📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཨབྷིདྷམྨཔིཊཀེ

པཉྩཔཀརཎ-ཨནུཊཱིཀཱ

དྷཱཏུཀཐཱཔཀརཎ-ཨནུཊཱིཀཱ

གནྠཱརམྦྷཝཎྞནཱ

དྷཱཏུཀཐཱཔཀརཎདེསནཱཡ ¶ ¶ དེསདེསཀཔརིསཱཔདེསཱ ཝུཏྟཔྤཀཱརཱ ཨེཝཱཏི ཀཱལཱཔདེསཾ དསྶེནྟོ ‘‘དྷཱཏུཀཐཱཔཀརཎཾ དེསེནྟོ’’ཏིཨཱདིམཱཧ. ‘‘ཏསྶེཝ ཨནནྟརཾ ཨདེསཡཱི’’ཏི ཧི ཨིམིནཱ ཝིབྷངྒཱནནྟརཾ དྷཱཏུཀཐཱ དེསིཏཱཏི ཏསྶཱ དེསནཱཀཱལོ ཨཔདིཊྛོ ཧོཏི. ཡེ པན ‘‘ཝིབྷངྒཱནནྟརཾ ¶ ཀཐཱཝཏྠུཔཀརཎཾ དེསིཏ’’ནྟི ཝདནྟི, ཏེསཾ ཝཱདཾ པཊིཀྑིཔནྟོ ‘‘ཝིབྷངྒཱནནྟརཾ…པེ… དསྶེཏུ’’ནྟི ཨཱཧ.

‘‘ཀཱམཱ ཏེ པཋམཱ སེནཱ’’ཏིཨཱདིཝཙནཏོ (སུ. ནི. ༤༣༨; མཧཱནི. ༢༨; ཙཱུལ༹ནི. ནནྡམཱཎཝཔུཙྪཱནིདྡེས ༤༧) ཀིལེསཝིདྡྷཾསནམྤི དེཝཔུཏྟམཱརསྶ བལཝིདྷམནནྟི སཀྐཱ ཝཏྟུཾ, ‘‘ཨཔྤཝཏྟིཀརཎཝསེན ཀིལེསཱབྷིསངྑཱརམཱརཱན’’ནྟི པན ཝུཙྩམཱནཏྟཱ ཁནྟིབལསདྡྷཱབལཱདིཨཱནུབྷཱཝེན ཨུསྶཱཧཔརིསཱབལབྷཉྫནམེཝ དེཝཔུཏྟམཱརསྶ བལཝིདྡྷཾསནཾ དཊྛབྦཾ. ཝིསཡཱཏིཀྐམནཾ ཀཱམདྷཱཏུསམཏིཀྐམོ. སམུདཡཔྤཧཱནཔརིཉྙཱཝསེནཱཏི པཧཱནཱབྷིསམཡཔརིཉྙཱབྷིསམཡཱནཾ ཝསེན. ནནུ ཙེཏཾ པཉྩནྣཾ མཱརཱནཾ བྷཉྫནཾ སཱཝཀེསུཔི ལབྦྷཏེཝཱཏི ཙོདནཾ མནསི ཀཏྭཱ ཨཱཧ ‘‘པརཱུཔནིསྶཡརཧིཏ’’ནྟིཨཱདི. ཝཱིརསྶ བྷཱཝོ ཝཱིརིཡནྟི ཀཏྭཱ ཝུཏྟཾ ‘‘མཧཱཝཱིརིཡོཏི མཧཱཝཱིརོ’’ཏི. མཧཱཝཱིརིཡཏཱ ཙ པརིཔུཎྞཝཱིརིཡཔཱརམིཏཱཡ ཙཏུརངྒསམནྣཱགཏཝཱིརིཡཱདྷིཊྛཱནེན ¶ ཨནཉྙསཱདྷཱརཎཙཏུབྦིདྷསམྨཔྤདྷཱནསམྤཏྟིཡཱ ཙ ཝེདིཏབྦཱ. ཏཏོ ཨེཝ ཧིསྶ ཝཱིརིཡཱཧཱནིསིདྡྷིཔཱིཏི.

ཁནྡྷཱདིཀེ དྷམྨེ ཨདྷིཊྛཱཡ ནིསྶཱཡ ཝིསཡཾ ཀཏྭཱ ཨབྷིདྷམྨཀཐཱ པཝཏྟཱཏི ཨཱཧ ‘‘ཨབྷིདྷམྨཀཐཱདྷིཊྛཱནཊྛེན ཝཱ’’ཏི. ཏེསཾ ཀཐནཏོཏི ཏེསཾ ཁནྡྷཱདཱིནཾ ཀཐཱབྷཱཝཏོ. ཨེཏེན ཨཏྠཝིསེསསནྣིསྶཡོ བྱཉྫནསམུདཱཡོ པཀརཎནྟི ཝུཏྟཾ ཧོཏི. ཨཐ ཝཱ དྷཱཏུཡོ ཀཐཱིཡནྟི ཨེཏྠ, ཨེཏེན ཝཱཏི དྷཱཏུཀཐཱ, ཏཐཱཔཝཏྟོ བྱཉྫནཏྠསམུདཱཡོ. ཡདི ཨེཝཾ སཏྟནྣམྤི པཀརཎཱནཾ དྷཱཏུཀཐཱབྷཱཝོ ཨཱཔཛྫཏཱིཏི ཙོདནཾ སནྡྷཱཡཱཧ ‘‘ཡདིཔཱི’’ཏིཨཱདི. ཏཏྠ སཱཏིསཡནྟི སཝིསེསཾ ཝིཙིཏྟཱཏིརེཀཝསེན ཨནཝསེསཏོ ཙ དེསནཱཡ པཝཏྟཏྟཱ. ཏཐཱ ཧི ཝུཏྟཾ ‘‘སབྦཱཔི དྷམྨསངྒཎཱི དྷཱཏུཀཐཱཡ མཱཏིཀཱ’’ཏི (དྷཱཏུ. ༥). ཏེནེཝཱཧ ‘‘ཨེཀདེསཀཐནམེཝ ཧི ཨཉྙཏྠ ཀཏ’’ནྟི.

ཨིདཱནི སཱསནེ ཡེསུ དྷཱཏུ-སདྡོ ནིརུལ༹ྷོ, ཏེསཾ ཝསེན ཨཉྙེཧིཔི ཨསཱདྷཱརཎཾ ཨིམསྶ པཀརཎསྶ དྷཱཏུཀཐཱབྷཱཝཾ དསྶེནྟོ ‘‘ཁནྡྷཱཡཏནདྷཱཏཱུཧི ཝཱ’’ཏིཨཱདིམཱཧ. ཏཏྠ ཏཏྠཱཏི ཁནྡྷཱཡཏནདྷཱཏཱུསུ. མཧནྟོ པབྷེདཱནུགཏོ ཝིསཡོ ཨེཏཱསནྟི མཧཱཝིསཡཱ, དྷཱཏུཡོ, ན ཁནྡྷཱཡཏནཱནི ཨཔྤཏརཔདཏྟཱ. ཡེན ཝཱ སབྷཱཝེན དྷམྨཱ སངྒཧཱསངྒཧསམྤཡོགཝིཔྤཡོགེཧི ཨུདྡེསནིདྡེསེ ལབྷནྟི, སོ སབྷཱཝོ དྷཱཏུ. སཱ དྷཱཏུ ཨིདྷ སཱཏིསཡཾ དེསིཏཱཏི སཝིསེསཾ དྷཱཏུཡཱ ཀཐནཏོ ཨིདཾ པཀརཎཾ ‘‘དྷཱཏུཀཐཱ’’ཏི ཝུཏྟཾ. སབྷཱཝཏྠོ ཧི ཨཡཾ དྷཱཏུ-སདྡོ ‘‘དྷཱཏུསོ, བྷིཀྑཝེ ¶ , སཏྟཱ སཾསནྡནྟཱི’’ཏིཨཱདཱིསུ (སཾ. ནི. ༢.༩༨) ཝིཡ. དྷཱཏུབྷེདནྟི དྷཱཏུཝིབྷཱགཾ. པཀརཎནྟི ཝཙནསེསོ. ཀུཏོ པཀརཎ-སདྡོ ལབྦྷཏཱིཏི ཨཱཧ ‘‘སཏྟནྣཾ པཀརཎཱནཾ ཀམེན ཝཎྞནཱཡ པཝཏྟཏྟཱ’’ཏི. ཏེན ཡོཛནཾ ཀཏྭཱཏི ཏེན པཀརཎ-སདྡེན ‘‘དྷཱཏུཀཐཱཝ པཀརཎཾ དྷཱཏུཀཐཱཔཀརཎ’’ནྟི ཡོཛནཾ ཀཏྭཱ. ཏཾ དཱིཔནནྟི ཏཾ དྷཱཏུཀཐཱཔཀརཎསྶ ཨཏྠདཱིཔནཾ, ཨཏྠདཱིཔནཱཀཱརེན པཝཏྟཾ ཝཎྞནཾ. ‘‘ཨཏྠཾ དཱིཔཡིསྶཱམཱི’’ཏི ཝཏྭཱ ‘‘ཏཾ སུཎཱཐཱ’’ཏི ཝདནྟོ སོཏདྭཱརཱནུསཱརེན ཏཏྠ ཨུཔདྷཱརཎེ ནིཡོཛེཏཱིཏི ཨཱཧ ‘‘ཏཾདཱིཔནཝཙནསཝནེན ཨུཔདྷཱརེཐཱཏི ཨཏྠོ’’ཏི.

གནྠཱརམྦྷཝཎྞནཱ ནིཊྛིཏཱ.

༡. མཱཏིཀཱཝཎྞནཱ

༡. ནཡམཱཏིཀཱཝཎྞནཱ

༡. ཙུདྡསཝིདྷེནཱཏི ¶ ¶ ཙུདྡསཔྤཀཱརེན, ཙུདྡསཧི པདེཧཱིཏི ཨཏྠོ. ཏཏྠ ‘‘སངྒཧོ ཨསངྒཧོ’’ཏི ཨིདམེཀཾ པདཾ, ཏཐཱ ‘‘སམྤཡོགོ ཝིཔྤཡོགོ’’ཏི. ‘‘སངྒཧིཏེན སམྤཡུཏྟཾ ཝིཔྤཡུཏྟ’’ནྟིཨཱདཱིནི པན ཏཱིཎི ཏཱིཎི པདཱནི ཨེཀེཀཾ པདཾ. ཨིཏརེསུ པདཝིབྷཱགོ སུཝིཉྙེཡྻོཝ. ཨེཏེཧཱིཏི སངྒཧཱདིཔྤཀཱརེཧི. ནཡནཾ པཱཔནཾ, ཏཾ པན པཝཏྟནཾ ཉཱཔནཉྩ ཧོཏཱིཏི ‘‘པཝཏྟཱིཡཏི ཉཱཡནྟཱི’’ཏི ཙ དྭིདྷཱཔི ཨཏྠོ ཝུཏྟོ. ནཡཱ ཨེཝ ཨུདྡིསིཡམཱནཱ མཱཏིཀཱ. ཨཏྠདྭཡེཔི པཝཏྟནཉཱཎཀིརིཡཱནཾ ཀརཎབྷཱཝེན སངྒཧཱདིཔྤཀཱརཱ ནཡཱཏི ཝུཏྟཱ. ཏེནཱཧ ཨཊྛཀཐཱཡཾ ‘‘ཨིམིནཱ སངྒཧཱདིཀེན ནཡེནཱ’’ཏི (དྷཱཏུ. ཨཊྛ. ༡). པདཱནནྟི ཨཏྠདཱིཔཀཱནཾ ཝཙནཱནཾ. པཛྫཏི ཨེཏེན ཨཏྠོཏི ཧི པདཾ. པདཱནནྟི ཙ སཾསཱམིསམྦནྡྷེ སཱམིཝཙནཾ, པཀརཎསྶཱཏི པན ཨཝཡཝཱཝཡཝཱིསམྦནྡྷེ.

༢. ཨབྦྷནྟརམཱཏིཀཱཝཎྞནཱ

༢. ཏདཏྠཱནཱིཏི པཊིཙྩསམུཔྤཱདཏྠཱནི. པཊིཙྩ སམུཔྤཛྫཏི སངྑཱརཱདིཀཾ ཨེཏསྨཱཏི ཧི པཊིཙྩསམུཔྤཱདོ, པཙྩེཀཾ ཨཝིཛྫཱདིཀོ པཙྩཡདྷམྨོ. ཏཐཱ ཧི ཝུཏྟཾ སངྑཱརཔིཊཀེ ‘‘དྭཱདས པཙྩཡཱ, དྭཱདས པཊིཙྩསམུཔྤཱདཱ’’ཏི. ཏེསནྟི ཁནྡྷཱདཱིནཾ. ཏཐཱདསྶིཏཱནནྟི གཎནུདྡེསཝིབྷཱགམཏྟེན དསྶིཏཱནཾ. ཀསྨཱ པནེཏྠ པཊིཙྩསམུཔྤཱདོ དྭཱདསབྷཱཝེནེཝ གཧིཏོ, ནནུ ཏཏྠ བྷཝོ ཀམྨབྷཝཱདིབྷེདེན, སོཀཱདཡོ ཙ སརཱུཔཏོཡེཝ ཨིདྷ པཱལི༹ཡཾ གཧིཏཱཏི ཙོདནཾ སནྡྷཱཡཱཧ ‘‘ཏཏྠཱ’’ཏིཨཱདི. ཏཏྠ ཏཏྠཱཏི ཏསྨིཾ ‘‘པཉྩཝཱིསཱདྷིཀེན པདསཏེནཱ’’ཏི ཨེཝཾ ཝུཏྟེ ཨཊྛཀཐཱཝཙནེ. ཀམྨབྷཝསྶ བྷཱཝནབྷཱཝེན, ཨུཔཔཏྟིབྷཝསྶ བྷཝནབྷཱཝེན. པདཏྠཏོ པན ཀམྨབྷཝོ ¶ བྷཝཏི ཨེཏསྨཱཏི བྷཝོ, ཨིཏརོ བྷཝཏི, བྷཝནཾ ཝཱཏི. ཏནྣིདཱནདུཀྑབྷཱཝེནཱཏི ཛརཱམརཎནིདཱནདུཀྑབྷཱཝེན.

‘‘སབྦཱཔི དྷམྨསངྒཎཱི དྷཱཏུཀཐཱཡ མཱཏིཀཱ’’ཏི ཨིདམྤི དྷཱཏུཀཐཱཡ མཱཏིཀཱཀིཏྟནམེཝཱཏི ‘‘སབྦཱཔི…པེ… མཱཏིཀཱཏི ཨཡཾ དྷཱཏུཀཐཱམཱཏིཀཱཏོ བཧིདྡྷཱ ཝུཏྟཱ’’ཏི ཝཙནཾ ཨསམྦྷཱཝེནྟོ ‘‘ཨཐ ཝཱ’’ཏིཨཱདིམཱཧ ¶ . པཀརཎནྟརགཏཱ ཝུཏྟཱ དྷཱཏུཀཐཱཡ མཱཏིཀཱབྷཱཝེནཱཏི ཨཏྠོ. ཀཱམཉྩེཏྠ མཱཏིཀཱབྷཱཝེན ཝུཏྟཱ, པཀརཎནྟརགཏཏྟཱ པན ཨཉྙཏོ གཧེཏབྦརཱུཔཱ ཨིཏོ བཧིབྷཱུཏཱ ནཱམ ཧོནྟི, སརཱུཔཏོ གཧིཏཱཝ པཉྩཀྑནྡྷཱཏིཨཱདིཀཱ ཨབྦྷནྟརཱ. ཏེནཱཧ ‘‘སརཱུཔཏོ དསྶེཏྭཱ ཋཔིཏཏྟཱ’’ཏི. མཱཏིཀཱཡ ཨསངྒཧིཏཏྟཱཏི མཱཏིཀཱཡ སརཱུཔེན ཨསངྒཧིཏཏྟཱ, ན ཨཉྙཐཱ. ན ཧི མཱཏིཀཱཡ ཨསངྒཧིཏོ ཀོཙི པདཏྠོ ཨཏྠི. ཝིཀིཎྞབྷཱཝེནཱཏི ཁནྡྷཝིབྷངྒཱདཱིསུ ཝིསུཾ ཝིསུཾ ཀིཎྞབྷཱཝེན ཝིསཊབྷཱཝེན.

༣. ནཡམུཁམཱཏིཀཱཝཎྞནཱ

༣. ནཡཱནཾ སངྒཧཱདིཔྤཀཱརཝིསེསཱནཾ པཝཏྟི དེསནཱ, ཏསྶཱ ཝིནིགྒམཊྛཱནཏཱཡ དྭཱརཾ. ཡཐཱཝུཏྟདྷམྨཱ ཡཐཱརཧཾ ཁནྡྷཱཡཏནདྷཱཏུཡོ ཨརཱུཔིནོ ཙ ཁནྡྷཱཏི ཏེསཾ ཨུདྡེསོ ནཡམུཁམཱཏིཀཱ. ཏེནཱཧ ‘‘ནཡཱན’’ནྟིཨཱདི. ཝིཡུཛྫནསཱིལཱ, ཝིཡོགོ ཝཱ ཨེཏེསཾ ཨཏྠཱིཏི ཝིཡོགིནོ, ཏཐཱ སཧཡོགིནོ, སངྒཧཱསངྒཧདྷམྨཱ ཙ ཝིཡོགཱིསཧཡོགཱིདྷམྨཱ ཙ སངྒཧཱ…པེ… དྷམྨཱ, སངྒཎྷནཱསངྒཎྷནཝསེན ཝིཡུཛྫནསཾཡུཛྫནཝསེན ཙ པཝཏྟནཀསབྷཱཝཱཏི ཨཏྠོ. ཙུདྡསཔཱིཏིཨཱདིནཱ ཏམེཝཏྠཾ པཱཀཊཏརཾ ཀརོཏི. ཡེཧཱིཏི ཡེཧི ཁནྡྷཱདཱིཧི ཨརཱུཔཀྑནྡྷེཧི ཙ. ཏེ ཙཏྟཱརོཏི ཏེ སངྒཧཱདཡོ ཙཏྟཱརོ. སཙྩཱདཱིཧིཔཱིཏི སཙྩཨིནྡྲིཡཔཊིཙྩསམུཔྤཱདཱདཱིཧིཔི སཧ. ཡཐཱསམྦྷཝནྟི སམྦྷཝཱནུརཱུཔཾ, ཡཾ ཡཾ པདཾ སངྒཧིཏོ ཨསངྒཧིཏོཏི ཙ ཝཏྟུཾ ཡུཏྟཾ, ཏཾ ཏནྟི ཨཏྠོ.

སོ པནཱཏི སངྒཧཱསངྒཧོ. སངྒཱཧཀབྷཱུཏེཧཱིཏི སངྒཧཎཀིརིཡཱཡ ཀཏྟུབྷཱུཏེཧི. ཏེཧཱིཏི སཙྩཱདཱིཧི. ན སངྒཧབྷཱུཏེཧཱིཏི སངྒཧཎཀིརིཡཱཡ ཀརཎབྷཱུཏེཧི སཙྩཱདཱིཧི སངྒཧཱསངྒཧོ ན ཝུཏྟོ. ཏཏྠཱཔི ཧི ཁནྡྷཱཡཏནདྷཱཏུཡོ ཨེཝ ཀརཎབྷཱུཏཱཏི དསྶེཏི. ཁནྡྷཱདཱིཧེཝ སངྒཧེཧཱིཏི ཁནྡྷཱདཱིཧིཡེཝ སངྒཎྷནཀིརིཡཱཡ ཀརཎབྷཱུཏེཧི, ‘‘ཁནྡྷསངྒཧེན སངྒཧིཏཱ, ཨཱཡཏནསངྒཧེན ཨསངྒཧིཏཱ ¶ , དྷཱཏུསངྒཧེན ཨསངྒཧིཏཱ, ཏེ དྷམྨཱ ཙཏཱུཧི ཁནྡྷེཧི, དྭཱིཧཱཡཏནེཧི, ཨཊྛཧི དྷཱཏཱུཧི ཨསངྒཧིཏཱ’’ཏི སངྒཧཱསངྒཧོ ནིཡམེཏྭཱ ཝུཏྟོ. ཏསྨཱཏི ཡསྨཱ སཙྩཱདཱིནི སངྒཱཧཀབྷཱཝེན ཝུཏྟཱནི, ན སངྒཧབྷཱཝེན, ཁནྡྷཱདཱིནིཡེཝ ཙ སངྒཧབྷཱཝེན ཝུཏྟཱནི, ཏསྨཱ.

ཀསྨཱ ¶ པནེཏྠ སཙྩཱདཡོ སངྒཧཝསེན ན ཝུཏྟཱཏི? ཏཐཱདེསནཱཡ ཨསམྦྷཝཏོ. ན ཧི སཀྐཱ རཱུཔཀྑནྡྷཱདཱིནཾ སམུདཡསཙྩཱདཱིཧི, སཉྙཱདཱིནཾ ཝཱ ཨིནྡྲིཡཱདཱིཧི སངྒཧནཡེན པུཙྪིཏུཾ ཝིསྶཛྫིཏུཾ ཝཱཏི. ཏཐཱ ཨརིཡཕལཱདཱིསུ ཨུཔྤནྣཝེདནཱདཱིནཾ སཙྩཝིནིམུཏྟཏཱཡ ‘‘ཝེདནཱཀྑནྡྷོ ཀཏིཧི སཙྩེཧི སངྒཧིཏོ’’ཏི པུཙྪིཏྭཱཔི ‘‘ཨེཀེན སཙྩེན སངྒཧིཏོ’’ཏིཨཱདིནཱ ནིཡམེཏྭཱ སངྒཧཾ དསྶེཏུཾ ན སཀྐཱཏི. ཡཐཱསམྦྷཝནྟི ཡེཧི སམྤཡོགོ, ཡེཧི ཙ ཝིཔྤཡོགོ, ཏདནུརཱུཔཾ.

རཱུཔཾ རཱུཔེན ནིབྦཱནེན ཝཱ ཝིཔྤཡུཏྟཾ ན ཧོཏི, ནིབྦཱནཾ ཝཱ རཱུཔེན. ཀསྨཱ? སམྤཡུཏྟནྟི ཨནཱསངྐནཱིཡསབྷཱཝཏྟཱ. ཙཏུནྣཉྷི ཁནྡྷཱནཾ ཨཉྙམཉྙཾ སམྤཡོགཱིབྷཱཝཏོ ‘‘རཱུཔནིབྦཱནེཧིཔི སོ ཨཏྠི ནཏྠཱི’’ཏི སིཡཱ ཨཱསངྐཱ, ཏསྨཱ ཏེསཾ ཨིཏརེཧི, ཨིཏརེསཉྩ ཏེཧི ཝིཔྤཡོགོ ཝུཙྩཏི, ན པན རཱུཔསྶ རཱུཔེན, ནིབྦཱནེན ཝཱ, ནིབྦཱནསྶ ཝཱ རཱུཔེན ཀཏྠཙི སམྤཡོགོ ཨཏྠཱིཏི ཏདཱསངྐཱབྷཱཝཏོ ཝིཔྤཡོགོཔི རཱུཔསྶ རཱུཔནིབྦཱནེཧི, ནིབྦཱནསྶ ཝཱ ཏེན ན ཝུཙྩཏི, ཨརཱུཔཀྑནྡྷེཧིཡེཝ པན ཝུཙྩཏཱིཏི ཨཱཧ ‘‘ཙཏཱུཧེཝཱ’’ཏིཨཱདི. ཨནཱརམྨཎསྶ ཙཀྑཱཡཏནཱདིཀསྶ. ཨནཱརམྨཎཨནཱརམྨཎམིསྶཀེཧཱིཏི ཨནཱརམྨཎེན སོཏཱཡཏནཱདིནཱ ཨནཱརམྨཎམིསྶཀེན ཙ དྷམྨཱཡཏནཱདིནཱ. མིསྶཀསྶ དྷམྨཱཡཏནཱདིཀསྶ. ཨནཱརམྨཎཨནཱརམྨཎམིསྶཀེཧི ན ཧོཏཱིཏི ཡོཛེཏབྦཾ. ཡེསཾ པན ཡེཧི ཧོཏི, ཏཾ དསྶེཏུཾ ‘‘ཨནཱརམྨཎསྶ པནཱ’’ཏིཨཱདི ཝུཏྟཾ. ཡཐཱ ཧི སཱརམྨཎསྶ ཨནཱརམྨཎེན ཨནཱརམྨཎམིསྶཀེན ཙ ཝིཔྤཡོགོ ཧོཏི, ཨེཝཾ སཱརམྨཎེནཔི སོ ཧོཏིཡེཝ. ཏེན ཝིཡ ཨནཱརམྨཎསྶ ཨནཱརམྨཎམིསྶཀསྶ ཙཱཏི དཊྛབྦཾ.

༤. ལཀྑཎམཱཏིཀཱཝཎྞནཱ

༤. ཝིསུཾ ཡོཛནཱ ཀཱཏབྦཱཏི ཡོ ཏཱིཧི སངྒཧོ ཙཏཱུཧི ཙ སམྤཡོགོ ཝུཏྟོ, ཏཾ སབྷཱགོ བྷཱཝོ པཡོཛེཏི, ཡོ ཙ ཏཱིཧི ཨསངྒཧོ ཙཏཱུཧི ཙ ཝིཔྤཡོགོ ཝུཏྟོ, ཏཾ ཝིསབྷཱགོ བྷཱཝོཏི ཨིམམཏྠཾ དསྶེནྟོ ‘‘སངྒཧོ…པེ… ཝིཉྙཱཡཏཱི’’ཏི ཨཱཧ. ཡསྶ སངྒཧོ, སོ དྷམྨོ ཁནྡྷཱདིཀོ ¶ སབྷཱགོ. ཡསྶ ཨསངྒཧོ, སོ ཝིསབྷཱགོ. ཏཐཱ སམྤཡོགེསུཔི ཝེདིཏབྦཾ. ཨིདཱནི ཡཐཱཝུཏྟཾ སབྷཱགཏཾ སརཱུཔཏོ ནིདྡྷཱརེཏྭཱ དསྶེཏུཾ ‘‘ཏཏྠཱ’’ཏིཨཱདི ཝུཏྟཾ. ཏཏྠ ¶ སམཱནབྷཱཝོ སངྒཧེ སབྷཱགཏཱ, ཨེཀུཔྤཱདཱདིཀོ སམྤཡོགེཏི ཨིམིནཱ རུཔྤནཱདིཝིདྷུརོ ཨསམཱནསབྷཱཝོ ཨསངྒཧེ ཝིསབྷཱགཏཱ, ནཱནུཔྤཱདཱདིཀོ ཝིཔྤཡོགེཏི ཨཡམཏྠོ ཨཏྠསིདྡྷོཏི ན ཝུཏྟོཏི.

༥. བཱཧིརམཱཏིཀཱཝཎྞནཱ

༥. ཨེཏེན ཋཔནཱཀཱརེནཱཏི སརཱུཔེན ཨགྒཧེཏྭཱ ཡཐཱཝུཏྟེན པཀརཎནྟརམཱཏིཀཱཡ ཨིདྷ མཱཏིཀཱབྷཱཝཀིཏྟནསངྑཱཏེན ཋཔནཱཀཱརེན. པཀརཎནྟརཋཔིཏཱཡ མཱཏིཀཱཡ ཨཝིབྷཱགེན པཙྪཏོ གཧཎཾ བཧི ཋཔནནྟི ཨཱཧ ‘‘བཧི པིཊྛིཏོ ཋཔིཏཏྟཱ’’ཏི. ཨིདྷ ཨཊྛཔེཏྭཱཏི ཨིམིསྶཱ དྷཱཏུཀཐཱཡ སརཱུཔེན ཨཝཏྭཱ. ཏཐཱ པཀཱསིཏཏྟཱཏི མཱཏིཀཱབྷཱཝེན ཛོཏིཏཏྟཱ. དྷམྨསངྒཎཱིསཱིསེན ཧི དྷམྨསངྒཎིཡཾ ཨཱགཏམཱཏིཀཱཝ གཧིཏཱཏི. ཡེཧི ནཡེཧི དྷཱཏུཀཐཱཡ ནིདྡེསོ, ཏེསུ ནཡེསུ, ཏེཧི ཝིབྷཛིཏབྦེསུ ཁནྡྷཱདཱིསུ, ཏེསཾ ནཡཱནཾ པཝཏྟིདྭཱརལཀྑཎེསུ ཙ ཨུདྡིཊྛེསུ དྷཱཏུཀཐཱཡ ཨུདྡེསཝསེན ཝཏྟབྦཾ ཝུཏྟམེཝ ཧོཏཱིཏི ཡཾ ཨུདྡེསཝསེན ཝཏྟབྦཾ, ཏཾ ཝཏྭཱ པུན ཡཐཱཝུཏྟཱནཾ ཁནྡྷཱདཱིནཾ ཀུསལཱདིཝིབྷཱགདསྶནཏྠཾ ‘‘སབྦཱཔི དྷམྨསངྒཎཱི དྷཱཏུཀཐཱཡ མཱཏིཀཱ’’ཏི ཝུཏྟནྟི ཨེཝམེཏྠ མཱཏིཀཱཡ ནིཀྑེཔཝིདྷི ཝེདིཏབྦོ.

‘‘གཱཝཱིཏི ཨཡམཱཧཱ’’ཏི ཨེཏྠ གཱཝཱི-སདྡོ ཝིཡ ‘‘སངྒཧོ ཨསངྒཧོ’’ཏི ཨེཏྠ པདཏྠཝིཔལླཱསཀཱརིནཱ ཨིཏི-སདྡེན ཨཏྠཔདཏྠཀོ སངྒཧཱསངྒཧ-སདྡོ སདྡཔདཏྠཀོ ཛཱཡཏཱིཏི ཨདྷིཔྤཱཡེནཱཧ ‘‘ཨནིདྡྷཱརིཏཏྠསྶ སདྡསྶེཝ ཝུཏྟཏྟཱ’’ཏི. ཏེན ཨཏྠུདྡྷཱརཏོ སངྒཧསདྡཾ སཾཝཎྞེཏཱིཏི དསྶེཏི. ཨནིདྡྷཱརིཏཝིསེསོཏི ཨསངྒཧིཏཛཱཏིསཉྫཱཏིཨཱདིཝིསེསོ. སཱམཉྙེན གཧེཏབྦཏནྟི སངྒཧསདྡཱབྷིདྷེཡྻཏཱསཱམཉྙེན ཝིཉྙཱཡམཱནོ ཝུཙྩམཱནོ ཝཱ. ན ཙེཏྠ སཱམཉྙཉྩ ཨེཀརཱུཔམེཝཱཏི ཙོདནཱ ཀཱཏབྦཱ བྷེདཱཔེཀྑཏྟཱ ཏསྶ. ཡཏྟཀཱ ཧི ཏསྶ ཝིསེསཱ, ཏདཔེཀྑམེཝ ཏནྟི. ‘‘ཨཏྟནོ ཛཱཏིཡཱ’’ཏི ཝིཉྙཱཡཏི ཡཐཱ ‘‘མཏྟེཡྻཱ’’ཏི ཝུཏྟེ ཨཏྟནོ མཱཏུ ཧིཏཱཏི.

དྷམྨཝིསེསཾ ཨནིདྡྷཱརེཏྭཱཏི སངྒཧིཏཏཱདིནཱ པུཙྪིཏབྦཝིསྶཛྫེཏབྦདྷམྨཱནཾ ཝིསེསནཾ ཨཀཏྭཱ. སཱམཉྙེནཱཏི ཨཝིསེསེན. དྷམྨཱནནྟི ཁནྡྷཱདིདྷམྨཱནཾ. ཨཝསེསཱ ནིདྡྷཱརེཏྭཱཏི ‘‘སངྒཧིཏེན ¶ ཨསངྒཧིཏ’’ནྟིཨཱདིཀཱ ཨཝསེསཱ ¶ དྭཱདསཔི པུཙྪིཏབྦཝིསྶཛྫེཏབྦདྷམྨཝིསེསཾ ནིདྡྷཱརེཏྭཱ དྷམྨཱནཾ པུཙྪནཝིསྶཛྫནནཡཨུདྡེསཱཏི ཡོཛནཱ. ནནུ ཙ ‘‘སངྒཧིཏེན ཨསངྒཧིཏ’’ནྟིཨཱདཡོཔི ཡཐཱཝུཏྟཝིསེསཾ ཨནིདྡྷཱརེཏྭཱ སཱམཉྙེན དྷམྨཱནཾ པུཙྪནཝིསྶཛྫནནཡུདྡེསཱཏི ཙོདནཾ སནྡྷཱཡཱཧ ‘‘སངྒཧིཏེན ཨསངྒཧིཏ’’ནྟིཨཱདི. ཡསྶ ཨཏྠོ ཉཱཡཏི, སདྡོ ཙ ན པཡུཛྫཏི, སོ ལོཔོཏི ཝེདིཏབྦོ, ཨཱཝུཏྟིཨཱདིཝསེན ཝཱ ཨཡམཏྠོ དཱིཔེཏབྦོ. ཏེནཱཏི ལུཏྟནིདྡིཊྛེན ཨསངྒཧིཏ-སདྡེན. སངྒཧིཏཝིསེསཝིསིཊྛོཏི ཙཀྑཱཡཏནེན ཁནྡྷསངྒཧེན སངྒཧིཏཏཱཝིསེསཝིསིཊྛོ, ཏེན སོཏཱཡཏནཱདིབྷཱཝེན ཨསངྒཧིཏོ སོཏཔསཱདཱདིཀོ ཡོ རུཔྤནསབྷཱཝོ དྷམྨཝིསེསོ. ཏནྣིསྶིཏོ ཏཾ དྷམྨཝིསེསཾ ནིསྶཱཡ ལབྦྷམཱནོ. ‘‘ཏེ དྷམྨཱ ཀཏིཧི ཁནྡྷེཧི…པེ… ཙཏཱུཧི ཁནྡྷེཧི ཨསངྒཧིཏཱ’’ཏིཨཱདིནཱ ཨསངྒཧིཏཏཱསངྑཱཏོ པུཙྪཱཝིསྶཛྫནནཡོ པརཏོ པུཙྪིཏྭཱ ཝིསྶཛྫིཡམཱནོ ཨིདྷ ཨུདྡིཊྛོ ཧོཏི. ཝིསེསནེ ཀརཎཝཙནནྟི ཨིམིནཱ ཏསྶ དྷམྨསྶ ཡཐཱཝུཏྟསངྒཧིཏཏཱཝིསེསཝིསིཊྛཏཾཡེཝ ཝིབྷཱཝེཏི. ཨེཝམེཏེ པུཙྪིཏབྦཝིསྶཛྫེཏབྦདྷམྨཝིསེསཾ ནིདྡྷཱརེཏྭཱ པུཙྪནཝིསྶཛྫནནཡུདྡེསཱ པཝཏྟཱཏི ཝེདིཏབྦཱ.

ནནུ ཙ ‘‘སངྒཧིཏེན ཨསངྒཧིཏ’’ནྟི ཨེཏྟཱཝཏཱཔི ཨཡམཏྠོ ལབྦྷཏཱིཏི? ན ལབྦྷཏི ཏསྶ དྷམྨམཏྟདཱིཔནཏོ. ནཡུདྡེསོ ཧེསོ, ན དྷམྨུདྡེསོ. ཏཐཱ ཧི པཱལི༹ཡཾ སངྒཧིཏེནཨསངྒཧིཏཔདནིདྡེསེ ‘‘ཙཀྑཱཡཏནེན ཡེ དྷམྨཱ ཁནྡྷསངྒཧེན སངྒཧིཏཱ, ཨཱཡཏན…པེ… དྷཱཏུསངྒཧེན ཨསངྒཧིཏཱ’’ཏི ཝཏྭཱ ‘‘ཏེ དྷམྨཱ ཀཏིཧི ཁནྡྷེཧི…པེ… ཨསངྒཧིཏཱ’’ཏི (དྷཱཏུ. ༡༧༡) པུཙྪིཏྭཱ ‘‘ཏེ དྷམྨཱ ཙཏཱུཧི ཁནྡྷེཧི དྭཱིཧཱཡཏནེཧི ཨཊྛཧི དྷཱཏཱུཧི ཨསངྒཧིཏཱ’’ཏི དུཏིཡཾ ཨསངྒཧིཏཔདཾ གཧིཏཾ. ཨཉྙཐཱ ‘‘ཙཀྑཱཡཏནེན ཡེ དྷམྨཱ ཁནྡྷསངྒཧེན སངྒཧིཏཱ, ཏེ དྷམྨཱ ཨཱཡཏནསངྒཧེན ཨསངྒཧིཏཱ, དྷཱཏུསངྒཧེན ཨསངྒཧིཏཱ. ཏེ ཀཏམེ’’ཨིཙྩེཝ ནིདྡིསིཏབྦཾ སིཡཱ.

ཨེས ནཡོཏི ཨཏིདེསེན དསྶིཏམཏྠཾ པཱཀཊཏརཾ ཀཱཏུཾ ‘‘ཏེསུཔཱི’’ཏིཨཱདི ཝུཏྟཾ. ཏཏིཡཔདེནཱཏི ལུཏྟནིདྡེསེན གཧེཏབྦནྟི ཝུཏྟཔདཾ སནྡྷཱཡཱཧ. ཀཏྟུཨཏྠེ ཀརཎནིདྡེསོ སངྒཧིཏཱསངྒཧིཏེཧི ཏེཧི དྷམྨེཧི དྷམྨཱནཾ སངྒཧིཏཏཱསངྒཧིཏཏཱཡ ཝུཏྟཏྟཱ. ཏཐཱ ¶ ཧི ཏཏྠ པཱལི༹ཡཾ ‘‘ཏེཧི དྷམྨེཧི ཡེ དྷམྨཱ’’ཏི དྷམྨམུཁེནེཝ སངྒཧིཏཏཱསངྒཧིཏཏཱ ཝུཏྟཱ. དུཏིཡཏཏིཡེསུ པན སངྒཧིཏཏཱསངྒཧིཏཏཱསངྑཱཏཝིསེསནདྭཱརེན དྷམྨཱནཾ ཨསངྒཧིཏཏཱསངྒཧིཏཏཱ ཝུཏྟཱཏི ཏཏྠ ‘‘ཝིསེསནེ ཀརཎཝཙན’’ནྟི ཝུཏྟཾ. ཏེནཱཧ ‘‘ཏཏྠ ཧི…པེ… དྷམྨནྟརསྶཱ’’ཏི. ཏཏྠ སབྷཱཝནྟརེནཱཏི སངྒཧིཏཏཱསངྒཧིཏཏཱསངྑཱཏེན ¶ སབྷཱཝནྟརེན པཀཱརནྟརེན. སབྷཱཝནྟརསྶཱཏི ཨསངྒཧིཏཏཱསངྒཧིཏཏཱསངྑཱཏསྶ སབྷཱཝནྟརསྶ. ཨེཏེསཱུཏི ཙཏུཏྠཔཉྩམེསུ. དྷམྨནྟརེནཱཏི ཨཉྙདྷམྨེན. དྷམྨནྟརསྶཱཏི ཏཏོ ཨཉྙསྶ དྷམྨསྶ ཝིསེསནཾ ཀཏཾ. ཏཏྠ ཧི ཨནྟརེན པཀཱརཝིསེསཱམསནཾ དྷམྨེནེཝ དྷམྨོ ཝིསེསིཏོཏི. ཨཱདིཔདེནེཝཱཏི ‘‘སངྒཧིཏེནཱ’’ཏིཨཱདིནཱ ཝུཏྟེན པཋམཔདེནེཝ. ཨིཏརེཧཱིཏི ‘‘སམྤཡུཏྟཾ ཝིཔྤཡུཏྟ’’ནྟིཨཱདིནཱ ཝུཏྟེཧི དུཏིཡཏཏིཡཔདེཧི. ཨེཏྠཱཏི ཨེཀཱདསམཱདཱིསུ ཙཏཱུསུ. དུཏིཡཏཏིཡེསུ ཝིཡ ཝིསེསནེ ཨེཝ ཀརཎཝཙནཾ དཊྛབྦཾ, ན ཙཏུཏྠཔཉྩམེསུ ཝིཡ ཀཏྟུཨཏྠེཏི ཨདྷིཔྤཱཡོ. པུཙྪཱཝིསྶཛྫནཱནནྟིཨཱདིནཱ ཏམེཝཏྠཾ ཝིབྷཱཝེཏི.

ཝིཝིདྷཀཔྤནཏོཏི ཝིཝིདྷཾ བཧུདྷཱ ཀཔྤནཏོ, སངྒཧཱསངྒཧཱནཾ ཝིསུཾ སཧ ཙ ཝིསེསནཝིསེསིཏབྦབྷཱཝཀཔྤནཏོཏི ཨཏྠོ. ཏཾ པན ཝིཀཔྤནཾ ཝུཏྟཱཀཱརེན ཝིབྷཛནཾ ཧོཏཱིཏི ཨཱཧ ‘‘ཝིབྷཱགཏོཏི ཨཏྠོ’’ཏི. སནྣིཊྛཱནལཀྑཎེན ཨདྷིམོཀྑེན སམྤཡུཏྟདྷམྨཱ ཨཱརམྨཎེ ནིཙྪཡནཱཀཱརེན པཝཏྟིཡཱ སནྣིཊྛཱནཝསེན ཝུཏྟདྷམྨཱ. ཏེ ཙ ཏེཧི སདྡྷིཾ ཏདཝསིཊྛེ དྭིཔཉྩཝིཉྙཱཎཝིཙིཀིཙྪཱསཧགཏདྷམྨེ ཙ སངྒཧེཏྭཱ ཨཱཧ ‘‘སནྣིཊྛཱནཝསེན ཝུཏྟཱ ཙ སབྦེ ཙ ཙིཏྟུཔྤཱདཱ སནྣིཊྛཱནཝསེན ཝུཏྟསབྦཙིཏྟུཔྤཱདཱ’’ཏི. ཨིཏརེཏི ཕསྶཱདཡོ. སབྦེསནྟི ཨེཀཱུནནཝུཏིཡཱ ཙིཏྟུཔྤཱདཱནཾ. པརིགྒཧེཏབྦཱཏི སངྒཧཱདིཝསེན པརིགྒཎྷིཏབྦཱ. མཧཱཝིསཡེན ཨདྷིམོཀྑེན. ཨཉྙེསནྟི ཝིཏཀྐཱདཱིནཾ. ཝཙནཾ སནྡྷཱཡཱཏི ‘‘ཨདྷིམུཙྩནཾ ཨདྷིམོཀྑོ, སོ སནྣིཊྛཱནལཀྑཎོ’’ཏི དྷམྨསངྒཧཝཎྞནཱཡཾ (དྷ. ས. ཨཊྛ. ཡེཝཱཔནཀཝཎྞནཱ) ‘‘ཏཎྷཱཔཙྩཡཱ ཨདྷིམོཀྑོ, ཨདྷིམོཀྑཔཙྩཡཱ བྷཝོ’’ཏི པཊིཙྩསམུཔྤཱདཝིབྷངྒེ ཙ ཨཱགཏཾ ཝཙནཾ སནྡྷཱཡ. ཨཏྠེ སཏཱིཏི ‘‘སནྣིཊྛཱན…པེ… སཱདྷཱརཎཏོ’’ཏི ཨེཝམཏྠེ ཝུཙྩམཱནེ. ཝཏྟབྦེསཱུཏི སངྒཧཱདིཔརིགྒཧཏྠཾ ཝཏྟབྦེསུ. ཝུཏྟཱ ཕསྶཱདཡོ མནསིཀཱརཔརིཡོསཱནཱ. ཏཱདིསསྶཱཏི ¶ ཕསྶཱདིསདིསསྶ སཱདྷཱརཎསྶ ཨདྷིམོཀྑསདིསསྶ ཨསཱདྷཱརཎསྶ ཨཉྙསྶ དྷམྨསྶ ཨབྷཱཝཱ.

ནནུ ཛཱིཝིཏིནྡྲིཡཙིཏྟཊྛིཏིཡོཔི སཱདྷཱརཎཱཏི? སཙྩཾ སཱདྷཱརཎཱ, ཨཏྠི པན ཝིསེསོཏི དསྶེནྟོ ཨཱཧ ‘‘ཛཱིཝིཏིནྡྲིཡཾ པནཱ’’ཏིཨཱདི. ཨསམཱདྷིསབྷཱཝཱ བལབྷཱཝཾ ཨཔྤཏྟཱ སཱམཉྙསདྡེནེཝ ཝཏྟབྦཱཏི ཡོཛནཱ. སཱམཉྙཝིསེསསདྡེཧི ཙཱཏི སཱམཉྙཝིསེསསདྡེཧི ཝཏྟབྦཱ ཙ སམཱདྷིསབྷཱཝཱ ཙིཏྟེཀགྒཏཱ. ཝིསེསསདྡཝཙནཱིཡཾ ཨཉྙནྟི བལཔྤཏྟསམཱདྷིཏོ ཨཉྙཾ སཱམཉྙསདྡེན བྱཱཔེཏབྦཾ, ཝིསེསསདྡེན ཙ ནིཝཏྟེཏབྦཾ ནཏྠི སམཱདྷིསབྷཱཝཱཡ ཨེཝ ཙིཏྟེཀགྒཏཱཡ གཧིཏཏྟཱ. ན ཨཉྙབྱཱཔཀནིཝཏྟཀོ སཱམཉྙཝིསེསོ ཨནཉྙ…པེ… ཝིསེསོ ¶ , ཏསྶ དཱིཔནཏོ. ཏསྶེཝ དྷམྨསྶཱཏི ཏསྶེཝ བལཔྤཏྟསམཱདྷིདྷམྨསྶ. བྷེདདཱིཔཀེཧཱིཏི ཝིསེསདཱིཔཀེཧི སམཱདྷིབལཱདིཝཙནེཧི ཝཏྟབྦཱ. ཝུཏྟལཀྑཎཱ ཨནཉྙབྱཱཔཀནིཝཏྟཀསཱམཉྙཝིསེསདཱིཔནཱ སདྡཱ. ཏཏོ ཝིཔརཱིཏེཧི ཨཉྙཾ བྱཱཔེཏབྦཾ ནིཝཏྟེཏབྦཉྩ གཧེཏྭཱ པཝཏྟེཧི སཱམཉྙཝིསེསསདྡེཧེཝ ན སུཁཱདིསབྷཱཝཱ ཝེདནཱ ཝིཡ ཝཏྟབྦཱ. ཏསྨཱཏི ཡསྨཱ ཨསམཱདྷིསབྷཱཝཱ སམཱདྷིསབྷཱཝཱཏི དྭེདྷཱ བྷིནྡིཏྭཱ གཧིཏཱ ཙིཏྟེཀགྒཏཱ, ཏསྨཱ. ཨསམཱདྷིསབྷཱཝམེཝ པཀཱསེཡྻ ཝིསེསསདྡནིརཔེཀྑཾ པཝཏྟམཱནཏྟཱ. ཨིཏརོཏི སམཱདྷིབལཱདིཀོ ཝིསེསསདྡོ. ཨིདྷཱཏི ཨིམསྨིཾ ཨབྦྷནྟརམཱཏིཀུདྡེསེ, སཱདྷཱརཎེ ཕསྶཱདིཀེ, མཧཱཝིསཡེ ཝཱ ཨདྷིམོཀྑེ ཨུདྡིསིཡམཱནེ. ནནུ ཙ ཨབྷིནྡིཏྭཱ གཡ྄ཧམཱནཱ ཙིཏྟེཀགྒཏཱ ཝེདནཱ ཝིཡ སཱདྷཱརཎཱ ཧོཏཱིཏི ཙོདནཾ སནྡྷཱཡཱཧ ‘‘ཨབྷིནྣཱཔི ཝཱ’’ཏིཨཱདི. ‘‘ཙིཏྟསྶ ཋིཏི ཙིཏྟེཀགྒཏཱ ཨཝིསཱཧཊམཱནསཏཱ (དྷ. ས. ༡༡, ༡༥). ཨརཱུཔཱིནཾ དྷམྨཱནཾ ཨཱཡུ ཋིཏཱི’’ཏི (དྷ. ས. ༡༩) ཝཙནཏོ སམཱདྷིཛཱིཝིཏིནྡྲིཡཱནཾ ཨཉྙདྷམྨནིསྶཡེན ཝཏྟབྦཏཱ ཝེདིཏབྦཱ. ན ཨརཧཏཱིཏི ཨིདྷ ཨུདྡེསཾ ན ཨརཧཏི སམུཁེནེཝ ཝཏྟབྦེསུ ཕསྶཱདཱིསུ ཨུདྡིསིཡམཱནེསཱུཏི ཨཏྠོ.

མཱཏིཀཱཝཎྞནཱ ནིཊྛིཏཱ.

༢. ནིདྡེསཝཎྞནཱ

༡. པཋམནཡོ སངྒཧཱསངྒཧཔདཝཎྞནཱ

༡. ཁནྡྷཔདཝཎྞནཱ

༦. ‘‘ཨབྷིཉྙེཡྻདྷམྨབྷཱཝེན ¶ ¶ ཝུཏྟཱ ཙཏྟཱརོ ཁནྡྷཱ ཧོནྟཱི’’ཏིཨཱདིནཱ, ‘‘རཱུཔཀྑནྡྷོ ཨབྷིཉྙེཡྻོ’’ཏིཨཱདིནཱ ཙ ཨབྷིཉྙཱཏལཀྑཎཝིསཡཱཏི ཨཱཧ ‘‘སབྷཱཝཏོ ཨབྷིཉྙཱཏཱན’’ནྟི. པརིཉྙེཡྻཏཱདཱིཏི ཨཱདི-སདྡེན པཧཱཏབྦསཙྪིཀཱཏབྦབྷཱཝེཏབྦཏཱ སངྒཡ྄ཧཏི. ཨདྷིཔཏིཡཱདཱིཏི ཨདྷིཔཏིཔཙྩཡབྷཱཝཨུཔཊྛཱནཔདཧནཱདཱིནི. སཙྩཱདིཝིསེསོ ཝིཡཱཏི དུཀྑསཙྩཱདིཔརིཡཱཡོ ཨབྷིཉྙེཡྻཔཱིལ༹ནཊྛཱདིཝིསེསོ ཝིཡ. ཨེཝཉྩ ཀཏྭཱཏི ནཡམུཁམཱཏིཀཱཡ ཨབྷིཉྙེཡྻནིསྶཡེན ཝུཙྩམཱནཏྟཱ ཨེཝ. ཏེསཾ རཱུཔདྷམྨཱནཾ པཉྩནྣཾ ཁནྡྷཱནཾ ཁནྡྷབྷཱཝེན ཝིཡ རཱུཔཀྑནྡྷབྷཱཝེན སབྷཱགཏཱ ཧོཏི, ན ཝེདནཱཀྑནྡྷཱདིབྷཱཝེནཱཏི སངྒཧལཀྑཎམཱཧ. ཨིཏཱིཏི ཏསྨཱ, ཡསྨཱ རཱུཔདྷམྨཱ ཨཉྙམཉྙཾ རཱུཔཀྑནྡྷབྷཱཝེན སབྷཱགཱ, ཏསྨཱཏི ཨཏྠོ. རཱུཔཀྑནྡྷབྷཱཝསངྑཱཏེན རཱུཔཀྑནྡྷབྷཱཝེན ཨཏྠམུཁེནེཝ གཧཎེ. སདྡདྭཱརེན པན གཧཎེ རཱུཔཀྑནྡྷཝཙནསངྑཱཏེན ཝཱ རཱུཔཀྑནྡྷཝཙནཝཙནཱིཡཏཱསངྑཱཏེན. ཨིདཱནི ཏམེཝཏྠཾ པཱཀཊཏརཾ ཀཱཏུཾ ‘‘རཱུཔཀྑནྡྷོཏི ཧཱི’’ཏིཨཱདི ཝུཏྟཾ.

པུརིམེནཱཏི རཱུཔཀྑནྡྷེན. སཉྙཱཀྑནྡྷམཱུལཀཱཏིཨཱདཱིསུ ‘‘པུརིམེན ཡོཛིཡམཱནེ’’ཏིཨཱདིཾ ཨཱནེཏྭཱ ཡཐཱརཧཾ ཡོཛེཏབྦཾ. ཨབྷེདཏོ པཉྩཀཔུཙྪཱཝིསྶཛྫནཾ ཁནྡྷཔདནིདྡེསེ སབྦཔཙྪིམམེཝཱཏི ཨཱཧ ‘‘བྷེདཏོ པཉྩཀཔུཙྪཱཝིསྶཛྫནཱནནྟར’’ནྟི.

ཨཱཡཏནཔདཱདིཝཎྞནཱ

༤༠. ཡདིཔི ¶ ཨེཀཀེཔི སདིསཾ ཝིསྶཛྫནཾ ཝིསྶཛྫནཾ སམུདཡམགྒསཙྩཱནཾ ‘‘སམུདཡསཙྩཾ ཨེཀེན ཁནྡྷེན…པེ… མགྒསཙྩཾ ཨེཀེན ཁནྡྷེན ཨེཀེནཱཡཏནེན ཨེཀཱཡ དྷཱཏུཡཱ སངྒཧིཏཾ, ཙཏཱུཧི ཁནྡྷེཧི ཨེཀཱདསཧི ཨཱཡཏནེཧི སཏྟརསཧི དྷཱཏཱུཧི ཨསངྒཧིཏ’’ནྟི (དྷཱཏུ. ༤༡) ནིདྡིཊྛཏྟཱ. ཨེཏྠཱཏི ཨེཏསྨིཾ ཨིནྡྲིཡཔདནིདྡེསེ ¶ . ཙཀྑུསོཏཙཀྑུསུཁིནྡྲིཡདུཀཱནནྟི ཙཀྑུསོཏདུཀཾ ཙཀྑུསུཁིནྡྲིཡདུཀནྟི ཨེཏེསཾ དུཀཱནཾ. ཙཀྑུསོཏསུཁིནྡྲིཡཱནཉྷི ‘‘ཨེཀེན ཁནྡྷེན ཨེཀེནཱཡཏནེན ཨེཀཱཡ དྷཱཏུཡཱ སངྒཧིཏཾ, ཙཏཱུཧི ཁནྡྷེཧི ཨེཀཱདསཧི ཨཱཡཏནེཧི སཏྟརསཧི དྷཱཏཱུཧི ཨསངྒཧིཏ’’ནྟི ཨེཀཀེ སདིསཾ ཝིསྶཛྫནཾ. ཙཀྑུསོཏིནྡྲིཡདུཀསྶ པན ‘‘ཙཀྑུནྡྲིཡཉྩ སོཏིནྡྲིཡཉྩ ཨེཀེན ཁནྡྷེན དྭཱིཧཱཡཏནེཧི དྭཱིཧི དྷཱཏཱུཧི སངྒཧིཏཱ, ཙཏཱུཧི ཁནྡྷེཧི དསཧཱཡཏནེཧི སོལ༹སཧི དྷཱཏཱུཧི ཨསངྒཧིཏཱ’’ཏི, ‘‘ཙཀྑུནྡྲིཡཉྩ སུཁིནྡྲིཡཉྩ དྭཱིཧི ཁནྡྷེཧི དྭཱིཧཱཡཏནེཧི དྭཱིཧི དྷཱཏཱུཧི སངྒཧིཏཱ, ཏཱིཧི ཁནྡྷེཧི དསཧཱཡཏནེཧི སོལ༹སཧི དྷཱཏཱུཧི ཨསངྒཧིཏཱ’’ཏི ཙཀྑུསུཁིནྡྲིཡདུཀསྶ ཙ ཨསདིསཾ ཝིསྶཛྫནཾ. ནཱཔི དུཀེཧི ཏིཀསྶཱཏི ཙཀྑུསོཏཙཀྑུསུཁིནྡྲིཡཱདིདུཀེཧི ཙཀྑུསོཏསུཁིནྡྲིཡཱདིཏིཀསྶ ནཱཔི སདིསཾ ཝིསྶཛྫནཾ. ཨིདྷཱཏི སཙྩཔདནིདྡེསེ. ཏིཀེན ཙཱཏི དུཀྑསམུདཡམགྒཱདིཏིཀེན ཙ. ‘‘པཉྩཧི ཁནྡྷེཧི དྭཱདསཧཱཡཏནེཧི ཨཊྛཱརསཧི དྷཱཏཱུཧི སངྒཧིཏཱ, ན ཀེཧིཙི ཁནྡྷེཧི ན ཀེཧིཙི ཨཱཡཏནེཧི ན ཀཱཧིཙི དྷཱཏཱུཧི ཨསངྒཧིཏཱ’’ཏི སདིསཾ ཝིསྶཛྫནཾ.

༦. པཊིཙྩསམུཔྤཱདཝཎྞནཱ

༦༡. ཨཝིཛྫཱཝཙནེནཱཏི ‘‘ཨཝིཛྫཱཔཙྩཡཱ སངྑཱརཱ’’ཏི ཨེཏྠ ཨཝིཛྫཱགྒཧཎེན. ཝིསེསནཾ ན ཀཏྟབྦཾ, ‘‘སབྦམྤི ཝིཉྙཱཎ’’ནྟི ཝཏྟབྦནྟི ཨདྷིཔྤཱཡོ. ཏཏྠ ཀཱརཎམཱཧ ‘‘ཀུསལཱདཱིནམྤཱི’’ཏིཨཱདིནཱ. ཝིསྶཛྫནཱསདིསེན སབྦཝིཉྙཱཎཱདིསངྒཧཎཏོ. ཏེསནྟི ཝིཉྙཱཎཱདིཔདཱནཾ. ཨིདྷཱཏི ཨིམསྨིཾ པཋམནཡེ. ཨཀམྨཛཱནམྤི སངྒཧིཏཏཱ ཝིཉྙཱཡཏི སདྡཱཡཏནསྶཔི གཧིཏཏྟཱ.

༧༡. ཛཱཡམཱན…པེ… མཱནཱནནྟི ཛཱཡམཱནཱདིཨཝཏྠཱནཾ དྷམྨཱནཾ. ཛཱཡམཱནཱདིབྷཱཝམཏྟཏྟཱཏི ནིབྦཏྟནཱདིཨཝཏྠཱམཏྟབྷཱཝཏོ. ཝིནིབྦྷུཛྫིཏྭཱཏི ཨཝཏྠཱབྷཱཝཏོ ཝིནིབྦྷོགཾ ཀཏྭཱ. པརམཏྠཏོ ཨཝིཛྫམཱནཱནི, སབྷཱཝམཏྟབྷཱུཏཱནཱིཏི པརམཏྠདྷམྨཱནཾ ཨཝཏྠཱབྷཱཝམཏྟབྷཱུཏཱནི ¶ . ཨཔརམཏྠསབྷཱཝཱནིཔི རཱུཔདྷམྨསྶ ནིབྦཏྟིཨཱདིབྷཱཝཏོ རུཔྤནབྷཱཝེན གཡ྄ཧནྟི. ཏཏོ ‘‘རཱུཔཀྑནྡྷསྶ སབྷཱགཱནི, ཨརཱུཔཱནཾ པན ཛཱཏིཛརཱམརཎཱནཱི’’ཏི ཨཱནེཏྭཱ ཡོཛནཱ. ཨེཀེཀབྷཱུཏཱནཱིཏི ཡཐཱ ཨེཀསྨིཾ རཱུཔཀལཱཔེ ཛཱཏིཨཱདཱིནི ཨེཀེཀཱནིཡེཝ ཧོནྟི, ཨེཝཾ ཨེཀསྨིཾ ཨརཱུཔཀལཱཔེཔཱིཏི ཝུཏྟཾ. ཏེནཱཧ ¶ ‘‘རཱུཔཀལཱཔཛཱཏིཨཱདཱིནི ཝིཡཱ’’ཏིཨཱདི. ཨནུབྷཝནསཉྫཱནནཝིཛཱནནཀིཙྩཱནཾ ཝེདནཱདཱིནཾ ནིབྦཏྟིཨཱདིབྷཱུཏཱནིཔི ཛཱཏིཨཱདཱིནི ཏཐཱ ན གཡ྄ཧནྟཱིཏི ཨཱཧ ‘‘ཝེདིཡན…པེ… ཨགཡ྄ཧམཱནཱནཱི’’ཏི. ཏེན ཝེདནཱཀྑནྡྷཱདཱིཧི ཛཱཏིཨཱདཱིནཾ སངྒཧཱབྷཱཝམཱཧ. ‘‘ཛཱཏི, བྷིཀྑཝེ, ཨནིཙྩཱ སངྑཏཱ’’ཏིཨཱདིཝཙནཏོ ཛཱཏིཨཱདཱིནམྤི སངྑཏཔརིཡཱཡོ ཨཏྠཱིཏི སངྑཏཱབྷིསངྑརཎཀིཙྩེན སངྑཱརཀྑནྡྷེན ཏེསཾ སངྒཧོཏི ཝུཏྟཾ ‘‘སངྑཏཱ…པེ… སབྷཱགཱནཱི’’ཏི. ཏེནེཝ ཙ སངྑཱརཀྑནྡྷསྶ ཨནེཀནྟཔརམཏྠཀིཙྩཏཱ ཝེདིཏབྦཱ. ཏཐཱ དུཝིདྷཱནཱིཏི ཝུཏྟཔྤཀཱརེན རཱུཔཱརཱུཔདྷམྨཱནཾ ནིབྦཏྟིཨཱདིབྷཱཝེན དྭིཔྤཀཱརཱནི. ཏེནཱཏི ཡཐཱཝུཏྟསབྷཱགཏྠེན. ཏེཧི ཁནྡྷཱདཱིཧཱིཏི རཱུཔཀྑནྡྷསངྑཱརཀྑནྡྷདྷམྨཱཡཏནདྷམྨདྷཱཏཱུཧི.

པཋམནཡསངྒཧཱསངྒཧཔདཝཎྞནཱ ནིཊྛིཏཱ.

༢. དུཏིཡནཡོ སངྒཧིཏེནཨསངྒཧིཏཔདཝཎྞནཱ

༡༧༡. ‘‘སངྒཧིཏེན ཨསངྒཧིཏ’’ནྟི ཨེཏྠ སངྒཧིཏཱསངྒཧིཏསདྡཱ བྷིནྣཱདྷིཀརཎཱ ན གཧེཏབྦཱ ཝིསེསནཝིསེསིཏབྦཏཱཡ ཨིཙྪིཏཏྟཱ. ཡོ ཧི དྷམྨོ སངྒཧིཏཏཱཝིསེསཝིསིཊྛོ ཨསངྒཧིཏོ ཧེཊྛཱ ཨུདྡིཊྛོ, སྭེཝ ཨིདྷ ཨསངྒཧིཏབྷཱཝེན པུཙྪིཏྭཱ ཝིསྶཛྫཱིཡཏཱིཏི དསྶེནྟོ ‘‘ཡཾ ཏཾ…པེ… ཏདེཝ དསྶེནྟོ’’ཏི ཨཱཧ. ཡེ ཧི དྷམྨཱ ཙཀྑཱཡཏནེན ཁནྡྷསངྒཧེན སངྒཧིཏཱ, ཨཱཡཏནདྷཱཏུསངྒཧེན ཙ ཨསངྒཧིཏཱ, ཏེསཾཡེཝ པུན ཁནྡྷཱདཱིཧི ཨསངྒཧོ པུཙྪིཏྭཱ ཝིསྶཛྫིཏོ. ཏེན ཝུཏྟཾ ‘‘ཙཀྑཱཡཏནེན…པེ… ཨཱཧཱ’’ཏི. སབྦཏྠཱཏི སབྦེསུ ནཡེསུ ཝཱརེསུ ཙ. ཁནྡྷཱདིསངྒཧསཱམཉྙཱནནྟི ‘‘ཁནྡྷསངྒཧེནཱ’’ཏིཨཱདིནཱ ཨཝིསེསེན ཝུཏྟཱནཾ ཁནྡྷཱདིསངྒཧཱནཾ. ‘‘སཱམཉྙཛོཏནཱ ཝིསེསེ ཨཝཏིཊྛཏཱི’’ཏི ཨཱཧ ‘‘ནིཙྩཾ ཝིསེསཱཔེཀྑཏྟཱ’’ཏི. ཝིསེསཱཝབོདྷནཏྠཱནི པཉྷབྱཱཀརཎཱནཱིཏི ཝུཏྟཾ ‘‘བྷེདནིསྶིཏཏྟཱ ཙ པུཙྪཱཝིསྶཛྫནཱན’’ནྟི. སཝིསེསཱཝ ཁནྡྷཱདིགཎནཱཏི ‘‘ཁནྡྷསངྒཧེནཱ’’ཏིཨཱདིནཱ ཨཝིསེསེན ཝུཏྟཱཔི ¶ རཱུཔཀྑནྡྷཱདིནཱ སཝིསེསཱཝ ཁནྡྷཱདིགཎནཱ, ཁནྡྷཱདིནཱ སངྒཧོཏི ཨཏྠོ. སུདྡྷཱཏི ཀེཝལཱ ཨནཝསེསཱ, སཱམཉྙབྷཱུཏཱཏི ཝུཏྟཾ ཧོཏི.

ཏཏྠཱཏི ཡཐཱདྷིཀཏེ དུཏིཡནཡེ. སཱམཉྙཛོཏནཱཡ ཝིསེསནིདྡིཊྛཏྟཱ ཨཱཧ ‘‘སངྒཧི…པེ… ནིདྡྷཱརིཏཏྟཱ’’ཏི. ཏཱིསུ སངྒཧེསཱུཏི ཁནྡྷཱདིསངྒཧེསུ ¶ ཏཱིསུ. ཨཉྙེཧཱིཏི ཝུཏྟཱཝསེསེཧི དྭཱིཧི ཨེཀེན ཝཱ. ཨེཏྟཀེནེཝ དསྶེཏབྦཱ སིཡུཾ ཏཱཝཏཱཔི སངྒཧིཏེན ཨསངྒཧིཏབྷཱཝསྶ པཀཱསིཏཏྟཱ. ཏེསནྟི སངྒཧིཏེནཨསངྒཧིཏབྷཱཝེན ཝུཏྟདྷམྨཱནཾ. ཨེཝཾཝིདྷཱནནྟི ‘‘ཙཀྑཱཡཏནཾ སོཏཱཡཏན’’ནྟིཨཱདིནཱ ཨནིདྡྷཱརིཏཝིསེསཱནཾ. ཨསམྦྷཝཱཏི ཝུཏྟཔྤཀཱརེན ནིདྡིསིཏུཾ ཨསམྦྷཝཱ. སངྒཧཱདིནཡདསྶནམཏྟཾ ནཡམཱཏིཀཱཡ བྱཱཔཱརོ, ཡཏྠ པན སངྒཧཱདཡོ, ཏེ ཁནྡྷཱདཡོ ཀུསལཱདཡོ ཙ ཏེསཾ ཝིསཡབྷཱུཏཱཏི ཏེཧི ཝིནཱ སངྒཧཱདཱིནཾ པཝཏྟི ནཏྠི. ཏེནཱཧ ‘‘ནཡམཱཏིཀཱཡ ཨབྦྷནྟརབཱཧིརམཱཏིཀཱཔེཀྑཏྟཱ’’ཏི. སངྒཱཧཀཾ ཨསངྒཱཧཀཉྩཱཏི ཝཏྟབྦཾ. ཡོ ཧི ཨིདྷ སངྒཱཧཀབྷཱཝེན ཝུཏྟོ དྷམྨོ ཨསངྒཱཧཀབྷཱཝེནཔི ཝུཏྟོཡེཝཱཏི.

‘‘ཡེ དྷམྨཱ ཁནྡྷསངྒཧེན སངྒཧིཏཱ, ཨཱཡཏནདྷཱཏུསངྒཧེན ཨསངྒཧིཏཱ’’ཏི, ‘‘ཡེ དྷམྨཱ ཁནྡྷསངྒཧེན ཨསངྒཧིཏཱ, ཨཱཡཏནདྷཱཏུསངྒཧེན སངྒཧིཏཱ’’ཏི ཙ ཡཏྠ པུཙྪིཏབྦཝིསྶཛྫིཏབྦདྷམྨཝིསེསནིདྡྷཱརཎཾ ནཏྠི, ཏཏྠ པཋམནཡེ ཚཊྛནཡེ ཙ ‘‘རཱུཔཀྑནྡྷོ ཀཏིཧི ཁནྡྷེཧི སངྒཧིཏོ? ཨེཀེན ཁནྡྷེནཱ’’ཏི (དྷཱཏུ. ༦), ‘‘རཱུཔཀྑནྡྷོ ཀཏིཧི ཁནྡྷེཧི སམྤཡུཏྟོཏི? ནཏྠི. ཙཏཱུཧི ཁནྡྷེཧི ཝིཔྤཡུཏྟོ’’ཏི (དྷཱཏུ. ༢༢༨) ཙ ཨེཝཾ པུཙྪིཏབྦཝིསྶཛྫིཏབྦབྷཱཝེན. ཨིཏརེསཱུཏི དུཏིཡཱདིནཡེསུ. ཏསྶ ཏསྶཱཏི ཡཾ པུཙྪིཏབྦཾ ཝིསྶཛྫིཏབྦཉྩ ‘‘ཡེ དྷམྨཱ’’ཏི ཨནིཡམིཏརཱུཔེན ནིདྡྷཱརིཏཾ, ཏསྶ ཏསྶ ‘‘ཏེ དྷམྨཱ’’ཏི ནིཡཱམཀབྷཱཝེན.

ཨེཏྠཱཏི ཨེཏསྨིཾ པཀརཎེ. ཡེན ཡེན ཙཀྑཱཡཏནཱདིནཱ སངྒཱཧཀེན. ཁནྡྷཱདིསངྒཧེསཱུཏི ཁནྡྷཱཡཏནདྷཱཏུསངྒཧེསུ. ཏེན ཏེནཱཏི ཁནྡྷཱདིསངྒཧེན. ཨཉྙནྟི ཏཏོ ཏཏོ སངྒཱཧཀཏོ ཨཉྙཾ. ཏབྦིནིམུཏྟཾ སངྒཧེཏབྦཱསངྒཧེཏབྦཾ ཡཾ དྷམྨཛཱཏཾ ཨཏྠི, ཏཾ ཏདེཝ ‘‘ཙཀྑཱཡཏནེན ཡེ དྷམྨཱ ཁནྡྷསངྒཧེན སངྒཧིཏཱ, ཨཱཡཏནདྷཱཏུསངྒཧེན ཨསངྒཧིཏཱ’’ཏི སངྒཱཧཀཱསངྒཱཧཀབྷཱཝེན ཨུདྡྷཊཾ. ཨཉྙོ དྷམྨོ ནཏྠི ཏསྶ སབྷཱགབྷཱཝེན སངྒཱཧཀསྶེཝ ཨབྷཱཝཏོ. སིཡཱ པནེཏཾ སབྷཱགེན ཨེཀདེསེན སངྒཧོཏི, ཏཾ པཊིཀྑིཔནྟོ ཨཱཧ ‘‘ན ཙ སོ…པེ… ཧོཏཱི’’ཏི. ཡཉྩཱཏིཨཱདིནཱ ཝཙནནྟརཾ པརིཧརཏི.

ཡདི ¶ ¶ ཙཱཏིཨཱདིནཱཔི ཏསྶེཝ ཏེན སངྒཧཱབྷཱཝཾ པཱཋཱབྷཱཝདསྶནེན ཝིབྷཱཝེཏི. ཏཏྠ སོ ཨེཝཱཏི ཡོ རཱུཔཱདིཀྑནྡྷོ སངྒཱཧཀབྷཱཝེན ཝུཏྟོ, སོ ཨེཝ ཏེན རཱུཔཱདིཀྑནྡྷེན སངྒཡ྄ཧེཡྻ སངྒཧེཏབྦོ བྷཝེཡྻ, ཏེནེཝ ཏསྶ སངྒཧཱབྷཱཝེ ལཀྑཎཾ དསྶེནྟོ ཨཱཧ ‘‘ན ཧི སོ ཨེཝ ཏསྶ སབྷཱགོ ཝིསབྷཱགོ ཙཱ’’ཏི. ཨེཀདེསཱ ཝིཡ ཙཀྑཱཡཏནཱདཡོ སམུདཱཡསྶ རཱུཔཀྑནྡྷཱདིཀསྶ. རཱུཔཀྑནྡྷོ ཙཀྑཱཡཏནཱདཱིནཾ ན སངྒཱཧཀོ ཨསངྒཱཧཀོ ཙ སབྷཱགཝིསབྷཱགབྷཱཝཱབྷཱཝཏོ. ཨེས ནཡོ སེསེསུཔི. སམུདཱཡནྟོགདྷཱནནྟིཨཱདིནཱ ཝུཏྟམེཝཏྠཾ པཱཀཊཏརཾ ཀརོཏི. ཏཏྠ ཡེནཱཏི ཝིབྷཱགེན. ཏེཏི ཨེཀདེསཱ. ཏེསནྟི ཨེཀདེསཱནཾ. ཨེཏྠ ཏདནྟོགདྷཏཱཡ ཝིབྷཱགཱབྷཱཝོ, ཝིབྷཱགཱབྷཱཝེན སབྷཱགཝིསབྷཱགཏཱབྷཱཝོ, ཏེན སངྒཱཧཀཱསངྒཱཧཀཏཱབྷཱཝོ དསྶིཏོཏི ཝེདིཏབྦོ.

ཡཐཱ སབྦེན སབྦཾ སབྷཱགཝིསབྷཱགཱབྷཱཝེན ཨེཀདེསཱནཾ སམུདཱཡོ སངྒཱཧཀོ ཨསངྒཱཧཀོ ཙ ན ཧོཏི, ཨེཝཾ ཨེཀདེསསབྷཱགཝིསབྷཱགཱནནྟི དསྶེནྟོ ‘‘ཏཐཱ’’ཏིཨཱདིམཱཧ. ཏཏྠ ཡཐཱཏིཨཱདི ཨུདཱཧརཎདསྶནེན ཡཐཱཝུཏྟསྶ ཨཏྠསྶ པཱཀཊཀརཎཾ. ཁནྡྷསངྒཧེན སངྒཱཧཀཾ ཨསངྒཱཧཀཉྩཱཏི ཡོཛནཱ. ཏཐཱ སེསེསུཔི. ན ཧི ཨེཀདེས…པེ… ཝིསབྷཱགཾ ཡེན སམུདཱཡོ སངྒཱཧཀོ ཨསངྒཱཧཀོ ཙ སིཡཱཏི ཨདྷིཔྤཱཡོ. ཨེཏྠ ཙ སངྒཱཧཀཏྟཾ ཏཱཝ མཱ ཧོཏུ, ཨསངྒཱཧཀཏྟཾ པན ཀསྨཱ པཊིཀྑིཔཱིཡཏཱིཏི ཙོདནཾ མནསི ཀཏྭཱ ཨཱཧ ‘‘ཏསྨཱ’’ཏིཨཱདི. ཏཏྠ ཏསྨཱཏི ཝུཏྟམེཝཏྠཾ ཧེཏུབྷཱཝེན པརཱམསཏི. ཨཏྟཏོ ཨཉྙསྶ, ཨཏྟནི ཨནྟོགདྷཏོ ཨཉྙསྶ, ཨཏྟེཀདེསསབྷཱགཏོ ཨཉྙསྶ སཏིཔི ཨསངྒཱཧཀཏྟེཏི ཡོཛནཱ. ཏཾ པནེཏཾ ‘‘རཱུཔཀྑནྡྷོ རཱུཔཀྑནྡྷེན སངྒཧིཏོ ཨསངྒཧིཏོ ཙ ན ཧོཏཱི’’ཏིཨཱདིནཱ ཝུཏྟེ ཏཡོ པཀཱརེ སནྡྷཱཡ ཝུཏྟཾ. སངྒཱཧཀཏྟམེཝ ཨེཏེསཾ ནཏྠཱིཏི ཨེཏེསཾ ཨཏྟཱ, ཨཏྟནི ཨནྟོགདྷོ, ཨཏྟེཀདེསསབྷཱགོ ཙཱཏི ཝུཏྟཱནཾ སངྒཱཧཀབྷཱཝོ ཨེཝ ནཏྠི སབྷཱགཱབྷཱཝཏོ. ཏེན ཝུཏྟཾ ‘‘ན ཧི སོ ཨེཝ ཏསྶ སབྷཱགོ’’ཏིཨཱདི. ཡེནཱཏི སངྒཱཧཀཏྟེན. ཨེཝརཱུཔཱནནྟི ཡཐཱཝུཏྟཱནཾ ཏིཔྤཀཱརཱནཾ ཨགྒཧཎཾ ཝེདིཏབྦཾ སཏིཔི ཝིསབྷཱགབྷཱཝེཏི ཨདྷིཔྤཱཡོ.

ཏེནཱཏི ¶ ‘‘དྷམྨཱཡཏན’’ནྟིཨཱདིནཱ ཝཙནེན. ཨེཀདེསསྶ ཝེདནཱཀྑནྡྷཱདིཀསྶ སམུདཱཡསྶ དྷམྨཱཡཏནསྶ སངྒཱཧཀཏྟཾ ཨེཀདེསེན སམུདཱཡསྶ སངྒཧིཏབྷཱཝནྟི ཨཏྠོ, སམུདཱཡསྶ རཱུཔཀྑནྡྷསྶ ཨེཀདེསསྶ ཙཀྑཱཡཏནསྶ སོཏཱཡཏནསྶ ཙ སངྒཱཧཀཏྟཾ སམུདཱཡེན ཨེཀདེསསྶ སངྒཧིཏབྷཱཝནྟི ཝུཏྟཾ ཧོཏི. ཡདི ཨེཝཾ ན དསྶེཏི, ཨཐ ཀིཾ དསྶེཏཱིཏི ཨཱཧ ‘‘ཙཏུཀྑནྡྷགཎནབྷེདེཧཱི’’ཏིཨཱདི. ཏཏྠ ཙཏུཀྑནྡྷགཎནབྷེདེཧཱིཏི རཱུཔཱདིཙཏུཀྑནྡྷགཎནཝིབྷཱགེཧི ¶ . པཉྩདྷཱཏི རཱུཔཱདིཙཏུཀྑནྡྷསངྒཧོ ཝིཉྙཱཎཀྑནྡྷསངྒཧོཏི ཨེཝཾ པཉྩཔྤཀཱརེན བྷིནྣཏཾ. ཏེནཱཧ ‘‘གཎེཏབྦཱགཎེཏབྦབྷཱཝེནཱ’’ཏི. ‘‘ཨེཀེན ཁནྡྷེནཱ’’ཏིཨཱདཱིསུ ཀརཎཏྠེ ཀརཎཝཙནཾ, ན ཀཏྟུཨཏྠེཏི ཀཏྭཱ ཨཱཧ ‘‘སངྒཱཧཀཱསངྒཱཧཀནིརཔེཀྑཱན’’ནྟི. ཏེནེཝཱཧ ‘‘ཀམྨཀརཎམཏྟསབྦྷཱཝཱ’’ཏི. དུཏིཡཱདཡོ པན ནཡཱ. ཨགཎནཱདིདསྶནཱནཱིཏི ཨགཎནགཎནདསྶནཱནི. ནནུ ཙ དུཏིཡཱདཱིསུ གཎནཱདཱིནིཔི ཝིཛྫནྟཱིཏི? སཙྩཾ ཝིཛྫནྟི, ཏཱནི པན ཝིསེསནབྷཱུཏཱནི ཨཔྤདྷཱནཱནཱིཏི ཝིསེསིཏབྦབྷཱུཏཱནཾ པདྷཱནཱནཾ ཝསེནེཝཾ ཝུཏྟཾ. ‘‘ཙཀྑཱཡཏནེན ཡེ དྷམྨཱ ཁནྡྷསངྒཧེན སངྒཧིཏཱ’’ཏིཨཱདིནཱ ཀཏྟུཨཱདཡོ ནིདྡིཊྛཱཏི ཨཱཧ ‘‘ཀཏྟུཀརཎཀམྨཏྟཡསབྦྷཱཝཱ’’ཏི.

ཏཐཱ ཏཐཱཏི ཏེན ཏེན རཱུཔཀྑནྡྷཱདིཔྤཀཱརེན. ཏཾཏཾཁནྡྷཱདིབྷཱཝཱབྷཱཝོ སབྷཱགཝིསབྷཱགཏཱཏི རཱུཔདྷམྨཱདཱིནཾ རཱུཔཀྑནྡྷཱདིབྷཱཝོ སབྷཱགཏཱ, ཝེདནཱཀྑནྡྷཱདིཨབྷཱཝོ ཝིསབྷཱགཏཱཏི ཨཏྠོ. ཡཐཱནིདྡྷཱརིཏདྷམྨདསྶནེཏི ‘‘ཡེ དྷམྨཱ, ཏེ དྷམྨཱ’’ཏི ནིདྡྷཱརིཏཔྤཀཱརདྷམྨནིརཱུཔནེ. སངྒཱཧཀསངྒཧེཏབྦཱནནྟི ཙཀྑཱཡཏནཱདིཀསྶ སངྒཱཧཀསྶ སོཏཱཡཏནཱདིཀསྶ ཙ སངྒཧེཏབྦསྶ. སམཱནཀྑནྡྷཱདིབྷཱཝོཏི ཨེཀཀྑནྡྷཱདིབྷཱཝོ, རཱུཔཀྑནྡྷཱདིབྷཱཝོཏི ཨཏྠོ. ཏདབྷཱཝོཏི ཏསྶ སམཱནཀྑནྡྷཱདིབྷཱཝསྶ ཨབྷཱཝོ ཨཉྙཀྑནྡྷཱདིབྷཱཝོ. ཨཡནྟི ཡྭཱཡཾ པཋམནཡེ ཏཐཱ ཏཐཱ གཎེཏབྦཱགཎེཏབྦཏཱསངྑཱཏོ དུཏིཡཱདིནཡེསུ ཡཐཱཝུཏྟཱནཾ སམཱནཀྑནྡྷཱདིབྷཱཝཱབྷཱཝསངྑཱཏོ ཏཾཏཾཁནྡྷཱདིབྷཱཝཱབྷཱཝོ ཝུཏྟོ, ཨཡམེཏེསཾ དྭིཔྤཀཱརཱནཾ ནཡཱནཾ སབྷཱགཝིསབྷཱགཏཱསུ ཝིསེསོ.

སམུདཡསཙྩསུཁིནྡྲིཡཱདཱིཏི ཨཱདི-སདྡེན མགྒསཙྩདུཀྑིནྡྲིཡཱདི སངྒཡ྄ཧཏི. ཨསངྒཱཧཀཏྟཱབྷཱཝཏོཏི སངྒཧིཏཏཱཝིསིཊྛསྶ ཨསངྒཱཧཀཏྟསྶ ཨབྷཱཝཏོ ¶ . ན ཧི སཀྐཱ ‘‘སམུདཡསཙྩེན ཡེ དྷམྨཱ ཁནྡྷསངྒཧེན སངྒཧིཏཱ, ཨཱཡཏནདྷཱཏུསངྒཧེན ཨསངྒཧིཏཱ’’ཏིཨཱདི ཝཏྟུཾ. དུཀྑསཙྩསདིསཱནི ཨབྱཱཀཏཔདཱདཱིནི. ཨིཏརེཧཱིཏི ཨཱཡཏནདྷཱཏུསངྒཧེཧི སངྒཱཧཀཏྟཱསངྒཱཧཀཏྟཱབྷཱཝཏོ ན ཨུདྡྷཊཱནཱིཏི ཡོཛནཱ. ཨེཝནྟིཨཱདི ཡཐཱཝུཏྟསྶ ཨཏྠསྶ ནིགམནཝསེན ཝུཏྟཾ. ན རཱུཔཀྑནྡྷོཏི ན སབྦོ རཱུཔཀྑནྡྷདྷམྨོཏི ཨཏྠོ.

‘‘ཁནྡྷཔདེནཱ’’ཏི ཨིདཾ ཀརཎཏྠེ ཀརཎཝཙནཾ, ན ཀཏྟུཨཏྠེཏི ཨཱཧ ‘‘ཁནྡྷཔདསངྒཧེནཱཏི ཨཏྠོ’’ཏི. ཏེནེཝསྶ ཀཏྟུཨཏྠཏཾ པཊིསེདྷེཏུཾ ‘‘ན སངྒཱཧཀེནཱ’’ཏི ཝུཏྟཾ. ཀརཎཾ པན ཀཏྟུརཧིཏཾ ¶ ནཏྠཱིཏི ཨཱཧ ‘‘ཀེནཙི སངྒཱཧཀེནཱཏི ཨིདཾ པན ཨཱནེཏྭཱ ཝཏྟབྦ’’ནྟི. སངྒཱཧཀེསུ ན ཡུཛྫཏི ན སངྒཧེཏབྦེསཱུཏི ཨདྷིཔྤཱཡོ. རཱུཔཀྑནྡྷདྷམྨཱ ཧི ‘‘ཡེ དྷམྨཱ ཁནྡྷསངྒཧེན སངྒཧིཏཱ’’ཏི ཝུཏྟཱཏི. སམུདཱཡེ ཝུཏྟཝིདྷི ཏདཝཡཝེཔི སམྦྷཝཏཱིཏི ཙོདནཾ སམུཊྛཱཔེནྟོ ‘‘ཨེཏེན ནཡེནཱ’’ཏིཨཱདིམཱཧ. པཊིཡོགཱིནིཝཏྟནཾ ཨེཝ-སདྡེན ཀརཱིཡཏཱིཏི ཨཱཧ ‘‘ན ཧི ཨཉྙམཏྟནིཝཱརཎཾ ཨེཝ-སདྡསྶ ཨཏྠོ’’ཏི. ཏེནཱཧ ‘‘སངྒཱཧཀཏོ ཨཉྙནིཝཱརཎཾ ཨེཝ-སདྡསྶ ཨཏྠོ’’ཏི. སོ ཙ…པེ… པེཀྑནྟི ཨིམིནཱ ཏམེཝཏྠཾ པཱཀཊཏརཾ ཀརོཏི. སངྒཱཧཀཱཔེཀྑཏྟེ ཧི ‘‘སོ ཙཱ’’ཏིཨཱདིཝཙནསྶ ‘‘ཙཀྑཱཡཏནེན རཱུཔཀྑནྡྷོཝ སངྒཧིཏོ’’ཏི ཨེཏྠ ཙཀྑཱཡཏནཾ སངྒཱཧཀནྟི ཡཐཱདྷིཔྤེཏསྶ ཨཏྠསྶ ཨསམྦྷཝོ ཨེཝཱཏི ཨིདཱནི ཏཾ ཨསམྦྷཝཾ ཝིབྷཱཝེནྟོ ‘‘ཀཐ’’ནྟིཨཱདིམཱཧ, ཏཾ སུཝིཉྙེཡྻམེཝ.

ཨེཏྠཱཏི ‘‘ཨཌྜྷེཀཱདསཧི ཨཱཡཏནདྷཱཏཱུཧཱི’’ཏི ཨེཏྠ. ‘‘རཱུཔཀྑནྡྷེནཱ’’ཏི ཨཱནེཏྭཱ ཝཏྟབྦཾ ཨཱཡཏནདྷཱཏུཝིསེསནཏྠཾ. ན སོ ཨེཝ ཏསྶ, སམུདཱཡོ ཝཱ ཏདེཀདེསཱནཾ སངྒཱཧཀོ ཨསངྒཱཧཀོ ཙ ཧོཏཱིཏི ཝུཏྟོཝཱཡམཏྠོཏི ཨཱཧ ‘‘རཱུཔཀྑནྡྷོ…པེ… ན ཧོཏཱི’’ཏི. ཨིམིནཱ པརིཡཱཡེནཱཏི ཡསྨཱ ཝུཏྟཔྤཀཱརཾ སངྒཱཧཀཏྟཾ ནཏྠི ‘‘ཡེན སངྒཧིཏསྶ ཨསངྒཱཧཀཾ སིཡཱ’’ཏི ཨིམིནཱ པརིཡཱཡེན. ཨསངྒཧིཏཏཱཡ ཨབྷཱཝོ ཝུཏྟོ ཨཊྛཀཐཱཡཾ (དྷཱཏུ. ཨཊྛ. ༡༧༡) ‘‘སོ ཙ…པེ… ནཏྠཱི’’ཏི. སངྒཧིཏཏཱཡཱཏི ནིཔྤརིཡཱཡེན སངྒཧིཏབྷཱཝེན ཨསངྒཧིཏཏཱཡ ཨབྷཱཝོ ཝུཏྟོཏི ན ཡུཛྫཏཱིཏི ཡོཛནཱ. སཱ སངྒཧིཏཏཱཏི ཨཏྟནཱ ཨཏྟནོ, ཨཏྟེཀདེསཱནཾ ¶ ཝཱ སངྒཧིཏཏཱ. ཏེནཱཏི རཱུཔཀྑནྡྷེན. ཏེསནྟི རཱུཔཀྑནྡྷཏདེཀདེསཱནཾ. ཨཏྠི ཙ ཝིཔྤཡུཏྟཏཱ ཝེདནཱཀྑནྡྷཱདཱིཧི. ཙཀྑཱཡཏནཱདཱིཧི ཝིཡཱཏི ཝིསདིསུདཱཧརཎཾ. ཨེཏེཧི རཱུཔཝེདནཱཀྑནྡྷཱདཱིཧི ཨཉྙེཧི ཙ ཨེཝརཱུཔེཧི. ཨེཏཱནི ཨཉྙཱནི ཙཱཏི ཨེཏྠཱཔི ཨེསེཝ ནཡོ.

ཏེནེཝ ཏསྶ སངྒཧིཏཏྟཱབྷཱཝདསྶནེན ཧེཊྛཱ དསྶིཏེན. ཨེཏྠཱཏི ཨེཏསྨིཾ ཝཱརེ. ཨགྒཧཎེཏི ཨཀཐནེ, ཨདེསནཱཡནྟི ཨཏྠོ. སམུདཡསཙྩཱདཱིསཱུཏི སམུདཡསཙྩསུཁིནྡྲིཡཱདཱིསུ ཡུཛྫེཡྻ ཏཾ ཀཱརཎཾ. ཀསྨཱ? ཏེཧི སམུདཡསཙྩཱདཱིཧི ཁནྡྷཱདིསངྒཧེན སངྒཧིཏེ དྷམྨཛཱཏེ སཏི ཏསྶ ཨཱཡཏནསངྒཧཱདཱིཧི ཨསངྒཧིཏཏྟསྶ ཨབྷཱཝཏོ. རཱུཔཀྑནྡྷཱདཱིཧཱིཏི རཱུཔཀྑནྡྷཝེདནཱཀྑནྡྷཱདཱིཧི. སངྒཧིཏམེཝ ནཏྠི, ཀསྨཱ? ‘‘སོ ཨེཝ ཏསྶ སངྒཱཧཀོ ན ཧོཏཱི’’ཏི ཝུཏྟོཝཱཡམཏྠོ. ཡདིཔི རཱུཔཀྑནྡྷཱདིནཱ རཱུཔཀྑནྡྷཱདིཀསྶ ཨཏྟནོ…པེ… ནཏྠཱིཏི སམྦནྡྷོ. ཨཉྙསྶ པན ཝེདནཱཀྑནྡྷཱདིཀསྶ རཱུཔཀྑནྡྷཱདིནཱ སངྒཧིཏཏྟཱབྷཱཝེན ཨསངྒཧིཏཏྟཾ ཨཏྠཱིཏི ཡོཛནཱ. ཨུབྷཡཱབྷཱཝོཏི ¶ སངྒཧིཏཏྟཱསངྒཧིཏཏྟཱབྷཱཝོ. ཨེཏྠ ཨེཏསྨིཾ ཝཱརེ. དྷམྨཱཡཏནཛཱིཝིཏིནྡྲིཡཱདཱིནནྟི དྷམྨཱཡཏནཱདཱིནཾ ཁནྡྷཙཏུཀྐསངྒཱཧཀཏྟེ, ཛཱིཝིཏིནྡྲིཡཱདཱིནཾ ཁནྡྷདུཀསངྒཱཧཀཏྟེཏི ཡོཛནཱ. པཱལི༹ཡཾ ཨནཱགཏཏྟཱ ‘‘སཏཱི’’ཏི སཱསངྐཾ ཝདཏི. ཨཱདི-སདྡེན པཋམེན དྷམྨདྷཱཏུསལཱ༹ཡཏནཱདཱིནཾ སུཁིནྡྲིཡཱདཱིནཉྩ, དུཏིཡེན ཨེཀཀྑནྡྷསྶ སངྒཧོ དཊྛབྦོ. སུཁིནྡྲིཡཉྷི ཝེདནཱཀྑནྡྷསྶེཝ སངྒཱཧཀཾ. ཏེསནྟི ཁནྡྷཙཏུཀྐཁནྡྷདུཀཱདཱིནཾ ཨསངྒཧིཏཏཱ ན ནཏྠི ཨཏྠེཝཱཏི ཏསྶཱ ཨབྷཱཝོ ཨནེཀནྟིཀོ. པུབྦེ ཝུཏྟནཡེནཱཏི ‘‘རཱུཔཀྑནྡྷཱདཱིཧི པནཱ’’ཏིཨཱདིནཱ ཝུཏྟནཡེན.

ཏཏྠེཝཱཏི ཏསྨིཾཡེཝ པུབྦེ ཝུཏྟེ སནིདསྶནསཔྤཊིགྷཔདེ. ནིཝཏྟེཏྭཱ གཎྷནྟོཏི པུབྦེ ཝུཏྟཾ པཊིནིཝཏྟེཏྭཱ གཎྷནྟོ པཙྩཱམསནྟོ. ཏདཝཏྟབྦཏཱཏི ཏེསཾ སངྒཱཧཀཱསངྒཱཧཀསངྒཧིཏཏྟཱསངྒཧིཏཏྟཱནཾ ཨཝཏྟབྦཏཱ. ཨསངྒཱཧཀཏྟཱབྷཱཝཏོ ཨེཝ…པེ… ན སངྒཱཧཀཏྟཱབྷཱཝཏོཏི ཡསྨཱ ནེསཾ ཨསངྒཱཧཀཏྟཾ ཝིཡ སངྒཱཧཀཏྟམྤི ནཏྠི, ཏཏོ ཨེཝ སངྒཧིཏཏྟཱསངྒཧིཏཏྟམྤཱིཏི དསྶེཏི.

དུཏིཡནཡསངྒཧིཏེནཨསངྒཧིཏཔདཝཎྞནཱ ནིཊྛིཏཱ.

༣. ཏཏིཡནཡོ ཨསངྒཧིཏེནསངྒཧིཏཔདཝཎྞནཱ

༡༧༩. རཱུཔཀྑནྡྷེན ¶ ཁནྡྷསངྒཧེན ཨསངྒཧིཏེསཱུཏི ནིདྡྷཱརཎེ བྷུམྨཾ. ཏསྨཱཏི ཡསྨཱ ཨེཀདེསསབྷཱགཏཱ སམུདཱཡསབྷཱགཏཱ ན ཧོཏི, ཏསྨཱ. ཏེནཱཏི རཱུཔཀྑནྡྷེན. ཏཱནཱིཏི ཝེདནཱདིཀྑནྡྷཏྟཡནིབྦཱནཱནི. ཡཐཱ ཙ ཨེཀདེསཝིསབྷཱགཏཱཡ ན སངྒཧིཏཏཱ, ཨེཝཾ ཨེཀདེསསབྷཱགཏཱཡ ཨསངྒཧིཏཏཱཔི ནཏྠཱིཏི དསྶེནྟོ ‘‘ན ཀེཝལ’’ནྟིཨཱདིམཱཧ. སངྒཧིཏཱནེཝ ན ན ཧོནྟཱིཏི ཡོཛནཱ. ཏེཏི ཝེདནཱདིཀྑནྡྷཏྟཡནིབྦཱནསུཁུམརཱུཔདྷམྨཱ. ཏེཧཱིཏི ཝིཉྙཱཎཀྑནྡྷཙཀྑཱཡཏནཱདཱིཧི. ན ཀཐཉྩི སམྨིསྶཱཏི ཀེནཙིཔི པཀཱརེན ན སམྨིསྶཱཏི ཨསམྨིསྶཏཱཡ སངྒཧིཏཏྟཱབྷཱཝཾ སཱདྷེཏི. རཱུཔཀྑནྡྷེན ཝིཡ…པེ… ན ཧོཏཱིཏི ཡཐཱ རཱུཔཀྑནྡྷེན སབྷཱགཏཱབྷཱཝཏོ ནིབྦཱནཾ ན ཀེནཙིཔི སངྒཧཎེན སངྒཧིཏཾ, ཨེཝཾ ཝིཉྙཱཎཀྑནྡྷཙཀྑཱཡཏནཱདཱིཧི ཏཾ ཨཱཡཏནདྷཱཏུསངྒཧེཧི སངྒཧིཏཾ ན ཧོཏཱིཏི ཁནྡྷསངྒཧཱབྷཱཝོ པཱཀཊོ ཝུཏྟོཝཱཏི ཨེཝཾ ཝུཏྟཾ.

ཨེཝརཱུཔཱནནྟི ¶ རཱུཔཀྑནྡྷཝིཉྙཱཎཀྑནྡྷཙཀྑཱཡཏནཱདཱིནཾ. ན ཧི ནིབྦཱནཾ སནྡྷཱཡ ‘‘རཱུཔཀྑནྡྷེན ཝིཉྙཱཎཀྑནྡྷེན ཙཀྑཱཡཏནེན ཡེ དྷམྨཱ ཁནྡྷསངྒཧེན ཨསངྒཧིཏཱ, ཨཱཡཏནདྷཱཏུསངྒཧེན སངྒཧིཏཱ’’ཏི སཀྐཱ ཝཏྟུཾ. ཏེན ཝུཏྟཾ ‘‘སངྒཱཧཀཏྟཱབྷཱཝཏོ ཨེཝཱ’’ཏི. ཏཐཱ ‘‘ཨབྱཱཀཏེཧི དྷམྨེཧི ཡེ དྷམྨཱ ཁནྡྷསངྒཧེན ཨསངྒཧིཏཱ, ཨཱཡཏནདྷཱཏུསངྒཧེན སངྒཧིཏཱ’’ཏིཨཱདི ན སཀྐཱ ཝཏྟུཾ ཏཱདིསསྶ དྷམྨསྶ ཨབྷཱཝཏོཏི ཨཱཧ ‘‘སནིབྦཱན…པེ… བྷཱཝཏོཝཱ’’ཏི. ཨགྒཧཎཾ ཝེདིཏབྦནྟི ཡོཛནཱ. ཏེནཱཧ ‘‘ན ཧཱི’’ཏིཨཱདི. ཀཉྩཱིཏི ཀཉྩི དྷམྨཛཱཏཾ. ཏེཏི ཨབྱཱཀཏདྷམྨཱདཡོ. ཨཏྟནོཏི ཨབྱཱཀཏདྷམྨཱདིཾ སནྡྷཱཡཱཧ. ཨེཀདེསོཏི རཱུཔཀྑནྡྷཱདི. ཨཏྟེཀདེསསབྷཱགོཏི ནིབྦཱནཾ. ཏཉྷི དྷམྨཱཡཏནདྷམྨདྷཱཏུཔརིཡཱཔནྣཏཱཡ ཏདེཀདེསསབྷཱགོ. ཨསངྒཧིཏསངྒཱཧཀཏྟཱཏི ཁནྡྷསངྒཧེན ཨསངྒཧིཏཱནཾ སཉྙཱཀྑནྡྷཱདཱིནཾ ཨཱཡཏནདྷཱཏུསངྒཧེན སངྒཱཧཀཏྟཱཏི ཨཏྠོ.

ཝིསབྷཱགཀྑནྡྷནིབྦཱནསམུདཱཡཏྟཱ ཁནྡྷསངྒཧེན དྷམྨཱཡཏནེན ན ཀོཙི དྷམྨོ སངྒཧིཏོ ཨཏྠཱིཏི ཡོཛནཱ. ཨེཏསྶཱཏི ‘‘དྷམྨཱཡཏནེན སངྒཧིཏཱ’’ཏི ཨེཏསྶ པདསྶ དྷམྨཱཡཏནགཎནེན སངྒཧིཏཱཏི ཨཏྠོ. ཨོལཱ༹རིཀརཱུཔསམྨིསྶཾ དྷམྨཱཡཏནེཀདེསཾ.

ཏཏིཡནཡཨསངྒཧིཏེནསངྒཧིཏཔདཝཎྞནཱ ནིཊྛིཏཱ.

༤. ཙཏུཏྠནཡོ སངྒཧིཏེནསངྒཧིཏཔདཝཎྞནཱ

༡༩༡. ཏིཎྞཾ ¶ སངྒཧཱནནྟི ཁནྡྷཱཡཏནདྷཱཏུསངྒཧཱནཾ. སངྒཧཎཔུབྦཾ ཨསངྒཧཎཾ, ཨསངྒཧཎཔུབྦཾ སངྒཧཎཉྩ ཝུཙྩམཱནཾ སངྒཧཎཱསངྒཧཎཱནཾ པཝཏྟིཝིསེསེན ཝུཏྟཾ ཧོཏཱིཏི ཨཱཧ ‘‘སངྒཧཎཱ…པེ… ཨུདྡིཊྛཱ’’ཏི. སངྒཧཱབྷཱཝཀཏོ ཨསངྒཧོ སངྒཧཧེཏུཀོ སངྒཧསྶ པཝཏྟིཝིསེསོཡེཝ ནཱམ ཧོཏཱིཏི ཨཱཧ ‘‘སངྒཧཎཔྤཝཏྟིཝིསེསཝིརཧེ’’ཏི. ཀེནཙི སམུདཡསཙྩཱདིནཱ ཏཱིཧིཔི སངྒཧེཧི སངྒཧིཏེན སངྑཱརཀྑནྡྷཔརིཡཱཔནྣེན དྷམྨཝིསེསེན པུན ཏཐེཝ སངྒཧིཏོ སོ ཨེཝ སམུདཡསཙྩཱདིཀོ དྷམྨཝིསེསོ སངྒཧིཏེན སངྒཧིཏོ. སངྒཱཧཀཏྟཱབྷཱཝསབྦྷཱཝཱ སངྒཱཧཀབྷཱཝེན ན ཨུདྡྷཊཱ, ན ཨསངྒཱཧཀཏྟཱ ཨེཝ. ཡཐཱ ཧི ཏཱིཧི སངྒཧེཧི ན སངྒཱཧཀཱ, ཨེཝཾ ¶ དྭཱིཧི, ཨེཀེནཔི སངྒཧེན ན སངྒཱཧཀཱ ཨིདྷ ན ཨུདྡྷཊཱ. ཏེཧི སངྒཧིཏཱཏི ཏེཧི ཏཱིཧི སངྒཧེཧི སངྒཧིཏཱ དྷམྨཱ. ཡསྶཱཏི ཡསྶ ཨཏྟནོ སངྒཱཧཀསྶ.

སཀལཝཱཙཀེནཱཏི ཨནཝསེསཾ ཁནྡྷཱདིཨཏྠཾ ཝདནྟེན. ཏེན ཁནྡྷཱདིཔདེནཱཏི ‘‘ཏེནེཝ སངྒཧཾ གཙྪེཡྻཱ’’ཏི ཨེཏྠ ཏེན ཁནྡྷཱདིཔདེནཱཏི ཨེཝཾ ཡོཛེཏབྦཾ. ཨེཝཾ པན ཨཡོཛེཏྭཱ ‘‘ཡཾ ཨཏྟནོ སངྒཱཧཀཾ སངྒཎྷིཏྭཱ པུན ཏེནེཝ སངྒཧཾ གཙྪེཡྻ, ཏཾ ཨཉྙཾ སངྒཧིཏཾ ནཱམ ནཏྠཱི’’ཏི ཨེཝཾ ན སཀྐཱ ཝཏྟུཾ. ཀསྨཱཏི ཙེ? ན ཧི ཡེན སམུདཡསཙྩཱདིནཱ ཡཾ སངྑཱརཀྑནྡྷཔརིཡཱཔནྣཾ དྷམྨཛཱཏཾ ཁནྡྷཱདིསངྒཧེཧི སངྒཧིཏཾ, ཏེནེཝ སམུདཡསཙྩཱདིནཱ ཏསྶ ཏདཝསིཊྛསྶ སངྑཱརཀྑནྡྷདྷམྨསྶ, ན ཙ ཏསྶེཝ ཀེཝལསྶ སམུདཡསཙྩཱདིཀསྶ སངྒཧོ པུཙྪིཏོ ཝིསྶཛྫིཏོཏི ཡོཛནཱ, ཨཐ ཁོ ཏེན སངྑཱརཀྑནྡྷདྷམྨེན ཕསྶཱདིནཱ. སངྒཧིཏསྶཱཏི སངྒཧིཏཏཱཝིསིཊྛསྶཱཏི ཨཏྠོ. ཏསྨཱ ཨཏྟནོ སངྒཱཧཀཾ སཀལཀྑཎཱདིཾ སངྒཎྷིཏྭཱ པུན ཏེན ཁནྡྷཱདིཔདེན ཡཾ སངྒཧཾ གཙྪེཡྻ, ཏཾ ཏཱདིསཾ ནཏྠཱིཏི ཨཏྠོ ཝེདིཏབྦོ. ཝེདནཱ སདྡོ ཙ ཁནྡྷོ ཨཱཡཏནཉྩཱཏི ཝེདནཱ ཝིསུཾ ཁནྡྷོ, སདྡོ ཙ ཝིསུཾ ཨཱཡཏནནྟི ཨཏྠོ. ཨཉྙེན ཁནྡྷནྟརཱདིནཱ. ཨསམྨིསྶནྟི ཨབྱཱཀཏདུཀྑསཙྩཱདི ཝིཡ ཨམིསྶིཏཾ. ན ཧི…པེ… ཨེཏྠཱཏི སངྒཧིཏཏཱཝིསིཊྛེན དྷམྨེན ཡོ དྷམྨོ སངྒཧིཏོ, ཏསྶ སངྒཧིཏཏཱཝིསིཊྛོཡེཝ ཡོ སངྒཧོ, སོ ན ཨེཏྠ ཝཱརེ པུཙྪིཏོ ཝིསྶཛྫིཏོ ཙ. སངྒཧོཝཱཏི ཀེཝལོ སངྒཧོ ¶ , ན ཀཏྟཱཔེཀྑོཏི ཨཏྠོ. ན སངྒཱཧཀེནཱཏི ཨིདཾ ཡཐཱཝུཏྟེན ཨཏྠེན ནིཝཏྟིཏསྶ དསྶནཾ. ན ཧཱིཏིཨཱདི ཏཾསམཏྠནཾ.

ཙཏུཏྠནཡསངྒཧིཏེནསངྒཧིཏཔདཝཎྞནཱ ནིཊྛིཏཱ.

༥. པཉྩམནཡོ ཨསངྒཧིཏེནཨསངྒཧིཏཔདཝཎྞནཱ

༡༩༣. ཝུཏྟནཡེནཱཏི ཡསྨཱ སངྒཧཔྤཝཏྟིཝིསེསཝིརཧིཏོ ཨསངྒཧིཏདྷམྨཝིསེསནིསྶིཏོ པཉྩམནཡོ, ཏསྨཱ ཡོ ཨེཏྠ ཀེནཙི ཨསངྒཧིཏེན དྷམྨཝིསེསེན པུན ཨསངྒཧིཏོ དྷམྨཝིསེསོ ཨསངྒཧིཏེན ཨསངྒཧིཏོ ཨསངྒཧིཏཏཱཡ པུཙྪིཏབྦོ ཝིསྶཛྫིཏབྦོ ཙ. ཏམེཝ ཏཱཝ ཡཐཱནིདྡྷཱརིཏཾ ¶ དསྶེནྟོ ‘‘རཱུཔཀྑནྡྷེན ཡེ དྷམྨཱ ཁནྡྷ…པེ… ཨསངྒཧིཏཱ, ཏེཧི དྷམྨེཧི ཡེ དྷམྨཱ ཁནྡྷ…པེ… ཨསངྒཧིཏཱཏི ཨཱཧཱ’’ཏི ཙཏུཏྠནཡེ ཝུཏྟནཡཱནུསཱརེན. ཡཐཱནིདྡྷཱརིཏདྷམྨདསྶནནྟི པཱལི༹ཡཾ ནིདྡྷཱརིཏཔྤཀཱརདྷམྨདསྶནཾ. སཧ སུཁུམརཱུཔེནཱཏི སསུཁུམརཱུཔཾ, ཏེན སུཁུམརཱུཔེན སདྡྷིཾ གཧིཏཾ ཝིཉྙཱཎཾ, ཏེན སཧིཏདྷམྨསམུདཱཡཱ སསུཁུམ…པེ… དཱཡཱ. ཀེ པན ཏེཏི ཨཱཧ ‘‘དུཀྑསཙྩཱ’’ཏིཨཱདི. ཀེསཉྩཱིཏི ནིབྦཱནཙཀྑཱཡཏནཱདཱིནཾ. ཏཱིཧིཔི སངྒཧེཧི. པརིཔུཎྞསངྒཧེཧི ཏཱིཧིཔི སངྒཧེཧི ཨསངྒཱཧཀཱ པརིཔུཎྞསངྒཧཱསངྒཱཧཀཱ. ཨབྱཱཀཏདྷམྨསདིསཱ ནེཝདསྶནེནནབྷཱཝནཱཡཔཧཱཏབྦནེཝསེཀྑཱནཱསེཀྑཱདཡོ. ཨིཏརེཏི རཱུཔཀྑནྡྷཱདཡོ. ཏབྦིཔརིཡཱཡེནཱཏི ཝུཏྟཝིཔརིཡཱཡེན, ཏཱིཧིཔི སངྒཧེཧི ཨསངྒཧེཏབྦསྶ ཨཏྠིཏཱཡ པརིཔུཎྞསངྒཧཱསངྒཱཧཀཏྟཱཏི ཨཏྠོ.

ཨསངྒཱཧཀེསུ ནིབྦཱནཾ ཨནྟོགདྷཾ, ཏསྨཱ ཏཾ ཨནིདསྶནཨཔྤཊིགྷེཧི ཨསངྒཧེཏབྦཾ ན ཧོཏཱིཏི ཨཏྠོ. ཏེནཱཧ ‘‘ན ཙ ཏདེཝ ཏསྶ ཨསངྒཱཧཀ’’ནྟི. ‘‘ཝེདནཱཀྑནྡྷེན ཡེ དྷམྨཱ’’ཏིཨཱདཡོ ནཝ པཉྷཱ དུཏིཡཔཉྷཱདཡོ, ཏེ པཋམཔཉྷེན སདྡྷིཾ དས, ནཱམརཱུཔཔཉྷཱདཡོ པན ཙཏུཝཱིསཏཱིཏི ཨཱཧ ‘‘སབྦེཔི ཙཏུཏྟིཾས ཧོནྟཱི’’ཏི. རཱུཔཀྑནྡྷཱདིཝིསེསཀཔདནྟི ‘‘རཱུཔཀྑནྡྷེནཱ’’ཏིཨཱདིནཱ ཨསངྒཱཧཀཏྟེན ཝིསེསཀཾ རཱུཔཀྑནྡྷཱདིཔདཾ. པུཙྪཱཡཱཏི ཙ པུཙྪནཏྠནྟི ཨཏྠོ. ‘‘རཱུཔཀྑནྡྷེནཱ’’ཏིཨཱདི སབྦམྤི ཝཱ ཝིཉྙཱཔེཏུཾ ཨིཙྪིཏབྷཱཝེན ཝཙནཾ པཉྷབྷཱཝཏོ པུཙྪཱ. ཏེནཱཧ ཨཊྛཀཐཱཡཾ ¶ ‘‘པཉྷཱ པནེཏྠ…པེ… ཙཏུཏྟིཾས ཧོནྟཱི’’ཏི. ཏེ ཧི ལཀྑཎཏོ དསྶིཏཱཏི ཏེ ནིདྡྷཱརིཏདྷམྨཱ ཏེནེཝ ཨསངྒཧིཏཱསངྒཧིཏཏཱཡ ནིདྡྷཱརཎསངྑཱཏེན ལཀྑཎེན དསྶིཏཱ.

ཏདེཝཱཏི ཨེཝ-སདྡེནཱཏི ‘‘ཏདེཝཱ’’ཏི ཨེཏྠ ཨེཝ-སདྡེན. ‘‘ཡཾ པུཙྪཱཡ ཨུདྡྷཊཾ པདཾ, ཏཾ ཁནྡྷཱདཱིཧི ཨསངྒཧིཏ’’ནྟི ཨེཏྠ ‘‘ཁནྡྷཱདཱིཧེཝཱ’’ཏི ཨཝདྷཱརཎཾ ནིཔྤཡོཛནཾ པཀཱརནྟརསྶ ཨབྷཱཝཏོ. ‘‘ཏཱིཧི ཨསངྒཧོ’’ཏི ཧི ཝུཏྟཾ. ཏཐཱ ‘‘ཨསངྒཧིཏམེཝཱ’’ཏི སངྒཧིཏཏཱནིཝཏྟནསྶ ཨནདྷིཔྤེཏཏྟཱ. ཏདེཝཱཏི པན ཨིཙྪིཏཾ ཨུདྡྷཊསྶེཝ ཨསངྒཧིཏེནཨསངྒཧིཏབྷཱཝསྶ ཨཝདྷཱརེཏབྦཏྟཱཏི དསྶེནྟོ ‘‘ན ཀདཱཙཱི’’ཏིཨཱདིམཱཧ. ཏཏྠ ཨཉྙསྶཱཏི ཨནུདྡྷཊསྶ. ཨནིཡཏཏཾ དསྶེཏཱིཏི ཨིདཾ ཨཝདྷཱརཎཕལདསྶནཾ. ནིཡམཏོཏི སཀྐཱ ཝཙནསེསོ ཡོཛེཏུནྟི ཨིདམྤི ཨེཝ-ཀཱརེན སིདྡྷམེཝཏྠཾ པཱཀཊཏརཾ ཀཱཏུཾ ཝུཏྟཾ. ཡཏོ ཧི ཨེཝ-ཀཱརོ, ཏཏོ ཨཉྙཏྠ ནིཡམོཏི. ཨེཝཾཔཀཱརམེཝཱཏི པུཙྪཱཡ ཨུདྡྷཊཔྤཀཱརམེཝ, ཡཾ པཀཱརཾ པུཙྪཱཡ ཨུདྡྷཊཾ, ཏཾཔཀཱརམེཝཱཏི ཨཏྠོ. ཏསྶཱཏི ¶ ཨསངྒཧིཏསྶ. ཨཉྙསྶཱཏི པུཙྪཱཡ ཨནུདྡྷཊཔྤཀཱརསྶ. ཨེཏེན ཡོ པུཙྪཱཡ ཨུདྡྷཊོ ཏཱིཧིཔི སངྒཧེཧི ཨསངྒཧིཏོ, ཏསྶེཝ ཨིདྷ པུཙྪིཏབྦཝིསྶཛྫིཏབྦབྷཱཝོ, ན ཨཉྙསྶཱཏི དསྶེཏི. ཏེནཱཧ ‘‘པུཙྪཱཡ ཨུདྡྷཊཉྷཱི’’ཏིཨཱདི. ཨཱཡཏནདྷཱཏུསངྒཧཝསེན ཙེཏྠ རཱུཔཀྑནྡྷཱདཱིནཾ ཨཉྙསཧིཏཏཱ, ཝིཉྙཱཎཀྑནྡྷཱདཱིནཾ ཨསཧིཏཏཱ ཙ ཝེདིཏབྦཱ.

ཨཝསེསཱ ཝེདནཱདཡོ ཏཡོ ཁནྡྷཱ ནིབྦཱནཉྩ སཀལེན རཱུཔཀྑནྡྷེན ཏེསཾ སངྒཧོ ནཏྠཱིཏི ‘‘སངྒཧིཏཱ’’ཏི ན སཀྐཱ ཝཏྟུཾ, ཨེཀདེསེན པན སངྒཧོ ཨཏྠཱིཏི ‘‘ཨསངྒཧིཏཱ ན ཧོནྟཱིཏི ཨེཝཾ དཊྛབྦ’’ནྟི ཨཱཧ. ‘‘རཱུཔདྷམྨཱཝཱ’’ཏི ནིཡམནཾ པུཙྪཱཡ ཨུདྡྷཊབྷཱཝཱཔེཀྑནྟི དསྶེནྟོ ‘‘པུཙྪཱཡ…པེ… ཨདྷིཔྤཱཡོ’’ཏི ཨཱཧ. ཏེན ཝུཏྟཾ ‘‘ཨནུདྡྷཊཱ ཝེདནཱདཡོཔི ཧི ཨསངྒཧིཏཱ ཨེཝཱ’’ཏི. ཨེཏྠཱཏི ཨེཏསྨིཾ པཉྩམནཡནིདྡེསེ. པཋམེ ནཡེཏི པཋམེ ཨཏྠཝིཀཔྤེ. ཏཐཱ དུཏིཡེཏི ཨེཏྠཱཔི. རཱུཔཝིཉྙཱཎེཧཱིཏི ཨསུཁུམརཱུཔདྷམྨེཧི ཝིཉྙཱཎེན ཙཱཏི ཨཡམེཏྠ ཨདྷིཔྤཱཡོཏི དསྶེནྟོ ‘‘ཨོལཱ༹རིཀ…པེ… ཨཏྠོ’’ཏི ཨཱཧ. ཀཐཾ པན རཱུཔདྷམྨཱཏི ཝུཏྟེ ཨོལཱ༹རིཀརཱུཔསྶེཝ གཧཎནྟི ཨཱཧ ‘‘རཱུཔེཀདེསོ ཧི ཨེཏྠ རཱུཔགྒཧཎེན གཧིཏོ’’ཏི.

༡༩༦. ཨསངྒཱཧཀནྟི ¶ ‘‘ཙཀྑཱཡཏནེན…པེ… ཨསངྒཧིཏཱ’’ཏི ཨེཝཾ ཨསངྒཱཧཀབྷཱཝེན ཝུཏྟཾ པུཙྪིཏབྦཝིསྶཛྫེཏབྦབྷཱཝེན ཝུཏྟམྤི ཀཱམཾ ཝེདནཱདཱིཧེཝ ཙཏཱུཧི ཨསངྒཧིཏཾ, ཏཾ པན ན ཙཀྑཱཡཏནམེཝཱཏི དསྶེཏུཾ ‘‘ཙཀྑཱཡཏནེན པནཱ’’ཏིཨཱདི ཝུཏྟཾ. ཡེཧི དྷམྨེཧཱིཏི ཁནྡྷཱདཱིསུ ཡེཧི. སབྦཾ དྷམྨཛཱཏཾ ཏེཝ རཱུཔཱདིཀེ དྷམྨེ ཨུདཱནེཏི པཱལི༹ཡཾ. ཀསྨཱ པནེཏཾ ཨུདཱནེཏཱིཏི ཨཱཧ ‘‘སདིསཝིསྶཛྫནཱ’’ཏིཨཱདི. པཋམེན ཨུདཱནེན. དྭེཏི ‘‘བཱཧིརཱ ཨུཔཱདཱ དྭེ’’ཏི ཨེཏྠ ཝུཏྟཾ དྭེ-སདྡཾ སནྡྷཱཡཱཧ. ཏསྶ ཨསངྒཧིཏསྶ. ཡཐཱདསྶིཏསྶཱཏི ‘‘རཱུཔ’’ནྟིཨཱདིནཱ དསྶིཏཔྤཀཱརསྶ. དྷམྨནྭཡཉཱཎུཔྤཱདནཾ ནཡདཱནཾ. ‘‘རཱུཔཾ དྷམྨཱཡཏན’’ནྟིཨཱདཱིནཾ པདཱནཾ ཝསེན དྭེཝཱིསཔདིཀོ ཨེས ནཡོ.

པཉྩམནཡཨསངྒཧིཏེནཨསངྒཧིཏཔདཝཎྞནཱ ནིཊྛིཏཱ.

༦. ཚཊྛནཡོ སམྤཡོགཝིཔྤཡོགཔདཝཎྞནཱ

༢༢༨. ‘‘ཏཏྠཱ’’ཏི ¶ ཨིམིནཱ ‘‘སམྤཡོགཝིཔྤཡོགཔདཾ བྷཱཛེཏྭཱ’’ཏི ཨེཏྠ སམྤཡོགཝིཔྤཡོགཔདཾ བྷཱཛིཏཾ, སཾཝཎྞེཏབྦཏཱཡ ཙ པདྷཱནབྷཱུཏཾ པཙྩཱམཊྛཾ, ན རཱུཔཀྑནྡྷཱདིཔདནྟི དསྶེནྟོ ‘‘ཡཾ ལབྦྷཏི…པེ… ཝེདིཏབྦ’’ནྟི ཝཏྭཱ པུན ‘‘རཱུཔཀྑནྡྷཱདཱིསུ ཧཱི’’ཏིཨཱདིནཱ ཏམཏྠཾ ཝིཝརཏི. ཏཏྠ ན ལབྦྷཏཱིཏི ‘‘སམྤཡུཏྟཾ ཝིཔྤཡུཏྟ’’ནྟི ཝཱ གཧེཏུཾ ན ལབྦྷཏི, ཨལབྦྷམཱནམྤི པུཙྪཱཡ གཧིཏཾ པཊིཀྑེཔེན ཝིསྶཛྫེཏུཾ. པཊིཀྑེཔོཔི ཧི པུཙྪཱཡ ཝིསྶཛྫནམེཝ. ཏཐཱ ཧི ཡམཀེ (ཡམ. ༡.ཁནྡྷཡམཀ.༥༩-༦༡) ‘‘ཡསྶ རཱུཔཀྑནྡྷོ ནུཔྤཛྫིཏྠ, ཏསྶ ཝེདནཱཀྑནྡྷོ ནུཔྤཛྫིཏྠཱ’’ཏི པུཙྪཱཡ ‘‘ནཏྠཱི’’ཏི ཝིསྶཛྫིཏཾ. ཏེན པནེཏྠ རཱུཔདྷམྨེསུ སམྤཡོགཊྛོ ན ལབྦྷཏཱིཏི ཨཡམཏྠོ དསྶིཏོ ཧོཏི. ཨལབྦྷམཱནམྤི སམྤཡོགཔདཾ གཧིཏནྟི སམྦནྡྷོ. སབྦཏྠཱཏི རཱུཔཀྑནྡྷཝེདནཱཀྑནྡྷཱདཱིསུ. ཨེཏེསནྟི རཱུཔནིབྦཱནཱནཾ. ཝིསབྷཱགཏཱཏི ཨཏཾསབྷཱགཏཱ. ཨེཀུཔྤཱདཱདིབྷཱཝོ ཧི སམྤཡོགེ སབྷཱགཏཱ, ན སངྒཧེ ཝིཡ སམཱནསབྷཱགཏཱ, ཏསྨཱ ཨེཀུཔྤཱདཱདིབྷཱཝརཧིཏཱནཾ རཱུཔནིབྦཱནཱནཾ སཱ ཨེཀུཔྤཱདཱདིཏཱ ཝིསབྷཱགཏཱ ཝུཏྟཱ. ཏདབྷཱཝཏོཏི ཏསྶཱ ཝིསབྷཱགཏཱཡ ཨེཀུཔྤཱདཱདིཏཱཡ ཨབྷཱཝཏོ. ཝིཔྤཡོགོཔི ནིཝཱརིཏོ ཨེཝ ཧོཏི, ཝིསབྷཱགོ བྷཱཝོ ཝིཔྤཡོགོཏི ཝུཏྟོཝཱཡམཏྠོཏི. ‘‘ཙཏཱུསུ ¶ ཧཱི’’ཏིཨཱདིནཱ ཝུཏྟམེཝཏྠཾ པཱཀཊཏརཾ ཀརོཏི. ཏཏྠ ཏེསཾ ཏེཧཱིཏི ཙ ཨརཱུཔཀྑནྡྷེ ཨེཝ པརཱམསཏི. ཝིསབྷཱགཏཱ ཙ ཧོཏི རཱུཔནིབྦཱནེསུ ཨཝིཛྫམཱནཏྟཱཏི ཨཏྠོ. ཏེནཱཧ ‘‘ན ཙ རཱུཔེཀདེསསྶཱ’’ཏིཨཱདི. ཏེནེཝཱཏི ཙཏུཀྑནྡྷསབྷཱགཏྟཱ ཨེཝ.

ཏཱིཧི ཝིཉྙཱཎདྷཱཏཱུཧཱིཏི གྷཱནཛིཝ྄ཧཱཀཱཡཝིཉྙཱཎདྷཱཏཱུཧི ཝིཔྤཡུཏྟེ ཨནཱརམྨཎམིསྶཀེ རཱུཔདྷམྨམིསྶཀེ དྷམྨེ དཱིཔེཏི རཱུཔབྷཝོཏི ཡོཛནཱ. པཉྩཧཱིཏི ཙཀྑུཝིཉྙཱཎཱདཱིཧི པཉྩཧི ཝིཉྙཱཎདྷཱཏཱུཧི. ཨེཀཱཡ མནོདྷཱཏུཡཱ. ན སམྤཡུཏྟེཏི ན སམྤཡུཏྟེ ཨེཝ. ཏཐཱ ཧི ‘‘ཝིཔྤཡུཏྟེ ཨཧོནྟེ སཏྟཧིཔི སམྤཡུཏྟེ སཏྟཔི ཝཱ ཏཱ’’ཏི ཝུཏྟཾ. ཏེནཱཏི ཝིཔྤཡུཏྟཏཱཔཊིཀྑེཔེན. ཏཱཧཱིཏི སཏྟཝིཉྙཱཎདྷཱཏཱུཧི. སམྤཡུཏྟེ དཱིཔེནྟཱིཏི སམྤཡུཏྟེ དཱིཔེནྟིཡེཝ, ན སམྤཡུཏྟེ ཨེཝཱཏི ཨེཝམཝདྷཱརཎཾ གཧེཏབྦཾ. ཨེས ནཡོ སེསེསུཔི. སམྤཡུཏྟེ ཝེདནཱདིཀེ. སམྤཡུཏྟཝིཔྤཡུཏྟབྷཱཝེཧི ནཝཏྟབྦཾ, ཏཾཡེཝ ཝིཉྙཱཎདྷཱཏུསཏྟཀཾ. སམྤཡུཏྟབྷཱཝེན ནཝཏྟབྦཱནི སམྤཡུཏྟནཝཏྟབྦཱནི, བྷིནྣསནྟཱནིཀཱནི, ནཱནཱཀྑཎིཀཱནི ཙ ཨརཱུཔཱནིཔི དྷམྨཛཱཏཱནི. ཨནཱརམྨཎམིསྶཀསབྦཝིཉྙཱཎདྷཱཏུཏཾསམྤཡུཏྟཱ དྷམྨཱཡཏནཱདིཔདེཧི དཱིཔེཏབྦཱ, ཨནཱརམྨཎམིསྶཀསབྦཝིཉྙཱཎདྷཱཏུཡོ ¶ ཨཙེཏསིཀཱདིཔདེཧི དཱིཔེཏབྦཱ, ཏདུབྷཡསམུདཱཡཱ དུཀྑསཙྩཱདིཔདེཧི དཱིཔེཏབྦཱཏི ཝེདིཏབྦཱ.

