‘ཏུཎྷཱིབྷཱཝོ’’ཏི ཝུཙྩཏི.

༥༢༦. ཨུཔཱསནཊྛཱནནྟི ཨིསྶཱསཱནཾ ཝིཡ ཨུཔཱསནསྶ སིཀྑཱཡོགཀརཎསྶ ཀམྨཊྛཱནཨུཔཱསནསྶ ཋཱནནྟི ཨཏྠོ. ཏམེཝ ཧི ཨཏྠཾ དསྶེཏུཾ ‘‘ཡོགཔཐ’’ནྟི ཨཱཧཱཏི. སཱིསཾ དྷོཝཏཱིཏི ཨིཙྪཱདཱསབྱཱ བྷུཛིསྶཏཾ ཉཱཔཡཏི, མིཙྪཱཔཊིཔནྣེཧི ཝཱ པཀྑིཏྟཾ ཨཡསརཛཾ དྷོཝཏི.

༥༢༩. ཝིནཡཔརིཡཱཡེན ¶ ཨདིནྣཱདཱནཔཱརཱཛིཀེ ཨཱགཏཾ. སུཏྟནྟཔརིཡཱཡེན ཨཱརཉྙཀསིཀྑཱཔདེ ‘‘པཉྩདྷནུསཏིཀཾ པཙྪིམ’’ནྟི ཨཱགཏཾ ཨཱརཉྙིཀཾ བྷིཀྑུཾ སནྡྷཱཡ. ན ཧི སོ ཝིནཡཔརིཡཱཡིཀེ ཨརཉྙེ ཝསནཏོ ‘‘ཨཱརཉྙཀོ པནྟསེནཱསནོ’’ཏི སུཏྟེ ཝུཏྟོཏི.

༥༣༠. ‘‘ནིཏུམྦ’’ནྟིཔི ‘‘ནདཱིཀུཉྫ’’ནྟིཔི ཡཾ ཝདནྟི, ཏཾ ཀནྡརནྟི ཨཔབྦཏཔདེསེཔི ཝིདུགྒནདཱིནིཝཏྟནཔདེསཾ ཀནྡརནྟི དསྶེཏི.

༥༣༡. བྷཱཛེཏྭཱ དསྶིཏནྟི ཨེཏེན བྷཱཛེཏབྦཏཾ ཨནྟེ ནིདྡེསསྶ ཀཱརཎཾ དསྶེཏི.

༥༣༣. རཧསྶ ཀིརིཡཱ རཧསྶཾ, ཏཾ ཨརཧཏི ཏསྶ ཡོགྒནྟི རཱཧསྶེཡྻཀཾ. ཝིཙིཏྟཱ ཧི ཏདྡྷིཏཱཏི. རཧསི ཝཱ སཱདྷུ རཧསྶཾ, ཏསྶ ཡོགྒཾ རཱཧསྶེཡྻཀཾ.

༥༣༦. པཎིཧིཏོཏི སུཊྛུ ཋཔིཏོ.

༥༣༧. པརིགྒཧིཏནིཡྻཱནནྟི པརིགྒཧིཏནིཡྻཱནསབྷཱཝཾ, ཀཱཡཱདཱིསུ སུཊྛུ པཝཏྟིཡཱ ནིཡྻཱནསབྷཱཝཡུཏྟནྟི ཨཏྠོ. ཀཱཡཱདིཔརིགྒཧཎཾ ཉཱཎཾ ཝཱ པརིགྒཧོ, ཏཾ-སམྤཡུཏྟཏཱཡ པརིགྒཧིཏཾ ནིཡྻཱནབྷཱུཏཾ ཨུཔཊྛཱནཾ ཀཏྭཱཏི ཨཏྠོ.

༥༤༢-༥༤༣. ཝིཀཱརཔྤཏྟིཡཱཏི ཙིཏྟསྶ ཝིཀཱརཱཔཏྟིབྷཱཝེནཱཏི ཨཏྠོ. སབྦསངྒཱཧིཀཝསེནཱཏི སཏྟསངྑཱརགཏསབྦཀོདྷསངྒཱཧིཀཝསེན. སབྦསངྒཧཎཉྩ སམུཙྪེདཔྤཧཱནསྶཔི ཨདྷིཔྤེཏཏྟཱ ཀཏནྟི ཝེདིཏབྦཾ.

༥༤༦. ཨིདཾ ¶ སནྡྷཱཡཱཏི ‘‘དྭེ དྷམྨཱ’’ཏི སནྡྷཱཡ. ཨེཀཝཙནེན ‘‘ཐིནམིདྡྷ’’ནྟི ཨུདྡིསིཏྭཱཔི ནིདྡེསེ ‘‘སནྟཱ’’ཏི ཝཙནབྷེདོ, བཧུཝཙནཾ ཀཏནྟི ཨཏྠོ. ནིརོདྷསནྟཏཱཡཱཏི ཝཙནཾ ཨངྒསནྟཏཱཡ, སབྷཱཝསནྟཏཱཡ ཝཱ སནྟཏཱནིཝཱརཎཏྠཾ.

༥༥༠. ཐིནམིདྡྷཝིཀཱརཝིརཧཱ ཏཔྤཊིཔཀྑསཉྙཱ ཨཱལོཀསཉྙཱ ནཱམ ཧོཏི. ཏེནེཝ ཝུཏྟཾ ‘‘ཨཡཾ སཉྙཱ ཨཱལོཀཱ ཧོཏཱི’’ཏི.

༥༥༣. ‘‘ཝནྟཏྟཱ མུཏྟཏྟཱ’’ཏིཨཱདཱིནི, ‘‘ཨཱལོཀཱ ཧོཏཱི’’ཏིཨཱདཱིནི ཙ ‘‘ཙཏྟཏྟཱཏིཨཱདཱིནཱི’’ཏི ཝུཏྟཱནི. ཨཱདི-སདྡེན ཝཱ དྭིནྣམྤི ནིདྡེསཔདཱནི ¶ སངྒཧེཏྭཱ ཏཏྠ ཡཱནི ཡེསཾ ཝེཝཙནཱནི, ཏཱནེཝ སནྡྷཱཡ ‘‘ཨཉྙམཉྙཝེཝཙནཱནཱི’’ཏི ཝུཏྟནྟི དཊྛབྦཾ. པཊིམུཉྩཏོཏི ཨེཏེན སཱརམྦྷཾ ཨབྷིབྷཝཾ དསྶེཏི. ནིརཱཝརཎཱ ཧུཏྭཱ ཨཱབྷུཛཏི སམྤཛཱནཱཏཱིཏི ནིརཱཝརཎཱབྷོགཱ, ཏཾསབྷཱཝཏྟཱ ཝིཝཊཱ.

༥༥༦. ‘‘ཝིཀཱལོ ནུ ཁོ, ན ནུ ཁོ’’ཏི ཨནིཙྪཡཏཱཡ ཀཏཝཏྠུཛ྄ཛྷཱཙཱརམཱུལཀོ ཝིཔྤཊིསཱརོ ཝཏྠུཛ྄ཛྷཱཙཱརོ ཀཱརཎཝོཧཱརེན ཝུཏྟོཏི དཊྛབྦོ.

༥༦༢. ཀིལིསྶནྟཱིཏི ཀིལེསེནྟཱིཏི ཨཏྠཾ ཝདནྟི, སདརཐབྷཱཝེན སཡམེཝ ཝཱ ཀིལིསྶནྟི. ན ཧི ཏེ ཨུཔྤཛྫམཱནཱ ཀིལེསརཧིཏཱ ཨུཔྤཛྫནྟཱིཏི.

༥༦༤. ཨིདྷེཝ ཙ ཝིབྷངྒེ ‘‘ཨུཔེཏོ ཧོཏཱི’’ཏིཨཱདི ཏཏྠ ཏཏྠ ཝུཏྟམེཝ.

༥༨༨. ནིདྡེསཝསེནཱཏི ‘‘ཏཏྠ ཀཏམཱ ཨུཔེཀྑཱ? ཡཱ ཨུཔེཀྑཱ’’ཏིཨཱདིནིདྡེསཝསེན. ‘‘ཨིམཱཡ ཨུཔེཀྑཱཡ ཨུཔེཏོ ཧོཏཱི’’ཏིཨཱདི པཊིནིདྡེསཝསེནཱཏི ཝདནྟི. ‘‘ཏཏྠ ཀཏམཱ…པེ… ཨིམཱཡ ཨུཔེཀྑཱཡ ཨུཔེཏོ ཧོཏཱི’’ཏི ཨེཏེན པུགྒལོ ནིདྡིཊྛོ ཧོཏི, ‘‘སམུཔེཏོ’’ཏིཨཱདིནཱ པཊིནིདྡིཊྛོ. ཡཱཝ ཝཱ ‘‘སམནྣཱགཏོ’’ཏི པདཾ, ཏཱཝ ནིདྡིཊྛོ, ‘‘ཏེན ཝུཙྩཏི ཨུཔེཀྑཀོ’’ཏི ཨིམིནཱ པཊིནིདྡིཊྛོཏི ཏེསཾ ཝསེན ནིདྡེསཔཊིནིདྡེསཱ ཡོཛེཏབྦཱ. པཀཱརེནཱཏི ཨུཔེཀྑཱཡ ‘‘ཨུཔེཀྑནཱ’’ཏིཨཱདིདྷམྨཔྤཀཱརེན ‘‘ཨུཔེཏོ སམུཔེཏོ’’ཏིཨཱདིཔུགྒལཔྤཀཱརེན ཙ ཨུཔེཀྑཀསདྡསྶ ཨཏྠཾ ཋཔེནྟོ པཊྛཔེནྟི. ‘‘ཨུཔེཀྑཱ’’ཏི ཨེཏསྶ ཨཏྠསྶ ‘‘ཨུཔེཀྑནཱ’’ཏི ཀཱརཎཾ. ཨུཔེཀྑནཱཝསེན ¶ ཧི ཨུཔེཀྑཱཏི. ཏཐཱ ‘‘ཨུཔེཏོ སམུཔེཏོ’’ཏི ཨེཏེསཾ ‘‘ཨུཔཱགཏོ སམུཔཱགཏོ’’ཏི ཀཱརཎནྟི ཨེཝཾ དྷམྨཔུགྒལཝསེན ཏསྶ ཏསྶཏྠསྶ ཀཱརཎཾ དསྶེནྟཱ ཝིཝརནྟི, ‘‘ཨུཔེཀྑཀོ’’ཏི ཨིམསྶེཝ ཝཱ ཨཏྠསྶ ‘‘ཨིམཱཡ ཨུཔེཀྑཱཡ ཨུཔེཏོ ཧོཏཱི’’ཏིཨཱདིནཱ ཀཱརཎཾ དསྶེནྟཱ. ‘‘ཨུཔེཀྑནཱ ཨཛ྄ཛྷུཔེཀྑནཱ སམུཔེཏོ’’ཏིཨཱདིནཱ བྱཉྫནཱནཾ ཝིབྷཱགཾ དསྶེནྟཱ ཝིབྷཛནྟི. ཨུཔེཀྑཀ-སདྡནྟོགདྷཱཡ ཝཱ ཨུཔེཀྑཱཡ ཏསྶེཝ ཙ ཨུཔེཀྑཀ-སདྡསྶ ཝིསུཾ ཨཏྠཝཙནཾ ‘‘ཡཱ ཨུཔེཀྑཱ ཨུཔེཀྑནཱ’’ཏིཨཱདིནཱ, ‘‘ཨིམཱཡ ཨུཔེཀྑཱཡ ཨུཔེཏོ ཧོཏཱི’’ཏིཨཱདིནཱ ཙ ¶ བྱཉྫནཝིབྷཱགོ. སབྦཐཱ ཨཉྙཱཏཏཱ ནིཀུཛ྄ཛྷིཏབྷཱཝོ, ཀེནཙི པཀཱརེན ཝིཉྙཱཏེཔི ནིརཝསེསཔརིཙྪིནྡནཱབྷཱཝོ གམྦྷཱིརབྷཱཝོ.

༦༠༢. ཨུཔརིབྷཱུམིཔྤཏྟིཡཱཏི ཨིདཾ ‘‘རཱུཔསཉྙཱནཾ སམཏིཀྐམཱ’’ཏི ཨེཏྠེཝ ཡོཛེཏབྦཾ. ཝིཉྙཱཎཉྩཱཡཏནཱདཱིནིཔི ཝཱ ཨཱཀཱསཱནཉྩཱཡཏནཱདཱིནཾ ཨུཔརིབྷཱུམིཡོཏི སབྦཏྠཱཔི ན ན ཡུཛྫཏི.

༦༡༠. ཝིཉྙཱཎཉྩཱཡཏནནིདྡེསེ ‘‘ཨནནྟཾ ཝིཉྙཱཎནྟི ཏཾཡེཝ ཨཱཀཱསཾ ཝིཉྙཱཎེན ཕུཊཾ མནསི ཀརོཏི ཨནནྟཾ ཕརཏི, ཏེན ཝུཙྩཏི ཨནནྟཾ ཝིཉྙཱཎ’’ནྟི ཨེཏྠ ཝིཉྙཱཎེནཱཏི ཨེཏཾ ཨུཔཡོགཏྠེ ཀརཎཝཙནཾ, ཏཾཡེཝ ཨཱཀཱསཾ ཕུཊཾ ཝིཉྙཱཎཾ མནསི ཀརོཏཱིཏི ཀིར ཨཊྛཀཐཱཡཾ ཝུཏྟཾ. ཨཡཾ ཝཱ ཨེཏསྶ ཨཏྠོ – ཏཾཡེཝ ཨཱཀཱསཾ ཕུཊཾ ཝིཉྙཱཎཾ ཝིཉྙཱཎཉྩཱཡཏནཝིཉྙཱཎེན མནསི ཀརོཏཱིཏི. ཨཡཾ པནཏྠོ ཡུཏྟོ – ཏཾཡེཝ ཨཱཀཱསཾ ཝིཉྙཱཎེན ཕུཊཾ ཏེན གཧིཏཱཀཱརཾ མནསི ཀརོཏི, ཨེཝཾ ཏཾ ཝིཉྙཱཎཾ ཨནནྟཾ ཕརཏཱིཏི. ཡཉྷི ཨཱཀཱསཾ པཋམཱརུཔྤསམངྒཱི ཝིཉྙཱཎེན ཨནནྟཾ ཕརཏི, ཏཾ ཕརཎཱཀཱརསཧིཏམེཝ ཝིཉྙཱཎཾ མནསིཀརོནྟོ དུཏིཡཱརུཔྤསམངྒཱི ཨནནྟཾ ཕརཏཱིཏི ཝུཙྩཏཱིཏི.

༦༡༥. ཏཾཡེཝ ཝིཉྙཱཎཾ ཨབྷཱཝེཏཱིཏི ཡཾ པུབྦེ ‘‘ཨནནྟཾ ཝིཉྙཱཎ’’ནྟི མནསི ཀཏཾ, ཏཾཡེཝཱཏི ཨཏྠོ. ཏསྶེཝ ཧི ཨཱརམྨཎབྷཱུཏཾ པཋམེན ཝིཡ རཱུཔནིམིཏྟཾ ཏཏིཡེནཱརུཔྤེན ཨབྷཱཝེཏཱིཏི.

ནིདྡེསཝཎྞནཱ ནིཊྛིཏཱ.

སུཏྟནྟབྷཱཛནཱིཡཝཎྞནཱ ནིཊྛིཏཱ.

༢. ཨབྷིདྷམྨབྷཱཛནཱིཡཝཎྞནཱ

༦༢༣. ཨབྷིདྷམྨབྷཱཛནཱིཡེ ¶ པཉྩཀནཡདསྶནེ ‘‘པཉྩ ཛྷཱནཱནཱི’’ཏི ཙ, ‘‘ཏཏྠ ཀཏམཾ པཋམཾ ཛྷཱན’’ནྟི ཙ ཨཱདིནཱ ཨུདྡྷཊཾ. ཨུདྡྷཊཱནཾཡེཝ ཙཏུནྣཾ པཋམཏཏིཡཙཏུཏྠཔཉྩམཛ྄ཛྷཱནཱནཾ དསྶནཏོ, དུཏིཡསྶེཝ ཝིསེསདསྶནཏོ ཙ.

ཨབྷིདྷམྨབྷཱཛནཱིཡཝཎྞནཱ ནིཊྛིཏཱ.

༣. པཉྷཔུཙྪཀཝཎྞནཱ

༦༤༠. ལོཀུཏྟརཱཔནེཏྠཱཏི ¶ ཨེཏེསུ ཏཱིསུཛྷཱནེསུ ‘‘ལོཀུཏྟརཱ སིཡཱ ཨཔྤམཱཎཱརམྨཎཱ’’ཏི ཨེཝཾ ཀོཊྛཱསིཀཱ པན མགྒཀཱལེ, ཕལཀཱལེ ཝཱ ལོཀུཏྟརབྷཱུཏཱ ཨེཝཱཏི ཨདྷིཔྤཱཡོ. པརིཙྪིནྣཱཀཱསཀསིཎཱལོཀཀསིཎཱནཱཔཱནབྲཧྨཝིཧཱརཙཏུཏྠཱནི སབྦཏྠཔཱདཀཙཏུཏྠེ སངྒཧིཏཱནཱིཏི དཊྛབྦཱནི.

བུདྡྷཔཙྩེཀབུདྡྷཁཱིཎཱསཝཱ མགྒཾ བྷཱཝཡིཾསུ, ཕལཾ སཙྪིཀརིཾསཱུཏི, བྷཱཝེསྶནྟི སཙྪིཀརིསྶནྟཱིཏི ཙ ཧེཊྛིམམགྒཕལཱནཾ ཝསེན ཝུཏྟནྟི ཝེདིཏབྦཾ. ཀུསལཏོ ཏེརསསུ ཧི ཙཏུཏྠེསུ ཨཡཾ ཀཐཱ པཝཏྟཱ, ན ཙ ཀུསལཙཏུཏྠེན ཨརཧཏྟམགྒཕལཱནི དཊྛུཾ སཀྐོཏི.

‘‘ཀིརིཡཏོ ཏེརསནྣ’’ནྟི ཨེཏྠ ལོཀུཏྟརཙཏུཏྠཾ ཀིརིཡཾ ནཏྠཱིཏི ‘‘དྭཱདསནྣ’’ནྟི ཝཏྟབྦཾ, ཀུསལཏོ ཝཱ ཏེརསསུ སེཀྑཕལཙཏུཏྠཾ ཨནྟོགདྷཾ ཀཏྭཱ ‘‘ཀིརིཡཏོ ཏེརསནྣ’’ནྟི ཨསེཀྑཙཏུཏྠེན སཧ ཝདཏཱིཏི ཝེདིཏབྦཾ. སབྦཏྠཔཱདཀཉྩེཏྠ ཁཱིཎཱསཝཱནཾ ཡཱནི ཨབྷིཉྙཱདཱིནི སནྟི, ཏེསཾ སབྦེསཾ པཱདཀཏྟཱ སབྦཏྠཔཱདཀནྟི དཊྛབྦཾ. ན ཧི ཏེསཾ ཝཊྚཾ ཨཏྠཱིཏི. པརིཙྪནྣཱཀཱསཀསིཎཙཏུཏྠཱདཱིནི ཝིཡ ཝཱ ནཝཏྟབྦཏཱཡ སབྦཏྠཔཱདཀསམཱནཏྟཱ སབྦཏྠཔཱདཀཏཱ དཊྛབྦཱ.

མནོསངྑཱརཱ ¶ ནཱམ སཉྙཱཝེདནཱ, ཙཏྟཱརོཔི ཝཱ ཁནྡྷཱ. ནིམིཏྟཾ ཨཱརབྦྷཱཏི ཨེཏྠ ‘‘ནིམིཏྟཾ ནིབྦཱནཉྩཱ’’ཏི ཝཏྟབྦཾ.

‘‘ཨཛ྄ཛྷཏྟོ དྷམྨོ ཨཛ྄ཛྷཏྟསྶ དྷམྨསྶ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༢༠.༢༨) ཨེཏྠ ‘‘ཨཛ྄ཛྷཏྟཱ ཁནྡྷཱ ཨིདྡྷིཝིདྷཉཱཎསྶ པུབྦེནིཝཱསཱནུསྶཏིཉཱཎསྶ ཡཐཱཀམྨཱུཔགཉཱཎསྶ ཨནཱགཏཾསཉཱཎསྶ ཨཱཝཛྫནཱཡ ཨཱརམྨཎཔཙྩཡེན པཙྩཡོ’’ཏི ཝུཏྟཏྟཱ ན ཙེཏོཔརིཡཉཱཎཾ ཝིཡ ཡཐཱཀམྨཱུཔགཉཱཎཾ པརསནྟཱནགཏམེཝ ཛཱནཱཏི, སསནྟཱནགཏམྤི པན ཨཔཱཀཊཾ རཱུཔཾ དིབྦཙཀྑུ ཝིཡ ཨཔཱཀཊཾ ཀམྨཾ ཝིབྷཱཝེཏི. ཏེནཱཧ ‘‘ཨཏྟནོ ཀམྨཛཱནནཀཱལེ’’ཏི.

པཉྷཔུཙྪཀཝཎྞནཱ ནིཊྛིཏཱ.

ཛྷཱནཝིབྷངྒཝཎྞནཱ ནིཊྛིཏཱ.

༡༣. ཨཔྤམཉྙཱཝིབྷངྒོ

༡. སུཏྟནྟབྷཱཛནཱིཡཝཎྞནཱ

༦༤༢. སབྦདྷཱིཏི ¶ ¶ དིསཱདེསོདྷིནཱ ཨནོདྷིསོཕརཎཾ ཝུཏྟཾ, སབྦཏྟཏཱཡ སབྦཱཝནྟནྟི སཏྟོདྷིནཱ. ཏེནཱཧ ‘‘ཨནོདྷིསོ དསྶནཏྠ’’ནྟི. ཏཐཱ-སདྡོ ཨིཏི-སདྡོ ཝཱ ན ཝུཏྟོཏི ‘‘མེཏྟཱསཧགཏེན ཙེཏསཱ’’ཏི ཨེཏསྶ ཨནུཝཏྟཀཾ ཏཾ དྭཡཾ ཏསྶ ཕརཎནྟརཱདིཊྛཱནཾ ཨཊྛཱནནྟི ཀཏྭཱ ན ཝུཏྟཾ, པུན ‘‘མེཏྟཱསཧགཏེན ཙེཏསཱ’’ཏི ཝུཏྟནྟི ཨཏྠོ.

༦༤༣. ཧིརོཏྟཔྤཱནུཔཱལིཏཱ མེཏྟཱ ན པརིཧཱཡཏི ཨཱསནྣསཔཏྟསྶ རཱགསྶ སིནེཧསྶ ཙ ཝིཔཏྟིཡཱ ཨནུཔྤཏྟིཏོཏི ཨདྷིཔྤཱཡོ.

༦༤༥. ཨདྷིམུཉྩིཏྭཱཏི སུཊྛུ པསཱརེཏྭཱཏི ཨཏྠོ. ཏཾ དསྶེནྟོ ‘‘ཨདྷིཀབྷཱཝེནཱ’’ཏིཨཱདིམཱཧ, བལཝཏཱ ཝཱ ཨདྷིམོཀྑེན ཨདྷིམུཙྩིཏྭཱ.

༦༤༨. ཧེཊྛཱ ཝུཏྟོཡེཝཱཏི ‘‘སབྦེན སབྦཾ སབྦཐཱ སབྦ’’ནྟི ཨེཏེསཾ ‘‘སབྦེན སིཀྑཱསམཱདཱནེན སབྦཾ སིཀྑཾ, སབྦེན སིཀྑིཏབྦཱཀཱརེན སབྦཾ སིཀྑ’’ནྟི ཙ ཛྷཱནཝིབྷངྒེ (ཝིབྷ. ཨཊྛ. ༥༡༦) ཨཏྠོ ཝུཏྟོ. ཨིདྷ པན སབྦེན ཨཝདྷིནཱ ཨཏྟསམཏཱཡ སབྦསཏྟཡུཏྟཏཱཡ ཙ སབྦཾ ལོཀཾ, སབྦཱཝདྷིདིསཱདིཕརཎཱཀཱརེཧི སབྦཾ ལོཀནྟི ཙ ཨཏྠོ ཡུཛྫཏི.

༦༥༠. པཙྩཏྠིཀཝིགྷཱཏཝསེནཱཏི མེཏྟཱདཱིནཾ ཨཱསནྣདཱུརཔཙྩཏྠིཀཱནཾ རཱགབྱཱཔཱདཱདཱིནཾ ཝིགྷཱཏཝསེན. ཡཾ ཨཔྤམཱཎཾ, སོ ཨཝེརོཏི སོ ཨཝེརབྷཱཝོཏི ཨཡཾ ཝཱ ཏསྶ ཨཏྠོཏི.

༦༥༣. ནིརཡཱདི ¶ གཏི, ཙཎྜཱལཱདི ཀུལཾ, ཨནྣཱདཱིནཾ ཨལཱབྷིཏཱ བྷོགོ. ཨཱདི-སདྡེན དུབྦཎྞཏཱདི གཧིཏཾ.

སུཏྟནྟབྷཱཛནཱིཡཝཎྞནཱ ནིཊྛིཏཱ.

༣. པཉྷཔུཙྪཀཝཎྞནཱ

༦༩༩. ཨིམསྨིཾ ¶ པན…པེ… ཀཐིཏཱཏི ཨིམིནཱ ཨིམསྨིཾ ཝིབྷངྒེ ཀཐིཏཱནཾ ལོཀིཡབྷཱཝམེཝ དསྶེནྟོ ཁནྡྷཝིབྷངྒཱདཱིཧི ཝིསེསེཏཱིཏི ན ཨཉྙཏྠ ལོཀུཏྟརཱནཾ ཨཔྤམཉྙཱནཾ ཀཐིཏཏཱ ཨནུཉྙཱཏཱ ཧོཏི.

པཉྷཔུཙྪཀཝཎྞནཱ ནིཊྛིཏཱ.

ཨཔྤམཉྙཱཝིབྷངྒཝཎྞནཱ ནིཊྛིཏཱ.

༡༤. སིཀྑཱཔདཝིབྷངྒོ

༡. ཨབྷིདྷམྨབྷཱཛནཱིཡཝཎྞནཱ

༧༠༣. པཏིཊྛཱནཊྛེནཱཏི ¶ ¶ སམྤཡོགཝསེན ཨུཔནིསྶཡཝསེན ཙ ཨོཀཱསབྷཱཝེན. པིཊྛཔཱུཝཨོདནཀིཎྞནཱནཱསམྦྷཱརེ པཀྑིཔིཏྭཱ མདྡིཏྭཱ ཀཏཱ སུརཱ ནཱམ. མདྷུཀཱདིཔུཔྥཔནསཱདིཕལཨུཙྪུམུདྡིཀཱདིནཱནཱསམྦྷཱརཱནཾ རསཱ ཙིརཔརིཝཱསིཏཱ མེརཡཾ ནཱམ, ཨཱསཝོཏི ཨཏྠོ.

