📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཨབྷིདྷམྨཔིཊཀེ

དྷམྨསངྒཎཱི-ཨནུཊཱིཀཱ

ཝཱིསཏིགཱཐཱཝཎྞནཱ

༡. ཨབྷིདྷམྨསཾཝཎྞནཱཡ ¶ ¶ ཨཏྠཾ སཾཝཎྞེཏུཀཱམོ ཏསྶཱ ཨཱདིགཱཐཱཡ ཏཱཝ པཡོཛནསམྦནྡྷཱབྷིདྷཱནཔུབྦངྒམཾ ཨཏྠཾ ནིདྡྷཱརེནྟོ ཨུལཱ༹རཛ྄ཛྷཱསཡཱནཾ ནིསམྨཀཱརཱིནཾ པཊིཔཏྟི པརེསཾ ཝིཝིདྷཧིཏསུཁནིཔྥཱདནཔྤཡོཛནཱཏི ཨཱཙརིཡསྶཱཔི དྷམྨསཾཝཎྞནཱཡ ཨཱདིམྷི སཏྠརི ནིཔཙྩཀཱརསྶ ཨནྟརཱཡཝིསོསནཏྠཏཱ ཝིཡ སཏྠརི དྷམྨེ ཙ པརེསཾ ཨཙྩནྟསུཁཔྤཊིལཱབྷསཾཝཏྟནིཡསདྡྷཱརཏནུཔྤཱདནཏྠཏཱཔི སིཡཱཏི དསྶེཏུཾ ‘‘དྷམྨསཾཝཎྞནཱཡ’’ནྟིཨཱདིམཱཧ. ཏཏྠ ཡཐཱནུསིཊྛཾ པཊིཔཛྫམཱནེ ཨཔཱཡེསུ ཨཔཏམཱནེ དྷཱརེཏཱིཏི དྷམྨོཏི སཱམཉྙཝཙནོཔི དྷམྨ-སདྡོ སདྡནྟརསནྣིདྷཱནེན ¶ ཨིདྷ པརིཡཏྟིཝིསེསཝིསཡོ. སཾཝཎྞཱིཡཏི ཨཏྠོ ཨེཏཱཡཱཏི སཾཝཎྞནཱ, ཨཊྛཀཐཱ.

ཏིཝིདྷཡཱནམུཁེན ཝིམུཏྟིདྷམྨཾ ཡཐཱརཧམནུསཱསཏཱིཏི སཏྠཱ. པཎམནཾ པཎཱམོ, ཀཱཡཝཱཙཱཙིཏྟེཧི སཏྠུ གུཎནིནྣཏཱ. ཀིརིཡཱ ཀརཎཾ, པཎཱམསྶ ཀརཎཾ པཎཱམཀརཎཾ, ཝནྡནཱཔཡོགོ. སོ ཙ ཀིཉྩཱཔི ‘‘ཨིདཱནི ཨདྷིཔྤེཏཾ པཎཱམཾ ཀརོནྟོ’’ཏིཨཱདིནཱ ‘‘ཏསྶ པཱདེ ནམསྶིཏྭཱ’’ཏིཨཱདིཀསྶ ཨདྷིཔྤེཏཔཎཱམབྷཱཝཾ དསྶེསྶཏི, ‘‘ཀརུཎཱ ཝིཡཱ’’ཏིཨཱདིཀསྶ པན སབྦསྶ ཐོམནཱཝསེན ཝུཏྟསྶཔི ཝསེན ཝེདིཏབྦོ. སོ ཧི སཏྠུ མཧཱཀརུཎཱདིགུཎཝིསེསཀིཏྟནཝསེན པཝཏྟོ མཧཱཀརུཎཱདིགུཎཝིསེསཱཝིནཱབྷཱཝིནཱ སཾཝཎྞིཡམཱནསཾཝཎྞནཱདྷམྨཝིབྷཱཝིཏེན དྷམྨསྶ སྭཱཀྑཱཏབྷཱཝེན སྭཱཀྑཱཏདྷམྨེ སཏྠརི ¶ ཨནུཔྤནྣསདྡྷཱནཾ སདྡྷཱཛནནཱཡ, ཨུཔྤནྣསདྡྷཱནཉྩ བྷིཡྻོབྷཱཝཱཡ ཧོཏི. སཏྠུནོ ཙ ཨཝིཔརཱིཏདྷམྨདེསནབྷཱཝེན ཨཝིཏཐདེསནཱབྷཱུཏེ དྷམྨེཏི ཨེཏེན སཏྠུནོ མཧཱཀརུཎཱདིགུཎཱནཾཡེཝ ཙ ཕལཝིསེསནིཔྥཱདནསམཏྠཏཱཡ པསཱདཱཝཧཏཾ ཨཱཧ. དྷམྨེན ཧི སཏྠུསིདྡྷི, སཏྠཱརཱ ཙ དྷམྨསིདྡྷི, དྷམྨསམྤཏྟིཡཱཔི སཏྠུགུཎཏཱཡ སཏྠུགུཎཝིབྷཱཝནེན སམྤཛྫཏཱིཏི.

ཨེཝཾ སཏྠརི པཎཱམཀརཎསྶ ཨེཀཾ པཡོཛནཾ དསྶེཏྭཱ ཨིདཱནི སམྦནྡྷཾ ཝིབྷཱཝེཏི ‘‘ཏདུབྷཡཔྤསཱདཱ ཧཱི’’ཏིཨཱདིནཱ. ན ཧི སཏྠརི དྷམྨེ ཝཱ ཨཔྤསནྣོ སཾཝཎྞིཡམཱནེ ཏདདྷིགནྟབྦེ ཙ དྷམྨེ སམྨཱ པཊིཔཛྫཏི, ནཱཔི སཱིལཱདིཨནུཔཱདཱཔརིནིབྦཱནནྟཾ མཧནྟཾ ཨཏྠཾ སཱདྷེཏི, ཏསྨཱ དྷམྨསཾཝཎྞནཱསུ པརེསཾ སམྨཱཔཊིཔཏྟིཨཱཀངྑཱཡ ཏཐཱརཱུཔདྷམྨཔཊིགྒཱཧཀེཧི ཙ ཝིནིཡོཛིཏེན སཏྠརི དྷམྨེ ཙ པསཱདུཔྤཱདནཾ སཏྠརི པཎཱམཀརཎཾ ཝིཧིཏནྟི ཨདྷིཔྤཱཡོ.

བྷགཝཏོ གུཎསཾཀིཏྟནཾ ཏསྶ དྷམྨསངྒྷཱནམྤི ཐོམནཱ ཧོཏིཡེཝཱཏི ཝུཏྟཾ ‘‘རཏནཏྟཡཔཎཱམཝཙན’’ནྟི. ཏཐཱ ཙ ཝཀྑཏི ‘‘བྷགཝཏོ ཐོམནེནེཝཱ’’ཏིཨཱདི (དྷ. ས. མཱུལཊཱི. ༦). ཝཀྑམཱནཾ ཝཱ ‘‘སདྡྷམྨཉྩསྶ པཱུཛེཏྭཱ’’ཏིཨཱདིཾ སནྡྷཱཡ ཝུཏྟཾ. ཝིཉྙཱཔནཏྠཾ པརེསཾ ཝིཉྙཱུནནྟི ཝཱ སམྦནྡྷནཱིཡཾ. ཨཝིཉྙཱུནཾ ཨཔྤམཱཎཏཱཡ ཨབྷཱཛནཏཱཡ ཙ ཝིཉྙཱུནཾ གཧཎཾ. ཏེ ཧི བུདྡྷཱདཱིསུ སགཱརཝསྶ པམཱཎབྷཱུཏཏཾ ཛཱནནྟཱ ཏསྶ ཝཙནཾ སོཏབྦཾ སདྡྷཱཏབྦཾ མཉྙནྟི, སམྨདེཝ ཙ ནཾ ཨནུཏིཊྛནྟཱ ཏདདྷིཔྤཱཡཾ པཱུརེནྟི. ཨིདྷཱཔི པུརིམནཡེནེཝ སམྦནྡྷོ ཝེདིཏབྦོ པསཱདཝིཉྙཱཔནཱདིམུཁེནཔི སམྨཱཔཊིཔཏྟིཨཱཀངྑཱཡ པཝེདིཏཏྟཱ.

ཨེཏྠ ¶ ཙ པཋམོ ཨཏྠཝིཀཔྤོ སདྡྷཱནུསཱརཱིནཾ པུགྒལཱནཾ ཝསེན ཝུཏྟོ, དུཏིཡོ དྷམྨཱནུསཱརཱིནཾ. པཋམོ ཝཱ ཨསཾསིདྡྷསཏྠུདྷམྨཱནཾ ཝསེན ཝུཏྟོ, དུཏིཡོ སཾསིདྡྷསཏྠུདྷམྨཱནཾ. ཏཐཱ པཋམོ པཋམེ རཏནེ པཎཱམཀིརིཡཱདསྶནཔརོ, དུཏིཡོ ཨིཏརེསུཔཱིཏི ཨཡཾ ཝིསེསོ ཝེདིཏབྦོ.

པཎཱམོ ཀརཱིཡཏི ཨེཏཱཡཱཏི པཎཱམཀརཎཾ, པཎཱམཀིརིཡཱབྷིནིཔྥཱདིཀཱ ཙེཏནཱ. སཱ ཧི ཁེཏྟསམྤཏྟིཡཱ ཨཱཙརིཡསྶ ཙ ཨཛ྄ཛྷཱསཡསམྤཏྟིཡཱ དིཊྛདྷམྨཝེདནཱིཡབྷཱུཏཱ ཡཐཱལདྡྷསམྤཏྟིནིམིཏྟཀསྶ ཀམྨསྶ ¶ བལཱནུཔྤདཱནཝསེན པུརིམཀམྨནིཔྥནྣསྶ ཝིཔཱཀསནྟཱནསྶ ཨནྟརཱ ཝེམཛ྄ཛྷེ ཨཱཡནྟི ཨཱཔཏནྟཱིཏི ཨནྟརཱཡཱཏི ལདྡྷནཱམཱནཾ རོགཱདིཨནཏྠཱནཾ ཝིདྷཱཡཀསྶ ཨུཔཔཱིལ༹ཀསྶ ཨུཔཙྪེདཀསྶ ཝཱ ཀམྨསྶ ཝིདྡྷཾསནསམཏྠོ པུཉྙཱཏིསཡོཏི ཨིམམཏྠཾ དསྶེཏི ‘‘རཏནཏྟཡཔཎཱམ…པེ… ཝིསེསབྷཱཝཏོ’’ཏི. ཨེཝཉྩ ཀཏྭཱ རཱགཱདིཔརིཡུཊྛཱནཱབྷཱཝཝཙནེན ཨནྟརཱཡསྶ ཀཱརཎབྷཱུཏཱཡ པཡོགཝིཔཏྟིཡཱ ཨབྷཱཝསྶ, ཨཏྠལཱབྷཱདིཝཙནེན ཨནནྟརཱཡཏཱཧེཏུབྷཱུཏཱཡ པཡོགསམྤཏྟིཡཱ སབྦྷཱཝསྶ, ‘‘སབྱཱཔཛ྄ཛྷཱཡ པཛཱཡ ཨབྱཱཔཛ྄ཛྷོ ཝིཧརཏཱི’’ཏི (ཨ. ནི. ༦.༡༠; ༡༡.༡༡) ཝཙནེན དིཊྛེཝ དྷམྨེ སུཁཝིཧཱརིཏཱཡ ཙ པཀཱསནཾ མཧཱནཱམསུཏྟཾཡེཝ ཨུདཱཧཊཾ.

གུཎཝིསེསདསྶནཏྠནྟི ཨེཏེན སཏིཔི ཀཱཡམནོཔཎཱམཱནཾ ཨནྟརཱཡཝིསོསནསམཏྠབྷཱཝེ ཏེཧི པཎཱམཝིསཡསྶ པཎཱམཱརཧབྷཱཝཝིབྷཱཝནེན སཱཏིསཡོ ཝཙཱིཔཎཱམོ ཝིཧིཏོཏི དསྶེཏི. གུཎཝིསེསཝཱ ཧཱིཏིཨཱདིནཱ ཨཱཙརིཡསྶ ཡུཏྟཔཏྟཀཱརིཏཾ དསྶེཏི. དེསནཱ ཝིནཡཔིཊཀེཏི ཨེཏྠ ནནུ ཝིནཡཔིཊཀསྶཔི དེསནཱབྷཱཝཏོ དེསནཱཝིནཡཔིཊཀཱནཾ བྷེདཝཙནཾ ན ཡུཏྟནྟི? ནོ ན ཡུཏྟཾ ‘‘ཏཱིསུཔི ཙེཏེསུ ཨེཏེ དྷམྨཏྠདེསནཱཔཊིཝེདྷཱ’’ཏི (དྷ. ས. ཨཊྛ. ནིདཱནཀཐཱ; དཱི. ནི. ཨཊྛ. ༡.པཋམམཧཱསངྒཱིཏིཀཐཱ; པཱརཱ. ཨཊྛ. ༡.པཋམམཧཱསངྒཱིཏིཀཐཱ) ཨེཏྠ ཝིཡ སམུདཱཡདེསནཱཡ ཨཝཡཝདེསནཱནཾ ཨཱདྷཱརབྷཱཝཏོ. དེསནཱཀཱལེ ཝཱ མནསཱ ཝཝཏྠཱཔིཏཱཡ ཝིནཡཏནྟིཡཱ ཝིནཡཔིཊཀབྷཱཝཏོ ཏདཏྠཔཉྙཱཔནསྶ ཙ དེསནཱབྷཱཝཏོ བྷེདཝཙནཾ. ཨཐ ཝཱ དེསཱིཡཏི ཨེཏེནཱཏི དེསནཱ, དེསནཱསམུཊྛཱཔཀོ ཙིཏྟུཔྤཱདོ, ཏསྶ ཙ ཝིནཡཔིཊཀཝིསཡོ ཀརུཎཱཔུབྦངྒམོ ཙ སོཏི ཨེཝམེཏྠ བྷེདཝཙནོཔཔཏྟི དཊྛབྦཱ. སུཏྟནྟཔིཊཀེཏིཨཱདཱིསུཔི ཨེསེཝ ནཡོ.

ཀཐཾ པན བྷགཝཏོ དེསནཱ ཝིནཡཔིཊཀེ ཀརུཎཱཔྤདྷཱནཱ, སུཏྟཱབྷིདྷམྨཔིཊཀེསུ ཙ པཉྙཱཀརུཎཱཔཉྙཱཔྤདྷཱནཱཏི ཝིཉྙཱཡཏཱིཏི? ཡཏོ ཨུཀྐཾསཔརིཡནྟགཏཧིརོཏྟཔྤོཔི བྷགཝཱ ལོཀིཡསཱདྷུཛནེཧིཔི ¶ པརིཧརིཏབྦཱནི ‘‘སིཁརཎཱི’’ཏིཨཱདཱིནི ཝཙནཱནི ཡཐཱཔརཱདྷཉྩ གརཧཝཙནཱནི ཝིནཡཔིཊཀདེསནཱཡཾ མཧཱཀརུཎཱསཉྩོདིཏམཱནསོ མཧཱཔརིསམཛ྄ཛྷེ ཨབྷཱསི, ཏཾཏཾསིཀྑཱཔདཔཉྙཏྟིཀཱརཎཱཔེཀྑཱཡ ཝེརཉྫཱདཱིསུ སཱརཱིརིཀཉྩ ¶ ཁེདམནུབྷོསི, ཏསྨཱ ཀིཉྩཱཔི བྷཱུམནྟརཔཙྩཡཱཀཱརསམཡནྟརཀཐཱནཾ ཝིཡ ཝིནཡཔཉྙཏྟིཡཱཔི སམུཊྛཱཔིཀཱ པཉྙཱ ཨནཉྙསཱདྷཱརཎཏཱཡ ཨཏིསཡཀིཙྩཝཏཱི, ཏཏོཔི ཀརུཎཱཡ ཀིཙྩཾ ཨདྷིཀནྟི ཨདྷིཔྤཱཡེན ཝུཏྟཾ ‘‘ཝིནཡཔིཊཀེ ཀརུཎཱཔྤདྷཱནཱ’’ཏི. ཀརུཎཱབྱཱཔཱརཱདྷིཀཏཱཡ ཧི དེསནཱཡ ཀརུཎཱཔྤདྷཱནཏཱ, སུཏྟནྟདེསནཱཡ མཧཱཀརུཎཱསམཱཔཏྟིབཧུལོ ཝེནེཡྻསནྟཱནེསུ ཏདཛ྄ཛྷཱསཡཱནུལོམེན གམྦྷཱིརམཏྠཔདཾ པཏིཊྛཔེསཱིཏི ཀརུཎཱཔཉྙཱཔྤདྷཱནཏཱ, ཨབྷིདྷམྨདེསནཱཡ པན སབྦཉྙུཏཉྙཱཎསྶ ཝིསཡབྷཱཝཔྤཧོནཀོ རཱུཔཱརཱུཔཔརིཙྪེདོ དྷམྨསབྷཱཝཱནུརོདྷེན པཝཏྟིཏོཏི པཉྙཱཔྤདྷཱནཏཱ. ཏེནེཝ ཙ ཀཱརཎེནཱཏིཨཱདིནཱ དེསནཱནུརཱུཔཏཾཏཾསཾཝཎྞནཱཡ ཐོམནཱ ཨཱཙརིཡསྶ པཀཏཱིཏི དསྶེཏི.

ཀུསལཱ རཱུཔཾ ཙཀྑུམཱ དས དཱལི༹མཱདི སམཱུཧཝསེན ཨཏྠཱནཝབོདྷནཏྠོ ཝིཡ ཨཏྠཱཝབོདྷནཏྠོ ཧི སདྡཔྤཡོགོ ཨཏྟཔརཱདྷཱིནོ ཀེཝལོ ཨཏྠཔདཏྠཀོ, སོ པདཏྠཝིཔརིཡེསཀཱརིནཱ ཨིཏི-སདྡེན སདྡཔདཏྠཀོ ཛཱཡཏཱིཏི ཨཱཧ ‘‘ཀརུཎཱ ཝིཡཱཏི ནིདསྶནཝཙན’’ནྟི. ནིདསྶནཉྷི ནཱམ ནིདསྶིཏབྦདྷམྨེ ཏེན ཙ སམྦནྡྷེ སཏི ཧོཏི, ནཱཉྙཐཱཏི ཏསྶ ནིདསྶནབྷཱཝཾ ཝིབྷཱཝེནྟོ ཨཱཧ ‘‘ཡསྶ ཡཐཱ…པེ… པཝཏྟིཏྠཱཏི ཨཏྠོ’’ཏི.

‘‘ཏཏྠ ཀརུཎཱ ཝིཡཱཏི ནིདསྶནཝཙན’’ནྟིཨཱདིནཱ ནིདསྶནནིདསྶིཏབྦདྷམྨཱནཾ ཨཱདྷཱརཝིསཡབྱཱཔཱརེཧི སཝིསེསནེཧི སཧ པཀཱསནཝསེན གཱཐཱཡ ཨཏྠཏཏྭཾ དསྶེཏྭཱ ཨཝཡཝབྷེདཝསེན ཨཏྠཾ དསྶེཏུཾ ‘‘ཀིརཏཱིཏི ཀརུཎཱ’’ཏིཨཱདི ཝུཏྟཾ. ཏཏྠ ནིཙྪནྡརཱགཱནཾ བྷཱུཏཔུབྦགཏིཡཱ ཝཱ སཏྟཏཱ ཝེདིཏབྦཱ. ཨེཀསྶཔི དྷམྨསྶ ཨནེཀསཱམཉྙཱཀཱརཝནྟཏཱཡ ‘‘ཡཐཱསབྷཱཝཾ པཀཱརེཧཱི’’ཏི ཝུཏྟཾ. ཏཐཱ ཧི ཝུཏྟཾ – ‘‘སབྦེ དྷམྨཱ སབྦཱཀཱརེནཱ’’ཏི (མཧཱནི. ༡༥༦; ཙཱུལ༹ནི. མོགྷརཱཛམཱཎཝཔུཙྪཱནིདྡེས ༨༥; པཊི. མ. ༣.༥) དྷམྨཱནཾ ཨཉྙེཡྻཏྟཾ པཊིཀྑིཔཏི ཉཱཏུཾ ཨསཀྐུཎེཡྻཏྟཱབྷཱཝཏོ. ཨེཏེན ཏསྶཱ པཉྙཱཡ ཨཀིཙྪཝུཏྟིཏཾ ཨཱཧ. ཡཐེཝ ཧི ‘‘ཉེཡྻེསུ སབྦེསུ པཝཏྟིཏྠཱ’’ཏི ཨེཏྟཱཝཏཱ ཨདྷིཔྤེཏཏྠེ སིདྡྷེ ཏེསཾ ཨཏྟཏྟནིཡཏཱཝིརཧསཾསཱུཙནཏྠཾ པརེསཾ སཏྟཱདིམིཙྪཱགཱཧཔཊིསེདྷནེན དྷམྨ-སདྡེན ཉེཡྻཱ ཝིསེསིཏབྦཱ, ཨེཝཾ ‘‘དྷམྨེསུ སབྦེསུ པཝཏྟིཏྠཱ’’ཏི ཨེཏྟཱཝཏཱ ¶ ཙ ཨདྷིཔྤེཏཏྠེ སིདྡྷེ དྷམྨེསུ ཏསྶཱ པཉྙཱཡ ཨཱཀངྑཔྤཊིབདྡྷཏཱཡ ཨཀིཙྪཝུཏྟིཏཾ དསྶེཏུཾ ཨཉྙེཡྻཏྟཔཊིསེདྷནེན ཉེཡྻ-སདྡེན དྷམྨཱ ¶ ཝིསེསིཏཱཏི. ཉེཡྻདྷམྨ-སདྡཱ ནཱིལུཔྤལསདྡཱ ཝིཡ ཨཉྙམཉྙཾ བྷེདཱབྷེདཡུཏྟཱཏི ‘‘ཉེཡྻཱ ཙ ཏེ དྷམྨཱ ཙཱ’’ཏི ཝུཏྟཾ. ཡཱ ཡཱཏི ཡཐཱ-སདྡསྶཏྠཾ དསྶེཏི. བྱཱཔནིཙྪཱཡཉྷི ཨཡཾ ཡཐཱ-སདྡོ, ཏཔྤབྷེདཱ པཉྙཱ པཝཏྟིཏྠཱཏི སམྦནྡྷོཏི.

བྷགཝཏི པཝཏྟཱཝཱཏི ཨིདཾ ཡེབྷུཡྻེན ཨུཔམཱནོཔམེཡྻཏྠཱནཾ བྷིནྣཱདྷཱརཏཱཡ བྷིནྣཱདྷཱརསྶ ཙ ཨུཔམཱནཏྠསྶ ཨིདྷ ཨསམྦྷཝཏོ ཝུཏྟཾ. བྷགཝཏོ ཀརུཎཱཡ ཨཉྙེཧི ཨསཱདྷཱརཎབྷཱཝོ སཏྟེ སཾསཱརདུཀྑཏོ ཨུདྡྷརིཏྭཱ ཨཙྩནྟསུཁེ ནིབྦཱནེ པཏིཊྛཔེཏུཾ ཨཏྟནོ སརཱིརཛཱིཝིཏཔརིཙྩཱགེནཔི ཨེཀནྟཧིཏཛ྄ཛྷཱསཡཏཱཝསེན ཝེདིཏབྦོ, ཡཏོ ཝིནེཡྻཱནཾ ཀོསོཧིཏཝཏྠགུཡ྄ཧཔཧཱུཏཛིཝ྄ཧཱཝིདཾསནམྤི ཀཏཾ, ཡཉྩ ཡདིམེ སཏྟཱ ཛཱནེཡྻུཾ, བྷགཝཏོ སཱསནེན རཧདམིཝ སཱིཏལཾ སམྤཛྫལིཏཾ ཨགྒིཀྑནྡྷམྤི སམོགཱཧེཡྻ. ཨཉྙེསཾ པསྶནྟཱནནྟི སམྦནྡྷོ. ཨུདྡྷཊཱཏི པདཾ ཨཔེཀྑིཏྭཱ མཧོགྷཔཀྑནྡཱནཾ སཏྟཱནནྟི ཀམྨཏྠེ སཱམིཝཙནཾ. ཨཡཉྷེཏྠ སངྑེཔཏྠོ – ཀཱམཱདིམཧོགྷཔཀྑནྡེ སཏྟེ ཏཏོ ཨུདྡྷཊཱ ནཏྠཉྙོ ཀོཙི མཾ ཋཔེཏྭཱཏི པསྶཏོ ཡཐཱ བྷགཝཏོ ཀརུཎཱཡ ཨཱཝིསནཾ ཧོཏི, ན ཨེཝཾ ཨཉྙེསཾ ཏཐཱདསྶནསྶེཝ ཨབྷཱཝཏོ. ཨཐ ཝཱ ཨཉྙེསཾ པསྶནྟཱནནྟི ཡདིཔི པརེ པསྶེཡྻུཾ, ཏཐཱཔི ན ཏེསཾ བྷགཝཏོ ཝིཡ ཀརུཎོཀྐམནཾ ཨཏྠི ཨཔྤཊིཔཏྟིཏོ ཨཏྟཧིཏམཏྟཔཊིཔཏྟིཏོ ཙཱཏི ཨཏྠོ.

ཨནཱཝརཎཱ ཏཱིསུ ཀཱལེསུ སབྦཏྠ ཨཔྤཊིཧཏཝུཏྟིཏཱཡ, ཨསཱདྷཱརཎཱ སབྦདྷམྨཱནཾ ནིརཝསེསཧེཏུཔཙྩཡཔརིགྒཧཝསེན ཏེསཉྩ སབྷཱཝཀིཙྩཱདིཨཝཏྠཱཝིསེསཱདིཔརིཛཱནནེན ཨཱཡཱུཧནཝེལཱཡམེཝ ཏཾཏཾཀམྨཱནཾ ཏཾཏཾཕལཝིསེསཧཱིནམཛ྄ཛྷིམཔཎཱིཏཱདིཝིབྷཱགསྶ ཨིནྡྲིཡབདྡྷེསུ ཨནིནྡྲིཡབདྡྷེསུ ཙ ཨཏིསུཁུམཏིརོཧིཏཝིདཱུརཝུཏྟིཨཏཱིཏཱནཱགཏཱདིབྷེདབྷིནྣཱནཾ རཱུཔདྷམྨཱནཾ ཏཾཏཾཀཱརཎསམཝཱཡཝིབྷཱཝནེནེཝ ཏཾཏཾཕལེསུ ཝཎྞསཎྛཱནགནྡྷརསཕསྶཱདིཝིསེསསྶ ནིརཝསེསཏོ པཊིཝིཛ྄ཛྷནེན ཝེདིཏབྦཱ. ཨཡཉྩ ཨཏྠོ བྷགཝཏོ ཨནེཀདྷཱཏུནཱནཱདྷཱཏུལོཀཾ ཡཐཱབྷཱུཏཾ ཉཱཎཱདིཝསེན ཝེདིཏབྦོ. ཡཐཱ ཙ པསྶནྟསྶཱཏི ཨིདཾ རཱགགྒིཨཱདཱིཧི ¶ ལོཀསནྣིཝཱསསྶ ཨཱདིཏྟཏཱདིཨཱཀཱརདསྶནཾ བྷགཝཏོ མཧཱཀརུཎོཀྐམནུཔཱཡཾ སནྡྷཱཡ ཝུཏྟཾ. ཏཾ པན བཧུཀེཧི ཨཱཀཱརེཧི པསྶནྟཱནཾ བུདྡྷཱནཾ བྷགཝནྟཱནཾ ¶ སཏྟེསུ མཧཱཀརུཎཱ ཨོཀྐམཏི. ‘‘ཨཱདིཏྟོ ལོཀསནྣིཝཱསོ…པེ… ཨུཡྻུཏྟོ…པེ… པཡཱཏོ…པེ… ཀུམྨགྒཔྤཊིཔནྣོ…པེ… ཨུཔནཱིཡཏི ལོཀོ ཨདྷུཝོ…པེ… ཨཏཱཎོ ལོཀོ ཨནབྷིསྶརོ…པེ… ཨསྶཀོ ལོཀོ སབྦཾ པཧཱཡ གམནཱིཡཾ…པེ… ཨཱུནོ ལོཀོ ཨཏིཏྟོ ཏཎྷཱདཱསོཏི པསྶནྟཱནཾ བུདྡྷཱནཾ བྷགཝནྟཱནཾ སཏྟེསུ མཧཱཀརུཎཱ ཨོཀྐམཏཱི’’ཏིཨཱདིནཱ (པཊི. མ. ༡.༡༡༧) པཊིསམྦྷིདཱམགྒེ པརོསཏཾ ཨཱཀཱརེཧི དསྶིཏནྟི གནྠཝིཏྠཱརཾ པརིཧརིཏུཾ སཾཝཎྞཡིཏུཉྩ ཨུཔཱཡཾ དསྶེཏུཾ ཨཱཧ ‘‘ཏཾ སབྦཾ པཊིསམྦྷིདཱམགྒེ མཧཱཀརུཎཱཉཱཎཝིབྷངྒཝསེན ཛཱནིཏབྦ’’ནྟི. ཨིནྡྲིཡཔརོཔརིཡཏྟཨཱསཡཱནུསཡ ཡམཀཔཱཊིཧཱརིཡ སབྦཉྙུཏཱནཱཝརཎཉཱཎཱནི སེསཱསཱདྷཱརཎཉཱཎཱནི. ཏེསམྤི ཧི ཝིབྷངྒོ ‘‘ཨིདྷ ཏཐཱགཏོ སཏྟེ པསྶཏི ཨཔྤརཛཀྑེ’’ཏིཨཱདིནཱ (པཊི. མ. ༡.༡༡༡) པཊིསམྦྷིདཱམགྒེ ནཱནཔྤཀཱརེན དསྶིཏོཏི པུརིམནཡེནེཝ ཨཏིདིསཏི. ཨཱདི-སདྡེན ཏཏྠ ཝིབྷཏྟཱནཾ པཊིསམྦྷིདཱསཙྩཉཱཎཱདཱིནཾ སངྒཧོ ཀཏོཏི ཝེདིཏབྦོ.

ནིཔྤདེསསཔྤདེསཝིསཡཱ ཀརུཎཱ ཝིཡ བྷགཝཏོ པཉྙཱཔི ཨིདྷ ནིཔྤདེསསཔྤདེསཝིསཡཱ ནིརཝསེསཱ ཨདྷིཔྤེཏཱཏི ཏསྶཱ ཀཏིཔཡབྷེདདསྶནེན ནཡཏོ ཏདཝསིཊྛབྷེདཱ གཧེཏབྦཱཏི དསྶེནྟོ ‘‘པཉྙཱགྒཧཎེན ཙཱ’’ཏིཨཱདིམཱཧ. ཏེ པན སཱིལསམཱདྷི པཉྙཱཝིམུཏྟིཝིམུཏྟིཉཱཎདསྶན, དྭཱཙཏྟཱལཱིསསཏདུཀདྷམྨ, བཱཝཱིསཏིཏིཀདྷམྨ, ཙཏུསཏིཔཊྛཱན སམྨཔྤདྷཱན ཨིདྡྷིཔཱད སཱམཉྙཕལ ཨརིཡཝཾསཱདི, པཉྩགཏི པཉྩཔདྷཱནིཡངྒཔཉྩངྒིཀསམཱདྷི ཨིནྡྲིཡ བལ ནིསྶཱརཎཱིཡདྷཱཏུ ཝིམུཏྟཱཡཏན ཝིམུཏྟིཔརིཔཱཙནཱིཡདྷམྨསཉྙཱདི, ཚསཱརཎཱིཡདྷམྨ ཨནུསྶཏིཊྛཱན ཨགཱརཝགཱརཝ ནིསྶཱརཎིཡདྷཱཏུ སཏཏཝིཧཱར ཨནུཏྟརིཡ ནིབྦེདྷབྷཱགིཡཔཉྙཱདི, སཏྟཨཔརིཧཱནིཡདྷམྨ ཨརིཡདྷན བོཛ྄ཛྷངྒ སཔྤུརིསདྷམྨནིཛྫརཝཏྠུ སཉྙཱ དཀྑིཎེཡྻཔུགྒལཁཱིཎཱསཝབལཱདི, ཨཊྛཔཉྙཱཔཊིལཱབྷཧེཏུ མིཙྪཏྟ སམྨཏྟ ལོཀདྷམྨ ཨརིཡཱནརིཡཝོཧཱར ཨཱརམྦྷཝཏྠུ ཀུསཱིཏཝཏྠུ ཨཀྑཎ མཧཱཔུརིསཝིཏཀྐ ཨབྷིབྷཱཡཏན ཝིམོཀྑཱདི, ནཝཡོནིསོམནསིཀཱརམཱུལདྷམྨཔཱརིསུདྡྷིཔདྷཱནིཡངྒ ¶ སཏྟཱཝཱས ཨཱགྷཱཏཝཏྠུ ཨཱགྷཱཏཔཊིཝིནཡ སཉྙཱནཱནཏྟ ཨནུཔུབྦཝིཧཱརཱདི, དསནཱཐཀརདྷམྨ ཀསིཎཱཡཏན ཨཀུསལཀམྨཔཐ ཀུསལཀམྨཔཐ མིཙྪཏྟ སམྨཏྟ ཨརིཡཝཱས དསབལཉཱཎ ཨསེཀྑདྷམྨཱདི, ཨེཀཱདསམེཏྟཱནིསཾས སཱིལཱནིསཾས དྷམྨཏཱ བུདྡྷིཧེཏུ, དྭཱདསཱཡཏནཔཊིཙྩསམུཔྤཱད དྷམྨཙཀྐཱཀཱར, ཏེརསདྷུཏགུཎ, ཙུདྡསབུདྡྷཉཱཎ, པཉྩདསཙརཎཝིམུཏྟིཔརིཔཱཙནཱིཡདྷམྨ, སོལ༹སཨཱནཱཔཱནསྶཏི སཙྩཱཀཱར སུཏྟནྟཔཊྛཱན, ཨཊྛཱརས བུདྡྷདྷམྨདྷཱཏུ བྷེདཀརཝཏྠུ, ཨེཀཱུནཝཱིསཏིཔཙྩཝེཀྑཎ, ཙཏུཝཱིསཏིཔཙྩཡ, ཨཊྛཝཱིསཏིསུཏྟནྟཔཊྛཱན, པཎྞཱསཨུདཡབྦཡདསྶན, པརོཔཎྞཱསཀུསལདྷམྨ, དྭཱསཊྛིདིཊྛིགཏ, ཨཊྛསཏཏཎྷཱཝིཙརིཏཱདིབྷེདཱནཾ དྷམྨཱནཾ པཊིཝིཛ྄ཛྷནདེསནཱཀཱརཔྤཝཏྟཱ, ཡེ ཙ ཙཏུཝཱིསཏིཀོཊིསཏསཧསྶསམཱཔཏྟིསཉྩཱརིམཧཱཝཛིརཉཱཎཔྤབྷེདཱ, ཡེ ཙ ཨནནྟནཡསམནྟཔཊྛཱནཔཝིཙཡདེསནཱཀཱརཔྤཝཏྟཱ, ཡེ ཙ ཨནནྟཱསུ ¶ ལོཀདྷཱཏཱུསུ ཨནནྟཱནཾ སཏྟཱནཾ ཨཱསཡཱནུསཡཙརིཏཱདིཝིབྷཱཝནཱཀཱརཔྤཝཏྟཱཏི ཨེཝཾཔཀཱརཱ བྷགཝཏོ པཉྙཱཔབྷེདཱ, སབྦེཔི ཨིདྷ ཨཱདི-སདྡེན ནཡཏོ སངྒཡ྄ཧནྟཱིཏི ཝེདིཏབྦཾ. ཀོ ཧི སམཏྠོ བྷགཝཏོ པཉྙཱཡ པབྷེདེ ཨནུཔདཾ ནིརཝསེསཏོ དསྶེཏུཾ. ཏེནེཝ བྷགཝནྟཾ ཋཔེཏྭཱ པཉྙཝནྟཱནཾ ཨགྒབྷཱུཏོ དྷམྨསེནཱཔཏིསཱརིཔུཏྟཏྠེརོཔི བུདྡྷགུཎཔརིཙྪེདནཾ པཏིཨནུཡུཏྟོ ‘‘ཨཔིཙ མེ, བྷནྟེ, དྷམྨནྭཡོ ཝིདིཏོ’’ཏི (དཱི. ནི. ༢.༡༤༦) ཨཱཧཱཏི.

སཾསཱརམཧོགྷཔཀྑནྡཱནཾ སཏྟཱནཾ ཏཏོ སནྟཱརཎཏྠཾ པཊིཔནྣོ ཏེཧི པཡོཛིཏོ ནཱམ ཧོཏི ཨསཏིཔི ཏེསཾ ཏཐཱཝིདྷེ ཨབྷིསནྡྷིཡནྟི ཝུཏྟཾ ‘‘སཏྟཱ ཧི མཧཱབོདྷིཾ པཡོཛེནྟཱི’’ཏི. ཨེཏེན སབྦེནཱཏི མཧཱབོདྷིམཱུལཱདིདསྶནེན. ཨཔགམནཾ ནིརུཔཀྐིལེསནྟི ཡོཛེཏབྦཾ. ཛཱཏསཾཝདྡྷབྷཱཝདསྶནེན ‘‘ཨནཱདི ཨནིདྷནོ ཙ སཏྟོ’’ཏི ཨེཝཾཔཀཱརཱ མིཙྪཱཝཱདཱ པཊིསེདྷིཏཱ ཧོནྟི. སམཉྙཱ…པེ… དསྶེཏི སཏྟེ པརམཏྠཏོ ཨསཏིཔི སཏྟཔཉྙཏྟིཝོཧཱརསཱུཙནཏོ. ཀརུཎཱ ཨཱདིཔཉྙཱ པརིཡོསཱནནྟི ཨིདཾ སམྦྷརཎནིཔྥཏྟིཀཱལཱཔེཀྑཱཡ ཝུཏྟཾ, ན པརིཙྪེདཝནྟཏཱཡ. ཏེནེཝཱཧ ‘‘ཏནྣིདཱནབྷཱཝཏོ ཏཏོ ཨུཏྟརིཀརཎཱིཡཱབྷཱཝཏོ’’ཏི. སབྦེ བུདྡྷགུཎཱ དསྶིཏཱ ཧོནྟི ནཡཏོ དསྶིཏཏྟཱ. ཨེསོ ཨེཝ ཧི ཨནཝསེསཏོ བུདྡྷགུཎདསྶནུཔཱཡོ ཡདིདཾ ནཡགྒཱཧཎཾ. པརདྷནཧརཎཱདིཏོཔི ཝིརཏི པརེསཾ ཨནཏྠཔརིཧརཎཝསཔྤཝཏྟིཡཱ ¶ སིཡཱ ཀརུཎཱུཔནིསྶཡཱཏི ཀརུཎཱནིདཱནཾ སཱིལཾ. ཏཏོ ཨེཝ ‘‘ཏཏོ པཱཎཱཏིཔཱཏཱདིཝིརཏིཔྤཝཏྟིཏོ’’ཏི ཝུཏྟཾ.

༢. ཡསྶཱ སཾཝཎྞནནྟིཨཱདིནཱ ‘‘དཡཱཡཱ’’ཏིཨཱདིཐོམནཱཡ སམྦནྡྷཾ དསྶེཏི. པཡོཛནཾ པན ཝུཏྟནཡེན ཝེདིཏབྦཾ. ཨབྦྷནྟརཾ ནིཡཀཛ྄ཛྷཏྟཾ, ཏཏོ བཧིབྷཱུཏཾ བཱཧིརཾ. དཡཱཏི ཀརུཎཱ ཨདྷིཔྤེཏཱཏི དཡཱ-སདྡསྶ མེཏྟཱཀརུཎཱནཾ ཝཱཙཀཏྟཱ ཝཀྑམཱནཉྩ ཨནུཡོགཾ མནསི ཀཏྭཱ ཝུཏྟཾ. ཏཱཡ ཧི སམུསྶཱཧིཏོ, ན མེཏྟཱཡཱཏི ཨདྷིཔྤཱཡོ. པུབྦེ ཝུཏྟསྶ པཊིནིདྡེསོ ཧོཏཱིཏི ཏ-སདྡསྶ ཨཏྠཾ ཨཱཧ. ཏནྟི པཉྙཾ ཝིསེསེཏྭཱ ཨུཔམཱབྷཱཝེན ཝིནིཝཏྟཱ ཙརིཏཏྠཏཱཡ. པཊིནིདྡེསཾ ནཱརཧཏི པདྷཱནཱཔདྷཱནེསུ པདྷཱནེ ཀིཙྩདསྶནཏོ. དྭིནྣཾ པདཱནཾ…པེ… ཝཏོཏི ཀརུཎཱཝཱཙིནཱ དཡཱ-སདྡེན ཨེཀཱདྷིཀརཎབྷཱཝེན ཝུཙྩམཱནོ ཏ-སདྡོ ཏཏོ ཨཉྙདྷམྨཝིསཡོ བྷཝིཏུཾ ན ཡུཏྟོཏི ཨདྷིཔྤཱཡོ. ཨཔརིཡཱཡསདྡཱནཾ སམཱནཱདྷིཀརཎབྷཱཝོ ཝིསེསནཝིསེསིཏབྦབྷཱཝེ སཏི ཧོཏི, ནཱཉྙཐཱཏི ཨཱཧ ‘‘སམཱནཱ…པེ… ཧོཏཱི’’ཏི. སམཱནཱདྷིཀརཎབྷཱཝེན ཧེཏྠ ཝིསེསནཝིསེསིཏབྦབྷཱཝོ སཱདྷཱིཡཏི, སཱ ཙ སམཱནཱདྷིཀརཎཏཱ ཝིསིཊྛཝིབྷཏྟིཀཱནཾ ན ཧོཏཱིཏི སམཱནཝིབྷཏྟིཏཱཡཔི ཏམེཝ སཱདྷཱིཡཏཱིཏི ‘‘དཡཱ…པེ… ཙིད’’ནྟི ཨིདཾ དཡཱཡ ཝིསེསིཏབྦབྷཱཝེ ཀཱརཎཝཙནཾ. པདྷཱནཏཱཡ ཧི ¶ སཱམཉྙཏཱཡ ཙ སཱ ཝིསེསིཏབྦཱ ཛཱཏཱ. ཏཏྠ བྷགཝཏོ ཏདཉྙེསཉྩ ཀརུཎཱནཾ ཝཱཙཀཏྟཱ སཱམཉྙཏཱ ཝེདིཏབྦཱ. ཏསྶ ཙཱཏི དཡཱ-སདྡསྶ. ‘‘པདྷཱནཉྩ པཉྙ’’ནྟིཨཱདིནཱ ཀིཉྩཱཔི པུརིམགཱཐཱཡ པཉྙཱཔྤདྷཱནཱ, ‘‘ཏཱཡཱ’’ཏི པན ཀེཝལཾ ཨཝཏྭཱ དཡཱཝིསེསནབྷཱཝེན ཝུཏྟཏྟཱ ཨཔྤདྷཱནཱཡཔི ཀརུཎཱཡ པཊིནིདྡེསོ ཡུཏྟོཏི དསྶེཏི. ཨཔྤདྷཱནཏཱ ཙ ཀརུཎཱཡ པུརིམགཱཐཱཡ ཝསེན ཝུཏྟཱ, ཨིདྷ པན པདྷཱནཱ ཨེཝ. ཏཐཱ ཙ ཝུཏྟཾ ‘‘དཡཱསམུསྶཱཧིནཱིཏི པདྷཱནཱ’’ཏི (དྷ. ས. མཱུལཊཱི. ༢).

ཀཐཾ པན…པེ… ཉཱཏབྦཱཏི ཝཀྑམཱནཉྙེཝ ཨཏྠཾ ཧདཡེ ཋཔེཏྭཱ ཙོདེཏི. ཡདི ཨེཝནྟི ཡདི ཨཊྛཀཐཱཡ ཨདྷིཔྤཱཡཾ ཨགྒཧེཏྭཱ ཝཙནམཏྟམེཝ གཎྷསི. མེཏྟཱཏི ཙ ན ཡུཛྫེཡྻཱཏི ཡཐཱ ‘‘མེཏྟཙིཏྟཏཾ ཨཱཔནྣོ’’ཏི ཨེཏིསྶཱ ཨཊྛཀཐཱཡ ཝསེན ན དཡཱ ཀརུཎཱ ¶ , ཨེཝཾ ‘‘ནིཀྐརུཎཏཾ ཨཱཔནྣོ’’ཏི ཨེཏིསྶཱ ཨཊྛཀཐཱཡ ཝསེན ན དཡཱ མེཏྟཱཏི ཝཙནམཏྟགྒཧཎེ ཨཊྛཀཐཱནམྤི ཝིརོདྷཾ དསྶེཏི. ‘‘ཨདྷིཔྤཱཡཝསེན ཡོཛེཏབྦོ’’ཏི ཝཏྭཱ ཏམེཝ ཨདྷིཔྤཱཡཾ དཡཱ-སདྡོ ཧཱིཏིཨཱདིནཱ ཝིཝརཏི. ཨཀྑརཙིནྟཀཱ ཧི དཡཱ-སདྡཾ དཱནགཏིརཀྑཎེསུ པཋནྟི. ཨནུརཀྑཎཉྩ མེཏྟཱཀརུཎཱནཾ ཧིཏཱུཔསཾཧཱརདུཀྑཱཔནཡནཱཀཱརཝུཏྟཱིནཾ སམཱནཀིཙྩཾ, ཏསྨཱ ཨུབྷཡཏྠ དཡཱ-སདྡོ པཝཏྟཏཱིཏི ཝུཏྟཾ. ཨནྟོནཱིཏནྟི ཨནྟོགདྷཾ, རུཀྑཏྠོ ཝིཡ དྷཝཁདིརཱདཱིནཾ ཨནུརཀྑཎཏྠོ མེཏྟཱཀརུཎཱནཾ སཱམཉྙནྟི ཨཏྠོ, ཨདྷིཔྤཱཡོ པན ‘‘དཡཱཔནྣོ’’ཏི ཨེཏྠ སབྦཔཱཎབྷཱུཏཧིཏཱནུཀམྤཱིཏི ཨནནྟརཾ ཀརུཎཱཡ ཝུཏྟཏྟཱ དཡཱ-སདྡོ མེཏྟཱཔརིཡཱཡོཏི ཝིཉྙཱཡཏི. མེཏྟཱཔི ཧི ཀརུཎཱ ཝིཡ པཱཎཱཏིཔཱཏཝིརཏིཡཱ ཀཱརཎནྟི. ‘‘ཨདཡཱཔནྣོ’’ཏི ཨེཏྠ པན ཀཱརུཎིཀོ ཨཝིཧིཾ སཛ྄ཛྷཱསཡཏྟཱ པརེསཾ ཝིཧེསཱམཏྟམྤི ན ཀརོཏི, ཀོ པན ཝཱདོ པཱཎཱཏིཔཱཏནེཏི ནིཀྐརུཎཏཱཡ པཱཎཱཏིཔཱཏིཏཱ དསྶིཏཱཏི ཝེདིཏབྦཱ. ཨེཏམེཝཏྠཾ སནྡྷཱཡ ‘‘ཨེཝཉྷི ཨཊྛཀཐཱནཾ ཨཝིརོདྷོ ཧོཏཱི’’ཏི ཨཱཧ. ཡདི དཡཱ-སདྡོ མེཏྟཱཀརུཎཱནཾ ཝཱཙཀོ, ཨེཝམྤིཀཐཾ པན ཀརུཎཱ ‘‘དཡཱ’’ཏི ཛཱནིཏབྦཱཏི ཨནུཡོགོ ཏདཝཏྠོ ཨེཝཱཏི ཙོདནཾ མནསི ཀཏྭཱ ཀརུཎཱ ཙ དེསནཱཡཱཏིཨཱདིནཱ ཀརུཎཱཡ ཨེཝ གཧཎེ ཀཱརཎམཱཧ.

ནནུ ཏཱཡཱཏིཨཱདིནཱ སཱམཏྠིཡཏོཔི པཀརཎཾ བལཝནྟི པཀརཎཝསེནེཝ ཀརུཎཱཝིསཡསྶ ཉཱཏཏཾ དསྶེཏི. ཡཐཱརུཙི པཝཏྟིཏྠཱཏི ཨེཏཾ པུརིམགཱཐཱཡ སཔྤདེསནིཔྤདེསསཏྟཝིསཡཱཡ ཀརུཎཱཡ གཧིཏབྷཱཝསྶ ཀཱརཎཝཙནཾ. ཡཐཱརུཙིཔཝཏྟི ཧི ཨེཀསྨིཾ ཨནེཀེསུ ཙ ཨིཙྪཱནུརཱུཔཔྤཝཏྟཱིཏི. ‘‘ཨིདྷ པན ནིཔྤདེསསཏྟཝིསཡཏཾ གཧེཏུ’’ནྟི ཨེཏེན སིདྡྷེ སཏི ཨཱརམྦྷོ ཉཱཔཀཏྠོ ཧོཏཱིཏི པུན ‘‘སཏྟེསཱུ’’ཏི ¶ ཝཙནཾ ཨིམམཏྠཝིསེསཾ བོདྷེཏཱིཏི དསྶེཏི. ན དེཝེསུཡེཝཱཏིཨཱདིནཱཔི དཡཱསཱདྷནསྶ སམུསྶཱཧནསྶ སཏྟཝིསཡབྷཱཝེ སཱམཏྠིཡལདྡྷེཔི ‘‘སཏྟེསཱུ’’ཏི ཝཙནཾ ཏསྶ ནིཔྤདེསསཏྟཝིསཡབྷཱཝོ ཨདྷིཔྤེཏོཏི ཨིམཾ ཝིསེསཾ ཉཱཔེཏཱིཏི དསྶེཏི.

ཀཱལདེསདེསཀཔརིསཱདིཔརིདཱིཔནཾ བཱཧིརནིདཱནནྟི ཀཱལཱདཱིནི ནིདྡྷཱརེནྟོ ‘‘ཡསྨིཾ ཀཱལེ’’ཏིཨཱདིམཱཧ. ཨཝསཱནམྷི ཝསནྟོ ཏིདསཱལཡེཏི ཝཙནཏོཏི ཨེཏེན ཏསྶ པཱཊིཧཱརིཡསྶ སདྡནྟརསནྣིདྷཱནེན ¶ ཨཝཙྪིནྣཏཾ དསྶེཏི. ཏཏྠ པཝཏྟཝོཧཱརེན ཙ ན སཀྐཱཏི པུཐུཛྫནསནྟཱནེཔི རཱགཱདིཔཊིཔཀྑཧརཎསྶ ཨབྷཱཝཏོ ནིཙྪནྡརཱགེསུ སཏྟཝོཧཱརོ ཝིཡ པུཐུཛྫནསནྟཱནེ རཱགཱདིཔཊིཔཀྑཧརཎཝསེན པཝཏྟཾ ཏདབྷཱཝེཔི བྷགཝཏོ སནྟཱནེ རུལ༹ྷཱིཝསེན པཱཊིཧཱརིཡནྟྭེཝ ཝུཙྩཏཱིཏི ན སཀྐཱ ཝཏྟུནྟི ཨདྷིཔྤཱཡོ. དིཊྛིཧརཎཝསེན ཡེ སམྨཱདིཊྛིཀཱ ཛཱཏཱ ཨཙེལཀཀསྶཔཱདཡོ ཝིཡ, དིཊྛིཔྤཀཱསནེ ཨསམཏྠབྷཱཝེན ཨཔྤཊིབྷཱནབྷཱཝཱདིཔྤཏྟིཡཱ སཙྩཀཱདཡོ ཝིཡ.

༣ . སཱིཏཔབྦཏཱ ནཱམ ‘‘སིནེརུཾ པརིཝཱརེཏྭཱ ཋིཏཱ ཡུགནྡྷརོ…པེ… གིརི བྲཧཱ’’ཏི (ཝིསུདྡྷི. ༡.༡༣༧; པཱརཱ. ཨཊྛ. ༡.༡ ཝེརཉྫཀཎྜཝཎྞནཱ) ཨེཝཾ ཝུཏྟཔབྦཏཱ.

༤-༥. སབྦསོ ཙཀྐཝཱལ༹སཧསྶེཧི སབྦསོ ཨཱགམྨ སབྦསོ སནྣིསིནྣེནཱཏི སམྦནྡྷཝསེན ཏཡོ ཝིཀཔྤཱ ཡུཏྟཱ, སབྦསོ ཙཀྐཝཱལ༹སཧསྶེཧི དསཧི དསཧཱིཏི པན ཨནིཊྛསཱདྷནཏོ པཊིསེདྷིཏོ. ཝཛྫིཏབྦེཏི ཡེ ཝཛྫེཏུཾ སཀྐཱ ‘‘ཨཏིསམྨུཁཱ ཨཏིསམཱིཔཾ ཨུནྣཏཔྤདེསོ’’ཏི, ཨེཏེ. ཨིཏརེ པན ཏསྶཱ པརིསཱཡ མཧནྟབྷཱཝེན ན སཀྐཱ པརིཧརིཏུཾ.

‘‘སབྦཉེཡྻ…པེ… སམཏྠཱ’’ཏི ཝཏྭཱ ཏེསཾ དེསེཏབྦཔྤཀཱརཛཱནནསམཏྠཱཏི ཝཙནཾ ཨཏྟནཱ པཊིཝིདྡྷཱཀཱརསྶ དྷམྨསཱམིནཱཔི པརེསཾ དེསེཏུཾ ཨསཀྐུཎེཡྻཏྟཱ ཝུཏྟཾ. ཨཉྙཐཱ སབྦེཔི སཏྟཱ དིཊྛསཙྩཱ ཨེཝ བྷཝེཡྻུཾ. སབྦཉེཡྻདྷམྨཱནཾ ཡཐཱསབྷཱཝཛཱནནསམཏྠཏཱདིཡེཝ ཡཐཱཝུཏྟབལཾ. ཏེསཾ གཧཎསམཏྠཏཾ དཱིཔེཏི, ཨདྷིཀཝཙནམཉྙམཏྠཾ བོདྷེཏཱིཏི ཨདྷིཔྤཱཡོ.

༦. ཏཐཱགཏོ ཝནྡནཱིཡོཏིཨཱདིནཱ ‘‘ནམསྶིཏྭཱ’’ཏིཨཱདིཀིརིཡཱཝིསེསཱནཾ ཏཾཏཾསུཏྟཱནུརོདྷེན ¶ པཝཏྟིཏམཱཧ. སརཱིརསོབྷགྒཱདཱིཏི ཨཱདི-སདྡེན ཀལྱཱཎཝཱཀྐརཎཏཱཨཱདྷིཔཙྩཔརིཝཱརསམྤཏྟིཨཱདི སངྒཡ྄ཧཏི.

༧. ཨནྟརདྷཱཔེཏྭཱཏི ནིརོདྷེཏྭཱ. ནིརོདྷནཉྩེཏྠ ཨུཔྤཱདཀཧེཏུཔརིཧརཎཝསེན ཏེསཾ ཨནུཔྤཏྟིཀརཎནྟི ཝེདིཏབྦཾ. ཨཏྠཾ པཀཱསཡིསྶཱམཱིཏི སམྦནྡྷོཏི ‘‘སོསེཏྭཱ’’ཏི པུབྦཀཱལཀིརིཡཱཡ ཨཔརཀཱལཀིརིཡཱཔེཀྑཏཱཡ ཝུཏྟཾ.

༨. དུཀྐརབྷཱཝཾ ¶ དཱིཔེཏུནྟི ཨདུཀྐརསྶ ཏཐཱཨབྷིཡཱཙེཏབྦཏཱབྷཱཝཏོཏི ཨདྷིཔྤཱཡོ. པཱརཱཛིཀསངྒྷཱདིསེསཱནཾ སཱིལཝིཔཏྟིབྷཱཝཏོ ཐུལླཙྩཡཱདཱིནཉྩ ཡེབྷུཡྻེན ཨཱཙཱརཝིཔཏྟིབྷཱཝཏོ ཨཱཙཱརསཱིལཱནཾ ཏཐཱ ཡོཛནཱ ཀཏཱ, ཏཐཱ ཙཱརིཏྟསཱིལསྶ ཨཱཙཱརསབྷཱཝཏྟཱ ཨིཏརཾ སབྷཱཝེནེཝ གཧེཏྭཱ དུཏིཡཱ. ཨསཀྐུཎེཡྻནྟི ཝིསུདྡྷཱཙཱརཱདིགུཎསམནྣཱགཏེན སབྲཧྨཙཱརིནཱ སདྡྷམྨཙིརཊྛིཏཏྠཾ སཱདརཾ ཨབྷིཡཱཙིཏེན ཏེན ཙ ཨབྷིདྷམྨཏྠཔྤཀཱསནེ སམཏྠོཏི ཡཱཐཱཝཏོ པམཱཎིཏེན ཏབྦིམུཁབྷཱཝོ ན སུཀརོཏི ཨདྷིཔྤཱཡོ.

༩. དེཝདེཝ-སདྡསྶ ཨཏྠོ པཊྛཱནསཾཝཎྞནཱཊཱིཀཱཡཾ ཝིཔཉྩིཏོཏི ན ཝིཏྠཱརཡིམྷ.

༡༣. པཋམསངྒཱིཏིཡཾ ཡཱ ཨཊྛཀཐཱ སངྒཱིཏཱཏི ཝཙནེན སཱ བྷགཝཏོ དྷརམཱནཀཱལེཔི ཨཊྛཀཐཱ སཾཝིཛྫཏི, ཏེན པཱཋོ ཝིཡ བྷགཝཾམཱུལིཀཱཝཱཏི ཝིཉྙཱཡཏི. ‘‘ཨབྷིདྷམྨསྶཱ’’ཏི པདཾ ‘‘ཨཏྠཾ པཀཱསཡིསྶཱམཱི’’ཏི ཨེཏདཔེཀྑནྟི ‘‘ཀསྶ པན སཱ ཨཊྛཀཐཱ’’ཏི པུཙྪིཏྭཱ ཨདྷིཀཱརཝསེན ཏམེཝ ཨབྷིདྷམྨཔདཾ ཨཱཀཌྜྷཏི. ཨཱཝུཏྟིཨཱདིཝསེན ཝཱ ཨཡམཏྠོ ཝིབྷཱཝེཏབྦོ.

༡༦. ཨརིཡམགྒསྶ བོཛ྄ཛྷངྒམགྒངྒཛྷཱནངྒཝིསེསཾ པཱདཀཛ྄ཛྷཱནམེཝ ནིཡམེཏཱིཏིཨཱདིནཡཔྤཝཏྟོ ཏིཔིཊཀཙཱུལ༹ནཱགཏྠེརཝཱདོ ཨཱདི-སདྡེན ཝིཔསྶནཱཡ ཨཱརམྨཎབྷཱུཏཱ ཁནྡྷཱ ནིཡམེནྟི, པུགྒལཛ྄ཛྷཱསཡོ ནིཡམེཏཱིཏི ཨེཝམཱདཡོ མོརཝཱཔིཝཱསིམཧཱདཏྟཏྠེརཏིཔིཊཀཙཱུལཱ༹བྷཡཏྠེརཝཱདཱདཡོ སངྒཡ྄ཧནྟི. ཏཔྤཀཱསནེནེཝཱཏི ཨབྷིདྷམྨསྶ ཨཏྠཔྤཀཱསནེནེཝ. སོཏི མཧཱཝིཧཱརཝཱསཱིནཾ ཝིནིཙྪཡོ. ཏཐཱཏི ཨསམྨིསྶཱནཱཀུལབྷཱཝེན. ཨསམྨིསྶཱནཱཀུལབྷཱུཏོ ཝཱ ཝིནིཙྪཡོ མཧཱཝིཧཱརཝཱསཱིནཾ སནྟཀབྷཱཝེན, ཨེཏེན ཨབྷིདྷམྨསྶ ཨཏྠཔྤཀཱསནེནེཝ མཧཱཝིཧཱརཝཱསཱིནཾ ཝིནིཙྪཡོ ཨིདྷ ཨབྷིནིཔྥཱདཱིཡཏཱིཏི དསྶེཏི. ཨཐ ཝཱ ཏཔྤཀཱསནེནེཝཱཏི ཨསམྨིསྶཱནཱཀུལབྷཱཝཔྤཀཱསནེནེཝ ¶ . སོཏི པཀཱསིཡམཱནོ ཨབྷིདྷམྨཏྠོ. ཏཐཱཏི མཧཱཝིཧཱརཝཱསཱིནཾ ཝིནིཙྪཡབྷཱཝེན. ཨིམསྨིཾ ཨཏྠཝིཀཔྤེ ‘‘ཨསམྨིསྶཾ ཨནཱཀུལཾ ཨཏྠཾ པཀཱསཡིསྶཱམཱི’’ཏི སམྦནྡྷནཱིཡཾ.

༡༧. ཨཉྙཉྩ ¶ སབྦཾ ཨཏྠཔྤཀཱསནཾ ཧོཏཱིཏི ཏོསནཾ ཧོཏཱིཏི ཨཏྠོ. ཏེནེཝཱཧ ‘‘སབྦེན ཏེན ཏོསནཾ ཀཏཾ ཧོཏཱི’’ཏི. ཡུཏྟརཱུཔཱ ཡོཛནཱ.

ཝཱིསཏིགཱཐཱཝཎྞནཱ ནིཊྛིཏཱ.

ནིདཱནཀཐཱཝཎྞནཱ

པརིཙྪེདོ སཏྟཔྤཀརཎབྷཱཝོ. སནྣིཝེསོ སཏྟནྣཾ པཀརཎཱནཾ ཏདཝཡཝཱནཉྩ ཝཝཏྠཱནཾ. སཱགརེཧི ཏཐཱ ཙིནྟཱཏི ‘‘ཨིམསྶ ཨབྷིདྷམྨསྶ གམྦྷཱིརབྷཱཝཝིཛཱནནཏྠཾ ཙཏྟཱརོ སཱགརཱ ཝེདིཏབྦཱ’’ཏིཨཱདིནཱ ནཡེན ཛལསཱགརཱདཱིཧི སཧ ནཡསཱགརཝིཙཱརོ. ‘‘སཏབྷཱགེན སཧསྶབྷཱགེན དྷམྨནྟརཱ དྷམྨནྟརཾ སངྐམིཏྭཱ སངྐམིཏྭཱ དེསེསཱི’’ཏིཨཱདིནཱ དེསནཱབྷེདེཧི ཨབྷིདྷམྨསྶ གམྦྷཱིརབྷཱཝཀཐཱ དེསནཱཧི གམྦྷཱིརཏཱ.

‘‘ཨེཝཾ ཏེམཱསཾ ནིརནྟརཾ དེསེནྟསྶཱ’’ཏིཨཱདིནཱ དེསནཱཀཱལེ བྷགཝཏོ སརཱིརསྶ ཡཱཔིཏཱཀཱརཝིཙཱརོ དེསནཱ…པེ… གཧཎཾ. ཏཐཱ ཐེརསྶ…པེ…པི ཙཱཏི ‘‘ཨབྷིདྷམྨེ ཝཱཙནཱམགྒོ ནཱམཱ’’ཏིཨཱདིནཱ ཨབྷིདྷམྨེ ཝཱཙནཱམགྒསྶ སཱརིཔུཏྟཏྠེརསམྦནྡྷིཏཏཱ ཏསྶ ཙ ཏེནེཝ ཨུཔྤཱདིཏཏཱ. ཡོ ཧི བྷགཝཏཱ དེཝཏཱནཾ དེསིཏཱཀཱརོ, སོ ཨཔརིཙྪིནྣཝཱརནཡཏནྟིཏཱཡ ཨནནྟོ ཨཔརིམཱཎོ ན བྷིཀྑཱུནཾ ཝཱཙནཱཡོགྒོ, ཡོ ཙ ཐེརསྶ དེསིཏཱཀཱརོ, སོ ཨཏིསཾཁིཏྟཏཱཡ. ནཱཏིསངྑེཔནཱཏིཝིཏྠཱརབྷཱུཏོ པན པཱཋནཡོ ཐེརཔྤབྷཱཝིཏོ ཝཱཙནཱམགྒོཏི.

ཝཙནཏྠཝིཛཱནནེནཱཏིཨཱདིནཱ ཀུསལཱ དྷམྨཱཏིཨཱདིཔདཱནཉྙེཝ ཨཏྠཝཎྞནཾ ཨཀཏྭཱ ཨབྷིདྷམྨ-སདྡཝིཙཱརསྶ སམྦནྡྷམཱཧ. ‘‘ཡེ ཏེ མཡཱ དྷམྨཱ ཨབྷིཉྙཱ དེསིཏཱ. སེཡྻཐིདཾ – ཙཏྟཱརོ ¶ སཏིཔཊྛཱནཱ…པེ… སིཀྑིཏཾ སིཀྑིཾསུ དྭེ བྷིཀྑཱུ ཨབྷིདྷམྨེ ནཱནཱཝཱདཱ’’ཏིཨཱདིསུཏྟཝསེན ཀིཉྩཱཔི བོདྷིཔཀྑིཡདྷམྨཱ ‘‘ཨབྷིདྷམྨོ’’ཏི ཝུཙྩནྟི, དྷམྨ-སདྡོ ཙ སམཱདྷིཨཱདཱིསུ དིཊྛཔྤཡོགོ, པརིཡཏྟིདྷམྨོ ཨེཝ པན ཨིདྷ ཨདྷིཔྤེཏོཏི དསྶེནྟོ ‘‘སུཏྟནྟཱདྷིཀཱ པཱལཱི༹ཏི ཨཏྠོ’’ཏི ཨཱཧ. ཏཏྠ དྷམྨབྱབྷིཙཱརབྷཱཝེན ཝིསེསཏོ ཨབྷིདྷམྨོ ཝིཡ སུཏྟནྟོཔི ‘‘དྷམྨོ’’ཏི ཝུཙྩཏི. ‘‘ཡོ ¶ ཝོ, ཨཱནནྡ, མཡཱ དྷམྨོ ཙ ཝིནཡོ ཙ དེསིཏོ པཉྙཏྟོ’’ཏིཨཱདཱིསུ (དཱི. ནི. ༡.༢༡༦) ཨཉྙཏྠ ཙ སམྦྷཝཏོ ཨབྷི-སདྡེན ནིཝཏྟེཏབྦཏྠཾ དཱིཔེཏུཾ ‘‘སུཏྟནྟཱ’’ཏི ཝུཏྟཾ. ནནུ ཙ ཨཏིརེཀཝིསེསཊྛཱ བྷིནྣསབྷཱཝཱ ཡཏོ ཏེ ཡཐཱཀྐམཾ ཨདྷིཀཝིཙིཏྟཔརིཡཱཡེཧི བོདྷིཏཱ, ཏསྨཱ ‘‘དྷམྨཱཏིརེཀདྷམྨཝིསེསཊྛེཧཱི’’ཏི བཧུཝཙནེན བྷཝིཏབྦཾ, ན ཨེཀཝཙནེནཱཏི ཨནུཡོགཾ མནསི ཀཏྭཱ ཨཱཧ ‘‘དྭིནྣམྤི…པེ… ཨེཀཝཙནནིདྡེསོ ཀཏོ’’ཏི.

པཡོགམེཝ ནཱརཧཏི ཨུཔསགྒ-སདྡཱནཾ དྷཱཏུ-སདྡསྶེཝ པུརཏོ པཡོཛནཱིཡཏྟཱ. ཨཐཱཔི པཡུཛྫེཡྻ ཨཏིམཱལཱདཱིསུ ཨཏི-སདྡཱདཡོ ཝིཡ. ཨེཝམྤི ཡཐཱ ‘‘ཨཏིམཱལཱ’’ཏི ཨེཏྠ སམཱསཝསེན ཨནཱཝིབྷཱུཏཱཡ ཀམནཀིརིཡཱཡ ཝིསེསཀོ ཨཏི-སདྡོ, ན མཱལཱཡ, ཨེཝམིདྷཱཔི ཨབྷི-སདྡོ ན དྷམྨཝིསེསཀོ ཡུཏྟོཏི ཨདྷིཔྤཱཡོ. ཨཉྙསྶཔི ཧི ཨུཔསགྒསྶཱཏི ཨིདཾ རུལ༹ྷཱིཝསེན, ཨཏྠེ ཨུཔསཛྫཏཱིཏི ཝཱ ཨུཔསགྒསྶ ཨནྭཏྠསཉྙཏཾ གཧེཏྭཱ ཝུཏྟཾ. ཨཏིཚཏྟཱདཱིསུ ཧི ཨཏི-སདྡོ ཨིདྷ ཨུཔསགྒོཏི ཨདྷིཔྤེཏོ. ཏཏྠ ཡཐཱ ཀལྱཱཎོ པཱུཛིཏོ ཝཱ པུརིསོ ཨཏིཔུརིསོཏི བྷཝཏི, ཨེཝཾ ཨཏིརེཀཝིསེསཊྛཱནམྤི ཀལྱཱཎཔཱུཛིཏཏྠབྷཱཝསམྦྷཝཏོ ཀལྱཱཎཾ ཝཱ པཱུཛིཏཾ ཝཱ ཚཏྟཾ ཨཏིཚཏྟནྟི སདྡནཡོ ཝེདིཏབྦོ. ཀལྱཱཎཔཱུཛིཏབྷཱཝཱ ཧི གུཎཝིསེསཡོགེན ཨིཙྪིཏབྦཱ. གུཎཝིསེསོ ཙེས ཡདིདཾ པམཱཎཱཏིརེཀོ ཙ ཝིཙིཏྟརཱུཔཏཱ ཙ. ཨེཝཉྩ པན ཀཏྭཱ ‘‘ཨཀིརིཡཱཡཔཱི’’ཏི ཝཙནཾ སམཏྠིཏཾ བྷཝཏི. ཡཐཱ ཙ ཨཏིཚཏྟཱདཱིསུ, ཨེཝཾ ཨབྷིདྷམྨ-སདྡེཔི དཊྛབྦཾ. ཨནེཀཏྠཱ ཧི ནིཔཱཏཱཏི. ཏབྦྷཱཝདཱིཔཀཏྟཱཏི ཨཏིརེཀཝིསེསབྷཱཝདཱིཔཀཏྟཱ.

ཨེཀཏོ ཨནཱགཏཏྟཱཏི ཨིདཾ སུཏྟནྟེ ཨེཀཏོ ཨཱགཏཱནཾ ཁནྡྷཱཡཏནཱདཱིནཾ སུཏྟནྟབྷཱཛནཱིཡསྶ དིཊྛཏྟཱ ‘‘ཚ ཨིམཱནི, བྷིཀྑཝེ, ཨིནྡྲིཡཱནཱི’’ཏིཨཱདིནཱ (སཾ. ནི. ༥.༤༩༥-༤༩༦) ཙཀྑཱདཱིནཾ ཚནྣཾ ཨིཏྠིནྡྲིཡཱདཱིནཾ ཏིཎྞཾ སུཁིནྡྲིཡཱདཱིནཾ པཉྩནྣཾ སདྡྷིནྡྲིཡཱདཱིནཾ པཉྩནྣཾ ཨནཉྙཱཏཉྙསྶཱམཱིཏིནྡྲིཡཱདཱིནཉྩ ཏིཎྞཾ ཝསེན ཝིསུཾ ཝིསུཾ སུཏྟནྟབྷཱཝེན ཨཱགཏཏྟཱ ཨེཀསུཏྟབྷཱཝེན ཨནཱགཏཱནཾ བཱཝཱིསཏིཡཱ ཨིནྡྲིཡཱནཾ སུཏྟནྟབྷཱཛནཱིཡསྶ ཨདིཊྛཏྟཱ ¶ ཙ ཝུཏྟཾ, ན སུཏྟནྟེ ཨེཀཏོ ཨཱགམནསྶ སུཏྟནྟབྷཱཛནཱིཡསྶ ཀཱརཎཏྟཱ. སུཏྟནྟེ ཨེཀཏོ སབྦེན སབྦཉྩ ཨནཱགཏཱ ཧི བྷཱུམནྟརཔརིཙྪེདཔཊིསམྦྷིདཱ སུཏྟནྟབྷཱཛནཱིཡཝསེན ཝིབྷཏྟཱ དིསྶནྟི, ཨེཀཏོ ཨཱགཏཱནི ཙ ¶ སིཀྑཱཔདཱནི ཏཐཱ ན ཝིབྷཏྟཱནི. ཝེརམཎཱིནཾ ཝིཡ པན སབྷཱཝཀིཙྩཱདིཝིབྷཱགཝིནིམུཏྟོ བཱཝཱིསཏིཡཱ ཨིནྡྲིཡཱནཾ སམཱནོ ཝིབྷཛནཔྤཀཱརོ ནཏྠི, ཡོ སུཏྟནྟབྷཱཛནཱིཡཾ སིཡཱཏི ཨིནྡྲིཡཝིབྷངྒེ སུཏྟནྟབྷཱཛནཱིཡཾ ནཏྠཱིཏི ཡུཏྟཾ སིཡཱ.

ཡདིཔི པཙྩཡདྷམྨཝིནིམུཏྟོ པཙྩཡབྷཱཝོ ནཱམ ནཏྠི, ཡཐཱ པན པཝཏྟོ པཙྩཡདྷམྨོ པཙྩཡུཔྤནྣདྷམྨཱནཾ པཙྩཡོ ཧོཏི, སོ ཏསྶ པཝཏྟིཨཱཀཱརཝིསེསོ ཧེཏུཨཱདིབྷཱཝོ ཏཏོ ཨཉྙོ ཝིཡ པཙྩཡདྷམྨསྶ པཙྩཡབྷཱཝོཏི ཝུཏྟོ, སོ ཙ ‘‘ཨཝིཛྫཱཔཙྩཡཱ སངྑཱརཱ སམྦྷཝནྟཱི’’ཏིཨཱདཱིསུ པདྷཱནབྷཱཝེན ཝུཏྟོ. ཏཏྠ ཙ གུཎཱིབྷཱུཏཱ ཧེཏུཧེཏུཕལབྷཱུཏཱ ཨཝིཛྫཱསངྑཱརཱདཡོཏི ཝུཏྟཾ ‘‘པཙྩཡབྷཱཝོ ཨུདྡིཊྛོ’’ཏི. ཨུདྡིཊྛདྷམྨཱནནྟིཨཱདི ཨུདྡེསེན པརིཙྪིནྣཱནཾཡེཝ ཁནྡྷཱདཱིནཾ ཁནྡྷཝིབྷངྒཱདཱིསུ པཉྷཔུཙྪཀནཡོ དསྶིཏོ, ན ཨིཏོ ཨཉྙཐཱཏི ཀཏྭཱ ཝུཏྟཾ.

སུཏྟནྟེ སངྒཱིཏིསུཏྟནྟཱདིཀེ. པཉྩ སིཀྑཱཔདཱནི པཱཎཱཏིཔཱཏཱ…པེ… པམཱདཊྛཱནཱ ཝེརམཎཱིཏི ཨེཝཾ ཨུདྡིཊྛཱནི. ཨཉྙོ པན ཝེརམཎཱིནཾ ཝིབྷཛིཏབྦཔྤཀཱརོ ནཏྠཱིཏི ཨིདཾ ཨཏཱིཏཱནིཙྩཱདིཝིབྷཱགོ ཝེརམཎཱིནཾ ཁནྡྷཱཡཏནཱདཱིསུ ཨནྟོགདྷཏྟཱ ཏབྦསེནེཝ ཝིཛཱནིཏབྦོ, ཏཏོ པན ཨཉྙོ ཨབྷིདྷམྨནཡཝིདྷུརོ ཝེརམཎཱིནཾ ཝིབྷཛིཏབྦཔྤཀཱརོ ནཏྠཱིཏི ཨདྷིཔྤཱཡེན ཝུཏྟཾ. ཏཐཱ ཙ པཊིསམྦྷིདཱམགྒེ ‘‘ཙཀྑུཾ ཨནིཙྩཾ…པེ… ཛརཱམརཎཾ ཨནིཙྩ’’ནྟི ཨནུཔདདྷམྨསམྨསནཀཐཱཡཾ ན ཝེརམཎིཡོ ཨུདྡྷཊཱ.

ནནུ དྷམྨསངྒཎཱིདྷཱཏུཀཐཱདཱིནམྤི ཝསེན ཨབྷིདྷམྨཔཱལི༹ཡཱ ཨཏིརེཀཝིསེསབྷཱཝོ དསྶེཏབྦོཏི? སཙྩམེཏཾ, སོ པན ཨེཀནྟཨབྷིདྷམྨནཡནིསྶིཏོ ཨཝུཏྟོཔི སིདྡྷོཏི ཀཏྭཱ ན དསྶིཏོ. ཨེཏེན ཝཱ ནིདསྶནེན སོཔི སབྦོ ནེཏབྦོ. ཨབྷིདྷམྨནཡསཱམཉྙེན ཝཱ ཨབྷིདྷམྨབྷཱཛནཱིཡཔཉྷཔུཙྪཀེཧི སོ ཝུཏྟོ ཨེཝཱཏི ན ཝུཏྟོཏི དཊྛབྦོ.

པཉྷཝཱརཱཏི པུཙྪནཝིསྶཛྫནཝསེན པཝཏྟཱ པཱལི༹ནཡཱ. ཨེཏྠེཝཱཏི དྷམྨཧདཡཝིབྷངྒེ ཨེཝ. ཨཔེཀྑཱཝསིཀཏྟཱ ཨཔྤམཧནྟབྷཱཝསྶ ཡཏོ ཨཔྤམཏྟིཀཱ མཧཱདྷཱཏུཀཐཱཏནྟི དྷམྨཧདཡཝིབྷངྒཝཙནཝསེན ཨཝསེསཱ, ཏཾ དསྶནཏྠཾ ‘‘དྷམྨཧདཡཝིབྷངྒེ ཨནཱགནྟྭཱ མཧཱདྷམྨཧདཡེ ཨཱགཏཏནྟིཏོ’’ཏི ¶ ཝུཏྟཾ. དྷམྨཧདཡ…པེ… ཨཱགཏཏནྟིཏོ རཱུཔཀཎྜདྷཱཏུཝིབྷངྒཱདཱིསུ ཨནཱགནྟྭཱ མཧཱདྷཱཏུཀཐཱཡཾ ཨཱགཏཏནྟི ཨཔྤམཏྟིཀཱཝཱཏི སམྦནྡྷོ ¶ . ཨཐ དྷཱཏུཀཐཱཡ ཝིཏྠཱརཀཐཱ མཧཱདྷཱཏུཀཐཱ དྷམྨཧདཡཝིབྷངྒེ ཨནཱགནྟྭཱ མཧཱདྷམྨཧདཡེ ཨཱགཏཏནྟིཏོ དྷཱཏུཀཐཱཡཾ ཨནཱགནྟྭཱ མཧཱདྷཱཏུཀཐཱཡ ཨཱགཏཏནྟི ཨཔྤམཏྟིཀཱཝཱཏི ཡོཛེཏབྦཾ.

ཨུཔལབྦྷཏཱིཏི ཨནུལོམཔཙྩནཱིཡཔཉྩཀསྶ, ནུཔལབྦྷཏཱིཏི པཙྩནཱིཡཱནུལོམཔཉྩཀསྶ ཨུཔལཀྑཎཝསེན ཝུཏྟཾ. སཙྩིཀཊྛཾ ནིསྶཡནྟི ‘‘སབྦཏྠཱ’’ཏིཨཱདིནཱ དེསཱདིཨནཱམསནེན རཱུཔཱདིསཏྟཔཉྙཱསདྷམྨཔྤབྷེདཾ སཙྩིཀཊྛམེཝ ནིསྶཡབྷཱུཏཾ. སབྦཏྠཱཏི ཨེཏྠཱཔི ‘‘ཨུཔལབྦྷཏི ནུཔལབྦྷཏཱིཏི པཊིཉྙཱཡ གཧིཏཱཡ པཊིཀྑེཔགྒཧཎཏྠ’’ནྟི ཨཱནེཏྭཱ སམྦནྡྷནཱིཡཾ, ཏཐཱ སབྦདཱ སབྦེསཱུཏི ཨེཏྠཱཔི. ཡདི ཁནྡྷཱཡཏནཱདཡོ གཧིཏཱ ཨཊྛཀཐཱཡཾ ཨཱགཏནཡེན, ཨཐ པན ཝུཏྟནྟི སམྦནྡྷོ. ཡོ སཙྩིཀཊྛོཏི སཙྩིཀཊྛནིསྶཡཾ ཨུཔལཀྑེཏི. ཨེཏེཧཱིཏི ཨེཏེཧི ཝཙནེཧི. སཙྩིཀཊྛདེསཀཱལཔྤདེསེཧི ཀཐཾ སཙྩིཀཊྛཱདཱིནཾ པདེསོ ཨེཀདེསབྷཱུཏོ སབྦོཏི ཝུཙྩཏི? པདེསཱནཾ པུཐུཏྟཱ. ‘‘སབྦེསུ པདེསེསཱུ’’ཏི པཙྩེཀཾ བྷེདཱམསནཝསེན ཙཱཡཾ པཉྷོ པཝཏྟོཏི ན པུརིམེཧི ཨཝསེསོ.

ཨུཔལབྦྷཏི…པེ… མིཙྪཱཏི ཨེཀནྟི ཨུཔལབྦྷཏཱིཏི པཊིཉྙཱགྒཧཎཔཊིཀྑེཔགྒཧཎནིགྒཎྷནཱནཾ ཨནུལོམཔཊིལོམཏོ པཊིཉྙཱཋཔནནིགྒཧཔཱཔནཱརོཔནཱནཉྩ ཝསེན པཝཏྟཱ ཏནྟི པཋམཔཉྩཀསྶ ཨེཀཾ ཨངྒཾ ཨེཀོ ཨཝཡཝོཏི ཨཏྠོ. ཨེཝཾ སེསེསུཔི ནེཏབྦཾ. ནིགྒཧསྶ སུནིགྒཧབྷཱཝཾ ཨིཙྪཏོ སཀཝཱདིནོ ‘‘ཏྭཾ ཙེ པན མཉྙསི ཝཏྟབྦེ ཁོ པུགྒལོ ནུཔལབྦྷཏཱི’’ཏིཨཱདིནཱ (ཀཐཱ. ༣) པཊིཉྙཱཋཔནེན, ཏེན ‘‘ཏཝ ཏཏྠ ཧེཏཱཡ པཊིཉྙཱཡ ཧེཝཾ པཊིཛཱནནྟོ ཧེཝཾ ནིགྒཧེཏབྦེ ཨཐ ཏཾ ནིགྒཎྷཱམ སུནིགྒཧིཏོ ཙ ཧོཏཱི’’ཏི ཝཏྭཱ ‘‘ཧཉྩི པུགྒལོ ནུཔལབྦྷཏཱི’’ཏིཨཱདིནཱ (ཀཐཱ. ༢) པརཝཱདིནོ ཨཏྟནོ པཊིཀམྨཾ ཡཐཱ སཀཝཱདཱི ན ནིབྦེཋེཏི, ཨེཝཾ ཀརཎཾ པཊིཀམྨཝེཋནཾ. པརཝཱདིནོ པཊིཀམྨསྶ དུཔྤཊིཀམྨབྷཱཝཾ ཨིཙྪཏོ སཀཝཱདིནོ ཏཾནིདསྶནེན ‘‘ཨེསོ ཙེ དུནྣིགྒཧིཏོ ཧེཝ’’ནྟི པཊིཀམྨནིདསྶནེན, ‘‘ཝཏྟབྦེ ཁོ པུགྒལོ ཨུཔལབྦྷཏི…པེ… པརམཏྠེནཱཏི (ཀཐཱ. ༡). ནོ ཙ མཡཾ ཏཡཱ ཏཏྠ ཧེཏཱཡ པཊིཉྙཱཡ ཧེཝཾ པཊིཛཱནནྟོ ཧེཝཾ ནིགྒཧེཏབྦཱ. ཨཐ ཨམྷེ ནིགྒཎྷཱསི དུནྣིགྒཧིཏཱ ཙ ཧོམཱ’’ཏི ཝཏྭཱ ‘‘ཧཉྩི པུགྒལོ ཨུཔལབྦྷཏཱི’’ཏིཨཱདིནཱ (ཀཐཱ. ༥) ནིགྒཧསྶ དུནྣིགྒཧིཏབྷཱཝདསྶནེན ¶ ཨནིགྒཧིཏབྷཱཝཀརཎཾ ནིགྒཧནིབྦེཋནཾ. ‘‘ཏེན ཧི ཡཾ ནིགྒཎྷཱསི ཧཉྩི ¶ པུགྒལོ ཨུཔལབྦྷཏཱི’’ཏིཨཱདིཾ ཝཏྭཱ ‘‘ཏེན ཧི ཡེ ཀཏེ ནིགྒཧེ སེ ནིགྒཧེ དུཀྐཊེ སུཀཏེ པཊིཀམྨེ སུཀཏཱ པཊིཔཱདནཱ’’ཏི སཀཝཱདིནོ ནིགྒཧསྶ, ཨནིགྒཧབྷཱཝཱརོཔནེན ཨཏྟནོ པཊིཀམྨསྶ སུཔཊིཀམྨབྷཱཝཀརཎེན ཙ སཀཝཱདིནོ ནིགྒཧསྶ ཚེདོ ཝིནཱསནཾ པུགྒལཝཱདནིསེདྷནཝསེན སམུཊྛིཏཏྟཱ. དྷམྨཏཱཡ ཨནུལོམནཝསེན ཨུཊྛཧིཏྭཱ ཏབྦིལོམནཝསེན པཝཏྟོ ཨནུལོམཔཙྩནཱིཀཔཉྩཀོ ཝུཏྟཝིཔརིཡཱཡེན དུཏིཡཔཉྩཀོ ཝེདིཏབྦོ.

ཏདཱདྷཱརོཏི ཏེ སཙྩིཀཊྛཔརམཏྠཱ རཱུཔཱདཡོ ཨཱདྷཱརཱ ཨེཏསྶཱཏི ཏདཱདྷཱརོ. ཨེཏེན ‘‘རཱུཔསྨིཾ ཨཏྟཱ’’ཏི ཨེཝཾཔཀཱརོ པུགྒལཝཱདོ དསྶིཏོ ཧོཏི. ཏེསཾ ཝཱ ཨཱདྷཱརབྷཱུཏོཏི ཨེཏེན ‘‘ཨཏྟནི རཱུཔ’’ནྟི ཨེཝཾཔཀཱརོ. ཨཉྙཏྲ ཝཱ ཏེཧཱིཏི ཏེཧི རཱུཔཱདཱིཧི ཝིནཱ. ཨཱདྷཱརཱདྷེཡྻཱདིབྷཱཝེན ཨསཾསཊྛོ ཝིསུཾཡེཝ ཝིནཱ. ཏེན སཏྟཱདིགུཎེཧི ཨཝོཀིཎྞོ པུརིསོཏི ཨེཝམཱདིཀོ. ཏཾསཱམིབྷཱུཏཏཱཡ ཝཱ ཏདདྷཱིནབྷཱཝེན ‘‘ཨཉྙཏྲ ཝཱ ཏེཧཱི’’ཏི ཝུཏྟནྟི ‘‘རཱུཔཝཱ ཨཏྟཱ’’ཏི ཨེཝཾཔཀཱརོ པུགྒལཝཱདོ དསྶིཏོཏི ཝེདིཏབྦོ. ཨནཉྙོཏི ཨེཏེན ‘‘རཱུཔཾ ཨཏྟཱ’’ཏི ཨེཝཾཔཀཱརོ. རུཔྤནཱདིསབྷཱཝོ རཱུཔཀྑནྡྷཱདཱིནཾ ཝིསེསལཀྑཎཾ, སཔྤཙྩཡཱདིསབྷཱཝོ སཱམཉྙལཀྑཎཾ. རཱུཔཱདིཏོ ཨཉྙོ ཨནཉྙོ ཝཱ ཨཉྙཏྟེ ཙ ཏདཱདྷཱརཱདིབྷཱུཏོ ཨུཔལབྦྷམཱནོ ཨཱཔཛྫཏཱིཏི ཨནུཡུཉྫཏི སཀཝཱདཱི པཀཱརནྟརསྶ ཨསམྦྷཝཏོ. པུགྒལཝཱདཱི པུགྒལསྶ རཱུཔཱདཱིཧི ན ཨཉྙཏྟཾ ཨིཙྪཏི རཱུཔཱདི ཝིཡ པཙྩཀྑཏོ ཨནུམཱནཏོ ཝཱ གཱཧཡིཏུཾ ཨསཀྐུཎེཡྻཏྟཱ ཏསྶ ཙ ཀཱརཀཝེདཀབྷཱཝསྶ ཨཡུཛྫམཱནཀཏྟཱ. ནཱཔི ཨནཉྙཏྟཾ རུཔྤནསཔྤཙྩཡཱདིསབྷཱཝཔྤསངྒཏོ པུགྒལསྶེཝ ཨབྷཱཝཔྤསངྒཏོ ཙ. ཡཐེཝ ཧི ན ཝིནཱ ཨིནྡྷནེན ཨགྒི པཉྙཱཔིཡཏི, ན ཙ ཨཉྙཾ ཨིནྡྷནཏོ ཨགྒིཾ སཀྐཱ པཊིཛཱནིཏུཾ, ནཱཔི ཨནཉྙཾ. ཡདི ཧི ཨཉྙོ སིཡཱ, ན ཨུཎྷཾ ཨིནྡྷནཾ སིཡཱ. ཨཐ ཨནཉྙོ, ནིདྡཧིཏབྦཾཡེཝ དཱཧཀཾ སིཡཱ. ཨེཝམེཝ ན ཝིནཱ རཱུཔཱདཱིཧི པུགྒལོ པཉྙཱཔིཡཏི, ན ཙ ཏེཧི ཨཉྙོ, ནཱཔི ཨནཉྙོ སསྶཏུཙྪེདབྷཱཝཔྤསངྒཏོཏི ལདྡྷིཡཾ ཋཏྭཱ པུགྒལཝཱདཱི ‘‘ན ཧེཝཱ’’ཏི པཊིཀྑིཔཏི. ཏཏྠ ཨགྒིནྡྷནོཔམཱ ཏཱཝ ཡདི ལོཀཝོཧཱརེན ཝུཏྟཱ, ཨཔལི༹ཏྟཾ ཀཊྛཱདིཨིནྡྷནཾ ནིདྡཧིཏབྦཉྩ, པལི༹ཏྟཾ བྷཱསུརུཎྷཾ ཨགྒི དཱཧཀཉྩ, ཏཉྩ ཨོཛཊྛམཀརཱུཔཾ པུརིམཔཙྪིམཀཱལིཀཾ ¶ ཨནིཙྩཾ སངྑཏཾ པཊིཙྩསམུཔྤནྣཾ, ཡདི ཨེཝཾ པུགྒལོ རཱུཔཱདཱིཧི ཨཉྙོ ཨནིཙྩོ ཙ ཨཱཔནྣོ. ཨཐ པརམཏྠཏོ, ཏསྨིཾཡེཝ ཀཊྛཱདིཀེ པལི༹ཏྟེ ཡཾ ཨུསུམཾ སོ ཨགྒི, ཏཾསཧཛཱཏཱནི ཏཱིཎི བྷཱུཏཱནི ཨིནྡྷནཾ, ཨེཝམྤི སིདྡྷཾ ལཀྑཎབྷེདཏོ ཨགྒིནྡྷནཱནཾ ཨཉྙཏྟནྟི ཨགྒི ཝིཡ ཨིནྡྷནཏོ རཱུཔཱདཱིཧི ཨཉྙོ པུགྒལོ ཨནིཙྩོ ཙ ཨཱཔནྣོཏི བྱཱཧཏཱཏི ཝེདིཏབྦཾ.

པུགྒལོ ¶ ཨུཔལབྦྷཏཱིཏི པཊིཛཱནནྟསྶ པཀཱརནྟརསྶ ཨསམྦྷཝཏོ ཝུཏྟེསུ པཀཱརེསུ ཨེཀེན པཀཱརེན ཨུཔལབྦྷམཱནོ ཨུཔལབྦྷཏཱིཏི ‘‘ཨཱཔནྣ’’ནྟི ཝུཏྟཾ ‘‘པཊིཉྙཱཡ ཨེཀཏྟཱཔནྣ’’ནྟི. ཨེཀཏྟཱཔནྣཏྟཱ ཨེཝ ཨཔྤཊིཀྑིཔིཏབྦཾ, པུགྒལེ པཊིསིདྡྷེ ཏདབྷིནིཝེསོཔི ཨཡཱཐཱཝཏོ པུགྒལཝཱདིནོ གཧིཏཱཀཱརསུཉྙཏཱཝིབྷཱཝནེན སཀཊྛཱནཏོ ཙཱཝིཏོ པཊིསེདྷིཏོ ཨེཝ ནཱམ ཧོཏཱིཏི ཝུཏྟཾ ‘‘པུགྒལདིཊྛིཾ པཊིསེདྷེནྟོ’’ཏི. པུགྒལོཡེཝ ཝཱ ཏཐཱ པསྶིཏབྦཏྟཱ དིཊྛི. ‘‘སཱམཱི ནིཝཱསཱི ཀཱརཀོ ཝེདཀོ ནིཙྩོ དྷུཝོ’’ཏི ཨབྷིནིཝེསཝིསཡབྷཱུཏོ ཧི པརིཀཔྤམཏྟསིདྡྷོ པུགྒལོ ཨིདྷ པཊིཀྑིཔཱིཡཏི, ‘‘ན ཙཏྟཱརོམེ, བྷིཀྑཝེ, པུགྒལཱ’’ཏིཨཱདིནཱ ཝུཏྟཝོཧཱརཔུགྒལོཏི ཨནནུཡོགོ ཨཱཀཱསཀུསུམསྶ རཏྟནཱིལཱདིབྷཱཝཝིཙཱརཎཱ ཝིཡཱཏི ཨཏྠོ. པུབྦེ ‘‘ནུཔལབྦྷཏཱི’’ཏི པཊིཛཱནིཏྭཱ ཝིསེསཙོདནཱཡ ཨནཱཔཛྫནཏོ པུན ‘‘ན ཧེཝཱ’’ཏི པཊིཀྑེཔོ པཊིཉྙཱཡ ཨཱཔཛྫནལེསོ. ཝཉྫྷཱཔུཏྟཀསྶ དཱིགྷརསྶཏཱནུཡོགསྶ ཝིཡ སབྦེན སབྦཾ པརམཏྠཏོ ཨནུཔལབྦྷམཱནསྶ པུགྒལསྶ རཱུཔཱདཱིཧི ཨཉྙཱནཉྙཏཱནུཡོགསྶ ཨནནུཡོགབྷཱཝོ ཨེཝ ཨིདྷ ཨཝིཔརཱིཏཏྠོ.

ཡཾཀཱརཎཱཏི ཨེཏེན ‘‘ཡཏོནིདཱན’’ནྟི ཨེཏྠ ཝིབྷཏྟིཨལོཔོ དཊྛབྦོཏི དསྶེཏི. ཨཛ྄ཛྷཱཙརནྟཱིཏི ཨབྷིབྷཝནྟི. ཨབྷིནནྡནཱདཡོ ཏཎྷཱདཱིཧི ཡཐཱསངྑྱཾ ཡོཛེཏབྦཱ, ཏཎྷཱདིཊྛཱིཧི ཝཱ ཨབྷིནནྡནཛ྄ཛྷོསཱནཱནི, ཏཱིཧིཔི ཨབྷིཝདནཾ ཨཝིསེསེན ཝཱ ཏཱིཧིཔི ཏཡོ ཡོཛེཏབྦཱ. ཨེཏྠ ཙེ ནཏྠི ཨབྷིནནྡིཏབྦནྟིཨཱདིནཱ ཨབྷིནནྡནཱདཱིནཾ ཨབྷཱཝསཱུཙནེན ཕལཱུཔཙཱརཏོ ཨབྷིནནྡནཱདཱིནཾ སམུཙྪེདཔཊིཔྤསྶདྡྷིབྷཱུཏཾ མགྒཕལཾ ཝུཙྩཏི, ཏཾ པཙྩཱམསནཉྩ ཨེསེཝཱཏི ཨིདནྟི ཀཏྭཱ ཝུཏྟཾ ‘‘ཨབྷི…པེ… ཕལཾ ཝཱ’’ཏི.

‘‘ཉཱཡཏཱིཏི ཛཱན’’ནྟི ཨུཀྐཾསགཏིཝིཛཱནནེན ནིརཝསེསཾ ཉེཡྻཛཱཏཾ པརིགྒཡ྄ཧཏཱིཏི ཏབྦིསཡཱཡ ཛཱནཱཏིཀིརིཡཱཡ སབྦཉྙུཏཉྙཱཎམེཝ ཀརཎཾ བྷཝིཏུམརཧཏཱིཏི ¶ ‘‘སབྦཉྙུཏཉྙཱཎེན ཛཱནིཏབྦཾ ཛཱནཱཏཱི’’ཏི ཝུཏྟཾ. ཨཐ ཝཱ པཀརཎཝསེན, ‘‘བྷགཝཱ’’ཏི སདྡནྟརསནྣིདྷཱནེན ཝཱ ཨཡཾ ཨཏྠོ ཝིབྷཱཝེཏབྦོ. པསྶཾ པསྶཏཱིཏི ཨེཏྠཱཔི ཨེསེཝ ནཡོ. ཛཱནནྟཱཔི ཝིཔལླཱསཝསེན ཛཱནནྟི ཏིཏྠིཡཱ པཋམཛ྄ཛྷཱནཨརཱུཔཛ྄ཛྷཱནེཧི ཀཱམརཱུཔཔརིཉྙཱཝཱདིནོ. ཛཱནནྟོ ཛཱནཱཏིཡེཝ བྷགཝཱ ཨནཱགཱམིཨརཧཏྟམགྒེཧི ཏཾཔརིཉྙཱཝཱདིཏཱཡ. ཨཡཉྩ ཨཏྠོ དུཀྑཀྑནྡྷསུཏྟཝསེན (མ. ནི. ༡.༡༦༣, ༡༧༥ ཨཱདཡོ) ཝིབྷཱཝེཏབྦོ. པཉྙཱཙཀྑུནཱ ཨུཔྤནྣཏྟཱ ཝཱ ཙཀྑུབྷཱུཏོ. ཉཱཎབྷཱུཏོཏིཨཱདཱིསུཔི ཨེསེཝ ནཡོ. ཨཐ ཝཱ དིབྦཙཀྑུཨཱདིཀཾ ¶ པཉྩཝིདྷམྤི ཙཀྑུཾ བྷཱུཏོ པཏྟོཏི ཙཀྑུབྷཱུཏོ. ཨེཝཾ ཉཱཎབྷཱུཏོཏིཨཱདཱིསུཔི དཊྛབྦཾ. སཱམུཀྐཾསིཀཱཡ དྷམྨདེསནཱཡ སཱཏིསཡོ བྷགཝཏོ ཝཏྟུཨཱདིབྷཱཝོཏི ཝུཏྟཾ ‘‘ཙཏུསཙྩདྷམྨེ ཝདཏཱིཏི ཝཏྟཱ’’ཏིཨཱདི. ‘‘པཝཏྟཱ’’ཏི ཨེཏྠ པ-ཀཱརསྶ པཀཊྛཏྠཏཾ དསྶེཏུཾ ‘‘ཙིརཾ…པེ… པཝཏྟཱ’’ཏི ཨཱཧ. ནིདྡྷཱརེཏྭཱ ནེཏཱ ནིནྣེཏཱ.

‘‘ཨེཀཱུནནཝུཏི ཙིཏྟཱནཱི’’ཏི ཝུཏྟཱ ཙིཏྟསཧཙརིཡཱཡ ཡཐཱ ‘‘ཀུནྟཱ པཙརནྟཱི’’ཏི. ཏེསཉྩ པཱལི༹པདེསཱནཾ ཨེཀེཀཾ པདཾ ཨུདྡྷརིཏྭཱཔི ཀིཉྩཱཔི ཀུསལཏྟིཀཔདཱནིཡེཝ ཨུདྡྷརིཏྭཱ ཙིཏྟུཔྤཱདཀཎྜེ ཙིཏྟཱནི ཝིབྷཏྟཱནི, ཀུསལཏྟིཀེན པན སབྷཱཝདྷམྨསངྒཧིཏཱནཾ སེསཏྟིཀདུཀཔདཱནཾ ཨསངྒཧིཏཱནཾ ཨབྷཱཝཏོ ཀུསལཏྟིཀཔདུདྡྷཱརེན ནཡདསྶནབྷཱུཏེན ཨིཏརཏྟིཀདུཀཔདཱནིཔི ཨུདྡྷཊཱནེཝཱཏི ཝུཏྟཾ. ཨེཝཉྩ ཀཏྭཱ མཱཏིཀཱགྒཧཎཾ སམཏྠིཏཾ བྷཝཏི.

སོ ཙ དྷམྨོཏི ‘‘ཏཡོ ཀུསལཧེཏཱུ’’ཏིཨཱདཱིསུ (དྷ. ས. ༡༠༦༠) པུརིམཱཡ པུརིམཱཡ པཱལི༹ཡཱ པཙྪིམཱ པཙྪིམཱ ཨཏྠནིདྡེསོཏི ཝུཏྟཾ. ‘‘སམཱནེནྟཱི’’ཏིསདྡསྶ པཊཔཊཱཡཏི-སདྡསྶ ཝིཡ སདྡནཡོ དཊྛབྦོཏི དསྶེཏུཾ ‘‘སམཱནཾ ཀརོནྟཱི’’ཏི ཝུཏྟཾ. སམཱནཀརཎཉྩ ཨཱུནཔཀྑིཔནེན ཨདྷིཀཱཔནཡནེན ཝཱ ཧོཏི, ཨིདྷ ཨཱུནཔཀྑིཔནེནཱཏི དསྶེཏུཾ ‘‘པཱུརེནྟཱི’’ཏི ཝུཏྟཾ. སམཱནེཏབྦནྟི ཨེཏྠཱཔཱིཏི ‘‘པཊྛཱནཾ སམཱནེཏབྦ’’ནྟི ཨེཏྠ.

བལཝཏཱ ཉཱཎཝེགེན ཨབྷིདྷམྨཔཙྩཝེཀྑཎཝསཔྤཝཏྟེན. བལཝཏོ ཉཱཎཝེགསྶ སབྦཀིལེསཀྑེཔནཝསཔྤཝཏྟསྶ. གམྦྷཱིརམེཝ གམྦྷཱིརགཏཾ དིཊྛིགཏནྟིཨཱདཱིསུ ཝིཡ. ནིརཝསེསེནཱཏི ན ཀཉྩི ཨཝསེསེཏྭཱ. པཉྩཁཱིལརཧིཏེནཱཏི པཉྩཙེཏོཁཱིལརཧིཏེན.

ཨེཀཱདྷིཀེསུ ¶ ཨཊྛསུ ཀིལེསསཏེསཱུཏི ‘‘ཛཱཏིམདོ’’ཏིཨཱདིནཱ ཨེཀཀཝསེན ཨཱགཏཱ ཏེསཏྟཏི, ‘‘ཀོདྷོ ཙ ཨུཔནཱཧོ ཙཱ’’ཏིཨཱདིནཱ དུཀཝསེན ཚཏྟིཾས, ‘‘ཏཱིཎི ཨཀུསལམཱུལཱནཱི’’ཏིཨཱདིནཱ ཏིཀཝསེན པཉྩཱདྷིཀཾ སཏཾ, ‘‘ཙཏྟཱརོ ཨཱསཝཱ’’ཏིཨཱདིནཱ ཙཏུཀྐཝསེན ཚཔྤཉྙཱས, ‘‘པཉྩོརམྦྷཱགིཡཱནི སཾཡོཛནཱནཱི’’ཏིཨཱདིནཱ པཉྩཀཝསེན པཉྩསཏྟཏི, ‘‘ཚ ཝིཝཱདམཱུལཱནཱི’’ཏིཨཱདིནཱ ཚཀྐཝསེན ཙཏུརཱསཱིཏི, ‘‘སཏྟ ཨནུསཡཱ’’ཏིཨཱདིནཱ སཏྟཀཝསེན ཨེཀཱུནཔཉྙཱས, ‘‘ཨཊྛ ཀིལེསཝཏྠཱུནཱི’’ཏིཨཱདིནཱ ¶ ཨཊྛཀཝསེན ཙཏུསཊྛི, ‘‘ནཝ ཨཱགྷཱཏཝཏྠཱུནཱི’’ཏིཨཱདིནཱ ནཝཀཝསེན ཨེཀཱསཱིཏི, ‘‘དས ཀིལེསཝཏྠཱུནཱི’’ཏིཨཱདིནཱ དསཀཝསེན སཏྟཏི, ‘‘ཨཛ྄ཛྷཏྟིཀསྶུཔྤཱདཱཡ ཨཊྛཱརས ཏཎྷཱཝིཙརིཏཱནཱི’’ཏིཨཱདིནཱ ཨཊྛཱརསཀཝསེན ཨཊྛསཏནྟི ཨེཝཾ ཨེཀཱདྷིཀེསུ ཨཊྛསུ ཀིལེསསཏེསུ. སེསཱ ཏེནཝུཏཱདྷིཀཾ ཚསཏཾ ཀིལེསཱ. ཏེ བྲཧྨཛཱལསུཏྟཱགཏཱཧི དྭཱསཊྛིཡཱ དིཊྛཱིཧི སཧ པཉྩཔཉྙཱསཱདྷིཀཾ སཏྟསཏཾ ཧོནྟི.

ཨཐ ཝཱ ཙུདྡསེཀནྟཱཀུསལཱ, པཉྩཝཱིསཏི ཀུསལཱབྱཱཀཏསཱདྷཱརཎཱ, ཙུདྡས ཀུསལཏྟིཀསཱདྷཱརཎཱ, ཨུཔཙཡཱདིདྭཡཾ ཨེཀཾ ཀཏྭཱ སཏྟཝཱིསཏི རཱུཔཱནི ཙཱཏི ཨིམེ ཨསཱིཏི དྷམྨཱ, ཨིམེསུ བྷཱཝདྭཡེ ཨེཀཾ ཋཔེཏྭཱ ཨཛ྄ཛྷཏྟིཀཱ ཨེཀཱུནཱསཱིཏི, བཱཧིརཱ ཨེཀཱུནཱསཱིཏཱིཏི སབྦེཔི ཨཊྛཔཉྙཱསཱདྷིཀཾ སཏཾ ཧོནྟི. ཨིམེསུ ཨེཀེཀསྨིཾ དསནྣཾ དསནྣཾ ཀིལེསཱནཾ ཨུཔྤཛྫནཏོ ཨསཱིཏིཨདྷིཀཾ དིཡཌྜྷཀིལེསསཧསྶཾ ཧོནྟི.

ཨཐ ཝཱ ཏེཔཉྙཱས ཨརཱུཔདྷམྨཱ, ཨཊྛཱརས རཱུཔརཱུཔཱནི, ཨཱཀཱསདྷཱཏུ, ལཀྑཎརཱུཔཱནི ཙཱཏི པཉྩསཏྟཏི དྷམྨཱ ཨཛ྄ཛྷཏྟབཧིདྡྷཱབྷེདཏོ པཉྙཱསསཏཾ ཧོནྟི. ཏཏྠ ཨེཀེཀསྨིཾ དས དས ཀིལེསཱཏིཔི དིཡཌྜྷཀིལེསསཧསྶཾ. ཏཐཱ ཨེཏྠ ཝེདནཾ སུཁིནྡྲིཡཱདིཝསེན པཉྩཝིདྷཾ ཀཏྭཱ སཏྟཔཉྙཱས ཨརཱུཔདྷམྨཱ, ཨཊྛཱརས རཱུཔརཱུཔཱནི ཙཱཏི པཉྩསཏྟཏི ཝིཔསྶནཱུཔགདྷམྨཱ ཨཛ྄ཛྷཏྟབཧིདྡྷཱབྷེདཏོ པཉྙཱསསཏཾ ཧོནྟི. ཨེཏེསུ ཨེཀེཀསྨིཾ དས དས ཀིལེསཱཏིཔི དིཡཌྜྷཀིལེསསཧསྶཾ.

ཨཔརོ ནཡོ – དྭཱདསཨཀུསལཙིཏྟུཔྤཱདེསུ པཋམེ ཚ ཀིལེསཱ, དུཏིཡེ སཏྟ, ཏཏིཡེ ཚ, ཙཏུཏྠེ སཏྟ, པཉྩམེ ཚ, ཚཊྛེ སཏྟ, སཏྟམེ ཚ, ཨཊྛམེ སཏྟ, ནཝམེ པཉྩ, དསམེ ཚ, ཨེཀཱདསམེ པཉྩ, དྭཱདསམེ ཙཏྟཱརོཏི སབྦེ དྭཱསཏྟཏི, ཨིམེ པཉྩདྭཱརིཀཱ པཉྩསུ རཱུཔཱདཱིསུ ཨཱརམྨཎེསུ ¶ ཨེཀེཀསྨིཾ དྭཱསཏྟཏཱིཏི སཊྛིཨདྷིཀཱནི ཏཱིཎི སཏཱནི, མནོདྭཱརིཀཱ པན ཚསུ ཨཱརམྨཎེསུ ཨེཀེཀསྨིཾ དྭཱསཏྟཏི དྭཱསཏྟཏཱིཏི ཀཏྭཱ དྭཏྟིཾསཱདྷིཀཱནི ཙཏྟཱརི སཏཱནི, སབྦཱནིཔི དྭཱནཝུཏིཨདྷིཀཱནི སཏྟསཏཱནི, ཏཱནི ཨཛ྄ཛྷཏྟབཧིདྡྷཱཝིསཡཏཱཡ ཙཏུརཱསཱིཏིཨདྷིཀཾ དིཡཌྜྷཀིལེསསཧསྶཾ ཧོནྟཱིཏི ཝེདིཏབྦཾ.

ཨཐ ཝཱ རཱུཔཱརམྨཎཱདཱིནི པཉྩ, ཨཝསེསརཱུཔཝེདནཱསཉྙཱསངྑཱརཝིཉྙཱཎཝསེན པཉྩ དྷམྨཱརམྨཎཀཱ སེསཱ ཙཱཏི དས, ཏེ ཨཛ྄ཛྷཏྟབཧིདྡྷཱབྷེདཏོ ཝཱིསཏི, པཉྙཏྟི ཙཱཏི ཨེཀཝཱིསཏིཡཱ ¶ ཨཱརམྨཎེསུ དྭཱསཏྟཏི དྭཱསཏྟཏི ཀིལེསཱཏི དྭཱདསཱདྷིཀཾ དིཡཌྜྷཀིལེསསཧསྶཾ ཧོནྟི.

ཨཐ ཝཱ དྭཱདསསུ ཨཀུསལཙིཏྟུཔྤཱདེསུ པཋམེ ཝཱིསཏི དྷམྨཱ, དུཏིཡེ དྭཱཝཱིསཏི, ཏཏིཡེ ཝཱིསཏི, ཙཏུཏྠེ དྭཱཝཱིསཏི, པཉྩམེ ཨེཀཱུནཝཱིསཏི, ཚཊྛེ ཨེཀཱུནཝཱིསཏི, སཏྟམེ ཨེཀཱུནཝཱིསཏི, ཨཊྛམེ ཨེཀཝཱིསཏི, ནཝམེ ཨེཀཱུནཝཱིསཏི, དསམེ ཨེཀཝཱིསཏི, ཨེཀཱདསམེ སོལ༹ས, དྭཱདསམེ སོལ༹སཱཏི སབྦེ ཨཀུསལདྷམྨཱ ཚཏྟིཾསཱདྷིཀཱནི དྭེ སཏཱནི, ཨིམེ ཚསུ ཨཱརམྨཎེསུ པཙྩེཀཾ ཚཏྟིཾ སཱདྷིཀཱནི དྭེ སཏཱནི, སབྦེ སོལ༹སཱདྷིཀཱནི ཙཏྟཱརི སཏཱནི ཙ སཧསྶཾ ཧོནྟཱིཏི ཨེཝམྤི དིཡཌྜྷཀིལེསསཧསྶཾ ཝེདིཏབྦཾ.

ཨིཏརེསནྟི ཏཎྷཱཝིཙརིཏཱནཾ ‘‘ཨཏཱིཏཱནི ཚཏྟིཾསཱ’’ཏིཨཱདིནཱ ཨཏཱིཏཱདིབྷཱཝཱམསནཏོ. ཁེཔནེཏི ཨརིཡམགྒེན སམུཙྪིནྡནེ. ‘‘དིཡཌྜྷཀིལེསསཧསྶཾ ཁེཔེཏྭཱ’’ཏི ཧི ཝུཏྟཾ. པརམཏྠཏོ ཨཏཱིཏཱདཱིནཾ མགྒེན ཨཔྤཧཱཏབྦཏྟཱ ‘‘ཨཏཱིཏཱདིབྷཱཝཱམསནཱ ཨགྒཧཎཾ ཁེཔནེ’’ཏི ཝུཏྟཾ. ཡཾ པན པཊྛཱནེ ‘‘དསྶནེན པཧཱཏབྦོ དྷམྨོ དསྶནེན པཧཱཏབྦསྶ དྷམྨསྶ ཨནནྟརཔཙྩཡེན པཙྩཡོ’’ཏིཨཱདིནཱ ཏིཀེ, ཏཐཱ དསྶནེན པཧཱཏབྦཱཏཱིཏཏིཀཏིཀེ ‘‘ཨཏཱིཏཱ དསྶནེན པཧཱཏབྦཱ’’ཏིཨཱདིནཱ ཙ ཏཱིསུ ¶ ཀཱལེསུ དསྶནཱདིཔཧཱཏབྦཝཙནཾ ཀཏཾ, ཏཾ ཨཏཱིཏཱདཱིནཾ སཾཀིལིཊྛཏཱཡ ཨཔཱཡགམནཱིཡཏཱཡ ཙ དསྶནཔཧཱཏབྦེཧི ནིརཏིསཡཏྟཱ ཝུཏྟནྟི དཊྛབྦཾ.

ན བྷཱསིཏཏྠཝཙནནྟི ཨིདཾ ‘‘ཧིཏཔརིཡཱཡཝཙན’’ནྟི ཨེཏེན ནིཝཏྟིཏསྶ ཨེཀདེསཀཐནཾ. ཡཐཱ ཧི ཨཡཾ ཨཏྠ-སདྡོ ན བྷཱསིཏཏྠཝཙནཾ, ཨེཝཾ ཝིསཡཔྤཡོཛནཱདིཝཙནམྤི ན ཧོཏཱིཏི. ཡཐཱཝུཏྟསྶཱཏི ཧིཏཔརིཡཱཡསྶ. ‘‘ན ཧཉྙདཏྠཏྠིཔསཾསལཱབྷཱ’’ཏི པདསྶ ནིདྡེསེ ‘‘ཨཏྟཏྠོ ཝཱ པརཏྠོ ཝཱ’’ཏིཨཱདིནཱ (མཧཱནི. ༦༩) ཀིཉྩཱཔི སུཏྟནིརཔེཀྑཾ ཨཏྟཏྠཱདཡོ ཝུཏྟཱ སུཏྟཏྠབྷཱཝེན ཨནིདྡིཊྛཏྟཱ, ཏེསུ པན ཨེཀོཔི ཨཏྠཔྤབྷེདོ སུཏྟེན དཱིཔེཏབྦཏཾ ནཱཏིཀྐམཏཱིཏི ཨཱཧ ‘‘ཏེ སུཏྟཾ སཱུཙེཏཱི’’ཏི. ཨིམསྨིཾ ཝིཀཔྤེ ཨཏྠ-སདྡོ བྷཱསིཏཏྠཝཙནམྤི ཧོཏི. པུརིམཀཱ ཧི པཉྩ ཨཏྠཔྤབྷེདཱ ཧིཏཔརིཡཱཡཱ, ཏཏོ པརེ ཚ བྷཱསིཏཏྠཔྤབྷེདཱ, པཙྪིམཀཱ པན ཨུབྷཡསབྷཱཝཱ. ཏཏྠ དུརདྷིགམཏཱཡ ཝིབྷཱཝནེ ཨལདྡྷགཱདྷོ གམྦྷཱིརོ, ན ཝིཝཊོ གུལ༹ྷོ, མཱུལུདཀཱདཡོ ཝིཡ པཾསུནཱ ཨཀྑརསནྣིཝེསཱདིནཱ ཏིརོཧིཏོ པཊིཙྪནྣོ, ནིདྡྷཱརེཏྭཱ ཉཱཔེཏབྦོ ནེཡྻོ, ཡཐཱརུཏཝསེནེཝ ཝེདིཏབྦོ ནཱིཏོ. ཨནཝཛྫནིཀྐིལེསཝོདཱནཱ པརིཡཱཡཝསེན ཝུཏྟཱ, ཀུསལཝིཔཱཀཀིརིཡདྷམྨཝསེན ཝཱ ¶ . པརམཏྠོ ནིབྦཱནཾ, ཨཝིཔརཱིཏསབྷཱཝོ ཨེཝ ཝཱ. སཱཏིསཡཾ པཀཱསིཏཱནི ཏཔྤརབྷཱཝེན པཀཱསིཏཏྟཱ. ‘‘ཨེཏྟཀཾ ཏསྶ བྷགཝཏོ སུཏྟཱགཏཾ སུཏྟཔརིཡཱཔནྣ’’ནྟི (པཱཙི. ༡༢༤༢), ‘‘སཀཝཱདེ པཉྩསུཏྟསཏཱནཱི’’ཏི (དྷ. ས. ཨཊྛ. ནིདཱནཀཐཱ; ཀཐཱ. ཨཊྛ. ནིདཱནཀཐཱ) ཙ ཨེཝམཱདཱིསུ སུཏྟ-སདྡོ ཨུཔཙརིཏོཏི ཨདྷིཔྤཱཡེནཱཧ ‘‘ཨིདམེཝ ཨཏྠཱནཾ སཱུཙནཏོ སུཏྟནྟི ཝུཏྟ’’ནྟི. ཨེཀནྟཧིཏཔཊིལཱབྷསཾཝཏྟནིཀཱ སུཏྟནྟདེསནཱཏི ཨིདམྤི ཝིནེཡྻཱནཾ ཧིཏསམྤཱཔནེ སུཏྟནྟདེསནཱཡ ཏཔྤརབྷཱཝཾཡེཝ སནྡྷཱཡ ཝུཏྟཾ. ཏཔྤརབྷཱཝོ ཙ ཝིནེཡྻཛ྄ཛྷཱསཡཱནུལོམཏོ དཊྛབྦོ, ཏཐཱ ཨཏྟཏྠཱདིཔྤཀཱསནཔདྷཱནཏཱཔི. ཨིཏརེཧཱིཏི ཝིནཡཱབྷིདྷམྨེཧི.

རཏྟིཨཱདཱིསཱུཏི རཏྟིརཱཛཝིནཡེསུ ཝིསཡབྷཱུཏེསུ. ནནུ ཙ ‘‘ཨབྷིརཏྟཱི’’ཏི ཨཝུཏྟཏྟཱ རཏྟིགྒཧཎཾ ན ཀཏྟབྦཾ, ‘‘ཨབྷིཉྙཱཏཱ ཨབྷིལཀྑིཏཱ’’ཏི ཙ ཉཱཎལཀྑཎཀིརིཡཱཝིསེསཀོ ཨབྷི-སདྡོཏི? ན, ‘‘ཨབྷིཉྙཱཏཱ ཨབྷིལཀྑིཏཱ’’ཏི ཨབྷི-སདྡཝིསིཊྛཱནཾ ཉཱཏལཀྑིཏསདྡཱནཾ རཏྟིསདྡེན ¶ སམཱནཱདྷིཀརཎཏཱཡ རཏྟིཝིསཡཏྟཱ. ཨེཏྠ ཙ ཝཱཙཀསདྡསནྣིདྷཱནེ ནིཔཱཏཱནཾ ཏདཏྠཛོཏཀམཏྟཏྟཱ ལཀྑིཏསདྡཏྠཛོཏཀོ ཨབྷི-སདྡོ ལཀྑཎེ ཝཏྟཏཱིཏི ཝུཏྟོ. ཨབྷིལཀྑིཏསདྡཔརིཡཱཡོ ཙ ཨབྷིཉྙཱཏསདྡོཏི དཊྛབྦོ, ཨབྷིཝིནཡསདྡསྶ པན ཨབྷིཔུརིསསྶ ཝིཡ སམཱསསིདྡྷི དཊྛབྦཱ. ཨནེཀཏྠཱ ཧི ནིཔཱཏཱ, ཨནེཀཏྠབྷེདོ ཙ སདྡཱནཾ པཡོགཝིསཡོཏི.

ཀིཉྩཱཔི དེསནཱདཡོ དེསེཏབྦཱདིནིརཔེཀྑཱ ན སནྟི, ཨཱཎཱདཡོ པན ཝིསེསཏོ དེསཀཱདིཨདྷཱིནཱཏི ཏཾཏཾཝིསེསཡོགཝསེན ཏེསཾ བྷེདོ ཝུཏྟོ. ཡཐཱ ཧི ཨཱཎཱཝིདྷཱནཾ ཝིསེསཏོ ཨཱཎཱརཧཱདྷཱིནཾ ཏཏྠ ཀོསལླཡོགཏོ, ཨེཝཾ ཝོཧཱརཔརམཏྠཝིདྷཱནཱནི ཙ ཝིདྷཱཡཀཱདྷཱིནཱནཱིཏི ཨཱཎཱདིཝིདྷིནོ དེསཀཱཡཏྟཏཱ ཝུཏྟཱ. ཨཔརཱདྷཛ྄ཛྷཱསཡཱནུརཱུཔཾ ཝིཡ དྷམྨཱནུརཱུཔམྤི སཱསནཾ ཝིསེསཏོ ཏཐཱཝིནེཏབྦཔུགྒལཱཔེཀྑནྟི ཝུཏྟཾ ‘‘སཱསིཏབྦ…པེ… ཏབྦབྷཱཝེནཱ’’ཏི. སཾཝརཱསཾཝརནཱམརཱུཔཱནཾ ཝིཡ ཝིནིཝེཋེཏབྦཱཡ དིཊྛིཡཱཔི ཀཐནཾ སཏི ཝཱཙཱཝཏྠུསྨིཾ, ནཱསཏཱིཏི ཝིསེསཏོ ཏདདྷཱིནནྟི ཨཱཧ ‘‘ཀཐེཏབྦསྶ…པེ… ཀཐཱ’’ཏི. ཨུཔཱརམྦྷཱདཱིཏི ཨུཔཱརམྦྷནིསྶརཎདྷམྨཀོསརཀྑཎཱནི. པརིཡཱཔུཎནཱདཱིཏི པརིཡཱཔུཎནསུཔྤཊིཔཏྟིདུཔྤཊིཔཏྟིཡོ.

ཏནྟིསམུདཱཡོ ཨཝཡཝཏནྟིཡཱ ཨཱདྷཱརོ ཡཐཱ ‘‘རུཀྑེ སཱཁཱ’’ཏི. ན ཙོདེཏབྦམེཏཾ སམུཁེན, ཝིསཡཝིསཡིམུཁེན ཝཱ ཝིནཡཱདཱིནཾཡེཝ གམྦྷཱིརབྷཱཝསྶ ཝུཏྟཏྟཱཏི ཨདྷིཔྤཱཡོ. དྷམྨོ ཧི ཝིནཡཱདཡོ, ཏེསཉྩ ཝིསཡོ ཨཏྠོ, དྷམྨཏྠཝིསཡཱ ཙ དེསནཱཔཊིཝེདྷཱཏི. ‘‘པཊིཝེདྷསྶཱ’’ཏིཨཱདིནཱ ¶ དྷམྨཏྠཱནཾ དུཔྤཊིཝིདྡྷཏྟཱ དེསནཱཡ ཨུཔྤཱདེཏུཾ ཨསཀྐུཎེཡྻཏྟཱ པཊིཝེདྷསྶ ཨུཔྤཱདེཏུཉྩ པཊིཝིཛ྄ཛྷིཏུཉྩ ཨསཀྐུཎེཡྻཏྟཱ དུཀྑོགཱཧཏཾ དསྶེཏི.

དྷམྨཱནུརཱུཔཾ ཡཐཱདྷམྨནྟི ཙ ཨཏྠོ ཡུཛྫཏི. དེསནཱཔི ཧི པཊིཝེདྷོ ཝིཡ ཨཝིཔརཱིཏཾ སཝིསཡཝིབྷཱཝནཏོ དྷམྨཱནུརཱུཔཾ པཝཏྟཏི ཡཏོ ‘‘ཨཝིཔརཱིཏཱབྷིལཱཔོ’’ཏི ཝུཙྩཏི. དྷམྨནིརུཏྟིཾ དསྶེཏཱིཏི ཨེཏེན དེསནཱསདྡསབྷཱཝཱཏི དཱིཔེཏི. ཏཐཱ ཧི ནིརུཏྟིཔཊིསམྦྷིདཱཡ པརིཏྟཱརམྨཎཱདིབྷཱཝོ པཱལི༹ཡཾ ཝུཏྟོ, ཨཊྛཀཐཱཡཉྩ ‘‘ཏཾཏཾསབྷཱཝནིརུཏྟིསདྡཾ ཨཱརམྨཎཾ ཀཏྭཱ’’ཏིཨཱདིནཱ སདྡཱརམྨཎཏཱ. ཨིམསྶ ཨཏྠསྶ ཨཡཾ སདྡོ ཝཱཙཀོཏི ཝཙནཝཙནཱིཡཾ ¶ ཝཝཏྠཔེཏྭཱ ཏཾཏཾཝཙནཱིཡཝིབྷཱཝནཝསེན པཝཏྟིཏོ ཧི སདྡོ དེསནཱཏི. ནནུ ཙ ‘‘དྷམྨོ ཏནྟཱི’’ཏི ཨིམསྨིཾ པཀྑེ དྷམྨསྶཔི སདྡསབྷཱཝཏྟཱ དྷམྨདེསནཱནཾ ཝིསེསོ ན སིཡཱཏི? ན, ཏེསཾ ཏེསཾ ཨཏྠཱནཾ བོདྷཀབྷཱཝེན ཉཱཏོ ཨུགྒཧིཏཱདིཝསེན ཙ པུབྦེ པཝཏྟིཏོ སདྡཔྤབནྡྷོ དྷམྨོ, པཙྪཱ པརེསཾ ཨཝབོདྷནཏྠཾ པཝཏྟིཏོ ཏདཏྠཔྤཀཱསནཀོ སདྡོ དེསནཱཏི. ཨཐ ཝཱ ཡཐཱཝུཏྟསདྡསམུཊྛཱཔཀོ ཙིཏྟུཔྤཱདོ དེསནཱ མུསཱཝཱདཱདཡོ ཝིཡ. ཝཙནསྶ པཝཏྟནནྟི ཙ ཡཐཱཝུཏྟཙིཏྟུཔྤཱདམཱཧ. སོ ཧི ཝཙནཾ པཝཏྟེཏི, ཏཾ ཝཱ ཨེཏེན པཝཏྟཱིཡཏཱིཏི པཝཏྟནཾ. དེསཱིཡཏི ཨཏྠོ ཨེཏེནཱཏི དེསནཱ. པཀཱརེཧི ཉཱཔཱིཡཏི ཨེཏེན, པཀཱརཏོ ཉཱཔེཏཱིཏི ཝཱ པཉྙཏྟཱིཏི ཝུཙྩཏཱིཏི. ཏེནེཝཱཧ ‘‘ཨདྷིཔྤཱཡོ’’ཏིཨཱདི. ཨབྷིསམེཏི, ཨབྷིསམཱིཡཏི ཝཱ ཨེཏེནཱཏི ཨབྷིསམཡོཏི ཨེཝམྤི ཨབྷིསམཡཏྠོ སམྦྷཝཏི. ཨབྷིསམེཏབྦཏོ པན ཨབྷིསམཡོཏི དུཏིཡཝིཀཔྤེ པཊིཝེདྷོཡེཝཱཏི.

ཝུཏྟནཡེན ཝེདིཏབྦཱཏི ཨཝིཛྫཱསངྑཱརཱདཱིནཾ དྷམྨཏྠཱནཾ དུཔྤཊིཝིཛ྄ཛྷཏཱཡ དུཀྑོགཱཧཏཱ, ཏེསཾ པཉྙཱཔནསྶ དུཀྐརབྷཱཝཏོ ཏཾདེསནཱཡ པཊིཝེདྷནསངྑཱཏསྶ པཊིཝེདྷསྶ ཨུཔྤཱདནཝིསཡིཀརཎཱནཾ ཨསཀྐུཎེཡྻཏཱཡ དུཀྑོགཱཧཏཱ ཝེདིཏབྦཱ.

ཀཱརཎེ ཕལཝོཧཱརེན ཏེ དྷམྨཱ དུཀྑཱཡ སཾཝཏྟནྟཱིཏི ཝུཏྟནྟི ཨཱཧ ‘‘ཨུཔཱརམྦྷ…པེ… ཧེཏུབྷཱཝེནཱ’’ཏི. ཨཉྙཾ ཨཏྠནྟི ཨུཔཱརམྦྷཾ ནིསྶརཎཉྩ. ནིཊྛཱཔེཏྭཱཏི ཀཐནཝསེན པརིཡོསཱཔེཏྭཱ. ཏསྶ ‘‘ཨཱརདྡྷ’’ནྟི ཨེཏེན སམྦནྡྷོ. ཨུདྡཱནསངྒཧཱདིབྷེདོ སངྒཱིཏོཏི པཱཋོ ཡུཏྟོ, ‘‘སངྒཱིཏིཡཱ’’ཏི པན ལིཁནྟི. པུརིམཾ ཝཱ སངྒཱིཏིཡཱཏི བྷཱཝེན བྷཱཝལཀྑཎེ བྷུམྨཾ, པཙྪིམཾ ཨདྷིཀརཎེ. པིཊཀཱདཱིཏི པིཊཀནིཀཱཡངྒདྷམྨཀྑནྡྷཱནི.

ཏཏྠ ¶ ཨངྒེསུ སུཏྟངྒམེཝ ན སམྦྷཝཏི ‘‘སགཱཐཀཾ སུཏྟཾ གེཡྻཾ, ནིགྒཱཐཀཾ སུཏྟཾ ཝེཡྻཱཀརཎ’’ནྟི (དཱི. ནི. ཨཊྛ. ༡.པཋམམཧཱསངྒཱིཏིཀཐཱ; པཱརཱ. ཨཊྛ. ༡.པཋམམཧཱསངྒཱིཏིཀཐཱ; དྷ. ས. ཨཊྛ. ནིདཱནཀཐཱ) ཝུཏྟཏྟཱ, མངྒལསུཏྟཱདཱིནཉྩ སུཏྟངྒསངྒཧོ ན སིཡཱ གཱཐཱབྷཱཝཏོ དྷམྨཔདཱདཱིནཾ ཝིཡ, གེཡྻངྒསངྒཧོ ཝཱ སིཡཱ སགཱཐཀཏྟཱ སགཱཐཱཝགྒསྶ ཝིཡ, ཏཐཱ ཨུབྷཏོཝིབྷངྒཱདཱིསུ སགཱཐཀཔདེསཱནནྟི? ཝུཙྩཏེ –

སུཏྟནྟི ¶ སཱམཉྙཝིདྷི, ཝིསེསཝིདྷཡོ པརེ;

སནིམིཏྟཱ ནིརུལ༹ྷཏྟཱ, སཧཏཱཉྙེན ནཱཉྙཏོ. (ནེཏྟི. ཨཊྛ. སངྒཧཝཱརཝཎྞནཱ);

སབྦསྶཔི ཧི བུདྡྷཝཙནསྶ སུཏྟནྟི ཨཡཾ སཱམཉྙཝིདྷི. ཏེནེཝཱཧ ཨཱཡསྨཱ མཧཱཀཙྩཱཡནོ ནེཏྟིཡཾ ‘‘ནཝཝིདྷསུཏྟནྟཔརིཡེཊྛཱི’’ཏི (ནེཏྟི. སངྒཧཝཱར). ‘‘ཨེཏྟཀཾ ཏསྶ བྷགཝཏོ སུཏྟཱགཏཾ སུཏྟཔརིཡཱཔནྣཾ (པཱཙི. ༡༢༤༢) སཀཝཱདེ པཉྩ སུཏྟསཏཱནཱི’’ཏི (དྷ. ས. ཨཊྛ. ནིདཱནཀཐཱ; ཀཐཱ. ཨཊྛ. ནིདཱནཀཐཱ) ཨེཝམཱདི ཙ ཨེཏསྶ ཨཏྠསྶ སཱདྷཀཾ, ཏདེཀདེསེསུ པན གེཡྻཱདཡོ ཝིསེསཝིདྷཡོ ཏེན ཏེན ནིམིཏྟེན པཏིཊྛིཏཏྟཱ. ཏཐཱ ཧི གེཡྻསྶ སགཱཐཀཏྟཾ ཏབྦྷཱཝནིམིཏྟཾ. ལོཀེཔི ཧི སསིལོཀཾ སགཱཐཀཾ ཝཱ ཙུཎྞིཡགནྠཾ ‘‘གེཡྻ’’ནྟི ཝདནྟི. གཱཐཱཝིརཧེ པན སཏི པུཙྪཾ ཀཏྭཱ ཝིསྶཛྫནབྷཱཝོ ཝེཡྻཱཀརཎསྶ. པུཙྪཱཝིསྶཛྫནཉྷི བྱཱཀརཎནྟི ཝུཙྩཏི. བྱཱཀརཎམེཝ ཝེཡྻཱཀརཎནྟི.

ཨེཝཾ སནྟེ སགཱཐཀཱནམྤི པཉྷཝིསྶཛྫནཝསེན པཝཏྟཱནཾ ཝེཡྻཱཀརཎབྷཱཝོ ཨཱཔཛྫཏཱིཏི? ནཱཔཛྫཏི ཝེཡྻཱཀརཎཱདིསཉྙཱནཾ ཨནོཀཱསབྷཱཝཏོ ‘‘གཱཐཱཝིརཧེ པན སཏཱི’’ཏི ཝིསེསིཏཏྟཱ ཙ. ཏཐཱ ཧི དྷམྨཔདཱདཱིསུ ཀེཝལཾ གཱཐཱབནྡྷེསུ སགཱཐཀཏྟེཔི སོམནསྶཉཱཎམཡིཀགཱཐཱཔཊིསཾཡུཏྟེསུ ‘‘ཝུཏྟཉྷེཏ’’ནྟིཨཱདིཝཙནསམྦནྡྷེསུ ཨབྦྷུཏདྷམྨཔཊིསཾཡུཏྟེསུ ཙ སུཏྟཝིསེསེསུ ཡཐཱཀྐམཾ གཱཐཱཨུདཱནཨིཏིཝུཏྟཀཨབྦྷུཏདྷམྨསཉྙཱ པཏིཊྛིཏཱ, ཏཐཱ སཏིཔི གཱཐཱབནྡྷབྷཱཝེ བྷགཝཏོ ཨཏཱིཏཱསུ ཛཱཏཱིསུ ཙརིཡཱནུབྷཱཝཔྤཀཱསཀེསུ ཛཱཏཀསཉྙཱ. སཏིཔི པཉྷཝིསྶཛྫནབྷཱཝེ སགཱཐཀཏྟེ ཙ ཀེསུཙི སུཏྟནྟེསུ ཝེདསྶ ལབྷཱཔནཏོ ཝེདལླསཉྙཱ པཏིཊྛིཏཱཏི ཨེཝཾ ཏེན ཏེན སགཱཐཀཏྟཱདིནཱ ནིམིཏྟེན ཏེསུ ཏེསུ སུཏྟཝིསེསེསུ ¶ གེཡྻཱདིསཉྙཱ པཏིཊྛིཏཱཏི ཝིསེསཝིདྷཡོ སུཏྟངྒཏོ པརེ གེཡྻངྒཱདཡོ. ཡཾ པནེཏྠ གེཡྻངྒཱདིནིམིཏྟརཧིཏཾ, ཏཾ སུཏྟངྒཾ ཝིསེསསཉྙཱཔརིཧཱརེན སཱམཉྙསཉྙཱཡ པཝཏྟནཏོཏི.

ནནུ ཙ སགཱཐཀཾ སུཏྟཾ གེཡྻཾ, ནིགྒཱཐཀཾ སུཏྟཾ ཝེཡྻཱཀརཎནྟི སུཏྟངྒཾ ན སམྦྷཝཏཱིཏི ཙོདནཱ ཏདཝཏྠཱཏི? ན, སོདྷིཏཏྟཱ. སོདྷིཏཉྷི པུབྦེ གཱཐཱཝིརཧེ སཏི པུཙྪཱཝིསྶཛྫནབྷཱཝོ ཝེཡྻཱཀརཎབྷཱཝསྶ ནིམིཏྟནྟི. ཡཉྩ ཝུཏྟཾ ‘‘གཱཐཱབྷཱཝཏོ མངྒལསུཏྟཱདཱིནཾ སུཏྟངྒསངྒཧོ ན སིཡཱ’’ཏི, ཏཾ ¶ ན, ནིརུལ༹ྷཏྟཱ. ནིརུལ༹ྷོ ཧི མངྒལསུཏྟཱདཱིསུ སུཏྟབྷཱཝོ. ན ཧི ཏཱནི དྷམྨཔདབུདྡྷཝཾསཱདཡོ ཝིཡ གཱཐཱབྷཱཝེན པཉྙཱཏཱནི, ཀིནྟུ སུཏྟབྷཱཝེནེཝ. ཏེནེཝ ཧི ཨཊྛཀཐཱཡཾ སུཏྟནཱམཀནྟི ནཱམགྒཧཎཾ ཀཏཾ. ཡཾ པན ཝུཏྟཾ ‘‘སགཱཐཀཏྟཱ གེཡྻངྒསངྒཧོ ཝཱ སིཡཱ’’ཏི, ཏདཔི ནཏྠི. ཡསྨཱ སཧཏཱཉྙེན. སཧ གཱཐཱཧཱིཏི སགཱཐཀཾ, སཧབྷཱཝོ ཙ ནཱམ ཨཏྟཏོ ཨཉྙེན ཧོཏི, ན ཙ མངྒལསུཏྟཱདཱིསུ གཱཐཱཝིནིམུཏྟོ ཀོཙི སུཏྟཔྤདེསོ ཨཏྠི, ཡོ ‘‘སཧ གཱཐཱཧཱི’’ཏི ཝུཙྩེཡྻ, ན ཙ སམུདཱཡོ ནཱམ ཀོཙི ཨཏྠི. ཡདཔི ཝུཏྟཾ ‘‘ཨུབྷཏོཝིབྷངྒཱདཱིསུ སགཱཐཀཔྤདེསཱནཾ གེཡྻངྒསངྒཧོ སིཡཱ’’ཏི, ཏདཔི ན, ཨཉྙཏོ. ཨཉྙཱ ཨེཝ ཧི ཏཱ གཱཐཱ ཛཱཏཀཱདིཔརིཡཱཔནྣཏྟཱ. ཨཏོ ན ཏཱཧི ཨུབྷཏོཝིབྷངྒཱདཱིནཾ གེཡྻངྒབྷཱཝོཏི ཨེཝཾ སུཏྟཱདཱིནཾ ཨངྒཱནཾ ཨཉྙམཉྙསངྐརཱབྷཱཝོ ཝེདིཏབྦོ.

ཛིནསཱསནཾ ཨབྷིདྷམྨོ. པཊིཝིདྡྷཊྛཱནཾ པཊིཝེདྷབྷཱུམི པཊིཝེདྷཱཝཏྠཱ, པཊིཝེདྷཧེཏུ ཝཱ. ‘‘སོ ཨེཝཾ པཛཱནཱམི སམྨཱདིཊྛིཔཙྩཡཱཔི ཝེདཡིཏ’’ནྟི (སཾ. ནི. ༥.༡༡-༡༢) ཝུཏྟཾ. པཱལི༹ཡཾ པན ‘‘སོ ཨེཝཾ པཛཱནཱམི མིཙྪཱདིཊྛིཔཙྩཡཱཔི ཝེདཡིཏཾ. སམྨཱདིཊྛིཔཙྩཡཱཔི ཝེདཡིཏ’’ནྟི ཨཱགཏཾ (སཾ. ནི. ༥.༡༡-༡༢). པཙྩཡཱདཱིཧཱིཏི པཙྩཡསབྷཱཝཝཱུཔསམཏདུཔཱཡཱདཱིཧི. པརཝཱདིཙོདནཾ པཏྭཱཏི ཨཊྛཀཐཱཡཾ ཨཱགཏཾ པརཝཱདིཙོདནཾ པཏྭཱ. ཨདྷིག…པེ… རཱུཔེནཱཏི ཨདྷིགནྟབྦོ ཙ སོ དེསེཏབྦོ ཙཱཏི ཨདྷིགནྟབྦདེསེཏབྦོ, སོ ཨེཝ དྷམྨོ, ཏདནུརཱུཔེན. ཨེཏྠ ཙ ཡཐཱདྷམྨསཱསནཏྟཱ ཡཐཱདྷིགཏདྷམྨདེསནཱབྷཱཝཏོ ཨབྷིདྷམྨསྶ ཨབྷིསམྦོདྷི ཨདྷིགམནིདཱནཾ. དེསཀཱལཱདིཡེཝ དེསནཱནིདཱནཾ. ཡཾ པན ཨཊྛཀཐཱཡཾ ‘‘དེསནཱནིདཱནཾ ཡཱཝ དྷམྨཙཀྐཔྤཝཏྟནཱ’’ཏི ཝུཏྟཾ, ཏཾ ཨབྷིདྷམྨདེསནཱཝིསེསེན དྷམྨཙཀྐཔྤཝཏྟནནྟི ཀཏྭཱ ཝུཏྟཾ. དྷམྨཙཀྐཔྤཝཏྟནསུཏྟེ ཝཱ དེསིཏེཧི ཨརིཡསཙྩེཧི སཀལཱབྷིདྷམྨཔདཏྠསངྒཧཏོ, པརམཏྠཏོ ཨབྷིདྷམྨབྷཱུཏཱནཾ ཝཱ སམྨཱདིཊྛིཨཱདཱིནཾ ཏཏྠ དེསིཏཏྟཱ ཝུཏྟཾ. ཏཏྟཀཱནཾཡེཝ དེསནཱརུལ༹ྷཏཱཡ ཨཌྜྷཚཀྐེསུ ཛཱཏཀསཏེསུ པརིཔཱཙནཾ ཝུཏྟནྟི དཊྛབྦཾ. ན ཧི ཨེཏྟཀཱསུ ཨེཝ ཛཱཏཱིསུ པུཉྙཱདིསམྦྷཱརསམྦྷརཎཾ ¶ , ཀིཾ པན ཀཱརཎཾ ཨེཏྟཀཱ ཨེཝ ཛཱཏིཡོ དེསིཏཱཏི? ཏདཉྙེསཾ ཨཊྛུཔྤཏྟིཡཱ ཨབྷཱཝཏོ.

སུམེདྷཀཐཱཝཎྞནཱ

ཨུཔྤནྣེ ¶ བུདྡྷེ ཏཏོ ཨཏྟཱནཾ སེཡྻཏོ ཝཱ སདིསཏོ ཝཱ དཧནྟོ ཛྷཱནཱབྷིཉྙཱཧི པརིཧཱཡཏི, ན ཏཐཱ སུམེདྷཔཎྜིཏོ ཨཊྛཱསཱིཏི ཏསྶ ཛྷཱནཱབྷིཉྙཱཧི ཨཔརིཧཱནི དཊྛབྦཱ. ཏེནེཝཱཧ ‘‘ཏཱཔསེཧི ཨསམོ’’ཏི. ཡཐཱ ནིབྦཱནཾ, ཨཉྙཾ ཝཱ ནིཙྩཱབྷིམཏཾ ཨཝིཔརཱིཏཝུཏྟིཏཱཡ སབྦཀཱལཾ ཏཐཱབྷཱཝེན ‘‘སསྶཏ’’ནྟི ཝུཙྩཏི, ཨེཝཾ བུདྡྷཱནཾ ཝཙནནྟི ཏསྶ སསྶཏཏཱ ཝུཏྟཱ. ཏེནེཝཱཧ ‘‘ཨཝིཔརཱིཏམེཝཱ’’ཏི. ཨུཔཔཱརམཱིཨཱདིཝིབྷཱགེན ཨནེཀཔྤཀཱརཏཱ. སམཱདཱནཱདྷིཊྛཱནནྟི སམཱདཱནསྶ ཨདྷིཊྛཱནཾ པཝཏྟནཾ ཀརཎནྟི ཨཏྠོ. ཉཱཎཏེཛེནཱཏི པཱརམཱིཔཝིཙཡཉཱཎཔྤབྷཱཝེན. མཧཱནུབྷཱཝཉྷི ཏཾ ཉཱཎཾ བོདྷིསམྦྷཱརེསུ ཨནཱཝརཎཾ ཨནཱཙརིཡཀཾ མཧཱབོདྷིསམུཔྤཏྟིཡཱ ཨནུརཱུཔཔུབྦནིམིཏྟབྷཱུཏཾ. ཏཐཱ ཧི ཏཾ མནུསྶཔུརིསབྷཱཝཱདིཨཱདྷཱརམེཝ ཛཱཏཾ. ཀཱཡཱདཱིསུ ཨསུབྷསཉྙཱདིབྷཱཝེན སུདྡྷགོཙརཱ. ‘‘ཨཉྙཐཱ’’ཏི པདསྶ པཀརཎཔརིཙྪིནྣཾ ཨཏྠཾ དསྶེནྟོ ‘‘ལཱིནཏཱ’’ཏི ཨཱཧ. ལཱིནཏཱཏི ཙ སངྐོཙོ ཝཱིརིཡཧཱནི ཝཱིརིཡཱརམྦྷསྶ ཨདྷིཔྤེཏཏྟཱ. ཏེནཱཧ ‘‘ཨེསཱ མེ ཝཱིརིཡཔཱརམཱི’’ཏི.

ནིདཱནཀཐཱཝཎྞནཱ ནིཊྛིཏཱ.

༡. ཙིཏྟུཔྤཱདཀཎྜཾ

ཏིཀམཱཏིཀཱཔདཝཎྞནཱ

༡. ཏེནཱཏི ¶ ¶ ཝེདནཱསདྡེན. སབྦཔདེཧཱིཏི ཏཱིཧི པདེཧི ལདྡྷནཱམོ ཧོཏི ཨཝཡཝདྷམྨེནཱཔི སམུདཱཡསྶ ཨཔདིསིཏབྦཏོ ཡཐཱ ‘‘སམཾ ཙུཎྞ’’ནྟི. ཙོདཀོ ཡཐཱདྷིཔྤེཏམཏྠཾ ཨཔྤཊིཔཛྫམཱནོ ཝིབྷཏྟིཨནྟསྶེཝ པདབྷཱཝཾ སལླཀྑེཏྭཱ ‘‘ནནུ སུཁཱཡཱ’’ཏིཨཱདིནཱ ཙོདེཏི. ཨིཏརོ ‘‘ཨདྷིཔྤེཏཔྤཀཱརཏྠགམཀསྶཱ’’ཏིཨཱདིནཱ ཨཏྟནོ ཨདྷིཔྤཱཡཾ ཝིཝརཏི. ཏེན ‘‘ཝཱཀྱཾ ཨིདྷ པདནྟི ཝུཏྟ’’ནྟི དསྶེཏི. ཧེཏུཔདསཧེཏུཀཔདཱདཱིཧཱིཏི ཨཱདི-སདྡེན ནཧེཏུཔདཨཧེཏུཀཔདཧེཏུསམྤཡུཏྟཔདཱནི ཧེཏུཝིཔྤཡུཏྟཔདམྤི ཝཱ སངྒཎྷཱཏི.

ཨུབྷཡེཀཔདཝསེནཱཏི ཨུབྷཡཔདཝསེན ཧེཏུདུཀསམྦནྡྷོ, ཨེཀཔདཝསེན སཧེཏུཀདུཀསམྦནྡྷོ. ཏཐཱཏི ཨུབྷཡེཀཔདཝསེན. ཨེཏྠ ཙ སཧེཏུཀཧེཏུསམྤཡུཏྟདུཀཱཏིཨཱདིནཱ ཡཐཱ ཧེཏུགོཙྪཀེ པཋམདུཀསམྦནྡྷཱ དུཏིཡཏཏིཡདུཀཱ, པཋམདུཀདུཏིཡདུཀསམྦནྡྷཱ ཙཏུཏྠཚཊྛདུཀཱ, པཋམདུཀཏཏིཡདུཀསམྦནྡྷོ པཉྩམོ དུཀོ, ཨེཝཾ ཨཱསཝགོཙྪཀཱདཱིསུཔཱིཏི ནཡཾ དསྶེཏི. སཀྐཱ ཧི ཨིམིནཱཝ ནཡེན ཏེསུཔི དུཀནྟརསམྦནྡྷོ ཝིཉྙཱཏུཾ, ཀེཝལཾ པན ཨཱསཝགོཙྪཀཱདཱིསུ དུཏིཡདུཀཏཏིཡདུཀསམྦནྡྷོ ཨོསཱནདུཀོ, ཀིལེསགོཙྪཀེ ཙ དུཏིཡཙཏུཏྠདུཀསམྦནྡྷོཏི. དྷམྨཱནཾ སཱཝསེསནིརཝསེསབྷཱཝེན ཏིཀདུཀཱནཾ སཔྤདེསནིཔྤདེསཏཱ ཝུཏྟཱཏི ཡེཧི ཏིཀདུཀཱ སཱཝསེསཱཏི པདིསྶནྟི ཨཔདིསྶནྟི, ཏེ ཨསངྒཧིཏདྷམྨཱཔདེསོ. ཨེཝཾ སཏི ‘‘ཨསངྒཧིཏོ’’ཏི ཝིསེསནཾ ཀིམཏྠིཡནྟི? ཨེཏསྶེཝཏྠསྶ པཱཀཊཀརཎཏྠཾ དཊྛབྦཾ. ཨཐ ཝཱ པདིསྶཏི ཨེཏེན སམུདཱཡོཏི པདེསོ, ཨཝཡཝོ. ‘‘སཱམཉྙཛོཏནཱ ཝིསེསེ ཨཝཏིཊྛཏཱི’’ཏི ཡཐཱདྷིཔྤེཏཾ ཝིསེསཾ དསྶེནྟོ ‘‘ཨསངྒཧིཏོ’’ཏི ཨཱཧ.

ཨནཝཛྫཏྠོ ¶ ཨཝཛྫཝིརཧཏྠོ. ནཱམཾ སཉྙཱ, ཀིརིཡཱ ཀརཎཾ, པཡོཛནཾ རཐརཐངྒཝིབྷཱཝནེན ཏེསཾ པཀཱརཏོ ཡོཛནཾ. ཀུསེན ཉཱཎེན ལཱཏབྦཱཏི ཀུསལཱཏི ཨཡམཏྠོ ཉཱཎསམྤཡུཏྟཱནཾ ཏཱཝ ཧོཏུ, ཉཱཎཝིཔྤཡུཏྟཱནཾ ཀཐནྟི ཨཱཧ ‘‘ཉཱཎཝིཔྤཡུཏྟཱནམྤཱི’’ཏིཨཱདི. ཉཱཎཝིཔྤཡུཏྟཱཔི ¶ ཧི ཉཱཎེནེཝ པཝཏྟིཡནྟི ཧིཏསུཁཧེཏུབྷཱུཏཱཡ པཝཏྟིཡཱ པཉྙཝནྟཱནཾ པཊིཔཏྟིབྷཱཝཏོ. ན ཧི ཨནྟརེན ཡོནིསོམནསིཀཱརཾ ཀུསལུཔྤཏྟི ཨཏྠཱིཏི. ‘‘ཡདི ཀུསལསྶ ཨུབྷཡབྷཱགགཏཾ སཾཀིལེསལཝནཾ པཱཀཊཾ སིཡཱ, ཀུསཱ ཝིཡ ལུནནྟཱིཏི ཀུསལཱཏི ཨཡམཏྠོ ཡུཏྟོ སིཡཱ’’ཏི ཀོཙི ཝདེཡྻཱཏི ཨཱསངྐཱཡ ཨཱཧ ‘‘སམྨཔྤདྷཱནདྭཡཾ ཝིཡཱ’’ཏི.

ན ཙཱཏིཨཱདིནཱ ‘‘སབྷཱཝཾ དྷཱརེནྟཱི’’ཏི ཨེཏྠ པརམཏྠཏོ ཀཏྟུཀམྨསྶ ཙ བྷེདོ ནཏྠི, ཀཔྤནཱསིདྡྷོ ཨེཝ པན བྷེདོཏི དསྶེཏི. ཏཏྠ ནཱམཝསེན ཝིཉྙཱཏཱཝིཉྙཱཏེཏི ཡེསཾ ‘‘དྷམྨཱ’’ཏི ཨིམིནཱ པརིཡཱཡེན ཨཝིཉྙཱཏཱ སབྷཱཝཱ, ‘‘སབྷཱཝཾ དྷཱརེནྟཱི’’ཏི ཨིམིནཱ ཙ པརིཡཱཡེན ཝིཉྙཱཏཱ, ཏེསཾ ཝསེན ཨེཝཾ ཝུཏྟཾ. ཨེཏྠ ཙ པཋམོ ཨཏྠོ སངྑཏཱསངྑཏདྷམྨཝསེན ཝུཏྟོ, དུཏིཡོ སངྑཏཝསེན, ཏཏིཡོ སངྑཏཱསངྑཏཔཉྙཏྟིདྷམྨཝསེནཱཏི དཊྛབྦཾ.

ཀུསལཔཊིསེདྷནཾ ཀུསལཱབྷཱཝོ ཨེཝ. ཨབྷཱཝོ ཧི སཏྟཱཔཊིསེདྷོཏི. དྷམྨོཏི སབྷཱཝདྷམྨོ. ཨཀུསལཝཙནེན ན ཀོཙི ཨཏྠོ སབྷཱཝདྷམྨསྶ ཨབོདྷཀཏྟཱཏི ཨདྷིཔྤཱཡོ. ཨཐ སིཡཱ ཨཀུསལཝཙནེན ཀོཙི ཨཏྠོ ཨསབྷཱཝདྷམྨབོདྷཀཏྟེཔི ‘‘པཉྙཏྟིདྷམྨཱ’’ཏིཨཱདཱིསུ ཝིཡ, ཨེཝཾ སཏི ‘‘ཨནབྱཱཀཏཱ’’ཏི ཙ ཝཏྟབྦཾ སིཡཱ, ཏཏོ ཙཱཡཾ ཙཏུཀྐོ ཨཱཔཛྫཏི, ན ཏིཀོ. ཏསྨཱཏི ཡསྨཱ དུཀཙཏུཀྐབྷཱཝོ ཨནབྱཱཀཏཝོཧཱརོ ཙ ནཏྠི, སོ ཙ ཝུཏྟནཡེན ཨབྷཱཝམཏྟཝཙནེ ཨཱཔཛྫཏི, ཏསྨཱ. སབྷཱཝདྷཱརཎཱདཱིཏི ཨཱདི-སདྡེན ‘‘དྷཱརཱིཡནྟི པཙྩཡེཧཱི’’ཏི ཨཡམཏྠོ སངྒཧིཏོ. ཉེཡྻཔརིཡཱཡེན པན དྷམྨ-སདྡེནཱཡཾ དོསོཏི ནནུ ཨཉེཡྻཔརིཡཱཡེཔི དྷམྨ-སདྡེ ན ཀོཙི དོསོཏི? ན, ཝུཏྟདོསཱནཏིཝཏྟནཏོ.

