ཏཱིཀཱ > ཨབྷིདྷམྨཔིཊཀ (ཊཱིཀཱ) > པཉྩཔཀརཎ-མཱུལཊཱིཀཱ

དྷཱཏུཀཐཱཔཀརཎཾ ¶ ¶ དེསེནྟོ བྷགཝཱ ཡསྨིཾ སམཡེ དེསེསི, ཏཾ སམཡཾ དསྶེཏུཾ, ཝིབྷངྒཱནནྟརཾ དེསིཏསྶ པཀརཎསྶ དྷཱཏུཀཐཱབྷཱཝཾ དསྶེཏུཾ ཝཱ ‘‘ཨཊྛཱརསཧཱི’’ཏིཨཱདིམཱཧ. ཏཏྠ བལཝིདྷམནཝིསཡཱཏིཀྐམནཝསེན དེཝཔུཏྟམཱརསྶ, ཨཔྤཝཏྟིཀརཎཝསེན ཀིལེསཱབྷིསངྑཱརམཱརཱནཾ, སམུདཡཔྤཧཱནཔརིཉྙཱཝསེན ཁནྡྷམཱརསྶ, མཙྩུམཱརསྶ ཙ བོདྷིམཱུལེ ཨེཝ བྷཉྫིཏཏྟཱ པརཱུཔནིསྶཡརཧིཏཾ ¶ ནིརཏིསཡཾ ཏཾ བྷཉྫནཾ ཨུཔཱདཱཡ བྷགཝཱ ཨེཝ ‘‘མཱརབྷཉྫནོ’’ཏི ཐོམིཏོ. ཏཏྠ མཱརེ ཨབྷཉྫེསི, མཱརབྷཉྫནཾ ཝཱ ཨེཏསྶ, ན པརརཱཛཱདིབྷཉྫནནྟི མཱརབྷཉྫནོ. མཧཱཝིཀྐནྟོ མཧཱཝཱིརིཡོཏི མཧཱཝཱིརོ.

ཁནྡྷཱདཡོ ཨརཎནྟཱ དྷམྨཱ སབྷཱཝཊྛེན དྷཱཏུཡོ, ཨབྷིདྷམྨཀཐཱདྷིཊྛཱནཊྛེན ཝཱཏི ཀཏྭཱ ཏེསཾ ཀཐནཏོ ཨིམསྶ པཀརཎསྶ དྷཱཏུཀཐཱཏི ཨདྷིཝཙནཾ. ཡདིཔི ཨཉྙེསུ ཙ པཀརཎེསུ ཏེ སབྷཱཝཱ ཀཐིཏཱ, ཨེཏྠ པན ཏེསཾ སབྦེསཾ སངྒཧཱསངྒཧཱདཱིསུ ཙུདྡསསུ ནཡེསུ ཨེཀེཀསྨིཾ ཀཐིཏཏྟཱ སཱཏིསཡཾ ཀཐནནྟི ཨིདམེཝ ཨེཝཾནཱམཀཾ. ཨེཀདེསཀཐནམེཝ ཧི ཨཉྙཏྠ ཀཏནྟི. ཁནྡྷཱཡཏནདྷཱཏཱུཧི ཝཱ ཁནྡྷཱདཱིནཾ ཨརཎནྟཱནཾ སངྒཧཱསངྒཧཱདཡོ ནཡཱ ཝུཏྟཱཏི ཏཏྠ མཧཱཝིསཡཱནཾ དྷཱཏཱུནཾ ¶ ཝསེན དྷཱཏཱུཧི ཀཐཱ དྷཱཏུཀཐཱཏི ཨེཝཾ ཨསྶ ནཱམཾ ཝུཏྟནྟི ཝེདིཏབྦཾ. དྭིདྷཱ ཏིདྷཱ ཚདྷཱ ཨཊྛཱརསདྷཱཏི ཨནེཀདྷཱ དྷཱཏུབྷེདཾ པཀཱསེསཱིཏི དྷཱཏུབྷེདཔྤཀཱསནོཏི. ཏསྶཏྠནྟི ཏསྶཱ དྷཱཏུཀཐཱཡ ཨཏྠཾ. ཨ-ཀཱརེ ཨཱ-ཀཱརསྶ ལོཔོ དཊྛབྦོ. ‘‘ཡཾ དྷཱཏུཀཐ’’ནྟི ཝཱ ཨེཏྠ པཀརཎནྟི ཝཙནསེསོ སཏྟནྣཾ པཀརཎཱནཾ ཀམེན ཝཎྞནཱཡ པཝཏྟཏྟཱཏི ཏེན ཡོཛནཾ ཀཏྭཱ ཏསྶ པཀརཎསྶ ཨཏྠཾ ཏསྶཏྠནྟི ཨ-ཀཱརལོཔོ ཝཱ. ཏནྟི ཏཾ དཱིཔནཾ སུཎཱཐ, ཏཾ ཝཱ ཨཏྠཾ ཏཾདཱིཔནཝཙནསཝནེན ཨུཔདྷཱརེཐཱཏི ཨཏྠོ. སམཱཧིཏཱཏི ནཱནཱཀིཙྩེཧི ཨཝིཀྑིཏྟཙིཏྟཱ, ཨཏྟནོ ཙིཏྟེ ཨཱཧིཏཱཏི ཝཱ ཨཏྠོ.

༡. ཀོ ¶ ¶ པནེཏསྶ པཀརཎསྶ པརིཙྪེདོཏི? ན སོ ཨིདྷ ཝཏྟབྦོ, ཨཊྛསཱལིནིཡཾ (དྷ. ས. ཨཊྛ. ནིདཱནཀཐཱ) པཀརཎཔརིཙྪེདོ ཝུཏྟོ ཨེཝཱཏི དསྶེནྟོ ཨཱཧ ‘‘ཙུདྡསཝིདྷེན ཝིབྷཏྟནྟི ཝུཏྟ’’ནྟི. ཁནྡྷཱདཱིནཾ དེསནཱ ནཱིཡཏི པཝཏྟཱིཡཏི ཨེཏེཧི, ཁནྡྷཱདཡོ ཨེཝ ཝཱ ནཱིཡནྟི ཉཱཡནྟི ཨེཏེཧི པཀཱརེཧཱིཏི ནཡཱ, ནཡཱནཾ མཱཏིཀཱ ཨུདྡེསོ, ནཡཱ ཨེཝ ཝཱ མཱཏིཀཱཏི ནཡམཱཏིཀཱ. ཨེཏེསཾ པདཱནཾ མཱུལབྷཱུཏཏྟཱཏི ‘‘མཱུལམཱཏིཀཱ’’ཏི ཝཏྟབྦཱནཾ སངྒཧཱསངྒཧཱདཱིནཾ ཙུདྡསནྣཾ པདཱནཾ ཁནྡྷཱདིདྷམྨཝིབྷཛནསྶ ཨིམསྶ པཀརཎསྶ མཱུལབྷཱུཏཏྟཱ ནིསྶཡབྷཱུཏཏྟཱཏི ཨཏྠོ.

༢. ‘‘པཉྩཀྑནྡྷཱ’’ཏིཨཱདཱིཧི རཱུཔཀྑནྡྷཱདིཔདཱནི དསྶིཏཱནི, པཊིཙྩསམུཔྤཱདཝཙནེན ཙ ཡེསུ དྭཱདསསུ ཨངྒེསུ པཙྩེཀཾ པཊིཙྩསམུཔྤཱདསདྡོ ཝཏྟཏི, ཏདཏྠཱནི དྭཱདས པདཱནི དསྶིཏཱནཱིཏི ཏེསཾ ཏཐཱདསྶིཏཱནཾ སརཱུཔེནེཝ དསྶིཏཱནཾ ཕསྶཱདཱིནཉྩ པདཱནཾ ཝསེན ཨཱཧ ‘‘པཉྩཝཱིསཱདྷིཀེན པདསཏེནཱ’’ཏི. ཏཏྠ ཀམྨུཔཔཏྟིཀཱམབྷཝཱདཱིནཾ ཨིདྷ ཝིབྷཏྟཱནཾ བྷཱཝནབྷཝནབྷཱཝེན བྷཝེ ཝིཡ སོཀཱདཱིནཾ ཛརཱམརཎསྶ ཝིཡ ཨནིཊྛཏྟཱ ཏནྣིདཱནདུཀྑབྷཱཝེན ཙ ཛརཱམརཎེ ཨནྟོགདྷཏཱཡ པཊིཙྩསམུཔྤཱདསྶ དྭཱདསཔདཏཱ དཊྛབྦཱ. ཨེཏྠ ཙ པཱལི༹ཡཾ བྷིནྡིཏྭཱ ཨཝིསྶཛྫིཏཱནམྤི སཏིཔཊྛཱནཱདཱིནཾ བྷིནྡིཏྭཱ གཧཎཾ ཀརོནྟོ ཏེསཾ བྷིནྡིཏྭཱཔི ཝིསྶཛྫིཏབྦཏཾ དསྶེཏཱིཏི ཝེདིཏབྦཾ.

ནཡམཱཏིཀཱདིཀཱ ¶ ལཀྑཎམཱཏིཀནྟཱ མཱཏིཀཱ པཀརཎནྟརཱསཱདྷཱརཎཏཱཡ དྷཱཏུཀཐཱཡ མཱཏིཀཱ ནཱམ, ཏསྶཱ ཨབྦྷནྟརེ ཝུཏྟོ ཝིབྷཛིཏབྦཱནཾ ཨུདྡེསོ ཨབྦྷནྟརམཱཏིཀཱ ནཱམཱཏི ཨིམམཏྠཾ པཀཱསེནྟོ ‘‘ཨཡཉྷཱི’’ཏིཨཱདིམཱཧ. ཏཏྠ ཨེཝཾ ཨཝཏྭཱཏི ཡཐཱ ‘‘སབྦཱཔི…པེ… མཱཏིཀཱ’’ཏི ཨཡཾ དྷཱཏུཀཐཱམཱཏིཀཏོ བཧིདྡྷཱ ཝུཏྟཱ, ཨེཝཾ ཨཝཏྭཱཏི ཨཏྠོ. དྷཱཏུཀཐཱཡ ཨབྦྷནྟརེཡེཝཱཏི ཙ དྷཱཏུཀཐཱམཱཏིཀཱཡ ཨབྦྷནྟརེཡེཝཱཏི ཨཏྠོ དཊྛབྦོ. ཏདཱཝེཎིཀམཱཏིཀཱཨབྦྷནྟརེ ཧི ཋཔིཏཱ ཏསྶཱཡེཝ ཨབྦྷནྟརེ ཋཔིཏཱཏི ཝུཏྟཱ ¶ . ཨཐ ཝཱ ཨེཝཾ ཨཝཏྭཱཏི ཡཐཱ ‘‘སབྦཱཔི…པེ… མཱཏིཀཱ’’ཏི ཨེཏེན ཝཙནེན དྷཱཏུཀཐཱཏོ བཧིབྷཱུཏཱ ཀུསལཱདིཨརཎནྟཱ མཱཏིཀཱ པཀརཎནྟརགཏཱ ཝུཏྟཱ, ཨེཝཾ ཨཝཏྭཱཏི ཨཏྠོ. དྷཱཏུཀཐཱཡ ཨབྦྷནྟརེཡེཝཱཏི ཙ ཨིམསྶ པཀརཎསྶ ཨབྦྷནྟརེ ཨེཝ སརཱུཔཏོ དསྶེཏྭཱ ཋཔིཏཏྟཱཏི ཨཏྠོ. སབྦསྶ ཨབྷིདྷམྨསྶ མཱཏིཀཱཡ ཨསངྒཧིཏཏྟཱ ཝིཀིཎྞབྷཱཝེན པཀིཎྞཀཏཱ ཝེདིཏབྦཱ.

༣. ནཡཱནཾ པཝཏྟིདྭཱརབྷཱུཏཱ སངྒཧཱསངྒཧཝིཡོགཱིསཧཡོགཱིདྷམྨཱ ནཡམུཁཱནཱིཏི ཏེསཾ ཨུདྡེསོ ནཡམུཁམཱཏིཀཱ. ཙུདྡསཔི ཧི སངྒཧཱསངྒཧསམྤཡོགཝིཔྤཡོགཱནཾ ཝོམིསྶཀཏཱཝསེན པཝཏྟཱཏི ཡེཧི ཏེ ཙཏྟཱརོཔི ཧོནྟི, ཏེ དྷམྨཱ ཙུདྡསནྣམྤི ནཡཱནཾ མུཁཱནི ཧོནྟཱིཏི. ཏཏྠ སངྒཧིཏེནཨསངྒཧིཏཔདཱདཱིསུ སཙྩཱདཱིཧིཔི ཡཐཱསམྦྷཝཾ སངྒཧཱསངྒཧོ ཡདིཔི ཝུཏྟོ, སོ པན སངྒཱཧཀབྷཱུཏེཧི ཏེཧི ཝུཏྟོ, ན སངྒཧབྷཱུཏེཧི, སོཔི ‘‘ཙཀྑཱཡཏནེན ཡེ དྷམྨཱ ཁནྡྷསངྒཧེན སངྒཧིཏཱ ཨཱཡཏནསངྒཧེན ཨསངྒཧིཏཱ’’ཏིཨཱདིནཱ པུཙྪིཏབྦཝིསྶཛྫིཏབྦདྷམྨུདྡྷཱརེ ཏཏྠཱཔི ཁནྡྷཱདཱིཧེཝ སངྒཧེཧི ནིཡམེཏྭཱ ཝུཏྟོ, ཏསྨཱ ‘‘ཏཱིཧི སངྒཧོ, ཏཱིཧི ཨསངྒཧོ’’ཏི ཝུཏྟཾ. པུཙྪིཏབྦཝིསྶཛྫིཏབྦདྷམྨུདྡྷཱརེཔི པན པུཙྪཱཝིསྶཛྫནེསུ ཙ རཱུཔཀྑནྡྷཱདཱིནཾ ཨརཎནྟཱནཾ ཡཐཱསམྦྷཝཾ སམྤཡོགཝིཔྤཡོགཱ ཙཏཱུཧེཝ ཁནྡྷེཧི ཧོནྟཱིཏི ‘‘ཙཏཱུཧི སམྤཡོགོ, ཙཏཱུཧི ཝིཔྤཡོགོ’’ཏི ཝུཏྟཾ.

ནནུ ཙ ཝིཔྤཡོགོ རཱུཔནིབྦཱནེཧིཔི ཧོཏི, ཀསྨཱ ‘‘ཙཏཱུཧི ཝིཔྤཡོགོ’’ཏི ཝུཏྟནྟི? རཱུཔནིབྦཱནེཧི བྷཝནྟསྶཔི ཙཏཱུཧེཝ བྷཱཝཏོ. ན ཧི རཱུཔཾ རཱུཔེན ནིབྦཱནེན ཝཱ ཝིཔྤཡུཏྟཾ ཧོཏི, ནིབྦཱནཾ ཝཱ རཱུཔེན, ཙཏཱུཧེཝ པན ཁནྡྷེཧི ཧོཏཱིཏི ཙཏུནྣཾ ཁནྡྷཱནཾ རཱུཔནིབྦཱནེཧི ཝིཔྤཡོགོཔི ཝིཔྤཡུཛྫམཱནེཧི ཙཏཱུཧི ཁནྡྷེཧི ནིཡམིཏོ ཏེཧི ཝིནཱ ཝིཔྤཡོགཱབྷཱཝཏོ. སོ ཙཱཡཾ ¶ ཝིཔྤཡོགོ ཨནཱརམྨཎསྶ, ཨནཱརམྨཎཨནཱརམྨཎམིསྶཀེཧི མིསྶཀསྶ ཙ ན ཧོཏི, ཨནཱརམྨཎསྶ པན མིསྶཀསྶ ཙ སཱརམྨཎེན, སཱརམྨཎསྶ སཱརམྨཎེན ཨནཱརམྨཎེན མིསྶཀེན ཙ ཧོཏཱིཏི ཝེདིཏབྦོ.

༤. སངྒཧོཡེཝ ¶ སངྒཧནཡོ. སབྷཱགོ. ཝིསབྷཱགོཏི ཨེཏསྶ ‘‘ཏཱིཧི སངྒཧོ, ཏཱིཧི ཨསངྒཧོ’’ཏི ཨེཏེན, ‘‘ཙཏཱུཧི སམྤཡོགོ, ཙཏཱུཧི ཝིཔྤཡོགོ’’ཏི ཨེཏེནཔི ཝིསུཾ ཡོཛནཱ ཀཱཏབྦཱ. ཏེན སངྒཧོ ཨསངྒཧོ ཙ སབྷཱགོ ཝིསབྷཱགོ ཙ བྷཱཝོ, ཏཐཱ སམྤཡོགོ ཝིཔྤཡོགོ ཙཱཏི ཨཡམཏྠོ ཝིཉྙཱཡཏི. ཡསྶ ཝཱ སངྒཧོ ཙ ཨསངྒཧོ ཙ, སོ དྷམྨོ སབྷཱགོ ཝིསབྷཱགོ ཙ, ཏཐཱ ཡསྶ སམྤཡོགོ ཝིཔྤཡོགོ ཙ, སོཔི སབྷཱགོ ཝིསབྷཱགོ ཙཱཏི. ཏཏྠ ཡེན རཱུཔཀྑནྡྷོ…པེ… མནོཝིཉྙཱཎདྷཱཏཱུཏི དྷམྨཱ གཎནཾ གཙྪནྟི, སོ རུཔྤནཱདིཀོ སམཱནབྷཱཝོ སངྒཧེ སབྷཱགཏཱ, ཨེཀུཔྤཱདཱདིཀོ སམྤཡོགེ ཝེདིཏབྦོ.

༥. ཨེཝཾ དྷཱཏུཀཐཱཡ མཱཏིཀཏོ བཧི ཋཔིཏཏྟཱཏི ‘‘སབྦཱཔི…པེ… མཱཏིཀཱ’’ཏི ཨེཏེན ཋཔནཱཀཱརེན བཧི པིཊྛིཏོ ཋཔིཏཏྟཱཏི ཨཏྠོ. ཨེཏེན ཝཱ ཋཔནཱཀཱརེན ཀུསལཱདཱིནཾ ཨརཎནྟཱནཾ ཨིདྷ ཨཊྛཔེཏྭཱ དྷཱཏུཀཐཱཡ མཱཏིཀཏོ བཧི པཀརཎནྟརམཱཏིཀཱཡ ཨིམསྶ པཀརཎསྶ མཱཏིཀཱབྷཱཝེན ཋཔིཏཏྟཱ ཏཐཱ པཀཱསིཏཏྟཱཏི ཨཏྠོ.

སངྒཧོ ཨསངྒཧོཏིཨཱདཱིསུ སངྒཧོ ཨེཀཝིདྷོཝ, སོ ཀསྨཱ ‘‘ཙཏུབྦིདྷོ’’ཏི ཝུཏྟོཏི? སངྒཧོཏི ཨཏྠཾ ཨཝཏྭཱ ཨནིདྡྷཱརིཏཏྠསྶ སདྡསྶེཝ ཝུཏྟཏྟཱ. སངྒཧོ ཨསངྒཧོཏིཨཱདཱིསུ སདྡེསུ སངྒཧསདྡོ ཏཱཝ ཨཏྟནོ ཨཏྠཝསེན ཙཏུབྦིདྷོཏི ཨཡཉྷེཏྠཏྠོ. ཨཏྠོཔི ཝཱ ཨནིདྡྷཱརིཏཝིསེསོ སཱམཉྙེན གཧེཏབྦཏཾ པཏྟོ ‘‘སངྒཧོ ཨསངྒཧོ’’ཏིཨཱདཱིསུ ‘‘སངྒཧོ’’ཏི ཝུཏྟོཏི ན ཀོཙི དོསོ. ནིདྡྷཱརིཏེ ཧི ཝིསེསེ ཏསྶ ཨེཀཝིདྷཏཱ སིཡཱ, ན ཏཏོ པུབྦེཏི. ཛཱཏིསདྡསྶ སཱཔེཀྑསདྡཏྟཱ ‘‘ཛཱཏིཡཱ སངྒཧོ’’ཏི ཝུཏྟེ ‘‘ཨཏྟནོ ཛཱཏིཡཱ’’ཏི ཝིཉྙཱཡཏི སམྦནྡྷཱརཧསྶ ཨཉྙསྶ ཨཝུཏྟཏྟཱཏི ཛཱཏིསངྒཧོཏི རཱུཔཀཎྜེ ཝུཏྟོ སཛཱཏིསངྒཧོ ཝུཏྟོ ཧོཏི.

ཨེཏྠ ¶ ¶ ནཡམཱཏིཀཱཡ ‘‘སངྒཧོ ཨསངྒཧོ, སམྤཡོགོ ཝིཔྤཡོགོ’’ཏི ཨིམེ དྭེ པུཙྪིཏབྦཝིསྶཛྫིཏབྦདྷམྨཝིསེསཾ ཨནིདྡྷཱརེཏྭཱ སཱམཉྙེན དྷམྨཱནཾ པུཙྪནཝིསྶཛྫནནཡཨུདྡེསཱ, ཨཝསེསཱ ནིདྡྷཱརེཏྭཱ. ‘‘སངྒཧིཏེན ཨསངྒཧིཏ’’ནྟི ཧི ‘‘སངྒཧིཏེན ཨསངྒཧིཏཾ ཨསངྒཧིཏ’’ནྟི ཝཏྟབྦེ ཨེཀསྶ ཨསངྒཧིཏསདྡསྶ ལོཔོ དཊྛབྦོ. ཏེན སངྒཧིཏཝིསེསཝིསིཊྛོ ཡོ ཨསངྒཧིཏོ དྷམྨཝིསེསོ, ཏནྣིསྶིཏོ ཨསངྒཧིཏཏཱསངྑཱཏོ པུཙྪཱཝིསྶཛྫནནཡོ ཨུདྡིཊྛོ ཧོཏི, ‘‘སངྒཧིཏེནཱ’’ཏི ཙ ཝིསེསནེ ཀརཎཝཙནཾ དཊྛབྦཾ. ཨེས ནཡོ ཏཏིཡཱདཱིསུ དསམཱཝསཱནེསུ ནཡུདྡེསེསུ ཚཊྛཝཛྫེསུ. ཏེསུཔི ཧི ཝུཏྟནཡེན དྭཱིཧི དྭཱིཧི པདེཧི པུཙྪིཏབྦཝིསྶཛྫིཏབྦདྷམྨཝིསེསནིདྡྷཱརཎཾ ཀཏྭཱ ཏཏྠ ཏཏྠ ཨནྟིམཔདསདིསེན ཏཏིཡཔདེན པུཙྪནཝིསྶཛྫནནཡཱ ཨུདྡིཊྛཱཏི. ཏཏྠ ཙཏུཏྠཔཉྩམེསུ ཀཏྟུཨཏྠེ ཀརཎནིདྡེསོ, སཏྟམཱདཱིསུ ཙ ཙཏཱུསུ སཧཡོགེ དཊྛབྦོ, ན དུཏིཡཏཏིཡེསུ ཝིཡ སམཱནཱདྷིཀརཎེ ཝིསེསནེ. ཏཏྠ ཧི སབྷཱཝནྟརེན སབྷཱཝནྟརསྶ ཝིསེསནཾ ཀཏཾ, ཨེཏེསུ དྷམྨནྟརེན དྷམྨནྟརསྶཱཏི. ཨེཀཱདསམཱདཱིསུ པན ཙཏཱུསུ ཨཱདིཔདེནེཝ དྷམྨཝིསེསནིདྡྷཱརཎཾ ཀཏྭཱ ཨིཏརེཧི པུཙྪནཝིསྶཛྫནནཡཱ ཨུདྡིཊྛཱ. ཝིསེསནེ ཨེཝ ཙེཏྠ ཀརཎཝཙནཾ དཊྛབྦཾ. པུཙྪཱཝིསྶཛྫནཱནཉྷི ནིསྶཡབྷཱུཏཱ དྷམྨཱ སངྒཧིཏཏཱདིཝིསེསེན ཀརཎབྷཱུཏེན སམྤཡུཏྟཝིཔྤཡུཏྟཱདིབྷཱཝཾ ཨཏྟནོ ཝིསེསེནྟཱིཏི.

ཝིཀཔྤཏོཏི ཝིཝིདྷཀཔྤནཏོ, ཝིབྷཱགཏོཏི ཨཏྠོ. སནྣིཊྛཱནཝསེནཱཏི ཨདྷིམོཀྑསམྤཡོགཝསེན. སནྣིཊྛཱནཝསེན ཝུཏྟཱ ཙ སབྦེ ཙ ཙིཏྟུཔྤཱདཱ སནྣིཊྛཱནཝསེན ཝུཏྟསབྦཙིཏྟུཔྤཱདཱ, ཏེསཾ སཱདྷཱརཎཝསེནཱཏི ཨེཝམེཏྠ ཨཏྠོ དཊྛབྦོ. ཨདྷིམོཀྑོ ཧི སནྣིཊྛཱནཝསེན ཝུཏྟཱནཾ ཙིཏྟུཔྤཱདཱནཾ སཱདྷཱརཎཝསེན ཝུཏྟོ, ཨིཏརེ སབྦེསནྟི. ཏཏྠ སཱདྷཱརཎཱ པསཊཱ པཱཀཊཱ ཙཱཏི ཨཱདིཏོ པརིགྒཧེཏབྦཱ, ཏསྨཱ ཏེསཾ སངྒཧཱདིཔརིགྒཧཏྠཾ ཨུདྡེསོ ཀཏོ, ཨསཱདྷཱརཎཱཔི པན པརིགྒཧེཏབྦཱཝཱཏི ཏེསུ མཧཱཝིསཡེན ཨཉྙེསམྤི སངྒཧཱདིཔརིགྒཧཾ དསྶེཏུཾ ཨདྷིམོཀྑོ ཨུདྡིཊྛོ. ‘‘སནྣིཊྛཱནཝསེན ཝུཏྟཱ’’ཏི ཙ དྷམྨསངྒཧཝཎྞནཱཡཾ པཊིཙྩསམུཔྤཱདཝིབྷངྒེ ཙ ཝཙནཾ སནྡྷཱཡ ཝུཏྟནྟི ཝེདིཏབྦཾ. སནྣིཊྛཱནཝསེན ཡེ ཝུཏྟཱ, ཏེསཾ སབྦེསཾ སཱདྷཱརཎཏོཏི པན ཨཏྠེ སཏི ¶ སཱདྷཱརཎཱསཱདྷཱརཎེསུ ཝཏྟབྦེསུ ཡོ ཨསཱདྷཱརཎེསུ མཧཱཝིསཡོ ཨདྷིམོཀྑོ, ཏསྶ ཝསེན ཝུཏྟསབྦཙིཏྟུཔྤཱདསཱདྷཱརཎཏོ ཕསྶཱདཡོ སབྦསཱདྷཱརཎཱཏི ཨདྷིམོཀྑོ ཙ ཨསཱདྷཱརཎེསུ མཧཱཝིསཡོཏི ཀཏྭཱ ཝུཏྟོ ཨཉྙསྶ ཏཱདིསསྶ ཨབྷཱཝཱཏི ཨཡམདྷིཔྤཱཡོ དཊྛབྦོ.

ཛཱིཝིཏིནྡྲིཡཾ ¶ པནེཏྠ རཱུཔམིསྶཀཏྟཱ ན ཝུཏྟནྟི ཝེདིཏབྦཾ, ཙིཏྟེཀགྒཏཱ པན ཨསམཱདྷིསབྷཱཝཱ སཱམཉྙསདྡེནེཝ སཱམཉྙཝིསེསསདྡེཧི ཙ སམཱདྷིསབྷཱཝཱ ཝིསེསསདྡཝཙནཱིཡཾ ཨཉྙཾ བྱཱཔེཏབྦཾ ནིཝཏྟེཏབྦཉྩ ནཏྠཱིཏི ཨནཉྙབྱཱཔཀནིཝཏྟཀསཱམཉྙཝིསེསདཱིཔནཏོ ཏསྶེཝ དྷམྨསྶ བྷེདདཱིཔཀེཧི ཝཏྟབྦཱ, ན སུཁཱདིསབྷཱཝཱ ཝེདནཱ ཝིཡ ཝུཏྟལཀྑཎཝིཔརཱིཏེཧི སཱམཉྙཝིསེསསདྡེཧེཝ, ཏསྨཱ ‘‘ཙིཏྟེཀགྒཏཱ’’ཏི ཨཡཾ སཱམཉྙསདྡོ སམཱདྷིསབྷཱཝེ ཝིསེསསདྡནིརཔེཀྑོ པཝཏྟམཱནོ སཡམེཝ ཝིསེསསདྡམཱཔཛྫིཏྭཱ ཨསམཱདྷིསབྷཱཝམེཝ པཀཱསེཡྻ, ཨིཏརོ ཙ སམཱདྷིསབྷཱཝམེཝཱཏི དྭིདྷཱ བྷིནྣཱ ཙིཏྟེཀགྒཏཱ ཨསཱདྷཱརཎཱ ཙེཝ ཨཔྤཝིསཡཱ ཙཱཏི ཨིདྷ ཨུདྡེསཾ ན ཨརཧཏི. ཨབྷིནྣཱཔི ཝཱ ཕསྶཱདཱིནཾ ཝིཡ པཱཀཊཏྟཱབྷཱཝཏོ ཨཉྙདྷམྨནིསྶཡེན ཝཏྟབྦཏོ ཙ སཱ ཛཱིཝིཏཉྩ ན ཨརཧཏཱིཏི ན ཨུདྡིཊྛཱཏི.

༦. ཁནྡྷཱཡཏནདྷཱཏུཡོམཧནྟརེ ¶ ¶ ཨབྷིཉྙེཡྻདྷམྨབྷཱཝེན ཝུཏྟཱ, ཏེསཾ པན སབྷཱཝཏོ ཨབྷིཉྙཱཏཱནཾ དྷམྨཱནཾ པརིཉྙེཡྻཏཱདིཝིསེསདསྶནཏྠཾ སཙྩཱནི, ཨདྷིཔཏིཡཱདིཀིཙྩཝིསེསདསྶནཏྠཾ ཨིནྡྲིཡཱདཱིནི ཙ ཝུཏྟཱནཱིཏི སཙྩཱདིཝིསེསོ ཝིཡ སངྒཧཱསངྒཧཝིསེསོ ཙ ཨབྷིཉྙེཡྻནིསྶིཏོ ཝུཙྩམཱནོ སུཝིཉྙེཡྻོ ཧོཏཱིཏི ‘‘ཏཱིཧི སངྒཧོ. ཏཱིཧི ཨསངྒཧོ’’ཏི ནཡམུཁམཱཏིཀཱ ཋཔིཏཱཏི ཝེདིཏབྦཱ. ཨེཝཉྩ ཀཏྭཱ ‘‘ཙཏཱུཧཱི’’ཏི ཝུཏྟཱ སམྤཡོགཝིཔྤཡོགཱ ཙ ཨབྷིཉྙེཡྻནིསྶཡེན ཁནྡྷཱདཱིཧེཝ པུཙྪིཏྭཱ ཝིསྶཛྫིཏཱཏི. རཱུཔཀྑནྡྷོ ཨེཀེན ཁནྡྷེནཱཏི ཡེ དྷམྨཱ ‘‘རཱུཔཀྑནྡྷོ’’ཏི ཝུཙྩནྟི, ཏེསཾ པཉྩསུ ཁནྡྷེསུ རཱུཔཀྑནྡྷབྷཱཝེན སབྷཱགཏཱ ཧོཏཱིཏི རཱུཔཀྑནྡྷབྷཱཝསངྑཱཏེན, རཱུཔཀྑནྡྷཝཙནསངྑཱཏེན ཝཱ གཎནེན སངྒཧཾ གཎནཾ དསྶེཏི. ཏེནཱཧ ‘‘ཡཉྷི ཀིཉྩཱི’’ཏིཨཱདི. རཱུཔཀྑནྡྷོཏི ཧི སངྒཧིཏབྦདྷམྨོ དསྶིཏོ. ཡེན སངྒཧེན སངྒཡ྄ཧཏི, ཏསྶ སངྒཧསྶ དསྶནཾ ‘‘ཨེཀེན ཁནྡྷེནཱ’’ཏི ཝཙནཾ. པཉྩསུ ཁནྡྷགཎནེསུ ཨེཀེན ཁནྡྷགཎནེན གཎིཏོཏི ཨཡཉྷེཏྠ ཨཏྠོ. ཡསྨཱ ཙ ཁནྡྷཱདིཝཙནེཧི སངྒཧོ ཝུཙྩཏི, ཏསྨཱ ཨུཔརི ‘‘ཁནྡྷསངྒཧེན སངྒཧིཏཱ’’ཏིཨཱདིཾ ཝཀྑཏཱིཏི.

ཨསངྒཧནཡནིདྡེསེཏི ཨིདཾ ‘‘སངྒཧོ ཨསངྒཧོ’’ཏི ཨེཏསྶེཝ ནཡསྶ ཨེཀདེསནཡབྷཱཝེན ཝུཏྟཾ, ན ནཡནྟརཏཱཡཱཏི དཊྛབྦཾ. རཱུཔཀྑནྡྷམཱུལཀཱཡེཝ ཙེཏྠ དུཀཏིཀཙཏུཀྐཱ དསྶིཏཱཏི ཨེཏེན ཝེདནཱཀྑནྡྷམཱུལཀཱ པུརིམེན ཡོཛིཡམཱནེ ཝིསེསོ ནཏྠཱིཏི པཙྪིམེཧེཝ ཡོཛེཏྭཱ ཏཡོ དུཀཱ དྭེ ཏིཀཱ ¶ ཨེཀོ ཙཏུཀྐོ, སཉྙཱཀྑནྡྷམཱུལཀཱ དྭེ དུཀཱ ཨེཀོ ཏིཀོ, སངྑཱརཀྑནྡྷམཱུལཀོ ཨེཀོ དུཀོཏི ཨེཏེ ལབྦྷནྟཱིཏི དསྶེཏི. ཏེསཾ པན བྷེདཏོ པཉྩཀཔུཙྪཱཝིསྶཛྫནཱནནྟརཾ པུཙྪཱཝིསྶཛྫནཾ ཀཱཏབྦཾ སཾཁིཏྟནྟི དཊྛབྦཾ, ཝུཏྟནཡེན ཝཱ སཀྐཱ ཉཱཏུནྟི པཱལི༹ཾ ན ཨཱརོཔིཏནྟི.

༤༠. ཡསྨཱ ¶ ཙ དུཀཏིཀེསཱུཏི ཡདིཔི ཨེཀཀེཔི སདིསཾ ཝིསྶཛྫནཾ, ཨེཀཀེ པན སདིསཝིསྶཛྫནཱནཾ ཙཀྑུནྡྲིཡསོཏིནྡྲིཡསུཁིནྡྲིཡཱདཱིནཾ དུཀཱདཱིསུ ཨསདིསཝིསྶཛྫནཾ དིཊྛཾ. ན ཧེཏྠ ཙཀྑུསོཏཙཀྑུསུཁིནྡྲིཡདུཀཱནཾ ཨཉྙམཉྙསདིསཝིསྶཛྫནཾ, ནཱཔི དུཀེཧི ཏིཀསྶ, ཨིདྷ པན དུཀྑསམུདཡདུཀྑམགྒདུཀཱནཾ ཨཉྙམཉྙཾ ཏིཀེན ཙ སདིསཾ ཝིསྶཛྫནནྟི དུཀཏིཀེསྭེཝ སདིསཝིསྶཛྫནཏཾ སམུདཡཱནནྟརཾ མགྒསཙྩསྶ ཝཙནེ ཀཱརཎཾ ཝདཏི.

༦༡. ‘‘པུཙྪཾ ཨནཱརབྷིཏྭཱ ཨཝིཛྫཱ ཨེཀེན ཁནྡྷེན, ཨཝིཛྫཱཔཙྩཡཱ སངྑཱརཱ ཨེཀེན ཁནྡྷེནཱ’’ཏི ལིཁིཏབྦེཔི པམཱདཝསེན ‘‘ཨཝིཛྫཱ ཨེཀེན ཁནྡྷེནཱ’’ཏི ཨིདཾ ན ལིཁིཏནྟི དཊྛབྦཾ. སརཱུཔེཀསེསཾ ཝཱ ཀཏྭཱ ཨཝིཛྫཱཝཙནེན ཨཝིཛྫཱཝིསྶཛྫནཾ དསྶིཏནྟི. སབྦམྤི ཝིཔཱཀཝིཉྙཱཎནྟི ཨེཏྠ ཝིཔཱཀགྒཧཎེན ཝིསེསནཾ ན ཀཱཏབྦཾ. ཀུསལཱདཱིནམྤི ཧི ཝིཉྙཱཎཱནཾ དྷཱཏུཀཐཱཡཾ སངྑཱརཔཙྩཡཱཝིཉྙཱཎཱདིཔདེཧི སངྒཧིཏཏཱ ཝིཔྤཡུཏྟེནསངྒཧིཏཱསངྒཧིཏཔདནིདྡེསེ ‘‘ཝིཔཱཀཱ དྷམྨཱ’’ཏི ཨིམསྶ ཝིསྶཛྫནཱསདིསེན ཏེསཾ ཝིསྶཛྫནེན དསྶིཏཱ, ཨིདྷ ཙ ནཱམརཱུཔསྶ ཨེཀཱདསཧཱཡཏནེཧི སངྒཧཝཙནེན ཨཀམྨཛཱནམྤི སངྒཧིཏཏཱ ཝིཉྙཱཡཏཱིཏི.

༧༡. ཛཱཡམཱནཔརིཔཙྩམཱནབྷིཛྫམཱནཱནཾ ཛཱཡམཱནཱདིབྷཱཝམཏྟཏྟཱ ཛཱཏིཛརཱམརཎཱནི པརམཏྠཏོ ཝིནིབྦྷུཛྫིཏྭཱ ཨནུཔལབྦྷམཱནཱནི པརམཏྠཱནཾ སབྷཱཝམཏྟབྷཱུཏཱནི, ཏཱནི རཱུཔསྶ ནིབྦཏྟིཔཱཀབྷེདབྷཱུཏཱནི རུཔྤནབྷཱཝེན གཡ྄ཧནྟཱིཏི རཱུཔཀྑནྡྷདྷམྨསབྷཱགཱནི, ཨརཱུཔཱནཾ པན ནིབྦཏྟིཨཱདིབྷཱུཏཱནི རཱུཔཀལཱཔཛཱཏིཨཱདཱིནི ཝིཡ སཧུཔྤཛྫམཱནཙཏུཀྑནྡྷཀལཱཔནིབྦཏྟིཨཱདིབྷཱཝཏོ ཨེཀེཀབྷཱུཏཱནི ཝེདིཡནསཉྫཱནནཝིཛཱནནེཧི ཨེཀནྟཔརམཏྠཀིཙྩེཧི ཨགཡ྄ཧམཱནཱནི སངྑཏཱབྷིསངྑརཎེན ཨནེཀནྟཔརམཏྠཀིཙྩེན གཡ྄ཧནྟཱིཏི སངྑཱརཀྑནྡྷདྷམྨསབྷཱགཱནི, ཏཐཱ དུཝིདྷཱནིཔི ¶ ཏཱནི ཙཀྑཱཡཏནཱདཱིཧི ཨེཀནྟཔརམཏྠཀིཙྩེཧི ཨགཡ྄ཧམཱནཱནི ནིསྶཏྟཊྛེན དྷམྨཱཡཏནདྷམྨདྷཱཏུདྷམྨེཧི སབྷཱགཱནི, ཏེན ཏེཧི ཁནྡྷཱདཱིཧི སངྒཡ྄ཧནྟཱིཏི ‘‘ཛཱཏི དྭཱིཧི ཁནྡྷེཧཱི’’ཏིཨཱདིམཱཧ.

པཋམནཡསངྒཧཱསངྒཧཔདཝཎྞནཱ ནིཊྛིཏཱ.

༢. དུཏིཡནཡོ སངྒཧིཏེནཨསངྒཧིཏཔདཝཎྞནཱ

༡༧༡. སངྒཧིཏེནཨསངྒཧིཏཔདནིདྡེསེ ¶ ཡཾ ཏཾ ཨུདྡེསེ ཨསངྒཧིཏཏཱཡ པུཙྪིཏབྦཾ ཝིསྶཛྫིཏབྦཉྩ སངྒཧིཏཏཱཝིསིཊྛཾ ཨསངྒཧིཏཾ དྷམྨཛཱཏཾ ནིདྡྷཱརིཏཾ, ཏདེཝ ཏཱཝ དསྶེནྟོ ‘‘ཙཀྑཱཡཏནེན ཡེ དྷམྨཱ ཁནྡྷསངྒཧེན སངྒཧིཏཱ ཨཱཡཏནདྷཱཏུསངྒཧེན ཨསངྒཧིཏཱ’’ཏི ཨཱཧ. སབྦཏྠ ཁནྡྷཱདིསངྒཧསཱམཉྙཱནཾ ནིཙྩཾ ཝིསེསཱཔེཀྑཏྟཱ བྷེདནིསྶིཏཏྟཱ ཙ པུཙྪཱཝིསྶཛྫནཱནཾ སཝིསེསཱཝ ཁནྡྷཱདིགཎནཱ སུདྡྷཱ. ཏཏྠ སངྒཧིཏེནཨསངྒཧིཏཝཙནམཏྟེན དྷམྨཝིསེསསྶ ནིདྡྷཱརིཏཏྟཱ ཏཱིསུ སངྒཧེསུ ཨེཀེན དྭཱིཧི ཝཱ ཡེ སངྒཧིཏཱ ཧུཏྭཱ ཨཉྙེཧི ཨསངྒཧིཏཱ, ཏེཡེཝ དྷམྨཱ ‘‘ཁནྡྷསངྒཧེན སངྒཧིཏཱ ཨཱཡཏནདྷཱཏུསངྒཧེན ཨསངྒཧིཏཱ’’ཏི ཨེཏྟཀེནེཝ དསྶེཏབྦཱ སིཡུཾ, ཏེསཾ པན ཨེཝཾཝིདྷཱནཾ ཨསམྦྷཝཱ ནཡམཱཏིཀཱཡ ཙ ཨབྦྷནྟརབཱཧིརམཱཏིཀཱཔེཀྑཏྟཱ ཨུདྡེསེཔི ཡཾ ཡཾ རཱུཔཀྑནྡྷཱདཱིསུ ཨརཎནྟེསུ སངྒཱཧཀཾ, ཏཾ ཏཾ ཨཔེཀྑིཏྭཱ སངྒཧིཏེནཨསངྒཧིཏཾ ནིདྡྷཱརིཏནྟི ཝིཉྙཱཡཏཱིཏི ཏེན ཏེན སངྒཱཧཀེན ཡཐཱནིདྡྷཱརིཏཾ དྷམྨཾ ནིཡམེཏྭཱ དསྶེཏུཾ ‘‘ཙཀྑཱཡཏནེནཱ’’ཏིཨཱདིམཱཧ. ཡཏྠ ཧི པུཙྪིཏབྦཝིསྶཛྫིཏབྦདྷམྨཝིསེསནིདྡྷཱརཎཾ ནཏྠི, ཏསྨིཾ པཋམནཡེ ཚཊྛནཡེ ཙ པུཙྪིཏབྦཝིསྶཛྫིཏབྦབྷཱཝེན, ཨིཏརེསུ ཙ ཡཾ ཡཾ པུཙྪིཏབྦཝིསྶཛྫིཏབྦཾ ནིདྡྷཱརིཏཾ, ཏསྶ ཏསྶ ནིཡཱམཀབྷཱཝེན རཱུཔཀྑནྡྷཱདཡོ ཨརཎནྟཱ ཨུདྡིཊྛཱཏི.

ཏཏྠ ‘‘ཙཀྑཱཡཏནེན…པེ… ཕོཊྛབྦདྷཱཏུཡཱ’’ཏི ཀཏྟུཨཏྠེ ཀརཎནིདྡེསོ དཊྛབྦོ, ‘‘ཁནྡྷསངྒཧེན ཨཱཡཏནསངྒཧེན དྷཱཏུསངྒཧེནཱ’’ཏི ཀརཎཏྠེ. ཨེཏྠ ཙ ཡེན ཡེན སངྒཱཧཀེན ཁནྡྷཱདིསངྒཧེསུ ཏེན ཏེན སངྒཧེཏབྦཱསངྒཧེཏབྦཾ ཨཉྙཾ ཨཏྠི, ཏཾ ཏདེཝ སངྒཱཧཀཱསངྒཱཧཀབྷཱཝེན ཨུདྡྷཊཾ. རཱུཔཀྑནྡྷེན པན ཁནྡྷསངྒཧེན སངྒཧེཏབྦོ ཨཉྙོ དྷམྨོ ནཏྠི, ཏཐཱ ཝེདནཱཀྑནྡྷཱདཱིཧི ¶ , ན ཙ སོ ཨེཝ ཏསྶ སངྒཱཧཀོ ཨསངྒཱཧཀོ ཝཱ ཧོཏི. ཡཉྩ ‘‘རཱུཔཀྑནྡྷོ ཨེཀེན ཁནྡྷེན སངྒཧིཏོ’’ཏི ཝུཏྟཾ, ཏཉྩ ན ཏསྶེཝ ཏེན སངྒཧིཏཏཾ སནྡྷཱཡ ཝུཏྟཾ, རཱུཔཀྑནྡྷབྷཱཝེན པན རཱུཔཀྑནྡྷཝཙནེན ཝཱ གཧིཏཏཾ སནྡྷཱཡ ཝུཏྟནྟི པཀཱསིཏོཡམཏྠོ.

ཡདི ཙ སོ ཨེཝ ཏེན སངྒཡ྄ཧེཡྻ, སངྒཧིཏེནསམྤཡུཏྟཝིཔྤཡུཏྟཔདནིདྡེསེ – ‘‘ཝེདནཱཀྑནྡྷེན ཡེ དྷམྨཱ ཁནྡྷསངྒཧེན སངྒཧིཏཱ ཨཱཡཏནསངྒཧེན ¶ སངྒཧིཏཱ དྷཱཏུསངྒཧེན སངྒཧིཏཱ, ཏེ དྷམྨཱ ཏཱིཧི ཁནྡྷེཧི ཨེཀེནཱཡཏནེན སཏྟཧི དྷཱཏཱུཧི སམྤཡུཏྟཱ’’ཏིཨཱདི ཝཏྟབྦཾ སིཡཱ, ན ཙ ཝུཏྟཾ, ཏསྨཱ ཡཐཱ ཙིཏྟཾ ཙིཏྟེན སམྤཡུཏྟཾ ཝིཔྤཡུཏྟཉྩ ན ཧོཏི, ཨེཝཾ རཱུཔཀྑནྡྷོ རཱུཔཀྑནྡྷེན སངྒཧིཏོ ཨསངྒཧིཏོ ཙ ན ཧོཏི, ཏཐཱ ཝེདནཱཀྑནྡྷཱདཡོ ཝེདནཱཀྑནྡྷཱདཱིཧི. ན ཧི སོ ཨེཝ ཏསྶ སབྷཱགོ ཝིསབྷཱགོ ཙཱཏི. ཏེནེཝ ན ཨེཀདེསཱ ཝིཡ སམུདཱཡསྶ, སམུདཱཡོ ཨེཀདེསཱནཾ སངྒཱཧཀོ ཨསངྒཱཧཀོ ཙ. ཡཐཱ རཱུཔཀྑནྡྷོ ཙཀྑཱཡཏནཱདཱིནཾ, དྷམྨཱཡཏནཾ ཝེདནཱཀྑནྡྷཱདཱིནཾ, སརཎཱ དྷམྨཱ ཙཏུནྣཾ ཁནྡྷཱནཾ. སམུདཱཡནྟོགདྷཱནཉྷི ཨེཀདེསཱནཾ ན ཝིབྷཱགོ ཨཏྠི, ཡེན ཏེ སམུདཱཡསྶ སམུདཱཡོ ཙ ཏེསཾ སབྷཱགོ ཝིསབྷཱགོ ཙ སིཡཱཏི, ཏཐཱ ན སམུདཱཡོ ཨེཀདེསསབྷཱགཝིསབྷཱགཱནཾ སངྒཱཧཀོ ཨསངྒཱཧཀོ ཙ. ཡཐཱ དྷམྨཱཡཏནཾ སུཁུམརཱུཔསབྷཱགསྶ ཝེདནཱདིཝིསབྷཱགསྶ ཙ རཱུཔཀྑནྡྷེཀདེསསྶ ཁནྡྷསངྒཧེན, ཛཱིཝིཏིནྡྲིཡཾ རཱུཔཱརཱུཔཛཱིཝིཏསབྷཱགཝིསབྷཱགསྶ རཱུཔཀྑནྡྷེཀདེསསྶ སངྑཱརཀྑནྡྷེཀདེསསྶ ཙ ཛཱིཝིཏཝཛྫསྶ ཁནྡྷསངྒཧེནེཝ. ན ཧི ཨེཀདེསསབྷཱགཾ སམུདཱཡསབྷཱགཾ, ནཱཔི ཨེཀདེསཝིསབྷཱགཾ སམུདཱཡཝིསབྷཱགནྟི, ཏསྨཱ སཏིཔི ཨཏྟཏོ ཨཏྟནི ཨནྟོགདྷཏོ ཨཏྟེཀདེསསབྷཱགཏོ ཙ ཨཉྙསྶ ཨསངྒཱཧཀཏྟེ སངྒཱཧཀཏྟམེཝ ཨེཏེསཾ ནཏྠི, ཡེན སངྒཧིཏསྶ ཨསངྒཱཧཀཱ སིཡུནྟི སངྒཱཧཀཏྟཱབྷཱཝཏོ ཨེཝ ཨེཝརཱུཔཱནཾ ཨགྒཧཎཾ ཝེདིཏབྦཾ.

ཡཾ པན ‘‘དྷམྨཱཡཏནཾ ཨསངྑཏཾ ཁནྡྷཏོ ཋཔེཏྭཱ ཙཏཱུཧི ཁནྡྷེཧི སངྒཧིཏ’’ནྟི (དྷཱཏུ. ༢༥), ‘‘ཙཀྑཱཡཏནཉྩ སོཏཱཡཏནཉྩ ཨེཀེན ཁནྡྷེན སངྒཧིཏ’’ནྟི (དྷཱཏུ. ༢༦) ཙ ཝུཏྟཾ, ན ཏེན ཨེཀདེསཱནཾ སམུདཱཡསངྒཱཧཀཏྟཾ, སམུདཱཡསྶ ཙ ཨེཀདེསསངྒཱཧཀཏྟཾ དསྶེཏི, ཙཏུཀྑནྡྷགཎནབྷེདེཧི པན དྷམྨཱཡཏནསྶ གཎེཏབྦཱགཎེཏབྦབྷཱཝེན པཉྩདྷཱ བྷིནྣཏཾ, ཙཀྑཱཡཏནཱདཱིནཾ ཨེཀཀྑནྡྷགཎནེན གཎེཏབྦཏཱཡ ཨེཀཝིདྷཏཉྩ དསྶེཏི. སངྒཱཧཀཱསངྒཱཧཀནིརཔེཀྑཱནཾ གཎེཏབྦཱགཎེཏབྦཱནཾ ཏཾཏཾགཎནེཧི གཎནདསྶནམཏྟམེཝ ཧི པཋམནཡོ ཀམྨཀརཎམཏྟསབྦྷཱཝཱ, དུཏིཡཱདཡོ པན སངྒཱཧཀཱསངྒཱཧཀེཧི སངྒཧིཏཱསངྒཧིཏཱནཾ ཨགཎནཱདིདསྶནཱནི ཀཏྟུཀརཎཀམྨཏྟཡསབྦྷཱཝཱ ¶ . ཏཐཱ པཋམནཡེ ཏཐཱ ཏཐཱ གཎེཏབྦཱགཎེཏབྦབྷཱཝསངྑཱཏོ ཏཾཏཾཁནྡྷཱདིབྷཱཝཱབྷཱཝོ སབྷཱགཝིསབྷཱགཏཱ ¶ , དུཏིཡཱདཱིསུ ཡཐཱནིདྡྷཱརིཏདྷམྨདསྶནེ སངྒཱཧཀསངྒཧེཏབྦཱནཾ སམཱནཀྑནྡྷཱདིབྷཱཝོ སབྷཱགཏཱ, ཏདབྷཱཝོ ཙ ཝིསབྷཱགཏཱ. པུཙྪཱཝིསྶཛྫནེསུ ཏཾཏཾཁནྡྷཱདིབྷཱཝཱབྷཱཝོ ཨེཝཱཏི ཨཡམེཏེསཾ ཝིསེསོཏི.

སམུདཡསཙྩསུཁིནྡྲིཡསདིསཱནི པན ཏེཧི སངྒཧེཏབྦམེཝ ཨཏྠི, ན སངྒཧིཏཾ ཨསངྒཧེཏབྦནྟི ཨསངྒཱཧཀཏྟཱབྷཱཝཏོ ན ཨུདྡྷཊཱནི. དུཀྑསཙྩསདིསཱནི ཏེཧི ཝིསབྷཱགསམུདཱཡབྷཱུཏེཧི ཨནེཀཀྑནྡྷེཧི ཁནྡྷསངྒཧེན སངྒཧེཏབྦཾ, ཨིཏརེཧི ཨསངྒཧེཏབྦཉྩ ནཏྠཱིཏི སངྒཱཧཀཏྟཱསངྒཱཧཀཏྟཱབྷཱཝཏོ. ཨེཝཾ སངྒཱཧཀཏྟཱབྷཱཝཏོ ཨསངྒཱཧཀཏྟཱབྷཱཝཏོ ཨུབྷཡཱབྷཱཝཏོ ཙ ཡཐཱཝུཏྟསདིསཱནི ཨནུདྡྷརིཏྭཱ སངྒཱཧཀཏྟཱསངྒཱཧཀཏྟབྷཱཝཏོ ཙཀྑཱཡཏནཱདཱིནེཝ ཨུདྡྷཊཱནཱིཏི ཝེདིཏབྦཱནི. ཏཏྠ ‘‘ཙཀྑཱཡཏནེན ཡེ དྷམྨཱ ཁནྡྷསངྒཧེན སངྒཧིཏཱ’’ཏི ཙཀྑཱཡཏནཝཛྫཱ རཱུཔདྷམྨཱ ཁནྡྷསངྒཧེན སངྒཧིཏཱཏི ཝེདིཏབྦཱ, ན རཱུཔཀྑནྡྷོཏི. ན ཧི ཨེཀདེསོ སམུདཱཡསངྒཱཧཀོཏི དསྶིཏམེཏནྟི.

ཨཊྛཀཐཱཡཾ པན ཁནྡྷཔདེནཱཏི ཁནྡྷཔདསངྒཧེནཱཏི ཨཏྠོ, ན སངྒཱཧཀེནཱཏི. ‘‘ཀེནཙི སངྒཱཧཀེནཱ’’ཏི ཨིདཾ པན ཨཱནེཏྭཱ ཝཏྟབྦཾ. ཏཾ པན རཱུཔཀྑནྡྷཱདཱིསུ ན ཡུཛྫཏཱིཏི ཏཾ ཝིསྶཛྫནཾ རཱུཔཀྑནྡྷཱདཱིསུ སངྒཱཧཀེསུ ན ཡུཛྫཏཱིཏི ཨཏྠོ. རཱུཔཀྑནྡྷེན ཧི…པེ… སངྒཧིཏོཏི ཨེཏེན ནཡེན ཙཀྑཱཡཏནེན རཱུཔཀྑནྡྷོཝ སངྒཧིཏོ, སོ ཙ ཨཌྜྷེཀཱདསཧི ཨཱཡཏནདྷཱཏཱུཧི ཨསངྒཧིཏོ ནཱམ ནཏྠཱིཏི ཨེཝཾ ཙཀྑཱཡཏནཱདཱིནིཔི ན གཧེཏབྦཱནཱིཏི ཨཱཔཛྫཏཱིཏི ཙེ? ནཱཔཛྫཏི. ན ཧི ཨཉྙམཏྟནིཝཱརཎཾ ཨེཝསདྡསྶ ཨཏྠོ, ཨཐ ཁོ སངྒཱཧཀཏོ ཨཉྙནིཝཱརཎཾ. སོ ཙཱཏིཨཱདི ཙ ན ནིརཔེཀྑཝཙནཾ, ཨཐ ཁོ སངྒཱཧཀཱཔེཀྑནྟི. ཀཐཾ? རཱུཔཀྑནྡྷེན ཧི རཱུཔཀྑནྡྷོཝ སངྒཧིཏོཏི ཡཐཱ ཙཀྑཱཡཏནེན ཙཀྑཱཡཏནཏོ ཨཉྙམྤི ཁནྡྷསངྒཧེན སངྒཧིཏཾ ཨཏྠི, ཡཾ ཨཱཡཏནདྷཱཏུསངྒཧེཧི ཨསངྒཧིཏཾ ཧོཏི, ན ཨེཝཾ རཱུཔཀྑནྡྷེན རཱུཔཀྑནྡྷཏོ ཨཉྙཾ ཁནྡྷསངྒཧེན སངྒཧིཏཾ ཨཏྠི, ཡཾ ཨཱཡཏནདྷཱཏུསངྒཧེཧི ཨསངྒཧིཏཾ སིཡཱ, རཱུཔཀྑནྡྷེན པན རཱུཔཀྑནྡྷོཝ ཁནྡྷསངྒཧེན སངྒཧིཏོཏི ཨཡཉྷེཏྠ ཨདྷིཔྤཱཡོ ཡུཏྟོ. སིཡཱ པནེཏཾ ‘‘སོ ཨེཝ རཱུཔཀྑནྡྷོ རཱུཔཀྑནྡྷེན ཨཱཡཏནདྷཱཏུསངྒཧེཧི ཨསངྒཧིཏོ ཧོཏཱུ’’ཏི, ཏཾ ནིཝཱརེནྟོ ཨཱཧ ‘‘སོ ཙ ཨཌྜྷེཀཱདསཧི ཨཱཡཏནདྷཱཏཱུཧི ཨསངྒཧིཏོ ནཱམ ནཏྠཱི’’ཏི ¶ . ཨེཏྠ ཙ ‘‘རཱུཔཀྑནྡྷེནཱ’’ཏི ཨཱནེཏྭཱ ཝཏྟབྦཾ. ཏཏྠ ¶ རཱུཔཀྑནྡྷོ རཱུཔཀྑནྡྷསྶ ཝཱ ཏདེཀདེསཱནཾ ཝཱ ཙཀྑཱདཱིནཾ ཨཱཡཏནདྷཱཏུསངྒཧེཧི སངྒཱཧཀོ ཨསངྒཱཧཀོ ཙ ན ཧོཏཱིཏི ཨིམིནཱ པརིཡཱཡེན ཨསངྒཧིཏཏཱཡ ཨབྷཱཝོ ཝུཏྟོཏི ཡུཛྫཏི, ན རཱུཔཀྑནྡྷེན རཱུཔཀྑནྡྷསྶ ཏདེཀདེསཱནཾ ཝཱ ཨཌྜྷེཀཱདསཧི ཨཱཡཏནདྷཱཏུསངྒཧེཧི སངྒཧིཏཏཱཡ. ན ཧི སཱ སངྒཧིཏཏཱ ཨཏྠི. ཡདི སིཡཱ, སངྒཧིཏེནསམྤཡུཏྟཝིཔྤཡུཏྟཔདནིདྡེསེ རཱུཔཀྑནྡྷོཔི ཨུདྡྷརིཏབྦོ སིཡཱ. ཏེན ཧི ཏཱིཧིཔི སངྒཧེཧི རཱུཔཀྑནྡྷོ ཏདེཀདེསོ ཝཱ སངྒཧིཏཱ སིཡུཾ, ཨཏྠི ཙ ཏེསཾ ཝིཔྤཡུཏྟཏཱཏི.

ཨེཝཾ ཨསངྒཧིཏཏཱཡ ཨབྷཱཝཏོ ཨེཏཱནི, ཨཉྙཱནི ཙཱཏི ཨེཏྠཱཔི ཙཀྑཱཡཏནཱདཱིཧི ཝིཡ ཨེཏེཧི ཨཉྙེཧི ཙ སངྒཧིཏཱནཾ ཨསངྒཧིཏཏཱཡ ཨབྷཱཝཏོ ཨེཏཱནི ཨཉྙཱནི ཙ ཡཐཱ ཝཱ ཏཐཱ ཝཱ ཨེཏཱནི ཝིཡ ཨཡུཛྫམཱནཝིསྶཛྫནཏྟཱ ཨེཝརཱུཔཱནི པདཱནི སངྒཱཧཀབྷཱཝེན ན གཧིཏཱནཱིཏི ཨདྷིཔྤཱཡོ.

ཏཏྠ ཡཾ ཝུཏྟཾ ‘‘རཱུཔཀྑནྡྷེན ཧི རཱུཔཀྑནྡྷོཝ སངྒཧིཏོ’’ཏི, ཏཾ ཏེནེཝ ཏསྶ སངྒཧིཏཏྟཱསངྒཧིཏཏྟཱབྷཱཝདསྶནེན ནིཝཱརིཏཾ. ཡཉྷེཏྠ ཨགྒཧཎེ ཀཱརཎཾ ཝུཏྟཾ, ཏཉྩ སཏིཔི སངྒཧིཏཏྟེ ཨསངྒཧིཏཏཱཡ ཨབྷཱཝཏོཏི ཝིཉྙཱཡམཱནཾ སམུདཡསཙྩཱདཱིསུ ཡུཛྫེཡྻ སཏི ཏེཧི སངྒཧིཏེ ཏདསངྒཧིཏཏྟཱབྷཱཝཏོ. རཱུཔཀྑནྡྷཱདཱིཧི པན སངྒཧིཏམེཝ ནཏྠི, ཀུཏོ ཏསྶ ཨསངྒཧིཏཏཱ བྷཝིསྶཏི, ཏསྨཱ སངྒཱཧཀཏྟཱབྷཱཝོ ཨེཝེཏྠ ཨགྒཧཎེ ཀཱརཎནྟི ཡུཏྟཾ. སངྒཧིཏཏྟཱབྷཱཝེན ཨསངྒཧིཏཏྟཾ ཡདིཔི རཱུཔཀྑནྡྷཱདིནཱ ཨཏྟནོ ཨཏྟནི ཨནྟོགདྷསྶ ཨཏྟེཀདེསསབྷཱགསྶ ཙ ནཏྠི, ཨཉྙསྶ པན ཨཏྠཱིཏི ན དུཀྑསཙྩཱདཱིསུ ཝིཡ ཨུབྷཡཱབྷཱཝོ ཙེཏྠ ཨགྒཧཎེ ཀཱརཎཾ བྷཝིཏུཾ ཡུཏྟོཏི. དྷམྨཱཡཏནཛཱིཝིཏིནྡྲིཡཱདཱིནཉྩ ཁནྡྷཙཏུཀྐདུཀཱདིསངྒཱཧཀཏྟེ སཏི ན ཏེསཾ སངྒཧིཏཱནཾ ཏེཧི དྷམྨཱཡཏནཛཱིཝིཏིནྡྲིཡཱདཱིཧི ཨཱཡཏནདྷཱཏུསངྒཧེཧི ཨསངྒཧིཏཏཱ ནཏྠཱིཏི ཨསངྒཧིཏཏཱཡ ཨབྷཱཝོ ཨནེཀནྟིཀོ, ཏསྨཱ པུབྦེ ཝུཏྟནཡེནེཝ ཨགྒཧིཏཱནཾ ཨགྒཧཎེ, གཧིཏཱནཉྩ གཧཎེ ཀཱརཎཾ ཝེདིཏབྦནྟི.

ཨནིདསྶནཾ པུནདེཝ སཔྤཊིགྷནྟི ཨེཏྠ ཨནིདསྶནནྟི ཨེཏེན ‘‘སནིདསྶནསཔྤཊིགྷ’’ནྟི ཨེཏྠ ཝུཏྟེན སཔྤཊིགྷསདྡེན སདྡྷིཾ ཡོཛེཏྭཱ ཨནིདསྶནསཔྤཊིགྷཱ ¶ དསྶིཏཱ. པུནདེཝཱཏི ཨེཏེན ཏཏྠེཝ ཨཝིསིཊྛཾ སནིདསྶནཔདཾ ནིཝཏྟེཏྭཱ གཎྷནྟོ སནིདསྶནདུཀཔདཾ དསྶེཏི. ‘‘ཙཀྑཱཡཏནེན ཙཀྑཱཡཏནམེཝེཀཾ སངྒཧིཏ’’ནྟི ཨིདཾ ན སཀྐཱ ཝཏྟུཾ. ན ཧི ‘‘ཙཀྑཱཡཏནེན ¶ ཙཀྑཱཡཏནཾ ཨཱཡཏནསངྒཧེན སངྒཧིཏ’’ནྟི ཙ ‘‘ཨསངྒཧིཏ’’ནྟི ཙ ཝཏྟབྦནྟི དསྶིཏོཡཾ ནཡོཏི. ཨེཝཾ སབྦཏྠ ཏསྶེཝ སམུདཱཡེཀདེསཱནཉྩ སངྒཱཧཀསངྒཧིཏནྟི ཝཙནེསུ ཨསངྒཱཧཀཨསངྒཧིཏནྟི ཝཙནེསུ ཙ ཏདཝཏྟབྦཏཱ ཡོཛེཏབྦཱ. ཨསངྒཱཧཀཏྟཱབྷཱཝཏོ ཨེཝ ཧི ཙཀྑཱཡཏནཱདཱིནི ཙཀྑཱཡཏནཱདཱིཧི ཨསངྒཧིཏཱནཱིཏི ན ཝུཙྩནྟི, ན སངྒཱཧཀཏྟཱབྷཱཝཏོཏི.

དུཏིཡནཡསངྒཧིཏེནཨསངྒཧིཏཔདཝཎྞནཱ ནིཊྛིཏཱ.

༣. ཏཏིཡནཡོ ཨསངྒཧིཏེནསངྒཧིཏཔདཝཎྞནཱ

༡༧༩. ཨསངྒཧིཏེནསངྒཧིཏཔདནིདྡེསེ རཱུཔཀྑནྡྷེན ཁནྡྷསངྒཧེན ཨསངྒཧིཏེསུ ཝེདནཱདཱིནཾ ཏིཎྞཾ ཁནྡྷཱནཾ ནིབྦཱནསྶ ཙ སུཁུམརཱུཔེན སཧ ཨཱཡཏནདྷཱཏུསབྷཱགཏྟེ སཏིཔི ན སུཁུམརཱུཔམེཝ རཱུཔཀྑནྡྷོཏི རཱུཔཀྑནྡྷེན ཨཱཡཏནདྷཱཏུསབྷཱགཏྟཾ ནཏྠི, ཏསྨཱ ན ཏེན ཏཱནི ཨཱཡཏནདྷཱཏུསངྒཧེཧི སངྒཧིཏཱནི. ན ཀེཝལཾ སངྒཧིཏཱནེཝ, ཨསངྒཧིཏཱནིཔི ཏེན ཏཱནི ཏེཧི སངྒཧེཧི ན ཧོནྟེཝ ཏདེཀདེསེན སུཁུམརཱུཔེན ཨཱཡཏནདྷཱཏུསབྷཱགཏྟཱ, སངྒཧིཏཱབྷཱཝོ ཨེཝ པན ཨིདྷཱདྷིཔྤེཏོ, ཝིཉྙཱཎཀྑནྡྷཙཀྑཱཡཏནཱདཱིཧི པན ཨསངྒཧིཏཱ ན ཏེ ཏེཧི ཀཐཉྩི སམྨིསྶཱཏི སབྦཐཱ ཏེ ཏེཧི ན སངྒཧིཏཱ. དུཀྑསཙྩཱདཱིཧི ཙ པཉྩཀྑནྡྷསམུདཱཡབྷཱུཏེཧི ཁནྡྷསངྒཧེན ཨསངྒཧིཏཾ ནིབྦཱནཾ རཱུཔཀྑནྡྷེན ཝིཡ ཨཱཡཏནདྷཱཏུསངྒཧེཧི སངྒཧིཏཾ ཏེཧི ན ཧོཏི, ཏསྨཱ སངྒཱཧཀཏྟཱབྷཱཝཏོ ཨེཝ ཨེཝརཱུཔཱནཾ ཨསངྒཱཧཀབྷཱཝེན ཨགྒཧཎཾ ཝེདིཏབྦཾ, སནིབྦཱནཔཉྩཀྑནྡྷསམུདཱཡབྷཱུཏཱནཾ པན ཨབྱཱཀཏདྷམྨཱདཱིནཾ ཨསངྒཱཧཀཏྟཱབྷཱཝཏོཝ. ན ཧི ཏཾ ཀཉྩི ཨཏྠི, ཡསྶ ཏེ ཁནྡྷསངྒཧེན ཨསངྒཱཧཀཱ སིཡུཾ, ན ཙ ཨཏྟནོ ཨེཀདེསོ ཨཏྟེཀདེསསབྷཱགོ ཙ ཨཏྟནཱ ཨསངྒཧིཏོ ཧོཏཱིཏི ཨཏྟནཱ ཨསངྒཧིཏསངྒཱཧཀཏྟཱ པན ཝེདནཱཀྑནྡྷཱདཱིནཾ གཧཎཾ ཀཏནྟི.

ཡཾ ¶ པན ཨཊྛཀཐཱཡཾ ཝུཏྟཾ ‘‘ཡེ དྷམྨཱཡཏནེན སངྒཧིཏཱ’’ཏི, ཏཾ ན སཀྐཱ ཝཏྟུཾ. དྷམྨཱཡཏནེན ཧི ན ཀོཙི དྷམྨོ ཀེནཙི སངྒཧེན སངྒཧིཏོ ཨཏྠི ཝིསབྷཱགཀྑནྡྷནིབྦཱནསམུདཱཡཏྟཱ ¶ , ཁནྡྷསངྒཧེན སཡམེཝ ཨཏྟནོ སངྒཱཧཀཾ ན ཧོཏཱིཏི ཨཱཡཏནདྷཱཏུསངྒཧེཧི ཙ སངྒཱཧཀཏྟཱབྷཱཝཏོཏི དསྶིཏོཡཾ ནཡོཏི ཨེཏསྶ དྷམྨཱཡཏནགཎནེན གཎིཏཱཏི ཨཏྠོ. ཡཱནི…པེ… གཧིཏཱནཱིཏི ཨེཏེན ཝིཉྙཱཎསམྨིསྶཾ དྷམྨཱཡཏནེཀདེསཾ དཱིཔེནྟཱནི ཨིདྡྷིཔཱདཱདིཔདཱནི, ཨོལཱ༹རིཀརཱུཔསམྨིསྶཾ དཱིཔེནྟཱནི རཱུཔཀྑནྡྷཱདིཔདཱནི, སབྦེན སབྦཾ དྷམྨཱཡཏནཾ ཨདཱིཔེནྟཱནི ཝིཉྙཱཎཀྑནྡྷཙཀྑཱཡཏནཱདིཔདཱནི, སཀལདྷམྨཱཡཏནདཱིཔཀཱནི དྷམྨཱཡཏནཱདིཔདཱནི ཙ ཝཛྫེཏྭཱ དྷམྨཱཡཏནེཀདེསཾ ཨཉྙཱཡཏནེན ཨསམྨིསྶཾ དཱིཔེནྟཱནི གཧིཏཱནཱིཏི དསྶེཏི.

ཏཏིཡནཡཨསངྒཧིཏེནསངྒཧིཏཔདཝཎྞནཱ ནིཊྛིཏཱ.

༤. ཙཏུཏྠནཡོ སངྒཧིཏེནསངྒཧིཏཔདཝཎྞནཱ

༡༩༡. སངྒཧིཏེནསངྒཧིཏཔདནིདྡེསེ ཡསྨཱ ཡཐཱ དུཏིཡཏཏིཡནཡཱ ཏིཎྞཾ སངྒཧཱནཾ སངྒཧཎཱསངྒཧཎཔྤཝཏྟིཝིསེསེན ‘‘སངྒཧིཏེན ཨསངྒཧིཏཾ, ཨསངྒཧིཏེན སངྒཧིཏ’’ནྟི ཙ ཨུདྡིཊྛཱ, ནེཝཾ ཙཏུཏྠཔཉྩམཱ. སངྒཧཎཔྤཝཏྟིཡཱ ཨེཝ ཧི སངྒཧིཏེན སངྒཧིཏཾ ཨུདྡིཊྛཾ, ཨསངྒཧཎཔྤཝཏྟིཡཱ ཨེཝ ཙ ཨསངྒཧིཏེན ཨསངྒཧིཏནྟི, ཏསྨཱ སངྒཧཎཔྤཝཏྟིཝིསེསཝིརཧེ སངྒཧིཏདྷམྨཱསངྒཧིཏདྷམྨཝིསེསེ ནིསྶིཏཱ ཨེཏེ དྭེ ནཡཱཏི ཨེཏྠ ཀེནཙི སངྒཧིཏེན དྷམྨཝིསེསེན པུན སངྒཧིཏོ དྷམྨཝིསེསོ སངྒཧིཏེན སངྒཧིཏོ སངྒཧིཏཏཱཡ པུཙྪིཏབྦོ ཝིསྶཛྫིཏབྦོ ཙ, ཏམེཝ ཏཱཝ ཡཐཱནིདྡྷཱརིཏཾ དསྶེནྟོ ‘‘སམུདཡསཙྩེན ཡེ དྷམྨཱ ཁནྡྷ…པེ… སངྒཧིཏཱ, ཏེཧི དྷམྨེཧི ཡེ དྷམྨཱ ཁནྡྷ…པེ… སངྒཧིཏཱ’’ཏི ཨཱཧ. ཨེཏྠ ཙ ཡེ ཏཱིཧིཔི སངྒཧེཧི ན སངྒཱཧཀཱ རཱུཔཀྑནྡྷཝིཉྙཱཎཀྑནྡྷདྷམྨཱཡཏནདུཀྑསཙྩཱདཱིནི ཝིཡ, ཡེ ཙ དྭཱིཧཱཡཏནདྷཱཏུསངྒཧེཧི ཨསངྒཱཧཀཱ ཙཀྑཱཡཏནཱདཱིནི ཝིཡ, ཡེ ཙ ཨེཀེན ཁནྡྷསངྒཧེནེཝ དྷཱཏུསངྒཧེནེཝ ཙ ན སངྒཱཧཀཱ ཝེདནཱདིཀྑནྡྷནིརོདྷསཙྩཛཱིཝིཏིནྡྲིཡཱདཱིནི ཝིཡ ཙཀྑུཝིཉྙཱཎདྷཱཏཱདཡོ ཝིཡ ཙ, ཏེ དྷམྨཱ སངྒཱཧཀཏྟཱབྷཱཝསབྦྷཱཝཱ སངྒཱཧཀབྷཱཝེན ན ཨུདྡྷཊཱ, ཏཱིཧིཔི པན སངྒཧེཧི ¶ ཡེ སངྒཱཧཀཱ, ཏེ སངྒཱཧཀཏྟཱབྷཱཝཱབྷཱཝཏོ ཨིདྷ ཨུདྡྷཊཱ. ཏེཧི སངྒཧིཏཱཔི ཧི ཨེཀནྟེན ¶ ཨཏྟནོ སངྒཱཧཀསྶ སངྒཱཧཀཱ ཧོནྟི, ཡསྶ པུན སངྒཧོ པུཙྪིཏབྦོ ཝིསྶཛྫིཏབྦོ ཙཱཏི.

ཨཊྛཀཐཱཡཾ པན སཀལེན ཧི ཁནྡྷཱདིཔདེནཱཏི སཀལཝཱཙཀེན རཱུཔཀྑནྡྷཱདིཔདེནཱཏི ཨཏྠོ. ཡཾ པནེཏཾ ཝུཏྟཾ ‘‘ཡཾ ཨཏྟནོ སངྒཱཧཀཾ སངྒཎྷིཏྭཱ པུན ཏེནེཝ སངྒཧཾ གཙྪེཡྻཱ’’ཏི, ཏཾ ཏེན ཁནྡྷཱདིཔདེནཱཏི ཨེཝཾ ཨཡོཛེཏྭཱ ཏཾ ཨཉྙཾ སངྒཧིཏཾ ནཱམ ནཏྠཱིཏི ཨེཝཾ ན སཀྐཱ ཝཏྟུཾ. ན ཧི ཡེན ཡཾ སངྒཧིཏཾ, ཏེནེཝ ཏསྶ སངྒཧོ པུཙྪིཏོ ཝིསྶཛྫིཏོ, ན ཙ ཏསྶེཝ, ཨཐ ཁོ ཏེན སངྒཧིཏསྶཱཏི. ཡཐཱ ཝེདནཱ སདྡོ ཙ ཁནྡྷོ ཨཱཡཏནཉྩ, ན ཨེཝཾ སུཁུམརཱུཔཾ, ཏཾ པན ཁནྡྷཱཡཏནཱནཾ ཨེཀདེསོཝ, ཏསྨཱ ‘‘སུཁུམརཱུཔེཀདེསཾ ཝཱ’’ཏི ཨཝཏྭཱ ‘‘སུཁུམརཱུཔཾ ཝཱ’’ཏི ཝུཏྟཾ. སབྦཏྠ ཙ ཨཉྙེན ཨསམྨིསྶནྟི ཡོཛེཏབྦཾ. ཡམྤི ཙེཏཾ ཝུཏྟཾ ‘‘ཏདེཝ ཡེཧི དྷམྨེཧི ཁནྡྷཱདིཝསེན སངྒཧིཏཾ, ཏེ དྷམྨེ སནྡྷཱཡཱ’’ཏི, ཏམྤི ཏཐཱ ན སཀྐཱ ཝཏྟུཾ. ན ཧི སངྒཧིཏེན སངྒཧིཏསྶ སངྒཧིཏེན སངྒཧོ ཨེཏྠ པུཙྪིཏོ ཝིསྶཛྫིཏོ ཙ, ཨཐ ཁོ སངྒཧོཝ, ཏསྨཱ ཨེཀེན ཁནྡྷེནཱཏི ཨེཀེན ཁནྡྷགཎནེནཱཏི ཨཡམེཝེཏྠ ཨཏྠོ, ན སངྒཱཧཀེནཱཏི. ན ཧི ཨེཀོ ཁནྡྷོ ཨཏྟནོ ཨེཀདེསསྶ སངྒཱཧཀོཏི.

ཙཏུཏྠནཡསངྒཧིཏེནསངྒཧིཏཔདཝཎྞནཱ ནིཊྛིཏཱ.

༥. པཉྩམནཡོ ཨསངྒཧིཏེནཨསངྒཧིཏཔདཝཎྞནཱ

༡༩༣. ཨསངྒཧིཏེནཨསངྒཧིཏཔདནིདྡེསེཔི ཝུཏྟནཡེནེཝ ཡཐཱནིདྡྷཱརིཏདྷམྨདསྶནཾ ཝེདིཏབྦཾ. ཨེཏྠ ཙ སསུཁུམརཱུཔཝིཉྙཱཎསཧིཏདྷམྨསམུདཱཡཱ ཡེ ཏེ དུཀྑསཙྩཨནིདསྶནཨཔྤཊིགྷཨཙེཏསིཀཱནུཔཱདཱསདིསཱ སཏིཔི ཨེཀེན དྭཱིཧི ཝཱ སངྒཧེཧི ཀེསཉྩི ཨསངྒཱཧཀཏྟེ ཏཱིཧིཔི ཨསངྒཧེཏབྦསྶ ཨབྷཱཝཏོ པརིཔུཎྞསངྒཧཱསངྒཱཧཀཱ ན ཧོནྟི, ཨབྱཱཀཏདྷམྨསདིསཱ ཀེནཙི སངྒཧེན ཨསངྒཧེཏབྦབྷཱཝཏོ ཨསངྒཱཧཀཱ ཨེཝ ན ཧོནྟི, ཏེན ཏེ ཨསངྒཱཧཀབྷཱཝེན ན ཨུདྡྷཊཱ, ཨིཏརེ པན ཏབྦིཔརིཡཱཡེན ཨུདྡྷཊཱཏི.

ཡཾ ¶ ¶ པན ཨཊྛཀཐཱཡཾ ‘‘ཏཱདིསེན ཧི པདེན ནིབྦཱནཾ ཁནྡྷསངྒཧམཏྟཾ ན གཙྪེཡྻཱ’’ཏི ཝུཏྟཾ, ཏཾ དུཀྑསཙྩཾ སནྡྷཱཡ ཝུཏྟཾ. ཨནིདསྶནཨཔྤཊིགྷེསུ པན ཨསངྒཱཧཀེསུ ནིབྦཱནཾ ཨནྟོགདྷཾ, ན ཙ ཏདེཝ ཏསྶ ཨསངྒཱཧཀནྟི. སདིསཝིསྶཛྫནཱནཾ ཝསེན སམོདྷཱནེཏྭཱ ཀཏེཧི སདྡྷིནྟི ཨེཝཾ ཀཏེཧི དུཏིཡཔཉྷཱདཱིཧི སདྡྷིཾ པཋམཔཉྷནཱམརཱུཔཔཉྷཱདཡོ སབྦེཔི ཙཏུཏྟིཾས ཧོནྟཱིཏི ཨཏྠོ. ཡཾ པུཙྪཱཡ ཨུདྡྷཊཾ པདཾ, ཏདེཝཱཏི རཱུཔཀྑནྡྷཱདིཝིསེསཀཔདཾ ཝདཏི, ན ནིདྡྷཱརིཏེ པུཙྪིཏབྦདྷམྨེ. ཏེ ཧི ལཀྑཎཏོ དསྶིཏཱ, ན པདེན སརཱུཔཏོཏི. ཏཏྠ ཏདེཝཱཏི ཨེཝ-སདྡེན ན ཏཾ ཀདཱཙི སངྒཧིཏེན ཨསངྒཧིཏཾ ན ཧོཏཱིཏི ཨུདྡྷཊསྶེཝ ཨསངྒཧིཏེནཨསངྒཧིཏབྷཱཝེ ནིཡཏཏཾ ཨཉྙསྶ ཙ ཨནིཡཏཏཾ དསྶེཏཱིཏི ཝེདིཏབྦཾ. ‘‘ཏདེཝ ཡེཧི ཨསངྒཧིཏ’’ནྟི ཨེཏྠ ཧི ‘‘ནིཡམཏོ’’ཏི སཀྐཱ ཝཙནསེསོ ཡོཛེཏུནྟི. ཨཐ ཝཱ ཏདེཝཱཏི པུཙྪཱཡ ཨུདྡྷཊམེཝ ཨེཝཾཔཀཱརམེཝ ཧུཏྭཱ ཡེཧི ཨསངྒཧིཏནྟི ཏསྶ པུཙྪཱཡ ཨུདྡྷཊབྷཱཝེན ཨེཝཾ ཨསངྒཧིཏེནཨསངྒཧིཏབྷཱཝནིཡམནཏྠོ ཨེཝ-སདྡོ, ན ཨཉྙསྶ ཨསངྒཧིཏེནཨསངྒཧིཏཏཱནིཝཱརཎཏྠོཏི དཊྛབྦོ. པུཙྪཱཡ ཨུདྡྷཊཉྷི ཨཉྙསཧིཏཾ ཨསཧིཏཉྩ ཨསངྒཧིཏེན ཨསངྒཧིཏཾ ཧོཏི. རཱུཔཀྑནྡྷཱདཱིནི ཧི ཨཉྙསཧིཏཱནི ཝིཉྙཱཎཀྑནྡྷཱདཱིནི ཨསཧིཏཱནཱིཏི.

ཨཝསེསཱ སངྒཧིཏཱཏི ཨིདཾ ཨཝསེསཱ ཨསངྒཧིཏཱ ན ཧོནྟཱིཏི ཨེཝཾ དཊྛབྦཾ. ཏེཧིཔི ཝིཉྙཱཎདྷམྨེཧི ཏེ རཱུཔདྷམྨཱཝ ཏཱིཧི སངྒཧེཧི ཨསངྒཧིཏཱཏི པུཙྪཱཡ ཨུདྡྷཊཱ ཏཱིཧིཔི སངྒཧེཧི ཨསངྒཱཧཀཱ ཧུཏྭཱ ཨསངྒཧིཏཱཏི ཨདྷིཔྤཱཡོ. ཨནུདྡྷཊཱ ཝེདནཱདཡོཔི ཧི ཨསངྒཧིཏཱ ཨེཝཱཏི. ཨེཏྠ ཙ པཋམེ ནཡེ ཝེདནཱདཡོཔི ཝིཉྙཱཎེན ཨསངྒཧིཏཱཏི ཝུཏྟཱ, དུཏིཡེ རཱུཔདྷམྨཱཝཱཏི ཨཡཾ ཝིསེསོ. ཝེདནཱདཡོ ཧི རཱུཔཝིཉྙཱཎེཧེཝ ཁནྡྷཱདིསངྒཧེན ཨསངྒཧིཏཱཏི ཨོལཱ༹རིཀརཱུཔེཧི ཝིཉྙཱཎེན ཙ ཏཱིཧིཔི སངྒཧེཧི ཨསངྒཧིཏཱཏི ཨཏྠོ. རཱུཔེཀདེསོ ཧི ཨེཏྠ རཱུཔགྒཧཎེན གཧིཏོཏི.

༡༩༦. ཙཏུཏྠཔཉྷེ ཙཀྑཱཡཏནཾ ཝེདནཱདཱིཧི ཙཏཱུཧཱིཏི ཨེཏྠ ཙཀྑཱཡཏནནྟི ཨེཏེན པུཙྪཱཡ ཨུདྡྷཊཾ ཨསངྒཱཧཀཾ དསྶེཏཱིཏི དཊྛབྦཾ. ཙཀྑཱཡཏནེན པན ཨསངྒཧིཏེན ཨསངྒཧིཏཱནི དས ཨོལཱ༹རིཀཱཡཏནཱནི ན ཙཀྑཱཡཏནམེཝཱཏི. ‘‘རཱུཔཉྩ དྷམྨཱཡཏན’’ནྟིཨཱདིནཱ ཡེཧི དྷམྨེཧི ཏཱིཧིཔི སངྒཧེཧི ཨསངྒཧིཏཾ ཏཾ ཝིཉྙཱཎམེཝ ཧོཏི, ཨསངྒཧིཏེན ཏེན ¶ ཨསངྒཧིཏཉྩ ཝིཉྙཱཎཝཛྫཾ སབྦཾ ཏེཝ དྷམྨེ ཨུདཱནེཏི. སདིསཝིསྶཛྫནཱ ཧི ཨེཀཏོ ཨུདཱནེཏྭཱ དསྶེཏབྦཱ. ཏཏྠ པཋམེན རཱུཔཀྑནྡྷེན སདིསཝིསྶཛྫནེསུ ཨེཀཏོ ཨུདཱནེཏྭཱ དསྶིཏེསུ ཨཉྙེ ཝིསདིསཝིསྶཛྫནཱ ¶ ནཡདཱནེན དསྶིཏཱ ཧོནྟི. ཏེནཱཧ ‘‘རཱུཔཉྩ དྷམྨཱཡཏནནྟི…པེ… ཨཉྙེནཱཀཱརེན སངྑིཔིཏྭཱ དསྶིཏཱ’’ཏི. ཏཏྠ དྭེ བྷཝཱཏི ཨསཉྙེཀཝོཀཱརབྷཝཱ. དྭེཏི བཱཧིརུཔཱདཱདྷམྨེ ཨེཝ སནྡྷཱཡ ཝུཏྟཾ. ཡེན ཨསངྒཱཧཀེན ཨསངྒཧིཏེན ཨསངྒཧིཏཾ པུཙྪིཏབྦཾ ཝིསྶཛྫིཏབྦཉྩ པརིཙྪིཛྫཏི, སོ རཱུཔཀྑནྡྷཱདིཀོ ཏསྶ པུཙྪཱཝིསྶཛྫནཱནཉྩ ནིསྶཡབྷཱཝཏོ ‘‘ཝིསཡོ’’ཏི ཝུཏྟོ, ཡཐཱདསྶིཏསྶ པན ཨུདྡཱནསྶ ནཡདཱནམཏྟཏྟཱ ‘‘ནཡོ’’ཏི ཝུཏྟཾ. ‘‘དྭེཝཱིསནཡོ ཙཱ’’ཏིཔི པཱཋོ, དྭེཝཱིསཔདིཀོ ཨེས ནཡོ ཙཱཏི ཨཏྠོ.

པཉྩམནཡཨསངྒཧིཏེནཨསངྒཧིཏཔདཝཎྞནཱ ནིཊྛིཏཱ.

༦. ཚཊྛནཡོ སམྤཡོགཝིཔྤཡོགཔདཝཎྞནཱ

༢༢༨. སམྤཡོགཝིཔྤཡོགཔདེ ཡཾ ལབྦྷཏི, ཡཉྩ ན ལབྦྷཏི, ཏཾ སབྦཾ པུཙྪཱཡ གཧིཏནྟི ཨིདཾ ན རཱུཔཀྑནྡྷཱདཱིནི པདཱནི སནྡྷཱཡ ཝུཏྟཾ, ཨཐ ཁོ སམྤཡོགཔདཾ ཝིཔྤཡོགཔདཉྩཱཏི ཝེདིཏབྦཾ. རཱུཔཀྑནྡྷཱདཱིསུ ཧི ཡཾ དྷམྨཱཡཏནཱདིཔདཾ ན ལབྦྷཏི, ཏཾ པུཙྪཱཡཔི ན གཧིཏཾ. སམྤཡོགཔདཾ པན རཱུཔཀྑནྡྷཱདཱིསུ ཨལབྦྷམཱནམྤི ‘‘རཱུཔཀྑནྡྷོ ཀཏིཧི…པེ… སམྤཡུཏྟོ’’ཏི ཨེཝཾ པུཙྪཱཡ གཧིཏཾ, ཝེདནཱཀྑནྡྷཱདཱིསུ ལབྦྷམཱནཾ, ཝིཔྤཡོགཔདཾ པན སབྦཏྠ ལབྦྷམཱནམེཝཱཏི. རཱུཔདྷམྨཱནཾ པན རཱུཔེན ནིབྦཱནེན ཝཱ, ནིབྦཱནསྶ ཙ རཱུཔེན སདྡྷིཾ སམྤཡོགོ ནཱམ ནཏྠཱིཏི ཨེཀུཔྤཱདཱདིསབྷཱགཏཱཡ ཨབྷཱཝཏོ སམྤཡོགཾ ནིཝཱརེནྟེན སཱ ཨེཝ ཨེཀུཔྤཱདཱདིཏཱ ཨེཏེསཾ ཝིསབྷཱགཏཱཏི ཏདབྷཱཝཏོ ཝིཔྤཡོགོཔི ནིཝཱརིཏོ ཨེཝ ཧོཏཱིཏི དཊྛབྦོ. ཙཏཱུསུ ཧི ཁནྡྷེསུ ཝིཛྫམཱནཱ ཨེཀུཔྤཱདཱདིཏཱ ཏེསཾ ཨཉྙམཉྙཾ སབྷཱགཏཱ ཧོཏི རཱུཔནིབྦཱནེཧི ཏེསཾ ཏེཧི ཙ རཱུཔནིབྦཱནཱནཾ ཝིསབྷཱགཏཱ ཙ, ན ཙ རཱུཔེཀདེསསྶ ནིབྦཱནསྶ ཝཱ སཱ ཨེཀུཔྤཱདཱདིཏཱ ཨཏྠི, ཡཱ རཱུཔེཀདེསེན རཱུཔེཀདེསནིབྦཱནཱནཾ ནིབྦཱནེན ཙ རཱུཔསྶ ཝིསབྷཱགཏཱ སིཡཱ. ཏེནེཝ ‘‘ཙཏཱུཧི ཝིཔྤཡོགོ’’ཏི ཝུཏྟནྟི.

སཏྟསུ ¶ ཝིཉྙཱཎདྷཱཏཱུསུ ཨེཀཱཡཔི ཨཝིཔྤཡུཏྟེཏི ཡཐཱ རཱུཔབྷཝོ ཏཱིཧི ཝིཉྙཱཎདྷཱཏཱུཧི, ནེཝཝིཔཱཀནཝིཔཱཀདྷམྨདྷམྨཱ པཉྩཧི, ཨཝིཏཀྐཨཝིཙཱརཱ ཨེཀཱཡ ཝིཔྤཡུཏྟེ ཨནཱརམྨཎམིསྶཀེ དྷམྨེ ¶ དཱིཔེནྟི, ཨེཝཾ ཨདཱིཔེཏྭཱ ཨེཀཱཡཔི ཝིཔྤཡུཏྟེ ཨཧོནྟེ སཏྟཧིཔི སམྤཡུཏྟེ སཏྟཔི ཝཱ ཏཱ དཱིཔེནྟཱིཏི ཨདྷིཔྤཱཡོ. ཨཝིཔྤཡུཏྟེཏི ཧི ཡེ ཝིཔྤཡུཏྟཱ ན ཧོནྟི, ཏེ དྷམྨེཏི ཝུཏྟཾ ཧོཏི, ན སམྤཡུཏྟེཏི. ཏེན ཡཱནི ཏཱཧི སམྤཡུཏྟེ དཱིཔེནྟི དྷམྨཱཡཏནཱདིཔདཱནི, ཡཱནི ཙ སམྤཡུཏྟཝིཔྤཡུཏྟབྷཱཝེཧི ནཝཏྟབྦཾ དཱིཔེནྟི ཨཙེཏསིཀཱདིཔདཱནི, ཡཱནི ཙ སམྤཡུཏྟནཝཏྟབྦཱནི དཱིཔེནྟི དུཀྑསཙྩཱདིཔདཱནི, ཏེསཾ སབྦེསཾ ཨནཱརམྨཎམིསྶཀདྷམྨདཱིཔཀཱནཾ ཨགྒཧཎཾ ཝུཏྟཾ ཧོཏི. ན ཧི ཨནཱརམྨཎམིསྶཀསབྦཝིཉྙཱཎདྷཱཏུཏཾསམྤཡུཏྟཏདུབྷཡསམུདཱཡཱནཾ ཁནྡྷཱཡཏནདྷཱཏཱུསུ ཀེནཙི སམྤཡོགོ ཝིཔྤཡོགོ ཝཱ ཨཏྠཱིཏི.

ཡདི ཨེཝཾ ཝིཔྤཡུཏྟེནཝིཔྤཡུཏྟཔདནིདྡེསེ ‘‘ཀུསལེཧི དྷམྨེཧི ཡེ དྷམྨཱ ཝིཔྤཡུཏྟཱ, ཏེཧི དྷམྨེཧི ཡེ དྷམྨཱ ཝིཔྤཡུཏྟཱ’’ཏི ན ཝཏྟབྦཾ. ཨཀུསལཱབྱཱཀཏཱ ཧི ཨནཱརམྨཎམིསྶོབྷཡདྷམྨཱཏི? ན, ཡཐཱཝུཏྟསམུདཱཡཱནཾ ཁནྡྷཱདཱིཧེཝ སམྤཡོགཝིཔྤཡོགཱབྷཱཝཝཙནཏོ. ཁནྡྷཱདཡོ ཧི ཏདེཀདེསཱ ཏདེཀདེསཉྙསམུདཱཡཱ ཙ, སམུདཱཡེཀདེསཱནཉྩ ཝིབྷཱགཱབྷཱཝཏོ ན སབྷཱགཝིསབྷཱགཏཱ ཨཏྠི, ཏེན ཏེསཾ ཁནྡྷཱདཱིཧི སམྤཡོགཝིཔྤཡོགཱབྷཱཝོ ཧོཏི. ཀུསལཱ པན དྷམྨཱ ཨཀུསལཱབྱཱཀཏེཧི ཝིབྷཏྟཱ, ཏེ ཙ ཀུསལེཧི, ན ཏེསཾ སམུདཱཡེཀདེསབྷཱཝོ ཏདེཀདེསཉྙསམུདཱཡབྷཱཝོ ཝཱ, ཏསྨཱ ཁནྡྷཱདཱིནི ཨནཱམསིཏྭཱ ཝིཔྤཡུཏྟཏཱམཏྟེན ཡཐཱནིདྡྷཱརིཏདྷམྨདསྶནེ ཀུསལེཧི ཨིཏརེསཾ, ཨིཏརེཧི ཙ ཀུསལཱནཾ ཝིཔྤཡོགོ ན ན ཧོཏི ཝིསབྷཱགཏཱསབྦྷཱཝཏོཏི ཏེསཾ ཨཉྙམཉྙཝིཔྤཡུཏྟཏཱ ཝུཏྟཱ. ཨེས ནཡོ སབྦེསུ ཨེཝརཱུཔེསུ.

ཨུདྡཱནེ པན ཨཊྛཱརས ཏཏོ པརེཏི ཨིདཾ ‘‘སོལ༹སཱ’’ཏི ཝཏྟབྦཾ, ཏེཝཱིསནྟི ཨིདཉྩ ‘‘ཨེཀཝཱིས’’ནྟི. སབྦཏྠ ཙ ཀཱལསནྟཱནབྷེདརཧིཏཱརཧིཏབཧུདྷམྨསམོདྷཱནཱནཾ སངྑཱརཀྑནྡྷདྷམྨཱཡཏནདྷམྨདྷཱཏཱུནཾ ཨེཀདེསཱ སམུདཡསཙྩཝེདནཱཀྑནྡྷཱདཡོ ཨེཀདེསསམྨིསྶཱ ཙ ཨིདྡྷིཔཱདཱདཡོ ཨནཱརམྨཎེཧི ཨསམྨིསྶཱ རཱུཔཀྑནྡྷཱདཡོ ཙ སཱརམྨཎེཧི ཨསམྨིསྶཱ སམྤཡོགཱིཝིཔྤཡོགཱིབྷཱཝེན ¶ སམཱནཀཱལསནྟཱནེཧི ཙ ཨེཀདེསནྟརེཧི ཝིབྷཏྟཱ ཨེཝ གཧིཏཱཏི ཏེཧི ཏེ ཀེཧིཙི ཨེཀདེསནྟརེཧི ཝིབྷཏྟེཧི ཡཐཱཡོགཾ སམྤཡོགཾ ཝིཔྤཡོགཉྩ ལབྷནྟི. ཨཏྠི ཧི ཏེསཾ ཨེཀུཔྤཱདཱདིཏཱ སབྷཱགཏཱ ཝིསབྷཱགཏཱ ཙཱཏི. ཏེན ཏཏྠ ཏཏྠ ‘‘ཨེཀེན ཁནྡྷེན ཨེཀེནཱཡཏནེན ཨེཀཱཡ དྷཱཏུཡཱ ཀེཧིཙི སམྤཡུཏྟ’’ནྟི ཙ, ‘‘ཨེཀེནཱཡཏནེན ཨེཀཱཡ དྷཱཏུཡཱ ཀེཧིཙི ཝིཔྤཡུཏྟ’’ནྟི ཙ ཝུཏྟཾ. བྷིནྣཀཱལསམུདཱཡཱ ཨེཝ པན ཝེདནཱསཉྙཱཝིཉྙཱཎཀྑནྡྷཱ ཝཏྟམཱནཱ ཙ ཨེཀེཀདྷམྨཱ ཨེཝ, ཏསྨཱ ཏེསཾ སམཱནཀཱལསྶ ཝིབྷཛིཏབྦསྶ ཨབྷཱཝཏོ ན སུཁིནྡྲིཡཱདཱིནི ¶ ཝེདནཱཀྑནྡྷསྶ ཝིབྷཱགཾ ཀརོནྟི, ཙཀྑུཝིཉྙཱཎདྷཱཏཱདཡོ ཙ ཝིཉྙཱཎཀྑནྡྷསྶ མནཱཡཏནསྶ ཙ. ཏེན ‘‘སུཁིནྡྲིཡཾ ཨེཀེན ཁནྡྷེན ཀེཧིཙི ཝིཔྤཡུཏྟ’’ནྟི, ‘‘ཙཀྑུཝིཉྙཱཎདྷཱཏུ ཨེཀེན ཁནྡྷེན ཨེཀེནཱཡཏནེན ཀེཧིཙི ཝིཔྤཡུཏྟཱ’’ཏི ཙ ཨེཝམཱདི ན ཝུཏྟཾ, ཁནྡྷཱཡཏནཝིབྷཱགཝིརཧིཏམྤི པན ཝིཉྙཱཎཾ དྷཱཏུཝིབྷཱགེན ཝིབྷཏྟམེཝ ཝུཏྟནྟི ‘‘ཙཀྑུཝིཉྙཱཎདྷཱཏུ…པེ… མནོཝིཉྙཱཎདྷཱཏུ སོལ༹སཧི དྷཱཏཱུཧི ཝིཔྤཡུཏྟཱ’’ཏི ཝུཏྟཾ, ཨེཝམེཝཾ ཨིནྡྲིཡཝིབྷཱགེན ཝིབྷཏྟཱནཾ སུཁིནྡྲིཡཱདཱིནཾ ‘‘སུཁིནྡྲིཡེན ཡེ དྷམྨཱ ཝིཔྤཡུཏྟཱ’’ཏིཨཱདཱིསུ ཡཐཱཡོགཾ ཝིཔྤཡོགོ དཊྛབྦོ, ནཱཝིབྷཏྟསྶ ཝེདནཱཀྑནྡྷསྶཱཏི.

༢༣༥. ཡཐཱ ཏཾསམྤཡོགཱིབྷཱཝཾ སནྡྷཱཡ ‘‘སམུདཡསཙྩཾ ཏཱིཧི ཁནྡྷེཧི སམྤཡུཏྟ’’ནྟི ཝུཏྟཾ, ཨེཝཾ ཏཾཝིཔྤཡོགཱིབྷཱཝཾ སནྡྷཱཡ ‘‘ཏཱིཧི ཁནྡྷེཧི ཝིཔྤཡུཏྟ’’ནྟི ཀསྨཱ ན ཝུཏྟནྟི ཙེ? ཨཝིབྷཱགེཧི ཏེཧི ཝིཔྤཡོགཝཙནསྶ ཨཡུཏྟཏྟཱ. ཝིབྷཱགེ ཧི སཏི སམུདཡསཙྩཾ སུཁདུཀྑདོམནསྶིནྡྲིཡེཧི མནོཝིཉྙཱཎདྷཱཏུཏོ ཨཉྙཝིཉྙཱཎདྷཱཏཱུཧི ཝིཔྤཡུཏྟནྟི ཡུཏྟཾ ཝཏྟུཾ ཝིབྷཱགེནེཝ ཝིསབྷཱགཏཱཡ སངྒཧིཏཏྟཱ, ཝིབྷཱགརཧིཏེཧི པན ཝེདནཱཀྑནྡྷཱདཱིཧི ན ཡུཏྟཾ, ཏེཧི ཝིཛྫམཱནེཧི ཝིཛྫམཱནསྶ སམུདཡསྶ ཝིསབྷཱགབྷཱཝཱབྷཱཝཏོ. ཡཉྷི ཨནུཔྤནྣཱ དྷམྨཱ ཝིཡ ཨཱམཊྛཀཱལབྷེདཾ ན ཧོཏི སངྑཏཾ ཨུདྡྷརིཏབྦཾ, ཏཾ པཙྩུཔྤནྣབྷཱཝཾ ནིསྶཱཡ སམྤཡོགཱིཝིཔྤཡོགཱིབྷཱཝེན ཨུདྡྷརཱིཡཏི, ཏཉྩ ཝིབྷཱགརཧིཏེཧི ཁནྡྷཱདཱིཧི སངྑཏེཧི པཙྩུཔྤནྣབྷཱཝམེཝ ནིསྶཱཡ ཨནཱམཊྛཀཱལབྷེདེ ཨཏྠིཏཱཡ ཨེཝ ནིསྶིཏབྦཏྟཱ. ཨཝིཛྫམཱནསྶ ཧི ཨཝིཛྫམཱནེན, ཨཝིཛྫམཱནསྶ ཙ ཝིཛྫམཱནེན, ཝིཛྫམཱནསྶ ཙ ཨཝིཛྫམཱནེན སམྤཡོགོ ནཏྠི, ཝིཔྤཡོགོ པན ཨཝིཛྫམཱནཏཱདཱིཔཀེ བྷེདེ གཧིཏེ ཏེནེཝ ཝིསབྷཱགཏཱཔི གཧིཏཱ ཨེཝཱཏི ཧོཏི ¶ . བྷེདེ པན ཨགྒཧིཏེ ཏེན ཏེན གཧཎེན ཝིསབྷཱགཏཱཡ ཨགྒཧིཏཏྟཱ སཏི སབྷཱགཏྟེ ཝིཛྫམཱནཏཱཡ ཨེཝ དྷམྨཱནཾ སབྷཱགསྶ པརིཙྪིནྡནཏོ ཝིཛྫམཱནཏཱ དསྶིཏཱཏི ཨེཀུཔྤཱདཱདིབྷཱཝསངྑཱཏཱ སབྷཱགཏཱཔི གཧིཏཱ ཨེཝ ཧོཏི. ཏསྶཱ ཙ གཧིཏཏྟཱ སམྤཡོགོཝ ལབྦྷཏི, ན ཝིཔྤཡོགོ, ཏསྨཱ སམུདཡསཙྩཾ ཝེདནཱཀྑནྡྷཱདཱིཧི སམྤཡུཏྟཏྟེན ཝུཏྟཾ, ན ཝིཔྤཡུཏྟཏྟེནཱཏི. ཨེས ནཡོ མགྒསཙྩཱདཱིསུཔཱིཏི.

༢༦༢. ‘‘དུཏིཡཛ྄ཛྷཱནཝིཙཱརཉྷི ཋཔེཏྭཱ སེསཱ ཨཝིཏཀྐཝིཙཱརམཏྟཱ’’ཏི ཨཊྛཀཐཱཝཙནཾ ཡེ པདྷཱནཱ ཝིཏཀྐོ ཝིཡ ཀོཊྛཱསནྟརཙིཏྟུཔྤཱདེསུ ཨལཱིནཱ, ཏེ ཨེཝ ཨིདྷ ཨཝིཏཀྐཝིཙཱརམཏྟཱཏི ཨདྷིཔྤེཏཱཏི དསྶེཏི. ཏེནེཝ ཧི ཨནནྟརནཡེ སམུདཡསཙྩེན སམཱནགཏིཀཱ ན སཝིཏཀྐསཝིཙཱརེཧཱིཏི ¶ ཏེ ན གཧིཏཱ. དསམོསཱནནཡེསུ ཙ ཏེཧི ཝིཔྤཡུཏྟེཧི ཝིཔྤཡུཏྟཱནཾ ཏེཧི ཝིཔྤཡུཏྟཱནཉྩ སོལ༹སཧི དྷཱཏཱུཧི ཝིཔྤཡོགོ ཨཊྛཱརསསངྒཧིཏོ ཙ ཝུཏྟོ. ཝིཏཀྐསཧིཏེསུཔི པན ཏེསུ གཧིཏེསུ སབྦེཔི ཏེ ཝིཙཱརེན སམྤཡུཏྟཱཏི ‘‘ཨེཀེན ཁནྡྷེན ཀེཧིཙི སམྤཡུཏྟཱ’’ཏི སཀྐཱ ཝཏྟུཾ. སོ ཧི སམུདཱཡོ ཝིཙཱརཾ ཝཛྫེཏྭཱ ཨཉྙེན ཀེནཙི སམྤཡུཏྟོ ན ཧོཏི. ན ཧི ཏདེཀདེསསྶ ཝིཏཀྐསྶ ཝིཙཱརཏོ ཨཉྙེན སམྤཡོགོ སམུདཱཡསྶ ཧོཏི. ཡཐཱ ནཱནཱཙིཏྟུཔྤཱདེསུ ཨུཔྤཛྫམཱནཱནཾ ཨིདྡྷིཔཱདཱནཾ སམུདཱཡསྶ ཨིདྡྷིཔཱདསྶ ཨེཀདེསཱནཾ ཏཱིཧི ཁནྡྷེཧི སམྤཡོགོ སམུདཱཡསྶ ན ཧོཏི, ཨེཝམིདྷཱཔི དཊྛབྦཾ. ཡཐཱ པན ཏེསུ ཨེཀོཔི ཝེདནཱསཉྙཱཀྑནྡྷེཧི སངྑཱརཀྑནྡྷེཀདེསེན ཙ ཨསམྤཡུཏྟོ ནཱམ ནཏྠཱིཏི སམུདཱཡསྶ ཏེཧི སམྤཡུཏྟཏཱ ཝུཏྟཱ, ཨེཝམིདྷཱཔི ཝིཙཱརེན ཨསམྤཡུཏྟསྶ ཨཝིཏཀྐཝིཙཱརམཏྟསྶ ཀསྶཙི ཨབྷཱཝཏོ སམུདཱཡསྶ ཏེན སམྤཡུཏྟཏཱ ན ན སཀྐཱ ཝཏྟུཾ. ན ཧི ཨཝིཏཀྐཝིཙཱརམཏྟཱནཾ དསྶནེནཔཧཱཏབྦཧེཏུཀཱདཱིནཾ ཝིཡ སམྤཡུཏྟཏཱ ན ཝཏྟབྦཱ. ཡཐཱ ཧི དསྶནེནཔཧཱཏབྦཧེཏུཀེསུ ཀེཙི སངྑཱརཀྑནྡྷེཀདེསེན མོཧེན སམྤཡུཏྟཱ, ཀེཙི ཨསམྤཡུཏྟཱཏི ན སམུདཱཡོ ཏེན སམྤཡུཏྟོ, ནཱཔི ཨཉྙོ ཀོཙི དྷམྨོ ཨཏྠི, ཡེན སོ སམུདཱཡོ སམྤཡུཏྟོ སིཡཱཏི ‘‘དསྶནེནཔཧཱཏབྦཧེཏུཀཱ དྷམྨཱ སམྤཡུཏྟཱཏི ནཏྠཱི’’ཏི ཝུཏྟཾ, ཨེཝཾ བྷཱཝནཱཡཔཧཱཏབྦཧེཏུཀསཧེཏུཀཱདཡོཔི. ན པནེཝཾ ཡེན ཨཝིཏཀྐཝིཙཱརམཏྟསམུདཱཡོ སམྤཡུཏྟོ སིཡཱ, ཏཾ ནཏྠི ཨཝིཏཀྐཝིཙཱརམཏྟེསུ ཀསྶཙི ཝིཙཱརེན ¶ ཨསམྤཡུཏྟསྶ ཨབྷཱཝཱ, ཏསྨཱ ཏེ ‘‘སམྤཡུཏྟཱ’’ཏི ན ན ཝཏྟབྦཱཏི. སབྦཏྠ ཙ ཨེཀདྷམྨེཔི ཀེཧིཙཱིཏི བཧུཝཙནནིདྡེསོ སངྑཱཡ ཨནིཡམིཏཏྟཱ ཀཏོཏི ཝེདིཏབྦོ.

ཚཊྛནཡསམྤཡོགཝིཔྤཡོགཔདཝཎྞནཱ ནིཊྛིཏཱ.

༧. སཏྟམནཡོ སམྤཡུཏྟེནཝིཔྤཡུཏྟཔདཝཎྞནཱ

༣༠༦. སམྤཡུཏྟེནཝིཔྤཡུཏྟཔདནིདྡེསེ རཱུཔཀྑནྡྷཱདཡོ ཏེཧི སམྤཡུཏྟཱབྷཱཝཏོ ན གཧིཏཱ. སམུདཡསཙྩཱདཱིནི སཏིཔི ཏེཧི སམྤཡུཏྟེ, སམྤཡུཏྟེཧི ཙ ཝིཔྤཡུཏྟེ སམྤཡུཏྟེནཝིཔྤཡུཏྟཱནཾ ཁནྡྷཱདཱིཧི ཝིཔྤཡོགཱབྷཱཝཏོ. ན ཧི སམུདཡསཙྩེན སམྤཡུཏྟེཧི ལོབྷསཧགཏཙིཏྟུཔྤཱདེཧི ཝིཔྤཡུཏྟཱནཾ ¶ ཏཏོ ཨཉྙདྷམྨཱནཾ ཁནྡྷཱདཱིསུ ཀེནཙི ཝིཔྤཡོགོ ཨཏྠི. ནནུ ཙ ཏེ ཨེཝ ཙིཏྟུཔྤཱདཱ ཙཏྟཱརོ ཁནྡྷཱ ཨཌྜྷདུཏིཡཱནི ཨཱཡཏནཱནི ཨཌྜྷདུཏིཡཱ དྷཱཏུཡོ ཙ ཧོནྟཱིཏི ཏེཧི ཝིཔྤཡོགོ ཝཏྟབྦོཏི? ན, ཏདཉྙདྷམྨཱནཾ ཁནྡྷཱདིབྷཱཝཏོ. ན ཧི ཏེ ཨེཝ དྷམྨཱ ཙཏྟཱརོ ཁནྡྷཱ, ཨཐ ཁོ ཏེ ཙ ཏཏོ ཨཉྙེ ཙ, ཏཐཱ ཨཌྜྷདུཏིཡཱཡཏནདྷཱཏུཡོཔི. ན ཙ ཏདཉྙསམུདཱཡེཧི ཨཉྙེ ཝིཔྤཡུཏྟཱ ཧོནྟི སམུདཱཡེཀདེསཱནཾ ཨེཀདེསཉྙསམུདཱཡཱནཉྩ ཝིཔྤཡོགཱབྷཱཝཏོ. ཨེས ནཡོ མགྒསཙྩསུཁིནྡྲིཡཱདཱིསུ. ཨཝིཏཀྐཝིཙཱརམཏྟེསུཔི ནིརཝསེསེསུ ཨདྷིཔྤེཏེསུ ཏེསཾ སཝིཏཀྐསཝིཙཱརསམཱནགཏིཀཏྟཱ ཨགྒཧཎེ ཀཱརཎཾ ན དིསྶཏི.

ཨཊྛཀཐཱཡཾ པན ཨེཝརཱུཔཱནཱིཏི ཡཐཱ རཱུཔཀྑནྡྷེ ཝིསྶཛྫནཾ ན ཡུཛྫཏི, ཨེཝཾ ཡེསུ ཨཉྙེསུཔི ན ཡུཛྫཏི, ཏཱནི ཝིསྶཛྫནསྶ ཨཡོགེན ‘‘ཨེཝརཱུཔཱནཱི’’ཏི ཝུཏྟཱནི, ན སམྤཡུཏྟཱབྷཱཝེནཱཏི དཊྛབྦཾ. ཡཱནི པན པདཱནི དྷམྨདྷཱཏུཡཱ སམྤཡུཏྟེ དྷམྨེ དཱིཔེནྟཱིཏི ཨེཏེན ཝེདནཱཀྑནྡྷཱདིཔདཱནི དསྶེཏི, ཝིཉྙཱཎཉྩ ཨཉྙེན ཨསམྨིསྶནྟི ཝིཉྙཱཎཀྑནྡྷམནཱཡཏནཱདིཔདཱནི. ཏཏྠ ཨཉྙེན ཨསམྨིསྶནྟི ཨསམྤཡུཏྟེན ཨསམྨིསྶནྟི ཨཏྠོ. ཨདུཀྑམསུཁཱཡཝེདནཱཡསམྤཡུཏྟཔདཱནིཔི ཧི སམྤཡུཏྟེཧི སམྨིསྶཝིཉྙཱཎདཱིཔཀཱནི ཨིདྷ གཧིཏཱནཱིཏི. ཨེཏེན ཙ ལཀྑཎེན ཨེཝརཱུཔཱནེཝ གཧིཏཱནཱིཏི དསྶེཏི, ན ཨེཝརཱུཔཱནི གཧིཏཱནེཝཱཏི སམུདཡསཙྩཱདིཨིདྡྷིཔཱདཱདིཔདཱནཾ ¶ ཨསངྒཧིཏཏྟཱ. ‘‘ཨཐ ཕསྶསཏྟཀཾ ཙིཏྟཾ སཧ ཡུཏྟཔདེཧི སཏྟཱ’’ཏི པུརཱཎཔཱཋོ, ཨཡཾ པན ཨཱུནོཏི ཀཏྭཱ ‘‘ཨཐ ཕསྶསཏྟཀཾ, ཏིཀེ ཏཡོ སཏྟ མཧནྟརེ ཙཱ’’ཏི པཱཋོ ཀཏོ.

༣༠༩. པུཙྪཱཡ ཨུདྡྷཊཔདེནེཝ སདྡྷིཾ ཝིཔྤཡུཏྟཱནཾ ཝསེནཱཏི ཨིདཾ པུཙྪཱཡ ཨུདྡྷཊཔདེན སམྤཡུཏྟེཧི ཝིཔྤཡུཏྟཱ ཏེན སདྡྷིཾ ཝིཔྤཡུཏྟཱ ཧོནྟཱིཏི ཀཏྭཱ ཝུཏྟཾ. པཱལི༹ཨུདྡཱནགཱཐཱཡཾ དྭེ ཙ མནེན ཡུཏྟཱ, ཝིཏཀྐཝིཙཱརཎཱཏི མནོདྷཱཏུཡཱ ཨེཀནྟསམྤཡུཏྟཱ དྭེ ཝིཏཀྐཝིཙཱརཱཏི སཝིཏཀྐཔདཾ སཝིཙཱརཔདཉྩ དསྶེཏི.

སཏྟམནཡསམྤཡུཏྟེནཝིཔྤཡུཏྟཔདཝཎྞནཱ ནིཊྛིཏཱ.

༨. ཨཊྛམནཡོ ཝིཔྤཡུཏྟེནསམྤཡུཏྟཔདཝཎྞནཱ

༣༡༧. ཝིཔྤཡུཏྟེནསམྤཡུཏྟཔདནིདྡེསེ ¶ རཱུཔཀྑནྡྷཱདཱིཧི ཝིཔྤཡུཏྟེནསམྤཡུཏྟམེཝ ཡཐཱནིདྡྷཱརིཏཾ ནཏྠཱིཏི ‘‘རཱུཔཀྑནྡྷེན ཡེ དྷམྨཱ ཝིཔྤཡུཏྟཱ, ཏེཧི དྷམྨེཧི ཡེ དྷམྨཱ སམྤཡུཏྟཱ’’ཏི ཨཝཏྭཱ ‘‘རཱུཔཀྑནྡྷེན ཡེ དྷམྨཱ ཝིཔྤཡུཏྟཱ, ཏེ དྷམྨཱ ཀཏིཧི ཁནྡྷེཧི…པེ… སམྤཡུཏྟཱཏི ནཏྠཱི’’ཏི ཝུཏྟཾ. ཏེན རཱུཔཀྑནྡྷེན ཝིཔྤཡུཏྟཱནཾ ཀེནཙི ཁནྡྷཱདིནཱ སམྤཡོགཱབྷཱཝཏོ ཡཐཱནིདྡྷཱརིཏཾ ཝིཔྤཡུཏྟེནསམྤཡུཏྟམེཝ ནཏྠི, ཀུཏོ ཏསྶ པུན ཁནྡྷཱདཱིཧི སམྤཡུཏྟཏཱཏི དསྶེཏི.

ཨཊྛམནཡཝིཔྤཡུཏྟེནསམྤཡུཏྟཔདཝཎྞནཱ ནིཊྛིཏཱ.

༩. ནཝམནཡོ སམྤཡུཏྟེནསམྤཡུཏྟཔདཝཎྞནཱ

༣༡༩. སམྤཡུཏྟེནསམྤཡུཏྟཔདཝཎྞནཱཡཾ ཡཾཁནྡྷཱདིཝསེནཱཏི སམཱསཔདཾ ཨིདཾ དཊྛབྦཾ, ཡསྶ ཁནྡྷཱདིནོ ཝསེནཱཏི ཨཏྠོ. ཏསྶེཝཱཏི ཙ ཏསྶེཝ ཁནྡྷཱདིནོཏི ཨཏྠོ. ཨིདཾ ཝུཏྟཾ ཧོཏི – ཡཾ ཨིདྷ སམྤཡུཏྟཾ ཝུཏྟཾ, ཏཾ རཱུཔཀྑནྡྷཱདཱིསུ ཨརཎནྟེསུ ཡེན ཝེདནཱཀྑནྡྷཱདིནཱ སམྤཡུཏྟཾ, པུན ཏསྶེཝ ཝེདནཱཀྑནྡྷཱདིནོ ཁནྡྷཱདཱིཧི སམྤཡོགཾ པུཙྪིཏྭཱ ཝིསྶཛྫནཾ ཀཏཾ ¶ . ཏཉྷི ཨཏྟནཱ སམྤཡུཏྟེན སམྤཡུཏྟཏྟཱ ‘‘སམྤཡུཏྟེན སམྤཡུཏྟ’’ནྟི ནིདྡྷཱརིཏནྟི. རཱུཔེན ཝཱཏི ཨེཏེན ནིརོདྷསཙྩཨཔྤཙྩཡཨསངྑཏེཧིཔི ཨཡོགོ ཝུཏྟོ ཧོཏཱིཏི དཊྛབྦོ, ཏཐཱ རཱུཔམིསྶཀེཧི ཝཱཏི ཨེཏེན ཨནུཔཱདིནྣཨནུཔཱདཱནིཡཱདཱིཧི ནིབྦཱནམིསྶཀེཧིཔི. ཝཀྑཏི ཧི ‘‘ནིབྦཱནཾ པན སུཁུམརཱུཔགཏིཀམེཝཱ’’ཏི. སབྦཱརཱུཔཀྑནྡྷསངྒཱཧཀེཧཱིཏི ཝཏྟམཱནཱནམེཝ སམྤཡོགོ ལབྦྷཏཱིཏི ཝཏྟམཱནེསུ ཨེཀམྤི དྷམྨཾ ཨནཔནེཏྭཱ ཨཝིཀལཙཏུཀྑནྡྷསངྒཱཧཀེཧི ཨརཱུཔབྷཝཱདཱིཧཱིཏི ཨཏྠོ. ཨཡཾ པནེཏྠ སངྑེཔོ – ཡེ སམྤཡོགཾ ན ལབྷནྟི རཱུཔཀྑནྡྷཱདཡོ, ཏེ སབྦེ ན གཧིཏཱ, ཨིཏརེ ཙ ཝེདནཱཀྑནྡྷཱདཡོ སབྦེ གཧིཏཱཏི.

ནཝམནཡསམྤཡུཏྟེནསམྤཡུཏྟཔདཝཎྞནཱ ནིཊྛིཏཱ.

༡༠. དསམནཡོ ཝིཔྤཡུཏྟེནཝིཔྤཡུཏྟཔདཝཎྞནཱ

༣༥༣. ཝིཔྤཡུཏྟེནཝིཔྤཡུཏྟཔདནིདྡེསེ ¶ ཨགྒཧིཏེསུ དྷམྨཱཡཏནཱདིདྷམྨཱ ཨནཱརམྨཎམིསྶཀསབྦཙིཏྟུཔྤཱདགཏདྷམྨབྷཱཝཏོ ཏེཧི ཝིཔྤཡུཏྟསྶ ཨབྷཱཝཱ ན གཧིཏཱ, དུཀྑསཙྩཙཏུམཧཱབྷཝཨབྱཱཀཏཱདིདྷམྨཱ ཏེཧི ཝིཔྤཡུཏྟེཧི ཝིཔྤཡུཏྟཱནཾ ཁནྡྷཱདཱིཧི ཝིཔྤཡོགཱབྷཱཝཏོཏི ཨཡཾ ཝིསེསོ ཝེདིཏབྦོཏི.

དསམནཡཝིཔྤཡུཏྟེནཝིཔྤཡུཏྟཔདཝཎྞནཱ ནིཊྛིཏཱ.

༡༡. ཨེཀཱདསམནཡོ སངྒཧིཏེནསམྤཡུཏྟཝིཔྤཡུཏྟཔདཝཎྞནཱ

༤༠༩. ཨེཀཱདསམནཡཝཎྞནཱཡཾ ‘‘ཏེ ཙ སེསེཧི ཏཱིཧི ཁནྡྷེཧི ཨེཀེན མནཱཡཏནེན སཏྟཧི ཝིཉྙཱཎདྷཱཏཱུཧཱི’’ཏི ཨེཏེསཾ པདཱནཾ ‘‘སམྤཡུཏྟཱ ནཱམཱ’’ཏི ཨེཏེན སཧ སམྦནྡྷོ. ‘‘ཀེཧིཙཱི’’ཏི ཨེཏསྶ པནཏྠཾ དསྶེཏུཾ ‘‘སངྑཱརཀྑནྡྷེ དྷམྨཱཡཏནདྷམྨདྷཱཏཱུསུ ཙ ཋཔེཏྭཱ ཏཎྷ’’ནྟི ཨེཏེན ‘‘ཏེ ཙཱ’’ཏི ཝུཏྟེ སམུདཡསཙྩེན ཁནྡྷཱདིསངྒཧེན སངྒཧིཏདྷམྨེ ཝིསེསེཏྭཱ ཏེསཾ ཨེཝ ཝིསེསིཏཱནཾ ཨཏྟཝཛྫེཧི སེསེཧི སངྑཱརཀྑནྡྷེ ཏཎྷཱཡ དྷམྨཱཡཏནདྷམྨདྷཱཏཱུསུ ཙ ཏཎྷཱཡ ཝེདནཱསཉྙཱཀྑནྡྷེཧི སམྤཡོགཱརཧེཧི ¶ སམྤཡུཏྟཏཾ སནྡྷཱཡཱཧ ‘‘སེསེཧི སམྤཡུཏྟཏྟཱ ཀེཧིཙི སམྤཡུཏྟཱ ནཱམཱ’’ཏི.

ཨེཀཱདསམནཡསངྒཧིཏེནསམྤཡུཏྟཝིཔྤཡུཏྟཔདཝཎྞནཱ ནིཊྛིཏཱ.

༡༢. དྭཱདསམནཡོ སམྤཡུཏྟེནསངྒཧིཏཱསངྒཧིཏཔདཝཎྞནཱ

༤༡༧. དྭཱདསམནཡེ ཙ ནཝམནཡེ ཝིཡ སམྤཡོགཱརཧཱཝ ལབྦྷནྟཱིཏི ཨཱཧ ‘‘ཏེཡེཝ ཨུདྡྷཊཱ’’ཏི.

དྭཱདསམནཡསམྤཡུཏྟེནསངྒཧིཏཱསངྒཧིཏཔདཝཎྞནཱ ནིཊྛིཏཱ.

༡༣. ཏེརསམནཡོ ཨསངྒཧིཏེནསམྤཡུཏྟཝིཔྤཡུཏྟཔདཝཎྞནཱ

༤༤༨. ཏེརསམནཡཝཎྞནཱཡཾ ¶ ཡེཧི ཏཱིཧིཔི སངྒཧེཧི ཨསངྒཧིཏཾ ཝིཉྙཱཎམེཝ ཧོཏི, ཏེ པཱལི༹ཡཾ ‘‘རཱུཔཉྩ དྷམྨཱཡཏན’’ནྟིཨཱདིཨུདྡཱནགཱཐཱཡ དསྶིཏཱ བཱཝཱིས དྷམྨཱ ‘‘རཱུཔཀྑནྡྷེན སདིསཔཉྷཱ དྷམྨཱ’’ཏི ཝུཏྟཱ. ཡེཧི པན ཏཱིཧིཔི སངྒཧེཧི ཨསངྒཧིཏཱནི ཨརཱུཔབྷཝེན ཝིཡ ཨོལཱ༹རིཀཱཡཏནཱནེཝ ཧོནྟི, ཏེ ཝུཏྟཱཝསེསཱ སབྦེ ཨིདྷ ཨུདྡྷཊཱ ‘‘ཨརཱུཔབྷཝེན སདིསཱ’’ཏི ཝུཏྟཱ. སེསཱཏི སེསཱ པཉྩམནཡེ ཨཱགཏཱ ཝེདནཱཀྑནྡྷཱདཡོ སཏིཔི ཨསངྒཱཧཀཏྟེ ཨིདྷ ཝིསྶཛྫནཾ ན རུཧནྟཱིཏི ན ཨུདྡྷཊཱ. ཡེ པན ཨསངྒཱཧཀཱ ཨེཝ ན ཧོནྟི དུཀྑསཙྩཱདིདྷམྨཱ, ཏེསུ ཝཏྟབྦམེཝ ནཏྠི. ཡཐཱ པན ཝེདནཱཀྑནྡྷཱདཡོ ན རུཧནྟི, ཏཾ དསྶེཏུཾ ‘‘ཝེདནཱཀྑནྡྷེན ཧཱི’’ཏིཨཱདིམཱཧ. ཏཏྠ ཏེསཉྩ སམྤཡོགོ ནཱམ ནཏྠཱིཏི རཱུཔཱརཱུཔདྷམྨཱནཾ ཨསམྤཡོགེཧི ཝོམིསྶཏཱཡ སམྤཡོགོ ནཏྠཱིཏི ཨཏྠོ.

ཡདི པན ཏེ ཀདཱཙི ཨསབྦཝིཉྙཱཎདྷཱཏུསམྤཡུཏྟཱ ཨརཱུཔདྷམྨཱ རཱུཔདྷམྨཱ ཙ སིཡུཾ, ན ཏེསཾ ཝིཔྤཡོགོ ནཏྠཱིཏི ‘‘ཝིཔྤཡོགོ ཙ ནཏྠཱི’’ཏི ན ཝུཏྟཾ, ན ཝེདནཱཀྑནྡྷེན ཨསངྒཧིཏཱནཾ ཝིཔྤཡོགསྶ ཨཏྠིཏཱཡཱཏི ཝེདིཏབྦཾ. ཨུབྷཡཱབྷཱཝཏོ ཧི ཝེདནཱཀྑནྡྷཱདཡོ ཨིདྷ ན རུཧནྟཱིཏི. ཨེཝཾ པནེཏྠ སིཡཱ ‘‘ཝེདནཱཀྑནྡྷེན ཧི ཁནྡྷཱདིཝསེན ཨནཱརམྨཎམིསྶཀཱ སཏྟཝིཉྙཱཎདྷཱཏུདྷམྨཱ ཨསངྒཧིཏཱ ཧོནྟི, ཏེསཉྩ སམྤཡོགོ ¶ ཝིཔྤཡོགོ ཙ ནཏྠཱི’’ཏི. ཨནཱརམྨཎསཧིཏཱནཉྷི སབྦཝིཉྙཱཎདྷཱཏཱུནཾ སབྦཝིཉྙཱཎདྷཱཏུསམྤཡུཏྟཱནཾ ཏདུབྷཡདྷམྨཱནཉྩ ཝེདནཱཀྑནྡྷཱདིཝིཉྙཱཎཀྑནྡྷཱདིཙཀྑཱཡཏནཱདཱིཧི ཏཱིཧིཔི སངྒཧེཧི ཨསངྒཧིཏཱནཾ སམྤཡོགཝིཔྤཡོགཱབྷཱཝོ ཨརུཧཎེ ཀཱརཎཾ. ཛཱཏིཝིཔྤཡོགབྷཱུམིཀཱལསནྟཱནཝིཔྤཡོགཏོ ཙཏུབྦིདྷོ ཝིཔྤཡོགོ. ཏཏྠ ཛཱཏིཝིཔྤཡོགོ ‘‘ཀུསལཱ དྷམྨཱ, ཨཀུསལཱ དྷམྨཱ’’ཏིཨཱདི, བྷཱུམིཝིཔྤཡོགོ ‘‘ཀཱམཱཝཙརཱ, རཱུཔཱཝཙརཱ’’ཏིཨཱདི, ཀཱལཝིཔྤཡོགོ ‘‘ཨཏཱིཏཱ དྷམྨཱ, ཨནཱགཏཱ དྷམྨཱ’’ཏིཨཱདི, སནྟཱནཝིཔྤཡོགོ ‘‘ཨཛ྄ཛྷཏྟཱ དྷམྨཱ, བཧིདྡྷཱ དྷམྨཱ’’ཏིཨཱདི. ཨེཝཾ ཝིཔྤཡོགོ ཙཏུདྷཱ ཝེདིཏབྦོ.

ཏེརསམནཡཨསངྒཧིཏེནསམྤཡུཏྟཝིཔྤཡུཏྟཔདཝཎྞནཱ ནིཊྛིཏཱ.

༡༤. ཙུདྡསམནཡོ ཝིཔྤཡུཏྟེནསངྒཧིཏཱསངྒཧིཏཔདཝཎྞནཱ

༤༥༦. ཙུདྡསམནཡེ ¶ དྷམྨཱཡཏནཱདཱིནཾ ཨནཱརམྨཎམིསྶཀསབྦཙིཏྟུཔྤཱདགཏདྷམྨབྷཱཝཏོ ཝིཔྤཡོགསྶ ཨརུཧཎཾ དཊྛབྦཾ. ཛཱཏིཨཱདིཏྟཡསྶ ཙེཏྠ དྷམྨསབྷཱཝམཏྟཏྟཱ ན ཀཐཉྩི སམྤཡོགོ ཝིཔྤཡོགོ ཙ རུཧཏི ཨཛ྄ཛྷཏྟབཧིདྡྷདྷམྨཱནཾ སབྦདྷམྨསམོདྷཱནཏྟཱ, ཨནིདསྶནཨཔྤཊིགྷཱདཱིནཾ ཨནཱརམྨཎམིསྶཀསབྦཙིཏྟུཔྤཱདཏྟཱ. དུཀྑསཙྩཱདིདྷམྨཱཝ ཨིདྷ ཏེཧི ཝིཔྤཡུཏྟཱནཾ སངྒཧཱསངྒཧསབྦྷཱཝཱ གཧིཏཱཏི.

པཱལི༹ཨུདྡཱནགཱཐཱཡཾ སམུཙྪེདེ ན ལབྦྷནྟཱིཏི པརིཡོསཱནེ ནཡེ ན ལབྦྷནྟཱིཏི ཨཏྠོ. མོགྷཔུཙྪཀེན ཙཱཏི ཨལབྦྷམཱནཱ ཙ ཏེ མོགྷཔུཙྪཀེན ཧེཏུནཱ ན ལབྦྷནྟི ཏེསཾ པུཙྪཱཡ མོགྷཏྟཱཏི ཝུཏྟཾ ཧོཏི. ཨཐ ཝཱ མོགྷཔུཙྪཀོ ཨཊྛམོ ནཡོ, ཏེན ཙ སཧ ཨོསཱནནཡེ ཨེཏེ དྷམྨཱ ཝིཔྤཡོགསྶཔི ཨབྷཱཝཱ སབྦཐཱཔི ན ལབྦྷནྟཱིཏི ཨཏྠོ.

ཙུདྡསམནཡཝིཔྤཡུཏྟེནསངྒཧིཏཱསངྒཧིཏཔདཝཎྞནཱ ནིཊྛིཏཱ.

༡. དྷམྨསངྒཧེ ¶ ¶ ཏིཀདུཀཝསེན སངྒཧིཏཱནཾ དྷམྨཱནཾ ཝིབྷངྒེ ཁནྡྷཱདིཝིབྷཱགཾ དསྶེཏྭཱ ཏཐཱསངྒཧིཏཝིབྷཏྟཱནཾ དྷཱཏུཀཐཱཡ སངྒཧཱསངྒཧཱདིཔྤབྷེདཾ ཝཏྭཱ ཡཱཡ པཉྙཏྟིཡཱ ཏེསཾ སབྷཱཝཏོ ཨུཔཱདཱཡ ཙ པཉྙཱཔནཾ ཧོཏི, ཏཾ པབྷེདཏོ དསྶེཏུཾ ‘‘ཚ པཉྙཏྟིཡོ’’ཏིཨཱདིནཱ པུགྒལཔཉྙཏྟི ཨཱརདྡྷཱ. ཏཏྠ ཡེ དྷམྨེ པུབྦཱཔརིཡབྷཱཝེན པཝཏྟམཱནེ ཨསབྷཱཝསམཱུཧཝསེན ཨུཔཱདཱཡ ‘‘པུགྒལོ, ཨིཏྠཱི, པུརིསོ, དེཝོ, མནུསྶོ’’ཏིཨཱདིཀཱ པུགྒལཔཉྙཏྟི ཧོཏི, ཏེསཾ ཨཉྙེསཉྩ བཱཧིརརཱུཔནིབྦཱནཱནཾ སསབྷཱཝསམཱུཧསསབྷཱཝབྷེདཝསེན པཉྙཱཔནཱ སབྷཱཝཔཉྙཏྟཱིཏི ཁནྡྷཔཉྙཏྟིཨཱདིཀཱ པཉྩཝིདྷཱ ཝེདིཏབྦཱ. ཏཱཡ དྷམྨསངྒཧཱདཱིསུ ཝིབྷཏྟཱ སབྷཱཝཔཉྙཏྟི སབྦཱཔི སངྒཧིཏཱ ཧོཏི. པུགྒལཔཉྙཏྟི པན ཨསབྷཱཝཔཉྙཏྟི. ཏཱཡ ཙ སམཡཝིམུཏྟཱདིཔྤབྷེདཱཡ སཏྟསནྟཱནགཏེ པརིཉྙེཡྻཱདིསབྷཱཝདྷམྨེ ཨུཔཱདཱཡ པཝཏྟིཏོ པདྷཱནཱཡ ‘‘ཝིཧཱརོ མཉྩོ’’ཏིཨཱདིཀཱ ཙ སབྦཱ ཨསབྷཱཝཔཉྙཏྟི སངྒཧིཏཱ ཧོཏི.