༧༠༤. ཏཾསམྤཡུཏྟཏྟཱཏི ཝིརཏིསམྤཡུཏྟཏྟཱ, ཝིརཏིཙེཏནཱསམྤཡུཏྟཏྟཱ ཝཱ.

ཀམྨཔཐཱ ཨེཝཱཏི ཨསབྦསཱདྷཱརཎེསུ ཛྷཱནཱདིཀོཊྛཱསེསུ ཀམྨཔཐཀོཊྛཱསིཀཱ ཨེཝཱཏི ཨཏྠོ. སུརཱཔཱནམྤི ‘‘སུརཱཔཱནཾ, བྷིཀྑཝེ, ཨཱསེཝིཏཾ…པེ… ནིརཡསཾཝཏྟནིཀ’’ནྟི (ཨ. ནི. ༨.༤༠) ཝིསུཾ ཀམྨཔཐབྷཱཝེན ཨཱགཏནྟི ཝདནྟི. ཨེཝཾ སཏི ཨེཀཱདས ཀམྨཔཐཱ སིཡུཾ, ཏསྨཱསྶ ཡཐཱཝུཏྟེསྭེཝ ཀམྨཔཐེསུ ཨུཔཀཱརཀཏྟསབྷཱགཏྟཝསེན ཨནུཔཝེསོ དཊྛབྦོ.

སཏྟཨིཏྠིཔུརིསཱརམྨཎཏཱ ཏཐཱགཧིཏསངྑཱརཱརམྨཎཏཱཡ དཊྛབྦཱ. ‘‘པཉྩ སིཀྑཱཔདཱ པརིཏྟཱརམྨཎཱ’’ཏི ཧི ཝུཏྟཾ. ‘‘སབྦཱཔི ཧི ཨེཏཱ ཝཱིཏིཀྐམིཏབྦཝཏྠུཾ ཨཱརམྨཎཾ ཀཏྭཱ ཝེརཙེཏནཱཧི ཨེཝ ཝིརམནྟཱི’’ཏི (ཝིབྷ. ཨཊྛ. ༧༠༤) ཙ ཝཀྑཏཱིཏི.

གོརཱུཔསཱིལཀོ པཀཏིབྷདྡོ. ཀཱཀཎིཀམཏྟསྶ ཨཏྠཱཡཱཏིཨཱདི ལོབྷཝསེན མུསཱཀཐནེ ཝུཏྟཾ. དོསཝསེན མུསཱཀཐནེ ཙ ནིཊྛཔྤཏྟོ སངྒྷབྷེདོ གཧིཏོ. དོསཝསེན པརསྶ བྱསནཏྠཱཡ མུསཱཀཐནེ པན ཏསྶ ཏསྶ གུཎཝསེན ཨཔྤསཱཝཛྫམཧཱསཱཝཛྫཏཱ ཡོཛེཏབྦཱ, མནྡཱདྷིམཏྟབྱསནིཙྪཱཝསེན ¶ ཙ. ནིསྶགྒིཡཐཱཝརཝིཛྫཱམཡིདྡྷིམཡཱ སཱཧཏྠིཀཱཎཏྟིཀེསྭེཝ པཝིསནྟཱིཏི དྭེ ཨེཝ གཧིཏཱ.

པཉྩཔི ཀམྨཔཐཱ ཨེཝཱཏི ཙེཏནཱསངྑཱཏཾ པརིཡཱཡསཱིལཾ སནྡྷཱཡ ཝུཏྟཾ, ཝིརཏིསཱིལཾ པན མགྒཀོཊྛཱསིཀནྟི. ཏེསཾ པནཱཏི སེསསཱིལཱནཾ.

༧༡༢. ‘‘ཀོཊྛཱསབྷཱཝེནཱ’’ཏི ཝུཏྟཾ, ‘‘པཏིཊྛཱནབྷཱཝེནཱ’’ཏི པན ཝཏྟབྦཾ. ཨེཏྠ པན སིཀྑཱཔདཝཱརེ པཧཱིནཔཉྩཱབྷབྦཊྛཱནསྶ ཨརཧཏོ ཝིརམིཏབྦཝེརསྶ ¶ སབྦཐཱ ཨབྷཱཝཱ ཀིརིཡེསུ ཝིརཏིཡོ ན སནྟཱིཏི ན ཨུདྡྷཊཱ, སེཀྑཱནཾ པན པཧཱིནཔཉྩཝེརཏྟེཔི ཏཾསབྷཱགཏཱཡ ཝེརབྷཱུཏཱནཾ ཨཀུསལཱནཾ ཝེརནིདཱནཱནཾ ལོབྷཱདཱིནཉྩ སབྦྷཱཝཱ ཝིརཏཱིནཾ ཨུཔྤཏྟི ན ན བྷཝིསྶཏི. ཨཀུསལསམུཊྛིཏཱནི ཙ ཀཱཡཀམྨཱདཱིནི ཏེསཾ ཀཱཡདུཙྩརིཏཱདཱིནི ཝེརཱནེཝ, ཏེཧི ཙ ཏེསཾ ཝིརཏིཡོ ཧོནྟེཝ, ཡཏོ ནཕལབྷཱུཏསྶཔི ཨུཔརིམགྒཏྟཡསྶ ཨཊྛངྒིཀཏཱ ཧོཏི. སིཀྑཱཝཱརེ ཙ ཨབྷཱཝེཏབྦཏཱཡ ཕལདྷམྨཱཔི ན སིཀྑིཏབྦཱ, ནཱཔི སིཀྑིཏསིཀྑསྶ ཨུཔྤཛྫམཱནཱ ཀིརིཡདྷམྨཱཏི ན ཀེཙི ཨབྱཱཀཏཱ སིཀྑཱཏི ཨུདྡྷཊཱ.

ཨབྷིདྷམྨབྷཱཛནཱིཡཝཎྞནཱ ནིཊྛིཏཱ.

༢. པཉྷཔུཙྪཀཝཎྞནཱ

༧༡༤. སམྤཏྟཝིརཏིཝསེནཱཏི སམྤཏྟེ པཙྩུཔྤནྣེ ཨཱརམྨཎེ ཡཐཱཝིརམིཏབྦཏོ ཝིརཏིཝསེནཱཏི ཨཏྠོ.

པཉྷཔུཙྪཀཝཎྞནཱ ནིཊྛིཏཱ.

སིཀྑཱཔདཝིབྷངྒཝཎྞནཱ ནིཊྛིཏཱ.

༡༥. པཊིསམྦྷིདཱཝིབྷངྒོ

༡. སུཏྟནྟབྷཱཛནཱིཡཾ

༡. སངྒཧཝཱརཝཎྞནཱ

༧༡༨. ཨེསེཝ ¶ ¶ ནཡོཏི སངྑེཔེན དསྶེཏྭཱ ཏམེཝ ནཡཾ ཝིཏྠཱརཏོ དསྶེཏུཾ ‘‘དྷམྨཔྤབྷེདསྶ ཧཱི’’ཏིཨཱདིམཱཧ. ནིརུཏྟིཔཊིབྷཱནཔྤབྷེདཱ ཏབྦིསཡཱནཾ ཨཏྠཱདཱིནཾ པཙྩཡུཔྤནྣཱདིབྷེདེཧི བྷིནྡིཏྭཱ ཝེདིཏབྦཱ.

‘‘ཡཾ ཀིཉྩི པཙྩཡསམུཔྤནྣ’’ནྟི ཨེཏེན སཙྩཧེཏུདྷམྨཔཙྩཡཱཀཱརཝཱརེསུ ཨཱགཏཱནི དུཀྑཱདཱིནི གཧིཏཱནི. སཙྩཔཙྩཡཱཀཱརཝཱརེསུ ནིབྦཱནཾ, པརིཡཏྟིཝཱརེ བྷཱསིཏཏྠོ, ཨབྷིདྷམྨབྷཱཛནཱིཡེ ཝིཔཱཀོ ཀིརིཡཉྩཱཏི ཨེཝཾ པཱལི༹ཡཾ ཝུཏྟཱནམེཝ ཝསེན པཉྩ ཨཏྠཱ ཝེདིཏབྦཱ, ཏཐཱ དྷམྨཱ ཙ.

ཝིདཧཏཱིཏི ནིབྦཏྟཀཧེཏུཨཱདཱིནཾ སཱདྷཱརཎཾ ནིབྦཙནཾ, ཏདཏྠཾ པན ཝིབྷཱཝེཏུམཱཧ ‘‘པཝཏྟེཏི ཙེཝ པཱཔེཏི ཙཱ’’ཏི. ཏེསུ པུརིམོ ཨཏྠོ མགྒཝཛྫེསུ དཊྛབྦོ. བྷཱསིཏམྤི ཧི ཨཝབོདྷནཝསེན ཨཏྠཾ པཝཏྟེཏཱིཏི. མགྒོ པན ནིབྦཱནཾ པཱཔེཏཱིཏི ཏསྨིཾ པཙྪིམོ.

དྷམྨནིརུཏྟཱབྷིལཱཔེཏི ཨེཏྠ དྷམྨ-སདྡོ སབྷཱཝཝཱཙཀོཏི ཀཏྭཱ ཨཱཧ ‘‘ཡཱ སབྷཱཝནིརུཏྟཱི’’ཏི, ཨཝིཔརཱིཏནིརུཏྟཱིཏི ཨཏྠོ. ཏསྶཱ ཨབྷིལཱཔེཏི ཏསྶཱ ནིརུཏྟིཡཱ ཨཝཙནབྷཱུཏཱཡ པཉྙཏྟིཡཱ ཨབྷིལཱཔེཏི ཀེཙི ཝཎྞཡནྟི. ཨེཝཾ སཏི པཉྙཏྟི ཨབྷིལཔིཏབྦཱ ¶ , ན ཝཙནནྟི ཨཱཔཛྫཏི, ན ཙ ཝཙནཏོ ཨཉྙཾ ཨབྷིལཔིཏབྦཾ ཨུཙྩཱརེཏབྦཾ ཨཏྠི, ཨཐཱཔི ཕསྶཱདིཝཙནེཧི བོདྷེཏབྦཾ ཨབྷིལཔིཏབྦཾ སིཡཱ, ཨེཝཾ སཏི ཨཏྠདྷམྨཝཛྫཾ ཏེཧི བོདྷེཏབྦཾ ན ཝིཛྫཏཱིཏི ཏེསཾ ནིརུཏྟིབྷཱཝོ ཨཱཔཛྫཏི. ‘‘ཕསྶོཏི ཙ སབྷཱཝནིརུཏྟི, ཕསྶཾ ཕསྶཱཏི ན སབྷཱཝནིརུཏྟཱི’’ཏི དསྶིཏོཝཱཡམཏྠོ, ན ཙ ཨཝཙནཾ ཨེཝཾཔཀཱརཾ ཨཏྠི, ཏསྨཱ ཝཙནབྷཱུཏཱཡ ཨེཝ ཏསྶཱ སབྷཱཝནིརུཏྟིཡཱ ཨབྷིལཱཔེ ཨུཙྩཱརཎེཏི ཨཏྠོ དཊྛབྦོ.

ཏཾ སབྷཱཝནིརུཏྟིཾ སདྡཾ ཨཱརམྨཎཾ ཀཏྭཱ པཙྩཝེཀྑནྟསྶ ཏསྨིཾ སབྷཱཝནིརུཏྟཱབྷིལཱཔེ པབྷེདགཏཾ ཉཱཎཾ ནིརུཏྟིཔཊིསམྦྷིདཱཏི ཝུཏྟཏྟཱ ནིརུཏྟིསདྡཱརམྨཎཱཡ སོཏཝིཉྙཱཎཝཱིཐིཡཱ པརཏོ མནོདྭཱརེ ནིརུཏྟིཔཊིསམྦྷིདཱ ¶ པཝཏྟཏཱིཏི ཝདནྟི. ‘‘ནིརུཏྟིཔཊིསམྦྷིདཱ པཙྩུཔྤནྣཱརམྨཎཱ’’ཏི ཙ ཝཙནཾ སདྡཾ གཧེཏྭཱ པཙྪཱ ཛཱནནཾ སནྡྷཱཡ ཝུཏྟནྟི. ཨེཝཾ པན ཨཉྙསྨིཾ པཙྩུཔྤནྣཱརམྨཎེ ཨཉྙཾ པཙྩུཔྤནྣཱརམྨཎནྟི ཝུཏྟནྟི ཨཱཔཛྫཏི. ཡཐཱ པན དིབྦསོཏཉཱཎཾ མནུསྶཱམནུསྶཱདིསདྡཔྤབྷེདནིཙྪཡསྶ པཙྩཡབྷཱུཏཾ ཏཾ ཏཾ སདྡཝིབྷཱཝཀཾ, ཨེཝཾ སབྷཱཝཱསབྷཱཝནིརུཏྟིནིཙྪཡསྶ པཙྩཡབྷཱུཏཾ པཙྩུཔྤནྣསབྷཱཝནིརུཏྟིསདྡཱརམྨཎཾ ཏཾཝིབྷཱཝཀཉཱཎཾ ནིརུཏྟིཔཊིསམྦྷིདཱཏི ཝུཙྩམཱནེ ན པཱལི༹ཝིརོདྷོ ཧོཏི. ཏཾ སབྷཱཝནིརུཏྟིཾ སདྡཾ ཨཱརམྨཎཾ ཀཏྭཱ པཙྩཝེཀྑནྟསྶཱཏི ཙ པཙྩུཔྤནྣསདྡཱརམྨཎཾ པཙྩཝེཀྑཎཾ པཝཏྟཡནྟསྶཱཏི ན ན སཀྐཱ ཝཏྟུཾ. ཏམྤི ཧི ཉཱཎཾ སབྷཱཝནིརུཏྟིཾ ཝིབྷཱཝེནྟཾཡེཝ ཏཾཏཾསདྡཔཙྩཝེཀྑཎཱནནྟརཾ ཏཾཏཾཔབྷེདནིཙྪཡཧེཏུཏྟཱ ནིརུཏྟིཾ བྷིནྡནྟཾ པཊིཝིཛ྄ཛྷནྟམེཝ ཨུཔྤཛྫཏཱིཏི ཙ པབྷེདགཏམྤི ཧོཏཱིཏི. སབྷཱཝནིརུཏྟཱིཏི མཱགདྷབྷཱསཱ ཨདྷིཔྤེཏཱཏི ཏཏོ ཨཉྙཾ སཀྐཊནཱམཱདིསདྡཾ སནྡྷཱཡ ‘‘ཨཉྙཾ པནཱ’’ཏི ཨཱཧ. བྱཉྫནནྟི ནིཔཱཏཔདམཱཧ.

ཀཐིཏཾ ཨཊྛཀཐཱཡཾ. བོདྷིམཎྜ-སདྡོ པཋམཱབྷིསམྦུདྡྷཊྛཱནེ ཨེཝ དཊྛབྦོ, ན ཡཏྠ ཀཏྠཙི བོདྷིརུཀྑསྶ པཏིཊྛིཏཊྛཱནེ. སུཝཎྞསལཱཀནྟི སེཊྛསལཱཀཾ, དྷམྨདེསནཏྠཾ སལཱཀཾ གཧེཏྭཱཏི ཨཏྠོ, ན པཊིསམྦྷིདཱཡཾ ཋིཏེན པཝཱརིཏཾ, ཏསྨཱ པཊིསམྦྷིདཱཏོ ཨཉྙེནེཝ པཀཱརེན ཛཱནིཏབྦཏོ ན སཀྐཊབྷཱསཱཛཱནནཾ པཊིསམྦྷིདཱཀིཙྩནྟི ཨདྷིཔྤཱཡོ.

ཨིདཾ ཀཐིཏནྟི མཱགདྷབྷཱསཱཡ སབྷཱཝནིརུཏྟིཏཱཉཱཔནཏྠཾ ཨིདཾ ཨིདཱནི ཝཏྟབྦཾ ཀཐིཏནྟི ཨཏྠོ. ཚདྡནྟཝཱརཎ (ཛཱ. ༡.༡༦.༩༧ ཨཱདཡོ) -ཏིཏྟིརཛཱཏཀཱདཱིསུ (ཛཱ. ༡.༤.༧༣ ཨཱདཡོ) ཏིརཙྪཱནེསུ ཙ མཱགདྷབྷཱསཱ ཨུསྶནྣཱ, ན ཨོཊྚཀཱདིབྷཱསཱ སཀྐཊཾ ཝཱ.

ཏཏྠཱཏི ¶ མཱགདྷསེསབྷཱསཱསུ. སེསཱ པརིཝཏྟནྟི ཨེཀནྟེན ཀཱལནྟརེ ཨཉྙཐཱ ཧོནྟི ཝིནསྶནྟི ཙ. མཱགདྷཱ པན ཀཏྠཙི ཀདཱཙི པརིཝཏྟནྟཱིཔི ན སབྦཏྠ སབྦདཱ སབྦཐཱ ཙ པརིཝཏྟཏི, ཀཔྤཝིནཱསེཔི ཏིཊྛཏིཡེཝཱཏི ‘‘ཨཡམེཝེཀཱ ན པརིཝཏྟཏཱི’’ཏི ཨཱཧ. པཔཉྩོཏི ཙིརཱཡནནྟི ཨཏྠོ. བུདྡྷཝཙནམེཝ ཙེཏསྶ ཝིསཡོ, ཏེནེཝ ‘‘ནེལངྒོ སེཏཔཙྪཱདོ’’ཏི གཱཐཾ པུཙྪིཏོ ཙིཏྟོ གཧཔཏི ‘‘‘ཀིཾ ནུ ཁོ ཨེཏཾ, བྷནྟེ, བྷགཝཏཱ བྷཱསིཏ’ནྟི? ‘ཨེཝཾ གཧཔཏཱི’ཏི. ‘ཏེན ཧི, བྷནྟེ, མུཧུཏྟཾ ཨཱགམེཐ, ཡཱཝསྶ ཨཏྠཾ པེཀྑཱམཱི’’’ཏི (སཾ. ནི. ༤.༣༤༧) ཨཱཧཱཏི ཝདནྟི.

སབྦཏྠཀཉཱཎནྟི ¶ ཨཏྠཱདཱིསུ ཉཱཎཾ. ཏཉྷི སབྦེསུ ཏེསུ ཏཱིསུ ཙཏཱུསུཔི ཝཱ པཝཏྟཏྟཱ, ཀུསལཀིརིཡབྷཱུཏཱཡ པཊིབྷཱནཔཊིསམྦྷིདཱཡ དྷམྨཏྠབྷཱཝཏོ ཏཱིསུ ཨེཝ ཝཱ པཝཏྟཏྟཱ ‘‘སབྦཏྠཀཉཱཎ’’ནྟི ཝུཏྟཾ. ཨིམཱནི ཉཱཎཱནི ཨིདམཏྠཛོཏཀཱནཱིཏི སཱཏྠཀཱནཾ པཙྩཝེཀྑིཏབྦཏྟཱ སབྦོ ཨཏྠོ ཨེཏསྶཱཏིཔི སབྦཏྠཀཾ, སབྦསྨིཾ ཁིཏྟནྟི ཝཱ. སེཀྑེ པཝཏྟཱ ཨརཧཏྟཔྤཏྟིཡཱ ཝིསདཱ ཧོནྟཱིཏི ཝདནྟི. པུབྦཡོགོ ཝིཡ པན ཨརཧཏྟཔྤཏྟི ཨརཧཏོཔི པཊིསམྦྷིདཱཝིསདཏཱཡ པཙྩཡོ ན ན ཧོཏཱིཏི པཉྩནྣམྤི ཡཐཱཡོགཾ སེཀྑཱསེཀྑཔཊིསམྦྷིདཱཝིསདཏྟཀཱརཎཏཱ ཡོཛེཏབྦཱ.

པུཙྪཱཡ པརཏོ པཝཏྟཱ ཀཐཱཏི ཀཏྭཱ ཨཊྛཀཐཱ ‘‘པརིཔུཙྪཱ’’ཏི ཝུཏྟཱ. པཊིཔཏྟིཾ པཱུརེཏབྦཾ མཉྙིསྶནྟཱིཏི པཊིཔཏྟིགརུཏཱཡ ལཱབྷཾ ཧཱིལེ༹ནྟེན སཏསཧསྶགྒྷནཀམྤི ཀམྦལཾ ཝཱསིཡཱ ཀོཊྚེཏྭཱ པརིབྷཎྜཀརཎཾ མཡཱ ཀཏཾ ཨཱཝཛྫིཏྭཱ ལཱབྷགརུནོ པརིཡཏྟིདྷརཱ དྷམྨཀཐིཀཱཝ བྷཝིཏུཾ ན མཉྙིསྶནྟཱིཏི ཝུཏྟཾ ཧོཏི. ཨེཏྠ ཙ ཐེརསྶ ཀངྑུཔྤཏྟིཡཱ པུབྦེ ཨཝིསདཏཾ དསྶེཏྭཱ ཨརཧཏྟཔྤཏྟསྶ པཉྷཝིསྶཛྫནེན ཨརཧཏྟཔྤཏྟིཡཱ ཝིསདཏཱ དསྶིཏཱ. ཏིསྶཏྠེརོ ཨནནྟརཾ ཝུཏྟོ ཏིསྶཏྠེརོ ཨེཝཱཏི ཝདནྟི.

པབྷེདོ ནཱམ མགྒེཧི ཨདྷིགཏཱནཾ པཊིསམྦྷིདཱནཾ པབྷེདགམནཾ. ཨདྷིགམོ ཏེཧི པཊིལཱབྷོ, ཏསྨཱ སོ ལོཀུཏྟརོ, པབྷེདོ ཀཱམཱཝཙརོ དཊྛབྦོ. ན པན ཏཐཱཏི ཡཐཱ ཨདྷིགམསྶ བལཝཔཙྩཡོ ཧོཏི, ན ཏཐཱ པབྷེདསྶཱཏི ཨཏྠོ. ཨིདཱནི པརིཡཏྟིཡཱདཱིནཾ ཨདྷིགམསྶ བལཝཔཙྩཡཏྟཱབྷཱཝཾ, པུབྦཡོགསྶ ཙ བལཝཔཙྩཡཏྟཾ དསྶེནྟོ ‘‘པརིཡཏྟིསཝནཔརིཔུཙྪཱ ཧཱི’’ཏིཨཱདིམཱཧ. ཏཏྠ པཊིསམྦྷིདཱ ནཱམ ནཏྠཱིཏི པཊིསམྦྷིདཱདྷིགམོ ནཏྠཱིཏི ཨདྷིཔྤཱཡོ. ཨིདཱནི ¶ ཡཾ ཝུཏྟཾ ཧོཏི, ཏཾ དསྶེནྟོ ‘‘ཨིམེ པནཱ’’ཏིཨཱདིམཱཧ. པུབྦཡོགཱདྷིགམཱ ཧི དྭེཔི ཝིསདཀཱརཎཱཏི ‘‘པུབྦཡོགོ པབྷེདསྶ བལཝཔཙྩཡོ ཧོཏཱི’’ཏི ཝུཏྟནྟི.

སངྒཧཝཱརཝཎྞནཱ ནིཊྛིཏཱ.

༢. སཙྩཝཱརཱདིཝཎྞནཱ

༧༡༩. ཧེཏུཝཱརེ ¶ ཀཱལཏྟཡེཔི ཧེཏུཕལདྷམྨཱ ‘‘ཨཏྠཱ’’ཏི ཝུཏྟཱ, ཏེསཉྩ ཧེཏུདྷམྨཱ ‘‘དྷམྨཱ’’ཏི, དྷམྨཝཱརེ ཝེནེཡྻཝསེན ཨཏཱིཏཱནཉྩ སངྒཧིཏཏྟཱ ‘‘ཨུཔྤནྣཱ སམུཔྤནྣཱ’’ཏིཨཱདི ན ཝུཏྟནྟི ཨཏཱིཏཔཙྩུཔྤནྣཱ ‘‘ཨཏྠཱ’’ཏི ཝུཏྟཱ, ཏཾནིབྦཏྟཀཱ ཙ ‘‘དྷམྨཱ’’ཏི ཨིདམེཏེསཾ དྭིནྣམྤི ཝཱརཱནཾ ནཱནཏྟཾ.

སཙྩཝཱརཱདིཝཎྞནཱ ནིཊྛིཏཱ.

སུཏྟནྟབྷཱཛནཱིཡཝཎྞནཱ ནིཊྛིཏཱ.

༢. ཨབྷིདྷམྨབྷཱཛནཱིཡཝཎྞནཱ

༧༢༥. ཨཝུཏྟཏྟཱཏི ‘‘ཏེསཾ ཝིཔཱཀེ ཉཱཎ’’ནྟི སཱམཉྙེན ཝཏྭཱ ཝིསེསེན ཨཝུཏྟཏྟཱཏི ཨདྷིཔྤཱཡོ. ཨེཏྠ ཙ ཀིརིཡཱནཾ ཨཝིཔཱཀཏྟཱ དྷམྨབྷཱཝོ ན ཝུཏྟོཏི. ཡདི ཨེཝཾ ཝིཔཱཀཱ ན ཧོནྟཱིཏི ཨཏྠབྷཱཝོ ཙ ན ཝཏྟབྦོཏི? ན, པཙྩཡུཔྤནྣཏྟཱ. ཨེཝཉྩེ ཀུསལཱཀུསལཱནམྤི ཨཏྠབྷཱཝོ ཨཱཔཛྫཏཱིཏི. ནཔྤཊིསིདྡྷོ, ཝིཔཱཀསྶ པན པདྷཱནཧེཏུཏཱཡ པཱཀཊཏྟཱ དྷམྨབྷཱཝོཝ ཏེསཾ ཝུཏྟོ. ཀིརིཡཱནཾ པཙྩཡཏྟཱ དྷམྨབྷཱཝོ ཨཱཔཛྫཏཱིཏི ཙེ? ནཱཡཾ དོསོ ཨཔྤཊིསིདྡྷཏྟཱ, ཀམྨཕལསམྦནྡྷསྶ པན ཨཧེཏུཏྟཱ དྷམྨབྷཱཝོ ན ཝུཏྟོ. ཨཔིཙ ‘‘ཨཡཾ ཨིམསྶ པཙྩཡོ, ཨིདཾ པཙྩཡུཔྤནྣ’’ནྟི ཨེཝཾ བྷེདཾ ཨཀཏྭཱ ཀེཝལཾ ཀུསལཱཀུསལེ ཝིཔཱཀཀིརིཡདྷམྨེ ཙ སབྷཱཝཏོ པཙྩཝེཀྑནྟསྶ དྷམྨཔཊིསམྦྷིདཱ ཨཏྠཔཊིསམྦྷིདཱ ཙ ཧོཏཱིཏིཔི ཏེསཾ ཨཏྠདྷམྨཏཱ ན ཝུཏྟཱཏི ཝེདིཏབྦཱ ¶ . ཀུསལཱཀུསལཝཱརེསུ ཙ དྷམྨཔཊིསམྦྷིདཱ ཀུསལཱཀུསལཱནཾ པཙྩཡབྷཱཝཾ སཏྟིཝིསེསཾ སནིཔྥཱདེཏབྦཏཾ པསྶནྟཱི ནིཔྥཱདེཏབྦཱཔེཀྑཱ ཧོཏཱིཏི ཏཾསམྦནྡྷེནེཝ ‘‘ཏེསཾ ཝིཔཱཀེ ཉཱཎཾ ཨཏྠཔཊིསམྦྷིདཱ’’ཏི ཝུཏྟཾ. སབྷཱཝདསྶནམཏྟམེཝ པན ཨཏྠཔཊིསམྦྷིདཱཡ ཀིཙྩཾ ནིཔྥནྣཕལམཏྟདསྶནཏོཏི ཏསྶཱ ནིཔྥཱདཀཱནཔེཀྑཏྟཱ ཝིཔཱཀཝཱརེ ‘‘ཏེསཾ ཝིཔཙྩནཀེ ཉཱཎཾ དྷམྨཔཊིསམྦྷིདཱ’’ཏི ན ཝུཏྟནྟི ཝེདིཏབྦཾ.