ཡདི ཨེཝནྟི ཡདི ཨནཱརམྨཎམིསྶཱནཾ དྷམྨཱནཾ ཝིཔྤཡོགོ ནཏྠི. ཨནཱརམྨཎམིསྶོབྷཡདྷམྨཱཏི རཱུཔནིབྦཱནསཧིཏསབྦཝིཉྙཱཎདྷཱཏུཏཾསམྤཡུཏྟདྷམྨཱ. ཁནྡྷཱདཱིཧེཝཱཏི ཁནྡྷཱཡཏནདྷཱཏཱུཧི ཨེཝ, ན ཨརཱུཔཀྑནྡྷམཏྟེན. ཨརཱུཔཀྑནྡྷེཡེཝ པན སནྡྷཱཡ ‘‘ཏེཧི དྷམྨེཧི ཡེ དྷམྨཱ ཝིཔྤཡུཏྟཱ’’ཏི ཝུཏྟནྟི ནཱཡཾ དོསོཏི དསྶེཏི. ཏདེཀདེསཱཏི ‘‘ཨནཱརམྨཎམིསྶཱ’’ཏིཨཱདིནཱ ཝུཏྟདྷམྨསམུདཱཡསྶ ཨེཀདེསཱ. ཏདེཀདེསཉྙསམུདཱཡཱཏི ཏསྶེཝ ཡཐཱཝུཏྟསྶ སམུདཱཡསྶ ཨེཀདེསཱ ཧུཏྭཱ ཨཉྙེསཾ ཨཝཡཝཱནཾ རཱུཔཀྑནྡྷཱདཱིནཾ སམུདཱཡབྷཱུཏཱ. ཝིབྷཱགཱབྷཱཝཏོཏི བྷེདཱབྷཱཝཏོ. བྷེདོཏི ཙེཏྠ ཨཙྩནྟབྷེདོ ཨདྷིཔྤེཏོ. ན ཧི སམུདཱཡཱཝཡཝཱནཾ སཱམཉྙཝིསེསཱནཾ ཝིཡ ཨཙྩནྟབྷེདོ ཨཏྠི བྷེདཱབྷེདཡུཏྟཏྟཱ. ཏེསཾ ཨཙྩནྟབྷེདམེཝ ཧི སནྡྷཱཡ ‘‘སམུདཱཡནྟོགདྷཱནཾ ཨེཀདེསཱནཾ ན ཝིབྷཱགོ ཨཏྠཱི’’ཏི སངྒཧེཔི ཝུཏྟཾ. ཏེནཱཏི ཨཝིབྷཱགསབྦྷཱཝཏོ སབྷཱགཝིསབྷཱགཏྟཱབྷཱཝེན. ཏེསནྟི ཨནཱརམྨཎམིསྶཀསབྦཝིཉྙཱཎདྷཱཏུཨཱདཱིནཾ ¶ . ཏེ ཙ ཨཀུསལཱབྱཱཀཏཱ. ཏེསནྟི ཀུསལཱཀུསལཱབྱཱཀཏདྷམྨཱནཾ. ཏསྨཱཏི ཡསྨཱ ཝིབྷཏྟསབྷཱཝཱནཾ ན ཏེསཾ སམུདཱཡེཀདེསཱདིབྷཱཝོ, ཏསྨཱ. ཡསྨཱ པན ཀུསལཱདཡོ ཨེཝ ཁནྡྷཱདཡོཏི ཁནྡྷཱདིཨཱམསནེན སམུདཱཡེཀདེསཱདིབྷཱཝོ ཨཱཔནྣོ ཨེཝཱཏི ཝུཏྟནཡེན ཝིཔྤཡོགཱབྷཱཝོ ཧོཏི, ཏསྨཱ ཏཾ པརིཧརནྟོ ‘‘ཁནྡྷཱདཱིནི ཨནཱམསིཏྭཱ’’ཏིཨཱདིམཱཧ. ཏེསནྟི ཀུསལཱདཱིནཾ. ཨཉྙམཉྙཝིཔྤཡུཏྟཏཱ ཝུཏྟཱ ‘‘ཀུསལེཧི དྷམྨེཧི ཡེ དྷམྨཱ ཝིཔྤཡུཏྟཱ’’ཏིཨཱདིནཱ. སབྦེསཱུཏི དུཏིཡཱདིསབྦཔཉྷེསུ.

ཚཏྟིཾསཱཡ པིཊྛིདུཀཔདེསུ ཝཱིསཏི དུཀཔདཱནི ཨིམསྨིཾ ནཡེ ལབྦྷནྟི, ཨཝསིཊྛཱནི སོལ༹སེཝཱཏི ཨཱཧ ‘‘སོལ༹སཱཏི ཝཏྟབྦ’’ནྟི. ཏཏོ ཨེཝ ‘‘ཏེཝཱིསཔདསཏ’’ནྟི ཨེཏྠ ‘‘ཏེཝཱིས’’ནྟི ཨིདཉྩ ‘‘ཨེཀཝཱིས’’ནྟི ཝཏྟབྦནྟི ཡོཛནཱ. སབྦཏྠཱཏི སབྦཔཉྷེསུ. ཨེཀཀཱལེཀསནྟཱནཱནཾ བྷིནྣཀཱལབྷིནྣསནྟཱནཱནཉྩ ཨནེཀེསཾ དྷམྨཱནཾ སམུདཱཡབྷཱུཏཱ སངྑཱརཀྑནྡྷདྷམྨཱཡཏནདྷམྨདྷཱཏུཡོཏི ཨཱཧ ‘‘ཀཱལསནྟཱན…པེ… དྷཱཏཱུན’’ནྟི. ཨེཀདེསསམྨིསྶཱཏི ཙིཏྟིདྡྷིཔཱདཱདིནཱ ཨཏྟནོ ཨེཀདེསེནེཝ ཁནྡྷནྟརཱདཱིཧི སམྨིསྶཱ ཨིདྡྷིཔཱདཱདཡོ, ཨནཱརམྨཎེཧི རཱུཔནིབྦཱནེཧི ཙ ཨསམྨིསྶཱ. སམཱནཀཱལསནྟཱནེཧཱིཏི ཨེཀཀཱལསནྟཱནེཧི ཀཱལསནྟཱནབྷེདརཧིཏེཧི ཨེཀདེསནྟརེཧི, སངྑཱརཀྑནྡྷཱདཱིནཾ ཨེཀདེསནྟརེཧི, སངྑཱརཀྑནྡྷཱདཱིནཾ ཨེཀདེསཝིསེསབྷཱུཏེཧི ¶ སཏིཔཊྛཱནསམྨཔྤདྷཱནསཉྙཱཀྑནྡྷཱདཱིཧི ཝིབྷཏྟཱ ཨེཝ སམུདཡསཙྩཱདཡོ སམྤཡོགཱིཝིཔྤཡོགཱིབྷཱཝེན, རཱུཔཀྑནྡྷཱདཡོ ཝིཔྤཡོགཱིབྷཱཝེན གཧིཏཱཏི ཡོཛནཱ. ཏེཧི སམུདཡསཙྩཱདཱིཧི. ཏེ སཉྙཱཀྑནྡྷཱདཡོ. ཀེཧིཙི སཧུཔྤཛྫནཱརཧེཧི ཨེཀདེསནྟརེཧི ཝིབྷཏྟེཧི. ན ཧི སངྑཱརཀྑནྡྷཱདིཔརིཡཱཔནྣཏྟེཔི སམུདཡསཙྩཱདཡོ མགྒསཙྩཱདཱིཧི སམྤཡོགཾ ལབྷནྟི. ཏེསནྟི ཝེདནཱཀྑནྡྷསཉྙཱཀྑནྡྷཱདཱིནཾ. ཨེཀུཔྤཱདཱ…པེ… ཝིསབྷཱགཏཱ ཙཱཏི ཨེཀུཔྤཱདཱདིཏཱསངྑཱཏཱ ཡཐཱརཧཾ སབྷཱགཏཱ ཝིསབྷཱགཏཱ ཙ. ཏེན ཡཐཱཝུཏྟཀཱརཎེན སམྤཡོགསྶ ཝིཔྤཡོགསྶ ཙ ལབྷནཏོ.

བྷིནྣཀཱལཱནཾ སམུདཱཡཱིནཾ སམུདཱཡཱ བྷིནྣཀཱལསམུདཱཡཱ. ཝཏྟམཱནཱ ཙ ཨེཀསྨིཾ སནྟཱནེ ཨེཀེཀདྷམྨཱ ཝཏྟནྟི. ཏསྨཱཏི ཡསྨཱ ཨེཏདེཝ, ཏསྨཱ. ཏེསཾ ཝེདནཱཀྑནྡྷཱདཱིནཾ ཝིབྷཛིཏབྦསྶ ཨེཀདེསབྷཱུཏསྶ ཨབྷཱཝཏོ. སུཁིནྡྲིཡཱདཱིནི ཝེདནཱཀྑནྡྷེཀདེསབྷཱུཏཱནིཔི. ཏེན ཝིབྷཱགཱཀརཎེན ¶ . ཡདི སམཱནཀཱལསྶ ཝིབྷཛིཏབྦསྶ ཨབྷཱཝཏོ ཙཀྑུཝིཉྙཱཎདྷཱཏཱདཡོ ཝིཉྙཱཎཀྑནྡྷསྶ ཝིབྷཱགཾ ན ཀརོནྟི, ཨཐ ཀསྨཱ ‘‘ཙཀྑུཝིཉྙཱཎདྷཱཏུ…པེ… མནོཝིཉྙཱཎདྷཱཏུ སོལ༹སཧི དྷཱཏཱུཧི ཝིཔྤཡུཏྟཱ’’ཏི ཝུཏྟནྟི ཙོདནཾ མནསི ཀཏྭཱ ཨཱཧ ‘‘ཁནྡྷཱཡཏན…པེ… ཝིཔྤཡུཏྟཱཏི ཝུཏྟ’’ནྟི. ཨེཝམེཝནྟི ཡཐཱ དྷཱཏུཝིབྷཱགེན ཝིབྷཏྟསྶ ཝིཉྙཱཎསྶ, ཨེཝམེཝཾ.

༢༣༥. ཏཾསམྤཡོགཱིབྷཱཝནྟི ཏེཧི ཁནྡྷེཧི སམྤཡོགཱིབྷཱཝཾ. ཡཐཱ ཧི སམཱནཀཱལསནྟཱནེཧི ཨེཀཙིཏྟུཔྤཱདགཏེཧི ཝེདནཱསཉྙཱཝིཉྙཱཎཀྑནྡྷེཧི སམུདཡསཙྩསྶ སམྤཡུཏྟཏཱ, ཨེཝཾ བྷིནྣསནྟཱནེཧི བྷིནྣཀཱལེཧི ཙ ཏེཧི ཏསྶ ཝིཔྤཡུཏྟཏཱཏི ཨཱཧ ‘‘ཨེཝཾ ཏཾཝིཔྤཡོགཱིབྷཱཝཾ…པེ… ན ཝུཏྟ’’ནྟི. ཝིསབྷཱགཏཱནིབནྡྷསྶ ཝིབྷཱགསྶ ཨབྷཱཝེན ཨཝིབྷཱགེཧི ཏེཧི ཏཱིཧི ཁནྡྷེཧི. ཝིབྷཱགེ ཧཱིཏིཨཱདིནཱ ཏམེཝཏྠཾ པཱཀཊཏརཾ ཀརོཏི. ཝིབྷཱགརཧིཏེཧཱིཏི སམཱནཀཱལསནྟཱནེཧི ཨེཀཙིཏྟུཔྤཱདགཏཏྟཱ ཨཝིབྷཏྟེཧི ཝེདནཱཀྑནྡྷཱདཱིཧི ན ཡུཏྟཾ ཝིཔྤཡུཏྟནྟི ཝཏྟུཾ. ཏེནཱཧ ‘‘ཝིཛྫམཱནེཧི…པེ… བྷཱཝཏོ’’ཏི. ཏཏྠ ཝིཛྫམཱནསྶ སམཱནསྶ སམཱནཛཱཏིཀསྶཱཏི ཨདྷིཔྤཱཡོ. ན ཧི ཝིཛྫམཱནཾ རཱུཔཱརཱུཔཾ ཨཉྙམཉྙསྶ ཝིསབྷཱགཾ ན ཧོཏི. ཨནུཔྤནྣཱ དྷམྨཱ ཝིཡཱཏི ཨིདཾ ཝིསདིསུདཱཧརཎདསྶནཾ. ཡཐཱ ‘‘ཨནུཔྤནྣཱ དྷམྨཱ’’ཏི ཨནཱགཏཀཱལཾ ཝུཙྩཏཱིཏི ཨཱམཊྛཀཱལབྷེདཾ, ཨེཝཾ ཡཾ ཨཱམཊྛཀཱལབྷེདཾ ན ཧོཏཱིཏི ཨཏྠོ. ཨུདྡྷརིཏབྦཾ དེསནཱཡ དེསེཏབྦནྟི ཝུཏྟཾ ཧོཏི. ཝིཛྫམཱནསྶེཝ ཝིཛྫམཱནེན སམྤཡོགོ, སམྤཡོགཱརཧསྶེཝ ¶ ཙ ཝིཔྤཡོགོཏི ཨཏྠིབྷཱཝསནྣིསྶཡཱ སམྤཡུཏྟཝིཔྤཡུཏྟཏཱཏི ཨཱཧ ‘‘པཙྩུཔྤནྣབྷཱཝཾ ནིསྶཱཡཱ’’ཏི. ཏེནེཝཱཧ ‘‘ཨཝིཛྫམཱནསྶཱ’’ཏིཨཱདི. ཏཉྩཱཏི ཨུདྡྷརཎཾ.

ཝིབྷཱགརཧིཏེཧཱིཏི ཝིསབྷཱགཏཱབྷཱཝཏོ ཨཝིབྷཱགེཧི. ཨནཱམཊྛཀཱལབྷེདེཏི ཨནཱམཊྛཀཱལཝིསེསེ. ཨཝིཛྫམཱནསྶ…པེ… སམྤཡོགོ ནཏྠཱིཏི ཨེཏེན པཱརིསེསཏོ ཝིཛྫམཱནསྶ ཙ ཝིཛྫམཱནེན སམྤཡོགོ དསྶིཏོ. ཨཝིཛྫམཱནཏཱདཱིཔཀེ བྷེདེ གཧིཏེཏི ཡཐཱགཧིཏེསུ དྷམྨེསུ ཏེཧི ཝིཔྤཡོགཱིནཾ ཨཝིཛྫམཱནབྷཱཝདཱིཔཀེ ཏེསཾཡེཝ ཝིསེསེ ‘‘ཨརཱུཔབྷཝོ ཨེཀེན ཁནྡྷེན དསཧཱཡཏནེཧི སོལ༹སཧི དྷཱཏཱུཧི ཝིཔྤཡུཏྟོ’’ཏིཨཱདིནཱ (དྷཱཏུ. ༢༤༦) གཧིཏེ ཏེནེཝ རུཔྤནཱདིནཱ བྷེདེན ཏེསཾ ¶ ཨཉྙམཉྙཾ ཝིསབྷཱགཏཱཔི གཧིཏཱ ཨེཝཱཏི ཝིཔྤཡོགོ ཧོཏཱིཏི ཡོཛནཱ. བྷེདེ པན ཨགྒཧིཏེ ཏེན ཏེན གཧཎེནཱཏི ཡཐཱཝུཏྟེ ཨཝིཛྫམཱནཏཱདཱིཔཀེ ཝིསེསེ, ཝིསབྷཱགེ ཝཱ ཨགྒཧིཏེ ‘‘ཝེདནཱ, སཉྙཱ, སངྑཱརཀྑནྡྷོ ཏཱིཧི ཁནྡྷེཧི ཨེཀེནཱཡཏནེན སཏྟཧི དྷཱཏཱུཧི སམྤཡུཏྟོ’’ཏིཨཱདིནཱ ཏེན ཏེན གཧཎེན སབྷཱགཏཱདཱིཔནེན ཝིསབྷཱགཏཱཡ ཨགྒཧིཏཏྟཱ སབྷཱགཏཱཝ ཧོཏི. ཏཐཱ ཙ སཏི སབྷཱགཏྟེ ཀཱ པནེཏྠ སབྷཱགཏཱཏི ཨཱཧ ‘‘ཝིཛྫམཱནཏཱཡ…པེ… ཧོཏཱི’’ཏི. ཏསྶཱཏི སབྷཱགཏཱཡ. ཏསྨཱཏི ཝིསབྷཱགཏཱཡ ཨལབྦྷམཱནཏྟཱ, སབྷཱགཏཱཡ ཙ ལབྦྷམཱནཏྟཱ.

༢༦༢. ཝིཏཀྐོ ཝིཡཱཏི སཝིཏཀྐསཝིཙཱརེསུ ཙིཏྟུཔྤཱདེསུ ཝིཏཀྐོ ཝིཡ. སོ ཧི ཝིཏཀྐརཧིཏཏྟཱ ཨཝིཏཀྐོ ཝིཙཱརམཏྟོ ཙ. ཏེནཱཧ ‘‘ཀོཊྛཱསནྟརཙིཏྟུཔྤཱདེསུ ཨལཱིནཱ’’ཏི. ཏཏོ ཨེཝ སོ ཨཔྤདྷཱནོ, དུཏིཡཛྷཱནདྷམྨཱ ཨེཝེཏྠ པདྷཱནཱཏི ཨཱཧ ‘‘ཡེ པདྷཱནཱ’’ཏི. ཏེནེཝཱཏི སཝིཏཀྐསཝིཙཱརེསུ ཙིཏྟུཔྤཱདེསུ ཝིཏཀྐསྶ ཨཝིཏཀྐཝིཙཱརམཏྟགྒཧཎེན ཨིདྷ ཨགྒཧིཏཏྟཱ, ཝིཏཀྐཏྟིཀེ དུཏིཡརཱསིཡེཝ ཙ ཨདྷིཔྤེཏཏྟཱ. ཨནནྟརནཡེཏི སམྤཡུཏྟེནཝིཔྤཡུཏྟཔདནིདྡེསེ. སམུདཡསཙྩེན སམཱནགཏིཀཱ སདིསཔྤཝཏྟིཀཱ. ཨིཏཱིཏི ཨིམིནཱ ཀཱརཎེན. ཏེ ཨཝིཏཀྐཝིཙཱརམཏྟཱ དྷམྨཱ ན གཧིཏཱ, སམུདཡསཙྩཾ ཝིཡ ན དེསནཱརུལ༹ྷཱ. ན སཝིཏཀྐསཝིཙཱརེཧི སམཱནགཏིཀཱཏི ཡོཛནཱ. ཡདི ཧི ཏེ སཝིཏཀྐསཝིཙཱརེཧི སམཱནགཏིཀཱ སིཡུཾ, ‘‘ཨཝིཏཀྐཝིཙཱརམཏྟེཧི དྷམྨེཧི ཡེ དྷམྨཱ སམྤཡུཏྟཱ, ཏེཧི དྷམྨེཧི ཡེ དྷམྨཱ ཝིཔྤཡུཏྟཱ, ཏེ དྷམྨཱ ན ཀེཧིཙི ཁནྡྷེཧི, ན ཀེཧིཙི ཨཱཡཏནེཧི, ཨེཀཱཡ དྷཱཏུཡཱ ཝིཔྤཡུཏྟཱ’’ཏི ཝཏྟབྦཱ སིཡུཾ. ཡསྨཱ པན ཏེ སམུདཡསཙྩེན སམཱནགཏིཀཱ. ཡཐཱ ཧི ཡེ སམུདཡསཙྩེན སམྤཡུཏྟེཧི ཝིཔྤཡུཏྟཱ, ཏེསཾ ཀེཧིཙི ཝིཔྤཡོགཾ ཝཏྟུཾ ན སཀྐཱ, ཨེཝཾ ཏེཧིཔི ¶ . ཏཐཱ ཧི ཝཀྑཏི ‘‘སམུདཡསཙྩཱདཱིནཱི’’ཏིཨཱདི. དསམོ…པེ… ཝུཏྟོཏི ཨེཏྠ དསམནཡེ ཏེཧི ཨཝིཏཀྐཝིཙཱརམཏྟེཧི ཝིཔྤཡུཏྟེཧི ཝིཔྤཡུཏྟཱནཾ སོལ༹སཧི དྷཱཏཱུཧི ཝིཔྤཡོགོ ཝུཏྟོ, ཨོསཱནནཡེ ཏེཧི ཝིཔྤཡུཏྟཱནཾ ཨཊྛཱརསཧི དྷཱཏཱུཧི སངྒཧོ ཙ ཝུཏྟོཏི ཏསྨཱ ན ཏེ སཝིཏཀྐསཝིཙཱརེཧི སམཱནགཏིཀཱཏི དསྶེཏི.

ཝིཏཀྐསཧིཏེསཱུཏི ¶ སཧཝིཏཀྐེསུ. ཏེསཱུཏི ཨཝིཏཀྐཝིཙཱརམཏྟེསུ སཧ ཝིཏཀྐེན དུཏིཡཛ྄ཛྷཱནདྷམྨེསུ, ‘‘ཨཝིཏཀྐཝིཙཱརམཏྟཱ’’ཏི གཧིཏེསུ ཝུཏྟེསཱུཏི ཨཏྠོ. སབྦེཔི ཏེཏི དུཏིཡཛ྄ཛྷཱནདྷམྨཱ ཝིཏཀྐོ ཙཱཏི སབྦེཔི ཏེ དྷམྨཱ སཀྐཱ ཝཏྟུཾ. ཏཐཱ ཧི སམྤཡོགཝིཔྤཡོགཔདནིདྡེསེ ‘‘ཨཝིཏཀྐཝིཙཱརམཏྟཱ དྷམྨཱ ཨེཀེན ཁནྡྷེན ཨེཀེནཱཡཏནེན ཨེཀཱཡ དྷཱཏུཡཱ ཀེཧིཙི སམྤཡུཏྟཱ’’ཏི ཝུཏྟཾ. ཏཏྠ ཨེཀེན ཁནྡྷེནཱཏི སངྑཱརཀྑནྡྷེན. སོ ཧི སམུདཱཡོཏི ‘‘ཨཝིཏཀྐཝིཙཱརམཏྟཱ དྷམྨཱ’’ཏི ཝུཏྟདྷམྨསམུདཱཡོ. ནནུ ཝིཏཀྐོཔེཏྠ དྷམྨསངྒཧཾ གཏོ, སོ ཙ ཝིཙཱརཏོ ཨཉྙེནཔི སམྤཡུཏྟོཏི ཙོདནཾ སནྡྷཱཡཱཧ ‘‘ན ཧི ཏདེཀདེསསྶ…པེ… ཧོཏཱི’’ཏི. ཡཐཱཏིཨཱདིནཱ ཏམེཝཏྠཾ ཨིདྡྷིཔཱདནིདསྶནེན ཝིབྷཱཝེཏི. ཏསྶཏྠོ – ཡཐཱ ཨིདྡྷིཔཱདསམུདཱཡསྶ ཨེཀདེསབྷཱུཏཱནཾ ཚནྡིདྡྷིཔཱདཱདཱིནཾ ཏཱིཧི ཁནྡྷེཧི སམྤཡོགོ ཝུཏྟོ, ཏཾསམུདཱཡསྶ ན ཧོཏི, ཨེཝཾ ཨིདྷཱཔི ཝིཏཀྐསྶ ཨཉྙེཧི སམྤཡོགོ ཨཝིཏཀྐཝིཙཱརམཏྟསྶ སམུདཱཡསྶ ན ཧོཏཱིཏི.

ཡདི ཨེཝཾ ‘‘ཨིདྡྷིཔཱདོ དྭཱིཧི ཁནྡྷེཧི སམྤཡུཏྟོ’’ཏིཨཱདི ན ཝཏྟབྦནྟི ཙེ? ནོ ན ཝཏྟབྦནྟི དསྶེནྟོ ‘‘ཡཐཱ པནཱ’’ཏིཨཱདིམཱཧ. ཏཏྠ ཏེསཱུཏི ཨིདྡྷིཔཱདེསུ. སམུདཱཡསྶཱཏི ཨིདྡྷིཔཱདསམུདཱཡསྶ. ཏེཧི ཝེདནཱཀྑནྡྷཱདཱིཧི སམྤཡུཏྟཏཱ ཝུཏྟཱ ‘‘ཨིདྡྷིཔཱདོ དྭཱིཧི ཁནྡྷེཧི སམྤཡུཏྟོ’’ཏིཨཱདིནཱ. ཏེནཱཏི ཝིཙཱརེན. ན ཧཱིཏིཨཱདིནཱ ཡཐཱདྷིགཏདྷམྨཱནཾ སམྤཡུཏྟཏཱཡ ནཝཏྟབྦཱབྷཱཝཾ ཨུདཱཧརཎདསྶནཝསེན ཝིབྷཱཝེཏི. ཀེཙི ཝིཙིཀིཙྪཱ ཏཾསཧགཏཱ ཙ མོཧཝཛྫཱ མོཧེན སམྤཡུཏྟཱ, ཀེཙི ཨསམྤཡུཏྟཱ. མོཧེནཱཏི ཝིཙིཀིཙྪཱསཧགཏམོཧམེཝ སནྡྷཱཡ ཝདཏི. ཨིཏི ཨིམིནཱ ཀཱརཎེན ན སམུདཱཡོ ཏེན མོཧེན སམྤཡུཏྟོ. ཨཉྙོ ཀོཙི དྷམྨོ ཧེཏུབྷཱཝོ ནཱཔི ཨཏྠི, ཡེན ཧེཏུནཱ སོ དསྶནེནཔཧཱཏབྦཧེཏུཀོཏི ཝུཏྟོ སམུདཱཡོ. ཨེཝནྟི ཨིམིནཱ ནཡེན ‘‘བྷཱཝནཱ…པེ… ཡོཔི སམྤཡུཏྟཱ’’ཏི ནཝཏྟབྦཏཱཡ ནིདསྶེཏབྦཱཏི ཨཏྠོ. ཨེཝནྟི ཡཐཱ དསྶནེནཔཧཱཏབྦཧེཏུཀསམུདཱཡསྶ སམྤཡུཏྟཏཱ ན ཝཏྟབྦཱ, ཨེཝཾ ཡེན དྷམྨེན ཨཝིཏཀྐ…པེ… སིཡཱ, ཏཾ ན ནཏྠི. ཏསྨཱཏི ཡསྨཱ ཨཝིཏཀྐཝིཙཱརམཏྟེསུ ཀོཙིཔི ཝིཙཱརེན ¶ ཨསམྤཡུཏྟོ ནཏྠི, ཏསྨཱ. ཏེཏི ཨཝིཏཀྐཝིཙཱརམཏྟཱ ¶ དྷམྨཱ. ཨེཀདྷམྨེཔི…པེ… ཀཏོ ཡཐཱ ‘‘ཨཔྤཙྩཡཱ དྷམྨཱ ཨསངྑཏཱ དྷམྨཱ’’ཏི.

ཚཊྛནཡསམྤཡོགཝིཔྤཡོགཔདཝཎྞནཱ ནིཊྛིཏཱ.

༧. སཏྟམནཡོ སམྤཡུཏྟེནཝིཔྤཡུཏྟཔདཝཎྞནཱ

༣༠༦. ཏེཧི སམུདཡསཙྩཱདཱིཧི ཁནྡྷཏྟཡཁནྡྷེཀདེསཱདིཀེ སམྤཡུཏྟེ སཏིཔི, སམྤཡུཏྟེཧི ཙ ཝིཔྤཡུཏྟེ རཱུཔནིབྦཱནཱདིཀེ ཏདཉྙདྷམྨེ སཏིཔི ཝིཔྤཡོགཱབྷཱཝཏོ. སངྑེཔེན ཝུཏྟམཏྠཾ ཝིཏྠཱརེན དསྶེཏུཾ ‘‘ན ཧཱི’’ཏིཨཱདི ཝུཏྟཾ. ཏཏོ ལོབྷསཧགཏཙིཏྟུཔྤཱདཏོ ཨཉྙདྷམྨཱནཾ ཨཝསིཊྛཱནཾ ཀུསལཱཀུསལཱབྱཱཀཏདྷམྨཱནཾ ཁནྡྷཱདཱིསུ ཀེནཙི ཝིཔྤཡོགོ ན ཧི ཨཏྠི ཁནྡྷཔཉྩཀཱདཱིནཾ སངྒཎྷནཏོ ཏེསཾ. ཏེ ཨེཝ ཙིཏྟུཔྤཱདཱཏི ཏེ ལོབྷསཧགཏཙིཏྟུཔྤཱདཱ ཨེཝ. ཏདཉྙདྷམྨཱནནྟི ཏདཉྙདྷམྨཱནམྤཱིཏི པི-སདྡལོཔོ དཊྛབྦོ. ཏཐཱཏི ཨིམིནཱ ན ཙ ཏེ ཨེཝ དྷམྨཱ ཨཌྜྷདུཏིཡཱཡཏནདྷཱཏུཡོ, ཨཐ ཁོ ཏེ ཙ ཏཏོ ཨཉྙེ ཙཱཏི ཨིམམཏྠཾ ཨུཔསཾཧརཏི.

ནནུ ཏདཉྙབྷཱཝཏོ ཨེཝ ཏེཧི ཨིཏརེསཾ ཝིཔྤཡོགོ སིདྡྷོཏི ཨཱཧ ‘‘ན ཙཱ’’ཏིཨཱདི. ཏདཉྙསམུདཱཡེཧཱིཏི ཏཏོ ལོབྷསཧགཏཙིཏྟུཔྤཱདཏོ ཨཉྙསམུདཱཡེཧི ཨཉྙེ ལོབྷསཧགཏཱ དྷམྨཱ ཝིཔྤཡུཏྟཱ ན ཧོནྟི. ཀསྨཱ? སམུདཱཡེ…པེ… ཝིཔྤཡོགཱབྷཱཝཏོ. ཏསྶཏྠོ – སམུདཱཡེན ལོབྷསཧགཏཏདཉྙདྷམྨརཱསིནཱ ཨེཀདེསཱནཾ ལོབྷསཧགཏདྷམྨཱནཾ ཝིཔྤཡོགཱབྷཱཝཏོ, ཏཐཱ ཡེ ཨེཀདེསཱ ཧུཏྭཱ ཨཉྙེསཾ ཨཝཡཝཱནཾ སམུདཱཡབྷཱུཏཱ, ཏེསཉྩ སམུདཱཡེན ཝིཔྤཡོགཱབྷཱཝཏོཏི. ཨནེན སམུདཱཡེན ཨཝཡཝསྶ སམུདཱཡསྶ ཨཝཡཝེན ཙ ཏསྶ ན ཝིཔྤཡོགོ, ཨཝཡཝསྶེཝ པན ཨཝཡཝེནཱཏི དསྶེཏི. ཨེས ནཡོཏི ཡྭཱཡཾ སམུདཡསཙྩེ ཝུཏྟོ ཝིདྷི, ཨེསེཝ མགྒསཙྩསུཁིནྡྲིཡཱདཱིསུ ཨརཱུཔཀྑནྡྷེཀདེསཏྟཱ ཏེསནྟི དསྶེཏི. ནིརཝསེསེསཱུཏི ཨབཧིཀཏཝིཏཀྐེསུ. ཝིཏཀྐོ ཧི སམུདཱཡཏོ ཨབཧིཀཏོ. ‘‘སོ ཧི སམུདཱཡོ’’ཏིཨཱདིཀོ ཝུཏྟནཡོ ལབྦྷཏཱིཏི ཨཱཧ ‘‘ཨགྒཧཎེ ཀཱརཎཾ ན དིསྶཏཱི’’ཏི.

ཨཉྙེསུཔི ¶ ¶ སམུདཡསཙྩཱདཱིསུ ཝིསྶཛྫནསྶ…པེ… དཊྛབྦཾ, ཡཏོ སམུདཡསཙྩཱདི ཨིདྷ ན གཧིཏནྟི ཨདྷིཔྤཱཡོ. སམྤཡུཏྟཱདྷིཀཱརཏོ ‘‘ཨཉྙེནཱ’’ཏི པདཾ སམྤཡུཏྟཏོ ཨཉྙཾ ཝདཏཱིཏི ཨཱཧ ‘‘ཨསམྤཡུཏྟེན ཨསམྨིསྶནྟི ཨཏྠོ’’ཏི. ཨིདཱནི བྱཏིརེཀེནཔི ཏམཏྠཾ པཏིཊྛཱཔེཏུཾ ‘‘ཨདུཀྑམསུཁཱ…པེ… གཧིཏཱནཱི’’ཏི ཝུཏྟཾ. ཨེཏེན ལཀྑཎེནཱཏི ‘‘ཨསམྤཡུཏྟེན ཨསམྨིསྶ’’ནྟི ཝུཏྟལཀྑཎེན. ཙིཏྟནྟི ‘‘ཙིཏྟེཧི དྷམྨེཧི ཡེ དྷམྨཱ’’ཏི པཉྷཾ ཨུཔལཀྑེཏི. སཧཡུཏྟཔདེཧི སཏྟཱཏི ‘‘ཙེཏསིཀེཧི དྷམྨེཧི ཡེ དྷམྨཱ’’ཏིཨཱདིནཱ ཙིཏྟེན སཧཡུཏྟེ དྷམྨེ དཱིཔེནྟེཧི པདེཧི ཨཱགཏཱ སཏྟ པཉྷཱ. ཏིཎྞཾ ཏིཀཔདཱནམགྒཧཎེན ཨཱུནོཏི ཀཏྭཱ. ཡེ སནྡྷཱཡ ‘‘ཏིཀེ ཏཡོ’’ཏི ཝུཏྟཾ. ཏཾ པན ཝེདནཱཔཱིཏིཏྟིཀེསུ པཙྪིམཾ, ཝིཏཀྐཏྟིཀེ པཋམནྟི པདཏྟཡཾ ཝེདིཏབྦཾ.

༣༠༩. ཨུདྡྷཊཔདེན པཀཱསིཡམཱནཱ ཨཏྠཱ ཨབྷེདོཔཙཱརེན ‘‘ཨུདྡྷཊཔད’’ནྟི ཝུཏྟཱཏི ཨཱཧ ‘‘ཨུདྡྷཊཔདེན སམྤཡུཏྟེཧཱི’’ཏི. ཏེན ཙ ཡཐཱཝུཏྟེན ཨུདྡྷཊཔདེན. མནེན ཡུཏྟཱཏི ཨེཏྠ མནནམཏྟཏྟཱ མནོདྷཱཏུ ‘‘མནོ’’ཏི ཝུཏྟཱཏི ཨཱཧ ‘‘མནོདྷཱཏུཡཱ ཨེཀནྟསམྤཡུཏྟཱ’’ཏི.

སཏྟམནཡསམྤཡུཏྟེནཝིཔྤཡུཏྟཔདཝཎྞནཱ ནིཊྛིཏཱ.

༨. ཨཊྛམནཡོ ཝིཔྤཡུཏྟེནསམྤཡུཏྟཔདཝཎྞནཱ

༣༡༧. རཱུཔཀྑནྡྷེན ཝིཔྤཡུཏྟཱ ནཱམ ཙཏྟཱརོ ཨརཱུཔིནོ ཁནྡྷཱ, ཏེསཾ ཨཉྙེཧི སམྤཡོགོ ནཱམ ནཏྠི ཏཱདིསསྶ ཨཉྙསྶ སམྤཡོགིནོ ཨབྷཱཝཏོ. སམུདཱཡསྶ ཙ ཨེཀདེསེན སམྤཡོགོ ནཏྠཱིཏི ཝུཏྟོཝཱཡམཏྠོ. ཝེདནཱཀྑནྡྷཱདཱིཧི ཝིཔྤཡུཏྟཾ རཱུཔཾ ནིབྦཱནཉྩ, ཏསྶ ཀེནཙི སམྤཡོགོ ནཏྠེཝཱཏི ཨཱཧ ‘‘རཱུཔཀྑནྡྷཱདཱིཧི…པེ… ནཏྠཱི’’ཏི. ཏེནཱཏི ‘‘རཱུཔཀྑནྡྷེན ཡེ དྷམྨཱ ཝིཔྤཡུཏྟཱ’’ཏིཨཱདིཝཙནེན.

ཨཊྛམནཡཝིཔྤཡུཏྟེནསམྤཡུཏྟཔདཝཎྞནཱ ནིཊྛིཏཱ.

༩. ནཝམནཡོ སམྤཡུཏྟེནསམྤཡུཏྟཔདཝཎྞནཱ

༣༡༩. ‘‘སམཱསཔདཾ ¶ ¶ ཨིད’’ནྟི ཝཏྭཱ ཨཡཾ ནཱམ སམཱསོཏི དསྶེནྟོ ‘‘ཡསྶ ཁནྡྷཱདིནོ’’ཏིཨཱདིམཱཧ, ཡསྶ ཝེདནཱཀྑནྡྷཱདིནོཏི ཨཏྠོ. ཡཾ ཨིདྷ སམྤཡུཏྟཾ ཝུཏྟནྟི ཨིམསྨིཾ ནཝམནཡེ ཡཾ དྷམྨཛཱཏཾ སམྤཡུཏྟནྟི ཝུཏྟཾ. རཱུཔཀྑནྡྷཱདཱིསུ ཨརཎནྟེསུ ཨབྦྷནྟརབཱཧིརམཱཏིཀཱདྷམྨེསཱུཏི ནིདྡྷཱརཎེ བྷུམྨཾ. ཏཉྷི དྷམྨཛཱཏཾ ཨཏྟནཱ སམྤཡུཏྟེན ཝེདནཱཀྑནྡྷཱདིནཱ སཡཾ སམྤཡུཏྟནྟི ནིདྡྷཱརིཏཾ. ཨཡོགོཏི ཨསམྤཡོགོ. ཝཀྑཏི དསམནཡེ. ཏཏྠ ཧི ‘‘རཱུཔཀྑནྡྷེན ཝེདནཱདཡོ ཝིཔྤཡུཏྟཱ, ཏེཧི རཱུཔཀྑནྡྷོ ཝིཔྤཡུཏྟོ’’ཏི ཝཏྭཱ ནིབྦཱནཾ ཀཐནྟི ཙོདནཾ སནྡྷཱཡཱཧ ‘‘ནིབྦཱནཾ པན སུཁུམརཱུཔགཏིཀམེཝཱ’’ཏི ཝུཏྟཾ. ‘‘མནཱཡཏནཾ ཨེཀེནཱཡཏནེན ཨེཀཱཡ དྷཱཏུཡཱ ཀེཧིཙི ཝིཔྤཡུཏྟ’’ནྟི ཨེཏྠ ཧི ཡཐཱ སུཁུམརཱུཔཾ ཝིཡ སརཱུཔཏོ ཨནུདྡྷཊམྤི ནིབྦཱནཾ ཀེཧིཙཱིཏིཔདེན གཧིཏམེཝ ཧོཏཱིཏི ཨེདིསེསུ ཋཱནེསུ ནིབྦཱནཾ སུཁུམརཱུཔགཏིཀནྟི ཝིཉྙཱཡཏི, ཨེཝམིདྷཱཔི ‘‘རཱུཔམིསྶཀེཧི ཝཱ’’ཏི ཨེཏེན ཨནུཔཱདིནྣཨནུཔཱདཱནིཡཱདཱིཧི ནིབྦཱནམིསྶཀེཧིཔི ཨསམྤཡོགོ ཝུཏྟོ ཧོཏཱིཏི དཊྛབྦོ. ཨཝིཀལཙཏུཀྑནྡྷསངྒཱཧཀེཧི པདེཧི སཧཝཏྟིནོ ཨཉྙསྶ སམྤཡོགིནོ ཨབྷཱཝཏོ ཨཏཱིཏཱནཱགཏེཧི ཙ སམྤཡོགོ ནཏྠེཝཱཏི ཏསྶ ཨཡུཛྫམཱནཏཾ དསྶེནྟོ ‘‘ཝཏྟམཱནཱནམེཝ…པེ… ཨརཱུཔབྷཝཱདཱིཧཱིཏི ཨཏྠོ’’ཏི ཨཱཧ. ཨིཏརེཏི ཡེ སམྤཡོགཾ ལབྷནྟི, ཀེ པན ཏེ རཱུཔེན ཨསམྨིསྶཱ ཨརཱུཔེཀདེསབྷཱུཏཱ. ཏེནཱཧ ‘‘ཝེདནཱཀྑནྡྷཱདཡོ’’ཏི.

ནཝམནཡསམྤཡུཏྟེནསམྤཡུཏྟཔདཝཎྞནཱ ནིཊྛིཏཱ.

༡༠. དསམནཡོ ཝིཔྤཡུཏྟེནཝིཔྤཡུཏྟཔདཝཎྞནཱ

༣༥༣. ཡེ ཝིཔྤཡུཏྟེན ཝིཔྤཡུཏྟབྷཱཝེན པཱལི༹ཡཾ ཨགྒཧིཏཱ, ཏེསུ ཀེཙི ཝིཔྤཡུཏྟསྶ དྷམྨནྟརསྶ ཨབྷཱཝཏོ ཀེཙི ཁནྡྷཱདཱིཧི ཝིཔྤཡོགསྶེཝ ཨསམྦྷཝཏོཏི ཨིམམཏྠཾ དསྶེནྟོ ‘‘དྷམྨཱཡཏནཱདིདྷམྨཱ’’ཏིཨཱདིམཱཧ. ཏཏྠ སབྦཙིཏྟུཔྤཱདགཏདྷམྨབྷཱཝཏོཏི ཨིམིནཱ བྷིནྣཀཱལཏཱདིཝིསེསཝཏོ ཨརཱུཔཀྑནྡྷསྶ ཝིཔྤཡུཏྟསྶ དྷམྨནྟརསྶ ཨབྷཱཝམཱཧ, ཨནཱརམྨཎམིསྶཀབྷཱཝཏོཏི ཨིམིནཱ པན སབྦསྶཔི. ཀཱམབྷཝོ ¶ ཨུཔཔཏྟིབྷཝོ སཉྙཱིབྷཝོ པཉྩཝོཀཱརབྷཝོཏི ¶ ཨིམེ ཙཏྟཱརོ མཧཱབྷཝཱ. ཝིཔྤཡོགཱབྷཱཝཏོཏི ཝིཔྤཡོགཱསམྦྷཝཏོ. ན ཧི ཡེ དུཀྑསཙྩཱདཱིཧི ཝིཔྤཡུཏྟཱ, ཏེཧི ཝིཔྤཡུཏྟཱནཾ ཏེསཾཡེཝ དུཀྑསཙྩཱདཱིནཾ ཁནྡྷཱདཱིསུ ཀེནཙི ཝིཔྤཡོགོ སམྦྷཝཏི.

དསམནཡཝིཔྤཡུཏྟེནཝིཔྤཡུཏྟཔདཝཎྞནཱ ནིཊྛིཏཱ.

༡༡. ཨེཀཱདསམནཡོ སངྒཧིཏེནསམྤཡུཏྟཝིཔྤཡུཏྟཔདཝཎྞནཱ

༤༠༩. ཏེཏི སངྑཱརཀྑནྡྷདྷམྨཱ. སེསེཧཱིཏི ཨཝསིཊྛེཧི ཝེདནཱསཉྙཱཝིཉྙཱཎཀྑནྡྷེཧི. ‘‘ཨེཏེན སཧ སམྦནྡྷོ’’ཏི ཨིམིནཱ པདཱནཾ སམྦནྡྷདསྶནམུཁེན ‘‘སམུདཡསཙྩེན ཡེ དྷམྨཱ སམྤཡུཏྟཱ’’ཏི པཱལི༹ཡཱ ཨཏྠཝིཝརཎཾ པཱཀཊཏརཾ ཀཏྭཱ ཀེཧིཙཱིཏིཔདསྶཏྠཾ ཀཱཏུཾ ‘‘ཀེཧིཙཱིཏི ཨེཏསྶ པནཱ’’ཏིཨཱདིམཱཧ. ཨཏྠཾ དསྶེཏུཾ ཨཱཧཱཏི སམྦནྡྷོ. ཝིསེསེཏྭཱཏི ཨེཏྠ ཏེསཾ དྷམྨཱནཾ ཏཎྷཱཝཛྫཱནཾ སངྑཱརཀྑནྡྷདྷམྨཱཡཏནདྷམྨདྷཱཏུཔརིཡཱཔནྣཏཱཀིཏྟནཾ ཝིསེསནཾ དཊྛབྦཾ, ཡཏོ ཏེ སམུདཡསཙྩེན ཁནྡྷཱདིསངྒཧེན སངྒཧིཏཱཏི ཝུཏྟཱ. སཡཾ ཨཏྟནཱ སམྤཡུཏྟོ ན ཧོཏཱིཏི ཝུཏྟཾ ‘‘ཨཏྟཝཛྫེཧཱི’’ཏི. ཏེན ཝུཏྟཾ ‘‘ཙིཏྟཾ ན ཝཏྟབྦཾ ཙིཏྟེན སམྤཡུཏྟནྟིཔི, ཙིཏྟེན ཝིཔྤཡུཏྟནྟིཔཱི’’ཏི. སམྤཡོགཱརཧེཧཱིཏི ཝིསེསནཾ སུཁུམརཱུཔཾ ནིབྦཱནནྟི དྭེ སནྡྷཱཡ ཀཏཾ, ན ཏཎྷཱདིཀེ.

ཨེཀཱདསམནཡསངྒཧིཏེནསམྤཡུཏྟཝིཔྤཡུཏྟཔདཝཎྞནཱ ནིཊྛིཏཱ.

༡༢. དྭཱདསམནཡོ སམྤཡུཏྟེནསངྒཧིཏཱསངྒཧིཏཔདཝཎྞནཱ

༤༡༧. ནཝམནཡེ སམྤཡོགཝིསིཊྛཱ སམྤཡུཏྟཱ ཨུདྡྷཊཱ, དྭཱདསམནཡེ ཙ སམྤཡོགཝིསིཊྛཱ སངྒཧིཏཱསངྒཧིཏཱཏི ཨུབྷཡཏྠཱཔི སམྤཡོགཝིསིཊྛཱཝ གཧིཏཱཏི ཨཱཧ ‘‘དྭཱདསམ…པེ… ལབྦྷནྟཱི’’ཏི.

དྭཱདསམནཡསམྤཡུཏྟེནསངྒཧིཏཱསངྒཧིཏཔདཝཎྞནཱ ནིཊྛིཏཱ.

༡༣. ཏེརསམནཡོ ཨསངྒཧིཏེནསམྤཡུཏྟཝིཔྤཡུཏྟཔདཝཎྞནཱ

༤༤༨. ཡེཧཱིཏི ¶ ¶ རཱུཔཀྑནྡྷདྷམྨཱཡཏནཱདཱིཧི. ཏཱིཧིཔི ཁནྡྷཱཡཏནཱདིསངྒཧེཧི. པུན ཡེཧཱིཏི ཨརཱུཔབྷཝཱདཱིཧི. ཨོལཱ༹རིཀཱཡཏནཱནེཝ ཧོནྟི ཨཱཡཏནདྷཱཏུསངྒཧེཧིཔི ཨསངྒཧིཏཏྟཱ. ཏེཏི ཙཏུཝོཀཱརབྷཝཱདཡོ. ཝུཏྟཱཝསེསཱཏི རཱུཔཀྑནྡྷདྷམྨཱཡཏནཱདཱིཧི ཨཝསིཊྛཱ. སཏིཔི ཨསངྒཱཧཀཏྟེ ཏེཧི ཨསངྒཧིཏཱནཾ སམྤཡོགོ ན སམྦྷཝཏཱིཏི ཝེདནཱཀྑནྡྷཱདཡོ ཨིདྷ ཏེརསམནཡེ ཝིསྶཛྫནཾ ན རུཧནྟི ནཱརོཧནྟི. ཏེནཱཧ ཨཊྛཀཐཱཡཾ ‘‘ཝེདནཱཀྑནྡྷེན ཧི ཁནྡྷཱདིཝསེན རཱུཔཱརཱུཔདྷམྨཱ ཨསངྒཧིཏཱ ཧོནྟི, ཏེསཉྩ སམྤཡོགོ ནཱམ ནཏྠཱི’’ཏི (དྷཱཏུ. ༤༤༨) ཨསངྒཱཧཀཱ ཨེཝ ན ཧོནྟི ཨཝིཀལཔཉྩཀྑནྡྷཱདིསམུདཱཡབྷཱཝཏོ.

ཏེཏི ‘‘དུཀྑསཙྩཱདཱི’’ཏི ཨཱདི-སདྡེན ཝུཏྟདྷམྨཱ. ཨསབྦ…པེ… སིཡུཾ ཨཝིཏཀྐཱཝིཙཱརཱདིདྷམྨཱ ཝིཡ. ན ཏེསཾ ཝིཔྤཡོགོ ནཏྠི ཏབྦིནིམུཏྟསྶ ཙིཏྟུཔྤཱདསྶ སམྦྷཝཏོ. ཝེདནཱཀྑནྡྷེན ཨསངྒཧིཏཱནཾ ཨནཱརམྨཎམིསྶཀཏྟཱ ན ‘‘ཝིཔྤཡོགསྶ ཨཏྠིཏཱཡཱ’’ཏི ཝུཏྟཾ. ཏཐཱ ཙཱཧ ‘‘རཱུཔཱརཱུཔདྷམྨཱ ཨསངྒཧིཏཱ’’ཏི. ཨུབྷཡཱབྷཱཝཏོཏི སམྤཡོགཝིཔྤཡོགཱབྷཱཝཏོ. ཨནཱརམྨཎསཧིཏསབྦཝིཉྙཱཎཏཾདྷཱཏུསམྤཡུཏྟཏདུབྷཡདྷམྨཱ ཨཙེཏསིཀཙེཏསིཀལོཀིཡཔདཱདཱིནཾ ཝསེན ཝེདིཏབྦཱ.

ཏེརསམནཡཨསངྒཧིཏེནསམྤཡུཏྟཝིཔྤཡུཏྟཔདཝཎྞནཱ ནིཊྛིཏཱ.

༡༤. ཙུདྡསམནཡོ ཝིཔྤཡུཏྟེནསངྒཧིཏཱསངྒཧིཏཔདཝཎྞནཱ

༤༥༦. དྷམྨསབྷཱཝམཏྟཏྟཱཏི སབྷཱཝདྷམྨཱནཾ དྷམྨམཏྟཏྟཱ ཨཝཏྠཱཝིསེསམཏྟཏྟཱ.

སམུཙྪིཛྫཏི ཨེཏེནཱཏི སམུཙྪེདོ. སངྒཧཱདིཝིཙཱརཔརིནིཊྛཱནབྷཱུཏོ ཙུདྡསམནཡོ. ཏེནཱཧ ‘‘པརིཡོསཱནེ ནཡེ’’ཏི. ཝིསྶཛྫེཏབྦདྷམྨཝིཝིཏྟཱ པུཙྪཱ མོགྷཔུཙྪཱ, སཱ ཏཐཱབྷཱུཏཱཔི ཝིསྶཛྫེཏབྦདྷམྨཱབྷཱཝསྶ ཉཱཔིཀཱ ཧོཏཱིཏི ཨཱཧ ‘‘ཏེསཾ པུཙྪཱཡ མོགྷཏྟཱ ཏེ ན ལབྦྷནྟཱི’’ཏི. མོགྷཱ པུཙྪཱ ཨེཏསྶཱཏི མོགྷཔུཙྪཀོ. ཨཊྛམོ ནཡོ ¶ ཏཏྠ སབྦཔུཙྪཱནཾ མོགྷཏྟཱ ¶ . ཏེན ཙ སཧཱཏི ཏེན ཨཊྛམནཡེན སདྡྷིཾ ཨིམསྨིཾ ཨོསཱནནཡེ ཨཊྛམནཡེ ཙ ཨོསཱནནཡེ ཙ ཨེཏེ དྷམྨཱཡཏནཱདཡོ སབྦཔྤཀཱརེན ན ལབྦྷནྟི. ཝིཔྤཡོགསྶཔི ཨབྷཱཝཱཏི ཏཏྠ ཀཱརཎམཱཧ.

ཙུདྡསམནཡཝིཔྤཡུཏྟེནསངྒཧིཏཱསངྒཧིཏཔདཝཎྞནཱ ནིཊྛིཏཱ.

དྷཱཏུཀཐཱཔཀརཎ-ཨནུཊཱིཀཱ སམཏྟཱ.

པུགྒལཔཉྙཏྟིཔཀརཎ-ཨནུཊཱིཀཱ

༡. མཱཏིཀཱཝཎྞནཱ

༡. ‘‘དྷཱཏུཀཐཾ ¶ ¶ དེསཡིཏྭཱ ཨནནྟརཾ ཏསྶ ཨཱཧ པུགྒལཔཉྙཏྟི’’ནྟི ཝུཏྟེ ཏཏྠ ཀཱརཎཾ སམུདཱགམཏོ པཊྛཱཡ ཝིབྷཱཝེནྟོ ‘‘དྷམྨསངྒཧེ’’ཏིཨཱདིམཱཧ. ཏཏྠ ཡདིཔི དྷམྨསངྒཧེ ཕསྶཱདཱིནཾ པཐཝཱིཨཱདཱིནཉྩ དྷམྨཱནཾ ནཱནཱནཡཝིཙིཏྟོ ཨནུཔདཝིབྷཱགོཔི ཀཏོ, ན སངྒཧོ ཨེཝ, སོ པན ཏེསཾ ཀུསལཏྟིཀཱདིཧེཏུདུཀཱདིཏིཀདུཀེཧི སངྒཧསནྡསྶནཏྠོཏི ཝུཏྟཾ ‘‘དྷམྨསངྒཧེ ཏིཀདུཀཱདིཝསེན སངྒཧིཏཱནཾ དྷམྨཱན’’ནྟི. ཏེནེཝ ཧི ཏཾ པཀརཎཾ ‘‘དྷམྨསངྒཧོ’’ཏི སམཉྙཾ ལབྷི. ཀཱམཉྩ དྷམྨསངྒཧེཔི ‘‘ཏསྨིཾ ཁོ པན སམཡེ ཙཏྟཱརོ ཁནྡྷཱ ཧོནྟཱི’’ཏིཨཱདིནཱ (དྷ. ས. ༥༨) ཁནྡྷཱདིཝིབྷཱགོ དསྶིཏོ, སོ པན ན ཏཐཱ སཱཏིསཡོ, ཡཐཱ ཝིབྷངྒཔཀརཎེཏི སཱཏིསཡཾ ཏཾ གཧེཏྭཱ ཨཱཧ ‘‘ཝིབྷངྒེ ཁནྡྷཱདིཝིབྷཱགཾ དསྶེཏྭཱ’’ཏི, ཡཏོ ཏཾ ‘‘ཝིབྷངྒོ’’ཏྭེཝ པཉྙཱཡིཏྠ. དྷཱཏུཀཐཱཡཱཏི ཨཱདྷཱརེ བྷུམྨཾ, ཏཐཱ ‘‘དྷམྨསངྒཧེ ཝིབྷངྒེ’’ཏི ཨེཏྠཱཔི. ཨཱདྷཱརོ ཧི སངྒཧཎཝིབྷཛནཔྤབྷེདཝཙནསངྑཱཏཱནཾ ¶ ཨཝཡཝཀིརིཡཱནཾ ཏཾསམུདཱཡབྷཱུཏཱནི པཀརཎཱནི ཡཐཱ ‘‘རུཀྑེ སཱཁཱ’’ཏི. ཀརཎཝཙནཾ ཝཱ ཨེཏཾ, དྷཱཏུཀཐཱཡ ཀརཎབྷཱུཏཱཡཱཏི ཨཏྠོ.

ཨེཏྠ ཙ ཨབྷིཉྙེཡྻདྷམྨེ དེསེནྟོ དེསནཱཀུསལོ བྷགཝཱ ཏིཀདུཀཝསེན ཏཱཝ ནེསཾ སངྒཧཾ དསྶེནྟོ དྷམྨསངྒཎིཾ དེསེཏྭཱ སངྒཧཔུབྦཀཏྟཱ ཝིབྷཱགསྶ ཏདནནྟརཾ ཁནྡྷཱདིཝསེན ཝིབྷཱགཾ དསྶེནྟོ ཝིབྷངྒཾ དེསེསི. པུན ཡཐཱཝུཏྟཝིབྷཱགསངྒཧཡུཏྟེ དྷམྨེ སངྒཧཱསངྒཧཱདིནཡཔྤབྷེདཏོ དསྶེནྟོ དྷཱཏུཀཐཾ དེསེསི ཏསྶཱ ཨབྦྷནྟརབཱཧིརམཱཏིཀཱསརཱིརཀཏྟཱ. ན ཧི སཀྐཱ ཁནྡྷཱདིཀེ ཀུསལཱདིཀེ ཙ ཝིནཱ སངྒཧཱསངྒཧཱདིནཡཾ ནེཏུནྟི. ཏེནཱཧ ‘‘ཏཐཱསངྒཧིཏཝིབྷཏྟཱན’’ནྟི. ཨེཝཾ སངྒཧཏོ ཝིབྷཱགཏོ པབྷེདཏོ ཙ དྷམྨཱནཾ དེསནཱ ཡསྶཱ ¶ པཉྙཏྟིཡཱ ཝསེན ཧོཏི, ཡོ ཙཱཡཾ ཡཐཱཝུཏྟདྷམྨུཔཱདཱནོ པུགྒལཝོཧཱརོ, ཏསྶ ཙ སམཡཝིམུཏྟཱདིཝསེན ཝིབྷཱགོ, ཏཾ སབྦཾ ཝིབྷཱཝེཏུཾ པུགྒལཔཉྙཏྟི དེསིཏཱཏི ཨིདམེཏེསཾ ཙཏུནྣཾ པཀརཎཱནཾ དེསནཱནུཀྐམཀཱརཎཾ དཊྛབྦཾ.

ཏེསནྟི དྷམྨཱནཾ. སབྷཱཝཏོཏི ‘‘ཕསྶོ ཝེདནཱ’’ཏིཨཱདིསབྷཱཝཏོ. ཨུཔཱདཱཡཱཏི ‘‘པུགྒལོ སཏྟོ པོསོ’’ཏིཨཱདིནཱ ཁནྡྷེ ཨུཔཱདཱཡ. པཉྙཱཔནཾ ཡཱཡ ཏཛྫཱཨུཔཱདཱདིབྷེདཱཡ པཉྙཏྟིཡཱ ཧོཏི, ཏཾ པཉྙཏྟིཾ. པབྷེདཏོཏི ཁནྡྷཱདིསམཡཝིམུཏྟཱདིཝིབྷཱགཏོ. ཡཱཡ པཉྙཏྟིཡཱ སབྷཱཝཏོ ཨུཔཱདཱཡ ཙ པཉྙཱཔནནྟི སངྑེཔཏོ ཝུཏྟམཏྠཾ ཝིཝརནྟོ ‘‘ཏཏྠ ཡེ དྷམྨེ’’ཏིཨཱདིམཱཧ. ཏཏྠ ཨསབྷཱཝཔཉྙཏྟིཡཱཔི མཱུལབྷཱུཏཾ ཨུཔཱདཱནཾ སབྷཱཝདྷམྨོ ཨེཝ, ཀེཝལཾ པན ཏེསཾ པཝཏྟིཨཱཀཱརབྷེདསནྣིསྶཡཏོ ཝིསེསོཏི དསྶེནྟོ ‘‘ཡེ དྷམྨེ…པེ… ཧོཏཱི’’ཏི ཨཱཧ. ཏཏྠ པུབྦཱཔརིཡབྷཱཝེན པཝཏྟམཱནེཏི ཨིམིནཱ པབནྡྷསནྣིསྶཡཏཾ དསྶེནྟོ སནྟཱནཔཉྙཏྟིཾ ཝདཏི, ཨསབྷཱཝསམཱུཧཝསེནཱཏི ཨིམིནཱ སེསཔཉྙཏྟིཾ. ཏིསྶོ ཧི པཉྙཏྟིཡོ སནྟཱནཔཉྙཏྟི སམཱུཧཔཉྙཏྟི ཨཝཏྠཱཝིསེསཔཉྙཏྟཱིཏི. ཏཏྠ པབནྡྷོ སནྟཱནོ. སམུདཱཡོ སམཱུཧོ. ཨུཔྤཱདཱདིཀོ དཧརབྷཱཝཱདིཀོ ཙ ཨཝཏྠཱཝིསེསོ. ཏེསུ ཨསབྷཱཝགྒཧཎེན ཝིནཱ པབནྡྷསམཱུཧཱནཾ ཨསབྷཱཝཏྟེ སིདྡྷེ ཨསབྷཱཝསམཱུཧཝསེནཱཏི ཨསབྷཱཝགྒཧཎཾ པབནྡྷསམཱུཧཝིནིམུཏྟཔཉྙཏྟིསནྡསྶནཏྠནྟི ཏེན ཨཝཏྠཱཝིསེསཔཉྙཏྟིཡཱ པརིགྒཧོ ཝུཏྟོཏི ཝེདིཏབྦོ.

ཏེསནྟི པུབྦེ ཡཾ-སདྡེན པརཱམཊྛཱནཾ ཨིནྡྲིཡབདྡྷདྷམྨཱནཾ. ཏེནེཝཱཧ ‘‘ཨཉྙེསཉྩ བཱཧིརརཱུཔནིབྦཱནཱན’’ནྟི. སསབྷཱཝསམཱུཧསསབྷཱཝཔྤབྷེདཝསེནཱཏི རཱུཔཀྑནྡྷཱདིསསབྷཱཝསམཱུཧཝསེན ཙཀྑཱཡཏནཱདིསསབྷཱཝཝིསེསཝསེན ཙ. ‘‘སསབྷཱཝསམཱུཧསབྷཱཝབྷེདཝསེནཱ’’ཏི ཙ པཱཋོ. ཏཏྠ སམཱུཧསབྷཱཝོཏི ¶ སབྷཱཝསནྟཱནཾ ཨཝཏྠཱཝིསེསཝིདྷུརཾ སམཱུཧཝསེན ལཀྑཎམེཝཱཧ. ཏཐཱ ཧི ཁནྡྷཔཉྙཏྟིཡཱཔི སབྷཱཝཔཉྙཏྟིཏཱ ཝུཏྟཱ. ཏཱཡཱཏི ཨཱཡཏནཔཉྙཏྟིཨཱདིཔྤབྷེདཱཡ སབྷཱཝཔཉྙཏྟིཡཱ. ཝིབྷཏྟཱ སབྷཱཝཔཉྙཏྟཱིཏི ‘‘ཕསྶོ ཕུསནཱ’’ཏིཨཱདིནཱ (དྷ. ས. ༢) ཝིབྷཏྟཱ ཕསྶཱདིསབྷཱཝཔཉྙཏྟི. སབྦཱཔཱིཏི པི-སདྡེན སབྷཱཝདྷམྨེསུ སཱམཉྙཝསེན པཝཏྟཾ ཀུསལཱདིཔཉྙཏྟིཾ སངྒཎྷཱཏི. རཱུཔཱདིདྷམྨཱནཾ སམཱུཧོ སནྟཱནེན ¶ པཝཏྟམཱནོ ཨཝཏྠཱཝིསེསསཧིཏོ ཨེཀཏྟགྒཧཎནིབནྡྷནོ སཏྟོཏི ཝོཧརཱིཡཏཱིཏི སོ སབྷཱཝདྷམྨོ ནཱམ པན ན ཧོཏཱིཏི ཨཱཧ ‘‘པུགྒལཔཉྙཏྟི པན ཨསབྷཱཝཔཉྙཏྟཱི’’ཏི. ཏཱཡཱཏི པུགྒལཔཉྙཏྟིཡཱ. ཡསྨཱ པན དྷམྨཱནཾ པབནྡྷོ སམཱུཧོ ཙ དྷམྨསནྣིསྶིཏོཏི ཝཏྟབྦཏཾ ཨརཧཏི, ཏསྨཱ ‘‘པརིཉྙེཡྻཱདིསབྷཱཝདྷམྨེ ཨུཔཱདཱཡ པཝཏྟིཏོ’’ཏི ཝུཏྟཾ.

ཝིཛྫམཱནཔཉྙཏྟི པན ‘‘སབྷཱཝཔཉྙཏྟཱི’’ཏི ཝུཏྟཱ, ཨཝིཛྫམཱནཔཉྙཏྟི ‘‘ཨསབྷཱཝཔཉྙཏྟཱི’’ཏི ཝུཏྟཱ. སབྦཱ པཉྙཏྟིཡོཏི ཨུཔཱདཱཡཔཉྙཏྟིཀིཙྩཔཉྙཏྟིཨཱདཡོ སབྦཱ པཉྙཏྟིཡོ. ཡདི སབྦཱ པཉྙཏྟིཡོ ཨིདྷ དསྶིཏཱ ཧོནྟི, ཀཐཾ ‘‘པུགྒལཔཉྙཏྟཱི’’ཏི ནཱམཾ ཛཱཏནྟི ཨཱཧ ‘‘ཁནྡྷཱདིཔཉྙཏྟཱིསཱུ’’ཏིཨཱདི. ཨཉྙཏྠཱཏི དྷམྨསངྒཧཱདཱིསུ. ཡེ དྷམྨེཏི ཡེ ཁནྡྷཱདིདྷམྨེ. པཉྙཏྟིཡཱ ཝཏྠུབྷཱཝེནཱཏི པཉྙཱཔནསྶ ཨདྷིཊྛཱནབྷཱཝེན. ཨདྷིཊྛཱནཉྷི པཉྙཱཔེཏབྦདྷམྨཱ པཉྙཱཔནསྶ. ཨེཝཉྩ ཀཏྭཱ ཁནྡྷཱདཱིཧི སདྡྷིཾ པུགྒལོ གཧིཏོ. ཡེ དྷམྨེཏི ཝཱ ཡེ པཉྙཏྟིདྷམྨེ. པཉྙཱཔེཏུཀཱམོཏི ནིཀྑིཔིཏུཀཱམོ ཝཏྠུབྷེདཏོ ཨསངྐརཏོ ཋཔེཏུཀཱམོ. པཉྙཏྟིཔརིཙྪེདནྟི ཙ ཝཏྠུབྷེདབྷིནྣཾ པཉྙཏྟིབྷཱུཏཾ པརིཙྪེདཾ. ཨེཝམེཏྠ ཨཏྠོ དཊྛབྦོ.

སཱམཉྙཔྤབྷེདཔཉྙཱཔནཱཏི སཱམཉྙབྷཱུཏཱནཾ ཝིསེསབྷཱུཏཱནཉྩ ཨཏྠཱནཾ པཉྙཱཔནཱ. ཏེསནྟི ཨཏྠ-སདྡཱཔེཀྑཱཡ པུལླིངྒནིདྡེསོ. ཏཏྠཱཏི པཉྙཱཔནཱཡ ཨཏྠདསྶནབྷཱུཏེསུ དསྶནཱདཱིསུ. ཨིདམེཝཾནཱམཀནྟི ཨིདཾ རུཔྤནཱདིཨཏྠཛཱཏཾ ཨིཏྠནྣཱམཀཾ རཱུཔཀྑནྡྷཝེདནཱཀྑནྡྷཱདིསམཉྙཾ. ཏཾཏཾཀོཊྛཱསིཀཀརཎནྟི རཱུཔཝེདནཱདིཏཾཏཾཨཏྠཝིབྷཱགཔརིཡཱཔནྣཏཱཔཱདནཾ. ཏཐཱ སཉྙུཔྤཱདཱནམེཝཱཏི ཨཱཧ ‘‘བོདྷནམེཝ ནིཀྑིཔནཱ’’ཏི. བོདྷནཉྷི བོདྷནེཡྻསནྟཱནེ བོདྷེཏབྦསྶ ཨཏྠསྶ ཋཔནནྟི ཀཏྭཱ ‘‘ནིཀྑིཔནཱ’’ཏི ཝུཏྟཾ. ‘‘པཉྙཱཔནཱ’’ཏིཨཱདིནཱ བྷཱཝསཱདྷནེན ཝཏྭཱ སཱདྷནནྟརཱམསནེན ཨཏྠནྟརཔརིཀཔྤཱསངྐཱ སིཡཱཏི ཏཾ ནིཝཱརེཏུཾ ‘‘ཡོ པནཱཡཾ…པེ… ཝེདིཏབྦོ’’ཏི ཨཱཧ. ཏེསཾ ཏེསཾ དྷམྨཱནནྟི ཏཾཏཾཔཉྙཱཔེཏབྦདྷམྨཱནཾ. དསྶནབྷཱུཏཱཡ ནཱམཔཉྙཏྟིཡཱ དིཊྛཏཱཡ, ཋཔནབྷཱུཏཱཡ ཋཔིཏཏཱཡ. ཏཾནིམིཏྟཏནྟི ཏསྶ དསྶནསྶ ཋཔནསྶ ཙ ནིམིཏྟཀཱརཎཏཾ. ནིམིཏྟཉྷི ཀཏྟུབྷཱཝེན ¶ ཝོཧརཱིཡཏི ཡཐཱ ‘‘བྷིཀྑཱ ཝཱསེཏཱི’’ཏི, ‘‘ཨརིཡབྷཱཝཀརཱནི སཙྩཱནི ཨརིཡསཙྩཱནཱི’’ཏི ཙ.

པཱལི༹ཡཾ ¶ ཨནཱགཏཏནྟི ཝིཛྫམཱནཏཱདིཝིསེསཝཙནེན སཧ པཱཋཱནཱརུལ༹ྷཏཾ. ཝིཛྫམཱནསྶ སཏོཏི ཝིཛྫམཱནསྶ སམཱནསྶཱཏི ཨིམམཏྠཾ དསྶེནྟོ ‘‘ཝིཛྫམཱནབྷཱུཏསྶཱཏི ཨཏྠོ’’ཏི ཨཱཧ. ཏཐཱཏི སཙྩིཀཊྛཔརམཏྠཝསེན ཨཝིཛྫམཱནསྶ ཨནུཔལབྦྷམཱནསྶ. ཏཾ པན ཨནུཔལབྦྷམཱནཏཾ ཏཐཱ-སདྡེན བྱཏིརེཀཝསེན དཱིཔིཏཾ པཱཀཊཏརཾ ཀཱཏུཾ ‘‘ཡཐཱ ཀུསལཱདཱིནཱི’’ཏིཨཱདིམཱཧ. ཏཏྠ ཝིནིཝཏྟསབྷཱཝཱནཱིཏི ཝིབྷཏྟསབྷཱཝཱནི. ཨུཔལདྡྷཱིཏི གཧཎཾ. ཏེནཱཀཱརེནཱཏི ཏེན རཱུཔཝེདནཱདིཨཱཀཱརེན ཨཝིཛྫམཱནསྶ. ཨཉྙེནཱཀཱརེནཱཏི ཏཏོ རཱུཔཝེདནཱདིཏོ ཨཉྙེན ཏབྦིནིམུཏྟེན པཉྙཱཔེཏབྦཔཉྙཱཔནཱཀཱརེན ཝིཛྫམཱནསྶ. པཉྙཏྟིདུཀེ ཝུཏྟམེཝ ‘‘ཨཡཉྩ ཝཱདོ སེཝཏྠིཀཐཱཡ པཊིསིདྡྷོ’’ཏིཨཱདིནཱ. ལོཀནིརུཏྟིམཏྟསིདྡྷསྶཱཏི ཨེཏྠ མཏྟགྒཧཎཾ ཏསྶ པཉྙཏྟིཝཏྠུསྶ ན ཀེཝལཾ ཝིཛྫམཱནསབྷཱཝཏཱནིཝཏྟནཏྠམེཝ, ཨཐ ཁོ ཝིཔརཱིཏགྒཱཧནིཝཏྟནཏྠམྤཱིཏི དསྶེནྟོ ‘‘ཨནབྷིནིཝེསེན ཙིཏྟེནཱ’’ཏི ཨཱཧ. ཙཏུསཙྩཔཉྩཀྑནྡྷཱདིཝིནིམུཏྟཾ སཙྩནྟརཁནྡྷནྟརཱདིཀཾ པཉྩམསཙྩཱདིཀཾ. སཙེ ཏཾ ཀོཙི ཨཏྠཱིཏི པཊིཛཱནེཡྻ, ཨཡཱཐཱཝགཧིཏསྶ ཏཾ ཝཱཙཱཝཏྠུམཏྟམེཝསྶཱཏི དསྶེནྟོ ཨཱཧ ‘‘སཱབྷིནིཝེསེན…པེ… ཝུཏྟ’’ནྟི. ཨུདྡེསེ ནིདྡེསེ ཙ སཏྟཝནྟཾ པདྷཱནབྷཱཝེན ཨཱགམནཾ སནྡྷཱཡཱཧ ‘‘སརཱུཔཏོ ཏིསྶནྣཾ ཨཱགཏཏ’’ནྟི. གུཎབྷཱཝེན པན ཨུདྡྷཾསོཏཔཉྙཱཝིམུཏྟཔཱསཱཎལེཁཱདིགྒཧཎེསུ ཨིཏརཱཔི ཏིསྶོ པཉྙཏྟིཡོ ཨིམསྨིཾ པཀརཎེ ཨཱགཏཱ ཨེཝ.

ཡཐཱཝུཏྟསྶ…པེ… ཨཝིརོདྷེནཱཏི ‘‘ཝིཛྫམཱནཔཉྙཏྟི ཨཝིཛྫམཱནཔཉྙཏྟཱི’’ཏི ཨེཝཾ ཝུཏྟཔྤཀཱརསྶ ཨཝིལོམནེན. ཨཱཙརིཡཝཱདཱཏི ཙེཏྠ ཨཏྟནོམཏིཡོ ཝེདིཏབྦཱ, ཨཉྙཏྠ པན ཨཊྛཀཐཱ ཙ. ཡཐཱ ཙ ཨཝིརོདྷོ ཧོཏི, ཏཾ དསྶེནྟོ ‘‘ཏསྨཱ’’ཏིཨཱདིམཱཧ. ཏཏྠ ཨཝིཛྫམཱནཏྟཱ པཉྙཱཔེཏབྦམཏྟཏྠེན པཉྙཏྟཱིཏི ཨེཏེན ‘‘ཨཝིཛྫམཱནཱ པཉྙཏྟི ཨཝིཛྫམཱནཔཉྙཏྟཱི’’ཏི ཨིམཾ སམཱསཝིཀཔྤམཱཧ. ཨཝིཛྫམཱནཔཉྙཏྟཱིཏི ཨེཏྠ ཧི དྭེ སམཱསཱ ཨཝིཛྫམཱནསྶ, ཨཝིཛྫམཱནཱ ཝཱ པཉྙཏྟཱིཏི ཨཝིཛྫམཱནཔཉྙཏྟི. ཏེསུ པུརིམེན ནཱམཔཉྙཏྟི ཝུཏྟཱ, དུཏིཡེན ཨུཔཱདཱཔཉྙཏྟིཨཱདིབྷེདཱ ཨིཏརཱཔི. སསབྷཱཝཾ ཝེདནཱདིཀཾ. ཏཛྫཔརམཏྠནཱམལཱབྷཏོཏི ཏཛྫསྶ ཏདནུརཱུཔསྶ པརམཏྠསྶ ཨནྭཏྠསྶ ནཱམསྶ ལབྷནཏོ, ཨནུབྷཝནཱདིསབྷཱཝཱནཾ དྷམྨཱནཾ པརམཏྠིཀསྶ ཝེདནཱདིནཱམསྶ ལབྷནཏྟཱཏི ཨཏྠོ ¶ . ཨེཏེན ཝིསེསནིཝཏྟིཨཏྠོ ¶ མཏྟ-སདྡོ, ཏེན ཙཱཡཾ ཝིསེསོ ནིཝཏྟིཏོཏི དསྶེཏི. པརཏོ ལབྷིཏབྦནྟི པརཾ ཨུཔཱདཱཡ ལདྡྷབྦཾ ཡཐཱ རཱུཔཱདིཀེ ཨུཔཱདཱཡ སཏྟོཏི ནིསྶབྷཱཝསམཱུཧསནྟཱནཱདི པཉྙཏྟིཝཏྠུ. ཨེཀཏྟེནཱཏི ཨནཉྙཏྟེན. ཨནུཔལབྦྷསབྷཱཝཏཱ ཉཱཎེན ཨགྒཧེཏབྦསབྷཱཝཏཱ, ཡཏོ ཏེ ནཝཏྟབྦཱཏི ཝུཙྩནྟི.

སསཱུཀསཱལིརཱསིཨཱདིཨཱཀཱརེན སཾཀུཙིཏགྒོ ཝཱསཝཝཱསུདེཝཱདཱིནཾ ཝིཡ མོལིཝིསེསོ ཀིརཱིཊཾ, སོ པན མཀུཊཝིསེསོཔི ཧོཏིཡེཝཱཏི ཨཱཧ ‘‘ཀིརཱིཊཾ མཀུཊ’’ནྟི. སབྦསམོརོདྷོཏི སབྦཱསཾ ཝིཛྫམཱནཔཉྙཏྟིཨཱདཱིནཾ ཚནྣཾ པཉྙཏྟཱིནཾ ཨནྟོཀརཎཾ. སངྑཱཏབྦཔྤདྷཱནཏྟཱཏི ཨིདཾ ལཀྑཎཝཙནཾ. ན ཧི སབྦཱཔི ཨུཔནིདྷཱཔཉྙཏྟིསངྑཱཝསེན པཝཏྟཱ, ནཱཔི སབྦཱ སངྑཱཏབྦཔྤདྷཱནཱ. དུཏིཡཾ ཏཏིཡནྟིཨཱདིཀཾ པན ཨུཔནིདྷཱཔཉྙཏྟིཡཱ, དྭེ ཏཱིཎཱིཏིཨཱདིཀཾ ཨུཔནིཀྑིཏྟཔཉྙཏྟིཡཱ ཨེཀདེསཾ ཨུཔལཀྑཎཝསེན དསྶེནྟོ ཏསྶ ཙ སངྑྱེཡྻཔྤདྷཱནཏཱཡཱཧ ‘‘སངྑཱཏབྦཔྤདྷཱནཏྟཱ’’ཏི. པཱུརཎཏྠོ ཧི སདྡོ ཏདཏྠདཱིཔནམུཁེན པཱུརེཏབྦམཏྠཾ དཱིཔེཏི. སོ ཙ སངྑཱཝིསཡོ པདྷཱནོཝཱཏི དུཏིཡཱདཱིནཾ པཉྙཏྟཱིནཾ སངྑཱཏབྦཔྤདྷཱནཏཱ ཝུཏྟཱ. ཡཱཝ ཧི དསསངྑཱ སངྑྱེཡྻཔྤདྷཱནཱཏི. ཏཐཱ དྭེ ཏཱིཎཱིཏིཨཱདཱིནམྤི པཉྙཏྟཱིནཾ. སངྑཱཏབྦོ པན ཨཏྠོ ཀོཙི ཝིཛྫམཱནོ, ཀོཙི ཨཝིཛྫམཱནོ, ཀོཙི སཧ ཝིསུཉྩ ཏདུབྷཡཾ མིསྶོཏི ཚཔི པཉྙཏྟིཡོ བྷཛཏཱིཏི.

ཨིཏརཱཏི ཨུཔཱདཱསམོདྷཱནཏཛྫཱསནྟཏིཔཉྙཏྟིཡོ ཝུཏྟཱཝསེསཱ ཨུཔནིདྷཱཔཉྙཏྟིཨུཔནིཀྑིཏྟཔཉྙཏྟིཡོ ཙ. སཏྟརཐཱདིབྷེདཱ ཨུཔཱདཱཔཉྙཏྟི, དཱིགྷརསྶཱདིབྷེདཱ ཨུཔནིདྷཱཔཉྙཏྟི ཙ ཨཝིཛྫམཱནཔཉྙཏྟི. ཧཏྠགཏཱདིཝིསིཊྛཱ ཨུཔནིདྷཱཔཉྙཏྟི, སམོདྷཱནཔཉྙཏྟི ཙ ཨཝིཛྫམཱནེནཨཝིཛྫམཱནཔཉྙཏྟི. ཏཐེཝ ‘‘སུཝཎྞཝཎྞོ བྲཧྨསྶརོ’’ཏིཨཱདིཀཱ ཝིཛྫམཱནགབྦྷཱ ཝིཛྫམཱནེནཨཝིཛྫམཱནཔཉྙཏྟིཾ བྷཛནྟཱིཏི ཨཱཧ ‘‘ཡཐཱཡོགཾ ཏཾ ཏཾ པཉྙཏྟི’’ནྟི. ཏེན ཝུཏྟཾ ‘‘དུཏིཡཾ ཏཏིཡཾ…པེ… བྷཛནྟཱི’’ཏི. ཡཉྷཱིཏིཨཱདི ཡཐཱཝུཏྟཨུཔནིདྷཱཨུཔནིཀྑིཏྟཔཉྙཏྟཱིནཾ ཨཝིཛྫམཱནེནཨཝིཛྫམཱནཔཉྙཏྟིབྷཱཝསམཏྠནཾ. ཏཏྠ ཏཉྩ སངྑཱནནྟི ཡཾ ‘‘པཋམཾ ཨེཀ’’ནྟིཨཱདིཀཾ སངྑཱནཾ, ཏཉྩ སངྑཱམུཁེན གཧེཏབྦརཱུཔཾ. ཙ-སདྡེན སངྑྱེཡྻཾ སངྒཎྷཱཏི. ཏམྤི ཧི པཉྙཱཔེཏབྦཾ པཉྙཏྟཱིཏི. ཏསྶཱ པན པརམཏྠཏོ ཨབྷཱཝོ ཝུཏྟོཡེཝ. ཀིཉྩི ¶ ནཏྠཱིཏི པརམཏྠཏོ ཀིཉྩི ནཏྠི. ཏཐཱཏི ཨིམིནཱ ཨཝིཛྫམཱནེནཨཝིཛྫམཱནབྷཱཝནྟི ཨེཏཾ ཨཱཀཌྜྷཏི. ཏེནཱཧ ‘‘ན ཧི…པེ… ཝིཛྫམཱནོ’’ཏི.

ཨོཀཱསེཏི ¶ ཨཝཱིཙིཔརནིམྨིཏཝསཝཏྟཱིཔརིཙྪིནྣེ པདེསེ. སོ ཧི ཀཱམཱདྷིཊྛཱནཏོ ‘‘ཀཱམོ’’ཏི ཝུཙྩཏི. ཀམྨནིབྦཏྟཀྑནྡྷེསཱུཏི ཨིམིནཱ ཨུཏྟརཔདལོཔེན ཀཱམབྷཝཾ ‘‘ཀཱམོ’’ཏི ཝདཏི. བྷཎནཾ སདྡོ ཙེཏནཱ ཝཱ, ཏཾསམངྒིཏཱཡ ཏབྦིསིཊྛེ པུགྒལེ བྷཱཎཀོཏི པཉྙཏྟཱིཏི ཨཱཧ ‘‘ཝིཛྫམཱནེནཨཝིཛྫམཱནཔཉྙཏྟིཔཀྑཾ བྷཛཏཱི’’ཏི. ཡེབྷུཡྻེན རཱུཔཱཡཏནགྒཧཎམུཁེན རཱུཔསངྑཱཏེན སཎྛཱནཾ གཡ྄ཧཏཱིཏི ཏསྶ ཏེན ཨབྷེདོཔཙཱརཾ ཀཏྭཱ ཝུཏྟཾ ‘‘རཱུཔཱཡཏནསངྑཱཏེན སཎྛཱནེནཱ’’ཏི. ཡཾ ཨབྷེདོཔཙཱརཾ བྷིནྡིཏུཾ ཨཛཱནནྟཱ ནིཀཱཡནྟརིཡཱ རཱུཔཱཡཏནཾ སཎྛཱནསབྷཱཝཾ པཊིཛཱནནྟི. ‘‘ཀིསོ པུགྒལོ, ཐཱུལོ པུགྒལོ, ཀིསོ དཎྜོ, ཐཱུལོ དཎྜོ’’ཏིཨཱདིནཱ པུགྒལཱདཱིནཾ པཉྙཱཔནཱ ཏཐཱཏཐཱསནྣིཝིཊྛེ རཱུཔསངྑཱཏེ ཀིསཱདིསཎྛཱནཔཉྙཏྟི, ན རཱུཔཱཡཏནམཏྟེཏི ཨཱཧ ‘‘སཎྛཱནནྟི ཝཱ རཱུཔཱཡཏནེ ཨགྒཧིཏེ’’ཏི. པཙྩཏྟདྷམྨནཱམཝསེནཱཏི ‘‘པཐཝཱི ཕསྶོ’’ཏིཨཱདིནཱ དྷམྨཱནཾ ཏཾཏཾནཱམཝསེན. ཀིཙྩཔཉྙཏྟིཨཱདིཝིབྷཱགེན པཝཏྟོ ཨཡམྤི ཨཱཙརིཡཝཱདོ ‘‘ཀིཙྩཔཉྙཏྟི ཨེཀཙྩཱ བྷཱུམིཔཉྙཏྟི པཙྩཏྟཔཉྙཏྟི ཨསངྑཏཔཉྙཏྟི ཙ ཝིཛྫམཱནཔཉྙཏྟི, ལིངྒཔཉྙཏྟི ཨེཀཙྩཱ པཙྩཏྟཔཉྙཏྟི ཙ ཨཝིཛྫམཱནཔཉྙཏྟི, ཨེཀཙྩཱ ཀིཙྩཔཉྙཏྟི ཝིཛྫམཱནེནཨཝིཛྫམཱནཔཉྙཏྟི, ཨེཀཙྩཱ བྷཱུམིསཎྛཱནཔཉྙཏྟི ཝིཛྫམཱནེན ཝཱ ཨཝིཛྫམཱནེན ཝཱ ཨཝིཛྫམཱནཔཉྙཏྟཱི’’ཏི དསྶིཏཏྟཱ ‘‘དྷམྨཀཐཱ ཨིཏྠིལིངྒ’’ནྟིཨཱདཱིནཾ ཝིཛྫམཱནེནཝིཛྫམཱནཔཉྙཏྟིབྷཱཝོ, ཨཝིཛྫམཱནེནཨཝིཛྫམཱནཔཉྙཏྟིབྷཱཝོ ཙ དསྶིཏནཡོཏི ཨཱཧ ‘‘སབྦསངྒཱཧཀོཏི དཊྛབྦོ’’ཏི. ཨུཔཱདཱཔཉྙཏྟིཨཱདིབྷཱཝོ ཙེཏྠ ཀིཙྩཔཉྙཏྟིཨཱདཱིནཾ ཀིཙྩཔཉྙཏྟིཨཱདིབྷཱཝོ ཙ ཏཱསཾ ཡཐཱརཧཾ ཝིབྷཱཝེཏབྦོ.

༢. སངྑེཔཔྤབྷེདཝསེནཱཏི ‘‘ཡཱཝཏཱ པཉྩཀྑནྡྷཱ’’ཏི སབྦེཔི ཁནྡྷེ ཁནྡྷབྷཱཝསཱམཉྙེན སཾཁིཔནཝསེན, ‘‘ཡཱཝཏཱ རཱུཔཀྑནྡྷོ’’ཏིཨཱདིནཱ ཁནྡྷཱནཾ ཏཏོ སཱམཉྙཏོ པཀཱརེཧི བྷིནྡནཝསེན ཙ. ཨཡཾ ཨཏྠོཏི ཨཡཾ པཉྙཏྟིསངྑཱཏོ ཨཏྠོ. སཱམཉྙཏོ ཝཱ ཧི དྷམྨཱནཾ པཉྙཱཔནཾ ཧོཏི ཝིསེསཏོ ཝཱ. ཝིསེསོ ཙེཏྠ ཨཏྟནོ སཱམཉྙཱཔེཀྑཱཡ ཝེདིཏབྦོ, ཝིསེསཱཔེཀྑཱཡ པན སོཔི སཱམཉྙཾ སམྤཛྫཏཱིཏི ‘‘ཀིཏྟཱཝཏཱ ཁནྡྷཱནཾ ཁནྡྷཔཉྙཏྟཱི’’ཏི པུཙྪཱཡ སངྑེཔཏོ ཝིསྶཛྫནཝསེན ¶ ‘‘ཡཱཝཏཱ པཉྩཀྑནྡྷཱ’’ཏི ཝུཏྟནྟི ཏཏྠཱཔི ‘‘ཁནྡྷཱནཾ ཁནྡྷཔཉྙཏྟཱི’’ཏི ཨཱནེཏྭཱ ཡོཛེཏབྦནྟི ཨཱཧ ‘‘ཡཱཝཏཱ…པེ… པཉྙཏྟཱི’’ཏི. ‘‘ཡཱཝཏཱ པཉྩཀྑནྡྷཱ, ཨེཏྟཱཝཏཱ ཁནྡྷཱནཾ ཁནྡྷཔཉྙཏྟི. ཡཱཝཏཱ རཱུཔཀྑནྡྷོ…པེ… ཝིཉྙཱཎཀྑནྡྷོ, ཨེཏྟཱཝཏཱ ཁནྡྷཱནཾ ཁནྡྷཔཉྙཏྟཱི’’ཏི ཨེཝམེཏྠ པཱལི༹ཡོཛནཱ ཀཱཏབྦཱ. ཨེཝཉྷི སངྑེཔཏོ པབྷེདཏོ ཙ ཁནྡྷཔཉྙཏྟི ཝིསྶཛྫིཏཱ ཧོཏི. ཏཐཱ ཧི ཨིམསྶེཝ ཨཏྠསྶ ཨཊྛཀཐཱཡཾ ཝུཏྟབྷཱཝཾ ¶ དསྶེནྟོ ‘‘ཡཏྟཀེན…པེ… ཨཱདིཀེནཱ’’ཏི ཨཱཧ. ཏཏྠཱཏི ཏསྨིཾ ཝིསྶཛྫནསྶ ཨཏྠཝཙནེ, ཏསྨིཾ ཝཱ ཝིསྶཛྫནཔཱཋེ ཏདཏྠཝཙནེ ཙ. པབྷེདནིདསྶནམཏྟནྟི པབྷེདསྶ ཨུདཱཧརཎམཏྟཾ. ཨཝུཏྟོཔི སབྦོ བྷཱུཏུཔཱདིཀོ, སུཁཱདིཀོ ཙ པབྷེདོ. ཏཾ པན བྷཱུམིམུཁེན དསྶེཏུཾ ‘‘རཱུཔཀྑནྡྷོ ཀཱམཱཝཙརོ’’ཏིཨཱདི ཝུཏྟནྟི དཊྛབྦཾ.

ཨེཝཾ ཨཊྛཀཐཱཡཾ ཨཱགཏནཡེན པཱལི༹ཡཱ ཨཏྠཡོཛནཾ དསྶེཏྭཱ ཨིདཱནི ཏཾ པཀཱརནྟརེན དསྶེཏུཾ ‘‘ཨཡཾ ཝཱ’’ཏིཨཱདི ཝུཏྟཾ. ཏཏྠ ཨཡཾ ཝཱཏི ཝུཙྩམཱནཾ སནྡྷཱཡཱཧ. ཨེཏྠཱཏི ཨེཏསྨིཾ ཁནྡྷཔཉྙཏྟིཝིསྶཛྫནེ. ཨིདནྟི ཨིདཾ པདཾ. ཡཏྟཀོ…པེ… ཁནྡྷཔཉྙཏྟིཡཱ པབྷེདོཏི ཨིམིནཱ སངྑེཔཏོ ཝིཏྠཱརཏོ ཙ ཁནྡྷཱནཾ པབྷེདཾ པཏི པཉྙཏྟིཝིབྷཱགོཏི དསྶིཏཾ ཧོཏི. ཏེནཱཧ ‘‘ཝཏྠུབྷེདེན…པེ… དསྶེཏཱི’’ཏི. པཀརཎནྟརེཏི ཝིབྷངྒཔཀརཎེ. ཏཏྠ ཧི སཱཏིསཡཾ ཁནྡྷཱནཾ ཝིབྷཱགཔཉྙཏྟི ཝུཏྟཱ. ཏེནཱཧ ཨཊྛཀཐཱཡཾ ‘‘སམྨཱསམྦུདྡྷེན ཧི…པེ… ཀཐིཏཱ’’ཏི. ཨེཏྠ ཙ པཋམནཡེ སམུཁེན, དུཏིཡེ ཝཏྠུམུཁེན པཉྙཏྟིཡཱ ཝིབྷཱགཱ དསྶིཏཱཏི ཨཡམེཏེསཾ ཝིསེསོ.

ཨེས ནཡོཏི ཨིམིནཱ ཁནྡྷཔཉྙཏྟིཡཱ ཝུཏྟམཏྠཾ ཨཱཡཏནཔཉྙཏྟིཡཱདཱིསུ ཨཏིདིསཏི. ཏཏྠ ‘‘ཡཱཝཏཱ པཉྩཀྑནྡྷཱ’’ཏི, ‘‘ཁནྡྷཱནཾ ཁནྡྷཔཉྙཏྟཱི’’ཏི ཨིདཾ པཉྙཏྟིནིདྡེསཔཱལི༹ཡཱ ཨཱདིཔརིཡོསཱནགྒཧཎམུཁེན དསྶནཾ. ‘‘ཡཱཝཏཱ དྭཱདསཱཡཏནཱནཱི’’ཏི, ‘‘ཨཱཡཏནཱནཾ ཨཱཡཏནཔཉྙཏྟཱི’’ཏི ཨིམསྶ ཨཏྠོ ‘‘ཡཏྟཀེན པཉྙཱཔནེན སངྑེཔཏོ དྭཱདསཱཡཏནཱནཱི’’ཏི ཨེཏེན དསྶིཏོ, ‘‘ཡཱཝཏཱ ཙཀྑཱཡཏན’’ནྟིཨཱདིཀསྶ པན ‘‘པབྷེདཏོ ཙཀྑཱཡཏན’’ནྟིཨཱདིཀེནཱཏི. ཏཏྠ ‘‘ཙཀྑཱཡཏནཾ…པེ… དྷམྨཱཡཏན’’ནྟི པབྷེདནིདསྶནམཏྟམེཏཾ. ཨེཏེན ཨཝུཏྟོཔི སབྦོ སངྒཧིཏོ ཧོཏཱིཏི ‘‘ཏཏྲཱཔི དསཱཡཏནཱ ཀཱམཱཝཙརཱ’’ཏིཨཱདི ཝུཏྟཾ. ཨཡཾ ཝཱ ཨེཏྠ པཱལི༹ཡཱ ཨཏྠཡོཛནཱ – ‘‘ཡཱཝཏཱ’’ཏི ཨིདཾ སབྦེཧི པདེཧི ¶ ཡོཛེཏྭཱ ‘‘ཡཏྟཀཱནི དྭཱདསཱཡཏནཱནི…པེ… ཡཏྟཀོ དྭཱདསནྣཾ ཨཱཡཏནཱནཾ, ཏཔྤབྷེདཱནཉྩ ཙཀྑཱཡཏནཱདཱིནཾ པབྷེདོ, ཏཏྟཀོ ཨཱཡཏནཱནཾ ཨཱཡཏནཔཉྙཏྟིཡཱ པབྷེདོ’’ཏི པཀརཎནྟརེ ཝུཏྟེན ཝཏྠུཔབྷེདེན ཨཱཡཏནཔཉྙཏྟིཡཱ པབྷེདཾ དསྶེཏཱིཏིཨཱདིནཱ ཨིཏརཔཉྙཏྟཱིསུཔི ནཡོ ཡོཛེཏབྦོ.

༧. ‘‘ཚ པཉྙཏྟིཡོ…པེ… པུགྒལཔཉྙཏྟཱི’’ཏི ཨིམཾ ཨཔེཀྑིཏྭཱ ‘‘ཀིཏྟཱཝཏཱ…པེ… ཨེཏྟཱཝཏཱ ཨིནྡྲིཡཱནཾ ཨིནྡྲིཡཔཉྙཏྟཱི’’ཏི ཨཡཾ པཱལི༹པདེསོ ནིདྡེསོཔི སམཱནོ ¶ པཀརཎནྟརེ ཝཏྠུབྷེདེན ཝུཏྟཾ ཁནྡྷཱདིཔཉྙཏྟིཔྤབྷེདཾ ཨུཔཱདཱཡ ཨུདྡེསོཡེཝ ཧོཏཱིཏི ཨཱཧ ‘‘ཨུདྡེསམཏྟེནེཝཱཏི ཨཏྠོ’’ཏི.

མཱཏིཀཱཝཎྞནཱ ནིཊྛིཏཱ.

༢. ནིདྡེསཝཎྞནཱ

༡. ཨེཀཀནིདྡེསཝཎྞནཱ

༡. པཙྩནཱིཀདྷམྨཱནཾ ¶ ¶ ཛྷཱཔནཊྛེན ཛྷཱནཾ, ཏཏོ སུཊྛུ ཝིམུཙྩནཊྛེན ཝིམོཀྑོཏི ནིཔྤརིཡཱཡེན ཛྷཱནངྒཱནེཝ ཝིམོཀྑོཏི ཨཊྛཀཐཱཨདྷིཔྤཱཡོ. ཊཱིཀཱཀཱརེན པན ‘‘ཨབྷིབྷཱཡཏནཾ ཝིཡ སསམྤཡུཏྟཾ ཛྷཱནཾ ཝིམོཀྑོ’’ཏི མཉྙམཱནེན ‘‘ཨདྷིཔྤཱཡེནཱཧཱ’’ཏི ཝུཏྟཾ. ཛྷཱནདྷམྨཱ ཧི སམྤཡུཏྟདྷམྨེཧི སདྡྷིཾཡེཝ པཊིཔཀྑཏོ ཝིམུཙྩནྟི, ན ཝིནཱ, ཏཐཱ ཨབྷིརཏིཝསེན ཨཱརམྨཎེ ནིརཱསངྐཔྤཝཏྟིཔཱིཏི ཨདྷིཔྤཱཡོ. ཡཐཱ ཝཱ ཛྷཱནངྒཱནཾ ཛྷཱནཔཙྩཡེན པཙྩཡབྷཱཝཏོ སཝིསེསོ ཛྷཱནཔརིཡཱཡོ, ཨེཝཾ ཝིམོཀྑཀིཙྩཡོགཏོ ཏེསཾ སཝིསེསོ ཝིམོཀྑཔརིཡཱཡོ, ཏདུཔཙཱརེན སམྤཡུཏྟཱནཾ ཝེདིཏབྦོ. པཋམཾ སམངྒིབྷཱཝཏྠནྟི པཊིལཱབྷཾ སནྡྷཱཡཱཧ. ‘‘ཕུསིཏྭཱ ཝིཧརཏཱིཏི པཊིལབྷིཏྭཱ ཨིརིཡཏཱི’’ཏི ཧི ཝུཏྟཾ. ཨཊྛཀཐཱཡཾ ‘‘ཡེན ཧི སདྡྷིཾ…པེ… པཊིལདྡྷཱ ནཱམ ཧོནྟཱི’’ཏི ཏེཧི སཱདྷེཏབྦསཧཛཱཏཱདིཔཙྩཡལཱབྷོཡེཝེཏྠ པཊིལཱབྷོ དཊྛབྦོ. ཡཐཱ ཕསྶོ ཡཏྠ ཨུཔྤནྣོ, ཏཾ ཨཱརམྨཎཾ ཕུསཏཱིཏི ཝུཙྩཏི, ཨེཝཾ སམྤཡུཏྟདྷམྨེཔི ཏཾསབྷཱཝཏྟཱཏི ཨཱཧ ‘‘སམྥསྶེན ཕུསནཏྠ’’ནྟི. ཏསྶ ‘‘ཝིཝརཏཱི’’ཏི ཨིམིནཱ སམྦནྡྷོ. ཨིཏརེཧཱིཏི ཨུཔཙཱརམྤཱིཏིཨཱདིནཱ ཨུཔཙཱརཔུརིམཔྤནཱཔརཔྤནཱནཾ པཊིལཱབྷཀཱརཎནྟི ཝཙནེཧི. ཨིཏརེ ཀཱརཎཏྠེཏི ‘‘ཨུཔཙཱརེན…པེ… ཕུསཏིཡེཝཱ’’ཏི ཝུཏྟེ ཀཱརཎཏྠདཱིཔཀེ ཨཏྠེ. ཕུསཏི ཕལཾ ཨདྷིགཙྪཏི ཨེཏཱཡཱཏི ཀཱརཎབྷཱཝསྶ ཕུསནཱཔརིཡཱཡོ ཝེདིཏབྦོ.

པཋམཏྠམེཝཱཏི སམངྒིབྷཱཝཏྠམེཝ. ཏཱནི ཨངྒཱནཱིཏི ཨིམིནཱ ཛྷཱནཀོཊྛཱསབྷཱཝེན ཝུཏྟདྷམྨཱཡེཝ གཧིཏཱ, ན ཕསྶཔཉྩམཀཨིནྡྲིཡཊྛཀཱདིབྷཱཝེནཱཏི ཝུཏྟཾ ‘‘སེསཱ…པེ… སངྒཧིཏཱནཱི’’ཏི. ཨེཝཾ སཏཱིཏི སུཁསངྑཱཏཛྷཱནངྒཏོ ཝེདནཱསོམནསྶིནྡྲིཡཱནཾ སེསིཏབྦབྷཱཝེ ¶ སཏི. ཨེཝཉྷི ནེསཾ ཕསྶཀཏཱ ཨིཏརསྶ ཕསྶིཏབྦཏཱཝ སིཡཱ. ཏེནཱཧ ‘‘སུཁསྶ ཕུསིཏབྦཏྟཱ’’ཏི. ཝེདཡིཏཱདྷིཔཏེཡྻཊྛེཧཱིཏི ཨཱརམྨཎཱནུབྷཝནསངྑཱཏེན ཝེདཡིཏསབྷཱཝེན, ཏསྶེཝ སཱཏཝིསེསསངྑཱཏེན སམྤཡུཏྟེཧི ཨནུཝཏྟནཱིཡབྷཱཝེན ཙ. ཨུཔནིཛ྄ཛྷཱཡནབྷཱཝོཔི ཡཐཱཝུཏྟཝེདཡིཏཱདྷིཔཏེཡྻཊྛཝིསིཊྛོ ཨོལཱ༹རིཀསྶ ཨཱརམྨཎསྶ ནིཛ྄ཛྷཱཡནབྷཱཝོ. ཨབྷིནྣསབྷཱཝོཔི ཧི དྷམྨོ པུརིམཝིསིཊྛཔཙྩཡཝིསེསསམྦྷཝེན ཝིསེསེན ¶ བྷིནྣཱཀཱརོ ཧུཏྭཱ ཝིསིཊྛཕལབྷཱཝཾ ཨཱཔཛྫཏི. ཡཐེཀཾཡེཝ ཀམྨཾ ཙཀྑཱདིནིབྦཏྟིཧེཏུབྷཱུཏཾ ཀམྨཾ. ཏེན ཝུཏྟཾ ‘‘ཝེདཡིཏཱ…པེ… ཝུཏྟཏྟཱ’’ཏི. ཨངྒཱནཱིཏི ནཱཡཾ ཏཔྤརབྷཱཝེན བཧུཝཙནནིདྡེསོ ཨནནྟབྷཱཝཏོ, ཀེཝལཉྩ ཨངྒཱནཾ བཧུཏྟཱ བཧུཝཙནཾ, ཏེན ཀིཾ སིདྡྷཾ? པཙྩེཀམྤི ཡོཛནཱ སིདྡྷཱ ཧོཏི. ཏེན ཝུཏྟཾ ‘‘པཙྩེཀམྤི ཡོཛནཱ ཀཱཏབྦཱ’’ཏི. ཡདི ‘‘སུཁཾ ཋཔེཏྭཱ’’ཏི ཡོཛནཱཡཾ སེསཱ ཏཡོ ཁནྡྷཱ ཧོནྟི, སེསཱ ཏཡོ, ཙཏྟཱརོ ཙ ཁནྡྷཱ ཧོནྟཱིཏི ཝཏྟབྦཾ སིཡཱཏི? ན, ཙཏཱུསུ ཏིཎྞཾ ཨནྟོགདྷཏྟཱ. ཏེནཱཧ ‘‘སབྦཡོཛནཱ…པེ… ཝུཏྟ’’ནྟི.

༢. ཨསམཡཝིམོཀྑེནཱཏི ཧེཊྛཱམགྒཝིམོཀྑེན. སོ ཧི ལོཀིཡཝིམོཀྑོ ཝིཡ ཨདྷིགམཝལ༹ཉྫནཏྠཾ པཀཔྤེཏབྦསམཡཝིསེསཱབྷཱཝཏོ ཨེཝཾ ཝུཏྟོ. ཨགྒམགྒཝིམོཀྑོ པན ཨེཀཙྩཱསཝཝིམུཏྟིཝཙནཏོ ཨིདྷ ནཱདྷིཔྤེཏོ. ཏེནཱཧ ‘‘ཨེཀཙྩེ ཨཱསཝཱ པརིཀྑཱིཎཱ ཧོནྟཱི’’ཏི. ཨེཀཙྩེཧི ཨཱསཝེཧི ཝིམུཏྟོཏི དིཊྛཱསཝཱདཱིཧི སམུཙྪེདཝིམུཏྟིཡཱ ཝིམུཏྟོ. ཨསམཡ…པེ… ལཱབྷེནཱཏི ཡཐཱཝུཏྟཨསམཡཝིམོཀྑསྶ ཨུཔནིསྶཡབྷཱུཏསྶ ཨདྷིགམེན. ཏཏོ ཨེཝ སཱཏིསཡེན, ཨེཀཙྩེཧི ཀཱམཱསཝེཧི ཝིམུཏྟོ ཝིཀྑམྦྷནཝསེནཱཏི ཨཏྠོ. སོ ཨེཝ ཨེཀཙྩསམཡཝིམོཀྑལཱབྷཱི ཡཐཱཝུཏྟོ སམཡཝིམུཏྟོ ཨསམཡཝིམོཀྑཝིསེསསྶ ཝསེན སམཡཝིམོཀྑཔཉྙཏྟིཡཱ ཨདྷིཔྤེཏཏྟཱ. སོཏི ཨསམཡཝིམོཀྑཱུཔནིསྶཡསམཡཝིམོཀྑལཱབྷཱི. ཏེན སཱཏིསཡེན སམཡཝིམོཀྑེན. ཏཐཱཝིམུཏྟོཝ ཧོཏཱིཏི ཨེཏྠ ཨིཏི-སདྡོ ཧེཏུཨཏྠོ. ཡསྨཱ ཏཐཱཝིམུཏྟོ ཧོཏི, ཏསྨཱ སམཡཝིམུཏྟཔཉྙཏྟིཾ ལདྡྷུཾ ཨརཧཏཱིཏི པརིཉྙཱཏཏྠཾ ཧེཏུནཱ པཏིཊྛཱཔེཏི. བྱཏིརེཀམུཁེནཔི ཏམཏྠཾ པཱཀཊཏརཾ ཀཱཏུཾ ‘‘པུཐུཛྫནོ པནཱ’’ཏིཨཱདི ཝུཏྟཾ. ཏཏྠ སམུདཱཙཱརབྷཱཝཏོཏི སམུདཱཙཱརསྶ སམྦྷཝཏོ. སོཏི ཛྷཱནལཱབྷཱི པུཐུཛྫནོ.

ཡདི པུནརཱཝཏྟཀདྷམྨཏཱཡ པུཐུཛྫནོ སམཡཝིམུཏྟོཏི ན ཝུཏྟོ, ཏདབྷཱཝཏོ ཀསྨཱ ཨརཧཱ ཏཐཱ ན ཝུཏྟོཏི ཨཱཧ ‘‘ཨརཧཏོ པནཱ’’ཏིཨཱདི. ཏདཀཱརཎབྷཱཝནྟི ཏེསཾ ཝིམོཀྑཱནཾ, ཏསྶ ཝཱ སམཡཝིམུཏྟིབྷཱཝསྶ ཨཀཱརཎབྷཱཝཾ. སབྦོཏི སུཀྑཝིཔསྶཀོཔི སམཐཡཱནིཀོཔི ཨཊྛཝིམོཀྑལཱབྷཱིཔི ¶ . བཧིཨབྦྷནྟརབྷཱཝཱ ཨཔེཀྑཱསིདྡྷཱ, ཝཏྟུ ཨདྷིཔྤཱཡཝསེན གཧེཏབྦརཱུཔཱ ཙཱཏི ཨཱཧ ‘‘བཱཧིརཱནནྟི ལོཀུཏྟརཏོ བཧིབྷཱུཏཱན’’ནྟི.

༣. རཱུཔཏོ ¶ ཨཉྙཾ ན རཱུཔནྟི ཏཏྠ རཱུཔཔཊིབྷཱགཾ ཀསིཎརཱུཔཱདི རཱུཔ-སདྡེན གཧིཏནྟི ཏདཉྙཾ པཋམཏཏིཡཱརུཔྤཝིསཡམཏྟཾ ཨརཱུཔཀྑནྡྷནིབྦཱནཝིནིམུཏྟཾ ཨརཱུཔ-སདྡེན གཧིཏཾ དཊྛབྦཾ. པཊིཔཀྑབྷཱུཏེཧི ཀིལེསཙོརེཧི ཨམཱུསིཏབྦཾ ཛྷཱནམེཝ ཙིཏྟམཉྫཱུསཾ. སམཱདྷིནྟི ཝཱ སམཱདྷིསཱིསེན ཛྷཱནམེཝ ཝུཏྟནྟི ཝེདིཏབྦཾ.

༤. ཨཏྟནོ ཨནུརཱུཔེན པམཱདེནཱཏི ཨེཏྠ ཨནཱགཱམིནོ ཨདྷིཀུསལེསུ དྷམྨེསུ ཨསཀྐཙྩཨསཱཏཙྩཀིརིཡཱདིནཱ. ཁཱིཎཱསཝསྶ པན ཏཱདིསེན པམཱདཔཏིརཱུཔཀེན, ཏཱདིསཱཡ ཝཱ ཨསཀྐཙྩཀིརིཡཱཡ. སཱ ཙསྶ ཨུསྶུཀྐཱབྷཱཝཏོ ཝེདིཏབྦཱ. པཊིཔྤསྶདྡྷསབྦུསྶུཀྐཱ ཧི ཏེ ཨུཏྟམཔུརིསཱ. སམཡེན སམཡནྟི སམཡེ སམཡེ. བྷུམྨཏྠེ ཧི ཨེཏཾ ཀརཎཝཙནཾ ཨུཔཡོགཝཙནཉྩ. ཨནིཔྥཏྟིཏོཏི སམཱཔཛྫིཏུཾ ཨསཀྐུཎེཡྻཏོ. ཨསྶཱཏི ‘‘ཏེསཉྷཱི’’ཏིཨཱདིནཱ ཝུཏྟསྶ ཨིམསྶ ཨཊྛཀཐཱཝཙནསྶ. ཏེནཱཏི ཡཐཱབྷཏེན སུཏྟེན.

༥. ཡེནཱདྷིཔྤཱཡེན ‘‘དྷམྨེཧཱི’’ཏི ཝཏྟབྦནྟི ཝུཏྟཾ, ཏཾ ཝིཝརནྟོ ‘‘ཨིདྷཱ’’ཏིཨཱདིམཱཧ. ཏཏྠ ཨིདྷཱཏི ‘‘པརིཧཱནདྷམྨོ ཨཔརིཧཱནདྷམྨོ’’ཏི ཨེཏསྨིཾ པདདྭཡེ. ཏཏྠཱཏི ‘‘ཀུཔྤདྷམྨོ ཨཀུཔྤདྷམྨོ’’ཏི པདདྭཡེ. སཏི ཝཙནནཱནཏྟེ ཨཏྠེཝ ཝཙནཏྠནཱནཏྟནྟི ཨཱཧ ‘‘ཝཙནཏྠནཱནཏྟམཏྟེན ཝཱ’’ཏི. ཝཙནཏྠགྒཧཎམུཁེན གཧེཏབྦསྶ པན ཝིབྷཱཝནཏྠསྶ ནཏྠེཏྠ ནཱནཏྟཾ, ཡཏོ ཏེསཾ པརིཡཱཡནྟརཏཱསིདྡྷི.

༧-༨. སམཱཔཏྟིཙེཏནཱཏི ཡཱཡ ཙེཏནཱཡ སམཱཔཏྟིཾ ནིབྦཏྟེཏི སམཱཔཛྫཏི ཙ. ཏེནཱཧ ‘‘ཏདཱཡཱུཧནཱ’’ཏི. ཨཱརཀྑཔཙྩུཔཊྛཱནཱ སཏཱིཏི ཀཏྭཱ ཨཱཧ ‘‘ཨནུརཀྑཎཱ…པེ… སཏཱི’’ཏི. ཏེནཱཧ ‘‘ཨེཀཱརཀྑོ སཏཱརཀྑེན ཙེཏསཱ ཝིཧརཏཱི’’ཏི. ཏཐཱ ཧི སཱ ‘‘ཀུསལཱཀུསལཱནཾ དྷམྨཱནཾ གཏིཡོ སམནྣེསཏཱི’’ཏི ཝུཏྟཱ.

༡༡. ཨགྒམགྒཊྛོཔི ཨིཏརམགྒཊྛཱ ཝིཡ ཨནུཔཙྪིནྣབྷཡཏྟཱ བྷཡཱུཔརཏཝོཧཱརཾ ལབྷཏཱིཏི ཨཱཧ ‘‘ཨརཧཏྟམགྒཊྛོ ཙ…པེ… བྷཡཱུཔརཏོ’’ཏི.

༡༢. ཀེཙཱིཏི ¶ ཏིཧེཏུཀཔཊིསནྡྷིཀེ མནྡབུདྡྷིཀེ སནྡྷཱཡཱཧ. ཏེན ཝུཏྟཾ ‘‘དུཔྤཉྙཱཏི ཨིམིནཱ གཡ྄ཧནྟཱི’’ཏི. དུབྦལཱ པཉྙཱ ཡེསཾ ཏེ དུཔྤཉྙཱཏི.

༡༤. ཨནིཡཏདྷམྨསམནྣཱགཏསྶེཝ ¶ པཙྩཡཝིསེསེན ནིཡཏདྷམྨཔཊིལཱབྷོཏི ཨཱཧ ‘‘ཡཏྠ…པེ… ཧོནྟཱི’’ཏི. ཏདབྷཱཝཱཏི ནིཡཏཱནིཡཏཝོམིསྶཱཡ པཝཏྟིཡཱ ཨབྷཱཝཱ.

༡༦. པརིཡཱདིཡིཏབྦཱནཱིཏི པརིཡཱདཀེན མགྒེན ཁེཔེཏབྦཱནི. ཏཎྷཱདཱིནཾ པལིབུདྷནཱདིཀིརིཡཱཡ མཏྠཀཔྤཏྟིཡཱ སཱིསབྷཱཝོ ཝེདིཏབྦོ, ནིབྦཱནསྶ པན ཝིསངྑཱརབྷཱཝཏོ སངྑཱརསཱིསཏཱ. ཏེནཱཧ ‘‘སངྑཱརཝིཝེཀབྷཱུཏོ ནིརོདྷོ’’ཏི. ཀེཙི པན ‘‘སངྑཱརསཱིསཾ ནིརོདྷསམཱཔཏྟཱི’’ཏི ཝདནྟི, ཏཾ ཏེསཾ མཏིམཏྟཾ པཉྙཏྟིམཏྟསྶ སཱིསབྷཱཝཱནུཔཔཏྟིཏོ ཏདུདྡྷཉྩ སངྑཱརཔྤཝཏྟིསབྦྷཱཝཏོ. སཧ ཝིཡཱཏི ཨེཀཛ྄ཛྷཾ ཝིཡ. ཨེཏེན སམ-སདྡསྶ ཨཏྠམཱཧ. སཧཏྠོ ཧེས སམ-སདྡོ. སཾསིདྡྷིདསྶནེནཱཏི སཾསིདྡྷིཡཱ ནིཊྛཱནསྶ ཨུཔརམསྶ དསྶནེན.

ཨིདྷཱཏི ཨིམིསྶཱ པུགྒལཔཉྙཏྟིཔཱལི༹ཡཱ, ཨིམིསྶཱ ཝཱ ཏདཊྛཀཐཱཡ. ཀིལེསཔཝཏྟསཱིསཱནནྟི ཀིལེསསཱིསཔཝཏྟསཱིསཱནཾ. ཏེསུ ཧི གཧིཏེསུ ཨིཏརམྤི པརིཡཱདིཡིཏབྦཾ ཀིལེསབྷཱཝེན པརིཡཱདིཡིཏབྦཏཱསཱམཉྙེན ཙ གཧིཏམེཝ ཧོཏཱིཏི ཀིལེསཝཊྚཔརིཡཱདཱནེན མགྒསྶ ཨིཏརཝཊྚཱནམྤི པརིཡཱདིཡནཾ. ཝཊྚུཔཙྪེདཀེན མགྒེནེཝ ཧི ཛཱིཝིཏིནྡྲིཡམྤི ཨནཝསེསཏོ ནིརུཛ྄ཛྷཏཱིཏི. ཀསྨཱ པནེཏྠ པཝཏྟསཱིསཾ ཝིསུཾ གཧིཏནྟི ཙོདནཾ སནྡྷཱཡཱཧ ‘‘པཝཏྟསཱིསམྤཱི’’ཏིཨཱདི. ཨོདྷིསོ ཙ ཨནོདྷིསོ ཙ ཀིལེསཔརིཡཱདཱནེ སཏི སིཛ྄ཛྷམཱནཱ པཙྩཝེཀྑཎཝཱརཱ ཏེན ནིཔྥཱདེཏབྦཱཏི ཝུཏྟཱ. ཏེནེཝཱཧ ‘‘ཀིལེསཔརིཡཱདཱནསྶེཝ ཝཱརཱ’’ཏི. ཨིདཱནི ཏམཏྠཾ ཨཱགམེན སཱདྷེནྟོ ‘‘ཝིམུཏྟསྨི’’ནྟིཨཱདིམཱཧ. ཙུཏིཙིཏྟེན ཧོཏཱིཏི ཨིདཾ ཡཐཱཝུཏྟསྶ ཀིལེསཔརིཡཱདཱནསམཱཔནབྷཱུཏསྶ པཙྩཝེཀྑཎཝཱརསྶ ཙུཏིཙིཏྟེན པརིཙྪིནྣཏྟཱ ཝུཏྟཾ, ཏསྨཱ ཙུཏིཙིཏྟེན པརིཙྪེདཀེན པརིཙྪིནྣཾ ཧོཏཱིཏི ཨཏྠོ.

༡༧. ཏིཊྛེཡྻཱཏི ན ཨུཔགཙྪེཡྻ. ཋཱནཉྷི གཏིནིཝཏྟི. ཏེན ཝུཏྟཾ ‘‘ནཔྤཝཏྟེཡྻཱ’’ཏི.

༡༨. པཡིརུཔཱསནཱཡ བཧཱུཔཀཱརཏྟཱ པཡིརུཔཱསིཏབྦཏྟཱ.

༢༠. ཨགྒཝིཛྫཱ ¶ ཡསྶ ཨནདྷིགཏཝིཛྫཱདྭཡསྶ ཧོཏི, སོ ཙེ པཙྪཱ ཝིཛྫཱདྭཡཾ ཨདྷིགཙྪཏི, ཏསྶ པཋམཾ ཨདྷིགཏཝིཛྫཱདྭཡསྶ ཝིཡ ཨཏེཝིཛྫཏཱབྷཱཝཱ ¶ ཡདིཔི ནིཔྤརིཡཱཡཏཱ ཏེཝིཛྫཏཱ, པཋམཾ ཨདྷིགཏཝིཛྫཱདྭཡསྶ པན སཱ སཝིསེསཱཏི དསྶེནྟོ ‘‘ཡཱཡ ཀཏཀིཙྩཏཱ’’ཏིཨཱདིམཱཧ. ཏཏྠ ཨགྒཝིཛྫཱཏི ཨཱསཝཀྑཡཉཱཎཾ, ཨགྒམགྒཉཱཎམེཝ ཝཱ ཝེདིཏབྦཾ. སཱ ཙ ཏེཝིཛྫཏཱཏི ཡོཛནཱ.

༢༢. ཏཏྠེཝཱཏི སཙྩཱབྷིསམྦོདྷེ ཨེཝ.

༢༤. ཏནྟི ནིརོདྷསམཱཔཏྟིལཱབྷིནོ ཨུབྷཏོབྷཱགཝིམུཏྟཏཱཝཙནཾ. ཝུཏྟལཀྑཎཱུཔཔཏྟིཀོཏི དྭཱིཧི བྷཱགེཧི དྭེ ཝཱརེ ཝིམུཏྟོཏི ཨེཝཾ ཝུཏྟལཀྑཎེན ཨུཔཔཏྟིཏོ ཡུཏྟིཏོ སམནྣཱགཏོ. ཨེསེཝ ནཡོཏི ཡཐཱ ཙཏུནྣཾ ཨརཱུཔསམཱཔཏྟཱིནཾ ཨེཀེཀཏོ ནིརོདྷཏོ ཙ ཝུཊྛཱཡ ཨརཧཏྟཾ པཏྟཱནཾ ཝསེན པཉྩ ཨུབྷཏོབྷཱགཝིམུཏྟཱ ཝུཏྟཱ, ཏཐཱ སེཀྑབྷཱཝཾ པཏྟཱནཾ ཝསེན པཉྩ ཀཱཡསཀྑིནོ ཧོནྟཱིཏི ཀཏྭཱ ཝུཏྟཾ.

དསྶནཀཱརཎཱཏི ཨིམིནཱ ‘‘དིསྭཱ’’ཏི ཨེཏྠ ཏྭཱ-སདྡོ ཧེཏུཨཏྠོཏི དསྶེཏི ཡཐཱ ‘‘སཱིཧཾ དིསྭཱ བྷཡཾ ཧོཏཱི’’ཏིཨཱདཱིསུ. དསྶནེ སཏི པརིཀྑཡོ, ནཱསཏཱིཏི ཨཱཧ ‘‘དསྶནཱཡཏྟཔརིཀྑཡཏྟཱ’’ཏི. པུརིམཀིརིཡཱཏི ཨཱསཝཱནཾ ཁཡཀིརིཡཱཡ པུརིམཀིརིཡཱ. སམཱནཀཱལཏྟེཔི ཧི ཀཱརཎཀིརིཡཱ ཕལཀིརིཡཱཡ པུརིམསིདྡྷཱ ཝིཡ ཝོཧརཱིཡཏི. ཏཏོ ནཱམཀཱཡཏོ མུཙྩནཏོ. ཡཏོ ཧི ཡེན མུཙྩིཏབྦཾ, ཏཾ ནིསྶིཏོ ཧོཏཱིཏི ཝུཏྟཾ ‘‘ནཱམནིསྶིཏཀོ’’ཏི. ཏསྶཱཏི ཀཱཡདྭཡཝིམུཏྟིཡཱ ཨུབྷཏོབྷཱགཝིམུཏྟབྷཱཝསྶ. ཨརཱུཔལོཀེ ཧི ཋིཏཱརཧནྟཝསེནཱཡམཏྠོ ཝུཏྟོ. ཏེནཱཧ ‘‘སུཏྟེ ཧཱི’’ཏིཨཱདི.

དྭཱིཧི བྷཱགེཧཱིཏི ཝིཀྑམྦྷནསམུཙྪེདབྷཱགེཧི. དྭེ ཝཱརེཏི ཀིལེསཱནཾ ཝིཀྑམྦྷནསམུཙྪིནྡནཝསེན དྭིཀྑཏྟུཾ. ཀིལེསེཧི ཝིམུཏྟོཏི ཨིདཾ པཋམཏཏིཡཝཱདཱནཾ ཝསེན ཝུཏྟཾ, ཨིཏརཾ དུཏིཡཝཱདསྶ. ཨརཱུཔཛ྄ཛྷཱནཾ ཡདིཔི རཱུཔསཉྙཱདཱིཧི ཝིམུཏྟཾ ཏཾསམཏིཀྐམཱདིནཱ པཏྟབྦཏྟཱ, པཝཏྟིནིཝཱརཀེཧི པན ཀཱམཙྪནྡཱདཱིཧིཡེཝསྶ ཝིམུཏྟི སཱཏིསཡཱཏི དསྶེནྟོ ‘‘ནཱིཝརཎསངྑཱཏནཱམཀཱཡཏོ ཝིམུཏྟ’’ནྟི ཨཱཧ. ཡཉྩཱཔི ཨརཱུཔཛ྄ཛྷཱནཾ རཱུཔལོཀེ ཝིཝེཀཊྛཏཱཝསེནཔི རཱུཔཀཱཡཏོ ཝིམུཏྟཾ, ཏཾ པན རཱུཔཔཊིབནྡྷཚནྡརཱགཝིཀྑམྦྷནེནེཝ ཧོཏཱིཏི ཝིཀྑམྦྷནམེཝ ¶ པདྷཱནནྟི ཝུཏྟཾ ‘‘རཱུཔཏཎྷཱཝིཀྑམྦྷནེན ¶ རཱུཔཀཱཡཏོ ཙ ཝིམུཏྟཏྟཱ’’ཏི. ཨེཀདེསེན ཨུབྷཏོབྷཱགཝིམུཏྟཾ ནཱམ ཧོཏི སམུཙྪེདཝིམུཏྟིཡཱ ཨབྷཱཝཱ.

༢༥. ‘‘སཏྟིསཡོ’’ཏི ཝིཡ སམུདཱཡེ པཝཏྟོ ཝོཧཱརོ ཨཝཡཝེཔི དིསྶཏཱིཏི དསྶེནྟོ ཨཱཧ ‘‘ཨཊྛཝིམོཀྑེཀདེསེན…པེ… ཝུཙྩཏཱི’’ཏི.