ཨེཏྟཱཝཏཱ ¶ ཙ པཉྙཏྟི ནཱམ ཝིཛྫམཱནཔཉྙཏྟི ཨཝིཛྫམཱནཔཉྙཏྟི ཙ. ཏཱ ཨེཝ ཧི ཝོམིསྶཱ ཨིཏརཱ ཙཏསྶོཏི. ཏསྨཱ ཏཱསཾ དསྶནེན ཨིམསྨིཾ པཀརཎེ སབྦཱ པཉྙཏྟིཡོ དསྶིཏཱཏི ཝེདིཏབྦཱ. ཁནྡྷཱདིཔཉྙཏྟཱིསུ པན ཚསུ ཨཉྙཏྠ ཨདསྶིཏཔྤབྷེདཾ ཨིདྷེཝ ཙ དསྶིཏཔྤབྷེདཾ པུགྒལཔཉྙཏྟིཾ ཨུཔཱདཱཡ ཨིམསྶ པཀརཎསྶ པུགྒལཔཉྙཏྟཱིཏི ནཱམཾ ཝུཏྟནྟི ཝེདིཏབྦཾ. ཡེ དྷམྨེ ཨིདྷ པཉྙཔེཏུཀཱམོཏི པཉྙཏྟིཡཱ ཝཏྠུབྷཱཝེན དསྶེཏུཀཱམོཏི ཨདྷིཔྤཱཡོ. ན ཧི ཨེཏསྨིཾ པཀརཎེ པཉྙཱཔནཾ ཀརོཏི, ཝཏྠཱུཧི པན པཉྙཏྟིཡོ དསྶེཏཱིཏི.

ཁནྡྷཱཏི ¶ པཉྙཱཔནཱཏི ཨིདཾ ཁནྡྷཱཏི རཱུཔཾ པཐཝཱིཏིཨཱདིཀཱ སབྦཱཔི སཱམཉྙཔྤབྷེདཔཉྙཱཔནཱ ནཱམ ཧོཏི, ཏཾ སནྡྷཱཡ ཝུཏྟནྟི དཊྛབྦཾ. པཉྙཱཔནཱཏི ཨེཏསྶ པན དསྶནཱ ཋཔནཱཏི ཨེཏེ དྭེ ཨཏྠཱ, ཏེསཾ པཀཱསནཱ ནིཀྑིཔནཱཏི. ཏཏྠ ‘‘རཱུཔཀྑནྡྷོ…པེ… ཨཉྙཱཏཱཝིནྡྲིཡཾ སམཡཝིམུཏྟོ’’ཏིཨཱདིནཱ ཨིདམེཝཾནཱམཀཾ ཨིདམེཝཾནཱམཀནྟི ཏཾཏཾཀོཊྛཱསིཀཀརཎཾ བོདྷནམེཝ ནིཀྑིཔནཱ, ན པཉྙཔེཏབྦཱནཾ མཉྩཱདཱིནཾ ཝིཡ ཋཱནསམྦནྡྷཀརཎཾ. ཡོ པནཱཡཾ ‘‘ནཱམཔཉྙཏྟི ཧི དསྶེཏི ཙ ཋཔེཏི ཙཱ’’ཏི ཀཏྟུནིདྡེསོ ཀཏོ, སོ བྷཱཝབྷཱུཏཱཡ ཀརཎབྷཱུཏཱཡ ཝཱ ནཱམཔཉྙཏྟིཡཱ ཏེསཾ ཏེསཾ དྷམྨཱནཾ དིཊྛཏཱཡ ཋཔིཏཏཱཡ ཙ ཏཾནིམིཏྟཏཾ སནྡྷཱཡ ཀཏོཏི ཝེདིཏབྦོ.

ཝིཛྫམཱནཔཉྙཏྟཱིཏིཨཱདིནཱ ཝཙནེན པཱལི༹ཡཾ ཨནཱགཏཏཾ སནྡྷཱཡ ‘‘པཱལི༹མུཏྟཀེནཱ’’ཏིཨཱདིམཱཧ. ཀུསལཱཀུསལསྶེཝཱཏི ཀུསལཱཀུསལསྶ ཝིཡ. ཝིཛྫམཱནསྶཱཏི ཨེཏསྶ ཨཏྠོ སཏོཏི, ཏསྶ ཨཏྠོ སམྦྷཱུཏསྶཱཏི. ཝིཛྫམཱནསྶ སཏོཏི ཝཱ ཝིཛྫམཱནབྷཱུཏསྶཱཏི ཨཏྠོ. ཏམེཝཏྠཾ དསྶེནྟོ ཨཱཧ ‘‘སམྦྷཱུཏསྶཱ’’ཏི. ཏེན ཨཝིཛྫམཱནབྷཱཝཾ པཊིཀྑིཔཏི. ཏཐཱ ཨཝིཛྫམཱནསྶཱཏི ཡཐཱ ཀུསལཱདཱིནི ཨཀུསལཱདིསབྷཱཝཏོ, ཕསྶཱདཡོ ཙ ཝེདནཱདིསབྷཱཝཏོ ཝིནིཝཏྟསབྷཱཝཱནི ཝིཛྫནྟི, ཏཐཱ ཨཝིཛྫམཱནསྶ ཡེ དྷམྨེ ཨུཔཱདཱཡ ‘‘ཨིཏྠཱི, པུརིསོ’’ཏི ཨུཔལདྡྷི ཧོཏི, ཏེ ཨཔནེཏྭཱ ཏེཧི ཝིནིཝཏྟསྶ ཨིཏྠིཨཱདིསབྷཱཝསྶ ཨབྷཱཝཏོ ཨསམྦྷཱུཏསྶཱཏི ཨཏྠོ. ཡཾ པནེཏསྶ ‘‘ཏེནཱཀཱརེན ཨཝིཛྫམཱནསྶ ཨཉྙེནཱཀཱརེན ཝིཛྫམཱནསྶཱ’’ཏི ཨཏྠཾ ཀེཙི ཝདནྟི, ཏཏྠ ཡཾ ཝཏྟབྦཾ, ཏཾ པཉྙཏྟིདུཀེ ཝུཏྟམེཝ. ཨཝིཛྫམཱནེཔི སབྷཱཝེ ལོཀནིརུཏྟིཾ ཨནུགནྟྭཱ ཨནབྷིནིཝེསེན ཙིཏྟེན ‘‘ཨིཏྠཱི, པུརིསོ’’ཏི གཧཎསབྦྷཱཝཱ ‘‘ལོཀནིརུཏྟིམཏྟསིདྡྷསྶཱ’’ཏི ཨཱཧ. སཱབྷིནིཝེསེན པན ཙིཏྟེན གཡ྄ཧམཱནཾ པཉྩམསཙྩཱདིཀཾ ན སབྷཱཝཏོ, ནཱཔི སངྐེཏེན སིདྡྷནྟི ‘‘སབྦཱཀཱརེནཔི ¶ ཨནུཔལབྦྷནེཡྻ’’ནྟི ཝུཏྟཾ. ཏཱསུ ཨིམསྨིཾ…པེ… ལབྦྷནྟཱིཏི ཨིམསྨིཾ པཀརཎེ སརཱུཔཏོ ཏིསྶནྣཾ ཨཱགཏཏཾ སནྡྷཱཡ ཝུཏྟཾ.

ཡཐཱཝུཏྟསྶ པན ཨཊྛཀཐཱནཡསྶ ཨཝིརོདྷེན ཨཱཙརིཡཝཱདཱ ཡོཛེཏབྦཱ, ཏསྨཱ པཉྙཔེཏབྦཊྛེན ཙེསཱ པཉྙཏྟཱིཏི ཨེཏསྶ སབྷཱཝཏོ ཨཝིཛྫམཱནཏྟཱ པཉྙཔེཏབྦམཏྟཊྛེན པཉྙཏྟཱིཏི ཨཏྠོ. པཉྙཔེཏབྦམྤི ཧི སསབྷཱཝཾ ཏཛྫཔརམཏྠནཱམལཱབྷཏོ ན པརཏོ ལབྷིཏབྦཾ ¶ པཉྙཏྟིནཱམཾ ལབྷཏི, ནིསབྷཱཝཾ པན སབྷཱཝཱབྷཱཝཏོ ན ཨཏྟནོ སབྷཱཝེན ནཱམཾ ལབྷཏཱིཏི. སཏྟོཏིཨཱདིཀེན ནཱམེན པཉྙཔིཏབྦམཏྟཊྛེན པཉྙཏྟཱིཏི ནཱམཾ ལབྷཏི, ནིསབྷཱཝཱ ཙ སཏྟཱདཡོ. ན ཧི སསབྷཱཝསྶ རཱུཔཱདཱིཧི ཨེཀཏྟེན ཨཉྙཏྟེན ཝཱ ཨནུཔལབྦྷསབྷཱཝཏཱ ཨཏྠཱིཏི.

ཀིརཱིཊཾ མཀུཊཾ, ཏཾ ཨསྶ ཨཏྠཱིཏི ཀིརཱིཊཱི. ཨེཏསྨིཉྩ ཨཱཙརིཡཝཱདེ ཨནཱུནེན ལཀྑཎེན བྷཝིཏབྦནྟི སབྦསམོརོདྷོ ཀཱཏབྦོ. དུཏིཡཾ ཏཏིཡནྟི ཨེཝཾཔཀཱརཱ ཧི ཨུཔནིདྷཱཔཉྙཏྟི ཨུཔནིཀྑིཏྟཀཔཉྙཏྟི ཙ སངྑཱཏབྦཔྤདྷཱནཏྟཱ ཚཔི པཉྙཏྟིཡོ བྷཛཏཱིཏི ཡུཏྟཾ ཝཏྟུཾ, ཨིཏརཱ ཙ ཡཐཱཡོགཾ ཏཾ ཏཾ པཉྙཏྟིནྟི. དུཏིཡཾ ཏཏིཡཾ དྭེ ཏཱིཎཱིཏིཨཱདི པན སངྑཱ ནཱམ ཀཱཙི ནཏྠཱིཏི ཏཱསཾ ཨུཔཱདཱསནྟཏིཔཉྙཏྟཱིནཾ ཨཝིཛྫམཱནཔཉྙཏྟིབྷཱཝཾ, ཨིཏརཱསཉྩ ཨུཔནིདྷཱཔཉྙཏྟཱིནཾ ཡཐཱནིདསྶིཏཱནཾ ཨཝིཛྫམཱནེནཨཝིཛྫམཱནཔཉྙཏྟིབྷཱཝཾ མཉྙམཱནོ ཨཱཧ ‘‘སེསཱ ཨཝིཛྫམཱནཔཀྑཉྩེཝ ཨཝིཛྫམཱནེནཨཝིཛྫམཱནཔཀྑཉྩ བྷཛནྟཱི’’ཏི. དུཏིཡཾ ཏཏིཡཾ དྭེ ཏཱིཎཱིཏིཨཱདཱིནཾ ཨུཔནིདྷཱཨུཔནིཀྑིཏྟཀཔཉྙཏྟཱིནཾ ཨཝིཛྫམཱནེནཨཝིཛྫམཱནཔཉྙཏྟིབྷཱཝམེཝ མཉྙཏི. ཡཉྷི པཋམཱདིཀཾ ཨཔེཀྑིཏྭཱ ཡསྶ ཙེཀཱདིཀསྶ ཨུཔནིཀྑིཔིཏྭཱ པཉྙཱཔཱིཡཏི, ཏཉྩ སངྑཱནཾ ཀིཉྩི ནཏྠཱིཏི. ཏཐཱ སནྟཏིཔཉྙཏྟིཡཱ ཙ. ན ཧི ཨསཱིཏི ཨཱསཱིཏིཀོ ཙ ཝིཛྫམཱནོཏི.

ཨེཀཙྩཱ བྷཱུམིཔཉྙཏྟཱིཏི ཀཱམཱཝཙརཱདིཔཉྙཏྟིཾ སནྡྷཱཡཱཧ. ཀཱམཱཝཙརཱདཱི ཧི སབྷཱཝདྷམྨཱཏི ཨདྷིཔྤཱཡོ. ཀཱམོཏི པན ཨོཀཱསེ གཧིཏེ ཨཝིཛྫམཱནེནཝིཛྫམཱནཔཉྙཏྟི ཨེསཱ བྷཝིཏུཾ ཨརཧཏི, ཀམྨནིབྦཏྟཀྑནྡྷེསུ གཧིཏེསུ ཝིཛྫམཱནེནཝིཛྫམཱནཔཉྙཏྟི. ཡཐཱ པན ཝཙནསངྑཱཏཱཡ ཝཙནསམུཊྛཱཔཀཙེཏནཱསངྑཱཏཱཡ ཝཱ ཀིརིཡཱཡ བྷཱཎཀོཏི པུགྒལསྶ པཉྙཏྟི ཝིཛྫམཱནེནཨཝིཛྫམཱནཔཉྙཏྟིཔཀྑཾ བྷཛཏི, ཨེཝཾ ཀིསོ ཐཱུལོཏི རཱུཔཱཡཏནསངྑཱཏེན སཎྛཱནེན པུགྒལཱདཱིནཾ པཉྙཱཔནཱ ཝིཛྫམཱནེནཨཝིཛྫམཱནཔཉྙཏྟི བྷཝིཏུཾ ཨརཧཏི. སཎྛཱནནྟི ¶ ཝཱ རཱུཔཱཡཏནེ ཨགྒཧིཏེ ཨཝིཛྫམཱནེནཨཝིཛྫམཱནཔཉྙཏྟི. རཱུཔཾ ཕསྶོཏིཨཱདིཀཱ པན ཝིཛྫམཱནཔཉྙཏྟི རུཔྤནཱདིཀིཙྩཝསེན ཀིཙྩཔཉྙཏྟིཡཾ, པཙྩཏྟདྷམྨནཱམཝསེན པཙྩཏྟཔཉྙཏྟིཡཾ ཝཱ ཨཝརོདྷེཏབྦཱ. ཝིཛྫམཱནཱཝིཛྫམཱནཔཉྙཏྟཱིསུ ཙ ཝུཏྟཱསུ ཏཱསཾ ཝོམིསྶཏཱཝསེན ¶ པཝཏྟཱ ཨིཏརཱཔི ཝུཏྟཱཡེཝ ཧོནྟཱིཏི ཨཡམྤི ཨཱཙརིཡཝཱདོ སབྦསངྒཱཧཀོཏི དཊྛབྦོ.

༢. ‘‘ཡཱཝཏཱ པཉྩཀྑནྡྷཱ’’ཏིཨཱདིཀསྶ ཨཏྠཾ དསྶེནྟོ ‘‘ཡཏྟཀེན པཉྙཱཔནེནཱ’’ཏིཨཱདིམཱཧ. ཏཏྠ ཡཱཝཏཱ པཉྩཀྑནྡྷཱཏི ཡཱཝཏཱ རཱུཔཀྑནྡྷོ…པེ… ཝིཉྙཱཎཀྑནྡྷོཏི ཁནྡྷཱནཾ ཁནྡྷཔཉྙཏྟི, ཨེཏྟཱཝཏཱ ཁནྡྷཱནཾ ཁནྡྷཔཉྙཏྟི, ཨེཝཾ པཱལི༹ཡོཛནཾ ཀཏྭཱ སངྑེཔཔྤབྷེདཝསེན ཨཡཾ ཨཏྠོ ཝུཏྟོཏི ཝེདིཏབྦོ. ‘‘ཡཱཝཏཱ པཉྩཀྑནྡྷཱ’’ཏི, ‘‘ཁནྡྷཱནཾ ཁནྡྷཔཉྙཏྟཱི’’ཏི ཧི ཨིམསྶ ཨཏྠོ ‘‘ཡཏྟཀེན པཉྙཱཔནེན སངྑེཔཏོ པཉྩཀྑནྡྷཱཏི ཝཱ’’ཏི ཨེཏེན དསྶིཏོ, ‘‘ཡཱཝཏཱ རཱུཔཀྑནྡྷོ’’ཏིཨཱདིཀསྶ པན ‘‘པབྷེདཏོ རཱུཔཀྑནྡྷོ’’ཏིཨཱདིཀེནཱཏི. ཏཏྠ རཱུཔཀྑནྡྷོ…པེ… ཝིཉྙཱཎཀྑནྡྷོཏི པབྷེདནིདསྶནམཏྟམེཏཾ. ཏེན ཨཝུཏྟོཔི སབྦོ སངྒཧིཏོ ཧོཏཱིཏི ‘‘ཏཏྲཱཔི རཱུཔཀྑནྡྷོ ཀཱམཱཝཙརོ’’ཏིཨཱདི ཝུཏྟཾ. ཨཡཾ ཝཱ ཨེཏྠ པཱལི༹ཡཱ ཨཏྠཡོཛནཱ – ‘‘ཡཱཝཏཱ’’ཏི ཨིདཾ སབྦེཧི པདེཧི ཡོཛེཏྭཱ ཡཏྟཀཱ པཉྩཀྑནྡྷཱ, ཏཏྟཀཱ ཁནྡྷཱནཾ ཁནྡྷཔཉྙཏྟི. ཡཏྟཀོ པཉྩནྣཾ ཁནྡྷཱནཾ ཏཔྤབྷེདཱནཉྩ རཱུཔཀྑནྡྷཱདཱིནཾ པབྷེདོ, ཏཏྟཀོ ཁནྡྷཱནཾ ཁནྡྷཔཉྙཏྟིཡཱ པབྷེདོཏི པཀརཎནྟརེ ཝུཏྟེན ཝཏྠུབྷེདེན ཁནྡྷཔཉྙཏྟིཡཱ པབྷེདཾ དསྶེཏི. ཨེས ནཡོ ‘‘ཡཱཝཏཱ ཨཱཡཏནཱན’’ནྟིཨཱདཱིསུཔི.

༧. ཨེཀདེསེནེཝཱཏི ཨུདྡེསམཏྟེནེཝཱཏི ཨཏྠོ.

༡. ཛྷཱནངྒཱནེཝ ¶ ¶ ཝིམོཀྑོཏི ཨིམིནཱ ཨདྷིཔྤཱཡེནཱཧ ‘‘ཝིམོཀྑསཧཛཱཏེན ནཱམཀཱཡེནཱ’’ཏི. ཡེན ཧི སདྡྷིནྟིཨཱདིནཱ པཋམཾ སམངྒིབྷཱཝཏྠཾ ཝིཝརཏི. ཕསྶེནཔི ཕུཊྛཱཡེཝ ནཱམཱཏི ཨེཏེན ‘‘ཨཔིཙེསཱ’’ཏིཨཱདིནཱ ཝུཏྟཾ དུཏིཡཾ སམྥསྶེན ཕུསནཏྠཾ, ཨིཏརེཧི ཨིཏརེ ཀཱརཎཏྠེ. སམངྒིབྷཱཝཕུསནཀཱརཎབྷཱཝཱ ཧི ཕུསནཱཏི ཝུཏྟཱཏི. པུནཔི པཋམཏྠམེཝ དུབྦིཉྙེཡྻཏྟཱ ཝིཝརནྟོ ‘‘ཏཏྲཱསྶཱ’’ཏིཨཱདིམཱཧ. ཋཔེཏྭཱ ཏཱནི ཨངྒཱནི སེསཱ ཨཏིརེཀཔཎྞཱསདྷམྨཱཏི ཨེཏྠ ཝེདནཱསོམནསྶིནྡྲིཡཱནི སངྒཧིཏཱནཱིཏི ཨཱཧ ‘‘ཙཏྟཱརོ ཁནྡྷཱ ཧོནྟཱི’’ཏི. ཨེཝཾ སཏི ཝེདནཱསོམནསྶིནྡྲིཡེཧི སུཁསྶ ཕུསིཏབྦཏྟཱ ཏིཎྞཉྩ ཏེསཾ ཨནཉྙཏྟཱ ཏེནེཝ ཏསྶ ཕུསནཱ ཨཱཔཛྫཏཱིཏི? ནཱཔཛྫཏི, ཝེདཡིཏཱདྷིཔཏིཡཊྛེཧི ཨུཔནིཛ྄ཛྷཱཡནབྷཱཝཔཊིལཱབྷསྶ ཝུཏྟཏྟཱ. ཨཐ ཝཱ ཋཔེཏྭཱ ཏཱནི ཨངྒཱནཱིཏི ཨངྒཱནཾ བཧུཏྟཱ བཧུཝཙནཾ. ཏེསུ པན པཙྩེཀམྤི ཡོཛནཱ ཀཱཏབྦཱ ‘‘ཝིཏཀྐཾ ཋཔེཏྭཱ’’ཏིཨཱདིནཱ. ཏཏྠ ‘‘སུཁཾ ཋཔེཏྭཱ’’ཏི ཨིམིསྶཱ ཡོཛནཱཡ སེསཱ ཏཡོ ཁནྡྷཱ ཧོནྟི, ཨིཏརཱསུ ཙཏྟཱརོཏི. སབྦཡོཛནཱསུ ཙ ཏཡོ ཨནྟོ ཀཏྭཱ ‘‘ཙཏྟཱརོ ཁནྡྷཱ ཧོནྟཱི’’ཏི ཝུཏྟཾ.

༢. ཡོ ཨསམཡཝིམོཀྑེན ཨེཀཙྩེཧི ཨཱསཝེཧི ཝིམུཏྟོ ཨསམཡཝིམོཀྑཱུཔནིསྶཡལཱབྷེན ཙ སཱཏིསཡེན སམཡཝིམོཀྑེན, སོ ཨེཝ སམཡཝིམུཏྟོ. སོ ཧི ཏེན ཝིམུཏྟོ ཛྷཱནལཱབྷཱི སེཀྑོ རཱུཔཱརཱུཔབྷཝཏོ ཨཔུནརཱཝཊྚཀོ ཀཱམརཱགཱདཱིཧི ཏཐཱཝིམུཏྟོཝ ཧོཏཱིཏི སམཡཝིམུཏྟཔཉྙཏྟིཾ ལདྡྷུཾ ཨརཧཏི. པུཐུཛྫནོ པན ཛྷཱནལཱབྷཱི པུནརཱཝཊྚཀདྷམྨོ པུན ཀཱམརཱགཱདིསམུདཱཙཱརབྷཱཝཏོ ཝིམུཏྟོ ནཱམ ན ཧོཏཱིཏི སམཡཝིམུཏྟཔཉྙཏྟིཾ ནཱརཧཏི, ཏེན སོ ¶ ‘‘སམཡཝིམུཏྟོ’’ཏི ན ཝུཏྟོ. ཨརཧཏོ པན ཨཔརིཀྑཱིཎཱ ཨཱསཝཱ ནཏྠི, ཡཏོ ཝིམུཙྩེཡྻ. དིཊྛདྷམྨསུཁཝིཧཱརམཏྟཱ ཧི ཏསྶ ཨཊྛ ཝིམོཀྑཱཏི. ཏསྨཱ ཏསྶ ན ཨཊྛ ཝིམོཀྑཱ སམཡཝིམུཏྟཔཉྙཏྟིབྷཱཝསྶ ཨསམཡཝིམུཏྟཔཉྙཏྟིབྷཱཝསྶ ཝཱ ཀཱརཎཾ. ཏདཀཱརཎབྷཱཝམེཝ དསྶེཏུཾ ¶ ‘‘ན ཧེཝ ཁོ…པེ… ཝིཧརཏཱི’’ཏི ཝུཏྟཾ, ན སུཀྑཝིཔསྶཀསྶེཝ ཨསམཡཝིམུཏྟབྷཱཝཾ དསྶེཏུནྟི དཊྛབྦཾ. སབྦོཔི ཧི ཨརཧཱ ཨསམཡཝིམུཏྟོཏི. བཱཧིརཱནནྟི ལོཀུཏྟརཏོ བཧིབྷཱུཏཱནཾ, ལོཀིཡཱནནྟི ཨཏྠོ.

༣. ཨརཱུཔཀྑནྡྷནིབྦཱནམཏྟཝཱཙཀོ ཨརཱུཔསདྡོ ན ཧོཏཱིཏི དསྶནཏྠཾ ‘‘རཱུཔཏོ ཨཉྙ’’ནྟིཨཱདི ཝུཏྟཾ. ཙིཏྟམཉྫཱུསནྟི སམཱདྷིཾ. ཨབྷིཉྙཱདཱིནཉྷི དྷམྨཱནཾ པཱདཀབྷཱཝེན སམཱདྷི མཉྫཱུསཱསདིསོ ཧོཏི. ཨདྡྷཱནཾ ཕརིཏུནྟི དཱིགྷཀཱལཾ བྱཱཔེཏུཾ, པཝཏྟེཏུནྟི ཨཏྠོ. ‘‘སམྨཛྫིཏབྦ’’ནྟི ཙིནྟེཏྭཱ ཏཏྠ ཨཱདརསྶ ཨཀཏཏྟཱ ཝཏྟབྷེདོཏི ཝེདིཏབྦོ. ཨེཝཾ ཝཏྟབྷེདམཏྟེན ནཊྛཱ པན སམཱཔཏྟི ཀཱམཙྪནྡཱདཱིཧི ནཊྛཱ ཝིཡ ན ཀིཉྩེན པཙྩཱཧརིཏབྦཱ ཧོཏི མནྡཔཱརིཔནྠཀཏྟཱ, ཏསྨཱ ཝཏྟསམིཏཀརཎམཏྟེནེཝ པཙྩཱཧརིཏབྦཏྟཱ ‘‘ཨཔྤེནྟོཝ ནིསཱིདཱི’’ཏི ཨཱཧ.

༤. ཨཏྟནོ ཨནུརཱུཔེན པམཱདེན ཝཱིཏིནཱམེནྟཱནམྤི སམཱཔཏྟི ན ཀུཔྤཏཱིཏི པརིཧཱིནོ ནཱམ ན ཧོཏི, ཏསྨིཾ ཏསྨིཾ བྱཱསངྒེ པཊིསཾཧཊམཏྟེ སམཱཔཛྫིཏུཾ སམཏྠཏཱཡཱཏི ཨདྷིཔྤཱཡོ. ‘‘ཀིསྶ པན, བྷནྟེ, ཁཱིཎཱསཝསྶ བྷིཀྑུནོ ལཱབྷསཀྐཱརསིལོཀོ ཨནྟརཱཡཱཡཱཏི? ཡཱ ཧིསྶ སཱ, ཨཱནནྡ, ཨཀུཔྤཱ ཙེཏོཝིམུཏྟི, ནཱཧཾ ཏསྶཱ ལཱབྷསཀྐཱརསིལོཀཾ ཨནྟརཱཡཱཡ ཝདཱམི. ཡེ ཙ ཁྭསྶ, ཨཱནནྡ, ཨཔྤམཏྟསྶ ཨཱཏཱཔིནོ པཧིཏཏྟསྶ ཝིཧརཏོ དིཊྛདྷམྨསུཁཝིཧཱརཱ ཨདྷིགཏཱ, ཏེསཱཧམསྶ ལཱབྷསཀྐཱརསིལོཀཾ ཨནྟརཱཡཱཡ ཝདཱམཱི’’ཏི སུཏྟེ (སཾ. ནི. ༢.༡༧༩) པན སམཡེན སམཡཾ ཨཱཔཛྫནེན པརིཧརིཏབྦཱནཾ སམཱཔཏྟིསུཁཝིཧཱརཱནཾ ཏསྨིཾ ཏསྨིཾ བྱཱསངྒཀཱལེ ཨནིཔྥཏྟིཏོ ལཱབྷསཀྐཱརསིལོཀོ ཨནྟརཱཡོཏི ཝུཏྟོཏི ཨདྷིཔྤཱཡེནསྶ ཏེན ཨཝིརོདྷོ ཝེདིཏབྦོ.

༥. དྷམྨཱནཾ…པེ… པཱིཏི ཨེཏྠ ‘‘དྷམྨེཧཱི’’ཏི ཝཏྟབྦཾ. ཨིདྷ ཧི ཏཱཧི སམཱཔཏྟཱིཧི པརིཧཱཡེཡྻཱཏི དྷམྨེཧི པུགྒལསྶ པརིཧཱནམྤི ཨཔརིཧཱནམྤི ཝུཏྟཾ. ཏཏྠ ཙ པུགྒལསྶ པམཱདམཱགམྨ ཏཱ སམཱཔཏྟིཡོ ཀུཔྤེཡྻུནྟི དྷམྨཱནཾ ཀུཔྤནཾ ཨཀུཔྤནཉྩ ཝུཏྟཾ, པུགྒལསྶ པན པརིཧཱནདྷམྨཱནམེཝ ¶ ཝིནཱསོཏི ཝཙནནཱནཏྟམཏྟེན ཝཙནཏྠནཱནཏྟམཏྟེན ཝཱ པརིཡཱཡནྟརཏཱ ཝུཏྟཱཏི དཊྛབྦཱ.

༧-༨. ཙེཏནཱ ¶ སམཱཔཏྟིཙེཏནཱ ཏདཱཡཱུཧནཱ ཙ. ཨནུརཀྑཎཱ སམཱཔཏྟིཨུཔཀཱརཱནུཔཀཱརཔརིགྒཱཧིཀཱ པཉྙཱསཧིཏཱ སཏི. ཏཱཧི ཙེཏིཡམཱནཨནུརཀྑིཡམཱནསམཱཔཏྟཱིནཾ བྷབྦཱ ཙེཏནཱབྷབྦཱ ཨནུརཀྑཎཱབྷབྦཱ.

༡༠. པུཐུཛྫནགོཏྟནྟི པུཐུཛྫནསིཀྑཾ, པུཐུཛྫནགཏཱ ཏིསྶོ སིཀྑཱ ཨཏིཀྐནྟཱཏི ཨཏྠོ. ཏཱ ཧི སཾཡོཛནཏྟཡཱནུཔཙྪེདེན ‘‘པུཐུཛྫནསིཀྑཱ’’ཏི ཝུཙྩནྟཱིཏི.

༡༡. ཨརཧཏྟམགྒཊྛོ ཙ ཝཊྚབྷཡཏོ པཉྙུབྦེགེན ཨུབྦིཛྫནྟོ ཨུདྡྷམྦྷཱགིཡསཾཡོཛནེཧི ཨུཔརཏོཏི བྷཡཱུཔརཏོ ནཱམཱཏི ཨཱཧ ‘‘སཏྟ སེཀྑཱ བྷཡཱུཔརཏཱ’’ཏི.

༡༢. བྷཝངྒཔཉྙཱཝིརཧིཏཱ ‘‘ཝིཔཱཀཱཝརཎེན སམནྣཱགཏཱ’’ཏི ཨིམིནཱ གཧིཏཱཏི ཏིཧེཏུཀཔཊིསནྡྷིཀཱ ཀེཙི ‘‘དུཔྤཉྙཱ’’ཏི ཨིམིནཱ གཡ྄ཧནྟཱིཏི དསྶེནྟོ ཨཱཧ ‘‘ཨཔྤཊིལདྡྷམགྒཕལཱུཔནིསྶཡཱ’’ཏི. པཉྙཱཡ ཧི ཝིནཱ ན ཏདུཔནིསྶཡོ ཨཏྠཱིཏི.

༡༤. ཡཏྠ ནིཡཏཱནིཡཏཝོམིསྶཱ པཝཏྟི ཨཏྠི, ཏཏྠེཝ ནིཡཏདྷམྨཱ ཧོནྟཱིཏི ཨུཏྟརཀུརཱུསུ ཏདབྷཱཝཱ ནིཡཏོ ནཱམ ནཏྠཱིཏི དསྶེནྟོ ‘‘ཡཱ པན ཨུཏྟརཀུརུཀཱན’’ནྟིཨཱདིམཱཧ.

༡༦. ཏེརསསུ སཱིསེསུ པལིབོདྷསཱིསཱདཱིནི པཝཏྟསཱིསཉྩ པརིཡཱདིཡིཏབྦཱནི, ཨདྷིམོཀྑསཱིསཱདཱིནི པརིཡཱདཀཱནི, པརིཡཱདཀཕལཾ གོཙརསཱིསཾ. ཏཉྷི ཝིསཡཛ྄ཛྷཏྟཕལཝིམོཀྑོཏི. པརིཡཱདཀསྶ མགྒསྶ ཕལསྶ ཙ ཨཱརམྨཎཾ སངྑཱརསཱིསཾ སངྑཱརཝིཝེཀབྷཱུཏོ ནིརོདྷོཏི པརིཡཱདིཡིཏབྦཱནཾ པརིཡཱདཀཕལཱརམྨཎཱནཾ སཧ ཝིཡ སཾསིདྡྷིདསྶནེན སམསཱིསིབྷཱཝཾ དསྶེཏུཾ པཊིསམྦྷིདཱཡཾ (པཊི. མ. ༡.༨༧) ཏེརས སཱིསཱནི ཝུཏྟཱནི. ཨིདྷ པན ‘‘ཨཔུབྦཾ ཨཙརིམཾ ཨཱསཝཔརིཡཱདཱནཉྩ ཧོཏི ཛཱིཝིཏཔརིཡཱདཱནཉྩཱ’’ཏི ཝཙནཏོ ཏེསུ ཀིལེསཔཝཏྟསཱིསཱནམེཝ ཝསེན ཡོཛནཾ ཀརོནྟོ ‘‘ཏཏྠ ཀིལེསསཱིས’’ནྟིཨཱདིམཱཧ. ཏཏྠ པཝཏྟསཱིསམྤི ཝཊྚཏོ ཝུཊྛཧནྟོ མགྒོ ཙུཏིཏོ ཨུདྡྷཾ ཨཔྤཝཏྟིཀརཎཝསེན ཡདིཔི པརིཡཱདིཡཏི ¶ , ཡཱཝ པན ཙུཏི, ཏཱཝ པཝཏྟིསབྦྷཱཝཏོ ‘‘པཝཏྟསཱིསཾ ཛཱིཝིཏིནྡྲིཡཾ ¶ ཙུཏིཙིཏྟཾ པརིཡཱདིཡཏཱི’’ཏི ཨཱཧ. ཀིལེསཔརིཡཱདཱནེན པན ཨཏྟནོ ཨནནྟརཾ ཝིཡ ནིཔྥཱདེཏབྦཱ པཙྩཝེཀྑཎཝཱརཱ ཙ ཀིལེསཔརིཡཱདཱནསྶེཝ ཝཱརཱཏི ཝཏྟབྦཏཾ ཨརཧནྟི. ‘‘ཝིམུཏྟསྨིཾ ཝིམུཏྟམིཏི ཉཱཎཾ ཧོཏཱི’’ཏི (མ. ནི. ༡.༧༨; སཾ. ནི. ༣.༡༢, ༡༤) ཝཙནཏོ ཧི པཙྩཝེཀྑཎཔརིསམཱཔནེན ཀིལེསཔརིཡཱདཱནཾ སམཱཔིཏཾ ནཱམ ཧོཏི. ཏཾ པན པརིསམཱཔནཾ ཡདི ཙུཏིཙིཏྟེན ཧོཏི, ཏེནེཝ ཛཱིཝིཏཔརིསམཱཔནཉྩ ཧོཏཱིཏི ཨིམཱཡ ཝཱརཙུཏིསམཏཱཡ ཀིལེསཔརིཡཱདཱནཛཱིཝིཏཔརིཡཱདཱནཱནཾ ཨཔུབྦཱཙརིམཏཱ ཧོཏཱིཏི ཨཱཧ ‘‘ཝཱརསམཏཱཡཱ’’ཏི. བྷཝངྒཾ ཨོཏརིཏྭཱ པརིནིབྦཱཡཏཱིཏི ཨེཏྠ པརིནིབྦཱནཙིཏྟམེཝ བྷཝངྒོཏརཎབྷཱཝེན ཝུཏྟནྟི དཊྛབྦཾ.

༡༧. མཧཱཔཡོགོཏི མཧཱཀིརིཡོ ཝིཔཏྟིཀརཎམཧཱམེགྷུཊྛཱནཱཀཱརཝིནཱསོ. ཏིཊྛེཡྻཱཏི ཝིནཱསོ ནཔྤཝཏྟེཡྻཱཏི ཨཏྠོ.

༡༨. ཨརཎཱིཡཏྟཱཏི པཡིརུཔཱསིཏབྦཏྟཱ.

༢༠. ཡཱཡ ཀཏཀིཙྩཏཱ ཧོཏི, ཏཱཡ ཨགྒཝིཛྫཱཡ ཨདྷིགཏཱཡ ཏེཝིཛྫཏཱབྷཱཝོ ནིཔྤརིཡཱཡཏཱ, སཱ ཙ ཨཱགམནཝསེན སིདྡྷཱ སཱཏིསཡཱ ཏེཝིཛྫཏཱཏི ཨཱཧ ‘‘ཨཱགམནཱིཡམེཝ དྷུར’’ནྟི.

༢༢. ཏཏྠ ཙཱཏི ནིམིཏྟཏྠེ བྷུམྨཾ, སབྦཉྙུཏཉྙཱཎཔྤཏྟིཡཱ ཨཱདྷཱརབྷཱཝེ ཝཱ. ཏཏྠེཝ ཧི སབྦཉྙུཏཾ པཏྟོ ནཱམ ཧོཏཱིཏི.

༢༣. ཨནནུསྶུཏེསུ དྷམྨེསཱུཏི ཙ ཨནནུསྶུཏེསུ སཙྩེསཱུཏི ཨཏྠོ.

༢༤. ‘‘རཱུཔཱི རཱུཔཱནི པསྶཏཱི’’ཏིཨཱདིཀེ (མ. ནི. ༢.༢༤༨; ༣.༣༡༢; པཊི. མ. ༡.༢༠༩; དྷ. ས. ༢༤༨) ནིརོདྷསམཱཔཏྟིཨནྟེ ཨཊྛ ཝིམོཀྑེ ཝཏྭཱ ‘‘ཡཏོ ཁོ, ཨཱནནྡ, བྷིཀྑུ ཨིམེ ཨཊྛ ཝིམོཀྑེ ཀཱཡེན ཕུསིཏྭཱ ཝིཧརཏི, པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟི. ཨཡཾ ཝུཙྩཏི, ཨཱནནྡ, བྷིཀྑུ ཨུབྷཏོབྷཱགཝིམུཏྟོ’’ཏི ཡདིཔི མཧཱནིདཱནསུཏྟེ ¶ ཝུཏྟཾ, ཏཾ པན ཨུབྷཏོབྷཱགཝིམུཏྟསེཊྛཝསེན ཝུཏྟནྟི ཨིདྷ ཀཱིཊཱགིརིསུཏྟཝསེན སབྦཨུབྷཏོབྷཱགཝིམུཏྟསངྒཧཏྠཾ ‘‘ཨཊྛ སམཱཔཏྟིཡོ སཧཛཱཏནཱམཀཱཡེན པཊིལབྷིཏྭཱ ཝིཧརཏཱི’’ཏི ཨཱཧ. ཀཱིཊཱགིརིསུཏྟེ ¶ ཧི ‘‘ཨིདྷ, བྷིཀྑཝེ, ཨེཀཙྩོ པུགྒལོ ཡེ ཏེ སནྟཱ ཝིམོཀྑཱ ཨཏིཀྐམྨ རཱུཔེ ཨཱརུཔྤཱ, ཏེ ཀཱཡེན ཕུསིཏྭཱ ཝིཧརཏི, པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟི. ཨཡཾ ཝུཙྩཏི, བྷིཀྑཝེ, པུགྒལོ ཨུབྷཏོབྷཱགཝིམུཏྟོ’’ཏི (མ. ནི. ༢.༡༨༢) ཨརཱུཔསམཱཔཏྟིཝསེན ཙཏྟཱརོ ཨུབྷཏོབྷཱགཝིམུཏྟཱ ཝུཏྟཱ, ཨུབྷཏོབྷཱགཝིམུཏྟསེཊྛོ ཙ ཝུཏྟལཀྑཎོཔཔཏྟིཏོཏི. ཀཱཡསཀྑིམྷིཔི ཨེསེཝ ནཡོ.

པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟཱིཏི ན ཨཱསཝཱ པཉྙཱཡ པསྶནྟི, དསྶནཀཱརཎཱ པན པརིཀྑཱིཎཱ དིསྭཱ པརིཀྑཱིཎཱཏི ཝུཏྟཱ. དསྶནཱཡཏྟཔརིཀྑཡཏྟཱ ཨེཝ ཧི དསྶནཾ པུརིམཀིརིཡཱ ཧོཏཱིཏི. ནཱམནིསྶིཏཀོ ཨེསོཏི ཨེསོ ཨུབྷཏོབྷཱགཝིམུཏྟོ རཱུཔཏོ མུཙྩིཏྭཱ ནཱམཾ ནིསྶཱཡ ཋིཏོ པུན ཏཏོ མུཙྩནཏོ ‘‘ནཱམནིསྶིཏཀོ’’ཏི ཝཏྭཱ ཏསྶ ཙ སཱདྷཀཾ སུཏྟཾ ཝཏྭཱ ‘‘ཀཱཡདྭཡཏོ སུཝིམུཏྟཏྟཱ ཨུབྷཏོབྷཱགཝིམུཏྟོ’’ཏི ཨཱཧཱཏི ཨཏྠོ. སུཏྟེ ཧི ཨཱཀིཉྩཉྙཱཡཏནལཱབྷིནོ ཨུཔསཱིཝབྲཱཧྨཎསྶ བྷགཝཏཱ ནཱམཀཱཡཱ ཝིམུཏྟོཏི ཨུབྷཏོབྷཱགཝིམུཏྟོཏི མུནི ཨཀྑཱཏོཏི.

པཋམཏྠེརཝཱདེ དྭཱིཧི བྷཱགེཧི ཝིམུཏྟོ ཨུབྷཏོབྷཱགཝིམུཏྟོ, དུཏིཡཏྠེརཝཱདེ ཨུབྷཏོ བྷཱགཏོ ཝིམུཏྟོཏི ཨུབྷཏོབྷཱགཝིམུཏྟོཏི, ཏཏིཡཏྠེརཝཱདེ དྭཱིཧི བྷཱགེཧི དྭེ ཝཱརེ ཝིམུཏྟོཏི ཨཡམེཏེསཾ ཝིསེསོ. ཏཏྠ ཝིམུཏྟོཏི ཀིལེསེཧི ཝིམུཏྟོ, ཀིལེསཝིཀྑམྦྷནསམུཙྪེདནེཧི ཝཱ ཀཱཡདྭཡཏོ ཝིམུཏྟོཏི ཨཏྠོ དཊྛབྦོ. ཨརཱུཔཱཝཙརཾ པན ནཱམཀཱཡཏོ ཙ ཝིམུཏྟནྟི ནཱིཝརཎསངྑཱཏནཱམཀཱཡཏོ ཝིམུཏྟནྟི ཝུཏྟཾ ཧོཏི. ཏཉྷི ནཱིཝརཎདཱུརཱིབྷཱཝེན ནཱམཀཱཡཏོ རཱུཔཏཎྷཱཝིཀྑམྦྷནེན རཱུཔཀཱཡཏོ ཙ ཝིམུཏྟཏྟཱ ཨེཀདེསེན ཨུབྷཏོབྷཱགཝིམུཏྟཾ ནཱམ ཧོཏཱིཏི ཨརཧཏྟམགྒསྶ པཱདཀབྷཱུཏཾ ཨུབྷཏོབྷཱགཝིམུཏྟནཱམལཱབྷསྶ ཀཱརཎཾ བྷཝིཏུཾ ཡུཏྟནྟི ཨདྷིཔྤཱཡོ.

༢༥. ཨེཏེསུ ཧི ཨེཀོཔི ཨཊྛཝིམོཀྑལཱབྷཱི ན ཧོཏཱིཏི ཨུབྷཏོབྷཱགཝིམུཏྟབྷཱཝསྶ ཀཱརཎབྷཱུཏཾ རཱུཔཀཱཡཏོ ཝིམུཏྟཾ ཨེཀམྤི ཝིམོཀྑཾ ¶ ཨནདྷིགཏོཏི ཨདྷིཔྤཱཡོ. ཨརཱུཔཱཝཙརེསུ ཧི ཨེཀམྤི ཨདྷིགཏོ ཨུབྷཏོབྷཱགཝིམུཏྟབྷཱཝཀཱརཎཔཊིལཱབྷཏོ ཨཊྛཝིམོཀྑེཀདེསེན ཏེན ཏཾནཱམདཱནེ ¶ སམཏྠེན ‘‘ཨཊྛཝིམོཀྑལཱབྷཱི’’ཏྭེཝ ཝུཙྩཏི. ཏེནཱཧ ‘‘ཨརཱུཔཱཝཙརཛ྄ཛྷཱནེསུ པནཱ’’ཏིཨཱདི.

༢༦. ཕུཊྛནྟཾ སཙྪིཀརོཏཱིཏི ཕུཊྛཱནཾ ཨནྟོ ཕུཊྛནྟོ, ཕུཊྛཱནཾ ཨརཱུཔཱཝཙརཛ྄ཛྷཱནཱནཾ ཨནནྟརོ ཀཱལོཏི ཨདྷིཔྤཱཡོ. ཨཙྩནྟསཾཡོགེ ཙེཏྠ ཨུཔཡོགཝཙནཾ དཊྛབྦཾ. ཕུཊྛཱནནྟརཀཱལམེཝ སཙྪིཀརོཏི སཙྪིཀཱཏབྦོཔཱཡེནཱཏི ཝུཏྟཾ ཧོཏི. ‘‘ཨེཀམནྟཾ ནིསཱིདཱི’’ཏིཨཱདཱིསུ (དཱི. ནི. ༡.༡༦༥) ཝིཡ བྷཱཝནཔུཾསཀཾ ཝཱ ཨེཏཾ. ཡོ ཧི ཨརཱུཔཛ྄ཛྷཱནེན རཱུཔཀཱཡཏོ ནཱམཀཱཡེཀདེསཏོ ཙ ཝིཀྑམྦྷནཝིམོཀྑེན ཝིམུཏྟོ, ཏེན ནིརོདྷསངྑཱཏོ ཝིམོཀྑོ ཨཱལོཙིཏོ པཀཱསིཏོ ཝིཡ ཧོཏི, ན པན ཀཱཡེན སཙྪིཀཏོ. ནིརོདྷཾ པན ཨཱརམྨཎཾ ཀཏྭཱ ཨེཀཙྩེསུ ཨཱསཝེསུ ཁེཔིཏེསུ ཏེན སོ སཙྪིཀཏོ ཧོཏི, ཏསྨཱ སོ སཙྪིཀཱཏབྦཾ ནིརོདྷཾ ཡཐཱཨཱལོཙིཏཾ ནཱམཀཱཡེན སཙྪིཀརོཏཱིཏི ཀཱཡསཀྑཱིཏི ཝུཙྩཏི, ན ཏུ ཝིམུཏྟོཏི ཨེཀཙྩཱནཾ ཨཱསཝཱནཾ ཨཔརིཀྑཱིཎཏྟཱ.

༢༧. དིཊྛཏྟཱ པཏྟོཏི ཨེཏེན ཙཏུསཙྩདསྶནསངྑཱཏཱཡ དིཊྛིཡཱ ནིརོདྷསྶ པཏྟཏཾ དཱིཔེཏི. ‘‘དིཊྛནྟཾ པཏྟོ’’ཏི ཝཱ པཱཋོ, དསྶནསངྑཱཏསྶ སོཏཱཔཏྟིམགྒཉཱཎསྶ ཨནནྟརཾ པཏྟོཏི ཝུཏྟཾ ཧོཏི. པཋམཕལཏོ པཊྛཱཡ ཧི ཡཱཝ ཨགྒམགྒཱ དིཊྛིཔྤཏྟོཏི.

༢༨. ཨིམཾ པན ནཡཾ ‘‘ནོ’’ཏི པཊིཀྑིཔིཏྭཱཏི ཨེཏྠ དིཊྛིཔྤཏྟསདྡྷཱཝིམུཏྟབྷཱཝཔྤཏྟཱནཾ པཉྙཱནཱནཏྟཾ ཝུཏྟཾ, ན པན ཡེན ཝིསེསེན སོ ཝིསེསོ པཏྟོ, སོ ཝུཏྟོཏི ཨིམཾ དོསཾ དིསྭཱ པཊིཀྑེཔོ ཀཏོཏི དཊྛབྦོ. ཨཱགམཊྛཀཐཱསཱུཏི ཙ ཝཙནེན ཨཱགམནཱིཡནཱནཏྟསནྣིཊྛཱནམེཝ ཐིརཾ ཀརོཏཱིཏི ཝེདིཏབྦཾ. སདྡཧནྟོ ཝིམུཏྟོཏི ཨེཏེན སབྦཐཱ ཨཝིམུཏྟསྶཔི སདྡྷཱམཏྟེན ཝིམུཏྟབྷཱཝཾ དསྶེཏི. སདྡྷཱཝིམུཏྟོཏི ཝཱ སདྡྷཱཡ ཨདྷིམུཏྟོཏི ཨཏྠོ.

༢༩. པཉྙཾ ཝཱཧེཏཱིཏི པཉྙཾ སཱཏིསཡཾ པཝཏྟེཏཱིཏི ཨཏྠོ. པཉྙཱ ཨིམཾ པུགྒལཾ ཝཧཏཱིཏི ནིབྦཱནཱབྷིམུཁཾ གམེཏཱིཏི ཨཏྠོ.

༣༡. ཨེཝཾ ¶ མགྒཀྑཎེཔཱིཏི ཨཡཾ ཨཔི-སདྡོ ཀསྨཱ ཝུཏྟོ, ནནུ ཨརིཡེན ཨཊྛངྒིཀེན མགྒེན སམནྣཱགཏོ མགྒཀྑཎེ ཨེཝ ཧོཏཱིཏི ཏདཱ ཨེཝ སོཏཱཔནྣོ ནཱམཱཏི ཨཱཔནྣནྟི? ནཱཔནྣཾ ¶ . མགྒེན ཧི ཨཏྟནཱ སདིསསྶ ཨཊྛངྒིཀསྶ ཝཱ སཏྟངྒིཀསྶ ཝཱ ཕལསྶ སོཏོཏི ནཱམཾ དིནྣནྟི ཏེནཔི སམནྣཱགཏསྶ སོཏཱཔནྣབྷཱཝཏོ, སོཏེན ཝཱ མགྒེན པཝཏྟེཏུཾ ཨཔརིཧཱིནེན ཕལཊྛོཔི སམནྣཱགཏོ ཨེཝ ནཱམ, ན ཙ ཏེན པཋམམགྒཀྑཎེ ཝིཡ སོཏོ སམཱཔཛྫིཡམཱནོ, ཏསྨཱ སམཱཔནྣསོཏཏྟཱ པཋམཕལཏོ པཊྛཱཡ ‘‘སོཏཱཔནྣོ’’ཏི ཝཏྟུཾ ཡུཏྟོ. ཝུཏྟཉྷི ‘‘ཡེ ཀེཙི, བྷིཀྑཝེ, མཡི ཨཝེཙྩཔྤསནྣཱ, སབྦེ ཏེ སོཏཱཔནྣཱ. ཏེསཾ སོཏཱཔནྣཱནཾ པཉྩནྣཾ ཨིདྷ ནིཊྛཱ, པཉྩནྣཾ ཨིདྷ ཝིཧཱཡ ནིཊྛཱ’’ཏི (ཨ. ནི. ༡༠.༦༤). ཏཏྠ དུཏིཡཕལཊྛཱདཱིནཾ ཝིསུཾ ནཱམཾ ཨཏྠཱིཏི པཋམཕལཊྛོ ཨེཝ ཨིཏརེཧི ཝིསེསིཡམཱནོ ‘‘སོཏཱཔནྣོ’’ཏི ཝཏྟུཾ ཡུཏྟོཏི སོ ཨེཝ ཨིདྷཱདྷིཔྤེཏོ. པཊིལདྡྷམགྒེན བུཛ྄ཛྷཏཱིཏི ཨེཏེན པཊིལདྡྷམགྒསྶ ཙཏུསཙྩཔཙྩཝེཀྑཎཱདཱིནཾ ཨུཔནིསྶཡབྷཱཝཾ དསྶེཏི. སམྦོདྷི པརཾ ཨཡནཾ ནིསྶཡོ ཨེཏསྶཱཏི ཧི སམྦོདྷིཔརཱཡཎོཏི. དུཏིཡེནཏྠེན སམྦོདྷི པརཾ ཨཡནཾ གཏི ཨེཏསྶཱཏི སམྦོདྷིཔརཱཡཎོ.

༣༢. ཀེཝལེན ཀུལསདྡེན མཧཱཀུལམེཝ ཝུཙྩཏཱིཏི ཨཱཧ ‘‘མཧཱབྷོགཀུལེསུཡེཝ ནིབྦཏྟཏཱིཏི ཨཏྠོ’’ཏི.

༣༣. ཁནྡྷབཱིཛཾ ནཱམ པཊིསནྡྷིཝིཉྙཱཎཾ. ཨིཧཊྛཀནིཛ྄ཛྷཱནིཀཝསེནེཝ ཨིམསྨིཾ ཋཱནེ ཀཐིཏཱཏི སཛ྄ཛྷཱནཀོ ཨཛ྄ཛྷཏྟསཾཡོཛནསམུཙྪེདེ ཨཀཏེཔི ཨནཱགཱམིསབྷཱགོ ཨནཱཝཏྟིདྷམྨོ ཨིདྷ གཎནཱུཔགོ ན ཧོཏི, ཧེཊྛཱ ཨུཔརི ཙ སཾསརཎཀོ ཀཱམབྷཝགཏོ ཧཱིནཛ྄ཛྷཱནཀོ ཨིདྷ གཎནཱུཔགོཏི ཨདྷིཔྤཱཡོ.

༣༤. ཡཾ ཝཏྟབྦནྟི ‘‘དྭཱིཧི ཀཱརཎེཧི ཏནུབྷཱཝོ ཝེདིཏབྦོ’’ཏིཨཱདི ཡཾ ཝཏྟབྦཾ སིཡཱཏི ཨཏྠོ.

༣༦. ཨུཔཔནྣཾ ཝཱ སམནནྟརཱཏི ཨུཔཔནྣཾ ཝཱ ཨེཏེན པུགྒལེན ཧོཏི, ཨཐ སམནནྟརཱ ཨརིཡམགྒཾ སཉྫནེཏི. ཨཔྤཏྟཾ ཝཱ ཝེམཛ྄ཛྷཾ ཨཱཡུཔྤམཱཎནྟི ཨཱཡུཔྤམཱཎཾ ཏསྶ པུགྒལསྶ ཝེམཛ྄ཛྷཾ ཨཔྤཏྟཾ ཧོཏི, ཨེཏྠནྟརེ ཨརིཡམགྒཾ ¶ སཉྫནེཏཱིཏི ཨཡམེཏྠ པཱལི༹ཨཏྠོ. ཨཊྛཀཐཱཡཾ པན ‘‘ཨཔྤཏྭཱ པབྦཏཾ ནདཱི’’ཏི ཝིཡ ཨཱཡུཔྤམཱཎཾ ཝེམཛ྄ཛྷཾ ཨཔྤཏྟཾ ཝཱ ཧུཏྭཱཏི པརསདྡཡོགེ པརཏོ བྷཱུཏོ ཧུཏྭཱ སདྡོ ཝཙནསེསབྷཱུཏོ པཡུཏྟོཏི ཝེདིཏབྦོ.

༣༧. ཨུཔཧཙྩཱཏི ¶ ཨེཏསྶ ཨུཔགནྟྭཱཏི ཨཏྠོ, ཏེན ཝེམཛ྄ཛྷཱཏིཀྐམོ ཀཱལཀིརིཡོཔགམནཉྩ སངྒཧིཏཾ ཧོཏི. ཏེན ཝུཏྟཾ ‘‘ཨཏིཀྐམིཏྭཱ ཝེམཛ྄ཛྷ’’ནྟིཨཱདི.

༤༠. ཨུདྡྷཾཝཱཧིབྷཱཝེནཱཏི ཨུདྡྷཾ ཝཧཏཱིཏི ཨུདྡྷཾཝཱཧཱི, ཏཎྷཱསོཏཾ ཝཊྚསོཏཾ ཝཱ, ཏསྶ བྷཱཝོ, ཏེན ཨུདྡྷཾཝཱཧིབྷཱཝེནཱཏི ཝུཏྟཾ ཧོཏི. ཨཝིཧེསུ ཨུདྡྷཾསོཏོ ཡདིཔི ཏཏྠ པརིནིབྦཱཡཱི ན ཧོཏི, ཡཏྠ ཝཱ ཏཏྠ ཝཱ གནྟྭཱ པརིནིབྦཱཡཏུ, པརིནིབྦཱཡིནོ པན ཏསྶ ཨསངྑཱརཔརིནིབྦཱཡིཏཱ སསངྑཱརཔརིནིབྦཱཡིཏཱ ཙ ཨཏྠཱིཏི ཏཏྠ དས ཨནཱགཱམིནོ ཝུཏྟཱ, ཨེཝཾ ཨཏཔྤཱདཱིསུཔི. ཨནུཔཧཙྩཏལཱཏི ཨཔྤཏྟཏལཱ. ཨསངྑཱརསསངྑཱརཔརིནིབྦཱཡཱིནཾ ལཧུསཱལཧུསགཏིཀཱ ཨེཝ པརིཏྟཝིཔུལཏིཎཀཊྛཛྷཱཔཀཔཔྤཊིཀཱསདིསཏཱ ཝེདིཏབྦཱ, ན ཨུཔྤཛྫིཏྭཱཝ ནིབྦཱཡནཀཱདཱིཧི ཨདྷིམཏྟཏཱ ཝིཡ སམུདྡཾ པཏྭཱ ནིབྦཱཡནཀཏོ ཨནདྷིམཏྟཏཱ ཝིཡ ཙ ཨནྟརཱ ཨུཔཧཙྩཔརིནིབྦཱཡཱིཧི ཨུདྡྷཾསོཏཏོ ཙ ཨདྷིམཏྟཱནདྷིམཏྟཏཱ. ཏེ ཨེཝ ཧི ཨསངྑཱརསསངྑཱརཔརིནིབྦཱཡིནོཏི. ཏཏོ མཧནྟཏརེཏི ཝཙནཾ ཏིཎཀཊྛཛྷཱཔནསམཏྠཔཔྤཊིཀཱདསྶནཏྠཾ, ན ཨདྷིམཏྟ ནཱདྷིམཏྟདསྶནཏྠནྟི.

ནོ ཙསྶ ནོ ཙ མེ སིཡཱཏི ཨཝིཛྫཱསངྑཱརཱདིཀཾ ཧེཏུཔཉྩཀཾ ནོ ཙ ཨསྶ, ཝིཉྙཱཎཱདིཀཾ ཨིདཾ ཕལཔཉྩཀཾ ཝཏྟམཱནཾ ནོ ཙ མེ སིཡཱཏི ཨཏྠོ. ཏེན ཨཏཱིཏབྷཝསཾསིདྡྷིཏོ དུཀྑསམུདཡཏོ ཨིམསྶ དུཀྑསྶ པཝཏྟིདསྶནཏོ པཙྩཡསམུདཡཊྛེན ཁནྡྷཱནཾ ཨུདཡདསྶནཔཊིཔཏྟི ཝུཏྟཱ ཧོཏི. ན བྷཝིསྶཏི, ན མེ བྷཝིསྶཏཱིཏི ཡདི ཨེཏརཧི ཧེཏུཔཉྩཀཾ ན བྷཝིསྶཏི, ཨནཱགཏེ ཕལཔཉྩཀཾ ན མེ བྷཝིསྶཏཱིཏི ཨཏྠོ. ཨེཏེན པཙྩཡནིརོདྷཊྛེན ཝཡདསྶནཔཊིཔཏྟི ཝུཏྟཱ ཧོཏི, ཨེཏརཧི ཨནཱགཏེ ཙ ཨཏྟཏྟནིཡནིཝཱརཎཝསེན སུཉྙཏཱཔཊིཔཏྟི ཝཱ ཙཏཱུཧིཔི ཝུཏྟཱ. ཡདཏྠཱིཏི ཡཾ ཨཏྠི. བྷཱུཏནྟི སསབྷཱཝཾ ནིབྦཏྟཾ ཝཱ ཡཐཱདིཊྛཨུདཡབྦཡཾ ཡཐཱདིཊྛསུཉྙཏཾ ཝཱ ཁནྡྷཔཉྩཀཾ པརིཀཔྤིཏཨིཏྠིཔུརིསསཏྟཱདིབྷཱཝརཧིཏཾ ནཱམརཱུཔམཏྟནྟི ཨཏྠོ. ཝིཝཊྚཱནུཔསྶནཱཡ ཝིཝཊྚམཱནསོ ཏཾ བྷཱུཏཾ པཛཧཱམཱིཏི ¶ ཨུཔེཀྑཾ པཊིལབྷཏི, སངྑཱརུཔེཀྑཱཉཱཎེན ཨུཔེཀྑཀོ ཧོཏཱིཏི ཝུཏྟཾ ཧོཏི.

བྷཝེ ན རཛྫཏི, སམྦྷཝེ ན རཛྫཏཱིཏི ཨཝིསིཊྛེ ཝིསིཊྛེ ཙ བྷཝེ ན རཛྫཏཱིཏི ཀེཙི ཝདནྟི. པཙྩུཔྤནྣོ པན བྷཝོ བྷཝོ, ཨནཱགཏོ ཛཱཏིཡཱ གཧཎེན གཧིཏོ སམྦྷཝོཏི ཝེདིཏབྦོ. ཨཐ ཝཱ བྷཝོཏི བྷཱུཏམེཝ ཝུཙྩཏི, སམྦྷཝོ ཏདཱཧཱརོ, ཏསྨིཾ དྭཡེ ན རཛྫཏཱིཏི སེཀྑཔཊིཔཏྟིཾ དསྶེཏི ¶ . བྷཱུཏེ ཧི སསམྦྷཝེ ཙ ཝིརཱགོ སེཀྑཔཊིཔཏྟི. ཡཐཱཧ ‘‘བྷཱུཏམིདནྟི, བྷནྟེ, ཡཐཱབྷཱུཏཾ སམྨཔྤཉྙཱཡ པསྶཏི, བྷཱུཏམིདནྟི ཡཐཱབྷཱུཏཾ སམྨཔྤཉྙཱཡ དིསྭཱ བྷཱུཏསྶ ནིབྦིདཱཡ ཝིརཱགཱཡ ནིརོདྷཱཡ པཊིཔནྣོ ཧོཏི. ཏདཱཧཱརསམྦྷཝནྟི ཡཐཱབྷཱུཏཾ…པེ… དིསྭཱ ཏདཱཧཱརསམྦྷཝསྶ ནིབྦིདཱཡ…པེ… པཊིཔནྣོ ཧོཏི. ཏདཱཧཱརནིརོདྷཱཡ ཡཾ བྷཱུཏཾ, ཏཾ ནིརོདྷདྷམྨནྟི ཡཐཱབྷཱུཏཾ…པེ… དིསྭཱ ནིརོདྷདྷམྨསྶ ནིབྦིདཱཡ ཝིརཱགཱཡ ནིརོདྷཱཡ པཊིཔནྣོ ཧོཏི. ཨེཝཾ ཁོ, བྷནྟེ, སེཀྑོ ཧོཏཱི’’ཏི (སཾ. ནི. ༢.༣༡). ཨཐུཏྟརཱིཏི ཨཐ ཨེཝཾ ཨརཛྫམཱནོ ཨུཏྟརི སནྟཾ པདཾ ནིབྦཱནཾ ཨནུཀྐམེན མགྒཔཉྙཱཡ སམྨཱ པསྶཏི, ཏཉྩ ཁྭསྶ པདཾ ན སབྦེན སབྦཾ སཙྪིཀཏཾ ཙཏུཏྠམགྒེནེཝ སཙྪིཀཱཏབྦསྶ ཏསྶ ཏེན ཨསཙྪིཀཏཏྟཱ.

༦༣. ཀསྶཙི ཀིལེསསྶ ཨཝིཀྑམྦྷིཏཏྟཱ ཀསྶཙི ཀཐཉྩི ཨཝིམུཏྟོ ཀཱམབྷཝོ ཨཛ྄ཛྷཏྟགྒཧཎསྶ ཝིསེསཔཙྩཡོཏི ཨཛ྄ཛྷཏྟཾ ནཱམ. ཏཏྠ བནྡྷནཾ ཨཛ྄ཛྷཏྟསཾཡོཛནཾ, ཏེན སམྤཡུཏྟོ ཨཛ྄ཛྷཏྟསཾཡོཛནོ.

༨༣. ཀཱརཎེན ཝིནཱ པཝཏྟཧིཏཙིཏྟོ ཨཀཱརཎཝཙྪལོ. ཨནཱགཏམྤི པཡོཛནཾ ཨཔེཀྑམཱནོ པུརིམགྒཧིཏཾ ཏཾ ཀཏཾ ཨུཔཱདཱཡ ཀཏཉྙཱུ ཨེཝ ནཱམ ཧོཏི, ན པུབྦཀཱརཱིཏི ཨཱཧ ‘‘ཀརིསྶཏི མེ’’ཏིཨཱདི. ཏམོཛོཏིཔརཱཡཎོ པུཉྙཕལཾ ཨནུཔཛཱིཝནྟོ ཨེཝ པུཉྙཱནི ཀརོཏཱིཏི ‘‘པུབྦཀཱརཱི’’ཏི ཝུཏྟོ. ‘‘ཨིཎཾ དེམཱི’’ཏི སཉྙཾ ཀརོཏཱིཏི ཨེཝཾསཉྙཾ ཨཀརོནྟོཔི ཀརོནྟོ ཝིཡ ཧོཏཱིཏི ཨཏྠོ.

༨༦. ཨཙྪམཾསཾ ¶ ལབྷིཏྭཱ སཱུཀརམཾསནྟི ན ཀུཀྐུཙྩཱཡཏཱིཏི ཨཙྪམཾསནྟི ཛཱནནྟོཔི སཱུཀརམཾསནྟི ན ཀུཀྐུཙྩཱཡཏི, མདྡིཏྭཱ ཝཱིཏིཀྐམཏཱིཏི ཝུཏྟཾ ཧོཏི.

༩༠. ཏིཏྟོཏི ནིཊྛིཏཀིཙྩཏཱཡ ནིརུསྶུཀྐོ.

༩༡. སེསསཾཝརབྷེདེནཱཏི ¶ མནོསཾཝརབྷེདེན, སཏིསཾཝརཱདིབྷེདེན ཝཱ. ཨཀུསལསཱིལསམནྣཱགམེནཱཏི ‘‘ཀཏམེ ཙ ཐཔཏི ཨཀུསལཱ སཱིལཱ? ཨཀུསལཾ ཀཱཡཀམྨཾ ཨཀུསལཾ ཝཙཱིཀམྨཾ པཱཔཀོ ཨཱཛཱིཝོ’’ཏི ཝུཏྟེཧི སམནྣཱགམེན. ཏསྶ ཧི…པེ… ཨེཝཾ སཱསངྐསམཱཙཱརོ ཧོཏཱིཏི ཨེཝཾ སཱསངྐོ སམཱཙཱརོ ཧོཏཱིཏི ཨཏྠོ.

༩༤. སམཱནཝིསཡཱནཾ པུགྒལཱནཾ ཝིསེསདསྶནཝསེན ‘‘ཀཱཡསཀྑཱི’’ཏིཨཱདིཀཾ ཝུཏྟཾ.

༡༠༧. སམཱདྷི ཝཱ ཨཱདཱིཏི ལོཀུཏྟརདྷམྨཱ ཧི པརམཏྠཏོ སཱསནནྟི ཏདཏྠོ པཱདཀསམཱདྷི ཏསྶ ཨཱདི ཝུཏྟོ, ཏདཱསནྣཏྟཱ ཝིཔསྶནཱ, ཏསྶ མཱུལེཀདེསཏྟཱ མགྒོ.

༡༠༨. ཨུཙྪངྒོ ཝིཡ ཨུཙྪངྒཔཉྙོ པུགྒལོ དཊྛབྦོཏི ཨུཙྪངྒསདིསཔཉྙཏཱཡ ཨེཝ པཉྙཱ ཝིཡ པུགྒལོཔི ཨུཙྪངྒོ ཝིཡ ཧོཏི, ཏསྨིཾ དྷམྨཱནཾ ཨཙིརཊྛཱནཏོཏི ཨདྷིཔྤཱཡེན ཝུཏྟཾ. ཝཀྑཏི ཧི ‘‘ཨུཙྪངྒསདིསཔཉྙོཏིཨཏྠོ’’ཏི.

༡༠༩. ཡཐཱ ཙ ཨུཙྪངྒསདིསཱ པཉྙཱ, ཨེཝཾ ནིཀྐུཛྫཀུམྦྷསདིསཱ པཉྙཱ ཨེཝཱཏི དཊྛབྦོ, ཏཏྠ དྷམྨཱནཾ ཨནཝཊྛཱནཏོ.

༡༡༣. ཙིརཊྛཱནཏོ ཐིརཊྛཱནཏོ ཙ པཱསཱཎལེཁསདིསཱ པརཱཔརཱདྷནིབྦཏྟཱ ཀོདྷལེཁཱ ཡསྶ སོ པཱསཱཎལེཁཱུཔམསམནྣཱགཏོ པཱསཱཎལེཁཱུཔམོཏི ཝུཏྟོ, ཨེཝཾ ཨིཏརེཔི.

༡༡༨. སུཏཱདིཝཏྠུརཧིཏོ ¶ ཏུཙྪམཱནོ ནལོ༹ ཝིཡཱཏི ‘‘ནལོ༹’’ཏི ཝུཙྩཏི, སོ ཨུགྒཏོ ནལོ༹ ཨེཏསྶཱཏི ཨུནྣལོ༹.

༡༢༢. ‘‘སཱིལཀཐཱ ཙ ནོ བྷཝིསྶཏཱི’’ཏི ཨེཏྠ ཝུཏྟཾ སཱིལཀཐཱབྷཝནཾ པཋམཱརམྦྷོཔི དུསྶཱིལེན སཧ ན ཧོཏཱིཏི དསྶེནྟོ ཨཱཧ ནེཝ སཱིལཀཐཱ ཧོཏཱི’’ཏི.

༡༢༣. ཏཏྠ ¶ ཏཏྠཱཏི ཏསྨིཾ ཏསྨིཾ ཨནུགྒཧེཏབྦེ པཉྙཱཡ སོདྷེཏབྦེ ཙ ཝཌྜྷེཏབྦེ ཙ ཨདྷིཀསཱིལཾ ནིསྶཱཡ ཨུཔྤནྣཔཉྙཱཡ ཨནུགྒཎྷཱཏི ནཱམཱཏི ཨཏྠོ.

༡༢༤. གཱུཐཀཱུཔོ ཝིཡ དུསྶཱིལྱནྟི ཨེཏེན དུསྶཱིལྱསྶ གཱུཐསདིསཏྟམེཝ དསྶེཏི.

༡༣༠. ནོ ཙ སམྨཱ པཉྙཔེཏུཾ སཀྐོནྟཱིཏི ཡེབྷུཡྻེན ན སཀྐོནྟཱིཏི ཨིམམཏྠཾ སནྡྷཱཡ ཝུཏྟཾ, ཨུཔྤནྣེ ཏཐཱགཏེ ཏསྨིཾ ཨནཱདརིཡཾ ཀཏྭཱ སམཱཔཏྟིཾ ཨུཔྤཱདེཏུཾ ཝཱཡམནྟསྶ ཨསམཏྠབྷཱཝཾ ཝཱ. ཏིཏྠིཡཱ ཝཱ པཱུརཎཱདཡོ ཨདྷིཔྤེཏཱ.

༡༣༣. པརེན ཀཏཾ དུསྶཱིལྱཾ ཨཱཎཏྟིཡཱ ཨཏྟནཱ ཙ པཡོགེན ཀཏནྟི ཨཱཎཏྟིཡཱ པཱཔསྶ དཱཡཱདོ ‘‘ཏཏོ ཨུཔཌྜྷསྶ དཱཡཱདོ’’ཏི ཝུཏྟོ.

༡༤༥. ཨཡནྟི ‘‘ཏེསུ པཋམོ’’ཏིཨཱདིཀཾ ནཡཾ ཝདཏི.

༡༤༨. དེསནཱཡ དྷམྨཱནཾ ཉཱཎསྶ ཨཱཔཱཐབྷཱཝསམྤཱདནཾ ཉཱཎུགྒྷཱཊནཾ. སཧ ཨུདཱཧཊཝེལཱཡཱཏི ཨུདཱཧཊཝེལཱཡ སདྡྷིཾ ཏསྨིཾ ཀཱལེ ཨནཏིཀྐནྟེ ཨེཝཱཏི ཨཏྠོ.

༡༥༢. ཏནྟི ཨནནྟརཝཙནཾ ཝདཏི. ‘‘ཀཏམོ ལོཀོ’’ཏི ཝུཏྟེ ‘‘པཉྩུཔཱདཱནཀྑནྡྷཱ’’ཏི མཧནྟཾ ཨཏྠཾ སངྒཧིཏྭཱ ཋིཏཝཙནཾ ཨཏྠཡུཏྟཾ. ལུཛྫཏཱིཏི ལོཀོཏི ཀཱརཎཡུཏྟཾ.

༡༥༦. སཧིཏཱསཧིཏསྶཱཏི ¶ སཧིཏཱསཧིཏེཏི ཨཏྠོ, སཧིཏཱསཧིཏསྶ པརིཙྪིནྡནེཏི ཝཱ ¶ . དྭེཡེཝཱཏི དུཏིཡཙཏུཏྠཱཡེཝ. དེསཀསཱཝཀསམྤཏྟིཡཱ བོདྷེཏུཾ སམཏྠཏཱཡ སབྷཱཝདྷམྨཀཐིཀཱ, སཙྩདྷམྨཀཐིཀཱཏི ཨཏྠོ.

༡༥༧. ཀུསལདྷམྨེཧི ཙིཏྟསྶ ཝཱསནཱབྷཱཝནཱ ཝཱསདྷུརཾ. ཨཡཾ པཱཔཔུགྒལོཏི ཙཏུཏྠོ ཝུཏྟོ, ན པཋམོ. པཋམོ ཧི ཨཝིསཾཝཱདེཏུཀཱམོ ཝེརཉྫབྲཱཧྨཎསདིསོ ཨདྷིཔྤེཏོཏི.

༡༥༩. པུགྒལེཔི ཨརིཡཱནཾ ཨབྷིཀྐམནཱདིསདིསཏཱཏི པུགྒལེ ཨབྷིཀྐམནཱདཱིནཾ ཨརིཡཱནཾ ཨབྷིཀྐམནཱདིསདིསཏཱཏི ཨཏྠོ, ཨརིཡཱནཾ ཨབྷིཀྐམནཱདིནཱ པུགྒལསྶ སདིསཏཱཏི ཝཱ སདིསཱབྷིཀྐམནཱདིཏཱཏི ཨཏྠོ.

༡༦༦. དུསྶཱིལཾ ‘‘དུསྶཱིལོ’’ཏི ཝདནྟོ བྷཱུཏཾ བྷཱསཏི ནཱམ. པཱཎཱཏིཔཱཏེན དུསྶཱིལཾ ཨདིནྣཱདཱནེན དུསྶཱིལོཏི ཨཝཏྭཱ པཱཎཱཏིཔཱཏེནེཝཱཏི ཝདནྟོ ཏཙྪཾ བྷཱསཏི ནཱམ. ཡམིདཾ ‘‘ཀཱལེནཱ’’ཏི ཝུཏྟཾ, ཏཏྲ ཏསྨིཾ ཝཙནེ, ཡོ ‘‘ཀཱལེན བྷཎཏཱི’’ཏི ཝུཏྟོ, སོ ཀཱིདིསོཏི དསྶནཏྠཾ ‘‘ཀཱལཉྙཱུ ཧོཏཱི’’ཏིཨཱདི ཝུཏྟནྟི དསྶེནྟོ ‘‘ཡམིདཾ ཀཱལེནཱཏི ཝུཏྟཾ, ཏཏྲ ཡོ པུགྒལོ’’ཏིཨཱདིམཱཧ.

༡༦༨. ཨཱགམནཝིཔཏྟི ནཱམ ཀམྨཾ, པུབྦུཔྤནྣཔཙྩཡཝིཔཏྟི སུཀྐསོཎིཏཾ. པཝཏྟེ, པཝཏྟསྶ ཝཱ པཙྩཡཱ པཝཏྟཔཙྩཡཱ, ཨཱཧཱརཱདཡོ. ཛོཏེཏཱིཏི ཛོཏི, ཨཱལོཀོ. ཀུལསམྤཏྟིཡཱདཱིཧི ཛོཏམཱནོ ཙ ཛོཏི ཝིཡཱཏི ཛོཏི.

༡༧༣. པཧཱིནཱཝསིཊྛཀིལེསཔཙྩཝེཀྑཎཱཔི ཡེཧི ཀིལེསེཧི ཝིམུཏྟོ ཨཝིམུཏྟོ ཙ, ཏེསཾ དསྶནཝསེན ཝིམུཏྟིདསྶནམེཝ ཧོཏཱིཏི ཨཱཧ ‘‘ཝིམུཏྟིཉཱཎདསྶནཾ ཨེཀཱུནཝཱིསཏིཝིདྷཾ པཙྩཝེཀྑཎཉཱཎ’’ནྟི.

༡༧༤. ཡཱནི ཀཱནིཙི ཏནྟཱཝུཏཱནནྟི ཏནྟཱཝུཏཱནཾ ཝཏྠཱནཾ ཡཱནི ཀཱནིཙི ཝཏྠཱནཱིཏི ཝུཏྟཾ ཧོཏི. སཱཡཾ ཏཏིཡཾ ཨསྶཱཏི སཱཡཏཏིཡོ. ཨནུཡུཉྫནཾ ཨནུཡོགོ. ཏཾ ཨནུཡུཏྟོཏི ཨུཔཡོགཝཙནཾ དཊྛབྦཾ, བྷཱཝནཔུཾསཀཾ ཝཱ.

༡༧༨. ཏཏྠ ¶ ¶ སིཀྑནབྷཱཝེནཱཏི སིཀྑཱཡ སཱཛཱིཝེ ཙ སིཀྑནབྷཱཝེན. སིཀྑཾ པརིཔཱུརེནྟོཏི སཱིལསཾཝརཾ པརིཔཱུརེནྟོ. སཱཛཱིཝཉྩ ཨཝཱིཏིཀྐམནྟོཏི ‘‘ནཱམཀཱཡོ པདཀཱཡོ ནིརུཏྟིཀཱཡོ བྱཉྫནཀཱཡོ’’ཏི ཝུཏྟཾ སིཀྑཱཔདཾ བྷགཝཏོ ཝཙནཾ ཨཝཱིཏིཀྐམནྟོ ཧུཏྭཱཏི ཨཏྠོ. ཨིདམེཝ ཙ དྭཡཾ ‘‘སིཀྑན’’ནྟི ཝུཏྟཾ. ཏཏྠ སཱཛཱིཝཱནཏིཀྐམོ སིཀྑཱཔཱརིཔཱུརིཡཱ པཙྩཡོ. ཏཏོ ཧི ཡཱཝ མགྒཱ སཾཝརཔཱརིཔཱུརཱི ཧོཏཱིཏི. ཝིནཱསནབྷཱཝཏོཏི ཧིཾསནབྷཱཝཏོ. ཧལིདྡིརཱགོ ཝིཡ ན ཐིརཀཐོ ཧོཏཱིཏི ཨེཏྠ ཀཐཱཡ ཨཊྛིཏབྷཱཝེན ཧལིདྡིརཱགསདིསཏཱ ཝེདིཏབྦཱ, ན པུགྒལསྶ.

༡༧༩. དཱརུམཱསཀོཏི ཡེ ཝོཧཱརཾ གཙྪནྟཱིཏི ཨིཏི-སདྡེན ཨེཝཾཔཀཱརེ དསྶེཏི. ཨཉྙཾ དསྶེཏྭཱ ཨཉྙསྶ པརིཝཏྟནནྟི དསགྒྷནཀཾ ཝཏྠཡུགཾ དསྶེཏྭཱ ཏསྶ ཨཛཱནནྟསྶ པཉྩགྒྷནཀསྶ དཱནཾ.

༡༨༡. ཨཝིཀིཎྞསུཁནྟི རཱུཔཱདཱིསུ སུབྷཱདིཔརིཀཔྤནཝསེན ཨཝིསཊསུཁཾ.

༡༨༧. ཁནྡྷདྷམྨེསུ ཨནིཙྩཱདིཝསེན པཝཏྟཱ ཝིཔསྶནཱ མགྒཕལལཱབྷེན པཊིལདྡྷཱ ནཱམ ཧོཏི ཏདལཱབྷེན ཨནཝཊྛཱནཏོཏི མགྒཕལལཱབྷཱི ཨེཝ ‘‘ཨདྷིཔཉྙཱདྷམྨཝིཔསྶནཱལཱབྷཱི’’ཏི ཝུཏྟོ, མགྒཕལཉཱཎམེཝ ཙ ཨདྷིཀཔཉྙཱབྷཱཝཏོ ཙཏུསཙྩདྷམྨེ སབྦདྷམྨསྶ ཝརེ ནིབྦཱནེ ཨེཝ ཝཱ ཝིསིཊྛདསྶནབྷཱཝཏོ ཙ ཨདྷིཔཉྙཱདྷམྨཝིཔསྶནཱཏི དཊྛབྦཱ.

༡༨༩. སུཏེན ཨནུཔཔནྣོཏི ཡཐཱསུཏེན ཝཱ ཨཏྠེན ཝཱ ན སམནྣཱགཏོཏི ཨཏྠོ.

༡༩༡. པཋམཔཉྩཀེ ཨུདྡེསེནེཝ པུགྒལཝིབྷཱགོ ཝིཉྙཱཡཏཱིཏི ཡཐཱ ཏེསུ པཊིཔཛྫིཏབྦཾ ¶ , ཏཱཡ པཊིཔཏྟིཡཱ ཏེ ཝིབྷཛནྟོ ‘‘ཏཏྲ ཡྭཱཡ’’ནྟིཨཱདིམཱཧ. ཨཱརམྦྷསདྡོཏི ཨཱརམྦྷཀིརིཡཱཝཱཙཀོ སདྡོཏི ཨཏྠོ. ཕལུཔྤཏྟིཡཱ ¶ མགྒཀིཙྩཾ ནིཊྛིཏཾ ཧོཏཱིཏི ‘‘མགྒཀིཙྩཝསེན ཕལམེཝ ཝུཏྟ’’ནྟི ཨཱཧ. ཨཱཡཱཙནསཱདྷཱུཏི ན པསཾསནཱདིསཱདྷཱུཏི ཨཏྠོ.

༡༩༢. ཨཱདིཏོ དྷེཡྻཾ ཋཔེཏབྦཾ ཨཱདྷེཡྻཾ, དསྶནསཝནཔཊིཝཙནདཱནཝསེན མུཁེན ཝིཡ པཝཏྟཾ གཧཎཾ མུཁནྟི དཊྛབྦཾ. ཏཾ མུཁཾ ཨཱདྷེཡྻཾ, གཧཎཏྠཾ པཀཏིམུཁམེཝ ཝཱ ཨཱདྷེཡྻཾ ཡསྶ སོ ཨཱདྷེཡྻམུཁོ, ཨཝིཙཱརེཏྭཱ ཨཱདིཀཐཱཡ ཨེཝ ཋཔིཏགཧཎོཏི ཝུཏྟཾ ཧོཏི.

༡༩༩. གཝཱ ཁཱིརཾ ཨགྒམཀྑཱཡཏཱིཏི ན ཨེཝཾ སམྦནྡྷོ, ཨུཔྤཏྟིཏོ པན པཉྩ གོརསེ དསྶེཏྭཱ ཏེསུ སཔྤིམཎྜསྶ ཨགྒབྷཱཝདསྶནཏྠཾ ‘‘གཝཱ ཁཱིར’’ནྟིཨཱདི ཝུཏྟཾ. ཏེནཱཧ ‘‘གཱཝིཏོ ཁཱིརཾ ནཱམ ཧོཏཱི’’ཏིཨཱདི.

༢༠༢. ཚཀྐེ ཨེཀནྟཏོ པཱཀཊཱ སམྨཱསམྦུདྡྷཱདཡོ ཏེ ཡཐཱཝུཏྟགུཎཱ པུགྒལཱཏི དསྶེནྟོ ‘‘སམྨཱསམྦུདྡྷོ ཏེན དཊྛབྦོ’’ཏིཨཱདིམཱཧ. ཏཏྠ ཏེནཱཏི སཱམཾ སཙྩཱབྷིསམཡོ ཏཏྠ ཙ སབྦཉྙུཏཔྤཏྟིབལེསུ ཙ ཝསིབྷཱཝཔྤཏྟཱིཏི ཨེཏེན སབྦེན སམུདིཏེན. ‘‘སབྦཉྙུཏཉྙཱཎེནཱ’’ཏི པན ཝུཏྟེ སབྦམིདཾ སངྒཧིཏཾ ཧོཏི སཱམཾ སཙྩཱབྷིསམཡེན བལེསུ ཙ ཝསིབྷཱཝཔྤཏྟིཡཱ ཙ ཝིནཱ སབྦཉྙུཏཉྙཱཎསྶ ཨབྷཱཝཱ, ཏསྨཱ ཨཊྛཀཐཱཡཾ ‘‘སབྦཉྙུཏཉྙཱཎེནཱ’’ཏི ཨེཏྟཀམེཝ ཝུཏྟཾ. ཏཏྠ ཨནཱཙརིཡཀེན ཨཏྟནཱ ཨུཔྤཱདིཏེནཱཏི ཝཙནེན སབྦཉྙུཏཉྙཱཎསྶ སཱཙརིཡཀཏྟཾ པརཏོ ཨུཔྤཏྟིཉྩ པཊིསེདྷེཏི, ན སཱཙརིཡཀཾ པརེཧི ཨུཔྤཱདིཏཉྩ སབྦཉྙུཏཉྙཱཎཾ. ན ཧི ཏཾ ཏཱདིསཾ ནིཝཱརེཏབྦཾ ཨཏྠཱིཏི.

༢༠༣. སདྡྷཱ ¶ ¶ ནཱམ སཱདྷུལདྡྷིཀཱཏི ཨུམྨུཛྫཏཱིཏི ཨེཏེན ཀུསལེསུ དྷམྨེསུ ཨནྟོགདྷཱ, བོདྷིཔཀྑིཡདྷམྨེསུ ཝཱ ཨདྷིམོཀྑབྷཱུཏཱ སདྡྷཱ སཱདྷཱུཏི ཨུམྨུཛྫམཱནཾ ཀུསལཾ དསྶེཏི, ཨེཝཾ ཧིརཱིཡཱདཱིསུ ཙ. ཀུསལེསུ དྷམྨེསཱུཏི ཨེཏྠ བྷུམྨནིདྡེསོ ཏདནྟོགདྷཏཱཡ ཏདུཔཀཱརཏཱཡ ཝཱ ཝེདིཏབྦོ. ཨེཏྠ ཙ ཨུམྨུཛྫཏི སཱཧུ སདྡྷཱ ཀུསལེསུ དྷམྨེསཱུཏིཨཱདིནཱ སདྡྷཱདཱིནཾ ཨུམྨུཛྫནཔཉྙཱཡ སདྡྷཱདཱིནཾ ཨུཔྤཏྟིཾ དསྶེཏི. ཏེནེཝ ‘‘ཏསྶ སཱ སདྡྷཱ ནེཝ ཏིཊྛཏཱི’’ཏིཨཱདི ཝུཏྟཾ. ‘‘སཱཧུ སདྡྷཱ ཀུསལེསུ དྷམྨེསཱུ’’ཏི ཝཱ ཨུམྨུཛྫནསྶ ཨུཔཀཱརཀཾ ཨཱནིསཾསདསྶནཾ ཝཏྭཱ ‘‘ཨུམྨུཛྫཏཱི’’ཏི ཨེཏེན སདྡྷཱསངྑཱཏམེཝ ཨུམྨུཛྫནཾ དསྶིཏནྟི ཝེདིཏབྦཾ. ཙངྐཝཱརེཏི རཛཀཱནཾ ཁཱརཔརིསཱཝནེ. ཨེཀཀམྨནིབྦཏྟཱ པཊིསནྡྷིབྷཝངྒཙུཏིསནྟཏི ཨེཀོ ཙིཏྟཝཱརོཏི ཙུཏིཏོ ཨནནྟརོ ཡཐཱགཧིཏོ དུཏིཡོ ཧོཏཱིཏི ཨཱཧ ‘‘དུཏིཡཙིཏྟཝཱརེནཱ’’ཏི. ཨུམྨུཛྫིཏྭཱ ཋིཏཱདཡོ ཙཏྟཱརོ ཏཱཡ ཏཱཡ ཛཱཏིཡཱ ཨརཧཏྟཾ ཨསཙྪིཀརོནྟཱ ཨནེཀེ པུགྒལཱ ཝེདིཏབྦཱ, སཙྪིཀརོནྟོ པན ཨེཀོཔི པུབྦབྷཱགེ ཏཏིཡཔུགྒལཱདིབྷཱཝཾ ཨཱཔཛྫིཏྭཱ ཨནྟེ སཏྟམཔུགྒལོ ཧོཏཱིཏི.

༢༠༩. པཉྩནྣཾ ཨིདྷ ནིཊྛཱ, པཉྩནྣཾ ཨིདྷ ཝིཧཱཡ ནིཊྛཱཏི ཨེཏྠ ཡེ སོཏཱཔནྣཱདཡོ རཱུཔཱརཱུཔབྷཝེ ཨུཔཔཛྫིཏྭཱ པརིནིབྦཱཡིསྶནྟི, ཏེ ཨིདྷ ཝིཧཱཡ ནིཊྛཱཔཀྑཾ བྷཛམཱནཱཔི ཨཛ྄ཛྷཏྟསཾཡོཛནཱནཾ ཨསམུཙྪིནྣཏྟཱ པུཐུཛྫནསཱདྷཱརཎེ ཙ ཋཱནེ ཨུཔཔཏྟིཡཱ ན གཧིཏཱ. ཨསཱདྷཱརཎཊྛཱནུཔྤཏྟིཝསེན པན ཨནྟརཱཔརིནིབྦཱཡཱིཨཱདཡོ ཨེཝ ‘‘ཨིདྷ ཝིཧཱཡ ནིཊྛཱ’’ཏི ཝུཏྟཱཏི ཝེདིཏབྦཱཏི.

པུགྒལཔཉྙཏྟིཔཀརཎ-མཱུལཊཱིཀཱ སམཏྟཱ.

ཀཐཱནཾ ¶ ¶ ཝཏྠུབྷཱཝཏོཏི ཀཐཱསམུདཱཡསྶ པཀརཎསྶ ཨཏྟནོ ཨེཀདེསཱནཾ ཨོཀཱསབྷཱཝཾ ཝདཏི. སམུདཱཡེ ཧི ཨེཀདེསཱ ཨནྟོགདྷཱཏི. ཡེན པཀཱརེན སངྑེཔེན ཨདེསཡི, ཏཾ དསྶེནྟོ ‘‘མཱཏིཀཱཋཔནེནེཝ ཋཔིཏསྶཱ’’ཏི ཨཱཧ.

ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡཱིཏི པརིནིབྦཱནམེཝ པརིནིབྦཱནསྶ པརིནིབྦཱནནྟརཏོ ཝིསེསནཏྠཾ ཀརཎབྷཱཝེན ཝུཏྟཾ. ཡཱཡ ཝཱ ནིབྦཱནདྷཱཏུཡཱ ཨདྷིགཏཱཡ པཙྪིམཙིཏྟཾ ཨཔྤཊིསནྡྷིཀཾ ཛཱཏཾ, སཱ ཏསྶ ཨཔྤཊིསནྡྷིཝཱུཔསམསྶ ཀརཎབྷཱཝེན ཝུཏྟཱཏི. དུབྦལཔཀྑནྟི ན ཀཱལཱ༹སོཀཾ ཝིཡ བལཝནྟཾ, ཨཐ ཁོ ཨེཀམཎྜལིཀནྟི ཝདནྟི. དྷམྨཝཱདཱིཨདྷམྨཝཱདཱིཝིསེསཛནནསམཏྠཱཡ པན པཉྙཱཡ ཨབྷཱཝཏོ དུབྦལཏཱ ཝུཏྟཱ. ཏེསཾཡེཝཱཏི བཱཧུལིཡཱནམེཝ ¶ , བཧུསྶུཏིཀཱཏིཔི ནཱམཾ. བྷིནྣཀཱཏི མཱུལསངྒཱིཏིཏོ མཱུལནིཀཱཡཏོ ཝཱ བྷིནྣཱ, ལདྡྷིཡཱ སུཏྟནྟེཧི ལིངྒཱཀཔྤེཧི ཙ ཝིསདིསབྷཱཝཾ གཏཱཏི ཨཏྠོ.

མཱུལསངྒཧནྟི པཉྩསཏིཀསངྒཱིཏིཾ. ཨཉྙཏྲ སངྒཧིཏཱཏིཨཱདཱིསུ དཱིགྷཱདཱིསུ ཨཉྙཏྲ སངྒཧིཏཏོ སུཏྟནྟརཱསིཏོ ཏཾ ཏཾ སུཏྟཾ ནིཀྐཌྜྷིཏྭཱ ཨཉྙཏྲ ཨཀརིཾསཱུཏི ཝུཏྟཾ ཧོཏི. སངྒཧིཏཏོ ཝཱ ཨཉྙཏྲ ཨསངྒཧིཏཾ སུཏྟཾ ཨཉྙཏྲ ཀཏྠཙི ཨཀརིཾསུ, ཨཉྙཾ ཝཱ ཨཀརིཾསཱུཏི ཨཏྠོ. ཨཏྠཾ དྷམྨཉྩཱཏི པཱལི༹ཡཱ ཨཏྠཾ པཱལི༹ཉྩ. ཝིནཡེ ནིཀཱཡེསུ ཙ པཉྩསཱུཏི ཝིནཡེ ཙ ཨཝསེསཔཉྩནིཀཱཡེསུ ཙ.

‘‘དྭེཔཱནནྡ ¶ , ཝེདནཱ ཝུཏྟཱ མཡཱ པརིཡཱཡེནཱ’’ཏིཨཱདི (མ. ནི. ༢.༨༩) པརིཡཱཡདེསིཏཾ. ཨུཔེཀྑཱཝེདནཱ ཧི སནྟསྨིཾ པཎཱིཏེ སུཁེ ཝུཏྟཱ བྷགཝཏཱཏི ཨཡཉྷེཏྠ པརིཡཱཡོ. ‘‘ཏིསྶོ ཨིམཱ, བྷིཀྑཝེ, ཝེདནཱ སུཁཱ དུཀྑཱ ཨུཔེཀྑཱ ཝེདནཱ’’ཏིཨཱདི (སཾ. ནི. ༤.༢༤༩-༢༥༡) ནིཔྤརིཡཱཡདེསིཏཾ. ཝེདནཱསབྷཱཝོ ཧི ཏིཝིདྷོཏི ཨཡམེཏྠ ནིཔྤརིཡཱཡཏཱ. ‘‘སུཁཱཔི ཝེདནཱ ཨནིཙྩཱ སངྑཏཱ’’ཏིཨཱདི (དཱི. ནི. ༢.༡༢༣) ནཱིཏཏྠཾ. ‘‘ཡཾ ཀིཉྩི ཝེདཡིཏཾ, སབྦཾ ཏཾ དུཀྑ’’ནྟིཨཱདི (སཾ. ནི. ༢.༣༢) ནེཡྻཏྠཾ. ‘‘ཏཱིཧི, བྷིཀྑཝེ, ཋཱནེཧི ཛམྦུདཱིཔཀཱ མནུསྶཱ ཨུཏྟརཀུརུཀེ ཙ མནུསྶེ ཨདྷིགྒཎྷནྟི དེཝེ ཙ ཏཱཝཏིཾསེ’’ཏིཨཱདིཀཾ (ཨ. ནི. ༩.༢༡) ཨཉྙཾ སནྡྷཱཡ བྷཎིཏཾ གཧེཏྭཱ ཨཉྙཾ ཨཏྠཾ ཋཔཡིཾསུ. ‘‘ནཏྠི དེཝེསུ བྲཧྨཙརིཡཝཱསོ’’ཏིཨཱདིཀཾ (ཀཐཱ. ༢༧༠) སུཏྟཉྩ ཨཉྙཾ སནྡྷཱཡ བྷཎིཏཾ ཨཏྠཉྩ ཨཉྙཾ ཋཔཡིཾསཱུཏི ཨེཝམེཏྠ ཨཏྠོ དཊྛབྦོ. ‘‘ཨཏྠེཀཙྩོ པུགྒལོ ཨཏྟཧིཏཱཡ པཊིཔནྣོ’’ཏིཨཱདི (པུ. པ. མཱཏིཀཱ ༤.༢༤) བྱཉྫནཙྪཱཡཱཡ སཎྷསུཁུམཾ སུཉྙཏཱདིཨཏྠཾ བཧུཾ ཝིནཱསཡུཾ.

ཝིནཡགམྦྷཱིརནྟི ཝིནཡེ གམྦྷཱིརཉྩ ཨེཀདེསཾ ཚཌྜེཏྭཱཏི ཨཏྠོ. ཀིལེསཝིནཡེན ཝཱ གམྦྷཱིརཾ ཨེཀདེསཾ སུཏྟཾ ཚཌྜེཏྭཱཏི ཨཏྠོ. པཏིརཱུཔནྟི ཨཏྟནོ ཨདྷིཔྤཱཡཱནུརཱུཔཾ སུཏྟཾ, སུཏྟཔཏིརཱུཔཀཾ ཝཱ ཨསུཏྟཾ. ཨེཀཙྩེ ཨཊྛཀཐཱཀཎྜམེཝ ཝིསྶཛྫིཾསུ, ཨེཀཙྩེ སཀལཾ ཨབྷིདྷམྨཔིཊཀནྟི ཨཱཧ ‘‘ཨཏྠུདྡྷཱརཾ ཨབྷིདྷམྨཾ ཚཔྤཀརཎ’’ནྟི. ཀཐཱཝཏྠུསྶ སཝིཝཱདཏྟེཔི ཨཝིཝཱདཱནི ཚཔྤཀརཎཱནི པཋིཏབྦཱནི སིཡུཾ, ཏཱནི ནཔྤཝཏྟནྟཱིཏི ཧི དསྶནཏྠཾ ‘‘ཚཔྤཀརཎ’’ནྟི ཝུཏྟནྟི. ཏཏིཡསངྒཱིཏིཏོ ཝཱ པུབྦེ པཝཏྟམཱནཱནཾ ཝསེན ‘‘ཚཔྤཀརཎ’’ནྟི ཝུཏྟཾ ¶ . ཨཉྙཱནཱིཏི ཨཉྙཱནི ཨབྷིདྷམྨཔཀརཎཱདཱིནི. ནཱམནྟི ཡཾ བུདྡྷཱདིཔཊིསཾཡུཏྟཾ ན ཧོཏི མཉྫུསིརཱིཏིཨཱདིཀཾ, ཏཾ ནིཀཱཡནཱམཾ. ལིངྒནྟི ནིཝཱསནཔཱརུཔནཱདིཝིསེསཀཏཾ སཎྛཱནཝིསེསཾ. སིཀྐཱདིཀཾ པརིཀྑཱརཾ. ཨཱཀཔྤོ ཋཱནཱདཱིསུ ཨངྒཊྛཔནཝིསེསོ དཊྛབྦོ. ཀརཎནྟི ཙཱིཝརསིབྦནཱདིཀིཙྩཝིསེསོ.

སངྐནྟིཀསྶཔིཀེན ནིཀཱཡེན ཝཱདེན ཝཱ བྷིནྣཱ སངྐནྟིཀཱཏི ཨཏྠོ. སངྐནྟིཀཱནཾ བྷེདཱ སུཏྟཝཱདཱི ཨནུཔུབྦེན བྷིཛྫཐ བྷིཛྫིཾསཱུཏི ཨཏྠོ. བྷིནྣཝཱདེནཱཏི བྷིནྣཱ ཝཱདཱ ཨེཏསྨིནྟི བྷིནྣཝཱདོ, ཏེན ཨབྷིནྣེན ¶ ཐེརཝཱདེན སཧ ཨཊྛཱརས ཧོནྟཱིཏི ཝུཏྟཾ ཧོཏི. བྷིནྣཝཱདེནཱཏི ཝཱ བྷིནྣཱཡ ལདྡྷིཡཱ ཨཊྛཱརས ཧོནྟི, ཏེ སབྦེཔི སཧཱཏི ཨཏྠོ. ཐེརཝཱདཱནམུཏྟམོཏི ཨེཏྠ ཐེར-ཨིཏི ཨཝིབྷཏྟིཀོ ནིདྡེསོ. ཐེརཱནཾ ཨཡནྟི ཐེརོ. ཀོ སོ? ཝཱདོ. ཐེརོ ཝཱདཱནམུཏྟམོཏི ཨཡམེཏྠ ཨཏྠོ.

ཨུཔྤནྣེ ཝཱདེ སནྡྷཱཡ ‘‘པརཔྤཝཱདམཐན’’ནྟི ཨཱཧ. ཨཱཡཏིཾ ཨུཔྤཛྫནཀཝཱདཱནཾ པཊིསེདྷནལཀྑཎབྷཱཝཏོ ‘‘ཨཱཡཏིལཀྑཎ’’ནྟི ཝུཏྟཾ.

༡. མཱཡཱཡ ¶ ¶ ཨམཎིཨཱདཡོ མཎིཨཱདིཨཱཀཱརེན དིསྶམཱནཱ ‘‘མཱཡཱ’’ཏི ཝུཏྟཱ. ཨབྷཱུཏེན མཎིཨུདཀཱདིཨཱཀཱརེན གཡ྄ཧམཱནཱ མཱཡཱམརཱིཙིཨཱདཡོ ཨབྷཱུཏཉྙེཡྻཱཀཱརཏྟཱ ཨསཙྩིཀཊྛཱ. ཡོ ཏཐཱ ན ཧོཏི, སོ སཙྩིཀཊྛོཏི དསྶེནྟོ ཨཱཧ ‘‘མཱཡཱ…པེ… བྷཱུཏཏྠོ’’ཏི. ཨནུསྶཝཱདིཝསེན གཡ྄ཧམཱནོ ཏཐཱཔི ཧོཏི ཨཉྙཐཱཔཱིཏི ཏཱདིསོ ཉེཡྻོ ན པརམཏྠོ, ཨཏྟཔཙྩཀྑོ པན པརམཏྠོཏི དསྶེནྟོ ཨཱཧ ‘‘ཨནུསྶཝཱ…པེ… ཨུཏྟམཏྠོ’’ཏི.

ཚལཝཱདསྶཱཏི ཨཏྠཱིཏི ཝཙནསཱམཉྙེན ཨཏྠཱིཏི ཝུཏྟེཧི རཱུཔཱདཱིཧི སཱམཉྙཝཙནསྶཱཏི ཨདྷིཔྤཱཡོ. ‘‘སོ སཙྩི…པེ… ལདྡྷིཾ གཧེཏྭཱ ཨཱམནྟཱཏི པཊིཛཱནཱཏཱི’’ཏི ཝཙནཏོ པན ‘‘ཚལཝཱདསྶཱ’’ཏི ན སཀྐཱ ཝཏྟུཾ. ན ཧི ལདྡྷི ཚལནྟི. ཨོཀཱསཾ ཨདདམཱནོཏི པཏིཊྛཾ པཙྪིནྡནྟོ. ཡདི སཙྩིཀཊྛེན ཨུཔལབྦྷཏི, རཱུཔཱདཡོ ཝིཡ ཨུཔལབྦྷེཡྻ, ཏཐཱ ཨནུཔལབྦྷནཱིཡཏོ ན ཏཝ ཝཱདོ ཏིཊྛཏཱིཏི ནིཝཏྟེནྟོཏི ཨདྷིཔྤཱཡོ. ཏཾ སནྡྷཱཡཱཏི ‘‘ཡོ སཙྩིཀཊྛོ’’ཏི ཨེཏྠ ཝུཏྟོ ཡོ སཙྩིཀཊྛོ, སོ སཔྤཙྩཡཱདིབྷཱཝེན དཱིཔིཏོ ‘‘རཱུཔཉྩ ཨུཔལབྦྷཏཱི’’ཏིཨཱདཱིསུ ཨཱགཏོ དྷམྨཔྤབྷེདོཏི དསྶེཏི.

‘‘ཏེན ¶ སཙྩིཀཊྛཔརམཏྠེནཱ’’ཏི ཝཏྭཱ ‘‘ཏེནཱཀཱརེནཱ’’ཏི ཝདཏོ ཨཡམདྷིཔྤཱཡོ – སཙྩིཀཊྛཔརམཏྠཱཀཱརེན ཨུཔལབྦྷམཱནཾ སཙྩིཀཊྛཔརམཏྠེན ཨུཔལབྦྷམཱནཾ ནཱམ ཧོཏཱིཏི. ཨཉྙཐཱ ཏཏོཏི ཏསྶ ཏེནཱཀཱརེནཱཏི ཝཏྟབྦཾ སིཡཱ. ཀོ པནེཏིསྶཱ པུརིམཔུཙྪཱཡ ཙ ཝིསེསོཏི? པུརིམཔུཙྪཱཡ སཏྟཔཉྙཱསཝིདྷོ དྷམྨཔྤབྷེདོ ཡཐཱ བྷཱུཏེན སབྷཱཝཏྠེན ཨུཔལབྦྷཏི, ཨེཝཾ པུགྒལོ ཨུཔལབྦྷཏཱིཏི ཝུཏྟཾ. ཨིདྷ པན བྷཱུཏསབྷཱཝཏྠེན ཨུཔལབྦྷམཱནོ སོ དྷམྨཔྤབྷེདོ ཡེན རུཔྤནཱདིསཔྤཙྩཡཱདིཨཱཀཱརེན ཨུཔལབྦྷཏི, ཀིཾ ཏེནཱཀཱརེན པུགྒལོཔི ¶ ཨུཔལབྦྷཏཱིཏི ཨེས ཝིསེསོ. ཡཐཱ པན རཱུཔཾ ཝིཡ བྷཱུཏསབྷཱཝཏྠེན ཨུཔལབྦྷམཱནཱ ཝེདནཱ ན རུཔྤནཱཀཱརེན ཨུཔལབྦྷཏི, ཨེཝཾ དྷམྨཔྤབྷེདོ ཝིཡ བྷཱུཏསབྷཱཝཏྠེན ཨུཔལབྦྷམཱནོ པུགྒལོ ན རུཔྤནཱདིསཔྤཙྩཡཱདིཨཱཀཱརེན ཨུཔལབྦྷཏཱིཏི སཀྐཱ པརཝཱདིནཱ ཝཏྟུནྟི ཨཙོདནཱིཡཾ ཨེཏཾ སིཡཱ. ཨཝཛཱནནཉྩ ཏསྶ ཡུཏྟནྟི ནིགྒཧོ ཙ ན ཀཱཏབྦོ. དྷམྨཔྤབྷེདཏོ པན ཨཉྙསྶ སཙྩིཀཊྛསྶ ཨསིདྡྷཏྟཱ དྷམྨཔྤབྷེདཱཀཱརེནེཝ ཙོདེཏི. ཨཝཛཱནནེནེཝ ནིགྒཧཾ དསྶེཏི. ཨནུཛཱནནཱཝཛཱནནཔཀྑཱ སཱམཉྙཝིསེསེཧི པཊིཉྙཱཔཊིཀྑེཔཔཀྑཱ ཨནུལོམཔཊིལོམཔཀྑཱ པཋམདུཏིཡནཡཱཏི ཨཡམེཏེསཾ ཝིསེསོ ཝེདིཏབྦོ.

‘‘ཏེན ཝཏ རེ ཝཏྟབྦེ’’ཏི ཝདནྟོ ཝཏྟབྦསྶ ཨཝཙནེ དོསཾ པཱཔེཏཱིཏི ཨིམིནཱ ཨདྷིཔྤཱཡེན ‘‘ནིགྒཧསྶ པཱཔིཏཏྟཱ’’ཏི ཝུཏྟནྟི དཊྛབྦཾ. ‘‘ཨེཝམེཏཾ ནིགྒཧསྶ ཙ ཨནུལོམཔཊིལོམཏོ ཙཏུནྣཾ པཱཔནཱརོཔནཉྩ ཝུཏྟཏྟཱ ཨུཔལབྦྷཏཱིཏིཨཱདིཀཾ ཨནུལོམཔཉྩཀཾ ནཱམཱ’’ཏི ཝུཏྟཾ, ཨནུལོམཔཊིལོམཏོ པན དྭཱིཧི ཋཔནཱཧི སཧ སཏྟཀེན བྷཝིཏབྦཾ, ཏཾཝཛྫནེ ཝཱ ཀཱརཎཾ ཝཏྟབྦཾ. ཡཾ པན ཝཀྑཏི ‘‘ཋཔནཱ ནཱམ པརཝཱདཱིཔཀྑསྶ ཋཔནཏོ ‘ཨཡཾ ཏཝ དོསོ’ཏི དསྶེཏུཾ ཋཔནམཏྟམེཝ ཧོཏི, ན ནིགྒཧསྶ ཝཱ པཊིཀམྨསྶ ཝཱ པཱཀཊབྷཱཝཀརཎ’’ནྟི (ཀཐཱ. ཨཊྛ. ༢). ཏེནཱདྷིཔྤཱཡེན ཨིདྷཱཔི ཋཔནཱདྭཡཾ ཝཛྫེཏི. ཡཐཱ པན ཏཏྠ པཊིཀམྨཔཉྩཀབྷཱཝཾ ཨཝཏྭཱ པཊིཀམྨཙཏུཀྐབྷཱཝཾ ཝཀྑཏི, ཨེཝམིདྷཱཔི ནིགྒཧཙཏུཀྐབྷཱཝོ ཝཏྟབྦོ སིཡཱ. སུདྡྷིཀནིགྒཧསྶ པན ནིགྒཧཔྤདྷཱནཏྟཱ ཨུདྡེསབྷཱཝེན ཝུཏྟོ ནིགྒཧོཝ ཝིསུཾ ཝུཏྟོཏི དཊྛབྦོ. ཡེ པན ‘‘ཨཡཐཱབྷཱུཏནིགྒཧཏྟཱ ཏཏྠ པཊིཀམྨཾ ཝིསུཾ ན ཝུཏྟ’’ནྟི ཝདནྟི, ཏེསཾ དུཏིཡེ ཝཱདམུཁེ ནིགྒཧཙཏུཀྐབྷཱཝོ པཊིཀམྨཔཉྩཀབྷཱཝོ ཙ ཨཱཔཛྫཏི.

༢. ཨཏྟནཱ ཨདྷིཔྤེཏཾ སཙྩིཀཊྛམེཝཱཏི སམྨུཏིསཙྩཾ སནྡྷཱཡཱཏི ཨདྷིཔྤཱཡོ. ཝཀྑཏི ཧི ¶ ‘‘སུདྡྷསམྨུཏིསཙྩཾ ཝཱ པརམཏྠམིསྶཀཾ ཝཱ སམྨུཏིསཙྩཾ སནྡྷཱཡ ‘ཡོ སཙྩིཀཊྛོ’ཏི པུན ཨནུཡོགོ པརཝཱདིསྶཱ’’ཏི (ཀཐཱ. ཨཊྛ. ༦). ཏཏྠ ཡདི པརཝཱདིནཱ ཨཏྟནཱ ཨདྷིཔྤེཏསཙྩིཀཊྛོ སམྨུཏིསཙྩཾ, སམྨུཏིསཙྩཱཀཱརེན པུགྒལོ ཨུཔལབྦྷཏཱིཏི ཝདནྟེན སམཱནལདྡྷིཀོ ནཔྤཊིསེདྷིཏབྦོ, ཀཐཱ ཨེཝཱཡཾ ནཱརབྷིཏབྦཱ. ཨཐ སཀཝཱདིནཱ ཨཏྟནཱ ¶ ཙ ཨདྷིཔྤེཏསཙྩིཀཊྛཾཡེཝ སནྡྷཱཡ པརཝཱདཱི ‘‘ཡོ སཙྩིཀཊྛོ’’ཏིཨཱདིམཱཧཱཏི ཨཡམཏྠོ. སཀཝཱདིནཱ སམྨུཏིསཙྩཾཡེཝ སཙྩིཀཊྛོཏི ཨདྷིཔྤེཏནྟི ཨཱཔཛྫཏི. ཡདི ཨུབྷཡཾ ཨདྷིཔྤེཏཾ, པུན ‘‘སམྨུཏིསཙྩཔརམཏྠསཙྩཱནི ཝཱ ཨེཀཏོ ཀཏྭཱཔི ཨེཝམཱཧཱ’’ཏི ན ཝཏྟབྦཾ སིཡཱཏི. ཡདི ཙ དྭེཔི སཙྩཱནི སཙྩིཀཊྛཔརམཏྠཱ, སཙྩིཀཊྛེཀདེསེན ཨུཔལདྡྷིཾ ཨིཙྪནྟེན ‘‘པུགྒལོ ཨུཔལབྦྷཏི སཙྩིཀཊྛཔརམཏྠེནཱ’’ཏིཨཱདི ཨནུཡོགོ ན ཀཱཏབྦོ, ན ཙ སཙྩིཀཊྛེཀདེསེན ཨནུཡོགོ ཡུཏྟོ. ན ཧི ཝེདཡིཏཱཀཱརེན ཨུཔལབྦྷམཱནཱ ཝེདནཱ རུཔྤནཱཀཱརེན ཨུཔལབྦྷཏཱིཏི ཨནུཡུཉྫིཏབྦཱ, ན ཙ པརཝཱདཱི རུཔྤནཱདིསབྷཱཝཾ པུགྒལཾ ཨིཙྪཏི, ཨཐ ཁོ སཙྩིཀཊྛཔརམཏྠམེཝཱཏི. པརམཏྠསཙྩཏོ ཨཉྙསྨིཾ སཙྩིཀཊྛེ ཝིཛྫམཱནེ ནཱསྶ པརམཏྠསཙྩཏཱ ཨནུཡུཉྫིཏབྦཱ. ཨསཙྩིཀཊྛེ སཙྩིཀཊྛཝོཧཱརཾ ཨཱརོཔེཏྭཱ ཏཾ སནྡྷཱཡ པུཙྪཏཱིཏི ཝདནྟཱནཾ ཝོཧརིཏསཙྩིཀཊྛསྶ ཨཏྟནཱ ཨདྷིཔྤེཏསཙྩིཀཊྛཏཱ ན ཡུཏྟཱ. ཝོཧརིཏཔརམཏྠསཙྩིཀཊྛཱནཉྩ དྭིནྣཾ སཙྩིཀཊྛབྷཱཝེ ཝུཏྟནཡོཝ དོསོ. སམྨུཏིསཙྩཱཀཱརེན ཨུཔལབྦྷམཱནཉྩ བྷཱུཏསབྷཱཝཏྠེན ཨུཔལབྦྷེཡྻ ཝཱ ན ཝཱ. ཡདི བྷཱུཏསབྷཱཝཏྠེན ཨུཔལབྦྷཏི, པུགྒལོཔི ཨུཔལབྦྷཏི སཙྩིཀཊྛཔརམཏྠེནཱཏི ཨནུཛཱནནྟོ ནཱནུཡུཉྫིཏབྦོ. ཨཐ ན བྷཱུཏསབྷཱཝཏྠེན, ཏཾཝིནིམུཏྟོ སམྨུཏིསཙྩསྶ སཙྩིཀཊྛཔརམཏྠཱཀཱརོ ན ཝཏྟབྦོ ཨསིདྡྷཏྟཱ. ཝཀྑཏི ཙ ‘‘ཡཐཱ རཱུཔཱདཡོ པཙྩཏྟལཀྑཎསཱམཉྙལཀྑཎཝསེན ཨཏྠི, ན ཨེཝཾ པུགྒལོ’’ཏི. ཏསྨཱ མགྒིཏབྦོ ཨེཏྠ ཨདྷིཔྤཱཡོ.

དྭིནྣཾ སཙྩཱནནྟི ཨེཏྠ སཙྩདྭཡཱཀཱརེན ཨནུཔལབྦྷནཱིཡཏོ ཨནུཉྙེཡྻམེཏཾ སིཡཱ, ན ཝཱ ཀིཉྩི ཝཏྟབྦཾ. ཡཐཱ ཧི ཨེཀདེསེན པརམཏྠཱཀཱརེན ཨནུཔལབྦྷནཱིཡཏཱ ཨནུཛཱནནསྶ ན ཀཱརཎཾ, ཨེཝཾ ཨེཀདེསེན སམྨུཏིཡཱཀཱརེན ཨུཔལབྦྷནཱིཡཏཱ པཊིཀྑེཔསྶ ཙཱཏི མགྒིཏབྦོ ཨེཏྠཱཔི ཨདྷིཔྤཱཡོ. ནུཔལབྦྷཏཱིཏི ཝཙནསཱམཉྙམཏྟནྟི ནུཔལབྦྷཏཱིཏི ཨིདམེཝ ཝཙནཾ ཨནུཉྙཱཏཾ པཊིཀྑིཏྟཉྩཱཏི ཨེཏཾ ཚལཝཱདཾ ནིསྶཱཡཱཏི ཨདྷིཔྤཱཡོ. ཡཐཱ ཨུཔལབྦྷཏཱིཏི ཨེཏསྶེཝ ཨནུཛཱནནཔཊིཀྑེཔེཧི ཨཧཾ ནིགྒཧེཏབྦོ, ཨེཝཾ ནུཔལབྦྷཏཱིཏི ཨེཏསྶེཝ ཨནུཛཱནནཔཊིཀྑེཔེཧི ཏྭནྟི ཨེཝཾ སམྦྷཝནྟསྶ སཱམཉྙེན ཨསམྦྷཝནྟསྶ ཀཔྤནཾ པནེཏྠ ཚལཝཱདོ ¶ བྷཝིཏུཾ ཨརཧཏི. ཏེན ནུཔལབྦྷཏཱིཏི ཝཙནསཱམཉྙམཏྟཾ ཚལཝཱདསྶ ཀཱརཎཏྟཱ ‘‘ཚལཝཱདོ’’ཏི ཝུཏྟནྟི དཊྛབྦཾ. ཝཙནསཱམཉྙམཏྟཉྩ ཚལཝཱདཉྩ ¶ ནིསྶཱཡཱཏི ཝཱ ཨཏྠོ. ཋཔནཱ ནིགྒཧཔྤཊིཀམྨཱནཾ པཱཀཊབྷཱཝཀརཎཾ ན ཧོཏཱིཏི ཨིདཾ ཝིཙཱརེཏབྦཾ. ན ཧི པཀྑཊྛཔནེན ཝིནཱ པུརིམཾ ཨནུཛཱནིཏྭཱ པཙྪིམསྶ ཨཝཛཱནནཾ, པཙྪིམཾ ཝཱ ཨཝཛཱནནྟསྶ པུརིམཱནུཛཱནནཾ མིཙྪཱཏི སཀྐཱ ཨཱརོཔེཏུནྟི.

༣. ཏཝཱཏི, པཊིཛཱནནྟནྟི ཙ པཙྩཏྟེ སཱམིཨུཔཡོགཝཙནཱནཱིཏི ཨདྷིཔྤཱཡེན ‘‘ཏྭཾཡེཝ པཊིཛཱནནྟོ’’ཏི ཨཱཧ.

༤-༥. ཙཏཱུཧི པཱཔནཱརོཔནཱཧི ནིགྒཧསྶ ཨུཔནཱིཏཏྟཱཏི ‘‘དུནྣིགྒཧིཏཱ ཙ ཧོམ, ཧཉྩཱི’’ཏིཨཱདིནཱ ཏཡཱ མམ ཀཏོ ནིགྒཧོ, མཡཱ ཏཝ ཀཏོ ནིགྒཧོ ཝིཡ མིཙྪཱཏི ཨེཝཾ ཏེན ཨནུལོམཔཉྩཀེ ཙཏཱུཧི པཱཔནཱརོཔནཱཧི ཀཏསྶ ནིགྒཧསྶ ཏེན ནིཡཱམེན དུཀྐཊབྷཱཝསྶ ཨཏྟནཱ ཀཏནིགྒཧེན སཧ ཨུཔནཱིཏཏྟཱ ཨནིགྒཧབྷཱཝསྶ ཝཱ ཨུཔགམིཏཏྟཱཏི ཨཏྠོ དཊྛབྦོ. ཨེཝམེཝ ཏེན ཧི ཡཾ ནིགྒཎྷཱསི ཧཉྩི…པེ… ཨིདཾ ཏེ མིཙྪཱཏི ཨེཏསྶ ཨནིགྒཧབྷཱཝནིགམནསྶེཝ ནིགྒམནཙཏུཀྐཏཱ ཝེདིཏབྦཱ.

༧-༡༠. ‘‘ཨཏྟནོ ལདྡྷིཾ ནིསྶཱཡ པཊིཉྙཱ པརཝཱདིསྶཱ’’ཏི ཝཏྭཱ པུན ‘‘པརམཏྠཝསེན པུགྒལསྶ ཨབྷཱཝཏོ པཊིཀྑེཔོ པརཝཱདིསྶཱ’’ཏི ཝུཏྟཾ. ཏཏྲཱཡཾ པཊིཀྑེཔོ ཨཏྟནོ ལདྡྷིཡཱ ཡདི ཀཏོ, པརམཏྠཏོ ཨཉྙེན སཙྩིཀཊྛཔརམཏྠེན པུགྒལོ ཨུཔལབྦྷཏཱིཏི ཨཡམསྶ ལདྡྷཱིཏི ཨཱཔཛྫཏི. ཏཐཱ ཙ སཏི ནཱཡཾ སམྨུཏིསཙྩཝསེན ཨུཔལདྡྷིཾ ཨིཙྪནྟེན ནིགྒཧེཏབྦོ. ཨཐ ཨཏྟནོ ལདྡྷིཾ ནིགྒཱུཧིཏྭཱ པརསྶ ལདྡྷིཝསེན པཊིཀྑིཔཏི, པུརིམཔཊིཉྙཱཡ ཨཝིརོདྷིཏཏྟཱ ན ནིགྒཧེཏབྦོ. ན ཧི ཨཏྟནོ ཙ པརསྶ ཙ ལདྡྷིཾ ཝདནྟསྶ དོསོ ཨཱཔཛྫཏཱིཏི. ཨཏྟནོ ¶ པན ལདྡྷིཡཱ པཊིཛཱནིཏྭཱ པརལདྡྷིཡཱ པཊིཀྑིཔནྟེན ཨཏྟནོ ལདྡྷིཾ ཚཌྜེཏྭཱ པརལདྡྷི གཧིཏཱ ཧོཏཱིཏི ནིགྒཧེཏབྦོཏི ཨཡམེཏྠ ཨདྷིཔྤཱཡོ སིཡཱ.

༡༡. སབྦཏྠཱཏི ¶ སབྦསྨིཾ སརཱིརེཏི ཨཡམཏྠོཏི དསྶེནྟོ ཨཱཧ ‘‘སརཱིརཾ སནྡྷཱཡཱ’’ཏི. ཏཏྠཱཏི ཏསྨིཾ སཾཁིཏྟཔཱཋེ. ཡསྨཱ སརཱིརཾ སནྡྷཱཡ ‘‘སབྦཏྠ ན ཨུཔལབྦྷཏཱི’’ཏི ཝུཏྟེ སརཱིརཏོ བཧི ཨུཔལབྦྷཏཱིཏི ཨཱཔཛྫཏི, ཏསྨཱ པཙྩནཱིཀེ པཊིཀྑེཔོ སཀཝཱདིསྶཱཏི ཨེཏེན ན ཀེནཙི སབྷཱཝེན པུགྒལོ ཨུཔལབྦྷཏཱིཏི ཨཡམཏྠོ ཝུཏྟོ ཧོཏི. ན ཧི ཀེནཙི སབྷཱཝེན ཨུཔལབྦྷམཱནསྶ སརཱིརཏདཉྙཱཝིམུཏྟོ ཨུཔལདྡྷིཨོཀཱསོ ཨཏྠཱིཏི.

༡༢. པུརིམཔཙྪིམཛཱཏིཀཱལཉྩཱཏི མཛ྄ཛྷིམཛཱཏིཀཱལེ ཨུཔལབྦྷམཱནསྶ ཏསྶེཝ པུརིམཔཙྪིམཛཱཏིཀཱལེསུ ཨུཔལདྡྷིཾ སནྡྷཱཡཱཏི ཨདྷིཔྤཱཡོ. སེསཾ པཋམནཡེ ཝུཏྟསདིསམེཝཱཏི ཨིམེསུ ཏཱིསུ པཋམེ ‘‘སབྦཏྠཱ’’ཏི ཨེཏསྨིཾ ནཡེ ཝུཏྟསདིསམེཝ, ཀིཾ ཏཾ? པཱཋསྶ སཾཁིཏྟཏཱཏི ཨཏྠོ. ཨིདྷཱཔི ཧི ཡསྨཱ ‘‘སབྦདཱ ན ཨུཔལབྦྷཏཱི’’ཏི ཝུཏྟེ ཨེཀདཱ ཨུཔལབྦྷཏཱིཏི ཨཱཔཛྫཏི, ཏསྨཱ པཙྩནཱིཀེ པཊིཀྑེཔོ སཀཝཱདིསྶཱཏི ཡོཛེཏབྦནྟི.

༡༣. ཏཏིཡནཡེ ¶ ཙ ཡསྨཱ ‘‘སབྦེསུ ན ཨུཔལབྦྷཏཱི’’ཏི ཝུཏྟེ ཨེཀསྨིཾ ཨུཔལབྦྷཏཱིཏི ཨཱཔཛྫཏི, ཏསྨཱ པཙྩནཱིཀེ པཊིཀྑེཔོ སཀཝཱདིསྶཱཏི ཡོཛེཏབྦཾ. ཏེནཱཧ ‘‘ཏཱདིསམེཝཱ’’ཏི.

༡༤. ཏཏྠ ཨནུལོམཔཉྩཀསྶཱཏིཨཱདིམྷི ཨནུལོམཔཉྩཀནྟི ནིགྒཧཔཉྩཀཾ, པཙྩནཱིཀནྟི ཙ པཊིཀམྨཾ ཝུཏྟནྟི དཊྛབྦཾ. ཏཏྠ ཨནུལོམཔཉྩཀསྶ ‘‘སབྦཏྠ ¶ པུགྒལོ ནུཔལབྦྷཏཱི’’ཏིཨཱདིཀསྶ ཨཏྠོ ‘‘སབྦཏྠ པུགྒལོ ནུཔལབྦྷཏཱི’’ཏིཨཱདིཔཱལི༹ཾ སཾཁིཔིཏྭཱ ཨཱགཏེ སརཱུཔེན ཨཝུཏྟེ ‘‘ཡསྨཱ སརཱིརཾ སནྡྷཱཡཱ’’ཏིཨཱདིནཱ (ཀཐཱ. ཨཊྛ. ༡༡) ཝུཏྟནཡེན ཝེདིཏབྦོ, པཙྩནཱིཀསྶ ཙ ‘‘སབྦཏྠ པུགྒལོ ཨུཔལབྦྷཏཱི’’ཏིཨཱདིཀསྶ པཊིཀམྨཀརཎཝསེན ཝུཏྟསྶ ཨཏྠོ པཊིཀམྨཱདིཔཱལི༹ཾ སཾཁིཔིཏྭཱ ཨཱདིམཏྟདསྶནེན ཨཱགཏེ ‘‘པུགྒལོ ཨུཔལབྦྷཏཱི’’ཏིཨཱདིམྷི ཨནུལོམེ ‘‘སབྦཏྠཱཏི སརཱིརཾ སནྡྷཱཡ ཨནུཡོགོ སཀཝཱདིསྶཱ’’ཏིཨཱདིནཱ (ཀཐཱ. ཨཊྛ. ༡༡) ཝུཏྟནཡེན ཝེདིཏབྦོཏི ཨེཝམཏྠོ དཊྛབྦོ. ཨཐ ཝཱ ཏཏྠཱཏི ཡཾ ཨཱརདྡྷཾ, ཏསྨིནྟི ཨེཝཾ ཨཏྠཾ ཨགྒཧེཏྭཱ ཏཏྠ ཏེསུ ཏཱིསུ མུཁེསཱུཏི ཨཏྠོ གཧེཏབྦོ. ཨནུལོམཔཉྩཀམཱུལཀཱ ཙེཏྠ སབྦཱནུལོམཔཙྩནཱིཀཔཉྩཀཔཱལི༹ ཨནུལོམཔཉྩཀསྶ པཱལཱི༹ཏི ཝུཏྟཱ, ཏཐཱ པཙྩནཱིཀཱནུལོམཔཉྩཀཔཱལི༹ ཙ པཙྩནཱིཀསྶ པཱལཱི༹ཏི. ཏཾ སཾཁིཔིཏྭཱ པཊིཀམྨཝསེན ཨཱགཏེ སརཱུཔེན ཨཝུཏྟེ ‘‘པུགྒལོ ནུཔལབྦྷཏཱི’’ཏིཨཱདིཀེ པཙྩནཱིཀེ ‘‘ཨུཔལབྦྷཏཱི’’ཏིཨཱདིཀེ ཨནུལོམེ ཙ ཨཏྠོ ཧེཊྛཱ སུདྡྷིཀསཙྩིཀཊྛེ ཝུཏྟནཡེནེཝ ཝེདིཏབྦོཏི ཝུཏྟཾ ཧོཏི.

༡༧-༢༧. རཱུཔཱདཱིཧི ¶ སདྡྷིཾ སཙྩིཀཊྛསཾསནྡནནྟི སཙྩིཀཊྛསྶ པུགྒལསྶ རཱུཔཱདཱིཧི སདྡྷིཾ སཾསནྡནཾ, སཙྩིཀཊྛེ ཝཱ རཱུཔཱདཱིཧི སདྡྷིཾ པུགྒལསྶ སཾསནྡནནྟི ཨདྷིཔྤཱཡོ. པུགྒལོ རཱུཔཉྩཱཏི ཙ-ཀཱརསྶ སམུཙྩཡཏྠཏྟཱ ཡཐཱ རཱུཔནྟི ཨེཝཾ ནིདསྶནཝསེན ཝུཏྟོ ཨཏྠོ ཝིཙཱརེཏབྦོ. རཱུཔཱདཱིཧི ཨཉྙོ ཨནཉྙོ ཙ པུགྒལོ ན ཝཏྟབྦོཏི ལདྡྷི སམཡོ. ‘‘ཨཉྙཾ ཛཱིཝཾ ཨཉྙཾ སརཱིརནྟི ཨབྱཱཀཏམེཏཾ བྷགཝཏཱ’’ཏིཨཱདིཀཾ (སཾ. ནི. ༤.༤༡༦) སུཏྟཾ. ཨནུཉྙཱཡམཱནེ ཏདུབྷཡཝིརོདྷོ ཨཱཔཛྫཏཱིཏི ཨིམམཏྠཾ སནྡྷཱཡཱཧ ‘‘སམཡསུཏྟཝིརོདྷཾ དིསྭཱ’’ཏི.

དྷམྨཏོཏི པཱལི༹ཏོ. ‘‘པཊིཀམྨཙཏུཀྐཱདཱིནི སཾཁིཏྟཱནི. པརཝཱདཱི…པེ… དསྶིཏཱནཱི’’ཏི ཝདནྟེཧི པུགྒལོ ནུཔལབྦྷཏི…པེ… ཨཱཛཱནཱཧི པཊིཀམྨནྟི ¶ ཨེཏྠ ཨཱཛཱནཱཧི ནིགྒཧནྟི པཱཋོ དིཊྛོ བྷཝིསྶཏི. ཨཉྙཏྟཾ པཊིཛཱནཱཔནཏྠནྟི ཡཐཱ མཡཱ ཨཉྙཏྟཾ ཝཏྟབྦཾ, ཏཐཱ ཙ ཏཡཱཔི ཏཾ ཝཏྟབྦནྟི ཨཉྙཏྟཔཊིཉྙཱཡ ཙོདནཏྠནྟི ཨཏྠོ. སམྨུཏིཔརམཏྠཱནཾ ཨེཀཏྟནཱནཏྟཔཉྷསྶ ཋཔནཱིཡཏྟཱཏི ཨབྱཱཀཏཏྟཱཏི ཨཏྠོ. ཡདི ཋཔནཱིཡཏྟཱ པཊིཀྑིཔིཏབྦཾ, པརེནཔི ཋཔནཱིཡཏྟཱ ལདྡྷིམེཝ ནིསྶཱཡ པཊིཀྑེཔོ ཀཏོཏི སོཔི ན ནིགྒཧེཏབྦོ སིཡཱ. པརོ པན པུགྒལོཏི ཀཉྩི སབྷཱཝཾ གཧེཏྭཱ ཏསྶ ཋཔནཱིཡཏྟཾ ཨིཙྪཏི, སཏི ཙ སབྷཱཝེ ཋཔནཱིཡཏཱ ན ཡུཏྟཱཏི ནིགྒཧེཏབྦོ. སམྨུཏི པན ཀོཙི སབྷཱཝོ ནཏྠི. ཏེནེཝསྶ ཨེཀཏྟནཱནཏྟཔཉྷསྶ ཋཔནཱིཡཏཾ ཝདནྟོ ན ནིགྒཧེཏབྦོཏི སཀཝཱདིནཱ པཊིཀྑེཔོ ཀཏོཏི ཨཡམེཏྠ ཨདྷིཔྤཱཡོ ཡུཏྟོ.

༢༨-༣༦. ཨུཔལདྡྷིསཱམཉྙེན ཨཉྙཏྟཔུཙྪཱ ཙཱཏི ཨིདཉྩ དྭིནྣཾ སམཱནཏཱ ནོ ཨཉྙཏྟསྶ ཀཱརཎཾ ཡུཏྟཾ, ཨཐ ཁོ ཝིསུཾ ཨཏྟནོ སབྷཱཝེན སཙྩིཀཊྛཔརམཏྠེན ཨུཔལབྦྷནཱིཡཏཱཏི ¶ ཝིཙཱརེཏབྦཾ. ‘‘ཨེཀཝཱིསཱདྷིཀཱནཱི’’ཏི པུརིམཔཱཋོ, ཝཱིསཱདྷིཀཱནཱིཏི པན པཋིཏབྦཾ.

༣༧-༤༥. ‘‘ཨཏྠི པུགྒལོ’’ཏི སུཏྟཾ ཨནུཛཱནཱཔེནྟེན ཨུཔལདྡྷི ཨནུཛཱནིཏཱ ཧོཏཱིཏི མཉྙམཱནོ ཨཱཧ ‘‘ཨུཔལདྡྷིསཱམཉྙཾ ཨཱརོཔེཏྭཱ’’ཏི. ཝཱིསཱདྷིཀཱནི ནཝ པཊིཀམྨཔཉྩཀསཏཱནི དསྶིཏཱནཱིཏི ཨེཏེན སུདྡྷིཀསཾསནྡནེཔི ‘‘ཨཱཛཱནཱཧི པཊིཀམྨ’’མིཙྩེཝ པཱཋོཏི ཝིཉྙཱཡཏི. ཡཉྩ ཝཱདམུཁེསུ སུདྡྷིཀསཙྩིཀཊྛེ ‘‘པཊིཀམྨཙཏུཀྐ’’ནྟི ཝུཏྟཾ, ཏམྤི ‘‘པཊིཀམྨཔཉྩཀ’’ནྟི.

༤༦-༥༢. ཨེཀདྷམྨཏོཔི ¶ ཨཉྙཏྟཾ ཨནིཙྪནྟོ རཱུཔཱདིཨེཀེཀདྷམྨཝསེན ནཱནུཡུཉྫིཏབྦོ. སམུདཱཡཏོ ཧི ཨཡཾ ཨཉྙཏྟཾ ཨནིཙྪནྟོ ཨེཀདེསཏོ ཨནཉྙཏྟཾ པཊིཀྑིཔནྟོ ན ནིགྒཧཱརཧོ སིཡཱཏི ཨེཏཾ ཝཙནོཀཱསཾ ནིཝཏྟེཏུཾ ‘‘ཨཡཉྩ ཨནུཡོགོ’’ཏིཨཱདིམཱཧ. སཀལནྟི སཏྟཔཉྙཱསཝིདྷོ དྷམྨཔྤབྷེདོ པུགྒལོཏི ཝཱ པརམཏྠསཙྩཾ པུགྒལོཏི ཝཱ ཨེཝཾ སཀལཾ སནྡྷཱཡཱཏི ཨཏྠོ. ཨེཝཾ སཀལཾ པརམཏྠཾ ཙིནྟེཏྭཱ ཏནྟིཝསེན ཨནུཡོགལཀྑཎསྶ ཋཔིཏཏྟཱ སཀལཔརམཏྠཏོ ཙ ཨཉྙསྶ སཙྩིཀཊྛསྶ ཨབྷཱཝཱ སཙྩིཀཊྛེན པུགྒལེན ཏཏོ ཨཉྙེན ན བྷཝིཏབྦནྟི ‘‘རཱུཔཾ པུགྒལོ’’ཏི ཨིམཾ པཉྷཾ པཊིཀྑིཔནྟསྶ ནིགྒཧཱརོཔནཾ ཡུཏྟནྟི ཨཏྠོ.