སབྷཱཝཔཉྙཏྟིཡཱཏི ན སཏྟཱདིཔཉྙཏྟིཡཱ, ཨཝིཔརཱིཏཔཉྙཏྟིཡཱ ཝཱ. ཁོབྷེཏྭཱཏི ལོམཧཾསཛནནསཱདྷུཀཱརདཱནཱདཱིཧི ཁོབྷེཏྭཱ. པུན དྷམྨསྶཝནེ ¶ ཛཱནིསྶཐཱཏི ཨཔྤསྶུཏཏྟཱ དུཏིཡཝཱརཾ ཀཐེནྟོ ཏདེཝ ཀཐེསྶཏཱིཏི ཨདྷིཔྤཱཡོ.

༧༤༦. བྷཱུམིདསྶནཏྠནྟི ཨེཏྠ ཀཱམཱཝཙརཱ ལོཀུཏྟརཱ ཙ བྷཱུམི ‘‘བྷཱུམཱི’’ཏི ཝེདིཏབྦཱ, ཙིཏྟུཔྤཱདཱ ཝཱཏི.

ཨབྷིདྷམྨབྷཱཛནཱིཡཝཎྞནཱ ནིཊྛིཏཱ.

༣. པཉྷཔུཙྪཀཝཎྞནཱ

༧༤༧. པཙྩཡསམུཔྤནྣཉྩ ཨཏྠཾ པཙྩཡདྷམྨཉྩཱཏི ཝཙནེཧི ཧེཏཱདིཔཙྩཡསམུཔྤནྣཱནཾ ཀུསལཱཀུསལརཱུཔཱནམྤི ཨཏྠཔརིཡཱཡཾ, ཧེཏཱདིཔཙྩཡབྷཱུཏཱནཾ ཝིཔཱཀཀིརིཡརཱུཔཱནམྤི དྷམྨཔརིཡཱཡཉྩ དསྶེཏི. པཊིབྷཱནཔཊིསམྦྷིདཱཡ ཀཱམཱཝཙརཝིཔཱཀཱརམྨཎཏཱ མཧགྒཏཱརམྨཎཏཱ ཙ པཊིསམྦྷིདཱཉཱཎཱརམྨཎཏྟེ ན ཡུཛྫཏི པཊིསམྦྷིདཱཉཱཎཱནཾ ཀཱམཱཝཙརལོཀུཏྟརཀུསལེསུ ཀཱམཱཝཙརཀིརིཡཱལོཀུཏྟརཝིཔཱཀེསུ ཙ ཨུཔྤཏྟིཏོ. སབྦཉཱཎཱརམྨཎཏཱཡ སཏི ཡུཛྫེཡྻ, ‘‘ཡེན ཉཱཎེན ཏཱནི ཉཱཎཱནི ཛཱནཱཏཱི’’ཏི (ཝིབྷ. ༧༢༦) ཝཙནཏོ པན ན སབྦཉཱཎཱརམྨཎཏཱཏི ཀཐཡནྟི. སུཏྟནྟབྷཱཛནཱིཡེ པན ‘‘ཉཱཎེསུ ཉཱཎཾ པཊིབྷཱནཔཊིསམྦྷིདཱ’’ཏི ཨཝིསེསེན ཝུཏྟཏྟཱ སབྦཉཱཎཱརམྨཎཏཱ སིཡཱ. ཨབྷིདྷམྨབྷཱཛནཱིཡེཔི ཙིཏྟུཔྤཱདཝསེན ཀཐནཾ ནིརཝསེསཀཐནནྟི ཡཐཱདསྶིཏཝིསཡཝཙནཝསེན ‘‘ཡེན ཉཱཎེན ཏཱནི ཉཱཎཱནི ¶ ཛཱནཱཏཱི’’ཏི ཡཾ ཝུཏྟཾ, ཏཾ ཨཉྙཱརམྨཎཏཾ ན པཊིསེདྷེཏཱིཏི. ཡཐཱ ཙ ཨཏྠཔཊིསམྦྷིདཱཝིསཡཱནཾ ན ནིརཝསེསེན ཀཐནཾ ཨབྷིདྷམྨབྷཱཛནཱིཡེ, ཨེཝཾ པཊིབྷཱནཔཊིསམྦྷིདཱཝིསཡསྶཔཱིཏི. ཨེཝཾ པཊིབྷཱནཔཊིསམྦྷིདཱཡ སབྦཉཱཎཝིསཡཏྟཱ ‘‘ཏིསྶོ པཊིསམྦྷིདཱ སིཡཱ པརིཏྟཱརམྨཎཱ སིཡཱ མཧགྒཏཱརམྨཎཱ སིཡཱ ཨཔྤམཱཎཱརམྨཎཱ’’ཏི (ཝིབྷ. ༧༤༩) ཝུཏྟཱ.

ཡདིཔི ‘‘སིཡཱ ཨཏྠཔཊིསམྦྷིདཱ ན མགྒཱརམྨཎཱ’’ཏི (ཝིབྷ. ༧༤༩) ཝཙནཏོ ཨབྷིདྷམྨབྷཱཛནཱིཡེ ཝུཏྟཔཊིསམྦྷིདཱསྭེཝ པཉྷཔུཙྪཀནཡོ པཝཏྟོ. ན ཧི མགྒོ པཙྩཡུཔྤནྣོ ན ཧོཏི, ཨབྷིདྷམྨབྷཱཛནཱིཡེ ཙ པཊིསམྦྷིདཱཉཱཎཝིསཡཱ ཨེཝ པཊིབྷཱནཔཊིསམྦྷིདཱ ཝུཏྟཱཏི ན ཏསྶཱ མཧགྒཏཱརམྨཎཏཱཏི. ཨེཝམཔི དྭེཔི ཨེཏཱ པཱལི༹ཡོ ཝིརུཛ྄ཛྷནྟི, ཏཱསུ བལཝཏརཱཡ ཋཏྭཱ ¶ ཨིཏརཱཡ ཨདྷིཔྤཱཡོ མགྒིཏབྦོ. ཀུསལཱཀུསལཱནཾ པན པཙྩཡུཔྤནྣཏྟཔཊིཝེདྷོཔི ཀུསལཱཀུསལབྷཱཝཔཊིཝེདྷཝིནིམུཏྟོ ནཏྠཱིཏི ནིཔྤརིཡཱཡཱ ཏཏྠ དྷམྨཔཊིསམྦྷིདཱ ཨེཀནྟདྷམྨཝིསཡཏྟཱ, ཏཐཱ ཝིཔཱཀཀིརིཡཱནཾ པཙྩཡབྷཱཝཔཊིཝེདྷོཔི ཝིཔཱཀཀིརིཡབྷཱཝཔཊིཝེདྷཝིནིམུཏྟོ ནཏྠཱིཏི ནིཔྤརིཡཱཡཱ ཏཏྠ ཨཏྠཔཊིསམྦྷིདཱ ཨེཀནྟིཀཨཏྠཝིསཡཏྟཱ. ཀིཉྩི པན ཉཱཎཾ ཨཔྤཊིབྷཱནབྷཱུཏཾ ནཏྠི ཉེཡྻཔྤཀཱསནཏོཏི སབྦསྨིམྤི ཉཱཎེ ནིཔྤརིཡཱཡཱ པཊིབྷཱནཔཊིསམྦྷིདཱ བྷཝིཏུཾ ཨརཧཏི. ནིཔྤརིཡཱཡཔཊིསམྦྷིདཱསུ པཉྷཔུཙྪཀསྶ པཝཏྟིཡཾ དྭེཔི པཱལི༹ཡོ ན ཝིརུཛ྄ཛྷནྟི.

སདྡཱརམྨཎཏྟཱ བཧིདྡྷཱརམྨཎཱཏི ཨེཏྠ པརསྶ ཨབྷིལཱཔསདྡཱརམྨཎཏྟཱཏི བྷཝིཏབྦཾ. ན ཧི སདྡཱརམྨཎཏཱ བཧིདྡྷཱརམྨཎཏཱཡ ཀཱརཎཾ སདྡསྶ ཨཛ྄ཛྷཏྟསྶ ཙ སབྦྷཱཝཱཏི. ཨནུཝཏྟམཱནོ ཙ སོ ཨེཝ སདྡོཏི ཝིསེསནཾ ན ཀཏནྟི དཊྛབྦཾ.

པཉྷཔུཙྪཀཝཎྞནཱ ནིཊྛིཏཱ.

པཊིསམྦྷིདཱཝིབྷངྒཝཎྞནཱ ནིཊྛིཏཱ.

༡༦. ཉཱཎཝིབྷངྒོ

༡. ཨེཀཀམཱཏིཀཱདིཝཎྞནཱ

༧༥༡. ཨོཀཱསཊྛེན ¶ ¶ སམྤཡུཏྟཱ དྷམྨཱ ཨཱརམྨཎཉྩཱཔི ཉཱཎསྶ ཝཏྠུ. ཡཱཐཱཝཀཝཏྠུཝིབྷཱཝནཱཏི ནཧེཏཱདིཨཝིཏཐེཀཔྤཀཱརཝཏྠུཝིབྷཱཝནཱ. ཡཐཱ ཨེཀཾ ནཧེཏུ, ཏཐཱ ཨེཀཾ ཨཉྙམྤཱིཏི ཧི གཧེཏབྦཾ ཨཝིཏཐསཱམཉྙཡུཏྟཾ ཉཱཎཱརམྨཎཾ ཡཱཐཱཝཀཝཏྠུ. ཡཱཐཱཝཀེན ཝཱ ཨཝིཏཐསཱམཉྙེན ཝཏྠུཝིབྷཱཝནཱ ཡཱཐཱཝཀཝཏྠུཝིབྷཱཝནཱ.

དུཀཱནུརཱུཔེཧཱིཏི དུཀམཱཏིཀཱནུརཱུཔེཧཱིཏི ཝདནྟི. ཨོསཱནདུཀསྶ པན དུཀམཱཏིཀཾ ཨནིསྶཱཡ ཝུཏྟཏྟཱ དུཀབྷཱཝཱནུརཱུཔེཧཱིཏི ཝཏྟབྦཾ. ཨེཝཾ ཏིཀཱནུརཱུཔེཧཱིཏི ཨེཏྠཱཔི དཊྛབྦཾ. ཨོསཱནདུཀེ པན ཨཏྠོཏི ཕལཾ, ཨནེཀཏྠཏྟཱ དྷཱཏུསདྡཱནཾ ཏཾ ཛནེཏཱིཏི ཨཏྠཛཱཔིཀཱ, ཀཱརཎགཏཱ པཉྙཱ. ཛཱཔིཏོ ཛནིཏོ ཨཏྠོ ཨེཏིསྶཱཏི ཛཱཔིཏཏྠཱ, ཀཱརཎཔཉྙཱསདིསཱི ཕལཔྤཀཱསནབྷཱུཏཱ ཕལསམྤཡུཏྟཱ པཉྙཱ.

༡༠. དསཀམཱཏིཀཱཝཎྞནཱ

༧༦༠. ‘‘ཙཏསྶོ ཁོ ཨིམཱ, སཱརིཔུཏྟ, ཡོནིཡོ. ཀཏམཱ…པེ… ཡོ ཁོ མཾ, སཱརིཔུཏྟ, ཨེཝཾ ཛཱན’’ནྟི (མ. ནི. ༡.༡༥༢) ཝཙནེན ཙཏུཡོནིཔརིཙྪེདཀཉཱཎཾ ཝུཏྟཾ, ‘‘ནིརཡཉྩཱཧཾ, སཱརིཔུཏྟ, པཛཱནཱམཱི’’ཏིཨཱདིནཱ (མ. ནི. ༡.༡༥༣) པཉྩགཏིཔརིཙྪེདཀཾ. ‘‘སཾཡུཏྟཀེ ཨཱགཏཱནི ཏེསཏྟཏི ཉཱཎཱནི, སཏྟསཏྟཏི ཉཱཎཱནཱི’’ཏི ཝུཏྟཾ, ཏཏྠ པན ནིདཱནཝགྒེ སཏྟསཏྟཏི ཨཱགཏཱནི ཙཏུཙཏྟཱརཱིསཉྩ, ཏེསཏྟཏི པན པཊིསམྦྷིདཱམགྒེ སུཏམཡཱདཱིནི ཨཱགཏཱནི ¶ དིསྶནྟི, ན སཾཡུཏྟཀེཏི. ཨཉྙཱནིཔཱིཏི ཨེཏེན ཨིདྷ ཨེཀཀཱདིཝསེན ཝུཏྟཾ, ཨཉྙཏྠ ཙ ‘‘པུབྦནྟེ ཉཱཎ’’ནྟིཨཱདིནཱ, བྲཧྨཛཱལཱདཱིསུ ཙ ‘‘ཏཡིདཾ ཏཐཱགཏོ པཛཱནཱཏི ‘ཨིམཱནི དིཊྛིཊྛཱནཱནི ཨེཝཾ གཧིཏཱནཱི’ཏི’’ཨཱདིནཱ ཝུཏྟཾ ཨནེཀཉཱཎཔྤབྷེདཾ སངྒཎྷཱཏི. ཡཱཐཱཝཔཊིཝེདྷཏོ སཡཉྩ ཨཀམྤིཡཾ པུགྒལཉྩ ཏཾསམངྒིཾ ཉེཡྻེསུ ཨདྷིབལཾ ཀརོཏཱིཏི ཨཱཧ ‘‘ཨཀམྤིཡཊྛེན ཨུཔཏྠམྦྷཀཊྛེན ཙཱ’’ཏི.

སེཊྛཊྛཱནཾ ¶ སབྦཉྙུཏཾ. པཊིཛཱནནཝསེན སབྦཉྙུཏཾ ཨབྷིམུཁཾ གཙྪནྟི, ཨཊྛ ཝཱ པརིསཱ ཨུཔསངྐམནྟཱིཏི ཨཱསབྷཱ, བུདྡྷཱ. ཨིདཾ པནཱཏི བུདྡྷཱནཾ ཋཱནཾ སབྦཉྙུཏམེཝ ཝདཏི. ཏིཊྛམཱནོཝཱཏི ཨཝདནྟོཔི ཏིཊྛམཱནོཝ པཊིཛཱནཱཏི ནཱམཱཏི ཨཏྠོ. ཨཊྛསུ པརིསཱསུ ‘‘ཨབྷིཛཱནཱམཧཾ, སཱརིཔུཏྟ, ཨནེཀསཏཾ ཁཏྟིཡཔརིསཾ…པེ… ཏཏྲ ཝཏ མཾ བྷཡཾ ཝཱ སཱརཛྫཾ ཝཱ ཨོཀྐམིསྶཏཱིཏི ནིམིཏྟམེཏཾ, སཱརིཔུཏྟ, ན སམནུཔསྶཱམཱི’’ཏི (མ. ནི. ༡.༡༥༡) ཝཙནེན དསྶིཏཨཀམྤིཡཉཱཎཡུཏྟོ དསབལོཧནྟི ཨབྷཱིཏནཱདཾ ནདཏི. སཱིཧནཱདསུཏྟེན ཁནྡྷཀཝགྒེ ཨཱགཏེན.

‘‘དེཝམནུསྶཱནཾ ཙཏུཙཀྐཾ ཝཏྟཏཱི’’ཏི (ཨ. ནི. ༤.༣༡) སུཏྟསེསེན སཔྤུརིསཱུཔསྶཡཱདཱིནཾ ཕལསམྤཏྟི པཝཏྟི, པུརིམསཔྤུརིསཱུཔསྶཡཱདིཾ ཨུཔནིསྶཱཡ པཙྪིམསཔྤུརིསཱུཔསྶཡཱདཱིནཾ སམྤཏྟི པཝཏྟི ཝཱ ཝུཏྟཱཏི ཨཱདི-སདྡེན ཏཏྠ ཙ ཙཀྐ-སདྡསྶ གཧཎཾ ཝེདིཏབྦཾ. པཊིཝེདྷནིཊྛཏྟཱ ཨརཧཏྟམགྒཉཱཎཾ པཊིཝེདྷོཏི ‘‘ཕལཀྑཎེ ཨུཔྤནྣཾ ནཱམཱ’’ཏི ཝུཏྟཾ. ཏེན པཊིལདྡྷསྶཔི དེསནཱཉཱཎསྶ ཀིཙྩནིཔྥཏྟིཔརསྶ བུཛ྄ཛྷནམཏྟེན ཧོཏཱིཏི ‘‘ཨཉྙཱསིཀོཎྜཉྙསྶ སོཏཱཔཏྟིཕལཀྑཎེ པཝཏྟཾ ནཱམཱ’’ཏི ཝུཏྟཾ. ཏཏོ པརཾ པན ཡཱཝ པརིནིབྦཱནཱ དེསནཱཉཱཎཔྤཝཏྟི ཏསྶེཝ པཝཏྟིཏསྶ དྷམྨཙཀྐསྶ ཋཱནནྟི ཝེདིཏབྦཾ, པཝཏྟིཏཙཀྐསྶ ཙཀྐཝཏྟིནོ ཙཀྐརཏནཊྛཱནཾ ཝིཡ.

སམཱདཱིཡནྟཱིཏི སམཱདཱནཱནི, ཏཱནི པན སམཱདིཡིཏྭཱ ཀཏཱནི ཧོནྟཱིཏི ཨཱཧ ‘‘སམཱདིཡིཏྭཱ ཀཏཱན’’ནྟི. ཀམྨམེཝ ཝཱ ཀམྨསམཱདཱནནྟི ཨེཏེན སམཱདཱན-སདྡསྶ ཨཔུབྦཏྠཱབྷཱཝཾ དསྶེཏི མུཏྟགཏ-སདྡེ གཏ-སདྡསྶ ཝིཡ.

ཨགཏིགཱམིནིནྟི ¶ ནིབྦཱནགཱམིནིཾ. ཝུཏྟཉྷི ‘‘ནིབྦཱནཉྩཱཧཾ, སཱརིཔུཏྟ, པཛཱནཱམི ནིབྦཱནགཱམིནིཉྩ པཊིཔད’’ནྟི (མ. ནི. ༡.༡༥༣).

ཧཱནབྷཱགིཡདྷམྨནྟི ཧཱནབྷཱགིཡསབྷཱཝཾ, ཀཱམསཧགཏསཉྙཱདིདྷམྨཾ ཝཱ. ཏཾ ཀཱརཎནྟི པུབྦེཝ ཀཏཱབྷིསངྑཱརཱདིཾ.

‘‘ཨིདཱནཱི’’ཏི ཨེཏསྶ ‘‘ཨིམིནཱ ཨནུཀྐམེན ཝུཏྟཱནཱིཏི ཝེདིཏབྦཱནཱི’’ཏི ཨིམིནཱ སཧ ཡོཛནཱ ཀཱཏབྦཱ. ཀིལེསཱཝརཎཾ ཏདབྷཱཝཉྩཱཏི ཀིལེསཱཝརཎཱབྷཱཝཾ. ཀིལེསཀྑཡཱདྷིགམསྶ ཧི ཀིལེསཱཝརཎཾ ཨཊྛཱནཾ, ཏདབྷཱཝོ ཋཱནཾ. ཨནདྷིགམསྶ ཀིལེསཱཝརཎཾ ཋཱནཾ, ཏདབྷཱཝོ ¶ ཨཊྛཱནནྟི. ཏཏྠ ཏདབྷཱཝགྒཧཎེན གཧིཏཾ ‘‘ཨཏྠི དིནྣ’’ནྟིཨཱདིཀཱཡ སམྨཱདིཊྛིཡཱ ཋིཏིཾ ཏབྦིཔརཱིཏཱཡ ཋཱནཱབྷཱཝཉྩ ཨདྷིགམསྶ ཋཱནཾ པསྶནྟེན ཨིམིནཱ ཉཱཎེན ཨདྷིགམཱནདྷིགམཱནཾ ཋཱནཱཊྛཱནབྷཱུཏེ ཀིལེསཱཝརཎཏདབྷཱཝེ པསྶཏི བྷགཝཱཏི ཨིམམཏྠཾ སཱདྷེནྟོ ཨཱཧ ‘‘ལོཀིཡསམྨཱདིཊྛིཋིཏིདསྶནཏོ ནིཡཏམིཙྪཱདིཊྛིཋཱནཱབྷཱཝདསྶནཏོ ཙཱ’’ཏི. ཨེཏྠ ཙ ཨདྷིགམཊྛཱནདསྶནམེཝ ཨདྷིཔྤེཏཾ ཨུཔརི བྷབྦཔུགྒལཝསེནེཝ ཝིཔཱཀཱཝརཎཱབྷཱཝདསྶནཱདིཀསྶ ཝཀྑམཱནཏྟཱ. ཨིམིནཱ པན ཉཱཎེན སིཛ྄ཛྷནཏོ པསངྒེན ཨིཏརམྤི ཝུཏྟནྟི ཝེདིཏབྦཾ. དྷཱཏུཝེམཏྟདསྶནཏོཏི རཱགཱདཱིནཾ ཨདྷིམཏྟཏཱདིཝསེན ཏཾསཧིཏཱནཾ དྷཱཏཱུནཾ ཝེམཏྟཏཱདསྶནཏོ, ‘‘ཨཡཾ ཨིམིསྶཱ དྷཱཏུཡཱ ཨདྷིམཏྟཏྟཱ རཱགཙརིཏོ’’ཏིཨཱདིནཱ ཙརིཡཱཧེཏཱུནཾ ཝཱ, རཱགཱདཡོ ཨེཝ ཝཱ པཀཏིབྷཱཝཏོ དྷཱཏཱུཏི རཱགཱདིཝེམཏྟདསྶནཏོཏི ཨཏྠོ. པཡོགཾ ཨནཱདིཡིཏྭཱཏི སནྟཏིམཧཱམཏྟཨངྒུལིམཱལཱདཱིནཾ ཝིཡ ཀཱམརཱགབྱཱཔཱདཱདིཝསེན པཡོགཾ ཨནཱདིཡིཏྭཱ.

(༡.) ཨེཀཀནིདྡེསཝཎྞནཱ

༧༦༡. ན ཧེཏུམེཝཱཏི ཨེཏྠ ཙ ན ཧེཏཱུ ཨེཝཱཏི ཨཏྠོ, བྱཉྫནསིལིཊྛཏཱཝསེན པན རསྶཏྟཾ མ-ཀཱརོ ཙ ཀཏོ ‘‘ཨདུཀྑམསུཁཱ’’ཏི ཨེཏྠ ཝིཡ. ཨིམིནཱཔི ནཡེནཱཏི ཨེཏྠ པུརིམནཡེན ཧེཏུབྷཱཝཱདིཔཊིཀྑེཔོ, པཙྪིམནཡེན ནཧེཏུདྷམྨཱདིཀོཊྛཱསསངྒཧོཏི ཨཡཾ ཝིསེསོ ཝེདིཏབྦོ. ཙུཏིགྒཧཎེན ཙུཏིཔརིཙྪིནྣཱཡ ཨེཀཱཡ ཛཱཏིཡཱ གཧཎཾ དཊྛབྦཾ, བྷཝགྒཧཎེན ནཝདྷཱ ཝུཏྟབྷཝསྶ. ཏདནྟོགདྷཏཱཡ ཏཏྠ ཏཏྠ པརིཡཱཔནྣཏཱ ཝུཏྟཱ. ཨུཔྤནྣཾ མནོཝིཉྙཱཎཝིཉྙེཡྻམེཝཱཏི ¶ ‘‘ན རཱུཔཾ ཝིཡ ཨུཔྤནྣཱ ཚཝིཉྙཱཎཝིཉྙེཡྻཱ’’ཏི རཱུཔཏོ ཨེཏེསཾ ཝིསེསནཾ ཀརོཏི.

༧༦༢. ཀཔྤཏོ ཀཔྤཾ གནྟྭཱཔི ན ཨུཔྤཛྫཏཱིཏི ན ཀདཱཙི ཏཐཱ ཨུཔྤཛྫཏི. ན ཧི ཁཱིརཱདཱིནཾ ཝིཡ ཨེཏེསཾ ཡཐཱཝུཏྟལཀྑཎཝིལཀྑཎཏཱ ཨཏྠཱིཏི དསྶེཏི.

༧༦༣. སམོདྷཱནེཏྭཱཏི ལོཀེ ཝིཛྫམཱནཾ སབྦཾ རཱུཔཾ སམོདྷཱནེཏྭཱ. ཨེཏེན མཧཏྟེཔི ཨཝིབྷཱཝཀཏྟཾ དསྶེནྟོ སུཁུམཏྟཱ ན ཝིབྷཱཝེསྶཏཱིཏི ¶ ཝཱདཔཐཾ ཚིནྡཏི. ཙཀྑུཔསཱདེ མམ ཝཏྠུམྷཱིཏི ཨཏྠོ. ཝིསཡོཏི ཨིསྶརིཡཊྛཱནནྟི ཨདྷིཔྤཱཡོ.

༧༦༤. ཨབྦོཀིཎྞཱཏི ཨབྱཝཧིཏཱ, ཨནནྟརིཏཱཏི ཨཏྠོ. ཝཝཏྠིཏཱནམྤི པཊིཔཱཊིནིཡམོ ཏེན པཊིཀྑིཏྟོཏི ཨཏྠོ. ཨནནྟརཏཱཏི ཨནནྟརཔཙྩཡཏཱ ཨེཏེན པཊིཀྑིཏྟཱཏི ཨཏྠོ.