པཱརིསེསེནཱཏི ཨེཏྠ ནནུ ཨཡམཀཱརོ ན-ཨཏྠཏྟཡསྶེཝ ཛོཏཀོ, ཨཐ ཁོ ‘‘ཨཧེཏུཀཱ དྷམྨཱ, ཨབྷིཀྑུཀོ ཨཱཝཱསོ’’ཏི ཏཾཡོགནིཝཏྟིཡཱ, ‘‘ཨཔྤཙྩཡཱ དྷམྨཱ’’ཏི ཏཾསམྦནྡྷིབྷཱཝནིཝཏྟིཡཱ. པཙྩཡུཔྤནྣཉྷི པཙྩཡསམྦནྡྷཱིཏི ཨཔྤཙྩཡུཔྤནྣཏྟཱ ཨསམྦནྡྷིཏཱ ཨེཏྠ ཛོཏཱིཡཏི. ‘‘ཨནིདསྶནཱ དྷམྨཱ’’ཏི ཏཾསབྷཱཝནིཝཏྟིཡཱ. ནིདསྶནཉྷི དཊྛབྦཏཱ. ཨཐ ཙཀྑུཝིཉྙཱཎཾ ནིདསྶནཾ, ཏགྒཡ྄ཧབྷཱཝནིཝཏྟིཡཱ, ཏཐཱ ‘‘ཨནཱསཝཱ དྷམྨཱ’’ཏི. ‘‘ཨཔྤཊིགྷཱ དྷམྨཱ ¶ ཨནཱརམྨཎཱ དྷམྨཱ’’ཏི ཏཾཀིཙྩནིཝཏྟིཡཱ. ‘‘ཨརཱུཔིནོ དྷམྨཱ ཨཙེཏསིཀཱ ¶ དྷམྨཱ’’ཏི ཏབྦྷཱཝནིཝཏྟིཡཱ. ཏདཉྙཏཱ ཧི ཨེཏྠ པཀཱསཱིཡཏི. ‘‘ཨམནུསྶོ’’ཏི ཏབྦྷཱཝམཏྟནིཝཏྟིཡཱ. མནུསྶཏྟམཏྟཾ ནཏྠི ཨཉྙཾ སམཱནནྟི སདིསཏཱ ཧེཏྠ སཱུཙིཡཏི. ‘‘ཨསམཎོ སམཎཔཊིཉྙོ ཨཔུཏྟོ’’ཏི ཏཾསམྦྷཱཝནགུཎནིཝཏྟིཡཱ. གརཧཱ ཧི ཨེཏྠ ཉཱཡཏི. ‘‘ཀཙྩི ནུ བྷོཏོ ཨནཱམཡཱ, ཨནུདརཱ ཀཉྙཱ’’ཏི ཏདཔྤབྷཱཝནིཝཏྟིཡཱ. ‘‘ཨནུཔྤནྣཱ དྷམྨཱ’’ཏི ཏཾསདིསབྷཱཝནིཝཏྟིཡཱ. ཨཏཱིཏཱནཉྷི ཨུཔྤནྣཔུབྦཏྟཱ ཨུཔཱདིདྷམྨཱནཉྩ པཙྩཡེཀདེསནིཔྥཏྟིཡཱ ཨཱརདྡྷུཔྤཱདབྷཱཝཏོ ཀཱལཝིནིམུཏྟསྶ ཙ ཝིཛྫམཱནཏྟཱ ཨུཔྤནྣཱནུཀཱུལཏཱ, པགེཝ པཙྩུཔྤནྣཱནནྟི ཏབྦིདྷུརབྷཱཝོ ཨེཏྠ ཝིཉྙཱཡཏི. ‘‘ཨསེཀྑཱ དྷམྨཱ’’ཏི ཏདཔརིཡོསཱནནིཝཏྟིཡཱ. ཏཾནིཊྛཱནཉྷེཏྠ པཀཱསཱིཡཏཱིཏི ཨེཝམནེཀེསཾ ཨཏྠཱནཾ ཛོཏཀོ, ཏཏྠ ཀིཾ ཝུཙྩཏེ ཨཏྠདྭཡམེཝ ཝཏྭཱ པཱརིསེསེནཱཏི? ཨིཏརེསཾ ཨེཏྠ སུཝིདཱུརབྷཱཝཏོ. ན ཧི ཀུསལཝིཔྤཡུཏྟཱདཱིནཾ དྷམྨཱནཾ ཨཀུསལབྷཱཝོ ཡུཛྫཏི.

ཨཀུསལསདྡསྶ ཨུཙྩཱརཎཱནནྟརཾ ཝིནེཡྻཱནཾ ཀུསལཔཊིཔཀྑབྷཱུཏེ ཨཏྠེ པཊིཔཏྟིབྷཱཝཏོ ཏཏྠ ནིརུལ༹ྷཏཱ དཊྛབྦཱ. ‘‘ཝིརུདྡྷསབྷཱཝཏྟཱ’’ཏི ཝུཏྟཾ ཀིཙྩཝིརོདྷཱདཱིནམྤི ཏདནྟོགདྷཏྟཱ, ཝིརུདྡྷསབྷཱཝཏྟེཔི ཝིནཱསཀཝིནཱསིཏབྦབྷཱཝོ ཀུསལཱཀུསལེསུ ནིཡཏོཏི དསྶེཏུཾ ‘‘ཏཔྤཧེཡྻབྷཱཝཏོ’’ཏི ཨཱཧ. ཨིཏརཐཱ ཀུསལཱནམྤི ཨཀུསལེཧི པཧཱཏབྦབྷཱཝེ ཨཙྩནྟཾ སམུཙྪིནྣཀུསལམཱུལཏྟཱ ཨཔཱཡཔཱུརཀཱ ཨེཝ སཏྟཱ སིཡུཾ. ཡཾ པན ‘‘དྷམྨཱཔི ཝོ, བྷིཀྑཝེ, པཧཱཏབྦཱ’’ཏི (མ. ནི. ༡.༢༤༠) ཝུཏྟཾ, ཏཾ ‘‘རཱུཔཾ, བྷིཀྑཝེ, ན ཏུམྷཱཀཾ, ཏཾ པཛཧཐཱ’’ཏིཨཱདཱིསུ (སཾ. ནི. ༣.༣༣) ཝིཡ ཏདཱརམྨཎསཾཀིལེསཔྤཧཱནཝསེན པརིཡཱཡེན ཝུཏྟཾ. ཡཐཱཧ ‘‘ན ཧི ཀུསལཱ ཨཀུསལེཧི པཧཱཏབྦཱ’’ཏི (དྷ. ས. མཱུལཊཱི ༡).

ཕསྶཱདིཝཙནེཧི ཏཾནིདྡེསབྷཱུཏེཧི. ཏབྦཙནཱིཡབྷཱཝེནཱཏི ཏེཧི ‘‘སུཁཱཡ ཝེདནཱཡ སམྤཡུཏྟཱ དྷམྨཱ’’ཏིཨཱདིཝཙནེཧི ཨབྷིདྷེཡྻབྷཱཝེན. ཡཐཱ ཨནཝཛྫསུཁཝིཔཱཀཱདིཨཏྠཱ ཀུསལཱདིཝཙནེཧི, ཨེཝཾ ཨཝིཔཱཀཏྠཱ ཨབྱཱཀཏཝཙནེན བོདྷིཏཱ ཨེཝཱཏི ཨཱཧ ‘‘ཨབྱཱཀཏཝཙནེནེཝ ཙཱ’’ཏི. ཀཱརཎཾ ཨཝཏྭཱཏི ཨིདྷ ཝུཏྟབྷཱཝེན ཨནུཝཏྟམཱནཏྟཱཏི ཀཱརཎཾ ཨཝཏྭཱ. ཨཉྙཱ…པེ… ནིཝཱརེཏབྦོཏི ཨེཏེན ཀུསལཱཀུསལསདྡཱ ཝིཡ ཀུསལཱཀུསལསབྷཱཝཱནཾ ¶ ཏདུབྷཡཝིཔརཱིཏསབྷཱཝཱནཾ དྷམྨཱནཾ ཨབྱཱཀཏསདྡོ བོདྷཀོཏི དསྶེཏི. ན ཧི ཨཝིཔཱཀཝཙནཾ ཝུཏྟཾ, ཨཀུསལཝཙནཉྩ ཨཝུཏྟཾ. ཡཏོ ཨཝིཔཱཀཝཙནསྶ ཨདྷིཀཏབྷཱཝོ ཨཀུསལསྶ ཙ ཏབྦཙནཱིཡབྷཱཝེན ཨཀཐིཏབྷཱཝོ ¶ སིཡཱ, ཏསྨཱ ན ཨཀུསལཱནཾ ཨབྱཱཀཏཏཱཏི ཨཡཾ ཨཀུསལཱནཾ ཨནབྱཱཀཏབྷཱཝེ ཡོཛནཱ.

ཏཾ པརིཧརིཏུནྟི ཨབྱཱཀཏནིཝཏྟནམཱཧ. ཡདི ཨེཝཾ ‘‘སུཁཝིཔཱཀཱནཝཛྫཱ’’ཏི ཝཏྟབྦཾ. ཨནཝཛྫཱ ཧི བྱབྷིཙཱརིཏཱཡ ཝིསེསིཏབྦཱཏི? ན, སུཁཝིཔཱཀཝཙནསྶ ཝིསེསནབྷཱཝེན ཨགྒཧིཏཏྟཱ. སུཁཝིཔཱཀཝཙནེན ཧི ཀུསལབྷཱཝེ སམཏྟོ ཝིཉྙཱཡཏི, ཨནཝཛྫཝཙནཾ པནེཏྠ ཀུསལཱནཾ ཨགརཧིཏབྦཏཱསངྑཱཏཾ ཀཉྩི ཝིསེསམཱཧ. ཏེནེཝ ཙ ཏསྶ ཝིསེསནབྷཱཝེན ཝུཏྟསྶ པཝཏྟིསུཁཏཱདིདསྶནབྷཱཝཾ སཡམེཝ ཝཀྑཏཱིཏི. མནོསམཱཙཱརཝིསེསབྷཱུཏཱ ཕལདྷམྨཱ ཝིསེསེན པཊིཔྤསྶདྡྷཱཝཛྫཱ ནཱམ ཧོནྟཱིཏི སམཱཙཱརཏྟཡཝསེན ཏསྨིཾ སུཏྟེ ཨནཝཛྫདྷམྨཱནཾ ཝུཏྟཏྟཱ ཙ ཏེ ཨནཝསེསཏོ སངྒཧེཏྭཱ དསྶེཏུཾ ‘‘ཝིརཧིཏཱཝཛྫམཏྟཱ’’ཏི ཝུཏྟཾ. ཨཝཛྫཝིནཱསནབྷཱཝོ དསྶིཏོ ཀཎྷསུཀྐདྷམྨཱནཾ ཝཛ྄ཛྷགྷཱཏཀབྷཱཝསྶ ནིཡཏཏྟཱ. སཝིཔཱཀཏཱ ཝིཔཱཀདྷམྨཏཱ. སུཁོ ཝིཔཱཀོ ཨེཏེསནྟི སུཁཝིཔཱཀཱཏི ཨིམིནཱ སམཱསེན ཀུསལཱནཾ སུཁཝིཔཱཀཝནྟཏཱ ཝུཏྟཱ. སཱ ཙ ནེསཾ ན ཏཾསམངྒིཏཱཡ ཨསཧཝཏྟནཏོཏི ཏདུཔྤཱདནསམཏྠཏཱཏི ཝིཉྙཱཡཏཱིཏི ཝུཏྟཾ ‘‘སུཁཝིཔཱཀཝིཔཙྩནསབྷཱཝཾ དསྶེཏཱི’’ཏི. ཡུཏྟམེཏནྟི པརམཏྠཏོ བྷེདཱབྷཱཝེཔི ཡཐཱཝུཏྟཝཙནཝཙནཱིཡབྷཱཝསངྑཱཏོ བྷེདོ ཏསྨིཾ ཨབྷིདྷེཡྻཏྠབྷཱུཏེ ཝཏྠུསྨིཾ ཨུཔཙཱརེན ཧོཏཱིཏི ཡུཏྟམེཏྠ ལཀྑཎལཀྑིཏབྦབྷཱཝེན བྷེདཝཙནཾ. བྷཝཏི ཧི སདྡཏྠཝིསེསམཏྟེནཔི ཨབྷིནྣེ ཝཏྠུསྨིཾ བྷེདཝཙནཾ ཡཐཱ ‘‘སིལཱཔུཏྟཀསྶ སརཱིར’’ནྟི.

ཝིནཱཔི བྷཱཝཱབྷིདྷཱཡིནཱ སདྡེན བྷཱཝཔྤདྷཱནོ ནིདྡེསོ ཧོཏཱིཏི ཝུཏྟཾ ‘‘ཨནཝཛྫཝཙནེན ཨནཝཛྫཏྟཾ ཨཱཧཱ’’ཏི. ཨེཝཉྩེཏྠ པདཝིགྒཧོ གཧེཏབྦོ – ན ཨཝཛྫཾ ཨནཝཛྫཾ, ཨཝཛྫཔཊིཔཀྑཏཱཡ ཨགརཧིཏབྦསབྷཱཝོ. སུཁོ ཝིཔཱཀོ ཨསྶཱཏི སུཁཝིཔཱཀཾ, སུཁཝིཔཱཀཝིཔཙྩནསམཏྠཏཱ. ཨནཝཛྫཉྩ ཏཾ སུཁཝིཔཱཀཉྩཱཏི ཨནཝཛྫསུཁཝིཔཱཀཾ, ཏཾ ལཀྑཎཾ ཨེཏེསནྟི ཨནཝཛྫསུཁཝིཔཱཀལཀྑཎཱ. ཨཐ ཝཱ པུབྦེ ཝིཡ ཨནཝཛྫཾ, ཝིཔཙྩནཾ ཝིཔཱཀོ, སུཁསྶ ཝིཔཱཀོ སུཁཝིཔཱཀོ, ཨནཝཛྫཉྩ སུཁཝིཔཱཀོ ¶ ཙ ཨནཝཛྫསུཁཝིཔཱཀཾ ཨེཀཏྟཝསེན. ཏཾ ལཀྑཎཾ ཨེཏེསནྟི ཨནཝཛྫསུཁཝིཔཱཀལཀྑཎཱ. ཀིཾ པནེཏྠ ཀཱརཎཾ པདདྭཡཔརིགྒཧེ, ནནུ ཨེཀེནེཝ པདེན ཨིཊྛཔྤསིདྡྷི. ཡདིཔི ‘‘ཨཝཛྫརཧིཏཾ ཨནཝཛྫ’’ནྟི ཨིམསྨིཾ པན པཀྑེ ཨབྱཱཀཏནིཝཏྟནཏྠཾ སུཁཝིཔཱཀགྒཧཎཾ ཀཏྟབྦཾ སིཡཱ, སུཁཝིཔཱཀགྒཧཎེ པན ཀཏེ ཨནཝཛྫགྒཧཎཾ ན ཀཏྟབྦམེཝ. ‘‘ཨཝཛྫཔཊིཔཀྑཱ ཨནཝཛྫཱ’’ཏི ¶ ཨེཏསྨིཾ པན པཀྑེ སུཁཝིཔཱཀགྒཧཎཉྩཱཏི ཙོདནཾ མནསི ཀཏྭཱ ཨཱཧ ‘‘ཏཏྠ ཨནཝཛྫཝཙནེནཱ’’ཏིཨཱདི. ཏེན པཝཏྟིསུཁསུཁཝིཔཱཀཏཱཨཏྟསུདྡྷིཝིསུདྡྷཝིཔཱཀཏཱཨཀུསལཨབྱཱཀཏསབྷཱཝནིཝཏྟིརསཔཙྩུཔཊྛཱནཔདཊྛཱནཝིསེསདཱིཔནཏོ ཨེཝཾ ཝིཔུལཔྤཡོཛནཏྠོ པདདྭཡཔརིགྒཧོཏི དསྶེཏི. སུཁ-སདྡསྶ ཨིཊྛཔརིཡཱཡཏཱ ཝིཡ ‘‘ནིབྦཱནཔརམཾ སུཁཾ (དྷ. པ. ༢༠༣-༢༠༤), སུཁཱ ཝིརཱགཏཱ ལོཀེ (ཨུདཱ. ༡༡), ཏེསཾ ཝཱུཔསམོ སུཁོ’’ཏིཨཱདཱིསུ (དཱི. ནི. ༢.༢༢༡, ༢༧༢) སངྑཱརདུཀྑཱུཔསམཔརིཡཱཡཏཱཔི ཝིཛྫཏི, ཏཾཨཝིཔཱཀཏཱཡ པན ཨིདྷ སུཁཝིཔཱཀབྷཱཝོ ན སཀྐཱ ཝཏྟུནྟི དསྶེནྟོ ཨཱཧ ‘‘སངྑཱ…པེ… ནཏྠཱི’’ཏི. ཨིདཾ ཝུཏྟཾ ཧོཏི – ཏེབྷཱུམཀཀུསལཱནམྤི ཝིཝཊྚསནྣིསྶཡབྷཱཝེན པཝཏྟིསབྷཱཝཏྟཱ ཀིཉྩཱཔི སབྦེ ཀུསལཱ སངྑཱརདུཀྑཱུཔསམསུཁནིཔྥཱདཀཱ སམྦྷཝནྟི, ཡཐཱཝུཏྟསུཁསྶ པན ཨཝིཔཱཀབྷཱཝཏོ ན ཨེཏེན པདེན ཀུསལཱནཾ སུཁཝིཔཱཀཏཱ སམྦྷཝཏཱིཏི. ཝིཔཀྐབྷཱཝམཱཔནྣེསུ ཨརཱུཔདྷམྨེསུ ནིརུལ༹ྷཏྟཱ ཝིཔཱཀ-སདྡསྶ ‘‘ཡདི པནཱ’’ཏི སཱསངྐཾ ཝདཏི.

ཡཐཱསམྦྷཝནྟི སཧ ཨཝཛྫེནཱཏི སཱཝཛྫཱ, གརཧིཏབྦབྷཱཝཡུཏྟཱ. ཏེན ནེསཾ གརཧིཏབྦསབྷཱཝཾ དསྶེཏི. ཨཉྙེཔི ཨཏྠི དུཀྑབྷཱཝེན གརཧིཏབྦསབྷཱཝཱ ཨཀུསལཝིཔཱཀཱཏི སཱཝཛྫཝཙནམཏྟེན ཏེསམྤི ཨཀུསལཏཱཔཏྟིདོསཾ དིསྭཱ ཏཾ པརིཧརིཏུཾ དུཀྑཝིཔཱཀཝཙནམཱཧ. ཨཝཛྫ-སདྡོ ཝཱ རཱགཱདཱིསུ ཨེཀནྟཱཀུསལེསུ ནིརུལ༹ྷོཏི ཏཾསཧཝཏྟིདྷམྨཱནཾ ཨེཝ སཱཝཛྫབྷཱཝེ ཀུསལཱབྱཱཀཏེཧི ཨཀུསལཱནཾ ཝིསེསོ སཱཝཛྫཝཙནེནེཝ དསྶིཏོ. ཨབྱཱཀཏེཧི པན ཝིསིཊྛཾ ཀུསལཱཀུསལཱནཾ སཱདྷཱརཎཾ སཝིཔཱཀཏཱལཀྑཎནྟི ཏསྨིཾ ལཀྑཎེ ཝིསེསདསྶནཏྠཾ དུཀྑཝིཔཱཀལཀྑཎཾ ཝུཏྟཾ. ཨིཏོ པརཾ ‘‘དུཀྑོ ཝིཔཱཀོ ཨེཏེསནྟི དུཀྑཝིཔཱཀཱ’’ཏིཨཱདིནཱ སུཁཝིཔཱཀཨནཝཛྫཀུསལཔདཱནཾ ཋཱནེ དུཀྑཝིཔཱཀསཱཝཛྫཨཀུསལཔདཱནི ཋཔེཏྭཱ ཡཐཱཝུཏྟནཡེན ཨཏྠོ ཝེདིཏབྦོ ¶ . ཡོཛནཱ ཙ སཱཝཛྫཝཙནེན ཨཀུསལཱནཾ པཝཏྟིདུཀྑཏཾ དསྶེཏི, དུཀྑཝིཔཱཀཝཙནེན ཝིཔཱཀདུཀྑཏཾ. པུརིམཉྷི ཨཏྟནོ པཝཏྟིསབྷཱཝཝསེན ལཀྑཎཝཙནཾ, པཙྪིམཾ ཀཱལནྟརེ ཝིཔཱཀུཔྤཱདནསམཏྠཏཱཡཱཏི. ཏཐཱ པུརིམེན ཨཀུསལཱནཾ ཨཝིསུདྡྷསབྷཱཝཏཾ དསྶེཏི, པཙྪིམེན ཨཝིསུདྡྷཝིཔཱཀཏཾ. པུརིམེན ཙ ཨཀུསལེ ཀུསལསབྷཱཝཏོ ནིཝཏྟེཏི, པཙྪིམེན ཨབྱཱཀཏསབྷཱཝཏོ སཝིཔཱཀཏྟདཱིཔཀཏྟཱ པཙྪིམསྶ. པུརིམེན ཝཱ ཨཝཛྫཝནྟཏཱདསྶནཏོ ཀིཙྩཊྛེན རསེན ཨནཏྠཛནནརསཏཾ དསྶེཏི, པཙྪིམེན སམྤཏྟིཨཏྠེན ཨནིཊྛཝིཔཱཀརསཏཾ. པུརིམེན ཙ ཨུཔཊྛཱནཱཀཱརཊྛེན པཙྩུཔཊྛཱནེན སཾཀིལེསཔཙྩུཔཊྛཱནཏཾ, པཙྪིམེན ཕལཊྛེན དུཀྑཝིཔཱཀཔཙྩུཔཊྛཱནཏཾ. པུརིམེན ཙ ཨཡོནིསོམནསིཀཱརཾ ¶ ཨཀུསལཱནཾ པདཊྛཱནཾ པཀཱསེཏི. ཏཏོ ཧི ཏེ སཱཝཛྫཱ ཛཱཏཱཏི. པཙྪིམེན ཨཀུསལཱནཾ ཨཉྙེསཾ པདཊྛཱནབྷཱཝཾ ཝིབྷཱཝེཏི. ཏེ ཧི དུཀྑཝིཔཱཀསྶ ཀཱརཎཾ ཧོཏཱིཏི. ཨེཏྠ ཙ དུཀྑ-སདྡོ ཨནིཊྛཔརིཡཱཡཝཙནནྟི ཝེདིཏབྦཾ. ཨནིཊྛཙཏུཀྑནྡྷཝིཔཱཀཱ ཧི ཨཀུསལཱ, ན དུཀྑཝེདནཱཝིཔཱཀཱཝ. ཝིཔཱཀ-སདྡསྶ ཕལཔརིཡཱཡབྷཱཝེ པན ནིསྶནྡཝིཔཱཀེན ཨནིཊྛརཱུཔེནཔི དུཀྑཝིཔཱཀཏཱ ཡོཛེཏབྦཱ. ཝིཔཱཀདྷམྨཏཱཔཊིསེདྷཝསེན ཨབྱཱཀཏཱནཾ ཨཝིཔཱཀལཀྑཎཱཏི ལཀྑཎཾ ཝུཏྟནྟི ཏདཏྠཾ དསྶེནྟོ ‘‘ཨཝིཔཱཀཱརཧསབྷཱཝཱ’’ཏི ཨཱཧ. ཨེཝཾཔཀཱརཱནནྟི ཨབྷིཉྙཱདིཀེ སངྒཎྷཱཏི.

ཚཧི པདེཧི ཏིཀེསུ, ཙཏཱུཧི དུཀེསུ ཡཐཱཀྐམཾ ཚ ཙཏྟཱརོ ཨཏྠཱ ཝུཏྟཱ. ཚཀྐབྷཱཝོ ན བྷཝིསྶཏཱིཏི ཨེཏེན ཙཏུཀྐབྷཱཝཱབྷཱཝོ དསྶིཏནཡཏྟཱ ཙོདིཏོཡེཝཱཏི དཊྛབྦཾ. ཨཏྠབྷེདོ ཨུཔཔཛྫཏཱིཏི ཀསྨཱ ཨེཝཾ ཝུཏྟཾ, ནནུ ཏཱིཧི དྷམྨསདྡེཧི ཝུཙྩམཱནོ སབྷཱཝདྷཱརཎཱདིཨཏྠེན ཨབྷིནྣོ ཨེཝ སོ ཨཏྠོཏི? ན, ཛཱཏིཨཱདིབྷེདེན བྷེདསབྦྷཱཝཏོ. བྷེདཀཱ ཧི ཛཱཏིཨཱདཡོ. མཱསཔདཏྠཏཱཡཱཏི མཱས-སདྡཱབྷིདྷེཡྻབྷཱཝེན. ཏབྦཙནཱིཡབྷིནྣཏྠཱནནྟི ཏེཧི ཀཱལསདྡཱདཱིཧི ཝཏྟབྦཱནཾ ཝིསིཊྛཏྠཱནཾ. ཨིདཾ ཝུཏྟཾ ཧོཏི – ‘‘ཡཐཱ ཀཱལསདྡཱདིཨབྷིདྷེཡྻཱནཾ ཀཱལཱདིཨཏྠཱནཾ བྷིནྣསབྷཱཝཱནམྤི མཱས-སདྡཱབྷིདྷེཡྻབྷཱཝེན ཨབྷེདོ, ཨེཝཾ ཛཱཏིཨཱདིབྷེདེན བྷིནྣཱནམྤི ཏེསཾ ཏིཎྞཾ དྭིནྣཉྩ ཨཏྠཱནཾ དྷམྨ-སདྡཱབྷིདྷེཡྻབྷཱཝེན ནཏྠི བྷེདོ’’ཏི. ཝིནི…པེ… མཱནཱཏི དྷམྨ-སདྡསྶ རཱུཔཱབྷེདེཔི བྷེདཀཱརཎམཱཧ. བྷིནྣཛཱཏིཡཏྠཝཙནཱིཡཏཱཡ ཧི ཏསྶེཝཏྠབྷེདོཏི.

སཱདྷེཏུནྟི ¶ བོདྷེཏུཾ. ཧོཏུ ཨསམྦནྡྷོ, ཀཱ ནོ ཧཱནཱིཏི ཀདཱཙི ཝདེཡྻཱཏི ཨཱསངྐཱཡ ཨཱཧ ‘‘པུབྦཱ…པེ… ནཱམ ཧོནྟཱི’’ཏི. སོ ཙཱཏི སབྷཱཝདྷཱརཎཔཙྩཡདྷརིཡམཱནཏཱསངྑཱཏོ ཨཏྠོ ན སཀྐཱ ཝཏྟུནྟི ཡཐཱཝུཏྟསྶ ཨབྷཱཝསྶ ཨཔེཀྑཱཝུཏྟིཏཱཡ ཝུཏྟཾ. ན ཧི ཨཔེཀྑཱཝུཏྟིནོ ཨནྟརེན ཨཔེཀྑིཏབྦཾ ལབྷནྟི. སཏིཔི སབྷཱཝདྷཱརཎཱདིཨཏྠསཱམཉྙེ ཀུསལཛཱཏིཨཱདིཝིསིཊྛསྶེཝ ཏསྶ ཨིདྷ ཨདྷིཔྤེཏཏྟཱ ཨེཀཏྠཏཱ ན ཨནུཉྙཱཏཱཏི ཝུཏྟཾ, ཝཙནསིལེསཝསེན ཝཱ. ཨཐ ཝཱཏིཨཱདིནཱ ཏིཎྞཾ དྷམྨསདྡཱནཾ ཨབྷཱཝཏྟཾ ཨསམྤཊིཙྪནྟོ ནཱནཏྠཏཱབྷཱཝདོསཾ པརིཧརཏི.

ཉཱཔཀཧེཏུབྷཱཝཏོ ཨུཔཔཏྟི ཨིདྷ ཀཱརཎནྟི ཝུཏྟཱཏི ཨཱཧ ‘‘ཀཱརཎཾ ནཱམ ཡུཏྟཱི’’ཏི. པུནརུཏྟཱིཏིཨཱདིནཱ ནནུ ‘‘ཀུསལཱདཱིནམྤི ཨེཀཏྟཾ ཨཱཔཛྫཏཱི’’ཏི ཝུཏྟཏྟཱ ཨེཀཏྟཱཔཏྟིཔི ཝཏྟབྦཱཏི ¶ ? སཙྩཾ ཝཏྟབྦཱ, སཱ པན ཨབྷཱཝཱཔཏྟིཡཾ ཨེཝ ཨནྟོགདྷཱ ནཱནཏྟཱབྷཱཝཙོདནཱསཱམཉྙེན. བྷེདཱབྷེདནིབནྡྷནཏྟཱ ཝིསེསནཝིསེསིཏབྦབྷཱཝསྶ སོ ཨཙྩནྟམབྷིནྣེསུ ནིཡམེན ནཏྠཱིཏི ཝིསེསནཝིསེསིཏབྦཱབྷཱཝེན ཨཙྩནྟཱབྷེདཾ དསྶེཏི, ན པན ཨཙྩནྟཾ ཨབྷིནྣེསུཡེཝ ཝིསེསནཝིསེསིཏབྦཱབྷཱཝཾ. ཨཐ ཝཱ ཨཙྩནྟཾ ཨབྷིནྣེསུ ཨཝིཝཊསདྡཏྠཝིཝརཎཏྠཾ པཝཏྟཱ. ཀསྨཱ? ཝིསེསནཝིསེསིཏབྦཱབྷཱཝཏོཏི ཨེཝཾ ཡོཛནཱ ཀཱཏབྦཱ. ཨམིཏྟཾ ཨབྷིབྷཝིཏུཾ སཀྐུཎཱཏཱིཏི སཀྐོ, ཨིནྡཏཱིཏི ཨིནྡོ, པུརིམེ དདཱཏཱིཏི པུརིནྡདོཏི ཨེཝཾ ཀིརིཡཱགུཎཱདིཔརིགྒཧཝིསེསེན.

བྷེདཱབྷེདཝནྟེསཱུཏི ཝིསེསསཱམཉྙཝནྟེསུ. ནཱིལ-སདྡོ ཧི ཨུཔྤལསདྡསམཱཡོགོ རཏྟུཔྤལསེཏུཔྤལཱདིཨུཔྤལཛཱཏིསཱམཉྙཏོ ཝིནིཝཏྟེཏྭཱ ནཱིལགུཎཡུཏྟམེཝ ཨུཔྤལཛཱཏིཝིསེསཾ ཛོཏེཏི. ཨུཔྤལ-སདྡོཔི ནཱིལ-སདྡསམཱཡུཏྟོ བྷམརངྒཱརཀོཀིལཱདིགཏནཱིལགུཎསཱམཉྙཏོ ཨཝཙྪིནྡིཏྭཱ ཨུཔྤལཝཏྠུགཏམེཝ ནཱིལགུཎཾ པཀཱསེཏཱིཏི ཝིསེསཏྠསཱམཉྙཏྠཡུཏྟཏཱ པདདྭཡསྶ དཊྛབྦཱ. ཨིམིནཱ ནཡེན ཨིཏརཏྲཱཔི བྷེདཱབྷེདཝནྟཏཱ ཡོཛེཏབྦཱ. ཏཱཡ ཏཱཡ ཨནུམཏིཡཱཏི ཏེན ཏེན སངྐེཏེན. ཏེ ཏེ ཝོཧཱརཱཏི ཨཙྩནྟཾ ཨབྷིནྣེ ཨཏྠེ པརིཡཱཡབྷཱཝེན ཨཙྩནྟཾ བྷིནྣེ ཡཐཱསཀཾ ཨཏྠཝིཝརཎབྷཱཝེན བྷེདཱབྷེདཝནྟེ ཝིསེསནཝིསེསིཏབྦབྷཱཝེན ཏཱ ཏཱ སམཉྙཱ པཉྙཏྟིཡོ སིདྡྷཱཏི ཨཏྠོ ¶ . སམཱནེཏི ཨེཀསྨིཾ. ཀུསལཱདིབྷཱཝནྟི ཀུཙྪིཏསལནཱདིབྷཱཝཾ. ཨབྷིདྷཱནཏྠོཔི ཧི ཨནཝཛྫསུཁཝིཔཱཀཱདིཨབྷིདྷེཡྻཏྠོ ཝིཡ སབྷཱཝདྷཱརཎཱདིསཱམཉྙཏྠཾ ཝིསེསེཏཱིཏི.

ཨེཏྠཱཧ ‘‘ཀིཾ པན ཀཱརཎཾ ཏིཀཱ ཨེཝ པཋམཾ ཝུཏྟཱ, ན དུཀཱ, ཏིཀེསུཔི ཀུསལཏྟིཀོཝ, ན ཨཉྙོ’’ཏི? ཝུཙྩཏེ – སུཁགྒཧཎཏོ ཨཔྤབྷེདཏོ ཙ ཏིཀཱ ཨེཝ པཋམཾ ཝུཏྟཱ. ཡསྨཱ ཏིཀེཧི བོདྷིཏེ ཀུསལཱདིབྷེདེ ཏབྦིབྷཱགབྷིནྣཱ ཧེཏུཨཱདཡོ ཝུཙྩམཱནཱ སུཝིཉྙེཡྻཱ ཧོནྟི. ཏཐཱ ཧི ‘‘ཏཡོ ཀུསལཧེཏཱུ’’ཏིཨཱདིནཱ ཀུསལཱདིམུཁེན ཧེཏུཨཱདཡོ ཝིབྷཏྟཱ, ཀཏིཔཡབྷེདཱ ཙ ཏིཀཱ དྭཱཝཱིསཏིཔརིམཱཎཏྟཱ.

ཏེསུ པན སབྦསངྒཧཨསངྐརཨཱདིཀལྱཱཎབྷཱཝེན པཋམཾ ཀུསལཏྟིཀཾ ཝུཏྟཾ. ནིརཝསེསཱ ཧི རཱུཔཱརཱུཔདྷམྨཱ ཀུསལཏྟིཀེན སངྒཧིཏཱ, ན ཏཐཱ ཝེདནཱཏྟིཀཱདཱིཧི. ནནུ ཝིཔཱཀཏྟིཀཱདཱིཧིཔི ནིརཝསེསཱ དྷམྨཱ སངྒཧིཏཱཏི? སཙྩམེཏཾ, ཏེསུ པན ཨནཝཛྫསཱཝཛྫདྷམྨཱ ན ཨསངྐརཏོ ཝུཏྟཱ ཡཐཱ ཀུསལཏྟིཀེ. ནནུ ཙ སཾཀིལིཊྛསཾཀིལེསིཀཏྟིཀཱདཱིསུཔི ¶ ཏེ ཨསངྐརཏོ ཝུཏྟཱཏི? ཨེཝམེཏཾ, ཏེ པན ཨཀལྱཱཎབྷཱུཏེ པཱཔདྷམྨེ ཨཱདིཾ ཀཏྭཱ ཝུཏྟཱ, ན ཨེཝམཡཾ. ཨཡཾ པན ཀལྱཱཎབྷཱུཏེ པུཛྫབྷཝཔརིནིབྦུཏིནིཔྥཱདཀེ པུཉྙདྷམྨེ ཨཱདིཾ ཀཏྭཱ ཝུཏྟོ. ཨིཏི བྷགཝཱ སཎྷསུཁུམཾ རཱུཔཱརཱུཔདེསནཾ ཨཱརབྷནྟོ སབྦསངྒཧཨསངྐརཨཱདིཀལྱཱཎགུཎཡོགཏོ པཋམཾ ཀུསལཏྟིཀཾ དེསེཏི, ཀིཉྩ ཏདཉྙཏྟིཀཱནཾ སུཁགྒཧཎཏོ. ཏཐཱ ཧི ཀུསལཏྟིཀམུཁེན ‘‘ཀཱམཱཝཙརཀུསལཏོ ཙཏྟཱརོ སོམནསྶསཧགཏཙིཏྟུཔྤཱདཱ’’ཏིཨཱདིནཱ ཝེདནཱཏྟིཀཱདཡོ ཝིབྷཏྟཱཏི.

ཀུསལཏྟིཀེཔི ཙ པདྷཱནཔཱསཾསཨུབྷཡཧིཏབྷཱཝཏོ ཀུསལཱ དྷམྨཱ པཋམཾ ཝུཏྟཱ. ཀུསལཱ ཧི དྷམྨཱ སུཁཝིཔཱཀཏྟཱ སབྦསངྑཏདྷམྨཱནཾ ཨུཏྟམཱ ཨཝཛྫཝིདྷམནཏོ ཝིཉྙུཔྤསཏྠཱ ཨིདྷལོཀཔརལོཀེསུ ཨཏྠཱཝཧཱ ནིསྶརཎཱཝཧཱ ཙ, ཏསྨཱ པདྷཱནཱདིབྷཱཝེན པཋམཾ ཝུཏྟཱ, ཏཔྤཊིཔཀྑཏྟཱ ཏདནནྟརཾ ཨཀུསལཱ, ཏདུབྷཡཝིཔརཱིཏསབྷཱཝཱ ཏདནནྟརཾ ཨབྱཱཀཏཱ ཝུཏྟཱ. ཀུསལཝསེན ཝཱ ཨསྶཱདོ, ཨཀུསལཝསེན ཨཱདཱིནཝོ, ཨབྱཱཀཏདྷམྨེསུ ནིབྦཱནཝསེན ནིསྶརཎནྟི ཨིམིནཱ ཨསྶཱདཱདིཀྐམེན, ཀུསལེསུ པཏིཊྛཱཡ པཎྜིཏཱ ཨཀུསལེ པཛཧནྟཱ ཨབྱཱཀཏདྷམྨབྷཱུཏམགྒཕལཾ ནིབྦཱནཉྩ སཙྪིཀརོནྟཱིཏི ཨིམིནཱ ཝཱ པཊིཔཏྟིཀྐམེན ཨཡམནུཔུབྦཱི ཋཔིཏཱཏི ཝེདིཏབྦཱ.

ཀསྨཱ ¶ པནེཏྠ སེཀྑཏྟིཀཱདཱིསུ ཝིཡ སརཱུཔཏོ པུརིམཔདདྭཡཔཊིཀྑེཔཝསེན ཏཏིཡཔདཾ ན ཝུཏྟཾ ‘‘ནེཝཀུསལཱ ནཱཀུསལཱ’’ཏི? ཝིསེསདཱིཔནཏྠཾ. ཡཐཱ ཧི སེཀྑཱསེཀྑསབྷཱཝེསུ དྷམྨེསུ ཀོཙིཔི དྷམྨོ ཏདུབྷཡསབྷཱཝེན ཀེནཙིཔི པརིཡཱཡེན ཀདཱཙི ཨབྱཱཀརཎཱིཡོ ནཱམ ནཏྠཱིཏི སེཀྑཏྟིཀེ པདདྭཡཔཊིཀྑེཔཝསེན ‘‘ནེཝསེཀྑཱ ནཱསེཀྑཱ’’ཏྭེཝ ཝུཏྟཾ, ན ཨེཝཾ ཨིདྷ. ཨིདྷ པན ཀུསལསབྷཱཝཱ ཨེཝ དྷམྨཱ ཨགྒཕལུཔྤཏྟིཡཱ ཏཐཱ ན བྱཱཀརཎཱིཡཱ ཧོནྟཱིཏི ཨིམསྶ ཝིསེསསྶ དཱིཔནཏྠཾ ‘‘ཨབྱཱཀཏཱ’’ཏི ཝུཏྟཾ. ཝཙནམཏྟེ ཨེཝ ཝཱ ཨིདཾ ནཱནཱཀརཎཾ ‘‘ཨབྱཱཀཏཱ ནེཝཀུསལཱ ནཱཀུསལཱ’’ཏི བྱཱཀཏ-སདྡེན ཀུསལཱཀུསལཱནཾ བོདྷིཏཏྟཱཏི.

ཨེཏྠ ཙ ཨཀུསལེསུ ཏཎྷཱཡ སབྦཱཀུསལེཧི, ཏེབྷཱུམཀཀུསལཱཀུསལེཧི ཝཱ སམུདཡསཙྩཾ, ཏཾཏཾཨཝསིཊྛཏེབྷཱུམཀདྷམྨེཧི དུཀྑསཙྩཾ, ལོཀུཏྟརཀུསལེན མགྒསཙྩཾ, ཨཝསིཊྛཨབྱཱཀཏཝིསེསེན ནིརོདྷསཙྩཾ དསྶིཏཾ ཧོཏི. ཏཏྠ སམུདཡེན ཨསྶཱདོ, དུཀྑེན ཨཱདཱིནཝོ, མགྒནིརོདྷེཧི ནིསྶརཎཾ. ཀིཉྩཱཔི ནཱམརཱུཔཔརིཙྪེདབྷཱཝཏོ སབྷཱཝདྷམྨནིདྡྷཱརཎཔདྷཱནཱ ཨབྷིདྷམྨཀཐཱ, ཏེསཾ པན ¶ ཀུསལཱདིཝིསེསེ ནིདྡྷཱརིཏེ ཏསྶ ཨུཔསམྤཱདེཏབྦཏཱདིཔི ཨཏྠཏོ ཝུཏྟམེཝ ཧོཏི. ཨཀུསལཱནཾ དྷམྨཱནཾ པཧཱནཱཡ ཀུསལཱནཾ དྷམྨཱནཾ ཨུཔསམྤདཱཡ ‘‘སབྦཔཱཔསྶ ཨཀརཎཾ, ཀུསལསྶ ཨུཔསམྤདཱ’’ཏི (དྷ. པ. ༡༨༣; དཱི. ནི. ༢.༩༠) ཨེཝམཱདིཝཙནཏོ ཧི ཀུསལཱདཱིནཾ ཨུཔསམྤཱདནཱདིདསྶནཔརཾ བྷགཝཏོ སཱསནཾ, ཏསྨཱ ཀུསལཱནཾ ཨུཔསམྤཱདནཾ ཨཀུསལཱནཾ པཧཱནཉྩ ཨུཔཱཡོ, ཨབྱཱཀཏཝིསེསསྶ སཙྪིཀིརིཡཱ ཕལཾ, ཀུསལཱདཱིནཾ ཨུཔསམྤཱདནཱདིཨཏྠཱ དེསནཱ ཨཱཎཏྟཱིཏི ཨཡཾ དེསནཱཧཱརོ.

ཨཱརོགྱཊྛེན ཨནཝཛྫཊྛེན ཀོསལྱསམྦྷཱུཏཊྛེན ཙ ཀུསལཱ, ཏཔྤཊིཔཀྑཏོ ཨཀུསལཱ, ཏདུབྷཡཝིཔརཱིཏཏོ ཨབྱཱཀཏཱ, སབྷཱཝདྷཱརཎཱདིཨཏྠེན དྷམྨཱཏི ཨནུཔདཝིཙིནནཾ ཝིཙཡོ ཧཱརོ.

པུཛྫབྷཝཕལཔརིནིབྦུཏིནིཔྥཏྟི ཀུསལེཧཱིཏི ཡུཛྫཏི སུཁཝིཔཱཀཏྟཱ, ཨཔཱཡདུཀྑསཾསཱརདུཀྑུཔྤཏྟི ཨཀུསལེཧཱིཏི ཡུཛྫཏི ཨནིཊྛཕལཏྟཱ, ཏདུབྷཡཕལཱནཾ ཨནུཔྤཏྟི ཨབྱཱཀཏེཧཱིཏི ཡུཛྫཏི ཨཝིཔཱཀདྷམྨཏྟཱཏི ཨཡཾ ཡུཏྟི ཧཱརོ.

ཀུསལཱ ¶ དྷམྨཱ སུཁཝིཔཱཀསྶ པདཊྛཱནཾ, ཨཀུསལཱ དུཀྑཝིཔཱཀསྶ, ཨབྱཱཀཏཱ ཀུསལཱཀུསལཱབྱཱཀཏདྷམྨཱནནྟི ཨཡཾ པདཊྛཱནོ ཧཱརོ.

ཀུསལགྒཧཎེན ཡེ ཨནཝཛྫསུཁཝིཔཱཀཱ སུཁཱཡ ཝེདནཱཡ སམྤཡུཏྟཱ ཨདུཀྑམསུཁཱཡ ཝེདནཱཡ སམྤཡུཏྟཱ ཝིཔཱཀདྷམྨདྷམྨཱ ཨནུཔཱདིནྣུཔཱདཱནིཡཱ ཨནུཔཱདིནྣཨནུཔཱདཱནིཡཱ…པེ… ཨརཎཱ དྷམྨཱ, ཏེ བོདྷིཏཱ བྷཝནྟི ཀུསལལཀྑཎེན ཨེཀལཀྑཎཏྟཱ. ཏཐཱ ཨཀུསལགྒཧཎེན ཡེ སཱཝཛྫདུཀྑཝིཔཱཀཱ སུཁཱཡ ཝེདནཱཡ སམྤཡུཏྟཱ དུཀྑཱཡ ཝེདནཱཡ སམྤཡུཏྟཱ ཨདུཀྑམསུཁཱཡ ཝེདནཱཡ སམྤཡུཏྟཱ ཝིཔཱཀདྷམྨདྷམྨཱ ཨནུཔཱདིནྣུཔཱདཱནིཡཱ སཾཀིལིཊྛསཾཀིལེསིཀཱ…པེ… སརཎཱ དྷམྨཱ, ཏེ བོདྷིཏཱ བྷཝནྟི ཨཀུསལལཀྑཎེན ཨེཀལཀྑཎཏྟཱ. ཏཐཱ ཨབྱཱཀཏགྒཧཎེན ཡེ ཨཝིཔཱཀཱརཧཱ སུཁཱཡ ཝེདནཱཡ སམྤཡུཏྟཱ དུཀྑཱཡ ཝེདནཱཡ སམྤཡུཏྟཱ ཨདུཀྑམསུཁཱཡ ཝེདནཱཡ སམྤཡུཏྟཱ ཝིཔཱཀཱ དྷམྨཱ ནེཝཝིཔཱཀནཝིཔཱཀདྷམྨདྷམྨཱ ཨུཔཱདིནྣུཔཱདཱནིཡཱ ཨནུཔཱདིནྣུཔཱདཱནིཡཱ ཨནུཔཱདིནྣཨནུཔཱདཱནིཡཱ…པེ… ཨརཎཱ དྷམྨཱ, ཏེ བོདྷིཏཱ བྷཝནྟི ཨབྱཱཀཏལཀྑཎེན ཨེཀལཀྑཎཏྟཱཏི ཨཡཾ ལཀྑཎོ ཧཱརོ.

‘‘ཀུཙྪིཏེ ¶ པཱཔདྷམྨེ སལཡནྟཱི’’ཏིཨཱདིནཱ ནིརུཏྟི ཝེདིཏབྦཱ, ཀུསལཱདིམུཁེན རཱུཔཱརཱུཔདྷམྨེ པརིགྒཧེཏྭཱ ཝིསུདྡྷིཔརམྤརཱཡ ‘‘ཀཐཾ ནུ ཁོ སཏྟཱ ཨནུཔཱདིསེསནིབྦཱནབྷཱགིནོ བྷཝེཡྻུ’’ནྟི ཨཡམེཏྠ བྷགཝཏོ ཨདྷིཔྤཱཡོ, ནིདཱནཾ ཨསཱདྷཱརཎཏོ ཀུསལཱདིབྷེདེན བུཛ྄ཛྷནཀསཏྟཱ. སཱདྷཱརཎཏོ པན པཱཀཊམེཝ. པཋམཾ ཀུསལཏྟིཀསྶ དེསནཱ ཝིཙཱརིཏཱཡེཝཱཏི ཨཡཾ ཙཏུབྱཱུཧོ ཧཱརོ.

ཀུསལགྒཧཎེན ཀལྱཱཎམིཏྟཔརིགྒཧོ ཡོནིསོམནསིཀཱརཔརིགྒཧོ ཙ. ཏཏྠ པཋམེན སཀལཾ བྲཧྨཙརིཡམཱཝཏྟཏི, དུཏིཡེན ཙ ཡོནིསོམནསིཀཱརམཱུལཀཱ དྷམྨཱ. ཨཀུསལགྒཧཎེན ཝུཏྟཝིཔརིཡཱཡེན ཡོཛེཏབྦཾ. ཨབྱཱཀཏགྒཧཎེན པན སཀལསཾཀིལེསཝོདཱནཔཀྑོ ཡཐཱརཧམཱཝཏྟཏཱིཏི ཨཡཾ ཨཱཝཏྟོ ཧཱརོ.

ཏཏྠ ཀུསལཱ བྷཱུམིཏོ ཙཏུདྷཱ ཝིབྷཏྟཱ, སམྤཡུཏྟཔཝཏྟིཨཱཀཱརཱདིཏོ པན ཨནེཀདྷཱ. ཨཀུསལཱ བྷཱུམིཏོ ཨེཀདྷཱ ཝིབྷཏྟཱ, སམྤཡུཏྟཱདིཏོ ཨནེཀདྷཱ. ཨབྱཱཀཏཱ པན ཝིཔཱཀཀིརིཡརཱུཔནིབྦཱནཝསེན ཙཏུདྷཱ བྷཱུམིསམྤཡུཏྟཱདིཏོ ཨནེཀདྷཱ ཙ ཝིབྷཏྟཱཏི ཨཡཾ ཝིབྷཏྟི ཧཱརོ.

ཀུསལཱ ¶ དྷམྨཱ ཨཀུསལཱནཾ ཏདངྒཱདིཔྤཧཱནཱཡ ཝཱིཏིཀྐམཱདིཔྤཧཱནཱཡ ཙ སཾཝཏྟནྟི, ཨཀུསལཱ དྷམྨཱ ཀུསལཱནཾ ཨནུཔསམྤཛྫནཱཡ, ཨབྱཱཀཏེསུ ཨསངྑཏདྷཱཏུ སབྦསངྑཏནིསྶརཎཱཡཱཏི ཨཡཾ པརིཝཏྟོ ཧཱརོ.

ཀུསལཱ ཨནཝཛྫཱ པུཉྙཱནཱིཏི པརིཡཱཡཝཙནཾ, ཨཀུསལཱ སཱཝཛྫཱ ཨཔུཉྙཱནཱིཏི པརིཡཱཡ ཝཙནཾ, ཨབྱཱཀཏཱ ཨཝིཔཱཀཱརཧཱ ནེཝཨཱཙཡགཱམཱི ནཨཔཙཡགཱམཱིནོཏི པརིཡཱཡཝཙནནྟི ཨཡཾ ཝེཝཙནོ ཧཱརོ.

ཀུསལཱདཡོ ‘‘ཡསྨིཾ སམཡེ’’ཏིཨཱདིནཱ པབྷཝབྷཱུམིཝེཝཙནཔཉྙཏྟིཝསེན ཡཐཱསམྦྷཝཾ པརིཉྙཱདིཔཉྙཏྟིཝསེན ཙ པཉྙཏྟཱཏི ཨཡཾ པཉྙཏྟི ཧཱརོ.

ཨཀུསལཱནཾ ཀུཙྪིཏཱནཾ པཱཔདྷམྨཱནཾ སལནཾ ཀུསཱནཾ ཝིཡ ཀུསཱནཾ ཝཱ རཱགཱདཱིནཾ ལཝནཾ ཨེཝཾདྷམྨཏཱཏི ཨཡཾ པཊིཙྩསམུཔྤཱདམུཁེན ཨཝཏརཎཾ, ཏཐཱ ཀུསེན ལཱཏབྦཱ ཀོསལླསམྦྷཱུཏཱ ཙཱཏི ¶ པཙྩཡཔཊིབདྡྷཝུཏྟིཏཱཡ པཊིཙྩསམུཔྤཱད…པེ… ཨཝཏརཎཾ, པཙྩཡཔཊིབདྡྷཝུཏྟིཏཱཡ ཝཱ ཨཱདིཨནྟཝནྟཱ ཨནིཙྩནྟིཀཱ ཙཱཏི ཨནིཙྩཏཱམུཁེན ཨཝཏརཎཾ, ཨནིཙྩཏཱ ཨེཝ ཨུདཡབྦཡཔཊིཔཱིལི༹ཏཏཱཡ དུཀྑཱཏི དུཀྑཏཱམུཁེན ཨཝཏརཎཾ, ནིསྶཏྟནིཛྫཱིཝཊྛེན དྷམྨཱཏི ཨབྱཱཔཱརཏོ སུཉྙཏཱམུཁེན ཨཝཏརཎཾ, ཨེཝཾ ཀུསལཱཏི ཙཏྟཱརོ ཁནྡྷཱ དྭཱཡཏནཱནི དྭེ དྷཱཏུཡོཏིཨཱདིནཱ ཁནྡྷཱཡཏནདྷཱཏཱདིམུཁེནཔི ཨཝཏརཎཾ ཝེདིཏབྦཾ. ཨིམིནཱ ནཡེན ཨཀུསལཱབྱཱཀཏེསུཔི ཨཝཏརཎཾ དསྶེཏབྦནྟི ཨཡཾ ཨཝཏརཎོ ཧཱརོ.

ཀུསལཱཏི ཨཱརམྦྷོ, དྷམྨཱཏི པདསུདྡྷི, ནོ ཨཱརམྦྷསུདྡྷི. ཏཐཱ ཨཀུསལཱ དྷམྨཱ ཨབྱཱཀཏཱཏི, དྷམྨཱཏི པན པདསུདྡྷི ཨཱརམྦྷསུདྡྷི ཙཱཏི ཨཡཾ སོདྷནོ ཧཱརོ.

དྷམྨཱཏི སཱམཉྙཏོ ཨདྷིཊྛཱནཾ, ཏཾ ཨཝིཀཔྤེཏྭཱ ཝིསེསཝཙནཾ ཀུསལཱཀུསལཱབྱཱཀཏཱཏི. ཏཐཱ ཀུསལཱ དྷམྨཱཏི སཱམཉྙཏོ ཨདྷིཊྛཱནཾ, ཏཾ ཨཝིཀཔྤེཏྭཱ ཀཱམཱཝཙརཾ སོམནསྶསཧགཏནྟིཨཱདི ཝིསེསཝཙནཾ. ཨཀུསལཱ དྷམྨཱཏིཨཱདཱིསུཔི ཨེསེཝ ནཡོཏི ཨཡཾ ཨདྷིཊྛཱནོ ཧཱརོ.

ཀུསལཱནཾ དྷམྨཱནཾ ནཝམོ ཁཎོ ཙཏྟཱརི ཙ སམྤཏྟིཙཀྐཱནི ཡོནིསོམནསིཀཱརོ ཨེཝ ཝཱ ཧེཏུ, ཝུཏྟཝིཔརིཡཱཡེན ཨཀུསལཱནཾ དྷམྨཱནཾ ཧེཏུ, ཀུསལཱཀུསལཱ དྷམྨཱ ཡཐཱསམྦྷཝཾ ཨབྱཱཀཏཱནཾ དྷམྨཱནཾ ཧེཏཱུཏི ཨཡཾ པརིཀྑཱརོ ཧཱརོ.

ཀུསལཱཏི ¶ པརིཉྙེཡྻགྒཧཎཉྩེཝ བྷཱཝེཏབྦགྒཧཎཉྩ. ཨཀུསལཱཏི པརིཉྙེཡྻགྒཧཎཉྩེཝ པཧཱཏབྦགྒཧཎཉྩ. ཨབྱཱཀཏཱཏི པརིཉྙེཡྻགྒཧཎཉྩེཝ སཙྪིཀཱཏབྦགྒཧཎཉྩ. དྷམྨཱཏི པརིཉྙཱདཱིནཾ པཝཏྟནཱཀཱརགྒཧཎཾ. ཏེན པརིཉྙེཡྻཔྤཧཱནབྷཱཝནཱསཙྪིཀརཎཱནི དཱིཔིཏཱནཱིཏི ཏདངྒཱདིཝཱིཏིཀྐམཱདིཔྤཧཱནཱནི ལོཀིཡལོཀུཏྟརཱ ཙ བྷཱཝནཱ དསྶིཏཱཏི ཨཡཾ སམཱརོཔནོ ཧཱརོ.

ཀཱམཉྩེཏཾ ཨཝིསེསཏོ སབྷཱཝདྷམྨཀཐནཾ, ཝིསེསཝནྟོ པན དྷམྨཱ ཝིསེསཏོ ནིདྡྷཱརིཏཱ. ཏཐཱ ཧི ཙིཏྟེནེཝ སམཡོ ནིཡམིཏོ, ཏསྨཱ ཀུསལགྒཧཎེན ཝིསེསཏོ སཱདྷིཊྛཱནོ སམཐོ ཝིཔསྶནཱ ཙ དསྶིཏཱཏི. ཏཐཱ ཏཔྤཊིཔཀྑཏོ ཨཀུསལགྒཧཎེན སཱདྷིཊྛཱནཱ ཏཎྷཱ ཨཝིཛྫཱ ཙ ¶ , ཨབྱཱཀཏགྒཧཎེན སཔརིཝཱརཱ ཙེཏོཝིམུཏྟི པཉྙཱཝིམུཏྟི ཙཱཏི ཨཡཾ ནནྡིཡཱཝཏྟསྶ ནཡསྶ བྷཱུམི.

ཏཐཱ ཀུསལགྒཧཎེན མཱུལབྷཱཝཝིསེསཏོ ཏཱིཎི ཀུསལམཱུལཱནི, ཏེསུ ཙ ཨདོསེན སཱིལཀྑནྡྷོ, ཨལོབྷེན སམཱདྷིཀྑནྡྷོ, ཨམོཧེན པཉྙཱཀྑནྡྷོ ནཱིཡཏི. ཏཐཱ ཨཀུསལགྒཧཎེན ཏཱིཎི ཨཀུསལམཱུལཱནི, ཏེསུ ཙ ལོབྷེན ཏདེཀཊྛཱ ཨཀུསལཱ དྷམྨཱ. ཏཐཱ དོསམོཧེཧི ཏཾཏདེཀཊྛཱ. ཨབྱཱཀཏགྒཧཎེན ཨཔྤཎིཧིཏཱནིམིཏྟསུཉྙཏཱ ནཱིཡནྟཱིཏི ཨཡཾ ཏིཔུཀྑལསྶ ནཡསྶ བྷཱུམི.

ཏཐཱ ཀུསལགྒཧཎེན ཡཏོ ཀོསལླཏོ སམྦྷཱུཏཱ ཀུསལཱ, ཏཾ པཉྙིནྡྲིཡཾ. ཏཾསཧཛཱཏཱ ཏདུཔནིསྶཡཱ ཙ སདྡཧནུསྶཧནཱཔིལཱཔཱཝིཀྑེཔཱ སདྡྷིནྡྲིཡཱདཱིནི. ཏེཧི ཙ སབྦེ སདྡྷམྨཱ བོདྷིཏཱ བྷཝནྟི. ཨཀུསལགྒཧཎེན ཨཀོསལླཔཊིཙྪཱདིཏཱདཱིནཝེསུ ཀཱཡཝེདནཱཙིཏྟདྷམྨེསུ སུབྷསུཁནིཙྩཨཏྟཱབྷིནིཝེསབྷཱུཏཱ ཙཏྟཱརོ ཝིཔལླཱསཱ. ཨབྱཱཀཏགྒཧཎེན ཡཐཱཝུཏྟཨིནྡྲིཡཔཙྩཡཱནི ཡཐཱཝུཏྟཝིཔལླཱསཔྤཧཱནབྷཱུཏཱནི ཙ ཙཏྟཱརི སཱམཉྙཕལཱནི བོདྷིཏཱནཱིཏི ཨཡཾ སཱིཧཝིཀྐཱིལི༹ཏསྶ ནཡསྶ བྷཱུམཱིཏི ཨིམེ ཏཡོ ཨཏྠནཡཱ.

ཏེཧི ཙ སིདྡྷེཧི དྭེ ཀམྨནཡཱཔི སིདྡྷཱ ཧོནྟཱིཏི. ཨཡཾ ཏིཀོ སབྦདྷམྨསངྒཧིཏསབྦབྷཱགིཡོ ཝེདིཏབྦོཏི ཨིདཾ སཱསནཔཊྛཱནཾ.

ཨཡཾ ཏཱཝ ནེཏྟིནཡེན ཀུསལཏྟིཀཝཎྞནཱ.

ཨེཝཾ ¶ ཝེདནཱཏྟིཀཱདཱིསུཔི ཡཐཱསམྦྷཝཾ ཙཏུསཙྩནིདྡྷཱརཎཱདིཝིདྷིནཱ སོལ༹ས ཧཱརཱ པཉྩ ནཡཱ ནིདྡིསིཏབྦཱ, ཨཏིཝིཏྠཱརབྷཡེན པན ན ཝིཏྠཱརཡཱམ. སཀྐཱ ཧི ཨིམིནཱ ནཡེན ཏེསུ ཏེསུ ཏིཀདུཀེསུ ཏཾཏཾཧཱརནཡཡོཛནཱནུརཱུཔདྷམྨནིདྡྷཱརཎཝསེན ཏེ ཏེ ཧཱརནཡཱ ཝིཉྙུནཱ ནིདྡིསིཏུནྟི.

༢. ཏཉྩ སུཁིནྡྲིཡཾ སུཁཝེདནཱ ཨེཝ ཧོཏི སཱམཉྙསྶ བྷེདཔརིཡཱདཱནཏོ, བྷེདསྶ ཙ སཱམཉྙཔརིཙྩཱགཏོཏི ཨདྷིཔྤཱཡོ. ཡསྨཱ པན ཝིསེསསཱམཉྙཱནི ཨཝཡཝསམུདཱཡཱ ཝིཡ ཨཉྙམཉྙཏོ བྷིནྣཱནི, ཏསྨཱ ‘‘ན པན…པེ… སམཱནཏྠཏྟཱ’’ཏི ཝུཏྟཾ. ཨིདཱནི ཏམེཝ ནེསཾ བྷིནྣཏཏྭཾ ¶ ‘‘ཨཡཉྷཱི’’ཏིཨཱདིནཱ ཝིཝརཏི. ཏནྟི སུཁཧེཏཱུནཾ ཀཱརཎཾ. ཏེན སུཁསྶ ཀཱརཎཾ སུཁཧེཏུ, སུཁསྶ ཀཱརཎཀཱརཎཾ སུཁམཱུལནྟི དསྶེཏི. སུཁཧེཏཱུནནྟི ཨེཏྠ ཧེཏུ-སདྡེན ཀཱརཎབྷཱཝསཱམཉྙཏོ ཧེཏུཔཙྩཡཱ སངྒཧིཏཱཏི ཨཱཧ ‘‘པུཉྙཔསྶདྡྷིཨཱདཱིན’’ནྟི. ཨེཏྠ ཙ སུཁམཱུལསུཁཧེཏཱུསུ ཕལཱུཔཙཱརེན, སུཁཱརམྨཎསུཁཔཙྩཡཊྛཱནེསུ སུཁསཧཙརིཡཱཡ, ཨབྱཱཔཛྫནིབྦཱནེསུ དུཀྑཱཔགམབྷཱཝེན སུཁཔརིཡཱཡོ ཝུཏྟོཏི དཊྛབྦོ. ཨིཊྛཱསཱུཏི སུཁུཔེཀྑཱནཾ ཝིཔརིཎཱམཱཉྙཱཎསངྑཱརདུཀྑཏཱཡ ཨནིཊྛབྷཱཝོཔི ཨཏྠཱིཏི ཝིསེསེཏི. ཨུཔེཀྑམེཝ ཝཱ ཨཔེཀྑིཏྭཱ ཝིསེསནཾ ཀཏཾ. སཱ ཧི ཨཀུསལཝིཔཱཀབྷཱུཏཱ ཨནིཊྛཱཔི ཨཏྠཱིཏི. ཨེཝམཱདཱིསཱུཏི ཨཱདི-སདྡེན ‘‘སོཝགྒིཀཾ སུཁཝིཔཱཀ’’ནྟི (དཱི. ནི. ༡.༡༦༣) ཨེཝམཱདིཾ སངྒཎྷཱཏི. ཨིཊྛཔརིཡཱཡོ ཧི ཨེཏྠ སུཁ-སདྡོཏི.

སངྑཱརདུཀྑཱདཱིསཱུཏི ཨེཏྠ ཨཱདི-སདྡེན ‘‘ཋིཏིསུཁཾ ཝིཔརིཎཱམདུཀྑཾ, ཨཀུསལཾ ཀཱཡཀམྨཾ དུཀྑུདྲཡཾ དུཀྑཝིཔཱཀ’’ནྟིཨཱདིཀེ སངྒཎྷཱཏི. ཡཐཱཀྐམཾ སུཁཝེདནཱ དུཀྑཨནིཊྛཔརིཡཱཡོ ཧི ཨེཏྠ དུཀྑ-སདྡོཏི. དུཀྑཝེདནཱདུཀྑཝཏྠུཨཱདཱིསུ དུཀྑསདྡཔྤཝཏྟི ཝུཏྟནཡེནེཝ ཡོཛེཏབྦཱ. ཝིཔཱཀཱཝིཔཱཀབྷེདཱཡ སབྦཱཡཔི སུཁཝེདནཱཡ ཝསེན ལཀྑཎསྶ ཝུཏྟཏྟཱ ཏདུབྷཡཱནུཀཱུལམཏྠཾ ཝིཝརནྟོ ‘‘སབྷཱཝཏོ’’ཏིཨཱདིམཱཧ. ཏཏྠ ཝིཔཱཀཱ སབྷཱཝཏོ ཨིཊྛསྶ ཨནུབྷཝནལཀྑཎཱ. ཨིཏརཱ སབྷཱཝཏོ སངྐཔྤཏོ ཙ ཨིཊྛསྶ ཨིཊྛཱཀཱརསྶ ཝཱ ཨནུབྷཝནལཀྑཎཱཏི དཊྛབྦཾ.

ཨསམཱནཔཙྩཡེཧི ¶ ཨེཀཛ྄ཛྷཾ ཨུཔྤཏྟིཏོ སམཱནཔཙྩཡེཧི ཨེཀཛ྄ཛྷཾ ཨུཔྤཏྟི སཱཏིསཡཱཏི ཨུཀྐཾསགཏིཝིཛཱནནཝསེན ‘‘སམཱནཔཙྩཡེཧི སཧུཔྤཏྟིཀཱཏི ཨཏྠོ’’ཏི ཝུཏྟཾ. ཨཐ ཝཱ ཨུཔྤཛྫནཾ ཨུཔྤཱདོ, ཨུཔྤཛྫཏི ཨེཏསྨཱཏི ཨུཔྤཱདོཏི དུཝིདྷོཔི ཨུཔྤཱདོ ཨེཀུཔྤཱདཱཏི ཨེཏྠ ཨེཀསེསནཡེན སངྒཧིཏོཏི ཨིམིནཱ ཨདྷིཔྤཱཡེན ‘‘སམཱ…པེ… ཨཏྠོ’’ཏི ཝུཏྟཾ སིཡཱ. ཏེན ཏཱནི ཨེཀཝཏྠུཀཱནཱིཏི ཨེཏསྶ ཙ ‘‘ཀཔྤེནྟསྶཱ’’ཏིཨཱདིནཱ སམྦནྡྷོ. ཏཏྠ པུརིམཝིཀཔྤེ ཨེཀཾ ཝཏྠུ ནིསྶཡོ ཨེཏེསནྟི ཡོཛནཱ, ན ཨེཀཾཡེཝ ཝཏྠཱུཏི. ཨེཀེཀབྷཱུཏསྶ བྷཱུཏཏྟཡནིསྶིཏཏྟཱ ཙཏུབྷཱུཏནིསྶིཏཏྟཱ ཙ ཨུཔཱདཱརཱུཔཱནཾ. དུཏིཡཝིཀཔྤེ པན ཨེཀཾཡེཝ ཝཏྠུ ཨེཏེསུ ནིསྶིཏནྟི ཡོཛནཱ. ནིསྶཡནིསྶིཏཏཱསངྑཱཏཨུཔཀཱརོཔཀཏྟབྦབྷཱཝདཱིཔནཾ ཨེཀཝཏྠུཀཝཙནནྟི དུཏིཡཝིཀཔྤེ མཧཱབྷཱུཏཝསེན ཡོཛནཱ ཀཏཱ. ཨིཏརཐཱ ཨེཀཾ ཝཏྠུ ཨེཏེསཱུཏི སམཱསཏྠབྷཱཝེན ཨུཔཱདཱརཱུཔཱནམྤི པརིགྒཧོ ཝཏྟབྦོ སིཡཱ. པཉྩཝིཉྙཱཎསམྤཊིཙྪནཱནནྟི ཨིདཾ ནིདསྶནནྟི དཊྛབྦཾ. ཀིརིཡམནོདྷཱཏུཙཀྑུཝིཉྙཱཎཱདཡོཔི ཧི ཨེཀཱརམྨཎཱབྷིནྣཝཏྠུཀཱ ཙཱཏི པཱཀཊོཡམཏྠོཏི. སནྟཱིརཎཱདཱིནནྟི ¶ ཨཱདི-སདྡེན ཝོཊྛབྦནཛཝནཏདཱརམྨཎཱནི སངྒཡ྄ཧནྟི, ཨེཏཱནི ཙ སམྤཊིཙྪནཱདཱིནི ཙུཏིཨཱསནྣཱནི ཨིདྷཱདྷིཔྤེཏཱནཱིཏི དཊྛབྦཾ. ཏཱནི ཧི ཏདུདྡྷཾ ཀམྨཛརཱུཔསྶ ཨནུཔྤཏྟིཏོ ཨེཀསྨིཾཡེཝ ཧདཡཝཏྠུསྨིཾ ཝཏྟནྟི, ཨིཏརཱནི པན པུརིམཔུརིམཙིཏྟཀྑཎུཔྤནྣེ ཧདཡཝཏྠུསྨིཾ ཨུཏྟརུཏྟརཱནི པཝཏྟནྟཱིཏི. ཚསུ ཝཱ ཝཏྠཱུསུ ཨེཀཾ ཧདཡཝཏྠུཡེཝ ཝཏྠུ ཨེཏེསནྟི ཨེཝཾ པན ཨཏྠེ སཏི ཙུཏིཨཱསནྣཏོ ཨིཏརེསཾ སམྤཊིཙྪནཱདཱིནཾ གཧཎཾ སིཡཱཏི ཉཱཏབྦཾ.

ཨེཏྠཱཧ – ‘‘ཀསྨཱ པནེཏྠ ཀུསལཏྟིཀཱནནྟརཾ ཝེདནཱཏྟིཀོཝ ཝུཏྟོ’’ཏི? ཀིསྨིཾ པན ཝུཙྩམཱནེ ཨཡམནུཡོགོ ན སིཡཱ, ཨཔིཙ ཨཝཡཝཱནཾ ཨནེཀབྷེདཏཱདསྶནཏྠཱ ཏིཀནྟརདེསནཱ. སམྨཱསམྦུདྡྷེན ཧི ཀུསལཏྟིཀེན སབྦདྷམྨཱནཾ ཏིདྷཱ ཝིབྷཱགཾ དསྶེཏྭཱ པུན ཏདཝཡཝཱནཾ ཀུསལཱདཱིནམྤི ཨནེཀབྷེདབྷིནྣཏཾ དསྶེནྟེན ཏེསཾ ཝེདནཱསམྤཡོགཝིབྷཱགཝིབྷཱཝནཏྠཾ ‘‘སུཁཱཡ ཝེདནཱཡ སམྤཡུཏྟཱ’’ཏི ཝུཏྟཾ. ཀུསལཱ ཧི དྷམྨཱ སིཡཱ སུཁཱཡ ཝེདནཱཡ སམྤཡུཏྟཱ, སིཡཱ ཨདུཀྑམསུཁཱཡ ཝེདནཱཡ སམྤཡུཏྟཱ. ཨཀུསལཱ དྷམྨཱ སིཡཱ སུཁཱཡ ཝེདནཱཡ སམྤཡུཏྟཱ, སིཡཱ དུཀྑཱཡ ཝེདནཱཡ སམྤཡུཏྟཱ, སིཡཱ ཨདུཀྑམསུཁཱཡ ཝེདནཱཡ སམྤཡུཏྟཱ, ཏཐཱ ཨབྱཱཀཏཱ སམྤཡོགཱརཧཱཏི. ཨེཝཾ ཀུསལཱདིདྷམྨཱནཾ ¶ པཙྩེཀཾ ཝེདནཱབྷེདེན ཝིབྷཱགདསྶནཏྠཾ ཀུསལཏྟིཀཱནནྟརཾ ཝེདནཱཏྟིཀཾ ཝཏྭཱ ཨིདཱནི སུཁསམྤཡུཏྟཱདཱིནཾ པཙྩེཀཾ ཝིཔཱཀཱདིབྷེདབྷིནྣཏཾ དསྶེཏུཾ ཝེདནཱཏྟིཀཱནནྟརཾ ཝིཔཱཀཏྟིཀོ ཝུཏྟོ. སུཁསམྤཡུཏྟཱ ཧི དྷམྨཱ སིཡཱ ཝིཔཱཀཱ, སིཡཱ ཝིཔཱཀདྷམྨདྷམྨཱ, སིཡཱ ནེཝཝིཔཱཀནཝིཔཱཀདྷམྨདྷམྨཱ. ཏཐཱ ཨདུཀྑམསུཁསམྤཡུཏྟཱ, དུཀྑསམྤཡུཏྟཱ པན སིཡཱ ཝིཔཱཀཱ, སིཡཱ ཝིཔཱཀདྷམྨདྷམྨཱཏི ཨིམིནཱ ནཡེན ཨཝསེསཏྟིཀཱནཾ དུཀཱནཉྩ ཏསྶ ཏསྶ ཨནནྟརཝཙནེ པཡོཛནཾ ཝིབྷཱཝེཏབྦཾ.

༣. ཝིཔཱཀནིརུཏྟིཉྩ ལབྷནྟཱིཏི ཏེསུ ཝིཔཱཀསདྡསྶ ནིརུལ༹ྷཏཾ དསྶེཏི. སུཀྐཀཎྷཱདཱིཏི ཨཱདི-སདྡེན ཨཀཎྷཨསུཀྐཕསྶཱདིབྷཱཝོ པརིགྒཧིཏོ. སཏི པན པཱཀ-སདྡསྶ ཕལཔརིཡཱཡབྷཱཝེ རཱུཔཾ ཝིཡ ན ནིཧཱིནོ པཀྐཾ ཝིཡ ཝིསིཊྛོ པཱཀོཏི ཝིཔཱཀོཏི ཨེཝཾ ཝཱ ཨེཏྠ ཨཏྠོ དཊྛབྦོ. སབྱཱཔཱརཏཱཏི སཨུསྶཱཧཏཱ. སནྟཱནེ སབྱཱཔཱརཏཱཏི ཨེཏེན ཙིཏྟཔྤཡོགསངྑཱཏེན ཀིརིཡཱབྷཱཝེན ཝིཔཱཀདྷམྨཱནཾ སནྟཱནཝིསེསམཱཧ ‘‘ཡཏོ ཡསྨིཾ ཙིཏྟུཔྤཱདེ ཀུསལཱཀུསལཱ ཙེཏནཱ, ཏཾསནྟཱནེ ཨེཝ ཏསྶཱ ཝིཔཱཀུཔྤཏྟཱི’’ཏི. ཨེཏྠ ཙ ‘‘སབྱཱཔཱརཏཱ’’ཏི ཨེཏེན ཨཱཝཛྫནདྭཡཾ ཝིཔཱཀཉྩ ནིཝཏྟེཏི, ‘‘ཨནུཔཙྪིནྣཱཝིཛྫཱཏཎྷཱམཱནེ’’ཏི ཨིམིནཱ ཨཝསིཊྛཾ ཀིརིཡཾ ནིཝཏྟེཏི. ཨུབྷཡེནཔི ཨནུསཡསཧཱཡསཨུསྶཱཧཏཱལཀྑཎཱ ¶ ཝིཔཱཀདྷམྨདྷམྨཱཏི དསྶེཏི. ལོཀུཏྟརཀུསལཱནམྤི ཧི ཨནུསཡཱ ཨུཔནིསྶཡཱ ཧོནྟི, ཡཏོ ‘‘ཀཏམེ དྷམྨཱ ཀུསལཱ? ཡསྨིཾ སམཡེ ལོཀུཏྟརཾ…པེ… ཏསྨིཾ སམཡེ ཨཝིཛྫཱཔཙྩཡཱ སངྑཱརཱ’’ཏིཨཱདིནཱ (ཝིབྷ. ༣༤༢) ཨརིཡམགྒཙེཏནཱཡ ཨཝིཛྫཱཨུཔནིསྶཡཏཱ པཊིཙྩསམུཔྤཱདཝིབྷངྒེ པཀཱསིཏཱ. ནིརུསྶཱཧསནྟབྷཱཝལཀྑཎཱ ཝིཔཱཀཱ, ཨུབྷཡཝིཔརཱིཏལཀྑཎཱ ནེཝཝིཔཱཀནཝིཔཱཀདྷམྨདྷམྨཱཏི.

ཨབྷིཉྙཱདིཀུསལཱནནྟི ཨཱདི-སདྡེན ‘‘ཨཧོསི ཀམྨཾ ནཱཧོསི ཀམྨཝིཔཱཀོ’’ཏི (པཊི. མ. ༡.༢༣༤) ཨིམིནཱ ཏིཀེན སངྒཧིཏཾ གཏིཨུཔདྷིཀཱལཔཡོགཱབྷཱཝེན ཨཝིཔཱཀཾ དིཊྛདྷམྨཝེདནཱིཡཾ ཨུཔཔཛྫཝེདནཱིཡཉྩ སངྒཎྷཱཏི. ཨཔརཱཔརིཡཝེདནཱིཡཾ པན སཾསཱརཔྤཝཏྟིཡཾ ཨཧོསིཀམྨཱདིབྷཱཝཾ ན བྷཛཏི. བྷཱཝནཱཡ པཧཱཏབྦཱདཱིཏི ཨཱདི-སདྡེན དསྶནེན པཧཱཏབྦཾ སངྒཎྷཱཏི. ཨུབྷཡམྤི ‘‘ཝིཔཱཀཱནུཔྤཱདནེ’’ཏི ཝཙནཏོ གཏིཨུཔདྷིཀཱལཔཡོགཱབྷཱཝེན ཨནུཔྤནྣཝིཔཱཀམེཝ ཨདྷིཔྤེཏཾ བྷཱཝནཱཡ པཧཱཏབྦསྶཔི པཝཏྟིཝིཔཱཀསྶ ¶ ཨནུཛཱནནཏོ. ཡེསཾ པན བྷཱཝནཱཡ པཧཱཏབྦཱ ཨཝིཔཱཀཱ, ཏེསཾ མཏེན ཨཱདི-སདྡེན དསྶནེན པཧཱཏབྦསྶ ཨཧོསིཀམྨནྟི ཨེཝཾཔཀཱརསྶེཝ པརིགྒཧོཏི ཝེདིཏབྦཾ.

༤. ‘‘ཀཐམཱདིནྣཱ’’ཏི ཨཡམྤི པཉྷོ ལབྦྷཏི. ‘‘ཕལབྷཱཝེནཱ’’ཏི ཧི ཨཱདཱནཔྤཀཱརཝཙནཾ. ཀེསཉྩི གོཏྲབྷུཔཙྩཝེཀྑཎཱདཱིནཾ ཨུཔེཏཀིརིཡབྷཱུཏཱནཾ ཏཾཀཏྟུབྷཱུཏཱནཉྩ ཨཏྠཱནཾ ཨུཔེཏབྦསམྦནྡྷབྷཱཝཏོ ཏདབྷིདྷཱཡིནོཔི སདྡཱ སམྦནྡྷཱ ཨེཝཱཏི ‘‘ཨུཔེཏསདྡསམྦནྡྷིནཱ’’ཏི ཝུཏྟཾ. ཨུཔེཏནྟི ཧི ཨུཔེཏབྦཏྠེ ཝུཙྩམཱནེ ཨཝསྶཾ ཨུཔེཏཀིརིཡཱ ཨུཔེཏཱ ཙ ཉཱཡཏཱིཏི. ‘‘རཱུཔདྷཱཏུཡཱ ཁོ པན, གཧཔཏི, ཡོ ཚནྡོ ཡོ རཱགོ ཡཱ ནནྡཱི ཡཱ ཏཎྷཱ ཡེ ཨུཔཡུཔཱདཱནཱ, ཙེཏསོ ཨདྷིཊྛཱནཱ ཨབྷིནིཝེསཱ ཨནུསཡཱ’’ཏིཨཱདཱིསུ ‘‘ཨུཔཡོ’’ཏི ཏཎྷཱདིཊྛིཡོ ཨདྷིཔྤེཏཱཏི ཨཱཧ ‘‘ཨུཔཡ…པེ… དིཊྛཱིཧཱི’’ཏི. ཡཐཱསམྦྷཝནྟི ‘‘ཨཱརམྨཎཀརཎཝསེནཱ’’ཏིཨཱདིནཱ ཨཊྛཀཐཱཡཾ ཝུཏྟཨཏྠེསུ ཡོ ཡོ སམྦྷཝཏི ཡོཛེཏུཾ, སོ སོཏི ཨཏྠོ. ན ཝཙནཱནུཔུབྦེནཱཏི ‘‘ཀིཾ པན ཏཾ ཨུཔེཏ’’ནྟིཨཱདིནཱ ཝུཏྟཝཙནཱནུཔུབྦེན ན ཡོཛེཏབྦོ. སབྦཔཙྩཡུཔྤནྣཱནནྟི སབྦཏེབྷཱུམཀཔཙྩཡུཔྤནྣཱནཾ. ནཱཔཛྫཏི སཱམཉྙཛོཏནཱཡ ཝིསེསེ ཨཝཊྛཱནཏོ ཝིསེསཏྠིནཱ ཙ ཝིསེསོ ཨནུཔཡུཛྫཏཱིཏི ཏཾ པན ཝིསེསཾ ཝུཏྟཔྤཀཱརཾ ནིཡམེཏྭཱ དསྶེཏུཾ ‘‘བོདྷནེཡྻཱ’’ཏིཨཱདི ཝུཏྟཾ.

ཨུཔེཏཾ དཱིཔེཏཱིཏི ཡཐཱ ‘‘པཱཙརིཡོ’’ཏི ཨེཏྠ པགཏོ ཨཱཙརིཡོ པཱཙརིཡོཏི པ-སདྡོ པགཏཾ ¶ དཱིཔེཏི, ཨེཝཾ ཨུཔ-སདྡོ ཨུཔེཏཾ དཱིཔེཏི ཨེཝ, ན ཙེཏྠ གཏཱདིཨཏྠཱནཾ ཨེཀནྟེན པཙྩཏྟཝཙནཡོགོ ཨིཙྪིཏོཏི. ཨཏིསདྡོ ཝིཡཱཏི ཙ ཨིདཾ སསཱདྷནཀིརིཡཱདཱིཔནསཱམཉྙེན ཝུཏྟནྟི དཊྛབྦཾ. པཙྩཡབྷཱཝེནཱཏི ཨེཏེན པུརིམནིབྦཏྟིཾ ཝིསེསེཏི. ཏེན སཧཛཱཏསྶཔི ཨུཔཱདཱནསྶ སངྒཧོ ཀཏོ ཧོཏི. སཧཛཱཏོཔི ཧི དྷམྨོ པཙྩཡབྷཱུཏོ པུརིམནིཔྥནྣོ ཝིཡ ཝོཧརཱིཡཏི ཡཐཱ ‘‘ཨེཀཾ མཧཱབྷཱུཏཾ པཊིཙྩ ཏཡོ མཧཱབྷཱུཏཱ’’ཏི, ‘‘ཨེཀཾ ཁནྡྷཾ པཊིཙྩ ཏཡོ ཁནྡྷཱ’’ཏི (པཊྛཱ. ༡.༡.༥༣) ཙ. དྷཱཏུཀཐཱཡཾ པཀཱསིཏནྟི ‘‘ཨུཔཔཏྟིབྷཝོ པཉྩཧི ཁནྡྷེཧི ཨེཀཱདསཧཱཡཏནེཧི སཏྟརསཧི དྷཱཏཱུཧི སངྒཧིཏོ. ཀཏིཧི ཨསངྒཧིཏོ. ན ཀེཧིཙི ཁནྡྷེཧི ཨེཀེནཱཡཏནེན ཨེཀཱཡ དྷཱཏུཡཱ ཨསངྒཧིཏོ’’ཏི (དྷཱཏུ. ༦༧) ཨེཝམཱདིཾ ¶ སནྡྷཱཡཱཧ. ཏསྨཱ ཨེཝཱཏི ཨུཔཱདིནྣསདྡཱནཔེཀྑཏྟཱ ཨེཝ. ཨཝིསེསེཏྭཱཏི ཨུཔཱདིནྣཱནུཔཱདིནྣཝིསེསཾ ཨཀཏྭཱ. ཨུཔཱདཱནཱནཾ ཨཱརམྨཎབྷཱཝཱནཏིཝཏྟནཏོ ཨུཔཱདཱནེཧི ཨུཔཱདཱཏབྦཱཏི ཝཱ ཨུཔཱདཱནིཡཱ, ཨུཔཱདཱཏུཾ ཝཱ ཨརཧནྟཱིཏི ཨུཔཱདཱནིཡཱ, ཨུཔཱདཱནེ ནིཡུཏྟཱཏི ཝཱ ཨུཔཱདཱནིཡཱ ཀ-ཀཱརསྶ ཡ-ཀཱརཾ ཀཏྭཱཏི ཨེཝམེཏྠ ཨཏྠོ དཊྛབྦོཏི.

༥. ཝིབཱདྷནཾ པཱིལ༹ནཾ ཀིལམནཾ ཨུཔཏཱཔོ པརིལཱ༹ཧོ ཨཔྤསྶདྡྷིབྷཱཝོ. ཝིདཱུསིཏཱ མལཱིནཱ ཙ ཡཏོ ཀེཙི ཨཀིལེསསབྷཱཝཱཔི ཨནིཊྛཕལཱ གཱརཡ྄ཧཱ ཙ ཛཱཏཱ.

༦. ‘‘སཱིལམཏྟཀཾ, པརཾ ཝིཡ མཏྟཱཡཱ’’ཏིཨཱདཱིསུ མཏྟཱ-སདྡསྶ པམཱཎཝཱཙཀཏཱ དཊྛབྦཱ. མརིཡཱདཝཱཙཀོ ཝཱ མཏྟཱ-སདྡོ. ཝིཙཱརོ ཧེཏྠ ཛྷཱནངྒེསུ ཧེཊྛིམམརིཡཱདོ, ན པཋམཛ྄ཛྷཱནཨུཔཙཱརཛ྄ཛྷཱནེསུ ཝིཡ ཝིཏཀྐོ. སཱ པན ཝིཙཱརམརིཡཱདཏཱ ཝིཏཀྐཱབྷཱཝེན ཨེཏེསཾ ཛཱཏཱཏི ཨཝིཏཀྐགྒཧཎཾ ཀཏཾ. ཨིདཾ ཝུཏྟཾ ཧོཏི – ཨཝིཏཀྐཱ ཧུཏྭཱ ཝིཙཱརམརིཡཱདཛྷཱནངྒེསུ ཝིཙཱརཧེཊྛིམཀོཊིཀཱཏི. ཨཐ ཝཱ ཨཱིསདཏྠོ མཏྟཱ-སདྡོ ‘‘མཏྟཱསུཁཔརིཙྩཱགཱ’’ཏིཨཱདཱིསུ (དྷ. པ. ༢༩༠) ཝིཡ. ཨཡཉྷེཏྠ ཨཏྠོ – ཝིཏཀྐརཧིཏཱ བྷཱཝནཱཡ ཨཏིསུཁུམབྷཱུཏཝིཙཱརཏྟཱ ཨཱིསཾ ཝིཙཱརཱ ཙ ཨཝིཏཀྐཝིཙཱརམཏྟཱཏི. ན ཧི ཨིཏོ པརཾ ཝིཙཱརོ ཨཏྠཱིཏི. ཡདི ཝིཏཀྐཝིསེསརཧིཏཱ ཝིཙཱརམཏྟཱ, ཨེཝཾ སནྟེ ཨཝིཏཀྐཝཙནཾ ཀིམཏྠིཡནྟི ཨཱཧ ‘‘ཝིཙཱརམཏྟཝཙནེནཱ’’ཏིཨཱདི. ཡདི ཝིཙཱརམཏྟཏོ ཨཉྙེསམྤི ཨཝིཏཀྐཱནཾ ཨཏྠིབྷཱཝཛོཏནཏྠཾ ཨཝིཏཀྐཝཙནཾ, ཨཝིཏཀྐཱ ཙ ཝིཙཱརམཏྟཱ ཨཝིཙཱརཱཏི ནིཝཏྟེཏབྦཱ གཧེཏབྦཱ ཙ, ཨེཝཾ སཏི ཝིཙཱརམཏྟཱ ཝིསེསནཾ, ཨཝིཏཀྐཱ ཝིསེསིཏབྦཱཏི ཝིཙཱརམཏྟཱཝིཏཀྐཱཏི ཝཏྟབྦནྟི ཙོདནཾ མནསི ཀཏྭཱ ཨཱཧ ‘‘ཝིསེསནཝིསེསིཏབྦབྷཱཝོ’’ཏིཨཱདི. ཡཐཱཀཱམནྟི ཝཏྟུཨིཙྪཱནུརཱུཔཾ ¶ . ཡེན ཡེན ཧི པཀཱརེན དྷམྨེསུ ནིཝཏྟེཏབྦགཧེཏབྦབྷཱཝཱ ལབྦྷནྟི, ཏེན ཏེན པཀཱརེན ཝིསེསནཝིསེསིཏབྦབྷཱཝོ སམྦྷཝཏཱིཏི. པདཱནཾ ཨནུཀྐམོ པདཱནུཀྐམོ.

ཨཝིཏཀྐཱ སཝིཏཀྐཱ ཙ སཝིཙཱརཱ ཨཝིཙཱརཱ ཙཱཏི ཨཝིཏཀྐཱསཝིཙཱརཱ སཝིཏཀྐཱ ཨཝིཙཱརཱཏི ཡོཛེཏབྦཾ. ཨུབྷཡེཀདེསདསྶནམྤི ཨུབྷཡདསྶནནྟི ཨདྷིཔྤཱཡེན ‘‘ཡདི སཝིཏཀྐསཝིཙཱརཱ’’ཏིཨཱདི ཝུཏྟཾ. ཨིཏརམྤི པཀཱསེཏུནྟི ¶ ཨིདཾ ཡཐཱ སཝིཏཀྐསཝིཙཱརེསུ ཙིཏྟུཔྤཱདེསུ ཝིཏཀྐོ ཨཝིཏཀྐསཝིཙཱརཏཱཡ ‘‘ཨཝིཏཀྐཝིཙཱརམཏྟོ’’ཏི ཝུཏྟོ, ཨེཝཾ ཡཐཱཝུཏྟཙིཏྟུཔྤཱདེསུ ཝིཙཱརོ ‘‘སཝིཏཀྐཨཝིཙཱརོ’’ཏི སཀྐཱ ཝིཉྙཱཏུནྟི ཨིམམཏྠཾ སནྡྷཱཡ ཝུཏྟཾ. ཝིཏཀྐཱབྷཱཝེན ཨེཏེ ཝིཙཱརམཏྟཱཏི ཨཡམྤི ཨཏྠོ ཝིསེསནིཝཏྟིཨཏྠཾཡེཝ མཏྟཱ-སདྡཾ གཧེཏྭཱ ཝུཏྟོ. ཝིཙཱརམཏྟཱཏི ཧི ཝིཙཱརམཏྟཝནྟོཏི ཝིཉྙཱཡམཱནཏྟཱ ཏདཉྙཝིསེསཝིརཧསཱམཉྙཏོ ནིཝཏྟེཏྭཱ ཝིཏཀྐཝིསེསཝིརཧསངྑཱཏེ ཨཝིཏཀྐ-སདྡོ སནྣིདྷཱཔིཏོ ཝིསེསེཏི དུཏིཡཛ྄ཛྷཱནདྷམྨེཏི. ཡཐཱཧ ‘‘ན ཝིཙཱརཏོ’’ཏིཨཱདི.

༧. ཝེདཡམཱནཱཏི ཨནུབྷཝམཱནཱ. སུཁཱཀཱརེཏི ཨིཊྛཱཀཱརེ, ཨིཊྛཱནུབྷཝནཱཀཱརེ ཝཱ. ཨུདཱསིནཱཏི ནཏིཨཔནཏིརཧིཏཱ. སུཁདུཀྑཱནཾ ཨཝིརུདྡྷཱ ཏེསཾ བྱཝདྷཱཡིཀཱབྷཱཝཏོ. སུཁདུཀྑཱནི ཝིཡ ཧི སུཁདུཀྑཱནཾ ཨནནྟརཾ པཝཏྟནཏོ བྱཝདྷཱཡིཀཱབྷཱུཏཱ ན ཏེཧི ཝིརུཛ྄ཛྷཏི, ན པན སུཁདུཀྑཱནི ཨནནྟརཱཔཝཏྟིཏོ. ‘‘ཨུཔཔཏྟིཏོ ཨིཀྑཏཱིཏི ཨུཔེཀྑཱ’’ཏི ཨཡཾ པནཏྠོ ཨིདྷ ཨུཔེཀྑཱ-སདྡསྶ སབྦུཔེཀྑཱཔརིཡཱདཱནཏོ ན ཝུཏྟོ. ན ཧི ལོབྷསམྤཡུཏྟཱདིཨུཔེཀྑཱ ཨུཔཔཏྟིཏོ ཨིཀྑཏཱིཏི. ཏསྨཱཏི ཡསྨཱ པཱིཏིསཧགཏཱཡེཝ ན སུཁསཧགཏཱ, སུཁསཧགཏཱཔི ན པཱིཏིསཧགཏཱ ཨེཝཱཏི པཱིཏིསཧགཏཱ སུཁསཧགཏཱ ཙ ཨཉྙམཉྙཾ བྷིནྣཱ, ཏསྨཱ. སཏིཔི སུཁསཧགཏཱནཾ ཡེབྷུཡྻེན པཱིཏིསཧགཏབྷཱཝེ ཡེན སུཁེན སམནྣཱགཏཱ སུཁསཧགཏཱ ཨེཝ ཧོནྟི, ན པཱིཏིསཧགཏཱ, ཏཾ སུཁཾ ནིཔྤཱིཏིཀསུཁནྟི ཨཡཾ ཝིསེསོ ཨིམིནཱ ཏིཀེན དསྶིཏོཏི ཨིམམཏྠཾ ཝིབྷཱཝེནྟོ ‘‘པཱིཏིསཧགཏཱཏི ཝཏྭཱ’’ཏིཨཱདིམཱཧ.

སིདྡྷོཏི སཱཝསེསཾ ནིརཝསེསཉྩ སུཁཔཱིཏིཡོ སངྒཧེཏྭཱ པཝཏྟེཧི པཋམདུཏིཡཔདེཧི ཡོ པཱིཏིསཧགཏོ དྷམྨཝིསེསོ, ཏཾ སུཁཾ, ཡོ ཙ སུཁསཧགཏོ དྷམྨཝིསེསོ, སཱ པཱིཏཱིཏི སཏིཔི ཨཉྙམཉྙཾ སཾསཊྛབྷཱཝེ པདནྟརསངྒཧིཏབྷཱཝདཱིཔནཏོསིདྡྷོ ཉཱཏོ ཝིདིཏོཏི ཨཏྠོ. ‘‘ཙཏུཏྠཛ྄ཛྷཱནསུཁཾ ཨཏིཔཎཱིཏསུཁནྟི ཨོལཱ༹རིཀངྒཏོ ནཱིཧརིཏྭཱ ཏསྶ པཎཱིཏབྷཱཝཾ དསྶེཏུཾ ཨཡཾ ¶ ཏིཀོ ཝུཏྟོ’’ཏི ཀེཙི ཝདནྟི, ཏདེཏཾ སབྦེསཾ སུཁཝེདནཱསམྤཡུཏྟདྷམྨཱནཾ ཨིདྷ ‘‘སུཁསཧགཏཱ’’ཏི ཝུཏྟཏྟཱ ཝིཙཱརེཏབྦཾ. ཏཐཱ ཧི ‘‘སུཁབྷཱུམིཡཾ ཀཱམཱཝཙརེ’’ཏིཨཱདིནཱ (དྷ. ས. ༡༢༨༣) ‘‘ཀཱམཱཝཙརཀུསལཏོ ¶ ཙཏྟཱརོ སོམནསྶསཧགཏཙིཏྟུཔྤཱདཱ’’ཏིཨཱདིནཱ (དྷ. ས. ༡༥༩༨) ཙ ནིདྡེསོ པཝཏྟོཏི.

༨. ནིབྦཱནཱརམྨཎཏཾ སནྡྷཱཡཱཧ, ན ནིབྦཱནཔཊིཝིཛ྄ཛྷནཾ, ཨིཏརཐཱ གོཏྲབྷུསྶ དསྶནབྷཱཝཱཔཏྟི ཨཙོདནཱིཡཱ སིཡཱཏི ཨདྷིཔྤཱཡོ. ནནུ ཙ དིསྭཱ ཀཏྟབྦཀིཙྩཀརཎེན སོཏཱཔཏྟིམགྒོཝ དསྶནནྟི ཨུཀྐཾསགཏིཝིཛཱནནེན ནིབྦཱནསྶ པཊིཝིཛ྄ཛྷནམེཝ དསྶནནྟི གོཏྲབྷུསྶ དསྶནབྷཱཝཱཔཏྟི ན ཙོདེཏབྦཱཝཱཏི? ན, དསྶནསཱམཉྙསྶེཝ སུཡྻམཱནཏྟཱ དསྶནཀཏྟབྦཀིཙྩཀརཎཱནཉྩ བྷེདེན ཝུཏྟཏྟཱ. ཏཏྠ ཡདིཔི ‘‘པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟཱི’’ཏིཨཱདཱིསུ (མ. ནི. ༢.༡༨༢) ཝིཡ ཨབྷིནྣཀཱལསྶཔི བྷིནྣཀཱལསྶ ཝིཡ བྷེདོཔཙཱརདསྶནཏོ བྷེདཝཙནཾ ཡུཏྟཾ, དསྶནཝིསེསེ པན ཨདྷིཔྤེཏེ དསྶནསཱམཉྙཝཙནཾ ན ཀཏྟབྦནྟི དསྶནསཱམཉྙམཏྟཾ གཧེཏྭཱ ཙོདནཱ ཀཏཱཏི ‘‘ནིབྦཱནཱརམྨཎཏཾ སནྡྷཱཡཱཧཱ’’ཏི ཝུཏྟཾ. དུཏིཡཏཏིཡམགྒཱནམྤི དྷམྨཙཀྑུཔརིཡཱཡསབྦྷཱཝཏོ ‘‘བྷཱཝནཱབྷཱཝཾ ཨཔྤཏྟ’’ནྟི ཝུཏྟཾ. ཏཏྠ བྷཱཝནཱ ཝཌྜྷནཱ. སཱ ཙ བཧུལཾ ཨུཔྤཏྟིཡཱ ཧོཏཱིཏི ཨཱཧ ‘‘པུནཔྤུནཾ ནིབྦཏྟནེནཱ’’ཏི. ཏཐཱ ཧི སཏཱིཏི ‘‘ཨུབྷཡཔཊིཀྑེཔཝསེནཱ’’ཏི པདསྶ དསྶནབྷཱཝནཱཔཊིཀྑེཔཝསེནཱཏི ཨཏྠེ སཏི. ནནུ ལོཀིཡསམཐཝིཔསྶནཱཔི ཡཐཱབལཾ ཀཱམཙྪནྡཱདཱིནཾ པཧཱཡཀཱ, ཏཏྲ ཀཐམིདཾ ཝུཏྟཾ, ན ཙ ཨཉྙོ པཧཱཡཀོ ཨཏྠཱིཏི ཙོདནཾ སནྡྷཱཡཱཧ ‘‘ཨཉྙེཧཱི’’ཏིཨཱདི.

༩. ཨཔྤཧཱཏབྦཧེཏུམཏྟེསཱུཏི ཨཔྤཧཱཏབྦཧེཏུཀམཏྟེསུ. སབྦོ ཀུསལཱབྱཱཀཏདྷམྨོ ཡཐཱདྷིཔྤེཏཏྠོ. སམཱསོ ན ཨུཔཔཛྫཏི ཨསམཏྠབྷཱཝཏོ. ཡེསནྟི ཡེ ཏཏིཡརཱསིབྷཱཝེན ཝུཏྟཱ དྷམྨཱ, ཨཏྠོ ཏེསཾ. ཨུབྷིནྣནྟི ཝིསུཾ ཝིསུཾ ཡོཛེཏབྦཏཱཡ དྭེ པཧཱཏབྦཧེཏུསདྡཱཏི ཀཏྭཱ ཝུཏྟཾ. ཨེཏནྟི ‘‘ནེཝདསྶནེན ནབྷཱཝནཱཡ པཧཱཏབྦོ ཧེཏུ ཨེཏེསཾ ཨཏྠཱི’’ཏི ཨེཏཾ ཝཙནཾ. ཏེཧི དསྶནབྷཱཝནཱཔདེཧི ཡུཏྟེན པཧཱཏབྦཧེཏུཀཔདེན. ཨེཝཉྩ ཀཏྭཱཏི ཨེཝཾ དསྶནབྷཱཝནཱཔདེཧི པཧཱཏབྦཧེཏུཀཔདསྶ ཝིསུཾ ཝིསུཾ ཡོཛནཏོ. ཨེཝཉྷི པུརིམཔདདྭཡ…པེ… དསྶནམེཏཾ ཧོཏཱིཏི. ཨེཝནྟི དསྶནབྷཱཝནཱཧི ནཔཧཱཏབྦོ ཧེཏུ ཨེཏེསནྟི ཨེཝཾ ཨཏྠེ སཏི. ‘‘ཧེཏུ…པེ… སིཡཱ’’ཏི ¶ ཨེཏསྶ ‘‘པུརིམསྨིཉྷི ཨཏྠེ’’ཏིཨཱདིནཱ ཨཧེཏུཀཱནཾ ཨགྒཧིཏབྷཱཝདསྶནཝསེན ཨཏྠཾ ཝཏྭཱ ཨིདཱནི ‘‘ཨཐ ཝཱ’’ཏིཨཱདིནཱ དུཏིཡསྶེཝ ཨཏྠསྶ ཡུཏྟབྷཱཝཾ ¶ ཝིབྷཱཝེནྟོ ‘‘གཧེཏབྦཏྠསྶེཝཱ’’ཏིཨཱདིམཱཧ. སོ ཧི ‘‘ཨེཝམཏྠོ གཧེཏབྦོ’’ཏི ཝུཏྟཏྟཱ གཧེཏབྦཏྠོ.

༡༠. ཨཉྙཐཱཏི ཨཱརམྨཎཀརཎམཏྟེ ཨདྷིཔྤེཏེ. ཀཐཾ པནེཏཾ ཛཱནིཏབྦཾ ‘‘ཨཱརམྨཎཾ ཀཏྭཱཏི ཨེཏེན ཙཏུཀིཙྩསཱདྷཀཾ ཨཱརམྨཎཀརཎཾ ཝུཙྩཏཱི’’ཏི? སཱམཉྙཛོཏནཱཡ ཝིསེསེ ཨཝཊྛཱནཏོ ཨརིཡམགྒདྷམྨཱནཾཡེཝ ཙ ཨཔཙཡགཱམིབྷཱཝཏོ. ‘‘ཙཏྟཱརོ མགྒཱ ཨཔརིཡཱཔནྣཱ ཨཔཙཡགཱམིནོ’’ཏི (དྷ. ས. ༡༠༢༡) ཧི ཝུཏྟཾ. ཏེནེཝཱཧ ‘‘ཨརིཡམགྒཱནཾ ཨེཏཾ ཨདྷིཝཙན’’ནྟི. ཨེཏེནེཝ ཝཱ ཝིསེསུཔལཀྑཎཧེཏུབྷཱུཏེན ཝཙནེན ཡཐཱཝུཏྟོ ཨཱརམྨཎཀརཎཝིསེསོ ཝིཉྙཱཡཏི. ཨུཀྐཾསགཏིཝིཛཱནནེན ཝཱ ཨཡམཏྠོ ཝེདིཏབྦོ. པཙྩཝེཀྑཎཱདཱིནནྟི ཝོདཱནཱདཡོ སངྒཎྷཱཏི. ཧེཏུབྷཱཝེནཱཏི སམྤཱཔཀཧེཏུབྷཱཝེན. ཉཱཔཀོ ཀཱརཀོ སམྤཱཔཀོཏི ཏིཝིདྷོ ཧི ཧེཏུ, ཏཐཱ ཉཱཔེཏབྦཱདིབྷཱཝེན ཕལཾ. ཡཐཱ ནིརཡཱདིམནུསྶབྷཱཝཱདིགཱམིཔཊིཔདཱབྷཱཝཏོ ཨཀུསལལོཀིཡཀུསལཙིཏྟུཔྤཱདཱ ‘‘ཨཱཙཡགཱམིནོ དྷམྨཱ’’ཏི ཝུཏྟཱ, ན མིཙྪཱདིཊྛིཨཱདིལོཀིཡསམྨཱདིཊྛིཨཱདིདྷམྨཱ ཨེཝ, ཨེཝཾ ནིབྦཱནགཱམིཔཊིཔདཱབྷཱཝཏོ ལོཀུཏྟརཀུསལཙིཏྟུཔྤཱདཱ ‘‘ཨཔཙཡགཱམིནོ’’ཏི དཊྛབྦཱ, ན ཨརིཡམགྒདྷམྨཱ ཨེཝཱཏི ཨིམམཏྠཾ དསྶེནྟོ ཨཱཧ ‘‘པུརིམཔཙྪིམཱན’’ནྟིཨཱདི. ཏཏྠ ཨརིཡམགྒསྶེཝ ནིབྦཱནགཱམིཔཊིཔདཱབྷཱཝོ པརིབྱཏྟོཏི ཏསྶེཝ ཨཔཙཡགཱམིབྷཱཝོ ཡུཏྟོ, ཏདནུཝཏྟཀཏྟཱ པན སེསདྷམྨེ སངྒཧེཏྭཱ ཝུཏྟཾ. ཨཔཙཡེ དུཀྑཔརིཛཱནནཱདིནཱ སཱཏིསཡཾ གམནཾ ཡེསནྟེ ཨཔཙཡགཱམིནོཏི ‘‘མགྒཱ ཨེཝ ཨཔཙཡགཱམིནོ’’ཏི ཝུཏྟཾ. པུརིམཔཙྪིམཱནནྟི ཙ ཨིམསྨིཾ ཏིཀེ པཋམཔདདུཏིཡཔདསངྒཧིཏཱནཾ ཨཏྠཱནནྟི ཨཏྠོ. ‘‘ཛཡཾ ཝེརཾ པསཝཏི (དྷ. པ. ༢༠༡), ཙརཾ ཝཱ ཡདི ཝཱ ཏིཊྛ’’ནྟིཨཱདཱིསུ (ཨིཏིཝུ. ༨༦, ༡༡༠; སུ. ནི. ༡༩༥) ཝིཡ སཱནུནཱསིཀོ ཨཱཙཡ-སདྡོཏི ‘‘ཨནུནཱསིཀལོཔོ ཀཏོ’’ཏི ཝུཏྟཾ. ཨེཏྠ ཙ ‘‘ཨཱཙིན’’ནྟི ཝཏྟབྦེ ‘‘ཨཱཙཡ’’ནྟི བྱཏྟཡཝསེན ཝུཏྟནྟི དཊྛབྦཾ. ཨཱཙཡཱ ཧུཏྭཱ གཙྪནྟཱིཏི ཨེཏེན ཨཔཙིནནྟཱིཏི ཨཔཙཡཱ, ཨཔཙཡཱ ཧུཏྭཱ གཙྪནྟི པཝཏྟནྟཱིཏི ཨཡམཏྠོ ནཡཏོ དསྶིཏོཏི དཊྛབྦཾ.

༡༡. ལོཀིཡེསུ ¶ ཨསེཀྑབྷཱཝཱནཱཔཏྟི དཊྛབྦཱཏི ཀསྨཱ ཨེཝཾ ཝུཏྟཾ, ནནུ –

‘‘སིཀྑཏཱིཏི ཁོ བྷིཀྑུ ཏསྨཱ སེཀྑོཏི ཝུཙྩཏི. ཀིཉྩ སིཀྑཏི, ཨདྷིསཱིལམྤི ¶ སིཀྑཏི ཨདྷིཙིཏྟམྤི སིཀྑཏི ཨདྷིཔཉྙམྤི སིཀྑཏི. སིཀྑཏཱིཏི ཁོ བྷིཀྑུ ཏསྨཱ སེཀྑོཏི ཝུཙྩཏི (ཨ. ནི. ༣.༨༦). ཡོཔི ཀལྱཱཎཔུཐུཛྫནོ ཨནུལོམཔཊིཔདཱཡ པརིཔཱུརཀཱརཱི སཱིལསམྤནྣོ ཨིནྡྲིཡེསུ གུཏྟདྭཱརོ བྷོཛནེ མཏྟཉྙཱུ ཛཱགརིཡཱནུཡོགམནུཡུཏྟོ པུབྦརཏྟཱཔརརཏྟཾ བོདྷིཔཀྑིཡཱནཾ དྷམྨཱནཾ བྷཱཝནཱནུཡོགམནུཡུཏྟོ ཝིཧརཏི ‘ཨཛྫ ཝཱ སྭེ ཝཱ ཨཉྙཏརཾ སཱམཉྙཕལཾ ཨདྷིགམིསྶཱམཱི’ཏི, སོཔི སིཀྑཏཱིཏི སེཀྑོ’’ཏི –

ཝཙནཏོ ཡཐཱཝུཏྟཀལྱཱཎཔུཐུཛྫནསྶཔི སཱིལཱདིདྷམྨཱ སེཀྑཱཏི ཝུཙྩནྟཱིཏི? ན, པརིཡཱཡབྷཱཝཏོ. ནིཔྤརིཡཱཡེན ཧི སེཀྑཱསེཀྑབྷཱཝོ ཡཐཱསམྦྷཝཾ མགྒཕལདྷམྨེསུ ཨེཝཱཏི ལོཀིཡེསུ སེཀྑབྷཱཝཱསངྐཱབྷཱཝཏོ ཨསེཀྑབྷཱཝཱནཱཔཏྟི ཝུཏྟཱ. ཏེནེཝཱཧ ‘‘སཱིལསམཱདྷཱི’’ཏིཨཱདི. ཨརཧཏྟཕལདྷམྨཱཔི སིཀྑཱཕལབྷཱཝེན པཝཏྟནཏོ ཧེཊྛིམཕལདྷམྨཱ ཝིཡ སིཀྑཱསུ ཛཱཏཱཏིཨཱདིཨཏྠེཧི སེཀྑཱ སིཡུཾ, ཧེཊྛིམཕལདྷམྨཱཔི ཝཱ སིཀྑཱཕལབྷཱཝེན པཝཏྟནཏོ ཨརཧཏྟཕལདྷམྨཱ ཝིཡ ཨསེཀྑཱཏི ཙོདནཾ མནསིཀཏྭཱ ‘‘པརིནིཊྛིཏསིཀྑཱཀིཙྩཏྟཱ’’ཏི ཝུཏྟཾ, ཏཐཱ ‘‘ཧེཊྛིམཕལེསུ པནཱ’’ཏིཨཱདི. ‘‘ཏཾ ཨེཝ སཱལིཾ བྷུཉྫཱམི, སཱ ཨེཝ ཏིཏྟིརཱི, ཏཱནི ཨེཝ ཨོསདྷཱནཱི’’ཏིཨཱདཱིསུ ཏཾསདིསེསུ ཏབྦོཧཱརོ དཊྛབྦོ. ཨེཏེན ཙ སེཀྑསདིསཱ ཨསེཀྑཱ ཡཐཱ ‘‘ཨམནུསྶོ’’ཏི ཝུཏྟཾ ཧོཏཱིཏི ཨཉྙེ. ཨཉྙཏྠ ‘‘ཨརིཊྛ’’ནྟིཨཱདཱིསུ ཝུདྡྷིཨཏྠེཔི ཨ-ཀཱརོ དིསྶཏཱིཏི ཝུདྡྷིཔྤཏྟཱ སེཀྑཱ ཨསེཀྑཱཏི ཨཡམྤི ཨཏྠོ ཝུཏྟོ.

༡༢. ཀིལེསཝིཀྑམྦྷནསམཏྠཏཱཡཱཏི ཨིདཾ ནིདསྶནམཏྟཾ དཊྛབྦཾ. ཝིཏཀྐཱདིཝིཀྑམྦྷནསམཏྠཏཱཔི ཧེཏྠ ལབྦྷཏཱིཏི. ཨཀུསལཝིདྡྷཾསནརསཏྟཱ ཝཱ ཀུསལཱནཾ ཏཏྠ སཱཏིསཡཀིཙྩཡུཏྟཏཾ པརིཏྟདྷམྨེཧི མཧགྒཏཱནཾ པཀཱསེཏུཾ ‘‘ཀིལེསཝིཀྑམྦྷནསམཏྠཏཱཡཱ’’ཏི ཝུཏྟཾ. ཝིཔཱཀཀིརིཡེསུ དཱིགྷསནྟཱནཏཱཝ, ན ཀིལེསཝིཀྑམྦྷནསམཏྠཏཱ ཝིཔུལཕལཏཱ ཙཱཏི ¶ ཨཏྠོ. ‘‘ཝིཔུལཾ ཕལཾ ཝིཔུལཕལ’’ནྟི ཨེཝཾ པན ཨཏྠེ གཡ྄ཧམཱནེ ཝིཔཱཀེསུཔི ཝིཔུལཕལཏཱ ལབྦྷཏེཝ. སོཔི ཨེཀསེསནཡེན ཨཊྛཀཐཱཡཾ ཝུཏྟོཏི ཝེདིཏབྦོ. མཧནྟེཧི གཏཱ པཊིཔནྣཱཏི ཨཡཾ པནཏྠོ ཏིཎྞམྤི སཱདྷཱརཎོཏི. གུཎཏོ ཨཡཾ ཨེཏྟཀོཏི སཏྟཱནཾ པམཱཎཾ ཀརོནྟཱ ཝིཡ པཝཏྟནྟཱིཏི ཨོལཱ༹རིཀཱ ཀིལེསཱ ‘‘པམཱཎཀརཱ’’ཏི ཝུཏྟཱ. ཏེཧི པརིཏོ ཁཎྜིཏཱ པརིཙྪིནྣཱཏི པརིཏྟཱ. སཏིཔི ཀེཧིཙི པརིཙྪིནྣཏྟེ མཧཱཔམཱཎབྷཱཝེན གཏཱ པཝཏྟཱཏི མཧགྒཏཱ ¶ . པརིཙྪེདཀརཱནཾ ཀིལེསཱནཾ སུཁུམཱནམྤི ཨགོཙརབྷཱཝཏོ ཏེཧི ན ཀཐཉྩིཔི པརིཙྪིནྣཱ ཝཱིཏིཀྐནྟཱཏི ཨཔརིཙྪིནྣཱ ཨཔྤམཱཎཱ, ཡཏོ ཏེ ‘‘ཨཔརིཡཱཔནྣཱ’’ཏིཔི ཝུཙྩནྟི.

༡༤. ཏིཏྟིཾ ན ཛནེནྟི སནྟཏརཏཱཡ ཨསེཙནཀབྷཱཝཏོ. ཨེཏྠ ཙ ‘‘པམཱཎཀརེཧཱི’’ཏིཨཱདིཀོ ཨཏྠཝིཀཔྤོ ‘‘ཨཏཔྤཀཏྠེནཱ’’ཏིཨཱདིཀཱཡ ཧཱིནཏྟིཀཔདཝཎྞནཱཡ པརཏོ བཧཱུསུ པོཏྠཀེསུ ལིཁཱིཡཏི, ཡཐཱཋཱནེ ཨེཝ པན ཨཱནེཏྭཱ ཝཏྟབྦོ.

༡༥. ལོཀིཡསཱདྷུཛནེཧིཔི ཨཏིཛིགུཙྪནཱིཡེསུ ཨཱནནྟརིཡཀམྨནཏྠིཀཝཱདཱདཱིསུ པཝཏྟི ཝིནཱ ཝིཔལླཱསབལཝབྷཱཝེན ན ཧོཏཱིཏི ‘‘ཝིཔརིཡཱསདལ༹ྷཏཱཡཱ’’ཏི ཝུཏྟཾ. ཨེཏེནཱཏི ‘‘ཝིཔཱཀདཱནེ སཏཱི’’ཏིཨཱདིནཱ སཏིཔི ཀཱལནིཡམེ ཝིཔཱཀུཔྤཱདནེ སཱསངྐཝཙནེན. ཏསྨཱཏི ཡསྨཱ ཡཐཱཝུཏྟནཡེན ནིཡཏཏཱཡ ཨཏིཔྤསངྒོ དུནྣིཝཱརོ, ཏསྨཱ. བལཝཏཱ…པེ… པཝཏྟཱིཏི ཨེཏེན ཨསམཱནཛཱཏིཀེན ཨནིཝཏྟནཱིཡཝིཔཱཀཏཾ, སམཱནཛཱཏིཀེན ཙ ཝིཔཱཀཱནུཔྤཱདནེཔི ཨནནྟརཾ ཝིཔཱཀུཔྤཱདནསམཏྠཏཱཡ ཨཝིཧནྟབྦཏཾ ཨནནྟརིཀཱནཾ དསྶེཏི. ཡཏོ ཏེསཾ ཝིཔཱཀདྷམྨཏཱ ཝིཡ སབྷཱཝསིདྡྷཱ ནིཡཏཱནནྟརིཡཏཱ. ཨཉྙསྶ…པེ… དཱནཏོཏི ཨིམིནཱཔི ཨསམཱནཛཱཏིཀཱདཱིཧི ཨནིཝཏྟནཱིཡཕལཏཾ ཨེཝ ཝིབྷཱཝེཏི.

ཙོདཀོ ཨདྷིཔྤཱཡཾ ཨཛཱནནྟོ ‘‘ནནཱུ’’ཏིཨཱདིནཱ ཨཏིཔྤསངྒམེཝ ཙོདེཏི. ཨིཏརོ ‘‘ནཱཔཛྫཏཱི’’ཏིཨཱདིནཱ ཨཏྟནོ ཨདྷིཔྤཱཡཾ ཝིཝརཏི. ཨེཀནྟེཏི ཨཝསྶམྦྷཱཝིནི. སནྣིཡཏཏྟཱཏི སམྤཱདནེ ཛནནེ ནིཡཏབྷཱཝཏོ. ཨུཔརཏཱ ཨཝིཔཙྩནསབྷཱཝཱསངྐཱ ཡེསུ ཏཱནི ཨུཔརཏཱཝིཔཙྩ…པེ… སངྐཱནི, ཏབྦྷཱཝོ ཨུཔ…པེ… སངྐཏྟཾ, ཏསྨཱ. ‘‘ན སམཏྠཏཱཝིགྷཱཏཏྟཱཏི ¶ བལཝཏཱཔི ཨཱནནྟརིཡེན ཨནུཔཧནྟབྦཏཾ ཨཱཧ. ཨུཔཏྠམྦྷཀཱནི ཨནུབལཔྤདཱཡཀཱནི ཧོནྟི ཨུཔྤཏྟིཡཱ སནྟཱནསྶ ཝིསེསིཏཏྟཱ. ཏེན ནེསཾ ཝིཔཱཀཱནུཔྤཱདནེཔི ཨམོགྷཝུཏྟིཏཾ ཨཱཧ.

༡༦. མགྒཀིཙྩཾ པརིཉྙཱདི. ཨཊྛངྒིཀམགྒསམྨཱདིཊྛིམགྒསམྤཡུཏྟཱལོབྷཱདོསསངྑཱཏེཧི མགྒཧེཏཱུཧི མགྒསམྤཡུཏྟཁནྡྷསེསམགྒངྒསམྨཱདིཊྛཱིནཾ སཧེཏུཀབྷཱཝདསྶནཏོ ཏིཎྞཾ ནཡཱནཾ ཨསངྒཧིཏསངྒཎྷནཝསེནཱཏི ཝུཏྟཾ. ཧེཏུབཧུཏཱཝསེནཱཏི བཧུཧེཏུཀསྶ པཋམནཡསྶ ཨནནྟརཾ བཧུཧེཏུཀཏཱསཱམཉྙེན ནིཀྑེཔཀཎྜཔཱལི༹ཡཾ ཏཏིཡཾ ཝུཏྟནཡོ ཨིདྷ ཨཊྛཀཐཱཡཾ དུཏིཡཾ ཝུཏྟོ. ཡཐཱསཀཾ ¶ པཙྩཡེཧི པཝཏྟམཱནེསུ ནིརཱིཧཀེསུ དྷམྨེསུ ཀེསཉྩི ཨནུཝཏྟནཱིཡབྷཱཝོ ན ཀེཝལཾ དྷམྨསབྷཱཝཏོཡེཝ, ཨཐ ཁོ པུརིམདྷམྨཱནཾ པཝཏྟིཝིསེསེནཔི ཧོཏཱིཏི ཨཱཧ ‘‘པུབྦཱབྷིསངྑཱརཝསེནཱ’’ཏི. པཝཏྟིཝིསེསོ ཧི པུརིམཔུརིམཱནཾ ཙིཏྟཙེཏསིཀཱནཾ ཨུཏྟརུཏྟརེསུ ཝིསེསཱདྷཱནཾ བྷཱཝནཱཔུབྦཱབྷིསངྑཱརོཏི. ཨནུཝཏྟཡམཱནོཏི གརུཀཱརཡམཱནོ. ཨུདཱཧརཎཝསེནཱཏི ནིདསྶནཝསེན, ན ནིརཝསེསདསྶནཝསེན. ཡསྨཱ པནཱཏིཨཱདིནཱ ཡཐཱཝུཏྟཾ ཨཏྠཾ པཱཋནྟརེན སཱདྷེཏི. ཏཏྠ ཧི ཨདྷིཔཏིཔཙྩཡསྶ པཙྩནཱིཡེ ཋིཏཏྟཱ མགྒོ ཨདྷིཔཏི མགྒཱདྷིཔཏཱིཏི ཨཡམཏྠོ ལབྦྷཏཱིཏི. སམཱནསདྡཏྠཝསེནཱཏི སཏིཔི ཨཉྙཔདཏྠསམཱནཱདྷིཀརཎསམཱསཏྠབྷེདེ མགྒཱདྷིཔཏིསདྡཏྠབྷེདཱབྷཱཝཾ སནྡྷཱཡ ཝུཏྟཾ.

༡༧. ཨུཔྤནྣ-སདྡོ ཨུཔྤཱདཱདིཾ པཊིཔཛྫམཱནོ, པཏྭཱ ཝིགཏོ ཙཱཏི དུཝིདྷེསུ ཨཏྠེསུ ཨུབྷཡེསམྤི ཝཱཙཀོ, ན པུརིམཱནཾཡེཝཱཏི ཏམཏྠཾ དསྶེཏུཾ ‘‘ཨནུཔྤནྣཱ’’ཏིཨཱདིམཱཧ. ཏཏྠ ཨུཔྤནྣབྷཱཝོ ཨུཔྤཱདཱདིཔྤཏྟཏཱ. ཏེན ཨཏཱིཏཱཔི སངྒཧིཏཱ ཧོནྟི. ཏེནེཝཱཧ ‘‘སབྦོ ཨུཔྤནྣབྷཱཝོ’’ཏི. ཨུཔྤནྣདྷམྨབྷཱཝོ ‘‘ཨུཔྤནྣཱ དྷམྨཱ’’ཏི པདེན གཧིཏདྷམྨབྷཱཝོ, ཝཏྟམཱནདྷམྨབྷཱཝོཏི ཨཏྠོ. ཡོ ཝཱ ཨུཔྤཱདཱདིཔྤཏྟོ ཨཏྟནོ ཙ སབྷཱཝཾ དྷཱརེཏི པཙྩཡེཧི ཙ དྷཱརཱིཡཏི, སོ ཨུཔྤནྣདྷམྨོཏི པཙྩུཔྤནྣབྷཱཝོ ཨུཔྤནྣདྷམྨབྷཱཝོཏི ཨེཝམེཏྠ ཨཏྠོ དཊྛབྦོ. ཨུཔྤནྣདྷམྨེ ཝཏྭཱ ‘‘ཨནུཔྤནྣཱ’’ཏི ཝཙནཾ ན ཡཐཱདྷིགཏཔཊིསེདྷནནྟི ཀཐམིདཾ པཙྩེཏབྦནྟི ཨཱཧ ‘‘ཡདི ཧཱི’’ཏིཨཱདི. ཀེཙི པནེཏྠ ‘‘ཨུཔྤནྣཱཏི པདེན ཨཏཱིཏཱཔི སངྒཧིཏཱ. ཡདི ན སངྒཧིཏཱ, ནིབྦཱནཾ ཝིཡ ཏེཔི ནཝཏྟབྦཱཏི ཝཏྟབྦཾ སིཡཱ ¶ , ན ཙ ཏཐཱ ཝུཏྟ’’ནྟི ཝདནྟི, ཏཾ པན ཏེསཾ མཏིམཏྟམེཝ. ཨཡཾ པན ཏིཀོ དྭིནྣཾ ཨདྡྷཱནཾ ཝསེན པཱུརེཏྭཱ དསྶིཏོཏི ཨཊྛཀཐཱཡཾ ཝཀྑཏཱིཏི. ཨེཝཾ སནྟེ ཀསྨཱ ཨཏཱིཏཱ ནཝཏྟབྦཱཏི ན ཝུཏྟཱཏི? དྷམྨཝསེན ཨསངྒཧིཏཏྟཱབྷཱཝཏོ. དྷམྨཝསེན ཧི ཨསངྒཧིཏཾ ནིབྦཱནཾ ཏཏྠ ནཝཏྟབྦཾ ཛཱཏཾ, ན ཙ ནིཡོགཏོ ཨཏཱིཏཱ ནཱམ དྷམྨཱ ཀེཙི ཨཏྠི, ཡེ ཨིདྷ ཨསངྒཧིཏཏྟཱ ནཝཏྟབྦཱ སིཡུནྟི. ཕལནིབྦཏྟིཏོ ཀཱརཎསྶ པུརེཏརཾ ནིབྦཏྟི ཨིདྷ པརིནིཊྛིཏསདྡེན ཝུཙྩཏི, ན ཏསྶ ཧུཏྭཱ ཝིགཏབྷཱཝོཏི ཨཱཧ ‘‘ཨནཱགཏེ ཝཱ’’ཏི. ཡཏོ མེཏྟེཡྻསྶ བྷགཝཏོ ཨུཔྤཛྫནཀཕལམྤི ‘‘ཨུཔྤཱདཱི’’ཏི ཝུཙྩཏི.

༢༠. ཡསྶ ཛྷཱནཱ ཝུཊྛཧིཏྭཱཏིཨཱདིནཱ ‘‘ཏེནཱནནྡཱ’’ཏིཨཱདིཔཱལི༹ཡཱ ཧེཊྛཱཔཱལི༹ཾ ཨཏྠཝསེན དསྶེཏི. ཨཡཉྷི ཏཏྠ པཱལི༹ –

‘‘ཀཐཉྩཱནནྡ ¶ , བྷིཀྑུ ཨཛ྄ཛྷཏྟམེཝ ཙིཏྟཾ སཎྛཔེཏི སནྣིསཱདེཏི ཨེཀོདིཾ ཀརོཏི སམཱདཧཏི. ཨིདྷཱནནྡ, བྷིཀྑུ ཝིཝིཙྩེཝ…པེ… ཙཏུཏྠཾ ཛྷཱནཾ ཨུཔསམྤཛྫ ཝིཧརཏི. ཨེཝཾ ཁོ…པེ… སམཱདཧཏི. སོ ཨཛ྄ཛྷཏྟཾ སུཉྙཏཾ མནསི ཀརོཏི, ཏསྶ ཨཛ྄ཛྷཏྟཾ སུཉྙཏཾ མནསིཀརོཏོ སུཉྙཏཱཡ ཙིཏྟཾ ན པཀྑནྡཏི…པེ… མུཙྩཏི. ཨེཝཾ སནྟམེཏཾ, ཨཱནནྡ, བྷིཀྑུ ཨེཝཾ སམྤཛཱནཱཏི ཨཛ྄ཛྷཏྟཾ ཁོ མེ སུཉྙཏཾ མནསིཀརོཏོ ཨཛ྄ཛྷཏྟཾ སུཉྙཏཱཡ ཙིཏྟཾ ན པཀྑནྡཏི…པེ… མུཙྩཏཱིཏི, ཨིཏིཧ ཏཏྠ སམྤཛཱནོ ཧོཏི. སོ བཧིདྡྷཱ སུཉྙཏཾ…པེ… ཨཛ྄ཛྷཏྟབཧིདྡྷཱ སུཉྙཏཾ…པེ… སོ ཨཱནེཉྫཾ མནསི ཀརོཏི, ཏསྶ ཨཱནེཉྫཾ མནསིཀརོཏོ ཨཱནེཉྫཱཡ ཙིཏྟཾ ན པཀྑནྡཏི…པེ… མུཙྩཏཱིཏི, ཨིཏིཧ ཏཏྠ སམྤཛཱནོ ཧོཏི. ཏེནཱནནྡ, བྷིཀྑུནཱ’’ཏི (མ. ནི. ༣.༡༨༨).

ཏཏྠ ཨཛ྄ཛྷཏྟསུཉྙཏཱདཱིསཱུཏི ཨཛ྄ཛྷཏྟཾ བཧིདྡྷཱ ཨཛ྄ཛྷཏྟབཧིདྡྷཱ ཙ སུཉྙཏཱཡ ཨཱནེཉྫེ ཙ. པཋམཛ྄ཛྷཱནཱདིསམཱདྷིནིམིཏྟེཏི པཱདཀབྷཱུཏཔཋམཛ྄ཛྷཱནཱདིསམཱདྷིནིམིཏྟེ. ཨཔགུཎཔཱདཀཛ྄ཛྷཱནཏོ ཝུཊྛིཏསྶ ཧི ཨཛ྄ཛྷཏྟཾ སུཉྙཏཾ མནསིཀརོཏོ ཏཏྠ ཙིཏྟཾ ན པཀྑནྡཏི. ཏཏོ ‘‘པརསྶ སནྟཱནེ ནུ ཁོ ཀཐ’’ནྟི བཧིདྡྷཱ མནསི ཀརོཏི, ཏཏྠཔི ན པཀྑནྡཏི. ཏཏོ ‘‘ཀཱལེན ཨཏྟནོ སནྟཱནེ, ཀཱལེན པརསྶ སནྟཱནེ ནུ ཁོ ཀཐ’’ནྟི ¶ ཨཛ྄ཛྷཏྟབཧིདྡྷཱ མནསི ཀརོཏི, ཏཏྠཔི ན པཀྑནྡཏི. ཏཏོ ཨུབྷཏོབྷཱགཝིམུཏྟོ ཧོཏུཀཱམོ ‘‘ཨརཱུཔསམཱཔཏྟིཡཾ ནུ ཁོ ཀཐ’’ནྟི ཨཱནེཉྫཾ མནསི ཀརོཏི, ཏཏྠཔི ན པཀྑནྡཏི. ‘‘ཨིདཱནི མེ ཙིཏྟཾ ན པཀྑནྡཏཱི’’ཏི ཝིསྶཊྛཝཱིརིཡེན ན བྷཝིཏབྦཾ, པཱདཀཛ྄ཛྷཱནམེཝ པན སཱདྷུཀཾ པུནཔྤུནཾ མནསི ཀཱཏབྦཾ, ཨེཝམསྶ རུཀྑཾ ཚིནྡཏོ ཕརསུམྷི ཨཝཧནྟེ པུནཔྤུནཾ ནིསིཏནིསིཏཾ ཀཱརེཏྭཱ ཚིནྡནྟསྶ ཚིཛྫེ ཕརསུ ཝིཡ ཀམྨཊྛཱནེ མནསིཀཱརོ ཝཧཏཱིཏི དསྶེཏུཾ ‘‘ཏསྨིཾཡེཝཱ’’ཏིཨཱདི ཝུཏྟནྟི.

ཨཏྠཏོ ཙ ཨསམཱནཏྟཱཏི ཨིདཾ ཀསྨཱ ཝུཏྟཾ. ནནུ ཡེསུ ཨཏྠེསུ ཨཛ྄ཛྷཏྟ-སདྡོ ཝཏྟཏི, ཏེ སབྦེ དསྶེཏྭཱ ཨིདྷཱདྷིཔྤེཏཏྠནིདྡྷཱརཎཏྠཾ ཨཏྠུདྡྷཱརཝསེནེཏཾ ཝུཏྟཾ. ཙཀྑཱདཱིསུ ཙ ཨཛ྄ཛྷཏྟིཀ-སདྡོ ཨཛ྄ཛྷཏྟཱནཾ ཨབྦྷནྟརཏཱཝིསེསམུཔཱདཱཡ པཝཏྟཏི, ཡཏོ ཏེ ཨཛ྄ཛྷཏྟཨཛ྄ཛྷཏྟཱཏི ཝུཙྩནྟི. ཨཔིཙ ‘‘ཚ ཨཛ྄ཛྷཏྟིཀཱནཱི’’ཏི ཨིདཾ ཨཛ྄ཛྷཏྟིཀ-སདྡསྶ ཙཀྑཱདཱིནཾ ཨཛ྄ཛྷཏྟབྷཱཝཝིབྷཱཝནསབྦྷཱཝཏོ ཨིདྷ ཨུདཱཧརཎཝསེན ཝུཏྟཾ. ཏེནེཝ ཧི ཨཊྛཀཐཱཡཾ ཨཛ྄ཛྷཏྟིཀདུཀེ ‘‘ཨཛ྄ཛྷཏྟཱཝ ཨཛ྄ཛྷཏྟིཀཱ’’ཏི ཝུཏྟཾ. ཨེཝཉྩ སཏི ན ཨེཏྠ སདྡཏོ ཨསམཱནཏཱཔི སིཡཱ, ཏསྨཱཡེཝ ¶ ཡཐཱཝུཏྟཙོདནཾ ཝིསོདྷེནྟོ ‘‘ཨཡཾ པནེཏྠཱ’’ཏིཨཱདིམཱཧ. ཏེནཱཏི ཏསྨཱ. ཏཾཝཱཙཀསྶཱཏི ཨཛ྄ཛྷཏྟཛ྄ཛྷཏྟཝཱཙཀསྶ སཀྐཱ ཝཏྟུཾ ཏདཏྠསྶ ཨཛ྄ཛྷཏྟབྷཱཝསབྦྷཱཝཏོ.

‘‘ན ཁོ, ཨཱནནྡ, བྷིཀྑུ སོབྷཏི སངྒཎིཀཱརཱམོ སངྒཎིཀཱརཏོ སངྒཎིཀཱརཱམཏཾ ཨནུཡུཏྟོ’’ཏིཨཱདིནཱ (མ. ནི. ༣.༡༨༦) པབྦཛིཏཱསཱརུཔྤསྶ ནེཀྑམྨསུཁཱདིནིཀཱམལཱབྷིཏཱཡ ཨབྷཱཝསྶ ཙ དསྶནེན སངྒཎིཀཱརཱམཏཱཡ, ‘‘ནཱཧཾ, ཨཱནནྡ, ཨེཀཾ རཱུཔམྤི སམནུཔསྶཱམི, ཡཏྠ རཏྟསྶ ཡཐཱབྷིརཏསྶ རཱུཔསྶ ཝིཔརིཎཱམཉྙཐཱབྷཱཝཱ ན ཨུཔྤཛྫེཡྻུཾ སོཀཔརི…པེ… ཨུཔཱཡཱསཱ’’ཏི (མ. ནི. ༣.༡༨༦) ཨེཝཾ རཱུཔཱདིརཏིཡཱ ཙ ཨཱདཱིནཝཾ ཝཏྭཱ སཙེ ཀོཙི དུཔྤཉྙཛཱཏིཀོ པབྦཛིཏོ ཝདེཡྻ ‘‘སམྨཱསམྦུདྡྷོ ཁེཏྟེ པཝིཊྛཱ གཱཝིཡོ ཝིཡ ཨམྷེཡེཝ གཎཏོ ནཱིཧརཏི, ཨེཀཱིབྷཱཝེ ནིཡོཛེཏི, སཡཾ པན རཱཛརཱཛམཧཱམཏྟཱདཱིཧི པརིཝུཏོ ཝིཧརཏཱི’’ཏི, ཏསྶ ཝཙནོཀཱསུཔཙྪེདནཏྠཾ ཙཀྐཝཱལ༹པརིཡནྟཱཡ པརིསཱཡ མཛ྄ཛྷེ ནིསིནྣོཔི ཏཐཱགཏོ ཨེཀཀོཝཱཏི དསྶནཏྠཾ ‘‘ཨཡཾ ཁོ པནཱ’’ཏི དེསནཱ ཨཱརདྡྷཱཏི ཨཱཧ ‘‘ཏཔྤཊིཔཀྑཝིཧཱརདསྶནཏྠ’’ནྟི. ཏཏྠ སབྦནིམིཏྟཱནནྟི རཱུཔཱདཱིནཾ སངྑཏནིམིཏྟཱནཾ ¶ . ཨཛ྄ཛྷཏྟནྟི ཝིསཡཛ྄ཛྷཏྟཾ. སུཉྙཏནྟི ཨནཏྟཱནུཔསྶནཱནུབྷཱཝནིབྦཏྟཕལསམཱཔཏྟིཾ. ཏེནེཝཱཧ ‘‘ཨཛ྄ཛྷཏྟ’’ནྟིཨཱདི. ཏཏྠ དུཏིཡེ ཝིཀཔྤེ ཋཱན-སདྡོ ཀཱརཎཔརིཡཱཡོ དཊྛབྦོ. སཙྩཀསུཏྟེནཱཏི མཧཱསཙྩཀསུཏྟེན. ཏཏྠ ཧི –

‘‘ཨབྷིཛཱནཱམི ཁོ པནཱཧཾ, ཨགྒིཝེསྶན, ཨནེཀསཏཱཡ པརིསཱཡ དྷམྨཾ དེསེཏཱ, ཨཔིསྶུ མཾ ཨེཀམེཀོ ཨེཝཾ མཉྙཏི ‘མམེཝཱརབྦྷ སམཎོ གོཏམོ དྷམྨཾ དེསེཏཱི’ཏི. ན ཁོ པནེཏཾ, ཨགྒིཝེསྶན, ཨེཝཾ དཊྛབྦཾ. ཡཱཝདེཝ ཝིཉྙཱཔནཏྠཱཡ ཏཐཱགཏོ པརེསཾ དྷམྨཾ དེསེཏཱིཏི. སོ ཁོ ཨཧཾ, ཨགྒིཝེསྶན, ཏསྶཱཡེཝ ཀཐཱཡ པརིཡོསཱནེ ཏསྨིཾཡེཝ པུརིམསྨིཾ སམཱདྷིནིམིཏྟེ ཨཛ྄ཛྷཏྟམེཝ ཙིཏྟཾ སཎྛཔེམི སནྣིསཱདེམི, ཨེཀོདིཾ ཀརོམི, སམཱདཧཱམི ‘ཡེན སུདཾ ནིཙྩཀཔྤཾ ཝིཧརཱམཱི’’ཏི (མ. ནི. ༡.༣༨༧) –

ཨཱགཏནྟི.

༢༢. ཨཉྙེཧི ཨནིདསྶནེཧི ཨཉྙཾ ཝིཡ ཀཏྭཱ ཡཐཱ ‘‘སིལཱཔུཏྟཀསྶ སརཱིར’’ནྟི. དྷམྨསབྷཱཝསཱམཉྙེནཱཏིཨཱདིནཱ ཀིཉྩཱཔི རཱུཔཱཡཏནཏོ ཨཉྙོ ནིདསྶནབྷཱཝོ ནཱམ ནཏྠི, དྷམྨསབྷཱཝོ ¶ པན ཨཏྠི. ཏཏོ ཙ རཱུཔཱཡཏནསྶ ཝིསེསོ ནིདསྶནབྷཱཝེན ཀཏོཏི ཏདཉྙདྷམྨཝིསེསཀརོ ནིདསྶནབྷཱཝོ རཱུཔཱཡཏནཏོ ཨནཉྙོཔི ཨཉྙོ ཝིཡ ཀཏྭཱ ཨུཔཙརིཏོཏི དསྶེཏི. ཨཏྠཝིསེསོ སཱམཉྙཝིསེསཏྠབྷེདོ. སཡཾ སམྤཏྟཱནཾ ཕོཊྛབྦདྷམྨཱནཾ, ནིསྶཡཝསེན སམྤཏྟཱནཾ གྷཱནཛིཝ྄ཧཱཀཱཡཱནཾ གནྡྷརསཱནཉྩ, ཨིཏརེསཾ ཨསམྤཏྟཱནཾ. ཨཉྙམཉྙཔཏནཾ ཨཉྙམཉྙསྶ ཡོགྱདེསེ ཨཝཊྛཱནཾ, ཡེན པཊིཧནནབྷཱཝེན. བྱཱཔཱརཱདཱིཏི ཙིཏྟཀིརིཡཱཝཱཡོདྷཱཏུཝིཔྥཱརཝསེན ཨཀྑིཔཊལཱདཱིནཾ ཧེཊྛཱ ཨུཔརི ཙ སཾསཱིདནལངྒྷནཱདིཔྤཝཏྟིམཱཧ. ཝིཀཱརུཔྤཏྟི ཝིསདིསུཔྤཏྟི, ཝིསཡསྶ ཨིཊྛཱནིཊྛབྷཱཝེན ཨནུགྒཧོ ཨུཔགྷཱཏོ ཙཱཏི ཨཏྠོ.

ཏིཀམཱཏིཀཱཔདཝཎྞནཱ ནིཊྛིཏཱ.

དུཀམཱཏིཀཱཔདཝཎྞནཱ

༡-༦. སམཱནདེསགྒཧཎཱནཾ ¶ ཨེཀསྨིཾཡེཝ ཝཏྠུསྨིཾ གཧེཏབྦཱནཾ, ཨེཀཝཏྠུཝིསཡཱནཾ ཝཱ. ཨཐ ཝཱ སམཱནདེསཱནཾ ཨེཀཝཏྠུཀཏྟཱ སམཱནགཧེཏབྦབྷཱཝཱནཾ ཨེཀུཔྤཱདིཏོཏི ཨཏྠོ. ཡེ དྷམྨཱ ཧེཏུསཧགཏཱ, ཏེ ཧེཏཱུཧི སཧ སངྒཡ྄ཧནྟི. ཡོ ཙ ཏེསཾ སཧེཏུཀབྷཱཝོ, སོ སཧཛཱཏཱདཱིཧི ཧེཏཱུཧི ཀཏོཏི ཀཏྭཱ ཝུཏྟཾ ‘‘སམཱ…པེ… སབྦྷཱཝ’’ནྟི. ཨཱདི-སདྡེན ཙེཏྠ སུཔྤཏིཊྛིཏབྷཱཝསཱདྷནཱདིཧེཏུབྱཱཔཱརེ པརིགྒཎྷཱཏི. ཨེཀཱིབྷཱཝཱུཔགམནནྟི ཨེཀཀལཱཔབྷཱཝེན པཝཏྟམཱནཱནཾ ཙིཏྟཙེཏསིཀཱནཾ སཾསཊྛཏཱཡ སམཱུཧགྷནབྷཱཝེན དུཝིཉྙེཡྻནཱནཱཀརཎཏཾཡེཝ སནྡྷཱཡ ཝུཏྟཾ. དྷམྨནཱནཏྟཱབྷཱཝེཔཱིཏི སབྷཱཝཏྠབྷེདཱབྷཱཝེཔི. པདཏྠནཱནཏྟེནཱཏི ནཱནཱཔདཱབྷིདྷེཡྻཏཱབྷེདེན. ཨེཏེན པཀཱརནྟརཱཔེཀྑཾ དུཀནྟརཝཙནནྟི དསྶེཏི. ཨནེཀཔྤཀཱརཱ ཧི དྷམྨཱ. ཏེནེཝ ‘‘སབྦེ དྷམྨཱ སབྦཱཀཱརེན བུདྡྷསྶ བྷགཝཏོ ཉཱཎམུཁེ ཨཱཔཱཐཾ ཨཱགཙྪནྟཱི’’ཏི (མཧཱནི. ༡༥༦; ཙཱུལ༹ནི. མོགྷརཱཛམཱཎཝཔུཙྪཱནིདྡེས ༨༥) ཝུཏྟཾ. ཨཡཉྩ ཨཏྠོ ཏིཀེསུཔི དཊྛབྦོ. ཡེསཾ ཝིནེཡྻཱནཾ ཡེཧི པཀཱརཝིསེསེཧི དྷམྨཱནཾ ཝིབྷཱཝནེ ཀཏེ པཊིཝེདྷོ ཧོཏི, ཏེསཾ ཏཔྤཀཱརབྷེདེཧི དྷམྨཱནཾ ཝིབྷཱཝནཾ. ཡེསཾ པན ཡེན ཨེཀེནེཝ པཀཱརེན ཝིབྷཱཝནེ པཊིཝེདྷོ ཧོཏི, ཏེསམྤི ཏཾ ཝཏྭཱ དྷམྨིསྶརཏྟཱ ཏདཉྙནིརཝསེསཔྤཀཱརཝིབྷཱཝནཉྩ དེསནཱཝིལཱསོཏི ཨཱཧ ‘‘དེསེཏབྦཔྤཀཱརཛཱནན’’ནྟིཨཱདི. ནནུ ཨེཀེན པཀཱརེན ཛཱནནྟསྶ ཏདཉྙཔྤཀཱརཝིབྷཱཝནཾ ཨཕལཾ ¶ ཧོཏཱིཏི? ན ཧོཏི པཊིསམྦྷིདཱཔྤབྷེདསྶ ཨུཔནིསྶཡཏྟཱ. ཏེ པཀཱརཱ ཨེཏེསནྟི ཏཔྤཀཱརཱ, ཏབྦྷཱཝོ ཏཔྤཀཱརཏཱ. ཨིམིནཱ དྷམྨཱནཾ ཝིཛྫམཱནསྶེཝ པཀཱརཝིསེསསྶ ཝིབྷཱཝནཾ དེསནཱཝིལཱསོཏི དསྶེཏི.

ཨཉྙཏྠཱཔཱིཏི ‘‘ཨཧེཏུཀཱ ཙེཝ དྷམྨཱ ན ཙ ཧེཏཱུ’’ཏིཨཱདཱིསུ. ཡཐཱ པཋམདུཀེཀདེསེ གཧེཏྭཱ དུཏིཡཏཏིཡདུཀེཧི སདྡྷིཾ ཚཊྛདུཀནཡེ ཡོཛནཱ ‘‘ཧེཏཱུ དྷམྨཱ སཧེཏུཀཱཔི ཨཧེཏུཀཱཔཱི’’ཏིཨཱདཡོ ཏཡོ དུཀཱ ལབྦྷནྟི, ཨེཝཾ དུཏིཡཏཏིཡདུཀེཀདེསེ གཧེཏྭཱ པཋམདུཀེན སདྡྷིཾ ཡོཛནཱཡ ‘‘སཧེཏུཀཱ དྷམྨཱ ཧེཏཱུཔི ན ཧེཏཱུཔི, ཨཧེཏུཀཱ དྷམྨཱ ཧེཏཱུཔི ན ཧེཏཱུཔི, ཧེཏུསམྤཡུཏྟཱ དྷམྨཱ ཧེཏཱུཔི ན ཧེཏཱུཔི, ཧེཏུཝིཔྤཡུཏྟཱ དྷམྨཱ ཧེཏཱུཔི ན ཧེཏཱུཔཱི’’ཏི ཙཏྟཱརོ དུཀཱ ¶ ལབྦྷནྟི, ཏེ པན ཝུཏྟནཡེནེཝ སཀྐཱ དསྶེཏུནྟི ན དསྶིཏཱཏི དཊྛབྦཱ. ཨཐ ཝཱ པཱལི༹ཡཾ ཝུཏྟེཧི ཙཏུཏྠཔཉྩམེཧི ཨཊྛཀཐཱཡཾ དསྶིཏེཧི པུརིམེཧི དྭཱིཧི ནིནྣཱནཱཀརཎཏོ ཨེཏེ ན ཝུཏྟཱ. སནྣིཝེསཝིསེསམཏྟམེཝ ཧེཏྠ ཝིསེསོཏི. ཏེནེཝ ཧི ནིནྣཱནཏྠཏྟཱ པཱལི༹ཡཾ ཨཱགཏདུཀེསུ ཡཐཱནིདྡྷཱརིཏདུཀཱནཾ ཡཐཱསམྦྷཝཾ ཨཝརོདྷནེན ཨཝུཏྟཏཾ དསྶེཏུཾ ‘‘ཨེཏེསུ པནཱ’’ཏིཨཱདིམཱཧ.

ཨཐ ཝཱ ‘‘ཨེཏེན ཝཱ གཏིདསྶནེནཱ’’ཏིཨཱདིནཱ ཝཀྑམཱནནཡེན ‘‘ཧེཏཱུ ཙེཝ དྷམྨཱ ཨཧེཏུཀཱ ཙཱ’’ཏིཨཱདཱིནཾ སམྦྷཝནྟཱནཾ དུཀཱནཾ སངྒཧེ སཏི ཨེཏེསམྤི སངྒཧོ སིཡཱ. ཡཏོ ཝཱ དུཀཏོ པདཾ ནིདྡྷཱརེཏྭཱ དུཀནྟརཾ ཝུཙྩཏི, ཏེན སཏི ཙ ནཱནཏྟེ དུཀནྟརཾ ལབྦྷཏི, ན ཙེཏྠ ཀོཙི ཝིསེསོ ཡཐཱཝུཏྟདུཀེཧཱིཏི སཾཝཎྞནཱསུ ན དསྶིཏནྟི དཊྛབྦཾ. ཨེཏྠ ཙ ཡཐཱ སཧེཏུཀདུཀཏོ ཧེཏུསམྤཡུཏྟདུཀསྶ, ཧེཏུསཧེཏུཀདུཀཏོ ཙ ཧེཏུཧེཏུསམྤཡུཏྟདུཀསྶ པདཏྠམཏྟཏོ ནཱནཏྟཾ, ན སབྷཱཝཏྠཏོ. ཨེཝཾ སནྟེཔི སཧེཏུཀཧེཏུསཧེཏུཀདུཀེ ཝཏྭཱ ཨིཏརེཔི ཝུཏྟཱ, ཨེཝཾ ཧེཏུསམྤཡུཏྟཧེཏུཧེཏུསམྤཡུཏྟདུཀཱདཱིཧི སབྷཱཝཏྠནཱནཏྟཱབྷཱཝེཔི པདཏྠནཱནཏྟསམྦྷཝཏོ དྷམྨནཱནཏྟཱབྷཱཝེཔི པདཏྠནཱནཏྟེན དུཀནྟརཾ ཝུཙྩཏཱིཏི ཝུཏྟཏྟཱ ‘‘ཧེཏུསཧགཏཱ དྷམྨཱ, ན ཧེཏུསཧགཏཱ དྷམྨཱ, ཧེཏུསཧཛཱཏཱ དྷམྨཱ, ན ཧེཏུསཧཛཱཏཱ དྷམྨཱ. ཧེཏུསཾསཊྛཱ དྷམྨཱ, ཧེཏུཝིསཾསཊྛཱ དྷམྨཱ. ཧེཏུསམུཊྛཱནཱ དྷམྨཱ, ན ཧེཏུསམུཊྛཱནཱ དྷམྨཱ. ཧེཏུསཧབྷུནོ དྷམྨཱ, ན ཧེཏུསཧབྷུནོ དྷམྨཱ’’ཏིཨཱདཱིནཾ, ཏཐཱ ‘‘ཧེཏཱུ ཙེཝ དྷམྨཱ ཧེཏུསཧགཏཱ ཙཱ’’ཏིཨཱདཱིནཾ, ‘‘ན ཧེཏཱུ ཁོ པན དྷམྨཱ ཧེཏུསཧགཏཱཔི, ན ཧེཏུསཧགཏཱཔཱི’’ཏིཨཱདཱིནཉྩ སམྦྷཝནྟཱནཾ ཨནེཀེསཾ དུཀཱནཾ སངྒཧོ ཨནུཉྙཱཏོ ཝིཡ དིསྶཏི. ཏཐཱ ཧི ཝཀྑཏི ‘‘ཨེཏེན ཝཱ གཏིདསྶནེནཱ’’ཏིཨཱདི. ཨེཝཾ ཨཱསཝགོཙྪཀཱདཱིསུཔི ཨཡམཏྠོ ཡཐཱསམྦྷཝཾ ཝཏྟབྦོ. དྷམྨཱནཾ ཝཱ སབྷཱཝཀིཙྩཱདིཾ བོདྷེཏབྦཱཀཱརཉྩ ¶ ཡཱཐཱཝཏོ ཛཱནནྟེན དྷམྨསཱམིནཱ ཡཏྟཀཱ དུཀཱ ཝུཏྟཱ, ཏཏྟཀེསུ ཋཱཏབྦཾ. ཨདྡྷཱ ཧི ཏེ དུཀཱ ན ཝཏྟབྦཱ, ཡེ བྷགཝཏཱ ན ཝུཏྟཱཏི ཝེདིཏབྦཾ. ན ཧེཏུཧེཏུསམྤཡུཏྟདུཀོ ཚཊྛདུཀེན ནིནྣཱནཏྠོཏི ཨདྷིཔྤཱཡོ. ཏེསཱུཏི པཋམདུཀཏཏིཡདུཀེསུ. ཡདི དུཀནྟརེཧི དུཀནྟརཔདེཧི ཙ སམཱནཏྠཏྟཱ ཨེཏེསཾ དུཀཱནཾ དུཀནྟརཔདཱནཉྩ ཨཝཙནཾ ¶ , ཨེཝཾ སཏི ཚཊྛདུཀེ པཋམཔདམྤི ན ཝཏྟབྦཾ ཙཏུཏྠདུཀེ དུཏིཡཔདེན སམཱནཏྠཏྟཱ. ཏཐཱ ཙ ཚཊྛདུཀོཡེཝ ན ཧོཏཱིཏི ཙོདནཾ སནྡྷཱཡཱཧ ‘‘ཙཏུཏྠདུཀེ’’ཏིཨཱདི. དུཀཔཱུརཎཏྠནྟི ཨིདཾ སམཱནཏྠཏཾཡེཝ སནྡྷཱཡ ཝུཏྟཾ, དེསནཱཝིསེསོ པན ཝིཛྫཏིཡེཝ. ཨཏྠནྟརཏཱབྷཱཝེཔི པཀཱརབྷེདཧེཏུཀཾ དུཀནྟརཝཙནནྟི དསྶིཏོ ཧི ཨཡམཏྠོཏི. ཨེཏེན གཏིདསྶནེནཱཏི ཨཏྠཝིསེསཱབྷཱཝེཔི ཚཊྛདུཀཔཱུརཎསངྑཱཏེན ནཡདསྶནེན. པཋམདུཀེ…པེ… དསྶིཏོ པཱལི༹ཡཾ ཝུཏྟེཧི ཙཏུཏྠཔཉྩམེཧི, ཨཊྛཀཐཱཡཾ དསྶིཏེཧི པུརིམེཧི དྭཱིཧི, ཨིདྷ དསྶིཏེཧི ཙཏཱུཧི. ཏེསཱུཏི དུཏིཡཏཏིཡདུཀེསུ. པཋམདུཀཔཀྑེཔེན དསྶིཏོ པཱལི༹ཡཾ ཚཊྛདུཀེན ཨིཏརཏྲ ཙ ཨིཏརདུཀེཧཱིཏི ཝེདིཏབྦཾ.