སབྷཱགཝིནིབྦྷོགཏོཏི རཱུཔཏོ ཨཉྙསབྷཱགཏྟཱཏི ཝུཏྟཾ ཧོཏི. སབྦདྷམྨཱཏི རཱུཔཝཛྫེ སབྦདྷམྨེ ཝདཏི. ‘‘རཱུཔསྨིཾ པུགྒལོ’’ཏི ཨེཏྠ ནིསྶཡཝིནཱསེ ཝིནཱསཱཔཏྟིབྷཡེན པཊིཀྑིཔཏཱིཏི ཨདྷིཔྤཱཡེནཱཧ ‘‘ཨུཙྪེདདིཊྛིབྷཡེན ཙེཝཱ’’ཏི. ཏཱིསུ པན སམཡཝིརོདྷེན པཊིཀྑེཔོ ཨདྷིཔྤེཏོ. ན ཧི སོ སཀྐཱཡདིཊྛིཾ ཨིཙྪཏི, ཨཔིཙ སསྶཏདིཊྛིབྷཡེན པཊིཀྑིཔཏཱིཏི ཡུཏྟཾ ཝཏྟུཾ. སཀྐཱཡདིཊྛཱིསུ ¶ ཧི པཉྩེཝ ཨུཙྪེདདིཊྛིཡོ, སེསཱསསྶཏདིཊྛིཡོཏི. ཨཉྙཏྲ རཱུཔཱཏི ཨེཏྠ ཙ རཱུཔཝཱ པུགྒལོཏི ཨཡམཏྠོ སངྒཧིཏོཏི ཝེདིཏབྦོ.

༥༤. པཙྩནཱིཀཱནུལོམེཏི ཨིདཾ ཡཾ ཝཀྑཏི ‘‘ཚལཝསེན པན ཝཏྟབྦཾ ‘ཨཱཛཱནཱཧི པཊིཀམྨ’ནྟིཨཱདཱི’’ཏི (ཀཐཱ. ཨཊྛ. ༥༤), ཏེན པན ན སམེཏི. པཙྩནཱིཀཱནུལོམེ ཧི པཙྩནཱིཀེ ‘‘ཨཱཛཱནཱཧི ནིགྒཧ’’ནྟི ཝཏྟབྦཾ, ན པན ‘‘པཊིཀམྨ’’ནྟི.

༥༥-༥༩. པུགྒལོ ¶ ཨུཔལབྦྷཏཱིཏི པདདྭཡསྶ ཨཏྠཏོ ཨེཀཏྟེཏི ཨེཏྠ ཏདེཝ ཨེཀཏྟཾ པརེན སམྤཊིཙྪིཏཾ ཨསམྤཊིཙྪིཏནྟི ཝིཙཱརེཏབྦམེཏཾ. པུགྒལསྶ ཧི ཨཝིབྷཛིཏབྦཏཾ, ཨུཔལབྦྷཏཱིཏི ཨེཏསྶ ཝིབྷཛིཏབྦཏཾ ཝདནྟོ ཝིབྷཛིཏབྦཱཝིབྷཛིཏབྦཏྠཱནཾ ཨུཔལབྦྷཏིཔུགྒལ-སདྡཱནཾ ཀཐཾ ཨཏྠཏོ ཨེཀཏྟཾ སམྤཊིཙྪེཡྻཱཏི? ཡཐཱ ཙ ཝིབྷཛིཏབྦཱཝིབྷཛིཏབྦཏྠཱནཾ ཨུཔལབྦྷཏི-རཱུཔ-སདྡཱནཾ ཏཾ ཝིབྷཱགཾ ཝདཏོ རཱུཔཾ ཀིཉྩི ཨུཔལབྦྷཏི, ཀིཉྩི ན ཨུཔལབྦྷཏཱིཏི ཨཡཾ པསངྒོ ནཱཔཛྫཏི, ཨེཝཾ ཨེཏསྶཔི ཡཐཱཝུཏྟཝིབྷཱགཾ ཝདཏོ ཡཐཱཨཱཔཱདིཏེན པསངྒེན ན བྷཝིཏབྦནྟི མགྒིཏབྦོ ཨེཏྠ ཨདྷིཔྤཱཡོ.

༦༠. ‘‘སུཉྙཏོ ¶ ལོཀཾ ཨཝེཀྑསྶཱུ’’ཏི (སུ. ནི. ༡༡༢༥) ཨེཏེན ཨཏྠཏོ པུགྒལོ ནཏྠཱིཏི ཝུཏྟཾ ཧོཏཱིཏི ཨཱཧ ‘‘ནཏྠཱིཏིཔི ཝུཏྟ’’ནྟི.

༦༡-༦༦. རཱུཔཀཱཡཱཝིརཧཾ སནྡྷཱཡ ‘‘རཱུཔཀཱཡསབྦྷཱཝཏོ’’ཏི ཨཱཧ. ‘‘རཱུཔིནོ ཝཱ ཨརཱུཔིནོ ཝཱ’’ཏི (ཨིཏིཝུ. ༩༠) སུཏྟེ ཨཱགཏཔཉྙཏྟིཾ སནྡྷཱཡ ‘‘ཏཐཱརཱུཔཱཡ ཙ པཉྙཏྟིཡཱ ཨཏྠིཏཱཡཱ’’ཏི. ཝཱིཏརཱགསབྦྷཱཝཏོཏི ཀཱམཱིབྷཱཝསྶ ཨནེཀནྟིཀཏྟཱ ཀཱམདྷཱཏུཡཱ ཨཱཡཏྟཏྟཱབྷཱཝཏོ ཙ ‘‘ཀཱམཱི’’ཏི ན ཝཏྟབྦོཏི པཊིཀྑིཔཏཱིཏི ཨདྷིཔྤཱཡོ.

༦༧. ཀཱཡཱནུཔསྶནཱཡཱཏི ཀཱརཎཝཙནམེཏཾ, ཀཱཡཱནུཔསྶནཱཡ ཀཱརཎབྷཱུཏཱཡ ཨེཝཾལདྡྷིཀཏྟཱཏི ཨཏྠོ. ཨཱཧཙྩ བྷཱསིཏནྟི ‘‘ཨཉྙཾ ཛཱིཝཾ ཨཉྙཾ སརཱིརནྟི ཨབྱཱཀཏམེཏཾ མཡཱ’’ཏི (མ. ནི. ༢.༡༢༨) ཨཱཧཙྩ བྷཱསིཏཾ.

༦༩-༧༢. ‘‘དསྶེནྟོ ¶ ‘ཏེན ཧི པུགྒལོ སནྡྷཱཝཏཱི’ཏིཨཱདིམཱཧཱ’’ཏི ཝུཏྟཾ, ‘‘དསྶེནྟོ ‘ན ཝཏྟབྦཾ པུགྒལོ སནྡྷཱཝཏཱི’ཏིཨཱདིམཱཧཱ’’ཏི པན བྷཝིཏབྦཾ, དསྶེཏྭཱཏི ཝཱ ཝཏྟབྦཾ.

༩༡. ཡེན རཱུཔསངྑཱཏེན སརཱིརེན སདྡྷིཾ གཙྪཏཱིཏི ཨེཏྠ ‘‘རཱུཔེན སདྡྷིཾ གཙྪཏཱི’’ཏི ཝདནྟེན ‘‘རཱུཔཾ པུགྒལོ’’ཏི ཨནནུཉྙཱཏཏྟཱ ཡེནཱཀཱརེན ཏཾ ཛཱིཝཾ ཏཾ སརཱིརནྟི ཨིདཾ ཨཱཔཛྫཏི ¶ , སོ ཝཏྟབྦོ. ཨསཉྙཱུཔཔཏྟིཾ སནྡྷཱཡཱཏི ནིརཡཱུཔགསྶ པུགྒལསྶ ཨསཉྙཱུཔགསྶ ཨརཱུཔཱུཔགསྶ ཙ ཨནྟརཱབྷཝཾ ན ཨིཙྪཏཱིཏི ཙུཏིཏོ ཨནནྟརཾ ཨུཔཔཏྟིཾ སནྡྷཱཡཱཏི ཨཏྠོ དཊྛབྦོ. ཡེ པན ཙུཏིཀཱལེ ཨུཔཔཏྟིཀཱལེ ཙ ཨསཉྙཱུཔཔཏྟིཀཱལེ ཙ ཨསཉྙསཏྟེསུ སཉྙཱ ཨཏྠཱིཏི གཧེཏྭཱ ཨསཉྙཱུཔགསྶ ཙ ཨནྟརཱབྷཝཾ ཨིཙྪེཡྻུཾ, ཏེསཾ ཨནྟརཱབྷཝབྷཱཝཏོ ‘‘ཨསཉྙཱུཔཔཏྟི ཨཝེདནཱ’’ཏི ན སཀྐཱ ཝཏྟུནྟི.

༩༢. ཨཝེདནོཏིཨཱདཱིསུ ཏདཉྙནྟི སཉྙབྷཝཏོ ཨཉྙཾ ཨསཉྙཱནེཝསཉྙཱནཱསཉྙཱཡཏནུཔཔཏྟིཾ. ནེཝསཉྙཱནཱསཉྙཱཡཏནེཔི ཧི ན ཝཏྟབྦཾ སཉྙཱ ཨཏྠཱིཏི ཨིཙྪནྟི.

༩༣. ཡསྨཱ རཱུཔཱདིདྷམྨེ ཝིནཱ པུགྒལོ ནཏྠཱིཏི ཨིནྡྷནུཔཱདཱནོ ཨགྒི ཝིཡ ཨིནྡྷནེན རཱུཔཱདིཨུཔཱདཱནོ པུགྒལོ རཱུཔཱདིནཱ ཝིནཱ ནཏྠཱིཏི ལདྡྷིཝསེན ཝདཏི.

༩༧. ནཱིལཾ རཱུཔཾ ཨུཔཱདཱཡ ནཱིལོཏིཨཱདཱིསཱུཏི ‘‘ནཱིལཾ རཱུཔཾ ཨུཔཱདཱཡ ནཱིལཀསྶ པུགྒལསྶ པཉྙཏྟཱི’’ཏི ཨེཏྠ ཡོ པུཊྛོ ནཱིལཾ ཨུཔཱདཱཡ ནཱིལོཏི, ཏདཱདཱིསཱུཏི ཨཏྠོ.

༩༨. ཚེཀཊྛཾ སནྡྷཱཡཱཏི ཚེཀཊྛཾ སནྡྷཱཡ ཝུཏྟཾ, ན ཀུསལཔཉྙཏྟིཾ. ‘‘ཀུསལཾ ཝེདནཾ ཨུཔཱདཱཡཱ’’ཏི མཉྙམཱནོ པཊིཛཱནཱཏཱིཏི ཨཏྠོ དཊྛབྦོ.

༡༡༢. ཨིདཱནི ¶ …པེ… དསྶེཏུཾ ‘‘ཡཐཱ རུཀྑ’’ནྟིཨཱདིམཱཧཱཏི པུབྦཔཀྑཾ དསྶེཏྭཱ ཨུཏྟརམཱཧཱཏི ཝུཏྟཾ ཧོཏི.

༡༡༥. ‘‘ཡསྶ ¶ རཱུཔཾ སོ རཱུཔཝཱ’’ཏི ཨུཏྟརཔཀྑེ ཝུཏྟཾ ཝཙནཾ ཨུདྡྷརིཏྭཱ ‘‘ཡསྨཱ’’ཏིཨཱདིམཱཧ.

༡༡༦. ཙིཏྟཱནུཔསྶནཱཝསེནཱཏི ཙིཏྟཱནུཔསྶནཱཝསེན པརིདཱིཔིཏསྶ སརཱགཱདིཙིཏྟཡོགསྶ ཝསེནཱཏི ཨདྷིཔྤཱཡོ.

༡༡༨. ཡེནཱཏི ཙཀྑུནྟི ‘‘ཡེནཱ’’ཏི ཝུཏྟཾ ཀརཎཾ ཙཀྑུནྟི ཨཏྠོ. ཙཀྑུམེཝ རཱུཔཾ པསྶཏཱིཏི ཝིཉྙཱཎནིསྶཡབྷཱཝཱུཔགམནམེཝ ཙཀྑུསྶ དསྶནཾ ནཱམ ཧོཏཱིཏི སནྡྷཱཡ ཝདཏི.

ཨུཔཱདཱཔཉྙཏྟཱནུཡོགཝཎྞནཱ ནིཊྛིཏཱ.

༡༢༣. ཀརཎམཏྟནྟི ཀམྨཱནཾ ནིཔྥཱདཀཔྤཡོཛཀབྷཱཝེན པཝཏྟཱ ཁནྡྷཱ.

༡༢༤. པུརིམཀམྨེན ཝིནཱ པུགྒལསྶ ཛཱཏི, ཛཱཏསྶ ཙ ཝིཛྫཊྛཱནཱདཱིསུ སམྨཱ མིཙྪཱ ཝཱ པཝཏྟི ནཏྠཱིཏི སནྡྷཱཡ ‘‘པུརིམཀམྨམེཝ ཏསྶཱ’’ཏིཨཱདིམཱཧ.

༡༢༥. ཀམྨཝཊྚསྶཱཏི ཨེཏྠ ཀམྨཀཱརཀསྶ ཡོ ཀཱརཀོ, ཏེནཔི ཨཉྙཾ ཀམྨཾ ཀཱཏབྦཾ, ཏསྶ ཀཱརཀེནཔི ཨཉྙནྟི ཨེཝཾ ཀམྨཝཊྚསྶ ཨནུཔཙྪེདཾ ཝདནྟི. པུགྒལསྶ ཀཱརཀོ ཀམྨསྶ ཀཱརཀོ ཨཱཔཛྫཏཱིཏི ཝིཙཱརེཏབྦམེཏཾ. མཱཏཱཔིཏཱུཧི ཛནིཏཏཱདིནཱ ཏསྶ ཀཱརཀཾ ཨིཙྪནྟསྶ ཀམྨཀཱརཀཱནཾ ཀཱརཀཔརམྤརཱ ཨཱཔཛྫཏཱིཏི ཨིདཉྩ ཝིཙཱརེཏབྦཾ.

༡༧༠. སུཏྟཝིརོདྷབྷཡེནཱཏི ‘‘སོ ཀརོཏི སོ པཊིསཾཝེདཡཏཱིཏི ཁོ, བྲཱཧྨཎ, ཨཡམེཀོ ཨནྟོ’’ཏིཨཱདཱིཧི (སཾ. ནི. ༢.༤༦) ཝིརོདྷབྷཡཱ.

༡༧༡. ‘‘ཨིདྷ ¶ ནནྡཏི པེཙྩ ནནྡཏཱི’’ཏི (དྷ. པ. ༡༨) ཝཙནཏོ ཀམྨཀརཎཀཱལེ ཝིཔཱཀཔཊིསཾཝེདནཀཱལེ ཙ སོཡེཝཱཏི པཊིཛཱནཱཏཱིཏི ཨདྷིཔྤཱཡོ. སཡཾཀཏཾ ¶ སུཁདུཀྑནྟི ཙ པུཊྛོ ‘‘ཀིཾ ནུ ཁོ, བྷོ གོཏམ, སཡཾཀཏཾ སུཁཾ དུཀྑནྟི? མཱ ཧེཝཾ ཀསྶཔཱ’’ཏིཨཱདིསུཏྟཝིརོདྷཱ (སཾ. ནི. ༢.༡༨) པཊིཀྑིཔཏི.

༡༧༦. ལདྡྷིམཏྟམེཝེཏནྟི སོཡེཝེཀོ ནེཝ སོ ཧོཏི ན ཨཉྙོཏི ཨིདཾ པན ནཏྠེཝ, ཏསྨཱ ཨེཝཾཝཱདིནོ ཨསཡཾཀཱརནྟིཨཱདི ཨཱཔཛྫཏཱིཏི ཨདྷིཔྤཱཡོ. ཨཔིཙཱཏིཨཱདིནཱ ཨིདཾ དསྶེཏི – ན པརསྶ ཨིཙྪཱཝསེནེཝ ‘‘སོ ཀརོཏཱི’’ཏིཨཱདི ཨནུཡོགོ ཝུཏྟོ, ཨཐ ཁོ ‘‘སོ ཀརོཏཱི’’ཏིཨཱདཱིསུ ཨེཀཾ ཨནིཙྪནྟསྶ ཨིཏརཾ, ཏཉྩ ཨནིཙྪནྟསྶ ཨཉྙཾ ཨཱཔནྣནྟི ཨེཝཾ ཀཱརཀཝེདཀིཙྪཱཡ ཋཏྭཱ ‘‘སོ ཀརོཏཱི’’ཏིཨཱདཱིསུ ཏཾ ཏཾ ཨནིཙྪཱཡ ཨཱཔནྣཝསེནཱཔཱིཏི. ཨཐ ཝཱ ན ཀེཝལཾ ‘‘སོ ཀརོཏཱི’’ཏིཨཱདཱིནཾ སབྦེསཾ ཨཱཔནྣཏྟཱ, ཨཐ ཁོ ཨེཀེཀསྶེཝ ཙ ཨཱཔནྣཏྟཱ ཨཡཾ ཨནུཡོགོ ཀཏོཏི དསྶེཏི. པུརིམནཡེནེཝཱཏི ཨེཏེན ‘‘ཨིདྷ ནནྡཏཱི’’ཏིཨཱདི སབྦཾ པཊིཛཱནནཱདིཀཱརཎཾ ཨེཀཏོ ཡོཛེཏབྦནྟི དསྶེཏི.

པུརིསཀཱརཱནུཡོགཝཎྞནཱ ནིཊྛིཏཱ.

༡༩༣. ཨབྷིཉྙཱནུཡོགཱདིཝསེན ཨརཧཏྟསཱདྷནཱཏི ཨེཏྠ ‘‘ནནུ ཨཏྠི ཀོཙི ཨིདྡྷིཾ ཝིཀུབྦཏཱི’’ཏི ཨབྷིཉྙཱཨནུཡོགོ ཙ ‘‘ཧཉྩི ཨཏྠི ཀོཙི ཨིདྡྷིཾ ཝིཀུབྦཏཱི’’ཏི ཋཔནཱ ཙ ‘‘ཏེན ཝཏ རེ’’ཏིཨཱདི པཱཔནཱ ཙ ཨཱདིསདྡསངྒཧིཏོ ཨཏྠོཝ དཊྛབྦོ. ཨཱསཝཀྑཡཉཱཎཾ པནེཏྠ ཨབྷིཉྙཱ ཝུཏྟཱཏི ཏདབྷིཉྙཱཝཏོ ཨརཧཏོ སཱདྷནཾ ‘‘ཨརཧཏྟསཱདྷནཱ’’ཏི ཨཱཧ. ཨརཧཏོ ཧི སཱདྷནཱ ཏབྦྷཱཝསྶ ཙ སཱདྷནཱ ཧོཏིཡེཝཱཏི.

༢༠༩. ཏཐཱརཱུཔསྶཱཏི ¶ ¶ ཏཏིཡཀོཊིབྷཱུཏསྶ སཙྩིཀཊྛསྶ ཨབྷཱཝཱཏི ཨདྷིཔྤཱཡོ. ཨེཝཾ པན པཊིཀྑིཔནྟོ ཨསཙྩིཀཊྛཾ ཏཏིཡཀོཊིབྷཱུཏཾ པུགྒལཾ ཝདེཡྻཱཏི ཏཱདིསཾ པུགྒལཾ ཨིཙྪནྟོ ཧི སུཏྟེན ནིགྒཧེཏབྦོ སིཡཱ. ཀསྨཱ? ཏཐཱརཱུཔསྶ སཙྩིཀཊྛསྶ ཨབྷཱཝཏོཏི, ཏཐཱརཱུཔསྶ ཀསྶཙི སབྷཱཝསྶ ཨབྷཱཝཏོ པཊིཀྑེཔཱརཧཏྟཱ ཨཏྟནོ ལདྡྷིཾ ནིགཱུཧིཏྭཱ པཊིཀྑེཔོ པརཝཱདིསྶཱཏི ཨཡམཏྠོ དཊྛབྦོ.

༢༡༨. པརིགྒཧིཏཝེདནོཏི ཝཙནེན ཨཔརིགྒཧིཏཝེདནསྶ ‘‘སུཁིཏོསྨི, དུཀྑིཏོསྨཱི’’ཏི ཛཱནནཾ པཛཱནནཾ ནཱམ ན ཧོཏཱིཏི དསྶེཏི ཡོགཱཝཙརསྶ སུཁུམཱནམྤི ཝེདནཱནཾ པརིཙྪེདནསམཏྠཏཉྩ.

༢༢༨. ལཀྑཎཝཙནནྟི རཱུཔབྦྷནྟརགམནཾ སཧརཱུཔབྷཱཝོ, བཧིདྡྷཱ ནིཀྑམནཾ ཝིནཱརཱུཔབྷཱཝོཏི ཨདྷིཔྤཱཡོ.

༢༣༧. ཨིམཱ ཁོཏི ཨོལཱ༹རིཀོ ཨཏྟཔཊིལཱབྷོ མནོམཡོ ཨཏྟཔཊིལཱབྷོ ཨརཱུཔོ ཨཏྟཔཊིལཱབྷོཏི ཨིམཱ ལོཀསྶ སམཉྙཱ, ཡཱཧི ཏཐཱགཏོ ཝོཧརཏི ཨཔརཱམསཾ, ཡོ སཙྩོ མོགྷོ ཝཱ སིཡཱ, ཏསྨིཾ ཨནུཔལབྦྷམཱནེཔི ཨཏྟནི ཏདནུཔལབྦྷཏོཡེཝ པརཱམཱསཾ ཨཏྟདིཊྛིཾ ཨནུཔྤཱདེནྟོ ལོཀེ ཨཏྟཔཊིལཱབྷོཏི པཝཏྟཝོཧཱརཝསེནེཝ ཝོཧརཏཱིཏི ཨཡམེཏྠ ཨཏྠོ. ཨེཏྠ ཙ པཙྩཏྟསཱམཉྙལཀྑཎཝསེན པུགྒལསྶ ཨཏྠིཏཾ པཊིཀྑིཔིཏྭཱ ལོཀཝོཧཱརེན ཨཏྠིཏཾ ཝདནྟེན པུགྒལོཏི ཀོཙི སབྷཱཝོ ནཏྠཱིཏི ཝུཏྟཾ ཧོཏི. སཏི ཧི ཏསྨིཾ ཨཏྟནོ སབྷཱཝེནེཝ ཨཏྠིཏཱ ཝཏྟབྦཱ སིཡཱ, ན ལོཀཝོཧཱརེནཱཏི. ཨིམིནཱ པན ཡཐཱ སམེཏི, ཡཐཱ ཙ ¶ པརཱམཱསོ ན ཧོཏི, ཨེཝཾ ཨིཏོ པུརིམཱ ཙ ཨཏྠཝཎྞནཱ ཡོཛེཏབྦཱ.

ལོཀསམྨུཏིཀཱརཎནྟི ¶ ཡསྨཱ ལོཀསམྨུཏིཝསེན པཝཏྟཾ, ཏསྨཱ སཙྩནྟི ཝུཏྟཾ ཧོཏི. ཏཐལཀྑཎནྟི ཏཐཀཱརཎཾ. ཡསྨཱ དྷམྨཱནཾ ཏཐཏཱཡ པཝཏྟཾ, ཏསྨཱ སཙྩནྟི དསྶེཏི.

པཊིཝེདྷཱནུཡོགཱདིཝཎྞནཱ ནིཊྛིཏཱ.

༢༣༩. ‘‘དྭེམེ ¶ ¶ , བྷིཀྑཝེ, དྷམྨཱ སེཀྑསྶ བྷིཀྑུནོ པརིཧཱནཱཡ སཾཝཏྟནྟཱི’’ཏི (ཨ. ནི. ༢.༡༨༥) ཨིདཾ སུཏྟཾ ཨརཧཏོ པརིཧཱནིལདྡྷིཡཱ ན ནིསྶཡོ, ཨཐ ཁོ ཨནཱགཱམིཨཱདཱིནཾ པརིཧཱནིལདྡྷིཡཱ, ཏསྨཱ ཨརཧཏོཔི པརིཧཱནིཾ ཨིཙྪནྟཱིཏི ཨེཏྠ པི-སདྡེན ཨནཱགཱམིསྶཔི སཀདཱགཱམིསྶཔཱིཏི ཡོཛེཏབྦཾ.

‘‘ཏཏིཡསྨིམྤི མུདིནྡྲིཡཱཝ ཨདྷིཔྤེཏཱ. ཏེསཉྷི སབྦེསམྤི པརིཧཱནི ན ཧོཏཱིཏི ཏསྶ ལདྡྷཱི’’ཏི པུརིམཔཱཋོ, མུདིནྡྲིཡེསྭེཝ པན ཨདྷིཔྤེཏེསུ པརིཀྑེཔོ ན ཀཱཏབྦོ སིཡཱ, ཀཏོ ཙ, ཏསྨཱ ‘‘ཏཏིཡསྨིམྤི ཏིཀྑིནྡྲིཡཱཝ ཨདྷིཔྤེཏཱ. ཏེསཉྷི སབྦེསམྤི པརིཧཱནི ན ཧོཏཱིཏི ཏསྶ ལདྡྷཱི’’ཏི པཋནྟི.

ཨཡོནིསོ ཨཏྠཾ གཧེཏྭཱཏི སོཏཱཔནྣོཡེཝ ནིཡཏོཏི ཝུཏྟོཏི སོཡེཝ ན པརིཧཱཡཏི, ན ཨིཏརེཏི ཨཏྠཾ གཧེཏྭཱ. ‘‘ཨུཔརིམགྒཏྠཱཡཱ’’ཏི ཝུཏྟཾ ཨཏྠཾ ཨགྒཧེཏྭཱ ནིཡཏོཏི སོཏཱཔཏྟིཕལཱ ན པརིཧཱཡཏཱིཏི ཨེཏམཏྠཾ གཎྷཱིཏི པན ཝདནྟི.

ཝཱདཡུཏྟིཔརིཧཱནིཀཐཱཝཎྞནཱ ནིཊྛིཏཱ.

༢. ཨརིཡཔུགྒལསཾསནྡནཔརིཧཱནིཝཎྞནཱ

༢༤༡. ཡཾ ¶ པནེཏྠཱཏིཨཱདིམྷི དསྶནམགྒཕལེ ཋིཏསྶ ཨནནྟརཾ ཨརཧཏྟཔྤཏྟིཾ, ཏཏོ པརིཧཱཡིཏྭཱ ཏཏྠ ཙ ཋཱནཾ ཨིཙྪནྟོ པུན ཝཱཡཱམེན ཏདནནྟརཾ ཨརཧཏྟཔྤཏྟིཾ ན ཨིཙྪཏཱིཏི ཝིཙཱརེཏབྦམེཏཾ.

༢༦༢. ཨཝསིཔྤཏྟོ ཛྷཱནལཱབྷཱིཏི སེཀྑོ ཝུཏྟོཏི དཊྛབྦོ. པུཐུཛྫནོ པན ཝསིཔྤཏྟོ ཨཝསིཔྤཏྟོ ཙ སམཡཝིམུཏྟཨསམཡཝིམུཏྟཏནྟིཡཱ ཨགྒཧིཏོ, བྷཛཱཔིཡམཱནོ པན སམཱཔཏྟིཝིཀྑམྦྷིཏཱནཾ ཀིལེསཱནཾ ཝསེན སམཡཝིམུཏྟབྷཱཝཾ བྷཛེཡྻཱཏི ཝུཏྟོཏི.

ཨརིཡཔུགྒལསཾསནྡནཔརིཧཱནིཝཎྞནཱ ནིཊྛིཏཱ.

༢༦༥. ཨུཏྟམཧཱིནབྷེདོ ¶ ‘‘ཏཏྲ ཡཱཡཾ པཊིཔདཱ སུཁཱ ཁིཔྤཱབྷིཉྙཱ, སཱ ཨུབྷཡེནེཝ པཎཱིཏཱ ཨཀྑཱཡཏཱི’’ཏིཨཱདིསུཏྟཝསེན (དཱི. ནི. ༣.༡༥༢) ཝུཏྟོ. ‘‘དིཊྛཾ སུཏཾ མུཏ’’ནྟི ཨེཏྠ ཝིཡ མུཏསདྡོ པཏྟབྦཾ ཝདཏཱིཏི ཨཱཧ ‘‘ཕུསནཱརཧ’’ནྟི.

༢༦༧. ཨཔྤཏྟཔརིཧཱནཱཡ ཙེཝ སཾཝཏྟནྟི ཡཐཱཀཏསནྣིཊྛཱནསྶ སམཡཝིམུཏྟསྶཱཏི ཨདྷིཔྤཱཡོ.

སུཏྟསཱདྷནཔརིཧཱནིཝཎྞནཱ ནིཊྛིཏཱ.

༢༦༩. ‘‘པརནིམྨིཏཝསཝཏྟིདེཝེ ¶ ¶ ཨུཔཱདཱཡ ཏདུཔརཱི’’ཏི ཝུཏྟཾ, ‘‘ཏཱིཧི, བྷིཀྑཝེ, ཋཱནེཧཱི’’ཏི (ཨ. ནི. ༩.༢༡) པན སུཏྟསྶ ཝཙནེན ཧེཊྛཱཔི མགྒབྷཱཝནམྤི ན ཨིཙྪནྟཱིཏི ཝིཉྙཱཡཏི.

༢༧༠. ‘‘གིཧཱིནཉྩེཝ ཨེཀཙྩཱནཉྩ དེཝཱནཾ མགྒཔཊིལཱབྷཾ སནྡྷཱཡ པཊིཀྑེཔོ ཏསྶེཝཱ’’ཏི ཝུཏྟཾ, ‘‘ཡཏྠ ནཏྠཱི’’ཏི པན ཨོཀཱསཝསེན པུཊྛོ པུགྒལཝསེན ཏསྶ པཊིཀྑེཔོ ན ཡུཏྟོ. ཡདི ཙ ཏསྶཱཡཾ ཨདྷིཔྤཱཡོ, སཀཝཱདིནཱ སམཱནཱདྷིཔྤཱཡཏྟཱ ན ནིགྒཧེཏབྦོ.

༢༧༡. ཨེཀནྟརིཀཔཉྷཱཏི པརཝཱདཱིསཀཝཱདཱིནཾ ཨཉྙམཉྙཾ པཉྷནྟརིཀཱ པཉྷཱ.

སུདྡྷབྲཧྨཙརིཡཀཐཱཝཎྞནཱ ནིཊྛིཏཱ.

༢༧༣. རཱུཔཱཝཙརམགྒེན ཧི སོ ཨིདྷཝིཧཱཡནིཊྛོ ནཱམ ཛཱཏོཏི ཨིདཾ ‘‘ཨིདྷ བྷཱཝིཏམགྒོ ཧི ཨནཱགཱམཱི ཨིདྷཝིཧཱཡནིཊྛོ ནཱམ ཧོཏཱི’’ཏིཨཱདིཀེན ལདྡྷིཀིཏྟནེན ཀཐཾ སམེཏཱིཏི ཝིཙཱརེཏབྦཾ. པུབྦེ པན ཨནཱགཱམཱི ཨེཝ ཨནཱགཱམཱིཏི ཝུཏྟོ, ཨིདྷ ཛྷཱནཱནཱགཱམིསོཏཱཔནྣཱདིཀོཏི ¶ ཨདྷིཔྤཱཡོ. ཨིདྷ ཨརཧཏྟམགྒཾ བྷཱཝེཏྭཱ ཨིདྷེཝ ཕལཾ སཙྪིཀརོནྟཾ ‘‘ཨིདྷཔརིནིབྦཱཡཱི’’ཏི ཝདཏི, ཨིདྷ པན མགྒཾ བྷཱཝེཏྭཱ ཏཏྠ ཕལཾ སཙྪིཀརོནྟཾ ‘‘ཏཏྠཔརིནིབྦཱཡཱི ཨརཧཱ’’ཏི.

སཾསནྡནབྲཧྨཙརིཡཀཐཱཝཎྞནཱ ནིཊྛིཏཱ.

༢༧༤. ཨོདྷིསོ ¶ ཨོདྷིསོཏི ཨེཏསྶ ཨཏྠཾ དསྶེནྟོ ‘‘ཨེཀདེསེན ཨེཀདེསེནཱ’’ཏི ཨཱཧ.

༢༨༠. ཀིཙྩསབྦྷཱཝནྟི ཏཱིཧི པཧཱཏབྦསྶ པཧཱིནཏཾ. ཏཾ པན ཀིཙྩཾ ཡདི ཏེནེཝ མགྒེན སིཛ྄ཛྷཏཱིཏི ལདྡྷི, པུཐུཛྫནཀཱལེ ཨེཝ ཀཱམརཱགབྱཱཔཱདཱ པཧཱིནཱཏི ལདྡྷཱིཏི ཨེཏཾ ན སམེཏི, ཏསྨཱ པུཐུཛྫནཀཱལེ པཧཱིནཱནམྤི དསྶནམགྒེ ཨུཔྤནྣེ པུན ཀདཱཙི ཨནུཔྤཏྟིཏོ ཏིཎྞཾ མགྒཱནཾ ཀིཙྩཾ སམྦྷཝཏཱིཏི ཨདྷིཔྤཱཡོ.

༢༨༢. སབྦསྨིཾ ¶ སརཱིརེ སབྦནྟི སིརསི པཱདཱ པཙྪཏོ ཙཀྑཱུནཱིཏི ཨེཝཾ སབྦཾ སབྦཏྠ ཨཏྠཱིཏི ཨཏྠོ. སབྦསྨིཾ ཀཱལེཏི བཱལཀཱལེ ཡུཝཏཱ, ཝུཌྜྷཀཱལེ བཱལཏཱ, ཨེཝཾ སབྦསྨིཾ ཀཱལེ སབྦཾ. སབྦེནཱཀཱརེནཱཏི ནཱིལཱཀཱརེན པཱིཏཾ, པཱིཏཱཀཱརེན ལོཧིཏནྟི ཨེཝཾ. སབྦེསུ དྷམྨེསཱུཏི ཙཀྑུསྨིཾ སོཏཾ, སོཏསྨིཾ གྷཱནནྟི ཨེཝཾ. ཨཡུཏྟནྟི ཡོགརཧིཏཾ ཝདཏི, ཏཾ པན ཨེཀསབྷཱཝཾ. ཀཐཾ པན ཨེཀསབྷཱཝསྶ ཡོགརཧིཏཏཱཏི ཏཾ དསྶེནྟོ ‘‘ནཱནཱསབྷཱཝཱནཉྷཱི’’ཏིཨཱདིམཱཧ. དྭིནྣཉྷི ནཱནཱསབྷཱཝཱནཾ ཨངྒུལཱིནཾ མེཎྜཀཱནཾ ཝཱ ཨཉྙམཉྙཡོགོ ཧོཏི, ན ཨེཀསྶེཝ སཏོ, ཏསྨཱ ཡོ ནཱནཱསབྷཱཝེསུ ཧོཏི ཡོགོ, ཏེན རཧིཏཾ ཨེཀསབྷཱཝཾ ཨཡོགནྟི ཝུཏྟཾ. ཨིདཾ པུཙྪཏཱིཏི པརཝཱདཱིདིཊྛིཡཱ ¶ མིཙྪཱདིཊྛིབྷཱཝཾ གཧེཏྭཱ ཨུཔྤནྣཱཡ ཨཏྟནོ དིཊྛིཡཱ སམྨཱདིཊྛིབྷཱཝོ ཨཏྠཱིཏི ཝུཏྟཾ ཧོཏི.

༢༨༥. ཨཏཱིཏཱནཱགཏཾ པཧཱཡ པཙྩུཔྤནྣརཱུཔམེཝ ཨཔྤིཡཾ ཨཝིབྷཛིཏབྦཾ ཀརིཏྭཱཏི པཙྩུཔྤནྣསདྡེན རཱུཔསདྡེན ཙཱཏི ཨུབྷོཧིཔི པཙྩུཔྤནྣརཱུཔམེཝ ཝཏྟབྦཾ ཀཏྭཱཏི ཝུཏྟཾ ཧོཏི. པཉྙཏྟིཡཱ ཨཝིགཏཏྟཱཏི ཨེཏེན ཨིདཾ ཝིཉྙཱཡཏི ‘‘ན རཱུཔཔཉྙཏྟི ཝིཡ ཝཏྠཔཉྙཏྟི སབྷཱཝཔརིཙྪིནྣེ པཝཏྟཱ ཝིཛྫམཱནཔཉྙཏྟི, ཨཐ ཁོ པུབྦཱཔརིཡཝསེན པཝཏྟམཱནཾ རཱུཔསམཱུཧཾ ཨུཔཱདཱཡ པཝཏྟཱ ཨཝིཛྫམཱནཔཉྙཏྟི, ཏསྨཱ ཝཏྠབྷཱཝསྶ ཨོདཱཏབྷཱཝཝིགམེ ཝིགམཱཝཏྟབྦཏཱ ཡུཏྟཱ, ན པན རཱུཔབྷཱཝསྶ པཙྩུཔྤནྣབྷཱཝཝིགམེ’’ཏི.

༢༨༨. ཨནཱགཏཾ ¶ ཝཱ པཙྩུཔྤནྣཾ ཝཱ ཧུཏྭཱ ཧོཏཱིཏི ཝུཏྟནྟི ཨེཏྠ ཨནཱགཏཾ ཨནཱགཏཾ ཧུཏྭཱ པུན པཙྩུཔྤནྣཾ ཧོནྟཾ ཧུཏྭཱ ཧོཏཱིཏི, ཏཐཱ པཙྩུཔྤནྣཾ པཙྩུཔྤནྣཾ ཧོནྟཾ པུབྦེ ཨནཱགཏཾ ཧུཏྭཱ པཙྩུཔྤནྣཾ ཧོཏཱིཏི ཧུཏྭཱ ཧོཏཱིཏི ཝུཏྟནྟི དཊྛབྦཾ. ཀིཾ ཏེ ཏམྤི ཧུཏྭཱ ཧོཏཱིཏི ཏབྦྷཱཝཱཝིགམཏོ ཧུཏྭཱཧོཏིབྷཱཝཱནུཔརམཾ ཨནུཔཙྪེདཾ པུཙྪཏཱིཏི ཨདྷིཔྤཱཡོ ཡུཏྟོ. ཧུཏྭཱ བྷཱུཏསྶ པུན ཧུཏྭཱ ཨབྷཱཝཏོཏི ཨནཱགཏཾ ཧུཏྭཱ པཙྩུཔྤནྣབྷཱུཏསྶ པུན ཨནཱགཏཾ ཧུཏྭཱ པཙྩུཔྤནྣཱབྷཱཝཏོ.

ཡསྨཱ ཏནྟི ཏཾ ཧུཏྭཱ བྷཱུཏཾ པཙྩུཔྤནྣཾ ཡསྨཱ ཨནཱགཏཾ ཧུཏྭཱ པཙྩུཔྤནྣཾ ཧོནྟཾ ‘‘ཧུཏྭཱ ཧོཏཱི’’ཏི སངྑྱཾ གཏཾ, ཏསྨཱ དུཏིཡམྤི ‘‘ཧུཏྭཱ ཧོཏཱི’’ཏི ཝཙནཾ ཨརཧཏཱིཏི པཊིཛཱནཱཏཱིཏི ཨདྷིཔྤཱཡོ. ཨེཝཾ པན དྷམྨེ ཧུཏྭཱཧོཏིབྷཱཝཱནུཔརམཾ ཝདནྟསྶ ཨདྷམྨེ སསཝིསཱཎེ ནཧུཏྭཱན ཧོཏིབྷཱཝཱནུཔརམོ ཨཱཔཛྫཏཱིཏི ཨདྷིཔྤཱཡེན ‘‘ཨཐ ན’’ནྟིཨཱདིམཱཧ.

པཊིཀྑིཏྟནཡེནཱཏི ¶ ཀཱལནཱནཏྟེན. པཊིཉྙཱཏནཡེནཱཏི ཨཏྠཱནཱནཏྟེན. ཨཏྠཱནཱནཏྟཾ ཨིཙྪནྟོཔི པན ཨནཱགཏསྶ པཙྩུཔྤནྣེ ཝུཏྟཾ ཧོཏིབྷཱཝཾ, པཙྩུཔྤནྣསྶ ཙ ཨནཱགཏེ ཝུཏྟཾ ཧུཏྭཱབྷཱཝཾ ཀཐཾ པཊིཛཱནཱཏཱིཏི ཝིཙཱརེཏབྦཾ. ཨཏྠཱནཱནཏྟམེཝ ཧི ཏེན ཨནུཉྙཱཡཏི, ན ཨནཱགཏེ པཙྩུཔྤནྣབྷཱཝོ, པཙྩུཔྤནྣེ ཝཱ ཨནཱགཏབྷཱཝོཏི. པུརིམཾ པཊིཀྑིཏྟཔཉྷཾ པརིཝཏྟིཏྭཱཏི ཨནུཉྙཱཏཔཉྷསྶ ཧུཏྭཱ ཧོཏི ཧུཏྭཱ ཧོཏཱིཏི དོསོ ཝུཏྟོཏི ཨཝུཏྟདོསཾ ཨཏིཀྐམྨ པཊིཀྑིཏྟཔཉྷཾ པུན གཧེཏྭཱ ཏེན ཙོདེཏཱིཏི ཨཏྠོ. ཨེཏྠ ཙ ཨཏྠཱནཱནཏྟེན ཧུཏྭཱཧོཏཱིཏི ཨནུཛཱནནྟསྶ དོསོ ཀཱལནཱནཏྟཱཡེཝ ཨནཱགཏཾ པཙྩུཔྤནྣནྟི པཊིཀྑེཔེན ཀཐཾ ཧོཏཱིཏི? ཏསྶེཝ ཨནུཛཱནནཔཊིཀྑེཔཏོཏི ཨདྷིཔྤཱཡོ.

ཨེཀེཀནྟི ཨནཱགཏམྤི ན ཧུཏྭཱ ན ཧོཏི པཙྩུཔྤནྣམྤཱིཏི ཏདུབྷཡཾ གཧེཏྭཱ ‘‘ཨེཀེཀཾ ན ཧུཏྭཱ ན ཧོཏི ན ཧུཏྭཱ ན ཧོཏཱི’’ཏི ཝུཏྟཾ, ན ཨེཀེཀམེཝ ན ཧུཏྭཱ ན ཧོཏི ན ཧུཏྭཱ ན ཧོཏཱིཏི. ཨེས ནཡོ པུརིམསྨིཾ ‘‘ཨེཀེཀཾ ཧུཏྭཱ ཧོཏི ཧུཏྭཱ ཧོཏཱི’’ཏི ཝཙནེཔི. ཨནཱགཏསྶ ཧི ‘‘ཧུཏྭཱ ཧོཏཱི’’ཏི ནཱམཾ པཙྩུཔྤནྣསྶ ཙཱཏི དྭེཔི ནཱམཱནི སངྒཧེཏྭཱ ‘‘ཧུཏྭཱ ཧོཏི ཧུཏྭཱ ཧོཏཱི’’ཏི ཙོདིཏཾ, ཏཐཱ ‘‘ན ཧུཏྭཱ ན ཧོཏི ན ཧུཏྭཱ ན ཧོཏཱི’’ཏི ཙཱཏི ཨདྷིཔྤཱཡོ ¶ . སབྦཏོ ཨནྡྷཀཱརེན པརིཡོནདྡྷོ ཝིཡཱཏི ཨེཏེན ཨཔརིཡོནདྡྷེན པཊིཛཱནིཏབྦཾ སིཡཱཏི དསྶེཏི. ཨེཏྠ ཙ པུརིམནཡེ ཧུཏྭཱ བྷཱུཏསྶ པུན ཧུཏྭཱཧོཏིབྷཱཝོ ཙོདིཏོ, དུཏིཡནཡེ ཨནཱགཏཱདཱིསུ ཨེཀེཀསྶ ཧུཏྭཱཧོཏིནཱམཏཱཏི ཨཡཾ ཝིསེསོ.

༢༩༠. པུན པུཊྛོ…པེ… ཨཏྠིཏཱཡ པཊིཛཱནཱཏཱིཏི ཨེཏྠ པཙྩུཔྤནྣཾ ཉཱཎཾ ཏེནཱཏི ཨེཏེན ཨནུཝཏྟམཱནཱཔེཀྑནཝཙནེན ཀཐཾ ཝུཙྩཏཱིཏི ཝིཙཱརེཏབྦཾ.

ཨཏཱིཏཉཱཎཱདིཀཐཱཝཎྞནཱ ནིཊྛིཏཱ.

༢༩༡. ཡུཏྟིཝིརོདྷོ ¶ ཨརཧཏོ སརཱགཱདིབྷཱཝེ པུཐུཛྫནེན ཨནཱནཏྟཾ བྲཧྨཙརིཡཝཱསསྶ ཨཕལཏཱཏི ཨེཝམཱདིཀོ དཊྛབྦོ.

༢༩༥. ཏེན ཀཱརཎེནཱཏི ཨཏཱིཏཨཏྠིསདྡཱནཾ ཨེཀཏྠཏྟཱ ཨཏྠིསདྡཏྠསྶ ཙ ནྭཱཏཱིཏབྷཱཝཏོ ‘‘ཨཏཱིཏཾ ¶ ནྭཱཏཱིཏཾ, ནྭཱཏཱིཏཉྩ ཨཏཱིཏཾ ཧོཏཱི’’ཏི ཝུཏྟཾ ཧོཏི. ཨེཏྠ པན ཨཏཱིཏཱདཱིནཾ ཨཏྠིཏཾ ཝདནྟསྶ པརཝཱདིསྶེཝཱཡཾ དོསོ ཡཐཱ ཨཱཔཛྫཏི, ན པན ‘‘ནིབྦཱནཾ ཨཏྠཱི’’ཏི ཝདནྟསྶ སཀཝཱདིསྶ, ཏཐཱ པཊིཔཱདེཏབྦཾ.

༢༩༩. ཏིཎྞཾ རཱསཱིནནྟི ཨཝིཔཀྐཝིཔཱཀཝིཔཀྐཝིཔཱཀཨཝིཔཱཀཱནཾ. ཝོཧཱརཝསེན ཨཝིཔཀྐཝིཔཱཀཱནཾ ཨཏྠིཏཾ ཝདནྟོ ཀཐཾ ཙོདེཏབྦོཏི ཝིཙཱརེཏི ‘‘ཀམྨུཔཙཡཾ ཙིཏྟཝིཔྤཡུཏྟཾ སངྑཱརཾ ཨིཙྪནྟཱི’’ཏི.

ཨེཀཙྩཾཨཏྠཱིཏིཀཐཱཝཎྞནཱ ནིཊྛིཏཱ.

༣༠༡. ལོཀུཏྟརབྷཱཝཾ པུཙྪནཏྠཱཡཱཏི ལོཀིཡལོཀུཏྟརཱཡ སམྨཱསཏིཡཱ སཏིཔཊྛཱནཏྟཱ, ལོཀུཏྟརཱཡཡེཝ ཝཱ པརམཏྠསཏིཔཊྛཱནཏྟཱ ཏསྶཱ ཝསེན ལོཀུཏྟརབྷཱཝཾ པུཙྪནཏྠཱཡཱཏི ཨཏྠོ. པབྷེདཔུཙྪཱཝསེནཱཏི ¶ ལོཀིཡལོཀུཏྟརསཏིཔཊྛཱནསམུདཱཡབྷཱུཏསྶ སཏིཔཊྛཱནསྶ པབྷེདཱནཾ པུཙྪཱཝསེན.

༣༠༤. ཨཡོནིསོ ¶ པཏིཊྛཱཔིཏཏྟཱཏི ཨཝཏྟབྦུཏྟརེན ཨུཔེཀྑིཏབྦེན པཏིཊྛཱཔིཏཏྟཱཏི ཨཏྠོ དཊྛབྦོ.

༣༠༧. ཨདྷིམཱནིཀཱནཾ སུཀྐཝིསྶཊྛིདསྶནཾ ཝིཙཱརེཏབྦཾ. ཏེ ཧི སམཱདྷིཝིཔསྶནཱཧི ཝིཀྑམྦྷིཏརཱགཱཝ, བཱཧིརཀཱནམྤི ཙ ཀཱམེསུ ཝཱིཏརཱགཱནཾ སུཀྐཝིསྶཊྛིཡཱ ཨབྷཱཝོ ཝུཏྟོཏི. ཨདྷིམཱནིཀཔུབྦཱ པན ཨདྷིཔྤེཏཱ སིཡུཾ.

༣༠༨. ཝཙསཱཡཏྠེཏི ནིཙྪཡཏྠེ, ‘‘ཀིཾ ཀཱརཎཱ’’ཏི པན ཀཱརཎསྶ པུཙྪིཏཏྟཱ བྲཧྨཙརིཡཀཐཱཡཾ ཝིཡ ཀཱརཎཏྠེཏི ཡུཏྟཾ.

༣༢༦. ཝཙཱིབྷེདཀཐཱཡཾ ལོཀུཏྟརཾ པཋམཛ྄ཛྷཱནཾ སམཱཔནྣོཏི པཋམམགྒཾ སནྡྷཱཡ ཝདཏི, ཡསྨཱ སོ དུཀྑནྟི ཝིཔསྶཏི, ཏསྨཱ དུཀྑམིཙྩེཝ ཝཱཙཾ བྷཱསཏི, ན སམུདཡོཏིཨཱདཱིནཱིཏི ཨདྷིཔྤཱཡོ.

༣༢༨. ཡེན ¶ ¶ ཏཾ སདྡཾ སུཎཱཏཱིཏི ཨིདཾ ཝཙཱིསམུཊྛཱཔནཀྑཎེ ཨེཝ ཨེཏཾ སདྡཾ སུཎཱཏཱིཏི ཨིཙྪིཏེ ཨཱརོཔིཏེ ཝཱ ཡུཛྫཏི.

༣༣༢. ལོཀུཏྟརམགྒཀྑཎེ ཝཙཱིབྷེདཾ ཨིཙྪཏོ པརསྶ ཨབྷིབྷཱུསུཏྟཱཧརཎེ ཨདྷིཔྤཱཡོ ཝཏྟབྦོ.

༣༣༥. ཙིཏྟཊྛིཏིཀཐཱཡཾ ཙུལླཱསཱིཏི…པེ… ཨཱདིཝཙནཝསེནཱཏི ཨཱརུཔྤེཡེཝ ཨེཝཾ ཡཱཝཏཱཡུཀཊྛཱནཾ ཝུཏྟཾ, ན ཨཉྙཏྠཱཏི ཀཏྭཱ པཊིཀྑིཔཏཱིཏི ཨདྷིཔྤཱཡོ. ཨེཏེན པན ‘‘ན ཏྭེཝ ཏེཔི ཏིཊྛནྟི, དྭཱིཧི ཙིཏྟསམོཧིཏཱ’’ཏི (མཧཱནི. ༡༠ ཐོཀཾ ཝིསདིསཾ) དུཏིཡཱཔི ཨཌྜྷཀཐཱ པསྶིཏབྦཱ. པུརིམཱཡ ཙ ཝསྶསཏཱདིཊྛཱནཱནུཉྙཱཡ ཨཝིརོདྷོ ཝིབྷཱཝེཏབྦོ. མུཧུཏྟཾ མུཧུཏྟནྟི པཉྷོ སཀཝཱདིནཱ པུཙྪིཏོ ཝིཡ ཝུཏྟོ, པརཝཱདིནཱ པན པུཙྪིཏོཏི དཊྛབྦོ.

༣༣༩. ཨནུཔུབྦཱབྷིསམཡཀཐཱཡཾ ཨཐཝཱཏིཨཱདིནཱ ཨིདཾ དསྶེཏི – ཙཏུནྣཾ ཉཱཎཱནཾ ཨེཀམགྒབྷཱཝཏོ ན ཨེཀམགྒསྶ བཧུབྷཱཝཱཔཏྟི, ཨནུཔུབྦེན ཙ སོཏཱཔཏྟིམགྒཾ བྷཱཝེཏཱིཏི ཨུཔཔནྣནྟི པཊིཛཱནཱཏཱིཏི.

༣༤༥. ཨཊྛཧི ¶ ཉཱཎེཧཱིཏི ཨེཏྠ པཊིསམྦྷིདཱཉཱཎེཧི སཧ ཨཊྛསུ གཧིཏེསུ ནིརུཏྟིཔཊིབྷཱནཔཊིསམྦྷིདཱཧི སོཏཱཔཏྟིཕལསཙྪིཀིརིཡཱ ཀཐཾ ཧོཏཱིཏི ཝིཙཱརེཏབྦཾ.

ཨནུཔུབྦཱབྷིསམཡཀཐཱཝཎྞནཱ ནིཊྛིཏཱ.

༣༤༧. ཝོཧཱརཀཐཱཡཾ ¶ ཨུདཱཧུ སོཏཱདཱིནིཔཱིཏི ཨེཀནྟལོཀིཡེསུ ཝིསཡཝིསཡཱིསུ ཝིསཡསྶེཝ ལོཀུཏྟརབྷཱཝོ, ན ཝིསཡཱིནནྟི ནཏྠེཏྠ ཀཱརཎཾ. ཡཐཱ ཙ ཝིསཡཱིནཾ ལོཀུཏྟརབྷཱཝོ ཨསིདྡྷོ, ཏཐཱ ཝིསཡསྶ སདྡཱཡཏནསྶ. ཏཏྠ ཡཐཱ ཨསིདྡྷལོཀུཏྟརབྷཱཝསྶ ཏསྶ ལོཀུཏྟརཏཱ, ཨེཝཾ སོཏཱདཱིནཾ ཨཱཔནྣཱཏི ཀིནྟི ཏཱནིཔི ལོཀུཏྟརཱནཱིཏི ཨཏྠོ དཊྛབྦོ.

ཡདི ལོཀུཏྟརེ པཊིཧཉྙེཡྻ, ལོཀུཏྟརོ སིཡཱཏི ཨཏྠོ ན གཧེཏབྦོ. ན ཧི ལོཀུཏྟརེ པཊིཧཉྙཏཱིཏི པརིཀཔྤིཏེཔི སདྡསྶ ལོཀུཏྟརབྷཱཝོ ཨཏྠཱིཏི ཨདྷིཔྤཱཡོ. ‘‘ལོཀིཡེན ཉཱཎེནཱ’’ཏི ཨུདྡྷཊཾ, ‘‘ཝིཉྙཱཎེནཱ’’ཏི པན པཱལི༹, ཏཉྩ ཝིཉྙཱཎཾ སོཏསམྦནྡྷེན སོཏཝིཉྙཱཎནྟི ཝིཉྙཱཡཏཱིཏི. ཨནེཀནྟཏཱཏི ལོཀིཡེན ཉཱཎེན ཛཱནིཏབྦཏོ ལོཀིཡོཏི ཨེཏསྶ ཧེཏུསྶ ལོཀིཡེ ལོཀུཏྟརེ ཙ སམྦྷཝཏོ ཨནེཀནྟབྷཱཝོ སིཡཱཏི ཨདྷིཔྤཱཡོ.

༣༥༣. དྭེ དུཀྑསཙྩཱནི ན ཨིཙྪཏཱིཏི ཡེསཾ དྭིནྣཾ དྭཱིཧི ནིརོདྷེཧི བྷཝིཏབྦཾ, ཏཱནི དྭེ དུཀྑསཙྩཱནི ན ཨིཙྪཏཱིཏི ཝུཏྟཾ ཧོཏི. ཡེ པཊིསངྑཱཡ ལོཀུཏྟརེན ཉཱཎེན ཨནིརུདྡྷཱཏིཨཱདིནཱ པཊིསངྑཱཡ ཝིནཱ ནིརུདྡྷཱ ཨསམུདཱཙརཎསངྑཱརཱ ཨཔྤཊིསངྑཱནིརུདྡྷཱཏི དསྶེཏི ¶ , ན ཨུཔྤཛྫིཏྭཱ བྷངྒཱཏི. ཏེན ཨཔྤཊིསངྑཱནིརོདྷོ ཙ ཨསམུདཱཙརཎནིརོདྷོཏི དསྶིཏཾ ཧོཏི.

༣༥༤. ཨིནྡྲིཡཔརོཔརིཡཏྟཾ ¶ ཨསཱདྷཱརཎནྟི ཡཐཱ ནིདྡེསཏོ ཝིཏྠཱརཏོ སབྦཾ སབྦཱཀཱརཾ ཋཱནཱཊྛཱནཱདིཾ ཨཛཱནནྟཱཔི ‘‘ཨཊྛཱནམེཏཾ ཨནཝཀཱསོ, ཡཾ དིཊྛིསམྤནྣོ པུགྒལོ ཀཉྩི སངྑཱརཾ ནིཙྩཏོ ཨུཔགཙྪེཡྻཱ’’ཏིཨཱདིནཱ (ཨ. ནི. ༡.༢༦༨) ཋཱནཱཊྛཱནཱནི ཨུདྡེསཏོ སངྑེཔཏོ སཱཝཀཱ ཛཱནནྟི, ན ཨེཝཾ ‘‘ཨཱསཡཾ ཛཱནཱཏི ཨནུསཡཾ ཛཱནཱཏཱི’’ཏིཨཱདིནཱ (པཊི. མ. ༡.༡༡༣) ཨུདྡེསམཏྟེནཔི ཨིནྡྲིཡཔརོཔརིཡཏྟཾ ཛཱནནྟཱིཏི ‘‘ཨསཱདྷཱརཎ’’ནྟི ཨཱཧ. ཐེརེན པན སདྡྷཱདཱིནཾ ཨིནྡྲིཡཱནཾ ཏིཀྑམུདུབྷཱཝཛཱནནམཏྟཾ སནྡྷཱཡ ‘‘སཏྟཱནཾ ཨིནྡྲིཡཔརོཔརིཡཏྟཾ ཡཐཱབྷཱུཏཾ པཛཱནཱམཱི’’ཏི (པཊི. མ. ༢.༤༤) ཝུཏྟཾ, ན ཡཐཱཝུཏྟཾ ཨིནྡྲིཡཔརོཔརིཡཏྟཉཱཎཾ ཏཐཱགཏབལནྟི ཨཡམེཏྠ ཨདྷིཔྤཱཡོ དཊྛབྦོ. ‘‘ཨུདྡེསཏོ ཋཱནཱཊྛཱནཱདིམཏྟཛཱནནཝསེན པཊིཛཱནཱཏཱི’’ཏི ཝུཏྟཾ, ཨེཝཾ པན པཊིཛཱནནྟེན ‘‘ཏཐཱགཏབལཾ སཱཝཀསཱདྷཱརཎ’’ནྟི ཨིདམྤི ཨེཝམེཝ པཊིཉྙཱཏཾ སིཡཱཏི ཀཐམཡཾ ཙོདེཏབྦོ སིཡཱ.

༣༥༦. སེསེསུ པཊིཀྑེཔོ སཀཝཱདིསྶ ཋཱནཱཊྛཱནཉཱཎཱདཱིནཾ སཱདྷཱརཎཱསཱདྷཱརཎཏྟཱ ཏཏྠ སཱདྷཱརཎཔཀྑཾ སནྡྷཱཡཱཏི ཨདྷིཔྤཱཡོ.

༣༥༧. སངྑཱརེ ¶ སནྡྷཱཡ པཊིཛཱནནྟསྶ དྭིནྣཾ ཕསྶཱནཾ སམོདྷཱནཾ ཀཐཾ ཨཱཔཛྫཏི ཡཐཱཝུཏྟནཡེནཱཏི ཝིཙཱརེཏབྦཾ. པརིཀཔྤནཝསེན ཨཱརོཔེཏྭཱ ཋཔེཏབྦཏཱཡ སཏྟོ ‘‘པཎིདྷཱི’’ཏི ཝུཏྟོ. སོ པན ཨེཀསྨིམྤི ཨཱརོཔེཏྭཱ ན ཋཔེཏབྦོཏི ཨེཀསྨིམྤི ཨཱརོཔེཏྭཱ ཋཔེཏབྦེན ཏེན རཧིཏཏཱ ཝུཏྟཱ.

༣༦༦. ཛྷཱནེན ¶ ཝིཀྑམྦྷནཝིམུཏྟིཡཱ ཝིམུཏྟཾ ཙིཏྟཾ མགྒཀྑཎེ སམུཙྪེདཝིམུཏྟིཡཱ ཝིམུཙྩམཱནཾ ནཱམ ཧོཏཱིཏི ཨེཏིསྶཱ ལདྡྷིཡཱ ཀོ དོསོཏི ཝིཙཱརེཏབྦཾ. ཡདི ཝིཔྤཀཏནིདྡེསེ དོསོ, ཏཏྲཱཔི ཏེན ཝིམུཙྩམཱནཏཱཡ ‘‘ཝིམུཏྟཾ ཝིམུཙྩམཱན’’ནྟི ཝུཏྟཾ. སཏི ཙ དོསེ ཨུཔྤཱདཀྑཎེ ཝིམུཏྟཾ, ཝཡཀྑཎེ ཝིམུཙྩམཱནནྟི ཝིམུཏྟཝིམུཙྩམཱནཝཙནསྶ ན ཙོདེཏབྦཾ སིཡཱ, ཨཐ ཁོ ཝིམུཙྩམཱནཝཙནམེཝཱཏི. ཨེཀདེསེན, ཨེཀདེསེ ཝཱ ཝིམུཙྩམཱནསྶ ཙ ཝིམུཏྟཀིརིཡཱཡ ཨེཀདེསོ ཝིསེསནཾ ཧོཏཱིཏི ‘‘བྷཱཝནཔུཾསཀ’’ནྟི ཝུཏྟཾ. ཀཊཱདཡོཏི ཀཊཔཊཱདཡོ. ཨེཀེནེཝ ཙིཏྟེནཱཏི ཨེཀེནེཝ ཕལཙིཏྟེནཱཏི ཨདྷིཔྤཱཡོ.

༣༦༨. ཨནུལོམགོཏྲབྷུཀྑཎེཔི ཨསམུདཱཙརནྟཱ མགྒཀྑཎེཔི པཧཱིནཱ ཨེཝ ནཱམ བྷཝེཡྻུནྟི ལདྡྷི ཨུཔྤནྣཱཏི ཨདྷིཔྤཱཡེན ཨནུལོམགོཏྲབྷུགྒཧཎཾ ཀརོཏི.

༣༧༡. ཨིནྡྲིཡཱནི ¶ པཊིལབྷཏི ཨཔྤཊིལདྡྷིནྡྲིཡཏྟཱ ཨནིནྡྲིཡབྷཱུཏཱནི སདྡྷཱདཱིནི ནིཡྻཱནིཀཱནི བྷཱཝེནྟོ ཨིནྡྲིཡཱནི པཊིལབྷཏི, ན པན ཨིནྡྲིཡཱནི བྷཱཝེནྟོཏི ཨདྷིཔྤཱཡོ.

ཨཊྛམཀསྶ ཨིནྡྲིཡཀཐཱཝཎྞནཱ ནིཊྛིཏཱ.

༣༧༣. ཨུཔཏྠདྡྷནྟི ¶ ཡཐཱ ཝིསཡཱནུབྷཱཝགོཙརེཧི ཝིསིཊྛཾ ཧོཏི, ཏཐཱ པཙྩཡབྷཱུཏེན ཀཏབལཱདྷཱནནྟི ཨཏྠོ. ཏཾམཏྟམེཝཱཏི པུརིམཾ མཾསཙཀྑུམཏྟམེཝ དྷམྨུཔཏྠདྡྷཾ ན ཧོཏཱིཏི ཨཏྠོ. ཨནཱཔཱཐགཏནྟི མཾསཙཀྑུནཱ གཧེཏབྦཊྛཱནཾ ཨཱཔཱཐཾ ནཱགཏཾ. ཨེཏྠ ཙ ཝིསཡསྶ དཱིཔཀཾ ཨཱནུབྷཱཝགོཙརཱནམེཝ ཨསདིསཏཾ ཝདནྟོ ཡཱདིསོ མཾསཙཀྑུསྶ ཝིསཡོཏི ཝིསཡགྒཧཎཾ ན ཝིསཡཝིསེསདསྶནཏྠཾ, ཨཐ ཁོ ཡཱདིསེ ཝིསཡེ ཨཱནུབྷཱཝགོཙརཝིསེསཱ ཧོནྟི, ཏཱདིསསྶ རཱུཔཝིསཡསྶ དསྶནཏྠནྟི དཱིཔེཏི, སདིསསྶ ཝཱ ཝིསཡསྶ ཨཱནུབྷཱཝགོཙརཝིསེསོཝ ཝིསེསཾ.

ན ཙ མཾསཙཀྑུམེཝ དིབྦཙཀྑཱུཏི ཨིཙྪཏཱིཏི དྷམྨུཔཏྠདྡྷཀཱལེ པུརིམཾ མཾསཙཀྑུམེཝཱཏི ན ཨིཙྪཏཱིཏི ཨདྷིཔྤཱཡོ. མཾསཙཀྑུསྶ ཨུཔྤཱདོ མགྒོཏི མཾསཙཀྑུཔཙྩཡཏཱདསྶནཏྠམེཝ ཝུཏྟཾ, ན ཏེན ཨནུཔཱདིནྣཏཱསཱདྷནཏྠཾ. རཱུཔཱཝཙརིཀཱནནྟི རཱུཔཱཝཙརཛ྄ཛྷཱནཔཙྩཡེན ཨུཔྤནྣཱནི མཧཱབྷཱུཏཱནི རཱུཔཱཝཙརིཀཱནཱིཏི སོ ཨིཙྪཏཱིཏི ཨདྷིཔྤཱཡོ. ཨེས ནཡོ ‘‘ཨརཱུཔཱཝཙརིཀཱན’’ནྟི ཨེཏྠཱཔི. ཨརཱུཔཱཝཙརཀྑཎེ རཱུཔཱཝཙརཙིཏྟསྶ ཨབྷཱཝཱ པཊིཀྑིཔཏཱིཏི ཏསྨིཾཡེཝ ཁཎེ རཱུཔཱཝཙརཾ ཧུཏྭཱ ཨརཱུཔཱཝཙརཾ ན ཛཱཏནྟི པཊིཀྑིཔཏཱིཏི ཨདྷིཔྤཱཡོ.

༣༧༤. ཀིཉྩཱཔི དིབྦཙཀྑུནོ དྷམྨུཔཏྠདྡྷསྶ པཉྙཱཙཀྑུབྷཱཝཾ ན ཨིཙྪཏི, ཡེན ཏཱིཎི ཙཀྑཱུནི དྷམྨུཔཏྠམྦྷེན ཙཀྑུནྟརབྷཱཝཾ ཝདཏོ བྷཝེཡྻུནྟི ཨདྷིཔྤཱཡོ.

༣༧༧. དིབྦེན ¶ ཙཀྑུནཱ ཡཐཱཀམྨཱུཔགེ སཏྟེ པཛཱནཱཏཱིཏི ཡཐཱཀམྨཱུཔགཏཉཱཎསྶ ཨུཔནིསྶཡེ དིབྦཙཀྑུམྷི ཀརཎནིདྡེསོ ཀཏོ, ན ཡཐཱཀམྨཱུཔགཏཛཱནནཀིཙྩཀེ. ཏཾཀིཙྩཀེཡེཝ པན པརོ ཀརཎནིདྡེསཾ མཉྙཏཱིཏི ཨཱཧ ‘‘ཨཡོནིསོ གཧེཏྭཱ’’ཏི. ཡཐཱཀམྨཱུཔགཏཉཱཎམེཝ དིབྦཙཀྑུནྟི ལདྡྷཱིཏི ཨིམིནཱ ཝཙནེན དིབྦཙཀྑུམེཝ ཡཐཱཀམྨཱུཔགཏཉཱཎནྟི ཨེཝཾ ¶ བྷཝིཏབྦཾ. ཨེཝ-སདྡོ ཙ ཨཊྛཱནེ ཋིཏོ དིབྦཙཀྑུསདྡསྶ པརཏོ ཡོཛེཏབྦོ. ཡཐཱཀམྨཱུཔགཏཉཱཎསྶ ཧི སོ དིབྦཙཀྑུཏོ ཨཏྠནྟརབྷཱཝཾ ནིཝཱརེཏི. ན ཧི དིབྦཙཀྑུསྶ ཡཐཱཀམྨཱུཔགཏཉཱཎཏོཏི.

ཡཐཱཀམྨཱུཔགཏཉཱཎཀཐཱཝཎྞནཱ ནིཊྛིཏཱ.

༣༧༩. ཙཱཏུམཧཱརཱཛིཀཱནཾ སཾཝརཱསཾཝརསབྦྷཱཝོ ཨཱཊཱནཱཊིཡསུཏྟེན པཀཱསིཏོཏི ‘‘ཏཱཝཏིཾསེ དེཝེ ཨུཔཱདཱཡཱ’’ཏི ཨཱཧ. ཨེཝཾ སཏི སུགཏིཀཐཱཡཾ ‘‘ཏཱཝཏིཾསེ སངྒཧིཏཱནཾ པུབྦདེཝཱནཾ སུརཱཔཱནཾ, སཀྐདེཝཱནཾ སུརཱཔཱནནིཝཱརཎཾ སུཡྻཏི, ཏཾ ཏེསཾ སུརཱཔཱནཾ ཨསཾཝརོ ན ཧོཏཱི’’ཏི ཝཏྟབྦཾ ཧོཏི.

༣༨༧. གིཧིསཾཡོཛནསམྤཡུཏྟཏཱཡཱཏི ¶ ཨེཏེན གིཧིཚནྡརཱགསམྤཡུཏྟཏཱཡ ཨེཝ ‘‘གིཧཱི’’ཏི ཝུཙྩཏི, ན བྱཉྫནམཏྟེནཱཏི ཨིམམཏྠཾ དསྶེཏི.

གིཧིསྶ ཨརཧཱཏིཀཐཱཝཎྞནཱ ནིཊྛིཏཱ.

༣༨༨. ཨཡོནིསོཏི ཨོཔཔཱཏིཀོ ཧོཏི, ཏཏྠ ཏསྶཱཡེཝཱུཔཔཏྟིཡཱ པརིནིབྦཱཡཱིཏི ཨཏྠཾ གཧེཏྭཱཏི ཨདྷིཔྤཱཡོ.

༣༩༣. སམནྣཱགཏཀཐཱཡཾ ¶ པཏྟིཾ སནྡྷཱཡ པཊིཛཱནནྟོ ཙཏཱུཧི ཁནྡྷེཧི ཝིཡ སམནྣཱགམཾ ན ཝདཏཱིཏི ཏསྶ ཙཏཱུཧི ཕསྶཱདཱིཧི སམནྣཱགམཔྤསངྒོ ཡཐཱ ཧོཏི, ཏཾ ཝཏྟབྦཾ.

༣༩༧. ཨིམིནཱཝ ¶ ནཡེནཱཏི ‘‘ཏཏྠ དྭེ སམནྣཱགམཱ’’ཏིཨཱདི སབྦཾ ཡོཛེཏབྦཾ. ཏཏྠ པཏྟིདྷམྨོ ནཱམ རཱུཔཱཝཙརཱདཱིསུ ཨཉྙཏརབྷཱུམིཾ པཋམཛ྄ཛྷཱནཱདིཝསེན པཱཔུཎནྟསྶ པཋམཛ྄ཛྷཱནཱདཱིནཾ པཊིལཱབྷོ. ནིརུདྡྷེསུཔི པཋམཛ྄ཛྷཱནཱདཱིསུ ཨནིརུཛ྄ཛྷནཏོ ཙིཏྟཝིཔྤཡུཏྟོ སངྑཱརོ, ཡེན སུཔནྟོ སཛ྄ཛྷཱཡཱདིཔསུཏོ ཙ ཏེཧི སམནྣཱགཏོཏི ཝུཙྩཏཱིཏི ཝདནྟི.

ཨུཔེཀྑཱསམནྣཱགཏཀཐཱཝཎྞནཱ ནིཊྛིཏཱ.

༣༩༨. ཏསྨཱཏི ཡཐཱཝུཏྟསྶ ཉཱཎདྭཡསྶ བོདྷིབྷཱཝཏོ. ཏཾ ཨགྒཧེཏྭཱ པཏྟིདྷམྨཝསེན ནཏྠིཏཱཡ བོདྷིཡཱ སམནྣཱགཏོ བུདྡྷོཏི ཡེསཾ ལདྡྷི, ཏེ སནྡྷཱཡ པུཙྪཱ ཙ ཨནུཡོགོ ཙ སཀཝཱདིསྶཱཏི ཡོཛནཱ དཊྛབྦཱ.

བོདྷིཡཱབུདྡྷོཏིཀཐཱཝཎྞནཱ ནིཊྛིཏཱ.

༤༠༢. བོདྷིསཏྟམེཝ སནྡྷཱཡ ཝུཏྟནྟི ལཀྑཎསམནྣཱགཏེསུ ཨབོདྷིསཏྟེ ཚཌྜེཏྭཱ བོདྷིསཏྟམེཝ གཧེཏྭཱ ཨིདཾ སུཏྟཾ ཝུཏྟཾ, ན ¶ བོདྷིསཏྟཏོ ཨཉྙོ ལཀྑཎསམནྣཱགཏོ ནཏྠཱིཏི. ནཱཔི སབྦེསཾ ལཀྑཎསམནྣཱགཏཱནཾ བོདྷིསཏྟཏཱ, ཏསྨཱ ཨསཱདྷཀནྟི ཨདྷིཔྤཱཡོ.

༤༠༣. ཋཔེཏྭཱ ¶ པཱརམཱིཔཱུརཎནྟི པཱརམཱིཔཱུརཎེནེཝ ཏེ ‘‘བོདྷིཡཱ ནིཡཏཱ ནརཱ’’ཏི ཝུཙྩནྟཱིཏི དསྶེཏི. ཀེཝལཉྷི ནནྟིཨཱདིནཱ ཙ ན ནིཡཱམཀསྶ ནཱམ ཀསྶཙི ཨུཔྤནྣཏྟཱ བྱཱཀརོནྟཱིཏི དསྶེཏི.

ནིཡཱམོཀྐནྟིཀཐཱཝཎྞནཱ ནིཊྛིཏཱ.

༤༡༣. ནིཔྤརིཡཱཡེནེཝཱཏི ཨཝསིཊྛསྶ པཧཱཏབྦསྶ ཨབྷཱཝཱ ‘‘སབྦསཾཡོཛནཔྤཧཱན’’ནྟི ཨིམཾ པརིཡཱཡཾ ཨགྒཧེཏྭཱ ཨརཧཏྟམགྒེན པཛཧནཏོ ཨེཝཱཏི གཎྷཱཏཱིཏི ཝུཏྟཾ ཧོཏི. ཨཔྤཧཱིནསྶ ཨབྷཱཝཱཏི ཨཝསིཊྛསྶ པཧཱཏབྦསྶ ཨབྷཱཝཱ པཊིཛཱནཱཏཱིཏི ཝདནྟི, ཏཐཱ ‘‘ཨནཝསེསཔྤཧཱན’’ནྟི ཨེཏྠཱཔི. ཨེཝཾ སཏི ཏེན ཨཏྟནོ ལདྡྷིཾ ཚཌྜེཏྭཱ སཀཝཱདིསྶ ལདྡྷིཡཱ པཊིཉྙཱཏནྟི ཨཱཔཛྫཏི.

སབྦསཾཡོཛནཔྤཧཱནཀཐཱཝཎྞནཱ ནིཊྛིཏཱ.

༤༡༨. ཕལཉཱཎཾ ན ཧོཏཱིཏི ‘‘ཝིམུཏྟཱནཱི’’ཏི ཝཱ ཏདངྒཝིམུཏྟིཡཱདིབྷཱཝཏོ མགྒེན པཧཱིནཱནཾ པུན ཨནུཔྤཏྟིཏོ ཙ ‘‘ཨཝིམུཏྟཱནཱི’’ཏི ཝཱ ¶ ན ཝཏྟབྦཱནཱིཏི ཨདྷིཔྤཱཡོ. གོཏྲབྷུཉཱཎཉྩེཏྠ ཝིཔསྶནཱགྒཧཎེན གཧིཏནྟི དཊྛབྦཾ.

༤༢༡. ན ¶ པནེཏཾ ཨསེཁནྟི ཨེཏེན ཨསེཁཝིསཡཏྟཱ ཨསེཁམེཝ ཉཱཎནྟི པརསྶ ལདྡྷི, ན པན ཨསེཁསྶཱཏི ཨིམམཏྠཾ དསྶེཏི.

༤༢༤. ན པཐཝཱིཡེཝཱཏི ལཀྑཎཔཐཝཱིཡེཝ, སསམྦྷཱརཔཐཝཱིཡེཝ ཝཱ ན ཧོཏཱིཏི ཨཏྠོ. ཨནིཙྩེ ནིཙྩནྟིཨཱདིཝིཔརིཡེསོ པན ཝིཔརཱིཏཉཱཎཾ ནཱམཱཏི ཨཉྙཱཎེཔི ཉཱཎཝོཧཱརཾ ཨཱརོཔེཏྭཱ ཝདཏཱིཏི དཊྛབྦཾ.

༤༢༨-༤༣༡. ཉཱཎཾ ཨཏྠི, ཡཾ སཙྩཱནུལོམཾ མགྒཉཱཎཱནུགཏིཀཾ པསྶནྟོ བྷགཝཱ ‘‘བྷབྦོ’’ཏི ཛཱནཱཏཱིཏི ལདྡྷི. པཋམཔཉྷམེཝ ཙཏུཏྠཾ ཀཏྭཱཏི ཨེཏྠ ‘‘ནིཡཏསྶ ཨནིཡཱམགམནཱཡཱ’’ཏི ཝིཔརཱིཏཱནུཡོགཏོ པབྷུཏི གཎེཏྭཱ ‘‘ཙཏུཏྠ’’ནྟི ཨཱཧ.

༤༣༢-༤༣༣. ཡཾཀིཉྩི ¶ ཨརིཡཱནཾ ཉཱཎཾ, སབྦཾ ལོཀུཏྟརམེཝཱཏི གཎྷནྟེནཔི སབྦཾ ཉཱཎཾ པཊིསམྦྷིདཱཏི ན སཀྐཱ ཝཏྟུཾ. ཨནརིཡཱནམྤི ཧི ཉཱཎཾ ཉཱཎམེཝཱཏི ¶ . ཏསྶ ཝཱ ཉཱཎཏཾ ན ཨིཙྪཏཱིཏི ཝཏྟབྦཾ. པཐཝཱིཀསིཎསམྨུཏིཡཾ སམཱཔཏྟིཉཱཎཾ སནྡྷཱཡཱཏི ཨནརིཡསྶ ཨེཏཾ ཉཱཎཾ སནྡྷཱཡཱཏི ཨདྷིཔྤཱཡོ སིཡཱ.

༤༣༤-༤༣༥. སཙྩནྟི ཝཙནསཱམཉྙེན ཨུབྷཡསྶཔི སཙྩསཱམཉྙཏྟཾ གཧེཏྭཱ ཝདཏཱིཏི དསྶེནྟོ ‘‘ཏཏྠཱ’’ཏིཨཱདིམཱཧ.

༤༣༦-༤༣༨. ཕསྶསྶ ཕུསནལཀྑཎཾ མནསིཀརོཏོཏི ཨེཏེན པུརིམཱ ཝཏྟབྦཔཊིཉྙཱ ཨནུཔདདྷམྨམནསིཀཱརཏོ ཨཉྙཾ སམུདཱཡམནསིཀཱརཾ སནྡྷཱཡ ཀཏཱཏི དསྶེཏི.

༤༣༩-༤༤༠. སབྦསྨིམྤཱིཏི ¶ ‘‘པཱཊལིཔུཏྟསྶ ཁོ’’ཏིཨཱདིནཱ ཨནཱགཏེ ཉཱཎནྟི ཝུཏྟནྟི ཨནཱགཏབྷཱཝསཱམཉྙེན ཨནནྟརཱནཱགཏེཔི ཉཱཎཾ ཨིཙྪནྟཱིཏི ཝུཏྟཾ ཧོཏི.

༤༤༡-༤༤༢. ཝཙནཾ ¶ ནིསྶཱཡཱཏི ཨཏྠཏོ ཨཱཔནྣཾ ཝཙནཾ, ཨནུཛཱནནཝཙནཾ ཝཱ ནིསྶཱཡ. སནྟཏིཾ སནྡྷཱཡཱཏི བྷངྒཱནུཔསྶནཱནཾ བྷངྒཏོ ཨནུཔསྶནཱསནྟཏིཾ སནྡྷཱཡཱཏི ཨདྷིཔྤཱཡོ.

༤༤༣-༤༤༤. བུདྡྷཱནཾ ཝིཡཱཏི ཡཐཱ བུདྡྷཱ སབྦཔྤཀཱརཕལཔརོཔརིཡཏྟཛཱནནཝསེན ཨཏྟནོ ཨེཝ ཙ བལེན ཕལཾ ཛཱནནྟི, ཨེཝནྟི ཝུཏྟཾ ཧོཏི.

༤༤༥-༤༤༧. ཨནིཡཏོ ¶ ནཱམ ན ཧོཏཱིཏི ཡཐཱ མིཙྪཏྟནིཡཏསྶ བྷཝནྟརེ ཨནིཡཏཾ ནཱམ ཧོཏི, ཨེཝཾ ཨེཏསྶ ཀདཱཙིཔི ཨནིཡཏཏཱ ན ཧོཏཱིཏི ཡོ ནིཡཱམོ, སོ ཨསངྑཏོཏི ཨདྷིཔྤཱཡོ.

༤༥༡. ཀཱརཎཊྛེན ཋིཏཏཱཏི ཀཱརཎབྷཱཝོཡེཝ. ཨེཏེན ཙ དྷམྨཱནཾ ཀཱརཎབྷཱཝོ དྷམྨཊྛིཏཏཱཏི ཨེཏམཏྠཾ དསྶེཏི. ཏཐཱ ‘‘དྷམྨནིཡཱམཏཱ’’ཏི ཨེཏྠཱཔི.

པཊིཙྩསམུཔྤཱདཀཐཱཝཎྞནཱ ནིཊྛིཏཱ.

༤༥༢-༤༥༤. ཝཏྠུསཙྩནྟི ¶ ཛཱཏིཡཱདི ཀཱམཏཎྷཱདི སམྨཱདིཊྛིཨཱདི ཙ. བཱདྷནཔབྷཝནིཡྻཱནིཀལཀྑཎེཧི ལཀྑཎསཙྩཾ བཱདྷནཱདི.

༤༥༧-༤༥༩. ཀརིཡམཱནཱ ¶ ཀརཱིཡཏཱིཏི ཨརཱུཔཀྑནྡྷཱནཾ པཝཏྟམཱནཱནཾ སམཐཝིཔསྶནཱནུཀྐམེན ཨཔྤཝཏྟི སཱདྷཱིཡཏཱིཏི ཨཏྠོ. སངྑཏཱསངྑཏལཀྑཎཱནཾ པན ཨབྷཱཝེནཱཏི ཝདནྟོ སབྷཱཝདྷམྨཏཾ པཊིསེདྷེཏི. ཝོདཱནཉྩ ཝུཊྛཱནཔརིཡཱཡོཝ. ཨསངྑཏབྷཱཝེ ཀཱརཎཾ ན ཧོཏི སབྷཱཝདྷམྨཏྟཱསཱདྷཀཏྟཱཏི ཨདྷིཔྤཱཡོ.

ནིརོདྷསམཱཔཏྟིཀཐཱཝཎྞནཱ ནིཊྛིཏཱ.

༤༧༣-༤༧༤. ནཱནཏྟཝཝཏྠཱནཾ ནཏྠཱིཏི ཝདནྟོ ‘‘ཏིལམྷི ཏེལཾ ཨནུཔཝིཊྛ’’ནྟི ཝཙནམེཝ ན ཡུཛྫཏཱིཏི ‘‘ན ཧེཝ’’ནྟི པཊིཀྑིཏྟནྟི དསྶེཏི.

༤༧༥-༤༧༧. ཕསྶཱདཱིནཾ ¶ ¶ ཨེཀུཔྤཱདཏཱདིཝིརཧིཏཱ སཧཛཱཏཏཱ ནཏྠཱིཏི ཨཱཧ ‘‘སམྤཡུཏྟསཧཛཱཏཏཾ སནྡྷཱཡཱ’’ཏི.

༤༧༨. དེཡྻདྷམྨཝསེན ཙོདེཏུནྟི ཡདི ཙེཏསིཀོཝ དྷམྨོ དཱནཾ, ‘‘དིཡྻཏཱིཏི དཱན’’ནྟི ཨིམིནཱཔི ཨཏྠེན ཙེཏསིཀསྶེཝ དཱནབྷཱཝོ ཨཱཔཛྫཏཱིཏི ཙོདེཏུནྟི ཨཏྠོ.

༤༧༩. ཨནིཊྛཕལནྟིཨཱདི ཨཙེཏསིཀསྶ དྷམྨསྶ དཱནབྷཱཝདཱིཔནཏྠཾ ཝུཏྟནྟི ཕལདཱནབྷཱཝདཱིཔནཏྠཾ ན ཝུཏྟནྟི ཨཏྠོ དཊྛབྦོ. ཨནིཊྛཕལནྟིཨཱདིནཱ ཨཙེཏསིཀསྶ དྷམྨསྶ ཕལདཱནཾ ཝུཏྟཾ ཝིཡ ཧོཏི, ན དཱནབྷཱཝོ, ཏནྣིཝཱརཎཏྠཉྩེཏམཱཧཱཏི. ཨེཝཉྩ ཀཏྭཱ ཨནནྟརམེཝཱཧ ‘‘ན ཧི ཨཙེཏསིཀོ ཨནྣཱདིདྷམྨོ ཨཱཡཏིཾ ཝིཔཱཀཾ དེཏཱི’’ཏི. ཨིཊྛཕལབྷཱཝནིཡམནཏྠནྟི དེཡྻདྷམྨོ ཝིཡ ཀེནཙི པརིཡཱཡེན ཨནིཊྛཕལཏཱ དཱནསྶ ནཏྠི, ཨེཀནྟཾ པན ཨིཊྛཕལམེཝཱཏི ནིཡམནཏྠནྟི ཨཏྠོ.

ཨིཏརེནཱཏི ‘‘དིཡྻཏཱིཏི དཱན’’ནྟི ཨིམིནཱ པརིཡཱཡེན. ན པན ཨེཀེནཏྠེནཱཏི ‘‘དེཡྻདྷམྨོཝ དཱན’’ནྟི ཨིམཾ སཀཝཱདཱིཝཱདཾ ནིཝཏྟེཏུཾ ‘‘སདྡྷཱ ཧིརིཡ’’ནྟིཨཱདིཀཾ སུཏྟསཱདྷནཾ པརཝཱདཱིཝཱདེ ཡུཛྫཏི, ‘‘ཨིདྷེཀཙྩོ ཨནྣཾ དེཏཱི’’ཏིཨཱདིཀཉྩ, ‘‘ཙེཏསིཀོཝ དྷམྨོ དཱན’’ནྟི ཨིམཾ ནིཝཏྟེཏུཾ ‘‘ཙེཏསིཀོ དྷམྨོ དཱན’’ནྟི ཨིམཾ པན སཱདྷེཏུཾ ‘‘སདྡྷཱ ཧིརིཡ’’ནྟིཨཱདིཀཾ སཀཝཱདཱིཝཱདེ ཡུཛྫཏི, ‘‘ཨིདྷེཀཙྩོ ཨནྣཾ དེཏཱི’’ཏིཨཱདིཀཾ ཝཱ ‘‘དེཡྻདྷམྨོ དཱན’’ནྟི སཱདྷེཏུནྟི ཨེཝཾ ནིཝཏྟནསཱདྷནཏྠནཱནཏྟཾ སནྡྷཱཡ ‘‘ན པན ཨེཀེནཏྠེནཱ’’ཏི ཝུཏྟནྟི དཊྛབྦཾ. ཏཏྠ ཡཐཱ པརཝཱདཱིཝཱདེ ཙ སུཏྟསཱདྷནཏྠཾ ‘‘ན ཝཏྟབྦཾ ཙེཏསིཀོ དྷམྨོ དཱན’’ནྟི པུཙྪཱཡཾ ཙེཏསིཀོཝཱཏི ཨཏྠོ དཊྛབྦོ, ཏཐཱ ‘‘ན ཝཏྟབྦཾ དེཡྻདྷམྨོ དཱན’’ནྟི པུཙྪཱཡ ཙ དེཡྻདྷམྨོཝཱཏི ¶ . དེཡྻདྷམྨོ ཨིཊྛཕལོཏི ཨིཊྛཕལཱབྷཱཝམཏྟམེཝ པཊིཀྑིཏྟནྟི ཨེཏྠ ‘‘ཨིཊྛཕལབྷཱཝམཏྟམེཝ པཊིཀྑིཏྟ’’ནྟི པཱཋེན བྷཝིཏབྦནྟི ¶ . ‘‘ཨིཊྛཕལཱབྷཱཝམཏྟམེཝ དིསྭཱ པཊིཀྑིཏྟ’’ནྟི ཝཱ ཝཏྟབྦཾ. སངྐརབྷཱཝམོཙནཏྠནྟི ཙེཏསིཀསྶ དཱཏབྦཊྛེན དེཡྻདྷམྨསྶ ཙ ཨིཊྛཕལཊྛེན དཱནབྷཱཝམོཙནཏྠནྟི ཝུཏྟཾ ཧོཏི.

༤༨༣. པརིབྷོགམཡཾ ནཱམ ཙིཏྟཝིཔྤཡུཏྟཾ པུཉྙཾ ཨཏྠཱིཏི ལདྡྷི. ཏཉྷི ཏེ སནྡྷཱཡ པརིབྷོགམཡཾ པུཉྙཾ པཝཌྜྷཏཱིཏི ཝདནྟཱིཏི ཨདྷིཔྤཱཡོ.

༤༨༥. ཏསྶཱཔི ཝསེནཱཏི ཏསྶཱཔི ལདྡྷིཡཱ ཝསེན. པཉྩཝིཉྙཱཎཱནཾ ཝིཡ ཨེཏེསམྤི སམོདྷཱནཾ སིཡཱཏི པཊིཛཱནཱཏཱིཏི ཝདནྟི. པཉྩཝིཉྙཱཎཕསྶཱདཱིནམེཝ པན སམོདྷཱནཾ སནྡྷཱཡ པཊིཛཱནཱཏཱིཏི ཨདྷིཔྤཱཡོ.

༤༨༦. ཨཔརིབྷུཏྟེཔཱིཏི ཨིམིནཱ ‘‘པཊིགྒཱཧཀོ པཊིགྒཧེཏྭཱ ན པརིབྷུཉྫཏི ཚཌྜེཏཱི’’ཏིཨཱདིཀཾ དསྶེཏི. ཨཔརིབྷུཏྟེ དེཡྻདྷམྨེ པུཉྙབྷཱཝཏོ པརིབྷོགམཡཾ པུཉྙཾ པཝཌྜྷཏཱིཏི ཨཡཾ ཝཱདོ ཧཱིཡཏི. ཏསྨིཉྩ ཧཱིནེ སཀཝཱདཱིཝཱདོ བལཝཱ. ཙཱགཙེཏནཱཡ ཨེཝ ཧི པུཉྙབྷཱཝོ ཨེཝཾ སིདྡྷོ ཧོཏཱིཏི ཨདྷིཔྤཱཡོ. ཨཔརིབྷུཏྟེཔི དེཡྻདྷམྨེ པུཉྙབྷཱཝེ ཙཱགཙེཏནཱཡ ཨེཝ པུཉྙབྷཱཝོཏི ཨཱཧ ‘‘སཀཝཱདཱིཝཱདོཝ བལཝཱ’’ཏི.

པརིབྷོགམཡཔུཉྙཀཐཱཝཎྞནཱ ནིཊྛིཏཱ.

༤༨༨-༤༩༡. ཏེནེཝ ¶ ཡཱཔེནྟཱིཏི ཏེནེཝ ཙཱིཝརཱདིནཱ ཡཱཔེནྟི, ཏེནེཝ ཝཱ ཙཱིཝརཱདིདཱནེན ཡཱཔེནྟི, སཡཾཀཏེན ཀམྨུནཱ ཝིནཱཔཱིཏི ཨདྷིཔྤཱཡོ. ཨིམིནཱ ཀཱརཎེནཱཏི ཡདི ཡཾ ཨིཏོ ཙཱིཝརཱདི དིནྣཾ, ན ཏེན ཡཱཔེཡྻུཾ, ཀཐཾ ཨནུམོདེཡྻུཾ…པེ… སོམནསྶཾ པཊིལབྷེཡྻུནྟི ལདྡྷིཾ པཏིཊྛཔེནྟསྶཔཱིཏི ཝུཏྟཾ ཧོཏི.

༤༩༢. ཕསྶོ ¶ སུཁཝེདནཱིཡཱདིབྷེདོ ཧོཏཱིཏི ཕསྶེན སབྦམྤི ཀམྨཝིཔཱཀཾ དསྶེཏྭཱ པུན ཨཏྟཝཛྫེཧི སམྤཡོགདསྶནཏྠཾ ‘‘སོ ཙ སཉྙཱདཡོ ཙཱ’’ཏིཨཱདི ཝུཏྟཾ. ཨཏྠི ཙ ནེསནྟི སཱཝཛྫནེ ཙཀྑུཝིཉྙཱཎཱདིསཧཛཱཏདྷམྨེ སནྡྷཱཡ ཝུཏྟཾ. ཡོ ཏཏྠ ཨིཊྛཝིཔཱཀོ, ཏསྶ པཏྠནཱཏི ཨིཊྛཝིཔཱཀེ ཨེཝ པཏྠནཾ ཀཏྭཱ ཀམྨཾ ཀརོནྟཱིཏི ཀམྨཱུཔནིསྶཡབྷཱུཏམེཝ པཏྠནཾ དསྶེཏི, པཙྩུཔྤནྣཝེདནཱཔཙྩཡཾ ཝཱ ཏཎྷཾ ཨུཔཱདཱནཱདིནིབྦཏྟནཝསེན དུཀྑསྶ པབྷཱཝིཏཾ. མཱུལཏཎྷཱཏི པཙྩུཔྤནྣཝིཔཱཀཝཊྚནིབྦཏྟཀཀམྨསྶ ཨུཔནིསྶཡབྷཱུཏཾ པུརིམཏཎྷཾ, ཀམྨསཧཱཡཾ ཝཱ ཝིཔཱཀསྶ ཨུཔནིསྶཡབྷཱུཏཾ.

༤༩༣. སཀསམཡཝསེན ཙ ཙོདནཱཡ པཡུཛྫམཱནཏཾ དསྶེཏུཾ ‘‘ཏེསཉྩ ལདྡྷིཡཱ’’ཏིཨཱདིམཱཧ.

༤༩༤. པཊིལཱབྷཝསེནཱཏི ཀམྨེ སཏི པཐཝིཡཱདཱིནཾ པཊིལཱབྷོ ཧོཏཱིཏི ཀམྨཾ ཏཾསཾཝཏྟནིཀཾ ནཱམ ཧོཏཱིཏི དསྶེཏི.

པཐཝཱིཀམྨཝིཔཱཀོཏིཀཐཱཝཎྞནཱ ནིཊྛིཏཱ.

༤༩༥. སམྤཡོགལཀྑཎཱབྷཱཝཱཏི ¶ ‘‘ཨེཀཱརམྨཎཱ’’ཏི ཨིམསྶ སམྤཡོགལཀྑཎསྶ ཨབྷཱཝཱཏི ཨདྷིཔྤཱཡོ.

༤༩༦. པརིཡཱཡོ ནཏྠཱིཏི སཀཝཱདིནཱ ཨཏྟནཱ ཝཏྟབྦཏཱཡ པརིཡཱཡོ ནཏྠཱིཏི ཨབྱཱཀཏཱནཾ ཛརཱམརཎསྶ ཝིཔཱཀནིཝཱརཎཏྠཾ ཨབྱཱཀཏཝསེན པུཙྪཱ ན ཀཏཱཏི དསྶེཏི.

༤༩༧. ཨཔརིསུདྡྷཝཎྞཏཱ ཛརཱཡེཝཱཏི ཀེཙི, ཏཾ ཨཀུསལཀམྨཾ ཀམྨསམུཊྛཱནསྶཱཏིཨཱདིནཱ རཱུཔསྶེཝ དུབྦཎྞཏཱདསྶནེན སམམེཝཱཏི.

ཛརཱམརཎཾཝིཔཱཀོཏིཀཐཱཝཎྞནཱ ནིཊྛིཏཱ.

ཨརིཡདྷམྨཝིཔཱཀཀཐཱཝཎྞནཱ ནིཊྛིཏཱ.

༡༠. ཝིཔཱཀོཝིཔཱཀདྷམྨདྷམྨོཏིཀཐཱཝཎྞནཱ

༥༠༡. ཏཔྤཙྩཡཱཔཱིཏི ཡསྶ ཝིཔཱཀསྶ ཝིཔཱཀོ ཨཉྙམཉྙཔཙྩཡོ ཧོཏི ཏཔྤཙྩཡཱཔི ཨཉྙམཉྙཔཙྩཡབྷཱུཏཏོཔཱིཏི ཨདྷིཔྤཱཡོ. སོ ཧཱིཏིཨཱདིནཱ པུརིམཔཊིཉྙཱཡ ཨིམསྶ ཙོདནསྶ ཀཱརཎབྷཱཝཾ དསྶེཏི. ཨཉྙམཉྙཔཙྩཡཱདཱིསུ པཙྩཡཊྛེནཱཏི ཨཱདི-སདྡེན སཧཛཱཏཱདིཔཙྩཡེ སངྒཎྷིཏྭཱ ཏེསུ ཏེན ཏེན པཙྩཡབྷཱཝེནཱཏི དསྶེཏི.

ཝིཔཱཀོཝིཔཱཀདྷམྨདྷམྨོཏིཀཐཱཝཎྞནཱ ནིཊྛིཏཱ.

༥༠༣-༥༠༤. ཝཎྞོཏི ¶ ཝཎྞནིབྷཱ སཎྛཱནཉྩ ཝུཙྩཏཱིཏི ཨཱཧ ‘‘སདིསརཱུཔསཎྛཱནཱ’’ཏི.

༥༠༥. ཨཏིདཱུརསྶ ཨནྟརིཏསྶ པཏྟབྦསྶ དེསསྶ དསྶནཏོ དིབྦཙཀྑུཀོ ཝིཡ. ཨཱཀཱསེན པཐཝནྟརཊྛཱནཱནི བྷིནྡིཏྭཱ གམནཏོ ཨིདྡྷིམཱ ཝིཡ. ན སཧདྷམྨེནཱཏི ཡདི སོ བྷཝཱནཾ ཨནྟརཱ ན སིཡཱ, ན ནཱམ ཨནྟརཱབྷཝོཏི པཊིཀྑེཔེ ཀརཎཾ ནཏྠཱིཏི ཨདྷིཔྤཱཡོ.

༥༠༦. ཏཏྠ ¶ ཛཱཏིཛརཱམརཎཱནི ཙེཝ ཙུཏིཔཊིསནྡྷིཔརམྤརཉྩ ཨནིཙྪནྟོཏི ཨེཏེན ཙུཏིཨནནྟརཾ ཨནྟརཱབྷཝཾ ཁནྡྷཱཏི, ཝཏྟམཱནཱ ཛཱཏཱིཏི, མཱཏུཀུཙྪིམེཝ པཝིཊྛཱ ཨནྟརདྷཱཡམཱནཱ མརཎནྟི ན ཨིཙྪཏི.

༥༠༧. ཡཐཱ ཀཱམབྷཝཱདཱིསུ ཏཏྠ ཏཏྠེཝ པུནཔྤུནཾ ཙཝིཏྭཱ ཨུཔཔཏྟིཝསེན ཙུཏིཔཊིསནྡྷིཔརམྤརཱ ཧོཏི, ཨེཝཾ ཏཾ ཏཏྠ ན ཨིཙྪཏཱིཏི དསྶེཏི.

༥༡༠. ཀཱམབྷཝསྶ ¶ ཀམནཊྛེན ཀཱམབྷཝབྷཱཝོ སབྦེཔི ཀཱམཱཝཙརཱ ཁནྡྷཱདཡོ ཀཱམབྷཝོཏི ཨིམིནཱ ཨདྷིཔྤཱཡེན དཊྛབྦོ. ཨུཔཱདིནྣཀྑནྡྷཱནམེཝ པན ཀཱམབྷཝབྷཱཝོ དྷཱཏུཀཐཱཡཾ དསྶིཏོ, ན ཀམནཊྛེན ཀཱམབྷཝབྷཱཝོ. ‘‘པཉྩིམེ, བྷིཀྑཝེ, ཀཱམགུཎཱ’’ཏི ཝཙནམཏྟཾ ནིསྶཱཡཱཏི པཉྩེཝ ཀཱམཀོཊྛཱསཱ ‘‘ཀཱམོ’’ཏི ཝུཏྟཱཏི ཀཱམདྷཱཏཱུཏིཝཙནཾ ན ཨཉྙསྶ ནཱམནྟི ཨིམིནཱ ཨདྷིཔྤཱཡེནེཝཾ ཝཙནམཏྟཾ ནིསྶཱཡཱཏི ཨཏྠོ.

༥༡༥-༥༡༦. རཱུཔདྷཱཏུཀཐཱཡཾ རཱུཔདྷཱཏཱུཏི ཝཙནཏོ རཱུཔཱིདྷམྨེཧེཝ རཱུཔདྷཱཏུཡཱ བྷཝིཏབྦནྟི ལདྡྷི དཊྛབྦཱ. སུཏྟེསུ ‘‘ཏཡོམེ བྷཝཱ’’ཏིཨཱདིནཱ (དཱི. ནི. ༣.༣༠༥) པརིཙྪིནྣབྷཱུམིཡོཝ བྷཱུམིཔརིཙྪེདོ, ‘‘ཧེཊྛཏོ ཨཝཱིཙིནིརཡཾ པརིཡནྟཾ ཀརིཏྭཱ’’ཏིཨཱདིཀམྨཔརིཙྪིནྡནམྤི (ཝིབྷ. ༡༨༢) ཝདནྟི.

༥༡༧-༥༡༨. ཨིམིནཱཝུཔཱཡེནཱཏི ¶ ཡཐཱ ཧི པུརིམཀཐཱཡཾ རཱུཔིནོ དྷམྨཱ ཨཝིསེསེན ‘‘རཱུཔདྷཱཏཱུ’’ཏི ཝུཏྟཱ, ཨེཝམིདྷཱཔི ཨརཱུཔིནོ དྷམྨཱ ཨཝིསེསེན ‘‘ཨརཱུཔདྷཱཏཱུ’’ཏི ཝུཏྟཱཏི ཏཏྠ ཝུཏྟནཡོ ཨིདྷཱཔི སམཱནོཏི ཨདྷིཔྤཱཡོ.

༥༡༩. གྷཱནནིམིཏྟཱནིཔཱིཏི ¶ ཨིདཾ གྷཱནཱདིནིམིཏྟཱནིཔཱིཏི ཝཏྟབྦཾ. ནིམིཏྟནྟི གྷཱནཱདཱིནཾ ཨོཀཱསབྷཱཝེན ཨུཔལཀྑིཏཾ ཏཐཱཝིདྷསཎྛཱནཾ རཱུཔསམུདཱཡམཱཧ.

རཱུཔདྷཱཏུཡཱཨཱཡཏནཀཐཱཝཎྞནཱ ནིཊྛིཏཱ.

༥༢༤-༥༢༦. སུཁུམརཱུཔཾ ཨཏྠི, ཡཏོ ནིསྶརཎཾ ཏཾ ཨཱརུཔྤནྟི ཨདྷིཔྤཱཡོ.

༥༢༧-༥༣༧. པཀཔྤཡམཱནཱཏི ཨཱཡཱུཧམཱནཱ, སམྤཡུཏྟེསུ ཨདྷིཀཾ བྱཱཔཱརཾ ཀུརུམཱནཱཏི ཨཏྠོ. པུརིམཝཱརེཏི ‘‘ཡཾཀིཉྩི ཨཀུསལེན ཙིཏྟེན སམུཊྛིཏཾ རཱུཔཾ, སབྦཾ ཏཾ ཨཀུསལ’’ནྟི ཨིམཾ པཉྷཾ ཝདཏི.

རཱུཔཾཀམྨནྟིཀཐཱཝཎྞནཱ ནིཊྛིཏཱ.

༥༤༠. ཨརཱུཔཛཱིཝིཏིནྡྲིཡནྟིཔཉྷེ ¶ ‘‘ཨཏྠི ཨརཱུཔཱིནཾ དྷམྨཱནཾ ཨཱཡཱུ’’ཏིཨཱདིཀཾ པཉྷཾ ཨནྟཾ ¶ གཧེཏྭཱ ཝདཏི. ཨརཱུཔདྷམྨཱནཾ ཙིཏྟཝིཔྤཡུཏྟཾ ཛཱིཝིཏིནྡྲིཡསནྟཱནཾ ནཱམ ཨཏྠཱིཏི ཨིཙྪཏཱིཏི ཨེཏྠ རཱུཔཱརཱུཔདྷམྨཱནཾ ཏཾ ཨིཙྪནྟོ ཨརཱུཔདྷམྨཱནཾ ཨིཙྪཏཱིཏི ཝཏྟུཾ ཡུཏྟོཏི ‘‘ཨརཱུཔདྷམྨཱན’’ནྟི ཝུཏྟནྟི དཊྛབྦཾ.

༥༤༡. སཏྟསནྟཱནེ རཱུཔིནོ ཝཱ དྷམྨཱ ཧོནྟཱུཏིཨཱདིནཱཔི ཏམེཝ ཛཱིཝིཏིནྡྲིཡསནྟཱནཾ ཝདཏཱིཏི ཝེདིཏབྦཾ.

༥༤༢. པུབྦཱཔརབྷཱགཾ སནྡྷཱཡཱཏི སམཱཔཏྟིཡཱ ཨཱསནྣབྷཱཝཏོ ཏདཱཔི སམཱཔནྣོཡེཝཱཏི ཨདྷིཔྤཱཡོ.

༥༤༤-༥༤༥. དྭེ ཛཱིཝིཏིནྡྲིཡཱནཱིཏི ‘‘པུཙྪཱ སཀཝཱདིསྶ, པཊིཉྙཱ ཨིཏརསྶཱ’’ཏི པུརིམཔཱཋོ. ‘‘པུཙྪཱ པརཝཱདིསྶ, པཊིཉྙཱ སཀཝཱདིསྶཱ’’ཏི པཙྪིམཔཱཋོ, སོ ཡུཏྟོ.

ཛཱིཝིཏིནྡྲིཡཀཐཱཝཎྞནཱ ནིཊྛིཏཱ.

༥༤༦. སེསནྟི པཱཎཱཏིཔཱཏཱདིཀམྨསྶ ཧེཏཱུཏི ཨིཏོ པུརིམཾ སོཏཱཔནྣཱདིཨནུཡོགཾ ཝདཏི. ཧནྡ ཧཱིཏི པརཝཱདིསྶེཝེཏཾ སམྤཊིཙྪནཝཙནནྟི སམྤཊིཙྪཱཔེཏུནྟི ན སཀྐཱ ཝཏྟུཾ, ‘‘ཀཏམསྶ ཀམྨསྶ ཧེཏཱུ’’ཏི པན སཀཝཱདཱི ཏཾ སམྤཊིཙྪཱཔེཏུཾ ཝདཏཱིཏི ཡུཛྫེཡྻ, སམྤཊིཙྪཱཔེཏུནྟི པན པཀྑཾ པཊིཛཱནཱཔེཏུནྟི ཨཏྠཾ ཨགྒཧེཏྭཱ པརཝཱདཱི ཨཏྟནོ ལདྡྷིཾ སཀཝཱདིཾ གཱཧཱཔེཏུནྟི ཨཏྠོ དཊྛབྦོ.

༥༤༧. ཝིབྷཱགདསྶནཏྠནྟི ¶ ¶ ཝིསབྷཱགདསྶནཏྠནྟི ཝུཏྟཾ ཧོཏི. ནཱནཱཙིཏྟཝསེན པཊིཛཱནནྟསྶ ཨདྷིཔྤཱཡམདྡནཾ ཀཐཾ ཡུཏྟནྟི ཝིཙཱརེཏབྦཾ. ཨཱརམྨཎཝསེན ཧི དསྶནདྭཡཾ སཧ ཝདནྟསྶ ཏདབྷཱཝདསྶནཏྠཾ ཨིདཾ ཨཱརདྡྷནྟི ཡུཏྟནྟི. ཨནུསྶཝཝསེནཱཏིཨཱདིནཱ ན ཀེཝལཾ ཨནིཙྩཱདིཨཱརམྨཎམེཝ ཉཱཎཾ ཝིཔསྶནཱ, ཨཐ ཁོ ‘‘ཨནུཔྤཱདོ ཁེམ’’ནྟིཨཱདིཀཾ ནིབྦཱནེ ཨཱནིསཾསདསྶནཉྩཱཏི དཱིཔེཏི.

ཨཱནིསཾསདསྶཱཝཱིཀཐཱཝཎྞནཱ ནིཊྛིཏཱ.

༥༤༩. སུཏྟབྷཡེནཱཏི ‘‘པཱརིམཾ ཏཱིརཾ ཁེམཾ ཨཔྤཊིབྷཡནྟི ཁོ, བྷིཀྑཝེ, ནིབྦཱནསྶེཏཾ ཨདྷིཝཙན’’ནྟི (སཾ. ནི. ༤.༢༣༨) ཨསཾཡོཛནིཡཱདིབྷཱཝཾ སནྡྷཱཡ ཁེམཱདིབྷཱཝོ ཝུཏྟོཏི ཨེཝམཱདིནཱ སུཏྟབྷཡེནཱཏི དཊྛབྦཾ.

༥༥༢-༥༥༣. ཨཱརམྨཎཏྠསྶ ཝིབྷཱགདསྶནཏྠནྟི པཙྩཡཊྛོ ཨོལུབྦྷཊྛོཏི ཨེཝཾ ཝིབྷཱགེ ཝིཛྫམཱནེ ¶ པཙྩཡོལུབྦྷཱནཾ ཝིསེསཱབྷཱཝཾ ཀཔྤེཏྭཱ ཨཀཔྤེཏྭཱ ཝཱ སཔྤཙྩཡཏྟཱ ཨོལུབྦྷཱརམྨཎེནཔི སཱརམྨཎམེཝཱཏི ན གཧེཏབྦནྟི དསྶནཏྠནྟི ཝུཏྟཾ ཧོཏི.

རཱུཔཾསཱརམྨཎནྟིཀཐཱཝཎྞནཱ ནིཊྛིཏཱ.

༥༥༤-༥༥༦. ཨཔྤཧཱིནཏྟཱཝ ¶ ཨཏྠཱིཏི ཝུཙྩཏི, ན པན ཝིཛྫམཱནཏྟཱཏི ཨདྷིཔྤཱཡོ.

ཨནུསཡཱཨནཱརམྨཎཱཏིཀཐཱཝཎྞནཱ ནིཊྛིཏཱ.

༥༥༧-༨. ཏསྶ ཉཱཎསྶཱཏི མགྒཉཱཎསྶཱཏི ཝདནྟི.

ཉཱཎཾཨནཱརམྨཎནྟིཀཐཱཝཎྞནཱ ནིཊྛིཏཱ.

༥༦༢. ཨཝིསེསེནེཝཱཏི ཨཱརམྨཎསམྤཡོགེཧི དྭཱིཧིཔཱིཏི ཨཏྠོ.

ཝིཏཀྐཱནུཔཏིཏཀཐཱཝཎྞནཱ ནིཊྛིཏཱ.

༥༦༣. སབྦསོཏི ¶ སཝིཏཀྐཙིཏྟེསུ སབྦཏྠ སབྦདཱ ཝཱཏི ཨིམམཏྠཾ དསྶེནྟོ ཨཱཧ ‘‘ཨནྟམསོ མནོདྷཱཏུཔཝཏྟིཀཱལེཔཱི’’ཏི. ཝིཏཀྐཝིཔྥཱརམཏྟནྟི ཝིཏཀྐསྶ པཝཏྟིམཏྟནྟི ཨདྷིཔྤཱཡོ.

ཝིཏཀྐཝིཔྥཱརསདྡཀཐཱཝཎྞནཱ ནིཊྛིཏཱ.

༥༦༥. ཨནཱཔཏྟཱིཏི ཝིསཾཝཱདནཱདྷིཔྤཱཡསྶ ཨབྷཱཝཱ མུསཱཝཱདོ ན ཧོཏཱིཏི ཝུཏྟཾ.

ནཡཐཱཙིཏྟསྶཝཱཙཱཏིཀཐཱཝཎྞནཱ ནིཊྛིཏཱ.

༡༡. ཨཏཱིཏཱནཱགཏསམནྣཱགཏཀཐཱཝཎྞནཱ

༥༦༨-༥༧༠. ཏཱསཱུཏི ¶ ཏཱསུ པཉྙཏྟཱིསུ. སམནྣཱགམཔཉྙཏྟིཡཱ སམནྣཱགཏོཏི ཝུཙྩཏི, པཊིལཱབྷཔཉྙཏྟིཡཱ ལཱབྷཱིཏི ཝུཙྩཏི. སམནྣཱགཏོཏི ཝུཙྩཏི ཨཡཾ སམནྣཱགམཔཉྙཏྟི ནཱམ. ལཱབྷཱིཏི ཝུཙྩཏི ཨཡཾ པཊིལཱབྷཔཉྙཏྟི ནཱམཱཏི ཝཱ ཨདྷིཔྤཱཡོ ཡོཛེཏབྦོ.

ཨཏཱིཏཱནཱགཏསམནྣཱགཏཀཐཱཝཎྞནཱ ནིཊྛིཏཱ.

༥༧༡-༢. བྷཝངྒཙིཏྟསྶ ¶ བྷངྒཀྑཎེན སཧེཝཱཏིཨཱདིཾ ཝདནྟེན ཀིརིཡཁནྡྷཱནཾ བྷངྒཀྑཎེན སཧ ཨུཔཔཏྟེསིཡཱ ཁནྡྷཱ ཨུཔྤཛྫནྟཱིཏི ཙ ཝཏྟབྦཾ, ཏཐཱ ཨུཔཔཏྟེསིཡཱནཾ བྷངྒཀྑཎེན སཧ ཨུཔཔཏྟེསིཡཱ, ཀིརིཡཱནཾ བྷངྒཀྑཎེན སཧ ཀིརིཡཱཏི. ཙཀྑུཝིཉྙཱཎཱདཱིནཾ ཀིརིཡཱཙཏུཀྑནྡྷགྒཧཎེན གཧཎཾ. ཉཱཎནྟི མགྒཉཱཎཾ ཡུཏྟཾ.

༣. པཉྩཝིཉྙཱཎསམངྒིསྶམགྒཀཐཱཝཎྞནཱ

༥༧༦. ཏཾ ལཀྑཎནྟི ‘‘ཚ ཝིཉྙཱཎཱ’’ཏི ཨཝཏྭཱ ‘‘པཉྩཝིཉྙཱཎཱ ཨུཔྤནྣཝཏྠུཀཱ’’ཏིཨཱདིནཱ ཝུཏྟཾ ལཀྑཎཾ. ‘‘ཚ ཝིཉྙཱཎཱ’’ཏི ཨཝཙནཾ པནེཏྠ ‘‘ནོ ཙ ཝཏ རེ ཝཏྟབྦེ’’ཏིཨཱདིཝཙནསྶ ཀཱརཎནྟི ཨདྷིཔྤེཏཾ.

༥༧༧. ལོཀིཡོཏི ཝིཔསྶནཱམགྒམཱཧ. ཡཾ ཏཏྠ ཨནིམིཏྟནྟི ཙཀྑུཝིཉྙཱཎསམངྒིཀྑཎེ ཡཾ ཨནིམིཏྟཾ གཎྷནྟོ ན ནིམིཏྟགྒཱཧཱིཏི ཝུཏྟོ, ཏདེཝ སུཉྙཏནྟི ཨདྷིཔྤཱཡོ.

པཉྩཝིཉྙཱཎསམངྒིསྶམགྒཀཐཱཝཎྞནཱ ནིཊྛིཏཱ.

༥. པཉྩཝིཉྙཱཎཱསཱབྷོགཱཏིཀཐཱཝཎྞནཱ

༥༨༤-༥༨༦. ཀུསལཱཀུསལཝསེན ¶ ¶ ནམཱིཏི ཀུསལཱཀུསལབྷཱཝེན ནམིཏྭཱ པཝཏྟཱིཏི ཝུཏྟཾ ཧོཏི. སཱ པན ཨཱརམྨཎཔྤཀཱརགྒཧཎཾ ཡེན ཨལོབྷཱདཱིཧི ལོབྷཱདཱིཧི ཙ སམྤཡོགོ ཧོཏཱིཏི དཊྛབྦོ ‘‘སུཁམིཏི ཙེཏསོ ཨབྷཱགོ’’ཏིཨཱདཱིསུ ཝིཡ.

པཉྩཝིཉྙཱཎཱསཱབྷོགཱཏིཀཐཱཝཎྞནཱ ནིཊྛིཏཱ.

༥༨༧-༥༨༩. ཁཎབྷངྒནིརོདྷཾ, ན ཨཔྤཝཏྟིནིརོདྷཾ, སཱིལཝཱིཏིཀྐམནིརོདྷཾ ཝཱ. ཝཱིཏིཀྐམཾ ཝིཡཱཏི ཡཐཱ ཝཱིཏིཀྐམེ ཀཏེ དུསྶཱིལོ, ཨེཝཾ ནིརུདྡྷེཔཱིཏི ཨེཝཾ ཝཱིཏིཀྐམེན ནིནྣཱནཾ སལླཀྑེནྟོཏི ཨཏྠོ.

དྭཱིཧིསཱིལེཧཱིཏིཀཐཱཝཎྞནཱ ནིཊྛིཏཱ.

༥༩༠-༥༩༤. ཡེན སོ སཱིལཝཱཡེཝ ནཱམ ཧོཏཱིཏི ཡེན ཙིཏྟཝིཔྤཡུཏྟེན ཋིཏེན ཨུཔཙཡེན ཨཀུསལཱབྱཱཀཏཙིཏྟསམངྒཱི སཱིལཝཱཡེཝ ནཱམ ཧོཏཱིཏི ཨདྷིཔྤཱཡོ. སེསམེཏྠ ‘‘དཱནཾ ཨཙེཏསིཀ’’ནྟི ཀཐཱཡཾ ཝུཏྟནཡེནེཝ ཝེདིཏབྦནྟི ཝུཏྟཾ, སཱ པན ཀཐཱ མགྒིཏབྦཱ.

སཱིལཾཨཙེཏསིཀནྟིཀཐཱཝཎྞནཱ ནིཊྛིཏཱ.

༥༩༨-༦༠༠. སམཱདཱནཧེཏུཀཐཱཡཾ \༡༠༠ པུརིམཀཐཱསདིསམེཝཱཏི པརིབྷོགཀཐེཀདེསསདིསཏཱ དཊྛབྦཱ.

༡༡. ཨཝིཉྙཏྟིདུསྶཱིལྱནྟིཀཐཱཝཎྞནཱ

༦༠༣-༦༠༤. ཨཱཎཏྟིཡཱ ¶ ཙ པཱཎཱཏིཔཱཏཱདཱིསུ ཨངྒཔཱརིཔཱུརིནྟི ཨེཀསྨིཾ དིཝསེ ཨཱཎཏྟསྶ ཨཔརསྨིཾ དིཝསེ པཱཎཱཏིཔཱཏཾ ཀརོནྟསྶ ཏདཱ སཱ ཨཱཎཏྟི ཝིཉྙཏྟིཾ ཝིནཱཡེཝ ཨངྒཾ ཧོཏཱིཏི ཨཝིཉྙཏྟི དུསྶཱིལྱནྟི ཨདྷིཔྤཱཡོ.

ཨཝིཉྙཏྟིདུསྶཱིལྱནྟིཀཐཱཝཎྞནཱ ནིཊྛིཏཱ.

༦༡༤-༦༡༥. ཉཱཎཀཐཱཡཾ སེཡྻཐཱཔི མཧཱསངྒྷིཀཱནནྟི པུབྦེ ཉཱཎཾཨནཱརམྨཎནྟིཀཐཱཡཾ (ཀཐཱ. ༥༥༧ ཨཱདཡོ) ཝུཏྟེཧི ཨནྡྷཀེཧི ཨཉྙེ ཨིདྷ མཧཱསངྒྷིཀཱ བྷཝེཡྻུཾ. ཡདི ཨཉྙཱཎེ ཝིགཏེཏིཨཱདིནཱ རཱགཝིགམོ ཝིཡ ཝཱིཏརཱགཔཉྙཏྟིཡཱ ཨཉྙཱཎཝིགམོ ཉཱཎཱིཔཉྙཏྟིཡཱ ཀཱརཎནྟི དསྶེཏི. ན ཧི ཉཱཎཾ ཨསྶ ཨཏྠཱིཏི ཉཱཎཱི, ཨཐ ཁོ ཨཉྙཱཎཱིཔཊིཔཀྑཏོ ཉཱཎཱིཏི ¶ . ཡསྨཱ ཉཱཎཔཊིལཱབྷེནཱཏི ཨེཏྠ ཙ ཉཱཎཔཊིལཱབྷེན ཨཉྙཱཎསྶ ཝིགཏཏྟཱ སོ ཉཱཎཱིཏི ཝཏྟབྦཏཾ ཨཱཔཛྫཏཱིཏི ཨཏྠོ དཊྛབྦོ.

༦༡༨-༦༢༠. ཨིཏརོ པན སཀསམཡེཏི པརཝཱདཱི ཨཏྟནོ སམཡེཏི ཨཏྠོ.

ཨིདཾདུཀྑནྟིཀཐཱཝཎྞནཱ ནིཊྛིཏཱ.

༦༢༡-༦༢༤. ཀམྨསྶ ¶ ཝིཔཱཀཝསེན ཝཱཏི ནིརཡཾཝ སནྡྷཱཡ ཝུཏྟཾ. ཏཏྠ ཧི ཨབྦུདཱདིཔརིཙྪེདོ ཏཱདིསསྶ ཀམྨཝིཔཱཀསྶ ཝསེན ཝུཏྟོ. ཝསྶགཎནཱཡ ཝཱཏི མནུསྶེ ཙཱཏུམཧཱརཱཛིཀཱདིདེཝེ ཙ སནྡྷཱཡ. ཏེསཉྷི ཨསངྑྱེཡམྤི ཀཱལཾ ཝིཔཱཀདཱནསམཏྠཾ ཀམྨཾ ཝསྶགཎནཱཡ པརིཙྪིཛྫཏཱིཏི.

༦༢༥-༦༢༦. སམཱདྷཱནཊྛེནཱཏི སམཾ ཋཔནཊྛེན སམཱདྷི ནཱམ ཙེཏསིཀནྟརཾ ཨཏྠཱིཏི ཨགྒཧེཏྭཱཏི ¶ ཨཏྠོ. ཚལེནཱཏི ཨེཀཙིཏྟཀྑཎིཀཏྟེ ཙཀྑུཝིཉྙཱཎསྶ ཙ ཛྷཱནཙིཏྟསྶ ཙ ན ཀོཙི ཝིསེསོཏི ཨེཏེན སཱམཉྙམཏྟེནཱཏི ཨདྷིཔྤཱཡོ.

༦༢༧. ཨནནྟརཔཙྩཡཏཉྩེཝཱཏི ཨཝིཛྫཱ སངྑཱརཱནཾ ཨནནྟརཔཙྩཡོ ཨཝིཛྫཱཡ ཡཱ ཋིཏཏཱ ཏཏོ ཧོཏི, ཏཱཡ ཋིཏཏཱཡ ཨནནྟརཔཙྩཡབྷཱཝསངྑཱཏཱ ཋིཏཏཱ ཧོཏཱིཏི ཨདྷིཔྤཱཡོ. ཨནནྟརཔཙྩཡགྒཧཎཉྩེཏྠ ཨཉྙམཉྙཔཙྩཡབྷཱཝརཧིཏསྶ ཨེཀསྶ པཙྩཡསྶ དསྶནཏྠནྟི དཊྛབྦཾ. ཏེན ཧི སབྦོ ཏཱདིསོ པཙྩཡོ དསྶིཏོ ཧོཏཱིཏི. ཨཉྙམཉྙཔཙྩཡཏཉྩཱཏི ཨཝིཛྫཱ སངྑཱརཱནཾ པཙྩཡོ, སངྑཱརཱ ཙ ཨཝིཛྫཱཡ. ཏཏྠ ཨཝིཛྫཱཡ སངྑཱརཱནཾ པཙྩཡབྷཱཝསངྑཱཏཱཡ ཋིཏཏཱཡ སངྑཱརཱནཾ ཨཝིཛྫཱཡ པཙྩཡབྷཱཝསངྑཱཏཱ ཋིཏཏཱ ཧོཏི, ཏསྶཱ ཙ ཨིཏརཱཏི ཨདྷིཔྤཱཡོ.

༦༢༨. རཱུཔཱདཡོ ¶ ཝིཡ པརིནིཔྥནྣཱཏི རཱུཔཱདཱིཧི སཧ ཨུཔྤཛྫིཏྭཱ ནིརུཛ྄ཛྷནཏོ པརིནིཔྥནྣཱཏི ཨཏྠོ. ཨནིཙྩཏཱཝིབྷཱགཱནུཡུཉྫནཝསེནཱཏི ཏཱིསུ དཎྜེསུ དཎྜཝོཧཱརོ ཝིཡ ཏཱིསུ ལཀྑཎེསུ ཨནིཙྩཏཱཝོཧཱརོ ཧོཏཱིཏི ཏསྶཱ ཝིབྷཱགཱནུཡུཉྫནཝསེནཱཏི ཝདནྟི.

༦༣༠-༦༣༢. ཝིཔཱཀདྭཱརནྟི ¶ བྷཝངྒམནཾ ཝདཏི. ཀམྨདྭཱརནྟི ཀུསལཱཀུསལམནཾ.

སཾཝརོཀམྨནྟིཀཐཱཝཎྞནཱ ནིཊྛིཏཱ.

༦༣༣-༦༣༥. ཨབྱཱཀཏཾ སནྡྷཱཡ པཊིཀྑེཔོཏི སཀསམཡལཀྑཎེན པཊིཀྑེཔོ ཀཏོཏི ཝདནྟི. ཨཝིཔཱཀཙེཏནཱཡ སརཱུཔེན དསྶིཏཱཡ སཝིཔཱཀཱཔི དསྶིཏཱཡེཝ ནཱམ ཧོཏཱིཏི མཉྙམཱནོ ཨཱཧ ‘‘སཝིཔཱཀཱཝིཔཱཀཙེཏནཾ སརཱུཔེན དསྶེཏུ’’ནྟི.

༦༣༦-༦༣༧. ཀམྨསམུཊྛཱནཱ ཨརཱུཔདྷམྨཱཝཱཏིཨཱདིནཱ ཀམྨསམུཊྛཱནེསུ ཙཀྑཱདཱིསུཔི ཝིཔཱཀཝོཧཱརོ ནཏྠི, ཀོ པན ཝཱདོ ཨཀམྨསམུཊྛཱནེ སདྡེཏི དསྶེཏི.

སདྡོཝིཔཱཀོཏིཀཐཱཝཎྞནཱ ནིཊྛིཏཱ.

༦༣༨-༦༤༠. ཏསྨཱ ¶ ¶ ཝིཔཱཀོཏི ཨཝིསེསེན སལཱ༹ཡཏནཾ ཝིཔཱཀོཏི ཡེསཾ ལདྡྷཱིཏི ཝུཏྟཾ ཧོཏི.

༦༤༡-༦༤༥. སཏྟཀྑཏྟུཔརམཏཱནིཡཏོཏི སཏྟཀྑཏྟུཔརམཏཱཡ ནིཡཏོ. ཨིམཾ ཝིབྷཱགནྟི ཨིམཾ ཝིསེསཾ. ཏྭཾ པནསྶ ནིཡཱམཾ ཨིཙྪསཱིཏི ཨཝིནིཔཱཏདྷམྨཏཱཕལཔྤཏྟཱིཧི ཨཉྙསྨིཾ སཏྟཀྑཏྟུཔརམབྷཱཝེ ཙ ནིཡཱམཾ ཨིཙྪསཱིཏི ཨཏྠོ.

ཨཱནནྟརིཡཱབྷཱཝནྟི ཡེན སོ དྷམྨཱབྷིསམཡེན བྷབྦོ ནཱམ ཧོཏི, ཏསྶ ཨཱནནྟརིཡཀམྨསྶ ཨབྷཱཝནྟི ཨཏྠོ, པུགྒལསྶ ཝཱ ཨཱནནྟརིཡབྷཱཝསྶ ཨབྷཱཝནྟི. ཀིཾ པན སོ ཨནྟརཱདྷམྨཾ ཨབྷིསམིསྶཏཱིཏི? ཀེཙི ཝདནྟི ‘‘སཏྟཀྑཏྟུཔརམོ སཏྟམཾ བྷཝཾ ནཱཏིཀྐམཏི, ཨོརཏོ པན ནཏྠི པཊིསེདྷོ’’ཏི. ཨཔརེ ‘‘ཡོ བྷགཝཏཱ ཉཱཎབལེན བྱཱཀཏོ, ཏསྶ ཨནྟརཱ ཨབྷིསམཡོ ནཱམ ནཏྠི, ཏཐཱཔི བྷཝནིཡཱམསྶ ཀསྶཙི ཨབྷཱཝཱ བྷབྦོཏི ཝུཙྩཏི. ཡཐཱ ཀུསལཱ ཨབྷིཉྙཱཙེཏནཱ ཀདཱཙི ཝིཔཱཀཾ ཨདདམཱནཱཔི སཏི ཀཱརཎེ དཱཏུཾ བྷབྦཏཱཡ ཝིཔཱཀདྷམྨདྷམྨཱ ནཱམ, ཏཐཱ ཨིནྡྲིཡཱནཾ མུདུཏཱཡ སཏྟཀྑཏྟུཔརམོ, ན ནིཡཱམསབྦྷཱཝཱ ནཱཔི བྷགཝཏཱ བྱཱཀཏཏྟཱ, ན ཙ ཨིནྡྲིཡམུདུཏཱ ཨབྷབྦཏཱཀརོ དྷམྨོཏི ན སོ ཨབྷབྦོ ནཱམ. ཨབྷབྦཏཱཀརདྷམྨཱབྷཱཝཏོ ཙེཏྠ ཨབྷབྦཏཱ པཊིསེདྷིཏཱ, ན པན ཨནྟརཱ ཨབྷིསམེཏུཾ བྷབྦཏཱ ཝུཏྟཱ. ཡདི ཙ སཏྟཀྑཏྟུཔརམོ ཨནྟརཱ ཨབྷིསམེཡྻ, ཀོལཾཀོལོ སིཡཱ’’ཏི. ཝིསེསཾ པན ཨཀཏྭཱ བྷབྦསབྷཱཝཏཱཡ བྷབྦོཏི ཝཏྟུཾ ཡུཏྟཾ. ན བྷཝནིཡཱམཀཾ ཀིཉྩཱིཏི ཨེཏྠ པསྶིཏྭཱཏི ཝཙནསེསོ, བྱཱཀརོཏཱིཏི ཝཱ སམྦནྡྷོ.

སཏྟཀྑཏྟུཔརམཀཐཱཝཎྞནཱ ནིཊྛིཏཱ.

༦༥༤-༦༥༧. ཀཔྤཊྛཀཐཱཡཾ ¶ ¶ ཧེཊྛཱཏི ཨིདྡྷིབལཀཐཱཡཾ.

༦༦༠-༦༦༢. ཨནནྟརཱཔཡུཏྟཀཐཱཡཾ ཨཱནནྟརིཡཾ པཡུཏྟཾ ཨེཏེནཱཏི ཨནནྟརཱཔཡུཏྟོཏི ཨཱནནྟརིཡེ ཨནནྟརཱསདྡཾ ཨཱརོཔེཏྭཱ ཨཊྛཀཐཱཡཾ ཨཏྠོ ཝུཏྟོཏི དཊྛབྦོ. ‘‘ཨནནྟརཔཡུཏྟོ’’ཏིཔི པཱལི༹ དིསྶཏི.

ཨནནྟརཱཔཡུཏྟཀཐཱཝཎྞནཱ ནིཊྛིཏཱ.

༦༦༣-༦༦༤. སེསཱ ཏེབྷཱུམཀདྷམྨཱ ཨནིཡཏཱ ནཱམཱཏི ཨེཏྠ ཨཔྤཏྟནིཡཱམཱནཾ དྷམྨེ སནྡྷཱཡ ‘‘ཏེབྷཱུམཀདྷམྨཱ’’ཏི ཨཱཧ. ཨེཏེཝ ཧི སནྡྷཱཡ ‘‘ཏེཧི སམནྣཱགཏོཔི ཨནིཡཏོཡེཝཱ’’ཏི ཝུཏྟནྟི. ཨིཏི ཨིམཾ ཝོཧཱརམཏྟཾ གཧེཏྭཱ ‘‘ནིཡཏོ བོདྷིསཏྟོ པཙྪིམབྷཝིཀོ བྷབྦོ དྷམྨཾ ཨབྷིསམེཏུཾ ཨོཀྐམིཏུ’’ནྟི ཨདྷིཔྤཱཡེན ‘‘ནིཡཱམཾ ཨོཀྐམཏཱི’’ཏི ཡེསཾ ལདྡྷཱིཏི ཨཏྠཡོཛནཱ. ཨེཝཾ པན ཝོཧཱརམཏྟསབྦྷཱཝོ ‘‘ནིཡཏོ’’ཏི ཝཙནསྶ, དྷམྨཾ ཨབྷིསམེཏུཾ བྷབྦཏཱ ཙ ‘‘ནིཡཱམཾ ཨོཀྐམཏཱི’’ཏི ¶ ཝཙནསྶ ཀཱརཎབྷཱཝེན ཝུཏྟཱ ཧོཏི, བྷབྦཏཱཡེཝ པན ཨུབྷཡསྶཔི ཀཱརཎནྟི ཡུཏྟཾ. ཨཉྙེནཱཏི ཡདི ནིཡཏོ ནིཡཱམཾ ཨོཀྐམེཡྻ, མིཙྪཏྟནིཡཏོ སམྨཏྟནིཡཱམཾ, སམྨཏྟནིཡཏོ ཝཱ མིཙྪཏྟནིཡཱམཾ ཨོཀྐམེཡྻ, ན ཙ ཏཾ ཨཏྠཱིཏི དསྶནཏྠནྟི ཨཏྠོ.

ནིཡཏསྶནིཡཱམཀཐཱཝཎྞནཱ ནིཊྛིཏཱ.

༦༧༤. ཨསཱཏརཱགཀཐཱཡཾ ¶ ‘‘ཨཧོ ཝཏ མེ ཨེཏདེཝ བྷཝེཡྻཱ’’ཏི རཛྫནཱཏི ཨིམིནཱ ཨེཝཾ པཝཏྟམཱནོཡེཝ ལོབྷོ ཨིདྷ ‘‘རཱགོ’’ཏི ཨདྷིཔྤེཏོ, ན ཨཉྙཐཱཏི དསྶེཏི.

༦༧༥. སུཏྟེ པནཱཏི ཨེཏསྶ ‘‘ཨདྷིཔྤཱཡོ’’ཏི ཨེཏེན སམྦནྡྷོ.

༦༧༦-༦༨༠. ཡསྨཱ དྷམྨཏཎྷཱཏི ཝུཏྟཱ, ཏསྨཱ ཨབྱཱཀཏཱཏི ཀུསལེསུ དྷམྨེསུ ལོཀུཏྟརེསུ ཝཱ སབྦེསུ ཏཎྷཱ ‘‘དྷམྨཏཎྷཱ’’ཏི གཧེཏྭཱ ཡསྨཱ སཱ ཏཎྷཱ, ཏསྨཱ ཀུསལཱ ན ཧོཏི, ཡསྨཱ པན དྷམྨེ པཝཏྟཱ, ཏསྨཱ ཨཀུསལཱ ན ཧོཏཱིཏི ཨབྱཱཀཏཱཏི ལདྡྷཱིཏི དསྶེཏི. ཏཱིཧི ཀོཊྛཱསེཧི ཚཔི ཏཎྷཱ སཾཁིཔིཏྭཱ དསྶིཏཱ, ཏསྨཱ དྷམྨཏཎྷཱཔི ཀཱམཏཎྷཱདིབྷཱཝཏོ ན ཨབྱཱཀཏཱཏི ཨདྷིཔྤཱཡོ.

དྷམྨཏཎྷཱཨབྱཱཀཏཱཏིཀཐཱཝཎྞནཱ ནིཊྛིཏཱ.

༡. ཀུསལཱཀུསལཔཊིསནྡཧནཀཐཱཝཎྞནཱ

༦༨༦-༦༩༠. ཏནྟི ¶ ཀུསལཾ ཨཀུསལཉྩཱཏི ཝིསུཾ སམྦནྡྷོ དཊྛབྦོ. ཏཾ ཨུབྷཡནྟི ཝཱ ཝཙནསེསོ. པཊིསནྡཧཏཱིཏི གྷཊེཏི, ཨནནྟརཾ ཨུཔྤཱདེཏཱིཏི ཝུཏྟཾ ཧོཏི.

ཀུསལཱཀུསལཔཊིསནྡཧནཀཐཱཝཎྞནཱ ནིཊྛིཏཱ.

༦༩༡-༦༩༢. ཀེཙི ¶ ཝཱདིནོ ‘‘ཨངྐུརེ སཱཁཱཝིཊཔཱདིསམྤནྣཱནཾ རུཀྑཱདཱིནཾ བཱིཛམཏྟཾ ཨཱཝིབྷཱཝཾ གཙྪཏཱི’’ཏི ཝདནྟཱིཏི ཏེསཾ ཝཱདཾ ནིདསྶནཾ ཀརོནྟོ ཨཱཧ ‘‘སམྤནྣསཱཁཱཝིཊཔཱན’’ནྟིཨཱདི.

སལཱ༹ཡཏནུཔྤཏྟིཀཐཱཝཎྞནཱ ནིཊྛིཏཱ.