༧༦༥. སམནནྟརཏཱཏི ཙ སམནནྟརཔཙྩཡཏཱ.

༧༦༦. ཨཱབྷུཛནཏོཏི ཨཱབྷུགྒཀརཎཏོ, ནིཝཏྟནཏོ ཨིཙྩེཝ ཨཏྠོ. ཨེཏྠ ཙ ‘‘པཉྩ ཝིཉྙཱཎཱ ཨནཱབྷོགཱ’’ཏི ཨཱབྷོགསབྷཱཝཱ ན ཧོནྟཱིཏི ཨཏྠོ, ‘‘པཉྩནྣཾ ཝིཉྙཱཎཱནཾ ནཏྠི ཨཱཝཊྚནཱ ཝཱ’’ཏིཨཱདཱིསུཔི ཨཱཝཊྚནབྷཱཝོ ཝཱཏིཨཱདིནཱ ཨཏྠོ དཊྛབྦོ.

ན ཀཉྩི དྷམྨཾ པཊིཝིཛཱནཱཏཱིཏི ཨེཏྠ ན སབྦེ རཱུཔཱདིདྷམྨཱ དྷམྨགྒཧཎེན གཧིཏཱཏི ཡཐཱདྷིཔྤེཏདྷམྨདསྶནཏྠཾ ‘‘མནོཔུབྦངྒམཱ དྷམྨཱཏི ཨེཝཾ ཝུཏྟ’’ནྟི ཨཱཧ.

རཱུཔཱདཱིསུ ཨབྷིནིཔཏནཾ ཏེཧི སམཱགམོ ཏེསནྟིཔི ཝཏྟུཾ ཡུཛྫཏཱིཏི ཨཱཧ ‘‘རཱུཔཱདཱིནཾ ཨབྷིནིཔཱཏམཏྟ’’ནྟི. ཀམྨཏྠེ ཝཱ སཱམིཝཙནཾ. ཝིཉྙཱཎེཧི ཨབྷིནིཔཏིཏབྦཱནི ཧི རཱུཔཱདཱིནཱིཏི. ཨིདཾ ཝུཏྟཾ ཧོཏཱིཏིཨཱདཱིསུ ཧི ཨཡཾ ཨདྷིཔྤཱཡོ – ཨཱརམྨཎཀརཎེན པཊིཝིཛཱནིཏབྦཱནི རཱུཔཱདཱིནི ཋཔེཏྭཱ ཀུསལཱཀུསལཙེཏནཱཡ ཏཾསམྤཡུཏྟཱནཉྩ ཡཐཱཝུཏྟཱནཾ སཧཛཔུབྦངྒམདྷམྨེན པཊིཝིཛཱནིཏབྦཱནཾ པཊིཝིཛཱནནཾ ཨེཏེསཾ ནཏྠཱིཏི. ཨེཝཉྩ ཀཏྭཱ ‘‘དསྶནཱདིམཏྟཏོ ¶ པན མུཏྟཱ ཨཉྙཱ ཨེཏེསཾ ཀུསལཱདིཔཊིཝིཉྙཏྟི ནཱམ ནཏྠཱི’’ཏི ཀིཙྩནྟརཾ པཊིསེདྷེཏི.

ཨཝིཔཱཀབྷཱཝེན ཨཉྙཾ ཨབྱཱཀཏསཱམཉྙཾ ཨནིཝཱརེནྟོ ཀུསལཱཀུསལགྒཧཎཉྩ ཀརོཏཱིཏི ཙཝནཔརིཡོསཱནཉྩ ཀིཙྩཾ. པི-སདྡེན སཧཛཝནཀཱནི ཝཱིཐིཙིཏྟཱནི སམྤིཎྜེཏྭཱ པཉྩདྭཱརེ པཊིསེདྷནེ ཨཡཾ ཨདྷིཔྤཱཡོ སིཡཱ – ‘‘མནསཱ ཙེ པདུཊྛེན…པེ… པསནྣེན བྷཱསཏི ཝཱ ཀརོཏི ཝཱ’’ཏི (དྷ. པ. ༡-༢) ཨེཝཾ ཝུཏྟཱ བྷཱསནཀརཎཀརཱ, ཏཾསདིསཱ ཙ སུཁདུཀྑུཔྤཱདཀཱ བལཝནྟོ ཚཊྛདྭཱརིཀཱ ཨེཝ དྷམྨགྒཧཎེན གཧིཏཱཏི ན ཏེསཾ པཉྩདྭཱརིཀཛཝནེན པཊིཝིཛཱནནཾ ཨཏྠི, དུབྦལཱནཾ པན པུབྦངྒམཔཊིཝིཛཱནནཾ ཏཏྠ ན པཊིསིདྡྷཾ ‘‘ན ¶ ཀཱཡཀམྨཾ ན ཝཙཱིཀམྨཾ པཊྛཔེཏཱི’’ཏི ཝིཉྙཏྟིདྭཡཛནཀསྶེཝ པཊྛཔནཔཊིཀྑེཔེན དུབྦལསྶ མནོཀམྨསྶ ཨནུཉྙཱཏཏྟཱ. ཏཐཱ ཀཱཡསུཙརིཏཱདིཀུསལཀམྨཾ ཀརོམཱིཏི, ཏབྦིཔརཱིཏཾ ཨཀུསལཾ ཀམྨཾ ཀརོམཱིཏི ཙ ཀུསལཱཀུསལསམཱདཱནཾ པཉྩདྭཱརིཀཛཝནེན ན ཧོཏི. ཏཐཱ པཊིཙྩསམུཔྤཱདཝཎྞནཱཡཾ ཝུཏྟཱ ‘‘པཉྩདྭཱརིཀཙུཏི ཙ ན པཉྩདྭཱརིཀཙིཏྟེཧི ཧོཏི ཙུཏིཙིཏྟསྶ ཨཏཾདྭཱརིཀཏྟཱ’’ཏི. ཡཱ པནཱཡཾ པཱལི༹ ‘‘པཉྩཧི ཝིཉྙཱཎེཧི ན ཀཉྩི དྷམྨཾ པཊིཝིཛཱནཱཏི ཨཉྙཏྲ ཨབྷིནིཔཱཏམཏྟཱ’’ཏི, ཏསྶཱ རཱུཔཱདཱིནཾ ཨཱཔཱཐམཏྟཾ མུཉྩིཏྭཱ ཨཉྙཾ ཀཉྩི དྷམྨསབྷཱཝཾ ན པཊིཝིཛཱནཱཏཱིཏི ཨཡམཏྠོ དིསྶཏི. ན ཧི རཱུཔཾ པཊིགྒཎྷནྟམྤི ཙཀྑུཝིཉྙཱཎཾ རཱུཔནྟི ཙ གཎྷཱཏཱིཏི. སམྤཊིཙྪནསྶཔི རཱུཔནཱིལཱདིཨཱཀཱརཔཊིཝིཛཱནནཾ ནཏྠཱིཏི ཀིཉྩི དྷམྨསྶ པཊིཝིཛཱནནཾ པཊིཀྑིཏྟཾ, པཉྩཧི པན ཝིཉྙཱཎེཧི སཱཏིསཡཾ ཏསྶ ཝིཛཱནནནྟི ‘‘ཨཉྙཏྲ ཨབྷིནིཔཱཏམཏྟཱ’’ཏི ན ཝུཏྟཾ. ཡསྶ པཱལི༹ཡཾ བཧིདྡྷཱཔཙྩུཔྤནྣཱརམྨཎཏཱ ཝུཏྟཱ, ཏཏོ ཨཉྙཾ ནིརུཏྟིཔཊིསམྦྷིདཾ ཨིཙྪནྟེཧི པཉྩདྭཱརཛཝནེན པཊིསམྦྷིདཱཉཱཎསྶ སཧུཔྤཏྟི པཊིསིདྡྷཱ. རཱུཔཱརཱུཔདྷམྨེཏི རཱུཔཱརཱུཔཱཝཙརདྷམྨེཏི ཨཏྠོ.

པཉྩདྭཱརིཀཙིཏྟེན ན པཊིབུཛ྄ཛྷཏཱིཏི ཀསྨཱ ཝུཏྟཾ, ནནུ རཱུཔཱདཱིནཾ ཨཱཔཱཐགམནེ ནིདྡཱཔཊིབོདྷོ ཧོཏཱིཏི? ན, པཋམཾ མནོདྭཱརིཀཛཝནསྶ ཨུཔྤཏྟིཏོཏི དསྶེནྟོ ཨཱཧ ‘‘ནིདྡཱཡནྟསྶ ཧཱི’’ཏིཨཱདི. པལོབྷེཏྭཱ སཙྩསུཔིནེན.

ཨབྱཱཀཏོཡེཝ ཨཱཝཛྫནམཏྟསྶེཝ ཨུཔྤཛྫནཏོཏི ཝདནྟི. ཨེཝཾ ཝདནྟེཧི མནོདྭཱརེཔི ཨཱཝཛྫནཾ དྭཏྟིཀྑཏྟུཾ ཨུཔྤཛྫིཏྭཱ ཛཝནཊྛཱནེ ཋཏྭཱ བྷཝངྒཾ ཨོཏརཏཱིཏི ཨདྷིཔྤེཏནྟི དཊྛབྦཾ.

ཏསྶཱ ¶ ཨེཝ ཝསེནཱཏི ཏསྶཱ ཝསེན ཨེཀཝིདྷེན ཉཱཎཝཏྠུ ཧོཏཱིཏི ཙ, ཝེདིཏབྦནྟི ཙ ཡོཛནཱ ཀཱཏབྦཱ.

ཨེཀཀནིདྡེསཝཎྞནཱ ནིཊྛིཏཱ.

(༢.) དུཀནིདྡེསཝཎྞནཱ

༧༦༧. ཨཏྠ-སདྡོ ཨཉྙཏྲ སབྷཱཝཾ གཧེཏྭཱ ཨདྷིཀརཎེསུ པཝཏྟམཱནོ ཨདྷིཀརཎཝསེན ལིངྒཔརིཝཏྟིཾ གཙྪཏཱིཏི ཨདྷིཔྤཱཡེན ཛཱཔིཏཱ ¶ ཙ སཱ ཨཏྠཱ ཙཱཏི ཛཱཔིཏཏྠཱཏི ཨཡམཏྠོ ཝིབྷཱཝིཏོཏི དཊྛབྦོ.

དུཀནིདྡེསཝཎྞནཱ ནིཊྛིཏཱ.

(༣.) ཏིཀནིདྡེསཝཎྞནཱ

༧༦༨. པཉྙཱཔརིཎཱམིཏེསཱུཏི པཉྙཱཡ པརིཔཱཙིཏེསུ. ‘‘ཡོགཝིཧིཏེསཱུཏི ཨིདཉྩ ཝིསཡཝིསེསནམཏྟམེཝ, ཏསྨཱ ཡཱནི པཉྙཱཡ ཝིཧིཏཱནི ཨཧེསུཾ ཧོནྟི བྷཝིསྶནྟི ཙ, སབྦཱནི ཏཱནི ཡོགཝིཧིཏཱནཱིཏི དཊྛབྦཱནི. སིཀྑིཏྭཱ ཀཱཏབྦཾ སིཔྤཾ, ཨིཏརཾ ཀམྨཾ. ཨཡམེཏེསཾ ཝིསེསོ. ཝཌྜྷཀཱིཀམྨནྟི ཙ ཨསིཀྑིཏྭཱཔི ཀཱཏབྦཾ ཐཱུལཀམྨཾ ‘‘ཀམྨ’’ནྟི དཊྛབྦཾ, པཉྙཱ ཨེཝ ཝཱ ཏཏྠ ཏཏྠ ‘‘ཀམྨཾ སིཔྤ’’ནྟི ཙ ཝེདིཏབྦཱ. ནཱགམཎྜལཾ ནཱམ མཎྜལཾ ཀཏྭཱ སཔྤེ ཝིཛྫཱཡ པཀྐོསིཏྭཱ བལིཾ དཏྭཱ ཝིསཱཔནཡནཾ. པརིཏྟཾ རཀྑཱ, ཡེན ‘‘ཕཱུ’’ཏི མུཁཝཱཏཾ དཏྭཱ ཝིསཾ ཨཔནཡནྟི, སོ ཨུཎྞནཱབྷིཨཱདིམནྟོ ཕུདྷམནཀམནྟོ. ‘‘ཨ ཨཱ’’ཏིཨཱདིཀཱ མཱཏིཀཱ ‘‘ཀ ཀཱ’’ཏིཨཱདིཀོ ཏཔྤབྷེདོ ཙ ལེཁཱ.

ཀུསལཾ དྷམྨཾ སཀཾ, ཨིཏརཾ ནོསཀཾ. ཙཏུནྣཾ སཙྩཱནཾ པཊིཝིཛ྄ཛྷིཏབྦཱནཾ ཏཔྤཊིཝེདྷཔཙྩཡབྷཱཝེན ཨནུལོམནཾ དཊྛབྦཾ. པུབྦེ ‘‘ཡོགཝིཧིཏེསུ ཝཱ ཀམྨཱཡཏནེསཱུ’’ཏིཨཱདིནཱ པཉྙཱ ¶ ཝུཏྟཱ, པུན ཏསྶཱ ཝེཝཙནཝསེན ‘‘ཨནུལོམིཀཾ ཁནྟི’’ནྟིཨཱདི ཝུཏྟནྟི ཨདྷིཔྤཱཡེན ‘‘ཨནུ…པེ… པཉྙཱཝེཝཙནཱནཱི’’ཏི ཨཱཧ. ཨེཏྠ ཙ ཨེཝརཱུཔིནྟི ཡཐཱཝུཏྟཀམྨཱཡཏནཱདིཝིསཡཾ ཀམྨསྶཀཏསཙྩཱནུལོམིཀསབྷཱཝཾ ཨནིཙྩཱདིཔཝཏྟིཨཱཀཱརཉྩཱཏི ཨཏྠོ. ཡཐཱཝུཏྟཱ ཙ བྷཱུམིསབྷཱཝཔཝཏྟིཨཱཀཱརནིདྡེསཱ ཁནྟིཨཱདཱིཧི ཡོཛེཏབྦཱ. ཡསྶཱ པཉྙཱཡ དྷམྨཱ ནིཛ྄ཛྷཱནཔཛཱནནཀིཙྩསངྑཱཏཾ ཨོལོཀནཾ ཁམནྟི ཨཝིཔརཱིཏསབྷཱཝཏྟཱ, སཱ པཉྙཱ དྷམྨཱནཾ ནིཛ྄ཛྷཱནཀྑམནཾ ཨེཏིསྶཱ ཨཏྠཱིཏི དྷམྨནིཛ྄ཛྷཱནཀྑནྟཱིཏི ཨཏྠོ.

༧༦༩. ཨསཾཝརཾ མུཉྩཏཱིཏི སམཱདཱནསམྤཏྟཝིརཏིསམྤཡུཏྟཙེཏནཱ ‘‘སཱིལཾ པཱུརེནྟསྶ མུཉྩཙེཏནཱ’’ཏི ཝུཏྟཱ. པུབྦཱཔརཔཉྙཱཡ ཙ དཱནསཱིལམཡཏཱཝཙནཏོ མུཉྩཨཔརཙེཏནཱཝསེན ‘‘ཨཱརབྦྷཱ’’ཏི, པུབྦཙེཏནཱཝསེན ‘‘ཨདྷིཀིཙྩཱ’’ཏི ཙ ཝཏྟུཾ ཡུཏྟནྟི ‘‘ཨདྷིཀིཙྩཱ’’ཏིཔི པཱཋོ ཡུཛྫཏི.

༧༧༠. པཉྩསཱིལདསསཱིལཱནི ¶ ཝིཉྙཱཎསྶ ཛཱཏིཡཱ ཙ པཙྩཡབྷཱུཏེསུ སངྑཱརབྷཝེསུ ཨནྟོགདྷཱནཱིཏི ‘‘ཨུཔྤཱདཱ ཝཱ’’ཏིཨཱདིཀཱཡ དྷམྨཊྛིཏིཔཱལི༹ཡཱ སངྒཧིཏཱནི. བྷཝནིབྦཏྟཀསཱིལསྶ པཉྙཱཔནཾ སཏིཔི སཝནེ ན ཏཐཱགཏདེསནཱཡཏྟནྟི བྷིཀྑུཨཱདཱིནམྤི ཏཾ ཝུཏྟཾ.

ཨདྷིཔཉྙཱཡ པཉྙཱཏི ཨདྷིཔཉྙཱཡ ཨནྟོགདྷཱ པཉྙཱ. ཨཐ ཝཱ ཨདྷིཔཉྙཱནིབྦཏྟེསུ, ཏདདྷིཊྛཱནེསུ ཝཱ དྷམྨེསུ ཨདྷིཔཉྙཱ-སདྡོ དཊྛབྦོ, ཏཏྠ པཉྙཱ ཨདྷིཔཉྙཱཡ པཉྙཱ.

༧༧༡. ཨཔཱཡུཔྤཱདནཀུསལཏཱ ཨཔཱཡཀོསལླཾ སིཡཱཏི མཉྙམཱནོ པུཙྪཏི ‘‘ཨཔཱཡཀོསལླཾ ཀཐཾ པཉྙཱ ནཱམ ཛཱཏཱ’’ཏི. ཏཾ པན པརསྶ ཨདྷིཔྤཱཡཾ ནིཝཏྟེནྟོ ‘‘པཉྙཝཱཡེཝ ཧཱི’’ཏིཨཱདིམཱཧ. ཏཏྲུཔཱཡཱཏི ཏཏྲ ཏཏྲ ཨུཔཱཡབྷཱུཏཱ. ཋཱནེ ཨུཔྤཏྟི ཨེཏསྶཱཏི ཋཱནུཔྤཏྟིཡཾ. ཀིཾ ཏཾ? ཀཱརཎཛཱནནཾ, བྷཡཱདཱིནཾ ཨུཔྤཏྟིཀྑཎེ ཏསྨིཾཡེཝ ཋཱནེ ལཧུཨུཔྤཛྫནཀནྟི ཝུཏྟཾ ཧོཏི.

ཏིཀནིདྡེསཝཎྞནཱ ནིཊྛིཏཱ.

(༤.) ཙཏུཀྐནིདྡེསཝཎྞནཱ

༧༩༣. ན ¶ པརིཏསྶཏཱིཏི ‘‘ཨཔི ནཱམ མེ ཏཎྜུལཱདཱིནི སིཡུ’’ནྟི ན པཏྠེཏི, ཏདབྷཱཝེན ཝཱ ན ཨུཏྟསཏི.

༧༩༦. ཨཔརཔྤཙྩཡེཏི པརེན ནཔཏྟིཡཱཡིཏབྦེ. དྷམྨེ ཉཱཎནྟི སཙྩཝིསཡཾ ཉཱཎཾ. ཨརིཡསཙྩེསུ ཧི དྷམྨ-སདྡོ ཏེསཾ ཨཝིཔརཱིཏསབྷཱཝཏྟཱཏི. སངྑཏཔཝརོ ཝཱ ཨརིཡམགྒོ ཏསྶ ཙ ཕལཾ དྷམྨོ, ཏཏྠ པཉྙཱ ཏཾསཧགཏཱ དྷམྨེ ཉཱཎཾ. ན ཨཉྙཉཱཎུཔྤཱདནཾ ནཡནཡནཾ, ཉཱཎསྶེཝ པན པཝཏྟིཝིསེསོཏི ཨདྷིཔྤཱཡེནཱཧ ‘‘པཙྩཝེཀྑཎཉཱཎསྶ ཀིཙྩ’’ནྟི. ཨེཏྠ ཙ ཨིམིནཱ དྷམྨེནཱཏི མགྒཉཱཎེནཱཏི ཝུཏྟཾ, དུཝིདྷམྤི པན མགྒཕལཉཱཎཾ པཙྩཝེཀྑཎཱཡ ཙ མཱུལཾ, ཀཱརཎཉྩ ནཡནཡནསྶཱཏི དུཝིདྷེནཔི ཏེན དྷམྨེནཱཏི ན ན ཡུཛྫཏི, ཏཐཱ ཙཏུསཙྩདྷམྨསྶ ཉཱཏཏྟཱ, མགྒཕལསངྑཱཏསྶ ཙ དྷམྨསྶ སཙྩཔཊིཝེདྷསམྤཡོགཾ གཏཏྟཱ ནཡནཾ ཧོཏཱིཏི ཏེན ཨིམིནཱ དྷམྨེན ¶ ཉཱཎཝིསཡབྷཱཝེན, ཉཱཎསམྤཡོགེན ཝཱ ཉཱཏེནཱཏི ཙ ཨཏྠོ ན ན ཡུཛྫཏི.

ཡདིཔི སབྦེན སབྦཾ ཨཏཱིཏཱནཱགཏཔཙྩུཔྤནྣཾ དུཀྑཾ ཨབྷིཛཱནནྟི, ཏཐཱཔི པཙྩུཔྤནྣེ སསནྟཏིཔརིཡཱཔནྣེ སཝིསེསེ ཨབྷིནིཝེསོ ཧོཏཱིཏི ཨཱཧ ‘‘ན ཏཉྙེཝ ཨིམ’’ནྟི. དིཊྛེན ཨདིཊྛེན ནཡཏོ ནཡནཉཱཎཾ, ཨདིཊྛསྶ དིཊྛཏཱཡ ཀཱརཎབྷཱུཏཏྟཱ ཀཱརཎཉཱཎཾ, ཨནུརཱུཔཏྠཝཱཙཀོ ཝཱ ཀཱརཎ-སདྡོཏི དྷམྨེ ཉཱཎསྶ ཨནུརཱུཔཉཱཎནྟི ཨཏྠོ.

སམྨུཏིམྷི ཉཱཎནྟི དྷམྨེ ཉཱཎཱདཱིནཾ ཝིཡ སཱཏིསཡསྶ པཊིཝེདྷཀིཙྩསྶ ཨབྷཱཝཱ ཝིསཡོབྷཱསནམཏྟཛཱནནསཱམཉྙེན ཉཱཎནྟི སམྨཏེསུ ཨནྟོགདྷནྟི ཨཏྠོ. སམྨུཏིཝསེན ཝཱ པཝཏྟཾ སམྨུཏིམྷི ཉཱཎཾ, ཨཝསེསཾ པན ཨིཏརཉཱཎཏྟཡཝིསབྷཱགཾ ཉཱཎཾ ཏབྦིསབྷཱགསཱམཉྙེན སམྨུཏིཉཱཎམྷི པཝིཊྛཏྟཱ སམྨུཏིཉཱཎཾ ནཱམ ཧོཏཱིཏི.

༧༩༧. ཀིལེསམཱུལཀེ ཙཱཏི ནཱིཝརཎམཱུལཀེ ཙ ཀཱམབྷཝདྷམྨེ.

༧༩༨. སཱ ཧིསྶཱཏི ཨེཏྠ ཨསྶཱཏི ཡོ ‘‘ཀཱམེསུ ཝཱིཏརཱགོ ཧོཏཱི’’ཏི ཨེཝཾ ཝུཏྟོ, ཨསྶ ¶ པཋམཛ྄ཛྷཱནསམངྒིསྶཱཏི ཨཏྠོ. སྭེཝཱཏི ཨེཏེན ཀཱམེསུ ཝཱིཏརཱགབྷཱཝནཱཝཏྠསྶེཝ པཋམཛ྄ཛྷཱནསམངྒིསྶ གཧཎེ པཝཏྟེ ཏསྶ ཏཏོ པརཾ ཨཝཏྠཾ དསྶེཏུཾ ‘‘ཀཱམེསུ ཝཱིཏརཱགོ སམཱནོ’’ཏི ཝུཏྟཾ. ཙཏུཏྠམགྒཔཉྙཱ ཚཊྛཱབྷིཉྙཱབྷཱཝཔྤཏྟིཡཱ ཏཾ པཊིཝིཛ྄ཛྷཏི ནཱམ, ཨིཏརཱ ཏདུཔནིསྶཡཏྟཱ. ཡཐཱནུརཱུཔཾ ཝཱ ཨཱསཝཀྑཡབྷཱཝཏོ, ཕལེ ཝཱ ཨཱསཝཀྑཡེ སཏི ཡཐཱནུརཱུཔཾ ཏཾནིབྦཏྟནཏོ ཙཏཱུསུཔི མགྒེསུ པཉྙཱ ཚཊྛཾ ཨབྷིཉྙཾ པཊིཝིཛ྄ཛྷཏཱིཏི དཊྛབྦཱ.

༧༩༩. ཀཱམསཧགཏཱཏི ཝཏྠུཀཱམཱརམྨཎཱ. ཙོདེནྟཱིཏི ཀཱམཱབྷིམུཁཾ ཏནྣིནྣཾ ཀརོནྟཱིཏི ཨཏྠོ. ཏདནུདྷམྨཏཱཏི ཏདནུདྷམྨཱ ཨིཙྩེཝ ཝུཏྟཾ ཧོཏི. ཏཱ-སདྡསྶ ཨཔུབྦཏྠཱབྷཱཝཏོཏི ཨདྷིཔྤཱཡེནཱཧ ‘‘ཏདནུརཱུཔསབྷཱཝཱ’’ཏི. ནིཀནྟིཾ, ནིཀནྟིསཧགཏཙིཏྟུཔྤཱདཾ ཝཱ ‘‘མིཙྪཱསཏཱི’’ཏི ཝདཏི. ‘‘ཨཧོ ཝཏ མེ ཨཝིཏཀྐཾ ཨུཔྤཛྫེཡྻཱ’’ཏི ཨཝིཏཀྐཱརམྨཎཱ ཨཝིཏཀྐསཧགཏཱ.

༨༠༡. ཨདྷིགམབྷཱཝེན ¶ ཨབྷིམུཁཾ ཛཱནནྟསྶ ཨབྷིཛཱནནྟསྶ, ཨབྷིཝིསིཊྛེན ཝཱ ཉཱཎེན ཛཱནནྟསྶ, ཨནཱརམྨཎབྷཱུཏཉྩ ཏཾ ཋཱནཾ པཱཀཊཾ ཀརོནྟསྶཱཏི ཨཏྠོ.

༨༠༢. ཝསིཏཱཔཉྩཀརཧིཏཾ ཛྷཱནཾ ཨཔྤགུཎཾ. ཨེཏྠ ཙཏསྶོ པཊིཔདཱ ཙཏྟཱརི ཨཱརམྨཎཱནཱིཏི པཉྙཱཡ པཊིཔདཱརམྨཎུདྡེསེན པཉྙཱ ཨེཝ ཨུདྡིཊྛཱཏི སཱ ཨེཝ ཝིབྷཏྟཱཏི.

ཙཏུཀྐནིདྡེསཝཎྞནཱ ནིཊྛིཏཱ.