༧-༡༣. པཙྩཡབྷཱཝམཏྟེན…པེ… ཨཏྠིཏནྟི ཨེཏེན ན པཊིལདྡྷཏྟཏཱསངྑཱཏཱ སསབྷཱཝཏཱཝ ཨཏྠིཏཱ, ཨཐ ཁོ པཊིཔཀྑེན ཨནིརོདྷོ ཨཔྤཧཱིནཏཱ ཨནིཔྥཱདིཏཕལཏཱ ཀཱརཎཱསམུགྒྷཱཏེན ཕལནིབྦཏྟནཱརཧཏཱ ཙཱཏི ཨིམམཏྠཾ དསྶེཏི. ཏཐཱ ཧི ‘‘ཨིམསྨིཾ སཏི ཨིདཾ ཧོཏཱི’’ཏི ཨེཏྠ ‘‘སཏཱི’’ཏི ཨིམིནཱ ཝཙནེན ཡེན ཝིནཱ ཡཾ ན ཧོཏི, ཏཾ ཨཏཱིཏཱདིཔི ཀཱརཎཾ སངྒཧིཏམེཝཱཏི. ཏེནེཝཱཧ ‘‘ན སཧེཏུ…པེ… ཀཱལཱནམེཝཱ’’ཏི. སམེ…པེ… དཱིཔེཏི སམེཙྩ སམྦྷཱུཡ པཙྩཡེཧི ཀཏནྟི སངྑཏནྟི. ཨཡམེཏེསཾ ཝིསེསོཏི ཨཡཾ པཙྩཡནིབྦཏྟཱནཾ པཙྩཡཝནྟཏཱ ཨནེཀཔཙྩཡནིཔྥཱདིཏཏཱ ཙ དུཀདྭཡེ པུརིམཔདཏྠཱནཾ བྷེདོ, ཨིཏརེསཾ པན པུརིམཔདསངྒཧིཏདྷམྨཝིདྷུརསབྷཱཝཏཱཡཱཏི. ཨཝིནི…པེ… ཋཔནཏོཏི ‘‘ཨེཏྟཀཱ’’ཏི པབྷེདཔརིཙྪེདནིདྡྷཱརཎཝསེན ཨབྷིདྷམྨམཱཏིཀཱཡཾ དྷམྨཱནཾ ཨཝུཏྟཏྟཱ ཝུཏྟཾ. སུཏྟནྟམཱཏིཀཱཡཾ པན ནིདྡྷཱརིཏསརཱུཔསངྑཱཝིསེསཏྟཱ ཝིནིཙྪིཏཏྠཔརིཙྪེདཱཡེཝ ཨཝིཛྫཱདཡོ ཝུཏྟཱཏི. ‘‘པཐཝཱིཨཱདི རཱུཔ’’ནྟི ཨེཏསྨིཾ ཨཏྠཝིཀཔྤེ ཨནེཀཧེཏུཀེསུ ཙིཏྟུཔྤཱདེསུ ཧེཏཱུནཾ སཧེཏུཀབྷཱཝོ ཝིཡ སབྦེསཾ པཐཝཱིཨཱདཱིནཾ རཱུཔིབྷཱཝོ སིདྡྷོཏི ཨཱཧ ‘‘པུརིམ…པེ… པཛྫཏཱི’’ཏི. ན ཧི ཏེསུ ནིཡཏོ ཀཏྠཙི སཾསཱམིབྷཱཝོཏི. ཨནིཙྩཱནུཔསྶནཱཡ ཝཱ ལུཛྫཏི ཚིཛྫཏི ཝིནསྶཏཱིཏི གཧེཏབྦོ ལོཀོཏི ཏཾགཧཎརཧིཏཱནཾ ལོཀུཏྟརཱནཾ ནཏྠི ལོཀཏཱ. ཏེནེཝཱཏི དུཀྑསཙྩབྷཱཝེན པརིཉྙེཡྻབྷཱཝེནཱཏི ཨཏྠོ.

དུཀབཧུཏཱ ¶ ཨཱཔཛྫཏཱིཏི ཀསྨཱ ཝུཏྟཾ, ནནུ ཝཱིསཏི དུཀཱ ཝིབྷཏྟཱ, ‘‘ཨཝུཏྟོཔི ཡཐཱལཱབྷཝསེན ཝེདིཏབྦོ’’ཏི ཙ ཝཀྑཏཱིཏི དུཀབཧུཏཱ ¶ ཨིཙྪིཏཱ ཨེཝཱཏི? སཙྩམེཏཾ, ཏཾཡེཝ པན དུཀབཧུཏཾ ཨནིཙྪནྟོ ཨེཝམཱཧ. ཨཔིཙ དུཀབཧུཏཱ ཨཱཔཛྫཏི, སཱ ཙ ཁོ ཝིཉྙཱཎབྷེདཱནུསཱརིནཱི, ཏཏྲཱཔི ཀཱམཱཝཙརཀུསལཏོ ཉཱཎསམྤཡུཏྟཱནི, ཏཐཱ མཧཱཀིརིཡཏོ མནོདྭཱརཱཝཛྫནནྟི ཨེཝཾཔཀཱརཱནཾ སབྦདྷམྨཱརམྨཎཝིཉྙཱཎཱནཾ ཨནཱམསནཏོ ན བྱཱཔིནཱིཏི དསྶེཏི ‘‘དུཀབཧུཏཱ’’ཏིཨཱདིནཱ. ཨབྱཱཔིབྷཱཝེ པན དོསཾ དསྶེནྟོ ‘‘ཏཐཱ ཙ…པེ… སིཡཱ’’ཏི ཨཱཧ. ནིདྡེསེན ཙ ཝིརུདྡྷནྟི ‘‘ཡེ ཏེ དྷམྨཱ ཙཀྑུཝིཉྙེཡྻཱ, ན ཏེ དྷམྨཱ སོཏཝིཉྙེཡྻཱ’’ཏིཨཱདིནཱ རཱུཔཱཡཏནཱདཱིནཾ པཙྩེཀཙཀྑུཝིཉྙཱཎཱདིནཱ ཀེནཙི ཝིཉྙེཡྻཏཾ, སོཏཝིཉྙཱཎཱདིནཱ ཀེནཙི ནཝིཉྙེཡྻཏཉྩ དསྶེནྟེན ནིཀྑེཔརཱསིནིདྡེསེན ‘‘དྭིནྣམྤི པདཱནཾ ཨཏྠནཱནཏྟཏོ དུཀོ ཧོཏཱི’’ཏི ཨིདཾ ཝཙནཾ ཝིརུདྡྷཾ, ཏཐཱ ཨཏྠུདྡྷཱརནིདྡེསེནཔི ཨཏྠཏོ ན སམེཏཱིཏི ཨཏྠོ. ཏཏྠཱཏི ཏསྶཾ ནིཀྑེཔརཱསིསཾཝཎྞནཱཡཾ. ཡོ ཙ པཊིསེདྷོ ཀཏོ ཨཏྠནཱནཏྟཏོ དུཀཾ དསྶེཏུནྟི ཨདྷིཔྤཱཡོ. ན ཧི སམ…པེ… སེདྷེཏུནྟི ཨེཏེན ‘‘ཡེ ཏེ དྷམྨཱ ཙཀྑུཝིཉྙེཡྻཱ, ན ཏེ དྷམྨཱ སོཏཝིཉྙེཡྻཱ’’ཏི ཨེཏྟཀེསུ ནིདྡེསཔདེསུ དུཀཔདདྭཡཔྤཝཏྟི པཱལི༹ཏོ ཨེཝ ཝིཉྙཱཡཏཱིཏི དསྶེཏི.

ཏཐེཝཱཏི ཨུབྷིནྣཾ ཀེཙིན-སདྡཱནཾ ཨནིཡམཏོ ཙཀྑུསོཏཱདིནིསྶཡཝོཧཱརེན ཙཀྑུསོཏཝིཉྙཱཎཱདིཀོ བྷིནྣསབྷཱཝོཡེཝ དྷམྨོ ཨཏྠོཏི དསྶནཝསེན. རཱུཔཱཡཏནམེཝ ཧི ཙཀྑུསོཏཝིཉྙཱཎེཧི ཝིཉྙེཡྻཱཝིཉྙེཡྻབྷཱཝཏོ ‘‘ཀེནཙི ཝིཉྙེཡྻཾ ཀེནཙི ནཝིཉྙེཡྻ’’ནྟི ཙ ཝུཙྩཏཱིཏི. ཡདི ཨེཝཾ ཨིམསྨིམྤི པཀྑེ དུཀབཧུཏཱ ཨཱཔཛྫཏཱིཏི ཙོདནཾ མནསི ཀཏྭཱ ཨཱཧ ‘‘ན ཙེཏྠཱ’’ཏིཨཱདི. ཝིཉྙཱཏབྦབྷེདེནཱཏི ཝིཉྙཱཏབྦཝིསེསེན, ཝིཉྙེཡྻེཀདེསེནཱཏི ཨཏྠོ. དུཀབྷེདོཏི དུཀཝིསེསོ, ཀེནཙི ཝིཉྙེཡྻདུཀོ, ཏཔྤབྷེདོཡེཝ ཝཱ. སམཏྟོ པརིཡཏྟོ པརིཔུཎྞོཏི ཨཏྠོ. ཡཏྟཀཱ ཝིཉྙཱཏབྦཱ ཏཏྟཀཱ དུཀཱཏི དུཀབྷེདཱཔཛྫནཔྤཀཱརདསྶནཾ. ཨེཝཉྩ སཏཱིཏིཨཱདིནཱ ཨིམིསྶཱ སཾཝཎྞནཱཡ ལདྡྷགུཎཾ དསྶེཏི. ‘‘ཡེ ཏེ དྷམྨཱ ཙཀྑུཝིཉྙེཡྻཱ, ན ཏེ དྷམྨཱ སོཏཝིཉྙེཡྻཱ’’ཏི རཱུཔཱཡཏནསྶེཝ ཝུཏྟཏྟཱ ཨཏྠབྷེདཱབྷཱཝཏོ ཀཐམཡཾ དུཀོ ཧོཏཱིཏི ཨཱཧ ‘‘ཝིཉྙཱཎནཱནཏྟེནཱ’’ཏིཨཱདི. ཡདི པན སབྦཝིཉྙཱཏབྦསངྒཧེ དུཀོསམཏྟོ ཧོཏི, ནིཀྑེཔརཱསིནིདྡེསོ ཀཐཾ ནཱིཡཏཱིཏི ཨཱཧ ‘‘ཨེཏསྶ པནཱ’’ཏིཨཱདི.

ཨེཏྠ ¶ པན ཡཐཱ ཝིཉྙཱཎནཱནཏྟེན ཝིཉྙཱཏབྦཾ བྷིནྡིཏྭཱ དུཀེ ཝུཙྩམཱནེ སཏིཔི ཝིཉྙཱཏབྦཱནཾ ¶ བཧུབྷཱཝེ ཡཏྟཀཱ ཝིཉྙཱཏབྦཱ, ཏཏྟཀཱ དུཀཱཏི ནཏྠི དུཀབཧུཏཱ དུཀསངྒཧིཏདྷམྨེཀདེསེསུ དུཀཔདདྭཡཔྤཝཏྟིདསྶནབྷཱཝཏོ. ཨེཝཾ དྭིནྣམྤི པདཱནཾ ཨཏྠནཱནཏྟེན དུཀེ ཝུཙྩམཱནེཔི ཡཏྟཀཱནི ཝིཉྙཱཎཱནི, ཏཏྟཀཱ དུཀཱཏི ནཏྠི དུཀབཧུཏཱ དུཀསངྒ…པེ… བྷཱཝཏོ ཨེཝ. ན ཧི ཨེཀཾཡེཝ ཝིཉྙཱཎཾ ‘‘ཀེནཙི ཀེནཙཱི’’ཏི ཝུཏྟཾ, ཀིནྟུ ཨཔརམྤཱིཏི སབྦཝིཉྙཱཎསངྒཧེ དུཀོ སམཏྟོ ཧོཏི, ན ཙ ཀཏྠཙི དུཀསྶ པཙྪེདོ ཨཏྠི ཨིནྡྲིཡཝིཉྙཱཎཱནཾ ཝིཡ མནོཝིཉྙཱཎསྶཔི ཝིསཡསྶ བྷིནྣཏྟཱ. ན ཧི ཨཏཱིཏཱརམྨཎཾ ཝིཉྙཱཎཾ ཨནཱགཏཱདིཨཱརམྨཎཾ ཧོཏི, ཨནཱགཏཱརམྨཎཾ ཝཱ ཨཏཱིཏཱདིཨཱརམྨཎཾ, ཏསྨཱ ཡཐཱལདྡྷཝིསེསེན ཝིསིཊྛེསུ མནོཝིཉྙཱཎབྷེདེསུ ཏསྶ ཏསྶ ཝིསཡསྶ ཨཱལམྦནཱནཱལམྦནཝསེན དུཀཔདདྭཡཔྤཝཏྟི ན སཀྐཱ ནིཝཱརེཏུཾ. ཏེནེཝ ཙ ཨཊྛཀཐཱཡཾ ‘‘མནོཝིཉྙཱཎེན པན ཀེནཙི ཝིཉྙེཡྻཉྩེཝ ཨཝིཉྙེཡྻཉྩཱཏི ཨཡམཏྠོ ཨཏྠི, ཏསྨཱ སོ ཨཝུཏྟོཔི ཡཐཱལཱབྷཝསེན ཝེདིཏབྦོ’’ཏི བྷཱུམིབྷེདཝསེན ཡཐཱལཱབྷཾ དསྶེསྶཏི. ‘‘ཝཝཏྠཱནཱབྷཱཝཏོ’’ཏི ཨིདམྤི ཨནཱམཊྛཝིསེསཾ མནོཝིཉྙཱཎསཱམཉྙམེཝ གཧེཏྭཱ ཝུཏྟཾ. པཱལི༹ པན ཨིནྡྲིཡཝིཉྙཱཎེཧི ནཡདསྶནཝསེན ཨཱགཏཱཏི དཊྛབྦཾ. ཨེཝཉྩ ཀཏྭཱ ཨིམིསྶཱཔི ཨཏྠཝཎྞནཱཡ ‘‘ཀེནཙཱི’’ཏི པདཾ ཨནིཡམེན སབྦཝིཉྙཱཎསངྒཱཧཀནྟི སིདྡྷཾ ཧོཏི, ནིདྡེསེན ཙ ན ཀོཙི ཝིརོདྷོ. ཙཀྑུཝིཉྙེཡྻནསོཏཝིཉྙེཡྻབྷཱཝེཧི དུཀཔདདྭཡཔྤཝཏྟི དསྶིཏཱ, ན པན ཙཀྑུཝིཉྙེཡྻཱཙཀྑུཝིཉྙེཡྻབྷཱཝེཧི ཝིསེསཀཱརཎཱབྷཱཝཏོ. ཀིཉྩ ‘‘ཡེ ཝཱ པནཱ’’ཏི པདནྟརསམྤིཎྜནཏོཔི ‘‘ཡེ ཏེ དྷམྨཱ ཙཀྑུཝིཉྙེཡྻཱ…པེ… ན ཏེ དྷམྨཱ ཙཀྑུཝིཉྙེཡྻཱ’’ཏི (དྷ. ས. ༡༡༠༡) ཨེཏྟཱཝཏཱ དུཀཔདདྭཡཔྤཝཏྟི དསྶིཏཱཏི ཝིཉྙཱཡཏི. པདནྟརབྷཱཝདསྶནཏྠོ ཧི ཡེཝཱཔན-སདྡོ ཡཐཱ ‘‘ཡེ ཀེཙི ཀུསལཱ དྷམྨཱ, སབྦེ ཏེ ཀུསལམཱུལཱ. ཡེ ཝཱ པན ཀུསལམཱུལཱ, སབྦེ ཏེ དྷམྨཱ ཀུསལཱ’’ཏིཨཱདཱིསུ (ཡམ. ༡.མཱུལཡམཀ.༡). ཨཉྙཐཱ ‘‘ཡེ ཏེ དྷམྨཱ ཙཀྑུཝིཉྙེཡྻཱ, ན ཏེ དྷམྨཱ སོཏཝིཉྙེཡྻཱ. ཡེ ཏེ དྷམྨཱ སོཏཝིཉྙེཡྻཱ, ན ཏེ དྷམྨཱ ཙཀྑུཝིཉྙེཡྻཱ’’ཏི པཱལི༹ ཨབྷཝིསྶ. ཡཾ པན ཝདནྟི ‘‘ཡེ ཏེ དྷམྨཱ ཙཀྑུཝིཉྙེཡྻཱ…པེ… ན ཏེ དྷམྨཱ ཙཀྑུཝིཉྙེཡྻཱཏི ཨིམིནཱ ཨཏྠཏོ དྭེ ¶ དུཀཱ ཝུཏྟཱ ཧོནྟཱི’’ཏི, ཏདཔི ཙཀྑུཝིཉྙེཡྻཱཙཀྑུཝིཉྙེཡྻཏཾ སོཏཝིཉྙེཡྻཱསོཏཝིཉྙེཡྻཏཉྩ སནྡྷཱཡ ཝུཏྟཾ, ན པན ‘‘ཙཀྑུཝིཉྙེཡྻནསོཏཝིཉྙེཡྻཏཾ སོཏཝིཉྙེཡྻནཙཀྑུཝིཉྙེཡྻཏཉྩཱ’’ཏི དཊྛབྦཾ. ཨེཏེན པཱལི༹པཊིསེདྷནཉྩ ནིཝཱརིཏཾ དཊྛབྦཾ པཊིསེདྷནསྶེཝ ཨབྷཱཝཏོ. ཏཐཱ ཡསྶ ཨཱརམྨཎསྶ ཝིཛཱནནབྷཱཝེན ཡོ ཨཏྠོ ཝུཙྩམཱནོ ཨནིཡམདསྶནཏྠཾ ‘‘ཀེནཙཱི’’ཏི ཝུཏྟོ, སོཡེཝ ཏཏོ ཨཉྙསྶ ཨཝིཛཱནནབྷཱཝེན ཝུཙྩམཱནོ ཨནིཡམདསྶནཏྠཾ པུན ‘‘ཀེནཙཱི’’ཏི ཝུཏྟོཏི ¶ ཏདཏྠདསྶནེ ཏེནེཝཱཏི ཨཡཾ པདཏྠོ ན སམྦྷཝཏཱིཏི ན སཀྐཱ ཝཏྟུནྟི. ཨེཝམེཏྠ ཡཐཱ ཨཊྛཀཐཱ ཨཝཊྛིཏཱ, ཏཐཱ ཨཏྠོ ཡུཛྫཏཱིཏི ཝེདིཏབྦཾ.

༡༤-༡༩. སནྟཱནསྶ ཨཛཉྙམལཱིནབྷཱཝཀརཎཏོ ཀཎྷཀམྨཝིཔཱཀཧེཏུཏོ ཙ ཨཔརིསུདྡྷཏྟཱ ‘‘ཨསུཙིབྷཱཝེན སནྡནྟཱི’’ཏི ཝུཏྟཾ. ཏཏྠཱཏི ཝཎེ. པགྒྷརཎཀ…པེ… སདྡོཏི ཨེཏེན ཨཱསཝོ ཝིཡ ཨཱསཝོཏི ཨཡམྤི ཨཏྠོ དསྶིཏོཏི དཊྛབྦཾ. གོཏྲབྷུ…པེ… ཝུཏྟཱནཱིཏི ཨེཏེན གོཏྲབྷུགྒཧཎཾ ཨུཔལཀྑཎཾ ཡཐཱ ‘‘ཀཱཀེཧི སཔྤི རཀྑིཏབྦ’’ནྟི དསྶེཏི. གོཏྲབྷུསདིསཱ གོཏྲབྷཱུཏི པན ཨཏྠེ སཏི གུཎཔྤདྷཱནཏྠཱནཾ ཨེཀེན སདྡེན ཨཝཙནཱིཡཏྟཱ ཝོདཱནཱདཡོཝ ཝུཏྟཱ བྷཝེཡྻུཾ. ཨཐ ཝཱ གོཏྲབྷཱུཏི ཨེཀསེསེན སཱམཉྙེན ཝཱ ཨཡཾ ནིདྡེསོཏི ཝེདིཏབྦཾ. ཨབྷིཝིདྷིཝིསཡཾ ཨཝདྷིནྟི ཝིབྷཏྟིཾ པརིཎཱམེཏྭཱ ཝཏྟབྦཾ.

སམྤཡུཏྟེཧི ཨཱསཝེཧི ཏཾསཧིཏཏཱ ཨཱསཝསཧིཏཏཱ. ཨིདཾ ཝུཏྟཾ ཧོཏི – ཡཐཱ སཧེཏུཀཱནཾ སམྤཡུཏྟེཧི ཧེཏཱུཧི སཧེཏུཀཏཱ, ན ཨེཝཾ སཱསཝཱཏི ཝུཏྟདྷམྨཱནཾ སམྤཡུཏྟེཧི ཨཱསཝེཧི སཱསཝཏཱ, ཨཐ ཁོ ཝིཔྤཡུཏྟེཧཱིཏི. དུཀནྟརེ ཨཝུཏྟཔདབྷཱཝོཡེཝེཏྠ དུཀཡོཛནཱཡ ཉཱཡཱགཏཏཱ. ཡདི ཨེཝཾ ཧེཏུགོཙྪཀེ ཀཐནྟི ཨཱཧ ‘‘ཧེཏུགོཙྪཀེ པནཱ’’ཏིཨཱདི. པཋམེ དུཀེ དུཏིཡསྶ པཀྑེཔེ ཨེཀོཏི ཙཏུཏྠདུཀམཱཧ. པཋམེ དུཀེ ཏཏིཡསྶ པཀྑེཔེ དྭེཏི ‘‘ཨཱསཝཱ ཙེཝ དྷམྨཱ ཨཱསཝཝིཔྤཡུཏྟཱ ཙ, ཨཱསཝཝིཔྤཡུཏྟཱ ཙེཝ དྷམྨཱ ནོ ཙ ཨཱསཝཱ’’ཏི ཨིམིནཱ སདྡྷིཾ པཉྩམདུཀམཱཧ. པཋམསྶ དུཏིཡེ དུཀེ པཀྑེཔེ ཨེཀོཏི ‘‘ནོ ཨཱསཝཱ དྷམྨཱ སཱསཝཱཔི ཨནཱསཝཱཔཱི’’ཏི ཨཡམེཀོ. ཏཏིཡེ པཋམསྶ པཀྑེཔེ དྭེཏི ‘‘ཨཱསཝཱ དྷམྨཱ ཨཱསཝསམྤཡུཏྟཱཔི ¶ ཨཱསཝཝིཔྤཡུཏྟཱཔི, ནོ ཨཱསཝཱདྷམྨཱ ཨཱསཝསམྤཡུཏྟཱཔི ཨཱསཝཝིཔྤཡུཏྟཱཔཱི’’ཏི ཨིམེ དྭེ. ཏཏིཡེ དུཏིཡསྶ པཀྑེཔེ ཨེཀོཏི ‘‘སཱསཝཱ དྷམྨཱ ཨཱསཝསམྤཡུཏྟཱཔི ཨཱསཝཝིཔྤཡུཏྟཱཔཱི’’ཏི ཨེཀོ. དུཏིཡེ ཏཏིཡསྶ པཀྑེཔེ ཨེཀོཏི ཚཊྛདུཀམཱཧ. ཏཱིཧཱིཏི ཙཏུཏྠཔཉྩམཚཊྛེཧི. ཨིཏརེཏི ཏདཝསིཊྛཱ པཉྩ. ཏེ པན པཋམེ ཏཏིཡདུཀདུཏིཡཔདཔཀྑེཔེ ཨེཀོ, དུཏིཡེ པཋམདུཀདུཏིཡཔདཔཀྑེཔེ ཨེཀོ, ཏཏིཡེ པཋམསྶ ཨེཀེཀཔདཔཀྑེཔེ དྭེ, ཏཏིཡེ དུཏིཡདུཀཔཋམཔདཔཀྑེཔེ ཨེཀོཏི ཨེཝཾ ཝེདིཏབྦཱ. ‘‘སཱསཝཱ དྷམྨཱ ཨཱསཝཱཔི ནོ ཨཱསཝཱཔི. ཨཱསཝསམྤཡུཏྟཱ དྷམྨཱ ཨཱསཝཱཔི ནོ ཨཱསཝཱཔི. ཨཱསཝཝིཔྤཡུཏྟཱ དྷམྨཱ ཨཱསཝཱཔི ནོ ཨཱསཝཱཔཱི’’ཏི ཨེཏེསམྤི, ‘‘ཨཱསཝསཧགཏཱ དྷམྨཱ ནོ ཨཱསཝསཧགཏཱ དྷམྨཱ’’ཏི ཨེཝམཱདཱིནཉྩ ཨགྒཧཎེ ཀཱརཎཾ གཧཎནཡོ ཙ པུབྦེ ཝུཏྟནཡེནེཝ ཝེདིཏབྦཾ.

ཨེས ¶ ནཡོཏི ཡོ ཨེས པཋམདུཀེ དུཏིཡདུཀཔཀྑེཔཱདིཀོ ཨུཔཱཡོ ཨིདྷ ཨཱསཝགོཙྪཀེ ཝུཏྟོ, ཨེས ནཡོ སཾཡོཛནགོཙྪཀཱདཱིསུ དུཀནྟརནིདྡྷཱརཎེཏི ཨཏྠོ. ཏཏྠ པཱལི༹ཡཾ ཨནཱགཏདུཀཱ སཾཡོཛནགོཙྪཀེ ཏཱཝ ‘‘སཾཡོཛནཱ ཙེཝ དྷམྨཱ སཾཡོཛནཝིཔྤཡུཏྟཱ ཙ, སཾཡོཛནཝིཔྤཡུཏྟཱ ཙེཝ དྷམྨཱ ནོ ཙ སཾཡོཛནཱ, སཾཡོཛནཱ དྷམྨཱ སཾཡོཛནསམྤཡུཏྟཱཔི སཾཡོཛནཝིཔྤཡུཏྟཱཔི, ནོ སཾཡོཛནཱ དྷམྨཱ སཾཡོཛནསམྤཡུཏྟཱཔི སཾཡོཛནཝིཔྤཡུཏྟཱཔི, ནོ སཾཡོཛནཱ དྷམྨཱ སཾཡོཛནིཡཱཔི ཨསཾཡོཛནིཡཱཔི, སཾཡོཛནིཡཱ དྷམྨཱ སཾཡོཛནསམྤཡུཏྟཱཔི སཾཡོཛནཝིཔྤཡུཏྟཱཔཱི’’ཏི པཉྩ. ཨེཝཾ གནྠཨོགྷཡོགཨུཔཱདཱནགོཙྪཀེསུ པཙྩེཀཾ པཉྩ. ནཱིཝརཎགོཙྪཀེ པན ནཱིཝརཎཱནཾ ནཱིཝརཎཝིཔྤཡུཏྟབྷཱཝཱབྷཱཝཏོ ‘‘ནོ ནཱིཝརཎཱ དྷམྨཱ ནཱིཝརཎིཡཱཔི ཨནཱིཝརཎིཡཱཔི, ནོ ནཱིཝརཎཱ དྷམྨཱ ནཱིཝརཎསམྤཡུཏྟཱཔི ནཱིཝརཎཝིཔྤཡུཏྟཱཔི, ནཱིཝརཎིཡཱ དྷམྨཱ ནཱིཝརཎསམྤཡུཏྟཱཔི ནཱིཝརཎཝིཔྤཡུཏྟཱཔཱི’’ཏི ཏཡོ. ཏཐཱ པརཱམཱསགོཙྪཀེ ‘‘ནོ པརཱམཱསཱ དྷམྨཱ པརཱམཊྛཱཔི ཨཔརཱམཊྛཱཔི, ནོ པརཱམཱསཱ དྷམྨཱ པརཱམཱསསམྤཡུཏྟཱཔི པརཱམཱསཝིཔྤཡུཏྟཱཔི, པརཱམཊྛཱ དྷམྨཱ པརཱམཱསསམྤཡུཏྟཱཔི པརཱམཱསཝིཔྤཡུཏྟཱཔཱི’’ཏི. ཀིལེསགོཙྪཀེ ‘‘ནོ ཀིལེསཱ དྷམྨཱ སཾཀིལེསིཀཱཔི ཨསཾཀིལེསིཀཱཔི, ནོ ཀིལེསཱ དྷམྨཱ སཾཀིལིཊྛཱཔི ཨསཾཀིལིཊྛཱཔི, ནོ ཀིལེསཱ དྷམྨཱ ཀིལེསསམྤཡུཏྟཱཔི ཀིལེསཝིཔྤཡུཏྟཱཔི, སཾཀིལེསིཀཱ དྷམྨཱ ¶ སཾཀིལིཊྛཱཔི ཨསཾཀིལིཊྛཱཔི, སཾཀིལེསིཀཱ དྷམྨཱ ཀིལེསསམྤཡུཏྟཱཔི ཀིལེསཝིཔྤཡུཏྟཱཔི, ཨསཾཀིལིཊྛཱ དྷམྨཱ སཾཀིལེསིཀཱཔི ཨསཾཀིལེསིཀཱཔཱི’’ཏི ཚ དུཀཱཏི ཨེཝཾ ཝེདིཏབྦཱ. སེསཾ ཝུཏྟནཡམེཝ.

༢༠-༢༥. པཙྩཡབྷཱཝེནཱཏི སཾཡོཛནཏྠཾ དསྶེཏི. ཡཐཱསཀཾ པཙྩཡབྷཱཝོ ཨེཝ ཧི ཀཱམརཱགཱདཱིནཾ ཝཊྚསཾཡོཛནནྟི. ཡདི ཨེཝཾ ཀཐཾ ཀཱམརཱགཱདཱིནཾཡེཝ སཾཡོཛནབྷཱཝོཏི ཨཱཧ ‘‘སཏིཔཱི’’ཏིཨཱདི. ཨཉྙེསནྟི སཾཡོཛནེཧི ཨཉྙེསཾ ཀིལེསཱབྷིསངྑཱརཱདཱིནཾ. ཏཔྤཙྩཡབྷཱཝེཏི ཏེསཾ ཀིལེསཀམྨཝིཔཱཀཝཊྚཱནཾ པཙྩཡབྷཱཝེ. ཨོརམྦྷཱགིཡུདྡྷཾབྷཱགིཡབྷཱཝེན སངྒཧིཏཱ པརིཙྪིནྣཱ ཨོར…པེ… སངྒཧིཏཱ, ཏེཧི ཀཱམརཱགཱདཱིཧི ཝིསེསཔཙྩཡབྷཱུཏེཧི. ཀཱམཀམྨབྷཝཱདཱིནཾ ཀཱམཱུཔཔཏྟིབྷཝཱདིནིཔྥཱདནེཔི ནིཡམོཏི ཀཏྭཱ ཨཱཧ ‘‘ཏཾཏཾ…པེ… ཧོཏཱི’’ཏི. ཏེན སཾཡོཛནཱནཾ བྷཱཝེ ཡཐཱཝུཏྟནིཡམཱནཾ ཀམྨཱུཔཔཏྟིབྷཝཱནཾ བྷཱཝཾ དསྶེཏྭཱ ཏདབྷཱཝེ ཨབྷཱཝཾ དསྶེནྟོ ‘‘ན ཙཱ’’ཏིཨཱདིམཱཧ. བནྡྷནཾ ཨསེརིབྷཱཝཀརཎཾ ཨནྡུབནྡྷནཱདཡོ ཝིཡ. གནྠཀརཎཾ ཨཝཙྪིནྣཏཱཀརཎཾ. ཙཀྐལཀཾ པཱདཔུཉྪནརཛྫུམཎྜལཾ. ན ཙོདེཏབྦནྟི པཉྙཱཙཀྑུནཱ པཙུརཛནསྶ པསྶིཏུཾ ཨསཀྐུཎེཡྻཏྟཱ ཡཐཱཝུཏྟཝིསེསསྶ སདྡྷེཡྻཏཾ ཨཱཧ. ཏིཝིདྷོ ཧི ཨཏྠོ ཀོཙི ¶ པཙྩཀྑསིདྡྷོ ཡོ རཱུཔཱདིདྷམྨཱནཾ པཙྩཏྟཝེདནཱིཡོ ཨནིདྡིསིཏབྦཱཀཱརོ, སབྦདྷམྨཱནཾ སབྷཱཝལཀྑཎནྟི ཝུཏྟཾ ཧོཏི. ཀོཙི ཨནུམཱནསིདྡྷོ ཡོ གྷཊཱདཱིསུ པཊཱདཱིསུ ཙ པསིདྡྷེན པཙྩཡཱཡཏྟབྷཱཝེན གྷཊཔཊ-སདྡཱདཱིནཾ ཨནིཙྩཏཱདིཨཱཀཱརོ, ཀོཙི ཨོཀཔྤནསིདྡྷོ ཡོ པཙུརཛནསྶ ཨཙྩནྟམདིཊྛོ སདྡྷཱཝིསཡོ སགྒནིབྦཱནཱདི. ཏཏྠ ཡསྶ སཏྠུནོ ཝཙནཾ པཙྩཀྑསིདྡྷེ ཨནུམཱནསིདྡྷེ ཙ ཨཏྠེ ན ཝིསཾཝཱདེཏི ཨཝིཔརཱིཏཔྤཝཏྟིཡཱ, ཏསྶ ཝཙནེན སདྡྷེཡྻཏྠསིདྡྷཱིཏི ཏཐཱརཱུཔོ ཙ བྷགཝཱཏི ‘‘དྷམྨཱནཾ སབྷཱཝ…པེ… ན ཙོདེཏབྦ’’ནྟི ཝུཏྟཾ. ཨེས ནཡོ ཨིཏོ པརེསུཔི ཨེཝརཱུཔེསུ.

༢༦-༣༧. ཡཐཱ སརབྷེཧི ཨཏིཀྐམིཏབྦཱ པབྦཏརཱཛི སརབྷནིཡཱ, ཨེཝཾ ཨོགྷནིཡཱཏི སདྡསིདྡྷཱིཏི ཨཱཧ ‘‘ཏེནཱ’’ཏིཨཱདི.

༥༠-༥༤. ཝིཔརིཡེསགྒཱཧོ པརཱམསནནྟི ‘‘པརཏོ’’ཏི ཨེཏྠ ན དྷམྨསབྷཱཝཏོ ཨཉྙཐཱམཏྟཾ པརནྟི ཨདྷིཔྤེཏཾ, ཨཐ ཁོ ཏབྦིཔརིཡཱཡོཏི ཨཱཧ ‘‘པརཏོཏི ནིཙྩཱདིཏོ’’ཏི.

༥༥-༦༨. ཡདི ¶ སབྷཱཝཏོ ཨཝིཛྫམཱནཾ, ཀཐམཱརམྨཎབྷཱཝོཏི ཨཱཧ ‘‘ཝིཙིཏྟསཉྙཱཡ སཉྙིཏ’’ནྟི, པརིཀཔྤནཱམཏྟསིདྡྷནྟི ཨཏྠོ. དུཝིཉྙེཡྻནཱནཏྟཏཱཡ ནིརནྟརབྷཱཝཱུཔགམནཾ སཾསཊྛབྷཱཝོཏི ‘‘སུཝིཉྙེཡྻནཱནཏྟཏྟཱ ན སཾསཊྛཏཱ’’ཏི ཝུཏྟཾ. ཏེསཾ ཨརཱུཔཀྑནྡྷཱནཾ. ཨིཏརེཧི རཱུཔནིབྦཱནེཧི. ཀིཾ པན ཀཱརཎཾ སམཱནུཔྤཱདནིརོདྷཱནཾ ཨེཀཀལཱཔབྷཱུཏཱནཾ ཨརཱུཔདྷམྨཱནམེཝ ཨཉྙམཉྙཾ སཾསཊྛཏཱ ཝུཙྩཏི, ན པན ཏཐཱབྷཱུཏཱནམྤི རཱུཔདྷམྨཱནནྟི ཨཱཧ ‘‘ཨེས ཧི ཏེསཾ སབྷཱཝོ’’ཏི. ཏེན ཡདིཔི ཀེཙི ཨརཱུཔདྷམྨཱ ཝིསུཾ ཨཱརམྨཎཾ ཧོནྟི, དནྡྷཔྤཝཏྟིཀཏྟཱ པན རཱུཔདྷམྨཱནཾཡེཝ སུཝིཉྙེཡྻནཱནཏྟཾ, ན ཨརཱུཔདྷམྨཱནནྟི ཏེསཾ སཾསཊྛབྷཱཝོ ཏདབྷཱཝོ ཙ ཨིཏརེསཾ སབྷཱཝསིདྡྷོཏི དསྶེཏི. སམཱུཧགྷནཏཱཡ ཝཱ དུབྦིབྷཱགཏརཏྟཱ ནཏྠི ཨརཱུཔདྷམྨཱནཾ ཝིསུཾ ཨཱརམྨཎབྷཱཝོཏི དུཝིཉྙེཡྻནཱནཏྟཏྟཱ ཏེསཾཡེཝ སཾསཊྛཏཱ. ཨམུཉྩིཏྭཱ ཏདདྷཱིནཝུཏྟིཏཱཡ གཧེཏབྦཏོ བུདྡྷིཡཱ.

༨༣-༡༠༠. ཀཱམཏཎྷཱ ཀཱམོ ཨུཏྟརཔདལོཔེན ཡཐཱ རཱུཔབྷཝོ རཱུཔཾ. ཨེཝཾ སེསེསུཔི. ཨཱརམྨཎཀརཎཝསེནཱཏི ཨེཏེན ཀཱམརཱུཔཱརཱུཔཏཎྷཱནཾ ཝིསཡབྷཱཝོ ཡཐཱཀྐམཾ ཀཱམརཱུཔཱརཱུཔཱཝཙརཏཱཡ ཀཱརཎནྟི དསྶེཏི. ཨཝསྶཉྩེཏམེཝཾ སམྤཊིཙྪིཏབྦཾ, ཨཉྙཐཱ ཀཱམཱཝཙརཱདིབྷཱཝོ ¶ ཨཔརིཔུཎྞཝིསཡོ སིཡཱ. ཡདི ཧི ཨཱལམྦིཏབྦདྷམྨཝསེན བྷཱུམིཔརིཙྪེདོ, ཨེཝཾ སཏི ཨནཱརམྨཎཱནཾ སངྒཧོ ན སིཡཱ. ཨཐ ཝིཔཱཀདཱནཝསེན, ཨེཝམྤི ཨཝིཔཱཀཱནཾ སངྒཧོ ན སིཡཱ, ཏསྨཱ ཨཱརམྨཎཀརཎཝསེན པརིཡཱཔནྣཱནཾ བྷཱུམིཔརིཙྪེདོ ཀཱཏབྦོ. ཨེཝཉྷི སཏི ཀཱམཱཝཙརཱདིབྷཱཝོ པརིཔུཎྞཝིསཡོ སིཡཱ. ཏེནེཝཱཧ ‘‘ཨེཝཉྷི སཏཱི’’ཏིཨཱདི. ཨཔརིཡཱཔནྣཱནཾ པན ལོཀཏོ ཨུཏྟིཎྞབྷཱཝེན ཨནུཏྟརབྷཱུམིཏཱ. ཨཀཱམཱཝཙརཱདིཏཱ ནཱཔཛྫཏཱིཏི ཨབྱཱཔིཏདོསཾ པརིཧརཏི, ཀཱམཱཝཙརཱདིཏཱ ནཱཔཛྫཏཱིཏི ཨཏིབྱཱཔིཏདོསཾ. ནནུ ཙ ཨིམསྨིཾ པཀྑེ ཀཱམཏཎྷཱ ཀཏམཱ, ཀཱམཱཝཙརདྷམྨཱརམྨཎཱ ཏཎྷཱ, ཀཱམཱཝཙརདྷམྨཱ ཀཏམེ, ཀཱམཏཎྷཱཝིསཡཱཏི ཨིཏརཱིཏརནིསྶཡཏཱ དོསོཏི? ན, ཨཝཱིཙིཨཱདིཨེཀཱདསོཀཱསནིནྣཏཱཡ ཀིཉྩི ཏཎྷཾ ཀཱམཏཎྷཱབྷཱཝེན གཧེཏྭཱ ཏཾསབྷཱཝཱཡ ཝིསཡབྷཱཝེན ཀཱམཱཝཙརདྷམྨཱནཾ ཨུཔལཀྑེཏབྦཏྟཱ.

ཨིདཱནི ཡཐཱཝུཏྟམཏྠཾ པཱཋེན སམཏྠེནྟོ ‘‘ནིཀྑེཔཀཎྜེཔཱི’’ཏིཨཱདིམཱཧ. ཏཏྠ ཧི ཀཱམཏཎྷཱཡ ཨཱལམྦིཏབྦཏྟཱ ཀཱམདྷཱཏུཔརིཡཱཔནྣདྷམྨཱ ཙ ཀཱམབྷཝསངྑཱཏེ ¶ ཀཱམེ ཨོགཱལ༹ྷཱ ཧུཏྭཱ ཙརནྟི, ནཱཉྙཏྠཱཏི ཨེཏྠཱཝཙརཱཏི ཝུཏྟནྟི. ཝིསེསཏྠིནཱ ཝིསེསོ ཨནུཔཡུཛྫཏཱིཏི ཨིམམཏྠཾ དསྶེནྟོ ཨཱཧ ‘‘ལོཀསྶ ཝསེན པརིཡཱཔནྣནིཙྪཡཏོ’’ཏི. ཏེན ལོཀིཡདྷམྨེསུ པརིཡཱཔནྣ-སདྡསྶ ནིརུལ༹ྷཏཾ དསྶེཏི བྷགཝཏོ ཏདུཙྩཱརཎཱནནྟརཾ ཝིནེཡྻཱནཾ ཏདཏྠཔཊིཔཏྟིཏོ. པརིཙྪེདཀཱཔེཀྑཱ པརིཙྪིནྣཏཱཏི ‘‘པརིཙྪེདཀཱརིཀཱཡ ཏཎྷཱཡཱ’’ཏི ཝུཏྟཾ. སཱ ཧི དྷམྨཱནཾ ཀཱམཱཝཙརཱདིབྷཱཝཾ པརིཙྪིནྡཏི. པརི-སདྡོ ཙེཏྠ ‘‘ཨུཔཱདིནྣཱ’’ཏིཨཱདཱིསུ ཨུཔ-སདྡོ ཝིཡ སསཱདྷནཾ ཀིརིཡཾ དཱིཔེཏཱིཏི ཨཡམཏྠོ ཝུཏྟོཏི དཊྛབྦཾ.

ནིཡྻཱནཀརཎསཱིལཱ ནིཡྻཱནིཀཱ ཡཐཱ ‘‘ཨཔཱུཔབྷཀྑནསཱིལོ ཨཱཔཱུཔིཀོ’’ཏི, ནིཡྻཱནསཱིལཱ ཨེཝ ཝཱ. རཱགདོསམོཧཱཝ གཧིཏཱཏི ཉཱཡཏི, ཨིཏརཐཱ པཧཱནེཀཊྛཏཱཝཙནཾ ནིཔྤཡོཛནཾ སིཡཱ. ‘‘རཎོཧཏཱ ན ཛོཏནྟི, ཙནྡསཱུརིཡཱ སཏཱརཀཱ’’ཏིཨཱདཱིསུ རཎ-སདྡསྶ རེཎུཔརིཡཱཡཏཱ དཊྛབྦཱ. སམྤཧཱརཔརིཡཱཡཏྟཱ ཡུདྡྷ-སདྡསྶ སམྤཧཱརོ ཙ པཧརིཏབྦཱདྷཱརོཏི ཨཀུསལསེནཱཝ ‘‘སརཎཱ’’ཏི ཝུཏྟཱ. དུཀྑཱདཱིནནྟི ཕལབྷཱུཏཱནཾ དུཀྑཝིགྷཱཏཨུཔཱཡཱསཔརིལཱ༹ཧཱནཾ སབྷཱགབྷཱུཏཱཡ ཙ མིཙྪཱཔཊིཔདཱཡ. ཏནྣིབྦཏྟཀསབྷཱཝཱནཾ ཨཀུསལཱནནྟི ཨེཏེན སབྦེསམྤི ཨཀུསལཱནཾ སརཎཏཾ དསྶེཏི.

ཨབྷིདྷམྨདུཀམཱཏིཀཱཔདཝཎྞནཱ ནིཊྛིཏཱ.

སུཏྟནྟིཀདུཀམཱཏིཀཱཔདཝཎྞནཱ

༡༠༡-༡༠༨. ཝིཛྫཱསབྷཱགཏཱཡ ¶ , ན སངྐཔྤཱདཡོ ཝིཡ ཝིཛྫཱཡ ཨུཔཀཱརཀབྷཱཝཏོ. ‘‘ཨབྷེཛྫཾ…པེ… རུཧཏཱི’’ཏི ཨུབྷཡམྤི ཨནཝསེསཔྤཧཱནམེཝ སནྡྷཱཡ ཝུཏྟཾ. ཀིཉྩཱཔི ཧི ཧེཊྛིམམགྒེཧིཔི པཧཱིཡམཱནཱ ཀིལེསཱ ཏེན ཏེན ཨོདྷིནཱ ཨནཝསེསམེཝ པཧཱིཡནྟི, ཡེ པན ཨཝསིཊྛཱ བྷིནྡིཏབྦཱ, ཏེ ལོབྷཱདིཀིལེསབྷཱཝསཱམཉྙཏོ པུན ཝིརུལ༹ྷཱ ཝིཡ ཧོནྟི. ཨརཧཏྟམགྒེ པན ཨུཔྤནྣེ ན ཨེཝཾ ཨཝསིཊྛཱབྷཱཝཏོ. ཏདུཔཙཱརེན ནིསྶཡཝོཧཱརེན. ཀུསལེཧི ཏཱཔེཏབྦཱཏི ཝཱ ཏཔནིཡཱ, ཏདངྒཱདིཝསེན བཱདྷིཏབྦཱ པཧཱཏབྦཱཏི ཨཏྠོ. སམཱནཏྠཱནི ཨདྷིཝཙནཱདཱིནཾ སངྑཱདིབྷཱཝཏོ. ‘‘སབྦེཝ དྷམྨཱ ཨདྷིཝཙནཔཐཱ’’ཏིཨཱདིནཱ ཨདྷིཝཙནཱདཱིནཾ ཝིསཡབྷཱཝེ ན ཀོཙི དྷམྨོ ཝཛྫིཏོ, ཝཙནབྷཱཝོ ཨེཝ ཙ ¶ ཨདྷིཝཙནཱདཱིནཾ ཝཀྑམཱནེན ནཡེན ཡུཛྫཏཱིཏི ཨདྷིཔྤཱཡེནཱཧ ‘‘སབྦཉྩ ཝཙནཾ ཨདྷིཝཙནཱདིབྷཱཝཾ བྷཛཏཱི’’ཏི.

༡༠༩-༡༡༨. ཨཉྙཾ ཨནཔེཀྑིཏྭཱ སཡམེཝ ཨཏྟནོ ནཱམཀརཎསབྷཱཝོ ནཱམཀརཎཊྛོཏི, ཏེན ཨརཱུཔདྷམྨཱནཾ ཝིཡ ཨོཔཔཱཏིཀནཱམཏཱཡ པཐཝཱིཨཱདཱིནམྤི ནཱམབྷཱཝོ སིཡཱཏི ཨཱསངྐཱཡ ནིཝཏྟནཏྠཾ ‘‘ནཱམནྟརཱནཱཔཛྫནཏོ’’ཏི ཨཱཧ. ན ཧི ཝིནཱ པཐཝཱིཨཱདིནཱམེནཔི རཱུཔདྷམྨཱ ཝིཡ ཀེསཱདིནཱམེཧི ཝིནཱ ཝེདནཱདིནཱམེཧི ཨཉྙེན ནཱམེན ཨརཱུཔདྷམྨཱ པིཎྜཱཀཱརཏོ ཝོཧརཱིཡནྟཱིཏི. ཡཾ པན པརསྶ ནཱམཾ ཀརོཏི, ཏསྶ ཨཉྙཱཔེཀྑཾ ནཱམཀརཎནྟི ནཱམཀརཎསབྷཱཝཏཱ ནཏྠཱིཏི སཱམཉྙནཱམཱདིཀརཎཱནཾ ནཱམབྷཱཝོ ནཱཔཛྫཏི. ཡསྶ ཙཉྙེཧི ནཱམཾ ཀརཱིཡཏི, ཏསྶ ནཱམཀརཎསབྷཱཝཏཱཡ ཨབྷཱཝོཡེཝཱཏི ནཏྠི ནཱམབྷཱཝོ. ཡེ པན ཨནཱཔནྣནཱམནྟརཱ སབྷཱཝསིདྡྷནཱམཱ ཙ, ཏེ ཝེདནཱདཡོཝ ནཱམཾ ནཱམཱཏི དསྶེནྟོ ‘‘ཨཏྟནཱཝཱ’’ཏིཨཱདིམཱཧ. ཕསྶཱདཱིནཾ ཨཱརམྨཎཱབྷིམུཁཏཱ ཏཾ ཨགྒཧེཏྭཱ ཨཔྤཝཏྟིཡེཝཱཏི དསྶེཏུཾ ‘‘ཨཝིནཱབྷཱཝཏོ’’ཏི ཝུཏྟཾ. ཨདྷིཝཙནསམྥསྶོ མནོསམྥསྶོ, སོ ནཱམམནྟརེན གཧེཏུཾ ཨསཀྐུཎེཡྻཏཱཡ པཱཀཊོཏི ནིདསྶནབྷཱཝེན ཝུཏྟོ. རུཔྤནསབྷཱཝེནཱཏི ནིདསྶནམཏྟཾ དཊྛབྦཾ. པཀཱསཀཔཀཱསིཏབྦབྷཱཝེནཔི ཧི ཝིནཱཔི ནཱམེན རཱུཔདྷམྨཱ པཱཀཊཱ ཧོནྟཱིཏི. ཨཐ ཝཱ པཀཱསཀཔཀཱསིཏབྦབྷཱཝོ ཝིསཡིཝིསཡབྷཱཝོ ཙཀྑུརཱུཔཱདཱིནཾ སབྷཱཝོ, སོ རུཔྤནསབྷཱཝེ སཱམཉྙེ ཨནྟོགདྷོཏི དཊྛབྦཾ.

༡༡༩-༡༢༣. ཨིཏོ པུབྦེ པརིཀམྨནྟིཨཱདིནཱ སམཱཔཏྟིཝུཊྛཱནཀུསལཏཱ ཝིཡ སམཱཔཏྟིཀུསལཏཱཔི ¶ ཛྷཱནལཱབྷཱིནཾཡེཝ ཧོཏཱིཏི ཝུཏྟཾ ཝིཡ དིསྶཏི. ‘‘ཨིཏརེསམྤི ཨནུསྶཝཝསེན སམཱཔཏྟཱིནཾ ཨཔྤནཱཔརིཙྪེདཔཉྙཱ ལབྦྷཏཱི’’ཏི ཝདནྟི. ‘‘ཨེཝཾ སཱིལཝིསོདྷནཱདིནཱ སམཱཔཏྟིཾ ཨཔྤེཏཱིཏི ཛཱནནཀཔཉྙཱ སཧ པརིཀམྨེན ཨཔྤནཱཔརིཙྪེདཛཱནནཀཔཉྙཱ’’ཏི ཀེཙི. ཝུཊྛཱནེ ཀུསལབྷཱཝོ ཝུཊྛཱནཝསིཏཱ. པུབྦེཏི སམཱཔཛྫནཏོ པུབྦེ.

༡༢༤-༡༣༤. སོབྷནེ རཏོ སུརཏོ, ཏསྶ བྷཱཝོ སོརཙྩནྟི ཨཱཧ ‘‘སོབྷནཀམྨརཏཏཱ’’ཏི. སུཊྛུ ཝཱ ཨོརཏོ ཝིརཏོ སོརཏོ ¶ , ཏསྶ བྷཱཝོ སོརཙྩནྟི. ཨཡཾ པནཏྠོ ཨཊྛཀཐཱཡཾ ཝུཏྟོ ཨེཝ. ཨཔྤཊིསངྑཱནཾ མོཧོ. ཀུསལབྷཱཝནཱ བོདྷིཔཀྑིཡདྷམྨཱནཾ ཝཌྜྷནཱ. སཉྙཱཎཾ ཨུཔལཀྑཎཾ. སཝིགྒཧཾ སབིམྦཀཾ. ཨུཔལཀྑེཏབྦཱཀཱརཾ དྷམྨཛཱཏཾ, ཨཱརམྨཎཾ ཝཱ. ཨཝིཀྑེཔོཏི ཙིཏྟཝིཀྑེཔཔཊིཔཀྑོ. ཨུཛུཝིཔཙྩནཱིཀཏཱཡ ཧི པཧཱནཝུཊྛཱནེན ཙ ཨཝིཀྑེཔོ ཝིཀྑེཔཾ པཊིཀྑིཔཏི, པཝཏྟིཏུཾ ན དེཏཱིཏི.

༡༣༥-༡༤༢. ཀཱརཎསཱིལཾ ལོཀིཡཾ. ཕལསཱིལཾ ལོཀུཏྟརཾ ཏེན སིཛ྄ཛྷཏཱིཏི ཀཏྭཱ, ལོཀིཡསྶཔི ཝཱ སཱིལསྶ ཀཱརཎཕལབྷཱཝོ པུབྦཱཔརབྷཱཝེན དཊྛབྦོ. སམྤནྣསམུདཱཡསྶ པརིཔུཎྞསམཱུཧསྶ. ཨཀུསལཱ སཱིལཱ ཨཀུསལཱ སམཱཙཱརཱ. སཱིལསམྤདཱ སཱིལསམྤཏྟི སཱིལགུཎཱཏི ཨཏྠོ. སཧོཏྟཔྤཾ ཉཱཎནྟི ཨོཏྟཔྤསྶ ཉཱཎཔྤདྷཱནཏཾ ཨཱཧ, ན པན ཉཱཎསྶ ཨོཏྟཔྤསཧིཏཏཱམཏྟཾ. ན ཧི ཨོཏྟཔྤརཧིཏཾ ཉཱཎཾ ཨཏྠཱིཏི. ཨདྷིམུཏྟཏཱ ཨབྷིརཏིཝསེན ནིརཱསངྐཱཔཝཏྟི. ནིསྶཊཏཱ ཝིསཾཡུཏྟཏཱ. ཨེཏྠ ཙ ཨདྷིམུཏྟཏཱནིསྶཊཏཱཝཙནེཧི ཏདུབྷཡཔརིཡཱཡཱ དྭེ ཝིམུཏྟིཡོ ཨེཀསེསནཡེན ཨིདྷ ‘‘ཝིམུཏྟཱི’’ཏི ཝུཏྟཱཏི དསྶེཏི. ཏཐཱ ཧི ཝུཏྟཾ ‘‘ཙིཏྟསྶ ཙ ཨདྷིམུཏྟི ནིབྦཱནཉྩཱ’’ཏི. ཨུཔྤཛྫཏི ཨེཏེནཱཏི ཨུཔྤཱདོ, ན ཨུཔྤཱདོཏི ཨནུཔྤཱདོ, ཏབྦྷཱུཏེ ཨནུཔྤཱདཔརིཡོསཱནེ ཝིམོཀྑནྟེ ཨནུཔྤཱདསྶ ཨརིཡམགྒསྶ ཀིལེསཱནཾ ཝཱ ཨནུཔྤཛྫནསྶ པརིཡོསཱནེཏི ཋཱནཕལེཧི ཨརིཡཕལམེཝ ཨུཔལཀྑཱིཡཏཱིཏི དཊྛབྦཾ.

མཱཏིཀཱཔདཝཎྞནཱ ནིཊྛིཏཱ.

ཀཱམཱཝཙརཀུསལཔདབྷཱཛནཱིཡཝཎྞནཱ

༡. ཨཔྤེཏུནྟི ¶ ནིགམེཏུཾ. ‘‘པདབྷཱཛནཱིཡཾ ན ཝུཏྟ’’ནྟི པདབྷཱཛནཱིཡཱཝཙནེན ཨཔྤནཱཝརོདྷཾ སཱདྷེཏྭཱ པདབྷཱཛནཱིཡཱཝཙནསྶ ཀཱརཎཾ ཝདནྟོ ‘‘སརཱུཔེནཱ’’ཏིཨཱདིམཱཧ. ཏཏྠ ‘‘ཕསྶོ ཧོཏཱི’’ཏིཨཱདཱིསུ ཧོཏི-སདྡོ ཨཏྠི-སདྡེན ཨནཱནཏྠོཏི ཨདྷིཔྤཱཡེན ཝུཏྟཾ ‘‘དུཏིཡེན ཧོཏི-སདྡེནཱ’’ཏི. པུབྦེ ཨཊྛཀཐཱདྷིཔྤཱཡེན ཝཏྭཱ ཡཐཱཝུཏྟསྶ པཱལི༹པྤདེསསྶ ཨཔྤནཱཝརོདྷོ སམཏྠིཏོཏི ཨཏྟནོ ཨདྷིཔྤཱཡཾ དསྶེནྟོ ‘‘སངྑེཔེནཱ’’ཏིཨཱདིམཱཧ.

ཉཱཏུཾ ¶ ཨིཙྪིཏོཏི ལཀྑཎསྶ པུཙྪཱཝིསཡཏཾ དསྶེཏུཾ ཝུཏྟཾ. ཡེན ཀེནཙཱིཏི དསྶནཱདིཝིསེསཡུཏྟེན, ཨིཏརེན ཝཱ. ཨཝཏྠཱཝིསེསོ ཧི ཉཱཎསྶ དསྶནཏུལནཏཱིརཎཱནི. ‘‘ཨདིཊྛཏ’’ནྟིཨཱདཱིསུ ཨཱཧཱཏི ཡོཛེཏབྦཾ, སབྦཏྠ ཙ ལཀྑཎསྶཱཏི. ཏཉྷེཏྠ ཨདྷིཀཏནྟི. ཨདིཊྛཾ ཛོཏཱིཡཏི ཨེཏཱཡཱཏི ཨེཏེན དིཊྛཾ སཾསནྡཏི ཨེཏཱཡཱཏི དིཊྛསཾསནྡནཱ. ཝིམཏིཾ ཚིནྡཏི ཨེཏཱཡཱཏི ཝིམཏིཙྪེདནཱཏི ཨེཏཱསམྤི སདྡཏྠོ ནཡཏོ དསྶིཏོ, ཨཏྠཏོ པན སབྦཱཔི ཏཐཱཔཝཏྟཾ ཝཙནཾ, ཏདུཔྤཱདཀོ ཝཱ ཙིཏྟུཔྤཱདོཏི ཝེདིཏབྦཾ.

ཨཉྙམཉྙཏོ པབྷིཛྫཏཱིཏི པབྷེདོ, ཝིསེསོ, ཏེན པབྷེདེན. དྷམྨཱནཾ དེསནནྟི ཀིཉྩཱཔི སམཡབྷཱུམིཛཱཏིཨཱརམྨཎསབྷཱཝཱདིཝསེན ཨནཝསེསཔྤབྷེདཔརིགྒཧཏོ ནིདྡེསདེསནཱཝ ཝཏྟུཾ ཡུཏྟཱ, ཏཐཱཔི ཀུསལཱདིམཱཏིཀཱཔདསངྒཧིཏཝིསེསོཡེཝ ཨིདྷ པབྷེདོཏི ཨདྷིཔྤེཏོཏི ཝུཏྟཾ ‘‘པབྷེད…པེ… དེསནཾ ཨཱཧཱ’’ཏི. ཏེནེཝཱཧ ཨཊྛཀཐཱཡཾ ‘‘ཀུསལ…པེ… དཱིཔེཏྭཱཏི ཕསྶོ ཧོཏི…པེ… ཨཝིཀྑེཔོ ཧོཏཱི’’ཏི (དྷ. ས. ཨཊྛ. དྷམྨུདྡེསཝཱར ཕསྶཔཉྩམཀརཱསིཝཎྞནཱ). ‘‘ཕསྶོ ཕུསནཱ’’ཏིཨཱདིནཱ ཙ པབྷེདཝནྟོཝ སཱཏིསཡཾ ནིདྡིཊྛཱ, ན པན མཱཏིཀཱཡཾ ཝུཏྟཔྤབྷེདོཏི པབྷེདཝནྟདསྶནཾ ནིདྡེསོ. ཨིདཾ ཝུཏྟཾ ཧོཏཱིཏིཨཱདིནཱ ‘‘པབྷེདེ…པེ… དསྶནཏྠ’’ནྟི ཨིམསྶ ཝཱཀྱསྶ པིཎྜཏྠམཱཧ. ཡདི དྷམྨཱ ཨེཝ པུཙྪིཏབྦཱ ཝིསྶཛྫེཏབྦཱ ཙ, ཀསྨཱ ཀུསལཱཏི པབྷེདཝཙནནྟི ཨཱཧ ‘‘ཏེ པནཱ’’ཏིཨཱདི. ན ཧི པབྷེདེཧི ཝིནཱ པབྷེདཝནྟོ ཨཏྠཱིཏི. ‘‘ཨིམེ དྷམྨཱ ཀུསལཱ’’ཏི ཨེཏེན ‘‘ཕསྶོ ཧོཏཱི’’ཏི, ‘‘ཕསྶོ ཕུསནཱ’’ཏི ཙ ཨཱདིནཱ ཨུདྡིཊྛནིདྡིཊྛཱནཾ དྷམྨཱནཾ ཀུསལབྷཱཝོ ཝིསྶཛྫིཏོ ཧོཏཱིཏི ཨིམིནཱ ཨདྷིཔྤཱཡེན ‘‘ཨིམེ དྷམྨཱ ཀུསལཱཏི ཝིསྶཛྫནེཔཱི’’ཏི ཨཱཧ. ཨིམསྨིཉྷཱིཏི ཧི-སདྡོ ཀཱརཎཏྠོ. ཏེན ཡསྨཱ དྷམྨཱཝ དེསེཏབྦཱ, ཏེ ཙ ཀུསལཱ…པེ… བྷེདཱ དེསེཏབྦཱ ¶ , ཏསྨཱཏི ཨེཝཾ ཝཱ ཡོཛནཱ. དྷམྨཱནམེཝཱཏི ཨཝདྷཱརཎཕལཾ དསྶེཏི ‘‘ཨཝོཧཱརདེསནཱཏོ’’ཏི. ཨཏྠཱནཉྩཱཏི ཙ-སདྡེན ‘‘ཕསྶོ ཕུསནཱ’’ཏི ཨེཝམཱདིསབྷཱཝནིརུཏྟིཾ ཡཐཱཝུཏྟདྷམྨཱདིཉཱཎཉྩ སངྒཎྷཱཏི. ‘‘ཨིཏི ཨེཝཾ ཨཡཾ པཝཏྟེཏབྦོ ནིཝཏྟེཏབྦོ ཙཱ’’ཏི ཏཐཱ ཏཐཱ ཝིདྷེཏབྦབྷཱཝོ ཨིཏིཀཏྟབྦཏཱ, ཏཱཡ ཡུཏྟོ ཨིཏི…པེ… ཡུཏྟོ ¶ , ཏསྶ ཝིདྷེཏབྦསྶཱཏི ཨཏྠོ, ཝིསེསནཏྟཱ པབྷེདསྶཱཏི ཨདྷིཔྤཱཡོ.

ཨིཏིཀཏྟབྦཏཱཡུཏྟསྶ ཝིསེསིཏབྦཏྟཱ ཨུདྡེསོ དྷམྨཔྤདྷཱནོ, ཏསྨཱ ཏཏྠ དྷམྨསྶ ཝིསེསིཏབྦཏྟཱ ‘‘ཀུསལཱ དྷམྨཱ’’ཏི ཨཡཾ པདཱནུཀྐམོ ཀཏོ. པུཙྪཱ སཾསཡིཏཔྤདྷཱནཱ ཨནིཙྪིཏནིཙྪཡནཱཡ པཝཏྟེཏབྦཏྟཱ. ཏེན སབྦདྷམྨེསུ སམུགྒྷཱཊིཏཝིཙིཀིཙྪཱནུསཡཱནམྤི པུཙྪཱ དེསེཏབྦཔུགྒལགཏསཾསཡཱཔཏྟིཾ ཨཏྟནི ཨཱརོཔེཏྭཱ སཾསཡཱཔནྣེཧི ཝིཡ པཝཏྟཱིཡཏཱིཏི དསྶེཏི. ཀཱམཱཝཙརཱདིབྷེདོ ཝིཡ ཀུསལཱདིབྷཱཝེན ཀུསལཱདིབྷེདོ དྷམྨབྷཱཝེན ནིཡཏོཏི དྷམྨཱཏི ཝུཏྟེ ནིཙྪཡཱབྷཱཝཏོ ‘‘ཀུསལཱ ནུ ཁོ ཨཀུསལཱ ནུ ཁོ’’ཏིཨཱདིནཱ སཾསཡོ ཧོཏཱིཏི ཨཱཧ ‘‘ཀུསལཱདིབྷེདོ པན སཾསཡིཏོ’’ཏི. དྷམྨབྷཱཝོ པན ཀུསལཱདཱིསུ ཨེཀནྟིཀཏྟཱ ནིཙྪིཏོཡེཝཱཏི ཝུཏྟཾ ‘‘ན ཙ དྷམྨབྷཱཝོ སཾསཡིཏོ’’ཏི. ཏེན སཾསཡིཏོ ནིཙྪེཏབྦབྷཱཝེན པདྷཱནོ ཨེཏྠ ཀུསལབྷཱཝོ, ན ཏཐཱ དྷམྨབྷཱཝོཏི དྷམྨཱ ཀུསལཱཏི ཝུཏྟནྟི དསྶེཏི.

ཙིཏྟུཔྤཱདསམཡེཏི ཙིཏྟསྶ ཨུཔྤཛྫནསམཡེ. ‘‘ཨཐ ཝིཛྫམཱནེ’’ཏི ཨེཏྠ ཨཐ-སདྡསྶ ཨཏྠམཱཧ ‘‘པཙྪཱ’’ཏི. བྷོཛནགམནཱདཱིཧི སམཡེཀདེསནཱནཏྟཾ དསྶེཏྭཱ ཨཝསེསནཱནཏྟཾ དསྶེཏུཾ ‘‘སམཝཱཡཱདཱི’’ཏི ཝུཏྟཾ. ཝིསེསིཏཱཏི ཨེཏེན ‘‘ནིཡམིཏཱ’’ཏི པདསྶ ཨཏྠཾ ཝིཝརཏི, ཏསྨཱ ཡཐཱཝུཏྟཙིཏྟཝིསེསིཏབྦཏོ སམཡཏོཏི ཨཏྠོ. ཡཐཱདྷིཔྤེཏཱནནྟི ཀཱམཱཝཙརཱདིཝིསེསཡུཏྟཱནཾ. ‘‘ཏསྨིཾ སམཡེ’’ཏི ཙིཏྟུཔྤཏྟིཡཱ ཝིསེསིཏབྦོཔི སམཡོ ཡེན ཙིཏྟེན ཨུཔྤཛྫམཱནེན ཝིསེསཱིཡཏི, ཏསྶེཝ ཙིཏྟསྶ ‘‘ཡསྨིཾ སམཡེ’’ཏི ཨེཏྠ སཡཾ ཝིསེསནབྷཱཝཾ ཨཱཔཛྫཏི. ཏཐཱ ‘‘ཏསྨིཾ སམཡེ’’ཏི ཨེཏྠ ཝིསེསནབྷཱུཏཾ ཙིཏྟཾ ཨཏྟནཱ ཝིསེསིཏབྦསམཡསྶ ཨུཔཀཱརཏྠཾ ‘‘ཡསྨིཾ སམཡེ…པེ… ཙིཏྟ’’ནྟི ཝིསེསིཏབྦབྷཱཝཾ ཨཱཔཛྫཏི. ཨུཔཀཱརོཏི ཙ ཨཉྙམཉྙཾ ཨཝཙྪེདཀཱཝཙྪིནྡིཏབྦབྷཱཝོཏི དཊྛབྦཾ. པུརིམདྷམྨཱནཾ བྷངྒསམཀཱལཾ, བྷངྒཱནནྟརམེཝ ཝཱ པཙྪིམདྷམྨཱནཾ ཨུཔྤཏྟི པུརིམཔཙྪིམཱནཾ ནིརནྟརཏཱ ཀེནཙི ཨནནྟརིཏཏཱ. ཡཱཡ བྷཱཝཔཀྑསྶ བལཝབྷཱཝེན པཊིཙྪཱདིཏོ ཝིཡ ཧུཏྭཱ ཨབྷཱཝཔཀྑོ ན པཉྙཱཡཏཱིཏི ཏདེཝེཏནྟི གཧཎཝསེན པཙུརཛནོ ཝིཔརིཡེསིཏོ, སོཡམཏྠོ ¶ ཨལཱཏཙཀྐེན སུཔཱཀཊོ ཧོཏི. ཏེནེཝཱཧ ‘‘ཨེཀཱིབྷཱུཏཱནམིཝཱ’’ཏི ¶ . ཨེཀསམཱུཧཝསེན ཨེཀཱིབྷཱུཏཱནམིཝ པཝཏྟི སམཱུཧགྷནཏཱ, དུབྦིཉྙེཡྻཀིཙྩབྷེདཝསེན ཨེཀཱིབྷཱུཏཱནམིཝ པཝཏྟི ཀིཙྩགྷནཏཱཏི ཡོཛནཱ. ཨེཏྠ ཙ པཙྩཡཔཙྩཡུཔྤནྣབྷཱཝེན པཝཏྟམཱནཱནཾ ཨནེཀེསཾ དྷམྨཱནཾ ཀཱལསབྷཱཝབྱཱཔཱརཱརམྨཎེཧི དུབྦིཉྙེཡྻབྷེདཏཱཡ ཨེཀཱིབྷཱུཏཱནམིཝ གཧེཏབྦཏཱ ཡཐཱཀྐམཾ སནྟཏིགྷནཏཱདཡོཏི དཊྛབྦཾ.

སཧཀཱརཱིཀཱརཎསནྣིཛ྄ཛྷཾ སམེཏཱིཏི སམཡོ, སམཝེཏཱིཏི ཨཏྠོཏི སམཡ-སདྡསྶ སམཝཱཡཏྠཏཾ དསྶེནྟོ ‘‘པཙྩཡསཱམགྒི’’ནྟི ཨཱཧ. སམེཏི སམཱགཙྪཏི ཨེཏྠ མགྒབྲཧྨཙརིཡཾ ཏདཱདྷཱརཔུགྒལེཧཱིཏི སམཡོ, ཁཎོ. སམེནྟི ཨེཏྠ, ཨེཏེན ཝཱ, སམཱགཙྪནྟི དྷམྨཱ སཧཛཱཏདྷམྨེཧི ཨུཔྤཱདཱདཱིཧི ཝཱཏི སམཡོ, ཀཱལོ. དྷམྨཔྤཝཏྟིམཏྟཏཱཡ ཨཏྠཏོ ཨབྷཱུཏོཔི ཧི ཀཱལོ དྷམྨཔྤཝཏྟིཡཱ ཨདྷིཀརཎཾ ཀརཎཾ ཝིཡ ཙ པརིཀཔྤནཱམཏྟསིདྡྷེན རཱུཔེན ཝོཧརཱིཡཏཱིཏི. སམཾ, སཧ ཝཱ ཨཝཡཝཱནཾ ཨཡནཾ པཝཏྟི ཨཝཊྛཱནནྟི སམཡོ, སམཱུཧོ ཡཐཱ ‘‘སམུདཱཡོ’’ཏི. ཨཝཡཝསཧཱཝཊྛཱནམེཝ ཧི སམཱུཧོ. པཙྩཡནྟརསམཱགམེ ཨེཏི ཕལཾ ཨེཏསྨཱ ཨུཔྤཛྫཏི པཝཏྟཏི ཙཱཏི སམཡོ, ཧེཏུ ཡཐཱ ‘‘སམུདཡོ’’ཏི. སམེཏི སམྦནྡྷོ ཨེཏི སཝིསཡེ པཝཏྟཏི, སམྦནྡྷཱ ཝཱ ཨཡནྟི ཨེཏེནཱཏི སམཡོ, དིཊྛི. དིཊྛིསཾཡོཛནེན ཧི སཏྟཱ ཨཏིཝིཡ བཛ྄ཛྷནྟཱིཏི. སམཡནཾ སངྒཏི སམོདྷཱནནྟི སམཡོ, པཊིལཱབྷོ. སམསྶ ནིརོདྷསྶ ཡཱནཾ, སམྨཱ ཝཱ ཡཱནཾ ཨཔགམོ ཨཔྤཝཏྟཱིཏི སམཡོ, པཧཱནཾ. ཨབྷིམུཁབྷཱཝེན སམྨཱ ཨེཏབྦོ ཨབྷིསམེཏབྦོ ཨདྷིགནྟབྦོཏི ཨཝིཔརཱིཏོ སབྷཱཝོ ཨབྷིསམཡོ. ཨབྷིམུཁབྷཱཝེན སམྨཱ ཝཱ ཨེཏི གཙྪཏི བུཛ྄ཛྷཏཱིཏི ཨབྷིསམཡོ, ཨཝིརཱདྷེཏྭཱ དྷམྨཱནཾ ཨཝིཔརཱིཏསབྷཱཝཱཝབོདྷོ. ཨེཏྠ ཙ ཨུཔསགྒཱནཾ ཛོཏཀམཏྟཏྟཱ ཏསྶ ཏསྶ ཨཏྠསྶ ཝཱཙཀོ སམཡ-སདྡོ ཨེཝཱཏི སཨུཔསགྒོཔི ཝུཏྟོ. ཏཱནེཝཱཏི པཱིལ༹ནཱདཱིནེཝ. ཝིཔྥཱརིཀཏཱ སེརིབྷཱཝེན ཀིརིཡཱསུ ཨུསྶཱཧནཔརིནིཔྥནྣོ.

ཀེསུཙཱིཏི ཨཀུསལཝིཔཱཀཱདཱིསུ. ཁཎསྶ ཨསམྦྷཝོ ཏེན ཝིནཱབྷཱཝོཏི ཨཱཧ ‘‘ནནཱུ’’ཏིཨཱདི. དྷམྨེནེཝཱཏི ཝིསེསནྟརརཧིཏེན. ཏཾཡེཝ ཧི ཨཝདྷཱརཎེན ནིཝཏྟིཏཾ ཝིསེསཾ དསྶེཏི ‘‘ན ཏསྶ པཝཏྟིཏྠཱ’’ཏིཨཱདིནཱ. ཡཐཱ ཝཱ ཏཐཱ ཝཱཏི ཀཱལེན ལོཀོ པཝཏྟཏི ནིཝཏྟཏཱིཏི ཝཱ ཀཱལོ ནཱམ བྷཱཝོ ཝཏྟནལཀྑཎོ བྷཱཝཱནཾ པཝཏྟིཨོཀཱསདཱཡཀོཏི ¶ ཝཱ ཡེན ཏེན པཀཱརེན. ཨིདྷ ཨུཏྟམཧེཏུནོ སམྦྷཝོ ཨེཝ ནཏྠཱིཏི ཧེཏུཧེཏུསཱདྷཱརཎཧེཏཱུཡེཝ པཊིསེདྷེཏི. ཏཔྤཙྩཡཏཾ ཨནེཀཔཙྩཡཏཾ.

པཀཏིསྶརཝཱདགྒཧཎཾ ¶ ནིདསྶནམཏྟཾ དཊྛབྦཾ. པཛཱཔཏིཔུརིསཀཱལཝཱདཱདཡོཔི ‘‘ཨེཀཀཱརཎཝཱདོ’’ཏི. ཝཱ-སདྡེན ཝཱ ཏེསམྤི སངྒཧོ དཊྛབྦོ. ཨཝཡཝ…པེ… དཱཡོ ཝུཏྟོ ཨཝཡཝདྷམྨེན སམུདཱཡསྶ ཨཔདིསིཏབྦཏྟཱ, ཡཐཱ ‘‘སམཾ ཙུཎྞཾ, ཨལངྐཏོ དེཝདཏྟོ’’ཏི ཙ. ཨནིཔྥཱདནཾ ནིཔྥཱདནཱབྷཱཝོ ཨཧེཏུབྷཱཝོ. ནིཔྥཱདེཏུཾ ཨསམཏྠསྶ པན པཙྩཡནྟརཱནཾ སཧསྶེཔི སམཱགཏེ ནཏྠེཝ སམཏྠཏཱཏི ཨཱཧ ‘‘ནིཔྥཱདནསམཏྠསྶཱ’’ཏི. ཨེཏྠ ཙ སཧཀཱརཱིཀཱརཎཱཡཏྟཱ ཕལུཔྤཱདནཱ པཙྩཡདྷམྨཱནཾ ཨཉྙམཉྙཱཔེཀྑཱཏི ཝུཏྟཱཏི ཨཔེཀྑཱ ཝིཡཱཏི ཨཔེཀྑཱ དཊྛབྦཱ.

ནིབྱཱཔཱརེསུ ཨབྱཱཝཊེསུ. ཨེཀེཀསྨིནྟི ཨཊྛཀཐཱཡཾ ཨཱམེཌིཏཝཙནསྶ ལུཏྟནིདྡིཊྛཏཾ དསྶེཏི. སཏི ཙ ཨཱམེཌིཏེ སིདྡྷོ བཧུབྷཱཝོཏི. ཨནྡྷསཏཾ པསྶཏཱིཏི ཙ པཙྩཏྟཝཙནཾ ནིདྡྷཱརཎེ བྷུམྨཝསེན པརིཎཱམེཏྭཱ ‘‘ཨནྡྷསཏེ’’ཏི ཨཱཧ. ཏཐཱ ཨེཀེཀསྨིནྟི ཨིམིནཱ ཝིསུཾ ཨསམཏྠཏཱ ཛོཏིཏཱཏི ཨནྡྷསཏཾ པསྶཏཱིཏི སམུདིཏཾ པསྶཏཱིཏི ཨཏྠཏོ ཨཡམཏྠོ ཨཱཔནྣོཏི ཨཱཧ ‘‘ཨནྡྷསཏཾ སཧིཏཾ པསྶཏཱིཏི ཨདྷིཔྤཱཡོ’’ཏི. ཨཉྙཐཱཏི ཡཐཱརུཏཝསེན ཨཏྠེ གཡ྄ཧམཱནེ. ཡསྨཱ ཨསཱ…པེ… སིདྡྷོ སིཝིཀུབྦཧནཱདཱིསུ, ཏསྨཱ ནཱཡམཏྠོ སཱདྷེཏབྦོ. ཨིདཱནི ཏསྶཏྠསྶ སུཔཱཀཊབྷཱཝེན ཨསཱདྷེཏབྦཏཾ དསྶེནྟོ ‘‘ཝིསུ’’ནྟིཨཱདིམཱཧ.

ཨེཏེནུཔཱཡེནཱཏི ཡོཡཾ ཁཎསངྑཱཏོ སམཡོ ཀུསལུཔྤཏྟིཡཱ དུལླབྷབྷཱཝཾ དཱིཔེཏི. ཨཏྟནོ དུལླབྷཏཱཡཱཏི ཨེཏྠ ཁཎཏྠོ ཝཱ སམཡ-སདྡོ ཁཎསངྑཱཏོ སམཡོཏི ཨཏྠོ ཝུཏྟོ. ཨེཏེན ཨུཔཱཡབྷཱུཏེན ནཡབྷཱུཏེན. ཡོཛནཱ ཀཱཏབྦཱཏི ཨེཏྠཱཡཾ ཡོཛནཱ – སམཝཱཡ…པེ… ཝུཏྟིཾ དཱིཔེཏི སཡཾ པཙྩཡསཱམགྒིབྷཱཝཏོ, སམཝཱཡཏྠོ ཝཱ སམཡ-སདྡོ སམཝཱཡསངྑཱཏོ སམཡོ. སོ ཡཱཡ པཙྩཡསཱམགྒིཡཱ སཏཱིཏི ཨིམསྶ ཨཏྠསྶ པཀཱསནཝསེན དྷམྨཱནཾ ཨནེཀཧེཏུཏོ ཝུཏྟིཾ དཱིཔེཏི. ཀཱལ…པེ… པརིཏྟཏཾ དཱིཔེཏི ཨཏྟནོ ཨཏིཔརིཏྟཏཱཡ. སམཱུཧ…པེ… སཧུཔྤཏྟིཾ དཱིཔེཏི སཡཾ དྷམྨཱནཾ སམུདཱཡབྷཱཝཏོ. ཧེཏུ…པེ… ཝུཏྟིཏཾ དཱིཔེཏི སཏི ཨེཝ ཨཏྟནི ཨཏྟནོ ཕལཱནཾ ¶ སམྦྷཝཏོཏི. ཨཏྠཔཀྑེ ཙ སདྡཔཀྑེ ཙ ཡསྨིཾ ཨཏིཔརིཏྟེ ཀཱལེ ཡསྨིཾ དྷམྨསམུདཱཡེ ཡམྷི ཧེཏུམྷི སཏཱིཏི ཨེཏསྶ ཨཏྠསྶ ཉཱཔནཝསེན ཏདཱདྷཱརཱཡ ཏདདྷཱིནཱཡ ཙ ཀུསལདྷམྨཔྤཝཏྟིཡཱ དུཔྤཊིཝིཛ྄ཛྷཏཾ ཨནེཀེསཾ སཧུཔྤཏྟིཾ པརཱདྷཱིནཔྤཏྟིཉྩ དཱིཔེཏཱིཏི.

དལ༹ྷདྷམྨཱ དྷནུགྒཧཱཏི དལ༹ྷདྷནུནོ ཨིསྶཱསཱ. དལ༹ྷདྷནུ ནཱམ དྭིསཧསྶཐཱམཾ ཝུཙྩཏི. དྭིསཧསྶཐཱམནྟི ཙ ཡསྶ ཨཱརོཔིཏསྶ ཛིཡཱབདྡྷོ ལོཧསཱིསཱདཱིནཾ བྷཱརོ དཎྜེ གཧེཏྭཱ ཡཱཝ ཀཎྜཔྤམཱཎཱ ¶ ཨུཀྑིཏྟསྶ པཐཝིཏོ མུཙྩཏི. སིཀྑིཏཱཏི དསདྭཱདསཝསྶཱནི ཨཱཙརིཡཀུལེ ཨུགྒཧིཏསིཔྤཱ. ཀཏཧཏྠཱཏི དྷནུསྨིཾ ཙིཎྞཝསཱིབྷཱཝཱ. ཀོཙི སིཔྤམེཝ ཨུགྒཎྷཱཏི, ཀཏཧཏྠོ ན ཧོཏི, ཨིམེ པན ན ཏཐཱཏི དསྶེཏི. ཀཏུཔཱསནཱཏི རཱཛཀུལཱདཱིསུ དསྶིཏསིཔྤཱ. ཙཏུདྡིསཱ ཋིཏཱ ཨསྶཱུཏི ཨེཀསྨིཾཡེཝ པདེསེ ཐམྦྷཾ ཝཱ རུཀྑཾ ཝཱ ཡཾ ཀིཉྩི ཨེཀཾཡེཝ ནིསྶཱཡ ཙཏུདྡིསཱབྷིམུཁཱ ཋིཏཱ སིཡུནྟི ཨཏྠོ. ཨེཝཾ ཝུཏྟཛཝནཔུརིསསྶཱཏི ན ཨེཝརཱུཔོ པུརིསོ ཀོཙི བྷཱུཏཔུབྦོ ཨཉྙཏྲ བོདྷིསཏྟེན. སོ ཧི ཛཝནཧཾསཀཱལེ ཨེཝརཱུཔམཀཱསི. སུཏྟེ པན ཨབྷཱུཏཔརིཀཔྤནཝསེན ཨུཔམཱམཏྟཾ ཨཱཧཊཾ. ཏཔྤརབྷཱཝཱཏི ཏཔྤརབྷཱཝཏོ ཧེཏུསངྑཱཏསྶ སམཡསྶ པརཱཡཏྟཝུཏྟིདཱིཔནེ ཨེཀནྟབྱཱཝཊསབྷཱཝཏོཏི ཨཏྠོ. ཡེ པན ‘‘ཏཔྤརབྷཱཝོ’’ཏི པཋནྟི, ཏེསཾ པཙྩཡཱཡཏྟཝུཏྟིདཱིཔནཏོ ཏཔྤརབྷཱཝོ ཧེཏུསངྑཱཏསྶ སམཡསྶ, ཏསྨཱ ཏསྶ པརཱཡཏྟཝུཏྟིདཱིཔནཏཱ ཝུཏྟཱཏི ཡོཛནཱ. སམུདཱཡཱཡཏྟཏཱདཱིཔནེ ཏཔྤརོ, ཏདེཀདེསཱཡཏྟཏཱདཱིཔནེ ཏཔྤརོ ན ཧོཏཱིཏི ཨཱཧ ‘‘ཨཏཔྤརབྷཱཝཏོ’’ཏི.

ནནུ ཙ ཏཾ ཏཾ ཨུཔཱདཱཡ པཉྙཏྟོ ཀཱལོ ཝོཧཱརམཏྟཀོ, སོ ཀཐཾ ཨཱདྷཱརོ ཏཏྠ ཝུཏྟདྷམྨཱནནྟི ཨཱཧ ‘‘ཀཱལོཔི ཧཱི’’ཏིཨཱདི. ཡདི ཀིརིཡཱཡ ཀིརིཡནྟརལཀྑཎཾ བྷཱཝེནབྷཱཝལཀྑཎཾ, ཀཱ པནེཏྠ ལཀྑཎཀིརིཡཱཏི ཨཱཧ ‘‘ཨིཧཱཔཱི’’ཏིཨཱདི. ལཀྑཎབྷཱུཏབྷཱཝཡུཏྟོཏི ཨིཏི-སདྡོ ཧེཏུཨཏྠོ. ཨིདཾ ཝུཏྟཾ ཧོཏི – ཡསྨཱ སཏྟཱསངྑཱཏཱཡ ལཀྑཎཀིརིཡཱཡ ཡུཏྟོ སམཡོ, ཏསྨཱ ཏཏྠ བྷཱུམིནིདྡེསོཏི.

ཨུདྡཱནཏོཏི ཡདི སངྑེཔཏོཏི ཨཏྠོ. ནནུ ཙ ཨཝསིཊྛཀིལེསཱདཡོ ཝིཡ ཀིལེསཀཱམོཔི ཨསྶཱདེཏབྦཏཱཡ ཝཏྠུཀཱམེ སམཝརུདྡྷོ ཉཱཎཾ ཝིཡ ཉེཡྻེཏི སངྑེཔཏོ ཨེཀོཡེཝ ཀཱམོ ¶ སིཡཱཏི ཨནུཡོགཾ སནྡྷཱཡཱཧ ‘‘ཀིལེསཀཱམོ’’ཏིཨཱདི. སཧིཏསྶཱཏི ཝིསཡཝིསཡིབྷཱཝེན ཨཝཊྛིཏསྶ. ‘‘ཨུདྡཱནཏོ དྭེ ཀཱམཱ’’ཏི ཀིཉྩཱཔི སབྦེ ཀཱམཱ ཨུདྡིཊྛཱ, ‘‘ཙཏུནྣཾ ཨཔཱཡཱན’’ནྟིཨཱདིནཱ པན ཝིསཡསྶ ཝིསེསིཏཏྟཱ ཨོརམྦྷཱགིཡཀིལེསབྷཱུཏོ ཀཱམརཱགོ ཨིདྷ ཀིལེསཀཱམོཏི གཧིཏོཏི ‘‘ཏེནཱ’’ཏིཨཱདིམཱཧ. ཙོདཀོ ཏསྶ ཨདྷིཔྤཱཡཾ ཨཛཱནནྟོ ‘‘ནནུ ཙཱ’’ཏིཨཱདིནཱ ཨནུཡུཉྫཏི. ཨིཏརོ པན ‘‘བཧལཀིལེསསྶཱ’’ཏིཨཱདིནཱ ཨཏྟནོ ཨདྷིཔྤཱཡཾ ཝིཝརཏི.

ཀཱམཱཝཙརདྷམྨེསུ ཝིམཱནཀཔྤརུཀྑཱདིཔྤཀཱརེསུ པརིཏྟཀུསལཱདཱིསུ ཝཱ. ནནུ ཙ ‘‘ཙཏུནྣཾ ཨཔཱཡཱན’’ནྟི ཝིསཡསྶ ཝིསེསིཏཏྟཱ རཱུཔཱརཱུཔདྷཱཏུགྒཧཎསྶ ཨསམྦྷཝོཡེཝཱཏི? ན, ‘‘ཨུདྡཱནཏོ ¶ དྭེ ཀཱམཱ’’ཏི ནིརཝསེསཏོ ཀཱམཱནཾ ཨུདྡིཊྛཏྟཱ. ཨུདྡིཊྛེཔི ཧི ཀཱམསམུདཱཡེ ཡཐཱ ཏདེཀདེསོཝ གཡ྄ཧཏི, ཏཾ དསྶེཏུཾ ‘‘དུཝིདྷོ’’ཏིཨཱདིམཱཧ. ཀཱམརཱགོ པཉྩཀཱམགུཎིཀོ རཱགོ. ཀཱམཏཎྷཱ ཀཱམཱཝཙརདྷམྨཝིསཡཱ ཏཎྷཱ. ནིརོདྷཏཎྷཱ ཨུཙྪེདདིཊྛིསཧགཏོ རཱགོ. ཨིདྷཱཏི ཨེཀཱདསཝིདྷེ པདེསེ. ཡདི ཨནཝསེསཔྤཝཏྟི ཨདྷིཔྤེཏཱ, ‘‘དུཝིདྷོཔེསོ’’ཏི ན ཝཏྟབྦཾ ཝཏྠུཀཱམེཀདེསསྶ ཨིདྷ ཨཔྤཝཏྟནཏོཏི ཨནུཡོགེན ཡེབྷུཡྻབྷཱཝཏོ ཨནཝསེསོ ཝིཡ ཨནཝསེསོཏི ཝཱ ཨཏྠོ གཧེཏབྦོཏི དསྶེནྟོ ‘‘ཝཏྠུཀཱམོཔཱི’’ཏིཨཱདིམཱཧ. ཨནཝསེསསདིསཏཱ ཙེཏྠ སབྷཱཝབྷིནྣསྶ ཀསྶཙི ཨནཝསེསཏོ. ཨེཝཉྩ ཀཏྭཱཏི ཀིལེསཀཱམཝཏྠུཀཱམཱནཾ ཨནཝསེསཔརིཔུཎྞབྷཱཝེན ཨབྷིལཀྑིཏཏྟཱཏི ཨཏྠོ. ཙཱསདྡསྶ རསྶཏྟཾ ཀཏནྟི ཀཱམཱཝཙརསདྡེ ཧེཏུཀཏྟུཨཏྠོ ཨནྟོནཱིཏོཏི དསྶེཏི.

ཝིསཡེཏི ཝཏྠུསྨིཾ ཨབྷིདྷེཡྻཏྠེཏི ཨཏྠོ. ནིམིཏྟཝིརཧེཏི ཨེཏེན རུལ༹ྷཱིསུ ཀིརིཡཱ ཝིབྷཱགཀརཎཱཡ, ན ཨཏྟཀིརིཡཱཡཱཏི དསྶེཏི. ཀུསལབྷཱཝནྟི ཛཱཏཀབཱཧིཏིཀསུཏྟཨབྷིདྷམྨཔརིཡཱཡེན ཀཐིཏཾ ཀུསལཏྟཾ. ཏསྶཱཏི སུཁཝིཔཱཀབྷཱཝསྶ. ཏསྶ པཙྩུཔཊྛཱནཏཾ ཝཏྟུཀཱམཏཱཡཱཏི ཨེཏེན ‘‘ཨནཝཛྫསུཁཝིཔཱཀལཀྑཎ’’ནྟི ཨེཏྠ སུཁསདྡོ ཨིཊྛཔརིཡཱཡོ ཝུཏྟོཏི དསྶེཏི. སཉྙཱཔཉྙཱཀིཙྩཾ སཉྙཱཎཀརཎཔཊིཝིཛ྄ཛྷནཱནི, ཏདུབྷཡཝིདྷུརཱ ཨཱརམྨཎཱུཔལདྡྷི ‘‘ཝིཛཱནཱཏཱི’’ཏི ཨིམིནཱ ཝུཙྩཏཱིཏི ཨཱཧ ‘‘སཉྙཱ…པེ… གཧཎ’’ནྟི. ནནུ ཙ ཕསྶཱདིཀིཙྩཏོཔི ཝིསིཊྛཀིཙྩཾ ཙིཏྟནྟི? སཙྩམེཏཾ, སོ པན ཝིསེསོ ན ཏཐཱ དུརཝབོདྷོ, ཡཐཱ ¶ སཉྙཱཔཉྙཱཝིཉྙཱཎཱནནྟི སཉྙཱཔཉྙཱཀིཙྩཝིསིཊྛལཀྑཎཏཱཡ ཝིཉྙཱཎལཀྑཎམཱཧ. ཨནནྟརདྷམྨཱནཾ པགུཎབལཝབྷཱཝསྶ ཀཱརཎབྷཱཝེན པཝཏྟམཱནོ སནྟཱནཾ ཙིནོཏི ནཱམ. ཏཐཱཔཝཏྟི ཙ ཨཱསེཝནཔཙྩཡབྷཱཝོཏི ཨཱཧ ‘‘ཨཱསེཝནཔཙྩཡབྷཱཝེན ཙིནོཏཱི’’ཏི.

ཙིཏྟཀཏམེཝཱཏི ཨབྷིསངྑཱརཝིཉྙཱཎཀཏམེཝ. ནཱནཏྟཱདཱིནཾ ཝཝཏྠཱནནྟི ཨེཏྠ ཝཝཏྠཱནཾ པཙྩེཀཾ ཡོཛེཏབྦཾ. ཝཝཏྠཱནཾ པརིཙྪེདོ ཨསངྐརབྷཱཝོ. ཏེན ཙ དྷམྨོ ནིཙྪིཏོ ནཱམ ཧོཏཱིཏི ཨཱཧ ‘‘ནིཙྪིཏཏཱ’’ཏི. ལིངྒནཱནཏྟཱདཱིནཱིཏི ཨེཏྠ ཨིཏྠིཔུརིསསཎྛཱནཝསེན ལིངྒནཱནཏྟཾ. དེཝམནུསྶཏིརཙྪཱནཱདིཝསེན ཨིཏྠིལིངྒསྶ པུཐུཏྟཾ, ཏཐཱ པུརིསལིངྒསྶ. དེཝཱདིབྷེདེ ཨིཏྠིལིངྒེ པཙྩེཀཾ ནཱནཏྟཀཱཡཏཱསངྑཱཏསྶ ཨཉྙམཉྙཝིསདིསསབྷཱཝསྶ དེསཱདིབྷེདབྷིནྣསྶ ཙ ཝིསེསསྶ ཝསེན པབྷེདོ ཝེདིཏབྦོ. ཏཐཱ པུརིསལིངྒེ. ལིངྒནིབྦཏྟཀསྶ ཝཱ ཀམྨསྶ ཡཐཱཝུཏྟནཱནཏྟཱདིཝསེན ལིངྒསྶ ནཱནཏྟཱདཱིནི ཡོཛེཏབྦཱནི. ལིངྒནཱནཏྟཱདཱིསུ པཝཏྟཏྟཱ སཉྙཱདཱིནཾ ¶ ནཱནཏྟཱདཱིནི. ཏེནེཝཱཧ ‘‘ཀམྨནཱནཏྟཱདཱིཧི ནིབྦཏྟཱནི ཧི ཏཱནཱི’’ཏི. ཨཔདཱདིནཱནཱཀརཎདསྶནེན ལིངྒནཱནཏྟཾ དསྶིཏཾ. ཏསྨིཉྩ དསྶིཏེ སཉྙཱནཱནཏྟཱདཡོ དསྶིཏཱ ཨེཝཱཏི ཨཱཝཏྟཏི བྷཝཙཀྐནྟི དསྶེནྟོ ཨཱཧ ‘‘ཨནཱག…པེ… གྷཊེནྟོ’’ཏི. ཨིཏྠིལིངྒཔུརིསལིངྒཱདི ཝིཉྙཱཎཱདྷིཊྛིཏསྶ རཱུཔཀྑནྡྷསྶ སནྣིཝེསཝིསེསོ. སཉྙཱསཱིསེན ཙཏྟཱརོ ཁནྡྷཱ ཝུཏྟཱ. ཝོཧཱརཝཙནེན ཙ པཉྩནྣཾ ཁནྡྷཱནཾ ཝོཧརིཏབྦབྷཱཝེན པཝཏྟི དཱིཔིཏཱ, ཡཱ སཱ ཏཎྷཱདིཊྛིཨབྷིནིཝེསཧེཏཱུཏི ཨིམམཏྠཾ དསྶེནྟོ ‘‘ལིངྒཱདི…པེ… ཡོསཱནཱནཱི’’ཏི ཨཱཧ.

‘‘ཡེ ཀེཙི, བྷིཀྑཝེ, དྷམྨཱ ཨཀུསལཱ ཨཀུསལབྷཱགིཡཱ, སབྦེཏེ མནོཔུབྦངྒམཱ’’ཏི (ཨ. ནི. ༡.༥༦-༥༧), ‘‘མནོཔུབྦངྒམཱ དྷམྨཱ’’ཏི (དྷ. པ. ༡, ༢) ཙ ཨེཝམཱདིཝཙནཏོ ཙིཏྟཧེཏུཀཾ ཀམྨནྟི ཨཱཧ ‘‘ཀམྨཉྷི ཙིཏྟཏོ ནིབྦཏྟ’’ནྟི. ཡཐཱསངྑྱནྟི ཀམྨཏོ ལིངྒཾ ལིངྒཏོ སཉྙཱཏི ཨཏྠོ. ན པུརིམཝིཀཔྤེ ཝིཡ ཀམྨཏོ ལིངྒསཉྙཱ ལིངྒཏོ ལིངྒསཉྙཱཏི ཨུབྷཡཏོ ཨུབྷཡཔྤཝཏྟིདསྶནཝསེན. ‘‘བྷེདཾ གཙྪནྟི ཨིཏྠཱཡཾ པུརིསོཏི ཝཱ’’ཏི བྷེདསྶ ཝིསེསིཏཏྟཱ ཨིཏྠཱདིབྷཱཝེན ཝོཧརིཏབྦབྷཱཝོ ཨིདྷ བྷེདོཏི ‘‘ཨིཏྠིཔུརིསཱདིཝོཧཱརཾ གཙྪནྟཱི’’ཏི ཝུཏྟཾ. ཨདྡྷདྭཡཝསེནཱཏི ཨཏཱིཏཔཙྩུཔྤནྣདྡྷདྭཡཝསེན. གུཎཱབྷིབྱཱཔནཾ ¶ ཀིཏྟཱིཏི ཨཱཧ ‘‘པཏྠཊཡསཏ’’ནྟི. ཀམྨནཱནཱཀརཎེན ཝིནཱ ཀམྨནིབྦཏྟནཱནཱཀཱརཎཱབྷཱཝཏོ ‘‘ཀམྨཛེཧི…པེ… ནཱནཱཀརཎ’’ནྟི ཝུཏྟཾ. ཨཝིཔཙྩནོཀཱསོ ཨཊྛཱནབྷཱུཏཱ, གཏིཀཱལོཔི ཝཱ. ཀཱམཱཝཙརཾ ཨབྷིསངྑཱརཝིཉྙཱཎཾ རཱུཔདྷཱཏུཡཱ ཙཀྑུཝིཉྙཱཎཱདིཾ ཛནེཏྭཱ ཨནོཀཱསཏཱཡ ཏདཱརམྨཎཾ ཨཛནེནྟཾ ཨེཏྠ ནིདསྶེཏབྦཾ. ཨེཀཙྩཙིཏྟཀརཎསྶ ཨདྷིཔྤེཏཏྟཱ ཙཀྑཱདིཝེཀལླེན ཙཀྑུཝིཉྙཱཎཱདཱིནཾ ཨཛནཀཾ ཀམྨཝིཉྙཱཎཾ ཨཝསེསཔཙྩཡཝིཀལེ ཨནོགདྷཾ དཊྛབྦཾ. ཏདཔི ཀཱལགཏིཔཡོགཱདཱིཏི ཨཱདི-སདྡེན སངྒཧིཏནྟི. ཨེཏྠ ཙ ‘‘སཧཀཱརཱིཀཱརཎཝིཀལཾ ཝིཔཱཀསྶ ཨཙྩནྟཾ ཨོཀཱསམེཝ ན ལབྷཏི, ཨིཏརཾ ཝིཔཱཀེཀདེསསྶ ལདྡྷོཀཱསནྟི, ཨིདམེཏེསཾ ནཱནཏྟ’’ནྟི ཝདནྟི, ཏཾ ཝིཔཱཀསྶ ཨོཀཱསལཱབྷེ སཏི སཧཱཡཀཱརཎཝིཀལཏཱཝ ནཏྠཱིཏི ཨདྷིཔྤཱཡེན ཝུཏྟཾ.

བྷཝཏུ ཏཱཝ བྷཝིཏྭཱ ཨཔགཏཾ བྷཱུཏཱཔགཏཾ, ཨནུབྷཝིཏྭཱ ཨཔགཏཾ པན ཀཐནྟི ཨཱཧ ‘‘ཨནུབྷཱུཏབྷཱུཏཱ’’ཏིཨཱདི. ཏེན ཨནུབྷཱུཏ-སདྡེན ཡོ ཨཏྠོ ཝུཙྩཏི, ཏསྶ བྷཱུཏ-སདྡོཡེཝ ཝཱཙཀོ, ན ཨནུ-སདྡོ, ཨནུ-སདྡོ པན ཛོཏཀོཏི དསྶེཏི. སཱཁཱབྷངྒསདིསཱ ཧི ནིཔཱཏོཔསགྒཱཏི. ཀིརིཡཱཝིསེསཀཏྟཉྩ ཨུཔསགྒཱནཾ ཨནེཀཏྠཏྟཱ དྷཱཏུསདྡཱནཾ ཏེཧི ཝཏྟབྦཝིསེསསྶ ཛོཏནབྷཱཝེནེཝ ཨཝཙྪིནྡནནྟི ཡཏྟཀཱ དྷཱཏུསདྡེན ཨབྷིདྷཱཏབྦཱ ཨཏྠཝིསེསཱ, ཏེསཾ ¶ ཡཾ སཱམཉྙཾ ཨཝིསེསོ, ཏསྶ ཝིསེསེ ཨཝཊྛཱཔནཾ ཏསྶ ཏསྶ ཝིསེསསྶ ཛོཏནམེཝཱཏི ཨཱཧ ‘‘སཱམཉྙ…པེ… ཝིསེསཱིཡཏཱི’’ཏི. ཨནུབྷཱུཏ-སདྡོ བཧུལཾ ཀམྨཏྠེ ཨེཝ དིསྶཏཱིཏི ཏསྶ ཨིདྷ ཀཏྟུཨཏྠཝཱཙིཏཾ དསྶེཏུཾ ‘‘ཨནུབྷཱུཏསདྡོ ཙཱ’’ཏིཨཱདིམཱཧ. སཏིཔི སབྦེསཾ ཙིཏྟུཔྤཱདཱནཾ སཝེདཡིཏབྷཱཝཏོ ཨཱརམྨཎཱནུབྷཝནེ, སཝིཔལླཱསེ པན སནྟཱནེ ཙིཏྟཱབྷིསངྑཱརཝསེན པཝཏྟིཏོ ཨབྱཱཀཏེཧི ཝིསིཊྛོ ཀུསལཱཀུསལཱནཾ སཱཏིསཡོ ཝིསཡཱནུབྷཝནཱཀཱརོཏི ཨཡམཏྠོ ཨིདྷཱདྷིཔྤེཏོཏི དསྶེནྟོ ‘‘ཝཏྟུཾ ཨདྷིཔྤཱཡཝསེནཱ’’ཏི ཨཱཧ. བྷཱུཏཱཔགཏབྷཱཝཱབྷིདྷཱནཱདྷིཔྤཱཡེནཱཏི ཀུསལཱཀུསལསྶ ཨཱཀཌྜྷནུཔཱཡམཱཧ.

ཨུཔྤཏིཏཀིཙྩནིཔྥཱདནཏོ ཨུཔྤཏིཏསདིསཏྟཱ ‘‘ཨུཔྤཏིཏ’’ནྟི ཝུཏྟཾ. ཨུཔྤཛྫིཏུཾ ཨཱརདྡྷོཏི ཨནཱགཏསྶཔི ཏསྶེཝ ཨུཔྤནྣ-སདྡེན ཝུཏྟཏཱཡ ཀཱརཎམཱཧ. ཨེཏྠ ཙ རཛྫནཱདིཝསེན ཨཱརམྨཎརསཱནུབྷཝནཾ སཱཏིསཡནྟི ཨཀུསལཉྩ ཀུསལཉྩ ཨུཔྤཛྫིཏྭཱ ནིརུདྡྷཏཱསཱམཉྙེན ‘‘སབྦསངྑཏཾ བྷཱུཏཱཔགཏ’’ནྟི ¶ ཝུཏྟཾ. སམྨོཧཝིནོདནིཡཾ པན ‘‘ཝིཔཱཀཱནུབྷཝནཝསེན ཏདཱརམྨཎཾ. ཨཝིཔཀྐཝིཔཱཀསྶ སབྦཐཱ ཨཝིགཏཏྟཱ བྷཝིཏྭཱ ཝིགཏཏཱམཏྟཝསེནཀམྨཉྩ བྷཱུཏཱཔགཏ’’ནྟི ཝུཏྟཾ. ཏེནེཝ ཏཏྠ ཨོཀཱསཀཏུཔྤནྣནྟི ཝིཔཱཀམེཝཱཧ. ཨིདྷ པན ཀམྨམྤཱིཏི. ཨཱརམྨཎཀརཎཝསེན བྷཝཏི ཨེཏྠ ཀིལེསཛཱཏནྟི བྷཱུམཱིཏི ཝུཏྟཱ ཨུཔཱདཱནཀྑནྡྷཱ. ཨགྒིཨཱཧིཏོ ཝིཡཱཏི བྷཱུམིལདྡྷནྟི ཝཏྟབྦཏཱཡ ཨུཔཱཡཾ དསྶེཏི. ཨེཏེནཱཏི ཀམྨཾ. ཨེཏསྶཱཏི ཝིཔཱཀོ ཝུཏྟོཏི དཊྛབྦཾ.

ཨཝིཀྑམྦྷིཏཏྟཱཏི ཨཝིནོདིཏཏྟཱ. སབྷཱུམིཡནྟི སཀབྷཱུམིཡཾ. ཝིཙྪིནྡིཏྭཱཏི པུན ཨུཔྤཛྫིཏུཾ ཨདཏྭཱ. ཁཎཏྟཡེཀདེསགཏཾ ཁཎཏྟཡགཏནྟི ཝུཏྟནྟི ཡཐཱཝུཏྟསྶ ཨུདཱཧརཎསྶ ཨུཔཙཱརབྷཱཝམཱཧ. ཏེན ཨུཔྤནྣཱ དྷམྨཱ པཙྩུཔྤནྣཱ དྷམྨཱཏི ཨིདམེཏྠ ཨུདཱཧརཎཾ ཡུཏྟནྟི དསྶེཏི. པདྷཱནེནཱཏི པདྷཱནབྷཱཝེན. དེསནཱཡ ཙིཏྟཾ པུབྦངྒམནྟི ལོཀིཡདྷམྨེ དེསེཏབྦེ ཙིཏྟཾ པུབྦངྒམཾ ཀཏྭཱ དེསནཱ བྷགཝཏཱ ཨུཙིཏཱཏི དསྶེཏི. དྷམྨསབྷཱཝཾ ཝཱ སནྡྷཱཡཱཏི ལོཀིཡདྷམྨཱནཾ ཨཡཾ སབྷཱཝོ ཡདིདཾ ཏེ ཙིཏྟཛེཊྛཀཱ ཙིཏྟཔུབྦངྒམཱ པཝཏྟནྟཱིཏི དསྶེཏི. ཏེན ཏེསཾ ཏཐཱདེསནཱཡ ཀཱརཎམཱཧ, སབྦེ ཨཀུསལཱ དྷམྨཱ ཙིཏྟཝཛྫཱཏི ཨཏྠོ. ཀེཙཱིཏི པདཀཱརཱ. ཕསྶཱདཡོཔཱིཏི པི-སདྡེན རཱགཱདཡོ སམྤིཎྜེཏི. ཀཱལབྷེདཱབྷཱཝེཔི པཙྩཡབྷཱཝེན ཨཔེཀྑིཏོ དྷམྨོ པུརིམནིཔྥནྣོ ཝིཡ ཝོཧརཱིཡཏཱིཏི ཨཱཧ ‘‘པཋམཾ ཨུཔྤནྣོ ཝིཡཱ’’ཏི. ཨནུཔཙརིཏམེཝསྶ པུབྦངྒམབྷཱཝཾ དསྶེཏུཾ ‘‘ཨནནྟརཔཙྩཡམན’’ནྟིཨཱདི ཝུཏྟཾ. ‘‘ཁཱིཎཱ བྷཝནེཏྟཱི’’ཏིཨཱདིཝཙནཏོ (དཱི. ནི. ༢.༡༥༥; ནེཏྟི. ༡༡༤) ནེཏྟིབྷཱུཏཱཡ ¶ ཏཎྷཱཡ ཡུཏྟཾ ཙིཏྟཾ ནཱཡཀནྟི ཨཱཧ ‘‘ཏཎྷཱསམྤཡུཏྟཾ ཝཱ’’ཏི.

‘‘ཡཾ ཏསྨིཾ སམཡེ ཙེཏསིཀཾ སཱཏ’’ནྟི ནིདྡིཊྛཏྟཱ སོམནསྶཝེདནཱ སཱཏསབྷཱཝཱཏི ཨཱཧ ‘‘སབྷཱཝཝསེན ཝུཏྟ’’ནྟི. ནིཔྤརིཡཱཡེན མདྷུར-སདྡོ རསཝིསེསཔརིཡཱཡོ, ཨིཊྛབྷཱཝསཱམཉྙེན ཨིདྷ ཨུཔཙཱརེན ཝུཏྟོཏིཨཱཧ ‘‘མདྷུརཾ ཝིཡཱ’’ཏི. པརམཏྠཏོ ཏཎྷཱཝིནིམུཏྟོ ནནྡིརཱགོ ནནྡིརཱགབྷཱཝོ ཝཱ ནཏྠཱིཏི ‘‘ན ཨེཏྠ སམྤཡོགཝསེན སཧགཏབྷཱཝོ ཨཏྠཱི’’ཏི, ‘‘ནནྡིརཱགསཧགཏཱ’’ཏི ཙ ཝུཙྩཏི. ཏེན ཝིཉྙཱཡཏི ‘‘སཧགཏསདྡོ ཏཎྷཱཡ ནནྡིརཱགབྷཱཝཾ ཛོཏེཏཱི’’ཏི. ཨཝཏྠཱཝིསེསཝཱཙཀོ ཝཱ ¶ སཧ-སདྡོ ‘‘སནིདསྶནཱ’’ཏིཨཱདཱིསུ ཝིཡ, སབྦཱསུཔི ཨཝཏྠཱསུ ནནྡིརཱགསབྷཱཝཱཝིཛཧནདཱིཔནཝསེན ནནྡིརཱགབྷཱཝཾ གཏཱ ནནྡིརཱགསཧགཏཱཏི ཏཎྷཱ ཝུཏྟཱ. གཏ-སདྡསྶ ཝཱ ‘‘དིཊྛིགཏ’’ནྟིཨཱདཱིསུ ཝིཡ ཨཏྠནྟརཱབྷཱཝཏོ ནནྡིརཱགསབྷཱཝཱ ཏཎྷཱ ‘‘ནནྡིརཱགསཧགཏཱ’’ཏི ཝུཏྟཱ, ནནྡིརཱགསབྷཱཝཱཏི ཨཏྠོ. ཨིདྷཱཔཱིཏི ཨིམིསྶཾ ཨཊྛཀཐཱཡཾ. ཨིམསྨིམྤི པདེཏི ‘‘སོམནསྶསཧགཏ’’ནྟི ཨེཏསྨིམྤི པདེ. ཨཡམེཝཏྠོཏི སཾསཊྛོ ཨེཝ. ཡཐཱདསྶིཏསཾསཊྛསདྡོཏི ཨཏྠུདྡྷཱརཔྤསངྒེན པཱལི༹ཏོ ཨཊྛཀཐཱཡ ཨཱགཏསཾསཊྛསདྡོ. སཧཛཱཏེཏི སཧཛཱཏཏྠེ.

ཀཱལཝིསེསཱནཔེཀྑོ ཀམྨསཱདྷནོ ཨཱབྷཊྛ-སདྡོ བྷཱསིཏཔརིཡཱཡོཏི དསྶེནྟོ ཨཱཧ ‘‘ཨབྷཱསིཏབྦཏཱ ཨནཱབྷཊྛཏཱ’’ཏི. པཱལི༹ཡནྟི ཨིམིསྶཱ པཋམཙིཏྟུཔྤཱདཔཱལི༹ཡཾ. ཨབྷཱསིཏཏྟཱ ཨེཝཱཏི ཨསངྑཱརིཀབྷཱཝསྶ ཨཝུཏྟཏྟཱ ཨེཝ. ཀཱརཎཔརིཡཱཡཏྟཱ ཝཏྠུསདྡསྶ པཙྩཡབྷཱཝསཱམཉྙཏོ དྭཱརབྷཱུཏདྷམྨཱནམྤི སིཡཱ ཝཏྠུཔརིཡཱཡོཏི ཨཱཧ ‘‘དྭཱརཾ ཝཏྠཱུཏི ཝུཏྟ’’ནྟི. ཏེན ཝཏྠུ ཝིཡ ཝཏྠཱུཏི དསྶེཏི. མནོདྭཱརབྷཱུཏཱ དྷམྨཱ ཡེབྷུཡྻེན ཧདཡཝཏྠུནཱ སཧ ཙརནྟཱིཏི དྭཱརེན…པེ… ཧདཡཝཏྠུ ཝུཏྟནྟི ཨཱཧ ཡཐཱ ‘‘ཀུནྟཱ པཙརནྟཱི’’ཏི. སཀིཙྩབྷཱཝེནཱཏི ཨཏྟནོ ཀིཙྩབྷཱཝེན, ཀིཙྩསཧིཏཏཱཡ ཝཱ. ཨཉྙཱསཱདྷཱརཎོཏི ས-སདྡསྶ ཨཏྠམཱཧ. སཀོ ཧི རསོ སརསོཏི.

ཨནནྟརཙིཏྟཧེཏུཀཏྟཱ ཙིཏྟསྶ ཨེཀསམུཊྛཱནཏཱ ཝུཏྟཱ, སཧཛཱཏཙིཏྟཕསྶཧེཏུཀཏྟཱ ཙེཏསིཀཱནཾ དྭིསམུཊྛཱནཏཱ. ‘‘ཙིཏྟསམུཊྛཱནཱ དྷམྨཱ, ཕུཊྛོ བྷིཀྑཝེ ཝེདེཏི, ཕུཊྛོ སཉྫཱནཱཏི, ཕུཊྛོ ཙེཏེཏཱི’’ཏི (སཾ. ནི. ༤.༩༣) ཧི ཝུཏྟཾ.

སུཁུམརཛཱདིརཱུཔནྟི ¶ ཨཎུཏཛྫཱརིརཱུཔམཱཧ. པརམཱཎུརཱུཔེ པན ཝཏྟབྦམེཝ ནཏྠི. ཝཏྠུཔརིཏྟཏཱཡཱཏི ཨེཏེན ཨནེཀཀལཱཔགཏཱནི བཧཱུནིཡེཝ རཱུཔཱཡཏནཱནི སམུདིཏཱནི སཾཧཙྩཀཱརིཏཱཡ སིཝིཀུབྦཧནཉཱཡེན ཙཀྑུཝིཉྙཱཎསྶ ཨཱརམྨཎཔཙྩཡོ, ན ཨེཀཾ ཀཏིཔཡཱནི ཝཱཏི དསྶེཏི. ནནུ ཙ ཨེཝཾ སནྟེ ཙཀྑུཝིཉྙཱཎཾ སམུདཱཡཱརམྨཎཾ ཨཱཔཛྫཏཱིཏི? ནཱཔཛྫཏི སམུདཱཡསྶེཝ ཨབྷཱཝཏོ. ན ཧི པརམཏྠཏོ སམུདཱཡོ ནཱམ ཀོཙི ཨཏྠི. ཝཎྞཱཡཏནམེཝ ཧི ཡཏྟཀཾ ཡོགྱདེསེ ཨཝཊྛིཏཾ, སཏི ¶ པཙྩཡནྟརསམཱཡོགེ ཏཏྟཀཾ ཡཐཱཝུཏྟེན ཉཱཡེན ཙཀྑུཝིཉྙཱཎསྶ ཨཱརམྨཎཔཙྩཡོ ཧོཏི ཨཝིཀཔྤཀཏྟཱ ཏསྶ. ཏདབྷིནིཧཊཾ པན མནོཝིཉྙཱཎཾ ཨནེཀཀྑཏྟུཾ ཨུཔྤཛྫམཱནཾ པུརིམསིདྡྷཀཔྤནཱཝསེན སམཱུཧཱཀཱརེན སཎྛཱནཱདིཨཱཀཱརེན ཙ པཝཏྟཏཱིཏི ཀིཾ ཙཀྑུཝིཉྙཱཎསྶ ཨེཀཾ ཝཎྞཱཡཏནཾ ཨཱརམྨཎཾ, ཨུདཱཧུ ཨནེཀཱནཱིཏི ན ཙོདེཏབྦམེཏཾ. ན ཧི པཙྩཀྑཝིསཡེ ཡུཏྟིམགྒནཱ ཡུཏྟཱ. ཀིཉྩ བྷིཡྻོ ཨཙྪརཱསངྒྷཱཏཀྑཎེན ཨནེཀཀོཊིསངྑཱཡ ཙིཏྟུཔྤཏྟིཡཱ པཝཏྟནཏོ ཙིཏྟསྶ ལཧུཔརིཝཏྟིཏཱཡ སམཱནེཔི གྷཊསརཱཝཱདིཝཎྞཱནཾ ཡོགྱདེསཱཝཊྛཱནེ པུརིམམནསིཀཱརཱནུརཱུཔཾ ‘‘གྷཊོ’’ཏི ཝཱ ‘‘སརཱཝོ’’ཏི ཝཱ པཋམཾ ཏཱཝ ཨེཀོ མནོཝིཉྙཱཎསནྟཱནེན པརིཙྪིཛྫཏི, པཙྪཱ ཨིཏརོ ཙཀྑུཝིཉྙཱཎཝཱིཐིཡཱ བྱཝཧིཏེནཱཏི ཨཝིསེསཝིདུཏཱཡ པན གྷཊསརཱཝཱདིབུདྡྷིཡཱ ཨབྷེདཱཔཏྟིཔརིཀཔྤནཱཏི. ཨཱིདིསཱིཔེཏྠ ཙོདནཱ ཨཙོདནཱཏི དཊྛབྦཱ. ཁཎཔརིཏྟཏཱཡཱཏི པབནྡྷཀྑཎསྶ ཨིཏྟརཏཱཡ. པབནྡྷཝསེན ཧི པཙྩེཀཾ རཱུཔཱརཱུཔདྷམྨཱ ཝིརོདྷིཨཝིརོདྷིཔཙྩཡསམཱཡོགེ ལཧུཾ དནྡྷཉྩ ནིརུཛ྄ཛྷནཏོ པརིཏྟཀཱལཱ དཱིགྷཀཱལཱ ཙ ཧོནྟི, སབྷཱཝལཀྑཎཝསེན པན ཨེཀཔརིཙྪེདཱ ཨེཝཱཏི. ཡཐཱ ཙ རཱུཔཱཡཏནཾ, ཨེཝཾ ཨིཏརཱནིཔི. སདྡཱདཡོཔི ཧི ཝཏྠུཔརིཏྟཏཱདིབྷཱཝེན ལབྦྷནྟཱིཏི. ཨཙྩཱསནྣཱདིཏཱཡཱཏི ཨཱདི-སདྡེན ཨནཱཝཛྫནཾ ཀེནཙི པཊིཙྪནྣཏཱཏི ཨེཝམཱདིཾ སངྒཎྷཱཏི. ཝིསཡིདྷམྨཾ ཝིསེསཏོ སིནོཏི བནྡྷཏཱིཏི ཝིསཡོཏི ཨནཉྙཏྠབྷཱཝཱཔེཀྑོ ཝིསཡོཏི ཨཱཧ ‘‘ཝིསཡོ ཨནཉྙཏྠབྷཱཝེནཱ’’ཏི. ན ཧི ཙཀྑུཝིཉྙཱཎཱདཡོ རཱུཔཱཡཏནཱདིཏོ ཨཉྙསྨིཾ ཨཱརམྨཎེ པཝཏྟནྟཱིཏི. གཱཝོ ཙརནྟི ཨེཏྠཱཏི གོཙརོ, གོཙརོ ཝིཡཱཏི གོཙརོཏི སམྦཧུལཙཱརིཏཱཔེཀྑོ གོཙརོཏི ཨཱཧ ‘‘གོཙརོ ཏཏྠ ཙརཎེནཱ’’ཏི. བཧུལཉྷི ཙཀྑུཝིཉྙཱཎཱདཱིཧི རཱུཔཱདཡོ གཡ྄ཧནྟི, ན ཏཐཱ མནོཝིཉྙཱཎེནཱཏི. ཏེསནྟི མནོཝིཉྙཱཎེན གཡ྄ཧམཱནཱནཾ རཱུཔཱཡཏནཱདཱིནཾ. ‘‘ཝཙནསྶ ཨནུཔཔཏྟིཏོ’’ཏི ཀསྨཱ ཝུཏྟཾ, ནནུ པཉྩདྭཱརེ པཝཏྟམནོཝིཉྙཱཎདྷཱཏུཾ སནྡྷཱཡ ཏེསཾ གོཙརཝིསཡཾ པཙྩནུབྷོཏཱིཏི ཝཙནཾ ཨུཔཔཛྫཏིཡེཝཱཏི? ན, ནིཡམཱབྷཱཝཏོ. ན ཧི པཉྩདྭཱརཱབྷིནིཧཊཾཡེཝ མནོ ཨིདྷ ‘‘མནོ’’ཏི ཝུཏྟནྟི ནིཡམཧེཏུ ཨཏྠཱིཏི, ཨེཏཾཡེཝ ཝཱ ཙོདནཾ མནསི ¶ ཀཏྭཱ དིབྦཙཀྑུཉཱཎཱདིགྒཧཎཾ ཀཏཾ. ཨེཝཾཝཎྞོཏིཨཱདིཝཙནཏོ པུབྦེནིཝཱསཨཏཱིཏཱནཱགཏཾསཉཱཎཱདཡོཔི ཨིདྷ སམྦྷཝནྟི. ཨིཏརཐཱཏི རཱུཔཾ སདྡནྟིཨཱདིནཱ.

བྷོཛན ¶ …པེ… ཨུསྶཱཧཱདཱིཧཱིཏི ཨིདཾ ཡཱཡ ཀམྨཉྙཏཱཡ རཱུཔཀཱཡསྶ ཀལླཏཱ ཧོཏི, ཏསྶཱ པཙྩཡནིདསྶནཾ. བྷོཛནེ ཧི སམྨཱཔརིཎཏེ སཔྤཱཡེ ཙ ཨུཏུབྷོཛནེ སམྨུཔཡུཏྟེ སམྨཱཔཡོགསངྑཱཏེ ཀཱཡིཀཙེཏསིཀཝཱིརིཡེ ཙ སམཱརདྡྷེ ལཧུཏཱདིསབྦྷཱཝེན ཀཱཡོ ཀམྨཀྑམོ ཧོཏི སབྦཀིརིཡཱནུཀཱུལོཏི. ཨཐ ཝཱ བྷོཛན…པེ… ཨུསྶཱཧཱདཱིཧཱིཏི ཨིདཾ ཀཱཡསྶ ཀལྱཏཱཡ ཝིཡ ཨུཔདྡུཏཏཱཡཔི ཀཱརཎཝཙནཾ. ཝིསམབྷོཛནཱཔརིཎཱམཱདིཏོ ཧི ཀཱཡསྶ ཨུཔདྡཝཀརཱ ཝཱཏཱདཡོ ཨུཔྤཛྫནྟཱིཏི. ཨནུཝཏྟནྟསྶཱཏི པདཾ ‘‘ཛཡཾ ཝེརཾ པསཝཏཱི’’ཏིཨཱདཱིསུ (དྷ. པ. ༢༠༡) ཝིཡ ཧེཏུཨཏྠཝསེན ཝེདིཏབྦཾ. ཛཱགརཎནིམིཏྟཉྷི ཨིདྷ ཨནུཝཏྟནཾ ཨདྷིཔྤེཏནྟི. ཨཐ ཝཱ ཨནུཝཏྟནྟསྶཱཏི ཨིདཾ པཀཏིཡཱ དིཊྛཱདིཝསེན ཨཱཔཱཐགམནུཔནིསྶཡཱནཾ ཀལྱཏཱདིནིབྦཏྟཱནཾ ཀཱཡིཀསུཁཱདཱིནཾ སམྦྷཝདསྶནཾ. ཀཱཡཀལྱཏཱདིཾ ཨནནུཝཏྟནྟསྶ ཧི ཡཐཱཝུཏྟཨུཔནིསྶཡཱབྷོགཱབྷཱཝེན ཝུཏྟཔྤཀཱརཾ ཨཱཔཱཐགམནཾ ན སིཡཱཏི. ཡཐཱནུབྷཱུཏེ རཱུཔཱདིཝིསཡེ ཙིཏྟསྶ ཋཔནཾ ཨཱཝཛྫནཾ ཙིཏྟཔཎིདཧནཾ. ཡཐཱནུབྷཱུཏེན རཱུཔཱདིནཱ སདིསཾ ཨསདིསཾ སམྦནྡྷཉྩ སདིསཱསདིསསམྦནྡྷཾ, ཏསྶ དསྶནཱདི སདིསཱསདིསསམྦནྡྷདསྶནཱདི, ཙིཏྟཔཎིདཧནཉྩ སདིསཱསདིས…པེ… དསྶནཱདི ཙ ཙིཏྟ…པེ… དསྶནཱདཡོ ཏེ པཙྩཡཱཏི ཡོཛེཏབྦཾ. དྷཱཏུཀྑོབྷཱདཱིཏི ཨཱདི-སདྡེན དེཝཏཱུཔསཾཧཱརཱདིཾ སངྒཎྷཱཏི. ཏཾསདིསཏཱ དིཊྛསུཏསདིསཏཱ. ཏཾསམྤཡུཏྟཏཱ དིཊྛསུཏཔཊིབདྡྷཏཱ. ཀེནཙི ཝུཏྟེཏི ཨིམིནཱ སདྡྷཱཡ ཨནུསྶཝནིབྦཏྟཏཾ ཨཱཧ. ཨཱཀཱརཝིཙཱརཎནྟི ཏེསཾ ཏེསཾ ཨཏྠཱནཾ ཨུཔཊྛཱནཱཀཱརཝིཙཱརཎཾ. ཀཏྠཙི ཨཏྠེ.

ནིཡམིཏསྶཱཏི ཀུསལམེཝ མཡཱ ཨུཔྤཱདེཏབྦནྟི ཨེཝཾ ནིཡམིཏསྶ. པསཱདསིནེཧཱབྷཱཝོ དོསབཧུལཏཱཡ ཧོཏཱིཏི ལཱུཁཔུགྒལཱ དོསབཧུལཱཏི ཨཱཧ.

ཨཱཡཏནབྷཱཝཏོཏི ཀཱརཎབྷཱཝཏོ.

ཝིཛྫམཱནཝཏྠུསྨིནྟི ཨེཏེན ‘‘ཝིནཱཔི དེཡྻདྷམྨཔརིཙྩཱགེན ཙིཏྟུཔྤཱདམཏྟེནེཝ དཱནམཡཾ ཀུསལཾ ཨུཔཙིཏཾ ཧོཏཱི’’ཏི ཀེསཉྩི ཨཏིདྷཱཝནཾ ནིཝཏྟིཏཾ ཧོཏཱིཏི.

དྷམྨསཝནསྶ ¶ ¶ གྷོསནཾ དྷམྨསཝནགྷོསནཾ. ཏསྶཱཏི ‘‘སདྡདཱནཾ དསྶཱམཱི’’ཏི སདྡཝཏྠཱུནཾ ཋཱནཀརཎབྷེརིཨཱདཱིནཾ སསདྡཔྤཝཏྟིཀརཎསྶ. ཙིནྟནཾ ཏཐཱ ཏཐཱ ཙིཏྟུཔྤཱདནཾ. ཨཉྙཏྠཱཏི སུཏྟེསུ. ཨཔརཏྠཱཏི ཨབྷིདྷམྨཔདེསུ. ཨཔརིཡཱཔནྣཱཏི པདསྶ ཨཏྠཝཎྞནཱ ‘‘པརིབྷོགརསོ’’ཏིཨཱདིཀཱཡ ཨཏྠཝཎྞནཱཡ པརཏོ བཧཱུསུ པོཏྠཀེསུ ལིཁཱིཡཏི, ཡཐཱཋཱནེཡེཝ པན ཨཱནེཏྭཱ ཝཏྟབྦཱ. ཏཏྠ པརམཏྠཏོ ཨཝིཛྫམཱནཏྟཱ ལཀྑཎཔཉྙཏྟིཡོ ཨཉྙཱཡཏནཏྟཱ ཚ ཨཛ྄ཛྷཏྟིཀཱཡཏནཱནི ཨསངྒཧིཏཱ དྷམྨཱཡཏནེནཱཏི ཡོཛེཏབྦཾ.

‘‘ཨེཀདྭཱརིཀཀམྨཾ ཨཉྙསྨིཾ དྭཱརེ ཨུཔྤཛྫཏཱི’’ཏི ཀསྨཱ ཝུཏྟཾ, ནནུ རཱུཔཱདཱིསུ ཨེཀཱརམྨཎཾ ཙིཏྟཾ ཡཐཱ ན ཨཉྙཱརམྨཎཾ ཧོཏི ཙིཏྟཝིསེསསྶ ཨདྷིཔྤེཏཏྟཱ, ཨེཝཾ ཀམྨཝིསེསེ ཨདྷིཔྤེཏེ ཀཱཡདྭཱརཱདཱིསུ ཨེཀདྭཱརིཀཀམྨཾ ཨཉྙསྨིཾ དྭཱརེ ན ཨུཔྤཛྫཏི ཏཏྠེཝ པརིཡོསིཏཏྟཱ, ཨཐ ཀམྨསཱམཉྙཾ ཨདྷིཔྤེཏཾ, རཱུཔཱདཱིསུ ཨེཀཱརམྨཎནྟི ཨིདཾ ཨུདཱཧརཎཾ ན སིཡཱཏི? ན, ཨསདིསབྷཱཝཝིབྷཱཝནཝསེན ཨུདཱཧཊཏྟཱ, ཨིཏརཐཱ མནོཝིཉྙཱཎབྷཱུཏཾ ཨིདཾ ཙིཏྟཾ ཚསུཔི ཝིསཡེསུ པཝཏྟནཏོ ཨནིབདྡྷཱརམྨཎནྟི ཨཱརམྨཎཾ སདིསཱུདཱཧརཎབྷཱཝེན ཝུཙྩེཡྻ ཨཱརམྨཎཾ ཝིཡ དྭཱརམྤི ཨནིབདྡྷནྟི. ཡསྨཱ པན སཏིཔི ཀམྨཱནཾ དྭཱརནྟརཙརཎེ ཡེབྷུཡྻེན ཝུཏྟིཡཱ ཏབྦཧུལཝུཏྟིཡཱ ཙ དྭཱརཀམྨཱནཾ ཨཉྙམཉྙཾ ཝཝཏྠཱནཾ ཝཀྑཏི, ཏསྨཱ པཱཎཱཏིཔཱཏཱདིབྷཱཝསཱམཉྙེན ཀམྨཾ ཨེཀཏྟནཡཝསེན གཧེཏྭཱ ཏསྶ ཝཙཱིདྭཱརཱདཱིསུ པཝཏྟིསབྦྷཱཝཏོ ཀམྨསྶ ཨནིབདྡྷཏྟཱཏི ཝུཏྟནྟི ཨཱཧ ‘‘ཀཱཡདྭཱརཱདཱིསུ ཨེཀདྭཱརིཀཀམྨཾ ཨཉྙསྨིཾ དྭཱརེ ན ནུཔྤཛྫཏཱི’’ཏི. རཱུཔཱདཱིསུ པན ཨེཀཱརམྨཎཾ ཙིཏྟཾ ཏེནེཝཱརམྨཎེན པརིཙྪིནྣནྟི ཝིསིཊྛམེཝ གཧིཏནྟི ཨཱརམྨཎམེཝ ནིབདྡྷནྟི ཝུཏྟནྟི ཙིཏྟཝིསེསོ ཨེཝ གཧིཏོ, ན ཙིཏྟསཱམཉྙཾ. ‘‘ནནུ ཙ རཱུཔཱརམྨཎཾ ཝཱ…པེ… དྷམྨཱརམྨཎཾ ཝཱ ཡཾ ཡཾ ཝཱ པནཱ’’ཏི ཨཱརམྨཎམྤི ཨནིཡམེནེཝ ཝུཏྟནྟི? སཙྩམེཏཾ, ཏཏྠ པན ཡཾ རཱུཔཱདཱིསུ ཨེཀཱརམྨཎཾ ཙིཏྟཾ, ཏཾ ཏེན ཝིནཱ ནཔྤཝཏྟཏི, ཀམྨཾ པན ཀཱཡདྭཱརིཀཱདིབྷེདཾ ཝཙཱིདྭཱརཱདཱིསུ ན ནཔྤཝཏྟཏཱིཏི ཨིམསྶ ཝིསེསསྶ ཛོཏནཏྠཾ པཱལི༹ཡཾ ཨཱརམྨཎམེཝ གཧིཏཾ, དྭཱརཾ ན གཧིཏནྟི ཨིམམཏྠཾ དསྶེཏི ‘‘ཨཱརམྨཎམེཝ ནིབདྡྷ’’ནྟིཨཱདིནཱ. ཝཙཱིདྭཱརེ ཨུཔྤཛྫམཱནམྤི པཱཎཱཏིཔཱཏཱདཱིཏི ཨཏྠོ.

ཀཱམཱཝཙརཀུསལཾ

ཀཱཡཀམྨདྭཱརཀཐཱཝཎྞནཱ

ཀམྨདྭཱརཱནནྟིཨཱདིནཱ ¶ ¶ པཀཱསེཏབྦསྶ སརཱུཔཾ པཀཱསནུཔཱཡཉྩ དསྶེཏི. ནིཡཏརཱུཔརཱུཔཝསེནཱཏི དྷམྨསངྒཧེ ནིདྡིཊྛནིཡཏརཱུཔརཱུཔཝསེན. ཨཉྙཐཱ ཀམྨསམུཊྛཱནིཀཀཱཡེ ཧདཡཝཏྠུཔི གཧེཏབྦཾ སིཡཱ. ཨེཀསནྟཏིཔརིཡཱཔནྣོ ཨུཔཱདིནྣཀཀཱཡོ ཨིདྷ གཧིཏོཏི ཙཀྑཱཡཏནཱདཱིཏི ཝུཏྟེསུ ཨེཀོ བྷཱཝོ ཧདཡཝཏྠུ ཙ གཧིཏནྟི ན སཀྐཱ ཝཏྟུཾ ‘‘ཙཀྑཱཡཏནཱདཱིནི ཛཱིཝིཏཔརིཡནྟཱནཱི’’ཏི སནྣིཝེསསྶ ཝིབྷཱཝིཏཏྟཱ.

ཝིཔྥནྡམཱནཝཎྞགྒཧཎཱནནྟརཾ ཝིཉྙཏྟིགྒཧཎསྶ ཨིཙྪིཏཏྟཱ ཙལནཱཀཱརཱཝ ཝཱཡོདྷཱཏུ ཝིཉྙཏྟིཝིཀཱརསཧིཏཱཏི ཀདཱཙི ཨཱསངྐེཡྻཱཏི ཏནྣིཝཏྟནཏྠཾ ‘‘པཋམཛཝནསམུཊྛིཏཱ’’ཏི ཨཱཧ. དེསནྟརུཔྤཏྟིཧེཏུབྷཱཝེན ཙཱལེཏུནྟི ཨེཏེན དེསནྟརུཔྤཏྟི ཙལནཾ, ཏཾནིམིཏྟེ ཙ ཀཏྟུབྷཱཝོ ཨུཔཙརིཏོཏི དསྶེཏི, ཨཉྙཐཱ ཁཎིཀཏཱ ཨབྱཱཔཱརཏཱ ཙ དྷམྨཱནཾ ན སམྦྷཝེཡྻཱཏི. ཏདབྷིམུཁབྷཱཝཝིཀཱརཝཏཱིཏི ཏཾདིསམབྷིམུཁོ ཏདབྷིམུཁོ, ཏསྶ བྷཱཝོ ཏདབྷིམུཁབྷཱཝོ, སོ ཨེཝ ཝིཀཱརོ, ཏཾསམངྒིནཱི ཝཱཡོདྷཱཏུ ཏདབྷིམུཁབྷཱཝཝིཀཱརཝཏཱི. ཨིདཱནི ཏདབྷིམུཁབྷཱཝཝིཀཱ རསྶ ཝིཉྙཏྟིབྷཱཝཾ དསྶེནྟོ ཨཱཧ ‘‘ཨདྷིཔྤཱཡསཧབྷཱཝཱི’’ཏིཨཱདི. ཨེཝཉྩ ཀཏྭཱཏིཨཱདིནཱ ཨིམིསྶཱ ཨཏྠཝཎྞནཱཡ ལདྡྷགུཎཾ དསྶེཏི. ཏཏྠ ཨཱཝཛྫནསྶཱཏི མནོདྭཱརཱཝཛྫནསྶ. ཡཏོ བཱཏྟིཾསཱཏིཨཱདིནཱ ཏསྶ ཝིཉྙཏྟིསམུཊྛཱཔཀཏཱ ན སཀྐཱ པཊིསེདྷེཏུནྟི དསྶེཏི.

པཙྩཡོ བྷཝིཏུཾ སམཏྠོཏི ཨེཏེན ཡཐཱཝུཏྟཝཱཡོདྷཱཏུཡཱ ཐམྦྷནཙལནསངྑཱཏཀིཙྩནིཔྥཱདནེ ཏསྶ ཨཱཀཱརཝིསེསསྶ སཧཀཱརཱིཀཱརཎབྷཱཝམཱཧ. ཨནིདསྶནསཔྤཊིགྷཏཱདཡོ ཝིཡ མཧཱབྷཱུཏཱནཾ ཨཝཏྠཱཝིསེསམཏྟཾ སོ ཨཱཀཱརཝིསེསོཏི པརམཏྠཏོ ན ཀིཉྩི ཧོཏཱིཏི ‘‘པརམཏྠཏོ ཨབྷཱཝཾ དསྶེཏཱི’’ཏི ཨཱཧ. པརམཏྠཏོ ཙིཏྟསམུཊྛཱནབྷཱཝོ པཊིསེདྷིཏོ. ཀམྨསམུཊྛཱནཱདིབྷཱཝསྶ པན སམྦྷཝོཡེཝ ནཏྠཱིཏི ཡཐཱཝུཏྟཝིཀཱརསྶ པརམཏྠཏོ སབྦྷཱཝེ ནཀུཏོཙིསམུཊྛིཏཏྟཱ ཨཔྤཙྩཡཏྟཾ ཨཱཔནྣཾ. ན ཧི རཱུཔཾ ཨཔྤཙྩཡཾ ཨཏྠི, ཨཔྤཙྩཡཏྟེ ཙ སཏི ནིཙྩབྷཱཝོ ཨཱཔཛྫཏི, ན ཙ ནིབྦཱནཝཛྫོ ཨཏྠོ སབྷཱཝདྷམྨོ ¶ ནིཙྩོ ཨཏྠི. ཙིཏྟསམུཊྛཱནབྷཱཝོ ཝིཡཱཏི ཝིཉྙཏྟིཡཱ ཙིཏྟསམུཊྛཱནཨུཔཱདཱརཱུཔབྷཱཝོ ཨུཔཙཱརསིདྡྷོཏི དསྶེཏི.

ཝིཉྙཏྟིཡཱ ¶ ཀརཎབྷཱུཏཱཡ. ཡཾ ཀརཎནྟི ཡཾ ཙིཏྟཀིརིཡཾ ཙིཏྟབྱཱཔཱརཾ. ཝིཉྙཏྟིཡཱ ཝིཉྙཱཏཏྟནྟི ཨིདམེས ཀཱརེཏཱིཏི ཡདེཏཾ ཨདྷིཔྤཱཡཝིབྷཱཝནཾ, ཨེཏཾ ཝིཉྙཏྟིཝིཀཱརརཧིཏེསུ རུཀྑཙལནཱདཱིསུ ན དིཊྛཾ, ཧཏྠཙལནཱདཱིསུ པན དིཊྛཾ, ཏསྨཱ ཝིཔྥནྡམཱནཝཎྞཝིནིམུཏྟོ ཀོཙི ཝིཀཱརོ ཨཏྠི ཀཱཡིཀཀརཎསངྑཱཏསྶ ཨདྷིཔྤཱཡསྶ ཉཱཔཀོཏི ཝིཉྙཱཡཏི. ཉཱཔཀོ ཙ ཧེཏུ ཉཱཔེཏབྦམཏྠཾ སཡཾ ཉཱཏོཡེཝ ཉཱཔེཏི, ན སབྦྷཱཝམཏྟེནཱཏི ཝཎྞགྒཧཎཱནནྟརཾ ཝིཀཱརགྒཧཎམྤི ཝིཉྙཱཡཏི. ཏཐཱ ཧི ཝིསཡབྷཱཝམཱཔནྣོ ཨེཝ སདྡོ ཨཏྠཾ པཀཱསེཏི, ནེཏརོ. ཏེནེཝཱཧ ‘‘ན ཧི ཝིཉྙཏྟཱི’’ཏིཨཱདི. ཡདི པན ཙིཏྟཛརཱུཔཱནཾ ཙལནཱཀཱརོ ཝིཉྙཏྟི, ཙཀྑུཝིཉྙཱཎསྶ ཝིཔྥནྡམཱནཝཎྞཱརམྨཎཏྟཱ ཏེནཔི སཱ གཧིཏཱ སིཡཱཏི ཨཱསངྐཱཡ ནིཝཏྟནཏྠཾ ཨཱཧ ‘‘ཙཀྑུཝིཉྙཱཎསྶཱ’’ཏིཨཱདི.

ཏཱལཔཎྞཱདིརཱུཔཱནཱིཏིཨཱདིནཱཔི ཝིཉྙཏྟིཡཱ ཝིཉྙཱཏབྦཏཾ མནོཝིཉྙཱཎེནེཝ ཙ ཝིཉྙཱཏབྦཏཾ དསྶེཏི. སཉྫཱནཱཏི ཨེཏེནཱཏི སཉྙཱཎཾ, ཏསྶ ཨུདཀཱདིནོ སཉྙཱཎཾ ཏཾསཉྙཱཎཾ, ཏསྶ ཨཱཀཱརོ ཏཾསཉྙཱཎཱཀཱརོ, ཨུདཀཱདིསཧཙཱརིཔྤཀཱརོ ཙ སོ ཏཾསཉྙཱཎཱཀཱརོ ཙཱཏི ཨུདཀཱ…པེ… ཀཱརོ, ཏཾ གཧེཏྭཱ ཛཱནིཏྭཱ. ཏདཱཀཱརསྶཱཏི ཨུདཀཱདིཉཱཔནཱཀཱརསྶ. ཡདི ཡཐཱཝུཏྟཝིཀཱརགྒཧཎཾཡེཝ ཀཱརཎཾ ཨདྷིཔྤཱཡགྒཧཎསྶ, ཨཐ ཀསྨཱ ཨགྒཧིཏསངྐེཏསྶ ཨདྷིཔྤཱཡགྒཧཎཾ ན ཧོཏཱིཏི? ན ཀེཝལཾ ཝིཀཱརགྒཧཎམེཝ ཨདྷིཔྤཱཡགྒཧཎསྶ ཀཱརཎཾ, ཀིཉྩརཧཱིཏི ཨཱཧ ‘‘ཨེཏསྶ པནཱ’’ཏིཨཱདི.

ཨཐ པནཱཏིཨཱདིནཱ ཝིཉྙཏྟིཡཱ ཨནུམཱནེན གཧེཏབྦཏཾ དསྶེཏི. སཱདྷིཔྤཱཡ…པེ… ནནྟརནྟི ཨདྷིཔྤཱཡསཧིཏཝིཀཱརེན སཧཛཱཏཝཎྞཱཡཏནགྒཧཎསངྑཱཏསྶ ཙཀྑུདྭཱརིཀཝིཉྙཱཎསནྟཱནསྶ ཨནནྟརཾ. ཨདྷིཔྤཱཡགྒཧཎསྶཱཏི ཨདྷིཔྤཱཡཝཝཏྠཱཔཀསྶ ཏཏིཡཝཱརེ ཛཝནསྶ. ཨདྷིཔྤཱཡསཧབྷཱུ ཝིཀཱརཱབྷཱཝེ ཨབྷཱཝཏོཏི ཨེཏེན ཡཐཱཝུཏྟཝིཀཱརཾ ཨདྷིཔྤཱཡགྒཧཎེན ཨནུམིནོཏི. ཨེཝཾ སཏཱིཏིཨཱདིནཱ ཡཐཱནུམིཏམཏྠཾ ནིགམནཝསེན དསྶེཏི. ཏཏྠ ཨུདཀཱདིགྒཧཎེནེཝཱཏི ཏཱལཔཎྞཱདཱིནཾ ཝཎྞགྒཧཎཱནནྟརེན པུརིམསིདྡྷསམྦནྡྷཱནུགྒཧིཏེན ཨུདཀཱདཱིནཾ ཏཏྠ ཨཏྠིབྷཱཝཝིཛཱནནེནེཝ. ཡཐཱ ཏཱལཔཎྞཱདཱིནཾ ཨུདཀཱདིསཧཙཱརིཔྤཀཱརཏཾ ¶ སཉྙཱཎཱཀཱརོ ཝིཉྙཱཏོཡེཝ ཧོཏི ནཱནནྟརིཡཀཏྟཱ, ཨེཝཾ ཝིཔྥནྡམཱནཝཎྞགྒཧཎཱནནྟརེན པུརིམསིདྡྷསམྦནྡྷཱནུགྒཧིཏེན གནྟུཀཱམཏཱདིཨདྷིཔྤཱཡཝིཛཱནནེནེཝ ཝིཉྙཏྟི ཝིཉྙཱཏཱ ཧོཏི ཏདབྷཱཝེ ཨབྷཱཝཏོཏི ཨུཔམཱཡོཛནཱ.

སབྷཱཝབྷཱུཏནྟི ¶ ཨནྭཏྠབྷཱུཏཾ. དྭིདྷཱཏི ཝིཉྙཱཔནཏོ ཝིཉྙེཡྻཏོ ཙ. ཀཱཡཝིཉྙཏྟིཡཱ ཏཐཱཔཝཏྟམཱནཱཡ ཙེཏནཱསངྑཱཏསྶ ཀམྨསྶ ཀཱཡཀམྨབྷཱཝོ ནིཔྥཛྫཏི ཏཱཡ ཨུཔལཀྑིཏབྦཏྟཱ, ན པན ཙཏུཝཱིསཏིཡཱ པཙྩཡེསུ ཀེནཙི པཙྩཡབྷཱཝཏོཏི དསྶེནྟོ ‘‘ཏསྨིཾ དྭཱརེ སིདྡྷཱ’’ཏིཨཱདིམཱཧ. ཏེན ཝཙཱིདྭཱརུཔྤནྣཱཔི པཱཎཱཏིཔཱཏཱདཡོ སངྒཧིཏཱཏི ཏེསཾ སངྒཧིཏབྷཱཝཾ དསྶེཏི. ཨཐ ཝཱ ཀཱཡདྭཱརུཔྤནྣཱཡ ཀཱཡཀམྨབྷཱུཏཱཡ ཙེཏནཱཡ ཝསེན ‘‘ཏེན དྭཱརེན ཝིཉྙཱཏབྦབྷཱཝཏོ’’ཏི ཝུཏྟཾ, ཏསྶཱཡེཝ དྭཱརནྟརུཔྤནྣཱཡ ཝསེན ‘‘ཏེན དྭཱརེན ནཱམལཱབྷཏོ’’ཏི. མནོདྭཱརཱཝཛྫནསྶཔི ཝིཉྙཏྟིསམུཊྛཱཔཀབྷཱཝོ ནིཙྪིཏོཏི ‘‘ཨེཀཱདསནྣཾ ཀིརིཡཙིཏྟཱན’’ནྟི ཨཱཧ.

དྭཱརནྟརཙཱརིནོཏི དྭཱརནྟརབྷཱཝེན པཝཏྟནཀཱ. དྭཱརསམྦྷེདཱཏི དྭཱརཱནཾ སངྐརཎཏོ. དྭཱརཱནཉྷི དྭཱརནྟརབྷཱཝཔྤཏྟིཡཱ སཏི ཀཱཡདྭཱརསྶ ཝཙཱིདྭཱརཱདིབྷཱཝོ, ཝཙཱིདྭཱརསྶ ཙ ཀཱཡདྭཱརཱདིབྷཱཝོ ཨཱཔཛྫཏཱིཏི ཏཾཏཾདྭཱརུཔྤནྣཀམྨཱནམྤི སངྐརོ སིཡཱ. ཏེནཱཧ ‘‘ཀམྨསམྦྷེདོཔཱི’’ཏི. ཨེཝཾ སཏི ཀཱཡཀམྨཾ…པེ… ཝཝཏྠཱནཾ ན སིཡཱ. ཡདི ཀམྨཱནི ཀམྨནྟརཙཱརཱིནི ཧོནྟི, ཀཱཡཀམྨཱདིཀསྶ ཝཙཱིཀམྨཱདིཀབྷཱཝཱཔཏྟིཏོ ‘‘ཀམྨསམྦྷེདཱ དྭཱརསམྦྷེདོཔཱི’’ཏི ཀཱཡཀམྨཾ ཀཱཡཀམྨདྭཱརནྟི ཨཉྙམཉྙཝཝཏྠཱནཾ ན སིཡཱཏི ཨིམམཏྠམཱཧ ‘‘ཀམྨཱནམྤི ཀམྨནྟརཙརཎེ ཨེསེཝ ནཡོ’’ཏི. ཀམྨནྟརཙརཎཾ ཀམྨནྟརཱུཔལཀྑཎཏཱ. ཏེནེཝཱཧ ‘‘དྭཱརབྷཱཝེནཱ’’ཏི. དྭཱརནྟརཙརཎཾ དྭཱརནྟརུཔྤཏྟི. དྭཱརེཏི ཨཏྟནོ དྭཱརེ. ཨཉྙསྨིནྟི དྭཱརནྟརེ. ཀམྨཱནཱིཏི ཏཾཏཾདྭཱརིཀཀམྨཱནི. ཨཉྙཱནཱིཏི ཨཉྙདྭཱརིཀཀམྨཱནི. དྭཱརེ དྭཱརཱནི ན ཙརནྟཱིཏི དྭཱརནྟརབྷཱཝེན ནཔྤཝཏྟནྟི, དྭཱརནྟརཾ ཝཱ ན སངྐམནྟི. ཀིཉྩཱཔི ཝིཉྙཏྟིཡཱ ཙཏུཝཱིསཏིཡཱ པཙྩཡེསུ ཡེན ཀེནཙི པཙྩཡེན ཙེཏནཱཡ པཙྩཡབྷཱཝོ ནཏྠི, ཏཐཱ པན ཝིཉྙཏྟིཡཱ པཝཏྟམཱནཱཡ ཨེཝ པཱཎཱཏིཔཱཏཱདི ཧོཏི, ནཱཉྙཐཱཏི སིཡཱ ཝིཉྙཏྟིཡཱ ཧེཏུབྷཱཝོ ཙེཏནཱཡཱཏི ཝུཏྟཾ ‘‘དྭཱརེཧི ཀཱརཎབྷཱུཏེཧཱི’’ཏི. ཀཱཡཀམྨཾ ཝཙཱིཀམྨནྟི ཀམྨཝཝཏྠཱནསྶེཝ ཝཱ ¶ ཀཱརཎབྷཱཝཾ སནྡྷཱཡ ‘‘དྭཱརེཧི ཀཱརཎབྷཱུཏེཧཱི’’ཏི ཝུཏྟཾ. ཡདིཔི ‘‘དྭཱརེཧི ཀམྨཱནཱི’’ཏི ཝུཏྟཾ, ‘‘ཨཉྙམཉྙཾ ཝཝཏྠིཏཱ’’ཏི པན ཝུཏྟཏྟཱ ཀམྨེཧིཔི དྭཱརཱནི ཝཝཏྠིཏཱནཱིཏི ཨཡམཏྠོཔི སིདྡྷོཡེཝཱཏི དསྶེཏུཾ ‘‘ན ཀེཝལ’’ནྟིཨཱདི ཝུཏྟཾ. ཨདྭཱརཙཱརཱིཧཱིཏི དྭཱརཱནཾ སཡཾ ཝཝཏྠིཏབྷཱཝམཱཧ, ན པན ཨཝཝཏྠཱནཾ, ཝཝཏྠཱནམེཝཱཏི ཨདྷིཔྤཱཡོ. ཨིདཱནི ཏཾ ཝཝཏྠཱནཾ ཝིབྷཱཝེཏི ཀམྨཱནཔེཀྑཱཏིཨཱདིནཱ. ཏཏྠ སམཡནིཡམིཏེན ཙིཏྟེན སམཡོ ཝིཡ དྭཱརནིཡམིཏེཧི ཀམྨེཧི དྭཱརཱནི ནིཡམིཏཱནཱིཏི ཨཡཾ སངྑེཔཏྠོ.

ཨེཝཾསབྷཱཝཏྟཱཏི ¶ དྭཱརབྷཱུཏེཧི ཀཱཡཱདཱིཧི ཨུཔལཀྑཎཱིཡསབྷཱཝཏྟཱ. ཨཱཎཏྟི…པེ… མཱནསྶཱཏི ཀཱཡཝཙཱིཀམྨཱནཾ ཝཙཱིཀཱཡཝིཉྙཏྟཱིཧི པཀཱསེཏབྦཏཾ ཨཱཧ. ཀཱཡཱདཱིཧཱིཏི ཀཱཡཝཙཱིཝིཉྙཏྟཱིཧི. ཏསྨཱཏི ཡསྨཱ དྭཱརནྟརེ ཙརནྟཱནིཔི ཀམྨཱནི སཀེན དྭཱརེན ཨུཔལཀྑིཏཱནེཝ ཙརནྟི, ཏསྨཱ. ནཱཔི ཀམྨཾ དྭཱརསྶཱཏི ཡསྨིཾ དྭཱརནྟརེ ཀམྨཾ ཙརཏི, ཏསྶ དྭཱརསྶ ཨནཏྟནིཡསྶ. ཏཾཏཾདྭཱརམེཝཱཏི སཀདྭཱརམེཝ. ཀམྨསྶཱཏི སཀསཀཀམྨསྶ. ཡདི ཀམྨེཧི དྭཱརཱནི ཝཝཏྠིཏཱནི, ‘‘ཀམྨསྶ ཨནིབདྡྷཏྟཱ’’ཏི ཨིདཾ ཀཐཾ ནཱིཡཏཱིཏི ཨཱཧ ‘‘པུབྦེ པནཱ’’ཏིཨཱདི.

སཱཏི ཝིཉྙཏྟི. ཏསྶཱཏི ཀམྨསྶ. ཀེནཙི པཀཱརེནཱཏི ཙཏུཝཱིསཏིཡཱ པཙྩཡཔྤཀཱརེསུ ཀེནཙི པཀཱརེན. ཏཾསཧཛཱཏཱཏི ཨེཏེན ཀཱཡཝིཉྙཏྟིཡཱ སབྦྷཱཝེཡེཝ ཀཱཡཀམྨསྶ སབྦྷཱཝོ, ནཱཉྙཐཱཏི པརིཡཱཡེན ཝིཉྙཏྟིཡཱ ཀམྨསྶ ཀཱརཎབྷཱཝཾ ཝིབྷཱཝེཏི. ཏེནེཝཱཧ ‘‘ཨུཔྤཏྟིཊྛཱནབྷཱཝེན ཝུཏྟཱ’’ཏི. ཡཐཱཝུཏྟནིཡམེནཱཏིཨཱདིནཱ ཀམྨསྶ ཨུཔྤཏྟིཊྛཱནབྷཱཝེ བྱབྷིཙཱརཱབྷཱཝམཱཧ. ཏཏྠ ཡཐཱཝུཏྟནིཡམེནཱཏི ཨཊྛཀཐཱཡཾ ཝུཏྟཔྤཀཱརེན ཝཝཏྠཱནཡུཏྟིསངྑཱཏེན ནིཡམེན. དྭཱརཙརཎེཏི ཨཉྙདྭཱརཙརཎེ.

ཀཱཡཀམྨདྭཱརཀཐཱཝཎྞནཱ ནིཊྛིཏཱ.