༦༩༣-༦༩༧. ཙཀྑུཉྩ པཊིཙྩ རཱུཔེ ཙ ཨུཔྤཛྫཏི སོཏཝིཉྙཱཎནྟི ཨེཏྠ ‘‘ལདྡྷིཝསེན པཊིཛཱནཱཏཱི’’ཏི ཨནནྟརུཔྤཏྟིཾ སལླཀྑེནྟོཔི ན སོ ཙཀྑུམྷི རཱུཔཱརམྨཎཾ སོཏཝིཉྙཱཎཾ ཨིཙྪཏི, ཨཐ ཁོ སོཏམྷིཡེཝ སདྡཱརམྨཎནྟི ཨནནྟརཱུཔལདྡྷིཝསེན ཨཱཔནྣཏྟཱ ‘‘པཊིཛཱནཱཏཱི’’ཏི ཡུཏྟཾ ཝཏྟུཾ.

༦༩༨-༦༩༩. སམྨཱཝཱཙཱདི ¶ རཱུཔཾ མགྒོ ཙཱཏི ཨིཙྪནྟོ ‘‘ཨརིཡརཱུཔ’’ནྟིཔི ཝདཏི.

༧༠༠-༧༠༡. ‘‘སརཱགོཏིཨཱདི པན ཏསྨིཾ སམཡེ རཱགསྶ ཨཔྤཧཱིནཏྟཱ སརཱགོཏི ཝཏྟབྦཏ’’ནྟི པུརིམཔཱཋོ, ‘‘སཱནུསཡོཏིཨཱདི པན ཏསྨིཾ སམཡེ ཨནུསཡསྶ ཨཔྤཧཱིནཏྟཱ སཱནུསཡོཏི ཝཏྟབྦཏ’’ནྟི པཙྪིམཔཱཋོ, སོ ཡུཏྟོ. སོ ཧི ན ཨནུསཡཔརིཡུཊྛཱནཱནཾ ཨཉྙཏྟཾ, ཏསྨཱ ཏཾ ཨསཱདྷཀནྟི ཨེཏེན སམེཏཱིཏི.

ཨཉྙོཨནུསཡོཏིཀཐཱཝཎྞནཱ ནིཊྛིཏཱ.

༦. པརིཡུཊྛཱནཾཙིཏྟཝིཔྤཡུཏྟནྟིཀཐཱཝཎྞནཱ

༧༠༢. ཡསྨཱ ¶ ཨནིཙྩཱདིཏོ མནསིཀརོཏོཔི རཱགཱདཡོ ཨུཔྤཛྫནྟི, ན ཙ ཏེ ཝིཔསྶནཱཡ སམྤཡུཏྟཱ, ཏསྨཱ པརིཡུཊྛཱནཾ ཙིཏྟཝིཔྤཡུཏྟནྟི ལདྡྷཱིཏི ཨདྷིཔྤཱཡོ.

པརིཡུཊྛཱནཾཙིཏྟཝིཔྤཡུཏྟནྟིཀཐཱཝཎྞནཱ ནིཊྛིཏཱ.

༧༠༣-༧༠༥. ཏིཝིདྷཱཡཱཏི ¶ ཀིལེསཝཏྠུཨོཀཱསཝསེན, ཀཱམརཱགཀཱམཝིཏཀྐཀཱམཱཝཙརདྷམྨཝསེན ཝཱ ཏིཝིདྷཱཡ. ཀིལེསཀཱམཝསེནཱཏི ཀིལེསཀཱམབྷཱུཏཀཱམདྷཱཏུབྷཱཝེནཱཏི ཝུཏྟཾ ཧོཏི. ཨདྷིཔྤཱཡཾ ཨསལླཀྑེནྟོཏི རཱུཔདྷཱཏུསཧགཏཝསེན ཨནུསེཏཱིཏི, རཱུཔདྷཱཏུདྷམྨེསུ ཨཉྙཏརབྷཱཝེན རཱུཔདྷཱཏུཔརིཡཱཔནྣོཏི ཙ པུཙྪིཏབྷཱཝཾ ཨསལླཀྑེནྟོཏི ཨཏྠོ.

༧༠༦-༧༠༨. དིཊྛིགཏཾ ‘‘སསྶཏོ ལོཀོཏི ཁོ, ཝཙྪ, ཨབྱཱཀཏམེཏ’’ནྟི སསྶཏཱདིབྷཱཝེན ཨཀཐིཏཏྟཱ ‘‘ཨབྱཱཀཏ’’ནྟི ཝུཏྟནྟི སམྦནྡྷོ. ཨེཏྠ པན ན དིཊྛིགཏཾ ‘‘ཨབྱཱཀཏ’’ནྟི ཝུཏྟཾ, ཨཐ ཁོ ‘‘ཋཔནཱིཡོ ཨེསོ པཉྷོ’’ཏི དསྶིཏཾ, ཏསྨཱ སབྦཐཱཔི དིཊྛིགཏཾ ‘‘ཨབྱཱཀཏ’’ནྟི ན ཝཏྟབྦནྟི ཡུཏྟཾ.

༧༠༩-༧༡༠. ཏསྨཱཏི ཡསྨཱ དིཊྛིརཱགཱནཾ སམཱནེ ཝིཀྑམྦྷནབྷཱཝེཔི ‘‘ཝཱིཏརཱགོ’’ཏི ཝུཙྩཏི, ན པན ‘‘ཝིགཏདིཊྛིཀོ’’ཏི, ཏསྨཱ དིཊྛི ལོཀིཡཔརིཡཱཔནྣཱ ན ཧོཏཱིཏི ཨཏྠཾ ཝདནྟི. རཱུཔདིཊྛིཡཱ ཨབྷཱཝཱ པན ཀཱམདྷཱཏུཔརིཡཱཔནྣཱཡ དིཊྛིཡཱ བྷཝིཏབྦཾ. ཡདི ཙ པརིཡཱཔནྣཱ སིཡཱ, ཏཐཱ ཙ ¶ སཏི ཀཱམརཱགོ ཝིཡ ཛྷཱནལཱབྷིནོ དིཊྛིཔི ཝིགཙྪེཡྻཱཏི ‘‘ཝིགཏདིཊྛིཀོ’’ཏི ཝཏྟབྦོ སིཡཱ, ན ཙ ཝུཙྩཏི, ཏསྨཱ ཨཔརིཡཱཔནྣཱ དིཊྛི. ན ཧི སཱ ¶ ཏསྶ ཨཝིགཏཱ དིཊྛི ཀཱམརཱགོ ཝིཡ ཀཱམདིཊྛི ཡེན ཀཱམདྷཱཏུཡཱ པརིཡཱཔནྣཱ སིཡཱཏི ཝདཏཱིཏི ཝེདིཏབྦཾ.

༧༡༡-༧༡༧. ཏསྨཱ པཙྩཡཏཱ ཝཝཏྠིཏཱཏི ཧེཏུཔཙྩཡབྷཱུཏསྶ དྷམྨསྶ ཨཱརམྨཎཔཙྩཡབྷཱཝཱདིནཱ ཝིཡ ཨདྷིཔཏིཔཙྩཡཏཱདིནཱ ཙ ན བྷཝིཏབྦནྟི ཧེཏུཔཙྩཡབྷཱཝོཡེཝེཏསྶ ཝཝཏྠིཏོ ཧོཏཱིཏི ཨཏྠོ.

༧༡༨-༧༡༩. ཨཔུཉྙཱབྷིསངྑཱརོཝ གཧིཏོ ‘‘ནནུ ཨཝིཛྫཱ སངྑཱརེན སཧཛཱཏཱ’’ཏི ཝུཏྟཏྟཱཏི ཨདྷིཔྤཱཡོ. སཧཛཱཏཨཉྙམཉྙཨཏྠིཨཝིགཏསམྤཡུཏྟཝསེནཱཏི ཨེཏྠ ནིསྶཡོ ཀམབྷེདེན ཨཏྠིགྒཧཎེན གཧིཏོ ཧོཏཱིཏི ན ཝུཏྟོ, ཀམྨཱཧཱརཱ ཨསཱདྷཱརཎཏཱཡཱཏི ཝེདིཏབྦཱ. ཝཀྑཏི ཧི ‘‘ཏཱིཎི ཨུཔཱདཱནཱནི ཨཝིཛྫཱཡ སངྑཱརཱ ཝིཡ ཏཎྷཱཡ པཙྩཡཱ ཧོནྟཱི’’ཏི (ཀཐཱ. ཨཊྛ. ༧༡༨-༧༡༩), ཏསྨཱ ཨུཔཱདཱནེཧི སམཱནཱ ཨེཝེཏྠ སངྑཱརཱནཾ པཙྩཡཏཱ དསྶིཏཱཏི.

༧༣༢. ཏཏིཡསཉྙཱཝེདཡིཏཀཐཱཡཾ ¶ ¶ སེསསཏྟེ སནྡྷཱཡཱཏི ནིརོདྷསམཱཔནྣཏོ ཨཉྙེ ཡེསཾ ནིརོདྷསམཱཔཏྟིཡཱ བྷཝིཏབྦཾ, ཏེ པཉྩཝོཀཱརསཏྟེ སནྡྷཱཡཱཏི ཨདྷིཔྤཱཡོ, ཨསཉྙསཏྟཱནམྤི ཙ སཉྙུཔྤཱདཱ ཙུཏིཾ ཨིཙྪནྟཱིཏི སེསསབྦསཏྟེ སནྡྷཱཡཱཏི ཝཱ. སརཱིརཔཀཏིནྟི ཏཐཱརཱུཔོ ཨཡཾ ཀཱཡོ, ཡཐཱརཱུཔེ ཀཱཡེ པཱཎིསམྥསྶཱཔི ཀམནྟཱིཏིཨཱདིཀཾ.

༧༣༣-༧༣༤. སུཏྟཝིརོདྷོ སིཡཱཏི ཨིདཾ པརཝཱདིཾ སམྤཊིཙྪཱཔེཏྭཱ ཝཏྟབྦཾ.

ཏཏིཡསཉྙཱཝེདཡིཏཀཐཱཝཎྞནཱ ནིཊྛིཏཱ.

༧༣༥. སཉྙཱཝིརཱགཝསེན པཝཏྟབྷཱཝནཱ ཨསཉྙསམཱཔཏྟིཔཱིཏི ལདྡྷིཀིཏྟནེ སཉྙཱཝིརཱགཝསེན པཝཏྟབྷཱཝནཾ ཙཏུཏྠཛ྄ཛྷཱནསམཱཔཏྟིཾ ‘‘ཨསཉྙསམཱཔཏྟཱི’’ཏི ཨགྒཧེཏྭཱ སཱཔི ཨསཉྙིཏཱ སཉྙཱཝེདཡིཏནིརོདྷསམཱཔཏྟིཡེཝ ནཱམཱཏི པརསྶ ལདྡྷཱིཏི དསྶེཏི. ཡསྨཱ ཨསཉྙསམཱཔཏྟིཾ སམཱཔནྣསྶ ཨལོབྷཱདཡོ ཨཏྠཱིཏི ཨེཏྠ སཀསམཡསིདྡྷཱ ཙཏུཏྠཛ྄ཛྷཱནསམཱཔཏྟི ‘‘ཨསཉྙསམཱཔཏྟཱི’’ཏི ཝུཏྟཱ.

༧༣༦. སཉྙཱཝིརཱགཝསེན སམཱཔནྣཏྟཱ ཨསཉྙིཏཱ, ན སཉྙཱཡ ཨབྷཱཝཏོཏི ཙཏུཏྠཛ྄ཛྷཱནསམཱཔཏྟིམེཝ སནྡྷཱཡ ཝདཏི.

ཨསཉྙསཏྟུཔིཀཱཀཐཱཝཎྞནཱ ནིཊྛིཏཱ.

༧༣༨-༧༣༩. ཀམྨེན ¶ སཧཛཱཏོཏི པཉྷེསུ ‘‘ཀམྨཱུཔཙཡཾ སནྡྷཱཡ པཊིཀྑིཔཏི, ཙིཏྟཝིཔྤཡུཏྟཾ སནྡྷཱཡ པཊིཛཱནཱཏཱི’’ཏི ཀཏྠཙི པཱཋོ, ‘‘ཙིཏྟསམྤཡུཏྟཾ ¶ སནྡྷཱཡ པཊིཀྑིཔཏི, ཙིཏྟཝིཔྤཡུཏྟཾ སནྡྷཱཡ པཊིཛཱནཱཏཱི’’ཏི ཨཉྙཏྠ. ཨུབྷཡམྤི ཝིཙཱརེཏབྦཾ.

༧༤༡. ཏསྨཱཏི ཏིཎྞམྤི ཨེཀཀྑཎེ སབྦྷཱཝཏོ ཏིཎྞཾ ཕསྶཱནཉྩ སམོདྷཱནཱ ཙ ཨེཀཏྟཾ པུཙྪཏཱིཏི ཨདྷིཔྤཱཡོ དཊྛབྦོ.

༧༤༧-༧༤༨. སུཁཱནུཔྤདཱནཀཐཱཡཾ ཡཾ ཨེཝརཱུཔནྟི ཡཾ ནེཝཏྟནོ, ན པརེསཾ, ན ཏསྶ, ཨེཝརཱུཔཾ ནཱམ ཨནུཔྤདིནྣཾ བྷཝིཏུཾ ན ཨརཧཏི ཨཉྙསྶ ཨསཀྐུཎེཡྻཏྟཱཏི ལདྡྷིམཏྟེན པཊིཛཱནཱཏི, ན ཡུཏྟིཡཱཏི ཨདྷིཔྤཱཡོ.

སུཁཱནུཔྤདཱནཀཐཱཝཎྞནཱ ནིཊྛིཏཱ.

༧༤༩-༧༥༣. ཏཾཙིཏྟཏཱཡཱཏི ¶ ཏདེཝ ཨཱརམྨཎབྷཱུཏཾ ཙིཏྟཾ ཨེཏསྶཱཏི ཏཾཙིཏྟོ, ཏསྶ བྷཱཝོ ཏཾཙིཏྟཏཱ, ཏཱཡ ཏཾཙིཏྟཏཱཡ. ཏཾ ཝཱ ཨཱལམྦཀཾ ཨཱལམྦིཏབྦཉྩ ཙིཏྟཾ ཏཾཙིཏྟཾ, ཏསྶ བྷཱཝོ ཏསྶེཝ ཨཱལམྦཀཨཱལམྦིཏབྦཏཱ ཏཾཙིཏྟཏཱ, ཏཱཡ ཙོདེཏུནྟི ཨཏྠོ.

ཨདྷིགཡ྄ཧམནསིཀཱརཀཐཱཝཎྞནཱ ནིཊྛིཏཱ.

༩. རཱུཔཾརཱུཔཱཝཙརཱརཱུཔཱཝཙརནྟིཀཐཱཝཎྞནཱ

༧༦༨-༧༧༠. རཱུཔཾརཱུཔཱཝཙརཱརཱུཔཱཝཙརནྟིཀཐཱཡཾ ཧེཊྛཱཏི ཙུདྡསམཝགྒེ ཨཱགཏཔརིཡཱཔནྣཀཐཱཡཾ (ཀཐཱ. ཨཊྛ. ༧༠༣-༧༠༥). ‘‘སམཱཔཏྟེསིཡ’’ནྟིཨཱདི ཝུཏྟནཡམེཝ. ཡཉྩེཏྠ ¶ ‘‘ཨཏྠི རཱུཔཾ ཨརཱུཔཱཝཙར’’ནྟི ཨརཱུཔཱཝཙརཀམྨསྶ ཀཏཏྟཱ རཱུཔཾ ཝུཏྟཾ, ཏཏྠ ཙ ཡཾ ཝཏྟབྦཾ, ཏཾ ཨཊྛམཝགྒེ ཨརཱུཔེརཱུཔཀཐཱཡཾ (ཀཐཱ. ཨཊྛ. ༥༢༤-༥༢༦) ཝུཏྟནཡམེཝཱཏི.

རཱུཔཾརཱུཔཱཝཙརཱརཱུཔཱཝཙརནྟིཀཐཱཝཎྞནཱ ནིཊྛིཏཱ.

༡. ཨཏྠིཨརཧཏོཔུཉྙཱུཔཙཡཀཐཱཝཎྞནཱ

༧༧༦-༧༧༩. ཙིཏྟཾ ཨནཱདིཡིཏྭཱཏི ‘‘ཀིརིཡཙིཏྟེན དཱནཱདིཔཝཏྟིསབྦྷཱཝཏོ’’ཏི ཝུཏྟཾ ཀིརིཡཙིཏྟཾ ཨབྱཱཀཏཾ ཨནཱདིཡིཏྭཱཏི ཨཏྠོ.

ཨཏྠིཨརཧཏོཔུཉྙཱུཔཙཡཀཐཱཝཎྞནཱ ནིཊྛིཏཱ.

༢. ནཏྠིཨརཧཏོཨཀཱལམཙྩཱུཏིཀཐཱཝཎྞནཱ

༧༨༠. ཨཡོནིསོ ¶ གཧེཏྭཱཏི ཨལདྡྷཝིཔཱཀཝཱརཱནམྤི ཀམྨཱནཾ བྱནྟཱིབྷཱཝཾ ན ཝདཱམཱིཏི ཨཏྠཾ གཧེཏྭཱཏི ཨདྷིཔྤཱཡོ. ཀེཙི པན ‘‘ཀམྨཱནཾ ཝིཔཱཀཾ ཨཔྤཊིསཾཝིདིཏྭཱ པུགྒལསྶ བྱནྟཱིབྷཱཝཾ ན ཝདཱམཱིཏི ཨེཝཾ ཨཡོནིསོ ཨཏྠཾ གཧེཏྭཱ’’ཏི ཝདནྟི.

༧༨༡. ཏཱཝ ན ཀམཏཱིཏི ལདྡྷིཡཱ པཊིཀྑིཔཏཱིཏི ཏཱཝ ན ཀམཏི, ཏཏོ པརཾ ཀམཏཱིཏི ལདྡྷིཡཱ པཊིཀྑིཔཏཱིཏི ཨདྷིཔྤཱཡོ. ཨེཏྠ ཀིར ‘‘སཏི ཛཱིཝིཏེ ཛཱིཝིཏཱཝསེསེ ཛཱིཝིཏཱ ཝོརོཔེཏཱི’’ཏི ཝཙནཏོ ཨཏྟནོ དྷམྨཏཱཡ མརནྟཾ ཀོཊྚེནྟསྶ ཝཱ སཱིསཾ ཝཱ ཚིནྡནྟསྶ ནཏྠི པཱཎཱཏིཔཱཏོཏི ཨཱཙརིཡཱ ཝདནྟི. པཱཎོ པཱཎསཉྙིཏཱ ཝདྷཀཙིཏྟཨུཔཀྐམམརཎེསུ ཝིཛྫམཱནེསུཔི ན ཏེན ཨུཔཀྐམེན མཏོཏི ནཏྠི པཱཎཱཏིཔཱཏོཏི ཨདྷིཔྤཱཡོ. ཨེཝཾ པན མརནྟེན ཏེན ཨེཀཙིཏྟཝཱརམྤི དྷམྨཏཱམརཎཏོ ཨོརཏོ ན མཏོཏི དུབྦིཉྙེཡྻམེཏཾ.

ནཏྠིཨརཧཏོཨཀཱལམཙྩཱུཏིཀཐཱཝཎྞནཱ ནིཊྛིཏཱ.

༧༨༤. བཱིཛཏོ ¶ ཨངྐུརསྶེཝཱཏི ཡཐཱ ཨངྐུརསྶ ཨབཱིཛཏོ ནིབྦཏྟི ནཏྠི, ཏཐཱ པཙྩུཔྤནྣཔཝཏྟསྶཔི ཨཀམྨཏོ ཀམྨཝིཔཱཀཏོ ནིབྦཏྟི ནཏྠི, ཏཾ སནྡྷཱཡ པཊིཀྑིཔཏཱིཏི ཨདྷིཔྤཱཡོ. དེཡྻདྷམྨཝསེན དཱནཕལཾ པུཙྪཏཱིཏི དེཡྻདྷམྨཝསེན ཡཱཡ ཙེཏནཱཡ ཏཾ དེཏི, ཏསྶ དཱནསྶ ཕལཾ པུཙྪཏི, ན དེཡྻདྷམྨསྶཱཏི ཝུཏྟཾ ཧོཏི.

སབྦམིདཾཀམྨཏོཏིཀཐཱཝཎྞནཱ ནིཊྛིཏཱ.

༧༨༨. ཝིནཱཔི ¶ ཨནིཙྩཏྟེནཱཏི ‘‘ཡཱཝ དུཀྑཱ ནིརཡཱ’’ཏིཨཱདཱིསུ (མ. ནི. ༣.༢༥༠) ཝིཡ དུཀྑཱརམྨཎཏྟེནཔི དུཀྑཾ ཝཏྟབྦནྟི ཨདྷིཔྤཱཡོ.

༧. ནཝཏྟབྦཾསངྒྷོདཀྑིཎཾཝིསོདྷེཏཱིཏིཀཐཱཝཎྞནཱ

༧༩༣-༧༩༤. ནཝཏྟབྦཾསངྒྷོདཀྑིཎཾཝིསོདྷེཏཱིཏིཀཐཱཡཾ ན ཙ ཏཱནི དཀྑིཎཾ ཝིསོདྷེཏུཾ སཀྐོནྟཱིཏི ཡཐཱ པུགྒལོ སཱིལཔརིསོདྷནཱདཱིནི ཀཏྭཱ ནིརོདྷམྤི སམཱཔཛྫིཏྭཱ ཝིསོདྷེཏུཾ སཀྐོཏི, ན ཨེཝཾ མགྒཕལཱནཱིཏི ཨདྷིཔྤཱཡོ, ཨཔྤཊིགྒཧཎཏོཏི ཝཱ.

ནཝཏྟབྦཾསངྒྷོདཀྑིཎཾཝིསོདྷེཏཱིཏིཀཐཱཝཎྞནཱ ནིཊྛིཏཱ.

༨༠༠-༨༠༡. དཀྑིཎཱཝིསུདྡྷིཀཐཱཡཾ ཝིསུཛ྄ཛྷེཡྻཱཏི ཨེཏསྶ ཨཏྠཾ དསྶེནྟོ ‘‘མཧཔྥལཱ བྷཝེཡྻཱ’’ཏི ཨཱཧ. དཱཡཀསྶེཝ ཙིཏྟཝིསུདྡྷི ཝིཔཱཀདཱཡིཀཱ ཧོཏཱིཏི པཊིགྒཱཧཀནིརཔེཀྑཱ པཊིགྒཱཧཀེན པཙྩཡབྷཱུཏེན ཝིནཱ དཱཡཀེནེཝ མཧཱཝིཔཱཀཙེཏནཏྟཾ ཨཱཔཱདིཀཱ, པཊིགྒཱཧཀནིརཔེཀྑཱ ཝིཔཱཀདཱཡིཀཱ ཧོཏཱིཏི ཨདྷིཔྤཱཡོ. ཨཉྙོ ཨཉྙསྶ ཀཱརཀོཏི ¶ ཡདི དཱཡཀསྶ དཱནཙེཏནཱ ནཱམ པཊིགྒཱཧཀེན ཀཏཱ བྷཝེཡྻ, ཡུཏྟརཱུཔཾ སིཡཱཏི ཀསྨཱ ཝུཏྟཾ, ནནུ ལདྡྷིཀིཏྟནེ ‘‘དཱཡཀེན དཱནཾ དིནྣཾ, པཊིགྒཱཧཀེན ཝིཔཱཀོ ནིབྦཏྟིཏོཏི ཨཉྙོ ཨཉྙསྶ ཀཱརཀོ བྷཝེཡྻཱ’’ཏི ཝུཏྟནྟི? སཙྩམེཏཾ, པཊིགྒཱཧཀེན ཝིཔཱཀནིབྦཏྟནམྤི པན དཱནཙེཏནཱནིབྦཏྟནེན ¶ ཡདི བྷཝེཡྻ, ཨེཝཾ སཏི ཨཉྙོ ཨཉྙསྶ ཀཱརཀོཏི ཡུཏྟརཱུཔཾ སིཡཱཏི ཨདྷིཔྤཱཡོ.

དཀྑིཎཱཝིསུདྡྷིཀཐཱཝཎྞནཱ ནིཊྛིཏཱ.

༨༠༢-༨༠༣. ཨཡོནིསོཏི ‘‘ཏུསིཏཔུརཾ སནྡྷཱཡཱ’’ཏིཨཱདིཀཾ གཧཎཾ སནྡྷཱཡཱཧ.

༨༠༤-༨༠༦. ཏསྶ ཙ དེསནཾ སམྤཊིཙྪིཏྭཱ སཡམེཝ ཙ ཨཱཡསྨཏཱ ཨཱནནྡཏྠེརེན དེསིཏོཏི ཝདཏི.

༨༡༣-༨༡༦. ཛྷཱནསངྐནྟིཀཐཱཡཾ ཨུཔྤཊིཔཱཊིཡཱཏི པཋམཛ྄ཛྷཱནཏོ ཝུཊྛཱཡ ཝིཏཀྐཝིཙཱརཱ ཨཱདཱིནཝཏོ མནསིཀཱཏབྦཱ, ཏཏོ དུཏིཡཛ྄ཛྷཱནེན བྷཝིཏབྦནྟི ཨེཝཾ ཡོ ཨུཔཙཱརཱནཾ ཛྷཱནཱནཉྩ ཨནུཀྐམོ, ཏེན ཝིནཱཏི ཨཏྠོ.

༨༡༧-༨༡༩. ཛྷཱནནྟརིཀཱ ¶ ¶ ནཱམ ཨེསཱཏི པཋམཛ྄ཛྷཱནཱདཱིསུ ཨཉྙཏརབྷཱཝཱབྷཱཝཏོ ན ཛྷཱནཾ, ཨཐ ཁོ དཀྑིཎཔུབྦཱདིདིསནྟརིཀཱ ཝིཡ ཛྷཱནནྟརིཀཱ ནཱམ ཨེསཱཏི. ཀཏརཱ? ཡོཡཾ ཨཝིཏཀྐཝིཙཱརམཏྟོ སམཱདྷཱིཏི ཡོཛེཏབྦཾ.

༩. ཙཀྑུནཱརཱུཔཾཔསྶཏཱིཏིཀཐཱཝཎྞནཱ

༨༢༦-༨༢༧. པཊིཛཱནནཾ སནྡྷཱཡཱཏི ‘‘ཙཀྑུནཱ རཱུཔཾ དིསྭཱ ནིམིཏྟགྒཱཧཱི ཧོཏཱི’’ཏིཨཱདིནཱ (དྷ. ས. ༡༣༥༢) ནཡེན ཝུཏྟཾ མནོཝིཉྙཱཎཔཊིཛཱནནཾ ཀིར སནྡྷཱཡཱཏི ཨདྷིཔྤཱཡོ, ཏསྨཱ ‘‘ཨེཝཾ སནྟེ རཱུཔཾ མནོཝིཉྙཱཎཾ ཨཱཔཛྫཏཱིཏི མནོཝིཉྙཱཎཔཊིཛཱནནཾ པན རཱུཔདསྶནཾ ཀཐཾ ཧོཏཱི’’ཏི ཝིཙཱརེཏབྦཾ.

ཙཀྑུནཱརཱུཔཾཔསྶཏཱིཏིཀཐཱཝཎྞནཱ ནིཊྛིཏཱ.

༨༢༨-༨༣༡. ཨནུཔྤནྣཱཡེཝ ནུཔྤཛྫནྟཱིཏི པཧཱིནཱ ནཱམ ཧོནྟི, ཏསྨཱ ནཏྠི ཀིལེསཔཛཧནཱཏི ¶ པཊིཀྑིཔཏི. ཏེ པན ནེཝ ཨུཔྤཛྫིཏྭཱ ཝིགཏཱ, ནཱཔི བྷཝིསྶནྟི, ན ཙ ཨུཔྤནྣཱཏི ཨཏཱིཏེ ཀིལེསེ པཛཧཏཱིཏིཨཱདི ན ཝཏྟབྦནྟི དསྶེཏི.

༨༣༢. ཨནཏྟལཀྑཎཾ ¶ ཏཱཝ ཨེཀཙྩནྟི ཨརཱུཔཀྑནྡྷཱནཾ ཨནཏྟལཀྑཎཾ ཝདཏི. ཨེཀེན པརིཡཱཡེནཱཏི ཨནཏྟལཀྑཎསྶ ཛརཱམརཎབྷཱཝཔརིཡཱཡེནཱཏི ཝདནྟི. རཱུཔཀྑནྡྷཱདཱིནཉྷི མཱ ཛཱིརཏུ མཱ མརཏཱུཏི ཨལབྦྷནེཡྻོ ཨཝསཝཏྟནཱཀཱརོ ཨནཏྟཏཱ, སཱ ཨཏྠཏོ ཛརཱམརཎམེཝ, ཏཉྩ ‘‘ཛརཱམརཎཾ དྭཱིཧི ཁནྡྷེཧི སངྒཧིཏ’’ནྟི (དྷཱཏུ. ༧༡) ཝུཏྟཏྟཱ ཨརཱུཔཀྑནྡྷཱནཾ ཛརཱམརཎཾ སངྑཱརཀྑནྡྷཔརིཡཱཔནྣནྟི ཨཡམེཏེསཾ ཨདྷིཔྤཱཡོ.

༨༣༥-༨༣༦. ཕལུཔྤཏྟི ཙཱཏི པཏྟིདྷམྨཾ ཝདཏི.

༨༤༡-༨༤༣. རཱུཔཱདིསབྷཱཝཏཱསངྑཱཏཱཏི ¶ ཨེཏྠ རཱུཔཱདཱིནཾ སབྷཱཝཏཱཏི རཱུཔཱདིསབྷཱཝཏཱཏི ཨེཝམཏྠོ དཊྛབྦོ. བྷཱཝཾ ཧེས ཏཐཏཱཏི ཝདཏི, ན བྷཱཝཡོགནྟི.

༨༤༤-༨༤༦. ཨནཝཛྫབྷཱཝམཏྟེནེཝ ནིབྦཱནཾ ཀུསལནྟི ཡཾཀིཉྩི ཀུསལཾ, སབྦཾ ཏཾ ཨནཝཛྫབྷཱཝམཏྟེནེཝ, ཏསྨཱ ནིབྦཱནཾ ཀུསལནྟི ཝུཏྟཾ ཧོཏི.

༨༤༧. ‘‘སཀིཾ ¶ ནིམུགྒོ ནིམུགྒོཝ ཧོཏཱི’’ཏི སུཏྟཾ ནིསྶཱཡཱཏི ཏཱཡ ཛཱཏིཡཱ ལོཀུཏྟརསདྡྷཱདཱིནཾ ཨནུཔྤཏྟིཾ སནྡྷཱཡ ཀཏཾ ཨཝདྷཱརཎཾ སཾསཱརཁཱཎུཀབྷཱཝཾ སནྡྷཱཡ ཀཏནྟི མཉྙམཱནོ པུཐུཛྫནསྶཱཡཾ ཨཙྩནྟནིཡཱམཏཱ, ཡཱཡཾ ནིཡཏམིཙྪཱདིཊྛཱིཏི ‘‘ཨཏྠི པུཐུཛྫནསྶ ཨཙྩནྟནིཡཱམཏཱ’’ཏི ཝདཏི. ཝིཙིཀིཙྪུཔྤཏྟི ནིཡཱམནྟརུཔྤཏྟི ཙ ཨཙྩནྟནིཡཱམནིཝཏྟཀཱ ཝིཙཱརེཏྭཱ གཧེཏབྦཱ.

༨༥༣-༨༥༦. ལོཀིཡཱནམྤཱིཏི ¶ ལོཀུཏྟརཱནཾ ཝིཡ ལོཀིཡཱནམྤི སདྡྷཱདཱིནཾཡེཝ སདྡྷིནྡྲིཡཱདིབྷཱཝདསྶནེན ལོཀིཡསདྡྷིནྡྲིཡཱདིབྷཱཝཾ སཱདྷེཏུཾ སདྡྷཱདཱིནཾཡེཝ སདྡྷིནྡྲིཡཱདིབྷཱཝདསྶནཏྠཾ ཝུཏྟནྟི ཨཏྠོ དཊྛབྦོ.

ཨེཀཱུནཝཱིསཏིམཝགྒཝཎྞནཱ ནིཊྛིཏཱ.

༨༦༣-༨༦༥. ཉཱཎཀཐཱཡཾ དུཀྑཾ པརིཛཱནཱཏཱིཏི ལོཀུཏྟརམགྒཉཱཎམེཝ དཱིཔེཏཱིཏི ‘‘དུཀྑཾ པརིཛཱནཱཏཱི’’ཏི ཝདནྟོ ཨིདཾ ཏཝ ཝཙནཾ ལོཀུཏྟརམགྒཉཱཎམེཝ དཱིཔེཏི, ན ཏསྶེཝ ཉཱཎབྷཱཝཾ. ཀསྨཱ? ཡསྨཱ ན ལོཀུཏྟརམེཝ ཉཱཎཾ, ཏསྨཱ ན ཨིདཾ སཱདྷཀནྟི ཝུཏྟཾ ཧོཏི.

༨༦༧-༨༦༨. པཎུནྣནྟི ¶ པཎུདིཏཾ, ཨནཝསེསཁིཏྟནྟི ཨཏྠོ.

༨༦༩-༨༧༡. ཏསྶ ¶ ཨཏྠིཏཱཡ པཊིཉྙཱཏི ཏསྶ ཧཏྠིནཱགསྶ ཙ དིབྦཡཱནསྶ ཙ ཨཏྠིཏཱཡཱཏི ཝིསུཾ ཡོཛེཏབྦཾ.

༨༧༦-༨༧༧. ཉཱཎཀཐཱཡཾ སཙེ ཏཾ དྭཱདསཝཏྠུཀནྟི ཨེཏྠ ཙ ‘‘ལོཀུཏྟར’’ནྟི ཝཙནསེསོ, ཏཾ ཝཱ ལོཀུཏྟརཉཱཎཾ སཙེ དྭཱདསཝཏྠུཀནྟི ཨཏྠོ. པརིཉྙེཡྻནྟི པུབྦབྷཱགོ, པརིཉྙཱཏནྟི ཨཔརབྷཱགོ, སཙྩཉཱཎཾ པན མགྒཀྑཎེཔི པརིཛཱནནཱདིཀིཙྩསཱདྷནཝསེན ཧོཏཱིཏི ཨཱཧ ‘‘སདྡྷིཾ པུབྦབྷཱགཔརབྷཱགེཧཱི’’ཏི.

༨༧༨. ཏཱིསུཔི པུཙྪཱསུ ཙོདནཏྠཾ ཝུཏྟནྟི ཏཱིསུཔི པུཙྪཱསུ ‘‘སཱསན’’ནྟིཨཱདིཝཙནཾ ཝུཏྟནྟི སམུདཱཡཱ ཨེཀདེསཱནཾ ཨདྷིཀརཎབྷཱཝེན ཝུཏྟཱཏི དཊྛབྦཱ.

༨༨༣-༨༨༤. ཨིདྡྷིཀཐཱཡཾ ¶ ¶ ཨཏྠི ཨདྷིཔྤཱཡཨིདྡྷཱིཏི ཨདྷིཔྤཱཡཝསེན ཨིཛ྄ཛྷནཏོ ཨདྷིཔྤཱཡོཏི ཨེཝཾནཱམིཀཱ ཨིདྡྷི ཨཏྠཱིཏི ཨཏྠོ.

༨༨༧-༨༨༨. དྷམྨཀཐཱཡཾ རཱུཔཊྛཏོ ཨཉྙསྶ རཱུཔསྶ ཨབྷཱཝཱཏི ཡོ རཱུཔསྶ ནིཡཱམོ ཝུཙྩེཡྻ, སོ རཱུཔཊྛོ ནཱམ ཀོཙི རཱུཔཏོ ཨཉྙོ ནཏྠཱིཏི རཱུཔཊྛཏོ ཨཉྙཾ རཱུཔཉྩ ན ཧོཏི, ཏསྨཱ རཱུཔཾ རཱུཔམེཝ, ན ཝེདནཱདིསབྷཱཝནྟི ཨདྷིཔྤཱཡེན ‘‘རཱུཔཾ རཱུཔཊྛེན ནིཡཏ’’ནྟི ཝཏྟབྦཾ, ན ཨཉྙཐཱ རཱུཔཊྛེན ནིཡཱམེནཱཏི ཨདྷིཔྤཱཡོ. ཏཏྠ རཱུཔཏོ ཨཉྙསྶ རཱུཔཊྛསྶ ཨབྷཱཝེ དསྶིཏེ རཱུཔཊྛཏོ ཨཉྙསྶ རཱུཔསྶ ཨབྷཱཝོ དསྶིཏོཡེཝ ནཱམ ཧོཏཱིཏི ཏམེཝ རཱུཔཏོ ཨཉྙསྶ རཱུཔཊྛསྶ ཨབྷཱཝཾ དསྶེནྟོ ‘‘རཱུཔསབྷཱཝོ ཧཱི’’ཏིཨཱདིམཱཧ. ཨེས ཝོཧཱརོཏི རཱུཔསྶ སབྷཱཝོ རཱུཔསབྷཱཝོ, རཱུཔསྶ ཨཏྠོ རཱུཔཊྛོཏི ཨེཝཾ ཨཉྙཏྟཾ གཧེཏྭཱ ཝིཡ པཝཏྟོ རཱུཔསབྷཱཝཝོཧཱརོ རཱུཔཊྛཝོཧཱརོ ཝཱ ཝེདནཱདཱིཧི ནཱནཏྟམེཝ སོ སབྷཱཝོཏི ནཱནཏྟསཉྙཱཔནཏྠཾ ཧོཏཱིཏི ཨཏྠོ. ཏསྨཱཏི རཱུཔསྶ རཱུཔཊྛེན ཨནཉྙཏྟཱ. ‘‘རཱུཔཾ རཱུཔམེཝ, ན ཝེདནཱདིསབྷཱཝ’’ནྟི ཨཝཏྭཱ ‘‘རཱུཔཾ རཱུཔཊྛེན ནིཡཏ’’ནྟི ཝདཏོ ཏཉྩ ཝཙནཾ ཝུཏྟཔྤཀཱརེན སདོསཾ, ཨཐ ཀསྨཱ ‘‘རཱུཔཉྷི རཱུཔཊྛེན ནིཡཏནྟི རཱུཔཾ རཱུཔམེཝ, ན ཝེདནཱདིསབྷཱཝནྟི ཨདྷིཔྤཱཡེན ཝཏྟབྦ’’ནྟི ཝདནྟོ ‘‘རཱུཔཾ རཱུཔཊྛེན ནིཡཏ’’ནྟི པཊིཛཱནཱཏཱིཏི ཨཏྠོ དཊྛབྦོ. ནནུ ཙེཏཾ ཨཏྟནཱཝ ཝུཏྟཾ, ན པརེནཱཏི པཊིཛཱནཱཏཱིཏི ན ཝཏྟབྦནྟི? ན, ཨཏྟཱནམྤི པརཾ ཝིཡ ཝཙནཏོ. ཝཏྟབྦནྟི ཝཱ སཀཝཱདིནཱ ཝཏྟབྦནྟི ཝུཏྟཾ ཧོཏི. ཡདི ཙ ཏེན ཝཏྟབྦཾ པཊིཛཱནཱཏི ཙ སོ ཨེཏམཏྠནྟི, ཨཐ ཀསྨཱ པཊིཛཱནཱཏི སཀཝཱདཱིཏི ཨཡམེཏྠ ཨཏྠོ. ཨཏྠནྟརཝསེནཱཏི ཏཏྠ ཝུཏྟམེཝ ཀཱརཎཾ ནིགཱུཧིཏྭཱ པརེན ཙོདིཏནྟི ཏམེཝ ཀཱརཎཾ དསྶེཏྭཱ ཙོདནཾ ནིཝཏྟེཏི. ཨིཏོ ཨཉྙཐཱཏི རཱུཔཱདིསབྷཱཝམཏྟཾ མུཉྩིཏྭཱ ཏེན པརིཀཔྤིཏཾ ནིཡཏཾ ནཏྠཱིཏི ¶ ཏསྶ ¶ པརིཀཔྤིཏསྶ ནིཝཏྟནཏྠཾ པུན ཏེནེཝ ནཡེན ཙོདེཏུཾ ‘‘མིཙྪཏྟནིཡཏ’’ནྟིཨཱདིམཱཧཱཏི ཨཏྠོ.

༨༩༤-༨༩༥. ཀུསལཙིཏྟཀཐཱཡཾ ཛཝནཀྑཎེཏི པརིནིབྦཱནཙིཏྟཏོ པུརིམཛཝནཀྑཎེ.

༨༩༦. བྷཝངྒཙིཏྟེཏི བྷཝངྒཔརིཡོསཱནཏྟཱ ཙུཏིཙིཏྟཾ ‘‘བྷཝངྒཙིཏྟ’’ནྟི ཨཱཧ.

༨༩༨-༩༠༠. སཏྟཝསྶིཀཾ ¶ གབྦྷཾ དིསྭཱ ‘‘གབྦྷེཡེཝ ཨརཧཏྟཔྤཏྟིཧེཏུབྷཱུཏོ ཨིནྡྲིཡཔརིཔཱཀོ ཨཏྠཱི’’ཏི ‘‘ཨརཧཏྟཔྤཏྟིཔི ཨཏྠཱི’’ཏི མཉྙཏི, ཨཱཀཱསསུཔིནཾ དིསྭཱ ‘‘ཨཱཀཱསགམནཱདིཨབྷིཉྙཱ ཝིཡ དྷམྨཱབྷིསམཡོ ཨརཧཏྟཔྤཏྟི ཙ ཨཏྠཱི’’ཏི མཉྙཏཱིཏི ཨདྷིཔྤཱཡོ.

༩༠༣-༩༠༥. ན ¶ ཀོཙི ཨཱསེཝནཔཙྩཡཾ ཨཱསེཝཏི ནཱམཱཏི ཡཐཱ བཱིཛཾ ཙཏུམདྷུརབྷཱཝཾ ན གཎྷཱཏི, ཨེཝཾ བྷཱཝནཱསངྑཱཏཾ ཨཱསེཝནཔཙྩཡཾ གཎྷནྟོ ཨཱསེཝནྟོ ནཱམ ཀོཙི ནཏྠཱིཏི ཨཏྠོ.

༩༠༦-༩༠༧. པཐཝིཡཱདིརཱུཔེསུ ཀེསཉྩི ཨུཔྤཱདོ ཀེསཉྩི ནིརོདྷོཏི ཨེཝཾ པཏིཊྛཱནཾ རཱུཔསནྟཏིཡཱ ཧོཏི. ན ཧི རཱུཔཱནཾ ཨནནྟརཱདིཔཙྩཡཱ སནྟི, ཡེཧི ཨརཱུཔསནྟཏིཡཱ ཝིཡ རཱུཔསནྟཏིཡཱ པཝཏྟི སིཡཱཏི ཙིཏྟེ ‘‘ཙིཏྟེ མཧཱཔཐཝཱི སཎྛཱཏཱི’’ཏིཨཱདི ཙོདིཏཾ.

༩༠༨. ཀརུཎཱདྷིཔྤཱཡེན ¶ ཨེཀཱདྷིཔྤཱཡོཏི རཱགཱདྷིཔྤཱཡཏོ ཨཉྙཱདྷིཔྤཱཡོཝཱཏི ཝུཏྟཾ ཧོཏི. ཨེཀོ ཨདྷིཔྤཱཡོཏི ཨེཏྠ ཨེཀཏོབྷཱཝེ ཨེཀསདྡོ དཊྛབྦོ. སམཱནཏྠེ ཧི སཏི རཱགཱདྷིཔྤཱཡེཔི ཨེཀཱདྷིཔྤཱཡེནཱཏི ཨེཀཱདྷིཔྤཱཡཏཱ ཨཏྠཱིཏི.

༣-༧. ཨིསྶརིཡཀཱམཀཱརིཀཱཀཐཱཝཎྞནཱ

༩༡༠-༩༡༤. ཨིསྶརིཡེན ཡཐཱདྷིཔྤེཏསྶ ཀརཎཾ ཨིསྶརིཡཀཱམཀཱརིཀཱ. གཙྪེཡྻཱཏི གབྦྷསེཡྻོཀྐམནཾ གཙྪེཡྻ. ཨིསྶརིཡཀཱམཀཱརིཀཱཧེཏུ ¶ ནཱམ དུཀྐརཀཱརིཀཱ མིཙྪཱདིཊྛིཡཱ ཀརཱིཡཏཱིཏི ཨེཏྠ དུཀྐརཀཱརིཀཱ ནཱམ ཨིསྶརིཡཀཱམཀཱརིཀཱཧེཏུ ཀརིཡམཱནཱ མིཙྪཱདིཊྛིཡཱ ཀརཱིཡཏཱིཏི ཨཏྠོ དཊྛབྦོ, ཨིསྶརིཡཀཱམཀཱརིཀཱཧེཏུ ནཱམ ཝིནཱ མིཙྪཱདིཊྛིཡཱ ཀརིཡམཱནཱ ནཏྠཱིཏི ཝཱ.

ཨིསྶརིཡཀཱམཀཱརིཀཱཀཐཱཝཎྞནཱ ནིཊྛིཏཱ.

༩༡༥-༩༡༦. མེཏྟཱདཡོ སནྡྷཱཡ ‘‘མེཏྟཱདཡོ ཝིཡ ན རཱགོ རཱགཔཏིརཱུཔཀོ ཀོཙི ཨཏྠཱིཏི རཱགམེཝ གཎྷཱཏི, ཨེཝཾ དོསེཔཱི’’ཏི ཝདནྟི.

༩༡༧-༩༡༨. ན ¶ ཨནིཙྩཱདིབྷཱཝནྟི ཨེཏྠ ཨནིཙྩཱདིཀོ བྷཱཝོ ཨེཏསྶཱཏི ཨནིཙྩཱདིབྷཱཝནྟི རཱུཔཾ ཝུཏྟཾ. ‘‘ན ཀེཝལཉྷི པཋམསཙྩམེཝ དུཀྑ’’ནྟི ཝདནྟེན ‘‘དུཀྑཉྙེཝ པརིནིཔྥནྣ’’ནྟི དུཀྑསཙྩཾ སནྡྷཱཡ པུཙྪཱ ཀཏཱཏི དསྶིཏཾ ཧོཏི. ཨེཝཾ སཏི ཏེན ‘‘ཙཀྑཱཡཏནཾ ཨཔརིནིཔྥནྣ’’ནྟིཨཱདི ན ཝཏྟབྦཾ སིཡཱ. ན ཧི ཙཀྑཱཡཏནཱདཱིནི ཨནུཔཱདིནྣཱནི ལོཀུཏྟརཱནི ཝཱ. ཏནྟི ‘‘དུཀྑཉྙེཝ པརིནིཔྥནྣཾ, ན པན རཱུཔ’’ནྟི ཨེཏཾ རཱུཔསྶ ཙ དུཀྑཏྟཱ ནོ ཝཏ རེ ཝཏྟབྦེཏི ཨཏྠོ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཀཐཱཝཏྠུཔཀརཎེན ¶ ¶ སངྑེཔེནེཝ དེསིཏེན དྷམྨེསུ ཝིཔརཱིཏགྒཧཎཾ ནིཝཱརེཏྭཱ ཏེསྭེཝ དྷམྨེསུ དྷམྨསངྒཧཱདཱིསུ པཀཱསིཏེསུ དྷམྨཔུགྒལོཀཱསཱདིནིསྶཡཱནཾ སནྣིཊྛཱནསཾསཡཱནཾ ཝསེན ནཱནཔྤཀཱརཀཨོསལླཏྠཾ ཡམཀཔཀརཎཾ ཨཱརདྡྷཾ, ཏཾ སམཡདེསདེསཀཝསེནེཝ དསྶེཏྭཱ སཾཝཎྞནཱཀྐམཉྩསྶ ཨནུཔྤཏྟཾ ‘‘ཨཱགཏོ བྷཱརོ ཨཝསྶཾ ཝཧིཏབྦོ’’ཏི སཾཝཎྞནམསྶ པཊིཛཱནནྟོ ཨཱཧ ‘‘སངྑེཔེནེཝཱ’’ཏིཨཱདི.

ཏཏྠ ཡམསྶ ཝིསཡཱཏཱིཏོཏི ཛཱཏིཡཱ སཏི མརཎཾ ཧོཏཱིཏི ཛཱཏི, པཉྩ ཝཱ ཨུཔཱདཱནཀྑནྡྷཱ ཡམསྶ ཝིསཡོ, ཏཾ སམུདཡཔྤཧཱནེན ཨཏཱིཏོཏི ཨཏྠོ. ཡམསྶ ཝཱ རཉྙོ ཝིསཡཾ མརཎཾ, ཏསྶ ཨཱཎཱཔཝཏྟིཊྛཱནཾ དེསཾ ཝཱ ཨཏཱིཏོ. ‘‘ཚཙྩཱབྷིཋཱནཱནི ཨབྷབྦ ཀཱཏུ’’ནྟི (ཁུ. པཱ. ༦.༡༡; སུ. ནི. ༢༣༤) ཝུཏྟཱནཾ ཚནྣཾ ཨབྷབྦཊྛཱནཱནཾ དེསཀོཏི ཚཊྛཱནདེསཀོ ¶ . ཨཡམཱ ཨེཀེཀཱ ཧུཏྭཱ ཨཱཝཏྟཱ ནཱིལཱ ཨམལཱ ཙ ཏནུརུཧཱ ཨསྶཱཏི ཨཡམཱཝཏྟནཱིལཱམལཏནུརུཧོ.

༡. ཡམཀཱནཾ ཝསེན དེསིཏཏྟཱཏི ཨིམིནཱ དསསུ ཨེཀེཀསྶ ཡམཀསམཱུཧསྶ ཏཾསམཱུཧསྶ ཙ སཀལསྶ པཀརཎསྶ ཡམཀཱནཾ ཝསེན ལདྡྷཝོཧཱརཏཾ དསྶེཏི.

ཀུསལཱཀུསལམཱུལསངྑཱཏཱནཾ ¶ དྭིནྣཾ ཨཏྠཱནཾ ཝསེན ཨཏྠཡམཀནྟི ཨེཏེན ‘‘ཡེ ཀེཙི ཀུསལཱ དྷམྨཱ, སབྦེ ཏེ ཀུསལམཱུལཱ’’ཏི ཨེཏསྶེཝ ཡམཀབྷཱཝོ ཨཱཔཛྫཏཱིཏི ཙེ? ནཱཔཛྫཏི ཉཱཏུཾ ཨིཙྪིཏཱནཾ དུཏིཡཔཋམཔུཙྪཱསུ ཝུཏྟཱནཾ ཀུསལཀུསལམཱུལཝིསེསཱནཾ, ཀུསལམཱུལཀུསལཝིསེསེཧི ཝཱ ཉཱཏུཾ ཨིཙྪིཏཱནཾ པཋམདུཏིཡཔུཙྪཱསུ སནྣིཊྛཱནཔདསངྒཧིཏཱནཾ ཀུསལཀུསལམཱུལཱནཾ ཝསེན ཨཏྠཡམཀབྷཱཝསྶ ཝུཏྟཏྟཱ. ཉཱཏུཾ ཨིཙྪིཏཱནཉྷི ཝིསེསཱནཾ ཝིསེསཝནྟཱཔེཀྑཱནཾ, ཏཾཝིསེསཝཏཾ ཝཱ དྷམྨཱནཉྩ ཝིསེསཱཔེཀྑཱནཾ ཨེཏྠ པདྷཱནབྷཱཝོཏི ཨེཀེཀཱཡ པུཙྪཱཡ ཨེཀེཀོ ཨེཝ ཨཏྠོ སངྒཧིཏོ ཧོཏཱིཏི. ཨཏྠསདྡོ ཙེཏྠ ན དྷམྨཝཱཙཀོ ཧེཏུཕལཱདིཝཱཙཀོ ཝཱ, ཨཐ ཁོ པཱལི༹ཨཏྠཝཱཙཀོ. ཏེནེཝཱཧ ‘‘ཏེསཉྙེཝ ཨཏྠཱན’’ནྟིཨཱདི.

ཏཱིཎིཔི པདཱནི ཨེཀཏོ ཀཏྭཱཏི ཨིདཾ ནཱམཔདསྶ ཀུསལཱདཱིནཾ སངྒཱཧཀཏྟམཏྟམེཝ སནྡྷཱཡ ཝུཏྟཾ, ན ནིརཝསེསསངྒཱཧཀཏྟཾ. སབྦཀུསལཱདིསངྒཎྷནཏྠམེཝ ཙ ནཱམཔདསྶ ཝུཏྟཏྟཱ ‘‘ཀུསལཏྟིཀམཱཏིཀཱཡ ཙཏཱུསུ པདེསཱུ’’ཏི ཝུཏྟཾ.

༥༢. ཨཉྙམཉྙཡམཀེ ¶ ཡེ ཀེཙི ཀུསལཱཏི ཨཔུཙྪིཏྭཱཏི ཨེཏྠ ཡཐཱ དུཏིཡཡམཀེ ‘‘ཡེ ཀེཙི ཀུསལམཱུལཱ’’ཏི ཨཔུཙྪིཏྭཱ ‘‘ཡེ ཀེཙི ཀུསལཱ’’ཏི པུཙྪཱ ཀཏཱ, ཨེཝམིདྷཱཔི ‘‘ཡེ ཀེཙི ཀུསལཱ’’ཏི པུཙྪཱ ཀཱཏབྦཱ སིཡཱ པུརིམཡམཀཝིསིཊྛཾ ཨཔུབྦཾ གཧེཏྭཱ པཙྪིམཡམཀསྶ ཨཔྤཝཏྟཏྟཱཏི ཨདྷིཔྤཱཡོ. ‘‘པཊིལོམཔུཙྪཱནུརཱུཔབྷཱཝཏོ’’ཏི ཀེཙི. པུརིམཔུཙྪཱཡ པན ཨཏྠཝསེན ཀཏཱཡ ཏདནུརཱུཔཱཡ པཙྪིམཔུཙྪཱཡ བྷཝིཏབྦཾ ཨནུལོམེ ཝིགཏསཾསཡསྶ པཊིལོམེ སཾསཡུཔྤཏྟིཏོ. ཏེན ན ཙ པཙྪིམཔུཙྪཱནུརཱུཔཱཡ པུརིམཔུཙྪཱཡ བྷཝིཏབྦནྟི པུརིམོཝེཏྠ ཨདྷིཔྤཱཡོ ཡུཏྟོ. ཨིམིནཱཔི བྱཉྫནེན ཏསྶེཝཏྠསྶ སམྦྷཝཏོཏི ཨིདམེཝཾ ན སཀྐཱ ཝཏྟུཾ. ན ཧི ཀུསལབྱཉྫནཏྠོ ཨེཝ ཀུསལམཱུལེན ཨེཀམཱུལབྱཉྫནཏྠོ, ཏེནེཝ ཝིསྶཛྫནམྤི ཨསམཱནཾ ཧོཏི. ཀུསལབྱཉྫནེན ཧི ¶ པུཙྪཱཡ ཀཏཱཡ ‘‘ཨཝསེསཱ’’ཏི ཨིམསྨིཾ ཋཱནེ ‘‘ཨཝསེསཱ ཀུསལཱ དྷམྨཱ’’ཏི ཝཏྟབྦཾ ཧོཏི, ཨིཏརཐཱ ཨཝསེསཱ ཀུསལམཱུལསཧཛཱཏཱ དྷམྨཱཏི, ན ཙ ཏཱནི ཝཙནཱནི སམཱནཏྠཱནི ཀུསལཀུསལཱབྱཱཀཏདཱིཔནཏོཏི. ཨཡཾ པནེཏྠ ཨདྷིཔྤཱཡོ སིཡཱ – ‘‘ཡེ ཀེཙི ཀུསལཱ’’ཏི ཨིམིནཱཔི བྱཉྫནེན ‘‘ཡེ ཀེཙི ཀུསལམཱུལེན ཨེཀམཱུལཱ’’ཏི ཝུཏྟབྱཉྫནཏྠསྶེཝ སམྦྷཝཏོ དུཏིཡཡམཀེ ཝིཡ ཨཔུཙྪིཏྭཱ ‘‘ཡེ ཀེཙི ཀུསལམཱུལེན ཨེཀམཱུལཱ’’ཏི པུཙྪཱ ཀཏཱ. ན ཧི ཀུསལམཱུལེཧི ཝིཡ ཀུསལམཱུལེན ཨེཀམཱུལེཧི ཨཉྙེ ཀུསལཱ སནྟི, ཀུསལེཧི པན ཨཉྙེཔི ཏེ སནྟཱིཏི.

པཊིལོམཔུཙྪཱཝཎྞནཱཡཾ ‘‘ཀུསལམཱུལེན ཨེཀམཱུལཱ’’ཏི ཧི པུཙྪཱཡ ཀཏཱཡ ‘‘མཱུལཱནི ཡཱནི ཨེཀཏོ ཨུཔྤཛྫནྟཱི’’ཏི ཧེཊྛཱ ཝུཏྟནཡེནེཝ ཝིསྶཛྫནཾ ཀཱཏབྦཾ བྷཝེཡྻཱཏི ཝུཏྟཾ, ཏམྤི ཏཐཱ ན སཀྐཱ ཝཏྟུཾ. ‘‘ཡེ ཝཱ པན ཀུསལམཱུལེན ཨཉྙམཉྙམཱུལཱ, སབྦེ ཏེ དྷམྨཱ ཀུསལམཱུལེན ཨེཀམཱུལཱ’’ཏི ཙ པུཙྪིཏེ ‘‘ཨཱམནྟཱ’’ ཨིཙྩེཝ ཝིསྶཛྫནེན བྷཝིཏབྦཾ. ན ཧི ཀུསལམཱུལེན ཨཉྙམཉྙམཱུལེསུ ཀིཉྩི ཨེཀམཱུལཾ ན ཧོཏི, ཡེན ཨནུལོམཔུཙྪཱཡ ཝིཡ ཝིབྷཱགོ ཀཱཏབྦོ བྷཝེཡྻ. ཡཏྠ ཏཱིཎི ཀུསལམཱུལཱནི ཨུཔྤཛྫནྟི, ཏཏྠ ཏཱནི ཨཉྙམཉྙམཱུལཱནི ཨེཀམཱུལཱནི ཙ དྭིནྣཾ དྭིནྣཾ ཨེཀེཀེན ཨཉྙམཉྙེཀམཱུལཏྟཱ. ཡཏྠ པན དྭེ ཨུཔྤཛྫནྟི, ཏཏྠ ཏཱནི ཨཉྙམཉྙམཱུལཱནེཝ, ན ཨེཀམཱུལཱནཱིཏི ཨེཏསྶ གཧཎསྶ ནིཝཱརཎཏྠཾ ‘‘མཱུལཱནི ཡཱནི ཨེཀཏོ ཨུཔྤཛྫནྟཱི’’ཏིཨཱདིནཱ ཝིསྶཛྫནཾ ཀཱཏབྦནྟི ཙེ? ན, ‘‘ཨཱམནྟཱ’’ཏི ཨིམིནཱཝ ཝིསྶཛྫནེན ཏཾགཧཎནིཝཱརཎཏོ ཨནུལོམཔུཙྪཱཝིསྶཛྫནེན ཙ ཨེཀཏོ ཨུཔྤཛྫམཱནཱནཾ དྭིནྣཾ ཏིཎྞཉྩ ¶ མཱུལཱནཾ ཨཉྙམཉྙེཀམཱུལབྷཱཝསྶ ནིཙྪིཏཏྟཱ. ཨཉྙམཉྙམཱུལཱནཉྷི སམཱནམཱུལཏཱ ཨེཝ ཨེཀམཱུལཝཙནེན པུཙྪཱིཡཏི, ན ཨཉྙམཉྙསམཱནམཱུལཏཱ, ཨཏྠི ཙ དྭིནྣཾ མཱུལཱནཾ སམཱནམཱུལཏཱ. ཏེསུ ཧི ཨེཀེཀཾ ཨིཏརེན མཱུལེན ཏཾམཱུལེཧི ཨཉྙེཧི སམཱནམཱུལནྟི.

ཨཉྙམཉྙམཱུལཏྟེ པན ནིཙྪིཏེ ཨེཀམཱུལཏྟསཾསཡཱབྷཱཝཏོ ‘‘སབྦེ ཏེ དྷམྨཱ ཀུསལམཱུལེན ཨེཀམཱུལཱ’’ཏི པུཙྪཱ ན ཀཏཱཏི དཊྛབྦཱ. ‘‘ཨཉྙམཉྙསྶ མཱུལཱ ཨེཏེསནྟིཔི ཨཉྙམཉྙམཱུལཱ, སམཱནཏྠེན ཨེཀཾ མཱུལཾ ཨེཏེསནྟི ཨེཀམཱུལཱ’’ཏི ཨུབྷཡམྤི ཝཙནཾ མཱུལཡུཏྟཏམེཝ ཝདཏི, ཏེནེཝ ཙ ཨུབྷཡཏྠཱཔི ‘‘ཀུསལམཱུལེནཱ’’ཏི ཝུཏྟཾ. ཏཏྠ མཱུལཡོགསཱམཉྙེ ཨེཀམཱུལཏྟེ ནིཙྪིཏེ ཏབྦིསེསོ ཨཉྙམཉྙམཱུལབྷཱཝོ ན ནིཙྪིཏོ ཧོཏཱིཏི ཨནུལོམཔུཙྪཱ པཝཏྟཱ, མཱུལཡོགཝིསེསེ པན ཨཉྙམཉྙམཱུལཏྟེ ནིཙྪིཏེ ན ཝིནཱ ཨེཀམཱུལཏྟེན ¶ ཨཉྙམཉྙམཱུལཏྟཾ ཨཏྠཱིཏི མཱུལཡོགསཱམཉྙཾ ཨེཀམཱུལཏྟཾ ནིཙྪིཏམེཝ ཧོཏི, ཏསྨཱ ‘‘ཨེཀམཱུལཱ’’ཏི པུཙྪཾ ཨཀཏྭཱ ཡཐཱ ཀུསལམཱུལཝཙནཾ ཨེཀམཱུལཝཙནཉྩ ཀུསལབྷཱཝདཱིཔཀཾ ན ཧོཏཱིཏི ཀུསལབྷཱཝེ སཾསཡསབྦྷཱཝཱ པཋམདུཏིཡཡམཀེསུ ‘‘སབྦེ ཏེ དྷམྨཱ ཀུསལཱ’’ཏི པཊིལོམཔུཙྪཱ ཀཏཱ, ཨེཝཾ ཨཉྙམཉྙམཱུལཝཙནཾ ཀུསལབྷཱཝདཱིཔཀཾ ན ཧོཏཱིཏི ཀུསལབྷཱཝེ སཾསཡསབྦྷཱཝཱ ཀུསལཱདྷིཀཱརསྶ ཙ ཨནུཝཏྟམཱནཏྟཱ ‘‘སབྦེ ཏེ དྷམྨཱ ཀུསལཱ’’ཏི པཊིལོམཔུཙྪཱ ཀཏཱཏི.

༥༣-༦༡. མཱུལནཡེ ཝུཏྟེ ཨེཝ ཨཏྠེ ཀུསལམཱུལབྷཱཝེན མཱུལསྶ ཝིསེསནེན སམཱནེན མཱུལེན ཨཉྙམཉྙསྶ ཙ མཱུལེན མཱུལཡོགདཱིཔནེན ཙཱཏི ཨིམིནཱ པརིཡཱཡནྟརེན པཀཱསེཏུཾ མཱུལམཱུལནཡོ ཝུཏྟོ. ཨཉྙཔདཏྠསམཱསནྟེན ཀ-ཀཱརེན ཏཱིསུཔི ཡམཀེསུ མཱུལཡོགམེཝ དཱིཔེཏུཾ མཱུལཀནཡོ ཝུཏྟོ. མཱུལམཱུལཀནཡཝཙནཔརིཡཱཡོ ཝུཏྟཔྤཀཱརོཝ.

༧༤-༨༥. ཨབྦོཧཱརིཀཾ ཀཏྭཱཏི ན ཨེཀམཱུལབྷཱཝཾ ལབྷམཱནེཧི ཨེཀཏོ ལབྦྷམཱནཏྟཱ སཧེཏུཀཝོཧཱརརཧིཏཾ ཀཏྭཱ. ན ཝཱ སཧེཏུཀདུཀེ ཝིཡ ཨེཏྠ ཧེཏུཔཙྩཡཡོགཱཡོགཝསེན ཨབྦོཧཱརིཀཾ ཀཏཾ, ཨཐ ཁོ སཧེཏུཀཝོཧཱརམེཝ ལབྷཏི, ན ཨཧེཏུཀཝོཧཱརནྟི ཨབྦོཧཱརིཀཾ ཀཏཾ. ཨེཀཏོ ལབྦྷམཱནཀཝསེནཱཏི ཨཧེཏུཀཙིཏྟུཔྤཱདནིབྦཱནེཧི ཧེཏུཔཙྩཡརཧིཏེཧི སཧ ལབྦྷམཱནཀརཱུཔཝསེནཱཏི ཨཏྠོ.

༨༦-༩༧. ཡསྶཾ པཱལི༹ཡཾ ‘‘ཨཧེཏུཀཾ ནཱམམཱུལེན ན ཨེཀམཱུལཾ, སཧེཏུཀཾ ནཱམམཱུལེན ཨེཀམཱུལ’’ནྟི (ཡམ. ༡.མཱུལཡམཀ.༨༧) ¶ པཱཋོ ཨཱགཏོ, ཏཏྠ ‘‘ཡེ ཀེཙི ནཱམཱ དྷམྨཱ’’ཏི ནཱམཱནཾ ནིདྡྷཱརིཏཏྟཱ ‘‘ཨཧེཏུཀཾ སཧེཏུཀ’’ནྟི ཙ ཝུཏྟེ ‘‘ནཱམ’’ནྟི ཙ ཨིདཾ ཝིཉྙཱཡམཱནམེཝཱཏི ན ཝུཏྟནྟི ཝེདིཏབྦཾ. ཡཏྠ པན ‘‘ཨཧེཏུཀཾ ནཱམཾ, སཧེཏུཀཾ ནཱམ’’ནྟི (ཡམ. ༡.མཱུལཡམཀ.༨༧) ཙ པཱཋོ, ཏཏྠ སུཔཱཀཊབྷཱཝཏྠཾ ‘‘ནཱམ’’ནྟི ཝུཏྟནྟི.

༢-༣. ཁནྡྷཡམཀེ ¶ ཚསུ ཀཱལབྷེདེསུ པུགྒལཨོཀཱསཔུགྒལོཀཱསཝསེན ཁནྡྷཱནཾ ཨུཔྤཱདནིརོདྷཱ ཏེསཾ པརིཉྙཱ ཙ ཝཏྟབྦཱ. ཏེ པན ཁནྡྷཱ ‘‘རཱུཔཀྑནྡྷོ’’ཏིཨཱདཱིཧི པཉྩཧི པདེཧི ཝུཙྩནྟི, ཏེསཾ དས ཨཝཡཝཔདཱནི. ཏཏྠ ཡོ རཱུཔཱདིཨཝཡཝཔདཱབྷིཧིཏོ དྷམྨོ, ཀིཾ སོ ཨེཝ སམུདཱཡཔདསྶ ཨཏྠོ. ཡོ ཙ སམུདཱཡཔདེན ཝུཏྟོ, སོ ཨེཝ ཨཝཡཝཔདསྶཱཏི ཨེཏསྨིཾ སཾསཡཊྛཱནེ རཱུཔཱདིཨཝཡཝཔདེཧི ཝུཏྟོ ཨེཀདེསོ སཀལོ ཝཱ སམུདཱཡཔདཱནཾ ཨཏྠོ, སམུདཱཡཔདེཧི པན ཝུཏྟོ ཨེཀནྟེན རཱུཔཱདིཨཝཡཝཔདཱནཾ ཨཏྠོཏི ཨིམམཏྠཾ དསྶེཏུཾ ‘‘རཱུཔཾ རཱུཔཀྑནྡྷོ, རཱུཔཀྑནྡྷོ རཱུཔ’’ནྟིཨཱདིནཱ པདསོདྷནཝཱརོ ཝུཏྟོ.

པུན ‘‘རཱུཔཀྑནྡྷོ’’ཏིཨཱདཱིནཾ སམཱསཔདཱནཾ ཨུཏྟརཔདཏྠཔྤདྷཱནཏྟཱ པདྷཱནབྷཱུཏསྶ ཁནྡྷཔདསྶ ཝེདནཱདིཨུཔཔདཏྠསྶ ཙ སམྦྷཝཏོ ཡཐཱ ‘‘རཱུཔཀྑནྡྷོ’’ཏི ཨེཏསྨིཾ པདེ རཱུཔཱཝཡཝཔདེན ཝུཏྟསྶ རཱུཔཀྑནྡྷབྷཱཝོ ཧོཏི རཱུཔསདྡསྶ ཁནྡྷསདྡསྶ ཙ སམཱནཱདྷིཀརཎབྷཱཝཏོཏི, ཨེཝཾ ཏཏྠ པདྷཱནབྷཱུཏེན ཁནྡྷཱཝཡཝཔདེན ཝུཏྟསྶ ཝེདནཱཀྑནྡྷཱདིབྷཱཝོ ཧོཏི ཁནྡྷཔདེན ཝེདནཱདིཔདཱནཾ སམཱནཱདྷིཀརཎཏྟཱཏི ¶ ཨེཏསྨིཾ སཾསཡཊྛཱནེ ཁནྡྷཱཝཡཝཔདེན ཝུཏྟོ དྷམྨོ ཀོཙི ཀེནཙི སམུདཱཡཔདེན ཝུཙྩཏི, ན སབྦོ སབྦེནཱཏི ཨིམམཏྠཾ དསྶེཏུཾ ‘‘རཱུཔཾ རཱུཔཀྑནྡྷོ, ཁནྡྷཱ ཝེདནཱཀྑནྡྷོ’’ཏིཨཱདིནཱ པདསོདྷནམཱུལཙཀྐཝཱརོ ཝུཏྟོ. ཨེཝཉྩ དསྶེནྟེན རཱུཔཱདིསདྡསྶ ཝིསེསནབྷཱཝོ, ཁནྡྷསདྡསྶ ཝིསེསིཏབྦབྷཱཝོ, ཝིསེསནཝིསེསིཏབྦཱནཾ སམཱནཱདྷིཀརཎབྷཱཝོ ཙ དསྶིཏོ ཧོཏི.

ཏེནེཏྠ སཾསཡོ ཧོཏི – ཀིཾ ཁནྡྷཏོ ཨཉྙམྤི རཱུཔཾ ཨཏྠི, ཡཏོ ཝིནིཝཏྟཾ རཱུཔཾ ཁནྡྷཝིསེསནཾ ཧོཏི, སབྦེཝ ཁནྡྷཱ ཀིཾ ཁནྡྷཝིསེསནབྷཱུཏེན རཱུཔེན ཝིསེསིཏབྦཱཏི, ཀིཾ པན ཏཾ ཁནྡྷཝིསེསནབྷཱུཏཾ རཱུཔནྟི? བྷཱུཏུཔཱདཱཡརཱུཔཾ ཏསྶེཝ གཧིཏཏྟཱ. ནིདྡེསེ ‘‘ཁནྡྷཱ རཱུཔཀྑནྡྷོ’’ཏི པདཾ ཨུདྡྷརིཏྭཱ ཝིསྶཛྫནཾ ཀཏནྟི. ཨེཝཾ ཨེཏསྨིཾ སཾསཡཊྛཱནེ ན ཁནྡྷཏོ ཨཉྙཾ རཱུཔཾ ཨཏྠི, ཏེནེཝ ཙེཏེན རཱུཔསདྡེན ཝུཙྩམཱནཾ སུདྡྷེན ཁནྡྷསདྡེན ཝུཙྩཏེ, ན ¶ ཙ སབྦེ ཁནྡྷཱ ཁནྡྷཝིསེསནབྷཱུཏེན རཱུཔེན ཝིསེསིཏབྦཱ, ཏེནེཝ ཏེ ཝིབྷཛིཏབྦཱ, ཨེས ནཡོ ཝེདནཱཀྑནྡྷཱདཱིསུཔཱིཏི ཨིམམཏྠཾ དསྶེཏུཾ ‘‘རཱུཔཾ ཁནྡྷོ, ཁནྡྷཱ རཱུཔ’’ནྟིཨཱདིནཱ སུདྡྷཁནྡྷཝཱརོ ཝུཏྟོ.

ཏཏོ ‘‘རཱུཔཾ ཁནྡྷོ’’ཏི ཨེཏསྨིཾ ཨནུཉྙཱཡམཱནེ ‘‘ན ཀེཝལཾ ཨཡཾ ཁནྡྷསདྡོ རཱུཔཝིསེསནོཝ, ཨཐ ཁོ ཝེདནཱདིཝིསེསནོ ཙཱ’’ཏི རཱུཔསྶ ཁནྡྷབྷཱཝནིཙྪཡཱནནྟརཾ ཁནྡྷཱནཾ རཱུཔཝིསེསནཡོགེ ཙ སཾསཡོ ཧོཏི. ཏཏྠ ན སབྦེ ཁནྡྷཱ ཝེདནཱདིཝིསེསནཡུཏྟཱ, ཨཐ ཁོ ཀེཙི ཀེནཙི ཝིསེསནེན ཡུཉྫནྟཱིཏི དསྶེཏུཾ སུདྡྷཁནྡྷམཱུལཙཀྐཝཱརོ ཝུཏྟོཏི. ཨེཝཾ ཡེསཾ ཨུཔྤཱདཱདཡོ ཝཏྟབྦཱ, ཏེསཾ ཁནྡྷཱནཾ པཎྞཏྟིསོདྷནཝསེན ཏནྣིཙྪཡཏྠཾ པཎྞཏྟིཝཱརོ ཝུཏྟོཏི ཝེདིཏབྦོ.

ཙཏྟཱརི ཙཏྟཱརི ཙཀྐཱནི བནྡྷིཏྭཱཏི ཨེཏྠ ཙཀྐཱཝཡཝབྷཱཝཏོ ཙཀྐཱནཱིཏི ཡམཀཱནི ཝུཏྟཱནི ཨེཀེཀཁནྡྷམཱུལཱནི ཙཏྟཱརི ཙཏྟཱརི ཡམཀཱནི བནྡྷིཏྭཱཏི. ཨིམིནཱ ཧི ཨེཏྠ ཨཏྠེན བྷཝིཏབྦནྟི. ཙཏྟཱརི ཙཏྟཱརི ཡམཀཱནི ཡཐཱ ཨེཀེཀཁནྡྷམཱུལཀཱནི ཧོནྟི, ཨེཝཾ བནྡྷིཏྭཱཏི ཝཱ ཨཏྠོ དཊྛབྦོ. ཏཏྠ ‘‘རཱུཔཾ རཱུཔཀྑནྡྷོ’’ཏི ཨེཝམཱདིཀཾ མཱུལཔདཾ ནཱབྷིཾ ཀཏྭཱ ‘‘ཁནྡྷཱ’’ཏི ཨིདཾ ནེམིཾ, ‘‘ཝེདནཱཀྑནྡྷོ’’ཏིཨཱདཱིནི ཨརེ ཀཏྭཱ ཙཀྐབྷཱཝོ ཝུཏྟོཏི ཝེདིཏབྦོ, ན མཎྜལབྷཱཝེན སམྦཛ྄ཛྷནཏོ. ཝེདནཱཀྑནྡྷམཱུལཀཱདཱིསུཔི ཧི ཧེཊྛིམཾ སོདྷེཏྭཱཝ པཱཋོ གཏོ, ན མཎྜལསམྦནྡྷེནཱཏི. ཏེནེཝ ཙ ཀཱརཎེནཱཏི སུདྡྷཁནྡྷལཱབྷམཏྟམེཝ གཧེཏྭཱ ཁནྡྷཝིསེསནེ རཱུཔཱདིམྷི སུདྡྷརཱུཔཱདིམཏྟཏཱཡ ¶ ཨཊྛཏྭཱ ཁནྡྷཝིསེསནབྷཱཝསངྑཱཏཾ རཱུཔཱདིཨཏྠཾ དསྶེཏུཾ ཁནྡྷསདྡེན སཧ ཡོཛེཏྭཱ ‘‘ཁནྡྷཱ རཱུཔཀྑནྡྷོ’’ཏིཨཱདིནཱ ནཡེན པདཾ ཨུདྡྷརིཏྭཱ ཨཏྠསྶ ཝིབྷཏྟཏྟཱཏི ཨཏྠོ.

༢༦. པིཡརཱུཔཾ སཱཏརཱུཔནྟི ‘‘ཙཀྑུཾ ལོཀེ པིཡརཱུཔཾ…པེ… རཱུཔཱ ལོཀེ…པེ… ཙཀྑུཝིཉྙཱཎཾ…པེ… ཙཀྑུསམྥསྶོ…པེ… ཙཀྑུསམྥསྶཛཱ ཝེདནཱ…པེ… རཱུཔསཉྙཱ…པེ… རཱུཔསཉྩེཏནཱ…པེ… རཱུཔཏཎྷཱ…པེ… རཱུཔཝིཏཀྐོ…པེ… རཱུཔཝིཙཱརོ’’ཏི (དཱི. ནི. ༢.༤༠༠; མ. ནི. ༡.༡༣༣; ཝིབྷ. ༢༠༣) ཨེཝཾ ཝུཏྟཾ ཏཎྷཱཝཏྠུབྷཱུཏཾ ¶ ཏེབྷཱུམཀཾ ཝེདིཏབྦཾ, ཏསྨཱ ཡཾ པཉྩཀྑནྡྷསམུདཱཡབྷཱུཏཾ པིཡརཱུཔསཱཏརཱུཔཾ, ཏཾ ཨེཀདེསེན རཱུཔཀྑནྡྷོ ཧོཏཱིཏི ཨཱཧ ‘‘པིཡརཱུཔཾ སཱཏརཱུཔཾ རཱུཔཾ ན རཱུཔཀྑནྡྷོ’’ཏི. པིཡསབྷཱཝཏཱཡ ཝཱ རཱུཔཀྑནྡྷོ པིཡརཱུཔེ པཝིསཏི, ན རུཔྤནསབྷཱཝེནཱཏི ‘‘པིཡརཱུཔཾ སཱཏརཱུཔཾ རཱུཔཾ ན རཱུཔཀྑནྡྷོ’’ཏི ཝུཏྟཾ. སཉྙཱཡམཀེ ཏཱཝ དིཊྛིསཉྙཱཏི ‘‘ཝིསེསོ’’ཏི ཝཙནསེསོ. ཏཏྠ དིཊྛི ཨེཝ སཉྙཱ དིཊྛིསཉྙཱ. ‘‘སཡཾ སམཱདཱཡ ཝཏཱནི ཛནྟུ, ཨུཙྩཱཝཙཾ གཙྪཏི སཉྙསཏྟོ’’ཏི (སུ. ནི. ༧༩༨), ‘‘སཉྙཱཝིརཏྟསྶ ན སནྟི གནྠཱ’’ཏི (སུ. ནི. ༨༥༣) ཙ ཨེཝམཱདཱིསུ ཧི དིཊྛི ཙ ‘‘སཉྙཱ’’ཏི ཝུཏྟཱཏི.

༢༨. ‘‘ན ཁནྡྷཱ ན ཝེདནཱཀྑནྡྷོཏི? ཨཱམནྟཱ’’ཏི ཨེཝཾ ཁནྡྷསདྡཔྤཝཏྟིཡཱ ཨབྷཱཝེ ཝེདནཱཀྑནྡྷསདྡཔྤཝཏྟིཡཱ ཙ ཨབྷཱཝོཏི པཎྞཏྟིསོདྷནམཏྟམེཝ ཀརོཏཱིཏི དཊྛབྦཾ, ན ཨཉྙདྷམྨསབྦྷཱཝོ ཨེཝེཏྠ པམཱཎཾ. ཨེཝཉྩ ཀཏྭཱ ‘‘ནཱཡཏནཱ ན སོཏཱཡཏནནྟི? ཨཱམནྟཱ’’ཏིཨཱདིཾ ཝཀྑཏཱིཏི.

༣༩. རཱུཔཏོ ཨཉྙེ ཝེདནཱདཡོཏི ཨེཏྠ ལོཀུཏྟརཱ ཝེདནཱདཡོ དཊྛབྦཱ. ཏེ ཧི པིཡརཱུཔཱ ཙ སཱཏརཱུཔཱ ཙ ན ཧོནྟི ཏཎྷཱཡ ཨནཱརམྨཎཏྟཱཏི རཱུཔཏོ ཨཉྙེ ཧོནྟཱིཏི. རཱུཔཉྩ ཁནྡྷེ ཙ ¶ ཋཔེཏྭཱ ཨཝསེསཱཏི ཨིདམྤི ཨེཏེཧི སདྡྷིཾ ན-སདྡཱནཾ ཨཔྤཝཏྟིམཏྟམེཝ སནྡྷཱཡ ཝུཏྟནྟི དཊྛབྦཾ. ཨེཝཉྩ ཀཏྭཱ ‘‘ཙཀྑུཉྩ ཨཱཡཏནེ ཙ ཋཔེཏྭཱ ཨཝསེསཱ ན ཙེཝ ཙཀྑུ ན ཙ ཨཱཡཏནཱ’’ཏིཨཱདིཾ (ཡམ. ༡.ཨཱཡཏནཡམཀ.༡༥) ཝཀྑཏི. ན ཧི ཏཏྠ ཨཝསེསགྒཧཎེན གཡ྄ཧམཱནཾ ཀཉྩི ཨཏྠི. ཡདི སིཡཱ, དྷམྨཱཡཏནཾ སིཡཱ. ཝཀྑཏི ཧི ‘‘དྷམྨོ ཨཱཡཏནནྟི? ཨཱམནྟཱ’’ཏི (ཡམ. ༡.ཨཱཡཏནཡམཀ.༡༦). ཏཎྷཱཝཏྠུ ཙ ན ཏཾ སིཡཱ. ཡདི སིཡཱ, པིཡརཱུཔསཱཏརཱུཔབྷཱཝཏོ རཱུཔཾ སིཡཱ ‘‘རཱུཔཾ ཁནྡྷོཏི? ཨཱམནྟཱ’’ཏི (ཡམ. ༡.ཁནྡྷཡམཀ.༤༠) ཝཙནཏོ ཁནྡྷོ ཙཱཏི. ཨཊྛཀཐཱཡཾ པན ཨཝིཛྫམཱནེཔི ཝིཛྫམཱནཾ ཨུཔཱདཱཡ ཨིཏྠིཔུརིསཱདིགྒཧཎསབྦྷཱཝཾ སནྡྷཱཡ ཨཝསེསཱཏི ཨེཏྠ པཉྙཏྟིཡཱ གཧཎཾ ཀཏནྟི ཝེདིཏབྦཾ.

༥༠-༢༠༥. པཝཏྟིཝཱརེ ¶ ཝེདནཱཀྑནྡྷཱདིམཱུལཀཱནི པཙྪིམེནེཝ སཧ ཡོཛེཏྭཱ ཏཱིཎི དྭེ ཨེཀཉྩ ཡམཀཱནི ཝུཏྟཱནི, ན པུརིམེན. ཀསྨཱ? ཨམིསྶཀཀཱལབྷེདེསུ ཝཱརེསུ ཨཏྠཝིསེསཱབྷཱཝཏོ. པུརིམསྶ ཧི པཙྪིམེན ཡོཛིཏཡམཀམེཝ པཙྪིམསྶ པུརིམེན ཡོཛནཱཡ པུཙྪཱནཾ ཨུཔྤཊིཔཱཊིཡཱ ཝུཙྩེཡྻ, ཨཏྠེ པན ན ཀོཙི ཝིསེསོཏི. པུཙྪཱཝིསྶཛྫནེསུཔི ཝིསེསོ ནཏྠི, ཏེན ཏཐཱ ཡོཛནཱ ན ཀཏཱཏི. ཀཱལབྷེདཱ པནེཏྠ ཚ ཨེཝ ཝུཏྟཱ. ཨཏཱིཏེན པཙྩུཔྤནྣོ, ཨནཱགཏེན པཙྩུཔྤནྣོ, ཨནཱགཏེནཱཏཱིཏོཏི ཨེཏེ པན ཏཡོ ཡཐཱདསྶིཏཱ མིསྶཀཀཱལབྷེདཱ ཨེཝ ཏཡོ, ན ཝིསུཾ ཝིཛྫནྟཱིཏི ན གཧིཏཱ. ཏཏྠ ཏཏྠ ཧི པཊིལོམཔུཙྪཱཧི ཨཏཱིཏེན པཙྩུཔྤནྣཱདཡོ ཀཱལབྷེདཱ དསྶིཏཱ, ཏེནེཝ ཙ ནཡེན ‘‘ཡསྶ རཱུཔཀྑནྡྷོ ཨུཔྤཛྫིཏྠ, ཏསྶ ཝེདནཱཀྑནྡྷོ ཨུཔྤཛྫཏཱི’’ཏིཨཱདི སཀྐཱ ཡོཛེཏུཾ. ཏེནེཝ ཧི མིསྶཀཀཱལབྷེདེསུ ཙ ན པཙྪིམཔཙྪིམསྶ ཁནྡྷསྶ པུརིམཔུརིམེན ཡོཛནཾ ཀཏྭཱ ཡམཀཱནི ཝུཏྟཱནི, ཨམིསྶཀཀཱལབྷེདེསུ གཧིཏནིཡཱམེན སུཁགྒཧཎཏྠམྤི པཙྪིམཔཙྪིམེནེཝ ཡོཛེཏྭཱ ཝུཏྟཱནཱིཏི.

ཨིམིནཱཡེཝ ¶ ཙ ལཀྑཎེནཱཏིཨཱདིནཱ ཡེན ཀཱརཎེན ‘‘པུརེཔཉྷོ’’ཏི ཙ ‘‘པཙྪཱཔཉྷོ’’ཏི ཙ ནཱམཾ ཝུཏྟཾ, ཏཾ དསྶེཏི. ཡསྶ ཧི སརཱུཔདསྶནེན ཝིསྶཛྫནཾ ཧོཏི, སོ པརིཔཱུརེཏྭཱ ཝིསྶཛྫེཏབྦཏྠསངྒཎྷནཏོ པརིཔུཎྞཔཉྷོ ནཱམ. ཏཾཝིསྶཛྫནསྶ པན པུརིམཀོཊྛཱསེན སདིསཏྠཏཱཡ པུརེཔཉྷོ, པཙྪིམཀོཊྛཱསསདིསཏྠཏཱཡ ‘‘པཙྪཱཔཉྷོ’’ཏི ཙ ནཱམཾ ཝུཏྟཾ. སདིསཏྠཏཱ ཙ སནྣིཊྛཱནསཾསཡཔདཝིསེསཾ ཨཝིཙཱརེཏྭཱ ཨེཀེན པདེན སངྒཧིཏསྶ ཁནྡྷསྶ ཨུཔྤཱདནིརོདྷལཱབྷསཱམཉྙམཏྟེན པུརེཔཉྷེ དཊྛབྦཱ. སནྣིཊྛཱནཔདསངྒཧིཏསྶ ཝཱ ཁནྡྷསྶ ཨནུཉྙཱཏཝསེན པུརེཔཉྷོ ཝུཏྟོཏི ཡུཏྟཾ.

སནྣིཊྛཱནཏྠསྶེཝ པཊིཀྑིཔནཾ པཊིཀྑེཔོ, སཾསཡཏྠནིཝཱརཎཾ པཊིསེདྷོཏི ཨཡཾ པཊིཀྑེཔཔཊིསེདྷཱནཾ ཝིསེསོ. པཱལི༹པདམེཝ ཧུཏྭཱཏི པུཙྪཱཔཱལི༹ཡཱ ‘‘ནུཔྤཛྫཏཱི’’ཏི ཡཾ པདཾ ཝུཏྟཾ, ན-ཀཱརཝིརཧིཏཾ ཏདེཝ པདཾ ཧུཏྭཱཏི ཨཏྠོ. ཏཏྠ ཨུཔྤཏྟིནིརོདྷཔཊིསེདྷསྶ པཊིསེདྷནཏྠཾ པཱལི༹གཏིཡཱ ཝིསྶཛྫནཾ ཨུཔྤཏྟིནིརོདྷཱནམེཝ པཊིསེདྷནཏྠཾ པཊིསེདྷེན ཝིསྶཛྫནཾ ཀཏནྟི ཝེདིཏབྦཾ.

ཙཏུནྣཾ ¶ པཉྷཱནཾ པཉྩནྣཉྩ ཝིསྶཛྫནཱནཾ སཏྟཝཱིསཏིཡཱ ཋཱནེསུ པཀྑེཔོ ཏདེཀདེསཔཀྑེཔཝསེན ཝུཏྟོཏི ཝེདིཏབྦོ. པརིཔུཎྞཔཉྷོ ཨེཝ ཧི སརཱུཔདསྶནེན ཙ ཝིསྶཛྫནཾ སཏྟཝཱིསཏིཡཱ ཋཱནེསུ པཀྑིཔིཏབྦནྟི.

ཀིཾ ནུ སཀྐཱ ཨིཏོ པརནྟི ཨིཏོ པཱལི༹ཝཝཏྠཱནདསྶནཱདིཏོ ཨཉྙོ ཀིཾ ནུ སཀྐཱ ཀཱཏུནྟི ཨཉྙསྶ སཀྐུཎེཡྻསྶ ཨབྷཱཝཾ དསྶེཏི.

‘‘སུདྡྷཱཝཱསཱནཾ ཏེསཾ ཏཏྠ རཱུཔཀྑནྡྷོ ཙ ནུཔྤཛྫིཏྠ ཝེདནཱཀྑནྡྷོ ཙ ནུཔྤཛྫིཏྠཱ’’ཏི ཨེཏེན སུདྡྷཱཝཱསབྷཱུམཱིསུ ཨེཀབྷཱུམིཡམྤི དུཏིཡཱ ཨུཔཔཏྟི ནཏྠཱིཏི ཉཱཔིཏཾ ཧོཏི. པཊིསནྡྷིཏོ པབྷུཏི ཧི ཡཱཝ ཙུཏི, ཏཱཝ པཝཏྟཀམྨཛསནྟཱནཾ ཨེཀཏྟེན གཧེཏྭཱ ཏསྶ ཨུཔྤཱདནིརོདྷཝསེན ཨཡཾ དེསནཱ པཝཏྟཱ. ཏསྨིཉྷི ཨབྦོཙྪིནྣེ ཀུསལཱདཱིནཉྩ པཝཏྟི ཧོཏི, ཝོཙྪིནྣེ ཙ ཨཔྤཝཏྟཱིཏི ཏེནེཝ ཙ ཨུཔྤཱདནིརོདྷཱ དསྶིཏཱ, ཏསྨཱ ཏསྶ ཨེཀསཏྟསྶ པཊིསནྡྷིཨུཔྤཱདཏོ ཡཱཝ ཙུཏིནིརོདྷོ, ཏཱཝ ཨཏཱིཏཏཱ ནཏྠི, ན ཙ ཏཏོ པུབྦེ ཏཏྠ པཊིསནྡྷིཝསེན ཀམྨཛསནྟཱནཾ ཨུཔྤནྣཔུབྦནྟི ཁནྡྷདྭཡམྤི ‘‘ནུཔྤཛྫིཏྠཱ’’ཏི ཝུཏྟཾ. ཀསྨཱ པན ཨེཏཱཡ པཱལི༹ཡཱ ¶ སཀལེཔི སུདྡྷཱཝཱསེ དུཏིཡཱ པཊིསནྡྷི ནཏྠཱིཏི ན ཝིཉྙཱཡཏཱིཏི? ཨུདྡྷཾསོཏཔཱལི༹སབྦྷཱཝཱ. དྭེཔི ཧི པཱལི༹ཡོ སཾསནྡེཏབྦཱཏི.

‘‘ཨསཉྙསཏྟཱནཾ ཏེསཾ ཏཏྠ རཱུཔཀྑནྡྷོ ཨུཔྤཛྫིསྶཏཱི’’ཏི ཨེཏྠ ‘‘ཡསྶ ཡཏྠ རཱུཔཀྑནྡྷོ ཨུཔྤཛྫིསྶཏཱི’’ཏི ཨེཏེན སནྣིཊྛཱནེན ཝིསེསིཏཱ ཨསཉྙསཏྟཱཔི སནྟཱིཏི ཏེ ཨེཝ གཧེཏྭཱ ‘‘ཨསཉྙསཏྟཱན’’ནྟི ཝུཏྟཾ. ཏེན ཡེ སནྣིཊྛཱནེན ཝཛྫིཏཱ, ཏེ ཏཏོ པཉྩཝོཀཱརཾ གནྟྭཱ པརིནིབྦཱཡིསྶནྟི, ན ཏེསཾ པུན ཨསཉྙེ ཨུཔཔཏྟིཔྤསངྒོ ཨཏྠཱིཏི ཏེ སནྡྷཱཡཱཧ – ‘‘པཙྪིམབྷཝིཀཱནཾ ཏེསཾ ཏཏྠ རཱུཔཀྑནྡྷོ ཙ ནུཔྤཛྫིསྶཏི ཝེདནཱཀྑནྡྷོ ཙ ནུཔྤཛྫིསྶཏཱི’’ཏི (ཡམ. ༡.ཁནྡྷཡམཀ.༦༥). ཨེཏྠ ཀིཾ པཉྩཝོཀཱརཱདིབྷཱཝོ ཝིཡ པཙྪིམབྷཝོཔི ཀོཙི ཨཏྠི, ཡཏྠ ཏེསམནུཔྤཏྟི བྷཝིསྶཏཱིཏི? ནཏྠི པཉྩཝོཀཱརཱདིབྷཝེསྭེཝ ཡཏྠ ཝཱ ཏཏྠ ཝཱ ཋིཏཱནཾ པཙྪིམབྷཝིཀཱནཾ ‘‘ཡསྶ ཡཏྠ རཱུཔཀྑནྡྷོ ནུཔྤཛྫིསྶཏཱི’’ཏི ཨེཏེན སནྣིཊྛཱནེན སངྒཧིཏཏྟཱ. ཏེསཾ ཏཏྠ ཨིཏརཱནུཔྤཏྟིབྷཱཝཉྩ ཨནུཛཱནནྟོ ‘‘ཝེདནཱཀྑནྡྷོ ཙ ནུཔྤཛྫིསྶཏཱི’’ཏི ཨཱཧཱཏི.

‘‘སུདྡྷཱཝཱསེ ¶ པརིནིབྦནྟཱན’’ནྟི ཨིདཾ སཔྤཊིསནྡྷིཀཱནཾ ཨཔྤཊིསནྡྷིཀཱནཉྩ སུདྡྷཱཝཱསཱནཾ ཏཾཏཾབྷཱུམིཡཾ ཁནྡྷཔརིནིབྦཱནཝསེན ཝུཏྟནྟི ཝེདིཏབྦཾ. སབྦེསཉྷི ཏེསཾ ཏཏྠ ཝེདནཱཀྑནྡྷོ ནུཔྤཛྫིཏྠཱཏི. ཡཐཱ པན ‘‘ནིརུཛ྄ཛྷིསྶཏཱི’’ཏི ཝཙནཾ པཙྩུཔྤནྣེཔི ཨུཔྤཱདཀྑཎསམངྒིམྷི པཝཏྟཏི, ན ཨེཝཾ ‘‘ཨུཔྤཛྫིཏྠཱ’’ཏི ཝཙནཾ པཙྩུཔྤནྣེ པཝཏྟཏི, ཨཐ ཁོ ཨུཔྤཛྫིཏྭཱ ཝིགཏེ ཨཏཱིཏེ ཨེཝ, ཏསྨཱ ‘‘པརིནིབྦནྟཱནཾ ནུཔྤཛྫིཏྠཱ’’ཏི ཝུཏྟཾ ཨུཔྤནྣསནྟཱནསྶ ཨཝིགཏཏྟཱ. ཨནནྟཱ ལོཀདྷཱཏུཡོཏི ཨོཀཱསསྶ ཨཔརིཙྪིནྣཏྟཱ ཨོཀཱསཝསེན ཝུཙྩམཱནཱནཾ ཨུཔྤཱདནིརོདྷཱནམྤི པརིཙྪེདཱབྷཱཝཏོ སཾཀིཎྞཏཱ ཧོཏཱིཏི ‘‘ཡཏྠ ཝེདནཱཀྑནྡྷོ ཨུཔྤཛྫཏི, ཏཏྠ སཉྙཱཀྑནྡྷོ ནིརུཛ྄ཛྷཏཱིཏི? ཨཱམནྟཱ’’ཏི ཝུཏྟཾ.

༢༠༦-༢༠༨. པུགྒལོཀཱསཝཱརོ ¶ ལབྦྷམཱནོཔཱིཏི ཀསྨཱ ཝུཏྟཾ, ནནུ ཨོཀཱསཝཱརསྶ ཨལཱབྷེ ཏསྶཔི ཨལཱབྷེན བྷཝིཏབྦནྟི? ན, ཏཏྠ པུགྒལསྶེཝ པརིཉྙཱཝཙནཏོ. པུགྒལོཀཱསཝཱརེཔི ཧི ཨོཀཱསེ པུགྒལསྶེཝ པརིཉྙཱ ཝུཙྩཏི, ན ཨོཀཱསསྶ. ཨོཀཱསཝཱརོཔི ཙ ཡདི ཝུཙྩེཡྻ, ‘‘ཡཏྠ རཱུཔཀྑནྡྷཾ པརིཛཱནཱཏཱི’’ཏི ཨོཀཱསེ པུགྒལསྶེཝ པརིཛཱནནཝསེན ཝུཙྩེཡྻ, ཏསྨཱ པུགྒལོཀཱསཝཱརསྶེཝ ལབྦྷམཱནཏཱ ཝུཏྟཱ, ན ཨོཀཱསཝཱརསྶཱཏི. ཏེནཱཧ – ‘‘ཨཱམནྟཱ…པེ… སིཡཱ’’ཏི.

ཏེནེཝཱཏི པཝཏྟེ ཙིཏྟཀྑཎཝསེན ཏིཎྞཾ ཨདྡྷཱནཾ ལཱབྷཏོ ཨེཝ, ཨཉྙཐཱ ཙུཏིཔཊིསནྡྷིཀྑཎེ རཱུཔཀྑནྡྷཔརིཛཱནནསྶ ཨབྷཱཝཱ ‘‘ཡོ རཱུཔཀྑནྡྷཾ པརིཛཱནཱཏི, སོ ཝེདནཱཀྑནྡྷཾ པརིཛཱནཱཏཱི’’ཏི ཨེཏྠ ‘‘ནཏྠཱི’’ཏི ཝིསྶཛྫནེན བྷཝིཏབྦཾ སིཡཱ, ‘‘ཨཱམནྟཱ’’ཏི ཙ ཀཏནྟི. སནྣིཊྛཱནསཾསཡཔདསངྒཧིཏཱནཾ པརིཉྙཱནཾ པཝཏྟེ ཙིཏྟཀྑཎེ ཨེཝ ལཱབྷཾ དསྶེནྟོ ‘‘ལོཀུཏྟརམགྒཀྑཎསྨིཉྷཱི’’ཏིཨཱདིམཱཧ. ན པརིཛཱནཱཏཱིཏི པཉྷེ པུཐུཛྫནཾ སནྡྷཱཡ ཨཱམནྟཱཏི ཝུཏྟནྟི ཨིདཾ པུཐུཛྫནསྶ སབྦཐཱ པརིཉྙཱཀིཙྩསྶ ཨབྷཱཝཏོ ཝུཏྟཾ. ‘‘ཨརཧཱ རཱུཔཀྑནྡྷཾ ན པརིཛཱནཱཏི ནོ ཙ ཝེདནཱཀྑནྡྷཾ ན པརིཛཱནིཏྠ, ཨགྒམགྒསམངྒིཉྩ ཨརཧནྟཉྩ ཋཔེཏྭཱ ཨཝསེསཱ པུགྒལཱ རཱུཔཀྑནྡྷཉྩ ན པརིཛཱནནྟི ¶ ཝེདནཱཀྑནྡྷཉྩ ན པརིཛཱནིཏྠཱ’’ཏི པན ཝཙནེན ‘‘ཨགྒམགྒསམངྒིཾ ཋཔེཏྭཱ ཨཉྙོ ཀོཙི པརིཛཱནཱཏཱི’’ཏི ཝཏྟབྦོ ནཏྠཱིཏི དསྶིཏཾ ཧོཏི, ཏེན ཏདཝསེསཔུགྒལེ སནྡྷཱཡ ‘‘ཨཱམནྟཱ’’ཏི ཝུཏྟནྟི ཝིཉྙཱཡཏཱིཏི.

༡-༩. ཨཱཡཏནཡམཀཱདཱིསུ ¶ ཙ པཎྞཏྟིཝཱརེ པདསོདྷནཝཱརཱདཱིནཾ ཝཙནེ ཀཱརཎཾ ཁནྡྷཡམཀེ ཝུཏྟནཡེནེཝ ཝེདིཏབྦཾ. ‘‘ཨེཀཱདས ཨེཀཱདས ཀཏྭཱ ཏེཏྟིཾསསཏཾ ཡམཀཱནཱི’’ཏིཨཱདིནཱ ཀེསུཙི པོཏྠཀེསུ གཎནཱ ལིཁིཏཱ, སཱ ཏཐཱ ན ཧོཏི. ‘‘དྭཏྟིཾསསཏ’’ནྟིཨཱདིནཱ ཨཉྙཏྠ ལིཁིཏཱ.

༡༠-༡༧. ཝཱཡནཊྛེནཱཏི པསཱརཎཊྛེན, པཱཀཊབྷཱཝཊྛེན ཝཱ. ‘‘ཀཱཡོ དྷམྨོ’’ཏི ཙ ཝུཙྩམཱནཾ སབྦཾ སསབྷཱཝཾ ཨཱཡཏནམེཝཱཏི ‘‘ཀཱཡོ ཨཱཡཏན’’ནྟི, ‘‘དྷམྨོ ཨཱཡཏན’’ནྟི ཙ ཨེཏྠ ‘‘ཨཱམནྟཱ’’ཏི ཝུཏྟཾ. ཀཱཡཝཙནེན པན དྷམྨཝཙནེན ཙ ཨཝུཙྩམཱནཾ ཀཉྩི སསབྷཱཝཾ ནཏྠཱིཏི ‘‘ན ཀཱཡོ ནཱཡཏནཾ, ན དྷམྨོ ནཱཡཏན’’ནྟི ཨེཏྠ ‘‘ཨཱམནྟཱ’’ཨིཙྩེཝ ཝུཏྟཾ.

༡༨-༢༡. པཝཏྟིཝཱརེ ¶ ཙཀྑཱཡཏནམཱུལཀཱནི ཨེཀཱདསཱཏི པཊིསནྡྷིཙུཏིཝསེན ཨུཔཱདིནྣཔཝཏྟསྶ ¶ ཨུཔྤཱདནིརོདྷཝཙནེ ཨེཏསྨིཾ ཨལབྦྷམཱནཝིསྶཛྫནམྤི སདྡཱཡཏནེན སདྡྷིཾ ཡམཀཾ པུཙྪཱམཏྟལཱབྷེན སངྒཎྷིཏྭཱ ཝདཏཱིཏི དཊྛབྦཾ. ཚསཊྛི ཡམཀཱནཱིཏི ཨེཏྠ ཙཀྑུསོཏགྷཱནཛིཝ྄ཧཱཀཱཡརཱུཔཱཡཏནམཱུལཀེསུ ཨེཀེཀཾ སདྡཱཡཏནམཱུལཀཱནི པཉྩཱཏི ཨེཀཱདས ཡམཀཱནི ཝིསྶཛྫནཝསེན ཧཱཔེཏབྦཱནི. ཝཀྑཏི ཧི ‘‘སདྡཱཡཏནསྶ པཊིསནྡྷིཀྑཎེ ཨནུཔྤཏྟིཏོ ཏེན སདྡྷིཾ ཡམཀསྶ ཝིསྶཛྫནམེཝ ནཏྠཱི’’ཏི (ཡམ. ཨཊྛ. ཨཱཡཏནཡམཀ ༡༨-༢༡).

དུཏིཡཾ ཀིཉྩཱཔི པཋམེན སདིསཝིསྶཛྫནནྟིཨཱདི པུགྒལཝཱརམེཝ སནྡྷཱཡ ཝུཏྟནྟི དཊྛབྦཾ. ཨོཀཱསཝཱརེ པན ཨསདིསཝིསྶཛྫནཏྟཱ ཝུཏྟཾ, ན ཏཾ སབྦཏྠ སདིསཝིསྶཛྫནནྟི ཉཱཔེཏུཾ པུགྒལཝཱརེཔི ཝིསྶཛྫིཏནྟི. གནྡྷརསཕོཊྛབྦཱཡཏནེཧི སདྡྷིཾ ཏཱིཎི ཡམཀཱནི སདིསཝིསྶཛྫནཱནཱིཏི རཱུཔཱཝཙརསཏྟེ སནྡྷཱཡ ‘‘སཙཀྑུཀཱནཾ ཨགནྡྷཀཱན’’ནྟིཨཱདིནཱ ཝིསྶཛྫིཏབྦཏྟཱ ཝུཏྟཾ. ཏེསཉྷི ཝིརཏྟཀཱམཀམྨནིབྦཏྟསྶ པཊིསནྡྷིབཱིཛསྶ ཨེཝཾསབྷཱཝཏྟཱ གྷཱནཱདཱིནི གནྡྷཱདཡོ ཙ ན སནྟཱིཏི. གྷཱནཱཡཏནཡམཀེན སདིསཝིསྶཛྫནཏྟཱཏི ཙཀྑཱཡཏནམཱུལཀེསུ གྷཱནཱཡཏནཡམཀེན སདྡྷིཾ སདིསཝིསྶཛྫནཏྟཱཏི ཨཏྠོ. ནནུ ཏཏྠ ‘‘སཙཀྑུཀཱནཾ ཨགྷཱནཀཱནཾ ཨུཔཔཛྫནྟཱན’’ནྟིཨཱདིནཱ ཝིསྶཛྫནཾ པཝཏྟཾ, ཨིདྷ པན གྷཱནཱཡཏནམཱུལཀེསུ ‘‘ཡསྶ གྷཱནཱཡཏནཾ ཨུཔྤཛྫཏི, ཏསྶ ཛིཝ྄ཧཱཡཏནཾ ཨུཔྤཛྫཏཱིཏི? ཨཱམནྟཱ’’ཏི ཝིསྶཛྫནེན བྷཝིཏབྦནྟི ནཏྠི སདིསཝིསྶཛྫནཏཱཏི? སཙྩཾ, ཡཐཱ པན ཏཏྠ གྷཱནཱཡཏནཡམཀེན ཛིཝ྄ཧཱཀཱཡཱཡཏནཡམཀཱནི སདིསཝིསྶཛྫནཱནི, ཨེཝམིདྷཱཔི ཛིཝ྄ཧཱཀཨཱཡཱཡཏནཡམཀཱནི སདིསཝིསྶཛྫནཱནི, ཏསྨཱ ཏཏྠ ཏཏྠེཝ སདིསཝིསྶཛྫནཏཱ པཱལི༹ཡཾ ཨནཱརུལ༹ྷཏཱཡ ཀཱརཎནྟི. ནིདསྶནབྷཱཝེན པན གཧིཏཾ ཙཀྑཱཡཏནམཱུལཀཱནཾ སདིསཝིསྶཛྫནཀཱནཾ སདིསཝིསྶཛྫནཾ ནིདསྶནབྷཱཝེནེཝ ཀཱརཎནྟི དསྶེནྟོ ‘‘གྷཱནཱཡཏནཡམཀེན སདིསཝིསྶཛྫནཏྟཱ’’ཏི ཨཱཧ. སདིསཝིསྶཛྫནཏཱ ཙེཏྠ གྷཱནཱཡཏནམཱུལཀེསུ ཡེབྷུཡྻཏཱཡ དཊྛབྦཱ. ཏེསུ ཧི ཛིཝ྄ཧཱཀཱཡཱཡཏནཡམཀེསུ ཏིཎྞཾ པུཙྪཱནཾ ‘‘ཨཱམནྟཱ’’ཏི ཝིསྶཛྫནེན བྷཝིཏབྦཾ ¶ , པཙྪིམཔུཙྪཱཡ ‘‘སཀཱཡཀཱནཾ ཨགྷཱནཀཱནཾ ཨུཔཔཛྫནྟཱན’’ནྟིཨཱདིནཱཏི.

ཨཐ ཝཱ ཡཐཱ ཝེདནཱཀྑནྡྷཱདིམཱུལཀཱནཾ སཉྙཱཀྑནྡྷཱདིཡམཀཱནཾ ཨམིསྶཀཀཱལབྷེདེསུ ཏཱིསུ ‘‘ཨཱམནྟཱ’’ཏི པཊིཝཙནཝིསྶཛྫནེན ཡཐཱཝུཏྟཝཙནསྶ ཝིསྶཛྫནབྷཱཝཱནུཛཱནནཾ ཀཏྟབྦནྟི ཨཔུབྦསྶ ཝཏྟབྦསྶ ཨབྷཱཝཱ ཝིསྶཛྫནཾ ན ཀཏཾ, ཨེཝམིདྷཱཔི གྷཱནཱཡཏནམཱུལཀཾ ཛིཝ྄ཧཱཡཏནཡམཀཾ ¶ ཨཔུབྦསྶ ཝཏྟབྦསྶ ཨབྷཱཝཱ པཱལི༹ཾ ཨནཱརུལ༹ྷནྟི པཱཀཊོཡམཏྠོ. ཀཱཡཱཡཏནཡམཀཾ པན དུཏིཡཔུཙྪཱཡ ཝསེན ཝིསྶཛྫིཏབྦཾ སིཡཱ, སཱ ཙ ཙཀྑཱཡཏནམཱུལཀེསུ གྷཱནཱཡཏནཡམཀེན སདིསཝིསྶཛྫནཱ, ཏསྨཱ ཡསྶཱ པུཙྪཱཡ ཝིསྶཛྫནཱ ཀཱཏབྦཱ, ཏསྶཱ གྷཱནཱཡཏནཡམཀེན སདིསཝིསྶཛྫནཏྟཱ ཏཾསེསཱནི པཱལི༹ཾ ཨནཱརུལ༹ྷཱནཱིཏི ཨེཝམེཏྠ ཨཏྠོ དཊྛབྦོ. ཏཐཱཏི ཨིདཾ པཱལི༹ཨནཱརུལ༹ྷཏཱསཱམཉྙེནེཝ ཝུཏྟཾ, ན ཀཱརཎསཱམཉྙེན. གྷཱནཛིཝ྄ཧཱཀཱཡཱཡཏནཱནཾ པན ཨགབྦྷསེཡྻཀེསུ པཝཏྟམཱནཱནཾ གབྦྷསེཡྻཀེསུ ཙ ཨཱཡཏནཔཱརིཔཱུརིཀཱལེ སཧཙཱརིཏཱཡ ཨཝིསེསཏྟཱ ཙ ཨཔྤཝིསེསཏྟཱ ཙ ཨེཀསྨིཾ གྷཱནཱཡཏནཡམཀེ ཝིསྶཛྫིཏེ ཨིཏརཱནི དྭེ, གྷཱནཱཡཏནམཱུལཀེསུ ཙ ཝིསྶཛྫིཏེསུ ཨིཏརདྭཡམཱུལཀཱནི ན ཝིསྶཛྫཱིཡནྟཱིཏི ཝེདིཏབྦཱནི. རཱུཔཱཡཏནམནཱཡཏནེཧི སདྡྷིནྟི ‘‘ཡསྶ རཱུཔཱཡཏནཾ ཨུཔྤཛྫཏི, ཏསྶ མནཱཡཏནཾ ཨུཔྤཛྫཏཱི’’ཏི ཨེཏིསྶཱ པུཙྪཱཡ ཝུཏྟེཧི རཱུཔཱཡཏནམནཱཡཏནེཧི སདྡྷིནྟི ཨདྷིཔྤཱཡོ. རཱུཔཱཡཏནམཱུལཀེསུ ཧི མནཱཡཏནཡམཀེ ཨཱདིཔུཙྪཱཡ གནྡྷརསཕོཊྛབྦཡམཀེསུ ཨཱདིཔུཙྪཱནཾ སདིསཝིསྶཛྫནཏཱ ཡམཀཱནཾ ཨཝིསྶཛྫནེ ཀཱརཎབྷཱཝེན ཝུཏྟཱ. དུཏིཡཔུཙྪཱནཉྷི པཊིཝཙནཝིསྶཛྫནེན བྷཝིཏབྦནྟི པུབྦེ ཝུཏྟནཡེན ཝིསྶཛྫནཾ ན ཀཱཏབྦཾ, ཨཱདིཔུཙྪཱནཉྩ ན ཀཱཏབྦནྟི.

ཧེཊྛིམེཧི སདིསཝིསྶཛྫནཏྟཱཏི ཨེཏྠ གནྡྷཱཡཏནམཱུལཀཱནཾ རསཕོཊྛབྦཡམཀཱནཾ རསཱཡཏནམཱུལཀསྶ ཙ ཕོཊྛབྦཡམཀསྶ པཊིཝཙནཝིསྶཛྫནེནེཝ བྷཝིཏབྦནྟི པུབྦེ ཝུཏྟནཡེནེཝ ཝིསྶཛྫནཾ ན ཀཱཏབྦནྟི ཡེསཾ ཀཱཏབྦཾ, ཏེསཾ གནྡྷརསཕོཊྛབྦམཱུལཀཱནཾ མནཱཡཏནདྷམྨཱཡཏནཡམཀཱནཾ ཙཀྑཱདིཔཉྩཱཡཏནམཱུལཀེཧི མནཱཡཏནདྷམྨཱཡཏནཡམཀེཧི སདིསཝིསྶཛྫནཏྟཱཏི ཨཏྠོ. ཙཀྑཱཡཏནཱདིམཱུལཀཱནི སདྡཱཡཏནཡམཀཱནི སདྡཱཡཏནམཱུལཀཱནི སབྦཱནི ཨཝིསྶཛྫནེནེཝ ཨལབྦྷམཱནཝིསྶཛྫནཏཱདསྶནེན ¶ ཝིསྶཛྫིཏཱནི ནཱམ ཧོནྟཱིཏི ཨཱཧ ‘‘ཚསཊྛི ཡམཀཱནི ཝིསྶཛྫིཏཱནི ནཱམ ཧོནྟཱི’’ཏི.

ཛཙྩནྡྷམྤི ཛཙྩབདྷིརམྤཱིཏི ཨེཏྠ ཙ ཛཙྩབདྷིརགྒཧཎེན ཛཙྩནྡྷབདྷིརོ གཧིཏོཏི ཝེདིཏབྦོ. སགྷཱནཀཱནཾ སཙཀྑུཀཱནནྟི པརིཔུཎྞཱཡཏནམེཝ ཨོཔཔཱཏིཀཾ སནྡྷཱཡ ཝུཏྟནྟི ཨེཏྠ ཨེཝ-སདྡཾ ཝུཏྟནྟི-ཨེཏསྶ པརཏོ ཡོཛེཏྭཱ ཡཐཱ ‘‘སགྷཱནཀཱནཾ ཨཙཀྑུཀཱན’’ནྟི ཨིདཾ ཨཔརིཔུཎྞཱཡཏནཾ སནྡྷཱཡ ཝུཏྟཾ, ན ཨེཝཾ ‘‘སགྷཱནཀཱནཾ སཙཀྑུཀཱན’’ནྟི ཨེཏཾ. ཨེཏཾ པན པརིཔུཎྞཱཡཏནཾ ¶ སནྡྷཱཡ ཝུཏྟམེཝཱཏི ཨཏྠོ དཊྛབྦོ. ཏེན ཛཙྩབདྷིརམྤི སནྡྷཱཡ ཝུཏྟཏཱ ན ཝཱརིཏཱ ཧོཏཱིཏི.

༢༢-༢༥༤. ཡཏྠ ཙཀྑཱཡཏནནྟི རཱུཔཱིབྲཧྨལོཀཾ པུཙྪཏཱིཏི ནིཡམཏོ ཏཏྠ ཙཀྑུསོཏཱནཾ སཧུཔྤཏྟིམཏྟཾ པསྶནྟོ ཝདཏི, ཨོཀཱསཝཱརེ པན ཏསྨིཾ པུགྒལསྶ ཨནཱམཊྛཏྟཱ ཡཏྠ ཀཱམདྷཱཏུཡཾ རཱུཔདྷཱཏུཡཉྩ ཙཀྑཱཡཏནཾ ཨུཔྤཛྫཏི, ཏཏྠ སོཏཱཡཏནམྤི ཨེཀནྟེན ཨུཔྤཛྫཏཱིཏི ‘‘ཨཱམནྟཱ’’ཏི (ཡམ. ༡.ཨཱཡཏནཡམཀ.༢༢) ཝུཏྟཾ.

‘‘ཡསྶ ཝཱ པན རཱུཔཱཡཏནཾ ཨུཔྤཛྫིསྶཏི, ཏསྶ ཙཀྑཱཡཏནཾ ཨུཔྤཛྫིསྶཏཱིཏི? ཨཱམནྟཱ’’ཏི ཀསྨཱ པཊིཉྙཱཏཾ, ནནུ ཡོ གབྦྷསེཡྻཀབྷཱཝཾ གནྟྭཱ པརིནིབྦཱཡིསྶཏི, ཏསྶ རཱུཔཱཡཏནཾ པཊིསནྡྷིཡཾ ཨུཔྤཛྫིསྶཏི, ན པན ཙཀྑཱཡཏནནྟི? ཡསྶ རཱུཔཱཡཏནཾ ཨུཔྤཛྫིསྶཏི, ཏསྶ ཏདཝཏྠསྶ པུགྒལསྶ རཱུཔཱཡཏནུཔྤཱདཏོ ཨུདྡྷཾ ཙཀྑཱཡཏནསནྟཱནུཔྤཱདསྶ པཝཏྟིཡམྤི བྷཝིསྶནྟསྶ པཊིཉྙཱཏབྦཏྟཱ. ཨཐ ཀསྨཱ ‘‘ཡསྶ ཝཱ པན རཱུཔཱཡཏནཾ ནུཔྤཛྫིསྶཏི, ཏསྶ ཙཀྑཱཡཏནཾ ནུཔྤཛྫིསྶཏཱིཏི? ཨཱམནྟཱ’’ཏི པཊིཉྙཱཏཾ, ནནུ གབྦྷསེཡྻཀསྶ པཙྪིམབྷཝིཀསྶ ཨུཔཔཛྫནྟསྶ ཨེཀཱདསམསཏྟཱཧཱ ཨོརཏོ ཋིཏསྶ རཱུཔཱཡཏནཾ ནུཔྤཛྫིསྶཏི ནོ ཙ ཙཀྑཱཡཏནཾ ནུཔྤཛྫིསྶཏཱིཏི? ཏསྨིཾ བྷཝེ བྷཝིསྶནྟསྶ ཨུཔྤཱདསྶ ཨནཱགཏབྷཱཝེན ཨཝཙནཏོ. བྷཝནྟརེ ཧི ཏསྶ ཏསྶ ཨཱཡཏནསནྟཱནསྶ ཡོ ཨཱདིཨུཔྤཱདོ པཊིསནྡྷིཡཾ པཝཏྟེ ཙ བྷཝིསྶཏི, སོ ཨནཱགཏུཔྤཱདོ ཏབྦྷཱཝེན ཝུཙྩཏི ཨདྡྷཱཔཙྩུཔྤནྣཱནནྟོགདྷཏྟཱ. ན པན ཡོ ཏསྨིཾཡེཝ བྷཝེ པཝཏྟེ བྷཝིསྶཏི, སོ ཨནཱགཏུཔྤཱདབྷཱཝེན ཝུཙྩཏི ཨདྡྷཱཔཙྩུཔྤནྣནྟོགདྷཏྟཱ. ཨདྡྷཱཝསེན ཧེཏྠ ཀམྨཛཔཝཏྟསྶ པཙྩུཔྤནྣཱདིཀཱལབྷེདོ ཨདྷིཔྤེཏོ. ཨེཝཉྩ ཀཏྭཱ ཨིནྡྲིཡཡམཀེ (ཡམ. ༣.ཨིནྡྲིཡཡམཀ.༣༦༨) ‘‘ཡསྶ ཨིཏྠིནྡྲིཡཾ ཨུཔྤཛྫཏི ¶ , ཏསྶ པུརིསིནྡྲིཡཾ ཨུཔྤཛྫིསྶཏཱིཏི? པཙྪིམབྷཝིཀཱནཾ ཨིཏྠཱིནཾ ཨུཔཔཛྫནྟཱིནཾ, ཡཱ ཙ ཨིཏྠིཡོ རཱུཔཱཝཙརཾ ཨརཱུཔཱཝཙརཾ ཨུཔཔཛྫིཏྭཱ པརིནིབྦཱཡིསྶནྟི, ཡཱ ཙ ཨིཏྠིཡོ ཨེཏེནེཝ བྷཱཝེན ཀཏིཙི བྷཝེ དསྶེཏྭཱ པརིནིབྦཱཡིསྶནྟི, ཏཱསཾ ཨུཔཔཛྫནྟཱིནཾ ཏཱསཾ ཨིཏྠིནྡྲིཡཾ ཨུཔྤཛྫཏི, ནོ ཙ ཏཱསཾ པུརིསིནྡྲིཡཾ ཨུཔྤཛྫིསྶཏཱི’’ཏི ཝུཏྟཾ. ན ཧི ཏཱསཾ སབྦཱསཾ ཏསྨིཾ བྷཝེ པཝཏྟེ པུརིསིནྡྲིཡཾ ན ཨུཔྤཛྫིསྶཏི ལིངྒཔརིཝཏྟནསབྦྷཱཝཱ, བྷཝནྟརེ པན ཨཱདིཨུཔྤཱདསྶ ཨབྷཱཝཾ སནྡྷཱཡ ‘‘ནོ ཙ ¶ ཏཱསཾ པུརིསིནྡྲིཡཾ ཨུཔྤཛྫིསྶཏཱི’’ཏི ཝུཏྟཾ. བྷཝནྟརེ ཧི ཨཱདིཨུཔྤཱདསྶ ཨནཱགཏཏྟཾ ཨདྷིཔྤེཏནྟི. ཨེཝཉྩ ཀཏྭཱ ‘‘ཀཏིཙི བྷཝེ དསྶེཏྭཱ’’ཏི བྷཝགྒཧཎཾ ཀཏནྟི.

‘‘ཨཱཡཏནཱནཾ པཊིལཱབྷོ ཛཱཏཱི’’ཏི (དཱི. ནི. ༢.༣༨༨; ཝིབྷ. ༢༣༥) ཝཙནཏོ ཏཾཏཾཨཱཡཏནནིབྦཏྟཀཀམྨེན གཧིཏཔཊིསནྡྷིཀསྶ ཨཝསྶཾབྷཱཝཱིཨཱཡཏནསྶ ཡཱཝ ཨཱཡཏནཔཱརིཔཱུརི, ཏཱཝ ཨུཔྤཛྫཏཱིཏི པན ཨཏྠེ གཡ྄ཧམཱནེ པུཙྪཱདྭཡཝིསྶཛྫནཾ སཱུཔཔནྣཾ ཧོཏི. ཨེཝཉྩ སཏི ‘‘ཡསྶ ཝཱ པན སོཏཱཡཏནཾ ནུཔྤཛྫིསྶཏི, ཏསྶ ཙཀྑཱཡཏནཾ ནུཔྤཛྫཏཱིཏི? པཙྪིམབྷཝིཀཱནཾ པཉྩཝོཀཱརཾ ཨུཔཔཛྫནྟཱནཾ, ཡེ ཙ ཨརཱུཔཾ ཨུཔཔཛྫིཏྭཱ པརིནིབྦཱཡིསྶནྟི, ཏེསཾ ཨུཔཔཛྫནྟཱནཾ ཏེསཾ སོཏཱཡཏནཾ ནུཔྤཛྫིསྶཏི, ནོ ཙ ཏེསཾ ཙཀྑཱཡཏནཾ ནུཔྤཛྫཏཱི’’ཏི ཨེཝམཱདཱིསུ (ཡམ. ༡.ཨཱཡཏནཡམཀ.༩༥) གབྦྷསེཡྻཀཱཔི པཙྪིམབྷཝིཀཱདཡོ ཨུཔཔཛྫནྟཱ གཧིཏཱ ཧོནྟི. ཨེཝཉྩ ཀཏྭཱ ཨིནྡྲིཡཡམཀེ (ཡམ. ༣.ཨིནྡྲིཡཡམཀ.༡༨༦) ‘‘ཡསྶ ཝཱ པན སོམནསྶིནྡྲིཡཾ ཨུཔྤཛྫཏི, ཏསྶ ཙཀྑུནྡྲིཡཾ ཨུཔྤཛྫཏཱིཏི? ཨཱམནྟཱ’’ཏི ཨིདམྤི ཨུཔཔནྣཾ ཧོཏི. སོམནསྶིནྡྲིཡུཔྤཱདཀསྶ ཀམྨསྶ ཨེཀནྟེན ཙཀྑུནྡྲིཡུཔྤཱདནཏོ གབྦྷེཔི ཡཱཝ ཙཀྑུནྡྲིཡུཔྤཏྟི, ཏཱཝ ཨུཔྤཛྫམཱནཏཱཡ ཏསྶཱ ཨབྷིནནྡིཏབྦཏྟཱ.

ཡཾ པན ‘‘ཡསྶ ཝཱ པན ཡཏྠ རཱུཔཱཡཏནཾ ཨུཔྤཛྫིཏྠ, ཏསྶ ཏཏྠ གྷཱནཱཡཏནཾ ཨུཔྤཛྫཏཱིཏི? ཀཱམཱཝཙརཱ ཙཝནྟཱནཾ, ཨགྷཱནཀཱནཾ ཀཱམཱཝཙརཾ ཨུཔཔཛྫནྟཱནཾ, རཱུཔཱཝཙརཱནཾ ཏེསཾ ཏཏྠ རཱུཔཱཡཏནཾ ཨུཔྤཛྫིཏྠ, ནོ ཙ ཏེསཾ ཏཏྠ གྷཱནཱཡཏནཾ ཨུཔྤཛྫཏཱི’’ཏི ཨེཏྠ ‘‘ཨགྷཱནཀཱནཾ ཀཱམཱཝཙརཾ ཨུཔཔཛྫནྟཱན’’ནྟི (ཡམ. ༡.ཨཱཡཏནཡམཀ.༧༦) ཝུཏྟཾ, ཏཾ ཡེ ཨེཀཱདསམསཏྟཱཧཱ ཨོརཏོ ཀཱལཾ ཀརིསྶནྟི, ཏེསཾ གྷཱནཱཡཏནཱནིབྦཏྟཀཀམྨེན གཧིཏཔཊིསནྡྷིཀཱནཾ ཝསེན ཝུཏྟནྟི ཝེདིཏབྦཾ. ‘‘ཡསྶ ཡཏྠ གྷཱནཱཡཏནཾ ན ནིརུཛ྄ཛྷཏི, ཏསྶ ¶ ཏཏྠ རཱུཔཱཡཏནཾ ན ནིརུཛ྄ཛྷིསྶཏཱིཏི? ཀཱམཱཝཙརཾ ཨུཔཔཛྫནྟཱནཾ, ཨགྷཱནཀཱནཾ ཀཱམཱཝཙརཱ ཙཝནྟཱནཾ, རཱུཔཱཝཙརཱནཾ ཏེསཾ ཏཏྠ གྷཱནཱཡཏནཾ ན ནིརུཛ྄ཛྷཏི, ནོ ཙ ཏེསཾ ཏཏྠ རཱུཔཱཡཏནཾ ན ནིརུཛ྄ཛྷིསྶཏཱི’’ཏི ཧི ཨེཏྠ ‘‘ཨགྷཱནཀཱནཾ ཀཱམཱཝཙརཱ ཙཝནྟཱན’’ནྟི (ཡམ. ༡.ཨཱཡཏནཡམཀ.༡༨༡) ཝཙནཾ ཨནུཔྤནྣེཡེཝ གྷཱནཱཡཏནེ གབྦྷསེཡྻཀཱནཾ ཙུཏི ཨཏྠཱིཏི དཱིཔེཏི. ན ཧི ཀཱམཱཝཙརེ གབྦྷསེཡྻཀཏོ ཨཉྙོ ཨགྷཱནཀོ ཨཏྠི དྷམྨཧདཡཝིབྷངྒེ (ཝིབྷ. ༩༧༨ ཨཱདཡོ) ‘‘ཀཱམདྷཱཏུཡཱ ཨུཔཔཏྟིཀྑཎེ ཀསྶཙི ཨཊྛཱཡཏནཱནི པཱཏུབྷཝནྟཱི’’ཏི ཨཝུཏྟཏྟཱཏི. ཨཐ ཀསྨཱ ཨོཔཔཱཏིཀེ ཨེཝ སནྡྷཱཡ ཨིདྷ, ཨིནྡྲིཡཡམཀེ ཙ ཡཐཱདསྶིཏཱསུ པུཙྪཱསུ ¶ ‘‘ཨཱམནྟཱ’’ཏི ཝུཏྟནྟི ན ཝིཉྙཱཡཏཱིཏི? ཡམཀེ སནྣིཊྛཱནེན གཧིཏཏྠསྶ ཨེཀདེསེ སཾསཡཏྠསམྦྷཝེན པཊིཝཙནསྶ ཨཀརཎཏོ. བྷིནྡིཏབྦེ ཧི ན པཊིཝཙནཝིསྶཛྫནཾ ཧོཏི. ཡདི སིཡཱ, པརིཔུཎྞཝིསྶཛྫནམེཝ ན སིཡཱཏི. ཨཐ ཀསྨཱ ‘‘ཡསྶ ཝཱ པན སོམནསྶིནྡྲིཡཾ ཨུཔྤཛྫཏི, ཏསྶ ཙཀྑུནྡྲིཡཾ ཨུཔྤཛྫཏཱིཏི? ཨཱམནྟཱ’’ཏི (ཡམ. ༣.ཨིནྡྲིཡཡམཀ.༡༨༦) ཨིམིནཱ ‘‘གབྦྷསེཡྻཀཱནཾ སོམནསྶཔཊིསནྡྷི ནཏྠཱི’’ཏི ན ཝིཉྙཱཡཏཱིཏི? ‘‘ཀཱམདྷཱཏུཡཱ ཨུཔཔཏྟིཀྑཎེ ཀསྶ དསིནྡྲིཡཱནི པཱཏུབྷཝནྟི? གབྦྷསེཡྻཀཱནཾ སཏྟཱནཾ སཧེཏུཀཱནཾ ཉཱཎསམྤཡུཏྟཱནཾ ཨུཔཔཏྟིཀྑཎེ དསིནྡྲིཡཱནི པཱཏུབྷཝནྟི ཀཱཡིནྡྲིཡཾ མནིནྡྲིཡཾ ཨིཏྠིནྡྲིཡཾ ཝཱ པུརིསིནྡྲིཡཾ ཝཱ ཛཱིཝིཏིནྡྲིཡཾ སོམནསྶིནྡྲིཡཾ ཝཱ ཨུཔེཀྑིནྡྲིཡཾ ཝཱ སདྡྷིནྡྲིཡ’’ནྟིཨཱདིཝཙནཏོ (ཝིབྷ. ༡༠༡༢).

ནིརོདྷཝཱརེ ཨནཱགཏཀཱལབྷེདེ ཡཐཱ ཏསྶེཝ ཙིཏྟསྶ ནིརོདྷོ ཨནཱགཏབྷཱཝེན ཏསྶ ཨུཔྤཏྟིཀྑཎེ ཝུཏྟོ, ཨེཝཾ ཏསྶེཝ ཀམྨཛསནྟཱནསྶ ནིརོདྷོ ཨནཱགཏབྷཱཝེན ཏསྶ ཨུཔྤཱདེ ཝཏྟབྦོཏི སབྦཏྠ ཨུཔཔཛྫནྟཱནཾ ཨེཝ སོ ཏཐཱ ཝུཏྟོ, ན ཨུཔྤནྣཱནཾ. ཨུཔྤནྣཱནཾ པན ཨཉྙསྶ ཨནཱགཏསྶ སནྟཱནསྶ ནིརོདྷོ ཨནཱགཏབྷཱཝེན ཝཏྟབྦོ, ན ཏསྶེཝ. ཏསྶ ཧི ཨུཔྤཱདཱནནྟརཾ ནིརོདྷོ ཨཱརདྡྷོ ནཱམ ཧོཏཱིཏི. ཏསྨཱ ཨརཧཏཾ པཝཏྟེ སོཏསྶ ཙཀྑུསྶ ཙ བྷེདེ སཏིཔི ཨནཱགཏཀཱལཱམསནཝསེནེཝ ‘‘ཡསྶ ཙཀྑཱཡཏནཾ ནིརུཛ྄ཛྷིསྶཏི, ཏསྶ སོཏཱཡཏནཾ ནིརུཛ྄ཛྷིསྶཏཱིཏི? ཨཱམནྟཱ. ཡསྶ ཝཱ པན སོཏཱཡཏནཾ ནིརུཛ྄ཛྷིསྶཏི, ཏསྶ ཙཀྑཱཡཏནཾ ནིརུཛ྄ཛྷིསྶཏཱིཏི? ཨཱམནྟཱ’’ཏི ཝིསྶཛྫནདྭཡཾ ཨུཔཔནྣམེཝ ཧོཏཱིཏི. ཡསྨཱ ཙ ཨུཔཔཏྟིཨནནྟརཾ ནིརོདྷོ ¶ ཨཱརདྡྷོ ནཱམ ཧོཏི, ཏཾནིཊྛཱནབྷཱཝཏོ པན ཙུཏིཡཱ ནིརོདྷཝཙནཾ, ཏསྨཱ པཝཏྟེ ནིརུདྡྷེཔི སནྟཱནེཀདེསེ ཨནིརུདྡྷཾ ཨུཔཱདཱཡ ཨནིཊྛིཏནིརོདྷོཏི ཙུཏིཡཱཝ ཏསྶ ནིརོདྷོཏི ཝུཙྩཏི. ཝཀྑཏི ཧི ‘‘ཡསྶ ཝཱ པན སོམནསྶིནྡྲིཡཾ ནིརུཛ྄ཛྷཏི, ཏསྶ ཙཀྑུནྡྲིཡཾ ནིརུཛ྄ཛྷཏཱིཏི? ཨཱམནྟཱ’’ཏི, ཏེནེཏྠཱཔི ཙུཏིནིརོདྷེ ཨེཝ ཙ ཨདྷིཔྤེཏེ ཡཉྩ པཝཏྟེ ནིརུཛ྄ཛྷིསྶཏི, ཏཉྩ ནིཊྛཱནཝསེན ཙུཏིཡཱ ཨེཝ ནིརུཛ྄ཛྷིསྶཏཱིཏི ཝུཏྟནྟི ‘‘ཨཱམནྟཱ’’ཏི ཡུཏྟཾ པཊིཝཙནཾ. ‘‘སཙཀྑུཀཱན’’ནྟིཨཱདཱིསུ ཙ ‘‘པཊིལདྡྷཙཀྑུཀཱན’’ནྟིཨཱདིནཱ ཨཏྠོ ཝིཉྙཱཡཏཱིཏི.

‘‘ཡསྶ ཙཀྑཱཡཏནཾ ན ནིརུཛ྄ཛྷཏི, ཏསྶ སོཏཱཡཏནཾ ན ནིརུཛ྄ཛྷིསྶཏཱིཏི? སབྦེསཾ ཨུཔཔཛྫནྟཱནཾ, ཨཙཀྑུཀཱནཾ ཙཝནྟཱནཾ ཏེསཾ ཙཀྑཱཡཏནཾ ན ནིརུཛ྄ཛྷཏི, ནོ ཙ ཏེསཾ སོཏཱཡཏནཾ ¶ ན ནིརུཛ྄ཛྷིསྶཏཱི’’ཏི ཨེཏྠ ཨཱརུཔྤེ པཙྪིམབྷཝིཀེ ཋཔེཏྭཱ སབྦེ ཨུཔཔཛྫནྟཱ, ཨཙཀྑུཀཱ ཙཝནྟཱ ཙ གཧིཏཱཏི དཊྛབྦཱ. ཏེ ཧི དུཏིཡཀོཊྛཱསེན སངྒཡ྄ཧནྟཱིཏི ཏདཔེཀྑཏྟཱ སཱཝསེསམིདཾ སབྦཝཙནཾ ཨཙཀྑུཀཝཙནཉྩཱཏི. ‘‘ཨཱརུཔྤེ པཙྪིམབྷཝིཀཱན’’ནྟི ཨེཏྠ ཙ ཨརཱུཔཏོ པཉྩཝོཀཱརཾ ཨགཙྪནྟཱ ཨནཉྙཱུཔཔཏྟིཀཱཔི ‘‘ཨརཱུཔེ པཙྪིམབྷཝིཀཱ’’ཨིཙྩེཝ སངྒཡ྄ཧནྟཱིཏི ཝེདིཏབྦཱ. ཨེས ནཡོ ཨཉྙེསུཔི ཨེཝརཱུཔེསཱུཏི.

༡-༡༩. ལབྦྷམཱནཱནནྟི ཨིདཾ པཝཏྟིཝཱརེ སདྡདྷཱཏུསམྦནྡྷཱནཾ ཡམཀཱནཾ ཙཀྑུཝིཉྙཱཎདྷཱཏཱདིསམྦནྡྷཱནཉྩ ཙུཏིཔཊིསནྡྷིཝསེན ཨལབྦྷམཱནཏཾ སནྡྷཱཡ ཝུཏྟཾ.