༢༦. ཕུཊྛཱནནྟི ཕསྶིཏཱནཾ, ཨདྷིགཏཱནནྟི ཨཏྠོ. ཨནྟོཏི ཨནྟསདིསོ ཕསྶནཱཡ པརཀཱལོ. ཏདནནྟརོ ཧི ཏཔྤརིཡོསཱནོ ཝིཡ ཧོཏཱིཏི. ཀཱལཝིསཡོ ཙཱཡཾ ཨནྟ-སདྡོ, ན པན ཀཱལཏྠོ. ཏེནཱཧ ‘‘ཨདྷིཔྤཱཡོ’’ཏི. ནཱམཀཱཡེཀདེསཏོཏི ནཱིཝརཎསངྑཱཏནཱམཀཱཡེཀདེསཏོ. ཨཱལོཙིཏོ པཀཱསིཏོ ཝིཡ ཧོཏི ཝིབནྡྷཝིཀྑམྦྷནེན ཨཱལོཙནེ པཀཱསནེ སམཏྠསྶ ཉཱཎཙཀྑུནོ ཨདྷིཊྛཱནསམུཔྤཱདནཏོ. ན ཏུ ཝིམུཏྟོཏི ཝིམུཏྟོཏི ན ཝུཙྩཏེཝ.

༢༨. ཨིམཾ པན ནཡནྟི ‘‘ཨཔིཙ ཏེས’’ནྟིཨཱདིནཱ ཨཱགཏཝིདྷིཾ. ཡེན ཝིསེསེནཱཏི ཡེན ཀཱརཎཝིསེསེན. སོཏི དིཊྛིཔྤཏྟསདྡྷཱཝིམུཏྟཱནཾ ཡཐཱཝུཏྟོ པཉྙཱཡ ཝིསེསོ. པཊིཀྑེཔོ ཀཏོ ཀཱརཎསྶ ཨཝིབྷཱཝིཏཏྟཱ. ཨུབྷཏོབྷཱགཝིམུཏྟོ ཝིཡ, པཉྙཱཝིམུཏྟོ ཝིཡ ཝཱ སབྦཐཱ ཨཝིམུཏྟསྶ སཱཝསེསཝིམུཏྟིཡམྤི དིཊྛིཔྤཏྟསྶ ཝིཡ པཉྙཱཡ སཱཏིསཡཱཡ ཨབྷཱཝཏོ སདྡྷཱམཏྟེན ཝིམུཏྟབྷཱཝོ དཊྛབྦོ. སདྡྷཱཡ ཨདྷིམུཏྟོཏི ཨིདཾ ཨཱགམནཝསེན སདྡྷཱཡ ཨདྷིཀབྷཱཝཾ སནྡྷཱཡ ཝུཏྟཾ, མགྒཱདྷིགམཏོ པནསྶ པཙྩཀྑམེཝ ཉཱཎདསྶནཾ.

༣༡. ‘‘སོཏོཏི ཨརིཡམགྒསྶ ནཱམ’’ནྟི ནིཔྤརིཡཱཡེན ཏཾསམངྒཱི སོཏཱཔནྣོཏི ཨདྷིཔྤཱཡེན ཙོདཀོ ‘‘ཨཔི-སདྡོ ཀསྨཱ ཝུཏྟོ’’ཏི ཙོདནཾ ཨུཊྛཱཔེཏྭཱ ‘‘ནནཱུ’’ཏིཨཱདིནཱ ཨཏྟནོ ཨདྷིཔྤཱཡཾ ཝིཝརཏི. ཨིཏརོ ‘‘ནཱཔནྣ’’ནྟིཨཱདིནཱ པརིཧརཏི. སམནྣཱགཏོ ཨེཝ ནཱམ ལོཀུཏྟརདྷམྨཱནཾ ཨཀུཔྤསབྷཱཝཏྟཱ. ཨིཏརེཧཱིཏི དུཏིཡམགྒཊྛཱདཱིཧི. སོ ཨེཝཱཏི པཋམཕལཊྛོ ཨེཝ. ཨིདྷཱཏི ཨིམསྨིཾ སཏྟཀྑཏྟུཔརམནིདྡེསེ. སོཏཾ ཝཱ ཨརིཡམགྒཾ ཨཱདིཏོ པནྣོ ཨདྷིགཏོཏི སོཏཱཔནྣོཏི ཝུཙྩམཱནེ དུཏིཡམགྒཊྛཱདཱིནཾ ¶ ནཏྠེཝ སོཏཱཔནྣབྷཱཝཱཔཏྟི. སུཏྟེ པན སོཏཾ ཨརིཡམགྒཾ ཨཱདིཏོ མརིཡཱདཾ ཨམུཉྩིཏྭཱཝ པནྣོ པཊིཔཛྫཏཱིཏི ཀཏྭཱ མགྒསམངྒཱི ‘‘སོཏཱཔནྣོ’’ཏི ཝུཏྟོ. པརིཡཱཡེན ཨིཏརོཔི ཏསྶ ཨཔརིཧཱནདྷམྨཏྟཱ སོཏཱཔནྣོཏི ཝེདིཏབྦཾ. པཧཱིནཱཝསིཊྛཀིལེསཔཙྩཝེཀྑཎཱཡ སམུདཡསཙྩཾ ཝིཡ དུཀྑསཙྩམྤི པཙྩཝེཀྑིཏཾ ཧོཏི སཙྩདྭཡཔརིཡཱཔནྣཏྟཱ ¶ ཀིལེསཱནནྟི ཨཱཧ ‘‘ཙཏུསཙྩཔཙྩཝེཀྑཎཱདཱིན’’ནྟི. ཨཱདི-སདྡེན ཕལཔཙྩཝེཀྑཎཨུཔརིམགྒཕལདྷམྨེ ཙ སངྒཎྷཱཏི.

༣༢. མཧཱཀུལམེཝཱཏི ཨུལཱ༹རཀུལམེཝ ཝུཙྩཏི ‘‘ཀུལཱིནོ ཀུལཔུཏྟོ’’ཏིཨཱདཱིསུ ཝིཡ.

༣༣. སཛ྄ཛྷཱནཀོ ཨཔརིཧཱིནཛ྄ཛྷཱནོ ཀཱལཀཏོ བྲཧྨལོཀཱུཔགོ ཧུཏྭཱ ཝཊྚཛ྄ཛྷཱསཡོ ཙེ, ཨུཔརཱུཔརི ནིབྦཏྟིཏྭཱ ནིབྦཱཡཏཱིཏི ཨཱཧ ‘‘ཨནཱགཱམིསབྷཱགོ’’ཏི. ཡཏོ སོ ཛྷཱནཱནཱགཱམཱིཏི ཝུཙྩཏི. ཏེནཱཧ ‘‘ཨནཱཝཏྟིདྷམྨོ’’ཏི.

༣༦. པརཡོགེ ཏྭཱ-སདྡོ ཏདནྟོ ཧུཏྭཱ ‘‘པརསདྡཡོགེ’’ཏི ཝུཏྟོ, ཨཔྤཏྭཱཏི ཝུཏྟཾ ཧོཏཱིཏི ‘‘ཨཔྤཏྟཾ ཧུཏྭཱ’’ཏི ཨིམིནཱ ཝུཙྩཏི.

༣༧. ཏེནཱཏི ‘‘ཨུཔཧཙྩཱ’’ཏི པདེན. ནནུ ཙ ཝེམཛ྄ཛྷཱཏིཀྐམོ ‘‘ཨཏིཀྐམིཏྭཱ ཝེམཛ྄ཛྷ’’ནྟི ཨིམིནཱ པཀཱསིཏོ ཧོཏཱིཏི ཨདྷིཔྤཱཡོ.

༤༠. ཏཎྷཱཝཊྚསོཏཱ ཏཎྷཱཝཊྚབནྡྷཱ. ཏསྶཱཏི སོཏསྶ. སམྦནྡྷེ ཙེཏཾ སཱམིཝཙནཾ. ཨུདྡྷཾསོཏསྶ ཨུཔརིབྷཝཱུཔགཏཱ ཨེཀཾསིཀཱཏི ཨཱཧ ‘‘ཡཏྠ ཝཱ ཏཏྠ ཝཱ གནྟྭཱ’’ཏི. ཏསྶཱཏི ཨུདྡྷཾསོཏསྶ. ཏཏྠཱཏི ཨཝིཧེསུ. ལཧུསཱལཧུསགཏིཀཱཏི ལཧུཀཱལཧུཀཱཡུགཏིཀཱ, ལཧུཀཱལཧུཀཉཱཎགཏིཀཱ ཝཱ. ཨུཔྤཛྫིཏྭཱཝ ནིབྦཱཡནཀཱདཱིཧཱིཏི ཨཱདི-སདྡེན ‘‘ཨཱཀཱསཾ ལངྒྷིཏྭཱ ནིབྦཱཡཏཱི’’ཏིཨཱདིནཱ ཝུཏྟཱ ཏིསྶོ ཨུཔམཱ སངྒཎྷཱཏི. ཨནྟརཱཨུཔཧཙྩཔརིནིབྦཱཡཱིཧི ཨདྷིམཏྟཏཱ, ཨུདྡྷཾསོཏཏོ ཨནདྷིམཏྟཏཱ ཙ ཨསངྑཱརསསངྑཱརཔརིནིབྦཱཡཱིནཾ ན ཝེདིཏབྦཱཏི ཡོཛནཱ. ཏེ ཨེཝཱཏི ཨནྟརཱཨུཔཧཙྩཔརིནིབྦཱཡིཨུདྡྷཾསོཏཱ ཨེཝ. ཡདི ཨེཝཾ ཨསངྑཱརསསངྑཱརཔརིནིབྦཱཡཱིནཾ ཨུཔམཱཝཙནེན ཏཏོ མཧནྟཏརེཧི ཀསྨཱ ཝུཏྟནྟི ཙོདནཾ སནྡྷཱཡཱཧ ‘‘ཏཏོ མཧནྟ…པེ… དསྶནཏྠ’’ནྟི.

ཏེནཱཏི ¶ ‘‘ནོ ཙསྶ, ནོ ཙ མེ སིཡཱ’’ཏི ཝཙནེན. ཏེནཱཏི ཝཱ ཡཐཱཝུཏྟེན ཏསྶ ཨཏྠཝཙནེན. ཨིམསྶ དུཀྑསྶཱཏི ཨིམསྶ སམྤཏི ཝཏྟམཱནསྶ ཝིཉྙཱཎཱདིདུཀྑསྶ. ཨུདཡདསྶནཾ ཉཱཎཾ. ཙཏཱུཧིཔཱིཏི ‘‘ནོ ཙསྶཱ’’ཏི ཙཏཱུཧི པདེཧི. ཡཾ ཨཏྠཱིཏི ཡཾ པརམཏྠཏོ ཝིཛྫཏི ¶ . ཏེནཱཧ ‘‘བྷཱུཏནྟི སསབྷཱཝ’’ནྟི, བྷཱུཏནྟི ཁནྡྷཔཉྩཀནྟི ཨཏྠོ. ཡཐཱཧ ‘‘བྷཱུཏམིདནྟི, བྷིཀྑཝེ, སམནུཔསྶཐཱ’’ཏི. ཝིཝཊྚམཱནསོ ཝིཝིཙྩམཱནཧདཡོ ཏཎྷཱདིསོཏཏོ ནིཝཏྟཛ྄ཛྷཱསཡོ. ཨུཔེཀྑཀོ ཧོཏཱིཏི ཙཏྟབྷརིཡོ ཝིཡ པུརིསོ བྷཡཾ ནནྡིཉྩ པཧཱཡ ཨུདཱསིནོ ཧོཏི.

ཨཝིསིཊྛེཏི ཧཱིནེ. ཝིསིཊྛེཏི ཨུཏྟམེ. ‘‘བྷཝེ’’ཏི ཝཏྭཱ ‘‘སམྦྷཝེ’’ཏི ཝུཙྩམཱནཾ ཨཝུཏྟཝཱཙཀཾ ཧོཏཱིཏི དསྶེནྟོ ‘‘པཙྩུཔྤནྣོ’’ཏིཨཱདིམཱཧ. བྷཱུཏམེཝ ཝུཙྩཏཱིཏི ཡཾ བྷཱུཏནྟི ཝུཙྩཏི, ཏདེཝ བྷཝོཏི ཙ ཝུཙྩཏི, བྷཝཏི ཨཧོསཱིཏི ཝཱ. སམྦྷཝཏི ཨེཏསྨཱཏི སམྦྷཝོ. ཏདཱཧཱརོ ཏསྶ བྷཝསྶ པཙྩཡོ. ཨནུཀྐམེན མགྒཔཉྙཱཡཱཏི ཝིཔསྶནཱནུཀྐམེན ལདྡྷཱཡ ཨརིཡམགྒཔཉྙཱཡ. ཏེནཱཏི སེཀྑེན.

ཨེཀཀནིདྡེསཝཎྞནཱ ནིཊྛིཏཱ.

༢. དུཀནིདྡེསཝཎྞནཱ

༦༣. ཀསྶཙཱིཏི ཀསྶཙིཔི. ཀཐཉྩཱིཏི ཀེནཙི པཀཱརེན, ཝིཀྑམྦྷནམཏྟེནཱཔཱིཏི ཝུཏྟཾ ཧོཏི. ཨཛ྄ཛྷཏྟགྒཧཎསྶཱཏི ཨཏྟཱནཾ ཨདྷིཀིཙྩ ཨུདྡིསྶ པཝཏྟགྒཱཧསྶ.

༨༣. པུརིམགྒཧིཏནྟི ‘‘ཀརིསྶཏི མེ’’ཏིཨཱདིནཱ ཙིཏྟེན པཋམཾ གཧིཏཾ. ཏཾ ཀཏནྟི ཏཾ ཏཱདིསཾ ཨུཔཀཱརཾ. པུཉྙཕལཾ ཨུཔཛཱིཝནྟོ ཀཏཉྙུཔཀྑེ ཏིཊྛཏཱིཏི ཝུཏྟཾ ‘‘པུཉྙཕལཾ ཨནུཔཛཱིཝནྟོ’’ཏི.

༩༠. གུཎཔཱརིཔཱུརིཡཱ པརིཔུཎྞོ ཡཱཝདཏྠོ ཨིདྷ ཏིཏྟོཏི ཨཱཧ ‘‘ནིཊྛིཏཀིཙྩཏཱཡ ནིརུསྶུཀྐོ’’ཏི.

དུཀནིདྡེསཝཎྞནཱ ནིཊྛིཏཱ.

༣. ཏིཀནིདྡེསཝཎྞནཱ

༩༡. སེསསཾཝརབྷེདེནཱཏི ¶ ¶ ཀཱཡིཀཝཱཙསིཀཝཱིཏིཀྐམཏོ སེསེན སཾཝརཝིནཱསེན. སོ པན དྭཱརཝསེན ཝུཙྩམཱནོ མནོདྭཱརིཀོ ཧོཏཱིཏི ཨཱཧ ‘‘མནོསཾཝརབྷེདེནཱ’’ཏི. ཨིདཱནི ཏཾ པཀཱརབྷེདེན དསྶེནྟོ ‘‘སཏིསཾཝརཱདིབྷེདེན ཝཱ’’ཏི ཨཱཧ, མུཊྛསཙྩཱདིཔྤཝཏྟིཡཱཏི ཨཏྠོ. ཡཾ ཀིཉྩི སབྷཱཝབྷཱུཏཾ ཙརིཏམྤི ‘‘སཱིལ’’ནྟི ཝུཙྩཏཱིཏི ཨཀུསལསྶཔི སཱིལཔརིཡཱཡོ ཝུཏྟོ.

༩༤. སམཱནཝིསཡཱནནྟི པཋམཕལཱདིཀོ སམཱནོ ཨེཝརཱུཔོ ཝིསཡོ ཨེཏེསནྟི སམཱནཝིསཡཱ, ཏེསཾ.

༡༠༧. ཏདཏྠོ ཏཔྤཡོཛནོ ལོཀུཏྟརསཱདྷཀོཏི ཨཏྠོ. ཏསྶ པརམཏྠསཱསནསྶ. མཱུལེཀདེསཏྟཱཏི མཱུལབྷཱཝེན ཨེཀདེསཏྟཱ.

༡༡༨. ཨུནྣལོ༹ ཨུགྒཏཏུཙྪམཱནོ.

༡༢༣. སཱིལསྶ ཨནུགྒཎྷནཾ ཨཔརིསུདྡྷིཡཾ སོདྷནཾ ཨཔཱརིཔཱུརིཡཾ པཱུརཎཉྩཱཏི ཨཱཧ ‘‘སོདྷེཏབྦེ ཙ ཝཌྜྷེཏབྦེ ཙཱ’’ཏི. ཨདྷིསཱིལཾ ནིསྶཱཡཱཏི ཨདྷིསཱིལཾ ནིསྶཡཾ ཀཏྭཱ ཨུཔྤནྣཔཉྙཱཡ.

༡༢༤. གཱུཐསདིསཏྟམེཝ དསྶེཏི, ན གཱུཐཀཱུཔསདིསཏྟནྟི ཨདྷིཔྤཱཡོ. གཱུཐཝསེནེཝ ཧི ཀཱུཔསྶཔི ཛིགུཙྪནཱིཡཏཱཏི. ཨཡཉྩ ཨཏྠོ གཱུཐརཱསིཡེཝ གཱུཐཀཱུཔོཏི ཨིམསྨིཾ པཀྑེ ནཝཏྟབྦོ སིཡཱ.

༡༣༠. སརབྷངྒསཏྠཱརཱདཡོ རཱུཔབྷཝཱདིཀཱམཱདིཔརིཉྙཾ ཀཏྭཱ པཉྙཔེནྟོ ལོཀིཡཾ པརིཉྙཾ སམྨདེཝ པཉྙཔེནྟཱིཏི ཨཱཧ ‘‘ཡེབྷུཡྻེན ན སཀྐོནྟཱི’’ཏི. ཨསམཏྠབྷཱཝཾ ཝཱ སནྡྷཱཡ ནོ ཙ པཉྙཱཔེཏུཾ སཀྐོནྟཱིཏི ཝུཏྟནྟི ཡོཛནཱ.

ཏིཀནིདྡེསཝཎྞནཱ ནིཊྛིཏཱ.

༤. ཙཏུཀྐནིདྡེསཝཎྞནཱ

༡༣༣. པརེནཱཏི ¶ ¶ ཨཉྙེན, ཨཱཎཏྟེནཱཏི ཨཏྠོ. ཨཱཎཏྟིཡཱ ཨཏྟནཱ ཙཱཏི ཨཱཎཱཔཀསྶ ཨཱཎཏྟིཡཱ, ཨཏྟནཱ ཙ ཨཱཎཏྟེན ཀཏཾ ཏཉྩ ཏསྶ ཨཱཎཱཔཀསྶ ཡཾ ཝཙཱིཔཡོགེན ཀཏནྟི ཡོཛནཱ. ཨཱཎཏྟིཡཱ པཱཔསྶཱཏི ཨཱཎཱཔནཝསེན པསུཏཔཱཔསྶ.

༡༤༨. དེསནཱཡ ཀརཎབྷཱུཏཱཡ. དྷམྨཱནནྟི དེསནཱཡ ཡཐཱབོདྷེཏབྦཱནཾ སཱིལཱདིདྷམྨཱནཾ.

༡༥༢. ཨནནྟརནྟི ཉཱཎསྶ ཨུཔཊྛིཏནྟི ཨནནྟརཾ ཝུཏྟཾ. ཀིཾ པན ཏནྟི ཨཱཧ ‘‘ཝཙན’’ནྟི. ལུཛྫཏཱིཏི ཨིདཾ ཡེན ཀཱརཎེན ལོཀ-སདྡོ ཏདཏྠེ པཝཏྟོ, ཏཾ དསྶེཏཱིཏི ཨཱཧ ‘‘ཀཱརཎཡུཏྟ’’ནྟི.

༡༥༦. སཧིཏཱསཧིཏསྶཱཏི ཀུསལསདྡཡོགེན སཱམིཝཙནཾ བྷུམྨཏྠེཏི དསྶེནྟོ ཨཱཧ ‘‘སཧིཏཱསཧིཏེཏི ཨཏྠོ’’ཏི. སཧིཏབྷཱསནེན དེསཀསམྤཏྟི, སཧིཏཱསཧིཏཀོསལླེན སཱཝཀསམྤཏྟི ཝེདིཏབྦཱ. པརིསསམྤཏྟིཔི ཉཱཎསམྤནྣསྶ དྷམྨཀཐིཀསྶ པཊིབྷཱནསམྤདཱཡ ཀཱརཎཾ ཧོཏཱིཏི ཨཱཧ ‘‘སཱཝཀསམྤཏྟིཡཱ བོདྷེཏུཾ སམཏྠཏཱཡཱ’’ཏི.

༡༥༧. ཀུསལདྷམྨེཧཱིཏི སམཐཝིཔསྶནཱདྷམྨེཧི. ཙཏུཏྠོ ཝུཏྟོ, ཡོ ནེཝ སངྒྷཾ ནིམནྟེཏི, ན དཱནཾ དེཏི.

༡༦༦. ཡམིདཾ ‘‘ཀཱལེནཱ’’ཏི ཝུཏྟནྟི ‘‘ཡོ ཏཏྠ ཨཝཎྞོ, ཏམྤི བྷཎཏི ཀཱལེན. ཡོཔི ཏཏྠ ཝཎྞོ, ཏམྤི བྷཎཏི ཀཱལེནཱ’’ཏི ཡཾ ཨིདཾ པཱལི༹ཡཾ ཝུཏྟཾ, ཏཏྲ ཏསྨིཾ ཝཙནེ ཝཱཀྱེ ཡོ པུགྒལོ ‘‘ཀཱལེན བྷཎཏཱི’’ཏི ཝུཏྟོ, སོ ཀཱིདིསོཏི ཝིཙཱརཎཱཡ ཏསྶ དསྶནཏྠཾ ‘‘ཀཱལཉྙཱུ ཧོཏཱི’’ཏིཨཱདི པཱལི༹ཡཾ ཝུཏྟནྟི དསྶེནྟོ སངྒཧེ ཨཱཧཱཏི ཡོཛནཱ.

༡༦༨. པུབྦུཔྤནྣཔཙྩཡཝིཔཏྟཱིཏི ཏསྨིཾ ཨཏྟབྷཱཝེ པཋམུཔྤནྣཔཙྩཡཝིཔཏྟི. ཏེསཾ ཝིཔཏྟི པཝཏྟཔྤཙྩཡཝིཔཏྟཱིཏི ཡོཛནཱ.

༡༧༣. ཏེསནྟི ¶ ¶ པཧཱིནཱཝསིཊྛཀིལེསཱནཾ. ཝིམུཏྟིདསྶནམེཝ ཧོཏི ཝིམུཏྟིཨཏྠཏྟཱ ཏཾདསྶནསྶ.

༡༧༤. ཏནྟཱཝུཏཱནཾ ཝཏྠཱནནྟི ནིདྡྷཱརཎེ སཱམིཝཙནཾ.

༡༧༨. ནཱམཀཱཡོཏི ནཱམསམཱུཧོ. ཨིདམེཝ ཙ དྭཡནྟི སཱིལསཾཝརཔཱུརཎཾ, སཱཛཱིཝཱཝཱིཏིཀྐམནཉྩཱཏི ཨིདམེཝ དྭཡཾ. ཏཏོཏི སཱཛཱིཝཱཝཱིཏིཀྐམནཏོ. ཀཐཱཡ ཧལིདྡརཱགཱདིསདིསཏཱཏི ཡོཛནཱ. ཏེནཱཧ ‘‘ན པུགྒལསྶཱ’’ཏི.

༡༧༩. ཨིཏི-སདྡེནཱཏི ‘‘དཱརུམཱསཀོ’’ཏི ཨེཏྠ ཝུཏྟཨིཏི-སདྡེན. ཨེཝཾཔཀཱརེཏི ཨིམིནཱཔི སལཱཀཱདིཀེ སངྒཎྷཱཏི.

༡༨༡. ཨཝིསཊསུཁནྟི ཨཝིཀྑེཔསུཁཾ.

༡༨༧. ཁནྡྷདྷམྨེསཱུཏི སངྑཏདྷམྨེསུ. ཏདལཱབྷེནཱཏི མགྒཕལཱལཱབྷེན. ཨཏྠེནཱཏི སཱིལཱདིཨཏྠེན.

ཙཏུཀྐནིདྡེསཝཎྞནཱ ནིཊྛིཏཱ.

༥. པཉྩཀནིདྡེསཝཎྞནཱ

༡༩༡. ཡཐཱ ཏེསུ པཊིཔཛྫིཏབྦནྟི ཏེསུ པཉྩསུ པུགྒལེསུ ཡཐཱརཧཾ ཨུཔམེཡྻོཔམཱདསྶནམུཁེན ཧིཏཱུཔདེསཔཊིཔཏྟིཡཱ ཡཐཱ ཨཉྙེཧི པཊིཔཛྫིཏབྦནྟི ཨཏྠོ. ཀིརིཡཱཝཱཙཱི ཨཱརམྦྷ-སདྡོ ཨདྷིཔྤེཏོ, ན ‘‘ཨཱརམྦྷཀཏྟུསྶ ཀསཱཝཔུཙྪཱ’’ཏིཨཱདཱིསུ ཝིཡ དྷམྨཝཱཙཱིཏི ཨཱཧ ‘‘ཨཱརམྦྷཀིརིཡཱཝཱཙཀོ སདྡོ’’ཏི. ‘‘ནིརུཛ྄ཛྷནྟཱི’’ཏི ཝུཏྟཏྟཱ ‘‘མགྒཀིཙྩཝསེནཱ’’ཏི ཝུཏྟཾ.

༡༩༢. གཧཎཾ ¶ ‘‘ཨེཝམེཏ’’ནྟི སམྤཊིཙྪནཾ.

༡༩༩. ན ཨེཝཾ སམྦནྡྷོ ཨསམཱནཛཱཏིཀཏྟཱ.

པཉྩཀནིདྡེསཝཎྞནཱ ནིཊྛིཏཱ.

༦. ཚཀྐནིདྡེསཝཎྞནཱ

༢༠༢. ཨིདཾ ¶ སཙྩཱབྷིསམྦོདྷཱདིཀཾ སངྒཧིཏཾ ཧོཏི ཕལསྶ ཧེཏུནཱ ཨཝིནཱབྷཱཝཏོ. ཏེནཱཧ ‘‘སཱམ’’ནྟིཨཱདི. ཨནཱཙརིཡཀེན ཨཏྟནཱ ཨུཔྤཱདིཏེནཱཏི ཨིདཾ སབྦཉྙུཏཉྙཱཎེ ཝིཛྫམཱནགུཎཀཐནཾ, ན ཏབྦིདྷུརདྷམྨནྟརནིཝཏྟནཾ ཏཐཱརཱུཔསྶ ཨཉྙསྶ ཨབྷཱཝཏོ. ཏེནསྶ སཱཙརིཡཀཏཱ, པརཏོ ཙ ཨུཔྤཏྟི པཊིཀྑིཏྟཱཏི ཨིམམཏྠམཱཧ ‘‘ཏཏྠཱ’’ཏིཨཱདིནཱ. ཏཏྠ སཱཙརིཡཀཏྟཾ པརཱུཔདེསཧེཏུཀཏཱ, པརཏོ ཨུཔྤཏྟི ཨུཔདེསེན ཝིནཱཔི སནྣིསྶཱཡ ནིབྦཏྟཱིཏི ཨཡམེཏེསཾ ཝིསེསོ.

ཚཀྐནིདྡེསཝཎྞནཱ ནིཊྛིཏཱ.

༧. སཏྟཀནིདྡེསཝཎྞནཱ

༢༠༣. ཀུསལེསུ དྷམྨེསཱུཏི ཨཱདྷཱརེ བྷུམྨཾ, ན ཝིསཡེཏི དསྶེནྟོ ‘‘ཀུསལེསུ དྷམྨེསུ ཨནྟོགདྷཱ’’ཏི ཨཱཧ. ཨིདཱནི ཝིསཡལཀྑཎཾ ཨེཏཾ བྷུམྨནྟི དསྶེནྟོ ‘‘བོདྷིཔཀྑིཡདྷམྨེསུ ཝཱ’’ཏིཨཱདིམཱཧ. ‘‘ཏདུཔཀཱརཏཱཡཱ’’ཏི ཨིདཾ ཀུསལེསུ དྷམྨེསུ སཱདྷེཏབྦེསཱུཏི ཨིམམཏྠཾ སནྡྷཱཡ ཝུཏྟཾ. ཨུམྨུཛྫནཔཉྙཱཡཱཏི ཨུམྨུཛྫཱཔནཔཉྙཱཡ, ཨུམྨུཛྫནཱཀཱརེན ཝཱ པཝཏྟཔཉྙཱཡ. ཏེནེཝཱཏི ཨུམྨུཛྫནམཏྟཏྟཱ ཨེཝ. ཡཐཱ ཧི ཉཱཎུཔྤཱདོ སཾཀིལེསཔཀྑཏོ ཨུམྨུཛྫནཾ, ཨེཝཾ སདྡྷུཔྤཱདོཔཱིཏི ཨཱཧ ‘‘སདྡྷཱསངྑཱཏམེཝ ཨུམྨུཛྫན’’ནྟི. ཙིཏྟཝཱརོཏི ཙིཏྟཔྤབནྡྷཝཱརོ. པཙྩེཀཾ ཋཱནཝིཔསྶནཱཔཏརཎཔཏིགཱདྷཔྤཏྟིནིཊྛཏྟཱ ¶ ཏེསཾ པུགྒལཱནཾ ‘‘ཨནེཀེ པུགྒལཱ’’ཏི ཝུཏྟཾ. ཀསྨཱ? ཏེནཏྟབྷཱཝེན ཨརཧཏྟསྶ ཨགྒཧཎཏོ. ཏཏིཡཔུགྒལཱདིབྷཱཝནྟི ཨུམྨུཛྫིཏྭཱ ཋིཏཔུགྒལཱདིབྷཱཝཾ.

སཏྟཀནིདྡེསཝཎྞནཱ ནིཊྛིཏཱ.

༡༠. དསཀནིདྡེསཝཎྞནཱ

༢༠༩. སོཏཱཔནྣཱདཡོཏི ¶ ཝུཏྟཝིསེསཡུཏྟཱ སོཏཱཔནྣསཀདཱགཱམིཛྷཱནཱནཱགཱམིནོ. ཨསཱ…པེ… པནཱཏི ཨེཏྠ པན-སདྡོ ཝིསེསཏྠདཱིཔནོ. ཏེན ‘‘ཨཛ྄ཛྷཏྟསཾཡོཛནཱནཾ སམུཙྪིནྣཏྟཱ’’ཏི ཨིདཾ ཝིསེསཾ དཱིཔེཏཱིཏི ཝེདིཏབྦཾ.

དསཀནིདྡེསཝཎྞནཱ ནིཊྛིཏཱ.

པུགྒལཔཉྙཏྟིཔཀརཎ-ཨནུཊཱིཀཱ སམཏྟཱ.

ཀཐཱཝཏྠུཔཀརཎ-ཨནུཊཱིཀཱ

གནྠཱརམྦྷཝཎྞནཱ

སམུདཱཡེ ¶ ¶ ཨེཀདེསཱ ཨནྟོགདྷཱཏི སམུདཱཡོ ཏེསཾ ཨདྷིཊྛཱནབྷཱཝེན ཝུཏྟོ ཡཐཱ ‘‘རུཀྑེ སཱཁཱ’’ཏི དསྶེཏི ‘‘ཀཐཱསམུདཱཡསྶཱ’’ཏིཨཱདིནཱ. ཏཏྠ ཀཐཱནནྟི ཏིསྶོ ཀཐཱ ཝཱདོ ཛཔྤོ ཝིཏཎྜཱཏི. ཏེསུ ཡེན པམཱཎཏཀྐེཧི པཀྑཔཊིཔཀྑཱནཾ པཏིཊྛཱཔནཔཊིཀྑེཔཱ ཧོནྟི, སོ ཝཱདོ. ཨེཀཱདྷིཀརཎཱ ཧི ཨཉྙམཉྙཝིརུདྡྷཱ དྷམྨཱ པཀྑཔཊིཔཀྑཱ ཡཐཱ ‘‘ཧོཏི ཏཐཱགཏོ པརཾ མརཎཱ, ན ཧོཏི ཏཐཱགཏོ པརཾ མརཎཱ’’ཏི (དཱི. ནི. ༡.༦༥). ནཱནཱདྷིཀརཎཱ པན ཨཉྙམཉྙཝིརུདྡྷཱཔི པཀྑཔཊིཔཀྑཱ ནཱམ ན ཧོནྟི ཡཐཱ ‘‘ཨནིཙྩཾ རཱུཔཾ, ནིཙྩཾ ནིབྦཱན’’ནྟི. ཡེན ཚལཛཱཏིནིགྒཧཊྛཱནེཧི པཀྑཔཊིཔཀྑཱནཾ པཏིཊྛཱཔནཾ པཊིཀྑེཔཱརམྦྷོ, སོ ཛཔྤོ. ཨཱརམྦྷམཏྟམེཝེཏྠ, ན ཨཏྠསིདྡྷཱིཏི དསྶནཏྠཾ ཨཱརམྦྷགྒཧཎཾ. ཡཱཡ པན ཚལཛཱཏིནིགྒཧཊྛཱནེཧི པཊིཔཀྑཔཊིཀྑེཔཱཡ ཝཱཡམནྟི, སཱ ཝིཏཎྜཱ. ཏཏྠ ཨཏྠཝིཀཔྤུཔཔཏྟིཡཱ ཝཙནཝིགྷཱཏོ ཚལཾ ཡཐཱ ‘‘ནཝཀམྦལོཡཾ པུརིསོ, རཱཛཱ ནོ སཀྑཱི’’ཏི ཨེཝམཱདི ¶ . དཱུསནབྷཱསཱ ཛཱཏཡོ, ཨུཏྟརཔཏིརཱུཔཀཱཏི ཨཏྠོ. ནིགྒཧཊྛཱནཱནི པརཏོ ཨཱཝི བྷཝིསྶནྟི. ཨེཝཾ ཝཱདཛཔྤཝིཏཎྜཔྤབྷེདཱསུ ཏཱིསུ ཀཐཱསུ ཨིདྷ ཝཱདཀཐཱ ‘‘ཀཐཱ’’ཏི ཨདྷིཔྤེཏཱ. སཱ ཙ ཁོ ཨཝིཔརཱིཏདྷམྨཏཱཡ པཏིཊྛཱཔནཝསེན, ན ཝིགྒཱཧིཀཀཐཱབྷཱཝེནཱཏི ཝེདིཏབྦཾ. མཱཏིཀཱཋཔནེནེཝཱཏི ཨུདྡེསདེསནཱཡ ཨེཝ. ཋཔིཏསྶཱཏི དེསིཏསྶ. དེསནཱ ཧི དེསེཏབྦམཏྠཾ ཝིནེཡྻསནྟཱནེསུ ཋཔནཏོ ནིཀྑིཔནཏོ ཋཔནཾ, ནིཀྑེཔོཏི ཙ ཝུཙྩཏི.

གནྠཱརམྦྷཝཎྞནཱ ནིཊྛིཏཱ.

ནིདཱནཀཐཱཝཎྞནཱ

པརིནིབྦཱནམེཝ ¶ …པེ… ཝུཏྟཾ. ཨབྷིནྣསབྷཱཝམྤི ཧི ཨཏྠཾ ཏདཉྙདྷམྨཏོ ཝིསེསཱཝབོདྷནཏྠཾ ཨཉྙཾ ཝིཡ ཀཏྭཱ ཝོཧརནྟི ཡཐཱ ‘‘ཨཏྟནོ སབྷཱཝཾ དྷཱརེནྟཱིཏི དྷམྨཱ’’ཏི (དྷ. ས. ཨཊྛ. ༡). སཱཏི ཨསངྑཏཱ དྷཱཏུ. ཀརཎབྷཱཝེན ཝུཏྟཱ ཡཐཱཝུཏྟསྶ ཨུཔསམསྶ སཱདྷཀཏམབྷཱཝཾ སནྡྷཱཡ. དྷམྨཝཱདཱི…པེ… དུབྦལཏཱ ཝུཏྟཱ ཏཐཱརཱུཔཱཡ པཉྙཱཡ བྷཱཝེ ཏཱདིསཱནཾ པཀྑབྷཱཝཱབྷཱཝཏོ. ལདྡྷིཡཱཏི ‘‘ཨཏྠི པུགྒལོ སཙྩིཀཊྛཔརམཏྠེན, པརིཧཱཡཏི ཨརཧཱ ཨརཧཏྟཱ’’ཏིཨཱདིལདྡྷིཡཱ. སུཏྟནྟེཧཱིཏི དེཝཏཱསཾཡུཏྟཱདཱིཧི. ལིངྒཱཀཔྤབྷེདཾ པརཏོ སཡམེཝ ཝཀྑཏི.

བྷིནྡིཏྭཱ མཱུལསངྒཧནྟི མཱུལསངྒཱིཏིཾ ཝིནཱསེཏྭཱ, བྷེདཾ ཝཱ ཀཏྭཱ ཡཐཱ སཱ ཋིཏཱ, ཏཏོ ཨཉྙཐཱ ཀཏྭཱ. སངྒཧིཏཏོ ཝཱ ཨཉྙཏྲཱཏི མཱུལསངྒཱིཏིཡཱ སངྒཧིཏཏོ ཨཉྙཏྲ. ཏེནཱཧ ‘‘ཨསངྒཧིཏཾ སུཏྟ’’ནྟི. ནཱིཏཏྠཾ ཡཐཱརུཏཝསེན ཝིཉྙེཡྻཏྠཏྟཱ. ནེཡྻཏྠཾ ཝིཔརིཎཱམདུཀྑཏཱདིཝསེན ནིདྡྷཱརེཏབྦཏྠཏྟཱ. ཏཱིཧི ཋཱནེཧཱིཏི ‘‘སཱུརཱ སཏིམནྟོ ཨིདྷ བྲཧྨཙརིཡཝཱསོ’’ཏི (ཨ. ནི. ༩.༢༡) ཨེཝཾ ཝུཏྟེཧི ཏཱིཧི ཀཱརཎེཧི. ཨཉྙཾ སནྡྷཱཡ བྷཎིཏནྟི ཨེཀཾ པབྦཛྫཱསངྑཱཏཾ བྲཧྨཙརིཡཝཱསཾ སནྡྷཱཡ བྷཎིཏཾ. ཨཉྙཾ ཨཏྠཾ ཋཔཡིཾསཱུཏི སབྦསྶཔི བྲཧྨཙརིཡཝཱསསྶ ཝསེན ‘‘ནཏྠི དེཝེསུ བྲཧྨཙརིཡཝཱསོ’’ཏིཨཱདིཀཾ (ཀཐཱ. ༢༦༩) ཨཉྙཾ ཨཏྠཾ ཋཔཡིཾསུ. སུཏྟཉྩ ཨཉྙཾ སནྡྷཱཡ བྷཎིཏཾ ཏཏོ ཨཉྙཾ སནྡྷཱཡ བྷཎིཏཾ ཀཏྭཱ ¶ ཋཔཡིཾསུ, ཏསྶ ཨཏྠཉྩ ཨཉྙཾ ཋཔཡིཾསཱུཏི ཨེཝམེཏྠ ཡོཛནཱ ཝེདིཏབྦཱ. སུཉྙཏཱདཱིཏི ཨཱདི-སདྡེན ཨནིཙྩཏཱདིཾ སངྒཎྷཱཏི.

གམྦྷཱིརཾ ཨེཀདེསཾ མཧཱཔདེསཔརིཝཱརཱདིཾ. ཨེཀཙྩེ སཀལཾ ཨབྷིདྷམྨཾ ཝིསྶཛྫིཾསུ ཚཌྜཡིཾསུ སེཡྻཐཱཔི སུཏྟནྟིཀཱ. ཏེ ཧི ཏཾ ན ཛིནཝཙནནྟི ཝདནྟི. ཀཐཱཝཏྠུསྶ སཝིཝཱདཏྟེཏིཨཱདི ཧེཊྛཱ ནིདཱནཊྛཀཐཱཡ ཨཱགཏནཡཾ སནྡྷཱཡ ཝུཏྟཾ. ཀེཙི པན པུགྒལཔཉྙཏྟིཡཱཔི སཝིཝཱདཏྟཾ མཉྙནྟི. ‘‘ཏཏིཡསངྒཱིཏིཏོ པུབྦེ པཝཏྟམཱནཱནཾ ཝསེནཱ’’ཏི ཨིདཾ ཀསྨཱ ཝུཏྟཾ, ནནུ ཏཏིཡསངྒཱིཏིཏོ པུབྦེཔི ཏཾ མཱཏིཀཱརཱུཔེན པཝཏྟཏེཝ? ནིདྡེསཾ ཝཱ སནྡྷཱཡ ཏཐཱ ཝུཏྟནྟི ཝེདིཏབྦཾ. ཨཉྙཱནཱིཏི ཨཉྙཱཀཱརཱནི ཨབྷིདྷམྨཔཀརཎཱདཱིནི ཨཀརིཾསུ, པཝཏྟནྟཱནིཔི ཏཱནི ཨཉྙཐཱ ཀཏྭཱ པཋིཾསཱུཏི ཨཏྠོ ¶ . མཉྫུསིརཱིཏི ཨིདཾ ཀསྨཱ ཝུཏྟཾ. ན ཧི ཏཾ ནཱམཾ པིཊཀཏྟཡཾ ཨནུཝཏྟནྟེཧི བྷིཀྑཱུཧི གཡ྄ཧཏི? ཨིཏརེཧི གཡ྄ཧམཱནམྤི ཝཱ སཱསནིཀཔརིཉྙེཧི ན སཱསནཱཝཙརཾ གཡ྄ཧཏཱིཏི ཀཏྭཱ ཝུཏྟཾ. ནིཀཱཡནཱམནྟི མཧཱསངྒྷིཀཱདིནིཀཱཡནཱམཾ, དུཏྟགུཏྟཱདིཝགྒནཱམཉྩ.

སངྐནྟིཀཱནཾ བྷེདོ སུཏྟཝཱདཱིཏི སངྐནྟིཀཱནཾ ཨནནྟརེ ཨེཀོ ནིཀཱཡབྷེདོ སུཏྟཝཱདཱི ནཱམ བྷིཛྫིཏྠ. སཧཱཏི ཨེཀཛ྄ཛྷཾ ཀཏྭཱ, གཎིཡམཱནཱཏི ཨཏྠོ.

ཨུཔྤནྣེ ཝཱདེ སནྡྷཱཡཱཏི ཏཏིཡསངྒཱིཏིཀཱལེ ཨུཔྤནྣེ ཝཱདེ སནྡྷཱཡ. ཨུཔྤཛྫནཀེཏི ཏཏོ པཊྛཱཡ ཡཱཝ སདྡྷམྨནྟརདྷཱནཱ ཨེཏྠནྟརེ ཨུཔྤཛྫནཀེ. སུཏྟསཧསྶཱཧརཎཉྩེཏྠ པརཝཱདབྷཉྫནཏྠཉྩ སཀཝཱདཔཏིཊྛཱཔནཏྠཉྩ. སུཏྟེཀདེསོཔི ཧི ‘‘སུཏྟ’’ནྟི ཝུཙྩཏི སམུདཱཡཝོཧཱརསྶ ཨཝཡཝེསུཔི དིསྶནཏོ ཡཐཱ ‘‘པཊོ དཌྜྷོ, སམུདྡོ དིཊྛོ’’ཏི ཙ. ཏེ པནེཏྠ སུཏྟཔདེསཱ ‘‘ཨཏྠི པུགྒལོ ཨཏྟཧིཏཱཡ པཊིཔནྣོ’’ཏིཨཱདིནཱ ཨཱགཏཱ ཝེདིཏབྦཱ.

ནིདཱནཀཐཱཝཎྞནཱ ནིཊྛིཏཱ.

མཧཱཝགྒོ

༡. པུགྒལཀཐཱ

༡. སུདྡྷསཙྩིཀཊྛོ

༡. ཨནུལོམཔཙྩནཱིཀཝཎྞནཱ

༡. སམྦརཱདཱིཧི ¶ ¶ པཀཔྤིཏཝིཛྫཱ, ཏཐཱབྷིསངྑཏཱནི ཨོསདྷཱནི ཙ ‘‘མཱཡཱ’’ཏི ཝུཙྩནྟི, ཨིདྷ པན མཱཡཱཡ ཨཱཧིཏཝིསེསཱ ཨབྷཱུཏཉྙེཡྻཱཀཱརཱ ཨདྷིཔྤེཏཱཏི དསྶེནྟོ ‘‘མཱཡཱཡ ཨམཎིཨཱདཡོ མཎིཨཱདིཨཱཀཱརེན དིསྶམཱནཱ མཱཡཱཏི ཝུཏྟཱ’’ཏི ཨཱཧ. སཙྩཉྙེཝ སཙྩིཀཾ, སོ ཨེཝ ཨཏྠོ ཨཝིཔརཱིཏསྶ ཉཱཎསྶ ཝིསཡབྷཱཝཊྛེནཱཏི སཙྩིཀཊྛོ. ཏེནཱཧ ‘‘བྷཱུཏཊྛོ’’ཏི. ཨཝིཔརཱིཏབྷཱཝཏོ ཨེཝ པརམོ པདྷཱནོ ཨཏྠོཏི པརམཏྠོ, ཉཱཎསྶ པཙྩཀྑབྷཱུཏོ དྷམྨཱནཾ ཨནིདྡིསིཏབྦསབྷཱཝོ. ཏེན ཝུཏྟཾ ‘‘ཨུཏྟམཏྠོ’’ཏི.

ཨཏྠཱིཏི ཝཙནསཱམཉྙེནཱཏི ‘‘ཨཏྠི པུགྒལོ ཨཏྟཧིཏཱཡ པཊིཔནྣོ’’ཏིཨཱདཱིསུ (ཨ. ནི. ༤.༩༦; ཀཐཱ. ༢༢) ‘‘ཨཏྠཱི’’ཏི པཝཏྟཝཙནསཱམཉྙེན. ཨཏྠཝིཀཔྤུཔཔཏྟིཡཱ ཝཙནཝིགྷཱཏོ ཚལནྟི ཝདནྟི. པཏིཊྛཾ པཙྪིནྡནྟོཏི ཧེཏུཾ དཱུསེནྟོ, ཨཧེཏུཾ ཀརོནྟོཏི ཨཏྠོ. ཧེཏུ ཧི པཊིཉྙཱཡ པཏིཊྛཱཔནཏོ པཏིཊྛཱ, ཏཾ པན ཧེཏུཾ ཨཏྠམཏྟཏོ དསྶེནྟོ ‘‘ཡདི སཙྩིཀཊྛེནཱ’’ཏིཨཱདིམཱཧ. པཡོགཏོ པན དཱུསནེན སདྡྷིཾ པརཏོ ཨཱཝི བྷཝིསྶཏི. ཨོཀཱསཾ ཨདདམཱནོཏི ཡཐཱནུརཱུཔཾ ཡུཏྟིཾ ཝཏྟུཾ ཨཝསརཾ ཨདེནྟོ. ཨཐ ཝཱ པཏིཊྛཾ པཙྪིནྡནྟོ, པཊིཉྙཾ ཨེཝ པརིཝཏྟེནྟོཏི ཨཏྠོ. ཨུཔལབྦྷཏི པུགྒལོཏི ཧི སཀཝཱདིཾ ཨུདྡིསྶ པརཝཱདིནོ པཊིཉྙཱཝ ¶ ན ཡུཏྟཱ ཨཔྤསིདྡྷཏྟཱ ཝིསེསིཏབྦསྶ. ཏེནེཝཱཧ ‘‘ཨནུཔལབྦྷནེཡྻཏོ ན ཏཝ ཝཱདོ ཏིཊྛཏཱིཏི ནིཝཏྟེནྟོ’’ཏི. རཱུཔཉྩ ཨུཔལབྦྷཏི…པེ… དསྶེཏཱིཏི ཨེཏེན པརཝཱདིནཱ ཨདྷིཔྤེཏཧེཏུནོ ཝིཔརཱིཏཏྠསཱདྷཀཏྟཾ དསྶེཏི.

ཨུཔལབྦྷམཱནཾ ནཱམ ཧོཏཱིཏི ཨཱཀཱརཏོ ཏཾཨཱཀཱརཝནྟཱནཾ ཨནཉྙཏྟཱཏི ཨདྷིཔྤཱཡོ. ཨཉྙཐཱཏི ཨཱཀཱར, ཨཱཀཱརཝནྟཱནཾ བྷེདེ. ཨེཏིསྶཱཏི ‘‘ཏཏོ སོ པུགྒལོ ཨུཔལབྦྷཏི སཙྩིཀཊྛཔརམཊྛེནཱ’’ཏི ཨེཝཾ ¶ ཝུཏྟཱཡ དུཏིཡཔུཙྪཱཡ. ཨེས ཝིསེསོཏི ཡོ ཡཐཱཝུཏྟོ དྭིནྣཾ པུཙྪཱནཾ ཝིསཡསྶ སབྷཱཝཱཀཱརབྷེདོ, ཨེས དྭིནྣཾ པུཙྪཱནཾ ཝིསེསོ. སབྷཱཝདྷམྨཱནཾ སཱམཉྙལཀྑཎེན ཨབྷིནྣཱནམྤི སལཀྑཎཏོ བྷེདོཡེཝཱཏི ཨཉྙདྷམྨསྶ ཨཉྙེནཱཀཱརེན ན ཀདཱཙིཔི ཨུཔལབྦྷོ བྷཝེཡྻ. ཡདི སིཡཱ, ཨཉྙཏྟམེཝ ན སིཡཱཏི རུཔྤནཱདིསཔཙྩཡཱདིཨཱཀཱརེན ཨནུཔལབྦྷམཱནོཔི པུགྒལོ ཨཏྟནོ བྷཱུཏསབྷཱཝཊྛེན ཨུཔལབྦྷཏེཝཱཏི ཝདནྟཾ པརཝཱདིནཾ པཏི ‘‘ཡོ སཙྩིཀཊྛོ’’ཏིཨཱདི ཙོདནཱ ཨནོཀཱསཱཏི དསྶེནྟོ ཨཱཧ ‘‘ཡཐཱ པན…པེ… ནིགྒཧོ ཙ ན ཀཱཏབྦོ’’ཏི. ཏཏྠ ནིགྒཧོཏི ‘‘ཨཱཛཱནཱཧི ནིགྒཧ’’ནྟི ཨེཝཾ ཝུཏྟནིགྒཧོ, པརཱཛཡཱརོཔནེན པརཝཱདིནོ ནིགྒཎྷནནྟི ཨཏྠོ.

སྭཱཡཾ པན ཡསྨཱ ཏསྶ ཝཱདཱཔརཱདྷཧེཏུཀོ, ཏསྨཱ ཏཾ དསྶེཏུཾ ཨཊྛཀཐཱཡཾ དོསཱཔརཱདྷཔརིཡཱཡེཧི ཝིབྷཱཝིཏོ. ཨཝཛཱནནཉྷེཏྠ ནིགྒཧཊྛཱནཾ. ཏཐཱ ཧི པཊིཉྙཱཧཱནི, པཊིཉྙཱནྟརཾ, པཊིཉྙཱཝིརོདྷོ, པཊིཉྙཱསཉྙཱསོ, ཧེཏྭནྟརཾ, ཨཏྠནྟརཾ, ནིརཏྠཀཾ, ཨཝིཉྙཱཏཏྠཾ, ཨསམྦནྡྷཏྠཾ, ཨཔྤཏྟཀཱལཾ, ཨཱུནཾ, ཨདྷིཀཾ, པུནརུཏྟཾ, ཨནནུབྷཱསནཾ, ཨཝིཉྙཱཏཾ, ཨཔྤཊིབྷཱ, ཝིཀྑེཔོ, མཏཱནུཉྙཱ, ཨནུཡུཉྫིཏབྦསྶ ཨུཔེཀྑནཾ, ཨནནུཡུཉྫིཏབྦསྶ ཨནུཡོགོ, ཨཔསིདྡྷནྟརཾ, ཧེཏྭཱབྷཱསཱ ཙཱཏི དྭཱཝཱིསཏི ནིགྒཧཊྛཱནཱནི ཉཱཡཝཱདིནོ ཝདནྟི.

ཏཏྠ ཝིསདིསཱུདཱཧརཎདྷམྨཱནུཛཱནནཾ པཋམུདཱཧརཎེ པཊིཉྙཱཧཱནི. པཊིཉྙཱཏཏྠཔཊིསེདྷེ ཏདཉྙཏྠནིདྡེསོ པཊིཉྙཱནྟརཾ. པཊིཉྙཱཝིརུདྡྷཧེཏུཀིཏྟནཾ པཊིཉྙཱཝིརོདྷོ. པཊིཉྙཱཏཏྠཱཔནཡནཾ པཊིཉྙཱསཉྙཱསོ. ཨཝིསེསཝུཏྟེ ཧེཏུམྷི པཊིསིདྡྷེ ཝིསེསཧེཏུཀཐནཾ ཧེཏྭནྟརཾ. ཨདྷིཀཏཏྠཱནུཔཡོགིཨཏྠཀཐནཾ ཨཏྠནྟརཾ. མཱཏིཀཱཔཱཋོ ཝིཡ ཨཏྠཧཱིནཾ ནིརཏྠཀཾ. ཏིཀྑཏྟུཾ ཝུཏྟམྤི སཀྑིཔཊིཝཱདཱིཧི ཨཝིདིཏཾ ཨཝིཉྙཱཏཏྠཾ. པུབྦཱཔརཝསེན སམྦནྡྷརཧིཏཾ ཨསམྦནྡྷཏྠཾ. ཨཝཡཝཝིཔལླཱསཝཙནཾ ཨཔྤཏྟཀཱལཾ. ཨཝཡཝཝིཀལཾ ཨཱུནཾ. ཨདྷིཀཧེཏཱུདཱཧརཎཾ ཨདྷིཀཾ. ཋཔེཏྭཱ ¶ ཨནུཝཱདཾ སདྡཏྠཱནཾ པུནཔྤུནཾ ཝཙནཾ ཨཏྠཱཔནྣཝཙནཉྩ པུནརུཏྟཾ. པརིསཱཡ ཝིདིཏསྶ ཏཱིཧི ཝུཏྟསྶ ཨཔཙྩུདཱཧཱརོ ཨནནུབྷཱསནཾ. ཡཾ ཝཱདིནཱ ¶ ཝུཏྟཾ པརིསཱཡ ཝིཉྙཱཏཾ པཊིཝཱདིནཱ དུཝིཉྙཱཏཾ, ཏཾ ཨཝིཉྙཱཏཾ. ཏཾཝཱདིནཱ ཝཏྟབྦེ ཝུཏྟེ པརཝཱདིནོ པཊིཝཙནསྶ ཨནུཔཊྛཱནཾ ཨཔྤཊིབྷཱ. ཀིཙྩནྟརཔྤསངྒེན ཀཐཱཝིཙྪིནྡནཾ ཝིཀྑེཔོ. ཨཏྟནོ དོསཱནུཛཱནནེན པརཔཀྑསྶ དོསཔྤསཉྫནཾ པརམཏཱནུཛཱནནཾ མཏཱནུཉྙཱ. ནིགྒཧཔྤཏྟསྶ ནིགྒཎྷནཾ ཨནུཡུཉྫིཏབྦསྶ ཨུཔེཀྑནཾ. སམྤཏྟནིགྒཧསྶ ཨནིགྒཧཊྛཱནེ ཙ ནིགྒཎྷནཾ ཨནུཡུཉྫིཏབྦསྶ ཨནུཡོགོ. ཨེཀཾ སིདྡྷནྟམནུཛཱནིཏྭཱ ཨནིཡམཏོ ཏདཉྙསིདྡྷནྟཀཐཱཔྤསཉྫནཾ ཨཔསིདྡྷནྟརཾ. ཨསིདྡྷཱ ཨནེཀནྟིཀཱ ཝིརུདྡྷཱ ཙ ཧེཏྭཱབྷཱསཱ, ཧེཏུཔཏིརཱུཔཀཱཏི ཨཏྠོ. ཏེསཉྩ ཀཐནཾ ནིགྒཧཊྛཱནནྟི.

ཨིམེསུ དྭཱཝཱིསཏིཡཱ ནིགྒཧཊྛཱནེསུ ཨིདཾ པཊིཉྙཱཡ ཨཔནཡནཏོ སཡམེཝ པཙྩཀྑཱནཏོ པཊིཉྙཱསཉྙཱསོ ནཱམ ནིགྒཧཊྛཱནཾ. ཏེནེཝཱཧ ‘‘ཨཝཛཱནནེནེཝ ནིགྒཧཾ དསྶེཏཱི’’ཏི. ཨསིདྡྷཏྟཱཏི ཨེཏེན པཙྩཀྑཏོ ཨནུམཱནཏོ ཙ པུགྒལསྶ ཨནུཔལབྦྷམཱཧ. ན ཧི སོ པཙྩཀྑཏོ ཨུཔལབྦྷཏི. ཡདི ཨུཔལབྦྷེཡྻ, ཝིཝཱདོ ཨེཝ ན སིཡཱ, ཨནུམཱནམྤི ཏཱདིསཾ ནཏྠི, ཡེན པུགྒལཾ ཨནུམིནེཡྻུཾ. ཏཐཱ ཧི ཏཾ སཱསནིཀོ པུགྒལཝཱདཱི ཝདེཡྻ ‘‘པུགྒལོ ཨུཔལབྦྷཏི, ཨཏྠི པུགྒལོ’’ཏི བྷགཝཏཱ ཝུཏྟཏྟཱ རཱུཔཝེདནཱདི ཝིཡ. ཡཉྷི བྷགཝཏཱ ‘‘ཨཏྠཱི’’ཏི ཡདི ཝུཏྟཾ, ཏཾ པརམཏྠཏོ ཨཏྠི ཡཐཱ ཏཾ རཱུཔཾ ཝེདནཱ སཉྙཱ སངྑཱརཱ ཝིཉྙཱཎཾ. ཡཾ པན པརམཏྠཏོ ནཏྠི, ན ཏཾ བྷགཝཏཱ ‘‘ཨཏྠཱི’’ཏི ཝུཏྟཾ ཡཐཱ ཏཾ པཀཏིཝཱདིཨཱདཱིནཾ པཀཏིཨཱདཱིཏི, ཏཾ མིཙྪཱ. ཨེཏྠ ཧི ཡདི ཝོཧཱརཏོ པུགྒལསྶ ཨཏྠིབྷཱཝོ ཨདྷིཔྤེཏོ, སིདྡྷཾ སཱདྷནཾ, ཨཐ པརམཏྠཏོ, ཨསིདྡྷོ ཧེཏུ ཏཐཱ ཨཝུཏྟཏྟཱ. ཝིརུདྡྷོ ཙ ཏསྶ ཨནིཙྩསངྑཏཔཊིཙྩསམུཔྤནྣཱདིབྷཱཝཱསཱདྷནཏོ རཱུཔཝེདནཱདཱིསུ ཏཐཱ དིཊྛཏྟཱཏིཨཱདིནཱ ཏསྶ ཨཧེཏུཀབྷཱཝསྶེཝ པཱཀཊབྷཱཝཏོ.

ཡཾ པན བཱཧིརཀཱ པུཐུ ཨཉྙཏིཏྠིཡཱ ཝདནྟི. ཨཏྠེཝ ཙ པརམཏྠཏོ ཨཏྟཱ ཉཱཎཱབྷིདྷཱནསྶ པཝཏྟིཡཱ ནིམིཏྟབྷཱཝཏོ རཱུཔཱདི ཝིཡ. ཨཐ ཝཱ ཨཏྟཱཏིརིཏྟཔདཏྠནྟརོ རཱུཔཀྑནྡྷོ ཁནྡྷསབྷཱཝཏྟཱ ཡཐཱ ཏཾ ཨིཏརཀྑནྡྷཱ. ཡཉྷེཏྠ པདཏྠནྟརཾ, སོ པུགྒལོཏི ཨདྷིཔྤཱཡོ.

ཨེཏྠ ¶ ཙ པུརིམསྶ ཧེཏུནོ པཉྙཏྟིཡཱ ཨནེཀནྟིཀཏཱ ཨསིདྡྷཏཱ ཙ. ན ཧི ཨསཏོ སཀཝཱདིནཾ ¶ པཏི པརམཏྠཏོ ཉཱཎཱབྷིདྷཱནཔྤཝཏྟིཡཱ ནིམིཏྟབྷཱཝོ སིཛ྄ཛྷཏི. ཝོཧཱརཏོ ཙེ, ཏདསིདྡྷསཱདྷནཏཱ རཱུཔཱདིསབྷཱཝཝིནིམུཏྟརཱུཔོཔི པུགྒལོ ན ཧོཏཱིཏི ཨེཝམཱདིཝིརུདྡྷཏྠཏཱ. པཙྪིམསྶ པན ཧེཏུནོ སཱདྷེཏབྦཏྠསཱམཉྙཔརིགྒཧེ སིདྡྷསཱདྷནཏཱ, རཱུཔཀྑནྡྷཏོ པདཏྠནྟརཏོ པརམཏྠནྟརབྷཱུཏཝེདནཱདིསམྦྷཝསྶ ཨིཙྪིཏཏྟཱ ཙ. ཏབྦིསེསཔརིགྒཧེ ཙ སཀཝཱདིནཾ པཏི ཨུདཱཧརཎཱབྷཱཝོ པརཔརིཀཔྤིཏཛཱིཝཔདཏྠཝིརཧཏོ. ཨིཏརཀྑནྡྷཱནཾ ཝེདནཱདིཝིནིམུཏྟཨུབྷཡསིདྡྷཛཱིཝཔདཏྠསཧིཏོཔི རཱུཔཀྑནྡྷོ ན ཧོཏི ཨིཏརཀྑནྡྷཱ ཝིཡཱཏི ཝིརུདྡྷཏྠཏཱ ཙ.

ཡཾ པན ཀཱཎཱདཱ ‘‘སུཁཱདཱིནཾ ནིསྶཡབྷཱཝཏོ’’ཏི ཨནུམཱནཾ ཝདནྟི, ཏེ ཨིདཾ ཝཏྟབྦཱ – ཀིཾ སུཁཱདཱིནཾ ཨཏྟནི པཊིབདྡྷཾ ཡཏོ སུཁཱདིནིསྶཡཏཱཡ ཨཏྟཱ ཨནུམཱིཡཏི. ཡདི ཨུཔྤཱདོ, ཨེཝཾ སནྟེ སབྦེཔི སུཁཱདཡོ ཨེཀཏོ ཨེཝ བྷཝེཡྻུཾ ཀཱརཎསྶ སནྣིཧིཏབྷཱཝཏོ ཨཉྙནིརཔེཀྑཏོ ཙ. ཨཐ ཨཉྙམྤི ཀིཉྩི ཨིནྡྲིཡཱདིཀཱརཎནྟརམཔེཀྑིཏབྦཾ, ཏདེཝ ཧོཏུ ཀཱརཎཾ, ཀིམཉྙེན ཨདིཊྛསཱམཏྠིཡེན པརིཀཔྤིཏེན པཡོཛནཾ. ཨཐ པན ཏེསཾ ཨཏྟཱདྷཱིནཱ ཝུཏྟཱིཏི ཝདེཡྻུཾ, ཨེཝམྤི ན སིཛ྄ཛྷཏི ཨུདཱཧརཎཱབྷཱཝཏོ. ན ཧི རཱུཔཱདིཝིནིམུཏྟོ ཏཱདིསོ ཀོཙི སབྷཱཝདྷམྨོ སུཁཱདིསནྣིསྶཡབྷཱུཏོ ཨཏྠི, ཡཏོ ཨཏྟནོ ཨཏྟཏྠསིདྡྷིཡཱ ཨུདཱཧརཎཾ ཨཔདིསེཡྻུཾ. ཨིམིནཱ ནཡེན ཨསམཱསཔདཱབྷིདྷེཡྻཏྟཱཏིཨཱདཱིནམྤི ཨཡུཏྟཏྟཱ ནིཝཱརེཏབྦཱ. ཏཐཱ ‘‘ཨཉྙསྶ སཙྩིཀཊྛསྶ ཨསིདྡྷཏྟཱ’’ཏི ཨིམིནཱ ཙ པཀཏིཨཎུཨཱདཱིནམྤི བཱཧིརཔརིཀཔྤིཏཱནཾ ཨསིདྡྷཏཱ ཝུཏྟཱཝཱཏི ཝེདིཏབྦཱ. ཀཐཾ པན ཏེསཾ ཨསིདྡྷཱིཏི? པམཱཎེན ཨནུཔལབྦྷནཏོ. ན ཧི པཙྩཀྑཏོ པཀཏི སིདྡྷཱ ཀཔིལསྶཔི ཨིསིནོ ཏསྶ ཨཔཙྩཀྑབྷཱཝསྶ ཀཱཔིལེཧི ཨནུཉྙཱཡམཱནཏྟཱ.

ཡཾ པན ‘‘ཨཏྠི པདྷཱནཾ བྷེདཱནཾ ཨནྭཡདསྶནཏོ སཀལཀལཱཔམཏྟཾ ཝིཡཱ’’ཏི ཏེ ཨནུམཱནཾ ཝདནྟི. ཨིམིནཱ ཧི བྷེདཱནཾ སཏྭཱདཱིནཾ ཝིཛྫམཱནཔདྷཱནཏཱ པཊིཉྙཱཏཱ. ཨེཏྠ ཙ ཝུཙྩཏེ – སཀལཱདཱིནཾ པདྷཱནཾ ཏབྦིབྷཱགེཧི ཀིཾ ཨཉྙཏྟཾ, ཨུདཱཧུ ཨནཉྙནྟི, ཀིཉྩེཏྠ ཡདི ཨཉྙཏྟཾ, སབྦོ ལོཀོ པདྷཱནམཡོཏི སམཡཝིརོདྷོ སིཡཱ, སཎྛཱནབྷེདེན ཨཉྙཏྠ པཊིཛཱནནཏོ ¶ ན དོསོཏི ཙེ? ཏཾ ན, ཝལཡཀཊཀཱདིསཎྛཱནབྷེདེཔི ཀནཀཱབྷེདདསྶནཏོ. ན ཧི སཎྛཱནཾ ཝཏྠུབྷེདནིམིཏྟཾ ཏསྶ ཨནུཔཱདཱནཏྟཱ. ཡཾ ཡསྶ བྷེདནིམིཏྟཾ, ན ཏཾ ཏསྶ ཨནུཔཱདཱནཾ ཡཐཱ སུཝཎྞམཏྟིཀཱདིགྷཊཱདཱིནཾ སུཝཎྞགྷཊོ མཏྟིཀཱགྷཊོ ཀོསེཡྻཔཊོ ཀཔྤཱསཔཊོཏི ཙ སཱདྷེཏབྦདྷམྨརཧིཏཉྩ ཨུདཱཧརཎཾ. ན ཧི པདྷཱནེཀཀཱརཎཔུབྦཀཏྟཾ སཀལཱདཱིནཾ པཀཏིཝཱདིནོ ¶ སིདྡྷཾ, ནཱཔི ཀཱཔིལཱནཾ ཀཐཉྩི ཨཉྙཏྟཱནུཛཱནནཏོ. ཨནཉྙཏྟེ པན ཨུདཱཧརཎཱབྷཱཝོ. ན ཧི ཏདེཝ སཱདྷེཏབྦཾ ཏདེཝ ཙ ཨུདཱཧརཎཾ ཡུཏྟཾ, ཨནྭཡདསྶནམྤི ཨསིདྡྷཾ. ན ཧི ཏདེཝ ཏེན ཨནྭིཏཾ ཡུཛྫཏི. པདྷཱནེན ཨནྭཡདསྶནམྤི ཨསིདྡྷཾ པརཝཱདིནོཏི གུཎསྶ པདྷཱནསྶ ཨནནུཛཱནནཏོ. ཨཐ ཡཾ ཀིཉྩི ཀཱརཎཾ པདྷཱནཾ ‘‘པདྷཱིཡཏི ཨེཏྠ ཕལ’’ནྟི, ཨེཝམྤི ཨསིདྡྷམེཝ ཀཱརཎེ ཕལསྶ ཨཏྠིབྷཱཝཱནནུཛཱནནཏོ, ཧེཏུནོ ཙ ཨསིདྡྷནིསྶཡཏཱཔརཱབྷིམཏབྷེདཱནནུཛཱནནཏོ. ཨཐ ཝིསེསེན ཀཱརཎཱཡཏྟཝུཏྟིཏཱ ཕལསྶ སཱདྷཱིཡཏི, ན ཀིཉྩི ཝིརུདྡྷཾ དྷམྨཱནཾ ཡཐཱསཀཾ པཙྩཡེན པཊིཙྩསམུཔྤཏྟིཡཱ ཨིཙྪིཏཏྟཱཏི.

ཨཔིཙ པཀཏིཝཱདིནོ ‘‘སཏྭརཛཏམསངྑཱཏཱནཾ ཏིཎྞཾ གུཎཱནཾ སམབྷཱཝོ པཀཏི, སཱ ཙ ནིཙྩཱ སཏྭཱདིཝིསམསབྷཱཝཏོ ཨནིཙྩཏོ མཧཏཱདིཝིཀཱརཏོ ཨནཉྙཱ’’ཏི པཊིཛཱནནྟི. སཱ ཏེསཾ ཝུཏྟཔྤཀཱརཱ པཀཏི ན སིཛ྄ཛྷཏི ཏཏོ ཝིརུདྡྷསབྷཱཝཏོ ཝིཀཱརཏོ ཨནཉྙཏྟཱ. ན ཧི ཨསྶསྶ ཝིསཱཎཾ དཱིགྷཾ, ཏཉྩ རསྶཏོ གོཝིསཱཎཏོ ཨནཉྙནྟི ཝུཙྩམཱནཾ སིཛ྄ཛྷཏི. ཀིཉྩ བྷིཡྻོ? ཏིཎྞཾ ཨེཀབྷཱཝཱབྷཱཝཏོ. སཏྭཱདིགུཎཏྟཡཏོ ཧི པཀཏིཡཱ ཨནཉྙཏྟཾ ཨིཙྪནྟཱནཾ ཏེསཾ སཏྭཱདཱིནམྤི པཀཏིཡཱ ཨནཉྙཏྟཾ ཨཱཔཛྫཏི, ན ཙ ཡུཏྟཾ ཏིཎྞཾ ཨེཀབྷཱཝོཏི. ཨེཝམྤི པཀཏི ན སིཛ྄ཛྷཏི. ཀཐཾ? ཨནེཀདོསཱཔཏྟིཏོ. ཡདི ཧི བྱཏྟསབྷཱཝཏོ ཝིཀཱརཏོ ཨབྱཏྟསབྷཱཝཱ པཀཏི ཨནཉྙཱ, ཨེཝཾ སནྟེ ཧེཏུམནྟཏཱ ཨནིཙྩཏཱ ཨབྱཱཔིཏཱ སཀིརིཡཏཱ ཨནེཀཏཱ ནིསྶིཏཏཱ ལིངྒཏཱ སཱཝཡཝཏཱ པརཏནྟྲཏཱཏི ཨེཝམཱདཡོ ཨནེཀེ དོསཱ པཀཏིཡཱ ཨཱཔཛྫནྟི, ན ཛཱཏིཝིཀཱརཏོ ཨནཉྙཱ པཊིཛཱནིཏབྦཱ. ཏཐཱ ཙ སཏི སམཡཝིརོདྷོཏི ཀཔྤནཱམཏྟཾ པཀཏཱིཏི ཨསིདྡྷཱ སཱཏི ནིཊྛམེཏྠ གནྟབྦཾ.

པཀཏིཡཱ ¶ ཙ ཨསིདྡྷཱཡ ཏཾནིམིཏྟཀབྷཱཝེན ཝུཙྩམཱནཱ མཧཏཱདཡོཔི ཨསིདྡྷཱ ཨེཝ. ཡཐཱ ཙ པཀཏི མཧཏཱདཡོ ཙ, ཨེཝཾ ཨིསྶརཔཛཱཔཏིཔུརིསཀཱལསབྷཱཝནིཡཏིཡདིཙྪཱདཡོཔི. ཨེཏེསུ ཧི ཨིསྶརོ ཏཱཝ ན སིཛ྄ཛྷཏི ཨུཔཀཱརསྶ ཨདསྶནཏོ. སཏྟཱནཉྷི ཛཱཏིཡཾ མཱཏཱཔིཏཱུནཾ བཱིཛཁེཏྟབྷཱཝེན ཀམྨསྶ ཧཱིནཏཱདིཝིབྷཱགཀརཎེན, ཏཏོ པརཉྩ ཨུཏུཨཱཧཱརཱནཾ བྲཱུཧནུཔཏྠམྦྷནེན, ཨིནྡྲིཡཱནཾ དསྶནཱདིཀིཙྩསཱདྷནེན ཨུཔཀཱརོ དིསྶཏི, ན, ཨེཝམིསྶརསྶ. ཧཱིནཏཱདིཝིབྷཱགཀརཎམིསྶརསྶཱཏི ཙེ? ཏཾ ན, ཨསིདྡྷཏྟཱ. ཡཐཱཝུཏྟོ ཨུཔཀཱརཝིསེསོ ཨིསྶརནིམྨིཏོ, ན ཀམྨུནཱཏི སཱདྷནཱིཡམེཏཾ. ཨིཏརཏྲཱཔི སམཱནམེཏནྟི ཙེ? ན, ཀམྨཏོ ཕལནིཡམསིདྡྷཏྟཱ ¶ . སཏི ཧི ཀཏཱུཔཙིཏེ ཀམྨསྨིཾ ཏཏྠ ཡཾ ཨཀུསལཾ, ཏཏོ ཧཱིནཏཱ, ཡཾ ཀུསལཾ, ཏཏོ པཎཱིཏཏཱཏི སིདྡྷམེཏཾ. ཨིསྶརཝཱདིནཱཔི ཧི ན སཀྐཱ ཀམྨཾ པཊིཀྑིཔིཏུཾ.

ཨཔིཙེཏསྶ ལོཀཝིཙིཏྟསྶ ཨིསྶརནིམྨཱནབྷཱཝེ བཧཱུ དོསཱ སམྦྷཝནྟི. ཀཐཾ? ཡདི སབྦམིདཾ ལོཀཝིཙིཏྟཾ ཨིསྶརནིམྨིཏཾ, སཧེཝ ཝཙནེན པཝཏྟིཏབྦཾ, ན ཀམེན. ན ཧི སནྣིཧིཏཀཱརཎཱནཾ ཕལཱནཾ ཀམེན ཨུཔྤཏྟི ཡུཏྟཱ, ཀཱརཎནྟརཱཔེཀྑཱཡ ཨིསྶརསྶ སཱམཏྠིཡཧཱནི. ཙཀྑཱདཱིནཾ ཙཀྑུཝིཉྙཱཎཱདཱིསུ ཀཱརཎབྷཱཝོ ན ཡུཏྟོ. ཀརོཏཱིཏི ཧི ཀཱརཎནྟི. ཨིསྶརོ ཨེཝ ཙ ཀཱརཀོཏི སབྦཀཱརཎཱནཾ ཀཱརཎབྷཱཝཧཱནི. ཡེཧི པུཐུཝིསེསེཧི ཨིསྶརོ པསཱིདེཡྻ, ཏེསཉྩ སཡཾཀཱརཏཱ ཨཱཔཛྫཏི, ཏཐཱ སབྦེསཾ ཧེཏུཀཱནཾ ཀཱརཎབྷཱཝོ. ཡཉྫེཏཾ ནིམྨཱནཾ, ཏཉྩསྶ ཨཏྟདཏྠཾ ཝཱ སིཡཱ, པརཏྠཾ ཝཱ སིཡཱ. ཨཏྟདཏྠཏཱཡཾ ཨཏྟནོ ཨིསྶརབྷཱཝཧཱནི ཨཀཏཀིཙྩཏཱཡ ཨིསིཏཱཝསིཏཱབྷཱཝཏོ. ཏེན ཝཱ ནིམྨིཏེན ཡཾ ཨཏྟནོ ཀཱཏབྦཾ, ཏཾ ཀསྨཱ སཡམེཝ ན ཀརོཏི. པརཏྠཏཱཡཾ པན པརོ ནཱམེཏྠ ལོཀོ ཨེཝཱཏི ཀིམཏྠིཡཾ ཏསྶ ནིརཡཱདིརོགཱདིཝིསཱདིནིམྨཱནཾ. ཡཱ ཙསྶ ཨིསྶརཏཱ, སཱ སཡཾཀཏཱ ཝཱ སིཡཱ པརཾཀཏཱ ཝཱ ཨཧེཏུཀཱ ཝཱ. ཏཏྠ སཡཾཀཏཱ ཙེ, ཏཏོ པུབྦེ ཨནིསྶརབྷཱཝཱཔཏྟི. པརཾཀཏཱ ཙེ, པཙྪཱཔི ཨནིསྶརབྷཱཝཱཔཏྟི སཨུཏྟརཏཱ ཙ སིཡཱ. ཨཧེཏུཀཱ ཙེ, ན ཀསྶཙི ཨནིསྶརཏཱཏི ཨེཝམིསྶརསྶཔི ཨསིདྡྷི ཝེདིཏབྦཱ.

ཡཐཱ ཙ ཨིསྶརོ, ཨེཝཾ པཛཱཔཏི པུརིསོ ཙ. ནཱམམཏྟམེཝ ཧེཏྠ ཝིསེསོ. ཏེཧི ཝཱདཱིཧི པཀཔྤིཏཾ ཡདིདཾ ‘‘པཛཱཔཏི པུརིསོ’’ཏི. ཏཾནིམིཏྟཀཾ ¶ པན ལོཀཔྤཝཏྟིཾ ཨིཙྪནྟཱནཾ པཛཱཔཏིཝཱདེ པུརིསཝཱདེ ཙ ཨིསྶརཝཱདེ ཝིཡ དོསཱ ཨསིདྡྷི ཙ ཝིདྷཱཏབྦཱ. ཡཐཱ ཙེཏེ ཨིསྶརཱདཡོ, ཨེཝཾ ཀཱལོཔི ཨསིདྡྷོ ལཀྑཎཱབྷཱཝཏོ. པརམཏྠཏོ ཧི ཝིཛྫམཱནཱནཾ དྷམྨཱནཾ སབྷཱཝསངྑཱཏཾ ལཀྑཎཾ ཨུཔལབྦྷཏི. ཡཐཱ པཐཝིཡཱ ཀཐིནཏཱ, ན ཨེཝཾ ཀཱལསྶ, ཏསྨཱ ནཏྠི པརམཏྠཏོ ཀཱལོཏི. ཀཱལཝཱདཱི པནཱཧ ‘‘ཝཏྟནཱལཀྑཎོ ཀཱལོ’’ཏི. སོ ཝཏྟབྦོ ‘‘ཀཱ པནཱཡཾ ཝཏྟནཱ’’ཏི. སོ ཨཱཧ ‘‘སམཡམུཧུཏྟཱདཱིནཾ པཝཏྟཱི’’ཏི. ཏམྤི ན, རཱུཔཱདཱིཧི ཨཏྠནྟརབྷཱཝེན ཨནིདྡྷཱརིཏཏྟཱ. པརམཏྠཏོ ཧི ཨནིདྡྷཱརིཏསབྷཱཝསྶ ཝཏྟནཱལཀྑཎཏཱཡཾ སསཝིསཱཎཱདཱིནམྤི ཏཾལཀྑཎཏཱ ཨཱཔཛྫེཡྻ.

ཡཾ པན ཝདནྟི ཀཱཎཱདཱ ‘‘ཨཔརསྨིཾ ཨཔརཾ ཡུགཔདི ཙིརཾ ཁིཔྤམིཏི ཀཱལལིངྒཱནཱིཏི ལིངྒསབྦྷཱཝཏོ ¶ ཨཏྠི ཀཱལོ’’ཏི, ཏཾ ཨཡུཏྟཾ ལིངྒིནོ ཨནུཔལབྦྷམཱནཏྟཱ. སིདྡྷསམྦནྡྷེསུ ཧི ལིངྒེསུ ལིངྒམཏྟགྒཧཎེན ལིངྒིནི ཨཝབོདྷོ བྷཝེཡྻ. ན ཙ ཀེནཙི ཨཝིཔརཱིཏཙེཏསཱ ཏེན ལིངྒེན སཧ ཀདཱཙི ཀཱལསངྑཱཏོ ལིངྒཱི གཧིཏཔུབྦོཏི. ཨཏོ ན ཡུཏྟཾ ‘‘ལིངྒསབྦྷཱཝཏོ ཨཏྠི ཀཱལོ’’ཏི. ‘‘ཨཔརསྨིཾ ཨཔར’’ནྟིཨཱདིཀསྶ ཝིསེསསྶ ནིམིཏྟབྷཱཝཏོ ཡུཏྟནྟི ཙེ? ན, པཋམཛཱཏཏཱདིནིམིཏྟཀཏྟཱ ཏསྶ. ན ཙ པཋམཛཱཏཏཱདི ནཱམ ཀོཙི དྷམྨོ ཨཏྠི ཨཉྙཏྲ སམཉྙཱམཏྟཏོཏི ནཏྠེཝ པརམཏྠཏོ ཀཱལོ. ཀིཉྩ བྷིཡྻོ, བཧཱུནཾ ཨེཀབྷཱཝཱཔཏྟིཏོ. ཨཏཱིཏཱདིཝིབྷཱགེན ཧི ལོཀསམཉྙཱཝསེན བཧཱུ ཀཱལབྷེདཱ. ཏྭཉྩེཏཾ ཨེཀཾ ཝདསཱིཏི བཧཱུནཾ ཨེཀབྷཱཝཱབྷཱཝཏོ ནཏྠེཝ པརམཏྠཏོ ཀཱལོ. ཏཐཱ ཨེཀསྶ ཨནེཀབྷཱཝཱཔཏྟིཏོ. ཡོ ཧི ཨཡཾ ཨཛྫ ཝཏྟམཱནཀཱལོ, སོ ཧིཡྻོ ཨནཱགཏོ ཨཧོསི, སྭེ ཨཏཱིཏོ བྷཝིསྶཏི. ཧིཡྻོ ཙ ཝཏྟམཱནོ ཨཛྫ ཨཏཱིཏོ ཨཧོསི, ཏཐཱ སྭེ ཝཏྟམཱནོཔི ཨཔརཛྫ. ན ཙེཀསབྷཱཝསྶ ཨནེཀསབྷཱཝཏཱ ཡུཏྟཱཏི ཨསིདྡྷོ པརམཏྠཏོ ཀཱལོ. དྷམྨཔྤཝཏྟིཾ པན ཨུཔཱདཱཡ ཀཔྤནཱམཏྟསིདྡྷཱཡ ལོཀསམཉྙཱཡ ཨཏཱིཏཱདིཝིབྷཱགཏོ ཝོཧརཱིཡཏཱིཏི ཝོཧཱརམཏྟཀོཏི དཊྛབྦོ.

སབྷཱཝནིཡཏིཡདིཙྪཱདཡོཔི ཨསིདྡྷཱ. ཀིཾ ཀཱརཎཱ? ལཀྑཎཱབྷཱཝཱ. ན ཧི སབྷཱཝཏོ ནིཡཏིཡདིཙྪཱ སམྦྷཝཏི. ཨཉྙཐཱ ཨེཝཾཝིདྷོ ཀོཙི ¶ བྷཱཝོ ཨཏྠི ཙེ, ཏེསཾ སབྷཱཝསངྑཱཏེན ལཀྑཎེན བྷཝིཏབྦཾ, པཏིཊྛཱཔཀཧེཏུནཱ ཙ ན ཙཏྠི. ཀེཝལཾ པནེཏེ ཝཱདཱ ཝིམདྡིཡམཱནཱ ཨཧེཏུཝཱདེ ཨེཝ ཏིཊྛནྟི, ན ཙཱཧེཏུཀཾ ལོཀཝིཙིཏྟཾ ཝིསེསཱབྷཱཝཔྤསངྒཏོ. ཨཧེཏུཀབྷཱཝེ ཧི པཝཏྟིཡཱ ཡྭཱཡཾ ནརསུརནིརཡཏིརཙྪཱནཱདཱིསུ ཨིནྡྲིཡཱདཱིནཾ ཝིསེསོ, ཏསྶ ཨབྷཱཝོ ཨཱཔཛྫཏི, ན ཙཱཡཾ པཎྜིཏེཧི ཨིཙྪིཏོ. ཀིཉྩ? དིཊྛབྷཱཝཏོ. དིཊྛཱ ཧི ཙཀྑཱདིཏོ ཙཀྑུཝིཉྙཱཎཱདཱིནཾ བཱིཛཱདིཏོ ཨངྐུརཱདཱིནཾ པཝཏྟི, ཏསྨཱཔི ཧེཏུཏོཝཱཡཾ པཝཏྟི. ཏཐཱ པུརེ པཙྪཱ ཙ ཨབྷཱཝཏོ. ཡཏོ ཡཏོ ཧི པཙྩཡསཱམགྒིཏོ ཡཾ ཡཾ ཕལཾ ནིབྦཏྟཏི, ཏཏོ པུབྦེ པཙྪཱ ཙ ན ཏསྶ ནིབྦཏྟི སམྦྷཝཏི, ཀིཉྩ བཧུནཱ. ཡདི ཨཧེཏུཏོ པཝཏྟི སིཡཱ, ཨཧེཏུཀཱ པཝཏྟཱིཏི ཨིམཱཔི ཝཱཙཱ ཡཐཱསཀཔཙྩཡསམཝཱཡཏོ པུརེ པཙྪཱ ཙ བྷཝེཡྻུཾ, ན ཙ བྷཝནྟི ཨལདྡྷཔྤཙྩཡཏྟཱ, མཛ྄ཛྷེ ཨེཝ ཙ བྷཝནྟི ལདྡྷཔྤཙྩཡཏྟཱ. ཨེཝཾ སབྦེཔི སངྑཏཱ དྷམྨཱཏི ན སིཛ྄ཛྷཏི ཨཧེཏུཝཱདོ. ཏསྨིཉྩ ཨསིདྡྷེ པཝཏྟིཡཱ ཨཧེཏུབྷཱཝོ ཝིཡ ཨཧེཏུཔརིཡཱཡཝིསེསབྷཱུཏཱ སབྷཱཝནིཡཏིཡདིཙྪཱདཡོཔི ཨསིདྡྷཱ ཨེཝ ཧོནྟཱིཏི ཝེདིཏབྦཱ.

ཡཾ པན ཀཱཎཱདཱ ‘‘པརམཱཎཝོ ནིཙྩཱ, ཏེཧི དྭིཨཎུཀཱདིཕལཾ ནིབྦཏྟཏི, ཏཉྩ ཨནིཙྩཾ ¶ , ཏསྶ ཝསེནེཏཾ ལོཀཝིཙིཏྟ’’ནྟི ཝདནྟི, ཏམྤི མིཙྪཱཔརིཀཔྤམཏྟཾ. ན ཧི པརམཱཎཝོ ནཱམ སནྟི ཨཉྙཏྲ བྷཱུཏསངྒྷཱཏཱ. སོ པན ཨནིཙྩོཝ, ན ཙ ནིཙྩཏོ ཨནིཙྩསྶ ནིབྦཏྟི ཡུཏྟཱ ཏསྶ ཀཱརཎབྷཱཝཱནུཔཔཏྟིཏོ ཏཐཱ ཨདསྶནཏོ ཙ. ཡདི ཙ སོ ཀསྶཙི ཀཱརཎབྷཱཝཾ གཙྪེཡྻ, ཨནིཙྩོ ཨེཝ སིཡཱ ཝིཀཱརཱཔཏྟིཏོ. ན ཙཱཡཾ སམྦྷཝོ ཨཏྠི, ཡཾ ཝིཀཱརཾ ཨནཱཔཛྫནྟམེཝ ཀཱརཎཾ ཕལཾ ནིབྦཏྟེཡྻཱཏི. ཝིཀཱརཉྩེ ཨཱཔཛྫཏི, ཀུཏསྶ ནིཙྩཏཱཝཀཱསོ, ཏསྨཱ ཝུཏྟཔྤཀཱརཱ པརམཱཎཝོ སཏྟཱ ཨནིཙྩཱ, ཨཉྙེཔི ནིཙྩཱདིབྷཱཝེན བཱཧིརཀེཧི པརིཀཔྤིཏཱ ཨསིདྡྷཱ ཨེཝཱཏི ཝེདིཏབྦཾ. ཏེན ཝུཏྟཾ ‘‘དྷམྨཔྤབྷེདཏོ པན ཨཉྙསྶ སཙྩིཀཊྛསྶ ཨསིདྡྷཏྟཱ’’ཏི.

ཨེཏྠཱཧ ‘‘ཡདི པརམཏྠཏོ པུགྒལོ ན ཨུཔལབྦྷཏི, ཨེཝཾ པན པུགྒལེ ཨནུཔལབྦྷམཱནེ ཨཐ ཀསྨཱ བྷགཝཱ ‘ཨཏྠི པུགྒལོ ཨཏྟཧིཏཱཡ པཊིཔནྣོ’ཏི (ཨ. ནི. ༤.༩༥; ཀཐཱ. ༢༢), ‘ཙཏྟཱརོམེ, བྷིཀྑཝེ, པུགྒལཱ སནྟོ སཾཝིཛྫམཱནཱ ལོཀསྨི’ནྟི ¶ (ཨ. ནི. ༤.༩༥; ཀཐཱ. ༢༢) ཙ ཏཏྠ ཏཏྠ པུགྒལསྶ ཨཏྠིབྷཱཝཾ པཝེདེསཱི’’ཏི. ཝིནེཡྻཛ྄ཛྷཱསཡཝསེན. ཏཐཱ ཏཐཱ ཝིནེཏབྦཱནཉྷི པུགྒལཱནཾ ཨཛ྄ཛྷཱསཡཝསེན ཝིནེཡྻདམནཀུསལོ སཏྠཱ དྷམྨཾ དེསེནྟོ ལོཀསམཉྙཱནུརཱུཔཾ ཏཏྠ ཏཏྠ པུགྒལགྒཧཎཾ ཀརོཏི, ན པརམཏྠཏོ པུགྒལསྶ ཨཏྠིབྷཱཝཏོ.

ཨཔིཙ ཨཊྛཧི ཀཱརཎེཧི བྷགཝཱ པུགྒལཀཐཾ ཀཐེཏི ཧིརོཏྟཔྤདཱིཔནཏྠཾ, ཀམྨསྶཀཏཱདཱིཔནཏྠཾ, པཙྩཏྟཔུརིསཀཱརདཱིཔནཏྠཾ, ཨཱནནྟརིཡདཱིཔནཏྠཾ, བྲཧྨཝིཧཱརདཱིཔནཏྠཾ, པུབྦེནིཝཱསདཱིཔནཏྠཾ, དཀྑིཎཱཝིསུདྡྷིདཱིཔནཏྠཾ, ལོཀསམྨུཏིཡཱ ཨཔྤཧཱནཏྠཉྩཱཏི. ‘‘ཁནྡྷཱ དྷཱཏཱུ ཨཱཡཏནཱནི ཧིརཱིཡནྟི ཨོཏྟཔྤནྟཱི’’ཏི ཧི ཝུཏྟེ མཧཱཛནོ ན ཛཱནཱཏི, སམྨོཧཾ ཨཱཔཛྫཏི, པཊིསཏྟུ ཝཱ ཧོཏི ‘‘ཀིམིདཾ ཁནྡྷཱ དྷཱཏཱུ ཨཱཡཏནཱནི ཧིརཱིཡནྟི ཨོཏྟཔྤནྟི ནཱམཱ’’ཏི. ‘‘ཨིཏྠཱི ཧིརཱིཡཏི ཨོཏྟཔྤཏི, པུརིསོ, ཁཏྟིཡོ, བྲཱཧྨཎོ’’ཏི པན ཝུཏྟེ ཛཱནཱཏི, ན སམྨོཧཾ ཨཱཔཛྫཏི, ན པཊིསཏྟུ ཧོཏི, ཏསྨཱ བྷགཝཱ ཧིརོཏྟཔྤདཱིཔནཏྠཾ པུགྒལཀཐཾ ཀཐེཏི. ‘‘ཁནྡྷཱ ཀམྨསྶཀཱ, དྷཱཏུཡོ ཨཱཡཏནཱནཱི’’ཏི ཝུཏྟེཔི ཨེསེཝ ནཡོ. ཏསྨཱ ཀམྨསྶཀཏཱདཱིཔནཏྠམྤི པུགྒལཀཐཾ ཀཐེཏི. ‘‘ཝེལུ༹ཝནཱདཡོ མཧཱཝིཧཱརཱ ཁནྡྷེཧི ཀཱརཱཔིཏཱ, དྷཱཏཱུཧི, ཨཱཡཏནེཧཱི’’ཏི ཝུཏྟེཔི ཨེསེཝ ནཡོ. ཏཐཱ ‘‘ཁནྡྷཱ མཱཏརཾ ཛཱིཝིཏཱ ཝོརོཔེནྟི, པིཏརཾ, ཨརཧནྟཾ, རུཧིརུཔྤཱདཀམྨཾ, སངྒྷབྷེདཀམྨཾ ཀརོནྟི, དྷཱཏུཡོ, ཨཱཡཏནཱནཱི’’ཏི ཝུཏྟེཔི, ‘‘ཁནྡྷཱ མེཏྟཱཡནྟི ¶ , དྷཱཏུཡོ, ཨཱཡཏནཱནཱི’’ཏི ཝུཏྟེཔི, ‘‘ཁནྡྷཱ པུབྦེནིཝཱསཾ ཨནུསྶརནྟི, དྷཱཏུཡོ, ཨཱཡཏནཱནཱི’’ཏི ཝུཏྟེཔི ཨེསེཝ ནཡོ. ཏསྨཱ བྷགཝཱ པཙྩཏྟཔུརིསཀཱརདཱིཔནཏྠཾ ཨཱནནྟརིཡདཱིཔནཏྠཾ བྲཧྨཝིཧཱརདཱིཔནཏྠཾ པུབྦེནིཝཱསདཱིཔནཏྠཉྩ པུགྒལཀཐཾ ཀཐེཏི. ‘‘ཁནྡྷཱ དཱནཾ པཊིགྒཎྷནྟི, དྷཱཏུཡོ, ཨཱཡཏནཱནཱི’’ཏི ཝུཏྟེཔི མཧཱཛནོ ན ཛཱནཱཏི, སམྨོཧཾ ཨཱཔཛྫཏི, པཊིསཏྟུ ཝཱ ཧོཏི ‘‘ཀིམིདཾ ཁནྡྷཱ དྷཱཏཱུ ཨཱཡཏནཱནི པཊིགྒཎྷནྟི ནཱམཱ’’ཏི. ‘‘པུགྒལོ པཊིགྒཎྷཱཏཱི’’ཏི པན ཝུཏྟེ ཛཱནཱཏི, ན སམྨོཧཾ ཨཱཔཛྫཏི, ན པཊིསཏྟུ ཧོཏི, ཏསྨཱ བྷགཝཱ དཀྑིཎཱཝིསུདྡྷིདཱིཔནཏྠཾ པུགྒལཀཐཾ ཀཐེཏི. ལོཀསམྨུཏིཉྩ བུདྡྷཱ བྷགཝནྟོ ནཔྤཛཧནྟི ལོཀསམཉྙཱཡ ལོཀཱབྷིལཱཔེ ཋིཏཱཡེཝ དྷམྨཾ དེསེནྟི, ཏསྨཱ བྷགཝཱ ལོཀསམྨུཏིཡཱ ཨཔྤཧཱནཏྠམྤི པུགྒལཀཐཾ ཀཐེཏཱིཏི ཨིམེཧི ཨཊྛཧི ¶ ཀཱརཎེཧི བྷགཝཱ པུགྒལཀཐཾ ཀཐེཏི, ན པརམཏྠཏོ པུགྒལསྶ ཨཏྠིབྷཱཝཏོཏི ཝེདིཏབྦཾ.

དྷམྨཔྤབྷེདཱཀཱརེནེཝཱཏི ཡཐཱཝུཏྟརཱུཔཱདིདྷམྨཔྤབྷེདཏོ ཨཉྙསྶ སཙྩིཀཊྛསྶ ཨསིདྡྷཏྟཱ རཱུཔཱདིདྷམྨཔྤབྷེདཱཀཱརེནེཝ པུགྒལསྶ ཨུཔལདྡྷིཡཱ བྷཝིཏབྦནྟི ཨཏྠོ. ཏེན ‘‘ཀིཾ ཏཝ པུགྒལོ ཨུཔལབྦྷམཱནོ རུཔྤནཱཀཱརེན ཨུཔལབྦྷཏི, ཨུདཱཧུ ཨནུབྷཝནསཉྫཱནནཱབྷིསངྑརཎཝིཛཱནནེསུ ཨཉྙཏརཱཀཱརེནཱ’’ཏི དསྶེཏི ཏབྦིནིམུཏྟསྶ སབྷཱཝདྷམྨསྶ ལོཀེ ཨབྷཱཝཏོ. ཨཝིསེསཝིསེསེཧི པུགྒལཱུཔལབྦྷསྶ པཊིཉྙཱཔཊིཀྑེཔཔཀྑཱ ཨནུཛཱནནཱཝཛཱནནཔཀྑཱ. ཡདིཔིམེ དྭེཔི པཀྑཱ ཨནུལོམཔཊིལོམནཡེསུ ལབྦྷནྟི, ཨཱདིཏོ པན པཋམཾ ཋཔེཏྭཱ པཝཏྟོ པཋམནཡོ, ཨིཏརོ དུཏིཡནྟི ཨིམཾ ནེསཾ ཝིསེསཾ དསྶེནྟོ ‘‘ཨནུཛཱནནཱ…པེ… ཝེདིཏབྦོ’’ཏི ཨཱཧ. ཡཐཱདྷིཀཏཱཡ ལདྡྷིཡཱ ཨནུལོམནཏོ ཙེཏྠ པཋམོ ནཡོ ཨནུལོམཔཀྑོ, ཏབྦིལོམནཏོ ཨིཏརོ པཊིལོམཔཀྑོཏི ཝུཏྟོཏི ཝེདིཏབྦནྟི.

ཏེན ཝཏ རེཏི ཨེཏྠ ཏེནཱཏི ཀཱརཎཝཙནཾ. ཡེན པུགྒལཱུཔལབྦྷོ པཏིཊྛཔཱིཡཏི, ཏེན ཧེཏུནཱ. སྭཱཡཾ ཧེཏུ སཱསནིཀསྶ བཱཧིརཀསྶ ཙ ཝསེན ཧེཊྛཱ དསྶིཏོ ཨེཝ. ཧེཏུཔཏིརཱུཔཀེ ཙཱཡཾ ཧེཏུསམཉྙཱ པརམཏྠསྶ ཨདྷིཔྤེཏཏྟཱ. ཧེཊྛཱ ‘‘ཨཱཛཱནཱཧི ནིགྒཧ’’ནྟི ནིགྒཧསྶ སཉྙཱཔནམཏྟཾ ཀཏཾ, ཏཾ ཨིདཱནི ‘‘ཡཾ ཏཏྠ ཝདེསཱི’’ཏིཨཱདིནཱ ནིགམནརཱུཔེན མིཙྪཱབྷཱཝདསྶནེན ཙ ཝིབྷཱཝིཡམཱནཾ པཱཀཊབྷཱཝཀརཎཏོ ཨཱརོཔིཏཾ པཏིཊྛཱཔིཏཾ ཧོཏཱིཏི ཨཊྛཀཐཱཡཾ ‘‘ཨཱརོཔིཏཏྟཱ’’ཏི ཝུཏྟཾ.

ཨེཏྠ ¶ ཙ ‘‘པུགྒལོ ཨུཔལབྦྷཏཱི’’ཏི པཊིཉྙཱཝཡཝོ སརཱུཔེནེཝ དསྶིཏོ. ‘‘ཏེནཱ’’ཏི ཨིམིནཱ སཱམཉྙཏོ ཧེཏཱཝཡཝོ དསྶིཏོ. ཡྭཱཡཾ ཡསྨཱ པཊིཉྙཱདྷམྨོ ཧུཏྭཱ སདིསཔཀྑེ ཝིཛྫམཱནོ, ཝིསདིསཔཀྑེ ཨཝིཛྫམཱནོཡེཝ ཧེཏུ ལཀྑཎཱུཔཔནྣོ ནཱམ ཧོཏི, ན ཨིཏརོ, ཏསྨཱ ཡཏྠ སོ ཝིཛྫཏི ན ཝིཛྫཏི ཙ, སོ སདིསཱསདིསབྷཱཝབྷིནྣོ དུཝིདྷོ དིཊྛནྟཱཝཡཝོ. ཡཐཱ རཱུཔཱདི ཨུཔལབྦྷཏི, ཏཐཱ པུགྒལོ. ཡཐཱ ཙ སསཝིསཱཎཾ ན ཨུཔལབྦྷཏི, ན ཏཐཱ པུགྒལོཏི ཨུཔནཡོ. སྭཱཡཾ ‘‘ཝཏྟབྦེ ཁོ པུགྒལོ ཨུཔལབྦྷཏི སཙྩིཀཊྛཔརམཏྠེནཱ’’ཏི ཨིམཱཡ པཱལི༹ཡཱ དཱིཔིཏོ, ཡོ ཨཊྛཀཐཱཡཾ སདྡྷིཾ ཧེཏུདཱཧརཎེཧི ‘‘པཱཔནཱ’’ཏི ཝུཏྟོ. ནིགམནཾ པཱལི༹ཡཾ སརཱུཔེནེཝ ཨཱགཏཾ, ཡཱ ཨཊྛཀཐཱཡཾ ‘‘རོཔནཱ’’ཏི ¶ ཝུཏྟཱཏི. ཨེཝཾ པོརཱཎེན ཉཱཡཀྐམེན སཱདྷནཱཝཡཝཱ ནིདྡྷཱརེཏྭཱ ཡོཛེཏབྦཱ.

ཨིདཱནི ཝཏྟནེན པརཔཀྑུཔལཀྑིཏེ ཧེཏུདཱཧརཎེ ཨནྭཡབྱཏིརེཀདསྶནཝསེན ནིདྡྷཱརེཏྭཱ སཱདྷནཔཡོགོ ཡོཛེཏབྦོ. ཀཱརཎཾ ཝཏྟབྦནྟི ཀིམེཏྠ ཝཏྟབྦཾ. ཧེཏུདཱཧརཎེཧིཡེཝ ཧི སཔརཔཀྑཱནཾ སཱདྷནཾ དཱུསནཾ ཝཱ, ན པཊིཉྙཱཡ, ཏསྶཱ སཱདྷེཏབྦཱདིབྷཱཝཏོ. ཏཾ པན དྭཡཾ ‘‘ཏེན ཝཏ རེ’’ཏིཨཱདིཔཱལི༹ཡཱ ཝིབྷཱཝིཏཾ. ཨཊྛཀཐཱཡཾ པཱཔནཱརོཔནཱསཱིསེན དསྶིཏཾ. པཊིཉྙཱཋཔནཱ པན ཏེསཾ ཝིསཡདསྶནཾ ཀཐཱཡཾ ཏཾམཱུལཏཱཡཱཏི ཝེདིཏབྦཾ. ཏེནཱཧ ‘‘ཡཾ པན ཝཀྑཏཱི’’ཏིཨཱདི. ཏེནེཝ ཙ ཨཊྛཀཐཱཡཾ ‘‘ཨིདཾ ཨནུལོམ…པེ… ཨེཀཾ ཙཏུཀྐཾ ཝེདིཏབྦ’’ནྟི ཝཀྑཏི. ཏཐཱ ཙཱཧ ‘‘ཡཐཱ པན ཏཏྠཱ’’ཏིཨཱདི. ནིགྒཧོཝ ཝིསུཾ ཝུཏྟོ, ན པཊིཀམྨནྟི ཨདྷིཔྤཱཡོ. ཝིསུཾ ཝུཏྟོཏི ཙ པཱཔནཱརོཔནཱཧི ཨསམྨིསྶཾ ཀཏྭཱ ཝིསུཾ ཨངྒབྷཱཝེན ཝུཏྟོ, ན ཏདཉྙཏརོ ཝིཡ ཏདནྟོགདྷབྷཱཝེན ཝུཏྟོ, ནཱཔི ཋཔནཱ ཝིཡ ཨགཎནུཔགབྷཱཝེནཱཏི ཨཏྠོ. ཡེ པནཱཏི པདཀཱརེ སནྡྷཱཡཱཧ. དུཏིཡེ…པེ… ཨཱཔཛྫཏི ཏཏྠ ནིགྒཧསྶ ཨཡཐཱབྷཱུཏཏྟཱ པཊིཀམྨསྶ ཙ ཡཐཱབྷཱུཏབྷཱཝཏོཏི ཨདྷིཔྤཱཡོ.

༢. པརམཏྠཏོ པུགྒལཾ ནཱནུཛཱནཱཏི, ཝོཧཱརཏོ པན ཨནུཛཱནཱཏཱིཏི སཀཝཱདིམཏཾ ཛཱནནྟེནཔི པརཝཱདིནཱ ཚལཝསེན ཝིབྷཱགཾ ཨཀཏྭཱ ‘‘པུགྒལོ ནུཔལབྦྷཏི སཙྩིཀཊྛཔརམཏྠེནཱ’’ཏི པུཙྪཱཡ ཀཏཱཡ སཀཝཱདཱི ཏཏྠ ཨཡཾ པུགྒལཝཱདཱི, ཨིམསྶ ལདྡྷི པཊིཀྑིཔིཏབྦཱཏི པརམཏྠསཙྩཾ སནྡྷཱཡཱཧ ‘‘ཨཱམནྟཱ’’ཏི. ‘‘ན ཨུཔལབྦྷཏཱི’’ཏི ཧི ཝུཏྟཾ ཧོཏི. པུན ཨིཏརོ སམྨུཏིསཙྩཾ སནྡྷཱཡ ‘‘ཡོ སཙྩིཀཊྛོ’’ཏིཨཱདིམཱཧ. ཏསྶཏྠོ – ཡོ ལོཀཝོཧཱརསིདྡྷོ སཙྩིཀཊྛོ, ཏཏོ ཨེཝ ཀེནཙི ཨཔཊིཀྑིཔིཏབྦཏོ པརམཏྠཏོ ཏཏོ སོ པུགྒལོ ¶ ནུཔལབྦྷཏཱིཏི. པུན སཀཝཱདཱི པུབྦེ པརམཏྠསཙྩཝསེན པུགྒལེ པཊིཀྑིཏྟེ ཨིདཱནི སམྨུཏིསཙྩཝསེནཱཡཾ པུཙྪཱཏི མནྟྭཱ ཏཾ ཨཔྤཊིཀྑིཔནྟོ ‘‘ན ཧེཝཾ ཝཏྟབྦེ’’ཏི ཨཱཧ. ཏེནཱཧ ‘‘ཨཏྟནཱ ཨདྷིཔྤེཏཾ སཙྩིཀཊྛམེཝཱཏི སམྨུཏིསཙྩཾ སནྡྷཱཡཱཏི ཨདྷིཔྤཱཡོ’’ཏི ¶ . ཨེཝམཝཊྛིཏེ ‘‘ཡདི པརཝཱདིནཱ…པེ… ནཱརབྷིཏབྦཱ’’ཏི ཨིདཾ ན ཝཏྟབྦཾ པཋམཔུཙྪཱཡ པརམཏྠསཙྩསྶ སཙྩིཀཊྛོཏི ཨདྷིཔྤེཏཏྟཱ. ‘‘ཨཐ སཀཝཱདིནཱ…པེ… ཨཱཔཛྫཏཱི’’ཏི ཨིདམྤི ན ཝཏྟབྦཾ དུཏིཡཔུཙྪཱཡ སམྨུཏིསཙྩསྶ སཙྩིཀཊྛོཏི ཨདྷིཔྤེཏཏྟཱ.

ཡདི ཨུབྷཡཾ ཨདྷིཔྤེཏནྟི ཨིདཾ ཡདི པཋམཔུཙྪཾ སནྡྷཱཡ, ཏདཡུཏྟཾ ཏསྶཱ པརམཏྠསཙྩསྶེཝ ཝསེན པཝཏྟཏྟཱ. ཨཐ དུཏིཡཔུཙྪཾ སནྡྷཱཡ, ཏསྶཱ སམྨུཏིསཙྩཝསེན པཋམཏྠཾ ཝཏྭཱ པུན མིསྶཀཝསེན ཝཏྟུཾ ‘‘སམྨུཏིསཙྩཔརམཏྠསཙྩཱནི ཝཱ ཨེཀཏོ ཀཏྭཱཔི ཨེཝམཱཧཱ’’ཏི ཝུཏྟཏྟཱ ཏམྤི ན ཝཏྟབྦམེཝ. དྭེཔི སཙྩཱནཱིཏི སམྨུཏིཔརམཏྠསཙྩཱནི. ཏེསུ པརམཏྠསཙྩསྶེཝ ནིཔྤརིཡཱཡེན སཙྩིཀཊྛཔརམཏྠབྷཱཝོ, ཨིཏརསྶ ཨུཔཙཱརེན. ཏཐཱ ཙ ཝུཏྟཾ ‘‘མཱཡཱ མརཱིཙི…པེ… ཨུཏྟམཊྛོ’’ཏི. ཏསྨཱ སམྨུཏིསཙྩཝསེན ཨུཔལདྡྷིཾ ཨིཙྪནྟེནཔི པརམཏྠསཙྩཝསེན ཨནིཙྪནཏོ ‘‘པུགྒལོ ཨུཔལབྦྷཏི སཙྩིཀཊྛཔརམཏྠེནཱ’’ཏིཨཱདིནཱ ཨནུཡོགོ ཡུཏྟོ. ‘‘པདྷཱནཔྤདྷཱནེསུ པདྷཱནེ ཀིཙྩསིདྡྷཱི’’ཏི ཨེཏེནེཝ ‘‘ན ཙ སཙྩིཀཊྛེཀདེསེན ཨནུཡོགོ’’ཏིཨཱདི ནིཝཏྟིཏཉྩ ཧོཏི སཙྩིཀཊྛེཀདེསབྷཱཝསྶེཝ ཨསིདྡྷཏྟཱ. ནཱསྶ པརམཏྠསཙྩཏཱ ཨནུཡུཉྫིཏབྦཱཏི ཨསྶ སཙྩིཀཊྛསྶ པརམཏྠསཙྩཏཱ པརཝཱདིནཱ ན ཨནུཡུཉྫིཏབྦཱ ‘‘པུགྒལོ ནུཔལབྦྷཏི སཙྩིཀཊྛཔརམཏྠེནཱ’’ཏི སཀཝཱདིནོཔི སཙྩིཀཊྛཔརམཏྠཏོ ཏསྶ ཨིཙྪིཏབྦཏྟཱཏི ཨདྷིཔྤཱཡོ. ཝོཧརིཏསཙྩིཀཊྛསྶ ཨཏྟནཱ ཨདྷིཔྤེཏསཙྩིཀཊྛཏཱཔི ཡུཏྟཱ ཏསྶ ཏེན ཨདྷིཔྤེཏཏྟཱ. སྭཱཡམཏྠོ ཧེཊྛཱ དསྶིཏོཡེཝ. ཝུཏྟནཡོཝ དོསོཏི ‘‘དྭེཔི སཙྩཱནཱི’’ཏིཨཱདིནཱ ཨནནྟརམེཝ ཝུཏྟཾ སནྡྷཱཡཱཧ. ཏསྶ པན ཨདོསབྷཱཝོ དསྶིཏོཡེཝ. ཨཐ ན ཨིཏི ཨཐ ན བྷཱུཏསབྷཱཝཏྠེན ཨུཔལབྦྷེཡྻཱཏི ཡོཛནཱ. ཝཏྟབྦོཏི ཡདེཏྠ ཝཏྟབྦཾ, ཏཾ ‘‘ཡོ ལོཀཝོཧཱརསིདྡྷོ’’ཏིཨཱདིནཱ ཝུཏྟམེཝ, ཏསྨཱ ཨེཏྠ ‘‘པརམཏྠཏོ པུགྒལཾ ནཱནུཛཱནཱཏཱི’’ཏིཨཱདིནཱ ཨདྷིཔྤཱཡམགྒནཾ དཊྛབྦཾ.

ཨནུཉྙེཡྻམེཏཾ སིཡཱཏི ཨེཏཾ ཨནུཔལབྦྷནཾ པཋམཔུཙྪཱཡཾ ཝིཡ དུཏིཡཔུཙྪཱཡམྤི ཨནུཛཱནིཏབྦཾ སིཡཱ. ན ཝཱ ཀིཉྩི ཝཏྟབྦནྟི ཨཐ ཝཱ ཀིཉྩི ན ཝཏྟབྦཾ ཋཔནཱིཡཏྟཱ པཉྷསྶ. ཏཐཱ ཧིསྶ ཋཔནཱིཡཱཀཱརཾ དསྶེནྟོ ‘‘ཡཐཱ ཧཱི’’ཏིཨཱདིམཱཧ. ཨེཏྠ ཙ ཀཱམཾ སཙྩདྭཡཱཀཱརེན ¶ པུགྒལོ ནུཔལབྦྷཏི, སམྨུཏིཡཱཀཱརེན པན ནུཔལབྦྷཏཱིཏི ཨུཔལབྦྷནབྷཱཝསྶ ཝསེན པཊིཀྑེཔོ ཀཏོཏི ཨཡམེཏྠ ཨདྷིཔྤཱཡོ དཊྛབྦོ. ཨནུཉྙཱཏཾ པཊིཀྑིཏྟཉྩཱཏི ¶ པཋམཔུཙྪཱཡཾ ཨནུཉྙཱཏཾ, དུཏིཡཔུཙྪཱཡཾ པཊིཀྑིཏྟཾ. ཨེཏཾ ཚལཝཱདཾ ནིསྶཱཡཱཏི ཨེཏཾ ཨེཀཾཡེཝ ཝཏྠུཾ ཨུདྡིསྶ ཨནུཛཱནནཔཊིཀྑིཔནཱཀཱརཾ ཚལཝཙནཾ ནིསྶཱཡ. ཏྭཾ ནིགྒཧེཏབྦོཏི ཡོཛནཱ. སམྦྷཝནྟསྶ སཱམཉྙེནཱཏི ནིགྒཧཊྛཱནབྷཱཝེན སམྦྷཝནྟསྶ ཨནུལོམནཡེན ཨནུཛཱནནཔཊིཀྑེཔསྶ སམཱནབྷཱཝེན. ཨསམྦྷཝནྟསྶ ཀཔྤནནྟི པཙྩནཱིཀནཡེན ཏསྶ ནིགྒཧཊྛཱནབྷཱཝེན ཨསམྦྷཝནྟསྶ ཏཐཱ ཀཔྤནཾ སཾཝིདྷཱནཾ ཚལཝཱདོ བྷཝིཏུཾ ཨརཧཏི. ‘‘ཨཏྠཝིཀཔྤུཔཔཏྟིཡཱ ཝཙནཝིགྷཱཏོ ཚལ’’ནྟི ཝུཏྟོཝཱཡམཏྠོ. ཏེནཱཏི ཡཐཱཝུཏྟཀཔྤནཾ ཚལཝཱདོཏི ཝུཏྟཏྟཱ. ཝཙནསཱམཉྙམཏྟཾ ཀཔྤིཏཾ ཚལཾ ཝདཏི ཨེཏེནཱཏི ཚལཝཱདོ. ཏེན ཝུཏྟཾ ‘‘ཚལཝཱདསྶ ཀཱརཎཏྟཱ ཚལཝཱདོ’’ཏི. ཝཙནསཱམཉྙམཏྟཾ ཨཏྠབྷཱུཏཾ ཏདཏྠཾ ཚལཝཱདཾ ནིསྶཱཡ. ‘‘ཝིཙཱརེཏབྦ’’ནྟི ཝུཏྟཾ, ཀིམེཏྠ ཝིཙཱརེཏབྦཾ. ཡདིཔི པཀྑསྶ ཋཔནཱམཱུལཀཾ ཨནུཛཱནནཱཝཛཱནནཱནཾ མིཙྪཱབྷཱཝདསྶནཾ ཏབྦིསཡཏྟཱ, པཱཔནཱརོཔནཱཧི ཨེཝ པན སོ ཝིབྷཱཝཱིཡཏི, ན ཋཔནཱཡཱཏི པཱཀཊོཡམཏྠོ.

༤-༥. ཏེནཱཏི སཀཝཱདིནཱ. ཏེན ནིཡཱམེནཱཏི ཡེན ནིཡཱམེན སཀཝཱདིནཱ ཙཏཱུཧི པཱཔནཱརོཔནཱཧིསྶ ནིགྒཧོ ཀཏོ, ཏེན ནིཡཱམེན ནཡེན. སོ ནིགྒཧོ དུཀྐཊོ ཨནིགྒཧོཡེཝཱཏི དསྶེནྟོ ཨཱཧ ‘‘ཨནིགྒཧབྷཱཝསྶ ཝཱ ཨུཔགམིཏཏྟཱ’’ཏི, པཱཔིཏཏྟཱཏི ཨཏྠོ. ཨེཝམེཝཱཏི ཡཐཱ ‘‘ཏཡཱ མམ ཀཏོ ནིགྒཧོ’’ཏིཨཱདིནཱ ཨནིགྒཧབྷཱཝཱུཔནཡོ ཝུཏྟོ, ཨེཝམེཝ. ཨེཏསྶཱཏི ‘‘ཏེན ཧཱི’’ཏིཨཱདིནཱ ཨིམཱཡ པཱལི༹ཡཱ ཝུཏྟསྶ.

ཨནུལོམཔཙྩནཱིཀཝཎྞནཱ ནིཊྛིཏཱ.

༢. པཙྩནཱིཀཱནུལོམཝཎྞནཱ

༧-༡༠. ཨཉྙེནཱཏི སམྨུཏིསཙྩབྷཱུཏེན. པརསྶཱཏི སཀཝཱདིནོ. སོ ཧི པརཝཱདིནཱ པརོ ནཱམ ཧོཏི. པཊིཉྙཱཔཊིཀྑེཔཱནཾ བྷིནྣཝིསཡཏྟཱ ‘‘ཨཝིརོདྷིཏཏྟཱ’’ཏི ཝུཏྟཾ. ཨབྷིནྣཱདྷིཀརཎཾ ¶ ཝིཡ ཧི ཨབྷིནྣཝིསཡམེཝ ཝིརུདྡྷཾ ནཱམ སིཡཱ, ན ཨིཏརནྟི ཨདྷིཔྤཱཡོ. ཏམེཝཏྠཾ ཝིབྷཱཝེཏུཾ ‘‘ན ཧི…པེ… ཨཱཔཛྫཏཱི’’ཏི ཨཱཧ. ཡདི ཨེཝཾ ཀཐམིདཾ ནིགྒཧཊྛཱནཾ ཛཱཏནྟི ཨཱཧ ‘‘ཨཏྟནོ ¶ པནཱ’’ཏིཨཱདི. ཏེན པཊིཉྙཱནྟརཾ ནཱམ ཨཉྙམེཝེཏཾ ནིགྒཧཊྛཱནནྟི དསྶེཏི.

པཙྩནཱིཀཱནུལོམཝཎྞནཱ ནིཊྛིཏཱ.

སུདྡྷསཙྩིཀཊྛཝཎྞནཱ ནིཊྛིཏཱ.

༢. ཨོཀཱསསཙྩིཀཊྛོ

༡. ཨནུལོམཔཙྩནཱིཀཝཎྞནཱ

༡༡. སཱམཉྙེན ཝུཏྟཾ ཝིསེསནིཝིཊྛཾ ཧོཏཱིཏི ཨཱཧ ‘‘སབྦཏྠཱཏི སབྦསྨིཾ སརཱིརེཏི ཨཡམཏྠོ’’ཏི. སཱམཉྙཛོཏནཱ ཧི ཝིསེསེ ཨཝཏིཊྛཏཱིཏི ཝིསེསཏྠིནཱ ཝིསེསོ ཨནུཔཡུཛྫིཏབྦོཏི. ཨེཏེནཱཏི དེསཝསེན སབྦཏྠ པཊིཀྑེཔཝཙནེན.

༣. ཀཱལསཙྩིཀཊྛོ

༡. ཨནུལོམཔཙྩནཱིཀཝཎྞནཱ

༡༢. མཛ྄ཛྷིམཛཱཏིཀཱལེཏི པཙྩུཔྤནྣཏྟབྷཱཝཀཱལེ. ཨཏྟབྷཱཝོ ཧི ཨིདྷ ‘‘ཛཱཏཱི’’ཏི ཨདྷིཔྤེཏོ. ཏཏོ ཨཏཱིཏོ པུརིམཛཱཏིཀཱལོ, ཨནཱགཏོ པཙྪིམཛཱཏིཀཱལོ. ཨིམེསུ ཏཱིསཱུཏི སབྦཏྠ, སབྦདཱ, སབྦེསཱུཏི ཨིམེསུ ཏཱིསུ ནཡེསུ. པཱཋསྶ སཾཁིཏྟཏཱ སུཝིཉྙེཡྻཱཏི ཏཾ ཋཔེཏྭཱ ཨཏྠསྶ སདིསཏཾ ཝིབྷཱཝེནྟོ ‘‘ཨིདྷཱཔི ཧི…པེ… ཡོཛེཏབྦ’’ནྟི ཨཱཧ. ཨེཏྠཱཔི ‘‘ན ཀེནཙི སབྷཱཝེན པུགྒལོ ཨུཔལབྦྷཏཱི’’ཏི ཨཡམཏྠོ ཝུཏྟོ ཧོཏི. ན ཧི ཀེནཙི སབྷཱཝེན ཨུཔལབྦྷམཱནསྶ སཀལེཀདེསཝིནིམུཏྟོ པཝཏྟིཀཱལོ ནཱམ ཨཏྠཱིཏི.

༤. ཨཝཡཝསཙྩིཀཊྛོ

༡. ཨནུལོམཔཙྩནཱིཀཝཎྞནཱ

༡༣. ཏཏིཡནཡེ ¶ ན སབྦེཀདྷམྨཝིནིམུཏྟཾ པཝཏྟིཊྛཱནཾ ནཱམ ཨཏྠཱིཏི ཡོཛེཏབྦཾ.

ཨོཀཱསཱདིསཙྩིཀཊྛོ

༢. པཙྩནཱིཀཱནུལོམཝཎྞནཱ

༡༤. ཨནུལོམཔཉྩཀསྶཱཏིཨཱདིམྷི ¶ ཨཊྛཀཐཱཝཙནེ. པུན ཏཏྠཱཏི ཡཐཱཝུཏྟེ ཨཊྛཀཐཱཝཙནེ, ཏེསུ ཝཱ ཨནུལོམཔཉྩཀཔཙྩནཱིཀེསུ. སབྦཏྠ པུགྒལོ ནུཔལབྦྷཏཱིཏིཨཱདིཀསྶ པཱཋཔྤདེསསྶ ཨཏྠོ ‘‘སརཱིརཾ སནྡྷཱཡཱ’’ཏིཨཱདིནཱ ཨཊྛཀཐཱཡཾ ཝུཏྟནཡེན ཝེདིཏབྦོ ཨཏྠོ. པཊིཀམྨཱདིཔཱལི༹ནྟི པཊིཀམྨནིགྒཧཨུཔནཡནནིགམནཔཱལི༹ཾ. ཏཱིསུ མུཁེསཱུཏི ‘‘སབྦཏྠཱ’’ཏིཨཱདིནཱ ཝུཏྟེསུ ཏཱིསུ ཝཱདམུཁེསུ. པཙྩནཱིཀསྶ པཱལི༹ ཝུཏྟཱཏི སམྦནྡྷོ. ཏནྟི པཱལི༹ཾ. སངྑིཔིཏྭཱ ཨཱགཏཏྟཱ སརཱུཔེན ཨཝུཏྟེ. སུདྡྷིཀ…པེ… ཝུཏྟཾ ཧོཏི ཏཏྠ ‘‘སབྦཏྠཱ’’ཏིཨཱདིནཱ སརཱིརཱདིནོ པརཱམསནཾ ནཏྠི, ཨིདྷ ཨཏྠཱིཏི ཨཡམེཝ ཝིསེསོ, ཨཉྙཾ སམཱནནྟི.

སཙྩིཀཊྛཝཎྞནཱ ནིཊྛིཏཱ.

༥. སུདྡྷིཀསཾསནྡནཝཎྞནཱ

༡༧-༢༧. སཙྩིཀཊྛསྶ, སཙྩིཀཊྛེ ཝཱ སཾསནྡནཾ སཙྩིཀཊྛསཾསནྡནནྟི སམཱསདྭཡཾ བྷཝཏཱིཏི དསྶེནྟོ ‘‘སཙྩིཀཊྛསྶཱ’’ཏིཨཱདིམཱཧ. ཏཏྠ སཙྩིཀཊྛསྶ པུགྒལསྶཱཏི སཙྩིཀཊྛསབྷཱཝསྶ པརམཏྠཏོ ཝིཛྫམཱནསབྷཱཝསྶ པུགྒལསྶ. རཱུཔཱདཱིཧི སདྡྷིཾ སཾསནྡནནྟི སཙྩིཀཊྛཏཱསཱམཉྙེན རཱུཔཱདཱིཧི སམཱིཀརཎཾ. སཙྩིཀཊྛེཏི སཙྩིཀཊྛཧེཏུ, ཏཏྠ ཝཱ ཏཾ ཨདྷིཊྛཱནཾ ཀཏྭཱ. ‘‘ཏུལྱཡོགེ སམུཙྩཡོ’’ཏི སམུཙྩཡཏྠཏྟཱ ཨེཝ ཙ-ཀཱརསྶ སཙྩིཀཊྛེན ཨུཔལདྡྷིསཱམཉྙེན ¶ ཨིདྷ རཱུཔམཱཧཊནྟི ཏསྶ ཨུདཱཧཊབྷཱཝོ ཡུཏྟོཏི ‘‘ཡཐཱརཱུཔ’’ནྟི ནིདསྶནཝསེན ཨཏྠོ ཝུཏྟོ, ཨཉྙཐཱ ཨིདྷ རཱུཔསྶ ཨཱཧརཎམེཝ ཀིམཏྠིཡཾ. ཨེཝཾ སེསདྷམྨེསུཔི. ཡཱ པནེཏྠ ཨཉྙཏྟཔུཙྪཱ, སཱཔི ནིདསྶནཏྠཾ ཨུཔབྲཱུཧེཏི ཨཉྙཏྟནིབནྡྷནཏྟཱ ཏསྶ. ཨོཔམྨསཾསནྡནེ པན ནིདསྶནཏྠོ གཱཧཱིཡཏཱིཏི ཨིམསྨིཾ སུདྡྷིཀསཾསནྡནེ ཀེཝལཾ སམུཙྩཡཝསེནེཝ ཨཏྠདསྶནཾ ཡུཏྟནྟི ཨདྷིཔྤཱཡོ. རཱུཔཱདཱིནི ཨུཔཱདཱཔཉྙཏྟིམཏྟཏྟཱ པུགྒལསྶ སོ ཏེཧི ཨཉྙོ, ཨནཉྙོ ཙཱཏི ན ཝཏྟབྦོཏི ཨཡཾ སཱསནཀྐམོཏི ཨཱཧ ‘‘རཱུཔཱདཱིཧི…པེ… སམཡོ’’ཏི. ཨནུཉྙཱཡམཱནེཏི ཏསྨིཾ སམཡེ སུཏྟེ ཙ ཨཔྤཊིཀྑིཔིཡམཱནེ. ཨཡཉྩ ཨཏྠོ སཱསནིཀསྶ པརཝཱདིནོ ཝསེན ཝུཏྟོཏི ཝེདིཏབྦཾ.