ཝཙཱིཀམྨདྭཱརཀཐཱཝཎྞནཱ

ཙཏཱུཧི ཨངྒེཧཱིཏི ཨེཏྠ ‘‘སུབྷཱསིཏཾཡེཝ བྷཱསཏི, ནོ དུབྦྷཱསིཏཾ. དྷམྨཾཡེཝ, པིཡཾཡེཝ, སཙྩཾཡེཝ བྷཱསཏི, ནོ ཨལིཀ’’ནྟི (སཾ. ནི. ༡.༢༡༣; སུ. ནི. སུབྷཱསིཏསུཏྟ) ཡཱནི ཨངྒཱནི སུཏྟེ ¶ ཝུཏྟཱནི, ཏེསཾ ཙེཏནཱསབྷཱཝཾ དསྶེཏུཾ ‘‘སུབྷཱསིཏབྷཱསནཱ’’ཏིཨཱདི ཝུཏྟཾ. ཏཐཱཔཝཏྟཱཏི སུབྷཱསིཏབྷཱསནཱདིབྷཱཝེན པཝཏྟཱ. སཧ སམྦྷཱུཏཏྟཱཏི སཧེཝ ཨུཔྤནྣཏྟཱ. ན ཧི ཝཙཱིཝིཉྙཏྟི སདྡརཧིཏཱ ཨཏྠི. ཏཐཱ ཧི ‘‘ཡཱ ཏཱཡ ཝཱཙཱཡ ཝིཉྙཏྟཱི’’ཏི ཝུཏྟཾ. ‘‘ཝཱཙཱགིརཱ བྱཔཐོ’’ཏིཨཱདིནཱ (དྷ. ས. ༦༣༦) ནཱཏིསུཁུམཾཡེཝ སདྡཝཱཙཾ ཝཏྭཱ ‘‘ཡཱ ཏཱཡ ཝཱཙཱཡ ཝིཉྙཏྟཱི’’ཏི, ཏཱཡ སདྡྷིཾ ཡོཛེཏྭཱ ཝཙཱིཝིཉྙཏྟིཡཱ ཝུཏྟཏྟཱ རཱུཔཱཡཏནཾ ཝིཡ ཝཏྠུཔརིཏྟཏཱདིནཱ ¶ སདྡཱཡཏནམྤི ཨནིནྡྲིཡགོཙརོ ཨཏྠཱིཏི ཙ ཨདྷིཔྤཱཡེན ‘‘ཡཱ ཏཱཡ…པེ… ཝིཉྙཱཡཏཱི’’ཏི ཨཱཧ.

ཨིདཱནི ཨཝིསེསེན ཙིཏྟསམུཊྛཱནསདྡསྶ སོཏཝིཉྙཱཎཱརམྨཎཏཱ པཱལི༹ཡཾ ཝུཏྟཱཏི ཝིཏཀྐཝིཔྥཱརསདྡོ ན སོཏཝིཉྙེཡྻོཏི མཧཱཨཊྛཀཐཱཝཱདསྶ པཱལི༹ཡཱ ཝིརོདྷཾ དསྶེཏུཾ ‘‘ཙིཏྟསམུཊྛཱན’’ནྟིཨཱདི ཝུཏྟཾ. ཨེཝཾ སངྒཧཀཱརསྶ ཨདྷིཔྤཱཡེ ཋཏྭཱ མཧཱཨཊྛཀཐཱཝཱདསྶ པཊིསེདྷེཏབྦཏཾ དསྶེཏྭཱ ཨིདཱནི ཨཏྟནོ ཨདྷིཔྤཱཡེ ཋཏྭཱ ཏཾ པརིཧརིཏུཾ ‘‘མཧཱཨཊྛཀཐཱཡཾ པནཱ’’ཏིཨཱདིམཱཧ. སངྒྷཊྚནཱཀཱརེན པཝཏྟཱནཾ བྷཱུཏཱནཾ སདྡསྶ ནིསྶཡབྷཱཝཏོ སངྒྷཊྚནེན སཧེཝ སདྡོ ཨུཔྤཛྫཏི. ཏཔྤཙྩཡབྷཱཝོཏི ཨུཔཱདིནྣཀགྷཊྚནསྶ པཙྩཡབྷཱཝོ. ཙིཏྟཛཔཐཝཱིདྷཱཏུཡཱ ཨུཔཱདིནྣཀགྷཊྚནེ པཙྩཡོ བྷཝིཏུཾ སམཏྠོ ཙིཏྟསམུཊྛཱནམཧཱབྷཱུཏཱནཾ ཨེཀོ ཨཱཀཱརཝིསེསོ ཨཏྠི. ཏདཱཀཱརཏྟཱ ཧི ཏེསཾ པཐཝཱིདྷཱཏུ ཨུཔཱདིནྣཀཾ གྷཊྚེཏཱིཏི ཨིམམཏྠཾ ཝུཏྟཱནུསཱརེན ཝེདིཏབྦཏྟཱ ‘‘ཝུཏྟནཡེནེཝ ཝེདིཏབྦོ’’ཏི ཝཏྭཱ ཏམེཝ ཝུཏྟནཡཾ ‘‘ཏབྦིཀཱརཱན’’ནྟིཨཱདིནཱ ཝིབྷཱཝེཏི. ཏཏྠ ཨཉྙམཉྙསྶ པཙྩཡབྷཱཝོ ཏཔྤཙྩཡབྷཱཝོ ཝུཏྟོཏི ཨཏྠོ. ཨཉྙམྤི སབྦཾ ཝིདྷཱནནྟི ‘‘ན ཙིཏྟསམུཊྛཱནཱཏི ཨེཏེན པརམཏྠཏོ ཨབྷཱཝཾ དསྶེཏཱི’’ཏིཨཱདིནཱ ཨཏྟནཱ ཝུཏྟཝིདྷཱནཾ. ཨཊྛཀཐཱཡཾ པན ཝུཏྟཝིདྷཱནཾ ‘‘ཧེཊྛཱ ཝུཏྟནཡེནེཝ ཝེདིཏབྦ’’ནྟི ཨཊྛཀཐཱཡཾ ཝུཏྟམེཝཱཏི.

ཨཏྟནོ ཨཏྟནོ པཙྩཡུཔྤནྣསྶ དེསནྟརེ པཱརམྤརིཡེན ཨུཔྤཱདནཾ དེསནྟརུཔྤཱདནཔརམྤརཏཱ. ལདྡྷཱསེཝནེནཱཏི ལདྡྷཔུབྦཱབྷིསངྑཱརེན. ཙིཏྟེནེཝཱཏི པཋམཙིཏྟེནེཝ. ‘‘སཏྟ ཛཝནཱནི སཏྟ ཨཀྑརཱནི ནིབྦཏྟེནྟཱིཏི ཝཱདཾ པཊིཀྑིཔིཏྭཱ ཨེཀཛཝནཝཱརཔརིཡཱཔནྣཱནི ཙིཏྟཱནི ཨེཀམཀྑརཾ ནིབྦཏྟེནྟཱི’’ཏི ཝདནྟི. ཀིཉྩཱཔི པཋམཙིཏྟེནཔི གྷཊྚནཱ ནིཔྥཛྫཏི, ཨེཀསྶེཝ པན བཧུསོ པཝཏྟནེན ¶ ཨཏྠི ཀོཙི ཝིསེསོཏི པུརིམཛཝནསམུཊྛིཏཱཧི གྷཊྚནཱཧི པཊིལདྡྷཱསེཝནེན སཏྟམཛཝནེན སམུཊྛིཏཱ གྷཊྚནཱ པརིབྱཏྟམཀྑརཾ ནིབྦཏྟེཏཱིཏི ཨུཔཏྠམྦྷནཾ ནཏྠཱིཏི ན སཀྐཱ ཝཏྟུཾ. ལདྡྷཱབྷིསངྑཱརེན པན པཋམཙིཏྟེནཔི གྷཊྚནཱ བལཝཏཱི ཧོཏཱིཏི ཨཊྛཀཐཱཡཾ ‘‘ཨུཔཏྠམྦྷནཀིཙྩཾ ནཏྠཱི’’ཏི ཝུཏྟཾ སིཡཱ, སབྦམེཏཾ ཝཱིམཾསིཏྭཱ གཧེཏབྦཾ.

ཝཙཱིཀམྨདྭཱརཀཐཱཝཎྞནཱ ནིཊྛིཏཱ.

མནོཀམྨདྭཱརཀཐཱཝཎྞནཱ

‘‘སབྦཱཡཔི ¶ ཀཱཡཝཙཱིཝིཉྙཏྟིཡཱ ཀཱཡཝཙཱིདྭཱརབྷཱཝོ ཝིཡ སབྦསྶཔི ཙིཏྟསྶ མནོདྭཱརབྷཱཝོ སམྦྷཝཏཱི’’ཏི དསྶནཏྠཾ ཨཊྛཀཐཱཡཾ ‘‘ཨཡཾ ནཱམ མནོ མནོདྭཱརཾ ན ཧོཏཱིཏི ན ཝཏྟབྦོ’’ཏི ཝཏྭཱ ཏཾདྭཱརཝནྟདྷམྨདསྶནཏྠཾ ‘‘ཨཡཾ ནཱམ ཙེཏནཱ’’ཏིཨཱདི ཝུཏྟནྟི ཨཱཧ ‘‘ཡསྶ དྭཱརཾ མནོ, ཏཾ དསྶནཏྠཾ ཝུཏྟ’’ནྟི. ཡཐཱ པན ཏིཝིདྷཙཏུབྦིདྷཀཱཡཝཙཱིཀམྨཱནཾ དྭཱརབྷཱཝཏོ ཀཱཡཀམྨདྭཱརཝཙཱིཀམྨདྭཱརཱནི ཝུཏྟཱནི, ཨེཝཾ མནོཀམྨནྟི ཝུཏྟཨབྷིཛ྄ཛྷཱདཱིནཾ དྭཱརབྷཱཝཏོ ཝཊྚཧེཏུབྷཱུཏལོཀིཡཀུསལཱཀུསལསམྤཡུཏྟམནོ ཨེཝ མནོཀམྨདྭཱརནྟི སནྣིཊྛཱནཾ ཀཏནྟི དཊྛབྦཾ. ཙེཏནཱཡ ཨཏྟནོ ཀིཙྩཾ ཨཱརདྡྷཱཡ སམྤཡུཏྟཱཔི ཏཾ ཏཾ སཀིཙྩཾ ཨཱརབྷནྟཱིཏི སཱ ནེ སཀིཙྩེ པཝཏྟེཏི ནཱམ, ཏཐཱ པཝཏྟེནྟཱི ཙ སམྤཡུཏྟེ ཨེཀསྨིཾ ཨཱརམྨཎེ ཨཝིཔྤཀིཎྞེ ཀརོཏི བྱཱཔཱརེཏི ཙཱཏི ཝུཙྩཏི, ཏཐཱ སམྤཡུཏྟཱནཾ ཡཐཱཝུཏྟཾ ཨཝིཔྤཀིཎྞཀརཎཾ སམྤིཎྜནཾ ཨཱཡཱུཧནཾ བྱཱཔཱརཱཔཱདནཾ བྱཱཔཱརཎཾ ཙེཏཡནནྟི ཨཱཡཱུཧནཙེཏཡནཱནཾ ནཱནཏྟཾ དསྶེནྟོ ‘‘ཕསྶཱདིདྷམྨེཧཱི’’ཏིཨཱདིམཱཧ. ཏཐཱཀརཎནྟི ཡཐཱ ཕསྶཱདཡོ སཀསཀཀིཙྩེ པསུཏཱ བྷཝནྟི, ཏཐཱ ཀརཎཾ. ཏེནེཝ ཡཐཱཝུཏྟེན ཨཝིཔྤཀིཎྞབྱཱཔཱརཎཱཀཱརེན སམྤཡུཏྟཱནཾ ཀརཎཾ པཝཏྟནནྟི དཊྛབྦཾ. ཀམྨཀྑཡཀརཏྟཱཏི ཀམྨཀྑཡཀརམནསྶ ཀམྨདྭཱརབྷཱཝོ ན ཡུཛྫཏཱིཏི ཨདྷིཔྤཱཡོ. ཡཏོ ‘‘ཀམྨཔཐཀཐཱ ལོཀིཡཱ ཨེཝཱ’’ཏི ཝདནྟི.

མནོཀམྨདྭཱརཀཐཱཝཎྞནཱ ནིཊྛིཏཱ.

ཀམྨཀཐཱཝཎྞནཱ

སམཱནཀཱལཱཔི ¶ ཀཱརཎཕལཀིརིཡཱ པུབྦཱཔརཀཱལཱ ཝིཡ ཝཏྟུཾ ཡུཏྟཱཡེཝ. སེཡྻཐཱཔི པཊིཙྩསམུཔྤཱདེ ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎ’’ནྟི དསྶེཏུཾ ‘‘ཨཐ ཝཱ’’ཏིཨཱདིམཱཧ. ཙོཔནཀིརིཡནྟི ཝིཉྙཏྟིདྭཡཾ ཨཱཧ. ཏསྶཱ ཧི ཙིཏྟསམུཊྛཱནཀཱཡསདྡཝཱཙཱཧི ཀཱཡཝཙཱིཝིཉྙཏྟཱིཧི ཨེཝ ཝཱ པུརིམཔུརིམཱཧི པཝཏྟེཏབྦཏྟཱ ‘‘ཀཱཡཝཱཙཱཧི ཙོཔནཀིརིཡཾ ཀརོཏཱི’’ཏི ཝུཏྟཾ ཏབྦིཀཱརཱནཾ བྷཱུཏཱནཾ ཏཐཱཔཝཏྟནཏོ. ཨཐ ཝཱ ཀཱཡཝཱཙཱཧཱིཏི ཀཱཡཝཙཱིཝིཉྙཏྟཱིཧི ¶ . ཙོཔནཀིརིཡནྟི རཱུཔཀཱཡསྶ ཐམྦྷནཙལནཀིརིཡཾ ཨུཔཱདིནྣཀགྷཊྚནཀིརིཡཉྩ. ཨེསཱ ཧི ཀིརིཡཱ ‘‘རཱུཔཀཱཡཾ ཐམྦྷེཏུཾ ཙཱལེཏུཾ པཙྩཡོ བྷཝིཏུཾ སམཏྠོ’’ཏི, ‘‘ཨུཔཱདིནྣཀགྷཊྚནསྶ པཙྩཡབྷཱུཏོ’’ཏི ཙ ཝུཏྟཏྟཱ ཀཱཡཝཙཱིཝིཉྙཏྟཱིཧི ནིཔྥཛྫཏཱིཏི. ཨེཝཉྩ ཀཏྭཱ ‘‘ཙོཔནཀིརིཡཱནིསྶཡབྷཱུཏཱ ཀཱཡཝཱཙཱ’’ཏི, ‘‘ཀཱཡཱདཱིཧི ཀརཎབྷཱུཏེཧི ཙོཔནཱབྷིཛ྄ཛྷཱདིཀིརིཡཾ ཀརོནྟི ཝཱསིཨཱདཱིཧི ཝིཡ ཚེདནཱདི’’ནྟི ཙ ཨིདམྤི ཝཙནཾ སམཏྠིཏཾ བྷཝཏི. ན ཀེཝལཾ དྷརམཱནཏཱཝ སབྦྷཱཝོ, ཨཐ ཁོ མགྒེན ཨསམུཙྪིནྣཏཱཔཱིཏི དསྶེནྟོ ‘‘ཨནིརོདྷིཏེཝཱ’’ཏི ཨཱཧ. ཨསམུཙྪིནྣཏཱ ཙ ཀཱཡཱདཱིནཾ ཏདུཔནིསྶཡཀིལེསཱསམུཙྪེདེནེཝཱཏི དཊྛབྦཾ. ‘‘ཀཱཡཱདཱིཧི ཀརཎབྷཱུཏེཧི ཙོཔནཱབྷིཛ྄ཛྷཱདིཀིརིཡཾ ཀརོནྟཱི’’ཏི ཨེཏེན ཙོཔནཱབྷིཛ྄ཛྷཱདིཀིརིཡཱནིབྦཏྟིདྭཱརེན ཙེཏནཱནིབྦཏྟིཡེཝ ཝུཏྟཱཏི ཨིམིནཱ ཨདྷིཔྤཱཡེན ‘‘ཨེཝཉྩ…པེ… ཡུཛྫནྟཱི’’ཏི ཨཱཧ. ཨེཝཉྩ ཀཏྭཱ ཀཱཡེ སཏི ཝཱཙཱཡ སཏཱིཏིཨཱདིཝཙནཾ ཨནུལོམིཏཾ ཧོཏི. ཡཱཡ ཙེཏནཱཡཱཏི ཀརཎནིདྡེསོ པན ཀཱཡཱདཱིནཾ ཙོཔནཱབྷིཛ྄ཛྷཱདིཀིརིཡཱཡ ཙ ཙེཏནཱཧེཏུཀཏྟདསྶནཏྠཾ ཝུཏྟོཏི.

སབྷཱཝཏོ ཨུཔཀཱརཀཏོ མགྒེ སཏི སབྦྷཱཝཏོ ཙ བོཛ྄ཛྷངྒཱ མགྒེ ཨནྟོགདྷཱཏི ཨཱཧ ‘‘ན ཙ ན སཀྐཱ’’ཏིཨཱདི.

ཀམྨཔཐཾ ཨཔྤཏྟཱནམྤི ཏཾཏཾདྭཱརེ སཾསནྡནནྟི ཡཐཱ ཀམྨཔཐཾ པཏྟཱནཾ, ཨེཝཾ ཀམྨཔཐཾ ཨཔྤཏྟཱནམྤི སཏིཔི དྭཱརནྟརུཔྤཏྟིཡཾ ཡཐཱསཀཾ དྭཱརེཧེཝ ནཱམགྒཧཎནྟི ཝདནྟི, ཨེཝཾ སཏི ཨཊྛཀཐཱཡ ཝིརོདྷོ. དུཏིཡཏྠསྶ ཙ ཨབྷཱཝོ སིཡཱ, ཏསྨཱ ཏཾཏཾདྭཱརེ སཾསནྡནནྟི ཡསྨིཾ ཡསྨིཾ དྭཱརེ ཀམྨཔཐཾ ཨཔྤཏྟཱ ཨཀུསལཙེཏནཱདཡོ པཝཏྟཱ, ཏཱསཾ ཏེན ཏེནེཝ དྭཱརེན ནཱམགྒཧཎཾ. ཏཾ པན ཏཾཏཾདྭཱརཔཀྑིཀབྷཱཝཀརཎཏོ ཏཏྠ ཨཝརོདྷནནྟི ¶ ཝུཏྟཾ. ཡཐཱ ཧི ཀམྨཔཐཾ པཏྟཱ ཀཱཡཀམྨཱདིསངྑཱཏཱ ཙེཏནཱ དྭཱརནྟརེ ཨུཔྤནྣཱཔི ཀཱཡཀམྨཱདིནཱམམེཝ ལབྷནྟི, ན ཨེཝཾ ཀམྨཔཐཾ ཨཔྤཏྟཱ. ཏཱ པན ཡཏྠ ཡཏྠ དྭཱརེ ཨུཔྤཛྫནྟི, ཏེན ཏེནེཝ དྭཱརེན ཀཱཡདུཙྩརིཏཾ ཝཙཱིདུཙྩརིཏནྟིཨཱདིནཱམཾ ལབྷནྟི. ཨེཝཾ ནཱམགྒཧཎམེཝ ཧི ཏེསཾ ཏཾཏཾདྭཱརཔཀྑིཀཀརཎཾ ཝུཏྟཾ. ཏེནེཝ ཧི ཨཊྛཀཐཱཡཾ ‘‘ཀིཉྩཱཔི ཝཙཱིདྭཱརེ ཙོཔནཔྤཏྟཾ ཀམྨཔཐཾ, ཨཔྤཏྟཏཱཡ པན ཀཱཡཀམྨཾ ན ཧོཏི, ཀེཝལཾ ཝཙཱིདུཙྩརིཏཾ ནཱམ ཧོཏཱི’’ཏི ཝུཏྟཾ.

སཏིཔི པཱཎཱཏིཔཱཏཱདིཙེཏནཱཡ ཝཙཱིདྭཱརཱདཱིསུ པཝཏྟིཡཾ ཡཐཱཝུཏྟཡེབྷུཡྻཏབྦཧུལཝུཏྟིཡཱ ཀཱཡཀམྨཱདིབྷཱཝཝཝཏྠཱཔནཾ ¶ ཀཱཡཱདིཀསྶ ཏཾཏཾདྭཱརབྷཱཝཝཝཏྠཱཔནཉྩ ཀམྨདྭཱརཱབྷེདནཾ. ཏཉྷི ཀམྨདྭཱརཱནཾ ཨསཾཀིཎྞབྷཱཝེན པཏིཊྛཱཔནཾ. ཡཾ སནྡྷཱཡ ‘‘ཨཱཎཏྟིསམུཊྛིཏེསཱུ’’ཏི ཨཊྛཀཐཱཡཾ ཝཀྑཏི. ཀེཙི པན ‘‘ཨེཀེཀསྨིཾ དྭཱརེ ཨནེཀེསཾ ཀམྨཱནཾ པཝཏྟིདསྶནམྤི དྭཱརསཾསནྡན’’ནྟི ཝདནྟི. ཡཐཱ པཝཏྟོ བྱཱཔཱདོ ཀམྨཔཐོ ཧོཏི, ཏཾ དསྶེཏུཾ ‘‘ཨིམེ སཏྟཱ ཧཉྙནྟཱུ’’ཏི པཝཏྟི བྱཱཔཱདསྶ དསྶིཏཱ. ཀཱཡདྭཱརིཀཙེཏནཱཡ སཧཀཱརཱིཀཱརཎབྷཱཝཏོ ཀཱཡཀམྨཝོཧཱརལཱབྷཱ, ཨབྷིཛ྄ཛྷཱདཱིནཾ པརསནྟཀསྶ ཨཏྟནོ པརིཎཱམནཝསེན ‘‘ཨིམེ སཏྟཱ ཧཉྙནྟཱུ’’ཏིཨཱདིནཱ ཙ ཨཔྤཝཏྟཏྟཱ མནོཀམྨཝོཧཱརཝིརཧཱ, ཨཙེཏནཱསབྷཱཝཏོ ཝཱ པཱཎཱཏིཔཱཏཱདིཝསེན ཨབྦོཧཱརིཀཱ, པཱཎཱཏིཔཱཏཱདིབྷཱཝེན ན ཝཏྟབྦཱཏི ཨཏྠོ. ཨེཏྠཱཏི ཨབྦོཧཱརིཀབྷཱཝེ.

དསཝིདྷཱ ཨིདྡྷི…པེ… ཏབྦཱ ཝིཏྠཱརེནཱཏི ཨདྷིཔྤཱཡོ.

ཏེནཱདྷིཔྤེཏནྟི ‘‘ཨཀུསལཾ ཝཙཱིཀམྨཾ མནོདྭཱརེ སམུཊྛཱཏཱི’’ཏི ཝདནྟེན ཨདྷིཔྤེཏཾ. ‘‘ན ཨུཔོསཐཀྑནྡྷཀེ ཝུཏྟ’’ནྟི ཀསྨཱ ཝུཏྟཾ, ནནུ ཏེན ཨུཔོསཐཀྑནྡྷཀཏོ སུཏྟཾ ཨཱཧཊནྟི? ཀིཉྩཱཔི ཨཱཧཊཾ, ཏཏྠ ཨཝུཏྟོཡེཝ པན སོ ཏེན ཝུཏྟོཏི གཧིཏོཏི དསྶེནྟོ ‘‘ཏཏྠ ཨཝུཏྟམེཝཱ’’ཏིཨཱདིམཱཧ.

‘‘སུགཏིདུགྒཏཱིསུ ཨུཔཔཛྫནཾ སུཀཏདུཀྐཊཀམྨཏོ ན ཧོཏི, ཁནྡྷསིཝཱདཱིཧི པན ཧོཏཱིཏི གཧེཏྭཱ ‘ནཏྠི དིནྣ’ནྟིཨཱདིནཱ པརཱམསནྟསྶ ཝསེན ‘མིཙྪཱདིཊྛི…པེ… པརིབྷཎྜཱདཱིནི ཀརོཏཱི’ཏི ཝུཏྟ’’ནྟི ཝདནྟི. ཨབྷིཛ྄ཛྷཱདིཔདྷཱནཏྟཱཏི ཨེཏེན ཝིཛྫམཱནེསུཔི བྱཱཔཱདཱདཱིསུ ཡདཱ ཀཱཡཝཙཱིདྭཱརེསུ ཙེཏནཱ ¶ བལཝཏཱི ཧོཏི, ན ཏཐཱ ཨིཏརེ, ཏདཱ པདྷཱནབྷཱཝཏོ ཙེཏནཱ ཀཱཡཀམྨཾ ཝཙཱིཀམྨནྟི ཙ ཝོཧཱརཾ ལབྷཏི. སོ ཁོ པནསྶཱ པདྷཱནབྷཱཝོ པཱཎཱཏིཔཱཏཱདིསིདྡྷིཡཱ ཝིཉྙཱཡཏི. ཡདཱ པན ཏེསུཡེཝ དྭཱརེསུ ཨབྷིཛ྄ཛྷཱདཡོ བལཝནྟོ ཧོནྟི, ན ཏཐཱ ཙེཏནཱ, ཏདཱ ཏཏྠ ཝིཛྫམཱནཱཔི ཙེཏནཱ ཨཔདྷཱནབྷཱཝཏོ ཀཱཡཀམྨཾ ཝཙཱིཀམྨནྟི ཙ ཝོཧཱརཾ ན ལབྷཏི. ཨབྷིཛ྄ཛྷཱདཡོ པན པདྷཱནབྷཱཝཏོ སཏིཔི ཀཱཡངྒཝཱཙངྒཙོཔནེ སཀེན ཝཝཏྠཱནེན མནོཀམྨནྟྭེཝ ཝུཙྩནྟཱིཏི དསྶེཏི. ཡེ པན ‘‘ཏཱིསུཔི དྭཱརེསུ ཀམྨཔཐབྷཱཝེན ཨཔྤཏྟིཡཱ དྭཱརཏྟཡེཔི ཀམྨཔཐཔྤཏྟམནོཀམྨེན སཧ པཝཏྟིཡཱ ཙ ཙེཏནཱ ཨེཏྠ ཀམྨནྟི ན ཝུཙྩཏཱི’’ཏི ཝདནྟི, ཏེཧི ཨབྷིཛ྄ཛྷཱདཱིནཾ པདྷཱནསབྷཱཝཾཡེཝ སནྡྷཱཡ ཝུཏྟཾ སིཡཱ. ཨཐ ཝཱ ཙེཏནཱཡ ནིཔྤརིཡཱཡཀམྨབྷཱཝཏོ པརིཡཱཡཀམྨེ ཨནཝརོདྷེཏབྦཏྟཱ ‘‘ཨབྦོཧཱརིཀཱ’’ཏི ¶ ཝུཏྟཾ. ཨཏྟནོ སབྷཱཝེནེཝ པན སཱ ཨེཏྠཱཔི ཀམྨནྟི ཝུཙྩཏི. ཡཐཱཧ ‘‘ཙེཏནཱཧཾ, བྷིཀྑཝེ, ཀམྨཾ ཝདཱམཱི’’ཏིཨཱདི (ཀཐཱ. ༥༣༩). ཨཊྛཀཐཱཡཉྩ ‘‘ཏསྨིཾ དྭཱརེ སིདྡྷཱ ཙེཏནཱ’’ཏིཨཱདིནཱ ཙེཏནཱཡེཝ པདྷཱནཾ ཀཏྭཱ ཝུཏྟཾ. ཏེནེཝཱཧ ‘‘སབྷཱཝེནེཝ སཱ མནོཀམྨ’’ནྟིཨཱདི. ཨཐ ཝཱ ཀམྨཔཐཔྤཏྟཨབྷིཛ྄ཛྷཱདཱིཧི ཀཱཡཝཙཱིདྭཱརེ སཧཛཱཏཱ ཙེཏནཱ ཀཱཡཝཙཱིཀམྨཝསེན ཨབྦོཧཱརིཀཱ ཙེཏནཱསངྑཱཏམནོཀམྨཏྟཱཏི. ཡདི ཨབྷིཛ྄ཛྷཱདཡོ པདྷཱནཱ, ན ཙེཏནཱ, ཨེཝཾ སཏི ཨབྷིཛ྄ཛྷཱདཡོ ཙེཏྠ ཀམྨཾ, ན ཙེཏནཱ, ཨབྷིཛ྄ཛྷཱདིཔཀྑིཀཱ ཝཱ སཱ སིཡཱཏི ཨནུཡོགཾ མནསི ཀཏྭཱ ཨཱཧ ‘‘ཏིཝིདྷཱ, བྷིཀྑཝེ’’ཏིཨཱདི. ‘‘ཙེཏནཱཔི…པེ… མནོདྭཱརེ ཨེཝ སམུཊྛཧནྟཱི’’ཏི ཨིདཾ མནོདྭཱརེ ཙེཏནཱཡ ཨབྷིཛ྄ཛྷཱདཱིཧི མནོཀམྨབྷཱཝེ ནིབྦིསེསབྷཱཝདསྶནནྟི ཀཏྭཱ ‘‘ཙེཏནཱ…པེ… ཨདྷིཔྤཱཡོ’’ཏི ཨཱཧ. ཙེཏནཱ ཙེཏནཱཀམྨཾ, ཨབྷིཛ྄ཛྷཱདཡོ ཙེཏནཱསམྤཡུཏྟཀམྨནྟི ཨེཏྟཀམེཝ ཧི ཨེཏྠ ཝིསེསོཏི. ཨེཏྠ ཙ ཙེཏནཱཡ ཀཱཡཝཙཱིཀམྨབྷཱཝོ སིཡཱཏི ཨཱསངྐཱཡ ཨབྷཱཝཏོ མནོདྭཱརེ ཨཀུསལཀཱཡཝཙཱིཀམྨཱནཾ ཨནུཔྤཏྟིཏོ ཙ ཨབྦོཧཱརིཀཱཏི ན ཝུཏྟནྟི དཊྛབྦཾ.

ཝིརཏིཝིསིཊྛཱཏི ཝིརཏིཏོ ཙེཏནཱཡ པདྷཱནབྷཱཝམཱཧ. ཏཏྠ ‘‘ཏིཝིདྷཱ, བྷིཀྑཝེ, ཀཱཡསཉྩེཏནཱ’’ཏིཨཱདིནཱ (ཀཐཱ. ༥༣༩) ཨཱགམམྷི ‘‘པཱཎཱཏིཔཱཏཱདིཔཊིཔཀྑབྷཱུཏཱ’’ཏི ཡུཏྟིཾ དསྶེཏི. ཡསྨཱ ཙ པཊྛཱནེ ཙེཏནཱཝ ‘‘ཀམྨཔཙྩཡོ’’ཏི ¶ ཝུཏྟཱ, ན ཝིརཏི, ཨབྷིཛ྄ཛྷཱདཡོ ཝཱ, ཏསྨཱ ནིཔྤརིཡཱཡེན ཀམྨཾ ‘‘ཙེཏནཱ’’ཏི ཨནབྷིཛ྄ཛྷཱདཡོ ‘‘ཙེཏནཱཔཀྑིཀཱ ཝཱ’’ཏི ཝུཏྟཱཏི ཝེདིཏབྦཾ. ཨསངྐརཏོ ཀམྨདྭཱརཱནི ཝཝཏྠཔེནྟོ ‘‘རཀྑཏཱི’’ཏི, ཝིཔརིཡཱཡེན ‘‘བྷིནྡཏཱི’’ཏི ཝུཏྟོཏི རཀྑཎབྷིནྡནཱནི ཨནཱསེཏྭཱ ནཱསེཏྭཱ ཙ ཀཐནནྟི ཝུཏྟཱནཱིཏི.

ཀམྨཀཐཱཝཎྞནཱ ནིཊྛིཏཱ.

ཏཏིཡོ ཝིཀཔྤོ པཋམཙཏུཏྠཝིཉྙཱཎདྭཱརེསུཡེཝ ལབྦྷཏི, ན ཨིཏརཏྠ ‘‘སོཏཾ གྷཱན’’ནྟིཨཱདིནཱ ཨཝུཏྟཏྟཱ, ཨིཏརཐཱཔི ཝཱ ཨཝིབྷཏྟིཀེ ནིདྡེསེ ལབྦྷཏི. ཡཏོ སཾཝརཝསེན པཱཏིམོཀྑསཱིལཾ པཝཏྟཏི, ཏཾ དུསྶཱིལྱནྟི ཨཱཧ ‘‘དུསྶཱིལྱཾ པཱཎཱཏིཔཱཏཱདིཙེཏནཱ’’ཏི. ཨིཏརཱ སཾཝརཝིནིམུཏྟཱ ཨབྷིཛ྄ཛྷཱདོམནསྶཡུཏྟཱ ཏཔྤདྷཱནཱ ཝཱ ཨཀུསལདྷམྨཱ སཏིཔཊིཔཀྑཱ ཨཀུསལཱ དྷམྨཱ ¶ . ཨཱརམྨཎེ ཙིཏྟཝོསྶགྒཝསེན པཝཏྟོ ཨཀུསལཙིཏྟུཔྤཱདོ པམཱདོ. ཝཱིརིཡཔནོདནབྷཱཝཏོ ཐིནམིདྡྷཾ ‘‘ཀོསཛྫ’’ནྟི ཝུཏྟཾ, ཐིནམིདྡྷཔྤདྷཱནོ ཝཱ ཙིཏྟུཔྤཱདོ.

ཨསུདྡྷཏཱཏི ཨཀེཝལཏཱ ཨཉྙེན སམྨིསྶཏཱ. དྭཱརཉྷི དྭཱརནྟརིཀཀམྨསྶ དྭཱརཾ ཧོནྟཾ ཏེན མིསྶིཏཾ ཝིཡ ཧོཏི. ཏེནེཝཱཧ ‘‘མུསཱཝཱདཱདིནོཔི ཀཱཡདྭཱརེ པཝཏྟིསབྦྷཱཝཱ’’ཏི. ཀེཙི པན ‘‘ཨཝིཉྙེཡྻམཱནནྟརཱནཾ དྭཱརནྟརཙིཏྟཱནཾ ཨནྟརནྟརཱ ཨཔྤཝཏྟིཏོ སུདྡྷནྟི ཝུཏྟ’’ནྟི ཝདནྟི, ཏཾ ཨནེཀསྶཔི ཛཝནཝཱརསྶ ཀཱཡཀམྨཱདིབྷཱཝེན པབནྡྷནཝསེན པཝཏྟི ཨཏྠཱིཏི ཀཏྭཱ ཝུཏྟཾ. ཨཝིརུདྡྷཾ ཧོཏཱིཏི ཨཀུསལཀཱཡཀམྨཱདིབྷཱཝེན ཨཝདྷཱརེཏྭཱ ཨསཾཝརཾ ཝཏྭཱ པུན ཏསྶེཝ ཝཱཙཱཨསཾཝརདྭཱརཱདཱིསུ ཨུཔྤཏྟིཝཙནཾ ཀཱཡདྭཱརཱུཔལཀྑིཏོ ཨསཾཝརོ དྭཱརནྟརེ པཝཏྟོཔི ཀཱཡདྭཱརིཀོ ཨེཝཱཏི ཨེཝཾ སཾཝཎྞནཱཡ སཏི ན ཝིརུཛ྄ཛྷཏཱིཏི ཨཏྠོ. ཨིདཱནི ཏཾ ཨཝིརུཛ྄ཛྷནཱཀཱརཾ ‘‘ཨསཾཝརོ ཧཱི’’ཏིཨཱདིནཱ ཝིབྷཱཝེཏི. སདྭཱརེཏི ཨཏྟནོ དྭཱརེ. ཨསཾཝརོ དྭཱརནྟརེ ཨུཔྤཛྫམཱནོཔི སདྭཱརཝསེན ཨུཔྤནྣོཏི ཝུཙྩཏཱིཏི ཨེཏེན ཝཱཙཱཨསཾཝརདྭཱརེ ཨུཔྤནྣོཔི ཀཱཡིཀོ ཨསཾཝརོ ཙོཔནཀཱཡཨསཾཝརདྭཱརཝསེན ཨུཔྤནྣོཏྭེཝ ཝུཏྟོཏི དཊྛབྦཾ. ཨེས ནཡོ ཨིཏརཏྠཱཔི. ཀམྨཾ ཨཉྙདྭཱརེཏི ཀམྨསྶ དྭཱརནྟརཙརཎཾ པཱཀཊནྟི ཀཏྭཱ ཝུཏྟཾ.

ཨེཝཾ ¶ སཏཱིཏི ཙོཔནསངྑཱཏེ ཀཱཡཨསཾཝརདྭཱརེ ཨསཾཝརོཏི ཨེཏྟཀེ ཨེཝ གཧིཏེ. ཀམྨཔཐབྷཱཝཔྤཏྟསྶེཝ ཀམྨབྷཱཝོ ཨཊྛཀཐཱཡཾ ཝུཏྟོཏི ཨཱཧ ‘‘ཀམྨཔཐབྷཱཝཔྤཏྟཏཱཡ ཝཙཱིམནོཀམྨ’’ནྟི. སེསནྟི དྭཱརནྟརཱནུཔལཀྑིཏཾ. ཏཐཱ ན ཝུཙྩཏཱིཏི ཀཱཡཀམྨནྟི ན ཝུཙྩཏཱིཏི ཨཏྠོ. ཏཏྠེཝ ཝཀྑཱམཱཏི ཀམྨཔཐསཾསནྡནེ ཝཀྑཱམ. ‘‘སོ ཧི ཀཱཡདྭཱརེ ཙོཔནཔྤཏྟོ ཨཀུསལཾ ཀཱཡཀམྨཾ ཧོཏཱི’’ཏིཨཱདིནཱ (དྷ. ས. ཨཊྛ. ཀམྨཔཐསཾསནྡནཀཐཱ) ‘‘ཙོཔནཀཱཡཨསཾཝརདྭཱརཝསེན ཨུཔྤནྣོ ཨཀུསལཾ ཀཱཡཀམྨམེཝ ཧོཏཱི’’ཏིཨཱདིནཱ ཙ ཝཙཱིཀམྨཱདཱིནཉྩ ཀམྨཔཐཔྤཏྟཱནཾ ཨསཾཝརབྷཱུཏཱནཾ ཀཱཡཀམྨཱདིབྷཱཝེ ཨཱཔནྣེ ‘‘ཙཏུབྦིདྷཾ ཝཙཱིདུཙྩརིཏཾ ཨཀུསལཾ ཝཙཱིཀམྨམེཝ ཧོཏཱི’’ཏིཨཱདིནཱ ཨཔཝཱདེན ནིཝཏྟི དཊྛབྦཱཏི ཨེཝཾ ཝཀྑམཱནཏཾ སནྡྷཱཡཱཧ. ཨནྟོགདྷཏཱ དཊྛབྦཱ པཙྩཡསནྣིསྶིཏཨཱཛཱིཝཔཱརིསུདྡྷིསཱིལཱནཾ ཉཱཎཝཱིརིཡེཧི སཱདྷེཏབྦཏྟཱཏི ཨདྷིཔྤཱཡོ.

ཨཀུསལཀམྨཔཐཀཐཱཝཎྞནཱ

སརསེན ¶ ཨཏྟནོ སབྷཱཝེན. ཡཱཡ ཙེཏནཱཡ པཝཏྟམཱནསྶ ཛཱིཝིཏིནྡྲིཡསྶ པཙྩཡབྷཱུཏེསུ མཧཱབྷཱུཏེསུ ཨུཔཀྐམཀརཎཧེཏུ ཏཾམཧཱབྷཱུཏཔཙྩཡཱ ཨུཔྤཛྫནཀམཧཱབྷཱུཏཱ ནུཔྤཛྫིསྶནྟི, སཱ ཏཱདིསཔཡོགསམུཊྛཱཔིཀཱ ཙེཏནཱ པཱཎཱཏིཔཱཏོ ནཱམ. ལདྡྷུཔཀྐམཱནི ཧི བྷཱུཏཱནི ན པུརིམབྷཱུཏཱནི ཝིཡ ཝིསདཱནཱིཏི སམཱནཛཱཏིཡཱནཾ བྷཱུཏཱནཾ ཀཱརཎཾ ན ཧོནྟཱིཏི. ཨེཀསྶཔི པཡོགསྶ སཧསཱ ནིཔྥཱདནཝསེན ཀིཙྩསཱདྷིཀཱཡ བཧུཀྑཏྟུཾ པཝཏྟཛཝནེཧི ལདྡྷཱསེཝནཱཡ ཙ སནྣིཊྛཱཔཀཙེཏནཱཡ ཝསེན པཡོགསྶ མཧནྟབྷཱཝོ. སཏིཔི ཀདཱཙི ཁུདྡཀེ ཙེཝ མཧནྟེ ཙ པཱཎེ པཡོགསྶ སམབྷཱཝེ མཧནྟཾ ཧནནྟསྶ ཙེཏནཱ ཏིབྦཏརཱ ཨུཔྤཛྫཏཱིཏི ཝཏྠུསྶ མཧནྟབྷཱཝོཏི ཏདུབྷཡཾ ཙེཏནཱཡ བལཝབྷཱཝེནེཝ ཧོཏཱིཏི ཨཱཧ ‘‘པཡོག…པེ… བྷཱཝཏོ’’ཏི. ཡཐཱཝུཏྟཔཙྩཡཝིཔརིཡཱཡེཔཱིཏི པཡོགཝཏྠུཨཱདིཔཙྩཡཱནཾ ཨམཧཏྟེཔི. ཏཾཏཾཔཙྩཡེཧཱིཏི གུཎཝནྟཏཱདིཔཙྩཡེཧི. ཨེཏྠ ཙ ཧནྟབྦསྶ གུཎཝནྟཏཱཡ མཧཱསཱཝཛྫཏཱ ཝཏྠུམཧནྟཏཱཡ ཝིཡ དཊྛབྦཱ. ཀིལེསཱནཾ ཨུཔཀྐམཱནཾ དྭིནྣཉྩ མུདུཏཱཡ ཏིབྦཏཱཡ ཙ ཨཔྤསཱཝཛྫཏཱ མཧཱསཱཝཛྫཏཱ ཙ ཡོཛེཏབྦཱ. པཱཎོ པཱཎསཉྙིཏཱ ཝདྷཀཙིཏྟཉྩ པུབྦབྷཱགསམྦྷཱརཱ, ཨུཔཀྐམོ ¶ ཝདྷཀཙེཏནཱསམུཊྛཱཔིཏོ, པཉྩསམྦྷཱརཝཏཱི པཱཎཱཏིཔཱཏཙེཏནཱཏི སཱ པཉྩསམྦྷཱརཝིནིམུཏྟཱ དཊྛབྦཱ. ཨེས ནཡོ ཨདིནྣཱདཱནཱདཱིསུཔི.

མནྟཔརིཛཔྤནེན པརསྶ སནྟཀཧརཎཾ ཝིཛྫཱམཡོ, ཝིནཱ མནྟེན པརསནྟཀསྶ ཀཱཡཝཙཱིཔཡོགེཧི ཨཱཀཌྜྷནཾ ཏཱདིསཨིདྡྷིཡོགེན ཨིདྡྷིམཡོ པཡོགོཏི ཨདིནྣཱདཱནསྶཔི ཚ པཡོགཱ སཱཧཏྠིཀཱདཡོ ཝེདིཏབྦཱ.

ཨབྷིབྷཝིཏྭཱ ཝཱིཏིཀྐམནེ མིཙྪཱཙཱརོ མཧཱསཱཝཛྫོ, ན ཏཐཱ ཨུབྷིནྣཾ སམཱནཙྪནྡབྷཱཝེ. ‘‘ཙཏྟཱརོ སམྦྷཱརཱཏི ཝུཏྟཏྟཱ ཨབྷིབྷཝིཏྭཱ ཝཱིཏིཀྐམནེ སཏིཔི མགྒེནམགྒཔཊིཔཏྟིཨདྷིཝཱསནེ པུརིམུཔྤནྣསེཝནཱབྷིསནྡྷིཔཡོགཱབྷཱཝཏོ མིཙྪཱཙཱརོ ན ཧོཏི ཨབྷིབྷུཡྻམཱནསྶཱ’’ཏི ཝདནྟི. སེཝནཙིཏྟེ སཏི པཡོགཱབྷཱཝོ ན པམཱཎཾ ཨིཏྠིཡཱ སེཝནཔྤཡོགསྶ ཡེབྷུཡྻེན ཨབྷཱཝཏོ. པུརིསསྶེཝ ཧི ཡེབྷུཡྻེན སེཝནཔྤཡོགོ ཧོཏཱིཏི ཨིཏྠིཡཱ པུརེཏརཾ སེཝནཙིཏྟཾ ཨུཔཊྛཱཔེཏྭཱ ནིཔནྣཱཡཔི མིཙྪཱཙཱརོ ན སིཡཱཏི ཨཱཔཛྫཏི, ཏསྨཱ པུརིསསྶ ཝསེན ཨུཀྐཾསཏོ ཙཏྟཱརོ སམྦྷཱརཱ ཝུཏྟཱཏི དཊྛབྦཾ. ཨཉྙཐཱ ཨིཏྠིཡཱ པུརིསཀིཙྩཀརཎཀཱལེ ¶ པུརིསསྶཔི སེཝནཔྤཡོགཱབྷཱཝཏོ མིཙྪཱཙཱརོ ན སིཡཱཏི. ཀེཙི པན ‘‘ཨཏྟནོ རུཙིཡཱ པཝཏྟིཏསྶ ཏཱིཎི ཨངྒཱནི, བལཀྐཱརེན པཝཏྟིཏསྶ ཏཱིཎཱིཏི སབྦཱནི ཨགྒཧིཏགྒཧཎེན ཙཏྟཱརཱི’’ཏི ཝདནྟི, ཝཱིམཾསིཏྭཱ གཧེཏབྦཾ.

དུཊྛཙིཏྟསྶ ཨམརཎཱདྷིཔྤཱཡསྶ ཕརུསཀཱཡཝཙཱིཔཡོགསམུཊྛཱཔིཀཱ ཕརུསཙེཏནཱ ཕརུསཝཱཙཱ. མརཎཱདྷིཔྤཱཡེ པན སཏི ཨཏྠསིདྡྷིཏདབྷཱཝེསུ པཱཎཱཏིཔཱཏཱ བྱཱཔཱདཱ ཙ ཧོནྟཱིཏི. ཡཾ པཏི ཕརུསཝཱཙཱ པཡུཛྫཏི, ཏསྶ སམྨུཁཱཝ སཱིསཾ ཨེཏི. ‘‘པརམྨུཁེཔི ཕརུསཝཱཙཱ ཧོཏཱི’’ཏི ཝདནྟི.

ཡདི ཙེཏནཱཡ སབྦདཱ ཀམྨཔཐབྷཱཝཱབྷཱཝཏོ ཨནིཡཏོ ཀམྨཔཐབྷཱཝོཏི ཀམྨཔཐརཱསིམྷི ཨཝཙནཾ, ནནུ ཨབྷིཛ྄ཛྷཱདཱིནམྤི ཀམྨཔཐཾ ཨཔྤཏྟཱནཾ ཨཏྠིཏཱཡ ཨནིཡཏོ ཀམྨཔཐབྷཱཝོཏི ཏེསམྤི ཀམྨཔཐརཱསིཡཾ ཨཝཙནཾ ཨཱཔཛྫཏཱིཏི? ནཱཔཛྫཏི, ཀམྨཔཐཏཱཏཾསབྷཱགཏཱཧི ཏེསཾ ཏཏྠ ཝུཏྟཏྟཱ. ཡདི ཨེཝཾ ཙེཏནཱཔི ཏཏྠ ཝཏྟབྦཱ སིཡཱཏི? སཙྩམེཏཾ, སཱ པན པཱཎཱཏིཔཱཏཱདིཀཱཏི པཱཀཊོ ཏསྶཱ ¶ ཀམྨཔཐབྷཱཝོཏི ན ཝུཏྟཾ སིཡཱ. ཙེཏནཱཡ ཧི ‘‘ཙེཏནཱཧཾ, བྷིཀྑཝེ, ཀམྨཾ ཝདཱམི,’’‘‘ཏིཝིདྷཱ, བྷིཀྑཝེ, ཀཱཡསཉྩེཏནཱ ཨཀུསལཾ ཀཱཡཀམྨ’’ནྟིཨཱདིཝཙནེཧི ཀམྨབྷཱཝོ དཱིཔིཏོ. ཀམྨཾཡེཝ ཙ སུགཏིདུགྒཏཱིནཾ ཏདུཔྤཛྫནསུཁདུཀྑཱནཉྩ པཐབྷཱཝེན པཝཏྟཾ ཀམྨཔཐོཏི ཝུཙྩཏཱིཏི པཱཀཊོ ཏསྶཱ ཀམྨཔཐབྷཱཝོ. ཨབྷིཛ྄ཛྷཱདཱིནཾ པན ཙེཏནཱསམཱིཧནབྷཱཝེན སུཙརིཏདུཙྩརིཏབྷཱཝོ, ཙེཏནཱཛནིཏཏཾབནྡྷཏིབྷཱཝེན སུགཏིདུགྒཏིཏདུཔྤཛྫནསུཁདུཀྑཱནཾ པཐབྷཱཝོ ཙཱཏི ན ཏཐཱ པཱཀཊོ ཀམྨཔཐབྷཱཝོཏི ཏེ ཨེཝ ཀམྨཔཐརཱསིབྷཱཝེན ཝུཏྟཱ. ཨཏཐཱཛཱཏིཡཏྟཱ ཝཱ ཙེཏནཱ ཏེཧི སདྡྷིཾ ན ཝུཏྟཱ སིཡཱ. ཝིཙཱརེཏྭཱ གཧེཏབྦཾ.

པཱཎཱཏིཔཱཏཱདཱིནཾ ཨཱརམྨཎཱནེཝ ཏབྦིརཏིཨཱརམྨཎཱནཱིཏི པཉྩ སིཀྑཱཔདཱ པརིཏྟཱརམྨཎཱ ཨེཝཱཏི ཝཙནེན ཨདིནྣཱདཱནཱདཱིནཾ སཏྟཱརམྨཎཏཱཝཙནསྶ ཝིརོདྷཾ ཙོདེཏི. ཏཐཱ ཧི ཝཀྑཏི ‘‘ཝཱིཏིཀྐམིཏབྦཏོཡེཝ ཧི ཝེརམཎཱི ནཱམ ཧོཏཱི’’ཏི. སཡམེཝ པརིཧརིསྶཏཱིཏི སིཀྑཱཔདཝིབྷངྒེ པཉྷཔུཙྪཀཝཎྞནཾ སནྡྷཱཡ ཝདཏི. ཏཏྠ ཧི ‘‘ཡསྨཱ སཏྟོཏི སངྑྱཾ གཏེ སངྑཱརེཡེཝ ཨཱརམྨཎཾ ཀརོཏི, ཏསྨཱ པརིཏྟཱརམྨཎཱཏི ཝུཙྩནྟཱི’’ཏི ཝུཏྟཾ.

དུགྒཏཏཱདཱིནཱིཏི ¶ ཨཱདི-སདྡེན ‘‘ཨལདྡྷཱལཱབྷོ ལདྡྷཝིནཱསོ ཨིཙྪིཏཱནཾ བྷོགཱནཾ ཀིཙྪཔཊིལཱབྷོ རཱཛཱདཱིཧི སཱདྷཱརཎབྷོགཏཱ དུཀྑཝིཧཱརོ སཱསངྐཝིཧཱརོ’’ཏི ཨེཝམཱདཡོ སངྒཧིཏཱ. ཀེཙི པན ‘‘དིཊྛེཝ དྷམྨེ བྷོགཛཱནིཨཱདཡོ ནིསྶནྡཕལ’’ནྟི ཝདནྟི.

ཀུསལཀམྨཔཐཀཐཱཝཎྞནཱ

ཏཱསཉྩ ཝིརཏཱིནཾ ཙེཏནཱསམྤཡུཏྟཏྟཱ ཙེཏནཱདྭཱརེན སུགཏིདུགྒཏིཏདུཔྤཛྫནསུཁདུཀྑཱནཾ པཐབྷཱཝོ ཡུཏྟོཏི ཨདྷིཔྤཱཡོ.

ཀམྨཔཐསཾསནྡནཀཐཱཝཎྞནཱ

ཏཐཱཏི ཀམྨཔཐཔྤཏྟཱནཾ. ཀེཙཱིཏི དྷམྨསིརིཏྠེརཾ སནྡྷཱཡཱཧ. སོ ཧི ཀམྨཔཐཔྤཏྟཱནམེཝ དུསྶཱིལྱཱདཱིནཾ སུསཱིལྱཱདཱིནཉྩ ཀམྨཔཐེཧི ཨཏྠཏོ ནཱནཏྟཱབྷཱཝདསྶནཾ, ཏེསཾ ཝཱ ཕསྶདྭཱརཱདཱིཧི ཨཝིརོདྷབྷཱཝེན དཱིཔནཾ ཀམྨཔཐསཾསནྡནནྟི ཝདཏི. ཀམྨཔཐཏཱ ནཏྠཱིཏི ཨེཏེན ཡཐཱཝུཏྟཱནཾ ཨསཾཝརསཾཝརཱནཾ ¶ ཏེསཾ ཝཱདེ ཀམྨཔཐསཾསནྡནེ ཨསངྒཧིཏཏཾ དསྶེཏི. ཡེ པན སངྒཧཾ ལབྷནྟི, ཏེསཾ གཧཎེ པཡོཛནཱབྷཱཝཾ དསྶེཏུཾ ‘‘ཏིཝིདྷ…པེ… དསྶནེནཱ’’ཏི ཝུཏྟཾ. ཨེཝཾ པུརིམཔཀྑེ སངྑེཔཏོ དོསཾ ཝཏྭཱ དུཏིཡཔཀྑེཔི ཝཏྟུཾ ‘‘ན ཙ དུཙྩརིཏཱན’’ནྟིཨཱདིམཱཧ. ཏེན ཡེ དུཙྩརིཏསུཙརིཏཨསཾཝརསཾཝརཱ ཨནུཙརཱིཡནྟི, ཏེསཾ ཀཱཡཀམྨཱདིཏཱ ཝིདྷཱིཡཏཱིཏི དསྶེཏི. ‘‘པཉྩཕསྶདྭཱརཝསེན ཨུཔྤནྣོ ཨསཾཝརོ ཨཀུསལཾ མནོཀམྨམེཝ ཧོཏཱི’’ཏིཨཱདིནཱ ཧི ཝུཏྟནྟི. ཡདི ཙཱཏིཨཱདིནཱ ཨནཝསེསཔརིཡཱདཱནཱབྷཱཝམཱཧ. ཨུཔྤཏྟི ན ཝཏྟབྦཱཏི ཀམྨཔཐ…པེ… ཝདནྟེཧི ‘‘མནོཀམྨཾ ཚཕསྶདྭཱརཝསེན ཨུཔྤཛྫཏཱི’’ཏི ན ཝཏྟབྦནྟི ཨཏྠོ. ཨཐ ཝཱ ཡདི ཀམྨཔཐཔྤཏྟཱནེཝ དུསྶཱིལྱཱདཱིནི ཀཱཡཀམྨཱདིནཱམེཧི ཨཊྛཀཐཱཡཾ ཝུཏྟཱནཱིཏི ཨེཝཾ ཝདནྟེཧི ཨཊྛཀཐཱཙརིཡེཧི མནོཀམྨསྶ ཚཕསྶདྭཱརཝསེན ཨུཔྤཏྟི ན ཝཏྟབྦཱཏི ཨཏྠོ. ཏཾཏཾཀམྨབྷཱཝསྶ ཝུཏྟཏྟཱཏི ‘‘ཏིཝིདྷཾ ཀཱཡདུཙྩརིཏཾ ཨཀུསལཾ ཀཱཡཀམྨམེཝ ཧོཏཱི’’ཏིཨཱདིཾ (ཝིབྷ. ༩༡༣) སནྡྷཱཡཱཧ.

ཀམྨནྟརམྤི ཏཾདྭཱརིཀཀམྨམེཝ སིཡཱཏི པཱཎཱཏིཔཱཏཱདིཀསྶ ཝཙཱིཀམྨཱདིབྷཱཝམཱསངྐཏི. ཏསྨཱཏི ཡསྨཱ ཀེསཉྩི ཨསཾཝརཱནཾ སཾཝརཱནཉྩ ཀམྨཔཐཏཱ ནཏྠི, ཀཱཡདུཙྩརིཏཱདཱིནཉྩ ཀམྨཔཐེཧི ནཱནཏྟཱབྷཱཝདསྶནེན པཡོཛནཾ ནཏྠི, ན ཙ དུཙྩརིཏཱདཱིནཾ ཕསྶདྭཱརཱནཾ ཝསེན ཨུཔྤཏྟི ¶ དཱིཔིཏཱ, ན ཙཱཡཾ ཝིདྷི ནིརཝསེསསངྒཱཧིཀཱ, ཀམྨཱནཉྩ སངྐརོ ཨཱཔཛྫཏི, ཨཊྛཀཐཱཡཉྩ པུབྦཱཔརཝིརོདྷོ, ཏསྨཱཏི ཨཏྠོ. སམཱནནཱམཏཱ ཀཱཡཀམྨཱདིཏཱ. སཱམཉྙནཱམཱཝིཛཧནཾ ཀཱཡཀམྨཱདིབྷཱཝཱཝིཛཧནཾ. ཨུབྷཡེསནྟི ཀམྨཔཐཱཀམྨཔཐཱནཾ. ཨུཔྤཏྟིཔརིཡཱཡཝཙནཱབྷཱཝཏོཏི ཨེཏེན ཕསྶདྭཱརཨསཾཝརདྭཱརཱདཱིནཾ ཏཾདྭཱརིཀཀམྨཱནཉྩ ཨཏྠཏོ ནཱནཏྟཱབྷཱཝེཔི ཏཐཱ ཏཐཱ པཝཏྟདེསནཱཝསེན ཏེ ཝིཙཱརིཏཱཏི དསྶེཏི. ‘‘ཨཀུསལཾ ཀཱཡཀམྨཾ པཉྩཕསྶདྭཱརཝསེན ན ཨུཔྤཛྫཏཱི’’ཏིཨཱདིཀོ དུཏིཡཝིནིཙྪཡོ.

ཀཱཡེ ཝཱཙཱཡ ཙ…པེ… སིདྡྷིཏོཏི ཨེཏེན ཙོཔནཔྤཏྟཾ ཨཀུསལཾ མནོཀམྨཾ ཙོཔནཾ ཨཔྤཏྟཏོ ཝིསེསེཏྭཱ དསྶེཏུཾ ‘‘ཀཱཡཝཙཱིཀམྨ’’ནྟི ཝུཏྟཾ, ན པན ཀཱཡཝཙཱིཀམྨབྷཱཝཏོཏི དསྶེཏི. ཏེན ཀཱཡཝཙཱིགཧཎཾ ཡཐཱཝུཏྟཙོཔནཔྤཏྟཾ ཨེཝ ཝིབྷཱཝེཏཱིཏི དཊྛབྦཾ. ཏེནེཝཱཧ – ‘‘ཙོཔནཔྤཏྟཾ ཨཀུསལཾ ཀཱཡདྭཱརེ ཝཙཱིདྭཱརེ ཙ མནོཀམྨཾ ཧོཏཱི’’ཏི. ཏཾ-སདྡེ ¶ ཝུཏྟེ ཡཾ-སདྡོ ཨབྱབྷིཙཱརིཏསམྦནྡྷཏཱཡ ཝུཏྟོཡེཝ ཧོཏཱིཏི ཀཏྭཱ ‘‘ཡཾ ཨུཔྤཛྫཏཱི’’ཏི ཝུཏྟཾ. ཨུཔྤཱདམཏྟཔརིཙྪིནྣེནཱཏི ཚཕསྶདྭཱརིཀཀམྨེནཱཏི ཨཏྠོ. མཏྟ-སདྡེན ཝིསེསནིཝཏྟིཨཏྠེན མནོཀམྨཏཱཝིསེསཾ ནིཝཏྟེཏི. ནིཡམསྶ ཨེཝ-སདྡསྶ ཨཀཏཏྟཱ ‘‘ཀཱཡཝཙཱིཀམྨམེཝ ཧོཏཱི’’ཏི ཨཝུཏྟཏྟཱ. ཨིདཱནི ནིཡམཱཀརཎེན ལདྡྷགུཎཾ དསྶེནྟོ ‘‘ན པན སབྦམྤཱི’’ཏིཨཱདིམཱཧ.

‘‘ནིཡམསྶ ཨཀཏཏྟཱ’’ཏིཨཱདི པུརིམནཡོཏི ཨདྷིཔྤེཏོ. ཝཏྟུཨདྷིཔྤཱཡཱནུརོདྷིནཱི སདྡཔྤཝཏྟཱིཏི སམཱསཔདེ ཨེཀདེསོཔི ཨཱཀཌྜྷཱིཡཏི ཨདྷིཀཱརཝསེནཱཏི ཨདྷིཔྤཱཡེན ‘‘ཀམྨ-སདྡམཏྟེན སམྦནྡྷཾ ཀཏྭཱ’’ཏི ཝུཏྟཾ. ཡཾ པན ཝདནྟཱིཏིཨཱདིནཱ ཨེཏྠ པདཀཱརམཏསྶ ཨཡུཏྟཏཾ དསྶེཏི. ཏཏྠ ཙེཏནཱཔཀྑིཀཱནནྟི ཀཱཡཝཙཱིཀམྨབྷཱུཏཙེཏནཱཔཀྑིཀཱནཾ. སཏནྟི སམཱནཱནཾ. ཏཾཏཾདྭཱརཀམྨཔཐཱནཉྩཱཏི ཨིདཾ ཨིམསྶ ཙིཏྟསྶ ཀམྨཔཐབྷཱཝེན པཝཏྟཾ ཀཱལཾ སནྡྷཱཡ ཝུཏྟཾ, ན སབྦདཱ, ཀམྨཔཐབྷཱཝེནེཝ པཝཏྟནཏོ. ཙ-སདྡེན ཝཱ ཨཀམྨཔཐསངྒཧོ དཊྛབྦོ. ཨཐ ཝཱ ཏཾཏཾདྭཱརཱ ཙ ཏཾཏཾདྭཱརཀམྨཔཐཱ ཙ ཏཾཏཾདྭཱརཀམྨཔཐཱཏི ‘‘ཏཾཏཾདྭཱརཱ’’ཏི པདེན ཨཀམྨཔཐཱནཾ སཾཝརཱནཾ སངྒཧོ དཊྛབྦོ. ཏེན སབྷཱཝེནཱཏི མནོཀམྨསྶ དྭཱརབྷཱཝེན, ན ཨཏྟནོཏི ཨདྷིཔྤཱཡོ. ཨེཝམིདྷཱཔཱིཏི ཙིཏྟཛནིཏོ ཙིཏྟསམྤཡུཏྟསྶ ཀམྨསྶ དྭཱརབྷཱཝོ ཙིཏྟེཔི ཨུཔཙརིཏོཏི ཨཏྠོ. ཝཏྟབྦམེཝ ནཏྠི ཨནནྟརཔཙྩཡབྷཱུཏམནོརཧིཏསྶ ཙིཏྟསྶ ཨབྷཱཝཏོཏི.

དྭཱརཀཐཱཝཎྞནཱ ནིཊྛིཏཱ.

ཀམཱབྷཱཝནིཡམཱབྷཱཝེ ¶ སབྦཱརམྨཎཏཱདཱིཏི ཨཱདི-སདྡེན སངྒཎྷཱཏི. ན ཧི…པེ… ཨཏྠཱིཏི པདྷཱནེ ཨསམྦྷཝཏོ ཨཔྤདྷཱནཾ ཨདྷིཀརཱིཡཏཱིཏི དསྶེཏི.

དྷམྨུདྡེསཝཱརཀཐཱ

ཕསྶཔཉྩམཀརཱསིཝཎྞནཱ

‘‘ཏསྨིཾ སམཡེ ཕསྶོ ཧོཏཱི’’ཏིཨཱདིཀཱཡ པཱལི༹ཡཱ ཕསྶཱདཱིནཾ ཀཱམཱཝཙརཏཱདིདསྶནེ ན ཏཔྤརབྷཱཝོ, སབྷཱཝདསྶནེ ཨེཝ པན ཏཔྤརབྷཱཝོཏི དསྶེཏི ‘‘ན ཧི ཕསྶཱདཱིན’’ནྟིཨཱདིནཱ.

ཙིཏྟཀིརིཡཱབྷཱཝེནཱཏི ¶ ཙིཏྟབྱཱཔཱརབྷཱཝེན. ཕསྶསྶ སམྤཛྫནམུཔྤཛྫནམེཝ. སནྣིཔཏིཏཔྤཝཏྟིཡཱ པཙྩཡོ ཧོཏཱིཏི ཨེཏེན ཙིཏྟཱརམྨཎསནྣིཔཱཏཀཱརཎཾ ཕསྶོ ཙིཏྟཱརམྨཎསནྣིཔཱཏོཏི ཝུཏྟོཏི དསྶེཏི. ཕསྶོ ཧི ཙིཏྟསྶ ཨཱརམྨཎེ ཕུསནཱཀཱརེནེཝ པཝཏྟིཏོ ཏསྶ ཨཱརམྨཎེ སནྣིཔཏིཏཔྤཝཏྟིཡཱ པཙྩཡོཏི ཙ ཝུཙྩཏི. སཱ ཙསྶ ཕུསནཱཀཱརཔྤཝཏྟི སཱཁགྒེ ཋིཏཾ དིསྭཱ བྷཱུམིསཎྛིཏསྶ ཨཝཱིརཀཔུརིསསྶ ཛངྒྷཙལནཾ, ཨམྦིལཨམྦཔཀྐཱདིཾ ཁཱདནྟཾ དིསྭཱ མུཁེ ཁེལུ༹པྤཏྟི, དཡཱལུཀསྶ པརཾ ཧཉྙམཱནཾ དིསྭཱ སརཱིརཀམྤནནྟི ཨེཝམཱདཱིསུ པརིབྱཏྟཱ ཧོཏི. ཏབྦིསེསབྷཱུཏཱ རཱུཔདྷམྨཱཏི ཡཐཱ པཊིཧནནཝསེན ཨཉྙམཉྙཾ ཨཱསནྣཏརཾ ཨུཔྤཛྫམཱནེསུ རཱུཔདྷམྨཝིསེསེསུ སངྒྷཊྚནཔརིཡཱཡོ, ཨེཝཾ ཙིཏྟཱརམྨཎཱནཾ ཝིསཡཀརཎཝིསཡབྷཱཝཔྤཏྟི པཊིཧནནཱཀཱརེན ཧོཏི. སོ ཙ ཙིཏྟནིསྶིཏོ དྷམྨཝིསེསོ སངྒྷཊྚནཔརིཡཱཡེན ཝུཏྟོ, ཡདཱཧ ‘‘ཨེཝ’’ནྟིཨཱདི. ཀེཙི པན ‘‘སངྒྷཊྚནརསོ ཕསྶོ པཉྩདྭཱརིཀོཝ, ན ཨིཏརོ ཝཏྠཱརམྨཎསངྒྷཊྚནཱབྷཱཝཏོ’’ཏི ཝདནྟི, ཏཾ ན ཡུཛྫཏི ཨུཔཙཱརསིདྡྷཏྟཱ སངྒྷཊྚནསྶ. ཨིཏརཐཱ པཉྩདྭཱརིཀསྶཔི ཏཾ ན སམྦྷཝེཡྻཱཏི. ཨིནྡྲིཡམནསིཀཱརེསུ ཡཐཱཔཝཏྟམཱནེསུ ཏཾཏཾཨཱརམྨཎེ ཝིཉྙཱཎཾ ཨུཔྤཛྫཏི, ཏེསཾ ཏཐཱཔཝཏྟིཡེཝ ཝིཉྙཱཎསྶ ཝིསཡབྷཱཝཀརཎཾ.

‘‘ཡཾ ཁོ, བྷིཀྑཝེ, ཨིམེ པཉྩ ཀཱམགུཎེ པཊིཙྩ ཨུཔྤཛྫཏི སུཁཾ སོམནསྶཾ, ཨཡཾ ཝུཙྩཏི ཀཱམཱནཾ ཨསྶཱདོ’’ཏིཨཱདིཝཙནཏོ (ཨ. ནི. ༩.༣༤) སུཁཝེདནཱཝ ཨསྶཱདོཏི ཨཱཧ ¶ ‘‘ཨསྶཱདབྷཱཝཏོ’’ཏི. ཕུསནཱདིབྷཱཝེན ཨཱརམྨཎགྒཧཎཾ ཨེཀདེསཱནུབྷཝནནྟི ཨནུཔཙརིཏམེཝ ཕསྶཱདཱིནཾ ཨནུབྷཝནཀིཙྩམཱཧ.

ནིམིཏྟེནཱཏི ནཱིལཱདིནཱ དཱིགྷཱདིནཱ ཙ ནིམིཏྟེན. ཨེཏེནུཔཱཡེནཱཏི ཡཐཱ ཉཱཎཔྤདྷཱནེ ཙིཏྟུཔྤཱདེ སཉྙཱ ཉཱཎམནུཝཏྟཏི, ཨེཝཾ སམཱདྷིཔྤདྷཱནེ སམཱདྷིནྟི དསྶེཏི.

པབནྡྷཏཱིཏི པཊྛཔེཏི སམྤཡུཏྟདྷམྨེ སཀསཀཀིཙྩེ པཊྛཔེཏི. ཏེནེཝ ཧི ཏདཏྠཾ ཝིཝརནྟོ ‘‘པཝཏྟེཏཱི’’ཏི ཨཱཧ.

ཝིཛྫམཱནཏཱཝཱཙཱི ཧོཏི-སདྡོ, ཝིཛྫམཱནཏཱ ཙ སངྑཏདྷམྨཱནཾ ཨུཔྤཛྫནེན ཝིནཱ ནཏྠཱིཏི ‘‘ཙིཏྟཾ ན ཏཐཱ ཨཏྠཏོ ནུཔྤཛྫཏཱི’’ཏི ཝུཏྟཾ. ཏེན ཡསྨཱ ཙིཏྟཾ ¶ ན ནུཔྤཛྫཏི ཨུཔྤཛྫཏི ཨེཝ, ཏསྨཱ ཙིཏྟཾ ཧོཏཱིཏི ཝུཏྟནྟི ཨཡམེཏྠ ཨཊྛཀཐཱཡ ཨཏྠོ. ཨེཝམཝཊྛིཏེ ཧོཏི-ཨུཔྤཛྫཏི-སདྡཱནཾ སམཱནཏྠཏྟེན ན ཀིཉྩི པཡོཛནཾ དིསྶཏི. ཨཐ ཝཱ བྷཝནཾ ནཱམ སཏྟཱ, སཏྟཱ ཙ ཨུཔྤཱདཱདིནཱ སམངྒིཏཱཏི ཕསྶཱདཱིནཾ ཁཎཏྟཡཔརིཡཱཔནྣཏཱ ‘‘ཕསྶོ ཧོཏཱི’’ཏིཨཱདཱིསུ ཧོཏི-སདྡེན ཝུཏྟཱ. ཏཏྠ ཡོ བྷཱཝོ ཨུཔྤཱདསམངྒཱི, ན སོ ན ཧོཏི ནཱམ, ཏསྨཱ ཨུཔྤཛྫཏི-སདྡེན ཝུཙྩམཱནསྶ ཨཏྠསྶ ཧོཏི-སདྡཝཙནཱིཡཏཱ ན ན སམྦྷཝཏི. ཨུཔྤནྣཾ ཧོཏཱིཏི ཨེཏྠ པན ཀིཉྩཱཔི ཨུཔྤནྣ-སདྡེནེཝ ཨུཔྤཱདཱདིསམངྒིཏཱ ཝུཙྩཏི, ཏབྦྷཱཝཱནཏིཝཏྟི པན ཧོཏི-སདྡེན ཝུཏྟཱ ཁཎཏྟཡཝཱིཏིཝཏྟེཔི ཨུཔྤནྣ-སདྡསྶ ཝཏྟནཏོ, ཏསྨཱ ན ཨེཏྠ ཨུཔྤཛྫཏི-སདྡེན སམཱནཏྠཏཱསབྦྷཱཝདསྶནཾ ཝིཡ ཨུཔྤཛྫཏིདསྶནམྤི ཝིརུཛ྄ཛྷཏི པཱཀཊཀརཎབྷཱཝཏོ. ཨིཏརཐཱ ‘‘ཙིཏྟཾ ཨུཔྤནྣཾ ཧོཏཱི’’ཏི ཨིམིནཱཝ ཙིཏྟསྶ ཝིཛྫམཱནབྷཱཝོ དསྶིཏོཏི ཀིཾ པུན ཝིཛྫམཱནབྷཱཝདསྶནེནཱཏི ན ན སཀྐཱ ཝཏྟུཾ, སམཡཝཝཏྠཱནཝསེན སཝིསེསཾ ཝུཏྟམྤི ཙིཏྟཾ ཕསྶཱདཱིཧི སཧུཔྤཏྟིཡཱ སུཊྛུཏརཾ ནིབྦིསེསནྟི དསྶེཏུཾ ཙིཏྟསྶ པུན ཝཙནཾ. ཨུདྡིཊྛདྷམྨཱནཾཡེཝ ཙེཏྠ ནིདྡེསཝཱརེ ཝིབྷཛནཾ, ན ཝིབྷངྒེ ཝིཡ པཱལི༹ཡཱ ཨཱརུལ༹ྷསབྦཔདཱནནྟི ‘‘ཨུདྡེསཝཱརེ སངྒཎྷནཏྠཾ ནིདྡེསཝཱརེ ཝིབྷཛནཏྠ’’ནྟི ཨཡམྤི ཨཏྠོ ནིཙྩལོ. ཏཐཱ ཧི ‘‘ཡསྨིཾ སམཡེ རཱུཔཱུཔཔཏྟིཡཱ མགྒཾ བྷཱཝེཏཱི’’ཏིཨཱདཱིསུ མགྒཱདཡོ ན ཝིབྷཏྟཱ. ཨཔིཙ ཨདྷིཔཏིབྷཱཝེན ཨིནྡྲིཡེསུ ཝིཡ ཕསྶཝེདནཱསཉྙཱཙེཏནཱཧི སཧ སབྦཙིཏྟུཔྤཱདསཱདྷཱརཎརཱསིཡཾ གཧེཏབྦཏྟཱ སམཡཝཝཏྠཱནེ ཝུཏྟམྤི ཙིཏྟཾ ཕསྶཔཉྩམཀེ ཝུཏྟནྟི དཊྛབྦཾ.

ཛྷཱནངྒརཱསིཝཎྞནཱ

ཝིཏཀྐནནྟི ¶ ཝིཏཀྐནཀིརིཡཱ, སཱ ཙ ཝིཏཀྐསྶ ཨཏྟནོ པཙྩཡེཧི པཝཏྟིམཏྟམེཝཱཏི བྷཱཝནིདྡེསོ ཝསཝཏྟིབྷཱཝནིཝཱརཎཱཡ ཧོཏི. ཡསྨིཾ ཨཱརམྨཎེ ཙིཏྟཾ ཨབྷིནིརོཔེཏི, ཏཾ ཏསྶ གཧཎཡོགྱཾ ཀརོནྟོ ཝིཏཀྐོ ཨཱཀོཊེནྟོ ཝིཡ པརིཝཏྟེནྟོ ཝིཡ ཙ ཧོཏཱིཏི ཏསྶ ཨཱཀོཊནལཀྑཎཏཱ པརིཡཱཧནནརསཏཱ ཙ ཝུཏྟཱ. ཨིདཉྩ ལཀྑཎཾ ཀིཙྩསནྣིསྶིཏཾ ཀཏྭཱ ཝུཏྟཾ. དྷམྨཱནཉྷི སབྷཱཝཝིནིམུཏྟཱ ཀཱཙི ཀིརིཡཱ ནཱམ ནཏྠི, ཏཐཱ གཧེཏབྦཱཀཱརོ. བོདྷནེཡྻཛནཱནུརོདྷེན པན པརམཏྠཏོ ཨེཀསབྷཱཝོཔི སབྷཱཝདྷམྨོ པརིཡཱཡཝཙནེཧི ཝིཡ སམཱརོཔིཏརཱུཔེཧི བཧཱུཧི པཀཱརེཧི པཀཱསཱིཡཏི. ཨེཝཉྷི སོ སུཊྛུ པཀཱསིཏོ ཧོཏཱིཏི.

ཝིཔྥཱརོ ¶ ནཱམ ཝིཏཀྐསྶ ཐིནམིདྡྷཔཊིཔཀྑོ ཨཱརམྨཎེ ཨནོལཱིནཏཱ ཨསངྐོཙོ, སོ པན ཨབྷིནིརོཔནབྷཱཝཏོ ཙལནཾ ཝིཡ ཧོཏཱིཏི ཨདྷིཔྤཱཡེན ‘‘ཝིཔྥཱརཝཱཏི ཝིཙལནཡུཏྟོ’’ཏི ཝུཏྟཾ. ཨུཔཙཱརཔྤནཱསུ སནྟཱནེན པཝཏྟིཡནྟི ཨེཏེན ཡཐཱ ཨཔུབྦཱརམྨཎེ པཋམཱབྷིནིཔཱཏབྷཱུཏོ ཝིཏཀྐོ ཝིཔྥཱརཝཱ ཧོཏི, ན ཏཐཱ ཨེཀསྨིཾཡེཝ ཨཱརམྨཎེ ནིརནྟརཾ ཨནུཔྤབནྡྷཝསེན པཝཏྟིཡཾ, ནཱཏིཝིཔྥཱརཝཱ པན ཏཏྠ ཧོཏི སནྣིསིནྣབྷཱཝཏོཏི དསྶེཏི. ཏེནེཝཱཧ ‘‘ནིཙྩལོ ཧུཏྭཱ’’ཏིཨཱདི.

‘‘པཱིཏིསུཁེན ཨབྷིསནྡེཏཱི’’ཏིཨཱདིཝཙནཏོ (དཱི. ནི. ༡.༢༢༦; མ. ནི. ༡.༤༢༧) པཱིཏིཡཱ ཕརཎཾ ཀཱཡཝིསཡནྟི ཡཐཱ ཏཾ ཧོཏི, ཏཾ དསྶེཏུཾ ‘‘པཎཱིཏརཱུཔེཧཱི’’ཏི ཝུཏྟཾ.

ཝིསཱརསྶ བྱགྒབྷཱཝསྶ པཊིཔཀྑོ སབྷཱཝོ ཨཝིསཱརོ, ན ཝིསཱརཱབྷཱཝམཏྟཾ. ཨཝིསཱརཱཝིཀྑེཔཱནཾ སམཱདྷཱནབྷཱཝཏོ ཨཏྠཏོ ཝིསེསཱབྷཱཝེཔི སམུཁེན སམྤཡུཏྟམུཁེན ཙ ཨུབྷཡཾ ཝུཏྟནྟི དསྶེཏུཾ ‘‘ཨཝིསཱ…པེ… ཝིཀྑེཔོ’’ཏི ཝུཏྟཾ. ཝིསེསཏོཏི ཨཏིསཡེནཱཏི ཝཱ ཨཏྠོ གཧེཏབྦོ. སུཁཉྷི སམཱདྷིསྶ ཝིསེསཀཱརཎཾ ‘‘སུཁིནོ ཙིཏྟཾ སམཱདྷིཡཏཱི’’ཏི (དཱི. ནི. ༣.༣༥༩; ཨ. ནི. ༣.༩༦; ༦.༡༠; ༡༡.༡༢) ཝཙནཏོ.

ཨིནྡྲིཡརཱསིཝཎྞནཱ

ཏཏྠཱཏི ¶ སདྡཧནསངྑཱཏེ ཨདྷིམོཀྑལཀྑཎེ. པུགྒལོ སདྡཧཏཱིཏི ཨིམིནཱཔི སདྡྷཱཡ ཨཱཧིཏཝིསེསཱནཾ ཏཾསམྤཡུཏྟདྷམྨཱནཾ སདྡཧནཀིརིཡཱཡ ཀཏྟུབྷཱཝམེཝ ཝིབྷཱཝེཏི. ཨཝཡཝབྱཱཔཱརོ ཧི སམུདཱཡེ ཝོཧརཱིཡཏཱིཏི. ན ཀེཝལཾ པསཱདནཱིཡཝཏྠུསྨིཾ ཨཔྤསཱདནཱཀཱརཔྤཝཏྟམེཝ ཨཀུསལཾ ཨསྶདྡྷིཡཾ, ཨཐ ཁོ ཨཔྤསཱདནཱིཡཝཏྠུསྨིཾ པསཱདནཱཀཱརཔྤཝཏྟམྤཱིཏི དསྶེཏུཾ ‘‘མིཙྪཱདྷིམོཀྑོ’’ཏི ཝུཏྟཾ. ཏེན པཱུརཎཱདཱིསུ པསཱདསྶ ཨསྶདྡྷིཡཏམཱཧ. པསཱདབྷཱུཏོཏི ཨེཏེན ཨཔྤསཱདབྷཱུཏཾ ཨསྶདྡྷིཡཾ ནིཝཏྟེཏི. ཝཏྠུགཏོཏི ཨིམིནཱ མིཙྪཱདྷིམོཀྑཾ. ‘‘པསཱདབྷཱུཏོ ནིཙྪཡོ’’ཏི ཨིམིནཱ པན ཝིབྷཱཝིཏམེཝཏྠཾ པཱཀཊཾ ཀརོནྟོ ‘‘ན ཡེཝཱཔནཀཱདྷིམོཀྑོ’’ཏི ཨཱཧ. ཨཀཱལུསྶིཡཾ པསཱདོ, ཏཾ པན ཨསངྑོབྷབྷཱཝཏོ ‘‘ཨནཱཝིལབྷཱཝོ’’ཏི ཝུཏྟཾ. ཏཉྷི སམྤཡུཏྟེསུ ཝིདཧནྟཱི སདྡྷཱ ཨཀཱལུསྶིཡཔཙྩུཔཊྛཱནཱ. ཨེཝམེཏནྟི ཨདྷིམུཙྩནཱཀཱརེན པན གཧེཏབྦཏྟཱ ¶ ཨདྷིམུཏྟིཔཙྩུཔཊྛཱནཱ. བུདྡྷཱདིཝཏྠཱུནཱིཏི ཨེཏྠ ཨིདྷལོཀཔརལོཀཀམྨཕལསམྦནྡྷཱཔི སངྒཧིཏཱཏི དཊྛབྦཾ. ‘‘སདྡྷཱཧཏྠོ, མཧཱནཱམ, ཨརིཡསཱཝཀོ’’ཏི, ‘‘སདྡྷཱིདྷ ཝིཏྟཾ པུརིསསྶ སེཊྛ’’ནྟི (སཾ. ནི. ༡.༢༤༦; སུ. ནི. ༡༨༤), ‘‘སདྡྷཱ བཱིཛཾ ཏཔོ ཝུཊྛཱི’’ཏི (སཾ. ནི. ༡.༡༩༧; སུ. ནི. ༧༧) ཨེཝམཱདིཝཙནཏོ ཀུསལདྷམྨཱནཾ ཨཱདཱནཱདཱིསུ ཧཏྠཱདཡོ ཝིཡ སདྡྷཱ དཊྛབྦཱ.

‘‘ཨིདྷ བྷིཀྑུནཱ ཀམྨཾ ཀཏྟབྦཾ ཧོཏི. ཏསྶ ཨེཝཾ ཧོཏི ‘ཀམྨཾ ཁོ མེ ཀཏྟབྦཾ བྷཝིསྶཏི, ཀམྨཾ ཁོ པན མེ ཀརོནྟསྶ ན སུཀརཾ བུདྡྷཱནཾ སཱསནཾ མནསི ཀཱཏུཾ, ཧནྡཱཧཾ ཝཱིརིཡཾ ཨཱརབྷཱམི ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ ཨསཙྪིཀཏསྶ སཙྪིཀིརིཡཱཡཱ’’’ཏི (དཱི. ནི. ༣.༣༣༥) –

ཨཱདིཀཱ ཨནུརཱུཔཔཙྩཝེཀྑཎཱ.

ཏཾམཱུལཀཱནཱིཏི གནྟབྦམགྒཱདིམཱུལཀཱནི. ཨེཏྠ ཙ མགྒོ གནྟབྦོ ཧོཏཱིཏིཨཱདཡོ ཨཊྛཀཐཱཡཾ དསྶནཝསེནེཝ ཝུཏྟཱ, ན པཱལི༹ཡཾ ཨཱགཏཱནུཀྐམེནཱཏི དཊྛབྦཾ.

ཀརཎཱདིཀཱལེ ཝིཡ ཙིརཀཏཱདིཨཱརམྨཎཾ ཝིབྷཱུཏཾ ཀཏྭཱ པཝཏྟནྟཱི སཏི ཏཾ ཨུཔགནྟྭཱ ཏིཊྛནྟཱི ¶ ཨནིསྶཛྫནྟཱི ཙ ཧོཏི. ཡཾ ཨཱརམྨཎཾ སམྨུཊྛཾ, ཏཾ པིལཝིཏྭཱ གཏཾ ཝིཡ ཙལིཏཾ ཝིཡ ཙ ཧོཏི, ཏཔྤཊིཔཀྑབྷཱཝེན པན ཨསམྨུཊྛནྟི ཨིམམཏྠཾ དསྶེནྟོ ‘‘ཨུདཀེ ཨལཱབུ ཝིཡཱ’’ཏིཨཱདིམཱཧ. ཏཏྠ སཱརཎནྟི ཨེཏེན ‘‘སརནྟི ཏཱཡཱ’’ཏི ཨིམམེཝཏྠཾ ཝིབྷཱཝེཏི. སརཎཀིརིཡཱཡ ཧི པཝཏྟམཱནཱནཾ དྷམྨཱནཾ ཏཏྠ ཨཱདྷིཔཙྩབྷཱཝེན སཏི པཙྩཡོ. ཏསྶཱ ཧི ཏཐཱ པཙྩཡབྷཱཝེ སཏི ཏེ དྷམྨཱ སཱརིཏཱ ཨསམྨུཊྛཀཏཱ ཨཔིལཱཝིཏཱཧོནྟཱིཏི. ‘‘ཨིམེཧི ནཱམ ཧེཏཱུཧི པཙྩཡེཧི ཙ ཨེཏེ དྷམྨཱ སམྦྷཝནྟཱི’’ཏི སམྦྷཝཏོ. ‘‘ཨིམཾ ནཱམ ཕལཾ ནིབྦཏྟེནྟཱི’’ཏི ཕལཏོ དྷམྨཱ ཨུཔྤཛྫནེན ཝིཔཙྩནེན ཙ ནིཔྥནྣཱ ནཱམ ཧོནྟཱིཏི. ཝཏྠུབྷཱུཏཱཏི ཨཱརམྨཎབྷཱུཏཱ.

སཏིཔི སབྦེསཾ སཱརམྨཎདྷམྨཱནཾ ཨཱརམྨཎགྒཧཎེ ན ཙིཏྟཾ ཝིཡ པརེ པརིཙྪིཛྫགཱཧིནོཏི ‘‘པརིཙྪིནྣོཔལདྡྷིཝསེན ཛཱནཱཏཱི’’ཏི ཙིཏྟཾ ཝུཏྟཾ. ཙེཏསིཀེསུ ཧི ཀེཙི ཝིསཡཾ པརིཙྪིཛྫ གཧེཏུཾ ན སཀྐོནྟི, ཀེཙི པན པརིཙྪེདམཏྟེཡེཝ ¶ ཏིཊྛནྟི, ན ཝིཉྙཱཎཾ ཝིཡ ཝིསཡཾ གཎྷནྟཱིཏི ཡེ ཨཱསངྐིཏབྦཱ, ཏེསུ ཏདབྷཱཝཾ དསྶེནྟོ ‘‘ན སཉྙཱ…པེ… ཝིཛ྄ཛྷནཝསེནཱ’’ཏི ཨཱཧ.

པཱིཏིཡཱ ཙ སོམནསྶབྷཱཝོ ཨཱཔཛྫཏཱིཏི ཨིདཾ པཱིཏི ཙ སོམནསྶཉྩ པཱིཏིསོམནསྶནྟི པཱིཏིསོམནསྶཱནཾ ཏུལྱཡོགཾ སནྡྷཱཡ ཝུཏྟཾ. སོམནསྶསྶེཝ པན ‘‘ཨཱཛཉྙརཐོ’’ཏི ཝིཡ པཱིཏིཡུཏྟཾ སོམནསྶཾ པཱིཏིསོམནསྶནྟི པདྷཱནབྷཱཝོ ཨིཙྪིཏོཏི ན པཱིཏིཡཱ སོམནསྶབྷཱཝཔྤཏྟི. ན ཧི པདྷཱནེ ཝིཛྫམཱནེ ཨཔྤདྷཱནཾ ཨུཔཡུཛྫཏི, པཱིཏིགྒཧཎཉྩེཏྠ པཱིཏིཡུཏྟསྶ སོམནསྶསྶ ཡེབྷུཡྻེན བྷཱཝཏོ པརིབྱཏྟཀིཙྩཏོ ཙ ཀཏཾ, ན ཙ ནིཔྤཱིཏིཀསོམནསྶསྶ ཨསངྒཧོ. རུལ༹ྷཱིསདྡེསུ ཀིརིཡཱཡ ཨནཙྩནྟིཀབྷཱཝཏོ. པཱིཏིཡཱ པན ཨུཔལཀྑཎབྷཱཝེན ཨཡམཏྠོ སུཊྛུ ཡུཛྫཏཱིཏི དསྶེནྟོ ཨཱཧ ‘‘པཱིཏིཨུཔལཀྑིཏཾ ཝཱ’’ཏིཨཱདི.

པཝཏྟཾ ཨུཔཱདིནྣཀྑནྡྷཾ. ཙིརཊྛིཏིཀཾ ཧོཏཱིཏི ཨེཏེན ན ཀེཝལཾ ཨནུཔཱལེཏབྦདྷམྨཱནཾ ཁཎཊྛིཏིཡཱཡེཝ, ཨཐ ཁོ པབནྡྷཱནུཔཙྪེདསྶཔི ཛཱིཝིཏཾ ཀཱརཎནྟི དསྶེཏི. ཨཉྙཐཱ ཧི ཨཱཡུཀྑཡམརཎཾ ན ཡུཛྫེཡྻཱཏི. ཨཝིསེསེནཱཏི ཀཱརཎཝིསེསཱནཔེཀྑེན ཛཱིཝིཏིནྡྲིཡཏཱསཱམཉྙེན. ཡདིཔི ཨརཱུཔཱསཉྙབྷཝེསུ རཱུཔཱརཱུཔདྷམྨཱ ནཔྤཝཏྟནྟི, ཏེཧི པན པུརིམཔཙྪིམབྷཝེསུ ཙརིམཔཋམདྷམྨཱ སམཱནཛཱཏིཡེན ཨབྱཝཧིཏཏཱཡ ནིརནྟརཱཡེཝ ནཱམ ཧོནྟཱིཏི ‘‘ཡཱཝ པརིནིབྦཱནཾ ཨཝིཙྪིནྣཾ པཝཏྟཏཱི’’ཏི ཝུཏྟཾ. ཨནུཔཱལནཱདིཀསྶཱཏི ཨནུཔཱལནཔཝཏྟནཊྛཔནཱནིཡེཝ ¶ ཝདཏི. ཛཱིཝམཱནཝིསེསཔྤཙྩཡབྷཱཝཏོཏི སཧཛཱཏཱནཾ ཛཱིཝམཱནཏཱཝིསེསསྶ པཙྩཡབྷཱཝཏོ. ཨིནྡྲིཡབདྡྷསྶ ཧི མཏརཱུཔཏོ ཀམྨཛསྶ ཙ ཨུཏུཛཱདིཏོ ཝིསེསོ ཛཱིཝིཏིནྡྲིཡཀཏོཏི.

མགྒངྒརཱསིཝཎྞནཱ

ཨཝིཔརཱིཏནིཡྻཱནིཀབྷཱཝེནཱཏི ཨིདཾ སམྨཱ-སདྡསྶ དིཊྛི-ཨཱདིསདྡཱནཉྩ སམཱནཱདྷིཀརཎཏཱཝསེན དིཊྛིཨཱདཱིནཾ ཨཝིསེསབྷཱུཏསྶ ནིཡྻཱནིཀབྷཱཝསྶ སམྨཱ-སདྡེན ཝིསེསིཏབྦཏྟཱ ཝུཏྟཾ. ཨཝིཔརཱིཏཏྠོ ཧི སམྨཱ-སདྡོ, ན ནིཡྻཱནིཀཏྠོཏི. ཨཝིཔརཱིཏནིཡྻཱནིཀཏྠོ ཨེཝ ཝཱ སམྨཱ-སདྡོ. ཨནེཀཏྠཱ ཧི ནིཔཱཏཱཏི. ཨེཝམེཝཱཏི ཨཝིཔརཱིཏནིཡྻཱནིཀབྷཱཝེན.

བལརཱསིཝཎྞནཱ

པཏིསྶཝོ ¶ ཝཙནསམྤཊིགྒཧོཏི ཨདྷིཔྤཱཡེན ‘‘སཔྤཏིསྶཝཾ པཏིསྶཝབྷཱུཏཾ ཏཾསབྷཱགཉྩ ཡཾ ཀིཉྩི གཱརཝ’’ནྟི ཨཱཧ. ཏཏྠ ཏཏྠ པཱཀཊབྷཱཝེནཱཏི ཨཛ྄ཛྷཏྟབྷཱུཏེསུ ཛཱཏིཡཱདཱིསུ བཧིདྡྷཱབྷཱུཏེསུ བྷིཀྑུཨཱདཱིསུ ཧིརོཏྟཔྤཱནཾ ཨནུརཱུཔཔཙྩཝེཀྑཎཝསེན སསམྦྷཱརཔཐཝཱིཨཱདཱིསུ པཐཝཱིདྷཱཏུཨཱདཱིནཾ ཝིཡ ཝིབྷཱུཏཀིཙྩབྷཱཝེནཱཏི ཨཏྠོ.

མཱུལརཱསིཝཎྞནཱ

ཨེཝཉྷི ཨུཔམཱཡ སམེཏཱིཏི ཡཐཱ ཨསུཙིམྷི པཏིཏཔུརིསསྶ སཏིཔི ཀཱཡེན ཨལླཱིཡནེ བྷཱཝོ ཨནལླཱིནོ, ཨེཝཾ ཨལོབྷོཔི ཨཱརམྨཎཀརཎཝསེན གཧིཏེཔི ཨཱརམྨཎེ ཨལགྒབྷཱཝེན ཨནལླཱིནབྷཱཝོ ཨནལླཱིནཱཀཱརོ ཨེཝ པཝཏྟཏི. ཨེཝཾསབྷཱཝོ ཧི སོ དྷམྨོཏི. ཀིཉྩི དུསྶཱིལྱཾ དོསསམུཊྛཱནཾ སབྦམྤི དུསྶཱིལྱཾ དོསཱུཔནིསྶཡནྟི ‘‘དོསསམུཊྛཱནཏཾ དོསཱུཔནིསྶཡཏཉྩཱ’’ཏི ཝུཏྟཾ. ཏེན ཨདོསོ དོསསྶེཝ ཨུཛུཝིཔཙྩནཱིཀོ, ཏཾམུཁེན དུསྶཱིལྱསྶཱཏི དསྶེཏི.

ཏཏྠ ཛཱཏཱནཾ དྷམྨཱནཾ ཨནཏིཝཏྟནཊྛེན…པེ… ཨཱསེཝནཊྛེན བྷཱཝནཱཏི ཡོ སོ ཨེཀཏྟུཔགཏོ ¶ པཋམཛ྄ཛྷཱནཱདིཨཔྤནཱཙིཏྟུཔྤཱདོ ཨཱསནྣཱུཔཙཱརཱཧིཏཝིསེསོ ནཱིཝརཎཱདིཔརིཔནྠཝིསུདྡྷིཡཱ ཝིསུདྡྷོ, ཏདཱཝརཎཝིསཡཝིརཧེན ཙ སམཔྤཝཏྟཨཔྤནཱསམཱདྷིསངྑཱཏཾ མཛ྄ཛྷིམཾ སམཐནིམིཏྟཾ པཊིཔནྣོ, ཨེཝཾ པཊིཔནྣཏྟཱ ཨེཝ ཏཏྠུཔགམནེན ཏཏྠ ཙ པཀྑནྡོ, ཝིསོདྷེཏབྦསྶ ཝིཀྑེཔསྶ ཀིལེསསཾསགྒསྶ ཙ ཨབྷཱཝཏོ ཝིསོདྷནསམཱདྷཱནཨེཀཏྟུཔཊྛཱནབྱཱཔཱརཝིརཧེན ཝིསུདྡྷིསམཐཔཊིཔཏྟིཨེཀཏྟུཔཊྛཱནཱཀཱརེ ཨཛ྄ཛྷུཔེཀྑནྟོ ཨབྷིབྱཏྟརཱུཔཱཡ སཧཛཱཏཏཏྲམཛ྄ཛྷཏྟུཔེཀྑཱཡ ཀིཙྩཝསེན ཨུཔེཀྑཱནུབྲཱུཧིཏོ, ཏསྨིཾཡེཝ ཛཱཏཱ སམཱདྷིཔཉྙཱསངྑཱཏཱ ཡུགནདྡྷདྷམྨཱ. ཏེ ཡཐཱ ཨཉྙཾ ཨནཏིཝཏྟམཱནཱ ཧུཏྭཱ པཝཏྟནྟི, ཨེཝཾ བྷཱཝནཱ བྲཱུཧནཱ. ཏཐཱ ཡཱནི ཏཏྠ སདྡྷཱདཱིནི ཨིནྡྲིཡཱནི ནཱནཱཀིལེསེཧི ཝིམུཏྟཏྟཱ ཝིམུཏྟིརསེན ཨེཀརསཱནི ཧུཏྭཱ པཝཏྟཱནི. ཡཉྩ ཏཏྠ ཏདུཔགཾ, ཏེསཾ ཨནཏིཝཏྟནཨེཀརསབྷཱཝཱནཾ ཨནུཙྪཝིཀཾ ཝཱིརིཡཾ ཝཱཧཱིཡཏི པཝཏྟཱིཡཏི, ཡཱ ཙསྶ ཏསྨིཾ ཁཎེ པཝཏྟཱ པགུཎབལཝབྷཱཝཱཔཏྟིསངྑཱཏཱ ཨཱསེཝནཱ. སབྦེསཾ ཨེཏེསཾ ཨཱཀཱརཱནཾ བྷཱཝནཱ ཨུཔྤཱདནཱ ཝཌྜྷནཱ, ཨཡཾ ཏཏྠ ཛཱཏཱནཾ…པེ… ཨཱསེཝནཊྛེན བྷཱཝནཱ ནཱམ.

ཡསྨཱ ¶ པནཱཡཾ བྷཱཝནཱཀཱརོ ‘‘པཋམསྶ ཛྷཱནསྶ པཊིཔདཱཝིསུདྡྷི ཨཱདཱི’’ཏིཨཱདིནཱཔི (པཊི. མ. ༡.༡༥༨) པཱལི༹ཡཾ ཨཱགཏོ ཨེཝ, ཉཱཎེན ཙ སཾཀིལེསཝོདཱནེསུ ཏཾ ཏཾ ཨཱདཱིནཝཾ ཨཱནིསཾསཉྩ དིསྭཱ ཏཐཱ ཏཐཱ ནིཔྥཱདེཏབྦོ, ཏསྨཱ ‘‘ཨེཝཾ ཝུཏྟཱཡ པཉྙཱསཱདྷནཱཡ བྷཱཝནཱཡཱ’’ཏི ཝུཏྟཾ. ཨཔྤཝཏྟཱིཏི ཡསྨིཾ དྷམྨེ སཏི ཡཐཱཝུཏྟཱ བྷཱཝནཱ ནཔྤཝཏྟཏི, སོ དྷམྨོ པཊིཔཀྑབྷཱཝནཱཔརཱམསནེན ཨབྷཱཝནཱཏི ཝུཏྟོཏི ཨདྷིཔྤཱཡོ. ན ཧི ཨབྷཱཝམཏྟསྶ ཨམོཧོ པཊིཔཀྑོཏི ཡུཛྫཏཱིཏི. ཏཔྤཊིཔཀྑབྷཱུཏཱ ཨཀུསལཱ ཀཱམཙྪནྡཱདཡོ དཊྛབྦཱ. པམཱདཝིསེསོ ཝཱ ཨབྷཱཝནཱ. སོ ཧི ‘‘ཀུསལཱནཾ ཝཱ དྷམྨཱནཾ ཨནཱསེཝནཱ ཨབྷཱཝནཱ ཨབཧུལཱིཀམྨ’’ནྟིཨཱདིནཱ ནིདྡིཊྛོཏི.

ཨེཀནྟེན ཨལབྦྷནེཡྻདསྶནཏྠཾ ‘‘ཛརཱདྷམྨོ’’ཏི ཝུཏྟཾ. ཏཐཱ ཧི པཱལི༹ཡཾ ‘‘ཛཱཏིདྷམྨཱནཾ, བྷིཀྑཝེ, སཏྟཱནཾ ཨེཝཾ ཨིཙྪཱ ཨུཔྤཛྫཏཱི’’ཏིཨཱདིནཱ (མ. ནི. ༣.༣༧༣) ཨིཙྪིཏཱལཱབྷོ ཝིབྷཏྟོ. ཨལོབྷཱནུབྷཱཝེན ཀཱཡཱནུཔསྶནཱཡ, ཨམོཧཱནུབྷཱཝེན ཙིཏྟདྷམྨཱནུཔསྶནཱཡ སིདྡྷི པཱཀཊཱཡེཝཱཏི ཨཔཱཀཊཾ ཨདོསཱནུབྷཱཝེན ཝེདནཱནུཔསྶནཱསིདྡྷིཾ ཝིབྷཱཝེནྟོ ‘‘སུཁཝིཔརིཎཱམེ’’ཏིཨཱདིམཱཧ. ཨཡཉྩ ཡོཛནཱ ཨལོབྷཱདཱིནཾ ཝིསེསཔཙྩཡཏཾ སནྡྷཱཡ ཀཏཱ, ཨཝིསེསེན ¶ པན སབྦེ སབྦེསཾ པཙྩཡཱ. སབྷཱཝཏོ སངྐཔྤཏོ ཙ ཨུཔྤནྣསྶ དུཀྑསྶ ཨསཧནཝསེནེཝ ཨུཔྤཛྫཏཱིཏི དོསོ ཏཾདསྶནསྶ ཨཱསནྣཔཊིཔཀྑོ, ན རཱགོ ཝིཡ དཱུརཔཊིཔཀྑོ.

ཀམྨཔཐརཱསིཝཎྞནཱ

ཨབྷིཛ྄ཛྷཱདཡོ ཝིཡ ཨནབྷིཛ྄ཛྷཱདཡོཔི ན ཨེཀནྟཾ ཀམྨཔཐབྷཱུཏཱཡེཝཱཏི ཨཱཧ ‘‘ཀམྨཔཐཏཱཏཾསབྷཱགཏཱཧཱི’’ཏི. མནོཀམྨཔཐབྷཱཝེན པཝཏྟནཀམྨབྷཱཝཏོ ཧི ཨེཏེསཾ ཀམྨཔཐརཱསིབྷཱཝེན སངྒཧོ, ན སབྦདཱ ཀམྨཔཐཱཡེཝཱཏི. ཏེན ཡོ ཨཉྙོཔི དྷམྨོ ཨནིཡཏོ ཀམྨཔཐབྷཱཝེན པཱཀཊོ ཙ, ཏསྶཔི ཀམྨཔཐཏཱཝཙནཾ ན ཝིརུཛ྄ཛྷཏཱིཏི དསྶེཏི.

པསྶདྡྷཱདིཡུགལཝཎྞནཱ

སམནྟི ¶ སམྨཱ. ཙེཏིཡཝནྡནཱདིཨཏྠནྟི ཙེཏིཡཝནྡནཱདིཧེཏུ. སམཐཙཏུསཙྩཀམྨཊྛཱནཝསེན ཏབྦྷེདཝསེན ཙ སབྦཀམྨཊྛཱནབྷཱཝནཱབྷིཡུཏྟཱནཾ མུདུམཛ྄ཛྷིམཏིཀྑིནྡྲིཡཏཱདིབྷེདཝསེན སབྦཡོགཱིནཾ ཙིཏྟསྶ ལཱིནུདྡྷཙྩཱདིཀཱལཝསེན སབྦདཱ ཧིཏཱཧིཏདྷམྨཱུཔལཀྑཎབྷཱཝཏོ ཡཐཱསབྷཱཝཾ པཊིཝེདྷབྷཱཝཏོ ཙ སཏིསམྤཛཉྙཱནཾ པཱརིབནྡྷཀཧརཎབྷཱཝནཱཝཌྜྷནཱནི ཨཝིསེསཏོ དཊྛབྦཱནི. ཡཐཱ ཨཔྤནཱཀོསལླེན ཝིནཱ སམཐོ སམཐམནྟརེན ཡཐཱབྷཱུཏཱཝབོདྷོ ཙ ནཏྠཱིཏི ནཱནཱཀྑཎིཀཱ སམཱདྷིཔཉྙཱ ཨཉྙམཉྙསྶ ཝིསེསཀཱརཎཾ, ཨེཝཾ པཊིཝེདྷེ ཨེཀཀྑཎིཀཱཔཱིཏི དསྶེནྟོ ཨཱཧ ‘‘ཨཉྙམཉྙཾ ནིམིཏྟབྷཱཝེནཱ’’ཏི. པཉྙཱཡ ཧི སཱཏིསཡཾ ཨཝབྷཱསིཡམཱནེ ཝིསཡེ སམཱདྷི ཨེཀཏྟཝསེན ཨཔྤེཏུཾ སཀྐོཏི, སམཱདྷིམྷི ཙ མཛ྄ཛྷིམཾ སམཐནིམིཏྟཾ པཊིཔནྣེ པཉྙཱ ཨཱརམྨཎེསུ ཝིསདཱ ཝཧཏཱིཏི. སམཾ པཝཏྟཱཏི ཨཉྙམཉྙཱནཏིཝཏྟནེན སམཾ ཨཝིསམཾ ཨེཀརསབྷཱཝེན པཝཏྟཱ. ཨཉྙམཉྙསཧཱཡབྷཱཝཱུཔགམནེན ཡོགིནོ མནོརཐདྷུརཱཀཌྜྷནེ རཐདྷུརཱཀཌྜྷནེ ཝིཡ ཨཱཛཱནེཡྻཡུགོ ཡུགལཀོ ཧུཏྭཱ ཨཉྙམཉྙཱནཏིཝཏྟམཱནེན ནདྡྷཱ བདྡྷཱ ཝིཡཱཏི ཝཱ ཡུགནདྡྷཱ. ཨདྷིཙིཏྟམནུཡུཏྟེཧི ཝཱིརིཡསམཱདྷཡོ སམཾ ཡོཛེཏབྦཱཏི ཨིམསྶ ཝིསེསསྶ དསྶནཏྠཾ པུབྦེ གཧིཏཱཔི ཏེ པུན གཧིཏཱཏི དསྶེཏུཾ ཝཱིརིཡསམཱདྷིཡོཛནཏྠཱཡཱཏི ཨཊྛཀཐཱཡཾ ཝུཏྟཾ. ཏཾ པན སམཱདྷིཝཱིརིཡཡོགསྶ ཝིབྷཱཝནཾ ཧོཏཱིཏི ‘‘ཡོགཝཙནཏྠཱཡཱཏི ཨཏྠོ’’ཏི ཨཱཧ.

ཡེཝཱཔནཀཝཎྞནཱ

ཡཐཱ ¶ ཏཐཱ ཝཱཏི སམྨཱ མིཙྪཱ ཝཱ. ཨནདྷིམུཙྩནྟོཏི ‘‘ཨིདཾ ཀརིསྶཱམི, ཨེཏཾ ཀརིསྶཱམཱི’’ཏི ཨེཝཾ པཝཏྟཔུབྦབྷཱགསནྣིཊྛཱནཧེཏུཀེན པཡོགཀཱལསནྣིཊྛཱནེན ཨནིཙྪིནནྟོ. ཡཏྠ ཧི ཨནིཙྪཡོ, ཏཏྠ ཨཔྤཊིཔཏྟི ཨེཝཱཏི. སཾསཔྤནཾ སཾསཡོ. སོ ཧི ‘‘ཨཱསཔྤནཱ པརིསཔྤནཱ’’ཏི ཝུཏྟོ. ཨསཏིཔི བྱཱཔཱརེ ཏཏྲམཛ྄ཛྷཏྟཏཱཡ སཏི ཏཾསམྤཡུཏྟདྷམྨཱ སཀསཀཀིཙྩཝསེན ཨནཱུནཱནདྷིཀཏཱཡ ཨལཱིནཨནུདྡྷཏཏཱཡ ཙ སཾཝཏྟནྟཱིཏི སཱ ཏེསཾ ཏཐཱཔཝཏྟིཡཱ པཙྩཡབྷཱུཏཱ ཨཱུནཱདྷིཀབྷཱཝཾ ནིཝཱརེཏི ཝིཡཱཏི ཨཱུནཱདྷིཀནིཝཱརཎརསཱ ཝུཏྟཱ. ཏཐཱ པཝཏྟིཔཙྩཡཏྟཱཡེཝ ཏེསུ དྷམྨེསུ མཛ྄ཛྷཏྟཏཱཏི ཙ ཝུཏྟཱ.

ཛྷཱནཔདསྶཱཏི ¶ ཛྷཱནསདྡསྶ. ཏེསཱུཏི པཉྩསུ. པཉྩ ཧི ཨངྒཱནི ཛྷཱནཔདསྶ ཨཏྠོཏི ཨིདཾ སཾཝཎྞིཡམཱནཏྟཱཡེཝ ཨིམཾ ཙིཏྟུཔྤཱདཾ སནྡྷཱཡ ཝུཏྟཾ. ན ཧི སབྦསྨིཾ ཙིཏྟུཔྤཱདེ པཉྩེཝ ཛྷཱནངྒཱནི. པདསམཱུཧོ ཝཱཀྱཾ, པདཀོཊྛཱསོ ཝཱ ཕསྶཔཉྩམཀཱདི དྷམྨརཱསི. ཝུཏྟཾ པཱུརིཏནྟི ཚཔཎྞཱསཱདིཏཱཡ པཱུརཎཝསེན. ཕསྶཔཙྩཡཱ ཝེདནཱ ‘‘ཕུཊྛོ ཝེདེཏི, ཕུཊྛོ སཉྫཱནཱཏཱི’’ཏིཨཱདིཝཙནཏོ (སཾ. ནི. ༤.༩༣) ཕསྶོ ཝེདནཱདཱིནཾ པཙྩཡོ. ཡདིཔི ཚནྡཱདཡོ ཡཐཱཝུཏྟརཱསིཀིཙྩཱབྷཱཝཏོ ཏེསུ ན ཝཏྟབྦཱ, ཝིསུཾ རཱསིཨནྟརབྷཱཝེན པན སརཱུཔཏོ ཝཏྟབྦཱཏི ཙོདནཾ མནསི ཀཏྭཱ ‘‘ཝུཏྟཱནམྤཱི’’ཏིཨཱདིམཱཧ.

དྷམྨུདྡེསཝཱརཀཐཱཝཎྞནཱ ནིཊྛིཏཱ.

ཀཱམཱཝཙརཀུསལཾ

ནིདྡེསཝཱརཀཐཱཝཎྞནཱ

༢. སནྟེཏི སབྷཱཝཏོ ཝིཛྫམཱནེ. ཕསྶསྶ ཝིསཡཝིསཡཱིནཾ སནྣིཔཏནཱཀཱརེན གཧེཏབྦཏྟཱ ཕུསནཾ ཝིསཡེ ཙིཏྟསྶ སནྣིཔཏནཾ ཝུཏྟཾ. ‘‘ཙིནྟནཊྛེན ཙིཏྟཾ, མནནཊྛེན མནོ’’ཏིཨཱདིནཱ ¶ ཙིཏྟཱདིསདྡཱ ཙིནྟནཱདིབྱཱཔཱརམུཁེན ཨཏྟནོ ཨཏྠཾ ཝིབྷཱཝེནྟཱིཏི ཨཱཧ ‘‘ཙིཏྟཾ མནོཏིཨཱདཱིསུ ཝིཡ ཀིཙྩཝིསེསཾ ཨནཔེཀྑིཏྭཱ’’ཏི. ཡཐཱ ལོཀེ ཝིཀཏམེཝ ཝེཀཏཾ, ཝིསཡོ ཨེཝ ཝེསཡནྟི ཝུཙྩཏི, ཨེཝཾ མནོ ཨེཝ མཱནསནྟི སདྡམཏྟཝིསེསོ. ནཱིལཱདི-སདྡཱ ཝིཡ ཝཏྠཱདཱིསུ ཙིཏྟེསུ པརིསུདྡྷབྷཱཝནིབནྡྷནཱ པཎྜརསདྡསྶ པཝཏྟཱིཏི ཏསྶ གུཎཝིསེསཱཔེཀྑཏཱ ཝུཏྟཱ. ཡཐཱ ཀཱཡིཀཾ སཱཏནྟི ཨེཏྠ ཀཱཡཔྤསཱདནིསྶིཏནྟི ཨཏྠོ, ཨེཝཾ ཙེཏསིཀཾ སཱཏནྟི ཨེཏྠ ཙེཏོནིསྶིཏཾ སཱཏནྟི ནིསྶཡཝིསེསཱཔེཀྑཏཱ ཝུཏྟཱ. ཨེཀཀྑཎིཀཱ ནཱནཱཀྑཎིཀཱ ཙ ཙིཏྟསྶ ཋིཏི ནཱམ, ཏསྶ ཨཝཏྠཱཝིསེསོཏི ཨཝཏྠཱཝིསེསཱཔེཀྑོ ཙིཏྟསྶ ཋིཏཱིཏི ཨེཝཾཔཀཱརོ ནིདྡེསོ. ‘‘ན ལུབྦྷཏཱི’’ཏི ཝུཏྟསྶ ཙིཏྟསྶ, པུགྒལསྶ ཝཱ པཝཏྟིཨཱཀཱརབྷཱཝེན ཨལུབྦྷནཱཏི ཨལོབྷོ ཝུཏྟོཏི ཨཉྙསྶ ཀིརིཡཱབྷཱཝཝིསེསཱཔེཀྑོ ཨལུབྦྷནཱཏི ནིདྡེསོ. ཝུཏྟནཡེནེཝ ཨལུབྦྷིཏསྶ བྷཱཝོ ཨལུབྦྷིཏཏྟནྟི ཨཡཾ ནིདྡེསོ ཨཉྙསྶ བྷཱཝབྷཱུཏཏཱཝིསེསཱཔེཀྑོ ཝུཏྟོ. ཀཏྟུཀརཎབྷཱཝཱདཡོ སབྷཱཝདྷམྨཱནཾ ཨཛ྄ཛྷཱརོཔནཝསེནེཝ སིཛ྄ཛྷནྟི ¶ , བྷཱཝནིདྡེསོ པན ཨཛ྄ཛྷཱརོཔནཱནཔེཀྑོ, ཏཏོཡེཝ ཙ ཝིསེསནྟརཝིནིམུཏྟོ ཝིནིཝཏྟོ ཝིསེསཏོ ནིཛྫཱིཝབྷཱཝགིབྷཱཝཏོ སབྷཱཝནིདྡེསོ ནཱམ ཧོཏཱིཏི ཕསྶོཏི ཨིདཾ ཕུསནཊྛེན ‘‘དྷམྨམཏྟདཱིཔནཾ སབྷཱཝཔད’’ནྟི ཝུཏྟཾ. ཨཱརམྨཎཾ ཕུསནྟསྶ ཙིཏྟསྶ པཝཏྟིཨཱཀཱརོ ཕུསནབྱཱཔཱརོ ཧོཏཱིཏི ‘‘ཕུསནཀིརིཡཱ ཕུསནཱཀཱརོ’’ཏི ཝུཏྟཾ. སམྥུསནཱཏི སཾ-སདྡོ ‘‘སམུདཡོ’’ཏིཨཱདཱིསུ ཝིཡ སམཱགམཏྠདཱིཔཀོཏི ཨཱཧ ‘‘སམཱགམཕུསནཱ’’ཏི. ‘‘ཕུསཱམི ནེཀྑམྨསུཁ’’ནྟིཨཱདཱིསུ (དྷ. པ. ༢༧༢) པཊིལཱབྷོཔི ཕུསནཱ སམྥུསནཱཏི ཙ ཝུཙྩཏཱིཏི ཨཱཧ ‘‘ན པཊིལཱབྷསམྥུསནཱ’’ཏི.

ཨཔརེན ཝེཝཙནེན. བཧུསྶུཏབྷཱཝསམྤཱདིཀཱཡ པཉྙཱཡ པཎྜིཙྩཔརིཡཱཡོ. སིཔྤཱཡཏནཱདཱིསུ དཀྑཏཱབྷཱུཏཱཡ ཀོསལླཔརིཡཱཡོ, ཡཏྠ ཀཏྠཙི ཏིཀྑསུཁུམཱཡ ནེཔུཉྙཔརིཡཱཡོ, སམྨཱ དྷམྨེ པཉྙཔེནྟིཡཱ ཝེབྷབྱཱཔརིཡཱཡོཏི ཨེཝམཱདིནཱ ཏེསུ ཏེསུ པཉྙཱཝིསེསེསུ ཏེ ཏེ པརིཡཱཡཝིསེསཱ ཝིསེསེན པཝཏྟཱཏི ཏེསཾ པཉྙཱཝིསེསཱནཾ ནཱནཱཀཱལེ ལབྦྷམཱནཏཱ ཝུཏྟཱ, ཨིཏརེཔི ཨནུགཏཱ ཧོནྟི ཡེབྷུཡྻེནཱཏི ཨདྷིཔྤཱཡོ. ཨཏྠནཱནཏྟེན པཉྙཱདིཨཏྠཝིསེསེན. ཀོདྷོ ཀུཛ྄ཛྷནཱ ཀུཛ྄ཛྷིཏཏྟནྟི ཨེཝཾཔཀཱརཱ ནིདྡེསཱ སབྷཱཝཱཀཱརབྷཱཝདཱིཔནཝསེན བྱཉྫནཝསེནེཝ ཝིབྷཱགཝཙནཾ. པཎྜིཙྩནྟིཨཱདཡོ པཉྙཱཝིསེསནིབནྡྷནཏྟཱ ཨཏྠཝསེན ཝིབྷཱགཝཙནནྟི ཨིམམཏྠམཱཧ ‘‘ཨཐ ཝཱ’’ཏིཨཱདིནཱ. ཨེཝམཱཀཱརོ པནཱཏི པུརིམཱཀཱརཏོ ཝིསེསོ ཨཏྠཏོ ཝིབྷཏྟིགམནསྶ ཀཱརཎཾ ཝུཏྟཾ.

པཊིཀྑིཔནཾ ¶ པཊིསེདྷནཾ པཊིཀྑེཔོ, ཏསྶ ནཱནཏྟཾ ཝིསེསོ པཊིཀྑེཔནཱནཏྟཾ, སདྡྷམྨགརུཏཱཡ པཊིཀྑེཔོ སདྡྷམྨགརུཏཱཔཊིཀྑེཔོ, ཏེན སདྡྷམྨགརུཏཱཔཊིཀྑེཔེན ནཱནཏྟཾ སདྡྷམྨགརུཏཱཔཊིཀྑེཔནཱནཏྟཾ. ཏཾ སདྡྷམྨགརུཏཱཔཊིཀྑེཔནཱནཏྟཾ པན ཀོདྷགརུཏཱདིབྷེདབྷིནྣནྟི ‘‘ཀོདྷགརུཏཱདིཝིསིཊྛེནཱ’’ཏི ཝུཏྟཾ. ཀོདྷཱདཱིཧི ཝིསིཊྛོ བྷིནྣོ སདྡྷམྨགརུཏཱཡ པཊིཀྑེཔོ པཊིསེདྷནཾ ཀོདྷཱདིཝིསིཊྛཔཊིཀྑེཔོ. ཀོདྷགརུཏཱདིཡེཝ, ཏསྶ ནཱནཏྟེན སདྡྷམྨགརུཏཱཔཊིཔཀྑནཱནཏྟེནཱཏི ཀོདྷགརུཏཱ སདྡྷམྨགརུཏཱཡ པཊིཔཀྑོ. མཀྑལཱབྷསཀྐཱརགརུཏཱ སདྡྷམྨགརུཏཱཡ པཊིཔཀྑོཏི སདྡྷམྨགརུཏཱཡ པཊིཔཀྑབྷཱཝཝིསེསེན ཨསདྡྷམྨགརུཏཱ ཏབྦྷཱཝེན ¶ ཨེཀཱིབྷཱུཏཱཔི ནཱནཏྟཾ གཏཱ. ཡསྨཱ པན ཀོདྷོ ཨཏྠཏོ དོསོཡེཝ. མཀྑོ དོསཔྤདྷཱནཱ པརགུཎཝིདྡྷཾསནཱཀཱརཔྤཝཏྟཱ ཨཀུསལཱ ཁནྡྷཱ. ཏགྒརུཏཱ ཙ ཏེསཾ སཱདརཨབྷིསངྑརཎཝསེན པཝཏྟནམེཝ. ལཱབྷགརུཏཱ ཙཏུནྣཾ པཙྩཡཱནཾ སཀྐཱརགརུཏཱ, ཏེསཾཡེཝ སུསངྑཏཱནཾ ལདྡྷཀཱམཏཱ. ཏདུབྷཡེསུ ཙ ཨཱདརཀིརིཡཱ ཏཐཱཔཝཏྟཱ ཨིཙྪཱཡེཝ, ཏསྨཱ ‘‘སདྡྷམྨགརུཏཱཔཊིཔཀྑནཱནཏྟེན ཨསདྡྷམྨཱ ནཱནཏྟཾ གཏཱ’’ཏི ཝུཏྟཾ. ཏཐཱ ཧི ཙཏྟཱརོ ཨསདྡྷམྨཱ ཨིཙྩེཝ ཨུདྡིཊྛཱ. ཨསདྡྷམྨགརུཏཱཏི ཨེཏྠ ཙ པུརིམསྨིཾ ཝིཀཔྤེ ‘‘ན སདྡྷམྨགརུཏཱ’’ཏི སདྡྷམྨགརུཏཱ ན ཧོཏཱིཏི ཨཏྠོ. དུཏིཡསྨིཾ སདྡྷམྨགརུཏཱཡ པཊིཔཀྑོཏི སདྡྷམྨགརུཏཱ ཨེཝ ཝཱ པཊིཔཀྑོ, ཏསྶ ནཱནཏྟེན སདྡྷམྨགརུཏཱཔཊིཔཀྑནཱནཏྟེནཱཏི ཨེཝམེཏྠ ཨཏྠོ དཊྛབྦོ. ཀོདྷམཀྑགརུཏཱནཉྷི སདྡྷམྨཝིསེསཱ པཝཏྟིབྷེདབྷིནྣཱ མེཏྟཱ པཊིཔཀྑོ. ལཱབྷསཀྐཱརགརུཏཱནཾ ཨཔྤིཙྪཏཱ སནྟོསཱ. ཏེན ཀོདྷགརུཏཱ ན སདྡྷམྨགརུཏཱཏི ཀོདྷགརུཏཱ ཀཱཡཙི སདྡྷམྨགརུཏཱཡ པཊིཔཀྑོཏི ཨཡམཏྠོ ཝུཏྟོ ཧོཏི. ཏཐཱ མཀྑགརུཏཱདཱིསུཔི. ཨེཝཉྩ ཀཏྭཱ ‘‘ཙཏྟཱརོ སདྡྷམྨཱ སདྡྷམྨགརུཏཱ ན ཀོདྷགརུཏཱ…པེ… སདྡྷམྨགརུཏཱ ན སཀྐཱརགརུཏཱ’’ཏི (ཨ. ནི. ༤.༤༤) ཨཱགཏཏནྟིཔི སམཏྠིཏཱ བྷཝཏི. ལོབྷོ ན ཧོཏཱིཏི ཨལོབྷོ ལུབྦྷནཱ ན ཧོཏཱིཏི ཨལུབྦྷནཱཏི ཨེཝམཱདིཀོ ཨལོབྷོཏིཨཱདཱིནཾ ལོབྷཱདིཝིསིཊྛོ པཊིཀྑེཔོ ‘‘ཕསྶོ ཕུསནཱ’’ཏིཨཱདིཀེཧི ཝིསདིསབྷཱཝཏོ ‘‘ཕསྶཱདཱིཧི ནཱནཏྟ’’ནྟི ཝུཏྟོ. ཕསྶཱདཱིཧཱིཏི ཙེཏྠ ཨལུབྦྷནཱདཡོཔི ཨཱདི-སདྡེན སངྒཧིཏཱཏི དཊྛབྦཾ. ལོབྷཱདིཔཊིཔཀྑེནཱཏི ‘‘ལོབྷཔཊིཔཀྑོ ཨལོབྷོ’’ཏིཨཱདིནཱ ཡོཛེཏབྦཾ. སེསཾ པུརིམསདིསམེཝ. ཨལོབྷཱདོསཱམོཧཱནཾ ཝིདྷུརཏཱཡ པཊིཔཀྑབྷཱཝེན ཙ ལབྦྷམཱནོ ཨཉྙམཉྙཝིསདིསོ ལོབྷཱདིཝིསིཊྛཔཊིཀྑེཔབྷཱཝེན ལོབྷཱདིཔཊིཔཀྑབྷཱཝེན ཙ ཝིཉྙཱཡཏཱིཏི ཨཱཧ ‘‘ཨལོབྷཱ…པེ… ཡོཛེཏབྦ’’ནྟི. བཧཱུཧི པཀཱརེཧི དཱིཔེཏབྦཏྠཏཱ མཧཏྠཏཱ. ཨཱདརཝསེན སོཏཱུནཾ.

༣. ཡདིཔི ¶ ཨེཀསྨིཾ ཁཎེ ཨེཀཾཡེཝ ཨཱརམྨཎཾ ཧོཏི, ཚསུཔི པན ཨཱརམྨཎེསུ ཨུཔྤཏྟིརཧཏྟཱ ‘‘ཏེཧི ཝཱ’’ཏིཨཱདི ཝུཏྟཾ. ཏསྶཱཏི སཱཏསྶ སུཁསྶ. ཛཱཏཱཏི ཨེཏསྶ ཨཏྠཾ དསྶེཏུཾ ‘‘ཀཱརཎབྷཱཝེན ཕསྶཏྠཾ པཝཏྟཱ’’ཏི ཝུཏྟཾ. ཨིདཾ ཝུཏྟཾ ཧོཏི – ཡཐཱ ཙེཏསིཀསཱཏསངྑཱཏཱ སོམནསྶཝེདནཱ ¶ སཧེཝ ཨུཔྤཛྫཏི, ཨེཝཾ ཏདནུརཱུཔཕསྶསཧིཏཱ ཧུཏྭཱ པཝཏྟཱ ཏཛྫཱཏི ཝུཏྟཱ. སཱདཡཏཱིཏི ཨདྷིགམཱསཱིསཱཡ ཨནཉྙནིནྣཾ ཀརོཏི.

༥. ན ཏསྶཱ ཏཛྫཏཱཏི ཏསྶཱ མནོཝིཉྙཱཎདྷཱཏུཡཱ ཏསྶཱརུཔྤཱ ‘‘ཏསྶ ཛཱཏཱ’’ཏི ཝཱ ཨུབྷཡཐཱཔི ཏཛྫཏཱ ན ཡུཛྫཏི. ཡདིཔི ཕསྶོ ཝིཉྙཱཎསྶ ཝིསེསཔཙྩཡོ ན ཧོཏི, ཏཐཱཔི སོ ཏསྶ པཙྩཡོ ཧོཏིཡེཝཱཏི ཏསྶ ཏཛྫཱམནོཝིཉྙཱཎདྷཱཏུསམྥསྶཛཏཱ ཝཏྟབྦཱཏི ཙོདནཾ སནྡྷཱཡཱཧ ‘‘ན ཙ ཏདེཝཱ’’ཏིཨཱདི. ཏེཧི ཨཱརམྨཎེཧི ཛཱཏཱ ཏཛྫཱཏི ཨིམིནཱཔི ཨཏྠེན ཏཛྫཱ མནོཝིཉྙཱཎདྷཱཏུསམྥསྶཛཱཏི ཝཏྟུཾ ན སཀྐཱ. ཝིཉྙཱཎསྶ པན ཏཛྫཏཱཔཉྙཏྟི ལབྦྷཏེཝ. ཏཐཱ ཧི ‘‘ཀིཾ ཝཱ ཨེཏེནཱ’’ཏིཨཱདིནཱ ཕསྶཱདཱིནཾ ཏཐཱ དེསེཏབྦཏཾ ཨཱཧ.

༧. ཙིཏྟསྶ ཨཱརམྨཎེ ཨཱནཡནཱཀཱརཔྤཝཏྟོ ཝིཏཀྐོ ཨཏྠཏོ ཨཱརམྨཎཾ ཏཏྠ ཨཱཀཌྜྷནྟོ ཝིཡ ཧོཏཱིཏི ‘‘ཨཱརམྨཎསྶ ཨཱཀཌྜྷནཾ ཝིཏཀྐན’’ནྟི ཝུཏྟཾ.

༨. ཨཱརམྨཎསྶ ཨནུམཛྫནཱཀཱརཔྤཝཏྟོ ཝིཙཱརོ ཏཏྠ པརིབྦྷམནྟོ ཝིཡ སམནྟཏོ ཙརནྟོ ཝིཡ ཙ ཧོཏཱིཏི ‘‘སམནྟཏོ ཙརཎཾ ཝིཙརཎ’’ནྟི ཝུཏྟཾ.

༡༡. ཏཐཱ ཨཝཊྛཱནམཏྟབྷཱཝཏོཏི པཱཎཝདྷཱདིསཱདྷནཨཝཊྛཱནམཏྟབྷཱཝཏོ, ན བལཝབྷཱཝཏོཏི ཨདྷིཔྤཱཡོ.

༡༤. ཡེན དྷམྨེན ཙིཏྟེ ཨཱརམྨཎཾ ཨུཔཏིཊྛཏི ཛོཏཏི ཙ, སོ དྷམྨོ ཨུཔཊྛཱནཾ ཛོཏནནྟི ཙ ཝུཏྟོཏི ཨཱཧ ‘‘ཨུཔཊྛཱནཾ ཛོཏནཉྩ སཏིཡེཝཱ’’ཏི.

༡༦. སཎྷཊྛེནཱཏི སུཁུམཊྛེན.

༣༠. བྷཱཝོཏི ཧིརིཡནཾ ཝདཏི.

༣༣. ན ¶ བྱཱཔཱདེཏབྦོཏི ཨབྱཱཔཛྫ-སདྡསྶ ཀམྨཏྠཏཾ ཨཱཧ.

༤༢-༤༣. ཡདི ཨནཝཛྫདྷམྨཱནཾ སཱིགྷསཱིགྷཔརིཝཏྟནསམཏྠཏཱ ལཧུཏཱ, སཱཝཛྫདྷམྨཱནཾ ཀཐནྟི ཨཱཧ ‘‘ཨཝིཛྫཱནཱིཝརཎཱན’’ནྟིཨཱདི. ཏེསཾ བྷཱཝོ ¶ གརུཏཱཏི ཨེཏེན སཏིཔི སབྦེསཾ ཨརཱུཔདྷམྨཱནཾ སམཱནཁཎཏྟེ མོཧསམྤཡུཏྟཱནཾ སཱཏིསཡོ དནྡྷོ པཝཏྟིཨཱཀཱརོཏི དསྶེཏི. སོ པན ཏེསཾ དནྡྷཱཀཱརོ སནྟཱནེ པཱཀཊོ ཧོཏི.

༤༤-༤༥. ཨཔྤཊིགྷཱཏོ ཨཝིལོམནཾ.

༤༦-༤༧. ཀིལིནྣནྟི ཨཝསྶུཏཾ.

༥༠-༥༡. པཙྩོསཀྐནཾ མཱཡཱ ཡཱ ཨཙྩསརཱཏིཔི ཝུཙྩཏི. ཨརུམཀྑནཾ ཝཎཱལེཔནཾ. ཝེལུ༹ ཨེཝ དཱཏབྦབྷཱཝེན པརིགྒཧིཏོ ཝེལུ༹དཱནཾ ནཱམ.

ནིདྡེསཝཱརཀཐཱཝཎྞནཱ ནིཊྛིཏཱ.

ཀོཊྛཱསཝཱརཀཐཱཝཎྞནཱ

༥༨-༡༢༠. ཏེཏི ཕསྶཔཉྩམཀཱདཡོ. སངྒཧགམནེནེཝཱཏི སཱདྷཱརཎཏཱདིནཱ ཀེནཙི སདིསཏཱལེསེན, ན ཕསྶཱདཡོ ཝིཡ ཝིསུཾ དྷམྨབྷཱཝེནེཝཱཏི ཨཏྠོ. ཏཐཱ ཨཝིཔྤཀིཎྞཏྟཱཏི ཕསྶཱདཡོ ཝིཡ སརཱུཔེན ཝིསུཾ ཝིསུཾ ཨཝུཏྟཏྟཱ. ཡདིཔི ཚནྡཱདཡོ སངྒཧསུཉྙཏཝཱརེསུཔི སརཱུཔེན ན ཝུཏྟཱ, ཁནྡྷཱཡཏནདྷཱཏུརཱསཱིསུ པན སངྒཧིཏཱཡེཝཱཏི དསྶེཏུཾ ‘‘ཡསྨཱ པནཱ’’ཏིཨཱདིམཱཧ. ཏཾནིདྡེསེཏི སངྑཱརཀྑནྡྷནིདྡེསེ. ཁནྡྷཱནཾ དྷཱཏཱཡཏནབྷཱཝེ བྱབྷིཙཱརཱབྷཱཝཏོ ཨཁནྡྷབྷཱཝནིཝཱརཎེན ཨནཱཡཏནཱདྷཱཏུབྷཱཝནིཝཱརཎམྤི དཊྛབྦཾ. ན ཡེཝཱཔནཀཱ ཋཔེཏབྦཱཏི ཁནྡྷཱདིརཱསིཨནྟོགདྷཏཾ སནྡྷཱཡ ཝུཏྟཾ. ཨུདྡེསཱདཱིསུ པན ‘‘ཡེཝཱཔནཱཏྭེཝ ཝུཏྟཱནཾ ཏེསཾ ཏཐཱཡེཝ སངྒཧོ ཡུཏྟོ’’ཏི ཨཊྛཀཐཱཡཾ ‘‘ཋཔེཏྭཱ ཡེཝཱཔནཀེ’’ཏི ཝུཏྟཾ. སརཱུཔེན ཨཝུཏྟཱནམྤི ཙིཏྟུཔྤཱདཔརིཡཱཔནྣཱནཾ ¶ ཁནྡྷཱདིབྷཱཝོ ན ཝཱརེཏབྦོཏི ན ཡེཝཱཔནཀཱ ཋཔེཏབྦཱཏི ཝུཏྟནྟི ཨུབྷཡེསམྤི ཨདྷིཔྤཱཡོ ཝེདིཏབྦོ.

ཨཱཧཱརཔཙྩཡསངྑཱཏེནཱཏི ཨུཔཏྠམྦྷཀཔཙྩཡསངྑཱཏེན. སོ ཙ ཨཱཧཱརཱནཾ ཨུཔཏྠམྦྷཀབྷཱཝོ པཱཀཊོཏི ཀཏྭཱ ཝུཏྟོ, ན ཛནཀཏྟཱབྷཱཝཏོ. ཨོཛཊྛམཀརཱུཔསྶ ཧི ཝེདནཱདཱིནཉྩ ཨཱཧཱརཎཏོ ཏེསཾ ཛནཀཏྟཾ ལབྦྷཏཱིཏི. ཡདི ཨུཔཏྠམྦྷཀོ ཨིདྷ པཙྩཡོཏི ཨདྷིཔྤེཏོ, ཀབལཱི༹ཀཱརཱཧཱརསྶ ཏཱཝ ཧོཏུ, ཨིཏརེསཾ ཀཐནྟི ཨཱཧ ‘‘ཡཐཱ ཧཱི’’ཏིཨཱདི ¶ . སཧཛཱཏཱདིཔཙྩཡེཏི སཧཛཱཏཨཉྙམཉྙནིསྶཡསམྤཡུཏྟཨཏྠིཨཝིགཏཔཙྩཡེ ཝདཏི, མཧཱཙཏུཀྐཾ ཝཱ, ཨེཀེནཱཀཱརེནཱཏི རཱུཔཱརཱུཔཱནཾ ཨུཔཏྠམྦྷཀཏྟེན ཨུཔཀཱརཀབྷཱཝམཱཧ. སོ ཨེཝ ཙ ནེསཾ ཨཱཧརཎཀིཙྩཾ. ‘‘སངྑཱརཔཙྩཡཱ ཝིཉྙཱཎ’’ནྟི ཝཙནཏོ ཙེཏནཱཡ ཝིཉྙཱཎསྶ པཙྩཡབྷཱཝོ སཱཏིསཡོཏི ཨཱཧ ‘‘ཝིཉྙཱཎཾ ཝིསེསེནཱ’’ཏི.

ཡཐཱགཏམགྒོཏི ཝུཏྟོ ཀཱརཎཕལཱནཾ ཨབྷེདཱུཔཙཱརེནཱཏི དཊྛབྦཾ, ནཱནཱཀྑཎིཀོ ཨཊྛངྒིཀམགྒོ ཨུཔནིསྶཡོ ཨེཏསྶཱཏི ཨཊྛངྒིཀམགྒཱུཔནིསྶཡོ. ཨརིཡམགྒསྶ ཡཐཱགཏམགྒཔརིཡཱཡོ ཝུཙྩམཱནོ ཏསྶ ཡཱ པུརིམཀཱལབྷཱུཏཱ ཨབྷེདོཔཙཱརསིདྡྷཱ ཨཱགམནཱཝཏྠཱ ཏཏོ ནཱཏིཝིལཀྑཎཱཏི ཨིམམཏྠཾ ཝིབྷཱཝེཏཱིཏི ཨཱཧ ‘‘པུབྦབྷཱག…པེ… དཱིཔིཏཱ’’ཏི. ཝིཉྙཱཎསྶ ཙིཏྟཝིཙིཏྟཏཱ ཝིཛཱནནབྷཱཝཝིསེསཱ ཨེཝཱཏི ཨཱཧ ‘‘ཝིཛཱནནམེཝ ཙིཏྟཝིཙིཏྟཏཱ’’ཏི. ཝེདནཱཀྑནྡྷཱདཱིནནྟི ཨཱདི-སདྡེན ‘‘དྭཱཡཏནཱནི ཧོནྟཱི’’ཏིཨཱདཱིསུ ཝུཏྟམནཱཡཏནཱདཡོཔི སངྒཎྷཱཏི. ཏཔྤཊིཀྑེཔོཏི ཏསྶ ཛཱཏིནིདྡེསབྷཱཝསྶ པཊིཀྑེཔོ. ཀཏོ ཧོཏཱིཏི ཨེཏེན ཨཱཧཱརིནྡྲིཡཛྷཱནམགྒཕལཧེཏུཡོ ཡཏྟཀཱ ཨིམསྨིཾ ཙིཏྟེ ལབྦྷནྟི, ཏེ སབྦེཔི ‘‘ཨེཀོ ཝིཉྙཱཎཱཧཱརོ ཧོཏཱི’’ཏིཨཱདིནཱ ཨཝུཏྟཱཔི ཨཏྠཏོ ཝུཏྟཱཡེཝཱཏི དསྶེཏི. ཨེས ནཡོ ཨཉྙཏྠཱཔི.

ཀོཊྛཱསཝཱརཀཐཱཝཎྞནཱ ནིཊྛིཏཱ.

སུཉྙཏཝཱརཱདིཝཎྞནཱ

༡༢༡-༡༤༥. ཡཐཱཝུཏྟེ ¶ སམཡེཏི ཝུཏྟཔྤཀཱརསམཱུཧེ.

༡༤༦. ཨུསྶཱཧནཾ པེསནཾ ནིཡོཛནཾ.

༡༥༦-༡༥༩. ནཱཏིསམཱཧིཏཱཡཱཏི ནཱནཱཝཛྫནཱུཔཙཱརཾ སནྡྷཱཡ ཝདཏི. ཡེཝཱཔནཀེཧིཔི ནིབྦིསེསཏཾ དསྶེཏི ཀརུཎཱམུདིཏཱནམྤི ཨུཔྤཛྫནཏོ.

ཀཱཡཝཙཱིཀིརིཡཱ ཀཱཡཝཙཱིཔཝཏྟི, ཝིཉྙཏྟི ཨེཝ ཝཱ. ཨསམཏྟབྷཱཝནནྟི པུབྦབྷཱགབྷཱཝནམཱཧ.

ཀཱམཱཝཙརཀུསལཝཎྞནཱ ནིཊྛིཏཱ.

རཱུཔཱཝཙརཀུསལཾ

ཙཏུཀྐནཡོ

པཋམཛ྄ཛྷཱནཀཐཱཝཎྞནཱ

༡༦༠. ཨུཏྟརཔདལོཔཾ ¶ ཀཏྭཱ ‘‘རཱུཔབྷཝོ རཱུཔ’’ནྟི ཝུཏྟོ, ‘‘རཱུཔཱི རཱུཔཱནི པསྶཏི (མ. ནི. ༢.༢༤༨; ༣.༣༡༢; དྷ. ས. ༢༤༨; པཊི. མ. ༡.༢༠༩), རཱུཔརཱགོ’’ཏིཨཱདཱིསུ (དྷ. ས. ༣༦༣) ཝིཡཱཏི དཊྛབྦཾ. པཡོགསམྤཱདིཏསྶ རཱུཔཛ྄ཛྷཱནསྶ རཱུཔབྷཝཱཏིཀྐམསྶཔི ཨུཔཱཡབྷཱཝཏོ ཡཐཱ རཱུཔཱུཔཔཏྟིཡཱ ཨེཝ མགྒོཏི ཨཡཾ ནིཡམོ ན ཡུཛྫཏི, ཨེཝཾ པཙྩཡནྟརཝིཀལཏཱདཱིཧི རཱུཔཱུཔཔཏྟིཡཱ ཨནབྷིནིཔྥཱདཀསྶཔི ཨཏྠིབྷཱཝཏོ རཱུཔཱུཔཔཏྟིཡཱ མགྒོ ཨེཝཱཏི ཨཡམྤི ནིཡམོ ན ཡུཛྫཏི. ཨེཝཉྩ སཏི ཡདེཝ རཱུཔཱུཔཔཏྟིཡཱ ནིཔྥཱདཀཾ, ཏསྶེཝ སམྤཡུཏྟསྶ རཱུཔཱཝཙརཀུསལབྷཱཝོ, ན ཨནབྷིནིཔྥཱདཀསྶཱཏི ཨཡམཏྠོ ཨཱཔནྣོཏི ཙོདནཾ སམུཊྛཱཔེཏི ¶ ན སབྦསྶ ཀུསལཛ྄ཛྷཱནསྶཱཏིཨཱདིནཱ. ཏཏྠ སཱམཉྙསདྡོཔི ཨདྷིཀཱརཝསེན ཝིསེསནིདྡིཊྛོ ཧོཏཱིཏི ‘‘ཀུསལཛ྄ཛྷཱནསྶ མགྒབྷཱཝོ’’ཏི ཝུཏྟཾ.

རཱུཔཱུཔཔཏྟིཛནཀསབྷཱཝོ རཱུཔབྷཝཝིཔཙྩནསབྷཱཝོཏི ཏསྶཔི ཝིཔཱཀདྷམྨབྷཱཝེ སཏིཔི སབྦཀུསལཱཀུསལསཱདྷཱརཎཾ ཝིཔཱཀདྷམྨབྷཱཝསཱམཉྙཾ ‘‘ཝིཔཱཀདྷམྨབྷཱཝོ ཝིཡཱ’’ཏི ཨུདཱཧརཎབྷཱཝེན ཝུཏྟཾ. སཱམཉྙམྤི ཧི ཝིསེསཏོ བྷིནྣཾ ཀཏྭཱ ཝོཧརཱིཡཏཱིཏི. སབྦསམཱནོཏི རཱུཔཱུཔཔཏྟིཡཱ ནིཔྥཱདཀསྶ པཙྩཡནྟརཝིཀལཏཱདཱིཧི ཨནིཔྥཱདཀསྶ ཙ སབྦསྶ ཡཐཱདྷིགཏསྶ ཛྷཱནསྶ སཱདྷཱརཎོ. ཨེཏེན ཨུཏྟརཔདཱཝདྷཱརཎསྶ པརིགྒཧིཏཏཾ དསྶེཏི. ‘‘ཨིཏོ ཨཉྙོ མགྒོ ནཱམ ནཏྠཱི’’ཏི ཨིམིནཱཔི སཛཱཏིཡཱ སཱདྷཱརཎོ ཨཉྙཛཱཏིཝིནིཝཏྟིཡཱ ཨནཉྙསཱདྷཱརཎོ ཨིམསྶ ཛྷཱནསྶ རཱུཔཱུཔཔཏྟིཡཱ ཨུཔཱཡབྷཱཝོ ཝུཏྟོཏི དཊྛབྦཾ. ཨིཏརེ དྭེ སདྡྷཱ ཧིརཱི ཙ. ཡདི པཊིཔདཱཡ སཱདྷེཏབྦཏོ པུགྒལཔུབྦངྒམཱཡ དེསནཱཡ བྷཱཝེནྟེན སམཡཝཝཏྠཱནཾ ཀཏཾ. པཊིཔདཱརཧིཏེསུ ཀཐནྟི ཨཱཧ ‘‘ཀེསཉྩཱི’’ཏིཨཱདི. ཏཏྠ ཀེསཉྩཱིཏི སམཐབྷཱཝནཱཡ ཀཏཱདྷིཀཱརཱནཾ. ཏེསཉྷི མགྒཱདྷིགམནཏོ པུབྦེ ཨནདྷིགཏཛ྄ཛྷཱནཱནཾ པཊིསམྦྷིདཱདཡོ ཝིཡ མགྒཱདྷིགམེནེཝ ཏཱནི སམིཛ྄ཛྷནྟི.

ཨཉྙཱནཱིཏི ཨརིཡམགྒསིདྡྷིཏོ ཨཉྙཱནི. ཏེསུཔཱིཏི ཨརིཡམགྒེན སིདྡྷཏྟཱ པཊིཔདཱརཧིཏེསུཔི. ནནུ ཙ ཨརིཡམགྒསིདྡྷསྶཔི ཨཱགམནཝསེན པཊིཔདཱ ཨུཔལབྦྷཏིཡེཝ. ཨིཏརཐཱ ‘‘ན ཀཱམཱཝཙརཾ ཝིཡ ཝིནཱ པཊིཔདཱཡ ཨུཔྤཛྫཏཱི’’ཏི ¶ , ‘‘བཧུཏརཾ ལོཀིཡཛ྄ཛྷཱནམྤི ན ཝིནཱ པཊིཔདཱཡ ཨིཛ྄ཛྷཏཱི’’ཏི ཙ ཝཙནཾ ཝིརུཛ྄ཛྷེཡྻཱཏི? ན, ཡེབྷུཡྻེན གཧཎཏོ པུགྒལཝིསེསཱཔེཀྑཏྟཱ ཙ. ཨརིཡམགྒསམིཛ྄ཛྷནཀཉྷི ཛྷཱནཾ ཀསྶཙིདེཝ ཧོཏི, ཏསྨཱ ཨིཏརཾ བཧུཏརཾ ལོཀིཡཛ྄ཛྷཱནཾ པུཐུཛྫནསྶ ཨརིཡསྶ ཙ ཨཀཏཱདྷིཀཱརསྶ ན ཝིནཱ པཊིཔདཱཡ སིཛ྄ཛྷཏཱིཏི ཏེསཾ ཝསེན ཝུཏྟཾ. ཨརིཡམགྒསིདྡྷསྶཔི ཛྷཱནསྶ ཝིཔཱཀཱནཾ ཝིཡ ཀུསལེན ཨརིཡམགྒེན སདིསཏྟཱབྷཱཝཏོ ཨཏབྦིཔཱཀཏྟཱ ཙ ན མགྒཱགམནཝསེན པཊིཔདཱ ཡུཛྫཏི, ཨེཝམསྶ པཊིཔདཱཝིརཧོ སིདྡྷོ. ཨེཝཉྩ ཀཏྭཱ སུདྡྷིཀནཝཀདེསནཱཔི སུཊྛུ ནཱིཏཱ ཧོཏི. ཏཐཱ ཙ ཝཀྑཏི ལོཀུཏྟརཀཐཱཡཾ ‘‘ལོཀིཡཛ྄ཛྷཱནམྤཱི’’ཏིཨཱདི (དྷ. ས. མཱུལཊཱི. ༢༧༧).

ཝཊྚཱསཡསྶ ཝིསེསཔཙྩཡབྷཱུཏཱཡ ཏཎྷཱཡ ཏནུཀརཎཝསེན ཝིཝཊྚཱསཡསྶ ཝཌྜྷནནྟི ཨཱཧ ‘‘ཏཎྷཱསཾཀིལེསསོདྷནེན ཨཱསཡཔོསན’’ནྟི. ཨཱསཡཔོསནནྟི ཙ ཛྷཱནབྷཱཝནཱཡ པཙྩཡབྷཱུཏཱ པུབྦཡོགཱདིཝསེན ¶ སིདྡྷཱ ཨཛ྄ཛྷཱསཡསམྤདཱ. སཱ པན ཏཎྷུཔཏཱཔཝིགམེན ཧོཏཱིཏི ཨཱཧ ‘‘ཏཎྷཱསཾཀིལེསསོདྷནེནཱ’’ཏི.

ཐིནམིདྡྷཱདཱིནནྟི ཐིནམིདྡྷཨུདྡྷཙྩཀུཀྐུཙྩཝིཙིཀིཙྪཱནཾ. པཧཱནནྟི པཧཱཡཀཾ.

ཏཾསདིསེསཱུཏི མཧགྒཏབྷཱཝཱདིནཱ པཋམཛ྄ཛྷཱནསམཱདྷིསདིསེསུ.

པཱིཏིསུཁཝནྟཾ ཛྷཱནཾ པཱིཏིསུཁནྟི ཝུཏྟཾ ཡཐཱ ཨརིསསོཏི དསྶེནྟོ ‘‘པཱིཏིསུཁ…པེ… ཨཀཱརོ ཝུཏྟོ’’ཏི ཨཱཧ. མགྒསྶཔི ཝཱ ནིབྦཱནཱརམྨཎཏོ ཏཐལཀྑཎཱུཔནིཛ྄ཛྷཱནཏཱ ཡོཛེཏབྦཱ. ཨསམྨོསདྷམྨནྟི ཨཝིནཱསབྷཱཝཾ.

དུཏིཡཛ྄ཛྷཱནཀཐཱཝཎྞནཱ

༡༦༡-༡༦༢. དིཊྛཱདཱིནཝསྶ ཏཾཏཾཛྷཱནཀྑཎེ ཨནུཔྤཛྫནདྷམྨཏཱཔཱདནཾ ཝཱུཔསམནཾ ཝིརཛྫནཾ པཧཱནཉྩཱཏི ཨིདྷཱདྷིཔྤེཏཝིཏཀྐཱདཡོཡེཝ ཛྷཱནངྒབྷཱུཏཱ ཏཐཱ ཀརཱིཡནྟི, ན ཏཾསམྤཡུཏྟཕསྶཱདཡོཏི ཝིཏཀྐཱདཱིནཾཡེཝ ཝཱུཔསམཱདིཝཙནཾ ཉཱཡཱགཏཾ. ཡསྨཱ པན ཝིཏཀྐཱདཡོ ཝིཡ ཏཾསམྤཡུཏྟདྷམྨཱཔི ཨེཏེན ཨེཏཾ ཨོལཱ༹རིཀནྟི དིཊྛཱདཱིནཝཱ ཨེཝ, ཏསྨཱ ཨཝིསེསེན ཝིཏཀྐཱདཱིནཾ ཏཾསཧཛཱཏཱནཉྩ ཝཱུཔསམཱདིཀེ ཝཏྟབྦེ ཝིཏཀྐཝིཙཱརཱདཱིནཾཡེཝ ཝཱུཔསམཱདིཀཾ ཝུཙྩམཱནཾ ‘‘ཨདྷིཀཝཙནམཉྙམཏྠཾ བོདྷེཏཱི’’ཏི ཀིཉྩི ཝིསེསཾ དཱིཔེཏཱིཏི ཏཾ དསྶེནྟོ ‘‘ཡེཧི ཝིཏཀྐཝིཙཱརེཧཱི’’ཏིཨཱདིམཱཧ. ཝིསུཾ ¶ ཝིསུཾ ཋིཏཱནིཔི ཝིཏཀྐཝིཙཱརསམཏིཀྐམཝཙནཱདཱིནི པཧེཡྻངྒནིདྡེསཏཱསཱམཉྙེན ཙིཏྟེན སམཱུཧཏོ གཧེཏྭཱ ཨཝཡཝེན སམུདཱཡོཔལཀྑཎཾ ཀཏནྟི དསྶེནྟོ ‘‘ཏེསཾ…པེ… ཏཾ དཱིཔཀནྟི ཝུཏྟ’’ནྟི ཨཱཧ. ཨིདཱནི ཨཝཡཝེན སམུདཱཡོཔལཀྑཎཾ ཝིནཱ ཝིཏཀྐཝིཙཱརཝཱུཔསམཝཙནེན པཱིཏིཝིརཱགཱདིཝཙནཱནཾ སཝིསཡེ སམཱནབྱཱཔཱརཏཾ དསྶེནྟོ ‘‘ཨཐ ཝཱ’’ཏིཨཱདིམཱཧ.

ཏསྨིཾ དསྶིཏེཏི ‘‘ཡཱ སདྡྷཱ སདྡཧནཱ’’ཏིཨཱདིནཱ ཛྷཱནཝིབྷངྒེ སམྤསཱདནེ དསྶིཏེ. སམཱནཱདྷིཀརཎནིདྡེསེནེཝཱཏི ཏཏྠེཝ ཝིབྷངྒེ ཨུདྡེསཔདུདྡྷཱརཱདཱིསུ སདྡྷཱཛྷཱནཱནཾ ‘‘སམྤསཱདན’’ནྟི ཨེཀཱདྷིཀརཎཏཱཝཙནེནེཝ.

ཨོལཱ༹རིཀངྒམུཁེན ¶ ‘‘ཏདནུདྷམྨཏཱ སཏཱི’’ཏི ཝུཏྟཱཡ ཏཾཏཾཛྷཱནནིཀནྟིཡཱ ཝིཀྑམྦྷནཾ ཝིཏཀྐཝིཙཱརཝཱུཔསམཝཙནཱདཱིཧི པཀཱསིཏནྟི ཨཱཧ ‘‘ཏཎྷཱཔྤཧཱནཾ ཨེཏེསཾ ཝཱུཔསམན’’ནྟི (ཝིབྷ. ༧༩༩). ཡཏོ ཝིཏཀྐཝིཙཱརེསུ ཝིརཏྟབྷཱཝདཱིཔཀཾ ཝིཏཀྐཝིཙཱརཝཱུཔསམཝཙནནྟི ཏདུབྷཡཱབྷཱཝདཱིཔནཾ པུན ཀཏནྟི དསྶེཏུཾ ‘‘ཡེ ཙཱ’’ཏིཨཱདི ཝུཏྟཾ.