(༥.) པཉྩཀནིདྡེསཝཎྞནཱ

༨༠༤. པཉྩངྒིཀོ སམྨཱསམཱདྷཱིཏི སམཱདྷིཨངྒབྷཱཝེན པཉྙཱ ཨུདྡིཊྛཱཏི. པཱིཏིཕརཎཏཱདིཝཙནེན ཧི ཏམེཝ ཝིབྷཛཏི, ‘‘སོ ཨིམམེཝ ཀཱཡཾ ཝིཝེཀཛེན པཱིཏིསུཁེན ཨབྷིསནྡེཏཱི’’ཏིཨཱདིནཱ (དཱི. ནི. ༡.༢༢༦; མ. ནི. ༡.༤༢༧) ནཡེན པཱིཏིཡཱ སུཁསྶ ཙ ཕརཎཾ ཝེདིཏབྦཾ. པཱིཏིཕརཎཏཱསུཁཕརཎཏཱཧི ཨཱརམྨཎེ ཋཏྭཱ ཙཏུཏྠཛ྄ཛྷཱནསྶ ཨུཔྤཱདནཏོ ‘‘པཱདཱ ཝིཡཱ’’ཏི ཏཱ ཝུཏྟཱ.

དུཏིཡཔཉྩཀེ ¶ ཙ ‘‘པཉྩཉཱཎིཀོ’’ཏི སམཱདྷིམུཁེན པཉྩཉཱཎཱནེཝ ཨུདྡིཊྛཱནི ནིདྡིཊྛཱནི ཙཱཏི དཊྛབྦཱནི. ལོཀིཡསམཱདྷིསྶ པཙྩནཱིཀཱནི ནཱིཝརཎཔཋམཛ྄ཛྷཱནནིཀནྟིཨཱདཱིནི ནིགྒཧེཏབྦཱནི. ཨཉྙེ ཀིལེསཱ ཝཱརེཏབྦཱ, ཨིམསྶ པན ཨརཧཏྟསམཱདྷིསྶ པཊིཔྤསྶདྡྷསབྦཀིལེསཏྟཱ ན ནིགྒཧེཏབྦཾ ཝཱརེཏབྦཉྩ ཨཏྠཱིཏི མགྒཱནནྟརཾ སམཱཔཏྟིཀྑཎེ ཙ ཨཔྤཡོགེནེཝ ཨདྷིགཏཏྟཱ ཙ ཋཔིཏཏྟཱ ཙ, ཨཔརིཧཱནིཝསེན ཋཔིཏཏྟཱ ཝཱ ན སསངྑཱརནིགྒཡ྄ཧཝཱརིཏགཏོ. སཏིཝེཔུལླཔྤཏྟཏྟཱཏི ཨེཏེན ཨཔྤཝཏྟམཱནཱཡཔི སཏིཡཱ སཏིབཧུལཏཱཡ སཏོ ཨེཝ ནཱམཱཏི དསྶེཏི. ཡཐཱཔརིཙྪིནྣཀཱལཝསེནཱཏི ཨེཏེན པརིཙྪིནྡནསཏིཡཱ སཏོཏི.

པཉྩཀནིདྡེསཝཎྞནཱ ནིཊྛིཏཱ.

(༦.) ཚཀྐནིདྡེསཝཎྞནཱ

༨༠༥. ཝིསུདྡྷིབྷཱཝཾ ¶ དསྶེནྟོ ‘‘དཱུར…པེ… རམྨཎཱཡཱ’’ཏི ཨཱཧ. སོཏདྷཱཏུཝིསུདྡྷཱིཏི ཙ ཙིཏྟཙེཏསིཀཱ དྷམྨཱ ཝུཏྟཱཏི ཏཏྠ ཉཱཎཾ སོཏདྷཱཏུཝིསུདྡྷིཡཱ ཉཱཎཾ. ‘‘ཙེཏོཔརིཡཉཱཎ’’ནྟི ཨིདམེཝ ཨཏྠཝསེན ‘‘པརཙིཏྟེ ཉཱཎ’’ནྟི ཨུདྡྷཊནྟི དཊྛབྦཾ. ཙུཏཱུཔཔཱཏཉཱཎསྶ དིབྦཙཀྑུཉཱཎེཀདེསཏྟཱ ‘‘ཝཎྞདྷཱཏུཨཱརམྨཎཱ’’ཏི ཝུཏྟཾ. མུདྡྷཔྤཏྟེན ཙུཏཱུཔཔཱཏཉཱཎསངྑཱཏེན དིབྦཙཀྑུཉཱཎེན སབྦཾ དིབྦཙཀྑུཉཱཎནྟི ཝུཏྟནྟི དཊྛབྦཾ.

ཚཀྐནིདྡེསཝཎྞནཱ ནིཊྛིཏཱ.

(༧.) སཏྟཀནིདྡེསཝཎྞནཱ

༨༠༦. ཏདེཝ ཉཱཎནྟི ཚབྦིདྷམྤི པཙྩཝེཀྑཎཉཱཎཾ ཝིཔསྶནཱརམྨཎབྷཱཝེན སཧ གཧེཏྭཱ ཝུཏྟནྟི ཨདྷིཔྤཱཡོ. དྷམྨཊྛིཏིཉཱཎེནཱཏི ཚཔི ཉཱཎཱནི སངྑིཔིཏྭཱ ཝུཏྟེན ཉཱཎེན. ཁཡདྷམྨནྟིཨཱདིནཱ ¶ ཧི པཀཱརེན པཝཏྟཉཱཎསྶ དསྶནཾ, ཉཱཎཝིཔསྶནཱདསྶནཏོ ཝིཔསྶནཱཔཊིཝིཔསྶནཱདསྶནམཏྟམེཝཱཏི ན ཏཾ ཨངྒནྟི ཨདྷིཔྤཱཡོ. པཱལི༹ཡཾ པན སབྦཏྠ ཉཱཎཝཙནེན ཨངྒཱནཾ ཝུཏྟཏྟཱ ནིརོདྷདྷམྨནྟི ཉཱཎནྟི ཨིཏི-སདྡེན པཀཱསེཏྭཱ ཝུཏྟཾ ཝིཔསྶནཱཉཱཎཾ སཏྟམཾ ཉཱཎནྟི ཨཡམཏྠོ དིསྶཏི. ན ཧི ཡམྤི ཏཾ དྷམྨཊྛིཏིཉཱཎཾ, ཏམྤི ཉཱཎནྟི སམྦནྡྷོ ཧོཏི ཏཾཉཱཎགྒཧཎེ ཨེཏསྨིཾ ཉཱཎབྷཱཝདསྶནསྶ ཨནདྷིཔྤེཏཏྟཱ, ‘‘ཁཡདྷམྨཾ…པེ… ནིརོདྷདྷམྨ’’ནྟི ཨེཏེསཾ སམྦནྡྷཱབྷཱཝཔྤསངྒཏོ ཙཱཏི.

སཏྟཀནིདྡེསཝཎྞནཱ ནིཊྛིཏཱ.

(༨.) ཨཊྛཀནིདྡེསཝཎྞནཱ

༨༠༨. ཝིཧཱརིཏབྦཊྛེནཱཏི པཙྩནཱིཀདྷམྨེ, དུཀྑཾ ཝཱ ཝིཙྪིནྡིཏྭཱ པཝཏྟེཏབྦཊྛེན.

ཨཊྛཀནིདྡེསཝཎྞནཱ ནིཊྛིཏཱ.

(༡༠.) དསཀནིདྡེསོ

པཋམབལནིདྡེསཝཎྞནཱ

༨༠༩. ཨཝིཛྫམཱནཾ ¶ ཋཱནཾ ཨཊྛཱནཾ, ནཏྠི ཋཱནནྟི ཝཱ ཨཊྛཱནཾ. ཨེས ‘‘ཨནཝཀཱསོ’’ཏི ཨེཏྠཱཔི ནཡོ. ཏདཏྠནིགམནམཏྟམེཝ ཧི ‘‘ནེཏཾ ཋཱནཾ ཝིཛྫཏཱི’’ཏི ཝཙནནྟི. ཨསུཁེ སུཁནྟི དིཊྛིཝིཔལླཱསོཝ ཨིདྷ སུཁཏོ ཨུཔགམནསྶ ཋཱནནྟི ཨདྷིཔྤེཏནྟི དསྶེནྟོ ‘‘ཨེཀནྟ…པེ… ཨཏྟདིཊྛིཝསེནཱ’’ཏི པདྷཱནདིཊྛིམཱཧ. བྷེདཱནུརཱུཔསྶ སཱཝནཾ ཨནུསྶཱཝནཾ, བྷེདཱནུརཱུཔེན ཝཱ ཝཙནེན ཝིཉྙཱཔནཾ.

ལིངྒེ ¶ པརིཝཏྟེ ཙ སོ ཨེཝ ཨེཀཀམྨནིབྦཏྟིཏོ བྷཝངྒཔྤབནྡྷོ ཛཱིཝིཏིནྡྲིཡཔྤབནྡྷོ ཙ, ནཱཉྙོཏི ཨཱཧ ‘‘ཨཔི པརིཝཏྟལིངྒ’’ནྟི. ཨཡཾ པཉྷོཏི ཉཱཔནིཙྪཱནིབྦཏྟཱ ཀཐཱ.

སངྒཱམཙཏུཀྐཾ སཔཏྟཝསེན ཡོཛེཏབྦཾ. སབྦཏྠ ཙ པུརིམཾ ཨབྷིསནྡྷིཙིཏྟཾ ཨཔྤམཱཎཾ, ཝདྷཀཙིཏྟཾ པན ཏདཱརམྨཎཉྩ ཛཱིཝིཏིནྡྲིཡཾ ཨཱནནྟརིཡཱནཱནནྟརིཡབྷཱཝེ པམཱཎནྟི དཊྛབྦཾ. པུཐུཛྫནསྶེཝ ཏཾ དིནྣཾ ཧོཏི. ཀསྨཱ? ཡཐཱ ཝདྷཀཙིཏྟཾ པཙྩུཔྤནྣཱརམྨཎམྤི ཛཱིཝིཏིནྡྲིཡཔྤབནྡྷཝིཙྪེདནཝསེན ཨཱརམྨཎཾ ཀཏྭཱ པཝཏྟཏི, ན ཨེཝཾ ཙཱགཙེཏནཱ. སཱ ཧི ཙཛིཏབྦཾ ཨཱརམྨཎཾ ཀཏྭཱ ཙཛནམཏྟམེཝ ཧོཏི, ཨཉྙསཀཀརཎཉྩ ཏསྶ ཙཛནཾ, ཏསྨཱ ཡསྶ ཏཾ སཀཾ ཀཏཾ, ཏསྶེཝ དིནྣཾ ཧོཏཱིཏི.

སཎྛ…པེ… ཀཔྤཝིནཱསེཡེཝ མུཙྩཏཱིཏི ཨིདཾ ཀཔྤཊྛཀཐཱཡ ན སམེཏི. ཏཏྠ ཧི ཨཊྛཀཐཱཡཾ (ཀཐཱ. ཨཊྛ. ༦༥༤-༦༥༧) ཝུཏྟཾ ‘‘ཨཱཔཱཡིཀོཏི ཨིདཾ སུཏྟཾ ཡཾ སོ ཨེཀཾ ཀཔྤཾ ཨསཱིཏིབྷཱགེ ཀཏྭཱ ཏཏོ ཨེཀབྷཱགམཏྟཾ ཀཱལཾ ཏིཊྛེཡྻ, ཏཾ ཨཱཡུཀཔྤཾ སནྡྷཱཡ ཝུཏྟ’’ནྟི. ཀཔྤཝིནཱསེཡེཝཱཏི པན ཨཱཡུཀཔྤཝིནཱསེཡེཝཱཏི ཨཏྠེ སཏི ནཏྠི ཝིརོདྷོ. ཨེཏྠ ཙ སཎྛཧནྟེཏི ཨིདཾ སྭེ ཝིནསྶིསྶཏཱིཏི ཝིཡ ཨབྷཱུཏཔརིཀཔྤཝསེན ཝུཏྟཾ. ཨེཀདིཝསམེཝ པཙྩཏི ཏཏོ པརཾ ཀཔྤཱབྷཱཝེན ཨཱཡུཀཔྤསྶཔི ཨབྷཱཝཏོཏི ཨཝིརོདྷཏོ ཨཏྠཡོཛནཱ དཊྛབྦཱ.

པཀཏཏྟོཏི ཨནུཀྑིཏྟོ. སམཱནསཾཝཱསཀོཏི ཨཔཱརཱཛིཀོ.

ཀིཾ ¶ པན ཏནྟི ཡོ སོ ‘‘ནིཡཏོ’’ཏི ཝུཏྟོ, ཏཾ ཀིཾ ནིཡམེཏཱིཏི ཨཏྠོ. ཏསྶེཝ པན ཡཐཱཔུཙྪིཏསྶ ནིཡཏསྶ མིཙྪཏྟསམྨཏྟནིཡཏདྷམྨཱནཾ ཝིཡ སབྷཱཝཏོ ཝིཛྫམཱནཏཾ ཡཐཱཔུཙྪིཏཉྩ ནིཡཱམཀཧེཏུཾ པཊིསེདྷེཏྭཱ ཡེན ‘‘ནིཡཏོ’’ཏི ‘‘སཏྟཀྑཏྟུཔརམཱདིཀོ’’ཏི ཙ ཝུཙྩཏི, ཏཾ ཡཐཱདྷིཔྤེཏཀཱརཎཾ དསྶེཏུཾ ‘‘སམྨཱསམྦུདྡྷེན ཧཱི’’ཏིཨཱདིམཱཧ. ཛཱཏསྶ ཀུམཱརསྶ ཝིཡ ཨརིཡཱཡ ཛཱཏིཡཱ ཛཱཏསྶ ནཱམམཏྟམེཏཾ ནིཡཏསཏྟཀྑཏྟུཔརམཱདིཀཾ, ནིཡཏཱནིཡཏབྷེདཾ ནཱམནྟི ཨཏྠོ. ཡདི པུབྦཧེཏུ ནིཡཱམཀོ, སོཏཱཔནྣོ ཙ ནིཡཏོཏི སོཏཱཔཏྟིམགྒཏོ ཨུདྡྷཾ ཏིཎྞཾ མགྒཱནཾ ཨུཔནིསྶཡབྷཱཝཏོ པུབྦཧེཏུཀིཙྩཾ, ཏཏོ པུབྦེ པན པུབྦཧེཏུཀིཙྩཾ ནཏྠཱིཏི སོཏཱཔཏྟིམགྒསྶ ཨུཔནིསྶཡཱབྷཱཝོ ཨཱཔཛྫཏི. ཡདི ཧི ཏསྶཔི པུབྦཧེཏུ ཨུཔནིསྶཡོ སིཡཱ, སོ ཙ ནིཡཱམཀོཏི སོཏཱཔཏྟིམགྒུཔྤཏྟིཏོ པུབྦེ ཨེཝ ནིཡཏོ སིཡཱ, ཏཉྩ ཨནིཊྛཾ, ཏསྨཱསྶ ¶ པུབྦཧེཏུནཱ ཨཧེཏུཀཏཱ ཨཱཔནྣཱཏི ཨིམམཏྠཾ སནྡྷཱཡཱཧ ‘‘ཨིཙྩསྶ ཨཧེཏུ ཨཔྤཙྩཡཱ ནིབྦཏྟིཾ པཱཔུཎཱཏཱི’’ཏི.

པཊིལདྡྷམགྒོ སོཏཱཔཏྟིམགྒོ, ཏེནེཝ སཏྟཀྑཏྟུཔརམཱདིནིཡམེ སཏི སཏྟམབྷཝཱདིཏོ ཨུདྡྷཾ པཝཏྟནཀསྶ དུཀྑསྶ མཱུལབྷཱུཏཱ ཀིལེསཱ ཏེནེཝ ཁཱིཎཱཏི ཨུཔརི ཏཡོ མགྒཱ ཨཀིཙྩཀཱ ཧོནྟཱིཏི ཨཏྠོ. ཡདི ཨུཔརི ཏཡོ མགྒཱ སཏྟཀྑཏྟུཔརམཱདིཀཾ ནིཡམེནྟི, ཏཏོ ཙ ཨཉྙོ སོཏཱཔནྣོ ནཏྠཱིཏི སོཏཱཔཏྟིམགྒསྶ ཨཀིཙྩཀཏཱ ནིཔྤཡོཛནཏཱ ཨཱཔཛྫཏཱིཏི ཨཏྠོ. ཨཐ སཀྐཱཡདིཊྛཱདིཔྤཧཱནཾ དསྶནཀིཙྩཾ, ཏེསཾ པཧཱནེན སཏྟཀྑཏྟུཔརམཱདིཏཱཡ བྷཝིཏབྦཾ. སཱ ཙུཔརིམགྒེཧི ཨེཝ ཧོཏཱིཏི སཏྟམབྷཝཱདིཏོ ཨུདྡྷཾ པཝཏྟིཏོ ཏེན ཝིནཱ ཝུཊྛཱནེ སཀྐཱཡདིཊྛཱདིཔྤཧཱནེན ཙ ཏེན ཝིནཱ བྷཝིཏབྦནྟི ཨཱཧ ‘‘པཋམམགྒེན ཙ ཨནུཔྤཛྫིཏྭཱཝ ཀིལེསཱ ཁེཔེཏབྦཱ ཧོནྟཱི’’ཏི. ན ཨཉྙོ ཀོཙི ནིཡམེཏཱིཏི ནཱམཀརཎནིམིཏྟཏོ ཝིཔསྶནཱཏོ ཨཉྙོ ཀོཙི ནིཡཱམཀོ ནཱམ ནཏྠཱིཏི ཨཏྠོ. ཝིཔསྶནཱཝ ནིཡམེཏཱིཏི ཙ ནཱམཀརཎནིམིཏྟཏཾཡེཝ སནྡྷཱཡ ཝུཏྟཾ. ཏེནེཝཱཧ ‘‘ཨིཏི སམྨཱསམྦུདྡྷེན གཧིཏནཱམམཏྟམེཝ ཏ’’ནྟི.

ན ཨུཔྤཛྫནྟཱིཏི པན ཨཏྠཱིཏི ‘‘ན མེ ཨཱཙརིཡོ ཨཏྠི, སདིསོ མེ ན ཝིཛྫཏཱི’’ཏིཨཱདིཾ (མ. ནི. ༡.༢༨༥; ༢.༣༤༡; མཧཱཝ. ༡༡; ཀཐཱ. ༤༠༥) ཨིམིསྶཱ ལོཀདྷཱཏུཡཱ ཋཏྭཱ ཝདནྟེན བྷགཝཏཱ ‘‘ཀིཾ པནཱཝུསོ ¶ སཱརིཔུཏྟ, ཨཏྠེཏརཧི ཨཉྙེ སམཎཱ ཝཱ བྲཱཧྨཎཱ ཝཱ བྷགཝཏཱ སམསམཱ སམྦོདྷིཡནྟི ཨེཝཾ པུཊྛཱཧཾ, བྷནྟེ, ནོཏི ཝདེཡྻ’’ནྟི (དཱི. ནི. ༣.༡༦༡) ཝཏྭཱ ཏསྶ ཀཱརཎཾ དསྶེཏུཾ ‘‘ཨཊྛཱནམེཏཾ ཨནཝཀཱསོ, ཡཾ ཨེཀིསྶཱ ལོཀདྷཱཏུཡཱ དྭེ ཨརཧནྟོ སམྨཱསམྦུདྡྷཱ’’ཏི (མ. ནི. ༣.༡༢༩) ཨིམཾ སུཏྟཾ དསྶེནྟེན དྷམྨསེནཱཔཏིནཱ ཙ བུདྡྷཀྑེཏྟབྷཱུཏཾ ཨིམཾ ལོཀདྷཱཏུཾ ཋཔེཏྭཱ ཨཉྙཏྠ ཨནུཔྤཏྟི ཝུཏྟཱ ཧོཏཱིཏི ཨདྷིཔྤཱཡོ.

‘‘ཡོ པན བྷིཀྑཱུ’’ཏིཨཱདིནཱ ཝུཏྟཱནི སིཀྑཱཔདཱནི མཱཏིཀཱ, ཏཱཡ ཨནྟརཧིཏཱཡ ནིདཱནུདྡེསསངྑཱཏེ པཱཏིམོཀྑེ པབྦཛྫཱུཔསམྤདཱཀམྨེསུ ཙ སཱསནཾ ཏིཊྛཏཱིཏི ཨཏྠོ. པཱཏིམོཀྑེ ཝཱ ཨནྟོགདྷཱ པབྦཛྫཱ ཨུཔསམྤདཱ ཙ ཏདུབྷཡཱབྷཱཝེ པཱཏིམོཀྑཱབྷཱཝཏོ, ཏསྨཱ པཱཏིམོཀྑེ, ཏཱསུ ཙ སཱསནཾ ཏིཊྛཏཱིཏི ཝུཏྟཾ. ཨོསཀྐིཏཾ ནཱམཱཏི པཙྪིམཔཊིཝེདྷསཱིལབྷེདདྭཡཾ ཨེཀཏོ ཀཏྭཱ ཏཏོ པརཾ ཝིནཊྛཾ ནཱམ ཧོཏཱིཏི ཨཏྠོ.

ཏཱཏི རསྨིཡོ. ཀཱརུཉྙནྟི པརིདེཝནཀཱརུཉྙཾ.

ཨནཙྪརིཡཏྟཱཏི ¶ དྭཱིསུ ཨུཔྤཛྫམཱནེསུ ཨཙྪརིཡཏྟཱབྷཱཝདོསཏོཏི ཨཏྠོ. ཝིཝཱདབྷཱཝཏོཏི ཝིཝཱདཱབྷཱཝཏྠཾ དྭེ ན ཨུཔྤཛྫནྟཱིཏི ཨཏྠོ.

ཨེཀཾ བུདྡྷཾ དྷཱརེཏཱིཏི ཨེཀབུདྡྷདྷཱརཎཱི. ཨེཏེན ཨེཝཾསབྷཱཝཱ ཨེཏེ བུདྡྷགུཎཱ, ཡེན དུཏིཡབུདྡྷགུཎེ དྷཱརེཏུཾ ཨསམཏྠཱ ཨཡཾ ལོཀདྷཱཏཱུཏི དསྶེཏི. པཙྩཡཝིསེསནིཔྥནྣཱནཉྷི དྷམྨཱནཾ སབྷཱཝཝིསེསོ ན སཀྐཱ དྷཱརེཏུནྟི. སམཾ ཨུདྡྷཾ པཛྫཏཱིཏི སམུཔཱདིཀཱ, ཨུདཀསྶོཔརི སམཾ གཱམིནཱིཏི ཨཏྠོ. དྭིནྣམྤཱིཏི དྭེཔི, དྭིནྣམྤི ཝཱ སརཱིརབྷཱརཾ. ཚཱདེནྟནྟི རོཙཡམཱནཾ. སཀིཾ བྷུཏྟོཝཱཏི ཨེཀམྤི ཨཱལོཔཾ ཨཛ྄ཛྷོཧརིཏྭཱཝ མརེཡྻཱཏི ཨཏྠོ.

ཨཏིདྷམྨབྷཱརེནཱཏི དྷམྨེན ནཱམ པཐཝཱི ཏིཊྛེཡྻ, སཱ ཀིཾ ཏེནེཝ ཙལཏཱིཏི ཨདྷིཔྤཱཡོ. པུན ཐེརོ ‘‘རཏནཾ ནཱམ ལོཀེ ཀུཊུམྦཾ སནྡྷཱརེནྟཾ ཨབྷིམཏཉྩ ལོཀེན ཨཏྟནོ གརུསབྷཱཝཏཱཡ སཀཊབྷངྒསྶ ཀཱརཎཾ ཨཏིབྷཱརབྷཱུཏཾ དིཊྛཾ. ཨེཝཾ དྷམྨོ ཙ ཧིཏསུཁཝིསེསེཧི ཏཾསམངྒིནཾ དྷཱརེནྟོ ཨབྷིམཏོ ཙ ཝིཉྙཱུཧི གམྦྷཱིརཱཔྤམེཡྻབྷཱཝེན གརུསབྷཱཝཏྟཱ ཨཏིབྷཱརབྷཱུཏོ པཐཝཱིཙལནསྶ ཀཱརཎཾ ཧོཏཱི’’ཏི དསྶེནྟོ ¶ ‘‘ཨིདྷ, མཧཱརཱཛ, དྭེ སཀཊཱ’’ཏིཨཱདིམཱཧ. ཨེཀསྶཱཏི ཨེཀསྨཱ, ཨེཀསྶ ཝཱ སཀཊསྶ རཏནཾ, ཏསྨཱ སཀཊཏོ གཧེཏྭཱཏི ཨཏྠོ. ཨོསཱརིཏནྟི པཝེསིཏཾ ཨཱཧཊཾ ཝུཏྟནྟི ཨཏྠོ.

སབྷཱཝཔཀཏིཀཱཏི ཨཀིཏྟིམཔཀཏིཀཱཏི ཨཏྠོ. ཀཱརཎམཧནྟཏྟཱཏི མཧནྟེཧི པཱརམིཏཱཀཱརཎེཧི བུདྡྷགུཎཱནཾ ནིབྦཏྟིཏོཏི ཝུཏྟཾ ཧོཏི. པཐཝཱིཨཱདཡོ མཧནྟཱ ཨཏྟནོ ཨཏྟནོ ཝིསཡེ ཨེཀེཀཱཝ, ཨེཝཾ སམྨཱསམྦུདྡྷོཔི མཧནྟོ ཨཏྟནོ ཝིསཡེ ཨེཀོ ཨེཝ. ཀོ ཙ ཏསྶ ཝིསཡོ? ཡཱཝཏཀཾ ཉེཡྻཾ, ཨེཝཾ ཨཱཀཱསོ ཝིཡ ཨནནྟཝིསཡོ བྷགཝཱ ཨེཀོ ཨེཝ ཧོཏཱིཏི ཝདནྟོ ལོཀདྷཱཏྭནྟརེསུཔི དུཏིཡསྶ ཨབྷཱཝཾ དསྶེཏི.

པུབྦབྷཱགེ ཨཱཡཱུཧནཝསེན ཨཱཡཱུཧནསམངྒིཏཱ སནྣིཊྛཱནཙེཏནཱཝསེན ཙེཏནཱསམངྒིཏཱ ཙ ཝེདིཏབྦཱ, སནྟཏིཁཎཝསེན ཝཱ. ཝིཔཱཀཱརཧནྟི དུཏིཡབྷཝཱདཱིསུ ཝིཔཙྩནཔཀཏིཏཾ སནྡྷཱཡ ཝདཏི. ཙལཏཱིཏི པརིཝཏྟཏི. སུནཁེཧི ཝཛནསཱིལོ སུནཁཝཱཛིཀོ.

པཋམབལནིདྡེསཝཎྞནཱ ནིཊྛིཏཱ.