‘‘ཨཱཛཱནཱཧི ¶ ནིགྒཧ’’ནྟི པཱཋོ དིཊྛོ བྷཝིསྶཏི, ཨཉྙཐཱ ‘‘པཊིལོམཔཉྩཀཱནི དསྶིཏཱནི, པཊིཀམྨཙཏུཀྐཱདཱིནི སཾཁིཏྟཱནཱི’’ཏི ན སཀྐཱ ཝཏྟུནྟི ཨདྷིཔྤཱཡོ. ཙོདནཱཡ ཝིནཱ པརཝཱདིནོ པཊིཛཱནཱཔནཾ ནཏྠཱིཏི ཝུཏྟཾ ‘‘པཊིཛཱནཱཔནཏྠནྟི…པེ… ཙོདནཏྠ’’ནྟི. ཙོདནཱཔུབྦཀཉྷི ཏསྶ པཊིཛཱནཱཔནཾ. ཏེན ཕལཝོཧཱརེན ཀཱརཎཾ ཝུཏྟནྟི དསྶེཏི. ཨབྱཱཀཏཏྟཱཏི ཨབྱཱཀརཎཱིཡཏྟཱ, བྷགཝཏཱ ཝཱ ན བྱཱཀཏཏྟཱ. ཡདི ཋཔནཱིཡཏྟཱ པཊིཀྑིཔིཏབྦནྟི ཨིམསྨིཾ པཙྩནཱིཀནཡེ ཋཔནཱིཡཏྟཱ པཉྷསྶ སཀཝཱདིནཱ པཊིཀྑིཔིཏབྦཾ. པརེནཔཱིཏི པརཝཱདིནཱཔི ཋཔནཱིཡཏྟཱ ལདྡྷིམེཝ ནིསྶཱཡ ཨནུལོམནཡེ པཊིཀྑེཔོ ཀཏོཏི ཨཡམེཏྠ སུདྡྷིཀསཾསནྡནཱཡ ཨདྷིཔྤཱཡོ ཡུཏྟོ ཨནུལོམེཔི རཱུཔཱདཱིཧི ཨཉྙཏྟཙོདནཱཡམེཝ པརཝཱདིནཱ པཊིཀྑེཔསྶ ཀཏཏྟཱཏི ཨདྷིཔྤཱཡོ.

སུདྡྷིཀསཾསནྡནཝཎྞནཱ ནིཊྛིཏཱ.

༦. ཨོཔམྨསཾསནྡནཝཎྞནཱ

༢༨-༣༦. ཨུཔལདྡྷིསཱམཉྙེན ཨཉྙཏྟཔུཙྪཱ ཙཱཏི ཨིམིནཱ དྭཡམྤི ཨུདྡྷརཏི ཨུཔལདྡྷིསཱམཉྙེན ཨཉྙཏྟཔུཙྪཱ, ཨུཔལདྡྷིསཱམཉྙེན པུཙྪཱ ཙཱཏི. ཏཏྠ པཙྪིམཾ སནྡྷཱཡཱཧ ‘‘དྭིནྣཾ སམཱནཏཱ’’ཏིཨཱདི. ཏསྶཏྠོ – དྭིནྣཾ རཱུཔཝེདནཱནཾ ཝིཡ རཱུཔཔུགྒལཱནཾ སཙྩིཀཊྛེན སམཱནཏཱ ¶ ཏེསཾ ཨཉྙཏྟསྶ ཀཱརཎཾ ཡུཏྟཾ ན ཧོཏི. ཨཐ ཁོ…པེ… ཨུཔལབྦྷནཱིཡཏཱཏི ཨིདཉྩ སཾསནྡནཾ ཝིཙཱརེཏབྦཾ. ཨཡཾ ཧེཏྠ ཨདྷིཔྤཱཡོ – ཡདི སཙྩིཀཊྛསཱམཉྙེན རཱུཔཔུགྒལཱནཾ ཨུཔལདྡྷིསཱམཉྙཾ ཨིཙྪིཏཾ, ཏེནེཝ ནེསཾ ཨཉྙཏྟམྤི ཨིཙྪིཏབྦཾ. ཨཐ པརམཏྠཝོཧཱརབྷེདཏོ ཏེསཾ ཨཉྙཏྟཾ ན ཨིཙྪིཏཾ, ཏཏོ ཨེཝ ཨུཔལདྡྷིསཱམཉྙམྤི ན ཨིཙྪིཏབྦནྟི.

༣༧-༤༥. ཨུཔལདྡྷཱིཏི པུགྒལསྶ ཨུཔལདྡྷི ཝིཛྫམཱནཏཱ. ‘‘པཊིཀམྨཔཉྩཀ’’ནྟི ཝིཉྙཱཡཏཱིཏི ཡོཛནཱ.

ཨོཔམྨསཾསནྡནཝཎྞནཱ ནིཊྛིཏཱ.

༧. ཙཏུཀྐནཡསཾསནྡནཝཎྞནཱ

༤༦-༥༢. ཨེཀདྷམྨཏོཔཱིཏི ¶ སཏྟཔཉྙཱསཱཡ སཙྩིཀཊྛེསུ ཨེཀདྷམྨཏོཔི. ཨེཏེན ཏཏོ སབྦཏོཔི པུགྒལསྶ ཨཉྙཏྟཱནནུཛཱནནཾ དསྶེཏི. ཏེནཱཧ ཨཊྛཀཐཱཡཾ ‘‘སཀལཾ པརམཏྠསཙྩཾ སནྡྷཱཡཱ’’ཏི. རཱུཔཱདིཨེཀེཀདྷམྨཝསེན ནཱནུཡུཉྫིཏབྦོ ཨཝཡཝབྱཏིརེཀེན སམུདཱཡསྶ ཨབྷཱཝཏོ. ཡསྨཱ པན སམུདཱཡཱཝཡཝཱ བྷིནྣསབྷཱཝཱ, ཏསྨཱ ‘‘སམུདཱཡཏོ…པེ… ནིགྒཧཱརཧོ སིཡཱ’’ཏི པརཝཱདིནོ ཨཱསངྐམཱཧ. ཨེཏཾ ཝཙནོཀཱསནྟི ཡདིཔི སཏྟཔཉྙཱསདྷམྨསམུདཱཡཏོ པུགྒལསྶ ཨཉྙཏྟཾ ན ཨིཙྪཏི ཏབྦིནིམུཏྟསྶ སཙྩིཀཊྛསྶ ཨབྷཱཝཏོ, ཏདེཀདེསཏོ པནསྶ ཨནཉྙཏྟམྤི ན ཨིཙྪཏེཝ. ན ཧི སམུདཱཡོ ཨཝཡཝོ ཧོཏཱིཏི. ཏསྨཱ ‘‘ཏཾ པཊིཀྑིཔཏོ ཀིཾ ནིགྒཧཊྛཱནནྟི ཝཏྟུཾ མཱ ལབྦྷེཐཱ’’ཏི དསྶེཏུཾ ‘‘ཨཡཉྩཱ’’ཏིཨཱདི ཝུཏྟཾ. རཱུཔཱདིདྷམྨཔྤབྷེདཝིབྷཱགམུཁེནེཝ ཨནཝསེསཏོ པུགྒལོཏི གཧཎཱཀཱརདསྶནཝསེན པཝཏྟོ པཋམཝིཀཔྤོ, དུཏིཡོ པན ཨཝིབྷཱགཏོ པརམཏྠསཙྩབྷཱཝསཱམཉྙེནཱཏི ཨཡཾ ཨིམེསཾ དྭིནྣཾ ཝིཀཔྤཱནཾ ཝིསེསོ. ཨིཏཱིཏི ཝུཏྟཔྤཀཱརཔརཱམསནནྟི ཨཱཧ ‘‘ཨེཝ’’ནྟི.

སབྷཱཝཝིནིབྦྷོགཏོཏི སབྷཱཝེན ཝིནིབྦྷུཛྫིཏབྦཏོ. སབྷཱཝབྷིནྣོ ཧི དྷམྨོ ཏདཉྙདྷམྨཏོ ཝིནིབྦྷོགཾ ལབྷཏི. ཏེནཱཧ ‘‘རཱུཔཏོ ཨཉྙསབྷཱགཏྟཱ’’ཏི. རཱུཔཝཛྫེཏི རཱུཔདྷམྨཝཛྫེ ¶ . ཏཱིསུཔཱིཏི ‘‘རཱུཔསྨིཾ པུགྒལོ, ཨཉྙཏྲ རཱུཔཱ, པུགྒལསྨིཾ རཱུཔ’’ནྟི ཨིམེསུ ཨེཝཾ པཝཏྟེསུ ཏཱིསུཔི ཨནུཡོགེསུ. སཱསནིཀོ ཨེཝཱཡཾ པུགྒལཝཱདཱིཏི ཀཏྭཱ ཨཱཧ ‘‘ན ཧི སོ སཀྐཱཡདིཊྛིཾ ཨིཙྪཏཱི’’ཏི. ‘‘རཱུཔཝཱ’’ཏི ཨིམིནཱ རཱུཔེན སཀིཉྩནཏཱཝ ཉཱཔཱིཡཏི, ན རཱུཔཱཡཏྟཝུཏྟིཏཱཏི ཨཱཧ ‘‘ཨཉྙཏྲ རཱུཔཱཏི ཨེཏྠ ཙ རཱུཔཝཱ པུགྒལོཏི ཨཡམཏྠོ སངྒཧིཏོ’’ཏི.

ཙཏུཀྐནཡསཾསནྡནཝཎྞནཱ ནིཊྛིཏཱ.

ནིཊྛིཏཱ ཙ སཾསནྡནཀཐཱཝཎྞནཱ.

༨. ལཀྑཎཡུཏྟིཝཎྞནཱ

༥༤. ལཀྑཎཡུཏྟིཀཐཱཡཾ ¶ ‘‘ཚལཝསེན པན ཝཏྟབྦཾ ཨཱཛཱནཱཧི ནིགྒཧ’’ནྟི པཱཋོ གཧེཏབྦོ.

ལཀྑཎཡུཏྟིཝཎྞནཱ ནིཊྛིཏཱ.

༩. ཝཙནསོདྷནཝཎྞནཱ

༥༥-༥༩. པདདྭཡསྶ ཨཏྠཏོ ཨེཀཏྟེཏི པདདྭཡསྶ ཨེཀཏྟཏྠེ སཏཱིཏི ཨཏྠོ. པརིཀཔྤཝཙནཉྷེཏཾ དོསདསྶནཏྠཾ ‘‘ཨེཝཾ སནྟེ ཨཡཾ དོསོ’’ཏི. ཏཡིདཾ ཨེཀཏྟཾ ཨུཔལབྦྷཏི ཨེཝཱཏི པཙྪིམཔདཱཝདྷཱརཎཾ ཝེདིཏབྦཾ. ‘‘ཀེཧིཙི པུགྒལོ ཀེཧིཙི ན པུགྒལོ’’ཏི བྱབྷིཙཱརདསྶནཏོ པརེན ན སམྤཊིཙྪིཏནྟི ཀཏྭཱ ཏམེཝ ཨསམྤཊིཙྪིཏཏྟཾ ཝིབྷཱཝེནྟོ ‘‘པུགྒལསྶ ཧཱི’’ཏིཨཱདིམཱཧ. ཏཏྠ ཨཝིབྷཛིཏབྦཏནྟི ‘‘ཨུཔལབྦྷཏི ཙཱ’’ཏི ཨེཝཾ ཨཝིབྷཛིཏབྦཏཾ. ཝིབྷཛིཏབྦཏནྟི ‘‘པུགྒལོ ཙ ཏདཉྙཉྩ ཨུཔལབྦྷཏཱི’’ཏི ཨེཝཾ ཝིབྷཛིཏབྦཏཾ. ཨེཏེན ‘‘པུགྒལོ ཨུཔལབྦྷཏི ཨེཝཱ’’ཏི པཙྪིམཔདཱཝདྷཱརཎཾ ཝེདིཏབྦཾ, ན ‘‘པུགྒལོ ཨེཝ ཨུཔལབྦྷཏཱི’’ཏི ཨིམམཏྠཾ དསྶེཏི. ཏཾ ཝིབྷཱགནྟི ཡཐཱཝུཏྟཾ ཝིབྷཛིཏབྦཱཝིབྷཛིཏབྦཾ ཝིབྷཱགཾ ཝདཏོ སཀཝཱདིནོ, ཨཉྙསྶ ཝཱ ཀསྶཙི. ཨེཏསྶཱཏི པརཝཱདིནོ ¶ . ཡཐཱཝུཏྟཝིབྷཱགནྟི ‘‘པུགྒལོ ཨུཔལབྦྷཏི…པེ… ཀེཧིཙི ན པུགྒལོ’’ཏི ཨེཝཾ པཱལི༹ཡཾ ཝུཏྟཔྤཀཱརཾ ཝིབྷཱགཾ. ཡཐཱཨཱཔཱདིཏེནཱཏི ‘‘པུགྒལོ ཨུཔལབྦྷཏཱིཏི པདདྭཡསྶ ཨཏྠཏོ ཨེཀཏྟེ’’ཏིཨཱདིནཱ ཨཱཔཱདིཏཔྤཀཱརེན. ན བྷཝིཏབྦནྟི ཡདིཔི ཏེན པུགྒལོ ཨུཔལབྦྷཏི ཨེཝ ཝུཙྩཏི, ཨུཔལབྦྷཏཱིཏི པན པུགྒལོ ཨེཝ ན ཝུཙྩཏི, ཨཐ ཁོ ཨཉྙོཔི, ཏསྨཱ ཡཐཱཝུཏྟེན པསངྒེན ན བྷཝིཏབྦཾ. ཏེནཱཧ ‘‘མགྒིཏབྦོ ཨེཏྠ ཨདྷིཔྤཱཡོ’’ཏི.

༦༠. ཨཏྠཏོ པུགྒལོ ནཏྠཱིཏི ཝུཏྟཾ ཧོཏི ཨཏྟསུཉྙཏཱདསྶནེན ཨནཏྟལཀྑཎསྶ ཝིཧིཏཏྟཱ.

ཝཙནསོདྷནཝཎྞནཱ ནིཊྛིཏཱ.

༡༠. པཉྙཏྟཱནུཡོགཝཎྞནཱ

༦༡-༦༦. རཱུཔཀཱཡཱཝིརཧཾ ¶ སནྡྷཱཡ ཨཱཧ, ན རཱུཔཏཎྷཱསབྦྷཱཝཾ. ཏཐཱ སཏི ཨནེཀནྟིཀཏྟཱ པཊིཀྑིཔིཏབྦམེཝ སིཡཱ, ན ཨནུཛཱནིཏབྦནྟི. ‘‘ཨཏྠིཏཱཡཱ’’ཏི ཨཱཧཱཏི སམྦནྡྷོ. ཀཱམཱིབྷཱཝསྶ ཨནེཀནྟིཀཏྟཱ ཀསྶཙི ཀཱམདྷཱཏཱུཔཔནྣསྶ ཀཱམདྷཱཏུཡཱ ཨཱཡཏྟཏྟཱབྷཱཝཏོ ཙ ཀདཱཙི བྷཱཝསྶེཝཱཏི ཡོཛནཱ.

༦༧. ཀཱཡཱནུཔསྶནཱཡཱཏི ཀཱཡཱནུཔསྶནཱདེསནཱཡ. སཱ ཧི ཀཱཡཀཱཡཱནུཔསྶཱིནཾ ཝིབྷཱགགྒཧཎསྶ ཀཱརཎབྷཱུཏཱ, ཀཱཡཱནུཔསྶནཱ ཨེཝ ཝཱ. ཨེཝཾལདྡྷིཀཏྟཱཏི ཨཉྙོ ཀཱཡོ ཨཉྙོ པུགྒལོཏི ཨེཝཾལདྡྷིཀཏྟཱ. ཨཱཧཙྩ བྷཱསིཏནྟི ཋཱནཀརཎཱནི ཨཱཧནྟྭཱ ཀཐིཏཾ, བྷགཝཏཱ སཱམཾ དེསིཏནྟི ཨཏྠོ.

པཉྙཏྟཱནུཡོགཝཎྞནཱ ནིཊྛིཏཱ.

༡༡. གཏིཨནུཡོགཝཎྞནཱ

༦༩-༧༢. ཡཱནིསྶ ¶ སུཏྟཱནི ནིསྶཱཡ ལདྡྷི ཨུཔྤནྣཱ, ཏེསཾ དསྶནཏོ པརཏོ ‘‘ཏེན ཧི པུགྒལོ སནྡྷཱཝཏཱི’’ཏིཨཱདིནཱ པཱལི༹ ཨཱགཏཱ, པུརཏོ པན ‘‘ན ཝཏྟབྦཾ པུགྒལོ སནྡྷཱཝཏཱི’’ཏིཨཱདིནཱ, ཏསྨཱ ཝུཏྟཾ ‘‘དསྶེནྟོ…པེ… བྷཝིཏབྦ’’ནྟི. དསྶེཏྭཱཏི ཝཱ ཝཏྟབྦནྟི ‘‘ཡཱནིསྶ…པེ… ཏཱནི དསྶེཏྭཱ ‘ཏེན ཧི པུགྒལོ སནྡྷཱཝཏཱི’ཏིཨཱདིམཱཧཱ’’ཏི ཝཏྟབྦནྟི ཨཏྠོ. དསྶེནྟོཏི ཝཱ ཨིདཾ དསྶནཀིརིཡཱཡ ན ཝཏྟམཱནཏཱམཏྟཝཙནཾ, ཨཐ ཁོ ཏསྶཱ ལཀྑཎཏྠཝཙནཾ, ཧེཏུབྷཱཝཝཙནཾ ཝཱཏི ན ཀོཙི དོསོ.

༩༡. སོ ཝཏྟབྦོཏི སོ ཛཱིཝསརཱིརཱནཾ ཨནཉྙཏཱཔཛྫནཱཀཱརོ ཝཏྟབྦོ, ནཏྠཱིཏི ཨདྷིཔྤཱཡོ. ‘‘རཱུཔཱི ཨཏྟཱ’’ཏི ཨིམིསྶཱ ལདྡྷིཡཱ ཝསེན ‘‘ཡེན རཱུཔསངྑཱཏེན ཨཏྟནོ སབྷཱཝབྷཱུཏེན སརཱིརེན སདྡྷིཾ གཙྪཏཱི’’ཏི ཨེཝཾ པན ཨཏྠེ སཏི སོ ཨཱཀཱརོ ཝུཏྟོ ཨེཝ ཧོཏི, ཏཐཱ ཙ སཏི ‘‘རཱུཔཾ པུགྒལོཏི ཨནནུཉྙཱཏཏྟཱ’’ཏི ཨེཝམྤི ཝཏྟུཾ ན སཀྐཱ. ཡསྨཱ པན ‘‘ཨིདྷ སརཱིརནིཀྑེཔཱ’’ཏི ཨནནྟརཾ ཝཀྑཏི, ཏསྨཱ ¶ ‘‘སོ ཝཏྟབྦོ’’ཏི ཝུཏྟཾ. ནིརཡཱུཔགསྶ པུགྒལསྶ ཨནྟརཱབྷཝཾ ན ཨིཙྪཏཱིཏི ཨིདཾ པུརཱཏནཱནཾ ཨནྟརཱབྷཝཝཱདཱིནཾ ཝསེན ཝུཏྟཾ. ཨདྷུནཱཏནཱ པན ‘‘ཨུདྡྷཾཔཱདོ ཏུ ནཱརཀོ’’ཏི ཝདནྟཱ ཏསྶཔི ཨནྟརཱབྷཝཾ ཨིཙྪནྟེཝ, ཀེཙི པན ཨསཉྙཱུཔགཱནཾ. ཨརཱུཔཱུཔགཱནཾ པན སབྦེཔི ན ཨིཙྪནྟི. ཏཏྠ ཡེ ‘‘སཉྙུཔྤཱདཱ ཙ པན ཏེ དེཝཱ ཏམྷཱ ཀཱཡཱ ཙཝནྟཱི’’ཏི སུཏྟསྶ ཨཏྠཾ མིཙྪཱ གཧེཏྭཱ ཙུཏཱུཔཔཱཏཀཱལེསུ ཨསཉྙཱིནཾ སཉྙཱ ཨཏྠཱིཏི ཨནྟརཱབྷཝཏོཝ ཨསཉྙཱུཔཔཏྟིཾ ཨིཙྪནྟི, ཏདཉྙེསཾ ཝསེན ‘‘སཝེདནོ…པེ… པཊིཀྑིཔཏཱི’’ཏི དསྶེནྟོ ‘‘ཡེ པནཱ’’ཏིཨཱདིམཱཧ. ཀེ པནེཝཾ ཨིཙྪནྟི? སབྦཏྠིཝཱདཱིསུ ཨེཀཙྩེ.

༩༢. ནེཝསཉྙཱནཱསཉྙཱཡཏནེཏི ནེཝསཉྙཱནཱསཉྙཱཡཏནེ བྷཝེ, ཨཙིཏྟུཔྤཱདེ ཝཱ སཉྙཱ ཨཏྠཱིཏི ཨིཙྪནྟཱིཏི ན ཝཏྟབྦནྟི སམྦནྡྷོ. ཡཏོ སོ སཉྙཱབྷཝེན ཨསངྒཧིཏོ, བྷཝནྟརབྷཱཝེན ཙ སངྒཧིཏོ.

༩༣. ཨིནྡྷནུཔཱདཱནོ ཨགྒི ཝིཡ ཨིནྡྷནེན རཱུཔཱདིཨུཔཱདཱནོ པུགྒལོ རཱུཔཱདིནཱ ཝིནཱ ནཏྠཱིཏི ཨེཏྠ ཨཡམདྷིཔྤཱཡཝིབྷཱཝནཱ – ཡཐཱ ན ཝིནཱ ཨིནྡྷནེན ཨགྒི པཉྙཱཔཱིཡཏི, ན ཙ ཏཾ ཨཉྙཾ ཨིནྡྷནཏོ སཀྐཱ པཊིཛཱནིཏུཾ, ནཱཔི ཨནཉྙཾ. ཡདི ཧི ཨཉྙཾ སིཡཱ, ན ཨུཎྷཾ ཨིནྡྷནཾ ¶ སིཡཱ, ཨཐ ཨནཉྙཾ, ནིདཧིཏབྦཾཡེཝ དཱཧཀཾ སིཡཱ, ཨེཝཾ ན ཝིནཱ རཱུཔཱདཱིཧི པུགྒལོ པཉྙཱཔཱིཡཏི, ན ཙ ཏེཧི ཨཉྙོ, ནཱཔི ཨནཉྙོ སསྶཏུཙྪེདབྷཱཝཔྤསངྒཏོཏི པརཝཱདིནོ ཨདྷིཔྤཱཡོ. ཏཏྠ ཡདི ཨགྒིནྡྷནོཔམཱ ལོཀཝོཧཱརེན ཝུཏྟཱ, ཨཔལི༹ཏྟཾ ཀཊྛཱདིཨིནྡྷནཾ ནིདཧིཏབྦཉྩ, པལི༹ཏྟཾ བྷཱསུརུཎྷཾ ཨགྒིདཱཧཀཉྩ, ཏཉྩ ཨོཛཊྛམཀརཱུཔཾ པབནྡྷཝསེན པཝཏྟཾ ཨནིཙྩཾ སངྑཏཾ པཊིཙྩསམུཔྤནྣཾ. ཡདི ཨེཝཾ པུགྒལོ རཱུཔཱདཱིཧི ཨཉྙོ ཨནིཙྩོ ཙ ཨཱཔནྣོ, ཨཐ པརམཏྠཏོ ཙ, ཏསྨིཾཡེཝ ཀཊྛཱདིསཉྙིཏེ རཱུཔསངྑཱཏཔལི༹ཏྟེ ཡཾ ཨུསུམཾ སོ ཨགྒི ཏཾསཧཛཱཏཱནི ཏཱིཎིབྷཱུཏཱནི ཨིནྡྷནཾ. ཨེཝམྤི སིདྡྷཾ ལཀྑཎབྷེདཏོ ཨགྒིནྡྷནཱནཾ ཨཉྙཏྟནྟི ཨགྒི ཝིཡ ཨིནྡྷནཏོ རཱུཔཱདཱིཧི ཨཉྙོ པུགྒལོ ཨནིཙྩོ ཙ ཨཱཔཛྫཏཱིཏི.

གཏིཨནུཡོགཝཎྞནཱ ནིཊྛིཏཱ.

༡༢. ཨུཔཱདཱཔཉྙཏྟཱནུཡོགཝཎྞནཱ

༩༧. ནཱིལགུཎཡོགཏོ ¶ ནཱིལོ, ནཱིལོ ཨེཝ ནཱིལཀོ, ཏསྶ, ཨཡཾ པནསྶ ནཱིལཔཉྙཏྟི ནཱིལརཱུཔུཔཱདཱནཱཏི ཨཱཧ ‘‘ནཱིལཾ…པེ… པཉྙཏྟཱི’’ཏི. ཨེཝཾ པན པཱཋེ ཋིཏེ ནཱིལཾ ཨུཔཱདཱཡ ནཱིལོཏི ཀཐམཡཾ པདུདྡྷཱརོཏི ཨཱཧ ‘‘ནཱིལཾ རཱུཔཾ…པེ… ཨེཏྠ ཡོ པུཊྛོ ནཱིལཾ ཨུཔཱདཱཡ ནཱིལོ’’ཏི. ཨེཏྠཱཏི ཨེཏསྨིཾ ཝཙནེ. ཏདཱདཱིསཱུཏི ‘‘པཱིཏཾ རཱུཔཾ ཨུཔཱདཱཡཱ’’ཏིཨཱདིཀཾ ཨཊྛཀཐཱཡཾ ཨཱདི-སདྡེན གཧིཏམེཝ ཏདཏྠདསྶནཝསེན གཎྷཱཏི.

༩༨. ཝུཏྟནྟི ‘‘མགྒཀུསལོ’’ཏིཨཱདཱིསུ ཚེཀཊྛཾ སནྡྷཱཡ ཝུཏྟཾ. ཀུསལཔཉྙཏྟིཾ ཀུསལཝོཧཱརཾ.

༡༡༢. པུབྦཔཀྑཾ དསྶེཏྭཱ ཨུཏྟརམཱཧཱཏི པརཝཱདཱི པུབྦཔཀྑཾ དསྶེཏྭཱ སཀཝཱདིསྶ ཨུཏྟརམཱཧ.

༡༡༥. ‘‘རཱུཔཾ རཱུཔཝཱ’’ཏིཨཱདིནཡཔྤཝཏྟཾ པརཝཱདིཝཱདཾ བྷིནྡིཏུཾ ‘‘ཡཐཱ ན ནིགལོ༹ ནེགལི༹ཀོ’’ཏིཨཱདིནཱ ¶ སཀཝཱདིཝཱདོ ཨཱརདྡྷོཏི ཨཱཧ ‘‘ཡསྶ རཱུཔཾ སོ རཱུཔཝཱཏི ཨུཏྟརཔཀྑེ ཝུཏྟཾ ཝཙནཾ ཨུདྡྷརིཏྭཱ’’ཏི.

༡༡༨. ཝིཉྙཱཎནིསྶཡབྷཱཝཱུཔགམནནྟི ཙཀྑུཝིཉྙཱཎསྶ ནིསྶཡབྷཱཝཱུཔགམནཾ. ཏཡིདཾ ཝིསེསནཾ ཙཀྑུསྶཱཏི ཨིམིནཱཝ སིདྡྷནྟི ན ཀཏཾ དཊྛབྦཾ.

ཨུཔཱདཱཔཉྙཏྟཱནུཡོགཝཎྞནཱ ནིཊྛིཏཱ.

༡༣. པུརིསཀཱརཱནུཡོགཝཎྞནཱ

༡༢༣. ཀམྨཱནནྟི ཀུསལཱཀུསལཀམྨཱནཾ. ཏགྒཧཎེནེཝ ཧི ཏཾཏཾཀིཙྩཀརཎཱིཡེ ཀིརིཡཱནམྤི སངྒཧོ དཊྛབྦོ. ནིཔྥཱདཀཔྤཡོཛཀབྷཱཝེནཱཏི ཀཱརཀཀཱརཱཔཀབྷཱཝེན.

༡༢༥. ཀམྨཀཱརཀསྶ པུགྒལསྶ ཡོ ཨཉྙོ པུགྒལོ ཀཱརཀོ. ཏེནཔཱིཏི ཀཱརཀཀཱརཀེནཔི. ཏསྶཱཏི ཀཱརཀཀཱརཀསྶ. ཨཉྙནྟི ཨཉྙཾ ཀམྨཾ. ཨེཝནྟི ཨིམིནཱ ཝུཏྟཔྤཀཱརེན. ཏེཧི ཏེཧི ཀཱརཀེཧི པུགྒལཱ ཝིཡ ཨཉྙཱནི ཀམྨཱནི ཀརཱིཡནྟཱིཏི དསྶེཏི. ཏེནཱཧ ¶ ‘‘ཀམྨཝཊྚསྶ ཨནུཔཙྪེདཾ ཝདནྟཱི’’ཏི. ཨེཝཾ སནྟེ པུགྒལསྶ ཀཱརཀོ, ཀམྨསྶ ཀཱརཀོཏི ཨཡཾ ཝིབྷཱགོ ཨིདྷ ཨནཱམཊྛོ ཧོཏི, ཏཐཱ ཙ སཏི ཀཱརཀཔརམྤརཱཡ ཝཙནཾ ཝིརུཛ྄ཛྷེཡྻཱཏི ཨཱཧ ‘‘པུགྒལསྶ…པེ… ཝིཙཱརེཏབྦམེཏ’’ནྟི. ཏསྶ ཀཱརཀནྟི པུགྒལསྶ ཀཱརཀཾ. ཨིདཉྩཱཏི ན ཀེཝལཾ པུགྒལཀཱརཀསྶ ཀམྨཀཱརཀཏཱཔཏྟིཡེཝ དོསོ, ཨཐ ཁོ ཨིདཾ ཀམྨཀཱརཀཏཱཡ ཀཱརཀཔརམྤརཱཔཛྫནམྤི ཝིཙཱརེཏབྦཾ, ན ཡུཛྫཏཱིཏི ཨཏྠོ. པུགྒལཱནཉྷི པཊིཔཱཊིཡཱ ཀཱརཀབྷཱཝོ ཀཱརཀཔརམྤརཱ.

༡༧༠. ཨེཀོ ཨནྟོཏི ‘‘གཱཧོ’’ཏི སསྶཏགཱཧསངྑཱཏོ ཨནྟོཏི ཨཏྠོ.

༡༧༦. སིཡཱ ཨཉྙོ, སིཡཱ ཨནཉྙོ, སིཡཱ ན ཝཏྟབྦོ ‘‘ཨཉྙོཏི ཝཱ ཨནཉྙོཏི ཝཱ’’ཏི ¶ , ཨེཝཾ པཝཏྟནིགཎྛཝཱདསདིསཏྟཱ སོ ཨེཝ ཨེཀོ ནེཝ སོ ཧོཏི, ན ཨཉྙོཏི ལདྡྷིམཏྟཾ. ཏེནཱཧ ‘‘ཨིདཾ པན ནཏྠེཝཱ’’ཏི. པརསྶ ཨིཙྪཱཝསེནེཝཱཏི པརཝཱདིནོ ལདྡྷིཝསེནེཝ. ཨེཀཾ ཨནིཙྪནྟསྶཱཏི ཨེཀཾ ‘‘སོ ཀརོཏི, སོ པཊིསཾཝེདེཏཱི’’ཏི གཧཎཾ སསྶཏདིཊྛིབྷཡེན པཊིཀྑིཔནྟསྶ ཨིཏརཾ ཨུཙྪེདགྒཧཎཾ ཨཱཔནྣཾ. ཏཉྩ པཊིཀྑིཔནྟསྶ ཨཉྙཾ མིསྶཀཾ ནིཙྩཱནིཙྩགྒཧཎཾ, ཝིཀྑེཔགྒཧཎཉྩ ཨཱཔནྣཾ. ཀཱརཀཝེདཀིཙྪཱཡ ཋཏྭཱཏི སྭེཝ ཀཱརཀོ ཝེདཀོ ཙཱཏི ཨིམསྨིཾ ཨཱདཱཡེ ཋཏྭཱ. ཏཾཏཾཨནིཙྪཱཡཱཏི ཏསྶ ཏསྶ ཝཱདསྶ ཨསམྤཊིཙྪནེན. ཨཱཔནྣཝསེནཔཱིཏི ཨཱཔནྣགཱཧཝསེནཔི ཨཡཾ ཨནུཡོགོ ཝུཏྟོཏི ཡོཛནཱ. སབྦེསཾ ཨཱཔནྣཏྟཱཏི ཧེཊྛཱ ཝུཏྟནཡེན སབྦེསཾ ཝིཀཔྤཱནཾ ཨནུཀྐམེན ཨཱཔནྣཏྟཱ ནཱཡམནུཡོགོ ཀཏོཏི ཡོཛནཱ. ཨེཀེཀསྶེཝཱཏི ཏེསུ ཝིསུཾ ཝིསུཾ ཨེཀེཀསྶེཝ ཨཱཔནྣཏྟཱ. ཏནྟིཝསེན པན ཏེ ཝིཀཔྤཱ ཨེཀཛ྄ཛྷཾ དསྶེཏྭཱཏི ཨདྷིཔྤཱཡོ. ཨེཀཏོ ཡོཛེཏབྦཾ ཙཏུནྣམྤི པཉྷཱནཾ ཨེཀཏོ པུཊྛཏྟཱ.

པུརིསཀཱརཱནུཡོགཝཎྞནཱ ནིཊྛིཏཱ.

ཀལྱཱཎཝགྒོ ནིཊྛིཏོ.

༡༤. ཨབྷིཉྙཱནུཡོགཝཎྞནཱ

༡༩༣. ཝིཀུབྦཏཱིཏི ¶ ཨེཏྠ ཨིཏི-སདྡོ ཨཱདིཨཏྠོ, པཀཱརཏྠོ ཝཱ. ཏེན ‘‘དིབྦཱཡ སོཏདྷཱཏུཡཱ སདྡཾ སུཎཱཏཱི’’ཏིཨཱདིཀཾ སངྒཎྷཱཏི. ཨབྷིཉྙཱནུཡོགོ དཊྛབྦོཏི ཡོཛནཱ. ཏདབྷིཉྙཱཝཏོཏི ཨཱསཝཀྑཡཱབྷིཉྙཱཝཏོ. ཨརཧཏོ སཱདྷནནྟི ཨརཧཏོ སཙྩིཀཊྛཔརམཏྠེན པུགྒལཏྟཱབྷཱཝསཱདྷནཾ. ཏབྦྷཱཝསྶཱཏི ཨརཧཏྟསྶ. ཨརཧཏྟདྷཱརཱནཉྷི ཁནྡྷཱ ནཱམ པུགྒལཏྟཾ ཏསྶཔི ཧོཏཱིཏི.

ཨབྷིཉྙཱནུཡོགཝཎྞནཱ ནིཊྛིཏཱ.

༡༥-༡༨. ཉཱཏཀཱནུཡོགཱདིཝཎྞནཱ

༢༠༩. ཏཏིཡཀོཊིབྷཱུཏསྶཱཏི ¶ ཏཏིཡཀོཊིསབྷཱཝསྶ སངྑཏཱསངྑཏཝིནིམུཏྟསབྷཱཝསྶ. སབྷཱཝསྶཱཏི ཙ སབྷཱཝདྷམྨསྶ. ལདྡྷིཾ ནིགཱུཧིཏྭཱཏི པུགྒལོ ནེཝ སངྑཏོ, ནཱསངྑཏོཏི ལདྡྷིཾ ཨཝིབྷཱཝེཏྭཱ.

ཉཱཏཀཱནུཡོགཱདིཝཎྞནཱ ནིཊྛིཏཱ.

༡༩. པཊིཝེདྷཱནུཡོགཱདིཝཎྞནཱ

༢༡༨. པཛཱནནཾ ནཱམ ན ཧོཏི ནིབྦིདཱདཱིནཾ ཨཔྤཙྩཡཏྟཱ. པརིཙྪེདནསམཏྠཏཉྩ དསྶེཏཱིཏི སམྦནྡྷོ.

༢༢༨. སཧརཱུཔབྷཱཝོ རཱུཔེན སམངྒིཏཱ, ཝིནཱརཱུཔབྷཱཝོ ཏཏོ ཝིནིསྶཊཏཱཏི ཏདུབྷཡཾ རཱུཔསྶ ཨབྦྷནྟརགམནཾ བཧིནིཀྑམནཉྩ ཧོཏི. ཏསྨཱ ཏཾ དྭཡཾ སཧརཱུཔབྷཱཝཝིནཱརཱུཔབྷཱཝཱནཾ ལཀྑཎཝཙནནྟི ཝུཏྟཾ.

༢༣༧. ཨོལཱ༹རིཀོཏི ཐཱུལོ. ཨཱཧིཏོ ཨཧཾ མཱནོ ཨེཏྠཱཏི ཨཏྟཱ, ཨཏྟབྷཱཝོ. སོ ཨེཝ ཡཐཱསཀཾ ཀམྨུནཱ པཊིལབྷིཏབྦཏོ པཊིལཱབྷོ. པདདྭཡེནཔི ཀཱམཱཝཙརཏྟབྷཱཝོ ཀཐིཏོ. མནོམཡོ ཨཏྟཔཊིལཱབྷོ རཱུཔཱཝཙརཏྟབྷཱཝོ. སོ ཧི ཛྷཱནམནེན ནིབྦཏྟཏྟཱ ¶ མནོམཡོ. ཨརཱུཔོ ཨཏྟཔཊིལཱབྷོཏི ཨརཱུཔཱཝཙརཏྟབྷཱཝོ. སོ ཧི རཱུཔེན ཨམིསྶིཏཏྟཱ ཨརཱུཔོཏི ཨེཝམེཏྠ ཨཏྠོ ཝེདིཏབྦོ. ‘‘ཨཏྟཱ’’ཏི པན ཛཱིཝེ ལོཀཝོཧཱརོ ནིརུལ༹ྷོ, ཨསཏིཔི ཛཱིཝེ ཏཐཱནིརུལ༹ྷཾ ལོཀཝོཧཱརཾ གཧེཏྭཱ སམྨཱསམྦུདྡྷཱཔི ཝོཧརནྟཱིཏི དསྶེནྟོ ‘‘ཨིཏི ཨིམཱ ལོཀསྶ སམཉྙཱ, ཡཱཧི ཏཐཱགཏོ ཝོཧརཏཱི’’ཏི ཝཏྭཱ ཨིདཱནི ཡཐཱ ཝོཧརནྟི, ཏཾ པཀཱརཾ ཝིབྷཱཝེནྟོ ‘‘ཨཔརཱམས’’ནྟིཨཱདིམཱཧ.

པཙྩཏྟསཱམཉྙལཀྑཎཝསེནཱཏི ཀཀྑལ༹ཕུསནཱདིསལཀྑཎཝསེན ཨནིཙྩཏཱདིསཱམཉྙལཀྑཎཝསེན ཙ. ཨིམིནཱཏི ‘‘པཙྩཏྟསཱམཉྙལཀྑཎཝསེནཱ’’ཏིཨཱདིནཱ ཝུཏྟེན པརམཏྠཏོ པུགྒལཱབྷཱཝཝཙནེན ¶ . ཨིཏོ པུརིམཱཏི ཏཏྠ ཏཏྠ སཀཝཱདིཔཊིཀྑེཔཱདིཝིབྷཱཝནཝསེན པཝཏྟཱ ཨིཏོ ཨཏྠསཾཝཎྞནཏོ པུརིམཱ. ཨིམིནཱཏི ཝཱ ‘‘ཡཐཱ རཱུཔཱདཡོ དྷམྨཱ’’ཏིཨཱདིནཱ ཨཊྛཀཐཱཡཾ ཝུཏྟཝཙནེན. ཡཐཱ ཙཱཏི ཨེཏྠ ཙ-སདྡོ སམུཙྩཡཏྠོ. ཏེན སམཉྙཱནཏིདྷཱཝནཾ སམྤིཎྜེཏི. ཨིདཾ ཝུཏྟཾ ཧོཏི – ཡཐཱ པརཱམཱསོ ཙ ན ཧོཏི ཛནཔདནིརུཏྟིཡཱ ཨབྷིནིཝིསིཏབྦཏོ, ཡཐཱ ཙ སམཉྙཱཏིདྷཱཝནཾ ན ཧོཏི, ཨེཝཾ ཨིཏོ པུརིམཱ ཙ ཨཏྠཝཎྞནཱ ཡོཛེཏབྦཱ. སམཉྙཱཏིདྷཱཝནེ ཧི སཏི སབྦལོཀཝོཧཱརཱུཔཙྪེདོ སིཡཱཏི.

ཏསྨཱ སཙྩནྟི ཡསྨཱ ཏཏྠ པརམཏྠཱཀཱརཾ ཨནཱརོཔེཏྭཱ སམཉྙཾ ནཱཏིདྷཱཝནྟོ ཀེཝལཾ ལོཀསམྨུཏིཡཱཝ ཝོཧརཏི, ཏསྨཱ སཙྩཾ པརེསཾ ཨཝིསཾཝཱདནཏོ. ཏཐཀཱརཎནྟི ཏཐོ ཨཝིཏཐོ དྷམྨསབྷཱཝོ ཀཱརཎཾ པཝཏྟིཧེཏུ ཨེཏསྶཱཏི ཏཐཀཱརཎཾ, པརམཏྠཝཙནཾ, ཨཝིཔརཱིཏདྷམྨསབྷཱཝཝིསཡནྟི ཨཏྠོ. ཏེནཱཧ ‘‘དྷམྨཱནཾ ཏཐཏཱཡ པཝཏྟ’’ནྟི.

པཊིཝེདྷཱནུཡོགཱདིཝཎྞནཱ ནིཊྛིཏཱ.

པུགྒལཀཐཱཝཎྞནཱ ནིཊྛིཏཱ.

༢. པརིཧཱནིཀཐཱ

༡. ཝཱདཡུཏྟིཔརིཧཱནིཀཐཱཝཎྞནཱ

༢༣༩. ཨིདཾ ¶ ¶ སུཏྟནྟི ཨིདཾ ལཀྑཎམཏྟཾ དཊྛབྦཾ. ‘‘པཉྩིམེ, བྷིཀྑཝེ, དྷམྨཱ སམཡཝིམུཏྟསྶ བྷིཀྑུནོ པརིཧཱནཱཡ སཾཝཏྟནྟཱི’’ཏི (ཨ. ནི. ༥.༡༤༩-༡༥༠) ཨིདམྤི ཧི སུཏྟཾ ཨནཱགཱམིཨཱདཱིནཾཡེཝ པརིཧཱནིནིསྶཡོ, ན ཨརཧཏོ. སམཡཝིམུཏྟོཏི ཨཊྛསམཱཔཏྟིལཱབྷིནོ སེཀྑསྶེཏཾ ནཱམཾ. ཡཐཱཧ –

‘‘ཀཏམོ ཙ པུགྒལོ སམཡཝིམུཏྟོ? ཨིདྷེཀཙྩོ པུགྒལོ ཀཱལེན ཀཱལཾ སམཡེན སམཡཾ ཨཊྛ ཝིམོཀྑེ ཀཱཡེན ཕུསིཏྭཱ ཝིཧརཏི, པཉྙཱཡ ཙསྶ དིསྭཱ ཨེཀཙྩེ ཨཱསཝཱ པརིཀྑཱིཎཱ ཧོནྟི. ཨཡཾ ཝུཙྩཏི པུགྒལོ སམཡཝིམུཏྟོ’’ཏི (པུ. པ. ༡).

‘‘པརིཧཱནིདྷམྨོ’’ཏི ཙ པུཐུཛྫནོ ཙ ཨེཀཙྩོ ཙ སེཀྑོ ཨདྷིཔྤེཏོ, ན ཨརཧཱཏི. ཏསྨཱཏི ཡསྨཱ ཡཐཱདསྶིཏཱནི སུཏྟཱནི ཨནཱགཱམིཨཱདཱིནཾ པརིཧཱནིལདྡྷིཡཱ ནིསྶཡོ, ན ཨརཧཏོ, ཏསྨཱ. ཏཾ ནིསྶཱཡ ཏཾ ཨཔེཀྑིཏྭཱ ཡསྨཱ ‘‘ཨརཧཏོཔཱི’’ཏི ཨེཏྠ ཨརཧཏོཔི པརིཧཱནི, ཀོ པན ཝཱདོ ཨནཱགཱམིཨཱདཱིནནྟི ཨཡམཏྠོ ལབྦྷཏི, ཏསྨཱ པི-སདྡསམྤིཎྜིཏམཏྠཾ དསྶེནྟོ ‘‘ཨརཧཏོཔི…པེ… ཡོཛེཏབྦ’’ནྟི ཨཱཧ. ཡསྨཱ ཝཱ ཀཱམཉྩེཏྠ དུཏིཡསུཏྟཾ སེཀྑཝསེན ཨཱགཏཾ, པཋམཏཏིཡསུཏྟཱནི པན ཨསེཀྑཝསེནཔི ཨཱགཏཱནཱིཏི ཏེསཾ ལདྡྷི, ཏསྨཱ ‘‘ཨརཧཏོཔཱི’’ཏི ཨཊྛཀཐཱཡཾ ཝུཏྟཾ. ཏེནཱཧ ‘‘ཨིདཾ སུཏྟཾ ཨརཧཏོ’’ཏིཨཱདི.

ཏཏིཡསྨིནྟི ‘‘སབྦེསཉྙེཝ ཨརཧནྟཱནཾ པརིཧཱནཱི’’ཏི ཨེཏསྨིཾ པཉྷེ. སོ ཧི ‘‘སབྦེཝ ཨརཧནྟོ’’ཏིཨཱདིནཱ ¶ ཨཱགཏེསུ ཏཏིཡོ པཉྷོ. ཏེསནྟི མུདིནྡྲིཡཱནཾ. ཏཏིཡསྨིམྤཱིཏི པི-སདྡོ ཝུཏྟཏྠསམུཙྩཡོ. ཏེན པཋམཔཉྷཾ སམུཙྩིནོཏི ‘‘ཏཏྠཔི ཏིཀྑིནྡྲིཡཱ ཨདྷིཔྤེཏཱ’’ཏི.

སོཡེཝ ན པརིཧཱཡཏཱིཏི སོཏཱཔནྣོཡེཝ སོཏཱཔནྣབྷཱཝཏོ ན པརིཧཱཡཏཱིཏི ཨཏྠོ. ན ཙེཏྠ སཀདཱགཱམིབྷཱཝཱཔཏྟིཡཱ སོཏཱཔནྣབྷཱཝཱཔགམོ པརིཧཱནི ཧོཏི ཝིསེསཱདྷིགམབྷཱཝཏོ. པཏྟཝིསེསཏོ ¶ ཧི པརིཧཱནཱིཏི. ཨིཏརེཏི སཀདཱགཱམིཨཱདིཀཱ. ཨུཔརིམགྒཏྠཱཡཱཏི ཨུཔརིམགྒཏྟཡཔཊིལཱབྷཏྠཱཡ ‘‘ནིཡཏོ’’ཏི ཝུཏྟམཏྠཾ ཨགྒཧེཏྭཱ.

ཝཱདཡུཏྟིཔརིཧཱནིཀཐཱཝཎྞནཱ ནིཊྛིཏཱ.

༢. ཨརིཡཔུགྒལསཾསནྡནཔརིཧཱནིཀཐཱཝཎྞནཱ

༢༤༡. ཏཏོཏི ཨརཧཏྟཏོ. ཏཏྠཱཏི དསྶནམགྒཕལེ. ཝཱཡཱམེནཱཏི ཝིཔསྶནུསྶཱཧནེན. ཏདནནྟརནྟི སོཏཱཔཏྟིཕལཱནནྟརཾ. པཋམཾ དསྶནམགྒཕལཱནནྟརཾ ཨརཧཏྟཾ པཱཔུཎཱཏི, ཏཏོ པརིཧཱིནོ པུན ཝཱཡམནྟོ ཏདནནྟརཾ ན ཨརཧཏྟཾ པཱཔུཎཱཏཱིཏི ཀཱ ཨེཏྠ ཡུཏྟཱིཏི ཨདྷིཔྤཱཡོ. པརཝཱདཱི ནཱམ ཡུཏྟམྤི ཝདཏི ཨཡུཏྟམྤཱིཏི ཀིཾ ཏསྶ ཝཱདེ ཡུཏྟིགཝེསནཱཡཱཏི པན དཊྛབྦཾ. ཨཔརིཧཱནསབྷཱཝོ བྷཱཝནཱམགྒོ ཨརིཡམགྒཏྟཱ དསྶནཱདསྶནམགྒོ ཝིཡ. ན ཙེཏྠ ཨསིདྡྷཏཱསངྐཱ ལོཀུཏྟརམགྒསྶ པརསྶཔི ཨརིཡམགྒབྷཱཝསྶ སིདྡྷཏྟཱ, ནཱཔི ལོཀིཡམགྒེན ཨནེཀནྟིཀཏཱ ཨརིཡསདྡེན ཝིསེསིཏཏྟཱ. ཏཐཱ ན ཝིརུདྡྷཏཱ དུཏིཡམགྒཱདཱིནཾ བྷཱཝནཱམགྒབྷཱཝསྶ ཨོལཱ༹རིཀཀིལེསཔྤཧཱནཱདཱིནཉྩ པརསྶཔི ཨཱགམཏོ སིདྡྷཏྟཱ.

ཨརིཡཔུགྒལསཾསནྡནཔརིཧཱནིཀཐཱཝཎྞནཱ ནིཊྛིཏཱ.

༣. སུཏྟསཱདྷནཔརིཧཱནིཀཐཱཝཎྞནཱ

༢༦༥. པུགྒལཔཉྙཏྟིཨཊྛཀཐཱཡཾ ¶ ‘‘པཏྟི, ཕུསནཱ’’ཏི ཙ པཙྩཀྑཏོ ཨདྷིགམོ ཨདྷིཔྤེཏོཏི ཝུཏྟཾ ‘‘པཏྟབྦཾ ཝདཏཱིཏི ཨཱཧ ཕུསནཱརཧ’’ནྟི.

༢༦༧. ཀཏསནྣིཊྛཱནསྶཱཏི ཨིམསྨིཾ སཏྟཱཧེ མཱསེ ཨུཏུམྷི ཨནྟོཝསྶེ ཝཱ ཨཉྙཾ ཨཱརཱདྷེསྶཱམཱིཏི ཀཏནིཙྪཡསྶ.

སུཏྟསཱདྷནཔརིཧཱནིཀཐཱཝཎྞནཱ ནིཊྛིཏཱ.

པརིཧཱནིཀཐཱཝཎྞནཱ ནིཊྛིཏཱ.

༣. བྲཧྨཙརིཡཀཐཱ

༡. སུདྡྷབྲཧྨཙརིཡཀཐཱཝཎྞནཱ

༢༦༩. ཧེཊྛཱཔཱིཏི ¶ ¶ པརནིམྨིཏཝསཝཏྟིདེཝེཧི ཧེཊྛཱཔི. མགྒབྷཱཝནམྤི ན ཨིཙྪནྟཱིཏི ཝིཉྙཱཡཏི ‘‘ཨིདྷ བྲཧྨཙརིཡཝཱསོ’’ཏི ཨིམིནཱ ‘‘དྭེཔི བྲཧྨཙརིཡཝཱསཱ ནཏྠི དེཝེསཱུཏི ཨུཔལདྡྷིཝསེནཱ’’ཏི ཝུཏྟཏྟཱ.

༢༧༠. ཏསྶེཝཱཏི པརཝཱདིནོ ཨེཝ. པུགྒལཝསེནཱཏི ‘‘གིཧཱིནཉྩེཝ ཨེཀཙྩཱནཉྩ དེཝཱན’’ནྟི ཨེཝཾ པུགྒལཝསེན. ཏསྶཱཏི པརཝཱདིནོ. པཊིཀྑེཔོ ན ཡུཏྟོཏི ཨེཝཾ པུགྒལཝསེན ཨཏྠཡོཛནཱ ན ཡུཏྟཱཏི ཨདྷིཔྤཱཡོ. པུགྒལཱདྷིཊྛཱནེན པན ཀཏཱཔི ཨཏྠཝཎྞནཱ ཨོཀཱསཝསེན པརིཙྪིཛྫཏཱིཏི ནཱཡཾ དོསོ. ཏསྶཱཡཾ ཨདྷིཔྤཱཡོཏི ཨཡཾ ‘‘གིཧཱིནཉྩེཝཱ’’ཏིཨཱདིནཱ ཝུཏྟོ ཏསྶ པརཝཱདིནོ ཡདི ཨདྷིཔྤཱཡོ, ཨེཝཾ སཉྙཱཡ པརཝཱདིནོ སཀཝཱདིནཱ སམཱནཱདཱཡོཏི ན ནིགྒཧཱརཧོ སིཡཱ. ཏེནཱཧ ‘‘སཀ…པེ… ཏབྦོ’’ཏི. པཋམཾ པན ཨནུཛཱནིཏྭཱ པཙྪཱ པཊིཀྑེཔེནེཝ ནིགྒཧེཏབྦཏཱ ཝེདིཏབྦཱ. ཀེཙི ‘‘ཡཏྠ ནཏྠི པབྦཛྫཱ, ནཏྠི ཏཏྠ བྲཧྨཙརིཡཝཱསོཏི པུཙྪཱཡ ཨེཀཙྩཱནཾ མནུསྶཱནཾ མགྒཔྤཊིཝེདྷཾ སནྡྷཱཡ པརཝཱདིནོ པཊིཀྑེཔོ. ཡདིཔི སོ དེཝཱནཾ མགྒཔྤཊིལཱབྷཾ ན ཨིཙྪཏི, སམྦྷཝནྟཾ པན སབྦཾ དསྶེཏུཾ ཨཊྛཀཐཱཡཾ ‘གིཧཱིན’མིཙྩེཝ ཨཝཏྭཱ ‘ཨེཀཙྩཱནཉྩ དེཝཱན’ནྟི ཝུཏྟ’’ནྟི ཝདནྟི, ཏཾ ན སུནྡརཾ ‘‘སནྡྷཱཡཱ’’ཏི ཝུཏྟཏྟཱ, པུརིམོཡེཝཏྠོ ཡུཏྟོ.

སུདྡྷབྲཧྨཙརིཡཀཐཱཝཎྞནཱ ནིཊྛིཏཱ.

༢. སཾསནྡནབྲཧྨཙརིཡཀཐཱཝཎྞནཱ

༢༧༣. རཱུཔཱཝཙརམགྒེནཱཏི ¶ རཱུཔཱཝཙརཛ྄ཛྷཱནེན. ཏཉྷི རཱུཔབྷཝཱུཔཔཏྟིཡཱ ཨུཔཱཡབྷཱཝཏོ མགྒོཏི ཝུཏྟོ. ཡཐཱཧ ‘‘རཱུཔུཔཔཏྟིཡཱ མགྒཾ བྷཱཝེཏཱི’’ཏི (དྷ. ས. ༡༦༠). ཨིདནྟི ཨིདཾ རཱུཔཱཝཙརཛ྄ཛྷཱནཾ. ‘‘ཨིདྷཝིཧཱཡནིཊྛཧེཏུབྷཱུཏོ རཱུཔཱཝཙརམགྒོ’’ཏིཨཱདིཀཾ དཱིཔེནྟཾ ཝཙནཾ ཨནཱགཱམིམགྒསྶ ཏབྦྷཱཝདཱིཔཀེན ‘‘ཨིདྷ བྷཱཝིཏམགྒོ’’ཏིཨཱདིཀེན ཀཐཾ སམེཏཱིཏི ཙོདེཏྭཱ ཡཐཱ སམེཏི ¶ , ཏཾ དསྶེཏུཾ ‘‘པུབྦེ པནཱ’’ཏིཨཱདི ཝུཏྟཾ. ཏཏྠ ‘‘པུབྦེ’’ཏི ཨིམིནཱ ‘‘ཨིདྷ བྷཱཝིཏམགྒོ’’ཏིཨཱདིཀཾ ཝདནྟི, ཨིདྷཱཔི པན ‘‘རཱུཔཱཝཙརམགྒེནཱ’’ཏིཨཱདིཀཾ. ཏཏྠ ཨནཱགཱམཱི ཨེཝཱཏི ཨནཱགཱམིཕལཊྛོ ཨེཝ. ཛྷཱནཱནཱགཱམཱིཏི ཨསམུཙྪིནྣཛ྄ཛྷཏྟསཾཡོཛནོཔི རཱུཔབྷཝེ ཨུཔྤཛྫིཏྭཱ ཨནཱཝཏྟིདྷམྨམགྒཾ བྷཱཝེཏྭཱ ཏཏྠེཝ པརིནིབྦཱཡནཏོ. ཨདྷིཔྤཱཡོཏི ཡཐཱཝུཏྟོ དྭིནྣཾ ཨཊྛཀཐཱཝཙནཱནཾ ཨཝིརོདྷདཱིཔཀོ ཨདྷིཔྤཱཡོ.

ཨིདྷཱཏི ཀཱམལོཀེ. ཏཏྠཱཏི བྲཧྨལོཀེ. ཨེཏྠ ཙ པརཝཱདཱི ཨེཝཾ པུཙྪིཏབྦོ ‘‘ཏཱིཧི, བྷིཀྑཝེ, ཋཱནེཧཱི’’ཏི སུཏྟཾ ཀིཾ ཡཐཱརུཏཝསེན གཧེཏབྦཏྠཾ, ཨུདཱཧུ སནྡྷཱཡབྷཱསིཏནྟི? ཏཏྠ ཛཱནམཱནོ སནྡྷཱཡབྷཱསིཏནྟི ཝདེཡྻ. ཨཉྙཐཱ ‘‘པརནིམྨིཏཝསཝཏྟིདེཝེ ཨུཔཱདཱཡཱ’’ཏིཨཱདི ཝཏྟུཾ ན སཀྐཱ ‘‘དེཝེ ཙ ཏཱཝཏིཾསེ’’ཏི ཝུཏྟཏྟཱ. ཡཐཱ ཧི ཏསྶ ‘‘སེཡྻཐཱཔི དེཝེཧི ཏཱཝཏིཾསེཧི སདྡྷིཾ མནྟེཏྭཱ’’ཏིཨཱདཱིསུ ཝིཡ སཀྐཾ དེཝརཱཛཱནཾ ཨུཔཱདཱཡ ཀཱམཱཝཙརདེཝེསུ ཏཱཝཏིཾསདེཝཱ པཱཀཊཱ པཉྙཱཏཱཏི ཏེསཾ གཧཎཾ, ན ཏེཡེཝ ཨདྷིཔྤེཏཱཏི སུཏྟཔདསྶ སནྡྷཱཡབྷཱསིཏཏྠཾ སམྤཊིཙྪིཏབྦཾ, ཨེཝཾ ‘‘ཨིདྷ བྲཧྨཙརིཡཝཱསོ’’ཏི ཨེཏྠཱཔི ཨནཝཛྫསུཁཨབྱཱསེཀསུཁནེཀྑམྨསུཁཱདིསནྣིསྶཡབྷཱཝེན མཧཱནིསཾསཏཱཡ སཱསནེ པབྦཛྫཱ ‘‘ཨིདྷ བྲཧྨཙརིཡཝཱསོ’’ཏི ཨིམསྨིཾ སུཏྟེ ཨདྷིཔྤེཏཱ. སཱ ཧི ཨུཏྟརཀུརུཀཱནཾ དེཝཱནཉྩ ཨནོཀཱསབྷཱཝཏོ དུཀྐརཱ དུལླབྷཱ ཙ. ཏཏྠ སཱུརིཡཔརིཝཏྟཱདཱིཧིཔི དེཝེསུ མགྒཔཊིལཱབྷཱཡ ཨཏྠིཏཱ ཝིབྷཱཝེཏབྦཱ, ཨུཏྟརཀུརུཀཱནཾ པན ཝིསེསཱནདྷིགམབྷཱཝོ ཨུབྷིནྣམྤི ཨིཙྪིཏོ ཨེཝཱཏི.

སཾསནྡནབྲཧྨཙརིཡཀཐཱཝཎྞནཱ ནིཊྛིཏཱ.

བྲཧྨཙརིཡཀཐཱཝཎྞནཱ ནིཊྛིཏཱ.

༣. ཨོདྷིསོཀཐཱཝཎྞནཱ

༢༧༤. ཨོདྷིསོཏི ¶ བྷཱགསོ, བྷཱགེནཱཏི ཨཏྠོ. བྷཱགོ ནཱམ ཡསྨཱ ཨེཀདེསོ ཧོཏི, ཏསྨཱ ‘‘ཨེཀདེསེན ཨེཀདེསེནཱ’’ཏི ཝུཏྟཾ. ཏཏྠ ཡདི ཙཏུནྣཾ མགྒཱནཾ ཝསེན སམུདཡཔཀྑིཀསྶ ཀིལེསགཎསྶ ཙཏུབྷཱགེཧི པཧཱནཾ ‘‘ཨོདྷིསོ པཧཱན’’ནྟི ཨདྷིཔྤེཏཾ, ཨིཙྪིཏམེཝེཏཾ སཀཝཱདིསྶ ‘‘ཏིཎྞཾ སཾཡོཛནཱནཾ པརིཀྑཡཱ དིཊྛིགཏཱནཾ པཧཱནཱཡཱ’’ཏི ¶ ཙ ཨཱདིཝཙནཏོ. ཡསྨཱ པན མགྒོ ཙཏཱུསུ སཙྩེསུ ནཱནཱབྷིསམཡཝསེན ཀིཙྩཀརོ, ན ཨེཀཱབྷིསམཡཝསེནཱཏི པརཝཱདིནོ ལདྡྷི, ཏསྨཱ ཡཐཱ ‘‘མགྒོ ཀཱལེན དུཀྑཾ པརིཛཱནཱཏི, ཀཱལེན སམུདཡཾ པཛཧཏཱི’’ཏིཨཱདིནཱ ནཱནཀྑཎཝསེན སཙྩེསུ པཝཏྟཏཱིཏི ཨིཙྪིཏོ, ཨེཝཾ པཙྩེཀམྤི ནཱནཀྑཎཝསེན པཝཏྟེཡྻ. ཏཐཱ སཏི དུཀྑཱདཱིནཾ ཨེཀདེསཨེཀདེསམེཝ པརིཛཱནཱཏི པཛཧཏཱིཏི དསྶེཏུཾ པཱལི༹ཡཾ ‘‘སོཏཱཔཏྟི…པེ… ཨེཀདེསེ པཛཧཏཱི’’ཏིཨཱདི ཝུཏྟཾ. སཏི ཧི ནཱནཱབྷིསམཡེ པཋམམགྒཱདཱིཧི པཧཱཏབྦཱནཾ སཾཡོཛནཏྟཡཱདཱིནཾ དུཀྑདསྶནཱདཱིཧི ཨེཀདེསཨེཀདེསཔྤཧཱནཾ སིཡཱཏི ཨེཀདེསསོཏཱཔཏྟིམགྒཊྛཱདིཏཱ, ཏཏོ ཨེཝ ཨེཀདེསསོཏཱཔནྣཱདིཏཱ ཙ ཨཱཔཛྫཏི ཨནནྟརཕལཏྟཱ ལོཀུཏྟརཀུསལཱནཾ, ན ཙ ཏཾ ཡུཏྟཾ. ན ཧི ཀཱལབྷེདེན ཝིནཱ སོ ཨེཝ སོཏཱཔནྣོ, ཨསོཏཱཔནྣོ ཙཱཏི སཀྐཱ ཝིཉྙཱཏུཾ. ཏེནཱཧ ‘‘ཨེཀདེསཾ སོཏཱཔནྣོ, ཨེཀདེསཾ ན སོཏཱཔནྣོ’’ཏིཨཱདི.

ཨཔིཙཱཡཾ ནཱནཱབྷིསམཡཝཱདཱི ཨེཝཾ པུཙྪིཏབྦོ ‘‘མགྒཉཱཎཾ སཙྩཱནི པཊིཝིཛ྄ཛྷནྟཾ ཀིཾ ཨཱརམྨཎཏོ པཊིཝིཛ྄ཛྷཏི, ཨུདཱཧུ ཀིཙྩཏོ’’ཏི. ཡདི ཨཱརམྨཎཏོཏི ཝདེཡྻ, ཏསྶ ཝིཔསྶནཱཉཱཎསྶ ཝིཡ དུཀྑསམུདཡཱནཾ ཨཙྩནྟཔརིཙྪེདསམུཙྪེདཱ ན ཡུཏྟཱ ཏཏོ ཨནིསྶཊཏྟཱ, ཏཐཱ མགྒདསྶནཾ. ན ཧི སཡམེཝ ཨཏྟཱནཾ ཨཱརབྦྷ པཝཏྟཏཱིཏི ཡུཏྟཾ, མགྒནྟརཔརིཀཔྤནཱཡཾ ཨནཝཊྛཱནཾ ཨཱཔཛྫཏཱིཏི, ཏསྨཱ ཏཱིཎི སཙྩཱནི ཀིཙྩཏོ, ནིརོདྷཾ ཀིཙྩཏོ ཨཱརམྨཎཏོ ཙ པཊིཝིཛ྄ཛྷཏཱིཏི ཨེཝམསམྨོཧཏོ པཊིཝིཛ྄ཛྷནྟསྶ མགྒཉཱཎསྶ ནཏྠེཝ ནཱནཱབྷིསམཡོ. ཝུཏྟཉྷེཏཾ ‘‘ཡོ, བྷིཀྑཝེ, དུཀྑཾ པསྶཏི, དུཀྑསམུདཡམྤི སོ པསྶཏཱི’’ཏིཨཱདི. ན ཙེཏཾ ཀཱལནྟརདསྶནཾ སནྡྷཱཡ ཝུཏྟཾ. ‘‘ཡོ ནུ ཁོ, ཨཱཝུསོ, དུཀྑཾ པསྶཏི, དུཀྑསམུདཡམྤི སོ པསྶཏི, དུཀྑནིརོདྷམྤི…པེ… དུཀྑནིརོདྷགཱམིནིཔཊིཔདམྤི སོ པསྶཏཱི’’ཏི (སཾ. ནི. ༥.༡༡༠༠) ཨེཀསཙྩདསྶནསམངྒིནོ ཨཉྙསཙྩདསྶནསམངྒིབྷཱཝཝིཙཱརཎཱཡཾ ཏདཏྠསཱདྷནཏྠཾ ཨཱཡསྨཏཱ གཝཾཔཏིཏྠེརེན ཨཱབྷཏཏྟཱ པཙྩེཀཉྩ སཙྩཏྟཡདསྶནསྶ ཡོཛིཏཏྟཱ. ཨཉྙཐཱ པུརིམདིཊྛསྶ པུན ཨདསྶནཏོ སམུདཡཱདིདསྶནེ དུཀྑཱདིདསྶནམཡོཛནཱིཡཾ ¶ སིཡཱ. ན ཧི ལོཀུཏྟརམགྒོ ལོཀིཡམགྒོ ཝིཡ ཀཏཀཱརིབྷཱཝེན པཝཏྟཏི སམུཙྪེདཀཏྟཱ. ཏཐཱ ཡོཛནེ ཙ སབྦཾ དསྶནཾ ¶ དསྶནནྟརཔརནྟི དསྶནཱནུཔརམོ སིཡཱ. ཨེཝཾ ཨཱགམཏོ ཡུཏྟིཏོ ཙ ནཱནཱབྷིསམཡསྶ ཨསམྦྷཝཏོ པཙྩེཀཾ མགྒཱནཾ ཨོདྷིསོ པཧཱནཾ ནཏྠཱིཏི ནིཊྛམེཏྠ གནྟབྦཾ.

ཨོདྷིསོཀཐཱཝཎྞནཱ ནིཊྛིཏཱ.

༤. ཛཧཏིཀཐཱཝཎྞནཱ

༡. ནསུཏྟཱཧརཎཀཐཱཝཎྞནཱ

༢༨༠. ཡདིཔི པཱལི༹ཡཾ ‘‘ཏཡོ མགྒེ བྷཱཝེཏཱི’’ཏི ཝུཏྟཾ, མགྒབྷཱཝནཱ པན ཡཱཝདེཝ ཀིལེསསམུཙྪིནྡནཏྠཱཏི ཉཏྭཱ ‘‘ཀིཙྩསབྦྷཱཝནྟི ཏཱིཧི པཧཱཏབྦསྶ པཧཱིནཏ’’ནྟི ཨཱཧ. ཏཏྠ ཏཱིཧཱིཏི ཧེཊྛིམེཧི ཏཱིཧི ཨརིཡམགྒེཧི པཧཱཏབྦསྶ ཨཛ྄ཛྷཏྟསཾཡོཛནསྶ པཧཱིནཏཾ སམུཙྪིནྡནནྟི ཨཏྠོ. ཏཾ པན ཀིཙྩནྟི ཨདྷོབྷཱགིཡསཾཡོཛནེསུ མགྒསྶ པཧཱནཱབྷིསམཡཀིཙྩཾ. ཏེནེཝ མགྒེནཱཏི ཨནཱགཱམིམགྒེནེཝ. ཨེཏཾ ན སམེཏཱིཏི ཨེཝཾ མགྒུཔྤཱདཏོ པགེཝ ཀཱམརཱགབྱཱཔཱདཱ པཧཱིཡནྟཱིཏི ལདྡྷིཀིཏྟནཾ ཨིམིནཱ མགྒསྶ ཀིཙྩསབྦྷཱཝཀཐནེན ན སམེཏི ན ཡུཛྫཏི. ཏསྨཱཏི ཨིམིནཱ ཡཐཱཝུཏྟམེཝ ཝིརོདྷཾ པཙྩཱམསཏི. པཧཱིནཱནནྟི ཝིཀྑམྦྷིཏཱནཾ. ཡོ ཧི ཛྷཱནལཱབྷཱི ཛྷཱནེན ཡཐཱཝིཀྑམྦྷིཏེ ཀིལེསེ མགྒེན སམུཙྪིནྡཏི, སོ ཨིདྷཱདྷིཔྤེཏོ. ཏེནཱཧ ‘‘དསྶནམགྒེ…པེ… ཨདྷིཔྤཱཡོ’’ཏི.

ཛཧཏིཀཐཱཝཎྞནཱ ནིཊྛིཏཱ.

༥. སབྦམཏྠཱིཏིཀཐཱཝཎྞནཱ

༡. ཝཱདཡུཏྟིཝཎྞནཱ

༢༨༢. སབྦཾ ¶ ཨཏྠཱིཏི ཨེཏྠ ཡསྨཱ པཙྩུཔྤནྣཾ ཝིཡ ཨཏཱིཏཱནཱགཏམྤི དྷརམཱནསབྷཱཝནྟི པརཝཱདིནོ ལདྡྷི, ཏསྨཱ སབྦནྟི ཀཱལཝིབྷཱགཏོ ཨཏཱིཏཱདིབྷེདཾ སབྦཾ. སོ པན ‘‘ཡམྤི ནཏྠི, ཏམྤི ཨཏྠཱི’’ཏི ཀཱལཝིམུཏྟསྶ ཝསེན ཨནུཡོགོ, ཏཾ ཨཏིཔྤསངྒདསྶནཝསེན པརཝཱདིཔཊིཉྙཱཡ དོསཱརོཔནཾ. ནཡདསྶནཾ ཝཱ ཨཏཱིཏཱནཱགཏཱནཾ ནཏྠིབྷཱཝསྶ. ཨཏྠཱིཏི ¶ པན ཨཡཾ ཨཏྠིབྷཱཝོ ཡསྨཱ དེསཀཱལཱཀཱརདྷམྨེཧི ཝིནཱ ན ཧོཏི, ཏསྨཱ ཏཾ ཏཱཝ ཏེཧི སདྡྷིཾ ཡོཛེཏྭཱ ཨནུཡོགཾ དསྶེཏུཾ ‘‘སབྦཏྠ སབྦམཏྠཱི’’ཏིཨཱདིནཱ པཱལི༹ པཝཏྟཱ. ཏཏྠ ཡདིཔི སབྦཏྠཱཏི ཨིདཾ སཱམཉྙཝཙནཾ, ཏཾ པན ཡསྨཱ ཝིསེསནིཝིཊྛཾ ཧོཏི, པརཏོ ཙ སབྦེསཱུཏི དྷམྨཱ ཝིབྷཱགཏོ ཝུཙྩནྟི, ཏསྨཱ ཨོལཱ༹རིཀསྶ པཱཀཊསྶ རཱུཔདྷམྨསམུདཱཡསྶ ཝསེན ཨཏྠཾ དསྶེཏུཾ ཨཊྛཀཐཱཡཾ ‘‘སབྦཏྠཱཏི སབྦསྨིཾ སརཱིརེ’’ཏི ཝུཏྟཾ, ནིདསྶནམཏྟཾ ཝཱ ཨེཏཾ དཊྛབྦཾ. ཏཐཱ ཙ ཀཱཎཱདཀཱཔིལེཧི པཊིཉྙཱཡམཱནཱ ཨཱཀཱསཀཱལཱདིསཏྟཔཀཏིཔུརིསཱ ཝིཡ པརཝཱདིནཱ པཊིཉྙཱཡམཱནཾ སབྦཾ སབྦབྱཱཔཱིཏི ཨཱཔནྣམེཝ ཧོཏཱིཏི. ‘‘སབྦཏྠ སརཱིརེ’’ཏི ཙ ‘‘ཏིལེ ཏེལ’’ནྟི ཝིཡ བྱཱཔནེ བྷུམྨནྟི སརཱིརཔརིཡཱཔནྣེན སབྦེན བྷཝིཏབྦནྟི ཝུཏྟཾ ‘‘སིརསི པཱདཱ…པེ… ཨཏྠོ’’ཏི.

སབྦསྨིཾ ཀཱལེ སབྦམཏྠཱིཏི ཡོཛནཱ. ཨེཏསྨིཾ པཀྑེཡེཝསྶ ཨཉྙཝཱདོ པརིདཱིཔིཏོ སིཡཱ ‘‘ཡཾ ཨཏྠི, ཨཏྠེཝ ཏཾ, ཡཾ ནཏྠི, ནཏྠེཝ ཏཾ, ཨསཏོ ནཏྠི སམྦྷཝོ, སཏོ ནཏྠི ཝིནཱསོ’’ཏི. ཨེཝཾ སབྦེནཱཀཱརེན སབྦཾ སབྦེསུ དྷམྨེསུ སབྦཾ ཨཏྠཱིཏི ཨཏྠོཏི སམྦནྡྷོ. ཨིམེཧི པན པཀྑེཧི ‘‘སབྦཾ སབྦསབྷཱཝཾ, ཨནེཀསཏྟིནིཙིཏཱབྷཱཝཱ ཨསཏོ ནཏྠི སམྦྷཝོ’’ཏི ཝཱདོ པརིདཱིཔིཏོ སིཡཱ. ཡོགརཧིཏནྟི ཀེནཙི ཡུཏྟཱཡུཏྟལཀྑཎསཾཡོགརཧིཏཾ. ཏཾ པན ཨེཀསབྷཱཝནྟི སཾཡོགརཧིཏཾ ནཱམ ཨཏྠཏོ ཨེཀསབྷཱཝཾ, ཨེཀདྷམྨོཏི ཨཏྠོ. ཨེཏེན དེཝཝཱདཱིནཾ བྲཧྨདསྶནཾ ཨཏྠེཝཱཏིཝཱདོ པརིདཱིཔིཏོ སིཡཱ. ཨཏྠཱིཏི པུཙྪཏཱིཏི ཡདི སབྦམཏྠཱིཏི ཏཝ ཝཱདོ, ཡཐཱཝུཏྟཱཡ མམ དིཊྛིཡཱ སམྨཱདིཊྛིབྷཱཝོ ཨཏྠཱིཏི ཨེཀནྟེན ཏཡཱ སམྤཊིཙྪིཏབྦོ, ཏསྨཱ ‘‘ཀིཾ སོ ཨཏྠཱི’’ཏི པུཙྪཏཱིཏི ཨཏྠོ.

ཝཱདཡུཏྟིཝཎྞནཱ ནིཊྛིཏཱ.

༢. ཀཱལསཾསནྡནཀཐཱཝཎྞནཱ

༢༨༥. ཨཏཱིཏཱ ¶ …པེ… ཀརིཏྭཱཏི ཨེཏྠཱཡཾ སངྑེཔཏྠོ – ཨཏཱིཏཾ ཨནཱགཏནྟི རཱུཔསྶ ཨིམཾ ཝིསེསཾ, ཨེཝཾ ཝིསེསཾ ཝཱ རཱུཔཾ ཨགྒཧེཏྭཱ པཙྩུཔྤནྣཏཱཝིསེསཝིསིཊྛརཱུཔམེཝ ཨཔྤིཡཾ པཙྩུཔྤནྣརཱུཔབྷཱཝཱནཾ སམཱནཱདྷིཀརཎཏྟཱ ཨེཏསྨིཾཡེཝ ¶ ཝིསཡེ ཨཔྤེཏབྦཾ, ཝཙཱིགོཙརཾ པཱཔེཏབྦཾ སཏིཔི ནེསཾ ཝིསེསནཝིསེསིཏབྦཏཱསངྑཱཏེ ཝིབྷཱགེ ཏཐཱཔི ཨཝིབྷཛིཏབྦཾ ཀཏྭཱཏི. ཡསྨཱ པན པཱལི༹ཡཾ ‘‘པཙྩུཔྤནྣནྟི ཝཱ རཱུཔནྟི ཝཱ’’ཏི པཙྩུཔྤནྣརཱུཔསདྡེཧི ཏདཏྠསྶ ཝཏྟབྦཱཀཱརོ ཨིཏིསདྡེཧི དསྶིཏོ, ཏསྨཱ ‘‘པཙྩུཔྤནྣསདྡེན…པེ… ཝུཏྟཾ ཧོཏཱི’’ཏི ཨཱཧ. རཱུཔཔཉྙཏྟཱིཏི རཱུཔཱཡཏནཔཉྙཏྟི. སཱ ཧི སབྷཱཝདྷམྨུཔཱདཱནཱ ཏཛྫཱཔཉྙཏྟི. ཏེནེཝཱཧ ‘‘སབྷཱཝཔརིཙྪིནྣེ པཝཏྟཱ ཝིཛྫམཱནཔཉྙཏྟཱི’’ཏི. རཱུཔསམཱུཧཾ ཨུཔཱདཱཡཱཏི ཏཾཏཾཨཏྟཔཉྙཏྟིཡཱ ཨུཔཱདཱནབྷཱུཏཱནཾ ཨབྷཱཝཝིབྷཱཝནཱཀཱརེན པཝཏྟམཱནཱནཾ རཱུཔདྷམྨཱནཾ སམཱུཧཾ ཨུཔཱདཱཡ. ཨུཔཱདཱནུཔཱདཱནམྤི ཧི ཨུཔཱདཱནམེཝཱཏི. ཏསྨཱཏི སམཱུཧུཔཱདཱཡཱདྷཱིནཏཱཡ ཨཝིཛྫམཱནཔཉྙཏྟིབྷཱཝཏོ. ཝིགམཱཝཏྟབྦཏཱཏི ཝིགམསྶ ཝཏྠབྷཱཝཱཔགམསྶ ཨཝཏྟབྦཏཱ. ན ཧི ཨོདཱཏཏཱཝིགམེན ཨཝཏྠཾ ཧོཏི. ན པན ཡུཏྟཱ རཱུཔབྷཱཝསྶ ཝིགམཱཝཏྟབྦཏཱཏི ཡོཛནཱ. རཱུཔབྷཱཝོཏི ཙ རཱུཔཱཡཏནསབྷཱཝོ ཙཀྑུཝིཉྙཱཎསྶ གོཙརབྷཱཝོ. ན ཧི ཏསྶ པཙྩུཔྤནྣབྷཱཝཝིགམེ ཝིགམཱཝཏྟབྦཏཱ ཡུཏྟཱ.

ཀཱལསཾསནྡནཀཐཱཝཎྞནཱ ནིཊྛིཏཱ.

ཝཙནསོདྷནཝཎྞནཱ

༢༨༨. ཨནཱགཏཾ ཝཱ པཙྩུཔྤནྣཾ ཝཱཏི ཨེཏྠ ཝཱ-སདྡོ ཨནིཡམཏྠོ ཡཐཱ ‘‘ཁདིརེ ཝཱ བནྡྷིཏབྦཾ པལཱསེ ཝཱ’’ཏི. ཏསྨཱ ‘‘ཧུཏྭཱ ཧོཏཱི’’ཏི ཨེཏྠ ཧོཏི-སདྡོ ཨནཱགཏཔཙྩུཔྤནྣེསུ ཡཾ ཀིཉྩི པདྷཱནཾ ཀཏྭཱ སམྦནྡྷཾ ལབྷཏཱིཏི དསྶེནྟོ ‘‘ཨནཱགཏཾ…པེ… དཊྛབྦ’’ནྟི ཨཱཧ. ཏཏྠ པཙྩུཔྤནྣཾ ཧོནྟནྟི པཙྩུཔྤནྣཾ ཛཱཡམཱནཾ པཙྩུཔྤནྣབྷཱཝཾ ལབྷནྟཾ. ཏེནཱཧ ‘‘ཏཉྙེཝ ཨནཱགཏཾ ཏཾ པཙྩུཔྤནྣནྟི ལདྡྷིཝསེནཱ’’ཏི. ཏམྤི ཧུཏྭཱ ཧོཏཱིཏི ཡཾ ཨནཱགཏཾ ཧུཏྭཱ པཙྩུཔྤནྣབྷཱཝཔྤཏྟིཡཱ ‘‘ཧུཏྭཱ ཧོཏཱི’’ཏི ཝུཏྟཾ, ཀིཾ ཏདཔི པུན ཧུཏྭཱ ཧོཏཱིཏི པུཙྪཏི. ཏབྦྷཱཝཱཝིགམཏོཏི པཙྩུཔྤནྣབྷཱཝཏོ ཧུཏྭཱཧོཏིབྷཱཝཱནུཔགམཏོ. པཙྩུཔྤནྣཱབྷཱཝཏོཏི པཙྩུཔྤནྣཏཱཡ ཨབྷཱཝཏོ.

ཝཙནཾ ¶ ¶ ཨརཧཏཱིཏི ཨིམིནཱ ཝཙནམཏྟེ ན ཀོཙི དོསོཏི དསྶེཏི. ཨིདཾ ཝུཏྟཾ ཧོཏི – ཡདིཔི ཏསྶ པུན ཧུཏྭཱ བྷཱུཏསྶ པུན ཧུཏྭཱཧོཏིབྷཱཝོ ནཏྠི, པུནཔྤུནཾ ཉཱཔེཏབྦཏཱཡ པན དུཏིཡཾ ཏཏོ པརམྤི ཏཐཱ ཝཏྟབྦཏཾ ཨརཧཏཱིཏི ‘‘ཨཱམནྟཱ’’ཏི པཊིཛཱནཱཏཱིཏི. དྷམྨེཏི སབྷཱཝདྷམྨེ. ཏཔྤཊིཀྑེཔཏོ ཨདྷམྨེ ཨབྷཱཝདྷམྨེ. ཏེནཱཧ ‘‘སསཝིསཱཎེ’’ཏི.

པཊིཀྑིཏྟནཡེནཱཏི ‘‘ཧུཏྭཱ ཧོཏི, ཧུཏྭཱ ཧོཏཱི’’ཏི ཨེཏྠ པུབྦེ ཡདེཏཾ ཏཡཱ ‘‘ཨནཱགཏཾ ཧུཏྭཱ པཙྩུཔྤནྣཾ ཧོཏཱི’’ཏི ཝདཏཱ ‘‘ཏཾཡེཝ ཨནཱགཏཾ ཏཾ པཙྩུཔྤནྣ’’ནྟི ལདྡྷིཝསེན ‘‘ཨནཱགཏཾ ཝཱ པཙྩུཔྤནྣཾ ཝཱ ཧུཏྭཱ ཧོཏཱི’’ཏི ཝུཏྟཾ, ‘‘ཀིཾ ཏེ ཏམྤི ཧུཏྭཱ ཧོཏཱི’’ཏི པུཙྪིཏེ ཡོ པརཝཱདིནཱ ཧུཏྭཱ བྷཱུཏསྶ པུན ཧུཏྭཱཨབྷཱཝཏོ ‘‘ན ཧེཝཱ’’ཏི པཊིཀྑེཔོ ཀཏོ, ཏེན པཊིཀྑིཏྟནཡེན. སྭཱཡཾ ཡདེཝ རཱུཔཱདི ཨནཱགཏཾ, ཏདེཝ པཙྩུཔྤནྣནྟི སཏིཔི ཨཏྠཱབྷེདེ ཨནཱགཏཔཙྩུཔྤནྣནྟི པན ཨཏྠེཝ ཀཱལབྷེདོཏི ཏཾཀཱལབྷེདཝིརོདྷཱཡ པཊིཀྑེཔོ པཝཏྟོཏི ཨཱཧ ‘‘པཊིཀྑིཏྟནཡེནཱཏི ཀཱལནཱནཏྟེནཱ’’ཏི. ཏེན ཧི སོ ཨཡཉྩ པཊིཀྑེཔོ ནཱིཏོ པཝཏྟིཏོཏི. པཊིཉྙཱཏནཡེནཱཏི ཨིདམྤི ཡཐཱཝུཏྟཔཊིཀྑེཔཱནནྟརཾ ཡཾ པཊིཉྙཱཏཾ, ཏཾ སནྡྷཱཡཱཧ. ཡཐཱ ཧི སཱ པཊིཉྙཱ ཨཏྠཱབྷེདེན ནཱིཏཱ པཝཏྟིཏཱ, ཏཐཱཡམྤི. ཏེནེཝཱཧ ‘‘ཨཏྠཱནཱནཏྟེནཱ’’ཏི, ཨནཱགཏཱདིཔྤབྷེདཱཡ ཀཱལཔཉྙཏྟིཡཱ ཨུཔཱདཱནབྷཱུཏསྶ ཨཏྠསྶ ཨབྷེདེནཱཏི ཨཏྠོ. ཡཐཱ ཨུཔཱདཱནབྷཱུཏརཱུཔཱདིཨཏྠཱབྷེདེཔི ཏེསཾ ཁཎཏྟཡཱནཱཝཏྟི ཏཾསམངྒིཏཱ ཨནཱགཏཔཙྩུཔྤནྣབྷཱཝཱཝཏྟིཏཱ, ཏཐཱ ཏཏྠ ཝུཙྩམཱནཱ ཧུཏྭཱཧོཏིབྷཱཝཱ ཡཐཱཀྐམཾ པུརིམཔཙྪིམེསུ པཝཏྟིཏཱ པུརིམཔཙྪིམཀིརིཡཱཏི ཀཏྭཱཏི ཨིམམཏྠཾ དསྶེནྟོ ‘‘ཨཏྠཱནཱནཏྟཾ…པེ… པཊིཛཱནཱཏཱི’’ཏི ཝཏྭཱ པུན ‘‘ཨཏྠཱནཱནཏྟམེཝ ཧཱི’’ཏིཨཱདིནཱ ཏམེཝ ཨཏྠཾ སམཏྠེཏི. ཡཐཱ པན ‘‘ཏཾ ཛཱིཝཾ ཏཾ སརཱིར’’ནྟི པཊིཛཱནནྟསྶ ཛཱིཝོཝ སརཱིརཾ, སརཱིརམེཝ ཛཱིཝོཏི ཛཱིཝསརཱིརཱནཾ ཨནཉྙཏྟཾ ཨཱཔཛྫཏི, ཨེཝཾ ‘‘ཏཉྙེཝ ཨནཱགཏཾ ཏཾ པཙྩུཔྤནྣ’’ནྟི ཙ པཊིཛཱནནྟསྶ ཨནཱགཏཔཙྩུཔྤནྣཱནཾ ཨནཉྙཏྟཾ ཨཱཔནྣནྟི པཙྩུཔྤནྣཱནཱགཏེསུ ཝུཏྟཱ ཧོཏིབྷཱཝཧུཏྭཱབྷཱཝཱ ཨནཱགཏཔཙྩུཔྤནྣེསུཔི ཨཱཔཛྫེཡྻུནྟི ཝུཏྟཾ ཨཊྛཀཐཱཡཾ ‘‘ཨེཝཾ སནྟེ ཨནཱགཏམྤི ཧུཏྭཱཧོཏི ནཱམ, པཙྩུཔྤནྣམྤི ཧུཏྭཱཧོཏིཡེཝ ནཱམཱ’’ཏི.

ཨནུཉྙཱཏཔཉྷསྶཱཏི ¶ ‘‘ཏཉྙེཝ ཨནཱགཏཾ ཏཾ པཙྩུཔྤནྣནྟི? ཨཱམནྟཱ’’ཏི ཨེཝཾ ཨཏྠཱནཱནཏྟཾ སནྡྷཱཡ ཨནུཉྙཱཏསྶ ཨཏྠསྶ. ཉཱཏུཾ ཨིཙྪིཏོ ཧི ཨཏྠོ པཉྷོ. དོསོ ཝུཏྟོཏི ཨནཱགཏཾ ཧུཏྭཱ པཙྩུཔྤནྣབྷཱུཏསྶ པུན ཨནཱགཏཾ ཧུཏྭཱ པཙྩུཔྤནྣབྷཱཝཱཔཏྟིསངྑཱཏོ དོསོ ཝུཏྟོ པུརིམནཡེ ¶ . པཙྪིམནཡེ པན ཨནཱགཏཔཙྩུཔྤནྣེསུ ཨེཀེཀསྶ ཧུཏྭཱཧོཏིབྷཱཝཱཔཏྟིསངྑཱཏོ དོསོ ཝུཏྟོཏི ཨཏྠོ. པཊིཀྑིཏྟཔཉྷནྟི ‘‘ཏཾཡེཝ ཨནཱགཏཾ ཏཾ པཙྩུཔྤནྣནྟི? ན ཧེཝཾ ཝཏྟབྦེ’’ཏི ཨེཝཾ ཀཱལནཱནཏྟཾ སནྡྷཱཡ པཊིཀྑིཏྟཔཉྷཾ. ཏེནཱཏི ཨནཱགཏཔཙྩུཔྤནྣཱནཾ ཧོཏིཧུཏྭཱབྷཱཝཔཊིཀྑེཔེན. ཙོདེཏཱིཏི ཨནཱགཏཾ ཏེན ཧོཏི ནཱམ, པཙྩུཔྤནྣཾ ཏེན ཧུཏྭཱ ནཱམ, ཨུབྷཡམྤི ཨནཉྙཏྟཱ ཨུབྷཡསབྷཱཝནྟི ཙོདེཏི. ཨེཏྠཱཏི ‘‘ཧུཏྭཱ ཧོཏཱི’’ཏི ཨེཏསྨིཾ པཉྷེ ཀཐཾ ཧོཏི དོསོཏི ཙོདེཏཱིཏི. ‘‘ཏསྶེཝཱ’’ཏི པརིཧརཏི. ཀཐཾ ཀཏྭཱ ཙོདནཱ, ཀཐཉྩ ཀཏྭཱ པརིཧཱརོ? ཨནུཛཱནནཔཊིཀྑེཔཱནཾ བྷིནྣཝིསཡཏཱཡ ཙོདནཱ, ཨཏྠཱབྷེདཀཱལབྷེདཝིསཡཏྟཱ ཨབྷིནྣཱདྷཱརཏཱཡ ཏེསཾ པརིཧཱརོ. ཏསྶེཝཱཏི ཧི པརཝཱདིནོ ཨེཝཱཏི ཨཏྠོ.

ཏདུབྷཡཾ གཧེཏྭཱཏི ‘‘ཏཾ ཨནཱགཏཾ ཏཾ པཙྩུཔྤནྣ’’ནྟི ཨུབྷཡཾ ཨེཀཛ྄ཛྷཾ གཧེཏྭཱ. ཨེཀེཀནྟི ཏེསུ ཨེཀེཀཾ. ཨེཀེཀམེཝཱཏི ཨུབྷཡཾ ཨེཀཛ྄ཛྷཾ ཨགྒཧེཏྭཱ ཨེཀེཀམེཝ ཝིསུཾ ཝིསུཾ ཨིམསྨིཾ པཀྑེ ཏཐཱ ན ཡུཏྟནྟི ཨཏྠོ. ཨེས ནཡོཏི ཨཏིདེསཾ ཀཏྭཱ སཾཁིཏྟཏྟཱ ཏཾ དུབྦིཉྙེཡྻནྟི ‘‘ཨནཱགཏསྶ ཧཱི’’ཏིཨཱདིནཱ ཝིཝརཏི. པཊིཛཱནིཏབྦཾ སིཡཱ ཨནཱགཏཔཙྩུཔྤནྣཱནཾ ཡཐཱཀྐམཾ ཧོཏིཧུཏྭཱབྷཱཝཏོཏི ཨདྷིཔྤཱཡོ. ‘‘ཡདེཏཾ ཏཡཱ’’ཏིཨཱདིནཱ པཝཏྟོ སཾཝཎྞནཱནཡོ པུརིམནཡོ, ཏཏྠ ཧི ‘‘ཡདི ཏེ ཨནཱགཏཾ ཧུཏྭཱ’’ཏིཨཱདིནཱ ཧུཏྭཱཧོཏིབྷཱཝོ ཙོདིཏོ. ‘‘ཨཔརོ ནཡོ’’ཏིཨཱདིཀོ དུཏིཡནཡོ. ཏཏྠ ཧི ‘‘ཨནཱགཏསྶ…པེ… ཧུཏྭཱཧོཏིཡེཝ ནཱམཱ’’ཏི ཨནཱགཏཱདཱིསུ ཨེཀེཀསྶ ཧུཏྭཱཧོཏིནཱམཏཱ ཙོདིཏཱ.

ཝཙནསོདྷནཝཎྞནཱ ནིཊྛིཏཱ.

ཨཏཱིཏཉཱཎཱདིཀཐཱཝཎྞནཱ

༢༩༠. ཀཐཾ ¶ ཝུཙྩཏཱིཏི ཀསྨཱ ཝུཏྟཾ. ཏེནཱཏི ཧི ཨིམིནཱ དུཏིཡཔུཙྪཱཡ ‘‘ཨཏཱིཏཾ ཉཱཎ’’ནྟི ཨིདཾ པཙྩཱམཊྛཾ, ཏཉྩ པཙྩུཔྤནྣཾ ཉཱཎཾ, ཨཏཱིཏདྷམྨཱརམྨཎཏཱཡ ཨཏཱིཏནྟི ཝུཏྟཾ. ཏེནཱཧ ཨཊྛཀཐཱཡཾ ‘‘པུན པུཊྛོ ཨཏཱིཏཱརམྨཎཾ པཙྩུཔྤནྣཾ ཉཱཎ’’ནྟིཨཱདི.

ཨཏཱིཏཉཱཎཱདིཀཐཱཝཎྞནཱ ནིཊྛིཏཱ.

ཨརཧནྟཱདིཀཐཱཝཎྞནཱ

༢༩༡. ‘‘ཨརཧཾ ¶ ཁཱིཎཱསཝོ’’ཏིཨཱདིནཱ སུཏྟཝིརོདྷོ པཱཀཊོཏི ཨིདམེཝ དསྶེནྟོ ‘‘ཡུཏྟིཝིརོདྷོ…པེ… དཊྛབྦོ’’ཏི ཨཱཧ. ཏཏྠ ཨནཱནཏྟནྟི ཨཝིསེསོ. ཨེཝམཱདིཀོཏི ཨཱདི-སདྡེན ཀཏཀིཙྩཏཱབྷཱཝོ ཨནོཧིཏབྷཱརཏཱཏི ཨེཝམཱདཱིནཾ སངྒཧོ དཊྛབྦོ.

ཨརཧནྟཱདིཀཐཱཝཎྞནཱ ནིཊྛིཏཱ.

པདསོདྷནཀཐཱཝཎྞནཱ

༢༩༥. ཡོ ཨཏཱིཏསདྡཱབྷིདྷེཡྻོ ཨཏྠོ, སོ ཨཏྠིསདྡཱབྷིདྷེཡྻོཏི དྭེཔི སམཱནཱདྷིཀརཎཏྠཱཏི ཀཏྭཱ ཝུཏྟཾ ‘‘ཨཏཱིཏཨཏྠིསདྡཱནཾ ཨེཀཏྠཏྟཱ’’ཏི, ན, ཨཏཱིཏསདྡཱབྷིདྷེཡྻསྶེཝ ཨཏྠིསདྡཱབྷིདྷེཡྻཏྟཱ. ཏེནཱཧ ‘‘ཨཏྠིསདྡཏྠསྶ ཙ ནྭཱཏཱིཏབྷཱཝཏོ’’ཏི. ཏེན ཀིཾ སིདྡྷནྟི ཨཱཧ ‘‘ཨཏཱིཏཾ ནྭཱཏཱིཏཾ, ནྭཱཏཱིཏཉྩ ཨཏཱིཏཾ ཧོཏཱི’’ཏི. ཨིདཾ ཝུཏྟཾ ཧོཏི – ཡདི ཏཝ མཏེན ཨཏཱིཏཾ ཨཏྠི, ཨཏྠི ཙ ནྭཱཏཱིཏནྟི ཨཏཱིཏཉྩ ནོ ཨཏཱིཏཾ སིཡཱ, ཏཐཱ ཨཏྠི ནོ ཨཏཱིཏཾ ཨཏཱིཏཉྩ ནོ ཨཏཱིཏཾ ཨཏཱིཏཾ སིཡཱཏི, ཡཐཱ ‘‘ཨཏཱིཏཾ ཨཏྠཱི’’ཏི ཨེཏྠ ཨཏཱིཏམེཝ ཨཏྠཱིཏི ནཱཡཾ ནིཡམོ གཧེཏབྦོ ཨནཏཱིཏསྶཔི ཨཏྠིབྷཱཝསྶ ཨིཙྪིཏཏྟཱ. ཏེནེཝཱཧ ‘‘ཨཏྠི སིཡཱ ཨཏཱིཏཾ, སིཡཱ ནྭཱཏཱིཏ’’ནྟི. ཡེན ཧི ཨཱཀཱརེན ཨཏཱིཏསྶ ཨཏྠིབྷཱཝོ པརཝཱདིནཱ ཨིཙྪིཏོ, ཏེནཱཀཱརེན ཨནཏཱིཏསྶ ཨནཱགཏསྶ པཙྩུཔྤནྣསྶ ཙ སོ ཨིཙྪིཏོ. ཀེན པན ཨཱཀཱརེན ཨིཙྪིཏོཏི ¶ ? སངྑཏཱཀཱརེན. ཏེན ཝུཏྟཾ ‘‘ཏེནཱཏཱིཏཾ ནྭཱཏཱིཏཾ, ནྭཱཏཱིཏཾ ཨཏཱིཏ’’ནྟི. ཏསྨཱ ཨཏཱིཏཾ ཨཏྠིཡེཝཱཏི ཨེཝམེཏྠ ནིཡམོ གཧེཏབྦོ. ཨཏྠིབྷཱཝེ ཧི ཨཏཱིཏཾ ནིཡམིཏཾ, ན ཨཏཱིཏེ ཨཏྠིབྷཱཝོ ནིཡམིཏོ, ‘‘ན པན ནིབྦཱནཾ ཨཏྠཱི’’ཏི ཨེཏྠ པན ནིབྦཱནམེཝ ཨཏྠཱིཏི ཨཡམྤི ནིཡམོ སམྦྷཝཏཱིཏི སོ ཨེཝ གཧེཏབྦོ. ཡདིཔི ཧི ནིབྦཱནཾ པརམཏྠཏོ ཨཏྠིབྷཱཝཾ ཨུཔཱདཱཡ ཨུཏྟརཔདཱཝདྷཱརཎཾ ལབྦྷཏི ཏདཉྙསྶཔི ཨབྷཱཝཏོ, ཏཐཱཔི ཨསངྑཏཱཀཱརེན ཨཉྙསྶ ཨནུཔལབྦྷནཏོ ཏཐཱ ནིབྦཱནམེཝ ཨཏྠཱིཏི པུརིམཔདཱཝདྷཱརཎེ ཨཏྠེ གཡ྄ཧམཱནེ ‘‘ཨཏྠི སིཡཱ ནིབྦཱནཾ, སིཡཱ ནོ ནིབྦཱན’’ནྟི ཙོདནཱ ཨནོཀཱསཱ. ཨཏཱིཏཱདཱིསུ པན པུརིམཔདཱཝདྷཱརཎཾ པརཝཱདིནཱ ན གཧིཏནྟི ནཏྠེཏྠ ཨཏིཔྤསངྒོ. ཨགྒཧཎཉྩསྶ པཱལི༹ཏོ ཨེཝ ཝིཉྙཱཡཏི. ཨེཝམེཏྠ ¶ ཨཏཱིཏཱདཱིནཾ ཨཏྠིཏཾ ཝདནྟསྶ པརཝཱདིསྶེཝཱཡཾ ཨིཊྛཝིགྷཱཏདོསཱཔཏྟི, ན པན ནིབྦཱནསྶ ཨཏྠིཏཾ ཝདནྟསྶ སཀཝཱདིསྶཱཏི. པཊིཔཱདནཱ པཏིཊྛཱཔནཱ ཝེདིཏབྦཱ.

ཨེཏྠཱཧ ‘‘ཨཏཱིཏཾ ཨཏྠཱི’’ཏིཨཱདིནཱ ཀིཾ པནཱཡཾ ཨཏཱིཏཱནཱགཏཱནཾ པརམཏྠཏོ ཨཏྠིབྷཱཝོ ཨདྷིཔྤེཏོ, ཨུདཱཧུ ན པརམཏྠཏོ. ཀིཉྩེཏྠ – ཡདི ཏཱཝ པརམཏྠཏོ, སབྦཀཱལཾ ཨཏྠིབྷཱཝཏོ སངྑཱརཱནཾ སསྶཏབྷཱཝོ ཨཱཔཛྫཏི, ན ཙ ཏཾ ཡུཏྟཾ ཨཱགམཝིརོདྷཏོ ཡུཏྟིཝིརོདྷཏོ ཙ. ཨཐ ན པརམཏྠཏོ, ‘‘སབྦམཏྠཱི’’ཏིཨཱདིཀཱ ཙོདནཱ ནིརཏྠིཀཱ སིཡཱ, ན ནིརཏྠིཀཱ. སོ ཧི པརཝཱདཱི ‘‘ཡཾ ཀིཉྩི རཱུཔཾ ཨཏཱིཏཱནཱགཏ’’ནྟིཨཱདིནཱ ཨཏཱིཏཱནཱགཏཱནམྤི ཁནྡྷབྷཱཝསྶ ཝུཏྟཏྟཱ ཨསཏི ཙ ཨཏཱིཏེ ཀུསལཱཀུསལསྶ ཀམྨསྶ ཨཱཡཏིཾ ཕལཾ ཀཐཾ བྷཝེཡྻ, ཏཏྠ ཙ པུབྦེནིཝཱསཉཱཎཱདི ཨནཱགཏེ ཙ ཨནཱགཏཾསཉཱཎཱདི ཀཐཾ པཝཏྟེཡྻ, ཏསྨཱ ཨཏྠེཝ པརམཏྠཏོ ཨཏཱིཏཱནཱགཏནྟི ཡཾ པཊིཛཱནཱཏི, ཏཾ སནྡྷཱཡ ཨཡཾ ཀཏཱཏི. ཨེཀནྟེན ཙེཏཾ སམྤཊིཙྪིཏབྦཾ. ཡེཔི ‘‘སབྦཾ ཨཏྠཱི’’ཏི ཝདནྟི ཨཏཱིཏཾ ཨནཱགཏཾ པཙྩུཔྤནྣཉྩ, ཏེ སབྦཏྠིཝཱདཱཏི.

ཙཏུབྦིདྷཱ ཙེཏེ ཏེ སབྦཏྠིཝཱདཱ. ཏཏྠ ཀེཙི བྷཱཝཉྙཏྟིཀཱ. ཏེ ཧི ‘‘ཡཐཱ སུཝཎྞབྷཱཛནསྶ བྷིནྡིཏྭཱ ཨཉྙཐཱ ཀརིཡམཱནསྶ སཎྛཱནསྶེཝ ཨཉྙཐཏྟཾ, ན ཝཎྞཱདཱིནཾ, ཡཐཱ ཙ ཁཱིརཾ དདྷིབྷཱཝེན པརིཎམནྟཾ རསཝཱིརིཡཝིཔཱཀེ པརིཙྩཛཏི, ན ཝཎྞཾ, ཨེཝཾ དྷམྨཱཔི ཨནཱགཏདྡྷུནོ པཙྩུཔྤནྣདྡྷཾ སངྐམནྟཱ ཨནཱགཏབྷཱཝམེཝ ཛཧནྟི, ན ཨཏྟནོ སབྷཱཝཾ. ཏཐཱ ¶ པཙྩུཔྤནྣདྡྷུནོ ཨཏཱིཏདྡྷཾ སངྐམེ’’ཏི ཝདནྟི. ཀེཙི ལཀྑཎཉྙཏྟིཀཱ, ཏེ པན ‘‘ཏཱིསུ ཨདྡྷཱསུ པཝཏྟམཱནོ དྷམྨོ ཨཏཱིཏོ ཨཏཱིཏལཀྑཎཡུཏྟོ, ཨིཏརལཀྑཎེཧི ཨཡུཏྟོ. ཏཐཱ ཨནཱགཏོ པཙྩུཔྤནྣོ ཙ. ཡཐཱ པུརིསོ ཨེཀིསྶཱ ཨིཏྠིཡཱ རཏྟོ ཨཉྙཱསུ ཨརཏྟོ’’ཏི ཝདནྟི. ཨཉྙེ ཨཝཏྠཉྙཏྟིཀཱ, ཏེ ‘‘ཏཱིསུ ཨདྡྷཱསུ པཝཏྟམཱནོ དྷམྨོ ཏཾ ཏཾ ཨཝཏྠཾ པཏྭཱ ཨཉྙོ ཨཉྙཾ ནིདྡིསཱིཡཏི ཨཝཏྠནྟརཏོ, ན སབྷཱཝཏོ. ཡཐཱ ཨེཀཾ ཨཀྑཾ ཨེཀངྒེ ནིཀྑིཏྟཾ ཨེཀནྟི ཝུཙྩཏི, སཏངྒེ སཏནྟི, སཧསྶངྒེ སཧསྶནྟི, ཨེཝཾསམྤདམིད’’ནྟི. ཨཔརེ ཨཉྙཐཉྙཏྟིཀཱ, ཏེ པན ‘‘ཏཱིསུ ཨདྡྷཱསུ པཝཏྟམཱནོ དྷམྨོ ཏཾ ཏཾ ཨཔེཀྑིཏྭཱ ཏདཉྙསབྷཱཝེན ཝུཙྩཏི. ཡཐཱ ཏཾ ཨེཀཱ ཨིཏྠཱི མཱཏཱཏི ཙ ཝུཙྩཏི དྷཱིཏཱ’’ཏི ཙ. ཨེཝམེཏེ ཙཏྟཱརོ སབྦཏྠིཝཱདཱ.

ཏེསུ པཋམོ པརིཎཱམཝཱདིཏཱཡ ཀཱཔིལཔཀྑིཀེསུ པཀྑིཔིཏབྦོཏི. དུཏིཡསྶཔི ཀཱལསངྐརོ ཨཱཔཛྫཏི སབྦསྶ སབྦལཀྑཎཡོགཏོ. ཙཏུཏྠསྶཔི སངྐརོཝ. ཨེཀསྶེཝ དྷམྨསྶ ¶ པཝཏྟིཀྑཎེ ཏཡོཔི ཀཱལཱ སམོདྷཱནཾ གཙྪནྟི. པུརིམཔཙྪིམཀྑཎཱ ཧི ཨཏཱིཏཱནཱགཏཱ, མཛ྄ཛྷིམོ པཙྩུཔྤནྣོཏི. ཏཏིཡསྶ པན ཨཝཏྠཉྙཏྟིཀསྶ ནཏྠི སངྐརོ དྷམྨཀིཙྩེན ཀཱལཝཝཏྠཱནཏོ. དྷམྨོ ཧི སཀིཙྩཀྑཎེ པཙྩུཔྤནྣོ, ཏཏོ པུབྦེ ཨནཱགཏོ, པཙྪཱ ཨཏཱིཏོཏི.

ཏཏྠ ཡདི ཨཏཱིཏམྤི དྷརམཱནསབྷཱཝཏཱཡ ཨཏྠི ཨནཱགཏམྤི, ཀསྨཱ ཏཾ ཨཏཱིཏནྟི ཝུཙྩཏི ཨནཱགཏནྟི ཝཱ, ནནུ ཝུཏྟཾ ‘‘དྷམྨཀིཙྩེན ཀཱལཝཝཏྠཱནཏོ’’ཏི. ཡདི ཨེཝཾ པཙྩུཔྤནྣསྶ ཙཀྑུསྶ ཀིཾ ཀིཙྩཾ, ཨནཝསེསཔཙྩཡསམཝཱཡེ ཕལུཔྤཱདནཾ. ཨེཝཾ སཏི ཨནཱགཏསྶཔི ཙསྶ ཏེན བྷཝིཏབྦཾ ཨཏྠིབྷཱཝཏོཏི ལཀྑཎསངྐརོ སིཡཱ. ཨིདཉྩེཏྠ ཝཏྟབྦཾ, ཏེནེཝ སབྷཱཝེན སཏོ དྷམྨསྶ ཀིཙྩཾ, ཀིཙྩཀརཎེ ཀོ ཝིབནྡྷོ, ཡེན ཀདཱཙི ཀརོཏི ཀདཱཙི ན ཀརོཏི པཙྩཡསམཝཱཡབྷཱཝཏོ, ཀིཙྩསྶ སམཝཱཡཱབྷཱཝཏོཏི ཙེ? ཏཾ ན, ནིཙྩཾ ཨཏྠིབྷཱཝསྶ ཨིཙྪིཏཏྟཱ. ཏཏོ ཨེཝ ཙ ཨདྡྷུནཾ ཨཝཝཏྠཱནཾ. དྷམྨོ ཧི ཏེནེཝ སབྷཱཝེན ཝིཛྫམཱནོ ཀསྨཱ ཀདཱཙི ཨཏཱིཏོཏི ཝུཙྩཏི ཀདཱཙི ཨནཱགཏོཏི ཀཱལསྶ ཝཝཏྠཱནཾ ན སིཡཱ. ཡོ ཧི དྷམྨོ ཨཛཱཏོ, སོ ཨནཱགཏོ. ཡོ ཛཱཏོ ན ཙ ནིརུདྡྷོ, སོ པཙྩུཔྤནྣོ. ཡོ ནིརུདྡྷོ, སོ ཨཏཱིཏོ. ཨིདམེཝེཏྠ ཝཏྟབྦཾ. ཡདི ཡཐཱ ཝཏྟམཱནཾ ཨཏྠི ¶ , ཏཐཱ ཨཏཱིཏཾ ཨནཱགཏཉྩ ཨཏྠི, ཏསྶ ཏཐཱ སཏོ ཨཛཱཏཏཱ ནིརུདྡྷཏཱ ཙ ཀེན ཧོཏཱིཏི. ཏེནེཝ ཧི སབྷཱཝེན སཏོ དྷམྨསྶ ཀཐམིདཾ སིཛ྄ཛྷཏི ཨཛཱཏོཏི ཝཱ ནིརུདྡྷོཏི ཝཱ. ཀིཾ ཏསྶ པུབྦེ ནཱཧོསི, ཡསྶ ཨབྷཱཝཏོ ཨཛཱཏོཏི ཝུཙྩཏི, ཀིཉྩ པཙྪཱ ནཏྠི, ཡསྶ ཨབྷཱཝཏོ ནིརུདྡྷོཏི ཝུཙྩཏི. ཏསྨཱ སབྦཐཱཔི ཨདྡྷཏྟཡཾ ན སིཛ྄ཛྷཏི, ཡདི ཨཧུཏྭཱ སངྒཏི ཧུཏྭཱ ཙ ཝིནསྶཏཱིཏི ན སམྤཊིཙྪནྟི. ཡཾ པན ཝུཏྟཾ ‘‘སངྑཏལཀྑཎཡོགཏོ ན སསྶཏབྷཱཝཔྤསངྒོ’’ཏི, ཏཡིདཾ ཀེཝལཾ ཝཱཙཱཝཏྠུམཏྟཾ ཨུདཡཝཡཱསམྦྷཝཏོ, ཨཏྠི ཙ ནཱམ སབྦདཱ སོ དྷམྨོ, ན ཙ ནིཙྩོཏི ཀུཏོཡཾ ཝཱཙཱཡུཏྟི.

སབྷཱཝོ སབྦདཱ ཨཏྠི, ནིཙྩོ དྷམྨོ ན ཝུཙྩཏི;

དྷམྨོ སབྷཱཝཏོ ནཱཉྙོ, ཨཧོ དྷམྨེསུ ཀོསལཾ.

ཡཉྩ ¶ ཝུཏྟཾ ‘‘ཡཾ ཀིཉྩི རཱུཔཾ ཨཏཱིཏཱནཱགཏ’’ནྟིཨཱདིནཱ ཨཏཱིཏཱནཱགཏཱནཾ ཁནྡྷབྷཱཝསྶ ཝུཏྟཏྟཱ ཨཏྠེཝཱཏི, ཝདཱམ. ཨཏཱིཏཾ བྷཱུཏཔུབྦཾ, ཨནཱགཏཾ ཡཾ སཏི པཙྩཡེ བྷཝིསྶཏི, ཏདུབྷཡསྶཔི རུཔྤནཱདིསབྷཱཝཱནཱཏིཝཏྟནཏོ རཱུཔཀྑནྡྷཱདིབྷཱཝོ ཝུཏྟོ. ཡཐཱདྷམྨསབྷཱཝཱནཱཏིཝཏྟནཏོ ཨཏཱིཏཱ དྷམྨཱ ཨནཱགཏཱ དྷམྨཱཏི, ན དྷརམཱནསབྷཱཝཏཱཡ. ཀོ ཙ ཨེཝམཱཧ ‘‘པཙྩུཔྤནྣཾ ཝིཡ ཏཾ ཨཏྠཱི’’ཏི. ཀཐཾ པནེཏཾ ཨཏྠཱིཏི? ཨཏཱིཏཱནཱགཏསབྷཱཝེན. ཨིདཾ པན ཏཝེཝ ཨུཔཊྛིཏཾ, ཀཐཾ ཏཾ ཨཏཱིཏཾ ཨནཱགཏཉྩ ཝུཙྩཏི, ཡདི ནིཙྩཀཱལཾ ཨཏྠཱིཏི.

ཡཾ པན ‘‘ན ཏཱཝ ཀཱལཾ ཀརོཏི, ཡཱཝ ན ཏཾ པཱཔཾ བྱནྟཱི ཧོཏཱི’’ཏི (མ. ནི. ༣.༢༥༠) སུཏྟེ ཝུཏྟཾ, ཏཾ ཡསྨིཉྩ སནྟཱནེ ཀམྨཾ ཀཏཱུཔཙིཏཾ, ཏཏྠ ཏེནཱཧིཏཾ ཏཾཕལུཔྤཱདནསམཏྠཏཾ སནྡྷཱཡ ཝུཏྟཾ, ན ཨཏཱིཏསྶ ཀམྨསྶ དྷརམཱནསབྷཱཝཏྟཱ. ཏཐཱ སཏི སཀེན བྷཱཝེན ཝིཛྫམཱནཾ ཀཐཾ ཏཾ ཨཏཱིཏཾ ནཱམ སིཡཱ. ཨིཏྠཉྩེཏཾ ཨེཝཾ སམྤཊིཙྪིཏབྦཾ, ཡཾ སངྑཱརཱ ཨཧུཏྭཱ སམྦྷཝནྟི, ཧུཏྭཱ པཏིཝེནྟི ཏེསཾ ཨུདཡཏོ པུབྦེ ཝཡཏོ ཙ པཙྪཱ ན ཀཱཙི ཋིཏི ནཱམ ཨཏྠི, ཡཏོ ཨཏཱིཏཱནཱགཏཾ ཨཏྠཱིཏི ཝུཙྩེཡྻ. ཏེན ཝུཏྟཾ –

‘‘ཨནིདྷཱནགཏཱ བྷགྒཱ, པུཉྫོ ནཏྠི ཨནཱགཏེ;

ཨུཔྤནྣཱ ཡེཔི ཏིཊྛནྟི, ཨཱརགྒེ སཱསཔཱུཔམཱ’’ཏི. (མཧཱནི. ༡༠, ༣༩);

ཡདི ¶ ཙཱནཱགཏཾ པརམཏྠཏོ སིཡཱ, ཨཧུཏྭཱ སམྦྷཝནྟཱིཏི ཝཏྟུཾ ན སཀྐཱ. པཙྩུཔྤནྣཀཱལེ ཨཧུཏྭཱ སམྦྷཝནྟཱིཏི ཙེ? ན, དྷམྨཔྤཝཏྟིམཏྟཏྟཱ ཀཱལསྶ. ཨཐ ཨཏྟནོ སབྷཱཝེན ཨཧུཏྭཱ སམྦྷཝནྟཱིཏི, སིདྡྷམེཏཾ ཨནཱགཏཾ པརམཏྠཏོ ནཏྠཱིཏི. ཡཉྩ ཝུཏྟཾ ‘‘ཨསཏི ཨཏཱིཏེ ཀུསལཱཀུསལསྶ ཀམྨསྶ ཨཱཡཏིཾ ཕལཾ ཀཐཾ བྷཝེཡྻཱ’’ཏི, ན ཁོ པནེཏྠ ཨཏཱིཏཀམྨཏོ ཕལུཔྤཏྟི ཨིཙྪིཏཱ, ཨཐ ཁོ ཏསྶ ཀཏཏྟཱ ཏདཱཧིཏཝིསེསཏོ སནྟཱནཏོ. ཝུཏྟཉྷེཏཾ བྷགཝཏཱ ‘‘ཀཱམཱཝཙརསྶ ཀུསལསྶ ཀམྨསྶ ཀཏཏྟཱ ཨུཔཙིཏཏྟཱ ཝིཔཱཀཾ ཙཀྑུཝིཉྙཱཎཾ ཨུཔྤནྣཾ ཧོཏཱི’’ཏི (དྷ. ས. ༤༣༡). ཡསྶ པན ཨཏཱིཏཱནཱགཏཾ པརམཏྠཏོ ཨཏྠི, ཏསྶ ཕལཾ ནིཙྩམེཝ ཨཏྠཱིཏི ཀིཾ ཏཏྠ ཀམྨསྶ སཱམཏྠིཡཾ. ཨུཔྤཱདནེ ཙེ, སིདྡྷམིདཾ ཨཧུཏྭཱ བྷཝཏཱིཏི. ཡཾ པན ཝུཏྟཾ ‘‘ཨསཏི ཨཏཱིཏཱནཱགཏེ ཀཐཾ ཏཏྠ ཉཱཎཾ པཝཏྟེཡྻཱ’’ཏི, ཡཐཱ ཏཾ ཨཱལམྦཎཾ, ཏཾ ཏཐཱ ཨཏྠི, ཀཐཉྩ ཏཾ ཨཱལམྦཎཾ, ཨཧོསི བྷཝིསྶཏི ཙཱཏི. ན ཧི ཀོཙི ཨཏཱིཏཾ ཨནུསྶརནྟོ ཨཏྠཱིཏི ཨནུསྶརཏི, ཨཐ ཁོ ཨཧོསཱིཏི. ཡཐཱ པན ཝཏྟམཱནཾ ཨཱརམྨཎཾ ཨནུབྷཱུཏཾ, ཏཐཱ ཏཾ ཨཏཱིཏཾ ¶ ཨནུསྶརཏི. ཡཐཱ ཙ ཝཏྟམཱནཾ བྷཝིསྶཏི, ཏཐཱ བུདྡྷཱདཱིཧི གཡ྄ཧཏི. ཡདི ཙ ཏཾ ཏཐེཝ ཨཏྠི, ཝཏྟམཱནམེཝ ཏཾ སིཡཱ. ཨཐ ནཏྠི, སིདྡྷཾ ‘‘ཨསནྟཾ ཉཱཎསྶ ཨཱརམྨཎཾ ཧོཏཱི’’ཏི. ཝིཛྫམཱནཾ ཝཱ ཧི ཙིཏྟསཉྙཱཏཾ ཨཝིཛྫམཱནཾ ཝཱ ཨཱརམྨཎཾ ཨེཏེསཾ ཨཏྠཱིཏི ཨཱརམྨཎཱ, ཙིཏྟཙེཏསིཀཱ, ན ཝིཛྫམཱནཾཡེཝ ཨཱརབྦྷ པཝཏྟནཏོ, ཏསྨཱ པཙྩུཔྤནྣམེཝ དྷརམཱནསབྷཱཝཾ ན ཨཏཱིཏཱནཱགཏནྟི ན ཏིཊྛཏི སབྦཏྠིཝཱདོ. ཀེཙི པན ‘‘ན ཨཏཱིཏཱདཱིནཾ ཨཏྠིཏཱཔཊིཉྙཱཡ སབྦཏྠིཝཱདཱ, ཨཐ ཁོ ཨཱཡཏནསབྦསྶ ཨཏྠིཏཱཔཊིཉྙཱཡཱ’’ཏི ཝདནྟི, ཏེསཾ མཏེན སབྦེཝ སཱསནིཀཱ སབྦཏྠིཝཱདཱ སིཡུནྟི.

པདསོདྷནཀཐཱཝཎྞནཱ ནིཊྛིཏཱ.

སབྦམཏྠཱིཏིཀཐཱཝཎྞནཱ ནིཊྛིཏཱ.

༦. ཨཏཱིཏཀྑནྡྷཱདིཀཐཱ

༡. ནསུཏྟསཱདྷནཀཐཱཝཎྞནཱ

༢༩༧. ‘‘ཨཏཱིཏཾ ¶ ཨནཱགཏཾ པཙྩུཔྤནྣ’’ནྟི ཨཡཾ ཀཱལཝིབྷཱགཔརིཙྪིནྣོ ཝོཧཱརོ དྷམྨཱནཾ ཏཾ ཏཾ ཨཝཏྠཱཝིསེསཾ ཨུཔཱདཱཡ པཉྙཏྟོ. དྷམྨོ ཧི སཀིཙྩཀྑཎེ པཙྩུཔྤནྣོ, ཏཏོ པུབྦེ ཨནཱགཏོ, པཙྪཱ ཨཏཱིཏོཏི ཝུཏྟོཝཱཡམཏྠོ. ཏཏྠ ཡདིཔི དྷམྨཱ ཨནིཙྩཏཱཡ ཨནཝཊྛིཏཱ, ཨཝཏྠཱ པན ཏེསཾ ཡཐཱཝུཏྟཱ ཝཝཏྠིཏཱཏི ཏདུཔཱདཱནཱ ཀཱལཔཉྙཏྟིཔི ཝཝཏྠིཏཱ ཨེཝ. ན ཧི ཨཏཱིཏཱདི ཨནཱགཏཱདིབྷཱཝེན ཝོཧརཱིཡཏི, ཁནྡྷཱདིཔཉྙཏྟི པན ཨནཔེཀྑིཏཀཱལཝིསེསཱ. ཏཱིསུཔི ཧི ཀཱལེསུ རཱུཔཀྑནྡྷོ རཱུཔཀྑནྡྷོཝ, ཏཐཱ སེསཱ ཁནྡྷཱ ཨཱཡཏནདྷཱཏུཡོ ཙ. ཨེཝམཝཊྛིཏེ ཡསྨཱ པརཝཱདཱི ‘‘ཨཏྠཱི’’ཏི ཨིམཾ པཙྩུཔྤནྣནིཡཏཾ ཝོཧཱརཾ ཨཏཱིཏཱནཱགཏེསུཔི ཨཱརོཔེཏི, ཏསྨཱ སོ ཨདྡྷསངྐརཾ ཀརོཏི. པརམཏྠཏོ ཨཝིཛྫམཱནེ ཝིཛྫམཱནེ ཀཏྭཱ ཝོཧརཏཱིཏི ཏཏོ ཝིཝེཙེཏུཾ ‘‘ཨཏཱིཏཾ ཁནྡྷཱ’’ཏིཨཱདིཀཱ ཨཡཾ ཀཐཱ ཨཱརདྡྷཱ.

ཡསྨཱ པན རུཔྤནཱདིསབྷཱཝེ ཨཏཱིཏཱདིབྷེདབྷིནྣེ དྷམྨེ ཨེཀཛ྄ཛྷཾ གཧེཏྭཱ ཏཏྠ རཱསཊྛཾ ཨུཔཱདཱཡ ཁནྡྷཔཉྙཏྟི, ཙཀྑུརཱུཔཱདཱིསུ ཀཱརཎཱདིཨཏྠཾ སུཉྙཏཊྛཉྩ ཨུཔཱདཱཡ ཨཱཡཏནཔཉྙཏྟི དྷཱཏུཔཉྙཏྟི ¶ ཙ, ཏསྨཱ སཱ ཨདྡྷཏྟཡསཱདྷཱརཎཱ, ན ཨཏཱིཏཱདིཔཉྙཏྟི ཝིཡ ཨདྡྷཝིསེསཱདྷིཊྛཱནཱཏི ཨཱཧ ‘‘ཁནྡྷཱདིབྷཱཝཱཝིཛཧནཏོ ཨཏཱིཏཱནཱགཏཱན’’ནྟི. ཏེ པནེཏེ ཨཏཱིཏཱདིཀེ ཁནྡྷཱདིཀེ ཝིཡ སབྷཱཝདྷམྨཏོ སཉྫཱནནྟོ པརཝཱདཱི ‘‘ཨཏྠཱི’’ཏི པཊིཛཱནཱཏཱིཏི ཨཱཧ ‘‘ཨཏཱིཏཱནཱགཏཱནཾ ཨཏྠིཏཾ ཨིཙྪནྟསྶཱ’’ཏི. སེསམེཏྠ ཡཾ ཝཏྟབྦཾ, ཏཾ ཧེཊྛཱ ཝུཏྟནཡམེཝ.