ཏཏིཡཛ྄ཛྷཱནཀཐཱཝཎྞནཱ

༡༦༣. ཝཱིརིཡཾ ཨུཔེཀྑཱཏི ཝུཏྟཾ ‘‘པགྒཧནིགྒཧེསུ བྱཱཔཱརཱཀརཎེན ཨུཔེཀྑིཡཏཱི’’ཏི. གཧཎེ མཛ྄ཛྷཏྟབྷཱཝེན སངྑཱརེ ཨུཔེཀྑཏཱིཏི སངྑཱརུཔེཀྑཱ, ཏཐཱཔཝཏྟཱ ཝིཔསྶནཱ པཉྙཱ. ཏསྶཱ པན ཝིསཡཏོ པབྷེདོ ‘‘ཨཊྛ སངྑཱརུཔེཀྑཱ’’ཏིཨཱདིནཱ (པཊི. མ. ༡.༥༧) ཡསྶཾ པཱལི༹ཡཾ ཝུཏྟོ, ཏཾ པཱལི༹སེསཾ དསྶེནྟོ ‘‘པཋམཛ྄ཛྷཱན’’ནྟིཨཱདིམཱཧ. ཏཏྠ ཨུཔྤཱདནྟི པུརིམཀམྨཔཙྩཡཱ ཨིདྷ ཨུཔྤཏྟིཾ. པཝཏྟནྟི ཏཐཱ ཨུཔྤནྣསྶ པཝཏྟིཾ. ནིམིཏྟནྟི སབྦམྤི སངྑཱརགཏཾ ནིམིཏྟབྷཱཝེན ཨུཔཊྛཱནཏོ. ཨཱཡཱུཧནནྟི ཨཱཡཏིཾ པཊིསནྡྷིཧེཏུབྷཱུཏཾ ཀམྨཾ. པཊིསནྡྷིནྟི ཨཱཡཏིཾ ཨུཔཔཏྟིཾ. གཏིནྟི ཡཱཡ གཏིཡཱ སཱ པཊིསནྡྷི ཧོཏི. ནིབྦཏྟིནྟི ཁནྡྷཱནཾ ནིབྦཏྟནཾ. ཨུཔཔཏྟིནྟི ‘‘སམཱཔནྣསྶ ཝཱ ཨུཔཔནྣསྶ ཝཱ’’ཏི ཨེཝཾ ཝུཏྟཾ ཝིཔཱཀཔྤཝཏྟིཾ. ཛཱཏིནྟི ཛརཱདཱིནཾ པཙྩཡབྷཱུཏཾ བྷཝཔཙྩཡཱ ཛཱཏིཾ. ཛརཱམརཎཱདཡོ པཱཀཊཱ ཨེཝ. ཨེཏྠ ཙ ཨུཔྤཱདཱདཡོ པཉྩེཝ སངྑཱརུཔེཀྑཱཉཱཎསྶ ཝིསཡཝསེན ཝུཏྟཱ, སེསཱ ཏེསཾ ཝེཝཙནཝསེན. ‘‘ནིབྦཏྟི ¶ ཛཱཏཱི’’ཏི ཨིདཉྷི དྭཡཾ ཨུཔྤཱདསྶ ཙེཝ པཊིསནྡྷིཡཱ ཙ ཝེཝཙནཾ. ‘‘གཏི ཨུཔཔཏྟི ཙཱ’’ཏི ཨིདཾ དྭཡཾ པཝཏྟསྶ. ཛརཱདཡོ ནིམིཏྟསྶཱཏི.

བྷཱུཏསྶཱཏི ཁནྡྷཔཉྩཀསྶ. ཨེཏེཧཱིཏི ཛྷཱནཙིཏྟསམུཊྛིཏརཱུཔེཧི.

ཙཏུཀྐནཡཝཎྞནཱ ནིཊྛིཏཱ.

པཉྩཀནཡཝཎྞནཱ

༡༦༧. ཨཱཀཱརབྷེདནྟི ཨཱཀཱརཝིསེསཾ. ཨནེཀཱཀཱརཱ ཧི དྷམྨཱ, ཏེ ཙ ནིརཝསེསཾ ¶ ཡཱཐཱཝཏོ བྷགཝཏཱ ཨབྷིསམྦུདྡྷཱ. ཡཐཱཧ – ‘‘སབྦེ དྷམྨཱ སབྦཱཀཱརེན བུདྡྷསྶ བྷགཝཏོ ཉཱཎམུཁེ ཨཱཔཱཐཾ ཨཱགཙྪནྟཱི’’ཏི (མཧཱནི. ༡༥༦; ཙཱུལ༹ནི. མོགྷརཱཛམཱཎཝཔུཙྪཱནིདྡེས ༨༥; པཊི. ༣.༥). དུཏིཡཛ྄ཛྷཱནཔཀྑིཀཾ ན པཋམཛ྄ཛྷཱནཔཀྑིཀནྟི ཨདྷིཔྤཱཡོ. ཏེནེཝཱཧ ‘‘པཋམཛ྄ཛྷཱནམེཝ ཧཱི’’ཏིཨཱདི. ཨཏྠཏོ ཧི ཙཏུཀྐཔཉྩཀནཡཱ ཨཉྙམཉྙཱནུཔྤཝེསིནོ. པཉྩཀནཡེ དུཏིཡཛ྄ཛྷཱནཾ ཀིཾ སཝིཙཱརཏཱཡ པཋམཛ྄ཛྷཱནཔཀྑིཀཾ ཨུདཱཧུ ཨཝིཏཀྐཏཱཡ དུཏིཡཛ྄ཛྷཱནཔཀྑིཀནྟི སིཡཱ ཨཱསངྐཱཏི ཏདཱསངྐཱནིཝཏྟནཏྠམིདཾ ཝུཏྟཾ. ཀསྨཱཏིཨཱདིནཱ ཏཏྠ ཀཱརཎམཱཧ. སུཏྟནྟདེསནཱསུ ཙ དུཏིཡཛ྄ཛྷཱནམེཝ བྷཛནྟཱིཏི སམྦནྡྷོ. ཙ-སདྡེན ན ཀེཝལཾ ཨིདྷེཝ, ཨཐ ཁོ སུཏྟནྟདེསནཱསུཔཱིཏི དེསནནྟརེཔི ཡཐཱཝུཏྟཛ྄ཛྷཱནསྶ པཋམཛ྄ཛྷཱནཔཀྑིཀཏྟཱབྷཱཝཾ དསྶེཏི. ཨིདཱནི བྷཛནམྤི དསྶེཏུཾ ‘‘ཝིཏཀྐཝཱུཔསམཱ’’ཏིཨཱདི ཝུཏྟཾ. ཏེན སུཏྟནྟེཔི པཉྩཀནཡསྶ ལབྦྷམཱནཏཾ དསྶེཏི.

ནནུ ཙ སུཏྟནྟེ ཙཏྟཱརིཡེཝ ཛྷཱནཱནི ཝིབྷཏྟཱནཱིཏི པཉྩཀནཡོ ནཏྠིཡེཝཱཏི? ན, ‘‘སཝིཏཀྐསཝིཙཱརོ སམཱདྷཱི’’ཏིཨཱདིནཱ སམཱདྷིཏྟཡཱཔདེསེན པཉྩཀནཡསྶ ལབྦྷམཱནཏྟཱ. ཙཏུཀྐནཡནིསྶིཏོ པན ཀཏྭཱ པཉྩཀནཡོ ཝིབྷཏྟོཏི ཏཏྠཱཔི པཉྩཀནཡོ ནིདྡྷཱརེཏབྦོ. ཝིཏཀྐཝིཙཱརཱནཾ ཝཱུཔསམཱཏི ཧི ཝིཏཀྐསྶ ཝིཙཱརསྶ ཝིཏཀྐཝིཙཱརཱནཉྩ ཝིཏཀྐཝིཙཱརཱནནྟི སཀྐཱ ཝཏྟུཾ. ཏཐཱ ཨཝིཏཀྐཨཝིཙཱརཱནནྟི ཙ ཝིནཱ སཧ ཙ ཝིཙཱརེན ཝིཏཀྐཔྤཧཱནེན ཨཝིཏཀྐཾ སཧ ཝིནཱ ཙ ཝིཏཀྐེན ཝིཙཱརཔྤཧཱནེན ཨཝིཙཱརནྟི ཨཝིཏཀྐཾ ཨཝིཙཱརཾ ཨཝིཏཀྐཨཝིཙཱརཉྩཱཏི ཝཱ ཏིཝིདྷམྤི སཀྐཱ སངྒཎྷིཏུཾ.

དུཏིཡནྟི ¶ ཙ ཝིཏཀྐརཧིཏེ ཝིཏཀྐཝིཙཱརདྭཡརཧིཏེ ཙ ཉཱཡཱགཏཱ དེསནཱ. དུཏིཡཾ ཨདྷིགནྟབྦཏྟཱ ཝིཙཱརམཏྟརཧིཏེཔི དྭཡཔྤཧཱནཱདྷིགཏསམཱནདྷམྨཏྟཱ. ཨེཝཉྩ ཀཏྭཱ པཉྩཀནཡནིདྡེསེ དུཏིཡེ ཝཱུཔསནྟོཔི ཝིཏཀྐོ ཏཾསཧཱཡཝིཙཱརཱཝཱུཔསམེན ན སམྨཱཝཱུཔསནྟོཏི ཝིཏཀྐཝིཙཱརདྭཡརཧིཏེ ཝིཡ ཝིཙཱརཝཱུཔསམེནེཝ ཏདུཔསམཾ སེསདྷམྨསམཱནཏཉྩ དསྶེནྟེན ‘‘ཝིཏཀྐཝིཙཱརཱནཾ ཝཱུཔསམཱ ཨཛ྄ཛྷཏྟཾ སམྤསཱདནཾ ཙེཏསོ ཨེཀོདིབྷཱཝཾ ཨཝིཏཀྐཾ ཨཝིཙཱརཾ སམཱདྷིཛཾ པཱིཏིསུཁཾ ཏཏིཡཾ ཛྷཱནཾ ཨུཔསམྤཛྫ ཝིཧརཏཱི’’ཏི ཏཏིཡཾ ཙཏུཀྐནཡེ དུཏིཡེན ནིབྦིསེསཾ ཝིབྷཏྟཾ. དུཝིདྷསྶཔི སཧཱཡཝིརཧེན ཨཉྙཐཱ ཙ ཝིཏཀྐཔྤཧཱནེན ཨཝིཏཀྐཏྟཾ སམཱདྷིཛཾ པཱིཏིསུཁཏྟཉྩ སམཱནནྟི སམཱནདྷམྨཏྟཱཔི དུཏིཡནྟི ནིདྡེསོ. ཝིཙཱརམཏྟམྤི ཧི ཝིཏཀྐཝིཙཱརདྭཡརཧིཏཾ ཝིཡ ‘‘ཡསྨིཾ སམཡེ རཱུཔཱུཔཔཏྟིཡཱ མགྒཾ བྷཱཝེཏི ཨཝིཏཀྐཝིཙཱརམཏྟཾ ¶ སམཱདྷིཛཾ པཱིཏིསུཁཾ དུཏིཡཾ ཛྷཱནཾ ཨུཔསམྤཛྫ ཝིཧརཏཱི’’ཏི ཨཝིཏཀྐཾ སམཱདྷིཛཾ པཱིཏིསུཁནྟི ཝིབྷཏྟཾ. པཋམཛ྄ཛྷཱནེ ཝཱ སཧཙཱརཱིསུ ཝིཏཀྐཝིཙཱརེསུ ཨེཀཾ ཨཏིཀྐམིཏྭཱ དུཏིཡམྤི ཏཏྲཊྛམེཝ དོསཏོ དིསྭཱ ཨུབྷཡམྤི སཧཱཏིཀྐམནྟསྶ པཉྩཀནཡེ ཏཏིཡཾ ཝུཏྟཾ ཏཏིཡཾ ཨདྷིགནྟབྦཏྟཱ. པཋམཏོ ཨནནྟརབྷཱཝེན པནསྶ དུཏིཡབྷཱཝོ ཙ ཨུཔྤཛྫཏི. ཀསྨཱ པནེཏྠ སརཱུཔཏོ པཉྩཀནཡོ ན ཝིབྷཏྟོཏི? ཝིནེཡྻཛ྄ཛྷཱསཡཏོ. ཡཐཱནུལོམདེསནཱ ཧི སུཏྟནྟདེསནཱཏི.

པཊིཔདཱཙཏུཀྐཱདིཝཎྞནཱ

༡༧༦-༡༨༠. ཏདནུརཱུཔཏཱཏི ཏསྶ པཋམཱདིཛ྄ཛྷཱནསྶ ཨནུརཱུཔསབྷཱཝཱ. ཡཐཱལདྡྷཛ྄ཛྷཱནཾ སནྟཏོ པཎཱིཏཏོ དིསྭཱ ཨསྶཱདཡམཱནཱ ནིཀནྟི ཏཾསམྤཡུཏྟཱ ཁནྡྷཱ ཝཱ ཏདཱརཀྑབྷཱུཏཱ སཏིཡེཝ ཝཱ ཏསྶ ཛྷཱནསྶ ཨནུཙྪཝིཀཏཱཡ ‘‘ཏདནུདྷམྨཏཱ སཏཱི’’ཏི ཝུཏྟཱཏི. ཀདཱཙཱིཏི ཡདཱ པཋམཾ ཨདྷིགནྟྭཱ ཡཐཱནིསིནྣོཡེཝ ཝིནཱ པཡོགནྟརཾ དུཏིཡཱདཱིནི ཨདྷིགཙྪཏི, ཨཱིདིསེ ཀཱལེཏི ཨཏྠོ.

༡༨༦. ཀུསལཛ྄ཛྷཱནསྶ ཨདྷིགཏཏྟཱ ‘‘སེཀྑཱ’’ཏི ཝུཏྟཾ. ན ཧི ཏེ ཨུཔྤཱདེནྟི ནཱམཱཏི ཨརིཡམགྒཀྑཎེ རཱུཔཱཝཙརཛ྄ཛྷཱནཱནཾ ཨནུཔྤཛྫམཱནཏཾ སནྡྷཱཡཱཧ.

ཀསིཎཀཐཱཝཎྞནཱ

༢༠༣. ཨཱརུཔྤཔཱདཀཏཱ ¶ ཙ དསྶིཏཱ ཝིནཱ ཨབྷཱཝཏོ. ན ཧི ཏེསཾ ཨཱརུཔྤཔཱདཀཏཱཡ ཝིནཱ ནིརོདྷཔཱདཀཏཱ ཨཏྠཱིཏི. ནིམྨིནིཏུཾ ཨིཙྪིཏསྶ ཝཏྠུནོ ནིམྨཱནཝསེན ཁིཔྤཾ ནིསནྟི ནིསཱམནཾ ཨཱལོཙནཾ ཨདྷིགམོ ཨེཏསྶཱཏི ཁིཔྤནིསནྟི. ཏབྦྷཱཝོ ‘‘ཁིཔྤནིསནྟིབྷཱཝོ’’ཏི ཨཱཧ ‘‘ཁིཔྤདསྶནཾ ཁིཔྤཱབྷིཉྙཏཱ’’ཏི.

ཀསིཎཀཐཱཝཎྞནཱ ནིཊྛིཏཱ.

ཨབྷིབྷཱཡཏནཀཐཱཝཎྞནཱ

༢༠༤. པཊིབྷཱགནིམིཏྟབྷཱུཏཾ ¶ ཀསིཎཱརམྨཎསངྑཱཏཾ ཨཱཡཏནཾ ཀཱརཎཾ ཨེཏསྶཱཏི ཀསིཎཱཡཏནཾ, ཛྷཱནཾ. ཨཐ ཝཱ ཨཱརམྨཎསྶ ཨནཝསེསཕརཎཊྛེན ཀསིཎཉྩ ཏཾ ཨཱཡཏནཉྩ ཡོགིནོ སུཁཝིསེསཱནཾ ཨདྷིཊྛཱནབྷཱཝཏོ མནཱཡཏནདྷམྨཱཡཏནབྷཱཝཏོ ཙཱཏི སསམྤཡུཏྟཾ ཛྷཱནཾ ཀསིཎཱཡཏནཾ. ཏེནེཝཱཧ ‘‘སཏིཔི ཨབྷིབྷཱཡཏནཱནཾ ཀསིཎཱཡཏནཏྟེ’’ཏི. བྷཱཝནཱཡ ནིམིཏྟཾ བྷཱཝནཱནིམིཏྟཾ, ཨཱརམྨཎསྶ པརིཏྟཔྤམཱཎཏཱ སུཝིསུདྡྷནཱིལཱདིཏཱ ཙ, ཏདེཝ ནཱནཏྟཾ. བྷཱཝནཱ ཨེཝ ཝཱ པུབྦབྷཱགབྷཱུཏཱ བྷཱཝནཱནིམིཏྟཾ, ཏསྶ ནཱནཏྟཾ བྷཱཝནཱནིམིཏྟནཱནཏྟཾ. པུབྦབྷཱགབྷཱཝནཱ ཧི ཡཐཱཝུཏྟཝིསེསེ ཨཱརམྨཎེ པཝཏྟིཨཱཀཱརཝིསེསཏོ ནཱནཱསབྷཱཝཱཏི. ཀསིཎནིམིཏྟསྶ ཨབྷིབྷཝནཀབྷཱཝནཱནིམིཏྟནཱནཏྟཾ ཀསིཎ…པེ… ནཱནཏྟཾ, ཏཏོཏི ཡོཛེཏབྦཾ.

ཨེཏྠ ཙ པུརིམཱནི ཙཏྟཱརི ཨབྷིབྷཱཡཏནཱནི བྷཱུཏཀསིཎཱརམྨཎཱནི, བྷཱུཏཀསིཎེསུ ཙ ཡཾ སུཝཎྞཾ དུབྦཎྞནྟི ཙ ན སཀྐཱ ཝཏྟུཾ. ཏཏྠ པཝཏྟིཏཱནི སབྦཏྠ ཝཱ ཝཎྞཱབྷོགརཧིཏེན པཝཏྟིཏཱནི པཋམཏཏིཡཱབྷིབྷཱཡཏནཱནཱིཏི དུཏིཡཙཏུཏྠཱནི ཝཎྞཀསིཎཱརམྨཎཱནི. ཡདི ཨེཝཾ དུཏིཡཙཏུཏྠེཧི པཉྩམཱདཱིནཾ ཀོ ཝིསེསོཏི ‘‘པཉྩམཱདཱིནི ཝཎྞཏོ རམཎཱིཡཏརཱནི, ན ཏཐཱ ཨིཏརཱནཱི’’ཏི ཝདནྟི. པུརིམཱནིཔི ཙཏྟཱརི ཨཊྛ ཀསིཎཱརམྨཎཱནེཝ, ཏསྨཱ ཏཾ ནེསཾ མཏིམཏྟཾ ‘‘ཨཊྛསུ ཀསིཎེསཱུ’’ཏི ཝུཏྟཏྟཱ. ཝིམོཀྑེསུ ཙ པཋམདུཏིཡཝིམོཀྑཱ ཨཊྛ ཀསིཎཱརམྨཎཱ. ཏཏིཡོ ཝཎྞཀསིཎཱརམྨཎོ. པཋམདུཏིཡཱཔི ཝཱ ཝཎྞཀསིཎཱརམྨཎཱ ཨེཝ ‘‘བཧིདྡྷཱ ནཱིལཀསིཎཱདིརཱུཔཱནི ¶ ཛྷཱནཙཀྑུནཱ པསྶཏཱི’’ཏི ཝུཏྟཏྟཱ. ཨཱརམྨཎམནུཉྙཏཱཡ ཧི ཏཏྠ ཨནིགྒཏིཏབྷཱཝེན ཏེསཾ པཝཏྟཱིཏི. ཨེཝཾ སནྟེ ཏཏིཡསྶ ཨིཏརེཧི ཀོ ཝིསེསོཏི? སུབྷཱཀཱརཱབྷོགོ. ཏཏིཡོ ཨེཝ ཧི སུབྷནྟི ཨཱབྷུཛནཝསེན པཝཏྟཏི, ན ཨིཏརེཏི.

ཉཱཎཾ ཨཔྤནཱཔཉྙཱ. ཝིཛྫམཱནེཔཱིཏི ཨཔི-སདྡེན ཨཝིཛྫམཱནེཔཱིཏི དསྶེཏི. པརིཏྟཔྤམཱཎཏཱ ཨབྷིབྷཝནསྶ ཀཱརཎཾ ཨིམེསུ ཙཏཱུསུ ཨབྷིབྷཱཡཏནེསཱུཏི ཨདྷིཔྤཱཡོ. ནནུ ཙ སབྦཏྠ ‘‘སུཝཎྞདུབྦཎྞཱནཱི’’ཏི ཝཙནཏོ ཝཎྞཱབྷོགསཧིཏཱནིཡེཝ གཧིཏཱནཱིཏི? ན གཧིཏཱནཱིཏི དསྶེནྟོ ‘‘ཏཏྠ ཙཱ’’ཏིཨཱདིམཱཧ. ཏཏྠཱཏི ཨཱགམེསུ. ཏཐཱ ཨཔྤམཱཎཱནཱིཏི ཝཎྞཱབྷོགརཧིཏཱནི ཙ སབྦཱནི ཨཔྤམཱཎཱནི སུཝཎྞདུབྦཎྞཱནཱིཏི ཨཏྠོ. ཡདི ཨེཝཾ ཀཐཾ ཝིསིཊྛཱནཾ ཝཎྞཱབྷོགེན རཧིཏཱནཾ སཧིཏཱནཉྩ ཨེཀཛ྄ཛྷཾ མནསི ཀརོཏི? ན ཨེཀཛ྄ཛྷཾ, ཝིསུཾཡེཝ ¶ པན ཏེསུ མནསིཀཱརོ. ཡདི ཝིསུཾ ཀཐམེཀནྟི? པརིཏྟབྷཱཝསཱམཉྙཏོ. ཡདི ཨེཝཾ ‘‘སུཝཎྞདུབྦཎྞགྒཧཎཾ ཨཏིརིཙྪཏཱི’’ཏི, ནཱཏིརིཙྪཏཱིཏི དསྶེནྟོ ‘‘ཨཏྠི ཧི ཨེསོ པརིཡཱཡོ’’ཏིཨཱདིམཱཧ. ཏཏྠ ཡདིདཾ ཝཎྞཱབྷོགཛནིཏཾ ཝིསེསཾ ཨགྒཧེཏྭཱ པརིཏྟསཱམཉྙེན ཨེཀཏྟཾ ནེཏྭཱ ‘‘པརིཏྟཱནི ཨབྷིབྷུཡྻཱ’’ཏི ཝཏྭཱ པུན ཏདནྟོགདྷདྷམྨཔྤབྷེདཾ ཝིནེཡྻཝསེན དསྶེཏུཾ ‘‘ཏཱནི ཙེ ཀདཱཙི ཝཎྞཝསེན ཨཱབྷུཛིཏཱནི ཧོནྟི སུཝཎྞདུབྦཎྞཱནི ཨབྷིབྷུཡྻཱ’’ཏི ཝཏྟབྦཏཱཡ ཝཎྞཱབྷོགརཧིཏཱནི སཧིཏཱནི ཙ ཝིསུཾ མནསི ཀཏྭཱ ཨུབྷཡཏྠཱཔི ཝཎྞཱབྷོགརཧིཏཔརིཏྟཱབྷིབྷཝནེ ཏཾ སཧིཏཔརིཏྟཱབྷིབྷཝནེ ཙ པརིཏྟཱབྷིབྷཝནསྶ སཱམཉྙཾ གཧེཏྭཱ ཨེཀནྟི ཝཙནཾ, ཨེསོ པརིཡཱཡོ ཝིཛྫཏཱིཏི ཨཡམདྷིཔྤཱཡོ.

ཨེཝཾ སུཏྟནྟཱབྷིདྷམྨཔཱཋཝིསེསཏོ ཨཊྛཀཐཱཡ ཝིརོདྷཱབྷཱཝཾ དསྶེཏྭཱ ཨིདཱནི སུཏྟནྟཱབྷིདྷམྨཔཱཋཱནཾ ཨཝིརོདྷཾ ཨདྷིཔྤཱཡཝིབྷཱཝནེན དསྶེཏུཾ ‘‘ཏཏྠཙཱ’’ཏིཨཱདིམཱཧ. ཨེཝཾ ཨབྷིདྷམྨེ ཝཎྞཱབྷོགརཧིཏཱནི སཧིཏཱནི ཙ ཝིསུཾ ཝུཏྟཱནི. སུཏྟནྟེ པན ‘‘ཨུབྷཡཱནི ཨེཀཛ྄ཛྷ’’ནྟི ཝུཏྟཾ, ཏཾ ཀཐཾ ཝིཉྙཱཡཏཱིཏི ཨཱཧ ‘‘ཏདེཏ’’ནྟིཨཱདི. ཏཏྠ ཨཱགཏསྶཱཏི སུཏྟནྟེ ཨཱགཏསྶ. ཏཏྠ ཧི ‘‘ཨཛ྄ཛྷཏྟཾ རཱུཔསཉྙཱི’’ཏི ཨཱགཏཾ. ཨཝཙནཏོཏི ཨབྷིདྷམྨེ ཨཝཙནཏོ. ཡདིཔི ཝིམོཀྑཱ ཝིསུཾ དེསིཏཱ, ཀསིཎཱཡཏནབྷཱཝོ ཝིཡ པན ཨབྷིབྷཱཡཏནཱནཾ ཝིམོཀྑཀིཙྩཏཱཔི ཨཏྠཱིཏི ཨབྷིབྷཱཡཏནཝིམོཀྑཱནཾ ཨིདྷཱཔི སངྐརོ དུནྣིཝཱརོཏི ཙོདནཾ མནསི ཀཏྭཱ ཨཱཧ ¶ ‘‘སབྦཝིམོཀྑཀིཙྩསཱདྷཱརཎཝཙནབྷཱཝཏོ’’ཏི. ཏེན ཡཐཱ ཨབྷིབྷཱཡཏནདེསནཱཡཾ ཨབྷིབྷཱཡཏནཀིཙྩཱནི ནིརཝསེསཏོ ཝུཏྟཱནི, ཨེཝཾ ཝིམོཀྑདེསནཱཡཾ ཝིམོཀྑཀིཙྩཱནཱིཏི ཨིདྷ ཏེསཾ ཨསངྐརོཡེཝཱཏི དསྶེཏི.

ཡེ ཙ ཡཐཱཝུཏྟཾ ཝཝཏྠཱནཾ ན སམྤཊིཙྪནྟི, ཏེཧི སུཏྟནྟཱབྷིདྷམྨཔཱཋབྷེདེ ཨཉྙཾ ཀཱརཎཾ ཝཏྟབྦཾ སིཡཱ. ཀིམེཏྠ ཝཏྟབྦཾ, ནནུ ཨཊྛཀཐཱཡཾ ‘‘ཀསྨཱ པན ཡཐཱ སུཏྟནྟེ’’ཏིཨཱདིཾ ཝཏྭཱ ‘‘ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏོ’’ཏི ཀཱརཎཾ ཝུཏྟནྟི. ན ཏཾ ཏསྶ ཀཱརཎཝཙནནྟི དསྶེནྟོ ‘‘ཨཛ྄ཛྷཏྟརཱུཔཱན’’ནྟིཨཱདིམཱཧ. ཏཏྠ ཡནྟི ཨིདྷ སུཏྟནྟེ ཙ ‘‘བཧིདྡྷཱ རཱུཔཱནི པསྶཏཱི’’ཏི (ཨ. ནི. ༨.༦༥) ཝུཏྟཝཙནཾ སནྡྷཱཡཱཧ. བཧིདྡྷཱ རཱུཔཱནིཡེཝ ཧི ཨབྷིབྷཝནཱིཡཱནཱིཏི. ཨཉྙཧེཏུཀནྟི དེསནཱཝིལཱསཏོ ཨཉྙཾ ཨབྷིབྷཝནཱིཡཧེཏུ ཨེཏསྶཱཏི ཨཉྙཧེཏུཀཾ. ཨཛ྄ཛྷཏྟཨརཱུཔསཉྙིཏཱཡ ཨེཝ, ན སུཏྟནྟེ ཝིཡ ཨཛ྄ཛྷཏྟརཱུཔསཉྙིཏཱཡ ཙཱཏི ཨཏྠོ. ཨཝིབྷཱུཏཏྟཱཏི ཨིདཾ ཉཱཎུཏྟརཱནཾ སཧ ནིམིཏྟུཔྤཱདནེན ཨཔྤནཱནིབྦཏྟནཾ ཨཱརམྨཎསྶ ཨབྷིབྷཝོ ན ¶ སུཊྛུ ཝིབྷཱུཏབྷཱཝམནྟརེན སམྦྷཝཏཱིཏི ཀཏྭཱ ཝུཏྟཾ. ནནུ ཙ ཨཊྛཀཐཱཡཾ པཱཋདྭཡཝིསེསསྶ དེསནཱཝིལཱསོ ཀཱརཎབྷཱཝེན ཝུཏྟོཏི ཨཱཧ ‘‘དེསནཱཝིལཱསོ ཙ ཡཐཱཝུཏྟཝཝཏྠཱནཝསེན ཝེདིཏབྦོ’’ཏི. དེསནཱཝིལཱསོ ཧི ནཱམ ཝིནེཡྻཛ྄ཛྷཱསཡཱནུརཱུཔཾ ཝིཛྫམཱནསྶེཝ པརིཡཱཡསྶ ཝིབྷཱཝནཾ ན ཡསྶ ཀསྶཙཱིཏི. ཏཏྠ ཙ ‘‘པརིཡཱཡདེསནཏྟཱ’’ཏིཨཱདིནཱ ཝུཏྟཔྤཀཱརཝཝཏྠཱནཾ དེསནཱཝིལཱསནིབནྡྷནམཱཧ. ཏཐཱ ཙེཝ ཧི པུརཏོ དེསནཱཝིལཱསོ ཝིབྷཱཝིཏོ.

ཨབྷིབྷཱཡཏནཀཐཱཝཎྞནཱ ནིཊྛིཏཱ.

ཝིམོཀྑཀཐཱཝཎྞནཱ

༢༤༨. ཏནྟི ‘‘སསནྟཏིཔརིཡཱཔནྣརཱུཔ’’ནྟི ཝུཏྟཀེསཱདིཝཎྞམཱཧ. ཏཾ པན ཡསྨཱ ཁལམཎྜལཱདི ཝིཡ པརམྤརཱཡ ཛྷཱནསྶ ཀཱརཎཾ, ཏསྨཱ ‘‘ཛྷཱནསྶ ཧེཏུབྷཱཝེནཱ’’ཏི ཨཱཧ. ཡེནཱཏི ཡཐཱཝུཏྟརཱུཔཝིསེསེན. ཝིསིཊྛེནཱཏི ཨཏིསཡཔྤཏྟེན ‘‘རཱུཔཱུཔཔཏྟིཡཱ’’ཏིཨཱདཱིསུ (དྷ. ས. ༡༦༠ ཨཱདཡོ; ཝིབྷ. ༦༢༥) ཝིཡ ཨུཏྟརཔདལོཔེན ¶ ‘‘རཱུཔ’’ནྟི ཝུཏྟེན རཱུཔཛྷཱནེན. ‘‘ཝིསིཊྛེནཱ’’ཏི ཨིམིནཱ ཧི ཨཏིསཡརཱུཔཡུཏྟོ རཱུཔཱིཏི ཝུཏྟོཏི དསྶེཏི. ‘‘པཋམཾ ཛྷཱནཾ ཨུཔསམྤཛྫ ཝིཧརཏི པཐཝཱིཀསིཎ’’ནྟིཨཱདིནཱ (དྷ. ས. ༤༩༩) ཛྷཱནཱནམེཝ ཀསིཎབྷཱཝེན པཝཏྟཱ. སུཏྟེ ཨཱརམྨཎཱནཾ ཀསིཎབྷཱཝེན པཝཏྟཱ ‘‘པཐཝཱིཀསིཎམེཀོ སཉྫཱནཱཏཱི’’ཏིཨཱདིནཱ (དཱི. ནི. ༣.༣༦༠; ཨ. ནི. ༡༠.༢༥).

ཝིམོཀྑཀཐཱཝཎྞནཱ ནིཊྛིཏཱ.

བྲཧྨཝིཧཱརཀཐཱཝཎྞནཱ

༢༥༡. ཨཉྙཱཎསམྤཡུཏྟཱཔི ཝཱ ཨུཔེཀྑཱཝེདནཱ ཨཉྙཱཎུཔེཀྑཱ, ཨུཔེཀྑཱཏི ཨཉྙཱཎསམྤཡུཏྟཱ ཨུཔེཀྑཱཝེདནཱ, ཨཉྙཱཎུཔེཀྑཱཏིཔི ཨེཏཱསཾཡེཝ ནཱམནྟི (ཝིབྷ. ཨཊྛ. ༩༤༧) ཧི ¶ སམྨོཧཝིནོདནིཡཾ ཝཀྑཏཱིཏི. ཨཔྤཊིབྷཱགནིམིཏྟཏྟེཔི ཨེཀཾ ཀཏིཔཡེ ཝཱ སཏྟེ ཨོདིསྶ པཝཏྟཱ པརིཙྪིནྣརཱུཔཱདིཨུཔཱདཱནཝིསཡེ པཝཏྟཏྟཱ ཀཐམཔྤམཱཎགོཙརཱཏི ཨཱཧ ‘‘ན ཙ སམྨུཏིསཙྩཝསེནཱ’’ཏིཨཱདི. ཨེཝམྤི ཡཐཱ ནཏྠི སཏྟཱ ཨོཔཔཱཏིཀཱཏི སཏྟཝསེན པཝཏྟཱཡཔི མིཙྪཱདིཊྛིཡཱ སངྑཱརཱརམྨཎཏཱ ཝུཙྩཏི ཨུཔཱདཱནཝསེན, ཨེཝཾ སཏྟཝསེན པཝཏྟཱནམྤི མེཏྟཱདཱིནཾ སངྑཱརཱརམྨཎཏཱཔི སིཡཱཏི ཙེ? ན, ཨཔརཱམསནཝསེན པཝཏྟཱནཾ མེཏྟཱདཱིནཾ སཨུཔཱདཱནགྒཧཎཱསམྦྷཝཏོཏི དསྶེནྟོ ཨཱཧ ‘‘ཨཔརཱམཱསཱ’’ཏིཨཱདི.

བྲཧྨཝིཧཱརཀཐཱཝཎྞནཱ ནིཊྛིཏཱ.

ཨསུབྷཀཐཱཝཎྞནཱ

༢༦༣. ‘‘ཨེཀཱཧམཏཾ ཝཱ དྭཱིཧམཏཾ ཝཱ’’ཏིཨཱདིནཱ (དཱི. ནི. ༢.༣༧༩; མ. ནི. ༡.༡༡༢) ཝུཏྟཱསུ ནཝསུ སིཝཐིཀཱསུ ཝཎྞཝསེན པཝཏྟཛ྄ཛྷཱནཾ སིཝཐིཀཱཝཎྞཛ྄ཛྷཱནཾ. ནནུ ཙེཏསྶ ཝཎྞཀསིཎེཧི གཧཎཾ ཡུཏྟཾ, ན ཨསུབྷེཧཱིཏི? ན, སིཝཐིཀཱཝཎྞཾ ཨུཔམཾ ཀཏྭཱ ཨཏྟནོ ཀཱཡེ པཊིཀཱུལཏྟཾ ཨམུཉྩིཏྭཱཝ ཝཎྞཝསེན པཝཏྟནཏོ ¶ . ཏེནེཝཱཧ ‘‘པཊིཀཱུལམནསིཀཱརསཱམཉྙེནཱ’’ཏི. ཨཡམཏྠོ སིཝཐིཀཱཝཎྞཛ྄ཛྷཱནསྶཱཏི ཨེཏྠཱཔི ཡོཛེཏབྦོཏི ཝིབྷཱཝེནྟོ ‘‘ཏམྤཱི’’ཏིཨཱདིམཱཧ.

ཨསུབྷཀཐཱཝཎྞནཱ ནིཊྛིཏཱ.

རཱུཔཱཝཙརཀུསལཝཎྞནཱ ནིཊྛིཏཱ.

ཨརཱུཔཱཝཙརཀུསལཀཐཱཝཎྞནཱ

༢༦༥. རཱུཔནིམིཏྟནྟི རཱུཔཧེཏུ རཱུཔཱདྷིཀརཎཾ. རཱུཔཱརཱུཔནིམིཏྟེསཱུཏི རཱུཔདྷམྨེསུ ཙ པཐཝཱིཀསིཎཱདིནིམིཏྟེསུ ཙ. ཏདཱརམྨཎཛ྄ཛྷཱནེསཱུཏི ཨེཏྠ ཏཾ-སདྡེན རཱུཔནིམིཏྟཾ པཙྩཱམསཏི རཱུཔམྤི ¶ ཝཱ རཱུཔདྷམྨཱརམྨཎཱནམྤི རཱུཔཱཝཙརཛ྄ཛྷཱནཱནཾ སམྦྷཝཏོ. རཱུཔཱདཱིསཱུཏི རཱུཔཱརཱུཔནིམིཏྟཏདཱརམྨཎཛ྄ཛྷཱནེསུ རཱུཔཔཊིབདྡྷདྷམྨེསུ ཙ. ཨནཱཝཛྫིཏུཀཱམཏཱདིནཱཏི ཨཱདི-སདྡེན ཨསམཱཔཛྫིཏུཀཱམཏཱདིཾ སངྒཎྷཱཏི.

ཙུཏིཏོ ཨུདྡྷཾ ཨུཔྤཏྟིརཧཱནཾ…པེ… ཨནུཔྤཏྟིདྷམྨཏཱཔཱདནེན སམཏིཀྐམོཏི ཨེཏེན སམཏིཀྐམིཏབྦཏྟེན རཱུཔཱཝཙརཀུསལཱནཾ རཱུཔཱཝཙརཝིཔཱཀཀིརིཡེཧི ཝིསེསཱབྷཱཝཾ དསྶེཏི ཨནདྷིགཏབྷཱཝཏོ. ཡེསཉྷི རཱུཔསཉྙཱདཱིནཾ ཨརཱུཔབྷཱཝནཱཡ སམཏིཀྐམཱདིཀོ ལབྦྷཏི, ཏེ དསྶེཏུཾ ‘‘ཨརཱུཔབྷཱཝནཱཡ ཨབྷཱཝེ ཙུཏིཏོ ཨུདྡྷཾ ཨུཔྤཏྟིརཧཱན’’ནྟི ཝུཏྟནྟི. ཡཱཏི ཨེཀནྟརཱུཔནིསྶིཏཱ ཨཝསིཊྛཔརིཏྟཝིཔཱཀསཉྙཱདཡོ.

ཨཱནེཉྫསནྟསམཱཔཏྟིསུཁཱནུབྷཝནབྷཝཝིསེསཱུཔཔཛྫནཱདཡོ ཨཱརུཔྤསམཱཔཏྟཱིནཾ ཨཏྠཱཏི ཨཱཧ ‘‘རཱུཔསཉྙཱ…པེ… ན ཨཏྠོ’’ཏི.

ཨིདྷ ཨུགྒྷཱཊིཏཀསིཎཝསེན པརིཏྟཱནནྟཏཱ ཧོཏི ནིཔྤརིཡཱཡདེསནཏྟཱཏི ཨདྷིཔྤཱཡོ. ཡདི ཨེཝཾ པརིཏྟཀསིཎུགྒྷཱཊིཏེ ཀཐམཱཀཱསཱནཉྩཱཡཏནཝཙནནྟི? ཏཏྠཱཔི ཨནནྟཕརཎསབྦྷཱཝཏོ. ཏེནེཝཱཧ ‘‘ཨནནྟཕརཎཏཱསབྦྷཱཝེ’’ཏི. ཡདི སབྦཏྠ ཨནནྟཕརཎཏཱ ཨཏྠི, ཨཐ ཀསྨཱ ‘‘ཨནནྟོ ཨཱཀཱསོ’’ཏི ན ཝུཏྟནྟི ཨཱཧ ‘‘སམཡཝཝཏྠཱཔནཱ’’ཏིཨཱདི. ཏཏྠ པཊིཔཏྟཱིཏི ཛྷཱནབྷཱཝནཱཀཱརམཱཧ.

༢༦༦. ཨུགྒྷཱཊབྷཱཝོ ཨུགྒྷཱཊིམཾ. ཡཐཱ པཱཀིམཾ.

༢༦༨. ཨཱཀཱསེ ¶ པཝཏྟིཏཝིཉྙཱཎཱཏིཀྐམཏོ ཏཏིཡཱཏི པདུདྡྷཱརཾ ཀཏྭཱ ཡུཏྟིཏོ ཨཱགམཏོ ཙ ཏདཏྠཾ ཝིབྷཱཝེཏུཾ ‘‘ཏདཏིཀྐམཏོ ཧཱི’’ཏིཨཱདིམཱཧ. ཨཱརུཔྤསམཱཔཏྟཱིནཾ ཨཱརམྨཎཱཏིཀྐམེན པཏྟབྦཏྟཱ ཝིསེསཏོ ཨཱརམྨཎེ དོསདསྶནཾ ཏདེཝ ཨཏིཀྐམིཏབྦནྟི ཨཡཾ ཡུཏྟི, ཨཱརམྨཎེ པན ཨཏིཀྐནྟེ ཏདཱརམྨཎཾ ཛྷཱནམྤི ཨཏིཀྐནྟམེཝ ཧོཏི. བྷཱཝནཱཡ ཨཱརམྨཎསྶ ཝིགམནཾ ཨཔནཡནཾ ཝིབྷཱཝནཱ. པཱལི༹ཡནྟི ཝིབྷངྒེ. ནནུ ཙ པཱལི༹ཡཾ ‘‘ཏཉྙེཝ ཝིཉྙཱཎ’’ནྟི ཨཝིསེསེན ཝུཏྟཾ ‘‘ན ཨཱཀཱསཱནཉྩཱཡཏནཝིཉྙཱཎ’’ནྟི. ‘‘ན ཏཉྙེཝཝིཉྙཱཎནྟི ཝིསེསཝཙནེན ཨཡམཏྠོ སིདྡྷོ’’ཏི དསྶེནྟོ ‘‘ཝིཉྙཱཎཉྩཱཡཏན’’ནྟིཨཱདིམཱཧ.

ཨརཱུཔཱཝཙརཀུསལཀཐཱཝཎྞནཱ ནིཊྛིཏཱ.

ཏེབྷཱུམཀཀུསལཝཎྞནཱ

༢༦༩. སཏྟཧི ¶ མཧཱཝཱརེཧཱིཏི པཊིཙྩསཧཛཱཏཔཙྩཡནིསྶཡསཾསཊྛསམྤཡུཏྟཔཉྷཱཝཱརེཧི ཨནུལོམཔཙྩནཱིཡཨནུལོམཔཙྩནཱིཡཔཙྩནཱིཡཱནུལོམཱདིནཡཱ ཨནུལོམཱདིནཡཱ. བྷཱརདྭཱཛགོཏམཱདཡོ ཨཊྛཙཏྟཱལཱིས ལོཀེ གོཏྟཱནི མཱུལབྷཱུཏཱནི, ཏཐཱ ཀཊྛཀལཱཔཱདཡོ ཨཊྛཙཏྟཱལཱིསེཝ ཙརཎཱནཱིཏི ཨཱཧ ‘‘ཨཊྛཙཏྟཱལཱིས’’ནྟིཨཱདི. ཏཏྠ ཏེསནྟི བྷབྦཱབྷབྦཱནཾ. དྭཱརསཱིསེན དྭཱརཝནྟཱནི གཡ྄ཧནྟཱིཏི ཨདྷིཔྤཱཡེནཱཧ ‘‘ཏཾཏཾདྭཱརཱནི ཝཱ ཀཱཡཱདཱིནཱི’’ཏི. ཨཙིཏྟཱིཀཱརེན ཝཱ ཀཏཾ ཧཱིནཾ, ཨཛ྄ཛྷུཔེཀྑནེན ཀཏཾ མཛ྄ཛྷིམཾ, སཀྐཙྩཀཏཾ པཎཱིཏཾ. ཨཱམིསཀིཉྫཀྑཱདིཧེཏུ ཝཱ ཀཏཾ ཧཱིནཾ, པུཉྙཕལཀཱམཏཱཡ ཀཏཾ མཛ྄ཛྷིམཾ, ཀཏྟབྦམིཙྩེཝ ཨརིཡབྷཱཝེ ཋིཏེན ཀཏཾ པཎཱིཏཾ. བྷཝསམྤཏྟིལོབྷེན ཝཱ པཝཏྟིཏཾ ཧཱིནཾ, ཨལོབྷཛ྄ཛྷཱསཡེན པཝཏྟིཏཾ མཛ྄ཛྷིམཾ, པརཧིཏཱཡ པཝཏྟིཏཾ པཎཱིཏཾ. པརིཏྟཀཏཾ ཝཱ ཧཱིནཾ, མཏྟསོ ཀཏཾ མཛ྄ཛྷིམཾ, ཨདྷིམཏྟསོ ཀཏཾ པཎཱིཏཾ. མཧགྒཏེསུ པན པཊིལདྡྷམཏྟཾ ཧཱིནཾ, ནཱཏིསུབྷཱཝིཏཾ མཛ྄ཛྷིམཾ, སུབྷཱཝིཏཾ ཝསིཔྤཏྟཾ པཎཱིཏཾ. ཨིམེསུཔི ཨེཀེཀསྶ ཧཱིནཱདིཀསྶ ཨཱཡཱུཧནནཱནཏྟཱདིཝསེན ཧཱིནཱདིབྷེདོ ལབྦྷཏིཡེཝཱཏི དཊྛབྦཾ. སམྤཡུཏྟདྷམྨཱནཾ ཝསེནཱཏི ཡོ ཙིཏྟཔྤབྷཱཝིཏོ ཙིཏྟསམྤཡུཏྟཱནཾ ཙིཏྟཱདྷིཔཏེཡྻབྷཱཝོ, སོ ཏཾནིམིཏྟེ ཙིཏྟེ ཨུཔཙརིཏོཏི ཨེཝཾ ཝཱ ཨེཏྠ ཨཏྠོ.

ཏེབྷཱུམཀཀུསལཝཎྞནཱ ནིཊྛིཏཱ.

ལོཀུཏྟརཀུསལཝཎྞནཱ

༢༧༧. ‘‘ཀེནཊྛེན ¶ ལོཀུཏྟར’’ནྟིཨཱདི པཊིསམྦྷིདཱཝཙནཾ (པཊི. མ. ༢.༤༣) ཨཊྛཀཐཱཡ ཨཱབྷཏཾ, ཏསྨཱ ཏཏྠ ‘‘ཏིཝིདྷོཔི ཨནུཏྟརདྷམྨོ ལོཀཾ ཏརཏཱི’’ཏིཨཱདིནཱ སངྒཧིཏོཏི ཏཾ ཏཱིཧི པདེཧི ཡོཛེཏྭཱ དསྶེཏུཾ ‘‘ལོཀཾ ཏརཏཱིཏི ཨེཏེནཱ’’ཏིཨཱདིམཱཧ. ཨེཀེཀསྨིཾ ཡོཛེཏབྦོ ལོཀསྶ ཨནྟགམནཱདིཏཱཡ མགྒཱདཱིསུཔི ལབྦྷམཱནཏྟཱ. མགྒེཡེཝ ཝཱ ཏིཝིདྷོཔི ཨཏྠོ ཡོཛེཏབྦོཏི སམྦནྡྷོ. ཨནཏིཝཏྟནཱདཱིཏི ཨཱདི-སདྡེན ཨིནྡྲིཡཱནཾ ཨེཀརསཏཱ ཏདུཔགཝཱིརིཡཝཱཧནཾ ཨཱསེཝནཱཏི ཨིམེ ཏཡོ བྷཱཝནཱཝིསེསེ སངྒཎྷཱཏི. ཡསྨཱ ཙེཏེ བྷཱཝནཱཝིསེསཱ སཾཀིལེསཝོདཱནེསུ ཝཊྚཝིཝཊྚེསུ ཙ ཏཾཏཾཨཱདཱིནཝཱནིསཾསདསྶནབྷཱུཏཱཡ པུབྦབྷཱགཔཉྙཱཡ ¶ སམྤཱདིཏེན ཉཱཎཝིསེསེན ནིཔྥཛྫནྟི, ཏསྨཱ ཝུཏྟཾ ‘‘ཨཉྙམཉྙཾ…པེ… ཝཌྜྷེཏཱི’’ཏི.

ནིསྶཡོ ཧོཏཱིཏི རུཀྑོ ཝིཡ སཱཁཱཡ ཨཱདྷཱརབྷཱཝེན ཝོཧརཱིཡཏཱིཏི ཨཏྠོ. ཕལཉཱཎཕལངྒཱནཾ ནིསྶཡཝཙནཾ ནིསྶཡཔཙྩཡཏྟཱ. ཏཏོཡེཝ ནིསྶཡབྷཱཝཏོ པཏིཊྛཱབྷཱཝཏོ. ཨརིཡཕལསནྣིསྶཡེན ཧི ཨརིཡཱ ཀཏཀིཙྩཱ སུཊྛུ ནིབྦིནྣསབྦབྷཝཱཔི ཙིརཏརཾ ལོཀེ པརཧིཏཱཡ ཏིཊྛནྟི. ཀིལེསཱནཾ ཨོདྷིསོ པཛཧནཀཱཔི ཨརིཡམགྒཱ ཨཝིསེསེན སབྦཱཀུསལཱནཾ སབྦཀུསལཔཊིཔཀྑཏཱཡ ཨཉྙམགྒཔྤཧཱཏབྦེསུཔི ཀེནཙི པཧཱནཱཀཱརེན པཝཏྟནྟཱིཏི ཏཾ པཧཱནཱཀཱརཾ དསྶེནྟོ ‘‘ཨིཏརེསཾ ཝིཛྫུཏོབྷཱསེན ཝིཡ ཏམསྶཱ’’ཏི ཨཱཧ. ཡེན པཱལི༹ཡཾ ཧེཊྛིམམགྒཉཱཎཱནཾ ཝིཛྫཱུཔམཏཱ དསྶིཏཱ. ཡདི ཨེཝཾ ཨུཔརིམགྒཝཛ྄ཛྷཱ ཀིལེསཱ ཨིཏརེཏི ཨིདྷཱདྷིཔྤེཏཱ. ན ཏེསཾ སམུཙྪེདཝཙནཾ ཡུཏྟཾ. ན ཧི བྷཱཝནཱཡ པཧཱཏབྦེ དསྶནམགྒོ སམུཙྪིནྡིཏུཾ སཀྐོཏི. ཏཐཱ ཙ སཏི དསྶནེན པཧཱཏབྦཱ ཨེཝ ཏེ སིཡུཾ. ཨཐ ཏདངྒཔྤཧཱནཾ ཨདྷིཔྤེཏཾ, ཡེན ‘‘ཝིཛྫུཏོབྷཱསེན ཝིཡ ཏམསྶཱ’’ཏི ཝུཏྟཾ, ཏཾ པུབྦབྷཱགཝིཔསྶནཱཡ ཨེཝ སིདྡྷཾ ན ཙ ཡུཏྟཾ ལོཀུཏྟརམགྒོ ཏདངྒཝསེན ཀིལེསེ པཛཧཏཱིཏི. ཝིཀྑམྦྷནེཔི ཨེསེཝ ནཡོ, ཨནུལོམཉཱཎེནེཝ ཏསྶ སཱཏིསཡཾ སཱདྷིཏཏྟཱ. ཨཐ པན པཋམམགྒཝཛ྄ཛྷཱ ཨེཝ ཀིལེསཱ ཨིཏརེཏི ཨདྷིཔྤེཏཱ, ཨེཝཾ སནྟེ ཏེསཾ ཨིཏརབྷཱཝོཝ ན སིཡཱ, ན ཙ ཨནཔཱཡགམནཱིཡཱ ¶ ནཱམ ཀིལེསཱ དསྶནེན པཧཱཏབྦཱ ཨཏྠི, ནཱཔི པཋམམགྒཝཛ྄ཛྷཱ ཀིལེསཱ ཏེན ཝིཛྫུཏོབྷཱསེན ཝིཡ ཏམོ སམུཙྪིནྡིཏབྦཱཏི ཝཏྟུཾ ཡུཏྟནྟི ཨུཔཔརིཀྑིཏབྦོཡཾ ‘‘ཨིཏརེསཾ…པེ… སམུཙྪེདོ’’ཏི. ལོཀིཡཛ྄ཛྷཱནམྤི ན ཝིནཱ པཊིཔདཱཡ ཨིཛ྄ཛྷཏཱིཏི ཨིདཾ ཨདྷིཔྤཱཡཝསེན ནེཏབྦཾ ནེཡྻཏྠཏྟཱཏི ཏཾ ཨདྷིཔྤཱཡཾ ཝིབྷཱཝེནྟོ ‘‘ཨཀཏཱདྷིཀཱརསྶཱ’’ཏི ཨཱཧ. ཏེན ཡཐཱཝུཏྟཝཙནསྶ ཙ སཔྤདེསཏཾ དསྶེཏི. ནནུ ཙ ཀཏཱདྷིཀཱརསྶ ཨརིཡསྶ མགྒེན སམིཛ྄ཛྷམཱནམྤི ཛྷཱནཾ མགྒཔཊིཔདཱཝསེན པཊིཔདཱསཧིཏམེཝཱཏི. ན ཝིནཱ པཊིཔདཱཡ ཨིཛ྄ཛྷཏཱིཏི སཀྐཱ ཝཏྟུཾ, ཏེནེཏཾ ཝཙནཾ ནིཔྤདེསམེཝཱཏི ཨནུཡོགཾ སནྡྷཱཡཱཧ ‘‘ཀཏཱདྷིཀཱརསྶ པནཱ’’ཏིཨཱདི. ཨིདཱནི ཏསྶ ཝཙནསྶ ཨདྷིཔྤཱཡཝསེན གཧེཏབྦཏྠཏཱ པཱལི༹ཏོཔི ཝིཉྙཱཡཏཱིཏི དསྶེནྟོ ཨཱཧ ‘‘ཡཐཱཝུཏྟ…པེ… ཀཏཱ’’ཏི.

‘‘ཡོ ཀོཙཱིཏི ཨཝིསེསཝཙན’’ནྟི ཏསྶ ཨཔཝཱདཾ དསྶེནྟོ ‘‘སཀིཾ དྭིཀྑཏྟུ’’ནྟི ཨཱདིམཱཧ. པརིཙྪིནྡིཏྭཱ གཧཎཾ པརིཛཱནནཾ. ནཱམརཱུཔཝཝཏྠཱཔནཱདཱིནནྟི ནཱམརཱུཔཝཝཏྠཱཔནཔཙྩཡཔརིགྒཧལཀྑཎཔཊིཝེདྷནིཀནྟིཔརིཡཱདཱནཱནཾ ¶ . ཀིཙྪསིདྡྷིཏོཏི ནཱམརཱུཔཝཝཏྠཱཔནཱདཱིནཾ ཀེསཉྩི སབྦེསམྤི ཝཱ ཀིཙྪསིདྡྷིཏོ. ཨེས ནཡོ དུཏིཡཝཱརཱདཱིསུཔི ཡཐཱསམྦྷཝཾ. སུཁསིདྡྷིཡམྤཱིཏི ནཱམརཱུཔཝཝཏྠཱཔནཱདཱིནཾ ཀིཙྪསིདྡྷི མགྒཔཱཏུབྷཱཝདནྡྷབྷཱཝསྶ ཀཱརཎབྷཱཝེ ཨནེཀནྟིཀཱ. ཝིཔསྶནཱསཧགཏིནྡྲིཡཱནཾ པན མནྡཏཱ ཏསྶ ཨེཀནྟཀཱརཎནྟི དསྶེཏི.

ཨེཏདནྟཏྟཱ པཊིཔདཱཡཱཏི ཨེཏེན ནིཔྤརིཡཱཡཏོ པཊིཔདཱཉཱཎདསྶནཝིསུདྡྷིསངྑཱཏཱཡ ཝིཔསྶནཱཔཉྙཱཡ ཙིརཱཙིརཔྤཝཏྟིཝསེན མགྒསྶ ཁིཔྤདནྡྷཱབྷིཉྙཏཱ ཝུཏྟཱཏི དསྶེཏི. པུརིམཱནནྟི པུརིམཝཱརཱནཾ, ལཀྑཎཔཊིཝེདྷཱདཱིནཾཡེཝ ཝཱ. ཧེཊྛིམཀོཊིཡཱ ཏིཀྑཏྟུཾ ཀིལེསཝིཀྑམྦྷནེ སཏི དུཀྑཱཔཊིཔདཱབྷཱཝོ, ན ཏཏོ ཧེཊྛཱཏི ནིཙྪིཏཏྟཱ ཨཱཧ ‘‘ཏིཀྑཏྟུཾ ཝིཀྑམྦྷནཝཱརཏཱཝསེནཱ’’ཏི. ཏསྶ སུཁཱཔཊིཔདཱ ཝེདིཏབྦཱ ཨུཀྐཾསཝསེནཱཏི ཨདྷིཔྤཱཡོ.

ཡསྨིཾ པུགྒལེ ཝིསཾཝཱདནབྷེདནཱནིཊྛཱནཏྠནིཡོཛནཱནཾ པཝཏྟི, ཏཏྠ སིནེཧཝིརཧེནེཝ ཏེསཾ པཝཏྟི, སོ ཙ པུགྒལོ ཨསངྒཧིཏོ ཧོཏཱིཏི མུསཱཝཱདཱདཱིནཾ ཝིསཾཝཱདནཱདིཀིཙྩཏཱཡ ལཱུཁཏཱ ཙ ཨཔརིགྒཧཏཱ ཙ ཝུཏྟཱ. ཏཔྤཊིཔཀྑཝིརུདྡྷསབྷཱཝཏྟཱ སམྨཱཝཱཙཱཡ སིནིདྡྷབྷཱཝཏཱ པརིགྒཱཧཀསབྷཱཝཏཱ ¶ . སདྡྷཱཝིསེསཡོགཏོ ཝཱ ཏསྶཱ སིནིདྡྷབྷཱཝོ དཊྛབྦོ. སམུཊྛཱཔེཏཱིཏི པཝཏྟེཏི. ཛཱིཝམཱནོ ཝཱ སཏྟོ, སམྤཡུཏྟདྷམྨཱ ཝཱ ཝོདཱཡནྟི ཨེཏེན སཡཾ ཝཱ ཝོདཱཡཏཱིཏི ཝོདཱནཾ.

༢༨༥. ཏཎྷཱདིཊྛཱིཧི པཏིཊྛཱནཾ. ཨཝསེསཀིལེསཱབྷིསངྑཱརེཧི ཨཱཡཱུཧནཱ. སསྶཏདིཊྛིཡཱ པཏིཊྛཱནཾ. ཨུཙྪེདདིཊྛིཡཱ ཨཱཡཱུཧནཱ. ལཱིནཝསེན པཏིཊྛཱནཾ. ཨུདྡྷཙྩཝསེན ཨཱཡཱུཧནཱ. ཀཱམསུཁཱནུཡོགཝསེན པཏིཊྛཱནཾ. ཨཏྟཀིལམཐཱནུཡོགཝསེན ཨཱཡཱུཧནཱ. སབྦཱཀུསལཱབྷིསངྑཱརཝསེན པཏིཊྛཱནཾ. སབྦལོཀིཡཀུསལཱབྷིསངྑཱརཝསེན ཨཱཡཱུཧནཱཏི ཨོགྷཏརཎསུཏྟཝཎྞནཱཡཾ ཝུཏྟེསུ པཀཱརནྟརེསུ ཨིདྷ ཨཝུཏྟཱནཾ ཝསེནཔི པཏིཊྛཱནཱཡཱུཧནཱ ཝེདིཏབྦཱ.

ཨཐ ཝཱ ཀིལེསགྒཧཎེན ཏཎྷཱསསྶཏདིཊྛིསབྦཱཀུསལཱབྷིསངྑཱརཱ གཧིཏཱ ཏཾསབྷཱགཏཱཡ ཏདེཀཊྛཏཱཡ ཙ. ཏཐཱ ཨབྷིསངྑཱརགྒཧཎེན ཨཝསེསཀིལེསཨུཙྪེདདིཊྛིསབྦལོཀིཡཀུསལཱབྷིསངྑཱརཱ. ལཱིནུདྡྷཙྩཀཱམསུཁཏྟཀིལམཐཱནུཡོགཱནཾ ཝིསུཾ ཝུཏྟཏྟཱ ཏེཧི ན ཡོཛེཏབྦནྟི ཀིལེསཱབྷིསངྑཱརཝསེན པཏིཊྛཱནཱཡཱུཧནེ ཝཏྭཱ ཏཎྷཱདིཊྛཱིནཾ ཏཏྠ ཝིསེསཔཙྩཡཏཾ དཱིཔེཏུཾ ཏདུབྷཡཝསེནཔི ཡོཛནཱ ཀཏཱ. ནཡདསྶནཾ ཝཱ ཨེཏཾ ཏཏྠ དཊྛབྦཾ. ཨེཝམིཏརེཔི པཀཱརཱ ཡོཛེཏབྦཱཏི ¶ . ‘‘ཙཏཱུཧི, བྷིཀྑཝེ, ཨངྒེཧི སམནྣཱགཏོ པུགྒལོ’’ཏིཨཱདཱིསུ (མ. ནི. ༤.༡༡༢, ༡༡༤) ཨངྒ-སདྡསྶ ཀཱརཎཏྠཏཱ དཊྛབྦཱ.

༢༩༩. མུསཱཝཱདཱདཱིནི བྷཱསམཱནོ ཀརོཏི ནཱམ ཀིཾ ཝཀྑམཱནཾ ཀིརིཡཾ, ཀཱ པན སཱཏི? མུསཱཝཱདཱདིཀིརིཡཱཏི ཝིདིཏོཝཱཡམཏྠོ. ཨེཝཾ ཝཱ ཨེཏྠ ཡོཛནཱ དཊྛབྦཱ.

༣༠༡. ནིཔྥཱདིཏཔཙྩཡཱནནྟི ཙཱིཝརཱདིཔཙྩཡཱནཾ. ཀུཧནཝཏྠཱུནཱིཏི པཱཔིཙྪཏཾ ནིསྶཱཡ ལཱུཁཙཱིཝརཱདིསེཝནཝསེན ‘‘ཡོ ཏེ ཝིཧཱརེ ཝསཏི, སོ ཨརཧཱ’’ཏིཨཱདིནཱ (པཱརཱ. ༢༢༤) ཨཏྟཱནཾ ཨརིཡགུཎསཱམནྟཾ ཀཏྭཱ བྷཎནཝསེན ཝིསེསལཱབྷིནོ ཝིཡ ཨཏྟནོ པརིཧརཎཝསེན ཙ པཝཏྟཱ ཨཀུསལཙིཏྟུཔྤཱདཱ པརེསཾ ཝིམྷཱཔནཀཱརཎཱནི ཀུཧནཝཏྠཱུནི.

༣༤༣. སཏིཔི ¶ སགུཎཱརམྨཎེཧི མགྒསྶ ཨནིམིཏྟནཱམལཱབྷེ ན ནིཔྤརིཡཱཡེན ཝིཔསྶནཱ ཨནིམིཏྟནཱམིཀཱཏི ཨཱགམནཏོ མགྒོ ཨནིམིཏྟནཱམཾ ན ལབྷཏཱིཏི ཨཱཧ ‘‘ན པན སགུཎཱརམྨཎེཧི…པེ… སིདྡྷཾ ཧོཏཱི’’ཏི. ཡསྨཱ པན ཨཱགམནཏོ སུཉྙཏཾ ཨཔྤཎིཧིཏནྟི ལདྡྷནཱམསྶ མགྒསྶ སགུཎཏོ ཨཱརམྨཎཏོ ཙ ཏཾནཱམཱབྷཱཝོ ན ཀདཱཙིཔི ཨཏྠི, ཏསྨཱ ནཱམཏྟཡཔཱརིཔཱུརིཧེཏུཨཱགམནཏོ ནཱམལཱབྷོཏི ཨདྷིཔྤཱཡེནཱཧ ‘‘པརིཔུཎྞནཱམསིདྡྷིཧེཏུཏྟཱ’’ཏི. སབྦེསནྟི སབྦཝིམོཀྑམུཁཱགཏཱནམྤི མགྒཱནཾ. ནཱམཏྟཡཡོགོཏི སུཉྙཏཱཔཎིཧིཏཱནིམིཏྟནཱམཡོགོ. ཝཝཏྠཱནཾ ཨསངྐརོ.

༣༥༠. ནིམིཏྟདྷམྨཱ སངྑཱརཱ ཏེཧི སནིམིཏྟཱ སཝིགྒཧཱ ཝིཡ ཨུཔཊྛཧནྟཱིཏི ཏེསཾ ཨབྷཱཝིཏབྷཱཝནསྶ བྷཱཝིཏབྷཱཝནསྶ ཙ ཨུཔཊྛཧནཱཀཱརཾ དསྶེནྟོ ‘‘སམཱུཧཱདཱི’’ཏིཨཱདིམཱཧ. ཏེན ཙ ‘‘ཝིམོཀྑེན སདྡྷིནྡྲིཡཾ ཨདྷིམཏྟཾ ཧོཏཱི’’ཏི (དྷ. ས. ཨཊྛ. ༣༥༠) ཝུཏྟཾ, ན ‘‘ཏསྨིཾ ཝིམོཀྑེ’’ཏི, ཏསྨཱ ‘‘ཨནིམིཏྟཝིམོཀྑོཏི ཨནིཙྩཱནུཔསྶནཾ ཨཱཧཱ’’ཏི ཝུཏྟཾ. ཨིཏརཏྠཱཔི ཨེསེཝ ནཡོ. ཨནིམིཏྟསྶ ཨནིམིཏྟབྷཱཝཱབྷཱཝོ ནཏྠཱིཏི ཀསྨཱ ཝུཏྟཾ, ནནུ ཙ ཨནིཙྩཱནུཔསྶནཱཡ ཨནིམིཏྟཝིམོཀྑབྷཱཝོ པརིཡཱཡེནཱཏི ནིཔྤརིཡཱཡདེསནཱཡ ཏསྶཱ ཨནིམིཏྟབྷཱཝཱབྷཱཝོ ཨཏྠི ཨེཝ, ཨེཝཉྩ སཏི ‘‘ཨནིམིཏྟསྶ ཨནིམིཏྟནཱམདཱནཱབྷཱཝོ’’ཏི ཙ ན ན སཀྐཱ ཝཏྟུནྟི ཨུཔམཱསཾསནྡནཾ སུཊྛུཏརཾ ཡུཛྫཏི, ཏཐཱ ཨནིམིཏྟེན མགྒསྶ ཨནིམིཏྟབྷཱཝོ ན ཡུཛྫཏིཡེཝ. ཏེནཱཧ ‘‘པརམཏྠཏོ ནཱམཾ དཱཏུཾ ན སཀྐོཏཱི’’ཏི? སཙྩམེཏཾ ¶ , པརིཡཱཡསིདྡྷཾཡེཝ པན ཨནིཙྩཱནུཔསྶནཱཡ ཨནིམིཏྟབྷཱཝཾ གཧེཏྭཱ མགྒསོདྷནཝསེནཱཡམནུཡོགོ ཀཏོ ‘‘ཨནིམིཏྟཝིམོཀྑསྶ ཨནིམིཏྟབྷཱཝཱབྷཱཝོ ནཏྠཱིཏིཝིརུདྡྷཾ ཝིཡ ཧོཏཱི’’ཏི. ཨེཝཉྩ ཀཏྭཱ ‘‘ཨནིམིཏྟཾ…པེ… དཱིཔིཏོ ཧོཏཱི’’ཏི སཡམེཝ ཝཀྑཏཱིཏི. སཱམཉྙནྟི ཨུཔམོཔམིཏབྦཱནཾ སམྦནྡྷམཱཧ. ན མགྒཱདྷིཔཏཱིཏི མགྒོ ཨདྷིཔཏི མགྒཱདྷིཔཏཱིཏི ཚནྡཙིཏྟཱནཾ ཨཡཾ སམཉྙཱ ནཏྠཱིཏི ཨཏྠོ. ན ཙ ཏེཧི མགྒསྶཱཏི ཚནྡཙིཏྟེཧི མགྒོ ཨདྷིཔཏི ཨེཏསྶཱཏི མགྒཱདྷིཔཏཱིཏི ཨཡཾ སམཉྙཱ མགྒསྶ ནཏྠི. ཀསྨཱ? ཏེསཾ ཚནྡཙིཏྟཱནཾ ཨམགྒངྒཏྟཱ.

ཛྷཱནསྶ སུཉྙཏཱདིནཱམཀཏྟཱཏི ཨེཏེན ཨིནྡྲིཡབལཱདཱིནམྤི མགྒསམྤཡོགཏོ སུཉྙཏཱདིནཱམཀཏཱ དསྶིཏཱཏི དཊྛབྦཾ. སཏིཔི པཙྩནཱིཀཱམསནེ ¶ ན ཏསྶ མགྒསྶ ཏཾ པརིབྱཏྟཾ ཡཐཱ སརསཏཱཏི ཨཱཧ ‘‘སརསཔྤདྷཱནོ’’ཏི. དྭཱིཧཱིཏི སརསཔཙྩནཱིཀེཧི. ཨཉྙནིརཔེཀྑེཧཱིཏི ཨཱགམནནིརཔེཀྑེཧི. ཏསྨཱཏི ཡསྨཱ སརསཏོཝ ནཱམལཱབྷེ ཨཝཝཏྠཱནཱཔཏྟི སབྦསྶ མགྒསྶ སབྦནཱམབྷཱཝཱཔཏྟི ཧོཏི, ཏསྨཱ. ཨཏྟཱབྷི…པེ… མགྒཱཏི ཏེན ཨཱགམནཏོ ནཱམལཱབྷསྶ པཙྩནཱིཀཏོ ནཱམལཱབྷབྷཱཝཾ དསྶེཏི. སརསནྟརེཏི ཨནིམིཏྟབྷཱཝཱདིཀེ. པཙྩནཱིཀསཧིཏེན སརསེནཱཏི སུཉྙཏཱཔྤཎིཧིཏབྷཱཝེཧི ཏདཱགམནེཧི. ནིམིཏྟགྒཧཎཱནིཝཱརཎཱཏི སངྑཱརནིམིཏྟགྒཱཧསྶ ཨནིསེདྷནཏོ. སུཉྙཏཱཔྤཎིཧིཏསྶེཝ མགྒསྶ ཝུཏྟཏྟཱ ཨནིཙྩཏོ ཝུཊྛཧནྟསྶ མགྒོ ཨིདྷ ཨསངྒཧིཏོ སིཡཱཏི ཨཱསངྐིཏྭཱ ཨཱཧ ‘‘ཨནིཙྩཱནུཔསྶནཱ’’ཏིཨཱདི. སངྑཱརེཧི ཝུཊྛཱནཾ ན སིཡཱ, ལཀྑཎེཧི ཨེཝ ཝུཊྛཱནཾ སིཡཱཏི ཨདྷིཔྤཱཡོ, ལཀྑཎཔཊིཝེདྷོ ན སིཡཱ ཨཏདཱརམྨཎཏྟཱཏི ཨཏྠོ. སངྑཱརཱནཉྷི ཧུཏྭཱ ཨབྷཱཝཨུདཡབྦཡཔཊིཔཱིལ༹ནཱཝསཝཏྟནཱཀཱརེསུ ཨནིཙྩཏཱདིལཀྑཎཝོཧཱརོ.

ཨཱཀཱརཝནྟེསུ གཧིཏེསུ ཏདཱཀཱརོཔི གཧིཏོཡེཝ ཧོཏཱིཏི ཨཱཧ ‘‘ལཀྑཎཱནིཔི པཊིཝིདྡྷཱནི ཧོནྟི ཏདཱཀཱརསངྑཱརགྒཧཎཏོ’’ཏི. ཡཐཱཝུཏྟཱདྷིཔྤཱཡེནཱཏི ‘‘ཨནིཙྩ’’ནྟིཨཱདིནཱ ‘‘སངྑཱརེསཱུ’’ཏིཨཱདིནཱཝ ཝུཏྟཔྤཀཱརཱདྷིཔྤཱཡེན. ཝིསུནྟི སངྑཱརེཧི ཝིནིཝཏྟེཏྭཱ.

ལོཀུཏྟརཀུསལཾ

པཀིཎྞཀཀཐཱཝཎྞནཱ

པཉྩདྷཱ ¶ ཨུདྡིསཏི པཉྩུཔཱདཱནཀྑནྡྷེ ཨཛ྄ཛྷཏྟདུཀཝསེན རཱུཔདུཀཝསེན ཙ བྷིནྡིཏྭཱ ཨབྷིནྡིཏྭཱ ཙ ནིམིཏྟཝཙནེནེཝ ཨུདྡིསཏི པཝཏྟསྶཔི སངྑཱརནིམིཏྟབྷཱཝཱནཏིཝཏྟནཏོ ཝུཊྛཱཏབྦཏཱསཱམཉྙཏོ ཙ. ཏེནེཝ ཨུཔཱདིནྣཱནུཔཱདིནྣཝསེན པཝཏྟཾ དྭིདྷཱ ཀཏྭཱ ནིདྡིསིཏྭཱཔི ‘‘ཨཡཾ ཏཱཝ ནིམིཏྟེ ཝིནིཙྪཡོ’’ཏི ནིམིཏྟཝསེནེཝ ནིགམེཏི. ཨེཏྠ ཙ ནིམིཏྟཾ ཨཛ྄ཛྷཏྟབཧིདྡྷཱ, པཝཏྟཾ པན ཨཛ྄ཛྷཏྟམེཝཱཏི ཨཡམེཏེསཾ ཝིསེསོ. བོཛ྄ཛྷངྒཱདིཝིསེསནྟི བོཛ྄ཛྷངྒཛྷཱནངྒམགྒངྒཱནཾ ཨསདིསཏཾ. ཨསམཱཔཛྫིཏུཀཱམཏཱསངྑཱཏཱ ཝིཏཀྐཱདིཝིརཱགབྷཱཝནཱ ཨསམཱཔཛྫིཏུཀཱམཏཱཝིརཱགབྷཱཝནཱ. ཨིཏརསྶཱཏི པཱདཀཛ྄ཛྷཱནཱདིཀསྶ. ཨཏབྦྷཱཝཏོཏི ཡཐཱཝུཏྟཝིརཱགབྷཱཝནཱབྷཱཝསྶ ཨབྷཱཝཏོ. ཨིདཾ ཝུཏྟཾ ཧོཏི – ཡཐཱ མགྒཱསནྣཱཡ ཝིཔསྶནཱཡ སོམནསྶསཧགཏཏྟེ མགྒསྶ པཋམཱདིཛ྄ཛྷཱནིཀཏཱ ཙ ཨུཔེཀྑཱསཧགཏཏྟེ ¶ པཉྩམཛ྄ཛྷཱནིཀཏཱ ཨེཝ ཙ ཏབྦསེན ཙ བོཛ྄ཛྷངྒཱདཱིནཾ ཝིསེསོཏི ཏེསཾ ནིཡམེ ཨཱསནྣཀཱརཎཾ པདྷཱནཀཱརཎཉྩ ཝུཊྛཱནགཱམིནིཝིཔསྶནཱ, ན ཨེཝཾ པཱདཀཛ྄ཛྷཱནཱདཡོཏི.

ཨིདཱནི ཨཔཱདཀཔཋམཛ྄ཛྷཱནཔཱདཀཱནཾ པཀིཎྞཀསངྑཱརཔཋམཛ྄ཛྷཱནཱནི སམྨསིཏྭཱ ནིབྦཏྟིཏཱནཉྩ མགྒཱནཾ ཨེཀནྟེན པཋམཛ྄ཛྷཱནིཀབྷཱཝཏོ ཝིཔསྶནཱནིཡམོཡེཝེཏྠ ཨེཀནྟིཀོ པདྷཱནཉྩཱཏི ཨིམམཏྠཾ ཝིབྷཱཝེནྟོ ‘‘ཝིཔསྶནཱནིཡམེནེཝཱ’’ཏིཨཱདིམཱཧ. ཏཏྠ ཨིཏརེཏི དུཏིཡཛ྄ཛྷཱནིཀཱདིམགྒཱ. པཱདཀཛ྄ཛྷཱནཱཏིཀྐནྟཱནཾ ཨངྒཱནཾ ཨསམཱཔཛྫིཏུཀཱམཏཱཝིརཱགབྷཱཝནཱབྷཱུཏཱ ཝུཊྛཱནགཱམིནིཝིཔསྶནཱ ཨདྷིཊྛཱནབྷཱུཏེན པཱདཀཛ྄ཛྷཱནེན ཨཱཧིཏཝིསེསཱ མགྒསྶ ཛྷཱནངྒཱདིཝིསེསནིཡཱམིཀཱ ཧོཏཱིཏི ‘‘པཱདཀཛ྄ཛྷཱནཝིཔསྶནཱནིཡམེཧཱི’’ཏི ཝུཏྟཾ. ཡཐཱ ཙ ཨདྷིཊྛཱནབྷཱུཏེན པཱདཀཛ྄ཛྷཱནེན, ཨེཝཾ ཨཱརམྨཎབྷཱུཏེན སམྨསིཏཛ྄ཛྷཱནེན ཨུབྷཡསབྦྷཱཝེ ཨཛ྄ཛྷཱསཡཝསེན ཨཱཧིཏཝིསེསཱ ཝིཔསྶནཱ ནིཡམེཏཱིཏི ཨཱཧ ‘‘ཨེཝཾ སེསཝཱདེསུཔི…པེ… ཡོཛེཏབྦོ’’ཏི.

པཱདཀཛ྄ཛྷཱནསངྑཱརེསཱུཏི པཋམཛ྄ཛྷཱནསངྑཱརེསུ. ‘‘པཋམཛ྄ཛྷཱནཾ པཱདཀཾ ཀཏྭཱ’’ཏི (དྷ. ས. ཨཊྛ. ༣༥༠) ཧི ཝུཏྟཾ. ཏཾཏཾཝིརཱགཱཝིརཱགབྷཱཝནཱབྷཱཝེནཱཏི ཝིཏཀྐཱདཱིནཾ ཝིརཛྫནཱཝིརཛྫནབྷཱཝནཱབྷཱཝེན. ཏེན ཨཱརམྨཎཛ྄ཛྷཱནསྶཔི ཝིཔསྶནཱཡ ཝིསེསཱདྷཱནཾ ཨུཔནིསྶཡཏམཱཧ.

པཱདཀཛ྄ཛྷཱནསམྨསིཏཛ྄ཛྷཱནཱནིཡེཝ བོཛ྄ཛྷངྒཱདིཝིསེསཱནཾ ཨུཔནིསྶཡོ ཀཱརཎནྟི པཱདཀཛ྄ཛྷཱནསམྨསིཏཛ྄ཛྷཱནུཔནིསྶཡོ ¶ , ཏསྶ སབྦྷཱཝེ. ཏདབྷཱཝཱབྷཱཝཏོཏི ཏསྶ ཨཛ྄ཛྷཱསཡསྶ ཨབྷཱཝཱབྷཱཝཏོ.

ཙཏུཏྠཛ྄ཛྷཱནིཀསྶ མགྒསྶ ཨཱརུཔྤེ ཨརཱུཔཛ྄ཛྷཱནམེཝ པཱདཀཾ སིཡཱཏི ཨཱཧ ‘‘ཙཏུཏྠཛ྄ཛྷཱནིཀཝཛྫཱན’’ནྟི. ཨརིཡམགྒསྶ ཨོལཱ༹རིཀངྒཱཏིཀྐམནཱུཔནིསྶཡཱ ཝིཔསྶནཱཡ ཨདྷིཊྛཱནཱརམྨཎབྷཱུཏཱ དུཏིཡཛ྄ཛྷཱནཱདཡོ. པཉྩཧི ཨངྒེཧཱིཏི པཉྩཧི ཛྷཱནངྒེཧི. ‘‘ཏཾཏཾཝཱདེཧི པཉྙཱཔིཡམཱནཱནི པཱདཀཛ྄ཛྷཱནཱདཱིནི ཝཱདསཧཙཱརིཏཱཡ ‘ཝཱདཱ’ཏི ཝུཙྩནྟཱི’’ཏི ཨདྷིཔྤཱཡེན ‘‘ཏཡོཔེཏེ ཝཱདེ’’ཏི ཨཱཧ. ཝདནྟི ཨེཏེཧཱིཏི ཝཱ ཝཱདཀརཎབྷཱུཏཱནི པཱདཀཛ྄ཛྷཱནཱདཱིནི ཝཱདཱ.

ཝིཔཱཀསནྟཱནསྶ…པེ… ¶ སུསངྑཏཏྟཱཏི ཨེཏེན ཡསྨིཾ སནྟཱནེ ཀམྨཾ ཨུཔྤཛྫཏི, ཏཏྠ ཨུཔྤཛྫམཱནམེཝ ཀིཉྩི ཝིསེསཱདྷཱནཾ ཀརོཏཱིཏི དཱིཔེཏི. ཡཏོ ཏསྨིཾཡེཝ སནྟཱནེ ཏསྶ ཝིཔཱཀོ, ནཱཉྙཏྠ.

པུརིམཱནུལོམཾ ཝིཡ ཏནྟི ཡཐཱ གོཏྲབྷུཊྛཱནེ ཨུཔྤནྣཱནུལོམཏོ པུརིམཨནུལོམཉཱཎཾ ཏཾ གོཏྲབྷུཊྛཱནེ ཨུཔྤནྣཱནུལོམཾ ཨནུབནྡྷཏི, ཨེཝཾ. ཏདཔཱིཏི གོཏྲབྷུཊྛཱནེ ཨུཔྤནྣཱནུལོམཉཱཎམྤི ཨཉྙཾ ཨནུལོམཉཱཎམེཝ ཨནུབནྡྷེཡྻ, ཏསྶ ཨནནྟརཾ ཨུཔྤཛྫེཡྻ. སཱ བྷཱུམཱིཏི སཱ པཉྩུཔཱདཱནཀྑནྡྷསངྑཱཏཱ ཀིལེསཱནཾ ཨུཔྤཏྟིཊྛཱནཏཱཡ བྷཱུམི. ཨེཀོ བྷཝོཏི གཧེཏྭཱ ཝུཏྟནྟི ཨེཏེན སཏྟ བྷཝེ དྭེ བྷཝེཏི ཨིདམྤི ཨདྷིཔྤཱཡཝསེན ནེཏབྦཏྠཾ, ན ཡཐཱརུཏཝསེནཱཏི དསྶེཏི. ཏཏྠཱཡཾ ཨདྷིཔྤཱཡོ – ཨེཀཝཱརཾ ཀཱམཱཝཙརདེཝེསུ ཨེཀཝཱརཾ མནུསྶེསཱུཏི ཨེཝམྤི མིསྶིཏཱུཔཔཏྟིཝསེན ཏེསུ ཨེཀིསྶཱ ཨེཝ ཨུཔཔཏྟིཡཱ ཨཡཾ པརིཙྪེདོ. ཡཾ པན ‘‘ན ཏེ བྷཝཾ ཨཊྛམམཱདིཡནྟཱི’’ཏི (ཁུ. པཱ. ༦.༩; སུ. ནི. ༢༣༢) ཝུཏྟཾ, ཏམྤི ཀཱམཱཝཙརབྷཝཾཡེཝ སནྡྷཱཡཱཧ. མཧགྒཏབྷཝཱནཾ པརིཙྪེདོ ནཏྠཱིཏི ཝདནྟི. ཏཐཱ ‘‘ཋཔེཏྭཱ དྭེ བྷཝེ’’ཏི ཨེཏྠཱཔི ཀཱམཱཝཙརདེཝམནུསྶབྷཝཱནཾ མིསྶཀཝསེནེཝ, ཏསྨཱ ཀཱམདྷཱཏུཡཾ ཡེ དྭེ བྷཝཱཏི ཀཱམཱཝཙརདེཝམནུསྶཝསེན ཡེ དྭེ བྷཝཱཏི ཨཏྠོ. པུརིམཝིཀཔྤེསུ པུགྒལབྷེདེན པཊིཔདཱ བྷིནྡིཏྭཱ ཀསྶཙི ཙལཏཱིཏི, ཀསྶཙི ན ཙལཏཱིཏི ཀཏྭཱ ‘‘ཙལཏི ཨེཝཱ’’ཏི ཨཝདྷཱརཎམནྟརེན ཨཏྠོ ཝུཏྟོ. ཡསྨཱ པན ཨཊྛཀཐཱཡཾ (དྷ. ས. ཨཊྛ. ༣༥༠ ལོཀུཏྟརཀུསལཔཀིཎྞཀཀཐཱ) ‘‘ཡཐཱ ཙ པཊིཔདཱ, ཨེཝཾ ཨདྷིཔཏིཔི ཙལཏི ཨེཝཱ’’ཏི ཝུཏྟཾ, ཏསྨཱ སབྦེསམྤི པཊིཔདཱསུ ཨབྷེདེན གཧིཏཱསུ ཨེཀནྟེན ཙལནཾ སམྦྷཝཏཱིཏི ‘‘ཙལཏིཙྩེཝ ཝུཏྟཾ, ན ན ཙལཏཱི’’ཏི ཏཏིཡཝིཀཔྤོ ཙལནཱཝདྷཱརཎོ ཝུཏྟོ.

ལོཀུཏྟརཀུསལཔཀིཎྞཀཀཐཱཝཎྞནཱ ནིཊྛིཏཱ.

པཋམམགྒཝཱིསཏིམཧཱནཡཝཎྞནཱ

༣༥༧. ཛྷཱནམགྒཱདིཔརིཡཱཡེཧི ¶ ཀཐིཏེ བོཛ྄ཛྷནཀཱཏི ཨདྷིཔྤེཏཱ, ཝིསེསཏོ པུབྦབྷཱགེ ‘‘ཛྷཱནཾ བྷཱཝེམི མགྒཾ བྷཱཝེམཱི’’ཏི པཝཏྟཛ྄ཛྷཱསཡཱ ཧོནྟཱིཏི ཨདྷིཔྤཱཡེན ‘‘ཡསྶ པུབྦབྷཱགེ’’ཏིཨཱདིམཱཧ.

༣༥༨. ཨུཔནིསྶཡཝསེནཱཏི ¶ ཏཐཱ ཙིཏྟཔྤཝཏྟིསངྑཱཏེན པུབྦབྷཱགཱབྷིསངྑཱརེན. ཏེནེཝཱཧ ‘‘ཡསྶ ཧཱི’’ཏིཨཱདི. ཏདནུརཱུཔབལཱཏི ཨདྷིཔཏིཔཙྩཡལཱབྷེན སཏྟིཝིསེསཡོགམཱཧ. ཡདི པུབྦབྷཱགཱབྷིསངྑཱརཝསེན ཚནྡཱདཱིནཾ ཨདྷིཔཏིབྷཱཝོ, ཀིམཏྠམེཏེཡེཝ ཨེཝཾ ཝུཏྟཱ, ནནུ སདྡྷཱདཱིནམྤི པུབྦབྷཱགཱབྷིསངྑཱརོ ལབྦྷཏཱིཏི ཨཱཧ ‘‘སེསདྷམྨཱན’’ནྟིཨཱདི. ཨཏཾསབྷཱཝཏྟཱཏི སམྤཡུཏྟེཧི སཱཏིསཡམནུཝཏྟིཏབྦབྷཱཝརཧིཏཏྟཱ. ཀིཉྩཱཔི ཧི སདྡྷཱདཡོཔི ཨིནྡྲིཡཔཙྩཡཏཱཡ སམྤཡུཏྟེཧི ཨནུཝཏྟཡནྟི, ཨེཀསྨིཾ པན ཙིཏྟུཔྤཱདེ སམདྷུརེན ཨཉྙེན ཝིནཱ སམྤཡུཏྟེཧི ཨནུཝཏྟནཱིཡབྷཱཝོ ན ཏེསཾ ཡཐཱ ཚནྡཱདཱིནནྟི ཏེཡེཝ ཨདྷིཔཏིབྷཱཝེན ཝུཏྟཱ. ཨེཝཉྩ ཀཏྭཱ ཨིནྡྲིཡསཧཛཱཏཱདྷིཔཏིཔཙྩཡཱནཾ ཝིསེསོ པརིབྱཏྟོ ཧོཏི.

ཙཏུམགྒནཡསཧསྶཝཎྞནཱ

༣༦༢. མཱནསྶ དིཊྛིསདིསཱ པཝཏྟི. ཏཐཱ ཧི སོ ཨདྷིཔཏི ཝིཡ ཨཉྙཱདྷིཔཏིནཱ དིཊྛིཡཱ སཧ ནཔྤཝཏྟཏཱིཏི. ཨེཀདེས…པེ… ཨུཔམཱ ཧོཏི, ན སབྦསཱམཉྙེན, ཨིཏརཐཱ སཱུརིཡཏྠངྒམནེ ཨནྡྷཀཱརཱཝཏྠརཎཾ ཝིཡ ཨགྒམགྒཏིརོདྷཱནེ སཙྩཔཊིཙྪཱདཀཏམཔྤཝཏྟི ཨཱཔཛྫེཡྻཱཏི ཨདྷིཔྤཱཡོ. ཨཉྙམཉྙནྟི ཨཉྙེ ཨཉྙེ. ‘‘ཨཱནཱིཏཾ ཨིདཾ སུཏྟ’’ནྟི ཝིབྷཏྟི པརིཎཱམེཏབྦཱ. ཡཐཱཝུཏྟནཡེནཱཏི ཨིམིསྶཱ ཨཊྛཀཐཱཡཾ ཝུཏྟནཡེན. ན ཨུཔམཱཡ ཝུཏྟཏྟཱཏི ཨིམསྨིཾ སུཏྟེ ན ཨུཔམཱཡ ཝུཏྟབྷཱཝཏོ. ཡཐཱཝུཏྟནཡེནཱཏི ཝཱ ཨེཏསྨིཾ སུཏྟེ ཝུཏྟཔྤཀཱརེན ནཡེན ཨིམིསྶཱ ཨཊྛཀཐཱཡཾ ཨུཔམཱཡ ན ཝུཏྟཏྟཱ. ཨཝཡཝཱ ཝིཡ ཧོནྟི, ཡེན ཏེ ཙེཏསི ནིཡུཏྟཱ, ཙིཏྟསྶ ཨེཏེཏི ཙ ཙེཏསིཀཱཏིཨཱདིནཱ ཝུཙྩནྟི, ན པན ‘‘ཕསྶིཀཱ’’ཏིཨཱདིནཱཏི དཊྛབྦཾ.

ཀུསལཀཐཱཝཎྞནཱ ནིཊྛིཏཱ.

ཨཀུསལཔདཾ

དྷམྨུདྡེསཝཱརོ

པཋམཙིཏྟཝཎྞནཱ

༣༦༥. ཁཎཏྟཡསྶ ¶ ཨཀུསལེསུ ཨསམྦྷཝཏོ སམཝཱཡཀཱལཧེཏུསམཱུཧཏྠོ སམཡ-སདྡོ. ལོབྷཱབྷིབྷཱུཏཱཡ ཨེཝ ཨིཊྛཱརམྨཎསྨིཾ ཨིཏརཏྲ ¶ ཙ ཨིཊྛཱཀཱརགྒཧཎཝསེན སོམནསྶསཧགཏབྷཱཝོཏི ཨེཝམཱདིཾ སནྡྷཱཡ ‘‘ཡཐཱནུརཱུཔ’’ནྟི ཝུཏྟཾ. ‘‘ཀིལེསཱཏུརཏཱཡ ཨནཱརོགྱཊྛེན ཀིལེསཝཛྫསབྦྷཱཝཏོ སཱཝཛྫཊྛེན ཨཝིཛྫཱསམྦྷཱུཏཏཱཡ ཨཀོསལྱསམྦྷཱུཏཊྛེན ཨཀུསལ’’ནྟི ཙ ‘‘སཱཝཛྫདུཀྑཝིཔཱཀལཀྑཎཾ, ཨནཏྠཛནནརསཾ, སཾཀིལེསཔཙྩུཔཊྛཱནཾ, ཨཡོནིསོམནསིཀཱརཔདཊྛཱནཾ, གཱརཡ྄ཧབྷཱཝཏོ ཝཱ སཱཝཛྫལཀྑཎཾ, སཾཀིལེསབྷཱཝརསཾ, ཨནིཊྛཝིཔཱཀཔཙྩུཔཊྛཱནཾ, ཡཐཱཝུཏྟཔདཊྛཱནམེཝཱ’’ཏི ཙ ཨེཝམཱདིནཱ ཝུཏྟནཡེན ཨནུགནྟབྦཏཱཡ ཝུཏྟཾ ‘‘ཝུཏྟནཡཾ ཨནུགནྟྭཱ’’ཏི.

གཏཾ གམནཾ པཝཏྟཱིཏི ཀཏྭཱ ཝུཏྟཾ ‘‘གཏམཏྟཾ གཏིམཏྟཾ གཧཎམཏྟ’’ནྟི. དིཊྛིཡཱ ཧི གཏི པཝཏྟི ཨེཝཱཏི. ཨཱསནྣཀཱརཎཏྟཱཏི པདཊྛཱནཏཱཡ, ཡོནིསོམནསིཀཱརོ ཝིཡ ཧི ཀུསལསྶ ཨཡོནིསོམནསིཀཱརོ ཨཀུསལསྶ ཨཙྩཱསནྣཧེཏུ. ཏཐཱ ཧི སཏིཔི ཨསདྡྷམྨསཝནཱདིཀཱརཎེ ཨཡོནིསོ ཨནཱཝཛྫིཏེ ཨཝཝཏྠཱཔིཏེ ཙ ནཏྠི ཨཀུསལཔྤཝཏྟི. ཏཐཱ ཙ ཝཀྑཏི ཨཊྛཀཐཱཡཾ ‘‘ཨཡོནིསོ ཨཀུསལ’’ནྟི. ཨེཏེན ཨེཀནྟཀཱརཎཏཱ ཙ ཝུཏྟཏྠཱ ཧོཏི. པཊིསངྑཱ སཱིཏཱདིཁམནཾ ཨཔྤམཱདཝིཧཱརོཏི ཝུཏྟཾ ‘‘ཨཔྤམཛྫནཾ ཁམན’’ནྟི. ཏེན སཏིསཾཝརོཏི ཨིདྷ ཁནྟིསཾཝརོ ཝུཏྟོཏི ཨདྷིཔྤཱཡོ ཨིནྡྲིཡསཾཝརསྶ ཝུཏྟཏྟཱ. པཧཱནསཾཝརོཏི ཝཱིརིཡསཾཝརོ. སོ ཧི ‘‘ཨུཔྤནྣཾ ཀཱམཝིཏཀྐཾ ནཱདྷིཝཱསེཏི པཛཧཏཱི’’ཏིཨཱདིནཱ (མ. ནི. ༡.༢༦; ཨ. ནི. ༤.༡༤; ༦.༥༨) ཝུཏྟོཏི.

སམྨཱཔཊིཔཏྟིཡཱ པཊིཔཀྑབྷཱཝེན གཧེཏབྦཏཱཀཱརོ མོཧོ སམྨཱཔཊིཔཏྟིཔཊིཔཀྑབྷཱཝགྒཧཎཱཀཱརོ. ཏེན ཧི ནིཝུཏཱ ན སམྨཱ པཊིཔཛྫནྟི. ཨབྷིཛ྄ཛྷཱཡ ཝིསེསཡོགོ ཀམྨཔཐཔྤཏྟི.

ཨནུཔཔརིཀྑཱ མོཧོ. སོ ཙེཏྠ དིཊྛིརཧིཏོ ཝེདིཏབྦོ. དིཊྛིསཧིཏསྶ པན དིཊྛིཡཱ ཨནུཝིདྷཱཡཀཏྟཱ ཏགྒཧཎེནེཝ གཧཎནྟི. ཨཝཏྠུསྨིནྟི ཨསདྡཧནཱིཡེ ཝཏྠུསྨིཾ. སཱནུནཡོ ཨདྷིམོཀྑོཏི ¶ མོཧདིཊྛཱིནཾ སདྡྷཱཔཏིརཱུཔཏམཱཧ. ཨཧིརིཀཱནོཏྟཔྤམོཧཱདཱིཧི པམཛྫནཏོ ཨཧིརིཀཱདཱིཧི ཀཱརཎེཧི. ཨཱརཀྑརཧིཏཙིཏྟེཏི ཙིཏྟསྶ སཏིཝིརཧཏཾཡེཝ དསྶེཏི. ཨཱརཀྑཔཙྩུཔཊྛཱནཱ ཧི སཏཱིཏི. ཨེཏེན ‘‘ཨསྶདྡྷིཡཙིཏྟེ ཨནྡྷབཱལཙིཏྟེ’’ཏི པདདྭཡཾ ཝུཏྟཏྠཾ ཧོཏི. ཨུཔནཱཧཱདཱིཏི ཨཱདི-སདྡེན ¶ རཱགཱདཡོ སངྒཡ྄ཧནྟི. རཱགཱདཱིནཾ པརིཡུཊྛཱནཱདིསབྷཱཝཏཱཡ ‘‘ཨཝིསེསེནཱ’’ཏི ཝུཏྟཾ ཝིསེསསྶ ཨེཀཙྩསྶ ཨསམྦྷཝཏོ. ཨིདྷཱཏི, ཨིམསྨིཾ ཙིཏྟེ. ནིཔྥཱདེཏབྦེ པཡོཛནེ བྷུམྨཾ ‘‘ཙམྨསྨིཾ དཱིཔིནཾ ཧནྟཱི’’ཏི (ཝཛིར. ཊཱི. ༡༧-༡༨ ཝེརཉྫཀཎྜཝཎྞནཱ) ཝིཡ ཨཱརམྨཎཾ ཝཱ ཨཝཱུཔསམོ ཕལཱུཔཙཱརེན ‘‘སེམྷོ གུལོ༹’’ཏི ཝིཡ.

དྷམྨུདྡེསཝཱརཀཐཱཝཎྞནཱ ནིཊྛིཏཱ.

ནིདྡེསཝཱརཀཐཱཝཎྞནཱ

༣༩༠. སབྷཱཝཔཊིཙྪཱདཝསེན པཀཏིཨཏྟཱདིཨསནྟགྒཧཎསྶ ནིསྶཡཏྟཱ ནིམིཏྟཏྟཱ ཨསནྟཾ བུཛ྄ཛྷཏི, ནིཙྩཱདིཝིསམགྒཧཎསྶ སཉྙཱདིཝིཔརིཡེསསྶ ནིསྶཡཏྟཱ ཨསམཾ བུཛ྄ཛྷཏཱིཏི མོཧོ ཝུཏྟོ ནིམིཏྟསྶ ཀཏྟུབྷཱཝེན ཨུཔཙཱརིཏཏྟཱ, ཨཡཉྩ ཨཏྠོ དིཊྛིསཧིཏམོཧཝསེན དཊྛབྦོ. ཨེཏྠ ཙ པཀཏཱིཏི ཀཱཔིལཱནཾ པདྷཱནཾ.

ཏཏིཡཙིཏྟཝཎྞནཱ

༤༠༠. ཨཔཎྞཀཔདཾ ཝིཡ ཨཝིརཛ྄ཛྷནཀཔདམྤི ཀདཱཙི ནིཡཏབྷཱཝཾ དཱིཔེཡྻཱཏི ཨནིཡཏཏཾ དཱིཔེཏུཾ ‘‘ཨུཔྤཏྟིཨརཧངྒཱནཱི’’ཏི ཝུཏྟཾ མཱནསྶ ཨནིཡཏཏྟཱ. ཡདི ཧི མཱནོ ནིཡཏོ སིཡཱ, ཀཱམརཱགསྶ མཱནརཧིཏཱ པཝཏྟི ན སིཡཱ, ཏཐཱ བྷཝརཱགསྶ. ཨེཝཾ སཏི པཊྛཱནེ ཙཏུཀྑཏྟུཾ ཀཱམརཱགེན ཡོཛནཱ ན སིཡཱ, ཏིཀྑཏྟུཾཡེཝ སིཡཱ, བྷཝརཱགམཱུལིཀཱ ཙ ན སིཡཱ, ཨེཝཉྩ སཾཡོཛནཱནཾ སཾཡོཛནེཧི ཨཊྛཝིདྷེན ཡོཛནཱ སིཡཱ, ན དསཝིདྷཱ དསྶིཏཱཏི ཡཐཱཝུཏྟཱཧི ཡོཛནཱཧི མཱནསྶ ཨནིཡཏབྷཱཝོ པཀཱསིཏོ. ཨཐ ཝཱ མཱནེན སདྡྷིཾ པཉྩ ཧོནྟི ཡཐཱཝུཏྟཱནི ཨཔཎྞཀངྒཱནི, ཀིཾ པན ཧོནྟཱིཏི ཨཔེཀྑཱཡཾ ཡེཝཱཔནཀཱཏི ཝིདིཏོཝཱཡམཏྠོ. ཡེཝཱཔནཀཱནཉྷི པཉྩབྷཱཝོ ཨིདྷ ཝིདྷཱིཡཏི, ན ཨཔཎྞཀངྒཱནནྟི སོ ཡཐཱ ཧོཏི ¶ , ཏཐཱ ཡོཛེཏབྦཾ. ཀིལེསདུཀེ པཊིཙྩཝཱརཱདཱིསུ ‘‘ཀིལེསཾ དྷམྨཾ པཊིཙྩ ཀིལེསོ དྷམྨོ ཨུཔྤཛྫཏི ཧེཏུཔཙྩཡཱ’’ཏིཨཱདཱིསུ ‘‘ལོབྷཾ པཊིཙྩ མོཧོ མཱནོ ཐིནཾ ཨུདྡྷཙྩཾ ཨཧིརིཀཾ ཨནོཏྟཔྤཾ. ལོབྷཾ པཊིཙྩ མོཧོ མཱནོ ཨུདྡྷཙྩཾ ¶ ཨཧིརིཀཾ ཨནོཏྟཔྤཾ. ལོབྷཾ པཊིཙྩ མོཧོ ཐིནཾ ཨུདྡྷཙྩཾ ཨཧིརིཀཾ ཨནོཏྟཔྤཾ. ལོབྷཾ པཊིཙྩ མོཧོ ཨུདྡྷཙྩཾ ཨཧིརིཀཾ ཨནོཏྟཔྤ’’ནྟི ཝིབྷཏྟཏྟཱ ‘‘ཏཐཱ ཀིལེསདུཀེཔཱི’’ཏི ཝུཏྟཾ. དིཊྛིཝིཔྤཡུཏྟསསངྑཱརིཀཱསངྑཱརིཀཙིཏྟཝསེན ཧི ཨཡཾ པཱཋབྷེདོཏི.

‘‘ཀཱམརཱགོ ཙཏུདྷཱ ཨེཀཏོ ཨུཔྤཛྫཏི, པཊིགྷོ ཏིདྷཱ, མཱནོ ཨེཀདྷཱ, ཏཐཱ ཝིཙིཀིཙྪཱ བྷཝརཱགོཏི ཨུདྡིསིཏྭཱ ཀཱམརཱགོ མཱནསཾཡོཛནཨཝིཛྫཱསཾཡོཛནེཧི ཙེཝ ཨཝིཛྫཱསཾཡོཛནམཏྟེནེཝ ཙ སདྡྷིཾ མཱནོ བྷཝརཱགཱཝིཛྫཱསཾཡོཛནེཧི སདྡྷིཾ བྷཝརཱགོ ཨཝིཛྫཱསཾཡོཛནེན སདྡྷི’’ནྟི ཨཊྛཀཐཱཀཎྜཝཎྞནཱཡཾ (དྷ. ས. ཨཊྛ. ༡༤༨༥) ཝཀྑམཱནཏྟཱ ‘‘ཨིདྷ ཙ ཝཀྑཏཱི’’ཏིཨཱདི ཝུཏྟཾ. ཏཏྠེཝ ‘‘ལོབྷོ ཚདྷཱ ཨེཀཏོ ཨུཔྤཛྫཏི, པཊིགྷོ དྭེདྷཱ, ཏཐཱ མོཧོ’’ཏི ཨུདྡིསིཏྭཱ ‘‘ལོབྷོ ཨསངྑཱརིཀོ དིཊྛིཝིཔྤཡུཏྟོ མོཧཨུདྡྷཙྩཨཧིརིཀཱནོཏྟཔྤེཧི, སསངྑཱརིཀོ མོཧཐིནཨུདྡྷཙྩཨཧིརིཀཱནོཏྟཔྤེཧི, ཨསངྑཱརིཀོ ཨེཝ མོཧམཱནཨུདྡྷཙྩཨཧིརིཀཨནོཏྟཔྤེཧི, སསངྑཱརིཀོ ཨེཝ ཙ མོཧམཱནཐིནཨུདྡྷཙྩཨཧིརིཀཨནོཏྟཔྤེཧཱི’’ཏི ཝཀྑམཱནཏྟཱ ‘‘ཏཐཱདསཝིདྷཱ ཀིལེསཱན’’ནྟི ཝུཏྟཾ. ‘‘ཨཧ’’ནྟི གཧཎཏཱཡ ཨཝཾཀཏྭཱ གཧཎམྤི ‘‘སམྤགྒཧོ’’ཏི ཝུཏྟཾ.

ཙཏུཏྠཙིཏྟཝཎྞནཱ

༤༠༢. ཨུསྶཱཧཾ ཛནེནྟཱཏི ཨེཏྠ ཙིཏྟཔཡོགསངྑཱཏོ སངྑཱརོ ཨེཝ ཨུསྶཱཧོ, ན ཝཱིརིཡུསྶཱཧོཏི.

ནཝམཙིཏྟཝཎྞནཱ

༤༡༣. ཝིསཔྤནཱནིཊྛརཱུཔསམུཊྛཱནཾ ཡེན ཀུཔིཏསྶ སཀལསརཱིརཾ ཀམྤཏི, ཀུཔིཏཱཀཱརོ པཉྙཱཡཏི. ཨེཏེན སམྤཏྟིཨཏྠོ རསོ དསྶིཏོ ཧོཏི, པཝཏྟིཨཱཀཱརཝསེན ཝཱ ཝིསཔྤནརསོ. ཏཐཱ ཧི ཡསྶ ཀུཔྤཏི, ཏསྶ ཨམིཏྟསྶ སམྤཏྟི ཡེབྷུཡྻེན པཊིགྷུཔྤཏྟིཧེཏུ ཧོཏཱིཏི. ཨེཏེན ཀིཙྩཏྠོ རསོ ཝུཏྟོ ཧོཏཱིཏི.

༤༡༨. ཝཙནཏྠམེཝ ¶ ཝཙནཔརིཡཱཡམེཝ.

ཨེཀཱདསམཙིཏྟཝཎྞནཱ

༤༢༤. ནིཙྪཡཱབྷཱཝཱཏི ¶ ཨདྷིམོཀྑཱབྷཱཝཱ. ཨསཎྛཧནཏོཏི སནྟཱནཝསེན ཨེཀསྨིཾ ཨཱརམྨཎེ ཨནཝཊྛཱནཏོ.

དྭཱདསམཙིཏྟཝཎྞནཱ

༤༢༩. སཧཛཱཏཱདྷིཔཏི ནཏྠི ‘‘ཚནྡཝཏོ ཙེ ཝིཙིཀིཙྪཱ ཨུཔྤཛྫཏི, སཱ མཡ྄ཧཾ ཨུཔྤཛྫེཡྻཱ’’ཏིཨཱདིཔྤཝཏྟིཡཱ ཨབྷཱཝཱ. ཨནུདྡྷཊཏྟཱ པཊིསིདྡྷཏཱ, ཡཐཱདྷམྨསཱསནེ ཨཝཙནམྤི ཨབྷཱཝཾ དཱིཔེཏི.

ཨཝཙནཏོཏི ཨ-ཀཱརསྶ ཏདཉྙཝཙནཏཾ དསྶེཏི. ཨེཏེན ཙ དསྶནེན པཧཱཏབྦེསུ ཨབྷཱཝཝཙནེན ཀཱརཎསིདྡྷིཡཱ ཕལསིདྡྷཱིཏི ཏཏྠ ཨབྷཱཝསྶ ཀཱརཎམེཝ ཏཱཝ དསྶེཏུཾ ‘‘པཊིསནྡྷིཨནཱཀཌྜྷནཏོ’’ཏི ཝུཏྟཾ. ཏེན ཏཾསབྷཱཝཏཱ ཏསྶ ཙིཏྟུཔྤཱདསྶ ཝུཏྟཱ ཧོཏི. ཏཏོ ཙ ‘‘བལཝཾ པཊིསནྡྷིཾ ཨཱཀཌྜྷཏི, དུབྦལཾ ནཱཀཌྜྷཏཱི’’ཏི ཨིདཾ པཊིསནྡྷིདཱནསབྷཱཝེསུ. ཡསྶ པན པཊིསནྡྷིདཱནསབྷཱཝོ ཨེཝ ནཏྠི, ན ཏསྶ བལཝབྷཱཝོ པཊིསནྡྷིཨཱཀཌྜྷནེ ཀཱརཎནྟི ཨཡམཏྠོ དསྶིཏོ ཧོཏི. ཨནཱཀཌྜྷནཾ སཱདྷེཏི ‘‘ཡདི ཧི ཨཱཀཌྜྷེཡྻཱ’’ཏིཨཱདིནཱ. ཡསྨཱ ཙ ནཱགཏཾ, ཏསྨཱ ནཱཀཌྜྷཏཱིཏི ཨདྷིཔྤཱཡོ. ‘‘ཡསྨཱ པན ཏཾ པཊིསནྡྷིདཱནཾ ནཏྠི, ཏསྨཱ ནཱགཏ’’ནྟི ཝུཏྟཏྟཱ ‘‘ཨནཱཀཌྜྷནཏོ ཨནཱགམནཾ སཱདྷེཏུ’’ནྟི ཝུཏྟཾ.

ཨཔཱཡགམནཱིཡསྶཱཏི ཨཔཱཡཾ གམེཏཱིཏི ཨཔཱཡགམནཱིཡཾ, ཏཾསབྷཱཝནྟི ཨཏྠོ. པཊིསནྡྷིཨཱཀཌྜྷནེ སཏི ཨུདྡྷཙྩསཧགཏཾ ཨེཀནྟེན ཨཔཱཡགམནཱིཡཾ སིཡཱ. ཏེན ཝུཏྟཾ ཨཊྛཀཐཱཡཾ (དྷ. ས. ཨཊྛ. ༤༢༩) ‘‘ཨིཏརསྶཱཔི ཨེཏྠེཝ པཊིསནྡྷིདཱནཾ བྷཝེཡྻཱ’’ཏི. ན ཧི ཨཀུསལཔཊིསནྡྷི སུགཏིཡཾ སམྦྷཝཏཱིཏི. ‘‘ཙཏཱུཧི ཨཔཱཡེཧི ཙ ཝིཔྤམུཏྟོ (ཁུ. པཱ. ༦.༡༡; སུ. ནི. ༢༣༤) ཨཝིནིཔཱཏདྷམྨོ’’ཏི (ས. ནི. ༢.༤༡; ༥.༩༩༨, ༡༠༠༤) ཝཙནཏོ ཨཔཱཡགམནཱིཡཉྩ དསྶནེན པཧཱཏབྦཾ. ཏེནཱཧ ‘‘ཨཔཱཡགམནཱིཡསྶ དསྶནེན པཧཱཏབྦཏྟཱ’’ཏི. ན ཙེཏཾ དསྶནེན པཧཱཏབྦཾ, ན སོ ཏསྶ ཨཔཱཡགམནཱིཡོ རཱགོ དོསོ ¶ མོཧོ ཏདེཀཊྛཱ ཙ ཀིལེསཱཏི ཨེཏེན སངྒཧོཏི སཀྐཱ ཝཏྟུཾ ནིཡོགཏོ བྷཱཝནཱཡ པཧཱཏབྦབྷཱཝེན ཝུཏྟཏྟཱ. ཝུཏྟཉྷེཏཾ ‘‘ཀཏམེ དྷམྨཱ བྷཱཝནཱཡ པཧཱཏབྦཱ, ཨུདྡྷཙྩསཧགཏོ ཙིཏྟུཔྤཱདོ’’ཏི (དྷ. ས. ༡༤༠༦).

‘‘ཀུསལཱཀུསལཾ ¶ ཀམྨཾ ཝིཔཱཀཱནཾ ཁནྡྷཱནཾ ཀཊཏྟཱ ཙ རཱུཔཱནཾ ཀམྨཔཙྩཡེན པཙྩཡོ’’ཏི (པཊྛཱ. ༡.༡.༤༢༧) ཝུཏྟཀམྨཔཙྩཡབྷཱཝོ ནཱནཱཀྑཎིཀཀམྨཔཙྩཡབྷཱཝོ. སོ ཙ ཡདི ཨུདྡྷཙྩསཧགཏཾ པཊིསནྡྷིཾ ཨཱཀཌྜྷེཡྻ, ཏསྶཱཔི སིཡཱ. ཏཐཱ ཙ སཏི ཨུདྡྷཙྩསཧགཏཾ དསྶནེན པཧཱཏབྦཾ སིཡཱ དསྶནེན པཧཱཏབྦཱནཾཡེཝ ནཱནཱཀྑཎིཀཀམྨཔཙྩཡབྷཱཝསྶ ཝུཏྟཏྟཱ. ན ཙེཏཾ དསྶེནེན པཧཱཏབྦནྟི སབྦཾ པུབྦེ ཝིཡ ཨཱཝཏྟཏི.

སཧཛཱཏམེཝ ཝིབྷཏྟནྟི ཡཐཱ དསྶནེན པཧཱཏབྦཝིབྷངྒེ ‘‘དསྶནེན པཧཱཏབྦོ དྷམྨོ ནེཝ དསྶནེན ན བྷཱཝནཱཡ པཧཱཏབྦསྶ དྷམྨསྶ ཀམྨཔཙྩཡེན པཙྩཡོ’’ཏི (པཊྛཱ. ༢.༨.༨༦) སཧཛཱཏཾ ནཱནཱཀྑཎིཀནྟི ཨུདྡིསིཏྭཱ ‘‘སཧཛཱཏཱ དསྶནེན པཧཱཏབྦཱ ཙེཏནཱ ཙིཏྟསམུཊྛཱནཱནཾ རཱུཔཱནཾ ཀམྨཔཙྩཡེན པཙྩཡོ, ནཱནཱཀྑཎིཀཱ དསྶནེན པཧཱཏབྦཱ ཙེཏནཱ ཝིཔཱཀཱནཾ ཁནྡྷཱནཾ ཀཊཏྟཱ ཙ རཱུཔཱནཾ ཀམྨཔཙྩཡེན པཙྩཡོ’’ཏི ཝིབྷཏྟཾ, ཨེཝཾ ཨཝིབྷཛིཏྭཱ ‘‘བྷཱཝནཱཡ པཧཱཏབྦཱ ཙེཏནཱ ཙིཏྟསམུཊྛཱནཱནཾ རཱུཔཱནཾ ཀམྨཔཙྩཡེན པཙྩཡོ’’ཏི (པཊྛཱ. ༢.༨.༨༩) ཨེཏྟཀམེཝ ཝུཏྟཾ, ན ཝུཏྟཾ ‘‘ནཱནཱཀྑཎིཀཱ ཙེཏནཱ ཝིཔཱཀཱནཾ ཁནྡྷཱནཾ ཀཊཏྟཱ ཙ རཱུཔཱནཾ ཀམྨཔཙྩཡེན པཙྩཡོ’’ཏི. ཏེན ན བྷཱཝནཱཡ པཧཱཏབྦསྶ ནཱནཱཀྑཎིཀཀམྨཔཙྩཡབྷཱཝོཏི ཝིཉྙཱཡཏི. པཙྩནཱིཡེཔི ཡཐཱསམྦྷཝཾ སངྒཱཧཀཔཙྩཡཱནཾ ཝསེན པཙྩཡུདྡྷཱརེ ཀརིཡམཱནེ. ཨིཏརཏྠ ཙཱཏི དསྶནེནཔཧཱཏབྦཔདེ. ཏཏྠ ཧི ‘‘དསྶནེན པཧཱཏབྦོ དྷམྨོ ནེཝ དསྶནེན ན བྷཱཝནཱཡ པཧཱཏབྦསྶ དྷམྨསྶ ཨཱརམྨཎཔཙྩཡེན པཙྩཡོ, སཧཛཱཏཨུཔནིསྶཡཔཙྪཱཛཱཏཀམྨཔཙྩཡེན པཙྩཡོ’’ཏི (པཊྛཱ. ༢.༨.༧༡) ཀམྨཔཙྩཡོཔི ཝུཏྟོཏི.

ཏདབྷཱཝཱཏི ནཱནཱཀྑཎིཀཀམྨཔཙྩཡཏྟཱབྷཱཝཱ. ན ཙ ནཱནཱཀྑཎིཀཀམྨཔཙྩཡཾ ཝིནཱ པཊིསནྡྷིཨཱཀཌྜྷནཾ ཨཏྠཱིཏི ‘‘པཊིསནྡྷིཨནཱཀཌྜྷནཏོ ཏཏྠ ཨནཱགཏཱ’’ཏི ཝུཏྟཾ. ཨེཏྠཱཏི ‘‘ཋཔེཏྭཱ ཨུདྡྷཙྩསཧགཏཾ སེསཱནི ཨེཀཱདསེཝ པཊིསནྡྷིཾ ཨཱཀཌྜྷནྟཱི’’ཏི ཨེཏྠ. པཝཏྟིཝིཔཱཀསྶཱཏི པཝཏྟིཡཾ ཝིཔཱཀོ པཝཏྟིཨེཀདེསཏཱཡ པཝཏྟིབྷཱུཏོ ཝཱ ཝིཔཱཀོ ཨེཏསྶཱཏི པཝཏྟིཝིཔཱཀཾ, ཀམྨཾ, ཏསྶ. ཨཐ ཝཱ པཝཏྟིཡཾ ཝིཔཱཀོ པཝཏྟིཝིཔཱཀོ. ཨིམསྨིཾ པན ཨཏྠེ ནཱནཱཀྑཎིཀཀམྨཔཙྩཡོ ཨེཏསྶཱཏི ¶ ནཱནཱ…པེ… ཡོ, ཏབྦྷཱཝོ…པེ… ཏཱཏི ཨེཝཾ པདཙྪེདོ དཊྛབྦོ. ན སཀྐཱ ནིཝཱརེཏུཾ ནཱནཱཀྑཎིཀཀམྨཔཙྩཡཾ ཝིནཱ ཝིཔཱཀསྶ ཨནུཔྤཛྫནཏོ.

ཨིདཱནི ¶ པཝཏྟིཝིཔཱཀཱནཾ ནཱནཱཀྑཎིཀཀམྨཔཙྩཡལཱབྷིཏཱཡ ཨཱཧཙྩབྷཱསིཏཏཾ དསྶེཏུཾ ‘‘ཝུཏྟཉྩཱ’’ཏིཨཱདིམཱཧ. ཝིཔཱཀདཱནཾ པཊིསནྡྷིཝིཔཱཀདྷམྨཏཱཏི མཉྙམཱནོ ‘‘ཡདི བྷཱཝནཱ’’ཏིཨཱདིམཱཧ. ཨིཏརོ ཝིཔཱཀདཱནཱབྷཱཝེཔི སིདྡྷོ ཝིཔཱཀདྷམྨབྷཱཝོ ཏཱདིསཱནཾ ཨཉྙེསམྤི ལབྦྷམཱནཏྟཱཏི ཨཱཧ ‘‘ཨབྷིཉྙཱཙིཏྟཱདཱིན’’ནྟི. ཨཱདི-སདྡེན ཨཏྟནོ ཀཱལམཏིཀྐནྟཾ དིཊྛདྷམྨཝེདནཱིཡཾ ཨུཔཔཛྫཝེདནཱིཡཉྩ སངྒཎྷཱཏི. ཝུཏྟཾ སིཡཱཏི ཨིདཾ སཧཱཡཔཙྩཡལཱབྷཏོ པུཐུཛྫནསནྟཱནཝུཏྟིནོ ཨུདྡྷཙྩསཧགཏསྶ ཝིཔཱཀུཔྤཱདནཾ, ཏདབྷཱཝཱ སེཀྑསནྟཏིཡཾ ཏསྶ ཝིཔཱཀཱནུཔྤཱདནཉྩ ཡུཏྟཾ སིཡཱཏི ཝུཏྟཾ. ཏེནེཝཱཧ ‘‘ཨིདཾ པན ཋཱནཾ སུཊྛུ ཝིཙཱརེཏབྦ’’ནྟིཨཱདི. ཏཐཱ ཙ ཝཀྑཏི ‘‘པུཐུཛྫནེསུ ཨུཔྤཛྫམཱནཱནཾ སཀབྷཎྜེ ཚནྡརཱགཱདཱིནཾ ཨུདྡྷཙྩསཧགཏཙིཏྟུཔྤཱདསྶ ཙ སཾཡོཛནཏྟཡཏདེཀཊྛཀིལེསཱནཾ ཨནུཔཙྪིནྣཏཱཡ ཨཔརིཀྑཱིཎསཧཱཡཱནཾ ཝིཔཱཀུཔྤཱདནཾ ན སཀྐཱ པཊིཀྑིཔིཏུནྟི ཨུདྡྷཙྩསཧགཏདྷམྨཱནཾ ཝིཔཱཀོ ཝིབྷངྒེ ཝུཏྟོ’’ཏི. ཏསྶ ཏཱདིསསྶེཝ སཏི སཧཱཡེ ཝིཔཱཀུཔྤཱདནཝཙནཾ, ཨསཏི ཝིཔཱཀཱནུཔྤཱདནཝཙནཾ ཝིརུཛ྄ཛྷཏཱིཏི ཙ པཝཏྟིཝིཔཱཀདཱཡིཀཾ ཝཱ ཨུདྡྷཙྩསཧགཏསྶ མནསི ཀཏྭཱ ‘‘ཝུཏྟཾ སིཡཱ’’ཏི ཝུཏྟཾ. ‘‘པཝཏྟིཝིཔཱཀཉྷི སནྡྷཱཡ ‘ཏེསཾ ཝིཔཱཀེ ཉཱཎ’ནྟི པཊིསམྦྷིདཱཝིབྷངྒེ (ཝིབྷ. ༧༢༥-༧༢༦) ཝུཏྟ’’ནྟི ཨེཀེ ཝཎྞཡནྟི. ཨེཝཾ ཨུདྡྷཙྩཙེཏནཱཔི ན ཧོཏི, སཱཔི ཝིཉྙཱཎཔཙྩཡབྷཱཝེ ཨཔནེཏབྦཱཏི ཨིདམྤི པཊིསནྡྷིཝིཉྙཱཎམེཝ སནྡྷཱཡ ཝུཏྟནྟི.

ཨཀུསལཔདཝཎྞནཱ ནིཊྛིཏཱ.

ཨབྱཱཀཏཔདཾ

ཨཧེཏུཀཀུསལཝིཔཱཀཝཎྞནཱ

༤༣༡. ཀཱམཱཝཙར…པེ… ཨཱདི ཝུཏྟནྟི ཨེཏྠ ཨཱདི-སདྡེན ‘‘ཨུཔཙིཏཏྟཱ’’ཏི པདཾ སངྒཡ྄ཧཏི ‘‘ཨསཱདྷཱརཎཀམྨཔཙྩཡཝསེནཱ’’ཏི ཝུཏྟཏྟཱ. ‘‘ཨུཔཙིཏཏྟཱཏི ལདྡྷཱསེཝནཏྟཱ’’ཏི ཀེཙི ཝདནྟི ¶ , ཏཾ པཋམཛཝནསྶ ན ཡུཛྫཏི ཨནཱསེཝནཏྟཱ. ཏཐཱ ཙ སཏི ཏསྶ ཝིཔཱཀདཱནམེཝ ན སིཡཱཏི ཏཏོ ཨཉྙཐཱ ཨཏྠཾ དསྶེནྟོ ‘‘ཡཐཱ’’ཏིཨཱདིམཱཧ. ཏཏྠ ཝིཔཱཀཱབྷིམུཁནྟི ཝིཔཱཀདཱནཱབྷིམུཁཾ ཀཏོཀཱསཾ. ཀཏོཀཱསཏཱ ཙ ཨནཱདིམྷི སཾསཱརེ ཨནེཀེསཾ ཀམྨཱནཾ ཀཏཱནཾ ཨཏྠིཏཱཡ པརསྶ པཊིབཱཧནེན ཧོཏཱིཏི ‘‘ཨཉྙསྶ ཝིཔཱཀཾ པཊིབཱཧིཏྭཱ’’ཏིཨཱདི ཝུཏྟཾ. ཝཌྜྷིཏཏཱ ¶ ཙ སཀམྨསྶ བལདཱནསམཏྠཏཱཝསེན ཨཏྟནོ ཀཱརཎེཧི ཨབྷིསངྑཏཏཱ. ཨསཱདྷཱརཎེན ནཱམཾ ཨུདྡྷཊཾ ‘‘བྷེརཱིསདྡོ ཡཝངྐུརོ’’ཏི ཡཐཱ. ཝིཉྙཱཎཱནནྟི ཙཀྑུཝིཉྙཱཎཱདཱིནཾ. ཝིསེསཔཙྩཡཏྟཱཏི ཨདྷིཀཔཙྩཡཏྟཱ.

ཙཀྑུསནྣིསྶིཏཉྩ ཏཾ རཱུཔཝིཛཱནནཉྩཱཏི ཨེཏེན སམཱནཱདྷིཀརཎཏཾ སམཱསསྶ དསྶེནྟོ ཏཏྠ ཙ ‘‘ཙཀྑུསནྣིསྶིཏ’’ནྟིཨཱདིཔདདྭཡསྶ ནཱིལུཔྤལསདྡཱདཱིནཾ ཝིཡ ཨཉྙམཉྙཝིསེསནཝིསེསིཏབྦབྷཱཝམཱཧ. ཨཉྙཝིཉྙཱཎནྟི རཱུཔཱརམྨཎཾ མནོཝིཉྙཱཎཾ. རཱུཔཾཡེཝཱརམྨཎནྟི པན ཨཏྠེ དིབྦཙཀྑུཝིཉྙཱཎཾ དཊྛབྦཾ ཏཾསདིསཱནཾ ཏདུཔཙཱརཾ ཀཏྭཱ ཡཐཱ ‘‘སཱ ཨེཝ ཏིཏྟིརཱི ཏཱནི ཨེཝ ཨོསདྷཱནཱི’’ཏི. ཛྷཱནཔཙྩཡཏྟཱབྷཱཝེ ན ཛྷཱནངྒཏཱ ནཏྠཱིཏི པཉྩཝིཉྙཱཎེསུ ཨུཔེཀྑཱདཱིནཾ ཨུཔཙརིཏཛྷཱནངྒཏཾ སཱདྷེཏི. ན ཧི ཛྷཱནངྒཱནཾ ཛྷཱནཔཙྩཡཏཾ ཝཏྭཱ ཏེསཾ ཛྷཱནཔཙྩཡབྷཱཝོ པཊིཀྑིཏྟོཏི. ཡདི ཨེཝཾ པཉྩཝིཉྙཱཎེསུ ཨུཔེཀྑཱདཡོ ཛྷཱནརཱསིཊྛཱནེ ན ཝཏྟབྦཱ སིཡུནྟི ཨཱཧ ‘‘ཛྷཱནཔཙྩཡཏྟཱབྷཱཝེ’’ཏིཨཱདི. ཨུཔེཀྑཱདིབྷཱཝཏོཏི ཨུཔེཀྑཱསུཁདུཀྑེཀགྒཏཱབྷཱཝཏོ. ཨཉྙཊྛཱནཱབྷཱཝཏོཏི ཙིཏྟཊྛིཏིཾ ཨེཝ སནྡྷཱཡ ཝུཏྟཾ.

༤༣༦. ཨཀུསལཾ བྷཝངྒནིསྶནྡེན ‘‘པཎྜར’’ནྟི ཝུཙྩཏི, བྷཝངྒེ ཨཔཎྜརེ ཏཾམཱུལིཀཱ ཀུཏོ ཨཀུསལསྶ པཎྜརཏཱཏི ‘‘ཨཀུསལསྶ ཙཱ’’ཏི ཝུཏྟཾ. པཎྜརཏཱཡ ཀཱརཎཾ ཝཏྟབྦཾ, ཡདི ཨཉྙཀཱརཎཱ པཎྜརཏཱ, སབྷཱཝོཝཱཡནྟི ཙིཏྟསྶ ཨཀིལེསསབྷཱཝཏཱཡ ཝུཏྟཾ, ན ཙེཏྠ ཕསྶཱདཱིནམྤི པཎྜརཏཱཔཏྟི. ཡཏོ དྷམྨཱནཾ སབྷཱཝཀིཙྩཝིསེསཉྙུནཱ བྷགཝཏཱ ཝིཉྙཱཎཾཡེཝ ཏཐཱ ནིདྡིཊྛནྟི.

༤༣༩. ཨནཏིཀྐམནེན བྷཱཝནཱཡ. པསཱདགྷཊྚནཾ ཝིསཡསྶ ཡོགྱདེསེ ཨཝཊྛཱནནྟི ‘‘པསཱདཾ གྷཊྚེཏྭཱ ཨཱཔཱཐཾ གནྟྭཱ’’ཏི ཝུཏྟཾ. མཧཱབྷཱུཏེསུ པཊིཧཉྙཏཱིཏི ཨེཏྠ ན སཡཾ ཀིཉྩི པཊིཧཉྙཏི, ནཱཔི ཀེནཙི པཊིཧཉྙཱིཡཏི ཨཕོཊྛབྦསབྷཱཝཏྟཱ. ཝིསཡཝིསཡཱིབྷཱུཏཾ པན ཨབྷིམུཁབྷཱཝཔྤཏྟིཡཱ ཝིཉྙཱཎུཔྤཏྟིཡཱ ཧེཏུཏཱཡ ཝིསིཊྛབྷཱཝཔྤཏྟཾ པཊིཧཏཔཊིགྷཱཏཀབྷཱཝེན ཝོཧརཱིཡཏི ¶ , ཏསྨཱ ཏེསུ སཔྤཊིགྷཝོཧཱརོ. ‘‘ཨུཔཱདཱརཱུཔཾ གྷཊྚེཏཱིཏི ཨེཝམཱདི ཙ ཨུཔཙཱརཝསེནེཝ ཝེདིཏབྦཾ. མཧཱབྷཱུཏཱརམྨཎེན པན ¶ ཀཱཡཔྤསཱདནིསྶཡབྷཱུཏེསུ མཧཱབྷཱུཏེསུ གྷཊྚིཡམཱནེསུ པསཱདོཔི གྷཊྚིཏོ ཨེཝ ནཱམ ཧོཏཱིཏི ཝཏྭཱ ཝཱིམཾསིཏབྦ’’ནྟི ཝདནྟི. ཡཐཱདྷིཔྤེཏེན ཨེཀདེསསཱམཉྙེན ཨུཔམཱཝཙནཏོ ནིསྶིཏནིསྶཡགྷཊྚནཱནཾ སཏིཔི པུབྦཱཔརབྷཱཝེ ཨུཔམཏྟེ ཨུཔམཱབྷཱཝེན གཧེཏབྦབྷཱཝཾ དསྶེནྟོ ‘‘ཨུབྷཡགྷཊྚནདསྶནཏྠ’’ནྟི ཨཱཧ.

༤༥༥. དསྶནཱདིཔྤཝཏྟིབྷཱཝཏོཏི མནོདྷཱཏུམནོཝིཉྙཱཎདྷཱཏཱུནཾ ཨདསྶནཱདིཏཱཡ སཱ ཨེཏེསཾ ཨེཝ ཝིསེསོ. ཨནཉྙནིསྶཡམནོཔུབྦངྒམཏཱཡཱཏི ཨཉྙནིསྶཡམནོཔུབྦངྒམཏྟཱབྷཱཝཏོ. ཨཉྙནིསྶཡཝིཉྙཱཎསྶ ཨནནྟརཔཙྩཡཏྟཱབྷཱཝེནཱཏི ཨིམིནཱ ཀིརིཡཱམནོདྷཱཏུཏོཔི ཝིསེསསྶ ཝུཏྟཏྟཱ ‘‘མནོདྭཱརནིགྒམནམུཁབྷཱཝཱབྷཱཝཏོ’’ཏི ཝུཏྟཾ, ན ཝུཏྟཾ ‘‘ནིགྒམནཔཝེསམུཁབྷཱཝཱབྷཱཝཏོ’’ཏི. ཏིཝིདྷེནཔི ཧི མནོདྷཱཏུཝིཉྙཱཎདྷཱཏཱུཧི མནོཝིཉྙཱཎདྷཱཏུཡཱ ཝིསེསོ དསྶིཏོཏི. ཏཏོ ཨེཝ ཝིཛཱནནཝིསེསཝིརཧཏོཡེཝ. ཡདི མནོདྷཱཏུ ‘‘མནོཝིཉྙཱཎ’’ནྟི ན ཝུཙྩཏི, ཚཝིཉྙཱཎཀཱཡཱཏི ཀཐཾ མནོདྷཱཏུཡཱ ཏཏྠ སངྒཧོ ཧོཏཱིཏི? སངྒཧོ ཨེཝ པརིཡཱཡདེསནཏྟཱ. ཨཏྠི ཧི ཨེས པརིཡཱཡོ ‘‘མནནམཏྟཾ ཝིཉྙཱཎཾ མནོཝིཉྙཱཎ’’ནྟི ཡཐཱ ‘‘མནནམཏྟཱ དྷཱཏུ མནོདྷཱཏཱུ’’ཏི. ཨཔིཙ ཝཏྠུཀིཙྩེཧི མནོཝིཉྙཱཎསབྷཱགཏྟཱ ཏསྶ ཨུཔརམུཔྤཱདབྷཱཝཏོ ཨནྟཱདིབྷཱཝཏོ ཙ མནོཝིཉྙཱཎཀཱཡསངྒཧིཏཱ མནོདྷཱཏུ, ན སེསཝིཉྙཱཎཀཱཡསངྒཧིཏཱ ཨཏཾསབྷཱགཏྟཱ, ཨིདྷ པན ནིཔྤརིཡཱཡཀཏཏྟཱ མནསོ སམྦྷཱུཡ ཝིསིཊྛམནོཀིཙྩཡུཏྟཾ མནོཝིཉྙཱཎནྟི ཏདབྷཱཝཏོ ‘‘མནོཝིཉྙཱཎནྟིཔི ན ཝུཙྩཏཱི’’ཏི ཨིམམེཝཏྠཾ སཱདྷེཏུཾ ‘‘ན ཧི ཏཾ ཝིཉྙཱཎཾ མནཏོ’’ཏིཨཱདི ཝུཏྟཾ. ཏེན མནོདྷཱཏུཡཱ ནིཔྤརིཡཱཡཏོ མནོཝིཉྙཱཎཀིཙྩཝིརཧཾཡེཝ དསྶེཏི. དསྶནཱདཱིནཾ པནཱཏིཨཱདིནཱ ཨཉྙཝིཉྙཱཎཝིདྷུརཾ མནོདྷཱཏུཡཱ ཙ སབྷཱཝཾ དསྶེཏི.

ཡདི ཛནཀསདིསཏཱ ནཱམ མཧཱཝིཔཱཀེསུ ཝིཏཀྐཱདཱིནཾ སམྨཱསངྐཔྤཱདིཏཱ, ཏིཧེཏུཀཏོ ནིབྦཏྟཱནཾ ཏིཧེཏུཀཱནཾ, དུཧེཏུཀཏོ ནིབྦཏྟཱནཾ དུཧེཏུཀཱནཉྩ བྷཝཏུ སམྨཱསངྐཔྤཱདིཏཱ, ཏིཧེཏུཀཏོ པན ནིབྦཏྟདུཧེཏུཀཱནཾ ཀཐནྟི ཨཱཧ ‘‘ཏཏྠ ཧཱི’’ཏིཨཱདི. ཏཾསོཏཔཏིཏཏཱ ན སིཡཱ ཏསྶཱ ཨནཱནནྟརཏྟཱ. ཏཏོ ཨེཝ ཧཱིཏིཨཱདིནཱ ཝུཏྟསོཏཔཏིཏཾ ཨེཝཱནནྟརེན ཝཙནེན སམཏྠཡཏི. ཡདི ཝིཛྫམཱནཱནམྤི ¶ མནོདྷཱཏུཨཱདཱིསུ ཝིཏཀྐཱདཱིནཾ པཉྩཝིཉྙཱཎེསུ ཝིཡ ཨགཎནཱུཔགབྷཱཝོ, ཨེཝཾ སནྟེ པཊྛཱནེ ཀཐཾ ཏེསཾ ཛྷཱནཔཙྩཡཏཱཝཙནཾ. ‘‘ཨབྱཱཀཏོ དྷམྨོ ཨབྱཱཀཏསྶ ¶ དྷམྨསྶ ཛྷཱནཔཙྩཡེན པཙྩཡོ’’ཏི (པཊྛཱ. ༡.༡.༤༣༡), ‘‘ཝིཔཱཀཱབྱཱཀཏཱནི ཀིརིཡཱབྱཱཀཏཱནི ཛྷཱནངྒཱནི སམྤཡུཏྟཀཱནཾ ཁནྡྷཱནཾ ཙིཏྟསམུཊྛཱནཱནཉྩ རཱུཔཱནཾ ཛྷཱནཔཙྩཡེན པཙྩཡོ’’ཏི (པཊྛཱ. ༡.༡.༤༣༡) ཧི ཝུཏྟཾ. པཙྩནཱིཡེཔི ‘‘ཨབྱཱཀཏཾ དྷམྨཾ པཊིཙྩ ཨབྱཱཀཏོ དྷམྨོ ཨུཔྤཛྫཏི ན ཛྷཱནཔཙྩཡཱ, པཉྩཝིཉྙཱཎསཧིཏཾ ཨེཀཾ ཁནྡྷཾ པཊིཙྩ ཏཡོ ཁནྡྷཱ’’ཏིཨཱདིནཱ (པཊྛཱ. ༡.༡.༩༨) པཉྩཝིཉྙཱཎཱནི ཨེཝ ཨུདྡྷཊཱནི, ན མནོདྷཱཏུཨཱདཱིནཱིཏི ཨཱཧ ‘‘ཛྷཱནཔཙྩཡཀིཙྩམཏྟཏོ’’ཏིཨཱདི. ན ཧེཏྠ ཛྷཱནངྒཱནཾ བལཝདུབྦལབྷཱཝོ ཨདྷིཀཏོ, ཨཐ ཁོ ཛྷཱནཔཙྩཡབྷཱཝམཏྟནྟི ཨདྷིཔྤཱཡོ.

༤༦༩. སམཱནཝཏྠུཀཾ ཨནནྟརཔཙྩཡཾ ལབྷིཏྭཱཏི དསྶནཱདིཏོ མནོདྷཱཏུཡཱ ཙ བལཝབྷཱཝེ ཀཱརཎཝཙནཾ. ཡཐཱརམྨཎནྟི ཨཱརམྨཎཱནུརཱུཔཾ. ཡདི སམཱནནིསྶཡཏཱཡ མནོདྷཱཏུཏོ བལཝཏརཏྟཾ ཝིཔཱཀམནོཝིཉྙཱཎདྷཱཏུཡཱ སོམནསྶསཧགཏཱཡ, ཝོཊྛབྦནཾ ཀཐཾ མཛ྄ཛྷཏྟཝེདནནྟི ཨནུཡོགཾ མནསི ཀཏྭཱ ཏསྶ བལཝབྷཱཝཾ སམྤཊིཙྪིཏྭཱ སནྟཏིཔརིཎཱམནབྱཱཔཱརཝིསེསཱ ན སོམནསྶཝེདནནྟི པརིཧཱརཾ ཝདནྟོ ‘‘ཝོཊྛབྦན’’ནྟིཨཱདིམཱཧ. ཝིཔཱཀོ ཝིཡ ཨནུབྷཝནམེཝ ན ཧོཏཱིཏི སཏི སམཏྠཏཱཡ ཝིཔཱཀཱནཾ ཨེཀནྟེན ཨཱརམྨཎརསཱནུབྷཝནཏཱཡ ཝུཏྟཾ.

ཨཧེཏུཀཀུསལཝིཔཱཀཝཎྞནཱ ནིཊྛིཏཱ.

ཨཊྛམཧཱཝིཔཱཀཙིཏྟཝཎྞནཱ

༤༩༨. ཝིཔཱཀདྷམྨཱནཾ ཀམྨདྭཱརཾ ཝུཏྟཾ དྭཱརཀཐཱཡཾ ‘‘ཏེབྷཱུམཀཀུསལཱཀུསལོ ཨེཀཱུནཏིཾསཝིདྷོ མནོ’’ཏི (དྷ. ས. ཨཊྛ. མནོཀམྨདྭཱརཀཐཱ). པཡོགེནཱཏི ཨཏྟནཱ པརེཧི ཝཱ ཀཏེན ཨུསྶཱཧནཔཡོགེན. ཀུསལཱཀུསལཱནི ཝིཡ ཡེསཾ ཏཾ ཏདཱརམྨཎཾ ཨནུབནྡྷབྷཱུཏཾ. པཋམཔཉྩམཙིཏྟཱནཾ ཨཉྙམཉྙབལཝདུབྦལབྷཱཝཝིཙཱརེན དུཏིཡཚཊྛཱདཱིནམྤི སོ ཝིཙཱརིཏོ ཧོཏཱིཏི ‘‘ཨེཏེསུ བལཝཾ དུབྦལཉྩ ཝིཙཱརེཏུ’’ནྟི ཝུཏྟཾ. ཡཐཱ སཱལིཨཱདཱིནཾ ཐདྡྷམུདུབྷཱུམིཝསེན ཏིཎཱདཱིནཾ ¶ ཨནཱིཧརཎནཱིཧརཎཝསེན ཨུཏུཨཱདིཨཝསེསཔཙྩཡཱནཾ ཝིཔཏྟིསམྤཏྟིཝསེན ཙ ཕལཝིསེསཡོགོ, ཨེཝཾ ཀམྨསྶ སུགཏིདུགྒཏིཝསེན ཨཝིསུདྡྷཝིསུདྡྷཔཡོགཝསེན ཨུཔཔཏྟིཡཱ ཝིཔཏྟིསམྤཏྟིཝསེན ¶ ཙ ཝིསིཊྛཕལཏཱཡ པརིཎམནཾ, ཨེཝམེཝ གིམྷཝསྶཀཱལཱདཱིསུ བཱིཛཱནཾ ཕལཝིསེསཡོགོ ཝིཡ ཏཾཏཾཀཱལཝིསེསེན ཀམྨསྶ ཕལཝིསེསཡོགོ ཧོཏཱིཏི ཨཱཧ ‘‘ཀཱལཝསེན པརིཎམཏཱི’’ཏི. སུཀྐསོཎིཏཔཙྩཡཱནནྟི ཀམྨཝིསེསཔརིབྷཱཝིཏསནྟཱནུཔྤནྣཏཱཡ སུཀྐསོཎིཏཱནཾ ཨཱཡུཝིསེསཧེཏུབྷཱཝམཱཧ སུཀྐསོཎིཏཝསེནཔི ཝཎྞཱདིཝིསེསདསྶནཏོ, ཡེན ‘‘པིཏཱུནཾ ཨཱཀཱརཾ པུཏྟོ ཨནུཝིདཧཏཱི’’ཏི ཝུཙྩཏི. ཏཾམཱུལཀཱནནྟི ཨཔྤཱཡུཀསཾཝཏྟནིཡཀམྨམཱུལཀཱནཾ. ཨཱཧཱརཱདཱིཏི ཨཱདི-སདྡེན ཝིསམཱུཔཀྐམཱདཡོ པརིགྒཎྷཱཏི.

ཝིཔཱཀུདྡྷཱརཀཐཱཝཎྞནཱ

ཡཏོ ཏིཧེཏུཀཱདིཀམྨཏོ. ཡསྨིཉྩ ཋཱནེཏི པཊིསནྡྷིཨཱདིཊྛཱནེ, སུགཏིདུགྒཏིཡཾ ཝཱ. ཏིཧེཏུཀཏོ དུཧེཏུཀཾ ཨནིཙྪནྟོ པཊིསནྡྷིནྟི ཨདྷིཔྤཱཡོ. པཝཏྟིཝིཔཱཀཾ པན ཏིཧེཏུཀཏོ དུཧེཏུཀམྤི ཨིཙྪཏི ཨེཝ. ཏཐཱ ཧི ཝཀྑཏི ཨཊྛཀཐཱཡཾ ‘‘ཡཾ པུརིམཱཡ ཧེཏུཀིཏྟནལདྡྷིཡཱ ན ཡུཛྫཏཱི’’ཏི (དྷ. ས. ཨཊྛ. ༤༩༨).

ཡེ ‘‘ཏསྶེཝ ཀམྨསྶ ཝིཔཱཀཱཝསེསེནཱ’’ཏི, ‘‘ཨེཀཔུཔྥཾ ཡཛིཏྭཱན, ཨསཱིཏི ཀཔྤཀོཊིཡོ (ཐེརགཱ. ༩༦). དུགྒཏིཾ ནཱབྷིཛཱནཱམཱི’’ཏི (ཨཔ. ཐེར ༢.༤༦.༦༤) ཙ ཨེཝམཱདིཝཙནསྶ ཨདྷིཔྤཱཡཾ ཨཛཱནནྟཱ ‘‘ཀིཾ ནུ ཁོ ཨེཀེནཔི ཀམྨེན ཨནེཀཱ པཊིསནྡྷི ཧོཏཱི’’ཏི, ‘‘དིསྭཱ ཀུམཱརཾ སཏཔུཉྙལཀྑཎ’’ནྟིཨཱདིཝཙནསྶ (དཱི. ནི. ༣.༢༠༥) ཨཏྠཾ ཨསལླཀྑེཏྭཱ ‘‘ཀིནྣུ ཁོ ནཱནཱཀམྨེཧི ཨེཀཱ པཊིསནྡྷི ཧོཏཱི’’ཏི སཾསཡཔཀྑནྡཱ, ཏེསཾ བཱིཛངྐུརོཔམཱཡ ‘‘ཨེཀསྨཱ ཨེཀཱ, ཨནེཀསྨཱ ཙ ཨནེཀཱ པཊིསནྡྷི ཧོཏཱི’’ཏི ཝིནིཙྪིཏཏྟཱ ཀམྨཔཊིསནྡྷིཝཝཏྠཱནཏོ སཱཀེཏཔཉྷེ ཝིཔཱཀུདྡྷཱརཀཐཱཡ ཨུསྶདཀིཏྟནགཧཎསྶ སམྦནྡྷཾ ཨཱཧ ‘‘ཀམྨཝསེན…པེ… དསྶེཏུ’’ནྟི. པཊིསནྡྷིཛནཀཀམྨཝསེན པཊིསནྡྷིཝིཔཱཀོ ཨེཝ ཨལོབྷལོབྷཱདིགུཎདོསཱཏིརེཀབྷཱཝཧེཏཱུཏི ཨཏྠོ དཊྛབྦོ. ཏཐཱ ཧི ཝུཏྟཾ ‘‘སོ ཏེན ཀམྨེན དིནྣཔཊིསནྡྷིཝསེན ནིབྦཏྟོ ལུདྡྷོ ཧོཏཱི’’ཏིཨཱདི. ཨེཏྠ ཙ ལོབྷཝསེན, དོས, མོཧ ¶ , ལོབྷདོས, ལོབྷམོཧ, དོསམོཧ, ལོབྷདོསམོཧཝསེནཱཏི ཏཡོ ཨེཀཀཱ, ཏཡོ དྭིཀཱ, ཨེཀོ ཏིཀོཏི ལོབྷཱདིདསྶནཝསེན ཨཀུསལཔཀྑེཡེཝ སཏྟ ཝཱརཱ. ཏཐཱ ཀུསལཔཀྑེ ཨལོབྷཱདིདསྶནཝསེནཱཏི ཙུདྡས ཝཱརཱ ལབྦྷནྟི.

ཏཏྠ ¶ ‘‘ཨལོབྷདོསཱམོཧཱ, ཨལོབྷཱདོསམོཧཱ, ཨལོབྷདོསཱམོཧཱ བལཝནྟོ’’ཏི ཨཱགཏེཧི ཀུསལཔཀྑེ ཏཏིཡདུཏིཡཔཋམཝཱརེཧི དོསུསྶདམོཧུསྶདདོསམོཧུསྶདཝཱརཱ གཧིཏཱ. ཏཐཱ ཨཀུསལཔཀྑེ ‘‘ལོབྷཱདོསམོཧཱ, ལོབྷདོསཱམོཧཱ, ལོབྷཱདོསཱམོཧཱ བལཝནྟོ’’ཏི ཨཱགཏེཧི ཏཏིཡདུཏིཡཔཋམཝཱརེཧི ཨདོསུསྶདཨམོཧུསྶདཨདོསཱམོཧུསྶདཝཱརཱ གཧིཏཱཡེཝཱཏི ཨཀུསལཀུསལཔཀྑེ ཏཡོ ཏཡོ ཝཱརེ ཨནྟོགདྷེ ཀཏྭཱ ཨཊྛེཝ ཝཱརཱ དསྶིཏཱ. ཡེ པན ཨུབྷཡེསཾ ཝོམིསྶཏཱཝསེནེཝ ལོབྷཱལོབྷུསྶདཝཱརཱདཡོ ཨཔརེ ཨེཀཱུནཔཉྙཱས ཝཱརཱ དསྶེཏབྦཱ, ཏེ ཨསམྦྷཝཏོ ཨེཝ ན དསྶིཏཱ. ན ཧི ཨེཀསྨིཾ སནྟཱནེ ཨནྟརེན ཨཝཏྠནྟརཾ ལོབྷོ བལཝཱ ཨལོབྷོ ཙཱཏི ཡུཛྫཏི. པཊིཔཀྑཏོཡེཝ ཧི ཨེཏེསཾ བལཝདུབྦལབྷཱཝོ, སཧཛཱཏདྷམྨཏོ ཝཱ. ཏེསུ ལོབྷསྶ ཏཱཝ པཊིཔཀྑཏོ ཨལོབྷེན ཨནབྷིབྷཱུཏཏཱཡ བལཝབྷཱཝོ, ཏཐཱ དོསམོཧཱནཾ ཨདོསཱམོཧེཧི. ཨལོབྷཱདཱིནཾ པན ལོབྷཱདིཨབྷིབྷཝནཏོ སབྦེསཉྩ སམཱནཛཱཏིཡཾ སམབྷིབྷཱུཡ པཝཏྟིཝསེནེཝ སཧཛཱཏདྷམྨཏོ བལཝབྷཱཝོ. ཏེན ཝུཏྟཾ ཨཊྛཀཐཱཡཾ ‘‘ལོབྷོ བལཝཱ, ཨལོབྷོ མནྡོ, ཨདོསཱམོཧཱ བལཝནྟོ, དོསམོཧཱ མནྡཱ’’ཏི. སོ ཙ ཏེསཾ མནྡབལཝབྷཱཝོ པུརིམཱུཔནིསྶཡཏོ ཨཱསཡསྶ པརིབྷཱཝིཏཏཱཡ ཝེདིཏབྦོ. ཨེཏྠ ཙ པཋམདུཏིཡེཧི, སཏྟམཔཋམེཧི ཝཱ ཝཱརེཧི ཏིཧེཏུཀཀམྨཏོ པཊིསནྡྷིཔཝཏྟིཝསེན ཏིཧེཏུཀཝིཔཱཀོ, ཨིཏརེཧི ཏིཧེཏུཀདུཧེཏུཀཀམྨཏོ ཡཐཱསམྦྷཝཾ པཊིསནྡྷིཔཝཏྟིཝསེན དུཧེཏུཀཱཧེཏུཀཝིཔཱཀཱ དསྶིཏཱཏི ཨཡམྤི ཝིསེསོ ཝེདིཏབྦོ.

ཨིདྷཱཏི ཝིཔཱཀུདྡྷཱརམཱཏིཀཱཡཾ. ཏེན ཧེཏུཀིཏྟནཾ ཝིསེསེཏི. ཛཙྩནྡྷཱདིཝིཔཏྟིནིམིཏྟཾ མོཧོ, སབྦཱཀུསལཾ ཝཱ. ཡཾ པན ཝུཏྟནྟི སམྦནྡྷོ. ཏེན པཊིསམྦྷིདཱམགྒཝཙནེན. གཏིསམྤཏྟིཡཱ སཏི ཉཱཎསམྤཡུཏྟེ པཊིསནྡྷིམྷི ¶ ནིཔྥཱདེཏབྦེ. ཨཉྙཏྠཱཏི ནིཀནྟིཔཊིསནྡྷིཀྑཎེསུ. ཀམྨསརིཀྑཀོཏི ཨིདྷ སཱཏིསཡོ སརིཀྑབྷཱཝོ ཨདྷིཔྤེཏོཏི དཊྛབྦོ. ཨིཏརཐཱ ཏིཧེཏུཀདུཧེཏུཀཱཔི ཨཉྙམཉྙཾ སརིཀྑཱཡེཝཱཏི དསྶིཏམེཏནྟི. ཙཀྑུཝིཉྙཱཎཱདཱིནཱིཏི ཨེཏྠ པཉྩཝིཉྙཱཎཱནི ཝིཡ ཨཔུབྦནིསྶཡཔཝཏྟིནཱི ཝིཛཱནནཝིསེསརཧིཏཱ ཙ མནོདྷཱཏུ ཨིཊྛཱདིབྷཱགགྒཧཎེ ན སམཏྠཱཏི ‘‘པཱཀཊཱཡེཝཱ’’ཏི ན ཝུཏྟཱ, ཨཱདི-སདྡེན ཝཱ སངྒཧིཏཱ. ཏདཱརམྨཎཔཙྩཡསབྦཛཝནཝཏཱཏི ཏདཱརམྨཎསྶ པཙྩཡབྷཱུཏསཀལཛཝནཔྤཝཏྟིསཧིཏེན. ཡཾ སནྡྷཱཡ ‘‘ཨིདྷ པརིཔཀྐཏྟཱ ཨཱཡཏནཱན’’ནྟི ཝུཏྟཾ. ཨཉྙཀཱལེཏི ཨབུདྡྷིཔཝཏྟིཀཱལེ.

ཨནུལོམེཏི དྷམྨཱནུལོམེ. ཨཱསེཝནཔཙྩཡཱཏི ཨཱསེཝནབྷཱུཏཱ པཙྩཡཱ. ན མགྒེ ཨམགྒཔཙྩཡེ ¶ . སོཔི མོགྷཝཱརོ ལབྦྷེཡྻཱཏི ཡདི ཝོཊྛབྦནམྤི ཨཱསེཝནཔཙྩཡོ སིཡཱ, ཡཐཱ ‘‘སུཁཱཡ ཝེདནཱཡ སམྤཡུཏྟཾ དྷམྨཾ པཊིཙྩ སུཁཱཡ ཝེདནཱཡ སམྤཡུཏྟོ དྷམྨོ ཨུཔྤཛྫཏི ཨཱསེཝནཔཙྩཡཱ ན (པཊྛཱ. ༡.༢.༣) མགྒཔཙྩཡཱ’’ཏི (པཊྛཱ. ༡.༢.༡༤) ཨནུལོམཔཙྩནཱིཡེ, པཙྩནཱིཡཱནུལོམེ ཙ ‘‘སུཁཱ…པེ… ན མགྒཔཙྩཡཱ ཨཱསེཝནཔཙྩཡཱ’’ཏི ཙ ཝུཏྟཾ ཧསིཏུཔྤཱདཙིཏྟཝསེན, ཨེཝཾ ཝོཊྛབྦནཝསེན ‘‘ཨདུཀྑམསུཁཱཡ ཝེདནཱཡ སམྤཡུཏྟཾ དྷམྨཾ པཊིཙྩཱ’’ཏིཨཱདིནཱ པུབྦེ ཝུཏྟནཡེན པཱཋོ སིཡཱ, ཏཐཱ ཙ སཏི ཝཱརདྭཡཝསེན གཎནཱཡཾ ‘‘ཨཱསེཝནཔཙྩཡཱ ན མགྒེ དྭེ. ན མགྒཔཙྩཡཱ ཨཱསེཝནེ དྭེ’’ཏི ཙ ཝཏྟབྦཾ སིཡཱ, ན པན ཝུཏྟཾ, ཏསྨཱ ན ལབྦྷེཡྻཱཡཾ མོགྷཝཱརོཏི ཨདྷིཔྤཱཡོ.