དུཏིཡབལནིདྡེསཝཎྞནཱ

༨༡༠. གཏིཏོ ¶ ཨཉྙཱ གཏིསམྤཏྟི ནཱམ ནཏྠཱིཏི དསྶེནྟོ ‘‘སམྤནྣཱ གཏཱི’’ཏི ཨཱཧ. མཧཱསུདསྶནཱདིསུརཱཛཀཱལོ པཋམཀཔྤིཀཱདིསུམནུསྶཀཱལོ ཙ ཀཱལསམྤཏྟི.

ཨེཀནྟཾ ཀུསལསྶེཝ ཨོཀཱསོཏི ཨིདཾ ཡདིཔི ཀོཙི ཀཱཡསུཙརིཏཱདིཔཡོགསམྤཏྟིཡཾ ཋིཏཾ བཱདྷེཡྻ, ཏཾ པན བཱདྷནཾ བཱདྷཀསྶེཝ ཨིསྶཱདིནིམིཏྟེན ཝིཔརཱིཏགྒཱཧེན ཛཱཏཾ. སཱ པཡོགསམྤཏྟི སབྷཱཝཏོ སུཁཝིཔཱཀསྶེཝ པཙྩཡོ, ན དུཀྑཝིཔཱཀསྶཱཏི ཨིམམཏྠཾ སནྡྷཱཡ ཝུཏྟཾ. མཀྐཊོ བྷཏྟཔུཊཾ བནྡྷཊྛཱནེ མུཉྩིཏྭཱ བྷུཉྫིཏུཾ ན ཛཱནཱཏི, ཡཏྠ ཝཱ ཏཏྠ ཝཱ བྷིནྡིཏྭཱ ཝིནཱསེཏི, ཨེཝཾ ཨནུཔཱཡཉྙཱུཔི བྷོགེ. སུསཱནེ ཚཌྜེཏྭཱཏིཨཱདིནཱ གྷཱཏེཏྭཱ ཚཌྜིཏསྶ ཝུཊྛཱནཱབྷཱཝོ ཝིཡ ཨཔཱཡཏོ ཝུཊྛཱནཱབྷཱཝོཏི དསྶེཏི.

‘‘པཙྩརཱི’’ཏིཔི ¶ ཨུལུ༹མྤསྶ ནཱམཾ, ཏེན ཨེཏྠ ཀཏཱ ‘‘མཧཱཔཙྩརཱི’’ཏི ཝུཙྩཏི. ཨུདཀེ མརཎཾ ཐལེ མརཎཉྩ ཨེཀམེཝཱཏི ཀསྨཱ ཝུཏྟཾ, ནནུ སཀྐེན ‘‘སམུདྡཱརཀྑཾ ཀརིསྶཱམཱི’’ཏི ཝུཏྟནྟི? སཙྩཾ ཝུཏྟཾ, ཛཱིཝིཏསྶ ལཧུཔརིཝཏྟིཏཾ པཀཱསེནྟེཧི ཐེརེཧི ཨེཝཾ ཝུཏྟཾ, ལཧུཔརིཝཏྟིཏཱཡ ཛཱིཝིཏཧེཏུ ན གམིསྶཱམཱཏི ཨདྷིཔྤཱཡོ. ཨཐ ཝཱ ཨུདཀེཏི ནཱགདཱིཔཾ སནྡྷཱཡ ཝུཏྟཾ, ཐལེཏི ཛམྦུདཱིཔཾ.

ཐེརོ ན དེཏཱིཏི ཀཐམཧཾ ཨེཏེན ཉཱཏོ, ཀེནཙི ཀིཉྩི ཨཱཙིཀྑིཏཾ སིཡཱཏི སཉྙཱཡ ན ཨདཱསི. ཏེནེཝ ‘‘མཡམྤི ན ཛཱནཱམཱ’’ཏི ཝུཏྟཾ. ཨཔརསྶཱཏི ཨཔརསྶ བྷིཀྑུནོ པཏྟཾ ཨཱདཱཡ…པེ… ཐེརསྶ ཧཏྠེ ཋཔེསཱིཏི ཡོཛནཱ. ཨནཱཡཏནེཏི ནིཀྐཱརཎེ, ཨཡུཏྟེ ཝཱ ནསྶནཊྛཱནེ. ཏུཝཾ ཨཏྟཱནཾ རཀྑེཡྻཱསི, མཡཾ པན མཧལླཀཏྟཱ ཀིཾ རཀྑིཏྭཱ ཀརིསྶཱམ, མཧལླཀཏྟཱ ཨེཝ ཙ རཀྑིཏུཾ ན སཀྑིསྶཱམཱཏི ཨདྷིཔྤཱཡོ. ཨནཱགཱམིཏྟཱ ཝཱ ཐེརོ ཨཏྟནཱ ཝཏྟབྦཾ ཛཱནིཏྭཱ ཨོཝདཏི.

སམྨཱཔཡོགསྶ གཏམགྒོཏི སམྨཱཔཡོགེན ནིཔྥཱདིཏཏྟཱ ཏསྶ སཉྫཱནནཀཱརཎནྟི ཨཏྠོ.

བྷཱུཏམཏྠཾ ¶ ཀཏྭཱ ཨབྷཱུཏོཔམཾ ཀཐཡིསྶཏཱིཏི ཨདྷིཔྤཱཡོ. མནུསྶཱཏི བྷཎྜཱགཱརིཀཱདིནིཡུཏྟཱ མནུསྶཱ མཧནྟཏྟཱ སམྤཊིཙྪིཏུཾ ནཱསཀྑིཾསུ.

དུཏིཡབལནིདྡེསཝཎྞནཱ ནིཊྛིཏཱ.

ཏཏིཡབལནིདྡེསཝཎྞནཱ

༨༡༡. ཨཉྩིཏཱཏི གཏཱ. པེཙྩཱཏི པུན, མརིཏྭཱཏི ཝཱ ཨཏྠོ. ཨུསྶནྣཏྟཱཏི ཝིཏཀྐབཧུལཏཱཡ ཨུསྶནྣཏྟཱཏི ཝདནྟི, སཱུརཏཱདཱིཧི ཝཱ ཨུསྶནྣཏྟཱ. དིབྦནྟཱིཏི ཀཱིལ༹ནྟི.

སཉྫཱིཝཀཱལ༹སུཏྟསངྒྷཱཏརོརུཝམཧཱརོརུཝཏཱཔནམཧཱཏཱཔནཨཝཱིཙིཡོ ཨཊྛ མཧཱནིརཡཱ. ཨེཀེཀསྶ ཙཏྟཱརི དྭཱརཱནི, ཨེཀེཀསྨིཾ དྭཱརེ ཙཏྟཱརོ ཙཏྟཱརོ གཱུཐནིརཡཱདཡོཏི ཨེཝཾ སོལ༹ས ཨུསྶདནིརཡེ ཝཎྞཡནྟི.

སཀྐསུཡཱམཱདཡོ ¶ ཝིཡ ཛེཊྛཀདེཝརཱཛཱ. པཛཱཔཏིཝརུཎཨཱིསཱནཱདཡོ ཝིཡ དུཏིཡཱདིཊྛཱནནྟརཀཱརཀོ པརིཙཱརཀོ ཧུཏྭཱ.

ཏཏིཡབལནིདྡེསཝཎྞནཱ ནིཊྛིཏཱ.

ཙཏུཏྠབལནིདྡེསཝཎྞནཱ

༨༡༢. ཀཔྤོཏི དྭེདྷཱབྷཱུཏགྒོ. ཨེཏྠ ཙ བཱིཛཱདིདྷཱཏུནཱནཏྟཝསེན ཁནྡྷཱདིདྷཱཏུནཱནཏྟཾ ཝེདིཏབྦཾ.

ཙཏུཏྠབལནིདྡེསཝཎྞནཱ ནིཊྛིཏཱ.

པཉྩམབལནིདྡེསཝཎྞནཱ

༨༡༣. ཨཛ྄ཛྷཱསཡདྷཱཏཱུཏི ¶ ཨཛ྄ཛྷཱསཡསབྷཱཝོ. ཡཐཱ གཱུཐཱདཱིནཾ དྷཱཏུསབྷཱཝོ ཨེསོ, ཡཾ གཱུཐཱདཱིཧེཝ སཾསནྡཏི, ཨེཝཾ པུགྒལཱནཾ ཨཛ྄ཛྷཱསཡསྶེཝེས སབྷཱཝོ, ཡཾ དུསྶཱིལཱདཡོ དུསྶཱིལཱདིཀེཧེཝ སཾསནྡནྟཱིཏི ཝུཏྟཾ ཧོཏི. བྷིཀྑཱུཔི ཨཱཧཾསཱུཏི ཨཉྙམཉྙཾ ཨཱཧཾསུ. ཨཱཝུསོ ཨིམེ མནུསྶཱ ‘‘ཡཐཱསབྷཱགེན པརིབྷུཉྫཐཱ’’ཏི ཝདནྟཱ ཨམྷེ སབྷཱགཱསབྷཱགེ ཝིདིཏྭཱ ཧཱིནཛ྄ཛྷཱསཡཔཎཱིཏཛ྄ཛྷཱསཡཏཾ པརིཙྪིནྡིཏྭཱ དྷཱཏུསཾཡུཏྟཀམྨེ ཨུཔནེནྟི ཏསྶ པཡོགཾ དཊྛུཀཱམཱཏི ཨཏྠོ, ཨེཝཾ སབྷཱགཝསེནེཝ ཨཛ྄ཛྷཱསཡདྷཱཏུཔརིཙྪིནྡནཏོ ཨཛ྄ཛྷཱསཡདྷཱཏུསབྷཱགཝསེན ནིཡམེཏཱིཏི ཨདྷིཔྤཱཡོ.

པཉྩམབལནིདྡེསཝཎྞནཱ ནིཊྛིཏཱ.

ཚཊྛབལནིདྡེསཝཎྞནཱ

ཙརིཏནྟི ཨིདྷ དུཙྩརིཏཾ སུཙརིཏནྟི ཝུཏྟཾ. ཨཔྤརཛཾ ཨཀྑཾ ཨེཏེསནྟི ཨཔྤརཛཀྑཱཏི ཨཏྠོ ཝིབྷཱཝིཏོ, ཨཔྤརཛཾ ཨཀྑིམྷི ཨེཏེསནྟི ཨཔྤརཛཀྑཱཏིཔི སདྡཏྠོ སམྦྷཝཏི. ཨེཏྠ ཙ ཨཱསཡཛཱནནཱདིནཱ ཡེཧི ¶ ཨིནྡྲིཡེཧི པརོཔརེཧི སཏྟཱ ཀལྱཱཎཔཱཔཱསཡཱདིཀཱ ཧོནྟི, ཏེསཾ ཛཱནནཾ ཝིབྷཱཝེཏཱིཏི ཝེདིཏབྦཾ. ཨེཝཉྩ ཀཏྭཱ ཨིནྡྲིཡཔརོཔརིཡཏྟཨཱསཡཱནུསཡཉཱཎཱནཾ ཝིསུཾ ཨསཱདྷཱརཎཏཱ, ཨིནྡྲིཡཔརོཔརིཡཏྟནཱནཱདྷིམུཏྟིཀཏཱཉཱཎཱནཾ ཝིསུཾ བལཏཱ ཙ སིདྡྷཱ ཧོཏི.

༨༡༥. ཡདརིཡཱཏི ཡེ ཨརིཡཱ. ཨཱཝསིཾསཱུཏི ནིསྶཱཡ ཝསིཾསུ. ཀེ པན ཏེ? ‘‘ཨིདྷ, བྷིཀྑཝེ, བྷིཀྑུ པཉྩངྒཝིཔྤཧཱིནོ ཧོཏི ཚལ༹ངྒསམནྣཱགཏོ ཨེཀཱརཀྑོ ཙཏུརཱཔསྶེནོ པནུཎྞཔཙྩེཀསཙྩོ སམཝཡསཊྛེསནོ ཨནཱཝིལསངྐཔྤོ པསྶདྡྷཀཱཡསངྑཱརོ སུཝིམུཏྟཙིཏྟོ སུཝིམུཏྟཔཉྙོ’’ཏི (དཱི. ནི. ༣.༣༤༨; ཨ. ནི. ༡༠.༡༩) ཨེཝཾ ཝུཏྟཱ. ཨེཏེསུ པཉྩངྒཝིཔྤཧཱིནཔཙྩེཀསཙྩཔནོདནཨེསནཱསམཝཡསཛྫནཱནི ‘‘སངྑཱཡེཀཾ པཊིསེཝཏི ཨདྷིཝཱསེཏི པརིཝཛྫེཏི ཝིནོདེཏཱི’’ཏི (མ. ནི. ༢.༡༦༨) ཝུཏྟེསུ ཨཔསྶེནེསུ ཝིནོདནཉྩ མགྒཀིཙྩཱནེཝ, ཨིཏརེ ཙ མགྒེནེཝ སམིཛ྄ཛྷནྟི. ཏེནཱཧ ‘‘ཨེཏཉྷི སུཏྟཾ…པེ… དཱིཔེཏཱི’’ཏི.

༨༡༦. ཨཱརམྨཎསནྟཱནཱནུསཡནེསུ ¶ ཨིཊྛཱརམྨཎེ ཨཱརམྨཎཱནུསཡནེན ཨནུསེཏི. ཨཱཙིཎྞསམཱཙིཎྞཱཏི ཨེཏེན སམནྟཏོ ཝེཋེཏྭཱ ཝིཡ ཋིཏབྷཱཝེན ཨནུསཡིཏཏཾ དསྶེཏི. བྷཝསྶཔི ཝཏྠུཀཱམཏྟཱ, རཱགཝསེན ཝཱ སམཱནཏྟཱ ‘‘བྷཝརཱགཱནུསཡོ…པེ… སངྒཧིཏོ’’ཏི ཨཱཧ.

༨༡༨. ‘‘པཎཱིཏཱདྷིམུཏྟིཀཱ ཏིཀྑིནྡྲིཡཱ, ཨིཏརེ མུདིནྡྲིཡཱ’’ཏི ཨེཝཾ ཨིནྡྲིཡཝིསེསདསྶནཏྠམེཝ ཨདྷིམུཏྟིགྒཧཎནྟི ཨཱཧ ‘‘ཏིཀྑིནྡྲིཡམུདིནྡྲིཡབྷཱཝདསྶནཏྠ’’ནྟི.

༨༡༩. པཧཱནཀྐམཝསེནཱཏི ཨེཏྠ པཧཱཏབྦཔཛཧནཀྐམོ པཧཱནཀྐམོཏི དཊྛབྦོ, ཡསྶ པཧཱནེན བྷཝིཏབྦཾ, ཏཾ ཏེནེཝ པཧཱནེན པཋམཾ ཝུཙྩཏི, ཏཏོ ཨཔྤཧཱཏབྦནྟི ཨཡཾ ཝཱ པཧཱནཀྐམོ.

༨༢༠. མགྒསྶ ཨུཔནིསྶཡབྷཱུཏཱནི ཨིནྡྲིཡཱནི ཨུཔནིསྶཡཨིནྡྲིཡཱནི.

༨༢༦. ནིབྦུཏིཚནྡརཧིཏཏྟཱ ཨཙྪནྡིཀཊྛཱནཾ པཝིཊྛཱ. ཡསྨིཾ བྷཝངྒེ པཝཏྟམཱནེ ཏཾསནྟཏིཡཾ ལོཀུཏྟརཾ ནིབྦཏྟཏི, ཏཾ ཏསྶ པཱདཀཾ.

ཚཊྛབལནིདྡེསཝཎྞནཱ ནིཊྛིཏཱ.

སཏྟམབལནིདྡེསཝཎྞནཱ

༨༢༨. ནིདྡཱཡིཏྭཱཏི ¶ ཀམྨཊྛཱནཾ མནསི ཀརོནྟོ ནིདྡཾ ཨོཀྐམིཏྭཱ པཊིབུདྡྷོ སམཱཔཏྟིཾ སམཱཔནྣོམྷཱིཏི ཨཏྠོ. ནཱིཝརཎཱདཱིཧི ཝིསུདྡྷཙིཏྟསནྟཏི ཨེཝ ཙིཏྟམཉྫཱུསཱ, སམཱདྷི ཝཱ, ཀམྨཊྛཱནཾ ཝཱ. ཙིཏྟཾ ཋཔེཏུནྟི སམཱཔཏྟིཙིཏྟཾ ཋཔེཏུཾ. སཉྙཱཝེདཡིཏཱནཾ ཨཔགམོ ཨེཝ ཨཔགམཝིམོཀྑོ.

སཉྙཱམནསིཀཱརཱནཾ ཀཱམཱདིདུཏིཡཛ྄ཛྷཱནཱདིཔཀྑནྡནཱནི ‘‘ཧཱནབྷཱགིཡཝིསེསབྷཱགིཡདྷམྨཱ’’ཏི ¶ དསྶིཏཱནི, ཏེཧི པན ཛྷཱནཱནཾ ཏཾསབྷཱཝཏཱ དྷམྨ-སདྡེན ཝུཏྟཱ. པགུཎབྷཱཝཝོདཱནཾ པགུཎཝོདཱནཾ. ཏདེཝ པཋམཛ྄ཛྷཱནཱདཱིཧི ཝུཊྛཧིཏྭཱ དུཏིཡཛ྄ཛྷཱནཱདིཨདྷིགམསྶ པཙྩཡཏྟཱ ‘‘ཝུཊྛཱནཾ ནཱམཱ’’ཏི ཝུཏྟཾ. ‘‘ཝོདཱནམྤི ཝུཊྛཱནཾ, ཏམྷཱ ཏམྷཱ སམཱདྷིམྷཱ ཝུཊྛཱནམྤི ཝུཊྛཱན’’ནྟི ཨིམཱཡ ཝུཊྛཱནཔཱལི༹ཡཱ ཨསངྒཧིཏཏྟཱ ནིརོདྷསམཱཔཏྟིཡཱ ཝུཊྛཱནཾ ‘‘པཱལི༹མུཏྟཀཝུཊྛཱནཾ ནཱམཱ’’ཏི ཝུཏྟཾ. ཡེ པན ‘‘ནིརོདྷཏོ ཕལསམཱཔཏྟིཡཱ ཝུཊྛཱན’’ནྟི པཱལི༹ ནཏྠཱིཏི ཝདེཡྻུཾ, ཏེ ‘‘ནིརོདྷཱ ཝུཊྛཧནྟསྶ ནེཝསཉྙཱནཱསཉྙཱཡཏནཾ ཕལསམཱཔཏྟིཡཱ ཨནནྟརཔཙྩཡེན པཙྩཡོ’’ཏི (པཊྛཱ. ༡.༡.༤༡༧) ཨིམཱཡ པཱལི༹ཡཱ པཊིསེདྷེཏབྦཱ.

སཏྟམབལནིདྡེསཝཎྞནཱ ནིཊྛིཏཱ.

དསམབལནིདྡེསཝཎྞནཱ

༨༣༡. རཱགཱདཱིཧི ཙེཏསོ ཝིམུཏྟིབྷཱུཏོ སམཱདྷི ཙེཏོཝིམུཏྟི. པཉྙཱཝ ཝིམུཏྟི པཉྙཱཝིམུཏྟི. ཀམྨནྟརཝིཔཱཀནྟརམེཝཱཏི ཀམྨནྟརསྶ ཝིཔཱཀནྟརམེཝཱཏི ཨཏྠོ. ཙེཏནཱཙེཏནཱསམྤཡུཏྟཀདྷམྨེ ནིརཡཱདིནིབྦཱནགཱམིནིཔཊིཔདཱབྷཱུཏེ ཀམྨནྟི གཧེཏྭཱ ཨཱཧ ‘‘ཀམྨཔརིཙྪེདམེཝཱ’’ཏི. ཨཔྤེཏུཾ ན སཀྐོཏི ཨཊྛམནཝམབལཱནི ཝིཡ, ཏཾསདིསཾ ཨིདྡྷིཝིདྷཉཱཎཾ ཝིཡ ཝིཀུབྦིཏུཾ. ཨེཏེན དསབལསདིསཏཉྩ ཝཱརེཏི, ཛྷཱནཱདིཉཱཎཾ ཝིཡ ཝཱ ཨཔྤེཏུཾ ཝིཀུབྦིཏུཉྩ. ཡདིཔི ཧི ཛྷཱནཱདིཔཙྩཝེཀྑཎཉཱཎཾ སཏྟམབལནྟི ཏསྶ སཝིཏཀྐསཝིཙཱརཏཱ ཝུཏྟཱ, ཏཐཱཔི ཛྷཱནཱདཱིཧི ¶ ཝིནཱ པཙྩཝེཀྑཎཱ ནཏྠཱིཏི ཛྷཱནཱདིསཧགཏཾ ཉཱཎཾ ཏདནྟོགདྷཾ ཀཏྭཱ ཨེཝཾ ཝུཏྟནྟི ཝེདིཏབྦཾ. ཨཐ ཝཱ སབྦཉྙུཏཉྙཱཎཾ ཛྷཱནཱདིཀིཙྩཾ ཝིཡ ན སབྦཾ བལཀིཙྩཾ ཀཱཏུཾ སཀྐོཏཱིཏི དསྶེཏུཾ ‘‘ཏཉྷི ཛྷཱནཾ ཧུཏྭཱ ཨཔྤེཏུཾ ཨིདྡྷི ཧུཏྭཱ ཝིཀུབྦིཏུཉྩ ན སཀྐོཏཱི’’ཏི ཝུཏྟཾ, ན པན ཀསྶཙི བལསྶ ཛྷཱནཨིདྡྷིབྷཱཝཏོཏི དཊྛབྦཾ.

དསམབལནིདྡེསཝཎྞནཱ ནིཊྛིཏཱ.

ཉཱཎཝིབྷངྒཝཎྞནཱ ནིཊྛིཏཱ.

༡༧. ཁུདྡཀཝཏྠུཝིབྷངྒོ

༡. ཨེཀཀམཱཏིཀཱདིཝཎྞནཱ

༨༣༢. ‘‘ཏེཏྟིཾསཏི ¶ ¶ ཏིཀཱ’’ཏི ཝུཏྟཾ, ཏེ པན པཉྩཏིཾས. ཏཐཱ ‘‘པུརིསམལཱདཡོ ཨཊྛ ནཝཀཱ’’ཏི ཝུཏྟཾ, ཏེ པན ཨཱགྷཱཏཝཏྠུཨཱདཡོ ནཝ. ཡེ ‘‘དྭེ ཨཊྛཱརསཀཱ’’ཏིཨཱདིམྷི ཝུཏྟཱ, ཏེ ཨེཝ ‘‘ཨིཏི ཨཏཱིཏཱནི ཚཏྟིཾསཱ’’ཏིཨཱདིནཱ ཏཡོ ཚཏྟིཾསཀཱ ཀཏཱཏི ཨཱཧ ‘‘ཚ ཨཊྛཱརསཀཱ’’ཏི, དྭཱསཊྛི པན དིཊྛིགཏཱནི ཨཉྙཏྠ ཝུཏྟབྷཱཝེནེཝ ཨིདྷ ནིཀྑིཏྟཱནཱིཏི ན གཧིཏཱནཱིཏི དཊྛབྦཱནི.

ཨེཀཀམཱཏིཀཱདིཝཎྞནཱ ནིཊྛིཏཱ.

(༡.) ཨེཀཀནིདྡེསཝཎྞནཱ

༨༤༣-༨༤༤. ཨཏྠི པཊིཙྩཾ ནཱམཱཏི ཡཐཱ ‘‘ཙཀྑུཉྩ པཊིཙྩཱ’’ཏིཨཱདཱིསུ ནིསྶཡཱདིཔཙྩཡབྷཱཝེན པཊིཙྩཱཏི ཝུཏྟཾ, ན ཏཐཱ ཨིདྷ ཁཏྟིཡཱདིཛཱཏཱིནཾ པརམཏྠཏོ ཨཝིཛྫམཱནཱནཾ ནིསྶཡཱདིཔཙྩཡཏྟསྶ ཨབྷཱཝཱ. ཡེསུ པན ཁནྡྷེསུ སནྟེསུ ཁཏྟིཡཱདིསམྨུཏི ཧོཏི, ཏེསཾ ཨབྦོཙྪིནྣཏཱཝ ཁཏྟིཡཱདིཛཱཏིཡཱ ཨཏྠིཏཱ, སཱ ཨིདྷ པཊིཙྩ-སདྡེན ཝིབྷཱཝིཏཱཏི ཨཏྠོ. ཨེཀིསྶཱ སེཎིཡཱཏི ཨསམྦྷིནྣཱཡཱཏི ཨཏྠོ.

པཉྷཝིསྶཛྫནཱདིཀིརིཡཱསུ ¶ པུརཏོ ཀརཎཾ པུརེཀྑཱརོ. ནིཀྑེཔརཱསཱིཏི ནིདྷཱནརཱསི. པཏྠཊཱཀིཏྟིནོཏི ཝིཏྠིཎྞཱཀིཏྟིནོ. རཏྟཉྙུམདོཏི པུརཱཎཉྙུཏཱམདོཏི ཝདནྟི. ཙིརརཏྟིཛཱཏེན, ཙིརརཏྟིཔབྦཛིཏེན ཝཱ ཛཱནིཏབྦསྶ, རཏྟཱིནམེཝ ཝཱ ཛཱནནམདོ. ཨུཔཊྛཱཔཀམཱནོཏི ཨཱཎཱཀརཎམཱནོ. ཨཱཎཱཀརཎཉྷི ཝིཙཱརཎཾ ཨིདྷ ‘‘ཡསོ’’ཏི ཝུཏྟནྟི. པརིམཎྜལཏྟབྷཱཝནིསྶིཏོ མཱནོ པརིཎཱཧམདོ. སརཱིརསམྤཏྟིཔཱརིཔཱུརིཡཱ མདོ པཱརིཔཱུརིམདོ.

༨༤༥. ཝཏྠུནཱ ཝིནཱཔི ཝཏྟབྦཏཱཡ ཨཝཏྠུཀཾ, ན ཝཏྠུནོ ཨབྷཱཝཱ.