‘‘ཏཡོམེ, བྷིཀྑཝེ, ནིརུཏྟིཔཐཱ’’ཏི སུཏྟཾ ནིརུཏྟིཔཐསུཏྟཾ. ཏཏྠ ཧི པཙྩུཔྤནྣསྶེཝ ཨཏྠིབྷཱཝོ ཝུཏྟོ, ན ཨཏཱིཏཱནཱགཏཱནཾ. ཏེན ཝུཏྟཾ ‘‘ཨཏྠིཏཱཡ ཝཱརིཏཏྟཱ’’ཏི. ཡདི ཨེཝཾ ‘‘ཨཏྠི, བྷིཀྑཝེ, ནིབྦཱན’’ནྟི ཨིདཾ ཀཐནྟི? ཏཾ སབྦདཱ ཨུཔལདྡྷིཏོ ཝུཏྟཾ ནིཙྩསབྷཱཝཉཱཔནཏྠཾ ཨསངྑཏདྷམྨསྶ, ཨིདྷ པན སངྑཏདྷམྨཱནཾ ཁཎཏྟཡསམངྒིཏཱཡ ཨཏྠིབྷཱཝོ ན ཏཏོ པུབྦེ པཙྪཱ ཙཱཏི པཉྙཱཔནཏྠཾ ‘‘ཡཾ, བྷིཀྑཝེ, རཱུཔཾ…པེ… ན ཏསྶ སངྑཱ བྷཝིསྶཏཱི’’ཏི ཝུཏྟཾ. ཨེཏེན ‘‘ཨཏྠཱི’’ཏི སམཉྙཱཡ ཨནུཔཱདཱནཏོ ཨཏཱིཏཾ ཨནཱགཏཾ པརམཏྠཏོ ¶ ནཏྠཱིཏི དསྶིཏཾ ཧོཏི. ཨིམིནཱཝཱུཔཱཡེནཱཏི ‘‘ཁནྡྷཱདིབྷཱཝཱཝིཛཧནཏོ’’ཏི ཨེཝཾ ཝུཏྟེན ཧེཏུནཱ. ཨུཔཔཏྟིསཱདྷནཡུཏྟི ཧི ཨིདྷ ‘‘ཨུཔཱཡོ’’ཏི ཝུཏྟཱ.

ནསུཏྟསཱདྷནཀཐཱཝཎྞནཱ ནིཊྛིཏཱ.

༢. སུཏྟསཱདྷནཀཐཱཝཎྞནཱ

༢༩༨. ཨེཏེ དྷམྨཱཏི ཨེཏེ ཁནྡྷཨཱཡཏནདྷཱཏུདྷམྨཱ. སུཏྟཱཧརཎནྟི ནིརུཏྟིཔཐསུཏྟཱཧརཎཾ. ནེསནྟི ཨཏཱིཏཱནཱགཏཱནཾ.

སུཏྟསཱདྷནཀཐཱཝཎྞནཱ ནིཊྛིཏཱ.

ཨཏཱིཏཀྑནྡྷཱདིཀཐཱཝཎྞནཱ ནིཊྛིཏཱ.

༧. ཨེཀཙྩཾཨཏྠཱིཏིཀཐཱ

༡. ཨཏཱིཏཱདིཨེཀཙྩཀཐཱཝཎྞནཱ

༢༩༩. ཡེ ¶ ཀཏཱུཔཙིཏཱ ཀུསལཱཀུསལཱ དྷམྨཱ ཝིཔཱཀདཱནཱཡ ཨཀཏོཀཱསཱ, ཀཏོཀཱསཱ ཙ ཡེ ‘‘ཨོཀཱསཀཏུཔྤནྣཱ’’ཏི ཝུཙྩནྟི. ཡེ ཙ ཝིཔྤཀཏཝིཔཱཀཱ, ཏེ སབྦེཔི ‘‘ཨཝིཔཀྐཝིཔཱཀཱ’’ཏི ཝེདིཏབྦཱ. ཏེསཾ ཝིཔཱཀདཱནསཱམཏྠིཡཾ ཨནཔགཏནྟི ཨདྷིཔྤཱཡེན པརཝཱདཱི ཨཏྠིཏཾ ཨིཙྪཏི. ཡེ པན པརཝཱདཱི སབྦེན སབྦཾ ཝིཔཀྐཝིཔཱཀཱ ཀུསལཱཀུསལཱ དྷམྨཱ, ཏེསཾ ཨཔགཏནྟི ནཏྠིཏཾ ཨིཙྪཏི. ཏེནཱཧ ‘‘ཨཏྠཱིཏི ཨེཀཙྩཾ ཨཏྠི ཨེཀཙྩཾ ནཏྠཱི’’ཏིཨཱདི. ཨེཝཾ ཨིཙྪནྟསྶ པན པརཝཱདིནོ ཡཐཱ ཨཝིཔཱཀེསུཔི ཨེཀཙྩཾ ནཏྠཱིཏི ཨཱཔཛྫཏི, ཨེཝཾ ཝིཔཀྐཝིཔཱཀེསུ ཨཝིཔཀྐཝིཔཱཀེསུ ཙ ཨཱཔཛྫཏེཝཱཏི དསྶེཏུཾ ‘‘ཨཝིཔཀྐཝིཔཱཀཱ དྷམྨཱ ཨེཀཙྩེ’’ཏིཨཱདིནཱ པཱལི༹ པཝཏྟཱ. ཏེན ཝུཏྟཾ ‘‘ཏིཎྞཾ རཱསཱིནཾ ཝསེནཱ’’ཏིཨཱདི. ཝོཧཱརཝསེནཱཏི ཕལསྶ ཨནུཔརམཝོཧཱརཝསེན, ཧེཏུཀིཙྩཾ པན ཨནུཔརཏཾ ཨནུཔཙྪིནྣཾ ཨཏྠཱིཏི ལདྡྷིཡཾ ཋིཏཏྟཱ ཙོདེཏབྦོཝ. ཨཝིཙྪེདཝསེན པཝཏྟམཱནཉྷི ཕལསྶ པབནྡྷཝོཧཱརཾ པརཝཱདཱི ཝོཧཱརཏོ ཨཏྠཱིཏི ཨིཙྪཏི, ཧེཏུ པནསྶ ཀམྨཾ པརམཏྠཏོ ཙ ཀམྨཱུཔཙཡཝཱདིབྷཱཝཏོ པཏྟིཨཔྤཏྟིསབྷཱཝཏཱདཡོ ¶ ཝིཡ ཙིཏྟཝིཔྤཡུཏྟོ ཀམྨཱུཔཙཡོ ནཱམ ཨེཀོ སངྑཱརདྷམྨོ ཨཝིཔནྣོ, སོཔི ཏསྶེཝ ཝེཝཙནནྟི པརཝཱདཱི. ཡཾ སནྡྷཱཡཱཧ –

‘‘ནཔྤཙཡནྟི ཀམྨཱནི, ཨཔི ཀཔྤསཧསྶཏོ;

པཏྭཱ པཙྩཡསཱམགྒིཾ, ཀཱལེ པཙྩནྟི པཱཎིན’’ནྟི.

ཡཉྩ སནྡྷཱཡ པརཏོ པརིབྷོགམཡཔུཉྙཀཐཱཡ ‘‘པརིབྷོགམཡཾ པན ཙིཏྟཝིཔྤཡུཏྟཾ ཨུཔྤཛྫཏཱིཏི ལདྡྷིཡཱ པཊིཛཱནཱཏཱི’’ཏི ཝཀྑཏི.

ཨེཀཙྩཾཨཏྠཱིཏིཀཐཱཝཎྞནཱ ནིཊྛིཏཱ.

༨. སཏིཔཊྛཱནཀཐཱཝཎྞནཱ

༣༠༡. པརམཏྠསཏིཔཊྛཱནཏྟཱཏི ཨེཏེན ལོཀུཏྟརཱཡ ཨེཝ སམྨཱསཏིཡཱ ཏཏྠཱཔི མགྒབྷཱུཏཱཡ ནིཔྤརིཡཱཡེན ¶ སཏིཔཊྛཱནབྷཱཝོ ནིཡྻཱནིཀཏྟཱ ཨིཏརཱཡ པརིཡཱཡེནཱཏི དསྶེཏི. མགྒཕལསམྨཱསཏིཡཱ དྷམྨཱནུསྶཏིབྷཱཝཔརིཡཱཡོ ཨཏྠཱིཏི ‘‘ལོཀིཡལོཀུཏྟརསཏིཔཊྛཱནསམུདཱཡབྷཱུཏསྶཱ’’ཏི ཝུཏྟཾ. སཏིསམུདཱཡབྷཱུཏསྶ ན སཏིགོཙརབྷཱུཏསྶཱཏི ཨདྷིཔྤཱཡོ. སཏིགོཙརསྶ ཧི སཏིཔཊྛཱནཏཾ ཙོདེཏུཾ པཱལི༹ཡཾ ‘‘ཙཀྑཱཡཏནཾ སཏིཔཊྛཱན’’ནྟི ཨཱརདྡྷཾ. ཏེན ཝུཏྟཾ ‘‘སབྦདྷམྨཱནཾ པབྷེདཔུཙྪཱཝསེན ཝུཏྟ’’ནྟི. སུཏྟསཱདྷནཱཡཾ པན པཋམཾ ལོཀིཡསཏིཔཊྛཱནཝསེན, དུཏིཡཾ མིསྶཀཝསེན, ཏཏིཡཾ ལོཀུཏྟརཝསེན དསྶིཏནྟི ཝེདིཏབྦཾ.

སཏིཔཊྛཱནཀཐཱཝཎྞནཱ ནིཊྛིཏཱ.

༩. ཧེཝཏྠིཀཐཱཝཎྞནཱ

༣༠༤. ཧེཝཏྠིཀཐཱཡཾ ‘‘སབྦོ དྷམྨོ སཀབྷཱཝེན ཨཏྠི པརབྷཱཝེན ནཏྠཱི’’ཏི པཝཏྟོ པརཝཱདཱིཝཱདོ ཡཐཱ ཝིབྷཛྫ པཊིཔུཙྪཱ ཝཱ ན བྱཱཀཱཏབྦོ, ཨེཝཾ ཨེཀཾསཏོ ན བྱཱཀཱཏབྦོ ཝིསེསཱབྷཱཝཏོ, ཀེཝལཾ ཋཔནཱིཡཔཀྑེ ཏིཊྛཏཱིཏི ཨདྷིཔྤཱཡེནཱཧ ‘‘ཨཝཏྟབྦུཏྟརེནཱ’’ཏི. ཡཐཱ ཧི སབྦེ ¶ ཝཱདཱ སཔྤཊིཝཱདཱཝཱཏི པཊིཉྙཱ བྷཱུཏཀཐནཏྟཱ ཨཝཏྟབྦུཏྟརཱ ཨུཔེཀྑིཏབྦཱ, ཨེཝམཡམྤཱིཏི ཝེདིཏབྦཾ. ཏེནཱཧ ‘‘ཨུཔེཀྑིཏབྦེནཱ’’ཏི. ཨཐ ཝཱ ཨཝཏྟབྦཾ ཨུཏྟརཾ ཨཝཏྟབྦུཏྟརཾ. ཡཐཱ ཨནིཙྩཝཱདིནཾ པཏི ཨནིཙྩོ སདྡོ པཙྩཡཱདྷཱིནཝུཏྟིཏོཏི, ཨུཏྟརཾ ན ཝཏྟབྦཾ སིདྡྷསཱདྷནབྷཱཝཏོ, ཨེཝཾ ཨིདྷཱཔི དཊྛབྦཾ. སིདྡྷསཱདྷནཉྷི དཌྜྷསྶ ཌཧནསདིསཏྟཱ ནིརཏྠཀམེཝ སིཡཱ, ཨཊྛཀཐཱཡཾ པན ཡསྨཱ པརཝཱདིནཱ ཡེན སབྷཱཝེན ཡོ དྷམྨོ ཨཏྠི, ཏེནེཝ སབྷཱཝེན སོ ཝིནཱ ཀཱལབྷེདཱདིཔརཱམསནེན ནཏྠཱིཏི པཏིཊྛཱཔཱིཡཏི, ཏསྨཱ ‘‘ཨཡོནིསོ པཏིཊྛཱཔིཏཏྟཱ’’ཏི ཝུཏྟཾ.

ཨེཏྠ ཙ ‘‘ཧེཝཏྠི, ཧེཝཾ ནཏྠཱི’’ཏི པཊིཛཱནནྟེན པརཝཱདིནཱ ཡཐཱ སཔརབྷཱཝེཧི རཱུཔཱདཱིནཾ ཨཏྠིཏཱ པཊིཉྙཱཏཱ, ཨེཝཾ ཀཱལདེསཱདིབྷེདེཧིཔི སཱ པཊིཉྙཱཏཱ ཨེཝ. ཏེནེཝཱཧ ‘‘ཨཏཱིཏཾ ཨནཱགཏཔཙྩུཔྤནྣཝསེན, ཨནཱགཏཔཙྩུཔྤནྣཱནི ཝཱ ཨཏཱིཏཱདིཝསེན ནཏྠཱི’’ཏི. ཨེཝཾ སཏི ནིགཎྛཱཙེལཀཝཱདོ པརིདཱིཔིཏོ སིཡཱ. ཏེ ཧི ‘‘སིཡཱ ཨཏྠི, སིཡཱ ནཏྠི, སིཡཱ ཨཏྠི ཙ ¶ ནཏྠི ཙཱ’’ཏིཨཱདིནཱ སབྦཔདཏྠེསུ པཏྟབྷཱགེ པཊིཛཱནནྟི. ཏཏྠ ཡདི ཝཏྠུནོ སབྷཱཝེནེཝ, དེསཀཱལསནྟཱནཝསེན ཝཱ ནཏྠིཏཱ ཨདྷིཔྤེཏཱ, ཏཾ སིདྡྷསཱདྷནཾ སཀཝཱདིནོཔི ཨིཙྪིཏཏྟཱ. ཡསྶ ཧི དྷམྨསྶ ཡོ སབྷཱཝོ, ན སོ ཏཏོ ཨཉྙཐཱ ཨུཔལབྦྷཏི. ཡདི ཨུཔལབྦྷེཡྻ, ཨཉྙོ ཨེཝ སོ སིཡཱ. ན ཙེཏྠ སཱམཉྙལཀྑཎཾ ནིདསྶེཏབྦཾ སལཀྑཎསྶ ཨདྷིཔྤེཏཏྟཱ ཏསྶ ནཏྠིབྷཱཝསྶ ཨབྷཱཝཏོ. ཡཐཱ ཙ པརབྷཱཝེན ནཏྠིཏཱཡ ན ཝིཝཱདོ, ཨེཝཾ དེསཀཱལནྟརེསུཔི ཨིཏྟརཀཱལཏྟཱ སངྑཱརཱནཾ. ན ཧི སངྑཱརཱ དེསནྟརཾ, ཀཱལནྟརཾ ཝཱ སངྐམནྟི ཁཎིཀབྷཱཝཏོ. ཨེཏེནེཝ པརིཡཱཡནྟརེན ནཏྠིཏཱཔི པཊིཀྑིཏྟཱ ཝེདིཏབྦཱ. ཡཐཱ ཙ ཨཏྠིཏཱ, ནཏྠིཏཱ ཝིནཱ ཀཱལབྷེདེན ཨེཀསྨིཾ དྷམྨེ པཏིཊྛཾ ན ལབྷནྟི ཨཉྙམཉྙཝིརུདྡྷཏྟཱ, ཨེཝཾ སབྦདཱཔི ནིཙྩཏྟཱ.

ཡཾ པན ཏེ ཝདནྟི ‘‘ཡཐཱ སུཝཎྞཾ ཀཊཀཱདིརཱུཔེན ཋིཏཾ རུཙཀཱདིབྷཱཝཾ ཨཱཔཛྫཏཱིཏི ནིཙྩཱནིཙྩཾ. ཏཉྷི སུཝཎྞབྷཱཝཱཝིཛཧནཏོ ནིཙྩཾ ཀཊཀཱདིབྷཱཝཧཱནིཏོ ཨནིཙྩཾ, ཨེཝཾ སབྦདྷམྨཱ’’ཏི. ཏེ ཨིདཾ ཝཏྟབྦཱ ‘‘ཀིཾ ཀཊཀབྷཱཝོ ཀཊཀསྶ, ཨུདཱཧུ སུཝཎྞསྶཱ’’ཏི. ཡདི ཀཊཀསྶ, སུཝཎྞནིརཔེཀྑོ སིཡཱ ཏདཉྙབྷཱཝོ ཝིཡ. ཨཐ སུཝཎྞསྶ, ནིཙྩཀཱལཾ ཏཏྠ ཨུཔལབྦྷེཡྻ སུཝཎྞབྷཱཝོ ཝིཡ. ན ཙ སཀྐཱ ཨུབྷིནྣཾ ཨེཀབྷཱཝོཏི ཝཏྟུཾ ཀཊཀཝིནཱསེཔི སུཝཎྞཱཝིནཱསཏོ. ཨཐ མཏཾ, སུཝཎྞཀཊཀཱདཱིནཾ པརིཡཱཡཱིཔརིཡཱཡབྷཱཝཏོ ¶ ནཱཡཾ དོསོཏི. ཡཐཱ ཧི ཀཊཀཔརིཡཱཡནིརོདྷེན རུཙཀཔརིཡཱཡུཔྤཱདེཔི པརིཡཱཡཱི ཏཐེཝ ཏིཊྛཏི, ཨེཝཾ མནུསྶཔརིཡཱཡནིརོདྷེ དེཝཔརིཡཱཡུཔྤཱདེཔི པརིཡཱཡཱི ཛཱིཝདྲབྱཾ ཏིཊྛཏཱིཏི ནིཙྩཱནིཙྩཾ, ཏཐཱ སབྦདྲབྱཱནཱིཏི. ཏཡིདཾ ཨམྦཾ པུཊྛསྶ ལབུཛབྱཱཀརཎཾ. ཡཾ སྭེཝ ནིཙྩོ ཨནིཙྩོཏི ཝཱ ཝདནྟོ ཨཉྙཏྠ ནིཙྩཏཾ ཨཉྙཏྠ ཨནིཙྩཏཾ པཊིཛཱནཱཏི, ཨཐ པརིཡཱཡཔརིཡཱཡཱིནཾ ཨནཉྙཏཱ ཨིཙྪིཏཱ, ཨེཝཾ སཏི པརིཡཱཡོཔི ནིཙྩོ སིཡཱ པརིཡཱཡིནོ ཨནཉྙཏྟཱ པརིཡཱཡསརཱུཔཾ ཝིཡ, པརིཡཱཡཱི ཝཱ ཨནིཙྩོ པརིཡཱཡཏོ ཨནཉྙཏྟཱ པརིཡཱཡསརཱུཔཾ ཝིཡཱཏི. ཨཐ ནེསཾ ཨཉྙཱ ཨནཉྙཏཱ, ཨེཝཉྩ སཏི ཝུཏྟདོསདྭཡཱནཏིཝཏྟི. ཨཔིཙ ཀོཡཾ པརིཡཱཡོ ནཱམ, ཡདི སཎྛཱནཾ, སུཝཎྞོ ཏཱཝ ཧོཏུ, ཀཐཾ ཛཱིཝདྲབྱེ ཨརཱུཔིབྷཱཝཏོ. ཡདི ཏསྶཔི སཎྛཱནཝནྟཾ ཨིཙྪིཏཾ, ཏཐཱ སཏིསྶ ཨེཀསྨིམྤི སཏྟསནྟཱནེ བཧུཏཱ ཨཱཔཛྫཏི སརཱུཔཏཱ ཙ སཎྛཱནཝནྟེསུཔི པཱིལ༹ཀཱདཱིསུ ཏཐཱདསྶནཏོ. ཨཐ པཝཏྟིཝིསེསོ, ཨེཝམྤི བཧུཏཱ ཁཎིཀཏཱ ཙ ཨཱཔཛྫཏི, ཏསྨཱ པརིཡཱཡསརཱུཔམེཝ ཏཱཝ པཏིཊྛཔེཏབྦཾ.

ཡཾ པན ཝུཏྟཾ ‘‘སུཝཎྞཾ ཀཊཀཱདིརཱུཔེན ཋིཏ’’ནྟི, ཏཏྠ སམྤཏྟིཡོགཏོ ཝིཉྙཱཡམཱནེསུ ཝིསིཊྛེསུ ¶ རཱུཔགནྡྷརསཕོཊྛབྦེསུ ཀིཾ ཨེཀཾ, ཨུདཱཧུ ཏེསཾ སམུདཱཡོ, ཏབྦིནིམུཏྟཾ ཝཱ དྷམྨནྟརཾ སུཝཎྞནྟི? ཏཏྠ ན ཏཱཝ རཱུཔཱདཱིསུ ཨེཀེཀཾ སུཝཎྞཾ ཏེན སུཝཎྞཀིཙྩཱསིདྡྷིཏོ, ནཱཔི ཏབྦིནིམུཏྟཾ དྷམྨནྟརཾ ཏཱདིསསྶ ཨབྷཱཝཏོ. ཨཐ སམུདཱཡོ, ཏཾ པན པཉྙཏྟིམཏྟནྟི ན ཏསྶ ནིཙྩཏཱ, ནཱཔི ཨནིཙྩཏཱ སམྦྷཝཏི. ཡཐཱ ཙ སུཝཎྞསྶ, ཨེཝཾ ཀཊཀསྶཔི པཉྙཏྟིམཏྟཏྟཱཏི. ཏཡིདཾ ནིདསྶནཾ པརཝཱདིནོ ཛཱིཝདྲབྱསྶཔི པཉྙཏྟིམཏྟཾ ཏསྶེཝ སཱདྷེཏཱིཏི ཀུཏོ ཏསྶ ནིཙྩཱནིཙྩཏཱཏི ཨལམཏིཔྤཔཉྩེན.

ཧེཝཏྠིཀཐཱཝཎྞནཱ ནིཊྛིཏཱ.

མཧཱཝགྒཝཎྞནཱ ནིཊྛིཏཱ.

༢. དུཏིཡཝགྒོ

༡. པརཱུཔཧཱརཝཎྞནཱ

༣༠༧. ཝིཀྑམྦྷིཏརཱགཱཝ ཨཝིཀྑམྦྷིཏརཱགཱནཾ ཨདྷིམཱནིཀཏཱཡ ཨསམྦྷཝཏོཏི ཡཱཝ ཨདྷིམཱནིཀཾ, ཏཱཝ སམྤཛཱནཱ ནིདྡཾ ཨོཀྐམནྟཱིཏི ཨདྷིཔྤཱཡོ. ‘‘ཨདྷིམཱནིཀཱན’’ནྟི ¶ ཨིདཾ བྷཱུཏཔུབྦགཏིཡཱ ཝུཏྟནྟི ཨཱཧ ‘‘ཨདྷིམཱནིཀཔུབྦཱ ཨདྷིཔྤེཏཱ སིཡུ’’ནྟི.

༣༠༨. ཡཾ ཝིམཏིགཱཧཀཱརཎཾ ཝུཙྩམཱནཾ, ཏཾ ‘‘ཧནྡ ཧཱི’’ཏི པརཾ ཛོཏེཏཱིཏི ཨདྷིཔྤཱཡེནཱཧ ‘‘ཀཱརཎཏྠེཏི ཡུཏྟ’’ནྟི. ཝིམཏིགཱཧསྶ པན ནིཙྪིཏཏཾ ‘‘ཧནྡ ཧཱི’’ཏི པརཾ ཛོཏེཏཱིཏི ཝུཏྟཾ ‘‘ཝཙསཱཡཏྠེ’’ཏི.

པརཱུཔཧཱརཝཎྞནཱ ནིཊྛིཏཱ.

༥. ཝཙཱིབྷེདཀཐཱཝཎྞནཱ

༣༢༦. སོཏི ¶ པཋམམགྒཊྛོ. ཏསྨཱཏི ཡསྨཱ ‘‘ཝིརཛཾ ཝཱིཏམལཾ དྷམྨཙཀྑུཾ ཨུདཔཱདི ‘ཡཾ ཀིཉྩི སམུདཡདྷམྨཾ, སབྦཾ ཏཾ ནིརོདྷདྷམྨ’’’ནྟི སུཏྟསྶ ཨཏྠཾ ཨཉྙཐཱ གཧེཏྭཱ ཨུདཡབྦཡཱནུཔསྶནཱནིསྶནྡེན མགྒཀྑཎེཔི དུཀྑནྟི ཝིཔསྶནཱ ཨུཔཊྛཱཏི, ཏསྨཱ ‘‘སོ དུཀྑམིཙྩེཝ ཝཱཙཾ བྷཱསཏཱི’’ཏི ཝདནྟི.

༣༢༨. ཨིཙྪིཏེཏི པརཝཱདིནཱ སམྤཊིཙྪིཏེ. ཨཱརོཔིཏེཏི ཡུཏྟིནིདྡྷཱརཎེན ཏསྨིཾ ཨཏྠེ པཏིཊྛཱཔིཏེ ཡུཛྫཏི, ཝཙཱིསམུཊྛཱཔནཀྑཎཏོ པན པཙྪཱ ཏཾ སདྡཾ སུཎཱཏཱིཏི ཨིཙྪིཏེ ན ཡུཛྫཏི སོཏཝིཉྙཱཎསྶ པཙྩུཔྤནྣཱརམྨཎཏྟཱཏི ཨདྷིཔྤཱཡོ. ཡསྨཱ པན ཨཏྟནཱ ནིཙྪཱརིཏཾ སདྡཾ ཨཏྟནཱཔི སུཎཱཏི, ཏསྨཱ སོཏཝིཉྙཱཎཾ ‘‘ཡེན ཏཾ སདྡཾ སུཎཱཏཱི’’ཏི ཨཊྛཀཐཱཡཾ ཝུཏྟནྟི དཊྛབྦཾ.

༣༣༢. ལོཀུཏྟརམགྒཀྑཎེཏི པཋམཛ྄ཛྷཱནིཀསྶ པཋམམགྒསྶ ཁཎེ. ཨབྷིབྷཱུསུཏྟཱཧརཎེ ཨདྷིཔྤཱཡོ ཝཏྟབྦོཏི ཨེཏེན ཏདཱཧརཎསྶ ཨསམྦནྡྷཏཾ དསྶེཏི. ཏེནཱཧ ‘‘ཏསྨཱ ཨསཱདྷཀ’’ནྟི.

ཝཙཱིབྷེདཀཐཱཝཎྞནཱ ནིཊྛིཏཱ.

༧. ཙིཏྟཊྛིཏིཀཐཱཝཎྞནཱ

༣༣༥. ཨེཝནྟི ‘‘ཨེཀཙིཏྟཾ ཡཱཝཏཱཡུཀཾ ཏིཊྛཏཱི’’ཏི ཝུཏྟཱཀཱརེན. ཨཉྙཏྠཱཏི ཨརཱུཔབྷཝཏོ ཨཉྙསྨིཾ. ཨེཏེནཱཏི ‘‘ཨེཀམེཝ ཙིཏྟཾ ཨཱརུཔྤེ ཏིཊྛཏི ¶ , ཡཱཝཏཱཡུཀཾ ཏིཊྛཏཱི’’ཏི ཨེཝཾཝཱདིནཱ དུཏིཡཱཔི ཨཌྜྷཀཐཱ པསྶིཏབྦཱ པཋམཀཐཱཡ ཙིརཀཱལཱཝཊྛཱནཝཙནསྶ ཨཉྙདཏྠུ བྷཱཝཝིབྷཱཝནཏོཏི ཨདྷིཔྤཱཡོ. པུརིམཱཡཱཏི ‘‘ཡཱཝཏཱཡུཀཾ ཏིཊྛཏཱི’’ཏི པཉྷཏོ པུརིམཱཡ. ཏཏྠ ཧི ‘‘ཝསྶསཏཾ ཏིཊྛཏཱི’’ཏི པུཙྪཱཡ ‘‘ཨཱམནྟཱ’’ཏི ཨནུཉྙཱ ཀཏཱ, པཙྪིམཱཡཾ པན ‘‘མནུསྶཱནཾ ཨེཀཾ ཙིཏྟཾ ཡཱཝཏཱཡུཀཾ ཏིཊྛཏཱི’’ཏི ‘‘ན ཧེཝཾ ཝཏྟབྦེ’’ཏི པཊིཀྑེཔོ ཀཏོ. ཨཝིརོདྷོ ཝིབྷཱཝེཏབྦོ, ཡཏོ ཏཏྠེཝ ཨནུཉྙཱ ཀཏཱ, ན པཙྪཱཏི ཨདྷིཔྤཱཡོ ¶ . ཝསྶསཏཱདཱིཏི ཙ ཨཱདི-སདྡེན ན ཀེཝལཾ ‘‘དྭེ ཝསྶསཏཱནཱི’’ཏི ཨེཝམཱདིཡེཝ སངྒཧིཏཾ, ཨཐ ཁོ ‘‘ཨེཀཾ ཙིཏྟཾ དིཝསཾ ཏིཊྛཏཱི’’ཏི ཨེཝམཱདིཔཱིཏི དཊྛབྦཾ. ‘‘མུཧུཏྟཾ མུཧུཏྟཾ ཨུཔྤཛྫཏཱིཏི པཉྷོ སཀཝཱདིནཱ པུཙྪིཏོ ཝིཡ ཝུཏྟོ’’ཏི ཨིདཾ ཝིཙཱརེཏབྦཾ. ‘‘མུཧུཏྟཾ མུཧུཏྟཾ ཨུཔྤཛྫཏཱི’’ཏི པཉྷོ པརཝཱདིསྶ. ‘‘ཨུཔྤཱདཝཡདྷམྨིནོ’’ཏིཨཱདིསུཏྟཏྠཝསེན པཊིཉྙཱ སཀཝཱདིསྶཱཏི ཧི ཝུཏྟཾ.

ཙིཏྟཊྛིཏིཀཐཱཝཎྞནཱ ནིཊྛིཏཱ.

༩. ཨནུཔུབྦཱབྷིསམཡཀཐཱཝཎྞནཱ

༣༣༩. ‘‘ཏཱནི ཝཱ ཙཏྟཱརིཔི ཉཱཎཱནི ཨེཀོ སོཏཱཔཏྟིམགྒོཡེཝཱཏི པཊིཛཱནཱཏཱི’’ཏི ཨིམཾ སནྡྷཱཡཱཧ ‘‘ཨཐ ཝཱ’’ཏིཨཱདི. ཙཏུནྣཾ ཉཱཎཱནནྟི དུཀྑེཉཱཎཱདཱིནཾ ཙཏུནྣཾ ཉཱཎཱནཾ. ཨེཀམགྒབྷཱཝཏོཏི སོཏཱཔཏྟིཨཱདིཨེཀམགྒབྷཱཝཏོ. ཀམེན པཝཏྟམཱནཱནིཔི ཧི ཏཱནི ཉཱཎཱནི ཏཾཏཾམགྒཀིཙྩསྶ སཱདྷནཏོ ཨེཀོཡེཝ མགྒོ ཧོཏཱིཏི ཨདྷིཔྤཱཡོ. ཏེནཱཧ ‘‘ཨེཀམགྒསྶ…པེ… པཊིཛཱནཱཏཱི’’ཏི.

༣༤༤. དསྶནེཏི མགྒདསྶནེ.

༣༤༥. དྷམྨཏྠཱནཾ ཧེཏུཕལབྷཱཝཏོ དྷམྨཏྠཔཊིསམྦྷིདཱནཾ སིཡཱ སོཏཱཔཏྟིཕལཧེཏུཏཱ, ཏདབྷཱཝཏོ ན ཨིཏརཔཊིསམྦྷིདཱནནྟི ཨཱཧ ‘‘ནིརུཏྟི…པེ… ཝིཙཱརེཏབྦ’’ནྟི. སབྦཱསམྤི པན པཊིསམྦྷིདཱནཾ པཋམཕལསཙྪིཀིརིཡཱཧེཏུཏཱ ཝིཙཱརེཏབྦཱ མགྒཱདྷིགམེནེཝ ལདྡྷབྦཏྟཱ ཕལཱནཾ ཝིཡ, ཏསྨཱ ‘‘ཨཊྛཧི ཉཱཎེཧཱི’’ཏི ཨེཏྠ ནིཀྑེཔཀཎྜེ ཨཱགཏནཡེན དུཀྑཱདིཉཱཎཱནཾ པུབྦནྟཱདིཉཱཎཱནཉྩ ཝསེན ‘‘ཨཊྛཧི ཉཱཎེཧཱི’’ཏི ཡུཏྟཾ ཝིཡ དིསྶཏི.

ཨནུཔུབྦཱབྷིསམཡཀཐཱཝཎྞནཱ ནིཊྛིཏཱ.

༡༠. ཝོཧཱརཀཐཱཝཎྞནཱ

༣༤༧. ཝིསཡཝིསཡཱིསཱུཏི ¶ ¶ རཱུཔཙཀྑཱདིཀེ སནྡྷཱཡཱཧ. ཏེ ཧི རཱུཔཀྑནྡྷཔརིཡཱཔནྣཏྟཱ ཨེཀནྟེན ལོཀིཡཱ. ཝིསཡསྶེཝཱཏི སདྡསྶེཝ. སོ ཧི ཝོཧརིཏབྦཏོ ཝོཧཱརཀརཎཏཱཡ ཙ ‘‘ཝོཧཱརོ’’ཏི པཱལི༹ཡཾ ཝུཏྟོ. ནཏྠེཏྠ ཀཱརཎཾ ཝིསཡཱིནཾ ཝིསཡསྶཔི ཨཱསཝཱདིཨནཱརམྨཎཏཱབྷཱཝཏོ. ཨསིདྡྷལོཀུཏྟརབྷཱཝསྶ ཨེཀནྟསཱསཝཏྟཱ ཏསྶ སདྡཱཡཏནསྶ ཡཐཱ ལོཀུཏྟརཏཱ ཏཝ མཏེནཱཏི ཨདྷིཔྤཱཡོ.

པཊིཧཉྙེཡྻཱཏི ཨིདཾ པརིཀཔྤཝཙནཾ. པརིཀཔྤཝཙནཉྩ ཨཡཱཐཱཝནྟི ཨཱཧ ‘‘ན ཧི…པེ… ཨཏྠཱི’’ཏི. ན ཧི ཛལཾ ཨནལནྟི པརིཀཔྤིཏཾ དཧཏི པཙཏི ཝཱ. ཀིཾ ལོཀིཡེན ཉཱཎེན ཛཱནིཏབྦཏོ ལོཀིཡོ རཱུཔཱཡཏནཱདི ཝིཡ, ཨུདཱཧུ ལོཀུཏྟརོ པཙྩཝེཀྑིཡམཱནམགྒཱདི ཝིཡཱཏི ཨེཝམེཏྠ ཧེཏུསྶ ཨནེཀནྟབྷཱཝོ ཝེདིཏབྦོ. ཏེནཱཧ ‘‘ལོཀིཡེ ལོཀུཏྟརེ ཙ སམྦྷཝཏོ’’ཏི.

ཝོཧཱརཀཐཱཝཎྞནཱ ནིཊྛིཏཱ.

༡༡. ནིརོདྷཀཐཱཝཎྞནཱ

༣༥༣. ཡེསཾ དྭིནྣནྟི ཡེསཾ དྭིནྣཾ དུཀྑསཙྩཱནཾ. དྭཱིཧི ནིརོདྷེཧཱིཏི ཨཔྤཊིསངྑཱཔཊིསངྑཱསངྑཱཏེཧི དྭཱིཧི ནིརོདྷེཧི. ཏཏྠ དུཀྑཱདཱིནཾ པཊིསངྑཱཏི པཊིསངྑཱ, པཉྙཱཝིསེསོ. ཏེན ཝཏྟབྦོ ནིརོདྷོ པཊིསངྑཱནིརོདྷོ. ཡོ སཱསཝེཧི དྷམྨེཧི ཝིསཾཡོགོཏི ཝུཙྩཏི, ཡོ པཙྩཡཝེཀལླེན དྷམྨཱནཾ ཨུཔྤཱདསྶ ཨཙྩནྟཝིབནྡྷབྷཱུཏོ ནིརོདྷོ, སོ པཊིསངྑཱཡ ནཝཏྟབྦཏོ ཨཔྤཊིསངྑཱནིརོདྷོ ནཱམཱཏི པརཝཱདིནོ ལདྡྷི. པཊིསངྑཱཡ ཝིནཱ ནིརུདྡྷཱཏི པཙྩཡཝེཀལླེན ཨནུཔྤཏྟིཾ སནྡྷཱཡ ཝུཏྟཾ. ཏེནཱཧ ‘‘ན ཨུཔྤཛྫིཏྭཱ བྷངྒཱ’’ཏི. ཨནུཔྤཱདོཔི ཧི ནིརོདྷོཏི ཝུཙྩཏི ཡཏོ ‘‘ཨིམསྶུཔྤཱདཱ ཨིདཾ ཨུཔྤཛྫཏཱི’’ཏི ལཀྑཎུདྡེསསྶ པཊིལོམེ ‘‘ཨིམསྶ ¶ ནིརོདྷཱ ཨིདཾ ནིརུཛ྄ཛྷཏཱི’’ཏི དསྶིཏོ. ཏེནཱཏི པཊིསངྑཱཡ ནིརོདྷསྶ ཁཎིཀནིརོདྷསྶ ཙ ཨིདྷ ནཱདྷིཔྤེཏཏྟཱ.

ནིརོདྷཀཐཱཝཎྞནཱ ནིཊྛིཏཱ.

དུཏིཡཝགྒཝཎྞནཱ ནིཊྛིཏཱ.

༣. ཏཏིཡཝགྒོ

༡. བལཀཐཱཝཎྞནཱ

༣༥༤. ནིདྡེསཏོཏི ¶ ‘‘ཨཊྛཱནམེཏཾ ཨནཝཀཱསོ’’ཏིཨཱདིནཱ ནིདྡིཊྛཔྤཀཱརཏོ. སོ པན ཡསྨཱ ཝིཏྠཱརོ ཧོཏི, ཏསྨཱ ཝུཏྟཾ ‘‘ཝིཏྠཱརཏོ’’ཏི. སབྦཾ ཀིལེསཱཝརཎཱདིཾ, ཏམེཝ པཙྩེཀཾ པཝཏྟིཨཱཀཱརབྷེདཏོ སབྦཱཀཱརཾ. ‘‘སབྦ’’ནྟི ཧི ཨིདཾ སརཱུཔཏོ གཧཎཾ, ‘‘སབྦཱཀཱརཏོ’’ཏི པཝཏྟིཨཱཀཱརབྷེདཏོ. བྷགཝཱ ཧི དྷམྨེ ཛཱནནྟོ ཏེསཾ ཨཱཀཱརབྷེདེ ཨནཝསེསེཏྭཱཝ ཛཱནཱཏི. ཡཐཱཧ ‘‘སབྦེ དྷམྨཱ སབྦཱཀཱརཏོ བུདྡྷསྶ བྷགཝཏོ ཉཱཎམུཁེ ཨཱཔཱཐཾ ཨཱགཙྪནྟཱི’’ཏི (མཧཱནི. ༡༥༦; ཙཱུལ༹ནི. མོགྷརཱཛམཱཎཝཔུཙྪཱནིདྡེས ༨༥; པཊི. མ. ༣.༥). ཨུདྡེསཏོཏི ཨེཀདེསཏོ. ཨེཀདེསོ ཙ ཝིཏྠཱརོ ན ཧོཏཱིཏི ཨཱཧ ‘‘སངྑེཔཏོ’’ཏི. ཡཐཱ ཛཱནནྟཱིཏི སམྦནྡྷོ. ཨུདྡེསམཏྟེནཔཱིཏི དིཊྛིགཏཡཐཱབྷཱུཏཉཱཎཱདིཔྤབྷེདཱནཾ ཨཱསཡཱདཱིནཾ ཨུདྡེསམཏྟེནཔི. ཏེནཱཧ ‘‘ཨིནྡྲིཡཱནཾ ཏིཀྑམུདུབྷཱཝཛཱནནམཏྟཾ སནྡྷཱཡཱ’’ཏི. ཐེརེནཱཏི ཨནུརུདྡྷཏྠེརེན. ཨེཝམེཝཱཏི ཨུདྡེསཏོ ཋཱནཱདིམཏྟཛཱནནཱཀཱརེནེཝ. སྭཱཡམཏྠོ སཀཝཱདིནཱཔི ཨིཙྪིཏོཡེཝཱཏི ཨཱཧ ‘‘ཀཐམཡཾ ཙོདེཏབྦོ སིཡཱ’’ཏི.

༣༥༦. སེསེསཱུཏི ཨིནྡྲིཡཔརོཔརིཡཏྟཉཱཎཏོ སེསེསུ. པཊིཀྑེཔོཏི ཨསཱདྷཱརཎཏཱཔཊིཀྑེཔོ. ནནུ ཙ སེསཱནཾ ཨསཱདྷཱརཎཏཱཔི ཨཏྠཱིཏི ཙོདནཾ སནྡྷཱཡཱཧ ‘‘ཋཱནཱ…པེ… ཨདྷིཔྤཱཡོ’’ཏི.

བལཀཐཱཝཎྞནཱ ནིཊྛིཏཱ.

༢. ཨརིཡནྟིཀཐཱཝཎྞནཱ

༣༥༧. སངྑཱརེ ¶ སནྡྷཱཡ པཊིཛཱནནྟསྶཱཏི དིཊྛིཡཱ པརིཀཔྤིཏེན སཏྟེན སུཉྙེ སངྑཱརེ སནྡྷཱཡ ‘‘སུཉྙཏཉྩ མནསི ཀརོཏཱི’’ཏི པུཙྪཱཡ ‘‘ཨཱམནྟཱ’’ཏི པཊིཛཱནནྟསྶ. དྭིནྣཾ ཕསྶཱནཾ སམོདྷཱནཾ ཀཐཾ ཨཱཔཛྫཏི ཋཱནཱཋཱནབྷཱུཏེ སངྑཱརེ ཝུཏྟནཡེན སུཉྙཏཾ མནསི ཀརོནྟསྶཱཏི ཨདྷིཔྤཱཡོ. ཡཐཱཝུཏྟནཡེནཱཏི ‘‘དིཊྛིཡཱ པརིཀཔྤིཏེན སཏྟེན སུཉྙཱ ¶ པཉྩཀྑནྡྷཱ’’ཏི པཀཱརེན ནཡེན. ཨཐ ཝཱ ཡཐཱཝུཏྟནཡེནཱཏི ‘‘ཋཱནཱཋཱནམནསིཀཱརོ སངྑཱརཱརམྨཎོ, སུཉྙཏཱམནསིཀཱརོ ནིབྦཱནཱརམྨཎོ’’ཏི ཨེཝཾ ཝུཏྟནཡེན. ‘‘སངྑཱརེ སནྡྷཱཡ པཊིཛཱནནྟསྶཱ’’ཏི ཝུཏྟཏྟཱ ‘‘དྭིནྣཾ ཕསྶཱནཾ སམོདྷཱནཾ ཀཐཾ ཨཱཔཛྫཏཱི’’ཏི ཨཱཧ. སཏྟསུཉྙཏཱཡ སུཉྙཏྟེཔི སངྑཱརཱནཾ ཨཉྙོཝ ཋཱནཱཋཱནམནསིཀཱརོ, ཨཉྙོ སུཉྙཏཱམནསིཀཱརོཏི ཡུཛྫཏེཝ དྭིནྣཾ ཕསྶཱནཾ སམོདྷཱནཱཔཏྟིཙོདནཱ, སངྑཱརེ སནྡྷཱཡ པཊིཛཱནནྟསྶ པན ཀཐཾ ཨརིཡབྷཱཝསིདྡྷི ཋཱནཱཋཱནཉཱཎཱདཱིནནྟི ཝིཙཱརེཏབྦཾ. ཀིཾ ཝཱ ཨེཏཱཡ ཡུཏྟིཙིནྟཱཡ. ཨུམྨཏྟཀཔཙྪིསདིསོ ཧི པརཝཱདིཝཱདོ. ཨཉྙེསུཔི ཋཱནེསུ ཨཱིདིསེསུ ཨེསེཝ ནཡོ. ཨཱརོཔེཏྭཱཏི ཨིཏྠིཔུརིསཱདིཨཱཀཱརཾ, སཏྟཱཀཱརམེཝ ཝཱ ཨསནྟཾ རཱུཔཱདིཨུཔཱདཱནེ ཨཱརོཔེཏྭཱ. ཨབྷཱུཏཱརོཔནཉྷེཏྠ པཎིདཧནནྟི ཨདྷིཔྤེཏཾ. ཏེནཱཧ ‘‘པརིཀཔྤནཝསེནཱ’’ཏི. སོཏི ཡཐཱཝུཏྟོ པཎིདྷི. ཨེཀསྨིམྤི ཁནྡྷེ.

ཨརིཡནྟིཀཐཱཝཎྞནཱ ནིཊྛིཏཱ.

༤. ཝིམུཙྩམཱནཀཐཱཝཎྞནཱ

༣༦༦. མགྒཀྑཎེ ཙིཏྟཾ ཨེཀདེསེན ཝིམུཏྟཾ ཨེཀདེསེན ཨཝིམུཏྟནྟི ཨཡཾ ‘‘ཝིམུཏྟཾ ཝིམུཙྩམཱན’’ནྟི ལདྡྷིཡཱ དོསོ. ཏཐཱ ཧི ཝུཏྟཾ ‘‘ཨེཀདེསཾ ཝིམུཏྟཾ, ཨེཀདེསཾ ཨཝིམུཏྟ’’ནྟི. ཨཊྛཀཐཱཡཉྩ ‘‘ཏཉྷི ཏདཱ སམུཙྪེདཝིམུཏྟིཡཱ ཝིམུཏྟེཀདེསེན ཝིམུཙྩམཱནནྟིསྶ ལདྡྷཱི’’ཏི དསྶིཏོཝཱཡམཏྠོ. ཝིཔྤཀཏནིདྡེསེཏི ཝིམུཙྩནཀིརིཡཱཡ ཨཔརིཡོསིཏཏཱནིདྡེསེ. ཡཾ སནྡྷཱཡཱཧ ‘‘ཝིམུཏྟཾ ཝིམུཙྩམཱནནྟི ཝིཔྤཀཏབྷཱཝེན ཝུཏྟཏྟཱ’’ཏི. ཏེནཱཏི པརཝཱདིནཱ. ཝིམུཙྩ…པེ… ཝུཏྟཾ ཝིམུཙྩམཱནསྶ ཝིམུཏྟབྷཱཝཱབྷཱཝཏོ, ཝིམུཏྟབྷེདེན པན ཏཐཱ ཝུཏྟནྟི ཨདྷིཔྤཱཡོ. སཏི ཙ ¶ དོསེ ཝིཔྤཀཏནིདྡེསེཏི ཨཱནེཏྭཱ ཡོཛེཏབྦཾ. ཨེཀདེསོ ཝིསེསནཾ ཧོཏི ནིཔྤདེསཝིམུཏྟིཡཱ ཨཝིཙྪིནྣཏོ. ཕལཙིཏྟེནཱཏི པཋམཕལཙིཏྟེན ཨུཔྤནྣེན.

ཝིམུཙྩམཱནཀཐཱཝཎྞནཱ ནིཊྛིཏཱ.

༥. ཨཊྛམཀཀཐཱཝཎྞནཱ

༣༦༨. པཧཱིནཱ ¶ ནཱམ བྷཝེཡྻུཾ, ན པཧིཡྻམཱནཱཏི ཨདྷིཔྤཱཡོ.

ཨཊྛམཀཀཐཱཝཎྞནཱ ནིཊྛིཏཱ.

༦. ཨཊྛམཀསྶ ཨིནྡྲིཡཀཐཱཝཎྞནཱ

༣༧༡. ལོཀུཏྟརཱནཾཡེཝ སདྡྷཱདཱིནཾ ཨིནྡྲིཡབྷཱཝོ, ན ལོཀིཡཱནནྟི པརཝཱདིནོ ཨདྷིཔྤཱཡཝསེནཱཧ ‘‘ཨཔྤཊིལདྡྷིནྡྲིཡཏྟཱ’’ཏིཨཱདི. ཏཏྠ ནིཡྻཱནིཀཱནི བྷཱཝེནྟོཏི ཡཐཱ ནིཡྻཱནིཀཱ ཧོནྟི, ཨེཝཾ ཨུཔྤཱདེནྟོ བྲཱུཧེནྟོ ཝཱ. ཨིནྡྲིཡབྷཱཝཾ པན པཏྟེསུ ཏེསུ པུན བྷཱཝནཱཀིཙྩཾ ནཏྠཱིཏི ཏསྶ ཨདྷིཔྤཱཡོཏི དསྶེནྟོ ཨཱཧ ‘‘ན པན ཨིནྡྲིཡཱནི བྷཱཝེནྟོ’’ཏི.

ཨཊྛམཀསྶ ཨིནྡྲིཡཀཐཱཝཎྞནཱ ནིཊྛིཏཱ.

༧. དིབྦཙཀྑུཀཐཱཝཎྞནཱ

༣༧༣. ཝིསིནོཏི ཝིསེསེན བནྡྷཏི ཝིསཡཱིནཾ ཨཏྟཔཊིབནྡྷཾ ཀརོཏཱིཏི ཝིསཡོ, ཨཱརམྨཎཾ ¶ , ཨནུབྷཝཏི ཨེཏེནཱཏི ཨཱནུབྷཱཝོ, སཱམཏྠིཡཾ, བལནྟི ཨཏྠོ, གོཙརཀརཎཾ གོཙརོ, ཝིསཡེ ཨཱནུབྷཱཝགོཙརཱ ཝིསཡ…པེ… ཙརཱཏི. ཏེཧི ཡཐཱ ཝིསིཊྛཾ ཝིསེསཾ ཧོཏི, ཏཐཱ པཙྩཡབྷཱུཏེན ཛྷཱནདྷམྨེན ཨཱཧིཏབལཾ ཀཏབལཱདྷཱནཾ. ཝིསཡགྒཧཎཉྩེཏྠ ཨཱནུབྷཱཝགོཙརཀརཎཱནཾ པཝཏྟིཊྛཱནདསྶནཾ ཡཏྠསྶ ཏེཧི ཨུཔཏྠདྡྷཏྟཱ བལཱདྷཱནཾ པཱཀཊཾ ཧོཏི. ཏེནཱཧ ‘‘ཡཱདིསེ ཝིསཡེ’’ཏིཨཱདི. བལཱདྷཱནཉྩ ཨུཏྟརིམནུསྶདྷམྨཏོ མཧགྒཏདྷམྨཝིསེསཏོ ཨུཔྤནྣེཧི པཎཱིཏེཧི ཙིཏྟཛརཱུཔེཧི ཝིསེསཱཔཏྟི. ཡཾ ནིསྶཱཡ པརཱཝུཏྟཱིཏི ཨེཀེ ཝདནྟི. པུརིམཾ མཾསཙཀྑུམཏྟམེཝཱཏི ཡཐཱཝུཏྟབལཱདྷཱནཏོ པུརིམཾ མཾསཙཀྑུམཏྟམེཝ. ཝདནྟོ སངྒཧཀཱརོ. ཝིསཡགྒཧཎཾ པཱལི༹ཡཾ ཀཏཾ. ན ཝིསཡཝིསེསདསྶནཏྠནྟི ན ཝིསཡསྶ ཝིསེསདསྶནཏྠཾ. ཡཏོ ཨུབྷིནྣམྤི རཱུཔཱཡཏནམེཝ ཝིསཡོཏི ཝིསཡསྶ སདིསཏཾ ཨཝིསེསཾ ཨཱཧ, སདིསསྶ ཝཱ ཝིསེསཾ དཱིཔེཏཱིཏི ཡོཛནཱ.

དྷམྨུཔཏྠདྡྷ ¶ …པེ… ཨདྷིཔྤཱཡོ, ཨཉྙཐཱ ལདྡྷིཡེཝ ན སིཡཱཏི བྷཱཝོ. མགྒོཏི ཨུཔཱཡོ, ཀཱརཎནྟི ཨཏྠོ. པཀཏིཙཀྑུམཏོ ཨེཝ ཧི དིབྦཙཀྑུ ཨུཔྤཛྫཏི. ཀསྨཱ? ཀསིཎཱལོཀཾ ཝཌྜྷེཏྭཱ དིབྦཙཀྑུཉཱཎསྶ ཨུཔྤཱདནཾ, སོ ཙ ཀསིཎམཎྜལེ ཨུགྒཧནིམིཏྟེན ཝིནཱ ནཏྠི, ཏསྨཱ ཝུཏྟཾ ‘‘མཾསཙཀྑུཔཙྩཡཏཱདསྶནཏྠམེཝ ཝུཏྟ’’ནྟི. ཏེནཱཏི ‘‘མགྒོ’’ཏི ཝཙནེན. རཱུཔཱཝཙརཛ྄ཛྷཱནཔཙྩཡེནཱཏི རཱུཔཱཝཙརཛ྄ཛྷཱནེན པཙྩཡབྷཱུཏེན ཨུཔྤནྣཱནི རཱུཔཱཝཙརཛ྄ཛྷཱནཙིཏྟསམུཊྛིཏཱནི. ཛྷཱནཀམྨསམུཊྛིཏེསུ ཝཏྟབྦམེཝ ནཏྠི. ཏསྶ ཧེསཱ ལདྡྷི.

༣༧༤. ཡེན དིབྦཙཀྑུནོ པཉྙཱཙཀྑུབྷཱཝསྶ ཨིཙྪནེན པཊིཛཱནནེན. ཏཱིཎི ཙཀྑཱུནི མཾསདིབྦཔཉྙཱཙཀྑཱུནི ཙཀྑུནྟརབྷཱཝཾ ཝདཏོ བྷཝེཡྻུཾ, ཏསྨཱ ཏཾ ན ཨིཙྪཏཱིཏི ཨཏྠོ.

དིབྦཙཀྑུཀཐཱཝཎྞནཱ ནིཊྛིཏཱ.

༩. ཡཐཱཀམྨཱུཔགཏཉཱཎཀཐཱཝཎྞནཱ

༣༧༧. དིབྦཙཀྑུཔཱདཀཏྟཱ ‘‘ཡཐཱཀམྨཱུཔགཏཉཱཎསྶ ཨུཔནིསྶཡེ དིབྦཙཀྑུམྷཱི’’ཏི ཝུཏྟཾ, ན ཡཐཱཀམྨཱུཔགཏཛཱནནཀིཙྩཀེ དིབྦཙཀྑུམྷི ཏསྶ ཏཾཀིཙྩཀཏཱབྷཱཝཏོ. ཡཏོ ཡཾ ཨནཉྙཾ, ཏམྤི ¶ ཏཏོ ཨནཉྙམེཝཱཏི ཨཱཧ ‘‘ཨིམིནཱ…པེ… བྷཝིཏབྦ’’ནྟི. ཏཏྠ ཨཏྠནྟརབྷཱཝཾ ནིཝཱརེཏཱིཏི དིབྦཙཀྑུཉཱཎསྶ པཀྑིཀཏྟཱ ཡཐཱཀམྨཱུཔགཏཉཱཎསྶ ཏཏོ ཨཏྠནྟརབྷཱཝཾ ནིཝཱརེཏི. ཏསྶ ཧི ཏཾ པརིབྷཎྜཉཱཎཾ. དིབྦཙཀྑུསྶ ཡཐཱཀམྨཱུཔགཏཉཱཎཏོ ཨཏྠནྟརབྷཱཝཾ ན ནིཝཱརེཏི ཨཏཔྤཀྑིཀཏྟཱཏི ཨདྷིཔྤཱཡོ. དིབྦཙཀྑུསྶ ཡཐཱཀམྨཱུཔགཏཉཱཎཀིཙྩཏཱ པརཝཱདིནཱ ཨིཙྪིཏཱ, ན ཡཐཱཀམྨཱུཔགཏཉཱཎསྶ དིབྦཙཀྑུཀིཙྩཏཱཏི ཏམཏྠཾ ‘‘ཡཐཱཀམྨཱུཔགཏཉཱཎམེཝ དིབྦཙཀྑུ’’ནྟི ཨེཏྠ ཡོཛེཏྭཱ དསྶེནྟོ ‘‘ཨེཝ-སདྡོ ཙཱ’’ཏིཨཱདིམཱཧ.

ཡཐཱཀམྨཱུཔགཏཉཱཎཀཐཱཝཎྞནཱ ནིཊྛིཏཱ.

༡༠. སཾཝརཀཐཱཝཎྞནཱ

༣༧༩. ཨཱཊཱནཱཊིཡསུཏྟེ ¶ ‘‘སནྟི, བྷིཀྑཝེ, ཡཀྑཱ ཡེབྷུཡྻེན པཱཎཱཏིཔཱཏཱ ཨཔྤཊིཝིརཏཱ’’ཏི (དཱི. ནི. ༣.༢༧༦, ༢༨༦) ཨཱགཏཏྟཱ ཙཱཏུམཧཱརཱཛིཀཱནཾ སཾཝརཱསཾཝརསབྦྷཱཝོ ཨཝིཝཱདསིདྡྷོ. ཡཏྠ པན ཝིཝཱདོ, ཏམེཝ དསྶེནྟེན ཏཱཝཏིཾསཱདཡོ གཧིཏཱཏི ཨིམམཏྠཾ དསྶེཏུཾ ‘‘ཙཱཏུམཧཱརཱཛིཀཱན’’ནྟི ཝུཏྟཾ. ཨེཝཾ སཏཱིཏི ཡདི ཏཱཝཏིཾསེསུ སཾཝརཱསཾཝརོ ནཏྠི, ཨེཝཾ སནྟེ. སུརཱཔཱནནྟི ཨེཏྠཱཔི ‘‘སུཡྻཏཱི’’ཏི པདཾ ཨཱནེཏྭཱ སམྦནྡྷིཏབྦཾ. ཀཐཾ སུཡྻཏཱིཏི? ཝུཏྟཉྷེཏཾ ཀུམྦྷཛཱཏཀེ –

‘‘ཡཾ ཝེ པིཝིཏྭཱ པུབྦདེཝཱ པམཏྟཱ,

ཏིདིཝཱ ཙུཏཱ སསྶཏིཡཱ སམཱཡཱ;

ཏཾ ཏཱདིསཾ མཛྫམིམཾ ནིརཏྠཾ,

ཛཱནཾ མཧཱརཱཛ ཀཐཾ པིཝེཡྻཱ’’ཏི. (ཛཱ. ༡.༡༦.༥༨);

ཏཏྠ པུབྦདེཝཱ ནཱམ ཨསུརཱ. ཏེ ཧི ཏཱཝཏིཾསཱནཾ ཨུཔྤཏྟིཏོ པུབྦདེཝཱཏི པཉྙཱཡིཾསུ. པམཏྟཱཏི སུརཱཔཱནེན པམཱདཾ ཨཱཔནྣཱ. ཏིདིཝཱཏི མནུསྶཙཱཏུམཧཱརཱཛིཀལོཀེ ཨུཔཱདཱཡ ཏཏིཡལོཀབྷཱུཏཱ དེཝཊྛཱནཱ, ནཱམམེཝ ཝཱ ཨེཏཾ ཏསྶ དེཝཊྛཱནསྶ. སསྶཏིཡཱཏི ཀེཝལཾ དཱིགྷཱཡུཀཏཾ ¶ སནྡྷཱཡ ཝདཏི. སམཱཡཱ སཧ ཨཏྟནོ ཨསུརམཱཡཱཡ, ཨསུརམནྟེཧི སདྡྷིཾ ཙུཏཱཏི ཨཏྠོ. ཨཊྛཀཐཱཡཉྩ ཝུཏྟཾ ‘‘ཨཱགནྟུཀདེཝཔུཏྟཱ ཨཱགཏཱཏི ནེཝཱསིཀཱ གནྡྷཔཱནཾ སཛྫཡིཾསུ. སཀྐོ སཀཔརིསཱཡ སཉྙམདཱསཱི’’ཏི. ཏེནཱཧ ‘‘ཏེསཾ སུརཱཔཱནཾ ཨསཾཝརོ ན ཧོཏཱིཏི ཝཏྟབྦཾ ཧོཏཱི’’ཏི. ཨེཏྠ ཙ ཏཱཝཏིཾསཱནཾ པཱཏུབྷཱཝཏོ པཊྛཱཡ སུརཱཔཱནམྤི ཏཏྠ ནཱཧོསི, པགེཝ པཱཎཱཏིཔཱཏཱདཡོཏི ཝིརམིཏབྦཱབྷཱཝཏོ ཨེཝ ཏཱཝཏིཾསཏོ པཊྛཱཡ ཨུཔརི དེཝལོཀེསུ སམཱདཱནསམྤཏྟཝིརཏིཝསེན པུརེཏབྦཱ སཾཝརཱ ན སནྟི, ལོཀུཏྟརཱ པན སནྟིཡེཝ. ཏཐཱ ཏེཧི པཧཱཏབྦཱ ཨསཾཝརཱ. ན ཧི ཨཔྤཧཱིནཱནུསཡཱནཾ མགྒཝཛ྄ཛྷཱ ཀིལེསཱ ན སནྟཱིཏི.

སཾཝརཀཐཱཝཎྞནཱ ནིཊྛིཏཱ.

ཏཏིཡཝགྒཝཎྞནཱ ནིཊྛིཏཱ.

༤. ཙཏུཏྠཝགྒོ

༡. གིཧིསྶ ཨརཧཱཏིཀཐཱཝཎྞནཱ

༣༨༧. གིཧིཚནྡརཱགསམྤཡུཏྟཏཱཡཱཏི ¶ གིཧིབྷཱཝེ ཀཱམབྷོགིབྷཱཝེ ཚནྡརཱགསཧིཏཏཱཡ.

གིཧིསྶ ཨརཧཱཏིཀཐཱཝཎྞནཱ ནིཊྛིཏཱ.

༤. སམནྣཱགཏཀཐཱཝཎྞནཱ

༣༩༣. པཏྟིནྟི ཨདྷིགམོ. ཨདྷིགམོ ནཱམ སམནྣཱགམོ ཧོཏཱིཏི པཱལི༹ཡཾ ཙཏཱུཧི ཕསྶཱདཱིཧི སམནྣཱགམོ ཙོདིཏོཏི དཊྛབྦཾ.

སམནྣཱགཏཀཐཱཝཎྞནཱ ནིཊྛིཏཱ.

༥. ཨུཔེཀྑཱསམནྣཱགཏཀཐཱཝཎྞནཱ

༣༩༧. སབྦཾ ¶ ཡོཛེཏབྦནྟི ཨེཏྠ ཡདི ཏེ ཨརཧཱ ཙཏཱུཧི ཁནྡྷེཧི ཝིཡ ཚཧི ཨུཔེཀྑཱཧི སམནྣཱགཏོ, ཨེཝཾ སནྟེ ཚ ཨུཔེཀྑཱ པཙྩེཀཾ ཕསྶཱདིསཧིཏཱཏི ‘‘ཚཧི ཕསྶཱདཱིཧི སམནྣཱགཏོ’’ཏིཨཱདིནཱ ཡོཛེཏབྦཾ.

ཨུཔེཀྑཱསམནྣཱགཏཀཐཱཝཎྞནཱ ནིཊྛིཏཱ.

༦. བོདྷིཡཱབུདྡྷོཏིཀཐཱཝཎྞནཱ

༣༩༨. པཏྟིདྷམྨཝསེནཱཏི ‘‘པཏྟིདྷམྨོ ནཱམཱ’’ཏིཨཱདིནཱ ཝུཏྟསྶ ཙིཏྟཝིཔྤཡུཏྟསྶ སངྑཱརསྶ ཝསེན. ‘‘བོདྷིཡཱ བུདྡྷོ’’ཏི པུཙྪཱ. ‘‘བོདྷིཡཱ ནིརུདྡྷཱཡ ཝིགཏཱཡ པཊིཔྤསྶདྡྷཱཡ ཨབུདྡྷོ ཧོཏཱི’’ཏི ཨནུཡོགོ. ཨེཝམཉྙཏྠཱཔི པུཙྪཱནུཡོགཱ ཝེདིཏབྦཱ.

བོདྷིཡཱབུདྡྷོཏིཀཐཱཝཎྞནཱ ནིཊྛིཏཱ.

༧. ལཀྑཎཀཐཱཝཎྞནཱ

༤༠༢. ཏསྨཱཏི ¶ ཡསྨཱ ཨབོདྷིསཏྟསྶཔི ཙཀྐཝཏྟིནོ ལཀྑཎེཧི སམནྣཱགམོ བོདྷིསཏྟསྶཔི ཙརིམབྷཝཏོ ཨཉྙཏྠ ཨསམནྣཱགམོ ཧོཏི, ཏསྨཱ ལཀྑཎསམནྣཱགཏོ བོདྷིསཏྟོཝཱཏི ཨིམསྶཏྠསྶ ཨསཱདྷཀཾ. ཏེནཱཧ ‘‘ཨཱབྷཏམྤི ཨནཱབྷཏསདིསམེཝཱ’’ཏི.

ལཀྑཎཀཐཱཝཎྞནཱ ནིཊྛིཏཱ.

༨. ནིཡཱམོཀྐནྟིཀཐཱཝཎྞནཱ

༤༠༣. པཱརམཱིཔཱུརཎནྟི ¶ ཨིདཾ བོདྷིཙརིཡཱཡ ཨུཔལཀྑཎཾ, ན པཱརམཱིནཾ པུཎྞབྷཱཝདསྶནཾ. ཏེན ཏེསཾ ཨཱརམྦྷསམཱདཱནཱདཱིནམྤི སངྒཧོ ཀཏོཏི དཊྛབྦཾ. མཧཱབྷིནཱིཧཱརཏོ པཊྛཱཡ ཧི མཧཱསཏྟཱ ནིཡཏཱཏི ཝུཙྩནྟི. ཡཐཱཧ – ‘‘ཨེཝཾ སབྦངྒསམྤནྣཱ, བོདྷིཡཱ ནིཡཏཱ ནརཱ’’ཏི, ‘‘དྷུཝཾ བུདྡྷོ བྷཝིསྶཏཱི’’ཏི ཙ, ན ནིཡཱམསྶ ནཱམ ཀསྶཙི དྷམྨསྶ ཨུཔྤནྣཏྟཱ བྱཱཀརོནྟི, ཨཐ ཁོ ཨེཀཾསེནཱཡཾ པཱརམིཡོ པཱུརེཏྭཱ བུདྡྷོ བྷཝིསྶཏཱིཏི ཀཏྭཱ བྱཱཀརོནྟཱིཏི པརཝཱདཱིཔརིཀཔྤིཏཾ དྷམྨནྟརཾ པཊིསེདྷེཏི, ན བོདྷིཡཱ ནིཡཏཏྟཾ. ཏེནཱཧ ‘‘ཀེཝལཉྷི ན’’ནྟིཨཱདི.

ནིཡཱམོཀྐནྟིཀཐཱཝཎྞནཱ ནིཊྛིཏཱ.

༡༠. སབྦསཾཡོཛནཔྤཧཱནཀཐཱཝཎྞནཱ

༤༡༣. སཏིཔི ཀེསཉྩི སཾཡོཛནཱནཾ ཧེཊྛིམམགྒེཧི པཧཱིནཏྟེ ‘‘པཉྩནྣཾ ཨོརམྦྷཱགིཡཱནཾ སཾཡོཛནཱནཾ པརིཀྑཡཱ’’ཏིཨཱདཱིསུ ཝིཡ ཝཎྞབྷཎནམུཁེན ཨནཝསེསཏཉྩ སནྡྷཱཡ སབྦསཾཡོཛནཔྤཧཱནཀིཏྟནཾ པརིཡཱཡཝཙནནྟི ཨཱཧ ‘‘ཨིམཾ པརིཡཱཡཾ ཨགྒཧེཏྭཱ’’ཏི. ཨརཧཏྟམགྒེན པཛཧནཏོ ཨེཝཱཏི གཎྷཱཏཱིཏི ཨགྒམགྒོ ཨེཝ སབྦསཾཡོཛནཱནི པཛཧཏཱིཏི ལདྡྷིཾ གཎྷཱཏཱིཏི ཝདནྟི པདཀཱརཱ. ཨེཝཾ སཏཱིཏི ཡདི ཨནཝསེསཏཱམཏྟེན ཏཐཱ པཊིཛཱནཱཏི.

སབྦསཾཡོཛནཔྤཧཱནཀཐཱཝཎྞནཱ ནིཊྛིཏཱ.

ཙཏུཏྠཝགྒཝཎྞནཱ ནིཊྛིཏཱ.

༥. པཉྩམཝགྒོ

༡. ཝིམུཏྟིཀཐཱཝཎྞནཱ

༤༡༨. ཕལཉཱཎཾ ¶ ¶ ན ཧོཏི, སེསཱནི ཝིཔསྶནཱམགྒཔཙྩཝེཀྑཎཉཱཎཱནི ཝིམུཏྟཱནཱིཏི ན ཝཏྟབྦཱནཱིཏི སམྦནྡྷོ. ཨེཏྠཱཏི ཨེཏེསུ ཙཏཱུསུ ཉཱཎེསུ. ཝིཔསྶནཱགྒཧཎེན གཧིཏཾ མགྒཱདིཀིཙྩཝིདཱུརཀིཙྩཏྟཱ ཝིཔསྶནཱཔརིཡོསཱནཏྟཱ ཙ.

ཝིམུཏྟིཀཐཱཝཎྞནཱ ནིཊྛིཏཱ.

༢. ཨསེཁཉཱཎཀཐཱཝཎྞནཱ

༤༢༡. ཨསེཁེ ཨཱརབྦྷ པཝཏྟཏྟཱ ཨསེཁཉཱཎནྟི པརསྶ ལདྡྷི, ན ཨསེཁེ ཨསེཁདྷམྨེ པརིཡཱཔནྣནྟི ཨིམམཏྠམཱཧ ‘‘ཨེཏེན…པེ… དསྶེཏཱི’’ཏི.

ཨསེཁཉཱཎཀཐཱཝཎྞནཱ ནིཊྛིཏཱ.

༣. ཝིཔརཱིཏཀཐཱཝཎྞནཱ

༤༢༤. ཨསིཝེ སིཝཱཏི ཝོཧཱརཾ ཝིཡ ཨཉྙཱཎེ…པེ… ཝདཏི.

ཝིཔརཱིཏཀཐཱཝཎྞནཱ ནིཊྛིཏཱ.

༤. ནིཡཱམཀཐཱཝཎྞནཱ

༤༢༨-༤༣༡. ཡནྟི ¶ ཡཾ ཉཱཎཾ. སཙྩཱནུལོམནྟི སཙྩཔྤཊིཝེདྷཱནུཀཱུལཾ. ཝིཔརཱིཏཱནུཡོགཏོ པབྷུཏི གཎེཏྭཱ ‘‘ཙཏུཏྠ’’ནྟི ཨཱཧ ན ཨནིཡཏསྶ ནིཡཱམགམནཱཡཱཏི ཨཝིཔརཱིཏཱནུཡོགཏོ པབྷུཏི གཎེཏྭཱ, ཏཐཱ སཏི པཉྩམབྷཱཝཏོ ཝིསེསབྷཱཝཏོ ཙ.

ནིཡཱམཀཐཱཝཎྞནཱ ནིཊྛིཏཱ.

༥. པཊིསམྦྷིདཱཀཐཱཝཎྞནཱ

༤༣༢-༤༣༣. སབྦཾ ¶ ཉཱཎནྟི ཨིདཾ ‘‘ཨརིཡཱན’’ནྟི ཨིམིནཱ ན ཝིསེསིཏནྟི ཨདྷིཔྤཱཡེནཱཧ ‘‘ཨནརིཡཱནམྤི ཧི ཉཱཎཾ ཉཱཎམེཝཱ’’ཏི. ཨཐ ཝཱ པཱལི༹ཡཾ ཨཝིསེསེན སབྦཾ ཉཱཎནྟི ཝུཏྟཾ གཧེཏྭཱ ཨེཝམཱཧ. ཨརིཡསྶ ཙེ ཉཱཎནྟི, སོ པན པཊིཀྑེཔེཡྻཱཏི ཨཱཧ ‘‘ཨནརིཡསྶ ཨེཏཾ ཉཱཎཾ སནྡྷཱཡཱ’’ཏི.

པཊིསམྦྷིདཱཀཐཱཝཎྞནཱ ནིཊྛིཏཱ.

༧. ཙིཏྟཱརམྨཎཀཐཱཝཎྞནཱ

༤༣༦-༤༣༨. ཝཏྟབྦཔཊིཉྙཱཏི ཕསྶཱརམྨཎེ ཉཱཎཾ ཝཏྟབྦཾ ཙེཏོཔརིཡཉཱཎནྟི ཨེཝཾ པཝཏྟཱ པཊིཉྙཱ.

ཙིཏྟཱརམྨཎཀཐཱཝཎྞནཱ ནིཊྛིཏཱ.

༨. ཨནཱགཏཉཱཎཀཐཱཝཎྞནཱ

༤༣༩-༤༤༠. ཨནནྟརཱནཱགཏེཔི ¶ ཙིཏྟེ ཉཱཎཾ ཨིཙྪནྟི, ཏཏྠ པན ཁཎཔཙྩུཔྤནྣེ ཝིཡ ཏཱདིསེན པརིཀམྨེན ཀདཱཙི ཉཱཎཾ ཨུཔྤཛྫེཡྻ. ཏེནཱཧ ‘‘ཨནནྟརེ ཨེཀནྟེནེཝ ཉཱཎཾ ནཏྠཱི’’ཏི.

ཨནཱགཏཉཱཎཀཐཱཝཎྞནཱ ནིཊྛིཏཱ.

༩. པཊུཔྤནྣཉཱཎཀཐཱཝཎྞནཱ

༤༤༡-༤༤༢. ‘‘སབྦསངྑཱརེསུ ཨནིཙྩཏོ དིཊྛེསཱུ’’ཏི ཝུཏྟེ ཡཾ དསྶནབྷཱུཏཾ ཉཱཎཾ, ཏམྤི སངྑཱརསབྷཱཝཏྟཱ ཏཐཱདིཊྛཾ སིཡཱཏི ཨཏྠཏོ ཨཱཔཛྫཏི, ཨེཝཾབྷཱུཏཾ ཝཙནཾ སནྡྷཱཡཱཧ ‘‘ཨཏྠཏོ ཨཱཔནྣཾ ཝཙན’’ནྟི. ཏཾ པན ཡསྨཱ ‘‘ཏམྤི ཉཱཎཾ ཨནིཙྩཏོ དིཊྛཾ ཧོཏཱི’’ཏི པཊིཛཱནནཝསེན པཝཏྟཾ, ཏསྨཱ ‘‘ཨནུཛཱནནཝཙན’’ནྟི ཝུཏྟཾ. བྷངྒཱནུཔསྶནཱནཾ པབནྡྷཝསེན པཝཏྟམཱནཱནཾ.

པཊུཔྤནྣཉཱཎཀཐཱཝཎྞནཱ ནིཊྛིཏཱ.

༡༠. ཕལཉཱཎཀཐཱཝཎྞནཱ

༤༤༣-༤༤༤. ཕལཔརོཔརིཡཏྟཾ ¶ ཕལསྶ ཨུཙྩཱཝཙཏཱ. བལེནཱཏི ཉཱཎབལེན.

ཕལཉཱཎཀཐཱཝཎྞནཱ ནིཊྛིཏཱ.

པཉྩམཝགྒཝཎྞནཱ ནིཊྛིཏཱ.

མཧཱཔཎྞཱསཀོ སམཏྟོ.

༦. ཚཊྛཝགྒོ

༡. ནིཡཱམཀཐཱཝཎྞནཱ

༤༤༥-༤༤༧. ཨེཏསྶ ¶ ཨརིཡསྶ པུགྒལསྶ.

ནིཡཱམཀཐཱཝཎྞནཱ ནིཊྛིཏཱ.

༢. པཊིཙྩསམུཔྤཱདཀཐཱཝཎྞནཱ

༤༥༡. ཀཱརཎཊྛེན ཋིཏཏཱཏི ཀཱརཎབྷཱཝེན བྱབྷིཙརཎཱབྷཱཝམཱཧ. ཡོ ཧི དྷམྨོ ཡསྶ དྷམྨསྶ ཡདཱ ཀཱརཎཾ ཧོཏི, ན ཏསྶ ཏདཱ ཨཉྙཐཱབྷཱཝོ ཨཏྠི, སཱ ཙ ཨཏྠཏོ ཀཱརཎབྷཱཝོཡེཝཱཏི ‘‘ཀཱརཎབྷཱཝོཡེཝཱ’’ཏི ཨཱཧ.

པཊིཙྩསམུཔྤཱདཀཐཱཝཎྞནཱ ནིཊྛིཏཱ.

༥. ནིརོདྷསམཱཔཏྟིཀཐཱཝཎྞནཱ

༤༥༧-༤༥༩. སབྷཱཝདྷམྨཏཾ པཊིསེདྷེཏི ཏདུབྷཡལཀྑཎརཧིཏསྶ སབྷཱཝདྷམྨསྶ ཨབྷཱཝཱ. ‘‘ཝོདཱནམྤི ཝུཊྛཱན’’ནྟི ཝཙནཏོ ‘‘ཝོདཱནཉྩ ཝུཊྛཱནཔརིཡཱཡོཝཱ’’ཏི ཨཱཧ. སབྷཱཝདྷམྨཏྟེ སིདྡྷེ སངྑཏཝིདཱུརཏཱཡ ཨསངྑཏཾ སིཡཱཏི ཨཱཧ ‘‘སབྷཱཝདྷམྨཏྟཱསཱདྷཀཏྟཱ’’ཏི.

ནིརོདྷསམཱཔཏྟིཀཐཱཝཎྞནཱ ནིཊྛིཏཱ.

ཚཊྛཝགྒཝཎྞནཱ ནིཊྛིཏཱ.

༧. སཏྟམཝགྒོ

༡. སངྒཧིཏཀཐཱཝཎྞནཱ

༤༧༡-༤༧༢. སངྒཧིཏཱཏི ¶ ¶ སངྒཧཎཱདིཝསེན སདྡྷིཾ གཧིཏཱ. ཏེ པན ཡསྨཱ ཨེཀཝིདྷཏཱདིསཱམཉྙེན བནྡྷཱ ཝིཡ ཧོནྟི, ཏསྨཱ ཨཱཧ ‘‘སམྦནྡྷཱ’’ཏི.

སངྒཧིཏཀཐཱཝཎྞནཱ ནིཊྛིཏཱ.

༢. སམྤཡུཏྟཀཐཱཝཎྞནཱ

༤༧༣-༤༧༤. ཨནུཔྤཝིསིཏབྦཱནུཔྤཝིསནབྷཱཝོ ཏེསཾ བྷེདེ སཏི ཡུཛྫེཡྻ, ནཱཉྙཐཱཏི ཨུཔམཱབྷིནྡནེན ཨུཔམེཡྻསྶ བྷིནྣཏཾ དསྶེནྟོ ‘‘ནཱནཏྟཝཝཏྠཱ…པེ… དསྶེཏཱི’’ཏི ཨཱཧ.

སམྤཡུཏྟཀཐཱཝཎྞནཱ ནིཊྛིཏཱ.

༣. ཙེཏསིཀཀཐཱཝཎྞནཱ

༤༧༥-༤༧༧. ཕསྶིཀཱདཡོཏི ཨེཏྠ ཨཱདི-སདྡོ ཝཝཏྠཱཝཱཙཱི. ཏེན ཙིཏྟུཔྤཱདདེསནཱཡཾ དསྶིཏཔྤབྷེདཱ ཝེདནཱདཡོ གཡ྄ཧནྟི, ན ཏཾསམུཊྛཱནཱ རཱུཔདྷམྨཱཏི ཨཱཧ ‘‘ཨེཀུཔྤཱདཏཱདིཝིརཧིཏཱ སཧཛཱཏཏཱ ནཏྠཱི’’ཏི.

ཙེཏསིཀཀཐཱཝཎྞནཱ ནིཊྛིཏཱ.

༤. དཱནཀཐཱཝཎྞནཱ

༤༧༩. ཕལདཱནབྷཱཝདཱིཔནཏྠནྟི ¶ ཕལདཱནསབྦྷཱཝདཱིཔནཏྠཾ. ཕལདཱནཾ ཝུཏྟཾ ཝིཡ ཧོཏཱིཏི ཙིཏྟེན ཕལདཱནཾ པདྷཱནབྷཱཝེ ཝུཏྟཾ ཝིཡ ཧོཏཱིཏི ཨཏྠོ. ཨཉྙཐཱ དཱནབྷཱཝོཏི ན སཀྐཱ ཝཏྟུཾ. དཱནབྷཱཝོཔི ཧི ‘‘དཱནཾ ཨནིཊྛཕལ’’ནྟིཨཱདིནཱ ཝུཏྟོཡེཝཱཏི. ཏནྣིཝཱརཎཏྠནྟི ཕལདཱནནིཝཱརཎཏྠཾ. ཨེཏནྟི ‘‘དཱནཾ ཨནིཊྛཕལ’’ནྟིཨཱདིཝཙནཾ. བྷེསཛྫཱདིཝསེན ཨཱབཱདྷཱནིཊྛཏཱ དེཡྻདྷམྨསྶ ཨནིཊྛཕལཏཱཔརིཡཱཡོ དཊྛབྦོ.

ཀཐཾ ¶ ཏཐེཝ སུཏྟཾ སཀཝཱདིཔརཝཱདིཝཱདེསུ ཡུཛྫཏཱིཏི ཙོདནཱཡ ‘‘ན པན ཨེཀེནཏྠེནཱ’’ཏི ཝུཏྟཾ ཝིབྷཱཝེཏུཾ ‘‘དེཡྻདྷམྨོཝ དཱན’’ནྟིཨཱདི ཝུཏྟཾ. ཏཏྠ ནིཝཏྟནཔཀྑེཡེཝ ཨེཝ-ཀཱརོ ཡུཏྟོ, ན སཱདྷནཔཀྑེ དྭིནྣམྤི དཱནབྷཱཝསྶ ཨིཙྪིཏཏྟཱ. ཏེནཱཧ ‘‘ཙེཏསིཀོཝཱཏི ཨཏྠོ དཊྛབྦོ, དེཡྻདྷམྨོཝཱ’’ཏི ཙ. ཏེནེཝཱཧ ‘‘དྭིནྣཉྷི དཱནཱནནྟིཨཱདི. སངྐརབྷཱཝམོཙནཏྠནྟི སཏིཔི དཱནབྷཱཝེ སབྷཱཝསངྐརམོཙནཏྠཾ. ཏེནཱཧ ‘‘ཙེཏསིཀསྶཱ’’ཏིཨཱདི.

དཱནཀཐཱཝཎྞནཱ ནིཊྛིཏཱ.

༥. པརིབྷོགམཡཔུཉྙཀཐཱཝཎྞནཱ

༤༨༥. ཏསྶཱ ལདྡྷིཡཱཏི པཉྩནྣཾ ཝིཉྙཱཎཱནཾ སམོདྷཱནཾ ཧོཏཱིཏི ལདྡྷིཡཱ. ཨེཏེསནྟི ཝཏྟམཱནཙིཏྟཔརིབྷོགམཡཔུཉྙཱནཾ.

༤༨༦. ཨཡཾ ཝཱདོ ཧཱིཡཏི པརིབྷོགསྶེཝ ཨབྷཱཝཏོ. ཙཱགཙེཏནཱཡ ཨེཝ པུཉྙབྷཱཝོ, ན ཙིཏྟཝིཔྤཡུཏྟསྶ. ཨེཝནྟི ཨིམིནཱ པཀཱརེན, ཨཔརིབྷུཏྟེ དེཡྻདྷམྨེ པུཉྙབྷཱཝེནཱཏི ཨཏྠོ. ཨཔརིབྷུཏྟེ དེཡྻདྷམྨེ པུཉྙབྷཱཝཏོ ཨེཝ ཧི པུཐུཛྫནཀཱལེ དིནྣཾ ཨརཧཱ ཧུཏྭཱ པརིབྷུཉྫནྟེ ཏམྤི པུཐུཛྫནེ དཱནམེཝཱཏི ནིཙྪིཏཾ. པརཝཱདཱིཔཊིཀྑེཔམུཁེན སཀཝཱདཾ པཏིཊྛཱཔེཏི པཋམོ ཨཏྠཝིཀཔྤོ, དུཏིཡོ པན ཨུཛུཀམེཝ སཀཝཱདཾ པཏིཊྛཱཔེཏཱིཏི ཨཡམེཏེསཾ ཝིསེསོ.

པརིབྷོགམཡཔུཉྙཀཐཱཝཎྞནཱ ནིཊྛིཏཱ.

༦. ཨིཏོདིནྣཀཐཱཝཎྞནཱ

༤༨༨-༤༩༡. ཏེནེཝ ¶ ཙཱིཝརཱདིདཱནེནཱཏི ཨནུམོདནཾ ཝིནཱ དཱཡཀེན པཝཏྟིཏཙཱིཝརཱདིདཱནེན. ཏེནཱཧ ‘‘སཡཾཀཏེན ཀམྨུནཱ ཝིནཱཔཱི’’ཏི. ཨིམིནཱ ཀཱརཎེནཱཏི ཨནུམོདིཏཏྟཱཝ ཏེསཾ ཏཏྠ བྷོགཱ ཨུཔྤཛྫནྟཱིཏི ཨེཏེན ཀཱརཎེན. ཡདི ཡནྟིཨཱདི པརཝཱདིནོ ལདྡྷིཔཏིཊྛཱཔནཱཀཱརདསྶནཾ. ཏཏྠ ཡདི ན ཡཱཔེཡྻུཾ, ཀཐཾ ཨནུམོདེཡྻུཾ, ཙིཏྟཾ པསཱདེཡྻུཾ ¶ , པཱིཏིཾ ཨུཔྤཱདེཡྻུཾ, སོམནསྶཾ པཊིལབྷེཡྻུནྟི ཨེཀཙྩེ ཨཉྙེ པེཏེ ཨནུམོདནཱདཱིནི ཀཏྭཱ ཡཱཔེནྟེ དིསྭཱ ཨནུམོདནཱདཱིནི ཀརོནྟི, ཏསྨཱ ཏེ ཨིཏོ དིནྣེན ཡཱཔེནྟཱིཏི ཨདྷིཔྤཱཡོ.

ཨིཏོདིནྣཀཐཱཝཎྞནཱ ནིཊྛིཏཱ.

༧. པཐཝཱིཀམྨཝིཔཱཀོཏིཀཐཱཝཎྞནཱ

༤༩༢. ཨཏྟཝཛྫེཧཱིཏི ཕསྶཝཛྫེཧི. ན ཧི སོ ཨེཝ ཏེན སམྤཡུཏྟོ ཧོཏི. སོཏི ཕསྶམེཝ པཙྩཱམསཏི. སཱཝཛྫནེཏི ཨཱཝཛྫནསཧིཏེ, ཨཱཝཛྫནཾ པུརེཙཱརིཀཾ ཀཏྭཱ ཨེཝ པཝཏྟནཀེཏི ཨཏྠོ. ཀམྨཱུཔནིསྶཡབྷཱུཏམེཝཱཏི ཡེན ཀམྨུནཱ ཡཐཱཝུཏྟཱ ཕསྶཱདཡོ ནིབྦཏྟིཏཱ, ཏསྶ ཀམྨསྶ ཨུཔནིསྶཡབྷཱུཏམེཝ. དུཀྑསྶཱཏི ཨཱཡཏིཾ ཨུཔྤཛྫནཀདུཀྑསྶ. ‘‘མཱུལཏཎྷཱ’’ཏི དསྶེཏཱིཏི ཡོཛནཱ, ཏཐཱ ‘‘ཨུཔནིསྶཡབྷཱུཏ’’ནྟི ཨེཏྠཱཔི. ཀམྨཱཡཱུཧནསྶ ཀཱརཎབྷཱུཏཱ པུརིམསིདྡྷཱ ཏཎྷཱ ཀམྨསྶ ཨུཔནིསྶཡོ, ཀཏཱུཔཙིཏེ ཀམྨེ བྷཝཱདཱིསུ ནམནཝསེན པཝཏྟཱ ཧི ཝིཔཱཀསྶ ཨུཔནིསྶཡོ.

༤༩༣. ཨོཀཱསཀཏུཔྤནྣཾ ཨཁེཔེཏྭཱ པརིནིབྦཱནབྷཱཝོ སཀསམཡཝསེན ཙོདནཱཡ ཡུཛྫམཱནཏཱ.

༤༩༤. ཀམྨེ སཏཱིཏི ཨིམིནཱ ཀམྨསྶ པཐཝཱིཨཱདཱིནཾ པཙྩཡཏཱམཏྟམཱཧ, ན ཛནཀཏྟཾ. ཏེནཱཧ ‘‘ཏཾསཾཝཏྟནིཀཾ ནཱམ ཧོཏཱི’’ཏི.

པཐཝཱིཀམྨཝིཔཱཀོཏིཀཐཱཝཎྞནཱ ནིཊྛིཏཱ.

༨. ཛརཱམརཎཾཝིཔཱཀོཏིཀཐཱཝཎྞནཱ

༤༩༥. ཨེཀཱརམྨཎཱཏི ¶ ཨིདཾ ཨནཱརམྨཎཏཱསཱདྷནཝསེན སམྤཡོགལཀྑཎཱབྷཱཝསྶ ཨུདྡྷཊཏྟཱ ཝུཏྟཾ, ན ཏསྶེཝ སམྤཡོགལཀྑཎཏྟཱ.

༤༩༦. ཨབྱཱཀཏཱནནྟི ཝིཔཱཀཱབྱཱཀཏཱནཾ. ཨིཏརཏྠ ཝཏྟབྦམེཝ ནཏྠི.

༤༩༧. ཏནྟི ‘‘ཨཔརིསུདྡྷཝཎྞཏཱ ཛརཱཡེཝཱ’’ཏི ཝཙནཾ.

ཛརཱམརཎཾཝིཔཱཀོཏིཀཐཱཝཎྞནཱ ནིཊྛིཏཱ.

༡༠. ཝིཔཱཀོཝིཔཱཀདྷམྨདྷམྨོཏིཀཐཱཝཎྞནཱ

༥༠༡. ཝིཔཱཀོ ¶ ཝིཔཱཀསྶ པཙྩཡོ ཧོནྟོ ཨཉྙམཉྙཔཙྩཡོ ཧོཏཱིཏི ཨདྷིཔྤཱཡེནཱཧ ‘‘ཡསྶ ཝིཔཱཀསྶ ཝིཔཱཀོ ཨཉྙམཉྙཔཙྩཡོ ཧོཏཱི’’ཏི. ‘‘ཏཔྤཙྩཡཱཔི ཨཉྙསྶ ཝིཔཱཀསྶ ཨུཔྤཏྟིཾ སནྡྷཱཡཱ’’ཏིཨཱདིཝཙནཏོ པན ཛཱཏིཛརཱམརཎཱདཱིནཾ ཨུཔནིསྶཡཔཙྩཡོཏི སཀྐཱ ཝིཉྙཱཏུཾ. པུརིམཔཊིཉྙཱཡཱཏི ‘‘ཝིཔཱཀོ ཝིཔཱཀདྷམྨདྷམྨོ’’ཏི པཊིཉྙཱཡ. ཨིམསྶ ཙོདནསྶཱཏི ‘‘ཝིཔཱཀོ ཙ ཝིཔཱཀདྷམྨདྷམྨོ ཙཱ’’ཏིཨཱདིནཱ པཝཏྟསྶ ཙོདནསྶ.

ཝིཔཱཀོཝིཔཱཀདྷམྨདྷམྨོཏིཀཐཱཝཎྞནཱ ནིཊྛིཏཱ.

སཏྟམཝགྒཝཎྞནཱ ནིཊྛིཏཱ.

༨. ཨཊྛམཝགྒོ

༡. ཚགཏིཀཐཱཝཎྞནཱ

༥༠༣-༥༠༤. ཝཎྞཱ ¶ ཨེཝ ནཱིལཱདིཝསེན ནིབྷཱཏཱིཏི ཝཎྞནིབྷཱ, ཝཎྞཱཡཏནནྟི ཨཏྠོ. སཎྛཱནཾ དཱིགྷཱདི.

ཚགཏིཀཐཱཝཎྞནཱ ནིཊྛིཏཱ.

༢. ཨནྟརཱབྷཝཀཐཱཝཎྞནཱ

༥༠༥. ཨནྟརཊྛཱནཱནཱིཏི ཨནྟརིཀཊྛཱནཱནི. ནིཝཱརཀཊྛཱནཱནི བྷིནྡིཏྭཱ ཙ ཨཱཀཱསེན ཙ གམནཏོ. ཡདི སོ བྷཝཱནཾ ཨནྟརཱ ན སིཡཱཏི སོ ཨནྟརཱབྷཝོ ཀཱམབྷཝཱདཱིནཾ བྷཝཱནཾ ཨནྟརེ ཡདི ན བྷཝེཡྻ. ན ནཱམ ཨནྟརཱབྷཝོཏི ‘‘སབྦེན སབྦཾ ནཏྠི ནཱམ ཨནྟརཱབྷཝོ’’ཏི ཨེཝཾ པཝཏྟསྶ སཀཝཱདིཝཙནསྶ པཊིཀྑེཔེ ཀཱརཎཾ ནཏྠི, ཏསྶ པཊིཀྑེཔེ ཀཱརཎཾ ཧདཡེ ཋཔེཏྭཱ ན པཊིཀྑིཔཏི, ཨཐ ཁོ ཏཐཱ ཨནིཙྪནྟོ ཀེཝལཾ ལདྡྷིཡཱ པཊིཀྑིཔཏཱིཏི ཨཏྠོ.

༥༠༦. ཛཱཏཱིཏི ན ཨིཙྪཏཱིཏི སམྦནྡྷོ.

༥༠༧. ཨེཝཾ ¶ ཏཾ ཏཏྠ ན ཨིཙྪཏཱིཏི ཀཱམབྷཝཱདཱིསུ ཝིཡ ཏཾ ཙུཏིཔཊིསནྡྷིཔརམྤརཾ ཏཏྠ ཨནྟརཱབྷཝཱཝཏྠཱཡ ན ཨིཙྪཏི. སོ ཧི ཏསྶ བྷཱཝིབྷཝནིབྦཏྟཀཀམྨཏོ ཨེཝ པཝཏྟིཾ ཨིཙྪཏི, ཏསྨཱ ཛཱཏིཛརཱམརཎཱནི ཨནིཙྩཏོ ཀུཏོ ཙུཏིཔཊིསནྡྷིཔརམྤརཱ. ཨཡཉྩ ཝཱདོ ཨནྟརཱབྷཝཝཱདཱིནཾ ཨེཀཙྩཱནཾ ཝུཏྟོ. ཡེ ‘‘ཨཔྤཀེན ཀཱལེན སཏྟཱཧེནེཝ ཝཱ པཊིསནྡྷིཾ པཱཔུཎཱཏཱི’’ཏི ཝདནྟི, ཡེ པན ‘‘ཏཏྠེཝ ཙཝིཏྭཱ ཨཱཡཱཏཱིཏི སཏྟསཏྟཱཧཱནཱི’’ཏི ཝདནྟི, ཏེཧི ཨནུཉྙཱཏཱཝ ཙུཏིཔཊིསནྡྷིཔརམྤརཱཏི ཏེ ཨདྷུནཱཏནཱ དཊྛབྦཱ པཱལི༹ཡཾ ‘‘ཨནྟརཱབྷཝེ སཏྟཱ ཛཱཡནྟི ཛཱིཡནྟི མཱིཡནྟི ཙཝནྟི ཨུཔཔཛྫནྟཱིཏི? ན ཧེཝཾ ཝཏྟབྦེ’’ཏི ཨཱགཏཏྟཱ. ཡཐཱ ཙེཏཾ, ཨེཝཾ ནིརཡཱུཔགཱདིབྷཱཝམྤིསྶ ཨདྷུནཱཏནཱ པཊིཛཱནནྟི. ཏཐཱ ཧི ཏེ ཝདནྟི ‘‘ཨུདྡྷཾཔཱདོ ཏུ ¶ ནཱརཀོ’’ཏིཨཱདི. ཏཏྠ ཡཾ ནིསྶཱཡ པརཝཱདཱི ཨནྟརཱབྷཝཾ ནཱམ པརིཀཔྤེཏི, ཏཾ དསྶེཏུཾ ཨཊྛཀཐཱཡཾ ‘‘ཨནྟརཱཔརིནིབྦཱཡཱིཏི སུཏྟཔདཾ ཨཡོནིསོ གཧེཏྭཱ’’ཏི ཝུཏྟཾ. ཨིམསྶ ཧི ‘‘ཨཝིཧཱདཱིསུ ཏཏྠ ཏཏྠ ཨཱཡུཝེམཛ྄ཛྷཾ ཨནཏིཀྐམིཏྭཱ ཨནྟརཱ ཨགྒམགྒཱདྷིགམེན ཨནཝསེསཀིལེསཔརིནིབྦཱནེན པརིནིབྦཱཡཏི, ཨནྟརཱཔརིནིབྦཱཡཱི’’ཏི སུཏྟཔདསྶ ཨཡམཏྠོ, ན ཨནྟརཱབྷཝབྷཱུཏོཏི. ཏསྨཱ ཝུཏྟཾ ‘‘ཨནྟརཱཔརིནིབྦཱཡཱིཏི སུཏྟཔདཾ ཨཡོནིསོ གཧེཏྭཱ’’ཏི.

ཡེ པན ‘‘སམྦྷཝེསཱིཏི ཝཙནཏོ ཨཏྠེཝ ཨནྟརཱབྷཝོ. སོ ཧི སམྦྷཝཾ ཨུཔཔཏྟིཾ ཨེསཏཱིཏི སམྦྷཝེསཱི’’ཏི ཝདནྟི, ཏེཔི ཡེ བྷཱུཏཱཝ ན པུན བྷཝིསྶནྟི, ཏེ ཁཱིཎཱསཝཱ ‘‘བྷཱུཏཱནཾ ཝཱ སཏྟཱནཾ ཋིཏིཡཱ’’ཏི ཨེཏྠ ‘‘བྷཱུཏཱ’’ཏི ཝུཏྟཱ. ཏབྦིདྷུརཏཱཡ སམྦྷཝམེསནྟཱིཏི སམྦྷཝེསིནོ, ཨཔྤཧཱིནབྷཝསཾཡོཛནཏྟཱ སེཀྑཱ པུཐུཛྫནཱ. ཙཏཱུསུ ཝཱ ཡོནཱིསུ ཨཎྜཛཛལཱབུཛཱ སཏྟཱ ཡཱཝ ཨཎྜཀོསཾ ཝཏྠིཀོསཉྩ ན བྷིནྡནྟི, ཏཱཝ སམྦྷཝེསཱི ནཱམ, ཨཎྜཀོསཏོ ཝཏྠིཀོསཏོ ཙ ནིཀྑནྟཱ བྷཱུཏཱ ནཱམ. སཾསེདཛཨོཔཔཱཏིཀཱ ཙ པཋམཙིཏྟཀྑཎེ སམྦྷཝེསཱི ནཱམ, དུཏིཡཙིཏྟཀྑཎཏོ པཊྛཱཡ བྷཱུཏཱ ནཱམ. ཡེན ཝཱ ཨིརིཡཱཔཐེན ཛཱཡནྟི, ཡཱཝ ཏཏོ ཨཉྙཾ ན པཱཔུཎནྟི, ཏཱཝ སམྦྷཝེསཱི ནཱམ, ཏཏོ པརཾ བྷཱུཏཱ ནཱམཱཏི ཨེཝཾ ཨུཛུཀེ པཱལི༹ཨནུགཏེ ཨཏྠེ སཏི ཀིཾ ཨནིདྡྷཱརིཏསྶ པཏྠིཡེན ཨནྟརཱབྷཝེན ཨཏྟབྷཱཝེན པརིཀཔྤིཏེན པཡོཛནནྟི པཊིཀྑིཔིཏབྦཱ.

ཡཾ ¶ པནེཀེ ‘‘སནྟཱནཝསེན པཝཏྟམཱནཱནཾ དྷམྨཱནཾ ཨཝིཙྪེདེན དེསནྟརེསུ པཱཏུབྷཱཝོ དིཊྛོ. ཡཐཱ ཏཾ ཝཱིཧིཨཱདིཨཝིཉྙཱཎཀསནྟཱནེ, ཨེཝཾ སཝིཉྙཱཎཀསནྟཱནེཔི ཨཝིཙྪེདེན དེསནྟརེ པཱཏུབྷཱཝེན བྷཝིཏབྦཾ. ཨཡཉྩ ནཡོ སཏི ཨནྟརཱབྷཝེ ཡུཛྫཏི, ནཱཉྙཐཱ’’ཏི ཡུཏྟིཾ ཝདནྟི, ཏེཧི ཨིདྡྷིམཏོ ཙེཏོཝསིཔྤཏྟསྶ ཙིཏྟཱནུགཏིཀཾ ཀཱཡཾ ཨདྷིཊྛཧནྟསྶ ཁཎེན བྲཧྨལོཀཏོ ཨིདྷཱུཔསངྐམནེ ཨིཏོ ཝཱ བྲཧྨལོཀཱུཔགམནེ ཡུཏྟི ཝཏྟབྦཱ. ཡདི སབྦཏྠེཝ ཝིཙྪིནྣདེསེ དྷམྨཱནཾ པཝཏྟི ན ཨིཙྪིཏཱ, ཡདིཔི སིཡཱ ‘‘ཨིདྡྷིམནྟཱནཾ ཨིདྡྷིཝིསཡོ ཨཙིནྟེཡྻོ’’ཏི, ཏཾ ཨིདྷཱཔི སམཱནཾ ‘‘ཀམྨཝིཔཱཀོ ཨཙིནྟེཡྻོ’’ཏི ཝཙནཏོ, ཏསྨཱ ཏཾ ཏེསཾ མཏིམཏྟམེཝ. ཨཙིནྟེཡྻསབྷཱཝཱ ཧི སབྷཱཝདྷམྨཱ, ཏེ ཀཏྠཙི པཙྩཡཝསེན ཝིཙྪིནྣདེསེ པཱཏུབྷཝནྟི, ཀཏྠཙི ཨཝིཙྪིནྣདེསེ ཙ. ཏཐཱ ཧི མུཁགྷོསཱདཱིཧི པཙྩཡེཧི ཨཉྙསྨིཾ དེསེ ཨཱདཱསཔབྦཏཔདེསཱདིཀེ པཊིབིམྦཔཊིགྷོསཱདིཀཾ ནིབྦཏྟམཱནཾ དིཊྛནྟི.

ཨེཏྠཱཧ ¶ – པཊིབིམྦཾ ཏཱཝ ཨསིདྡྷཏྟཱ ཨསདིསཏྟཱ ཙ ན ནིདསྶནཾ. པཊིབིམྦཉྷི ནཱམ ཨཉྙདེཝ རཱུཔནྟརཾ ཨུཔྤཛྫཏཱིཏི ཨསིདྡྷམེཏཾ. སིདྡྷིཡམྤི ཨསདིསཏྟཱ ན ནིདསྶནཾ སིཡཱ ཨེཀསྨིཾ ཋཱནེ དྭིནྣཾ སཧཋཱནཱབྷཱཝཏོ. ཡཏྠེཝ ཧི ཨཱདཱསརཱུཔཾ པཊིབིམྦརཱུཔཉྩ དིསྶཏི, ན ཙ ཨེཀསྨིཾ དེསེ རཱུཔདྭཡསྶ སཧབྷཱཝོ ཡུཏྟོ ནིསྶཡབྷཱུཏདེསཏོ, ཨསདིསཉྩེཏཾ སནྡྷཱནཏོ. ན ཧི མུཁསྶ པཊིབིམྦསནྡྷཱནབྷཱུཏཾ ཨཱདཱསསནྡྷཱནསམྦནྡྷཏྟཱ སནྡྷཱནཾ ཨུདྡིསྶ ཨཝིཙྪེདེན དེསནྟརེ པཱཏུབྷཱཝོ ཝུཙྩཏི, ན ཨསནྟཱནནྟི ཨསམཱནམེཝ ཏནྟི.

ཏཏྠ ཡཾ ཝུཏྟཾ ‘‘པཊིབིམྦཾ ནཱམ ཨཉྙདེཝ རཱུཔནྟརཾ ཨུཔྤཛྫཏཱིཏི ཨསིདྡྷཾ ཨེཀསྨིཾ ཋཱནེ དྭིནྣཾ སཧཋཱནབྷཱཝཏོ’’ཏི, ཏཡིདཾ ཨསནྟཱནམེཝ སཧཋཱནཾ ཙོདིཏཾ བྷིནྣནིསྶཡཏྟཱ. ན ཧི བྷིནྣནིསྶཡཱནཾ སཧཋཱནཾ ཨཏྠི. ཡཐཱ ཨནེཀེསཾ མཎིདཱིཔཱདཱིནཾ པབྷཱརཱུཔཾ ཨེཀསྨིཾ པདེསེ པཝཏྟམཱནཾ ཨཙྪིཏམཱནཏཱཡ ནིརནྟརཏཱཡ ཙ ཨབྷིནྣཊྛཱནཾ ཝིཡ པཉྙཱཡཏི, བྷིནྣནིསྶཡཏྟཱ པན བྷིནྣཊྛཱནམེཝ ཏཾ, གཧཎཝིསེསེན ཏཐཱཨབྷིནྣཊྛཱནམཏྟཾ, ཨེཝཾ ཨཱདཱསརཱུཔཔཊིབིམྦརཱུཔེསུཔི དཊྛབྦཾ. ཏཱདིསཔཙྩཡསམཝཱཡེན ཧི ཏཏྠ ཏཾ ཨུཔྤཛྫཏི ཙེཝ ཝིགཙྪཏི ཙ, ཨེཝཉྩེཏཾ སམྤཊིཙྪིཏབྦཾ ཙཀྑུཝིཉྙཱཎསྶ གོཙརབྷཱཝཱུཔགམནཏོ. ཨཉྙཐཱ ཨཱལོཀེན ཝིནཱཔི པཉྙཱཡེཡྻ, ཙཀྑུཝིཉྙཱཎསྶ ཝཱ ན གོཙརོ ཝིཡ སིཡཱ. ཏསྶ པན སཱམགྒིཡཱ ¶ སོ ཨཱནུབྷཱཝོ, ཡཾ ཏཐཱ དསྶནཾ ཧོཏཱིཏི. ཨཙིནྟེཡྻོ ཧི དྷམྨཱནཾ སཱམཏྠིཡབྷེདོཏི ཝདནྟེནཔི ཨཡམེཝཏྠོ སཱདྷིཏོ བྷིནྣནིསྶཡསྶཔི ཨབྷིནྣཊྛཱནསྶ ཝིཡ ཨུཔཊྛཱནཏོ. ཨེཏེནེཝ ཨུདཀཱདཱིསུ པཊིབིམྦརཱུཔཱབྷཱཝཙོདནཱ པཊིཀྑིཏྟཱ ཝེདིཏབྦཱ.

སིདྡྷེ ཙ པཊིབིམྦརཱུཔེ ཏསྶ ནིདསྶནབྷཱཝོ སིདྡྷོཡེཝ ཧོཏི ཧེཏུཕལཱནཾ ཝིཙྪིནྣདེསཏཱཝིབྷཱཝནཏོ. ཡཾ པན ཝུཏྟཾ ‘‘ཨསདིསཏྟཱ ན ནིདསྶན’’ནྟི, ཏདཡུཏྟཾ. ཀསྨཱ? ན ཧི ནིདསྶནཾ ནཱམ ནིདསྶིཏབྦེན སབྦདཱ སདིསམེཝ ཧོཏི. ཙུཏིཀྑནྡྷཱདྷཱནཏོ ཝིཙྪིནྣདེསེ ཨུཔཔཏྟིཀྑནྡྷཱ པཱཏུབྷཝནྟཱིཏི ཨེཏསྶ ཨཏྠསྶ སཱདྷནཏྠཾ མུཁརཱུཔཏོ ཝིཙྪིནྣེ ཋཱནེ ཏསྶ ཕལབྷཱུཏཾ པཊིབིམྦརཱུཔཾ ནིབྦཏྟཏཱིཏི ཨེཏྠ ཏསྶ ནིདསྶནཏྠསྶ ཨདྷིཔྤེཏཏྟཱ. ཨེཏེན ཨསནྟཱནཙོདནཱ པཊིཀྑིཏྟཱ ཝེདིཏབྦཱ.

ཡསྨཱ ཝཱ མུཁཔཊིབིམྦརཱུཔཱནཾ ཧེཏུཕལབྷཱཝོ སིདྡྷོ, ཏསྨཱཔི སཱ པཊིཀྑིཏྟཱཝ ཧོཏི. ཧེཏུཕལབྷཱཝསམྦནྡྷེསུ ཧི སནྟཱནཝོཧཱརོ. ཡཐཱཝུཏྟདྭཱིཧིཀཱརཎེཧི པཊིབིམྦཾ ཨུཔྤཛྫཏི བིམྦཏོ ¶ ཨཱདཱསཏོ ཙ, ན ཙེཝཾ ཨུཔཔཏྟིཀྑནྡྷཱནཾ ཝིཙྪིནྣདེསུཔྤཏྟི. ཡཐཱ ཙེཏྠ པཊིབིམྦརཱུཔཾ ནིདསྶིཏཾ, ཨེཝཾ པཊིགྷོསདཱིཔམུདྡཱདཡོཔི ནིདསྶིཏབྦཱ. ཡཐཱ ཧི པཊིགྷོསདཱིཔམུདྡཱདཡོ སདྡཱདིཧེཏུཀཱ ཧོནྟི, ཨཉྙཏྲ ཨགནྟྭཱ ཧོནྟི, ཨེཝམེཝ ཨིདཾ ཙིཏྟནྟི.

ཨཔིཙཱཡཾ ཨནྟརཱབྷཝཝཱདཱི ཨེཝཾ པུཙྪིཏབྦོ – ཡདི ‘‘དྷམྨཱནཾ ཝིཙྪིནྣདེསུཔྤཏྟི ན ཡུཏྟཱ’’ཏི ཨནྟརཱབྷཝོ པརིཀཔྤིཏོ, རཱཧུཨཱདཱིནཾ སརཱིརེ ཀཐམནེཀཡོཛནསཧསྶནྟརིཀེསུ པཱདཊྛཱནཧདཡཊྛཱནེསུ ཀཱཡཝིཉྙཱཎམནོཝིཉྙཱཎུཔྤཏྟི ཝིཙྪིནྣདེསེ ཡུཏྟཱ. ཡདི ཨེཀསནྟཱནབྷཱཝཏོ, ཨིདྷཱཔི ཏཾསམཱནཾ. ན ཙེཏྠ ཨརཱུཔདྷམྨབྷཱཝཏོ ཨལཾ པརིཧཱརཱཡ པཉྩཝོཀཱརེ རཱུཔཱརཱུཔདྷམྨཱནཾ ཨཉྙམཉྙཾ སམྦནྡྷཏྟཱ. ཝཏྟམཱནེཧི ཏཱཝ པཙྩཡེཧི ཝིཙྪིནྣདེསེ ཕལསྶ ཨུཔྤཏྟི སིདྡྷཱ, ཀིམངྒཾ པན ཨཏཱིཏེཧི པཉྩཝོཀཱརབྷཝེཧི. ཡཏྠ ཝིཔཱཀཝིཉྙཱཎསྶ པཙྩཡོ, ཏཏྠསྶ ནིསྶཡབྷཱུཏསྶ ཝཏྠུསྶ སཧབྷཱཝཱིནཉྩ ཁནྡྷཱནཾ སམྦྷཝོཏི ལདྡྷོཀཱསེན ཀམྨུནཱ ནིབྦཏྟིཡམཱནསྶ ཨཝསེསཔཙྩཡནྟརསཧིཏསྶ ཝིཔཱཀཝིཉྙཱཎསྶ ཨུཔྤཏྟིཡཾ ནཱལཾ ཝིཙྪིནྣདེསཏཱ ཝིབནྡྷཱཡ. ཡཐཱ ཙ ཨནེཀཀཔྤསཧསྶནྟརིཀཱཔི ཙུཏིཀྑནྡྷཱ ཨུཔཔཏྟིཀྑནྡྷཱནཾ ཨནནྟརཔཙྩཡོཏི ན ཀཱལདཱུརཏཱ, ཨེཝཾ ཨནེཀཡོཛནསཧསྶནྟརིཀཱཔི ཏེ ཏེསཾ ཨནནྟརཔཙྩཡོ ཧོནྟཱིཏི ན དེསདཱུརཏཱ. ཨེཝཾ ¶ ཙུཏིཀྑནྡྷནིརོདྷཱནནྟརཾ ཨུཔཔཏྟིཊྛཱནེ པཙྩཡནྟརསམཝཱཡེན པཊིསནྡྷིཀྑནྡྷཱ པཱཏུབྷཝནྟཱིཏི ནཏྠེཝ ཨནྟརཱབྷཝོ. ཨསཏི ཙ ཏསྨིཾ ཡཾ ཏསྶ ཀེཙི ‘‘བྷཱཝིབྷཝནིབྦཏྟཀཀམྨུནོ ཏཏོ ཨེཝ བྷཱཝིཔུརིམཀཱལབྷཝཱཀཱརོ སཛཱཏིསུདྡྷདིབྦཙཀྑུགོཙརོ ཨཧཱིནིནྡྲིཡོ ཀེནཙི ཨཔྤཊིཧཏགམནོ གནྡྷཱཧཱརོ’’ཏི ཨེཝམཱདིཀཱརཎཱཀཱརཱདིཾ ཝཎྞེནྟི, ཏཾ ཝཉྫྷཱཏནཡསྶ རསྶདཱིགྷསཱམཏཱདིཝིཝཱདསདིསནྟི ཝེདིཏབྦཾ.

ཨནྟརཱབྷཝཀཐཱཝཎྞནཱ ནིཊྛིཏཱ.

༣. ཀཱམགུཎཀཐཱཝཎྞནཱ

༥༡༠. སབྦེཔཱིཏི ཀུསལཱཀུསལཀྑནྡྷཱདཡོཔི. ཏེསམྤི ཧི ཨཱལམྦནཏྠིཀཏཱལཀྑཎསྶ ཀཏྟུཀམྱཏཱཚནྡསྶ ཝསེན སིཡཱ ཀམནཊྛཏཱཏི ཨདྷིཔྤཱཡོ. དྷཱཏུཀཐཱཡཾ ‘‘ཀཱམབྷཝོ པཉྩཧི ཁནྡྷེཧི ཨེཀཱདསཧི ཨཱཡཏནེཧི སཏྟརསཧི དྷཱཏཱུཧི སངྒཧིཏོ. ཀཏིཧི ཨསངྒཧིཏོ? ན ཀེཧིཙི ¶ ཁནྡྷེཧི ཨེཀེནཱཡཏནེན ཨེཀཱཡ དྷཱཏུཡཱ ཨསངྒཧིཏོ’’ཏི ཨཱགཏཏྟཱ ཨཱཧ ‘‘ཨུཔཱདིནྣཀྑནྡྷཱནམེཝ ཀཱམབྷཝབྷཱཝོ དྷཱཏུཀཐཱཡཾ དསྶིཏོ’’ཏི. པཉྩཱཏི གཎནཔརིཙྪེདོ, ཏདཉྙགཎནནིཝཏྟནཏྠོཏི ‘‘པཉྩ ཀཱམགུཎཱ’’ཏི ཝཙནཾ ཏཏོ ཨཉྙེསཾ ཏབྦྷཱཝཾ ནིཝཏྟེཏཱིཏི ཨཱཧ ‘‘པཉྩེཝ ཀཱམཀོཊྛཱསཱ ཀཱམོཏི ཝུཏྟཱ’’ཏི. ཏཏོ ཨེཝ ཀཱམདྷཱཏཱུཏི ཝཙནཾ ན ཨཉྙསྶ ནཱམཾ, ཏེསཾཡེཝ ནཱམནྟི ཨཏྠོ. ཏཡིདཾ པརཝཱདིནོ མཏིམཏྟནྟི ཝུཏྟཾ ‘‘ཨིམིནཱ ཨདྷིཔྤཱཡེནཱ’’ཏི. ཨེཝཾ ཝཙནམཏྟནྟི ཨེཝཾ ‘‘པཉྩིམེ ཀཱམགུཎཱ’’ཏི ཝཙནམཏྟཾ ནིསྶཱཡ, ན པནཏྠསྶ ཨཝིཔརཱིཏཾ ཨཏྠནྟི ཨཏྠོ.

ཀཱམགུཎཀཐཱཝཎྞནཱ ནིཊྛིཏཱ.

༥. རཱུཔདྷཱཏུཀཐཱཝཎྞནཱ

༥༡༥-༥༡༦. རཱུཔདྷཱཏཱུཏི ཝཙནཏོཏི ‘‘ཀཱམདྷཱཏུརཱུཔདྷཱཏུཨརཱུཔདྷཱཏཱུ’’ཏི ཨེཏྠ རཱུཔདྷཱཏཱུཏི ཝུཏྟཏྟཱ. རཱུཔཱིདྷམྨེཧེཝཱཏི རུཔྤནསབྷཱཝེཧིཡེཝ དྷམྨེཧི. ‘‘ཏཡོམེ བྷཝཱ’’ཏིཨཱདིནཱ པརིཙྪིནྣཱཏི ཏཡོམེ བྷཝཱ ¶ , ཏིསྶོ དྷཱཏུཡོཏི ཙ ཨེཝཾ པརིཙྪིནྣཱ. ‘‘དྷཱཏུཡཱ ཨཱགཏཊྛཱནེ བྷཝེན པརིཙྪིནྡིཏབྦཾ, བྷཝསྶ ཨཱགཏཊྛཱནེ དྷཱཏུཡཱ པརིཙྪིནྡིཏབྦ’’ནྟི ཧི ཝུཏྟཾ, ཏསྨཱ ཀཱམརཱུཔཱརཱུཔཱཝཙརདྷམྨཱཝ ཏཾཏཾབྷུམྨབྷཱཝེན པརིཙྪིནྣཱ ཨེཝཾ ཝུཏྟཱ.

རཱུཔདྷཱཏུཀཐཱཝཎྞནཱ ནིཊྛིཏཱ.

༦. ཨརཱུཔདྷཱཏུཀཐཱཝཎྞནཱ

༥༡༧-༥༡༨. པུརིམཀཐཱཡནྟི རཱུཔདྷཱཏུཀཐཱཡཾ. ཨཝིསེསེནཱཏི པཝཏྟིཊྛཱནཝསེན ཝིསེསཾ ཨཀཏྭཱ.

ཨརཱུཔདྷཱཏུཀཐཱཝཎྞནཱ ནིཊྛིཏཱ.

༧. རཱུཔདྷཱཏུཡཱཨཱཡཏནཀཐཱཝཎྞནཱ

༥༡༩. ཨོཀཱསབྷཱཝེནཱཏི ¶ ཝཏྠུབྷཱཝེན. ཏཐཱཝིདྷནྟི གྷཱནཱདིཨཱཀཱརཾ.

རཱུཔདྷཱཏུཡཱཨཱཡཏནཀཐཱཝཎྞནཱ ནིཊྛིཏཱ.

༨. ཨརཱུཔེརཱུཔཀཐཱཝཎྞནཱ

༥༢༤-༥༢༦. ནིསྶརཎཾ ནཱམ ནིསྶརིཏབྦེ སཏི ཧོཏི, ན ཨསཏི, ཏསྨཱ ‘‘ཨརཱུཔབྷཝེ སུཁུམརཱུཔཾ ཨཏྠི, ཡཏོ ནིསྶརཎཾ ཏཾ ཨཱརུཔྤ’’ནྟི ཨཱཧ.

ཨརཱུཔེརཱུཔཀཐཱཝཎྞནཱ ནིཊྛིཏཱ.

༩. རཱུཔཾཀམྨནྟིཀཐཱཝཎྞནཱ

༥༢༧-༥༣༧. པཀཔྤཡམཱནཱཏི པཀཱརེཧི ཀཔྤཡམཱནཱ ཨཏྟནོ སམྤཡུཏྟཱནཉྩ ཀིཙྩཾ སམཏྠཡམཱནཱ. ཏེནཱཧ ‘‘སམྤཡུཏྟེསུ ཨདྷིཀཾ བྱཱཔཱརཾ ཀུརུམཱནཱ’’ཏི.

རཱུཔཾཀམྨནྟིཀཐཱཝཎྞནཱ ནིཊྛིཏཱ.

༡༠. ཛཱིཝིཏིནྡྲིཡཀཐཱཝཎྞནཱ

༥༤༠. ཨནྟཾ ¶ གཧེཏྭཱ ཝདཏཱིཏི ‘‘ཨཏྠི ཨརཱུཔདྷམྨཱནཾ ཨཱཡུ ཋིཏི ཡཔནཱ ཡཱཔནཱ ཨིརིཡནཱ ¶ ཝཏྟནཱ པཱལནཱ, ཨཏྠི ཨརཱུཔཛཱིཝིཏིནྡྲིཡ’’ནྟི ཏསྨིཾ པཉྷེ ‘‘ཨཏྠི ཨརཱུཔཛཱིཝིཏིནྡྲིཡ’’ནྟི ཨིམཾ ཨནྟཾ པརིཡོསཱནཾ གཧེཏྭཱ ཝདཏི. ཝཏྟུཾ ཡུཏྟོ སམུདཱཡསྶ ཨིཙྪནྟོ ཏདཝཡཝསྶ ཨིཙྪཏཱིཏི. ན ཧི ཨཝཡཝེཧི ཝིནཱ སམུདཱཡོ ནཱམ ཨཏྠི.

༥༤༡. ཏམེཝཱཏི ཨརཱུཔཾ ཙིཏྟཝིཔྤཡུཏྟམེཝ.

༥༤༢. ཏདཱཔཱིཏི སམཱཔཛྫནཝུཊྛཱནཀཱལེཔི.

༥༤༤-༥༤༥. སོ ཡུཏྟོ དྭིནྣཾ རཱུཔཱརཱུཔཛཱིཝིཏིནྡྲིཡཱནཾ སཀསམཡེ ཨིཙྪིཏཏྟཱ.

ཛཱིཝིཏིནྡྲིཡཀཐཱཝཎྞནཱ ནིཊྛིཏཱ.

༡༡. ཀམྨཧེཏུཀཐཱཝཎྞནཱ

༥༤༦. ‘‘པཱཎཱཏིཔཱཏཀམྨསྶ ཧེཏཱུ’’ཏིཨཱདིཀསྶ པརིཧཱནིཀཐཱཡཾ ཨནཱགཏཏྟཱ ཡོ ཏཏྠ ཨཱགཏནཡོ, ཏམེཝ དསྶེནྟོ ‘‘སེསནྟི…པེ… ཝདཏཱི’’ཏི ཨཱཧ. སམྤཊིཙྪནཝཙནནྟི སམྤཊིཙྪཱཔནཝཙནཾ. ཏཾ པརཝཱདིཾ. ཏཾཏཾལདྡྷིསམྤཊིཙྪཱཔནཾ ཝཱ གཱཧཱཔནནྟི དསྶེནྟོ ‘‘པཀྑ’’ནྟིཨཱདིམཱཧ.

ཀམྨཧེཏུཀཐཱཝཎྞནཱ ནིཊྛིཏཱ.

ཨཊྛམཝགྒཝཎྞནཱ ནིཊྛིཏཱ.

༩. ནཝམཝགྒོ

༡. ཨཱནིསཾསདསྶཱཝཱིཀཐཱཝཎྞནཱ

༥༤༧. དཊྛབྦསྶ ཨཱདཱིནཝཏོ ཨཱནིསཾསཏོ ཙ ཡདིཔི པརཝཱདིནཱ པཙྪཱ ནཱནཱཙིཏྟཝསེན ¶ པཊིཉྙཱཏཾ, པུབྦེ པན ཨེཀཏོ ཀཏྭཱ པཊིཛཱནི, ན ཙ ¶ ཏཾ ལདྡྷིཾ པརིཙྩཛི. ཏེནསྶ ཨདྷིཔྤཱཡམདྡནཾ ཡུཏྟནྟི དཊྛབྦཾ. ཏེནེཝཱཧ ‘‘ཨནིཙྩ…པེ… པཊིཉྙཱཏཏྟཱ’’ཏི. ཨཱརམྨཎཝསེནཱཏི ཨཱརམྨཎཀརཎཝསེན, ན ཀིཙྩནིཔྥཏྟིཝསེནཱཏི ཨདྷིཔྤཱཡོ. ཨིདཾ ཨཱནིསཾསཀཐཱནུཡུཉྫནཾ ཨཱནིསཾསདསྶནཉྩ. ཉཱཎཾ ཝིཔསྶནཱ པཊིཝེདྷཉཱཎསྶ ཝིཡ ཨནུབོདྷཉཱཎསྶཔི ཡཐཱརཧཾ པཝཏྟིནིཝཏྟཱིསུ ཀིཙྩཀརཎཾ ཡུཏྟནྟི ཨདྷིཔྤཱཡོ.

ཨཱནིསཾསདསྶཱཝཱིཀཐཱཝཎྞནཱ ནིཊྛིཏཱ.

༢. ཨམཏཱརམྨཎཀཐཱཝཎྞནཱ

༥༤༩. ཨེཝམཱདིནཱ སུཏྟབྷཡེནཱཏི ཨེཏྠ ཨཱདི-སདྡེན ‘‘ཨནཱསཝཉྩ ཝོ, བྷིཀྑཝེ, དྷམྨཾ དེསེསྶཱམི ཨནཱསཝགཱམིནིཉྩ པཊིཔད’’ནྟིཨཱདཱིནི སུཏྟཔདཱནི སངྒཎྷཱཏི.

ཨམཏཱརམྨཎཀཐཱཝཎྞནཱ ནིཊྛིཏཱ.