ཝོཊྛབྦནམྤི ཡདི ཨཱསེཝནཔཙྩཡོ སིཡཱ, དུཏིཡམོགྷཝཱརེ ཨཏྟནོ ཝིཡ ཏཏིཡཙཏུཏྠཝཱརེསུཔི སིཡཱ, ཏཐཱ སཏི ཨཏྟནཱཔི ཀུསལཱཀུསལཱནཾ སིཡཱ. ན ཧི…པེ… ཨཝུཏྟོ ཨཏྠི ‘‘པུརིམཱ པུརིམཱ ཀུསལཱ དྷམྨཱ’’ཏིཨཱདིནཱ ཨནཝསེསཏོ ཝུཏྟཏྟཱ. ཝོཊྛབྦནསྶ…པེ… ཨཝུཏྟོ ‘‘ཨབྱཱཀཏོ དྷམྨོ ཀུསལསྶ དྷམྨསྶ ཨཱསེཝནཔཙྩཡེན པཙྩཡོ. ཨཀུསལསྶ…པེ… པཙྩཡོ’’ཏི ཝཙནཱབྷཱཝཏོ. ན ཀེཝལཾ ཨཝུཏྟོ, ཨཐ ཁོ ཀུསལཾ…པེ… པཊིཀྑིཏྟོཝ. ཨཐཱཔི སིཡཱཏིཨཱདི མགྒསོདྷནཏྠམེཝ ཝུཙྩཏི. སམཱནཝེདནཱནཾ ཨེཝ ཨཱསེཝནཔཙྩཡབྷཱཝསྶ དསྶནཏོ ‘‘ཨསམཱནཝེདནཱནཾ ཝསེནཱ’’ཏི ཝུཏྟཾ. ཨེཝཾ ‘‘ཨཱསེཝན པཙྩཡེན ¶ པཙྩཡོ’’ཏིཔི ཝཏྟབྦཾ སིཡཱ, སམཱནཝེདནཱཝསེནཱཏི ཨདྷིཔྤཱཡོ. ཨབྷིནྣཛཱཏིཀསྶ ཙཱཏི ཙ-སདྡོ ཨབྷིནྣཝེདནསྶ ཙཱཏི སམྤིཎྜནཏྠོ. ཝེདནཱཏྟིཀེཔི ཝོཊྛབྦནསྶ ཨཱསེཝནཔཙྩཡཏྟསྶ ཨབྷཱཝཱཏི ཡོཛནཱ. ཀུསལཏྟིཀཱདཱིསུ ཡཐཱདསྶིཏཔཱལི༹པྤདེསེསུཔཱིཏི སམྤིཎྜནཏྠོ པི-སདྡོ. གཎནཱཡ ཀཱརཎབྷཱུཏཱཡ གཎནཱཡ ནིདྡྷཱརིཡམཱནཱཡ སཏི གཎནཱཡ ཝཱ ཨབྦྷནྟརེ. དུཏིཡོ མོགྷཝཱརོ ཝཱིམཾསིཏབྦོཏི ཨཱསེཝནཔཙྩཡཏྟཱབྷཱཝཱ ཛཝནཊྛཱནེ ཋཱཏུཾ ན ཡུཛྫཏི. ན ཧི ཝིནཱ ཨཱསེཝནཾ ཛཝནཔྤཝཏྟི ཨཏྠཱིཏི ཨདྷིཔྤཱཡོ.

ཨཔིཙེཏྠ ‘‘ཡཾ ཛཝནབྷཱཝཔྤཏྟཾ, ཏཾ ཚིནྣམཱུལཀརུཀྑཔུཔྥཾ ཝིཡཱ’’ཏི (དྷ. ས. ཨཊྛ. ༥༦༦) ཝཀྑམཱནཏྟཱ ཨནུཔཙྪིནྣབྷཝམཱུལཱནཾ པཝཏྟམཱནསྶ ཝོཊྛབྦནསྶ ཀིརིཡབྷཱཝོ ན སིཡཱ, ཝུཏྟོ ཙ ‘‘ཡསྨིཾ སམཡེ མནོཝིཉྙཱཎདྷཱཏུ ཨུཔྤནྣཱ ཧོཏི ཀིརིཡཱ ནེཝ ཀུསལཱ ནཱཀུསལཱ ན ཙ ཀམྨཝིཔཱཀཱ ཨུཔེཀྑཱསཧགཏཱ’’ཏི, ཏསྨཱ ‘‘ཛཝནཊྛཱནེ ཋཏྭཱཏི ཛཝནསྶ ཨུཔྤཛྫནཊྛཱནེ ¶ དྭིཀྑཏྟུཾ པཝཏྟིཏྭཱ, ན ཛཝནབྷཱཝེནཱ’’ཏི, ‘‘ཨཱསེཝནཾ ལབྷིཏྭཱཏི ཙ ཨཱསེཝནཾ ཝིཡ ཨཱསེཝན’’ནྟི ཝུཙྩམཱནེ ན ཀོཙི ཝིརོདྷོ, ཝིཔྥཱརིཀསྶ པན སཏོ དྭིཀྑཏྟུཾ པཝཏྟིཡེཝེཏྠ ཨཱསེཝནསདིསཏཱ. ཝིཔྥཱརིཀཏཱཡ ཧི ཝིཉྙཏྟིསམུཊྛཱཔཀཏྟཉྩསྶ ཝུཙྩཏི. ཝིཔྥཱརིཀམྤི ཛཝནཾ ཝིཡ ཨནེཀཀྑཏྟུཾ ཨཔྤཝཏྟིཡཱ དུབྦལཏྟཱ ན ནིཔྤརིཡཱཡཏོ ཨཱསེཝནཔཙྩཡབྷཱཝེན པཝཏྟེཡྻཱཏི ན ཨིམསྶ པཱཋེ ཨཱསེཝནཏྠཾ ཝུཏྟཾ, ཨཊྛཀཐཱཡཾ པན པརིཡཱཡཏོ ཝུཏྟཾ ཡཐཱ ‘‘ཕལཙིཏྟེསུ མགྒངྒཾ མགྒཔརིཡཱཔནྣ’’ནྟི. ཨཡམེཏྠ ཨཏྟནོམཏི. ཨཡམྤི པོརཱཎཀེཧི ཨསཾཝཎྞིཏཏྟཱ སཱདྷུཀཾ ཨུཔཔརིཀྑིཏབྦོ.

ཨེཝཉྩ ཀཏྭཱཏི ཝོཊྛབྦནཱཝཛྫནཱནཾ ཨནཏྠནྟརབྷཱཝཏོ ‘‘ཨཱཝཛྫནཱ’’ཨིཙྩེཝ ཝུཏྟཾ, ཝོཊྛབྦནཊྛཱནེཔཱིཏི ཨདྷིཔྤཱཡོ. ཏསྨཱཏི ཡསྨཱ ཝོཊྛབྦནཾ ཨཱཝཛྫནཱཡེཝ ཨཏྠཏོ ཨུཔེཀྑཱསཧགཏཱཧེཏུཀཀིརིཡམནོཝིཉྙཱཎདྷཱཏུབྷཱཝཏོ, ཏསྨཱ. ཏཾ ཨཱཝཛྫནཱ ཝིཡ སཏི ཨུཔྤཏྟིཡཾ ཀཱམཱཝཙརཀུསལཱཀུསལཀིརིཡཛཝནཱནཾ ཨེཀནྟཏོ ཨནནྟརཔཙྩཡབྷཱཝེནེཝ ཝཏྟེཡྻ, ནོ ཨཉྙཐཱཏི ཨདྷིཔྤཱཡེན ‘‘ཝོཊྛབྦནཏོ’’ཏིཨཱདིམཱཧ. ཙཏུནྣནྟི མུཉྪཱམརཎཱསནྣཝེལཱདཱིསུ མནྡཱིབྷཱུཏཝེགཏཱཡ ཙཏྟཱརིཔི ཛཝནཱནི ཨུཔྤཛྫེཡྻུནྟི ཨདྷིཔྤཱཡེན ཝུཏྟཾ. ཨཡམེཏསྶ སབྷཱཝོཏི ¶ ཨཱརམྨཎམུཁེནཔི ཙིཏྟནིཡཱམཾཡེཝ དསྶེཏི. ཡདིཔི ‘‘ཛཝནཱཔཱརིཔཱུརིཡཱ…པེ… ཡུཏྟོ’’ཏི ཝུཏྟཾ, ‘‘ཨཱཝཛྫནཱདཱིནཾ པཙྩཡོ བྷཝིཏུཾ ན སཀྐོཏཱི’’ཏི པན ཝུཏྟཏྟཱ ཙིཏྟཔྤཝཏྟིཝསེན པཋམམོགྷཝཱརཏོ ཨེཏསྶ ན ཀོཙི ཝིསེསོ. ཏེནེཝཱཧ ‘‘ཨཡམྤི…པེ… རེཏབྦོ’’ཏི. པཊིསནྡྷིཙིཏྟེཡེཝ པཝཏྟིཡཾ ‘‘བྷཝངྒ’’ནྟི ཝུཙྩམཱནེ ན ཏསྶ ཧེཏུཝསེན བྷེདོཏི ‘‘སཧེཏུཀཾ བྷཝངྒཾ ཨཧེཏུཀསྶ བྷཝངྒསྶ ཨནནྟརཔཙྩཡེན པཙྩཡོ’’ཏི (པཊྛཱ. ༣.༡.༡༠༢) ན སཀྐཱ ཝཏྟུཾ, ཝུཏྟཉྩ, ཏསྨཱ སཧེཏུཀཾ བྷཝངྒནྟི ཏདཱརམྨཎཾ ཝུཏྟནྟི ཝིཉྙཱཡཏི.

སབྷཱཝཀིཙྩེཧི ཨཏྟནོ ཕལསྶ པཙྩཡབྷཱཝོ, སབྷཱཝཀིཙྩཱནཾ ཝཱ ཕལབྷཱུཏཱནཾ པཙྩཡབྷཱཝོ སབྷཱཝཀིཙྩཔཙྩཡབྷཱཝོ. ཨཔྤཊིསིདྡྷཾ དཊྛབྦནྟི ‘‘དུཧེཏུཀསོམནསྶསཧགཏཨསངྑཱརིཀཛཝནཱཝསཱནེ ཨེཝཱ’’ཏི ཨིམསྶ ཨཏྠསྶ ཨནདྷིཔྤེཏཏྟཱ. ཡཐཱ ཙ ཨཧེཏུཀདུཧེཏུཀཔཊིསནྡྷིཀཱནཾ ཏིཧེཏུཀཛཝནཱཝསཱནེ ཨཧེཏུཀདུཧེཏུཀཏདཱརམྨཎཾ ཨཔྤཊིསིདྡྷཾ, ཨེཝཾ ཏིཧེཏུཀཔཊིསནྡྷིཀསྶ ཏིཧེཏུཀཛཝནཱནནྟརཾ དུཧེཏུཀཏདཱརམྨཎཾ, དུཧེཏུཀཔཊིསནྡྷིཀསྶ ཙ དུཧེཏུཀཱནནྟརཾ ཨཧེཏུཀཏདཱརམྨཎཾ ཨཔྤཊིསིདྡྷཾ དཊྛབྦཾ. ‘‘ཏིཧེཏུཀཀམྨཾ ཏིཧེཏུཀམྤི དུཧེཏུཀམྤི ཨཧེཏུཀམྤི ཝིཔཱཀཾ དེཏཱི’’ཏི (དྷ. ས. ཨཊྛ. ༤༩༨) ཧི ཝུཏྟཾ. པརིཔུཎྞཝིཔཱཀསྶཱཏི ¶ ཨིམིནཱཔི ཏིཧེཏུཀཛཝནཏོ ཡཐཱཝུཏྟཏདཱརམྨཎསྶ ཨཔྤཊིསིདྡྷཾཡེཝ སཱདྷེཏི. ན ཧི པཙྩཡནྟརསཱམགྒིཡཱ ཨསཏི ཏདཱརམྨཎཾ སབྦཾ ཨཝིཔཙྩནྟཾ ཀམྨཾ པརིཔུཎྞཝིཔཱཀཾ ཧོཏཱིཏི. མུཁནིདསྶནམཏྟམེཝ ཡཐཱཝུཏྟཏདཱརམྨཎཔྤཝཏྟིཡཱ ཨཝིབྷཱཝིཏཏྟཱ. ཏིཧེཏུཀཱདིཀམྨསྶ ཧི ཨུཀྐཊྛསྶ ཏིཧེཏུཀཀམྨསྶ སོལ༹ས, ཨིཏརསྶ དྭཱདས, ཨུཀྐཊྛསྶེཝ དུཧེཏུཀཀམྨསྶ དྭཱདས, ཨིཏརསྶ ཨཊྛཱཏི ཨེཝཾ སོལ༹སཝིཔཱཀཙིཏྟཱདཱིནི ཡོཛེཏབྦཱནི. ཏསྨཱཏི ཡསྨཱ པརིཔུཎྞཝིཔཱཀསྶ པཊིསནྡྷིཛནཀཀམྨསྶ ཝསེན ཝིཔཱཀཝིབྷཱཝནཱཡ མུཁནིདསྶནམཏྟམེཝེཏཾ, ཏསྨཱ.

ཨེཝཉྩ ཀཏྭཱཏི ནཱནཱཀམྨཏོ ཏདཱརམྨཎུཔྤཏྟིཡཾ ཨིཏོ ཨཉྙཐཱཔི སམྦྷཝཏོཏི ཨཏྠོ. ‘‘ཨུཔེཀྑཱ…པེ… ཨུཔྤཛྫཏཱི’’ཏི ཨེཏྠ ཀེན ཀིཙྩེན ཨུཔྤཛྫཏཱིཏི? ཏདཱརམྨཎཀིཙྩཾ ཏཱཝ ན ཧོཏི ཛཝནཱརམྨཎསྶ ཨནཱལམྦཎཏོ, ནཱཔི སནྟཱིརཎཀིཙྩཾ ཏཐཱ ཨཔྤཝཏྟནཏོ, པཊིསནྡྷིཙུཏཱིསུ ཝཏྟབྦམེཝ ¶ ནཏྠི, པཱརིསེསཏོ བྷཝངྒཀིཙྩནྟི ཡུཏྟཾ སིཡཱ. ན ཧི པཊིསནྡྷིབྷཱུཏཾཡེཝ ཙིཏྟཾ ‘‘བྷཝངྒ’’ནྟི ཝུཙྩཏཱིཏི.

ཏནྣིནྣནྟི ཨཱཔཱཐགཏཝིསཡནིནྣཾ ཨཱཝཛྫནནྟི སམྦནྡྷོ. ཨཉྙསྶ ཝིཡ པཋམཛ྄ཛྷཱནཱདིཀསྶ ཝིཡ. ཨེཏསྶཔི སཱཝཛྫནཏཱཡ བྷཝིཏབྦནྟི ཨདྷིཔྤཱཡོ. ཨཏདཏྠཱཏི ཨེཏྠ ཏཾ-སདྡེན ནིརོདྷཾ པཙྩཱམསཏི. ཨུཔྤཏྟིཡཱཏི ཨུཔྤཏྟིཏོ. ཏནྟི ནེཝསཉྙཱནཱསཉྙཱཡཏནཾ. ཏསྶ ནིརོདྷསྶ. ཏཐཱ ཙ ཨུཔྤཛྫཏཱིཏི ‘‘ཨནནྟརཔཙྩཡོ ཧོཏཱི’’ཏི པདསྶ ཨཏྠཾ ཝིཝརཏི. ཡཐཱཝུཏྟཱ ཝུཏྟཔྤཀཱརཱ. ཝོདཱནཾ དུཏིཡམགྒཱདཱིནཾ པུརེཙཱརིཀཉཱཎཾ. ཨེཏེསནྟི ཨརིཡམགྒཙིཏྟམགྒཱནནྟརཕལཙིཏྟཱནཾ. ཨེཏསྶཱཏི ཡཐཱཝུཏྟཝིཔཱཀཙིཏྟསྶ.

ཨུཔནིསྶཡཏོ ཏསྶེཝ ཙཀྑུཝིཉྙཱཎཱདིཝིཔཱཀསྶ དསྶནཏྠཾ ཙཀྑཱདཱིནཾ དསྶནཱདིཨཏྠཏོ དསྶནཱདིཕལཏོ, དསྶནཱདིཔྤཡོཛནཏོ ཝཱ. པུརིམཙིཏྟཱནི ཨཱཝཛྫནཱདཱིནི. ཝཏྠནྟརརཧིཏཏྟེ དསྶེཏབྦེ ཝཏྠནྟརེ ཝིཡ ཨཱརམྨཎནྟརེཔི ན ཝཏྟཏཱིཏི ‘‘ཝཏྠཱརམྨཎནྟརརཧིཏ’’ནྟི ཝུཏྟཾ.

ཡདི ཝིཔཱཀེན ཀམྨསརིཀྑེནེཝ བྷཝིཏབྦཾ, ཨེཝཾ སཏི ཨིམསྨིཾ ཝཱརེ ཨཧེཏུཀཝིཔཱཀཱནཾ ཨསམྦྷཝོ ཨེཝ སིཡཱ ཏེསཾ ཨཀམྨསརིཀྑཀཏྟཱཏི ཨིམམཏྠཾ མནསི ཀཏྭཱ ཨཱཧ ‘‘ཨཧེཏུཀཱནཾ པནཱ’’ཏི. ཨབྷིནིཔཱཏམཏྟནྟི པཉྩནྣཾ ཝིཉྙཱཎཱནཾ ཀིཙྩམཱཧ. ཏེ ཧི ཨཱཔཱཐགཏེསུ རཱུཔཱདཱིསུ ཨབྷིནིཔཱཏནམཏྟེནེཝ ¶ ཝཏྟནྟི. ཨཱདི-སདྡེན སམྤཊིཙྪནཱདཱིནི སངྒཎྷཱཏི. ཀུསལེསུ ཀུསལཱཀུསལཀིརིཡེསུཔི ཝཱ ཝིཛྫམཱནཱ སསངྑཱརིཀཱསངྑཱརིཀཏཱ ཨཉྙམཉྙཾ ཨསརིཀྑཏྟཱ པཧཱནཱཝཊྛཱནཏོ ཙ ཝིརུདྡྷཱ ཝིཡཱཏི ཝིཔཱཀེསུ སཱ ཏདནུཀཱུལཱ སིཡཱ, སཱ པན མཱུལཱབྷཱཝེན ན སུཔྤཏིཊྛིཏཱནཾ སཝིསཡཱབྷིནིཔཏནམཏྟཱདིཝུཏྟཱིནཾ ནཏྠཱིཏི ཝུཏྟཾ ‘‘ན སསངྑཱརིཀཝིརུདྡྷོ’’ཏིཨཱདི. ཨུབྷཡེནཔི ཏེསཾ ནིབྦཏྟིཾ ཨནུཛཱནཱཏི ཡཐཱ ‘‘ཀཊཏྟཱརཱུཔཱན’’ནྟི ཨདྷིཔྤཱཡོ. ‘‘ཝིཔཱཀདྷམྨདྷམྨོ ཝིཔཱཀསྶ དྷམྨསྶ ཨཱརམྨཎཔཙྩཡེན པཙྩཡོ. ཝིཔཱཀདྷམྨདྷམྨེ ཁནྡྷེ ཨནིཙྩཏོ དུཀྑཏོ ཨནཏྟཏོ ཝིཔསྶཏི, ཨསྶཱདེཏི ཨབྷིནནྡཏི, ཏཾ ཨཱརབྦྷ རཱགོ ཨུཔྤཛྫཏི, དོམནསྶཾ ཨུཔྤཛྫཏི, ཀུསལཱཀུསལེ ནིརུདྡྷེ’’ཏིཨཱདིནཱ (པཊྛཱ. ༡.༣.༩༣) ཝིཔཱཀཏྟིཀེ ཝིཡ སིཡཱ ཀུསལཏྟིཀེཔི པཱལཱི༹ཏི ཀཏྭཱ ‘‘ཀུསལཏྟིཀེ ཙཱ’’ཏིཨཱདི ཝུཏྟཾ. ཏཏྠ ཧི ‘‘ཀུསལོ དྷམྨོ ཨབྱཱཀཏསྶ དྷམྨསྶ ཨཱརམྨཎཔཙྩཡེན པཙྩཡོ’’ཏི ཨུདྡིསིཏྭཱ ‘‘སེཀྑཱ ཝཱ པུཐུཛྫནཱ ཝཱ ཀུསལཾ ཨནིཙྩཏོ ¶ དུཀྑཏོ ཨནཏྟཏོ ཝིཔསྶནྟི, ཀུསལེ ནིརུདྡྷེ ཝིཔཱཀོ ཏདཱརམྨཎཏཱ ཨུཔྤཛྫཏི, ཀུསལཾ ཨསྶཱདེཏི ཨབྷིནནྡཏི, ཏཾ ཨཱརབྦྷ རཱགོ ཨུཔྤཛྫཏི, དིཊྛི, ཝིཙིཀིཙྪཱ, ཨུདྡྷཙྩཾ, དོམནསྶཾ ཨུཔྤཛྫཏི, ཨཀུསལེ ནིརུདྡྷེ ཝིཔཱཀོ ཏདཱརམྨཎཏཱ ཨུཔྤཛྫཏཱི’’ཏི ཝུཏྟཾ. ཨཝིཛྫམཱནཏྟཱ ཨེཝ ཨཝཙནནྟི ཨདྷིཔྤཱཡེན ཏཏྠ ཡུཏྟིཾ དསྶེཏི ‘‘ཝིཔྥཱརིཀཉྷཱི’’ཏིཨཱདིནཱ.

ཨེཏྠ ཀེཙི ‘‘ཚལ༹ངྒུཔེཀྑཱཝཏོཔི ཀིརིཡམཡཙིཏྟཏཱཡ ཀིརིཡཛཝནསྶ ཝིཔྥཱརིཀཀིརིཡབྷཱཝོ ན སཀྐཱ ནིསེདྷེཏུནྟི ནིདསྶནབྷཱཝེན པཎྞཔུཊམུཔནཱིཏཾ ཨསམཱནཾ. ཀིརིཡཛཝནཱནནྟརཾ ཏདཱརམྨཎཱབྷཱཝསྶ པཱལི༹ཡཾ ཨཝཙནམྤི ཨཀཱརཎཾ ལབྦྷམཱནསྶཔི ཀཏྠཙི ཀེནཙི ཨདྷིཔྤཱཡེན ཨཝཙནཏོ. ཏཐཱ ཧི དྷམྨསངྒཧེ ཨཀུསལནིདྡེསེ ལབྦྷམཱནོཔི ཨདྷིཔཏི ན ཝུཏྟོ, ཏསྨཱ ཀིརིཡཛཝནཱནནྟརཾ ཏདཱརམྨཎཱབྷཱཝོ ཝཱིམཾསིཏབྦོ’’ཏི ཝདནྟི. སཏིཔི ཀིརིཡམཡཏྟེ སབྦཏྠ ཏཱདིབྷཱཝཔྤཏྟཱནཾ ཁཱིཎཱསཝཱནཾ ཛཝནཙིཏྟཾ ན ཨིཏརེསཾ ཝིཡ ཝིཔྥཱརིཀཾ, སནྟསབྷཱཝཏཱཡ པན སནྣིསིནྣརསཾ སིཡཱཏི ཏསྶ པཎྞཔུཊཾ དསྶིཏཾ. དྷམྨསངྒཧེ ཨཀུསལནིདྡེསེ ཨདྷིཔཏིནོ ཝིཡ པཊྛཱནེ ཀིརིཡཛཝནཱནནྟརཾ ཏདཱརམྨཎསྶ ལབྦྷམཱནསྶ ཨཝཙནེ ན ཀིཉྩི ཀཱརཎཾ དིསྶཏི. ཏཐཱ ཧི ཝུཏྟཾ ཏཏྠ ཨཊྛཀཐཱཡཾ ‘‘ཧེཊྛཱ དསྶིཏནཡཏྟཱ’’ཏི (དྷ. ས. ཨཊྛ. ༤༢༩). ན ཙེཏྠ དསྶིཏནཡཏྟཱཏི སཀྐཱ ཝཏྟུཾ ཝིཔཱཀདྷམྨདྷམྨེཧི ཀུསལཱཀུསལེཧི ཨཏཾསབྷཱཝཱནཾ ནཡདསྶནསྶ ཨཡུཛྫམཱནཀཏྟཱ. ཨཔིཙ ཏཏྠ ཝཱིམཾསཱཡ ཀེསུཙི སབྦེསཉྩ ཨདྷིཔཏཱིནཾ ཨབྷཱཝཏོ ཨེཀརསཾ དེསནཾ ¶ དསྶེཏུཾ ‘‘ཨུདྡྷཊོ’’ཏི ཙ སཀྐཱ ཝཏྟུཾ, ཨིདྷ པན ན ཏཱདིསཾ ཨཝཙནེ ཀཱརཎཾ ལབྦྷཏཱིཏི ‘‘ཨཝཙནེ ཀཱརཎཾ ནཏྠཱི’’ཏི ཝུཏྟཾ.

ཨདྷིཔྤཱཡེནཱཏི ཨཀུསལཱནནྟརཾ སཧེཏུཀཏདཱརམྨཎཾ ནཏྠཱིཏི ཏསྶ ཐེརསྶ མཏིམཏྟནྟི དསྶེཏི. ‘‘ཀུསལཱཀུསལེ ནིརུདྡྷེ སཧེཏུཀོ ཝིཔཱཀོ ཏདཱརམྨཎཏཱ ཨུཔྤཛྫཏཱི’’ཏི (པཊྛཱ. ༣.༡.༩༨) ཝཙནཏོ པན ཨཀུསལཱནནྟརཾ སཧེཏུཀཏདཱརམྨཎམྤི ཝིཛྫཏིཡེཝཱཏི ཨུཔྤཏྟིཾ ཝདནྟསྶ ཡུཏྟགྒཧཎཝསེནཱཏི ཨདྷིཔྤཱཡོ.

ན ཨེཏྠ ཀཱརཎཾ དིསྶཏཱིཏི ཨེཏེན ཏིཧེཏུཀཛཝནཱནནྟརཾ ཏིཝིདྷམྤི ཏདཱརམྨཎཾ ཡུཏྟནྟི དསྶེཏི. ཡེན ཨདྷིཔྤཱཡེནཱཏི པཋམཐེརེན ཏཱཝ ཨེཀེན ¶ ཀམྨུནཱ ཨནེཀཏདཱརམྨཎཾ ནིབྦཏྟམཱནཾ ཀམྨཝིསེསཱབྷཱཝཱ ཏཾཏཾཛཝནསངྑཱཏཔཙྩཡཝིསེསེན ཝིསིཊྛཾ ཧོཏཱིཏི ཨིམིནཱ ཨདྷིཔྤཱཡེན ཛཝནཝསེན ཏདཱརམྨཎསྶ སསངྑཱརཱདིཝིདྷཱནཾ ཝུཏྟཾ, ཝིཔཱཀེན ནཱམ ཀམྨསརིཀྑེན བྷཝིཏབྦཾ, ན ཀམྨཝིརུདྡྷསབྷཱཝེན. ཨཉྙཐཱ ཨནིཊྛཔྤསངྒོ སིཡཱཏི ཨེཝམདྷིཔྤཱཡེན དུཏིཡཏྠེརོ ཀམྨཝསེནེཝ ཏདཱརམྨཎཝིསེསཾ ཨཱཧ. ཉཱཎསྶ ཛཙྩནྡྷཱདིདུགྒཏིཝིཔཏྟིནིམིཏྟཔཊིཔཀྑཏཱ ཝིཡ སུགཏིཝིཔཏྟིནིམིཏྟཔཊིཔཀྑཏཱཔི སིཡཱཏི མཉྙམཱནོ ཏཏིཡཏྠེརོ ‘‘ཏིཧེཏུཀཀམྨཏོ དུཧེཏུཀཔཊིསནྡྷིམྤི ནཱནུཛཱནཱཏཱི’’ཏི ཨིམིནཱ ནཡེན ཏེསུ ཝཱདེསུ ཨདྷིཔྤཱཡཱཝིརོདྷཝསེན ཡུཏྟཾ གཧེཏབྦཾ. མཧཱཔཀརཎེ ཨཱགཏཔཱལི༹ཡཱཏི ‘‘སཧེཏུཀོ དྷམྨོ ཨཧེཏུཀསྶ དྷམྨསྶ ཨནནྟརཔཙྩཡེན པཙྩཡོ’’ཏི (པཊྛཱ. ༣.༡.༡༠༢) ཨིམསྶ ཝིབྷངྒེ ‘‘སཧེཏུཀཾ བྷཝངྒཾ ཨཧེཏུཀསྶ བྷཝངྒསྶ ཨནནྟརཔཙྩཡེན པཙྩཡོ, སཧེཏུཀཱ ཁནྡྷཱ ཝུཊྛཱནསྶ ཨནནྟརཔཙྩཡེན པཙྩཡོ’’ཏི ཨེཝམཱདིནཱ པཊྛཱནེ སཧེཏུཀདུཀཱདཱིསུ ཨཱགཏཔཱལི༹ཡཱཏི ཨཏྠོ.

ཀཱམཱཝཙརཀུསལཝིཔཱཀཝཎྞནཱ ནིཊྛིཏཱ.

རཱུཔཱཝཙརཱརཱུཔཱཝཙརཝིཔཱཀཀཐཱཝཎྞནཱ

༤༩༩. ཏསྨིཾ ཁཎེ ཝིཛྫམཱནཱནཾ ཚནྡཱདཱིནནྟི ཨེཏེན ཝིཔཱཀཛ྄ཛྷཱནེ དུཀྑཱཔཊིཔདཱདིབྷཱཝསྶ ¶ ཨཝིཛྫམཱནཏཾ དསྶེཏི. ན ཧི ཀུསལཛ྄ཛྷཱནཾ ཝིཡ ཝིཔཱཀཛ྄ཛྷཱནཾ པརིཀམྨཝསེན ནིབྦཏྟཏཱིཏི. ན ཙེཏྠ པཊིཔདཱབྷེདོ ཝིཡ ཀུསལཱནུརཱུཔོ ཝིཔཱཀསྶ ཨཱརམྨཎབྷེདོཔི ན པརམཏྠིཀོ སིཡཱཏི སཀྐཱ ཝཏྟུཾ ཨེཀནྟེན སཱརམྨཎཏྟཱ ཨརཱུཔདྷམྨཱནཾ ཝིཔཱཀསྶ ཙ ཀམྨནིམིཏྟཱརམྨཎཏཱཡ ཨཉྙཏྲཱཔི ཝིཛྫམཱནཏྟཱ. ནཱནཱཀྑཎེསུ ནཱནཱདྷིཔཏེཡྻནྟི ‘‘ཡསྨིཾ ཁཎེ ཡཾ ཛྷཱནཾ ཡདདྷིཔཏིཀཾ, ཏཏོ ཨཉྙསྨིཾ ཁཎེ ཏཾ ཛྷཱནཾ ཨེཀནྟེན ཏདདྷིཔཏིཀཾ ན ཧོཏཱི’’ཏི ཀཏྭཱ ཝུཏྟཾ. ཙཏུཏྠཛ྄ཛྷཱནསྶེཝཱཏི ཙ པཊིཔདཱ ཝིཡ ཨདྷིཔཏཡོ ན ཨེཀནྟིཀཱཏི ཨིམམེཝཏྠཾ དསྶེཏི.

རཱུཔཱཝཙརཱརཱུཔཱཝཙརཝིཔཱཀཀཐཱཝཎྞནཱ ནིཊྛིཏཱ.

ལོཀུཏྟརཝིཔཱཀཀཐཱཝཎྞནཱ

༥༠༥. ཏཎྷཱཝིཛྫཱདཱིཧི ¶ ཨཱཧིཏཝིསེསཾ ལོཀིཡཀམྨཾ ཝིཔཱཀུཔྤཱདནསམཏྠཾ ཧོཏི, ན ཨཉྙཐཱཏི ཝུཏྟཾ ‘‘ཏཎྷཱདཱིཧི ཨབྷིསངྑཏ’’ནྟི. ཨིཏརསྶཱཏི སུཉྙཏཱཔྤཎིཧིཏནཱམརཧིཏསྶ. ཡོ སུདྡྷིཀཔཊིཔདཱཡ ཝིབྷཱཝིཏོ, ཡོ ཙ སུཏྟནྟཔརིཡཱཡེན ཨནིམིཏྟོཏི ཝུཙྩཏི. ཏེནེཝཱཧ ‘‘ཨནིཙྩཱནུཔསྶནཱནནྟརསྶཔི མགྒསྶཱ’’ཏིཨཱདི. ཝལ༹ཉྫན…པེ… བྷེདོ ཧོཏི མགྒཱགམནཝསེནཱཏི ཨདྷིཔྤཱཡོ. ‘‘མགྒཱནནྟརཕལཙིཏྟསྨིཾ ཡེཝཱ’’ཏི ཝཙནཾ ཨཔེཀྑིཏྭཱ ‘‘སུཉྙཏཱདིནཱམལཱབྷེ སཏཱི’’ཏི སཱསངྐཾ ཨཱཧ. ཨནིམིཏྟནཱམཉྩ ལབྷཏི མགྒཱགམནཏོ ཕལསྶ ནཱམལཱབྷེ ཝིསེསཱབྷཱཝཏོཏི ཨདྷིཔྤཱཡོ. ཏཱདིསཱཡ ཨེཝཱཏི ཡཱདིསཱ མགྒེ སདྡྷཱ, ཏཱདིསཱཡ ཨེཝ ཕལེ སདྡྷཱཡ.

༥༥༥. ‘‘ཀཏམེ དྷམྨཱ ནིཡྻཱནིཀཱ? ཙཏྟཱརོ མགྒཱ’’ཏི ཝཙནཏོ (དྷ. ས. ༡༢༩༥, ༡༦༠༩) ཨནིཡྻཱནིཀཔདནིདྡེསེ ཙ ‘‘ཙཏཱུསུ བྷཱུམཱིསུ ཝིཔཱཀོ’’ཏི (དྷ. ས. ༡༦༡༠) ཝུཏྟཏྟཱ ན ནིཔྤརིཡཱཡེན ཕལཾ ནིཡྻཱནསབྷཱཝཾ, ནིཡྻཱནསབྷཱཝསྶ པན ཝིཔཱཀོ ཀིལེསཱནཾ པཊིཔྤསྶདྡྷིཔྤཧཱནཝསེན པཝཏྟམཱནོ པརིཡཱཡཏོ ཏཐཱ ཝུཙྩཏཱིཏི ཨཱཧ ‘‘ནིཡྻཱནིཀསབྷཱཝསྶཱ’’ཏིཨཱདི. པཉྩངྒིཀོ ཙཱཏི ཨེཏེན མགྒཝིབྷངྒེ སབྦཝཱརེསུཔི ཕལསྶ མགྒཔརིཡཱཡོ ¶ ཨཱགཏོཏི དསྶེཏི. ཏཏྠ ཧི ཨརིཡམགྒཀྑཎེ ཝིཛྫམཱནཱསུཔི ཝིརཏཱིསུ ཏདཝསིཊྛཱནཾ པཉྩནྣཾ ཀཱརཱཔཀངྒཱནཾ ཨཏིརེཀཀིཙྩཏཱདསྶནཏྠཾ པཱལི༹ཡཾ པཉྩངྒིཀོཔི མགྒོ ཨུདྡྷཊོཏི. ཨེཝཾ བོཛ྄ཛྷངྒཱཔཱིཏི ཡཐཱ མགྒོ, ཨེཝཾ མགྒབོཛ྄ཛྷངྒཝིབྷངྒེསུ ཕལེསུ ཙ བོཛ྄ཛྷངྒཱ ཨུདྡྷཊཱཏི ཨཏྠོ.

ལོཀུཏྟརཝིཔཱཀཀཐཱཝཎྞནཱ ནིཊྛིཏཱ.

ཀིརིཡཱབྱཱཀཏཀཐཱཝཎྞནཱ

༥༦༨. པུརིམཱ པཝཏྟཱིཏི མཧཱཀིརིཡཙིཏྟཔྤཝཏྟིཾ ཨཱཧ. ཏཱཡ ཧི ཁཱིཎཱསཝོ ཨེཝཾ པཙྩཝེཀྑཏི. ཏེནེཝཱཧ ‘‘ཨིདཾ པན ཙིཏྟཾ ཝིཙཱརཎཔཉྙཱརཧིཏ’’ནྟི. ཨེཝནྟི ཡཐཱ སོཏདྭཱརེ, ཨེཝཾ གྷཱནདྭཱརཱདཱིསུཔི མཧཱཀིརིཡཙིཏྟེཧི ཏསྨིཾ ཏསྨིཾ ཝིསཡེ ཨིདམཏྠིཀཏཱཡ པརིཙྪིནྣཱཡ ཨིདཾ ཙིཏྟཾ ཝཏྟཏཱིཏི ¶ དསྶེཏི. པཉྩདྭཱརཱནུགཏཾ ཧུཏྭཱ ལབྦྷམཱནནྟི པཉྩདྭཱརེ པཝཏྟམཧཱཀིརིཡཙིཏྟཱནཾ པིཊྛིཝཊྚཀབྷཱཝེན ཨིམསྶ ཙིཏྟསྶ པཝཏྟིཾ སནྡྷཱཡ ཝུཏྟཾ, པཉྩདྭཱརེ ཨེཝ ཝཱ ཨིདམེཝ པཝཏྟནྟི སམྦནྡྷོ. ‘‘ལོལུཔྤ…པེ… བྷཱུཏ’’ནྟི ཝུཏྟཏྟཱ པཉྩདྭཱརེ པཋམཾ ཨིམིནཱ ཙིཏྟེན སོམནསྶིཏོ ཧུཏྭཱ པཙྪཱ མཧཱཀིརིཡཙིཏྟེཧི ཏཾ ཏཾ ཨཏྠཾ ཝིཙིནོཏཱིཏི ཨཡམཏྠོ ཝུཏྟོ ཝིཡ དིསྶཏི. པུབྦེཡེཝ པན མནོདྭཱརིཀཙིཏྟེན པདྷཱནསཱརུཔྤཊྛཱནཱདིཾ པརིཙྪིནྡནྟསྶ པཉྩདྭཱརེ ཏཱདིསསྶེཝ ཏཱདིསེསུ རཱུཔཱདཱིསུ ཨིདཾ ཙིཏྟཾ པཝཏྟཏཱིཏི ཝདནྟི. ཨཡམྤི ཨཏྠོ པཉྩདྭཱརེ ཨེཝ པཝཏྟཾ ལོལུཔྤཏཎྷཱཔཧཱནཱདིཔཙྩཝེཀྑཎཱཧེཏུ ཡཐཱཝུཏྟཀཱརཎབྷཱུཏཾ ཛཱཏནྟི ཨེཝཾ ཡོཛེཏྭཱ སཀྐཱ ཝཏྟུཾ. ཨེཝཉྩ སཏི ཨིམསྶ ཙིཏྟསྶ པཙྩཡབྷཱུཏཱ པུརིམཱ པཝཏྟཱིཏི ཨིདམྤི ཝཙནཾ སམཏྠིཏཾ ཧོཏི.

ཨེཏྠ ཙ པཉྩདྭཱརེ ཨིམིནཱ ཙིཏྟེན སོམནསྶུཔྤཱདནམཏྟཾ དཊྛབྦཾ, ན ཧཱསུཔྤཱདནཾ པཉྩདྭཱརིཀཙིཏྟཱནཾ ཨཝིཉྙཏྟིཛནཀཏྟཱ, མནོདྭཱརེ པན ཧཱསུཔྤཱདནཾ ཧོཏི. ཏེནེཝ ཧི ཨཊྛཀཐཱཡཾ པཉྩདྭཱརེ ‘‘སོམནསྶིཏོ ཧོཏཱི’’ཏི ཨེཏྟཀམེཝ ཝུཏྟཾ, མནོདྭཱརེ ཙ ‘‘ཧཱསཡམཱན’’ནྟི. ཨིམིནཱ ཧསིཏུཔྤཱདཙིཏྟེན པཝཏྟིཡམཱནམྤི བྷགཝཏོ སིཏཀརཎཾ པུབྦེནིཝཱསཨནཱགཏཾསསབྦཉྙུཏཉྙཱཎཱནཾ ¶ ཨནུཝཏྟཀཏྟཱ ཉཱཎཱནུཔརིཝཏྟིཡེཝཱཏི. ཨེཝཾ པན ཉཱཎཱནུཔརིཝཏྟིབྷཱཝེ སཏི ན ཀོཙི པཱལི༹ཨཊྛཀཐཱནཾ ཝིརོདྷོ, ཨེཝཉྩ ཀཏྭཱ ཨཊྛཀཐཱཡཾ ‘‘ཏེསཾ ཉཱཎཱནཾ ཙིཎྞཔརིཡནྟེ ཨིདཾ ཙིཏྟཾ ཨུཔྤཛྫཏཱི’’ཏི ཝུཏྟཾ. ཨཝསྶཉྩ ཨེཏཾ ཨེཝཾ ཨིཙྪིཏབྦཾ, ཨཉྙཐཱ ཨཱཝཛྫནཙིཏྟསྶཔི བྷགཝཏོ པཝཏྟི ན ཡུཛྫེཡྻ. ཏསྶཔི ཧི ཝིཉྙཏྟིསམུཊྛཱཔཀབྷཱཝསྶ ནིཙྪིཏཏྟཱ, ན ཙ ཝིཉྙཏྟིསམུཊྛཱཔཀཏྟེ ཏཾསམུཊྛིཏཱཡ ཝིཉྙཏྟིཡཱ ཀཱཡཀམྨཱདིབྷཱཝཾ ཨཱཝཛྫནབྷཱཝོ ཝིབནྡྷཏཱིཏི.

ཏཏོ ཨེཝཱཏི མཱུལཱབྷཱཝེན ན སུཔྤཏིཊྛིཏཏྟཱ ཨེཝ. ‘‘ཨཧེཏུཀཱནཾ ཛྷཱནངྒཱནི བལཱནི ཙཱ’’ཏི སམྤིཎྜནཏྠོ ཛྷཱནངྒཱནི ཙཱཏི ཙ-སདྡོ. ཡདི ཨཔརིཔུཎྞཏྟཱ བལབྷཱཝསྶ ཨིམསྨིཾ ཨཧེཏུཀདྭཡེ བལཱནི ཨནུདྡིཊྛཱནི ཨསངྒཧིཏཱནི ཙ, ཨཐ ཀསྨཱ ནིདྡིཊྛཱནཱིཏི ཨཱཧ ‘‘ཡསྨཱ པནཱ’’ཏིཨཱདི. སམྨཱ ནིཡྻཱནིཀསབྷཱཝཱནཾ ཀུསལཱནཾ པཊིབྷཱགབྷཱུཏོ ཝིཔཱཀོཔི ཕལཾ ཝིཡ ཏཾསབྷཱཝོ སིཡཱཏི སཧེཏུཀཝིཔཱཀཙིཏྟཱནི ཨགྒཧེཏྭཱ ཀིརིཡཙིཏྟཀཏཏྟཱ ཝཱ ‘‘མཧཱཀིརིཡཙིཏྟེསཱུ’’ཏི ཝུཏྟཾ. ཨཐ ཝཱ མཧཱཀིརིཡཙིཏྟེསུཙཱཏི ཙ-སདྡེན སཧེཏུཀཝིཔཱཀཙིཏྟཱནིཔི གཧིཏཱནཱིཏི ཝེདིཏབྦཱནི.

༥༧༤. ‘‘ཨིནྡྲིཡ ¶ …པེ… ཨིམསྶཱནནྟརཾ ཨུཔྤཛྫམཱནཱནཱི’’ཏི ཝུཏྟཾ ཏེསཾ ཉཱཎཱནཾ ཀཱམཱཝཙརཏྟཱ. ཨིཏརེསཾ མཧགྒཏཏྟཱ ‘‘པརིཀམྨཱནནྟརཱནཱི’’ཏི ཝུཏྟཾ.

༥༧༧. ཨཱཧིཏོ ཨཧཾ མཱནོ ཨེཏྠཱཏི ཨཏྟཱ, སོ ཨེཝ བྷཝཏི ཨུཔྤཛྫཏི, ན པརཔརིཀཔྤིཏོ ཝིཡ ནིཙྩོཏི ཨཏྟབྷཱཝོ. ཨཏྟཱཏི ཝཱ དིཊྛིགཏིཀེཧི གཧེཏབྦཱཀཱརེན བྷཝཏི པཝཏྟཏཱིཏི ཨཏྟབྷཱཝོ.

ཀིརིཡཱབྱཱཀཏཀཐཱཝཎྞནཱ ནིཊྛིཏཱ.

ཙིཏྟུཔྤཱདཀཎྜཝཎྞནཱ ནིཊྛིཏཱ.

༢. རཱུཔཀཎྜཾ

ཨུདྡེསཝཎྞནཱ

ཀེནཙཱིཏི ¶ ¶ རཱུཔེན ཝཱ ཨརཱུཔེན ཝཱ. ཙིཏྟུཔྤཱདེན ཏཱཝ རཱུཔསྶ སམཡཝཝཏྠཱནཾ ན སཀྐཱ ཀཱཏུཾ ཨབྱཱཔིཏཱཡ ཨནེཀནྟིཀཏཱཡ ཙཱཏི ཨིམམཏྠཾ དསྶེནྟོ ‘‘ཨཙིཏྟསམུཊྛཱནསབྦྷཱཝཏོ’’ཏིཨཱདིམཱཧ. ཏཏྠ ཨཙིཏྟསམུཊྛཱནཾ རཱུཔཾ ཙིཏྟསྶ ཏཱིསུ ཁཎེསུ ཨུཔྤཛྫཏཱིཏི ཨིམསྨིཾ ཏཱཝ ཝཱདེ ཙིཏྟུཔྤཏྟིསམཡེན རཱུཔཱུཔཔཏྟིསམཡསྶ ཝཝཏྠཱནཾ མཱ ཧོཏུ, ཙིཏྟསྶ ཨུཔྤཱདཀྑཎེཡེཝ སབྦམྤི རཱུཔཾ ཨུཔྤཛྫཏཱིཏི ཨིམསྨིཾ པན ཝཱདེ ཀཐནྟི? ཨེཏྠཱཔི ཨཙིཏྟསམུཊྛཱནཾ རཱུཔཾ ཙིཏྟེན སཧུཔྤཱདེཔི ཨནིནྡྲིཡབདྡྷརཱུཔཾ ཝིཡ ཨཙིཏྟཔཊི བནྡྷུཔྤཱདཏཱཡ ན ཙིཏྟེན ཝཝཏྠཱཔེཏབྦསམཡནྟི ཝུཏྟཾ ‘‘ཨཙིཏྟསམུཊྛཱནསབྦྷཱཝཏོ’’ཏི. ཏེན ཙིཏྟུཔྤཱདེན རཱུཔསྶ སམཡཝཝཏྠཱནཾ ན བྱཱཔཱིཏི དསྶེཏི. ཨནེཀཙིཏྟསམུཊྛཱནཏཱཡ ཝཝཏྠཱནཱབྷཱཝཏོཏི སམྦནྡྷོ. ནིཡཏེ ཧི སམུཊྛཱཔཀཙིཏྟེ ཙིཏྟསམུཊྛཱནརཱུཔསྶ སིཡཱ ཝཝཏྠཱནནྟི.

ཀེསཉྩཱིཏི ཀཱམཱཝཙརཀུསལཱདཱིནཾ. ཀཏྠཙཱིཏི ཨཱརུཔྤེ. ཀེསཉྩཱིཏི ཝཱ ཀེསཉྩི པཉྩཝོཀཱརཝིཔཱཀཱནཾ. ཀཏྠཙཱིཏི པཊིསནྡྷིཀྑཎེ ཙརིམཀྑཎེ ཙ. ‘‘ཏསྨིཾ སམཡེ ཕསྶོ ཧོཏཱི’’ཏིཨཱདིནཱ (དྷ. ས. ༡) ཙིཏྟསཧབྷཱཝིནཾ ཨེཝ ཙིཏྟེན སམཡཝཝཏྠཱནཾ ཀཏནྟི ཝུཏྟཾ ‘‘ཨཙིཏྟསཧབྷུབྷཱཝཏོ’’ཏི. ཏེསནྟི ཨུཔཱདཱརཱུཔཱནཾ. ཡོ ཡསྶ སཧབྷཱཝེན ཨུཔཀཱརཀོ, སོ ཨེཝ ཏསྶ སམཡཝཝཏྠཱཔཀབྷཱཝེན ཝུཏྟོཏི ཨཱཧ ‘‘སཧཛཱཏ…པེ… ཏྟནཏོ’’ཏི. ནཱཔི མཧཱབྷཱུཏེཧཱིཏིཨཱདིནཱ ཝཝཏྠཱནཱབྷཱཝམེཝ དསྶེཏི. ཀེསཉྩཱིཏི ཨཀམྨཛཱདཱིནཾ. ཀེཧིཙཱིཏི ཀམྨཛཱདཱིཧི. པཝཏྟིཏོཏི པཝཏྟནཏོ. སཧཱཏི ཨེཀསྨིཾ ཀཱལེ. ཨབྷཱཝཱཏི ནིཡོགཏོ ཨབྷཱཝཱ.

ཝིཉྙཏྟི ¶ …པེ… ན སཀྐཱ ཝཏྟུཾ མཧཱབྷཱུཏེཧི སམཡཝཝཏྠཱནེ ཀརིཡམཱནེ ཏེཧི ཨཡཱཝབྷཱཝིཏཏཱཡཱཏི ཨདྷིཔྤཱཡོ. ཨེཀསྨིཾ ཀཱལེཏིཨཱདིནཱཔི མཧཱབྷཱུཏེཧི སམཡནིཡམནེ ཝཝཏྠཱནཱབྷཱཝམེཝ ཝིབྷཱཝེཏི. ‘‘ཏཐཱ ཝིབྷཛནཏྠ’’ནྟི, ‘‘ཨཝིབྷཏྟཾ ཨབྱཱཀཏཾ ཨཏྠཱིཏི དསྶེཏུ’’ནྟི ཙ ཨིམེསཾ པདཱནཾ ‘‘ཝིབྷཏྟཾ ཨཝིབྷཏྟཉྩ སབྦཾ སངྒཎྷནྟོ ཨཱཧཱ’’ཏི ཨིམིནཱ སམྦནྡྷོ. སམཡཝཝཏྠཱནཾ ཀཏྭཱ ནིདྡིསིཡམཱནསྶ ནིཔྤདེསཏཱཡ ཨསམྦྷཝཏོ ¶ ཨེཀདེསཾ ནིདྡིསིཏྭཱ སཱམཉྙེན ནིགམནཾ ཡུཏྟཾ, ཨཀཏྭཱ པན སམཡཝཝཏྠཱནཾ སརཱུཔཏོ ནིདྡིསནེན ཏཐཱཏི ཨིམམཏྠཾ ཨཱཧ ‘‘སམཡཝཝཏྠཱནེནཱ’’ཏིཨཱདིནཱ. ཨཝིབྷཏྟེཏི ཝིཔཱཀཀིརིཡཱབྱཱཀཏཾ ཝིཡ ན པུབྦེ ཝིབྷཏྟེ. ཝིབྷཛིཏབྦེཏི བྷེདཝནྟཏཱཡ ཝིབྷཛནཱརཧེ. དསྶིཏེཏི ཨུདྡིསནཝསེན དསྶིཏེ. ཝུཏྟམེཝཏྠཾ ཝིཏྠཱརཏརེན དསྶེཏུཾ ‘‘ཨེཏྠ པནཱ’’ཏིཨཱདིམཱཧ.

ཝིཔཱཀཱདིདྷམྨཱནཾ ནཡནཾ ནཡོ, སོཝ དསྶནནྟི ནཡདསྶནཾ. ‘‘དེསནཱ’’ཏི ཝུཏྟཾ ཧེཊྛཱ གཧཎམེཝ ནཡདསྶནནྟི. དུཏིཡཝིཀཔྤེ པན ཀཱམཱཝཙརཱདིབྷཱཝེན ནཱིཡཏཱིཏི ནཡོ, ཀིརིཡཱབྱཱཀཏཾ. ཏསྶ དསྶནཾ ནཡདསྶནནྟི ཡོཛེཏབྦཾ. དུཀཱདཱིསུ ནིདྡེསཝཱརེ ཙ ཧདཡཝཏྠུནོ ཨནཱགཏཏྟཱ ཏཾ ཨགྒཧེཏྭཱ པཋམཝིཀཔྤོ ཝུཏྟོ, ཨེཀཀེ པན ཝཏྠུཔི གཧིཏནྟི ‘‘ཧདཡཝཏྠུཉྩཱ’’ཏི དུཏིཡཝིཀཔྤེ ཝུཏྟཾ. ཀིཾ པན ཀཱརཎཾ དུཀཱདཱིསུ ནིདྡེསཝཱརེ ཙ ཧདཡཝཏྠུ ན གཧིཏནྟི? ཨིཏརཝཏྠཱུཧི ཨསམཱནགཏིཀཏྟཱ དེསནཱབྷེདཏོ ཙ. ཡཐཱ ཧི ཙཀྑུཝིཉྙཱཎཱདཱིནི ཨེཀནྟཏོ ཙཀྑཱདིནིསྶཡཱནི, ན ཨེཝཾ མནོཝིཉྙཱཎཾ ཨེཀནྟཏོ ཧདཡཝཏྠུནིསྶཡཾ, ནིསྶིཏམུཁེན ཙ ཝཏྠུདུཀཱདིདེསནཱ པཝཏྟཱ. ཡམྤི ཨེཀནྟཏོ ཧདཡཝཏྠུནིསྶཡཾ, ཏསྶ ཝསེན ‘‘ཨཏྠི རཱུཔཾ མནོཝིཉྙཱཎསྶ ཝཏྠཱུ’’ཏིཨཱདིནཱ དུཀཱདཱིསུ ཝུཙྩམཱནེསུཔི ཏདནུཀཱུལཨཱརམྨཎདུཀཱདཡོ ན སམྦྷཝནྟི. ན ཧི ‘‘ཨཏྠི རཱུཔཾ མནོཝིཉྙཱཎསྶ ཨཱརམྨཎཾ, ཨཏྠི རཱུཔཾ ན མནོཝིཉྙཱཎསྶ ཨཱརམྨཎ’’ནྟིཨཱདིནཱ སཀྐཱ ཝཏྟུནྟི ཝཏྠཱརམྨཎདུཀདེསནཱ བྷིནྣགཏིཀཱ སིཡུཾ, སམཱནགཏིཀཱ ཙ ཏཱ དེསེཏུཾ བྷགཝཏོ ཨཛ྄ཛྷཱསཡོ. ཨེསཱ ཧི བྷགཝཏོ དེསནཱ པཀཏི. ཏེནེཝ ཧི ནིཀྑེཔཀཎྜེ ཙིཏྟུཔྤཱདཝིབྷཱགེན ཨཝུཙྩམཱནཏྟཱ ཨཝིཏཀྐཱཝིཙཱརཔདཝིསྶཛྫནེ ཝིཙཱརོཏི ཝཏྟུཾ ན སཀྐཱཏི ཨཝིཏཀྐཝིཙཱརམཏྟཔདཝིསྶཛྫནེ ལབྦྷམཱནོཔི ཝིཏཀྐོ ན ཨུདྡྷཊོ, ཨཉྙཐཱ ཝིཏཀྐོ ཙཱཏི ཝཏྟབྦཾ སིཡཱཏི. ཨེཝཾ ཨིཏརཝཏྠཱུཧི ཨསམཱནགཏིཀཏྟཱ དེསནཱབྷེདཏོ ཙ དུཀཱདཱིསུ ཨུདྡེསེ ན གཧིཏཾ. ཨུདྡིཊྛསྶེཝ ཧི ནིདྡིསནཏོ ནིདྡེསེཔི ན གཧིཏཾ ཧདཡཝཏྠཱུཏི ཝདནྟི.

ཙཀྑཱདིདསཀཱ ¶ སཏྟཱཏི ཙཀྑུསོཏགྷཱནཛིཝ྄ཧཱཀཱཡཨིཏྠིབྷཱཝཔུརིསབྷཱཝདསཀཱ སཏྟ, ཨེཀསནྟཱནཝསེན ཝཱ ཙཀྑུསོཏགྷཱནཛིཝ྄ཧཱཀཱཡབྷཱཝཝཏྠུདསཀཱ སཏྟ. ནིབྦཱནསྶ ཨསཏིཔི པརམཏྠཏོ བྷེདེ པརིཀཔྤིཏབྷེདོཔི ¶ བྷེདོཡེཝ ཝོཧཱརཝིསཡེཏི ཀཏྭཱ སོཔཱདིསེསཱདིབྷེདོ ཝུཏྟོ.

༥༨༤. ཀིཉྩཱཔི ཨཉྙཏྠ ཀུཀྐུཊཎྜསཎྛཱནེ པརིམཎྜལ-སདྡོ དིསྶཏི, ཙཀྐསཎྛཱནཏཱ པན ཝཊྚསཎྛཱནེ ཙཀྐཝཱལེ༹ ཝུཙྩམཱནོ པརིམཎྜལ-སདྡོ ཝཊྚཔརིཡཱཡོ སིཡཱ. ཨནེཀཏྠཱ ཧི སདྡཱཏི ཨདྷིཔྤཱཡེནཱཧ ‘‘ཝཊྚཾ པརིམཎྜལ’’ནྟི. ཨེཏྠ ཙ སིནེརུཡུགནྡྷརཱདཱིནཾ སམུདྡཏོ ཨུཔརིཨདྷོབྷཱགཱནཾ ཝསེན ཨུབྦེདྷོ ཝུཏྟོ, ཨཱཡཱམཝིཏྠཱརེཧིཔི སིནེརུ ཙཏུརཱསཱིཏིཡོཛནསཧསྶཔརིམཱཎོཝ. ཡཐཱཧ ‘‘སིནེརུ, བྷིཀྑཝེ, པབྦཏརཱཛཱ ཙཏུརཱསཱིཏི ཡོཛནསཧསྶཱནི ཨཱཡཱམེན, ཙཏུརཱསཱིཏི ཡོཛནསཧསྶཱནི ཝིཏྠཱརེནཱ’’ཏི (ཨ. ནི. ༧.༦༦). སིནེརུཾ པཱཀཱརཔརིཀྑེཔཝསེན པརིཀྑིཔིཏྭཱ ཋིཏཱ ཡུགནྡྷརཱདཡོ, སིནེརུཡུགནྡྷརཱདཱིནཾ ཨནྟརེཔི སཱིཏསམུདྡཱ ནཱམ. ‘‘ཏེ ཝིསཱལཏོ ཡཐཱཀྐམཾ སིནེརུཨཱདཱིནཾ ཨཙྩུགྒམནསམཱནཔརིམཱཎཱ’’ཏི ཝདནྟི.

ཀོཊིསཏསཧསྶཙཀྐཝཱལ༹སྶེཝ ཨཱཎཱཁེཏྟབྷཱཝོ དསསཧསྶཙཀྐཝཱལ༹སྶ ཛཱཏིཁེཏྟབྷཱཝོ ཝིཡ དྷམྨཏཱཝསེནེཝ ཝེདིཏབྦོ. ཝིཀཔྤསམཱནསམུཙྩཡཝིབྷཱཝནེསུ ཝིཡ ཨཝདྷཱརཎེ ཨནིཡམེ ཙ ཝཱ-སདྡོ ཝཏྟཏཱིཏི ཏཐཱ ཡོཛནཱ ཀཏཱ. ཨནེཀཏྠཱ ཧི ནིཔཱཏཱཏི. ཏཏྠ ཨནེཀནྟིཀཏྠོ ཨནིཡམཏྠོ.

སཱིལཱདིཝིསུདྡྷིསམྤཱདནེན, ཙཏུདྷཱཏུཝཝཏྠཱནཝསེནེཝ ཝཱ མཧཱཀིཙྩཏཱཡ མཧནྟེན ཝཱཡཱམེན. སཏིཔི ལཀྑཎཱདིབྷེདེ ཨེཀསྨིཾ ཨེཝ ཀཱལེ ཨེཀསྨིཾ སནྟཱནེ ཨནེཀསཏསཧསྶཀལཱཔཝུཏྟིཏོ མཧནྟཱནི བཧཱུནི བྷཱུཏཱནི པརམཏྠཏོ ཝིཛྫམཱནཱནཱིཏི ཝཱ མཧཱབྷཱུཏཱནི ཡཐཱ ‘‘མཧཱཛནོ’’ཏི. ཨེཝནྟི ‘‘ཨུཔཱདཱཡ པཝཏྟ’’ནྟི ཨཏྠེ སཏི པཊིཙྩསམུཔྤནྣཏཱ ཝུཏྟཱ ཧོཏི པཙྩཡསམྦྷཱུཏཏཱདཱིཔནཏོ. ཨུཔཱདཱཡཏཱིཏི ཨུཔཱདཱཡཏི ཨེཝཱཏི ཨདྷིཔྤཱཡོ. ཏེནེཝཱཧ ‘‘ཨེཀནྟནིསྶིཏསྶཱ’’ཏི. ‘‘བྷཝཏི ཧི ནིསྶཡརཱུཔཱནཾ སཱམིབྷཱཝོ’’ཏི ཨཱདྷཱརཱདྷེཡྻསམྦནྡྷཝཙནིཙྪཱཡ ཨབྷཱཝེ ཨཱདྷཱརབྷཱུཏོཔི ཨཏྠོ སཾསཱམིསམྦནྡྷཝཙནིཙྪཱཡ སཱམིབྷཱཝེན ཝུཙྩཏི ཡཐཱ ‘‘རུཀྑསྶ སཱཁཱ’’ཏི ཨདྷིཔྤཱཡོ.

ཏིཝིདྷརཱུཔསངྒཧཝཎྞནཱ

༥༨༥. ཝིཉྙཏྟིདུཀོ ¶ ¶ ཙཱཏི ཙ-སདྡེན ཙིཏྟསཧབྷུཙིཏྟཱནུཔརིཝཏྟིདུཀཱཔི སངྒཧིཏཱཏི ཝེདིཏབྦཱ. སཀྐཱ ཧི ཨེཏེན ནཡེན…པེ… ཝིཉྙཱཏུནྟི ཨེཏྠ པཉྩཝཱིསཱཡ ཏཱཝ ཝཏྠུདུཀེསུ པཋམདུཀཔཉྩཀཱདཡོ ཙུདྡསཧིཔི པཀིཎྞཀདུཀེཧི ཨཝསིཊྛེཧི ཝཏྠུདུཀེཧི པཉྩཝཱིསཱཡ ཨཱརམྨཎདུཀེཧི པཉྩཧི བཱཧིརཱཡཏནདུཀེཧི རཱུཔདྷཱཏུདུཀཱདཱིཧི པཉྩཧི དྷཱཏུདུཀེཧི པཙྪིམཀེཧི ཏཱིཧི ཨིནྡྲིཡདུཀེཧི དྭཱདསཧིཔི སུཁུམརཱུཔདུཀེཧི པཋམཱདིཝཛྫེཧི ཨཝསིཊྛེཧི ཨཱཡཏནདྷཱཏུཨིནྡྲིཡདུཀེཧི ཙ ཡོཛནཾ གཙྪནྟི. པཉྩཝཱིསཱཡ པན ཨཱརམྨཎདུཀེསུ པུརིམཀོ དུཀཔཉྩཀོ ཨུཔཱདིནྣཨུཔཱདིནྣུཔཱདཱནིཡསནིདསྶནཙིཏྟསམུཊྛཱནཙིཏྟསཧབྷུཙིཏྟཱནུཔརིཝཏྟིདུཀཝཛྫེཧི པཀིཎྞཀདུཀེཧི སབྦེཧིཔི ཝཏྠུདུཀེཧི རཱུཔཱཡཏནརཱུཔདྷཱཏུདུཀཝཛྫེཧི ཨཱཡཏནདྷཱཏུདུཀེཧི སབྦེཧིཔི ཨིནྡྲིཡདུཀསུཁུམརཱུཔདུཀེཧི ཡོཛནཾ གཙྪཏི. དུཏིཡདུཀཔཉྩཀཱདཱིསུ ཡཐཱཀྐམཾ སདྡཱཡཏནསདྡདྷཱཏུདུཀཱདཡོ ཡོཛནཾ ན གཙྪནྟི, རཱུཔཱཡཏནརཱུཔདྷཱཏུདུཀཱདཡོ གཙྪནྟི. པཀིཎྞཀདུཀེསུ སནིདསྶནདུཀཉྩཱཏི ཨཡམེཝ ཝིསེསོ. ཡཐཱ ཙ ཝཏྠུདུཀེསུ, ཨེཝཾ ཙཀྑཱཡཏནཙཀྑུདྷཱཏུཙཀྑུནྡྲིཡཱདིདུཀཔཉྩཀེསུ. ཡཐཱ ཙ ཨཱརམྨཎདུཀེསུ, ཨེཝཾ རཱུཔཱཡཏནརཱུཔདྷཱཏུཨཱདིདུཀཔཉྩཀེསུ ཏིཀཡོཛནཱ. ཨིཏྠིནྡྲིཡཔུརིསིནྡྲིཡཛཱིཝིཏིནྡྲིཡདུཀཱ སུཁུམརཱུཔདུཀཱ ཙ སབྦེཧིཔི དུཀེཧི ཡོཛནཾ གཙྪནྟཱིཏི ཨེཝཾ ཏཱཝ ཏིཀཡོཛནཱ ཝེདིཏབྦཱ. ནནུ ཙཱཡམྤི ཡོཛནཱ བྷགཝཏཱ ན དེསིཏཱཏི ན ཀཱཏབྦཱཏི? ནཡིདཾ ཨེཀནྟིཀཾ. ཀསྨཱ? བྷགཝཏཱ དིནྣནཡེན ཡོཛནཱཔི བྷགཝཏོཡེཝ དེསནཱ. ཏཐཱ ཧི ཝུཏྟཾ མཱཏིཀཱཝཎྞནཱཡཾ (དྷ. ས. ཨཊྛ. ༡-༦) ‘‘ཧེཏཱུ ཙེཝ དྷམྨཱ ཨཧེཏུཀཱ ཙཱཏི ཨིདམྤི སམྦྷཝཏཱི’’ཏིཨཱདི. སམྦྷཝོ ཧི གཧཎསྶ ཀཱརཎནྟི ཙ.

ཏིཝིདྷརཱུཔསངྒཧཝཎྞནཱ ནིཊྛིཏཱ.

ཙཏུབྦིདྷཱདིརཱུཔསངྒཧཝཎྞནཱ

༥༨༦. ཙིཏྟཏོ ཨེཝ སམུཊྛཱཏཱིཏི ཙིཏྟསམུཊྛཱནནྟི ཨིམམེཝ ཨཏྠཾ གཧེཏྭཱ ‘‘ཝིཉྙཏྟིདུཀཱདཱིཧི སམཱནགཏིཀོ ཙིཏྟསམུཊྛཱནདུཀོ’’ཏི ཝུཏྟཾ ¶ . ཝིནིཝཏྟིཏེ ཧི སཱམཉྙེ ཡཾ རཱུཔཾ ¶ ཛནཀཔཙྩཡེསུ ཙིཏྟཏོ སམུཊྛཱཏི, ཏཾ ཙིཏྟཏོ ཨེཝ སམུཊྛཱཏཱིཏི. ཝིཉྙཏྟིདུཀཱདཱིཧཱིཏི ཨཱདི-སདྡེན ཙིཏྟསཧབྷུཙིཏྟཱནུཔརིཝཏྟིདུཀེ སངྒཎྷཱཏི. ལབྦྷམཱནོཏི ཡཾ ཏཾ རཱུཔཾ ཨུཔཱདཱ, ཏཾ ཨཏྠི ཙིཏྟསམུཊྛཱནཾ, ཨཏྠི ན ཙིཏྟསམུཊྛཱནཾ. ཡཾ ཏཾ རཱུཔཾ ནུཔཱདཱ, ཏཾ ཨཏྠི ཙིཏྟསམུཊྛཱནཾ, ཨཏྠི ན ཙིཏྟསམུཊྛཱནནྟི ཨེཝཾ ལབྦྷམཱནོ. སནིདསྶནདུཀཱདཱིནནྟི ཨཱདི-སདྡེན སཔྤཊིགྷམཧཱབྷཱུཏདུཀཱདཡོ སངྒཎྷཱཏི. ཏེནཱཏི ཙིཏྟསམུཊྛཱནདུཀེན. ཏསྶཱཏི ཙིཏྟསམུཊྛཱནདུཀསྶེཝ. ཨཉྙེ པནཱཏི ཝིཉྙཏྟིཙིཏྟསམུཊྛཱནཙིཏྟསཧབྷུཙིཏྟཱནུཔརིཝཏྟིདུཀེཧི ཨཉྙེཔི པཀིཎྞཀདུཀཱ.

སདྡཱཡཏནསྶ ཨེཀནྟཏོ ཨནུཔཱདིནྣཏྟཱ ‘‘སོཏསམྥསྶཱརམྨཎདུཀཱདཡོ ཝཛྫེཏྭཱ’’ཏི ཝུཏྟཾ. ཙཏུཀྐཱ ལབྦྷནྟཱིཏི ཡཾ ཏཾ རཱུཔཾ ཨུཔཱདིནྣཾ, ཏཾ ཨཏྠི ཙཀྑུསམྥསྶསྶ ཨཱརམྨཎཾ, ཨཏྠི ཙཀྑུསམྥསྶསྶ ནཱརམྨཎཾ. ཡཾ ཏཾ རཱུཔཾ ཨནུཔཱདིནྣཾ, ཏཾ ཨཏྠི ཙཀྑུསམྥསྶསྶ ཨཱརམྨཎཾ, ཨཏྠི ཙཀྑུསམྥསྶསྶ ནཱརམྨཎནྟི ཨེཝམཱདཡོ སབྦཱརམྨཎབཱཧིརཱཡཏནཱདིལབྦྷམཱནདུཀེཧི ཡོཛནཱཡཾ ཙཏུཀྐཱ ལབྦྷནྟཱིཏི སམྦནྡྷོ. ཨཝསེསེཧཱིཏི ཨཱརམྨཎབཱཧིརཱཡཏནརཱུཔདྷཱཏུདུཀཱདིཏོ ལབྦྷམཱནདུཀེཧཱིཏི ཝུཏྟདུཀརཱསིཏོ ཨཝསེསེཧི. ཏེསནྟི ཨུཔཱདིནྣཨུཔཱདིནྣུཔཱདཱནིཡཙིཏྟསམུཊྛཱནདུཀཱནཾ. ཨཉྙེསནྟི ཨུཔཱདིནྣདུཀཱདིཏོ ཨཉྙེསཾ ཨུཔཱདཱདུཀཱདཱིནཾ. ཝཏྠུདུཀཱདཱིཧཱིཏི ཨཱདི-སདྡེན ཙཀྑཱཡཏནདུཀཱདཡོ སངྒཎྷཱཏི. ཨེཏྠཱཔི ཨཝསེསེཧི ཏེསཾ ཨཉྙེསཉྩ ཡོཛནཱཡ ཙཏུཀྐཱ ན ལབྦྷནྟཱིཏི སམྦནྡྷོ.

ཙཏུབྦིདྷཱདིརཱུཔསངྒཧཝཎྞནཱ ནིཊྛིཏཱ.

ཨུདྡེསཝཎྞནཱ ནིཊྛིཏཱ.

རཱུཔཝིབྷཏྟི

ཨེཀཀནིདྡེསཝཎྞནཱ

༥༩༤. པཐཝཱིཨཱདཱིནཾ དྷམྨཱནཾ རུཔྤནསབྷཱཝོ ཝིཡ ན ཧེཏུཨཱདིབྷཱཝོཔི སཱདྷཱརཎོཏི ན ཧེཏཱུསུ ཝིབྷཛིཏབྦོཏི ཝུཏྟཾ ‘‘ཨཝིཛྫམཱནཝིབྷཱགསྶཱ’’ཏི. ཏསྶ པན ཝིབྷཱགཱབྷཱཝདསྶནསརཱུཔདསྶནམེཝ ནིདྡེསོ. ཨེཝཉྩ ཀཏྭཱ ནིབྦཱནསྶཔི ཝིབྷཱགརཧིཏཏྟཱ ‘‘ཨསངྑཏཱ དྷཱཏཱུ’’ཏི ཨེཏྟཀམེཝ ནིདྡེསཝསེན ཝུཏྟཾ.

ཡདིཔི ¶ ¶ ཧིནོཏི ཨེཏེན པཏིཊྛཱཏི ཀུསལཱདིཀོ དྷམྨོཏི ཨལོབྷཱདཡོ ཀེཝལཾ ཧེཏུཔདཝཙནཱིཡཱ, ཀཱརཎབྷཱཝསཱམཉྙཏོ པན མཧཱབྷཱུཏཱདཡོཔི ཧེཏུ-སདྡཱབྷིདྷེཡྻཱཏི མཱུལཊྛཝཱཙིནཱ དུཏིཡེན ཧེཏུ-སདྡེན ཝིསེསེཏྭཱ ཨཱཧ ‘‘ཧེཏུཧེཏཱུ’’ཏི. སུཔྤཏིཊྛིཏབྷཱཝསཱདྷནཏོ ཀུསལཱདིདྷམྨཱནཾ མཱུལཏྠེན ཨུཔཀཱརཀདྷམྨཱ ‘‘ཏཡོ ཀུསལཧེཏཱུ’’ཏིཨཱདིནཱ (དྷ. ས. ༡༠༥༩-༡༠༦༠) པཊྛཱནེ ཙ ཏེཡེཝ ‘‘ཧེཏུཔཙྩཡོ’’ཏི ཝུཏྟཱཏི ཨཱཧ ‘‘མཱུལཧེཏུ པཙྩཡཧེཏཱུཏི ཝཱ ཨཡམཏྠོ’’ཏི. ཧིནོཏི ཨེཏེན, ཨེཏསྨཱ ཝཱ ཕལཾ པཝཏྟཏཱིཏི ཧེཏུ, པཊིཙྩ ཨེཏསྨཱ ཨེཏི པཝཏྟཏཱིཏི པཙྩཡོཏི ཨེཝཾ ཧེཏུཔཙྩཡ-སདྡཱནཾ ཨནཱནཏྠཏཾ སནྡྷཱཡ ཧེཏུསདྡཔརིཡཱཡབྷཱཝེན པཙྩཡ-སདྡོ ཝུཏྟོཏི ཨཱཧ ‘‘ཧེཏུཔཙྩཡསདྡཱནཾ སམཱནཏྠཏྟཱ’’ཏི. བྷཱུཏཏྟཡནིསྶིཏཱནི ཙ མཧཱབྷཱུཏཱནི ཙཏུམཧཱབྷཱུཏནིསྶིཏཾ ཨུཔཱདཱརཱུཔནྟི སབྦམྤི རཱུཔཾ སབྦདཱ སབྦཏྠ སབྦཱཀཱརཾ ཙཏུམཧཱབྷཱུཏཧེཏུཀཾ མཧཱབྷཱུཏཱནི ཙ ཨནཱམཊྛབྷེདཱནི སཱམཉྙཏོ གཧིཏཱནཱིཏི ཝུཏྟཾ ‘‘རཱུཔཀྑནྡྷསྶ ཧེཏཱུ’’ཏི.

ཀམྨསམཱདཱནཱནནྟི སམཱདཱནཱནཾ ཀམྨཱནཾ, སམཱདིཡིཏྭཱ ཀཏཀམྨཱནཾ ཝཱ. ཨཉྙེསུ པཙྩཡེསུ ཝིཔཱཀསྶ ཏཎྷཱཝིཛྫཱདཱིསུ.

‘‘ཨཊྛཱནམེཏཾ, བྷིཀྑཝེ, ཨནཝཀཱསོ, ཡཾ ཀཱཡདུཙྩརིཏསྶ ཨིཊྛོ ཀནྟོ མནཱཔོ ཝིཔཱཀོ ནིབྦཏྟེཡྻ, ནེཏཾ ཋཱནཾ ཝིཛྫཏི. ཋཱནཉྩ ཁོ ཨེཏཾ, བྷིཀྑཝེ, ཝིཛྫཏི, ཡཾ ཀཱཡདུཙྩརིཏསྶ ཨནིཊྛོ ཨཀནྟོ ཨམནཱཔོ ཝིཔཱཀོ ནིབྦཏྟེཡྻ. ཋཱནམེཏཾ ཝིཛྫཏི. ཝཙཱི…པེ… མནོ…པེ… ཝིཛྫཏི…པེ… ཨཊྛཱནམེཏཾ, བྷིཀྑཝེ, ཨནཝཀཱསོ, ཡཾ ཀཱཡསུཙརིཏསྶ ཨནིཊྛོ ཨཀནྟོ ཨམནཱཔོ ཝིཔཱཀོ ནིབྦཏྟེཡྻཱ’’ཏི (མ. ནི. ༣.༡༣༡; ཝིབྷ. ༨༠༩),

‘‘ཀམྨཾ སཏྟེ ཝིབྷཛཏི, ཡདིདཾ ཧཱིནཔཎཱིཏཏཱཡཱ’’ཏི (མ. ནི. ༣.༢༨༩) – ཨེཝམཱདིཝཙནཏོ ཀམྨཾ ཝིཔཱཀསྶ ཨིཊྛཱནིཊྛཏཾ ནིཡམེཏཱིཏི ཨཱཧ ‘‘ཨིཊྛཱནིཊྛཝིཔཱཀནིཡཱམཀཏྟཱ’’ཏི. གཏིཨུཔདྷིཀཱལཔཡོགསམྤཏྟིཝིཔཏྟིཡོཡེཝ ཋཱནཾ ཝིཔཱཀསྶ ཨོཀཱསབྷཱཝཏོ. ན ཧི ཏེཧི ཝིནཱ ཀོཙི ཝིཔཱཀོ ནིབྦཏྟཏཱིཏི. ཡཐཱཝུཏྟཊྛཱནེ སཏི ཨདྷིགནྟབྦཾ ཨིཊྛཱནིཊྛཱརམྨཎཾ ‘‘གཏི…པེ… ནིཔྥཱདིཏ’’ནྟི ཝུཏྟཾ. ཝིཔཱཀསྶ ཨཱརམྨཎེན ཝིནཱ ཨབྷཱཝཏོ ཨཱརམྨཎམྤི ¶ ཏསྶ པདྷཱནཾ ཀཱརཎཾ. ཨནཉྙསབྷཱཝཏོཏི ཧེཏུཨཱདིསབྷཱཝཱབྷཱཝཏོ.

རུཔྤནཾ ¶ རཱུཔཾ. ཏཾ ཨསྶ ཨཏྠཱིཏི ཨེཏྠ ‘‘ཨསྶཱ’’ཏི ཝུཙྩམཱནོ པཐཝཱིཨཱདིཨཏྠོཡེཝ རུཔྤཏཱིཏིཔི ཝུཙྩཏཱིཏི ཨཱཧ ‘‘རུཔྤནལཀྑཎཡུཏྟསྶེཝ རཱུཔཱིརཱུཔབྷཱཝཏོ’’ཏི. ཨེཏཾ སབྷཱཝནྟི ཨེཏཾ ཨུཔྤནྣབྷཱཝེ སཏི ཚཧི ཝིཉྙཱཎེཧི ཝིཉྙེཡྻསབྷཱཝཾ རཱུཔེ ནིཡམེཏི རཱུཔསྶེཝ ཏཾསབྷཱཝཏྟཱ. ན རཱུཔཾ ཨེཏསྨིནྟི ཀཱལབྷེདཝསེན ཨཏཾསབྷཱཝསྶཔི རཱུཔསྶ ཨཏྠིཏཱཡ ན རཱུཔཾ ཏཏྠ ནིཡནྟབྦནྟི དསྶེཏི. ཨཏྠི ཧཱིཏིཨཱདིནཱ ཏཏྠ རཱུཔསྶེཝ ནིཡནྟབྦཏཱབྷཱཝཾཡེཝ ཝིཝརཏི. ཨེཏམེཝཱཏིཨཱདིནཱ ཨུདྡེསེན ནིདྡེསཾ སཾསནྡེཏི. ཨེཏྠ ཨེཏམེཝ རཱུཔེ ཡཐཱཝུཏྟསབྷཱཝཾ ནིཡམེཏབྦཾ ནིདྡེསེ ཨེཝ-སདྡེན ནིཡམེཏི ཨཝདྷཱརེཏཱིཏི ཨཏྠོ. ཡཐཱཝུཏྟོ ནིཡམོཏི ཨུཔྤནྣབྷཱཝེ སཏི ཚཧི ཝིཉྙཱཎེཧི ཝིཉྙེཡྻབྷཱཝོ ནིཡནྟབྦཏཱཡ ‘‘ནིཡམོ’’ཏི ཝུཏྟོ, སོ རཱུཔེ ཨཏྠི ཨེཝ རཱུཔསྶེཝ ཏཾསབྷཱཝཏྟཱ. ཝིསིཊྛཀཱལསྶ ཝུཏྟཔྤཀཱརཾ ཨཝདྷཱརཎཾཡེཝ ཝཱ ཡཐཱཝུཏྟོ ནིཡམོ, སོ རཱུཔེ ཨཏྠིཡེཝ སམྦྷཝཏིཡེཝ, ན ཨརཱུཔེ ཝིཡ ན སམྦྷཝཏཱིཏི ཨཏྠོ དཊྛབྦོ. ཀཱལབྷེདནྟི ཀཱལཝིསེསཾ. ཨནཱམསིཏྭཱཏི ཨགྒཧེཏྭཱ. ཏཾ སབྦནྟི ཨནཱམཊྛཀཱལབྷེདཾ ཏཏོཡེཝ ཨརཱུཔེཧི སམཱནཝིཉྙེཡྻསབྷཱཝཾ སབྦཾ རཱུཔཾ. ཨུཔྤནྣནྟི ཨེཏེན ཀཱལབྷེདཱམསནེན ཝིསེསེཏི ‘‘ཨུཔྤནྣཾ…པེ… མེཝཱ’’ཏི.

ཝཏྟམཱནཀཱལིཀཾ སབྦཾ རཱུཔཾ དིཊྛསུཏམུཏཝིཉྙཱཏསབྷཱཝཾ, ཏཾ ཡཐཱསཀཾ ཚཧི ཝིཉྙཱཎེཧི ཝིཉྙེཡྻསབྷཱཝམེཝ, ན ཏེཧི ཨཝིཉྙེཡྻཾ. ནཱཔི ཨུཔྤནྣམེཝ ཚཧི ཝིཉྙཱཎེཧི ཝིཉྙེཡྻསབྷཱཝཾ ཨེཀནྟལཀྑཎནིཡམཱབྷཱཝཱཔཏྟིཏོཏི ཨེཝཾ ཨཝིཔརཱིཏེ ཨཏྠེ ཝིབྷཱཝིཏེཔི ཙོདཀོ ཨདྷིཔྤཱཡཾ ཨཛཱནནྟོ ‘‘ནནུ ཨེཝ’’ནྟིཨཱདིནཱ སབྦསྶ སབྦཱརམྨཎཏཱཔཏྟིཾ ཙོདེཏི. ཨིཏརོ ‘‘རཱུཔཾ སབྦཾ སམྤིཎྜེཏྭཱ’’ཏིཨཱདིནཱ ཨཏྟནོ ཨདྷིཔྤཱཡཾ ཝིབྷཱཝེཏི. ཨེཏྠ ཨེཀཱིབྷཱཝེན གཧེཏྭཱཏི ཨིདཾ ‘‘སམྤིཎྜེཏྭཱ’’ཏི ཨེཏསྶ ཨཏྠཝཙནཾ. ཨེཀནྟལཀྑཎཾ ཚཧི ཝིཉྙཱཎེཧི ཝིཉྙེཡྻསབྷཱཝོཡེཝ. ཨིདཾ ཝུཏྟཾ ཧོཏི – ཀིཉྩཱཔི པཉྩནྣཾ ཝིཉྙཱཎཱནཾ ཝིསཡནྟརེ ཨཔྤཝཏྟནཏོ ན སབྦསྶ སབྦཱརམྨཎཏཱ, སབྦསྶཔི པན རཱུཔསྶ ཚཝིཉྙཱཎཱརམྨཎབྷཱཝཏོ ཡཐཱསཀཾ ཚཧི ཝིཉྙཱཎེཧི ཝིཉྙེཡྻཏཱཡ ཚཧི ཝིཉྙཱཎེཧི ཝིཉྙེཡྻཏཱཝ ཨཏྠི, ཏཾ ཨེཀཏོ སངྒཧཎཝསེན གཧེཏྭཱ ‘‘ཨུཔྤནྣཾ སབྦཾ རཱུཔཾ ཚཧི ཝིཉྙཱཎེཧི ཝིཉྙེཡྻ’’ནྟི ¶ ཝུཏྟཾ ཡཐཱ ‘‘ཨབྷིཉྙཱཔྤཏྟཾ པཉྩམཛ྄ཛྷཱནཾ ཚལཱ༹རམྨཎཾ ཧོཏཱི’’ཏི. ཡཐཱ ཧི དིབྦཙཀྑུདིབྦསོཏཱདིཨབྷིཉྙཱཔྤཏྟསྶ པཉྩམཛ྄ཛྷཱནསྶ ཝིསུཾ ཨསབྦཱརམྨཎཏྟེཔི ཨེཀནྟལཀྑཎཝསེན ཨེཀཱིབྷཱཝེན གཧེཏྭཱ ཨཱརམྨཎཝསེན པཋམཛ྄ཛྷཱནཱདིཏོ ཝིསེསཾ དསྶེཏུཾ ‘‘ཨབྷིཉྙཱཔྤཏྟཾ པཉྩམཛ྄ཛྷཱནཾ ཚལཱ༹རམྨཎཾ ཧོཏཱི’’ཏི ཝུཙྩཏི, ཨེཝཾ ཨརཱུཔཏོ རཱུཔསྶ ཝིསཡཝསེན ཝིསེསཾ དསྶེཏུཾ ‘‘ཨུཔྤ ¶ …པེ… ཝིཉྙེཡྻ’’ནྟི ཝུཏྟནྟི. ཚཧི ཝིཉྙཱཎེཧི ཝིཉྙེཡྻབྷཱཝོ རཱུཔེ ནིཡམེཏབྦོ, ན པན རཱུཔཾ ཏསྨིཾ ནིཡམེཏབྦཾ, ཨནིཡཏདེསོ ཙ ཨེཝ-སདྡོཏི ཨཊྛཀཐཱཡཾ (དྷ. ས. ཨཊྚ. ༥༩༤) ‘‘པཙྩུཔྤནྣརཱུཔམེཝ ཙཀྑུཝིཉྙཱཎཱདཱིཧི ཚཧི ཝེདིཏབྦ’’ནྟི ཝུཏྟཾ. ‘‘པཙྩུཔྤནྣརཱུཔམེཝཱ’’ཏིཨཱདིནཱ ཏཏྠ དོསམཱཧ. ཏསྨཱཏི ཡསྨཱ པཱལི༹ཡཾ ཝིཉྙེཡྻམེཝཱཏི ཨེཝ-སདྡོ ཝུཏྟོ, ན ཙ ཏསྶ ཨཊྛཱནཡོཛནེན ཀཱཙི ཨིཊྛསིདྡྷི, ཨཐ ཁོ ཨནིཊྛསིདྡྷིཡེཝ སབྦརཱུཔསྶ ཨེཀནྟལཀྑཎནིཡམཱདསྶནཏོ, ཏསྨཱ. ཡཐཱརུཏཝསེནེཝ ནིཡམེ གཡ྄ཧམཱནེ ཨུཔྤ…པེ… པཏྟི ནཏྠི, ཏཏོ ཙ སོཏཔཏིཏཏཱཡཔི པཡོཛནཾ ནཏྠཱིཏི. ཝུཏྟནཡེནཱཏི ‘‘ཨརཱུཔཏོ ཝིདྷུར’’ནྟིཨཱདིནཱ ཝུཏྟནཡེན.

ཉཱཎསྶ ཝཱ ཨུཏྟརསྶ པུརིམཉཱཎཾ ཝཏྠུཀཱརཎནྟི ཉཱཎཝཏྠུ. ‘‘སཛཱཏཱི’’ཏི ཨེཏྠ ས-ཀཱརོ སམཱནསདྡཏྠོཏི དསྶེཏུཾ ‘‘སམཱནཛཱཏིཀཱན’’ནྟི ཝུཏྟཾ. སམཱནཛཱཏིཏཱ ཙ སམྨཱཝཱཙཱདཱིནཾ སཱིལནཏྠོ ཨེཝ. ཨེཏེན སམཱནསབྷཱཝཏཱ སཛཱཏིསངྒཧོཏི ཝེདིཏབྦོ. ཨཱརམྨཎེ ཙེཏསོ ཨཝིཀྑེཔཔྤཝཏྟིཡཱ ཨུཔཊྛཱནུསྶཱཧནཱནི ཝིཡ ཏེསཾ ཨཝིཀྑེཔོཔི ཨཏིསཡེན ཨུཔཀཱརཀོཏི ‘‘ཨཉྙམཉྙོཔཀཱརཝསེནཱ’’ཏི ཝུཏྟཾ. ཏེནེཝ ཝིཛྫམཱནེསུཔི ཨཉྙེསུ སཧཛཱཏདྷམྨེསུ ཨེཏེསཾཡེཝ སམཱདྷིཀྑནྡྷསངྒཧོ དསྶིཏོ. ཡཾ པན སཙྩཝིབྷངྒཝཎྞནཱཡཾ (ཝིབྷ. ཨཊྛ. ༡༨༩) ཝིསུདྡྷིམགྒཱདཱིསུ (ཝིསུདྡྷི. ༢.༥༦༨) ཙ ‘‘ཝཱཡཱམསཏིཡོ ཀིརིཡཏོ སངྒཧིཏཱ’’ཏི ཝུཏྟཾ, ཏཾ ཨསམཱདྷིསབྷཱཝཏཾ ཏེསཾ སམཱདྷིསྶ ཨུཔཀཱརཀཏྟཉྩ སནྡྷཱཡ ཝུཏྟཾ. ཏེནེཝ ཙ ཏཏྠ ‘‘སམཱདྷིཡེཝེཏྠ སཛཱཏིཏོ སམཱདྷིཀྑནྡྷེན སངྒཧིཏོ’’ཏི (ཝིསུདྡྷི. ༢.༥༦༨; ཝིབྷ. ཨཊྛ. ༡༨༩) ཝུཏྟཾ. ཨིདྷ པན སཛཱཏིསངྒཧོཏི སམཱདྷིཏདུཔཀཱརཀདྷམྨཱནཾ ཨུཔྤཏྟིདེསཝསེན སངྒཧོ ཝུཏྟོཏི. ཨཝིརཱདྷེཏྭཱ ཝིསཡསབྷཱཝཱཝགྒཧཎཾ པཊིཝེདྷོ, ཨཔྤནཱ ཙ ཨཱརམྨཎེ དལ༹ྷནིཔཱཏོ ཏདཝགཱཧོཡེཝཱཏི ‘‘པཊིཝེདྷསདིསཾ ཀིཙྩ’’ནྟི ཝུཏྟཾ. ཨཐ ཝཱ ཨཱརམྨཎཔཊིཝེདྷསྶ ཏདཱཧནནཔརིཡཱཧནནམནུགུཎཏཱཡ ¶ སམཱནནྟི པཉྙཱཝིཏཀྐཱནཾ ཀིཙྩསརིཀྑཏཱ ཝུཏྟཱ.

ཨེཀཀནིདྡེསཝཎྞནཱ ནིཊྛིཏཱ.

དུཀནིདྡེསོ

ཨུཔཱདཱབྷཱཛནཱིཡཝཎྞནཱ

༥༩༦. སམནྟཏོ ¶ སབྦསོ དསྶནཊྛེན ཙཀྑུ སམནྟཙཀྑཱུཏི ཨིམམཏྠཾ དསྶེཏུཾ ‘‘སབྦསངྑཏཱསངྑཏདསྶན’’ནྟི ཝུཏྟཾ. ཨེཝམཱདིནཱཏི ཨེཏྠ ཨཱདི-སདྡོ ‘‘དུཀྑཾ པརིཉྙེཡྻཾ པརིཉྙཱཏ’’ནྟི ཏཱིསུཔི པདེསུ པཙྩེཀཾ ཡོཛེཏབྦོ. ‘‘ཨིདཾ དུཀྑནྟི མེ, བྷིཀྑཝེ, པུབྦེ ཨནནུསྶུཏེསུ དྷམྨེསུ ཙཀྑུཾ ཨུདཔཱདི, ཉཱཎཾ ཨུདཔཱདཱི’’ཏིཨཱདིནཱ (མཧཱཝ. ༡༥; པཊི. མ. ༢.༣༠) ཧི པཱལི༹ པཝཏྟཱཏི. ཨཱཀཱརེནཱཏི དྭཱདསཝིདྷེན ཨཱཀཱརེན. ཏམྤི ཀཱམཱཝཙརཾ ཝིཔསྶནཱཔཙྩཝེཀྑཎཉཱཎབྷཱཝཏོ. ‘‘ཉཱཎཙཀྑུ སཧཨརིཡམགྒཾ ཝིཔསྶནཱཉཱཎནྟིཔི ཡུཛྫཏཱི’’ཏི ཝདནྟི. ཨགྒམགྒེན པན སཧ ཝིཔསྶནཱ པཙྩཝེཀྑཎཉཱཎནྟི ཡུཏྟཾ ཝིཡ དིསྶཏི.

ཡཐཱཝུཏྟེ མཾསཔིཎྜེ སསམྦྷཱརེ ཙཀྑུཝོཧཱརོ སནྟཱནཝསེན པཝཏྟམཱནེ ཙཏུསམུཊྛཱནིཀརཱུཔདྷམྨེ ཨུཔཱདཱཡ པཝཏྟོཏི ‘‘ཙཏུ…པེ… སམྦྷཱརཱ’’ཏི ཝུཏྟཾ. སཎྛཱནནྟི ཝཎྞཱཡཏནམེཝཱཏི ཏེན ཏེན ཨཱཀཱརེན སནྣིཝིཊྛེསུ མཧཱབྷཱུཏེསུ ཏཾཏཾསཎྛཱནཝསེན ཝཎྞཱཡཏནསྶ ཝིཉྙཱཡམཱནཏྟཱ ཝུཏྟཾ, ན ཝཎྞཱཡཏནསྶེཝ སཎྛཱནཔཉྙཏྟིཡཱ ཨུཔཱདཱནཏྟཱ. ཏཐཱ ཧི ཨནྡྷཀཱརེ ཕུསིཏྭཱཔི སཎྛཱནཾ ཝིཉྙཱཡཏཱིཏི. ཏཐཱ ཙ ཝཀྑཏི ‘‘དཱིགྷཱདཱིནི ཕུསིཏྭཱཔི སཀྐཱ ཛཱནིཏུ’’ནྟི, (དྷ. ས. ཨཊྚ. ༦༡༦) ‘‘དཱིགྷཱདིསནྣིཝེསཾ བྷཱུཏསམུདཱཡཾ ནིསྶཱཡཱ’’ཏི (དྷ. ས. མཱུལཊཱི. ༦༡༦) ཙ. ཏེསཾ སམྦྷཝསཎྛཱནཱནཾ ཨཱཔོདྷཱཏུཝཎྞཱཡཏནེཧི ཨནཏྠནྟརབྷཱཝེཔི ཏེཧི ཝིསུཾ ཝཙནཾ ཏཐཱབྷཱུཏཱནཾ སམྦྷཝབྷཱུཏཱནཾ སཎྛཱནབྷཱུཏཱནཉྩ. ཨེཏེན ཨཱཔོདྷཱཏུཝཎྞཱཡཏནཱནཾ ཝསེན ཝཏྟམཱནཨཝཏྠཱཝིསེསོ སམྦྷཝོ སཎྛཱནཉྩཱཏི ཨཡམཏྠོ དསྶིཏོ ཧོཏི. ཏཏྠ སམྦྷཝོ ཙཏུསམུཊྛཱནིཀོ སོལ༹སཝསྶཀཱལེ ཨུཔྤཛྫཏི. ཏསྶ རཱགཝསེན ཋཱནཱ ཝཙནཾ ཧོཏཱིཏི ཝདནྟི. ཨཏཐཱབྷཱུཏཱནཾ ¶ ཏཏོ ཨཉྙཐཱབྷཱུཏཱནཾ. ཡཐཱཝུཏྟེ སམྦྷཱརཝཏྠུསངྑཱཏེ. ཝིཛྫམཱནཏྟཱཏི བྷིཡྻོཝུཏྟིཝསེན ཝུཏྟཾ. ཏཐཱ ཧི ཁཱིཎཱསཝཱནཾ བྲཧྨཱནཉྩ སམྦྷཝོ ནཏྠཱིཏི. ཨཱཔོདྷཱཏུཝིསེསཏྟཱ སམྦྷཝོ ཨཱཔོདྷཱཏུསམྦནྡྷཱི ཨཱཔོདྷཱཏུཏནྣིསྶཡནིསྶིཏོཔི ཧོཏཱིཏི ཏསྶ ཙཏུདྷཱཏུནིསྶིཏཏཱཡ ཨཝིརོདྷོ ཝུཏྟོ.

ཨུཏུཙིཏྟཱཧཱརེཧི ཨུཔཏྠམྦྷིཡམཱནནྟི ཨེཏྠ ‘‘ཀལཱཔནྟརགཏཱ ཨུཏུཨཱཧཱརཱ ཨདྷིཔྤེཏཱ’’ཏི ཝདནྟི. ཨནེཀཀལཱཔགཏབྷཱཝཾ ཙཀྑུསྶ དསྶེཏི ཡཏོ ཨུཔདྡུཏཔཊལེ ནིརཱཀརཎེཔི ཙཀྑུ ཝིཛྫཏཱིཏི ¶ . པཊིགྷཊྚནཾ ཝིསཡཱབྷིམུཁབྷཱཝོ ནིགྷཾསཔཙྩཡཏྟཱ. ནིགྷཾསོ ནིསྶཡབྷཱཝཱཔཏྟི. ཡཏོ ཙཀྑཱདིནིསྶིཏཱ སཉྙཱ ‘‘པཊིགྷསཉྙཱ’’ཏི ཝུཙྩཏི.

ཨནེཀཏྟཱཏི ཨིདཾ ཨཝཙནསྶ ཀཱརཎཾ, ན ཧེཏུཀིརིཡཱཡ ཝིཉྙཱཡམཱནབྷཱཝསྶ. སོ པན ཨཔེཀྑཱསིདྡྷིཏོ ཨེཝ ཝེདིཏབྦོ. ཧེཏུཀིརིཡཱཔེཀྑཱ ཧི ཕལཀིརིཡཱཏི. ཙཀྑུཾ སངྒཎྷཱཏཱིཏི ཙཀྑུཝིཉྙཱཎསྶ ནིསྶཡབྷཱཝཱནུཔགམནེཔི ཏཾསབྷཱཝཱནཏིཝཏྟནཏོ ཏསྶཱ སམཉྙཱཡ ཏཏྠ ནིརུལ༹ྷབྷཱཝཾ དསྶེཏི. དསྶནཔརིཎཱཡཀཊྛོ ཙཀྑུསྶ ཨིནྡཊྛོཡེཝཱཏི ‘‘ཡཐཱ ཧི ཨིསྶརོ’’ཏིཨཱདིནཱ ཨིསྶརོཔམཱ ཝུཏྟཱ. ཙཀྑུཝིཉྙཱཎཾ དསྶནཀིཙྩེ པརིཎཱཡནྟཾ ཙཀྑུ ཏཾསཧཛཱཏེ ཙཀྑུསམྥསྶཱདཡོཔི ཏཏྠ པརིཎཱཡཏཱིཏི ཝུཙྩཏཱིཏི ‘‘ཏེ དྷམྨེ…པེ… པརིཎཱཡཏཱི’’ཏི ཝུཏྟཾ, ན པན ཙཀྑུསམྥསྶཱདཱིནཾ དསྶནཀིཙྩཏྟཱ. ཨཐ ཝཱ ཙཀྑུསམྥསྶཱདཱིནཾ ཨིནྡྲིཡཔཙྩཡབྷཱཝེན ཨུཔཀཱརཀཾ ཙཀྑུཝིཉྙཱཎཾ དསྶནཀིཙྩེ པརིཎཱཡནྟཾ ཙཀྑུ ཏཏྠ ཙཀྑུསམྥསྶཱདཡོཔི ཏདནུཝཏྟཀེ པརིཎཱཡཏཱིཏི ཨཏྠཱཡཾ པརིཡཱཡོཏི དསྶེནྟོ ཨཱཧ ‘‘ཏེ དྷམྨེ…པེ… ཎཱཡཏཱི’’ཏི. ཨནེཀཏྠཏྟཱ དྷཱཏཱུནཾ ཙཀྑཏཱིཏི ཨིམསྶ ‘‘པརིཎཱཡཏི པཀཱསེཏཱི’’ཏི ཙ ཨཏྠཱ ཝུཏྟཱ. སཎྛཱནམྤི རཱུཔཱཡཏནམེཝཱཏི ‘‘སམཝིསམཱནི རཱུཔཱནི ཙཀྑཏཱིཏི ཙཀྑཱུ’’ཏི ཝུཏྟཾ. ཏཾདྭཱརིཀཱནཾ ཕསྶཱདཱིནཾ ཨུཔནིསྶཡཔཙྩཡབྷཱཝོ ཨེཝ ཝལ༹ཉྫནཏྠོ.

༥༩༩. ཏཾདྭཱརིཀཱ…པེ… ཨུཔྤཏྟི ཝུཏྟཱཏི ཙཀྑུཝིཉྙཱཎེ ཨུཔྤནྣེ སམྤཊིཙྪནཱདཱིནི བལཝཱརམྨཎེ ཛཝནཾ ཨེཀནྟེན ཨུཔྤཛྫཏཱིཏི ཀཏྭཱ ཝུཏྟཾ. ཏཐཱ ཙེཝ ཧི ཨནྟརཱ ཙཀྑུཝིཉྙཱཎེ ཝཱ སམྤཊིཙྪནེ ཝཱ སནྟཱིརཎེ ཝཱ ཋཏྭཱ ནིཝཏྟིསྶཏཱིཏི ནེཏཾ ཋཱནཾ ཝིཛྫཏཱིཏི ནིཙྪིཏཾ. ཏེན པཙྩཡེནཱཏི ཏཾཔཀཱརེན པཙྩཡེན. ཏཾསདིསཱནནྟི གརུཾ ཀཏྭཱ ཨསྶཱདནཱདིཔྤཝཏྟིཝིསེསརཧིཏཏཱཡ དསྶནསདིསཱནཾ མནོདྷཱཏུསནྟཱིརཎཝོཊྛབྦནཱནཾ. པཉྩདྭཱརིཀཛཝནཱནཾ ¶ ཨསྶཱདནཱདིཏོ ཨཉྙཐཱ གརུཾ ཀཏྭཱ པཝཏྟི ནཏྠི རཱུཔདྷམྨཝིསཡཏྟཱཏི ‘‘ཨསྶཱདནཱབྷིནནྡནབྷཱུཏཱནཱི’’ཏི ཨེཏྟཀམེཝ ཝུཏྟཾ. མནོདྭཱརིཀཛཝནཔིཊྛིཝཊྚཀཱནམྤི ཧི པཉྩདྭཱརིཀཛཝནཱནཾ ཨསྶཱདནཱབྷིནནྡནབྷཱཝེན རཱུཔཾ གརུཾ ཀཏྭཱ པཝཏྟི ནཏྠཱིཏི ན སཀྐཱ ཝཏྟུནྟི. རཱུཔཾ ཨཱརམྨཎཱདྷིཔཏི ཨཀུསལསྶེཝ ཧོཏི. ཏཐཱ ཧི པཊྛཱནེ ‘‘ཨབྱཱཀཏོ དྷམྨོ ཨཀུསལསྶ དྷམྨསྶ ཨདྷིཔཏིཔཙྩཡེན པཙྩཡོ. ཨཱརམྨཎཱདྷིཔཏི ཙཀྑུཾ གརུཾ ཀཏྭཱ ཨསྶཱདེཏི ཨབྷིནནྡཏཱི’’ཏིཨཱདིནཱ (པཊྛཱ. ༡.༡.༤༡༦) རཱུཔདྷམྨོཔི ཨཱརམྨཎཱདྷིཔཏི ཝིབྷཏྟོ. ‘‘ཨབྱཱཀཏོ དྷམྨོ ཨབྱཱཀཏསྶ དྷམྨསྶ ཨབྱཱཀཏོ དྷམྨོ ཀུསལསྶཱ’’ཏི ཨེཏྠ པན ¶ ཕལནིབྦཱནཱནེཝ ཨཱརམྨཎཱདྷིཔཏིབྷཱཝེན ཝིབྷཏྟཱནཱིཏི. གཎནཱཡ ཙ ‘‘ཨཱརམྨཎཨཱརམྨཎཱདྷིཔཏིཨུཔནིསྶཡཔུརེཛཱཏཨཏྠིཨཝིགཏནྟི ཨེཀ’’ནྟི (པཊྛཱ. ༡.༡.༤༤༥) ཝུཏྟཾ. ཡདི ཀུསལསྶཔི སིཡཱ, དྭེཏི ཝཏྟབྦཾ སིཡཱཏི. ཏཱནཱིཏི ཡཐཱཝུཏྟཛཝནཱནི པཊིནིདྡིཊྛཱནི. ཏཾསམྤཡུཏྟཱནི ཙཱཏི ཛཝནསམྤཡུཏྟཱནི. ཨཉྙཱནི ཙཀྑུསམྥསྶཱདཱིནི. ཡདི རཱུཔསྶ ཨཱརམྨཎཔཙྩཡབྷཱཝམཏྟཾ ཨདྷིཔྤེཏཾ, ‘‘ཏཾ རཱུཔཱརམྨཎེཏི ཨེཏེནེཝ སིཛ྄ཛྷེཡྻཱ’’ཏི ཨེཏྟཀམེཝ ཝདེཡྻ. ཡསྨཱ པན རཱུཔཾ ཏཾདྭཱརིཀཛཝནཱནཾ པཙྩཡཝིསེསོཔི ཧོཏི, ཏསྨཱ ཏསྶ ཝིསེསསྶ དཱིཔནཏྠཾ ‘‘ཨཱརབྦྷཱ’’ཏི ཝཙནཾ ཝུཏྟཾ སིཡཱཏི ཨཱཧ ‘‘ཨཱརམྨཎཔཙྩཡཏོ ཨཉྙཔཙྩཡབྷཱཝསྶཔི དཱིཔཀ’’ནྟི.

༦༠༠. སོཏཝིཉྙཱཎཔྤཝཏྟིཡཾ སཝནཀིརིཡཱཝོཧཱརོཏི སོཏསྶ སཝནཀིརིཡཱཡ ཀཏྟུབྷཱཝོ སོཏཝིཉྙཱཎསྶ པཙྩཡབྷཱཝེནཱཏི ཝུཏྟཾ ‘‘སོཏཝིཉྙཱཎསྶ ནིསྶཡབྷཱཝེན སུཎཱཏཱི’’ཏི. ཛཱིཝིཏནིམིཏྟམཱཧཱརརསོ ཛཱིཝིཏཾ, ཏསྨིཾ ནིནྣཏཱཡ ཏཾ ཨཝ྄ཧཱཡཏཱིཏི ཛིཝ྄ཧཱཏི ཨེཝཾ སིདྡྷེན ཛིཝ྄ཧཱ-སདྡེན པཀཱསིཡམཱནཱ རསཱཝ྄ཧཱཡནསངྑཱཏཱ སཱཡནཀིརིཡཱ ལབྦྷཏཱིཏི ཀཏྭཱ ཝུཏྟཾ ‘‘ཛིཝ྄ཧཱསདྡེན ཝིཉྙཱཡམཱནཱ ཀིརིཡཱསཱཡན’’ནྟི. ཏཐཱ ཙ ཝཀྑཏི ‘‘ཛཱིཝིཏམཝ྄ཧཱཡཏཱིཏི ཛིཝ྄ཧཱ’’ཏི (ཝིབྷ. ཨཊྛ. ༡༥༤). ཨཱཡོཏི ཨུཔྤཏྟིདེསོ. པསཱདཀཱཡསྶ ཀཱཡིཀཱནཾ དུཀྑསུཁཱནཾ ནིསྶཡབྷཱཝཏོ ཨིཏརེསཾ ཨུཔནིསྶཡབྷཱཝཏོ ‘‘དུཀྑདུཀྑཝིཔརིཎཱམདུཀྑཱནཾ ཨཱཡོ’’ཏི ཝུཏྟཾ. བྱཱཔིཏཱཡཱཏི བྱཱཔིབྷཱཝེ, བྱཱཔིབྷཱཝེན ཝཱ. ཀཱཡཔྤསཱདབྷཱཝོཏི ཀཱཡཔྤསཱདསབྦྷཱཝོ. ཨནུཝིདྡྷཏྟཱཏི ཨནུཡུཏྟབྷཱཝཏོ, སཾསཊྛབྷཱཝཏོཏི ཨཏྠོ. ཏསྨཱཏི ཡསྨཱ ཡཱཝཏཱ ཨིམསྨིཾ ¶ ཀཱཡེ ཨུཔཱདིནྣཀཔཝཏྟཾ ནཱམ ཨཏྠི, སབྦཏྠ ཀཱཡཱཡཏནཾ ཀཔྤཱསཔཊལེ སྣེཧོ ཝིཡཱཏི ཝུཏྟཾ, ཏསྨཱ. པཎྜརསབྷཱཝཱ པསཱདཱ ཨཱཔཱཐགཏཾ ཝིསཡཾ ཝིཉྙཱཎུཔྤཏྟིཧེཏུབྷཱཝེན པཀཱསེནྟཱ ཝིཡ ཧོནྟཱིཏི ཏེསཾ ཝིསཡཱཝབྷཱསནཀིཙྩཏཱ ཝུཏྟཱ. སམཱནནིསྶཡཱནནྟི ཨེཀནིསྶཡཱནཾ. ཨཝིནིབྦྷུཏྟེསུ ཧི རཱུཔརསཱདཱིསུ ཡཾནིསྶཡཾ རཱུཔཾ, ཏཾནིསྶཡོ ཨེཝ རསཱདཱིཏི. ཨཉྙམཉྙསབྷཱཝཱནུཔགམེནཱཏི ལཀྑཎསངྐརཱབྷཱཝམཱཧ.

ཡསྨཱ པཙྩཡནྟརསཧིཏོཡེཝ ཙཀྑུཔྤསཱདོ རཱུཔཱབྷིཧནནཝསེན པཝཏྟཏི, ན པཙྩཡནྟརརཧིཏོ, ཏསྨཱ རཱུཔཱབྷིགྷཱཏོ ཧོཏུ ཝཱ མཱ ཝཱ ཧོཏུ, ཨེཝཾསབྷཱཝོ སོ རཱུཔདྷམྨོཏི དསྶེཏུཾ ‘‘རཱུཔཱབྷིགྷཱཏཱརཧོ’’ཏི ཝུཏྟཾ ཡཐཱ ‘‘ཝིཔཱཀཱརཧསབྷཱཝཱ ཀུསལཱཀུསལཱ’’ཏི. ཝིསཡཝིསཡཱིནཾ ཨཉྙམཉྙཾ ཨབྷིམུཁབྷཱཝོ ཨབྷིགྷཱཏོ ཝིཡཱཏི ཨབྷིགྷཱཏོ, སོ རཱུཔེ ཙཀྑུསྶ ¶ , ཙཀྑུམྷི ཝཱ རཱུཔསྶ ཧོཏཱིཏི ཝུཏྟཾ ‘‘རཱུཔེ, རཱུཔསྶ ཝཱ ཨབྷིགྷཱཏོ’’ཏི. ཏེནེཝཱཧ ‘‘ཡམྷི ཙཀྑུམྷི ཨནིདསྶནམྷི སཔྤཊིགྷམྷི རཱུཔཾ སནིདསྶནཾ སཔྤཊིགྷཾ པཊིཧཉྙི ཝཱ’’ཏི (དྷ. ས. ༥༩༧), ‘‘ཙཀྑུ ཨནིདསྶནཾ སཔྤཊིགྷཾ རཱུཔམྷི སནིདསྶནམྷི སཔྤཊིགྷམྷི པཊིཧཉྙི ཝཱ’’ཏི (དྷ. ས. ༥༩༨) ཙ ཨཱདི. ཨེཏྠ ཙ ཏཾཏཾབྷཝཔཏྠནཱཝསེན ཙཀྑཱདཱིསུ ཨཝིགཏརཱགསྶ ཨཏྟབྷཱཝནིཔྥཱདཀསཱདྷཱརཎཀམྨཝསེན པུརིམཾ ཙཀྑུལཀྑཎཾ ཝུཏྟཾ, སུདཱུརསུཁུམཱདིབྷེདསྶཔི རཱུཔསྶ གཧཎསམཏྠམེཝ ཙཀྑུ ཧོཏཱུཏི ཨེཝཾ ནིབྦཏྟིཏཨཱཝེཎིཀཀམྨཝསེན དུཏིཡཾ. ཨེས ནཡོ སེསེསུཔི. ཨཐ ཝཱ སཏིཔི པཉྩནྣཾ པསཱདབྷཱཝསཱམཉྙེ སཝིསཡཱཝབྷཱསནསངྑཱཏསྶ པསཱདབྱཱཔཱརསྶ དསྶནཝསེན པུརིམཾ ཝུཏྟཾ, པསཱདཀཱརཎསྶ སཏིཔི ཀམྨབྷཱཝསཱམཉྙེ ཨཏྟནོ ཀཱརཎབྷེདེན བྷེདདསྶནཝསེན དུཏིཡཾ.

ཀཱམཏཎྷཱཏི ཀཱམབྷཝེ ཏཎྷཱ. ཏཐཱ རཱུཔཏཎྷཱ དཊྛབྦཱ. ཏསྶ ཏསྶ བྷཝསྶ མཱུལཀཱརཎབྷཱུཏཱ ཏཎྷཱ ཏསྨིཾ ཏསྨིཾ བྷཝེ ཨུཔྤཛྫནཱརཧཱཡཏནཝིསཡཱཔི ནཱམ ཧོཏཱིཏི ཀཱམཏཎྷཱདཱིནཾ དཊྛུཀཱམཏཱདིཝོཧཱརཱརཧཏཱ ཝུཏྟཱ. དཊྛུཀཱམཏཱཏི ཧི དཊྛུམིཙྪཱ རཱུཔཏཎྷཱཏི ཨཏྠོ. ཏཐཱ སེསཱསུཔཱིཏི. ཨེཏྠ ཙ དཊྛུཀཱམཏཱདཱིནཾ ཏཾཏཾཨཏྟབྷཱཝནིབྦཏྟཀཀམྨཱཡཱུཧནཀྑཎཏོ སཏི པུརིམནིབྦཏྟིཡཾ ཝཏྟབྦཾ ནཏྠི. ཨསཏིཔི ཏསྶ མགྒེན ཨསམུགྒྷཱཏིཏབྷཱཝེནེཝ ཀཱརཎནྟི དཊྛབྦཾ. ཡཏོ ¶ མགྒེན ཨསམུཙྪིནྣཾ ཀཱརཎལཱབྷེ སཏི ཨུཔྤཛྫིཏྭཱ ཨཏྟནོ ཕལསྶ ཀཱརཎབྷཱཝཱུཔགམནཏོ ཝིཛྫམཱནམེཝཱཏི ཨུཔྤནྣཨཏྠིཏཱཔརིཡཱཡེཧི ཝུཙྩཏི ‘‘ཨརིཡཾ ཨཊྛངྒིཀཾ མགྒཾ བྷཱཝེནྟོ ཨརིཡཾ ཨཊྛངྒིཀཾ མགྒཾ བཧུལཱིཀརོནྟོ ཨུཔྤནྣུཔྤནྣེ པཱཔཀེ ཨཀུསལེ དྷམྨེ ཨནྟརཱཡེཝ ཨནྟརདྷཱཔེཏི’’ (སཾ. ནི. ༥.༡༥༧), ‘‘སནྟཾ ཝཱ ཨཛ྄ཛྷཏྟཾ ཀཱམཙྪནྡཾ ཨཏྠི མེ ཨཛ྄ཛྷཏྟཾ ཀཱམཙྪནྡོཏི པཛཱནཱཏཱི’’ཏི (དཱི. ནི. ༢.༣༨༢; མ. ནི. ༡.༡༡༥) ཙ ཨེཝམཱདཱིསུ.

ཨེཏྠཱཧ – ཙཀྑཱདཱིནཾ ཨིནྡྲིཡཱནཾ ཀིཾ ཨེཀཀམྨུནཱ ཨུཔྤཏྟི, ཨུདཱཧུ ནཱནཱཀམྨུནཱཏི? ཨུབྷཡཐཱཔཱིཏི པོརཱཎཱ. ཏཏྠ ནཱནཱཀམྨུནཱ ཏཱཝ ཨུཔྤཏྟིཡཾ ཙཀྑཱདཱིནཾ ཝིསེསེ ཝཏྟབྦཾ ནཏྠི ཀཱརཎསྶ བྷིནྣཏྟཱ. ཨེཀཀམྨུནཱ པན ཨུཔྤཏྟིཡཾ ཏེསཾ ཀཐཾ ཝིསེསོཏི? ཀཱརཎསྶ བྷིནྣཏྟཱཡེཝ. ཏཾཏཾབྷཝཔཏྠནཱབྷཱུཏཱ ཧི ཏཎྷཱ ཏཾཏཾབྷཝཔརིཡཱཔནྣཱཡཏནཱབྷིལཱསཏཱཡ སཡཾ ཝིཙིཏྟརཱུཔཱ ཨུཔནིསྶཡབྷཱཝེན ཏཾཏཾབྷཝནིབྦཏྟཀཀམྨསྶ ཝིཙིཏྟབྷེདཏཾ ཝིདཧཏི. ཡཏོ ཏདཱཧིཏཝིསེསཾ ཏཾ ཏཐཱརཱུཔསམཏྠཏཱཡོགེན ཨནེཀརཱུཔཱཔནྣཾ ཝིཡ ཨནེཀཾ ཝིསིཊྛསབྷཱཝཾ ཕལཾ ནིབྦཏྟེཏི. ཏཐཱ ཙ ཝཀྑཏི ‘‘ཀམྨམེཝ ནེསཾ ཝིསེསཀཱརཎ’’ནྟི. ན ཙེཏྠ སམཏྠཏཱབྷཱཝཏོ ཨཉྙཾ ¶ ཝེདིཏབྦཾ ཀཱརཎཝིསེསེནཱཧིཏཝིསེསསྶ ཝིསིཊྛཕལནིཔྥཱདནཡོགྱཏཱབྷཱཝཏོ. ཏཐཱ ཧི སཏི ཨེཀསྶཔི ཀམྨསྶ ཨནེཀིནྡྲིཡཧེཏུཏཱཝིསེསཡོགཾ ཨེཀམྤི ཀམྨནྟིཨཱདིནཱ ཡུཏྟིཏོ ཨཱགམཏོཔི པརཏོ སཡམེཝ ཝཀྑཏི. ཏཐཱ ཙ ཨེཀསྶེཝ ཀུསལཙིཏྟསྶ སོལ༹སཱདིཝིཔཱཀཙིཏྟནིབྦཏྟིཧེཏུབྷཱཝོ ཝུཙྩཏི. ལོཀེཔི ཨེཀསྶེཝ སཱལིབཱིཛསྶ པརིཔུཎྞཱཔརིཔུཎྞཏཎྜུལཕལནིབྦཏྟིཧེཏུཏཱ དིསྶཏི. ཀིཾ ཝཱ ཨེཏཱཡ ཡུཏྟིཙིནྟཱཡ, ན ཙིནྟིཏབྦམེཝེཏཾ. ཡཏོ ཀམྨཝིཔཱཀོ ཙཀྑཱདཱིནི ཀམྨཝིཔཱཀོ ཙ སབྦཱཀཱརཏོ བུདྡྷཱནཾཡེཝ ཀམྨཝིཔཱཀཉཱཎཕལཡུཏྟཱནཾ ཝིསཡོ, ན ཨཉྙེསཾ ཨཏཀྐཱཝཙརཏཱཡ. ཏེནེཝ ཙ བྷགཝཏཱ ‘‘ཀམྨཝིཔཱཀོ ཨཙིནྟེཡྻོ ན ཙིནྟེཏབྦོ, ཡོ ཙིནྟེཡྻ ཨུམྨཱདསྶ ཝིགྷཱཏསྶ བྷཱགཱི ཨསྶཱ’’ཏི (ཨ. ནི. ༤.༧༧) ཨཱདཱིནཝཾ དསྶེཏྭཱ པཊིཀྑིཏྟཾ. ཨཱཝིཉྪནཾ པུགྒལསྶ ཝིཉྙཱཎསྶ ཝཱ ཏཾནིནྣབྷཱཝཔྤཏྟིཡཱ ཧེཏུབྷཱཝོ.

སབྦེསནྟི པདསྶ པཀརཎཏོ པཱརིསེསཏོ ཝཱ ལབྦྷམཱནཾ ཨཏྠཝིསེསཾ ཨཛཱནནྟོ ཡཐཱརུཏཝསེནེཝ ཨཏྠཾ གཧེཏྭཱ ‘‘ཀོ ཨེཏྠ ཝིསེསོ’’ཏིཨཱདིནཱ ¶ ཙོདེཏི. ཨིཏརོ ཏེཛཱདཱིནཾ པཙྩེཀཾ ཨདྷིཀབྷཱཝེ ཝིཡ དྭིནྣཾ ཏིཎྞཾ ཝཱ ཨདྷིཀབྷཱཝེཔི ཡཐཱཝུཏྟཱདྷིཀབྷཱཝེནེཝ ཨེཀཀཱདིཝསེན ལབྦྷམཱནཱཡ ཨོམཏྟཏཱཡཔི ཀཱཡཔྤསཱདོ ན ཧོཏཱིཏི ཝིཉྙཱཡམཱནཏྟཱ པཀརཎཏོ པཱརིསེསཏོ ཝཱ ཙཏུནྣམྤི བྷཱུཏཱནཾ སམབྷཱཝེན ཀཱཡོ ཧོཏཱིཏི ཨཡམཏྠོ སིདྡྷོཏི སབྦ-སདྡོ ཨིདྷ སམབྷཱཝདཱིཔཀོཏི དསྶེཏུཾ ‘‘ཨིདཾ པནཱ’’ཏིཨཱདིམཱཧ. ཨིམམཏྠཾ དཱིཔེཏཱིཏི ཙ ཡཐཱཝུཏྟེན ཉཱཡེན ‘‘སབྦེས’’ནྟི ཝཙནཏོ ཨཡམཏྠོ ལབྦྷཏི, ན ཏསྶ ཝཱཙཀཏྟཱཏི དསྶེཏི. ཏེནེཝཱཧ ‘‘ཨནུཝཏྟ…པེ… ཝསེན ཝུཏྟཏྟཱ’’ཏི. ཨེཀདེསཱདྷིཀབྷཱཝནིཝཱརཎེནེཝ ཧི ཨེཀདེསོམཏྟཏཱནིཝཱརཎམྤི ཝིཉྙཱཡཏཱིཏི. ཨེཀདེསོ ཨཝཡཝོ. ཙཏུདྷཱཏུསམུདཱཡནིསྶཡསྶ ཧི པསཱདསྶ ཏདེཀདྷཱཏུཨདྷིཀཏཱ ཨཝཡཝཱདྷིཀཏཱ ཧོཏཱིཏི.

‘‘པུརིམཱ ཙེཏྠ དྭེཔི ཝཱདིནོ ནིཀཱཡནྟརིཡཱ’’ཏི ཝདནྟི. ཨཱལོཀཱདིསཧཀཱརཱིཀཱརཎསཧིཏཱནཾཡེཝ ཙཀྑཱདཱིནཾ རཱུཔཱདིཨཝབྷཱསནསམཏྠཏཱ ཝིཝརསྶ ཙ སོཏཝིཉྙཱཎུཔནིསྶཡབྷཱཝོ གུཎོཏི ཏེསཾ ལདྡྷཱིཏི ཨདྷིཔྤཱཡེན ‘‘ཏཾཏཾབྷཱུཏགུཎེཧཱི’’ཏིཨཱདི ཝུཏྟཾ. ཏེཛཱདཱིནཾ ཝིཡ ཝིཝརསྶ བྷཱུཏབྷཱཝཱབྷཱཝཏོ ‘‘ཡཐཱཡོག’’ནྟི ཝུཏྟཾ. ཨཐ ཝཱ རཱུཔཱདཡོ ཝིཡ ཝིཝརམྤི བྷཱུཏགུཎོཏི པརཱདྷིཔྤཱཡཾ དསྶེནྟོ ‘‘ཏཾཏཾབྷཱུཏགུཎེཧཱི’’ཏི ཨཱཧ. ཏེཛསྶ པན ཨཱལོཀརཱུཔེན, ཨཱཀཱསསངྑཱཏསྶ ཝིཝརསྶ སདྡེན, ཝཱཡུསྶ གནྡྷེན, ཨུདཀསྶ རསེན, པཐཝིཡཱ ཕོཊྛབྦེནཱཏི ཨིམམཏྠཾ ¶ སནྡྷཱཡ ‘‘ཡཐཱཡོགཾ ཏཾཏཾབྷཱུཏགུཎེཧཱི’’ཏི ཝུཏྟཾ སིཡཱ. རཱུཔཱདིགྒཧཎེཏི རཱུཔཱདིཝིསཡེ ཙཀྑུཝིཉྙཱཎཱདིཀེ ནིཔྥཱདེཏབྦེཏི ཨཏྠོ. ཨུཔཀརིཏབྦཏོཏི སཧཀཱརཱིཀཱརཎབྷཱུཏེཧི ཡཐཱཝུཏྟབྷཱུཏགུཎེཧི ཙཀྑཱདཱིནཾ སཀིཙྩཀརཎེ ཨུཔཀརིཏབྦཏོ. སབྷཱཝེན སུཡྻམཱནསྶཱཏི ཀེནཙི ཨནུཙྩཱརིཡམཱནསྶེཝ ལབྦྷམཱནཏྟཱ ཝུཏྟཾ. གྷཊྚནཾ པན ཝིནཱ ཝཱཡུསདྡོཔི ནཏྠཱིཏི. ཨཐ ཝཱ ཝཱཡུམྷི སདྡོ སབྷཱཝེན སུཡྻཏཱིཏི ཨཱཔེ རསོ མདྷུརོཏི ཙ ཏསྶ ལདྡྷིཡེཝཱཏི དཊྛབྦཾ. དུཏིཡཝཱདིསྶཔི ནིགྒཧོ ཧོཏི ཏསྶཔི ཏེཛཱདིགུཎཱ རཱུཔཱདཡོཏི ཨེཝཾལདྡྷིཀཏྟཱ.

རཱུཔཱདིཝིསེསགུཎེཧཱིཏི རཱུཔཱདིཝིསེསགུཎཡུཏྟེཧི. ཏེཛ…པེ… ཝཱཡཱུཧཱིཏི སཧཱཀཱསེཧི ཏེཛཱདིཔརམཱཎཱུཧི. ཀཔྤཱསཏོ ཝིསདིསཱཡཱཏི ¶ ཀཔྤཱསཔཐཝིཏོ ཝིསེསཡུཏྟཱཡ ཏཏོ ཨདྷིཀསཱམཏྠིཡཡུཏྟཱཡཱཏི ཨདྷིཔྤཱཡོ. ཏསྶཱཡེཝཱཏི ཀཔྤཱསཔཐཝིཡཱཡེཝ. ཡསྨཱ སཱ ཝིཛྫམཱནཱནིཔི ཨཝིསེསབྷཱུཏཱནི ཨཏྠཱིཏི གཧེཏུཾ ཨསཀྐུཎེཡྻབྷཱཝེན ཨབྷིབྷཝིཏྭཱ ཋིཏཱ, ཏསྨཱ ཏསྶཱཡེཝ གནྡྷོ ཨདྷིཀཏརོ བྷཝེཡྻཱཏི ཨཏྠོ. ཨཡཉྩ སབྦོ ཨུཏྟརོ ‘‘ཏསྶ ཏསྶ བྷཱུཏསྶ ཨདྷིཀཏཱཡཱ’’ཏིཨཱདིནཱ ཨཊྛཀཐཱཡཾ (དྷ. ས. ཨཊྛ. ༦༠༠) ཝུཏྟཏྟཱ ཏཐཱགཏཱནཾ ཝཱདཾ སམྤཊིཙྪིཏྭཱ ཝདནྟསྶ ཀཎཱདསྶ ཝསེན ཝུཏྟོ. ‘‘ཨཏྟནོ པན མཏེན ཀཎཱདཀཔིལཱདཡོ ཀེཝལཾ པཐཝཱདིདྲབྱམེཝཱཏིཨཱདི ལདྡྷི. ཀཎཱདསཱསནཱཡ ཨདྷིམུཏྟཱནཾ སཱསནེ ཨནཝགཱལ༹ྷཱནཾ ཀེསཉྩི ཨཡཾ ཝཱདོ’’ཏི ཙ ཝདནྟི. ཨེཏསྶུབྷཡསྶཱཏི ཨཱསཝགནྡྷཏོ ཀཔྤཱསགནྡྷོ ཨདྷིཀོ སཱིཏུདཀཝཎྞཏོ ཨུཎྷོདཀཝཎྞོ ཙ ཨདྷིཀོཏི ཨེཏསྶ ཨུབྷཡསྶ. ཏེཛཱདིཨདྷིཀེསུ ཙ སམྦྷཱརེསུ རཱུཔཱདཱིནཾ ཝིསེསསྶ ཨདསྶནཏོ ན རཱུཔཱདཡོ ཏེཛཱདཱིནཾ ཝིསེསགུཎོཏི སིདྡྷནྟི ཨཱཧ ‘‘ཏདབྷཱ…པེ… ཏྟིཏཱ’’ཏི. ཏེན ན རཱུཔཾ ཏེཛསྶ ཝིསེསགུཎོ ཨེཀནྟཏོ ཏེཛཱདིཀེ སམྦྷཱརེ ཝིསེསེན ཨདསྶནཏོ, ཡོ ཡསྶ ཝིསེསགུཎོ, ན སོ ཏདདྷིཀེ སམྦྷཱརེ ཨེཀནྟཏོ ཝིསེསེན དིསྶཏི ཡཐཱ པཐཝཱིཨདྷིཀེ སམྦྷཱརེ ཨཱཔོདྷཱཏཱུཏི དསྶེཏི. ཨེཝཾ སེསེསུཔི ཡཐཱཡོགཾ ཡོཛེཏབྦཾ. ཀོ པན ཝཱདོ ནཱནཱཀལཱཔེཏི སབྷཱཝཏོ ནཱནཏྟཱབྷཱཝེཔི མཱུལཀཱརཎནཱནཏྟཝསེན ཨཏྠི ཀོཙི ཝིསེསོ ཨསངྒྷཱཏེཏི དསྶེཏི, ཡཏོ པརམརཎཱདིཀིརིཡཱསམཏྠཏཱ ནེསཾ ཀེསཉྩིཡེཝ དིསྶཏཱིཏི.

ཨེཀམྤཱིཏི པི-སདྡེན ཨནེཀསྨིཾ ཝཏྟབྦམེཝ ནཏྠཱིཏི དསྶེཏི. པཉྩཱཡཏནིཀཏྟབྷཱཝེ པཏྠནཱ ཡཱ དཊྛུཀཱམཏཱདིབྷཱཝེན ཝུཏྟཱ, ཏཱཡ ནིཔྥནྣཾ. ཨེཏེན ཀཱརཎཝིསེསེན ཕལཝིསེསམཱཧ. ན ཧཱིཏིཨཱདིནཱ ཝུཏྟམེཝཏྠཾ སམཏྠཡཏི. ཏནྟི ཀམྨཾ. ཝིསེསེནཱཏི ཨཏྟནོ ཀཱརཎེན ཨཱཧིཏཱཏིསཡེན ¶ . ཏེནེཝ སོཏསྶ ན ཧོཏི པཙྩཡོ, ཏཏོ ཨཉྙེནེཝ པན ཧོཏཱིཏི ཨདྷིཔྤཱཡོ. ཏེན ཨནེཀསབྷཱཝེན ཀཱརཎེན ཨཱཧིཏཝིསེསཾ ཨེཀམྤི ཀམྨཾ ཨནེཀསབྷཱཝཾ ཕལཾ ནིཔྥཱདེཏུཾ སམཏྠཾ ཧོཏཱིཏི དསྶེཏི. ཨིདཱནི ཀམྨསྶ ཝུཏྟཔྤཀཱརཝིསེསཱབྷཱཝེ ¶ དོསམཱཧ ‘‘ཨིནྡྲིཡནྟརཱབྷཱཝཔྤཏྟིཏོ’’ཏི. ཏསྶཏྠོ – ཀཱརཎཝིསེསཱབྷཱཝེ ཕལཝིསེསསྶ ཨསམྦྷཝཏོ ཡཾ ཝིསེསཡུཏྟཾ ཀམྨཾ ཙཀྑུསྶ ཀཱརཎཾ, ཏསྶ ཏཏོ ཨཉྙཝིསེསཱབྷཱཝེ ཏདཉྙིནྡྲིཡུཔྤཱདཀཏཱཔི ན སིཡཱཏི སོཏིནྡྲིཡཱདཱིནཾ ཏཏོ ཨནུཔྤཏྟི ཨེཝ སིཡཱ. ཨེཝམིཏརཏྠཱཔི. ཝིསེསོཏི ཙེཏྠ ཀམྨསྶ ཏཾཏཾཨིནྡྲིཡུཔྤཱདནསམཏྠཏཱ ཨདྷིཔྤེཏཱ, སཱ ཙ པུབྦེ དསྶིཏསབྷཱཝོཝ.

ཨནེཀཱཧི མཧགྒཏཙེཏནཱཧི ཨེཀཱཡ ཝཱ པརིཏྟཙེཏནཱསཧིཏཱཡ པཊིསནྡྷིཀྑཎེ ཀཊཏྟཱརཱུཔཱནཾ ནིབྦཏྟཱིཏི ན སཀྐཱ ཝིཉྙཱཏུནྟི ‘‘སབྦེསཾ…པེ… ཝིཉྙཱཡཏཱི’’ཏི ཝུཏྟཾ. ཨིདཱནི ཏམེཝ ཨསཀྐུཎེཡྻཏཾ ཝིཏྠཱརཏོ དསྶེཏུཾ ‘‘ནཱནཱཙེཏནཱཡཱ’’ཏིཨཱདི ཝུཏྟཾ. ཏསྶཱཡཾ སངྑེཔཏྠོ – ‘‘པཊིས…པེ… པཙྩཡོ’’ཏི ཨེཏྠ ཡདི ནཱནཱཀམྨཝསེན ཨིནྡྲིཡཱནཾ ཨུཔྤཏྟི ཨདྷིཔྤེཏཱ, ཨེཝཾ སཏི མཧགྒཏཀམྨེན ཙ ཀཱམཱཝཙརཀམྨེན ཙ ཏཾཏཾཔཊིསནྡྷིཀྑཎེ ཀཊཏྟཱརཱུཔཾ ཨུཔྤནྣཾ སིཡཱ, ན ཙེཏཾ ཡུཏྟཾ ‘‘མཧགྒཏཙེཏནཱ ཀམྨཔཙྩཡོ’’ཏི (པཊྛཱ. ༢.༡༢.༧༨) ཝུཏྟཏྟཱ. ནཱཔི ཏཾཏཾབྷཝནིཡཏརཱུཔིནྡྲིཡེཧི ཝིཀལིནྡྲིཡཏཱ གཏིསམྤཏྟིཡཱ ཨོཔཔཱཏིཀཡོནིཡཾ པཊིསནྡྷིཀྑཎེ ཡུཏྟཱ. ཨཐ མཧགྒཏཱཧི ཨེཝ ནཱནཱཙེཏནཱཧི ནིབྦཏྟཾ, ན ཙེཀཱ པཊིསནྡྷི ཨནེཀཀམྨནིབྦཏྟཱ ཧོཏི. ནིཙྪིཏཉྷེཏཾ སཱཀེཏཔཉྷེནཱཏི. ཨེཝཾ ཨེཀེན མཧགྒཏཀམྨུནཱ ཙཀྑུནྡྲིཡསོཏིནྡྲིཡཧདཡཝཏྠཱུནཾ ཨུཔྤཏྟིཉཱཔཀེན ཨིམིནཱ ཝཙནེན པརིཏྟཀམྨུནཱཔི ཨེཀེན ཡཐཱརཧཾ ཨནེཀེསཾ ཨིནྡྲིཡཱནཾ ཨུཔྤཏྟི སིདྡྷཱཝཱཏི ཝུཏྟཾ ‘‘སིདྡྷམེཀེན ཀམྨེན ཨནེཀིནྡྲིཡུཔྤཏྟི ཧོཏཱི’’ཏི.

སམྤཏྟོཡེཝ ནཱམ སམྤཏྟིཀིཙྩཀརཎཏོཏི ཨིམམཏྠཾ དསྶེཏུཾ ‘‘པཊི…པེ… ནཀཏོ’’ཏི ཝུཏྟཾ. ཨཏིསུཁུམབྷཱཝཏོ མཾསཙཀྑུཨགོཙརེན རཱུཔཱཡཏནེན སམནྣཱགཏསངྒྷཱཏཝུཏྟིཏཱཡ ཙ ‘‘ཝཱཡུ ཝིཡཱ’’ཏི ཝུཏྟཾ. ཙིཏྟསམུཊྛཱནཾ སདྡཱཡཏནཾ སོཏཝིཉྙཱཎསྶ ཀདཱཙིཔི ཨཱརམྨཎཔཙྩཡོ ན སིཡཱ དྷཱཏུཔརམྤརཱཡ གྷཊྚེནྟསྶ ཨུཏུསམུཊྛཱནཏྟཱ. ཏེནཱཧ ‘‘ན ཧི…པེ… པཛྫཏཱི’’ཏི. པཊྛཱནེ (པཊྛཱ. ༡.༡.༢) ཙ ‘‘སདྡཱཡཏནཾ སོཏཝིཉྙཱཎསྶ ཨཱརམྨཎཔཙྩཡེན པཙྩཡོ’’ཏི ཨཝིསེསེན ཝུཏྟཾ.

ནནུ ཙིརེན སུཡྻནྟཱིཏི དཱུརེ ཋིཏཱནཾ ལཧུཀཾ སཝནཾ ནཏྠི, ཏེསམྤི ཝཱ ལཧུཀཾ སཝནེན དཱུརཱསནྣབྷཱཝཱནཾ ¶ ཝིསེསོ ན སིཡཱཏི ཨདྷིཔྤཱཡོ. ན ¶ , དཱུ…པེ… ཏོཏི ན དཱུརེ ཋིཏེཧི རཛཀཱདིསདྡཱ ཙིརེན སོཏཝིཉྙཱཎེན སུཡྻནྟི, སཙེ སཝནཱུཔཙཱརེ སོ སདྡོ དཱུརེ ཨཱསནྣེ ཙ ཋིཏཱནཾ ཡཐཱབྷཱུཏེ ཨཱཔཱཐགཏེ སདྡེ མནོཝིཉྙཱཎསངྑཱཏཏོ གཧཎཝིསེསཏོ ཙིརེན སུཏོ སཱིགྷཾ སུཏོཏི ཨབྷིམཱནོཏི ཨཏྠོ. ཨེཏམེཝཏྠཾ ཝིཏྠཱརཏོ དསྶེནྟོ ‘‘ཡཐཱ ཧཱི’’ཏིཨཱདིམཱཧ. ནིཙྪཡ…པེ… ཨབྷིམཱནོ ཧོཏི, སོཏཝིཉྙཱཎཔྤཝཏྟི པན ཨུབྷཡཏྠཱཔི སམཱནཱ, ཡསྨཱ སོ པན སདྡོ…པེ… ཨཱགཙྪཏཱིཏི. ཡདི དྷཱཏུཔརམྤརཱཡ སདྡོ ནཔྤཝཏྟཏི, ཀཐཾ པཊིགྷོསཱདཱིནཾ ཨུཔྤཏྟཱིཏི ཨཱཧ ‘‘དཱུརེ…པེ… པཙྩཡོ ཧོཏཱི’’ཏི. ཨུཔྤཏྟིཝསེན ཨཱགཏཱནཱིཏི ཨེཏེན རཱུཔདྷམྨཱཔི ཡཏྠ ཨུཔྤཛྫནྟི, ཏཏྠེཝ བྷིཛྫནྟི, ན དེསནྟརཾ སངྐམནྟཱིཏི དསྶེཏི. གྷཊྚནསབྷཱཝཱནེཝཱཏི ཏེསཾ བྷཱུཏཱནཾ སདྡསམུཔྤཏྟིཧེཏུབྷཱཝམཱཧ. སོཏཔདེསསྶཱཏི སོཏདེསསྶ, སོཏདེསེ ཋིཏསྶཱཏི ཨཏྠོ.

ཙཀྑུམཏོ པུགྒལསྶ ཨཛ྄ཛྷཱསཡཝསེནཱཏི ཙིཏྲཝིཙིཏྲརཱུཔཱཡཏནེ ཡེབྷུཡྻེན སཏྟཱནཾ ཙཀྑུདྭཱརིཀཛཝནསྶ ཨནུཀཌྜྷནཝསེན པཝཏྟིཾ སནྡྷཱཡ ཝུཏྟཾ. ཀཎྞཀཱུཔཙྪིདྡེཡེཝ པཝཏྟནཏོཏི ཨེཏེན ཨདྷིཊྛཱནཏོ བཧིདྡྷཱ ཨིནྡྲིཡཾ པཝཏྟཱིཏི ཝཱདཾ པཊིསེདྷེཏི. ཨདྷིཊྛཱནདེསེ ཨེཝ ཧི ཨིནྡྲིཡཾ ཝཏྟཏི ཏཏྠ ཀིཙྩཱདིཔྤཡོགདསྶནཏོ. སཏིཔི པནསྶ བཧིདྡྷཱ ཝུཏྟིཡཾ ན ཝིསཡགྒཧཎེ སམཏྠཏཱ, ཨཉྙཐཱ ཨདྷིཊྛཱནཔིདཧནེཔི ཝིསཡགྒཧཎཾ བྷཝེཡྻཱཏི. ཨཱརམྨཎགྒཧཎཧེཏུཏོ ཙཱཏི ཀཎྞཀཱུཔཙྪིདྡེཡེཝ ཋཏྭཱ ཨཱརམྨཎཀརཎསྶ ཝིཉྙཱཎསྶ ཝཱ ཧེཏུབྷཱཝཏོ.

ཏབྦོཧཱརེནཱཏི གནྡྷགནྡྷགྒཧཎསྶ སཧཙརིཏཱཡ གནྡྷོཔི ཏཐཱ ཝུཏྟོཏི ཨདྷིཔྤཱཡོ. གནྡྷོ པཙྩཡོཏི གནྡྷོ སཧཀཱརཱིཔཙྩཡོཏི ཨཏྠོ. ཁེལཱ༹དིཀོ པཙྩཡོཏི ཡོཛེཏབྦཾ. ཏཐཱ པཐཝཱིཏི སཧཀཱརཱིཔཙྩཡནྟརབྷཱུཏཱ ཨཛ྄ཛྷཏྟིཀབཱཧིརཱ པཐཝཱི ཨཱརམྨཎགྒཧཎེ པཙྩཡོཏི ཨཏྠོ. ཨཱདྷཱརབྷཱུཏཱཏི ཏེཛོཝཱཡོདྷཱཏཱུནཾ ཨཱདྷཱརབྷཱུཏཱ. ནིསྶཡབྷཱུཏཱནནྟི ནིསྶཡམཧཱབྷཱུཏཱནཾ ཨཱཔོཏེཛོཝཱཡོདྷཱཏཱུནཾ. སབྦདཱཏི ཨུཔྤཱིལ༹ནཀཱལེ ཙ ཨནུཔྤཱིལ༹ནཀཱལེ ཙ. ཏཏྠཱཏི ཙཏུརཱསཱིཏིཔབྷེདེ ཨུཔརིམཀཱཡསངྑཱཏེ རཱུཔསམཱུཧེ. ཝིནིབྦྷུཛྫིཏུཾ ཨསཀྐུཎེཡྻཱནནྟི ཨིདཾ ཙཀྑུདསཀཾ ཨིདཾ ཀཱཡདསཀཾ ཨིདཾ བྷཱཝདསཀནྟི ཨེཝཾ ཀལཱཔཏོཔི ཝིནིབྦྷུཛྫིཏུཾ ཨསཀྐུཎེཡྻཱནཾ.

༦༡༦. དཱིགྷཱདཱིནཾ ¶ ཕུསིཏྭཱ ཛཱནིཏབྦཏོཏི ཨིདཾ དཱིགྷཱདཱིནཾ ན ཀཱཡཝིཉྙཱཎགོཙརཏྟཱ ཝུཏྟཾ, དཱིགྷཱདིཝོཧཱརརཱུཔཱདཱིནཾ པན ཕོཊྛབྦཾ ཕུསིཏྭཱ ཀཱཡཝིཉྙཱཎཝཱིཐིཡཱ པརཏོ པཝཏྟེན མནོཝིཉྙཱཎེནཔི ¶ ཛཱནིཏབྦཏྟཱ ཝུཏྟཾ. དཱིགྷཱདིསནྣིཝེསནྟི དཱིགྷཱདིསནྣིཝེསཝནྟཾ. ཨེཀསྨིཾ ཨིཏརསྶ ཨབྷཱཝཱཏི ཚཱཡཱཏཔཱནཾ ཨཱལོཀནྡྷཀཱརཱནཉྩ ཨསཧཊྛཱཡིཏཾ ཨཱཧ. ཀཐཾ པན ཨཱལོཀོ ཨནྡྷཀཱརཾ ཝིདྷམཏཱིཏི? ‘‘ཨཱལོཀཔྤཝཏྟིསམཱནཀཱལཾ ཨནྡྷཀཱརསབྷཱཝེན པཝཏྟམཱནཾ ཝཎྞཱཡཏནཾ བྷིཛྫཏི. ཨནྡྷཀཱརསྶ ནིསྶཡོ ཧུཏྭཱ པཝཏྟམཱནཱནི བྷཱུཏཱནི ཀམེན ཏཐཱརཱུཔསྶ ཝཎྞཱཡཏནསྶ ནིསྶཡབྷཱཝཾ གཙྪནྟཱི’’ཏི ཀེཙི. སཧ ཨནྡྷཀཱརེན ཏནྣིསྶཡབྷཱུཏཱནཾ ནིརོདྷསམནནྟརཾ ཏཾསནྟཏིཡཾ ཏཱདིསེ པཙྩཡསནྣིཔཱཏེ ཨཱལོཀནིསྶཡབྷཱུཏཱནཾ ཨུཔྤཏྟཱིཏི ཝེདིཏབྦཾ. ན ཧི ནིསྶཡམཧཱབྷཱུཏེཧི ཝིནཱ ཨཱལོཀཔྤཝཏྟི ཨཏྠི, ནཱཔི ཨནྡྷཀཱརསངྑཱཏཾ ཝཎྞཱཡཏནམེཝ ནིརུཛ྄ཛྷཏི ཏཾནིསྶཡེཧི པཡུཛྫམཱནཀཨེཀཀལཱཔབྷཱུཏོཔཱདཱརཱུཔཱནཾ སཧེཝ ནིརུཛ྄ཛྷནཏོ. པདཱིཔསིཁཱམཎིརཾསིཡོ ཝིཡ པཐཝཱིཔཱཀཱརརུཀྑཱདཱིནི མུཉྩིཏྭཱཔི ཨནྡྷཀཱརོ པཝཏྟཏཱིཏི ཝདནྟི. མནྡཾ པན པཱཀཱརཱདིཨཱདྷཱརརཧིཏཾ ན སུཊྛུ པཉྙཱཡཏི, བཧལཾ ཨཱདྷཱརཾ ནིསྶཱཡ པཝཏྟཏཱིཏི ཡུཏྟནྟི ཙ ཝདནྟི.

༦༢༠. ‘‘ཨམནུསྶསདྡོ’’ཏི ཨེཏྠ ཨ-ཀཱརོ ན མནུསྶཏཱམཏྟནིཝཏྟིཨཏྠོ སདིསབྷཱཝདཱིཔནཏཱཡ ཨནདྷིཔྤེཏཏྟཱ, མནུསྶཏོ པན ཨནཉྙཏཱནིཝཏྟིཨཏྠོཏི དསྶེཏུཾ ‘‘ཨམནུསྶ…པེ… ཊྛཱདཡོཔཱི’’ཏི ཨཱཧ. ཏཐཱ ཀིཏྟེཏབྦོཏི ‘‘ཝཾསཕཱལནསདྡོ’’ཏིཨཱདིནཱ ཝཏྠུཝསེན ཀིཏྟེཏབྦོ.

༦༣༢. ཀམྨཙིཏྟཱདིནཱཏི ཨཱདི-སདྡེན ཨུཏུཨཱཧཱརེ སངྒཎྷཱཏི. ཏཾཏདཱཀཱརཱནཱིཏི ཨིཏྠིལིངྒཱདིཨཱཀཱརཱནི. ཨིཏྠིནྡྲིཡཾ པཊིཙྩ སམུཊྛཧནྟཱིཏི ཨཉྙམཉྙཔཙྩཡཱནིཔི ཨིཏྠིལིངྒཱདཱིནི ཡེབྷུཡྻེན ཨིཏྠིནྡྲིཡསཧིཏེ ཨེཝ སནྟཱནེ སབྦྷཱཝཱ ཨིཏརཏྠ ཙ ཨབྷཱཝཱ ཨིནྡྲིཡཧེཏུཀཱནི ཝུཏྟཱནི. ཨཉྙཐཱཏི ཨིཏྠིལིངྒཱདིཨཱཀཱརཏོ ཨཉྙཐཱ, ཨིཏྠིནྡྲིཡཱབྷཱཝེ ཝཱ. ཨིཏྠིགྒཧཎསྶ ཙཱཏི ཨིཏྠཱིཏི ཙིཏྟཔྤཝཏྟིཡཱ. ཏེསཾ རཱུཔཱནནྟི ཨིཏྠིལིངྒཱདིཨཱཀཱརརཱུཔཱནཾ. ཡདི ཨིཏྠིནྡྲིཡཾ ཨིཏྠིལིངྒཱདིཨཱཀཱརརཱུཔཱནཾ སཧཀཱརཱིཀཱརཎཾ, ཨཐ ཀསྨཱ ཏསྶ ཨིནྡྲིཡཱདིཔཙྩཡབྷཱཝོ ཏེསཾ ན ཝུཏྟོཏི? ནེཝ ཏཾ སཧཀཱརཱིཀཱརཎཾ, ཨཐ ཁོ ཏེསཾ ཏབྦྷཱཝབྷཱཝིཏཱམཏྟེན ཏཾ ཀཱརཎནྟི ཝུཙྩཏཱིཏི དསྶེཏུཾ ཨཱཧ ‘‘ཡསྨཱ པནཱ’’ཏིཨཱདི.

༦༣༣. ལིངྒཾ ¶ པརིཝཏྟམཱནཾ པུརིམལིངྒཱདྷཱརཛཱཏིཨནུརཱུཔམེཝ ཧུཏྭཱ པརིཝཏྟཏཱིཏི ཀཏྭཱ ཝུཏྟཾ ‘‘པཊིསནྡྷིཡཾ ཝིཡ པཝཏྟེཔཱི’’ཏི. ཡསྶ…པེ… ནོཏི ཨཱདིཝཙནཏོཏི ཨཱདི-སདྡེན ‘‘ཡསྶ ¶ ཝཱ པན པུརིསིནྡྲིཡཾ ཨུཔྤཛྫཏི, ཏསྶ ཨིཏྠིནྡྲིཡཾ ཨུཔྤཛྫཏཱིཏི ནོ’’ཏི (ཡམ. ༣.ཨིནྡྲིཡཡམཀ.༡༨༨) སངྒཎྷཱཏི.

༦༣༥. དྭཱརབྷཱཝེན ཀུཙྪིཏཱནཾ ཨཱསཝདྷམྨཱནཾ པཝཏྟིཊྛཱནཏཱཡ པསཱདཝིསེསེ ཝིཡ ཝིཉྙཏྟིཝིསེསེཔི ཀཱཡཝོཧཱརཔྤཝཏྟི དཊྛབྦཱ. ཝིཏྠམྦྷནསབྷཱཝཏཱཡ ཝཱཡོདྷཱཏུཡཱ ཐམྦྷནཾ ‘‘ཝཱཡོདྷཱཏུཀིཙྩ’’ནྟི ཝུཏྟཾ. ཀིཙྩམྤི ཧི དྷམྨཱནཾ སབྷཱཝོཡེཝཱཏི. པཐཝཱིདྷཱཏུཡཱ ཨཱཀཱརོ ཝཙཱིཝིཉྙཏྟཱིཏི ཝཏྟུཾ ཝཊྚཏཱིཏི ཡོཛནཱ.

༦༣༦. ཝིཏཀྐ…པེ… གཧིཏཱཏི ཡཐཱདྷིཔྤེཏཏྠཱབྷིབྱཉྫིཀཱཡ ཝཱཙཱཡ སམུཊྛཱཔནཱདྷིཔྤཱཡཔྤཝཏྟིཾ སནྡྷཱཡ ཝུཏྟཾ. ཏདཱ ཧི སཱ ཏེཧི པརིགྒཧིཏཱ ནཱམ ཧོཏཱིཏི. ཨེཀསྶཔི ཨཀྑརསྶ ཨནེཀེཧི ཛཝནེཧི ནིབྦཏྟེཏབྦཏྟཱ ཏཐཱ ནིབྦཏྟིཡམཱནཏཱཡ ཨསམཏྠསབྷཱཝཏྟཱ ན ཝིཉྙཱཏཝིསེསཱ ན བྷིནྣཱ ཨེཝཱཏི ཨཱཧ ‘‘སཝ…པེ… བྷིནྣཱ’’ཏི. ཨབྦོཀིཎྞེཏི ཨནྟརནྟརཱ ཨུཔྤཛྫམཱནེཧི ཨསཾསཊྛེ. ‘‘པཙྪིམཙིཏྟ’’ནྟི ཨཝིསེསེན ཙུཏིཙིཏྟཾ ཝུཏྟནྟི ཨདྷིཔྤཱཡེན ‘‘ཨཉྙེསམྤི ཙུཏིཙིཏྟཾ…པེ… ཉཱཡཏཱི’’ཏི ཝུཏྟཾ.

ཨཐ ཝཱ ‘‘ཡེ ཙ རཱུཔཱཝཙརཾ ཨརཱུཔཱཝཙརཾ ཨུཔཔཛྫིཏྭཱ པརིནིབྦཱཡིསྶནྟི, ཏེསཾ ཙཝནྟཱནཾ ཏེསཾ ཝཙཱིསངྑཱརོ ནིརུཛ྄ཛྷིསྶཏི, ནོ ཙ ཏེསཾ ཀཱཡསངྑཱརོ ནིརུཛ྄ཛྷིསྶཏཱི’’ཏི (ཡམ. ༢.སངྑཱརཡམཀ.༨༨) རཱུཔཱརཱུཔབྷཝཱུཔཔཛྫནཀཱནཾ ཀཱམཱཝཙརཙུཏིཙིཏྟསྶཔི ཀཱཡསངྑཱརཱསམུཊྛཱཔནཝཙནེན ཁཱིཎཱསཝེཧི ཨཉྙེསམྤི…པེ… ཉཱཡཏཱི’’ཏི ཝུཏྟཾ. ཡསྨཱ ཙ –

‘‘ཡསྶ ཀཱཡསངྑཱརོ ནིརུཛ྄ཛྷཏི, ཏསྶ ཝཙཱིསངྑཱརོ ནིརུཛ྄ཛྷིསྶཏཱིཏི ཨཱམནྟཱ’’ཏི (ཡམ. ༢.སངྑཱརཡམཀ.༡༠༨),

‘‘ཡསྶ ཀཱཡསངྑཱརོ ནིརུཛ྄ཛྷཏི, ཏསྶ ཙིཏྟསངྑཱརོ ནིརུཛ྄ཛྷིསྶཏཱིཏི ཨཱམནྟཱ’’ཏི (ཡམ. ༢.སངྑཱརཡམཀ.༡༠༨) ཙ,

‘‘པཙྪིམཙིཏྟསྶ བྷངྒཀྑཎེ ཏེསཾ ཀཱཡསངྑཱརོ ཙ ན ནིརུཛ྄ཛྷཏི ཙིཏྟསངྑཱརོ ཙ ན ནིརུཛ྄ཛྷིསྶཏཱི’’ཏི (ཡམ. ༢.སངྑཱརཡམཀ.༡༡༣) –

ཨཱདིཝཙནཏོ ¶ ¶ ཙ པཙྪིམཙིཏྟསྶ པུརཏོ སོལ༹སམེན ཙིཏྟེན ཏཏོ ཨོརིམེན ཝཱ སདྡྷིཾ ཨསྶཱསཔསྶཱསཱ ན ཨུཔྤཛྫནྟཱིཏི སིདྡྷཾ. ཡདི ཨུཔྤཛྫེཡྻུཾ, ‘‘པཙྪིམཙིཏྟསྶ བྷངྒཀྑཎེ ཏེསཾ ཀཱཡསངྑཱརོ ན ནིརུཛ྄ཛྷཏཱི’’ཏི ན ཝདེཡྻ, ཝུཏྟཉྩེཏཾ, ཏསྨཱ ཧེཊྛིམཀོཊིཡཱ ཙུཏིཏོ པུརིམེན སཏྟརསམེན ཨུཔྤནྣཱ ཨསྶཱསཔསྶཱསཱ ཙུཏིཡཱ ཧེཊྛཱ དུཏིཡེན ཙིཏྟེན སདྡྷིཾ ནིརུཛ྄ཛྷནྟི. ཏེན ‘‘ཡསྶ ཙིཏྟསྶ ཨནནྟརཱ ཀཱམཱཝཙརཱནཾ པཙྪིམཙིཏྟཾ ཨུཔྤཛྫིསྶཏཱི’’ཏི ཙུཏིཙིཏྟསྶཱནནྟརཔཙྩཡབྷཱུཏསྶཔི ཙིཏྟསྶ ཀཱཡསངྑཱརཱསམུཊྛཱཔནཏཱ ཝུཏྟཱ.