༡༠-༢༦. ‘‘དུཀྑཾ ¶ དུཀྑསཙྩནྟི? ཨཱམནྟཱ’’ཏི ཨེཏྠ ཀིཉྩཱཔི དུཀྑདུཀྑཾ སངྑཱརདུཀྑཾ ཝིཔརིཎཱམདུཀྑནྟི ཏཱིསུཔི དུཀྑསདྡོ པཝཏྟཏི, ‘‘ཛཱཏིཔི དུཀྑཱ’’ཏིཨཱདིནཱ (མཧཱཝ. ༡༤; ཝིབྷ. ༡༩༠) ཛཱཏིཨཱདཱིསུ ཙ, སོ པན དུཀྑདུཀྑཏོ ཨཉྙཏྠ པཝཏྟམཱནོ ¶ ཨཉྙནིརཔེཀྑོ ནཔྤཝཏྟཏི. སུདྡྷཉྩེཏྠ དུཀྑཔདཾ ཨཉྙནིརཔེཀྑཾ གཧེཏྭཱ པཎྞཏྟིསོདྷནཾ ཀརོཏི, ཏེན ནིཔྤརིཡཱཡཏོ དུཀྑསབྷཱཝཏྟཱ ཨེཝ ཡཾ དུཀྑདུཀྑཾ, ཏསྨིཾ དུཀྑདུཀྑེ ཨེས དུཀྑསདྡོ, ཏཉྩ ཨེཀནྟེན དུཀྑསཙྩམེཝཱཏི ‘‘ཨཱམནྟཱ’’ཏི ཝུཏྟཾ. སུདྡྷསཙྩཝཱརེ སཙྩཝིབྷངྒེ ཝུཏྟེསུ སམུདཡེསུ ཀོཙི ཕལདྷམྨེསུ ནཏྠི, ན ཙ ཕལདྷམྨེསུ ཀོཙི ནིརོདྷོཏི ཝུཙྩམཱནོ ཨཏྠི, མགྒསདྡོ ཙ ཕལཕལངྒེསུ མགྒཕལཏྟཱ པཝཏྟཏི, ན མགྒཀིཙྩསབྦྷཱཝཱ. པརིནིཊྛིཏནིཡྻཱནཀིཙྩཱནི ཧི ཏཱནི. ནིཡྻཱནཝཱཙཀོ ཙེཏྠ མགྒསདྡོ, ན ནིཡྻཱནཕལཝཱཙཀོ, ཏསྨཱ སམུདཡོ སཙྩཾ, ནིརོདྷོ སཙྩཾ, མགྒོ སཙྩནྟི ཨེཏེསུཔི ‘‘ཨཱམནྟཱ’’ཨིཙྩེཝ ཝིསྶཛྫནཾ ཀཏཾ.

ཨཐ ཝཱ པདསོདྷནེན པདེསུ སོདྷིཏེསུ སཙྩཝིསེསནབྷཱུཏཱ ཨེཝ དུཀྑཱདིསདྡཱ ཨིདྷ གཧིཏཱཏི ཝིཉྙཱཡནྟི. ཏེསཾ པན ཨེཀནྟེན སཙྩཝིསེསནབྷཱཝཾ, སཙྩཱནཉྩ ཏབྦིསེསནཡོགཝིསེསཾ དཱིཔེཏུཾ སུདྡྷསཙྩཝཱརོ ཝུཏྟོཏི སཙྩཝིསེསནཱནཾ དུཀྑཱདཱིནཾ ཨེཀནྟསཙྩཏྟཱ ‘‘དུཀྑཾ སཙྩཾ…པེ… མགྒོ སཙྩནྟི? ཨཱམནྟཱ’’ཏི ཝུཏྟནྟི. ཡཐཱ ཙེཏྠ, ཨེཝཾ ཁནྡྷཡམཀཱདཱིསུཔི སུདྡྷཁནྡྷཱདིཝཱརེསུ ཁནྡྷཱདིཝིསེསནབྷཱུཏཱནམེཝ རཱུཔཱདཱིནཾ གཧཎཾ ཡུཏྟཾ. ཨཊྛཀཐཱཡཾ (ཡམ. ཨཊྛ. ཁནྡྷཡམཀ ༣༨) པན ‘‘ཡསྨཱ པིཡརཱུཔསཱཏརཱུཔསངྑཱཏཾ ཝཱ རཱུཔཾ ཧོཏུ བྷཱུཏུཔཱདཱརཱུཔཾ ཝཱ, སབྦཾ པཉྩསུ ཁནྡྷེསུ སངྒཧཾ གཙྪཏེཝ, ཏསྨཱ ཨཱམནྟཱཏི པཊིཛཱནཱཏཱི’’ཏི ཝཙནེན རཱུཔཱདིཙཀྑཱདིདུཀྑཱདིགྒཧཎེཧི སུདྡྷཁནྡྷཱདིཝཱརེསུཔི ཁནྡྷཱདིཝིསེསནཏོ ཨཉྙེཔི གཧིཏཱཏི ཨཡམཏྠོ དཱིཔིཏོ ཧོཏི, ཏེན ཏདནུརཱུཔཏཱཝསེན ཨིཏརོ ཨཏྠོ ཝུཏྟོ.

༢༧-༡༦༤. ཨནྟམསོ ¶ སུདྡྷཱཝཱསཱནམྤཱིཏི ཨིདཾ ཏེསཾ ཨརིཡཏྟཱ དུཀྑསཙྩེན ཨུཔཔཛྫནེ ཨཱསངྐཱ སིཡཱཏི ཀཏྭཱ ཝུཏྟཾ. ཏཎྷཱཝིཔྤཡུཏྟཙིཏྟསྶཱཏི ཨིདཾ པཉྩཝོཀཱརཝསེནེཝ གཧེཏབྦནྟི ཝུཏྟཾ. ཡསྶ དུཀྑསཙྩཾ ཨུཔྤཛྫཏཱིཏི ཨེཏེན པན སནྣིཊྛཱནེན སབྦེ ཨུཔཔཛྫནྟཱ པཝཏྟིཡཾ ཙཏུཝོཀཱརེ ¶ མགྒཕལཏོ ཨཉྙཙིཏྟཱནཾ ཨུཔྤཱདཀྑཎསམངྒིནོ པཉྩཝོཀཱརེ ཙ སབྦཙིཏྟཱནཾ ཨུཔྤཱདཀྑཎསམངྒིནོ སངྒཧིཏཱཏི ཏེསྭེཝ སནྣིཊྛཱནེན ནིཙྪིཏེསུ ཀེཙི ‘‘པཝཏྟེ ཏཎྷཱཝིཔྤཡུཏྟཙིཏྟསྶ ཨུཔྤཱདཀྑཎེ’’ཏི ཨེཏེན དུཀྑསམུདཡེསུ ཨེཀཀོཊྛཱསཔྤཝཏྟིསམངྒིནོ དསྶཱིཡནྟི སནྣིཊྛཱནེན གཧིཏསྶེཝ ཝིབྷཱགདསྶནཏོ, ཏེན ཙཏུཝོཀཱརཱནམྤི གཧཎཾ ཨུཔཔནྣམེཝ. ན ཧི ཏེསུ མགྒཕལུཔྤཱདསམངྒཱིསུ པསངྒཏཱ ཨཏྠི ཏཾསམངྒཱིནཾ ཏེསཾ སནྣིཊྛཱནེན ཨགྒཧིཏཏྟཱཏི. ཨིདཾ ཨིདྷ ན གཧེཏབྦནྟི ཨིདཾ ཙཏུཝོཀཱརེ ཕལསམཱཔཏྟིཙིཏྟཾ ཨིདྷ སཙྩཱནཾ ཨུཔྤཱདཝཙནེ ན གཧེཏབྦནྟི ཝུཏྟཾ ཧོཏི.

ཨེཏྠ ཙ སབྦེསཾ ཨུཔཔཛྫནྟཱནནྟི ཨིདཾ ཀམྨཛཔཝཏྟསྶ པཋམུཔྤཱདདསྶནེན ཝུཏྟཾ, ཨསཉྙསཏྟཱཔེཏྠ སངྒཧིཏཱ. པཝཏྟེ ཏཎྷཱཝིཔྤཡུཏྟཙིཏྟསྶ ཨུཔྤཱདཀྑཎེཏི ཨིདཾ པན སམུདཡསཙྩུཔྤཱདཝོམིསྶསྶ དུཀྑསཙྩུཔྤཱདསྶ ཏཾརཧིཏསྶ དསྶནཝསེན ཝུཏྟཾ. ཏཎྷཱཡ ཨུཔྤཱདཀྑཎེཏི ཏཾསཧིཏསྶ སམུདཡསཙྩུཔྤཱདཝོམིསྶསྶ. ཏེསཾ པན ཨསཉྙསཏྟཱནཾ པཝཏྟིཡཾ དུཀྑསཙྩསྶ ཨུཔྤཱདོ སབྦཏྠ ན གཧིཏོ, ཏཐཱ ནིརོདྷོ ཙཱཏི. མགྒསཙྩཡམཀེཔི ཨེསེཝ ནཡོ. ཏེསཾ ཏསྨིཾ ཨུཔཔཏྟིཀྑཎེ ཙ ཏཎྷཱཝིཔྤཡུཏྟཙིཏྟུཔྤཏྟིཀྑཎེ ཙཱཏི ཨེཝམེཏྠ ཁཎཝསེན ཨོཀཱསོ ཝེདིཏབྦོཏི ཝུཏྟཾ, ཨེཝཉྩ སཏི ‘‘ཡསྶ ཡཏྠ དུཀྑསཙྩཾ ཨུཔྤཛྫཏི, ཏསྶ ཏཏྠ སམུདཡསཙྩཾ ཨུཔྤཛྫིསྶཏཱི’’ཏི (ཡམ. ༡.སཙྩཡམཀ.༧༡) ཨེཏསྶ ཝིསྶཛྫནེ པཙྪིམཀོཊྛཱསེ ‘‘ཨིཏརེསཾ ཙཏུཝོཀཱརཾ པཉྩཝོཀཱརཾ ཨུཔཔཛྫནྟཱནཾ, པཝཏྟེ ཙིཏྟསྶ ཨུཔྤཱདཀྑཎེ ཏེསཾ ཏཏྠ དུཀྑསཙྩཉྩ ཨུཔྤཛྫཏི སམུདཡསཙྩཉྩ ཨུཔྤཛྫིསྶཏཱི’’ཏི ཨིདཾ ན ཡུཛྫེཡྻ. ན ཧི ཨུཔཔཏྟིཀྑཎེ ཙིཏྟུཔྤཏྟིཀྑཎེ ཙ སམུདཡསཙྩཾ ཨུཔྤཛྫིསྶཏཱིཏི. ཏསྨཱ ཨུཔཔཏྟིཀྑཎཏཎྷཱཝིཔྤཡུཏྟཙིཏྟུཔྤཏྟིཀྑཎསམངྒཱིནཾ པུགྒལཱནཾ ཡསྨིཾ ཀཱམཱཝཙརཱདིཨོཀཱསེ སཱ ཨུཔཔཏྟི ཙིཏྟུཔྤཏྟི ཙ པཝཏྟམཱནཱ, ཏཏྠ ཏེསནྟི ཨོཀཱསཝསེནེཝེཏྠ ¶ ཏཏྠ-སདྡསྶ ཨཏྠོ ཡུཛྫཏི. པུགྒལོཀཱསཝཱརོ ཧེས. ཏཏྠ པུགྒལཝིསེསདསྶནཏྠཾ ‘‘སབྦེསཾ ཨུཔཔཛྫནྟཱན’’ནྟིཨཱདི ཝུཏྟཾ, ཨོཀཱསོ པན ཡཏྠ ཏེ, སོ ཨེཝཱཏི.

‘‘སབྦེསཾ ཙཝནྟཱནཾ པཝཏྟེ ཙིཏྟསྶ བྷངྒཀྑཎེ ཨཱརུཔྤེ མགྒསྶ ཙ ཕལསྶ ཙ ཨུཔྤཱདཀྑཎེ ཏེསཾ སམུདཡསཙྩཉྩ ནུཔྤཛྫཏི དུཀྑསཙྩཉྩ ནུཔྤཛྫཏཱི’’ཏི ཨེཏྠ པན ‘‘པཝཏྟེ ཙིཏྟསྶ བྷངྒཀྑཎེ དུཀྑསཙྩཾ ནུཔྤཛྫཏཱི’’ཏི ཙིཏྟཔཊིབདྡྷཝུཏྟིཏྟཱ ཙིཏྟཛརཱུཔམེཝ ཨིདྷཱདྷིཔྤེཏཾ, ན ཀམྨཛཱདིརཱུཔཾ ཙིཏྟཾ ཨནཔེཀྑིཏྭཱཝ ཨུཔྤཛྫནཏོཏི ཀེཙི ཝདནྟི. ‘‘ཡསྶ ཝཱ ¶ པན སམུདཡསཙྩཾ ནུཔྤཛྫཏཱི’’ཏི ཨེཏེན པན སནྣིཊྛཱནེན གཧིཏོ པུགྒལོ ན ཙིཏྟཾ ཨཔེཀྑིཏྭཱཝ གཧིཏོ, ཨཐ ཁོ ཡོ ཀོཙི ཨེཝཾཔཀཱརོ, ཏསྨཱ ‘‘ཏསྶ དུཀྑསཙྩཾ ནུཔྤཛྫཏཱི’’ཏི ཨེཏེན ཙ ན ཙིཏྟཱཔེཀྑམེཝ དུཀྑསཙྩཾ ཝུཏྟཾ, ཨཐ ཁོ ཡཾ ཀིཉྩཱིཏི ཙིཏྟསྶ བྷངྒཀྑཎེ ཡཾ ཀིཉྩི དུཀྑསཙྩཾ ནུཔྤཛྫཏཱིཏི ཨཡམཏྠོ ཝིཉྙཱཡཏཱིཏི. ན ཧི ཡམཀེ ཝིབྷཛིཏབྦེ ཨཝིབྷཏྟཱ ནཱམ པུཙྪཱ ཨཏྠཱིཏི.

‘‘སུདྡྷཱཝཱསཱནཾ དུཏིཡེ ཙིཏྟེཝཏྟམཱནེ’’ཏི ཨིདཾ སབྦནྟིམེན པརིཙྪེདེན ཡསྶ ཡཏྠ དུཀྑསཙྩཾ ཨུཔྤཛྫིཏྠ, ནོ ཙ སམུདཡསཙྩཾ, ཏཾདསྶནཝསེན ཝུཏྟཾ. ཏསྨིཾ པན དསྶིཏེ ཏེན སམཱནགཏིཀཏྟཱ དུཏིཡཱཀུསལཙིཏྟཏོ པུརིམསབྦཙིཏྟསམངྒིནོ ཏེནེཝ དསྶིཏཱ ཧོནྟི. ཏེསམྤི ཧི ཏཏྠ དུཀྑསཙྩཾ ཨུཔྤཛྫིཏྠ ནོ ཙ ཏེསཾ ཏཏྠ སམུདཡསཙྩཾ ཨུཔྤཛྫིཏྠཱཏི. ཨེཝཉྩ ཀཏྭཱ ‘‘ཨིཏརེསཾ ཙཏུཝོཀཱརཔཉྩཝོཀཱརཱན’’ནྟི ཨེཏྠ ཡཐཱཝུཏྟཱ སུདྡྷཱཝཱསཱ ཨགྒཧིཏཱ ཧོནྟི. ཡཐཱ ‘‘ཡསྶ ཡཏྠ དུཀྑསཙྩཾ ཨུཔྤཛྫཏི, ཏསྶ ཏཏྠ སམུདཡསཙྩཾ ཨུཔྤཛྫིཏྠཱ’’ཏི (ཡམ. ༡.སཙྩཡམཀ.༦༡) ཨེཏསྶ ཝིསྶཛྫནེ ‘‘སུདྡྷཱཝཱསཱནཾ ཨུཔཔཏྟིཙིཏྟསྶ ཨུཔྤཱདཀྑཎེ’’ཏི (ཡམ. ༡.སཙྩཡམཀ.༦༡) ཨེཏེནེཝ ཨུཔཔཏྟིཙིཏྟུཔྤཱདཀྑཎསམངྒིསམཱནགཏིཀཱ དུཏིཡཱཀུསལཏོ པུརིམསབྦཙིཏྟུཔྤཱདཀྑཎསམངྒིནོ དསྶིཏཱ ཧོནྟཱིཏི ན ཏེ ‘‘ཨིཏརེས’’ནྟི ཨེཏེན གཡ྄ཧནྟི, ཨེཝམིདྷཱཔི དཊྛབྦནྟི. ‘‘ཨིཏརེས’’ནྟི ཝཙནཾ པཉྩཝོཀཱརཱནཾ ཝིསེསནཏྠཾ, ན ཙཏུཝོཀཱརཱནཾ. ན ཧི ཏེ པུབྦེ ཝུཏྟཱ ཝཛྫེཏབྦཱ སནྟི པཉྩཝོཀཱརཱ ཝིཡ ཡཐཱཝུཏྟཱ སུདྡྷཱཝཱསཱཏི. ‘‘ཨབྷིསམེཏཱཝཱིནཾ ཏེསཾ ཏཏྠ དུཀྑསཙྩཉྩ ཨུཔྤཛྫིཏྠ མགྒསཙྩཉྩ ཨུཔྤཛྫིཏྠཱ’’ཏི (ཡམ. ༡.སཙྩཡམཀ.༤༡) ཨེཏེན སནྣིཊྛཱནེན པུགྒལོཀཱསཱ ཨཉྙམཉྙཔརིཙྪིནྣཱ གཧིཏཱཏི ཡསྨིཾ ཨོཀཱསེ ཨབྷིསམེཏཱཝིནོ, ཏེ ཨེཝཾ ‘‘ཨབྷིསམེཏཱཝཱིན’’ནྟི ཨེཏེན གཧིཏཱཏི དཊྛབྦཱ ¶ . ཏེན ཡེ ཀཱམཱཝཙརེ རཱུཔཱཝཙརེ ཨརཱུཔཱཝཙརེ ཝཱ ཨབྷིསམེཏཱཝིནོ རཱུཔཱཝཙརཾ ཨརཱུཔཱཝཙརཾ ཝཱ ཨུཔཔནྣཱ, ཡཱཝ ཏཏྠཱབྷིསམཡོ ཨུཔྤནྣོ བྷཝིསྶཏི, ཏཱཝ ཏེ ཨེཏྠ ན གཡ྄ཧནྟི, ཏེ པན པུརིམཀོཊྛཱསེ ‘‘སུདྡྷཱཝཱསཱནཾ དུཏིཡེ ཙིཏྟེ ཝཏྟམཱནེ’’ཏི ཨེཝཾ དསྶིཏེཧི སུདྡྷཱཝཱསེ ཨནུཔྤནྣཱབྷིསམཡེཧི སམཱནགཏིཀཱཏི ཝིསུཾ ན དསྶིཏཱ. ‘‘ཨནབྷིསམེཏཱཝཱིན’’ནྟི གཧིཏཱ ཡེ སབྦཏྠ ཏཏྠ ཙ ཨནབྷིསམེཏཱཝིནོ, ཏེསུ སུདྡྷཱཝཱསཱནཾ གཧཎཀཱལཝིསེསནཏྠཾ ‘‘སུདྡྷཱཝཱསཱནཾ དུཏིཡེ ཙིཏྟེ ཝཏྟམཱནེ’’ཏི (ཡམ. ༡.སཙྩཡམཀ.༤༢) ཝུཏྟནྟི.

ཡསྶ ཙིཏྟསྶ ཨནནྟརཱ ཨགྒམགྒཾ པཊིལབྷིསྶནྟཱིཏི ཨེཏེན ཝོདཱནཙིཏྟསམངྒིནཱ སམཱནགཏིཀཱ ¶ ཏཏོ པུརིམཏརཙིཏྟསམངྒིནོཔི ཡཱཝ སབྦནྟིམཏཎྷཱསམྤཡུཏྟཙིཏྟསམངྒཱི, ཏཱཝ དསྶིཏཱཏི ཝེདིཏབྦཱ. ཨེས ནཡོ ཨཉྙེསུ ཨེཝརཱུཔེསཱུཏི.

པཝཏྟེ ཙིཏྟསྶ བྷངྒཀྑཎེཏི ཨཱགཏཊྛཱནེ པཊིསནྡྷིཙིཏྟསྶཔི བྷངྒཀྑཎགྒཧཎཾ དཊྛབྦཾ, ཏཐཱ ‘‘པཝཏྟེ ཙིཏྟསྶ ཨུཔྤཱདཀྑཎེ’’ཏི ཨཱགཏཊྛཱནེ ཙ ཙུཏིཙིཏྟསྶཔི ཨུཔྤཱདཀྑཎསྶཱཏི. ‘‘ཡསྶ དུཀྑསཙྩཾ ན ནིརུཛ྄ཛྷཏི, ཏསྶ སམུདཡསཙྩཾ ན ནིརུཛ྄ཛྷིསྶཏཱི’’ཏི (ཡམ. ༡.སཙྩཡམཀ.༡༡༦) ཨེཏསྶ ཝིསྶཛྫནེ དྭཱིསུཔི ཀོཊྛཱསེསུ ‘‘ཨརཱུཔེ མགྒསྶ ཙ ཕལསྶ ཙ བྷངྒཀྑཎེ’’ཨིཙྩེཝ (ཡམ. ༡.སཙྩཡམཀ.༡༡༦) ཝུཏྟཾ, ན ཝིསེསིཏཾ. ཀསྨཱ? ཨེཀསྶཔི མགྒསྶ ཙ ཕལསྶ ཙ བྷངྒཀྑཎསམངྒིནོ ཨུབྷཡཀོཊྛཱསབྷཛནཏོ. ཡསྶ དུཀྑསཙྩཾ ན ནིརུཛ྄ཛྷཏཱིཏི ཨེཏེན སནྣིཊྛཱནེན གཧིཏེསུ ཧི ཨརུཔེ མགྒཕལབྷངྒཀྑཎསམངྒཱིསུ ཀེསཉྩི ཏིཎྞཾ ཕལཱནཾ དྭིནྣཉྩ མགྒཱནཾ བྷངྒཀྑཎསམངྒཱིནཾ ནིརནྟརཾ ཨནུཔྤཱདེཏྭཱ ཨནྟརནྟརཱ ཝིཔསྶནཱནིཀནྟིཾ བྷཝནིཀནྟིཾ ཨུཔྤཱདེཏྭཱ ཡེ ཨུཔརིམགྒེ ཨུཔྤཱདེསྶནྟི, ཏེསཾ སམུདཡསཙྩཾ ནིརུཛ྄ཛྷིསྶཏཱིཏི ཏེསཾཡེཝ པན ཀེསཉྩི ཨནྟརཱ ཏཎྷཾ ཨནུཔྤཱདེཏྭཱ ཨུཔརིམགྒཨུཔྤཱདེནྟཱནཾ མགྒཕལབྷངྒཀྑཎསམངྒཱིནཾ སམུདཡསཙྩཾ ན ནིརུཛ྄ཛྷིསྶཏཱིཏི. སཱམཉྙཝཙནེནཔི ཙ པུརིམཀོཊྛཱསེ ཝུཙྩམཱནེན པཙྪིམཀོཊྛཱསེ ཝཀྑམཱནེ ཝཛྫེཏྭཱཝ གཧཎཾ ཧོཏཱིཏི དསྶིཏོཡཾ ནཡོཏི.

༡༦༥-༡༧༠. པརིཉྙཱཝཱརེ ¶ …པེ… ཏིསྶོཔེཏྠ པརིཉྙཱ ལབྦྷནྟཱིཏི ཨེཏྠེཝ ཝིསེསནཾ ཁནྡྷཡམཀཱདཱིསུ སབྦཁནྡྷཱདཱིནཾ ཝིཡ སབྦསཙྩཱནཾ ཨཔརིཉྙེཡྻཏཱདསྶནཏྠཾ སཙྪིཀརཎབྷཱཝནཱཝསེན ཨིམསྶ ཝཱརསྶ ཨཔྤཝཏྟིདསྶནཏྠཉྩ. དུཀྑསྶ པརིཉྙཏྠཾ སམུདཡསྶ ཙ པཧཱནཏྠཾ བྷགཝཏི བྲཧྨཙརིཡཾ ཝུསྶཏཱིཏི པརིཉྙཱཔཧཱནཾ སཙྩེསུ དསྶེཏུཾ དུཀྑེ ཏཱིརཎཔརིཉྙཱ ཝུཏྟཱ, ན པཧཱནཔརིཉྙཱ. སམུདཡེ ཙ པཧཱནཔརིཉྙཱ, ན ཏཱིརཎཔརིཉྙཱ. ཉཱཏཔརིཉྙཱ པན སཱདྷཱརཎཱཏི ཨུབྷཡཏྠ ཝུཏྟཱ. མགྒཉཱཎཉྷི དུཀྑསམུདཡཱནི ཝིབྷཱཝེཏཱིཏི ཉཱཏཔརིཉྙཱ ཙ ཧོཏི ¶ , དུཀྑཏཱིརཎཀིཙྩཱནཾ ནིཔྥཱདནཏོ ཏཱིརཎཔརིཉྙཱ ཙ, སམུདཡསྶ ཨཔྤཝཏྟིཀརཎཏོཝ པཧཱནཔརིཉྙཱ ཙཱཏི ཏིསྶོཔི པརིཉྙཱ མགྒཀྑཎེ ཨེཝ ཡོཛེཏབྦཱཏི.

༡. ཁནྡྷཱདཡོ ཝིཡ པུབྦེ ཨཝིབྷཏྟཱ ཀཱཡསངྑཱརཱདཡོཏི ཏེསཾ ཨཝིཉྙཱཏཏྟཱ ‘‘ཨསྶཱསཔསྶཱསཱ ཀཱཡསངྑཱརོ’’ཏིཨཱདིནཱ (སཾ. ནི. ༤.༣༤༨) ཏཡོ སངྑཱརེ ཝིབྷཛཏི. ཀཱཡསྶ སངྑཱརོཏི པཋམེ ཨཏྠེ སཱམིཨཏྠེ ཨེཝ སཱམིཝཙནཾ, དུཏིཡེ ཨཏྠེ ཀཏྟུཨཏྠེ. ཝཙིཡཱ སངྑཱརོཏི ཀམྨཏྠེ སཱམིཝཙནཾ. ཙིཏྟསྶ སངྑཱརོཏི ཙ ཀཏྟུཨཏྠེཡེཝ. སོ པན ཀརཎཝཙནསྶ ཨཏྠོཏི ཀཏྭཱ ‘‘ཀརཎཏྠེ སཱམིཝཙནཾ ཀཏྭཱ’’ཏི ཝུཏྟཾ.

༢-༧. སུདྡྷིཀཨེཀེཀཔདཝསེན ཨཏྠཱབྷཱཝཏོཏི པདསོདྷནཏཾམཱུལཀཙཀྐཝཱརེཧི ཡོཔི ཨཏྠོ དསྶིཏོ དྭཱིཧི པདེཧི ལབྦྷམཱནོ ཨེཀོ ཨསྶཱསཔསྶཱསཱདིཀོ, ཏསྶ སུདྡྷིཀེཧི ཀཱཡཱདིཔདེཧི སུདྡྷིཀེན ¶ ཙ སངྑཱརཔདེན ཨཝཙནཱིཡཏྟཱ ཡཐཱ རཱུཔཔདསྶ ཁནྡྷེཀདེསོ ཁནྡྷཔདསྶ ཁནྡྷསམུདཱཡོ པདསོདྷནེ དསྶིཏོ ཡཐཱདྷིཔྤེཏོ ཨཏྠོ ཨཏྠི, ཨེཝཾ ཨེཀེཀཔདསྶ ཡཐཱདྷིཔྤེཏཏྠཱབྷཱཝཏོཏི ཨདྷིཔྤཱཡོ. ཀཱཡོ ཀཱཡསངྑཱརོཏིཨཱདི པན ཝཏྟབྦཾ སིཡཱཏི ཡདི ཝིསུཾ ཨདཱིཔེཏྭཱ སམུདིཏོ ཀཱཡསངྑཱརསདྡོ ཨེཀཏྠ དཱིཔེཏི, ཀཱཡསངྑཱརསདྡོ ཀཱཡསངྑཱརཏྠེ ཝཏྟམཱནོ ཁནྡྷསདྡོ ཝིཡ རཱུཔསདྡེན ཀཱཡསདྡེན ཝིསེསིཏབྦོཏི ཨདྷིཔྤཱཡེན ཝདཏི. སུདྡྷསངྑཱརཝཱརོ ཧེསཱཏི ཨེཏེན ཨིམསྶ ཝཱརསྶ པདསོདྷནེན དསྶིཏཱནཾ ཡཐཱདྷིཔྤེཏཱནམེཝ གཧཎཏོ ཏེསཉྩ ཀཱཡཱདིཔདེཧི ཨགྒཧིཏཏྟཱ ‘‘ཀཱཡོ ཀཱཡསངྑཱརོ’’ཏིཨཱདིཝཙནསྶ ཨཡུཏྟིཾ དསྶེཏི. ཨིདྷ པན སངྑཱརཡམཀེ ཀཱཡཱདིཔདཱནཾ སངྑཱརཔདསྶ ཙ ཨསམཱནཱདྷིཀརཎཏྟཱ ‘‘ཀཱཡོ སངྑཱརོ, སངྑཱརཱ ཀཱཡོ’’ཏིཨཱདིམྷི ¶ ཝུཙྩམཱནེ ཨདྷིཔྤེཏཏྠཔརིཙྩཱགོ ཨནདྷིཔྤེཏཏྠཔརིགྒཧོ ཙ ཀཏོ སིཡཱཏི སུདྡྷསངྑཱརཏཾམཱུལཙཀྐཝཱརཱ ན ཝུཏྟཱ. པདསོདྷནཝཱརཏཾམཱུལཙཀྐཝཱརེཧི པན ཨསམཱནཱདྷིཀརཎེཧི ཀཱཡཱདིཔདེཧི སངྑཱརསདྡསྶ ཝིསེསནཱིཡཏཱཡ དསྶིཏཱཡ སཾསཡོ ཧོཏི ‘‘ཡོ ཨཏྠནྟརཔྤཝཏྟིནཱ ཀཱཡསདྡེན ཝིསེསིཏོ ཀཱཡསངྑཱརོ, ཨེསོ ཨཏྠནྟརཔྤཝཏྟཱིཧི ཝཙཱིཙིཏྟེཧི ཝིསེསིཏོ ཨུདཱཧུ ཨཉྙོ’’ཏི. ཨེཝཾ སེསེསུཔི. ཨེཏྠ ཏེསཾ ཨཉྙཏྠ དསྶནཏྠཾ ‘‘ཀཱཡསངྑཱརོ ཝཙཱིསངྑཱརོ’’ཏིཨཱདིནཱ ཨནུལོམཔཊིལོམཝསེན ཚ ཡམཀཱནི ཝུཏྟཱནཱིཏི དཊྛབྦཾ. ཨཊྛཀཐཱཡཾ པན སུདྡྷསངྑཱརཝཱརཊྛཱནེ ཝུཏྟཏྟཱ ཨཡཾ ནཡོ སུདྡྷསངྑཱརཝཱརོཏི ཝུཏྟོ.

༡༩. པཝཏྟིཝཱརེ སངྑཱརཱནཾ པུགྒལཱནཉྩ ཨོཀཱསཏྟཱ ཛྷཱནཾ བྷཱུམི ཙ ཝིསུཾ ཨོཀཱསབྷཱཝེན གཧིཏཱཏི པུགྒལཝཱརེ ཙ ཨོཀཱསཝསེན པུགྒལགྒཧཎེན ཏེསཾ དྭིནྣཾ ཨོཀཱསཱནཾ ཝསེན གཧཎཾ ཧོཏི, ཏསྨཱ ‘‘ཝིནཱ ཝིཏཀྐཝིཙཱརེཧི ཨསྶཱསཔསྶཱསཱནཾ ཨུཔྤཱདཀྑཎེ’’ཏི དུཏིཡཏཏིཡཛ྄ཛྷཱནོཀཱསཝསེན གཧིཏཱ པུགྒལཱ ཝིསེསེཏྭཱ དསྶིཏཱཏི དཊྛབྦཱ ¶ . པུན པཋམཛ྄ཛྷཱནཾ སམཱཔནྣཱནནྟི ཛྷཱནོཀཱསཝསེན པུགྒལཾ དསྶེཏི, ཀཱམཱཝཙརཱནནྟི བྷཱུམོཀཱསཝསེན. དྭིཔྤཀཱརཱནམྤི པན ཏེསཾ ཝིསེསནཏྠམཱཧ ‘‘ཨསྶཱསཔསྶཱསཱནཾ ཨུཔྤཱདཀྑཎེ’’ཏི. ཏེན རཱུཔཱརཱུཔཱཝཙརེསུ པཋམཛ྄ཛྷཱནསམཱཔནྣཀེ ཀཱམཱཝཙརེ གབྦྷགཏཱདིཀེ ཙ ནིཝཏྟེཏི. ཀཱམཱཝཙརཱནམྤི ཧི གབྦྷགཏཱདཱིནཾ ཝིནཱ ཨསྶཱསཔསྶཱསེཧི ཝིཏཀྐཝིཙཱརཱནཾ ཨུཔྤཏྟི ཨཏྠི. ཨཊྛཀཐཱཡཾ པན ཨེཀནྟིཀཏྟཱ རཱུཔཱརཱུཔཱཝཙརཱ ནིདསྶིཏཱ. ཝིནཱ ཨསྶཱསཔསྶཱསེཧི ཝིཏཀྐཝིཙཱརཱནཾ ཨུཔྤཱདཀྑཎེཏི ཨེཏེན པན དསྶིཏཱ པུགྒལཱ པཋམཛ྄ཛྷཱནོཀཱསཱ ཀཱམཱཝཙརཱདིཨོཀཱསཱ ཙ ཨསྶཱསཔསྶཱསཝིརཧཝིསིཊྛཱ དཊྛབྦཱ. ཨིམིནཱ ནཡེན སབྦཏྠ པུགྒལཝིབྷཱགོ ཝེདིཏབྦོ.

༢༡. ‘‘པཋམཛ྄ཛྷཱནེ ཀཱམཱཝཙརེཏི ཀཱམཱཝཙརབྷཱུམིཡཾ ཨུཔྤནྣེ པཋམཛ྄ཛྷཱནེ’’ཏི ཨཊྛཀཐཱཡཾ ཝུཏྟཾ ¶ , ཨེཏསྨིཾ པན ཨཏྠེ སཏི ‘‘ཙཏུཏྠཛ྄ཛྷཱནེ རཱུཔཱཝཙརེ ཨརཱུཔཱཝཙརེ ཏཏྠ ཙིཏྟསངྑཱརོ ཨུཔྤཛྫཏི, ནོ ཙ ཏཏྠ ཀཱཡསངྑཱརོ ཨུཔྤཛྫཏཱི’’ཏི ཨེཏྠཱཔི རཱུཔཱརཱུཔཱཝཙརབྷཱུམཱིསུ ཨུཔྤནྣེ ཙཏུཏྠཛ྄ཛྷཱནེཏི ཨཏྠོ བྷཝེཡྻ, སོ ཙ ཨནིཊྛོ བྷཱུམཱིནཾ ཨོཀཱསབྷཱཝསྶེཝ ཨགྒཧིཏཏཱཔཏྟིཏོ, སབྦཙཏུཏྠཛ྄ཛྷཱནསྶ ཨོཀཱསཝསེན ཨགྒཧིཏཏཱཔཏྟིཏོ ཙ, ཏསྨཱ ཛྷཱནབྷཱུམོཀཱསཱནཾ སངྐརཾ ཨཀཏྭཱ ཝིསུཾ ཨེཝ ཨོཀཱསབྷཱཝོ ཡོཛེཏབྦོ. པཋམཛ྄ཛྷཱནོཀཱསེཔི ཧི ཀཱཡསངྑཱརོ ཙ ཨུཔྤཛྫཏི ཝཙཱིསངྑཱརོ ཙ ཨུཔྤཛྫཏི ཀཱམཱཝཙརོཀཱསེ ཙ. ཡདིཔི ན སབྦམྷི པཋམཛ྄ཛྷཱནེ སབྦམྷི ཙ ཀཱམཱཝཙརེ དྭཡཾ ཨུཔྤཛྫཏི, ཏཏྠ པན ཏཾདྭཡུཔྤཏྟི ཨཏྠཱིཏི ཀཏྭཱ ཨེཝཾ ཝུཏྟནྟི དཊྛབྦཾ. ཝིསུཾ ཨོཀཱསཏྟཱ ཙ ‘‘ཨངྒམཏྟཝསེན ཙེཏྠཱ’’ཏིཨཱདིཝཙནཾ ན ཝཏྟབྦཾ ཧོཏཱིཏི. ཨིམམྷི ཙ ཡམཀེ ཨཝིཏཀྐཝིཙཱརམཏྟཾ དུཏིཡཛ྄ཛྷཱནཾ ཝིཙཱརཝསེན པཋམཛ྄ཛྷཱནེ སངྒཧཾ གཙྪཏཱིཏི དཊྛབྦཾ. མུདྡྷབྷཱུཏཾ དུཏིཡཛ྄ཛྷཱནཾ གཧེཏྭཱ ཨིཏརཾ ཨསངྒཧིཏནྟི ཝཱ. ཡསྶཡཏྠཀེ ‘‘ནིརོདྷསམཱཔནྣཱན’’ནྟི ན ལབྦྷཏི. ན ཧི ཏེ ཨསཉྙསཏྟཱ ཝིཡ ཨོཀཱསེ ཧོནྟཱིཏི.

༣༧. སུདྡྷཱཝཱསཱནཾ དུཏིཡེ ཙིཏྟེ ཝཏྟམཱནེཏི ཏེསཾ པཋམཏོ ཨཝིཏཀྐཨཝིཙཱརཏོ དུཏིཡེ སཝིཏཀྐསཝིཙཱརེཔི བྷཝནིཀནྟིཨཱཝཛྫནེ ཝཏྟམཱནེ ཨུབྷཡཾ ནུཔྤཛྫིཏྠཱཏི དསྶེནྟེན ཏཏོ པུརིམཙིཏྟཀྑཎེསུཔི ནུཔྤཛྫིཏྠཱཏི ¶ དསྶིཏམེཝ ཧོཏི. ཡཐཱ པན ཙིཏྟསངྑཱརསྶ ཨཱདིདསྶནཏྠཾ ‘‘སུདྡྷཱཝཱསཾ ཨུཔཔཛྫནྟཱན’’ནྟི ཝུཏྟཾ, ཨེཝཾ ཝཙཱིསངྑཱརསྶ ཨཱདིདསྶནཏྠཾ ‘‘དུཏིཡེ ཙིཏྟེ ཝཏྟམཱནེ’’ཏི ཝུཏྟནྟི དཊྛབྦཾ.

པརིཙྪེདཔརིཙྪིནྣུདྡེསཝཱརཝཎྞནཱ

༡. པཙྩཡཔརིགྒཧཔརིཡོསཱནཱ ཉཱཏཔརིཉྙཱཏི པཙྩཡདཱིཔཀེན མཱུལཡམཀེན ཉཱཏཔརིཉྙཾ ¶ , ཁནྡྷཱདཱིསུ ཏཱིརཎབཱཧུལླཏོ ཁནྡྷཱདིཡམཀེཧི ཏཱིརཎཔརིཉྙཉྩ ཝིབྷཱཝེཏྭཱ ཨནུསཡཔཧཱནནྟཱ པཧཱནཔརིཉྙཱཏི པཧཱཏབྦམུདྡྷབྷཱུཏེཧི ཨནུསཡེཧི པཧཱནཔརིཉྙཾ ཝིབྷཱཝེཏུཾ ཨནུསཡཡམཀཾ ཨཱརདྡྷཾ. ལབྦྷམཱནཝསེནཱཏི ཨནུསཡབྷཱཝེན ལབྦྷམཱནཱནཾ ཝསེནཱཏི ཨཏྠོ. ཏཱིཧཱཀཱརེཧི ཨནུསཡཱནཾ གཱཧཱཔནཾ ཏེསུ ཏཐཱ ཨགྒཧིཏེསུ ཨནུསཡཝཱརཱདིཔཱལི༹ཡཱ དུརཝབོདྷཏྟཱ.

ཨཡཾ པནེཏྠ པུརིམེསཱུཏི ཨེཏེསུ སཱནུསཡཝཱརཱདཱིསུ པུརིམེསཱུཏི ཨཏྠོ. ཨཏྠཝིསེསཱབྷཱཝཏོ ‘‘ཀཱམདྷཱཏུཾ ཝཱ པན ཨུཔཔཛྫནྟསྶ ཀཱམདྷཱཏུཡཱ ཙུཏསྶ, རཱུཔདྷཱཏུཾ ཝཱ པན ཨུཔཔཛྫནྟསྶ ཀཱམདྷཱཏུཡཱ ཙུཏསྶཱ’’ཏི ཨེཝམཱདཱིཧི ཨཝུཙྩམཱནེ ཀཐམཡཾ ཡམཀདེསནཱ སིཡཱཏི? ནཱཡཾ ཡམཀདེསནཱ, པུརིམཝཱརེཧི པན ཡམཀཝསེན དེསིཏཱནཾ ཨནུསཡཱནཾ ཙུཏིཨུཔཔཏྟིཝསེན ཨནུསཡཊྛཱནཔརིཙྪེདདསྶནཾ. ཡམཀདེསནཱབཱཧུལླཏོ པན སབྦཝཱརསམུདཱཡསྶ ཨནུསཡཡམཀནྟི ནཱམཾ དཊྛབྦཾ. ཨཐ ཝཱ པཊིལོམཔུཙྪཱཔི ཨཏྠཝསེན ལབྦྷནྟི, ཨཏྠཝིསེསཱབྷཱཝཏོ པན ན ཝུཏྟཱཏི ལབྦྷམཱནཏཱཝསེན ཨེཏིསྶཱཔི དེསནཱཡ ཡམཀདེསནཏཱ ཝེདིཏབྦཱ.

ཨནུརཱུཔཾ ཀཱརཎཾ ལབྷིཏྭཱ ཨུཔྤཛྫནྟཱིཏི ཨེཏེན ཀཱརཎལཱབྷེ ཨུཔྤཏྟིཨརཧཏཾ དསྶེཏི. ཨཔྤཧཱིནཱ ཧི ཨནུསཡཱ ཀཱརཎལཱབྷེ སཏི ཨུཔྤཛྫནྟི. ཡཱཝ ཙ མགྒེན ཏེསཾ ཨནུཔྤཏྟིཨརཧཏཱ ན ཀཏཱ ཧོཏི, ཏཱཝ ¶ ཏེ ཨེཝཾཔཀཱརཱ ཨེཝཱཏི ‘‘ཨནུསཡཱ’’ཏི ཝུཙྩནྟི. སོ ཨེཝཾཔཀཱརོ ཨུཔྤཛྫཏི-སདྡེན གཧིཏོ, ན ཁནྡྷཡམཀཱདཱིསུ ཝིཡ ཨུཔྤཛྫམཱནཏཱ. ཏེནེཝ ‘‘ཡསྶ ཀཱམརཱགཱནུསཡོ ཨུཔྤཛྫཏི, ཏསྶ པཊིགྷཱནུསཡོ ཨུཔྤཛྫཏཱིཏི? ཨཱམནྟཱ’’ཏིཨཱདིནཱ ཨུཔྤཛྫནཝཱརོ ཨནུསཡཝཱརེན ནིནྣཱནཱཀརཎོ ཝིབྷཏྟོ. ཨནུརཱུཔཾ ཀཱརཎཾ པན ལབྷིཏྭཱ ཡེ ཨུཔྤཛྫིཾསུ ཨུཔྤཛྫམཱནཱ ཙ, ཏེཔི ཨཔྤཧཱིནཊྛེན ཐཱམགཏཱ ཨཧེསུཾ བྷཝནྟི ཙ. ཨུཔྤཏྟིཨརཧཏཱཡ ཨེཝ ཙ ཏེ ཨུཔྤཛྫིཾསུ ཨུཔྤཛྫནྟི ཙ, ན ཙ ཨཏཱིཏཱནཱགཏཔཙྩུཔྤནྣཏོ ཨཉྙེ ཨུཔྤཏྟིཨརཧཱ ནཱམ ཨཏྠི, ཏསྨཱ སབྦེ ཨཏཱིཏཱནཱགཏཔཙྩུཔྤནྣཱ ཀཱམརཱགཱདཡོ ‘‘ཨནུསཡཱ’’ཏི ཝུཙྩནྟི. ཨཔྤཧཱིནཊྛེནེཝ ཧི ཨནུསཡཱ, ཨཔྤཧཱིནཱ ཙ ཨཏཱིཏཱདཡོ ཨེཝ, མགྒསྶ པན ཏཱདིསཱནཾ ཨནུཔྤཏྟིཨརཧཏཱཔཱདནེན ཨནུསཡཔྤཧཱནཾ ཧོཏཱིཏི. ཨཔྤཧཱིནཱཀཱརོ ནཱམ དྷམྨཱཀཱརོ, ན དྷམྨོ, དྷམྨོ ཨེཝ ཙ ཨུཔྤཛྫཏཱིཏི ཨིམིནཱ ཨདྷིཔྤཱཡེནཱཧ ‘‘ཨཔྤཧཱིནཱཀཱརོ ཙ ཨུཔྤཛྫཏཱིཏི ཝཏྟུཾ ན ཡུཛྫཏཱི’’ཏི. སཏྟཱནུསཡཱཏི ཨེཏྠ ཡདི ཨཔྤཧཱིནཊྛེན སནྟཱནེ ཨནུསེནྟཱིཏི ཨནུསཡཱ, ཨཐ ཀསྨཱ སཏྟེཝ ཝུཏྟཱ, ནནུ སཏྟཱནུསཡཏོ ཨཉྙེསམྤི ཀིལེསཱནཾ ཨཔྤཧཱིནཏྟཱ ཨནུསཡབྷཱཝོ ཨཱཔཛྫཏཱིཏི ཙེ? ནཱཔཛྫཏི, ཨཔྤཧཱིནམཏྟསྶེཝ ཨནུསཡབྷཱཝསྶ ཨཝུཏྟཏྟཱ. ཝུཏྟཉྷི ¶ ‘‘ཨནུསཡོཏི པན ཨཔྤཧཱིནཊྛེན ཐཱམགཏཀིལེསོ ཝུཙྩཏཱི’’ཏི (ཡམ. ཨཊྛ. ཨནུསཡཡམཀ ༡), ཏསྨཱ ཨཔྤཧཱིནཊྛེན ཐཱམགཏོ ཀིལེསོཡེཝ ཨནུསཡོ ནཱམཱཏི ཡུཏྟཾ. ཐཱམགཏནྟི ཙ ཨཉྙེཧི ཨསཱདྷཱརཎོ སབྷཱཝོ དཊྛབྦོ. ཏཐཱ ཧི དྷམྨསབྷཱཝབོདྷིནཱ ཏཐཱགཏེན ཨིམེཡེཝ ‘‘ཨནུསཡཱ’’ཏི ཝུཏྟཱ. ཐཱམགཏོཏི ཨནུསཡསམངྒཱིཏི ཨཏྠོ.

ཨནུསཡཨུཔྤཛྫནཝཱརཱནཾ སམཱནགཏིཀཏྟཱ ཡཐཱ ‘‘ཨནུསེཏཱི’’ཏི ཝཙནཾ ཨཔྤཧཱིནཱཀཱརདཱིཔཀཾ, ཨེཝཾ ‘‘ཨུཔྤཛྫཏཱི’’ཏི ཝཙནཾ སིཡཱཏི ཨུཔྤཛྫནཝཱརེན ‘‘ཨུཔྤཛྫཏཱི’’ཏི ཝཙནསྶ ཨཝུཏྟཏཱ སཀྐཱ ཝཏྟུནྟི ཙེ? ཏཾ ན, ཝཙནཏྠཝིསེསེན ཏཾདྭཡསྶ ཝུཏྟཏྟཱ. ‘‘ཨནུརཱུཔཾ ཀཱརཎཾ ལབྷིཏྭཱ ཨུཔྤཛྫཏཱི’’ཏི ཧི ཨེཏསྨིཾ ཨཏྠེ ཨཝིསིཊྛེཔི ‘‘ཨནུསེཏཱི’’ཏི ཝཙནཾ སནྟཱནེ ཨནུསཡིཏཏཾ ཐཱམགཏབྷཱཝཾ དཱིཔེཏི. ཡདི ཏམེཝ ‘‘ཨུཔྤཛྫཏཱི’’ཏི ཝཙནཾ དཱིཔེཡྻ, ཀསྶཙི ཝིསེསསྶ ཨབྷཱཝཱ ཨུཔྤཛྫནཝཱརོ ན ཝཏྟབྦོ སིཡཱ, ‘‘ཨུཔྤཛྫཏཱི’’ཏི ཝཙནཾ པན ཨུཔྤཏྟིཡོགྒཾ དཱིཔེཏི. ཀསྨཱ? ཨུཔྤཛྫནཝཱརེན ཨུཔྤཏྟིཡོགྒསྶ ¶ དསྶིཏཏྟཱ, ཨནུསཡསདྡསྶ སབྦདཱ ཝིཛྫམཱནཱནཾ ཨཔརིནིཔྥནྣསཡནཏྠཏཱཡ ནིཝཱརཎཏྠཾ ཨུཔྤཏྟིཨརཧཏཱཡ ཐཱམགཏབྷཱཝསངྑཱཏསྶ ཡཐཱདྷིཔྤེཏསཡནཏྠསྶ དསྶནཏྠཾ ‘‘ཨནུསེནྟཱིཏི ཨནུརཱུཔཾ ཀཱརཎཾ ལབྷིཏྭཱ ཨུཔྤཛྫནྟཱི’’ཏི ཡཾ ཨུཔྤཏྟིཡོགྒཝཙནཾ ཝུཏྟཾ, ཏཾ སུཝུཏྟམེཝཱཏི ཨདྷིཔྤཱཡོ. ཏམྤི སུཝུཏྟམེཝ ཨིམིནཱ ཏནྟིཔྤམཱཎེནཱཏི སམྦནྡྷོ. ཏནྟིཏྟཡེནཔི ཧི ཙིཏྟསམྤཡུཏྟཏཱ དཱིཔིཏཱ ཧོཏི.

པརིཙྪེདཔརིཙྪིནྣུདྡེསཝཱརཝཎྞནཱ ནིཊྛིཏཱ.

༢. ཀཱམདྷཱཏུཡཱ དྭཱིསུ ཝེདནཱསཱུཏི ཀཱམཱཝཙརབྷཱུམིཡཾ སུཁཱཡ ཙ ཨུཔེཀྑཱཡ ཙཱཏི ཨཊྛཀཐཱཡཾ ཀཱམདྷཱཏུགྒཧཎཾ དྭིནྣཾ ཝེདནཱནཾ ཝིསེསནབྷཱཝེན ཝུཏྟཾ, ཨེཝཾ སཏི ཀཱམདྷཱཏུཡཱ ཀཱམརཱགཱནུསཡསྶ ཨནུསཡཊྛཱནཏཱ ན ཝུཏྟཱ ཧོཏི. དྭཱིསུ པན རཱགེསུ བྷཝརཱགསྶ ཏཱིསུ དྷཱཏཱུསུ རཱུཔཱརཱུཔདྷཱཏཱུནཾ ཨནུསཡཊྛཱནཏཱ ཝུཏྟཱཏི ཀཱམདྷཱཏུཡཱ ཀཱམརཱགསྶ ཨནུསཡཊྛཱནཏཱ ཝཏྟབྦཱ. དྷཱཏུཝེདནཱསབྦསཀྐཱཡཔརིཡཱཔནྣཝསེན ¶ ཧི ཏིཔྤཀཱརཾ ཨནུསཡཱནཾ ཨནུསཡཊྛཱནཾ ཝུཏྟནྟི. ཏསྨཱ ཏཱིསུ དྷཱཏཱུསུ ཀཱམདྷཱཏུཡཱ ཏཱིསུ ཝེདནཱསུ དྭཱིསུ ཝེདནཱསུ ཨེཏྠ ཀཱམརཱགཱནུསཡོ ཨནུསེཏཱིཏི ཝིསུཾ ཨནུསཡཊྛཱནཏཱ དྷཱཏུཡཱ ཝེདནཱནཉྩ ཡོཛེཏབྦཱ. དྭཱིསུ ཝེདནཱསཱུཏི ཨིདཉྩ ཝེདནཱསུ ཨནུསཡམཱནོ ཀཱམརཱགཱནུསཡོ དྭཱིསྭེཝ ཨནུསེཏི, ན ཏཱིསཱུཏི ཏིཎྞམྤི ཋཱནཏཱནིཝཱརཎཏྠམེཝ ཝུཏྟནྟི ན སབྦཱསུ དྭཱིསུ ཨནུསཡནཔྤཏྟོ ཨཏྠི, ཏེན ཝེདནཱཝིསེསནཏྠཾ ན ཀཱམདྷཱཏུགྒཧཎེན ཀོཙི ཨཏྠོ. བྷཝརཱགཱནུསཡནཊྛཱནཉྷི ཨཊྛཱནཉྩ ཨནུསཡཱནཾ ཨཔརིཡཱཔནྣཾ སཀྐཱཡེ ཀཱམརཱགཱནུསཡསྶ ཨནུསཡཊྛཱནཾ ན ཧོཏཱིཏི པཱཀཊམེཏཾ. ཡཐཱ ཙ ‘‘དྭཱིསུ ཝེདནཱསཱུ’’ཏི ཝུཏྟེ པཊིགྷཱནུསཡཱནུསཡཊྛཱནཏོ ཨཉྙཱ དྭེ ཝེདནཱ གཡ྄ཧནྟི, ཨེཝཾ བྷཝརཱགཱནུསཡཱནུསཡནཊྛཱནཏོ ཙ ཨཉྙཱ ཏཱ གཡ྄ཧནྟཱིཏི.

ཨེཏྠ ཙ དྭཱིཧི ཝེདནཱཧི སམྤཡུཏྟེསུ ཨཉྙེསུ ཙ པིཡརཱུཔསཱཏརཱུཔེསུ ཨིཊྛརཱུཔཱདཱིསུ ཨུཔྤཛྫམཱནོ ཀཱམརཱགཱནུསཡོ སཱཏསནྟསུཁགིདྡྷིཡཱ པཝཏྟཏཱིཏི དྭཱིསུ ཝེདནཱསུ ཏསྶ ཨནུསཡནཾ ཝུཏྟཾ. ཨཉྙཏྠ ཨུཔྤཛྫམཱནོཔི ¶ ཧི སོ ཨིམཱསུ དྭཱིསུ ཝེདནཱསུ ཨནུགཏོ ཧུཏྭཱ སེཏི སུཁམིཙྩེཝ ཨབྷིལབྷཏཱིཏི. ཨེཝཾ པཊིགྷཱནུསཡོ ཙ དུཀྑཝེདནཱསམྤཡུཏྟེསུ ཨཉྙེསུ ཙ ཨཔྤིཡརཱུཔཱསཱཏརཱུཔེསུ ཨནིཊྛརཱུཔཱདཱིསུ ཨུཔྤཛྫམཱནོ དུཀྑཔཊིཀཱུལཏོ དུཀྑམིཙྩེཝ པཊིཧཉྙཏཱིཏི དུཀྑཝེདནམེཝ ཨནུགཏོ ཧུཏྭཱ སེཏི, ཏེན པན ཏསྨིཾ ཨནུསཡནཾ ཝུཏྟཾ. ཨེཝཾ ཀཱམརཱགཔཊིགྷཱནཾ ཏཱིསུ ཝེདནཱསུ ཨནུསཡཝཙནེན ཨིཊྛཨིཊྛམཛ྄ཛྷཏྟཨནིཊྛེསུ ཨཱརམྨཎཔཀཏིཡཱ ཝིཔརཱིཏསཉྙཱཡ ཙ ཝསེན ཨིཊྛཱདིབྷཱཝེན གཧིཏེསུ ཀཱམརཱགཔཊིགྷཱནཾ ཨུཔྤཏྟི དསྶིཏཱ ཧོཏི. ཏཏྠ ཨུཔྤཛྫམཱནཱ ཧི ཏེ ཏཱིསུ ཝེདནཱསུ ཨནུསེནྟི ནཱམ. ཝེདནཱཏྟཡམུཁེན ཝཱ ཨེཏྠ ཨིཊྛཱདཱིནཾ ཨཱརམྨཎཱནཾ གཧཎཾ ཝེདིཏབྦཾ, ཀཱམདྷཱཏུཨཱདིགྒཧཎེན ཀཱམསྶཱདཱདིཝཏྠུབྷཱུཏཱནཾ ཀཱམབྷཝཱདཱིནཾ. ཏཏྠ ཀཱམརཱགཱནུསཡོ བྷཝསྶཱདཝསེན ཨནུསཡམཱནོ ཀཱམདྷཱཏུཡཱ ཨནུསེཏི, ཀཱམསུཁསྶཱདཝསེན ཨནུསཡམཱནོ སུཁོཔེཀྑཱཝེདནཱསུ. པཊིགྷོ དུཀྑཔཊིགྷཱཏཝསེནེཝ པཝཏྟཏཱིཏི ཡཏྠ ཏཏྠ པཊིཧཉྙམཱནོཔི དུཀྑཝེདནཱཡ ཨེཝ ཨནུསེཏི. རཱུཔཱརཱུཔབྷཝེསུ པན རཱུཔཱརཱུཔཱཝཙརདྷམྨེསུ ཙ ཀཱམསྶཱདསྶ པཝཏྟི ནཏྠཱིཏི ཏཏྠ ཨནུསཡམཱནོ རཱགོ བྷཝརཱགོཨིཙྩེཝ ཝེདིཏབྦོ. དྷཱཏུཏྟཡཝེདནཱཏྟཡགྒཧཎེན ཙ སབྦསཀྐཱཡཔརིཡཱཔནྣཱནཾ གཧིཏཏྟཱ ‘‘ཡཏྠ ཀཱམརཱགཱནུསཡོ ནཱནུསེཏི, ཏཏྠ དིཊྛཱནུསཡོ ནཱནུསེཏཱི’’ཏི (ཡམ. ༢.ཨནུསཡཡམཀ.༤༦) ཨེཝམཱདཱིནཾ ཝིསྶཛྫནེསུ དྷཱཏུཏྟཡཝེདནཱཏྟཡཝིནིམུཏྟཾ དིཊྛཱནུསཡཱདཱིནཾ ཨནུསཡཊྛཱནཾ ན ཝུཏྟནྟི དཊྛབྦཾ. ནནུ ཙ ཨནུཏྟརེསུ ཝིམོཀྑེསུ པིཧཾ ཨུཔཊྛཱཔཡཏོ པིཧཔཙྩཡཱ ¶ ཨུཔྤནྣདོམནསྶེ པཊིགྷཱནུསཡོ ནཱནུསེཏི, ཏཐཱ ནེཀྑམྨསྶིཏསོམནསྶུཔེཀྑཱསུ ཀཱམརཱགེན ནཱནུསཡིཏབྦནྟི ཏདནུསཡནཊྛཱནཏོ ཨཉྙཱཔི དིཊྛཱནུསཡཱནུསཡནཊྛཱནབྷཱུཏཱ ཀཱམཱཝཙརཝེདནཱ སནྟཱིཏི? ཧོནྟུ, ན པན དྷཱཏུཏྟཡཝེདནཱཏྟཡཏོ ཨཉྙཾ ཏདནུསཡནཊྛཱནཾ ཨཏྠི, ཏསྨཱ ཏཾ ན ཝུཏྟཾ. ཡསྨཱ པན ‘‘ཡཏྠ ཀཱམརཱགཱནུསཡོ ཙ པཊིགྷཱནུསཡོ ཙ མཱནཱནུསཡོ ཙ ནཱནུསེནྟི, ཏཏྠ དིཊྛཱནུསཡོ ཝིཙིཀིཙྪཱནུསཡོ ནཱནུསེཏཱིཏི? ཨཱམནྟཱ’’ཏི (ཡམ. ༢.ཨནུསཡཡམཀ.༥༢) ཝུཏྟཾ, ཏསྨཱ ཨཝིསེསེན དུཀྑཾ པཊིགྷཱནུསཡསྶ ཨནུསཡནཊྛཱནནྟི སམུདཱཡཝསེན གཧེཏྭཱ ཝུཏྟནྟི ཝེདིཏབྦཾ. ཏཐཱ ལོཀིཡསུཁོཔེཀྑཱ ཀཱམརཱགམཱནཱནུསཡནཊྛཱནནྟི.

ཨཔིཙ ¶ སུཏྟེ ‘‘ཨིདྷཱཝུསོ ཝིསཱཁ, བྷིཀྑུ ཨིཏི པཊིསཉྩིཀྑཏི ‘ཀུདཱསྶུ ནཱམཱཧཾ དོམནསྶཾ པཛཧེཡྻ’ནྟི, སོ ཨིཏི པཊིསཉྩིཀྑིཏྭཱ པཊིགྷཾ ཏེན པཛཧཏི, ན ཏཏྠ པཊིགྷཱནུསཡོ ཨནུསེཏཱི’’ཏི ནེཀྑམྨསྶིཏཾ དོམནསྶཾ ཨུཔྤཱདེཏྭཱ ཏཾ ཝིཀྑམྦྷེཏྭཱ ཝཱིརིཡཾ ཀཏྭཱ ཨནཱགཱམིམགྒེན པཊིགྷསྶ སམུགྒྷཱཏནཾ སནྡྷཱཡ ཝུཏྟཾ. ན ཧི པཊིགྷེནེཝ པཊིགྷཔྤཧཱནཾ, དོམནསྶེན ཝཱ དོམནསྶཔྤཧཱནཾ ཨཏྠཱིཏི. པཊིགྷུཔྤཏྟིརཧཊྛཱནཏཱཡ པན ཨིདྷ སབྦཾ དུཀྑཾ ‘‘པཊིགྷཱནུསཡསྶ ཨནུསཡནཊྛཱན’’ནྟི ཝུཏྟནྟི དཊྛབྦཾ. ནིཔྤརིཡཱཡདེསནཱ ཧེསཱ, སཱ པན པརིཡཱཡདེསནཱ. ཨེཝཉྩ ཀཏྭཱ པཋམཛ྄ཛྷཱནཝིཀྑམྦྷིཏཾ ཀཱམརཱགཱནུསཡཾ ཏཐཱ ཝིཀྑམྦྷིཏམེཝ ཀཏྭཱ ཨནཱགཱམིམགྒེན སམུགྒྷཱཏནཾ སནྡྷཱཡ ‘‘ཝིཝིཙྩེཝ…པེ… པཋམཾ ཛྷཱནཾ ཨུཔསམྤཛྫ ཝིཧརཏི, རཱགཾ ཏེན པཛཧཏི, ན ཏཏྠ རཱགཱནུསཡོ ཨནུསེཏཱི’’ཏི ཝུཏྟཾ. ཨེཝཾ ཙཏུཏྠཛ྄ཛྷཱནཝིཀྑམྦྷིཏཾ ཨཝིཛྫཱནུསཡཾ ཏཐཱ ཝིཀྑམྦྷིཏམེཝ ཀཏྭཱ ཨརཧཏྟམགྒེན སམུགྒྷཱཏནཾ སནྡྷཱཡ ‘‘སུཁསྶ ཙ པཧཱནཱ…པེ… ཙཏུཏྠཾ ཛྷཱནཾ ཨུཔསམྤཛྫ ཝིཧརཏི, ཨཝིཛྫཾ ཏེན པཛཧཏི, ན ཏཏྠ ཨཝིཛྫཱནུསཡོ ཨནུསེཏཱི’’ཏི (མ. ནི. ༡.༤༦༥) ཝུཏྟཾ. ན ཧི ལོཀིཡཙཏུཏྠཛ྄ཛྷཱནུཔེཀྑཱཡ ཨཝིཛྫཱནུསཡོ སབྦཐཱ ནཱནུསེཏཱིཏི སཀྐཱ ཝཏྟུཾ ‘‘སབྦསཀྐཱཡཔརིཡཱཔནྣེསུ དྷམྨེསུ ཨེཏྠ ཨཝིཛྫཱནུསཡོ ཨནུསེཏཱི’’ཏི (ཡམ. ཨཊྛ. ཨནུསཡཡམཀ ༢) ཝུཏྟཏྟཱ, ཏསྨཱ ཨཝིཛྫཱནུསཡསྶེཝ ཝཏྠུ ཙཏུཏྠཛ྄ཛྷཱནུཔེཀྑཱ, ནེཀྑམྨསྶིཏདོམནསྶཉྩ པཊིགྷཱནུསཡསྶ ཝཏྠུ ན ན ཧོཏཱིཏི ཏཏྠཱཔི ཏསྶ ཨནུསཡནཾ ཝེདིཏབྦཾ. ཨཝཏྠུབྷཱཝཏོ ཧི ཨིདྷ ཨནུསཡནཾ ན ཝུཙྩཏི, ན སུཏྟནྟེསུ ཝིཡ ཝུཏྟནཡེན ཏཾཔཊིཔཀྑབྷཱཝཏོ ཏཾསམུགྒྷཱཏཀམགྒསྶ བལཝཱུཔནིསྶཡབྷཱཝཏོ ཙཱཏི.

ཨེཏྠ ¶ ཙ ཨཱརམྨཎེ ཨནུསཡཊྛཱནེ སཏི བྷཝརཱགཝཛྫོ སབྦོ ལོབྷོ ཀཱམརཱགཱནུསཡོཏི ན སཀྐཱ ཝཏྟུཾ. དུཀྑཱཡ ཧི ཝེདནཱཡ རཱུཔཱརཱུཔདྷཱཏཱུསུ ཙ ཨནུསཡམཱནེན དིཊྛཱནུསཡེན སམྤཡུཏྟོཔི ལོབྷོ ལོབྷོ ཨེཝ, ན ཀཱམརཱགཱནུསཡོ. ཡདི སིཡཱ, དིཊྛཱནུསཡསྶ ཝིཡ ཨེཏསྶཔི ཋཱནཾ ཝཏྟབྦཾ སིཡཱཏི. ཨཐ པན ཨཛ྄ཛྷཱསཡཝསེན ཏནྣིནྣཏཱཡ ཨནུསཡནཊྛཱནཾ ཝུཏྟཾ. ཡཐཱ ཨིཊྛཱནཾ རཱུཔཱདཱིནཾ སུཁཱཡ ཙ ཝེདནཱཡ ཨཔྤཊིལདྡྷཾ ཝཱ ཨཔྤཊིལཱབྷཏོ སམནུཔསྶཏོ, པཊིལདྡྷཔུབྦཾ ཝཱ ཨཏཱིཏཾ ནིརུདྡྷཾ ཝིགཏཾ པརིཎཏཾ སམནུཔསྶཏོ ཨུཔྤཛྫམཱནོ པཊིགྷོ དུཀྑེ པཊིཧཉྙནཝསེནེཝ པཝཏྟཏཱིཏི དུཀྑམེཝ ཏསྶ ཨནུསཡནཊྛཱནཾ ཝུཏྟཾ, ནཱལམྦིཏཾ, ཨེཝཾ དུཀྑཱདཱིསུ ཨབྷིནིཝེསནཝསེན ¶ ཨུཔྤཛྫམཱནེན དིཊྛཱནུསཡེན སམྤཡུཏྟོཔི ལོབྷོ སུཁཱབྷིསངྒཝསེནེཝ པཝཏྟཏཱིཏི སཱཏསནྟསུཁདྭཡམེཝསྶ ཨནུསཡཊྛཱནཾ ཝུཏྟནྟི བྷཝརཱགཝཛྫསྶ སབྦལོབྷསྶ ཀཱམརཱགཱནུསཡཏཱ ན ཝིརུཛ྄ཛྷཏི, ཨེཀསྨིཾཡེཝ ཙ ཨཱརམྨཎེ རཛྫནྟི དུསྶནྟི ཙ. ཏཏྠ རཱགོ སུཁཛ྄ཛྷཱསཡོ པཊིགྷོ དུཀྑཛ྄ཛྷཱསཡོཏི ཏེསཾ ནཱནཱནུསཡཊྛཱནཏཱ ཧོཏི.

ཨེཝཉྩ ཀཏྭཱ ‘‘ཡཏྠ ཀཱམརཱགཱནུསཡོ ཨནུསེཏི, ཏཏྠ པཊིགྷཱནུསཡོ ཨནུསེཏཱིཏི? ནོ’’ཏི (ཡམ. ༢.ཨནུསཡཡམཀ.༡༤) ཝུཏྟནྟི. ཨཊྛཀཐཱཡཾ པན དྭཱིསུ ཝེདནཱསུ ཨིཊྛཱརམྨཎེ ཙ དོམནསྶུཔྤཏྟིཾ ཝཏྭཱ ‘‘དོམནསྶམཏྟམེཝ པན ཏཾ ཧོཏི, ན པཊིགྷཱནུསཡོ’’ཏི (ཡམ. ཨཊྛ. ཨནུསཡཡམཀ ༢) ཝུཏྟཏྟཱ ཡཐཱ ཏཏྠ པཊིགྷོ པཊིགྷཱནུསཡོ ན ཧོཏི, ཨེཝཾ དུཀྑཱདཱིསུ ཨུཔྤཛྫམཱནེན དིཊྛཱནུསཡེན སཧཛཱཏོ ལོབྷོ ཀཱམརཱགཱནུསཡོ ན ཧོཏིཙྩེཝ ཝིཉྙཱཡཏཱིཏི. ཡཾ པནེཏཾ ཝུཏྟཾ ‘‘དོམནསྶམཏྟམེཝ པན ཏཾ ཧོཏི, ན པཊིགྷཱནུསཡོ’’ཏི, ཨེཏྠ ན པཊིགྷཱནུསཡོཏི ནཏྠི པཊིགྷཱནུསཡོཏི ཨཏྠོ དཊྛབྦོ. ན ཧི དོམནསྶསྶ པཊིགྷཱནུསཡབྷཱཝཱསངྐཱ ཨཏྠཱིཏི.

དེསནཱ སཾཀིཎྞཱ ཝིཡ བྷཝེཡྻཱཏི བྷཝརཱགསྶཔི ཀཱམདྷཱཏུཡཱ དྭཱིསུ ཝེདནཱསུ ཨཱརམྨཎཀརཎཝསེནེཝ ཨུཔྤཏྟི ཝུཏྟཱ ཝིཡ བྷཝེཡྻ, ཏསྨཱ ཨཱརམྨཎཝིསེསེན ཝིསེསདསྶནཏྠཾ ཨེཝཾ དེསནཱ ཀཏཱ སཧཛཱཏཝེདནཱཝིསེསཱབྷཱཝཏོཏི ཨདྷིཔྤཱཡོ.

ཨུཔྤཏྟིཊྛཱནཝཱརཝཎྞནཱ ནིཊྛིཏཱ.

༣. ཨནུསེཏི ¶ ཨུཔྤཛྫཏཱིཏི པཙྩུཔྤནྣཝོཧཱརཱ པཝཏྟཱཝིརཱམཝསེན ཝེདིཏབྦཱ. མགྒེནེཝ ཧི ཨནུསཡཱནཾ ཝིརཱམོ ཝིཙྪེདོ ཧོཏི, ན ཏཏོ པུབྦེཏི.

༢༠. ནཱཔི ཨེཀསྨིཾ ཋཱནེ ཨུཔྤཛྫནྟི, ན ཨེཀཾ དྷམྨཾ ཨཱརམྨཎཾ ཀརོནྟཱིཏི ཨེཏྠ པུརིམེན ཨེཀསྨིཾ ཙིཏྟུཔྤཱདེ ཨུཔྤཏྟི ནིཝཱརིཏཱ, པཙྪིམེན ཨེཀསྨིཾ ཨཱརམྨཎེཏི ཨཡཾ ཝིསེསོ. པུགྒལོཀཱསཝཱརསྶ པཊིལོམེ ཏེསཾ ཏེསཾ པུགྒལཱནཾ ¶ ཏསྶ ཏསྶ ཨནུསཡསྶ ཨནནུསཡནཊྛཱནཾ པཀཏིཡཱ པཧཱནེན ཙ ཝེདིཏབྦཾ, ‘‘ཏིཎྞཾ པུགྒལཱནཾ དུཀྑཱཡ ཝེདནཱཡ ཏེསཾ ཏཏྠ ཀཱམརཱགཱནུསཡོ ནཱནུསེཏི, ནོ ཙ ཏེསཾ ཏཏྠ པཊིགྷཱནུསཡོ ནཱནུསེཏི, ཏེསཉྙེཝ པུགྒལཱནཾ རཱུཔདྷཱཏུཡཱ ཨརཱུཔདྷཱཏུཡཱ ཨཔརིཡཱཔནྣེ ཏེསཾ ཏཏྠ ཀཱམརཱགཱནུསཡོ ཙ ནཱནུསེཏི, པཊིགྷཱནུསཡོ ཙ ནཱནུསེཏཱི’’ཏི པཀཏིཡཱ དུཀྑཱདཱིནཾ ཀཱམརཱགཱདཱིནཾ ཨནནུསཡཊྛཱནཏཾ སནྡྷཱཡ ཝུཏྟཾ, ‘‘དྭིནྣཾ པུགྒལཱནཾ སབྦཏྠ ཀཱམརཱགཱནུསཡོ ཙ ནཱནུསེཏི, པཊིགྷཱནུསཡོ ཙ ནཱནུསེཏཱི’’ཏི (ཡམ. ༢.ཨནུསཡཡམཀ.༥༦) ཨནུསཡཔྤཧཱནེན. ཨེཏྠ པུརིམནཡེན ཨོཀཱསཾ ཨཝེཀྑིཏྭཱ པུགྒལསྶ ཝིཛྫམཱནཱནཾ ཨནུསཡཱནཾ ཨནནུསཡནཾ ཝུཏྟཾ, པཙྪིམནཡེན པུགྒལཾ ཨཝེཀྑིཏྭཱ ཨོཀཱསསྶ ཀཱམདྷཱཏུཨཱདིཀསྶ ཨནོཀཱསཏཱཏི.

༦༦-༡༣༡. སཱནུསཡཔཛཧནཔརིཉྙཱཝཱརེསུ ‘‘སཱནུསཡོ, པཛཧཏི, པརིཛཱནཱཏཱི’’ཏི པུགྒལོ ཝུཏྟོ. པུགྒལསྶ ཙ ཨིམསྨིཾ བྷཝེ སཱནུསཡོཏི ཨེཝཾ བྷཝཝིསེསེན ཝཱ, ཨིམསྨིཾ ཀཱམརཱགཱནུསཡེན སཱནུསཡོ ཨིམསྨིཾ ཨིཏརེསུ ཀེནཙཱིཏི ཨེཝཾ བྷཝཱནུསཡཝིསེསེན ཝཱ སཱནུསཡཏཱནིརནུསཡཏཱདིཀཱ ¶ ནཏྠི. ཏཐཱ དྭཱིསུ ཝེདནཱསུ ཀཱམརཱགཱནུསཡེན སཱནུསཡོ, དུཀྑཱཡ ཝེདནཱཡ ནིརནུསཡོཏི ཨིདམྤི ནཏྠི. ན ཧི པུགྒལསྶ ཝེདནཱ ཨོཀཱསོ, ཨཐ ཁོ ཨནུསཡཱནནྟི. ཨནུསཡསྶ པན ཏསྶ ཏསྶ སོ སོ ཨནུསཡནོཀཱསོ པུགྒལསྶ ཏེན ཏེན ཨནུསཡེན སཱནུསཡཏཱཡ, ཏསྶ ཏསྶ པཛཧནཔརིཛཱནནཱནཉྩ ནིམིཏྟཾ ཧོཏི, ཨནནུསཡནོཀཱསོ ཙ ནིརནུསཡཏཱདཱིནཾ, ཏསྨཱ ཨོཀཱསཝཱརེསུ བྷུམྨནིདྡེསཾ ཨཀཏྭཱ ‘‘ཡཏོ ཏཏོ’’ཏི ནིམིཏྟཏྠེ ནིསྶཀྐཝཙནཾ ཀཏཾ, པཛཧནཔརིཉྙཱཝཱརེསུ ཨཔཱདཱནཏྠེ ཨེཝ ཝཱ. ཏཏོ ཏཏོ ཧི ཨོཀཱསཏོ ཨཔགམཀརཎཾ ཝིནཱསནཾ པཛཧནཾ པརིཛཱནནཉྩཱཏི.

ཏཏྠ ཡཏོཏི ཡཏོ ཨནུསཡཊྛཱནཏོ ཨནུལོམེ, པཊིལོམེ ཨནནུསཡཊྛཱནཏོཏི ཨཏྠོ. ཨནུསཡཱནཱནུསཡསྶེཝ ཧི ནིམིཏྟཱཔཱདཱནབྷཱཝདསྶནཏྠཾ ¶ ‘‘རཱུཔདྷཱཏུཡཱ ཨརཱུཔདྷཱཏུཡཱ ཏཏོ མཱནཱནུསཡེན སཱནུསཡོཏི (ཡམ.༢.ཨནུསཡཡམཀ.༧༧), པཛཧཏཱི’’ཏི (ཡམ. ༢.ཨནུསཡཡམཀ.༡༤༣) ཙ ‘‘དུཀྑཱཡ ཝེདནཱཡ ཏཏོ ཀཱམརཱགཱནུསཡེན ནིརནུསཡོཏི (ཡམ. ༢.ཨནུསཡཡམཀ.༡༡༠), ན པཛཧཏཱི’’ཏི (ཡམ. ༢.ཨནུསཡཡམཀ.༡༧༤-༡༧༦) ཙ ཨེཝམཱདཱིསུ རཱུཔདྷཱཏུཨཱདཡོ ཨེཝ བྷུམྨནིདྡེསེནེཝ ནིདྡིཊྛཱཏི. ཨཊྛཀཐཱཡཾ པན ཙཏུཏྠཔཉྷཝིསྶཛྫནེན སརཱུཔཏོ ཨནུསཡནཊྛཱནསྶ དསྶིཏཏྟཱ ཏདཏྠེ ཨཱདིཔཉྷེཔི ‘‘ཡཏོ’’ཏི ཨནུསཡནཊྛཱནཾ ཝུཏྟནྟི ཨིམམཏྠཾ ཝིབྷཱཝེཏྭཱ པུན ‘‘ཡཏོ’’ཏི ཨེཏསྶ ཝཙནཏྠཾ དསྶེཏུཾ ‘‘ཨུཔྤནྣེན ཀཱམརཱགཱནུསཡེན སཱནུསཡོ’’ཏི ཝུཏྟཾ, ཏཾ པམཱདལིཁིཏཾ ཝིཡ དིསྶཏི. ན ཧི ཨུཔྤནྣེནེཝ ཨནུསཡེན སཱནུསཡོ, ཨུཔྤཏྟིརཧཊྛཱནཏཉྩ སནྡྷཱཡེཝ ནིསྶཀྐཝཙནཾ ན སཀྐཱ ཝཏྟུཾ. ན ཧི ཨཔརིཡཱཔནྣཱནཾ ཨནུསཡུཔྤཏྟིརཧཊྛཱནཏཱཏི ཏཾ ཏཐེཝ དིསྶཏི. ཨེཝཾ པནེཏྠ ཨཏྠོ དཊྛབྦོ – ཡཏོ ཨུཔྤནྣེནཱཏི ཡཏོ ཨུཔྤནྣེན བྷཝིཏབྦཾ, ཏེནཱཏི ཨུཔྤཏྟིརཧཊྛཱནེ ནིསྶཀྐཝཙནཾ ཀཏནྟི. ཏཐཱ སབྦདྷམྨེསུ ཨུཔྤཛྫནཀེནཱཏི. ཨུཔྤཏྟིཔཊིསེདྷེ ཨཀཏེ ཨནུཔྤཏྟིཡཱ ཨནིཙྪིཏཏྟཱ སབྦདྷམྨེསུ ཨུཔྤཛྫནཀབྷཱཝཾ ཨཱཔནྣེན ཨནུཔྤཛྫནབྷཱཝཾ ཨཔནེཏི ནཱམ. སབྦཏྠཱཏི ཨེཏསྶ པན སབྦཊྛཱནཏོཏི ཨཡམཏྠོ ན ན སམྦྷཝཏི. ཏྠ-ཀཱརཉྷི བྷུམྨཏོ ཨཉྙཏྠཱཔི སདྡཝིདཱུ ཨིཙྪནྟཱིཏི.

༡༣༢-༡༩༧. པཛཧནཝཱརེ ¶ ཡེན ཀཱམརཱགཱནུསཡཱདཡོ སཱཝསེསཱ པཧཱིཡནྟི, སོ ཏེ པཛཧཏཱིཏི སནྣིཊྛཱནཾ ཀཏྭཱ ཝཏྟབྦོ ན ཧོཏི ཨཔཛཧནསབྦྷཱཝཱ, ཏསྨཱ སནྣིཊྛཱནེ ནིརཝསེསཔྤཛཧནཀོཡེཝ པཛཧཏཱིཏི ཝུཏྟོ, ཏསྨཱ ‘‘ཡོ ཝཱ པན མཱནཱནུསཡཾ པཛཧཏི, སོ ཀཱམརཱགཱནུསཡཾ པཛཧཏཱིཏི? ནོ’’ཏི (ཡམ. ༢.ཨནུསཡཡམཀ.༡༣༢) ཝུཏྟཾ. ཡསྨཱ པན སཾསཡཔདེན པཧཱནཀརཎམཏྟམེཝ པུཙྪཏི, ན སནྣིཊྛཱནཾ ཀརོཏི, ཏསྨཱ ཡཐཱཝིཛྫམཱནཾ པཧཱནཾ སནྡྷཱཡ ‘‘ཡོ ཀཱམརཱགཱནུསཡཾ པཛཧཏི, སོ མཱནཱནུསཡཾ པཛཧཏཱིཏི? ཏདེཀཊྛཾ པཛཧཏཱི’’ཏི ཝུཏྟཾ. པཊིལོམེ པན ‘‘ནཔྤཛཧཏཱི’’ཏི པཛཧནཱབྷཱཝོ ཨེཝ སནྣིཊྛཱནཔདེན སཾསཡཔདེན ཙ ཝིནིཙྪིཏོ ¶ པུཙྪིཏོ ཙ, ཏསྨཱ ཡེསཾ པཛཧནཾ ནཏྠི ནིརཝསེསཝསེན པཛཧནཀཱནཾ, ཏེ ཋཔེཏྭཱ ཨཝསེསཱ ཨཔྤཛཧནསབྦྷཱཝེནེཝ ནཔྤཛཧནྟཱིཏི ཝུཏྟཱ, ན ཙ ཡཐཱཝིཛྫམཱནེན པཧཱནེནེཝ ཝཛྫིཏཱཏི དཊྛབྦཱཏི. ‘‘ཨནཱགཱམིམགྒསམངྒིཉྩ ཨཊྛམཀཉྩ ཋཔེཏྭཱ ཨཝསེསཱ པུགྒལཱ ཀཱམརཱགཱནུསཡཉྩ ནཔྤཛཧནྟི ཝིཙིཀིཙྪཱནུསཡཉྩ ནཔྤཛཧནྟཱི’’ཏི (ཡམ. ༢.ཨནུསཡཡམཀ.༡༦༥) ཨེཏྠ ཨཊྛཀཐཱཡཾ ‘‘པུཐུཛྫནོ པཧཱནཔརིཉྙཱཡ ཨབྷཱཝེན ནཔྤཛཧཏི, སེསཱ ཏེསཾ ཨནུསཡཱནཾ པཧཱིནཏྟཱ’’ཏི (ཡམ. ཨཊྛ. ཨནུསཡཡམཀ ༡༣༢-༡༩༧) ཝུཏྟཾ.

ཏཏྠ ཀིཉྩཱཔི ཀེསཉྩི ཝིཙིཀིཙྪཱནུསཡོ ཀེསཉྩི ཨུབྷཡནྟི སེསཱནཾ ཏེསཾ པཧཱིནཏཱ ཨཏྠི, ཏཐཱཔི སོཏཱཔནྣཱདཱིནཾ ཝིཙིཀིཙྪཱནུསཡསྶ པཧཱིནཏཱ ཨུབྷཡཱཔཛཧནསྶ ཀཱརཎཾ ན ཧོཏཱིཏི ཏེསཾ པཧཱིནཏྟཱ ‘‘ནཔྤཛཧནྟཱི’’ཏི ན སཀྐཱ ཝཏྟུཾ, ཨཐ པན ཀཱམརཱགཱནུསཡཉྩ ནཔྤཛཧནྟཱིཏི ཨིམཾ སནྣིཊྛཱནེན ཏེསཾ པུགྒལཱནཾ སངྒཧིཏཏཱདསྶནཏྠཾ ཝུཏྟནྟི ན ཏཏྠ ཀཱརཎཾ ཝཏྟབྦཾ, པུཙྪིཏསྶ པན སཾསཡཏྠསྶ ཀཱརཎཾ ཝཏྟབྦཾ. ཨེཝཾ སཏི ‘‘སེསཱ ཏསྶ ཨནུསཡསྶ པཧཱིནཏྟཱ’’ཏི ཝཏྟབྦནྟི? ན ཝཏྟབྦཾ ‘‘ཡོ ཀཱམརཱགཱནུསཡཾ ནཔྤཛཧཏི, སོ དིཊྛཱནུསཡཾ ཝིཙིཀིཙྪཱནུསཡཾ ནཔྤཛཧཏཱི’’ཏི པཊིཀྑིཔིཏྭཱ པུཙྪིཏེ སདིསཝིསྶཛྫནཀེ དིཊྛིཝིཙིཀིཙྪཱནུསཡེ སནྡྷཱཡ ཀཱརཎསྶ ཝཏྟབྦཏྟཱ, ཏསྨཱ ཏེསཾ ཨནུསཡཱནཾ པཧཱིནཏྟཱཏི ཏེསཾ དིཊྛིཝིཙིཀིཙྪཱནུསཡཱནཾ པཧཱིནཏྟཱ ཏེ སཾསཡཏྠསངྒཧིཏེ ཨནུསཡེ ནཔྤཛཧནྟཱིཏི ཨཏྠོ དཊྛབྦོ.

༢༦༤-༢༧༤. པཧཱིནཝཱརེ ¶ ཕལཊྛཝསེནེཝ དེསནཱ ཨཱརདྡྷཱཏི ཨནུལོམཾ སནྡྷཱཡ ཝུཏྟཾ. པཊིལོམེ ཧི པུཐུཛྫནཝསེནཔི དེསནཱ གཧིཏཱཏི. ‘‘ཕལཊྛཝསེནེཝཱ’’ཏི ཙ སཱདྷཱརཎཝཙནེན མགྒསམངྒཱིནཾ ཨགྒཧིཏཏཾ དཱིཔེཏི. ཨནུསཡཙྩནྟཔཊིཔཀྑེཀཙིཏྟཀྑཎིཀཱནཉྷི མགྒསམངྒཱིནཾ ན ཀོཙི ཨནུསཡོ ཨུཔྤཏྟིརཧོ, ནཱཔི ཨནུཔྤཏྟིརཧཏཾ ཨཱཔཱདིཏོ, ཏསྨཱ ཏེ ན ཨནུསཡསཱནུསཡཔཧཱིནཨུཔྤཛྫནཝཱརེསུ གཧིཏཱཏི.

༢༧༥-༢༩༦. ཨོཀཱསཝཱརེ ¶ སོ སོ ཨནུསཡོ ཨཏྟནོ ཨཏྟནོ ཨོཀཱསེ ཨེཝ ཨནུཔྤཏྟིདྷམྨཏཾ ཨཱཔཱདིཏོ པཧཱིནོ, ཨནཱཔཱདིཏོ ཙ ཨཔྤཧཱིནོཏི པཧཱིནཱཔྤཧཱིནཝཙནཱནི ཏདོཀཱསམེཝ དཱིཔེནྟི, ཏསྨཱ ཨནོཀཱསེ ཏདུབྷཡཱཝཏྟབྦཏཱ ཝུཏྟཱཏི. སཱདྷཱརཎཊྛཱནེ ཏེན སདྡྷིཾ པཧཱིནོ ནཱམ ཧོཏཱིཏི ཏེན སདྡྷིཾ སམཱནོཀཱསེ པཧཱིནོ ནཱམཱཏི ཨཏྠོ, ན སམཱནཀཱལེ པཧཱིནོཏི.

༣༣༢-༣༤༠. དྷཱཏུཝཱརེ སནྟཱནཾ ཨནུགཏཱ ཧུཏྭཱ སཡནྟཱིཏི ཡསྨིཾ སནྟཱནེ ཨཔྤཧཱིནཱ, ཏཾསནྟཱནེ ཨཔྤཧཱིནབྷཱཝེན ཨནུགནྟྭཱ ཨུཔྤཏྟིཨརཧབྷཱཝེན སཡནྟཱིཏི ཨཏྠོ. ཨུཔྤཏྟིརཧཏཱ ཨེཝ ཧི ཨནུརཱུཔཾ ཀཱརཎཾ ལབྷིཏྭཱ ཨུཔྤཛྫནྟཱིཏི ཨིདྷཱཔི ཡུཏྟཱཏི. ཨེཏྠ ཙ ན ཀཱམདྷཱཏུཨཱདཱིནི ཚ པཊིནིསེདྷཝཙནཱནི དྷཱཏུཝིསེསནིདྡྷཱརཎཱནི ན ཧོནྟཱིཏི ‘‘ན ཀཱམདྷཱཏུཡཱ ཙུཏསྶ ན ཀཱམདྷཱཏུཾ ཨུཔཔཛྫནྟསྶཱ’’ཏིཨཱདིམྷི ཝུཙྩམཱནེ ཨིམཾ ནཱམ ཨུཔཔཛྫནྟསྶཱཏི ན ཝིཉྙཱཡེཡྻ, ཏསྨཱ ཏཾམཱུལིཀཱསུ ཡོཛནཱསུ ‘‘ན ཀཱམདྷཱཏུཡཱ ཙུཏསྶ ཀཱམདྷཱཏུཾ རཱུཔདྷཱཏུཾ ཨརཱུཔདྷཱཏུཾ ཨུཔཔཛྫནྟསྶཱ’’ཏི པཋམཾ ཡོཛེཏྭཱ པུན ཨནུཀྐམེན ‘‘ན ཀཱམདྷཱཏུཾ ཨུཔཔཛྫནྟསྶཱ’’ཏིཨཱདིཀཱ ཡོཛནཱ ཀཏཱ. ཨེཝཉྷི ན ཀཱམདྷཱཏུཨཱདིཔདེཧི ཡཐཱཝུཏྟདྷཱཏུཡོཡེཝ གཧིཏཱ, ན ཀཉྩཱིཏི ཝིཉྙཱཡཏི. ཡཐཱ ཨནུསཡཝཱརེ ‘‘ཨནུསེནྟཱིཏི པདསྶ ཨུཔྤཛྫནྟཱིཏི ཨཏྠོ གཧིཏོ’’ཏི ཝུཏྟཾ, ཏཏྠཱཔི ཨུཔྤཛྫམཱནམེཝ སནྡྷཱཡ ཨུཔྤཛྫནྟཱིཏི གཧེཏུཾ ན སཀྐཱ ‘‘ཡསྶ ¶ ཀཱམརཱགཱནུསཡོ ཨནུསེཏི, ཏསྶ པཊིགྷཱནུསཡོ ཨནུསེཏཱིཏི? ཨཱམནྟཱ’’ཏིཨཱདིཝཙནཏོ. ཨཐཱཔི ཨཔྤཧཱིནཏཾ སནྡྷཱཡ ཨུཔྤཛྫནྟཱིཏི ཨཏྠོ ཏཏྠ གཧིཏོ, ཨིདྷཱཔི སོ ན ན ཡུཛྫཏཱིཏི. བྷངྒཱཏི བྷཉྫིཏབྦཱ, དྭིདྷཱ ཀཱཏབྦཱཏི ཨཏྠོ. ནནུ ན ཀོཙི ཨནུསཡོ ཡཏྠ ཨུཔྤཛྫནྟསྶ ཨནུསེཏི ནཱནུསེཏི ཙཱཏི དྭིདྷཱ ཀཱཏབྦཱ, ཏཏྠེཝ ཀསྨཱ ‘‘ཀཏི ཨནུསཡཱ བྷངྒཱ? ཨནུསཡཱ བྷངྒཱ ནཏྠཱི’’ཏི པུཙྪཱཝིསྶཛྫནཱནི ཀཏཱནི. ན ཧི པཀཱརནྟརཱབྷཱཝེ སཾསཡོ ཡུཏྟོཏི ¶ ? ན ན ཡུཏྟོ, ‘‘ཨནུསཡཱ བྷངྒཱ ནཏྠཱི’’ཏི ཨཝུཏྟེ བྷངྒཱབྷཱཝསྶ ཨཝིཉྙཱཏཏྟཱཏི.

༡-༦༢. ཙིཏྟཡམཀཝཎྞནཱཡཾ ཨཱདིཏོཝ ཏཡོ སུདྡྷིཀམཧཱཝཱརཱ ཧོནྟཱིཏི ཨིམེ ཏཡོ མཧཱཝཱརཱ སརཱགཱདིཀུསལཱདཱིཧི མིསྶཀཱ སུདྡྷིཀཱ ཙ, ཏེསུ ཨཱདིཏོ སུདྡྷིཀཱ ཧོནྟཱིཏི ཨཏྠོ. མིསྶཀེསུ ཙ ཨེཀེཀསྨིཾ སརཱགཱདིམིསྶཀཙིཏྟེ ཏཡོ ཏཡོ མཧཱཝཱརཱ, ཏེ ཏཏྠ ཏཏྠ པན ཝུཏྟེ སམྤིཎྜེཏྭཱ ‘‘སོལ༹ས པུགྒལཝཱརཱ’’ཏིཨཱདི ཝུཏྟཾ, ན ནིརནྟརཾ ཝུཏྟེཏི. ‘‘ཡསྶ ཙིཏྟཾ ཨུཔྤཛྫཏི ན ནིརུཛ྄ཛྷཏི, ཏསྶ ཙིཏྟཾ ནིརུཛ྄ཛྷིསྶཏི ནུཔྤཛྫིསྶཏཱི’’ཏིཨཱདིནཱ ཨུཔྤཱདནིརོདྷཱནཾ པཙྩུཔྤནྣཱནཱགཏཀཱལཱནཉྩ སཾསགྒཝསེན ཨེཀེཀཱཡ པུཙྪཱཡ པཝཏྟཏྟཱ ‘‘ཨུཔྤཱདནིརོདྷཀཱལསམྦྷེདཝཱརོ’’ཏི ཝུཏྟོ. ཨེཝཾ སེསཱནམྤི ཝཱརཱནཾ ཏཾཏཾནཱམཏཱ པཱལི༹ཨནུསཱརེན ཝེདིཏབྦཱ.

༦༣. ཏཐཱརཱུཔསྶེཝ ¶ ཁཱིཎཱསཝསྶ ཙིཏྟཾ སནྡྷཱཡཱཏི ཨིདཾ ཨུཔྤཱདཀྑཎསམངྒིཔཙྪིམཙིཏྟསམངྒིམྷི པུགྒལེ ཨདྷིཔྤེཏེ ཏཉྩ ཙིཏྟཾ ཨདྷིཔྤེཏམེཝ ཧོཏཱིཏི ཀཏྭཱ ཝུཏྟནྟི དཊྛབྦཾ. ཨརཧཏོ པཙྪིམཙིཏྟམྤཱིཏི ནུཔྤཛྫཏི ནིརུཛ྄ཛྷཏཱིཏི ཨེཝཾཔཀཱརཾ བྷངྒཀྑཎསམངྒིམེཝ སནྡྷཱཡ ཝུཏྟཾ.

༦༥-༨༢. ཨུཔྤཱདཝཱརསྶ དུཏིཡཔུཙྪཱཝིསྶཛྫནེ ཙིཏྟསྶ བྷངྒཀྑཎེ, ནིརོདྷསམཱཔནྣཱནཾ, ཨསཉྙསཏྟཱནཾ ཏེསཾ ཙིཏྟཾ ཨུཔྤཛྫིཏྠ, ནོ ཙ ཏེསཾ ཙིཏྟཾ ཨུཔྤཛྫཏཱིཏི ¶ ཨེཏྠ ‘‘ཙིཏྟསྶ བྷངྒཀྑཎེ ཏེསཾ ཙིཏྟཾ ཨུཔྤཛྫིཏྠཱ’’ཏི ཨེཏསྶ ‘‘སབྦེསཾ ཙིཏྟཾ ཁཎཔཙྩུཔྤནྣམེཝ ཧུཏྭཱ ཨུཔྤཱདཀྑཎཾ ཨཏཱིཏཏྟཱ ཨུཔྤཛྫིཏྠ ནཱམཱ’’ཏི ཨཏྠོ ཝུཏྟོ. ཙིཏྟསྶ ཨུཔྤཱདཀྑཎེ ཏེསཾ ཙིཏྟཾ ཨུཔྤཛྫིཏྠ ཙེཝ ཨུཔྤཛྫཏི ཙཱཏི ཨེཏསྶཔི ཨུཔྤཱདཾ པཏྟཏྟཱ ཨུཔྤཛྫིཏྠ, ཨནཏཱིཏཏྟཱ ཨུཔྤཛྫཏི ནཱམཱཏི དྭཡམེཏཾ ཨེཝཾ ན སཀྐཱ ཝཏྟུཾ. ན ཧི ཁཎཔཙྩུཔྤནྣེ ‘‘ཨུཔྤཛྫིཏྠཱ’’ཏི ཨཏཱིཏཝོཧཱརོ ཨཏྠི. ཡདི སིཡཱ, ཡཾ ཝཱ པན ཙིཏྟཾ ཨུཔྤཛྫིཏྠ, ཏཾ ཙིཏྟཾ ཨུཔྤཛྫཏཱིཏི ཨེཏྠ ‘‘ནོ’’ཏི ཨཝཏྭཱ ཝིབྷཛིཏབྦཾ སིཡཱ. ཏཐཱ ‘‘ཡཾ ཙིཏྟཾ ཨུཔྤཛྫཏི, ཏཾ ཙིཏྟཾ ཨུཔྤཛྫིཏྠཱ’’ཏི ཨེཏྠ ཙ ‘‘ནོ’’ཏི ཨཝཏྭཱ ‘‘ཨཱམནྟཱ’’ཏི ཝཏྟབྦཾ སིཡཱ. ‘‘ཙིཏྟསྶ བྷངྒཀྑཎེ’’ཏི པན བྷིཛྫམཱནཙིཏྟསམངྒཱི པུགྒལོ ཝུཏྟོ, ཏསྶ ཨཏཱིཏཾ ཙིཏྟཾ ཨུཔྤཛྫིཏྠ, ན ཙ ཀིཉྩི ཙིཏྟཾ ཨུཔྤཛྫཏི. ཙིཏྟསྶ ཨུཔྤཱདཀྑཎེཏི ཙ ཨུཔྤཛྫམཱནཙིཏྟསམངྒཱི པུགྒལོ ཝུཏྟོ, ཏསྶཔི ཨཏཱིཏཾ ཙིཏྟཾ ཨུཔྤཛྫིཏྠ, ཏཾ པན ཙིཏྟཾ ཨུཔྤཛྫཏཱིཏི ཨེཝམེཏྠ ཨཏྠོ དཊྛབྦོ. ཙིཏྟནྟི ཧི སཱམཉྙཝཙནཾ ཨེཀསྨིཾ ཨནེཀསྨིཉྩ ཡཐཱགཧིཏཝིསེསེ ཏིཊྛཏཱིཏི. ‘‘ཡསྶ ཝཱ པན ཙིཏྟཾ ཨུཔྤཛྫིསྶཏི, ཏསྶ ཙིཏྟཾ ཨུཔྤཛྫཏཱིཏི? ཙིཏྟསྶ བྷངྒཀྑཎེ’’ཏི ཨེཏྠ ཡསྶ ཝཱ པན ཙིཏྟཾ ཨུཔྤཛྫིསྶཏཱིཏི ཨེཏེན སནྣིཊྛཱནེན གཧིཏཔུགྒལསྶེཝ ཙིཏྟསྶ བྷངྒཀྑཎེཏི ཨེཝཾ སབྦཏྠ སནྣིཊྛཱནཝསེན ནིཡམོ ཝེདིཏབྦོ. ཨུཔྤནྣུཔྤཛྫམཱནཝཱརོ ནིརུདྡྷནིརུཛ྄ཛྷམཱནཝཱརོ ཙ པུགྒལཝཱརཱདཱིསུ ཏཱིསུཔི ནིནྣཱནཱཀརཎཱ ཨུདྡིཊྛཱ ནིདྡིཊྛཱ ཙ. ཏཏྠ པུགྒལཝཱརེ ཨཝིསེསེན ཡཾ ཀཉྩི ཏཱདིསཾ པུགྒལཾ སནྡྷཱཡ ‘‘ཨུཔྤནྣཾ ཨུཔྤཛྫམཱན’’ནྟིཨཱདི ཝུཏྟཾ, དྷམྨཝཱརེ ཙིཏྟམེཝ, པུགྒལདྷམྨཝཱརེ པུགྒལཾ ཙིཏྟཉྩཱཏི ཨཡམེཏྠ ཝིསེསོ དཊྛབྦོ.

༨༣. ཨཏིཀྐནྟཀཱལཝཱརེ ཨིམསྶ པུགྒལཝཱརཏྟཱ པུགྒལོ པུཙྪིཏོཏི པུགྒལསྶེཝ ཝིསྶཛྫནེན ¶ བྷཝིཏབྦཾ. ཡཐཱ ཡསྶ ཙིཏྟཾ ཨུཔྤཛྫིཏྠཱཏི ཨེཏེན ན ཀོཙི པུགྒལོ ན གཧིཏོ, ཨེཝཾ ཡསྶ ཙིཏྟཾ ཨུཔྤཛྫམཱནཾ ཁཎཾ ཁཎཾ ཝཱིཏིཀྐནྟཾ ཨཏིཀྐནྟཀཱལནྟི ཨེཏེན སནྣིཊྛཱནེན ན ཀོཙི ན གཧིཏོ. ན ཧི སོ པུགྒལོ ཨཏྠི, ཡསྶ ཙིཏྟཾ ཨུཔྤཱདཀྑཎཾ ཨཏཱིཏཾ ནཏྠི, ཏེ ཙ པན ནིརུཛ྄ཛྷམཱནཀྑཎཱཏཱིཏཙིཏྟཱ ན ན ཧོནྟཱིཏི པཋམོ པཉྷོ ‘‘ཨཱམནྟཱ’’ཏི ཝིསྶཛྫིཏབྦོ སིཡཱ, ཏཐཱ དུཏིཡཏཏིཡཱ. ཙཏུཏྠོ པན ‘‘པཙྪིམཙིཏྟསྶ བྷངྒཀྑཎེ ཏེསཾ ཙིཏྟཾ བྷངྒཀྑཎཾ ཨཝཱིཏིཀྐནྟཾ, ནོ ཙ ཏེསཾ ཙིཏྟཾ ཨུཔྤཱདཀྑཎཾ ཨཝཱིཏིཀྐནྟཾ, ཨིཏརེསཾ ཙིཏྟཾ བྷངྒཀྑཎཉྩ ཨཝཱིཏིཀྐནྟཾ ཨུཔྤཱདཀྑཎཉྩ ཨཝཱིཏིཀྐནྟ’’ནྟི ཝིསྶཛྫིཏབྦོ བྷཝེཡྻ, ཏཐཱ ཨཝིསྶཛྫེཏྭཱ ཀསྨཱ སབྦཏྠ ཙིཏྟམེཝ ཝིབྷཏྟནྟི ¶ ? ཙིཏྟཝསེན པུགྒལཝཝཏྠཱནཏོ. ཁཎསྶ ཧི ཝཱིཏིཀྐནྟཏཱཡ ཨཏིཀྐནྟཀཱལཏཱཝཙནེན ཝཏྟམཱནསྶ ཙ ཙིཏྟསྶ ཝསེན པུགྒལོ ཨུཔྤཱདཀྑཎཱཏཱིཏཙིཏྟོ ཝུཏྟོ ཨཏཱིཏསྶ ཙ, ཏཏྠ པུརིམསྶ ཙིཏྟཾ ན བྷངྒཀྑཎཾ ཝཱིཏིཀྐནྟཾ པཙྪིམསྶ ཝཱིཏིཀྐནྟནྟི ཨེཝམཱདིཀོ པུགྒལཝིབྷཱགོ ཡསྶ ཙིཏྟསྶ ཝསེན པུགྒལཝཝཏྠཱནཾ ཧོཏི, ཏསྶ ཙིཏྟསྶ ཏཾཏཾཁཎཝཱིཏིཀྐམཱཝཱིཏིཀྐམདསྶནཝསེན དསྶིཏོ ཧོཏཱིཏི སབྦཝིསྶཛྫནེསུ ཙིཏྟམེཝ ཝིབྷཏྟཾ. ཨཐ ཝཱ ནཡིདྷ དྷམྨམཏྟཝིསིཊྛོ པུགྒལོ པུཙྪིཏོ, ཨཐ ཁོ པུགྒལཝིསིཊྛཾ ཙིཏྟཾ, ཏསྨཱ ཙིཏྟམེཝ ཝིསྶཛྫིཏནྟི ཝེདིཏབྦཾ. ཡདིཔི པུགྒལཔྤདྷཱནཱ པུཙྪཱ, ཨཐཱཔི ཙིཏྟཔྤདྷཱནཱ, ཨུབྷཡཐཱཔི དུཏིཡཔུཙྪཱཡ ‘‘ཨཱམནྟཱ’’ཏི ཝཏྟབྦཾ སིཡཱ, ཏཐཱ པན ཨཝཏྭཱ ནིརོདྷཀྑཎཝཱིཏིཀྐམེན ཨཏིཀྐནྟཀཱལཏཱ ན ཨུཔྤཱདཀྑཎཝཱིཏིཀྐམེན ཨཏིཀྐནྟཀཱལཏཱ ཝིཡ ཝཏྟམཱནསྶ ཨཏྠཱིཏི དསྶནཏྠཾ ‘‘ཨཏཱིཏཾ ཙིཏྟ’’ནྟི ཝུཏྟནྟི དཊྛབྦཾ. ཡསྶ ཙིཏྟཾ ན ཨུཔྤཛྫམཱནནྟི ཨེཏྠ ཨུཔྤཛྫམཱནཾ ཁཎཾ ཁཎཾ ཝཱིཏིཀྐནྟཾ ཨཏིཀྐནྟཀཱལཾ ཡསྶ ཙིཏྟཾ ན ཧོཏཱིཏི ཨཏྠོ. ཨེས ནཡོ ‘‘ན ནིརུཛ྄ཛྷམཱན’’ནྟི ཨེཏྠཱཔི.

༡༡༤-༡༡༦. མིསྶཀཝཱརེསུ ཡསྶ སརཱགཾ ཙིཏྟཾ ཨུཔྤཛྫཏི ན ནིརུཛ྄ཛྷཏི, ཏསྶ ཙིཏྟཾ ནིརུཛ྄ཛྷིསྶཏི ནུཔྤཛྫིསྶཏཱིཏི པུཙྪཱ, ནོཏི ཝིསྶཛྫནཉྩ ཨཊྛཀཐཱཡཾ དསྶིཏཾ. པཱལི༹ཡཾ པན ‘‘ཡསྶ སརཱགཾ ཙིཏྟཾ ཨུཔྤཛྫཏི ན ནིརུཛ྄ཛྷཏི, ཏསྶ སརཱགཾ ཙིཏྟཾ ནིརུཛ྄ཛྷིསྶཏི ནུཔྤཛྫིསྶཏཱི’’ཏི མཱཏིཀཱཋཔནཱཡཾ ཝུཏྟཏྟཱ ཝིསྶཛྫནེཔི ཏཐེཝ སནྣིཊྛཱནསཾསཡཏྠེསུ སརཱགཱདིམིསྶཀཙིཏྟཝསེནེཝ པུཙྪཱ ཨུདྡྷརིཏྭཱ ‘‘སརཱགཔཙྪིམཙིཏྟསྶ ཨུཔྤཱདཀྑཎེ ཏེསཾ སརཱགཾ ཙིཏྟཾ ཨུཔྤཛྫཏི ན ནིརུཛ྄ཛྷཏི ནིརུཛ྄ཛྷིསྶཏི ནུཔྤཛྫིསྶཏི, ཨིཏརེསཾ སརཱགཙིཏྟསྶ ཨུཔྤཱདཀྑཎེ ཏེསཾ སརཱགཾ ཙིཏྟཾ ཨུཔྤཛྫཏི ན ནིརུཛ྄ཛྷཏི ནིརུཛ྄ཛྷིསྶཏི ཙེཝ ཨུཔྤཛྫིསྶཏི ཙཱ’’ཏི ཨེཝམཱདིནཱ ¶ ནཡེན ཡེབྷུཡྻེན སུདྡྷིཀཝཱརསདིསམེཝ ཝིསྶཛྫནཾ ཀཱཏབྦནྟི ཀཏྭཱ སཾཁིཏྟནྟི ཝིཉྙཱཡཏི.

༡-༡༦. དྷམྨཡམཀཝཎྞནཱཡཾ ¶ ཀུསལཱདིདྷམྨཱནཾ མཱཏིཀཾ ཋཔེཏྭཱཏི ཡཐཱ མཱུལཡམཀེ ཀུསལཱདིདྷམྨཱ དེསིཏཱ, ཡཐཱ ཙ ཁནྡྷཡམཀཱདཱིསུ ‘‘པཉྩཀྑནྡྷཱ’’ཏིཨཱདིནཱ ཨཉྙཐཱ སངྒཧེཏྭཱ དེསིཏཱ, ཏཐཱ ཨདེསེཏྭཱ ཡཱ ཀུསལཱདཱིནཾ དྷམྨཱནཾ ‘‘ཀུསལཱཀུསལཱ དྷམྨཱ’’ཏིཨཱདིཀཱ མཱཏིཀཱ, ཏཾ ཨིདྷ ཨཱདིམྷི ཋཔེཏྭཱ དེསིཏསྶཱཏི ཨཏྠོ.

༣༣-༣༤. ‘‘ཡསྶ ཀུསལཱ དྷམྨཱ ཨུཔྤཛྫནྟི, ཏསྶ ཨབྱཱཀཏཱ དྷམྨཱ ཨུཔྤཛྫནྟཱི’’ཏི ཨེཏསྶ ཝིསྶཛྫནེ ‘‘ཨབྱཱཀཏཱ ཙཱཏི ཙིཏྟསམུཊྛཱནརཱུཔཝསེན ཝུཏྟ’’ནྟི ཨཊྛཀཐཱཡཾ ཝུཏྟཾ, ཨིམསྨིཾ པན པཉྷེ ཀམྨསམུཊྛཱནཱདིརཱུཔཉྩ ལབྦྷཏི, ཏཾ པན པཊིལོམཝཱརསྶ ཝིསྶཛྫནེ སབྦེསཾ ཙཝནྟཱནཾ, པཝཏྟེ ཙིཏྟསྶ བྷངྒཀྑཎེ, ཨཱརུཔྤེ ཨཀུསལཱནཾ ཨུཔྤཱདཀྑཎེ ཏེསཾ ཀུསལཱ ཙ དྷམྨཱ ན ཨུཔྤཛྫནྟི ཨབྱཱཀཏཱ ཙ དྷམྨཱ ན ཨུཔྤཛྫནྟཱིཏི ཨེཏྠ པཝཏྟེ ཙིཏྟསྶ བྷངྒཀྑཎེ ཨུཔྤཛྫམཱནམྤི ¶ ཀམྨསམུཊྛཱནཱདིརཱུཔཾ ཨགྒཧེཏྭཱ ‘‘ཨབྱཱཀཏཱ ཙ དྷམྨཱ ན ཨུཔྤཛྫནྟཱི’’ཏི ཝུཏྟཏྟཱ ཙིཏྟསམུཊྛཱནརཱུཔམེཝ ཨིདྷཱདྷིཔྤེཏཾ. ཀམྨསམུཊྛཱནཱདིརཱུཔེ ན ཝིདྷཱནཾ, ནཱཔི པཊིསེདྷོཏི ཀེཙི ཝདནྟི, ཏཐཱ ཙིཏྟསམུཊྛཱནརཱུཔམེཝ སནྡྷཱཡ ‘‘ཡསྶ ཀུསལཱ དྷམྨཱ ཨུཔྤཛྫནྟི, ཏསྶ ཨབྱཱཀཏཱ དྷམྨཱ ནིརུཛ྄ཛྷནྟཱིཏི? ནོ’’ཏི (ཡམ. ༣.དྷམྨཡམཀ.༡༦༣) ཝུཏྟནྟི. ཏཾ པནེཏཾ ཨེཝཾ ན སཀྐཱ ཝཏྟུཾ ཙིཏྟསྶ བྷངྒཀྑཎེ ཀམྨསམུཊྛཱནརཱུཔཱདཱིནམྤི ཨུཔྤཱདསྶ ཨུཔྤཱདཀྑཎེ ཙ ནིརོདྷསྶ ཨེཝམཱདཱིཧི ཨེཝ པཱལཱི༹ཧི པཊིསེདྷསིདྡྷིཏོ.

ཡེ ཙ ཝདནྟི ‘‘ཡཐཱ པཊིསམྦྷིདཱམགྒེ ནིརོདྷཀཐཱཡཾ ‘སོཏཱཔཏྟིམགྒཀྑཎེ ཛཱཏཱ དྷམྨཱ ཋཔེཏྭཱ ཙིཏྟསམུཊྛཱནརཱུཔཾ སབྦེཔི ཝིརཱགཱ ཙེཝ ཧོནྟི ཝིརཱགཱརམྨཎཱ ཝིརཱགགོཙརཱ ཝིརཱགསམུདཱགཏཱ ཝིརཱགཔཏིཊྛཱ’ཏིཨཱདཱིསུ ‘ཋཔེཏྭཱ རཱུཔ’ནྟི ཨཝཏྭཱ ཙིཏྟཔཊིབདྡྷཏྟཱ ཙིཏྟཛརཱུཔཱནཾ ¶ ‘ཋཔེཏྭཱ ཙིཏྟསམུཊྛཱནརཱུཔ’ནྟི ཝུཏྟཾ, ཨེཝམིདྷཱཔི ཙིཏྟཔཊིབདྡྷཏྟཱ ཙིཏྟཛརཱུཔམེཝ ཀཐིཏ’’ནྟི, ཏཉྩ ཏཐཱ ན ཧོཏི. ཡེསཉྷི སོཏཱཔཏྟིམགྒོ སཧཛཱཏཔཙྩཡོ ཧོཏི, ཡེསུ ཙ ཝིརཱགཱདིཨཱསངྐཱ ཧོཏི, ཏེ སོཏཱཔཏྟིམགྒསཧཛཱཏཱ དྷམྨཱ སོཏཱཔཏྟིམགྒཀྑཎེ ཛཱཏཱ དྷམྨཱཏི ཏཏྠ ཝུཏྟཱ. སོཏཱཔཏྟིམགྒཀྑཎེ ཛཱཏཱཏི ཧི ཝཙནཾ མགྒེ ཛཱཏཏཾ དཱིཔེཏི, ན ཙ ཀམྨཛཱདཱིནི ཨམགྒེ ཛཱཡམཱནཱནི མགྒཀྑཎེ ཛཱཏཝོཧཱརཾ ཨརཧནྟི ཏེསཾ ཏསྶ སོཏཱཔཏྟིམགྒཀྑཎེ སཧཛཱཏཔཙྩཡཏྟཱབྷཱཝཏོ, ཏསྨཱ མགྒཀྑཎེ ཏཾསཧཛཱཏདྷམྨེསུ ཋཔེཏབྦཾ ཋཔེཏུཾ ‘‘ཋཔེཏྭཱ ཙིཏྟསམུཊྛཱནརཱུཔ’’ནྟི ཝུཏྟཾ, ཨིདྷ པན ཀུསལཱདིདྷམྨཱ ཡསྶ ཡཏྠ ཨུཔྤཛྫནྟི ནིརུཛ྄ཛྷནྟི ཙ, ཏསྶ པུགྒལསྶ ཏསྨིཉྩ ཨོཀཱསེ ཨབྱཱཀཏདྷམྨཱནཾ ཨུཔྤཱདནིརོདྷཱནཾ ཀུསལཱདིཔཊིབདྡྷཏཱ ཨཔྤཊིབདྡྷཏཱ ཙ ཨཱམཊྛཱ, ན ཙ ཀམྨཛཱདིརཱུཔཾ ཨབྱཱཀཏཾ ན ཧོཏི, ཏསྨཱ སནྣིཊྛཱནེན གཧིཏསྶ པུགྒལསྶ ཨོཀཱསེ ཝཱ ཨུཔྤཱདནིརོདྷེསུ ཝིཛྫམཱནེསུ ཨབྱཱཀཏཱནཾ ཏེ ཝེདིཏབྦཱ, ཨཝིཛྫམཱནེསུ ཙ པཊིསེདྷེཏབྦཱ, ན ཙ ཨཙིཏྟཔཊིབདྡྷཱ ཨབྱཱཀཏཱཏི ཨེཏྠ ན གཧིཏཱཏི སཀྐཱ ཝཏྟུཾ ནིརོདྷསམཱཔནྣཱནཾ ཨསཉྙསཏྟཱནཉྩ ཨུཔྤཱདནིརོདྷཝཙནཏོཏི.

ཙཏུཏྠཔཉྷེ པཝཏྟེ ཨཀུསལཱབྱཱཀཏཙིཏྟསྶ ཨུཔྤཱདཀྑཎེཏི ཨིདཾ ‘‘ཡསྶ ཝཱ པན ཨབྱཱཀཏཱ དྷམྨཱ ཨུཔྤཛྫནྟཱི’’ཏི ཨེཏེན སནྣིཊྛཱནེན གཧིཏེསུ པཉྩཝོཀཱརེ ཨཀུསལཱབྱཱཀཏཙིཏྟཱནཾ ཙཏུཝོཀཱརེ ཙ ཨབྱཱཀཏཙིཏྟསྶེཝ ཨུཔྤཱདཀྑཎསམངྒིནོ སནྡྷཱཡ ཝུཏྟཾ. ཨེཝཾ སབྦཏྠ སནྣིཊྛཱནཝསེན ཝིསེསོ ཝེདིཏབྦོ.

༧༩. ‘‘ཨེཀཱཝཛྫནེན ༡༦༦ ཨུཔྤནྣསྶཱ’’ཏི ཝུཏྟཾ, ནཱནཱཝཛྫནེནཔི པན ཏཏོ པུརིམཏརཛཝནཝཱིཐཱིསུ ཨུཔྤནྣསྶ ‘‘ཨུཔྤཱདཀྑཎེ ཏེསཾ ཨཀུསལཱ དྷམྨཱ ནུཔྤཛྫིསྶནྟི, ནོ ཙ ཏེསཾ ཀུསལཱ དྷམྨཱ ནུཔྤཛྫནྟཱི’’ཏི ཨིདཾ ལཀྑཎཾ ལབྦྷཏེཝ, ཏསྨཱ ཨེཏེན ལཀྑཎེན སམཱནལཀྑཎཾ སབྦཾ ཡསྶ ཙིཏྟསྶ ཨནནྟརཱ ཨགྒམགྒཾ པཊིལབྷིསྶནྟི, ཏསྶ ཙིཏྟསྶ ཨུཔྤཱདཀྑཎེཏི ཨེཏེནེཝ ཀུསལཱནཱགཏབྷཱཝཔརིཡོསཱནེན ཏཱཡ ཨེཝ སམཱནལཀྑཎཏཱཡ དཱིཔིཏཾ ཧོཏཱིཏི དཊྛབྦཾ. ཨེས ནཡོ ཨཀུསལཱཏཱིཏབྷཱཝསྶ ཨབྱཱཀཏཱཏཱིཏབྷཱཝསྶ ཙ ཨཱདིམྷི ‘‘དུཏིཡེ ཨཀུསལེ’’ཏི, ‘‘དུཏིཡེ ཙིཏྟེ’’ཏི ཙ ཝུཏྟཊྛཱནེ. ཡཐཱ ཧི བྷཱཝནཱཝཱརེ བྷཱཝནཱཔཧཱནཱནཾ པརིཡོསཱནེན ¶ ཨགྒམགྒེན ཏཏོ པུརིམཏརཱནིཔི བྷཱཝནཱཔཧཱནཱནི དསྶིཏཱནི ཧོནྟི, ཨེཝམིདྷཱཔི ཏཾ ཏཾ ཏེན ཏེན ཨཱདིནཱ ཨནྟེན ཙ དསྶིཏནྟི.

༡༠༠. པཉྩཝོཀཱརེ ཨཀུསལཱནཾ བྷངྒཀྑཎེ ཏེསཾ ཨཀུསལཱ ཙ དྷམྨཱ ནིརུཛ྄ཛྷནྟི ཨབྱཱཀཏཱ ཙ དྷམྨཱ ནིརུཛ྄ཛྷནྟཱིཏི ཝཙནེན པཊིསནྡྷིཙིཏྟཏོ སོལ༹སམཾ, ཏཏོ པརམྤི ཝཱ བྷཝནིཀནྟིཙིཏྟཾ ཧོཏི, ན ཏཏོ ཨོརནྟི ཝིཉྙཱཡཏཱིཏི.

༡. ཨིནྡྲིཡཡམཀེ ཝིབྷངྒེ ཝིཡ ཛཱིཝིཏིནྡྲིཡཾ མནིནྡྲིཡཱནནྟརཾ ཨནིདྡིསིཏྭཱ པུརིསིནྡྲིཡཱནནྟརཾ ཨུདྡིཊྛཾ ‘‘ཏཱིཎིམཱནི, བྷིཀྑཝེ, ཨིནྡྲིཡཱནི. ཀཏམཱནི ཏཱིཎི? ཨིཏྠིནྡྲིཡཾ པུརིསིནྡྲིཡཾ ཛཱིཝིཏིནྡྲིཡ’’ནྟི (སཾ. ནི. ༥.༤༩༢) སུཏྟེ དེསིཏཀྐམེན. པཝཏྟིཝཱརེ ཧི ཨེཀནྟཾ པཝཏྟིཡཾ ཨེཝ ཨུཔྤཛྫམཱནཱནཾ སུཁིནྡྲིཡཱདཱིནཾ ཀམྨཛཱནཾ ཨཀམྨཛཱནཉྩ ཨནུཔཱལཀཾ ཛཱིཝིཏིནྡྲིཡཾ ¶ ཙུཏིཔཊིསནྡྷཱིསུ ཙ པཝཏྟམཱནཱནཾ ཀམྨཛཱནནྟི ཏཾམཱུལཀཱནི ཡམཀཱནི ཙུཏིཔཊིསནྡྷིཔཝཏྟིཝསེན ཝཏྟབྦཱནཱིཏི ཝེདིཏབྦཱནི. ཙཀྑུནྡྲིཡཱདཱིསུ པན པུརིསིནྡྲིཡཱཝསཱནེསུ ཡཾ མཱུལཀམེཝ ན ཧོཏི མནིནྡྲིཡཾ, ཏཾ ཋཔེཏྭཱ ཨཝསེསམཱུལཀཱནི ཙུཏིཨུཔཔཏྟིཝསེནེཝ ཝཏྟབྦཱནི ཨཱཡཏནཡམཀེ ཝིཡ, ཏསྨཱ ཛཱིཝིཏིནྡྲིཡཾ ཏེསཾ མཛ྄ཛྷེ ཨནུདྡིསིཏྭཱ ཨནྟེ ཨུདྡིཊྛནྟི.

༩༤. ཨིཏྠཱི ཨིཏྠིནྡྲིཡནྟི ཨེཏྠ ཡསྨཱ ཨིཏྠཱིཏི ཀོཙི སབྷཱཝོ ནཏྠི, ན ཙ རཱུཔཱདིདྷམྨེ ཨུཔཱདཱཡ ཨིཏྠིགྒཧཎཾ ན ཧོཏི, ཏསྨཱ ཨིཏྠིགྒཧཎསྶ ཨཝིཛྫམཱནམྤི ¶ ཝིཛྫམཱནམིཝ གཧེཏྭཱ པཝཏྟིཏོ ཏཐཱགཧིཏསྶ ཝསེན ‘‘ནཏྠཱི’’ཏི ཨཝཏྭཱ ‘‘ནོ’’ཏི ཝུཏྟཾ. སུཁསྶ ཙ བྷེདཾ ཀཏྭཱ ‘‘སུཁཾ སོམནསྶ’’ནྟི, དུཀྑསྶ ཙ ‘‘དུཀྑཾ དོམནསྶ’’ནྟི ཝཙནེནེཝ སོམནསྶཏོ ཨཉྙཱ སུཁཱ ཝེདནཱ སུཁཾ, དོམནསྶཏོ ཙ ཨཉྙཱ དུཀྑཱ ཝེདནཱ དུཀྑནྟི ཨཡཾ ཝིསེསོ གཧིཏོཡེཝཱཏི ‘‘སུཁཾ སུཁིནྡྲིཡཾ དུཀྑཾ དུཀྑིནྡྲིཡ’’ནྟི ཨེཏྠ ‘‘ཨཱམནྟཱ’’ཏི ཝུཏྟཾ.

༡༤༠. སུདྡྷིནྡྲིཡཝཱརེ ཙཀྑུ ཨིནྡྲིཡནྟི ཨེཏྠ དིབྦཙཀྑུཔཉྙཱཙཀྑཱུནི པཉྙིནྡྲིཡཱནི ཧོནྟཱིཏི ‘‘ཨཱམནྟཱ’’ཏི ཝུཏྟཾ. ཨཝསེསཾ སོཏནྟི ཏཎྷཱསོཏམེཝཱཧ.

༡༨༦. པཝཏྟིཝཱརེ ‘‘ཚཡིམཱནི, བྷིཀྑཝེ, ཨིནྡྲིཡཱནི. ཀཏམཱནི ཚ? ཙཀྑུནྡྲིཡཾ…པེ… ཀཱཡིནྡྲིཡཾ མནིནྡྲིཡ’’ནྟི (སཾ. ནི. ༥.༤༩༥) སུཏྟེ ཝུཏྟནཡེན ཨིདྷ ཨུདྡིཊྛཾ ¶ མནིནྡྲིཡཾ ཙུཏིཔཊིསནྡྷིཔཝཏྟཱིསུ པཝཏྟམཱནེཧི ཀམྨཛཱཀམྨཛེཧི སབྦེཧིཔི ཡོགཾ གཙྪཏི, ན ཙ ཛཱིཝིཏིནྡྲིཡཾ ཝིཡ ཨཉྙདྷམྨནིསྶཡེན གཧེཏབྦཾ, པུབྦངྒམཏྟཱཝ པདྷཱནཾ, ཏསྨཱ ཀཱུཊཾ ཝིཡ གོཔཱནསཱིནཾ སབྦིནྡྲིཡཱནཾ སམོསརཎཊྛཱནཾ ཨནྟེ ཋཔེཏྭཱ ཡོཛིཏཾ. ཛཱིཝིཏིནྡྲིཡཱདིམཱུལཀེསུ པཝཏྟིཉྩ གཧེཏྭཱ གཏེསུ ‘‘ཡསྶ ཛཱིཝིཏིནྡྲིཡཾ ཨུཔྤཛྫཏི, ཏསྶ སུཁིནྡྲིཡཾ ཨུཔྤཛྫཏཱིཏི? སབྦེསཾ ཨུཔཔཛྫནྟཱནཾ, པཝཏྟེ སུཁིནྡྲིཡཝིཔྤཡུཏྟཙིཏྟསྶ ཨུཔྤཱདཀྑཎེ ཏེསཾ ཛཱིཝིཏིནྡྲིཡཾ ཨུཔྤཛྫཏི, ནོ ཙ ཏེསཾ སུཁིནྡྲིཡཾ ཨུཔྤཛྫཏི, སུཁིནྡྲིཡསམྤཡུཏྟཙིཏྟསྶ ཨུཔྤཱདཀྑཎེ ཏེསཾ ཛཱིཝིཏིནྡྲིཡཉྩ ཨུཔྤཛྫཏི སུཁིནྡྲིཡཉྩ ཨུཔྤཛྫཏཱི’’ཏིཨཱདིནཱ སུཁདུཀྑདོམནསྶིནྡྲིཡེཧི ལོཀུཏྟརིནྡྲིཡེཧི ཙ ཡོཛནཱ ལབྦྷཏི, ཏཐཱ ‘‘ཡསྶ སུཁིནྡྲིཡཾ ཨུཔྤཛྫཏི, ཏསྶ དུཀྑིནྡྲིཡཾ ཨུཔྤཛྫཏཱིཏི? ནོ’’ཏིཨཱདིནཱ ཏཾམཱུལཀཱ ཙ ནཡཱ. ཏེཧི པན པཝཏྟིཡཾཡེཝ ཨུཔྤཛྫམཱནེཧི ཡོཛནཱ ཏཾམཱུལཀཱ ཙ ཙུཏིཔཊིསནྡྷིཔཝཏྟཱིསུ པཝཏྟམཱནེཧི སོམནསྶིནྡྲིཡཱདཱིཧི ཡོཛནཱཡ ཛཱིཝིཏིནྡྲིཡམཱུལཀེཧི ཙ ནཡེཧི པཱཀཊཱཡེཝཱཏི ཀཏྭཱ ན ཝུཏྟཱཏི དཊྛབྦཱ.

‘‘སཙཀྑུཀཱནཾ ¶ ཝིནཱ སོམནསྶེནཱཏི ཨུཔེཀྑཱསཧགཏཱནཾ ཙཏུནྣཾ མཧཱཝིཔཱཀཔཊིསནྡྷཱིནཾ ཝསེན ཝུཏྟ’’ནྟི ཨཊྛཀཐཱཡཾ ཝུཏྟཾ, ཏཾ སོམནསྶཝིརཧིཏསཙཀྑུཀཔཊིསནྡྷིནིདསྶནཝསེན ཝུཏྟནྟི དཊྛབྦཾ. ན ཧི ‘‘ཙཏུནྣཾཡེཝཱ’’ཏི ནིཡམོ ཀཏོ, ཏེན ཏཾསམཱནལཀྑཎཱ པརིཏྟཝིཔཱཀརཱུཔཱཝཙརཔཊིསནྡྷིཡོཔི དསྶིཏཱ ཧོནྟི. ཏཏྠ ཀཱམཱཝཙརེསུ སོམནསྶཔཊིསནྡྷིསམཱནཏཱཡ མཧཱཝིཔཱཀེཧི ཙཏཱུཧི ནིདསྶནཾ ཀཏཾ, ཏེན ཡཐཱ སསོམནསྶཔཊིསནྡྷིཀཱ ཨཙཀྑུཀཱ ན ཧོནྟི, ཨེཝཾ ཨིཏརམཧཱཝིཔཱཀཔཊིསནྡྷིཀཱཔཱིཏི ཨཡམཏྠོ དསྶིཏོ ཧོཏི. གབྦྷསེཡྻཀཱནཉྩ ཨནུཔྤནྣེསུ ཙཀྑཱདཱིསུ ཙཝནྟཱནཾ ཨཧེཏུཀཔཊིསནྡྷིཀཏཱ སཧེཏུཀཔཊིསནྡྷིཀཱནཾ ཀཱམཱཝཙརཱནཾ ནིཡམཏོ སཙཀྑུཀཱདིབྷཱཝདསྶནེན དསྶིཏཱ ཧོཏི. གབྦྷསེཡྻཀེཔི ཧི སནྡྷཱཡ ‘‘ཡསྶ ཝཱ པན སོམནསྶིནྡྲིཡཾ ཨུཔྤཛྫཏི, ཏསྶ ཙཀྑུནྡྲིཡཾ ཨུཔྤཛྫཏཱིཏི? ཨཱམནྟཱ’’ཏི ཨིདཾ ཝཙནཾ ཡཐཱ ཡུཛྫཏི, ཏཐཱ ཨཱཡཏནཡམཀེ དསྶིཏཾ. ན ཧི སནྣིཊྛཱནེན སངྒཧིཏཱནཾ གབྦྷསེཡྻཀཱནཾ ཝཛྫནེ ཀཱརཎཾ ཨཏྠི, ‘‘ཨིཏྠཱིནཾ ཨགྷཱནཀཱནཾ ཨུཔཔཛྫནྟཱིན’’ནྟིཨཱདཱིསུ (ཡམ. ༣.ཨིནྡྲིཡཡམཀ.༡༨༧) ཙ ཏེ ཨེཝ ཝུཏྟཱཏི.

ཨུཔེཀྑཱཡ ཨཙཀྑུཀཱནནྟི ཨཧེཏུཀཔཊིསནྡྷིཝསེན ཝུཏྟནྟི ཨེཏྠ ཙ ཀཱམཱཝཙརེ སོཔེཀྑཨཙཀྑུཀཔཊིསནྡྷིཡཱ ¶ ཏཾསམཱནལཀྑཎཾ ཨརཱུཔཔཊིསནྡྷིཉྩ ནིདསྶེཏཱིཏི དཊྛབྦཾ. ཀེསུཙི པན པོཏྠཀེསུ ‘‘ཨཧེཏུཀཱརཱུཔཔཊིསནྡྷིཝསེནཱ’’ཏི པཱཋོ དིསྶཏི, སོ ཨེཝ སེཡྻོ.

‘‘ཏཏྠ ཧི ཨེཀནྟེནེཝ སདྡྷཱསཏིཔཉྙཱཡོ ནཏྠི, སམཱདྷིཝཱིརིཡཱནི པན ཨིནྡྲིཡཔྤཏྟཱནི ན ཧོནྟཱི’’ཏི ཝུཏྟཾ, ཡདི པན སམཱདྷིཝཱིརིཡཱནི སནྟི, ‘‘ཨིནྡྲིཡཔྤཏྟཱནི ན ཧོནྟཱི’’ཏི ན སཀྐཱ ཝཏྟུཾ ‘‘སམཱདྷི སམཱདྷིནྡྲིཡནྟི? ཨཱམནྟཱ’’ཏི (ཡམ. ༣.ཨིནྡྲིཡཡམཀ.༡༡༣) ‘‘ཝཱིརིཡཾ ཝཱིརིཡིནྡྲིཡནྟི? ཨཱམནྟཱ’’ཏི (ཡམ. ༣.ཨིནྡྲིཡཡམཀ.༡༡༡) ཝཙནཏོ. ཨཧེཏུཀཔཊིསནྡྷིཙིཏྟེ ཙ ཡཐཱ སམཱདྷིལེསོ ཨེཀགྒཏཱ ཨཏྠི, ན ཨེཝཾ ཝཱིརིཡལེསོ ཨཏྠི, ཏསྨཱ ཨེཝམེཏྠ ཝཏྟབྦཾ སིཡཱ ‘‘ཏཏྠ ཧི ཨེཀནྟེནེཝ སདྡྷཱཝཱིརིཡསཏིཔཉྙཱཡོ ནཏྠི, ཨེཀགྒཏཱ པན སམཱདྷིལེསོ ཨེཝ ཧོཏཱི’’ཏི. ཨཡཾ པནེཏྠ ཨདྷིཔྤཱཡོ སིཡཱ – ཡཐཱ ཨཉྙེསུ ཀེསུཙི ཨཧེཏུཀཙིཏྟེསུ སམཱདྷིཝཱིརིཡཱནི ཧོནྟི ཨིནྡྲིཡཔྤཏྟཱནི ཙ, ཨེཝམིདྷ སམཱདྷིཝཱིརིཡཱནི ཨིནྡྲིཡཔྤཏྟཱནི ན ཧོནྟཱིཏི. སམཱདྷིཝཱིརིཡིནྡྲིཡཱནམེཝ ཨབྷཱཝཾ དསྶེནྟོ ཨཧེཏུཀནྟརཏོ ཝིསེསེཏི ¶ . ཏཏྠ ‘‘སམཱདྷིཝཱིརིཡཱནི པན ན ཧོནྟཱི’’ཏི ཝཏྟབྦེ ‘‘ཨིནྡྲིཡཔྤཏྟཱནཱི’’ཏི སམཱདྷིལེསསྶ སམཱདྷིནྡྲིཡབྷཱཝཾ ཨཔྤཏྟསྶ སབྦྷཱཝཏོ ཝུཏྟཾ, ན ཝཱིརིཡལེསསྶ. ཝིསེསནཉྷི ཝིསེསིཏབྦེ པཝཏྟཏི. ཡེསུ པན པོཏྠཀེསུ ‘‘ཏཏྠ ཨེཀནྟེནེཝ སདྡྷཱཝཱིརིཡསཏིཔཉྙཱཡོ ནཏྠཱི’’ཏི པཱཋོ, སོ ཨེཝ སུནྡརཏརོ.