༣. རཱུཔཾསཱརམྨཎནྟིཀཐཱཝཎྞནཱ

༥༥༢-༥༥༣. ‘‘ཏདཔྤཏིཊྛཾ ཨནཱརམྨཎ’’ནྟིཨཱདཱིསུ པཙྩཡཏྠོ ཨཱརམྨཎ-སདྡོ. ‘‘རཱུཔཱཡཏནཾ ཙཀྑུཝིཉྙཱཎདྷཱཏུཡཱ ཏཾསམྤཡུཏྟཀཱནཉྩ དྷམྨཱནཾ ཨཱརམྨཎཔཙྩཡེན པཙྩཡོ’’ཏིཨཱདཱིསུ ཨོལུབྦྷཊྛོཏི ཨཱཧ ‘‘པཙྩཡཊྛོ ཨོལུབྦྷཊྛོ’’ཏི. ཨེཝཾ ཝིབྷཱགེ ཝིཛྫམཱནེཏི ཏཏྠ པཙྩཡཱཡཏྟཝུཏྟིཏཱ པཙྩཡཊྛོ, དཎྜརཛྫུཨཱདི ཝིཡ དུབྦལསྶ ཙིཏྟཙེཏསིཀཱནཾ ཨཱལམྦིཏབྦཏཱཡ ཨུཔཏྠམྦྷནཊྛོ ཨོལུབྦྷཊྛོ. ཝིསེསཱབྷཱཝཾ པཙྩཡབྷཱཝསཱམཉྙེན ཀཔྤེཏྭཱ ཝཱ.

རཱུཔཾསཱརམྨཎནྟིཀཐཱཝཎྞནཱ ནིཊྛིཏཱ.

༤. ཨནུསཡཱཨནཱརམྨཎཱཏིཀཐཱཝཎྞནཱ

༥༥༤-༥༥༦. ‘‘ཨིམསྨིཾ ¶ སཏཱི’’ཏི ཨིམིནཱ མགྒེན ཨནིརུདྡྷཏཱཔི སངྒཧིཏཱཏི ཨཱཧ ‘‘ཨཔྤཧཱིནཏྟཱཝ ཨཏྠཱིཏི ཝུཙྩཏཱི’’ཏི. ན པན ཝིཛྫམཱནཏྟཱཏི ཨཝདྷཱརཎེན ¶ ནིཝཏྟིཏཾ དསྶེཏི, ཝིཛྫམཱནཏྟཱ དྷརམཱནཏྟཱ ཁཎཏྟཡསམངྒིབྷཱཝཏོཏི ཨཏྠོ.

ཨནུསཡཱཨནཱརམྨཎཱཏིཀཐཱཝཎྞནཱ ནིཊྛིཏཱ.

༥. ཉཱཎཾཨནཱརམྨཎནྟིཀཐཱཝཎྞནཱ

༥༥༧-༥༥༨. ཡསྶ ཨདྷིགཏཏྟཱ ཨརཧཏོ པརིཉྙེཡྻཱདཱིསུ ཨནཝསེསཏོ སམྨོཧོ ཝིགཏོ, ཏཾ ཨགྒམགྒཉཱཎཾ སནྡྷཱཡ ‘‘མགྒཉཱཎསྶཱ’’ཏི ཝདནྟི. ཡསྨཱ ཏསྶ སབྦསྶ སཏོཀཱརིཏཱ ཝིཡ སམྤཛཱནཀཱརིཏཱ, ཏསྨཱ ཏེན ཉཱཎེན སོ ཉཱཎཱི. སཏིཔཉྙཱཝེཔུལླཔྤཏྟོ ཧི སོ ཨུཏྟམཔུརིསོ.

ཉཱཎཾཨནཱརམྨཎནྟིཀཐཱཝཎྞནཱ ནིཊྛིཏཱ.

༧. ཝིཏཀྐཱནུཔཏིཏཀཐཱཝཎྞནཱ

༥༦༢. དྭཱིཧིཔཱིཏི དྭཱིཧི ཝིསེསེཧི, ཝིསེསེན ཝིསེསཾ ཨཀཏྭཱཏི ཨཏྠོ.

ཝིཏཀྐཱནུཔཏིཏཀཐཱཝཎྞནཱ ནིཊྛིཏཱ.

༨. ཝིཏཀྐཝིཔྥཱརསདྡཀཐཱཝཎྞནཱ

༥༦༣. སབྦསོཏི ¶ སབྦཔྤཀཱརཏོ, སོ པན པཀཱརོ པཝཏྟིཊྛཱནཀཱལཝསེན གཧེཏབྦོཏི ཨཱཧ ‘‘སབྦཏྠ སབྦདཱ ཝཱ’’ཏི. ཏེ ཙ ཋཱནཀཱལཱ ‘‘ཝིཏཀྐཡཏོ’’ཏིཨཱདིཝཙནཏོ ཙིཏྟཝིསེསཝསེན གཧེཏབྦཱཏི ཝུཏྟཾ ‘‘སཝིཏཀྐཙིཏྟེསཱུ’’ཏི. ‘‘ཝིཏཀྐེཏྭཱ ཝཱཙཾ བྷིནྡཏཱི’’ཏི སུཏྟཔདཾ ཨཡོནིསོ གཧེཏྭཱ ‘‘ཝིཏཀྐཝིཔྥཱརམཏྟཾ སདྡོ’’ཏི ཨཱཧ.

ཝིཏཀྐཝིཔྥཱརསདྡཀཐཱཝཎྞནཱ ནིཊྛིཏཱ.

༩. ནཡཐཱཙིཏྟསྶཝཱཙཱཏིཀཐཱཝཎྞནཱ

༥༦༥. མུསཱཝཱདོ ¶ ན ཧོཏཱིཏི ཝུཏྟཾ ཨནཱཔཏྟཱིཏི སམྦནྡྷོ.

ནཡཐཱཙིཏྟསྶཝཱཙཱཏིཀཐཱཝཎྞནཱ ནིཊྛིཏཱ.

༡༡. ཨཏཱིཏཱནཱགཏསམནྣཱགཏཀཐཱཝཎྞནཱ

༥༦༨-༥༧༠. སམནྣཱགཏཔཉྙཏྟིཡཱཏི སམངྒིབྷཱཝཔཉྙཏྟིཡཱ. ཏེནེཝཱཧ ‘‘པཙྩུཔྤནྣདྷམྨསམངྒཱི སམནྣཱགཏོཏི ཝུཙྩཏཱི’’ཏི. པཊིལཱབྷཔཉྙཏྟིཡཱཏི ཨདྷིགམནཔཉྙཏྟིཡཱ. ཨཡནྟི ‘‘སམནྣཱགཏོ’’ཏི ཝུཙྩམཱནཔུགྒལསྶ ཡོ ཏཐཱ ཝཏྟབྦཱཀཱརོ, ཨཡཾ སམནྣཱགཏཔཉྙཏྟི ནཱམ. ཨེས ནཡོ སེསེསུཔི.

ཨཏཱིཏཱནཱགཏསམནྣཱགཏཀཐཱཝཎྞནཱ ནིཊྛིཏཱ.

ནཝམཝགྒཝཎྞནཱ ནིཊྛིཏཱ.

༡༠. དསམཝགྒོ

༡. ནིརོདྷཀཐཱཝཎྞནཱ

༥༧༡-༥༧༢. སཀསམཡེ ¶ ‘‘པུརིམཙིཏྟསྶ ནིརོདྷཱནནྟརཾ པཙྪིམཙིཏྟཾ ཨུཔྤཛྫཏཱི’’ཏི ཨིཙྪིཏཾ, པརཝཱདཱི པན ‘‘ཡསྨིཾ ཁཎེ བྷཝངྒཙིཏྟཾ, ཏསྨིཾཡེཝ ཁཎེ ཀིརིཡམཡཙིཏྟཾ ཨུཔྤཛྫཏཱི’’ཏི ཝདཏི. ཨེཝཾ སཏི པུརིམཔཙྪིམཙིཏྟཱནཾ སཧབྷཱཝོཔི ཨནུཉྙཱཏོ ཧོཏི. ཏེནཱཧ ‘‘བྷངྒཀྑཎེན སཧེཝཱ’’ཏི. ཏཐཱ ཙ སཏི ཝིཔཱཀཀིརིཡཀྑནྡྷཱནཾ ཝིཡ ཀིརིཡཝིཔཱཀཀྑནྡྷཱནཾ ཝིཔཱཀཝིཔཱཀཀྑནྡྷཱནཾ ཀིརིཡཀིརིཡཀྑནྡྷཱནཉྩ ཝུཏྟནཡེན སཧབྷཱཝོ ཝཏྟབྦོཏི ཨིམམཏྠཾ དསྶེནྟོ ‘‘བྷཝངྒཙིཏྟསྶཱ’’ཏིཨཱདིམཱཧ. ཏཏྠ ཨུཔཔཏྟིབྷཝབྷཱཝེན ཨེསིཡཱ ཨིཙྪིཏབྦཱཏི ཨུཔཔཏྟེསིཡཱ ཝིཔཱཀཀྑནྡྷཱ, ཏེ ཙ ཡེབྷུཡྻེན བྷཝངྒཔརིཡཱཡཀཱཏི ཨཊྛཀཐཱཡཾ ཝུཏྟཾ ‘‘ཨུཔཔཏྟེསིཡནྟི སངྑཾ གཏསྶ བྷཝངྒཙིཏྟསྶཱ’’ཏི. ཨཱདིཔརིཡོསཱནམཏྟཉྷི ཏསྶ པཊིསནྡྷིཙུཏིཙིཏྟཾ, ཏདཱརམྨཎཾ བྷཝངྒནྟྭེཝ ཝུཙྩཏཱིཏི. ཙཀྑུཝིཉྙཱཎཱདཱིནཾ ཀིརིཡཱཝེམཛ྄ཛྷེ ¶ པཏིཏཏྟཱ ཀིརིཡཱཙཏུཀྑནྡྷགྒཧཎེན གཧཎཾ ཡུཏྟནྟི ཝུཏྟཾ. ཙཀྑུཝིཉྙཱཎཱདཱིནནྟི ཧི ཨཱདི-སདྡེན ན སོཏཝིཉྙཱཎཱདཱིནཾཡེཝ གཧཎཾ, ཨཐ ཁོ སམྤཊིཙྪནསནྟཱིརཎཱནམྤཱིཏི དཊྛབྦཾ.

ནིརོདྷཀཐཱཝཎྞནཱ ནིཊྛིཏཱ.

༣. པཉྩཝིཉྙཱཎསམངྒིསྶམགྒཀཐཱཝཎྞནཱ

༥༧༦. ལཀྑཎནྟི པཉྩཝིཉྙཱཎཱནཾ ཨུཔྤནྣཱརམྨཎཏཱདིཨཝིཏཐེཀཔྤཀཱརཏཱལཀྑཎཾ. ཀཱམཾ མནོཝིཉྙཱཎཾ ཨཝཏྠུཀམྤི ཧོཏི, སཝཏྠུཀཏྟེ པན ཏམྤི ཨུཔྤནྣཝཏྠུཀམེཝ. ཏཐཱ ཧི པཱལི༹ཡཾ ཋཔནཱཡཾ ‘‘ཧཉྩི པཉྩཝིཉྙཱཎཱ ཨུཔྤནྣཱརམྨཎཱ’’ཏྭེཝ ཝུཏྟཾ. མནོཝིཉྙཱཎསྶཔི ཨུཔྤནྣཝཏྠུཀཏཱཔརིཡཱཡོ ཨཏྠཱིཏི ‘‘པཉྩ ཝིཉྙཱཎཱ’’ཏི ཨཝཏྭཱ ‘‘ཚ ཝིཉྙཱཎཱ ཨུཔྤནྣཝཏྠུཀཱ’’ཏི ཝུཏྟེ ‘‘ནོ ཙ ཝཏ རེ ཝཏྟབྦེ པཉྩཝིཉྙཱཎསམངྒིསྶ ཨཏྠི མགྒབྷཱཝནཱ’’ཏི ཝཏྟུཾ ན སཀྐཱཏི དསྶེནྟོ ཨཱཧ ‘‘ཚ ཝིཉྙཱཎཱ…པེ… ཨདྷིཔྤེཏ’’ནྟི.

༥༧༧. ‘‘ཨནིམིཏྟཾ ¶ སུཉྙཏཾ ཨཔྤཎིཧིཏ’’ནྟི ནིབྦཱནསྶ ཏེ པརིཡཱཡཱ. ཙཀྑུཝིཉྙཱཎསྶ ཨནིམིཏྟགཱཧིབྷཱཝེ སུཉྙཏཱརམྨཎཏཱཔི སིཡཱཏི ཝུཏྟཾ ‘‘ཏདེཝ སུཉྙཏནྟི ཨདྷིཔྤཱཡོ’’ཏི.

པཉྩཝིཉྙཱཎསམངྒིསྶམགྒཀཐཱཝཎྞནཱ ནིཊྛིཏཱ.

༥. པཉྩཝིཉྙཱཎཱསཱབྷོགཱཏིཀཐཱཝཎྞནཱ

༥༨༤-༥༨༦. སཱ པན ནམིཏྭཱ པཝཏྟི. ཨཱརམྨཎཔྤཀཱརགྒཧཎནྟི ཨཱརམྨཎསྶ ཨིཊྛཱནིཊྛཔྤཀཱརསྶ གཧཎཾ. ཡེན ཨཱརམྨཎཔྤཀཱརགྒཧཎེན ཀུསལཙིཏྟསྶ ཨལོབྷཱདཱིཧི སམྤཡོགོ ཨཀུསལཙིཏྟསྶ ལོབྷཱདཱིཧི སམྤཡོགོ ཧོཏི, སོ ཨཱབྷོགོཏི དསྶེཏི.

པཉྩཝིཉྙཱཎཱསཱབྷོགཱཏིཀཐཱཝཎྞནཱ ནིཊྛིཏཱ.

༦. དྭཱིཧིསཱིལེཧཱིཏིཀཐཱཝཎྞནཱ

༥༨༧-༥༨༩. ཨཔྤཝཏྟིནིརོདྷནྟི ¶ ཨནུཔྤཱདནིརོདྷཾ. སཱིལསྶ ཝཱིཏིཀྐམོཡེཝ ནིརོདྷོ སཱིལཝཱིཏིཀྐམནིརོདྷོ. ནིནྣཱནཾ ཁཎིཀནིརོདྷཾ སལླཀྑེནྟོ.

དྭཱིཧིསཱིལེཧཱིཏིཀཐཱཝཎྞནཱ ནིཊྛིཏཱ.

༧. སཱིལཾཨཙེཏསིཀནྟིཀཐཱཝཎྞནཱ

༥༩༠-༥༩༤. ཋིཏེན ཨཝིནཊྛེན. ཨུཔཙཡེནཱཏི སཱིལབྷཱུཏེན ཀམྨཱུཔཙཡེན. ‘‘དཱནཾ ཨཙེཏསིཀ’’ནྟི ¶ ཀཐཱཡཾ ཝུཏྟནཡེནཱཏི ཡཐཱ ‘‘ན ཝཏྟབྦཾ ཙེཏསིཀོ དྷམྨོ དཱནནྟི? ཨཱམནྟཱ. དཱནཾ ཨནིཊྛཕལནྟི…པེ… ཏེན ཧི ཙེཏསིཀོ དྷམྨོ དཱན’’ནྟི པཱལི༹ པཝཏྟཱ, ཨེཝཾ ཏདནུསཱརེན ‘‘ན ཝཏྟབྦཾ ཙེཏསིཀཾ སཱིལནྟི? ཨཱམནྟཱ. སཱིལཾ ཨནིཊྛཕལ’’ནྟིཨཱདིནཱ སཱིལསྶ ཙེཏསིཀབྷཱཝསཱདྷཀཱནི སུཏྟཔདཱནི ཙ ཨཱནེཏྭཱ ཏདཏྠདསྶནཝསེན ཨཙེཏསིཀོ རཱུཔཱདིདྷམྨོ ཨཱཡཏིཾ ཝིཔཱཀཾ དེཏི. ཡདི སོ སཱིལཾ བྷཝེཡྻ, ཝིནཱ སཾཝརསམཱདཱནེན ཝིནཱ ཝིརཏིཡཱ སཱིལཝཱ ནཱམ སིཡཱ. ཡསྨཱ པན སམཱདཱནཙེཏནཱ ཝིརཏི སཾཝརོ སཱིལཾ, ཏསྨཱ ‘‘སཱིལཾ ཨིཊྛཕལཾ ཀནྟཕལ’’ནྟིཨཱདིནཱ ཡོཛནཱ ཀཱཏབྦཱཏི ཨིམམཏྠཾ སནྡྷཱཡ ཝུཏྟཾ ‘‘ཝུཏྟནཡེནཱ’’ཏི, ཝུཏྟནཡཱནུསཱརེནཱཏི ཨཏྠོ. ཡསྨཱ པན པཱལི༹ཡཾ ཡཐཱ ‘‘སཱིལཾ ཨཙེཏསིཀ’’ནྟི ཀཐཱ ཨཱགཏཱ, ཏཐཱ ‘‘དཱནཾ ཨཙེཏསིཀ’’ནྟི ཝིསུཾ ཨཱགཏཱ ཀཐཱ ནཏྠི, ཏསྨཱ ‘‘སཱ པན ཀཐཱ མགྒིཏབྦཱ’’ཏི ཝུཏྟཾ.

སཱིལཾཨཙེཏསིཀནྟིཀཐཱཝཎྞནཱ ནིཊྛིཏཱ.

༩. སམཱདཱནཧེཏུཀཐཱཝཎྞནཱ

༥༩༨-༦༠༠. སམཱདཱནཧེཏུཀཐཱཡཾ ‘‘ཕསྶོ དེཏཱི’’ཏི ཨཱརབྷིཏྭཱ ཡཱཝ ཀཎྷསུཀྐསཔྤཊིབྷཱགཱ དྷམྨཱ སམྨུཁཱིབྷཱཝཾ ཨཱགཙྪནྟཱིཏི ཨཱརཱམརོཔཱདིསུཏྟཱཧརཎཉྩཱཏི ཨེཏྟཀམེཝ པརིབྷོགཀཐཱཡ སདིསནྟི ཨཱཧ ‘‘སམཱདཱན…པེ… དཊྛབྦཱ’’ཏི.

སམཱདཱནཧེཏུཀཐཱཝཎྞནཱ ནིཊྛིཏཱ.

༡༡. ཨཝིཉྙཏྟིདུསྶཱིལྱནྟིཀཐཱཝཎྞནཱ

༦༠༣-༦༠༤. མཧཱབྷཱུཏཱནི ¶ ཨུཔཱདཱཡ པཝཏྟོ ཨཉྙཙིཏྟཀྑཎེཔི ལབྦྷམཱནོ ཀུསལཱཀུསལཱནུབནྡྷོ ཨཝིཉྙཏྟཱིཏི ཨཡཾ ཝཱདོ ‘‘ཙིཏྟཝིཔྤཡུཏྟོ ཨཔུཉྙཱུཔཙཡོ’’ཏི ཨིམིནཱ སངྒཧིཏོཏི ¶ ཏཏོ ཨཉྙཱནུབནྡྷཱཡཾ ‘‘ཨཱཎཏྟིཡཱ’’ཏིཨཱདི ཝུཏྟནྟི ཏཾ དསྶེཏུཾ ‘‘ཨཱཎཏྟིཡཱ…པེ… ཨདྷིཔྤཱཡོ’’ཏི ཝུཏྟཾ. ཏཏྠ ཨཱཎཏྟོ ཡདཱ ཨཱཎཏྟབྷཱཝེན ཝིཧིཾསཱདིཀིརིཡཾ སཱདྷེཏི, ཏདཱ ཨཱཎཏྟིཡཱ པཱཎཱཏིཔཱཏཱདཱིསུ ཨངྒབྷཱཝོ ཝེདིཏབྦོ. སཱ པནཱཎཏྟི པཱརིཝཱསིཀབྷཱཝེན ཝིཉྙཏྟིརཧིཏཱ ནཱམ ཧོཏཱིཏི པརཝཱདིནོ ཨདྷིཔྤཱཡོ, ཏཾ དསྶེཏུཾ ‘‘ཨེཀསྨིཾ དིཝསེ’’ཏིཨཱདི ཝུཏྟཾ.

ཨཝིཉྙཏྟིདུསྶཱིལྱནྟིཀཐཱཝཎྞནཱ ནིཊྛིཏཱ.

དསམཝགྒཝཎྞནཱ ནིཊྛིཏཱ.

དུཏིཡོ པཎྞཱསཀོ སམཏྟོ.

༡༡. ཨེཀཱདསམཝགྒོ

༤. ཉཱཎཀཐཱཝཎྞནཱ

༦༡༤-༦༡༥. ‘‘ཨནྡྷཀཱ’’ཏི ཝུཏྟཱ པུབྦསེལིཡཨཔརསེལིཡརཱཛགིརིཀསིདྡྷཏྠིཀཱཔི ཡེབྷུཡྻེན མཧཱསངྒྷིཀཱ ཨེཝཱཏི ཝུཏྟཾ ‘‘པུབྦེ…པེ… བྷཝེཡྻུ’’ནྟི. ཏཏྠ ཨཉྙེཏི ཝཙནཾ དྭིནྣཾ ཀཐཱནཾ ཨུཛུཝིཔཙྩནཱིཀབྷཱཝཏོ. པུརིམཀཱནཉྷི ཙཀྑུཝིཉྙཱཎཱདིསམངྒཱི ‘‘ཉཱཎཱི’’ཏི ཝུཙྩཏི, ཨིམེསཾ སོ ཨེཝ ‘‘ཉཱཎཱི’’ཏི ན ཝཏྟབྦོཏི ཝུཏྟོ. རཱགཝིགམོ རཱགསྶ སམུཙྪིནྡནཾ, ཏཐཱ ཨཉྙཱཎཝིགམོ. ཡཐཱ སམུཙྪིནྣཱཝིཛྫོ ‘‘ཉཱཎཱི’’ཏི, པཊིཔཀྑཏོ ‘‘ཨཉྙཱཎཱི’’ཏི, ཨེཝཾ ཨསམུཙྪིནྣཱཝིཛྫོ ‘‘ཨཉྙཱཎཱི’’ཏི, པཊིཔཀྑཏོ ‘‘ཉཱཎཱི’’ཏི ཝུཏྟོ. ཨཉྙཱཎསྶ ཝིགཏཏྟཱ སོ ‘‘ཉཱཎཱི’’ཏི ཝཏྟབྦཏཾ ཨཱཔཛྫཏི, ན པན སཏཏཾ སམིཏཾ ཉཱཎསྶ པཝཏྟནཏོཏི ཨདྷིཔྤཱཡོ.

ཉཱཎཀཐཱཝཎྞནཱ ནིཊྛིཏཱ.

༧. ཨིདྡྷིབལཀཐཱཝཎྞནཱ

༦༢༡-༦༢༤. ཡསྨིཾ ¶ ¶ ཨཱཡུཀཔྤེ ཀམྨཀྑཡེན མརཎཾ ཧོཏི, ཏཾ སནྡྷཱཡ ཝུཏྟཾ ‘‘ཀམྨསྶ ཝིཔཱཀཝསེནཱ’’ཏི, ཡསྨིཾ པན ཨཱཡུཀྑཡེན མརཎཾ ཧོཏི, ཏཾ སནྡྷཱཡ ‘‘ཝསྶགཎནཱཡཱ’’ཏི. ཏཏྠ ‘‘ན ཙ ཏཱཝ ཀཱལཾ ཀརོཏི, ཡཱཝ ན ཏཾ པཱཔཀམྨཾ བྱནྟཱི ཧོཏཱི’’ཏི (མ. ནི. ༣.༢༥༠; ཨ. ནི. ༣.༣༦) ཝཙནཏོ ཡེབྷུཡྻེན ནིརཡེ ཀམྨཀྑཡེན མརཎཾ ཧོཏཱིཏི ཨཱཧ ‘‘ཀམྨསྶ ཝིཔཱཀཝསེན ཝཱཏི ནིརཡཾཝ སནྡྷཱཡ ཝུཏྟ’’ནྟི. ‘‘ཝསྶསཏཾ ཝསྶསཧསྶཾ ཝསྶསཏསཧསྶཱནཱི’’ཏིཨཱདིནཱ མནུསྶཱནཾ དེཝཱནཉྩ ཨཱཡུཔརིཙྪེདཝཙནཏོ ཡེབྷུཡྻེན ཏེསཾ ཨཱཡུཀྑཡེན མརཎཾ ཧོཏཱིཏི ཝུཏྟཾ ‘‘ཝསྶགཎནཱཡ ཝཱཏི མནུསྶེ ཙཱཏུམཧཱརཱཛིཀཱདིདེཝེ ཙ སནྡྷཱཡཱ’’ཏི. ‘‘ཝུཏྟ’’ནྟི ཨཱནེཏྭཱ ཡོཛེཏབྦཾ.

ཨིདྡྷིབལཀཐཱཝཎྞནཱ ནིཊྛིཏཱ.

༨. སམཱདྷིཀཐཱཝཎྞནཱ

༦༢༥-༦༢༦. སམཾ ཋཔནཊྛེནཱཏི སམཾ ཝིསམཾ ལཱིནུདྡྷཙྩཱདིཾ པཊིབཱཧིཏྭཱ, ཝིཀྑེཔམེཝ ཝཱ ཝིདྡྷཾསེཏྭཱ ཋཔནཊྛེན. ‘‘ཙིཏྟསནྟཏི སམཱདྷཱི’’ཏི ཝདནྟེན ཏསྶ ཙེཏསིཀབྷཱཝོ པཊིཀྑིཏྟོ ཧོཏཱིཏི ཨཱཧ ‘‘ཙེཏསིཀནྟརཾ ཨཏྠཱིཏི ཨགྒཧེཏྭཱ’’ཏི. བྷཱཝནཱཡ ཨཱཧིཏཝིསེསཱཡ ཨེཀགྒཏཱཡ ཝིཛྫམཱནཝིསེསཔཊིཀྑེཔོ ཚལཾ, སོ པནསྶ ཨནཱཧིཏཝིསེསཱཡ ཨེཀགྒཏཱཡ སཱམཉྙེནཱཏི ཨཱཧ ‘‘སཱམཉྙམཏྟེནཱ’’ཏི.

སམཱདྷིཀཐཱཝཎྞནཱ ནིཊྛིཏཱ.

༩. དྷམྨཊྛིཏཏཱཀཐཱཝཎྞནཱ

༦༢༧. ཨཝིཛྫཱཡ ¶ ཡཱ ཋིཏཏཱཏི ཨཝིཛྫཱཡ སངྑཱརཱནཾ ཨནནྟརཔཙྩཡབྷཱཝེ ཡཱ ནིཡཏཏཱ དྷམྨནིཡཱམཏཱསངྑཱཏཱ, ཡཱ ཋིཏསབྷཱཝཏཱ ནིཔྥནྣཱ ¶ , ན དྷམྨམཏྟཏཱཊྛིཏཏཱཡ ནིཔྥནྣཱཡ ཝསེན, ཨནནྟརཔཙྩཡབྷཱཝསངྑཱཏཱ ཋིཏཏཱ པཙྩཡཏཱ ཧོཏཱིཏི ཨཏྠོ. ཨཉྙམཉྙཔཙྩཡབྷཱཝརཧིཏསྶཱཏི ཨིདཾ སཧཛཱཏནིསྶཡཱདིཔཙྩཡཱནཾ པཊིཀྑེཔཔདཾ དཊྛབྦཾ, ན ཨཉྙམཉྙཔཙྩཡཏཱམཏྟསྶ. སབྦོ ཏཱདིསོཏི ཨིམིནཱ སམནནྟརཨནནྟརཱུཔནིསྶཡནཏྠིཝིགཏཱསེཝནཱདིཀཾ སངྒཎྷཱཏི. ཨཉྙམཉྙཔཙྩཡཏཉྩཱཏི ཨེཏྠཱཔི ཝུཏྟནཡེན ཨཏྠོ ཝེདིཏབྦོ. ཨེཏྠ པན པཙྩཡུཔྤནྣསྶཔི པཙྩཡབྷཱཝཏོ སངྑཱརཱནམྤི ཝསེན ཡོཛེཏབྦཾ. ཏེནཱཧ ‘‘ཏསྶཱ ཙ ཨིཏརཱ’’ཏི.

དྷམྨཊྛིཏཏཱཀཐཱཝཎྞནཱ ནིཊྛིཏཱ.

༡༠. ཨནིཙྩཏཱཀཐཱཝཎྞནཱ

༦༢༨. རཱུཔཱདཱིནཾ ཨནིཙྩཏཱ རཱུཔཱདིཀེ སཏི ཧོཏི, ཨསཏི ན ཧོཏཱིཏི ཨིམིནཱ པརིཡཱཡེན ཏསྶཱ ཏེཧི སཧ ཨུཔྤཱདནིརོདྷོ ཝུཏྟོ, ཨུཔྤཱདཱདཱིསུ ཏཱིསུ ལཀྑཎེསུ ཨནིཙྩཏཱཝོཧཱརོ ཧོཏཱིཏི ཡཐཱ ཏཡོ དཎྜེ ཨུཔཱདཱཡ པཝཏྟོ ཏིདཎྜཝོཧཱརོ ཏེསུ སབྦེསུ ཧོཏི, ཨེཝཾ ཛཱཏིཛརཱམརཎདྷམྨོ ན ནིཙྩོ ཨནིཙྩོ, ཏསྶ ཛཱཏིཨཱདིཔཀཏིཏཱ ཨནིཙྩཏཱསདྡེན ཝུཙྩཏཱིཏི ཨུཔྤཱདཱདཱིསུ ལཀྑཎེསུ ཨནིཙྩཏཱཝོཧཱརོ སམྦྷཝཏཱིཏི ཝུཏྟཾ ‘‘ཏཱིསུ…པེ… ཧོཏཱི’’ཏི. ཝིབྷཱགཱནུཡུཉྫནཝསེནཱཏི པབྷེདཱནུཡུཉྫནཝསེན. ཏཏྠ ཡཐཱ ཛརཱབྷངྒཝསེན ཨནིཙྩཏཱ པཱཀཊཱ ཧོཏི, ན ཏཐཱ ཛཱཏིཝསེནཱཏི པཱལི༹ཡཾ ཛརཱམརཎཝསེནེཝ ཨནིཙྩཏཱཝིབྷཱགོ དསྶིཏོཏི དཊྛབྦཾ.

ཨནིཙྩཏཱཀཐཱཝཎྞནཱ ནིཊྛིཏཱ.

ཨེཀཱདསམཝགྒཝཎྞནཱ ནིཊྛིཏཱ.

༡༢. དྭཱདསམཝགྒོ

༡. སཾཝརོཀམྨནྟིཀཐཱཝཎྞནཱ

༦༣༠-༦༣༢. སབྦསྶཔི ¶ མནསོ མནོདྭཱརབྷཱཝཏོ ‘‘ཝིཔཱཀདྭཱརནྟི བྷཝངྒམནཾ ཝདཏཱི’’ཏི ཨཱཧ.

སཾཝརོཀམྨནྟིཀཐཱཝཎྞནཱ ནིཊྛིཏཱ.

༢. ཀམྨཀཐཱཝཎྞནཱ

༦༣༣-༦༣༥. སཝིཔཱཀཱཔི ¶ དསྶིཏཱཡེཝ ནཱམ ཧོཏི ཝུཏྟཱཝསིཊྛཱ སཝིཔཱཀཱཏི ཨཏྠསིདྡྷཏྟཱ.

ཀམྨཀཐཱཝཎྞནཱ ནིཊྛིཏཱ.

༤. སལཱ༹ཡཏནཀཐཱཝཎྞནཱ

༦༣༨-༦༤༠. མནཱཡཏནེཀདེསསྶ ཝིཔཱཀསྶ ཨཏྠིཏཱཡ ‘‘ཨཝིསེསེནཱ’’ཏི ཝུཏྟཾ.

སལཱ༹ཡཏནཀཐཱཝཎྞནཱ ནིཊྛིཏཱ.

༥. སཏྟཀྑཏྟུཔརམཀཐཱཝཎྞནཱ

༦༤༡-༦༤༥. ཨསྶཱཏི ཨིམསྶ སཏྟཀྑཏྟུཔརམསྶ. ཏེནཱཧ ‘‘སཏྟཀྑཏྟུཔརམབྷཱཝེ ཙ ནིཡཱམཾ ¶ ཨིཙྪསཱི’’ཏི. ཡེན ཨཱནནྟརིཡཀམྨེན. ཨནྟརཱཏི སཏྟ བྷཝེ ཨནིབྦཏྟེཏྭཱ ཏེསཾ ཨནྟརེཡེཝ. ཀེཙཱིཏི ཨབྷཡགིརིཝཱསིནོ. ཨཔརེཏི པདཀཱརཱ. ཏསྶཱཏི ཡོ སཏྟཀྑཏྟུཔརམོཏི ཝཱ, ཀོལཾཀོལོཏི ཝཱ, ཨེཀབཱིཛཱིཏི ཝཱ བྷགཝཏཱ ཉཱཎེན པརིཙྪིནྡིཏྭཱ བྱཱཀཏོ, ཏསྶ ཡཐཱཝུཏྟཔརིཙྪེདཱ ཨནྟརཱ ཨུཔརིམགྒཱདྷིགམོ ནཏྠི ཨཝིཏཐདེསནཏྟཱ. ཡཐཱཔརིཙྪེདམེཝ ཏསྶ ཨབྷིསམཡོ, སྭཱཡཾ ཝིབྷཱགོ ཏེསཾཡེཝ པུགྒལཱནཾ ཨིནྡྲིཡཔརོཔརིཡཏྟེན ཝེདིཏབྦོ བྷཝནིཡཱམེན ཏཱདིསསྶ ཀསྶཙི ཨབྷཱཝཏོ. ཡསྨཱ ཀསྶཙི མུདུཀཱནིཔི ཨིནྡྲིཡཱནི པཙྩཡཝིསེསེན ཏིཀྑབྷཱཝཾ ཨཱཔཛྫེཡྻུཾ, ཏསྨཱ ཏཱདིསཾ སནྡྷཱཡ ‘‘བྷབྦོཏི ཝུཙྩཏི, ན སོ ཨབྷབྦོ ནཱམཱ’’ཏི ཙ ཝུཏྟཾ. ཡསྨཱ པན བྷགཝཱ ན ཏཱདིསཾ ‘‘སཏྟཀྑཏྟུཔརམོ’’ཏིཨཱདིནཱ ནིཡམེཏྭཱ བྱཱཀརོཏི, ཏསྨཱ ཨཱཧ ‘‘ན པན ཨནྟརཱ ཨབྷིསམེཏུཾ བྷབྦཏཱ ཝུཏྟཱ’’ཏི. ཨཡཉྩ ནཡོ ཨེཀནྟེན ཨིཙྪིཏབྦོ. ཨཉྙཐཱ པུགྒལསྶ སངྐརོ སིཡཱཏི དསྶེནྟོ ‘‘ཡདི ཙཱ’’ཏིཨཱདིམཱཧ.

སཏྟཀྑཏྟུཔརམཀཐཱཝཎྞནཱ ནིཊྛིཏཱ.

དྭཱདསམཝགྒཝཎྞནཱ ནིཊྛིཏཱ.

༡༣. ཏེརསམཝགྒོ

༡. ཀཔྤཊྛཀཐཱཝཎྞནཱ

༦༥༤-༦༥༧. ‘‘ཧེཊྛཱ ¶ ཝུཏྟཱདྷིཔྤཱཡམེཝཱ’’ཏི ཨིདཾ ཨིདྡྷིབལཀཐཱཡཾ ཡཾ ཝུཏྟཾ ‘‘ཨཏཱིཏཾ ཨནཱགཏནྟི ཨིདཾ ཨཝིསེསེན ཀཔྤཾ ཏིཊྛེཡྻཱཏི པཊིཉྙཱཏཏྟཱ ཙོདེཏཱི’’ཏིཨཱདི, ཏཾ སནྡྷཱཡ ཝུཏྟནྟི ཨཱཧ ‘‘ཧེཊྛཱཏི ཨིདྡྷིབལཀཐཱཡ’’ནྟི. ཏཏྠ ‘‘དྭེ ཀཔྤེ’’ཏིཨཱདིཨཱཡུཔརིཙྪེདཱཏིཀྐམསམཏྠཏཱཙོདནཱཝསེན ཨཱགཏཱ, ཨིདྷ པན སངྒྷབྷེདཀོ ཨཱཡུཀཔྤམེཝ ཨཊྛཏྭཱ ཡདི ཨེཀཾ མཧཱཀཔྤཾ ཏིཊྛེཡྻ, ཡཐཱ ཨེཀཾ, ཨེཝཾ ཨནེཀེཔི ཀཔྤེ ཏིཊྛེཡྻཱཏི ཙོདནཱ ཀཱཏབྦཱ.

ཀཔྤཊྛཀཐཱཝཎྞནཱ ནིཊྛིཏཱ.

༤. ནིཡཏསྶནིཡཱམཀཐཱཝཎྞནཱ

༦༦༣-༦༦༤. ཨཔྤཏྟནིཡཱམཱནནྟི ¶ ཡེ ཨནུཔྤནྣམིཙྪཏྟསམྨཏྟནིཡཏདྷམྨཱ པུགྒལཱ, ཏེསཾ དྷམྨེ. ཀེ པན ཏེ? ཡཐཱཝུཏྟཔུགྒལསནྟཱནཔརིཡཱཔནྣཱ དྷམྨཱ. ཏེ ཧི བྷཱུམིཏྟཡཔརིཡཱཔནྣཏཱཡ ‘‘ཏེབྷཱུམཀཱ’’ཏི ཝུཏྟཱ. ཡེ པན པཏྟནིཡཱམཱནཾ སནྟཱནེ པཝཏྟཱ ཨནིཡཏདྷམྨཱ, ན ཏེསམེཏྠ སངྒཧོ ཀཏོ. ན ཧི ཏེཧི སམནྣཱགམེན ཨནིཡཏཏཱ ཨཏྠི. ཏེནེཝཱཧ ‘‘ཏེཧི སམནྣཱགཏོཔི ཨནིཡཏོཡེཝཱ’’ཏི. ཨིམཾ ཝོཧཱརམཏྟནྟི ཨིམིནཱ ནིཡཱམོ ནཱམ ཀོཙི དྷམྨོ ནཏྠི, ཨུཔཙིཏསམྦྷཱརཏཱཡ ཨབྷིསམྦུཛ྄ཛྷིཏུཾ བྷབྦཏཱཝ ཏཐཱ ཝུཙྩཏཱིཏི དསྶེཏི. ནིཡཏོཏི ཝཙནསྶ ཀཱརཎབྷཱཝེན ཝུཏྟོཏི ཡོཛནཱ. ཨུབྷཡསྶཔཱིཏི ནིཡཏོ ནིཡཱམཾ ཨོཀྐམཏཱིཏི ཝཙནདྭཡསྶ.

ནིཡཏསྶནིཡཱམཀཐཱཝཎྞནཱ ནིཊྛིཏཱ.

༨. ཨསཱཏརཱགཀཐཱཝཎྞནཱ

༦༧༤. ཨེཝཾ པཝཏྟམཱནོཏི ‘‘ཨཧོ ཝཏ མེ བྷཝེཡྻཱ’’ཏི ཨེཝཾ པཏྠནཱཀཱརེན པཝཏྟམཱནོ. ཨཉྙཐཱཏི ནནྡནཱདིཨཱཀཱརེན.

ཨསཱཏརཱགཀཐཱཝཎྞནཱ ནིཊྛིཏཱ.

༩. དྷམྨཏཎྷཱཨབྱཱཀཏཱཏིཀཐཱཝཎྞནཱ

༦༧༦-༦༨༠. གཧེཏྭཱཏི ¶ ཨེཏེན གཧཎམཏྟམེཝ ཏཾ, ན པན སཱ ཏཱདིསཱི ཨཏྠཱིཏི དསྶེཏི. ན ཧི ལོཀུཏྟརཱརམྨཎཱ ཨབྱཱཀཏཱ ཝཱ ཏཎྷཱ ཨཏྠཱིཏི. ཏཱིཧི ཀོཊྛཱསེཧཱིཏི ཀཱམབྷཝཝིབྷཝཏཎྷཱཀོཊྛཱསེཧི. རཱུཔཏཎྷཱདིབྷེདཱ ཚཔི ཏཎྷཱ.

དྷམྨཏཎྷཱཨབྱཱཀཏཱཏིཀཐཱཝཎྞནཱ ནིཊྛིཏཱ.

ཏེརསམཝགྒཝཎྞནཱ ནིཊྛིཏཱ.

༡༤. ཙུདྡསམཝགྒོ

༡. ཀུསལཱཀུསལཔཊིསནྡཧནཀཐཱཝཎྞནཱ

༦༨༦-༦༩༠. ཨནནྟརཔཙྩཡབྷཱཝོཡེཝེཏྠ ¶ པཊིསནྡྷཱནཾ གྷཊནཉྩཱཏི ཨཱཧ ‘‘ཨནནྟརཾ ཨུཔྤཱདེཏཱི’’ཏི.

ཀུསལཱཀུསལཔཊིསནྡཧནཀཐཱཝཎྞནཱ ནིཊྛིཏཱ.

༢. སལཱ༹ཡཏནུཔྤཏྟིཀཐཱཝཎྞནཱ

༦༩༡-༦༩༢. ཀེཙི ཝཱདིནོཏི ཀཱཔིལེ སནྡྷཱཡཱཧ. ཏེ ཧི ཨབྷིབྱཏྟཝཱདིནོ ཝིཛྫམཱནམེཝ ཀཱརཎེ ཕལཾ ཨནབྷིབྱཏྟཾ ཧུཏྭཱ ཋིཏཾ པཙྪཱ ཨབྷིབྱཏྟིཾ གཙྪཏཱིཏི ཝདནྟཱ བཱིཛཱཝཏྠཱཡ ཝིཛྫམཱནཱཔི རུཀྑཱདཱིནཾ ན ཨངྐུརཱདཡོ ཨཱཝིབྷཝནྟི, བཱིཛམཏྟཾ ཨཱཝིབྷཱཝཾ གཙྪཏཱིཏི ཀཐེནྟི.

སལཱ༹ཡཏནུཔྤཏྟིཀཐཱཝཎྞནཱ ནིཊྛིཏཱ.

༣. ཨནནྟརཔཙྩཡཀཐཱཝཎྞནཱ

༦༩༣-༦༩༧. ཨནནྟརུཔྤཏྟིཾ སལླཀྑེནྟོཏི ཙཀྑུཝིཉྙཱཎཱནནྟརཾ སོཏཝིཉྙཱཎུཔྤཏྟིཾ མཉྙམཱནོ. སོཏཝིཉྙཱཎནྟི ཝཙནེནེཝ ཏསྶ ཙཀྑུསནྣིསྶཡཏཱ ¶ རཱུཔཱརམྨཎཏཱ ཙ པཊིཀྑིཏྟཱ, པཊིཉྙཱཏཱ ཙ སོཏསནྣིསྶཡཏཱ སདྡཱརམྨཎཏཱ ཙཱཏི ཨཱཧ ‘‘ན སོ ཙཀྑུམྷི སདྡཱརམྨཎ’’ནྟི. ཏཏྠ སདྡཱརམྨཎནྟི ‘‘སོཏཝིཉྙཱཎཾ ཨིཙྪཏཱི’’ཏི ཨཱནེཏྭཱ སམྦནྡྷིཏབྦཾ. ཏཡིདཾ ཙཀྑུཝིཉྙཱཎསྶ ཨནནྟརཾ སོཏཝིཉྙཱཎཾ ཨུཔྤཛྫཏཱིཏི ལདྡྷིཡཱ ཨེཝཾ ཉཱཡཏཱིཏི ཨཱཧ ‘‘ཨནནྟརཱུཔལདྡྷིཝསེན ཨཱཔནྣཏྟཱ’’ཏི.

ཨནནྟརཔཙྩཡཀཐཱཝཎྞནཱ ནིཊྛིཏཱ.

༤. ཨརིཡརཱུཔཀཐཱཝཎྞནཱ

༦༩༨-༦༩༩. སམྨཱཝཱཙཱདཱིཏི ¶ སམྨཱཝཱཙཱཀམྨནྟཱ. ཏཏྠ སམྨཱཝཱཙཱ སདྡསབྷཱཝཱ, ཨིཏརོ ཙ ཀཱཡཝིཉྙཏྟིསབྷཱཝོ, ཨུབྷཡམྤི ཝཱ ཝིཉྙཏྟཱིཏི ཨདྷིཔྤཱཡེན རཱུཔནྟིསྶ ལདྡྷི.

ཨརིཡརཱུཔཀཐཱཝཎྞནཱ ནིཊྛིཏཱ.

༥. ཨཉྙོཨནུསཡོཏིཀཐཱཝཎྞནཱ

༧༠༠-༧༠༡. ཏསྨིཾ སམཡེཏི ཀུསལཱབྱཱཀཏཙིཏྟཀྑཎེ. སོ ཧཱིཏི པཙྪིམཔཱཋོ.

ཨཉྙོཨནུསཡོཏིཀཐཱཝཎྞནཱ ནིཊྛིཏཱ.

༦. པརིཡུཊྛཱནཾཙིཏྟཝིཔྤཡུཏྟནྟིཀཐཱཝཎྞནཱ

༧༠༢. ཏེཏི རཱགཱདཡོ. ཏསྨཱཏི ཡསྨཱ ཝིཔསྶནྟསྶཔི རཱགཱདཡོ ཨུཔྤཛྫནྟི, ཏསྨཱ.

པརིཡུཊྛཱནཾཙིཏྟཝིཔྤཡུཏྟནྟིཀཐཱཝཎྞནཱ ནིཊྛིཏཱ.

༧. པརིཡཱཔནྣཀཐཱཝཎྞནཱ

༧༠༣-༧༠༥. ཀིལེསཝཏྠུཨོཀཱསཝསེནཱཏི ¶ ཀིལེསཀཱམཝཏྠུཀཱམབྷཱུམིཝསེན. རཱུཔདྷཱཏུསཧགཏཝསེན ཨནུསེཏཱིཏི ཀཱམརཱགོ ཡཐཱ ཀཱམཝིཏཀྐསངྑཱཏཱཡ ཀཱམདྷཱཏུཡཱ སཧ པཙྩཡསམཝཱཡེ ¶ ཨུཔྤཛྫནཱརཧོ, ཏམེཝ རཱུཔདྷཱཏུཡཱཔཱིཏི ཨཏྠོ. རཱགཱདིཀཱརཎལཱབྷེ ཨུཔྤཏྟིཨརཧཏཱ ཧི ཨནུསཡནཾ.

པརིཡཱཔནྣཀཐཱཝཎྞནཱ ནིཊྛིཏཱ.

༨. ཨབྱཱཀཏཀཐཱཝཎྞནཱ

༧༠༦-༦༠༨. སབྦཐཱཔཱིཏི ཨཝིཔཱཀབྷཱཝེནཔི སསྶཏཱདིབྷཱཝེནཔི.

ཨབྱཱཀཏཀཐཱཝཎྞནཱ ནིཊྛིཏཱ.

༩. ཨཔརིཡཱཔནྣཀཐཱཝཎྞནཱ

༧༠༩-༧༡༠. ཏསྨཱ དིཊྛི ལོཀིཡཔརིཡཱཔནྣཱ ན ཧོཏཱིཏི ཨཏྠཾ ཝདནྟི, ཨེཝཾ སཏི ཨཏིཔྤསངྒོ ཧོཏི ཝཱིཏདོསཱདིཝོཧཱརབྷཱཝཏོཏི. ཏཏོ ཨཉྙཐཱ ཨཏྠཾ ཝདནྟོ ‘‘རཱུཔདིཊྛིཡཱ’’ཏིཨཱདིམཱཧ. ཏཏྠ ཨཱདི-སདྡེན ཨརཱུཔདིཊྛིཨཱདིཾ སངྒཎྷཱཏི. པརཝཱདིཨདྷིཔྤཱཡཝསེན ཨཡམཏྠཝིབྷཱཝནཱཏི ཨཱཧ ‘‘ཡདི ཙ པརིཡཱཔནྣཱ སིཡཱ’’ཏི. ཏཐཱ ཙ སཏཱིཏི དིཊྛིཡཱ ཀཱམདྷཱཏུཔརིཡཱཔནྣཏྟེ སཏཱིཏི ཨཏྠོ. ཏསྨཱཏི ‘‘ཝཱིཏདིཊྛིཀོ’’ཏི ཨེཝཾ ཝོཧཱརཱབྷཱཝཏོ. ན ཧི སཱ ཏསྶ ཨཝིགཏཱ དིཊྛི, ཡཏོ སོ ཝཱིཏདིཊྛིཀོཏི ན ཝུཙྩཏི. ཡེནཱཏི ཀཱམདིཊྛིབྷཱཝེན.

ཨཔརིཡཱཔནྣཀཐཱཝཎྞནཱ ནིཊྛིཏཱ.

ཙུདྡསམཝགྒཝཎྞནཱ ནིཊྛིཏཱ.

༡༥. པནྣརསམཝགྒོ

༡. པཙྩཡཏཱཀཐཱཝཎྞནཱ

༧༡༡-༧༡༧. ཝཝཏྠིཏོཏི ¶ ¶ ཨསཾཀིཎྞོ. ཡོ ཧི དྷམྨོ ཡེན པཙྩཡབྷཱཝེན པཙྩཡོ ཧོཏི, ཏསྶ ཏཏོ ཨཉྙེནཔི པཙྩཡབྷཱཝེ སཏི པཙྩཡཏཱ སཾཀིཎྞཱ ནཱམ བྷཝེཡྻ. ཝིརུདྡྷཱསམྦྷཝཱིནཾ ཝིཡ ཏབྦིདྷུརཱནཾ པཙྩཡབྷཱཝཱནཾ སཧབྷཱཝཾ པཊིཀྑིཔཏི.

པཙྩཡཏཱཀཐཱཝཎྞནཱ ནིཊྛིཏཱ.

༢. ཨཉྙམཉྙཔཙྩཡཀཐཱཝཎྞནཱ

༧༡༨-༧༡༩. སཧཛཱཏཱཏི ཝུཏྟཏྟཱ ན སངྑཱརཔཙྩཡཱ ཙ ཨཝིཛྫཱཏི ཝུཏྟཏྟཱཏི ཨདྷིཔྤཱཡོ. ཨནནྟརཱདིནཱཔི ཧི སངྑཱརཱ ཨཝིཛྫཱཡ པཙྩཡཱ ཧོནྟིཡེཝ. ཨཉྙམཉྙཱནནྟརཾ ཨཝཏྭཱ ཨཝིགཏཱནནྟརཾ སམྤཡུཏྟསྶ ཝཙནཾ ཀམབྷེདོ, ཨཏྠིགྒཧཎེནེཝ གཧིཏོ ཨཏྠིཔཙྩཡབྷཱུཏོཡེཝ དྷམྨོ ནིསྶཡཔཙྩཡོ ཧོཏཱིཏི. ཨསཱདྷཱརཎཏཱཡཱཏི པདནྟརཱསཱདྷཱརཎཏཱཡ. ཏེནཱཧ ‘‘ཝཀྑཏི ཧཱི’’ཏིཨཱདི.

ཨཉྙམཉྙཔཙྩཡཀཐཱཝཎྞནཱ ནིཊྛིཏཱ.

༩. ཏཏིཡསཉྙཱཝེདཡིཏཀཐཱཝཎྞནཱ

༧༣༢. ཡདིཔི སེསཾ ནཱམ གཧིཏཏོ ཨཉྙཾ, ཏཐཱཔི པཀརཎཔརིཙྪིནྣམེཝེཏྠ ཏཾ གཡ྄ཧཏཱིཏི དསྶེནྟོ ‘‘ཡེསཾ…པེ… ཨདྷིཔྤཱཡོ’’ཏི ཝཏྭཱ པུན ཨནཝསེསམེཝ སངྒཎྷནྟོ ‘‘ཨསཉྙསཏྟཱནམྤི ¶ ཙཱ’’ཏིཨཱདིམཱཧ. ཏཏྠ སབྦསཏྟེ སནྡྷཱཡཱཏི ཨདྷིཔྤཱཡོཏི ཡོཛནཱ. པཱཎིསམྥསྶཱཔི ཀམནྟཱིཏིཨཱདིཀཾ སརཱིརཔཀཏཱིཏི སམྦནྡྷོ.

༧༣༣-༧༣༤. པཉྩཧི ཝིཉྙཱཎེཧི ན ཙཝཏི, ན ཨུཔཔཛྫཏཱིཏི ཝཱདཾ པརཝཱདཱི ནཱནུཛཱནཱཏཱིཏི ཨཱཧ ‘‘སུཏྟ…པེ… ཝཏྟབྦ’’ནྟི.

ཏཏིཡསཉྙཱཝེདཡིཏཀཐཱཝཎྞནཱ ནིཊྛིཏཱ.

༡༠. ཨསཉྙསཏྟུཔིཀཱཀཐཱཝཎྞནཱ

༧༣༥. ཡཐཱ ¶ ཝིཏཀྐཝིཙཱརཔཱིཏིསུཁཝིརཱགཝསེན པཝཏྟཱ སམཱཔཏྟི ཝིཏཀྐཱདིརཧིཏཱ ཧོཏི, ཨེཝཾ སཉྙཱཝིརཱགཝསེན པཝཏྟཱཔི སཉྙཱརཧིཏཱཝ སིཡཱཏི ཏསྶ ལདྡྷཱིཏི དསྶེནྟོ ཨཱཧ ‘‘སཱཔི ཨསཉྙིཏཱ…པེ… དསྶེཏཱི’’ཏི.

༧༣༦. ཡདི ཙཏུཏྠཛ྄ཛྷཱནསམཱཔཏྟི ཀཐཾ ཨསཉྙསམཱཔཏྟཱིཏི ཙོདནཾ སནྡྷཱཡཱཧ ‘‘སཉྙཱཝིརཱགཝསེན སམཱཔནྣཏྟཱ ཨསཉྙིཏཱ, ན སཉྙཱཡ ཨབྷཱཝཏོ’’ཏི.

ཨསཉྙསཏྟུཔིཀཱཀཐཱཝཎྞནཱ ནིཊྛིཏཱ.

༡༡. ཀམྨཱུཔཙཡཀཐཱཝཎྞནཱ

༧༣༨-༧༣༩. ‘‘ཀམྨཱུཔཙཡོ ཀམྨེན སཧཛཱཏོ’’ཏི པུཊྛོ སམྤཡུཏྟསཧཛཱཏཏཾ སནྡྷཱཡ པཊིཀྑིཔཏི, ཝིཔྤཡུཏྟསཧཛཱཏཏཾ སནྡྷཱཡ པཊིཛཱནཱཏཱིཏི. ཝིཔྤཡུཏྟསྶཔི ཧི ཨཏྠི སཧཛཱཏཏཱ ཙིཏྟསམུཊྛཱནརཱུཔསྶ ཝིཡཱཏི ཨདྷིཔྤཱཡོ.

༧༤༡. ཏིཎྞནྟི ¶ ཀམྨཀམྨཱུཔཙཡཀམྨཝིཔཱཀཱནཾ.

ཀམྨཱུཔཙཡཀཐཱཝཎྞནཱ ནིཊྛིཏཱ.

པནྣརསམཝགྒཝཎྞནཱ ནིཊྛིཏཱ.

ཏཏིཡོ པཎྞཱསཀོ སམཏྟོ.

༡༦. སོལ༹སམཝགྒོ

༣. སུཁཱནུཔྤདཱནཀཐཱཝཎྞནཱ

༧༤༧-༧༤༨. ན ཏསྶཱཏི ཡསྶ ཏཾ ཨནུཔྤདིསྶཏི, ན ཏསྶ. ཡོ ཧི ཨནུཔྤདེཏི, ཡསྶ ཙ ཨནུཔྤདེཏི, ཏདུབྷཡཝིནིམུཏྟཱ ཨིདྷ པརེཏི ཨདྷིཔྤེཏཱ.

སུཁཱནུཔྤདཱནཀཐཱཝཎྞནཱ ནིཊྛིཏཱ.

༤. ཨདྷིགཡ྄ཧམནསིཀཱརཀཐཱཝཎྞནཱ

༧༤༩-༧༥༣. ཏཾཙིཏྟཏཱཡཱཏི ¶ ཨེཏྠ མནསིཀརོནྟོ ཡདི སབྦསངྑཱརེ ཨེཀཏོ མནསི ཀརོཏི, ཡེན ཙིཏྟེན མནསི ཀརོཏི, སབྦསངྑཱརནྟོགདྷཏྟཱ ཏསྨིཾཡེཝ ཁཎེ ཏཾ ཙིཏྟཾ མནསི ཀཱཏབྦཾ ཨེཏསྶཱཏི ཏཾཙིཏྟཏཱ ནཱམ དོསོ ཨཱཔཛྫཏཱིཏི དསྶེནྟོ ཨཱཧ ‘‘ཏདེཝ ཨཱརམྨཎབྷཱུཏ’’ནྟིཨཱདི. ཨེཏེན ཏསྶེཝ ཏེན མནསིཀརཎཱསམྦྷཝམཱཧ, ཏཾ ཝཱཏིཨཱདིནཱ པན སསཾཝེདནཱཝཱདཱཔཏྟིནྟི ཨཡམེཏེསཾ ཝིསེསོ.

ཨདྷིགཡ྄ཧམནསིཀཱརཀཐཱཝཎྞནཱ ནིཊྛིཏཱ.

སོལ༹སམཝགྒཝཎྞནཱ ནིཊྛིཏཱ.

༡༧. སཏྟརསམཝགྒོ

༡. ཨཏྠིཨརཧཏོཔུཉྙཱུཔཙཡཀཐཱཝཎྞནཱ

༧༧༦-༧༧༩. ཀིརིཡཙིཏྟཾ ¶ ཨབྱཱཀཏཾ ཨནཱདིཡིཏྭཱཏི ‘‘ཀིརིཡཙིཏྟཾ ཨབྱཱཀཏ’’ནྟི ཨགྒཧེཏྭཱ, དཱནཱདིཔཝཏྟནེན དཱནམཡཱདིཔུཉྙཏྟེན ཙ གཧེཏྭཱཏི ཨཏྠོ.

ཨཏྠིཨརཧཏོཔུཉྙཱུཔཙཡཀཐཱཝཎྞནཱ ནིཊྛིཏཱ.

༢. ནཏྠིཨརཧཏོཨཀཱལམཙྩཱུཏིཀཐཱཝཎྞནཱ

༧༨༠. ཨལདྡྷཝིཔཱཀཝཱརཱནནྟི ཝིཔཱཀདཱནཾ པཏི ཨལདྡྷོཀཱསཱནཾ. བྱནྟཱིབྷཱཝནྟི ཝིགཏནྟཏཾ, ཝིགམཾ ཨཝིཔཱཀནྟི ཨཏྠོ.

༧༨༡. ཏཏོ པརནྟི བྱཏིརེཀེན ཨཏྠསིདྡྷི, ན ཀེཝལེན ཨནྭཡེནཱཏི ཨཱཧ ‘‘ཏཱཝ ན ཀམཏི, ཏཏོ པརཾ ཀམཏཱིཏི ལདྡྷིཡཱ པཊིཀྑིཔཏཱི’’ཏི. ཏཏྠ ཏཏོ པརནྟི པུབྦེ ཀཏསྶ ཀམྨསྶ པརིཀྑཡགམནཏོ པརཾ. ནཏྠི པཱཎཱཏིཔཱཏོ པཱཎཱཏིཔཱཏལཀྑཎཱབྷཱཝཏོཏི ཨདྷིཔྤཱཡོ. ཏམེཝ ལཀྑཎཱབྷཱཝཾ དསྶེཏུཾ ‘‘པཱཎོཔཱཎསཉྙིཏཱ’’ཏིཨཱདི ཝུཏྟཾ. ཏཏྠ ན ཏེནཱཏི ཡོ པརེན ཨུཔཀྐམོ ཀཏོ ¶ , ཏེན ཨུཔཀྐམེན ན མཏོ, དྷམྨཏཱམརཎེནེཝ མཏོཏི དུབྦིཉྙེཡྻཾ ཨཝིསེསཝིདཱུཧི, དུབྦིཉྙེཡྻཾ ཝཱ ཧོཏུ སུཝིཉྙེཡྻཾ ཝཱ, ཨངྒཔཱརིཔཱུརིཡཱཝ པཱཎཱཏིཔཱཏོ.

ནཏྠིཨརཧཏོཨཀཱལམཙྩཱུཏིཀཐཱཝཎྞནཱ ནིཊྛིཏཱ.

༣. སབྦམིདཾཀམྨཏོཏིཀཐཱཝཎྞནཱ

༧༨༤. ཨབཱིཛཏོཏི ¶ སབྦེན སབྦཾ ཨབཱིཛཏོ ཨཉྙབཱིཛཏོ ཙ. ཏནྟི དེཡྻདྷམྨཾ, གིལཱནཔཙྩཡནྟི ཨཏྠོ.

སབྦམིདཾཀམྨཏོཏིཀཐཱཝཎྞནཱ ནིཊྛིཏཱ.

༤. ཨིནྡྲིཡབདྡྷཀཐཱཝཎྞནཱ

༧༨༨. ཝིནཱཔི ཨནིཙྩཊྛེནཱཏི ཨནིཙྩཊྛཾ ཋཔེཏྭཱཔི ཨཊྛཔེཏྭཱཔཱིཏི ཨཏྠོ, ན ཨནིཙྩཊྛཝིརཧེནཱཏི. ན ཧི ཨནིཙྩཊྛཝིརཧིཏཾ ཨནིནྡྲིཡབདྡྷཾ ཨཏྠི.

ཨིནྡྲིཡབདྡྷཀཐཱཝཎྞནཱ ནིཊྛིཏཱ.

༧. ནཝཏྟབྦཾསངྒྷོདཀྑིཎཾཝིསོདྷེཏཱིཏིཀཐཱཝཎྞནཱ

༧༩༣-༧༩༤. ཨཔྤཊིགྒཧཎཏོཏི པཊིགྒཱཧཀཏྟཱབྷཱཝཏོ.

ནཝཏྟབྦཾསངྒྷོདཀྑིཎཾཝིསོདྷེཏཱིཏིཀཐཱཝཎྞནཱ ནིཊྛིཏཱ.

༡༡. དཀྑིཎཱཝིསུདྡྷིཀཐཱཝཎྞནཱ

༨༠༠-༨༠༡. པཊིགྒཱཧཀནིརཔེཀྑཱཏི པཊིགྒཱཧཀསྶ གུཎཝིསེསནིརཔེཀྑཱ, ཏསྶ དཀྑིཎེཡྻབྷཱཝེན ཝིནཱཏི ཨཏྠོ. ཏེནཱཧ ‘‘པཊིགྒཱཧཀེན ¶ པཙྩཡབྷཱུཏེན ཝིནཱ’’ཏི. སཙྩམེཏནྟི ¶ ལདྡྷིཀིཏྟནེན ཝུཏྟབྷཱཝམེཝ པཊིཛཱནཱཏི. པཊིགྒཱཧཀསྶ ཝིཔཱཀནིབྦཏྟནཾ དཱནཙེཏནཱཡ མཧཱཕལཏཱ. པཙྩཡབྷཱཝོཡེཝ ཧི ཏསྶ, ན ཏསྶཱ ཀཱརཎཏྟཾ. ཏེནཱཧ ‘‘དཱནཙེཏནཱནིབྦཏྟནེན ཡདི བྷཝེཡྻཱ’’ཏིཨཱདི.

དཀྑིཎཱཝིསུདྡྷིཀཐཱཝཎྞནཱ ནིཊྛིཏཱ.

སཏྟརསམཝགྒཝཎྞནཱ ནིཊྛིཏཱ.

༡༨. ཨཊྛཱརསམཝགྒོ

༡. མནུསྶལོཀཀཐཱཝཎྞནཱ

༨༠༢-༨༠༣. གཧཎནྟི མིཙྪཱགཧཎཾ.

མནུསྶལོཀཀཐཱཝཎྞནཱ ནིཊྛིཏཱ.

༢. དྷམྨདེསནཱཀཐཱཝཎྞནཱ

༨༠༤-༨༠༦. ཏསྶ ཙ ནིམྨིཏབུདྡྷསྶ དེསནཾ སམྤཊིཙྪིཏྭཱ ཨཱཡསྨཏཱ ཨཱནནྡེན སཡམེཝ ཙ དེསིཏོ.

དྷམྨདེསནཱཀཐཱཝཎྞནཱ ནིཊྛིཏཱ.

༦. ཛྷཱནསངྐནྟིཀཐཱཝཎྞནཱ

༨༡༣-༨༡༦. ཝིཏཀྐཝིཙཱརེསུ ཝིརཏྟཙིཏྟཏཱ ཏཏྠ ཨཱདཱིནཝམནསིཀཱརོ, ཏདཱཀཱརོ ཙ དུཏིཡཛ྄ཛྷཱནཱུཔཙཱརོཏི ཨཱཧ ‘‘ཝིཏཀྐཝིཙཱརཱ ཨཱདཱིནཝཏོ མནསི ཀཱཏབྦཱ, ཏཏོ དུཏིཡཛ྄ཛྷཱནེན བྷཝིཏབྦ’’ནྟི.

ཛྷཱནསངྐནྟིཀཐཱཝཎྞནཱ ནིཊྛིཏཱ.

༧. ཛྷཱནནྟརིཀཀཐཱཝཎྞནཱ

༨༡༧-༨༡༩. ན ¶ ¶ པཋམཛ྄ཛྷཱནཾ ཝིཏཀྐཱབྷཱཝཏོ, ནཱཔི དུཏིཡཛ྄ཛྷཱནཾ ཝིཙཱརསབྦྷཱཝཏོཏི ཛྷཱནམེཏཾ ན ཧོཏཱིཏི དསྶེནྟོ ཨཱཧ ‘‘པཋམཛ྄ཛྷཱནཱདཱིསུ ཨཉྙཏརབྷཱཝཱབྷཱཝཏོ ན ཛྷཱན’’ནྟི.

ཛྷཱནནྟརིཀཀཐཱཝཎྞནཱ ནིཊྛིཏཱ.

༩. ཙཀྑུནཱརཱུཔཾཔསྶཏཱིཏིཀཐཱཝཎྞནཱ

༨༢༦-༨༢༧. ‘‘ཙཀྑུནཱ རཱུཔཾ དིསྭཱ’’ཏི ཨིམིནཱ ཙཀྑུཝིཉྙཱཎེན པཊིཛཱནནསྶ ཨགྒཧཎེ ཨརུཙིཾ སཱུཙེནྟོ ཨཱཧ ‘‘མནོཝིཉྙཱཎཔཊིཛཱནནཾ ཀིར སནྡྷཱཡཱ’’ཏི. ཏེནེཝཱཧ ‘‘མནོཝིཉྙཱཎཔཊིཛཱནནཾ པནཱ’’ཏིཨཱདི. ཏསྨཱཏི མནོཝིཉྙཱཎཔཊིཛཱནནསྶེཝ ཨདྷིཔྤེཏཏྟཱཏི ཨཏྠོ. ཨེཝཾ སནྟེཏི ཡདི རཱུཔེན རཱུཔཾ པཊིཝིཛཱནཱཏི, རཱུཔཾ པཊིཝིཛཱནནྟམྤི མནོཝིཉྙཱཎཾ རཱུཔཝིཛཱནནཾ ཧོཏི, ན རཱུཔདསྶནནྟི ཨཱཧ ‘‘མནོཝིཉྙཱཎཔཊིཛཱནནཾ པན རཱུཔདསྶནཾ ཀཐཾ ཧོཏཱི’’ཏི.

ཙཀྑུནཱརཱུཔཾཔསྶཏཱིཏིཀཐཱཝཎྞནཱ ནིཊྛིཏཱ.

ཨཊྛཱརསམཝགྒཝཎྞནཱ ནིཊྛིཏཱ.

༡༩. ཨེཀཱུནཝཱིསཏིམཝགྒོ

༡. ཀིལེསཔཛཧནཀཐཱཝཎྞནཱ

༨༢༨-༨༣༡. ཏེ པནཱཏི ཡེ ཨརིཡམགྒེན པཧཱིནཱ ཀིལེསཱ, ཏེ པན. ཀཱམཉྩེཏྠ མགྒེན པཧཱཏབྦཀིལེསཱ མགྒབྷཱཝནཱཡ ཨསཏི ཨུཔྤཛྫནཱརཧཱ ཁཎཏྟཡཾ ན ཨཱགཏཱཏི ཙ ཨནཱགཏཱ ནཱམ ¶ སིཡུཾ, ཡསྨཱ པན ཏེ ན ཨུཔྤཛྫིསྶནྟི, ཏསྨཱ ཏཐཱ ན ཝུཙྩནྟཱིཏི དཊྛབྦཾ. ཏེནེཝཱཧ ‘‘ནཱཔི བྷཝིསྶནྟཱི’’ཏི.

ཀིལེསཔཛཧནཀཐཱཝཎྞནཱ ནིཊྛིཏཱ.

༢. སུཉྙཏཀཐཱཝཎྞནཱ

༨༣༢. ཡེན ¶ ཨཝསཝཏྟནཊྛེན པརཔརིཀཔྤིཏོ ནཏྠི ཨེཏེསཾ ཨཏྟནོ ཝིསཡནྟི ཨནཏྟཱཏི ཝུཙྩནྟི སབྷཱཝདྷམྨཱ, སྭཱཡཾ ཨནཏྟཏཱཏི ཨཱཧ ‘‘ཨཝསཝཏྟནཱཀཱརོ ཨནཏྟཏཱ’’ཏི. སཱ པནཱཡཾ ཡསྨཱ ཨཏྠཏོ ཨསཱརཀཏཱཝ ཧོཏི, ཏསྨཱ ཏདེཀདེསེན ཏཾ དསྶེཏུཾ ‘‘ཨཏྠཏོ ཛརཱམརཎམེཝཱ’’ཏི ཨཱཧ. ཨེཝཾ སཏི ལཀྑཎསངྐརོ སིཡཱ, ཏེསཾ པནིདཾ ཨདྷིཔྤཱཡཀིཏྟནནྟི དཊྛབྦཾ. ཨརཱུཔདྷམྨཱནཾ ཨཝསཝཏྟནཱཀཱརཏཱཡ ཨེཝ ཧི ཨནཏྟལཀྑཎསྶ སངྑཱརཀྑནྡྷཔརིཡཱཔནྣཏཱ.

སུཉྙཏཀཐཱཝཎྞནཱ ནིཊྛིཏཱ.

༣. སཱམཉྙཕལཀཐཱཝཎྞནཱ

༨༣༥-༨༣༦. པཏྟིདྷམྨནྟི ཧེཊྛཱ ཝུཏྟཾ སམནྣཱགམམཱཧ.

སཱམཉྙཕལཀཐཱཝཎྞནཱ ནིཊྛིཏཱ.

༥. ཏཐཏཱཀཐཱཝཎྞནཱ

༨༤༡-༨༤༣. རཱུཔཱདཱིནཾ སབྷཱཝཏཱཏི ཨེཏེན རཱུཔཱདཡོ ཨེཝ སབྷཱཝཏཱཏི ཨིམམཏྠཾ པཊིཀྑིཔཏི ¶ . ཡཏོ ཏཾ པརཝཱདཱི རཱུཔཱདཱིསུ ཨཔརིཡཱཔནྣཾ ཨིཙྪཏི. ཏེནཱཧ ‘‘བྷཱཝཾ ཧེས ཏཐཏཱཏི ཝདཏི, ན བྷཱཝཡོག’’ནྟི. ཏཏྠ བྷཱཝནྟི དྷམྨམཏྟཾ, པཀཏཱིཏི ཨཏྠོ ‘‘ཛཱཏིདྷམྨ’’ནྟིཨཱདཱིསུ ཝིཡ. རཱུཔཱདཱིནཉྷི རུཔྤནཱདིཔཀཏི ཏཐཱ ཨསངྑཏཱཏི ཙ པརཝཱདིནོ ལདྡྷི. ཏེན ཝུཏྟཾ ‘‘ན བྷཱཝཡོག’’ནྟི. ཡེན ཧི བྷཱཝོ སབྷཱཝདྷམྨོ ཡུཛྫཏི, ཨེཀཱིབྷཱཝམེཝ གཙྪཏི, ཏཾ རུཔྤནཱདིལཀྑཎཾ བྷཱཝཡོགོ. ཏཾ པན རཱུཔཱདིཏོ ཨནཉྙཾ, ཏཏོ ཨེཝ སངྑཏཾ, ཨཝིཔརཱིཏཊྛེན པན ‘‘ཏཐ’’ནྟི ཝུཙྩཏི.

ཏཐཏཱཀཐཱཝཎྞནཱ ནིཊྛིཏཱ.

༦. ཀུསལཀཐཱཝཎྞནཱ

༨༤༤-༨༤༦. ཨནཝཛྫབྷཱཝམཏྟེནེཝ ¶ ཀུསལནྟི ཡོཛནཱ. ཏསྨཱཏི ཡསྨཱ ཨཝཛྫརཧིཏཾ ཨནཝཛྫཾ, ཨནཝཛྫབྷཱཝམཏྟེནེཝ ཙ ཀུསལཾ, ཏསྨཱ ནིབྦཱནཾ ཀུསལནྟི.

ཀུསལཀཐཱཝཎྞནཱ ནིཊྛིཏཱ.

༧. ཨཙྩནྟནིཡཱམཀཐཱཝཎྞནཱ

༨༤༧. ཡཾ ‘‘ཨེཀཝཱརཾ ནིམུགྒོ ཏཐཱ ནིམུགྒོཝ ཧོཏི, ཨེཏསྶ པུན བྷཝཏོ ཝུཊྛཱནཾ ནཱམ ནཏྠཱི’’ཏི ཨཊྛཀཐཱཡཾ ཨཱགཏཾ, སོ པན ཨཱཙརིཡཝཱདོ, ན ཨཊྛཀཐཱནཡོཏི དསྶེནྟོ ‘‘ཏཱཡ ཛཱཏིཡཱ…པེ… མཉྙམཱནོ’’ཏི ཨཱཧ. ཏཏྠ ཏཱཡ ཛཱཏིཡཱཏི ཡསྶཾ ཛཱཏིཡཾ པུགྒལོ ཀམྨཱཝརཎཱདིཨཱཝརཎེཧི སམནྣཱགཏོ ཧོཏི, ཏཱཡ ཛཱཏིཡཱ. སཾསཱརཁཱཎུཀབྷཱཝོ ཝསྶབྷཉྙཱདཱིནཾ ཝིཡ མཀྑལིཨཱདཱིནཾ ཝིཡ ཙ དཊྛབྦོ. སོ ཙ ཨཧེཏུཀཱདིམིཙྪཱདསྶནསྶ ཕལབྷཱཝེནེཝ ཝེདིཏབྦོ, ན ཨཙྩནྟནིཡཱམསྶ ནཱམ ཀསྶཙི ཨཏྠིབྷཱཝཏོ. ཡཐཱ ཧི ཝིམུཙྩནྟསྶ ཀོཙི ནིཡཱམོ ནཱམ ནཏྠི ཋཔེཏྭཱ མགྒེན བྷཝཔརིཙྪེདཾ, ཨེཝཾ ཨཝིམུཙྩནྟསྶཔི ཀོཙི སཾསཱརནིཡཱམོ ནཱམ ¶ ནཏྠི. ཏཱདིསསྶ པན མིཙྪཱདསྶནསྶ བལཝབྷཱཝེ ཨཔརིམིཏཀཔྤཔརིཙྪེདེ ཙིརཏརཾ སཾསཱརཔྤབནྡྷོ ཧོཏི, ཨཔཱཡཱུཔཔཏྟི ཙ ཡཏྠ སཾསཱརཁཱཎུསམཉྙཱ.

ཡཾ པནེཀེ ཝདནྟི ‘‘ཨཏྠེཝ ཨཙྩནྟཾ སཾསརིཏཱ ཨནནྟཏྟཱ སཏྟནིཀཱཡསྶཱ’’ཏི, ཏམྤི ཨཔུཉྙབཧུལཾ སཏྟསནྟཱནཾ སནྡྷཱཡ ཝུཏྟཾ སིཡཱ. ན ཧི མཱཏུགྷཱཏཀཱདཱིནཾ ཏེནཏྟབྷཱཝེན སམྨཏྟནིཡཱམོཀྐམནནྟརཱཡབྷཱུཏོ མིཙྪཏྟནིཡཱམོ ཝིཡ སཏྟཱནཾ ཝིམུཏྟནྟརཱཡཀརོ སཾསཱརནིཡཱམོ ནཱམ ནཏྠི. ཡཱཝ པན ན མགྒཕལསྶ ཨུཔནིསྶཡོ ཨུཔལབྦྷཏི, ཏཱཝ སཾསཱརོ ཨཔརིཙྪིནྣོ. ཡདཱ ཙ སོ ཨུཔལདྡྷོ, ཏདཱ སོ པརིཙྪིནྣོ ཨེཝཱཏི དཊྛབྦཾ.

ཡཐཱ ནིཡཏསམྨཱདསྶནཾ, ཨེཝཾ ནིཡཏམིཙྪཱདསྶནེནཔི སཝིསཡེ ཨེཀཾསགཱཧཝསེན ཨུཀྐཾསགཏེན བྷཝིཏབྦནྟི ཏེན སམནྣཱགཏསྶ པུགྒལསྶ སཏི ཨཙྩནྟནིཡཱམེ ཀཐཾ ཏསྨིཾ ཨབྷིནིཝེསཝིསཡེ ཨནེཀཾསགཱཧོ ཨུཔྤཛྫེཡྻ, ཨབྷིནིཝེསནྟརཾ ཝཱ ཝིརུདྡྷཾ ཡདི ཨུཔྤཛྫེཡྻ, ཨཙྩནྟནིཡཱམོ ཨེཝ ན ¶ སིཡཱཏི པཱལི༹ཡཾ ཝིཙིཀིཙྪུཔྤཏྟིནིཡཱམནྟརུཔྤཏྟིཙོདནཱ ཀཏཱ. ན ཧི ཝིཙིཀིཙྪཱ ཝིཡ སམྨཏྟནིཡཏཔུགྒལཱནཾ ཡཐཱཀྐམཾ མིཙྪཏྟསམྨཏྟནིཡཏཔུགྒལཱནཾ སམྨཏྟམིཙྪཏྟནིཡཏཱ དྷམྨཱ ཀདཱཙིཔི ཨུཔྤཛྫནྟི, ཨཝིརུདྡྷཾ པན ནིཡཱམནྟརམེཝ ཧོཏཱིཏི ཨཱནནྟརིཀནྟརཾ ཝིཡ མིཙྪཱདསྶནནྟརཾ སམཱནཛཱཏིཀཾ ན ནིཝཏྟེཏཱིཏི ཝིརུདྡྷཾཡེཝ དསྶེཏུཾ པཱལི༹ཡཾ ཝིཙིཀིཙྪཱ ཝིཡ སསྶཏུཙྪེདདིཊྛིཡོ ཨེཝ ཨུདྡྷཊཱ. ཨེཝམེཏྠ ཝིཙིཀིཙྪུཔྤཏྟིནིཡཱམནྟརུཔྤཏྟཱིནཾ ནིཡཱམནྟརུཔྤཏྟིནིཝཏྟཀབྷཱཝོ ཝེདིཏབྦོ, ཨཙྩནྟནིཡཱམོ ཙ ནིཝཏྟིསྶཏཱིཏི ཙ ཝིརུདྡྷམེཏནྟི པན ‘‘ཝིཙཱརེཏྭཱཝ གཧེཏབྦཱ’’ཏི ཝུཏྟཾ སིཡཱ.

ཨཙྩནྟནིཡཱམཀཐཱཝཎྞནཱ ནིཊྛིཏཱ.

༨. ཨིནྡྲིཡཀཐཱཝཎྞནཱ

༨༥༣-༨༥༦. ཡཐཱ ལོཀུཏྟརཱ སདྡྷཱདཡོ ཨེཝ སདྡྷིནྡྲིཡཱདཱིནི, ཨེཝཾ ལོཀིཡཱཔི. ཀསྨཱ ¶ ? ཏཏྠཱཔི ཨདྷིམོཀྑལཀྑཎཱདིནཱ ཨིནྡཊྛསབྦྷཱཝཏོ. སདྡྷེཡྻཱདིཝཏྠཱུསུ སདྡཧནཱདིམཏྟམེཝ ཧི ཏནྟི ཨིམམཏྠཾ དསྶེནྟོ ཨཱཧ ‘‘ལོཀུཏྟརཱནཾ…པེ… དཊྛབྦོ’’ཏི.

ཨིནྡྲིཡཀཐཱཝཎྞནཱ ནིཊྛིཏཱ.

ཨེཀཱུནཝཱིསཏིམཝགྒཝཎྞནཱ ནིཊྛིཏཱ.

༢༠. ཝཱིསཏིམཝགྒོ

༢. ཉཱཎཀཐཱཝཎྞནཱ

༨༦༣-༨༦༥. ཀཱམཾ པུབྦབྷཱགེཔི ཨཏྠེཝ དུཀྑཔརིཉྙཱ, ཨཏྠསཱདྷིཀཱ པན སཱ མགྒཀྑཎིཀཱ ཨེཝཱཏི ཨུཀྐཾསགཏཾ དུཀྑཔརིཉྙཾ སནྡྷཱཡ ཨཝདྷཱརེནྟོ ཨཱཧ ‘‘དུཀྑཾ…པེ… མགྒཉཱཎམེཝ དཱིཔེཏཱི’’ཏི. ཏཾ པན ཨཝདྷཱརཎཾ ན ཉཱཎནྟརནིཝཏྟནཾ, ཨཐ ཁོ ཉཱཎནྟརསྶ ཡཐཱདྷིགཏཀིཙྩནིཝཏྟནཾ དཊྛབྦཾ. ཏེནཱཧ ‘‘ན ཏསྶེཝ ཉཱཎབྷཱཝ’’ནྟིཨཱདི.

ཉཱཎཀཐཱཝཎྞནཱ ནིཊྛིཏཱ.

༣. ནིརཡཔཱལཀཐཱཝཎྞནཱ

༨༦༦-༨༦༨. ནེརཡིཀེ ¶ ནིརཡེ པཱལེནྟི, ཏཏོ ནིགྒནྟུཾ ཨཔྤདཱནཝསེན རཀྑནྟཱིཏི ནིརཡཔཱལཱ. ནིརཡཔཱལཏཱཡ ཝཱ ནེརཡིཀཱནཾ ནརཀདུཀྑེན པརིཡོནདྡྷཱཡ ཨལཾ སམཏྠཱཏི ནིརཡཔཱལཱ. ཀིཾ པནེཏེ ནིརཡཔཱལཱ ནེརཡིཀཱ, ཨུདཱཧུ ཨནེརཡིཀཱཏི. ཀིཉྩེཏྠ – ཡདི ཏཱཝ ནེརཡིཀཱ, ནིརཡསཾཝཏྟནིཡེན ཀམྨེན ནིབྦཏྟཱཏི སཡམྤི ནིརཡདུཀྑཾ པཙྩནུབྷཝེཡྻུཾ, ཏཐཱ སཏི ཨཉྙེསཾ ནེརཡིཀཱནཾ ཡཱཏནཱཡ ཨསམཏྠཱ སིཡུཾ, ‘‘ཨིམེ ནེརཡིཀཱ, ཨིམེ ནིརཡཔཱལཱ’’ཏི ཝཝཏྠཱནཉྩ ན སིཡཱ. ཡེ ཙ ཡེ ཡཱཏེནྟི, ཏེཧི སམཱནརཱུཔབལཔྤམཱཎེཧི ཨིཏརེསཾ བྷཡསནྟཱསཱ ན ¶ སིཡུཾ. ཨཐ ཨནེརཡིཀཱ, ཏེསཾ ཏཏྠ ཀཐཾ སམྦྷཝོཏི? ཝུཙྩཏེ – ཨནེརཡིཀཱ ནིརཡཔཱལཱ ཨནིརཡགཏིསཾཝཏྟནིཡཀམྨནིབྦཏྟཱ. ནིརཡཱུཔཔཏྟིསཾཝཏྟནིཡཀམྨཏོ ཧི ཨཉྙེནེཝ ཀམྨུནཱ ཏེ ནིབྦཏྟནྟི རཀྑསཛཱཏིཀཏྟཱ. ཏཐཱ ཧི ཝདནྟི –

‘‘ཀོདྷནཱ ཀུརཱུརཀམྨནྟཱ, པཱཔཱབྷིརུཙིནོ ཏཐཱ;

དུཀྑིཏེསུ ཙ ནནྡནྟི, ཛཱཡནྟི ཡམརཀྑསཱ’’ཏི.

ཏཏྠ ཡདེཀེ ཝདནྟི ‘‘ཡཱཏནཱདུཀྑསྶ ཨཔྤཊིསཾཝེདནཏོ, ཨཉྙཐཱ པུན ཨཉྙམཉྙཾ ཡཱཏེཡྻུ’’ནྟི ཙ ཨེཝམཱདི, ཏཡིདཾ ཨཱཀཱསརོམཊྛནཾ ནིརཡཔཱལཱནཾ ནེརཡིཀབྷཱཝསྶེཝ ཨབྷཱཝཏོ. ཡེ པན ཝདེཡྻུཾ – ཡདིཔི ཨནེརཡིཀཱ ནིརཡཔཱལཱ, ཨཡོམཡཱཡ པན ཨཱདིཏྟཱཡ སམྤཛྫལིཏཱཡ སཛོཏིབྷཱུཏཱཡ ནིརཡབྷཱུམིཡཱ པརིཝཏྟམཱནཱ ཀཐཾ ནཱམ དུཀྑཾ ནཱནུབྷཝནྟཱིཏི? ཀམྨཱནུབྷཱཝཏོ. ཡཐཱ ཧི ཨིདྡྷིམནྟོ ཙེཏོཝསིཔྤཏྟཱ མཧཱམོགྒལླཱནཱདཡོ ནེརཡིཀེ ཨནུཀམྤནྟཱ ཨིདྡྷིབལེན ནིརཡབྷཱུམིཾ ཨུཔགཏཱ ཏཏྠ དཱཧདུཀྑེན ན བཱདྷཱིཡནྟི, ཨེཝཾ སམྤདམིདཾ དཊྛབྦཾ.

ཏཾ ཨིདྡྷིཝིསཡསྶ ཨཙིནྟེཡྻབྷཱཝཏོཏི ཙེ? ཨིདམྤི ཏཾསམཱནཾ ཀམྨཝིཔཱཀསྶ ཨཙིནྟེཡྻབྷཱཝཏོ. ཏཐཱརཱུཔེན ཧི ཀམྨུནཱ ཏེ ནིབྦཏྟཱ ཡཐཱ ནིརཡདུཀྑེན ཨབཱདྷིཏཱ ཨེཝ ཧུཏྭཱ ནེརཡིཀེ ཡཱཏེནྟི, ན ཙེཏྟཀེན བཱཧིརཝིསཡཱབྷཱཝོ ཝིཛྫཏི ཨིཊྛཱནིཊྛཏཱཡ པཙྩེཀཾ དྭཱརཔུརིསེསུ ཝིབྷཏྟསབྷཱཝཏྟཱ. ཏཐཱ ཧི ཨེཀཙྩསྶ དྭཱརསྶ པུརིསསྶ ཨིཊྛཾ ¶ ཨེཀཙྩསྶ ཨནིཊྛཾ, ཨེཀཙྩསྶ ཙ ཨནིཊྛཾ ཨེཀཙྩསྶ ཨིཊྛཾ ཧོཏི. ཨེཝཉྩ ཀཏྭཱ ཡདེཀེ ཝདནྟི ‘‘ནཏྠི ཀམྨཝསེན ཏེཛསཱ པརཱུཔཏཱཔན’’ནྟིཨཱདི, ཏདཔཱཧཏཾ ཧོཏི. ཡཾ པན ཝདནྟི ‘‘ཨནེརཡིཀཱནཾ ཏེསཾ ཀཐཾ ཏཏྠ སམྦྷཝོ’’ཏི ནེརཡིཀཱནཾ ཡཱཏཀབྷཱཝཏོ. ནེརཡིཀསཏྟཡཱཏནཱཡོགྒཉྷི ཨཏྟབྷཱཝཾ ནིབྦཏྟེནྟཾ ཀམྨཾ ཏཱདིསནིཀནྟིཝིནཱམིཏཾ ནིརཡཊྛཱནེཡེཝ ནིབྦཏྟེཏི. ཏེ ཙ ནེརཡིཀེཧི ཨདྷིཀཏརབལཱརོཧཔརིཎཱཧཱ ཨཏིཝིཡ བྷཡཱནཀསནྟཱསཀུརཱུརཏརཔཡོགཱ ཙ ཧོནྟི. ཨེཏེནེཝ ཏཏྠ ཀཱཀསུནཁཱདཱིནམྤི ནིབྦཏྟི སཾཝཎྞིཏཱཏི དཊྛབྦཾ.

ཀཐམཉྙགཏིཀེཧི ཨཉྙགཏིཀབཱདྷནནྟི ཙ ན ཝཏྟབྦཾ ཨཉྙཏྠཱཔི ཏཐཱ དསྶནཏོ. ཡཾ པནེཀེ ཝདནྟི ‘‘ཨསཏྟསབྷཱཝཱ ནིརཡཔཱལཱ ནིརཡསུནཁཱདཡོ ཙཱ’’ཏི, ཏཾ ཏེསཾ མཏིམཏྟཾ ཨཉྙཏྠ ¶ ཏཐཱ ཨདསྶནཏོ. ན ཧི ཀཱཙི ཨཏྠི ཏཱདིསཱི དྷམྨཔྤཝཏྟི, ཡཱ ཨསཏྟསབྷཱཝཱ, སམྤཏིསཏྟེཧི ཨཔྤཡོཛིཏཱ ཙ ཨཏྠཀིཙྩཾ སཱདྷེནྟཱི དིཊྛཔུབྦཱ. པེཏཱནཾ པཱནཱིཡནིཝཱརཀཱནཾ དཎྜཱདིཧཏྠཔུརིསཱནམྤི ཨསཏྟབྷཱཝེ ཝིསེསཀཱརཎཾ ནཏྠི. སུཔིནཱུཔགྷཱཏོཔི ཨཏྠཀིཙྩསམཏྠཏཱཡ ཨཔྤམཱཎཾ དསྶནཱདིམཏྟེནཔི ཏདཏྠསིདྡྷིཏོ. ཏཐཱ ཧི སུཔིནེ ཨཱཧཱརཱུཔབྷོགཱདིནཱ ན ཨཏྠསིདྡྷི ཨཏྠི, ནིམྨཱནརཱུཔཾ པནེཏྠ ལདྡྷཔརིཧཱརཾ ཨིདྡྷིཝིསཡསྶ ཨཙིནྟེཡྻབྷཱཝཏོ. ཨིདྷཱཔི ཀམྨཝིཔཱཀསྶ ཨཙིནྟེཡྻབྷཱཝཏོཏི ཙེ? ཏཾ ན, ཨསིདྡྷཏྟཱ. ནེརཡིཀཱནཾ ཀམྨཝིཔཱཀོ ནིརཡཔཱལཱཏི ཨསིདྡྷམེཏཾ, ཝུཏྟནཡེན པན ནེསཾ སཏྟབྷཱཝོ ཨེཝ སིདྡྷོ. སཀྐཱ ཧི ཝཏྟུཾ སཏྟསངྑཱཏཱ ནིརཡཔཱལསཉྙིཏཱ དྷམྨཔྤཝཏྟི སཱབྷིསནྡྷིཀཱ པརཱུཔགྷཱཏི ཨཏྠཀིཙྩསབྦྷཱཝཏོ ཨོཛཱཧཱརཱདིརཀྑསསནྟཏི ཝིཡཱཏི. ཨབྷིསནྡྷིཔུབྦཀཏཱ ཙེཏྠ ན སཀྐཱ པཊིཀྑིཔིཏུཾ ཏཐཱ ཏཐཱ ཨབྷིསནྡྷིཡཱ ཡཱཏནཏོ, ཏཏོ ཨེཝ ན སངྒྷཱཊཔབྦཏཱདཱིཧི ཨནེཀནྟིཀཏཱ. ཡེ པན ཝདནྟི ‘‘བྷཱུཏཝིསེསཱ ཨེཝ ཏེ ཝཎྞསཎྛཱནཱདིཝིསེསཝནྟོ བྷེརཝཱཀཱརཱ ནརཀཔཱལཱཏི སམཉྙཾ ལབྷནྟཱི’’ཏི, ཏདསིདྡྷཾ. ཨུཛུཀམེཝ པཱལི༹ཡཾ ‘‘ཨཏྠི ནིརཡེ ནིརཡཔཱལཱ’’ཏི ཝཱདསྶ པཏིཊྛཱཔིཏཏྟཱ.

ཨཔིཙ ཡཐཱ ཨརིཡཝིནཡེ ནརཀཔཱལཱནཾ བྷཱུཏམཏྟཏཱ ཨསིདྡྷཱ, ཏཐཱ པཉྙཏྟིམཏྟཝཱདིནོཔི ཏེསཾ བྷཱུཏམཏྟཏཱ ཨསིདྡྷཱཝ. ན ཧི ཏསྶ བྷཱུཏཱནི ནཱམ སནྟི. ཡདི པརམཏྠཾ གཧེཏྭཱ ཝོཧརཏི, ཨཐ ཀསྨཱ ཝེདནཱདིཀེ ¶ ཨེཝ པཊིཀྑིཔཏཱིཏི? ཏིཊྛཏེསཱ ཨནཝཊྛིཏཏཀྐཱནཾ ཨཔྤཧཱིནསམྨོཧཝིཔལླཱསཱནཾ ཝཱདཝཱིམཾསཱ, ཨེཝཾ ཨཏྠེཝ ནིརཡཔཱལཱཏི ནིཊྛམེཏྠ གནྟབྦཾ. སཏི ཙ ནེསཾ སབྦྷཱཝེ, ཨསཏིཔི བཱཧིརེ ཝིསཡེ ནརཀེ ཝིཡ དེསཱདིནིཡམོ ཧོཏཱིཏི ཝཱདོ ན སིཛ྄ཛྷཏི ཨེཝཱཏི དཊྛབྦཾ.

ནིརཡཔཱལཀཐཱཝཎྞནཱ ནིཊྛིཏཱ.

༤. ཏིརཙྪཱནཀཐཱཝཎྞནཱ

༨༦༩-༨༧༡. ཏསྶཱཏི ཨེརཱཝཎནཱམཀསྶ དེཝཔུཏྟསྶ. ཏཧིཾ ཀཱིལ༹ནཀཱལེ ཧཏྠིཝཎྞེན ཝིཀུབྦནཾ ¶ སནྡྷཱཡ ‘‘ཧཏྠིནཱགསྶཱ’’ཏི ཝུཏྟཾ. དིབྦཡཱནསྶཱཏི ཨེཏྠཱཔི ཨེསེཝ ནཡོ. ན ཧི ཨེཀནྟསུཁཔྤཙྩཡཊྛཱནེ སགྒེ དུཀྑཱདྷིཊྛཱནསྶ ཨཀུསལཀམྨསམུཊྛཱནསྶ ཨཏྟབྷཱཝསྶ སམྦྷཝོ ཡུཏྟོ. ཏེནཱཧ ‘‘ན ཏིརཙྪཱནགཏསྶཱ’’ཏི.

ཏིརཙྪཱནཀཐཱཝཎྞནཱ ནིཊྛིཏཱ.

༦. ཉཱཎཀཐཱཝཎྞནཱ

༨༧༦-༨༧༧. ‘‘དྭཱདསཝཏྠུཀཾ ཉཱཎཾ ལོཀུཏྟར’’ནྟི ཨེཏྠ དྭཱདསཝཏྠུཀསྶ ཉཱཎསྶ ལོཀུཏྟརཏཱ པཏིཊྛཱཔཱིཡཏཱིཏི དསྶེནྟོ པཋམཝིཀཔྤཾ ཝཏྭཱ པུན ལོཀུཏྟརཉཱཎསྶ དྭཱདསཝཏྠུཀཏཱ པཏིཊྛཱཔཱིཡཏཱིཏི དསྶེཏུཾ ‘‘ཏཾ ཝཱ…པེ… ཨཏྠོ’’ཏི ཨཱཧ. པརིཉྙེཡྻནྟི ཨེཏྠ ཨིཏི-སདྡོ ཨཱདིཨཏྠོ, པཀཱརཏྠོ ཝཱ. ཏེན ‘‘པཧཱཏབྦ’’ནྟི ཨེཝམཱདིཾ སངྒཎྷཱཏི. པརིཉྙཱཏནྟི ཨེཏྠཱཔི ཨེསེཝ ནཡོ. ‘‘པརིཉྙེཡྻཾ པརིཉྙཱཏ’’ནྟིཨཱདིནཱ པརིཛཱནནཱདིཀིརིཡཱཡ ནིབྦཏྟེཏབྦཏཱ ནིབྦཏྟིཏཏཱ ཙ དསྶིཏཱ, ན ནིབྦཏྟིཡམཱནཏཱཏི. ཡེན པན སཱ ཧོཏི, ཏཾ དསྶེཏུཾ ‘‘སཙྩཉཱཎཾ པནཱ’’ཏིཨཱདི ཝུཏྟཾ. ཏཏྠ སཙྩཉཱཎནྟི དུཀྑཱདིསཙྩསབྷཱཝཱཝབོདྷཀཾ ཉཱཎཾ, ཡཾ སནྡྷཱཡ ‘‘ཨིདཾ དུཀྑ’’ནྟིཨཱདི ཝུཏྟཾ. མགྒཀྑཎེཔཱིཏི ཨཔི-སདྡེན ཏཏོ ¶ པུབྦཱཔརབྷཱགེཔཱིཏི དཊྛབྦཾ. པརིཛཱནནཱདིཀིཙྩསཱདྷནཝསེན ཧོཏི ཨསམྨོཧཏོ ཝིསཡཏོ ཙཱཏི ཨདྷིཔྤཱཡོ.

ཉཱཎཀཐཱཝཎྞནཱ ནིཊྛིཏཱ.

ཝཱིསཏིམཝགྒཝཎྞནཱ ནིཊྛིཏཱ.

ཙཏུཏྠོ པཎྞཱསཀོ སམཏྟོ.

༢༡. ཨེཀཝཱིསཏིམཝགྒོ

༡. སཱསནཀཐཱཝཎྞནཱ

༨༧༨. སམུདཱཡཱཏི ¶ ‘‘སཱསནཾ ནཝཾ ཀཏ’’ནྟིཨཱདིནཱ པུཙྪཱཝསེན པཝཏྟཱ ཝཙནསམུདཱཡཱ. ཨེཀདེསཱནནྟི ཏདཝཡཝཱནཾ. ‘‘ཏཱིསུཔི པུཙྪཱསཱུ’’ཏི ཨེཝཾ ཨདྷིཀརཎབྷཱཝེན ཝུཏྟཱ.

སཱསནཀཐཱཝཎྞནཱ ནིཊྛིཏཱ.

༤. ཨིདྡྷིཀཐཱཝཎྞནཱ

༨༨༣-༨༨༤. ཨདྷིཔྤཱཡཝསེནཱཏི ཏཐཱ ཏཐཱ ཨདྷིམུཙྩནཱདྷིཔྤཱཡཝསེན.

ཨིདྡྷིཀཐཱཝཎྞནཱ ནིཊྛིཏཱ.

༧. དྷམྨཀཐཱཝཎྞནཱ

༨༨༧-༨༨༨. རཱུཔསབྷཱཝོ རཱུཔཊྛོཏི ཨཱཧ ‘‘རཱུཔཊྛོ ནཱམ ཀོཙི རཱུཔཏོ ཨཉྙོ ནཏྠཱི’’ཏི. ཡཾ པན ཡཏོ ཨཉྙཾ, ན ཏཾ ཏཾསབྷཱཝནྟི ཨཱཧ ‘‘རཱུཔཊྛཏོ ཨཉྙཾ རཱུཔཉྩ ན ཧོཏཱི’’ཏི, རཱུཔམེཝ ན ཧོཏཱིཏི ཨཏྠོ. ཨེཏེན བྱཏིརེཀཏོ ཏམཏྠཾ སཱདྷེཏི. ཏསྨཱཏི ཡསྨཱ རཱུཔཏོ ཨཉྙོ རཱུཔཊྛོ ནཏྠི, རཱུཔཊྛཏོ ཙ ཨཉྙཾ རཱུཔཾ, ཏསྨཱ རཱུཔཾ རཱུཔམེཝ རཱུཔསབྷཱཝམེཝཱཏི ¶ ཨེཝ-ཀཱརེན ནིཝཏྟིཏཾ དསྶེཏི ‘‘ན ཝེདནཱདིསབྷཱཝ’’ནྟི. ཨདྷིཔྤཱཡེནཱཏི རཱུཔརཱུཔཊྛཱནཾ ཨནཉྙཏྟཱདྷིཔྤཱཡེན. ཨཉྙཐཱཏི ཏེསཾ ཨཉྙཏྟེ རཱུཔཊྛེན ནིཡམེན རཱུཔཾ ནིཡཏནྟི ཝཏྟབྦནྟི ཡོཛནཱ. དསྶིཏོཡེཝ ཧོཏི ཨཏྠཏོ ཨཱཔནྣཏྟཱ. ན ཧི ཨབྷིནྣེ ཝཏྠུསྨིཾ པརིཡཱཡནྟརབྷེདཾ ཀརོཏི. ཨཉྙཏྟནྟི རཱུཔསབྷཱཝཱནཾ རཱུཔརཱུཔཊྛཱནཉྩ. སསཱམིནིདྡེསསིདྡྷཱབྷེདཱ ‘‘སིལཱཔུཏྟཀསྶ སརཱིར’’ནྟི ¶ ཝིཡ, ཀཔྤནཱམཏྟཏོ ཙཱཡཾ བྷེདོ, ན པརམཏྠཏོཏི ཨཱཧ ‘‘གཧེཏྭཱ ཝིཡ པཝཏྟོ’’ཏི. ཝེདནཱདཱིཧི ནཱནཏྟམེཝཱཏི ཝེདནཱདཱིཧི ཨཉྙཏྟམེཝ. སོ སབྷཱཝོཏི སོ རཱུཔསབྷཱཝོ. ནཱནཏྟསཉྙཱཔནཏྠནྟི རཱུཔསྶ སབྷཱཝོ, ན ཝེདནཱདཱིནནྟི ཨེཝཾ བྷེདསྶ ཉཱཔནཏྠཾ. ཏཉྩ ཝཙནནྟི ‘‘རཱུཔཾ རཱུཔཊྛེན ན ནིཡཏ’’ནྟི ཝཙནཾ. ཝུཏྟཔྤཀཱརེནཱཏི ‘‘རཱུཔཊྛཏོ ཨཉྙསྶ རཱུཔསྶ ཨབྷཱཝཱ’’ཏིཨཱདིནཱ ཝུཏྟཱཀཱརེན. ཡདི སདོསཾ, ཨཐ ཀསྨཱ པཊིཛཱནཱཏཱིཏི ཡོཛནཱ.

ཝུཏྟམེཝ ཀཱརཎནྟི ‘‘རཱུཔཾ རཱུཔམེཝ, ན ཝེདནཱདིསབྷཱཝ’’ནྟི ཨེཝཾ ཝུཏྟམེཝ ཡུཏྟིཾ. པརེན ཙོདིཏནྟི ‘‘ན ཝཏྟབྦཾ རཱུཔཾ རཱུཔཊྛེན ནིཡཏ’’ནྟིཨཱདིནཱ པརཝཱདིནོ ཙོདནཾ སནྡྷཱཡཱཧ. ཏམེཝ ཀཱརཎཾ དསྶེཏྭཱཏི ཏམེཝ ཡཐཱཝུཏྟཾ ཡུཏྟིཾ ‘‘ཨེཏྠ ཧཱི’’ཏིཨཱདིནཱ དསྶེཏྭཱ. ཙོདནཾ ནིཝཏྟེཏཱིཏི ‘‘ཨཐ ཀསྨཱ པཊིཛཱནཱཏཱི’’ཏི ཝུཏྟཾ ཙོདནཾ ནིཝཏྟེཏི. ཡམཏྠཾ སནྡྷཱཡ ‘‘ཨིཏོ ཨཉྙཐཱ’’ཏི ཝུཏྟཾ, ཏཾ དསྶེཏུཾ ‘‘རཱུཔཱདཱི’’ཏིཨཱདི ཝུཏྟཾ.

དྷམྨཀཐཱཝཎྞནཱ ནིཊྛིཏཱ.

ཨེཀཝཱིསཏིམཝགྒཝཎྞནཱ ནིཊྛིཏཱ.

༢༢. བཱཝཱིསཏིམཝགྒོ

༢. ཀུསལཙིཏྟཀཐཱཝཎྞནཱ

༨༩༤-༨༩༥. པུརིམཛཝནཀྑཎེཏི པརིནིབྦཱནཙིཏྟཏོ ཨནནྟརཱཏཱིཏཔུརིམཛཝནཝཱརཀྑཎེ.

ཀུསལཙིཏྟཀཐཱཝཎྞནཱ ནིཊྛིཏཱ.

༣. ཨཱནེཉྫཀཐཱཝཎྞནཱ

༨༩༦. ཧེཏུསརཱུཔཱརམྨཎསམྤཡུཏྟདྷམྨཱརམྨཎཱདིཏོ ¶ ¶ བྷཝངྒསདིསཏྟཱ ཙུཏིཙིཏྟཾ ‘‘བྷཝངྒཙིཏྟ’’ནྟི ཨཱཧ.

ཨཱནེཉྫཀཐཱཝཎྞནཱ ནིཊྛིཏཱ.

༥-༧. ཏིསྶོཔིཀཐཱཝཎྞནཱ

༨༩༨-༩༠༠. ཨརཧཏྟཔྤཏྟིཔི གབྦྷེཡེཝ ཨཏྠཱིཏི མཉྙཏི. སཏྟཝསྶིཀཱ ཧི སོཔཱཀསཱམཎེརཱདཡོ ཨརཧཏྟཾ པཏྟཱ. སཏྟཝསྶིཀོཔི གབྦྷོ ཨཏྠཱིཏི པརཝཱདིནོ ཨདྷིཔྤཱཡོ. ཨཱཀཱསེན གཙྪནྟོ ཝིཡ སུཔིནཾ ཨཱཀཱསསུཔིནཾ. ཏཾ ཨབྷིཉྙཱནིབྦཏྟཾ མཉྙཏཱིཏི ནིདསྶནཾ ཀཏྭཱ དསྶེནྟོ ཨཱཧ ‘‘ཨཱཀཱསགམནཱདིཨབྷིཉྙཱ ཝིཡཱ’’ཏི. ཧེཊྛིམཱནཾ ཙཏུནྣཾ ཝཱ མགྒཱནཾ ཨདྷིགམེན དྷམྨཱབྷིསམཡོ ཨགྒཕལཱདྷིགམེན ཨརཧཏྟཔྤཏྟི ཙ སུཔིནེ ཨཏྠཱིཏི མཉྙཏཱིཏི ཡོཛནཱ.

ཏིསྶོཔིཀཐཱཝཎྞནཱ ནིཊྛིཏཱ.

༩. ཨཱསེཝནཔཙྩཡཀཐཱཝཎྞནཱ

༩༠༣-༩༠༥. བཱིཛཾ ཙཏུམདྷུརབྷཱཝཾ ན གཎྷཱཏཱིཏི ཨིདཾ སཀསམཡཝསེན ཝུཏྟཾ, པརསམཡེ པན རཱུཔདྷམྨཱཔི ཨརཱུཔདྷམྨེཧི སམཱནཀྑཎཱ ཨེཝ ཨིཙྪིཏཱ. ཏེནེཝཱཧ ‘‘སབྦེ དྷམྨཱ ཁཎིཀཱ’’ཏི. ཁཎིཀཏྟེཔི ཝཱ ཨཙེཏནེསུཔི ཨནིནྡྲིཡབདྡྷརཱུཔེསུ བྷཱཝནཱཝིསེསོ ལབྦྷཏི, ཀིམངྒཾ པན སཙེཏནེསཱུཏི དསྶེཏུཾ ‘‘ཡཐཱ བཱིཛཾ ཙཏུམདྷུརབྷཱཝཾ ན གཎྷཱཏཱི’’ཏི ནིདསྶནནྟི དཊྛབྦཾ. ཨཱསེཝེནྟོ ནཱམ ཀོཙི དྷམྨོ ནཏྠི ཨིཏྟརཏཱཡ ཨནཝཊྛཱནཏོཏི ཨདྷིཔྤཱཡོ. ཨིཏྟརཁཎཏཱཡ ཨེཝ པན ཨཱསེཝནཾ ལབྦྷཏི. ཀུསལཱདིབྷཱཝེན ཧི ཨཏྟསདིསསྶ པཡོགེན ཀརཎཱིཡསྶ ¶ པུནཔྤུནཾ ཀརཎཔྤཝཏྟནཾ ཨཏྟསདིསཏཱཔཱདནཾ ཝཱསནཾ ཝཱ ཨཱསེཝནཾ པུརེ པརིཙིཏགནྠོ ཝིཡ པཙྪིམསྶཱཏི.

ཨཱསེཝནཔཙྩཡཀཐཱཝཎྞནཱ ནིཊྛིཏཱ.

༡༠. ཁཎིཀཀཐཱཝཎྞནཱ

༩༠༦-༩༠༧. པཐཝིཡཱདིརཱུཔེསཱུཏི ¶ ཨནེཀཀལཱཔསམུདཱཡབྷཱུཏེསུ སསམྦྷཱརཔཐཝཱིཨཱདིརཱུཔེསུ. ཏཏྠ ཧི ཀེསུཙི པུརིམུཔྤནྣེསུ ཋིཏེསུ ཀེསཉྩི ཏདཉྙེསཾ ཨུཔྤཱདོ, ཏཏོ པུརིམནྟརུཔྤནྣཱནཾ ཀེསཉྩི ནིརོདྷོ ཧོཏི ཨེཀེཀཀལཱཔརཱུཔེསུ སམཱནུཔྤཱདནིརོདྷཏྟཱ ཏེསཾ. ཨེཝཾ པཏིཊྛཱནནྟི ཨེཝཾ ཝུཏྟཔྤཀཱརེན ཨསམཱནུཔྤཱདནིརོདྷེན པབནྡྷེན པཏིཊྛཱནཔཝཏྟཱིཏི ཨཏྠོ. སཱ པནཱཡཾ ཡཐཱཝུཏྟཱ པཝཏྟི ཀསྨཱ རཱུཔསནྟཏིཡཱ ཨེཝཱཏི ཨཱཧ ‘‘ན ཧི རཱུཔཱན’’ནྟིཨཱདི. ཏསྶཏྠོ – ཡདི སབྦེ སངྑཏདྷམྨཱ སམཱནཀྑཎཱ, ཏཐཱ སཏི ཨརཱུཔསནྟཏིཡཱ ཝིཡ རཱུཔསནྟཏིཡཱཔི ཨནནྟརཱདིཔཙྩཡེན ཝིདྷིནཱ པཝཏྟི སིཡཱ, ན ཙེཏཾ ཨཏྠི. ཡདི སིཡཱ, ཙིཏྟཀྑཎེ ཙིཏྟཀྑཎེ པཐཝཱིཨཱདཱིནཾ ཨུཔྤཱདནིརོདྷེཧི བྷཝིཏབྦནྟི.

ཁཎིཀཀཐཱཝཎྞནཱ ནིཊྛིཏཱ.

བཱཝཱིསཏིམཝགྒཝཎྞནཱ ནིཊྛིཏཱ.

༢༣. ཏེཝཱིསཏིམཝགྒོ

༡. ཨེཀཱདྷིཔྤཱཡཀཐཱཝཎྞནཱ

༩༠༨. ཨེཀ-སདྡོ ཨཉྙཏྠོཔི ཧོཏི ‘‘ཨིཏྠེཀེ ཨབྷིཝདནྟཱི’’ཏིཨཱདཱིསུ ཝིཡ, ཨཉྙཏྟཉྩེཏྠ ¶ རཱགཱདྷིཔྤཱཡཏོ ཝེདིཏབྦཾ, པུཐུཛྫནསྶ པན སཚནྡརཱགཔརིབྷོགབྷཱཝཏོ ཨཱཧ ‘‘རཱགཱདྷིཔྤཱཡཏོ ཨཉྙཱདྷིཔྤཱཡོཝཱཏི ཝུཏྟཾ ཧོཏཱི’’ཏི. ཀོ པན སོ ཨཉྙཱདྷིཔྤཱཡོཏི? ཀརུཎཱདྷིཔྤཱཡོ. ཏེན ཝུཏྟཾ ‘‘ཀརུཎཱདྷིཔྤཱཡེན ཨེཀཱདྷིཔྤཱཡོ’’ཏི. ཨཡཉྩ ནཡོ ཨིཏྠིཡཱ ཛཱིཝིཏརཀྑཎཏྠཾ ཀཱརུཉྙེན མནོརཐཾ པཱུརེནྟསྶ བོདྷིསཏྟསྶ སཾཝརཝིནཱསོ ན ཧོཏཱིཏི ཨེཝཾཝཱདིནཾ པརཝཱདིཾ སནྡྷཱཡ ཝུཏྟོ, པཎིདྷཱནཱདྷིཔྤཱཡཝཱདིནཾ པན སནྡྷཱཡ ‘‘ཨེཀོ ཨདྷིཔྤཱཡོཏི ཨེཏྠཱ’’ཏིཨཱདི ཝུཏྟཾ. པུཏྟམུཁདསྶནཱདྷིཔྤཱཡོཔི ཨེཏྠེཝ སངྒཧཾ གཏོཏི དཊྛབྦཾ. ཨེཀཏོབྷཱཝེཏི སཧབྷཱཝེ.

ཨེཀཱདྷིཔྤཱཡཀཐཱཝཎྞནཱ ནིཊྛིཏཱ.

༣-༧. ཨིསྶརིཡཀཱམཀཱརིཀཱཀཐཱཝཎྞནཱ

༩༡༠-༩༡༤. ཨིསྶརིཡེནཱཏི ¶ ཙིཏྟིསྶརིཡེན, ན ཙེཏོཝསིབྷཱཝེནཱཏི ཨཏྠོ. ཀཱམཀཱརིཀཾ ཡཐིཙྪིཏནིཔྥཱདནཾ. ཨིསྶརིཡཀཱམཀཱརིཀཱཧེཏཱུཏི ཨིསྶརིཡཀཱམཀཱརིབྷཱཝནིམིཏྟཾ, ཏསྶ ནིབྦཏྟནཏྠནྟི ཨཏྠོ. མིཙྪཱདིཊྛིཡཱ ཀརཱིཡཏཱིཏི མིཙྪཱབྷིནིཝེསེནེཝ ཡཱ ཀཱཙི དུཀྐརཀཱརིཀཱ ཀརཱིཡཏཱིཏི ཨཏྠོ.

ཨིསྶརིཡཀཱམཀཱརིཀཱཀཐཱཝཎྞནཱ ནིཊྛིཏཱ.

༨. པཏིརཱུཔཀཐཱཝཎྞནཱ

༩༡༥-༩༡༦. མེཏྟཱདཡོ ཝིཡཱཏི ཡཐཱ མེཏྟཱ ཀརུཎཱ མུདིཏཱ ཙ སིནེཧསབྷཱཝཱཔི ཨརཉྫནསབྷཱཝཏྟཱ ཨསཾཀིལིཊྛཏྟཱ ཙ ན རཱགོ, ཨེཝཾ རཱགཔཏིརཱུཔཀོ ཀོཙི དྷམྨོ ནཏྠི ཋཔེཏྭཱ མེཏྟཱདཡོ, ཨཉྙཙིཏྟསྶ སིནིཡ྄ཧནཱཀཱརོ རཱགསྶེཝ པཝཏྟིཨཱཀཱརོཏི ཨཏྠོ. ཏེནེཝཱཧ ‘‘རཱགམེཝ གཎྷཱཏཱི’’ཏི. ཨེཝཾ དོསེཔཱིཏི ཨེཏྠ ཨིསྶཱདཡོ ཝིཡ ན དོསོ དོསཔཏིརཱུཔཀོ ཀོཙི ཨཏྠཱིཏི དོསམེཝ གཎྷཱཏཱིཏི ཡོཛེཏབྦཾ. ཋཔེཏྭཱ ཧི ཨིསྶཱདཡོ ཨཉྙཙིཏྟསྶ དུསྶནཱཀཱརོ དོསསྶེཝ པཝཏྟིཨཱཀཱརོཏི.

པཏིརཱུཔཀཐཱཝཎྞནཱ ནིཊྛིཏཱ.

༩. ཨཔརིནིཔྥནྣཀཐཱཝཎྞནཱ

༩༡༧-༩༡༨. ཨནིཙྩཱདིཀོ ¶ བྷཱཝོཏི ཨནིཙྩསངྑཱརཔཊིཙྩསམུཔྤནྣཏཱདིཀོ བྷཱཝོ དྷམྨོ པཀཏི ཨེཏསྶཱཏི ཨཏྠོ. དུཀྑཉྙེཝ པརིནིཔྥནྣནྟི ‘‘དུཀྑསཙྩཾ སནྡྷཱཡ པུཙྪཱ ཀཏཱ, ན དུཀྑཏཱམཏྟ’’ནྟི ཨཡམཏྠོ ཝིཉྙཱཡཏི ‘‘ན ཀེཝལཉྷི པཋམསཙྩམེཝ དུཀྑ’’ནྟི ཝཙནེན. ཏཐཱ སཏི པརཝཱདིནཱ ཙཀྑཱཡཏནཱདཱིནཾ ཨཉྙེསཉྩ ཏཾསརིཀྑཀཱནཾ དྷམྨཱནཾ པརིནིཔྥནྣཏཱ ནཱནུཛཱནིཏབྦཱ སིཡཱ. ཀསྨཱ? ཏེསམྤི ཧི དུཀྑསཙྩེན སངྒཧོ, ན ཨིཏརསཙྩེཧི. ཡཉྷི སམུདཡསཙྩཏོ ནིབྦཏྟཾ, ཏཾ ནིཔྤརིཡཱཡཏོ དུཀྑསཙྩཾ ¶ , ཨིཏརཾ སངྑཱརདུཀྑཏཱཡ དུཀྑནྟི ཨིམམཏྠཾ དསྶེནྟོ ‘‘ན ཀེཝལཉྷཱི’’ཏིཨཱདིམཱཧ. ཏཏྠ ན ཧི ཨནུཔཱདིནྣཱནཱིཏི ཨིམིནཱ ཙཀྑཱཡཏནཱདཱིནཾ སམུདཡསཙྩེན སངྒཧཱབྷཱཝམཱཧ. ལོཀུཏྟརཱནཱིཏི ཨིམིནཱ ནིརོདྷམགྒསཙྩེཧི. ཡདི ཨེཝམེཏྠ ཡུཏྟི ཝཏྟབྦཱ, ཀིམེཏྠ ཝཏྟབྦཾ? སབྷཱཝོ ཧེས པརཝཱདིཝཱདསྶ, ཡདིདཾ པུབྦེནཱཔརམསཾསནྡནཾ. ཏཐཱ ཧི སོ ཝིཉྙཱུཧི པཊིཀྑིཏྟོ. ཏཐཱ ཙེཝ ཏཾ ཨམྷེཧི ཏཏྠ ཏཏྠ ཝིབྷཱཝིཏཾ. ཨེཏནྟི ‘‘རཱུཔཾ ཨཔརིནིཔྥནྣཾ, དུཀྑཉྙེཝ པརིནིཔྥནྣ’’ནྟི ཡདེཏཾ ཏཡཱ ཝུཏྟཾ, ཨེཏཾ ནོ ཝཏ རེ ཝཏྟབྦེ. ཀསྨཱ? རཱུཔསྶ ཙ དུཀྑཏྟཱ. རཱུཔཉྷི ཨནིཙྩཾ དུཀྑཱདྷིཊྛཱནཉྩ. ཏེན ཝུཏྟཾ ‘‘ཡདནིཙྩཾ ཏཾ དུཀྑཾ. སཾཁིཏྟེན པཉྩུཔཱདཱནཀྑནྡྷཱ དུཀྑཱ’’ཏི ཙ.

ཨཔརིནིཔྥནྣཀཐཱཝཎྞནཱ ནིཊྛིཏཱ.

ཏེཝཱིསཏིམཝགྒཝཎྞནཱ ནིཊྛིཏཱ.

ཀཐཱཝཏྠུཔཀརཎ-ཨནུཊཱིཀཱ སམཏྟཱ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཡམཀཔཀརཎ-ཨནུཊཱིཀཱ

གནྠཱརམྦྷཝཎྞནཱ

སངྑེཔེནེཝཱཏི ¶ ¶ ཨུདྡེསེནེཝ. ཡཾ ‘‘མཱཏིཀཱཋཔན’’ནྟི ཝུཏྟཾ. དྷམྨེསཱུཏི ཁནྡྷཱདིདྷམྨེསུ ཀུསལཱདིདྷམྨེསུ ཙ. ཨཝིཔརཱིཏཏོ གཧིཏེསུ དྷམྨེསུ མཱུལཡམཀཱདིཝསེན པཝཏྟིཡམཱནཱ དེསནཱ ཝེནེཡྻཱནཾ ནཱནཔྤཀཱརཀོསལླཱཝཧཱ པརིཉྙཱཀིཙྩསཱདྷནཱི ཙ ཧོཏི, ན ཝིཔརཱིཏཏོཏི ཨཱཧ ‘‘ཝིཔརཱིཏགྒཧཎཾ…པེ… ཨཱརདྡྷ’’ནྟི. ཨེཏེན ཀཐཱཝཏྠུཔཀརཎདེསནཱནནྟརཾ ཡམཀཔཀརཎདེསནཱཡ ཀཱརཎམཱཧ. ཏཏྠ ཝིཔརཱིཏགྒཧཎནྟི པུགྒལཔརིགྒཧཎཱདིམིཙྪཱགཱཧཾ. དྷམྨཔུགྒལོཀཱསཱདིནིསྶཡཱནནྟི ‘‘ཡེ ཀེཙི ཀུསལཱ དྷམྨཱ, སབྦེ ཏེ ཀུསལམཱུལཱ’’ཏིཨཱདིནཱ (ཡམ. ༡.མཱུལཡམཀ.༡) དྷམྨེ, ‘‘ཡསྶ རཱུཔཀྑནྡྷོ ཨུཔྤཛྫཏི, ཏསྶ ཝེདནཱཀྑནྡྷོ ཨུཔྤཛྫཏཱི’’ཏིཨཱདིནཱ (ཡམ. ༡.ཁནྡྷཡམཀ.༥༠) པུགྒལཾ ‘‘ཡཏྠ རཱུཔཀྑནྡྷོ ཨུཔྤཛྫཏི, ཏཏྠ ཝེདནཱཀྑནྡྷོ ཨུཔྤཛྫཏཱི’’ཏིཨཱདིནཱ (ཡམ. ༡.ཁནྡྷཡམཀ.༥༡) ཨོཀཱསཾ ནིསྶཱཡ ཨཱརབྦྷ པཝཏྟཱནཾ. ཨཱདི-སདྡེན པུགྒལོཀཱསཨུཔྤཱདནིརོདྷཏདུབྷཡཔརིཉྙཱདཱིནཾ སངྒཧོ དཊྛབྦོ. སནྣིཊྛཱནསཾསཡཱནནྟི ¶ པཱལི༹གཏིཔཊིཝཙནསརཱུཔདསྶནཔཊིཀྑིཔནཔཊིསེདྷནནཡེཧི ཡཐཱཔུཙྪིཏསྶ ཨཏྠསྶ ནིཙྪཡཀརཎཾ སནྣིཊྛཱནཾ, ཏདབྷཱཝཏོ སཾསཡནཾ སཾསཡོ. ཏེསཾ སནྣིཊྛཱནསཾསཡཱནཾ.

ཀཱམཉྩེཏྠ དྷམྨཔཊིགྒཱཧཀཱནཾ སཾསཡཔུབྦཀཾ སནྣིཊྛཱནནྟི པཋམཾ སཾསཡོ ཝཏྟབྦོ, དེསེནྟསྶ པན བྷགཝཏོ སནྣིཊྛཱནཔུབྦཀོ སཾསཡོཏི དསྶནཏྠཾ ཨཡཾ པདཱནུཀྐམོ ཀཏོ. སབྦཉྷི པརིཉྙེཡྻཾ ཧཏྠཱམལཀཾ ཝིཡ པཙྩཀྑཾ ཀཏྭཱ ཋིཏསྶ དྷམྨསཱམིནོ ན ཀཏྠཙི སཾསཡོ, ཝིསྶཛྫེཏུཀཱམཏཱཡ པན ཝིནེཡྻཛ྄ཛྷཱསཡགཏཾ སཾསཡཾ དསྶེནྟོ སཾསཡིཏཝསེན པུཙྪཾ ཀརོཏཱིཏི ཨེཝཾ ཝིསྶཛྫནཔུཙྪནཝསེན ན སནྣིཊྛཱནསཾསཡཱ ལབྦྷནྟཱིཏི ཨཡམཏྠོ དསྶིཏོ, ནིཙྪིཏསཾསཡདྷམྨཝསེནེཝ པནེཏྠ སནྣིཊྛཱནསཾསཡཱ ¶ ཝེདིཏབྦཱ. ཏེནཱཧ ཨཊྛཀཐཱཡཾ ‘‘ཀུསལེསུ ཀུསལཱ ནུ ཁོ, ན ནུ ཁོ ཀུསལཱཏི སནྡེཧཱབྷཱཝཏོ’’ཏིཨཱདི. ཏེནེཝ ཙ ‘‘སནྣིཊྛཱནསཾསཡཱན’’ནྟི, ‘‘སནྣིཊྛཱནསཾསཡཝསེནཱ’’ཏི ཙ པཋམཾ སནྣིཊྛཱནགྒཧཎཾ ཀཏཾ.

ཏནྟི ཡམཀཔཀརཎཾ. ཏསྶ ཡེ སམཡཱདཡོ ཝཏྟབྦཱ, ཏེ ཀཐཱཝཏྠུཔཀརཎདེསནཱནནྟརོ དེསནཱསམཡོ, ཏཱཝཏིཾསབྷཝནམེཝ དེསནཱདེསོ, ཀུསལཱཀུསལམཱུལཱདིཡམཀཱཀཱརེན དེསནཱཏི ཝིབྷཱགཏོ ‘‘སངྑེཔེནེཝཱ’’ཏིཨཱདིགཱཐཱཧི ཝིབྷཱཝིཏཱ ནིམིཏྟེན སདྡྷིཾ སཾཝཎྞནཔཊིཉྙཱ ཙཱཏི ཨིམམཏྠཾ དསྶེནྟོ ‘‘སམཡདེསདེསནཱཝསེནཱ’’ཏིཨཱདིམཱཧ. ནིམིཏྟཉྷེཏཾ ཨིདྷ སཾཝཎྞནཱཡ, ཡདིདཾ ཀམཱནུཔྤཏྟི ཨཱགཏབྷཱརཝཱཧིཏཱ ཙ པཎྜིཏཱནཾ པཎྜིཏཀིཙྩབྷཱཝཏོ. ཏཏྠ ཨནུཔྤཏྟཾ དསྶེཏྭཱཏི སམྦནྡྷོ.