ཨཐ ཝཱ ཡསྶ ཙིཏྟསྶཱཏི ཡེན ཙིཏྟེན སབྦཔཙྪིམོ ཀཱཡསངྑཱརོ ཨུཔྤཛྫཏི. ཏཾ ཙིཏྟཾ ཝུཏྟནྟི གཧེཏབྦཾ, ན པཙྪིམཙིཏྟསྶ ཨནནྟརཔཙྩཡབྷཱུཏཾ. ཨནནྟརཱཏི ཧི ཀཱཡསངྑཱརུཔྤཱདནཾ ཨནྟརཾ ཝིནཱ, ཡཏོ པཙྪཱ ཀཱཡསངྑཱརུཔྤཱདནེན ཨནནྟརིཏཾ ཧུཏྭཱ པཙྪིམཙིཏྟཾ ཨུཔྤཛྫིསྶཏཱིཏི ཨཏྠོ. ཀསྨཱ? ‘‘ཨིཏརེསཾ ཝཙཱིསངྑཱརོ ཙ ནིརུཛ྄ཛྷིསྶཏི ཀཱཡསངྑཱརོ ཙ ནིརུཛ྄ཛྷིསྶཏཱི’’ཏི (ཡམ. ༢.སངྑཱརཡམཀ.༨༨) ཝུཏྟཏྟཱ. ཨཉྙཐཱཔཙྪིམཙིཏྟཏོ པུརིམཏཏིཡཙིཏྟསམངྒཱིནཾ ཀཱཡསངྑཱརོ ཨུཔྤཛྫཏཱིཏི ཨཱཔཛྫཏཱིཏི. ཨེཝཾ སབྦེསམྤི ཙུཏིཙིཏྟསྶ རཱུཔཛནཀཏཱབྷཱཝེ ཨཱགམཾ དསྶེཏྭཱ ཨིདཱནི ཡུཏྟིཾ དསྶེཏུཾ ‘‘ན ཧཱི’’ཏིཨཱདིམཱཧ. ཏཏྠ གབྦྷགམནཱདཱིཏི ཨཱདི-སདྡེན ཨུདཀནིམུགྒཨསཉྙཱིབྷཱུཏཀཱལཀཏཙཏུཏྠཛ྄ཛྷཱནསམཱཔནྣརཱུཔཱརཱུཔབྷཝསམངྒཱིནིརོདྷསམཱཔནྣབྷཱཝེ སངྒཎྷཱཏི.

༦༣༧. ཨནེཀེསཾ ཀལཱཔཱནཾ ཨེཀཏོ ཧུཏྭཱ ཨེཀགྷནཔིཎྜབྷཱཝེན པཝཏྟནཏོ ཀལཱཔནྟརབྷཱུཏཱནཾ ཀལཱཔནྟརབྷཱུཏེཧི སམྥུཊྛབྷཱཝོ ཝུཏྟོ. ཡཏོ ཏེསཾ དུཝིཉྙེཡྻནཱནཏྟཾ, ན པན ཨཝིནིབྦྷུཏྟབྷཱཝཏོ. ཏཾཏཾབྷཱུཏཝིཝིཏྟཏཱཏི ཏེསཾ ཏེསཾ བྷཱུཏཱནཾ ཝིབྷཏྟབྷཱཝོ ཀལཱཔནྟརབྷཱུཏེཧི ཝིབྷཏྟསབྷཱཝཏཱ ཨསཾཀིཎྞཏཱཏི ཨཏྠོ. ཡསྨཱ པན ཡཐཱཝུཏྟཱ ཝིཝིཏྟཏཱ རཱུཔཱནཾ ཨོསཱནཾ ཧོཏི, ཏསྨཱ ‘‘རཱུཔཔརིཡནྟོ’’ཏི ཝུཏྟཾ. ཨཐ ཝཱ ཏཾཏཾབྷཱུཏསུཉྙཏཱ. ཡེསཉྷི པརིཙྪེདོ ཨཱཀཱསོ, ཏེསཾ པརིཡནྟཏཱཡ ཏེཧི སུཉྙབྷཱཝོཏི ལཀྑིཏབྦོ. ཏཏོཡེཝ ཙ སོ བྷཱུཏནྟརེཧི ཝིཡ ཏེཧི ཨསམྥུཊྛོཏི ཝུཙྩཏཱིཏི. ཨཉྙཐཱཏི པརིཙྪིནྡིཏབྦེཧི ཨསམྥུཊྛབྷཱཝཱབྷཱཝེ.

༦༣༨. ཏཾཏཾཝིཀཱརཱདྷིཀརཱུཔེཧཱིཏི ¶ ཨེཏྠ ཀཐཾ ཙམྨསུཝཎྞེསུ མུདུཏཱཀམྨཉྙཏཱ ལབྦྷནྟི, ནནུ ལཧུཏཱདིཝིཀཱརཱ ཨེཀནྟཏོ ཨིནྡྲིཡབདྡྷརཱུཔེ ཨེཝ པཝཏྟནཏོ ཨནིནྡྲིཡབདྡྷེ ན ལབྦྷནྟཱིཏི? སཙྩམེཏཾ, ཨིདྷ པན ཏཾསདིསེསུ ཏབྦོཧཱརཝསེན ཝུཏྟཾ. ཏཐཱ ཧི ཏཱུལཔིཙུཨཱདཱིསུ གརུབྷཱཝཱདིཧེཏཱུནཾ ¶ བྷཱུཏཱནཾ ཨདྷིཀབྷཱཝཱབྷཱཝཏོ ལཧུཨཱདིཝོཧཱརོ. ནིདྡིསིཏབྦདྷམྨནིསྶཡརཱུཔེ ཨེཝ ཝཱ སནྡྷཱཡ ‘‘ཏཾཏཾཝིཀཱརཱདྷིཀརཱུཔེཧཱི’’ཏི ཝུཏྟནྟི དཊྛབྦཾ. སབྦེ སབྦེསཾ པཙྩཡཱ ལཧུཏཱདཱིནཾ ཨཉྙམཉྙཱཝིཛཧནཏོཏི ཨདྷིཔྤཱཡོ.

༦༤༡. ཨཱཙཡསདྡེནེཝཱཏི ནིདྡེསེ ཝུཏྟཨཱཙཡསདྡེནེཝ. ཡོ ཨཱཡཏནཱནཾ ཨཱདིཙཡཏྟཱ ཨཱཙཡོ པུནཔྤུནཾ ནིབྦཏྟམཱནཱནཾ, སོཝ རཱུཔསྶ ཨུཔརིཙཡཏྟཱ ཨུཔཙཡོཏི ཨདྷིཔྤེཏཾ ཨཏྠཾ པཱལི༹ཡཾ ཡོཛེཏྭཱ དསྶེཏུཾ ‘‘པཱལི༹ཡཾ པནཱ’’ཏིཨཱདི ཝུཏྟཾ. ཨུཔ-སདྡོ པཋམཏྠོ ‘‘དཱནཾ, བྷིཀྑཝེ, པཎྜིཏུཔཉྙཏྟ’’ནྟིཨཱདཱིསུ (ཨ. ནི. ༣.༤༥) ཝིཡ. ཨུཔརིཨཏྠོཙ ‘‘སམྨཊྛེ ཨུཔསིཏྟེ ཙ, ཏེ ནིསཱིདིཾསུ མཎྜཔེ’’ཏིཨཱདཱིསུ ཝིཡ. ཨཉྙཐཱཏི ཨུཔ-སདྡསྶ ཨུཔརིཨཏྠསྶེཝ གཧཎེ.

༦༤༣. ཕལཝིཔཙྩནཔཀཏིཡཱཏི ཕལཝིཔཙྩནསབྷཱཝེན. ཕལམེཝ ཝཱ པཀཏཱིཏི ཨཱཡུསཾཧཱནཱདིནཱ ཕལསབྷཱཝེན ཛརཱནིདྡེསོཏི ཨཏྠོ. ཏཐཱ ཧི ‘‘ཕལཱུཔཙཱརེན ཝུཏྟཱ’’ཏི ཝུཏྟཾ. སུཔརིཎཏརཱུཔཔརིཔཱཀཀཱལེ ཧཱནིདསཀཱདཱིསུ.

༦༤༥. ཀཏྟབྦསབྷཱཝཏོཏི མཱུལཕལཱདཱིནཾ ཨིདྷཱདྷིཔྤེཏཨཱཧཱརཝཏྠཱུནཾ མུཁེན ཨསནཱདིཀཏྟབྦསབྷཱཝཏོ. ཝིསབྷཱུཏེ སངྒྷཱཏེ ཨོཛཱ མནྡཱ ཧོཏཱིཏི སཝིསཏྟཱབྷཱཝཏོ སུཁུམཏཱ ཝུཏྟཱ. ཨངྒམངྒཱནུསཱརིནོ རསསྶ སཱརོཏི རསཧརཎཱིདྷམནིཛཱལཱནུསཱརེན སརཱིརཱཝཡཝེ ཨནུཔྤཝིཊྛསྶ ཨཱཧཱརརསསྶ ཨབྦྷནྟརཱཧཱརཔཙྩཡོ སྣེཧོ, ཡོ ལོཀེ རསདྷཱཏཱུཏི ཝུཙྩཏི.

ཨུཔཱདཱབྷཱཛནཱིཡཀཐཱཝཎྞནཱ ནིཊྛིཏཱ.

ནོཨུཔཱདཱབྷཱཛནཱིཡཀཐཱཝཎྞནཱ

༦༤༦. ‘‘ཨེཀཾ ¶ མཧཱབྷཱུཏཾ པཊིཙྩ ཏཡོ མཧཱབྷཱུཏཱ ཏཡོ མཧཱབྷཱུཏེ པཊིཙྩ ཨེཀཾ མཧཱབྷཱུཏ’’ནྟིཨཱདིཝཙནཏོ (པཊྛཱ. ༡.༡.༥༣) ཨེཀཾ མཧཱབྷཱུཏཾ ཨཝསེསམཧཱབྷཱུཏེ ནིསྶཡཏི, ཏེཧི ཨུཔཱདཱརཱུཔེན ཙ ནིསྶཱིཡཏཱིཏི ཨཱཧ ‘‘ནིསྶཡཏི ཙ ནིསྶཱིཡཏི ཙཱ’’ཏི.

༦༤༧. མཧཱབྷཱུཏཱནཾ ¶ ཨཉྙམཉྙཱཝིཛཧནཏོ ཨེཀསྨིམྤི ཀལཱཔེ ཨནེཀཾ ཕོཊྛབྦཾ ཨཏྠཱིཏི ཕོཊྛབྦསབྷཱཝེསུཡེཝ ཨནེཀེསུཔི ཨཱརམྨཎེསུ ཨཱཔཱཐགཏེསུ ཨཱབྷོགཱདིཝསེན ཨེཀཾཡེཝ ཝིཉྙཱཎུཔྤཏྟིཧེཏུ ཧོཏཱིཏི ཨཡཾ ཝིཙཱརོ དསྶིཏོ. ཨིཏརེསུཔི པན ཡཐཱཡོགཾ དསྶེཏབྦོ. ཏཏྠ རསཱརམྨཎཾ ཏཱཝ ཨིནྡྲིཡནིསྶཡཾ ཨལླཱིཡིཏྭཱ ཝིཉྙཱཎུཔྤཏྟིཧེཏུབྷཱཝཏོ སཏིཔི ཨནེཀེསཾ རསཱནཾ ཨཱཔཱཐགམནེ ཨེཀསྨིཾ ཁཎེ ཨེཀཔྤཀཱརཾཡེཝ ཡཐཱཝུཏྟནཡེན ཛིཝ྄ཧཱཝིཉྙཱཎུཔྤཏྟིཧེཏུ ཧོཏི, ཏཐཱ གནྡྷཱརམྨཎཾ. རཱུཔསདྡཱརམྨཎཱནི པན ཨིནྡྲིཡནིསྶཡཾ ཨསམྤཏྭཱཝ ཝིཉྙཱཎུཔྤཏྟིཧེཏུབྷཱཝཏོ ཡོགྱདེསེ ཨཝཊྛིཏཱནི ཡཏྟཀཱནི སཧཀཱརཱིཔཙྩཡནྟརགཏཾ ཨུཔཀཱརཾ ལབྷནྟི, ཏཏྟཀཱནི ཨེཀསྨིཾ ཁཎེ ཨེཀཛ྄ཛྷཾ ཨཱརམྨཎཾ ན ཧོནྟཱིཏི ན ཝཏྟབྦཱནི. ཏཐཱ ཧི སདྡོ ནིགྒྷོསཱདིཀོ ཨནེཀཀལཱཔགཏོ ཏཐཱ ཝཎྞོཔི སིཝིཀུབྦཧནནིཡཱམེན ཨེཀཛ྄ཛྷཾ ཨཱརམྨཎཾ ཧོཏཱིཏི. ཨེཏྠཱཔི ཙ ཨཱབྷུཛིཏཝསེན ཨཱརམྨཎཱདྷིམཏྟཏཱཝསེན ཨནེཀཀལཱཔསནྣིཔཱཏེཔི ཀཏྠཙི ཝིཉྙཱཎུཔྤཏྟི ཧོཏིཡེཝ. པསཱདཱདྷིམཏྟཏཱ པིཏྟཱདིཝིབནྡྷཱབྷཱཝེན པསཱདསྶ ཏིཀྑཏཱ. ཀཐཾ པན ཙིཏྟསྶཱཏི ཙིཏྟསཱམཉྙཏོ ཨེཀཏྟནཡཝསེན པུཙྪཏི.

༦༥༡. ཏཱདིསཱཡཱཏི ཡཱ པཙུརཛནསྶ ཨཏྠཱིཏིཔི ན གཧིཏཱ. སནྟཱི སམཱནཱ. ཨེཝནྟི ཡཐཱསསམྦྷཱརུདཀཾ སསམྦྷཱརཔཐཝིཡཱ ཨཱབནྡྷཀཾ, ཨེཝཾ པརམཏྠུདཀཾ པརམཏྠཔཐཝིཡཱཏི དསྶེཏི. ཏདནུརཱུཔཔཙྩཡེཧཱིཏི ཨཏྟནོ ཨཱབནྡྷནཱནུགུཎེཧི ཨཱབནྡྷིཡམཱནེཧི སནྡྷཱརཎཱདིཀིཙྩེཧི པུརིམེཧི ཙ པཐཝཱིཨཱདཱིཧི. ཨཕུསིཏྭཱ པཏིཊྛཱ ཧོཏི, ཨཕུསིཏྭཱ ཨཱབནྡྷཏཱིཏི ཨིམིནཱ ཕུསིཏབྦཕུསནཀབྷཱཝོ ཨཱཔོདྷཱཏུཡཾ ནཏྠཱིཏི ཕོཊྛབྦཝསེན ཨུབྷཡདྷམྨཏཾ ཨཱཧ. ཨཉྙམཉྙཾ ནིསྶཡཏཱ ཨཉྙམཉྙནིསྶཡཏཱ. ཨཐ ཝཱ ¶ ཨཉྙམཉྙཏཱ ཙ ནིསྶཡཏཱ ཙ ཨཉྙམཉྙནིསྶཡཏཱ. ཡདི ཕོཊྛབྦཱཕོཊྛབྦདྷཱཏཱུནཾ ཕོཊྛབྦབྷཱཝེན ཝིནཱ ཨཉྙམཉྙནིསྶཡཏཱ, པཐཝཱིཨཱདཱིནཾ ཀཀྑལཱ༹དིསབྷཱཝོ ཨེཝ ཕོཊྛབྦབྷཱཝོཏི ཏབྦིརཧེན ཀཐཾ ཏེསཾ ཨཱཔོདྷཱཏུཡཱ ནིསྶཡཱདིབྷཱཝོཏི ཨཱཧ ‘‘ཨཝིནིབྦྷོགཝུཏྟཱིསཱུ’’ཏིཨཱདི. ཨཉྙམཉྙཔཙྩཡབྷཱུཏེསཱུཏི ཨེཏེན ཨུཔཱདཱརཱུཔཾ ནིཝཏྟེཏི. ཨཐ ཝཱ པུབྦེ ཨཊྛཀཐཱདྷིཔྤཱཡེ ཋཏྭཱ ཕོཊྛབྦཱཕོཊྛབྦདྷཱཏཱུནཾ ཝིསིཊྛཾ ཨཉྙམཉྙནིསྶཡཏཾ ཝཏྭཱ ཨིདཱནི ཨཏྟནོ ཨདྷིཔྤཱཡེ ཋཏྭཱ ཨཝིསེསེན ཏཾ དསྶེནྟོ ཨཱཧ ‘‘ཨཝིནིབྦྷོགཝུཏྟཱིསཱུ’’ཏིཨཱདི. ཏཾཡེཝ ཨཝིསིཊྛཾ ཨཉྙམཉྙནིསྶཡཏཾ དལ༹ྷཾ ཀཏྭཱ དསྶེནྟོ ‘‘ནཱཔི སཧཛཱཏེསཱུ’’ཏིཨཱདིམཱཧ. ཏཏྠ ཨཕུསནཾ ཏཱཝ ཨེཀཀལཱཔགཏཏྟཱ ན ཝིཙཱརེཏབྦཾ, ཕུསནཾ པན ཀཐནྟི? ཨེཀཀལཱཔགཏཏྟཱ ཨེཝ. ཝིསུཾ སིདྡྷཱནཾཡེཝ ཧི ཝིསཡམཧཱབྷཱུཏཱནཾ ཀཱཡཔྤསཱདནིསྶཡབྷཱུཏེསུ ཕུསནཾ དིསྶཏི.

ཛྷཱཡཏཱིཏི ¶ པརིཔཙྩཏི. ན ཨུཎྷཱ ཧུཏྭཱཏི ཨེཏསྶ ཨུཎྷསབྷཱཝཱ ཧུཏྭཱཏི ཨཡམཏྠོཏི ཀཏྭཱ ‘‘ཏེཛོསབྷཱཝཏཾཡེཝ པཊིཀྑིཔཏཱི’’ཏི ཝུཏྟཾ. ཨུཎྷཔཊིཔཀྑཏྟཱ སཱིཏསྶ ཨུཎྷཏཱཡ པཊིཀྑེཔེ སཱིཏཏཱསངྐཱ སིཡཱཏི ཨཱཧ ‘‘ན སཱིཏཏྟཾ ཨནུཛཱནཱཏཱི’’ཏི. ཏེཛོསབྷཱགཏཾཡེཝ ཝཱ སཱིཏཏཱཡཔི དསྶེཏུཾ ‘‘ན སཱིཏཏྟཾ ཨནུཛཱནཱཏཱི’’ཏི ཝུཏྟཾ. ཏེནེཝཱཧ ‘‘ཏེཛོ ཨེཝ ཧི སཱིཏ’’ནྟི. མནྡེ ཧི ཨུཎྷབྷཱཝེ སཱིཏབུདྡྷཱིཏི ཏེཛོ ཨེཝ ཧི སཱིཏཾ. ཀཐཾ པནེཏཾ ཝིཉྙཱཡཏཱིཏི? སཱིཏབུདྡྷིཡཱ ཨཝཝཏྠིཏབྷཱཝཏོ པཱརཱཔཱརཾ ཝིཡ. ཏཐཱ ཧི ཨཱཏཔེ ཋཏྭཱ ཚཱཡཾ པཝིཊྛཱནཾ སཱིཏབུདྡྷི ཧོཏི, ཏཏྠེཝ པཐཝཱིགབྦྷཏོ ནིགྒཏཱནཾ ཨུཎྷབུདྡྷཱིཏི. ཡདི ཏེཛོཡེཝ སཱིཏཾ, ཨུཎྷབྷཱཝེན སདྡྷིཾ སཱིཏབྷཱཝོཔི ཨེཀསྨིཾ ཀལཱཔེ ཨུཔལབྦྷེཡྻཱཏི ཨཱཧ ‘‘སཱིཏུཎྷཱནཉྩཱ’’ཏིཨཱདི. ཨུཎྷསཱིཏཀལཱཔེསུ སཱིཏུཎྷཱནཾ ཨཔྤཝཏྟི. དྭིནྣཾ…པེ… ཡུཛྫཏི, ན ཨཱཔོདྷཱཏུཝཱཡོདྷཱཏཱུནཾ སཱིཏབྷཱཝེཏི ཨདྷིཔྤཱཡོ. ཨཱཔོདྷཱཏུཡཱ ཧི ཝཱཡོདྷཱཏུཡཱ སཱིཏབྷཱཝེ ཨུཎྷབྷཱཝེན སདྡྷིཾ ཨེཀསྨིཾ ཀལཱཔེ སཱིཏབྷཱཝོ ལབྦྷེཡྻ, ན པན ལབྦྷཏི. ན ཙེཏྠ ཨཱཔོདྷཱཏུཨདྷིཀེ ཝཱཡོདྷཱཏུཨདྷིཀེ ཝཱ ཀལཱཔེ སཱིཏབྷཱཝོཏི སཀྐཱ ཝིཉྙཱཏུཾ ཏཱདིསེཔི ཀཏྠཙི ཀལཱཔེ ཨལབྦྷམཱནཏྟཱ སཱིཏབྷཱཝསྶཱཏི. ཁརཏཱདིསབྷཱཝཱདྷིཀསྶ བྷཱུཏསངྒྷཱཏསྶ དཝཏཱདིསབྷཱཝཱདྷིཀཏཱཔཏྟི བྷཱཝཉྙཐཏྟཾ. ཏཾ པན ཡཐཱ ཧོཏི, ཏཾ དསྶེཏུཾ ‘‘པཙྩ…པེ… པྤཏྟཱི’’ཏི ཨཱཧ.

༦༥༢. ཨེཀནྟནཙིཏྟསམུཊྛཱནཱདཱིཏི ¶ ཨཱདི-སདྡེན ཨེཀནྟཨནུཔཱདིནྣུཔཱདཱནིཡཱདིཾ སངྒཎྷཱཏི. པུརིམཱནམྤཱིཏི ‘‘ཡཾ ཝཱ པནཉྙམྤཱི’’ཏི ཨེཏསྨཱ ཝཙནཏོ པུརིམཱནཾ ཨནུཔཱདིནྣཱནཾ སདྡཱཡཏནཀཱཡཝིཉྙཏྟིཨཱདཱིནཾ ནཙིཏྟསམུཊྛཱནཱནཉྩ ཙཀྑཱཡཏནསོཏཱཡཏནཱདཱིནཾ. ནཀམྨསྶཀཏཏྟཱབྷཱཝཱདིཀནྟི ནཀམྨསྶཀཏཏྟཱབྷཱཝཾ ནཙིཏྟསམུཊྛཱནབྷཱཝནྟི ཨེཝམཱདིཀཾ. ཨེཀནྟཱཀམྨཛཱདཱིསཱུཏི ཨཱདི-སདྡེན ཨེཀནྟཱཙིཏྟཛཾ གཡ྄ཧཏི. ཏཱ ཛརཏཱཨནིཙྩཏཱ. ཨནེཀནྟེསུ ན གཧིཏཱཏི ཨེཀནྟཏོ ཨཀམྨཛེསུ སདྡཱཡཏནཱདཱིསུ ཨཙིཏྟཛེསུ ཙ ཙཀྑཱཡཏནཱདཱིསུ གཧེཏྭཱ ཙཏུསམུཊྛཱནིཀཏྟཱ ཨནེཀནྟེསུ རཱུཔཱཡཏནཱདཱིསུ ན གཧིཏཱཏི ཨཏྠོ.

༦༦༦. ཨནིཔྥནྣཏྟཱཏི ཨཉྙཾ ཨནཔེཀྑིཏྭཱ སབྷཱཝཏོ ཨསིདྡྷཏྟཾ. ཏསྶཱཏི ཝིཉྙཏྟིདྭཡསྶ.

ནོཨུཔཱདཱབྷཱཛནཱིཡཀཐཱཝཎྞནཱ ནིཊྛིཏཱ.

དུཀནིདྡེསཝཎྞནཱ ནིཊྛིཏཱ.

ཙཏུཀྐནིདྡེསཝཎྞནཱ

༩༦༦. ‘‘སབྦཾ ¶ རཱུཔཾ མནསཱ ཝིཉྙཱཏ’’ནྟི ཝཙནཏོ ཡདི ཝིཉྙཱཏཏོ ཨཉྙཾ དིཊྛཱདི ན ཧོཏཱིཏི ‘‘ཀཏམཾ ཏཾ རཱུཔཾ དིཊྛ’’ནྟིཨཱདིནཱ པུཙྪཱ ན ཀཏཱ, ཨེཝཾ སནྟེ ཙཏུཀྐབྷཱཝོ ཀཐནྟི ཨནུཡོགཾ མནསི ཀཏྭཱ ཨཱཧ ‘‘དསྶནཱདིགྒཧཎཝིསེསཏོ’’ཏི. དསྶནཾ སཝནཾ མིནིཏྭཱ ཛཱནནཾ ཝིཛཱནནཉྩཱཏི ཨེཏསྨཱ དསྶནཱདིགྒཧཎཝིསེསཏོ. ཨེཏེན གཱཧཀབྷེདེན གཧེཏབྦབྷེདོཏི དསྶེཏི. ཨིདཱནི སམུཁེནཔི གཧེཏབྦབྷེདོ ལབྦྷཏཱིཏི དསྶེཏུཾ ‘‘དིཊྛཱ…པེ… བྷཱཝཏོ’’ཏི ཝུཏྟཾ.

པཉྩཀནིདྡེསཝཎྞནཱ

༩༦༩. ཏདིདཾ ནཡཀརཎཾ ཚབྦིདྷཱདཱིསུ ཏཱིསུ སངྒཧེསུ ཡོཛིཏཾ.

པཀིཎྞཀཀཐཱཝཎྞནཱ

༩༧༥. ཨེཀནྟཏོ ནཱིཝརཎཏྟཱ མིདྡྷསྶ ‘‘ནཏྠི ནཱིཝརཎཱ’’ཏི ཝཙནེན གཧཎནྟི དསྶེཏུཾ ‘‘མིདྡྷསྶཔི ནཱིཝརཎསྶཱ’’ཏི ཝུཏྟཾ. ན ཙ རཱུཔཾ པཧཱཏབྦཾ ནིཔྤརིཡཱཡཔྤཧཱནསྶ ཨིདྷ ¶ ཨདྷིཔྤེཏཏྟཱ. ཨེཏྠ ཀེཙི ‘‘ནཱམཀཱཡརཱུཔཀཱཡགེལཉྙསབྷཱཝཏོ དུཝིདྷཾ མིདྡྷཾ. ཏཏྠ པུརིམཾ ‘ནཱིཝརཎཱ’ཏི ཝཙནེན ཝུཏྟཾ, ཨིཏརཾ རཱུཔསབྷཱཝ’’ནྟི ཝདནྟི. ཏཏྠ ཡཾ ཏཾ ཨརཱུཔཏོ ཨཉྙཾ མིདྡྷཾ པརིཀཔྤིཏཾ, ཏམྤི ནཱིཝརཎཾ མིདྡྷསབྷཱཝཏོ ཨིཏརཾ མིདྡྷཾ ཝིཡཱཏི པརིཀཔྤིཏམིདྡྷསྶཔི ན སཀྐཱ ནཱིཝརཎབྷཱཝཾ ནིཝཏྟེཏུནྟི ཏེསཾ ཝཙནསྶ ནཱིཝརཎཔྤཧཱནཝཙནེན ཝིརོདྷཾ དསྶེནྟོ ‘‘ན ཙ རཱུཔཀཱཡ’’ནྟིཨཱདིམཱཧ. ཨཐ ཝཱ ཁཱིཎཱསཝཱནཾ སོཔྤནསབྷཱཝཏོ སོཔྤསྶ ཙ མིདྡྷཧེཏུཀཏྟཱ ཨཏྠི མིདྡྷརཱུཔནྟི ཝཱདཾ སནྡྷཱཡ ཨུཏྟརམཱཧ ‘‘ན ཙ རཱུཔཀཱཡགེལཉྙ’’ནྟིཨཱདིནཱ. ཏཏྠ མིདྡྷམེཝ སོཔྤཧེཏཱུཏི ནཱཡཾ ཨཝདྷཱརཎཱ ཨིཙྪིཏཱ, སོཔྤཧེཏུ ཨེཝ མིདྡྷནྟི པན ཨིཙྪིཏཱཏི མིདྡྷཏོ ཨཉྙོཔི སོཔྤཧེཏུ ཨཏྠི, ཀོ པན སོ? རཱུཔཀཱཡགེལཉྙཾ. ན ཙ རཱུཔ…པེ… ཝཙནཏོཏི ཡོཛནཱ དཊྛབྦཱ.

ཝཙཱིགྷོསཱདཱིཏི ཨཱདི-སདྡེན ཧུཾཀཱརཱདིསདྡོ སངྒཡ྄ཧཏི. ཨངྒུལིཕོཊཱདིསདྡོ ཨུཏུསམུཊྛཱནོཡེཝ, ཙིཏྟཔཙྩཡོ པན ཧོཏི. རཱུཔབྷཱཝམཏྟཱནཱིཏི ཛརཱམརཎསབྷཱཝཱནཾ རཱུཔཱནཾ ཏཾདྷམྨམཏྟཱནི, ཏཏོ ཨེཝ ན ཛཱཏིཨཱདིདྷམྨཝནྟཱནཱིཏི ཨཱཧ ‘‘ན སཡཾ སབྷཱཝཝནྟཱནཱི’’ཏི. ཡཐཱ ¶ ཛརཱ ཨནིཙྩཏཱ ཙ རཱུཔབྷཱཝམཏྟཾ, ཨེཝཾ ཛཱཏིཔཱིཏི ཛཱཏིཡཱ རཱུཔབྷཱཝམཏྟཏཱཡ ཨུཔསཾཧརཎཏྠོ ཏཐཱ-སདྡོ.

ཏེསཾ རཱུཔདྷམྨཱནཾ. སངྑཱཏཱདི-སདྡོ ཝིཡ ཨབྷིནིབྦཏྟིཏ-སདྡོཔི ཝཏྟམཱནཀཱལིཀོཔི ཧོཏཱིཏི ‘‘ཨབྷིནིབྦཏྟིཡམཱནདྷམྨཀྑཎསྨི’’ནྟི ཝུཏྟཾ. ཨེཝམཔཱིཏི ཡདིཔི ཛིརཎབྷིཛྫནབྷཱཝཱ ཛིརཎཱདིསབྷཱཝཱནཾ དྷམྨཱནཾ ཛནཀཔཙྩཡཀིཙྩཱནུབྷཱཝཀྑཎེ ཨབྷཱཝཏོ ཏཔྤཙྩཡབྷཱཝཝོཧཱརཾ ཨབྷིནིབྦཏྟིཝོཧཱརཉྩ ན ལབྷནྟི, ཨེཝམཔི ཏེསཾ ཨུཔཱདིནྣཏཱ ཝཏྟབྦཱཏི སམྦནྡྷོ. ‘‘ཛརཱམརཎཾ པཊིཙྩསམུཔྤནྣ’’ནྟི ཝཙནཏོ ཏསྶ པརིཡཱཡཏཾ ཝིཝརཏི ‘‘ཏེསཾ ཨུཔྤཱདེ སཏཱི’’ཏིཨཱདིནཱ.

ཡདི ཨེཝནྟི ཡདི ནིསྶཡཔཊིབདྡྷཝུཏྟིཀཱ ཛཱཏིཨཱདཡོ, ཨེཝཾ སཏི. ‘‘མཧཱབྷཱུཏཱནཾ ཨུཔཱདཱཡརཱུཔ’’ནྟི ཝཙནཏོ བྷཱུཏནིསྶིཏེསུ ཀེཝལོ ཨུཔཱདཱཡཝོཧཱརོཏི ཨུཔཱདཱཡེ ནིསྶིཏཱཔི ཨཔརེན ཨུཔཱདཱཡ-སདྡེན ཝིསེསེཏྭཱ ཝཏྟབྦཱཏི ཨདྷིཔྤཱཡེན ‘‘ཨུཔཱདཱཡུཔཱདཱཡབྷཱཝོ ཨཱཔཛྫཏཱི’’ཏི ཨཱཧ. ཀཱརཎཀཱརཎེཔི ཀཱརཎེ ཝིཡ ཝོཧཱརོ ཧོཏི ¶ ‘‘ཙོརེཧི གཱམོ དཌྜྷོ’’ཏི ཡཐཱཏི དསྶེནྟོ ‘‘བྷཱུཏ…པེ… ཏྟནཏོ’’ཏི ཨཱཧ. ཨིདཱནི པརམྤརཱ ཝིནཱ ནིཔྤརིཡཱཡཏོ ཨུཔྤཱདཱདཱིནཾ བྷཱུཏཔཊིབདྡྷབྷཱཝཾ སཧ ནིདསྶནེན དསྶེཏུཾ ‘‘ཨཔི ཙཱ’’ཏིཨཱདིམཝོཙ. ཝིཀཱརཔརིཙྪེདཱཔི ཨུཔཱདཱཡརཱུཔཝིཀཱརཱདིབྷཱཝེ བྷཱུཏཔཊིབདྡྷབྷཱཝཱཝིནིཝཏྟིཏོ ཨེཀསྨིཾ ཀལཱཔེ ཨེཀེཀཱཝ ཝིཀཱརཱདཡོཏི ཛཱིཝིཏིནྡྲིཡཾ ཝིཡ ཀལཱཔཱནུཔཱལཀཾ ཀལཱཔཝིཀཱརཱདིབྷཱཝཏོ ཙ ‘‘ཨུཔཱདཱཡརཱུཔཱནི’’ཨིཙྩེཝ ཝུཙྩནྟཱིཏི ཨཱཧ ‘‘ཨེཝཾ ཝིཀཱ…པེ… ཡོཛེཏབྦཱནཱི’’ཏི.

ཨསངྑཏབྷཱཝནིཝཱརཎཏྠཾ པརིནིཔྥནྣཏཱ ཝུཏྟཱཏི ཨིདཾ ཨཔརིནིཔྥནྣསབྷཱཝཝཏོ ཨནུཔལབྦྷམཱནཏཱཡ སསཝིསཱཎཾ ཝིཡ ཀེནཙི ན སངྑཏནྟི ཨསངྑཏཾ ནཱམ སིཡཱཏི ཨིམིསྶཱ ཨཱསངྐཱཡ ནིཝཏྟནཝསེན ཝུཏྟཾ. ཨཐ ཝཱ རཱུཔཝིཀཱརཱདིབྷཱཝཏོ རཱུཔབྷཱཝོ ཝིཡ རཱུཔེ སཏི སནྟི, ཨསཏི ན སནྟཱིཏི སིདྡྷཱཡ པཊིཙྩསམུཔྤནྣཏཱཡ སཱདྷིཏཱ པརིནིཔྥནྣཏཱ ཏེསཾ སངྑཏབྷཱཝཾ སཱདྷེནྟཱི ཨསངྑཏབྷཱཝཾ ནིཝཱརཎཏྠཾ ཛཱཡཏཱིཏི ཝུཏྟཾ ‘‘ཨསངྑཏབྷཱཝནིཝཱརཎཏྠཾ པརིནིཔྥནྣཏཱ ཝུཏྟཱ’’ཏི.

པཀིཎྞཀཀཐཱཝཎྞནཱ ནིཊྛིཏཱ.

རཱུཔཀཎྜཝཎྞནཱ ནིཊྛིཏཱ.

༣. ནིཀྑེཔཀཎྜཾ

ཏིཀནིཀྑེཔཀཐཱཝཎྞནཱ

༩༨༥. ཡཐཱཝུཏྟཕསྶཔཉྩམཀཱདིརཱསིཀིཙྩརཧིཏཏྟཱ ¶ ¶ ཀེཙི དྷམྨེ ཝིསུཾ ཋཔེཏྭཱ སོཝཙསྶཏཱདིཨཝུཏྟཝིསེསསངྒཎྷནཏྠཉྩ, ཝེནེཡྻཛ྄ཛྷཱསཡཝསེན ཝཱ ཚནྡཱདཡོ ‘‘ཡེཝཱཔནཱ’’ཏི ཝུཏྟཱཏི ཡེཝཱཔནཀཱནཾ པདུདྡྷཱརེན ནིདྡེསཱནརཧཏཱཡ ཀཱརཎཾ ཝུཏྟནྟི ཧདཡཝཏྠུསྶ ཏཐཱ ནིདྡེསཱནརཧཏཱཡ ཀཱརཎཾ ཝདནྟོ ‘‘སུཁུམུཔཱ…པེ… ཧིཏསྶཱ’’ཏི ཨཱཧ. སུཁུམབྷཱཝེཔི ཨིནྡྲིཡཱདིསབྷཱཝཱནི ཨུཔཱདཱཡརཱུཔཱནི ཨཱདྷིཔཙྩཱདིཝསེན པཱཀཊཱནི ཧོནྟི, ན ཨཏཾསབྷཱཝཾ སུཁུམུཔཱདཱཡརཱུཔནྟི ཧདཡཝཏྠུསྶ པདུདྡྷཱརེན ཀུསལཏྟིཀཔདབྷཱཛནེ ནིདྡེསཱནརཧཏཱ ཝུཏྟཱ. སུཁུམབྷཱཝཏོཡེཝ ཧི ཏཾ མཧཱཔཀརཎེཔི ‘‘ཡཾ རཱུཔཾ ནིསྶཱཡ མནོདྷཱཏུ ཙ མནོཝིཉྙཱཎདྷཱཏུ ཙ ཝཏྟནྟཱི’’ཏི (པཊྛཱ. ༡.༡.༨) ནིསྶིཏདྷམྨམུཁེན དསྶིཏནྟི. ཝེནེཡྻཛ྄ཛྷཱསཡཝསེན ཝཱ ཧདཡཝཏྠུ པདུདྡྷཱརེན ན དསྶིཏནྟི དཊྛབྦཾ. ཡེན པན ཨདྷིཔྤཱཡེན རཱུཔཀཎྜེ ཧདཡཝཏྠུ དུཝིདྷེན རཱུཔསངྒཧཱདཱིསུ ན ཝུཏྟཾ, སོ རཱུཔཀཎྜཝཎྞནཱཡ ཝིབྷཱཝིཏོ ཨེཝཱཏི. ནིཀྑིཔིཏྭཱཏི པདསྶ པཀྑིཔིཏྭཱཏི ཨཏྠོཏི ཨདྷིཔྤཱཡེན ‘‘ཝིཏྠཱརདེསནཾ ཨནྟོགདྷཾ ཀཏྭཱ’’ཏི ཝུཏྟཾ. མཱུལཱདིཝསེན ཧི དེསིཏཱ ཀུསལཱདིདྷམྨཱ ཏཾཏཾཙིཏྟུཔྤཱདཱདིཝསེནཔི དེསིཏཱ ཨེཝ ནཱམ ཧོནྟི ཏཾསབྷཱཝཱནཏིཝཏྟནཏོཏི.

མཱུལཝསེནཱཏི སུཔྤཏིཊྛིཏབྷཱཝསཱདྷནཝསེན. ཨེཏཱནི ཧེཏུཔདཱདཱིནི ཧིནོཏི ཕལཾ ཨེཏསྨཱ པཝཏྟཏཱིཏི ཧེཏུ, པཊིཙྩ ཨེཏསྨཱ ཨེཏཱིཏི པཙྩཡོ, ཛནེཏཱིཏི ཛནཀོ, ནིབྦཏྟེཏཱིཏི ནིབྦཏྟཀོཏི སེསཱནཾ ཝཙནཏྠོ. ‘‘མཱུལཊྛསྶ…པེ… ཝུཏྟ’’ནྟི ཀསྨཱ ཝུཏྟཾ, ནནུ ‘‘པཱིལ༹ནཊྛོ’’ཏིཨཱདཱིསུ ཝིཡ མཱུལབྷཱཝོ མཱུལཊྛོ, ཏཱིཎི ཀུསལམཱུལཱནཱིཏི ཨཡཉྩ མཱུལཏོ ནིཀྑེཔོཏི? ན, མཱུལསྶ ཨཏྠོ མཱུལཊྛོ ¶ , སོ ཨེཝ མཱུལཊྛོཏི སུཔྤཏིཊྛིཏབྷཱཝསཱདྷནཊྛེན མཱུལསབྷཱཝཱནཾ ཨལོབྷཱདིདྷམྨཱནཾ ཀུསལདྷམྨེསུ ཀིཙྩཝིསེསསྶ ཨདྷིཔྤེཏཏྟཱ. ཏེནེཝཱཧ ‘‘ཨཏྠོཏི དྷམྨཀིཙྩ’’ནྟི. ཨཐ ཝཱ ཨཏྠཝསེནཱཏི ‘‘ཏཱིཎི ཀུསལམཱུལཱནཱི’’ཏི ཝུཏྟཱནཾ ཏེསཾ མཱུལཱནཾ སབྷཱཝསངྑཱཏཨཏྠཝསེན, ན གཱཐཱཡ ཝུཏྟཨཏྠཝསེན. ཡསྨཱ ¶ པན སོ མཱུལཊྛོཡེཝ ཙ ཧོཏི, ཏསྨཱ ཝུཏྟཾ ‘‘ཨལོབྷཱདཱིན’’ནྟིཨཱདི. ཨལོབྷཱདཡོ ཝིཡ ཝེདནཱཀྑནྡྷཱདཡོཔི ཨདྷིཀཏཏྟཱ ཏཾ-སདྡེན པཊིནིདྡིསིཏབྦཱཏི ཝུཏྟཾ ‘‘ཏེ ཀུསལམཱུལཱ ཏཾསམྤཡུཏྟཱ’’ཏི. ཏེཧི ཨལོབྷཱདཱིཧཱིཏི ཨེཏྠ ཨཱདི-སདྡེན ཝཱ ཝེདནཱཀྑནྡྷཱདཡོཔི སངྒཧིཏཱཏི དསྶེཏུཾ ‘‘ཏེ ཀུསལམཱུལཱ ཏཾསམྤཡུཏྟཱ’’ཏི ཝུཏྟཾ.

‘‘ཀཏམེ དྷམྨཱ ཀུསལཱ’’ཏི པུཙྪིཏྭཱ ཕསྶཱདིབྷེདཏོ ཙཏྟཱརོ ཁནྡྷེ དསྶེཏྭཱ ‘‘ཨིམེ དྷམྨཱ ཀུསལཱ’’ཏི (དྷ. ས. ༡) ཝུཏྟཏཱ ཁནྡྷཱ ཙ ཀུསལནྟི ཝུཏྟཾ ‘‘ཁནྡྷེཧི སབྷཱཝཏོ ཀུསལེ པརིཡཱདིཡཏཱི’’ཏི. ཝེདནཱཀྑནྡྷོ ཝཱཏི ཀུསལཾ…པེ… ཝིཉྙཱཎཀྑནྡྷོ ཝཱཏི. ཨཉྙསྶ ཨཏྟནོ ཕལསྶ. མཱུལེཧི ཀུསལཱནཾ ཨནཝཛྫཏཱཡ ཧེཏུཾ དསྶེཏཱིཏི ཨིདཾ ན མཱུལཱནཾ ཀུསལསྶ ཨནཝཛྫབྷཱཝསཱདྷཀཏྟཱ ཝུཏྟཾ, ཨཐ ཁོ ཏསྶ ཨནཝཛྫཏཱཡ སུཔྤཏིཊྛིཏབྷཱཝསཱདྷཀཏྟཱ. ཡདི ཧི མཱུལེཧི ཀཏོ ཀུསལཱནཾ ཨནཝཛྫབྷཱཝོ བྷཝེཡྻ, ཏཾསམུཊྛཱནརཱུཔསྶཔི སོ བྷཝེཡྻ, མཱུལཱནཾ ཝཱ ཏེསཾ པཙྩཡབྷཱཝོ ན སིཡཱ, ཧོཏི ཙ སོ. ཝུཏྟཉྷེཏཾ ‘‘ཧེཏཱུ ཧེཏུ…པེ… པཙྩཡོ’’ཏི (པཊྛཱ. ༡.༡.༡.). ཀིཉྩ བྷིཡྻོ ཀུསལཱནཾ ཝིཡ ཨཀུསལཱབྱཱཀཏཱནམྤི ཏབྦྷཱཝོ མཱུལཔཊིབདྡྷོ བྷཝེཡྻ, ཏཐཱ སཏི ཨཧེཏུཀཱནཾ ཨཀུསལཱབྱཱཀཏཱནཾ ཏབྦྷཱཝོ ན སིཡཱ, ཏསྨཱ ཀུསལཱདཱིནཾ ཡོནིསོམནསིཀཱརཱདིཔཊིབདྡྷོ ཀུསལཱདིབྷཱཝོ, ན མཱུལཔཊིབདྡྷོ, མཱུལཱནི པན ཀུསལཱདཱིནཾ སུཔྤཏིཊྛིཏབྷཱཝསཱདྷནཱནཱིཏི ཝེདིཏབྦཾ. སཧེཏུཀཱ ཧི དྷམྨཱ ཝིརུལ༹ྷམཱུལཱ ཝིཡ པཱདཔཱ སུཔྤཏིཊྛིཏཱ ཐིརཱ ཧོནྟི, ན ཏཐཱ ཨཧེཏུཀཱཏི. ཏཾསམྤཡོགཀཏཾ ཨནཝཛྫསབྷཱཝནྟི ཨིདམྤི ན ཨནཝཛྫསབྷཱཝསྶ ཏཾསམྤཡོགེན ནིཔྥཱདིཏཏྟཱ ཝུཏྟཾ, ཨནཝཛྫསབྷཱཝཾ པན ཝིསེསེཏྭཱ དསྶེཏུཾ ཝུཏྟཾ. ཨལོབྷཱདིསམྤཡོགཏོ ཧི ཀུསལཱདཱིནཾ ཁནྡྷཱནཾ ཨནཝཛྫབྷཱཝོ སུཔྤཏིཊྛིཏོ ཛཱཡཏི, ན ཨཧེཏུཀཱབྱཱཀཏཱནཾ ཝིཡ ན སུཔྤཏིཊྛིཏོཏི. ཡདི ཨེཝཾ ན ཏེསཾ ཁནྡྷཱནཾ ཀུསལཱདིབྷཱཝོ དསྶིཏོ སིཡཱ? ན, ཨདྷིཀཱརཏོ ཀུསལབྷཱཝསྶ ཝིཉྙཱཡམཱནཏྟཱ. ཀམྨ-སདྡོ ཝིཡ ཝིཔཱཀདྷམྨཏཱཝཱཙིནོ ན མཱུལཀྑནྡྷསདྡཱ, སོ ཙ ཨིདྷ ཨཝིསེསཏོ ཝུཏྟོཏི ཨཱཧ ‘‘ཀམྨེཧི སུཁཝིཔཱཀཏཾ དསྶེཏཱི’’ཏི. ཨཱདིཀལྱཱཎཏཾ ཀུསལཱནཾ ¶ དསྶེཏཱིཏི ཡོཛནཱ. ཨནཝཛྫཧེཏུསབྷཱཝསུཁཝིཔཱཀབྷཱཝནིདཱནཱདིསམྤཏྟིཡོ དཊྛབྦཱ, ཡོནིསོམནསིཀཱརཨཝཛྫཔཊིཔཀྑཏཱཨིཊྛཝིཔཱཀཏཱཝསེནཔི ནིདཱནཱདིསམྤཏྟིཡོ ¶ ཡོཛེཏབྦཱ. ཡོནིསོམནསིཀཱརཏོ ཧི ཀུསལཱ ཨལོབྷཱདིམཱུལཀཱ, ཨལོབྷཱདིསམྤཡོགཏོ ཙ ལོབྷཱདིཔཊིཔཀྑསུཁཝིཔཱཀཱཝ ཛཱཏཱཏི.

༩༨༦. ‘‘ཀསྨཱ ཝུཏྟ’’ནྟི ཨནུཡུཉྫིཏྭཱ ཙོདཀོ ‘‘ནནཱུ’’ཏིཨཱདིནཱ ཨཏྟནོ ཨདྷིཔྤཱཡཾ ཝིཝརཏི. ཨིཏརོ ཡཐཱཝུཏྟམོཧསྶ ཨིདྷ སམྤཡུཏྟ-སདྡེན ཨཝུཙྩམཱནཏཾ ‘‘སཙྩམེཏ’’ནྟི སམྤཊིཙྪིཏྭཱ ‘‘ཏེནཱ’’ཏིཨཱདིནཱ པརིཧཱརམཱཧ. ཏསྶཏྠོ – ‘‘ཏཾསམྤཡུཏྟཱ’’ཏིཔདེན ཀིཉྩཱཔི ཡཐཱཝུཏྟམོཧོ པདྷཱནབྷཱཝེན ན གཧིཏོ, ནཱནནྟརིཡཀཏཱཡ པན གུཎབྷཱཝེན གཧིཏོཏི. ཨཉྙཏྠ ཨབྷཱཝཱཏི ཡཐཱཝུཏྟསམྤཡུཏྟཏོ ཨཉྙཏྠ ཨབྷཱཝཱ. ན ཧི ཝིཙིཀིཙྪུདྡྷཙྩསཧགཏོ མོཧོ ཝིཙིཀིཙྪུདྡྷཙྩཱདིདྷམྨེཧི ཝིནཱ ཧོཏཱིཏི.

༩༨༧. ཨུཔྤཱདཱདིསངྑཏལཀྑཎཝིནིཝཏྟནཏྠཾ ‘‘ཨནིཙྩདུཀྑཨནཏྟཏཱ’’ཏི ཝུཏྟཾ. ཨུཔྤཱདཱདཡོ པན ཏདཝཏྠདྷམྨཝིཀཱརབྷཱཝཏོ ཏཾཏཾདྷམྨགྒཧཎེན གཧིཏཱཡེཝ. ཏཐཱ ཧི ཝུཏྟཾ ‘‘ཛརཱམརཎཾ དྭཱིཧི ཁནྡྷེཧི སངྒཧིཏ’’ནྟི (དྷཱཏུ. ༧༡), ‘‘རཱུཔསྶ ཨུཔཙཡོ’’ཏི ཙ ཨཱདི. ཀེསཀུམྦྷཱདི སབྦཾ ནཱམཾ ནཱམཔཉྙཏྟི, རཱུཔཝེདནཱདིཨུཔཱདཱནཱ བྲཧྨཝིཧཱརཱདིགོཙརཱ ཨུཔཱདཱཔཉྙཏྟི སཏྟཔཉྙཏྟི, ཏཾཏཾབྷཱུཏནིམིཏྟཾ བྷཱཝནཱཝིསེསཉྩ ཨུཔཱདཱཡ གཧེཏབྦོ ཛྷཱནགོཙརཝིསེསོ ཀསིཎཔཉྙཏྟི. པརམཏྠེ ཨམུཉྩིཏྭཱ ཝོཧརིཡམཱནཱཏི ཨིམིནཱ ཝིཧཱརམཉྩཱདིཔཉྙཏྟཱིནཾ སཏྟཔཉྙཏྟིསདིསཏཾ དསྶེཏི, ཡཏོ ཏཱ སཏྟཔཉྙཏྟིགྒཧཎེན གཡ྄ཧནྟི. ཧུཏྭཱ ཨབྷཱཝཔཊིཔཱིལ༹ནཨཝསཝཏྟནཱཀཱརབྷཱཝཏོ སངྑཏདྷམྨཱནཾ ཨཱཀཱརབྷཱཝཏོ སངྑཏདྷམྨཱནཾ ཨཱཀཱརཝིསེསབྷཱུཏཱནི ལཀྑཎཱནི ཝིཉྙཏྟིཨཱདཡོ ཝིཡ ཝཏྟབྦཱནི སིཡུཾ, ཏཱནི པན ནིསྶཡཱནཔེཀྑཾ ན ལབྦྷནྟཱིཏི པཉྙཏྟིསབྷཱཝཱནེཝ ཏཛྫཱཔཉྙཏྟིབྷཱཝཏོཏི ན ཝུཏྟཱནི, སཏྟགྷཊཱདིཏོ ཝིསེསདསྶནཏྠཾ པན ཨཊྛཀཐཱཡཾ ཝིསུཾ ཝུཏྟཱནཱིཏི. ན ཧི ཀོ…པེ… ཝཏྟུཾ ཡུཏྟཾ ཀུསལཏྟིཀསྶ ནིཔྤདེསཏྟཱ.

༩༨༨. བྷཝཏི ཨེཏྠཱཏི བྷཱུམི, ནིསྶཡཔཙྩཡབྷཱཝཏོ སུཁསྶ བྷཱུམི སུཁབྷཱུམི. སུཁཝེདནཱསཧིཏཾ ཙིཏྟཾ. ཏསྶ བྷཱུམིབྷེདེན ནིདྡྷཱརཎཏྠཾ ཏཾནིསྶཡབྷཱུཏཱ ¶ སམྤཡུཏྟདྷམྨཱ ‘‘ཀཱམཱཝཙརེ’’ཏི ཝུཏྟཱ. ཏསྶ ཝཱ ཨེཀདེསབྷཱུཏསྶ སམུདཱཡབྷཱཝཏོ ཨཱདྷཱརཎབྷཱཝེན ཨཔེཀྑིཏྭཱ ཏཾསམཱནབྷཱུམི ‘‘ཀཱམཱཝཙརེ’’ཏི ཝུཏྟཱ. ཏཏྠ ‘‘སུཁབྷཱུམིཡཾ ཀཱམཱཝཙརེ’’ཏི དྭེཔི བྷུམྨཝཙནཱནི བྷིནྣཱདྷིཀརཎབྷཱཝེན ཨཊྛཀཐཱཡཾ ཝུཏྟཱནཱིཏི ཨུབྷཡེསམྤི སམཱནཱདྷིཀརཎབྷཱཝེན ཨཏྠཡོགཾ ¶ དསྶེཏུཾ ‘‘སུཁབྷཱུམཱིཏི ཀཱམཱཝཙརཱདཡོཔི ཡུཛྫནྟཱི’’ཏི ཝུཏྟཾ. ཡཐེཝ ཧི ཙིཏྟཾ, ཨེཝཾ སབྦེཔི པརིཏྟསུཁེན སམྤཡུཏྟཱ དྷམྨཱ ཏསྶ ནིསྶཡབྷཱཝཏོ བྷཱུམི ཀཱམཱཝཙརཱཏི. ཨཊྛཀཐཱཡམྤི ཝཱ ཨཡམཏྠོ ཝུཏྟོཡེཝཱཏི དཊྛབྦཾ. ‘‘ཙིཏྟ’’ནྟི ཧི ཙིཏྟུཔྤཱདོཔི ཝུཙྩཏི. ཏེན ཝུཏྟཾ ‘‘ཙིཏྟཾ ཨུཔྤནྣནྟི ཨེཏྠ ཙིཏྟམེཝ ཨགྒཧེཏྭཱ པརོཔཎྞཱསཀུསལདྷམྨེཧི སདྡྷིཾཡེཝ ཙིཏྟཾ གཧིཏ’’ནྟི. ཨེཝཉྩ ཀཏྭཱཏི སུཁབྷཱུམིཡནྟི ཙིཏྟུཔྤཱདསྶ ཝིཉྙཱཡམཱནཏྟཱ. ཝིབྷཱགདསྶནཾ ཝིསེསདསྶནཾ. བྷཱསིཏབྦཾ བྷཱསིཏཾ, ཏདེཝ ཨཏྠོཏི བྷཱསིཏཏྠོ. ཨབྷིདྷེཡྻཏྠོ. ཏདཏྠཝིཉྙཱཔནེནཱཏི ཏིཀདུཀཱནཾ ཀུཙྪིཏཱནཾ སལནཱདིཨཏྠདཱིཔཀེན.

༩༩༤. ཀོ པན ཝཱདོ ཁནྡྷཱརམྨཎསྶཱཏི པུབྦཱཔརབྷཱཝེན ཝཏྟམཱནེ ཨརཧཏོ ཁནྡྷེ ཨེཀཏྟནཡཝསེན སནྟཱནཏོ ‘‘ཨམྷཱཀཾ མཱཏུལཏྠེརོ’’ཏིཨཱདིནཱ ཨཱལམྦིཏྭཱ པཝཏྟམཱནཾ ཨུཔཱདཱནཾ ཏསྶ ཨུཔཱདཱནཀྑནྡྷེཡེཝ གཎྷཱཏི. སཏིཔི ཏཾསནྟཏིཔརིཡཱཔནྣེ ལོཀུཏྟརཀྑནྡྷེ ཏཏྠ པཝཏྟིཏུཾ ཨསམཏྠབྷཱཝཏོ ཀཱ པན ཀཐཱ ཁནྡྷེ ཨཱརབྦྷ པཝཏྟམཱནེ. ཨེཏེན ནཏྠི མགྒོ ཝིསུདྡྷིཡཱ, ནཏྠི ནིབྦཱནནྟི ཨེཝམཱདིཝསེན པཝཏྟཱ མིཙྪཱདིཊྛིཨཱདཡོ ན མགྒཱདིཝིསཡཱ ཏཾཏཾཔཉྙཏྟིཝིསཡཱཏི དཱིཔིཏཾ ཧོཏི.

༩༩༨. ཨེཝཾ སཾ…པེ… ལེསིཀཱཏི ཨནུཔཱདཱནིཡེཧི ཨསཾཀིལེསིཀཱནཾ བྷེདཱབྷཱཝམཱཧ.

༡༠༠༦. ཨཝིཛྫམཱནོ ཙ སོ ནིཙྩཱདིཝིཔརིཡཱསཱཀཱརོ ཙཱཏི ཨཝི…པེ… སཱཀཱརོཏི པདཙྪེདོ. དིཊྛིཡཱ ནིཙྩཱདིཨཝིཛྫམཱནཱཀཱརེན གཡ྄ཧམཱནཏྟེཔི ན ཏདཱཀཱརོ ཝིཡ པརམཏྠཏོ ཨཝིཛྫམཱནོ, ཨཐ ཁོ ཝིཛྫམཱནོ ¶ ཀཱཡོ སཀྐཱཡོཏི ཨཝིཛྫམཱནནིཙྩཱདིཝིཔརིཡཱསཱཀཱརཏོ ཝིསེསནནྟི ལོཀུཏྟརཱ ན ཨིདཾ ཝིསེསནཾ ཨརཧནྟི ‘‘སནྟོ ཝིཛྫམཱནོ ཀཱཡོ སཀྐཱཡོ’’ཏི. ཝཏྠུ ཨཝིསེསིཏཾ ཧོཏཱིཏི ཨིདཾ ‘‘སཏཱི ཀཱཡེ’’ཏི ཨེཏྠ ཀཱཡ-སདྡོ སམཱུཧཏྠཏཱཡ ཨནཱམསིཏཝིསེསཾ ཁནྡྷཔཉྩཀཾ ཝདཏཱིཏི ཨདྷིཔྤཱཡེན ཝུཏྟཾ. པསཱདཀཱཡོ ཝིཡ ཀུཙྪིཏཱནཾ རཱགཱདཱིནཾ ཨུཔྤཏྟིཊྛཱནཏཱཡ ཀཱཡོཏི ཝུཙྩཏཱིཏི ཨེཝཾ པན ཨཏྠེ སཏི དིཊྛིཡཱ ཝཏྠུ ཝིསེསིཏམེཝ ཧོཏཱིཏི ལོཀུཏྟརཱཔི ཨཔནཱིཏཱ. ན ཧི ལོཀུཏྟརཱ ཁནྡྷཱ ཨུཔྤཏྟིཊྛཱནཏཱཡ ‘‘ཀཱཡོ’’ཏི ཝུཙྩནྟཱིཏི. སུདྡྷིཡཱ ཨཧེཏུབྷཱུཏེནཱཏི གོསཱིལཱདིནཱ, ལོཀིཡསཱིལེན ཝཱ ལོཀུཏྟརསཱིལསྶ ཨཔདཊྛཱནེན. ‘‘ཨཝཱིཏིཀྐམནཱིཡཏཱསཏཏཾཙརིཏབྦཏཱཧི ཝཱ སཱིལཾ, ཏཔོཙརཎབྷཱཝེན སམཱདིནྣཏཱཡ ཝཏཾ. ཨཏྟནོ གཝཱདིབྷཱཝཱདྷིཊྛཱནཾ སཱིལཾ, གཙྪནྟོཡེཝ བྷཀྑནཱདིགཝཱདིཀིརིཡཱཀརཎཾ ¶ ཝཏཾ. ཨཀཏྟབྦཱབྷིམཏཏོ ནིཝཏྟནཾ ཝཱ སཱིལཾ, ཏཾསམཱདཱནཝཏོ ཝེསབྷོཛནཀིཙྩཙརཎཱདིཝིསེསཔཊིཔཏྟི ཝཏ’’ནྟི ཙ སཱིལབྦཏཱནཾ ཝིསེསཾ ཝདནྟི.

༡༠༠༧. ཨིམསྶུཔྤཱདཱ ཨིདཾ ཨུཔྤཛྫཏཱིཏི ཨུཔྤཱདོཏི ན ཛནནམཏྟཾ ཨདྷིཔྤེཏཾ, ཨཐ ཁོ ཨནིརོདྷོཔཱིཏི ‘‘ཨཝིགྷཱཏཾ ཛནསདྡོ ཝདཏཱི’’ཏི ཨཱཧ. ཏཏྠཱཡཾ ཛན-སདྡེ ནཡོ, ཛནིཏཱཏི ཛནཱ, ཨཝིཧཏཱཏི ཨཏྠོ. པུཐཱུ ཛནཱ ཨེཏེསནྟི པུཐུཛྫནཱཏི པུཐུསཏྠུམཱནིནོ སཏྟཱ. ཨབྷིསངྑརཎཱདིཨཏྠོ ཝཱ ཛན-སདྡོ ཨནེཀཏྠཏྟཱ དྷཱཏཱུནཾ. ཁནྡྷཱཡཏནཱདཱིནཾ སཝནཱདྷཱིནཏྟཱ པཉྙཱཙཀྑུཔཊིལཱབྷསྶ ཏེསཾ སཝནཱབྷཱཝདཱིཔཀཾ ‘‘ཨསྶུཏཝཱ’’ཏི ཨིདཾ པདཾ ཨནྡྷཏཾ ཝདཏི.

ཀཏཾ ཛཱནནྟཱིཏི ཨཏྟནཱ པརེཧི ཙ ཀཏཾ ཀུསལཱཀུསལཾ ཏེཧི ནིཔྥཱདིཏཾ སུཁདུཀྑཾ ཡཱཐཱཝཏོ ཛཱནནྟི. པརེསཾ ཨཏྟནཱ, ཨཏྟནོ ཙ པརེཧི ཀཏཾ ཨུཔཀཱརཾ ཡཐཱཝུཏྟཱཀཱརེན པཱཀཊཾ ཀརོནྟི. བྱཱདྷིཨཱདཱིཧི དུཀྑིཏསྶ ཨུཔཊྛཱནཱདིཀཱཏབྦཾ, སཾསཱརདུཀྑདུཀྑིཏསྶེཝ ཝཱ ཡཐཱཝུཏྟཱཀཱརེན ཀཱཏབྦཾ ཀརོནྟི. ཨརིཡཀརདྷམྨཱ ཨརིཡསཙྩཱནཱིཏི པུརིམསཙྩདྭཡཝསེན ཝུཏྟཾ ‘‘ཝིཔསྶིཡམཱནཱ ཨནིཙྩཱདཡོ’’ཏི. པརིཉྙཱདིཝིསེསེན ཝཱ པསྶིཡམཱནཱཏི ཨཏྠེ སཏི ཨནིཙྩཱདཡོཏི ཨཱདི-སདྡེན ནིཙྩམྤི ནིབྦཱནཾ གཧིཏནྟི ཙཏུསཙྩཝསེནཔི ཡོཛེཏབྦཾ, ཨནིཙྩཏྟཱདཡོ ཝཱ ‘‘ཨནིཙྩཱདཡོ’’ཏི ཝུཏྟཱཏི དཊྛབྦཾ.

ཨཝསེསཀིལེསཱ ཀིལེསསོཏཾ. ཉཱཎནྟི ཡཱཐཱཝཏོ ཛཱནནཾ. ཡཐཱབྷཱུཏཱཝབོདྷེན ཧི ཏསྶ ཏཱནི ཨནུཔྤཏྟིདྷམྨཏཾ ཨཱཔཱདིཏཏཱཡ སནྟཱནེ ¶ ཨཔྤཝེསཱརཧཱནི ‘‘སཾཝུཏཱནི པིཧིཏཱནཱི’’ཏི ཙ ཝུཙྩནྟི. ཏཐཱཏི སབྦསངྑཱརཱནཾ ཝིཔྤཀཱརསྶ ཁམནཱཀཱརེན. ཨཝིཔརཱིཏདྷམྨཱ ཨེཏཱཡ ནིཛ྄ཛྷཱཡཾ ཁམནྟཱིཏི པཉྙཱ ཁནྟཱིཏི. ཨདུཊྛསྶེཝ ཏིཏིཀྑཱབྷཱཝཏོ ཏཐཱཔཝཏྟཱ ཁནྡྷཱཏི ཨདོསཔྤདྷཱནཱ ཁནྡྷཱ ཝུཏྟཱཏི ‘‘ཨདོསོ ཨེཝ ཝཱ’’ཏི ཏཏིཡོ ཝིཀཔྤོ ཝུཏྟོ. སཏིཔཊིཔཀྑཏྟཱ ཨབྷིཛ྄ཛྷཱདོམནསྶཱནཾ ‘‘མུཊྛསྶཙྩ’’ནྟི ཝུཏྟཱ. ཨཀྑནྟི དོསོ. སསྶཏཱདིཨནྟཝིནིམུཏྟཱ དྷམྨཊྛིཏཱིཏི སསྶཏུཙྪེདཱདིགཱཧོ ཏཔྤཊིལོམབྷཱཝོ ཝུཏྟོ. དིཊྛདྷམྨནིབྦཱནཝཱདོ ནིབྦཱནེ པཊིལོམབྷཱཝོ. ཙརིམཱནུལོམཉཱཎཝཛ྄ཛྷཏཎྷཱདིཀོ ཀིལེསོཏི ཝུཏྟོ, པཊིཔདཱཉཱཎདསྶནཉཱཎདསྶནཱནི ཝིཡ གོཏྲབྷུཉཱཎཾ ཀིལེསཱནཾ ཨཔྤཝཏྟིཀརཎབྷཱཝེན ཝཏྟཏི, ཀིལེསཝིསཡཱཏིལངྒྷནབྷཱཝེན པན པཝཏྟཏཱིཏི ཀཏྭཱ ཝུཏྟཾ ‘‘སངྑཱར…པེ… པཧཱན’’ནྟི.

དིཊྛིཡཱདཱིནཾ ¶ སམུདཡསབྷཱགཏཱ ཀམྨསྶ ཝིཀུཔྤཱདནེ སཧཀཱརཱིཀཱརཎབྷཱཝོ, དསྶནཱདིབྱཱཔཱརཾ ཝཱ ཨཏྟཱནཉྩ དསྶནཱདིཀིཙྩཾ ཙཀྑཱདཱིནནྟི ཨེཝཉྷི ཡཐཱཏཀྐིཏཾ ཨཏྟཱནཾ རཱུཔནྟི གཎྷཱཏི. ཡཐཱདིཊྛནྟི ཏཀྐདསྶནེན ཡཐོཔལདྡྷནྟི ཨདྷིཔྤཱཡོ. ན ཧི དིཊྛིགཏིཀོ རཱུཔཱཡཏནམེཝ ཨཏྟཱཏི གཎྷཱཏཱིཏི. ཨིམིསྶཱཔཝཏྟིཡཱཏི སཱམཉྙེན རཱུཔཾ ཨཏྟཱཏི སབྦསངྒཱཧཀབྷཱུཏཱཡ པཝཏྟིཡཱ. རཱུཔེ…པེ… མཱནནྟི ཙཀྑཱདཱིསུ ཏཾསབྷཱཝོ ཨཏྟཱཏི པཝཏྟམཱནཾ ཨཏྟགྒཧཎཾ. ཨནཉྙཏྟཱདིགྒཧཎནྟི ཨནཉྙཏྟཾ ཨཏྟནིཡཨཏྟནིསྶིཏཨཏྟཱདྷཱརཏཱགཧཎཾ. ཝཎྞཱདཱིནནྟི ཝཎྞརུཀྑཔུཔྥམཎཱིནཾ. ནནུ ཙ རུཀྑཔུཔྥམཎིཡོ པརམཏྠཏོ ན ཝིཛྫནྟི? སཙྩཾ ན ཝིཛྫནྟི, ཏདུཔཱདཱནཾ པན ཝིཛྫཏཱིཏི ཏཾ སམུདིཏཱདིཔྤཀཱརཾ ཨིདྷ རུཀྑཱདིཔརིཡཱཡེན ཝུཏྟནྟི རུཀྑཱདིནིདསྶནེཔི ན དོསོ ཚཱཡཱརུཀྑཱདཱིནཾ ཝིཡ རཱུཔསྶ ཨཏྟནོ ཙ སཾསཱམིབྷཱཝཱདིམཏྟསྶ ཨདྷིཔྤེཏཏྟཱ.

༡༠༠༨. ཛཱཏིཨཱདིསབྷཱཝནྟི ཛཱཏིབྷཝཱདཱིནཾ ནིབྦཏྟིནིབྦཏྟནཱདིསབྷཱཝཾ, ཨུཔྤཱདནསམཏྠཏཱ པཙྩཡབྷཱཝོ.

༡༠༠༩. སཱམཉྙེན ‘‘ཏདེཀཊྛཱ ཀིལེསཱ’’ཏི (དྷ. ས. ༡༠༡༠), པརཏོ ‘‘ཨཝསེསོ ལོབྷོ’’ཏིཨཱདིཝཙནཏོ (དྷ. ས. ༡༠༡༡) པཱརིསེསཏོ སཱམཏྠིཡཏོ ཝཱ ལབྦྷམཱནཏཱཡ སཏིཔི ཨཱགཏཏྟེ སརཱུཔེན པབྷེདེན ཝཱ དིཊྛིཨཱདཡོ ཝིཡ ཨནཱགཏཏྟཱ ལོབྷཱདཡོ ‘‘ཨནཱགཏཱ’’ཏི ཝུཏྟཱཏི ཨཱཧ ‘‘ཨིདྷ ¶ …པེ… སྶེཏུ’’ནྟི. ཨཏྠཏོ ཝིཉྙཱཡཏི ལོབྷཱདཱིཧི སཧཛཱཏཱ ཧུཏྭཱ དིཊྛིཡཱ ཨེཝ པཱལི༹ཡཾ ཝུཏྟཀིལེསབྷཱཝཏོ. ཨིཏིཔི ཨཏྠོ ཡུཛྫཏི སཾཡོཛནཀིལེསཱནམྤི པཊིནིདྡེསཱརཧཏྟཱ སམྤཡུཏྟསམུཊྛཱནབྷཱཝཏོ ཙ. སཾཡོཛནརཧིཏེཧཱིཏི སཾཡོཛནབྷཱཝརཧིཏེཧི ཐིནཨུདྡྷཙྩཨཧིརིཀཱནོཏྟཔྤེཧི, ཐིནཨཧིརིཀཱནོཏྟཔྤེཧི ཝཱ.

༡༠༡༣. ཨེཀདེ…པེ… ཝདཏི ཨཝཡཝེནཔི སམུདཱཡོ ཝུཙྩཏཱིཏི. ཧེཏུ ཨེཏེསཾ ཨཏྠཱིཏི ཝཱ ཧེཏུཀཱ. ཨནིཡཏོཏི ན ཨཝདྷཱརིཏོ. པུརིམཔདཱཝདྷཱརཎཝསེན གཧེཏབྦཏྠཏྟཱ ཝིཝརཎཱིཡཏྠཝཱ. ཨཏྠཏོ ནིཀྑིཔིཏུནྟི ‘‘ཏཡོ ཀུསལཧེཏཱུ ཨལོབྷོ ཨདོསོ ཨམོཧོ’’ཏིཨཱདཱིསུ (དྷ. ས. ༡༠༦༠) ཝིཡ པུརིམནཡེན དསྶིཏདྷམྨེཡེཝ ཧེཏུཔཧཱཏབྦཧེཏུཀབྷེདཏོ ཨཏྠདསྶནཝསེན ནིདྡིསིཏུནྟི ཨཏྠོ.

༡༠༢༩. ཨབྷིཉྙཱཡུཏྟཝཛྫཱནཾ ¶ མཧགྒཏཱནཾ པརིཏྟཱརམྨཎཏྟཱབྷཱཝཱ ‘‘མཧགྒཏཱ ཝཱ ཨིདྡྷིཝིདྷཱདཡོ’’ཏི ཝུཏྟཾ. ཨཏཱིཏཾསཉཱཎསྶ ཀཱམཱཝཙརཏྟཱ ‘‘ཙེཏོ…པེ… ཉཱཎསམྤཡུཏྟཱ’’ཏི ཨཱཧ.

༡༠༣༥. ཨནནྟརེ ནིཡུཏྟཱནཱིཏི ཙུཏིཨནནྟརཾ ཕལཾ ཨནནྟརཾ, ཏསྨིཾ ནིཡུཏྟཱནི ཏཾ ཨེཀནྟེན ནིཔྥཱདནཏོ ཨནཏིཀྐམནཀཱནཱིཏི ཨཏྠོ. ཝུཏྟཔྤཀཱརསྶ ཨནནྟརསྶ ཀརཎཾ ཨནནྟརཾ, ཏཾ སཱིལཱནཱིཏི ཡོཛེཏབྦཾ. ཨནེཀེསུ ཨཱནནྟརིཡེསུ ཀཏེསུ ཀིཉྩཱཔི བལཝཏོཡེཝ པཊིསནྡྷིདཱནཾ, ན ཨིཏརེསཾ, ཨཏྟནཱ པན ཀཱཏབྦཀིཙྩསྶ ཏེནེཝ ཀཏཏྟཱ ཏསྶ ཝིཔཱཀསྶ ཨུཔཏྠམྦྷནཝསེན པཝཏྟནཏོ ན ཨིཏརཱནི ཏེན ནིཝཱརིཏཕལཱནི ནཱམ ཧོནྟི, ཀོ པན ཝཱདོ པཊིཔཀྑེསུ ཀུསལེསཱུཏི ཝུཏྟཾ ‘‘པཊིཔཀྑེན ཨནིཝཱརཎཱིཡཕལཏྟཱ’’ཏི. ‘‘ཨནེཀསྨིམྤི…པེ… ནཏྠཱི’’ཏི ཀསྨཱ ཝུཏྟཾ, ནནུ ཨནེཀེསུ ཨཱནནྟརིཡེསུ ཀཏེསུ བལཝཾཡེཝ པཊིསནྡྷིདཱཡཀནྟི ཏེན ཨིཏརེསཾ ཝིཔཱཀོ པཊིབཱཧིཏོ ཧོཏཱིཏི ཨཱཧ ‘‘ན ཙ ཏེས’’ནྟིཨཱདི. ཏཉྩ ཏེསཾ ཨཉྙམཉྙཾ ཨཔྤཊིབཱཧཀཏྟཾ མཱཏིཀཱཝཎྞནཱཡཾ ཝིཏྠཱརེན ཝིཙཱརིཏམེཝ.

ཨཏྠཏོ ཨཱཔནྣཾ ཨགྒཧེཏྭཱ ཡཐཱརུཏཝསེནེཝ པཱལི༹ཡཱ ཨཏྠཾ གཧེཏྭཱ ཏེསཾ ཝཱདཱནཾ ཏཔྤརབྷཱཝེན པཝཏྟིཾ སནྡྷཱཡ ཨཧེཏུཀཝཱདཱདཱིནཾ ཝིསེསཾ ¶ དསྶེཏུཾ ‘‘པུརིམཝཱདོ’’ཏིཨཱདི ཝུཏྟཾ. ཨནིཡྻཱནིཀནིཡྻཱནིཀབྷེདཾ པན སམྦྷཱརཀམྨཾ བནྡྷམོཀྑཧེཏཱུཏི བནྡྷམོཀྑཧེཏུཾ པཊིསེདྷེནྟོཔི ཀམྨཾ པཊིསེདྷེཏི. སུམངྒལཝིལཱསིནིཡཾ པན ཝིཔཱཀསྶ ཀམྨཀིལེསསམཱདྷིཔཉྙཱནཾ ཧེཏུབྷཱཝཏོ ཝིཔཱཀོཔི བནྡྷམོཀྑཧེཏཱུཏི ‘‘ནཏྠི ཧེཏཱུཏི ཝདནྟོ ཨུབྷཡཾ པཊིབཱཧཏཱི’’ཏི (དཱི. ནི. ཨཊྛ. ༡.༡༧༠-༡༧༢) ཝུཏྟཾ. ཏཏྠ ཀམྨཾ པཊིསེདྷེནྟེནཔི ཝིཔཱཀོ པཊིསེདྷིཏོ ཧོཏི, ཝིཔཱཀཾ པཊིསེདྷེནྟེནཔི ཀམྨནྟི ཏཡོཔི ཨེཏེ ཝཱདཱ ཨཏྠཏོ ཨུབྷཡཔཊིསེདྷཀཱཏི ཝེདིཏབྦཱ. ནིཡཏམིཙྪཱདིཊྛིནྟི ཨཧེཏུཀཝཱདཱདིཔཊིསཾཡུཏྟེ ཨསདྡྷམྨེ ཨུགྒཧཔརིཔུཙྪཱཝིནིཙྪཡཔསུཏསྶ ‘‘ནཏྠི ཧེཏཱུ’’ཏིཨཱདིནཱ རཧོ ནིསཱིདིཏྭཱ ཙིནྟེནྟསྶ ཏསྨིཾ ཨཱརམྨཎེ མིཙྪཱསཏི སནྟིཊྛཏི, ཙིཏྟཾ ཨེཀགྒཾ ཧོཏི, ཛཝནཱནི ཛཝནྟི. པཋམཛཝནེ སཏེཀིཙྪོ ཧོཏི, ཏཐཱ དུཏིཡཱདཱིསུ. སཏྟམེ ཨཏེཀིཙྪབྷཱཝཾ པཏྟོ ནཱམ ཧོཏི. ཡཱ ཨེཝཾ པཝཏྟཱ དིཊྛི, ཏཾ སནྡྷཱཡ ཝུཏྟཾ ‘‘ནིཡཏམིཙྪཱདིཊྛི’’ནྟི. ཏཏོ པུརིམབྷཱཝཱ ཨནིཡཏཱ.

༡༠༣༩. སཧཛཱཏ ཨཉྙམཉྙ ནིསྶཡ ཨཏྠི ཨཝིགཏཱདིཝིསིཊྛབྷཱཝེཔི མགྒཔཙྩཡསྶ སམྤཡོགཝིསིཊྛཏཱདཱིཔནེནེཝ སཧཛཱཏཱདིཝིསིཊྛཏཱཔི ཝིཉྙཱཡཏཱིཏི པཱལི༹ཡཾ ‘‘སམྤཡུཏྟོ’’ཏི ཝུཏྟནྟི ¶ ‘‘སམྤཡོགཝིསིཊྛེནཱ’’ཏི ཝུཏྟཾ. མགྒ…པེ… དསྶེཏུཾ, ན པན མགྒངྒཱནཾ ཨཉྙམཉྙཾ མགྒཔཙྩཡབྷཱཝཱབྷཱཝཏོཏི ཨདྷིཔྤཱཡོ. ཨེཝཾ སཏཱིཏི ཡདི མགྒངྒཱནཾ མགྒཔཙྩཡལཱབྷིཏཱཡ པཀཱསནོ པཋམནཡོ, ཨེཝཾ སནྟེ. མགྒངྒཱནིཔི ཝེདནཱདཡོ ཝིཡ མགྒཧེཏུཀབྷཱཝེན ཝཏྟབྦཏྟཱ ཨམགྒསབྷཱཝཱནཾ ཨལོབྷཱདཱིནཾ ཏདཉྙེསཾ ཏདུབྷཡསབྷཱཝཱནཾ དྷམྨཱནཾ པཙྩཡབྷཱཝདཱིཔནེ ཏཏིཡནཡེ ཝིཡ ན ཋཔེཏབྦཱནཱིཏི ཨཱཧ ‘‘ཋཔེཏྭཱཏི ན ཝཏྟབྦཾ སིཡཱ’’ཏི. པུབྦེཏི པུརིམནཡེ.

དུཏིཡནཡེཔཱིཏི པི-སདྡེན པཋམནཡཾ སམྤིཎྜེཏི. ཏེན སམྨཱདིཊྛིཡཱ པུརིམསྨིཾ ནཡདྭཡེ ཋཔིཏཏྟཱ ཏསྶ སཧེཏུཀབྷཱཝདསྶནོ ཏཏིཡནཡོ ཨཱརདྡྷོཏི དསྶེཏི. ཏཏིཡནཡེ སམྨཱདིཊྛིཡཱ སཧེཏུཀབྷཱཝདསྶནཾ ཨནིཙྪནྟོ ཙོདཀོ ‘‘ཀཐཾ དསྶིཏོ’’ཏི ཙོདེཏྭཱ ‘‘ནནཱུ’’ཏིཨཱདིནཱ ཨཏྟནོ ཨདྷིཔྤཱཡཾ ཝིཝརཏི. ཨིཏརོ ‘‘ཡཐཱ ཧཱི’’ཏིཨཱདིནཱ དསྶནེན པཧཱཏབྦཧེཏུབྷཱཝེན ཝུཏྟཱནམྤི ལོབྷཱདཱིནཾ ཨཉྙམཉྙཾ སཧཛེཀཊྛསམྤཡུཏྟསངྑཱརཀྑནྡྷཔརིཡཱཔནྣཏོ དསྶནེན པཧཱཏབྦཧེཏུཀསངྒཧོ ¶ ཝིཡ མགྒཧེཏུབྷཱཝེན ཝུཏྟཱཡཔི སམྨཱདིཊྛིཡཱ མགྒཧེཏུཀབྷཱཝོཔི ཡུཛྫཏི མགྒཧེཏུསམྤཡུཏྟསངྑཱརཀྑནྡྷཔརིཡཱཔནྣབྷཱཝཏོཏི དསྶེཏི.

ཏཏོ ཨཉྙསྶེཝཱཏི ཏཏོ སམྨཱདིཊྛིསངྑཱཏཧེཏུཏོ ཨཉྙསྶ ཨལོབྷཱདོསསྶེཝ. ཨཉྙེནཱཏི ‘‘མགྒོ ཧེཏཱུ’’ཏི ཨིཏོ ཨཉྙེན. ཨལོབྷཱདོསཱནཾཡེཝ ཨདྷིཔྤེཏཏྟཱ ཏེསཾཡེཝ ཨཱཝེཎིཀེན མགྒཧེཏཱུཏི ཨིམིནཱ པརིཡཱཡེན. སཱདྷཱརཎེན པརིཡཱཡེནཱཏི ཏིཎྞམྤི ཧེཏཱུནཾ ཨདྷིཔྤེཏཏྟཱ མགྒཱམགྒསབྷཱཝཱནཾ སཱདྷཱརཎེན མགྒཧེཏུམགྒཧེཏཱུཏི ཨིམིནཱ པརིཡཱཡེན. ཏེསནྟི ཧེཏཱུནཾ. ཨཉྙེསནྟི ཧེཏུསམྤཡུཏྟཱནཾ. ཨཏྠཝིསེསཝསེནཱཏི ‘‘མགྒཧེཏུཀཱ’’ཏི པཱལི༹ཡཱ ཨཏྠཝིསེསཝསེན. ཨམོཧེན ཨལོབྷཱདོསཱམོཧེཧི ཙ སེསདྷམྨཱནཾ སཧེཏུཀབྷཱཝདསྶནཝསེན པཝཏྟཱ དུཏིཡཏཏིཡནཡཱ ‘‘སརཱུཔཏོ ཧེཏུཧེཏུམནྟདསྶན’’ནྟི ཝུཏྟཱ. ཏཐཱཨདསྶནཏོཏི སརཱུཔེན ཨདསྶནཏོ. ཨཏྠེན…པེ… གམནཏོཏི ‘‘མགྒངྒཱནི ཋཔེཏྭཱ ཏཾསམྤཡུཏྟོ’’ཏི (དྷ. ས. ༡༠༣༩) ཝཙནཏོ མགྒསབྷཱཝཱནཾ དྷམྨཱནཾ མགྒཔཙྩཡཏཱསངྑཱཏོ སམྤཡུཏྟཱནཾ ཧེཏུབྷཱཝོ སརཱུཔཏོ དསྶིཏོ. མགྒཧེཏུབྷཱུཏཱཡ པན སམྨཱདིཊྛིཡཱ སམྤཡུཏྟཱནཾ ཧེཏུཧེཏུབྷཱཝོ ཨཏྠཏོ ཉཱཔིཏོ ཧོཏཱིཏི ཨཏྠོ.

༡༠༤༠. ཨསབྷཱཝདྷམྨོ གརུཀཱཏབྦོ ན ཧོཏཱིཏི ‘‘སབྷཱཝདྷམྨོ’’ཏི ཝུཏྟཾ. ཏེནེཝ པཊྛཱནཝཎྞནཱཡཾ (པཊྛཱ. ཨཊྛ. ༡.༣) ‘‘ཨཱརམྨཎཱདྷིཔཏི ཛཱཏིབྷེདཏོ ཀུསལཱཀུསལཝིཔཱཀཀིརིཡརཱུཔནིབྦཱནཝསེན ཚབྦིདྷོ’’ཏི ཝཀྑཏི. མགྒཱདཱིནི ཋཔེཏྭཱཏི མགྒཱདཱིནི ¶ པཧཱཡ. ཨཉྙེསནྟི མགྒཱདིཏོ ཨཉྙེསཾ. ཨདྷི…པེ… ཝསྶཱཏི ཨཱརམྨཎཱདྷིཔཏིཔཙྩཡབྷཱཝསྶ. པཉྙུཏྟརཏྟཱ ཀུསལཱནཾ ལོཀུཏྟརཀཐཱཡ ཙ པཉྙཱདྷུརཏྟཱ ཝཱིམཾསཱདྷིཔཏིསྶ སེསཱདྷིཔཏཱིནཾ པདྷཱནཏཱ ཝེདིཏབྦཱ.

༡༠༤༡. པདེསསཏྟཝིསཡཏྟཱ པཋམཝིཀཔྤསྶ སཀལསཏྟཝསེན དསྶེཏུཾ ‘‘ཀཔྤསཧསྶཱཏིཀྐམེཔི ཝཱ’’ཏིཨཱདི ཝུཏྟཾ. ལདྡྷོཀཱསཾ ཡཾ བྷཝིསྶཏཱིཏི ལདྡྷོཀཱསཾ ཡཾ ཀམྨཾ པཱཔུཎིསྶཏི. ཀཔྤསཧསྶཱཏིཀྐམེ ཨཝསྶཾ ཨུཔྤཛྫནཝིཔཱཀཏྟཱ ཏདཔི…པེ… ཝུཙྩཏཱིཏི. ཨལདྡྷཏྟལཱབྷཏཱཡ ཨུཔྤཱདཱདིཀྑཎཾ ¶ ཨཔྤཏྟསྶ ཝིཔཱཀསྶ ཨནུཔྤནྣབྷཱཝོ ནཏྠིབྷཱཝོ པཱཀཊབྷཱཝཱབྷཱཝཏོཏི ཝུཏྟཾ ‘‘ནཏྠི ནཱམ ན ཧོཏཱིཏི ཨནུཔྤནྣོ ནཱམ ན ཧོཏཱི’’ཏི. ཏཏྠཱཏི ཨརཱུཔབྷཝངྒེ.

ཨཝིཔཀྐཝིཔཱཀཾ ཀམྨཾ སཧཀཱརཱིཀཱརཎསམཝཱཡཱལཱབྷེན ཨཀཏོཀཱསཾ ཝིཔཱཀཱབྷིམུཁབྷཱཝཱབྷཱཝཏོ ཝིཔཀྐཝིཔཱཀཀམྨསརིཀྑཀནྟི ཝུཏྟཾ ‘‘ཨལདྡྷོ…པེ… དེཡྻཱ’’ཏི. ཀིཙྩནིཔྥཏྟིཡཱ ཨསཏི ཨུཔྤནྣམྤི ཀམྨཾ ཨནུཔྤནྣསམཱནནྟི ‘‘ཨོཀཱསོ ན བྷཝེཡྻཱ’’ཏི ཨེཏསྶ སམཏྠཏཱ ན སིཡཱཏི ཨཏྠམཱཧ. ཏེན ཨཔཙཡགཱམིཀམྨཀིཙྩསྶ ཨོཀཱསཱབྷཱཝོ དསྶིཏོ. པུབྦེ ནིརཏྠཀཏྟཱ ཨུཔྤཏྟིཡཱ ཨོཀཱསོ ན བྷཝེཡྻཱཏི པཡོཛནཱབྷཱཝཏོ ཀམྨུཔྤཏྟིཡཱ ཨོཀཱསཱབྷཱཝོ ཝུཏྟོ. ‘‘ཝིཔཱཀཏོ ཨཉྙསྶ པཝཏྟིཨོཀཱསོ ན བྷཝེཡྻཱ’’ཏི ཨིམིནཱ ཨསམྦྷཝཏོཏི ཨཡམེཏེསཾ ཝིསེསོ. དྷུཝཝིཔཱཀསྶ ཀམྨསྶ ཝིཔཱཀེན ནིདསྶནམཏྟབྷཱུཏེནཱཏི ཨདྷིཔྤཱཡོ. ཨརིཡམགྒཨཱནནྟརིཡཀམྨཱནཾ ཝིཡ མཧགྒཏཀམྨཱནཾ ནིཡཏསབྷཱཝཏཱབྷཱཝཱ ཨཊྛསམཱཔཏྟཱིནཾ ‘‘བལཝཝིརཧེ’’ཏིཨཱདིནཱ སཝིསེསནདྷུཝཝིཔཱཀཏཱ ཝུཏྟཱ. ཨེཏྠ ཙ ‘‘པཉྩ ཨཱནནྟརིཡཀམྨཱནཱི’’ཏི ནིདསྶནམཏྟཾ དཊྛབྦཾ ནིཡཏམིཙྪཱདིཊྛིཡཱཔི དྷུཝཝིཔཱཀཏྟཱ. ཡསྶ ཀམྨསྶ ཀཏཏྟཱ ཡོ ཝིཔཱཀོ ནིཡོགཏོ ཨུཔྤཛྫིསྶཏི, སོ ཏསྶ ཨནཱགཏཀཱལེཔི ཨུཔྤཱདིཝོཧཱརཾ ལབྷཏི. སོ ཙ ཨུཔྤཱདིཝོཧཱརོ ཨཱཡཱུཧིཏཀམྨཝསེན ཝུཙྩམཱནོ བྷཱཝིནཱ ཨཱཡཱུཧིཏབྷཱཝེན མགྒོ ཨནུཔྤནྣོཏི ཨེཏྠ ཝུཏྟོཏི དསྶེཏུཾ ‘‘ཡཾ ཨཱཡཱུཧིཏཾ བྷཝིསྶཏཱི’’ཏིཨཱདི ཝུཏྟཾ.

༡༠༥༠. ཨུཔཱདཱནེཧི ཨཱདིནྣཱཏི སམྦནྡྷོ. ཨཉྙེཏི ཨུཔཱདཱནཱརམྨཎེཧི ཨཉྙེ ཨནུཔཱདཱནིཡཱཏི ཨཏྠོ. ཨཱདིཀེན གཧཎེནཱཏི ‘‘ཨཧཾ ཕལཾ སཙྪཱཀཱསི’’ནྟི ཨེཝཾ པཙྩཝེཀྑཎཉཱཎསངྑཱཏེན གཧཎེན. ཨིདཱནི ཨུཔེཏཏྠདཱིཔཀསྶ ཨུཔ-སདྡསྶ ཝསེན ཨུཔཱདིནྣ-སདྡསྶ ¶ ཨཏྠཾ ཝཏྟུཾ ‘‘ཨུཔཱདིནྣསདྡེན ཝཱ’’ཏིཨཱདི ཝུཏྟཾ. ཏཏྠ ནིབྦཱནསྶ ཨནཛ྄ཛྷཏྟབྷཱཝཏོ ‘‘ཨམགྒཕལདྷམྨཱཡེཝ ཝུཏྟཱ’’ཏི ཨཱཧ. ཨིཏརེཧཱིཏི ཨཛ྄ཛྷཏྟཔདཱདཱིཧི.

ཏིཀནིཀྑེཔཀཐཱཝཎྞནཱ ནིཊྛིཏཱ.

དུཀནིཀྑེཔཀཐཱཝཎྞནཱ

༡༠༦༢. མེཏྟཱཡ ¶ ཨཡནཾ ཨུཔགམནཾ མེཏྟཱཡནཾ, ཏཉྩ ཨཏྟནོ སནྟཱནེ མེཏྟཱཡ ལཱབྷོ ཨུཔྤཱདནཾ སཏྟཱནཾ ཨནུཔགམོ ཨཏྠཏོ མཛྫནམེཝཱཏི ‘‘མེཏྟཱ, མེདན’’ནྟི ཝཏྭཱ ‘‘སིནེཧན’’ནྟི ཨཱཧ.

༡༠༦༥. ཏསྨིཾ ཏསྨིཾ ཝིསཡེ ཙིཏྟཾ སཾརཉྫཏཱིཏི ཙིཏྟསྶ སཾརཉྫནཾ. ཏཎྷཱཝིཙརིཏཱདཱིཏི ཨཱདི-སདྡེན ཨེསནཱདཡོ སངྒཧིཏཱ. ཏཎྷཱཡ ཝིཔུལཏཱ ཝིསཡཝསེན པཝཏྟིཝསེན ཝཱ ཝེདིཏབྦཱ. ཨནིཙྩཱདིསབྷཱཝསྶ རཱུཔཱདིཀསྶ ནིཙྩཱདིཏོ གཧཎཾ ཨབྷིནིཝེསོ ཝིསེསཏོ ཏཎྷཱཝསེན ཧོཏི ཏཎྷཱརཧིཏཱཡ དིཊྛིཡཱ ཨབྷཱཝཱཏི ཨུཔཙཱརཝསེན ནིམིཏྟསྶ ཀཏྟུབྷཱཝམཱཧ ‘‘ནིཙྩཱདིཏོ གཎྷནྟཱི ཝིསཾཝཱདིཀཱ ཧོཏཱི’’ཏི. པཱཀཊེན སདྡེན ལབྦྷམཱནཏྟཱ ཡཐཱརུཏཝིཉྙཱཡམཱནཏྟཱ ཙ ཝིསཏྟིཀཱསདྡསྶ ཝིསཏསབྷཱཝོ ‘‘པདྷཱནོ ཨཏྠོ’’ཏི ཝུཏྟོ. ‘‘ཨནྟལིཀྑཙརོ པཱསོ, ཡྭཱཡཾ ཙརཏི མཱནསོ. ཏེན ཏཾ བཱདྷཡིསྶཱམཱི’’ཏིཨཱདིཝསེན (སཾ. ནི. ༡.༡༥༡; མཧཱཝ. ༣༣) མཱརེན གཧིཏཏཱཡ.

༡༠༦༦. ཨནཏྠཙརཎཱདིཨནབྷིསནྡྷཱནཀཏཱཡ ཨཊྛཱནབྷཱུཏེསུ ཙ ཝསྶཝཱཏཱདིསངྑཱརེསུ ཨུཔྤནྣཀོཔོ ཝིཡ སཏྟེསུ ཨཏྠཱཙརཎཱདིནཱ ཨཱརོཔནཱདྷིཔྤཱཡེསུཡེཝ ཏདཛ྄ཛྷཱརོཔནཝསེན པཝཏྟོ ཡདིཔི ཨནཱཡཏནུཔྤཏྟིཡཱ ཨཊྛཱནཱགྷཱཏོཡེཝ ཧོཏི, སཏྟཝིསཡཏྟཱ པན སཏི ཙིཏྟསྶ ཨེཀནྟབྱཱཔཏྟིཡཾ ཀམྨཔཐབྷེདོ ཧོཏིཡེཝཱཏི སཀྐཱ ཝིཉྙཱཏུཾ, ཨཊྛཱནུཔྤཏྟིཡཾ པནསྶ ན སིཡཱ ཀམྨཔཐབྷེདོཏི ཨཱཧ ‘‘སཏྟེསུ ཨུཔྤནྣོ ཨཊྛཱནཀོཔོ ཀརོཏཱི’’ཏི. པཊིགྷཱདིཔདཱནཾ གྷཊྚནཱཔུརིམཡཱམཝིཀཱརུཔྤཏྟིསམཉྙཱདཱིསུཔི ¶ དསྶནཏོ ‘‘པཊིཝིརོདྷཱདིཔདཱནི ཏེསཾ ཝིསེསནཏྠཱནཱི’’ཏི ཝུཏྟཾ.

༡༠༩༡. དྭེ དྷམྨཱ ཏཡོ དྷམྨཱཏི སདྡནྟརསནྣིདྷཱནེན པརིཙྪེདཝཏོ བཧུཝཙནསྶ དསྶནཏོ ‘‘ཨཔརིཙྪེདེན བཧུཝཙནེནཱ’’ཏི ཝུཏྟཾ. ཨུདྡེསོ ཀཏོཏི ཨིཏི-སདྡོ ཧེཏུཨཏྠོ. ཏེན བཧུཝཙནེན ཨུདྡེསཀརཎཾ བཧུཝཙནེན པུཙྪཱཡ ཀཱརཎནྟི དཱིཔེཏི. ཨུདྡེསཱནུཝིདྷཱཡིནཱི ཧི པུཙྪཱཏི. ཏཐཱ ཧི སངྑཱཔརིཙྪིནྣེ ཨུདྡེསེ ‘‘ཀཏམེ ཝཱ ཏཡོ’’ཏི སངྑཱཔརིཙྪིནྣཱཝ པུཙྪཱ ¶ ཀརཱིཡཏཱིཏི. ཨུདྡེསེན དྷམྨཱནཾ ཨཏྠིཏཱམཏྟཝཙནིཙྪཱཡཾ སབྷཱཝབྷཱུམིཀཱརཎཕལཱདིཔརིཙྪེདོ ཝིཡ སངྑཱཔརིཙྪེདོཔི ན ཀཱཏབྦོཏི ཨདྷིཔྤཱཡེན ‘‘ཨནིདྡྷཱརིཏཔརིཙྪེདེ’’ཏིཨཱདི ཝུཏྟཾ. ‘‘ཨཔཙྩཡཱ དྷམྨཱ’’ཏི པདཏོ པན ཧེཊྛཱ ཨནེཀབྷེདབྷིནྣཱ དྷམྨཱ ཨཔརིཙྪེདེན བཧུཝཙནེནེཝ ཨུདྡིཊྛཱ, ཨུདྡྷཉྩ ཏཐཱ ཨུདྡིསཱིཡནྟཱིཏི ཏཾ སོཏཔཏིཏཏཱཡ བྷེདཱབྷཱཝེཔི པརམཏྠཏོ ཨཔྤཙྩཡདྷམྨསྶ ཨསངྑཏདྷམྨསྶ ཙ སོཔཱདིསེསནིརུཔཱདིསེསརཱགཀྑཡཱདིཨསངྑཏཱདིཝཙནཝཙནཱིཡབྷཱཝེན ཨུཔཙརིཏབྷེདེགཧིཏེ པདདྭཡེན ཨཏྠི ཀཱཙི བྷེདམཏྟཱཏི ཨཔརིཙྪེདེན བཧུཝཙནེན ཨུདྡེསོ ཀཏོཏི ཡུཏྟཾ སིཡཱ. ཨུདྡེསཱནུསཱརཱིནི པུཙྪཱནིགམནཱནཱིཏི ཏཱནིཔི ཏཐཱ པཝཏྟཱནི. ནིདྡེསོ པན ཡཐཱདྷིཔྤེཏསབྷཱཝཱདིཔརིཙྪེདཝིབྷཱཝནཝསེནེཝ ཀཱཏབྦོཏི ཨསངྑཏཱ དྷཱཏུ ཨིཙྩེཝ ཀཏོ པརམཏྠཏོ བྷེདཱབྷཱཝདཱིཔནཏྠནྟི དཊྛབྦཾ. ཀཐེཏུཀཱམཏཱཝསེན པུཙྪནྟོ ཡསྶ ཀཐེཏི, ཏེན ཀཱཏབྦཔུཙྪཱཡ ཀརཎཏོ ཏགྒཏཾ ཨཛཱནནཾ སཾསཡཾ ཝཱ ཨནུཝིདྷཱཡཡེཝ པུཙྪཏཱིཏི ‘‘སབྷཱཝ…པེ… ཨཛཱནནྟསྶ ཝསེན པུཙྪཱ ཀརཱིཡཏཱི’’ཏི ཝུཏྟཾ. ནིདྡེསཏོ པུབྦེཏིཨཱདིནཱ ཨཊྛཀཐཱཡཾ ཝུཏྟཾ པུཙྪཱནུསནྡྷིཾཡེཝ ཝིབྷཱཝེཏི.

༡༡༠༡. བྷིནྡིཏྭཱཏི ཝིབྷཛིཏྭཱ. རཱུཔཱཝ…པེ… ཝིཉྙེཡྻཱཏི ཀཱམཱཝཙརཀུསལམཧཱཀིརིཡཝིཉྙཱཎེན མཧགྒཏདྷམྨཱནཾ སམྨསནཝསེན ཡཐཱཡོགཾ མཧགྒཏཔྤམཱཎདྷམྨཱནཾ པཙྩཝེཀྑཎཱདིཝསེན རཱུཔརཱགཱརཱུཔརཱགསམྤཡུཏྟེན ཨཀུསལམནོཝིཉྙཱཎེན མཧགྒཏདྷམྨཱནཾ ཨབྷིནིཝེསནཨསྶཱདནཝསེན ཏཾཏཾཔཉྙཏྟིཡཉྩ ཏཾཏཾཝོཧཱརཝསེན པཝཏྟེན ཨཱཝཛྫནེན ཙ ཡཐཱཝུཏྟཝིཉྙཱཎཱནཾ པུརེཙཱརིཀེན ཀཱམཱཝཙརདྷམྨཱ ན ཝིཉྙེཡྻཱ. ཨིཏརེནཱཏི པརིཏྟཱརམྨཎེན. ཀཱམཱཝཙརཱནམེཝ ཨཱརམྨཎཱནནྟི ནིདྡྷཱརཎེ སཱམིཝཙནཾ. རཱུཔཱརམྨཎཱདཱིཧི ཝིཉྙཱཎེཧི ཏཏྠ རཱུཔཱརམྨཎེན ཝིཉྙཱཎེནཔི སདྡཱདཱིནཾ ཨཝིཉྙེཡྻཏཱ རཱུཔསྶ ཙ ཝིཉྙེཡྻཏཱ. ཨེཝཾ སེསེསུཔི ཡོཛནཱ དཊྛབྦཱ. ཙཀྑུདྭཱརིཀེན སདྡཱདཱིནཾ ཨཝིཉྙེཡྻཏཱ རཱུཔསྶ ཝིཉྙེཡྻཏཱཏིཨཱདིནཱ དྭཱརབྷེདཝསེན ¶ ཡོཛེཏབྦཾ. ཨིཏརནྟི ཨིཊྛམཛ྄ཛྷཏྟཾ ཨནིཊྛམནིཊྛམཛ྄ཛྷཏྟཉྩ. རཱུཔཱཝཙརཱདཡོ ཀཱམཱཝཙརཝིཔཱཀཱདཱིཧཱིཏི རཱུཔཱཝཙརཱརཱུཔཱཝཙརལོཀུཏྟརཔཉྙཏྟིཡོ ཀཱམཱཝཙརཝིཔཱཀེཧི ལོཀུཏྟརཱ ཀཱམཱཝཙརཏོ ཉཱཎཝིཔྤཡུཏྟཀུསལཀིརིཡེཧི ཨཀུསལེཧི ཙ ཨཝིཉྙེཡྻཱཏི ཡོཛེཏབྦཾ. ནིབྦཱནསྶ ཨཝིཛཱནནསབྷཱཝོ ཨེཝ ཨཏྟསམྦྷཝོ.

༡༡༠༢. རཱུཔཱརཱུཔཱཝཙརཀམྨཱུཔཔཏྟིབྷཝེ ¶ དིཊྛིརཧིཏོ ལོབྷོ བྷཝཱསཝོཏི ཡཐཱཝུཏྟཝིསཡོ དིཊྛིསཧིཏོ སབྦཀཱམཱཝཙརདྷམྨཝིསཡོ ཙ ལོབྷོ ཀཱམཱསཝོ བྷཝིཏུཾ ཡུཏྟོཏི ཝུཏྟཾ ‘‘བྷཝཱསཝཾ…པེ… སིཡཱ’’ཏི. ཀཱམཱསཝབྷཝཱསཝཝིནིམུཏྟསྶ ཧི ལོབྷསྶ ཨབྷཱཝཾ སཡམེཝ ཝཀྑཏཱིཏི. པཱལི༹ཡནྟི ཨཊྛཀཐཱཀཎྜཔཱལི༹ཡཾ. ཏཏྠ ཡཐཱ ‘‘ཀཱམཱསཝོ ཨཊྛསུ ལོབྷསཧགཏཙིཏྟུཔྤཱདེསུ ཨུཔྤཛྫཏཱི’’ཏི ཝུཏྟཾ, ཨེཝཾ ‘‘བྷཝཱསཝོ ཨཊྛསུ ལོབྷསཧགཏཙིཏྟུཔྤཱདེསུ ཨུཔྤཛྫཏཱི’’ཏི ཨཝཏྭཱ ‘‘ཙཏཱུསུདིཊྛིགཏཝིཔྤཡུཏྟལོབྷསཧགཏཙིཏྟུཔྤཱདེསུ ཨུཔྤཛྫཏཱི’’ཏི (དྷ. ས. ༡༤༦༥) ཝུཏྟཏྟཱ ‘‘བྷཝཱསཝོ…པེ… ཡུཏྟེསུ ཨེཝ ཨུཔྤཛྫཏཱི’’ཏི པཱལི༹ཡཾ ཝུཏྟོཏི སཱཝདྷཱརཎཾ ཝུཏྟཾ. ཏཐཱ ཙ ཝཀྑཏི ‘‘བྷཝཱསཝོ ཙཏཱུསུ དིཊྛིགཏཝིཔྤཡུཏྟེསུ ཨཝིཛྫཱསཝེན སདྡྷིཾ ཨེཀདྷཱཝ ཨེཀཏོ ཨུཔྤཛྫཏཱི’’ཏི (དྷ. ས. ཨཊྛ. ༡༤༧༣). སོཔི རཱགོཏི སསྶཏདིཊྛིསཧགཏོ རཱགོ. ཀཱམབྷཝཔཏྠནཱ ཝིཡ ཀཱམཱསཝོཏི ཡུཏྟཾ ཝཏྟུཾ. སསྶཏདིཊྛིསཧགཏརཱགཀཱམབྷཝཔཏྠནཱནམྤི ཧི བྷཝཱསཝོཏི ཝཏྟབྦཔརིཡཱཡོ ཨཏྠཱིཏི ‘‘སསྶཏདིཊྛིསཧགཏོ རཱགོ བྷཝརཱགཝསེན པཏྠནཱ བྷཝཱསཝོ ནཱམཱ’’ཏི ཝུཏྟཾ, ན ཏེསཾ ཨིདྷ ཨདྷིཔྤེཏབྷཝཱསཝབྷཱཝདསྶནཏྠནྟི ཨཊྛཀཐཱཡཾ ཨདྷིཔྤཱཡོ དཊྛབྦོ. ཏཐཱ ཧི ‘‘རཱུཔཱརཱུཔསངྑཱཏེ ཀམྨཏོ ཙ ཨུཔཔཏྟིཏོ ཙ དུཝིདྷེཔི བྷཝེ ཨཱསཝོ བྷཝཱསཝོ’’ཏི ཝུཏྟནྟི. ཏཏྠ ཀཱམབྷཝཔཏྠནཱཡ ཏཱཝ ཀཱམཱསཝབྷཱཝོ ཧོཏུ, རཱུཔཱརཱུཔབྷཝེསུ སསྶཏཱབྷིནིཝེསསཧགཏརཱགསྶ ཀཐནྟི? སོཔི ཡཐཱཝུཏྟཝིསཡེ ཀཱམནཝསེན པཝཏྟིཏོ ཀཱམཱསཝོཡེཝ ནཱམ. སབྦེཔི ཧི ཏེབྷཱུམཀཱ དྷམྨཱ ཀམནཱིཡཊྛེན ཀཱམཱཏི. ན ཙེཏྠ ཨནིཊྛཔྤསངྒོ དིཊྛིཝིཔྤཡུཏྟལོབྷསྶ བྷཝཱསཝབྷཱཝེན ཝིསུཾ ཨུདྡྷཊཏྟཱ. ཨཝསྶཉྩེཏམེཝཾ ཝིཉྙཱཏབྦཾ, ཨིཏརཐཱ རཱུཔཱརཱུཔབྷཝེསུ ཨུཙྪེདདིཊྛིསཧགཏསྶཔི ལོབྷསྶ བྷཝཱསཝབྷཱཝོ ཨཱཔཛྫེཡྻཱཏི. ཀཱམཱསཝཱདཡོ ཨེཝ དིཊྛདྷམྨིཀསམྤརཱཡིཀཱསཝབྷཱཝེན དྭིདྷཱ ཝུཏྟཱ.

༡༡༠༣. ཨིདྷ པཱལི༹ཡཱཔི བྷཝཱསཝཝིནིམུཏྟལོབྷསྶ ཀཱམཱསཝབྷཱཝོ ན ན སཀྐཱ ཡོཛེཏུནྟི དསྶེཏུཾ ‘‘ཀཱམཱསཝནིདྡེསེ ཙཱ’’ཏིཨཱདི ཝུཏྟཾ. ‘‘དྷམྨཙྪནྡོ སདྡྷཱ’’ཏི ཀེཙི.

༡༡༠༥. ཨུཔཱདཱནཀྑནྡྷེསྭེཝ ¶ ¶ པཝཏྟཏི ཏབྦིནིམུཏྟསྶ དྷམྨསྶ ཛཱིཝགྒཧཎཝིསཡསྶ པརམཏྠཏོ ཨབྷཱཝཱ. རཱུཔེ…པེ… ཝིཉྙཱཎེ ཝཱ པན ན པཏིཊྛཱཏི རཱུཔཱདཱིནཾ ཨཝིཔརཱིཏསབྷཱཝམཏྟེ ཨཊྛཏྭཱ སཡཾ སམཱརོཔིཏསྶ ཏེསུ པརིཀཔྤནཱམཏྟསིདྡྷསྶ ཀསྶཙི ཨཱཀཱརསྶ ཨབྷིནིཝེསནཏོ. ཏེནེཝཱཧ ‘‘ཏཏོ ཨཉྙཾ ཀཏྭཱ’’ཏི. ཏཏོ ཨུཔཱདཱནཀྑནྡྷཏོ. ཝེདནཱདཡོཔི ཧི ཀེཙི དིཊྛིགཏིཀཱ ཨནིཙྩཱཏི པསྶནྟཱིཏི. ཏཏོཏི ཝཱ སརཱིརསངྑཱཏརཱུཔཀྑནྡྷཏོ. ‘‘ཨཉྙཾ ཛཱིཝཾ ཨཉྙཾ སརཱིར’’ནྟི ཧི ཝུཏྟཾ. ཧོཏཱིཏི བྷཝཏི སསྶཏཾ ཨཏྟཱཏི ཨཏྠོ. ཨཉྙནྟི བྲཧྨཨིསྶརཱདིཏོ ཨཉྙཾ.

ཨརཱུཔབྷཝོ ཝིཡ རཱུཔརཱགཔྤཧཱནེན རཱུཔབྷཝོ ཀཱམརཱགཔྤཧཱནེན པཏྟབྦོ. རཱུཔཱིབྲཧྨཱནཉྩ པཉྩཀཱམགུཎིཀོ རཱགོ པཧཱིཡཏི, ན ཝིམཱནཱདཱིསུ རཱགོཏི སོ ཨཀཱམརཱགོཏི ཀཏྭཱ ཀཱམཱསཝོ ན ཧོཏཱིཏི ཨཊྛཀཐཱཡཾ པཊིཀྑིཏྟཾ. ཊཱིཀཱཀཱརེཧི པན ཀཱམཱསཝབྷཝཱསཝཝིནིམུཏྟལོབྷཱབྷཱཝདསྶནེན རཱུཔཱིབྲཧྨཱནཾ ཝིམཱནཱདིརཱགསྶཔི ཀཱམཙྪནྡཱདིབྷཱཝཏོ དིཊྛིཝིཔྤཡུཏྟརཱུཔཱརཱུཔབྷཝརཱགཝིནིམུཏྟོ སབྦོ ལོབྷོ ཀཱམཱསཝོཏི དསྶིཏོ. ཏཏྠ ཡུཏྟཾ ཝིཙཱརེཏྭཱ གཧེཏབྦཾ. སིཡཱ ཨཱསཝསམྤཡུཏྟོ ཀཱམརཱགེན བྷཝརཱགེན ཝཱ སཧུཔྤཏྟིཡཾ, སིཡཱ ཨཱསཝཝིཔྤཡུཏྟོ ཏདཉྙརཱགེན སཧུཔྤཏྟིཡཾ, ‘‘ཙཏཱུསུ དིཊྛིགཏཱ’’ཏིཨཱདིཔཱལི༹ཡཱ ཨབྷཱཝདསྶནེན ཀཱམཱསཝབྷཝཱསཝཝིནིམུཏྟལོབྷཱབྷཱཝཾ དསྶེཏྭཱ ‘‘ཀཱམཱསཝོ’’ཏིཨཱདིཔཱལི༹དསྶནེན དིཊྛིརཱགསྶ ཀཱམཱསཝབྷཱཝཾ སཱདྷེཏི. པཧཱཏབྦདསྶནཏྠནྟི པཧཱཏབྦཏཱདསྶནཏྠཾ. པཧཱནེཏི པཧཱནནིམིཏྟཾ.

༡༡༢༡. ཛཱཏིཡཱཏི ཁཏྟིཡསབྷཱཝཱདིཛཱཏིསམྤཏྟིཡཱ. གོཏྟེནཱཏི གོཏམགོཏྟཱདིཨུཀྐཊྛགོཏྟེན. ཀོལཔུཏྟིཡེནཱཏི མཧཱཀུལབྷཱཝེན. ཝཎྞཔོཀྑརཏཱཡཱཏི ཝཎྞསམྤནྣསརཱིརཏཱཡ. ‘‘པོཀྑར’’ནྟི ཧི སརཱིརཾ ཝུཙྩཏཱིཏི. མཱནཾ ཛཔྤེཏཱིཏི མཱནཾ པཝཏྟེཏི ཀརོཏི. པཝཏྟོ མཱནོ པཝཏྟམཱནོ. པུགྒལཝིསེསནྟི སེཡྻསྶ སེཡྻོཏིཨཱདིབྷེདཾ པུགྒལཝིསེསཾ. སེཡྻཾ བྷིནྡིཏྭཱ པཝཏྟམཱནོ སེཡྻམཱནོ. ཏིཎྞནྟི སེཡྻསྶ སེཡྻཱདཱིནཾ ཏིཎྞཾ ‘‘སེཡྻོཧམསྨཱི’’ཏིཨཱདིནཱ ཨཉྙཾ པུགྒལཾ ཨནིསྶཱཡ ཝུཏྟཱནཾ. སེཡྻཱདིཝསེན ཨཏྟནོ མནནཾ པགྒཧོ མཱནོ, ཏསྶ ཀརཎཾ སེཡྻོཧམསྨཱིཏིཨཱདིཔཝཏྟིཡེཝཱཏི ཝུཏྟཾ ‘‘སེཡྻོཏི ཨཱདིཀིཙྩཀརཎ’’ནྟི.

༡༡༤༠. སབྦོཔི ¶ ལོབྷོ ཨབྷིཛ྄ཛྷཱསབྷཱཝོཏི ཨབྷིཛ྄ཛྷཱ ཨཱསཝདྭཡསབྷཱཝཱ, ཀཱམརཱགོ ཀཱམཱསཝསབྷཱཝོ ཨེཝཱཏི ཨཱསཝདྭཡཨེཀཱསཝབྷཱཝོ ཨབྷིཛ྄ཛྷཱཀཱམརཱགཱནཾ ཝིསེསོ ཝུཏྟོ. ན ཨབྷིཛ྄ཛྷཱ ¶ ཙ དྷམྨཱ ཋཔེཏྭཱ དིཊྛིཾ ཨཝིཛྫཉྩ ནོཨཱསཝསབྷཱཝཱ. ཨབྷིཛ྄ཛྷཱ ཙ ཨཱསཝདྭཡསབྷཱཝཱ ཨེཝ, ནཨབྷིཛ྄ཛྷཱསབྷཱཝོ ཙ ལོབྷོ ནཏྠཱིཏི ཨདྷིཔྤཱཡེན ‘‘ནོཨཱསཝལོབྷསྶ སབྦྷཱཝོ ཝིཙཱརེཏབྦོ’’ཏི ཨཱཧ. གཎནཱཡ ཧེཏུཡཱ སཏྟཱཏི ཝུཏྟནྟི པཉྷཱཝཱརཔཱཋཾ སནྡྷཱཡ ཝུཏྟཾ. ཏཏྠ ཧི ‘‘ཨཱསཝོ དྷམྨོ ཨཱསཝསྶ དྷམྨསྶ ཧེཏུཔཙྩཡེན པཙྩཡོ. ཨཱསཝོ དྷམྨོ ནོཨཱསཝསྶ དྷམྨསྶ. ཨཱསཝོ དྷམྨོ ཨཱསཝསྶ ཙ ནོཨཱསཝསྶ ཙ. ནོཨཱསཝོ དྷམྨོ ནོཨཱསཝསྶ. ནོཨཱསཝོ དྷམྨོ ཨཱསཝསྶ. ནོཨཱསཝོ དྷམྨོ ཨཱསཝསྶ ཙ ནོཨཱསཝསྶ ཙ. ཨཱསཝོ ཙ ནོཨཱསཝོ ཙ དྷམྨཱ ནོཨཱསཝསྶ ཧེཏུཔཙྩཡེན པཙྩཡོ’’ཏི (པཊྛཱ. ༣.༣.༡༦) ཨིམེསཾ ཝཱརཱནཾ ཝསེན ‘‘གཎནཱཡ སཏྟཱ’’ཏི ཝུཏྟཾ. ཏཏྠ ཡདི ནོཨཱསཝསབྷཱཝོཔི ལོབྷོ སིཡཱ, དིཊྛིསམྤཡུཏྟཙིཏྟསྶ ཝསེན ‘‘ཨཱསཝོ ཙ ནོཨཱསཝོ ཙ དྷམྨཱ མོཧཡཐཱཝུཏྟལོབྷཱ ཨཱསཝསྶ དྷམྨསྶ དིཊྛིཡཱ ཧེཏུཔཙྩཡེན པཙྩཡོ’’ཏི སཏྟམོ, པཱལི༹ཡཾ ཨཱགཏཾ སཏྟམཾ ཨཊྛམཾ ཀཏྭཱ ‘‘ཨཱསཝོ ཙ ནོཨཱསཝོ ཙ དྷམྨཱ ཨཱསཝསྶ ཙ ནོཨཱསཝསྶ ཙ དྷམྨསྶ ཧེཏུཔཙྩཡེན པཙྩཡོ’’ཏི ནཝམོ པཉྷོ ཝུཙྩེཡྻ, ན པན ཝུཏྟོཏི. ཨེཝཾ དིཊྛིསམྤཡུཏྟལོབྷསྶ ནོཨཱསཝབྷཱཝཱབྷཱཝཾ དསྶེཏྭཱ ཨིཏརསྶཔི ཏཾ དསྶེཏུཾ ‘‘དིཊྛིཝིཔྤཡུཏྟེ ཙཱ’’ཏིཨཱདི ཝུཏྟཾ.

༡༡༦༢. ཡཐཱརཱུཔེ རཱུཔཔྤབནྡྷེ ཝཏྟམཱནེ པུགྒལོ གཙྪཏི ཏིཊྛཏི ནིསཱིདཏཱིཏི ཝུཙྩཏི, ཏཐཱ ཝིསདརཱུཔསྶ ཨུཔྤཱདཀཾ ཙིཏྟཾ ཨིརིཡཱཔཐཱུཔཏྠམྦྷཀཾ. ཏཾ པན ཀུསལཏོ ཀིརིཡཏོ ཙ པཉྩམཛ྄ཛྷཱནཙིཏྟཾ ཨབྷིཉྙཱཔྤཏྟཾ ཨཔྤཏྟཉྩ བྷིནྡིཏྭཱ སཏྟཔཉྙཱས ཛཝནཱནི ཝོཊྛབྦནཉྩཱཏི ཨཊྛཔཉྙཱསཝིདྷཾ. སཧཛཱཏདྷམྨཱནཾ ཨཀམྨཉྙབྷཱཝཀརཏྟཱ ཐིནམིདྡྷསཧགཏཙིཏྟཾ ཝིསདཱནི རཱུཔཱནི ན སམུཊྛཔེཏི ན ཨུཔཏྠམྦྷེཏི ཙཱཏི ཝུཏྟཾ ‘‘ཨིརིཡཱཔཐཾ སནྡྷཱརེཏུཾ ཨསཀྐོནྟ’’ནྟི.

༡༡༦༣. ཝིཔཀྑེཔི བྷཱཝཏོ ཨནེཀནྟིཀཏྟཱ རཱུཔཏྟཱསཱདྷཀཏྟཾ. གརུབྷཱཝཔྤཏྟི ལཧུཏཱཝིརཧོ དཊྛབྦོ. སཏིཔི ཨཉྙེསམྤི ཨཀུསལཱདཱིནཾ ལཧུཏཱཝིརཧེ ¶ ཐིནམིདྡྷཱནཾ ཨེཀནྟཏོ ལཧུཏཱཔཊིཔཀྑཏྟཱ ཀཱརཎཱནུརཱུཔཏྟཱ ཙ ཕལསྶ ‘‘ཐིནམིདྡྷསམུཊྛིཏརཱུཔེཧཱི’’ཏི ཝུཏྟཾ. ན ཛཱགར…པེ… སནྟཏིནྟི ཨེཏེན ནཱམཀཱཡེ སུཔནསྶ ཨསིདྡྷཏཾ དསྶེཏི. མིདྡྷསྶ ཕལཏྟཱཏི ཨེཏྠ མིདྡྷཾཡེཝ ནིདྡཱཀཱརཎནྟི ནཱཡཾ ནིཡམོ ཨིཙྪིཏོ, ནིདྡཱཀཱརཎམེཝ པན མིདྡྷནྟི ནིཡམོ ཨིཙྪིཏོཏི དཊྛབྦོ. ཏཐཱ ཧི ཁཱིཎཱསཝཱནཾ ནིདྡཱཡ མིདྡྷཏོ ཨཉྙཾ ཀཱརཎཾ ཀརཛཀཱཡསྶ དུབྦལབྷཱཝོ ཨཊྛཀཐཱཡཾ དསྶིཏོཏི.

ཚཱདནཾ ¶ , ཨཝཏྠརཎཾ ཝཱ ཨོནཱཧོ, སོ རཱུཔསྶེཝ སབྷཱཝོཏི པརསྶ ཨཱསངྐཾ མནསི ཀཏྭཱ ཨཱཧ ‘‘ཏེན སཧ ཝུཏྟཱ ཨོནཱཧཔརིཡོནཱཧཱ ཙཱ’’ཏི. ཨསངྐོཙཝསེན ཝིསདཱ པཝཏྟི ཝིཔྥཱརིཀབྷཱཝོ. ཨཱཝརཎབྷཱཝོ ཝིཡཱཏི ཨེཏེན ཨཱཝརཎསབྷཱཝཏྟེཔི མིདྡྷསྶ ཏབྦིདྷུརོ ཨནཉྙསཱདྷཱརཎཏྟཱ ཨོནཧནཱདིབྷཱཝོཏི དསྶེཏི. སཱམཉྙཉྷི པཉྩནྣམྤི ཀཱམཙྪནྡཱདཱིནཾ ཨཱཝརཎསབྷཱཝོཏི ཨཱཝརཎབྷཱཝསདིསསྶ ཨོནཧནཱདིབྷཱཝསྶ ནཱམཀཱཡེ ལབྦྷམཱནསྶ གཧིཏཏཱཏི ཨེཏྠཱདྷིཔྤཱཡོ.

པཱནནྟི ཨནུཡོགོཏི ཙ ཏཾཀིརིཡཱསཱདྷིཀཱ ཙེཏནཱ ཨདྷིཔྤེཏཱཏི སུརཱཔཱནསྶ སུརཱ…པེ… ཡོགསྶ ཙ ཨཀུསལབྷཱཝེན ཨུཔཀྐིལེསདུབྦལཱིཀརཎབྷཱཝོ ཡུཏྟོཏི ཝུཏྟོ. ‘‘སུརཱམེརཡསྶ ཨཛ྄ཛྷོཧརཎཾ པཱནཾ པམཱདཊྛཱནཱནུཡོགོ ཙཱ’’ཏི པརསྶ ཨདྷིཔྤཱཡོ. ནཱིཝརཎཾ ཧུཏྭཱ ཝཱཏིཨཱདིནཱ ཨིདཾ དསྶེཏི ‘‘ནཱིཝརཎསབྷཱཝཱནཾ ནཱིཝརཎསམྤཡུཏྟབྷཱཝདསྶནཔརཱཡ ཙོདནཱཡ ནཱིཝརཎནྟི ཀཏྠཙི ཨདིཊྛཔཡོགསྶ ཨསམྤཡུཏྟསྶ རཱུཔསྶ ཡཐཱལཱབྷཏོ གཧཎཾ ཉཱཡོཡེཝ ན ཧོཏི, སིདྡྷནཱིཝརཎབྷཱཝསམྤཡུཏྟསབྷཱཝཱནཾཡེཝ པན གཧཎནྟི ཏཾསབྷཱཝཱ ཨརཱུཔདྷམྨཱཡེཝ དསྶིཏཱ, ན རཱུཔནྟི ཐིནཾ ཝིཡ མིདྡྷམྤི ཨརཱུཔམེཝཱཏི ཝིཉྙཱཡཏཱི’’ཏི. ཡནྟི ཡེན ཝཙནེན. ཨསམྦྷཝཝཙནཏོཏི ཨསམྦྷཝཝཙནབྷཱཝཏོ.

ཏེནཱཏི ཏེན རཱུཔཱརམྨཎསྶ ཚནྡརཱགསྶ པཧཱནཝཙནེན. རཱུཔཔྤཧཱནཏོ ཨཉྙོཏི ཀཏྭཱ རཱུཔེ ཚནྡརཱགཔྤཧཱནཾ ‘‘ཨཉྙོ ཀཱརོ’’ཏི ཝུཏྟཾ. ཡཾ ཨཊྛཀཐཱཡཾ ‘‘ཨཉྙཐཱ’’ཏི ཝུཏྟཾ. ཨིདནྟིཨཱདིནཱ ‘‘ཏཾ པཛཧཐཱ’’ཏི པཱལི༹ཡཱ ན ནིཔྤརིཡཱཡཔྤཧཱནཾ ཨདྷིཔྤེཏནྟི དསྶེཏི. ཨརཱུཔསྶེཝ ཡུཛྫཏཱིཏི ¶ སུདུདྡསཾ དཱུརངྒམཱདིཔྤཝཏྟཀཾ ཙིཏྟཾ ཏཾསམྤཡུཏྟོ ཨརཱུཔདྷམྨོཡེཝ ཝིབནྡྷིཏུཾ སམཏྠོཏི དསྶེཏི. ཙེཏསོ པརིཡུཊྛཱནནྟི ཀུསལཙིཏྟསྶ གཧཎཾ. ནཱིཝརཎཱནི ཧི ཨུཔྤཛྫམཱནཱནི ཨུཔྤཛྫིཏུཾ ཨཔྤདཱནེན ཀུསལཝཱརཾ གཎྷནྟཱིཏི ཝུཙྩནྟི. གཧཎཉྩེཏྠ པརིཡུཊྛཱནཾ ‘‘ཙོརཱ མགྒེ པརིཡུཊྛིཾསཱུ’’ཏིཨཱདཱིསུ ཝིཡ.

༡༡༧༦. ཨུདྡྷཙྩཾ ཀུཀྐུཙྩཉྩ སཧ ཝུཏྟནྟི ཨུདྡེསཔུཙྪཱནིགམནེ སནྡྷཱཡ ཝུཏྟཾ. ཡཾ པན ཨཊྛཀཐཱཡཾ ཨུདྡྷཙྩསྶ ཀུཀྐུཙྩེན ཝིནཱབྷཱཝཀཱརཎཾ ཝཏྭཱ ‘‘བྷིནྡིཏྭཱ ཝུཏྟ’’ནྟི ཝུཏྟཾ, ཏཾ ‘‘ནཱིཝརཎཱ ཙེཝ ནཱིཝརཎསམྤཡུཏྟཱ ཙཱ’’ཏི པདསྶ ནིདྡེསེ ཨུདྡྷཙྩཀུཀྐུཙྩཱནཾ ཝིསུཾ ནིདྡིཊྛཏཾ སནྡྷཱཡ ཝུཏྟཾ. ཀཱམཙྪནྡསྶ ཨུཀྐཊྛནཱིཝརཎཏཱ ཨོརམྦྷཱགིཡབྷཱཝོ. སོ ཧི རཱུཔརཱགཱརཱུཔརཱགཔྤཀཱརཀཱམཙྪནྡཾ ¶ ཨུཔཱདཱཡ ཏཏོ ཏིབྦཀིཙྩཏཱཡ ‘‘ཨུཀྐཊྛནཱིཝརཎ’’ནྟི ཝུཙྩཏི. ཀཱམཙྪནྡནཱིཝརཎནྟྭེཝ ལོབྷོ ཝུཏྟོ, ན བྷིནྡིཏྭཱ. ཀཱམཙྪནྡནཱིཝརཎསྶ ཙ ཨནཝསེསཏོ ཨནཱགཱམིམགྒེན པཧཱནེ ཝུཙྩམཱནེ ཙཏུཏྠམགྒཝཛ྄ཛྷོ ལོབྷོ ཨནཱིཝརཎསབྷཱཝོ ཨཱཔཛྫཏཱིཏི ཨཱཧ ‘‘ཡདི…པེ… སིཡཱ’’ཏི. ནོནཱིཝརཎོ རཱུཔརཱགཱརཱུཔརཱགཔྤཀཱརོ ལོབྷདྷམྨོ ནཱིཝརཎསྶ ཨཝིཛྫཱདིཀསྶ. ཨཱདི-སདྡེན ‘‘ནོནཱིཝརཎོ དྷམྨོ ནཱིཝརཎསྶ ཙ ནོནཱིཝརཎསྶ ཙ དྷམྨསྶ. ནཱིཝརཎོ ཙ ནོནཱིཝརཎོ ཙ དྷམྨཱ ནཱིཝརཎསྶ དྷམྨསྶ. ནཱིཝརཎོ ཙ ནོནཱིཝརཎོ ཙ དྷམྨཱ ནོནཱིཝརཎསྶ དྷམྨསྶ. ནཱིཝརཎོ ཙ ནོནཱིཝརཎོ ཙ དྷམྨཱ ནཱིཝརཎསྶ ཙ ནོནཱིཝརཎསྶ ཙ དྷམྨསྶ ཧེཏུཔཙྩཡེན པཙྩཡོ’’ཏི (པཊྛཱ. ༣.༨.༢༥) ཨིམེ པཉྷེ སངྒཎྷཱཏི. ཙཏྟཱརཱིཏི ཝུཏྟཾ ནཱིཝརཎཔདམཱུལཀཱནཾ ཏིཎྞཾ ནོནཱིཝརཎམཱུལཀསྶ ཨེཀསྶ ཝསེན. ནཱིཝརཎནོནཱིཝརཎཏདུབྷཡམཱུལཀཱནཾ པན ཏིཎྞཾ ཏིཎྞཾ ཝསེན ནཝཱཏི ཝུཏྟཾ. ཏསྨཱཏི ཡཐཱདསྶིཏནཡཱཡ པཱལི༹ཡཱ ཨབྷཱཝཱ ནོནཱིཝརཎལོབྷཱབྷཱཝཱ.

༡༢༡༩. ཏེནེཝཱཏི པུརིམདིཊྛིཨཱཀཱརེནེཝ ཨུཔྤཛྫམཱནེན. དིཊྛིགཏིཀེཧི ཝུཙྩམཱནཱནཾ ‘‘ནིཙྩཾ སུབྷ’’ནྟི ཨེཝམཱདིཝཙནཱནཾ, དིཊྛིརཧིཏེཧི ཝུཙྩམཱནཱནཾ གགནཀུསུམཱདིལོཀཝོཧཱརཝཙནཱནཉྩ ཝཏྠཱུནི ཝཱཙཱཝཏྠུམཏྟཱནཱིཏི ཨཱཧ ‘‘ཝཱཙཱ…པེ… ཝཱ’’ཏི.

༡༢༢༡. ཙིཏྟེན ¶ པརལོཀེ ཋིཏོཏི ཡསྨིཾ ལོཀེ ནིབྦཏྟིཝསེན སཡཾ ཋིཏོ, ཏཏོ ཨཉྙཾ ལོཀཾ པརལོཀོཏི ཙིཏྟེན གཧེཏྭཱ ཋིཏོ.

༡༢༣༦. ན ཧི པུརིམེཧཱིཏིཨཱདིནཱ པཋམམགྒཱདཱིཧི སམུགྒྷཱཊིཏཨཔཱཡགམནཱིཡབྷཱཝཱདིཀཱ ཨེཝ རཱགཱདཡོ དུཏིཡམགྒཱདཱིཧི པཧཱིཡནྟཱིཏི དསྶེཏི.

༡༢༨༧. ཨུཔཊྛིཏེཔི དུགྒཏིནིམིཏྟཱདིཀེ ན ཏཐཱ ཏིབྦོ ལོབྷོ ཨུཔྤཛྫཏི, ཡཐཱ སུགཏིནིམིཏྟཱདིཀེཏི ཨཱཧ ‘‘བལཝནིཀནྟིཝིརཧེནཱ’’ཏི.

༡༣༠༡. ཨེཀསྨིཾ ཙིཏྟུཔྤཱདེ ཨུཔྤནྣཱནཾ ཝིཡ ཨེཀསྨིཾ སནྟཱནེ ཨུཔྤནྣཱནམྤི སཧཔཝཏྟིཔརིཡཱཡོ ཨཏྠཱིཏི པཧཱནེཀཊྛེན རཱགརཎེན ཝིཙིཀིཙྪུདྡྷཙྩསཧགཏམོཧསྶ སརཎཏཱ ཝུཏྟཱ. ཨུདྡྷཙྩཝིཙིཀིཙྪཱཧི ཡོ མོཧོ སཧཛཱཏོ བྷཝེ, སོཔི རཱགེན སརཎོ པཧཱནེཀཊྛབྷཱཝཏོཏི ¶ . ལོབྷདོསམོཧཏདེཀཊྛཀིལེསཏཾསམྤཡུཏྟཀྑནྡྷཏཾསམུཊྛཱནཀམྨབྷེདཏོ སབྦསྶཔི ཨཀུསལསྶ སངྒཧཎཝསེན པཝཏྟོ སརཎཔདནིདྡེསོ ཨརཎཝིབྷངྒསུཏྟེནཔི ཨཉྙདཏྠུ སཾསནྡཏཱིཏི དསྶེཏུཾ ‘‘ཨརཎཝིབྷངྒསུཏྟེ’’ཏིཨཱདིམཱཧ. ཡཾ པན ཨཊྛཀཐཱཡཾ སམྤཡོགཔྤཧཱནེཀཊྛབྷཱཝདཱིཔནེན རཱགཱདཱིནཾ སབྦེསཾ ཝཱ ཨཀུསལདྷམྨཱནཾ སརཎབྷཱཝདསྶནཾ, ཏཾ པཱལི༹ཡཱ ཡཐཱདསྶིཏདྷམྨཱནཾ ཨཉྙམཉྙསརཎབྷཱཝདསྶནཔརཾ, ཏདཉྙདྷམྨཱནཾ སརཎབྷཱཝཔཊིསེདྷནཔརནྟི ཨརཎཝིབྷངྒསུཏྟཝིརོདྷོཏི དཊྛབྦཾ. སུཏྟནྟདེསནཱཡ ཝཱ པརིཡཱཡཀཐཱབྷཱཝཏོ ནིཔྤརིཡཱཡཏོ སརཎབྷཱཝོ ཝིཡ ཨརཎབྷཱཝོཔི ཨཀུསལདྷམྨཱནཾཡེཝཱཏི ཏཐཱཔཝཏྟཱཡ ཨཊྛཀཐཱཡ ན ཀོཙི སུཏྟཝིརོདྷོཏི དཊྛབྦཾ.

སུཏྟནྟིཀདུཀནིཀྑེཔཀཐཱཝཎྞནཱ

༡༣༡༣. ཨཧཾ-སདྡེན ཧེཏུབྷཱུཏེན ཡོ ཨཏྠོཏི ཨེཏྠ ཨཧཾ-སདྡོ ཨཏྠོཏི ཨདྷིཔྤེཏོ. ཨཏྠཱཝབོདྷནཏྠོ ཧི སདྡཔྤཡོགོ. ཨཏྠཔརཱདྷཱིནོ ཀེཝལོ ཨཏྠཔདཏྠཀོ, སོ པདཏྠཝིཔརིཡེསཀཱརིནཱ པན ཨིཏི-སདྡེན པརཏོ པཡུཏྟེན སདྡཔདཏྠཀོ ཛཱཡཏི ཡཐཱ གཱཝཱིཏི ཨཡམཱཧཱཏི གོ-སདྡཾ ཨཱཧཱཏི ཝིཉྙཱཡཏི. ཏེན ཝིཉྙཏྟིཝིཀཱརསཧིཏོ སདྡོ པཉྙཏྟཱིཏི དསྶེཏི. ཏཐཱ ཧི ‘‘བུདྡྷསྶ བྷགཝཏོ ¶ ཝོཧཱརོ ལོཀིཡསོཏེ པཊིཧཉྙཏཱི’’ཏིཨཱདིནཱ (ཀཐཱ. ༣༤༧) པཉྙཏྟིཡཱ ཝཙནབྷཱཝཾ སཱདྷཡཏི. ཨཉྙཐཱཏིཨཱདིནཱ པཉྙཏྟིཡཱ ཨསདྡསབྷཱཝཏྟེ དོསམཱཧ. ཨདྷིཝཙནཱདིཏཱ སིཡཱ, ཏཐཱ ཙ ཨདྷིཝཙནཱདཱིནཾ ཨདྷིཝཙནཔཐཱདིཏོ ཝིསེསོ ན སིཡཱཏི དུཀོཡེཝ ན སམྦྷཝེཡྻཱཏི ཨདྷིཔྤཱཡོ. ཨཊྛཀཐཱཡཾ པན སཀསནྟཏིཔརིཡཱཔནྣེ རཱུཔཱདཡོ དྷམྨེ སམཱུཧཏོ སནྟཱནཏོ ཙ ཨེཀཏྟཝསེན གཧེཏྭཱ ཨཧནྟི ཝོཧརིཡམཱནཱ ཨུཔཱདཱཔཉྙཏྟི སངྑཱཡཏི ཝོཧརཱིཡཏཱིཏི སངྑཱཏི ཨདྷིཔྤེཏཱ. ཏཐཱ སེསེསུ ཡཐཱསམྦྷཝཾ དཊྛབྦཾ. ཏེནེཝཱཧ ‘‘དཏྟོཏི ཨེཏྟཱཝཏཱ སཏྟཔཉྙཏྟིཾ དསྶེཏྭཱ ཨཉྙམྤི ཨུཔཱདཱཔཉྙཏྟིཾ དསྶེཏུ’’ནྟིཨཱདི. པདཏྠསྶཱཏི ཨཧཾ-སདྡཱདིཔདཱབྷིདྷེཡྻསྶ, པརམཏྠསྶ ཝཱ. ཨདྷིཝཙནཾ སདྡོཏི ཨདྷིཔྤཱཡེན ‘‘ཝདནྟེནཱ’’ཏིཨཱདི ཝུཏྟཾ. སོ ཧི ཨཏྟནཱ ཉཱཔེཏབྦམཏྠཾ སཡཾ ཉཱཏོ ཨེཝ ཉཱཔེཏཱིཏི ཨགྒཧིཏསམྦནྡྷསྶ ན སདྡོ ཨཏྠཔྤཀཱསནསམཏྠོཏི ཝུཏྟཾ ‘‘པུབྦེ གཧིཏསཉྙེནཱ’’ཏི. ཝིསེསེན ཉཱཡཏཱིཏི སམཉྙཱཏི སཾ-སདྡསྶ ཝིསེསཏྠཏཾ ཨཱཧ.

ཀརཱིཡཏཱིཏི ཨིདཾ ཨིམསྶཏྠསྶ ཨདྷིཝཙནནྟི ཨེཝཾ ནིཀྑིཔཱིཡཏི. ནཱམབྷཱུཏཾ ཝཙནམེཝ ཏཾ ཏཾ ¶ ཨཏྠཾ ནིདྡྷཱརེཏྭཱ སཧེཏུཀཾ ཀཏྭཱ ཝདཏི བྱཉྫཡཏི ཙཱཏི ཨཱཧ ‘‘ནཱམམིཙྩེཝ ཝུཏྟཾ ཧོཏཱི’’ཏི. ཏེནེཝཱཧ ‘‘ན ཧི པཐཝཱི’’ཏིཨཱདི. པཐཝཱིསངྑཱཏནྟི པཐཝཱི-སདྡཱབྷིདྷེཡྻཾ.

ཨཱཙརིཡཱཏི ཨཊྛཀཐཱཡ སཾཝཎྞནཀཱ ཨཱཙརིཡཱ, ན ཨཊྛཀཐཱཙརིཡཱཏི ཨདྷིཔྤཱཡེན ཝདཏི. མཱཏིཀཱཡནྟི མཱཏིཀཱཝཎྞནཱཡཾ. ཏེནཱཏི མཱཏིཀཱཝཎྞནཱཝཙནེན. ཨིམིསྶཱ པཱལི༹ཡཱ ཨཊྛཀཐཱཡ ཙ ཨཏྠདསྶནསྶ ཨེཏསྶ ཡཐཱཝུཏྟསྶ ཨཱཙརིཡཝཱདསྶ ཝིརོདྷོ སིཡཱ, ཏམེཝ ཝིརོདྷཾ ‘‘ན ཧཱི’’ཏིཨཱདིནཱ ཝིཝརཏི. ཏཏྠ ཨདྷིཝཙནཔཐཱདིབྷཱཝེན ཝུཏྟཱནཾ དྷམྨཱནཾ པཀཱསཀསྶ སབྷཱཝསྶ ཝིཉྙཏྟིཝིཀཱརསཧིཏསདྡསྶེཝ ཝཙནམཏྟཾ ཨདྷིཀཱརཾ ཀཏྭཱ པཝཏྟིཨཱདི ཡུཛྫཏི, ན ཨསབྷཱཝསྶཱཏི ཨདྷིཔྤཱཡེན ‘‘ཨུཔྤཱདཝཡཀིཙྩརཧིཏསྶཱ’’ཏིཨཱདི ཝུཏྟཾ. ཏཏྠ ཨནིདྡྷཱརིཏསབྷཱཝསྶཱཏི པརམཏྠཏོ ཨནུཔལདྡྷསབྷཱཝསྶ.

དུཝིདྷཱཏི པཉྙཱཔནཔཉྙཱཔིཏབྦབྷེདཏོ དུཝིདྷཱ. ཡཐཱཝུཏྟཔྤཀཱརཱཏི ཨུཔྤཱདཝཡཀིཙྩརཧིཏཱཏིཨཱདིཔྤཀཱརཱ. ཨཊྛཀཐཱཡཾ པུགྒལཔཉྙཏྟིཝཎྞནཱཡཾ. ནནུ ¶ ཙ ཏཏྠ ཨུཔནིདྷཱཔཉྙཏྟིཨཱདཡོ ཨཔརཱཔི པཉྙཏྟིཡོ ཝུཏྟཱ, ཨཐ ཀསྨཱ ‘‘ཚ པཉྙཏྟིཡོཝ ཝུཏྟཱ’’ཏི ཝུཏྟཾ? སཙྩཾ ཝུཏྟཱ, ཏཱ པན ཝིཛྫམཱནཔཉྙཏྟིཨཱདཱིསུ ཚསུ ཨེཝ ཨནྟོགདྷཱཏི ‘‘ཨཊྛཀཐཱཡཾ ཝིཛྫམཱནཔཉྙཏྟིཨཱདཡོ ཚ པཉྙཏྟིཡོཝ ཝུཏྟཱ’’ཏི ཝུཏྟཾ.

ཏཏྠ རཱུཔཱདི ཝིཡ ཨཝིཛྫམཱནཏྟཱ པཉྙཱཔིཏབྦཏྟཱ ཙ ཨཝིཛྫམཱནཔཉྙཏྟི, ཨཝིཛྫམཱནསྶ ཙ སཏྟརཐཱདིཨཏྠསྶ པཉྙཱཔནཏོ ཨཝིཛྫམཱནཔཉྙཏྟཱིཏི ཨེཝཾ ཨཝིཛྫམཱནཔཉྙཏྟིཝཙནེན ཡཐཱཝུཏྟཱ དུཝིདྷཱཔི པཉྙཏྟི སངྒཧིཏཱཏི ཨཱཧ ‘‘ཨཝིཛྫམཱན…པེ… ཝུཏྟཱ’’ཏི. ཨིཏརེཧཱིཏི ཝིཛྫམཱནཔཉྙཏྟིཨཱདཱིཧི ཨཝསེསེཧི པཉྩཧི, རཱུཔཝེདནཱདཱིནཾ སཏྟརཐཱདཱིནཉྩ ཨཏྠཱནཾ པཀཱརེཧི ཉཱཔནཏོ ཏཾཏཾཝཱཙཀོ སདྡོཡེཝ ཝིསཡབྷེདཏོ ཝིཛྫམཱནཔཉྙཏྟིཨཱདིབྷེདཱ པཉྙཏྟི སངྑཱདཱིཧི དསཧི པདེཧི ཝུཏྟཱཏི ཨཡཾ པུརིམོ ཨཏྠོ, སོ ཙ ཡཐཱརུཏཝསེནེཝ པཱལི༹ཡཱ ཝིཉྙཱཡམཱནཏྟཱ ‘‘པཱལི༹ཨནུགཏོ ཨུཛུཀོ’’ཏི ཙ ཝུཏྟོ. ཡདི ཙཱཏིཨཱདཱིསུ སཏྟཱདིཀཱ ཡཐཱཝུཏྟཔྤཀཱརཱ ཨུཔཱདཱཔཉྙཏྟི ཡདི ཨཝིཛྫམཱནཔཉྙཏྟི, སཱ ཨཏྠཱིཏི ན ཝཏྟབྦཱ. ཨཝིཛྫམཱནཱ ཙ སཱ པཉྙཱཔིཏབྦཏོ པཉྙཏྟི ཙཱཏི ཏེསཾ ཨཱཙརིཡཱནཾ ལདྡྷཱིཏི ཨདྷིཔྤཱཡོ. ཨིདཱནི ཏསྶཱ ལདྡྷིཡཱ ཝསེན པཉྙཏྟིཔཐཱཏི ཝུཏྟདྷམྨཱནམྤི ཝིཛྫམཱནཔཉྙཏྟིབྷཱཝཱཔཏྟིཙོདནེན ཏཏྠ དོསཾ དསྶེཏི ‘‘ཡཐཱ ཙཱ’’ཏིཨཱདིནཱ. ཏཏོཏི ཡསྨཱ ¶ ཨཝིཛྫམཱནཏྟཱ པཉྙཱཔིཏབྦཏྟཱ ཙ སཏྟརཐཱདཱིནཾ ཨཝིཛྫམཱནཔཉྙཏྟིབྷཱཝོ ཝིཡ ཝིཛྫམཱནཏྟཱ པཉྙཱཔིཏབྦཏྟཱ ཙ སབྦེསཾ སབྷཱཝདྷམྨཱནཾ ཝིཛྫམཱནཔཉྙཏྟིབྷཱཝོ ཨཱཔཛྫཏི, ཏསྨཱཏི ཨཏྠོ.

‘‘ཨཐཱ’’ཏིཨཱདིནཱ པཉྙཏྟིཔཐནིདྡེསཏོ ཝིསིཊྛསྶ པཉྙཏྟིདྷམྨནིདྡེསསྶ སཡམེཝ ཀཱརཎམཱསངྐཏི. ‘‘ནཱཔཱི’’ཏིཨཱདིནཱ ཏསྶ ཀཱརཎསྶ ཨསིདྡྷཏཾ དསྶེཏི. ‘‘པུརིསོཏི སངྑཱ’’ཏིཨཱདཱིསུ སངྑཱདཡོཔི ནཱམཱདཱིཧི ཨཏྠཏོ ཨཝིསིཊྛཱ ཝུཏྟཱཏི ཨཱཧ ‘‘སངྑཱདིསདྡཱནཾ སམཱནཏྠཏྟཱ’’ཏི. ཝཙནགྒཧཎཾ ཝཙནུཙྩཱརཎཾ. ཨཉྙསྶཱཏི ནཱམཔཉྙཏྟིཾ སནྡྷཱཡཱཧ. ཏེསནྟི སངྐེཏགྒཧཎཝཙནགྒཧཎཱནཾ. ཨསམཏྠཏཱ ན སམྦྷཝཏཱིཏི ཡོཛནཱ. ཏམེཝ ཨསམྦྷཝཾ ‘‘ཡདི ཧཱི’’ཏིཨཱདིནཱ ཝིཝརཏི. པཉྙཏྟིཡཱཏི ནཱམཔཉྙཏྟིཡཱ. པཉྙཏྟིཔཉྙཱཔནེཏི ཡཱཡ ནཱམཔཉྙཏྟིཡཱ ཨུཔཱདཱཡཔཉྙཏྟི རཱུཔཱདཡོ ཙ པཉྙཱཔཱིཡནྟི, ཡཱ ཙ སོཏདྭཱརཝིཉྙཱཎསནྟཱནཱནནྟརམུཔྤནྣེན གཧིཏཔུབྦསངྐེཏེན མནོདྭཱརཝིཉྙཱཎསནྟཱནེན གཡ྄ཧཏི, སཱ ཨཡཾ ནཱམཱཏི ཏསྶཱ ¶ པཉྙཱཔནེ ཨསངྐརཏོ ཋཔནེ. ཨཐ ཝཱ སོཏདྭཱརཝིཉྙཱཎསནྟཱནཱནནྟརམུཔྤནྣེན མནོདྭཱརཝིཉྙཱཎསནྟཱནེན པཉྙཏྟིཡཱ གཱཧཱཔནེ པརིཙྪིནྡནེ. ཏསྶཱ ཨཉྙཱ པཉྙཏྟི ཝཏྟབྦཱ སིཡཱཏི ཏསྶཱ ནཱམཔཉྙཏྟིཡཱ ཉཱཔནེ སངྐེཏགྒཧཎཝཙནགྒཧཎཱནཾ སཧཀཱརཱིཀཱརཎབྷཱུཏཱ ཨཉྙཱ ནཱམཔཉྙཏྟི ཨཏྠཱིཏི ཝཏྟབྦཱ ཨནུཉྙཱཏབྦཱ སིཡཱ. ཏཏོ ཨཏྠཝིཛཱནནམེཝ ན སིཡཱཏི ཀེཝལཱནི སངྐེཏགྒཧཎཝཙནགྒཧཎཱནི ཨཏྠཔཉྙཱཔནེ ཝིཡ པཉྙཏྟིཉཱཔནེཔི ཨསམཏྠཱནི, པཉྙཏྟི ཙ ཉཱཏཱཡེཝ ཏེསཾ སཧཀཱརཱིཀཱརཎཾ ཏཾཛཱནནཏྠཾ པཉྙཏྟིཨནནྟརཔརིཀཔྤནེ ཙ ཨནཝཏྠཱནཱཔཏྟཱིཏི ཨཏྠཱདྷིགམསྶ སམྦྷཝོ ཨེཝ ན བྷཝེཡྻ.

སངྐེཏོ རཱུཔཱདཱིསུ ན ཀིཉྩི ཧོཏི, བྷཱུཏཱདིནིམིཏྟཾ བྷཱཝནཱཝིསེསཉྩ ཨུཔཱདཱཡ ཝོཧརིཡམཱནཱ ཀསིཎཱདིཔཉྙཏྟི ཝིཡ ཏཾ ཏཾ སངྐེཏིཏབྦཾ སངྐེཏཀརཎཉྩ ཨུཔཱདཱཡ ཝོཧཱརམཏྟོ, ཏསྶ ཙ པཉྙཱཔིཀཱ ནཱམཔཉྙཏྟཱིཏི ཡཐཱཝུཏྟདོསཱཔཏྟིཾ དསྶེནྟོ ‘‘ནཱཔི སངྐེཏགྒཧཎ’’ནྟི ཨཝོཙ. ནནུ ཙ ཨཏྠཝིཛཱནནཱསམྦྷཝཙོདནེནེཝ སངྐེཏགྒཧཎཱབྷཝོཔི དསྶིཏོཏི? སཙྩམེཏཾ, སངྐེཏེ པན ཨཱཙརིཡཱནཾ མཏིབྷེདོ ཝིཛྫཏི. ཏཏྠ ཨེཀཔཀྑིཀོ ཨཡཾ དོསོཏི དསྶནཏྠཾ ཏསྶ ཝིསུཾ ཝཙནཾ ཝུཙྩམཱནཱ རཱུཔཱདཡོ དྷམྨཱཝཙནཏྠཱ པཉྙཱཔིཏབྦཱ ཙ, ཏདབྷིདྷཱཡཀོ སདྡོ པཉྙཏྟཱིཏི. ཨེཏྟཱཝཏཱ སབྦཝོཧཱརོ སིཛ྄ཛྷཏཱིཏི ཨདྷིཔྤཱཡེན ‘‘ཝཙན…པེ… ཛནཾ ནཏྠཱི’’ཏི ཨཱཧ. པཉྙཏྟིཡཱ ཝཙནབྷཱཝོ སིདྡྷོ པཊིཧནནསོཏབྦཏཱདཱིཔཀཏྟཱ ¶ ཏེསཾ པཱཋཱནནྟི ཨདྷིཔྤཱཡོ. ཨཱདི-སདྡེན ‘‘ཨཏྠི ཀེཙི བུདྡྷསྶ བྷགཝཏོ ཝོཧཱརཾ སུཎནྟི, ནིརུཏྟིཔཊིསམྦྷིདཱ པཙྩུཔྤནྣཱརམྨཎཱ’’ཏི ཨེཝམཱདིཾ སངྒཎྷཱཏི. ཏསྨཱཏི ཡསྨཱ ‘‘པཉྙཏྟིདྷམྨཱ’’ཏི པདསྶ ཡཐཱཝུཏྟཔཉྙཏྟིཡོ ཨཏྠོཏི ཨེཏསྨིཾ པཀྑེ མཱཏིཀཱཝཎྞནཱཡ ཝིརོདྷོ, ཨཊྛཀཐཱཡཾ ཨཝུཏྟཏཱ, ཨིམིསྶཱ པཱལི༹ཡཱ ཨནནུགམོ, སབྦེ དྷམྨཱ པཉྙཏྟཱིཏི ནིདྡིསིཏབྦཏཱ, པཉྙཏྟིཔཐཔདསྶ ནཝཏྟབྦཏཱ, ཨནཝཏྠཱནཱཔཏྟིཏོ ཨཏྠཝིཛཱནནཱསམྦྷཝོཏི ཨནེཀེ དོསཱ, ཝིཉྙཏྟིཝིཀཱརསཧིཏསྶ པན སདྡསྶ པཉྙཏྟིབྷཱཝེ ཡཐཱཝུཏྟདོསཱབྷཱཝོ ཨནེཀེསཾ པཱཋཔྤདེསཱནཉྩ ཨནུལོམནཾ, ཏསྨཱ. ཏཏྠ ཡུཏྟཾ གཧེཏབྦནྟི ཨདྷིཔྤཱཡེནཱཧ ‘‘པཱལི༹…པེ… ཏབྦོ’’ཏི.