༨༤༦. ཙིཏྟསྶ ཝོསྶཛྫནནྟི ཙིཏྟསྶ སཏིཏོ མུཙྩནཾ, ཀཱཡདུཙྩརིཏཱདཱིསུ པཀྑནྡནཾ ཝཱ ཝོསྶགྒོ. པཏིཊྛཱབྷཱཝོཏི ཀུསལཀརཎེ ཨཊྛཱནཾ, ཨནུཊྛཱནནྟི ¶ ཨཏྠོ. པམཱདསངྑཱཏསྶ ཨཏྠསྶ ཀཱཡདུཙྩརིཏེ ཙིཏྟསྶ ཝོསྶགྒོ པཱཎཱཏིཔཱཏེ མིཙྪཱདིཊྛིཡཾ ཀོདྷེ ཨུཔནཱཧེཏི ཨེཝམཱདིཀོ པརིཡཱཡོ ཨཔརིཡནྟོ, ཏདཏྠཏཔྤརིཡཱཡཔྤཀཱསཀོ ཝོསྶགྒནིསྶགྒཱདིཀོ བྱཉྫནཔརིཡཱཡོ ཙཱཏི སབྦཾ ཏཾ སངྑིཔིཏྭཱ ཨེཝརཱུཔོཏི ཨིདཾ ཨཱཀཱརནིདསྶནཾ སབྦཔརིཡཱཡསྶ ཝཏྟུཾ ཨསཀྐུཎེཡྻཏྟཱ ཀཏནྟི དསྶེནྟོ ཨཱཧ ‘‘པརིཡནྟཱབྷཱཝཏོ’’ཏི. ཝིསྶཊྛཱཀཱརོཏི སཏིཡཱ པཙྩནཱིཀབྷཱུཏེ ཙཏྟཱརོ ཁནྡྷེ དསྶེཏི.

༨༤༧. ཙིཏྟསྶ ཐདྡྷཏཱ ཏཐཱཔཝཏྟཙིཏྟམེཝཱཏི ཝདནྟི, མཱནཝིསེསོ ཝཱ དཊྛབྦོ. ཨུཔསངྐམནེ ཝནྡིཏབྦཾ ཧོཏཱིཏི པརིཡནྟེནེཝ ཙརཏི.

༨༤༨. ‘‘ཨཱཔཏྟིཾ ཨཱཔནྣོསཱི’’ཏི ཝུཏྟེ ‘‘ཨཱཝུསོ, ཏྭཾ ཨཱཔནྣོསཱི’’ཏིཨཱདིནཱ ཏེན ཝུཏྟཾ ཏསྶེཝ ཨུཔརི ཁིཔནཝསེན ‘‘པཊིཔྥརིཏྭཱ’’ཏི ཝདནྟི. ‘‘ཏསྨིཾ ནཱམ དལིདྡེ, ཨཀུསལེ ཝཱ ཨིདཾ ཀརོནྟེ ཨཧཾ ཀསྨཱ ན ཀརོམཱི’’ཏི ཨེཝཾ ཨིདྷ པཊིཔྥརཎཾ ཡུཏྟཾ. ཀརཎསྶ ཨུཏྟརཀིརིཡཱ ཀརཎུཏྟརིཡཾ. ཨཀུསལཔཀྑོ ཨེསཱཏི སཱརམྦྷོཏི ཨདྷིཔྤཱཡོ.

༨༤༩. ཨཏིཙྩ ཨིཙྪཏཱིཏི ཨཏིཙྩིཙྪོ, ཏསྶ བྷཱཝོ ཨཏིཙྩིཙྪཏཱཏི ཝཏྟབྦེ ཙྩི-ཀཱརལོཔཾ ཀཏྭཱ ‘‘ཨཏིཙྪཏཱ’’ཏི ཝུཏྟཾ. ཨཏྲིཙྪཏཱཏི ཙ སཱ ཨེཝ ཝུཙྩཏཱིཏི. ཏཏྲཱཔི ནེརུཏྟིཀཝིདྷཱནེན པདསིདྡྷི ཝེདིཏབྦཱ. ཡཐཱལདྡྷཾ ཝཱ ཨཏིཀྐམིཏྭཱ ཨཏྲ ཨཏྲ ཨིཙྪནཾ ཨཏྲིཙྪཏཱ, སཱ ཨེཝ ར-ཀཱརསྶ ཏ-ཀཱརཾ ཀཏྭཱ ‘‘ཨཏིཙྪཏཱ’’ཏི ཝུཏྟཱ.

ཨཏྲིཙྪནྟི ¶ ཨཏིཙྪཾ, ཨཏྲ ཝཱ ཨིཙྪནྟོ. ཀེན? ཨཏིལོབྷེན ཨཏིལོབྷམིཙྪཱསངྑཱཏེན ཨཏིལོབྷམདེན ཙ. ཨཏྟནོ ཧིཏཾ ཨཏྟཱཏི ཝུཏྟཾ. ཧཱཡཏི ཛཱིརཏི, ཨཱདིཎྞོ ཝཱ ཨཏྟཱ, པཏྟོ ཝཱ ཨཏྟཱ, ནཾ ཛཱིརཏི ཙནྡཀིནྣརིཾ པཏྠཡིཏྭཱ ཨསིཏཱབྷཱུདེཝིཡཱ ཝིཧཱིནོ ཝིཡ.

ཨིཙྪཱཧཏསྶཱཏི ཨིཙྪཱཡ ཨུཔདྡུཏསྶ, མུདྡིཏསྶ ཝཱ.

ཨཏིཧཱིལ༹ཡཱནོཏི ཨཝམཉྙམཱནོ. མལཀནྟི ཨེཝཾནཱམཀཾ ཛནཔདཾ, ཨབྦྷོཀཱསཾ ཝཱ. ཀོདཎྜཀེནཱཏི ཀུདཎྜཀེན རསྶདཎྜཀེན. གདྡུལེནཱཏི ཙ ཝདནྟི. རུཧིརམཀྑིཏངྒོཏི རུཧིརསིནྣགཏྟོ.

༨༥༠. ཛཱནནྟསྶེཝ ¶ བྷིཡྻོ བྷིཡྻོ ཙོདེནྟོ ཝིཡ སམྦྷཱཝེཏུཀཱམོ ཧོཏི. པཙྩཡེཏི ཨུཔཱདཱནཱདིཔཙྩཡེ.

༨༥༡. ཡེ པཏིརཱུཔེན ཝཉྩེནྟི, ཏེ གཎྛིཀཱ, དུརཱཙཱརེན ཝཱ གཎྛིབྷཱུཏཱ. གཎྛིཀཔུཏྟཱ ནཱམ གཎྛིཀཱ ཨེཝ ཧོནྟི, ཏེན སདྡྷིཝིཧཱརིཀཱ གཎྛིཀབྷཱཝེན ‘‘ཐེརོ…པེ… དཱིགྷཙངྐམེ ཝིཧརཏཱི’’ཏི ཝདནྟི.

ཝཊྚཏི བྷནྟེཏི ཨཡམྤི ཨེཀོ པཀཱརོ, ལཱབྷིནཱ ཨེཝ པན སཀྐཱ ཉཱཏུནྟི ཨཏྟནོ སམཱཔཏྟིལཱབྷིཏཾ སཱུཙེཏཱིཏི ཨཏྠོ. པཉྩཏྟཡཾ ནཱམ ཨུཔརིཔཎྞཱསཀེ དུཏིཡསུཏྟཾ (མ. ནི. ༣.༢༡ ཨཱདཡོ). ཏསྶ གམྦྷཱིརཏྟཱ ཝདཏི ‘‘པཉྩཏྟཡཾ ཨོལོཀེནྟསྶཱ’’ཏི.

༨༥༢. སིངྒནྟི སིངྒཱརཾ. ཏཉྷི ཀུསལསྶ ཝིཛ྄ཛྷནཏོ སམཱསེཝིཏཏཱཡ སཱིསེ པརིཀྑཏཾ སུནིཁཏཾ ཝིསཱཎཾ ཝིཡ, ཐིརཏྟཱ ཙ སིངྒཾ ཝིཡཱཏི སིངྒཾ, ཏཾ པནཏྠཏོ རཱགོ.

༨༥༣. ཏེམནཀརཎཏྠེ ཏིནྟིཎ-སདྡོ དཊྛབྦོ. ཁཱིཡནནྟི ཙ ཡེན ལོབྷེན པརཾ མམནྟི ཝདནྟཾ ཁཱིཡཏི, སོ ཝུཏྟོ. ཁཱིཡནཾ བྷཎྜནནྟི ཙ ཝདནྟི. ཏིནྟིཎནྟི ཝཱ ལོལུཔྤམིཙྩེཝ ཝུཏྟཾ ཧོཏི. སཉྙཱ-སདྡོ ཧི ཨེསོ ལོལུཔྤཝཱཙཀོཏི.

༨༥༤. ཨཱུརུཔྤམཱཎཱཔཱིཏི ¶ ཨེཏེན མཧནྟགྷནབྷཱཝེན ཨཔཱུཏིཏཾ དསྶེཏི. ཨཐཝཱཏིཨཱདིནཱ ཙཱིཝརམཎྜནཱདཱིནཾ ཝིསེསནཱནི ‘‘ཨིམསྶ ཝཱ པཱུཏིཀཱཡསྶ བཱཧིརཱནཾ ཝཱ པརིཀྑཱརཱནཾ མཎྜནཱ’’ཏིཨཱདཱིནཱིཏི དསྶེཏི. ཙཱིཝརེན ཧི མཎྜནཱ ཙཱིཝརམཎྜནཱ, ཙཱིཝརསྶ ཝཱ མཎྜནཱ ཙཱིཝརམཎྜནཱ, ཨེཝཾ པཏྟམཎྜནཱ སེནཱསནམཎྜནཱ ཙཱཏི ཨདྷིཔྤཱཡོ. ཨཱུནཊྛཱནཔཱུརཎཾ ཚཝིརཱགསུསཎྛཱནཱདིཀརཎཉྩ ཙཱིཝརཱདཱིསུ ཀཱཡེ ཙ ཡཐཱཡོགཾ ཡོཛེཏབྦཾ. ཏདཧུཛཱཏདཱརཀོ ཝིཡ ཧོཏཱིཏི དཱརཀཙཱཔལྱཾ ན མུཉྩཏཱིཏི ཨཏྠོ.

༨༥༥. སདིསཱ ཨནུརཱུཔཱ བྷཏྟི སབྷཱགོ, ན སབྷཱགོ ཨསབྷཱགོ, མཱནཐདྡྷཏཱ, ཝིརོདྷོ ཝཱ. ཏེནསྶ མཱཏཱདཱིསུ ཝཏྟནཾ ཨསབྷཱགཝུཏྟིཏཱ. ཨེཝཾཝིདྷཱནཾ མཱནཱདྷིཀཱནཾ ཨཀུསལཱནམིདཾ ནཱམཾ.

༨༥༦. པརིཏསྶིཏཱཏི ¶ སངྐམྤནཱ, ཨུཀྐཎྛིཏསྶ ཝཱ ཏསྶ ཏསྶ ཏཎྷཱཡནཱ.

༨༥༧. ཀུསལཀརཎེ ཀཱཡསྶ ཨཝིཔྥཱརིཀཏཱ ལཱིནཏཱ ཛཱཏིཨཱལསྱཾ, ན རོགཨུཏུབྷོཛནཱདཱིཧི ཀཱཡགེལཉྙཾ ཏནྡཱི ནཱམ, ཨཐ ཁོ པཀཏིཨཱལསྱནྟི ཨཏྠོ. ཀཱཡཱལསིཡནྟི ནཱམཀཱཡསྶ ཨཱལསིཡཾ, ཏདེཝ རཱུཔཀཱཡསྶཱཔཱིཏི དཊྛབྦཾ.

༨༥༨. ཨཙྩསནཱདཱིཧི ཨུཔྤནྣདྷཱཏུཀྑོབྷནིམིཏྟཾ ཨཱལསིཡཾ ཝིཛམྦྷིཏཱ.

༨༥༩. བྷཏྟནིམིཏྟེན ཨུཔྤནྣཾ ཨཱལསྱཾ བྷཏྟསམྨདོ.

༨༦༠. ཨིམེཧི པནཱཏི ཙིཏྟསྶ ཨཀལྱཏཱདཱིཧི. སབྦཏྠ ཀིལེསཝསེནཱཏི ཐིནམིདྡྷཀཱརཎཱནཾ རཱགཱདཱིནཾ ཝསེནཱཏི དཊྛབྦཾ.

༨༦༡. སམྨཱཨཱཛཱིཝཏོ ཨཔེཏོ ཀཏོཏི ཨཔཀཏོ. སོ ཨཱཛཱིཝུཔདྡཝེན ཨུཔདྡུཏོཏི ཀཏྭཱ ཨཱཧ ‘‘ཨུཔདྡུཏསྶཱཏི ཨཏྠོ’’ཏི.

ཏིཝིདྷམྤི ཏཾ ཏཏྠ ཨཱགཏཾ ཏསྶ ནིསྶཡབྷཱུཏཱཡ ཨིམཱཡ པཱལི༹ཡཱ དསྶེཏུནྟི ཨེཝམཏྠོ དཊྛབྦོ.

པཱཔཎིཀཱནཱིཏི ¶ ཨཱཔཎཏོ ཚཌྜིཏཱནི. ནནྟཀཱནཱིཏི ཨནྟརཧིཏཱནི, ཙཱིརཱནི ཝཱ. གིལཱནསྶ པཙྩཡབྷཱུཏཱ བྷེསཛྫསངྑཱཏཱ ཛཱིཝིཏཔརིཀྑཱརཱ གིལཱནཔཙྩཡབྷེསཛྫཔརིཀྑཱརཱ. པཱུཏིམུཏྟནྟི པུརཱཎསྶ ཨཔུརཱཎསྶ ཙ སབྦསྶ གོམུཏྟསྶེཏཾ ནཱམཾ. པཱུཏིབྷཱཝེན ཚཌྜིཏོསདྷནྟིཔི ཀེཙི.

ཨགབྦྷིཀཱ ཨེཀདྭཱརཱ དཱིགྷསཱལཱ ཀིར ཨུདྡཎྜོ. ཀུཙྪིཏརཛབྷཱུཏཱཡ པཱཔིཙྪཏཱཡ ནིརཏྠཀཀཱཡཝཙཱིཝིཔྥནྡནིགྒཧཎཾ ཀོརཛཾ, ཏཾ ཨེཏསྶ ཨཏྠཱིཏི ཀོརཛིཀོ, ཨཏིཝིཡ ཀོརཛིཀོ ཀོརཛིཀཀོརཛིཀོ. ཨཏིཔརིསངྐིཏོཏི ཀེཙི. མུཁསམྦྷཱཝིཏོཏི ཀོརཛིཀཀོརཛིཀཱདིབྷཱཝེན པཝཏྟཝཙནེཧི ཨཏྟནོ མུཁམཏྟེན ཨཉྙེཧི སམྦྷཱཝིཏོ. སོ ཨེཝརཱུཔོ ཨེཝརཱུཔཏཱཡ ཨེཝ ཨཏྟཱནཾ པརཾ ཝིཡ ཀཏྭཱ ‘‘ཨཡཾ སམཎོ’’ཏིཨཱདིཾ ཀཐེཏི.

པཎིདྷཱཡཱཏི ‘‘ཨརཧཱཏི མཾ ཛཱནནྟཱུ’’ཏི ཙིཏྟཾ ཋཔེཏྭཱ, པཏྠེཏྭཱ ཝཱ. ཨཱཔཱཐཀཛ྄ཛྷཱཡཱིཏི མནུསྶཱནཾ ཨཱཔཱཐཊྛཱནེ སམཱདྷིཾ སམཱཔནྣོ ཝིཡ ནིསཱིདནྟོ ཨཱཔཱཐཀེ ཛནསྶ པཱཀཊཊྛཱནེ ཛྷཱཡཱི.

ཨཉྙཾ ¶ ཝིཡ ཀཏྭཱ ཨཏྟནོ སམཱིཔེ བྷཎནཾ སཱམནྟཛཔྤིཏཾ. ཨཱཀཱརསྶ རསྶཏྟཾ ཀཏྭཱ ‘‘ཨཋཔནཱ’’ཏི ཝུཏྟཾ. ཀུཧནཾ ཀུཧོ, ཏསྶ ཨཡནཱ པཝཏྟི ཀུཧཱཡནཱ, ཀུཧསྶ ཝཱ པུགྒལསྶ ཨཡནཱ གཏིཀིརིཡཱ ཀུཧཱཡནཱ.

༨༦༢. པུཊྛསྶཱཏི ‘‘ཀོ ཏིསྶོ, ཀོ རཱཛཔཱུཛིཏོ’’ཏི པུཊྛསྶ. ནཧནཱཏི བནྡྷནཱ པརིཝེཋནཱ.

༨༦༣. ནིམིཏྟེན ཙརནྟོ ཛཱིཝནྟོ ནིམིཏྟཀཱརཀོ ནེམིཏྟིཀོ, ཏསྶ བྷཱཝོ ནེམིཏྟིཀཏཱ. ཨཏྟནོ ཨིཙྪཱཡ པཀཱསནཾ ཨོབྷཱསོ. ཀོ པན སོཏི? ‘‘ཨཛྫ བྷིཀྑཱུནཾ པཙྩཡཱ དུལླབྷཱ ཛཱཏཱ’’ཏིཨཱདིཀཱ པཙྩཡཔཊིསཾཡུཏྟཀཐཱ. ཨིཙྪིཏཝཏྠུསྶ སམཱིཔེ ཀཐནཾ སཱམནྟཛཔྤཱ.

༨༦༤. བཧི ཚཌྜནཾ ཨུཀྑེཔནཱ. པརཔིཊྛིམཾསཁཱདནསཱིལོ པརཔིཊྛིམཾསིཀོ, ཏསྶ བྷཱཝོ པརཔིཊྛིམཾསིཀཏཱ.

༨༦༥. ནིཀཏྟུཾ ¶ ཨཔྤེན ལཱབྷེན བཧུཀཾ ཝཉྩེཏྭཱ གཧེཏུཾ ཨིཙྪནཾ ནིཛིགཱིསནཾ, ཏསྶ བྷཱཝོ ནིཛིགཱིསནཏཱ. ཏསྶེཝ ཨིཙྪནསྶ པཝཏྟིཨཱཀཱརོ, ཏཾསཧཛཱཏཾ ཝཱ གཝེསནཀམྨཾ.

༨༦༦. ཝཎྞསམྤནྣཾ པོཀྑརཾ ཝཎྞཔོཀྑརནྟི ཨུཏྟརཔདལོཔོ པུབྦཔདསྶ དཊྛབྦོ, ཝཎྞཔཱརིཔཱུརཱི ཝཱ ཝཎྞཔོཀྑརཏཱ. ‘‘ཨཏྠཛཱཔིཀཱ’’ཏི ཨེཏྠ ཝིཡ ཛཔ-སདྡོ ཨུཔྤཏྟིཝཱཙཀོཏི ཨཱཧ ‘‘པཝཏྟེཏཱི’’ཏི.

༨༦༧. སེཡྻསདིསམཱནཱ ཨུནྣཏིཝསེན པཝཏྟཱཏི ཨུབྷཡཏྠཱཔི ‘‘མཱནཾ ཛཔྤེཏཱི’’ཏི ཝུཏྟཾ.

༨༦༨. ཧཱིནམཱནོ པན ཨོནཏིཝསེན པཝཏྟིཏོ ཀེཝལེན མཱནསདྡེན ནིདྡེསཾ ནཱརཧཏཱིཏི ཏཾནིདྡེསེ ‘‘ཨོམཱནཾ ཛཔྤེཏཱི’’ཏི (ཝིབྷ. ༨༧༤) ཝུཏྟཾ.

༨༧༢. རཱཛབྷོགེན རཊྛབྷུཉྫནཀོ རཱཛནིསྶིཏོ རཊྛིཡོ.

༨༧༩. པུགྒལཾ ཨནཱམསིཏྭཱཏི ཡཐཱ སེཡྻསྶ སེཡྻམཱནཱདིནིདྡེསེསུ ‘‘པརེཧི སེཡྻཾ ཨཏྟཱནཾ དཧཏཱི’’ཏི སེཡྻཱདིཔུགྒལོ མཱནུཔྤཱདཀོ ¶ ཨཱམཊྛོ, ཨེཝམེཏསྶ སེཡྻམཱནབྷཱཝེཔི མཱནུཔྤཱདཀཔུགྒལཝིསེསཾ ཨནཱམསིཏྭཱ ‘‘པརེ ཨཏིམཉྙཏི’’ཙྩེཝ ཝུཏྟནྟི ཨཏྠོ. པརེ ཨཏིཀྐམིཏྭཱ མཉྙནཉྷི ཡསྶ ཀསྶཙི ཨཏིམཱནོཏི.

༨༨༠. པུརིམམཱནསྶ ཨུཔརིམཱནོ མཱནཱཏིམཱནོ, ཨཏི-སདྡོ ཨུཔརི-སདྡསྶ ཨཏྠཾ ཝདཏཱིཏི དཊྛབྦོ. པུརིམམཱནཾ ཝཱ ཨཏིཀྐནྟོ མཱནོ མཱནཱཏིམཱནོ.

༨༨༡. པཀྑིཛཱཏཱིསུ ཝཱཡསོ ཨནྟོ ལཱམཀོཏི ཀཏྭཱ ‘‘ཀཱཀཛཱཏི ཝིཡཱ’’ཏི ཝུཏྟཾ.

༨༨༢. ཐེརོ ཀིར དོསཙརིཏོ ཨཧོསི, ཏསྨཱ ཨཱདིཏོཝ ‘‘ཏུམྷེ ཨཁཱིཎཱསཝཱ’’ཏི ཨཝཏྭཱ ཨུཔཱཡེན ཀཐེསཱིཏི ཝདནྟི, དོསཙརིཏཏྟཱ ཝཱ ཁིཔྤཾ ཏཏིཡཔདཝཱརེ ཝིརཱགཾ ཨུཔྤཱདེསཱིཏི ཨདྷིཔྤཱཡོ.

༨༨༣. མཱནཾ ¶ ཨནུགཏཙྪནྡོཏི མཱནསམྤཡུཏྟཚནྡོ, མཱནསབྷཱཝཾ ཨནུགཏོ མཱནཙྪནྡོ ཝཱ.

༨༨༤. ‘‘ཝིལམྦན’’ནྟི ཙ ཨིཏྠིཔུརིསསམྨཱནནཱདིཀིརིཡཱདིཝིལམྦནཔཊིསཾཡུཏྟཾ ཀཏྟབྦཾ དཊྛབྦཾ. ཏཏྠ ཡུཏྟམུཏྟསིལིཊྛཾ པཊིབྷཱནཾ ཝིལམྦནཔཊིབྷཱནཾ.

༨༨༧. ཨམརཝཱདཔཊིསཾཡུཏྟོ ཝིཏཀྐོ, ཨཏྟནོ ཨམརཎཏྠཱཡ དེཝབྷཱཝཏྠཱཡ ཝཱ ཝིཏཀྐོ ཨམརཝིཏཀྐོ.

༨༨༨. པརེསུ ཨནུདྡཡཱ རཱགཝསེན ཨནུདྡཡཀརཎཾ ཨེཏསྶཱཏི པརཱནུདྡཡོ, ཏསྶ བྷཱཝོ པརཱནུདྡཡཏཱ, པརེསུ ཝཱ ཨནུདྡཡསྶེཝ སཧནནྡིཏཱདིཀསྶ བྷཱཝོ པརཱནུདྡཡཏཱ, ཏཱདིསོ རཱགོ. ཏཏྠཱཏི པརཱནུདྡཡཏཱཡ སཾསཊྛཝིཧཱརེན དསྶིཏཱཡཱཏི ཨཏྠོ ཡུཛྫཏི.

༨༩༠. ཨནཝཉྙཏྟིཾ པཏྠེནྟོ ཨནཝཉྙཏྟཏྠམེཝ ཀཱམགུཎེ ཙ པཏྠེཏཱིཏི ཨཱཧ ‘‘པཉྩཀཱམ…པེ… ནིསྶིཏོ ཧུཏྭཱ’’ཏི.

ཨེཀཀནིདྡེསཝཎྞནཱ ནིཊྛིཏཱ.

(༢.) དུཀནིདྡེསཝཎྞནཱ

༨༩༡. ཨུཔནཡ྄ཧཏཱིཏི ¶ བནྡྷཏི. ཨ-ཀཱརོ ཨནནྟརཏྠཝཱཙཀོ, མརིཡཱདཝཱཙཀསྶ ཝཱ ཨཱཀཱརསྶ རསྶཏྟཾ ཀཏྭཱ ‘‘ཨཊྛཔནཱ’’ཏི ཝུཏྟནྟི ‘‘ཨནནྟརཊྛཔནཱ’’ཏིཨཱདིམཱཧ. ཏཏྠ པཋམུཔྤནྣསྶ པཝཏྟཱཀཱརོ མརིཡཱདཱ, ཏཾ ཨནཏིཀྐམིཏྭཱ ཏསྶེཝ དལ༹ྷཱིཀརཎཝསེན ཋཔནཱ མརིཡཱདཊྛཔནཱ. པཀཏིཊྛཔནཱམཏྟམེཝ, ཝིསེསནརཧིཏཱཏི ཨཏྠོ.

༨༩༢. ནིཊྛུརིཡཾ ཁེལ༹པཱཏནཾ, ནིཊྛུརིཡཾ ཝིཡ ནིཊྛུརིཡཾ. དསྶེཏྭཱཏི དནྟེཧི ཚིནྡིཏྭཱ. ཏེན ¶ པན དསྶནཾ པལཱ༹སོཏི དསྶེཏི. པལཱ༹སསྶ ཨཱཡནཱཏི ཡུགགྒཱཧཔྤཝཏྟི. སམབྷཱཝདཧནཾ ཛཡོ, ཏསྶ ཨཱཧརཎཏོ ཨཱཧཱརོ. དྷུརཾ ན དེཏཱིཏི པཱམོཀྑཾ ན དེཏི.

༨༩༤. ཀཱཡེན ཙེཏིཡངྒཎཱདིཝཏྟཾ ཀརོཏི ‘‘ཨེཝཾ ཝཏྟསམྤནྣོ སདྡྷོ ཀཐཾ ཀཱཡདུཙྩརིཏཱདཱིནི ཀརིསྶཏཱི’’ཏི པརེསཾ ཉཱཔནཏྠཾ. ཨཏིཙྩཱཏི ཨཙྩཡཾ ཀཏྭཱ. ཨཱསརནྟཱིཏི ཨཱགཙྪནྟི, པུན པཊིཙྪཱདནེ པཝཏྟནྟཱིཏི ཨཏྠོ. ཀོནཱམེཝཾ ཀརོཏཱིཏི ཝོཙྪིནྡནཙྪཱདནཱ ཝཱ ཝོཙྪཱདནཱ.

ན སམྨཱ བྷཱསིཏཱཏི ཡོ ན སམྨཱ བྷཱསཏི, སོ སཋོཏི དསྶེཏི. ཀུཙྪི ཝཱ པིཊྛི ཝཱ ཛཱནིཏུཾ ན སཀྐཱཏི ཨསནྟགུཎསམྦྷཱཝནེནེཝ ཙིཏྟཱནུརཱུཔཀིརིཡཱཝིརཧཏོ ‘‘ཨེཝཾཙིཏྟོ ཨེཝཾཀིརིཡོ’’ཏི ཛཱནིཏུཾ ན སཀྐཱཏི ཨཏྠོ.