ཏཏྠཱཏི ཏསྨིཾ སམཡཱདིདསྶནེ. ཡམནཾ ཨུཔརམནནྟི ཡམོ མརཎནྟི ཨཱཧ ‘‘ཛཱཏིཡཱ སཏི མརཎཾ ཧོཏཱིཏི…པེ… ཝིསཡོ’’ཏི. ཏཏྠ ཡཐཱ ‘‘ཛཱཏིཡཱ སཏི མརཎཾ ཧོཏཱི’’ཏི ཛཱཏི ཡམསྶ ཝིསཡོ, ཨེཝཾ ‘‘ཨུཔཱདཱནཀྑནྡྷེསུ སནྟེསུ མརཎཾ ཧོཏཱི’’ཏི ཨུཔཱདཱནཀྑནྡྷཱ ཡམསྶ ཝིསཡོཏི ཡོཛེཏབྦཾ. ཏེ ཧི མརཎདྷམྨིནོཏི. ཨནུཔྤཏྟམརཎཾཡེཝ ཀིབྦིསཀཱརིནཾ པུགྒལཾ ཡམཔུརིསཱ ཝིཝིདྷཱ ཀམྨཀཱརཎཱ ཀརོནྟི, ན ཨཔྤཏྟམརཎནྟི མརཎཾ ཡམསྶ ཝིསཡོ ཝུཏྟོ. ཨཱཎཱཔཝཏྟིཊྛཱནནྟི ཨིདཾ ཝིསཡ-སདྡསྶ ཨཏྠཝཙནཾ. དེསཾ ཝཱཏི ཀཱམཱདིདྷཱཏུཏྟཡདེསཾ སནྡྷཱཡཱཧ. དྷཱཏུཏྟཡིསྶརོ ཧི མཙྩུརཱཛཱ. པཉྩཱནནྟརིཡཱནི ཨཉྙསཏྠཱརུདྡེསོ ཙ, ཏེན ཝཱ སདྡྷིཾ པཉྩ ཝེརཱནི ཚ ཨབྷབྦཊྛཱནཱནི. ཨཱཝཏྟཱཏི པདཀྑིཎཱཝཏྟཱ. ཏནུརུཧཱཏི ལོམཱ.

གནྠཱརམྦྷཝཎྞནཱ ནིཊྛིཏཱ.

༡. མཱུལཡམཀཾ

ཨུདྡེསཝཱརཝཎྞནཱ

༡. ཡམཀསམཱུཧསྶཱཏི ¶ ¶ མཱུལཡམཀཱདིཀསྶ ཡམཀསམཱུཧསྶ. མཱུལཡམཀཱདཡོ ཧི པཀརཎཱཔེཀྑཱཡ ཨཝཡཝབྷཱུཏཱཔི ནིཙྩཱཝཡཝཱཔེཀྑཱཡ ཡམཀསམཱུཧོཏི ཝུཏྟོ. ཏེནཱཧ ‘‘ཏཾསམཱུཧསྶ ཙ སཀལསྶ པཀརཎསྶཱ’’ཏི.

ཀུསལཱཀུསལམཱུལཝིསེསཱནནྟི དུཏིཡཔུཙྪཱཡ ཝུཏྟཱནཾ སཾསཡཔདསངྒཧིཏཱནཾ ཀུསལསངྑཱཏཱནཾ, ཏཐཱ པཋམཔུཙྪཱཡ ཝུཏྟཱནཾ ཀུསལམཱུལསངྑཱཏཱནཾ ཝིསེསཱནཾ ཨཏྠཡམཀབྷཱཝསྶ ཝུཏྟཏྟཱཏི ཡོཛནཱ. ཡཐཱ ཧི པཋམཔུཙྪཱཡ ཝིསེསཝནྟབྷཱཝེན ཝུཏྟཱཡེཝ ཀུསལདྷམྨཱ དུཏིཡཔུཙྪཱཡཾ ཝིསེསབྷཱཝེན ཝུཏྟཱ, ཨེཝཾ པཋམཔུཙྪཱཡཾ ཝིསེསབྷཱཝེན ཝུཏྟཱཡེཝ ཀུསལམཱུལདྷམྨཱ དུཏིཡཔུཙྪཱཡཾ ཝིསེསཝནྟབྷཱཝེན ཝུཏྟཱ. ཝཏྟུཝཙནིཙྪཱཝསེན ཧི དྷམྨཱནཾ ཝིསེསཝིསེསཝནྟཏཱཝིབྷཱགཱ ཧོནྟཱིཏི. ཀུསལམཱུལཀུསལཝིསེསེཧི སཾསཡིཏཔདསངྒཧིཏེཧི ཀུསལཀུསལམཱུལཱནཾ ཝིསེསཝནྟཱནནྟི ཨདྷིཔྤཱཡོ. ཨེཏྠ ཙ ཝིསེསཝནྟཱཔེཀྑཝིསེསཝསེན པཋམོ ཨཏྠཝིཀཔྤོ ཝུཏྟོ, དུཏིཡོ པན ཝིསེསཱཔེཀྑཝིསེསཝནྟཝསེནཱཏི ཨཡམེཏེསཾ ཝིསེསོ. ཏེནཱཧ ‘‘ཉཱཏུཾ ཨིཙྪིཏཱནཾ ཧཱི’’ཏིཨཱདི.

ཏཏྠ ཉཱཏུཾ ཨིཙྪིཏཱནནྟི པུཙྪཱཡ ཝིསཡབྷཱུཏཱནནྟི ཨཏྠོ. ཝིསེསཱནནྟི ཀུསལཀུསལམཱུལཝིསེསཱནཾ. ཝིསེསཝནྟཱཔེཀྑཱནནྟི ཀུསལམཱུལཀུསལསངྑཱཏེཧི ཝིསེསཝནྟེཧི སཱཔེཀྑཱནཾ. ཝིསེསཝཏནྟི ཀུསལམཱུལཀུསལཱནཾ. ཝིསེསཱཔེཀྑཱནནྟི ཀུསལཀུསལམཱུལཝིསེསེཧི སཱཔེཀྑཱནཾ. ཨེཏྠཱཏི ཨེཏསྨིཾ མཱུལཡམཀེ. པདྷཱནབྷཱཝོཏི པཋམཝིཀཔྤེ ཏཱཝ སཾསཡིཏཔྤདྷཱནཏྟཱ པུཙྪཱཡ ཝིསེསཱནཾ པདྷཱནབྷཱཝོ ཝེདིཏབྦོ. ཏེ ཧི སཾསཡིཏཱནཾ ཝིསེསཝནྟོཏི. དུཏིཡཝིཀཔྤེ པན ཝིསེསཱ ནཱམ ཝིསེསཝནྟཱདྷཱིནཱཏི ཝིསེསཝནྟཱནཾ ཏཏྠ པདྷཱནབྷཱཝོ དཊྛབྦོ. དྭིནྣཾ པན ཨེཀཛ྄ཛྷཾ པདྷཱནབྷཱཝོ ན ཡུཛྫཏི. སཏི ཧི ཨཔྤདྷཱནེ པདྷཱནཾ ནཱམ སིཡཱ. ཏེནཱཧ ‘‘ཨེཀེཀཱཡ པུཙྪཱཡ ཨེཀེཀོ ཨེཝ ཨཏྠོ སངྒཧིཏོ ཧོཏཱི’’ཏི. ཨེཝཉྩེཏཾ སམྤཊིཙྪིཏབྦཾ, ཨཉྙཐཱ ཝིནིཙྪིཏཝིསེསིཏབྦབྷཱཝེཧི ཨིདྷ པདྷཱནབྷཱཝོ ན ཡུཛྫཏེཝཱཏི. ན དྷམྨཝཱཙཀོཏི ན སབྷཱཝདྷམྨཝཱཙཀོ. སབྷཱཝདྷམྨོཔི ¶ ཧི ཨཏྠོཏི ཝུཙྩཏི ‘‘གམྦྷཱིརཔཉྙཾ ནིཔུཎཏྠདསྶི’’ནྟིཨཱདཱིསུ ¶ (སུ. ནི. ༡༧༨). ‘‘ཧེཏུཕལེ ཉཱཎཾ ཨཏྠཔཊིསམྦྷིདཱ’’ཏིཨཱདཱིསུ (ཝིབྷ. ༧༢༠) ཨཏྠ-སདྡསྶ ཧེཏུཕལཝཱཙཀཏཱ དཊྛབྦཱ. ཨཱདི-སདྡེནསྶ ‘‘ཨཏྠཱབྷིསམཡཱ’’ཏིཨཱདཱིསུ (སཾ. ནི. ༡.༡༢༩) ཨཱགཏཱ ཧིཏཱདིཝཱཙཀཏཱ སངྒཡ྄ཧཏི. ཏེནེཝཱཏི པཱལི༹ཨཏྠཝཱཙཀཏྟཱ ཨེཝ.

ཏཱིཎིཔི པདཱནཱིཏི ཨེཏྠ པི-སདྡོ སམུཙྩཡཏྠོ, སམུཙྩཡོ ཙ ཏུལྱཡོགེ སིཡཱ. ཀིཾ ནཱམ-པདེན ཨནཝསེསཏོ ཀུསལཱདཱིནཾ སངྒཧོཏི ཨཱསངྐཱཡ ཏདཱསངྐཱནིཝཏྟནཏྠམཱཧ ‘‘ཏཱིཎིཔི…པེ… སངྒཱཧཀཏྟ’’ནྟི. ཏཏྠ སངྒཱཧཀཏྟམཏྟནྟི མཏྟ-སདྡོ ཝིསེསནིཝཏྟིཨཏྠོཏི. ཏེན ནིཝཏྟིཏཾ ཝིསེསཾ དསྶེཏུཾ ‘‘ན ནིརཝསེསསངྒཱཧཀཏྟ’’ནྟི ཝུཏྟཾ. ན ཧི རཱུཔཾ ནཱམ-པདེན སངྒཡ྄ཧཏི. ཀུསལཱདིཡེཝ ནཱམནྟི ནིཡམོ དཊྛབྦོ, ན ནཱམཾཡེཝ ཀུསལཱདཱིཏི ཨིམམེཝ ཙ ནིཡམཾ སནྡྷཱཡཱཧ ‘‘ཀུསལཱདཱིནཾ སངྒཱཧཀཏྟམཏྟམེཝ སནྡྷཱཡ ཝུཏྟ’’ནྟི. ཡདིཔི ནཱམ-པདཾ ན ནིརཝསེསཀུསལཱདིསངྒཱཧཀཾ, ཀུསལཱདིསངྒཱཧཀཾ པན ཧོཏི, ཏདཏྠམེཝ ཙ ཏཾ གཧིཏནྟི ནཱམསྶ ཀུསལཏྟིཀཔརིཡཱཔནྣཏཱ ཝུཏྟཱཏི དསྶེནྟོ ཨཱཧ ‘‘ཀུསལཱདི…པེ… ཝུཏྟ’’ནྟི.

ཨུདྡེསཝཱརཝཎྞནཱ ནིཊྛིཏཱ.

ནིདྡེསཝཱརཝཎྞནཱ

༥༢. དུཏིཡཡམཀེཏི ཨེཀམཱུལཡམཀེ. ཨེཝམིདྷཱཔཱིཏི ཡཐཱ ཨེཀམཱུལཡམཀེ ‘‘ཡེ ཀེཙི ཀུསལཱ’’ཨིཙྩེཝ པུཙྪཱ ཨཱརདྡྷཱ, ཨེཝཾ ཨིདྷཱཔི ཨཉྙམཉྙམཱུལཡམཀེཔི ‘‘ཡེ ཀེཙི ཀུསལཱ’’ཨིཙྩེཝ པུཙྪཱ ཨཱརབྷིཏབྦཱ སིཡཱ. ཀསྨཱ? པུརིམཡམཀ…པེ… ཨཔྤཝཏྟཏྟཱཏི. ཨིདཉྩ དུཏིཡཡམཀསྶ ཏཐཱ ཨཔྤཝཏྟཏྟཱ ཝུཏྟཾ, ཏཏིཡཡམཀཾ པན ཏཐེཝ པཝཏྟཾ. ཀེཙཱིཏི པདཀཱརཱ. ཏེ ཧི ཡཐཱ པཋམདུཏིཡཡམཀེསུ པུརིམཔུཙྪཱ ཨེཝ པརིཝཏྟནཝསེན པཙྪིམཔུཙྪཱ ཀཏཱཏི པཙྪིམཔུཙྪཱཡ པུརིམཔུཙྪཱ སམཱནཱ ཋཔེཏྭཱ པཊིལོམབྷཱཝཾ, ན ཏཐཱ ཨཉྙམཉྙཡམཀེ. ཏཏྠ ཧི དྭེཔི པུཙྪཱ ཨཉྙམཉྙཝིསདིསཱ. ཡདི ཏཏྠཱཔི དྭཱིཧིཔི པུཙྪཱཧི སདིསཱཧི བྷཝིཏབྦཾ ¶ , ‘‘ཡེ ཀེཙི ཀུསལཱ’’ཏི པཋམཔུཙྪཱ ཨཱརབྷིཏབྦཱ, པཙྪིམཔུཙྪཱ ཝཱ ‘‘སབྦེ ཏེ དྷམྨཱ ཀུསལམཱུལེན ཨེཀམཱུལཱ’’ཏི ¶ ཝཏྟབྦཱ སིཡཱ. ཨེཝཾ པན ཨཝཏྭཱ པཋམདུཏིཡཡམཀེསུ ཝིཡ པུརིམཔཙྪིམཔུཙྪཱ སདིསཱ ཨཀཏྭཱ ཏཏིཡཡམཀེ ཏཱསཾ ཝིསདིསཏཱ ‘‘ཡེ ཀེཙི ཀུསལཱ’’ཏི ཨནཱརདྡྷཏྟཱ, ཏསྨཱ པཊིལོམཔུཙྪཱནུརཱུཔཱཡ ཨནུལོམཔུཙྪཱཡ བྷཝིཏབྦནྟི ཨིམམཏྠཾ སནྡྷཱཡ ‘‘ཡེ ཀེཙི ཀུསལཱཏི ཨཔུཙྪིཏྭཱ’’ཏི ཝུཏྟནྟི ཝདནྟི.

ཨཏྠཝསེནཱཏི སམྦྷཝནྟཱནཾ ནིཙྪིཏསཾསཡིཏཱནཾ ཨཏྠཱནཾ ཝསེན. ཏདནུརཱུཔཱཡཱཏི ཏསྶཱ པུརིམཔུཙྪཱཡ ཨཏྠཏོ བྱཉྫནཏོ ཙ ཨནུཙྪཝིཀཱཡ. པུརིམཉྷི ཨཔེཀྑིཏྭཱ པཙྪིམཱཡ བྷཝིཏབྦཾ. ཏེནཱཏི ཏསྨཱ. ཡསྨཱ ཨནུལོམེ སཾསཡཙྪེདེ ཛཱཏེཔི པཊིལོམེ སཾསཡོ ཨུཔྤཛྫཏི, ཡདི ན ཨུཔྤཛྫེཡྻ, པཊིལོམཔུཙྪཱཡ པཡོཛནམེཝ ན སིཡཱ, ཏསྨཱ ན པཙྪིམཔུཙྪཱནུརཱུཔཱ པུརིམཔུཙྪཱ, ཨཐ ཁོ ཝུཏྟནཡེན པུརིམཔུཙྪཱནུརཱུཔཱ པཙྪིམཔུཙྪཱ, ཏཱཡ ཙ ཨནུརཱུཔཏཱཡ ཨཏྠཱདིཝསེན དྭིནྣཾ པདཱནཾ སམྦནྡྷཏྟཱ ཨཏྠཱདིཡམཀཏཱ ཝུཏྟཱ. དེསནཱཀྐམཏོ ཙེཏྠ ཨནུལོམཔཊིལོམཏཱ ཝེདིཏབྦཱ ‘‘ཀུསལཱ ཀུསལམཱུལཱ’’ཏི ཝཏྭཱ ‘‘ཀུསལམཱུལཱ ཀུསལཱ’’ཏི ཙ ཝུཏྟཏྟཱ. སེསཡམཀེསུཔི ཨེསེཝ ནཡོ. ཝིསེསཝནྟཝིསེས, ཝིསེསཝིསེསཝནྟགྒཧཎཏོ ཝཱ ཨིདྷ ཨནུལོམཔཊིལོམཏཱ ཝེདིཏབྦཱ. པཋམཔུཙྪཱཡཉྷི ཡེ དྷམྨཱ ཝིསེསཝནྟོ, ཏེ ནིཙྪཡཱདྷིཊྛཱནེ ཀཏྭཱ དསྶེནྟོ ‘‘ཡེ ཀེཙི ཀུསལཱ དྷམྨཱ’’ཏི ཝཏྭཱ ཏེསུ ཡསྨིཾ ཝིསེསོ སཾསཡཱདྷིཊྛཱནོ, ཏཾདསྶནཏྠཾ ‘‘སབྦེ ཏེ ཀུསལམཱུལཱ’’ཏི པུཙྪཱ ཀཏཱ. དུཏིཡཔུཙྪཱཡཾ པན ཏཔྤཊིལོམཏོ ཡེན ཝིསེསེན ཏེ ཝིསེསཝནྟོ, ཏཾ ཝིསེསཾ སནྣིཊྛཱནཾ ཀཏྭཱ དསྶེནྟོ ‘‘ཡེ ཝཱ པན ཀུསལམཱུལཱ’’ཏི ཝཏྭཱ ཏེ ཝིསེསཝནྟེ སཾསཡཱདྷིཊྛཱནབྷཱུཏེ དསྶེཏུཾ ‘‘སབྦེ ཏེ དྷམྨཱ ཀུསལཱ’’ཏི པུཙྪཱ ཀཏཱ. ཨནིཡཏཝཏྠུཀཱ ཧི སནྣིཊྛཱནསཾསཡཱ ཨནེཀཛ྄ཛྷཱསཡཏྟཱ སཏྟཱནཾ.

ཨིམིནཱཔི བྱཉྫནེནཱཏི ‘‘ཡེ ཀེཙི ཀུསལམཱུལེན ཨེཀམཱུལཱ’’ཏི ཨིམིནཱཔི ཝཱཀྱེན. ཨེཝཾ ན སཀྐཱ ཝཏྟུནྟི ཡེནཱདྷིཔྤཱཡེན ཝུཏྟཾ, ཏམེཝཱདྷིཔྤཱཡཾ ཝིཝརཏི ‘‘ན ཧཱི’’ཏིཨཱདིནཱ. ཏཏྠ ཏེནེཝཱཏི ཀུསལབྱཉྫནཏྠསྶ ཀུསལམཱུལེན ཨེཀམཱུལབྱཉྫནཏྠསྶ བྷིནྣཏྟཱ ཨེཝ. ཝིསྶཛྫནནྟི ཝིབྷཛནཾ ¶ . ཨིཏརཐཱཏི ཀུསལམཱུལེན ཨེཀམཱུལབྱཉྫནེན པུཙྪཱཡ ཀཏཱཡ. ཏཱནི ཝཙནཱནཱིཏི ཀུསལཝཙནཾ ཀུསལམཱུལེན ཨེཀམཱུལཝཙནཉྩ. ཀུསལཙིཏྟསམུཊྛཱནརཱུཔཝསེན ཙསྶ ཨབྱཱཀཏདཱིཔནཏཱ དཊྛབྦཱ. ཨེཏྠཱཏི ‘‘ཨིམིནཱཔི བྱཉྫནེན ཏསྶེཝཏྠསྶ སམྦྷཝཏོ’’ཏི ཨེཏསྨིཾ ཝཙནེ. ཡེ ཀེཙི ཀུསལཱ…པེ… སམྦྷཝཏོཏི ཨེཏེན ཀུསལཱནཾ ཀུསལམཱུལེན ཨེཀམཱུལཏཱཡ བྱབྷིཙཱརཱབྷཱཝཾ དསྶེཏི. ཏེནེཝཱཧ ‘‘ན ཧི…པེ… སནྟཱི’’ཏི. ཝུཏྟབྱཉྫནཏྠསྶེཝ ¶ སམྦྷཝཏོཏི ཧི ཨིམིནཱ ཨཝུཏྟབྱཉྫནཏྠསྶ སམྦྷཝཱབྷཱཝཝཙནེན སྭཱཡམདྷིཔྤཱཡམཏྠོ ཝིབྷཱཝིཏོ. ཡཐཱ ཧི ཀུསལམཱུལེན ཨེཀམཱུལབྱཉྫནཏྠོ ཀུསལབྱཉྫནཏྠཾ བྱབྷིཙརཏི, ན ཨེཝཾ ཏཾ ཀུསལབྱཉྫནཏྠོ. ཀཐཾ ཀཏྭཱ ཙོདནཱ, ཀཐཉྩ ཀཏྭཱ པརིཧཱརོ? ཀུསལམཱུལེན ཨེཀམཱུལཱ ཀུསལཱ ཨེཝཱཏི ཙོདནཱ ཀཏཱ, ཀུསལམཱུལེན ཨེཀམཱུལཱ ཨེཝ ཀུསལཱཏི པན པརིཧཱརོ པཝཏྟོཏི ཝེདིཏབྦཾ. དུཏིཡཡམཀེ ཝིཡ ཨཔུཙྪིཏྭཱཏི ‘‘ཡེ ཀེཙི ཀུསལཱ’’ཏི ཨཔུཙྪིཏྭཱ. ཀུསལམཱུལེཧཱིཏི ཀུསལེཧི མཱུལེཧི. ཏེཏི ཀུསལམཱུལེན ཨེཀམཱུལཱ.

ཨེཀཏོ ཨུཔྤཛྫནྟཱིཏི ཨེཏྠ ཨིཏི-སདྡོ ཨཱདིཨཏྠོ པཀཱརཏྠོ ཝཱ. ཏེན ‘‘ཀུསལམཱུལཱནི ཨེཀམཱུལཱནི ཙེཝ ཨཉྙམཉྙམཱུལཱནི ཙཱ’’ཏིཨཱདིཔཱལི༹སེསཾ དསྶེཏི. ཡཾ སནྡྷཱཡ ‘‘ཧེཊྛཱ ཝུཏྟནཡེནེཝ ཝིསྶཛྫནཾ ཀཱཏབྦཾ བྷཝེཡྻཱ’’ཏི ཝུཏྟཾ. ཏཏྠ ཧེཊྛཱཏི ཨནུལོམཔུཙྪཱཝིསྶཛྫནེ. ཝུཏྟནཡེནཱཏི ‘‘མཱུལཱནི ཡཱནི ཨེཀཏོ ཨུཔྤཛྫནྟཱི’’ཏིཨཱདིནཱ ཝུཏྟནཡེན. ཏམྤཱིཏི ‘‘ཀུསལམཱུལེནཱ’’ཏིཨཱདི ཨཊྛཀཐཱཝཙནམྤི. ཏཐཱཏི ཏེན པཀཱརེན, ཨནུལོམཔུཙྪཱཡཾ ཝིཡ ཝིསྶཛྫནཾ ཀཱཏབྦཾ བྷཝེཡྻཱཏི ཨིམིནཱ པཀཱརེནཱཏི ཨཏྠོ. ཡེན ཀཱརཎེན ‘‘ན སཀྐཱ ཝཏྟུ’’ནྟི ཝུཏྟཾ, ཏཾ ཀཱརཎཾ དསྶེཏུཾ ‘‘ཡེ ཝཱ པནཱ’’ཏིཨཱདིམཱཧ. ཏཏྠ ‘‘ཨཱམནྟཱ’’ཨིཙྩེཝ ཝིསྶཛྫནེན བྷཝིཏབྦནྟི ‘‘སབྦེ ཏེ དྷམྨཱ ཀུསལཱ’’ཏི པུཙྪཱཡཾ ཝིཡ ‘‘སབྦེ ཏེ དྷམྨཱ ཀུསལམཱུལེན ཨེཀམཱུལཱ’’ཏི པུཙྪིཏེཔི པཊིཝཙནཝིསྶཛྫནམེཝ ལབྦྷཏི, ན ཨནུལོམཔུཙྪཱཡཾ ཝིཡ སརཱུཔདསྶནཝིསྶཛྫནཾ ཝིབྷཛིཏྭཱ དསྶེཏབྦསྶ ཨབྷཱཝཏོ. ཡེ ཧི དྷམྨཱ ཀུསལམཱུལེན ཨེཀམཱུལཱ, ན ཏེ དྷམྨཱ ཀུསལམཱུལེན ཨཉྙམཉྙམཱུལཱཝ. ཡེ པན ཀུསལམཱུལེན ཨཉྙམཉྙམཱུལཱ, ཏེ ཀུསལམཱུལེན ཨེཀམཱུལཱཝ. ཏེནཱཧ ‘‘ན ཧི…པེ… ཝིབྷཱགོ ཀཱཏབྦོ བྷཝེཡྻཱ’’ཏི.

ཏཏྠ ¶ ཡེནཱཏི ཡེན ཨཉྙམཉྙམཱུལེསུ ཨེཀམཱུལསྶ ཨབྷཱཝེན. ཡཏྠཱཏི ཡསྨིཾ ཉཱཎསམྤཡུཏྟཙིཏྟུཔྤཱདེ. ཨཉྙམཉྙམཱུལཀཏྟཱ ཨེཀམཱུལཀཏྟཱ ཙཱཏི ཨདྷིཔྤཱཡོ. དྭིནྣཾ དྭིནྣཉྷི ཨེཀེཀེན ཨཉྙམཉྙམཱུལཀཏྟེ ཝུཏྟེ ཏེསཾ ཨེཀེཀེན ཨེཀམཱུལཀཏྟམྤི ཝུཏྟམེཝ ཧོཏི སམཱནཏྠོ ཨེཀསདྡོཏི ཀཏྭཱ. ཏེནེཝཱཧ ‘‘ཡཏྠ པན…པེ… ན ཨེཀམཱུལཱནཱི’’ཏི. ཏཡིདཾ མིཙྪཱ, དྭཱིསུཔི ཨེཀེཀེན ཨིཏརསྶ ཨེཀམཱུལཀཏྟཾ སམྦྷཝཏི ཨེཝཱཏི. ཏེནཱཧ ‘‘ཨེཏསྶ གཧཎསྶ ནིཝཱརཎཏྠ’’ནྟིཨཱདི. ‘‘ཡེ དྷམྨཱ ཀུསལམཱུལེན ཨཉྙམཉྙམཱུལཱ, ཏེ ཀུསལམཱུལེན ཨེཀམཱུལཱ’’ཏི ཨིམམཏྠཾ ཝིབྷཱཝེནྟེན ཨིདྷ ‘‘ཨཱམནྟཱ’’ཏི པདེན ཡཏྠ དྭེ མཱུལཱནི ཨུཔྤཛྫནྟི, ཏཏྠ ཨེཀེཀེན ཨིཏརསྶ ཨེཀམཱུལཀཏྟཾ པཀཱསིཏམེཝཱཏི ཨཱཧ ‘‘ཨཱམནྟཱཏི ཨིམིནཱཝ ཝིསྶཛྫནེན ཏཾགཧཎནིཝཱརཎཏོ’’ཏི ¶ . ནིཙྪིཏཏྟཱཏི ཨེཏྠ ཨེཀཏོ ཨུཔྤཛྫམཱནཱནཾ ཏིཎྞནྣཾ ཏཱཝ མཱུལཱནཾ ནིཙྪིཏཾ ཧོཏུ ཨཉྙམཉྙེཀམཱུལཀཏྟཾ, དྭིནྣཾ པན ཀཐནྟི ཨཱཧ ‘‘ཨཉྙམཉྙམཱུལཱནཾ ཧཱི’’ཏིཨཱདི. སམཱནམཱུལཏཱ ཨེཝཱཏི ཨཝདྷཱརཎེན ནིཝཏྟིཏཏྠཾ དསྶེཏུཾ ‘‘ན ཨཉྙམཉྙསམཱནམཱུལཏཱ’’ཏི ཝུཏྟཾ. ཏེན ཨཉྙམཉྙམཱུལཱནཾ སམཱནམཱུལཏཱམཏྟཝཙནིཙྪཱཡ ཨེཀམཱུལགྒཧཎཾ, ན ཏེསཾ ཨཉྙམཉྙཔཙྩཡཏཱཝིསིཊྛསམཱནམཱུལཏཱདསྶནཏྠནྟི ཨིམམཏྠཾ དསྶེཏི. དྭིནྣཾ མཱུལཱནནྟི དྭིནྣཾ ཨེཀམཱུལཱནཾ ཨེཀཏོ ཨུཔྤཛྫམཱནཱནཾ. ཡཐཱ ཏེསཾ སམཱནམཱུལཏཱ, ཏཾ དསྶེཏུཾ ‘‘ཏེསུ ཧཱི’’ཏིཨཱདི ཝུཏྟཾ. ཏཾམཱུལེཧི ཨཉྙེཧཱིཏི ཨིཏརམཱུལེཧི མཱུལདྭཡཏོ ཨཉྙེཧི སཧཛཱཏདྷམྨེཧི.

ཨིདཱནི ཡེན ཨདྷིཔྤཱཡེན པཊིལོམེ ‘‘ཀུསལཱ’’ཨིཙྩེཝ པུཙྪཱ ཀཏཱ, ན ‘‘ཀུསལམཱུལེན ཨེཀམཱུལཱ’’ཏི, ཏཾ དསྶེཏུཾ ‘‘ཨཉྙམཉྙམཱུལཏྟེ པན…པེ… ཀཏཱཏི དཊྛབྦ’’ནྟི ཨཱཧ. ན ཧི ཀུསལམཱུལེན ཨཉྙམཉྙམཱུལེསུ ཀིཉྩི ཨེཀམཱུལཾ ན ཧོཏཱིཏི ཝུཏྟོཝཱཡམཏྠོ. མཱུལཡུཏྟཏམེཝ ཝདཏི, ན མཱུལེཧི ཨཡུཏྟནྟི ཨདྷིཔྤཱཡོ. ཨཉྙཐཱ པུབྦེནཱཔརཾ ཝིརུཛ྄ཛྷེཡྻ. ཏེནེཝཱཏི མཱུལཡུཏྟཏཱཡ ཨེཝ ཝུཙྩམཱནཏྟཱ. ཨུབྷཡཏྠཱཔཱིཏི ཨཉྙམཉྙམཱུལཱ ཨེཀམཱུལཱཏི དྭཱིསུཔི པདེསུ. ‘‘ཀུསལམཱུལེནཱ’’ཏི ཝུཏྟཾ, ཀུསལམཱུལེན སམྤཡུཏྟེནཱཏི ཧི ཨཏྠོ. ཡདི ཨུབྷཡམྤི ཝཙནཾ མཱུལཡུཏྟཏམེཝ ཝདཏི, ཨཐ ཀསྨཱ ཨནུལོམཔུཙྪཱཡམེཝ ཨེཀམཱུལགྒཧཎཾ ཀཏཾ, ན པཊིལོམཔུཙྪཱཡནྟི ཨུབྷཡཏྠཱཔི ཏཾ གཧེཏབྦཾ ན ཝཱ གཧེཏབྦཾ. ཨེཝཉྷི མཱུལེཀམཱུལཡམཀདེསནཱཧི ཨཡཾ ཨཉྙམཉྙཡམཀདེསནཱ སམཱནརསཱ སིཡཱཏི ཙོདནཾ མནསི ཀཏྭཱ ཨཱཧ ‘‘ཏཏྠཱ’’ཏིཨཱདི.

ཏཏྠ ¶ ཏཏྠཱཏི ཏསྨིཾ ཨཉྙམཉྙཡམཀེ. ཡདིཔི ཨེཀམཱུལཱ ཨཉྙམཉྙམཱུལཱཏི ཨིདཾ པདདྭཡཾ ཝུཏྟནཡེན མཱུལཡུཏྟཏམེཝ ཝདཏི, ཏཐཱཔི སཱམཉྙཝིསེསལཀྑཎེ ཨཏྠེཝ བྷེདོཏི དསྶེཏུཾ ‘‘མཱུལཡོགསཱམཉྙེ’’ཏིཨཱདི ཝུཏྟཾ. སམཱུལཀཱནཾ སམཱནམཱུལཏཱ ཨེཀམཱུལཏྟནྟི ཨེཀམཱུལཝཙནཾ ཏེསུ ཨཝིསེསཏོ མཱུལསབྦྷཱཝམཏྟཾ ཝདཏི, ན ཨཉྙམཉྙམཱུལསདྡོ ཝིཡ མཱུལེསུ ལབྦྷམཱནཾ ཝིསེསཾ, ན ཙ སཱམཉྙེ ནིཙྪཡོ ཝིསེསེ སཾསཡཾ ཝིདྷམཏཱིཏི ཨིམམཏྠམཱཧ ‘‘མཱུལཡོགསཱམཉྙེ…པེ… པཝཏྟཱ’’ཏི ཨིམིནཱ. ཝིསེསེ པན ནིཙྪཡོ སཱམཉྙེ སཾསཡཾ ཝིདྷམནྟོ ཨེཝ པཝཏྟཏཱིཏི ཨཱཧ ‘‘མཱུལཡོགཝིསེསེ པན…པེ… ནིཙྪིཏམེཝ ཧོཏཱི’’ཏི. ཏསྨཱཏི ཝུཏྟསྶེཝ ཏསྶ ཧེཏུབྷཱཝེན པརཱམསནཾ, ཝིསེསནིཙྪཡེནེཝ ཨཝིནཱབྷཱཝཏོ, སཱམཉྙསྶ ནིཙྪིཏཏྟཱ ཏཏྠ ཝཱ སཾསཡཱབྷཱཝཏོཏི ཨཏྠོ. ཏེནཱཧ ‘‘ཨེཀམཱུལཱཏི པུཙྪཾ ཨཀཏྭཱ’’ཏི. ཀུསལབྷཱཝདཱིཔཀཾ ན ཧོཏཱིཏི ཀུསལབྷཱཝསྶེཝ ¶ དཱིཔཀཾ ན ཧོཏི ཏདཉྙཛཱཏིཀསྶཔི དཱིཔནཏོ. ཏེནཱཧ ‘‘ཀུསལབྷཱཝེ སཾསཡསབྦྷཱཝཱ’’ཏི. ཨཉྙམཉྙམཱུལཝཙནནྟི ཀེཝལཾ ཨཉྙམཉྙམཱུལཝཙནནྟི ཨདྷིཔྤཱཡོ. ཀུསལཱདྷིཀཱརསྶ ཨནུཝཏྟམཱནཏྟཱཏི ཨིམིནཱ ‘‘སབྦེ ཏེ དྷམྨཱ ཀུསལཱ’’ཏི ཀུསལགྒཧཎེ ཀཱརཎམཱཧ. ཨེཀམཱུལགྒཧཎེ ཧི པཡོཛནཱབྷཱཝོ དསྶིཏོ, ཀུསལསྶ ཝསེན ཙཱཡཾ དེསནཱཏི.

༥༣-༦༡. མཱུལནཡེ ཝུཏྟེ ཨེཝ ཨཏྠེཏི མཱུལནཡེ ཝུཏྟེ ཨེཝ ཀུསལཱདིདྷམྨེ. ཀུསལཱདཡོ ཧི སབྷཱཝདྷམྨཱ ཨིདྷ པཱལི༹ཨཏྠཏཱཡ ཨཏྠོཏི ཝུཏྟོ. ཀུསལམཱུལབྷཱཝེན, མཱུལསྶ ཝིསེསནེན, མཱུལཡོགདཱིཔནེན ཙ པཀཱསེཏུཾ. ཀུསལམཱུལབྷཱུཏཱ མཱུལཱ ཀུསལམཱུལམཱུལཱཏི སམཱསཡོཛནཱ. མཱུལཝཙནཉྷི ནིཝཏྟེཏབྦགཧེཏབྦསཱདྷཱརཎཾ. ཨཀུསལཱབྱཱཀཏཱཔི མཱུལདྷམྨཱ ཨཏྠཱིཏི ཀུསལམཱུལབྷཱཝེན མཱུལདྷམྨཱ ཝིསེསིཏཱ. མཱུལགྒཧཎེན ཙ མཱུལཝནྟཱནཾ མཱུལཡོགོ དཱིཔིཏོ ཧོཏི. སམཱནེན མཱུལེན, མཱུལསྶ ཝིསེསནེན, མཱུལཡོགདཱིཔནེན ཙ པཀཱསེཏུཾ ‘‘ཨེཀམཱུལམཱུལཱ’’ཏི, ཨཉྙམཉྙསྶ མཱུལེན མཱུལབྷཱཝེན, མཱུལསྶ ཝིསེསནེན, མཱུལཡོགདཱིཔནེན ཙ པཀཱསེཏུཾ ‘‘ཨཉྙམཉྙམཱུལམཱུལཱ’’ཏི མཱུལམཱུལནཡོ ཝུཏྟོཏི ཡོཛནཱ. ཏཱིསུཔི ཡམཀེསུ ཡཐཱཝུཏྟཝིསེསནམེཝེཏྠ པརིཡཱཡནྟརཾ དཊྛབྦཾ.

མཱུལཡོགཾ ¶ དཱིཔེཏུནྟི མཱུལཡོགམེཝ པདྷཱནཾ སཱཏིསཡཉྩ ཀཏྭཱ དཱིཔེཏུནྟི ཨདྷིཔྤཱཡོ. ཡཐཱ ཧི ཀུསལཱནི མཱུལཱནི ཨེཏེསནྟི ཀུསལམཱུལཀཱནཱིཏི བཱཧིརཏྠསམཱསེ མཱུལཡོགོ པདྷཱནབྷཱཝེན ཝུཏྟོ ཧོཏི, ན ཨེཝཾ ‘‘ཀུསལསངྑཱཏཱ མཱུལཱ ཀུསལམཱུལཱ’’ཏི ཀེཝལཾ, ‘‘ཀུསལམཱུལམཱུལཱ’’ཏི སཝིསེསནཾ ཝཱ ཝུཏྟེ ཨུཏྟརཔདཏྠཔྤདྷཱནསམཱསེ. ཏེནཱཧ ‘‘ཨཉྙཔདཏྠ…པེ… དཱིཔེཏུ’’ནྟི. ཝུཏྟཔྤཀཱརོཝཱཏི ‘‘ཀུསལམཱུལབྷཱཝེན མཱུལསྶ ཝིསེསནེནཱ’’ཏིཨཱདིནཱ མཱུལམཱུལནཡེ ཙ, ‘‘ཨཉྙཔདཏྠསམཱསནྟེན ཀ-ཀཱརེནཱ’’ཏིཨཱདིནཱ མཱུལཀནཡེ ཙ ཝུཏྟཔྤཀཱརོ ཨེཝ. ཝཙནཔརིཡཱཡོ མཱུལམཱུལཀནཡེ ཨེཀཛ྄ཛྷཾ ཀཏྭཱ ཡོཛེཏབྦོ.

༧༤-༨༥. ན ཨེཀམཱུལབྷཱཝཾ ལབྷམཱནེཧཱིཏི ཨབྱཱཀཏམཱུལེན ན ཨེཀམཱུལཀཾ ཏཐཱཝཏྟབྦཏཾ ལབྷམཱནེཧི ཨཊྛཱརསཨཧེཏུཀཙིཏྟུཔྤཱདཱཧེཏུཀསམུཊྛཱནརཱུཔནིབྦཱནེཧི ཨེཀཏོ ཨལབྦྷམཱནཏྟཱ. ཡཐཱ ཧི ཡཐཱཝུཏྟཙིཏྟུཔྤཱདཱདཡོ ཧེཏུཔཙྩཡཝིརཧིཏཱ ཨཧེཏུཀཝོཧཱརཾ ལབྷནྟི, ན ཨེཝཾ སཧེཏུཀསམུཊྛཱནཾ རཱུཔཾ. ཏེནཱཧ ‘‘ཨཧེཏུཀཝོཧཱརརཧིཏཾ ཀཏྭཱ’’ཏི. ཨེཏྠ ཙ ‘‘སབྦཾ རཱུཔཾ ན ཧེཏུཀམེཝ, ཨཧེཏུཀམེཝཱ’’ཏི ཝུཏྟཏྟཱ ཀིཉྩཱཔི སཧེཏུཀསམུཊྛཱནམྤི རཱུཔཾ ཨཧེཏུཀཾ, ‘‘ཨབྱཱཀཏོ ¶ དྷམྨོ ཨབྱཱཀཏསྶ དྷམྨསྶ ཧེཏུཔཙྩཡེན པཙྩཡོ, ཝིཔཱཀཱབྱཱཀཏཱ ཀིརིཡཱབྱཱཀཏཱ ཧེཏཱུ སམྤཡུཏྟཀཱནཾ ཁནྡྷཱནཾ ཙིཏྟསམུཊྛཱནཱནཉྩ རཱུཔཱནཾ ཧེཏུཔཙྩཡེན པཙྩཡོ’’ཏི (པཊྛཱ. ༡.༡.༤༠༣) པན ཝཙནཏོ ཧེཏུཔཙྩཡཡོགེན སཧེཏུཀསམུཊྛཱནསྶ རཱུཔསྶ ཨཧེཏུཀཝོཧཱརཱབྷཱཝོ ཝུཏྟོ. ཀེཙི པན ‘‘ཨབྦོཧཱརིཀཾ ཀཏྭཱཏི སཧེཏུཀཝོཧཱརེན ཨབྦོཧཱརིཀཾ ཀཏྭཱཏི ཨཏྠཾ ཝཏྭཱ ཨཉྙཐཱ ‘ཨཧེཏུཀཾ ཨབྱཱཀཏཾ ཨབྱཱཀཏམཱུལེན ཨེཀམཱུལ’ནྟི ན སཀྐཱ ཝཏྟུ’’ནྟི ཝདནྟི. ཏཏྠ ཡཾ ཝཏྟབྦཾ, ཏཾ ཝུཏྟམེཝ ཨཧེཏུཀཝོཧཱརཱབྷཱཝེན སཧེཏུཀཏཱཔརིཡཱཡསྶ ཨཏྠསིདྡྷཏྟཱ. ཨཔིཙ ཧེཏུཔཙྩཡསབྦྷཱཝཏོ ཏསྶ སཧེཏུཀཏཱཔརིཡཱཡོ ལབྦྷཏེཝ. ཏེནཱཧ ‘‘ན ཝཱ སཧེཏུཀདུཀེ ཝིཡ…པེ… ཨབྦོཧཱརིཀཾ ཀཏ’’ནྟི. ཨེཏྠ ཨེཏྠཱཏི ཨེཏསྨིཾ ཨེཀམཱུལཀདུཀེ. ཧེཏུཔཙྩཡཡོགཱཡོགཝསེནཱཏི ཧེཏུཔཙྩཡེན ཡོགཱཡོགཝསེན, ཧེཏུཔཙྩཡསྶ སབྦྷཱཝཱསབྦྷཱཝཝསེནཱཏི ཨཏྠོ. སཧེཏུཀཝོཧཱརམེཝ ལབྷཏི པཙྩཡབྷཱུཏཧེཏུསབྦྷཱཝཏོ.

ཨཔརེ ¶ པན བྷཎནྟི ‘‘སཧེཏུཀཙིཏྟསམུཊྛཱནཾ རཱུཔཾ ཨཧེཏུཀཾ ཨབྱཱཀཏནྟི ཨིམིནཱ ཝཙནེན སངྒཧཾ གཙྪནྟམྤི སམཱུལཀཏྟཱ ‘ཨབྱཱཀཏམཱུལེན ན ཨེཀམཱུལ’ནྟི ན སཀྐཱ ཝཏྟུཾ, སཏིཔི སམཱུལཀཏྟེ ནིཔྤརིཡཱཡེན སཧེཏུཀཾ ན ཧོཏཱིཏི ‘ཨབྱཱཀཏམཱུལེན ཨེཀམཱུལ’ནྟི ཙ ན སཀྐཱ ཝཏྟུཾ, ཏསྨཱ ‘ཨཧེཏུཀཾ ཨབྱཱཀཏཾ ཨབྱཱཀཏམཱུལེན ན ཨེཀམཱུལཾ, སཧེཏུཀཾ ཨབྱཱཀཏཾ ཨབྱཱཀཏམཱུལེན ཨེཀམཱུལ’ནྟི དྭཱིསུཔི པདེསུ ཨནཝརོདྷཏོ ཨབྦོཧཱརིཀཾ ཀཏྭཱཏི ཝུཏྟ’’ནྟི, ཏཾ ཏེསཾ མཏིམཏྟཾ ‘‘སཧེཏུཀཨབྱཱཀཏསམུཊྛཱནཾ རཱུཔཾ ཨབྱཱཀཏམཱུལེན ཨེཀམཱུལཾ ཧོཏཱི’’ཏི ཨཊྛཀཐཱཡཾ ཏསྶ ཨེཀམཱུལབྷཱཝསྶ ནིཙྪིཏཏྟཱ, ཏསྨཱ ཝུཏྟནཡེནེཝ ཙེཏྠ ཨཏྠོ ཝེདིཏབྦོ.

༨༦-༩༧. ཀུསལཱཀུསལཱབྱཱཀཏརཱསིཏོ ནམནནཱམནསངྑཱཏེན ཝིསེསེན ཨརཱུཔདྷམྨཱནཾ གཧཎཾ ནིདྡྷཱརཎཾ ནཱམ ཧོཏཱིཏི ཨཱཧ ‘‘ནཱམཱནཾ ནིདྡྷཱརིཏཏྟཱ’’ཏི. ཏེན ཏེསཾ ཨདྷིཀབྷཱཝམཱཧ ཝིཉྙཱཡམཱནམེཝ པཀརཎེན ཨཔརིཙྪིནྣཏྟཱ. ཡདི ཨེཝཾ ‘‘ཨཧེཏུཀཾ ནཱམཾ སཧེཏུཀཾ ནཱམ’’ནྟི པཱཋནྟརེ ཀསྨཱ ནཱམགྒཧཎཾ ཀཏནྟི ཨཱཧ ‘‘སུཔཱཀཊབྷཱཝཏྠ’’ནྟི, པརིབྱཏྟཾ ཀཏྭཱ ཝུཏྟེ ཀིཾ ཝཏྟབྦནྟི ཨདྷིཔྤཱཡོ.

ནིདྡེསཝཱརཝཎྞནཱ ནིཊྛིཏཱ.

མཱུལཡམཀཝཎྞནཱ ནིཊྛིཏཱ.

༢. ཁནྡྷཡམཀཾ

༡. པཎྞཏྟིཝཱརོ

ཨུདྡེསཝཱརཝཎྞནཱ

༢-༣. ཁནྡྷཡམཀེ ¶ …པེ… པརིཉྙཱ ཙ ཝཏྟབྦཱཏི ཨིདཾ པདྷཱནབྷཱཝེན ཝཏྟབྦདསྶནཾ. ཨབྷིཉྙེཡྻཀཐཱ ཧི ཨབྷིདྷམྨོ, སཱ ཙ ཡཱཝདེཝ པརིཉྙཏྟཱཏི པརིཉྙཱསུ ཙ ན ཝིནཱ ཏཱིརཎཔརིཉྙཱཡ པཧཱནཔརིཉྙཱ, ཏཱིརཎཉྩ སམྤུཎྞཔརཱནུགྒཧསྶ ཨདྷིཔྤེཏཏྟཱ ཀཱལཔུགྒལོཀཱསཝིབྷཱགམུཁེན ཁནྡྷཱནཾ ཝིསུཾ སཧ ཙ ཨུཔྤཱདནིརོདྷལཀྑཎཔརིགྒཧཝསེན སཱཏིསཡཾ སམྦྷཝཏི, ནཱཉྙཐཱཏི ཨིམམཏྠཾ དསྶེནྟོ ‘‘ཚསུ ཀཱལབྷེདེསུ…པེ… པརིཉྙཱ ཙ ཝཏྟབྦཱ’’ཏི པདྷཱནཾ ཝཏྟབྦཾ ཨུདྡྷརཏི. ཏཏྠ པན ཡཐཱ ན ཏཱིརཎཔརིཉྙཱཡ ཝིནཱ པཧཱནཔརིཉྙཱ, ཨེཝཾ ཏཱིརཎཔརིཉྙཱ ཝིནཱ ཉཱཏཔརིཉྙཱཡ. སཱ ¶ ཙ སུཏམཡཉཱཎམཱུལིཀཱཏི དེསནཱཀུསལོ སཏྠཱ ཨནྭཡཏོ བྱཏིརེཀཏོ ཙ སམུདཱཡཱཝཡཝཔདཏྠཱདིཝིབྷཱགདསྶནམུཁེན ཁནྡྷེསུ པརིཉྙཱཔྤབྷེདཾ པཀཱསེཏུཀཱམོ ‘‘པཉྩཀྑནྡྷཱ’’ཏིཨཱདིནཱ དེསནཾ ཨཱརབྷཱིཏི དསྶེནྟོ ‘‘ཏེ པན ཁནྡྷཱ’’ཏིཨཱདིམཱཧ. པཉྩཧི པདེཧཱིཏི པཉྩཧི སམུདཱཡཔདེཧི.

ཏཏྠཱཏི ཏེསུ སམུདཱཡཱཝཡཝཔདེསུ. དྷམྨོཏི རུཔྤནཱདིཀོ ཉེཡྻདྷམྨོ. སམུདཱཡཔདསྶཱཏི རཱུཔཀྑནྡྷཱདིསམུདཱཡཔདསྶ. ཡདིཔི ཨཝཡཝཝིནིམུཏྟོ པརམཏྠཏོ སམུདཱཡོ ནཱམ ནཏྠི, ཡཐཱ པན ཨཝཡཝོ སམུདཱཡོ ན ཧོཏི, ཨེཝཾ ན སམུདཱཡོཔི ཨཝཡཝོཏི སཏིཔི སམུདཱཡཱཝཡཝཱནཾ བྷེདེ དྭིནྣཾ པདཱནཾ སམཱནཱདྷིཀརཎབྷཱཝཏོ ཨཏྠེཝཱབྷེདོཏི པདདྭཡསྶ སམཱནཏྠཏཱཡ སིཡཱ ཨཱསངྐཱཏི ཨཱཧ ‘‘ཨེཏསྨིཾ སཾསཡཊྛཱནེ’’ཏི. ‘‘ཙཀྑཱཡཏནཾ རཱུཔཀྑནྡྷགཎནཾ གཙྪཏི, ཝིཉྙཱཎཀྑནྡྷོ ཏཛྫཱ མནོཝིཉྙཱཎདྷཱཏཱུ’’ཏིཨཱདཱིསུ ཨེཀདེསོ སམུདཱཡཔདཏྠོ ཝུཏྟོ, ‘‘ཡཾ ཀིཉྩི རཱུཔཾ…པེ… ཨཡཾ ཝུཙྩཏི རཱུཔཀྑནྡྷོ’’ཏིཨཱདཱིསུ (ཝིབྷ. ༢) པན སཀལོཏི ཨཱཧ ‘‘རཱུཔཱདི…པེ… ཨཏྠོ’’ཏི. ཨཝཡཝཔདཱནཉྩེཏྠ ཝིསེསནཝིསེསིཏབྦཝིསཡཱནཾ སམཱནཱདྷིཀརཎཏཱཡ སམུདཱཡཔདཏྠཏཱ ཝུཏྟཱ, ཏཏོ ཨེཝ སམུདཱཡཔདཱནམྤི ཨཝཡཝཔདཏྠཏཱ. ན ཧི ཝིསེསནཝིསེསིཏབྦཱནཾ ཨཏྠཱནཾ ཨཙྩནྟཾ བྷེདོ ཨབྷེདོ ཝཱ ཨིཙྪིཏོ, ཨཐ ཁོ བྷེདཱབྷེདོ, ཏསྨཱ ¶ ཨབྷེདདསྶནཝསེན པཋམནཡོ ཝུཏྟོ, བྷེདདསྶནཝསེན དུཏིཡནཡོ. ཡོ ཧི རུཔྤནཱདིསངྑཱཏོ རཱསཊྛོ ཨཝཡཝཔདེཧི རཱུཔཱདིསདྡེཧི ཙ ཁནྡྷསདྡེན ཙ ཝིསེསནཝིསེསིཏབྦབྷཱཝེན བྷིནྡིཏྭཱ ཝུཏྟོ, སྭཱཡཾ ཨཏྠཏོ རཱསིབྷཱཝེན ཨཔེཀྑིཏོ རུཔྤནཱདིཨཏྠོ ཨེཝཱཏི.

ཡཐཱ ཨཝཡཝཔདེཧི ཝུཙྩམཱནོཔི སམུདཱཡཔདསྶ ཨཏྠོ ཧོཏི, ཨེཝཾ སམུདཱཡཔདེཧི ཝུཙྩམཱནོཔི ཨཝཡཝཔདསྶ ཨཏྠོཏི ‘‘རཱུཔཀྑནྡྷོ རཱུཔཉྩེཝ རཱུཔཀྑནྡྷོ ཙ, རཱུཔཀྑནྡྷོ རཱུཔནྟི? ཨཱམནྟཱ’’ཏིཨཱདིནཱ པདསོདྷནཱ ཀཏཱཏི དསྶེནྟོ ཨཱཧ ‘‘རཱུཔཱདིཨཝཡཝཔདེཧི…པེ… པདསོདྷནཝཱརོ ཝུཏྟོ’’ཏི. ཏཏྠ ཨེཀཙྩསྶ ཨཝཡཝཔདསྶ ཨཉྙཏྠ ཝུཏྟིཡཱ ཨཝཡཝཔདཏྠསྶ སམུདཱཡཔདཏྠཏཱཡ སིཡཱ ཨནེཀནྟིཀཏཱ, སམུདཱཡཔདསྶ པན ཏཾ ནཏྠཱིཏི སམུདཱཡཔདཏྠསྶ ཨཝཡཝཔདཏྠཏཱཡ བྱབྷིཙཱརཱབྷཱཝོ ¶ ‘‘རཱུཔཀྑནྡྷོ རཱུཔནྟི? ཨཱམནྟཱ’’ཏི པཱལི༹ཡཱ པཀཱསིཏོཏི ཝུཏྟཾ ‘‘རཱུཔཱདི…པེ… དསྶེཏུ’’ནྟི.

‘‘རཱུཔཀྑནྡྷོ’’ཏིཨཱདཱིསུ ཁནྡྷཏྠསྶ ཝིསེསིཏབྦཏྟཱ ཝུཏྟཾ ‘‘པདྷཱནབྷཱུཏསྶ ཁནྡྷཔདསྶཱ’’ཏི. ཝེདནཱདིཨུཔཔདཏྠསྶ ཙ སམྦྷཝཏོ ‘‘ཝེདནཱཀྑནྡྷོ’’ཏིཨཱདཱིསུ. རཱུཔཱཝཡཝཔདེན ཝུཏྟསྶཱཏི རཱུཔསངྑཱཏེན ཨཝཡཝཔདེན ཝིསེསནབྷཱཝེན ཝུཏྟསྶ ཁནྡྷཏྠསྶ རཱུཔཀྑནྡྷབྷཱཝོ ཧོཏི. ཏེན ཝུཏྟཾ ‘‘རཱུཔཀྑནྡྷོ རཱུཔནྟི? ཨཱམནྟཱ’’ཏི. ཏཏྠཱཏི ཏསྨིཾ རཱུཔཀྑནྡྷཔདེ. པདྷཱནབྷཱུཏེན ཝིསེསིཏབྦཏྟཱ ཁནྡྷཱཝཡཝཔདེན ཝུཏྟསྶ རུཔྤནཊྛསྶ ཀིཾ ཝེདནཱཀྑནྡྷཱདིབྷཱཝོ ཧོཏཱིཏི ཡོཛནཱ. སམཱནེ ཨཝཡཝཔདཱབྷིདྷེཡྻབྷཱཝེ ཨཔྤདྷཱནེན པདེན ཡོ ཨཏྠོ ཝིཉྙཱཡཏི, སོ ཀསྨཱ པདྷཱནེན ན ཝིཉྙཱཡཏཱིཏི ཨདྷིཔྤཱཡོ. ཁནྡྷཱཝཡཝཔདེན ཝུཏྟོ དྷམྨོཏི རཱསཊྛམཱཧ. ཏཏྠ ཀོཙཱིཏི རུཔྤནཊྛོ. ཀེནཙི སམུདཱཡཔདེནཱཏི རཱུཔཀྑནྡྷཔདེན, ན ཝེདནཱཀྑནྡྷཱདིཔདེན. ཏེནཱཧ ‘‘ན སབྦོ སབྦེནཱ’’ཏི. ཨེས ནཡོ ཝེདནཱཀྑནྡྷཱདཱིསུ. རཱུཔརཱུཔཀྑནྡྷཱདིཨཝཡཝསམུདཱཡཔདསོདྷནམུཁེན ཏཏྠ ཙ ཙཏུཀྑནྡྷཝསེན པཝཏྟཱ པཱལི༹གཏི པདསོདྷནམཱུལཙཀྐཝཱརོ. ཨེཝཉྩ དསྶེནྟེནཱཏི ཨིམིནཱ ཡྭཱཡཾ རཱུཔཱདིཨཝཡཝཔདེཧི རཱུཔཀྑནྡྷཱདིསམུདཱཡཔདེཧི ཙ དསྶིཏཱཀཱརོ ཨཏྠཝིསེསོ, ཏཾ པཙྩཱམསཏི. ཝིསེསནབྷཱཝོ བྷེདཀཏཱཡ སཱམཉྙཏོ ཨཝཙྪེདཀཏྟཱ, ཝིསེསིཏབྦབྷཱཝོ ཨབྷེདཡོགེན བྷེདནྟརཏོ ཨཝིཙྪིནྡིཏབྦཏྟཱ, སམཱནཱདྷིཀརཎབྷཱཝོ ཏེསཾ བྷེདཱབྷེདཱནཾ ཨེཀཝཏྠུསནྣིསྶཡཏྟཱ.

ཏེནཱཏི ¶ ཡཐཱཝུཏྟེན ཝིསེསནཝིསེསིཏབྦབྷཱཝེན. ཨེཏྠཱཏི ཨེཏསྨིཾ སམཱནཱདྷིཀརཎེ. ཏེནཱཏི ཝཱ སམཱནཱདྷིཀརཎབྷཱཝེན. ཨེཏྠཱཏི རཱུཔཀྑནྡྷཔདེ. ཡཐཱ ནཱིལུཔྤལཔདེ ཨུཔྤལཝིསེསནབྷཱུཏཾ ནཱིལཾ ཝིསིཊྛམེཝ ཧོཏི, ན ཡཾ ཀིཉྩི, ཨེཝམིདྷཱཔི ཁནྡྷཝིསེསནབྷཱུཏཾ རཱུཔམྤི ཝིསིཊྛམེཝ སིཡཱཏི དསྶེནྟོ ‘‘ཀིཾ ཁནྡྷཏོ…པེ… ཧོཏཱི’’ཏི ཨཱཧ. ཏཐཱ ‘‘རཱུཔཉྩ ཏཾ ཁནྡྷོ ཙཱ’’ཏི སམཱནཱདྷིཀརཎབྷཱཝེནེཝ ཡཾ རཱུཔཾ, སོ ཁནྡྷོ. ཡོ ཁནྡྷོ, ཏཾ རཱུཔནྟི ཨཡམྤི ཨཱཔནྣོ ཨེཝཱཏི ཨཱཧ ‘‘སབྦེཝ…པེ… ཝིསེསིཏབྦཱ’’ཏི. ཝིསེསནེན ཙ ནཱམ ནིདྡྷཱརིཏརཱུཔེན བྷཝིཏབྦཾ ཨཝཙྪེདཀཏྟཱ, ན ཨནིདྡྷཱརིཏརཱུཔེནཱཏི ཨཱཧ ‘‘ཀིཾ པན ཏ’’ནྟིཨཱདི, ཏསྶེཝ གཧིཏཏྟཱ ན པིཡརཱུཔསཱཏརཱུཔསྶཱཏི ཨདྷིཔྤཱཡོ. ན ¶ ཧི ཏཾ ཁནྡྷཝིསེསནབྷཱཝེན གཧིཏཾ, ཝིསྶཛྫནཾ ཀཏཾ ཏསྶེཝཱཏི ཡོཛནཱ. ན ཁནྡྷཏོ ཨཉྙཾ རཱུཔཾ ཨཏྠཱིཏི ཨིདཾ རུཔྤནཊྛོ རཱུཔནྟི ཀཏྭཱ ཝུཏྟཾ, ན ཧི སོ ཁནྡྷཝིནིམུཏྟོ ཨཏྠི. ཏེནེཝཱཏི ཡཐཱཝུཏྟརཱུཔསྶ ཁནྡྷཝིནིམུཏྟསྶ ཨབྷཱཝེནེཝ. ‘‘པིཡརཱུཔཾ སཱཏརཱུཔཾ, དསྶེནྟེནཔྤཀ’’ནྟི ཙ ཨཱདཱིསུ ཨཏདཏྠསྶ རཱུཔསདྡསྶ ལབྦྷམཱནཏྟཱ ‘‘ཏེན རཱུཔསདྡེནཱ’’ཏི ཝིསེསེཏྭཱ ཝུཏྟཾ. ཝུཙྩམཱནཾ བྷཱུཏུཔཱདཱཡམྤི བྷེདཾ དྷམྨཛཱཏཾ. སུདྡྷེནཱཏི ཀེཝལེན, རཱུཔསདྡེན ཝིནཱཔཱིཏི ཨཏྠོ. ཏཡིདཾ པཀརཎཱདིཨཝཙྪིནྣཏཾ སནྡྷཱཡ ཝུཏྟཾ, སམཱནཱདྷིཀརཎཏཾ ཝཱ. ཡོ ཧི རཱུཔསདྡེན སམཱནཱདྷིཀརཎོ ཁནྡྷསདྡོ, ཏེན ཡཐཱཝུཏྟརཱུཔསདྡེན ཝིཡ ཏདཏྠོ ཝུཙྩཏེཝ. ཏེནཱཧ ‘‘ཁནྡྷཱ རཱུཔཀྑནྡྷོ’’ཏི. ཡདིཔི ཡཐཱཝུཏྟཾ རཱུཔཾ ཁནྡྷོ ཨེཝ ཙ, ཁནྡྷོ པན ན རཱུཔམེཝཱཏི ཨཱཧ ‘‘ན ཙ སབྦེ…པེ… ཝིསེསིཏབྦཱ’’ཏི. ཏེནེཝཱཏི ཨརཱུཔསབྷཱཝསྶ ཁནྡྷསྶ ཨཏྠིབྷཱཝེནེཝ. ཏེཏི ཁནྡྷཱ. ཝིབྷཛིཏབྦཱཏི ‘‘ཁནྡྷཱ རཱུཔཀྑནྡྷོ’’ཏི པདཾ ཨུདྡྷརིཏྭཱ ‘‘རཱུཔཀྑནྡྷོ ཁནྡྷོ ཙེཝ རཱུཔཀྑནྡྷོ ཙ, ཨཝསེསཱ ཁནྡྷཱ ན རཱུཔཀྑནྡྷོ’’ཏིཨཱདིནཱ ཝིབྷཱགེན དསྶེཏབྦཱ.

ཁནྡྷཱནཾ རཱུཔཝིསེསན…པེ… སཾསཡོ ཧོཏཱིཏི ཨེཏྠ ཀིཾ ཁནྡྷཏོ ཨཉྙཱཔི ཝེདནཱ ཨཏྠི, ཡཏོ ཝིནིཝཏྟཱ ཝེདནཱ ཁནྡྷཝིསེསནཾ ཧོཏི, སབྦེ ཙ ཁནྡྷཱ ཀིཾ ཁནྡྷཝིསེསནབྷཱུཏཱཡ ཝེདནཱཡ ཝིསེསིཏབྦཱཏི ཨེཝཾ ཡོཛནཱ ཝེདིཏབྦཱ. ཀེཙཱིཏི ཨནུབྷཝནཱདིཔྤཀཱརཱ. ཀེནཙི ཝིསེསནེནཱཏི ཝེདནཱདིནཱ ཝིསེསནེན.

ཨེཏྠ ཙ རཱུཔཱདིཔཎྞཏྟི ཁནྡྷཔཎྞཏྟི ཙ ‘‘རཱུཔཾ ཁནྡྷོ, ཁནྡྷཱ རཱུཔཀྑནྡྷོ’’ཏིཨཱདིནཱ ཝིསུཾ སཧ ཙ རུཔྤནཱདིཀེ ཨཏྠེ པཝཏྟམཱནཱ ཀདཱཙི ཨཝཡཝབྷཱུཏེ པཝཏྟཏི, ཀདཱཙི སམུདཱཡབྷཱུཏེ, ཏསྶཱ པན ཏཐཱ པཝཏྟནཱཀཱརེ ནིདྡྷཱརིཏེ ཡསྨཱ རཱུཔཱདིཀྑནྡྷཱ པདཏོ ཨཏྠཏོ ཙ ¶ ཝིསོདྷིཏཱ ནཱམ ཧོནྟི ཏབྦིསཡཀངྑཱཔནོདནཏོ, ཏསྨཱ ‘‘རཱུཔཀྑནྡྷོ རཱུཔཉྩེཝ རཱུཔཀྑནྡྷོ ཙ, རཱུཔཀྑནྡྷོ རཱུཔནྟི? ཨཱམནྟཱ’’ཏིཨཱདིནཡཔྤཝཏྟེན པཋམཝཱརེན རཱུཔཱདིཨཝཡཝཔདེཧི ཨཝཡཝཏྠོ ཝིཡ སམུདཱཡཏྠོཔི ཝུཙྩཏི, ཏཐཱ སམུདཱཡཔདེཧིཔཱིཏི ཨཡམཏྠོ དསྶིཏོ. ‘‘རཱུཔཾ རཱུཔཀྑནྡྷོ, ཁནྡྷཱ ཝེདནཱཀྑནྡྷོ’’ཏིཨཱདིནཡཔྤཝཏྟེན པན དུཏིཡཝཱརེན ཝིསེསཝཱཙཱི ཝིཡ རཱུཔཱདིཨཝཡཝཔདེཧི སཱམཉྙབྷཱུཏེནཔི ཏཾཏཾཝིསིཊྛེན ཁནྡྷཱཝཡཝཔདེན སོ ¶ སོ ཨེཝ སམུདཱཡཏྠོ ཝུཙྩཏི, ན སབྦོཏི ཨཡམཏྠོ དསྶིཏོ. ཁནྡྷཝིནིམུཏྟསྶ ཡཐཱདྷིཔྤེཏསྶ ཨབྷཱཝཱ ཡདིཔི ཁནྡྷོཡེཝ རཱུཔཾ, སོ པན ན སབྦོ རཱུཔཾ, ཨཐ ཁོ ཏདེཀདེསོ, ཏཐཱ ཝེདནཱདཡོཔཱིཏི ཨཡམཏྠོ ‘‘རཱུཔཾ ཁནྡྷོ, ཁནྡྷཱ རཱུཔ’’ནྟིཨཱདིནཡཔྤཝཏྟེན ཏཏིཡཝཱརེན དསྶིཏོ. ‘‘རཱུཔཾ ཁནྡྷོ, ཁནྡྷཱ ཝེདནཱཀྑནྡྷོ’’ཏིཨཱདིནཡཔྤཝཏྟེན པན ཙཏུཏྠཝཱརེན ‘‘རཱུཔཾ ཁནྡྷོ’’ཏི རཱུཔསྶ ཁནྡྷབྷཱཝེ ནིཙྪིཏེ ཁནྡྷོ ནཱམཱཡཾ ན ཀེཝལཾ རཱུཔམེཝ, ཨཐ ཁོ ཝེདནཱདི ཙཱཏི ཝེདནཱདཱིནམྤི ཁནྡྷབྷཱཝཔྤཀཱསནེ ན སབྦེ ཁནྡྷཱ ཝེདནཱདིཝིསེསཝནྟོ, ཀེཙིདེཝ པན ཏེན ཏེན ཝིསེསེན ཏཐཱ ཝུཙྩནྟཱིཏི ཨཡམཏྠོ དསྶིཏོ. ཨེཝཾ དསྶེནྟཱི ཙེསཱ པཱལི༹ ཁནྡྷཱནཾ ཡཐཱཝུཏྟཔཎྞཏྟིསོདྷནམུཁེན སརཱུཔཱཝདྷཱརཎཱཡ སཾཝཏྟཏི, ཏཉྩ ཏེསཾ ཡཱཝདེཝ ཨུཔྤཱདཱདིནིཙྪཡཏྠནྟི དསྶེནྟོ ‘‘ཨེཝཾ ཡེསཾ…པེ… ཝེདིཏབྦོ’’ཏི ཨཱཧ.

ཨེཀདེསེཔི སམུདཱཡཝོཧཱརོ དིསྶཏི ཡཐཱ པཊོ དཌྜྷོ, སམུདྡོ དིཊྛོཏི ཨཱཧ ‘‘ཙཀྐཱཝཡཝབྷཱཝཏོ ཙཀྐཱནཱིཏི ཡམཀཱནི ཝུཏྟཱནཱི’’ཏི. བནྡྷིཏྭཱཏི ཡམཀབྷཱཝེན བནྡྷིཏྭཱ, ཡམཀམཱུལབྷཱཝེནེཝ ཝཱ. མཱུལབྷཱཝེན གཧཎཾ སམྦནྡྷབྷཱཝོ, ཏཾསམྦནྡྷཏཱ ཙ མཱུལཔདཱདཱིནཾ ནཱབྷིཨཱདིསདིསཏཱ དཊྛབྦཱ. ཨཔུབྦསྶ ཝཏྟབྦསྶ ཨབྷཱཝཏོ ནཡིདྷ དེསནཱ མཎྜལབྷཱཝེནེཝ སམྦཛ྄ཛྷཏཱིཏི ཨཱཧ ‘‘ན མཎྜལབྷཱཝེན སམྦཛ྄ཛྷནཏོ’’ཏི. ཡདིཔི རཱུཔཀྑནྡྷམཱུལཀེ ཨཔུབྦཾ ནཏྠི, ཝེདནཱཀྑནྡྷཱདིམཱུལཀེསུ པན སཉྙཱདིམུཁེན དེསནཔྤཝཏྟིཡཾ ཨཔུབྦཝསེནེཝ གཏོ སིཡཱ མཎྜལབྷཱཝེན སམྦནྡྷོ, ན ཏཐཱ པཱཋོ པཝཏྟོཏི ཨཱཧ ‘‘ཝེདནཱཀྑནྡྷ…པེ… སམྦནྡྷེནཱ’’ཏི. པཙྪིམསྶ པུརིམེན ཨསམྦཛ྄ཛྷནམེཝ ཧི ཧེཊྛིམསོདྷནཾ. སུདྡྷཀྑནྡྷལཱབྷམཏྟམེཝ གཧེཏྭཱཏི ‘‘ཁནྡྷཱ རཱུཔ’’ནྟི ཨེཏྠ ཁནྡྷཱཏི ཁནྡྷསདྡེན ལབྦྷམཱནཾ རཱུཔཱདཱིཧི ཨསམྨིསྶཾ ཁནྡྷཊྛམཏྟམེཝ ཨུདྡེསཝསེན གཧེཏྭཱ. ཡདིཔི ཨུདྡེསེ ཁནྡྷཝིསེསནཾ རཱུཔཱདི ‘‘ཁནྡྷཱ རཱུཔ’’ནྟི སུདྡྷརཱུཔཱདིམཏྟམེཝ གཧིཏཾ, ཏཐཱཔི ཝིསེསརཧིཏསྶ སཱམཉྙསྶ ཨབྷཱཝཏོ ཏཏྠ སུདྡྷརཱུཔཱདིམཏྟཏཱཡ ཨཊྛཏྭཱ. ཁནྡྷཝིསེསནབྷཱཝསངྑཱཏནྟི ཡཐཱདྷིགཏཾ ཁནྡྷཱནཾ ཝིསེསནབྷཱཝེན ཀཐིཏཾ རུཔྤནཱདིཀཾ ¶ ཝིསེསནཏྠཾ དསྶེཏུཾ. ཀེཝལམེཝ ཏཾ ཨགྒཎྷནྟོ ཁནྡྷསདྡེན སཧ ཡོཛེཏྭཱ…པེ… ཝིབྷཏྟཏྟཱ སུདྡྷཀྑནྡྷཝཱརོཏི ཝུཏྟོཏི ཡོཛནཱ.

ཨུདྡེསཝཱརཝཎྞནཱ ནིཊྛིཏཱ.

༡. པཎྞཏྟིཝཱརོ

ནིདྡེསཝཱརཝཎྞནཱ

༢༦. ཨེཝཾ ¶ ཝུཏྟནྟི ཨེཝཾ དྭཱརཱལམྦནེཧི སདྡྷིཾ དྭཱརཔྤཝཏྟདྷམྨཝིབྷཱགཝསེན ཝུཏྟཾ. པིཡསབྷཱཝཾ པིཡཛཱཏིཀཾ ‘‘ཀཐཾ རཱུཔེན ཁོ, ཨཱཝུསོ’’ཏིཨཱདཱིསུ ཝིཡ པིཡསབྷཱཝཊྛེན རཱུཔཾ, ན རུཔྤནཊྛེནཱཏི ཝུཏྟཾ ‘‘པིཡརཱུཔཾ…པེ… རཱུཔཾ ན རཱུཔཀྑནྡྷོ’’ཏི. རུཔྤནཊྛེན རཱུཔཀྑནྡྷཔརིཡཱཔནྣམྤི ཙཀྑཱདི པིཡསབྷཱཝམཏྟཝཙནིཙྪཱཝསེན པིཡརཱུཔམེཝ ཨནུཔྤཝིསཏི, ན རཱུཔཀྑནྡྷནྟི ཨཱཧ ‘‘པིཡསབྷཱཝ…པེ… ན རཱུཔཀྑནྡྷོཏི ཝུཏྟ’’ནྟི. ‘‘ཡོ པན ཡཏྠ ཝིསེསོ’’ཏི ཝུཏྟོ ཝིསེསསདྡོ ནཱནུཝཏྟཏཱིཏི ཨདྷིཔྤཱཡེནཱཧ ‘‘ཝཙནསེསོ’’ཏི. ན ཧི ཨདྷིཀཱརཏོ ལབྦྷམཱནསྶ ཨཛ྄ཛྷཱཧརཎཀིཙྩཾ ཨཏྠི. དིཊྛིསཉྙཱཏི ཝཱ པདུདྡྷཱརོཡཾ ཝེདིཏབྦོ. ཝིསེསཏཱ པནསྶཱ ‘‘ཝིསེསཾ ཝཎྞཡིསྶཱམཱ’’ཏི པཊིཉྙཱཡ ཨེཝ པཱཀཊཱ. ‘‘ཨཝསེསཱ སངྑཱརཱ’’ཏི ཨེཏྠཱཔི ཨེསེཝ ནཡོ. སཾཡོཛནཝསེན ཛཱནཱཏི ཨབྷིནིཝིསཏཱིཏི སཉྙཱ དིཊྛཱིཏི ཨཱཧ ‘‘དིཊྛི ཨེཝ སཉྙཱ’’ཏི. དིཊྛི ཙཱཏི ཙ-སདྡེན ཨཝསིཊྛཾ པཔཉྩཾ སངྒཎྷཱཏི. ཏཐཱ ཧི ‘‘པཔཉྩསཉྙཱསངྑཱ’’ཏི ཨེཏྠ པཔཉྩསཱུདནིཡཾ (མ. ནི. ཨཊྛ. ༡.༢༠༡) ཝུཏྟཾ ‘‘སཉྙཱནཱམེན ཝཱ པཔཉྩཱ ཨེཝ ཝུཏྟཱ’’ཏི.

༢༨. ‘‘ཁནྡྷཱ ཝེདནཱཀྑནྡྷོ’’ཏི ཨེཏསྨིཾ ཨནུལོམེ ཡཐཱ སརཱུཔདསྶནེན ཝིསྶཛྫནཾ ལབྦྷཏི, ན ཨེཝཾ ‘‘ན ཁནྡྷཱ ན ཝེདནཱཀྑནྡྷོ’’ཏི པཊིལོམེ, ཨིདྷ པན པཊིཝཙནེན ཝིསྶཛྫནནྟི ཏདཏྠཾ ཝིཝརནྟོ ‘‘ཁནྡྷསདྡཔྤཝཏྟིཡཱ ཙ ཨབྷཱཝེ ཝེདནཱཀྑནྡྷསདྡཔྤཝཏྟིཡཱ ཙ ཨབྷཱཝོ’’ཏི ཨཱཧ. ཏེན སཏྟཱཔཊིསེདྷེ ཨཡཾ ན-ཀཱརོཏི དསྶེཏི. སདྡགྒཧཎཉྩེཏྠ སདྡནིབནྡྷནཏྟཱ ¶ པཉྙཏྟིཡཱ སདྡསབྷཱགཏཾ ཝཱ སནྡྷཱཡ ཀཏཾ. པཎྞཏྟིསོདྷནཉྷེཏཾ. ཏེནཱཧ ‘‘པཎྞཏྟིསོདྷནམཏྟམེཝ ཀརོཏཱི’’ཏི. ཏེན ནིདྡྷཱརེཏབྦསྶ དྷམྨནྟརསྶ ཨབྷཱཝཾ དསྶེཏི. ཡཏོ ཝུཏྟཾ ‘‘ན ཨཉྙདྷམྨསབྦྷཱཝོ ཨེཝེཏྠ པམཱཎ’’ནྟི. ཨེཝཉྩ ཀཏྭཱཏིཨཱདིནཱ ཡཐཱཝུཏྟམཏྠཾ པཱཋནྟརེན སམཏྠེཏི. ཀཱམཾ ཀཏྠཙི སཏིཔི ཁནྡྷེ ནཏྠི ཝེདནཱཀྑནྡྷོ, ཨཁནྡྷཏྟསབྷཱཝཱ པན ནཏྠི ཝེདནཱཏི ‘‘ན ཁནྡྷཱ ན ཝེདནཱཀྑནྡྷོཏི? ཨཱམནྟཱ’’ཏི ཝུཏྟནྟི ཨེཝཾ ཝཱ ཨེཏཾ དཊྛབྦཾ. ཏེནཱཧ ཨཊྛཀཐཱཡཾ ‘‘པཉྙཏྟིནིབྦཱནསངྑཱཏཱ’’ཏིཨཱདི.

༣༩. ‘‘རཱུཔཏོ ཨཉྙེ’’ཏི ཨེཏྠ བྷཱུཏུཔཱདཱཡ དྷམྨོ ཝིཡ པིཡསབྷཱཝོཔི རཱུཔསདྡཱབྷིདྷེཡྻཏཱསཱམཉྙེན གཧིཏོཏི ཨཱཧ ‘‘ལོཀུཏྟརཱ ཝེདནཱདཡོ ¶ དཊྛབྦཱ’’ཏི. ཨཔྤཝཏྟིམཏྟམེཝཱཏི ཁནྡྷསདྡཔྤཝཏྟིཡཱ ཨབྷཱཝེ རཱུཔསདྡཔྤཝཏྟིཡཱ ཙ ཨབྷཱཝོཏི པཎྞཏྟིསོདྷནམཏྟཏཾཡེཝ སནྡྷཱཡ ཝདཏི, ཏཐཱ ཙཱཧ ‘‘ཨེཝཉྩ ཀཏྭཱ’’ཏིཨཱདི. ཏེནེཏཾ དསྶེཏི – ཡཐཱ ཙཀྑུཏོ ཨཉྙསྶ སབྦསྶཔི སབྷཱཝདྷམྨསྶ ཨཱཡཏནགྒཧཎེན གཧིཏཏྟཱ ཏདུབྷཡཝིནིམུཏྟཾ ཀིཉྩི ནཏྠཱིཏི ཀེཝལཾ པཉྙཏྟིསོདྷནཏྠཾ ཏམེཝ ཨབྷཱཝཾ དསྶེཏུཾ ‘‘ཙཀྑུཉྩ ཨཱཡཏནེ ཙ ཋཔེཏྭཱ ཨཝསེསཱ ན ཙེཝ ཙཀྑུ ན ཙ ཨཱཡཏན’’ནྟི ཝུཏྟཾ, ཨེཝམིདྷཱཔི ཏདཏྠམེཝ ཨུབྷཡཝིནིམུཏྟསྶ ཨབྷཱཝཾ དསྶེཏུཾ ‘‘རཱུཔཉྩ ཁནྡྷེ ཙ ཋཔེཏྭཱ ཨཝསེསཱ ན ཙེཝ རཱུཔཾ ན ཙ ཁནྡྷཱ’’ཏི ཝུཏྟནྟི. ཝིསམོཔཉྙཱསོ. ‘‘ཙཀྑུཉྩ ཨཱཡཏནེ ཙ ཋཔེཏྭཱ’’ཏི ཨེཏྠ ཧི ཨཝསེསགྒཧཎེན གཡ྄ཧམཱནཾ ཀིཉྩི ནཏྠཱིཏི སཀྐཱ ཝཏྟུཾ ཨཱཡཏནཝིནིམུཏྟསྶ སབྷཱཝདྷམྨསྶ ཨབྷཱཝཱ. ཏེནཱཧ ‘‘ཡདི སིཡཱ’’ཏི. ‘‘རཱུཔཉྩ ཁནྡྷེ ཙ ཋཔེཏྭཱ’’ཏི ཨེཏྠ པན ན ཏཐཱ སཀྐཱ ཝཏྟུཾ ཁནྡྷཝིནིམུཏྟསྶ སབྷཱཝདྷམྨསྶ ཨཏྠིབྷཱཝཏོ. ཡདི པན ཏཱདིསཾ ཁནྡྷགཏཾ དྷམྨཛཱཏཾ ནཏྠཱིཏི ཨེཝམིདཾ ཝུཏྟཾ སིཡཱ, ཨེཝཾ སཏི ཡུཏྟམེཏཾ སིཡཱ. ཏཐཱ ཧི ‘‘ཨཊྛཀཐཱཡཾ པནཱ’’ཏིཨཱདིནཱ པཉྙཏྟིགྒཧཎམེཝ ཨུདྡྷརཱིཡཏི. ཏཎྷཱཝཏྠུ ཙ ན སིཡཱ ཨཝསེསགྒཧཎེན གཡ྄ཧམཱནནྟི ཨཱནེཏྭཱ སམྦནྡྷོ. ཁནྡྷོ ཙ སིཡཱཏི ཡོཛནཱ.

ནིདྡེསཝཱརཝཎྞནཱ ནིཊྛིཏཱ.

༢. པཝཏྟིཝཱརཝཎྞནཱ

༥༠-༢༠༥. མིསྶཀཀཱལབྷེདེསུ ¶ ཡམཀེསུ པདཱནཾ བྷིནྣཀཱལཏྟཱ སིཡཱ ཨཏྠཝིསེསོཏི ཨཱཧ ‘‘ཨམིསྶཀཀཱལབྷེདེསུ ཝཱརེསུ ཨཏྠཝིསེསཱབྷཱཝཏོ’’ཏི. ཨིདཱནི ཏམེཝཏྠཾ ‘‘པུརིམསྶ ཧཱི’’ཏིཨཱདིནཱ ཝིཝརཏི. ཏེནཱཏི ཨཏྠཝིསེསཱབྷཱཝེན. ཨེཏྠཱཏི ཨེཏསྨིཾ པཝཏྟིཝཱརཔཱཋེ, ཨེཏིསྶཾ ཝཱ པཝཏྟིཝཱརཝཎྞནཱཡཾ. ཚ ཨེཝ ཝུཏྟཱ, ན ནཝཱཏི ཨདྷིཔྤཱཡོ. ཏེནཱཧ ‘‘ཨཏཱིཏེནཱ’’ཏིཨཱདི. ཨེཏེ པན ཏཡོཏི ཨཏྟནཱ ཝིསུཾ ཨནནྟརཾ དསྶིཏེ སནྡྷཱཡཱཧ. ཡཐཱདསྶིཏཱཏི ཨཊྛཀཐཱཡཾ ནིདྡྷཱརེཏྭཱ དསྶིཏབྦཱཀཱརཱ པཙྩུཔྤནྣེནཱཏཱིཏཱདཡོ ཡེ པཱལི༹ཡཾ ཨུཛུཀམེཝ ཨཱགཏཱ. ‘‘ན ཝིསུཾ ཝིཛྫནྟཱི’’ཏི ཝུཏྟམེཝཏྠཾ ‘‘ཏཏྠ ཏཏྠ ཧཱི’’ཏིཨཱདིནཱ པཱཀཊཏརཾ ཀརོཏི. ཏཏྠ པཊིལོམཔུཙྪཱཧཱིཏི ‘‘ཡསྶ ཝཱ པན ཝེདནཱཀྑནྡྷོ ¶ ཨུཔྤཛྫིཏྠ, ཏསྶ རཱུཔཀྑནྡྷོ ཨུཔྤཛྫཏཱི’’ཏི ཨེཝམཱདིཀཱཧི པཋམཔདེ ཝུཏྟསྶ པཊིལོམཝསེན པཝཏྟཱཧི. ཏེནེཝཱཏི ནཡཏོ ཡོཛེཏུཾ སཀྐུཎེཡྻཏྟཱ ཨེཝ. མིསྶཀཀཱལབྷེདེསུ ཙཱཏི ན ཀེཝལཾ ཨམིསྶཀཀཱལབྷེདེསུཡེཝ, ཨཐ ཁོ མིསྶཀཀཱལབྷེདེསུ ཙཱཏི ཨཏྠོ. ན ཡོཛནཱསུཀརཏཱཡ ཨེཝ པུརིམེ ཨཡོཛནཱ, ཨཐ ཁོ སུཁགྒཧཎཏྠམྤཱིཏི དསྶེནྟོ ཨཱཧ ‘‘ཨམིསྶཀ…པེ… ཝུཏྟཱནཱི’’ཏི.

ཡེན ཀཱརཎེནཱཏི ཡེན ཨེཀཔདདྭཡསངྒཧིཏཱནཾ ཁནྡྷཱནཾ ཨུཔྤཱདསྶ ནིརོདྷསྶ ལཱབྷསངྑཱཏེན ཀཱརཎེན. ཡཐཱཀྐམཾ པུརེཔཉྷོ པཙྪཱཔཉྷོཏི ཙ ནཱམཾ ཝུཏྟཾ. ཙ-སདྡེན པུརེཔཙྪཱཔཉྷོཏི ཙ ནཱམཾ ཝུཏྟནྟི ནིདྡྷཱརེཏྭཱ ཡོཛེཏབྦཾ. ཏཏྠ པན ‘‘ཨེཀཔདདྭཡསངྒཧིཏཱན’’ནྟི ཨིདཾ ཨེཀཛ྄ཛྷཾ ཀཏྭཱ གཧེཏབྦཾ. ཏམེཝཏྠམྤི ཝིཝརཏི ‘‘ཡསྶ ཧཱི’’ཏིཨཱདིནཱ. ཏཏྠ ཡསྶཱཏི ཡསྶ པཉྷསྶ. ‘‘པཉྷོ’’ཏི ཙེཏྠ པུཙྪནཝསེན པཝཏྟཾ ཝཙནཾ ཝེདིཏབྦཾ. ཏེནེཝཱཧ ‘‘པརིཔཱུརེཏྭཱ ཝིསྶཛྫེཏབྦཏྠསངྒཎྷནཏོ’’ཏི. ཏཾ སརཱུཔདསྶནེན ཝིསྶཛྫནཾ ཏཾཝིསྶཛྫནཾ, ཏཾ ཝཱ ཡཐཱཝུཏྟཾ ཝིསྶཛྫནཾ ཨེཏསྶཱཏི ཏཾཝིསྶཛྫནོ, ཏསྶ ཏཾཝིསྶཛྫནསྶ. པུརིམཀོཊྛཱསེནཱཏི པུརིམེན ཨུདྡེསཔདེན. ཏེན ཧི ཝིསྶཛྫནཔདསྶ སམཱནཏྠཏཱ ཨིདྷ སདིསཏྠཏཱ. ཨེཀེན པདེནཱཏི ཨེཀེན པདྷཱནཱཔྤདྷཱནེན ཡམཀཔདེན, ན པཋམཔདེནེཝཱཏི ཨཏྠོ. ཨུཔྤཱདནིརོདྷལཱབྷསཱམཉྙམཏྟེནཱཏི ཨུཔྤཱདསྶ ཝཱ ནིརོདྷསྶ ཝཱ ལབྦྷམཱནཏཱཡ སམཱནཏཱམཏྟེན. སནྣིཊྛཱནཔད…པེ… ཡུཏྟནྟི ཨིདཾ ཨཊྛཀཐཱཡཾ ‘‘ཡཏྠ རཱུཔཀྑནྡྷོ ནུཔྤཛྫཏཱི’’ཏིཨཱདིནཱ པུརེཔཉྷསྶ དསྶིཏཏྟཱ ཝུཏྟཾ. ཡདིཔི ཏཏྠ ‘‘ཨུཔྤཛྫཏཱི’’ཏི ཝིསྶཛྫིཏཏྟཱ ཝེདནཱཀྑནྡྷསྶ ཨུཔྤཱདོ ལབྦྷཏཱིཏི ཝུཏྟཾ, ཡོ པན སནྣིཊྛཱནཔདསངྒཧིཏོ ¶ རཱུཔཀྑནྡྷསྶ ཨནུཔྤཱདོ པཱལི༹ཡཾ ཨནུཉྙཱཏརཱུཔེན ཋིཏོ, ཏསྶ ཝསེན པུརེཔཉྷོ ཡུཏྟོཏི ཨདྷིཔྤཱཡོ. ཨེཝཉྷི པུརིམཀོཊྛཱསེན སདིསཏྠཏཱ ཧོཏི.

‘‘ཡསྶ རཱུཔཀྑནྡྷོ ནུཔྤཛྫིཏྠ, ཏསྶ ཝེདནཱཀྑནྡྷོ ནུཔྤཛྫིཏྠཱ’’ཏི ཨེཏྠ རཱུཔཀྑནྡྷསྶ ཨནུཔྤནྣཔུབྦཏཱཔཊིཀྑེཔམུཁེན ཨིཏརསྶ པཊིཀྑིཔཱིཡཏཱིཏི རཱུཔཀྑནྡྷསྶེཝ ཡཐཱཝུཏྟཔཊིཀྑེཔོ པདྷཱནབྷཱཝེན ཝུཏྟོ. ཨེསེཝ ནཡོ ཨཉྙེསུཔི ཨེདིསེསུ ཋཱནེསཱུཏི ཨཱཧ ‘‘སནྣིཊྛཱནཏྠསྶེཝ པཊིཀྑིཔནཾ པཊིཀྑེཔོ’’ཏི ¶ . ‘‘ཡསྶ རཱུཔཀྑནྡྷོ ཨུཔྤཛྫཏི, ཏསྶ ཝེདནཱཀྑནྡྷོ ནིརུཛ྄ཛྷཏཱི’’ཏི ཨེཏྠ པན རཱུཔཀྑནྡྷསྶ ཨུཔྤཱདལཀྑཎཾ ཀཏྭཱ ཝེདནཱཀྑནྡྷསྶ ནིརོདྷོ པུཙྪཱིཡཏཱིཏི སོ ཨེཝ ‘‘ནོ’’ཏི པཊིསེདྷཱིཡཏི. ཨེས ནཡོ ཨཉྙེསུཔི ཨེདིསེསུ ཋཱནེསཱུཏི ཝུཏྟཾ ‘‘སཾསཡཏྠནིཝཱརཎཾ པཊིསེདྷོ’’ཏི. ‘‘ན-ཀཱརཝིརཧིཏ’’ནྟི ཨེཏེན པཊིསེདྷསྶ པཊིསེདྷིཏམཱཧ. ཡདི ཨེཝཾ པཱལི༹གཏིཔཊིསེདྷཝིསྶཛྫནཱནཾ ཀོ ཝིསེསོཏི ཨཱཧ ‘‘ཏཏྠ ཨུཔྤཏྟཱི’’ཏིཨཱདི.

ཏདེཀདེསཔཀྑེཔཝསེནཱཏི ཏེསཾ ཙཏུནྣཾ པཉྷཱནཾ པཉྩནྣཉྩ ཝིསྶཛྫནཱནཾ ཨེཀདེསསྶ པཀྑིཔནཝསེན. ཏེནཱཧ ཨཊྛཀཐཱཡཾ ‘‘པཋམེ ཋཱནེ པརིཔུཎྞཔཉྷསྶ པུརིམཀོཊྛཱསེ སརཱུཔདསྶནེནཱ’’ཏིཨཱདི. ཡོ པནེཏྠ པཉྷེསུ ཝིསྶཛྫནེསུ ཙ སཏྟཝཱིསཏིཡཱ ཋཱནེསུ པཀྑེཔཾ ལབྷཏི, ཏཾ དསྶེཏུཾ ‘‘པརིཔུཎྞཔཉྷོ ཨེཝཱ’’ཏིཨཱདི ཝུཏྟཾ. པཱལི༹ཝཝཏྠཱནདསྶནཱདིཏོཏི ཨེཏྠ ཨཱདི-སདྡེན པུཙྪཱཝིབྷངྒོ ཝིསྶཛྫནཱཋཱནཱནི ཨེཀསྨིཾ པཉྷེ ཡོཛནཱནཡོཏི ཨིམེསཾ སངྒཧོ དཊྛབྦོ.

སུདྡྷཱཝཱསཱནནྟིཨཱདི པཱལི༹ཡཱ པདཾ ཨུདྡྷརིཏྭཱ ཨཏྠདསྶནཏྠཾ ཨཱརདྡྷཾ. ‘‘ཡསྶ ཡཏྠ རཱུཔཀྑནྡྷོ ནུཔྤཛྫིཏྠ, ཏསྶ ཏཏྠ ཝེདནཱཀྑནྡྷོ ནུཔྤཛྫིཏྠཱ’’ཏི ཨིམསྶ ཝིསྶཛྫནཾ ཧོཏི ‘‘སུདྡྷཱཝཱསཱནཾ ཏེསཾ ཏཏྠཱ’’ཏི. ཏཏྠ ཨེཀབྷཱུམིཡཾ དུཏིཡཱ ཨུཔཔཏྟི ནཏྠཱིཏི ཨེཀིསྶཱ བྷཱུམིཡཱ ཨེཀསྶ ཨརིཡཔུགྒལསྶ དུཏིཡཝཱརཾ པཊིསནྡྷིགྒཧཎཾ ནཏྠཱིཏི ཨཏྠོ. ཏཏིཡཝཱརཱདཱིསུ ཝཏྟབྦམེཝ ནཏྠི. སྭཱཡམཏྠོ ཡཐཱ ཉཱཔིཏོ ཧོཏི, ཏཾ དསྶེཏུཾ ‘‘པཊིསནྡྷིཏོ པབྷུཏི ཧི…པེ… པཝཏྟཱ’’ཏི ཝུཏྟཾ. ཏེན ཨདྡྷཱཔཙྩུཔྤནྣཝསེནཱཡཾ དེསནཱ པཝཏྟཱཏི དསྶེཏི. ཨཱདཱནནིཀྑེཔཔརིཙྪིནྣཾ ཀམྨཛསནྟཱནཾ ཨེཀཏྟེན གཧེཏྭཱ ཏསྶ ཝསེན ཨུཔྤཱདནིརོདྷེསུ ཝུཙྩམཱནེསུ ཨཀམྨཛེསུ ཀུསལཱདཱིསུ ཀཐནྟི ཙོདནཱཡཾ ཏེཔི ཨིདྷ ཏཾནིསྶིཏཱ ཨེཝ ཀཏཱཏི དསྶེནྟོ ¶ ཨཱཧ ‘‘ཏསྨིཉྷི…པེ… དསྶིཏཱ’’ཏི. ཏེནེཝཱཏི ཀམྨཛསནྟཱནེནེཝ. ཏསྨཱཏི ཨེཀཀམྨནིབྦཏྟསྶ ཝིཔཱཀསནྟཱནསྶ ཨེཀཏྟེན གཧིཏཏྟཱ. ཏསྶཱཏི ཀམྨཛསནྟཱནསྶ. པཉྩསུ སུདྡྷཱཝཱསེསུ ཡཐཱ པཙྩེཀཾ ‘‘ཨེཀིསྶཱ བྷཱུམིཡཱ དུཏིཡཱ ཨུཔཔཏྟི ནཏྠཱི’’ཏི ཡཐཱཝུཏྟཔཱལི༹ཡཱ ཝིཉྙཱཡཏི, ཨེཝཾ ‘‘སུདྡྷཱཝཱསཱན’’ནྟི ཨཝིསེསཝཙནཏོ སཀལེཔི སུདྡྷཱཝཱསེ སཱ ནཏྠཱིཏི ཏཱཡ ཀསྨཱ ན ཝིཉྙཱཡཏཱིཏི ཙོདནཾ སམུཊྛཱཔེཏྭཱ སཡམེཝ པརིཧརིཏུཾ ‘‘ཀསྨཱ པནཱ’’ཏིཨཱདིམཱཧ. ཏཏྠ སུདྡྷཱཝཱསེསུ ཧེཊྛཱབྷཱུམིཀསྶ ཨསཏི ཨིནྡྲིཡཔརིཔཱཀེ ཨུཔརིབྷཱུམིསམུཔྤཏྟི ན སཀྐཱ ¶ པཊིསེདྷེཏུཾ ཨུདྡྷཾསོཏཝཙནཏོ. ཨུདྡྷམསྶ ཏཎྷཱསོཏཾ ཝཊྚསོཏཉྩཱཏི ཧི ཨུདྡྷཾསོཏོ. ཏེནཱཧ ‘‘ཨུདྡྷཾསོཏཔཱལི༹སབྦྷཱཝཱ’’ཏི. སཾསནྡེཏབྦཱཏི ཡཐཱ ན ཝིརུཛ྄ཛྷནྟི, ཨེཝཾ ནེཏབྦཱ. ཏཐཱ ཙེཝ སཾཝཎྞིཏཾ.

ཨེཏེན སནྣིཊྛཱནེནཱཏི ཨངྐིཏོཀཱསབྷཱཝིརཱུཔུཔྤཱདསནྣིསྶཡེན ནིཙྪཡེན. ཝིསེསིཏཱ ཏཐཱབྷཱཝིརཱུཔབྷཱཝིནོ. ཨསཉྙསཏྟཱཔཱིཏི ན ཀེཝལཾ པཉྩཝོཀཱརཱ ཨེཝ, ཨཐ ཁོ ཨསཉྙསཏྟཱཔི. ཏེ ཨེཝ ཨསཉྙསཏྟེ ཨེཝ གཧེཏྭཱ པུརིམཀོཊྛཱསེཏི ཨདྷིཔྤཱཡོ. ཏེན ཡེ སནྣིཊྛཱནེན ཝཛྫིཏཱཏི ཏེན ཡཐཱཝུཏྟསནྣིཊྛཱནེན ཡེ ཝིརཧིཏཱ, ཏེ ཏཐཱ ན ཝཏྟབྦཱཏི ཨཏྠོ. ཨིདཱནི ‘‘ཏེ ཏཏོ’’ཏིཨཱདིནཱ དསྶེཏི. ཏཏོཏི ཨསཉྙཱབྷཝཏོ. པཙྪིམབྷཝིཀཱནནྟི ཨེཏྠ པཙྪིམབྷཝཾ སརཱུཔཏོ དསྶེཏུཾ ‘‘ཀིཾ པཉྩཝོཀཱརཱདཱི’’ཏིཨཱདི ཝུཏྟཾ. ཨཔཙྪིམབྷཝིཀཱནམྤི ཨརཱུཔཱནཾ ཨརཱུཔབྷཝེ ཡཐཱ རཱུཔཀྑནྡྷོ ནུཔྤཱདི, ཨེཝཾ ཏཏྠ པཙྪིམབྷཝིཀཱནཾ ཝེདནཱཀྑནྡྷོཔཱིཏི ཨཱཧ ‘‘ཨེཏེན སནྣིཊྛཱནེན སངྒཧིཏཏྟཱ’’ཏི. ཏེནཱཧ ‘‘ཏེསཾ…པེ… ཨཱཧཱ’’ཏི. ཏཏྠ ཏེསནྟི པཙྪིམབྷཝིཀཱནཾ. ཏཏྠཱཏི ཨརཱུཔབྷཝེ. ཨིཏརཱནུཔྤཏྟིབྷཱཝཉྩཱཏི ཨིཏརསྶ ཝེདནཱཀྑནྡྷསྶ ཨནུཔྤཛྫནསབྦྷཱཝམྤི. སཔྤཊིསནྡྷིཀཱནམྤི སུདྡྷཱཝཱསཱནཾ ཁནྡྷབྷེདསྶ པརིནིབྦཱནཔརིཡཱཡོ ཨོལཱ༹རིཀདོསཔྤཧཱནཏོ ཀིལེསཱུཔསམསཱམཉྙེན ཝུཏྟོཏི ཝེདིཏབྦཾ.

སབྦེསཉྷི ཏེསནྟི ཏཾཏཾབྷཱུམིཡཾ ཋིཏཱནཾ སབྦེསཾ སུདྡྷཱཝཱསཱནཾ. ཡཐཱ པནཱཏིཨཱདིནཱ ཝུཏྟམེཝཏྠཾ པཱཀཊཏརཾ ཀརོཏི. ཨནནྟཱ ལོཀདྷཱཏུཡོཏི ཨིདཾ ཨོཀཱསསྶ པརིཙྪེདཱབྷཱཝཾཡེཝ དསྶེཏུཾ ཝུཏྟཾ. པུགྒལཝསེན སམཱནཱདྷཱརཏཱཡ སམཱནཀཱལཏྟེན ཨསམྦྷཝནྟོ ཨོཀཱསཝསེན པན སམྦྷཝནྟོ སཾཀིཎྞཱ ཝིཡ ཧོནྟཱིཏི ཨཱཧ ‘‘སཾཀིཎྞཏཱ ཧོཏཱི’’ཏི.

པཝཏྟིཝཱརཝཎྞནཱ ནིཊྛིཏཱ.

༣. པརིཉྙཱཝཱརཝཎྞནཱ

༢༠༦-༢༠༨. ཏསྶཱཔཱིཏི ¶ པུགྒལོཀཱསཝཱརསྶཔི. ཨོཀཱསེ པུགྒལསྶེཝཱཏི ཡཐཱགཧིཏེ ཨོཀཱསེ ཡོ པུགྒལོ, ཏསྶེཝ ཨོཀཱསཝིསིཊྛཔུགྒལསྶེཝཱཏི ¶ ཨཏྠོ. ཡཐཱ པན པུགྒལཝཱརེ ལབྦྷམཱནེ པུགྒལོཀཱསཝཱརོཔི ལབྦྷཏི, ཨེཝཾ ཨོཀཱསཝཱརོཔི ལབྦྷེཡྻཱཏི ཙོདནཾ སནྡྷཱཡཱཧ ‘‘ཨོཀཱསཝཱརོཔི ཙཱ’’ཏི. ཏསྨཱཏི ཡསྨཱ ཝུཙྩམཱནོཔི ཨོཀཱསོ པུགྒལསྶ ཝིསེསབྷཱཝེནེཝ ཝུཙྩེཡྻ, ན ཝིསུཾ, ཏསྨཱ.

ཨཉྙཐཱཏི པཝཏྟིཝཱརེ ཝིཡ ཨཱདཱནནིཀྑེཔཔརིཙྪིནྣཾ ཀམྨཛསནྟཱནཾ ཨེཀཏྟེན གཧེཏྭཱ ཏསྶ ཨུཔྤཱདནིརོདྷཝསེན པརིཉྙཱཝཙནེ. ‘‘ཡོ རཱུཔཀྑནྡྷཾ པརིཛཱནཱཏཱི’’ཏི སནྣིཊྛཱནཔདསངྒཧིཏཏྠཱབྷཱཝདསྶནམུཁེན ཨིཏརསྶཔི ཨབྷཱཝཾ དསྶེཏུཾ ‘‘རུཔཀྑནྡྷཔརིཛཱནནསྶ ཨབྷཱཝཱ’’ཏི ཝུཏྟཾ. ‘‘ཨཱམནྟཱ’’ཏི ཙ ཀཏཾ, ཏསྨཱ པཝཏྟེ ཙིཏྟཀྑཎཝསེནེཝེཏྠ ཏཡོ ཨདྡྷོ ལབྦྷནྟཱིཏི ཨཏྠོ. ‘‘ཨགྒམགྒསམངྒིཉྩ ཨརཧནྟཉྩཱ’’ཏི དྭིནྣཾ པདཱནཾ ‘‘རཱུཔཀྑནྡྷཉྩ ན པརིཛཱནནྟི ཝེདནཱཀྑནྡྷཉྩ ན པརིཛཱནིཏྠཱ’’ཏི དྭཱིཧི པདེཧི ཡཐཱཀྐམཾ སམྦནྡྷོ. ‘‘ཋཔེཏྭཱ ཨཝསེསཱ པུགྒལཱ’’ཏི པན པཙྩེཀཾ ཡོཛེཏབྦཾ. ཨགྒམགྒ…པེ… ནཏྠཱིཏི ཨིམིནཱ ཨརཧཏྟམགྒཉཱཎསྶེཝ པརིཉྙཱམཏྠཀཔྤཏྟིཡཱ པརིཉྙཱཀིཙྩཾ སཱཏིསཡཾ, ཏདབྷཱཝཱ ན ཨིཏརེསནྟི དསྶེཏི. ཡཏོ ཏསྶེཝ ཝཛིརཱུཔམཏཱ ཝུཏྟཱ, སེསཱནཉྩ ཝིཛྫཱུཔམཏཱ. ཏེནཱཏི ཏེན ཡཐཱཝུཏྟེན ཝཙནེན. ཏདཝསེསསབྦཔུགྒལེཏི ཏཏོ ཨགྒམགྒསམངྒིཏོ ཨཝསེསསབྦཔུགྒལེ. ཨིམཾ པན ཡཐཱཝུཏྟདོསཾ པརིཧརནྟཱ ‘‘པུཐུཛྫནཱདཡོ སནྡྷཱཡཱ’’ཏི ཝདནྟི.

པརིཉྙཱཝཱརཝཎྞནཱ ནིཊྛིཏཱ.

ཁནྡྷཡམཀཝཎྞནཱ ནིཊྛིཏཱ.

༣. ཨཱཡཏནཡམཀཾ

༡. པཎྞཏྟིཝཱརོ

ཨུདྡེསཝཱརཝཎྞནཱ

༡-༩. ཝུཏྟནཡེནཱཏི ¶ ‘‘ཨཝཡཝཔདེཧི ཝུཏྟོ ཨེཀདེསོ སཀལོ ཝཱ སམུདཱཡཔདཱནཾ ཨཏྠོ, སམུདཱཡཔདེཧི པན ཝུཏྟོ ཨེཀནྟེན ཨཝཡཝཔདཱནཾ ཨཏྠོ’’ཏིཨཱདིནཱ ཝུཏྟེན ནཡེན. ཨེཏེན ཡཐཱཝུཏྟཨཏྠཝཎྞནཱནཡདསྶནཏཱཡ སབྦཔཎྞཏྟིཝཱརཱདཱིསུ ཡཐཱརཧཾ ཨཏྠོ ནེཏབྦོཏི དསྶེཏི.

ཨུདྡེསཝཱརཝཎྞནཱ ནིཊྛིཏཱ.

ནིདྡེསཝཱརཝཎྞནཱ

༡༠-༡༧. ཝཱཡནཾ ¶ སཝིསཡཾ བྱཱཔེཏྭཱ པཝཏྟནཾ, ཏཡིདཾ ཡཐཱ གནྡྷཱཡཏནེ ལབྦྷཏི, ཨེཝཾ སཱིལཱདཱིསུཔཱིཏི པཱལི༹ཡཾ ‘‘སཱིལགནྡྷོ’’ཏིཨཱདི ཝུཏྟཾ ‘‘སཱིལཱདིཡེཝ གནྡྷོ’’ཏི ཀཏྭཱ. ཏེནཱཧ ཨཊྛཀཐཱཡཾ ‘‘སཱིལགནྡྷོ…པེ… ནཱམཱནཱི’’ཏི. ཡསྨཱ པན སཝིསཡབྱཱཔནཾ ཏཏྠ པསཊབྷཱཝོ པཱཀཊབྷཱཝོ ཝཱ ཧོཏི, ཏསྨཱ ‘‘པསཱརཎཊྛེན པཱཀཊབྷཱཝཊྛེན ཝཱ’’ཏི ཝུཏྟཾ. ཨཏྟནོ ཝཏྠུསྶ སཱུཙནཾ ཝཱ ཝཱཡནཾ. ‘‘དེཝཀཱཡཱ སམཱགཏཱ (དཱི. ནི. ༢.༣༣༢; སཾ. ནི. ༡.༣༧), པཎྞཏྟིདྷམྨཱ’’ཏིཨཱདཱིསུ (དྷ. ས. དུཀམཱཏིཀཱ ༡༠༨) སམཱུཧཔཉྙཏྟཱིསུཔི ཀཱཡདྷམྨསདྡཱ ཨཱགཏཱཏི ‘‘སསབྷཱཝ’’ནྟི ཝིསེསེཏི. ཀཱཡཝཙནེན…པེ… ནཏྠཱིཏི ཨིདཾ ‘‘ན དྷམྨོ ནཱཡཏན’’ནྟི ཨེཏྠ དྷམྨསདྡསྶ ཝིནིཝཏྟཝིསེསསབྦསབྷཱཝདྷམྨཝཱཙཀཏཾ སནྡྷཱཡ ཝུཏྟཾ, ན དྷམྨཱཡཏནསངྑཱཏདྷམྨཝིསེསཝཱཙཀཏནྟི དཊྛབྦཾ.

ནིདྡེསཝཱརཝཎྞནཱ ནིཊྛིཏཱ.

༢. པཝཏྟིཝཱརཝཎྞནཱ

༡༨-༢༡. ཨེཏསྨིནྟི ¶ པཝཏྟིཝཱརེ. པུཙྪཱམཏྟལཱབྷེནཱཏི མོགྷཔུཙྪཱབྷཱཝམཱཧ. ཨེཀེཀནྟི ‘‘ཡསྶ ཙཀྑཱཡཏནཾ ཨུཔྤཛྫཏི, ཏསྶ སདྡཱཡཏནཾ ཨུཔྤཛྫཏཱི’’ཏིཨཱདིཀཾ ཨེཀེཀཾ. པཉྩཱཏི ‘‘ཡསྶ སདྡཱཡཏནཾ ཨུཔྤཛྫཏི, ཏསྶ གནྡྷཱཡཏནཾ ཨུཔྤཛྫཏཱི’’ཏིཨཱདཱིནི པཉྩ. པུཙྪཱམཏྟལཱབྷེན སངྒཧཾ ཨནུཛཱནནྟོ ‘‘ཝིསྶཛྫནཝསེན ཧཱཔེཏབྦཱནཱི’’ཏི ཨཱཧ. ‘‘ཝཀྑཏི ཧཱི’’ཏིཨཱདིནཱ ཡཐཱཝུཏྟམཏྠཾ ཨཊྛཀཐཱཡ སམཏྠེཏི.

སདིསཝིསྶཛྫནནྟི སཱམཉྙཝཙནཾ ཝིསེསནིཝིཊྛམེཝ ཧོཏཱིཏི ཏཾ ཝིསེསཾ དསྶེནྟོ ‘‘པུགྒལཝཱརམེཝ སནྡྷཱཡ ཝུཏྟ’’ནྟི ཝཏྭཱ ཏསྶཱ པན སདིསཝིསྶཛྫནཏཱཡ ཨབྱཱཔིཏཏྟཱ ཡཏྠ སདིསཾ, ཏཏྠཱཔི ཝིསྶཛྫིཏནྟི དསྶེནྟོ ‘‘ཨོཀཱསཝཱརེ པན…པེ… ཝིསྶཛྫིཏ’’ནྟི ཨཱཧ. ཏཏྠ ཏནྟི དུཏིཡཾ. པུགྒལཝཱརེཔཱིཏི ཡཏྠ སདིསཾ ཝིསྶཛྫནཾ, ཏཏྠ པུགྒལཝཱརེཔི ཝིསྶཛྫིཏཾ, པགེཝ ཨོཀཱསཝཱརེཏི ཨདྷིཔྤཱཡོ. ཝིརཏྟཀཱམཀམྨནིབྦཏྟསྶཱཏི བྷཱཝནཱབལེན ཝིརཏྟོ ཀཱམོ ཨེཏེནཱཏི ཝིརཏྟཀཱམཾ, རཱུཔཱཝཙརཀམྨཾ, ཏཏོ ནིབྦཏྟསྶ. པཊིསནྡྷི ཨེཝ བཱིཛཾ ¶ པཊིསནྡྷིབཱིཛཾ, ཏསྶ. ‘‘ཨེཝཾསབྷཱཝཏྟཱ’’ཏི ཨེཏེན ཨེཀནྟཏོ ཀཱམཏཎྷཱནིདཱནཀམྨཧེཏུཀཱནི གྷཱནཱདཱིནཱིཏི དསྶེཏི. གནྡྷཱདཡོ ཙ ན སནྟཱིཏི སབྦེན སབྦཾ ཏེསམྤི ཨབྷཱཝཾ སནྡྷཱཡ ཝདཏི. ཏཏྠ ཡཾ ཝཏྟབྦཾ, ཏཾ ཧེཊྛཱ ཝུཏྟམེཝ.

‘‘སཙྩ’’ནྟི ཡཐཱཝུཏྟཝསེན གཧེཏབྦཾ ཙོདཀེན ཝུཏྟམཏྠཾ སམྤཊིཙྪིཏྭཱ པུན ཡེནཱདྷིཔྤཱཡེན ཏཱནི ཡམཀཱནི སདིསཝིསྶཛྫནཱནི, ཏཾ དསྶེཏུཾ ‘‘ཡཐཱ པནཱ’’ཏིཨཱདི ཝུཏྟཾ. ཏཏྲཱཡཾ སངྑེཔཏྠོ – ཏཏྠ ཙཀྑཱཡཏནམཱུལཀེསུ གྷཱནཱཡཏནཡམཀེན ‘‘སཙཀྑུཀཱནཾ ཨགྷཱནཀཱནཾ ཨུཔཔཛྫནྟཱན’’ནྟིཨཱདིནཱ ནཡེན ཛིཝ྄ཧཱཀཱཡཱཡཏནཡམཀཱནི ཡཐཱ སདིསཝིསྶཛྫནཱནི, ཏཐཱ ཨིདྷ གྷཱནཱཡཏནམཱུལཀེསུ གྷཱནཱཡཏནཡམཀེན ཏཱནི ཛིཝ྄ཧཱཀཱཡཱཡཏནཡམཀཱནི ‘‘ཡསྶ གྷཱནཱཡཏནཾ ཨུཔྤཛྫཏི, ཏསྶ ཛིཝ྄ཧཱཡཏནཾ ཨུཔྤཛྫཏཱིཏི? ཨཱམནྟཱ’’ཏིཨཱདིནཱ ནཡེན སདིསཝིསྶཛྫནཱནཱིཏི. ཨེཝམེཏྠ ཨུབྷཡེསཾ ཝིསུཾ ཨཉྙམཉྙཾ སདིསཝིསྶཛྫནཏཱཡ ཨིདཾ ཝུཏྟཾ, ན ཨེཀཛ྄ཛྷཾ ཨཉྙམཉྙཾ སདིསཝིསྶཛྫནཏཱཡ. ཏེནཱཧ ‘‘ཏསྨཱ ཏཏྠ ཏཏྠེཝ སདིསཝིསྶཛྫནཏཱ པཱལི༹ཨནཱརུལ༹ྷཏཱཡ ཀཱརཎ’’ནྟི. ཨེཝཉྩ སཏི ཙཀྑཱཡཏནམཱུལགྒཧཎཾ ཀིམཏྠིཡནྟི ཨཱཧ ‘‘ནིདསྶནབྷཱཝེནཱ’’ཏིཨཱདི. ཏཏྠ ནིདསྶནབྷཱཝེནཱཏི ནིདསྶནབྷཱུཏཱནཾ ཨཉྙམཉྙསདིསཝིསྶཛྫནཏཱསངྑཱཏེན ¶ ནིདསྶནབྷཱཝེནེཝ, ན པན ཏེསཾ ནིདསྶིཏབྦེཧི སབྦཐཱ སདིསཝིསྶཛྫནཏཱཡཱཏི ཨདྷིཔྤཱཡོ. ‘‘ཡེབྷུཡྻཏཱཡཱ’’ཏི ཝུཏྟཾ ཡེབྷུཡྻཏཾ དསྶེཏུཾ ‘‘ཏེསུ ཧཱི’’ཏིཨཱདི ཝུཏྟཾ.

ཨེཝནྟི ཨིམིནཱ ‘‘ཨཱམནྟཱ’’ཏི པཊིཝཙནཝིསྶཛྫནེན ཡཐཱཝུཏྟཝཙནསྶེཝ ཝིསྶཛྫནབྷཱཝཱནུཛཱནནཾ ཀཏྟབྦནྟི ཨིམམཏྠཾ ཨཱཀཌྜྷཏི. སཱཏི དུཏིཡཔུཙྪཱ. གྷཱནཱཡཏནཡམཀེནཱཏི ཙཀྑཱཡཏནམཱུལཀེསུ གྷཱནཱཡཏནཡམཀེནེཝ. ཏཾསེསཱནཱིཏི ཏེན གྷཱནཱཡཏནམཱུལཀཀཱཡཱཡཏནཡམཀེན སདྡྷིཾ སེསཱནི. སདིསཝིསྶཛྫནཏྟཱ ཨནཱརུལ༹ྷཱནཱིཏི ཨེཏྠ ‘‘ཨནཱརུལ༹ྷཱནཱི’’ཏི ཨེཏྟཀམེཝ ཏཐཱ-སདྡེན ཨནུཀཌྜྷཱིཡཏི, ན ‘‘སདིསཝིསྶཛྫནཏྟཱ’’ཏི དསྶེནྟོ ‘‘ཏཐཱཏི…པེ… སམཉྙེནཱ’’ཏི ཝཏྭཱ ཨིདཱནི ‘‘ཀཱརཎསཱམཉྙེནཱ’’ཏི ཝུཏྟསྶ སདིསཝིསྶཛྫནཏྟསྶ ཏཏྠ ཨབྷཱཝཾ དསྶེཏུཾ ‘‘གྷཱནཛིཝ྄ཧཱཀཱཡཱཡཏནཱནཾ པནཱ’’ཏིཨཱདི ཝུཏྟཾ. ཏཏྠ ¶ ཨགབྦྷསེཡྻཀེསུ པཝཏྟམཱནཱནནྟི ཨེཏྠཱཔི ‘‘སཧཙཱརིཏཱཡཱ’’ཏི པདཾ ཨཱནེཏྭཱ སམྦནྡྷིཏབྦཾ, ཏཐཱ ‘‘གབྦྷསེཡྻཀེསུ ཙ པཝཏྟམཱནཱན’’ནྟི. ཨིཏརཱནི གྷཱནཱཡཏནམཱུལཀཱནི ཛིཝ྄ཧཱཀཱཡཱཡཏནཡམཀཱནི དྭེ ན ཝིསྶཛྫཱིཡནྟི, གྷཱནཱཡཏནམཱུལཀེསུ ཙ ཡམཀེསུ ཝིསྶཛྫིཏེསུ ཨིཏརདྭཡམཱུལཀཱནི ཛིཝ྄ཧཱཀཱཡཱཡཏནམཱུལཀཱནི ན ཝིསྶཛྫཱིཡནྟི ཨཝིསེསཏྟཱ ཨཔྤཝིསེསཏྟཱ ཙཱཏི ཡོཛེཏབྦཾ. ཏཏྠ ཀཱཡཱཡཏནཡམཀེ དུཏིཡཔུཙྪཱཝསེན ཨཔྤཝིསེསོ, ཨིཏརཝསེན ཨཝིསེསོ ཝེདིཏབྦོ. རཱུཔཱཡཏནམནཱཡཏནེཧི སདྡྷིནྟི ཨིདཾ རཱུཔཱཡཏནམཱུལཀམནཱཡཏནཝསེན ཝུཏྟནྟི ཨཱཧ ‘‘རཱུཔཱཡཏན…པེ… ཨདྷིཔྤཱཡོ’’ཏི. ཏེནེཝཱཧ ‘‘རཱུཔཱཡཏནམཱུལཀེསུ ཧཱི’’ཏིཨཱདི. ཡམཀཱནནྟི རཱུཔཱཡཏནམཱུལཀགནྡྷརསཕོཊྛབྦཱཡཏནཡམཀཱནཾ. དུཏིཡཔུཙྪཱནནྟི ཡཐཱཝུཏྟཡམཀཱནཾཡེཝ དུཏིཡཔུཙྪཱནཾ. ཝུཏྟནཡེནཱཏི ‘‘སརཱུཔཀཱནཾ ཨཙིཏྟཀཱན’’ནྟིཨཱདིནཱ ཝུཏྟེན ནཡེན. ཨཱདིཔུཙྪཱནནྟི ཏེསཾཡེཝ ཡམཀཱནཾ པཋམཔུཙྪཱནཾ.

ཧེཊྛིམེཧཱིཏི ཨིདཾ ཨཝིསེསཝཙནམྤི ཡེསུ སདིསཝིསྶཛྫནཏཱ སམྦྷཝཏི, ཏདཔེཀྑནྟི ཨཱཧ ‘‘གནྡྷརས…པེ… ཨཏྠོ’’ཏི. ཨུདྡིཊྛདྷམྨེསུ ཨུདྡེསཱནུརཱུཔཾ ལབྦྷམཱནཝིསེསཀཐནཾ ཝིསྶཛྫནཾ, ཡོ ཏཏྠ ན སབྦེན སབྦཾ ཨུདྡེསཱནུརཱུཔགུཎེན ཨུཔལབྦྷཏི, ཏསྶ ཨཀཐནམྤི ཨཏྠཏོ ཝིསྶཛྫནམེཝ ནཱམ ཧོཏཱིཏི ཨཱཧ ‘‘ཨཝིསྶཛྫནེནེཝ ཨལབྦྷམཱནཏཱདསྶནེན ཝིསྶཛྫིཏཱནི ནཱམ ཧོནྟཱི’’ཏི.

ཙཀྑུཝིཀལསོཏཝིཀལཱ ¶ ཝིཡ ཙཀྑུསོཏཝིཀལོཔི ལབྦྷཏཱིཏི སོ པན ཨཊྛཀཐཱཡཾ པི-སདྡེན སངྒཧིཏོཏི དསྶེནྟོ ‘‘ཛཙྩནྡྷམྤི…པེ… ཝེདིཏབྦོ’’ཏི ཨཱཧ. པརིཔུཎྞཱཡཏནམེཝ ཨོཔཔཱཏིཀཾ སནྡྷཱཡ ཝུཏྟནྟི ཨེཏྠ ཨཊྛཱནཔྤཡུཏྟོ ཨེཝ-སདྡོཏི ཏསྶ ཋཱནཾ དསྶེནྟོ ‘‘ཝུཏྟམེཝཱཏི ཨཏྠོ’’ཏི ཝཏྭཱ ཏེན པརིཔུཎྞཱཡཏནསྶ ཏཏྠ ཨནིཡཏཏྟཱ ཨཔརིཔུཎྞཱཡཏནསྶཔི སངྒཧོ སིདྡྷོཏི དསྶེནྟོ ‘‘ཏེན ཛཙྩནྡྷབདྷིརམྤི སནྡྷཱཡ ཝུཏྟཏཱ ན ནིཝཱརིཏཱ ཧོཏཱི’’ཏི ཨཱཧ.

༢༢-༢༥༤. ཏསྨིཾ པུགྒལསྶ ཨནཱམཊྛཏྟཱཏི ཀསྨཱ ཝུཏྟཾ, ཡཱཝཏཱ ‘‘རཱུཔཱིབྲཧྨལོཀཾ པུཙྪཏཱི’’ཏི ཨིམིནཱཔི ཨོཀཱསོཡེཝ ཨཱམཊྛོཏི. ‘‘ཨཱམནྟཱ’’ཏི པཊིཉྙཱཡ ཀཱརཎཝིབྷཱཝནཱདྷིཔྤཱཡེནེཝ ‘‘ཀསྨཱ པཊིཉྙཱཏ’’ནྟི ཙོདནཾ སམུཊྛཱཔེཏྭཱ ཏཾ ཀཱརཎཾ དསྶེཏུཀཱམོ ‘‘ནནཱུ’’ཏིཨཱདིམཱཧ ¶ . གབྦྷསེཡྻཀབྷཱཝཾ གནྟྭཱ པརིནིབྦཱཡིསྶཏཱིཏི པཙྪིམབྷཝིཀཾ སནྡྷཱཡཱཧ. ཏདཝཏྠསྶཱཏི པཙྪིམབྷཝཱཝཏྠསྶ. བྷཝིསྶནྟསྶཱཏི བྷཱཝིནོ. པཊིཉྙཱཏབྦཏྟཱཏི ‘‘ཨུཔྤཛྫིསྶཏཱི’’ཏི པཊིཉྙཱཏབྦཏྟཱ.

ཨཐ ཀསྨཱཏི ཨེཏྠཱཡཾ སངྑེཔཏྠོ – ཡདི ‘‘ཡསྶ རཱུཔཱཡཏནཾ ཨུཔྤཛྫིསྶཏི, ཏསྶ ཙཀྑཱཡཏནཾ ཨུཔྤཛྫིསྶཏཱི’’ཏི པུཙྪཱཡཾ ཝུཏྟེན ཝིདྷིནཱ པཊིཉྙཱཏབྦཾ, ཨཐ ཀསྨཱ ཨཐ ཀེན ཀཱརཎེན པཊིལོམེ ‘‘ཡསྶ ཝཱ པན རཱུཔཱཡཏནཾ ནུཔྤཛྫིསྶཏི, ཏསྶ ཙཀྑཱཡཏནཾ ནུཔྤཛྫིསྶཏཱི’’ཏི པུཙྪཱཡ ‘‘ཨཱམནྟཱ’’ཏི པཊིཉྙཱཏཾ, ནནུ ཨིདཾ ཨཉྙམཉྙཾ ཝིརུདྡྷནྟི? ནནཱུཏིཨཱདིནཱཔི ཙོདཀོ ཏམེཝ ཝིརོདྷཾ ཝིབྷཱཝེཏི. ནོ ཙ ནུཔྤཛྫིསྶཏི ཨུཔྤཛྫིསྶཏི ཨེཝཱཏི ཨཏྠོ. ‘‘ཏསྨིཾ བྷཝེ’’ཏིཨཱདི ཏསྶ པརིཧཱརོ. ཏཏྠ ཏསྨིཾ བྷཝེཏི ཡསྨིཾ བྷཝེ ‘‘རཱུཔཱཡཏནཾ ནུཔྤཛྫིསྶཏཱི’’ཏི ཝུཏྟཾ པཝཏྟམཱནཏྟཱ, ཏསྨིཾ བྷཝེ. ཨནཱགཏབྷཱཝེན ཨཝཙནཏོཏི བྷཱཝཱིབྷཱཝེན ཨཝཏྟབྦཏོ ཨཱརདྡྷུཔྤཱདབྷཱཝེན པཝཏྟམཱནཏྟཱཏི ཨདྷིཔྤཱཡོ. ཏེནེཝཱཧ ‘‘བྷཝནྟརེ ཧཱི’’ཏིཨཱདི. ན པན ཝུཙྩཏཱིཏི སམྦནྡྷོ. ཨེཝཉྩ ཀཏྭཱཏིཨཱདིནཱ པཱཋནྟརེན ཡཐཱཝུཏྟམཏྠཾ སམཏྠེཏི.