ཡདི ¶ སཏྟཱཏིཨཱདིནཱ སདྡསྶ པཉྙཏྟིབྷཱཝེ ཨཊྛཀཐཱཡ ཝིརོདྷམཱཧ. ཨེཝཾ པཉྙཏྟིབྷཱཝེ ཡདི སདྡསྶ པཉྙཏྟིབྷཱཝོ, ཏསྶ པརམཏྠཏོ ཝིཛྫམཱནཏྟཱ རཱུཔཱདིཨཏྠསྶ ཙ པཉྙཱཔནཏོ ཝིཛྫམཱནཔཉྙཏྟིབྷཱཝོ ཨེཝ སིཡཱ, ན ཨཝིཛྫམཱནཔཉྙཏྟིབྷཱཝོ. ན ཧི ཏེ སཏྟཱདཡོ པཉྙཏྟཱིཏི. ཨེཝཉྩ ཨཝིཛྫམཱནཔཉྙཏྟིཡཱ ཨབྷཱཝོ ཨེཝ སིཡཱ. ཝུཏྟཱ ཙ ཨཊྛཀཐཱཡཾ (པ. པ. ཨཊྛ. ༡ མཱཏིཀཱཝཎྞནཱ) ‘‘ཨཝིཛྫམཱནཔཉྙཏྟཱི’’ཏི. ཨིཏརོ ཝིསཡསྶ ཨཝིཛྫམཱནཏྟཱ ཏསྶ ཨཝིཛྫམཱནཔཉྙཏྟིབྷཱཝོཏི ཡཐཱཝུཏྟཝིརོདྷཱབྷཱཝཾ དསྶེནྟོ ‘‘ཨཝིཛྫམཱནཱན’’ནྟིཨཱདིམཱཧ. ཨིདཱནི སཏྟཱདིཝིསཡསྶ ཀེནཙིཔི པརིཡཱཡེན ཨཏྠིཏཱཡ ཨབྷཱཝདསྶནེན ཏབྦིསཡཱཡ པཉྙཏྟིཡཱ ཨཝིཛྫམཱནཔཉྙཏྟིབྷཱཝཾཡེཝ ཝཝཏྠཔེཏི ‘‘ཨཡཉྩ ཝཱདོ’’ཏི. ཝིཛྫམཱནཱ ཨེཝ སཏྟཱདཡོ རཱུཔཱདིསབྷཱཝཱབྷཱཝཝསེན ‘‘ཨཝིཛྫམཱནཱ’’ཏི ཝུཙྩནྟི, ན སབྦཐཱ ཨབྷཱཝཏོ. ཏཐཱ ཧི ཏཐཱ ཏཐཱ པཉྙཱཔིཡམཱནབྷཱཝེན ཝིཉྙཱཡནྟཱིཏི ཡཐཱཝུཏྟརཱུཔོ ཝཱདོ ‘‘རཱུཔཾ ཨཏྠཱིཏི? ཧེཝཏྠི ཧེཝ ནཏྠཱིཏི. སེཝཏྠི སེཝ ནཏྠཱིཏི. ན ཧེཝཾ ཝཏྟབྦེ. སེཝཏྠི སེཝ ནཏྠཱིཏི. ཨཱམནྟཱ. ཨཏྠཊྛོ ནཏྠཊྛོ’’ཏི (ཀཐཱ. ༣༠༦) ཨེཝཾ པཝཏྟཱཡ ཧེཝཏྠིཀཐཱཡ. ཏཏྠ ཧི རཱུཔཱདཡོ དྷམྨཱ རཱུཔཱདིསབྷཱཝེན ཨཏྠི, ཝེདནཱདིསབྷཱཝེན ནཏྠི, ཏསྨཱ སབྦམེཝིདཾ ཨེཝཾ ཨཏྠི ཨེཝཾ ནཏྠཱིཏི ཨེཝཾལདྡྷིཀེ སནྡྷཱཡ ‘‘རཱུཔཾ ཨཏྠཱི’’ཏི པུཙྪཱ སཀཝཱདིསྶ. ‘‘ཧེཝཏྠི ཧེཝ ནཏྠཱི’’ཏི ཝིསྶཛྫནཾ པརཝཱདིསྶ. ཨཐ ནཾ སཀཝཱདཱི ཡདི རཱུཔམེཝ ཨེཝཾ ཨཏྠི ཨེཝཾ ནཏྠཱིཏི ལདྡྷི, ཨེཝཾ སནྟེ སོ ཨེཝ ཨཏྠི སོ ཨེཝ ནཏྠི ནཱམཱཏི པུཙྪནྟོ ‘‘སེཝཏྠཱི’’ཏི ཨཱཧ. ཨིཏརོ ཏེནེཝ སབྷཱཝེན ཨཏྠིཏཾ, ཏེནེཝ ནཏྠིཏཾ སནྡྷཱཡ པཊིཀྑིཔཏི. དུཏིཡཾ པུཊྛོ སཀབྷཱཝེན ཨཏྠིཏཾ, པརབྷཱཝེན ནཏྠིཏཾ སནྡྷཱཡ པཊིཛཱནཱཏི. ཏཏོ སཀཝཱདཱི ‘‘ཨཏྠཊྛོ ནཏྠཊྛོ’’ཏིཨཱདིནཱ ཨཏྠིཏཱ ཝཱ ནཏྠིཏཱ ཝཱ ཨཉྙམཉྙཝིརུདྡྷཱ ཨེཀསྨིཾ དྷམྨེ ཝིནཱ ཀཱལབྷེདེན ཨསམྦྷཝཏྟཱཏི ཀིཾ ཨེཀཏྟཾ ཨཱཔཛྫཏཱིཏི དསྶེནྟོ ¶ པརཝཱདིཾ ནིགྒཎྷཱཏཱིཏི. པཊིསིདྡྷོཏི ཙ ‘‘རཱུཔཾ ‘རཱུཔ’ནྟི ཧེཝཏྠི, རཱུཔཾ ‘ཝེདནཱ’ཏི ཧེཝ ནཏྠཱི’’ཏིཨཱདིནཱ (ཀཐཱ. ༣༠༦) ཝུཏྟཱཡ རཱུཔཝེདནཱསཉྙཱསངྑཱརཝིཉྙཱཎཱནཾ སཀབྷཱཝེན ཨཏྠིཏཱཡ པརབྷཱཝེན ནཏྠིཏཱཡ ཙ པཊིསེདྷནེན སཏྟཱདཱིནམྤི ཏཐཱབྷཱཝོ པཊིསེདྷིཏོ ཧོཏཱིཏི ཀཏྭཱ ཝུཏྟཾ.

རཱུཔཱདཡོ ¶ ན ཧོནྟཱིཏི རཱུཔཱདིསབྷཱཝཱ ན ཧོནྟི. ཏཐཱ ཏཐཱཏི སམཱུཧསནྟཱནཱདིཝསེན. ཝིཙིཏྟསཉྙཱ པརིཀཔྤཝསེན ཨུཔྤཛྫཏི. ཡདི སཏྟརཐཱདིསཉྙཱཝལམྦིཏོ ཝཙནཏྠོ ཝིཛྫམཱནོ ན ཧོཏི, ནནུ སཏྟརཐཱདིཨབྷིལཱཔཱ ཨནརིཡཝོཧཱརཱ ཛཱཡནྟཱིཏི ཨཱཧ ‘‘ན ཙ ཏེ ཨབྷིལཱཔཱ’’ཏིཨཱདི. ཨཏྟནོ ཝསེན ཀིཉྩི ཨཧོནྟཾ པཉྙཱཔཀསྶ ཝཙནསྶེཝ ཝསེན པཉྙཱཔིཏབྦཏྟཱ པཉྙཏྟིཝོཧཱརཾ ལབྷཏི. ཨིམིནཱཝ ཨདྷིཔྤཱཡེནཱཏིཨཱདི ‘‘སཡཾ ཨཝིཛྫམཱནོ’’ཏིཨཱདིནཱ ཝུཏྟམེཝཏྠཾ སནྡྷཱཡཱཧ. ཏནྟི སཏྟཱདིགྒཧཎཾ. ‘‘བྲཧྨཝིཧཱརཙཏུཀྐཾ སཏྟཔཉྙཏྟིཾ ཨཱརབྦྷ པཝཏྟཏྟཱ ནཝཏྟབྦཱརམྨཎཾ ནཱམ ཧོཏཱི’’ཏིཨཱདིནཱ ཨཊྛཀཐཱཡཾ (དྷ. ས. ཨཊྛ. ༡༤༢༡) ཏཏྠ ཏཏྠ ན ཝཏྟབྦནྟི ཝུཏྟཾ. ཡདི པརིཏྟཱདིབྷཱཝེན ན ཝཏྟབྦཾ, ཀཐཾ ཨཝིཛྫམཱནསྶ སཏྟཱདིཀསྶ པཙྩཡབྷཱཝོཏི ཨཱཧ ‘‘ཁནྡྷསམཱུཧསནྟཱན’’ནྟིཨཱདི. ཏནྟི ཁནྡྷསམཱུཧསནྟཱནཾ. ཏདུཔཱདཱནབྷཱུཏནྟི པུགྒལོཏི གཧཎཔཉྙཏྟཱིནཾ ཀཱརཎབྷཱུཏཾ. ཡདི པུགྒལསཉྙཱཡ སེཝམཱནསྶ ཀུསལཱདིཨུཔྤཏྟི ཧོཏི, ཀཐཾ པུགྒལདསྶནཾ མིཙྪཱདསྶནནྟི པཊིསིདྡྷནྟི ཨཱཧ ‘‘ཡསྨཱ པནཱ’’ཏིཨཱདི. པཐཝཱིདྷཱཏུ ཨུཔལབྦྷཏཱིཏི པུགྒལཱབྷཱཝེ ཝིཔཀྑཝསེན ནིདསྶནམཱཧ. ཨིདཉྷེཏྠ ཨནུམཱནཾ. ན རཱུཔཱདཡོ ཝིཝེཙེཏྭཱ པུགྒལོ ཨུཔལབྦྷཏི ཏེསཾ ཨགྒཧཎེ ཏཐཱརཱུཔཱཡ བུདྡྷིཡཱ ཨབྷཱཝཏོ སེཝནཱདཡོ ཝིཡཱཏི. པུགྒལོ ཨུཔལབྦྷཏི སཙྪིཀཊྛཔརམཏྠེན ཡོ ཚཝིཉྙཱཎཝིཉྙེཡྻོཏི སཾསརཏི མུཙྩཏི ཙཱཏི ཨེཝཾ དིཊྛིཡཱ པརིཀཔྤིཏཔུགྒལོཝ པཊིསེདྷིཏོ, ན ཝོཧཱརཔུགྒལོཏི དསྶེནྟོ ‘‘པཊིསེ…པེ… དིཊྛཱི’’ཏི ཨཱཧ.

གཱཐཱཡ པཉྩསུ ཁནྡྷེསུ རཱུཔཾ ཝེདནཱ སཉྙཱ ཙེཏནཱ ཝིཉྙཱཎནྟི ཨེཏེསུ ཀཾ ནཱམ དྷམྨཾ སཏྟོཏི ཛཱནཱསི ནུ, ཨེཏེསུ ཨེཀམྤི སཏྟོཏི གཎྷིཏུཾ ནཱརཧཏཱིཏི དསྶེཏི. ཨཐ ཨེཏེཧི ཨཉྙོ ཨེཀོ སཏྟོ ཨཏྠཱིཏི པཙྩེསི. ཨེཝམྤི མཱར དིཊྛིགཏཾ ནུ ཏེ. ནུ-སདྡོ དིཊྛིགཏམེཝེཏི ཨཝདྷཱརཎཏྠོ. ཀསྨཱ? ཡསྨཱ སུདྡྷསངྑཱརཔུཉྫོཡཾ. ཏམེཝཏྠཾ ཝིཝརཏི ‘‘ནཡིདྷ སཏྟཱུཔལབྦྷཏཱི’’ཏི. ཡསྨཱ པཙྩཀྑཏོ ཝཱ ཨནུམཱནཏོ ཝཱ ཨནུཔལདྡྷིཏོ ནཏྠི ཨེཏྠ ཀོཙི སཏྟོ ནཱམཱཏི ཨདྷིཔྤཱཡོ. ཡདི སཏྟོ ནཏྠི, ཀཐཾ སཏྟོ སཾསཱརམཱཔཱདཱིཏིཨཱདི ནཱིཡཏཱིཏི. ཀིམེཏྠ ¶ ནེཏབྦཾ, སཏྟོཏི ཝོཧཱརསཏྟོ ཨདྷིཔྤེཏོ, ཡསྨཱ སཏྟ-སདྡོ ཝོཧཱརེ ¶ པཝཏྟཏཱིཏི. དུཏིཡགཱཐཱཡ སམྦནྡྷཾ དསྶེནྟོ ‘‘སཏྟོ པནཱ’’ཏིཨཱདིམཱཧ. ཨངྒསམྦྷཱརཱཏི ཨངྒསམྦྷཱརཏོ ཨཀྑཙཀྐཨཱིསཱདིཨངྒསམྦྷཱརམུཔཱདཱཡཱཏི ཨཏྠོ. སཏྟོཏི ཝོཧཱརོ.

ཨཝིཛྫམཱནསྶཱཏི ཨཙྩནྟཾ ཨཝིཛྫམཱནསྶ སསཝིསཱཎཱདིཀསྶ. ཡདི ཨཙྩནྟཾ ཨཝིཛྫམཱནཾ, ཀཐཾ ཏཾ གཡ྄ཧཏཱིཏི ཨཱཧ ‘‘པརིཀཔྤིཏ’’ནྟི. ལོཀསཉྙཱཏཾ གྷཊཱདི. ཨེཏྠ པན ཡཐཱ ཨཏྟཱནཾ ཨཱརབྦྷ ཨུཔྤཛྫམཱནཀདྷམྨཱནཾ ཏཾསནྟཏིཔཏིཏཱནཉྩ ཀིལེསུཔཏཱཔཱབྷཱཝེན ཨསྶཏྠབྷཱཝཔཙྩཡཏཱཡ ཨུཔྤཱདཱདིརཧིཏམྤི ནིབྦཱནཾ ‘‘ཨསྶཱསནཀརས’’ནྟི ཝུཙྩཏི, ཨེཝཾ ཨཏྟཱནཾ ཨཱརབྦྷ པཝཏྟནཀདྷམྨཝསེན ཨུཔྤཱདཱདིརཧིཏཱཔི པཉྙཏྟི པཝཏྟཱཏི ཝུཏྟཱ. ཧེཏུཨཏྠོ ཝཱ ཨནྟོནཱིཏོཏི པཝཏྟིཏཱ ཝོཧཱརིཏཱཏི ཨཏྠོ དཊྛབྦོ. ཏཐཱ ནཱམཔཉྙཏྟི པཉྙཔེཏབྦམཏྠཾ གཧིཏཱཡེཝ པཉྙཱཔེཏི, ཝིཉྙཏྟི ཝིཡ ཨདྷིཔྤཱཡཾ ཝིཉྙཱཔེཏཱིཏི སཱ གཧེཏབྦཱབྷཱཝཏོ ཝུཙྩམཱནཏྠདྭཱརེན ཝུཙྩམཱནཱཏི ཝུཏྟཱ. པཉྙཱཔིཏབྦཔཉྙཏྟིཡཱ པན ཝུཙྩམཱནབྷཱཝེ ཝཏྟབྦམེཝ ནཏྠི. ཏཐཱ པཀཱརཏོ ཉཱཔནབྷཱཝེན ཉཱཔེཏབྦཉཱཔནནྟི ཀཏྭཱ གཧེཏབྦཏྟཱཡེཝ ཙ ཏསྶཱ ཨནིདྡྷཱརིཏསབྷཱཝཏཱ པཊིཀྑིཏྟཱ དཊྛབྦཱ. ན ཧི སབྷཱཝདྷམྨཱནཾ ཀཀྑལ༹ཕུསནཱདི སརཱུཔཏོ སདྡེན ཝཙནཱིཡབྷཱཝཾ བྷཛཏི, ཨཔིཙ ཁོ ནེསཾ ཀཱལདེསཱདིབྷེདབྷིནྣཱནཾ ཝིནིཝཏྟཨཉྙཛཱཏིཡཀོ སཛཱཏིཡསཱདྷཱརཎོ པུབྦསངྐེཏཱནུརཱུཔཾ ཨཛ྄ཛྷཱརོཔསིདྡྷོ སཱམཉྙཱཀཱརོ ཝཙནཱིཡོ. ཏཏྠཱཔི ན ཝིནཱ ཀེནཙི པཝཏྟིནིམིཏྟེན སདྡོ པཝཏྟཏཱིཏི ཏསྶ པཝཏྟིནིམིཏྟབྷཱུཏོ ལོཀསངྐེཏསིདྡྷོ ཏཾཏཾཝཙནཏྠནིཡཏོ སཱམཉྙཱཀཱརཝིསེསོ ནཱམ པཉྙཏྟཱིཏི པུབྦཱཙརིཡཱ. སོ ཧི ཏསྨིཾ ཏསྨིཾ ཨཏྠེ སདྡཾ ནཱམེཏི, ཏསྶ ཏསྶ ཝཱ ཨཏྠསྶ ནཱམསཉྙཾ ཀརོཏཱིཏི ནཱམཾ, པཀཱརེཧི ཉཱཔནཏོ པཉྙཏྟི ཙཱཏི.

ཀསྶ པན སོ ཨཱཀཱརཝིསེསོཏི? པཉྙཱཔེཏབྦཏྠསྶཱཏི ཝེདིཏབྦཾ. ཨནེཀཱཀཱརཱ ཧི ཨཏྠཱཏི. ཨེཝཉྩ ཀཏྭཱ ཏསྶཱ པཉྙཏྟིཡཱ གཧེཏབྦཏཱཝཙནཉྩ སམཏྠིཏཾ བྷཝཏི, ཨཝསྶཉྩ ཨེཏམེཝཾ སམྤཊིཙྪིཏབྦཾ. ཨཉྙཐཱ ཝཙནཝཙནཱིཡབྷེདཱནཾ སངྐརོ སིཡཱ, སབྦོཔི ཨཏྠོ སབྦསྶ སདྡསྶ ཝཙནཱིཡོ, སབྦོ ཙ སདྡོ སབྦསྶ ཨཏྠསྶ ཝཱཙཀོཏི ན ཙེཏྠ སངྐེཏགྒཧཎེནེཝ ཏེསཾ པཝཏྟཱཏི སཀྐཱ ཝཏྟུཾ ཝཝཏྠིཏེསུ ཨེཝ ཏེསུ སངྐེཏགྒཧཎསྶ པཝཏྟིཏོ.

ཨཔརེ ¶ པན ‘‘ཡཐཱ དྷཱུམཏོ ཨགྒིཨནུམཱནེ ན ཀེཝལེན དྷཱུམེནེཝ ཨགྒི ཝིཉྙཱཡཏི, དྷཱུམསྶ པན ¶ ཨགྒིནཱ ཨཝིནཱབྷཱཝསངྑཱཏོ སམྦནྡྷོ ཝིཉྙཱཡམཱནོ དྷཱུམེན ཨགྒི ཝིཉྙཱཡཏི, ཨེཝཾ སདྡེན ཨཏྠཝིཛཱནནེ ན ཀེཝལེན སདྡེན ཏདཏྠོ ཝིཉྙཱཡཏི. ཏཾཏཾསདྡསྶ པན ཏེན ཏེན ཨཏྠེན ཨཝིནཱབྷཱཝསངྑཱཏོ སམྦནྡྷོ ཝིཉྙཱཡམཱནོ ཏེན ཏེན སདྡེན ཨཏྠཾ ཉཱཔེཏཱིཏི ཝེདིཏབྦཾ. ཨཉྙཐཱ ཨགྒཧིཏསམྦནྡྷེནཔི སདྡསཝནམཏྟེན ཏདཏྠོ ཝིཉྙཱཡེཡྻཱཏི. ཡོ ཡམེཏྠ ཡཐཱཝུཏྟརཱུཔོ སམྦནྡྷོ, སོ ཏསྶ ཏསྶ ཨཏྠསྶ སཉྙཱཔནབྷཱཝེན ནཱམནྟི པརམཏྠཏོ ཨབྷཱཝཱ ལོཀསངྐེཏཝསེན ལོཀསངྐེཏོཏི ཝཱ སིདྡྷོ ཉཱཏོཏི ལོཀསངྐེཏསིདྡྷོཏི, སདྡེན པཀཱསིཡམཱནཱནཾ ཨཏྠཔྤཀཱརཱནཾ ཨདྷིགམཧེཏུཏཱཡ པཀཱརཏོ ཉཱཔནཏོ པཉྙཏྟཱིཏི ཙ ཝུཏྟོ’’ཏི ཝཎྞཡནྟི.

སངྑཏཱསངྑཏཝིནིམུཏྟསྶཔི ཉེཡྻཝིསེསསྶ ཨབྷཱཝེ གྷཊཱདིསདྡཱབྷིདྷེཡྻཱ ཝིཡ པཐཝཱིཕསྶཱདིསདྡཝཙནཱིཡོཔི ན ལབྦྷཏིཡེཝཱཏི སབྦཝོཧཱརལོཔོ སིཡཱ. ཡསྨཱ ཙ རཱུཔཱརཱུཔདྷམྨཱ པབནྡྷསངྑཱཏཏཾཏཾཝིསེསཱཀཱརཝསེནེཝ པཝཏྟནྟི, ན ཀེཝལཱ, ཏསྨཱ ཏེསཾ ཏེ སཎྛཱནསམཱུཧཨཝཏྠཱཝིསེསཱཀཱརཱ ཡདིཔི པརམཏྠཏོ ཀིཉྩི ན ཧོནྟི, པརམཏྠཏོ པན ཝིཛྫམཱནཱནཾ རཱུཔཱདཱིནཾ ཨུཔཱདཱནཱནཾ ཝསེན ཝིཛྫམཱནབྷཱཝཾ ལབྷིཏྭཱ ཏཾཏཾགཧཎཱནུརཱུཔཾ ཏཾཏཾཨབྷིལཱཔཱདྷིཀརཎཾ བྷཝཏི. ཨུཔཱདཱཡཔཉྙཏྟི ཧི ཨུཔཱདཱནཏོ ཡཐཱ ཨཉྙཱ ཨནཉྙཱཏི ཙ ན ཝཏྟབྦཱ, ཨེཝཾ སབྦཐཱ ཨཏྠི ནཏྠཱིཏི ཙ ན ཝཏྟབྦཱ. ཏཡོཔི ཧི ཨེཏེ སནྟཱཡེཝཱཏི ཨེཝཾ ཏཱཝ མཱཏིཀཱཝཎྞནཱཡ ན ཀོཙི ཝིརོདྷོ. སངྑཱཡཏི སཾཀཐཱིཡཏཱིཏི སངྑཱཏི ཨཡམཏྠོ ཀཐེཏབྦབྷཱཝེན ཝཙནཏྠེཡེཝ ནིརུལ༹ྷོ, ན ཝཙནསྨིནྟི ཝཙནཔཀྑསྶ ཨུཛུཀཏཱ སམྦྷཝཏི. ཝཙནཔཀྑོཡེཝ པཱལི༹ཨནུགཏོ, ན པརམྤརཱགཏོ ཡཐཱཝུཏྟོ ཨཏྠོཏི ཀུཏོ པནེཏཾ ལབྦྷཱ. ན ཧི ཨནཱིཏོ ཨཏྠོ པཱལི༹ཨནནུགཏོ, ནཱཔི སབྦཱ པཱལི༹ནཱིཏཏྠཱ ཨེཝཱཏི ཡཐཱཝུཏྟཱ དུཝིདྷཱ པཉྙཏྟིཡོ ཨཊྛཀཐཱཡཾ ཚཧི པཉྙཏྟཱིཧི ཡཐཱསམྦྷཝཾ ཝུཏྟཱཡེཝཱཏི སིདྡྷམེཏཾ ཨཏྠཱིཏི ན ཝཏྟབྦཱཏི.

ཡདི པརམཏྠཏོ ཨཏྠིཏཱཔཊིསེདྷོ, ཨིཊྛམེཏཾ. ཨཐ ཝོཧཱརཏོ, སཏྟརཐགྷཊཱདཱིཧི སཏྟརཐཱདིཝཙནཔྤཡོགོཡེཝ ན སམྦྷཝེཡྻཱཏི. ན ¶ ཧི ཝཙནཱིཡརཧིཏོ ཝཙནཔྤཡོགོ ཨཏྠཱིཏི. པརམཏྠདྷམྨཱནཾ ཨསབྷཱཝདྷམྨབྷཱུཏཱཡ པཉྙཏྟིཡཱ ཝིབྷཱགདསྶནཏྠཱ ཨདྷིཝཙནཱདིདུཀཏྟཡདེསནཱཏི ན པརམཏྠདྷམྨཱནཾ རཱུཔཱདཱིནཾ པཉྙཏྟིབྷཱཝཱཔཏྟཱིཏི. ན ཙ པཉྙཏྟིཔཐཔཉྙཏྟིདྷམྨནིདྡེསཱནཾ ཨཝིསེསཝཙནཾ ཡུཏྟཾ, སདྡསྶེཝ པན པཉྙཏྟིབྷཱཝེ སིཡཱ ཀཱཙི ཏེསཾ ཝིསེསམཏྟཱ. པཉྙཱཔིཏབྦསྶ ཨཔརམཏྠསབྷཱཝསྶེཝ པཉྙཏྟིབྷཱཝོ ཨདྷིཔྤེཏོཏི ན སབྦོ པཉྙཏྟིཔཐོ པཉྙཏྟིསདྡེན ཝུཏྟོ, པཉྙཏྟི ཙ པཉྙཱཔེཏབྦབྷཱཝེན ཝུཏྟཱཏི པཉྙཏྟིཔཐཔདཾ ཝཏྟབྦམེཝ. ཨེཝཉྩེཏཾ ¶ ཨིཙྪིཏབྦཾ. ཨིཏརཐཱ སདྡསྶ ཙ པཉྙཱཔིཏབྦཏཱཡ པཉྙཏྟིཔཐབྷཱཝོཏི པཉྙཏྟིཔདཾ ན ཝཏྟབྦཾ སིཡཱཏི ཙ སཀྐཱ ཝཏྟུཾ, ནིཀྑེཔཀཎྜེ ཝིབྷཏྟཱཡེཝ པཉྙཏྟི ‘‘པུརིསོ མཱགཎྜིཡོ’’ཏི ཨེཏྠཱཔི དསྶིཏཱཏི ན ན སཀྐཱ ཝཏྟུཾ. ཏཐཱཔི ཧི ཡཐཱཝུཏྟཨུཔཱདཱཡཔཉྙཏྟིནཱམཔཉྙཏྟཱིནཾ སབྷཱཝསམྦྷཝཏོཏི སངྑཱདིསདྡཱནཾ སམཱནཏྠཏཱཔི ཏེསཾ མཏིམཏྟམེཝ, ཝིཉྙཏྟི ཝིཡ ཨདྷིཔྤཱཡཾ ཝིཉྙཱཔེནྟཱ སཡཾ ཉཱཏཱཡེཝ ནཱམཔཉྙཏྟི པཉྙཱཔེཏབྦམཏྠཾ པཉྙཱཔེཏི གཧིཏསརཱུཔཏཱཡ པདཱིཔོ ཝིཡ རཱུཔགཏཝིདྷཾསནེཏི ན པཉྙཏྟིཨནྟརཔརིཀཔྤནེན པཡོཛནཾ ཨཏྠི པཉྙཱཔེཏབྦཏྠཔཉྙཱཔནེ, ནཱམཔཉྙཏྟིཔཉྙཱཔནེ པན ཨུཔཱདཱནབྷེདབྷིནྣཱ ཨུཔཱདཱཡཔཉྙཏྟི ཝིཡ ཏཾཏཾཝཙནཝཙནཏྠབྷེདབྷིནྣཱ ནཱམཔཉྙཏྟཱིཏི ཨཉྙཱ པཉྙཏྟི ཨིཙྪིཏཱ ཨེཝ. ན ཙ ཨནཝཏྠཱནདོསོ ཏཾཏཾཝཙནསྶ ཏདཏྠཝིབྷཱཝནེ སཧཀཱརཱིཀཱརཎབྷཱཝེན པཊིནིཡཏསརཱུཔཏྟཱ. ཨེཏེན སངྐེཏགྒཧཎཱབྷཱཝོཔི པཊིསིདྡྷོ དཊྛབྦོ, ཏཐཱ ནཱམཔཉྙཏྟིཡཱ པཡོཛནཱབྷཱཝོ. དསྶིཏཔྤཡོཛནཱ ཧི སཱ པུབྦེཏི.

‘‘ཝོཧཱརོ ལོཀིཡསོཏེ པཊིཧཉྙཏཱི’’ཏིཨཱདཱིསུ སོཏབྦསྶ སདྡསྶ ཝསེན ཏབྦིསཡབྷཱུཏཱ ཝོཧཱརཱདཡོ པཊིཧནནསོཏབྦཏཱཔརིཡཱཡེན ཝུཏྟཱཏི དཊྛབྦཱ. སདྡོཡེཝ ཝཱ ཏཏྠ ཝོཧཱརཱདིསཧཙཱརིཏཱཡ ཏཐཱ ཝུཏྟོ. ན ཧི སཀྐཱ སབྦཏྠ ཨེཀརསཱ དེསནཱ པཝཏྟཱིཏི ཝཏྟུཾ. ཏཐཱ ཧི ཀཏྠཙི སུཁཱ དུཀྑཱ, སུཁཱཔི ཝེདནཱ དུཀྑཱཏི ཝུཙྩནྟི, དུཀྑཱ སུཁཱ, དུཀྑཱཔི སུཁཱཏི, ཨེཝཾ ཡཐཱཝུཏྟཱ དུཝིདྷཱཔི པཉྙཏྟི ཨདྷིཝཙནཱདིཔཱཋསྶ ཨཏྠབྷཱཝེན ཨཊྛཀཐཱཡཾ ཝུཏྟཱཡེཝཱཏི. ཨཡཾ སངྑཏཱསངྑཏཝིནིམུཏྟཾ ཉེཡྻཝིསེསཾ ཨིཙྪནྟཱནཾ ཝསེན ཝིནིཙྪཡོ.

༡༣༡༦. སཏིཔི པརེསཾ སཱམཉྙཱདིནཱམཀཱརཀཱནཾ ནཱམཀརཎབྷཱཝེ པརཱནཔེཀྑཏཱཡ ཏཏོ ཨཏིཝིཡ ཡུཏྟོ ཨིདྷ ནཱམཀརཎསབྷཱཝོ ཨུཀྐཾསཔརིཙྪེདེན ¶ ནཱམཀརཎཏྠོཏི ཨདྷིཔྤེཏོཏི དསྶེཏུཾ ‘‘ཨཉྙཾ ཨནཔེཀྑིཏྭཱ’’ཏིཨཱདིམཱཧ. ནཱམཀརཎསབྷཱཝཏཱ ན ཧོཏི ཨསབྷཱཝིཀཏཱཡ ཀདཱཙིདེཝ པཝཏྟིཏོ ཙཱཏི ཨདྷིཔྤཱཡོ. སབྷཱཝསིདྡྷཏྟཱཏི ཝེདནཱདཱིནཾ ཝེདནཱདིནཱམཀརཎདྷམྨཏཾ ཨཱཧ. ཡདི ཝེདནཱདཱིནཾ ཀེནཙི ཨཀཏཾ སཀནཱམཾ ཨཱདཱཡཡེཝ པཝཏྟནཏོ ཨོཔཔཱཏིཀནཱམཱནཾ ནཱམཀརཎཊྛེན ནཱམབྷཱཝོ, ཨེཝཾ སཏི པཐཝཱིཨཱདཱིནམྤི ནཱམབྷཱཝོ ཨཱཔཛྫཏི, ཨཉྙཐཱ པཐཝཱིཨཱདིནིདསྶནམེཝ ན སིཡཱཏི ཨནུཡོགཾ མནསི ཀཏྭཱ ཨཱཧ ‘‘པཐཝཱིཨཱདིནིདསྶནེནཱ’’ཏིཨཱདི. ཨེཀདེསསཱམཉྙེན ཧི ཡཐཱདྷིཔྤེཏེན ཨུཔམཱ ཧོཏི, ན སབྦསཱམཉྙེནཱཏི. ཨེཝམྤི ཡདི སབྷཱཝསིདྡྷནཱམཏྟཱ ཝེདནཱདཡོ ནཱམཾ, པཐཝཱིཨཱདཱིནམྤི ཨནིཝཏྟནཱིཡོ ¶ ནཱམབྷཱཝོཏི ཨཱཧ ‘‘ནིརུལ༹ྷཏྟཱ’’ཏིཨཱདི. ཏེན ཡཾནིམིཏྟཾ ཝེདནཱདཱིསུ ནཱམསདྡཔྤཝཏྟི, སཏིཔི ཏདཉྙེསཾ ཏཾནིམིཏྟཡོགེ གོ-སདྡོ ཝིཡ ཀུཀྐུཊཱདིསཏྟཔིཎྜེ ནིརུལ༹ྷཏོ ཝེདནཱདཱིསུ ནཱམ-སདྡོ པཝཏྟོཏི དསྶེཏི. ཏཐཱ ཧི ཨནེཀེསུ སུཏྟཔདེསེསུ ཏེསཾཡེཝ ནཱམཝོཧཱརོ དིསྶཏི. ནཱམཏཱནཱཔཏྟི ཝུཏྟཱ ཀེསཀུམྦྷཱདིནཱམནྟརཱཔཛྫནཏོ. ཨེཏམེཝཏྠཾ ནིདསྶནབྷཱཝེན ‘‘ན ཧཱི’’ཏིཨཱདིནཱ ཝིཝརཏི. ཡདིཔི སམཱུཧཱདིགྷནཝིནིབྦྷོགཱབྷཱཝཏོ ཝེདནཱདིཨརཱུཔདྷམྨེསུཔི པིཎྜཱཀཱརེན གཧཎཾ པཝཏྟཏི, ཏཾ པན ཡེབྷུཡྻེན ཨཏྠཱཏིཔརིཀཔྤམུཁེན ཨེཀདྷམྨཝསེནེཝ, ན སམཱུཧཝསེནཱཏི ཝུཏྟཾ ‘‘ཨཉྙེན…པེ… ནཏྠཱི’’ཏི.

པཀཱསཀཔཀཱསིཏབྦབྷཱཝོ ཝིསཡིཝིསཡབྷཱཝོ ཨེཝ. ཨདྷིཝཙནསམྥསྶོ མནོསམྥསྶོ. སོ ནཱམམནྟརེན གཧེཏུཾ ཨསཀྐུཎེཡྻཏཱཡ པཱཀཊོཏི ནིདསྶནབྷཱཝེན ཝུཏྟོ. ‘‘ཨདྷིཝཙནསམྥསྶོ ཝིཡཱ’’ཏི ཝཙནེན མནོསམྥསྶཏཔྤཀཱརཱནམེཝ ནཱམབྷཱཝོ སིཡཱ, ན པཊིགྷསམྥསྶཏཔྤཀཱརཱནནྟི ཨཱསངྐཱཡ ནིཝཏྟནཏྠཾ ‘‘པཊིགྷསམྥསྶོཔཱི’’ཏིཨཱདིམཱཧ. ཏཏྠ པཉྩཝིཉྙཱཎསཧགཏོ ཕསྶོ པཊིགྷསམྥསྶོ. པི-སདྡོ སམྦྷཱཝནེ. ཨིདཾ ཝུཏྟཾ ཧོཏི – ཝིསཡཱིཝིསཡསངྒྷཊྚནསམུཔྤཏྟིཡཱ ཨཉྙཕསྶཏོ ཨོལཱ༹རིཀོཔི པཊིགྷསམྥསྶོ ན རཱུཔདྷམྨཱ ཝིཡ ཝིབྷཱུཏཱཀཱརོ, ཏཏོ ནཱམཱཡཏྟགཧཎིཡབྷཱཝོ ནཱམསྶེཝཱཏི. ཨརཱུཔཏཱཡ ཝཱཏིཨཱདིནཱ སཱམཉྙཏོ ཝིསེསཏོ ཙ པཊིགྷསམྥསྶསྶ ཨུཔཙཱརཝསེན ནཱམབྷཱཝམཱཧ. པཙྪིམཔུརིམཱནནྟི ‘‘ནཱམཉྩ རཱུཔཉྩཱ’’ཏི ཨིམཾ ཨནུཔུབྦིཾ སནྡྷཱཡ ཝུཏྟཾ. སཏིཔི རཱུཔསྶཱཏིཨཱདིནཱ ནཱམཝོཧཱརཧེཏུཾ ¶ ཨནཉྙསཱདྷཱརཎཾ ནིབྦཱནསྶ ཨདྷིཔཏིཔཙྩཡབྷཱཝཾ ཨེཝ ཝིབྷཱཝེཏི, ཡཏོ ཨརིཡཱནཾ ཨཉྙཝིསཡཝིནིསྶཊཾ ནིནྣཔོཎཔབྦྷཱརབྷཱཝེན ཨསངྑཏདྷཱཏུཡཾ ཨེཝ ཙིཏྟཾ པཝཏྟཏཱིཏི.

༡༣༡༨. ཝཊྚསྨིཾ ཨཱདཱིནཝཔཊིཙྪཱདནཏོ ཏདསྶཱདནཱབྷིནནྡནཏོ ཙ ཝཊྚསྶ མཱུལཾ པདྷཱནཀཱརཎནྟི ཝཊྚམཱུལཾ.

༡༣༢༠. ཨེཀེཀསྨིཾ རཱུཔཱདིཀེ ཡཐཱབྷིནིཝིཊྛེ ཝཏྠུསྨིཾ ཨཧཾམཱནཱདྷཱརནིམིཏྟཏཾ ཀུསལཱཀུསལཏབྦིཔཱཀལོཀཱདྷཱརཏཉྩ སམཱརོཔེཏྭཱ པཝཏྟགྒཧཎཝིསེསོ. ཡཱ ཀཱཙི དིཊྛི ནིཝིསམཱནཱ དྷམྨསབྷཱཝཾ ཨཏིཙྩཔརཱམསནཱཀཱརེནེཝ ནིཝིསཏཱིཏི ཝུཏྟཾ ‘‘པརཱམསནྟཱིཏི ཨཏྠོ’’ཏི.

༡༣༣༢. ཙེཏནཱཔྤདྷཱནོ སངྑཱརཀྑནྡྷོཏི ཀཏྭཱ ‘‘ཡཱཡ ཙེཏནཱཡཱ’’ཏིཨཱདི ཝུཏྟཾ.

༡༣༣༣. དུནྣཱམཾ ¶ གཱརཡ྄ཧནཱམཾ. ཨནུཔསངྐམནྟསྶཱཏིཨཱདིནཱ སེཝནབྷཛནཱནཾ ཝིསེསམཱཧ.

༡༣༣༦. ཨཱཔཏྟིཨཱཔཏྟིཝུཊྛཱནཔརིཙྪེདཛཱནནཱུཔཱཡདསྶནཾ སཧ ཝཏྠུནཱ སཧ ཀམྨཝཱཙཱཡཱདིཝཙནནྟི ཨིམམཏྠཾ དསྶེནྟོ ‘‘ཝཏྠུཝཱིཏིཀྐམཏོ’’ཏིཨཱདིམཱཧ. ‘‘ཨཱཔཏྟིཀུསལཏཱ ཨཱཔཏྟིཝུཊྛཱནཀུསལཏཱ’’ཏི (དྷ. ས. དུཀམཱཏིཀཱ ༡༡༩) ཧི ཝུཏྟནྟི. ཀཱརཎཛཱནནེན ཕལཾ སུཊྛུ ཉཱཏཾ ཧོཏཱིཏི ཏཾ དསྶེཏུཾ ‘‘ཨཱཔཏྟིཡཱ ཝཱ’’ཏིཨཱདིམཱཧ.

༡༣༤༢. ཏསྶཱཏི མནསིཀཱརཀུསལཏཱཡ.

༡༣༤༤. ཨནུཔྤཛྫམཱནཱནེཝ ཨནུཔྤཛྫནྟཱནེཝ.

༡༣༤༨. ཨཀརཎེན ཨནཱདརཝསེནཱཏི ཨདྷིཔྤཱཡོ.

༡༣༥༠. ཕེགྒུརུཀྑསྶ སིགྒུཨཱདིཀསྶ.

༡༣༥༢. ཙཀྑུནྡྲིཡཱསཾཝརསྶཱཏི ཙཀྑུནྡྲིཡཱསཾཝརཎསྶ. ཨསཾཝུཏཙཀྑུནྡྲིཡསྶེཝ ཧེཏཱུཏི ཙཀྑུདྭཱརིཀསྶ ཨབྷིཛ྄ཛྷཱདིཨནྭཱསྶཝནསྶ ཏཾདྭཱརིཀཝིཉྙཱཎསྶ ¶ ཝིཡ ཙཀྑུནྡྲིཡཾ པདྷཱནཀཱརཎཾ. སཏི ཧི ཨསཾཝུཏཏྟེ ཙཀྑུནྡྲིཡསྶ ཏེ ཏེ ཨནྭཱསྶཝནྟཱིཏི ཨསཾཝརིཡམཱནཙཀྑུནྡྲིཡཧེཏུཀོ སོ ཨསཾཝརོ ཏཐཱཝུཏྟོཏི ཨཊྛཀཐཱཡ ཨདྷིཔྤཱཡཾ དསྶེཏི. ཨིདཱནི ཡཐཱཝུཏྟེ ཨདྷིཔྤཱཡེ ཋཏྭཱ ‘‘ཡཏྭཱདྷིཀརཎནྟི ཧཱི’’ཏིཨཱདིནཱ པཱལི༹ཡཱ ཡོཛནཾ དསྶེཏི. ཀསྶ ཙཱཏི པཀཱརཾ པུཙྪཏི, ཀཐཾཝིདྷསྶ ཀཐཾསཎྛིཏསྶཱཏི ཨཏྠོ. ན ཧི སརཱུཔེ ཝུཏྟེ པུན སརཱུཔཔུཙྪཱཡ པཡོཛནཾ ཨཏྠི. ཨནྭཱསྶཝནྟི ཨབྷིཛ྄ཛྷཱདཡོ. ཏདུཔལཀྑིཏནྟི ཨནྭཱསྶཝཱུཔལཀྑིཏཾ ཙཀྑུནྡྲིཡཾ ཨསཾཝུཏནྟི ཡོཛནཱ.

ཡཐཱསམྦྷཝནྟི དུསྶཱིལྱཱསཾཝརོ མནོདྭཱརཝསེན, སེསཱསཾཝརོ ཚདྭཱརཝསེན ཡོཛེཏབྦོ. མུཊྛསྶཙྩཱདཱིནཾ སཏིཔཊིཔཀྑཱཀུསལདྷམྨཱདིབྷཱཝཏོ སིཡཱ པཉྩདྭཱརེ ཨུཔྤཏྟི, ན ཏྭེཝ ཀཱཡིཀཝཱཙསིཀཝཱིཏིཀྐམབྷཱུཏསྶ དུསྶཱིལྱསྶ ཏཏྠ ཨུཔྤཏྟི པཉྩདྭཱརིཀཛཝནཱནཾ ཨཝིཉྙཏྟིཛནཀཏྟཱཏི ཏམེཝ ཡཐཱསམྦྷཝཾ ‘‘ན ཧི པཉྩདྭཱརེ’’ཏིཨཱདིནཱ ཝིཝརཏི.

ཡཐཱ ཀིནྟི ཡེན པཀཱརེན ཛཝནེ ཨུཔྤཛྫམཱནོ ཨསཾཝརོ ‘‘ཙཀྑུནྡྲིཡེ ཨསཾཝརོ’’ཏི ཝུཙྩཏི ¶ , ཏཾ ནིདསྶནཾ ཀིནྟི ཨཏྠོ. ཏཏྠཱཡཾ པཝཏྟིཀྐམོ – པཉྩདྭཱརེ རཱུཔཱདིཨཱརམྨཎེ ཨཱཔཱཐགཏེ ནིཡམིཏཱདིཝསེན ཀུསལཱཀུསལཛཝནེ ཨུཔྤཛྫིཏྭཱ བྷཝངྒཾ ཨོཏིཎྞེ མནོདྭཱརིཀཛཝནཾ ཏཾཡེཝཱརམྨཎཾ ཀཏྭཱ བྷཝངྒཾ ཨོཏརཏི, པུན ཏསྨིཾཡེཝ དྭཱརེ ‘‘ཨིཏྠིཔུརིསོ’’ཏིཨཱདིནཱ ཝཝཏྠཔེཏྭཱ ཛཝནཾ བྷཝངྒཾ ཨོཏརཏི. པུན ཝཱརེ པསཱདརཛྫནཱདིཝསེན ཛཝནཾ ཛཝཏི. པུན ཡདི ཏཾ ཨཱརམྨཎཾ ཨཱཔཱཐཾ ཨཱགཙྪཏི, ཏཾསདིསམེཝ པཉྩདྭཱརཱདཱིསུ ཛཝནཾ ཏདཱ ཨུཔྤཛྫམཱནཀཾ སནྡྷཱཡ ‘‘ཨེཝམེཝ ཛཝནེ དུསྶཱིལྱཱདཱིསུ ཨུཔྤནྣེསུ ཏསྨིཾ ཨསཾཝརེ སཏི དྭཱརམྤི ཨགུཏྟ’’ནྟིཨཱདི ཝུཏྟཾ. ཨཡཾ པན ཨུཀྐཊྛནཡོ པརིཙིཏཱརམྨཎཾ སནྡྷཱཡ ཝུཏྟོ, ཨཔརིཙིཏེ ཨནྟརནྟརཱ པཉྩདྭཱརེ ཨུཔྤཛྫིཏྭཱ ཏདནུརཱུཔཾ མནོདྭཱརེཔི ཨུཔྤཛྫཏཱིཏི. དྭཱརབྷཝངྒཱདཱིནཾ ཛཝནེན སམྦནྡྷོ ཨེཀསནྟཏིཔརིཡཱཔནྣཏོ དཊྛབྦོ.

སཏི དྭཱརབྷཝངྒཱདིཀེཏི པཙྩཡབྷཱཝེན པུརིམནིཔྥནྣཾ ཛཝནཀཱལེ ཨསནྟམྤི བྷཝངྒཱདི ཙཀྑཱདི ཝིཡ ཕལནིཔྥཏྟིཡཱ སནྟཉྙེཝ ནཱམཱཏི ཝུཏྟཾ. ན ཧི དྷརམཱནཾཡེཝ སནྟནྟི ཝུཙྩཏཱིཏི. བཱཧིརཾ ཝིཡ ཀཏྭཱཏི པརམཏྠཏོ ཛཝནསྶ བཱཧིརབྷཱཝེ ཨིཏརསྶ ཙ ཨབྦྷནྟརབྷཱཝེ ཨསཏིཔི ‘‘པབྷསྶརམིདཾ ¶ , བྷིཀྑཝེ, ཙིཏྟཾ, ཏཉྩ ཁོ ཨཱགནྟུཀེཧི ཨུཔཀྐིལེསེཧི ཨུཔཀྐིལིཊྛ’’ནྟིཨཱདིཝཙནཏོ (ཨ. ནི. ༡.༤༩) ཨཱགནྟུཀབྷཱུཏསྶ ཀདཱཙི ཀདཱཙི ཨུཔྤཛྫམཱནསྶ ཛཝནསྶ བཱཧིརབྷཱཝོ ཏབྦིདྷུརསབྷཱཝསྶ ཨིཏརསྶ ཨབྦྷནྟརབྷཱཝོ པརིཡཱཡཏོ ཝུཏྟོཏི དསྶེཏི. ཨསཾཝརཧེཏུབྷཱཝཱཔཏྟིཏོཏི དྭཱརཱདཱིནཾ ཨསཾཝརཧེཏུབྷཱཝཱཔཛྫནསྶ པཱཀཊབྷཱཝཾ སནྡྷཱཡཱཧ. ཨུཔྤནྣེ ཧི ཨསཾཝརེ དྭཱརཱདཱིནཾ ཏསྶ ཧེཏུབྷཱཝོ པཉྙཱཡཏཱིཏི. དྭཱརབྷཝངྒཱདིམཱུསནནྟི དྭཱརབྷཝངྒཱདཱིསུ མཱུསནཾ. ཡསྨིཉྷི དྭཱརེ ཨསཾཝརོ ཨུཔྤཛྫཏི, སོ ཏཏྠ དྭཱརཱདཱིནཾ སཾཝརཱུཔནིསྶཡབྷཱཝཾ ཨུཔཙྪིནྡནྟོཡེཝ པཝཏྟཏཱིཏི. ཏེནེཝཱཧ ‘‘ཀུསལབྷཎྜཝིནཱསན’’ནྟི.

ཨེཏྠ ཙ ‘‘ཙཀྑུནཱ རཱུཔཾ དིསྭཱ’’ཏིཨཱདིཔཱལི༹ཡཾ སཾཝརོ, སཾཝརིཏབྦཾ, སཾཝརཎུཔཱཡོ, ཡཏོ ཙ སོ སཾཝརོ, ཡཏྠ ཙ སོ སཾཝརོཏི ཨིམཾ པབྷེདཾ དསྶེཏྭཱ ཡོཛེཏབྦཱ. ཀཐཾ? ‘‘རཀྑཏི…པེ… སཾཝརཾ ཨཱཔཛྫཏཱི’’ཏི ཨེཏེན སཾཝརོ ཝུཏྟོ. སཏིཾ པཙྩུཊྛཔེཏཱིཏི ཨཡཉྷེཏྠ ཨཏྠོཏི. ཙཀྑཱདི སཾཝརིཏབྦཾ. ན ནིམིཏྟགྒཱཧཱི ཧོཏི ནཱནུབྱཉྫནགྒཱཧཱིཏི སཾཝརཎུཔཱཡོ. ‘‘ཡཏྭཱདྷིཀརཎ’’ནྟིཨཱདིནཱ སཾཝརཎཱཝདྷི. རཱུཔཱདཡོ སཾཝརཝིསཡོཏི. ཀིཉྩ པཊིསངྑཱབྷཱཝནཱབལསངྒཧིཏབྷཱཝེན དུཝིདྷོཔི ཨིནྡྲིཡསཾཝརོ? ཏཏྠ པུརིམེན ཝིསཡེསུ ཨཱདཱིནཝདསྶནཾ, ཨིཏརེན ཨཱདཱིནཝཔྤཧཱནཾ. ཏཐཱ པུརིམེན པརིཡུཊྛཱནཔྤཧཱནཾ, ཨིཏརེན ཨནུསཡཔྤཧཱནཾ ¶ . ཏཐཱ པུརིམོ ལོཀིཡམགྒསངྒཧིཏོ, དུཏིཡོ ལོཀུཏྟརམགྒསངྒཧིཏོཏི ཨཡམྤི ཝིསེསོ ཝེདིཏབྦོ.

༡༣༥༣. དཝཏྠཱདིཨབྷིལཱསོཏི དཝོ ཨེཝ ཨཏྠོ པཡོཛནནྟི དཝཏྠོ, སོ ཨཱདི ཡེསཾ ཏེ དཝཏྠཱདཡོ. ཏེསུ, ཏེསཾ ཝཱ ཨབྷིལཱསོ, དཝོ ཝཱ ཨཏྠོ ཨེཏསྶཱཏི དཝཏྠོ, ཏདཱདིཀོ དཝཏྠཱདི, ཀོ པན སོཏི ཨཱཧ ‘‘ཨབྷིལཱསོ’’ཏི. ཨཱཧཱརཔརིབྷོགེ ཨསནྟུསྶནཱཏི ཨཱཧཱརཔརིབྷོགེ ཨཏིཏྟི. བཧུནོ ཨུལཱ༹རསྶ ཙ པཏྠནཱཝསེན པཝཏྟཱ བྷིཡྻོཀམྱཏཱ ཨསནྟུསྶནཱཏི ཨེཝམེཏྠ ཨཏྠོ ཡུཛྫཏི.

༡༣༥༥. མཛྫནཱཀཱརེན པཝཏྟི མཱནསྶེཝཱཏི ཀཏྭཱ ‘‘མཱནོཝ མཱནམདོ’’ཏི ཝུཏྟཾ. ཏཐཱ ཧི ཛཱཏིམདཱདཡོ ‘‘མཱནོ མཉྙནཱ’’ཏིཨཱདིནཱ མཱནབྷཱཝེནེཝ ¶ ཝིབྷཏྟཱཏི. ཁུདཱ ནཱམ ཀམྨཛཏེཛོ. ཏཾ པན ཨབྷུཏྟེ བྷུཏྟེ ཙ ཨུཔྤཛྫཏཱིཏི ཡཾ ཏཏྠ ཨཱམཱསཡསངྑཱཏསྶ སརཱིརདེསསྶ པཱིལ༹ནཏོ ཝིཧིཾསཱསདྡཝཙནཱིཡཾ, ཏདེཝ དསྶེཏབྦཾ, ཨིཏརཉྩ ནིཝཏྟེཏབྦནྟི ཨབྷུཏྟཔཙྩཡཱ ཨུཔྤཛྫནཀཏྟེན ཁུདཱ ཝིསེསིཏཱཏི ཨཱཧ ‘‘ཁུདཱཡ ཝིསེསན’’ནྟི. ཡེ པན ‘‘ཀམྨཛཏེཛཔཙྩཡཱ དུཀྑཱ ཝེདནཱ ཁུདཱ’’ཏི ཝདནྟི, ཏེསཾ ཨབྷུཏྟཔཙྩཡཱ ཨུཔྤཛྫནཀཱཏི ཝིསེསནམེཝ ན ཡུཛྫཏི. སཏིཔི ཏསྨིཾ བྷཱུཏཏྠཀཐནེ ཝིཧིཾསཱུཔརཏིཔུརཱཎཝེདནཱཔཊིཧནནཱནཾ ཝིསེསཱབྷཱཝོ ཨཱཔཛྫཏཱིཏི པུརིམོཡེཝེཏྠ ཨཏྠོ. ཨེཏཱསཾ ཀོ ཝིསེསོཏི ཨབྷུཏྟཔཙྩཡཱ ཨུཔྤཛྫནཀཝེདནཱ, བྷུཏྟཔཙྩཡཱ ན ཨུཔྤཛྫནཀཝེདནཱཏི དྭེཔི ཙེཏཱ ཝེདནཱ ཡཱཝཏཱ ཨནཱགཏཱཡེཝཱཏི ཨདྷིཔྤཱཡོ. སཏིཔི ཨནཱགཏཏྟེ པུརིམཱ ཨུཔྤནྣསདིསཱི, ཨིཏརཱ པན ཨཏཾསདིསཱི ཨཙྩནྟཾ ཨནུཔྤནྣཱཝཱཏི ཨཡམེཏྠ ཝིསེསོ. ཏེནེཝ ‘‘ཡཐཱཔཝཏྟཱ’’ཏི པུརིམཱཡཾ ཝུཏྟཾ, ཨིཏརཏྠ ཙ ‘‘ཨཔྤཝཏྟཱ’’ཏི. ཨཐ ཝཱ ཨབྷུཏྟཔཙྩཡཱ ཨུཔྤཛྫནཀཝེདནཱ པུབྦེ ཀཏཀམྨསྶ ཝིཔཱཀཏྟཱ པུརཱཎཝེདནཱ ནཱམ. ཨཔྤཙྩཝེཀྑཎཱདིཨཡུཏྟཔརིབྷོགཔཙྩཡཱ པཙྩཝེཀྑཎཱདིཡུཏྟཔརིབྷོགཏོ ཨཱཡཏིཾ ན ཨུཔྤཛྫིསྶཏཱིཏི བྷུཏྟཔཙྩཡཱ ན ཨུཔྤཛྫནཀཝེདནཱ ནཝཝེདནཱ ནཱམ. ཝིཧིཾསཱནིམིཏྟཏཱ ཝིཧིཾསཱནིབྦཏྟཏཱ.

ཡཱཔེནྟི ཨེཏེནཱཏི ཡཱཔནཱཏི ཝུཏྟསྶ སརཱིརཡཱཔནཀཱརཎསྶ ཛཱིཝིཏིནྡྲིཡསྶཔིཡཱཔནཀཱརཎནྟི ཨིམསྶ ཝིསེསསྶདསྶནཏྠཾ ‘‘ཛཱིཝིཏིནྡྲིཡཡཱཔནཏྠཱཡཱ’’ཏི ཝཏྭཱ ན ཀེཝལཾ ཛཱིཝིཏིནྡྲིཡསྶེཝ ཡཱཔནཀཱརཎམཱཧཱརོ, ཨཐ ཁོ ཋཱནཱདིཔཝཏྟིཨཱཀཱརཝིསེསཡུཏྟསྶ སཀལསརཱིརསྶཔི ¶ ཡཱཔནཀཱརཎནྟི ཏཾདཱིཔནཏྠཾ ཡཱཏྲཱཏི ཝཙནནྟི ཡཱཔནཱ མེ བྷཝིསྶཏཱིཏི ཨཝིསེསེན ཝུཏྟནྟི དསྶེནྟོ ‘‘ཙཏུནྣཾ ཨིརིཡཱཔཐཱནཾ ཨཝིཙྪེདསངྑཱཏཱ ཡཱཔནཱ ཡཱཏྲཱ’’ཏི ཨཱཧ. ཨཊྛཱནཡོཛནཨཔརིབྷོགདུཔྤརིབྷོགཱདིཝསེན སདྡྷཱདེཡྻསྶ ཝིནཱསནཾ སདྡྷཱདེཡྻཝིནིཔཱཏནཾ. ཡེནཱཏི གཎབྷོཛནལཀྑཎཔྤཏྟསྶ ཐཱུཔཱིཀཏཱདིཀསྶ ཝཱ པཊིགྒཧཎེན. སཱཝཛྫཾ སནིནྡཾ པརིབྷོགཾ ཀརོཏཱིཏི ཝཱ ཨཏྠོ.

ཨིརིཡཱ…པེ… ཝུཏྟནྟི སུཁཾ པཝཏྟམཱནེཧི ཨིརིཡཱཔཐེཧི ཏེསཾ ཏཐཱཔཝཏྟིཡཱ ཀཱརཎནྟི གཧིཏཏྟཱ ཝིདིཏཏྟཱ ཡཐཱཝུཏྟབྷུཉྫནཔིཝནཱནི པུབྦཀཱལཀིརིཡཱབྷཱཝེན ཝུཙྩམཱནཱནི ཨིརིཡཱཔཐཀཏྟུཀཱནི ཝིཡ ཝུཏྟཱནཱིཏི ཨཏྠོ. ཡཐཱ ཧི ‘‘པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟཱི’’ཏི ¶ (མ. ནི. ༡.༢༧༡; ༢.༡༨༢) དསྶནསྶ ཁཡཧེཏུཏཱ, ‘‘གྷཏཾ པིཝིཏྭཱ བལཾ བྷཝཏི, སཱིཧཾ དིསྭཱ བྷཡཾ བྷཝཏཱི’’ཏི ཙ པཱནདསྶནཱནཾ བལབྷཡཧེཏུཏཱ ཝུཙྩཏི, ཨེཝཾ བྷུཉྫནཔིཝནཱནཾ ཨིརིཡཱཔཐསུཁཔྤཝཏྟིཧེཏུབྷཱཝོ ཝུཏྟོཏི ཨེཝམེཏྠ ཨཏྠོ དཊྛབྦོ. སུལབྷཱནཝཛྫབྷཱཝོ ཝིཡ ཨཔྤབྷཱཝོཔི པཙྩཡཱནཾ པརམསལླེཁཝུཏྟཱིནཾ སུཁཝིཧཱརཱཡ པརིཡཏྟོཏི ཙཱིཝརསེནཱསནཱནཾ ཨཔྤབྷཱཝུཀྐཾསཱནུཛཱནནཝསེན པཝཏྟཱཧི ཨནནྟརགཱཐཱཧི ཨིདྷཱཔི དྷམྨསེནཱཔཏིནཱ སུཁཝིཧཱརཱཡ པརིཡཏྟོ ཨཔྤབྷཱཝུཀྐཾསོ ཨནུཉྙཱཏོཏི ཝིཉྙཱཡཏཱིཏི ‘‘པུནཔཱི’’ཏིཨཱདིནཱ ‘‘བྷུཏྭཱནཱ’’ཏི པཱཋཾ སམཏྠཡཏི.

༡༣༦༨. སཏིཨཱདིདྷམྨཱཏི སཏིཔཉྙཱསམཱདྷིཝཱིརིཡསམྨཱཝཱཙཱདིདྷམྨཱ, ཡེ ཚཧི དུཀེཧི པརིགྒཧིཏཱ.

༡༣༧༣. པཊིཝིཛ྄ཛྷིཏབྦེཧི པཊིཝེདྷོ ཝུཏྟོ. ཝིསཡེནཔི ཧི ཝིསཡཱི ཝུཙྩཏི སཧཙརབྷཱཝཏོ. ཡཐཱ –

‘‘ཨུཔྤཱདེཏྭཱན སཾཝེགཾ, དུཀྑེནསྶ ཙ ཧེཏུནཱ;

ཝཌྜྷཡིཏྭཱ སམྨསིཏྭཱ, མུཏྟིཡཱ མགྒམབྲཝཱི’’ཏི

‘‘སཙྩཔརིཡོསཱནེ’’ཏི ཙ.

ཡཐཱ ¶ དུཀྑཱདཱིནཾ པརིཉྙཱདིཝསེན པཝཏྟམཱནཾ པཊིཝེདྷཉཱཎཾ ཨསམྨོཧཏོ ཏེ ཨཝིལོམེཏྭཱ ཨཝིརོདྷེཏྭཱ པཝཏྟཏི ནཱམ, ཨེཝཾ ཏདུཔནིསྶཡབྷཱཝཾ ཝིཔསྶནཱཉཱཎམྤི ཡཐཱབལཾ ཏེ ཨཝིལོམེཏྭཱ པཝཏྟཏཱིཏི ཙཏུནྣཾ སཙྩཱནཾ ཨནུལོམནྟི ཝུཏྟནྟི དུཏིཡོ ཨཏྠཝིཀཔྤོ ཝུཏྟོ. ཨེཏྠ ཙ ‘‘ཙཏུནྣཾ སཙྩཱན’’ནྟི པདཾ ཝིནཱ ཨུཔཙཱརེན ཝུཏྟཾ, པུརིམསྨིཾ ཨུཔཙཱརེནཱཏི དཊྛབྦཾ. སམྨཱདིཊྛིཔྤདྷཱནཏྟཱ ཝཱ སེསམགྒངྒཱནཾ མགྒསཙྩེཀདེསསྶ པཊིཝེདྷསྶ ཨནུལོམཾ སམུདཱཡཱནུལོམཾ ཝུཏྟཾ, ཙཏུསཙྩེཀདེསསྶ མགྒསྶ ཝཱ.

༡༣༨༠. ཁཡསམཡེཏི ཁཡསམཱུཧེ. ‘‘ཀིལེསཱནཾ ཁཡཝསེན པཝཏྟདྷམྨཔུཉྫེ’’ཏི ཙ ཝདནྟི.

༡༣༨༡. ཨཔརིབནྡྷབྷཱཝེན ནིརཱསངྐཱ, ཨཱརམྨཎེ ཨབྷིརཏིབྷཱཝེན ཙ པཝཏྟི ཨདྷིམུཙྩནཊྛོཏི ཨཱཧ ‘‘ཨནི…པེ… ཏྟནཊྛེནཱ’’ཏི.

༡༣༨༢. ཨརིཡམགྒཔྤཝཏྟིཡཱ ¶ ཨུཏྟརཀཱལཾ པཝཏྟམཱནཾ ཕལཉཱཎཾ ཏཾཏཾམགྒཝཛ྄ཛྷཀིལེསཱནཾ ཁཡཔརིཡོསཱནེ པཝཏྟཏྟཱ ‘‘ཁཱིཎནྟེ ཉཱཎ’’ནྟི ཝུཏྟཾ. ཡསྨཱ པན ཏཾ མགྒཱནནྟརཾ ཨུཔྤཛྫཏི, ཏསྨཱ མགྒེན ཋཱནསོ ཁཱིཎེསུ ཀིལེསེསུ ཏེསཾ ཁཱིཎབྷཱཝཱནནྟརཾ པཝཏྟམཱནཾ ཁཱིཎབྷཱཝཱནཾ པཋམཀཱལེ པཝཏྟནྟིཔི ཝུཙྩཏཱིཏི དུཏིཡོ ཝིཀཔྤོ ཝུཏྟོ.

དུཀནིཀྑེཔཀཐཱཝཎྞནཱ ནིཊྛིཏཱ.

ནིཀྑེཔཀཎྜཝཎྞནཱ ནིཊྛིཏཱ.

༤. ཨཊྛཀཐཱཀཎྜཾ

ཏིཀཨཏྠུདྡྷཱརཝཎྞནཱ

༡༣༨༤. ནཡགམནནྟི ¶ ¶ ནཱིཡཏི, ནེཏི, ནཱིཡནྟི ཝཱ ཨེཏེནཱཏི ནཡོ, གམྨཏི ཨེཏེནཱཏི གམནཾ, ནཡོཝ, ནཡསྶ ཝཱ གམནཾ ནཡགམནཾ. གཏི ཨེཝ ཝཱ གམནཾ. པཋམེན ཨཱདི-སདྡེན ཨབྷིདྷམྨབྷཱཛནཱིཡཱདིསངྒཧཱསངྒཧཱདིཨེཀཀཱདིསུདྡྷིཀསཙྪི ཀཊྛཱདིམཱུལམཱུལཱདིཀཱ པཉྩཔཀརཎིཀཱ ནཡགཏི སངྒཡ྄ཧཏི. ཨནུལོམཱདཱིཏི པན པཙྩནཱིཡཨནུལོམཔཙྩནཱིཡཔཙྩནཱིཡཱནུལོམཔཀཱརཱ ཨེཀམཱུལཱདིཔྤཀཱརཱ ཙ. ཨེཏྠ ཨཏྠེསུ ནིཙྪིཏེསཱུཏི ཨེཏསྨིཾ ཨཊྛཀཐཱཀཎྜེ ཙིཏྟུཔྤཱདཝསེན བྷཱུམནྟརཝིསེསཡོགཏོ སབྦེསཾ མཱཏིཀཱཔདཱནཾ ཨཏྠེསུ སངྑེཔཏོ ཝཝཏྠཱཔིཏེསུ.

པཉྷུདྡྷཱརནྟིཨཱདཱིསུ ‘‘སིཡཱ ཀུསལཾ དྷམྨཾ པཊིཙྩ ཀུསལོ དྷམྨོ ཨུཔྤཛྫེཡྻ ཧེཏུཔཙྩཡཱ’’ཏིཨཱདིནཱ (པཊྛཱ. ༡.༡.༢༥) ཀུསལཔདཾ ཨཱདིཾ ཀཏྭཱ ཀུསལཱཀུསལཱབྱཱཀཏནྟཱ ཏིསྶོ ཀུསལཱདིཀཱ, ཀུསལཱབྱཱཀཏཨཀུསལཱབྱཱཀཏཀུསལཱཀུསལནྟཱ ཏིསྶོ, ཀུསལཱཀུསལཱབྱཱཀཏནྟཱ ཨེཀཱཏི ཀུསལཱདིཀཱ སཏྟ པུཙྪཱ, ཏཐཱ ཨཀུསལཱདིཀཱ, ཨབྱཱཀཏཱདིཀཱ, ཀུསལཱབྱཱཀཏཱདིཀཱ, ཨཀུསལཱབྱཱཀཏཱདིཀཱ, ཀུསལཱཀུསལཱདིཀཱ, ཀུསལཱཀུསལཱབྱཱཀཏཱདིཀཱཏི སཏྟནྣཾ སཏྟཀཱནཾ ཝསེན དྷམྨཱནུལོམེ ཀུསལཏྟིཀཾ ནིསྶཱཡ ཧེཏུཔཙྩཡེ ཨེཀཱུནཔཉྙཱས པུཙྪཱ, ཏཐཱ སེསཔཙྩཡེསུ སེསཏིཀེསུ དྷམྨཔཙྩནཱིཡཱདཱིསུ ཙ. ཏཾ སནྡྷཱཡ ‘‘ཨེཀཱུནཔཉྙཱསཱཡ ཨེཀཱུནཔཉྙཱསཱཡཱ’’ཏི ཝུཏྟཾ. ‘‘སིཡཱ ཧེཏུཾ དྷམྨཾ པཊིཙྩ ཧེཏུདྷམྨོ ཨུཔྤཛྫེཡྻ ཧེཏུཔཙྩཡཱ’’ཏིཨཱདིནཱ (པཊྛཱ. ༣.༡.༡) ‘‘ཧེཏུཾ པཊིཙྩ ཧེཏུ, ཧེཏུཾ པཊིཙྩ ནཧེཏུ, ཧེཏུཾ པཊིཙྩ ཧེཏུ ཙ ནཧེཏུ ཙ. ནཧེཏུཾ པཊིཙྩ ནཧེཏུ, ནཧེཏུཾ པཊིཙྩ ཧེཏུ, ནཧེཏུཾ པཊིཙྩ ཧེཏུ ཙ ནཧེཏུ ཙ. ཧེཏུཉྩ ནཧེཏུཉྩ པཊིཙྩ ཧེཏུ, ཧེཏུཉྩ ནཧེཏུཉྩ པཊིཙྩ ནཧེཏུ, ཧེཏུཉྩ ནཧེཏུཉྩ ¶ པཊིཙྩ ཧེཏུ ཙ ནཧེཏུ ཙཱ’’ཏི ཨེཀེཀསྨིཾ དུཀེ ཧེཏུཔཙྩཡཱདཱིསུ ཨེཀམེཀསྨིཾ པཙྩཡེ ནཝ ནཝ པུཙྪཱ ཧོནྟི. ཏཱ སནྡྷཱཡ ‘‘ནཝསུ ནཝསུ པཉྷེསཱུ’’ཏི ཝུཏྟཾ.

ལབྦྷམཱནསྶཱཏི ཀུསལཏྟིཀེ ཏཱཝ པཊིཙྩཝཱརེ ཧེཏུཔཙྩཡེ ‘‘ཀུསལཾ དྷམྨཾ པཊིཙྩ ཀུསལོ དྷམྨོ ཨུཔྤཛྫཏི ཧེཏུཔཙྩཡཱ, ཀུསལཾ ཨེཀཾ ¶ ཁནྡྷཾ པཊིཙྩ ཏཡོ ཁནྡྷཱ’’ཏིཨཱདིནཱ (པཊྛཱ. ༡.༡.༥༣) ཀུསལེན ཀུསལཾ, ཀུསལེན ཨབྱཱཀཏཾ, ཀུསལེན ཀུསལཱབྱཱཀཏཾ, ཨཀུསལེན ཨཀུསལཾ, ཨཀུསལེན ཨབྱཱཀཏཾ, ཨཀུསལེན ཨཀུསལཱབྱཱཀཏཾ, ཨབྱཱཀཏེན ཨབྱཱཀཏཾ, ཀུསལཱབྱཱཀཏེན ཨབྱཱཀཏཾ, ཨཀུསལཱབྱཱཀཏེན ཨབྱཱཀཏནྟི ནཝནྣཾ ནཝནྣཾ པཉྷཱནཾ ཨཏྠཏོ སམྦྷཝནྟསྶ པཉྷསྶ ཝིསྶཛྫནཝསེན ཨུདྡྷརཎཾ, ཏཐཱ སེསཔཙྩཡཝཱརཏྟིཀཱདཱིསུ. ཏེསུཡེཝཱཏི ཡཐཱཝུཏྟེསུ ཨེཝ པཉྷེསུ ཨཏྠསམྦྷཝཏོ ཡཐཱཝིབྷཏྟཱནཾ པཉྷཝིསྶཛྫནཱནཾ ‘‘ཧེཏུཡཱ ནཝཱ’’ཏིཨཱདིནཱ གཎནཱཋཔནཾ. པསཊེ དྷམྨེཏི ཡཐཱ ཧེཊྛཱ ཀཎྜདྭཡེ ‘‘ཡསྨིཾ སམཡེ ཀཱམཱཝཙརཾ ཀུསལཾ ཙིཏྟ’’ནྟིཨཱདིནཱ (དྷ. ས. ༡) ཝིཔྤཀིཎྞེ མུཏྟཔུཔྥེ ཝིཡ ཕསྶཱདཡོ དྷམྨེ. ཨཝིསིཊྛནིདྡེསོ སཱམཉྙནིདྡེསོ. ཝིཉྙཱཏདྷམྨསྶ པུགྒལསྶཱཏི ཨདྷིཔྤཱཡོ.

ཡདི ཙིཏྟུཔྤཱདརཱུཔཀཎྜེསུ ཙཏུབྷཱུམིཙིཏྟུཔྤཱདཱདིཝསེན ཝིཉྙཱཏདྷམྨསྶ ཨཏྠུདྡྷཱརདེསནཱ ཨཱརདྡྷཱ, ཨེཝཾ སནྟེ ཨིདྷ ཀསྨཱ ཀུསལཏྟིཀནིདྡེསོ ཝུཏྟོཏི ཨཱཧ ‘‘ཡདིཔི ཀུསལཏྟིཀཝིཏྠཱརོ’’ཏིཨཱདི. དྷམྨཝིསེསནབྷཱཝཏོཏི ‘‘དྷམྨཱ’’ཏི པདསྶ པདྷཱནབྷཱཝཾ དསྶེཏི. ཨཏོ ཧི ཏདབྷིདྷེཡྻཱ པུཙྪིཏབྦཱ ཛཱཏཱ. ཝིཉྙཱཏཱཧཱིཏི བྷཱུམཱིནཾ ཝིསེསནལཀྑཎཡོགམཱཧ. ཨེཏྠ པདྷཱནནྟི ཀིཉྩཱཔི ཨུདྡེསེ ཀུསལཔདེན དྷམྨཱ ཝིསེསིཏབྦཱ, ‘‘ཙཏཱུསུ བྷཱུམཱིསུ ཀུསལ’’ནྟི ཨིམསྨིཾ པན ནིདྡེསེ བྷཱུམཱིཧི ཝིསེསིཏབྦཏྟཱ ཀུསལཔདཾ པདྷཱནནྟི ཝིསེསནབྷཱཝེན ཝཙནིཙྪཱཡ ཨབྷཱཝཏོ སཏིཔི ཝིསེསིཏབྦདྷམྨཱནཾ ཀཱམཱཝཙརཱདིཕསྶཱདིབྷེདེ ཏདནཔེཀྑཾ ཨནཝཛྫསུཁཝིཔཱཀཏཱསངྑཱཏཾ ཨཏྟནོ ཀུསལཱཀཱརམེཝ གཧེཏྭཱ པཝཏྟམཱནཏྟཱ ‘‘ཨེཀཏྟམེཝ ཨུཔཱདཱཡ པཝཏྟཏཱི’’ཏི ཝུཏྟཾ. སབྦེཔི ཧི ཀུསལཱ དྷམྨཱ ཨནཝཛྫསུཁཝིཔཱཀཏཱཡ ཨེཀསབྷཱཝཱཡེཝཱཏི.

༡༣༨༥. ཡཐཱཡོགཾ ཡོཛེཏབྦནྟི ཙཏཱུཧི བྷཱུམཱིཧི ཨཱདྷཱརབྷཱུཏཱཧི ཝིསེསེཏྭཱ སམཡཕསྶཱདིབྷེདཾ ཨནཱམསིཏྭཱ ཝིཔཱཀབྷཱཝེན ཨེཀཏྟཾ ནེཏྭཱ ‘‘ཙཏཱུསུ བྷཱུམཱིསུ ཝིཔཱཀོ’’ཏི ཝུཏྟནྟི ཡོཛེཏབྦཾ. ཨེས ནཡོ ‘‘ཏཱིསུ བྷཱུམཱིསུ ཀིརིཡཱབྱཱཀཏ’’ནྟིཨཱདཱིསུཔི.

ཨུཔྤཛྫཏི ¶ ཨེཏྠཱཏི ཨུཔྤཱདོ, ཙེཏསིཀཱ. ཏེ ཧི ཙིཏྟསྶ སབྦཐཱཔི ནིསྶཡཱདིཔཙྩཡབྷཱཝཏོ ཨེཏྠ ཙ ཨུཔྤཏྟིཡཱ ཨཱདྷཱརབྷཱཝེན ཨཔེཀྑིཏཱ. ཡཐཱ ¶ ཙ ཙེཏསིཀཱ ཙིཏྟསྶ, ཨེཝཾ ཙིཏྟམྤི ཙེཏསིཀཱནཾ ནིསྶཡཱདིཔཙྩཡབྷཱཝཏོ ཨཱདྷཱརབྷཱཝེན ཝཏྟབྦཏཾ ཨརཧཏཱིཏི ཡཐཱཝུཏྟཾ ཨུཔྤཱདསདྡཱབྷིདྷེཡྻཏཾ ན ཝིནིཝཏྟཏི. ཨིདཾ ཝུཏྟཾ ཧོཏི – ‘‘ཙིཏྟུཔྤཱདོ’’ཏི ཨེཏྠ ཨུཔྤཱདསྶ ཝིསེསནབྷཱཝེན པཝཏྟམཱནམྤི ཙིཏྟཾ ཨཏྟནི ཡཐཱཝུཏྟཨུཔྤཱདཨཏྠསམྦྷཝཏོ ཨཔརིཙྩཏྟཝིསེསིཏབྦབྷཱཝམེཝ ཧུཏྭཱ ཏསྶ ཝིསེསནབྷཱཝཾ པཊིཔཛྫཏཱིཏི. ཡདཱཧ ‘‘ཨཝཡཝེན སམུདཱཡོཔལཀྑཎཝསེན ཨཏྠོ སམྦྷཝཏཱི’’ཏི. ཙིཏྟསམཱནགཏིཀསྶ ཨིདྷ ཙིཏྟགྒཧཎེན གཧེཏབྦཏཱཡ ‘‘དྭེཔཉྩཝིཉྙཱཎཱནཱི’’ཏི ནིདསྶནེན ཝཀྑམཱནཏྟཱ ‘‘ཙིཏྟ…པེ… གཧཎཾ ཀཏ’’ནྟི ཝུཏྟཾ. ཏཏྠ ཨཉྙསྶཱཏི རཱུཔསྶ.

༡༤༢༠. པཉྩདྭཱརེ ཝཏྟབྦམེཝ ནཏྠི ཨེཀནྟཔརིཏྟཱརམྨཎཏྟཱ པཉྩདྭཱརིཀཙིཏྟཱནཾ. ཨིཊྛཱནིཊྛཱརམྨཎཱནུབྷཝནནྟི ཝིཔཱཀསྶ པཀཔྤེཏྭཱ ཨཱརམྨཎགྒཧཎཱབྷཱཝམཱཧ. ཏཏོ ཀམྨཱནུརཱུཔཾ པཝཏྟམཱནོ ཝིཔཱཀོ པརིཏྟཀམྨཝིཔཱཀཏཱཡ པརིཏྟཱརམྨཎེཡེཝ པཝཏྟིཏུམརཧཏི, ན མཧགྒཏཔྤམཱཎཱརམྨཎེཏི ཨདྷིཔྤཱཡོ. སམཱདྷིཔྤདྷཱནསྶཔི ཀསྶཙི ཀམྨསྶ ཨཔྤནཱཨཔྤཏྟསྶ ཨེཀནྟེན སདིསཝིཔཱཀཏཱཨབྷཱཝཏོ ‘‘ཨཔྤནཱཔྤཏྟསྶཱ’’ཏི ཀམྨཾ ཝིསེསིཏཾ. ཝཎྞལཀྑཎཱདིཾ ཨགྒཧེཏྭཱ ལོཀསཉྙཱནུརོདྷེནེཝ གཧིཏེ པཐཝཱདིཀེ པརིཀམྨསཉྙཱཡ སམུཔྤཱདིཏཏྟཱ པཊིབྷཱགནིམིཏྟསངྑཱཏཾ སཉྙཱཝསཾ ཨཱརམྨཎཾ ཨསྶཱཏི སཉྙཱཝསཱརམྨཎཾ. ཏཱདིསེནེཝཱཏི སམཱདྷིཔྤདྷཱནཏཱཡ ཨཔྤནཱཔྤཏྟཱིཧི ཝིཡ སཉྙཱཝསཱརམྨཎཏཱཡ ཙ ནིབྦིསེསེནེཝ. སོཔཱིཏི པི-སདྡོ སམྤིཎྜནཏྠོ. ཏེནེཏཾ དསྶེཏི ‘‘ཨཏྟནོ ཀམྨསྶ སམཱནབྷཱུམིཀདྷམྨཱརམྨཎཏཱཡ ཝིཡ ཏསྶ ཨཱརམྨཎཱརམྨཎཏཱཡཔི ཝིཔཱཀོ ཀམྨཱནུརཱུཔོཡེཝ ནཱམ ཧོཏཱི’’ཏི.

ཡདི ཨེཝཾ ཀསྨཱ མཧགྒཏཔྤམཱཎཱརམྨཎསྶ པརིཏྟཀམྨསྶ ཝིཔཱཀོ ཏདཱརམྨཎཱརམྨཎོ ན ཧོཏཱིཏི? ཨཔྤནཱཔྤཏྟཀམྨཝིཔཱཀསྶ ཝིཡ ཏསྶ ཀམྨཱརམྨཎཱརམྨཎཏཱཡ ནིཡམཱབྷཱཝཏོ ཀམྨཱནུརཱུཔཏཱཡ ཙ ཨནེཀརཱུཔཏྟཱ. ཡཐཱ ཨཏྟནོ ཀམྨསདིསསྶ མཧགྒཏཛཝནསྶ པརིཏྟཱརམྨཎསྶཔི ཏདཱརམྨཎཾ ནཱནུབནྡྷཀཾ པརིཙཡཱབྷཱཝཏོ, ཨེཝཾ ཨཏྟནོ ཀམྨསྶ ནིམིཏྟབྷཱུཏེཔི ཏསྶ སཧཀཱརཱིཀཱརཎཱཧི ཨཔརིཡཱདིནྣེ མཧགྒཏཔྤམཱཎེ ཨཱརམྨཎེ པརིཙཡཱབྷཱཝཏོ པརིཏྟཝིཔཱཀོ ན པཝཏྟཏི, ཀམྨནིམིཏྟཱརམྨཎོ པན ཛཱཡམཱནོ པརིཏྟེནེཝ ཏེན ཧོཏཱིཏི ཨཱཧ ¶ ‘‘པཊིསནྡྷིཨཱདིབྷཱུཏོ’’ཏིཨཱདི. ཡསྨཱ པནཱཏིཨཱདིནཱ པཱལི༹ཡཱཝ ཡཐཱཝུཏྟམཏྠཾ ¶ ནིཙྪིནོཏི. ནཱནཱཀྑཎིཀཀམྨཔཙྩཡོ ཧི ཨེཏྠ ཨདྷིཔྤེཏོ པཙྩཡཔཙྩཡུཔྤནྣཱནཾ བྷིནྣཱརམྨཎཏཱཡ ཝུཏྟཏྟཱ. ན ཙཱཏིཨཱདིནཱ པརིཏྟཝིཔཱཀཱ ཨེཝ ཨིདྷ པཙྩཡུཔྤནྣབྷཱཝེན ཝུཏྟཱཏི དསྶེཏི. ཨིདྷཱཏི ཨིམསྨིཾ ཨཏྠུདྡྷཱརཀཎྜེ.

སཏིཝེཔུལླཔྤཏྟཱནཾ སཏིཝིརཧིཏསྶ ཀཱཡཀམྨསྶ སམྦྷཝཾ དསྶེཏུཾ ‘‘ཝཱསནཱཝསེནཱ’’ཏི ཝུཏྟཾ. ཨཝཱིཏརཱགཱནཾ ཨཔརིཏྟེཔི ཀཏྠཙི ཨཱརམྨཎེ སིཡཱ ཙེཏསོ ཨུཔྤིལཱཝིཏཏྟནྟི ‘‘ཀིལེསཝིརཧེ’’ཏི ཝིསེསེཏྭཱ ཝུཏྟཾ. ཨཱདརཱཀརཎཝསེནེཝཱཏི ཨཱདརཱཀརཎམཏྟཝསེནེཝཱཏི ཝིསེསནིཝཏྟིཨཏྠོ ཨེཝ-སདྡོ ཏམེཝ ནིཝཏྟེཏབྦཾ ཝིསེསཾ དསྶེཏི, ནཱཉྙཐཱ. ཀོསཛྫཱདཱིཏི ཨཱདི-སདྡེན དོསཱདཡོ སངྒཎྷཱཏི. ཨཱདརཱཀརཎཾ ནིརུསྶུཀྐཏཱ ཨེཝཱཏི ཨཱདརཾ ཀརོནྟཱ ནིརུསྶུཀྐབྷཱཝེནེཝ ན ཧོནྟི, ན པན ཨཱདརཾ ན ཀརོནྟིཡེཝཱཏི དཊྛབྦཾ. ཨེཀཙྩེ པན ‘‘ཨཀམྨཉྙསརཱིརཏཱཡ ཨཉྙཝིཧིཏཏཱཡ ཙ ཁཱིཎཱསཝཱནཾ ཨསཀྐཙྩདཱནཱདིཔཝཏྟི ན ཨནཱདརཝསེནཱ’’ཏི ཝདནྟི.

༡༤༢༡. ཨཏིཔགུཎཱནནྟི སུབྷཱཝིཏཱནཾ སུཊྛུཏརཾ ཝསིཔྤཏྟཱནཾ. ཨེཝཾ པགུཎཛ྄ཛྷཱནེསུཔི པཝཏྟི ཧོཏི ཏཏྠ ཝིཙཱརཎུསྶཱཧསྶ མནྡབྷཱཝཏོཏི ཨདྷིཔྤཱཡོ. པུབྦེ དསྶིཏནྟི ‘‘ཏཱིཎི ལཀྑཎཱནཱིཏི ཨཧནྟི ཝཱ’’ཏིཨཱདིནཱ པུབྦེ དསྶིཏཾ. ‘‘ཨཝིཛྫམཱནོ ཨཔརམཏྠབྷཱཝཏོ, ཝིཛྫམཱནོ ཙ ལོཀསངྐེཏསིདྡྷིཡཱ སམྨུཏིསཙྩབྷཱཝཏོ ཨཏྠོ ཨརཱིཡཏི ཙིཏྟེན གམྨཏི ཉཱཡཏཱི’’ཏི ཨཱཙརིཡཱ ཝདནྟི. ཡཏོ ཏབྦིསཡཱ ཙིཏྟུཔྤཱདཱ ནཝཏྟབྦཾ ཨཱརམྨཎཾ ཨེཏེསནྟི ནཝཏྟབྦཱརམྨཎཱཏི ཨཉྙཔདཏྠསམཱསཝསེན ཝུཙྩནྟི. ཨཡཾ པན ཝཱདོ ཧེཝཏྠིཀཝཱདོ ཝིཡ ཧོཏཱིཏི ཏསྶ ཨཙྩནྟཾ ཨཝིཛྫམཱནཏཾ མཉྙནྟོ ཨིཏོ ཙ ཨཉྙཐཱ ཨཝིཛྫམཱནཔཉྙཏྟིཾ དསྶེཏུཾ ‘‘སམྨུཏིསཙྩེ པནཱ’’ཏིཨཱདིམཱཧ. ཀཐཾ པན ཏསྶ ཨཙྩནྟམཝིཛྫམཱནཏྟེ ཏབྦིསཡཱནཾ དྷམྨཱནཾ པཝཏྟི ནཝཏྟབྦཱརམྨཎབྷཱཝོ ཙཱཏི ཨཱཧ ‘‘ཨཝིཛྫམཱནམྤཱི’’ཏིཨཱདི. པརིཏྟཱདིཨཱརམྨཎཱཏི ན ཝཏྟབྦཱཏི ཝུཏྟཱཏི པརིཏྟཱདཡོ ཝིཡ ཏསྶ ཝིསུཾ ཝཝཏྠིཏབྷཱཝཾ ནིསེདྷེཏི.

ཝིཀྑིཔནཾ ནཱནཱརམྨཎེསུ ཙིཏྟསྶ པཝཏྟནཾ. ཨནཝཊྛཱནཾ ཨེཀསྨིཾཡེཝ པཝཏྟིཏུཾ ཨཔྤདཱནཾ. དུཏིཡཱདིམགྒཔུརེཙཱརིཀཾ ཕལསམཱཔཏྟིཔུརེཙཱརིཀཉྩ ཀཱམཱཝཙརཉཱཎཾ ¶ ནིབྦཱནཱརམྨཎཏཱཡ ལོཀུཏྟརཙིཏྟསྶ ཨཱཝཛྫནཊྛཱནིཡཏཱཡ ཙ པཋམམགྒཔུརེཙཱརིཀཉཱཎེན སམཱནནྟི ཀཏྭཱ ཝུཏྟཾ ‘‘གོཏྲབྷུཝོདཱནེ གོཏྲབྷཱུཏི གཧེཏྭཱ’’ཏི.

སབྦཏྠཔཱདཀནྟི ¶ ནིཔྥཱདེཏབྦེ, པཡོཛནེ ཝཱ བྷུམྨཾ ‘‘ཙེཏསོ ཨཝཱུཔསམེ’’ཏིཨཱདཱིསུ ཝིཡ. ཏེན སབྦེསུ ཝིཔསྶནཱདཱིསུ ནིཔྥཱདེཏབྦེསཱུཏི ཨཏྠོ. ཏེནེཝཱཧ ‘‘སབྦེསཱུ’’ཏིཨཱདི. ཨཏཱིཏཾསཉཱཎསྶ ཀཱམཱཝཙརཏྟཱ ཨིདྡྷིཝིདྷཱདཱིསུ ཏསྶ ཨགྒཧཎཾ དཊྛབྦཾ. ཏསྶ པན ཨཏཱིཏསཏྟདིཝསཏོ ཧེཊྛཱ ཡཱཝ པཙྩུཔྤནྣཔཊིསནྡྷི, ཏཱཝ ཝིསཡོཏི ཝདནྟི. ཨཏཱིཏསཏྟདིཝསེསུཔི ཁནྡྷཔཊིབདྡྷཱནཾ ཏསྶ ཝིསཡབྷཱཝོ ཡུཏྟོ ཝིཡ དིསྶཏི.

པཱདཀཛ྄ཛྷཱནཙིཏྟཾ པརིཀམྨེཧི གཧེཏྭཱཏི པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ‘‘ཨིདཾ ཙིཏྟཾ ཝིཡ ཨཡཾ ཀཱཡོ སཱིགྷགམནོ ཧོཏཱུ’’ཏི པུབྦབྷཱགཔརིཀམྨེཧི རཱུཔཀཱཡསྶ ཝིཡ པཱདཀཛ྄ཛྷཱནཙིཏྟསྶཔི གཧེཏབྦཏཾ སནྡྷཱཡ ཝུཏྟཾ. ཨིདཾ པན ཨདྷིཊྛཱནཾ ཨེཝཾ པཝཏྟཏཱིཏི ཝེདིཏབྦཾ. ཨདྷིཔྤེཏཊྛཱནཔཱཔུཎནཏྠཾ གནྟུཀཱམཏཾ པུརཀྑཏྭཱ པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ‘‘ཨིདཾ ཙིཏྟཾ ཝིཡ ཨཡཾ ཀཱཡོ སཱིགྷགམནོ ཧོཏཱུ’’ཏི ཀརཛཀཱཡཱརམྨཎཾ པརིཀམྨཾ ཀཏྭཱ བྷཝངྒཾ ཨོཏརིཏྭཱ ཝུཊྛཱཡ པཱདཀཛ྄ཛྷཱནཾ སམཱཔཛྫིཏྭཱ པུན བྷཝངྒེ ཨོཏིཎྞེ མནོདྭཱརཱཝཛྫནཾ རཱུཔཀཱཡཾ ཨཱརམྨཎཾ ཀཏྭཱ ཨུཔྤཛྫཏི ཨནུལོམཱནི ཙ. ཏཏོ ཨདྷིཊྛཱནཙིཏྟམྤི ཏམེཝཱརམྨཎཾ ཀཏྭཱ ཨུཔྤཛྫཏི. ཏསྶཱནུབྷཱཝེན ཡཐཱདྷིཔྤེཏཊྛཱནཾ གཏོཡེཝ ཧོཏི. ཨེཝཾ ཨདིསྶམཱནེན ཀཱཡེན གཙྪནྟོ པནཱཡཾ ཀིཾ ཏསྶ ཨདྷིཊྛཱནཙིཏྟསྶ ཨུཔྤཱདཀྑཎེ གཙྪཏི, ཨུདཱཧུ ཋིཏིཀྑཎེ བྷངྒཀྑཎེ ཝཱཏི? ཏཱིསུ ཁཎེསུ གཙྪཏཱིཏི ཨིཙྪནྟི. ཙིཏྟེཏི པཱདཀཛ྄ཛྷཱནཙིཏྟེ. སམོདཧཏཱིཏི ཙིཏྟཱནུགཏིཀཾ ཙིཏྟཾ ཝིཡ སཱིགྷགམནཾ ཀརོཏཱིཏི ཨཏྠོ. ཡཐཱ ཧི ཙིཏྟཾ ཨིཙྪིཏཀྑཎེ ཨཏིདཱུརེཔི ཝིསཡཾ ཨཱརབྦྷ པཝཏྟཏི, ཨེཝཾ རཱུཔཀཱཡསྶཔི ལཧུཔརིཝཏྟིབྷཱཝཱཔཱདནཾ ཙིཏྟཝསེན ཀཱཡཔརིཎཱམནཾ. ན ཙེཏྠ རཱུཔདྷམྨཱནཾ དནྡྷཔརིཝཏྟིབྷཱཝཏོ ཨེཀཙིཏྟཀྑཎེན དེསནྟརུཔྤཏྟི ན ཡུཛྫཏཱིཏི ཝཏྟབྦཱ ཨདྷིཊྛཱནཙིཏྟེན རཱུཔཀཱཡསྶ ལཧུཔརིཝཏྟིབྷཱཝསྶ ཨཱཔཱདིཏཏྟཱ. ཏེནེཝཱཧ ‘‘ཙིཏྟཝསེན ཀཱཡཾ ཨདྷིཊྛཧིཏྭཱ སུཁསཉྙཉྩ ལཧུསཉྙཉྩ ཨོཀྐམིཏྭཱ ཨདིསྶམཱནེན ཀཱཡེན བྲཧྨལོཀཾ གཙྪཏཱི’’ཏི (ཝིསུདྡྷི. ༢.༣༩༧). ཨཙིནྟེཡྻོ ཧི ཨིདྡྷིམནྟཱནཾ ཨིདྡྷིཝིསཡོཏི.

ཙིཏྟསནྟཱནཾ ¶ རཱུཔཀཱཡེ སམོདཧིཏནྟི ཡཏྟཀེཧི ཙིཏྟེཧི དིསྶམཱནེན ཀཱཡེན ཡཐཱདྷིཔྤེཏཊྛཱནཔྤཏྟི, ཏཏྟཀཱནཾ ཙིཏྟཱནཾ པབནྡྷསྶ དནྡྷགམནཀརཎཏོ ཨིམསྶ ཨདྷིཊྛཱནསྶ ཀརཛཀཱཡེ ཨཱརོཔིཏཾ ཏདནུགུཎནྟི ཨཏྠོ. ཨིདམྤི ཨདྷིཊྛཱནཔཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ‘‘ཨཡཾ ཀཱཡོ ཝིཡ ཨིདཾ ཙིཏྟཾ དནྡྷགམནཾ ཧོཏཱུ’’ཏི སམཱཔཛྫིཏྭཱ ཝུཊྛིཏཛ྄ཛྷཱནཙིཏྟཱརམྨཎཾ པརིཀམྨཾ ¶ ཀཏྭཱ བྷཝངྒཾ ཨོཏརིཏྭཱ བྷཝངྒཏོ ཝུཊྛཱཡ པཱདཀཛ྄ཛྷཱནཾ སམཱཔཛྫིཏྭཱ པུན བྷཝངྒེ ཨོཏིཎྞེ མནོདྭཱརཱཝཛྫནཾ པཱདཀཛ྄ཛྷཱནཾ ཨཱརམྨཎཾ ཀཏྭཱ ཨུཔྤཛྫཏི ཨནུལོམཱནི ཙ. ཏཏོ ཨདྷིཊྛཱནཙིཏྟམྤི ཏམེཝཱརམྨཎཾ ཀཏྭཱ ཨུཔྤཛྫཏི. ཏསྶཱནུབྷཱཝེན ཨནྟརཱ པཉྩཝིཉྙཱཎཱདཱིསུ ཨུཔྤནྣེསུཔི ཨཔཏནྟོ ཨིཙྪིཏཊྛཱནཾ གཙྪཏི. ཨེཝཾ གཙྪནྟོ ཙ སཙེ ཨིཙྪཏི, པཐཝཱིཀསིཎཝསེན ཨཱཀཱསེ མགྒཾ ནིམྨིནིཏྭཱ པདསཱ གཙྪཏི. སཙེ ཨིཙྪཏི, ཝཱཡོཀསིཎཝསེན ཝཱཡུཾ ཨདྷིཊྛཧིཏྭཱ ཏཱུལཔིཙུ ཝིཡ ཝཱཡུནཱ གཙྪཏི. ཨཔིཙ གནྟུཀཱམཏཱཝ ཨེཏྠ པམཱཎཾ. སཏི ཧི གནྟུཀཱམཏཱཡ ཨེཝཾ ཀཏཱདྷིཊྛཱནོ ཨདྷིཊྛཱནཝེགཀྑིཏྟོཝེསོ ཨིསྶཱསཔཀྑིཏྟོ སརོ ཝིཡ དིསྶམཱནོ གཙྪཏཱིཏི. ཏཏྠ ཨཱཀཱསེ མགྒཾ ནིམྨིནིཏྭཱ གཙྪནྟོ ཝིནཱཔི ཨབྷིཉྙཱཉཱཎེན པཀཏིཔཐཝིཡཾ ཝིཡ གཙྪཏི. ཏེནེཝ ‘‘པདསཱ གཙྪཏཱི’’ཏི ཝུཏྟཾ. ཝཱཡུཾ ཨདྷིཊྛཧིཏྭཱ གཙྪནྟོ ཨབྷིཉྙཱཉཱཎསམུཊྛིཏཝཱཡོདྷཱཏུཔརམྤརཱཡ གཙྪཏི. ཨུབྷཡཏྠཱཔི ཨནྟརཱ ཝནརཱམཎཱིཡཀཱདཱིནི པེཀྑམཱནོ ཨཱཔཱཐགཏེ སདྡེ ཙ སུཎམཱནོ གཙྪཏཱིཏི ཝདནྟི. ཀེཙི པན ‘‘ཨདིསྶམཱནེན ཀཱཡེན ཨེཀཙིཏྟཀྑཎེནེཝ ཨིཙྪིཏཊྛཱནགམནེ དིསྶམཱནེན ཀཱཡེན པདསཱ ཝཱཡུནཱ ཙ གམནེ ཨབྷིཉྙཱཙིཏྟསམུཊྛིཏཀཱཡཝིཉྙཏྟིཝིཔྥཱརེན གམན’’ནྟི ཝདནྟི. ཨཔརེ ‘‘ཨབྷིཉྙཱཙིཏྟསྶ ཝིཉྙཏྟིནིབྦཏྟནཀིཙྩཾ ནཏྠཱི’’ཏི ཝདནྟི.

ཨདྷིཊྛཱནདྭཡནྟི ཙིཏྟཀཱཡཝསེན ཀཱཡཙིཏྟཔརིཎཱམནབྷཱུཏཾ རཱུཔཀཱཡཔཱདཀཛ྄ཛྷཱནཙིཏྟཱརམྨཎཾ ཨུབྷཡཾ ཨདྷིཊྛཱནཾ. ཏཾསམྤཡུཏྟཱཡཱཏི ཡཐཱཝུཏྟཨདྷིཊྛཱནདྭཡསམྤཡུཏྟཱཡ. སུཁསཉྙཱལཧུསཉྙཱབྷཱཝཏོཏི སུཁསཉྙཱལཧུསཉྙཱསབྦྷཱཝཏོ, ཏབྦྷཱཝཾ ཨཱཔཛྫནཏོཏི ཨཏྠོ. སུཁསཉྙཱཏི ཙེཏྠ ཨུཔེཀྑཱསམྤཡུཏྟཱ སཉྙཱ. ཨུཔེཀྑཱ ཧི ‘‘སནྟཾ སུཁ’’ནྟི ཝུཏྟཱ. སཱཡེཝ ཙ སཉྙཱ ནཱིཝརཎེཧི ཙེཝ ཝིཏཀྐཱདཱིཧི པཙྩནཱིཀེཧི ཙ ཝིམུཏྟཏྟཱ ‘‘ལཧུསཉྙཱ’’ཏིཔི ཝེདིཏབྦཱ. ཏཱཧི སམོཀྐནྟཱཧི རཱུཔཀཱཡོཔི ཏཱུལཔིཙུ ཝིཡ སལླཧུཀོ ཧོཏི. སོ ཨེཝཾ ཝཱཏཀྑིཏྟཏཱུལཔིཙུནཱ ¶ ཝིཡ སལླཧུཀེན ཨེཀཙིཏྟཀྑཎེན ཨདིསྶམཱནེན ཙ ཀཱཡེན ཡཐཱརུཙི གཙྪཏཱིཏི.

‘‘མུཏྟོ ཝཏམྷི ཏཱཡ ཨནཏྠསཾཧིཏཱཡ དུཀྐརཀཱརིཀཱཡ, སཱདྷུ ཝཏམྷི སམྨཱསམྦོདྷིཾ སམྦུཛ྄ཛྷ’’ནྟི (སཾ. ནི. ༡.༡༣༧) པཝཏྟཾ བྷགཝཏོ ཙེཏོཔརིཝིཏཀྐམཉྙཱཡ མཱརོ ‘‘ཨམུཏྟབྷཱཝམསྶ ཀརིསྶཱམཱི’’ཏི,

‘‘ཏཔོཀམྨཱ ¶ ཨཔཀྐམྨ, ཡཾ ན སུཛ྄ཛྷནྟི མཱཎཝཱ;

ཨསུདྡྷོ མཉྙསི སུདྡྷོ, སུདྡྷིམགྒཱ ཨཔརདྡྷོ’’ཏི. (སཾ. ནི. ༡.༡༣༧) –

ཨཱཧཱཏི ཨེཝམཱདིཾ སནྡྷཱཡ ‘‘མཱརཱདཱིནམྤི བྷགཝཏོ ཙིཏྟཛཱནནཾ ཝུཏྟ’’ནྟི ཝུཏྟཾ. ནིབྦཱནཔཙྩཝེཀྑཎཉྩ པུབྦེནིཝཱསཱནུསྶཏིཉཱཎེན ནིབྦཱནཱ…པེ… ཉཱཏེསུ པཝཏྟཏཱིཏི སམྦནྡྷོ. ནིབྦཱནཱ…པེ… ཉཱཏེསཱུཏི ཨིདཾ ཨབྷིཉྙཱཉཱཎསྶ པརཏོ པཝཏྟམཱནཾ པཙྩཝེཀྑཎཾ ཨབྷིཉྙཱཉཱཎསྶ ཝིསཡེ ཝིཡ ཨབྷིཉྙཱཉཱཎཝིསཡཝིསཡེཔི ཀདཱཙི པཝཏྟིཏུཾ ཨརཧཏཱིཏི ཀཏྭཱ ཝུཏྟཾ. ཨཔྤམཱཎཱརམྨཎཏནྟི ཨཔྤམཱཎཁནྡྷཱརམྨཎཏནྟི ཨཏྠོ. ཏསྨཱཏི ཡསྨཱ པུབྦེནིཝཱསཱནུསྶཏིཉཱཎསྶ ནིབྦཱནཱརམྨཎབྷཱཝདཱིཔཀོ ཀོཙི པཱཋོ ནཏྠི, ཏསྨཱ. པཙྩཝེཀྑཎཀིཙྩེ ཝུཙྩམཱནེཏི རུལ༹ྷིཾ ཨགྒཧེཏྭཱ མགྒཱདཱིནཾ ཨཏཱིཏཱནཾ པཏི པཏི ཨཝེཀྑནཾ ཨནུསྶརཎཾ པཙྩཝེཀྑཎནྟི པུབྦེནིཝཱསཱནུསྶཏིཉཱཎསྶ ཀིཙྩཾཡེཝ པཙྩཝེཀྑཎནྟི ཝུཙྩམཱནེཏི ཨཏྠོ. ཨནུཉྙཱཏཱཏི དིསྶཏཱིཏི ‘‘མགྒཕལནིབྦཱནཔཙྩཝེཀྑཎཏོ’’ཏི ཨིདམེཝ སནྡྷཱཡ ཝུཏྟཾ. ཨཡཉྷེཏྠ ཨཏྠོ – པུབྦེནིཝཱསཱནུསྶཏིཉཱཎེན ནིབྦཱནཱརམྨཎེ ཁནྡྷེ དིསྭཱ ‘‘ཨིམེ དྷམྨཱ ཀིཾ ནུ ཁོ ཨཱརབྦྷ པཝཏྟཱ’’ཏི ཨཱཝཛྫེནྟསྶ པུབྦེནིཝཱསཱནུསྶཏིཉཱཎཾ ནིབྦཱནཱརམྨཎེ པཝཏྟཏཱིཏི. ཨནཱགཏཾསཉཱཎེཔི ཨེསེཝ ནཡོ.

ཡདི ཨེཝཾ ཀསྨཱ པརིཏྟཏྟིཀེ ‘‘ཨཔྤམཱཎོ དྷམྨོ མཧགྒཏསྶ དྷམྨསྶ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༡༢.༥༨) ཨེཏྠ ‘‘ཨཔྤམཱཎཱ ཁནྡྷཱ ཙེཏོཔརིཡཉཱཎསྶ པུབྦེནིཝཱསཨནཱགཏཾསཉཱཎསྶ ཨཱརམྨཎཔཙྩཡེན པཙྩཡོ’’ཏི ཨཛ྄ཛྷཏྟཏྟིཀེ ཙ ‘‘བཧིདྡྷཱདྷམྨོ བཧིདྡྷཱདྷམྨསྶ, བཧིདྡྷཱདྷམྨོ ཨཛ྄ཛྷཏྟསྶ དྷམྨསྶ ཨཱརམྨཎཔཙྩཡེན པཙྩཡོ’’ཏི ཨེཏེསཾ ཝིབྷངྒེསུ ‘‘བཧིདྡྷཱ ཁནྡྷཱ ¶ ཨིདྡྷིཝིདྷཉཱཎསྶ ཙེཏོཔརིཡཔུབྦེནིཝཱསཡཐཱཀམྨཱུཔགཨནཱགཏཾསཨཱཝཛྫནཱཡ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༢༠.༢༩) ཨེཏྟཀམེཝ ཝུཏྟཾ, ན ཝུཏྟཾ ནིབྦཱནནྟི. ཙེཏོཔརིཡཨིདྡྷིཝིདྷཱདིཉཱཎེཧི སཧ ཝུཏྟཏྟཱཏི ཙེ, ཨེཝམྤི ཝིསུཾ ཝིབྷཛིཏབྦཾ སིཡཱ. ན ཧི ཝིསུཾ ཝིབྷཛནཱརཧཾ སཧ ཝིབྷཛཏཱིཏི? ན, ཨཝཙནསྶ ཨཉྙཀཱརཎཏྟཱ. ཡཱནི ཧི པུཐུཛྫནཱནཾ པུབྦེནིཝཱསཨནཱགཏཾསཉཱཎཱནི, ཏེསཾ ཨཝིསཡོ ཨེཝ ནིབྦཱནཾ. ཨརིཡཱནཾ པན མགྒཕལཔཙྩཝེཀྑཎེཧི སཙྪིཀཏནིབྦཱནཱནཾ ཨིམེཧི ཉཱཎེཧི པཙྩཀྑཀརཎེ པཡོཛནཾ ནཏྠཱིཏི སཱདྷཱརཎེན ཨིདྡྷིཝིདྷཉཱཎཱདཱིནཾ གཧིཏཏྟཱ ནིབྦཱནཾ ན ཝུཏྟནྟི དཊྛབྦཾ ¶ . ནིབྦཏྟཀྑནྡྷཛཱནནམཱཧ, ན ནིབྦཏྟཀཀྑནྡྷཛཱནནཾ. ཡཐཱཀམྨཱུཔགཉཱཎཀིཙྩཉྷི ཏནྟི. ཨཏྠོ སམྦྷཝཏཱིཏི ཨིདཾ ཨནཱགཏཾསཉཱཎསྶཔི ཨནིབྦཱནཱརམྨཎཏཾ སནྡྷཱཡ ཝུཏྟཾ.

༡༤༢༩. མགྒཱརམྨཎཏྟིཀེ ཡསྨཱ ཙིཏྟུཔྤཱདཀཎྜེ བོདྷིཏེསུ ཙིཏྟུཔྤཱདེསུ ཨེཀནྟཏོ མགྒཱརམྨཎཱཡེཝ ཀེཙི ནཏྠི, མགྒཱརམྨཎཱཡེཝ པན ཀདཱཙི མགྒཱདྷིཔཏིནོ ཧོནྟི, ཏསྨཱ ‘‘ཀཏམེ དྷམྨཱ མགྒཱརམྨཎཱ’’ཏི ཨེཀམེཝ པུཙྪཾ ཀཏྭཱ ཏཡོཔི ཀོཊྛཱསཱ ལབྦྷམཱནཝསེན ཝིབྷཏྟཱ. ཨིམིནཱ ནཡེན པརཏོཔི ཨེཝརཱུཔེསུ ཋཱནེསུ ཨཏྠོ ཝེདིཏབྦོ. ‘‘ཙིཏྟུཔྤཱདཱ’’ཏི, ‘‘མགྒཱརམྨཎཱ’’ཏི ཙ ཝུཏྟདྷམྨཱནཾཡེཝ མགྒཧེཏུཀཏྟཱབྷཱཝཾ སཱདྷེཏུཾ ‘‘ཨསཧཛཱཏཏྟཱ’’ཏི ཨིདཾ ཧེཏུཝཙནནྟི ‘‘ཨསམྤཡུཏྟཏྟཱཏི ཨཏྠོ’’ཏི ཝུཏྟཾ. ཏེནེཝཱཧ ‘‘ན ཧི ཨརཱུཔདྷམྨཱན’’ནྟིཨཱདི. ‘‘ཨཉྙདྷམྨཱརམྨཎཀཱལེ ཨེཝཱ’’ཏི ཨཝདྷཱརཎསྶ ཨགྒཧིཏཏྟཱ གརུཾ ཨཀཏྭཱ མགྒཱརམྨཎཀཱལེཔི མགྒཱདྷིཔཏིབྷཱཝེན ན ཝཏྟབྦཱཏི ཨཡམྤི ཨཏྠོ ཨཊྛཀཐཱཡཾ པརིགྒཧིཏོཡེཝཱཏི དཊྛབྦཾ. ‘‘གརུཾ ཀཏྭཱ པཙྩཝེཀྑཎཀཱལེ’’ཏི ཧི ཝུཏྟཏྟཱ གརུཾ ཨཀཏྭཱ པཙྩཝེཀྑཎཀཱལེཔི ཨཏྠི ཨེཝ. ཏདཱ ཙ མགྒཱདྷིཔཏིབྷཱཝེན ན ཝཏྟབྦཱ ཏེ དྷམྨཱཏི བྷིཡྻོཔི སིདྡྷོཝཱཡམཏྠོ.

༡༤༣༤. ཨཏཱིཏཱརམྨཎཱཝཱཏི ཨུདྡྷཊཾ, ‘‘ཨཏཱིཏཱརམྨཎཱ’’ཏི པན ཨཊྛཀཐཱཔཱཋོ བཧཱུསུ པོཏྠཀེསུ དིསྶཏི. ཏསྨཱཏི ཡསྨཱ པཊིཙྩསམུཔྤཱདཝིབྷངྒཝཎྞནཱཡཾ (ཝིབྷ. ཨ. ༢༢༧) ‘‘མརཎསམཡེ ཉཱཏཀཱ ‘ཨཡཾ, ཏཱཏ, ཏཝཏྠཱཡ བུདྡྷཔཱུཛཱ ཀརཱིཡཏི, ཙིཏྟཾ པསཱདེཧཱི’ཏི ཝཏྭཱ’’ཏིཨཱདིནཱ པཉྩདྭཱརེ རཱུཔཱདིཨཱརམྨཎཱུཔསཾཧརཎཾ ཏཏྠ ཏདཱརམྨཎཔརིཡོསཱནཱནཾ ཙུདྡསནྣཾ ¶ ཙིཏྟཱནཾ པཝཏྟིཉྩ ཝཏྭཱ ཏསྨིཾཡེཝ ཨེཀཙིཏྟཀྑཎཊྛིཏིཀེ ཨཱརམྨཎེ པཊིསནྡྷིཙིཏྟཾ ཨུཔྤཛྫཏཱིཏི པཙྩུཔྤནྣཱརམྨཎབྷཱཝཾ པཊིསནྡྷིཡཱ ཝཀྑཏི, ཏསྨཱཏི ཨཏྠོ. དྭེ བྷཝངྒཱནི ཨཱཝཛྫནཾ མརཎསྶཱསནྣབྷཱཝེན མནྡཱིབྷཱུཏཝེགཏྟཱ པཉྩ ཛཝནཱནི དྭེ ཏདཱརམྨཎཱནི ཙུཏིཙིཏྟནྟི ཨེཀཱདས ཙིཏྟཀྑཎཱ ཨཏཱིཏཱཏི ཨཱཧ ‘‘པཉྩཙིཏྟཀྑཎཱཝསིཊྛཱཡུཀེ’’ཏི. ཨིཏརཏྠཱཏི ཨཉྙཏདཱརམྨཎཱཡ ཙུཏིཡཱ. ཨིདཱནི ཏམེཝ ‘‘ཨིཏརཏྠཱ’’ཏི སངྑེཔཏོ ཝུཏྟམཏྠཾ ཝིཏྠཱརཏོ དསྶེཏུཾ ‘‘ཡདཱ ཧཱི’’ཏིཨཱདིམཱཧ. ཙུཏིཡཱ ཏདཱརམྨཎརཧིཏཏྟཱ པཊིསནྡྷིཡཱ ཙ པཙྩུཔྤནྣཱརམྨཎཏྟཱ ‘‘རཱུཔཱ…པེ… ཛྫནྟསྶཱ’’ཏི ཨུདཱཧཊཾ. ཚ བྷཝངྒཱནི པཙྩུཔྤནྣཱརམྨཎཱནི ཧོནྟི, ནཝ ཙིཏྟཀྑཎཱ ཨཏཱིཏཱཏི སཏྟཙིཏྟཀྑཎཱཝསིཊྛཱཡུཀེ གཏིནིམིཏྟེ པཊིསནྡྷིཡཱ པཝཏྟཏྟཱཏི དཊྛབྦཾ.

ཝིཛྫམཱནམེཝ ¶ ཀཱཡཾ ཨཱརམྨཎཾ ཀརོཏཱིཏི ཨེཏེན སུཁལཧུསཉྙོཀྐམནེན པཙྩུཔྤནྣསྶེཝ བྷཱུཏུཔཱདཱཡརཱུཔསངྒྷཱཏསྶ ལཧུཔརིཝཏྟིབྷཱཝཱཔཱདནཾ, ན བྷཱཝིནོཏི དསྶེཏི.

ཨེཏྠནྟརེཏི ཨཔཱཀཊཀཱལཏོ པཊྛཱཡ ཡཱཝ པཱཀཊཀཱལོ, ཨེཏསྨིཾ ཨནྟརེ. ཡསྨཱ པན ཀསྶཙི ཀིཉྩི སཱིགྷཾ པཱཀཊཾ ཧོཏི, ཀསྶཙི དནྡྷཾ, ཏསྨཱ ‘‘ཨེཀདྭེསནྟཏིཝཱརཱ’’ཏི ཨནིཡམེཏྭཱ ཝུཏྟཾ. ‘‘ཝཙནསིལིཊྛཏཱཝསེན ཝུཏྟ’’ནྟི ཨེཀེ, ཀེཙི པན ‘‘ཨེཏྠནྟརེ པཝཏྟཱ རཱུཔདྷམྨཱ ཨརཱུཔདྷམྨཱ ཙ པཙྩུཔྤནྣཱཏི གཧིཏེ ཨེཀོ སནྟཏིཝཱརོ ཧོཏི, ཏཾ པན དྭིདྷཱ ཝིབྷཛིཏྭཱ ཨཔཱཀཊཀཱལཾ ཨཱདིཾ ཀཏྭཱ ཡེབྷུཡྻེན པཱཀཊཀཱལཏོ ཨོརབྷཱཝོ ཨེཀོ ཀོཊྛཱསོ ཡེབྷུཡྻེན པཱཀཊཀཱལཾ ཨཱདིཾ ཀཏྭཱ ཡཱཝ སུཔཱཀཊཀཱལོ ཨེཀོཏི ཨེཏེ དྭེ སནྟཏིཝཱརཱ. ཨིམིནཱ ནཡེན སེསསནྟཏིཝཱརབྷེདཱཔི ཝེདིཏབྦཱ. ཏཏྠ ཀཱལཝསེན སབྦེསཾ སམཱནབྷཱཝཾ ཨགྒཧེཏྭཱ དྷམྨཱནཾ སདིསཔྤཝཏྟིཝསེན སནྟཏིཔརིཙྪེདོ དཱིཔིཏབྦོ’’ཏི ཝདནྟི. ཀིཉྩི ཀིཉྩི ཀཱལཾ སདིསཾ པཝཏྟམཱནཱཔི ཧི ཨུཏུཙིཏྟཱདིསམུཊྛཱནཱ རཱུཔདྷམྨཱ སནྟཏིཝཱརཱཏི ཝུཙྩནྟི. ཡདཱཧ ‘‘ཨཏིཔརིཏྟཱ’’ཏིཨཱདིནཱ, ཨརཱུཔསནྟཏིཔི ཙེཏྠ ཡཐཱཝུཏྟརཱུཔསནྟཏིཔརིཙྪིནྣཱ སངྒཧིཏཱཡེཝཱཏི དཊྛབྦཾ. པཙྩུཔྤནྣེསུ དྷམྨེསུ སཾཧཱིརཏཱིཏི ཏཎྷཱདིཊྛཱིཧི ཨཱཀཌྜྷནཱིཡཊྛཱནབྷཱཝེན ཝུཏྟཾ. ‘‘ཡོ ཙཱཝུསོ, མནོ ཡེ ཙ དྷམྨཱ’’ཏི ཝིསཡིཝིསཡབྷཱུཏཱ ཨེཀབྷཝབྷཱུཏཱ ཙ ཨེཀསནྟཏིཔརིཡཱཔནྣཱ དྷམྨཱ ཝིབྷཱགཾ ཨཀཏྭཱ གཡ྄ཧམཱནཱ ཨདྡྷཱཔཙྩུཔྤནྣཾ ཧོཏི, སཏི པན ཝིབྷཱགཀརཎེ ¶ ཁཎསནྟཏིཔཙྩུཔྤནྣཏཱ ལབྦྷཏཱིཏི ཨཱཧ ‘‘ཨདྡྷཱཔཙྩུཔྤནྣཾ ཧོནྟཾ ཨེཏཾ ཨུབྷཡཾ ཧོཏཱི’’ཏི.

ཏསྶཱཏི མཧཱཛནསྶ. ཨཏཱིཏཱདིཝིབྷཱགཾ ཨཀཏྭཱཏི ཨཱཝཛྫནཱདཱིནཾ སམཱནཱཀཱརཔྤཝཏྟིཡཱ ཨུཔཱཡཾ དསྶེཏི. སིདྡྷཾ ཧོཏཱིཏི ཁཎཔཙྩུཔྤནྣཱརམྨཎཏྟེཔི པརིཀམྨཙེཏོཔརིཡཉཱཎཱནཾ ཨཡཾ པཱལི༹ སུཊྛུ ནཱིཏཱ ཧོཏཱིཏི ཨཏྠོ. ཨཏཱིཏཏྟིཀོ ཙ ཨེཝཾ ཨབྷིནྣོ ཧོཏཱིཏི ཨེཝཾ ཁཎཔཙྩུཔྤནྣེཡེཝ དྷམྨེ ཨིདྷ པཙྩུཔྤནྣོཏི གཡ྄ཧམཱནེ ཨཉྙཔདསངྒཧིཏསྶེཝ ཨནནྟརཔཙྩཡབྷཱཝཾ པཀཱསེནྟོ ཨཏཱིཏཏྟིཀོ ཙ པཊྛཱནེ ཨབྷེདཏོ སམྨཱ ཨཏྠསྶ ཨུདྡྷཊཏྟཱ ཨཝིནཱསིཏོ ཧོཏི. ཨཐ ཝཱ ཨཏཱིཏཏྟིཀོཏི པཊྛཱནེ ཨཏཱིཏཏྟིཀཔཱལི༹, ཨིམཱཡ ཨཏཱིཏཏྟིཀཔཱལི༹ཡཱ ཡཐཱཝུཏྟཀཱརཎཏོཡེཝ ཨབྷིནྣོ ཨཝིསིཊྛོ ཨཉྙདཏྠུ སཾསནྡཏི སམེཏཱིཏི ཨཏྠོ.

ཡཐཱསམྦྷཝནྟི ཨཱཝཛྫནཱཡ ཨནཱགཏཱརམྨཎཏཱ, ཛཝནཱནཾ པཙྩུཔྤནྣཱཏཱིཏཱརམྨཎཏཱ ཨནཱགཏཔཙྩུཔྤནྣཱཏཱིཏཱརམྨཎཏཱཏི ¶ ཡོཛེཏབྦཾ. ནཱནཱརམྨཎཏཱ ན སིཡཱ ཨདྡྷཱཝསེན པཙྩུཔྤནྣཱརམྨཎཏྟཱཏི ཨདྷིཔྤཱཡོ. ཨཡཉྩ ཨཏྠོ ཨེཀིསྶཱ ཛཝནཝཱིཐིཡཱ ཨེཀསྨིཾཡེཝ ཙིཏྟེ པཝཏྟིཡཾ ཨཱཝཛྫནཱདཱིནཾ ཨནཱགཏཱདིཨཱརམྨཎཏཱ སམྦྷཝཏཱིཏི སམྦྷཝདསྶནཝསེན ཝུཏྟོཏི ཡཐཱདྷིཔྤེཏསྶ ཨབྷིཉྙཱཙིཏྟསྶ ཁཎཔཙྩུཔྤནྣེ པཝཏྟིཾ ཡོཛེཏྭཱ དསྶེཏུཾ ‘‘ཏེནཱ’’ཏིཨཱདིམཱཧ. ཏཱིཎཱིཏི ‘‘ཨཏཱིཏཱརམྨཎོ དྷམྨོ ཨཏཱིཏཱརམྨཎསྶ དྷམྨསྶ ཨཱསེཝནཔཙྩཡེན པཙྩཡོ, ཨནཱགཏཱརམྨཎོ དྷམྨོ ཨནཱགཏཱརམྨཎསྶ དྷམྨསྶ, པཙྩུཔྤནྣཱརམྨཎོ དྷམྨོ པཙྩུཔྤནྣཱརམྨཎསྶ དྷམྨསྶ ཨཱསེཝནཔཙྩཡེན པཙྩཡོ’’ཏི (པཊྛཱ. ༢.༡༩.༣༤) པདནྟརསངྒཧིཏདྷམྨཱནཔེཀྑཱ དྷམྨཱ ཏཱིཎི པཉྷཝིསྶཛྫནཱནཱིཏི ཨཏྠོ. ཨནཱསེཝནཾ ནཏྠཱིཏི ཨཱསེཝནལཱབྷེ སཏི ཡཐཱདྷམྨསཱསནེ ཨཝཙནསྶ ཀཱརཎཾ ནཏྠཱིཏི ཨཝཙནེན ཏཏྠ ཨིཏརེསཾ པཉྷཱནཾ པཊིསེདྷོ ཝིཉྙཱཡཏཱིཏི ཨདྷིཔྤཱཡོ.

ཨེཏསྶ ཝཱདསྶཱཏི ‘‘ཨཱཝཛྫནཛཝནཱནཾ ཨནཱགཏཔཙྩུཔྤནྣཱརམྨཎཏྟེཔི ཙེཏོཔརིཡཉཱཎཾ སིདྡྷ’’ནྟི ཝཱདསྶ. ནིསྶཡབྷཱཝོཏི ཨཏྠསམྦྷཝཏོ ཡཐཱཝུཏྟནཡསྶ ཛོཏཀབྷཱཝོ. ཡནྟི ཙིཏྟཾ. ཏསྶཱཏི ཨཱཝཛྫནཛཝནཱནཾ ¶ ཁཎཔཙྩུཔྤནྣནིརུདྡྷཱརམྨཎཏཱཝཙནསྶ. ཨེཏྠ ཙ ཀཱལཝིསེསཾ ཨཱམསཏི, ཨནཱགཏཱཡེཝ ཙ ཨཱཝཛྫནཱ པཝཏྟཏཱིཏི ནཡིདཾ ཡུཛྫམཱནཀཾ. ཨཐ ‘‘ཡཾ ཨིམསྶ ཙིཏྟཾ བྷཝིསྶཏི, ཏཾ ཛཱནཱམཱི’’ཏི ཨཱབྷོགཾ ཀརོཏི, ཨེཝཾ སཏི པརིཀམྨཱབྷིཉྙཱཙིཏྟཱནམྤི ཨནཱགཏཱརམྨཎཏྟམེཝཱཏི སབྦཏྠ ཨཱཝཛྫནཛཝནཱནཾ ཨནཱགཏཔཙྩུཔྤནྣཱརམྨཎཏཱ ན སིཛ྄ཛྷཏཱིཏི ཨཱཧ ‘‘པཝཏྟི…པེ… ཝུཏྟཏྟཱ’’ཏི. དོསཱཔཏྟིཡཱཏི དོསཱཔཛྫནེན, དོསཱཔཏྟིཏོ ཝཱ. རཱསིཨེཀདེསཱཝཛྫནཔཊིཝེདྷེཏི ཡཐཱརུཏཝསེནེཝ པུརིམཝཱདིཔཀྑམཱཧ, སམྤཏྟསམྤཏྟཱཝཛྫནཛཱནནེཏི ཨཏྟནཱ ནིདྡྷཱརིཏཔཀྑཾ. པུརིམཝཱདིནོ ནཱནུཛཱནེཡྻུནྟི ཨདྡྷཱསནྟཏིཔཙྩུཔྤནྣཔདཏྠཏཱ ཨབྷིདྷམྨམཱཏིཀཱཡཾ ཨཱགཏཔཙྩུཔྤནྣཔདསྶ ནཏྠཱིཏི ཨདྷིཔྤཱཡེ ཋཏྭཱ ནཱནུཛཱནེཡྻུཾ. ཨེཏྠ ཙ སཏིཔི སབྷཱཝབྷེདེ ཨཱཀཱརབྷེདཱབྷཱཝཏོ ཨེཀཏྟནཡཝསེན ཨཱཝཛྫནཔརིཀམྨཱབྷིཉྙཱཙིཏྟཱནཾ ནཱནཱརམྨཎཏཱདོསོ ནཏྠཱིཏི ཁཎཔཙྩུཔྤནྣཱརམྨཎཏཱ ཙེཏོཔརིཡཉཱཎསྶ པུརིམཝཱདཱིནཾ ཨདྷིཔྤཱཡཝིབྷཱཝནམུཁེན དསྶིཏཱ. ཨཊྛཀཐཱཡཾ པན ‘‘སབྷཱཝབྷེདེ སཏི ནཱནཱརམྨཎཏཱདོསཱབྷཱཝོ ནཏྠི ཨེཝཱཏི ཨེཀསྨིཾ ཨེཝ ཙིཏྟེ ཨདྡྷཱསནྟཏིཝསེན པཙྩུཔྤནྣཱརམྨཎཏཱ ཝིབྷཱཝིཏཱ’’ཏི དྭཱིསུཔི ཝཱདེསུ ཡཾ ཡུཏྟཾ, ཏཾ ཝིཙཱརེཏྭཱ གཧེཏབྦཾ.

ཏེནེཝཱཏི ཡསྨཱ ཨཏཱིཏཏྟིཀེ ཨུཔྤནྣཏྟིཀེ ཙ ཙེཏོཔརིཡཉཱཎསྶ ཝཏྟམཱནདྷམྨཱརམྨཎབྷཱཝཛོཏནོ པཱཋོ ན དིསྶཏི, ཏེནེཝ ཀཱརཎེན. དྭཱིསུ ཉཱཎེསཱུཏི པུབྦེནིཝཱསཙེཏོཔརིཡཉཱཎེསུ ¶ . ཀམྨམུཁེན གཡ྄ཧནྟཱིཏི སཏིཔི ཨཱརམྨཎབྷཱཝེ ཙཏྟཱརོ ཁནྡྷཱ ཡཐཱཀམྨཱུཔགཉཱཎེན ཀམྨདྭཱརེན ཀུསལཱཀུསལཱ ཨིཙྩེཝ གཡ྄ཧནྟི, ན པན ཝིབྷཱགསོཏི དསྶེཏི. ལོབྷཱདིསམྤཡོགཝིསེསེན དུཙྩརིཏབྷཱཝོ, ཨལོབྷཱདིསམྤཡོགཝིསེསེན ཙ སུཙརིཏབྷཱཝོ ལཀྑཱིཡཏཱིཏི དུཙྩརིཏསུཙརིཏཱནི ཝིབྷཱཝེནྟཾ ལོབྷཱདཡོཔི ཝིབྷཱཝེཏིཡེཝ ནཱམ ཧོཏཱིཏི ཨཱཧ ‘‘དུཙྩརིཏ…པེ… བྷཱཝནཾ ཧོཏཱི’’ཏི.

༡༤༣༥. ཨསབྷཱཝདྷམྨསྶ ‘‘ཨཧ’’ནྟིཨཱདིཔཉྙཏྟིཡཱ ཨཛ྄ཛྷཏྟདྷམྨུཔཱདཱནཏཱཡ སིཡཱ ཀོཙི ཨཛ྄ཛྷཏྟཔརིཡཱཡོ, ན པན སབྷཱཝདྷམྨསྶ ཨསཏྟསནྟཱནེཝ ཏསྶཱཏི ཝུཏྟཾ ‘‘སབྷཱཝ…པེ… ཨཧོནྟ’’ནྟི. ཏཐཱ ཧི ‘‘ཨཏྟནོ ཁནྡྷཱདཱིནི པཙྩཝེཀྑནྟསྶཱ’’ཏི ཨེཏྠ ‘‘ཨཛ྄ཛྷཏྟཱརམྨཎཱ’’ཏི པདསྶ ཨཏྠཝིཝརཎཝསེན ‘‘ཨཛ྄ཛྷཏྟཾ གཡ྄ཧམཱནཾ ཨཧནྟི པཉྙཏྟིཾ ཨཱདི-སདྡེན གཎྷཱཏཱི’’ཏི ¶ ཝཀྑཏི. ཡདི ཨེཝཾ ཏསྶ ཨཛ྄ཛྷཏྟཏྟིཀེཔི ཨཛ྄ཛྷཏྟབྷཱཝོ ཝཏྟབྦོ སིཡཱ? ན, བཧིདྡྷཱབྷཱཝསྶ ཝིཡ ཨཛ྄ཛྷཏྟབྷཱཝསྶཔི ཨཛ྄ཛྷཏྟཏྟིཀེ ནིཔྤརིཡཱཡཝསེན ཨདྷིཔྤེཏཏྟཱཏི. ཡདཱཧ ‘‘ཨསབྷཱ…པེ… ན ཝུཏྟ’’ནྟི. ཨཱཀིཉྩཉྙཱཡཏནཱདཱིཏི ཨཱདི-སདྡེན སཱཝཛྫནཱནི ཏསྶ པུརེཙཱརིཀཨུཔཙཱརཙིཏྟཱནི ཏསྶ ཨཱརམྨཎེན པཝཏྟནཀཔཙྩཝེཀྑཎཨསྶཱདནཱདིཙིཏྟཱནི ཙ སངྒཎྷཱཏི.

ཨཱཀིཉྩཉྙཱཡཏནཾ ཏཾ-སདྡེན ཨཱཀཌྜྷིཏྭཱ ཝདཏི, ན པན ཏཾ སབྦནྟི ཝུཏྟཾ, ཡཉྩ ཏསྶ པུརེཙཱརིཀནྟི ཨཏྠོ. ལེསཝཙནནྟི ཨེཀདེསསཱརུཔྤེན སམཱནཱརམྨཎབྷཱཝེན ཨེཀདེསསྶེཝ ཝཙནཾ. ལིསྶཏི སིལིསྶཏི ཨེཀདེསེན ཨལླཱིཡཏཱིཏི ཧི ལེསོ. ཡེསནྟི ཀཱམཱཝཙརཀུསལཱཀུསལམཧཱཀིརིཡཱཝཛྫནཙིཏྟཱནཾ ཀུསལཀིརིཡཱབྷེདསྶ རཱུཔཱཝཙརཙཏུཏྠསྶ ཙ. ཨེཝཾ ཨུཔེཀྑཱསཧགཏནིདྡེསཱདཱིསཱུཏི ཡེསཾ ཨདུཀྑམསུཁཱཡ ཝེདནཱཡ སམྤཡུཏྟཏཱ ཝུཏྟཱ, ཏེསུ ཨེཀམེཝ ཨུཔེཀྑཱསཧགཏནིདྡེསཾ ཝཏྭཱ ཨིཏརཾ ན ཝཏྟབྦཾ སིཡཱཏི ཨཏྠོ. ཨཱདི-སདྡེན ཧེཏུསམྤཡུཏྟཀཱམཱཝཙརཱདིནིདྡེསེ སངྒཎྷཱཏི. ཏཏྠཱཔི ཧི པརིཏྟསཧེཏུཀཱདིབྷཱཝེན ཝུཏྟེསུ དྷམྨེསུ ཨེཀམེཝ ཝཏྭཱ ཨིཏརཾ ན ཝཏྟབྦཾ སིཡཱཏི. ཨབྷཱཝནཱནིཊྛཔྤཝཏྟིཡཱཏི ཨབྷཱཝནཱནིཊྛཔྤཝཏྟིཡཱ ཨབྷཱཝནཱཀཱརསྶ ཨུཀྐཾསཔྤཝཏྟིཡཱཏི ཨཏྠོ, ཨབྷཱཝསྶ ཝཱ ཨུཀྐཾསཔྤཝཏྟིཡཱ. ནཝཏྟབྦཾ ཛཱཏཾ ཨཛ྄ཛྷཏྟཱརམྨཎཱདིབྷཱཝེནཱཏི ཨདྷིཔྤཱཡོ. ཏཱནཱིཏི ཨཱཀིཉྩཉྙཱཡཏནེན སམཱནཱརམྨཎཱནི ཨཱཝཛྫནཱདཱིནི. ཡདི ཨེཝཾ ‘‘ཨབྷཱཝནཱསཱམཉྙེ’’ཏི ཀསྨཱ ཝུཏྟཾ. ན ཧི ཨཱཀིཉྩཉྙཱཡཏནཱརམྨཎསྶ པཙྩཝེཀྑཎཨསྶཱདནཱདིཝསེན པཝཏྟཙིཏྟཱནཾ ཨབྷཱཝནཱཀཱརེན པཝཏྟི ¶ ཨཏྠཱིཏི? ན, ཨབྷཱཝེཏབྦཏཱཡ ཨདྷིཔྤེཏཏྟཱ. ན བྷཱཝཱིཡཏཱིཏི ཧི ཨབྷཱཝནཾ, ན ན བྷཱཝེཏཱིཏི.

གཧཎཝིསེསནིམྨིཏཱནཱིཏིཨཱདཱིསུ ཨཡམདྷིཔྤཱཡོ – ཡདིཔི བྷཱཝནཱཉཱཎནིམྨིཏཱཀཱརམཏྟེསུ སབྷཱཝཏོ ཨཝིཛྫམཱནེསུ ཝིསཡེསུ ཡེབྷུཡྻེན མཧགྒཏཱ དྷམྨཱ པཝཏྟནྟི, བཧིདྡྷཱཀཱརགྒཧཎཝསེན པན ཀསིཎཱདཱིནཾ བཧིདྡྷཱབྷཱཝོཏི ཏདཱརམྨཎདྷམྨཱ བཧིདྡྷཱརམྨཎཱཏི ཝུཏྟཾ. ཀསིཎཱནཉྷི སནྟཱནཾ མུཉྩིཏྭཱ ཨུཔཊྛཱནཾ ཝིསེསཏོ ཝཌྜྷིཏཀསིཎཝསེན ཝིཉྙཱཡཏི, པཋམཱརུཔྤཝིཉྙཱཎཱབྷཱཝསྶ པན ན བཧིདྡྷཱཀཱརོ, ནཱཔི ཨཛ྄ཛྷཏྟཱཀཱརོཏི ¶ ཨུབྷཡཱཀཱརཝིདྷུརེ ཏསྨིཾ ཨནཉྙསཱདྷཱརཎེན པཝཏྟིཡཱཀཱརེན པཝཏྟམཱནཾ ཨཱཀིཉྩཉྙཱཡཏནམེཝ ནཝཏྟབྦཱརམྨཎཾ ཝུཏྟཾ, ན ཨིཏརེ ཨིཏརཱཀཱརཔྤཝཏྟིཏོཏི. ཀཱམཱཝཙརཀུསལཱནནྟི ནིདསྶནམཏྟཾ དཊྛབྦཾ.

ཨཱཀིཉྩཉྙཱཡཏནཝིཔཱཀཾ ནེཝསཉྙཱནཱསཉྙཱཡཏནསྶ ཝིཔཱཀཱདིཀསྶཱཏི ཨཏྠཝསེན ཝིབྷཏྟི པརིཎཱམེཏབྦཱ. ཨབྷིནཱིཧཱརཱསམྦྷཝཏོཏི སམཱཔཏྟིཙིཏྟསྶ ཨབྷིནཱིཧརཎཱསམྦྷཝཏོ. ཀུསལམེཝ ཝིཔཱཀསྶ ཨཱརམྨཎནྟི ཀཏྭཱ ‘‘ཝིཔཱཀསྶཱ’’ཏིཨཱདི ཝུཏྟཾ.

ཨསབྷཱཝདྷམྨཏྟེཔི བཧིདྡྷཱཀཱརེན གཧཎཱིཡབྷཱཝཏོ ཀསིཎཱནཾ བཧིདྡྷཱབྷཱཝོ ཝིཡ ཨེཀནྟཏོ ཨིདྷ ཨཛ྄ཛྷཏྟདྷམྨུཔཱདཱནཏཱཡ ཨཧནྟི པཉྙཏྟིཡཱ སིཡཱ ཨཛ྄ཛྷཏྟབྷཱཝོཏི ཝུཏྟཾ ‘‘ཨཛ྄ཛྷཏྟ’’ནྟིཨཱདི. ‘‘ཁནྡྷཱདཱིཏི ཨཱདི-སདྡེན དྷཱཏུཨཱཡཏནཱདི སངྒཡ྄ཧཏཱི’’ཏི ཙ ཝདནྟི. ཨེས ནཡོཏི ‘‘ཨརཱུཔཀྑནྡྷེ ཁནྡྷཱཏི གཧེཏྭཱ’’ཏིཨཱདིཀཾ ཝཎྞནཱནཱིཏིཾ ཨཱཧ. པརེསཾ ཁནྡྷཱདིགྒཧཎེཏི པརེསཾ ཁནྡྷཱདཱིཏི ཨིམསྶ པདསྶ ཀཐནེ ཨུཙྩཱརཎེ. སབྦཾ ཨུཔཱདཱཔཉྙཏྟིཾ ཨཱཧ ཨཱདིསདྡེནཱཏི སམྦནྡྷོ.

ཏིཀཨཏྠུདྡྷཱརཝཎྞནཱ ནིཊྛིཏཱ.

དུཀཨཏྠུདྡྷཱརཝཎྞནཱ

༡༤༧༣. ཨཉྙཐཱཏི ¶ ཝུཏྟཔྤཀཱརསྶ དསྶནེ. ཝུཏྟཔྤཀཱརསྶ དསྶནཏོ ཨེཝ ཧི ཨཊྛཀཐཱཡཾ སསངྑཱརིཀཱནཾ ཐིནམིདྡྷཝིརཧེ ཨསངྑཱརིཀསདིསཱི ཡོཛནཱ ན དསྶིཏཱ. བྷཝརཱགཱདཱིསཱུཏི བྷཝརཱགམཱུལིཀཱདཱིསུ ཡོཛནཱསུ.

༡༥༡༡. དྭེཏི ཨུདྡྷཙྩཱཝིཛྫཱནཱིཝརཎཱནི. ཏཱིཎཱིཏི ཀཱམཙྪནྡབྱཱཔཱདཝིཙིཀིཙྪཱསུ ཨེཀེཀེན ཨུདྡྷཙྩཱཝིཛྫཱནཱིཝརཎཱནི. དྭེ ཝཱ ཏཱིཎི ཝཱཏི པཱལི༹ཡཾ ཝཱ-སདྡསྶ ལུཏྟནིདྡིཊྛཏཾ ཨཱཧ. ཨཐ ཝཱ ནིཔཱཏསདྡསནྣིདྷཱནེཔི ནཱམཔདཱདཱིཧི ཨེཝ སམུཙྩཡཱདིཨཏྠོ ཝུཙྩཏི, ན ནིཔཱཏཔདེཧི ཏེསཾ ཨཝཱཙཀཏྟཱཏི ཨནྟརེནཔི ནིཔཱཏཔདཾ ཨཡམཏྠོ ལབྦྷཏི. ཏཐཱ ཝཙནིཙྪཱཡ སམྦྷཝོ ཨེཝ ཧེཏྠ པམཱཎནྟི པཱལི༹ཡཾ ‘‘དྭེ ཏཱིཎཱི’’ཏི ཝུཏྟཾ. ཡཏྠ ¶ སཧུཔྤཏྟཱིཏིཨཱདིནཱ ‘‘དྭེ ཏཱིཎཱི’’ཏི ལཀྑཎཝཙནནྟི སབྦསཱདྷཱརཎམཏྠམཱཧ. ཏཐཱ ཧི ‘‘ཨེཝཉྩ ཀཏྭཱ ཀིལེསགོཙྪཀེ ཙཱ’’ཏི ཝུཏྟཾ. ཏསྶཱཡམདྷིཔྤཱཡོ – ཀིལེསདྭཡསཧིཏསྶེཝ ཙིཏྟུཔྤཱདསྶ ཨབྷཱཝེཔི པཱལི༹ཡཾ དྭིགྒཧཎཾ ཀཏཾ, ཀིལེསཱནཉྩ སམྦྷཝནྟཱནཾ སབྦེསཾ སརཱུཔེན གཧཎཾ ན ཀཏནྟི དྭེ ཏཡོཏི ལཀྑཎཀརཎནྟི ཝིཉྙཱཡཏཱིཏི.

ཡདི སབྦཱཀུསལེ ཨུཔྤཛྫནཀསྶཔི ཨུདྡྷཙྩསྶ ཨེཀོ ཨེཝ ཙིཏྟུཔྤཱདོ ཝིསཡབྷཱཝེན ཝུཙྩཏི, ཨཝིཛྫཱནཱིཝརཎསྶཔི ཏཐཱ ཝཏྟབྦནྟི ཨདྷིཔྤཱཡེན ‘‘ཀསྨཱ ཝུཏྟ’’ནྟིཨཱདིནཱ ཙོདེཏི. ཨིཏརོ ཨུདྡྷཙྩནཱིཝརཎསྶེཝ ཏཐཱ ཝཏྟབྦཏཾ ཨཝིཛྫཱནཱིཝརཎསྶ ཏཐཱ ཝཏྟབྦཏཱབྷཱཝཉྩ དསྶེཏུཾ ‘‘སུཏྟནྟེ’’ཏིཨཱདིམཱཧ. ཏཏྠ སུཏྟནྟེ ཝུཏྟེསུ པཉྩསུ ནཱིཝརཎེསཱུཏི ཨུདྡྷཙྩསཧགཏེ ཨུདྡྷཙྩསྶ ཨཝིཛྫཱནཱིཝརཎེན ནཱིཝརཎསཧིཏཏཾ ཨཱསངྐིཏྭཱ ཝུཏྟཾ. ནནུ ཙ སུཏྟནྟེཔི ‘‘ཨཝིཛྫཱནཱིཝརཎཱནཾ སཏྟཱན’’ནྟིཨཱདཱིསུ (སཾ. ནི. ༢.༡༢༤) ཨཝིཛྫཱ ‘‘ནཱིཝརཎ’’ནྟི ཝུཏྟཱཏི? སཙྩམེཏཾ, ཛྷཱནངྒཱནཾ པཊིཔཀྑབྷཱཝེན པན སུཏྟནྟེ བཧུལཾ ཀཱམཙྪནྡཱདཡོ པཉྩེཝ ནཱིཝརཎཱནི ཝུཏྟཱནཱིཏི ཡེབྷུཡྻཝུཏྟིཝསེན ཨེཏཾ ཝུཏྟནྟི དཊྛབྦཾ.

ཀེཙི པན ‘‘ཡཐཱ ནིཀྑེཔཀཎྜེ ཀུསལཔཊིཔཀྑབྷཱུཏཱནི དུབྦལཱནིཔི ནཱིཝརཎཱནི པཊྛཱནེ ཝིཡ དསྶིཏཱནི. ཏཐཱ ཧི པཊྛཱནེ (པཊྛཱ. ༣.༨.༡) ‘ནཱིཝརཎཾ དྷམྨཾ པཊིཙྩ ནཱིཝརཎོ དྷམྨོ ཨུཔྤཛྫཏི ན པུརེཛཱཏཔཙྩཡཱ. ཨརཱུཔེ ཀཱམཙྪནྡནཱིཝརཎཾ པཊིཙྩ ཐིནམིདྡྷནཱིཝརཎཾ ཨུདྡྷཙྩནཱིཝརཎ’ནྟིཨཱདི ¶ ཝུཏྟཾ, ན ཨེཝཾ ཨཊྛཀཐཱཀཎྜེ. ཨཊྛཀཐཱཀཎྜེ པན ཛྷཱནཔཊིཔཀྑབྷཱུཏཱནིཡེཝ ནཱིཝརཎཱནི ནིདྡིཊྛཱནཱིཏི ‘ཨུདྡྷཙྩནཱིཝརཎཾ ཨུདྡྷཙྩསཧགཏེ ཙིཏྟུཔྤཱདེ ཨུཔྤཛྫཏཱི’ཏི ཝུཏྟཾ. ཨཊྛཀཐཱཡཾ པན ཨུདྡྷཙྩནཱིཝརཎསྶ ཀཱམཙྪནྡཱདཱིཧི ཨེཀཏོ ཨུཔྤཏྟིདསྶནཾ ནིཀྑེཔཀཎྜཱནུསཱརེན ཀཏཾ ཨེཀཏོ ཨུཔྤཏྟིཡཱ པབྷེདདསྶནཏྠཾ. ཏཏྠ ཧི པཱལི༹ཡཾཡེཝ ཏཱནི ཝིཏྠཱརཏོ ཝུཏྟཱནཱི’’ཏི ཝདནྟི. ཨཡཉྩ ཝཱདོ ‘‘ཨུདྡྷཙྩནཱིཝརཎཾ ཨུདྡྷཙྩསཧགཏེ ཙིཏྟུཔྤཱདེ ཨུཔྤཛྫཏཱི’’ཏི ཨིདམེཝ ཝཙནཾ ཉཱཔཀནྟི ཀཏྭཱ ཝུཏྟོ. ཨཉྙཐཱ ཨཝིཛྫཱནཱིཝརཎཾ ཝིཡ ཝཏྟབྦཾ སིཡཱ. ན ཏི ཨིཏོ ཨཉྙཾ པརིཡུཊྛཱནཔཊྛཱཡཱིནིཡེཝ ནཱིཝརཎཱནི ཨཏྠུདྡྷཱརཀཎྜེ ཨདྷིཔྤེཏཱནཱིཏི ཨིམསྶ ཨཏྠསྶ སཱདྷཀཾ ཝཙནཾ ཨཏྠི, ཨིདཾ ཝཙནཾ དྭེཏཱིཎིཝཙནསྶ སཱམཉྙེན སབྦནཱིཝརཎསངྒཱཧཀཏྟཱ ཡཐཱཝུཏྟཝཙནསྶ ཝིསཡཝིསེསཔྤཀཱསནསངྑཱཏེན ¶ པཡོཛནནྟརེན ཝུཏྟབྷཱཝསྶ དསྶིཏཏྟཱ ཙ ཉཱཔཀཾ ན བྷཝཏཱིཏི དིསྶཏི, ཏསྨཱ ཝིཙཱརེཏྭཱ གཧེཏབྦཾ.

ཨགྒཧེཏྭཱཏི ཡཐཱརུཏཝསེནེཝ ཨཏྠཾ ཨགྒཧེཏྭཱ ཡཐཱ ནིཀྑེཔཀཎྜཔཊྛཱནཱདཱིཧི ན ཨིམིསྶཱ པཱལི༹ཡཱ ཝིརོདྷོ ཧོཏི, ཨེཝཾ ཨདྷིཔྤཱཡོ གཝེསིཏབྦོཏི ཡཐཱཝུཏྟམེཝཏྠཾ ནིགམེཏི.

༡༥༧༧. ཏེསནྟི ལོབྷཱདིཏོ ཨཉྙེསཾ. དསྶིཏཱཏི ཀཐཾ དསྶིཏཱ? མཱནོ ཏཱཝ ལོབྷམོཧཨུདྡྷཙྩཨཧིརིཀཱནོཏྟཔྤེཧི, ལོབྷམོཧཐིནཨུདྡྷཙྩཨཧིརིཀཱནོཏྟཔྤེཧི, ཏཐཱ དིཊྛི, ཝིཙིཀིཙྪཱ མོཧཨུདྡྷཙྩཨཧིརིཀཱནོཏྟཔྤེཧི, ཐིནཾ ལོབྷམོཧདིཊྛིཨུདྡྷཙྩཨཧིརིཀཱནོཏྟཔྤེཧི, ལོབྷམོཧམཱནཨུདྡྷཙྩཨཧིརིཀཱནོཏྟཔྤེཧི, ལོབྷམོཧཨུདྡྷཙྩཨཧིརིཀཱནོཏྟཔྤེཧི, དོསམོཧཨུདྡྷཙྩཨཧིརིཀཱནོཏྟཔྤེཧི, ཨུདྡྷཙྩཾ ལོབྷམོཧདིཊྛིཨཧིརིཀཱནོཏྟཔྤེཧི, ལོབྷམོཧདིཊྛིཐིནཨཧིརིཀཱནོཏྟཔྤེཧི, ལོབྷམོཧམཱནཨཧིརིཀཱནོཏྟཔྤེཧི, ལོབྷམོཧམཱནཐིནཨཧིརིཀཱནོཏྟཔྤེཧི, ལོབྷམོཧཐིནཨཧིརིཀཱནོཏྟཔྤེཧི, ལོབྷམོཧཨཧིརིཀཱནོཏྟཔྤེཧི, དོསམོཧཨཧིརིཀཱནོཏྟཔྤེཧི, དོསམོཧཐིནཨཧིརིཀཱནོཏྟཔྤེཧི, མོཧཝིཙིཀིཙྪཱཨཧིརིཀཱནོཏྟཔྤེཧི, མོཧཨཧིརིཀཱནོཏྟཔྤེཧི ཨེཀཏོ ཨུཔྤཛྫཏི.

ཡཐཱ ཙ ཨུདྡྷཙྩཾ, ཨེཝཾ ཨཧིརིཀཱནོཏྟཔྤཱནི ཙ ཡོཛེཏྭཱ ཝེདིཏབྦཱནི. ཀཐཾ? ཨཧིརིཀཾ ལོབྷམོཧདིཊྛིཨུདྡྷཙྩཱནོཏྟཔྤེཧི, ལོབྷམོཧདིཊྛིཐིནཨུདྡྷཙྩཱནོཏྟཔྤེཧི, ལོབྷམོཧམཱནཨུདྡྷཙྩཱནོཏྟཔྤེཧི, ལོབྷམོཧམཱནཐིནཨུདྡྷཙྩཱནོཏྟཔྤེཧི, ལོབྷམོཧཐིནཨུདྡྷཙྩཱནོཏྟཔྤེཧི, ལོབྷམོཧཨུདྡྷཙྩཱནོཏྟཔྤེཧི, དོསམོཧཨུདྡྷཙྩཱནོཏྟཔྤེཧི, དོསམོཧཐིནཨུདྡྷཙྩཱནོཏྟཔྤེཧི, མོཧཝིཙིཀིཙྪཱཨུདྡྷཙྩཱནོཏྟཔྤེཧི ¶ , མོཧཨུདྡྷཙྩཱནོཏྟཔྤེཧི ཙ ཨེཀཏོ ཨུཔྤཛྫཏི. ཨནོཏྟཔྤཾ ལོབྷམོཧདིཊྛིཨུདྡྷཙྩཱཧིརིཀེཧི, ལོབྷམོཧདིཊྛིཐིནཨུདྡྷཙྩཱཧིརིཀེཧི, ལོབྷམོཧམཱནཨུདྡྷཙྩཱཧིརིཀེཧི, ལོབྷམོཧམཱནཐིནཨུདྡྷཙྩཱཧིརིཀེཧི, ལོབྷམོཧཐིནཨུདྡྷཙྩཱཧིརིཀེཧི, ལོབྷམོཧཨུདྡྷཙྩཱཧིརིཀེཧི, དོསམོཧཨུདྡྷཙྩཱཧིརིཀེཧི, དོསམོཧཐིནཨུདྡྷཙྩཱཧིརིཀེཧི, མོཧཝིཙིཀིཙྪཱཨུདྡྷཙྩཱཧིརིཀེཧི ¶ , མོཧཨུདྡྷཙྩཱཧིརིཀེཧི ཙ ཨེཀཏོ ཨུཔྤཛྫཏཱིཏི ཨེཝམེཏྠ མཱནཱདཱིནམྤི ཨེཀཏོ ཨུཔྤཏྟི ཝེདིཏབྦཱ. སེསཾ ཨུཏྟཱནཏྠམེཝ.

ཨཊྛཀཐཱཀཎྜཝཎྞནཱ ནིཊྛིཏཱ.

ཨིཏི དྷམྨསངྒཎཱིམཱུལཊཱིཀཱཡ ལཱིནཏྠཔདཝཎྞནཱ

དྷམྨསངྒཎཱི-ཨནུཊཱིཀཱ སམཏྟཱ.