ཡཱཝ ཙཀྑུནྡྲིཡཾ ནུཔྤཛྫཏི, ཏཱཝ གབྦྷགཏཱནཾ ཨཙཀྑུཀཱནཾ བྷཱཝོ ཨཏྠཱིཏི ཨིམིནཱ ཨདྷིཔྤཱཡེནཱཧ ‘‘སཧེཏུཀཱནཾ ཨཙཀྑུཀཱནནྟི གབྦྷསེཡྻཀཝསེན ཙེཝ ཨརཱུཔཱིཝསེན ཙ ཝུཏྟ’’ནྟི. གབྦྷསེཡྻཀཱཔི པན ཨཝསྶཾ ཨུཔྤཛྫནཀཙཀྑུཀཱ ན ལབྦྷནྟཱིཏི དཊྛབྦཱ. སཙཀྑུཀཱནཾ ཉཱཎཝིཔྤཡུཏྟཱནནྟི ཀཱམདྷཱཏུཡཾ དུཧེཏུཀཔཊིསནྡྷིཀཱནཾ ཝསེན ཝུཏྟནྟི ཨིདྷཱཔི ཨཧེཏུཀཔཊིསནྡྷིཀཱ ཙ ཨཙཀྑུཀཱ ལབྦྷནྟེཝ. ཨིཏྠིཔུརིསིནྡྲིཡསནྟཱནཱནམྤི ཨུཔཔཏྟིཝསེན ཨུཔྤཱདོ, ཙུཏིཝསེན ནིརོདྷོ བཱཧུལླཝསེན དསྶིཏོ. ཀདཱཙི ཧི ཏེསཾ པཋམཀཔྤིཀཱདཱིནཾ ཝིཡ པཝཏྟིཡམྤི ཨུཔྤཱདནིརོདྷཱ ཧོནྟཱིཏི. ཨེཏྠ པུརིསིནྡྲིཡཱཝསཱནེསུ ཨིནྡྲིཡམཱུལཡམཀེསུ པཋམཔུཙྪཱསུ སནྣིཊྛཱནེཧི གཧིཏེཧི ཨུཔཔཏྟིཙུཏིཝསེན གཙྪནྟེཧི ཙཀྑུནྡྲིཡཱདཱིཧི ནིཡམིཏཏྟཱ ཛཱིཝིཏིནྡྲིཡཱདཱིནཾ པཝཏྟིཝསེནཔི ལབྦྷམཱནཱནཾ ཨུཔཔཏྟིཙུཏིཝསེནེཝ དུཏིཡཔུཙྪཱསུ སནྣིཊྛཱནེཧི གཧཎཾ ཝེདིཏབྦཾ.

༡༩༠. རཱུཔཛཱིཝིཏིནྡྲིཡཾ ¶ ཙཀྑུནྡྲིཡཱདིསམཱནགཏིཀཾ ཙུཏིཔཊིསནྡྷིཝསེནེཝ གཙྪཏི སནྟཱནུཔྤཏྟིནིརོདྷདསྶནཏོཏི ཨཱཧ ‘‘པཝཏྟེ སོམནསྶཝིཔྤཡུཏྟཙིཏྟསྶ ཨུཔྤཱདཀྑཎེཏི ཨརཱུཔཛཱིཝིཏིནྡྲིཡཾ སནྡྷཱཡ ཝུཏྟ’’ནྟི. ཨེཏེསཉྩེཝ ཨཉྙེསཉྩ པཉྩིནྡྲིཡཱནཾ ཡཐཱལཱབྷཝསེནཱཏི ཨེཏྠ ཨེཏེསཾ ཛཱིཝིཏིནྡྲིཡཱདཱིནཾ ཙུཏིཔཊིསནྡྷིཔཝཏྟེསུ, ཨཉྙེསཉྩ ཙཀྑུནྡྲིཡཱདཱིནཾ ཙུཏིཔཊིསནྡྷཱིསཱུཏི ཨེཝཾ ཡཐཱལཱབྷོ དཊྛབྦོ. ཨཡཾ པན ཚེདེཡེཝཱཏི ཨེཏྠ ཏསྶ ཏསྶ པརིཔུཎྞཔཉྷསྶ ཏསྨིཾ ཏསྨིཾ སརཱུཔདསྶནེན ཝིསྶཛྫནེ ཝིསྶཛྫིཏེ པཙྪིམཀོཊྛཱསསྶ ཚེདོཏི ནཱམཾ དཊྛབྦཾ.

ཡསྶ ཝཱ པན སོམནསྶིནྡྲིཡཾ ན ཨུཔྤཛྫཏི, ཏསྶ ཛཱིཝིཏིནྡྲིཡཾ ན ཨུཔྤཛྫཏཱིཏི? ཝིནཱ སོམནསྶེན ཨུཔཔཛྫནྟཱནཾ པཝཏྟེ སོམནསྶཝིཔྤཡུཏྟཙིཏྟསྶ ཨུཔྤཱདཀྑཎེ ཏེསཾ སོམནསྶིནྡྲིཡཾ ན ཨུཔྤཛྫཏི, ནོ ཙ ཏེསཾ ¶ ཛཱིཝིཏིནྡྲིཡཾ ན ཨུཔྤཛྫཏཱིཏི ཨེཏྠ ‘‘ནིརོདྷསམཱཔནྣཱནཾ ཨསཉྙསཏྟཱན’’ནྟི ཨཝཙནཾ རཱུཔཛཱིཝིཏིནྡྲིཡསྶ ཙཀྑུནྡྲིཡཱདིསམཱནགཏིཀཏཾ དཱིཔེཏི. ཏསྶ ཧི ཨུཔཔཏྟིཡཾཡེཝ ཨུཔྤཱདོ ཝཏྟབྦོཏི. ‘‘ཝིནཱ སོམནསྶེན ཨུཔཔཛྫནྟཱན’’ནྟི ཨེཏྠ ཨསཉྙསཏྟེ སངྒཧེཏྭཱ པཝཏྟིཝསེན ཏེ ཙ ནིརོདྷསམཱཔནྣཱ ཙ ན ཝུཏྟཱ, ཨནུཔྤཱདོཔི པནེཏསྶ ཙུཏིཨུཔཔཏྟཱིསྭེཝ ཝཏྟབྦོ, ན པཝཏྟེཏི. པཙྪིམཀོཊྛཱསེཔི ‘‘སབྦེསཾ ཙཝནྟཱནཾ, པཝཏྟེ ཙིཏྟསྶ བྷངྒཀྑཎེ ཏེསཾ སོམནསྶིནྡྲིཡཉྩ ན ཨུཔྤཛྫཏི ཛཱིཝིཏིནྡྲིཡཉྩ ན ཨུཔྤཛྫཏཱི’’ཏི ཨེཝཾ ‘‘སབྦེསཾ ཙཝནྟཱན’’ནྟི ཨེཏྠེཝ ཨསཉྙསཏྟེ སངྒཎྷིཏྭཱ པཝཏྟིཝསེན ཏེ ཙ ནིརོདྷསམཱཔནྣཱ ན ཙ ཝུཏྟཱ. ཡསྶཡཏྠཀེ ཙ ནིརོདྷསམཱཔནྣཱ ན དསྶེཏབྦཱ ན གཧེཏབྦཱཏི ཨཏྠོ. ན ཧི ‘‘ནིརོདྷསམཱཔནྣཱན’’ནྟི ཝཙནཾ ‘‘ཨསཉྙསཏྟཱན’’ནྟི ཝཙནཾ ཝིཡ ཨོཀཱསདཱིཔཀཾ, ནཱཔི ‘‘ཨུཔེཀྑཱསམྤཡུཏྟཙིཏྟསྶ ཨུཔྤཱདཀྑཎེ, སབྦེསཾ ཙིཏྟསྶ བྷངྒཀྑཎེ’’ཏིཨཱདིཝཙནཾ ཝིཡ སོམནསྶིནྡྲིཡཱདཱིནཾ ཨནུཔྤཱདཀྑཎདཱིཔཀཾ, ཨཐ ཁོ པུགྒལདཱིཔཀམེཝཱཏི.

ཨཏཱིཏཀཱལབྷེདེ སུདྡྷཱཝཱསཱནཾ ཨུཔཔཏྟིཙིཏྟསྶ ཨུཔྤཱདཀྑཎེ ཏེསཾ ཏཏྠ སོམནསྶིནྡྲིཡཉྩ ན ཨུཔྤཛྫིཏྠ ཛཱིཝིཏིནྡྲིཡཉྩ ན ཨུཔྤཛྫིཏྠཱཏི ཨེཏྠ ‘‘ཨུཔཔཏྟིཙིཏྟསྶ ཨུཔྤཱདཀྑཎེ’’ཏི ཀསྨཱ ཝུཏྟཾ, ནནུ ‘‘སུདྡྷཱཝཱསཾ ཨུཔཔཛྫནྟཱནཾ, ཨསཉྙསཏྟཱནཾ ཏེསཾ ཏཏྠ སོམནསྶིནྡྲིཡཉྩ ན ཨུཔྤཛྫིཏྠ མནིནྡྲིཡཉྩ ན ཨུཔྤཛྫིཏྠཱ’’ཏི (ཡམ. ༣.ཨིནྡྲིཡཡམཀ.༢༧༧) ཨེཏྠ ཝིཡ ‘‘ཨུཔཔཛྫནྟཱན’’ནྟི ཝཏྟབྦནྟི? ན ཝཏྟབྦཾ. ཡཐཱ ཧི སོམནསྶམནིནྡྲིཡཱནཾ ཝསེན ཨུཔཔཛྫནྟཱ པུགྒལཱ ཨུཔཔཏྟིཙིཏྟསམངྒིནོ ཧོནྟི, ན ཨེཝཾ སོམནསྶཛཱིཝིཏིནྡྲིཡཱནཾ ཝསེན ཨུཔཔཏྟིསམངྒིནོཡེཝ ཧོནྟི. ཛཱིཝིཏིནྡྲིཡསྶ ཧི ཝསེན ཡཱཝ པཋམརཱུཔཛཱིཝིཏིནྡྲིཡཾ དྷརཏི, ཏཱཝ ¶ ཨུཔཔཛྫནྟཱ ནཱམ ཧོནྟི. ཏདཱ ཙ དུཏིཡཙིཏྟཏོ པཊྛཱཡ ‘‘ཛཱིཝིཏིནྡྲིཡཉྩ ན ཨུཔྤཛྫིཏྠཱ’’ཏི ན སཀྐཱ ཝཏྟུཾ ཨརཱུཔཛཱིཝིཏིནྡྲིཡསྶ ཨུཔྤཛྫིཏྭཱ ནིརུདྡྷཏྟཱ, ཏསྨཱ ཨུབྷཡཾ ཨུཔྤཱདཀྑཎེན ནིདསྶིཏཾ. ཡཐཱ ཧི ‘‘ན ནིརུཛ྄ཛྷིཏྠཱ’’ཏི ཨིདཾ ལཀྑཎཾ ཨུཔཔཏྟིཙིཏྟསྶ དྭཱིསུ ཁཎེསུ ལབྦྷམཱནཾ སབྦཔཋམེན ཨུཔཔཏྟིཙིཏྟསྶ བྷངྒཀྑཎེན ནིདསྶིཏཾ, ཨེཝམིདྷཱཔི དཊྛབྦཾ.

ཨནཱགཏཀཱལབྷེདེ ཨུཔྤཛྫིསྶམཱནེ སནྣིཊྛཱནཾ ཀཏྭཱ ཨཉྙསྶ ཙ ཨུཔྤཛྫིསྶམཱནཏཱཝ པུཙྪིཏཱ. ཏཏྠ ཡཐཱ པཙྩུཔྤནྣཀཱལབྷེདེ སནྣིཊྛཱནསཾསཡབྷེདེཧི ཨུཔྤཛྫམཱནསྶེཝ གཧིཏཏྟཱ ‘‘ཡསྶ ཙཀྑུནྡྲིཡཱདཱིནི ཨུཔྤཛྫནྟི ¶ , ཨུཔཔཛྫནྟསྶ ཏསྶ ཛཱིཝིཏིནྡྲིཡཱདཱིནི ཨུཔྤཛྫནྟཱི’’ཏི ཨུཔཔཛྫནྟསྶེཝ པུཙྪིཏཱནཾ ཨུཔཔཏྟིཡཾཡེཝ ཏེསཾ ཨུཔྤཱདོ སམྦྷཝཏི, ན ཨཉྙཏྠ, ན ཨེཝམིདྷ ‘‘ཡསྶ ཙཀྑུནྡྲིཡཱདཱིནི ཨུཔྤཛྫིསྶནྟི, ཨུཔཔཛྫནྟསྶ ཏསྶ ཛཱིཝིཏིནྡྲིཡཱདཱིནི ཨུཔྤཛྫིསྶནྟཱི’’ཏི ཨུཔཔཛྫནྟསྶེཝ པུཙྪིཏཱནཾ ཏེསཾ ཨུཔཔཏྟིཏོ ཨཉྙཏྠ ཨུཔྤཱདོ ན སམྦྷཝཏི, ཏསྨཱ ‘‘ཡསྶ ཙཀྑུནྡྲིཡཾ ཨུཔྤཛྫིསྶཏི, ཏསྶ སོམནསྶིནྡྲིཡཾ ཨུཔྤཛྫིསྶཏཱིཏི? ཨཱམནྟཱ’’ཏི ཝུཏྟཾ. ཨེཝཉྩ ཀཏྭཱ ནིརོདྷཝཱརེཔི ‘‘ཡསྶ ཙཀྑུནྡྲིཡཾ ནིརུཛ྄ཛྷིསྶཏི, ཏསྶ སོམནསྶིནྡྲིཡཾ ནིརུཛ྄ཛྷིསྶཏཱིཏི? ཨཱམནྟཱ’’ཏི ཝུཏྟཾ. ན ཧི ཡསྶ ཙཀྑུནྡྲིཡཾ ནིརུཛ྄ཛྷིསྶཏི, ཏསྶ སོམནསྶིནྡྲིཡཾ ན ནིརུཛ྄ཛྷིསྶཏི, ཨཔི པཙྪིམབྷཝིཀསྶ ཨུཔེཀྑཱསཧགཏཔཊིསནྡྷིཀསྶ. ན ཧི ཨུཔཔཛྫནྟསྶ ཏསྶ ཙུཏིཏོ པུབྦེཝ སོམནསྶིནྡྲིཡནིརོདྷོ ན སམྦྷཝཏཱིཏི. ཨེཏྠ ཧི པཋམཔུཙྪཱསུ སནྣིཊྛཱནཏྠོ པུཙྪིཏབྦཏྠནིསྶཡོ མཱདིསོཝ ཨུཔཔཏྟིཨུཔྤཱདིནྡྲིཡཝཱ ཨུབྷཡུཔྤཱདིནྡྲིཡཝཱ ཨཏྠོ པཊིནིཝཏྟིཏྭཱཔི པུཙྪིཏབྦཏྠསྶ ནིསྶཡོཏི ཨེཝཾ ཝིཡ དུཏིཡཔུཙྪཱསུ སནྣིཊྛཱནཏྠམེཝ ནིཡམེཏི, ན ཏཏྠེཝ པུཙྪིཏབྦཾ ཨནཱགཏབྷཱཝམཏྟེན སརཱུཔཏོ གཧིཏཾ ཨུཔྤཱདཾ ཝཱ ནིརོདྷཾ ཝཱ སཾསཡཏྠནྟི. ཡསྨཱ ཙེཝཾ སནྣིཊྛཱནཏྠསྶ ནིཡམོ ཧོཏི, ཏསྨཱ ‘‘ཡསྶ ཝཱ པན སོམནསྶིནྡྲིཡཾ ཨུཔྤཛྫིསྶཏི, ཏསྶ ཙཀྑུནྡྲིཡཾ ཨུཔྤཛྫིསྶཏཱིཏི? ཨཱམནྟཱ’’ཏི (ཡམ. ༣.ཨིནྡྲིཡཡམཀ.༢༨༡) ཝུཏྟཾ. ཨེས ནཡོ ནིརོདྷཝཱརེཔི.

པཊིལོམེ པན ཡཐཱ ཨནུལོམེ ‘‘ཨུཔྤཛྫིསྶཏི ནིརུཛ྄ཛྷིསྶཏཱི’’ཏི ཨུཔྤཱདནིརོདྷཱ ཨནཱགཏཱ སརཱུཔཝསེན ཝུཏྟཱ, ཨེཝཾ ཨཝུཏྟཏྟཱ ཡཐཱ ཏཏྠ སཾསཡཔདེན གཧིཏསྶ ཨིནྡྲིཡསྶ པཝཏྟིཡམྤི ཨུཔྤཱདནིརོདྷཱ ཙཀྑུནྡྲིཡཱདིམཱུལཀེསུ ཡོཛིཏཱ, ན ཨེཝཾ ཡོཛེཏབྦཱ. ཡཐཱ ཧི ཨུཔྤཱདནིརོདྷེ ཨཏིཀྐམིཏྭཱ ཨཔྤཏྭཱ ཙ ཨུཔྤཱདནིརོདྷཱ སམྦྷཝནྟི ཡོཛེཏུཾ, ན ཨེཝཾ ཨནུཔྤཱདཱནིརོདྷེ ¶ ཨཏིཀྐམིཏྭཱ ཨཔྤཏྭཱ ཙ ཨནུཔྤཱདཱནིརོདྷཱ སམྦྷཝནྟི ཨབྷཱུཏཱབྷཱཝསྶ ཨབྷཱུཏཱབྷཱཝཾ ཨཏིཀྐམིཏྭཱ ཨཔྤཏྭཱ ཙ སམྦྷཝཱནུཔྤཏྟིཏོ, ཨབྷཱུཏུཔྤཱདནིརོདྷཱབྷཱཝོ ཙ པཊིལོམེ པུཙྪིཏོ, ཏསྨཱསྶ ཝིསེསརཧིཏསྶ ཨབྷཱུཏཱབྷཱཝསྶ ཝཏྟམཱནཱནཾ ཨུཔྤཱདསྶ ཝིཡ ཀཱལནྟརཡོགཱབྷཱཝཏོ ཡཱདིསཱནཾ ཙཀྑཱདཱིནཾ ཨུཔྤཱདནིརོདྷཱབྷཱཝེན པུཙྪིཏབྦསྶ ནིསྶཡོ སནྣིཊྛཱནེན སནྣིཙྪིཏོ, ཏནྣིསྶཡཱ ཏཱདིསཱནཾཡེཝ ཨུཔཔཏྟིཙུཏིཨུཔྤཱདནིརོདྷཱནཾ ཛཱིཝིཏཱདཱིནམྤི ཨནུཔྤཱདཱནིརོདྷཱ སཾསཡཔདེན ¶ པུཙྪིཏཱ ཧོནྟཱིཏི ‘‘ཡསྶ ཙཀྑུནྡྲིཡཾ ནུཔྤཛྫིསྶཏི, ཏསྶ སོམནསྶིནྡྲིཡཾ ནུཔྤཛྫིསྶཏཱིཏི? ཨཱམནྟཱ’’ཏི (ཡམ. ༣.ཨིནྡྲིཡཡམཀ.༣༠༨) ཙ, ‘‘ཡསྶ ཙཀྑུནྡྲིཡཾ ན ནིརུཛ྄ཛྷིསྶཏི, ཏསྶ སོམནསྶིནྡྲིཡཾ ན ནིརུཛ྄ཛྷིསྶཏཱིཏི? ཨཱམནྟཱ’’ཏི ཙ ཝུཏྟཾ, ན ཝུཏྟཾ ‘‘ཡེ ཨརཱུཔཾ ཨུཔཔཛྫིཏྭཱ པརིནིབྦཱཡིསྶནྟཱི’’ཏིཨཱདིནཱ ཛཱིཝིཏིནྡྲིཡཨུཔེཀྑིནྡྲིཡཱདཱིསུ ཝིཡ ཝིསྶཛྫནནྟི.

ཡེ རཱུཔཱཝཙརཾ ཨུཔཔཛྫིཏྭཱ པརིནིབྦཱཡིསྶནྟི, ཏེསཾ གྷཱནིནྡྲིཡཾ ན ཨུཔྤཛྫིསྶཏི, ནོ ཙ ཏེསཾ སོམནསྶིནྡྲིཡཾ ན ཨུཔྤཛྫིསྶཏཱི’’ཏི ཨེཏྠ ཡེ སོཔེཀྑཔཊིསནྡྷིཀཱ བྷཝིསྶནྟི, ཏེ ‘‘ཡེ ཙ ཨརཱུཔཾ ཨུཔཔཛྫིཏྭཱ པརིནིབྦཱཡིསྶནྟཱི’’ཏི ཨེཏེན པཙྪིམཀོཊྛཱསཝཙནེན ཏཾསམཱནལཀྑཎཏཱཡ སངྒཧིཏཱཏི ཡེ སོམནསྶཔཊིསནྡྷིཀཱ བྷཝིསྶནྟི, ཏེ ཨེཝ ཝུཏྟཱཏི དཊྛབྦཱ.

ཨཊྛཀཐཱཡཾ ཡེསུ ཨཱདིམཔོཏྠཀེསུ ‘‘ཨཏཱིཏཱནཱགཏཝཱརེ སུདྡྷཱཝཱསཱནཾ ཨུཔཔཏྟིཙིཏྟསྶ བྷངྒཀྑཎེ མནིནྡྲིཡཉྩ ནུཔྤཛྫིཏྠཱཏི དྷམྨཡམཀེ ཝིཡ ཨུཔྤཱདཀྑཎཱཏིཀྐམཝསེན ཨཏྠཾ ཨགྒཧེཏྭཱ’’ཏི ལིཁིཏཾ, ཏཾ པམཱདལིཁིཏཾ. ཡེསུ པན པོཏྠཀེསུ ‘‘པཙྩུཔྤནྣཱཏཱིཏཝཱརེ སུདྡྷཱཝཱསཱནཾ ཨུཔཔཏྟིཙིཏྟསྶ བྷངྒཀྑཎེ མནིནྡྲིཡཉྩ ནུཔྤཛྫིཏྠཱཏི…པེ… ཏསྨིཾ བྷཝེ ཨནུཔྤནྣཔུབྦཝསེན ཨཏྠོ གཧེཏབྦོ’’ཏི པཱཋོ དིསྶཏི, སོ ཨེཝ སུནྡརཏརོཏི.

༤༣༥-༤༨༢. པརིཉྙཱཝཱརེ ¶ ལོཀིཡཨབྱཱཀཏམིསྶཀཱནི ཙཱཏི དུཀྑསཙྩཔརིཡཱཔནྣེཧི ཨེཀནྟཔརིཉྙེཡྻེཧི ལོཀིཡཨབྱཱཀཏེཧི མིསྶཀཏྟཱ ཏཱནི ཨུཔཱདཱཡ མནིནྡྲིཡཱདཱིནཾ ཝེདནཱཀྑནྡྷཱདཱིནཾ ཝིཡ པརིཉྙེཡྻཏཱ ཙ ཝུཏྟཱ. ཡདི པརིཉྙེཡྻམིསྶཀཏྟཱ པརིཉྙེཡྻཏཱ ཧོཏི, ཀསྨཱ དྷམྨཡམཀེ ‘‘ཡོ ཀུསལཾ དྷམྨཾ བྷཱཝེཏི, སོ ཨབྱཱཀཏཾ དྷམྨཾ པརིཛཱནཱཏཱི’’ཏིཨཱདིནཱ ཨབྱཱཀཏཔདེན ཡོཛེཏྭཱ ཡམཀཱནི ན ཝུཏྟཱནཱིཏི? ཡཐཱ ‘‘ཀུསལཾ བྷཱཝེམི, ཨཀུསལཾ པཛཧཱམཱི’’ཏི ཀུསལཱཀུསལེསུ ¶ བྷཱཝནཱཔཧཱནཱབྷིནིཝེསོ ཧོཏི, ཏཐཱ ‘‘ཝེདནཱཀྑནྡྷོ ཨནིཙྩོ, དྷམྨཱཡཏནཾ ཨནིཙྩ’’ནྟིཨཱདིནཱ ཁནྡྷཱདཱིསུ པརིཛཱནཱབྷིནིཝེསོ ཧོཏི, ཏཏྠ ཝེདནཱཀྑནྡྷཱདཡོ ‘‘ཨནིཙྩ’’ནྟིཨཱདིནཱ པརིཛཱནིཏབྦཱ, ཏེ ཙ ཝེདནཱཀྑནྡྷཱདིབྷཱཝཾ གཧེཏྭཱ པརིཛཱནིཏབྦཱ, ན ཨབྱཱཀཏབྷཱཝནྟི.

ཀསྨཱ པནེཏྠ དུཀྑསཙྩབྷཱཛནཱིཡེ ཨཱགཏསྶ དོམནསྶསྶ པཧཱཏབྦཏཱཝ ཝུཏྟཱ, ན པརིཉྙེཡྻཏཱ, ནནུ དུཀྑསཙྩཔརིཡཱཔནྣཱ ཝེདནཱཀྑནྡྷཱདཡོ ཀུསལཱཀུསལབྷཱཝེན ཨགྒཧིཏཱ ཀུསལཱཀུསལཱཔི པརིཉྙེཡྻཱཏི? སཙྩཾ, ཡཐཱ པན ཝེདནཱཀྑནྡྷཱདིབྷཱཝོ བྷཱཝེཏབྦཔཧཱཏབྦབྷཱཝེཧི ཝིནཱཔི ཧོཏི, ན ཨེཝཾ དོམནསྶིནྡྲིཡབྷཱཝོ པཧཱཏབྦབྷཱཝེན ཝིནཱ ཧོཏཱིཏི ཨིམཾ ཝིསེསཾ དསྶེཏུཾ དོམནསྶིནྡྲིཡསྶ པཧཱཏབྦཏཱཝ ཨིདྷ ཝུཏྟཱ, ན པརིཉྙེཡྻབྷཱཝསྶ ཨབྷཱཝཏོཏི དཊྛབྦོ. ཨཀུསལཾ ཨེཀནྟཏོ པཧཱཏབྦམེཝཱཏི ཨེཏེན པཧཱཏབྦམེཝ, ན ཨཔྤཧཱཏབྦནྟི ཨཔྤཧཱཏབྦམེཝ ནིཝཱརེཏི, ན པརིཉྙེཡྻབྷཱཝནྟི དཊྛབྦཾ. ཨཉྙིནྡྲིཡཾ བྷཱཝེཏབྦནིཊྛཾ, ན པན སཙྪིཀཱཏབྦནིཊྛནྟི བྷཱཝེཏབྦབྷཱཝོ ཨེཝ ཏསྶ གཧིཏོཏི. ‘‘དྭེ པུགྒལཱ’’ཏིཨཱདི ‘‘ཙཀྑུནྡྲིཡཾ ན པརིཛཱནཱཏཱི’’ཏིཨཱདིཀསྶ པརཏོ ལིཁིཏབྦཾ ཨུཔྤཊིཔཱཊིཡཱ ལིཁིཏནྟི དཊྛབྦཾ. ཙཀྑུནྡྲིཡམཱུལཀཉྷི ཨཏིཀྐམིཏྭཱ དོམནསྶིནྡྲིཡམཱུལཀེ ཨིདཾ ཝུཏྟཾ ‘‘དྭེ པུགྒལཱ དོམནསྶིནྡྲིཡཾ ན པཛཧནྟི ནོ ཙ ཨཉྙིནྡྲིཡཾ ན བྷཱཝེནྟཱི’’ཏི (ཡམ. ༣.ཨིནྡྲིཡཡམཀ.༤༤༠).

ཨེཏྠ ཙ པུཐུཛྫནོ, ཨཊྛ ཙ ཨརིཡཱཏི ནཝ པུགྒལཱ. ཏེསུ པུཐུཛྫནོ བྷབྦཱབྷབྦཝསེན དུཝིདྷོ, སོ ‘‘པུཐུཛྫནོ’’ཏི ཨཱགཏཊྛཱནེསུ ‘‘ཚ པུགྒལཱ ཙཀྑུནྡྲིཡཉྩ ན པརིཛཱནིཏྠ དོམནསྶིནྡྲིཡཉྩ ན པཛཧིཏྠཱ’’ཏིཨཱདཱིསུ ཙ ཨབྷིནྡིཏྭཱ གཧིཏོ. ‘‘ཡེ པུཐུཛྫནཱ མགྒཾ པཊིལབྷིསྶནྟཱི’’ཏི (ཡམ. ༡.སཙྩཡམཀ.༤༩, ༥༡-༥༢) ¶ ཨཱགཏཊྛཱནེསུ ‘‘པཉྩ པུགྒལཱ ཙཀྑུནྡྲིཡཉྩ པརིཛཱནིསྶནྟི དོམནསྶིནྡྲིཡཉྩ པཛཧིསྶནྟཱི’’ཏིཨཱདཱིསུ (ཡམ. ༣.ཨིནྡྲིཡཡམཀ.༤༥༡) ཙ བྷབྦོ ཨེཝ བྷིནྡིཏྭཱ གཧིཏོ. ‘‘ཡེ ཙ པུཐུཛྫནཱ མགྒཾ ན པཊིལབྷིསྶནྟཱི’’ཏི (ཡམ. ༡.སཙྩཡམཀ.༥༡) ཨཱགཏཊྛཱནེསུ ‘‘ཏཡོ པུགྒལཱ དོམནསྶིནྡྲིཡཉྩ ནཔྤཛཧིསྶནྟི ཙཀྑུནྡྲིཡཉྩ ན པརིཛཱནིསྶནྟཱི’’ཏིཨཱདཱིསུ (ཡམ. ༣.ཨིནྡྲིཡཡམཀ.༤༥༥) ཙ ཨབྷབྦོ ཨེཝ. ཨགྒཕལསམངྒཱི ཙ པཋམཕལསམངྒཱི ཨརཧཱ ཙཱཏི དུཝིདྷོ. སོཔི ‘‘ཨརཧཱ’’ཏི ཨཱགཏཊྛཱནེསུ ‘‘ཏཡོ པུགྒལཱ ཨནཉྙཱཏཉྙསྶཱམཱིཏིནྡྲིཡཉྩ བྷཱཝིཏྠ ¶ དོམནསྶིནྡྲིཡཉྩ པཛཧིཏྠཱ’’ཏིཨཱདཱིསུ (ཡམ. ༣.ཨིནྡྲིཡཡམཀ.༤༤༤) ཙ ཨབྷིནྡིཏྭཱ གཧིཏོ. ‘‘ཡོ ཨགྒཕལཾ སཙྪིཀརོཏཱི’’ཏི (ཡམ. ༣.ཨིནྡྲིཡཡམཀ.༤༤༦) ཨཱགཏཊྛཱནེསུ ‘‘ཏཡོ པུགྒལཱ དོམནསྶིནྡྲིཡཾ པཛཧིཏྠ, ནོ ཙ ཨཉྙཱཏཱཝིནྡྲིཡཾ སཙྪིཀརིཏྠཱ’’ཏིཨཱདཱིསུ (ཡམ. ༣.ཨིནྡྲིཡཡམཀ.༤༤༤) ཙ པཋམཕལསམངྒཱི ཙ བྷིནྡིཏྭཱ གཧིཏོ. ‘‘ཡོ ཨགྒཕལཾ སཙྪཱཀཱསཱི’’ཏི (ཡམ. ༣.ཨིནྡྲིཡཡམཀ.༤༤༣, ༤༤༦) ཨཱགཏཊྛཱནེསུ ཨིཏརོཝཱཏི ཨེཝཾ པུགྒལབྷེདཾ ཉཏྭཱ ཏཏྠ ཏཏྠ སནྣིཊྛཱནེན གཧིཏཔུགྒལེ ནིདྡྷཱརེཏྭཱ ཝིསྶཛྫནཾ ཡོཛེཏབྦནྟི.

དིབྦནྟི ¶ ¶ ཀཱམགུཎཱདཱིཧི ཀཱིལ༹ནྟི ལལ༹ནྟི, ཏེསུ ཝཱ ཝིཧརནྟི, ཝིཛཡསམཏྠཏཱཡོགེན པཙྩཏྠིཀེ ཝིཛེཏུཾ ཨིཙྪནྟི, ཨིསྶརིཡཊྛཱནཱདིསཀྐཱརདཱནགྒཧཎཾ ཏཾཏཾཨཏྠཱནུསཱསནཉྩ ཀརོནྟཱ ཝོཧརནྟི, པུཉྙཡོགཱནུབྷཱཝཔྤཏྟཱཡ ཛུཏིཡཱ ཛོཏནྟི, ཡཐཱབྷིལཱསིཏཉྩ ཝིསཡཾ ཨཔྤཊིགྷཱཏེན གཙྪནྟི, ཡཐིཙྪིཏནིཔྥཱདནེ སཀྐོནྟཱིཏི ཝཱ དེཝཱ, དེཝནཱིཡཱ ཝཱ ཏཾཏཾབྱསནནིཏྠརཎཏྠིཀེཧི སརཎཾ པརཱཡཎནྟི གམནཱིཡཱ, ཨབྷིཏྠཝནཱིཡཱ ཝཱ. སོབྷཱཝིསེསཡོགེན ཀམནཱིཡཱཏི ཝཱ དེཝཱ. ཏེ ཏིཝིདྷཱ – སམྨུཏིདེཝཱ ཨུཔཔཏྟིདེཝཱ ཝིསུདྡྷིདེཝཱཏི. བྷགཝཱ པན ནིརཏིསཡཱཡ ཨབྷིཉྙཱཀཱིལཱ༹ཡ, ཨུཏྟམེཧི དིབྦབྲཧྨཨརིཡཝིཧཱརེཧི, སཔརསནྟཱནསིདྡྷཱཡ པཉྩཝིདྷམཱརཝིཛཡིཙྪཱནིཔྥཏྟིཡཱ, ཙིཏྟིསྶརིཡསཏྟདྷནཱདིསམྨཱཔཊིཔཏྟིཨཝེཙྩཔྤསཱདསཀྐཱརདཱནགྒཧཎསངྑཱཏེན དྷམྨསབྷཱཝཔུགྒལཛ྄ཛྷཱསཡཱནུརཱུཔཱནུསཱསནཱིསངྑཱཏེན ཙ ཝོཧཱརཱཏིསཡེན, པརམཱཡ པཉྙཱསརཱིརཔྤབྷཱསངྑཱཏཱཡ ཛུཏིཡཱ, ཨནོཔམཱཡ ཙ ཉཱཎསརཱིརགཏིཡཱ, མཱརཝིཛཡསབྦཉྙུགུཎཔརཧིཏནིཔྥཱདནེསུ ¶ ཨཔྤཊིཧཏཱཡ སཏྟིཡཱ ཙ སམནྣཱགཏཏྟཱ སདེཝཀེན ལོཀེན སརཎནྟི གམནཱིཡཏོ, ཨབྷིཏྠཝནཱིཡཏོ, བྷཏྟིཝསེན ཀམནཱིཡཏོ ཙ སབྦེ ཏེ དེཝེ ཏེཧི གུཎེཧི ཨཏིཀྐནྟོ ཨཏིསཡོ ཝཱ དེཝོཏི དེཝཱཏིདེཝོ. སབྦདེཝེཧི པཱུཛནཱིཡཏརོ དེཝོཏི ཝཱ དེཝཱཏིདེཝོ, ཝིསུདྡྷིདེཝབྷཱཝཾ ཝཱ སབྦཉྙུགུཎཱལངྐཱརཾ པཏྟཏྟཱ ཨཉྙདེཝེཧི ཨཏིརེཀཏརོ ཝཱ དེཝོ དེཝཱཏིདེཝོ. དེཝཱནནྟི ཨུཔཔཏྟིདེཝཱནཾ ཏདཱ དྷམྨཔཊིགྒཱཧཀཱནཾ. སཀྐཱདཱིཧི དེཝེཧི པཧཱརཱདཨསུརིནྡཱདཱིཧི དཱནཝེཧི ཙ པཱུཛིཏོ. ཀཱཡཝཙཱིསཾཡམསྶ སཱིལསྶ ཨིནྡྲིཡསཾཝརསྶ ཙིཏྟསཾཡམསྶ སམཱདྷིསྶ ཙ པཊིཔཀྑཱནཾ ཨཙྩནྟཔཊིཔྤསྶདྡྷིཡཱ སུདྡྷསཾཡམོ.

ཨིསིསཏྟམོཏི ¶ ཙཏུསཙྩཱཝབོདྷགཏིཡཱ ཨིསཡོཏི སངྑྱཾ གཏཱནཾ སཏཾ པསཏྠཱནཾ ཨིསཱིནཾ ཨཏིསཡེན སནྟོ པསཏྠོཏི ཨཏྠོ. ཝིཔསྶཱིཨཱདཡོ ཙ ཨུཔཱདཱཡ བྷགཝཱ ‘‘སཏྟམོ’’ཏི ཝུཏྟོ. ཡཏོ ཝིཉྙཱཎཾ པཙྩུདཱཝཏྟཏི, ཏཾ ནཱམརཱུཔཾ སམུདཡནིརོདྷནེན ནིརོདྷེསཱིཏི ནཱམརཱུཔནིརོདྷནོ. ཨཏིགམྦྷཱིརནཡམཎྜིཏདེསནཾ པཊྛཱནཾ ནཱམ དེསེསི པཀརཎནྟི སམྦནྡྷོ.

‘‘ཀེ པན ཏེ ནཡཱ, ཀིཉྩ ཏཾ པཊྛཱནཾ ནཱམཱ’’ཏི ནཡིདཾ པུཙྪིཏབྦཾ. ཀསྨཱ? ནིདཱནཀཐཱཡཾ པཊྛཱནསམཱནནེ ཨནུལོམཱདཱིནཾ ནཡཱནཾ པཊྛཱནསྶ ཙ དསྶིཏཏྟཱཏི ཨིམམཏྠཾ ཝིབྷཱཝེནྟོ ‘‘སམྨཱསམྦུདྡྷེན ཧི…པེ… ནཱམཱཏི ཧི ཝུཏྟ’’ནྟི ཏཏྠ ཝུཏྟཾ ཨཊྛཀཐཱཔཱལི༹ཾ ཨཱཧརི. ཏཏྠ གཱཐཱཏྠཾ ཨཊྛཀཐཱདྷིཔྤཱཡཉྩ པརཏོ ཝཎྞཡིསྶཱམཱཏི.

པཊྛཱནནཱམཏྠོ པན ཏིཀཔཊྛཱནཱདཱིནཾ ཏིཀཔཊྛཱནཱདིནཱམཏྠོ, ཨིམསྶ པཀརཎསྶ ཙཏུཝཱིསཏིསམནྟཔཊྛཱནསམོདྷཱནཏཱ ཙེཏྠ ཝཏྟབྦཱ. ཨེཝཉྷི སངྑེཔཏོ པཊྛཱནེ ཉཱཏེ ཝིཏྠཱརོ སུཁཝིཉྙེཡྻོ ཧོཏཱིཏི. ཏཏྠ ཙ ནཱམཏྠོ པཋམཾ ཝཏྟབྦོཏི ‘‘ཏཏྠ ཡེསཾ…པེ… ནཱམཏྠོ ཏཱཝ ཨེཝཾ ཝེདིཏབྦོ’’ཏི ཝཏྭཱ སབྦསཱདྷཱརཎསྶ པཊྛཱནནཱམསྶེཝ ཏཱཝ ཨཏྠཾ དསྶེནྟོ ‘‘ཀེནཊྛེན པཊྛཱན’’ནྟིཨཱདིམཱཧ ¶ . པ-ཀཱརོ ཧཱིཏི ཨུཔསགྒཔདཾ དསྶེཏི. སོ ‘‘པཝིབྷཏྟེསུ དྷམྨེསུ, ཡཾ སེཊྛཾ ཏདུཔཱགམུནྟིཨཱདཱིསུ ཝིཡ ནཱནཔྤཀཱརཏྠཾ དཱིཔེཏི. ནནུ པཀཱརེཧི ཝིབྷཏྟཱ པཝིབྷཏྟཱཏི པ-ཨིཏི ཨུཔསགྒོ པཀཱརཏྠམེཝ དཱིཔེཏི, ན ནཱནཔྤཀཱརཏྠནྟི? ན, ཏེསཾ པཀཱརཱནཾ ནཱནཱཝིདྷབྷཱཝཏོ. ཨཏྠཏོ ཧི ཨཱཔནྣཾ ནཱནཱཝིདྷབྷཱཝཾ དསྶེཏུཾ ནཱནཱ-སདྡོ ཝུཏྟོཏི. ཏཏྠ ཨེཀསྶཔི དྷམྨསྶ ཧེཏུཨཱདཱིཧི ཨནེཀཔཙྩཡབྷཱཝཏོ ཙ ཨེཀེཀསྶ པཙྩཡསྶ ཨནེཀདྷམྨབྷཱཝཏོ ཙ ནཱནཔྤཀཱརཔཙྩཡཏཱ ཝེདིཏབྦཱ.

ཧེཏུཔཙྩཡཱདིཝསེན ཝིབྷཏྟཏྟཱཏི ཨེཏེན དྷམྨསངྒཧཱདཱིསུ ཝུཏྟཏོ ཀུསལཱདིཝིབྷཱགཏོ སཱཏིསཡཝིབྷཱགཏཾ པཊྛཱནནཱམལཱབྷསྶ ཀཱརཎཾ ¶ དསྶེཏི. གོཊྛཱཏི ཝཛཱ. པཊྛིཏགཱཝོཏི གཏགཱཝོ. ཨཱགཏཊྛཱནསྨིནྟི མཧཱསཱིཧནཱདསུཏྟཾ ཝདཏི. པཝཏྟགམནཏྟཱ ཨེཏྠཱཏི ཝཙནསེསོ. ཨཐ ཝཱ གཙྪཏི ཨེཏྠཱཏི གམནཾ, སབྦཉྙུཏཉྙཱཎསྶ ནིསྶངྒཝསེན པཝཏྟསྶ གམནཏྟཱ གམནདེསབྷཱཝཏོ ཨེཀེཀཾ པཊྛཱནཾ ནཱམཱཏི ཨཏྠོ. ཏཏྠ ཨཉྙེཧི གཏིམནྟེཧི ཨཏིསཡཡུཏྟསྶ གཏིམཏོ གམནཊྛཱནབྷཱཝདསྶནཏྠཾ ‘‘སབྦཉྙུཏཉྙཱཎསྶཱ’’ཏི ཝུཏྟཾ. ཏསྶ མཧཱཝེགསྶ པུརིསསྶ པཔཱཏཊྛཱནཾ ཝིཡ དྷམྨསངྒཎཱིཨཱདཱིནཾ སཱསངྒགམནཊྛཱནབྷཱཝཾ ཨིམསྶ ཙ མཧཱཔཐོ ཝིཡ ནིརཱསངྒགམནཊྛཱནབྷཱཝཾ དསྶེནྟོ ཨཏིསཡཡུཏྟགམནཊྛཱནབྷཱཝོ པཊྛཱནནཱམལཱབྷསྶ ཀཱརཎནྟི དསྶེཏི.

ཏིཀཱནནྟི ཏིཀཝསེན ཝུཏྟདྷམྨཱནཾ. སམནྟཱཏི ཨནུལོམཱདཱིཧི སབྦཱཀཱརེཧིཔི གཏཱནི ཙཏུཝཱིསཏི ཧོནྟཱིཏི ཨཏྠོ. ཨེཏསྨིཾ ཨཏྠེ ཙཏུཝཱིསཏིསམནྟཔཊྛཱནཱནཱིཏི ‘‘སམནྟཙཏུཝཱིསཏིཔཊྛཱནཱནཱི’’ཏི ཝཏྟབྦེ སམནྟསདྡསྶ པརཡོགཾ ཀཏྭཱ ཝུཏྟནྟི དཊྛབྦཾ. ཨཐ ཝཱ སམནྟཱ ཚ ཚ ཧུཏྭཱཏི ཨེཏེན ཨནུལོམཱདིསབྦཀོཊྛཱསཏོ ཏིཀཱདིཚཚབྷཱཝཾ དསྶེཏི. ཏེན སམནྟསདྡོ ཏིཀཱདིཚཚཔཊྛཱནཝིསེསནཾ ཧོཏི, ན ཙཏུཝཱིསཏིཝིསེསནཾ, ཏསྨཱ སམནྟཏོ པཊྛཱནཱནི ཏཱནི ཙཏུཝཱིསཏཱིཏི ཀཏྭཱ ‘‘ཙཏུཝཱིསཏིསམནྟཔཊྛཱནཱནཱི’’ཏི ཝུཏྟཾ. སམནྟཏོ ཝཱ དྷམྨཱནུལོམཱདིཏིཀཱདིཔཊིཙྩཝཱརཱདིཔཙྩཡཱནུལོམཱདིཧེཏུམཱུལཀཱདིཔྤཀཱརེཧི པཝཏྟཱནི པཊྛཱནཱནི སམནྟཔཊྛཱནཱནི, ཨནཱུནེཧི ནཡེཧི པཝཏྟཱནཱིཏི ཝུཏྟཾ ཧོཏི. ཏཱནི པན ཙཏུཝཱིསཏི ཧོནྟི. ཏེནེཝཱཧ ‘‘ཨིམེསཾ ཙཏུཝཱིསཏིཡཱ ཁུདྡཀཔཊྛཱནསངྑཱཏཱནཾ སམནྟཔཊྛཱནཱནཾ སམོདྷཱནཝསེནཱ’’ཏི.

ཧེཏུ ཙ སོ པཙྩཡོ ཙཱཏི ཨིམིནཱ ཝཙནེན ཧེཏུནོ ཨདྷིཔཏིཔཙྩཡཱདིབྷཱུཏསྶ ཙ གཧཎཾ སིཡཱཏི ¶ ཏཾ ནིཝཱརེནྟོ ཨཱཧ ‘‘ཧེཏུ ཧུཏྭཱ པཙྩཡོ’’ཏི. ཨེཏེནཔི སོ ཨེཝ དོསོ ཨཱཔཛྫཏཱིཏི པུནཱཧ ‘‘ཧེཏུབྷཱཝེན པཙྩཡོཏི ཝུཏྟཾ ཧོཏཱི’’ཏི. ཏེན ཨིདྷ ཧེཏུ-སདྡེན དྷམྨགྒཧཎཾ ན ཀཏཾ, ཨཐ ཁོ དྷམྨསཏྟིཝིསེསོ གཧིཏོཏི དསྶེཏི. ཏསྶ ཧི པཙྩཡསདྡསྶ ཙ སམཱནཱདྷིཀརཎཏཾ སནྡྷཱཡ ‘‘ཧེཏུ ཙ སོ པཙྩཡོ ཙཱ’’ཏི, ‘‘ཧེཏུ ཧུཏྭཱ པཙྩཡོ’’ཏི ཙ ཝུཏྟཾ. ཨེཝཉྩ ཀཏྭཱ པརཏོ པཱལི༹ཡཾ ‘‘ཧེཏཱུ ཧེཏུསམྤཡུཏྟ…པེ… ཧེཏུཔཙྩཡེན པཙྩཡོ’’ཏིཨཱདིནཱ (པཊྛཱ. ༡.༡.༡) ཏེན ¶ ཏེན ཧེཏུབྷཱཝཱདིཨུཔཀཱརེན ཏསྶ ཏསྶ དྷམྨསྶ ཨུཔཀཱརཏྟཾ ཝུཏྟཾ. ཨཊྛཀཐཱཡཾ པན ‘‘ཡོ ཧི དྷམྨོ ཡཾ དྷམྨཾ ཨཔྤཙྩཀྑཱཡ ཏིཊྛཏི ཝཱ ཨུཔྤཛྫཏི ཝཱ, སོ ཏསྶ པཙྩཡོ’’ཏི ‘‘མཱུལཊྛེན ཨུཔཀཱརཀོ དྷམྨོ ཧེཏུཔཙྩཡོ’’ཏིཙྩེཝམཱདིནཱ དྷམྨཔྤདྷཱནནིདྡེསེན དྷམྨཏོ ཨཉྙཱ དྷམྨསཏྟི ནཱམ ནཏྠཱིཏི དྷམྨེཧེཝ དྷམྨསཏྟིཝིབྷཱཝནཾ ཀཏནྟི དཊྛབྦཾ. ཨིདྷཱཔི ཝཱ ཧེཏུ ཙ སོ པཙྩཡོ ཙཱཏི དྷམྨེནེཝ དྷམྨསཏྟིཾ དསྶེཏི. ན ཧི ཧེཏུཔཙྩཡོཏིཨཱདིཀོ ཨུདྡེསོ ཀུསལཱདིཨུདྡེསོ ཝིཡ དྷམྨཔྤདྷཱནོ, ཨཐ ཁོ དྷམྨཱནཾ ཨུཔཀཱརཔྤདྷཱནོཏི. ཨེཏཱིཏི ཨེཏསྶ ཨཏྠོ ཝཏྟཏཱིཏི, ཏཉྩ ཨུཔྤཏྟིཊྛིཏཱིནཾ སཱདྷཱརཎཝཙནཾ. ཏེནེཝཱཧ – ‘‘ཏིཊྛཏི ཝཱ ཨུཔྤཛྫཏི ཝཱ’’ཏི. ཀོཙི ཧི པཙྩཡོ ཋིཏིཡཱ ཨེཝ ཧོཏི ཡཐཱ པཙྪཱཛཱཏཔཙྩཡོ, ཀོཙི ཨུཔྤཏྟིཡཱཡེཝ ཡཐཱ ཨནནྟརཱདཡོ, ཀོཙི ཨུབྷཡསྶ ཡཐཱ ཧེཏུཨཱདཡོཏི.

ཨུཔཀཱརཀལཀྑཎོཏི ཙ དྷམྨེན དྷམྨསཏྟིཨུཔཀཱརཾ དསྶེཏཱིཏི དཊྛབྦཾ. ཧིནོཏི པཏིཊྛཱཏི ཨེཏྠཱཏི ཧེཏུ. ཨནེཀཏྠཏྟཱ དྷཱཏུསདྡཱནཾ ཧི-སདྡོ མཱུལ-སདྡོ ཝིཡ པཏིཊྛཏྠོཏི དཊྛབྦོཏི. ཧིནོཏི ཝཱ ཨེཏེན ཀམྨནིདཱནབྷཱུཏེན ཨུདྡྷཾ ཨོཛཾ ཨབྷིཧརནྟེན མཱུལེན ཝིཡ པཱདཔོ ཏཔྤཙྩཡཾ ཕལཾ གཙྪཏི པཝཏྟཏི ཝུཌྜྷིཾ ཝིརཱུལ༹ྷིཾ ཨཱཔཛྫཏཱིཏི ཧེཏུ. ཨཱཙརིཡཱནནྟི རེཝཏཏྠེརཾ ཝདཏི.

‘‘ཡོནིསོ, བྷིཀྑཝེ, མནསིཀརོཏོ ཨནུཔྤནྣཱ ཙེཝ ཀུསལཱ དྷམྨཱ ཨུཔྤཛྫནྟི, ཨུཔྤནྣཱ ཙ ཀུསལཱ དྷམྨཱ ཨབྷིཝཌྜྷནྟཱི’’ཏིཨཱདཱིཧི (ཨ. ནི. ༡.༦༦-༦༧) ཀུསལབྷཱཝསྶ ཡོནིསོམནསིཀཱརཔཊིབདྡྷཏཱ སིདྡྷཱ ཧོཏཱིཏི ཨཱཧ ‘‘ཡོནིསོམནསིཀཱརཔཊིབདྡྷོ ཀུསལབྷཱཝོ’’ཏི. ཨེཏེནེཝ ཨཀུསལཱབྱཱཀཏབྷཱཝཱ ཀུསལབྷཱཝོ ཝིཡ ན ཧེཏུཔཊིབདྡྷཱཏི དསྶིཏཾ ཧོཏི. ཡཾ པནེཀེ མཉྙེཡྻུཾ ‘‘ཨཧེཏུཀཧེཏུསྶ ཨཀུསལབྷཱཝོ ཝིཡ སཧེཏུཀཧེཏཱུནཾ སབྷཱཝཏོཝ ཀུསལཱདིབྷཱཝོ ཨཉྙེསཾ ཏཾསམྤཡུཏྟཱནཾ ཧེཏུཔཊིབདྡྷོ’’ཏི, ཏསྶ ཨུཏྟརཾ ཝཏྟུཾ ‘‘ཡདི ཙཱ’’ཏིཨཱདིམཱཧ. ཨལོབྷོ ཀུསལོ ཝཱ སིཡཱ ཨབྱཱཀཏོ ཝཱ, ཡདི ཨལོབྷོ སབྷཱཝཏོ ཀུསལོ, ཀུསལཏྟཱ ཨབྱཱཀཏོ ན སིཡཱ. ཨཐ ཨབྱཱཀཏོ, ཏཾསབྷཱཝཏྟཱ ཀུསལོ ན སིཡཱ ཨལོབྷསབྷཱཝསྶ ¶ ཨདོསཏྟཱབྷཱཝོ ཝིཡ. ཡསྨཱ པན ཨུབྷཡཐཱཔི སོ ¶ ཧོཏི, ཏསྨཱ ཡཐཱ ཨུབྷཡཐཱ ཧོནྟེསུ ཕསྶཱདཱིསུ སམྤཡུཏྟེསུ ཧེཏུཔཊིབདྡྷཀུསལཱདིབྷཱཝཾ པརིཡེསཐ, ན སབྷཱཝཏོ, ཨེཝཾ ཧེཏཱུསུཔི ཀུསལཱདིཏཱ ཨཉྙཔཊིབདྡྷཱ པརིཡེསིཏབྦཱ, ན སབྷཱཝཏོཏི. ཡཾ ཝུཏྟཾ ‘‘སམྤཡུཏྟཧེཏཱུསུ སབྷཱཝཏོཝ ཀུསལཱདིབྷཱཝོ’’ཏི, ཏཾ ན ཡུཛྫཏི, སཱ པན པརིཡེསིཡམཱནཱ ཡོནིསོམནསིཀཱརཱདིཔཊིབདྡྷཱ ཧོཏཱིཏི ཧེཏཱུསུ ཝིཡ སམྤཡུཏྟེསུཔི ཡོནིསོམནསིཀཱརཱདིཔཊིབདྡྷོ ཀུསལཱདིབྷཱཝོ, ན ཧེཏུཔཊིབདྡྷོཏི སིདྡྷཾ ཧོཏཱིཏི ཨདྷིཔྤཱཡོ.

ཨཱརབྷིཏྭཱཔཱིཏི ཨེཏྠ པི-སདྡེན ཨིམམཏྠཾ དསྶེཏི – རཱུཔཱཡཏནཱདིམཏྟེ ཡསྨིཾ ཀིསྨིཉྩི ཨེཀསྨིཾ ཨཊྛཏྭཱ ‘‘ཡཾ ཡཾ དྷམྨཾ ཨཱརབྦྷཱ’’ཏི ཨནིཡམེན སབྦརཱུཔཱཡཏན…པེ… དྷམྨཱཡཏནཱནཉྩ ཨཱརམྨཎཔཙྩཡབྷཱཝསྶ ཝུཏྟཏྟཱ ན ཀོཙི དྷམྨོ ན ཧོཏཱིཏི.

‘‘ཚནྡཝཏོ ཀིཾ ནཱམ ན སིཛ྄ཛྷཏཱི’’ཏིཨཱདིཀཾ པུརིམཱབྷིསངྑཱརཱུཔནིསྶཡཾ ལབྷིཏྭཱ ཨུཔྤཛྫམཱནེ ཙིཏྟེ ཚནྡཱདཡོ དྷུརབྷཱུཏཱ ཛེཊྛཀབྷཱུཏཱ སཡཾ སམྤཡུཏྟདྷམྨེ སཱདྷཡམཱནཱ ཧུཏྭཱ པཝཏྟནྟི, ཏཾསམྤཡུཏྟདྷམྨཱ ཙ ཏེསཾ ཝསེ ཝཏྟནྟི ཧཱིནཱདིབྷཱཝེན ཏདནུཝཏྟནཏོ, ཏེན ཏེ ཨདྷིཔཏིཔཙྩཡཱ ཧོནྟི. གརུཀཱཏབྦམྤི ཨཱརམྨཎཾ ཏནྣིནྣཔོཎཔབྦྷཱརཱནཾ པཙྩཝེཀྑཎཨསྶཱདམགྒཕལཱནཾ ཨཏྟནོ ཝསེ ཝཏྟཡམཱནཾ ཝིཡ པཙྩཡོ ཧོཏི, ཏསྨཱཡཾ ཨཏྟཱདྷཱིནཱནཾ པཏིབྷཱཝེན ཨུཔཀཱརཀཏཱ ཨདྷིཔཏིཔཙྩཡཏཱཏི དཊྛབྦཱ.

མནོཝིཉྙཱཎདྷཱཏཱུཏིཨཱདི ཙིཏྟནིཡམོཏི ཨེཏྠ ཨཱདི-སདྡེན སནྟཱིརཎཱནནྟརཾ ཝོཊྛབྦནཾ, ཙུཏིཨནནྟརཱ པཊིསནྡྷཱིཏི ཡསྶ ཡསྶ ཙིཏྟསྶ ཨནནྟརཱ ཡཾ ཡཾ ཙིཏྟཾ ཨུཔྤཛྫཏི, ཏསྶ ཏསྶ ཏདནནྟརུཔྤཱདནིཡམོ ཏཾཏཾསཧཀཱརཱིཔཙྩཡཝིསིཊྛསྶ པུརིམཔུརིམཙིཏྟསྶེཝ ཝསེན ཨིཛ྄ཛྷཏཱིཏི དསྶེཏི. བྷཱཝནཱབལེན པན ཝཱརིཏཏྟཱཏི ཨེཏྠ ཡཐཱ རུཀྑསྶ ཝེཁེ དིནྣེ པུཔྥིཏུཾ སམཏྠསྶེཝ པུཔྥནཾ ན ཧོཏི, ཨགདཝེཁེ པན ཨཔནཱིཏེ ཏཱཡཡེཝ སམཏྠཏཱཡ པུཔྥནཾ ཧོཏི, ཨེཝམིདྷཱཔི བྷཱཝནཱབལེན ཝཱརིཏཏྟཱ སམུཊྛཱཔནསམཏྠསྶེཝ ཨསམུཊྛཱཔནཾ, ཏསྨིཉྩ ཨཔགཏེ ཏཱཡཡེཝ སམཏྠཏཱཡ སམུཊྛཱཔནཾ ཧོཏཱིཏི ཨདྷིཔྤཱཡོ.

བྱཉྫནམཏྟཏོཝེཏྠ ནཱནཱཀརཎཾ པཙྩེཏབྦཾ, ན ཨཏྠཏོཏི ཨུཔཙཡསནྟཏིཨདྷིཝཙནནིརུཏྟིཔདཱནཾ ཝིཡ སདྡཏྠམཏྟཏོ ནཱནཱཀརཎཾ, ན ཝཙནཱིཡཏྠཏོཏི ¶ ཨདྷིཔྤཱཡོ. ཏེནེཝ ¶ སདྡཏྠཝིསེསཾ དསྶེཏུཾ ‘‘ཀཐ’’ནྟིཨཱདིམཱཧ. ཏཏྠ པུརིམཔཙྪིམཱནཾ ནིརོདྷུཔྤཱདནྟརཱབྷཱཝཏོ ནིརནྟརུཔྤཱདནསམཏྠཏཱ ཨནནྟརཔཙྩཡབྷཱཝོ. རཱུཔདྷམྨཱནཾ ཝིཡ སཎྛཱནཱབྷཱཝཏོ པཙྩཡཔཙྩཡུཔྤནྣཱནཾ སཧཱཝཊྛཱནཱབྷཱཝཏོ ཙ ‘‘ཨིདམིཏོ ཧེཊྛཱ ཨུདྡྷཾ ཏིརིཡ’’ནྟི ཝིབྷཱགཱབྷཱཝཱ ཨཏྟནཱ ཨེཀཏྟམིཝ ཨུཔནེཏྭཱ སུཊྛུ ཨནནྟརབྷཱཝེན ཨུཔྤཱདནསམཏྠཏཱ སམནནྟརཔཙྩཡཏཱ.

ཨུཔྤཱདནསམཏྠཏཱཏི ཙ ཨབྱཱཔཱརཏྟཱ དྷམྨཱནཾ ཡསྨིཾ ཡདཱཀཱརེ ནིརུདྡྷེ ཝཏྟམཱནེ ཝཱ སཏི ཏཾཏཾཝིསེསཝནྟཱ དྷམྨཱ ཧོནྟི, ཏསྶ སོཝ ཨཱཀཱརོ ཝུཙྩཏཱིཏི དཊྛབྦོ. དྷམྨཱནཾ པཝཏྟིམེཝ ཙ ཨུཔཱདཱཡ ཀཱལཝོཧཱརོཏི ནིརོདྷཱ ཝུཊྛཧནྟསྶ ནེཝསཉྙཱནཱསཉྙཱཡཏནཕལསམཱཔཏྟཱིནཾ ཨསཉྙསཏྟཱ ཙཝནྟསྶ པུརིམཙུཏིཔཙྪིམཔཊིསནྡྷཱིནཉྩ ནིརོདྷུཔྤཱདནིརནྟརཏཱཡ ཀཱལནྟརཏཱ ནཏྠཱིཏི དཊྛབྦཱ. ན ཧི ཏེསཾ ཨནྟརཱ ཨརཱུཔདྷམྨཱནཾ པཝཏྟི ཨཏྠི, ཡཾ ཨུཔཱདཱཡ ཀཱལནྟརཏཱ ཝུཙྩེཡྻ, ན ཙ རཱུཔདྷམྨཔྤཝཏྟི ཨརཱུཔདྷམྨཔྤཝཏྟིཡཱ ཨནྟརཾ ཀརོཏི ཨཉྙསནྟཱནཏྟཱ. རཱུཔཱརཱུཔདྷམྨསནྟཏིཡོ ཧི དྭེ ཨཉྙམཉྙཾ ཝིསདིསསབྷཱཝཏྟཱ ཨཉྙམཉྙོཔཀཱརབྷཱཝེན ཝཏྟམཱནཱཔི ཝིསུཾཡེཝ ཧོནྟི. ཨེཀསནྟཏིཡཉྩ པུརིམཔཙྪིམཱནཾ མཛ྄ཛྷེ ཝཏྟམཱནཾ ཏཾསནྟཏིཔརིཡཱཔནྣཏཱཡ ཨནྟརཀཱརཀཾ ཧོཏི. ཏཱདིསཉྩ ཀཉྩི ནེཝསཉྙཱནཱསཉྙཱཡཏནཕལསམཱཔཏྟཱིནཾ མཛ྄ཛྷེ ནཏྠི, ན ཙ ཨབྷཱཝོ ཨནྟརཀཱརཀོ ཧོཏི ཨབྷཱཝཏྟཱཡེཝ, ཏསྨཱ ཛཝནཱནནྟརསྶ ཛཝནསྶ ཝིཡ, བྷཝངྒཱནནྟརསྶ བྷཝངྒསྶ ཝིཡ ཙ ནིརནྟརཏཱ སུཊྛུ ཙ ཨནནྟརཏཱ ཧོཏཱིཏི ཏཐཱ ཨུཔྤཱདནསམཏྠཏཱ ནེཝསཉྙཱནཱསཉྙཱཡཏནཙུཏཱིནམྤི དཊྛབྦཱ. ཨུཔྤཏྟིཡཱ པཙྩཡབྷཱཝོ ཙེཏྠ ཨནནྟརཔཙྩཡཱདཱིནཾ པཱཀཊོཏི ཨུཔྤཱདནསམཏྠཏཱཝ ཝུཏྟཱ. པཙྩུཔྤནྣཱནཾ པན དྷམྨཱནཾ པུབྦནྟཱཔརནྟཔརིཙྪེདེན གཧིཏཱནཾ ‘‘ཨུཔྤཛྫཏཱི’’ཏི ཝཙནཾ ཨལབྷནྟཱནཾ ‘‘ཨཏཱིཏོ དྷམྨོ པཙྩུཔྤནྣསྶ དྷམྨསྶ ཨནནྟརཔཙྩཡེན པཙྩཡོ’’ཏིཨཱདིནཱ (པཊྛཱ. ༢.༡༨.༥) ཨནནྟརཱདིཔཙྩཡབྷཱཝོ ཝུཏྟོཏི ན སོ ཨུཔྤཏྟིཡཾཡེཝཱཏི ཝིཉྙཱཡཏི. ན ཧི ཀུསལཱདིགྒཧཎཾ ཝིཡ པཙྩུཔྤནྣགྒཧཎཾ ཨཔརིཙྪེདཾ, ཡཏོ ཨུཔྤཏྟིམཏྟསམངྒིནོཡེཝ ཙ གཧཎཾ སིཡཱ, ཏེནེཝ ཙ ཨཏཱིཏཏྟིཀེ པཊིཙྩཝཱརཱདཡོ ན སནྟཱིཏི.

ཨུཔྤཛྫམཱནོཝ ¶ སཧུཔྤཱདབྷཱཝེནཱཏི ཨེཏྠཱཔི ཨུཔྤཏྟིཡཱ པཙྩཡབྷཱཝེན པཱཀཊེན ཋིཏིཡཱཔི པཙྩཡབྷཱཝཾ ནིདསྶེཏཱིཏི དཊྛབྦཾ, པཙྩཡུཔྤནྣཱནཾ པན སཧཛཱཏབྷཱཝེན ཨུཔཀཱརཀཏཱ སཧཛཱཏཔཙྩཡཏཱཏི.

ཨཏྟནོ ཨུཔཀཱརཀསྶ ཨུཔཀཱརཀཏཱ ཨཉྙམཉྙཔཙྩཡཏཱ, ཨུཔཀཱརཀཏཱ ཙ ཨཉྙམཉྙཏཱཝསེནེཝ ¶ དཊྛབྦཱ, ན སཧཛཱཏཱདིཝསེན. སཧཛཱཏཱདིཔཙྩཡོ ཧོནྟོཡེཝ ཧི ཀོཙི ཨཉྙམཉྙཔཙྩཡོ ན ཧོཏི, ན ཙ པུརེཛཱཏཔཙྪཱཛཱཏབྷཱཝེཧི ཨུཔཀཱརཀསྶ ཨུཔཀཱརཀཱ ཝཏྠུཁནྡྷཱ ཨཉྙམཉྙཔཙྩཡཱ ཧོནྟཱིཏི.

ཏརུཨཱདཱིནཾ པཐཝཱི ཝིཡ ཨདྷིཊྛཱནཱཀཱརེན པཐཝཱིདྷཱཏུ སེསདྷཱཏཱུནཾ, ཙཀྑཱདཡོ ཙ ཙཀྑུཝིཉྙཱཎཱདཱིནཾ ཨུཔཀཱརཀཱ ཙིཏྟཀམྨསྶ པཊཱདཡོ ཝིཡ ནིསྶཡཱཀཱརེན ཁནྡྷཱདཡོ ཏཾཏཾནིསྶཡཱནཾ ཁནྡྷཱདཱིནཾ.

ཏདདྷཱིནཝུཏྟིཏཱཡ ཨཏྟནོ ཕལེན ནིསྶིཏོཏི ཡཾ ཀིཉྩི ཀཱརཎཾ ནིསྶཡོཏི ཝདཏི. ཏཏྠ ཡོ བྷུསོ, ཏཾ ཨུཔནིསྶཡོཏི ནིདྡྷཱརེཏི.

པཀཏོཏི ཨེཏྠ པ-ཀཱརོ ཨུཔསགྒོ, སོ ཨཏྟནོ ཕལསྶ ཨུཔྤཱདནེ སམཏྠབྷཱཝེན སུཊྛུཀཏཏཾ དཱིཔེཏི. ཏཐཱ ཙ ཀཏཾ ཨཏྟནོ སནྟཱནེ ཀཏཾ ཧོཏཱིཏི ཨཱཧ ‘‘ཨཏྟནོ སནྟཱནེ’’ཏི. ཀརཎཉྩ དུཝིདྷཾ ནིཔྥཱདནཾ ཨུཔསེཝནཉྩཱཏི དསྶེཏུཾ ‘‘ནིཔྥཱདིཏོ ཝཱ’’ཏིཨཱདིམཱཧ. ཏཏྠ ཨུཔསེཝིཏོ ཝཱཏི ཨེཏེན ཀཱཡཨལླཱིཡཱཔནཝསེན ཨུཔབྷོགཱུཔསེཝནཾ ཝིཛཱནནཱདིཝསེན ཨཱརམྨཎཱུཔསེཝནཉྩ དསྶེཏཱིཏི དཊྛབྦཾ. ཏེན ཨནཱགཏཱནམྤི ཙཀྑུསམྤདཱདཱིནཾ ཨཱརམྨཎཱུཔསེཝནེན ཡཐཱཔཊིསེཝིཏཱནཾ པཀཏཱུཔནིསྶཡཏཱ ཝུཏྟཱ ཧོཏི.

ཡཐཱ པཙྪཱཛཱཏེན ཝིནཱ སནྟཱནཱཝིཙྪེདཧེཏུབྷཱཝཾ ཨགཙྪནྟཱནཾ དྷམྨཱནཾ ཡེ པཙྪཱཛཱཏཱཀཱརེན ཨུཔཀཱརཀཱ, ཏེསཾ སཱ ཝིཔྤཡུཏྟཱཀཱརཱདཱིཧི ཝིསིཊྛཱ ཨུཔཀཱརཀཏཱ པཙྪཱཛཱཏཔཙྩཡཏཱ, ཏཐཱ ནིསྶཡཱརམྨཎཱཀཱརཱདཱིཧི ཝིསིཊྛཱ པུརེཛཱཏབྷཱཝེན ཝིནཱ ཨུཔཀཱརཀབྷཱཝཾ ཨགཙྪནྟཱནཾ ཝཏྠཱརམྨཎཱནཾ པུརེཛཱཏཱཀཱརེན ཨུཔཀཱརཀཏཱ པུརེཛཱཏཔཙྩཡཏཱ, ཨེཝཾ སབྦཏྠ པཙྩཡཱནཾ པཙྩཡནྟརཱཀཱརཝིསིཊྛཱ ཨུཔཀཱརཀཏཱ ཡོཛེཏབྦཱ.

གིཛ྄ཛྷཔོཏཀསརཱིརཱནཾ ¶ ཨཱཧཱརཱསཱཙེཏནཱ ཝིཡཱཏི ཨེཏེན མནོསཉྩེཏནཱཧཱརཝསེན པཝཏྟམཱནེཧི ཨརཱུཔདྷམྨེཧི རཱུཔཀཱཡསྶ ཨུཔཏྠམྦྷིཏབྷཱཝཾ དསྶེཏི. ཏེནེཝ ‘‘ཨཱཧཱརཱསཱ ཝིཡཱ’’ཏི ཨཝཏྭཱ ཙེཏནཱགཧཎཾ ཀརོཏི.

ཀུསལཱདིབྷཱཝེན ¶ ཨཏྟནཱ སདིསསྶ པཡོགེན ཀརཎཱིཡསྶ པུནཔྤུནཾ ཀརཎཾ པཝཏྟནཾ ཨཱསེཝནཊྛོ, ཨཏྟསདིསསབྷཱཝཏཱཔཱདནཾ ཝཱསནཾ ཝཱ. གནྠཱདཱིསུ པུརིམཱཔུརིམཱབྷིཡོགོ ཝིཡཱཏི པུརིམཱ པུརིམཱ ཨཱསེཝནཱ ཝིཡཱཏི ཨདྷིཔྤཱཡོ.

ཙིཏྟཔྤཡོགོ ཙིཏྟཀིརིཡཱ, ཨཱཡཱུཧནནྟི ཨཏྠོ. ཡཐཱ ཧི ཀཱཡཝཙཱིཔཡོགོ ཝིཉྙཏྟི, ཨེཝཾ ཙིཏྟཔྤཡོགོ ཙེཏནཱ. སཱ ཏཱཡ ཨུཔྤནྣཀིརིཡཏཱཝིསིཊྛེ སནྟཱནེ སེསཔཙྩཡསམཱགམེ པཝཏྟམཱནཱནཾ ཝིཔཱཀཀཊཏྟཱརཱུཔཱནམྤི ཏེནེཝ ཀིརིཡབྷཱཝེན ཨུཔཀཱརིཀཱ ཧོཏི. ཏསྶ ཧི ཀིརིཡབྷཱཝསྶ པཝཏྟཏྟཱ ཏེསཾ པཝཏྟི, ན ཨཉྙཐཱཏི. སཧཛཱཏཱནཾ པན ཏེན ཨུཔཀཱརིཀཱཏི ཀིཾ ཝཏྟབྦནྟི.

ནིརུསྶཱཧསནྟབྷཱཝེནཱཏི ཨེཏེན སཨུསྶཱཧེཧི ཝིཔཱཀདྷམྨདྷམྨེཧི ཀུསལཱཀུསལེཧི སཱརམྨཎཱདིབྷཱཝེན སདིསཝིཔཱཀབྷཱཝཾ དསྶེཏི. སོ ཧི ཝིཔཱཀཱནཾ པཡོགེན ཨསཱདྷེཏབྦཏཱཡ པཡོགེན ཨཉྙཐཱ ཝཱ སེསཔཙྩཡེསུ སིདྡྷེསུ ཀམྨསྶ ཀཊཏྟཱཡེཝ སིདྡྷིཏོ ནིརུསྶཱཧོ སནྟབྷཱཝོ ཧོཏི, ན ཀིལེསཝཱུཔསམསནྟབྷཱཝོ, ཏཐཱསནྟསབྷཱཝཏོཡེཝ བྷཝངྒཱདཡོ དུཝིཉྙེཡྻཱ. པཉྩདྭཱརེཔི ཧི ཛཝནཔྤཝཏྟིཡཱ རཱུཔཱདཱིནཾ གཧིཏཏཱ ཝིཉྙཱཡཏི, ཨབྷིནིཔཱཏསམྤཊིཙྪནསནྟཱིརཎམཏྟཱ པན ཝིཔཱཀཱ དུཝིཉྙེཡྻཱཡེཝ. ནིརུསྶཱཧསནྟབྷཱཝཱཡཱཏི ནིརུསྶཱཧསནྟབྷཱཝཏྠཱཡ. ཨེཏེན ཏཔྤཙྩཡཝཏཾ ཨཝིཔཱཀཱནམྤི ཝིཔཱཀཱནུཀུལཾ པཝཏྟིཾ དསྶེཏི.

སཏིཔི ཛནཀཏྟེ ཨུཔཏྠམྦྷཀཏྟཾ ཨཱཧཱརཱནཾ པདྷཱནཀིཙྩནྟི ཨཱཧ ‘‘རཱུཔཱརཱུཔཱནཾ ཨུཔཏྠམྦྷཀཏྟེནཱ’’ཏི. ཨུཔཏྠམྦྷཀཏྟཉྷི སཏིཔི ཛནཀཏྟེ ཨརཱུཔཱིནཾ ཨཱཧཱརཱནཾ ཨཱཧཱརཛརཱུཔསམུཊྛཱཔཀརཱུཔཱཧཱརསྶ ཙ ཧོཏི, ཨསཏིཔི ཙཏུསམུཊྛཱནིཀརཱུཔཱུཔཏྠམྦྷཀརཱུཔཱཧཱརསྶ, ཨསཏི པན ཨུཔཏྠམྦྷཀཏྟེ ཨཱཧཱརཱནཾ ཛནཀཏྟཾ ནཏྠཱིཏི ཨུཔཏྠམྦྷཀཏྟཾ པདྷཱནཾ. ཛནཡམཱནོཔི ཧི ¶ ཨཱཧཱརོ ཨཝིཙྪེདཝསེན ཨུཔཏྠམྦྷཡམཱནོཡེཝ ཛནེཏཱིཏི ཨུཔཏྠམྦྷནབྷཱཝོ ཨཱཧཱརབྷཱཝོཏི.

ཨདྷིཔཏིཡཊྛེནཱཏི ཨེཏྠ ན ཨདྷིཔཏིཔཙྩཡདྷམྨཱནཾ ཝིཡ པཝཏྟིནིཝཱརཀེ ཨབྷིབྷཝིཏྭཱ པཝཏྟནེན གརུབྷཱཝོ ཨདྷིཔཏིཡཊྛོ, ཨཐ ཁོ དསྶནཱདིཀིཙྩེསུ ཙཀྑུཝིཉྙཱཎཱདཱིཧི ཛཱིཝནེ ཛཱིཝནྟེཧི སུཁིཏཱདིབྷཱཝེ སུཁིཏཱདཱིཧི ཨདྷིམོཀྑཔགྒཧུཔཊྛཱནཱཝིཀྑེཔཛཱནནེསུ ཨནཉྙཱཏཉྙསྶཱམཱིཏི པཝཏྟིཡཾ ཨཱཛཱནནེ ཨཉྙཱཏཱཝཱིབྷཱཝེ ཙ སདྡྷཱདིསཧཛཱཏེཧཱིཏི ཨེཝཾ ཏཾཏཾཀིཙྩེསུ ¶ ཙཀྑཱདིཔཙྩཡེཧི ཙཀྑཱདཱིནཾ ཨནུཝཏྟནཱིཡཏཱ. ཏེསུ ཏེསུ ཧི ཀིཙྩེསུ ཙཀྑཱདཱིནཾ ཨིསྶརིཡཾ ཏཔྤཙྩཡཱནཉྩ ཏདནུཝཏྟནེན ཏཏྠ པཝཏྟཱིཏི. ཨིཏྠིཔུརིསིནྡྲིཡཱནཾ པན ཡདིཔི ལིངྒཱདཱིཧི ཨནུཝཏྟནཱིཡཏཱ ཨཏྠི, སཱ པན ན པཙྩཡབྷཱཝཏོ. ཡཐཱ ཧི ཛཱིཝིཏཱཧཱརཱ ཡེསཾ པཙྩཡཱ ཧོནྟི, ཏེ ཏེསཾ ཨནུཔཱལཀཨུཔཏྠམྦྷཀཱ ཨཏྠི, ཨཝིགཏཔཙྩཡབྷཱུཏཱ ཙ ཧོནྟི, ན ཨེཝཾ ཨིཏྠིཔུརིསབྷཱཝཱ ལིངྒཱདཱིནཾ ཀེནཙི པཀཱརེན ཨུཔཀཱརཀཱ ཧོནྟི, ཀེཝལཾ པན ཡཐཱསཀེཧེཝ པཙྩཡེཧི པཝཏྟམཱནཱནཾ ལིངྒཱདཱིནཾ ཡཐཱ ཨིཏྠཱདིགྒཧཎསྶ པཙྩཡབྷཱཝོ ཧོཏི, ཏཏོ ཨཉྙེནཱཀཱརེན ཏཾསཧིཏསནྟཱནེ ཨཔྤཝཏྟིཏོ ལིངྒཱདཱིཧི ཨནུཝཏྟནཱིཡཏཱ ཨིནྡྲིཡཏཱ ཙ ཏེསཾ ཝུཙྩཏི, ཏསྨཱ ན ཏེསཾ ཨིནྡྲིཡཔཙྩཡབྷཱཝོ ཝུཏྟོ. ཙཀྑཱདཡོ ཨརཱུཔདྷམྨཱནཾཡེཝཱཏི ཨེཏྠ སུཁདུཀྑིནྡྲིཡཱནིཔི ཙཀྑཱདིགྒཧཎེན གཧིཏཱནཱིཏི དཊྛབྦཱནི.

ལཀྑཎཱརམྨཎཱུཔནིཛ྄ཛྷཱནབྷཱུཏཱནཾ ཝིཏཀྐཱདཱིནཾ ཝིཏཀྐནཱདིཝསེན ཨཱརམྨཎཾ ཨུཔགནྟྭཱ ནིཛ྄ཛྷཱནཾ པེཀྑནཾ, ཙིནྟནཾ ཝཱ ཝིཏཀྐཱདཱིནཾཡེཝ སཱདྷཱརཎོ བྱཱཔཱརོ ཨུཔནིཛ྄ཛྷཱཡནཊྛོ. ཋཔེཏྭཱ སུཁདུཀྑཝེདནཱདྭཡནྟི སུཁིནྡྲིཡདུཀྑིནྡྲིཡདྭཡཾ ཋཔེཏྭཱཏི ཨདྷིཔྤཱཡོ. ‘‘སབྦཱནིཔཱི’’ཏི ཝཏྭཱ ‘‘སཏྟཛྷཱནངྒཱནཱི’’ཏི ཝཙནེན ཨཛྷཱནངྒཱནཾ ཨུཔེཀྑཱཙིཏྟེཀགྒཏཱནཾ ནིཝཏྟནཾ ཀཏནྟི དཊྛབྦཾ. ཡདི ཨེཝཾ ‘‘སཏྟ ཛྷཱནངྒཱནཱི’’ཏི ཨེཏེནེཝ སིདྡྷེ ‘‘ཋཔེཏྭཱ སུཁདུཀྑཝེདནཱདྭཡ’’ནྟི ཀསྨཱ ཝུཏྟཾ? ཝེདནཱབྷེདེསུ པཉྩསུ སུཁདུཀྑདྭཡསྶ ཨེཀནྟེན ཨཛྷཱནངྒཏྟདསྶནཏྠཾ ཛྷཱནངྒཊྛཱནེ ནིདྡིཊྛཏྟཱ. སཏིཔི ཝཱ ཛྷཱནངྒཝོཧཱརེ ཝེདནཱབྷེདདྭཡསྶ ཨེཀནྟེན ཛྷཱནཔཙྩཡཏྟཱབྷཱཝདསྶནཏྠཾ. ཨུཔེཀྑཱཙིཏྟེཀགྒཏཱནཾ པན ཡདིཔི ཛྷཱནཔཙྩཡཏྟཱབྷཱཝོ ཨཏྠི, ཛྷཱནཔཙྩཡབྷཱཝོ པན ན ནཏྠཱིཏི ‘‘སབྦཱནིཔི སཏྟ ཛྷཱནངྒཱནཱི’’ཏི ཨེཏྠ གཧཎཾ ¶ ཀཏཾ. ཏཏྠ ‘‘སབྦཱནིཔཱི’’ཏི ཝཙནཾ སབྦཀུསལཱདིབྷེདསངྒཎྷནཏྠཾ, ན པན སབྦཙིཏྟུཔྤཱདགཏསངྒཎྷནཏྠནྟི དཊྛབྦཾ.

ཡཏོ ཏཏོ ཝཱཏི སམྨཱ ཝཱ མིཙྪཱ ཝཱཏི ཨཏྠོ. ཨེཏེ པན དྭེཔི ཛྷཱནམགྒཔཙྩཡཱ ཨཧེཏུཀཙིཏྟེསུ ན ལབྦྷནྟཱིཏི ཨིདཾ ཨཧེཏུཀཙིཏྟེསུ ན ལབྦྷནྟི, ན སཧེཏུཀཙིཏྟེསཱུཏི སཧེཏུཀཙིཏྟེསུ ཨལཱབྷཱབྷཱཝདསྶནཏྠཾ ཝུཏྟཾ, ན ཨཧེཏུཀཙིཏྟེསུ ལཱབྷཱབྷཱཝདསྶནཏྠནྟི. ཨེཝཾ ཨཏྠེ གཡ྄ཧམཱནེ ཨཧེཏུཀཙིཏྟེསུ ཀཏྠཙི ཀསྶཙི ལཱབྷོ ན ཝཱརིཏོཏི ཨེཏྟཀམེཝ ཝིཉྙཱཡེཡྻ, ན སཝིཏཀྐཱཧེཏུཀཙིཏྟེསུ ཛྷཱནཔཙྩཡསྶེཝ ཨལཱབྷཱབྷཱཝདསྶནཏྠཾ ཀཏནྟི. ཨཧེཏུཀཙིཏྟེསུ ཝཱ ལཱབྷཱབྷཱཝདསྶནཏྠེ པན ཨིམསྨིཾ ཝཙནེ སཝིཏཀྐཱཧེཏུཀཙིཏྟེསུ ཛྷཱནཔཙྩཡསྶ ལཱབྷཱབྷཱཝོ ཨཱཔཛྫཏི, ཏསྨཱ ཡེན ཨལཱབྷེན དྷམྨསངྒཎིཡཾ མནོདྷཱཏུཨཱདཱིནཾ སངྒཧསུཉྙཏཝཱརེསུ ཛྷཱནཾ ན ཨུདྡྷཊཾ ¶ , ཏཾ ཨལཱབྷཾ སནྡྷཱཡ ཨེས ཛྷཱནཔཙྩཡསྶཔི ཨཧེཏུཀཙིཏྟེསུ ཨལཱབྷོ ཝུཏྟོཏི ཝེདིཏབྦོ. ཡཐཱ ཧི སཧེཏུཀེསུ ཝིཏཀྐཱདཱིནཾ སཧཛཱཏེ སཾཀཌྜྷིཏྭཱ ཨེཀཏྟགཏབྷཱཝཀརཎཾ ཨུཔནིཛ྄ཛྷཱཡནབྱཱཔཱརོ བལཝཱ, ན ཏཐཱ ཨཧེཏུཀཙིཏྟེསུ ཧོཏི. ཨིམསྨིཾ པན པཀརཎེ དུབྦལམྤི ཨུཔནིཛ྄ཛྷཱཡནཾ ཡདིཔི ཀིཉྩིམཏྟམྤི ཨཏྠི, ཏེན ཨུཔཀཱརཀཏཱ ཧོཏཱིཏི སཝིཏཀྐཱཧེཏུཀཙིཏྟེསུཔི ཛྷཱནཔཙྩཡོ ཝུཏྟོཝ, ཏསྨཱ ཡེ ཨེཝཾ པཋནྟི ‘‘ན ཨེཏེ པན དྭེཔི ཛྷཱནམགྒཔཙྩཡཱ ཡཐཱསངྑྱཾ དྭིཔཉྩཝིཉྙཱཎཨཧེཏུཀཙིཏྟེསུ ལབྦྷནྟཱི’’ཏི, ཏེསཾ སོ པཱཋོ སུནྡརཏརོ, ཨིམསྶ པཀརཎསྶཱཡཾ ཨཏྠཝཎྞནཱ, ན དྷམྨསངྒཎིཡཱཏི.

སམཾ པཀཱརེཧི ཡུཏྟཏཱཡ ཨེཀཱིབྷཱཝོཔགམེན ཝིཡ ཨུཔཀཱརཀཏཱ སམྤཡུཏྟཔཙྩཡཏཱ.

ཡུཏྟཱནམྤི སཏཾ ཝིཔྤཡུཏྟབྷཱཝེན ནཱནཏྟཱུཔགམེན ཨུཔཀཱརཀཏཱ ཝིཔྤཡུཏྟཔཙྩཡཏཱ. ན ཧི ཝཏྠུསཧཛཱཏཔཙྪཱཛཱཏཝསེན ཨཡུཏྟཱནཾ རཱུཔཱདཱིནཾ ཨཱརམྨཎཱདིབྷཱཝེན ཨུཔཀཱརཀཱནཾ ཝིཔྤཡུཏྟཱནཾ ཝིཔྤཡུཏྟཔཙྩཡཏཱ ཨཏྠཱིཏི. རཱུཔཱནཾ པན རཱུཔེཧི སཏིཔི ཨཝིནིབྦྷོགེ ཝིཔྤཡོགོཡེཝ ནཏྠཱིཏི ན ཏེསཾ ཝིཔྤཡུཏྟཔཙྩཡཏཱ. ཝུཏྟཉྷི ‘‘ཙཏཱུཧི སམྤཡོགོ ཙཏཱུཧི ཝིཔྤཡོགོ’’ཏི (དྷཱཏུ. ༣).

པཙྩུཔྤནྣལཀྑཎེནཱཏི ¶ པཙྩུཔྤནྣསབྷཱཝེན. ཏེན ‘‘ཨཏྠི མེ པཱཔཀམྨཾ ཀཏ’’ནྟི (པཱརཱ. ༣༨), ‘‘ཨཏྠེཀཙྩོ པུགྒལོ ཨཏྟཧིཏཱཡ པཊིཔནྣོ’’ཏི (པུ. པ. མཱཏིཀཱ ༤.༢༤) ཙ ཨེཝམཱདཱིསུ ཝུཏྟཾ ནིབྦཏྟཨུཔལབྦྷམཱནཏཱལཀྑཎཾ ཨཏྠིབྷཱཝཾ ནིཝཱརེཏི. སཏིཔི ཛནཀཏྟེ ཨུཔཏྠམྦྷཀཔྤདྷཱནཱ ཨཏྠིབྷཱཝེན ཨུཔཀཱརཀཏཱཏི ཨཱཧ ‘‘ཨུཔཏྠམྦྷཀཏྟེནཱ’’ཏི. ཨིདཉྩ ཨུཔཏྠམྦྷཀཏྟཾ ཝཏྠཱརམྨཎསཧཛཱཏཱདཱིནཾ སཱདྷཱརཎཾ ཨཏྠིབྷཱཝེན ཨུཔཀཱརཀཏྟཾ དཊྛབྦཾ.

ཨཱརམྨཎེ ཕུསནཱདིཝསེན ཝཏྟམཱནཱནཾ ཕསྶཱདཱིནཾ ཨནེཀེསཾ སཧབྷཱཝོ ནཏྠཱིཏི ཨེཀསྨིཾ ཕསྶཱདིསམུདཱཡེ སཏི དུཏིཡོ ན ཧོཏི, ཨསཏི པན ཧོཏི, ཏེན ནཏྠིབྷཱཝེན ཨུཔཀཱརཀཏཱ ནཏྠིཔཙྩཡཏཱ. སཏིཔི པུརིམཏརཙིཏྟཱནཾ ནཏྠིབྷཱཝེ ན ཏཱནི ནཏྠིབྷཱཝེན ཨུཔཀཱརཀཱནི, ཨནནྟརམེཝ པན ཨཏྟནོ ཨཏྠིབྷཱཝེན པཝཏྟིཨོཀཱསཾ ཨལབྷམཱནཱནཾ ནཏྠིབྷཱཝེན པཝཏྟིཨོཀཱསཾ དདམཱནཾ ཝིཡ ཨུཔཀཱརཀཾ ཧོཏཱིཏི ‘‘པཝཏྟིཨོཀཱསདཱནེན ཨུཔཀཱརཀཏཱ’’ཏི ཨཱཧ.

ཨེཏྠ ཙ ཨབྷཱཝམཏྟེན ཨུཔཀཱརཀཏཱ ཨོཀཱསདཱནཾ ནཏྠིཔཙྩཡཏཱ, སབྷཱཝཱཝིགམེན ཨཔྤཝཏྟམཱནཱནཾ ¶ སབྷཱཝཝིགམེན ཨུཔཀཱརཀཏཱ ཝིགཏཔཙྩཡཏཱ, ནཏྠིཏཱ ཙ ནིརོདྷཱནནྟརསུཉྙཏཱ, ཝིགཏཏཱ ནིརོདྷཔྤཏྟཏཱ, ཨཡམེཏེསཾ ཝིསེསོ, ཏཐཱ ཨཏྠིཏཱཡ སསབྷཱཝཏོ ཨུཔཀཱརཀཏཱ ཨཏྠིཔཙྩཡཏཱ, སབྷཱཝཱཝིགམེན ནིརོདྷསྶ ཨཔྤཏྟིཡཱ ཨུཔཀཱརཀཏཱ ཨཝིགཏཔཙྩཡཏཱཏི པཙྩཡབྷཱཝཝིསེསོ དྷམྨཱཝིསེསེཔི ཝེདིཏབྦོ. དྷམྨཱནཉྷི སཏྟིཝིསེསཾ སབྦཾ ཡཱཐཱཝཏོ ཨབྷིསམྦུཛ྄ཛྷིཏྭཱ ཏཐཱགཏེན ཙཏུཝཱིསཏིཔཙྩཡཝིསེསཱ ཝུཏྟཱཏི བྷགཝཏི སདྡྷཱཡ ‘‘ཨེཝཾཝིསེསཱ ཨེཏེ དྷམྨཱ’’ཏི སུཏམཡཉཱཎཾ ཨུཔྤཱདེཏྭཱ ཙིནྟཱབྷཱཝནཱམཡེཧི ཏདབྷིསམཡཱཡ ཡོགོ ཀཱཏབྦོ.

ཙཏཱུསུ ཁནྡྷེསུ ཨེཀསྶཔི ཨསངྒཧིཏཏྟཱབྷཱཝཏོ ནཱམདྷམྨེཀདེསཏཱ ཨནནྟརཱདཱིནཾ ནཏྠཱིཏི ‘‘ནཱམདྷམྨཱཝཱ’’ཏི ཝཏྭཱ ན ཀེཝལཾ པཙྩཡཔཙྩཡུཔྤནྣབྷཱཝེ བྷཛནྟཱནཾ ཙཏུནྣཾཡེཝ ཁནྡྷཱནཾ ནཱམཏཱ, ཨཐ ཁོ ནིབྦཱནཉྩ ནཱམམེཝཱཏི དསྶེནྟོ ‘‘ནིབྦཱནསྶ ཨསངྒཧིཏཏྟཱ’’ཏིཨཱདིམཱཧ. པུརེཛཱཏཔཙྩཡོ རཱུཔེཀདེསོཏི ཨེཏྠ ཨེཀདེསཝཙནེན རཱུཔརཱུཔཏོ ¶ ཨཉྙཾ ཝཛྫེཏི, རཱུཔརཱུཔཾ པན ཀུསལཏྟིཀེ ཨནཱགཏམྤི པུརེཛཱཏཔཙྩཡབྷཱཝེན ཨཉྙཏྠ ཨཱགཏམེཝ. ཝུཏྟཉྷི ‘‘ཨནིདསྶནཨཔྤཊིགྷོ དྷམྨོ ཨནིདསྶནཨཔྤཊིགྷསྶ དྷམྨསྶ པུརེཛཱཏཔཙྩཡེན པཙྩཡོ – ཨཱརམྨཎཔུརེཛཱཏཾ, ཝཏྠུཔུརེཛཱཏཾ. ཨཱརམྨཎཔུརེཛཱཏཾ ཝཏྠུཾ ཨིཏྠིནྡྲིཡཾ པུརིསིནྡྲིཡཾ ཨཱཔོདྷཱཏུཾ ཀབལཱི༹ཀཱརཾ ཨཱཧཱརཾ ཨནིཙྩཏོ…པེ… དོམནསྶཾ ཨུཔྤཛྫཏཱི’’ཏི (པཊྛཱ. ༢.༢༢.༣༩).

༡. ཡོ ཧེཏུཔཙྩཡོཏི ཨུདྡིཊྛོ, སོ ཨེཝཾ ཝེདིཏབྦོཏི ཨེཏེན ཧེཏུསངྑཱཏསྶ པཙྩཡདྷམྨསྶ ཧེཏུསམྤཡུཏྟཀཏཾསམུཊྛཱནརཱུཔསངྑཱཏཱནཾ པཙྩཡུཔྤནྣཱནཾ ཧེཏུཔཙྩཡེན པཙྩཡབྷཱཝོ ཧེཏུཔཙྩཡོཏི ཨུདྡིཊྛོཏི. ཡོ པན ཧེཏུབྷཱཝེན ཡཐཱཝུཏྟོ པཙྩཡདྷམྨོ ཡཐཱཝུཏྟཱནཾ པཙྩཡུཔྤནྣཱནཾ པཙྩཡོ ཧོཏི, སོ ཧེཏུཔཙྩཡོཏི ཨུདྡིཊྛོཏི ཝེདིཏབྦོཏི དསྶེཏི. ཨུབྷཡཐཱཔི ཧེཏུབྷཱཝེན ཨུཔཀཱརཀཏཱ ཧེཏུཔཙྩཡོཏི ཨུདྡིཊྛོཏི དསྶིཏཾ ཧོཏི. ཨེས ནཡོ སེསཔཙྩཡེསུཔི. ཨུཔཀཱརཀཏཱ པན དྷམྨསབྷཱཝོ ¶ ཨེཝ, ན དྷམྨཏོ ཨཉྙཱ ཨཏྠཱིཏི. ཏཐཱ ཏཐཱ ཨུཔཀཱརཀཾ ཏཾ ཏཾ དྷམྨཾ དསྶེནྟོ ཧི བྷགཝཱ ཏཾ ཏཾ ཨུཔཀཱརཀཏཾ དསྶེཏཱིཏི.

ཧེཏཱུ ཧེཏུསམྤཡུཏྟཀཱནནྟི ཨེཏྠ པཋམོ ཧེཏུ-སདྡོ པཙྩཏྟནིདྡིཊྛོ པཙྩཡནིདྡེསོ. ཏེན ཨེཏསྶ ཧེཏུབྷཱཝེན ཨུཔཀཱརཀཏཱ ཧེཏུཔཙྩཡཏཱཏི དསྶེཏི. དུཏིཡོ པཙྩཡུཔྤནྣཝིསེསནཾ. ཏེན ན ཡེསཾ ཀེསཉྩི སམྤཡུཏྟཀཱནཾ ཧེཏུཔཙྩཡབྷཱཝེན པཙྩཡོ ཧོཏི, ཨཐ ཁོ ཧེཏུནཱ སམྤཡུཏྟཱནམེཝཱཏི དསྶེཏི. ནནུ ཙ སམྤཡུཏྟསདྡསྶ སཱཔེཀྑཏྟཱ དུཏིཡེ ཧེཏུསདྡེ ཨཝིཛྫམཱནེཔི ཨཉྙསྶ ཨཔེཀྑིཏབྦསྶ ཨནིདྡིཊྛཏྟཱ ཨཏྟནཱཝ སམྤཡུཏྟཀཱནཾ ཧེཏུཔཙྩཡེན པཙྩཡོཏི ཨཡམཏྠོ ཝིཉྙཱཡཏཱིཏི? ནཱཡཾ ཨེཀནྟོ. ཧེཏུསདྡོ ཧི པཙྩཏྟནིདྡིཊྛོ ‘‘ཧེཏུཔཙྩཡེན པཙྩཡོ’’ཏི ཨེཏྠེཝ བྱཱཝཊོ ཡདཱ གཡ྄ཧཏི ¶ , ཏདཱ སམྤཡུཏྟཝིསེསནཾ ན ཧོཏཱིཏི སམྤཡུཏྟཱ ཨཝིསིཊྛཱ ཡེ ཀེཙི གཧིཏཱ བྷཝེཡྻུནྟི ཨེཝཾ སམྤཡུཏྟསདྡེན ཨཏྟནི ཨེཝ བྱཱཝཊེན ཧེཏུསདྡེན ཝིསེསནེན ཝིནཱ ཡེསཾ ཀེསཉྩི སམྤཡུཏྟཱནཾ གཧཎཾ ཧོཏཱིཏི ཏཾ སནྡྷཱཡ ‘‘ཨཐཱཔི…པེ… ཨཏྠོ བྷཝེཡྻཱ’’ཏི ཨཱཧ. ནནུ ཡཐཱ ‘‘ཨརཱུཔིནོ ཨཱཧཱརཱ སམྤཡུཏྟཀཱནཾ དྷམྨཱན’’ནྟི (པཊྛཱ. ༡.༡.༡༥), ‘‘ཨརཱུཔིནོ ཨིནྡྲིཡཱ སམྤཡུཏྟཀཱན’’ནྟི (པཊྛཱ. ༡.༡.༡༦) ཙ ཝུཏྟེ དུཏིཡེན ཨཱཧཱརགྒཧཎེན ཨིནྡྲིཡགྒཧཎེན ཙ ཝིནཱཔི ཨཱཧཱརིནྡྲིཡསམྤཡུཏྟཀཱཝ གཡ྄ཧནྟི, ཨེཝམིདྷཱཔི སིཡཱཏི? ན, ཨཱཧཱརིནྡྲིཡཱསམྤཡུཏྟསྶ ཨབྷཱཝཏོ. ཝཛྫེཏབྦཱབྷཱཝཏོ ཧི ཏཏྠ དུཏིཡཨཱཧཱརིནྡྲིཡགྒཧཎེ ཨསཏིཔི ཏཾསམྤཡུཏྟཀཱཝ གཡ྄ཧནྟཱིཏི ཏཾ ན ཀཏཾ, ཨིདྷ པན ཝཛྫེཏབྦཾ ཨཏྠཱིཏི ཝཏྟབྦཾ དུཏིཡཾ ཧེཏུགྒཧཎནྟི.

ཨེཝམྤི ཧེཏཱུ ཧེཏུསམྤཡུཏྟཀཱནནྟི ཨེཏྠ ཧེཏུསམྤཡུཏྟཀཱནཾ སོ ཨེཝ སམྤཡུཏྟཀཧེཏཱུཏི ཝིསེསནསྶ ཨཀཏཏྟཱ ཡོ ཀོཙི ཧེཏུ ཡསྶ ཀསྶཙི ཧེཏུསམྤཡུཏྟཀསྶ ཧེཏུཔཙྩཡེན པཙྩཡོཏི ཨཱཔཛྫཏཱིཏི? ནཱཔཛྫཏི, པཙྩཏྟནིདྡིཊྛསྶེཝ ཧེཏུསྶ པུན སམྤཡུཏྟཝིསེསནབྷཱཝེན ཝུཏྟཏྟཱ, ཨེཏདཏྠམེཝ ཙ ཝིནཱཔི དུཏིཡེན ཧེཏུསདྡེན ཧེཏུསམྤཡུཏྟབྷཱཝེ སིདྡྷེཔི ཏསྶ གཧཎཾ ཀཏཾ. ཨཐ ཝཱ ཨསཏི དུཏིཡེ ཧེཏུསདྡེ ཧེཏུསམྤཡུཏྟཀཱནཾ ཧེཏུཔཙྩཡེན པཙྩཡོ, ན པན ཧེཏཱུནནྟི ཨེཝམྤི གཧཎཾ སིཡཱཏི ཏནྣིཝཱརཎཏྠཾ སོ ཝུཏྟོ, ཏེན ཧེཏུསམྤཡུཏྟབྷཱཝཾ ཡེ ལབྷནྟི, ཏེསཾ སབྦེསཾ ཧེཏཱུནཾ ཨཉྙེསམྤི ཧེཏུཔཙྩཡེན པཙྩཡོཏི དསྶིཏཾ ཧོཏི. ཡསྨཱ པན ཧེཏུཛྷཱནམགྒཱ པཏིཊྛཱམཏྟཱདིབྷཱཝེན ནིརཔེཀྑཱ, ན ཨཱཧཱརིནྡྲིཡཱ ཝིཡ སཱཔེཀྑཱ ཨེཝ, ཏསྨཱ ཨེཏེསྭེཝ དུཏིཡཾ ཧེཏཱདིགྒཧཎཾ ཀཏཾ. ཨཱཧཱརིནྡྲིཡཱ པན ཨཱཧརིཏབྦཨིསིཏབྦཱཔེཀྑཱ ཨེཝ, ཏསྨཱ ¶ ཏེ ཝིནཱཔི དུཏིཡེན ཨཱཧཱརིནྡྲིཡགྒཧཎེན ཨཏྟནཱ ཨེཝ ཨཱཧརིཏབྦེ ཙ ཨིསིཏབྦེ ཙ ཨཱཧཱརིནྡྲིཡབྷཱུཏེ ཨཉྙེ ཙ སམྤཡུཏྟཀེ པརིཙྪིནྡནྟཱིཏི ཏཾ ཏཏྠ ན ཀཏཾ, ཨིདྷ ཙ དུཏིཡེན ཧེཏུགྒཧཎེན པཙྩཡུཔྤནྣཱནཾ ཧེཏུནཱ པཙྩཡབྷཱུཏེནེཝ སམྤཡུཏྟཱནཾ ཧེཏཱུནཾ ཨཉྙེསཉྩ པརིཙྪིནྣཏྟཱ པུན ཝིསེསནཀིཙྩཾ ནཏྠཱིཏི པཉྷཱཝཱརེ ‘‘ཀུསལཱ ཧེཏཱུ སམྤཡུཏྟཀཱནཾ ཁནྡྷཱན’’ནྟིཨཱདཱིསུ (པཊྛཱ. ༡.༡.༤༠༡) དུཏིཡཾ ཧེཏུགྒཧཎཾ ན ཀཏནྟི དཊྛབྦཾ.

ནིདྡིསིཏབྦསྶ ¶ ཨཔཱཀཊཏྟཱཏི ཏཾ-སདྡོ པུརིམཝཙནཱཔེཀྑོ ཝུཏྟསྶེཝ ནིདྡེསོ ‘‘རཱུཔཱཡཏནཾ ཙཀྑུཝིཉྙཱཎདྷཱཏུཡཱ ཏཾསམྤཡུཏྟཀཱན’’ནྟིཨཱདཱིསུ (པཊྛཱ. ༡.༡.༢) པུརིམཝཙནེན ནིདྡིསིཏབྦེ པཱཀཊཱིབྷཱུཏེ ཨེཝ པཝཏྟཏི. ཨེཏྠ ཙ པཙྩཏྟནིདྡིཊྛོ ཧེཏུསདྡོ ‘‘ཧེཏུཔཙྩཡེན པཙྩཡོ’’ཏི ཨེཏྠ བྱཱཝཊོ སམྤཡུཏྟསདྡེན ཝིཡ ཏཾ-སདྡེནཔི ཨནཔེཀྑནཱིཡོ ཨཉྙོ ཙ ཀོཙི ནིདྡིསིཏབྦཔྤཀཱསཀོ ཝུཏྟོ ནཏྠི, ཏསྨཱ ‘‘ཏཾསམྤཡུཏྟཀཱན’’ནྟི ཙ ན ཝུཏྟནྟི ཨདྷིཔྤཱཡོ.

‘‘ཧེཏུསམྤཡུཏྟཀཱན’’ནྟི ཨིམིནཱ པན པཙྩཡུཔྤནྣཝཙནེན ཨསམཏྟེན པཙྩཡུཔྤནྣཝཙནནྟརཱཔེཀྑེན པུབྦེ ཝུཏྟེན ཏཾ-སདྡེན ནིདྡིསིཏབྦཾ པཱཀཊཱིཀཏཾ, ཏེན ‘‘ཏཾསམུཊྛཱནཱན’’ནྟི ཨེཏྠ ཏཾགཧཎཾ ཀཏནྟི. ཀིཾ པན ཏསྨིཾ ཧེཏུསམྤཡུཏྟཀསདྡེ ཏཾ-སདྡེན ནིདྡིསིཏབྦཾ པཱཀཊཱིབྷཱུཏནྟི? ཡེཧི ཧེཏཱུཧི སམྤཡུཏྟཱ ‘‘ཧེཏུསམྤཡུཏྟཀཱ’’ཏི ཝུཏྟཱ, ཏེ ཧེཏཱུ ཙེཝ སམྤཡུཏྟཀཝིསེསནབྷཱུཏཱ ཏབྦིསེསིཏཱ ཙ ཧེཏུསམྤཡུཏྟཀཱ. ཏེནཱཧ ‘‘ཏེ ཧེཏཱུ ཙེཝཱ’’ཏིཨཱདི. ཨཉྙཐཱ ‘‘ཏེ ཧེཏཱུ ཙེཝཱ’’ཏི ཨེཏསྶ པཙྩཏྟནིདྡིཊྛེན ཧེཏུསདྡེན སམྦནྡྷེ སཏི ཡཐཱ ཨིདྷ ཏེནེཝ ཏཾ-སདྡེན ནིདྡིསིཏབྦཱ པཱཀཊཱ, ཨེཝཾ པུབྦེཔི བྷཝིཏུཾ ཨརཧནྟཱིཏི ‘‘ནིདྡིསིཏབྦསྶ ཨཔཱཀཊཏྟཱ ‘ཏཾསམྤཡུཏྟཀཱན’ནྟི ན ཝུཏྟ’’ནྟི ཨིདཾ ན ཡུཛྫེཡྻཱཏི. དུཝིདྷམྤི ཝཱ ཧེཏུགྒཧཎཾ ཨཔནེཏྭཱ ཏཾསདྡཝཙནཱིཡཏཾ ཙོདེཏི པརིཧརཏི ཙ. ཏཾསམུཊྛཱནཱནནྟི ཙ ཧེཏུསམུཊྛཱནཱནནྟི ཡུཏྟཾ. ཧེཏཱུ ཧི པཙྩཡཱཏི.

ཙིཏྟཛརཱུཔཾ ཨཛནཡམཱནཱཔཱིཏི པི-སདྡེན ཛནཡམཱནཱཔི. ཡདི ‘‘ཙིཏྟསམུཊྛཱནཱན’’ནྟི ཝཙནེན པཊིསནྡྷིཀྑཎེ ཀཊཏྟཱརཱུཔསྶ ཨགྒཧཎཏོ ཏཾ ན ཝུཏྟཾ, སཧཛཱཏཔཙྩཡཝིབྷངྒེ ཙིཏྟཙེཏསིཀཱནཾ ཏསྶ ཀཊཏྟཱརཱུཔསྶ པཙྩཡབྷཱཝོ ན ཝུཏྟོ བྷཝེཡྻ. ཡདི ཙ ཏཏྠ ཙིཏྟསམུཊྛཱནཱནཾ པཙྩཡབྷཱཝེན ཏཾསམཱནལཀྑཎཱནཾ ཀཊཏྟཱརཱུཔཱནམྤི པཙྩཡབྷཱཝོ ནིདསྶིཏོ, ཨེཝམིདྷཱཔི བྷཝིཏབྦཾ. ‘‘ཙིཏྟསམུཊྛཱནཱན’’ནྟི པན ཨཝཏྭཱ ‘‘ཏཾསམུཊྛཱནཱན’’ནྟི ཝཙནཾ ཙིཏྟསམུཊྛཱནཱནཾ ¶ སབྦཙིཏྟཙེཏསིཀསམུཊྛཱནཏཱདསྶནཏྠཾ. ཨེཝཾཔཀཱརེན ཧི ཏཾསམུཊྛཱནཝཙནེན ཏཏྠ ཏཏྠ ཝུཏྟཾ སམུཊྛཱནཝཙནཾ ཝིསེསིཏཾ ཧོཏི. ནནུ ‘‘ཙིཏྟཙེཏསིཀཱ དྷམྨཱ ཙིཏྟསམུཊྛཱནཱན’’ནྟི ཝཙནེན ཙིཏྟསམུཊྛཱནཱནཾ ཙིཏྟཙེཏསིཀསམུཊྛཱནཏཱ ཝུཏྟཱཏི? ན ཝུཏྟཱ. ཙིཏྟཙེཏསིཀཱནཾ པཙྩཡབྷཱཝོ ཨེཝ ཧི ཏཏྠ ཝུཏྟོཏི.

ཙིཏྟཔཊིབདྡྷཝུཏྟིཏཱཡཱཏི ¶ ཨེཏེནེཝ ཧེཏུཨཱདིཔཊིབདྡྷཏཉྩ དསྶེཏི. ‘‘ཡཉྩ, བྷིཀྑཝེ, ཙེཏེཏི, ཡཉྩ པཀཔྤེཏི, ཡཉྩ ཨནུསེཏི, ཨཱརམྨཎམེཏཾ ཧོཏི, ཝིཉྙཱཎསྶ ཋིཏིཡཱ ཨཱརམྨཎེ སཏི པཏིཊྛཱ ཝིཉྙཱཎསྶ ཧོཏི, ཏསྨིཾ པཏིཊྛིཏེ ཝིཉྙཱཎེ ཝིརུལ༹ྷེ ནཱམརཱུཔསྶ ཨཝཀྐནྟི ཧོཏི, ནཱམརཱུཔཔཙྩཡཱ སལཱ༹ཡཏན’’ནྟི (སཾ. ནི. ༢.༣༩) ཨིམསྨིམྤི སུཏྟེ པཊིསནྡྷིནཱམརཱུཔསྶ ཝིཉྙཱཎཔཙྩཡཏཱ ཝུཏྟཱཏི ཨཱཧ ‘‘ཏསྨིཾ པཏིཊྛིཏེ’’ཏིཨཱདི.

པུརིམཏརསིདྡྷཱཡ པཐཝིཡཱ བཱིཛཔཏིཊྛཱནཾ ཝིཡ པུརིམཏརསིདྡྷེ ཀམྨེ ཏནྣིབྦཏྟསྶེཝ ཝིཉྙཱཎབཱིཛསྶ པཏིཊྛཱནཾ ཀམྨསྶ ཀཊཏྟཱ ཨུཔྤཏྟཱིཏི ཝུཏྟཾ ཧོཏི. ཏེནཱཧ – ‘‘ཀམྨཾ ཁེཏྟཾ, ཝིཉྙཱཎཾ བཱིཛ’’ནྟི. ཀསྶ པན ཏཾ ཁེཏྟཾ བཱིཛཉྩཱཏི? ནཱམརཱུཔངྐུརསྶ.

ཨཡཉྩ པནཏྠོཏི པཊིསནྡྷིཡཾ ཀམྨཛརཱུཔཱནཾ ཙིཏྟཔཊིབདྡྷཝུཏྟིཏཱ. ཨོཀཱསཝསེནེཝཱཏི ནཱམརཱུཔོཀཱསཝསེནེཝ. སོ ཧི ཏསྶ ཨཏྠསྶ ཨོཀཱསོཏི. ཝཏྠུརཱུཔམཏྟམྤཱིཏི ཝདནྟོ ཝཏྠུརཱུཔསྶ ཨུཔཏྠམྦྷཀཱནཾ སེསརཱུཔཱནམྤི ཏདུཔཏྠམྦྷཀབྷཱཝེནེཝ ཨརཱུཔདྷམྨཱནཾ པཙྩཡབྷཱཝཾ དསྶེཏི, སཧབྷཝནམཏྟཾ ཝཱ. ཏཏྠ ཀཱཡབྷཱཝཱདིཀལཱཔཱནཾ ཀཏྠཙི ཨབྷཱཝཏོ ཀཏྠཙི ཨབྷཱཝཱབྷཱཝཏོ ‘‘ཝཏྠུརཱུཔམཏྟམྤི ཝིནཱ’’ཏི ཨཱཧ. སསྶཱམིཀེཏི ཨེཏསྶེཝ ཝིསེསནཏྠཾ ‘‘སརཱཛཀེ’’ཏི ཝུཏྟཾ.

པཝཏྟིཡཾ ཀཊཏྟཱརཱུཔཱདཱིནཾ པཙྩཡབྷཱཝཔཊིབཱཧནཏོཏི ཨིདཾ ཀསྨཱ ཝུཏྟཾ, ནནུ ཏེསཾ པཙྩཡབྷཱཝཔྤསངྒོཡེཝ ནཏྠི ‘‘ཧེཏཱུ སཧཛཱཏཱན’’ནྟི (པཊྛཱ. ཨཊྛ. ༡.༡) ཝཙནཏོ. ན ཧི ཡེསཾ ཧེཏཱུ སཧཛཱཏཔཙྩཡོ ན ཧོནྟི, ཏཱནི ཧེཏུསཧཛཱཏཱནི ནཱམ ཧོནྟི. ཡདི སིཡུཾ, ‘‘ཀུསལཾ དྷམྨཾ སཧཛཱཏོ ཨབྱཱཀཏོ དྷམྨོ ཨུཔྤཛྫཏི ན ཧེཏུཔཙྩཡཱ’’ཏིཨཱདི ཙ ལབྦྷེཡྻ, ན པན ལབྦྷཏི, ཏསྨཱ ན ཏཱནི ཧེཏུསཧཛཱཏཱནཱིཏི? སཙྩམེཏཾ, ཡོ པན ཧེཏཱུཧི སམཱནཀཱལུཔྤཏྟིམཏྟཾ གཧེཏྭཱ ཧེཏུསཧཛཱཏབྷཱཝཾ མཉྙེཡྻ, ཏསྶཱཡཾ པསངྒོ ཨཏྠཱིཏི ཨིདཾ ཝུཏྟནྟི དཊྛབྦཾ. བྷགཝཱ པན ཝཙནཱནཾ ལཧུགརུབྷཱཝཾ ན གཎེཏི, བོདྷནེཡྻཱནཾ པན ཨཛ྄ཛྷཱསཡཱནུརཱུཔཏོ དྷམྨསབྷཱཝཾ ¶ ཨཝིལོམེནྟོ ཏཐཱ ཏཐཱ དེསནཾ ནིཡཱམེཏཱིཏི ན ཀཏྠཙི ཨཀྑརཱནཾ བཧུཏཱ ཝཱ ཨཔྤཏཱ ཝཱ ཙོདེཏབྦཱཏི.

ཧེཏུཔཙྩཡནིདྡེསཝཎྞནཱ ནིཊྛིཏཱ.

༢. ཨུཔྤཛྫནཀྑཎེཡེཝཱཏི ¶ ཨེཏེན ཝཏྟམཱནཀྑཎེཀདེསེན སབྦཾ ཝཏྟམཱནཀྑཎཾ གཡ྄ཧཏཱིཏི དཊྛབྦཾ. ན ཧི ཨུཔྤཛྫནཀྑཎེཡེཝ ཙཀྑུཝིཉྙཱཎཱདཱིནཾ རཱུཔཱདཱིནི ཨཱརམྨཎཔཙྩཡོ, ཨཐ ཁོ སབྦསྨིཾ ཝཏྟམཱནཀྑཎེཏི. ཏེན ཨཱལམྦིཡམཱནཱནམྤི རཱུཔཱདཱིནཾ ཙཀྑུཝིཉྙཱཎཱདིཝཏྟམཱནཏཱཡ པུརེ པཙྪཱ ཙ ཝིཛྫམཱནཱནཾ ཨཱརམྨཎཔཙྩཡཏྟཱབྷཱཝཾ དསྶེཏི, ཀོ པན ཝཱདོ ཨནཱལམྦིཡམཱནཱནཾ. ན ཨེཀཏོ ཧོནྟཱིཏི ནཱིལཱདཱིནི སབྦརཱུཔཱནི སཧ ན ཧོནྟི, ཏཐཱ སདྡཱདཡོཔཱིཏི ཨཏྠོ. ‘‘ཡཾ ཡ’’ནྟི ཧི ཝཙནཾ རཱུཔཱདཱིནི བྷིནྡཏཱིཏི. ཏཏྠ པུརིམེནཏྠེན ‘‘ཨུཔྤཛྫནྟཱི’’ཏི ཝཙནེན ཨཱརམྨཎཔཙྩཡབྷཱཝལཀྑཎདཱིཔནཏྠཾ ‘‘ཡཾ ཡཾ དྷམྨ’’ནྟིཨཱདི ཝུཏྟནྟི དསྶེཏི, པཙྪིམེན ‘‘ཡཾ ཡ’’ནྟི ཝཙནེན རཱུཔཱདིབྷེདདཱིཔནཏྠནྟི. ‘‘ཡཾ ཡཾ ཝཱ པནཱརབྦྷཱ’’ཏི ཨེཏསྶ ཝཎྞནཱཡཾ དསྶིཏསབྦཱརམྨཎཱདིཝསེན ཝཱ ཨིདྷཱཔི ཨཏྠོ གཧེཏབྦོཏི.

ཨེཝཾ ཝུཏྟནྟི ཡཐཱ ནདཱིཔབྦཏཱནཾ སནྡནཾ ཋཱནཉྩ པཝཏྟཾ ཨཝིརཏཾ ཨཝིཙྪིནྣནྟི སནྡནྟི ཏིཊྛནྟཱིཏི ཝཏྟམཱནཝཙནཾ ཝུཏྟཾ, ཨེཝཾ ‘‘ཡེ ཡེ དྷམྨཱ’’ཏི ཨཏཱིཏཱནཱགཏཔཙྩུཔྤནྣཱནཾ སབྦསངྒཧསམུདཱཡཝསེན གཧིཏཏྟཱ ཏེསཾ ཨུཔྤཛྫནཾ པཝཏྟནཾ ཨཝིརཏནྟི ཨུཔྤཛྫནྟཱིཏི ཝཏྟམཱནཝཙནཾ ཝུཏྟནྟི ཨདྷིཔྤཱཡོ. ཨིམེ པན ན ཧེཏཱདིཔཙྩཡཱ སབྦེཔི ཨཏཱིཏཱནཱགཏཱནཾ ཧོནྟི. ན ཧི ཨཏཱིཏོ ཙ ཨནཱགཏོ ཙ ཨཏྠི, ཡསྶེཏེ པཙྩཡཱ སིཡུཾ. ཨེཝཉྩ ཀཏྭཱ ཨཏཱིཏཏྟིཀེ ཨཏཱིཏཱནཱགཏཱནཾ ན ཀོཙི པཙྩཡོ ཝུཏྟོ, ཏསྨཱ ཨིདྷཱཔི ‘‘ཨུཔྤཛྫནྟཱི’’ཏི ཝཙནེན ཡེསཾ རཱུཔཱདཡོ ཨཱརམྨཎདྷམྨཱ ཨཱརམྨཎཔཙྩཡཱ ཧོནྟི, ཏེ པཙྩུཔྤནྣཱཝ དསྶིཏཱཏི དཊྛབྦཱ. ཏེསུ ཧི དསྶིཏེསུ ཨཏཱིཏཱནཱགཏེསུ ཏཾཏཾཔཙྩཡཱ ཨཧེསུཾ བྷཝིསྶནྟི ཙཱཏི ཨཡམཏྠོ དསྶིཏོ ཧོཏི, ན པན ཏཾཏཾཔཙྩཡཝནྟཏཱ. པཙྩཡཝནྟོ ཧི པཙྩུཔྤནྣཱཡེཝཱཏི.

ཨེཏྠ ¶ ཙ ‘‘ཡཾ ཡཾ དྷམྨཾ ཨཱརབྦྷཱ’’ཏི ཨེཀཝཙནནིདྡེསཾ ཀཏྭཱ པུན ‘‘ཏེ ཏེ དྷམྨཱ’’ཏི བཧུཝཙནནིདྡེསོ ‘‘ཡཾ ཡ’’ནྟི ཝུཏྟསྶ ཨཱརམྨཎདྷམྨསྶ ཨནེཀབྷཱཝོཔི ཨཏྠཱིཏི དསྶནཏྠོ. ཙཏྟཱརོ ཧི ཁནྡྷཱ སཧེཝ ཨཱརམྨཎཔཙྩཡཱ ཧོནྟི, ཏེ སབྦེཔི ཨཱརབྦྷ ཨུཔྤཛྫམཱནམྤི ཏེསུ ཨེཀེཀཾ ཨཱརབྦྷ ཨུཔྤཛྫམཱནཾ ན ན ཧོཏི, ཏསྨཱ ཝེདནཱདཱིསུ ཕསྶཱདཱིསུ ཙ ཨེཀེཀསྶཔི ཨཱརམྨཎཔཙྩཡབྷཱཝདསྶནཏྠཾ ‘‘ཡཾ ཡ’’ནྟི ཝུཏྟཾ, སབྦེསཾ ཨེཀཙིཏྟུཔྤཱདཔརིཡཱཔནྣཱནཾ ¶ ཨཱརམྨཎཔཙྩཡབྷཱཝདསྶནཏྠཾ ‘‘ཏེ ཏེ’’ཏི. ཏཏྠ ཡོ ཙ རཱུཔཱདིཀོ ཨེཀེཀོཝ ཡཾཡཾ-སདྡེན ཝུཏྟོ, ཡེ ཙ ཨནེཀེ ཕསྶཱདཡོ ཨེཀེཀཝསེན ཡཾཡཾ-སདྡེན ཝུཏྟཱ, ཏེ སབྦེ གཧེཏྭཱ ‘‘ཏེ ཏེ’’ཏི ཝུཏྟནྟི དཊྛབྦཾ. ཨཐ ཝཱ ཡསྨིཾ ཀཱལེ ཨཱརབྦྷ ཨུཔྤཛྫནྟི, ཏསྨིཾ ཀཱལེ ནཱིལཱདཱིསུ ཙིཏྟུཔྤཱདེསུ ཙ ཨེཀེཀམེཝ ཨཱརབྦྷ ཨུཔྤཛྫནྟཱིཏི དསྶནཏྠཾ ‘‘ཡཾ ཡ’’ནྟི ཝུཏྟཾ, ཏེ པན ཨཱལམྦིཡམཱནཱ རཱུཔཱརམྨཎདྷམྨཱ ཙ ཨནེཀེ, ཏཐཱ སདྡཱདིཨཱརམྨཎདྷམྨཱ ཙཱཏི དསྶནཏྠཾ ‘‘ཏེ ཏེ’’ཏི.

ནིབྦཱནཱརམྨཎཾ ཀཱམཱཝཙརརཱུཔཱཝཙརཀུསལསྶ ཨཔརིཡཱཔནྣཏོ ཀུསལཝིཔཱཀསྶ ཀཱམཱཝཙརརཱུཔཱཝཙརཀིརིཡསྶ ཙཱཏི ཨིམེསཾ ཚནྣཾ རཱསཱིནཾ ཨཱརམྨཎཔཙྩཡོ ཧོཏཱིཏི ཨིདཾ པུབྦེནིཝཱསཱནུསྶཏིཉཱཎེན ཁནྡྷཔཊིབདྡྷཱནུསྶརཎཀཱལེ ནིབྦཱནམྤི རཱུཔཱཝཙརཀུསལཀིརིཡཱནཾ ཨཱརམྨཎཾ ཧོཏཱིཏི ཨིམིནཱ ཨདྷིཔྤཱཡེན ཝུཏྟཾ. ཨེཝཾ སཏི ཡཐཱ ‘‘ཨཔྤམཱཎཱ ཁནྡྷཱ པུབྦེནིཝཱསཱནུསྶཏིཉཱཎསྶ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༡༢.༥༨) ཝུཏྟཾ, ཨེཝཾ ‘‘ནིབྦཱན’’ནྟི ཙ ཝཏྟབྦཾ སིཡཱ, ན ཙ ཏཾ ཝུཏྟཾ. ན ཧི ནིབྦཱནཾ པུབྦེ ནིཝུཊྛཾ ཨསངྑཏཏྟཱ, ན ཙ པུབྦེནིཝཱསཱནུསྶཏིཉཱཎེན པུབྦེ ནིཝུཊྛེསུ ཨཔྤམཱཎཀྑནྡྷེསུ ཉཱཏེསུ ནིབྦཱནཛཱནནེ ན ཏེན པཡོཛནཾ ཨཏྠི. ཡཐཱ ཧི ཙེཏོཔརིཡཉཱཎཾ ཙིཏྟཾ ཝིབྷཱཝེནྟམེཝ ཙིཏྟཱརམྨཎཛཱནནསྶ ཀཱམཱཝཙརསྶ པཙྩཡོ ཧོཏི, ཨེཝམིདམྤི ཨཔྤམཱཎཀྑནྡྷེ ཝིབྷཱཝེནྟམེཝ ཏདཱརམྨཎཛཱནནསྶ ཀཱམཱཝཙརསྶ པཙྩཡོ ཧོཏཱིཏི. དིཊྛནིབྦཱནོཡེཝ ཙ པུབྦེ ནིཝུཊྛེ ཨཔྤམཱཎཀྑནྡྷེ ཨནུསྶརཏི, ཏེན ཡཐཱདིཊྛམེཝ ནིབྦཱནཾ ཏེསཾ ཁནྡྷཱནཾ ཨཱརམྨཎནྟི དཊྛབྦཾ, ན པན པུབྦེནིཝཱསཱནུསྶཏིཉཱཎེན ཏདཱརམྨཎཝིབྷཱཝནཾ ཀཱཏབྦཾ. ཝིབྷཱུཏམེཝ ཧི ཏཾ ཏསྶཱཏི. ཨེཝཾ ཨནཱགཏཾསཉཱཎེཔི ཡཐཱརཧཾ ཡོཛེཏབྦཾ, ཏསྨཱ ནིབྦཱནཾ ན ཀསྶཙི རཱུཔཱཝཙརསྶ ཨཱརམྨཎནྟི ‘‘ཙཏུནྣཾ རཱསཱིན’’ནྟི ཝཏྟུཾ ཡུཏྟཾ.

ཨཱརམྨཎཔཙྩཡནིདྡེསཝཎྞནཱ ནིཊྛིཏཱ.

༣. དྷུརནྟི ¶ ¶ དྷུརགྒཱཧཾ. ཛེཊྛཀནྟི སེཊྛཾ. ཚནྡཱདྷིཔཏི ཚནྡསམྤཡུཏྟཀཱནནྟི ཨེཏྠ པུརིམཚནྡསྶ སམཱནརཱུཔེན ཏདནནྟརཾ ནིདྡིཊྛེན ཏཾསམྦནྡྷེན ཚནྡསདྡེནེཝ པཙྩཡབྷཱུཏསྶ ཚནྡསྶ སམྤཡུཏྟཀཝིསེསནབྷཱཝོ དསྶིཏོ ཧོཏཱིཏི ‘‘ཚནྡཱདྷིཔཏི སམྤཡུཏྟཀཱན’’ནྟི ཨཝཏྭཱ ‘‘ཚནྡསམྤཡུཏྟཀཱན’’ནྟི ཝུཏྟནྟི དཊྛབྦཾ. ཨེས ནཡོ ཨིཏརེསུཔི.

གརུཀཱརཙིཏྟཱིཀཱརཝསེན ཝཱཏི ཀུསལཱབྱཱཀཏཱནཾ པཝཏྟིཾ དསྶེཏི. ཨལདྡྷཾ ལདྡྷབྦཾ, ལདྡྷཾ ཨཝིཛཧིཏབྦཾ. ཡེན ཝཱ ཝིནཱ ན བྷཝིཏབྦཾ, ཏཾ ལདྡྷབྦཾ, ཏསྶེཝཏྠོ ཨཝིཛཧིཏབྦནྟི. ཨནཝཉྙཱཏནྟི ཨཝཉྙཱཏམྤི ཨདོསདསྶིཏཱཡ ཨསྶཱདནེན ཨནཝཉྙཱཏཾ ཀཏྭཱ.

མིཙྪཏྟནིཡཏཱ ཨཔྤནཱསདིསཱ མཧཱབལཱ ཝིནཱ ཨདྷིཔཏིནཱ ནུཔྤཛྫནྟཱིཏི ‘‘ཨེཀནྟེནེཝཱ’’ཏི ཨཱཧ. ཀམྨཀིལེསཱཝརཎབྷཱུཏཱ ཙ ཏེ སགྒཱཝརཎཱ ཙ མགྒཱཝརཎཱ ཙ པཙྩཀྑསགྒཱནཾ ཀཱམཱཝཙརདེཝཱནམྤི ཨུཔྤཛྫིཏུཾ ན ཨརཧནྟི, ཀོ པན ཝཱདོ རཱུཔཱརཱུཔཱིནནྟི.

ཀཱམཱཝཙརཱདིབྷེདཏོ པན ཏིཝིདྷོ ཀིརིཡཱརམྨཎཱདྷིཔཏི ལོབྷསཧགཏཱཀུསལསྶེཝ ཨཱརམྨཎཱདྷིཔཏིཔཙྩཡོ ཧོཏཱིཏི ཨིདཾ པརསནྟཱནགཏཱནཾ སཱརམྨཎདྷམྨཱནཾ ‘‘ཨཛ྄ཛྷཏྟཱརམྨཎོ དྷམྨོ བཧིདྡྷཱརམྨཎསྶ དྷམྨསྶ ཨདྷིཔཏིཔཙྩཡེན པཙྩཡོ’’ཏི ཨེཏསྶ ཨབྷཱཝཏོ ‘‘བཧིདྡྷཱརམྨཎོ དྷམྨོ བཧིདྡྷཱརམྨཎསྶཱ’’ཏི ཨེཏྠ ཙ ཨཱརམྨཎཱདྷིཔཏིནོ ཨནུདྡྷཊཏྟཱ ཨདྷིཔཏིཔཙྩཡཏཱ ནཏྠཱིཏི ཝིཉྙཱཡམཱནེཔི ‘‘བཧིདྡྷཱ ཁནྡྷེ གརུཾ ཀཏྭཱ ཨསྶཱདེཏཱི’’ཏིཨཱདིཝཙནཾ (པཊྛཱ. ༢.༢༠.༣༡) ནིསྶཱཡ ཨརཧཏོ ཀིརིཡདྷམྨཱ པུཐུཛྫནཱདཱིཧི གརུཾ ཀཏྭཱ ཨསྶཱདིཡནྟཱིཏི ཨིམིནཱ ཨདྷིཔྤཱཡེན ཝུཏྟནྟི དཊྛབྦཾ. ‘‘སནིདསྶནསཔྤཊིགྷཱ ཁནྡྷཱ’’ཏིཨཱདཱིསུ (པཊྛཱ. ༢.༢༢.༣༠) ཝིཡ ཁནྡྷསདྡོ རཱུཔེ ཨེཝ བྷཝིཏུཾ ཨརཧཏཱིཏི ཝིཙཱརིཏམེཏཾ. པུཐུཛྫནཱདིཀཱལེ ཝཱ ཨནཱགཏེ ཀིརིཡདྷམྨེ གརུཾ ཀཏྭཱ ཨསྶཱདནཾ སནྡྷཱཡེཏཾ ཝུཏྟཾ. ‘‘ནེཝཝིཔཱཀནཝིཔཱཀདྷམྨདྷམྨེ ཁནྡྷེ གརུཾ ཀཏྭཱ ཨསྶཱདེཏི ཨབྷིནནྡཏཱི’’ཏིཨཱདིཝཙནཏོ (པཊྛཱ. ༡.༣.༩༦) ཀིརིཡདྷམྨཱ རཱགདིཊྛཱིནཾ ཨདྷིཔཏིཔཙྩཡོ ཧོནྟེཝ, ཏེ ཙ ‘‘ཨཏཱིཏཱརམྨཎེ ཨནཱགཏེ ཁནྡྷེ གརུཾ ཀཏྭཱ ཨསྶཱདེཏཱི’’ཏིཨཱདིཝཙནཏོ ¶ (པཊྛཱ. ༢.༡༩.༢༣) ཨནཱགཏཱ ཏེབྷཱུམཀཱཔི ཨདྷིཔཏིཔཙྩཡོ ཧོནྟཱིཏི. ཨཱཝཛྫནཀིརིཡསབྦྷཱཝཏོ པན ཨིདམྤི ཝིཙཱརེཏབྦཾ.

ཨདྷིཔཏིཔཙྩཡནིདྡེསཝཎྞནཱ ནིཊྛིཏཱ.

༤. ཡཐཱ ¶ ཨོཀཱསདཱནཝིསེསབྷཱཝེན ནཏྠིཝིགཏཱ ཝུཏྟཱ, ན ཨེཝཾ ཨནནྟརསམནནྟརཱ, ཨེཏེ པན ཙིཏྟནིཡཱམཧེཏུཝིསེསབྷཱཝེན ཝུཏྟཱ, ཏསྨཱ ཏཾ ཙིཏྟནིཡཱམཧེཏུཝིསེསབྷཱཝཾ དསྶེནྟོ ‘‘ཙཀྑུཝིཉྙཱཎདྷཱཏཱུ’’ཏིཨཱདིནཱ དྷཱཏུཝསེན ཀུསལཱདིཝསེན ཙ ནིདྡེསམཱཧ. ཏཏྠ ‘‘མནོཝིཉྙཱཎདྷཱཏུ མནོཝིཉྙཱཎདྷཱཏུཡཱ’’ཏི ཝུཏྟེ པཙྩཡཔཙྩཡུཔྤནྣཝིསེསོ ན ཝིཉྙཱཡཏཱིཏི ‘‘པུརིམཱ པུརིམཱ པཙྪིམཱཡ པཙྪིམཱཡཱ’’ཏི ཝཏྟབྦཾ སིཡཱ. ཏཐཱ ཙ སཏི དྷཱཏུཝིསེསེན ཙིཏྟཝིསེསེ དསྶནཾ ཡཾ ཀཱཏུཾ ཨཱརདྡྷོ, ཏཾ ཝོཙྪིཛྫེཡྻ. ‘‘མནོཝིཉྙཱཎདྷཱཏུ མནོདྷཱཏུཡཱ’’ཏི ཨིདམྤི ན སཀྐཱ ཝཏྟུཾ ནིཡཱམཱབྷཱཝཏོ, ‘‘མནོདྷཱཏུ ཙཀྑུཝིཉྙཱཎདྷཱཏུཡཱ’’ཏི ཙ ཏཐེཝ ན སཀྐཱ. ན ཧི མནོདྷཱཏུ ཙཀྑུཝིཉྙཱཎདྷཱཏུཡཱཡེཝ ཨནནྟརཔཙྩཡོཏི ནིཡཱམོ ཨཏྠི, ཏསྨཱ པཱཀཊཱ པཉྩཝིཉྙཱཎདྷཱཏུཡོ ཨཱདིཾ ཀཏྭཱ ཡཱཝ དྷཱཏུཝིསེསནིཡཱམོ ཨཏྠི, ཏཱཝ ནིདསྶནེན ནཡཾ དསྶེཏྭཱ པུན ནིརཝསེསདསྶནཏྠཾ ‘‘པུརིམཱ པུརིམཱ ཀུསལཱ’’ཏིཨཱདིམཱཧ. སདིསཀུསལཱནནྟི ཝེདནཱཡ ཝཱ ཧེཏཱུཧི ཝཱ སདིསཀུསལཱནཾ ཨནུརཱུཔཀུསལཱནནྟི ཝཱ ཨཏྠོ. ཏེན བྷཱུམིབྷིནྣཱནམྤི པཙྩཡབྷཱཝོ ཝུཏྟོ ཧོཏི. བྷཝངྒགྒཧཎེན ཀུསལཱཀུསལམཱུལཀེསུ ཙུཏིཔི གཧིཏཱཏི དཊྛབྦཾ, ཨབྱཱཀཏམཱུལཀེ ཏདཱརམྨཎམྤི.

ཀཱམཱཝཙརཀིརིཡཱཝཛྫནསྶཱཏི ཀཱམཱཝཙརཀིརིཡཱཡ ཨཱཝཛྫནསྶཱཏི ཨཱཝཛྫནགྒཧཎེན ཀཱམཱཝཙརཀིརིཡཾ ཝིསེསེཏཱིཏི དཊྛབྦཾ. ཀཱམཱཝཙརཝིཔཱཀོ ཀཱམཱཝཙརཀིརིཡརཱསིསྶ ཙ ཨནནྟརཔཙྩཡོ ཧོཏི, ཧོནྟོ ཙ ཨཱཝཛྫནསྶེཝཱཏི ཨཡཉྷེཏྠ ཨདྷིཔྤཱཡོ. ཨཱཝཛྫནགྒཧཎེནེཝ ཙེཏྠ ཝོཊྛབྦནམྤི གཧིཏནྟི དཊྛབྦཾ.