ཨཛོ ཨེཝ ཨཛཱམིགོ. ནེལཀོཏི ཏརུཎཝཙྪོ. ཡཐཱ སོ ཡཀྑོ ཏཱདིསཾ རཱུཔཾ དསྶེཏྭཱ ‘‘ཨཛཱ’’ཏི སཉྙཱཡ ཨཱགཏཱགཏེ ཁཱདཏི, ཨེཝམཡམྤི ཏཾཏཾསདིསགུཎསམྦྷཱཝནེན ཏེ ཏེ ཝཉྩེཏི. ཏེནེཏཾ སཱཋེཡྻཾ མཱཡཱཏོ བལཝཏརཱ ཝཉྩནཱཏི དཊྛབྦཾ. ཏེནེཝ ‘‘པརིཀྑཏྟཏཱ’’ཏི ཝུཏྟཾ.

༩༠༨. སཀྐཱཡདིཊྛཱདཱིནཾ ཨབྷཱཝེཔི ཡཾ སཾཡོཛནཾ ཧོཏི, ཏཾ བཧིདྡྷཱ སཾཡོཛནཏོ བཧིདྡྷཱསཾཡོཛནསྶ པུགྒལསྶ ཝིསེསནབྷཱུཏཾ བཧིདྡྷཱསཾཡོཛནཾ ནཱམ.

དུཀནིདྡེསཝཎྞནཱ ནིཊྛིཏཱ.

(༣.) ཏིཀནིདྡེསཝཎྞནཱ

༩༠༩. ཨཀུསལམཱུལཱནེཝ ¶ ཝཊྚམཱུལཱནཱིཏི ཏེཧི ཀཐིཏེཧི ཝཊྚམཱུལསམུདཱཙཱརོ ཀཐིཏོ ཧོཏཱིཏི ཨཱཧ ‘‘ཏཱིཧི…པེ… ཀཐིཏོ’’ཏི.

༩༡༩. སསྶཏོ ¶ ལོཀོཏིཨཱདིདསྶནམེཝ བྲཧྨཙརིཡཾ མོཀྑསམྤཱཔཀཾ ཨུཏྟམཙརིཡནྟི དིཊྛིགཏིཀེཧི སམྨཏནྟི ཨཱཧ ‘‘དིཊྛིགཏིཀསམྨཏསྶཱ’’ཏི. རཱུཔཱརཱུཔཱཝཙརཝིཔཱཀེསུ སཱཏིསཡོ བྷཝརཱགོཏི ཨདྷིཔྤཱཡེན ཝུཏྟཾ ‘‘མཧཱབྲཧྨཱན’’ནྟི.

༩༢༠. ཀཐཾཝིདྷནྟི ཀེནཱཀཱརེན སཎྛིཏནྟི ཨཏྠོཏི ཀཏྭཱ ཨཱཧ ‘‘ཨཱཀཱརསཎྛཱན’’ནྟི. མཱནཋཔནཱཏི སེཡྻཱདིཝསེན མཱནེན ཋཔནཱ, མཱནསངྑཱཏཱ ཝཱ ཋཔནཱ.

༩༢༡. ཙེཏསོ ཨུཏྲཱསོ དོམནསྶཾ, དོསོ ཝཱ, ཏཾསམྤཡུཏྟཱ ཝཱ ཙེཏནཱདཡོ.

༩༢༢. དེསནཱསུཁཏཱཡཱཏི ཏིཎྞཾ ཨདྡྷཱནཾ ཝསེན ཝིཙིཀིཙྪཱཡ དེསནཱ སུཁཱ ‘‘ཀངྑཏི ཝིཙིཀིཙྪཏཱི’’ཏི, ན པན ཏཐཱ མོཧེནཱཏི ཨདྷིཔྤཱཡོ. ཝཎྞཱདིབྷེདཾ སུཏྭཱཏི ཀེཙི ཀིར ཝདནྟི ‘‘ཁཏྟིཡཛཱིཝོ པཎྜུཝཎྞོ. ཀསྨཱ? སོ ཧི པུབྦཎྷེ རམཏི, པུབྦཎྷེ ཙ ཚཱཡཱ པཎྜུཝཎྞཱ. བྲཱཧྨཎཝེསྶསུདྡཛཱིཝཱ ཨོདཱཏཔཱིཏཀཱལ༹ཝཎྞཱ. ཏེ ཧི མཛ྄ཛྷནྷསཱཡནྷརཏྟཱིསུ ཨོདཱཏཔཱིཏཀཱལ༹ཚཱཡཱ ཀཱལ༹ཏམཀཱལེསུ རམནྟཱི’’ཏི ཏེསཾ ཝཎྞབྷེདཾ, ‘‘བྱཱཔཱི པརིམཎྜལོ’’ཏིཨཱདིནཱ ཀཐེནྟཱནཾ སཎྛཱནབྷེདཉྩ སུཏྭཱ.

༩༢༣. པུརིསཔུགྒལོཏི པདདྭཡཾ ཨེཀཔདཾ ཀཏྭཱ ཛཱནནྟཱནཾ ཝསེནཱཡཾ སམྨུཏིཀཐཱ པཝཏྟཱ, པདནྟརམེཝ ཝཱ ཨིདཾ པུགྒལཝཱཙཀནྟི དསྶེནྟོ ‘‘ཨཡཾ པནཱ’’ཏིཨཱདིམཱཧ. ཨཐ ཝཱ པུརིསོཏི ཝུཏྟོ ཙ པུགྒལོ ཨེཝ, ན པུརིསིནྡྲིཡཡུཏྟོཝཱཏི དསྶནཏྠམྤི ‘‘པུརིསཔུགྒལོ’’ཏི ཝུཏྟནྟི ཝེདིཏབྦཾ. ཨཊྛསུ ཨཱབཱདྷེསཱུཏི པིཏྟསེམྷཝཱཏསམུཊྛཱནཨུཏུཝིཔརིཎཱམཛཨོཔཀྐམིཀཝིསམཔརིཧཱརཛསནྣིཔཱཏཛཀམྨསམུཊྛཱནེསུ. པུབྦེ ཀཏནྟི པུརཱཎཏརཀམྨཾ ཨིཙྪནྟཱིཏི ཨུཔཔཛྫཝེདནཱིཡཉྩ ཀིར པཊིཀྑིཔནྟི. ཨཱཎཏྟིམཱུལཀེན ཝཱཏི ཡོཔི ཨཱཎཱཔེཏྭཱ ཝདྷབནྡྷཱདིདུཀྑཾ ཨུཔྤཱདེཏི, ཏམྤི ཏཾམཱུལཀཾ ན ཧོཏི, ཨིསྶརནིམྨཱནམཱུལམེཝཱཏི ཨདྷིཔྤཱཡོ.

༩༢༤. མོཧསྶ ¶ ཨནུདཧནཾ དཱཧཀཱརཎཏཱཡ ཝུཏྟཾ, སབྷཱཝཏོཔི པན ཨསམྤཊིཝེདྷོ སམྤཊིཝེདྷསུཁསྶ པཙྩནཱིཀབྷཱུཏོ དུཀྑོ ཨེཝཱཏི ཨནུདཧནཏཱ ཝེདིཏབྦཱ. ཨེཝཉྩ ཀཏྭཱ ‘‘ཨུཔེཀྑཱ ཝེདནཱ ཉཱཎསུཁཱ ཨཉྙཱཎདུཀྑཱ’’ཏི (མ. ནི. ༡.༤༦༥) ཝུཏྟཱ.

༩༢༦. པུཐུནིམིཏྟཱརམྨཎེསཱུཏི ¶ སུབྷནིམིཏྟཱདིཝསེན པུཐུནིམིཏྟསབྷཱཝེསུ ཨཱརམྨཎེསུ, པུཐུསབྷཱཝེསུ ཝཱ སུབྷནིམིཏྟཱདིཨཱརམྨཎེསུ. ཀོསཛྫཔམཱདནིདྡེསཱནཾ སམཱནཏྟེཔི ཨཝིཔྥཱརིཀཏཱསངྑཱཏཱ ལཱིནཝུཏྟིཏཱ ཀོསཛྫཾ, སཏིཝོསྶགྒསངྑཱཏཾ པམཛྫནཾ པམཱདོཏི ཨཡཾ ཝིསེསོཏི.

༩༣༡. སགརུཝཱསནྟི སཨོཏྟཔྤཝཱསམཱཧ, སཛེཊྛཀཝཱསནྟི སཧིརིཝཱསཾ. ཨནཱདིཡནཱ ཨནདྡཱ ཨོཝཱདཨགྒཧཎཾ, ཨཙིཏྟཱིཀཱརོཏི ཨཏྠོ. སུཀྑཀཊྛསྶ ཝིཡ ཨནལླཏཱ, ཨམུདུཏཱ ཝཱ ཨནདྡཱ. ཨསཱིལྱནྟི ཨསུཁསཱིལཏཱ ཨམུདུཏཱ ཨེཝ.

༩༣༤. ཨུཔཱརམྦྷོ དོསསམྤཡུཏྟཙིཏྟུཔྤཱདོ སིཡཱ.

༩༣༦. ‘‘ཨིདྷ པཱསཱཎཾ ཀརོཏཱི’’ཏིཨཱདིནཱ ཋཔནཏྠེཔི ཀརོཏི-སདྡོ ཡུཛྫཏཱིཏི ཨཱཧ ‘‘ཀརོཏཱིཏི ཋཔེཏཱི’’ཏི. ཨེཏྠ ཙཱཡཾ ཨཱཝཛྫནཱ ཨཀུསལཱནཾ ཨཱསནྣཀཱརཎཏྟཱ ཁུདྡཀཝཏྠཱུསུ ཝུཏྟཱཏི ཝེདིཏབྦཱ, ཏདནུཀཱུལཀིཙྩཏྟཱ ཝཱ.

ཏིཀནིདྡེསཝཎྞནཱ ནིཊྛིཏཱ.

(༤.) ཙཏུཀྐནིདྡེསཝཎྞནཱ

༩༣༩. ཨིཏཱིཏི ནིདསྶནེ ནིཔཱཏོཏི ཨེཝཾ-སདྡེན སམཱནཏྠོཏི དསྶེཏི. བྷཝཱབྷཝཧེཏཱུཏིཔཱིཏི ཨེཏྠ བྷཝནྟི ཛཱཡནྟི ཨེཏེནཱཏི བྷཝོ, སཔྤིཨཱདིབྷེསཛྫཾ. བྷཝོ ཨེཝ པཎཱིཏཏརོ ཨབྷིཝུདྡྷོ ཨབྷཝོ. བྷཱཝནཱརཱམཏཱཨརིཡཝཾསཔྤཧེཡྻཏྟཱ ཝཱ པུརིམཏཎྷཱཏྟཡཝཛྫཱ སབྦཱ ཏཎྷཱ ‘‘བྷཝཱབྷཝཧེཏུ ཨུཔྤཛྫཏཱི’’ཏི ཝུཏྟཱཏི ཝེདིཏབྦཱ.

ཨེཏཱཡཱཏི ¶ ཚནྡཱདིཨགཏིཡཱ. ན གཙྪནྟཱིཏི ན པཝཏྟནྟི, ཏཾ ཏཾ ཀིརིཡཾ ན ཀརོནྟཱིཏི ¶ ཨཏྠོ. ཨིམིནཱཏི ཚནྡཱདིནཱ ཨགཏིགམནེན. ཚནྡཱདཱིསུ ཡེན ནིནྣོ, ཏེན གམནཾ ཡཐཱནིནྣགམནཾ.

‘‘རཱཛཱ’’ཏིཨཱདིནཱ རཱཛཱདིནིམིཏྟོ ཝིཡ ཨཱུམིཨཱདིནིམིཏྟོ ཙིཏྟུཏྲཱསོ ཨཱུམིཨཱདིབྷཡཾ, ‘‘ཨཱུམིབྷཡནྟི ཁོ, བྷིཀྑཝེ, ཀོདྷུཔཱཡཱསསྶེཏཾ ཨདྷིཝཙན’’ནྟིཨཱདིཝཙནཏོ (མ. ནི. ༢.༡༦༢; ཨ. ནི. ༤.༡༢༢; ཨིཏིཝུ. ༡༠༩) ཀོདྷུཔཱཡཱསཨོདརིཀཏྟཔཉྩཀཱམགུཎམཱཏུགཱམཱ ཝཱ. ཏཏྠ པཉྩཀཱམགུཎམཱཏུགཱམགྒཧཎེན ཏནྣིསྶིཏཚནྡརཱགགྒཧཎཾ ཝེདིཏབྦཾ, ཨོདརིཀཏྟཉྩ ལོབྷོཝ. ཨུཀྑེཔནཱིཡཱདིཀམྨཾ ཝིནཡདཎྜཾ.

‘‘ཨཐ ཁོ ཏིམྦརུཀོ པརིབྦཱཛཀོ ཡེན བྷགཝཱ…པེ… ཨེཏདཝོཙ ‘ཀིཾ ནུ ཁོ, བྷོ གོཏམ, སཡཾཀཏཾ སུཁདུཀྑ’ནྟི? མཱ ཧེཝཾ ཏིམྦརུཀཱཏི བྷགཝཱ ཨཝོཙཱ’’ཏིཨཱདིནཱ ནིདཱནཝགྒེ (སཾ. ནི. ༢.༡༨) ཨཱགཏཏྟཱ ‘‘ཏིམྦརུཀདིཊྛཱི’’ཏི ཝུཏྟཱ.

ཙཏུཀྐནིདྡེསཝཎྞནཱ ནིཊྛིཏཱ.

(༥.) པཉྩཀནིདྡེསཝཎྞནཱ

༩༤༠. ཨཱགནྟུཾ པན ན དེནྟཱིཏི ཨཱགམནསྶ པཙྩཡཱ ན ཧོནྟཱིཏི ཨཏྠོ དཊྛབྦོ.

༩༤༡. ཨཝདེཧནཏོཏི པཱུརཎེན མཾསཱུཔཙཡཧེཏུཏཱཡ ཙ ཨུཔཙཡནཏོ. གིམྷཀཱལེ བྷུཉྫིཏྭཱ སཡནྟསྶ སུཁཾ ཧོཏཱིཏི ཏཾ ཨུཏུསུཁཾ ‘‘སེཡྻསུཁ’’ནྟི ཝུཏྟཾ, སཡནིརིཡཱཔཐསུཁནྟི ཨཏྠོ. ཝཏནྟི དྷུཏངྒཱནི. ཏཔོཏི ཁནྡྷཀཝཏྟཱནི, ཝཱིརིཡཾ ཝཱ. སཱིལགྒཧཎེན ཁནྡྷཀཝཏྟམེཐུནཝིརཏཱིནཾ གཧིཏཏྟཱ ཏཔབྲཧྨཙརིཡགྒཧཎཾ ན ཀཏྟབྦནྟི ཙེ? ན, ཨཉྙསཱིལཏོ ཝིསེསེཏྭཱ ཏཔབྲཧྨཙརིཡཱནཾ དེཝཏྟཀཱརཎཏྟགྒཧཎསྶ དསྶནཏོ, བཱཧིརཱནཉྩསྶ ཝིནིབནྡྷསྶ པཝཏྟིདསྶནཏོ ཝཱ. ཏེསཉྷི ཨཝིཧིཾསཱདིགོཝཏཱདིདུཀྐརཀཱརིཀཱམེཐུནཝིརཏིཡོ ཡཐཱཀྐམཾ སཱིལཱདཱིནི, ཏཱནི ཙ ཏེ དེཝནིཀཱཡཾ པཎིདྷཱཡ ཙརནྟཱིཏི. ཨཉྙཐཱ ཙ སདྡྷཱརུཙིཨཱདཱིཧི ‘‘ཡཏོ ¶ ཁོ བྷོ ཨཡཾ ཨཏྟཱ རཱུཔཱི ཙཱཏུམཧཱབྷཱུཏིཀོ མཱཏཱཔེཏྟིཀསམྦྷཝོ ཀཱཡསྶ བྷེདཱ ཨུཙྪིཛྫཏཱི’’ཏིཨཱདིནཱ (དཱི. ནི. ༡.༨༥) ཝིཀཔྤེཏྭཱ.

༩༤༢. བྱསནེསུ ¶ ཉཱཏིབྷོགརོགབྱསནགྒཧཎེན ཏཾནིམིཏྟཱ སོཀཱདཡོ གཧིཏཱཏི དཊྛབྦཱ. དསྶནསཝནེསུ པཊིཀཱུལཏཱ དསྶནསཝནཔཊིཀཱུལཏཱ. ཨེཏྠ ཙ ཨཱདཱིནཝེཧི པཉྩཧི ཏེསཾ ཀཱརཎབྷཱུཏཱ ཨཀྑནྟིཡེཝ བྷིནྡིཏྭཱ ཀཐིཏཱཏི ཝེདིཏབྦཱ, ཨཀྑནྟིམཱུལཀཱ ཝཱ ཨཔྤིཡཏཱདིཧེཏུབྷཱུཏཱ དུཀྐཊདུབྦྷཱསིཏཏཱདིདོསཱ.

མིཙྪཱཛཱིཝནིམིཏྟཾ མརཎཀཱལེ ཨུཔྤནྣབྷཡཾ ‘‘ཨཱཛཱིཝཀབྷཡ’’ནྟི ཝུཏྟཾ. ‘‘ཨཱཛཱིཝིཀཱབྷཡ’’ནྟི པན པཱཋེ པཙྩཡཱནུཔྤཏྟིཾ པསྶཏོ ཨཱཛཱིཝིཀནིམིཏྟོ ཙིཏྟུཏྲཱསོཏི ཨཏྠོ དཊྛབྦོ. ཀིཏྟིསདྡོ སིལོཀནྟི ཏཔྤཊིཔཀྑཱ ཨསིལོཀཾ ཨཀིཏྟི. ཏེནཱཧ ‘‘གརཧབྷཡ’’ནྟི.

༩༤༣. ཨུཔྤིལཱཝིཏནྟི ཨུདགྒཏཱསངྑཱཏོ ཨཝཱུཔསམབྷཱཝོ, ཨཝཱུཔསམཧེཏུབྷཱུཏོ ཝཱ པཱིཏིཡཱ ཨཱཀཱརོ.

པཉྩཀནིདྡེསཝཎྞནཱ ནིཊྛིཏཱ.

(༦.) ཚཀྐནིདྡེསཝཎྞནཱ

༩༤༤. ‘‘ཀོདྷནོ ཧོཏི ཨུཔནཱཧཱི’’ཏིཨཱདིནཱ ཀོདྷཱདིཧེཏུཀཱ ཨུཔནཱཧཱདཡོ ཀོདྷཱདཱིནཾ སཧཱཡཀཱརཎབྷཱཝེན སུཏྟནྟེ ཝུཏྟཱཏི ཀོདྷཱདཡོ ཨེཝ ཝིཝཱདམཱུལཱནི, ཏེནེཏྠ ཏེ ཨེཝ ཝུཏྟཱ. སནྡིཊྛིཔརཱམསིཏཱ ཨཏྟནོ དིཊྛིཡཾ ཨབྷིནིཝིཊྛཏཱ.

༩༤༥. ཨཔྤཏིསྶཡོཏི པཏིསྶཡབྷཱུཏེཧི གརཱུཧི ཝིརཧིཏོ. ཨཔྤམཱདལཀྑཎནྟི སཏིཨཝིཔྤཝཱསཾ ཀུསལཱནུཡོགསཱཏཙྩཾ ཝཱ.

ཡུཏྟཔཡུཏྟཏཱཏི ¶ ཏནྣིནྣཏཱཝསེན སུཊྛུ ཡུཏྟཏཱ. གཎསངྒཎིཀཱ ཀིལེསཝསེན པཝཏྟཱ སངྒཎིཀཱ. ཨིཏྠིཔཊིསཾཡུཏྟཀཐཱསཝནེ ཨིཏྠིསདྡསཝནེ ཙ ཨསྶཱདོ སཝནསཾསགྒོ. ཨིཏྠིཡཱ ཀསྶཙི དཱནགྒཧཎསྶཱདོ པརིབྷོགསཾསགྒོ.

༩༤༦. སོམནསྶེན སདྡྷིཾ ཨུཔཝིཙརནྟཱིཏི སོམནསྶུཔཝིཙཱརཱཏི ཨཀུསལསོམནསྶསཧགཏཱ རཱུཔཝིཙཱརཱདཡོ ཨིདྷཱདྷིཔྤེཏཱཏི ཝེདིཏབྦཱ, ཏཐཱ ཨུཔེཀྑུཔཝིཙཱརཱ ཙ. ཏཾསམྤཡུཏྟོ ཝཱཏི ཨེཏེན ཝིཙཱརགྒཧཎེན ཝིཏཀྐོཔི ¶ གཧིཏོཏི ཝིཏཀྐཔྤཝཏྟནེན ‘‘ཨུཔཝིཏཀྐེཏཱི’’ཏི ཨིདམྤི ཝུཏྟཾ ཧོཏཱིཏི དསྶེཏི.

༩༤༧. ཨཉྙཱཎསམྤཡུཏྟཱཏི ཝིཙིཀིཙྪུདྡྷཙྩསཧགཏཙིཏྟེསུ ཨུཔེཀྑཱ མོཧོཏི ཝདནྟི, ལོབྷསམྤཡུཏྟུཔེཀྑཱཔི པན གེཧསྶིཏཱ ན ན ཧོཏི.

༩༤༨. ཨདྷིཙྩསམུཔྤནྣིཀོ ‘‘ཨདྷིཙྩ སམུཔྤནྣོ ཨཏྟཱ ཨུཔྤནྣོ བྷཝིསྶཏཱི’’ཏི གཎྷནྟོ སསྶཏདིཊྛིཀོ ཧོཏཱིཏི ཨེཝརཱུཔསྶ དིཊྛི ཝིཡཱཏི དསྶེནྟོ ‘‘ཨདྷིཙྩསམུཔྤནྣིཀསྶེཝཱ’’ཏི ཨཱཧ. ན སོ ཛཱཏོཏི ཨེཏྠ ‘‘ཛཱཏཱུ’’ཏི ཨཡཾ ནིཔཱཏོ ཨུ-ཀཱརསྶ ཨོ-ཀཱརཾ ཀཏྭཱ ཛཱཏོཏི ཝུཏྟོ, ཏེན ཝཱ སམཱནཏྠཾ ནིཔཱཏནྟརཾ ཨེཏཾ དཊྛབྦཾ. སབྦཱསཝདིཊྛཱིཏི སབྦཱསཝཔརིཡཱཡེན ཨཱགཏཱ དིཊྛི.

ཚཀྐནིདྡེསཝཎྞནཱ ནིཊྛིཏཱ.

(༧.) སཏྟཀནིདྡེསཝཎྞནཱ

༩༥༡. དྭཱསཊྛིཡཱ དིཊྛཱིསུ སཏྟཀསྶ ཨཉྙསྶ ཨབྷཱཝཱ སཏྟ ཨུཙྪེདཝཱདཱ ཨེཝ ཨིདྷ ཏཐཱ ཨཝཏྭཱ ‘‘སཏྟ དིཊྛཱི’’ཏི ཝུཏྟཱ.

སཏྟཀནིདྡེསཝཎྞནཱ ནིཊྛིཏཱ.

(༨.) ཨཊྛཀནིདྡེསཝཎྞནཱ

༩༥༢. ‘‘ཀམྨཾ ¶ ཁོ མེ ཀཏྟབྦཾ བྷཝིསྶཏཱི’’ཏིཨཱདིནཱ ཨོསཱིདནཱཀཱརེན པཝཏྟཙིཏྟུཔྤཱདཱ ཀོསཛྫཀཱརཎཱནི, ཀོསཛྫམེཝ ཝཱ ཀོསཛྫནྟརཀཱརཎཏཱཡ ཀོསཛྫཀཱརཎཱནཱིཏི དཊྛབྦཱནི. མཱསཱཙིཏཾ མཉྙེཏི ཨེཏྠ ཨཱཙིཏ-སདྡོ ཏིནྟ-སདྡསྶ, མཉྙེ-སདྡོ ཙ ཝིཡ-སདྡསྶ ཨཏྠཾ ཝདཏཱིཏི ཨདྷིཔྤཱཡེན ‘‘ཏིནྟམཱསོ ཝིཡཱ’’ཏི ཨཡམཏྠོ ཝིབྷཱཝིཏོ, མཱསཙཡོ ཝིཡཱཏི ཝཱ ཨཏྠོ.

༩༥༧. ཕརཏཱིཏི ཕུསཏི, གྷཊྚེཏཱིཏི ཨཏྠོ. ཨཉྙེན ཀཱརཎེནཱཏི ‘‘ཨཛྫ ཏཡཱ ཝིཀཱལེ བྷུཏྟཾ, ཏེན ཏྭཾ ཨཱཔཏྟིཾ ཨཱཔནྣོསཱི’’ཏི ཝུཏྟོ ‘‘ཧིཡྻོ ¶ མཡཱ ཀཱལེ བྷུཏྟཾ, ཏེནཱཧཾ ཨནཱཔནྣོ’’ཏིཨཱདིནཱ ཨཉྙེན ཨཡུཏྟེན ཀཱརཎེན ཨཉྙཾ ཡུཏྟཾ ཀཱརཎཾ པཊིཙྪཱདེཏཱིཏི ཨཏྠོ. པུཙྪིཏཏྠཏོ བཧིདྡྷཱ ཡཐཱ ཏཾ ན ཨལླཱིཡཏི, ཏཐཱ ཀཐཱཡ ཨཔནཡནཾ ཝིཀྑིཔནཾ བཧིདྡྷཱ ཨཔནཱམནཱ.

༩༥༨. ཨསཉྙཱིཝཱདཱཏི པུགྒལེཧི དིཊྛིཡོ དསྶེཏི. ཡེཧི ཝཱ ཨབྷིནིཝེསེཧི ཨསཉྙཱི ཨཏྟཱནཾ ཝདནྟི, ཏེ ཨསཉྙཱིཝཱདཱ. ཨརཱུཔསམཱཔཏྟིནིམིཏྟནྟི ཨཱཀཱསཱདིཾ.

ཨཊྛཀནིདྡེསཝཎྞནཱ ནིཊྛིཏཱ.

(༩.) ནཝཀནིདྡེསཝཎྞནཱ

༩༦༠. དསམསྶ ཨཝུཏྟཏྟཱ ‘‘སཏྟེསུ ཨུཔྤཏྟིཝསེནེཝ ཀཐིཏཱནཱི’’ཏི ཝུཏྟཾ.

༩༦༣. སུཁཝིནིཙྪཡནྟི སེཝིཏབྦཱསེཝིཏབྦསུཁསནྣིཊྛཱནནྟི ཨཏྠོ. ཨཛ྄ཛྷཏྟཾ སུཁནྟི སེཝིཏ