ཨནནྟརཔཙྩཡནིདྡེསཝཎྞནཱ ནིཊྛིཏཱ.

༦. ‘‘ཨཉྙམཉྙསྶཱཏི ¶ ཨཉྙོ ཨཉྙསྶཱ’’ཏི པོརཱཎཔཱཋོ. པཱལི༹ཡཾ པན ‘‘ཨཉྙམཉྙཾ སཧཛཱཏཔཙྩཡེན པཙྩཡོ’’ཏི ཨེཏྠ ཝུཏྟསྶ ‘‘ཨཉྙམཉྙ’’ནྟི ཨིམསྶ ཨཏྠོ ཝཏྟབྦོ ¶ , ན ཨཝུཏྟསྶ ‘‘ཨཉྙམཉྙསྶཱ’’ཏི ཨིམསྶ, ན ཙ སམཱནཏྠསྶཔི སདྡནྟརསྶ ཨཏྠེ ཝུཏྟེ སདྡནྟརསྶ ཨཏྠོ ཝུཏྟོ ཧོཏི, ཏསྨཱ ‘‘ཨཉྙམཉྙནྟི ཨཉྙོ ཨཉྙསྶཱ’’ཏི པཋནྟི. ཨོཀྐནྟཱིཏི པཉྩཝོཀཱརཔཊིསནྡྷིཡེཝ ཝུཙྩཏི, ན ཨིཏརཱཏི ཨིམིནཱ ཨདྷིཔྤཱཡེནཱཧ ‘‘པཉྩཝོཀཱརབྷཝེ པཊིསནྡྷིཀྑཎེ’’ཏི. རཱུཔིནོ དྷམྨཱ ཨརཱུཔཱིནཾ དྷམྨཱནནྟི ཨིདཾ ཡདིཔི པུབྦེ ‘‘ཨོཀྐནྟིཀྑཎེ ནཱམརཱུཔ’’ནྟི ཝུཏྟཾ, ཏཐཱཔི ན ཏེན ཁཎནྟརེ པཙྩཡབྷཱཝོ རཱུཔཱིནཾ ནིཝཱརིཏོཏི ཏནྣིཝཱརཎཏྠཾ ཝུཏྟཾ. ཀཉྩི ཀཱལེཏི ཀེཙི ཀིསྨིཉྩི ཀཱལེཏི ཝཱ ཨཏྠོ. ཏེན རཱུཔིནོ དྷམྨཱ ཀེཙི ཝཏྠུབྷཱུཏཱ ཀིསྨིཉྩི པཊིསནྡྷིཀཱལེཏི རཱུཔནྟརཱནཾ ཝཏྠུསྶ ཙ ཀཱལནྟརེ ཨརཱུཔཱིནཾ སཧཛཱཏཔཙྩཡཾ པུབྦེ ཨནིཝཱརིཏཾ ནིཝཱརེཏི. ཨེཝཉྩ ཀཏྭཱ ‘‘ཀཉྩི ཀཱལ’’ནྟི ཝཱ ‘‘ཀིསྨིཉྩི ཀཱལེ’’ཏི ཝཱ ཝཏྟབྦེ ཝིབྷཏྟིཝིཔལླཱསོ ཀཏོ. ཏེན ཧི ‘‘ཀཉྩཱི’’ཏི ཨུཔཡོགེཀཝཙནཾ ‘‘རཱུཔིནོ དྷམྨཱ’’ཏི ཨེཏེན སཧ སམྦནྡྷེན པཙྩཏྟབཧུཝཙནསྶ ཨཱདེསོ, ‘‘ཀཱལེ’’ཏི ཨིམིནཱ སམྦནྡྷེན བྷུམྨེཀཝཙནསྶཱཏི ཝིཉྙཱཡཏི. པུརིམེན ཙ ‘‘ཨེཀོ ཁནྡྷོ ཝཏྠུ ཙ ཏིཎྞནྣཾ ཁནྡྷཱན’’ནྟིཨཱདིནཱ ནཱམསཧིཏསྶེཝ ཝཏྠུསྶ ‘‘ནཱམསྶ པཙྩཡོ’’ཏི ཝཏྟབྦཏྟེ ཨཱཔནྣེ ཨེཏེན ཀེཝལསྶེཝ ཏཐཱ ཝཏྟབྦཏཾ དསྶེཏི.

ཏཡོ ན ཨཉྙམཉྙཝསེནཱཏི ལབྦྷམཱནེཔི ཀཏྠཙི ཨཉྙམཉྙསཧཛཱཏཔཙྩཡབྷཱཝེ ཝཙནེན ཨསངྒཧིཏཏྟཱ ཏསྶ ཨེཝཾ ཝུཏྟནྟི དཊྛབྦཾ. ཙཏུསམུཊྛཱནིཀསྶ རཱུཔསྶ ཨེཀདེསབྷཱུཏེ ཀམྨསམུཊྛཱནརཱུཔེ སམུདཱཡེཀདེསཝསེན སཱམིཝཙནཾ དཊྛབྦཾ, ནིདྡྷཱརཎེ ཝཱ.

སཧཛཱཏཔཙྩཡནིདྡེསཝཎྞནཱ ནིཊྛིཏཱ.

༨. ནིསྶཡཔཙྩཡནིདྡེསེ ‘‘རཱུཔིནོ དྷམྨཱ ཨརཱུཔཱིནཾ དྷམྨཱནཾ ཀིསྨིཉྩི ཀཱལེ’’ཏི ཨིདཾ ན ལབྦྷཏི. ཡཾ པནེཏྠ ལབྦྷཏི ‘‘རཱུཔིནོ དྷམྨཱ ཀེཙཱི’’ཏི, ཏཏྠ ¶ ཏེ ཨེཝ དྷམྨེ དསྶེཏུཾ ‘‘ཙཀྑཱཡཏན’’ནྟིཨཱདི ཝུཏྟནྟི. ‘‘ཝཏྠུརཱུཔཾ པཉྩཝོཀཱརབྷཝེ’’ཏི ཝུཏྟཏྟཱ ‘‘ཋཔེཏྭཱ ཨཱརུཔྤཝིཔཱཀ’’ནྟི ¶ ཨིདཾ ན ཝཏྟབྦནྟི ཙེ? ན, ‘‘ཏེབྷཱུམཀཝིཔཱཀསྶཱ’’ཏི ཝུཏྟེ པཉྩཝོཀཱརབྷཝེ ཨནུཔྤཛྫནཀཾ ཋཔེཏབྦཾ ཨཛཱནནྟསྶ ཏསྶ པཀཱསེཏབྦཏྟཱ.

ནིསྶཡཔཙྩཡནིདྡེསཝཎྞནཱ ནིཊྛིཏཱ.

༩. ཏེ ཏཡོཔི རཱསཡོཏི ཨུཔནིསྶཡེ ཏཡོ ཨནེཀསངྒཱཧཀཏཱཡ རཱསཡོཏི ཝདཏི. ཨེཏསྨིཾ པན ཨུཔནིསྶཡནིདྡེསེ ཡེ པུརིམཱ ཡེསཾ པཙྪིམཱནཾ ཨནནྟརཱུཔནིསྶཡཱ ཧོནྟི, ཏེ ཏེསཾ སབྦེསཾ ཨེཀནྟེནེཝ ཧོནྟི, ན ཀེསཉྩི ཀདཱཙི, ཏསྨཱ ཡེསུ པདེསུ ཨནནྟརཱུཔནིསྶཡོ སངྒཧིཏོ, ཏེསུ ‘‘ཀེསཉྩཱི’’ཏི ན སཀྐཱ ཝཏྟུནྟི ན ཝུཏྟཾ. ཡེ པན པུརིམཱ ཡེསཾ པཙྪིམཱནཾ ཨཱརམྨཎཔཀཏཱུཔནིསྶཡཱ ཧོནྟི, ཏེ ཏེསཾ ན སབྦེསཾ ཨེཀནྟེན ཧོནྟི, ཡེསཾ ཨུཔྤཏྟིཔཊིབཱཧིཀཱ པཙྩཡཱ བལཝནྟོ ཧོནྟི, ཏེསཾ ན ཧོནྟི, ཨིཏརེསཾ ཧོནྟི. ཏསྨཱ ཡེསུ པདེསུ ཨནནྟརཱུཔནིསྶཡོ ན ལབྦྷཏི, ཏེསུ ‘‘ཀེསཉྩཱི’’ཏི ཝུཏྟཾ. སིདྡྷཱནཾ པཙྩཡདྷམྨཱནཾ ཡེཧི པཙྩཡུཔྤནྣེཧི ཨཀུསལཱདཱིཧི བྷཝིཏབྦཾ, ཏེསཾ ཀེསཉྩཱིཏི ཨཡཉྩེཏྠ ཨཏྠོ, ན པན ཨཝིསེསེན ཨཀུསལཱདཱིསུ ཀེསཉྩཱིཏི.

པུརིམཱ པུརིམཱ ཀུསལཱ…པེ… ཨབྱཱཀཏཱནཾ དྷམྨཱནནྟི ཡེསཾ ཨུཔནིསྶཡཔཙྩཡེན བྷཝིཏབྦཾ, ཏེསཾ ཨབྱཱཀཏཱནཾ པཙྪིམཱནནྟི དཊྛབྦཾ. ན ཧི རཱུཔཱབྱཱཀཏཾ ཨུཔནིསྶཡཾ ལབྷཏཱིཏི. ཀཐཾ? ཨཱརམྨཎཱནནྟརཱུཔནིསྶཡེ ཏཱཝ ན ལབྷཏི ཨནཱརམྨཎཏྟཱ པུབྦཱཔརནིཡམེན ཨཔྤཝཏྟིཏོ ཙ, པཀཏཱུཔནིསྶཡཉྩ ན ལབྷཏི ཨཙེཏནེན རཱུཔསནྟཱནེན པཀཏསྶ ཨབྷཱཝཏོ. ཡཐཱ ཧི ཨརཱུཔསནྟཱནེན སདྡྷཱདཡོ ནིཔྥཱདིཏཱ ཨུཏུབྷོཛནཱདཡོ ཙ ཨུཔསེཝིཏཱ, ན ཨེཝཾ རཱུཔསནྟཱནེན. ཡསྨིཉྩ ཨུཏུབཱིཛཱདིཀེ ཀམྨཱདིཀེ ཙ སཏི རཱུཔཾ པཝཏྟཏི, ན ཏཾ ཏེན པཀཏཾ ཧོཏི. སཙེཏནསྶེཝ ཧི ཨུཔྤཱདནུཔཏྠམྦྷནུཔཡོགཱདིཝསེན ཙེཏནཾ པཀཔྤནཾ པཀརཎཾ, རཱུཔཉྩ ཨཙེཏནནྟི. ཡཐཱ ཙ ནིརཱིཧཀེསུ པཙྩཡཱཡཏྟེསུ དྷམྨེསུ ཀེསཉྩི སཱརམྨཎསབྷཱཝཏཱ ཧོཏི, ཀེསཉྩི ན, ཨེཝཾ ¶ སཔྤཀརཎསབྷཱཝཏཱ ནིཔྤཀརཎསབྷཱཝཏཱ ཙ དཊྛབྦཱ. ཨུཏུབཱིཛཱདཡོ པན ¶ ཨངྐུརཱདཱིནཾ ཏེསུ ཨསནྟེསུ ཨབྷཱཝཏོ ཨེཝ པཙྩཡཱ, ན པན ཨུཔནིསྶཡཱདིབྷཱཝཏོཏི. པུརིམཔུརིམཱནཾཡེཝ པནེཏྠ ཨུཔནིསྶཡཔཙྩཡབྷཱཝོ བཱཧུལླཝསེན པཱཀཊཝསེན ཙ ཝུཏྟོ. ‘‘ཨནཱགཏེ ཁནྡྷེ པཏྠཡམཱནོ དཱནཾ དེཏཱི’’ཏིཨཱདིཝཙནཏོ (པཊྛཱ. ༢.༡༨.༨) པན ཨནཱགཏཱཔི ཨུཔནིསྶཡཔཙྩཡཱ ཧོནྟི, ཏེ པུརིམེཧི ཨཱརམྨཎཔཀཏཱུཔནིསྶཡེཧི ཏཾསམཱནལཀྑཎཏཱཡ ཨིདྷ སངྒཡ྄ཧནྟཱིཏི དཊྛབྦཱ.

པུགྒལོཔི སེནཱསནམྤཱིཏི པུགྒལསེནཱསནགྒཧཎཝསེན ཨུཔནིསྶཡབྷཱཝཾ བྷཛནྟེ དྷམྨེ དསྶེཏི, པི-སདྡེན ཙཱིཝརཱརཉྙརུཀྑཔབྦཏཱདིགྒཧཎཝསེན ཨུཔནིསྶཡབྷཱཝཾ བྷཛནྟེ སབྦེ སངྒཎྷཱཏི. ‘‘ཨབྱཱཀཏོ དྷམྨོ ཨབྱཱཀཏསྶ དྷམྨསྶ ཨུཔནིསྶཡཔཙྩཡེན པཙྩཡོ’’ཏིཨཱདཱིསུ ཧི ‘‘སེནཱསནཾ ཀཱཡིཀསྶ སུཁསྶཱ’’ཏིཨཱདིཝཙནེན སེནཱསནགྒཧཎེན ཨུཔནིསྶཡབྷཱཝཾ བྷཛནྟཱཝ དྷམྨཱ ཨུཔནིསྶཡཔཙྩཡེན པཙྩཡོཏི ཨིམམཏྠཾ དསྶེནྟེན པུགྒལཱདཱིསུཔི ཨཡཾ ནཡོ དསྶིཏོ ཧོཏཱིཏི. པཙྩུཔྤནྣཱཔི ཨཱརམྨཎཔཀཏཱུཔནིསྶཡཱ པཙྩུཔྤནྣཏཱཡ སེནཱསནསམཱནལཀྑཎཏྟཱ ཨེཏྠེཝ སངྒཧིཏཱཏི དཊྛབྦཱ. ཝཀྑཏི ཧི ‘‘པཙྩུཔྤནྣཾ ཨུཏུཾ བྷོཛནཾ སེནཱསནཾ ཨུཔནིསྶཱཡ ཛྷཱནཾ ཨུཔྤཱདེཏཱི’’ཏིཨཱདིནཱ སེནཱསནསྶ པཙྩུཔྤནྣབྷཱཝཾ ཝིཡ པཙྩུཔྤནྣཱནཾ ཨུཏུཨཱདཱིནཾ པཀཏཱུཔནིསྶཡབྷཱཝཾ, ‘‘པཙྩུཔྤནྣཾ ཙཀྑུཾ…པེ… ཝཏྠུཾ པཙྩུཔྤནྣེ ཁནྡྷེ གརུཾ ཀཏྭཱ ཨསྶཱདེཏཱི’’ཏིཨཱདིནཱ (པཊྛཱ. ༢.༡༨.༤) ཙཀྑཱདཱིནཾ ཨཱརམྨཎཱུཔནིསྶཡབྷཱཝཉྩཱཏི. པཙྩུཔྤནྣཱནམྤི ཙ ཏཱདིསཱནཾ པུབྦེ པཀཏཏྟཱ པཀཏཱུཔནིསྶཡཏཱ དཊྛབྦཱ.

ཀསིཎཱརམྨཎཱདཱིནི ཨཱརམྨཎམེཝ ཧོནྟི, ན ཨུཔནིསྶཡོཏི ཨིམིནཱ ཨདྷིཔྤཱཡེན ‘‘ཨེཀཙྩཱཡཱ’’ཏི ཨཱཧ.

ཨརཱུཔཱཝཙརཀུསལམྤི ཡསྨིཾ ཀསིཎཱདིམྷི ཛྷཱནཾ ཨནུཔྤཱདིཏཾ, ཏསྨིཾ ཨནུཔྤནྣཛྷཱནུཔྤཱདནེ སབྦསྶ ཙ ཨུཔྤནྣཛྷཱནསྶ སམཱཔཛྫནེ ཨིདྡྷིཝིདྷཱདཱིནཾ ཨབྷིཉྙཱནཉྩ ཨུཔནིསྶཡོཏི ཨིམམཏྠཾ སནྡྷཱཡཱཧ ‘‘ཏེབྷཱུམཀཀུསལོ ཙཏུབྷཱུམཀསྶཔི ཀུསལསྶཱ’’ཏི. ཝུཏྟམྤི ཙེཏཾ ‘‘ཨརཱུཔཱཝཙརཾ སདྡྷཾ ཨུཔནིསྶཱཡ རཱུཔཱཝཙརཾ ཛྷཱནཾ ཝིཔསྶནཾ མགྒཾ ཨབྷིཉྙཾ སམཱཔཏྟིཾ ཨུཔྤཱདེཏཱི’’ཏི (པཊྛཱ. ༤.༡༣.༢༨༥). ཀཱམཱཝཙརཀུསལཾ རཱུཔཱཝཙརཱརཱུཔཱཝཙརཝིཔཱཀཱནམྤི ཏདུཔྤཱདཀཀུསལཱནཾ ཨུཔནིསྶཡབྷཱཝཝསེན ¶ , པཊིསནྡྷིནིཡཱམཀསྶ ཙུཏིཏོ པུརིམཛཝནསྶ ཙ ཝསེན ཨུཔནིསྶཡོ, རཱུཔཱཝཙརཀུསལཾ ཨརཱུཔཱཝཙརཝིཔཱཀསྶ, ཨརཱུཔཱཝཙརཀུསལཉྩ རཱུཔཱཝཙརཝིཔཱཀསྶ ¶ ཏདུཔྤཱདཀཀུསལཱུཔནིསྶཡབྷཱཝེནཱཏི ཨེཝཾ པཙྩེཀཾ ཏེབྷཱུམཀཀུསལཱནཾ ཙཏུབྷཱུམཀཝིཔཱཀསྶ ཏེབྷཱུམཀཀིརིཡསྶ ཙ ཡཐཱཡོགཾ པཙྩཡབྷཱཝོ ཝེདིཏབྦོ. པཱལི༹ཡམྤི ཧི པཀཏཱུཔནིསྶཡོ ནཡདསྶནམཏྟེནེཝ པཉྷཱཝཱརེསུ ཝིསྶཛྫིཏོཏི.

ཨིམིནཱ པན ནཡེནཱཏི ལོཀུཏྟརནིབྦཏྟནཾ ཨུཔནིསྶཱཡ སིནེཧུཔྤཱདནལེསེནཱཏི ཨཏྠོ. ལོཀུཏྟརཱ པན དྷམྨཱ ཨཀུསལཱནཾ ན ཀེནཙི པཙྩཡེན པཙྩཡོ ཧོནྟཱིཏི ན ཨིདཾ སཱརཏོ དཊྛབྦནྟི ཨདྷིཔྤཱཡོ. ཀཱམཱཝཙརཱདིཏིཧེཏུཀབྷཝངྒཾ ཀཱཡིཀསུཁཱདི ཙ རཱུཔཱཝཙརཱདིཀུསལཱནཾ ཨུཔནིསྶཡོ, ཨརཱུཔཱཝཙརཝིཔཱཀོ རཱུཔཱཝཙརཀུསལསྶ ཏཾ པཏྠེཏྭཱ ཏནྣིབྦཏྟཀཀུསལུཔྤཱདནཏྠཾ ཨུཔྤཱདིཡམཱནསྶ, རཱུཔཱཝཙརཀིརིཡསྶ ཙ པུབྦེ ནིཝུཊྛཱདཱིསུ ཨརཱུཔཱཝཙརཝིཔཱཀཛཱནནཏྠཾ ཛྷཱནཱབྷིཉྙཱཡོ ཨུཔྤཱདེནྟསྶ ཨརཧཏོ, ཙཏུབྷཱུམཀཝིཔཱཀཱནཾ པན ཏདུཔྤཱདཀཀུསལཱུཔནིསྶཡབྷཱཝཝསེན སོ སོ ཝིཔཱཀོ ཨུཔནིསྶཡོ. ཏེནཱཧ ‘‘ཏཐཱ ཏེབྷཱུམཀཝིཔཱཀོ’’ཏི. ཡདིཔི ཨརཧཏྟཕལཏྟཾ ཛྷཱནཝིཔསྶནཱ ཨུཔྤཱདེཏི ཨནཱགཱམཱི, ན པན ཏེན ཏཾ ཀདཱཙི དིཊྛཔུབྦཾ པུཐུཛྫནཱདཱིཧི སོཏཱཔཏྟིཕལཱདཱིནི ཝིཡ, ཏསྨཱ ཏཱནི ཝིཡ ཏེསཾ ཛྷཱནཱདཱིནཾ ཨིམསྶ ཙ ཨགྒཕལཾ ན ཛྷཱནཱདཱིནཾ ཨུཔནིསྶཡོ. ཨུཔལདྡྷཔུབྦསདིསམེཝ ཧི ཨནཱགཏམྤི ཨུཔནིསྶཡོཏི. ཏེནཱཧ ‘‘ཨུཔརིཊྛིམཾ ཀུསལསྶཔཱི’’ཏི.

ཀིརིཡཨཏྠཔཊིསམྦྷིདཱདིམྤི པཏྠེཏྭཱ དཱནཱདིཀུསལཾ ཀརོནྟསྶ ཏེབྷཱུམཀཀིརིཡཱཔི ཙཏུབྷཱུམཀསྶཔི ཀུསལསྶ ཨུཔནིསྶཡཔཙྩཡེན པཙྩཡོ. ཡོནིསོམནསིཀཱརེ ཝཏྟབྦམེཝ ནཏྠི, ཏཾ ཨུཔནིསྶཱཡ རཱགཱདིཨུཔྤཱདནེ ཨཀུསལསྶ, ཀུསལཱཀུསལཱུཔནིསྶཡབྷཱཝམུཁེན ཙཏུབྷཱུམཀཝིཔཱཀསྶ. ཨེཝཾ ཀིརིཡསྶཔི ཡོཛེཏབྦཾ. ཏེནཱཧ ‘‘ཀིརིཡསངྑཱཏོཔི པཀཏཱུཔནིསྶཡོ ཙཏུབྷཱུམཀཱནཾ ཀུསལཱདིཁནྡྷཱནཾ ཧོཏིཡེཝཱ’’ཏི. ནེཝཝིཔཱཀནཝིཔཱཀདྷམྨདྷམྨེསུ པན ཨུཏུབྷོཛནསེནཱསནཱནམེཝ ཏིཎྞཾ རཱསཱིནཾ པཀཏཱུཔནིསྶཡབྷཱཝདསྶནཾ ནཡདསྶནམེཝཱཏི. ཨིམསྨིཾ པཊྛཱནམཧཱཔཀརཎེ ཨཱགཏནཡེནཱཏི ཨིདཾ ‘‘ཀུསལཾ དྷམྨཾ པཊིཙྩ ཨབྱཱཀཏོ དྷམྨོ ཨུཔྤཛྫཏི ན ཨུཔནིསྶཡཔཙྩཡཱ, ཀུསལེ ཁནྡྷེ པཊིཙྩ ཙིཏྟསམུཊྛཱནཾ རཱུཔ’’ནྟི ¶ (པཊྛཱ. ༡.༡.༩༡) ཨེཝམཱདིཀཾ ཨུཔནིསྶཡཔཊིཀྑེཔཾ, ཨནུལོམེ ཙ ཨནཱགམནཾ སནྡྷཱཡ ཝུཏྟཾ. སུཏྟནྟིཀཔརིཡཱཡེནཱཏི ‘‘ཝིཉྙཱཎཱུཔནིསཾ ནཱམརཱུཔཾ, ནཱམརཱུཔནིསཾ སལཱ༹ཡཏན’’ནྟིཨཱདིཀེན (སཾ. ནི. ༢.༢༣),

‘‘ཡཐཱཔི ¶ པབྦཏོ སེལོ, ཨརཉྙསྨིཾ བྲཧཱཝནེ;

ཏཾ རུཀྑཱ ཨུཔནིསྶཱཡ, ཝཌྜྷནྟེ ཏེ ཝནཔྤཏཱི’’ཏི (ཨ. ནི. ༣.༤༩). –

ཨུཔནིསྶཡཔཙྩཡནིདྡེསཝཎྞནཱ ནིཊྛིཏཱ.

༡༠. ནཡདསྶནཝསེན ཡཱནི ཝིནཱ ཨཱརམྨཎཔུརེཛཱཏེན ན ཝཏྟནྟི, ཏེསཾ ཙཀྑུཝིཉྙཱཎཱདཱིནཾ ཨཱརམྨཎཔུརེཛཱཏདསྶནེན མནོདྭཱརེཔི ཡཾ ཡདཱརམྨཎཔུརེཛཱཏེན ཝཏྟཏི, ཏསྶ ཏདཱལམྦིཏཾ སབྦམྤི རཱུཔརཱུཔཾ ཨཱརམྨཎཔུརེཛཱཏནྟི དསྶིཏམེཝ ཧོཏི, སརཱུཔེན པན ཨདསྶིཏཏྟཱ ‘‘སཱཝསེསཝསེན དེསནཱ ཀཏཱ’’ཏི ཨཱཧ. ཙིཏྟཝསེན ཀཱཡཾ པརིཎཱམཡཏོ ཨིདྡྷིཝིདྷཱབྷིཉྙཱཡ ཙ ཨཊྛཱརསསུ ཡཾཀིཉྩི ཨཱརམྨཎཔུརེཛཱཏཾ ཧོཏཱིཏི དཊྛབྦཾ.

ཏདཱརམྨཎབྷཱཝིནོཏི ཨེཏྠ པཊིསནྡྷིབྷཱཝིནོ ཝཏྠུཔུརེཛཱཏཱབྷཱཝེན ཨིཏརསྶཔི ཨབྷཱཝཱ ཨགྒཧཎཾ. བྷཝངྒབྷཱཝིནོ པན གཧཎཾ ཀཱཏབྦཾ ན ཝཱ ཀཱཏབྦཾ པཊིསནྡྷིཡཱ ཝིཡ ཨཔརིབྱཏྟསྶ ཨཱརམྨཎསྶ ཨཱརམྨཎམཏྟབྷཱཝཏོ, ‘‘མནོདྷཱཏཱུནཉྩཱ’’ཏི ཨེཏྠ སནྟཱིརཎབྷཱཝིནོ མནོཝིཉྙཱཎདྷཱཏུཡཱཔི.

པུརེཛཱཏཔཙྩཡནིདྡེསཝཎྞནཱ ནིཊྛིཏཱ.

༡༡. ཏསྶེཝཱཏི ¶ ¶ ཨིདཾ ཀཱམཱཝཙརརཱུཔཱཝཙརཝིཔཱཀཱནཾ ནིརཝསེསདསྶིཏཔུརེཛཱཏདསྶནཝསེན ཝུཏྟཾ, རཱུཔཱཝཙརཝིཔཱཀོ པན ཨཱཧཱརསམུཊྛཱནསྶ ན ཧོཏཱིཏི.

པཙྪཱཛཱཏཔཙྩཡནིདྡེསཝཎྞནཱ ནིཊྛིཏཱ.

༡༢. པགུཎཏརབལཝཏརབྷཱཝཝིསིཊྛནྟི ཨེཏེན ཝིཔཱཀཱབྱཱཀཏཏོ ཝིསེསེཏི.

ཨཱསེཝནཔཙྩཡནིདྡེསཝཎྞནཱ ནིཊྛིཏཱ.

༡༣. ཙེཏནཱསམྤཡུཏྟཀམྨཾ ཨབྷིཛ྄ཛྷཱདི ཀམྨཔཙྩཡོ ན ཧོཏཱིཏི ‘‘ཙེཏནཱཀམྨམེཝཱ’’ཏི ཨཱཧ. སཏིཔི ཧི ཝིཔཱཀདྷམྨདྷམྨཏྟེ ན ཙེཏནཱཝཛྫཱ ཨེཝཾསབྷཱཝཱཏི. ཨཏྟནོ ཕལཾ ཨུཔྤཱདེཏུཾ སམཏྠེནཱཏི ཀམྨསྶ སམཏྠཏཱ ཏསྶ ཀམྨཔཙྩཡབྷཱཝོ ཝུཏྟཱཏི དཊྛབྦཱ.

པཉྩཝོཀཱརེཡེཝ, ན ཨཉྙཏྠཱཏི ཨེཏེན ཀཱམཱཝཙརཙེཏནཱ ཨེཀཝོཀཱརེ རཱུཔམྤི ན ཛནེཏཱིཏི དསྶེཏི.

༡༤. ཝིཔཱཀཔཙྩཡནིདྡེསེ ¶ ཡེསཾ ཨེཀནྟེན ཝིཔཱཀོ ཝིཔཱཀཔཙྩཡོ ཧོཏི, ཏེསཾ ཝསེན ནཡདསྶནཾ ཀཏཾ. ན ཧི ཨཱརུཔྤེ བྷཱུམིདྭཡཝིཔཱཀོ རཱུཔསྶ པཙྩཡོ ཧོཏི.

ཝིཔཱཀཔཙྩཡནིདྡེསཝཎྞནཱ ནིཊྛིཏཱ.

༡༥. ཀབལ༹ཾ ¶ ཀརིཏྭཱ ཨཛ྄ཛྷོཧརིཏོཝཱཏི ཨསིཏཔཱིཏཱདིཝཏྠཱུཧི སཧ ཨཛ྄ཛྷོཧརིཏོཝཱཏི ཝུཏྟཾ ཧོཏི. པཱཏབྦསཱཡིཏབྦཱནིཔི ཧི སབྷཱཝཝསེན ཀབལཱ༹ཡེཝ ཧོནྟཱིཏི.

སེསཏིསནྟཏིསམུཊྛཱནསྶ ཨནུཔཱལཀོཝ ཧུཏྭཱཏི ཨེཏྠ ཙིཏྟསམུཊྛཱནསྶ ཨཱཧཱརཔཙྩཡབྷཱཝོ ཝིཙཱརེཏྭཱ གཧེཏབྦོ. ན ཧི ཙིཏྟསམུཊྛཱནོ ཀབལཱི༹ཀཱརོ ཨཱཧཱརོ ནོཙིཏྟསམུཊྛཱནོ ཏདུབྷཡཉྩ ཙིཏྟསམུཊྛཱནཀཱཡསྶ ཨཱཧཱརཔཙྩཡོ ཝུཏྟོ, ཏིཝིདྷོཔི པན སོ ནོཙིཏྟསམུཊྛཱནཀཱཡསྶ ཝུཏྟོཏི.

ཨཱཧཱརཔཙྩཡནིདྡེསཝཎྞནཱ ནིཊྛིཏཱ.

༡༦. ཨརཱུཔཛཱིཝིཏིནྡྲིཡམྤི སངྒཧིཏནྟི མིསྶཀཏྟཱ ཛཱིཝིཏིནྡྲིཡཾ ན སབྦེན སབྦཾ ཝཛྫིཏབྦནྟི ཨདྷིཔྤཱཡོ.

ཨཝིནིབྦྷུཏྟདྷམྨཱནནྟི ཨེཏྠ ཨཡཾ ཨདྷིཔྤཱཡོ – རཱུཔཱརཱུཔཱནཾ ཨཉྙམཉྙཾ ཨཝིནིབྦྷུཏྟཝོཧཱརོ ནཏྠཱིཏི ཨརཱུཔཱནཾ ཨིནྡྲིཡཔཙྩཡབྷཱུཏཱནི པཙྩཡནྟརཱཔེཀྑཱནི ཙཀྑཱདཱིནི ཨཏྟནོ ¶ ཝིཛྫམཱནཀྑཎེ ཨཝིནིབྦྷུཏྟདྷམྨཱནཾ ཨིནྡྲིཡཔཙྩཡཏཾ ཨཕརནྟཱནིཔི ཨིནྡྲིཡཔཙྩཡཱ སིཡུཾ. ཡོ པན ནིརཔེཀྑོ ཨིནྡྲིཡཔཙྩཡོ ཨཝིནིབྦྷུཏྟདྷམྨཱནཾ ཧོཏི, སོ ཨཏྟནོ ཝིཛྫམཱནཀྑཎེ ཏེསཾ ཨིནྡྲིཡཔཙྩཡཏཾ ཨཕརནྟོ ནཱམ ནཏྠི. ཡདི ཙ ཨིཏྠིནྡྲིཡཔུརིསིནྡྲིཡཱནི ཨིནྡྲིཡཔཙྩཡོ ལིངྒཱདཱིནཾ སིཡུཾ, ཨཝིནིབྦྷུཏྟཱནཾ ཏེསམྤི སིཡུཾ. ན ཧི རཱུཔཾ རཱུཔསྶ, ཨརཱུཔཾ ཝཱ ཨརཱུཔསྶ ཝིནིབྦྷུཏྟསྶ ཨིནྡྲིཡཔཙྩཡོ ཨཏྠཱིཏི. སཏི ཙེཝཾ ཨིཏྠིཔུརིསིནྡྲིཡེཧི ཨཝིནིབྦྷུཏྟཏྟཱ ཀལལཱདིཀཱལེ ཙ ལིངྒཱདཱིནི སིཡུཾ, ཡེསཾ ཏཱནི ཨིནྡྲིཡཔཙྩཡཏཾ ཕརེཡྻུཾ, ན ཙ ཕརནྟི. ཏསྨཱ ན ཏེཧི ཏཱནི ཨཝིནིབྦྷུཏྟཀཱནི, ཨཝིནིབྦྷུཏྟཏྟཱབྷཱཝཏོ ཙ ཏེསཾ ཨིནྡྲིཡཔཙྩཡཏཾ ན ཕརནྟི. ཨཉྙེསཾ པན ཡེཧི ཏཱནི སཧཛཱཏཱནི, ཏེསཾ ཨབཱིཛབྷཱཝཏོཡེཝ ན ཕརནྟི, ཏསྨཱ ཨཱཔནྣཝིནིབྦྷུཏྟབྷཱཝཱནཾ ཏེསཾ ལིངྒཱདཱིནཾ ཨཝིནིབྦྷུཏྟཱནཾ ཨཉྙེསཉྩ སམཱནཀལཱཔདྷམྨཱནཾ ཨིནྡྲིཡཔཙྩཡཏཱཡ ¶ ཨཕརཎཏོ ཏཱནི ཨིནྡྲིཡཔཙྩཡོ ན ཧོནྟཱིཏི. ཡེསཾ བཱིཛབྷཱུཏཱནི ཨིཏྠིཔུརིསིནྡྲིཡཱནི, ཏེསཾ ལིངྒཱདཱིནཾ ཨཔརམཏྠབྷཱཝཏོཏི ཀེཙི, ཏེ པན ཀལལཱདིཀཱལེཔི ལིངྒཱདཱིནཾ ཏདནུརཱུཔཱནཾ ཨཏྠིཏཾ ཨིཙྪནྟི.

ཛཱཏིབྷཱུམིཝསེན ཝུཏྟེསུ བྷེདེསུ ཀུསལཛཱཏིཡཾ རཱུཔཱཝཙརཀུསལམེཝ ཨཱརུཔྤེ ཋཔེཏབྦནྟི ‘‘ཋཔེཏྭཱ པན རཱུཔཱཝཙརཀུསལཾ ཨཝསེསཱ ཀུསལཱཀུསལཱ’’ཏི ཝུཏྟཾ. པཋམལོཀུཏྟརཾ པན དོམནསྶཡུཏྟཉྩ ཝིསུཾ ཨེཀཱ ཛཱཏི བྷཱུམི ཝཱ ན ཧོཏཱིཏི ཨཱརུཔྤེ ཨལབྦྷམཱནམྤི ན ཋཔིཏཾ. ཧེཏུཨཱདཱིསུཔི ‘‘ཏཐཱ ཨཔརིཡཱཔནྣཀུསལཧེཏུ, ཏཐཱ ཨཀུསལཧེཏཱུ’’ཏིཨཱདཱིསུ (པཊྛཱ. ཨཊྛ. ༡.༡) ཨེས ནཡོ ཡོཛེཏབྦོ.

ཋིཏིཀྑཎེཏི ཨིདཾ རཱུཔཛཱིཝིཏིནྡྲིཡསྶ སཧཛཱཏཔཙྩཡཏྟཱབྷཱཝཾ སནྡྷཱཡ ཝུཏྟཾ. ཨུཔྤཱདཀྑཎེཔི པན ཏསྶ ཨིནྡྲིཡཔཙྩཡཏཱ ན སཀྐཱ ནིཝཱརེཏུཾ. ཝཀྑཏི ཧི ‘‘ཨབྱཱཀཏཾ དྷམྨཾ པཊིཙྩ…པེ… ཨསཉྙསཏྟཱནཾ ཨེཀཾ མཧཱབྷཱུཏཾ པཊིཙྩ…པེ… ཨིནྡྲིཡཔཙྩཡཾ ཀམྨཔཙྩཡསདིས’’ནྟི (པཊྛཱ. ༡.༡.༦༦). ན ཧི ཨསཉྙསཏྟཱནཾ ཨིནྡྲིཡཔཙྩཡཱ ཨུཔྤཛྫམཱནསྶ རཱུཔསྶ རཱུཔཛཱིཝིཏིནྡྲིཡཏོ ཨཉྙོ ཨིནྡྲིཡཔཙྩཡོ ཨཏྠི, པཉྩཝོཀཱརེ པཝཏྟེ ཙ ཀཊཏྟཱརཱུཔསྶ. པཊིཙྩཝཱརཱདཡོ ཙ ཚ ཨུཔྤཱདཀྑཎམེཝ གཧེཏྭཱ པཝཏྟཱ, ཨེཝཉྩ ཀཏྭཱ པཙྪཱཛཱཏཔཙྩཡོ ཨེཏེསུ ཨནུལོམཏོ ན ཏིཊྛཏཱིཏི.

ཨིནྡྲིཡཔཙྩཡནིདྡེསཝཎྞནཱ ནིཊྛིཏཱ.

༡༧. ཝིཏཀྐཝིཙཱརཔཱིཏིསོམནསྶདོམནསྶུཔེཀྑཱཙིཏྟེཀགྒཏཱསངྑཱཏཱནཱིཏི ¶ ཨེཏྠ ཡདིཔི སོམནསྶདོམནསྶསངྑཱཏཱནི ཛྷཱནངྒཱནི ནཏྠི, སུཁདུཀྑསངྑཱཏཱནི པན སོམནསྶདོམནསྶབྷཱུཏཱནེཝ ཛྷཱནངྒཱནི, ན ཀཱཡིཀསུཁདུཀྑབྷཱུཏཱནཱིཏི ཨིམསྶ དསྶནཏྠཾ སོམནསྶདོམནསྶགྒཧཎཾ ཀཏཾ. ནནུ ཙ ‘‘དྭིཔཉྩཝིཉྙཱཎཝཛྫེསཱུ’’ཏི ཝཙནེནེཝ ཀཱཡིཀསུཁདུཀྑཱནི ཝཛྫིཏཱནཱིཏི སུཁདུཀྑགྒཧཎམེཝ ཀཏྟབྦནྟི? ན, ཛྷཱནངྒསུཁདུཀྑཱནཾ ཛྷཱནངྒབྷཱཝཝིསེསནཏོ. ‘‘དྭིཔཉྩཝིཉྙཱཎཝཛྫེསུ སུཁདུཀྑུཔེཀྑཱཙིཏྟེཀགྒཏཱསངྑཱཏཱནཱི’’ཏི ཧི ཝུཏྟེ དྭིཔཉྩཝིཉྙཱཎེསུ ཨུཔེཀྑཱཙིཏྟེཀགྒཏཱཧི སདྡྷིཾ ཀཱཡིཀསུཁདུཀྑཱནིཔི ¶ ཝཛྫིཏཱནཱིཏི ཨེཏྟཀམེཝ ཝིཉྙཱཡཏི, ན པན ཡཱནི སུཁདུཀྑཱནི ཛྷཱནངྒཱནི ཧོནྟི, ཏེསཾ ཛྷཱནངྒབྷཱུཏོ སུཁབྷཱཝོ དུཀྑབྷཱཝོ ཙ ཝིསེསིཏོ, ཏསྨཱ སོམནསྶདོམནསྶབྷཱཝཝིསིཊྛོཡེཝ སུཁདུཀྑབྷཱཝོ སུཁདུཀྑཱནཾ ཛྷཱནངྒབྷཱཝོཏི དསྶནཏྠཾ སོམནསྶདོམནསྶགྒཧཎཾ ཀརོཏི. ཏེན ‘‘དྭིཔཉྩཝིཉྙཱཎཝཛྫེསཱུ’’ཏི ཝཙནེན ཝཛྫིཡམཱནཱནམྤི སུཁདུཀྑཱནཾ སོམནསྶདོམནསྶབྷཱཝཱབྷཱཝཏོ ཛྷཱནངྒབྷཱཝཱབྷཱཝོཏི དསྶིཏཾ ཧོཏི. ཡཐཱཝཛྫིཏཱ པན སུཁདུཀྑོཔེཀྑེཀགྒཏཱ ཀསྨཱ ཝཛྫིཏཱཏི? ཡཏྠ ཛྷཱནངྒཱནི ཨུདྡྷརཱིཡནྟི ཙིཏྟུཔྤཱདཀཎྜེ, ཏཏྠ ཙ ཛྷཱནངྒནྟི ཨནུདྡྷཊཏྟཱ. ཀསྨཱ པན ན ཨུདྡྷཊཱཏི ཏཾ དསྶེཏུཾ ‘‘པཉྩནྣཾ པན ཝིཉྙཱཎཀཱཡཱན’’ནྟིཨཱདིམཱཧ.

ཨབྷིནིཔཱཏམཏྟཏྟཱཏི ཨེཏེན ཨཱཝཛྫནསམྤཊིཙྪནམཏྟཱཡཔི ཙིནྟནཱཔཝཏྟིཡཱ ཨབྷཱཝཾ དསྶེཏི. ‘‘ཏེསུ ཝིཛྫམཱནཱནིཔི ཨུཔེཀྑཱསུཁདུཀྑཱནཱི’’ཏི པོརཱཎཔཱཋོ. ཏཏྠ ཨུཔེཀྑཱསུཁདུཀྑེཧེཝ ཏཾསམཱནལཀྑཎཱཡ ཙིཏྟེཀགྒཏཱཡཔི ཡཐཱཝུཏྟེནེཝ ཀཱརཎེན ཨནུདྡྷཊབྷཱཝོ དསྶིཏོཏི དཊྛབྦོ. པུབྦེ པན སཏྟ ཨངྒཱནི དསྶེནྟེན ཙཏྟཱརི ཨངྒཱནི ཝཛྫིཏཱནཱིཏི ཏེསཾ ཝཛྫནེ ཀཱརཎཾ དསྶེནྟེན ན སམཱནལཀྑཎེན ལེསེན དསྶེཏབྦཾ. ཨཊྛཀཐཱ ཧེསཱཏི. ཡདི ཙ ལེསེན དསྶེཏབྦཾ, ཡཐཱཝུཏྟེསུཔི ཏཱིསུ ཨེཀམེཝ ཝཏྟབྦཾ སིཡཱ, ཏིཎྞཾ པན ཝཙནེན ཏཏོ ཨཉྙསྶ ཛྷཱནངྒནྟི ཨུདྡྷཊབྷཱཝོ ཨཱཔཛྫཏི, ཡཐཱཝུཏྟཀཱརཎཏོ ཨཉྙེན ཀཱརཎེན ཨནུདྡྷཊབྷཱཝོ ཝཱ, ཏསྨཱ ཏཾདོསཔརིཧརཎཏྠཾ ‘‘ཨུཔེཀྑཱཙིཏྟེཀགྒཏཱསུཁདུཀྑཱནཱི’’ཏི པཋནྟི. ཡེ པན ‘‘ཛྷཱནངྒབྷཱུཏེཧི སོམནསྶཱདཱིཧི སུཁདུཀྑེན ཨཝིབྷཱུཏབྷཱཝེན པཱཀཊཏཱཡ ཨིནྡྲིཡཀིཙྩཡུཏྟཏཱཡ ཙ སམཱནཱནཾ སུཁཱདཱིནཾ ཛྷཱནངྒནྟི ཨནུདྡྷཊབྷཱཝེ ཀཱརཎཾ ཝཏྟབྦཾ, ན ཙིཏྟེཀགྒཏཱཡཱཏི ¶ སཱ ཨེཏྠ ན གཧིཏཱ’’ཏི ཝདནྟི, ཏེསཾ ཏཾ རུཙིམཏྟཾ. ཡདི ཛྷཱནངྒསམཱནཱནཾ ཛྷཱནངྒནྟི ཨནུདྡྷཊབྷཱཝེ ཀཱརཎཾ ཝཏྟབྦཾ, ཙིཏྟེཀགྒཏཱ ཙེཏྠ ཛྷཱནངྒབྷཱུཏཱཡ ཝིཙིཀིཙྪཱཡུཏྟམནོདྷཱཏུཨཱདཱིསུ ཙིཏྟེཀགྒཏཱཡ སམཱནཱཏི ཏསྶཱ ཨནུདྡྷཊབྷཱཝེ ཀཱརཎཾ ཝཏྟབྦམེཝཱཏི. སེསཱཧེཏུཀེསུཔི ཛྷཱནངྒཾ ཨུདྡྷཊམེཝ ཨུདྡྷརཎཊྛཱནེ ཙིཏྟུཔྤཱདཀཎྜེཏི ཨདྷིཔྤཱཡོ.

༡༨. པཉྙཱ ¶ ཝིཏཀྐོ སམྨཱཝཱཙཱཀམྨནྟཱཛཱིཝཱ ཝཱིརིཡཾ སཏི སམཱདྷི མིཙྪཱདིཊྛི མིཙྪཱཝཱཙཱཀམྨནྟཱཛཱིཝཱཏི ཨིམཱནི དྭཱདསངྒཱནཱིཏི ཨེཏྠ དུཝིདྷམྤི སངྐཔྤཾ ཝཱིརིཡཾ སམཱདྷིཉྩ ཝིཏཀྐཝཱིརིཡསམཱདྷིཝཙནེཧི སངྒཎྷིཏྭཱ ‘‘ཨཡམེཝ ཁོ, ཨཱཝུསོ, ཨཊྛངྒིཀོ མིཙྪཱམགྒོ ཨབྲཧྨཙརིཡཾ. སེཡྻཐིདཾ – མིཙྪཱདིཊྛི…པེ… མིཙྪཱསམཱདྷཱི’’ཏིཨཱདཱིཧི (སཾ. ནི. ༥.༡༨) སུཏྟཝཙནེཧི མིཙྪཱཝཱཙཱཀམྨནྟཱཛཱིཝེསུཔི མགྒངྒཝོཧཱརསིདྡྷིཏོ ཏེཧི སཧ དྭཱདསངྒཱནི ཨིདྷ ལབྦྷམཱནཱནི ཙ ཨལབྦྷམཱནཱནི ཙ མགྒངྒཝཙནསཱམཉྙེན སངྒཎྷིཏྭཱ ཝུཏྟཱནི. ཨེཝཉྷི སུཏྟནྟཝོཧཱརོཔི དསྶིཏོ ཧོཏི, ཨེཝཾ པན དསྶེནྟེན ‘‘མགྒཔཙྩཡནིདྡེསེ མགྒངྒཱནཱི’’ཏི ཨེཝཾ ཨུདྡྷརིཏྭཱ ཏསྶ པཱཋགཏསྶ མགྒངྒསདྡསྶ ཨཏྠབྷཱཝེན ཨིམཱནི དྭཱདསངྒཱནི ན དསྶེཏབྦཱནི. ན ཧི པཱལི༹ཡཾ མགྒངྒསདྡསྶ མིཙྪཱཝཱཙཱཀམྨནྟཱཛཱིཝོཏི ཨཏྠོ ཝཏྟབྦོ. ཏེཧི སམྨཱཝཱཙཱདཱིཧི པཊིཔཀྑཱ ཙེཏནཱདྷམྨཱ ཏཔྤཊིཔཀྑབྷཱཝཏོཡེཝ ‘‘མིཙྪཱམགྒངྒཱནཱི’’ཏི སུཏྟེ ཝུཏྟཱནི, ན པན མགྒཔཙྩཡབྷཱཝེན. མགྒངྒཱནི མགྒཔཙྩཡབྷཱུཏཱནི ཙ ཨིདྷ པཱལི༹ཡཾ ‘‘མགྒངྒཱནཱི’’ཏི ཝུཏྟཱནི, ན ཙ ཨཉྙཾ ཨུདྡྷརིཏྭཱ ཨཉྙསྶ ཨཏྠོ ཝཏྟབྦོ. པརིཡཱཡནིཔྤརིཡཱཡམགྒངྒདསྶནཏྠཾ པན ཨིཙྪནྟེན པཱལི༹གཏམགྒངྒསདྡཔཏིརཱུཔཀོ ཨཉྙོ མགྒངྒསདྡོ ཨུབྷཡཔདཏྠོ ཨུདྡྷརིཏབྦོ ཡཐཱ ‘‘ཨདྷིཀརཎཾ ནཱམ ཙཏྟཱརི ཨདྷིཀརཎཱནཱི’’ཏི (པཱརཱ. ༣༨༦, ༤༠༥). ཨིདྷ པན ‘‘མགྒཔཙྩཡནིདྡེསེ མགྒངྒཱནཱི’’ཏི པཱལི༹གཏོཡེཝ མགྒངྒསདྡོ ཨུདྡྷཊོ, ན ཙ ཨཏྠུདྡྷརཎཝསེན དསྶེཏྭཱ ཨདྷིཔྤེཏཏྠནིཡམནཾ ཀཏཾ, ཏསྨཱ པཱལི༹ཡཾ མགྒངྒསདྡསྶ མིཙྪཱཝཱཙཱདཱིནཾ ཨཏྠབྷཱཝོ མཱ ཧོཏཱུཏི ‘‘སམྨཱདིཊྛིསངྐཔྤཝཱཙཱཀམྨནྟཱཛཱིཝཝཱཡཱམསཏིསམཱདྷིམིཙྪཱདིཊྛིསངྐཔྤཝཱཡཱམསམཱདྷཡོཏི ¶ ཨིམཱནི དྭཱདསངྒཱནཱི’’ཏི པཋནྟི. ནནུ ཨེཝཾ ‘‘ཨཧེཏུཀཙིཏྟུཔྤཱདཝཛྫེསཱུ’’ཏི ན ཝཏྟབྦཾ. ན ཧི ཏེསུ སམྨཱདིཊྛིཨཱདཡོ ཡཐཱཝུཏྟཱ སནྟི, ཡེ ཝཛྫེཏབྦཱ སིཡུནྟི? ན, ཨུཔྤཏྟིཊྛཱནནིཡམནཏྠཏྟཱ. ཨཧེཏུཀཙིཏྟུཔྤཱདཝཛྫེསྭེཝ ཨེཏཱནི ཨུཔྤཛྫནྟི, ནཱཧེཏུཀཙིཏྟུཔྤཱདེསུ. ཏཏྠུཔྤནྣཱནི དྭཱདསངྒཱནཱིཏི ཨཡཉྷེཏྠ ཨཏྠོ.

༢༠. སམྤཡོགཱསངྐཱཡ ¶ ཨབྷཱཝཏོཏི ཨེཏེན སམྤཡོགཱསངྐཱཝཏྠུབྷཱུཏོ ཨུཔཀཱརཀབྷཱཝོ ཝིཔྤཡུཏྟཔཙྩཡཏཱཏི དསྶེཏི.

ཝིཔྤཡུཏྟཔཙྩཡནིདྡེསཝཎྞནཱ ནིཊྛིཏཱ.

༢༡. ཀུསལཱདིཝསེན པཉྩཝིདྷོ ཨཏྠིཔཙྩཡོ ཝུཏྟོ, ན ནིབྦཱནཾ. ཡོ ཧི ཨཏྠིབྷཱཝཱབྷཱཝེན ཨནུཔཀཱརཀོ ཨཏྠིབྷཱཝཾ ལབྷིཏྭཱ ཨུཔཀཱརཀོ ཧོཏི, སོ ཨཏྠིཔཙྩཡོ ཧོཏི. ནིབྦཱནཉྩ ནིབྦཱནཱརམྨཎཱནཾ ན ཨཏྟནོ ཨཏྠིབྷཱཝཱབྷཱཝེན ཨནུཔཀཱརཀཾ ཧུཏྭཱ ཨཏྠིབྷཱཝལཱབྷེན ཨུཔཀཱརཀཾ ཧོཏི. ཨུཔྤཱདཱདིཡུཏྟཱནཾ ཝཱ ནཏྠིབྷཱཝོཔཀཱརཀཏཱཝིརུདྡྷོ ཨུཔཀཱརཀབྷཱཝོ ཨཏྠིཔཙྩཡཏཱཏི ན ནིབྦཱནཾ ཨཏྠིཔཙྩཡོ.

སཏི ཙ ཡེསཾ པཙྩཡཱ ཧོནྟི, ཏེཧི ཨེཀཏོ པུརེཏརཾ པཙྪཱ ཙ ཨུཔྤནྣཏྟེ སཧཛཱཏཱདིཔཙྩཡཏྟཱབྷཱཝཏོ ཨཱཧ ‘‘ཨཱཧཱརོ ཨིནྡྲིཡཉྩ སཧཛཱཏཱདིབྷེདཾ ན ལབྷཏཱི’’ཏི. ཏདབྷཱཝོ ཙ ཨེཏེསཾ དྷམྨསབྷཱཝཝསེན དཊྛབྦོ.

ཨཏྠིཔཙྩཡནིདྡེསཝཎྞནཱ ནིཊྛིཏཱ.

༢༢-༢༣-༢༤. ནཏྠིཝིགཏཨཝིགཏཔཙྩཡནིདྡེསཝཎྞནཱ

༢༢-༢༣. པཙྩཡལཀྑཎམེཝ ¶ ཧེཏྠ ནཱནནྟི ཨེཏེན ནཏྠིཝིགཏཔཙྩཡེསུ ཨཏྠིཨཝིགཏཔཙྩཡེསུ ཙ བྱཉྫནམཏྟེཡེཝ ནཱནཏྟཾ, ན ཨཏྠེཏི ཨིདཾ ཡོ པཙྩཡོཏི ཨཏྠོ, ཏསྨིཾ ནཱནཏྟཾ ནཏྠི, བྱཉྫནསངྒཧིཏེ པཙྩཡལཀྑཎམཏྟེཡེཝ ནཱནཏྟནྟི ཨིམམཏྠཾ སནྡྷཱཡ ཝུཏྟནྟི ཝིཉྙཱཡཏི.

ནཏྠིཝིགཏཨཝིགཏཔཙྩཡནིདྡེསཝཎྞནཱ ནིཊྛིཏཱ.

པཙྩཡནིདྡེསཔཀིཎྞཀཝིནིཙྪཡཀཐཱཝཎྞནཱ

‘‘ལོབྷདོསམོཧཱ ¶ ཝིཔཱཀཔཙྩཡཱཔི ན ཧོནྟི, སེསཱནཾ སཏྟརསནྣཾ པཙྩཡཱནཾ ཝསེན པཙྩཡཱ ཧོནྟཱི’’ཏིཨཱདིམཔཱཋོ. ཨེཏྠ ཙ ལོབྷདོསམོཧཱནཾ པཙྩེཀཾ སཏྟརསཧི པཙྩཡེཧི པཙྩཡབྷཱཝོ ཝུཏྟོ, སབྦེ ཧེཏཱུ སཧ ཨགྒཧེཏྭཱ ཨེཀདྷམྨསྶ ཨནེཀཔཙྩཡབྷཱཝདསྶནཏྠཾ ཨམོཧཱདཱིནཾ ཝིསུཾ གཧིཏཏྟཱཏི དོསསྶཔི སཏྟརསཧི པཙྩཡབྷཱཝོ ཨཱཔཛྫཏི, ཏཐཱ ཙ སཏི དོསསྶཔི གརུཀརཎཾ པཱལི༹ཡཾ ཝཏྟབྦཾ སིཡཱ. ‘‘ཨཀུསལོ པན ཨཱརམྨཎཱདྷིཔཏི ནཱམ ལོབྷསཧགཏཙིཏྟུཔྤཱདོ ཝུཙྩཏཱི’’ཏི (པཊྛཱ. ཨཊྛ. ༡.༤) ཨེཏྠཱཔི ལོབྷདོསསཧགཏཙིཏྟུཔྤཱདཱཏི ཝཏྟབྦཾ སིཡཱ, ན པན ཝུཏྟཾ, ཏསྨཱ དོསསྶ ཨདྷིཔཏིཔཙྩཡཏཱཔི ནིཝཱརེཏབྦཱ. ན ཙ ‘‘སེསཱན’’ནྟི ཝཙནེན ཨདྷིཔཏིཔཙྩཡོ ནིཝཱརིཏོ, ཨཐ ཁོ སངྒཧིཏོ པུརེཛཱཏཱདཱིཧི ཡཐཱཝུཏྟེཧི སེསཏྟཱཏི ཏནྣིཝཱརཎཏྠཾ དོསཾ ལོབྷམོཧེཧི སཧ ཨགྒཧེཏྭཱ ཝིསུཉྩ ཨགྒཧེཏྭཱ ‘‘དོསོ ཨདྷིཔཏིཔཙྩཡོཔི ན ཧོཏི, སེསཱནཾ པཙྩཡཱནཾ ཝསེན པཙྩཡོ ཧོཏཱི’’ཏི པཋནྟི. ཨིམིནཱ ནཡེནཱཏི ཨེཏེན ཕོཊྛབྦཱཡཏནསྶ སཧཛཱཏཱདིཔཙྩཡབྷཱཝཾ, སབྦདྷམྨཱནཾ ཡཐཱཡོགཾ ཧེཏཱདིཔཙྩཡབྷཱཝཉྩ དསྶེཏི. ན ཧི ཨེཏཾ ཨེཀཔཙྩཡསྶ ཨནེཀཔཙྩཡབྷཱཝདསྶནནྟི རཱུཔཱདཱིནཾ པཀཏཱུཔནིསྶཡབྷཱཝོ ཙ ཨེཏེན དསྶིཏོཏི དཊྛབྦོ.

ཙཏུནྣཾ ཁནྡྷཱནཾ བྷེདཱ ཙཀྑུཝིཉྙཱཎདྷཱཏུཨཱདཡོཏི བྷེདཾ ཨནཱམསིཏྭཱ ཏེ ཨེཝ གཧེཏྭཱ ཨཱཧ ¶ ‘‘ཙཏཱུསུ ཁནྡྷེསཱུ’’ཏི. མིཙྪཱཝཱཙཱཀམྨནྟཱཛཱིཝཱ ཏེཧི ཙེཝ ཀམྨཱཧཱརཔཙྩཡེཧི ཙཱཏི ཨེཀཱུནཝཱིསཏིདྷཱཏི ཨིདམེཝཾ ན སཀྐཱ ཝཏྟུཾ. ན ཧི མིཙྪཱཝཱཙཱདཡོ མིཙྪཱདིཊྛི ཝིཡ མགྒཔཙྩཡཱ ཧོནྟི ཙེཏནཱཡ མགྒཔཙྩཡཏྟཱབྷཱཝཏོ. ཡདི ཙ བྷཝེཡྻ, པཉྷཱཝཱརེ ‘‘ཀམྨཔཙྩཡཱ མགྒེ ཏཱིཎཱི’’ཏི ཝཏྟབྦཾ སིཡཱ, ཏསྨཱ མིཙྪཱཝཱཙཱདཱིནཾ མགྒཔཙྩཡབྷཱཝོ ན ཝཏྟབྦོ. པཊྛཱནསཾཝཎྞནཱ ཧེསཱ. སེསཔཙྩཡབྷཱཝོ ཙ ཙེཏནཱཡ ཨནེཀཔཙྩཡབྷཱཝཝཙནེན ཝུཏྟོཡེཝཱཏི ན ཨིདཾ པཋིཏབྦནྟི ན པཋནྟི. ‘‘ཨཧིརིཀཾ…པེ… མིདྡྷཾ ཨུདྡྷཙྩཾ ཝིཙིཀིཙྪཱ’’ཏིཨཱདིམཔཱཋོ, ཝིཙིཀིཙྪཱ པན ཨདྷིཔཏིཔཙྩཡོ ན ཧོཏཱིཏི ཏཾ ཏཏྠ ཨཔཋིཏྭཱ ‘‘ཝིཙིཀིཙྪཱཨིསྶཱམཙྪརིཡཀུཀྐུཙྩཱནི ཏཏོ ཨདྷིཔཏིཔཙྩཡཾ ཨཔནེཏྭཱ’’ཏི ཨེཝམེཏྠ པཋནྟི.

‘‘ཙཏྟཱརི ¶ མཧཱབྷཱུཏཱནི ཨཱརམྨཎ…པེ… པུརེཛཱཏཝིཔྤཡུཏྟཨཏྠིཨཝིགཏཝསེན དསདྷཱ པཙྩཡཱ ཧོནྟི, པུན ཏཐཱ ཧདཡཝཏྠཱུ’’ཏི པུརིམཔཱཋོ, མཧཱབྷཱུཏཱནི པན ཝིཔྤཡུཏྟཔཙྩཡཱ ན ཧོནྟཱིཏི ‘‘པུརེཛཱཏཨཏྠིཨཝིགཏཝསེན ནཝདྷཱ པཙྩཡཱ ཧོནྟི, ཝིཔྤཡུཏྟཔཙྩཡཾ པཀྑིཔིཏྭཱ དསདྷཱ ཝཏྠུ’’ནྟི པཋནྟི. ཨེཏྟཀམེཝེཏྠ ཨཔུབྦནྟི ཨེཏསྨིཾ པུརེཛཱཏཔཙྩཡེ སཧཛཱཏནིསྶཡེཧི ཨཔུབྦཾ རཱུཔསདྡགནྡྷརསཱཡཏནམཏྟམེཝཱཏི ཨཏྠོ, ཨཱརམྨཎཱནི པནེཏཱནི ཨཱརམྨཎཔཙྩཡདྷམྨཱནཾ ཨནེཀཔཙྩཡབྷཱཝེ ཝུཏྟཱནཱིཏི སབྦཱཏིཀྐནྟཔཙྩཡཱཔེཀྑཱ ཨེཏེསཾ ཨཔུབྦཏཱ ནཏྠཱིཏི. ཨིནྡྲིཡཱདཱིསུ ཨཔུབྦཾ ནཏྠཱིཏི རཱུཔཛཱིཝིཏིནྡྲིཡསྶཔི ཨརཱུཔཛཱིཝིཏིནྡྲིཡཏོ ཨཔུབྦསྶ པཙྩཡབྷཱཝསྶ ཨབྷཱཝཾ མཉྙམཱནེན ཨཔུབྦཏཱ ན ཝུཏྟཱ. ཏསྶ པན པུརེཛཱཏཔཙྩཡབྷཱཝཏོ ཨཔུབྦཏཱ. ཀབལཱི༹ཀཱརཱཧཱརསྶ ཙ པུརེཛཱཏེན སདྡྷིཾ སཏྟདྷཱ པཙྩཡབྷཱཝོ ཡོཛེཏབྦོ.

ཨཱཀཱརོཏི མཱུལཱདིཨཱཀཱརོ. ཨཏྠོཏི ཏེནཱཀཱརེན ཨུཔཀཱརཀཏཱ. ‘‘ཡེནཱཀཱརེནཱ’’ཏི ཨེཏསྶ ཝཱ ཨཏྠཝཙནཾ ‘‘ཡེནཏྠེནཱ’’ཏི. ཝིཔཱཀཧེཏཱུསུཡེཝ ལབྦྷཏཱིཏི ཨེཏྠ ཨམོཧཝིཔཱཀཧེཏུསྶ ཨདྷིཔཏིཔཙྩཡབྷཱཝོ ཙ ལོཀུཏྟརཝིཔཱཀེཡེཝ ལབྦྷཏཱིཏི. ཨེཝཾ སབྦཏྠ ལབྦྷམཱནཱལབྦྷམཱནཾ སལླཀྑེཏབྦཾ. ཝིཔྤཡུཏྟཾ ཨཔཋིཏྭཱ ‘‘ཚཧཱཀཱརེཧཱི’’ཏི པུརིམཔཱཋོ, ཏཾ པན པཋིཏྭཱ ‘‘སཏྟཧཱཀཱརེཧཱི’’ཏི པཋནྟི. ཨུཀྐཊྛཔརིཙྪེདོ ཧེཏྠ ཝུཙྩཏི, ན ཙ ཡཾ ཨཱརམྨཎཾ ནིསྶཡོ ཧོཏི, ཏཾ ཝིཔྤཡུཏྟཾ ན ཧོཏཱིཏི.

ཨནནྟརསམནནྟརེསུ ཡཾ ཀམྨཔཙྩཡོ ཧོཏི, ཏཾ ན ཨཱསེཝནཔཙྩཡོ. ཡཉྩ ཨཱསེཝནཔཙྩཡོ ཧོཏི, ན ཏཾ ཀམྨཔཙྩཡོཏི དཊྛབྦཾ. ‘‘པཀཏཱུཔནིསྶཡོ པཀཏཱུཔནིསྶཡོཝཱ’’ཏི ཝུཏྟཾ ¶ , ཀམྨཔཙྩཡོཔི པན སོ ཧོཏི, ཏསྨཱ ‘‘ཀམྨཔཙྩཡོ ཙཱ’’ཏི པཋནྟི. ཨཡཾ པནེཏྠ ཨཏྠོ – པཀཏཱུཔནིསྶཡོ ཡེབྷུཡྻེན པཀཏཱུཔནིསྶཡོཝ ཧོཏི, ཀོཙི པནེཏྠ ཀམྨཔཙྩཡོ ཙ ཧོཏཱིཏི. ‘‘ཨཱརམྨཎཔུརེཛཱཏེ པནེཏྠ ཨིནྡྲིཡཝིཔྤཡུཏྟཔཙྩཡཏཱ ན ལབྦྷཏཱི’’ཏི ཝུཏྟཾ. ཏཏྠ ཨཱརམྨཎཔུརེཛཱཏནྟི ཡདི ཀཉྩི ཨཱརམྨཎབྷཱུཏཾ པུརེཛཱཏཾ ཝུཏྟཾ, ཨཱརམྨཎབྷཱུཏསྶ ཝཏྠུསྶ ཝིཔྤཡུཏྟཔཙྩཡཏཱ ལབྦྷཏཱིཏི སཱ ན ལབྦྷཏཱིཏི ན ཝཏྟབྦཱ. ཨཐ པན ¶ ཝཏྠུཔུརེཛཱཏཏོ ཨཉྙཾ ཝཏྠུབྷཱཝརཧིཏཱརམྨཎམེཝ ‘‘ཨཱརམྨཎཔུརེཛཱཏ’’ནྟི ཝུཏྟཾ, ཏསྶ ནིསྶཡཔཙྩཡཏཱ ན ལབྦྷཏཱིཏི ‘‘ནིསྶཡིནྡྲིཡཝིཔྤཡུཏྟཔཙྩཡཏཱ ན ལབྦྷཏཱི’’ཏི ཝཏྟབྦཾ. ཨིཏོ ཨུཏྟརིཔཱིཏི པུརེཛཱཏཏོ པརཏོཔཱིཏི ཨཏྠོ, ཨིཏོ ཝཱ ཨིནྡྲིཡཝིཔྤཡུཏྟཏོ ནིསྶཡིནྡྲིཡཝིཔྤཡུཏྟཏོ ཝཱ ཨུཏྟརི ཨཱརམྨཎཱདྷིཔཏིཨཱདི ཙ ལབྦྷམཱནཱལབྦྷམཱནཾ ཝེདིཏབྦནྟི ཨཏྠོ ཝཏྟབྦོ. ཀམྨཱདཱིསུ པན ལབྦྷམཱནཱལབྦྷམཱནཾ ན ཝཀྑཏཱིཏི པུརིམོཡེཝེཏྠ ཨཏྠོ ཨདྷིཔྤེཏོ.

‘‘ཀབལཱི༹ཀཱརོ ཨཱཧཱརོ ཨཱཧཱརཔཙྩཡོཝཱ’’ཏི པུརིམཔཱཋོ, ཨཏྠིཨཝིགཏཔཙྩཡོཔི པན སོ ཧོཏི, ཏེན ‘‘ཀབལཱི༹ཀཱརོ ཨཱཧཱརོ ཨཱཧཱརཔཙྩཡཏྟཾ ཨཝིཛཧནྟོཝ ཨཏྠིཨཝིགཏཱནཾ ཝསེན ཨཔརེཧིཔི དྭཱིཧཱཀཱརེཧི ཨནེཀཔཙྩཡབྷཱཝཾ གཙྪཏཱི’’ཏི པཋནྟི.

‘‘ཡཐཱནུརཱུཔཾ ཛྷཱནཔཙྩཡེ ཝུཏྟཱནཾ དསནྣཾ ཧེཏུཨདྷིཔཏཱིནཉྩཱཏི ཨིམེསཾ ཝསེནཱ’’ཏི པུརིམཔཱཋོ, ‘‘ཡཐཱནུརཱུཔཾ ཛྷཱནཔཙྩཡེ ཝུཏྟཱནཾ མགྒཝཛྫཱནཾ ནཝནྣཾ ཧེཏུཨདྷིཔཏིཛྷཱནཱནཉྩཱཏི ཨིམེསཾ ཝསེནཱ’’ཏི པཙྪིམཔཱཋོ, ཏེསུ ཝིཙཱརེཏྭཱ ཡུཏྟོ གཧེཏབྦོ.

སམནནྟརནིརུདྡྷཏཱཡ ཨཱརམྨཎབྷཱཝེན ཙ སདིསོ པཙྩཡབྷཱཝོ པཙྩཡསབྷཱགཏཱ, ཝིརུདྡྷཔཙྩཡཏཱ པཙྩཡཝིསབྷཱགཏཱ. ‘‘ཨིམིནཱ ཨུཔཱཡེནཱ’’ཏི ཝཙནཏོ ཧེཏུཨཱདཱིནཾ སཧཛཱཏཱནཾ སཧཛཱཏབྷཱཝེན སབྷཱགཏཱ, སཧཛཱཏཱསཧཛཱཏཱནཾ ཧེཏུཨཱརམྨཎཱདཱིནཾ ཨཉྙམཉྙཝིསབྷཱགཏཱཏི ཨེཝམཱདིནཱ ཨུཔཱཡེན སབྷཱགཏཱ ཝིསབྷཱགཏཱ ཡོཛེཏབྦཱ.

ཛནཀཱཡེཝ, ན ཨཛནཀཱཏི ཛནཀབྷཱཝཔྤདྷཱནཱཡེཝ ཧུཏྭཱ པཙྩཡཱ ཧོནྟི, ན ཨུཔཏྠམྦྷཀབྷཱཝཔྤདྷཱནཱཏི ཨཏྠོ དཊྛབྦོ. ཡེསཾ ཧེཏུཨཱདཡོ པཙྩཡཱ ཧོནྟི, ཏེ ཏེཧི ཝིནཱ ནེཝ ཨུཔྤཛྫནྟི, ན ཙ པཝཏྟནྟཱིཏི ཏེསཾ ཨུབྷཡཔྤདྷཱནཏཱ ཝུཏྟཱ. ན ཧི ཏེ ཨནནྟརཱདཡོ ཝིཡ ཛནནེནེཝ པཝཏྟིཾ ཀརོནྟཱིཏི.

སབྦེསཾ ¶ ཋཱནཾ ཀཱརཎབྷཱཝོ སབྦཊྛཱནཾ, ཏཾ ཨེཏེསཾ ཨཏྠཱིཏི སབྦཊྛཱནིཀཱ. ཨུཔནིསྶཡཾ བྷིནྡནྟེན ཏཡོཔི ཨུཔནིསྶཡཱ ཝཏྟབྦཱ, ཨབྷིནྡིཏྭཱ ¶ ཝཱ ཨུཔནིསྶཡགྒཧཎམེཝ ཀཱཏབྦཾ. ཏཏྠ བྷིནྡནཾ པཀཏཱུཔནིསྶཡསྶ རཱུཔཱནཾ པཙྩཡཏྟཱབྷཱཝདསྶནཏྠཾ, ཨཱརམྨཎཱནནྟརཱུཔནིསྶཡཱནཾ པན པུབྦེ ཨཱརམྨཎཱདྷིཔཏིཨནནྟརགྒཧཎེཧི གཧིཏཏྟཱ ཏེསུ ཨེཀདེསེན ཨནནྟརཱུཔནིསྶཡེན ཨིཏརམྤི དསྶེཏཱིཏི དཊྛབྦཾ. པུརེཛཱཏཔཙྪཱཛཱཏཱཔི ཨསབྦཊྛཱནིཀཱ ཨརཱུཔརཱུཔཱནཉྙེཝ ཡཐཱཀྐམེན པཙྩཡབྷཱཝཏོཏི ཨེཏྠ པུརེཛཱཏཔཙྩཡོ ཨནནྟརཱདཱིསུ ཨེཝ ཝཏྟབྦོ ཏཾསམཱནགཏིཀཏྟཱ, ན ཙ ཡུགལ༹བྷཱཝོ པཙྪཱཛཱཏེན སཧ ཀཐནེ ཀཱརཎཾ ཨསབྦཊྛཱནིཀདསྶནམཏྟསྶ ཨདྷིཔྤེཏཏྟཱཏི ཏཾ ཏཏྠ པཋིཏྭཱ ‘‘པཙྪཱཛཱཏོཔི ཨསབྦཊྛཱནིཀོ རཱུཔཱནཾཡེཝ པཙྩཡབྷཱཝཏོ’’ཏི པཋནྟི.

པཙྩཡནིདྡེསཔཀིཎྞཀཝིནིཙྪཡཀཐཱཝཎྞནཱ ནིཊྛིཏཱ.

ཨེཀེཀཾ ཏིཀདུཀནྟི ཨེཀེཀཾ ཏིཀཾ དུཀཉྩཱཏི ཨཏྠོ, ན ཏིཀདུཀནྟི.

པཙྩཡཱ ཙེཝཱཏི ཡེ ཀུསལཱདིདྷམྨེ པཊིཙྩཱཏི ཝུཏྟཱ, ཏེ པཊིཙྩཏྠཾ ཕརནྟཱ ཀུསལཱདིཔཙྩཡཱ ཙེཝཱཏི ཨཏྠོ. ཏེནེཝཱཧ ‘‘ཏེ ཙ ཁོ སཧཛཱཏཱཝཱ’’ཏི. ཡེཧི པན ཧེཏཱདིཔཙྩཡེཧི ཨུཔྤཏྟི ཝུཏྟཱ, ཏེ སཧཛཱཏཱཔི ཧོནྟི ཨསཧཛཱཏཱཔཱིཏི. ཨེཏྠ པཊིཙྩསཧཛཱཏཝཱརེཧི སམཱནཏྠེཧི པཊིཙྩསཧཛཱཏཱབྷིདྷཱནེཧི སམཱནཏྠཾ བོདྷེནྟེན བྷགཝཏཱ པཙྪིམཝཱརེན པུརིམཝཱརོ, པུརིམཝཱརེན ཙ པཙྪིམཝཱརོ ཙ བོདྷིཏོཏི ཝེདིཏབྦོ. ཨེས ནཡོ པཙྩཡནིསྶཡཝཱརེསུ སཾསཊྛསམྤཡུཏྟཝཱརེསུ ཙ, ཨེཝཉྩ ནིརུཏྟིཀོསལླཾ ཛནིཏཾ ཧོཏཱིཏི.

‘‘ཏེ ཏེ པན པཉྷེ ཨུདྡྷརིཏྭཱ པུན ཀུསལོ ཧེཏུ ཧེཏུསམྤཡུཏྟཀཱནཾ དྷམྨཱན’’ནྟི ལིཁིཏཾ. ‘‘ཀུསལཱ ཧེཏཱུ སམྤཡུཏྟཀཱནཾ ཁནྡྷཱན’’ནྟི (པཊྛཱ. ༡.༡.༤༠༡) པཉྷཱཝཱརཔཱཋོཏི པམཱདལེཁཱ ¶ ཨེསཱཏི པཱལི༹ཡཾ ཨཱགཏཔཱཋམེཝ པཋནྟི. པུརིམཝཱརེསུ སཧཛཱཏནིསྶཡསམྤཡུཏྟཔཙྩཡབྷཱཝེཧི ཀུསལཱདིདྷམྨེ ནིཡམེཏྭཱ ཏསྨིཾ ནིཡམེ ཀུསལཱདཱིནཾ ཧེཏུཔཙྩཡཱདཱིཧི ཨུཔྤཏྟིཾ པུཙྪིཏྭཱ ཝིསྶཛྫནཾ ཀཏཾ, ན ཏཏྠ ‘‘ཨིམེ ནཱམ ཏེ དྷམྨཱ ཧེཏཱདིཔཙྩཡབྷཱུཏཱ’’ཏི ཝིཉྙཱཡནྟི, ཏསྨཱ ཏཏྠ ‘‘སིཡཱ ཀུསལཾ དྷམྨཾ པཊིཙྩ ཀུསལོ དྷམྨོ ཨུཔྤཛྫེཡྻ ¶ ཧེཏུཔཙྩཡཱ’’ཏི (པཊྛཱ. ༡.༡.༢༥) ཨེཝམཱདཱིཧི སངྒཧིཏེ པཊིཙྩཏྠཱདིཕརཎཀབྷཱཝེ ཧེཏཱདིཔཙྩཡཔཙྩཡུཔྤནྣེསུ ཧེཏཱདིཔཙྩཡཱནཾ ནིཙྪཡཱབྷཱཝཏོ པཉྷཱ ནིཛྫཊཱ ནིགྒུམྦཱ ཙ ཀཏྭཱ ན ཝིབྷཏྟཱ, ཨིདྷ པན ‘‘སིཡཱ ཀུསལོ དྷམྨོ ཀུསལསྶ དྷམྨསྶ ཧེཏུཔཙྩཡེན པཙྩཡོ’’ཏི ཨེཝམཱདཱིཧི སངྒཧིཏཱ ཧེཏཱདིཔཙྩཡབྷཱུཏཱ ཀུསལཱདཡོ པཙྩཡུཔྤནྣཱ ཙ ནིཙྪིཏཱ, ན ཀོཙི པུཙྪཱསངྒཧིཏོ ཨཏྠོ ཨནིཙྪིཏོ ནཱམ ཨཏྠཱིཏི ཨཱཧ ‘‘སབྦེཔི ཏེ པཉྷཱ ནིཛྫཊཱ ནིགྒུམྦཱ ཙ ཀཏྭཱ ཝིབྷཏྟཱ’’ཏི. པཉྷཱ པན ཨུདྡྷརིཏྭཱ ཝིསྶཛྫནཾ སབྦཏྠ སམཱནནྟི ན ཏཾ སནྡྷཱཡ ནིཛྫཊཏཱ ཝུཏྟཱཏི དཊྛབྦཱ.

ཨུཔྤཏྟིཡཱ པཉྙཱཔིཏཏྟཱཏི པུཙྪཱམཏྟེནེཝ ཨུཔྤཏྟིཡཱ ཋཔིཏཏྟཱ པཀཱསིཏཏྟཱ, ནཱནཔྤཀཱརེཧི ཝཱ ཉཱཔིཏཏྟཱཏི ཨཏྠོ.

༢༥-༣༤. པརིཀཔྤཔུཙྪཱཏི ཝིདྷིཔུཙྪཱ. ཀིཾ སིཡཱཏི ཨེསོ ཝིདྷི ཀིཾ ཨཏྠཱིཏི ཨཏྠོ. ཀིཾ སིཡཱ, ཨཐ ན སིཡཱཏི སམྤུཙྪནཾ ཝཱ པརིཀཔྤཔུཙྪཱཏི ཝདཏི. ཀིམིདཾ སམྤུཙྪནཾ ནཱམ? སམེཙྩ པུཙྪནཾ, ‘‘ཀིཾ སུཏྟནྟཾ པརིཡཱཔུཎེཡྻ, ཨཐ ཨབྷིདྷམྨ’’ནྟི ཨཉྙེན སཧ སམྤདྷཱརཎནྟི ཨཏྠོ. ཡོ ཀུསལོ དྷམྨོ ཨུཔྤཛྫེཡྻ ཧེཏུཔཙྩཡཱ, སོ ཀུསལཾ དྷམྨཾ པཊིཙྩ སིཡཱཏི ཨེཏསྨིཾ ཨཏྠེ སཏི པཙྪཱཛཱཏཝིཔཱཀཔཙྩཡེསུཔི སབྦཔུཙྪཱནཾ པཝཏྟིཏོ ‘‘ཡོ ཀུསལོ དྷམྨོ ཨུཔྤཛྫེཡྻ པཙྪཱཛཱཏཔཙྩཡཱ ཝིཔཱཀཔཙྩཡཱ, སོ ཀུསལཾ དྷམྨཾ པཊིཙྩ སིཡཱ’’ཏི ཨཡམཏྠོ ཝིཉྙཱཡེཡྻ, ཏཐཱ ཙ སཏི པཙྪཱཛཱཏཔཙྩཡཱ ཝིཔཱཀཔཙྩཡཱཏི ཨུཔྤཛྫམཱནཾ ནིདྡྷཱརེཏྭཱ ཏསྶ ཀུསལཾ དྷམྨཾ པཊིཙྩ བྷཝནསྶ པུཙྪནཏོ ཀུསལཱནཾ ཏེཧི པཙྩཡེཧི ཨུཔྤཏྟི ཨནུཉྙཱཏཱཏི ཨཱཔཛྫཏི, ན ཙ ཏཾཏཾཔཙྩཡཱ ཨུཔྤཛྫམཱནཱནཾ ཀུསལཱདཱིནཾ ཀུསལཱདིདྷམྨེ པཊིཙྩ བྷཝནམཏྠིཏཱ ཨེཏྠ པུཙྪིཏཱ, ཨཐ ཁོ ཨུཔྤཏྟི, ཨེཝཉྩ ཀཏྭཱ ཝིསྶཛྫནེ ‘‘ཀུསལཾ དྷམྨཾ པཊིཙྩ ཀུསལོ དྷམྨོ ཨུཔྤཛྫཏཱི’’ཏི ཨུཔྤཏྟིཡེཝ ཝིསྶཛྫིཏཱཏི, ཏསྨཱ ཨཡམཏྠོ སདོསོཏི ‘‘ཨཐ ཝཱ’’ཏི ཨཏྠནྟརཝཙནཾ ཝུཏྟཾ.

ཏཏྠ ¶ ‘‘ཀུསལོ དྷམྨོ ཨུཔྤཛྫེཡྻཱ’’ཏི ཨུཔྤཏྟིཾ ཨནུཛཱནིཏྭཱ ‘‘ཧེཏུཔཙྩཡཱ སིཡཱ ཨེཏ’’ནྟི ཏསྶཱ ཧེཏུཔཙྩཡཱ བྷཝནཔུཙྪནཾ, ‘‘ཨུཔྤཛྫེཡྻ ཧེཏུཔཙྩཡཱ’’ཏི ཧེཏུཔཙྩཡཱ ཨུཔྤཏྟིཾ ཨནུཛཱནིཏྭཱ ཏསྶཱ ‘‘སིཡཱ ཨེཏ’’ནྟི བྷཝནཔུཙྪནཉྩ ན ཡུཏྟཾ. ཨནུཉྙཱཏཉྷི ནིཙྪིཏམེཝཱཏི. ཏསྨཱ ཨནནུཛཱནིཏྭཱ ¶ ‘‘ཀུསལཾ དྷམྨཾ པཊིཙྩ ཀུསལོ དྷམྨོ ཨུཔྤཛྫེཡྻ ཧེཏུཔཙྩཡཱ’’ཏི ཨེཝཾ ཡཐཱཝུཏྟཾ ཨུཔྤཛྫནཾ ཀིཾ སིཡཱཏི པུཙྪཏཱིཏི དཊྛབྦཾ. ཨུཔྤཛྫེཡྻཱཏི ཝཱ ཨིདམྤི སམྤུཙྪནམེཝ, ཀུསལཾ དྷམྨཾ པཊིཙྩ ཀུསལོ དྷམྨོ ཀིཾ ཨུཔྤཛྫེཡྻ ཧེཏུཔཙྩཡཱཏི ཨཏྠོ. སིཡཱཏི ཡཐཱཔུཙྪིཏསྶེཝ ཨུཔྤཛྫནསྶ སམྦྷཝཾ པུཙྪཏི ‘‘ཀིཾ ཨེཝཾ ཨུཔྤཛྫནཾ སིཡཱ སམྦྷཝེཡྻཱ’’ཏི, ཨཡཾ ནཡོ སིཡཱསདྡསྶ པཙྪཱཡོཛནེ. ཡཐཱཋཱནེཡེཝ པན ཋིཏཱ ‘‘སིཡཱ’’ཏི ཨེསཱ སཱམཉྙཔུཙྪཱ, ཏཱཡ པན པུཙྪཱཡ ‘‘ཨིདཾ ནཱམ པུཙྪིཏ’’ནྟི ན ཝིཉྙཱཡཏཱིཏི ཏསྶཱཡེཝ པུཙྪཱཡ ཝིསེསནཏྠཾ ‘‘ཀུསལཾ དྷམྨཾ པཊིཙྩ ཀུསལོ དྷམྨོ ཨུཔྤཛྫེཡྻ ཧེཏུཔཙྩཡཱ’’ཏི པུཙྪཏི, ཨེཝཾ ཝིསེསིཏབྦཝིསེསནབྷཱཝེན དྭེཔི པུཙྪཱ ཨེཀཱཡེཝ པུཙྪཱཏི དཊྛབྦཱ.

གམནུསྶུཀྐཝཙནནྟི གམནསྶ སམཱནཀཏྟུཀཔཙྪིམཀཱལཀིརིཡཱཔེཀྑཝཙནནྟི ཨཏྠོ. ཡདིཔི པཊིགམནུཔྤཏྟཱིནཾ པུརིམཔཙྪིམཀཱལཏཱ ནཏྠི, པཙྩཡཔཙྩཡུཔྤནྣཱནཾ པན སཧཛཱཏཱནམྤི པཙྩཡཔཙྩཡུཔྤནྣབྷཱཝེན གཧཎཾ པུརིམཔཙྪིམབྷཱཝེནེཝ ཧོཏཱིཏི གཧཎཔྤཝཏྟིཨཱཀཱརཝསེན པཙྩཡཱཡཏྟཏཱཨཏྟཔཊིལཱབྷསངྑཱཏཱནཾ པཊིགམནུཔྤཏྟིཀིརིཡཱནམྤི པུརིམཔཙྪིམཀཱལཝོཧཱརོ ཧོཏཱིཏི དཊྛབྦོ. གམནཾ ཝཱ ཨུཔྤཏྟི ཨེཝཱཏི གཙྪནྟསྶ པཊིགམནཾ ཨུཔྤཛྫནྟསྶ པཊིཨུཔྤཛྫནཾ སམཱནཀིརིཡཱ. པཊིཀརཎཉྷི པཊིསདྡཏྠོཏི. ཏསྨཱ ‘‘ཀུསལཾ དྷམྨ’’ནྟི ཨུཔཡོགནིདྡིཊྛཾ པཙྩཡཾ ཨུཔྤཛྫམཱནཾ པཊིཙྩ ཏདཱཡཏྟུཔྤཏྟིཡཱ པཊིགནྟྭཱཏི ཨཡམེཏྠ ཨཏྠོ, ཏེན པཊིཙྩཱཏི སཧཛཱཏཔཙྩཡཾ ཀཏྭཱཏི ཝུཏྟཾ ཧོཏི. སཧཛཱཏཔཙྩཡཀརཎཉྷི ཨུཔྤཛྫམཱནཱབྷིམུཁཨུཔྤཛྫམཱནཾ པཊིགམནཾ, ཏཾ ཀཏྭཱཏི པཊིཙྩསདྡསྶ ཨཏྠོཏི.

༣༥-༣༨. ཏཱསུ པཱལི༹ཡཾ དྭེཡེཝ དསྶིཏཱཏི ཧེཏཱརམྨཎདུཀེ དྭིནྣཾ པུཙྪཱནཾ དསྶིཏཏྟཱ ཝུཏྟཾ. ཨེཏྠ ཙ ཨེཀམཱུལཀཱདིབྷཱཝོ པུཙྪཱནཾ ཝུཏྟོཏི ཝེདིཏབྦོ, པཙྩཡཱནཾ པན ཝསེན སབྦཔཋམོ པཙྩཡནྟརེན ཨཝོམིསྶཀཏྟཱ སུདྡྷིཀནཡོ, དུཏིཡོ ཨཱརམྨཎཱདཱིསུ ཨེཀེཀསྶ ཧེཏུ ཨེཝ ཨེཀམཱུལཀནྟི ཀཏྭཱ ཨེཀམཱུལཀནཡོ. ཨེཝཾ ཧེཏཱརམྨཎདུཀཱདཱིནཾ ཨདྷིཔཏིཨཱདཱིནཾ མཱུལབྷཱཝཏོ དུཀམཱུལཀཱདཡོ ནཡཱ ཝེདིཏབྦཱ. ཏེཝཱིསཏིམཱུལཀནཡོ ཙ ཏཏོ པརཾ མཱུལསྶ ཨབྷཱཝཏོ ‘‘སབྦམཱུལཀ’’ནྟི པཱལི༹ཡཾ ཝུཏྟོ. ཏཏྠ ནཔུཾསཀནིདྡེསེན ཨེཀ…པེ… སབྦམཱུལཀཾ པཙྩཡགམནཾ ¶ པཱལི༹གམནཾ ཝཱཏི ཝིཉྙཱཡཏི, ཨེཀ…པེ… སབྦམཱུལཀཾ ནཡཾ ཨསམྨུཡ྄ཧནྟེནཱཏི ཨུཔཡོགོ ཝཱ ¶ , ཨིདྷ ཙ སབྦམཱུལཀནྟི ཙ ཏེཝཱིསཏིམཱུལཀསྶེཝ ཝུཏྟཏྟཱ པཙྩནཱིཡེ ཝཀྑཏི ‘‘ཡཐཱ ཨནུལོམེ ཨེཀེཀསྶ པདསྶ ཨེཀམཱུལཀཾ…པེ… ཡཱཝ ཏེཝཱིསཏིམཱུལཀཾ, ཨེཝཾ པཙྩནཱིཡེཔི ཝིཏྠཱརེཏབྦ’’ནྟི (པཊྛཱ. ཨཊྛ. ༡.༤༢-༤༤).

༣༩-༤༠. ‘‘ཨཱརམྨཎཔཙྩཡཱ ཧེཏུཔཙྩཡཱཏི ཨེཏྟཱཝཏཱ ཨཱརམྨཎཔཙྩཡཾ ཨཱདིཾ ཀཏྭཱ ཧེཏུཔཙྩཡཔརིཡོསཱནོ ཨེཀམཱུལཀནཡོ དསྶིཏོ’’ཏི ཝུཏྟཾ, ཨེཝཾ སཏི ཝིནཡེ ཝིཡ ཙཀྐབནྡྷནཝསེན པཱལི༹གཏི ཨཱཔཛྫཏི, ན ཧེཊྛིམསོདྷནཝསེན. ཧེཊྛིམསོདྷནཝསེན ཙ ཨིདྷ ཨབྷིདྷམྨེ པཱལི༹ གཏཱ, ཨེཝཉྩ ཀཏྭཱ ཝིསྶཛྫནེ ‘‘ཨཱརམྨཎཔཙྩཡཱ ཧེཏུཡཱ ཏཱིཎི, ཨདྷིཔཏིཔཙྩཡཱ ཏཱིཎི, ཨདྷིཔཏིཔཙྩཡཱ ཧེཏུཡཱ ནཝ, ཨཱརམྨཎེ ཏཱིཎཱི’’ཏིཨཱདིནཱ ཧེཊྛིམཾ སོདྷེཏྭཱཝ པཱལི༹ པཝཏྟཱ. ཡོ ཙེཏྠ ‘‘ཨེཀམཱུལཀནཡོ’’ཏི ཝུཏྟོ, སོ སུདྡྷིཀནཡོཝ. སོ ཙ ཝིསེསཱབྷཱཝཏོ ཨཱརམྨཎམཱུལཀཱདཱིསུ ན ལབྦྷཏི. ན ཧི ཨཱརམྨཎཱདཱིསུ ཏསྨིཾ ཏསྨིཾ ཨཱདིམྷི ཋཔིཏེཔི པཙྩཡནྟརེན སམྦནྡྷཱབྷཱཝེན ཨཱདིམྷི ཝུཏྟསུདྡྷིཀཏོ ཝིསེསཏྠོ ལབྦྷཏི, ཏེནེཝ ཝིསྶཛྫནེཔི ཨཱརམྨཎམཱུལཀཱདཱིསུ སུདྡྷིཀནཡོ ན དསྶིཏོཏི, ཏསྨཱ ‘‘ཨཱརམྨཎཔཙྩཡཱ ཧེཏུཔཙྩཡཱ ཨཱརམྨཎཔཙྩཡཱ ཨདྷིཔཏིཔཙྩཡཱ…པེ… ཨཱརམྨཎཔཙྩཡཱ ཨཝིགཏཔཙྩཡཱ’’ཏི (པཊྛཱ. ༡.༡.༣༩) ཨཡཾ ཧེཊྛིམསོདྷནཝསེན ཨེཀསྨིཾ ཨཱརམྨཎཔཙྩཡེ ཧེཏུཔཙྩཡཱདིཀེ ཡོཛེཏྭཱ ཝུཏྟོ ཨེཀམཱུལཀནཡོ དཊྛབྦོ. ‘‘ཨཱརམྨཎཔཙྩཡཱ…པེ… ཨཝིགཏཔཙྩཡཱ’’ཏི ཝཱ ཨེཀམཱུལཀེསུ ཨནནྟརཔཙྩཡསྶ མཱུལཀཾ ཨཱརམྨཎཾ དསྶེཏྭཱ ཨེཀམཱུལཀཱདཱིནི སཾཁིཔིཏྭཱ སབྦམཱུལཀསྶཱཝསཱནེན ཨཝིགཏཔཙྩཡེན ནིཊྛཱཔིཏནྟི དཊྛབྦཾ. ཨདྷིཔཏིཔཙྩཡཱ ཨནནྟརཔཙྩཡཱ སམནནྟརཔཙྩཡཱ སཧཛཱཏཔཙྩཡཱ ཨཉྙམཉྙཔཙྩཡཱཏི ཨིདཾ མཱུལམེཝ དསྶེཏྭཱ ཨེཀམཱུལཀཱདཱིནཾ སཾཁིཔནཾ དཊྛབྦཾ, ན སུདྡྷིཀདསྶནཾ, ནཱཔི སབྦམཱུལཀེ ཀཏིཔཡཔཙྩཡདསྶནཾ.

༤༡. ཏཏོ ནིསྶཡཱདཱིནི མཱུལཱནིཔི སཾཁིཔིཏྭཱ ཨཝིགཏམཱུལཀནཡཾ དསྶེཏུཾ ‘‘ཨཝིགཏཔཙྩཡཱ ཧེཏུཔཙྩཡཱ’’ཏིཨཱདི ཨཱརདྡྷཾ. ཨེཏསྨིཉྩ སུདྡྷིཀསྶ ཨདསྶནེན ཨཱརམྨཎམཱུལཀཱདཱིསུ ཝིསུཾ ཝིསུཾ སུདྡྷིཀནཡོ ན ལབྦྷཏཱིཏི ཉཱཔིཏོ ཧོཏི. ན ཧི ཨཱདི ཀཏྠཙི སཾཁེཔནྟརགཏོ ཧོཏི. ཨཱདིཨནྟེཧི མཛ྄ཛྷིམཱནཾ དསྶནཉྷི སངྑེཔོ, ཨཱདིཏོ པབྷུཏི ཀཏིཙི ¶ ཝཏྭཱ གཏིདསྶནཾ ཝཱཏི. དུཏིཡཙཏུཀྐཾ ཝཏྭཱ ‘‘ཝིགཏཔཙྩཡཱ’’ཏི པདཾ ཨུདྡྷརིཏྭཱ ཋཔིཏཾ ¶ . ཏེན ཨོསཱནཙཏུཀྐཾ དསྶེཏི. ཏཏིཡཙཏུཀྐཏོ པབྷུཏི ཝཱ པཉྩཀམཱུལཱནི སཾཁིཔིཏྭཱ སབྦམཱུལཀསྶ ཨཝསཱནེན ནིཊྛཔེཏི.

ཨེཏྠ ཙ དུཀམཱུལཀཱདཱིསུ ཡཐཱ ཧེཏུཨཱརམྨཎདུཀེན སདྡྷིཾ ཨཝསེསཱ པཙྩཡཱ ཡོཛིཏཱ, ཧེཏཱརམྨཎཱདྷིཔཏིཏིཀཱདཱིཧི ཙ ཨཝསེསཱཝསེསཱ, ཨེཝཾ ཧེཏུཨདྷིཔཏིདུཀཱདཱིཧི ཧེཏུཨདྷིཔཏིཨནནྟརཏིཀཱདཱིཧི ཙ ཨཝསེསཱཝསེསཱ ཡོཛེཏབྦཱ སིཡུཾ. ཡདི ཙ སབྦེསཾ པཙྩཡཱནཾ མཱུལབྷཱཝེན ཡོཛིཏཏྟཱ ཧེཏུམཱུལཀེ ཧེཏུཨདྷིཔཏིཨཱདིདུཀཱནཾ ཨདྷིཔཏིམཱུལཀཱདཱིསུ ཨདྷིཔཏིཧེཏུཨཱདིདུཀེཧི ཝིསེསོ ནཏྠི. ཏེ ཨེཝ ཧི པཙྩཡཱ ཨུཔྤཊིཔཱཊིཡཱ ཝུཏྟཱ, ཏཐཱཔི ཨཱརམྨཎམཱུལཀཱདཱིསུ ཨཱརམྨཎཱདྷིཔཏིདུཀཱདཱིནཾ ཨཝསེསཱཝསེསེཧི, ཧེཏུམཱུལཀེ ཙ ཧེཏུཨདྷིཔཏིཨནནྟརཏིཀཱདཱིནཾ ཨཝསེསཱཝསེསེཧི ཡོཛནེ ཨཏྠི ཝིསེསོཏི. ཡསྨཱ པན ཨེཝཾ ཡོཛིཡམཱནེསུཔི སུཁགྒཧཎཾ ན ཧོཏི, ན ཙ ཡཐཱཝུཏྟཱཡ ཡོཛནཱཡ སབྦཱ སཱ ཡོཛནཱ པཉྙཝཏཱ ན སཀྐཱ ཝིཉྙཱཏུཾ, ཏསྨཱ ཏཐཱ ཨཡོཛེཏྭཱ ཨནུཔུབྦེནེཝ ཡོཛནཱ ཀཏཱཏི དཊྛབྦཱ. དྷམྨཱནཾ དེསནཱཝིདྷཱནེ ཧི བྷགཝཱཝ པམཱཎནྟི. གཎནཱགཱཐཱ ཨཱདིམཔཱཋེ ཀཱཙི ཝིརུདྡྷཱ, ཏསྨཱ སུཊྛུ གཎེཏྭཱ གཧེཏབྦཱ.

‘‘དྭཱཝཱིསཏིཡཱ ཏིཀེསུ ཨེཀེཀཾ ཏིཀཾ དུཀཱནཾ སཏེན སཏེན སདྡྷིཾ ཡོཛེཏྭཱ’’ཏི ཝུཏྟཾ, ཏཾ དུཀཏིཀཔཊྛཱནེ ཀེསཉྩི པོཏྠཀཱནཾ ཝསེན ཝུཏྟཾ. ཀེསུཙི པན ཨེཀེཀོ དུཀོ དྭཱཝཱིསཏིཡཱ དྭཱཝཱིསཏིཡཱ ཏིཀེཧི ཡོཛིཏོ, ཏཉྩ གམནཾ ཡུཏྟཾ. ན ཧི ཏཏྠ ཏིཀསྶ ཡོཛནཱ ཨཏྠི, ཨཐ ཁོ ཏིཀཱནཾ ཨེཀེཀེན པདེན དུཀསྶཱཏི. ཏཏྠ ཚསཊྛིཡཱ ཏིཀཔདེསུ ཨེཀེཀེན སཾསནྡིཏྭཱ ཚསཊྛི ཧེཏུདུཀཱ, ཏཐཱ སཧེཏུཀདུཀཱདཡོ ཙཱཏི དུཀཱནཾ ཚསཏཱདྷིཀཱནི ཚསཧསྶཱནི ཧོནྟི. ཏེསུ ཨེཀེཀསྨིཾ པཊིཙྩཝཱརཱདཡོ སཏྟ ཝཱརཱ ནཡཱ པུཙྪཱ ཙ སབྦཱ དུཀཔཊྛཱནེ ཧེཏུདུཀེན སམཱནཱ.

‘‘དུཀསཏེ ཨེཀེཀཾ དུཀཾ དྭཱཝཱིསཏིཡཱ ཏིཀེཧི སདྡྷིཾ ཡོཛེཏྭཱ’’ཏི ཙ ཝུཏྟཾ, ཏམྤི ཏིཀདུཀཔཊྛཱནེ ཀེསཉྩི པོཏྠཀཱནཾ ཝསེན ཝུཏྟཾ. ཝུཏྟནཡེན པན ཡུཏྟགམནེསུ ཨེཀེཀོ ཏིཀོ དུཀསཏེན ཡོཛིཏོ. ཏཏྠ ཧེཏུཔདཾ པཀྑིཔིཏྭཱ ཝུཏྟོ ཨེཀོ ཀུསལཏྟིཀོ, ཏཐཱ ནཧེཏུཔདཾ…པེ… ཨརཎཔདནྟི ཀུསལཏྟིཀཱནཾ དྭེ ¶ སཏཱནི ཧོནྟི, ཏཐཱ ཝེདནཱཏྟིཀཱདཱིནམྤཱིཏི སབྦེསཾ ཙཏུསཏཱདྷིཀཱནི ཙཏྟཱརི སཧསྶཱནི ཧོནྟི. ཏེསུ ཨེཀེཀསྨིཾ ཝཱརནཡཔུཙྪཱ ཏིཀཔཊྛཱནེ ཀུསལཏྟིཀེན སམཱནཱ.

‘‘ཚ ¶ ཨནུལོམམྷི ནཡཱ སུགམྦྷཱིརཱ’’ཏི ཝཙནཏོ པནཱཏི ཨེཏེན ཨིདཾ དསྶེཏི – ‘‘ཨནུལོམམྷཱི’’ཏི ‘‘ཏིཀཱདཡོ ཚནཡཱ’’ཏི ཙ ཨཝིསེསེན ཝུཏྟཏྟཱ པཊིཙྩཝཱརཱདིཝསེན སཏྟཝིདྷམྤི ཨནུལོམཾ སཧ གཧེཏྭཱ ‘‘ཚ ཨནུལོམམྷཱི’’ཏི ཝུཏྟཾ, ཨནུལོམཱདིཝསེན ཙཏུབྦིདྷཾ ཏིཀཔཊྛཱནཾ སཧ གཧེཏྭཱ ‘‘ཏིཀཉྩ པཊྛཱནཝར’’ནྟི, ཏཐཱ ཙཏུབྦིདྷཱནི དུཀཔཊྛཱནཱདཱིནི སཧ གཧེཏྭཱ ‘‘དུཀུཏྟམ’’ནྟིཨཱདིཾ ཝཏྭཱ ‘‘ཚ ནཡཱ སུགམྦྷཱིརཱ’’ཏི ཝུཏྟནྟི ཨིམམཏྠཾ གཧེཏྭཱ ཨིམསྨིཾ པཙྩཡཱནུལོམེ སཏྟཔྤབྷེདེ ཚཔི ཨེཏེ པཊྛཱནཱ པཊྛཱནནཡཱ ཙཏུཔྤབྷེདཱ པུཙྪཱཝསེན ཨུདྡྷརིཏབྦཱཏི. ཨེཝཉྷི སབྦསྨིཾ པཊྛཱནེ སབྦོ པཙྩཡཱནུལོམོ དསྶིཏོ ཧོཏཱིཏི. པཙྩནཱིཡགཱཐཱདཱིསུཔི ཨེསེཝ ནཡོ. ཨེཏྠ ཙ དུཀཏིཀཔཊྛཱནཱདཱིསུ ཝིསེསིཏབྦེཧི ཏིཀེཧི པཊྛཱནཾ ཏིཀཔཊྛཱནཾ. དུཀཱནཾ ཏིཀཔཊྛཱནཾ དུཀཏིཀཔཊྛཱནཾ. དུཀཝིསེསིཏཱ ཝཱ ཏིཀཱ དུཀཏིཀཱ, དུཀཏིཀཱནཾ པཊྛཱནཾ དུཀཏིཀཔཊྛཱནནྟི ཨིམིནཱ ནཡེན ཝཙནཏྠོ ཝེདིཏབྦོ. དུཀཱདིཝིསེསིཏསྶ ཙེཏྠ ཏིཀཱདིཔདསྶ དུཀཱདིབྷཱཝོ དཊྛབྦོ. དུཀཔཊྛཱནམེཝ ཧི ཏིཀཔདསཾསནྡནཝསེན དུཀཔདསཾསནྡནཝསེན ཙ པཝཏྟཾ དུཀཏིཀཔཊྛཱནཾ དུཀདུཀཔཊྛཱནཉྩ, ཏཐཱ ཏིཀཔཊྛཱནམེཝ དུཀཔདསཾསནྡནཝསེན ཏིཀཔདསཾསནྡནཝསེན ཙ པཝཏྟཾ ཏིཀདུཀཔཊྛཱནཾ ཏིཀཏིཀཔཊྛཱནཉྩཱཏི.

༤༢-༤༤. ཏེཝཱིསཏིམཱུལཀནྟི ཨིདཉྩེཏྠ དུམཱུལཀཾཡེཝ སནྡྷཱཡ ཝུཏྟནྟི ཨིདཾ དུཀམཱུལཀེ པུཙྪཱནཾ མཱུལབྷཱུཏཱ ཏེཝཱིསཏི དུཀཱ སམྦྷཝནྟཱིཏི ཏསྶ ‘‘ཏེཝཱིསཏིམཱུལཀ’’ནྟི ནཱམཾ ཀཏྭཱ ཡཱཝ ཡཏྟཀོ པབྷེདོ ཨཏྠི, ཏཱཝ ཏཏྟཀཾ ཏེཝཱིསཏིམཱུལཀཾ ཡཐཱནུལོམེ ཝིཏྠཱརིཏཾ. ཨེཝཾ པཙྩནཱིཡེཔི ཝིཏྠཱརེཏབྦནྟི དུཀམཱུལཀེན ཏིཀམཱུལཀཱདཱིསུ ནཡཾ དསྶེཏཱིཏི ཨིམིནཱ ཨདྷིཔྤཱཡེན ཝུཏྟཾ སིཡཱ. ཡདི པན ཡཱཝ ཏེཝཱིསཏིམཾ མཱུལཾ ཡཐཱ ཝིཏྠཱརིཏནྟི ཨཡམཏྠོ ཨདྷིཔྤེཏོ, ‘‘ཡཱཝ ཏེཝཱིསཏིམཾ མཱུལ’’ནྟྭེཝ པཱཋེན བྷཝིཏབྦཾ ¶ སིཡཱ. ན ཧི ‘‘ཏེཝཱིསཏིམཱུལཀ’’ནྟི ཨེཏསྶ བྱཉྫནསྶ ཏེཝཱིསཏིམཾ མཱུལཀནྟི ཨཡམཏྠོ སམྦྷཝཏི. ཡཐཱ ཨནུལོམེ ‘‘ཨེཀེཀཔདསྶཱ’’ཏིཨཱདིནཱ པན ཨེཀམཱུལཱདིསབྦམཱུལཀཔརིཡོསཱནཾ ཏཏྠ ནཡདསྶནཝསེན དསྶིཏཾ ཨེཀེཀསྶ པདསྶ ཝིཏྠཱརཾ དསྶེཏཱིཏི ¶ སབྦམཱུལཀམེཝ ཙེཏྠ ‘‘ཏེཝཱིསཏིམཱུལཀ’’ནྟི ཝུཏྟནྟི ཝེདིཏབྦཾ. ཏཉྷི ཏེཝཱིསཏིཡཱ པཙྩཡཱནཾ ཨཝསེསསྶ པཙྩཡསྶ མཱུལབྷཱཝཏོ ‘‘ཏེཝཱིསཏིམཱུལཀ’’ནྟི ཙ ཏཏོ པརཾ མཱུལསྶ ཨཉྙསྶ ཨབྷཱཝཏོ ‘‘སབྦམཱུལཀ’’ནྟི ཙ ཝུཙྩཏི.

༤༥-༤༨. ཨནུལོམེ ཝུཏྟེསུ སབྦེསུ ཨེཀམཱུལཀཱདཱིསུ ཨེཀེཀཾ པདཾ པརིཧཱཔེཏྭཱཏི ཏཏྠ ཨེཀམཱུལཀེ ཙཏུཝཱིསཏི པཙྩཡཔདཱནི ཨིདྷ ཨེཀམཱུལཀེ ཏེཝཱིསཏི, ཨེཀོ པན པཙྩཡོ མཱུལབྷཱཝེན ཋིཏོ ཨཔུབྦཏཱབྷཱཝཏོ ཨགཎནཱུཔགོ. ཏཏྠ དུམཱུལཀེ ཏེཝཱིསཏི པཙྩཡཔདཱནི གཎནཱུཔགཱནི, ཨིདྷ དུམཱུལཀེ དྭཱཝཱིསཏཱིཏི ཨེཝཾ པརིཧཱཔེཏྭཱཏི ཨཏྠོ.

ཨནུལོམཏོ ཋིཏསྶ པཙྩནཱིཡཏོ ཨལབྦྷམཱནཱནཾ སུདྡྷིཀཔཙྩཡཱནཉྩ ཨལབྦྷམཱནཏཾ སནྡྷཱཡ ‘‘ལབྦྷམཱནཔདཱན’’ནྟི ཝུཏྟཾ. ན ཧི ཨཉྙཐཱ པུཙྪཱཝསེན ཀོཙི པཙྩཡོ ཨལབྦྷམཱནོ ནཱམ ཨཏྠཱིཏི. ཝིསྶཛྫནཱཝསེནེཝ ཝཱ པཝཏྟཾ ཨནུལོམཔཙྩནཱིཡདེསནཾ སནྡྷཱཡ ‘‘ལབྦྷམཱནཔདཱན’’ནྟི ཝུཏྟཾ.

༥༣. ཡཱ ¶ ཀུསལཏྟིཀེ ལབྷནྟི, ན ཏཱཡེཝ ཝེདནཱཏྟིཀཱདཱིསཱུཏི ཏིཀཔདནཱནཏྟམཏྟེན ཝིནཱ མཱུལཱཝསཱནཝསེན སདིསཏཾ སནྡྷཱཡ ‘‘ན ¶ ཏཱཡེཝཱ’’ཏི ཝུཏྟཾ, ན ཙ ཀེཝལཾ ཏིཀནྟརེཡེཝ, ཀུསལཏྟིཀེཔི པན ཡཱ པཊིཙྩཝཱརེ ལབྷནྟི, ན ཏཱཡེཝ པཙྩཡཝཱརཱདཱིསཱུཏི སབྦཔུཙྪཱསམཱཧརཎཾ ཨིདྷ ཀཏྟབྦམེཝ. དྷམྨཱནུལོམཔཙྩནཱིཡེ ཙ ཏིཀཔཊྛཱནེ ཝིཏཀྐཏྟིཀཔཱིཏིཏྟིཀཱནཾ ཝིསྶཛྫནེ སབྦཱཔེཏཱ ཝིསྶཛྫནཾ ལབྷནྟཱིཏི ཨེཏྠ པཱིཏིཏྟིཀགྒཧཎཾ ན ཀཱཏབྦཾ. ན ཧི ཏཏྠ ཨེཀཱུནཔཉྙཱས པུཙྪཱ ཝིསྶཛྫནཾ ལབྷནྟཱིཏི.

ཏེན སདྡྷིནྟི ཏེན སཧཛཱཏཔཙྩཡབྷཱུཏེན སདྡྷིནྟི ཨཏྠོ དཊྛབྦོ. ‘‘ཡཱཝ ནིརོདྷགམནཱ ཨུདྡྷཾ པཛྫཏཱི’’ཏི ཙ ‘‘ཨུཔྤཱདཱདཡོ ཝཱ པཱཔུཎཱཏཱི’’ཏི ཙ ཝཙནེཧི ཁཎཏྟཡསམངྒཱི ཨུཔྤཛྫཏཱིཏི ཝུཙྩཏཱིཏི ཨནུཉྙཱཏཾ ཝིཡ ཧོཏི, ཨུཔྤཱདཀྑཎསམངྒཱིཡེཝ པན ཨེཝཾ ཝུཏྟོཏི དཊྛབྦོ.

ཡསྨཱ པན ཨེཀོ ཁནྡྷོ ཨེཀསྶཱཏིཨཱདི ཨིདྷ ཀུསལཝཙནེན གཧིཏེ ཁནྡྷེ སནྡྷཱཡ ཝུཏྟཾ. ཝེདནཱཏྟིཀཱདཱིསུ པན ཨེཀཾ ཁནྡྷཾ པཊིཙྩ དྭིནྣཾ, དྭེ པཊིཙྩ ཨེཀསྶཔི, ཧེཏུདུཀཱདཱིསུ ཙ སངྑཱརཀྑནྡྷེཀདེསཾ པཊིཙྩ སངྑཱརཀྑནྡྷེཀདེསསྶཔི ཨུཔྤཏྟི ཝུཏྟཱཏི སཧ ཨུཔྤཛྫམཱནཱནཾ སབྦེསཾ དྷམྨཱནཾ པཙྩཡོ ཧོནྟོ ཨེཀེཀསྶཔི དུཀཏིཀཱདིབྷེདཱནཉྩ པཙྩཡོ ནཱམ ཧོཏིཡེཝ, ཏཐཱ དུཀཱདིབྷེདཱནཉྩཱཏི.

‘‘རཱུཔེན སདྡྷིཾ ཨནུཔྤཏྟིཏོ ཨཱརུཔྤཝིཔཱཀཉྩ ན གཧེཏབྦ’’ནྟི ཝུཏྟཾ, ཏཾ པན ན སབྦསྨིཾ ཨེཏསྨིཾ ཝཙནེ གཧེཏབྦཾ, ཨཐ ཁོ ‘‘ཙིཏྟསམུཊྛཱནཉྩ རཱུཔ’’ནྟི ཨེཏྠེཝ. ན ཀེཝལཉྩ ¶ ཨཱརུཔྤཝིཔཱཀོཝ, ཨཐ ཁོ ལོཀུཏྟརཝིཔཱཀཀིརིཡཱབྱཱཀཏམྤི ཨཱརུཔྤེ ཨུཔྤཛྫམཱནཾ ཨེཏྠ ན གཧེཏབྦཾ. ‘‘ཝིཔཱཀཱབྱཱཀཏཾ ཀིརིཡཱབྱཱཀཏཾ ཨེཀཾ ཁནྡྷཾ པཊིཙྩ ཏཡོ ཁནྡྷཱ’’ཏི ཨེཏྠ པན ན ཀིཉྩི རཱུཔེན ཝིནཱ སཧ ཝཱ ཨུཔྤཛྫམཱནཾ སཧེཏུཀཾ ཝིཔཱཀཀིརིཡཱབྱཱཀཏཾ ཨགྒཧིཏཾ ནཱམ ཨཏྠི. ཏཏྠ པན ཡཾ རཱུཔེན སཧ ཨུཔྤཛྫཏི, ཏསྶ པཙྩཡུཔྤནྣཝིསེསཾ དསྶེཏུཾ ‘‘ཙིཏྟསམུཊྛཱནཉྩ རཱུཔ’’ནྟི ཝུཏྟཾ.

‘‘ཝཏྠུཾ པཊིཙྩ ཁནྡྷཱ’’ཏི ཨེཏྟཀེ ཝཏྟབྦེ པཙྩཡབྷཱུཏསྶ ཝཏྠུསྶ ‘‘ཀཊཏྟཱ ཙ རཱུཔ’’ནྟི ཨེཏསྨིཾ སཱམཉྙཝཙནེ པཙྩཡུཔྤནྣབྷཱཝེན ཨགྒཧིཏཏཱཔཏྟིཾ ནིཝཱརེཏུཾ ‘‘ཁནྡྷེ པཊིཙྩ ཝཏྠཱུ’’ཏི ཝུཏྟཾ. ཁནྡྷེ པཊིཙྩ ཝཏྠུ, ཝཏྠུཾ པཊིཙྩ ཁནྡྷཱཏི ཝཱ ཝཏྠུཁནྡྷཱནཾ ཨཉྙམཉྙཔཙྩཡབྷཱུཏཱནཾ པཙྩཡབྷཱཝཝིསེསདསྶནཏྠཾ ཨཉྙམཉྙཱཔེཀྑཾ ཝཙནདྭཡཾ ཝུཏྟཾ སཱམཉྙེན གཧིཏམྤི ཝིསུཾ ཨུདྡྷཊཾ.

མཧཱབྷཱུཏེཔི ¶ པཊིཙྩ ཨུཔྤཏྟིདསྶནཏྟནྟི ཡཾ ཙིཏྟསམུཊྛཱནརཱུཔཾ ཀཊཏྟཱརཱུཔཉྩ ཨུཔཱདཱརཱུཔཾ ཨུཔཱདཱརཱུཔགྒཧཎེན ཝིནཱ ‘‘ཁནྡྷེ པཊིཙྩ ཨུཔྤཛྫཏཱི’’ཏི ཝུཏྟཾ, ཏསྶ མཧཱབྷཱུཏེཔི པཊིཙྩ ཨུཔྤཏྟིདསྶནཏྠནྟི ཨཏྠོ. ཨེཏསྨིཾ པན དསྶནེ ཁནྡྷཔཙྩཡསཧིཏཱསཧིཏཉྩ སབྦཾ ཨུཔཱདཱརཱུཔཾ ཨིཏོ པརེསུ སཧཛཱཏཔཙྩཡཱདཱིསུ སངྒཧིཏནྟི ཨིམམཏྠཾ སནྡྷཱཡ ‘‘ཀཊཏྟཱརཱུཔཾ པཊིསནྡྷིཡམྤཱི’’ཏི པི-སདྡོ ཝུཏྟོཏི དཊྛབྦོ.

མཧཱབྷཱུཏེ པཊིཙྩ ཨུཔཱདཱརཱུཔནྟི ཝུཏྟནཡེནཱཏི ‘‘མཧཱབྷཱུཏེ པཊིཙྩ ཙིཏྟསམུཊྛཱནཾ རཱུཔཾ ཀཊཏྟཱརཱུཔཾ ཨུཔཱདཱརཱུཔ’’ནྟི ཨེཏྠ ཨཏྠཏོ ཨཡཾ ནཡོ ཝུཏྟོཏི སནྡྷཱཡཱཧ.

༥༤. རཱུཔམིསྶཀཱ པཧཱཡཱཏི ཡཱསུ པུཙྪཱསུ རཱུཔེན ཝིནཱ པཙྩཡུཔྤནྣཾ ན ལབྦྷཏི, ཨཐ ཁོ རཱུཔམིསྶཀམེཝ ལབྦྷཏི, ཏཱ པཧཱཡཱཏི ཨདྷིཔྤཱཡོ.

༥༧. ‘‘ཏིཎྞཾ སནྣིཔཱཏཱ གབྦྷསྶ ཨཝཀྐནྟི ཧོཏཱི’’ཏི ཝཙནཏོཏི གབྦྷསེཡྻཀཔཊིསནྡྷིཡཱ པཉྩཀྑནྡྷསབྦྷཱཝེན ཏཱཡ སམཱནལཀྑཎཱ སབྦཱཔི པཉྩཝོཀཱརཔཊིསནྡྷི ཨོཀྐནྟིནཱམཀཱཏི སཱདྷེཏི. པརིཔུཎྞདྷམྨཱནཾ ཝིསྶཛྫནཾ ཨེཏྠ ཨཏྠཱིཏི པརིཔུཎྞཝིསྶཛྫནཱ.

ཨེཏྠ ¶ ཙ ‘‘ཨེཀཾ མཧཱབྷཱུཏཾ པཊིཙྩ ཏཡོ…པེ… མཧཱབྷཱུཏེ པཊིཙྩ ཙིཏྟསམུཊྛཱནཾ རཱུཔཾ ཀཊཏྟཱརཱུཔཾ ཨུཔཱདཱརཱུཔ’’ནྟི (པཊྛཱ. ༡.༡.༥༣) ཨེཏྟཱཝཏཱ པཉྩཝོཀཱརེ སབྦཾ ཙིཏྟཀམྨསམུཊྛཱནརཱུཔཾ དསྶིཏཾ. ཨཝསེསཾ པན དསྶེཏུཾ ‘‘བཱཧིར’’ནྟིཨཱདི ཝུཏྟཾ. ཏཏྠ བཱཧིརནྟི ཨེཏེན ཨནིནྡྲིཡབདྡྷརཱུཔཾ དསྶེཏི, པུན ཨཱཧཱརསམུཊྛཱནཾ ཨུཏུསམུཊྛཱནནྟི ཨེཏེཧི སབྦཾ ཨིནྡྲིཡབདྡྷཾ ཨཱཧཱརཨུཏུསམུཊྛཱནརཱུཔཾ. ཏཏྠ ‘‘ཨུཏུསམུཊྛཱནཾ ཨེཀ’’ནྟིཨཱདིནཱ ཨསཉྙསཏྟཱནམྤི ཨུཏུསམུཊྛཱནཾ ཝུཏྟམེཝཱཏི དཊྛབྦཾ. ན ཧི ཏཏྠ ཏསྶ ཝཛྫནེ ཀཱརཎཾ ཨཏྠཱིཏི. ཨཱདིམྷི པན ‘‘ཨེཀཾ མཧཱབྷཱུཏཾ པཊིཙྩཱ’’ཏིཨཱདི ཨཝིསེསཝཙནཾ སཧཛཱཏཾ ཨརཱུཔམྤི པཙྩཡཾ ཧེཏཱདིཀེ ཙ པཙྩཡེ བཧུཏརེ ལབྷནྟཾ ཙིཏྟསམུཊྛཱནཀཊཏྟཱརཱུཔདྭཡཾ སཧ སངྒཎྷིཏྭཱ ཝུཏྟཾ, ཨེཝཉྩ ཀཏྭཱ ཏསྶ པརིཡོསཱནེ ‘‘མཧཱབྷཱུཏེ པཊིཙྩ ཙིཏྟསམུཊྛཱནརཱུཔཾ ཀཊཏྟཱརཱུཔཾ ཨུཔཱདཱརཱུཔ’’ནྟི ཝུཏྟཾ, ཏསྨཱ ཏཏྠ ཀཊཏྟཱརཱུཔཾ ཙིཏྟསམུཊྛཱནསམྦནྡྷཾ ཏཾསམཱནགཏིཀཾ པཉྩཝོཀཱརེ ཝཏྟམཱནམེཝ གཧིཏནྟི ཨགྒཧིཏཾ ཀཊཏྟཱརཱུཔཾ དསྶེཏུཾ ‘‘ཨསཉྙསཏྟཱནཾ ཨེཀཾ མཧཱབྷཱུཏཾ པཊིཙྩཱ’’ཏིཨཱདི ཝུཏྟཾ, ཏསྨཱ ཨུཔཱདཱརཱུཔཾ ཨིདྷཔི ¶ ཀམྨཔཙྩཡཝིབྷངྒེ ཝིཡ ‘‘མཧཱབྷཱུཏེ པཊིཙྩ ཀཊཏྟཱརཱུཔཾ ཨུཔཱདཱརཱུཔ’’ནྟི (པཊྛཱ. ༡.༡.༦༣) ཀཊཏྟཱརཱུཔབྷཱཝཝིསིཊྛཾ ཨུཔཱདཱརཱུཔཾ གཧིཏནྟི དཊྛབྦཾ. ན ཧི ཝུཏྟསྶ ཨུཏུསམུཊྛཱནསྶ པུནཝཙནེ པཡོཛནཾ ཨཏྠཱིཏི.

ཀསྨཱ པན ཡཐཱ བཱཧིརཱདཱིསུ ‘‘མཧཱབྷཱུཏེ པཊིཙྩ ཨུཔཱདཱརཱུཔ’’ནྟི ཨཝིསེསེཏྭཱ ཨུཔཱདཱརཱུཔཾ ཝུཏྟཾ, ཨེཝཾ ཨཝཏྭཱ ཙིཏྟཀམྨཛཨུཔཱདཱརཱུཔཱནི ‘‘ཙིཏྟསམུཊྛཱནཾ རཱུཔཾ ཀཊཏྟཱརཱུཔཾ ཨུཔཱདཱརཱུཔ’’ནྟི ཧེཏུཔཙྩཡཱདཱིསུ སཧ ‘‘ཙིཏྟསམུཊྛཱནཾ རཱུཔཾ ཨུཔཱདཱརཱུཔཾ ཨསཉྙསཏྟཱནཾ…པེ… ཀཊཏྟཱརཱུཔཾ ཨུཔཱདཱརཱུཔ’’ནྟི ཨདྷིཔཏིཔཙྩཡཱདཱིསུ ཝིསུཾ ཙིཏྟསམུཊྛཱནརཱུཔབྷཱཝཀཊཏྟཱརཱུཔབྷཱཝེཧི ཝིསེསེཏྭཱཝ ཝུཏྟཱནཱིཏི? ཏཏྠ བཱཧིརགྒཧཎཱདཱིཧི ཝིཡ ཨེཏྠ མཧཱབྷཱུཏཱནཾ ཀེནཙི ཨཝིསེསིཏཏྟཱ. ཨཔིཙ ཨིདྡྷིཙིཏྟནིབྦཏྟཱནཾ ཀམྨཔཙྩཡཱནཉྩ ཨིཊྛཱནིཊྛཱནཾ བཱཧིརརཱུཔཱཡཏནཱདཱིནཾ ཙིཏྟཾ ཀམྨཉྩ ཧེཏཱདཱིསུ ན ཀོཙི པཙྩཡོ, ཨཱཧཱརཨུཏུསམུཊྛཱནཱནཾ པན ཙིཏྟཾ པཙྪཱཛཱཏབྷཱཝེན ཨུཔཏྠམྦྷཀམེཝ, ན ཛནཀཾ, མཧཱབྷཱུཏཱནེཝ པན ཏེསཾ སཧཛཱཏཱདིབྷཱཝེན ཛནཀཱནི, ཏསྨཱ སཏིཔི ཙིཏྟེན ཀམྨེན ཙ ཝིནཱ ཨབྷཱཝེ ཧེཏཱདིཔཙྩཡབྷཱུཏེཧི ཨརཱུཔེཧི ཨུཔྤཛྫམཱནཱནི ཙིཏྟསམུཊྛཱནརཱུཔཀཊཏྟཱརཱུཔབྷཱུཏཱནེཝ ཨུཔཱདཱརཱུཔཱནི ཧོནྟི, ན ཨཉྙཱནཱིཏི ཨིམཾ ཝིསེསཾ དསྶེཏུཾ ཙིཏྟཀམྨཛེསྭེཝ ཨུཔཱདཱརཱུཔེསུ ཝིསེསནཾ ཀཏཾ. ཨཉྙཱནི ཝཱ སམཱནཛཱཏིཀེན རཱུཔེན སམུཊྛཱནཱནི པཱཀཊཝིསེསནཱནེཝཱཏི ན ཝིསེསནཾ ཨརཧནྟི, ཨེཏཱནི པན ཨསམཱནཛཱཏིཀེཧི ཨརཱུཔེཧི སམུཊྛིཏཱནི ཝིསེསནཾ ཨརཧནྟཱིཏི ཝིསེསིཏཱནཱིཏི ཝེདིཏབྦཱནི. ཡཐཱ ཝཱ ཙིཏྟཀམྨཱནི ཙིཏྟཀམྨསམུཊྛཱནཱནཾ སཝིསེསེན པཙྩཡབྷཱཝེན ¶ པཙྩཡཱ ཧོནྟི སཧཛཱཏཱདིཔཙྩཡབྷཱཝཏོ མཱུལཀརཎབྷཱཝཏོ ཙ, ན ཨེཝཾ ཨུཏུཨཱཧཱརཱ ཏཾསམུཊྛཱནཱནནྟི ཙིཏྟཀམྨཛཱནེཝ ཝིསུཾ ཝིསེསནཾ ཨརཧནྟི. ཨིཏརཱནི པན མཧཱབྷཱུཏཝིསེསེནེཝ ཝིསེསིཏཱནི, ཨིདྷ ཨུཔཱདཱརཱུཔཝིསེསནེན མཧཱབྷཱུཏཱནི ཝིཡ. ན ཧི ཨཉྙཏརཝིསེསནཾ ཨུབྷཡཝིསེསནཾ ན ཧོཏཱིཏི.

༥༨. ཨཉྙམཉྙཔཙྩཡེ ཁནྡྷེ པཊིཙྩ ཝཏྠུ, ཝཏྠུཾ པཊིཙྩ ཁནྡྷཱཏི ཁནྡྷཝཏྠཱུནཾ ཨཉྙམཉྙཔཙྩཡཏཱདསྶནེན པུབྦེ ཝིསུཾ པཙྩཡབྷཱཝེན དསྶིཏཱནཾ ཁནྡྷཱནཾ ཨེཀཏོ པཙྩཡབྷཱཝོ དསྶིཏོ ཧོཏཱིཏི ཨིམིནཱ ཨདྷིཔྤཱཡེནཱཧ ‘‘ཙཏུནྣམྤི ཁནྡྷཱནཾ ཨེཀཏོ ཝཏྠུནཱ ཨཉྙམཉྙཔཙྩཡཏཾ དསྶེཏུཾ ཝུཏྟ’’ནྟི. ‘‘ཁནྡྷེ ¶ པཊིཙྩ ཝཏྠཱུ’’ཏི ཨིདཾ པན ཙཏུནྣམྤི ཁནྡྷཱནཾ ཨེཀཏོ པཊིཙྩཏྠཕརཎཏཱདསྶནཏྠཾ, ‘‘ཝཏྠུཾ པཊིཙྩ ཁནྡྷཱ’’ཏི ཝཏྠུསྶ. ན ཀེཝལཉྩ ཁནྡྷཱནཾ ཨིདྷེཝ, ཧེཏུཔཙྩཡཱདཱིསུཔི ཨཡམེཝ ནཡོ. ཏཏྠ སབྦེསཾ ཁནྡྷཱནཾ ཝིསུཾ པཊིཙྩཏྠཕརཎཏཾ དསྶེཏྭཱ པུན ‘‘ཝཏྠུཾ པཊིཙྩ ཁནྡྷཱ’’ཏི ཝཏྠུསྶཔི དསྶིཏཱཡ ‘‘ཨེཀཾ ཁནྡྷཉྩ ཝཏྠུཉྩ པཊིཙྩ ཏཡོ ཁནྡྷཱ’’ཏིཨཱདིནཱ ཁནྡྷཝཏྠཱུནཉྩ དསྶིཏཱཡེཝ ཧོཏཱིཏི དཊྛབྦཱ.

ཀསྨཱ པནེཏྠ ‘‘ཀུསལཾ དྷམྨཾ པཊིཙྩ ཨབྱཱཀཏོ དྷམྨོ ཨུཔྤཛྫཏི ཨཉྙམཉྙཔཙྩཡཱ, ཀུསལེ ཁནྡྷེ པཊིཙྩ ཙིཏྟསམུཊྛཱནཱ མཧཱབྷཱུཏཱ’’ཏི ཨེཝམཱདི ན ཝུཏྟཾ, ནནུ ཡདེཝ པཊིཙྩཏྠཾ ཕརཏི, ན ཏེནེཝ ཨཉྙམཉྙཔཙྩཡེན བྷཝིཏབྦཾ ཧེཏུཔཙྩཡཱདཱིཧི ཝིཡ. ན ཧི ཡཾ ‘‘ཨེཀཾ ཏཡོ དྭེ ཙ ཁནྡྷེ པཊིཙྩཱ’’ཏི ཝུཏྟཾ, ཏེ ཧེཏུཔཙྩཡབྷཱུཏཱ ཨེཝ ཧོནྟི. ཨེས ནཡོ ཨཱརམྨཎཔཙྩཡཱདཱིསུཔི. པཙྩཡཝཱརེ ཙ ‘‘ཨབྱཱཀཏཾ དྷམྨཾ པཙྩཡཱ ཀུསལོ དྷམྨོ ཨུཔྤཛྫཏི ཨཉྙམཉྙཔཙྩཡཱ’’ཏི (པཊྛཱ. ༡.༡.༢༥༦) ཝུཏྟཾ, ན ཝཏྠུ ཀུསལཱནཾ ཨཉྙམཉྙཔཙྩཡོ ཧོཏི, ཨཐ ཙ པན ཏཾཔཙྩཡཱ ཁནྡྷཱནཾ ཨཉྙམཉྙཔཙྩཡཱ ཨུཔྤཏྟི ཝུཏྟཱ ཨེཝ. ཡདིཔི ཀུསལཱ ཁནྡྷཱ མཧཱབྷཱུཏཱནཾ ཨཉྙམཉྙཔཙྩཡཱ ན ཧོནྟི, ཏཐཱཔི ཏེ པཊིཙྩ ཏེསཾ ཨུཔྤཏྟི ཝཏྟབྦཱ སིཡཱཏི? ན ཝཏྟབྦཱ ཁནྡྷསཧཛཱཏཱནཾ མཧཱབྷཱུཏཱནཾ ཁནྡྷཱནཾ པཙྩཡབྷཱཝཱབྷཱཝཏོ. ཨཉྙམཉྙསདྡོ ཧི ན ཧེཏཱདིསདྡོ ཝིཡ ནིརཔེཀྑོ, སཧཛཱཏཱདིསདྡོ ཝིཡ ཝཱ ཨཉྙཏརཱཔེཀྑོ, ཨཐ ཁོ ཡཐཱཝུཏྟེཏརེཏརཱཔེཀྑོ. པཙྩཡཔཙྩཡུཔྤནྣཱ ཙ ཁནྡྷཱ མཧཱབྷཱུཏཱ ཨིདྷ ཡཐཱཝུཏྟཱ བྷཝེཡྻུཾ, ཏེསུ ཙ མཧཱབྷཱུཏཱ ཁནྡྷཱནཾ ན ཀོཙི པཙྩཡོ. ཡསྶ ཙ སཡཾ པཙྩཡོ, ཏཏོ ཏེན ཏནྣིསྶིཏེན ཝཱ ཨཉྙམཉྙཔཙྩཡེན ཨུཔྤཛྫམཱནཾ ཨཉྙམཉྙཔཙྩཡཱ ཨུཔྤཛྫཏཱིཏི ཝཏྟབྦཏཾ ཨརཧཏི, ཡཐཱ ཁནྡྷེ པཊིཙྩ ཁནྡྷཱ, ཝཏྠུཾ པཙྩཡཱ ཁནྡྷཱ. ཏསྨཱ ཨཏྟནོ པཙྩཡསྶ ¶ པཙྩཡཏྟཱབྷཱཝཏོ ཏདཔེཀྑཏྟཱ ཙ ཨཉྙམཉྙསདྡསྶ ཁནྡྷེ པཊིཙྩ པཙྩཡཱ ཙ མཧཱབྷཱུཏཱནཾ ཨཉྙམཉྙཔཙྩཡཱ ཨུཔྤཏྟི ན ཝུཏྟཱ, ན ཨཉྙམཉྙཔཙྩཡཱ ཙ ཝུཏྟཱ. ཁནྡྷཱ པན ཝཏྠུཾ པཙྩཡཱ ཨུཔྤཛྫམཱནཱ ཝཏྠུསྶ པཙྪཱཛཱཏཔཙྩཡཱ ཧོནྟི, ཏནྣིསྶིཏེན ཙ ཨཉྙམཉྙཔཙྩཡེན ཨུཔྤཛྫནྟི. ཏསྨཱ ཝཏྠུཾ པཙྩཡཱ ཁནྡྷཱནཾ ཀུསལཱདཱིནཾ ཨཉྙམཉྙཔཙྩཡཱ ཨུཔྤཏྟི ཝུཏྟཱཏི.

༥༩. ན ¶ སཱ གཧིཏཱཏི ཙཀྑཱཡཏནཱདཱིནི ནིསྶཡབྷཱུཏཱནི པཊིཙྩཱཏི ན ཝུཏྟནྟི ཨདྷིཔྤཱཡོ. ནིསྶཡཔཙྩཡབྷཱཝེན པན ན ཙཀྑཱཡཏནཱདཱིནི ཨཱརམྨཎཔཙྩཡབྷཱཝེན རཱུཔཱཡཏནཱདཱིནི ཝིཡ ན གཧིཏཱནཱིཏི.

༦༠. དྭཱིསུ ཨུཔནིསྶཡེསུ ཝཏྟབྦམེཝ ནཏྠི, ཨཱརམྨཎཱུཔནིསྶཡམྤི པན ཡེ ལབྷནྟི, ཏེསཾ ཝསེན ཨཱརམྨཎཔཙྩཡསདིསནྟི ཨེཝཾ ཝུཏྟནྟི དསྶེཏུཾ ‘‘ཏཏྠ ཀིཉྩཱཔཱི’’ཏི ཨཱཧ. ཏཏྠ ‘‘ན སབྦེ ཨཀུསལཱ ཨབྱཱཀཏཱ ཨཱརམྨཎཱུཔནིསྶཡཾ ལབྷནྟཱི’’ཏི པུརིམཔཱཋོ. ཀུསལཱཔི པན མཧགྒཏཱ ཨེཀནྟེན, ཀཱམཱཝཙརཱ ཙ ཀདཱཙི ན ལབྷནྟཱིཏི ‘‘ན སབྦེ ཀུསལཱཀུསལཱབྱཱཀཏཱ’’ཏི པཋནྟི.

༦༡. པུརེཛཱཏཔཙྩཡེ ཡཐཱ ཨཉྙཏྠ པཙྩཡཾ ཨནིདྡིསིཏྭཱཝ དེསནཱ ཀཏཱ, ཨེཝཾ ཨཀཏྭཱ ཀསྨཱ ‘‘ཝཏྠུཾ པུརེཛཱཏཔཙྩཡཱ’’ཏི ཝུཏྟནྟི? ནིཡམསབྦྷཱཝཱ. ཧེཏུཨཱདཱིསུ ཧི ནིཡམོ ནཏྠི. ན ཧི ཏེཧི ཨུཔྤཛྫམཱནཱནཾ ཨལོབྷཱདཱིསུ ཀུསལཱདཱིསུ རཱུཔཱདཱིསུ ཙ ཨཡམེཝ པཙྩཡོཏི ནིཡམོ ཨཏྠི, ཨིདྷ པན ཝཏྠུ ན ཝཏྠུདྷམྨེསུ པུརེཛཱཏཔཙྩཡཱ ཨུཔྤཛྫམཱནཱནཾ དྷམྨཱནཾ ནིཡམཏོ ཚབྦིདྷཾ ཝཏྠུ པུརེཛཱཏཔཙྩཡོ ཧོཏཱིཏི ཨིམམཏྠཾ དསྶེཏུཾ ཨིདཾ ཝུཏྟཾ. ཨཱརམྨཎཔུརེཛཱཏམྤི ཧི ཝཏྠུཔུརེཛཱཏེ ཨཝིཛྫམཱནེ ན ལབྦྷཏི, ཨེཝཉྩ ཀཏྭཱ པཊིསནྡྷིཝིཔཱཀསྶ ནཔུརེཛཱཏཔཙྩཡཱ ཨེཝ ཨུཔྤཏྟི ཝུཏྟཱ, པཙྩུཔྤནྣཱརམྨཎསྶཔི ཏསྶ པུརེཛཱཏཔཙྩཡོ ན ཨུདྡྷཊོ. ‘‘ནེཝཝིཔཱཀནཝིཔཱཀདྷམྨདྷམྨཾ པཊིཙྩ ཝིཔཱཀོ དྷམྨོ ཨུཔྤཛྫཏི པུརེཛཱཏཔཙྩཡཱ’’ཏི ཨེཏསྶཔི ཨལཱབྷཏོ ཏཏྠ ‘‘པུརེཛཱཏེ ཏཱིཎཱི’’ཏི (པཊྛཱ. ༡.༣.༡༢༤) ཝུཏྟནྟི.

༦༣. ཏཐཱ པཊིསནྡྷིཀྑཎེ མཧཱབྷཱུཏཱནནྟི མཧཱབྷཱུཏཱནཾ ཨེཀཀྑཎིཀནཱནཱཀྑཎིཀཀམྨཔཙྩཡཝསེནེཝ ¶ ཏདུཔཱདཱརཱུཔཱནམྤི ཝདཏཱིཏི ཙ དཊྛབྦཾ. ཀཊཏྟཱརཱུཔཱནནྟི པཝཏྟིཡཾ ཀཊཏྟཱརཱུཔཱནནྟི ཨདྷིཔྤཱཡོ.

༦༤. ཡཐཱལཱབྷཝསེནཱཏི ཨིནྡྲིཡརཱུཔེསུ ཡཾ ཡཾ པཊིསནྡྷིཡཾ ལབྦྷཏི, ཏསྶ ཏསྶ ཝསེན.

༦༩. ཝིཔྤཡུཏྟཔཙྩཡཱ ཨུཔྤཛྫམཱནཱནམྤི ཀེསཉྩི ནིཡམཏོ ཝཏྠུ ཝིཔྤཡུཏྟཔཙྩཡོ, ཀེསཉྩི ཁནྡྷཱ, ན ཙ སམཱནཝིཔྤཡུཏྟཔཙྩཡཱ ཨེཝ ཀུསལཱདིཀེ པཊིཙྩ ཨུཔྤཛྫམཱནཱ ཨུཔྤཛྫནྟི, ཨཐ ཁོ ནཱནཱཝིཔྤཡུཏྟཔཙྩཡཱཔི, ཏསྨཱ ཏཾ ¶ ཝིསེསཾ དསྶེཏུཾ ‘‘ཝཏྠུཾ ཝིཔྤཡུཏྟཔཙྩཡཱ, ཁནྡྷེ ཝིཔྤཡུཏྟཔཙྩཡཱ’’ཏི ཏཏྠ ཏཏྠ ཝུཏྟཾ. ཏཏྠ ཏདཱཡཏྟཝུཏྟིཏཱཡ པཙྩཡུཔྤནྣོ པཙྩཡཾ པཙྩཡཾ ཀརོཏཱིཏི ཨིམསྶཏྠསྶ ཝསེན ཨུཔཡོགཝཙནཾ དཊྛབྦཾ. ཝཏྠུཾ ཁནྡྷེ ཝིཔྤཡུཏྟཔཙྩཡཀརཎཏོཏི ཨཡཉྷེཏྠ ཨཏྠོ. ཨཊྛཀཐཱཡཾ པན ‘‘ཝཏྠུཾ པཊིཙྩ ཝིཔྤཡུཏྟཔཙྩཡཱ, ཝཏྠུནཱ ཝིཔྤཡུཏྟཔཙྩཡཏཾ སཱདྷེནྟེནཱ’’ཏི ཨཏྠོ ཝུཏྟོ, ཏཏྠ ཀུསལཱནཾ ཁནྡྷཱནཾ ཝཏྠུཾ པཊིཙྩ ཨུཔྤཏྟི ནཏྠཱིཏི ‘‘ཝཏྠུཾ པཊིཙྩཱ’’ཏི ན སཀྐཱ ཝཏྟུནྟི, ཨིདཾ པན པཊིཙྩསདྡེན ཨཡོཛེཏྭཱ ‘‘པཊིཙྩ ཨུཔྤཛྫནྟི ཝཏྠུཾ ཝིཔྤཡུཏྟཔཙྩཡཱ’’ཏི ཡོཛེཏྭཱ ཏསྶཏྠོ ‘‘ཝཏྠུནཱ ཝིཔྤཡུཏྟཔཙྩཡཏཾ སཱདྷེནྟེནཱ’’ཏི ཝུཏྟོཏི དཊྛབྦོ. ཀིཾ པན པཊིཙྩཱཏི? ཡཾ ‘‘ཨེཀཾ ཁནྡྷ’’ནྟིཨཱདིཀཾ པཱལི༹ཡཾ པཊིཙྩཱཏི ཝུཏྟཾ. ཏམེཝ ཨཏྠཾ པཱཀཊཾ ཀཏྭཱ ‘‘ཝཏྠུཾ ཝིཔྤཡུཏྟཔཙྩཡཱཏི ཁནྡྷེ པཊིཙྩ ཁནྡྷཱ, ཝཏྠུནཱ ཝིཔྤཡུཏྟཔཙྩཡཏཾ སཱདྷེནྟེནཱ’’ཏི པཋནྟི. ཨནནྟརཏྟཱ པཱཀཊསྶ ཨབྱཱཀཏཙིཏྟསམུཊྛཱནསྶེཝ གཧཎཾ མཱ ཧོཏཱུཏི ‘‘ཨབྱཱཀཏཙིཏྟསམུཊྛཱནམྤི ཀུསལཱཀུསལཙིཏྟསམུཊྛཱནམྤཱི’’ཏི ཨཱཧ. ཨཱསནྣམྤི དཱུརམྤི སབྦནྟི ཝུཏྟཾ ཧོཏཱིཏི.

༧༡-༧༢. ‘‘ཨིམེ ཝཱིསཏི པཙྩཡཱཏི སཾཁིཔིཏྭཱ དསྶིཏཱནཾ ཝསེནེཏཾ ཝུཏྟ’’ནྟི ཝུཏྟཾ. ཏཏྠ ཡདི ཨེཀེནཔི དེསནཾ སཾཁིཏྟཾ སཾཁིཏྟམེཝ, ཨཱདིམྷི པན ཏཡོ པཙྩཡཱ ཝིཔྤཡུཏྟཔཙྩཡོ ཨེཀམྤི པདཾ ཨཔརིཧཱཔེཏྭཱ ཝིཏྠཱརིཏཱཏི ཏེ ཙཏྟཱརོ པཙྪཱཛཱཏཉྩ ཝཛྫེཏྭཱ ‘‘ཨིམེ ཨེཀཱུནཝཱིསཏི པཙྩཡཱ’’ཏི ཝཏྟབྦཾ སིཡཱ. ཨེཏྟཀཱ ཧི སཾཁིཔིཏྭཱ དསྶིཏཱཏི. ཡེ པན པཱལི༹ཡཾ ཝིཏྠཱརིཏཾ ཨཝིཏྠཱརིཏཉྩ སབྦཾ སངྒཧེཏྭཱ ཝུཏྟནྟི ཝདནྟི, ཏེསཾ ‘‘ཨིམེ ཏེཝཱིསཏི པཙྩཡཱ’’ཏི པཱཋེན བྷཝིཏབྦཾ. ཨཱདིམྷི པན ཏཡོ པཙྩཡེ ཝིཏྠཱརིཏེ ཝཛྫེཏྭཱ ཡཏོ པབྷུཏི སངྑེཔོ ཨཱརདྡྷོ, ཏཏོ ཙཏུཏྠཏོ པབྷུཏི སཾཁིཏྟཾ ཝིཏྠཱརིཏཉྩ སཧ གཧེཏྭཱ ‘‘ཨིམེ ཏེཝཱིསཏི པཙྩཡཱ’’ཏི ཝུཏྟནྟི དཊྛབྦཾ.

༧༣. ཏཐཱ ¶ པུརེཛཱཏཔཙྩཡེཏི ཡཐཱ ཨཉྙམཉྙཔཙྩཡེ ཝིསེསོ ཝིབྷངྒེ ཨཏྠི, ཏཐཱ པུརེཛཱཏཔཙྩཡེཔི ཨཏྠཱིཏི ཨཏྠོ. ‘‘ཝཏྠུཾ པུརེཛཱཏཔཙྩཡཱ’’ཏི ཧི ཏཏྠ ཝིསེསོ པཊིསནྡྷིཨབྷཱཝོ ཙཱཏི. ཝིཔཱཀཱནི ཙེཝ ¶ ཝཱིཐིཙིཏྟཱནི ཙ ན ལབྦྷནྟཱིཏི ཨེཏེན ‘‘ཀིརིཡཱབྱཱཀཏཾ ཨེཀཾ ཁནྡྷཾ པཊིཙྩཱ’’ཏིཨཱདིཀེ (པཊྛཱ. ༡.༡.༥༣) ཝིབྷངྒེ ཝིཔཱཀཱབྱཱཀཏཱབྷཱཝཾ ཀིརིཡཱབྱཱཀཏེ ཙ ཨཛཝནསྶ སབྦེན སབྦཾ ཨལབྦྷམཱནཏཾ ཝིསེསཾ དསྶེཏི.

༧༤. ཨེཀམཱུལཀེ དསྶིཏཱཡ དེསནཱཡ ལབྦྷམཱནགཎནཉྙེཝ ཨཱདཱཡཱཏི ཨིདཾ ཨེཏསྨིཾ ཨནུལོམེ སུདྡྷིཀནཡེ དསྶིཏགཎནཏོ ཏཏོ པརེསུ ནཡེསུ ཨཉྙིསྶཱ ཨབྷཱཝཾ སནྡྷཱཡ ཝུཏྟཾ. ཨབཧུགཎནེན ཡུཏྟསྶ ཏེན སམཱནགཎནཏཱ ཙ ཨིམསྨིཾ ཨནུལོམེཡེཝ དཊྛབྦཱ. པཙྩནཱིཡེ པན ‘‘ནཧེཏུཔཙྩཡཱ ནཱརམྨཎེ ཨེཀ’’ནྟིཨཱདིཾ (པཊྛཱ. ༡.༡.༡༠༤) ཝཀྑཏཱིཏི.

༧༦-༧༩. ཏེ པན སངྑིཔིཏྭཱ ཏེཝཱིསཏིམཱུལཀོཝེཏྠ དསྶིཏོཏི ཨེཏྠ པཙྪཱཛཱཏཝིཔཱཀཱནཾ པརིཧཱིནཏྟཱ ‘‘དྭཱཝཱིསཏིམཱུལཀོ’’ཏི ཝཏྟབྦཾ སིཡཱ སཱསེཝནསཝིཔཱཀཱནཾ ཝསེན. དུཝིདྷམྤི པན དྭཱཝཱིསཏིམཱུལཀཾ སཧ གཧེཏྭཱ སངྒཧིཏེ ཏསྨིཾ ཨུབྷཡསབྦྷཱཝཏོ ‘‘ཏེཝཱིསཏིམཱུལཀོ’’ཏི ཨཱཧཱཏི དཊྛབྦཾ. ཨཱསེཝནཝིཔཱཀཱནཾ ཝཱ ཝིརོདྷཱབྷཱཝེ སཏི པུཙྪཱཡ དསྶིཏནཡེན ཏེཝཱིསཏིམཱུལཀེན བྷཝིཏབྦཾ, ཏསྶ ཙ ནཱམཾ དྭཱཝཱིསཏིམཱུལཀེ ཨཱརོཔེཏྭཱ ‘‘ཏེཝཱིསཏིམཱུལཀོ’’ཏི ཝུཏྟནྟི ཨཡམེཏྠ རུལ༹ྷཱི.

ཨཱརམྨཎཔདེ ཙེཝཱཏི ཨེཏེན ཨེཀམཱུལཀེ ཨཉྙཔདཱནི ཝཛྫེཏི. ན ཧི ཨེཀམཱུལཀེ ཧེཏཱདཱིསུ ཏཡོཝཱཏི ཨདྷིཔྤཱཡོ. སུདྡྷིཀནཡོ པན ཨཱརམྨཎམཱུལཀཱདཱིསུ ན ལབྦྷཏཱིཏི ཨཱརམྨཎམཱུལཀེ ‘‘ནཝཱ’’ཏི ཨེཏཱཡ ཨདྷིཀགཎནཱཡ ཨབྷཱཝདསྶནཏྠཾ ‘‘ཨཱརམྨཎེ ཋིཏེན སབྦཏྠ ཏཱིཎེཝ པཉྷཱ’’ཏི ཝུཏྟཾ. ཏཏྠ ཀཱཏབྦཱཏི ཝཙནསེསོ. ཏཱིཎེཝཱཏི ཙ ཏཏོ ཨུདྡྷཾ གཎནཾ ནིཝཱརེཏི, ན ཨདྷོ པཊིཀྑིཔཏི. ཏེན ‘‘ཝིཔཱཀེ ཨེཀ’’ནྟི གཎནཱ ན ནིཝཱརིཏཱཏི དཊྛབྦཱ. ཏཱིསུ ཨེཀསྶ ཨནྟོགདྷཏཱཡ ཙ ‘‘ཏཱིཎེཝཱ’’ཏི ཝུཏྟནྟི. ཨིཏཱིཏིཨཱདིནཱ ‘‘སབྦཏྠ ཏཱིཎེཝཱ’’ཏི ཝཙནེན ཨཏྟནོ ཝཙནཾ དལ༹ྷཾ ཀརོཏི.

༨༠-༨༥. ཡེ ¶ …པེ… ཏཾ དསྶེཏུནྟི ཨེཏྠཱཡམདྷིཔྤཱཡོ – ཡདིཔི ཨཝིགཏཱནནྟརཾ ‘‘ཨཱརམྨཎཔཙྩཡཱ ཧེཏུཡཱ ཏཱིཎཱི’’ཏི ཝུཏྟེཔི ཨཱུནཏརགཎནེན སདྡྷིཾ སཾསནྡནེ ཡཱ གཎནཱ ལབྦྷཏི, སཱ དསྶིཏཱ ཧོཏི, ཏཐཱཔི ¶ ཨཱུནཏརགཎནེཧི སམཱནགཎནེཧི ཙ སདྡྷིཾ སཾསནྡནེ ཨཱུནཏརཱ སམཱནཱ ཙ ཧོཏི, ན ཨེཝཾ ཨཱཝིཀརཎཝསེན དསྶིཏཱ ཧོཏི, ཝིཔལླཱསཡོཛནཱཡ པན ཏཐཱ དསྶེཏི. ཝཙནེན ཝཱ ཧི ལིངྒེན ཝཱ ཨཏྠཝིསེསཱཝིཀརཎཾ ཧོཏཱིཏི. ཏེནེཏཾ ཨཱཝིཀརོཏཱིཏི ཨེཏྠཱཔི ཨེཝམེཝ ཨདྷིཔྤཱཡོ ཡོཛེཏབྦོ. པཙྩནཱིཡཱདཱིསུཔི པན ‘‘ནཱརམྨཎཔཙྩཡཱ ནཧེཏུཡཱ ཨེཀཾ…པེ… ནོཝིགཏཔཙྩཡཱ ནཧེཏུཡཱ ཨེཀ’’ནྟིཨཱདིནཱ (པཊྛཱ. ༡.༡.༡༠༧) མཱུལཔདཾ ཨཱདིམྷིཡེཝ ཋཔེཏྭཱ ཡོཛནཱ ཀཏཱ, ན ཙ ཏཏྠ ཨེཏཾ ལཀྑཎཾ ལབྦྷཏི, ཏསྨཱ མཱུལཔདསྶ ཨཱདིམྷི ཋཔེཏྭཱ ཡོཛནམེཝ ཀམོ, ན ཙཀྐབནྡྷནནྟི ‘‘ཨཱརམྨཎཔཙྩཡཱ ཧེཏུཡཱ ཏཱིཎཱི’’ཏིཨཱདི ཡོཛིཏཾ, ན ཙ ཝིཉྙཱཏེ ཨཏྠེ ཝཙནེན ལིངྒེན ཙ པཡོཛནམཏྠཱིཏི.

༨༦-༨༧. ‘‘ཨཧེཏུཀཾ ཝིཔཱཀཱབྱཱཀཏནྟི ཨིདཾ རཱུཔསམུཊྛཱཔཀཝསེནེཝ ཝེདིཏབྦ’’ནྟི ཝུཏྟཾ, སབྦསངྒཱཧཀཝསེན པནེཏཾ ན ན སཀྐཱ ཡོཛེཏུཾ.

༩༣. སཧཛཱཏཔུརེཛཱཏཔཙྩཡཱ སངྒཧཾ གཙྪནྟཱིཏི ཨེཏྠ ཙ སཧཛཱཏཱ ཙ ཧེཏཱདཡོ པུརེཛཱཏཱ ཙ ཨཱརམྨཎཱདཡོ པཙྩཡཱ སངྒཧཾ གཙྪནྟཱིཏི ཨཏྠོ དཊྛབྦོ. ན ཧི ནཔཙྪཱཛཱཏཔཙྩཡཱ ཨུཔྤཛྫམཱནཱ དྭཱིཧེཝ སཧཛཱཏཔུརེཛཱཏཔཙྩཡེཧི ཨུཔྤཛྫནྟི, ཨཐ ཁོ པཙྪཱཛཱཏཝཛྫེཧི སབྦེཧཱིཏི.

༩༤-༩༧. ནཱཧཱརཔཙྩཡེ ཨེཀཙྩཾ རཱུཔམེཝ པཙྩཡཔཙྩཡུཔྤནྣནྟི ཡཾ པཊིཙྩ ཨུཔྤཛྫཏི, སོ པཙྩཡོ ¶ རཱུཔམེཝཱཏི ཀཏྭཱ ཝུཏྟཾ. ཡསྨཱ པན པཙྩཡཱ ཨུཔྤཛྫཏི, སོ ཨརཱུཔམྤི ཧོཏི ཡཐཱ ཀམྨཾ ཀཊཏྟཱརཱུཔསྶ.

༩༩-༡༠༢. ནམགྒཔཙྩཡེ ཡདིཔི ཙིཏྟསམུཊྛཱནཱདཡོ སབྦེ རཱུཔཀོཊྛཱསཱ ལབྦྷནྟི, ཏཐཱཔི ཡཾ མགྒཔཙྩཡཾ ལབྷཏི, ཏསྶ པཧཱིནཏྟཱ ‘‘ཨེཀཙྩཾ རཱུཔཾ ¶ པཙྩཡུཔྤནྣ’’ནྟི ཝུཏྟཾ, ཨེཝམེཝ པན ནཧེཏུཔཙྩཡཱདཱིསུཔི ཨེཀཙྩརཱུཔསྶ པཙྩཡུཔྤནྣཏཱ དཊྛབྦཱ.

༡༠༧-༡༣༠. ནཱཧཱརནཨིནྡྲིཡནཛྷཱནནམགྒཔཙྩཡཱ སབྦཏྠ སདིསཝིསྶཛྫནཱཏི ཨིདཾ ཨེཏེསུ མཱུལབྷཱཝེན ཋིཏེསུ གཎནཱཡ སམཱནཏཾ སནྡྷཱཡ ཝུཏྟཾ. མཱུལཱནཉྷི ཨིདྷ ཝིསྶཛྫནཾ གཎནཱཡེཝ, ན སརཱུཔདསྶནནྟི. ནསཧཛཱཏཱདིཙཏུཀྐཾ ཨིདྷཱཔི པརིཧཱིནམེཝཱཏི སུདྡྷིཀནཡེ ཝིཡ མཱུལེསུཔི པརིཧཱིནམེཝཱཏི ཨཏྠོ.

༡༣༡-༡༨༩. ཧེཏཱདྷིཔཏིམགྒཔཙྩཡེསུ ཨནུལོམཏོ ཋིཏེསུ…པེ… ཨཊྛ པཙྩནཱིཡཏོ ན ལབྦྷནྟཱིཏི ཏིཎྞམྤི སཱདྷཱརཎཱནཾ པཙྩནཱིཡཏོ ཨལབྦྷམཱནཱནཾ སབྦེསཾ སངྒཧཝསེན ཝུཏྟཾ, ཏསྨཱ མགྒཔཙྩཡེ ཨིཏརེཧི སཱདྷཱརཎཱ སཏྟེཝ ཡོཛེཏབྦཱ. ཨདྷིཔཏིཔཙྩཡེ ཨནུལོམཏོ ཋིཏེ ཧེཏུཔཙྩཡོཔི པཙྩནཱིཡཏོ ན ལབྦྷཏི, སོ པན མགྒེན ཨསཱདྷཱརཎོཏི ཀཏྭཱ ན ཝུཏྟོཏི དཊྛབྦོ. ཡེཧི ཝིནཱ ཨརཱུཔཾ ན ཨུཔྤཛྫཏི, ཏེ ཨེཀནྟིཀཏྟཱ ཨརཱུཔཊྛཱནིཀཱཏི ཨིདྷ ཝུཏྟཱཏི དཊྛབྦཱ, ཏེན པུརེཛཱཏཱསེཝནཔཙྩཡཱ ཏེཧི ཝིནཱཔི ཨརཱུཔསྶ ཨུཔྤཏྟིཏོ ཝཛྫིཏཱ ཧོནྟི. སབྦཊྛཱནིཀཱ ཨཉྙམཉྙཨཱཧཱརིནྡྲིཡཱ ཙ ཏེཧི ཝིནཱ ཨརཱུཔསྶ ཨནུཔྤཏྟིཏོ སངྒཧིཏཱཏི. ཨཱུནཏརགཎནཱནཾཡེཝ ཝསེནཱཏི ཡདི ཨནུལོམཏོ ཋིཏཱ ཨེཀཀཱདཡོ དྭཱཝཱིསཏིཔརིཡོསཱནཱ ཨཱུནཏརགཎནཱ ཧོནྟི, ཏེསཾ ཝསེན པཙྩནཱིཡཏོ ཡོཛིཏསྶ ཏསྶ ཏསྶ གཎནཱ ཝེདིཏབྦཱ. ཨཐ པཙྩནཱིཡཏོ ཡོཛིཏོ ཨཱུནཏརགཎནོ, ཏསྶ ཝསེན ཨནུལོམཏོ ཋིཏསྶཔི གཎནཱ ཝེདིཏབྦཱཏི ¶ ཨཏྠོ. ‘‘ཨཉྙམཉྙཔཙྩཡཱ ནཱརམྨཎེ ཨེཀ’’ནྟིཨཱདིཝཙནཏོ (པཊྛཱ. ༡.༡.༡༤༦) པན ན ཨིདཾ ལཀྑཎཾ ཨེཀནྟིཀཾ.

པཙྩཡཱནུལོམཔཙྩནཱིཡཝཎྞནཱ ནིཊྛིཏཱ.

༡༩༠. སབྦཏྠེཝཱཏི ¶ ན ཀེཝལཾ ཧེཏུམྷིཡེཝ, ཨཐ ཁོ སབྦེསུ པཙྩཡེསུ པཙྩནཱིཀཏོ ཋིཏེསཱུཏི ཨཏྠོ. པུརེཛཱཏཾ ཨཱསེཝནཉྩ ཨལབྷནྟཾ ཀཉྩི ནིདསྶནཝསེན དསྶེནྟོ ‘‘པཊིསནྡྷིཝིཔཱཀོ པནཱ’’ཏིཨཱདིམཱཧ.

‘‘པུརེཛཱཏཔཙྪཱཛཱཏཱསེཝནཝིཔཱཀཝིཔྤཡུཏྟེསུ པཙྩནཱིཀཏོ ཋིཏེསུ ཨེཀཾ ཋཔེཏྭཱ ཨཝསེསཱ ཨནུལོམཏོ ལབྦྷནྟཱི’’ཏི ཨིདཾ ཨཝསེསཱནཾ ལཱབྷམཏྟཾ སནྡྷཱཡ ཝུཏྟཾ. ན སབྦེསཾ ཨཝསེསཱནཾ ལཱབྷནྟི དཊྛབྦཾ. ཡདིཔི ཧི པཙྪཱཛཱཏེ པསངྒོ ནཏྠི ‘‘ཨནུལོམཏོ སབྦཏྠེཝ ན ལབྦྷཏཱི’’ཏི ཨཔཝཱདསྶ ཀཏཏྟཱ, པུརེཛཱཏོ པན ཝིཔྤཡུཏྟེ པཙྩནཱིཀཏོ ཋིཏེ ཨནུལོམཏོ ལབྦྷཏཱིཏི ཨིདམྤི ཨཝསེསཱ སབྦེཏི ཨཏྠེ གཡ྄ཧམཱནེ ཨཱཔཛྫེཡྻ. ཡམྤི ཀེཙི ‘‘ཝིཔྤཡུཏྟཔཙྩཡརཧིཏེ ཨཱརུཔྤེཔི ཨཱརམྨཎཔུརེཛཱཏསྶ སམྦྷཝཾ ཉཱཔེཏུཾ ཨེཝཾ ཝུཏྟ’’ནྟི ཝདནྟི, ཏམྤི ཏེསཾ རུཙིམཏྟམེཝ. ན ཧི ཡཏྠ ཝཏྠུཔུརེཛཱཏཾ ན ལབྦྷཏི, ཏཏྠ ཨཱརམྨཎཔུརེཛཱཏབྷཱཝེན ཨུཔཀཱརཀཾ ཧོཏཱིཏི དསྶིཏོཡཾ ནཡོཏི. ཡུཛྫམཱནཀཝསེནཱཏི པཙྩནཱིཀཏོ ཋིཏསྶ ཋཔེཏབྦཏྟཱ ཝུཏྟཾ, ཡུཛྫམཱནཀཔཙྩཡུཔྤནྣཝསེན ཝཱཏི ཨཏྠོ. ‘‘མགྒཔཙྩཡེ པཙྩནཱིཀཏོ ཋིཏེ ཧེཏུཔཙྩཡོ ཨནུལོམཏོ ན ལབྦྷཏཱི’’ཏི པུརིམཔཱཋོ, ཨདྷིཔཏིཔཙྩཡོཔི པན ན ལབྦྷཏཱིཏི ‘‘ཧེཏཱདྷིཔཏིཔཙྩཡཱ ཨནུལོམཏོ ན ལབྦྷནྟཱི’’ཏི པཋནྟི. ཨདྷིཔཏིཔཙྩཡེ པཙྩནཱིཀཏོ ཋིཏེ པཙྪཱཛཱཏཏོ ཨཉྙོ ཨནུལོམཏོ ཨལབྦྷམཱནོ ནཱམ ནཏྠཱིཏི ན ཝིཙཱརིཏཾ. ཨཉྙམཉྙེ པཙྩནཱིཀཏོ ཋིཏེ ‘‘ཨརཱུཔཱནཾཡེཝཱ’’ཏི ཝུཏྟཱ ནཝ ཨནུལོམཏོ ན ལབྦྷནྟི, ཏམྤི པཙྩནཱིཀཏོ ཋིཏེཧི ཨཱརམྨཎཔཙྩཡཱདཱིཧི སདིསཏཱཡ སུཝིཉྙེཡྻནྟི ན ཝིཙཱརིཏཾ བྷཝིསྶཏཱིཏི.

༡༩༡-༡༩༥. ཡཱཝ ¶ ཨཱསེཝནཱ སབྦཾ སདིསནྟི ན ཨཉྙམཉྙེན གྷཊིཏསྶ མཱུལསྶ ཝིཏྠཱརིཏཏྟཱ ཏཏོ པརཱནི མཱུལཱནི སནྡྷཱཡ ཝུཏྟཾ. ཏེསུ ཧི ཨནུལོམཏོ ཡོཛེཏབྦཔཙྩཡཱ ཙ པཉྷཱ ཙཱཏི སབྦཾ སདིསནྟི.

ཨིམསྨིཾ པཙྩནཱིཡཱནུལོམེཏི ཨེཏསྶ ‘‘ཨིམེསམྤི པཀིཎྞཀཱནཾ ཝསེནེཏྠ གཎནཝཱརོ ཨསམྨོཧཏོ ཝེདིཏབྦོ’’ཏི ཨེཏེན སཧ སམྦནྡྷོ ¶ . ཏཏྠ ཨེཏྠཱཏི ཨེཏེསུ པཙྩཡེསཱུཏི ཨཏྠོ ཝེདིཏབྦོ. ཨིམསྨིཾ པཙྩནཱིཡཱནུལོམེ ལབྦྷམཱནེསུ པཙྩཡུཔྤནྣདྷམྨེསུཔཱིཏི ཝཱ ཡོཛེཏབྦཾ. ཏཏྠ པི-སདྡེན ཨིམམཏྠཾ དཱིཔེཏི – ན ཀེཝལཾ པཙྩཡེསྭེཝ ཀིསྨིཉྩི པཙྩནཱིཀཏོ ཋིཏེ ཀེཙི ཨནུལོམཏོ ན ལབྦྷནྟི, ཨཐ ཁོ པཙྩཡུཔྤནྣདྷམྨེསུཔི ཀོཙི ཨེཀཙྩཾ པཙྩཡཾ ལབྷམཱནོ ཀཉྩི པཙྩཡཾ ན ལབྷཏཱིཏི. ཏཏྠ ཀམྨཔཙྩཡཾ ལབྷམཱནོ ཡེབྷུཡྻེན ཨིནྡྲིཡཔཙྩཡཾ ལབྷཏི, མགྒཔཙྩཡཾ ལབྷམཱནོ ཡེབྷུཡྻེན ཧེཏུཔཙྩཡཾ, ཏཐཱ ཙ ཛྷཱནཔཙྩཡཾ ལབྷམཱནོ མགྒཔཙྩཡནྟི ཨེཏེསྭེཝ ལཱབྷཱལཱབྷཱ ཝིཙཱརིཏཱ. ཡཏྠཱཏི པཉྩཝོཀཱརཔཝཏྟེ ཨསཉྙེསུ ཙ. རཱུཔདྷམྨཱཏི ཡཐཱཝུཏྟཱནི ཀཊཏྟཱརཱུཔཱནེཝ སནྡྷཱཡ ཝདཏི. ན ཧི པཉྩཝོཀཱརཔཝཏྟེ སབྦེ རཱུཔདྷམྨཱ ཧེཏཱདཱིནི ན ལབྷནྟཱིཏི. ‘‘ཧེཏཱདྷིཔཏིཝིཔཱཀིནྡྲིཡཔཙྩཡེ ན ལབྷནྟཱི’’ཏི པུརིམཔཱཋོ, ཛྷཱནམགྒེཔི པན ན ལབྷནྟཱིཏི ‘‘ཧེཏཱདྷིཔཏིཝིཔཱཀིནྡྲིཡཛྷཱནམགྒཔཙྩཡེ ན ལབྷནྟཱི’’ཏི པཋནྟི. ཡེ རཱུཔདྷམྨཱནཾ པཙྩཡཱ ཧོནྟི, ཏེསུ ཨརཱུཔཊྛཱནིཀཝཛྫེསུ ཨེཏེཡེཝ ན ལབྷནྟཱིཏི ཨདྷིཔྤཱཡོ. པཙྪཱཛཱཏཱཧཱརཝིཔྤཡུཏྟཔཙྩཡེཔི ཧི པཝཏྟེ ཀཊཏྟཱརཱུཔཾ ལབྷཏཱིཏི. ལབྦྷམཱནཱལབྦྷམཱནཔཙྩཡདསྶནམཏྟཉྩེཏཾ, ན ཏེཧི པཙྩཡེཧི ཨུཔྤཏྟིཨནུཔྤཏྟིདསྶནནྟི. ཨེཝཾ ཨིནྡྲིཡཔཙྩཡཱལཱབྷོ ཛཱིཝིཏིནྡྲིཡཾ སནྡྷཱཡ ཝུཏྟོ སིཡཱ. ཡཐཱཝུཏྟེསུ ཧི དྷམྨཝསེན པཙྪཱཛཱཏཱདིཏྟཡམྤི ཨལབྷནྟཾ ནཱམ ཀཊཏྟཱརཱུཔཾ ནཏྠི. ཀོ པན ཝཱདོ སབྦཊྛཱནིཀཀམྨེསུ. ཨིནྡྲིཡཾ པན ཨལབྷནྟཾ ཨཏྠི, ཀིནྟཾ? ཛཱིཝིཏིནྡྲིཡནྟི. ཡདི ཨེཝཾ ཨུཔཱདཱརཱུཔཱནི སནྡྷཱཡ ཨཉྙམཉྙཔཙྩཡམྤི ན ལབྷནྟཱིཏི ཝཏྟབྦཾ, ཏཾ པན པཱཀཊནྟི ན ཝུཏྟཾ སིཡཱ. ཨརཱུཔིནྡྲིཡཱལཱབྷཾ ཝཱ སནྡྷཱཡ ཨིནྡྲིཡཔཙྩཡཱལཱབྷོ ཝུཏྟོཏི དཊྛབྦོ.

༡༩༦-༡༩༧. ནཱརམྨཎམཱུལཀེསུ དུཀཱདཱིསུ ཧེཏུཡཱ པཉྩཱཏི ཡདིཔི ཏིཀཱདཱིསུ ‘‘ཧེཏུཡཱ པཉྩཱ’’ཏི ཨིདཾ ནཏྠི, ཏཐཱཔི དུཀཱདཱིསུ སབྦཏྠ ཨནུཏྟཱནཾ ཝཏྟུཀཱམོ ‘‘དུཀཱདཱིསཱུ’’ཏི སབྦསངྒཧཝསེན ཝཏྭཱ ཏཏྠ ཡཾ ཨཱདིདུཀེ ཝུཏྟཾ ‘‘ཧེཏུཡཱ པཉྩཱ’’ཏི, ཏཾ ནིདྡྷཱརེཏི. ཀེཙི པན ‘‘ནཱརམྨཎམཱུལཀེ ཧེཏུཡཱ པཉྩཱ’’ཏི པཱཋཾ ཝདནྟི. ‘‘ཨཉྙམཉྙེ ཨེཀནྟི བྷཱུཏརཱུཔམེཝ སནྡྷཱཡ ¶ ཝུཏྟ’’ནྟི པུརིམཔཱཋོ, ཝཏྠུཔི པན ལབྦྷཏཱིཏི ‘‘བྷཱུཏརཱུཔཱནི ཙེཝ ཝཏྠུཉྩ སནྡྷཱཡ ཝུཏྟ’’ནྟི པཋནྟི. ཏིམཱུལཀེཏི ཨིདྷཱཔི དུམཱུལཀཾ ཏིམཱུལཀནྟི ཝདནྟི.

༢༠༣-༢༣༣. ནཀམྨམཱུལཀེ ¶ ཧེཏུཡཱ ཏཱིཎཱིཏིཨཱདཱིསུ ཙེཏནཱཝ པཙྩཡུཔྤནྣཱཏི ཨིདཾ ‘‘ཧེཏུཡཱ ཏཱིཎཱི’’ཏི ཨེཝཾཔཀཱརེ ཙེཏནཱམཏྟསངྒཱཧཀེ སནྡྷཱཡ ཝུཏྟནྟི དཊྛབྦཾ. ཨཱདི-སདྡོ ཧི པཀཱརཏྠོཝ ཧོཏཱིཏི. སཧཛཱཏཨཉྙམཉྙནིསྶཡཱཧཱརཨཏྠིཨཝིགཏེསུ པན རཱུཔམྤི ལབྦྷཏཱིཏི.

པཙྩཡཔཙྩནཱིཡཱནུལོམཝཎྞནཱ ནིཊྛིཏཱ.

༢༣༤-༢༤༢. ཀུསལཾ དྷམྨཾ སཧཛཱཏོ, ཀུསལཾ ཨེཀཾ ཁནྡྷཾ སཧཛཱཏོཏིཨཱདཱིསུ སཧཛཱཏསདྡེན སཧཛཱཏཔཙྩཡཀརཎཾ སཧཛཱཏཱཡཏྟབྷཱཝགམནཾ ཝཱ ཝུཏྟནྟི ཏསྶ ཀརཎསྶ གམནསྶ ཝཱ ཀུསལཱདཱིནཾ ཀམྨབྷཱཝཏོ ཨུཔཡོགཝཙནཾ ཀཏནྟི དཊྛབྦཾ. ཨེས ནཡོ པཙྩཡཝཱརཱདཱིསུཔི. ཏཏྲཱཔི ཧི པཙྩཡསདྡེན ཙ ནིསྶཡཔཙྩཡཀརཎཾ ནིསྶཡཱཡཏྟབྷཱཝགམནཾ ཝཱ ཝུཏྟཾ, སཾསཊྛསདྡེན ཙ སམྤཡུཏྟཔཙྩཡཀརཎཾ སམྤཡུཏྟཱཡཏྟབྷཱཝགམནཾ ཝཱཏི ཏཾཀམྨབྷཱཝཏོ ཨུཔཡོགཝཙནཾ ཀུསལཱདཱིསུ ཀཏནྟི. སཧཛཱཏམྤི ཙ ཨུཔཱདཱརཱུཔཾ བྷཱུཏརཱུཔསྶ པཙྩཡོ ན ཧོཏཱིཏི ‘‘པཊིཙྩཱ’’ཏི ཨིམིནཱ ཝཙནེན དཱིཔིཏོ པཙྩཡོ ན ཧོཏཱིཏི ཨཏྠོ. ‘‘ཨུཔཱདཱརཱུཔཾ བྷཱུཏརཱུཔསྶཱ’’ཏི ཙ ནིདསྶནཝསེན ཝུཏྟཾ. ཨུཔཱདཱརཱུཔསྶཔི ཧི ཨུཔཱདཱརཱུཔཾ ཡཐཱཝུཏྟོ པཙྩཡོ ན ཧོཏི, ཝཏྠུཝཛྫཱནི རཱུཔཱནི ཙ ཨརཱུཔཱནནྟི.

༢༤༣. པཙྩཡཱཏི ¶ ཨེཏྠ པཏི ཨཡོ པཙྩཡོ. པཏི-སདྡོ པཏིཊྛཏྠཾ དཱིཔེཏི, ཨཡ-སདྡོ གཏིཾ, པཏིཊྛཱབྷཱུཏཱ གཏི ནིསྶཡོ པཙྩཡོཏི ཝུཏྟཾ ཧོཏི, ཏཏོ པཙྩཡཱ, པཙྩཡཀརཎཏོ ཏདཱཡཏྟབྷཱཝགམནཏོ ཝཱཏི ཨཏྠོ.

‘‘མཧཱབྷཱུཏེ ¶ པཙྩཡཱ ཙིཏྟསམུཊྛཱནཾ རཱུཔ’’ནྟི (པཊྛཱ. ༡.༡.༢༤༥) བྷཱུཏུཔཱདཱརཱུཔཱནི སཧ སངྒཎྷིཏྭཱ ཝུཏྟཾ. ཨཊྛཀཐཱཡཾ པན ཙིཏྟསམུཊྛཱནེ ཙ མཧཱབྷཱུཏེ ནིསྶཱཡ ཙིཏྟསམུཊྛཱནཾ ཨུཔཱདཱརཱུཔནྟི སཡཾ ནིསྶཡོ ཨཧུཏྭཱ ནིསྶཡེ ཨུཔྤཛྫམཱནེན ཨུཔཱདཱརཱུཔེན ནིདསྶནཾ ཀཏནྟི དཊྛབྦཾ.

༢༥༥. ཨསཉྙ…པེ… ཀཊཏྟཱརཱུཔཾ ཨུཔཱདཱརཱུཔནྟི ཨེཏྠ ཡོ པཊིཙྩཝཱརེ སཧཛཱཏེ ཀམྨཨུཏུཛཱནཾ, ཀམྨེ ཙ ཨེཀནྟཱནེཀནྟཀམྨཛཱནཾ ཝསེན ཨཏྠོ ཝུཏྟོ, སོ ནཱདྷིཔྤེཏོ ཨེཝ ‘‘ཀཊཏྟཱརཱུཔ’’ནྟི ཀམྨསམུཊྛཱནརཱུཔསྶེཝ སབྦསྶ ཙ གཧིཏཏྟཱཏི ཏཾ པཧཱཡ ཡཐཱགཧིཏསྶ ཀཊཏྟཱརཱུཔསྶ ཝིསེསནཝསེན ‘‘ཨུཔཱདཱརཱུཔསངྑཱཏཾ ཀཊཏྟཱརཱུཔ’’ནྟི ཨཏྠམཱཧ. མཧཱབྷཱུཏེ པན པཊིཙྩ པཙྩཡཱ ཙ མཧཱབྷཱུཏཱནཾ ཨུཔྤཏྟི ན ནིཝཱརེཏབྦཱཏི ཨུཔཱདཱརཱུཔགྒཧཎེན ཀཊཏྟཱརཱུཔགྒཧཎཾ ཨཝིསེསེཏྭཱ ཨུཔཱདཱརཱུཔཱནཾ ནིཝཏྟེཏབྦཱནཾ ཨཏྠིཏཱཡ ཀཊཏྟཱརཱུཔགྒཧཎེནེཝ ཨུཔཱདཱརཱུཔགྒཧཎསྶ ཝིསེསནཾ དཊྛབྦཾ.

༢༦༩-༢༧༦. ‘‘ཨབྱཱཀཏེན ཨབྱཱཀཏཾ, ཀུསལཾ, ཨཀུསལ’’ནྟི ཝཏྟབྦེ ‘‘ཨབྱཱཀཏེན ཀུསལཾ, ཨཀུསལཾ, ཨབྱཱཀཏ’’ནྟི, ‘‘ཀུསལཾ དྷམྨཾ པཊིཙྩ ཀུསལོ ཙ ཨཀུསལོ ཙ དྷམྨཱ ཀུསལསྶཱཏི ཨནཱམསིཏྭཱ’’ཏི ཙ པུརིམཔཱཋེ པམཱདལེཁཱ དཊྛབྦཱ.

༢༨༦-༢༨༧. ནཧེཏུཔཙྩཡཱ ནཔུརེཛཱཏེ དྭེཏི ཨེཏྠ ཨཊྛཀཐཱཡཾ ‘‘ཨཱརུཔྤེ པན ཨཧེཏུཀམོཧསྶ ཨཧེཏུཀཀིརིཡསྶ ཙ ཝསེན དྭེཏི ཝུཏྟཱ, ནཝིཔྤཡུཏྟེ དྭེཏི ཨཱརུཔྤེ ཨཧེཏུཀཱཀུསལཀིརིཡཝསེནཱ’’ཏི ཝུཏྟཾ, ཏཾ ལབྦྷམཱནེསུ ཨེཀདེསེན ནིདསྶནཝསེན ཝུཏྟནྟི དཊྛབྦཾ. ཨཱརུཔྤེ པན ཨཧེཏུཀམོཧསྶ ཨཧེཏུཀཀིརིཡཱཡ ཨཧེཏུཀཔཊིསནྡྷིཡཱ ཨེཀཙྩསྶ ཙ རཱུཔསྶ ཝསེན དྭེ ཝུཏྟཱཏི, ནཝིཔྤཡུཏྟེ དྭེཏི ཨཱརུཔྤེ ཨཧེཏུཀཱཀུསལཀིརིཡཱཨེཀཙྩརཱུཔཱནཾ ཝསེནཱཏི ཝུཏྟནྟི. ‘‘ནོནཏྠིནོཝིགཏེསུ ཨེཀནྟི སབྦརཱུཔསྶ ཝསེནཱ’’ཏི ཝུཏྟཾ, ནཧེཏུམཱུལཀཏྟཱ ཨིམསྶ ¶ ནཡསྶ ཧེཏུཔཙྩཡཾ ལབྷནྟཾ ན ལབྦྷཏཱིཏི ‘‘ཨེཀཙྩསྶ རཱུཔསྶ ཝསེནཱ’’ཏི བྷཝིཏབྦཾ. ཙཀྑཱདིདྷམྨཝསེན པན ཙིཏྟསམུཊྛཱནཱདིཀོཊྛཱསཝསེན ཝཱ སབྦཾ ལབྦྷཏཱིཏི ‘‘སབྦརཱུཔསྶཱ’’ཏི ཝུཏྟཾ སིཡཱ.

༢༨༩-༢༩༦. ཨཱགཏཱནཱགཏནྟི ¶ པཉྷཝསེན ཝུཏྟཾ, ལབྦྷམཱནཱལབྦྷམཱནནྟི ཨཱགཏེ ཙ པཉྷེ ལབྦྷམཱནཱལབྦྷམཱནདྷམྨཝསེན.

༣༢༩-༣༣༧. པཙྩཡཝཱརེན ནིསྶཡཔཙྩཡབྷཱཝནྟི ནིསྶཡཝཱརེ ཝུཏྟསྶ ནིསྶཡཔཙྩཡབྷཱཝཾ ནིཡམེཏུནྟི ཨཏྠོ.

༣༥༡-༣༦༨. སཾསཊྛཝཱརེ པཙྩནཱིཡེ ‘‘ནཝིཔྤཡུཏྟེ པཊིསནྡྷི ནཏྠཱི’’ཏི ཨིདཾ ཝཏྠུཝིརཧིཏཱཡ པཊིསནྡྷིཡཱ ཝིསུཾ ཨནུདྡྷརཎཏོ ཝུཏྟཾ. པཊིཙྩཝཱརཱདཱིསུ ཧི སཧཛཱཏསྶ པཙྩཡབྷཱཝདསྶནཏྠཾ སཝཏྠུཀཱ པཊིསནྡྷི ཨུདྡྷཊཱ, སཱ ཨིདྷཱཔི ཨདྷིཔཏིཔུརེཛཱཏཱསེཝནེསུ ནཀམྨནཝིཔཱཀནཛྷཱནནཝིཔྤཡུཏྟེསུ ན ལབྦྷཏི, ཨཉྙེསུ ཙ ཨནུལོམཏོ པཙྩནཱིཡཏོ ཙ ལབྦྷམཱནཔཙྩཡེསུ ལབྦྷཏཱིཏི ཨིམསྶ ཝིསེསསྶ དསྶནཏྠཾ ཨུདྡྷཊཱཏི. སེསཱ ཏེརས ན ལབྦྷནྟཱིཏི ཨེཏྠ ‘‘སེསཱ ཙུདྡསཱ’’ཏི བྷཝིཏབྦཾ. ན ཛྷཱནེ ཨེཀནྟི ཨཧེཏུཀཔཉྩཝིཉྙཱཎཝསེནཱཏི པཉྩཝིཉྙཱཎཱནཾ ཧེཏུཔཙྩཡཝིརཧིཏམཏྟདསྶནཏྠཾ ཨཧེཏུཀགྒཧཎཾ ཀཏནྟི དཊྛབྦཾ, ‘‘ནམགྒེ ཨེཀནྟི ཨཧེཏུཀཀིརིཡཝསེནཱ’’ཏི ཝུཏྟཾ, ‘‘ཨཧེཏུཀཝིཔཱཀཀིརིཡཝསེནཱ’’ཏི བྷཝིཏབྦཾ.

༣༦༩-༣༩༡. ཧེཊྛཱ ¶ ཝུཏྟནཡེནེཝཱཏི པཊིཙྩཝཱརེ ཨནུལོམཔཙྩནཱིཡེ ཝུཏྟནཡེན. ‘‘ནཧེཏུཔཙྩཡུཔྤནྣེསུ ཨཧེཏུཀམོཧོཝ ཛྷཱནམགྒཔཙྩཡཾ ལབྷཏི, སེསཱ ན ལབྷནྟཱི’’ཏི ཝུཏྟཾ, སེསེསུ པན པཉྩཝིཉྙཱཎཝཛྫཱཧེཏུཀཀྑནྡྷཱ ཏཾསམུཊྛཱནཱ པཙྩཡུཔྤནྣདྷམྨཱ ཛྷཱནཔཙྩཡཾ ལབྷནྟི, ན པཙྩནཱིཡཱནུལོམེ དྭིནྣཾ པཙྩཡཱནཾ ཨནུལོམེན སཧ ཡོཛནཱ ཨཏྠཱིཏི ཛྷཱནམགྒཔཙྩཡཾ སཧིཏཾ ལབྷཏཱིཏི ཙ ན སཀྐཱ ཝཏྟུཾ, ཏསྨཱ ‘‘ཨཧེཏུཀམོཧོཝ མགྒཔཙྩཡཾ ལབྷཏཱི’’ཏི ཝཏྟབྦཾ.

༣༩༢-༤༠༠. སདིསཾ ¶ སམྤཡུཏྟཾ སཾསཊྛཾ ཝོཀིཎྞཉྩ སཾསཊྛཾ ན ཧོཏཱིཏི ཨུབྷཡཾ ཨཉྙམཉྙཱཔེཀྑཾ ཝུཙྩམཱནཾ ཨཉྙམཉྙསྶ ནིཡཱམཀཾ ཧོཏཱིཏི.

༤༠༡-༤༠༣. ཡེཧི པཙྩཡེཧི ཀུསལོ ཀུསལསྶ པཙྩཡོ ཧོཏི, ཏེ པཙྩཡེ པཊིཔཱཊིཡཱ དསྶེཏུནྟི ཡཐཱཀྐམེན ཨཱགཏཱགཏཔཊིཔཱཊིཡཱ དསྶེཏུནྟི ཨཏྠོ. ཀུསལོ ཀུསལསྶཱཏི ནིདསྶནམཏྟམེཏཾ, ཏེན ཀུསལོ ཀུསལཱདཱིནཾ, ཨཀུསལོ ཨཀུསལཱདཱིནཾ, ཨབྱཱཀཏོ ཨབྱཱཀཏཱདཱིནཾ, ཀུསལཱབྱཱཀཏཱ ཀུསལཱདཱིནནྟིཨཱདིཀོ སབྦོ པབྷེདོ ནིདསྶིཏོ ཧོཏཱིཏི ཡཐཱནིདསྶིཏེ སབྦེ གཧེཏྭཱ ཨཱཧ ‘‘ཏེ པཙྩཡེ པཊིཔཱཊིཡཱ དསྶེཏུ’’ནྟི.

༤༠༤. དཏྭཱཏི ཨེཏྠ དཱ-སདྡོ སོདྷནཏྠོཔི ཧོཏཱིཏི མནྟྭཱ ཨཱཧ ‘‘ཝིསུདྡྷཾ ཀཏྭཱ’’ཏི. ཏེསཉྷི ཏཾ ཙིཏྟནྟི ཏེསནྟི ཝཏྟབྦཏཱརཧཾ སཀདཱགཱམིམགྒཱདིཔུརེཙཱརིཀཾ ཏཾ གོཏྲབྷུཙིཏྟནྟི ཨདྷིཔྤཱཡོ ¶ . ཝིཔསྶནཱཀུསལཾ པན ཀཱམཱཝཙརམེཝཱཏི པཙྩཡུཔྤནྣཾ བྷཱུམིཏོ ཝཝཏྠཔེཏི. ཏེནེཝཱཏི དྷམྨཝསེནེཝ དསྶནཏོ, དེསནནྟརཏྟཱཏི ཨདྷིཔྤཱཡོ.

༤༠༥. ཨསྶཱདནཾ སརཱགསྶ སོམནསྶསྶ སསོམནསྶསྶ རཱགསྶ ཙ ཀིཙྩནྟི ཨཱཧ ‘‘ཨནུབྷཝཏི ཙེཝ རཛྫཏི ཙཱ’’ཏི. ཨབྷིནནྡནཾ པཱིཏིཀིཙྩསཧིཏཱཡ ཏཎྷཱཡ ཀིཙྩནྟི ཨཱཧ ‘‘སཔྤཱིཏིཀཏཎྷཱཝསེནཱ’’ཏི. དིཊྛཱབྷིནནྡནཱ དིཊྛིཡེཝ. ཨེཏྠ པན པཙྪིམཏྠམེཝ གཧེཏྭཱ ‘‘ཨབྷིནནྡནྟསྶ ཨཏྟཱ ཨཏྟནིཡནྟིཨཱདིཝསེན…པེ… དིཊྛི ཨུཔྤཛྫཏཱི’’ཏི ཝུཏྟཾ. ཨབྷིནནྡནཱ པན དིཊྛཱབྷིནནྡནཱཡེཝཱཏི ན སཀྐཱ ཝཏྟུཾ ‘‘བྷཱཝནཱཡ པཧཱཏབྦོ དྷམྨོ བྷཱཝནཱཡ པཧཱཏབྦསྶ དྷམྨསྶ ཨཱརམྨཎ…པེ… བྷཱཝནཱཡ པཧཱཏབྦཾ རཱགཾ ཨསྶཱདེཏི ཨབྷིནནྡཏཱི’’ཏི (པཊྛཱ. ༢.༨.༧༢) ཝཙནཏོ, ཏསྨཱ པུརིམོཔི ཨཏྠོ ཝུཏྟོཏི དཊྛབྦོ. དྭཱིསུ པན སོམནསྶསཧགཏཙིཏྟེསུ ཡཐཱཝུཏྟེན སོམནསྶེན ¶ རཱགེན ཙ ཨསྶཱདེནྟསྶ ཏེསུཡེཝ སཔྤཱིཏིཀཏཎྷཱཡ ཙཏཱུསུཔི དིཊྛཱབྷིནནྡནཱཡ ཨབྷིནནྡནྟསྶ ཙ དིཊྛི ཨུཔྤཛྫཏཱིཏིཔི སཀྐཱ ཡོཛེཏུཾ. ཛཱཏིཝསེནཱཏི སུཙིཎྞསཱམཉྙཝསེནཱཏི ཨཏྠོ.

༤༠༦. ཏདཱརམྨཎཏཱཏི ཏདཱརམྨཎབྷཱཝེན. ཝིབྷཏྟིལོཔོ ཧེཏྠ ཀཏོཏི. བྷཱཝཝནྟཏོ ཝཱ ཨཉྙོ བྷཱཝོ ནཏྠཱིཏི བྷཱཝེནེཝ ཝིཔཱཀཾ ཝིསེསེཏི, ཝིཔཱཀོ ཏདཱརམྨཎབྷཱཝབྷཱུཏོཏི ཨཏྠོ. ཝིཉྙཱཎཉྩཱཡཏནནེཝསཉྙཱནཱསཉྙཱཡཏནཝིཔཱཀཱནཾ ཝིཡ ན ཀཱམཱཝཙརཝིཔཱཀཱནཾ ནིཡོགཏོ ཝཝཏྠིཏཾ ཨིདཉྩ ཀམྨཾ ཨཱརམྨཎནྟི ཏཾ ལབྦྷམཱནམྤི ན ཝུཏྟཾ. ཏདཱརམྨཎེན པན ཀུསལཱརམྨཎབྷཱཝེན སམཱནལཀྑཎཏཱཡ ཀམྨཱརམྨཎཱ པཊིསནྡྷིཨཱདཡོཔི དསྶིཏཱཡེཝཱཏི དཊྛབྦཱ. པཊིལོམཏོ ཝཱ ཨེཀནྟརིཀཝསེན ཝཱཏི ཝདནྟེན ཨནུལོམཏོ སམཱཔཛྫནེ ཡེབྷུཡྻེན ཨཱསནྣསམཱཔཏྟིཡཱ ཨཱརམྨཎབྷཱཝོ དསྶིཏོཏི དཊྛབྦོ. ཡཐཱ པན པཊིལོམཏོ ཨེཀནྟརིཀཝསེན ཙ སམཱཔཛྫནྟསྶ ཨནཱསནྣཱཔི སམཱཔཏྟི ཨཱརམྨཎཾ ཧོཏི, ཨེཝཾ ཨནུལོམཏོ སམཱཔཛྫནྟསྶཔི བྷཝེཡྻཱཏི. ‘‘ཙེཏོཔརིཡཉཱཎསྶཱཏིཨཱདཱིནི པརཏོ ཨཱཝཛྫནཱཡ ཡོཛེཏབྦཱནཱི’’ཏི ཝཏྭཱ ‘‘ཡཱ ཨེཏེསཾ ཨཱཝཛྫནཱ, ཏསྶཱ’’ཏི ཨཏྠོ ཝུཏྟོ, ཨེཝཾ སཏི ‘‘ཨིདྡྷིཝིདྷཉཱཎསྶཱ’’ཏིཔི ཝཏྟབྦཾ སིཡཱ. ཡསྨཱ པན ཀུསལཱ ཁནྡྷཱ ཨབྱཱཀཏསྶ ཨིདྡྷིཝིདྷཉཱཎསྶ ཨཱརམྨཎཾ ན ཧོནྟཱིཏི ཏཾ ན ཝུཏྟཾ, ཙེཏོཔརིཡཉཱཎཱདཱིནཉྩ ཧོནྟཱིཏི ཏཱནི ཝུཏྟཱནི, ཏསྨཱ ཀིརིཡཱནཾ ཙེཏོཔརིཡཉཱཎཱདཱིནཾ ཡཱཡ ཀཱཡཙི ཨཱཝཛྫནཱཡ ཙ ཀུསལཱརམྨཎཱཡ ཀུསལཱ ཁནྡྷཱ ཨཱརམྨཎཔཙྩཡེན པཙྩཡོཏི ཨེཝམཏྠོ དཊྛབྦོ.

༤༠༧-༤༠༩. ཝིཔྤཊིསཱརཱདིཝསེན ¶ ཝཱཏི ཨཱདི-སདྡེན ཨཱདཱིནཝདསྶནེན སབྷཱཝཏོ ཙ ཨནིཊྛཏཱམཏྟཾ སངྒཎྷཱཏི, ཨཀྑནྟིབྷེདཱ ཝཱ.

༤༡༠. རཱུཔཱཡཏནཾ ཙཀྑུཝིཉྙཱཎསྶཱཏིཨཱདིནཱ ཝིཉྙཱཎཀཱཡེཧི ནིཡཏཱརམྨཎེཧི ཨབྱཱཀཏསྶ ཨབྱཱཀཏཱནཾ ཨཱརམྨཎཔཙྩཡབྷཱཝཾ ནིདསྶེཏི. སབྦསྶ ཧི ཝཏྟུཾ ཨསཀྐུཎེཡྻཏྟཱ ཨེཀསྨིཾ སནྟཱནེ དྷམྨཱནཾ ཨེཀདེསེན ནིདསྶནཾ ཀརོཏཱིཏི.

༤༡༣-༤༡༦. ཙཏུབྷཱུམཀཾ ¶ ཀུསལཾ ཨཱརམྨཎཱདྷིཔཏིཔཙྩཡབྷཱཝེན དསྶིཏཾ, པཙྩཡུཔྤནྣཾ པན ཀཱམཱཝཙརམེཝ.

༤༡༧. ཨཔུབྦཏོ ཙིཏྟསནྟཱནཏོ ཝུཊྛཱནཾ བྷཝངྒམེཝ, ཏཾ པན མཱུལཱགནྟུཀབྷཝངྒསངྑཱཏཾ ཏདཱརམྨཎཾ པཀཏིབྷཝངྒཉྩ. ཨནུལོམཾ སེཀྑཱཡ ཕལསམཱཔཏྟིཡཱཏི ཨེཏྠ ཀཱཡཙི སེཀྑཕལསམཱཔཏྟིཡཱ ཨཝཛྫེཏབྦཏྟཱ ཝཏྟབྦཾ ནཏྠཱིཏི ནེཝསཉྙཱནཱསཉྙཱཡཏནཀུསལཾ ཕལསམཱཔཏྟིཡཱཏི ཨིམཾ ནིབྦིསེསནཾ ཕལསམཱཔཏྟིཾ ཨུདྡྷརིཏྭཱ དསྶེནྟོ ཨཱཧ ‘‘ཕལསམཱཔཏྟིཡཱཏི ཨནཱགཱམིཕལསམཱཔཏྟིཡཱ’’ཏི. ཀཱམཱཝཙརཀིརིཡཱ དུཝིདྷསྶཔི ཝུཊྛཱནསྶཱཏི ཨེཏྠ ཀིརིཡཱནནྟརཾ ཏདཱརམྨཎཝུཊྛཱནེ ཡཾ ཝཏྟབྦཾ, ཏཾ ཙིཏྟུཔྤཱདཀཎྜེ ཝུཏྟམེཝ.

ཏཱ ཨུབྷོཔི…པེ… དྭཱདསནྣནྟི ཨིདཾ སོམནསྶསཧགཏམནོཝིཉྙཱཎདྷཱཏུཝསེན ཝུཏྟཾ, ཨུཔེཀྑཱསཧགཏཱ པན ཡཐཱཝུཏྟཱནཾ དསནྣཾ ཝིཉྙཱཎདྷཱཏཱུནཾ ཝོཊྛབྦནཀིརིཡསྶ མནོདྷཱཏུཀིརིཡསྶ ཙཱཏི དྭཱདསནྣཾ ཧོཏཱིཏི དཊྛབྦཾ.

༤༢༣. དཱནཱདིཔུཉྙཀིརིཡཱཡཏྟཱ སབྦསམྤཏྟིཡོ པཊིཝིཛ྄ཛྷིཏྭཱཏི སམྦནྡྷོ. ན པནེཏཾ ཨེཀནྟེན གཧེཏབྦནྟི ‘‘བལཝཙེཏནཱཝ ལབྦྷཏི, ན དུབྦལཱ’’ཏི ཨེཏཾ ཨེཀནྟཾ ན གཧེཏབྦཾ, དལ༹ྷཾ ཝཱ ན གཧེཏབྦནྟི ཨདྷིཔྤཱཡོ. ཀིཾ ཀཱརཎནྟི? བལཝཏོ དུབྦལསྶ ཝཱ ཀཏོཀཱསསྶ ཨནྟརཱཡཾ པཊིབཱཧིཏྭཱ ཝིཔཙྩནཏོ ‘‘ཡཾཀཉྩི ཡདི ཝིཔཱཀཾ ཛནེཏི, ཨུཔནིསྶཡོ ན ཧོཏཱི’’ཏི ནཝཏྟབྦཏྟཱ ཙཱཏི དསྶེནྟོ ‘‘ཀཏོཀཱསཉྷཱི’’ཏིཨཱདིམཱཧ. ཝིཔཱཀཏྟིཀེ པན པཉྷཱཝཱརཔཙྩནཱིཡེ ‘‘ཝིཔཱཀདྷམྨདྷམྨོ ཝིཔཱཀསྶ དྷམྨསྶ ཨཱརམྨཎཔཙྩཡེན པཙྩཡོ, ཨུཔནིསྶཡཔཙྩཡེན པཙྩཡོ, ཀམྨཔཙྩཡེན པཙྩཡོ’’ཏི (པཊྛཱ. ༡.༣.༩༣) ཀམྨཔཙྩཡསྶ ཝིསུཾ ¶ ཨུདྡྷཊཏྟཱ, ཝེདནཱཏྟིཀེ ཙ པཉྷཱཝཱརཔཙྩནཱིཡེ ‘‘ནཧེཏུཔཙྩཡཱ ནཨཱརམྨཎཔཙྩཡཱ ནཨུཔནིསྶཡེ ཨཊྛཱ’’ཏི (པཊྛཱ. ༡.༢.༨༧) ཝུཏྟཏྟཱ ‘‘ཝིཔཱཀཛནཀམྤི ཀིཉྩི ཀམྨཾ ཨུཔནིསྶཡཔཙྩཡོ ན ཧོཏཱི’’ཏི སཀྐཱ ཝཏྟུནྟི.

ཏསྨིཾ ཝཱ ཝིརུདྡྷོཏི ཏཾནིམིཏྟཾ ཝིརུདྡྷོ, ཝིརུདྡྷནྟི ཝཱ པཱཋོ. ཨོམཱནནྟི པརསྶ པཝཏྟཨོམཱནཾ. རཱགོ རཉྫནཝསེན པཝཏྟཱ ཀཱམརཱགཏཎྷཱ, ‘‘ཨིཏི མེ ཙཀྑུཾ སིཡཱ ཨནཱགཏམདྡྷཱནཾ, ཨིཏི རཱུཔཱ’’ཏི ཨཔྤཊིལདྡྷསྶ པཊིལཱབྷཱཡ ཙིཏྟཔཎིདཧནཏཎྷཱ པཏྠནཱཏི ཨཡམེཏེསཾ ཝིསེསོ.

ཏེསུ ¶ ཨཉྙམྤཱིཏི ཏེསུ ཡཾཀིཉྩི པུབྦེ ཧནིཏཏོ ཨཉྙམྤི པཱཎཾ ཧནཏཱིཏི ཨཏྠོ.

པུནཔྤུནཾ ཨཱཎཱཔནཝསེན ཝཱཏི མཱཏུགྷཱཏཀམྨེན སདིསཏཱཡ པུབྦེ པཝཏྟཱཡཔི ཨཱཎཏྟཙེཏནཱཡ མཱཏུགྷཱཏཀམྨནཱམཾ ཨཱརོཔེཏྭཱ ཝདནྟི. ཨེས ནཡོ དྭཱིཧི པཧཱརེཧཱིཏི ཨེཏྠཱཔི.

ཡཐེཝ ཧི…པེ… ཨུཔྤཱདེཏི ནཱམཱཏི རཱགཾ ཨུཔནིསྶཱཡ དཱནཾ དེཏཱིཏི རཱགཾ ཨུཔནིསྶཱཡ དཱནཝསེན སདྡྷཾ ཨུཔྤཱདེཏཱིཏི ཨཡམཏྠོ ཝུཏྟོ ཧོཏཱིཏི ཨིམིནཱ ཨདྷིཔྤཱཡེན ཝདཏི. ཡཐཱ རཱགཾ ཨུཔནིསྶཱཡ དཱནཾ དེཏཱིཏིཨེཝམཱདི ཧོཏི, ཨེཝཾ རཱགཱདཡོ སདྡྷཱདཱིནཾ ཨུཔནིསྶཡཔཙྩཡོཏི ཨིདམྤི ཧོཏཱིཏི དསྶེཏི. ཀཱཡིཀཾ སུཁནྟིཨཱདཱིནཾ ཨེཀཏོ དསྶནེན ཝིསུཾཡེཝ ན ཨེཏེསཾ པཙྩཡབྷཱཝོ, ཨཐ ཁོ ཨེཀཏོཔཱིཏི དསྶིཏཾ ཧོཏཱིཏི དཊྛབྦཾ.

༤༢༥. ཨུཔཏྠམྦྷཀཏྟེན པཙྩཡཏྟཱཡེཝཱཏི ཨེཏེན ཨིདཾ དསྶེཏི – ན པུརིམཝཱརེསུ ཝིཡ ཨིམསྨིཾ པཙྩཡེན ཨུཔྤཏྟི ཝུཙྩཏི, ཨཐ ཁོ ཏསྶ ཏསྶ པཙྩཡུཔྤནྣསྶ ཏེསཾ ཏེསཾ དྷམྨཱནཾ ཏཾཏཾཔཙྩཡབྷཱཝོ, ན ཙ པཙྪཱཛཱཏཀྑནྡྷཱ ཨུཔཏྠམྦྷཀཏྟེན པཙྩཡཱ ན ཧོནྟི, ཏེནེས པཙྪཱཛཱཏཔཙྩཡོ ཨིདྷ ཨནུལོམཏོ ཨཱགཏོཏི.

༤༢༧. ཙེཏནཱ ཝཏྠུསྶཔི པཙྩཡོཏི ཨཏྟནོ པཏིཊྛཱབྷཱུཏསྶཔི ཀམྨཔཙྩཡོཏི ཨདྷིཔྤཱཡོ.

ཀསྨཱ ¶ པནེཏྠ པཙྩཡཝཱརེ ཝིཡ ནིསྶཡཨཏྠིཨཝིགཏེསུ དུམཱུལཀདུཀཱཝསཱནཱ པཉྷཱ ན ཨུདྡྷཊཱཏི? ཨལབྦྷམཱནཏྟཱ. ཏཏྠ ཧི པཙྩཡུཔྤནྣཔྤདྷཱནཏྟཱ དེསནཱཡ ཀུསལོ ཙ ཨབྱཱཀཏོ ཙ དྷམྨཱ ཨེཀཏོ ཨུཔྤཛྫམཱནཱ ཀུསལཱབྱཱཀཏཔཙྩཡཱ ལབྦྷནྟཱིཏི ‘‘ཀུསལཉྩ ཨབྱཱཀཏཉྩ དྷམྨཾ པཙྩཡཱ ཀུསལོ ཙ ཨབྱཱཀཏོ ཙ དྷམྨཱ ཨུཔྤཛྫནྟཱི’’ཏི (པཊྛཱ. ༡.༡.༢༤༦) ཝུཏྟཾ. ཡཏོ ཏཏོ ཝཱ ཨུབྷཡཔཙྩཡཏོ པཙྩཡུཔྤནྣསྶ ཨུཔྤཏྟིམཏྟཾཡེཝ ཧི ཏཏྠ ཨདྷིཔྤེཏཾ, ན ཨུབྷཡསྶ ཨུབྷིནྣཾ པཙྩཡབྷཱཝོཏི. ཨིདྷ པན པཙྩཡཔྤདྷཱནཏྟཱ དེསནཱཡ ཀུསལཱབྱཱཀཏཱ ཀུསལཱབྱཱཀཏཱནཾ ཨུབྷིནྣཾ ནིསྶཡཱདིབྷཱུཏཱ ན ལབྦྷནྟཱིཏི ¶ ‘‘ཀུསལོ ཙ ཨབྱཱཀཏོ ཙ དྷམྨཱ ཀུསལསྶ ཙ ཨབྱཱཀཏསྶ ཙ དྷམྨསྶ ནིསྶཡཔཙྩཡེན པཙྩཡོ’’ཏིཨཱདི ན ཝུཏྟཾ.

༤༣༩. ‘‘ཨེཏྠ པན པུརེཛཱཏམྤི ལབྦྷཏཱི’’ཏི ཝུཏྟཾ, ཡདི ཨེཝཾ ཀསྨཱ ‘‘ཏཐཱ’’ཏི ཝུཏྟནྟི? ‘‘ཏཱིཎཱི’’ཏི གཎནམཏྟསཱམཉྙཏོ.

༤༤༠. ‘‘ཨདྷིཔཏིཔཙྩཡེ ཋཔེཏྭཱ ཝཱིམཾསཾ སེསཱདྷིཔཏིནོ ཝིསབྷཱགཱ’’ཏི པུརིམཔཱཋོ ནིདསྶནཝསེན དཊྛབྦོ. ཡསྨཱ པན ཧེཏུཔཙྩཡསྶ ཝིསབྷཱགེན ཨེཀེན ཨཱརམྨཎེན ནིདསྶནཾ ཨཀཏྭཱ ཨནནྟརཱདཱིནི ཝདནྟོ སབྦེ ཝིསབྷཱགེ དསྶེཏི, ཏསྨཱ ཨིནྡྲིཡམགྒཔཙྩཡཱ ཙ ཝིསབྷཱགཱ དསྶེཏབྦཱཏི ‘‘ཨདྷིཔཏིནྡྲིཡམགྒཔཙྩཡེསུ ཋཔེཏྭཱ པཉྙཾ སེསཱ དྷམྨཱ ཝིསབྷཱགཱ’’ཏི པཋནྟི. ཏཐཱ བྷཱཝཱབྷཱཝཏོ ཧེཏུཔཙྩཡབྷཱཝེ སཧཛཱཏཱདིཔཙྩཡབྷཱཝཏོ. ནནུ ཡཐཱ ཨམོཧཝཛྫཱནཾ ཧེཏཱུནཾ ཧེཏུཔཙྩཡབྷཱཝེ ཨདྷིཔཏིནྡྲིཡམགྒཔཙྩཡབྷཱཝོ ནཏྠཱིཏི པཉྙཱཝཛྫཱནཾ ཨདྷིཔཏིཔཙྩཡཱདཱིནཾ ཝིསབྷཱགཏཱ, ཨེཝཾ ཀུསལཱདིཧེཏཱུནཾ ཧེཏུཔཙྩཡབྷཱཝེ ཝིཔཱཀཔཙྩཡབྷཱཝཱབྷཱཝཏོ ཧེཏུཝཛྫཱནཾ ཝིཔཱཀཱནཾ ཝིསབྷཱགཏཱཡ བྷཝིཏབྦནྟི? ན བྷཝིཏབྦཾ, ཨུབྷཡཔཙྩཡསཧིཏེ ཙིཏྟཙེཏསིཀརཱསིམྷི ཧེཏུཔཙྩཡབྷཱཝེ ཝིཔཱཀཔཙྩཡཏྟཱབྷཱཝཱབྷཱཝཏོ. ཡཐཱ ཧི ཧེཏུསཧཛཱཏཔཙྩཡསཧིཏརཱསིམྷི སཏིཔི ཧེཏུཝཛྫསབྦྷཱཝེ ཧེཏཱུནཾ ཧེཏུཔཙྩཡབྷཱཝེ སཧཛཱཏཔཙྩཡཏྟཱབྷཱཝོ ¶ ནཏྠཱིཏི ན ཧེཏུཝཛྫཱནཾ སཧཛཱཏཱནཾ ཧེཏུསྶ ཝིསབྷཱགཏཱ ཝུཏྟཱ, ཨེཝམིདྷཱཔཱིཏི. ཨེས ནཡོ ཝིཔྤཡུཏྟཔཙྩཡེཔི. ཨཔིཙ པཙྩཡུཔྤནྣསྶེཝ པཙྩཡཱ ཝུཙྩནྟཱིཏི པཙྩཡུཔྤནྣཀྑཎེ ཏཐཱ བྷཱཝཱབྷཱཝཝསེན སབྷཱགཏཱཡ ཝུཙྩམཱནཱཡ ནཱནཱཀྑཎཝསེན ཝིསབྷཱགཏཱ ཏསྶེཝ ན ཝཏྟབྦཱཏི.

ཀུསལཱ ཝཱིམཾསཱཏི ཨིདཾ ‘‘ཀུསལཱ ཝཱིམཾསཱདྷིཔཏཱི’’ཏི ཨེཝཾ ཝཏྟབྦཾ. ན ཧི ཨནདྷིཔཏིབྷཱུཏཱ ཝཱིམཾསཱ ཨདྷིཔཏིཔཙྩཡོ ཧོཏཱིཏི.

༤༤༡-༤༤༣. ‘‘སཙེ ¶ པན ཝིཔྤཡུཏྟཔཙྩཡོ པཝིསཏི, ཨིཏརཱནི དྭེ ལབྷཏཱི’’ཏི པུརིམཔཱཋོ, ‘‘ཀུསལོ དྷམྨོ ཀུསལསྶ ཙ ཨབྱཱཀཏསྶ ཙཱ’’ཏི ཨིདཾ པན ན ལབྦྷཏཱིཏི ‘‘ཀུསལོ ཨབྱཱཀཏསྶ, ཨབྱཱཀཏོ ཨབྱཱཀཏསྶཱཏི དྭེ ལབྷཏཱི’’ཏི པཋནྟི. ཨཱུནཏརགཎནེསཱུཏི ཡེསུ པཝིཊྛེསུ ཨཱུནཏརཱ གཎནཱ ཧོཏི, ཏེསཱུཏི ཨཏྠོ. ཏཱིཎི དྭེ ཨེཀནྟི ཨེཝཾ ཨཱུནཏརགཎནེསུ ཝཱ ཨཉྙམཉྙཱདཱིསུ པཝིསནྟེསུ ཏེསཾ ཝསེན ཏིཀཏོ ཨཱུནཾ ཡཐཱལདྡྷཉྩ ཨེཀནྟི གཎནཾ ལབྷཏཱིཏི ཨཏྠོ.

ཨཝིཔཱཀཱནཱིཏི ཨནཱམཊྛཝིཔཱཀཱནཱིཏི ཨཏྠོ, ན ཝིཔཱཀཧེཏུརཧིཏཱནཱིཏི.

ཏཏྠ སབྦེཔི སཧཛཱཏཝིཔཱཀཱ ཙེཝཱཏི ཏཏྠ ཡེ སཧཛཱཏཱ པཙྩཡུཔྤནྣཱ ཝུཏྟཱ, ཏེ སབྦེཔི ཝིཔཱཀཱ ཙེཝ ཝིཔཱཀསཧཛཱཏརཱུཔཱ ཙཱཏི ཨཏྠོ. ཏཾསམུཊྛཱནརཱུཔཱ ཙཱཏི ཨེཏྠ པཊིསནྡྷིཡཾ ཀཊཏྟཱརཱུཔམྤི ཏཾསམུཊྛཱནགྒཧཎེནེཝ སངྒཎྷཱཏཱིཏི ཝེདིཏབྦཾ. ‘‘ཏཾསམུཊྛཱནརཱུཔཀཊཏྟཱརཱུཔཱ ཙ ལབྦྷནྟཱི’’ཏིཔི པཋནྟི. ཙཏུཏྠེ ཝིཔཱཀཙིཏྟསམུཊྛཱནརཱུཔམེཝཱཏི ཨེཏྠཱཔི ཨེསེཝ ནཡོ. ‘‘ཀཊཏྟཱརཱུཔཉྩཱ’’ཏིཔི པན པཋནྟི.

ཨེཝམྤཱིཏི ‘‘ཨེཏེསུ པན གྷཊནེསུ སབྦཔཋམཱནཱི’’ཏིཨཱདིནཱ ཝུཏྟནཡེནཔི. གྷཊནེསུ པན ཡོ ཡོ པཙྩཡོ མཱུལབྷཱཝེན ཋིཏོ, ཏཾཔཙྩཡདྷམྨཱནཾ ནིརཝསེསཨཱུནཨཱུནཏརཨཱུནཏམལཱབྷཀྐམེན གྷཊནཱ ཝུཙྩཏི, ནིརཝསེསལཱབྷེ ཙ པཙྩཡུཔྤནྣཱནཾ ནིརཝསེསལཱབྷཀྐམེན. ཏཐཱ ཨཱུནལཱབྷཱདཱིསཱུཏི ཨཡཾ ཀམོ ཝེདིཏབྦོ.

༤༤༥. ཝཏྠུཝསེན ¶ སནིསྶཡཾ ཝཀྑཏཱིཏི ན ཨིདཾ ལབྦྷམཱནསྶཔི ཝཏྠུསྶ ཝསེན གྷཊནནྟི ཨདྷིཔྤཱཡེནཱཧ ‘‘ཨཱརམྨཎཝསེནེཝ ཝཱ’’ཏི.

༤༤༦. སཧཛཱཏེན པན སདྡྷིཾ ཨཱརམྨཎཱདྷིཔཏི, ཨཱརམྨཎཱདྷིཔཏིནཱ ཙ སདྡྷིཾ སཧཛཱཏཾ ན ལབྦྷཏཱིཏི ཨིདཾ ཡཐཱ སཧཛཱཏཔུརེཛཱཏཱ ཨེཀོ ནིསྶཡཔཙྩཡོ ཨཏྠིཔཙྩཡོ ཙ ཧོནྟི, ཨེཝཾ སཧཛཱཏཱརམྨཎཱདྷིཔཏཱིནཾ ཨེཀསྶ ཨདྷིཔཏིཔཙྩཡབྷཱཝསྶ ཨབྷཱཝཏོ ཝུཏྟཾ ¶ . ནིསྶཡབྷཱཝོ ཧི ཨཏྠིཨཝིགཏབྷཱཝོ ཙ སཧཛཱཏཔུརེཛཱཏནིསྶཡཱདཱིནཾ སམཱནོ, ན པནེཝཾ སཧཛཱཏཱརམྨཎཱདྷིཔཏིབྷཱཝོ སམཱནོ. སཧཛཱཏོ ཧི ཨཱརམྨཎབྷཱཝཾ ཨནུཔགནྟྭཱ ཨཏྟནཱ སཧ པཝཏྟནཝསེན ཨདྷིཔཏི ཧོཏི, ཨིཏརོ ཨཱརམྨཎཾ ཧུཏྭཱ ཨཏྟནི ནིནྣཏཱཀརཎེན. སཧཛཱཏོ ཙ ཝིཛྫམཱནབྷཱཝེནེཝ ཨུཔཀཱརཀོ, ཨིཏརོ ཨཏཱིཏཱནཱགཏོཔི ཨཱརམྨཎབྷཱཝེནེཝ, ཏསྨཱ སཧཛཱཏཱརམྨཎཔཙྩཡཱ ཝིཡ བྷིནྣསབྷཱཝཱ སཧཛཱཏཱརམྨཎཱདྷིཔཏིནོཏི ན ཏེ ཨེཀཏོ ཨེཝ ཨདྷིཔཏིཔཙྩཡབྷཱཝཾ བྷཛནྟི, ཏེནེཝ པཉྷཱཝཱརཝིབྷངྒེ ཙ ‘‘ཀུསལོ ཙ ཨབྱཱཀཏོ ཙ དྷམྨཱ ཀུསལསྶ དྷམྨསྶ ཨདྷིཔཏིཔཙྩཡེན པཙྩཡོ’’ཏིཨཱདི ན ཝུཏྟནྟི.

༤༤༧-༤༥༢. སཱཧཱརཀགྷཊནཱནཾ པུརཏོ ཝཱིརིཡཙིཏྟཝཱིམཾསཱནཾ སཱདྷཱརཎཝསེན ཨནཱཧཱརཀཱམགྒཀཱནི སཨིནྡྲིཡགྷཊནཱནི ཝཏྟབྦཱནི སིཡུཾ ‘‘ཨདྷིཔཏིསཧཛཱཏནིསྶཡཨིནྡྲིཡཨཏྠིཨཝིགཏནྟི སཏྟ. ཨདྷིཔཏིསཧཛཱཏཨཉྙམཉྙནིསྶཡཨིནྡྲིཡསམྤཡུཏྟཨཏྠིཨཝིགཏནྟི ཏཱིཎི. ཨདྷིཔཏིསཧཛཱཏནིསྶཡཨིནྡྲིཡཝིཔྤཡུཏྟཨཏྠིཨཝིགཏནྟི ཏཱིཎི. ཨདྷིཔཏིསཧཛཱཏནིསྶཡཝིཔཱཀཨིནྡྲིཡཨཏྠིཨཝིགཏནྟི ཨེཀཾ. ཨདྷིཔཏིསཧཛཱཏཨཉྙམཉྙནིསྶཡཝིཔཱཀཨིནྡྲིཡསམྤཡུཏྟཨཝིགཏནྟི ཨེཀཾ. ཨདྷིཔཏིསཧཛཱཏནིསྶཡཝིཔཱཀཨིནྡྲིཡཝིཔྤཡུཏྟཨཏྠིཨཝིགཏནྟི ཨེཀ’’ནྟི. ཀསྨཱ ཏཱནི ན ཝུཏྟཱནཱིཏི? ཨིནྡྲིཡབྷཱུཏསྶ ཨདྷིཔཏིསྶ ཨཱཧཱརམགྒེཧི ཨཉྙསྶ ཨབྷཱཝཱ. ཙིཏྟཱདྷིཔཏི ཧི ཨཱཧཱརོ, ཝཱིརིཡཝཱིམཾསཱ ཙ མགྒོ ཧོཏི, ན ཙ ཨཉྙོ ཨིནྡྲིཡབྷཱུཏོ ཨདྷིཔཏི ཨཏྠི, ཡསྶ ཝསེན ཨནཱཧཱརཀཱམགྒཀཱནི སཨིནྡྲིཡགྷཊནཱནི ཝཏྟབྦཱནི སིཡུཾ, ཏསྨཱ ཏཱནི ཨཝཏྭཱ ཙིཏྟཱདྷིཔཏིཨཱདཱིནཾ ཨེཀནྟེན ཨཱཧཱརམགྒབྷཱཝདསྶནཏྠཾ སཱཧཱརཀསམགྒཀཱནེཝ ཝུཏྟཱནི. ཏེསུ ཙ སམགྒཀེསུ དྭེ པཙྩཡདྷམྨཱ ལབྦྷནྟི, སཱཧཱརཀེསུ ཨེཀོཡེཝཱཏི སམགྒཀཱནི པུབྦེ ཝཏྟབྦཱནི སིཡུཾ. སཨིནྡྲིཡཀཱནི པན ཡེཧི ཨཱཧཱརམགྒེཧི བྷིནྡིཏབྦཱནི ¶ , ཏེསཾ ཀམཝསེན པཙྪཱ ཝུཏྟཱནི. ཨཊྛཀཐཱཡཾ པན སདིསཏྟཱཏི སམགྒཀཏྟེན སམཱནཏྟཱ, ཨནནྟརརཱུཔཏྟཱཏི ཝཱ ཨཏྠོ.

༤༥༧-༤༦༠. ཀུསལཱབྱཱཀཏོ ཨབྱཱཀཏསྶཱཏི ཙཏྟཱརཱིཏི ཨབྱཱཀཏསཧིཏསྶ ཀུསལསྶ པཙྩཡབྷཱཝདསྶནཝསེན ཀུསལམཱུལཀེསྭེཝ དུམཱུལཀམྤི ཨཱཧརིཏྭཱ ཝུཏྟཾ. ཨབྱཱཀཏེ ཝཏྠུརཱུཔམྤཱིཏི ཨིདཾ ‘‘ཀཊཏྟཱརཱུཔམྤཱི’’ཏི ¶ ཨེཝཾ ཝཏྟབྦཾ. ‘‘དུཏིཡགྷཊནེ ཨབྱཱཀཏཝིསྶཛྫནེ རཱུཔེསུ ཝཏྠུམེཝ ལབྦྷཏཱི’’ཏི པུརིམཔཱཋོ, བྷཱུཏརཱུཔམྤི པན ལབྦྷཏཱིཏི ‘‘ཝཏྠུཉྩ བྷཱུཏརཱུཔཉྩ ལབྦྷཏཱི’’ཏི པཋནྟི. ‘‘ཙཏུཏྠེ ཙིཏྟསམུཊྛཱནརཱུཔམེཝཱ’’ཏི ཝུཏྟཾ, ‘‘ཙིཏྟསམུཊྛཱནརཱུཔཾ པཊིསནྡྷིཀྑཎེ ཀཊཏྟཱརཱུཔཉྩཱ’’ཏི པན ཝཏྟབྦཾ. སཝིཔཱཀེསུ པཋམེ ཝིཔཱཀཱ ཙེཝ ཝིཔཱཀཙིཏྟསམུཊྛཱནརཱུཔཉྩཱཏི ཨེཏྠ ཙཏུཏྠེ ཝིཔཱཀཙིཏྟསམུཊྛཱནམེཝཱཏི ཨིདྷ ཙ ཀཊཏྟཱརཱུཔམྤི ཝིཔཱཀཙིཏྟསམུཊྛཱནགྒཧཎེན གཧིཏནྟི དཊྛབྦཾ. ‘‘ཀཊཏྟཱརཱུཔཉྩཱ’’ཏིཔི པན པཋནྟི. ཨེཏྠ པན སཧཛཱཏཨཉྙམཉྙནིསྶཡཝིཔཱཀསམྤཡུཏྟཝིཔྤཡུཏྟཨཏྠི ཨཝིགཏམཱུལཀེསུ གྷཊནེསུ ཧེཏུཀམྨཛྷཱནམགྒེཧི གྷཊནཱནི ན ཡོཛིཏཱནི, ཡཐཱཝུཏྟེསུ ཨཏྠིཨཝིགཏམཱུལཝཛྫེསུ ཨཱཧཱརེན, ནིསྶཡཝིཔྤཡུཏྟཨཏྠིཨཝིགཏཝཛྫེསུ ཨདྷིཔཏིཨིནྡྲིཡེཧི ཙ. ཀསྨཱཏི? ཏེསུ ཧི ཡོཛིཡམཱནེསུ ཏཾཏཾཙིཏྟུཔྤཱདེཀདེསབྷཱུཏཱ ཧེཏུཨཱདཡོ ཨརཱུཔདྷམྨཱཝ པཙྩཡབྷཱཝེན ལབྦྷནྟི. ཏེན ཏེཧི གྷཊནཱནི ཧེཏུམཱུལཀཱདཱིསུ ཝུཏྟསདིསཱནེཝ རཱུཔམིསྶཀཏྟཱབྷཱཝེན སུཝིཉྙེཡྻཱནཱིཏི ན ཝུཏྟཱནི. ཨཏྠིཨཝིགཏེཧི པན ཡོཛིཡམཱནོ ཨཱཧཱརོ ནིསྶཡཱདཱིཧི ཨདྷིཔཏིཨིནྡྲིཡཱནི ཙ རཱུཔམིསྶཀཱནི ཧོནྟཱིཏི ཨདྷིཔཏཱཧཱརིནྡྲིཡམཱུལཀེསུ ཝུཏྟསདིསཱནིཔི གྷཊནཱནི ཨཏྠིཨཝིགཏམཱུལཀེསུ ནིསྶཡཱདིམཱུལཀེསུ ཙ ཨཱཧཱརེན ཨདྷིཔཏིནྡྲིཡེཧི ཙ སུཔཱཀཊབྷཱཝཏྠཾ ཡོཛིཏཱནཱིཏི དཊྛབྦཱནཱིཏི.

༤༦༢-༤༦༤. ནིསྶཡམཱུལཀེ ‘‘ཚཊྛེ ཏཱིཎཱིཏི ཀུསལཱདཱིནི ཙིཏྟསམུཊྛཱནསྶཱ’’ཏི པུརིམཔཱཋོ, ཙཀྑཱདཱིནི པན ཙཀྑུཝིཉྙཱཎཱདཱིནཾ ལབྦྷནྟཱིཏི ‘‘ཨབྱཱཀཏསྶ ཙཀྑཱཡཏནཱདཱིནི ཙཱ’’ཏི པཋནྟི.

༤༦༦. ཨུཔནིསྶཡམཱུལཀེ པཀཏཱུཔནིསྶཡཝསེན ཝུཏྟེསུ དྭཱིསུ པཋམེ ‘‘ལོཀིཡཀུསལཱཀུསལཙེཏནཱ པཙྩཡབྷཱཝཏོ གཧེཏབྦཱ’’ཏི ཝུཏྟཾ, ལོཀུཏྟརཱཔི པན གཧེཏབྦཱཝ.

༤༧༣-༤༧༧. ཀམྨམཱུལཀེ ¶ པཊིསནྡྷིཡཾ ཝཏྠུཔཱིཏི ཨེཏྠ ན པཝཏྟེ ཝིཡ ཁནྡྷཱཡེཝ པཙྩཡུཔྤནྣབྷཱཝེན གཧེཏབྦཱཏི ཨདྷིཔྤཱཡོ. ཝིཔཱཀཱཝིཔཱཀསཱདྷཱརཎཝསེན ཝུཏྟེསུ ཙཏཱུསུ པཋམེ ‘‘ཨརཱུཔེན སདྡྷིཾ ཙིཏྟསམུཊྛཱནརཱུཔཾ ལབྦྷཏཱི’’ཏི ཝུཏྟཾ, ཀཊཏྟཱརཱུཔམྤི པན ལབྦྷཏེཝ. ཨིམསྨིཾ པན ཀམྨམཱུལཀེ ‘‘ཀམྨཔཙྩཡཱ ཨཱརམྨཎེ དྭེ’’ཏི, ཨཱརམྨཎམཱུལཀེ ཙ ‘‘ཨཱརམྨཎཔཙྩཡཱ ཀམྨེ ¶ དྭེ’’ཏི ཀསྨཱ ན ཝུཏྟཾ, ནནུ ཀུསལཱཀུསལཙེཏནཱ ཀམྨཱརམྨཎཱནཾ པཊིསནྡྷིཡཱདཱིནཾ ཀམྨཔཙྩཡོ ཨཱརམྨཎཔཙྩཡོ ཙ ཧོཏི. ཡཐཱ ཙ ཨཱརམྨཎབྷཱུཏཾ ཝཏྠུཾ ཨཱརམྨཎནིསྶཡཔཙྩཡབྷཱཝེན ཝུཙྩཏི, ཨེཝཾ ཀམྨམྤི ཨཱརམྨཎཔཙྩཡབྷཱཝེན ཝཏྟབྦནྟི? ན, དྭིནྣཾ པཙྩཡབྷཱཝཱནཾ ཨཉྙམཉྙཔཊིཀྑེཔཏོ. པཙྩུཔྤནྣཉྷི ཝཏྠུ ནིསྶཡབྷཱཝཾ ཨཔརིཙྩཛིཏྭཱ ཏེནེཝཱཀཱརེན ཏནྣིསྶིཏེན ཨཱལམྦིཡམཱནཾ ནིསྶཡབྷཱཝེན ཙ ནིསྶཡཔཙྩཡོཏི ཡུཏྟཾ ཝཏྟུཾ. ཀམྨཾ པན ཏསྨིཾ ཀཏེ པཝཏྟམཱནཱནཾ ཀཏཱུཔཙིཏབྷཱཝེན ཀམྨཔཙྩཡོ ཧོཏི, ནཱརམྨཎཱཀཱརེན, ཝིསཡམཏྟཏཱཝསེན ཙ ཨཱརམྨཎཔཙྩཡོ ཧོཏི, ན སནྟཱནཝིསེསཾ ཀཏྭཱ ཕལུཔྤཱདནསངྑཱཏེན ཀམྨཔཙྩཡཱཀཱརེན, ཏསྨཱ ཀམྨཔཙྩཡབྷཱཝོ ཨཱརམྨཎཔཙྩཡབྷཱཝཾ པཊིཀྑིཔཏི, ཨཱརམྨཎཔཙྩཡབྷཱཝོ ཙ ཀམྨཔཙྩཡབྷཱཝནྟི ‘‘ཀམྨཔཙྩཡོ ཧུཏྭཱ ཨཱརམྨཎཔཙྩཡོ ཧོཏཱི’’ཏི, ‘‘ཨཱརམྨཎཔཙྩཡོ ཧུཏྭཱ ཀམྨཔཙྩཡོ ཧོཏཱི’’ཏི ཙ ན སཀྐཱ ཝཏྟུནྟི ན ཝུཏྟཾ. ཨེས ཙ སབྷཱཝོ ཝཏྟམཱནཱནཉྩ ཨཱརམྨཎཔུརེཛཱཏཱནཾ ཝཏྠུཙཀྑཱདཱིནཾ, ཡཾ ཨཱརམྨཎཔཙྩཡབྷཱཝེན སཧ ནིསྶཡཱདིཔཙྩཡཱ ཧོནྟཱིཏི ཝཏྟབྦཏཱ, ཨཏཱིཏསྶ ཙ ཀམྨསྶ ཨཡཾ སབྷཱཝོ, ཡཾ ཨཱརམྨཎཔཙྩཡབྷཱཝེན སཧ ཀམྨཔཙྩཡོ ཧོཏཱིཏི ནཝཏྟབྦཏཱ. ཡཐཱ སཧཛཱཏཔུརེཛཱཏནིསྶཡཱནཾ སཧ ནིསྶཡཔཙྩཡབྷཱཝེན ཝཏྟབྦཏཱ སབྷཱཝོ, སཧཛཱཏཱརམྨཎཱདྷིཔཏཱིནཉྩ སཧ ཨདྷིཔཏིཔཙྩཡབྷཱཝེན ནཝཏྟབྦཏཱ, ཨེཝམིདྷཱཔཱིཏི.

༤༧༨-༤༨༣. ནིརཱདྷིཔཏིཝིཉྙཱཎཱཧཱརཝསེནཱཏི ཨནཱམཊྛཱདྷིཔཏིབྷཱཝསྶ ཝིཉྙཱཎཱཧཱརསྶ ཝསེནཱཏི ཨདྷིཔྤཱཡོ. ཝཏྠུ པརིཧཱཡཏཱིཏི ཨཉྙམཉྙམྤི ལབྷནྟསྶ ཝཏྠུསྶ ཝསེན སབྦསྶ ཀཊཏྟཱརཱུཔསྶ པརིཧཱནཾ དསྶེཏི.

༤༨༤-༤༩༥. ‘‘ཏཏིཡེ ཨརཱུཔིནྡྲིཡཱནི རཱུཔཱན’’ནྟི ཝུཏྟཾ, ཙཀྑཱདཱིནི ཙ པན ཙཀྑུཝིཉྙཱཎཱདཱིནཾ ལབྦྷནྟི. ཏཏོ ཝཱིརིཡཝསེན མགྒསམྤཡུཏྟཱནི ཚཱཏི ཨེཏྠ ཡདིཔི ཝཱིམཾསཱ ལབྦྷཏི, ཝཱིརིཡསྶ པན ཝསེན ཏཾསམཱནགཏིཀཱ ཝཱིམཾསཱཔི གཧིཏཱཏི ‘‘ཝཱིརིཡཝསེནཱ’’ཏི ཝུཏྟཾ.

༥༡༡-༥༡༤. ཝིཔྤཡུཏྟམཱུལཀེ ¶ ‘‘དསམེ ཀུསལཱདཡོ ཙིཏྟསམུཊྛཱནཱན’’ནྟི ཝུཏྟཾ, པཊིསནྡྷིཡཾ པན ‘‘ཁནྡྷཱ ཀཊཏྟཱརཱུཔཱནཾ ཝཏྠུ ཙ ཁནྡྷཱན’’ནྟི ཨིདམྤི ལབྦྷཏི. ‘‘ཨེཀཱདསམེ པཊིསནྡྷིཡཾ ཝཏྠུ ཁནྡྷཱན’’ནྟི ཝུཏྟཾ, ཏཾ ཝིཔཱཀཔཙྩཡསྶ ¶ ཨགྒཧིཏཏྟཱ ཡསྶ ཝཏྠུསྶ ཝསེན གྷཊནཾ ཀཏཾ, ཏསྶ དསྶནཝསེན ཝུཏྟཾ. ‘‘ཁནྡྷཱ ཙ ཝཏྠུསྶཱ’’ཏི ཨིདམྤི པན ལབྦྷཏེཝ. ‘‘དྭཱདསམེ པཊིསནྡྷིཡཾ ཁནྡྷཱ ཀཊཏྟཱརཱུཔཱན’’ནྟི པུབྦཔཱཋོ, ཙིཏྟསམུཊྛཱནཱནི པན ན ཝཛྫེཏབྦཱནཱིཏི ‘‘དྭཱདསམེ ཁནྡྷཱ པཝཏྟེ ཙིཏྟསམུཊྛཱནརཱུཔཱནཾ པཊིསནྡྷིཡཾ ཀཊཏྟཱརཱུཔཱནཉྩཱ’’ཏི པཋནྟི.

༥༡༥-༥༡༨. ཨཏྠིཔཙྩཡམཱུལཀེ པཋམགྷཊནེ ‘‘ཨརཱུཔཝཏྠཱརམྨཎམཧཱབྷཱུཏཨིནྡྲིཡཱཧཱརཱནཾ ཝསེན སཧཛཱཏཔུརེཛཱཏཔཙྪཱཛཱཏཔཙྩཡཱ ལབྦྷནྟཱི’’ཏི ཝུཏྟཾ, ‘‘ཨཱཧཱརིནྡྲིཡཔཙྩཡཱ ཙཱ’’ཏིཔི པན ཝཏྟབྦཾ. ན ཧི ཨིནྡྲིཡཱཧཱརཱནཾ ཝསེན སཧཛཱཏཱདཡོ ལབྦྷནྟཱིཏི. ‘‘དུཏིཡེ པཙྪཱཛཱཏཀབལཱི༹ཀཱརཱཧཱརཱ ན ལབྦྷནྟཱི’’ཏི ཝུཏྟཾ, སབྦཱནིཔི པན ཨལབྦྷམཱནཱནི དསྶེཏུཾ ‘‘པཙྪཱཛཱཏཀབལཱི༹ཀཱརཱཧཱརརཱུཔཛཱིཝིཏིནྡྲིཡརཱུཔཱདིཨཱརམྨཎཱནི ཙ ན ལབྦྷནྟཱི’’ཏི པཋནྟི, ཚཊྛཾ སབྦེསཾ ཨིནྡྲིཡཱནཾ ཝསེན ཝུཏྟཾ. སཏྟམེ ཏཏོ རཱུཔཛཱིཝིཏིནྡྲིཡམཏྟཾ པརིཧཱཡཏཱིཏི ཨེཝམེཏེསཾ ཝིསེསོ ཝཏྟབྦོ. ཏཏོ ཨེཀཱདསམེཏི ཨེཏྠ ཏཏོཏི ནཝམཏོཏི ཨཏྠོ. ཏེརསམེ ཝཏྠཱརམྨཎཱཏི ཨེཏྠ ཝཏྠུགྒཧཎེན ཙཀྑཱདིཝཏྠཱུནིཔི གཧིཏཱནི, ཏཐཱ ཙུདྡསམེ ཝཏྠུམེཝཱཏི ཨེཏྠཱཔི. ‘‘སཏྟརསམེ པན ཏདེཝ ཨཱརམྨཎཱདྷིཔཏིབྷཱཝེན, ཨཊྛཱརསམེཔི ཏདེཝ ཨཱརམྨཎཱུཔནིསྶཡཝསེནཱ’’ཏི པུརིམཔཱཋོ, ‘‘ཨཱརམྨཎཱུཔནིསྶཡཝསེནཱ’’ཏི ཨཡཾ པན སཏྟརསམཏོ ཝིསེསོ ན ཧོཏི, ཝཏྠཱརམྨཎཱནཾ པན སཏྟརསམེ ཨཊྛཱརསམེ ཙ ཝཏྠུསྶེཝ པཙྩཡབྷཱཝོ ཝིསེསོཏི ‘‘སཏྟརསམེ པན ཨཱརམྨཎཱདྷིཔཏིབྷཱཝེན ཙཀྑཱདཱིནི ཙ, ཨཊྛཱརསམེ ཝཏྠུསྶེཝ ཨཱརམྨཎཱུཔནིསྶཡཝསེནཱ’’ཏི པཋནྟི.

༥༡༩. སཧཛཱཏཱནི ཝིཡ སཧཛཱཏེན ཀེནཙི ཨེཀེན པཙྩཡེན ཨནིཡམིཏཏྟཱ ཏཱནི པཀིཎྞཀཱནཱིཏི ཝུཏྟཱནཱིཏི ཨེཏྠ པུརེཛཱཏཔཙྪཱཛཱཏཱཧཱརིནྡྲིཡཱནི སཧཛཱཏེན ཨཉྙམཉྙཉྩ ཨསཱམཉྙཝསེན ཝིཔྤཀིཎྞཱནི ཝུཏྟཱནི. ཨཱརམྨཎམཱུལཀེ ཨནནྟརསམནནྟརཔུརེཛཱཏཱཏི ཨེཏྠ ཨུཔནིསྶཡོཔི པཋིཏབྦོ.

ཡེསུ པཱཀཊཱ ཧུཏྭཱ པཉྙཱཡནྟི, ཏཱནི དསྶེཏུཾ ‘‘ཧེཏུམཱུལཀཱདཱིན’’ནྟིཨཱདིམཱཧ. ཨལོབྷཱདིཏཾཏཾནཱམཝསེན ¶ པན ཧེཏུཨཱརམྨཎཱདྷིཔཏིཨཱཧཱརིནྡྲིཡཛྷཱནམགྒཔཙྩཡདྷམྨཱ ཨེཝཾ པཱཀཊཱ ཧུཏྭཱ ན པཉྙཱཡེཡྻུནྟི ཏེ ¶ པརིཙྪེདཝསེན དསྶེནྟོ ‘‘དྭཱདསེཝ ཧི ཧེཏཱུ’’ཏིཨཱདིམཱཧ. ཏེན ‘‘ཨེཏྟཀཱཡེཝ པཙྩཡདྷམྨཱ’’ཏི ནིཙྪཡཾ ཀཏྭཱ པཱཀཊོ ཧུཏྭཱ ཨཔཉྙཱཡམཱནོཔི ཏེསྭེཝ མགྒིཏབྦོཏི དསྶེཏི. ཏཏྠ ཚ ཨཱརམྨཎཱཏི ཨེཏེན ཨཱརམྨཎཱདྷིཔཏི རཱུཔཱདིཨཱརམྨཎབྷཱཝཏོ སངྒཧིཏོཏི ཏཾ ཨགྒཧེཏྭཱ ‘‘ཙཏྟཱརོ ཨདྷིཔཏཡོ’’ཏི ཝུཏྟཾ. ཨེཀནྟེན ཀུསལཝིཔཱཀཱཏི ཨིདཾ ཨིནྡྲིཡེསུ ཨཉྙིནྡྲིཡཝསེན ལབྦྷཏི. ཨེཀནྟེན ཨཀུསལཝིཔཱཀཱཏི ཨིདཾ པན ན སཀྐཱ ལདྡྷུཾ. ཛྷཱནངྒེསྭཔི ཧི དུཀྑཾ ཨཀུསལམེཝ ཝིཔཱཀསྶ ཨཛྷཱནངྒཏྟཱ. ཙིཏྟཊྛིཏིཔི ཨཀུསལཝིཔཱཀཀིརིཡཱ ཧོཏཱིཏི. ཨཀུསལསྶ ཝིཔཱཀཱ ཨཀུསལཝིཔཱཀཱཏི ཨེཝཾ པན ཨཏྠེ གཡ྄ཧམཱནེ ཨིནྡྲིཡེསུ དུཀྑིནྡྲིཡཝསེན ལབྦྷེཡྻ, ཀུསལཝིཔཱཀཱཀུསལཝིཔཱཀཝིསེསེན པན པཙྩཡཡོཛནཱ ནཏྠཱིཏི ཨཡམཏྠོ ཨདྷིཔྤེཏོཏི སཀྐཱ ཝཏྟུནྟི.

པཉྷཱཝཱརསྶ གྷཊནེ ཨནུལོམགཎནཱ ནིཊྛིཏཱ.

༥༢༧. ཨེཀེན ལཀྑཎེནཱཏི ‘‘ཀུསལོ དྷམྨོ ཀུསལསྶ དྷམྨསྶ ནཧེཏུཔཙྩཡེན པཙྩཡོ’’ཏི ཧེཏུཔཙྩཡཏོ ཨཉྙེན པཙྩཡེན པཙྩཡོཏི ཨཏྠོ. ཧེཏུཔཙྩཡཏོ ཙ ཨཉྙེ པཙྩཡཱ ཨགྒཧིཏགྒཧཎེན ཨཊྛ ཧོནྟི, ཏེསུ ཀུསལོ ཀུསལསྶ ཏཱིཧི པཙྩཡེཧི པཙྩཡོ, ཨཀུསལསྶ དྭཱིཧི, ཨེཝཾ ཏསྨིཾ ཏསྨིཾ པཙྩཡེ པཙྩནཱིཡཏོ ཋིཏེ ཏཏོ ཨཉྙེ པཙྩཡཱ ཨིམེསྭེཝ ཨཱརམྨཎཱདཱིསུ ཨཊྛསུ པཙྩཡེསུ ཡཐཱཡོགཾ ཡོཛེཏབྦཱཏི ཨིདམེཏྠ ལཀྑཎཾ ཝེདིཏབྦཾ. ཨེཏེསུ ཙ ཨཊྛསུ པཙྩཡེསུ པུརིམཔུརིམེཧི ཨསངྒཧིཏེ སངྒཧེཏྭཱ པཙྪིམཔཙྪིམཱ ཝུཏྟཱཏི ཨཱརམྨཎཏོ ཨཉྙེསཾ དྭིནྣཾ ཝསེན ཨུཔནིསྶཡོ, ཝཏྠུཔུརེཛཱཏསྶ ཝསེན པུརེཛཱཏཾ, སཧཛཱཏཏོ ཨུཔནིསྶཡཏོ ཙ, ཨཉྙིསྶཱ ཙེཏནཱཡ ཝསེན ཀམྨཾ, སཧཛཱཏཏོ ཨཉྙསྶ ཀབལཱི༹ཀཱརཱཧཱརསྶ ཝསེན ཨཱཧཱརོ, སཧཛཱཏཏོ པུརེཛཱཏཏོ ཙ ཨཉྙསྶ རཱུཔཛཱིཝིཏིནྡྲིཡསྶ ཝསེན ཨིནྡྲིཡཾ ཝུཏྟནྟི དཊྛབྦཾ. ཨེཝཉྩ ཀཏྭཱ ‘‘ཀུསལོ དྷམྨོ ཀུསལསྶ དྷམྨསྶ ཨཱརམྨཎཔཙྩཡེན པཙྩཡོ, སཧཛཱཏཨུཔནིསྶཡཔཙྩཡེན ¶ པཙྩཡོ’’ཏིཙྩེཝ (པཊྛཱ. ༡.༡.༤༠༤, ༤༡༩, ༤༢༣) ཝུཏྟཾ ¶ , ཏདཉྙཱབྷཱཝཱ ན ཝུཏྟཾ ‘‘ཀམྨཱཧཱརིནྡྲིཡཔཙྩཡེན པཙྩཡོ’’ཏི, ཏསྨཱ ‘‘ཨཱརམྨཎཱདྷིཔཏི ཨཱརམྨཎཔཙྩཡེ སངྒཧཾ གཙྪཏཱི’’ཏི ཨེཝཾ ཝཏྟབྦཾ. ཡཾ པན པརིཏྟཏྟིཀེ པཉྷཱཝཱརཔཙྩནཱིཡེ ‘‘ཨཔྤམཱཎོ དྷམྨོ ཨཔྤམཱཎསྶ དྷམྨསྶ སཧཛཱཏཨུཔནིསྶཡཔཙྩཡེན པཙྩཡོ’’ཏི (པཊྛཱ. ༢.༡༢.༦༦, ༧༤) ཨེཏྠ ཨཱརམྨཎསྶ ཨཝཙནཾ, ཏཾ པུརིམེཧི ཨསངྒཧིཏཝསེན ཝུཏྟཱནཾ སངྒཧིཏཝིཝཛྫནཱབྷཱཝཏོ ཨུཔནིསྶཡཏོ ཨཉྙཱརམྨཎཱབྷཱཝཏོ ཙ, ན པན ཨཱརམྨཎཱུཔནིསྶཡསྶ ཨཱརམྨཎེ ཨསངྒཧིཏཏྟཱ.

ཨཏྠིཨཝིགཏཔཙྩཡཱ ཡདིཔི སཧཛཱཏཔུརེཛཱཏཔཙྪཱཛཱཏཱཧཱརིནྡྲིཡཱནཾ ཝསེན པཉྩཝིདྷཱཝ, སཧཛཱཏཔུརེཛཱཏཱནཾ པན པཙྪཱཛཱཏཱཧཱརཱནཾ པཙྪཱཛཱཏིནྡྲིཡཱནཉྩ སཧཱཔི ཨཏྠིཨཝིགཏཔཙྩཡབྷཱཝོ ཧོཏི, ན ཏིཎྞཾ ཝིཔྤཡུཏྟཏཱ ཝིཡ ཝིསུཾཡེཝཱཏི ‘‘ཨཏྠིཨཝིགཏེསུ ཙ ཨེཀེཀསྶ ཝསེན ཚཧི བྷེདེཧི ཋིཏཱ’’ཏི ཨཏྠིཨཝིགཏཔཙྩཡལཀྑཎེསུ ཨེཀེཀཾ སངྒཧེཏྭཱ ཝུཏྟཾ.

‘‘རཱུཔིནྡྲིཡཔཙྩཡོ པན ཨཛ྄ཛྷཏྟབཧིདྡྷཱབྷེདཏོ དུཝིདྷོ’’ཏི ཝུཏྟཾ, ཏཾ ‘‘ཨཛ྄ཛྷཏྟིཀབཱཧིརབྷེདཏོ’’ཏི ཨེཝཾ ཝཏྟབྦཾ.

ཙཏུཝཱིསཏིཡཱཔཱིཏི ན སོལ༹སནྣཾཡེཝ, ནཱཔི ཨཊྛནྣཾཡེཝ, ཨཐ ཁོ ཙཏུཝཱིསཏིཡཱཔཱིཏི ཨཏྠོ. ཨཱརམྨཎབྷཱུཏཱནཾ ཨདྷིཔཏིཨུཔནིསྶཡཔཙྩཡཱནཾ ཨུཔནིསྶཡེ ནིསྶཡཔུརེཛཱཏཝིཔྤཡུཏྟཨཏྠིཨཝིགཏཱནཉྩ པུརེཛཱཏེ སངྒཧོ ཨཏྠཱིཏི ཨཱརམྨཎཔཙྩཡཾ ཨཱརམྨཎཔཙྩཡབྷཱཝེཡེཝ ཋཔེཏྭཱ ཏདེཀདེསསྶ ཏེསཉྩ ཨུཔནིསྶཡཱདཱིསུ སངྒཧཾ ཝཏྟུཀཱམོ ‘‘ཨཱརམྨཎཔཙྩཡེ ཨཱརམྨཎཔཙྩཡོཝ སངྒཧཾ གཙྪཏི, ན སེསཱ ཏེཝཱིསཏཱི’’ཏི ཨཱཧ. ཙཏུཏྠེ པུརེཛཱཏཔཙྩཡེཏི ཨེཏྠ ཡཐཱ ‘‘ཨུཔནིསྶཡཔཙྩཡེ ཨདྷིཔཏིབྷཱུཏོ ཨཱརམྨཎཔཙྩཡོ’’ཏི ཝུཏྟཾ, ཨེཝཾ ‘‘པུརེཛཱཏབྷཱུཏོ ཨཱརམྨཎཔཙྩཡོ’’ཏིཔི ཝཏྟབྦཾ, ཏཾ པན ཏཏྠ ཝུཏྟནཡེན གཧེཏུཾ སཀྐཱཏི ཀཏྭཱ ན ཝུཏྟཾ སིཡཱ. ཨཐ པན ‘‘ཨཱརམྨཎཏོ ཨཉྙཾ པུརེཛཱཏགྒཧཎེན གཧིཏ’’ནྟི ན ཝུཏྟཾ, ཨེཝཾ སཏི ཨུཔནིསྶཡགྒཧཎེནཔི ཨཱརམྨཎཏོ ཨཉྙསྶ གཧིཏཏཱཡ བྷཝིཏབྦནྟི ‘‘ཨདྷིཔཏིབྷཱུཏོ ཨཱརམྨཎཔཙྩཡོ ཨུཔནིསྶཡེ སངྒཧཾ གཙྪཏཱི’’ཏི ན ཝཏྟབྦཾ སིཡཱཏི.

ཡེསུ ¶ པཉྷེསུ…པེ… ཨེཀོཝ པཙྩཡོ ཨཱགཏོཏི ཨེཏྠ ཨཱགཏོཝཱཏི ཨེཝཾ ཨེཝསདྡོ ཨཱནེཏྭཱ ཡོཛེཏབྦོ. ཏེན དྭཱདསམཙུདྡསམེསུ པཉྷེསུ སཧཛཱཏཔུརེཛཱཏེསུ ཨེཀེཀོ པཙྩཡོ ན ཨནཱགཏོ ¶ ཧོཏི, ཨཐ ཁོ ཨཱགཏོཝཱཏི ཏེསུ ཨཉྙཏརཔཊིཀྑེཔེ ཏེཔི པཉྷཱ པརིཧཱཡནྟཱིཏི དསྶིཏཾ ཧོཏཱིཏི. ཡསྨིཾ པན པཉྷེཏི དུཏིཡཚཊྛཔཉྷེསུ ཨེཀེཀཝསེན གཧེཏྭཱ ཨེཀཝཙནེན ནིདྡིསཱིཡཏི. ཨེཝནྟི ཨཱརམྨཎཨུཔནིསྶཡཝསེནཱཏི ཨཏྠོ. ཏེན དྭཱདསམཙུདྡསམེ ནིཝཏྟེཏི. ཏེསུཔི ཧི དྭེ པཙྩཡཱ ཨཱགཏཱ, ན པན ཨཱརམྨཎཨུཔནིསྶཡཝསེནཱཏི. ཨཝསེསཱནཾ ཝསེནཱཏི ཨཝསེསཱནཾ ལབྦྷམཱནཱནཾ ཝསེནཱཏི དཊྛབྦཾ. ན ཧི ཏེརསམཔནྣརསམེསུ པཙྪཱཛཱཏེཔི པཊིཀྑིཏྟེ ཨཱཧཱརིནྡྲིཡཱནཾ ཝསེན ཏེ པཉྷཱ ལབྦྷནྟི, ཨཐ ཁོ སཧཛཱཏསྶེཝ ཝསེནཱཏི. ཨིདམེཝ ཙེཏྠ ལཀྑཎནྟི ཨཊྛནྣཾ པཙྩཡཱནཾ སབྦཔཙྩཡསངྒཱཧཀཏྟཾ, ཨུཀྐཊྛཝསེན པཉྷཱཔརིཙྪེདོ, ཏེ ཏེ པཙྩཡེ སངྒཧེཏྭཱ དསྶིཏཔཙྩཡཔརིཙྪེདོ, ཏསྨིཾ ཏསྨིཾ པཙྩཡེ པཊིཀྑིཏྟེ ཏསྶ ཏསྶ པཉྷསྶ པརིཧཱནཱཔརིཧཱནཱིཏི ཨེཏཾ སབྦཾ སནྡྷཱཡ ཝུཏྟནྟི དཊྛབྦཾ. ཏེནེཝ ‘‘ཨིམིནཱ ལཀྑཎེནཱ’’ཏི ཝུཏྟཾ.

ཏཏྲཱཏི པབྷེདཔརིཧཱནཱིསུ. ཏཱིཧི པཙྩཡེཧི ཨེཀཱུནཝཱིསཏི པཙྩཡཱ དསྶིཏཱཏི ‘‘ནཧེཏུཔཙྩཡཱ’’ཏི ཨེཏྠ ལབྦྷམཱནཔཙྩཡེ སནྡྷཱཡ ཝུཏྟཾ. ཨཡཾ པན པཙྩཡུདྡྷཱརོ སབྦཔཙྩནཱིཡསྶ སཱདྷཱརཎལཀྑཎཝསེན ཝུཏྟོ, ན ‘‘ནཧེཏུཔཙྩཡཱ’’ཏི ཨེཏྠེཝ ལབྦྷམཱནཔཙྩཡདསྶནཝསེན. ཨེཝཉྩ ཀཏྭཱ ཧེཏུདུཀཔཉྷཱཝཱརཔཙྩནཱིཡེ ‘‘ཧེཏུདྷམྨོ ཧེཏུསྶ དྷམྨསྶ ཨཱརམྨཎཔཙྩཡེན པཙྩཡོ, སཧཛཱཏཔཙྩཡེན པཙྩཡོ, ཨུཔནིསྶཡཔཙྩཡེན པཙྩཡོ’’ཏི (པཊྛཱ. ༣.༡.༤༣) ཝུཏྟཾ, ཨཉྙཐཱ ‘‘ནཧེཏུཔཙྩཡཱ’’ཏི ཨེཏྠ ལབྦྷམཱནཔཙྩཡདསྶནེ ‘‘སཧཛཱཏཔཙྩཡེན པཙྩཡོ’’ཏི ན ཝཏྟབྦཾ སིཡཱ, ཏསྨཱ ཨིདྷཱཔི སབྦལབྦྷམཱནཔཙྩཡསངྒཧཝསེན པཙྩཡུདྡྷཱརསྶ ཝུཏྟཏྟཱ ཏཱིཧི པཙྩཡེཧི ཝཱིསཏི པཙྩཡཱ དསྶིཏཱཏི དཊྛབྦཱ. ཡཾ ཝུཏྟཾ ‘‘ཏཏྲཱཡཾ ཝིཏྠཱརཀཐཱ’’ཏི, ཏཏྲ པབྷེདེ ཝིཏྠཱརཀཐཾ ཝཏྭཱ པརིཧཱནཱིཡཾ དསྶེནྟོ ‘‘ཏསྨིཾ པན པཙྩཡེ…པེ… ཏེ པརཏོ ཝཀྑཱམཱ’’ཏི ཨཱཧ.

༥༢༨. ཏཐཱ ཨཀུསལཱདིཀེསུཔི ཙཏཱུསུ པཉྷེསུ ཏེཧི ཏེཧི པཙྩཡེཧི ཏེ ཏེཡེཝ པཙྩཡཱ དསྶིཏཱཏི ཀུསལཱདིཀེསུ དསྶིཏེཧི ¶ ཨཉྙེསཾ ཨབྷཱཝཾ སནྡྷཱཡ ཝུཏྟནྟི ཝེདིཏབྦཾ. ན ཧི ‘‘ཨཀུསལོ དྷམྨོ ཀུསལསྶ དྷམྨསྶཱ’’ཏི ཨེཏྠ དྭཱིཧི པཙྩཡེཧི ཏཡོ པཙྩཡཱ དསྶིཏཱ, ཨཐ ཁོ དྭེཡེཝ, ཨབྱཱཀཏསྶཔི ཨཀུསལོ ཨཱརམྨཎཱདྷིཔཏིཔཙྩཡོ ན ཧོཏཱིཏི.

༥༣༠. སཧཛཱཏཔཙྩཡཱ པན ན ཧོནྟི ཝཏྠུམིསྶཀཏྟཱཏི ཨསཧཛཱཏཔཙྩཡེན ཝཏྠུནཱ སཧཛཱཏཔཙྩཡབྷཱཝེན ¶ གཧིཏཏྟཱ ཏེན སདྡྷིཾ སཧཛཱཏཔཙྩཡཱ ན ཧོནྟཱིཏི དསྶེཏི, ན པན སུདྡྷཱནཾ སཧཛཱཏཔཙྩཡབྷཱཝཾ ནིཝཱརེཏི. ཝཏྠུནཱ པན སདྡྷིཾ ཡེན ནིསྶཡཱདིནཱ པཙྩཡཱ ཧོནྟི, ཏམེཝ ནིསྶཡཱདིཾ ཝིསེསེཏུཾ སཧཛཱཏནྟི ཝུཏྟནྟི དསྶེནྟོ ‘‘ཏསྨཱ ཏེས’’ནྟིཨཱདིམཱཧ.

ཨིམསྨིཾ པན པཙྩཡུདྡྷཱརེ ཨཱརམྨཎཨུཔནིསྶཡཀམྨཨཏྠིཔཙྩཡེསུ ཙཏཱུསུ སབྦཔཙྩཡེ སངྒཎྷིཏྭཱ ཀསྨཱ ཏེསཾ ཝསེན པཙྩཡུདྡྷཱརོ ན ཀཏོཏི? མིསྶཀཱམིསྶཀསྶ ཨཏྠིཔཙྩཡཝིབྷཱགསྶ དུཝིཉྙེཡྻཏྟཱ. ན ཧི ‘‘ཨཝིབྷཱགེན ཨཏྠིཔཙྩཡེན པཙྩཡོ’’ཏི ཝུཏྟེ སཀྐཱ ཝིཉྙཱཏུཾ ‘‘ཀིཾ སུདྡྷེན སཧཛཱཏཨཏྠིཔཙྩཡེན པུརེཛཱཏཔཙྪཱཛཱཏཱཧཱརིནྡྲིཡཨཏྠིཔཙྩཡེན ཝཱ, ཨཐ སཧཛཱཏཔུརེཛཱཏམིསྶཀེན པཙྪཱཛཱཏཱཧཱརམིསྶཀེན པཙྪཱཛཱཏིནྡྲིཡམིསྶཀེན ཝཱ’’ཏི. ཨཏྠིཔཙྩཡཝིསེསེསུ པན སཧཛཱཏཱདཱིསུ སརཱུཔཏོ ཝུཙྩམཱནེསུ ཡཏྠ སུདྡྷཱནཾ སཧཛཱཏཱདཱིནཾ པཙྩཡབྷཱཝོ, ཏཏྠ ‘‘སཧཛཱཏཔཙྩཡེན པཙྩཡོ’’ཏིཨཱདིནཱ སུདྡྷཱནཾ, ཡཏྠ ཙ མིསྶཀཱནཾ པཙྩཡབྷཱཝོ, ཏཏྠ ‘‘སཧཛཱཏཾ པུརེཛཱཏ’’ནྟིཨཱདིནཱ མིསྶཀཱནཾ གཧཎཏོ སུཝིཉྙེཡྻཏཱ ཧོཏི, ཏསྨཱ ཨཏྠིཔཙྩཡཝིསེསདསྶནཏྠཾ སཧཛཱཏཱདཡོ གཧིཏཱ, ཏེན ཙ སབྦཔཙྩཡཱནཾ ཙཏཱུསུ པཙྩཡེསུ སངྒཧོ དསྶིཏོ ཧོཏི.

ཀསྨཱ པན སཧཛཱཏཔུརེཛཱཏེ ཨགྒཧེཏྭཱ ནིསྶཡོ, པུརེཛཱཏཔཙྪཱཛཱཏེ ཨགྒཧེཏྭཱ ཝིཔྤཡུཏྟོ ཝཱ ཨཏྠིཔཙྩཡཝིསེསབྷཱཝེན ན ཝུཏྟོཏི? ཨཝཏྟབྦཏྟཱ, ནིསྶཡོ ཏཱཝ ན ཝཏྟབྦོ སཧཛཱཏཔུརེཛཱཏཱནཾ སུདྡྷཱནཾ མིསྶཀཱནཉྩ ནིསྶཡཔཙྩཡབྷཱཝཏོ ཝིབྷཛིཏབྦཏཱཡ ཨཏྠིཔཙྩཡེན ཨཝིསིཊྛཏྟཱ, ཝིཔྤཡུཏྟཔཙྩཡོ ཙ སཧཛཱཏཔུརེཛཱཏཔཙྪཱཛཱཏབྷཱཝཏོ ཨཏྠིཔཙྩཡོ ཝིཡ ཝིསེསིཏབྦོཏི སོ ཝིཡ ན ཝཏྟབྦོ. སཧཛཱཏཔུརེཛཱཏཱནཉྩ མིསྶཀཱནཾ ཨཏྠིཔཙྩཡབྷཱཝོ ཧོཏི, ན ¶ ཝིཔྤཡུཏྟབྷཱཝོ. ཏཐཱ སཧཛཱཏཔཙྪཱཛཱཏཱནཉྩ མིསྶཀཱནཾ ཨཏྠིཔཙྩཡབྷཱཝོ ཧོཏི. ཝཀྑཏི ཧི ‘‘ཨནུཔཱདིནྣཨནུཔཱདཱནིཡོ དྷམྨོ ཨུཔཱདིནྣུཔཱདཱནིཡསྶ ཙ ཨནུཔཱདིནྣཨནུཔཱདཱནིཡསྶ ཙ དྷམྨསྶ ཨཏྠིཔཙྩཡེན པཙྩཡོ སཧཛཱཏཾ པཙྪཱཛཱཏ’’ནྟི (པཊྛཱ. ༡.༤.༨༤), ན པན ཝིཔྤཡུཏྟཔཙྩཡབྷཱཝོ, ཏསྨཱ ཝིཔྤཡུཏྟགྒཧཎེན མིསྶཀཱནཾ ཨཏྠིཔཙྩཡབྷཱཝསྶ ཨགྒཧཎཏོ ན སོ ཨཏྠིཔཙྩཡཝིསེསོ བྷཝིཏུཾ ཡུཏྟོཏི བྷིཡྻོཔི ན ཝཏྟབྦོ.

ནནུ ཙ སཧཛཱཏཔཙྩཡོ ཙ ཧེཏུཨཱདཱིཧི ཝིསེསིཏབྦོཏི སོཔི ནིསྶཡཝིཔྤཡུཏྟཱ ཝིཡ ཨཏྠིཔཙྩཡཝིསེསབྷཱཝེན ¶ ན ཝཏྟབྦོཏི? ན, ཝིརུདྡྷཔཙྩཡེཧི ཨཝིསེསིཏབྦཏྟཱ. ནིསྶཡཝིཔྤཡུཏྟཱ ཧི ཨཏྠིཔཙྩཡོ ཝིཡ ཨུཔྤཏྟིཀཱལཝིརུདྡྷེཧི པཙྩཡེཧི ཝིསེསིཏབྦཱ, ན པན སཧཛཱཏོ. ཧེཏུཨཱདཡོ ཧི སཧཛཱཏཱ ཨེཝ, ན ཨུཔྤཏྟིཀཱལཝིརུདྡྷཱཏི.

༥༣༢. སུདྡྷོ ཨཱརམྨཎཔཙྩཡོ པརིཧཱཡཏཱིཏི ཨེཏྠ སུདྡྷགྒཧཎེན ན ཀིཉྩི པཡོཛནཾ. ཨཱརམྨཎེ ཧི པཙྩནཱིཡཏོ ཋིཏེ ཨདྷིཔཏིཔཙྩཡཱདིབྷཱུཏོ ཨཱརམྨཎཔཙྩཡོ པརིཧཱཡཏིཡེཝཱཏི. སུདྡྷོཏི ཝཱ ཨཊྛསུ པཙྩཡེསུ ཀེཝལཾ ཨཱརམྨཎཔཙྩཡོ པརིཧཱཡཏི, ན སེསཱཏི དསྶེཏི. ཨེཀཱདསནྣནྟི སཧཛཱཏེ སངྒཧཾ གཙྪནྟེསུ པནྣརསསུ ཨཉྙམཉྙཝིཔཱཀསམྤཡུཏྟཝིཔྤཡུཏྟེ ཝཛྫེཏྭཱ ཨེཀཱདསནྣཾ ཝསེན. ཏེཏི ཏེ སཧཛཱཏེ ཨནྟོགདྷཱཡེཝ ཏསྨིཾ པཊིཀྑིཏྟེ ཨཉྙེནཱཀཱརེན ཝིསྶཛྫནཾ ན ལབྷནྟཱིཏི དསྶེཏི, ཨནནྟོགདྷཱ པན ཨཱརམྨཎཱདྷིཔཏིཔུརེཛཱཏནིསྶཡཱདཡོ ཨཱརམྨཎཱདིཨཱཀཱརེན ལབྷནྟཱིཏི.

ཀིཉྩཱཔི སཧཛཱཏཔཙྩཡོཡེཝ ནཏྠཱིཏི ཏསྨིཾ པཊིཀྑིཏྟེ ཨིམེ ཝཱརཱ ན ལབྦྷེཡྻུཾ, ཨཐ ཁོ ནིསྶཡཨཏྠིཨཝིགཏཱནཾ ཝསེན ཨེཏེ ལབྷིཏབྦཱ སིཡུནྟི ཨདྷིཔྤཱཡོ. ཡསྨཱ པནཱཏིཨཱདིནཱ ཡདིཔི སཧཛཱཏཔཙྩཡོ ནཏྠི ¶ , ཡསྨཱ པན སཧཛཱཏཔཙྩཡདྷམྨེ ཋིཏཱ ཨེཏེ ན ནིསྶཡཱདཡོ ན ཧོནྟི, ཡསྨཱ ཙ སཧཛཱཏེ པཊིཀྑིཏྟེ ཡེ པཊིཀྑིཏྟཱ ཧོནྟི, ཏེ ཨིདྷ སཧཛཱཏཔཊིཀྑེཔེན པཊིཀྑིཏྟཱ, ཏསྨཱ ཏེཔི ཝཱརཱ ན ལབྦྷནྟཱིཏི དསྶེཏི.

ཋཔེཏྭཱ སཧཛཱཏཔཙྩཡནྟི ཨེཏེན ནིསྶཡཱདིབྷཱུཏཉྩ སཧཛཱཏཔཙྩཡཾ ཋཔེཏྭཱཏི ཝུཏྟནྟི དཊྛབྦཾ. ཀུསལཏོ པཝཏྟམཱནེསུ ཀུསལཱབྱཱཀཏེསུ ཀུསལསྶ ཀུསལོ ཨཉྙམཉྙཔཙྩཡོ ཧོཏཱིཏི ¶ ཨིམམཏྠཾ སནྡྷཱཡཱཧ ‘‘ཨཉྙམཉྙཔཙྩཡདྷམྨཝསེན པཝཏྟིསབྦྷཱཝཏོ’’ཏི. ཡེ དྷམྨཱ ཨཉྙམཉྙཔཙྩཡསངྒཧཾ གཏཱཏི ཏེསཾ ཏེསཾ པཙྩཡུཔྤནྣཱནཾ པཙྩཡབྷཱཝེན ཝུཙྩམཱནཱ ཡེ དྷམྨཱ ཨཏྟནོ པཙྩཡུཔྤནྣབྷཱཝེན ཝུཙྩམཱནཱནཾ ཨཉྙམཉྙཔཙྩཡོཏི སངྒཧཾ གཏཱཏི ཨཏྠོ. ཀུསལོ ཙ ཀུསལསྶ ཨཉྙམཉྙཔཙྩཡོཏི ཀཏྭཱ ཀུསལཱབྱཱཀཏཱནཾ ཨཉྙམཉྙཔཙྩཡསངྒཧཾ གཏེཧེཝ དྷམྨེཧི པཙྩཡོ ཧོཏི, སམུདཱཡབྷཱུཏོ ཨེཀདེསབྷཱུཏེཧཱིཏི ཨཡམེཏྠ ཨདྷིཔྤཱཡོ. ཀུསལོ པན ཀུསལསྶ ཨཉྙམཉྙཔཙྩཡབྷཱུཏེཧེཝ ཀུསལཱབྱཱཀཏཱནཾ སཧཛཱཏཱདཱིཧི, ན ཨཉྙཐཱཏི ཨཉྙམཉྙེ པཊིཀྑིཏྟེ སོ ཝཱརོ པརིཧཱཡཏཱིཏི ཝཏྟབྦཾ.

ཙཏུནྣཾ ཁནྡྷཱནཾ ཨེཀདེསོཝཱཏི སཧཛཱཏེ སནྡྷཱཡ ཝུཏྟཾ. ཨསཧཛཱཏཱ ཧི ཨཱཧཱརིནྡྲིཡཱ རཱུཔཀྑནྡྷེཀདེསོཝ ཧོནྟི. ཏེཏི ཏེ ཝིཔྤཡུཏྟཔཙྩཡདྷམྨཱ.

༥༣༣. ‘‘དུམཱུལཀཱདིཝསེན པཙྩཡགཎནཾ དསྶེཏུ’’ནྟི ལིཁིཏཾ, ‘‘པཙྩནཱིཡགཎནཾ དསྶེཏུ’’ནྟི པན ཝཏྟབྦཾ. པཙྩནཱིཡཝཱརགཎནཱ ཧི དསྶིཏཱཏི.

‘‘ཝིཔཱཀཾ པནེཏྠ ནཨུཔནིསྶཡཔཙྩཡེན སདྡྷིཾ གྷཊིཏཏྟཱ ན ལབྦྷཏཱི’’ཏི ཝུཏྟཾ, ཝིཔཱཀསྶཔི པན ཀམྨཾ ཨུཔནིསྶཡོ ཨཧུཏྭཱཔི ཀམྨཔཙྩཡོ ཧོཏཱིཏི ཝིཔཱཀཏྟིཀེ དསྶིཏམེཏནྟི.

༥༣༤. སཏྟ པཉྩ ཏཱིཎི དྭེ ཨེཀནྟི པརིཙྪིནྣགཎནཱནཱིཏི སཏྟཱདིཔརིཙྪེདེཧི པརིཙྪིནྣགཎནཱནི ཝིསྶཛྫནཱནི ཧེཏུམཱུལཀེ དསྶིཏཱནཱིཏི ཨཱཧ.

༥༣༨. ནནིསྶཡཔཙྩཡཱ ¶ ནཨུཔནིསྶཡཔཙྩཡཱ ནཔཙྪཱཛཱཏེ ཏཱིཎཱིཏི མཱུལཀཾ སངྑིཔིཏྭཱ དསམཱུལཀེ ‘‘ནཔཙྪཱཛཱཏེ ཏཱིཎཱི’’ཏི ཝུཏྟཾ གཎནཾ ཨུདྡྷརཏི. ‘‘ཏེསུ ཀཊཏྟཱརཱུཔཉྩ ཨཱཧཱརསམུཊྛཱནཉྩ པཙྩཡུཔྤནྣ’’ནྟི ཝུཏྟཾ, དྭཱིསུ པན ཝིཔཱཀོ ཏཏིཡེ ཏེསམུཊྛཱནིཀཀཱཡོ ཙ པཙྩཡུཔྤནྣོ ཧོཏིཡེཝ.

༥༤༥. ཨབྱཱཀཏོ ཙ སཧཛཱཏཨབྱཱཀཏསྶཱཏི ‘‘ཨརཱུཔཱབྱཱཀཏོ ཨརཱ