ཡསྨིཾ ཨཏྟབྷཱཝེ ཡེཧི ཨཱཡཏནེཧི བྷཝིཏབྦཾ, ཏཾཏཾཨཱཡཏནནིབྦཏྟཀཀམྨེན ཨཝསྶཾབྷཱཝཱིཨཱཡཏནསྶ སཏྟསྶ, སནྟཱནསྶ ཝཱ, ‘‘ཡསྶ ཝཱ པན རཱུཔཱཡཏནཾ ཨུཔྤཛྫིསྶཏི, ཏསྶ ཙཀྑཱཡཏནཾ ཨུཔྤཛྫིསྶཏཱིཏི? ཨཱམནྟཱ, ཡསྶ ཝཱ པན རཱུཔཱཡཏནཾ ནུཔྤཛྫིསྶཏི, ཏསྶ ཙཀྑཱཡཏནཾ ནུཔྤཛྫིསྶཏཱིཏི? ཨཱམནྟཱ’’ཏི ཙ ཨེཝཾ པཝཏྟཾ པུཙྪཱདྭཡཝིསྶཛྫནཾ ཨཱཡཏནཔཊིལཱབྷསྶ ¶ ཛཱཏིབྷཱཝཏོ སུཊྛུ ཨུཔཔནྣཾ བྷཝཏི. པཙྪིམབྷཝིཀཱདཡོཏི ཨེཏྠ ཨཱདི-སདྡེན ཨརཱུཔེ ཨུཔྤཛྫིཏྭཱ པརིནིབྦཱཡནཀཱ སངྒཡ྄ཧནྟི. ཨིདམྤི ཝིསྶཛྫནཾ. ཨབྷིནནྡིཏབྦཏྟཱཏི ‘‘ཨཱམནྟཱ’’ཏི སམྤཊིཙྪིཏབྦཏྟཱ.

ཡཾ པན ཨགྷཱནཀཱནཾ ཀཱམཱཝཙརཾ ཨུཔཔཛྫནྟཱནནྟི ཝུཏྟནྟི སམྦནྡྷོ. ཡསྶ ཝིཔཱཀོ གྷཱནཱཡཏནུཔྤཏྟིཏོ པུརེཏརམེཝ ཨུཔཙྪིཛྫིསྶཏི, ཏཾ གྷཱནཱཡཏནཱནིབྦཏྟཀཀམྨནྟི ཝུཏྟཾ. ཀཐཾ པནཱིདིསཾ ཀམྨཾ ཨཏྠཱིཏི ཝིཉྙཱཡཏཱིཏི ཨཱཧ ‘‘ཡསྶ ཡཏྠཱ’’ཏིཨཱདི. ཨེཝམྤི གབྦྷསེཡྻཀོ ཨེཝ ཨིདྷ ཨགྷཱནཀོཏི ཨདྷིཔྤེཏོཏི ཀཐམིདཾ ཝིཉྙཱཡཏཱིཏི ཙོདནཱཡ ‘‘ན ཧཱི’’ཏིཨཱདིཾ ཝཏྭཱ ཏམཏྠཾ སཱདྷེཏུཾ ‘‘དྷམྨཧདཡཝིབྷངྒེ’’ཏིཨཱདི ཝུཏྟཾ. ཨཝཙནཏྟམྤི ཧི ཡཐཱདྷམྨསཱསནེ ཨབྷིདྷམྨེ པཊིཀྑེཔོཡེཝཱཏི ¶ . ཨིདྷཱཏི ཨིམསྨིཾ ཨཱཡཏནཡམཀེ. ཡཐཱདསྶིཏཱསཱུཏི ‘‘ཡསྶ ཝཱ པན སོཏཱཡཏནཾ ནུཔྤཛྫིསྶཏི, ཏསྶ ཙཀྑཱཡཏནཾ ནུཔྤཛྫཏི, ཡསྶ ཡཏྠ གྷཱནཱཡཏནཾ ན ནིརུཛ྄ཛྷཏི, ཏསྶ ཏཏྠ རཱུཔཱཡཏནཾ ན ནིརུཛ྄ཛྷིསྶཏཱི’’ཏི ཙ དསྶིཏཔྤཀཱརཱསུ པུཙྪཱསུ. ཨཱམནྟཱཏི ཝུཏྟནྟི ཨཐ ཀསྨཱ ན ཝིཉྙཱཡཏཱིཏི ཡོཛནཱ. ཨེཏཱསུ པུཙྪཱསུ ཀསྨཱ པཊིཝཙནེན ཝིསྶཛྫནཾ ན ཀཏནྟི ཨདྷིཔྤཱཡོ. སནྣིཊྛཱནེན གཧིཏཏྠསྶཱཏི ‘‘ཡསྶ ཝཱ པན སོཏཱཡཏནཾ ནུཔྤཛྫིསྶཏི, ཡསྶ ཡཏྠ གྷཱནཱཡཏནཾ ན ནིརུཛ྄ཛྷིསྶཏཱི’’ཏི ཙ ཨེཝམཱདིཀེན སནྣིཊྛཱནཔདེན གཧིཏསྶ ཨཏྠསྶ. ཨེཀདེསེ སཾསཡཏྠསྶ སམྦྷཝེནཱཏི ཨེཀདེསེ སཾསཡིཏབྦསྶ ཨཏྠསྶ སམྦྷཝེན སནྣིཊྛཱནཏྠཔཊིཡོགབྷཱུཏསཾསཡཏྠསྶ པཊིཝཙནསྶ ཨཀརཎཏོ ‘‘ཨཱམནྟཱ’’ཏི པཊིཝཙནཝིསྶཛྫནསྶ ཨཀཏྟབྦཏོ ཨཏྠསྶ ཨབྷིནྡིཏྭཱ ཨེཀཛ྄ཛྷཾ ཀཏྭཱ ཨཝཏྟབྦཏོ. ཏེནཱཧ ‘‘བྷིནྡིཏབྦེཧི ན པཊིཝཙནཝིསྶཛྫནཾ ཧོཏཱི’’ཏི.

ཡདི སིཡཱཏི བྷིནྡིཏྭཱ ཝཏྟབྦེཔི ཨཏྠེ ཡདི པཊིཝཙནཝིསྶཛྫནཾ སིཡཱ, པརིཔུཎྞཝིསྶཛྫནམེཝ ན སིཡཱ ཨནོཀཱསབྷཱཝཏོ བྷིནྡིཏབྦཏོ ཙཱཏི ཨཏྠོ. ཏཐཱ ཧི ‘‘པཉྩཝོཀཱརེ པརིནིབྦནྟཱནཾ, ཨརཱུཔེ པཙྪིམབྷཝིཀཱནཾ, ཡེ ཙ ཨརཱུཔཾ ཨུཔཔཛྫིཏྭཱ པརིནིབྦཱཡིསྶནྟི, ཏེསཾ ཙཝནྟཱནཾ ཏེསཾ སོཏཱཡཏནཉྩ ནུཔྤཛྫིསྶཏི, ཙཀྑཱཡཏནཉྩ ནུཔྤཛྫཏཱི’’ཏི ཙ, ཏཐཱ ‘‘རཱུཔཱཝཙརེ པརིནིབྦནྟཱནཾ, ཨརཱུཔཱནཾ ཏེསཾ ཏཏྠ གྷཱནཱཡཏནཉྩ ན ནིརུཛ྄ཛྷཏི, རཱུཔཱཡཏནཉྩ ན ནིརུཛ྄ཛྷིསྶཏཱི’’ཏི ཙ ཏཏྠ ཝིབྷཱགཝསེན པཝཏྟོ པཱཋསེསོ. ཨཐ ཀསྨཱཏི ཡདི ཨབྷིནྡིཏབྦེ པཊིཝཙནཝིསྶཛྫནཾ, ན བྷིནྡིཏབྦེ, ཨེཝཾ སནྟེ ‘‘ཡསྶ ཝཱ པན སོམནསྶིནྡྲིཡཾ ཨུཔྤཛྫཏི, ཏསྶ ཙཀྑུནྡྲིཡཾ ཨུཔྤཛྫཏཱིཏི? ཨཱམནྟཱ’’ཏི ཨིམིནཱ པཊིཝཙནཝིསྶཛྫནེན ¶ གབྦྷསེཡྻཀཱནཾ སོམནསྶཔཊིསནྡྷི ནཏྠཱིཏི ཀསྨཱ ན ཝིཉྙཱཡཏི, བྷིནྡིཏབྦེ ན པཊིཝཙནཝིསྶཛྫནཾ ཧོཏཱིཏི སམྤཊིཙྪིཏབྦནྟི? ཏཾ ན, ཨཉྙཱཡ པཱལི༹ཡཱ ཏདཏྠསྶ ཝིཉྙཱཡམཱནཏྟཱཏི དསྶེནྟོ ‘‘ཀཱམདྷཱཏུཡཱ’’ཏིཨཱདིམཱཧ.

‘‘ཡཾ ཙིཏྟཾ ཨུཔྤཛྫཏི, ན ནིརུཛ྄ཛྷཏི, ཏཾ ཙིཏྟཾ ནིརུཛ྄ཛྷིསྶཏི, ནུཔྤཛྫིསྶཏཱིཏི? ཨཱམནྟཱ’’ཏི ཏསྶེཝ ཙིཏྟསྶ ནིརོདྷོ ཨནཱགཏབྷཱཝེན ཏསྶ ཨུཔྤཱདཀྑཎེ ཡཐཱ ཝུཏྟོ, ཨེཝཾ ཏསྶེཝ ཀམྨཛསནྟཱནསྶ ནིརོདྷོ ཏསྶ ཨུཔྤཱདེ ཨནཱགཏབྷཱཝེན ཝཏྟབྦོ. ཏེནེཏཾ དསྶེཏི ‘‘ཨེཀཙིཏྟསྶ ནཱམ ཨུཔྤཱདཀྑཎེ ནིརོདྷོ ཨནཱགཏབྷཱཝེན ཝུཙྩཏི, ཀིམངྒཾ པན ཨེཀསནྟཱནསྶཱ’’ཏི ¶ . སབྦཏྠ སབྦསྨིཾ ཨནཱགཏཝཱརེ. ཨུཔཔཛྫནྟཱནཾ ཨེཝ ཝསེན སོ ནིརོདྷོ ཏཐཱ ཨནཱགཏབྷཱཝེན ཝུཏྟོ, ཀསྨཱ པནེཏྠ ནིརོདྷོ ཨུཔཔནྣཱནཾ ཝསེན ན ཝུཏྟོཏི ཨཱཧ ‘‘ཨུཔྤནྣཱནཾ པནཱ’’ཏིཨཱདི. ཏསྶེཝ ཡཐཱཔཝཏྟསྶ ཀམྨཛསནྟཱནསྶ ཨེཝ. ཏསྨཱཏི ཡསྨཱ ཨུཔྤཱདཀྑཎཏོ ཨུདྡྷཾ ནིརོདྷོ ཨཱརདྡྷོ ནཱམ ཧོཏི, ཏསྨཱ. བྷེདེ སཏིཔི ཀཱལབྷེདཱམསནསྶ ཀཱརཎེ སཏིཔི. ཨནཱགཏཀཱལཱམསནཝསེནེཝ ནིརོདྷསྶེཝ ཝསེན ཝིསྶཛྫནདྭཡཾ ཨུཔཔནྣམེཝ ཡུཏྟམེཝ ཧོཏཱིཏི. ཨཉྙེསཾ ཝསེན ནིརོདྷསྶེཝ ཝཏྟུཾ ཨསཀྐུཎེཡྻཏྟཱ ‘‘ཨརཧཏ’’ནྟི ཝུཏྟཾ.

ཡདི ཨུཔཔཏྟིཨནནྟརཾ ནིརོདྷོ ཨཱརདྡྷོ ནཱམ ཧོཏི, ཨཐ ཀསྨཱ ཙུཏིཡཱ ནིརོདྷཝཙནནྟི ཙོདནཾ སནྡྷཱཡཱཧ ‘‘ཏནྣིཊྛཱནབྷཱཝཏོ པན ཙུཏིཡཱ ནིརོདྷཝཙན’’ནྟི. ཏནྣིཊྛཱནབྷཱཝཏོཏི ཏསྶ སནྟཱནསྶ ནིཊྛཱནབྷཱཝཏོ. པཝཏྟེཏིཨཱདི ཝུཏྟསྶེཝཏྠསྶ པཱཀཊཀརཎཾ. ཏཏྠ ཏསྶཱཏི སནྟཱནསྶ. ཝཀྑཏཱིཏིཨཱདིཔི པཝཏྟེ ནིརོདྷཾ ཨནཱདིཡིཏྭཱ ཙུཏིནིརོདྷསྶེཝ གཧིཏཏཱཡ ཀཱརཎཝཙནཾ. ཏེནཱཏི ཏེན ཡཐཱཝུཏྟེན པཱཋནྟརཝཙནེན. ཨེཏྠཱཏི ཨེཏསྨིཾ ‘‘ཡསྶ ཙཀྑཱཡཏནཾ ནིརུཛ྄ཛྷིསྶཏཱི’’ཏིཨཱདིཀེ ཨཱཡཏནཡམཀེ. ཡདི པཝཏྟེ ནིརུདྡྷསྶཔི ཙུཏིཡཱ ཨེཝ ནིརོདྷོ ཨིཙྪིཏོ, ‘‘སཙཀྑུཀཱན’’ནྟིཨཱདི ཀཐནྟི ཨཱཧ ‘‘སཙཀྑུཀཱནནྟིཨཱདཱིསུ ཙ པཊིལདྡྷཙཀྑུཀཱནནྟིཨཱདིནཱ ཨཏྠོ ཝིཉྙཱཡཏཱི’’ཏི. ཏེཏི ཨརཱུཔེ པཙྪིམབྷཝིཀཱ. ཨཙཀྑུཀཝཙནཉྩ སཱཝསེསནྟི ཡོཛནཱ.

པཝཏྟིཝཱརཝཎྞནཱ ནིཊྛིཏཱ.

ཨཱཡཏནཡམཀཝཎྞནཱ ནིཊྛིཏཱ.

༤. དྷཱཏུཡམཀཾ

༡-༡༩. སདྡདྷཱཏུསམྦནྡྷཱནནྟི ¶ ཨིདཾ ཡཱནི ཙཀྑུདྷཱཏཱདིམཱུལཀེསུ སདྡཡམཀཱནི, སབྦཱནི ཙ སདྡདྷཱཏུམཱུལཀཱནི, ཏཱནི སནྡྷཱཡ ཝུཏྟཾ. ན ཧི ཏཱནི ཙཀྑུཝིཉྙཱཎདྷཱཏཱདིསམྦནྡྷཱནི ཝིཡ ཙུཏིཔཊིསནྡྷིཝསེན ལབྦྷནྟི, ཨེཏེནེཝ ཨཱཡཏནཡམཀེཔི པཝཏྟིཝཱརེ སདྡདྷཱཏུསམྦནྡྷཱནཾ ཡམཀཱནཾ ཨལབྦྷམཱནཏཱ ཙ ཝེདིཏབྦཱ.

དྷཱཏུཡམཀཝཎྞནཱ ནིཊྛིཏཱ.

༥. སཙྩཡམཀཾ

༡. པཎྞཏྟིཝཱརཝཎྞནཱ

༡༠-༢༦. སོཏི ¶ དུཀྑསདྡོ. ཨཉྙཏྠཱཏི སངྑཱརདུཀྑཝིཔརིཎཱམདུཀྑདུཀྑཱདྷིཊྛཱནེསུ. ཨཉྙནིརཔེཀྑོཏི སངྑཱརཱདིཔདནྟརཱནཔེཀྑོ. ཏེནཱཏི ཨཉྙནིརཔེཀྑདུཀྑཔདགྒཧཎཏོ. ཏསྨིཾ དུཀྑདུཀྑེ ཝིསཡབྷཱུཏེ. ཨེས དུཀྑསདྡོ ‘‘དུཀྑཾ དུཀྑསཙྩ’’ནྟི ཨེཏྠ པཋམོ དུཀྑསདྡོ. ཏཉྩ དུཀྑདུཀྑཾ. ‘‘དུཀྑཾ དུཀྑསཙྩ’’ནྟི ཨེཏྠ དུཀྑམེཝ དུཀྑསཙྩནྟི ནཡིདཾ ཨཝདྷཱརཎཾ ཨིཙྪིཏབྦཾ, དུཀྑཾ དུཀྑསཙྩམེཝཱཏི པན ཨིཙྪིཏབྦནྟི ཨཱཧ ‘‘ཨེཀནྟེན དུཀྑསཙྩམེཝཱ’’ཏི. སཙྩཝིབྷངྒེ ཝུཏྟེསུ སམུདཡེསུ ཀོཙི ཕལདྷམྨེསུ ནཏྠཱིཏི སཙྩཝིབྷངྒེ པཉྩདྷཱ ཝུཏྟེསུ སམུདཡེསུ ཨེཀོཔི ཕལསབྷཱཝེསུ ནཏྠི, ཕལསབྷཱཝོ ནཏྠཱིཏི ཨཏྠོ. ‘‘ཕལདྷམྨོ ནཏྠཱི’’ཏི ཙ པཱཋོ. མགྒསདྡོ ཙ ཕལངྒེསཱུཏི སཱམཉྙཕལངྒེསུ སམྨཱདིཊྛིཨཱདཱིསུ ‘‘མགྒངྒཾ མགྒཔརིཡཱཔནྣ’’ནྟིཨཱདིནཱ (ཝིབྷ. ༤༩༢, ༤༩༥) ཨཱགཏོ མགྒསདྡོ མགྒཕལཏྟཱ པཝཏྟཏི ཀཱརཎཱུཔཙཱརེནཱཏི ཨདྷིཔྤཱཡོ. ཏེནཱཧ ‘‘ན མགྒཀིཙྩསབྦྷཱཝཱ’’ཏིཨཱདི. ཏསྨཱཏི ཡསྨཱ སཙྩདེསནཱཡ པབྷཝཱདིསབྷཱཝཱ ཨེཝ དྷམྨཱ སམུདཡཱདིཔརིཡཱཡེན ཝུཏྟཱ, ན ཨཔྤབྷཝཱདིསབྷཱཝཱ, ཏསྨཱ ¶ . ཨེཏྠ ཙ ཏེབྷཱུམཀདྷམྨཱནཾ ཡཐཱརཧཾ དུཀྑསམུདཡསཙྩནྟོགདྷཏྟཱ ཨསཙྩསབྷཱཝེ སབྷཱཝདྷམྨེ ཙ ཨུདྡྷརནྟོ ཕལདྷམྨེ ཨེཝ ཨུདྡྷརི. ནནུ ཙ མགྒསམྤཡུཏྟཱཔི དྷམྨཱ ཨསཙྩསབྷཱཝཱཏི ཏེཔི ཨུདྡྷརིཏབྦཱཏི? ན, ཏེསཾ མགྒགཏིཀཏྟཱ. ‘‘ཕལདྷམྨེསཱུ’’ཏི ཨེཏྠ དྷམྨགྒཧཎེན ཝཱ ཕལསམྤཡུཏྟདྷམྨཱནཾ ཝིཡ ཏེསམྤི གཧཎཾ དཊྛབྦཾ.

པདསོདྷནེན…པེ… ཨིདྷ གཧིཏཱཏི ཨེཏེན ཨསཙྩསབྷཱཝཱནཾ དྷམྨཱནཾ པཀརཎེན ནིཝཏྟིཏཏཾ ཨཱཧ. ཏེསནྟི དུཀྑཱདཱིནཾ. ཏབྦིསེསནཡོགཝིསེསནྟི ཏེན དུཀྑཱདིཝིསེསནཡོགེན ཝིསིཊྛཏཾ. སཙྩཝིསེསནབྷཱཝེནེཝ དུཀྑཱདཱིནཾ པརིཉྙེཡྻཏཱདིབྷཱཝོ སིདྡྷོཏི ཨཱཧ ‘‘ཨེཀནྟསཙྩཏྟཱ’’ཏི. ཡཐཱ ཙེཏྠཱཏི ཡཐཱ ཨེཏསྨིཾ སཙྩཡམཀེ སུདྡྷསཙྩཝཱརེ སཙྩཝིསེསནབྷཱུཏཱ ཨེཝ དུཀྑཱདཡོ གཧིཏཱ. ཨེཝཾ ཁནྡྷཡམཀཱདཱིསུཔཱིཏི ན སུདྡྷསཙྩཝཱརེ ཨེཝ ཨཡཾ ནཡོ དསྶིཏོཏི ཨཏྠོ. པདསོདྷནཝཱརེ ཏཾམཱུལཙཀྐཝཱརེ ཙ ‘‘རཱུཔཾ རཱུཔཀྑནྡྷོ’’ཏིཨཱདིནཱ སམུདཱཡཔདཱནཾཡེཝ ཝུཏྟཏྟཱ ཝཏྟབྦམེཝ ནཏྠཱིཏི ‘‘སུདྡྷཀྑནྡྷཱདིཝཱརེསཱུ’’ཏི ཝུཏྟཾ. ཏཐཱ ཙེཏྠཱཔི ¶ སུདྡྷཝཱརེ ཨེཝ ཨཡཾ ནཡོ དསྶིཏོ. ཡདི སུདྡྷཀྑནྡྷཱདིཝཱརེསུ ཁནྡྷཱདིཝིསེསནབྷཱུཏཱནམེཝ རཱུཔཱདཱིནཾ གཧཎེན བྷཝིཏབྦཾ, ཨཐ ཀསྨཱ ཁནྡྷཱདིཝིསེསནཏོ ཨཉྙེསམྤི རཱུཔཱདཱིནཾ ཝསེན ཨཏྠོ དསྶིཏོཏི ཙོདནཾ སནྡྷཱཡཱཧ ‘‘ཨཊྛཀཐཱཡཾ པནཱ’’ཏིཨཱདི. པུརིམོ ཨེཝ ཨཏྠོ ཡུཏྟོ, ཡུཏྟིཏོ པཱཋོཝ བལཝཱཏི.

པཎྞཏྟིཝཱརཝཎྞནཱ ནིཊྛིཏཱ.

༢. པཝཏྟིཝཱརཝཎྞནཱ

༢༧-༡༦༤. དུཀྑཔརིཉྙཱ ཡཱཝ དུཀྑསམཏིཀྐམནཏྠཱཏི སཔྤདེསཾ པཝཏྟཱཔི སཱ ཏདཏྠཱཝཧཱ བྷཝེཡྻཱཏི ཀསྶཙི ཨཱསངྐཱ སིཡཱཏི དསྶེནྟོ ཨཱཧ ‘‘ཨརིཡཏྟཱ…པེ… ཀཏྭཱ ཝུཏྟ’’ནྟི. ཀེཙི པནེཏྠ ‘‘ཨནྟིམབྷཝེ ཋིཏཏྟཱ’’ཏི ཀཱརཎཾ ཝདནྟི, ཏཾ ན ཡུཛྫཏི ཨུཔཔཏྟིཡཱ དུཀྑཝིཙཱརཏྟཱ, ན ཙ སབྦེ སུདྡྷཱཝཱསཱ ཨནྟིམབྷཝིཀཱ ཨུདྡྷཾསོཏཝཙནཏོ. ‘‘ཡསྶ དུཀྑསཙྩཾ ཨུཔྤཛྫཏཱི’’ཏི ཨུཔྤཱདཱཝཏྠཱ. ཨཝིསེསེན དུཀྑསཙྩཔརིཡཱཔནྣཱ དྷམྨཱ སམྦནྡྷཱིབྷཱཝེནེཝ ¶ ཏཾསམངྒཱི ཙ པུགྒལོ ཝུཏྟོཏི དསྶེནྟོ ‘‘སབྦེ ཨུཔཔཛྫནྟཱ’’ཏིཨཱདིཾ ཝཏྭཱ སྭཱཡམཏྠོ ཡསྨཱ ནིཙྪཡརཱུཔེན གཧིཏོ, ནིཙྪིཏསྶེཝ ཙ ཨཏྠསྶ ཝིབྷཱགདསྶནེན བྷཝིཏབྦཾ, ཏསྨཱ ‘‘ཏེསྭེཝ…པེ… ཨུཔཔནྣམེཝཱ’’ཏི ཨཱཧ. ཏཏྠ ཏེསྭེཝ ཀེཙི དསྶཱིཡནྟཱིཏི སམྦནྡྷོ. ཨེཀཀོཊྛཱསུཔྤཏྟིསམངྒིནོཏི དུཀྑཀོཊྛཱསུཔྤཏྟིསམངྒིནོ. ཏེསཱུཏི སནྣིཊྛཱནེན གཧིཏེསུ. མགྒཕལུཔྤཱདསམངྒཱིསཱུཏི མགྒཕལུཔྤཱདསམངྒཱིནཾ, ཨཡམེཝ ཝཱ པཱཋོ.

ཨེཏྠ ཙཱཏིཨཱདིནཱ ‘‘སབྦེས’’ནྟིཨཱདིཔཱལི༹ཡཱ པིཎྜཏྠཾ དསྶེཏི. ཏཏྠ སམུདཡསཙྩུཔྤཱདཝོམིསྶསྶ དུཀྑསཙྩུཔྤཱདསྶཱཏི ཨིདཾ ཨནཱདརེ སཱམིཝཙནཾ. ཀཏྠཙི སམུདཡསཙྩུཔྤཱདཝོམིསྶེཔི དུཀྑསཙྩེ ཏཾརཧིཏསྶ སམུདཡསཙྩུཔྤཱདརཧིཏསྶ དུཀྑསཙྩུཔྤཱདསྶ དསྶནཝསེན ཝུཏྟནྟི ཡོཛནཱ. ཀེཙི པན ‘‘སམུདཡསཙྩཱཝོམིསྶསྶཱ’’ཏི པཋནྟི, ཏེསཾ ‘‘ཏཾརཧིཏསྶཱ’’ཏི ཨིདཾ པུརིམཔདསྶ ཨཏྠཝིཝརཎཾ ཝེདིཏབྦཾ. ཏཾསཧིཏསྶཱཏི སམུདཡསཙྩུཔྤཱདསཧིཏསྶ དུཀྑསཙྩུཔྤཱདསྶ དསྶནཝསེན ཝུཏྟནྟི ཡོཛནཱ. ཏེསནྟི ཨསཉྙསཏྟཱནཾ, པཝཏྟིཡཾ དུཀྑསཙྩསྶ ཨུཔྤཱདོ ‘‘པཝཏྟེ’’ཏིཨཱདིནཱ ཝུཏྟེསུ དྭཱིསུཔི ཀོཊྛཱསེསུ ན གཧིཏོཏི ཨཏྠོ. པཊིསནྡྷིཡཾ པན ¶ ཏེསཾ ཨུཔྤཱདསྶ པཋམཀོཊྛཱསེན གཧིཏཏཱ དསྶིཏཱ ཨེཝ. ཏཐཱ ནིརོདྷོ ཙཱཏི ཡཐཱ ཨསཉྙསཏྟཱནཾ པཊིསནྡྷིཡཾ དུཀྑསཙྩསྶ ཨུཔྤཱདོ པཋམཀོཊྛཱསེན གཧིཏོ, པཝཏྟིཡཾ པན སོ དྭཱིཧི ཀོཊྛཱསེཧི ན གཧིཏོ, ཏཐཱ ཏེསཾ དུཀྑསཙྩསྶ ནིརོདྷོཔཱིཏི ཨཏྠོ. ཏཐཱ ཧི ‘‘སབྦེསཾ ཙཝནྟཱནཾ པཝཏྟེ ཏཎྷཱཝིཔྤཡུཏྟཙིཏྟསྶ བྷངྒཀྑཎེ’’ཏིཨཱདིནཱ (ཡམ. ༡.སཙྩཡམཀ.༨༨) ནིརོདྷཝཱརེ པཱལི༹ པཝཏྟཱ. ཨེསེཝ ནཡོཏི ཡྭཱཡཾ ‘‘ཨེཏྠ ཙཱ’’ཏིཨཱདིནཱ སམུདཡསཙྩཡམཀེ པཱལི༹ཡཱ ཨཏྠནཡོ ཝུཏྟོ, མགྒསཙྩཡམཀེཔི ཨེསེཝ ནཡོ, ཨེཝམེཝ ཏཏྠཱཔི ཨཏྠོ ནེཏབྦོཏི ཨཏྠོ. ཏཐཱ ཧི ‘‘སབྦེསཾ ཨུཔཔཛྫནྟཱན’’ནྟིཨཱདིནཱ ཏཏྠ པཱལི༹ པཝཏྟཱ.

ཨེཝཉྩ སཏཱིཏི ཨེཝཾ ཁཎཝསེན ཨོཀཱསགྒཧཎེ སཏཱིཏི ཡཐཱཝུཏྟམཏྠཾ ཨནནུཛཱནནཝསེན པཙྩཱམསཏི. ཨེཏསྶ ཝིསྶཛྫནེཏི ཨེཏསྶ ཡམཀཔདསྶ ཝིསྶཛྫནེ. ‘‘ཨགྒམགྒསྶ ཨུཔྤཱདཀྑཎེ, ཨརཧནྟཱནཾ ཙིཏྟསྶ ཨུཔྤཱདཀྑཎེ, ཡསྶ ཙིཏྟསྶ ཨནནྟརཱ ཨགྒམགྒཾ པཊིལབྷིསྶནྟི, ཏསྶ ཙིཏྟསྶ ཨུཔྤཱདཀྑཎེ, ཨསཉྙསཏྟཾ ཨུཔཔཛྫནྟཱནཾ ཏེསཾ ཏཏྠ དུཀྑསཙྩཾ ཨུཔྤཛྫཏི, ནོ ཙ ཏེསཾ ཏཏྠ སམུདཡསཙྩཾ ཨུཔྤཛྫིསྶཏཱི’’ཏི (ཡམ. ༡.སཙྩཡམཀ.༧༡) པུརིམཀོཊྛཱསསྶ ཨཱགཏཏྟཱ ཝིརོདྷོ ནཏྠཱིཏི ‘‘པཙྪིམཀོཊྛཱསེ’’ཏིཨཱདི ཝུཏྟཾ ¶ . ཏཏྠ ཏསྨཱཏི ཡསྨཱ ན ཨུཔཔཏྟིཙིཏྟུཔྤཱདཀྑཎོ བྷཱཝིནོ སམུདཡཔཙྩུཔྤཱདསྶ ཨཱདྷཱརོ, ཨཐ ཁོ ཀཱམཱཝཙརཱདིཨོཀཱསོ, ཏསྨཱ. པུགྒལོཀཱསཝཱརོ ཧེསཱཏི ཡསྨཱ པུགྒལོཀཱསཝཱརོ ཨེས, ཏསྨཱ ‘‘ཏེསཾ ཏཏྠཱ’’ཏི ཨེཏྠ ཨོཀཱསཝསེན ཏཏྠ-སདྡསྶ ཨཏྠོ ཝེདིཏབྦོ. ཡདི པུགྒལོཀཱསཝཱརེ ཀཱམཱཝཙརཱདིཨོཀཱསཝསེནེཝ ཨཏྠོ གཧེཏབྦོ, ན ཁཎཝསེན, ཨཐ ཀསྨཱ ‘‘སབྦེསཾ ཨུཔཔཛྫནྟཱན’’ནྟིཨཱདིནཱ ཨོཀཱསཾ ཨནཱམསིཏྭཱ ཏཏྠ ཝིསྶཛྫནཾ པཝཏྟནྟི ཙོདནཾ སནྡྷཱཡཱཧ ‘‘ཏཏྠ…པེ… སོ ཨེཝཱ’’ཏི. ཏཏྠ ཏཏྠཱཏི ཨོཀཱསཝཱརེ. པུགྒལཝིསེསདསྶནཏྠནྟི པུགྒལསངྑཱཏཝིསེསདསྶནཏྠཾ. ཡཏྠ ཏེཏི ཡསྨིཾ ཀཱམཱཝཙརཱདིཨོཀཱསེ ཏེ པུགྒལཱ.

ཀེཙཱིཏི དྷམྨསིརིཏྠེརཾ སནྡྷཱཡཱཧ. སོ ཧི ‘‘པཝཏྟེ ཙིཏྟསྶ བྷངྒཀྑཎེ དུཀྑསཙྩཾ ནུཔྤཛྫཏཱི’’ཏི ཨེཏྠ ཙིཏྟཛརཱུཔམེཝ ཨདྷིཔྤེཏཾ ཙིཏྟཔཊིབདྡྷཝུཏྟིཏྟཱཏི ཀཱརཎཾ ཝདཏི. ཨཔརེ ‘‘ཨརཱུཔེཏི ཨིམཾ པུརིམཱཔེཀྑམྤི ཧོཏཱིཏི ཏེན པཝཏྟཾ ཝིསེསེཏྭཱ ཨརཱུཔབྷཝཝསེན ཨཡམཏྠོ ཝུཏྟོ ¶ , ཏསྨཱ ‘ཡསྶ ཝཱ པན སམུདཡསཙྩཾ ནིརུཛ྄ཛྷཏི, ཏསྶ དུཀྑསཙྩཾ ཨུཔྤཛྫཏཱིཏི? ནོ’ཏིཨཱདཱིསུཔི ཨེཝམཏྠོ ཝེདིཏབྦོ’’ཏི ཝདནྟི. པུགྒལོ ན ཙིཏྟཾ ཨཔེཀྑིཏྭཱཝ གཧིཏོཏི ཨིདཾ ཙིཏྟསྶ ཨནདྷིཀཏཏྟཱ ཝུཏྟཾ. ཡཏྠ པན སམུདཡསཙྩསྶ ཨུཔྤཱདནིཙྪཡོ, ཏཏྠེཝ ཏསྶ ཨནུཔྤཱདནིཙྪཡེནཔི བྷཝིཏབྦཾ ཙིཏྟེན ཙ ཝིནཱ པུགྒལསྶེཝ ཨནུཔལབྦྷནཏོཏི ‘‘ཡསྶ སམུདཡསཙྩཾ ནུཔྤཛྫཏཱི’’ཏི ཨེཏྠ སམུདཡསཙྩཱདྷཱརཾ ཙིཏྟཾ ཨཏྠཏོ གཧིཏམེཝཱཏི སཀྐཱ ཝིཉྙཱཏུཾ. ཨཔིཙ ཨིནྡྲིཡབདྡྷེཔི ན སབྦོ རཱུཔུཔྤཱདོ ཨེཀནྟེན ཙིཏྟུཔྤཱདཱདྷཱིནོཏི སཀྐཱ ཝཏྟུཾ ཙིཏྟུཔྤཏྟིཡཱ ཝིནཱཔི ཏཏྠ རཱུཔུཔྤཏྟིདསྶནཏོ, ཏསྨཱ ཙིཏྟཛརཱུཔམེཝ ཙིཏྟསྶ ཨུཔྤཱདཀྑཎེ ཨུཔྤཛྫཏི, ན ཨིཏརཾ, ཨིཏརཾ པན ཏསྶ ཏཱིསུཔི ཁཎེསུ ཨུཔྤཛྫཏཱིཏི ནིཊྛམེཏྠ གནྟབྦཾ. ཝིབྷཛིཏབྦཱ ཨཝིབྷཏྟཱ ནཱམ ནཏྠཱིཏི སིཡཱཡཾ པསངྒོ པཋམཝཱརེ, དུཏིཡཝཱརེ པན ཝིབྷཛནཱ ཨེཝ སཱཏི ནཱཡཾ པསངྒོ ལབྦྷཏི, པཋམཝཱརེཔི ཝཱ ནཱཡཾ པསངྒོ. ཀསྨཱ? ཨེསཱ ཧི ཡམཀསྶ པཀཏི, ཡདིདཾ ཡཐཱལཱབྷཝསེན ཡོཛནཱ.

དུཏིཡེ ཙིཏྟེ ཝཏྟམཱནེཏི ཨེཏྠ ‘‘པཋམཾ བྷཝངྒཾ, དུཏིཡཾ ཙིཏྟ’’ནྟི ཝདནྟི. བྷཝནིཀནྟིཡཱ ཨཱཝཛྫནམྤི ཝིཔཱཀཔྤཝཏྟིཏོ ཝིསདིསཏྟཱ ‘‘དུཏིཡ’’ནྟི ཝཏྟུཾ སཀྐཱ, ཏཏོ པཊྛཱཡ པུབྦེ ཏསྶ ཏཏྠ སམུདཡསཙྩཾ ནུཔྤཛྫིཏྠཱཏི ཝཏྟབྦཱཏི ཨཔརེ. བྷཝནིཀནྟིཡཱ པན སཧཛཱཏཾ པཋམཾ ཙིཏྟཾ ཨིདྷ དུཏིཡཾ ཙིཏྟནྟི ཨདྷིཔྤེཏཾ. ཏཏོ པུབྦེ པཝཏྟཾ སབྦཾ ཨབྱཱཀཏབྷཱཝེན སམཱནཛཱཏིཀཏྟཱ ཨེཀནྟི ཀཏྭཱ ཏཏོ པཊྛཱཡ ཧེཊྛཱ ཏསྶ ཏཏྠ སམུདཡསཙྩཾ ནུཔྤཛྫིཏྠེཝཱཏི ¶ . ཏེནཱཧ ‘‘སབྦནྟིམེན པརིཙྪེདེནཱ’’ཏིཨཱདི. ཏསྨིནྟི དུཏིཡེ ཙིཏྟེ. ཏེན སམཱནགཏིཀཏྟཱཏི ཏེན ཡཐཱཝུཏྟདུཏིཡཙིཏྟེན ཙ ཏཾསམངྒིནོ ཝཱ དུཀྑསཙྩཾ ཨུཔྤཛྫིཏྠ, ནོ ཙ སམུདཡསཙྩནྟི ཝཏྟབྦབྷཱཝེན སམཱནགཏིཀཏྟཱ. ཨེཝཉྩ ཀཏྭཱཏི ཏེན སམཱནགཏིཀཏཱཡ དསྶིཏཏྟཱ ཨེཝ. ཡཐཱཝུཏྟཱཏི དུཏིཡཱཀུསལཙིཏྟཏོ པུརིམསབྦཙིཏྟསམངྒིནོ ཨགྒཧིཏཱ ཧོནྟི ཨིཏརབྷཱཝཱབྷཱཝཏོ. ཝུཏྟམེཝཏྠཾ པཱཋནྟརེན སམཏྠེཏུཾ ‘‘ཡཐཱ’’ཏིཨཱདི ཝུཏྟཾ. ཏེཏི ཙཏུཝོཀཱརཱ. ཝཛྫེཏབྦཱཏི ‘‘ཨིཏརེས’’ནྟི ཝིསེསནེན ནིཝཏྟེཏབྦཱ. པཉྩཝོཀཱརཱ ཝིཡ ཡཐཱཝུཏྟཱ སུདྡྷཱཝཱསཱཏི དུཏིཡཙིཏྟཀྑཎསམངྒིབྷཱཝེན ཝུཏྟཔྤཀཱརཱ ཡཐཱ སུདྡྷཱཝཱསསངྑཱཏཱ པཉྩཝོཀཱརཱ པུབྦེ ཝུཏྟཱ སནྟི, ཨེཝཾ ཙཏུཝོཀཱརཱ པུབྦེ ཝུཏྟཱ ན ཧི སནྟཱིཏི ཡོཛནཱ.

‘‘ཡསྶ ¶ ཡཏྠཱ’’ཏི པུགྒལོཀཱསཱ ཨཱདྷེཡྻཱདྷཱརབྷཱཝེན ཨཔེཀྑིཏཱཏི ཨཱཧ ‘‘པུགྒལོཀཱསཱ ཨཉྙམཉྙཔརིཙྪིནྣཱ གཧིཏཱ’’ཏི. ཀཱམཱཝཙརེ…པེ… ཨུཔཔནྣཱཏི ཨེཏྠ ཀཱམཱཝཙརེ ཨབྷིསམེཏཱཝིནོ རཱུཔཱཝཙརཾ ཨུཔཔནྣཱ, རཱུཔཱཝཙརེ ཨབྷིསམེཏཱཝིནོ ཨརཱུཔཱཝཙརཾ ཨུཔཔནྣཱ, ཝཱ-སདྡེན ཀཱམཱཝཙརེ ཨབྷིསམེཏཱཝིནོ ཨརཱུཔཱཝཙརཾ ཨུཔཔནྣཱཏི ཙ ཡོཛེཏབྦཾ. ཏཏྠཱཏི ཨུཔཔནྣོཀཱསེ. ཨབྷིསམཡོཏི ཨུཔརིམགྒཱབྷིསམཡོ ཡཱཝ ཨུཔཔནྣོ ན བྷཝིསྶཏི, ཏཱཝ ཏེ ཏཏྠ ཨུཔཔནྣཔུགྒལཱ ཨེཏྠ ཨེཏསྨིཾ ‘‘ཨབྷིསམེཏཱཝཱིན’’ནྟིཨཱདིནཱ ཝུཏྟེ དུཏིཡཀོཊྛཱསེ ན གཡ྄ཧནྟི པུགྒལོཀཱསཱནཾ ཨཉྙམཉྙཾ པརིཙྪིནྣཏྟཱ. ཡདི ཨེཝཾ ཀིཾ ཏེ ཨིམསྨིཾ ཡམཀེ ཨསངྒཧིཏཱཏི ཨཱཧ ‘‘ཏེ པནཱ’’ཏིཨཱདི. ཏཏྠ ཡཾ ཝུཏྟཾ ‘‘སམཱནགཏིཀཱཏི ཝིསུཾ ན དསྶིཏཱ’’ཏི, ཏཾ པཱཀཊཏརཾ ཀཱཏུཾ ‘‘ཨནབྷིསམེཏཱཝཱིན’’ནྟིཨཱདི ཝུཏྟཾ. ཏསྶཏྠོ – ‘‘ཨནབྷིསམེཏཱཝཱིན’’ནྟི ཨིམིནཱ པཋམཔདེན གཧིཏཱ སབྦཏྠ མགྒུཔྤཏྟིརཧེ སམྤཏྟིབྷཝེ ཏཏྠ སུདྡྷཱཝཱསེ ཡེ ཨནབྷིསམེཏཱཝིནོ, ཏེསུ དྭིཔྤཀཱརེསུ སུདྡྷཱཝཱསཱ ཡསྨིཾ ཀཱལེ ཏཏྠ ཨནབྷིསམེཏཱཝིནོཏི གཧེཏབྦཱ, ཏཏྠ ནེསཾ ཏཐཱ གཧེཏབྦཀཱལསྶ ཝིསེསནཏྠཾ ‘‘སུདྡྷཱཝཱསཱནཾ དུཏིཡེ ཙིཏྟེ ཝཏྟམཱནེ’’ཏི ཝུཏྟནྟི.

ཨེཏེནཱཏི ཨེཏེན ཝཙནེན. ཝོདཱནཙིཏྟཾ ནཱམ མགྒཙིཏྟཱནཾ ཨནནྟརཔཙྩཡབྷཱུཏཾ ཙིཏྟཾ, ཨིདྷ པན ཨགྒམགྒཙིཏྟསྶ. ཏཏོཏི ཡཐཱཝུཏྟཝོདཱནཙིཏྟཏོ པུརིམཏརཙིཏྟསམངྒིནོ, ཨནུལོམཉཱཎསམྤཡུཏྟཙིཏྟསམངྒིནོ, ཨཝསིཊྛཝུཊྛཱནགཱམིནིཝིཔསྶནཱཙིཏྟཱདིསམངྒིནོཔི. ཏེནཱཧ ‘‘ཡཱཝ སབྦནྟིམཏཎྷཱསམྤཡུཏྟཙིཏྟསམངྒཱི, ཏཱཝ དསྶིཏཱ’’ཏི.

པཊིསནྡྷིཙུཏིཙིཏྟཱནཾ ¶ བྷངྒུཔྤཱདཀྑཎཱ པཝཏྟེ ཙིཏྟསྶ བྷངྒུཔྤཱདཀྑཎེཧི དུཀྑསཙྩཱདཱིནཾ ནུཔྤཱདཱདཱིསུ སམཱནགཏིཀཱཏི ཀཏྭཱ ཝུཏྟཾ ‘‘པཝཏྟེ ཙིཏྟསྶཱ’’ཏིཨཱདི. ཏཏྠ ཙུཏིཙིཏྟསྶཔི ཨུཔྤཱདཀྑཎསྶ གཧཎཾ དཊྛབྦནྟི ཡོཛནཱ. དྭཱིསུཔི ཀོཊྛཱསེསཱུཏི སམུདཡསཙྩསྶ བྷཱཝིནོ ནིརོདྷསྶ ཨཔྤཊིཀྑེཔཔཊིཀྑེཔཝསེན པཝཏྟེསུ པུརིམཔཙྪིམཀོཊྛཱསེསུ. ན ཝིསེསིཏནྟི ཡཐཱཝུཏྟེ ཨཔྤཊིཀྑེཔེ ཙ སཏིཔི ཝིསེསེཏྭཱ ན ཝུཏྟནྟི ཨཏྠོ. ཨེཀསྶཔི པུགྒལསྶ ཏཱདིསསྶ མགྒསྶ ཙ ཕལསྶ ཙ བྷངྒཀྑཎསམངྒིནོ པུརིམཀོཊྛཱསསྶེཝ ཨབྷཛནཏོ ཀོཊྛཱསདྭཡསམྦྷཝཱབྷཱཝཏོཏི ཨཏྠོ. ཨིདཱནི ཏམེཝཏྠཾ ཝིཝརིཏུཾ ‘‘ཡསྶ དུཀྑསཙྩ’’ནྟིཨཱདི ཝུཏྟཾ. ཀེསཉྩི པུགྒལཱནཾ. ནིདྡྷཱརཎེ ཙེཏཾ སཱམིཝཙནཾ. ‘‘མགྒསྶ ཙ ཕལསྶ ¶ ཙཱ’’ཏི ཝུཏྟམགྒཕལཱནི དསྶེནྟོ ‘‘ཏིཎྞཾ ཕལཱནཾ དྭིནྣཉྩ མགྒཱན’’ནྟི ཨཱཧ. ཏཱནི པན ཧེཊྛིམཱནི ཏཱིཎི ཕལཱནི མཛ྄ཛྷེ ཙ དྭེ མགྒཱ ཝེདིཏབྦཱ. ནིརནྟརཾ ཨནུཔྤཱདེཏྭཱཏི པཊིཔཀྑདྷམྨེཧི ཨཝོཀིཎྞཾ ཀཏྭཱ སཧ ཝིཔསྶནཱཡ མགྒཾ ཨུཔྤཱདེནྟེན ཡཱ སཱཏཙྩཀིརིཡཱ ཀཱཏབྦཱ, ཏཾ ཨཀཏྭཱཏི ཨཏྠོ. ཏེནཱཧ ‘‘ཨནྟརནྟརཱ…པེ… ཨུཔྤཱདེཏྭཱ’’ཏི. ‘‘ཨརཱུཔེ མགྒསྶ ཙ ཕལསྶ ཙ བྷངྒཀྑཎེ’’ཏི ཨཝིསེསཏོ ཝུཏྟེ ཀཐམཡཾ ཝིསེསོ ལབྦྷཏཱིཏི ཨཱཧ ‘‘སཱམཉྙཝཙནེནཔཱི’’ཏིཨཱདི. ཏེན ཨཔཝཱདཝིསཡཔརིཡཱཡེན ཨུཔསགྒཱ ཨབྷིནིཝིསནྟཱིཏི ལོཀསིདྡྷོཡཾ ཉཱཡོཏི དསྶེཏི.

པཝཏྟིཝཱརཝཎྞནཱ ནིཊྛིཏཱ.

༣. པརིཉྙཱཝཱརཝཎྞནཱ

༡༦༥-༡༧༠. ཨེཏྠེཝཱཏི ཨིམསྨིཾ སཙྩཡམཀེ ཨེཝ. ཨཔརིཉྙེཡྻཏཱདསྶནཏྠནྟི ཨེཏྠ ཨ-ཀཱརོ ན པརིཉྙེཡྻཱབྷཱཝཝཙནོ, ནཱཔི པརིཉྙེཡྻཔཊིཔཀྑཝཙནོ, ཨཐ ཁོ ཏདཉྙཝཙནོཏི ཡཐཱརཧཾ སཙྩེསུ ལབྦྷམཱནཱནཾ པཧཱཏབྦཏཱདཱིནམྤི དསྶནེ ཨཱཔནྣེཡེཝ སམཡཝཱརོ དསྶནཔརོ, ཡེསཉྩ ན དསྶནཔརོ, ཏེསུ ཀེསུཙི སཙྩེསུ ལབྦྷམཱནཱནམྤི ཀེསཉྩི ཝིསེསཱནཾ ཨཡཾ ཝཱརོ ན དསྶནཔརོཏི དསྶེནྟོ ‘‘སཙྪིཀརཎ…པེ… དསྶནཏྠཉྩཱ’’ཏི ཨཱཧ. སམུདཡེ པཧཱནཔརིཉྙཱཝ ཝུཏྟཱ, ན ཏཱིརཎཔརིཉྙཱཏི ཡུཏྟཾ ཏཱཝེཏཾ སམུདཡསྶཔི ཏཱིརེཏབྦསབྷཱཝཏྟཱ, ‘‘དུཀྑེ ཏཱིརཎཔརིཉྙཱཝ ¶ ཝུཏྟཱ, ན པཧཱནཔརིཉྙཱ’’ཏི ཨིདཾ པན ཀསྨཱ ཝུཏྟཾ, ནནུ དུཀྑཾ ཨཔྤཧཱཏབྦམེཝཱཏི? སམུདཡསཙྩཝིབྷངྒེ ཝུཏྟཱནཾ ཀེསཉྩི སམུདཡཀོཊྛཱསཱནཾ དུཀྑསཙྩེ སངྒཧཎཏོ དུཀྑསམུདཡེ ཝཱ ཨསངྐརཏོཝ གཧེཏྭཱ བྷཱུཏཀཐནམེཏཾ དཊྛབྦཾ. ཨུབྷཡཏྠཱཏི དུཀྑེ སམུདཡེ ཙ ཝུཏྟཱ. ཀསྨཱ? ཏེསཾ སཱདྷཱརཎཱཏི. ཨེཝཾ སཱདྷཱརཎཱསཱདྷཱརཎབྷེདབྷིནྣཾ ཡཐཱཝུཏྟཾ པརིཉྙཱཀིཙྩཾ པུབྦབྷཱགེ ནཱནཀྑཎེ ལབྦྷམཱནམྤི མགྒཀཱལེ ཨེཀཀྑཎེ ཨེཝ ལབྦྷཏི ཨེཀཉཱཎཀིཙྩཏྟཱཏི དསྶེཏུཾ ‘‘མགྒཉཱཎཉྷཱི’’ཏིཨཱདི ཝུཏྟཾ.

པརིཉྙཱཝཱརཝཎྞནཱ ནིཊྛིཏཱ.

སཙྩཡམཀཝཎྞནཱ ནིཊྛིཏཱ.

༦. སངྑཱརཡམཀཾ

༡. པཎྞཏྟིཝཱརཝཎྞནཱ

༡. སཏིཔི ¶ ཀུསལམཱུལཱདཱིནམྤི ཝིབྷཏྟབྷཱཝེ ཁནྡྷཱདིཝིབྷཱགོ ཏཏོ སཱཏིསཡོཏི དསྶེནྟོ ‘‘ཁནྡྷཱདཡོ ཝིཡ པུབྦེ ཨཝིབྷཏྟཱ’’ཏི ཨཱཧ. པཀཱརཏྠོ ཝཱ ཨེཏྠ ཨཱདི-སདྡོ ‘‘བྷཱུཝཱདཡོ’’ཏིཨཱདཱིསུ ཝིཡཱཏི ཀུསལམཱུལཱདཱིནམྤི སངྒཧོ དཊྛབྦོ. ཨཝིཉྙཱཏཏྟཱ ནིསཱམེནྟེཧི. ཧེཏུཨཏྠོ ཝཱ ཨེཏྠ ལུཏྟནིདྡིཊྛོ ཨཝིཉྙཱཔིཏཏྟཱཏི ཨཏྠོ. ཡདིཔི ཀཱཡསངྑཱརཱནཾ ཝིཀཔྤདྭཡེཔི ཧེཏུཕལབྷཱཝོཡེཝ ཨིཙྪིཏོ, སཱམིཝཙནརཱུཔཱཝིབྷཱུཏོ པན ཨཏྠེཝ ཨཏྠབྷེདོཏི དསྶེནྟོ ‘‘ཀཱཡསྶ…པེ… ཀཏྟུཨཏྠེ’’ཏི ཨཱཧ. སོ པནཱཏི ཀཏྟུཨཏྠོ.

༢-༧. སུདྡྷིཀཨེཀེཀཔདཝསེནཱཏི ‘‘ཀཱཡོ སངྑཱརོ’’ཏིཨཱདཱིསུ དྭཱིསུ དྭཱིསུ པདེསུ ཨཉྙམཉྙཾ ཨསམྨིསྶཨེཀེཀཔདཝསེན. ཨཏྠཱབྷཱཝཏོཏི ཡཐཱདྷིཔྤེཏཏྠཱབྷཱཝཏོ. ཨཉྙཐཱ ཀརཛཀཱཡཱདིཀོ ཨཏྠོ ཨཏྠེཝ. ཏེནེཝཱཧ ‘‘པདསོདྷན…པེ… ཨཝཙནཱིཡཏྟཱ’’ཏི. ཨིདཱནི ཏམེཝ ཨཏྠཱབྷཱཝཾ བྱཏིརེཀཝསེན དསྶེནྟོ ‘‘ཡཐཱ’’ཏིཨཱདིམཱཧ. ཀསྨཱ པན ཨུབྷཡཏྠ སམཱནེ སམཱསཔདབྷཱཝེ ཏཏྠ ཨཏྠོ ལབྦྷཏི, ཨིདྷ ན ལབྦྷཏཱིཏི? བྷིནྣལཀྑཎཏྟཱ. ཏཏྠ ཧི རཱུཔཀྑནྡྷཱདིཔདཱནི ¶ སམཱནཱདྷིཀརཎཱནཱིཏི པདདྭཡཱདྷིཊྛཱནོ ཨེཀོ ཨཏྠོ ལབྦྷཏི, ཨིདྷ པན ཀཱཡསངྑཱརཱདིཔདཱནི བྷིནྣཱདྷིཀརཎཱནཱིཏི ཏཐཱརཱུཔོ ཨཏྠོ ན ལབྦྷཏཱིཏི. ཏེནཱཧ ‘‘ཡཐཱདྷིཔྤེཏཏྠཱབྷཱཝཏོ’’ཏི.

ཝིསུཾ ཨདཱིཔེཏྭཱཏི ‘‘ཀཱཡསངྑཱརོ’’ཏིཨཱདིནཱ སཧ ཝུཙྩམཱནོཔི ཀཱཡསངྑཱརསདྡོ ཝིསུཾ ཝིསུཾ ཨཏྟནོ ཨཏྠཾ ཨཛོཏེཏྭཱ ཨེཀཾ ཨཏྠཾ ཡདི དཱིཔེཏཱིཏི པརིཀཔྤཝསེན ཝདཏི. ཏེན ཀཱཡསངྑཱརསདྡཱནཾ སམཱནཱདྷིཀརཎཏཾ ཨུལླིངྒེཏི. ‘‘ཀཱཡསངྑཱརསདྡོ ཀཱཡསངྑཱརཏྠེ ཝཏྟམཱནོ’’ཏི ཀསྨཱ ཝུཏྟཾ, ‘‘སངྑཱརསདྡོ སངྑཱརཏྠེཝ ཝཏྟམཱནོ’’ཏི པན ཝཏྟབྦཾ སིཡཱ. ཨེཝཉྷི སཏི ཁནྡྷཏྠེ ཝཏྟམཱནོ ཁནྡྷསདྡོ ཝིཡ རཱུཔསདྡེན ཀཱཡསདྡེན ཝིསེསིཏབྦོཏི ཨིདཾ ཝཙནཾ ཡུཛྫེཡྻ, ཀཱཡསངྑཱརསདྡཱནཾ པན སམཱནཱདྷིཀརཎཏྟེ ན ཀེཝལཾ སངྑཱརསདྡོཡེཝ སངྑཱརཏྠེ ¶ ཝཏྟཏི, ཨཐ ཁོ ཀཱཡསདྡོཔཱིཏི ཨིམམཏྠཾ དསྶེཏུཾ ‘‘ཀཱཡསངྑཱརསདྡོ ཀཱཡསངྑཱརཏྠེ ཝཏྟམཱནོ’’ཏི ཝུཏྟཾ སིཡཱ, ཀཱཡསདྡེན སམཱནཱདྷིཀརཎེནཱཏི ཨདྷིཔྤཱཡོ. བྱདྷིཀརཎེན པན སངྑཱརསྶ ཝིསེསིཏབྦཏཱ ཨཏྠེཝཱཏི.

ཨིམསྶ ཝཱརསྶཱཏི སུདྡྷསངྑཱརཝཱརསྶ. པདསོདྷནེན དསྶིཏཱནནྟི ཨེཏྟཀེཝ ཝུཙྩམཱནེ ཏཏྠ དསྶིཏབྷཱཝསཱམཉྙེན སུདྡྷཀཱཡཱདཱིནམྤི གཧཎཾ ཨཱཔཛྫེཡྻཱཏི ཏཾནིཝཱརཎཏྠཾ ‘‘ཡཐཱདྷིཔྤེཏཱནམེཝཱ’’ཏི ཨཱཧ. ཀཱཡཱདིཔདེཧི ཨགྒཧིཏཏྟཱཏི སུདྡྷཀཱཡཱདིཔདེཧི ཨགྒཧིཏཏྟཱ. ཨིདྷ པནཱཏི ཨཊྛཀཐཱཡཾ. སུདྡྷསངྑཱརཝཱརཾ སནྡྷཱཡ ཝུཏྟམྤི སུདྡྷསངྑཱརཝཱརམེཝེཏྠ ཨནནུཛཱནནྟོ སཀལསངྑཱརཡམཀཝིསཡནྟི ཨཱཧ ‘‘ཨིདྷ པན སངྑཱརཡམཀེ’’ཏི. ཨདྷིཔྤེཏཏྠཔརིཙྩཱགོཏི ཨསྶཱསཔསྶཱསཱདིཀསྶ ཨདྷིཔྤེཏཏྠསྶ ཨགྒཧཎཾ ཙེཏནཱཀཱཡཨབྷིསངྑརཎསངྑཱརཱདི ཨནདྷིཔྤེཏཏྠཔརིགྒཧོ. ཡདི ‘‘ཀཱཡོ སངྑཱརོ’’ཏིཨཱདིནཱ སུདྡྷསངྑཱརཏཾམཱུལཙཀྐཝཱརཱ ཨཏྠཱབྷཱཝཏོ ཨིདྷ ན གཧེཏབྦཱ, ཨཐ ཀསྨཱ པཝཏྟིཝཱརམེཝ ཨནཱརབྷིཏྭཱ ཨཉྙཐཱ དེསནཱ ཨཱརདྡྷཱཏི ཨཱཧ ‘‘པདསོདྷནཝཱརཏཾམཱུལཙཀྐཝཱརེཧཱི’’ཏིཨཱདི. སཾསཡོ ཧོཏི སངྑཱརསདྡཝཙནཱིཡཏཱསཱམཉྙཏོ ཀཱཡསངྑཱརཱདིཔདཱནཾ བྱདྷིཀརཎབྷཱཝཏོ ཙ. ཏེནེཝཱཧ ‘‘ཨསམཱནཱདྷིཀརཎེཧི…པེ… དསྶིཏཱཡཱ’’ཏི.

པཎྞཏྟིཝཱརཝཎྞནཱ ནིཊྛིཏཱ.

༢. པཝཏྟིཝཱརཝཎྞནཱ

༡༩. སངྑཱརཱནཾ ¶ པུགྒལཱནཉྩ ཨོཀཱསཏྟཱཏི སམྤཡུཏྟཱནཾ ནིསྶཡཔཙྩཡཏཱཡ, སངྑཱརཱནཾ སམཱཔཛྫིཏབྦཏཱཡ པུགྒལཱནཾ ཛྷཱནསྶ ཨོཀཱསཏཱ ཝེདིཏབྦཱ, བྷཱུམི པན ཡདགྒེན པུགྒལཱནཾ ཨོཀཱསོ, ཏདགྒེན སངྑཱརཱནམྤི ཨོཀཱསོ. ‘‘དུཏིཡེ ཛྷཱནེ ཏཏིཡེ ཛྷཱནེ’’ཏིཨཱདིནཱ ཛྷཱནཾ, ‘‘ཀཱམཱཝཙརེ རཱུཔཱཝཙརེ’’ཏིཨཱདིནཱ བྷཱུམི ཙ ཝིསུཾ ཨོཀཱསབྷཱཝེན གཧིཏཱ. ཨིཏཱིཏི ཧེཏུཨཏྠོ, ཡསྨཱ ཛྷཱནམྤི ཨོཀཱསབྷཱཝེན གཧིཏཾ, ཏསྨཱཏི ཨཏྠོ. པུགྒལཝཱརེ ཙ ཨོཀཱསཝསེན པུགྒལགྒཧཎེཏི པུགྒལཝཱརེ ཙ ཡདཱ པུགྒལོཀཱསསངྑཱརཱདཱིནཾ ཨོཀཱསབྷཱཝེན གཡ྄ཧཏི, ཏདཱ ¶ ཏེསཾ དྭིནྣཾ ཨོཀཱསཱནཾ ཝསེན གཡ྄ཧནཾ ཧོཏཱིཏི ཡཏྠ སོ པུགྒལོ, ཡཉྩ ཏསྨིཾ པུགྒལེ ཛྷཱནཾ ཨུཔལབྦྷཏི, ཏེསཾ དྭིནྣཾ བྷཱུམིཛྷཱནསངྑཱཏཱནཾ ཨོཀཱསཱནཾ ཝསེན ཡཐཱརཧཾ ཀཱཡསངྑཱརཱདཱིནཾ གཧཎཾ ཀཐནཾ ཧོཏཱིཏི. ཏསྨཱཏི ཡསྨཱ ཨེཏདེཝ, ཏསྨཱ. དུཏིཡཏཏིཡཛ྄ཛྷཱནོཀཱསཝསེནཱཏི དུཏིཡཏཏིཡཛ྄ཛྷཱནསངྑཱཏཨོཀཱསཝསེན གཧིཏཱ. ཀཐཾ? ‘‘ཝིནཱ ཝིཏཀྐཝིཙཱརེཧི ཨསྶཱསཔསྶཱསཱནཾ ཨུཔྤཱདཀྑཎེ’’ཏི ཨེཝཾ གཧིཏཱ པུགྒལཱ ཝིསེསེཏྭཱ དསྶིཏཱ. ཀེན? ཏེནེཝ ཝིཏཀྐཝིཙཱརརཧིཏཨསྶཱསཔསྶཱསུཔྤཱདཀྑཎེནཱཏི ཡོཛེཏབྦཾ.

པཋམཀོཊྛཱསེ ཛྷཱནོཀཱསཝསེན པུགྒལདསྶནཾ ཀཏནྟི ཝུཏྟཾ ‘‘པུན…པེ… དསྶེཏཱི’’ཏི. བྷཱུམིཨོཀཱསཝསེན པུགྒལཾ དསྶེཏཱིཏི སམྦནྡྷོ. དྭིཔྤཀཱརཱནནྟི ཛྷཱནབྷཱུམིཨོཀཱསབྷེདེན དུཝིདྷཱནཾ. ཏེསནྟི པུགྒལཱནཾ. ‘‘པཋམཾ ཛྷཱནཾ སམཱཔནྣཱནཾ ཀཱམཱཝཙརཱན’’ནྟི ཙ ཨིདཾ ནིཝཏྟེཏབྦགཧེཏབྦསཱདྷཱརཎཝཙནཾ, ཏསྶ ཙ ཨཝཙྪེདཀཾ ‘‘ཨསྶཱསཔསྶཱསཱནཾ ཨུཔྤཱདཀྑཎེ’’ཏི ཨིདནྟི ཝུཏྟཾ ‘‘ཝིསེས…པེ… ཁཎེ’’ཏི. ཏེན ཝིསེསནེན. ཀཱམཱཝཙརཱནམྤཱིཏི པི-སདྡོ སམྤིཎྜནཏྠོ. ཏེན ན ཀེཝལཾ རཱུཔཱརཱུཔཱཝཙརེསུ པཋམཛ྄ཛྷཱནཾ སམཱཔནྣཱནཾ, ཨཐ ཁོ ཀཱམཱཝཙརཱནམྤཱིཏི ཝུཏྟམེཝཏྠཾ སམྤིཎྜེཏི. ཀཱིདིསཱནཾ ཀཱམཱཝཙརཱནནྟི ཨཱཧ ‘‘གབྦྷགཏཱདཱིན’’ནྟི. ཨཱདི-སདྡེན ཨུདཀནིམུགྒཝིསཉྙིབྷཱུཏཱ སངྒཧིཏཱ, ན མཏཙཏུཏྠཛ྄ཛྷཱནསམཱཔནྣནིརོདྷསམཱཔནྣཱ. ཏེ ཧི ཨཀཱམཱཝཙརཏཱཡ ཝིཡ རཱུཔཱརཱུཔབྷཝསམངྒིནོ ཝིཏཀྐཝིཙཱརུཔྤཏྟིཡཱཝ ནིཝཏྟིཏཱ. ཨེཀནྟིཀཏྟཱཏི ཨསྶཱསཔསྶཱསཱབྷཱཝསྶ ཨེཀནྟིཀཏྟཱ. ནིདསྶིཏཱཏི རཱུཔཱརཱུཔཱཝཙརཱ ནིདསྶནབྷཱཝེན ཝུཏྟཱ, ན ཏབྦིརཧིཏཱནཾ ཨཉྙེསཾ ཨབྷཱཝཏོཏི ཨདྷིཔྤཱཡོ. པཋམཛ྄ཛྷཱནོཀཱསཱ ཨསྶཱསཔསྶཱསཝིརཧཝིསིཊྛཱཏི ཡོཛནཱ. པཋམཉྩེཏྠ པཋམཛ྄ཛྷཱནསམངྒཱིནཾ རཱུཔཱརཱུཔཱཝཙརཱནཾ གཧཎཾ, དུཏིཡཾ ཡཐཱཝུཏྟགབྦྷགཏཱདཱིནཾ. ཨིམིནཱ ནཡེནཱཏི ཡྭཱཡཾ ¶ ‘‘སངྑཱརཱནཾ པུགྒལཱནཉྩཱ’’ཏིཨཱདིནཱ ཛྷཱནོཀཱསབྷཱུམིཨོཀཱསཝསེན པུགྒལཝིབྷཱགནཡོ ཝུཏྟོ, ཨིམིནཱ ནཡེན ཨུཔཱཡེན. སབྦཏྠ སབྦཔུཙྪཱསུ.

༢༡. ཨེཏསྨིཾ པན ཨཏྠེ སཏཱིཏི ཡྭཱཡཾ ཨུཔྤཏྟིབྷཱུམིཡཱ ཛྷཱནཾ ཝིསེསེཏྭཱ ཨཏྠོ ཝུཏྟོ, ཨེཏསྨིཾ ཨཏྠེ གཡ྄ཧམཱནེ ཨཉྙཏྠཔི ཨུཔྤཏྟིབྷཱུམིཡཱ ཛྷཱནཾ ཝིསེསིཏབྦཾ བྷཝེཡྻ, ཏཐཱ ཙ ཨནིཊྛཾ ཨཱཔཛྫཏཱིཏི དསྶེནྟོ ‘‘ཙཏུཏྠཛ྄ཛྷཱནེ’’ཏིཨཱདིམཱཧ. ཀིཾ པན ཏཾ ཨནིཊྛནྟི ཨཱཧ ‘‘བྷཱུམཱིནཾ ¶ ཨོཀཱསབྷཱཝསྶེཝ ཨགྒཧིཏཏཱཔཏྟིཏོ’’ཏི. ཡཏྠ ཡཏྠ ཧི ཛྷཱནཾ གཡ྄ཧཏི, ཏཏྠ ཏཏྠ ཏཾ ཨུཔྤཏྟིབྷཱུམིཡཱ ཝིསེསིཏབྦཾ ཧོཏི. ཏཐཱ སཏི ཛྷཱནོཀཱསོཝ གཧིཏོ སིཡཱ, ན བྷཱུམིཨོཀཱསོ གུཎབྷཱུཏཏྟཱ. ཀིཉྩ ‘‘ཙཏུཏྠཛ྄ཛྷཱནེ རཱུཔཱཝཙརེ ཨརཱུཔཱཝཙརེ’’ཏི ཨེཏྠ རཱུཔཱརཱུཔབྷཱུམིཡཱ ཙཏུཏྠཛ྄ཛྷཱནེ ཝིསེསིཡམཱནེ ཏདེཀདེསོཝ ཨོཀཱསཝསེན གཧིཏོ སིཡཱ, ན སབྦཾ ཙཏུཏྠཛ྄ཛྷཱནཾ. ཏེནཱཧ ‘‘སབྦཙཏུཏྠཛ྄ཛྷཱནསྶ ཨོཀཱསཝསེན ཨགྒཧིཏཏཱཔཏྟིཏོ ཙཱ’’ཏི. ཛྷཱནབྷཱུམོཀཱསཱནནྟི ཛྷཱནོཀཱསབྷཱུམིཨོཀཱསཱནཾ.

ནནུ ཙ ཛྷཱནབྷཱུམིཨོཀཱསེ ཨསངྐརཏོ ཡོཛིཡམཱནེ ན སབྦསྨིཾ པཋམཛ྄ཛྷཱནོཀཱསེ ཀཱཡསངྑཱརོ ཝཙཱིསངྑཱརོ ཙ ཨཏྠི, ཏཐཱ སབྦསྨིཾ ཀཱམཱཝཙརོཀཱསེཏི ཙོདནུཔྤཏྟིཾ སནྡྷཱཡ ཏསྶ པརིཧཱརཾ ཝཏྟུཾ ‘‘ཡདིཔཱི’’ཏིཨཱདིམཱཧ. ཏཏྠཱཏི པཋམཛ྄ཛྷཱནོཀཱསེ ཀཱམཱཝཙརོཀཱསེ ཙ. ཏཾདྭཡུཔྤཏྟཱིཏི ཏསྶ ཀཱཡཝཙཱིསངྑཱརདྭཡསྶ ཨུཔྤཏྟི. ཨོཀཱསདྭཡསྶ ཨསངྐརཏོ གཧཎེ ཨཡཉྩ གུཎོ ལདྡྷོ ཧོཏཱིཏི ཨཱཧ ‘‘ཝིསུཾ…པེ… ན ཝཏྟབྦཾ ཧོཏཱི’’ཏི. ཏཏྠ ཨངྒམཏྟཝསེནཱཏི ཝིཏཀྐཱདིཛྷཱནངྒམཏྟཝསེན. ཏཏྠ ཝཏྟབྦཾ ཨཊྛཀཐཱཡཾ ཝུཏྟམེཝ. ཝིཏཀྐརཧིཏོཔི ཝིཙཱརོ ཝཙཱིསངྑཱརོཡེཝཱཏི ཨཱཧ ‘‘ཨཝིཏཀྐ…པེ… གཙྪཏཱི’’ཏི. མུདྡྷབྷཱུཏཾ དུཏིཡཛ྄ཛྷཱནནྟི ཙཏུཀྐནཡེ དུཏིཡཛ྄ཛྷཱནམཱཧ. ཏཉྷི སཀལཀྑོབྷཀརདྷམྨཝིགམེན ཝིཏཀྐེཀངྒཔྤཧཱཡིཀཏོ སཱཏིསཡཏྟཱ ‘‘མུདྡྷབྷཱུཏ’’ནྟི ཝཏྟབྦཏཾ ལབྷཏི. ཨསཉྙསཏྟཱ ཝིཡཱཏི ཨིདཾ ཝིསདིསུདཱཧརཎཾ དཊྛབྦཾ.

༣༧. ཨཱཝཛྫནཏོ པུབྦེ པཝཏྟཾ སབྦཾ ཙིཏྟཾ པཊིསནྡྷིཙིཏྟེན སམཱནགཏིཀཏྟཱ ཨེཀཾ ཀཏྭཱ ཝུཏྟཾ ‘‘པཋམཏོ’’ཏི. ཏེནཱཧ ‘‘ཨཝིཏཀྐཨཝིཙཱརཏོ’’ཏིཨཱདི. ཙིཏྟསངྑཱརསྶ ཨཱདིདསྶནཏྠནྟི སུདྡྷཱཝཱསེ ཙིཏྟསངྑཱརསྶ ཨཱདིདསྶནཏྠཾ. ཏཐཱ ‘‘ཝཙཱིསངྑཱརསྶ ཨཱདིདསྶནཏྠ’’ནྟི ཨེཏྠཱཔི.

པཝཏྟིཝཱརཝཎྞནཱ ནིཊྛིཏཱ.

སངྑཱརཡམཀཝཎྞནཱ ནིཊྛིཏཱ.

༧. ཨནུསཡཡམཀཾ

པརིཙྪེདཔརིཙྪིནྣུདྡེསཝཱརཝཎྞནཱ

༡. ‘‘ཨཝིཛྫཱསམུདཡཱ ¶ ¶ རཱུཔསམུདཡོ, ཏཎྷཱསམུདཡཱ རཱུཔསམུདཡོ, ཀམྨསམུདཡཱ རཱུཔསམུདཡོ. ལོབྷོ ནིདཱནཾ ཀམྨཱནཾ སམུདཡཱཡཱ’’ཏི ཙ ཨེཝམཱདིནཱ ཀུསལམཱུལཀུསལཱདཱིནཾ པཙྩཡབྷཱཝོ ཝུཏྟོཏི ཨཱཧ ‘‘པཙྩཡདཱིཔཀེན མཱུལཡམཀེནཱ’’ཏི. ‘‘སོ ‘ཨནིཙྩཾ རཱུཔཾ, ཨནིཙྩཾ རཱུཔ’ནྟི ཡཐཱབྷཱུཏཾ པཛཱནཱཏི. ཙཀྑུ ཨནིཙྩཾ, རཱུཔཱ ཨནིཙྩཱ’’ཏི ཙ ཨཱདིནཱ བཧུལཁནྡྷཱདིམུཁེན ཨནིཙྩཱནུཔསྶནཱདཡོ ཝིཧིཏཱཏི ཝུཏྟཾ ‘‘ཁནྡྷཱདཱིསུ ཏཱིརཎབཱཧུལླཏོ’’ཏི. ཀིལེསཱནཾ སམུཙྪིནྡནཏོ པརཾ པཧཱནཀིཙྩཾ ནཏྠཱིཏི ཨཱཧ ‘‘ཨནུསཡཔཧཱནནྟཱ པཧཱནཔརིཉྙཱ’’ཏི. ཡདིཔི ཨནུསཡེཧི སམྤཡོགཏོ ཨཱརམྨཎཏོ ཝཱ པཧཱནཔརིཉྙཱ ནཔྤཝཏྟཏི, ཨནུསཡཱབྷཱཝེ པན ཏདཱརམྦྷོ ཨེཝ ནཏྠཱིཏི ཀཏྭཱ ཝུཏྟཾ ‘‘ཨནུསཡེཧི པཧཱནཔརིཉྙཾ ཝིབྷཱཝེཏུ’’ནྟི. ཨནུསཡབྷཱཝེན ལབྦྷམཱནཱནནྟི ཨནུསཡབྷཱཝེན ཝིཛྫམཱནཱནཾ, ཨནུསཡསབྷཱཝཱནནྟི ཨཏྠོ. ཏཱིཧཱཀཱརེཧཱིཏི པརིཙྪེདཱདཱིཧི ཏཱིཧི པཀཱརེཧི. ཨནུསཡེསུ གཎནསརཱུཔཔྤཝཏྟིཊྛཱནཏོ ཨབོདྷིཏེསུ པུགྒལོཀཱསཱདིཝསེན པཝཏྟིཡམཱནཱ ཏབྦིསཡཱ དེསནཱ ན སུཝིཉྙེཡྻཱ ཧོཏཱིཏི དསྶེནྟོ ཨཱཧ ‘‘ཏེསུ ཏཐཱ…པེ… དུརཝབོདྷཏྟཱ’’ཏི.

ཨེཏྠ པུརིམེསཱུཏི པདུདྡྷཱརོ ཨནནྟརསྶ ཝིདྷི པཊིསེདྷོ ཝཱཏི ཀཏྭཱ སཱནུསཡཝཱརཱདིཨཔེཀྑོ, ན ཨནུསཡཝཱརཱདིཨཔེཀྑོ ཨནུསཡཝཱརེ པཱལི༹ཝཝཏྠཱནསྶ པགེཝ ཀཏཏྟཱཏི དསྶེནྟོ ‘‘ཨེཏེསུ སཱནུསཡཝཱརཱདཱིསུ པུརིམེསཱུཏི ཨཏྠོ’’ཏི ཨཱཧ. སཱནུསཡཝཱརཱདཱིསུ ཧི ཏཱིསུ པུརིམེསུ ཨོཀཱསཝཱརེ ཡཏོ ཏཏོཏི དེསནཱ པཝཏྟཱ, ན ཨནུསཡཝཱརཱདཱིསུ. ཨཏྠཝིསེསཱབྷཱཝཏོཏི ‘‘ཀཱམདྷཱཏུཡཱ ཙུཏསྶཱ’’ཏིཨཱདིནཱ (ཡམ. ༢.ཨནུསཡཡམཀ.༣༠༢) པཱལི༹ཨཱགཏཔདསྶ, ‘‘ཀཱམདྷཱཏུཾ ཝཱ པན ཨུཔཔཛྫནྟསྶཱ’’ཏིཨཱདིནཱ ཡམཀབྷཱཝེན ཨཊྛཀཐཱཨཱདིགཏཔདསྶ ཙ ཨཏྠཝིསེསཱབྷཱཝཏོ. ཀཐམཡཾ ཡམཀདེསནཱ སིཡཱ དུཏིཡསྶ པདསྶ ཨབྷཱཝཏོཏི ཨཏྠོ. ཡདི ནཱཡཾ ཡམཀདེསནཱ, ཨཐ ཀསྨཱ ཨིདྷཱགཏཱཏི ཨཱཧ ‘‘པུརིམཝཱརེ ཧཱི’’ཏིཨཱདི. ཏཏྠ ཨནུསཡཊྛཱནཔརིཙྪེདདསྶནནྟི ཨནུསཡཊྛཱནཏཱཡ ¶ པརིཙྪེདདསྶནཾ. ཨེཝམྤི ཀཐམིདཾ ཨནུསཡཡམཀཾ ཡམཀདེསནཱསབྦྷཱཝཏོཏི ཨཱཧ ‘‘ཡམཀདེསནཱ…པེ… ནཱམཾ དཊྛབྦ’’ནྟི ¶ . ཨཏྠཝསེནཱཏི པཊིལོམཏྠཝསེན. པཋམཔདེན ཧི ཝུཏྟསྶ ཝིཔརིཝཏྟནཝསེནཔི ཡམཀདེསནཱ ཧོཏི ‘‘རཱུཔཾ རཱུཔཀྑནྡྷོ, རཱུཔཀྑནྡྷོ རཱུཔ’’ནྟིཨཱདཱིསུ (ཡམ. ༡.ཁནྡྷཡམཀ.༢), ཏཏྠ པན ཨཏྠཝིསེསོ ཨཏྠི, ཨིདྷ ནཏྠི, ཏསྨཱ ན ཏཐཱ དེསནཱ ཀཏཱཏི དསྶེནྟོ ཨཱཧ ‘‘ཨཏྠཝིསེསཱབྷཱཝཏོ པན ན ཝུཏྟཱ’’ཏི. ལབྦྷམཱནཏཱཝསེནཱཏི པུཙྪཱཡ ལབྦྷམཱནཏཱཝསེན.

ཨུཔྤཏྟིཨརཧཏཾ དསྶེཏཱིཏི ཨིམིནཱ ནིཔྤརིཡཱཡེན ཨནུསཡཱ ཨནཱགཏཱཏི དསྶིཏཾ ཧོཏི ཡཏོ ཏེ མགྒཝཛ྄ཛྷཱ, ན ཙ ཨཏཱིཏཔཙྩུཔྤནྣཱ ཨུཔྤཏྟིརཧཱཏི ཝུཙྩནྟི ཨུཔྤནྣཏྟཱ. ཡཾསབྷཱཝཱ པན དྷམྨཱ ཨནཱགཏཱ ཨནུསཡཱཏི ཝུཙྩནྟི, ཏཾསབྷཱཝཱ ཨེཝ ཏེ ཨཏཱིཏཔཙྩུཔྤནྣཱ ཝུཏྟཱ. ན ཧི དྷམྨཱནཾ ཨདྡྷཱབྷེདེན སབྷཱཝབྷེདོ ཨཏྠི, ཏསྨཱ ཨནུསཡཱནཾ ཨཏཱིཏཔཙྩུཔྤནྣབྷཱཝཱ པརིཡཱཡཏོ ལབྦྷནྟཱིཏི ཨཊྛཀཐཱཡཾ (ཡམ. ཨཊྛ. ཨནུསཡཡམཀ ༡) ‘‘ཨཏཱིཏོཔི ཧོཏཱི’’ཏིཨཱདི ཝུཏྟཾ. ཨེཝཾཔཀཱརཱཏི ཨནུསཡཔྤཀཱརཱ, ཀཱརཎལཱབྷེ སཏི ཨུཔྤཛྫནཱརཧཱཨིཙྩེཝ ཨཏྠོ. སོ ཨེཝཾཔཀཱརོ ཨུཔྤཛྫནཝཱརེ ཨུཔྤཛྫཏི-སདྡེན གཧིཏོ ཨུཔྤཛྫནཱརཧཏཱཡ ཨཝིཙྪིནྣབྷཱཝདཱིཔནཏྠནྟི ཨདྷིཔྤཱཡོ. ཏེནཱཧ ‘‘ན ཁནྡྷཡམཀཱདཱིསུ ཝིཡ ཨུཔྤཛྫམཱནཏཱ’’ཏི, པཙྩུཔྤནྣཏཱཏི ཨཏྠོ. ཏེནེཝཱཏིཨཱདིནཱ ཡཐཱཝུཏྟམཏྠཾ པཱཀཊཏརཾ ཀརོཏི. ཏཏྠ ནིནྣཱནཱཀརཎོཏི ནིབྦིསེསོ. ཨུཔྤཛྫནཱནུསཡཱནཾ ནིནྣཱནཱཀརཎཏྟཱ ཨེཝ ཧི ‘‘ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏཱི’’ཏི ཝིབྷངྒེ (ཝིབྷ. ༢༠༣) ཨཱགཏཾ. ཨནུསཡནཉྷི ཨེཏྠ ནིཝིསནནྟི ཨདྷིཔྤེཏཾ.

ཨིདཱནི ཡེན པརིཡཱཡེན ཨཏཱིཏཔཙྩུཔྤནྣེསུ ཨནུསཡཝོཧཱརོ, ཏཾ དསྶེཏུཀཱམོ ཨནཱགཏམྤི ཏེཧི སདྡྷིཾ ཨེཀཛ྄ཛྷཾ ཀཏྭཱ དསྶེནྟོ ‘‘ཨནུརཱུཔཾ ཀཱརཎཾ པན…པེ… ཝུཙྩནྟཱི’’ཏི ཨཱཧ. ཨེཏེན བྷཱུཏཔུབྦགཏིཡཱ ཨཏཱིཏཔཙྩུཔྤནྣེསུ ཨུཔྤཏྟིརཧཏཱ ཝེདིཏབྦཱཏི དསྶེཏི. ཨུཔྤཏྟིཨརཧཏཱ ནཱམ ཀིལེསཱནཾ མགྒེན ཨསམུཙྪིནྣཏཱཡ ཝེདིཏབྦཱ. སཱ ཙ ཨཏཱིཏཔཙྩུཔྤནྣེསུཔི ཨཏྠེཝཱཏི པཀཱརནྟརེནཔི ཏེསཾ པརིཡཱཡཏོཝ ཨནུསཡབྷཱཝཾ པཀཱསེཏི. ཏེནེཝཱཧ ‘‘མགྒསྶ པནཱ’’ཏིཨཱདི. ཏཱདིསཱནནྟི ཡེ མགྒབྷཱཝནཱཡ ཨསཏི ཨུཔྤཏྟིརཧཱ, ཏཱདིསཱནཾ. དྷམྨོ ཨེཝ ཙ ཨུཔྤཛྫཏི, ན དྷམྨཱཀཱརོཏི ཨདྷིཔྤཱཡོ. ན ཧི དྷམྨཱཀཱརཱ ཨནིཙྩཏཱདཡོ ¶ ཨུཔྤཛྫནྟཱིཏི ཝུཙྩནྟི. ཡདི པན ཏེ ཨུཔྤཱདཱདིསམངྒིནོ སིཡུཾ, དྷམྨཱ ཨེཝ སིཡུཾ. ཏེན ཝུཏྟཾ ‘‘ཨཔྤཧཱིནཱཀཱརོ ཙ ཨུཔྤཛྫཏཱིཏི ཝཏྟུཾ ན ཡུཛྫཏཱི’’ཏི.

ཝུཏྟམྤི ཐཱམགམནཾ ཨགྒཧེཏྭཱ ཨཔྤཧཱིནཊྛམཏྟམེཝ གཧེཏྭཱ ཙོདཀོ ཙོདེཏཱིཏི དསྶེནྟོ ཨཱཧ ¶ ‘‘སཏྟཱནུསཡ…པེ… ཨཱཔཛྫཏཱིཏི ཙེ’’ཏི. ན ཧི ཐཱམགམནེ གཧིཏེ ཙོདནཱཡ ཨོཀཱསོ ཨཏྠི. ཏེནཱཧ ‘‘ནཱཔཛྫཏཱི’’ཏིཨཱདི. ཝུཏྟཾ ཨཊྛཀཐཱཡཾ, ན ཀེཝལམཊྛཀཐཱཡམེཝ པཱཋགཏོཝཱཡམཏྠོ, ཏསྨཱ ཨེཝམེཝ གཧེཏབྦོཏི དསྶེནྟོ ‘‘ཐཱམགཏོ…པེ… ཡུཏྟ’’ནྟི ཝཏྭཱ ཀིཾ པན ཏཾ ཐཱམགམནནྟི པརཱསངྐཾ ནིཝཏྟེནྟོ ‘‘ཐཱམགཏནྟི ཙ…པེ… ཝུཏྟཱ’’ཏི ཨཱཧ. ཏཏྠ ཨཉྙེཧི ཨསཱདྷཱརཎོཏི ཀིལེསཝཏྠུཨཱདཱིནཾ ཀིལེསཏཱདིསབྷཱཝོ ཝིཡ ཀཱམརཱགཱདིཏོ ཨཉྙཏྠ ཨལབྦྷམཱནོ ཏེསཾཡེཝ ཨཱཝེཎིཀོ སབྷཱཝོ, ཡཏོ ཏེ བྷཝབཱིཛཾ བྷཝམཱུལནྟི ཙ ཝུཙྩནྟི. ཡསྨཱ ཙ ཐཱམགམནཾ ཏེསཾ ཨནཉྙསཱདྷཱརཎོ སབྷཱཝོ, ཏསྨཱ ཨནུསཡནནྟི ཝུཏྟཾ ཧོཏཱིཏི དསྶེནྟོ ‘‘ཐཱམགཏོཏི ཨནུསཡསམངྒཱིཏི ཨཏྠོ’’ཏི ཨཱཧ.

‘‘ཡསྶ ཀཱམརཱགཱནུསཡོ ཨནུསེཏི, ཏསྶ པཊིགྷཱནུསཡོ ཨནུསེཏཱིཏི? ཨཱམནྟཱ’’ཏིཨཱདིནཱ (ཡམ. ༢.ཨནུསཡཡམཀ.༣) ཨནུསཡཝཱརེ ཝུཏྟོ ཨེཝ ཨཏྠོ ‘‘ཡསྶ ཀཱམརཱགཱནུསཡོ ཨུཔྤཛྫཏི, ཏསྶ པཊིགྷཱནུསཡོ ཨུཔྤཛྫཏཱིཏི? ཨཱམནྟཱ’’ཏིཨཱདིནཱ (ཡམ. ༢.ཨནུསཡཡམཀ.༣༠༠) ཝུཏྟོཏི ཨནུསཡནཱཀཱརོ ཨེཝ ཨུཔྤཛྫནཝཱརེ ཨུཔྤཛྫཏི-སདྡེན གཧིཏོཏི ‘‘ཨུཔྤཛྫནཝཱརོ ཨནུསཡཝཱརེན ནིནྣཱནཱཀརཎོ ཝིབྷཏྟོ’’ཏི ཡཾ ཝུཏྟཾ, ཏཏྠ ཝིཙཱརཾ ཨཱརབྷཏི ‘‘ཨནུསཡཨུཔྤཛྫནཝཱརཱནཾ སམཱནགཏིཀཏྟཱ’’ཏིཨཱདིནཱ. ‘‘ཨུཔྤཛྫཏཱི’’ཏི ཝཙནཾ སིཡཱཏི ཨུཔྤཛྫནཝཱརེ ‘‘ཨུཔྤཛྫཏཱི’’ཏི ཝཙནཾ ཨཔྤཧཱིནཱཀཱརདཱིཔཀཾ སིཡཱ. ཏཐཱ ཙ སཏི ཡཐཱ ‘‘ཨིམསྶ ཨུཔྤཱདཱ’’ཏི ཨེཏྠ ཨིམསྶ ཨནིརོདྷཱཏི ཨཡམཏྠོཔི ཉཱཡཏི, ཨེཝཾ ‘‘ཨུཔྤཛྫཏཱི’’ཏི ཝུཏྟེ ཨཏྠཏོ ‘‘ན ཨུཔྤཛྫཏཱི’’ཏི ཨཡམཏྠོ ཝུཏྟོ ཧོཏི ཨཔྤཧཱིནཱཀཱརསྶ ཨུཔྤཏྟིརཧབྷཱཝསྶ ཨནུཔྤཛྫམཱནསབྷཱཝཏྟཱཏི ཙོདནཾ དསྶེནྟོ ‘‘ཨུཔྤཛྫཏཱིཏི ཝཙནསྶ ཨཝུཏྟཏཱ ན སཀྐཱ ཝཏྟུནྟི ཙེ’’ཏི ཨཱཧ. ཝཙནཏྠཝིསེསེན ཏཾདྭཡསྶ ཝུཏྟཏྟཱཏི ཨེཏེན དྷམྨནཱནཏྟཱབྷཱཝེཔི པདཏྠནཱནཏྠེན ཝཱརནྟརདེསནཱ ཧོཏི ཡཐཱ ¶ སཧཛཱཏསཾསཊྛཝཱརེསཱུཏི དསྶེཏི. ཨནུརཱུཔཾ ཀཱརཎཾ ལབྷིཏྭཱཏིཨཱདི ཏམེཝ ཝཙནཏྠཝིསེསཾ ཝིབྷཱཝེཏུཾ ཨཱརདྡྷཾ. ཨུཔྤཏྟིཡོགྒནྟི ཨུཔྤཏྟིཡཱ ཡོགྒཾ, ཨུཔྤཛྫནསབྷཱགཏནྟི ཨཏྠོ. ཡཏོ ཨནུསཡཱ ཨུཔྤཏྟིརཧཱཏི ཝུཙྩནྟི, ཨེཀནྟེན ཙེཏདེཝ སམྤཊིཙྪིཏབྦཾ ‘‘ཡསྶ ཀཱམརཱགཱནུསཡོ ཨུཔྤཛྫཏི, ཏསྶ པཊིགྷཱནུསཡོ ཨུཔྤཛྫཏཱིཏི? ཨཱམནྟཱ’’ཏིཨཱདིཝཙནཏོ (ཡམ. ༢.ཨནུསཡཡམཀ.༣༠༠). ‘‘ཨནུསེནྟཱིཏི ཨནུསཡཱ’’ཏི ཨེཏྟཀེ ཝུཏྟེ སདཱ ཝིཛྫམཱནཱ ནུ ཁོ ཏེ ཨཔརིནིཔྥནྣཱནུསཡནཊྛེན ‘‘ཨནུསཡཱ’’ཏི ཝུཙྩནྟཱིཏི ཨཡམཏྠོ ཨཱཔཛྫཏཱིཏི ཏཾནིསེདྷནཏྠཾ ‘‘ཨནུརཱུཔཾ ཀཱརཎཾ ལབྷིཏྭཱ ཨུཔྤཛྫནྟཱི’’ཏི ཝུཏྟཾ. ཨུཔྤཏྟིཨརཧབྷཱཝེན ཐཱམགཏཏཱ ཨནུསཡཊྛོཏི ཡཾ ཏེསཾ ཨུཔྤཏྟིཡོགཝཙནཾ ཝུཏྟཾ, ཏཾ སམྨདེཝ ¶ ཝུཏྟནྟི ཨིམམཏྠམཱཧ ‘‘ཨནུསཡསདྡསྶཱ’’ཏིཨཱདིནཱ. ཏེན ཝཱརདྭཡདེསནུཔྤཱདིཀཱ ཨནུསཡསདྡཏྠནིདྡྷཱརཎཱཏི དསྶེཏི. ཏམྤི སུཝུཏྟམེཝ ཨིམིནཱ ཏནྟིཔྤམཱཎེནཱཏི ཨིདམྤི ‘‘ཨབྷིདྷམྨེ ཏཱཝཱ’’ཏིཨཱདིནཱ ཨཱགཏཾ ཏིཝིདྷམེཝ ཏནྟིཾ སནྡྷཱཡཱཧཱཏི དསྶེནྟོ ཨཱཧ ‘‘ཏནྟིཏྟཡེནཔི ཧི ཙིཏྟསམྤཡུཏྟཏཱ དཱིཔིཏཱ ཧོཏཱི’’ཏི.

པརིཙྪེདཔརིཙྪིནྣུདྡེསཝཱརཝཎྞནཱ ནིཊྛིཏཱ.

ཨུཔྤཏྟིཊྛཱནཝཱརཝཎྞནཱ

༢. ཨེཝཾ སཏཱིཏི ཝེདནཱནཾ ཝིསེསིཏབྦབྷཱཝེ ཀཱམདྷཱཏུཡཱ ཙ ཝིསེསནབྷཱཝེ སཏི. ཀཱམཱདྷཱཏུཡཱ ཨནུསཡནཊྛཱནཏཱ ན ཝུཏྟཱ ཧོཏི ཨཔྤདྷཱནབྷཱཝཏོ, པདྷཱནཱཔྤདྷཱནེསུ པདྷཱནེ ཀིཙྩདསྶནཏོ, ཝིསེསནབྷཱཝེན ཙརིཏབྦཏཱཡ ཙཱཏི ཨདྷིཔྤཱཡོ. ཧོཏུ ཀོ དོསོཏི ཀདཱཙི ཝདེཡྻཱཏི ཨཱསངྐམཱནོ ཨཱཧ ‘‘དྭཱིསུ པནཱ’’ཏིཨཱདི. དྭཱིསཱུཏི ནིདྡྷཱརཎེ བྷུམྨཾ, ཏཐཱ ‘‘ཏཱིསུ དྷཱཏཱུསཱུ’’ཏི ཨེཏྠཱཔི. ཏསྨཱཏི ཡསྨཱ དྷཱཏུཨཱདིབྷེདེན ཏིཝིདྷཾ ཨནུསཡཊྛཱནཾ, ཏཏྠ ཙ རཱུཔཱརཱུཔདྷཱཏཱུནཾ བྷཝརཱགསྶ ཨནུསཡཊྛཱནཏཱ ཝུཏྟཱཏི ཀཱམདྷཱཏུཡཱ ཀཱམརཱགསྶ ཨནུསཡཊྛཱནཏཱ ཨེཀནྟེན ཝཏྟབྦཱ, ཏསྨཱ. ཏཱིསུ དྷཱཏཱུསུ ཏཱིསུ ཝེདནཱསཱུཏི ཙ ནིདྡྷཱརཎེ བྷུམྨཾ, ཀཱམདྷཱཏུཡཱ དྭཱིསུ ཝེདནཱསཱུཏི ཙ ཨཱདྷཱརེ.

དྭཱིསྭེཝཱཏི ¶ དྭཱིསུ སུཁོཔེཀྑཱསུ ཨེཝ. སབྦཱསུ དྭཱིསཱུཏི ཡཱསུ ཀཱསུཙི དྭཱིསུ. ཏེནཱཏི ‘‘ཀཱམརཱགོ དྭཱིསུ ཝེདནཱསུ ཨནུསེཏཱི’’ཏི ཝཙནསཱམཏྠིཡལདྡྷེན ཝིསེསནིཙྪཡེནེཝ. བྷཝརཱགཱནུསཡཊྛཱནཾ རཱུཔཱརཱུཔདྷཱཏུཡོ ཏདནུརཱུཔཱ ཙ ཝེདནཱ. ན ཧི དྭཱིསུ ཝེདནཱསུ ཀཱམརཱགཱནུསཡོཝ ཨནུསེཏཱིཏི ཨཝདྷཱརཎཾ ཨིཙྪིཏཾ, དྭཱིསུ ཨེཝ པན ཝེདནཱསཱུཏི ཨིཙྪིཏཾ. ཏེནེཝཱཧ ‘‘དྭཱིསྭེཝ ཨནུསེཏི, ན ཏཱིསཱུ’’ཏི. ཨཊྛཱནཉྩ ཨནུསཡཱནཾ, ཀིཾ ཏཾ ཨཔརིཡཱཔནྣཾ སཀྐཱཡེ? སབྦོ ལོཀུཏྟརོ དྷམྨོ. ཙ-སདྡེན པཊིགྷཱནུསཡཊྛཱནཾ སངྒཎྷཱཏི. ཏེན ཝུཏྟཾ ‘‘ཡཐཱ ཙཱ’’ཏིཨཱདི. ཨཉྙཱཏི ཀཱམརཱགཱནུསཡཊྛཱནབྷཱུཏཱ དྭེ ཝེདནཱ.

ཨཉྙེསུ ¶ དྭཱིཧི ཝེདནཱཧི ཝིཔྤཡུཏྟེསུ. པིཡརཱུཔསཱཏརཱུཔེསཱུཏི པིཡཱཡིཏབྦམདྷུརསབྷཱཝེསུ. ཝིསེསནཉྩེཏཾ རཱུཔཱདཱིནཾ སབྦདྭཱརསབྦཔུརིསེསུ ཨིཊྛབྷཱཝསྶ ཨནིཡཏཏཱཡ ཀཏཾ. སཱཏསནྟསུཁགིདྡྷིཡཱཏི སཱཏསུཁེ སནྟསུཁེ ཙ གིཛ྄ཛྷནཱཀཱརེན ཨབྷིཀངྑནཱཀཱརེན. ཏཏྠ སཱཏསུཁཾ ཀཱཡིཀཾ, སནྟསུཁཾ ཙེཏསིཀཾ. སཱཏསུཁཾ ཝཱ ཀཱཡིཀསུཁཾ, སནྟསུཁཾ ཨུཔེཀྑཱསུཁཾ. ཏཐཱ ཙཱཧུ ‘‘ཨུཔེཀྑཱ པན སནྟཏྟཱ, སུཁམིཙྩེཝ བྷཱསིཏཱ’’ཏི (ཝིསུདྡྷི. ༢.༦༤༤; མཧཱནི. ཨཊྛ. ༢༧). པརིཏྟཾ ཝཱ ཨོལཱ༹རིཀཾ སུཁཾ སཱཏསུཁཾ, ཨནོལཱ༹རིཀཾ སནྟསུཁཾ. པརིཏྟགྒཧཎཉྩེཏྠ ཀཱམརཱགཱནུསཡསྶ ཨདྷིཔྤེཏཏྟཱ. ཨཉྙཏྠཱཏི ཝེདནཱཧི ཨཉྙཏྠ. སོཏི ཀཱམརཱགཱནུསཡོ. ཝེདནཱསུ ཨནུགཏོ ཧུཏྭཱ སེཏཱིཏི ཝེདནཱཔེཀྑོ ཨེཝ ཧུཏྭཱ པཝཏྟཏི ཡཐཱ པུཏྟཱཔེཀྑཱཡ དྷཱཏིཡཱ ཨནུགྒཎྷནཔྤཝཏྟི, སཡནསངྑཱཏཱ པཝཏྟི ཙ ཀཱམརཱགསྶ ནིཀཱམནམེཝ. ཏེནཱཧ ‘‘སུཁམིཙྩེཝ ཨབྷིལཔཏཱི’’ཏི. ཡཐཱ ཏསྶ, ཨེཝཾ པཊིགྷཱནུསཡཱདཱིནམྤི ཝུཏྟནིཡཱམེན ཡཐཱསཀཾ ཀིཙྩཀརཎམེཝ དུཀྑཝེདནཱདཱིསུ ཨནུསཡནཾ དཊྛབྦཾ. ཏེན ཝུཏྟཾ ‘‘ཨེཝཾ པཊིགྷཱནུསཡོ ཙཱ’’ཏིཨཱདི. ཏཱིསུ ཝེདནཱསུ ཨནུསཡནཝཙནེནཱཏི ཏཱིསུ ཝེདནཱསུ ཡཐཱརཧཾ ཨནུསཡནཝཙནེན. ཨིཊྛཱདིབྷཱཝེན གཧིཏེསཱུཏི ཨིཊྛཱདཱིསུ ཨཱརམྨཎཔཀཏིཡཱ ཝསེན ཨིཊྛཱདིབྷཱཝེན གཧིཏེསུ ཝིཔརཱིཏསཉྙཱཡ ཝསེན ཨནིཊྛཱདཱིསུ ཨིཊྛཱདིབྷཱཝེན གཧིཏེསཱུཏི ཡོཛནཱ. ན ཧི ཨིཊྛཱདིབྷཱཝེན གཧཎཾ ཝིཔརཱིཏསཉྙཱ.

ཏཏྠཱཏི ཨིཊྛཱརམྨཎཱདཱིསུ. ཨེཏྠཱཏི ཨནུསཡནེ. ཀཱམསྶཱདཱདིཝཏྠུབྷཱུཏཱནཾ ཀཱམབྷཝཱདཱིནནྟི ཀཱམསྶཱདབྷཝསྶཱདཝཏྠུབྷཱུཏཱནཾ ¶ ཀཱམརཱུཔཱརཱུཔབྷཝཱནཾ གཧཎཾ ཝེདིཏབྦནྟི ཡོཛནཱ. ཏཏྠཱཏི ཝེདནཱཏྟཡདྷཱཏུཏྟཡེསུ. ནིདྡྷཱརཎེ ཙེཏཾ བྷུམྨཾ. དུཀྑཔཊིགྷཱཏོ དུཀྑེ ཨནབྷིརཏི. ཡཏྠ ཏཏྠཱཏི དུཀྑཝེདནཱཡ ཏཾསམྤཡུཏྟེསུ ཨནིཊྛརཱུཔཱདཱིསུ ཝཱཏི ཡཏྠ ཏཏྠ. མཧགྒཏཱ ཨུཔཱདིནྣཀྑནྡྷཱ རཱུཔཱརཱུཔབྷཝཱ, ཨནུཔཱདིནྣཀྑནྡྷཱ རཱུཔཱརཱུཔཱཝཙརདྷམྨཱ. ཏཏྠཱཏི ཡཐཱཝུཏྟེསུ མཧགྒཏདྷམྨེསུ བྷཝརཱགོཨིཙྩེཝ ཝེདིཏབྦོ. ཏེན ཝུཏྟཾ ‘‘རཱུཔདྷཱཏུཡཱ ཨརཱུཔདྷཱཏུཡཱ ཨེཏྠ ཀཱམརཱགཱནུསཡོ ནཱནུསེཏཱི’’ཏི. དིཊྛཱནུསཡཱདཱིནནྟི ཨཱདི-སདྡེན ཝིཙིཀིཙྪཱནུསཡཨཝིཛྫཱནུསཡཱདཱིནཾ སངྒཧོ དཊྛབྦོ.

དྷཱཏུཏྟཡཝེདནཱཏྟཡཝིནིམུཏྟཾ དིཊྛཱནུསཡཱདཱིནཾ ཨནུསཡནཊྛཱནཾ ན ཝུཏྟནྟི སུཝུཏྟམེཏཾ དིཊྛཱནུསཡཱདཱིནཾ ཨུཔྤཏྟིཊྛཱནཔུཙྪཱཡཾ ‘‘སབྦསཀྐཱཡཔརིཡཱཔནྣེསུ དྷམྨེསུ’’ཨིཙྩེཝ ཝིསྶཛྫིཏཏྟཱ. ཀཱམརཱགོ པན ཡཏྠ ནཱནུསེཏི, ཏཾ དུཀྑཝེདནཱརཱུཔཱརཱུཔདྷཱཏུཝིནིམུཏྟཾ དིཊྛཱནུསཡཱདཱིནཾ ཨནུསཡནཊྛཱནཾ ¶ ཨཏྠཱིཏི དསྶེཏུཾ ‘‘ནནུ ཙཱ’’ཏིཨཱདི ཨཱརདྡྷཾ. ཏཏྠ ཏདནུསཡནཊྛཱནཏོཏི ཏསྶ ཀཱམརཱགཱནུསཡསྶ ཨནུསཡནཊྛཱནཏོ. ཨཉྙཱ ནེཀྑམྨསྶིཏསོམནསྶུཔེཀྑཱསངྑཱཏཱ. ཨཡམེཏྠ སངྑེཔཏྠོ – ནེཀྑམྨསྶིཏདོམནསྶེ ཝིཡ པཊིགྷཱནུསཡོ ནེཀྑམྨསྶིཏསོམནསྶུཔེཀྑཱསུ ཀཱམརཱགཱནུསཡོ ནཱནུསེཏཱིཏི ‘‘ཡཏྠ ཀཱམརཱགཱནུསཡོ ནཱནུསེཏི, ཏཏྠ དིཊྛཱནུསཡོ ནཱནུསེཏཱི’’ཏི སཀྐཱ ཝཏྟུནྟི ཏསྨཱ ཏཾ ཨུདྡྷརིཏྭཱ ན ཝུཏྟནྟི. ཧོནྟཱུཏི ཏཱསཾ ཝེདནཱནཾ ཨཏྠིཏཾ པཊིཛཱནིཏྭཱ ཨུདྡྷརིཏྭཱ ཨཝཙནསྶ ཀཱརཎཾ དསྶེནྟོ ཨཱཧ ‘‘ན པན…པེ… ཏཾ ན ཝུཏྟ’’ནྟི. ཏདནུསཡནཊྛཱནནྟི ཏེསཾ དིཊྛཱནུསཡཱདཱིནཾ ཨནུསཡནཊྛཱནཾ. ཏསྨཱཏི ཡསྨཱ སཏིཔི ཀཱམརཱགཱནུསཡནཊྛཱནཏོ ཨཉྙསྨིཾ དིཊྛཱནུསཡཱདཱིནཾ ཨནུསཡནཊྛཱནེ ཏཾ པན དྷཱཏུཏྟཡཝེདནཱཏྟཡཝིནིམུཏྟཾ ནཏྠི ཝེདནཱདྭཡབྷཱཝཏོ, ཏསྨཱ. ཏཾ ཝེདནཱདྭཡཾ ན ཝུཏྟཾ ཝིསུཾ ན ཨུདྡྷཊནྟི ཨཏྠོ. ཏསྨཱཏི ཡསྨཱ ‘‘ཡཏྠ ཀཱམརཱགཱདཡོ ནཱནུསེནྟི, ཏཏྠ དིཊྛིཝིཙིཀིཙྪཱ ནཱནུསེནྟཱི’’ཏི ཨཡམཏྠོ ‘‘ཨཱམནྟཱ’’ཏི ཨིམིནཱ པཊིཝཙནཝིསྶཛྫནེན ཨཝིབྷཱགཏོ ཝུཏྟོཏི ‘‘ཡཏྠ ཀཱམརཱགཱདཡོ ཨནུསེནྟི, ཏཏྠ དིཊྛིཝིཙིཀིཙྪཱ ཨནུསེནྟཱི’’ཏི ཨཡམྤི ཨཏྠོ ཨཝིབྷཱགཏོཝ ལབྦྷཏི, ཏསྨཱ. ཨཝིབྷཱགཏོ ཙ དུཀྑཾ པཊིགྷསྶ ཨནུསཡནཊྛཱནནྟི དཱིཔིཏཾ ཧོཏི. ཏེནཱཧ ‘‘ཨཝིསེསེན…པེ… ཝེདིཏབྦ’’ནྟི. ཏཏྠ ཨཝིསེསེནཱཏི གེཧསྶིཏཾ ནེཀྑམྨསྶིཏནྟི ཝིསེསཾ ཨཀཏྭཱ. སམུདཱཡཝསེན ¶ གཧེཏྭཱཏི ཡཐཱཝུཏྟཨཝཡཝཱནཾ སམཱུཧཝསེན དུཀྑནྟྭེཝ གཧེཏྭཱ. ‘‘ཨཝིསེསེན སམུདཱཡཝསེན གཧེཏྭཱ’’ཏི ཨིམམཏྠཾ ཏཐཱ-སདྡེན ཨནུཀཌྜྷཏི ‘‘དྭཱིསུ ཝེདནཱསཱུ’’ཏི ཨེཏྠཱཔི གེཧསྶིཏཱདིཝིབྷཱགསྶ ཨནིཙྪིཏཏྟཱ.

ཡདི ཨེཝཾ ‘‘པཊིགྷཾ ཏེན པཛཧཏི, ན ཏཏྠ པཊིགྷཱནུསཡོ ཨནུསེཏཱི’’ཏི ཨིདཾ སུཏྟཔདཾ ཀཐནྟི ཙོདནཾ སནྡྷཱཡ ‘‘ཨཔིཙཱ’’ཏིཨཱདི ཝུཏྟཾ. ཏཏྠཱཏི ཏསྨིཾ དོམནསྶེ, ཏཾསམྤཡུཏྟེ ཝཱ པཊིགྷེ. ནེཀྑམྨསྶིཏཾ དོམནསྶནྟིཨཱདིནཱ ནེཡྻཏྠམིདཾ སུཏྟཾ, ན ནཱིཏཏྠནྟི དསྶེཏི. ཡཐཱ པན སུཏྟཾ ཨུདཱཧཊཾ, ཏཐཱ ཨིདྷ ཀསྨཱ ན ཝུཏྟནྟི ཨཱཧ ‘‘པཊིགྷུཔྤཏྟིརཧཊྛཱནཏཱཡཱ’’ཏིཨཱདི. ཨེཝམྤི སུཏྟཱབྷིདྷམྨཔཱཋཱནཾ ཀཐམཝིརོདྷོཏི ཨཱཧ ནིཔྤརིཡཱཡདེསནཱ ཧེསཱ, སཱ པན པརིཡཱཡདེསནཱཏི. ཨེཝཉྩ ཀཏྭཱཏི པརིཡཱཡདེསནཏྟཱ ཨེཝ. རཱགཱནུསཡོཏི ཀཱམརཱགཱནུསཡོ ཨདྷིཔྤེཏོ. ཡཏོ ‘‘ཨནཱགཱམིམགྒེན སམུགྒྷཱཏནཾ སནྡྷཱཡཱ’’ཏི ཝུཏྟཾ, ཏསྨཱ ཏསྶ ན མཧགྒཏདྷམྨཱ ཨནུསཡནཊྛཱནནྟི ཏཾ པཋམཛ྄ཛྷཱནཉྩ ཨནཱམསིཏྭཱ ‘‘ན ཧི ལོཀིཡཱ…པེ… ནཱནུསེཏཱིཏི སཀྐཱ ཝཏྟུ’’ནྟི ཝུཏྟཾ. ཨཝཏྠུབྷཱཝཏོཏི སབྷཱཝེནེཝ ཨནུཔྤཏྟིཊྛཱནཏྟཱ. ཨིདྷཱཏི ཨིམསྨིཾ ཨནུསཡཡམཀེ. ཝུཏྟནཡེནཱཏི ‘‘ནེཀྑམྨསྶིཏཾ དོམནསྶཾ ཨུཔྤཱདེཏྭཱ’’ཏིཨཱདིནཱ ཝུཏྟེན ནཡེན ¶ . ཏཾཔཊིཔཀྑབྷཱཝཏོཏི ཏེསཾ པཊིགྷཱདཱིནཾ པཊིཔཀྑསྶ མགྒསྶ སབྦྷཱཝཏོ. ན ཀེཝལཾ མགྒསབྦྷཱཝཏོ, ཨཐ ཁོ བལཝཝིཔསྶནཱསབྦྷཱཝཏོཔཱིཏི དསྶེནྟོ ཨཱཧ ‘‘ཏཾསམུགྒྷཱ…པེ… བྷཱཝཏོ ཙཱ’’ཏི.

ཨིདཱནི ཡདེཏཾ ཏཏྠ ཏཏྠ ‘‘ཨནུསཡནཊྛཱན’’ནྟི ཝུཏྟཾ, ཏཾ གཧེཏབྦདྷམྨཝསེན ཝཱ སིཡཱ གཧཎཝིསེསེན ཝཱཏི དྭེ ཝིཀཔྤཱ, ཏེསུ པཋམཾ སནྡྷཱཡཱཧ ‘‘ཨཱརམྨཎེ ཨནུསཡནཊྛཱནེ སཏཱི’’ཏི. རཱུཔཱདིཨཱརམྨཎེ ཨནུསཡཱནཾ ཨནུསཡནཊྛཱནནྟི གཡ྄ཧམཱནེ ཡམཏྠཾ སནྡྷཱཡ ‘‘ན སཀྐཱ ཝཏྟུ’’ནྟི ཝུཏྟཾ, ཏཾ དསྶེཏུཾ ‘‘དུཀྑཱཡ ཧཱི’’ཏིཨཱདིམཱཧ. ཡདི སིཡཱཏི ཡདི ཀཱམརཱགཱནུསཡོ སིཡཱ. ཨེཏསྶཔཱིཏི དིཊྛཱནུསཡསམྤཡུཏྟལོབྷསྶཔི ‘‘སབྦསཀྐཱཡཔརིཡཱཔནྣེསུ དྷམྨེསཱུ’’ཏི ཀཱམརཱགསྶ ཋཱནཾ ཝཏྟབྦཾ སིཡཱ, ན ཙ ཝུཏྟཾ. ཨཐ པནཱཏིཨཱདི དུཏིཡཝིཀཔྤཾ སནྡྷཱཡ ཝུཏྟཾ. ཨཛ྄ཛྷཱསཡཝསེན ཏཾནིནྣཏཱཡཱཏི ཨསཏིཔི ཨཱརམྨཎཀརཎེ ཡཏྠ ཀཱམརཱགཱདཡོ ཨཛ྄ཛྷཱསཡཏོ ནིནྣཱ, ཏཾ ཏེསཾ ཨནུསཡནཊྛཱནཾ. ཏེན ¶ ཝུཏྟཾ ‘‘ཨནུགཏོ ཧུཏྭཱ སེཏཱི’’ཏི. ཨཐ པན ཝུཏྟནྟི སམྦནྡྷོ. ཡཐཱཏིཨཱདི ཡཐཱཝུཏྟསྶ ཨཏྠསྶ ཨུདཱཧརཎཝསེན ནིརཱུཔནཾ. དུཀྑེ པཊིཧཉྙནཝསེནེཝ པཝཏྟཏི, ནཱརམྨཎཀརཎཝསེནཱཏི ཨདྷིཔྤཱཡོ. དུཀྑམེཝ ཏསྶ ཨནུསཡནཊྛཱནཾ ཝུཏྟནྟི ཨཛ྄ཛྷཱསཡསྶ ཏཏྠ ནིནྣཏྟཱ དུཀྑམེཝ ཏསྶ པཊིགྷསྶ ཨནུསཡནཊྛཱནཾ ཝུཏྟཾ, ནཱལམྦིཏཾ རཱུཔཱདི སུཁཝེདནཱ ཙཱཏི ཨདྷིཔྤཱཡོ. ཨེཝནྟི ཡཐཱ ཨཉྙཱརམྨཎསྶཔི པཊིགྷསྶ ཨཛ྄ཛྷཱསཡཏོ དུཀྑནིནྣཏཱཡ དུཀྑམེཝ ཨནུསཡནཊྛཱནཾ ཝུཏྟཾ, ཨེཝཾ. དུཀྑཱདཱིསུ…པེ… ཝུཏྟནྟི ‘‘དུཀྑེན སུཁཾ ཨདྷིགནྟབྦཾ. ནཏྠི དིནྣ’’ནྟི ཙ ཨཱདིནཱ ཀཱཡཀིལམནདུཀྑེ དཱནཱནུབྷཱཝཱདིཀེ ཙ མིཙྪཱབྷིནིཝེསནཝསེན ཨུཔྤཛྫམཱནེན དིཊྛཱནུསཡེན སམྤཡུཏྟོ ཨཉྙཱརམྨཎོཔི ལོབྷོ ‘‘ཨེཝཾ སུཁཾ བྷཝིསྶཏཱི’’ཏི ཨཛ྄ཛྷཱསཡཏོ སུཁཱབྷིསངྒཝསེནེཝ པཝཏྟཏཱིཏི སུཁུཔེཀྑཱབྷེདཾ སཱཏསནྟསུཁདྭཡམེཝ ཨསྶ ལོབྷསྶ ཨནུསཡནཊྛཱནཾ ཝུཏྟཾ པཱལི༹ཡཾ, ན ཡཐཱཝུཏྟཾ དུཀྑཱདི, ཏསྨཱ བྷཝརཱག…པེ… ན ཝིརུཛ྄ཛྷཏི. ཨེཀསྨིཾཡེཝ ཙཱཏིཨཱདི དུཏིཡཝིཀཔྤཾཡེཝ ཨུཔབྲཱུཧནཏྠཾ ཝུཏྟཾ. ཏཏྠ རཱགསྶ སུཁཛ྄ཛྷཱསཡཏཱ ཏཾསམངྒིནོ པུགྒལསྶ ཝསེན ཝེདིཏབྦཱ, ཏནྣིནྣབྷཱཝེན ཝཱ ཙཀྑུསྶ ཝིསམཛ྄ཛྷཱསཡཏཱ ཝིཡ. ཨེས ནཡོ སེསེསུཔི. ཏེསཾ རཱགཔཊིགྷཱནཾ ནཱནཱནུསཡཊྛཱནཏཱ ཧོཏི ཨེཀསྨིམྤི ཨཱརམྨཎེཏི ཨཏྠོ.

ཨེཝཉྩ ཀཏྭཱཏི ཨསཏིཔི གཧེཏབྦབྷེདེ གཧཎཝིསེསེན ཨནུསཡནཊྛཱནསྶ བྷིནྣཏྟཱ ཨེཝ. ‘‘ཡཏྠ…པེ… ནོ’’ཏི ཝུཏྟཾ, ཨཉྙཐཱ ཝིརུཛ྄ཛྷེཡྻ. གཧེཏབྦབྷེདེན ཧི རཱགཔཊིགྷཱནཾ ཨནུསཡནཊྛཱནབྷེདེ ¶ གཡ྄ཧམཱནེ ཝིཔཱཀམཏྟེ ཋཱཏབྦཾ སིཡཱ, ན ཙ ཏཾ ཡུཏྟཾ, ནཔི སབྦེསཾ པུརིསདྭཱརཱནཾ ཨིཊྛཱནིཊྛཾ ནིཡཏནྟི. ཡདིཔི ཡཐཱཝུཏྟལོབྷསྶ ཝུཏྟནཡེན ཀཱམརཱགཱནུསཡཏཱ སམྦྷཝཏི, ཡཐཱ པན སུཁུཔེཀྑཱསུ ཨིཊྛཱརམྨཎེ ཙ ཨུཔྤཛྫནྟེན དོམནསྶེན སཧ པཝཏྟོ དོསོ དུབྦལབྷཱཝེན པཊིགྷཱནུསཡོ ན ཧོཏི, ཨེཝཾ ཡཐཱཝུཏྟལོབྷོཔི ཀཱམརཱགཱནུསཡོ ན ཧོཏཱིཏི ཨིམམཏྠཾ དསྶེཏུཾ ‘‘ཨཊྛཀཐཱཡཾ པནཱ’’ཏིཨཱདི ཝུཏྟཾ. ན པཊིགྷཱནུསཡོཏི ཨེཏྠ ན-ཀཱརོ པཊིསེདྷནཏྠོ, ན ཨཉྙཏྠོ, ཨིཏརཏྠ པན སམྦྷཝོ ཨེཝ ནཏྠཱིཏི དསྶེནྟོ ‘‘ཡཾ པནེཏ’’ནྟིཨཱདིམཱཧ. ཏཏྠ ‘‘ན ཧི དོམནསྶསྶ པཊིགྷཱནུསཡབྷཱཝཱསངྐཱ ཨཏྠཱི’’ཏི ཨིམིནཱ ན-ཀཱརསྶ ཨཉྙཏྠཏཱབྷཱཝདསྶནམུཁེན ཨབྷཱཝཏྠཏཾ སམཏྠེཏི.

དེསནཱ ¶ སཾཀིཎྞཱ ཝིཡ བྷཝེཡྻཱཏི ཨེཏྠ དེསནཱསངྐརཾ དསྶེཏུཾ ‘‘བྷཝརཱགསྶཔི…པེ… བྷཝེཡྻཱ’’ཏི ཝུཏྟཾ. ཏསྶཏྠོ – ཡཐཱ ཀཱམརཱགསྶ ཀཱམདྷཱཏུཡཱ དྭཱིསུ ཝེདནཱསུ ཨཱརམྨཎཀརཎཝསེན ཨུཔྤཏྟི ཝུཏྟཱ ‘‘ཀཱམརཱགོ ཀཱམདྷཱཏུཡཱ དྭཱིསུ ཝེདནཱསུ ཨནུསེཏཱི’’ཏི, ཨེཝཾ ཡདི ‘‘བྷཝརཱགོ ཀཱམདྷཱཏུཡཱ དྭཱིསུ ཝེདནཱསུ ཨནུསེཏཱི’’ཏི ཝུཙྩེཡྻ, བྷཝརཱགསྶཔི…པེ… བྷཝེཡྻ. ཏཏོ ཙ ཀཱམརཱགེན སདྡྷིཾ བྷཝརཱགསྶ དེསནཱ སཾཀིཎྞཱ བྷཝེཡྻ, ཀཱམརཱགཏོ ཙ བྷཝརཱགསྶ ཝིསེསོ དསྶེཏབྦོ. སོ ཙ སཧཛཱཏཱནུསཡཝསེན ན སཀྐཱ དསྶེཏུནྟི ཨཱརམྨཎཀརཎཝསེན དསྶེཏབྦོ. ཏེན ཝུཏྟཾ ‘‘ཏསྨཱ ཨཱརམྨཎ…པེ… ཨདྷིཔྤཱཡོ’’ཏི. ཏཏྠ ཨཱརམྨཎཝིསེསེནཱཏི རཱུཔཱརཱུཔདྷཱཏུསངྑཱཏཨཱརམྨཎཝིསེསེན. ཝིསེསདསྶནཏྠནྟི ཀཱམརཱགཏོ བྷཝརཱགསྶ ཝིསེསདསྶནཏྠཾ. ཨེཝཾ དེསནཱ ཀཏཱཏི ‘‘རཱུཔདྷཱཏུཡཱ ཨརཱུཔདྷཱཏུཡཱ ཨེཏྠ བྷཝརཱགཱནུསཡོ ཨནུསེཏཱི’’ཏི ཨེཝཾ ཝིསཡེ བྷུམྨཾ ཀཏྭཱ དེསནཱ ཀཏཱ. ཏེནཱཧ ‘‘སཧཛཱཏཝེདནཱཝིསེསཱབྷཱཝཏོ’’ཏི.

ཨུཔྤཏྟིཊྛཱནཝཱརཝཎྞནཱ ནིཊྛིཏཱ.

མཧཱཝཱརོ

༡. ཨནུསཡཝཱརཝཎྞནཱ

༣. པཝཏྟཱཝིརཱམཝསེནཱཏི ¶ ཨནུསཡཔྤཝཏྟིཡཱ ཨཝིརཱམཝསེན, ཨཝིཙྪེདཝསེནཱཏི ཨཏྠོ. ཀཐཾ པན ཀུསལཱབྱཱཀཏཙིཏྟཀྑཎེ ཨནུསཡཱནཾ པཝཏྟཱིཏི ཨཱཧ ‘‘མགྒེནེཝ…པེ… པུབྦེ’’ཏི.

༢༠. ཙིཏྟཙེཏསིཀཱནཉྩ ཋཱནཾ ནཱམ ཙིཏྟུཔྤཱདོཏི ཨཱཧ ‘‘ཨེཀསྨིཾ ཙིཏྟུཔྤཱདེ’’ཏི. ཏེསཾ ཏེསཾ པུགྒལཱནནྟི པུཐུཛྫནཱདཱིནཾ པུགྒལཱནཾ. པཀཏིཡཱ སབྷཱཝེན. སབྷཱཝསིདྡྷཱ ཧི དུཀྑཱཡ ཝེདནཱཡ ཀཱམརཱགསྶ ཨནནུསཡནཊྛཱནཏཱ. ཨེཝཾ སེསེསུཔི ཡཐཱརཧཾ ཝཏྟབྦཾ. ཝཀྑཏི ཧི ‘‘པཀཏིཡཱ དུཀྑཱདཱིནཾ ཀཱམརཱགཱདཱིནཾ ཨནནུསཡནཊྛཱནཏཾ སནྡྷཱཡ ཝུཏྟ’’ནྟི. པཧཱནེནཱཏི ཏསྶ ཏསྶ ཨནུསཡསྶ སམུཙྪིནྡནེན. ཏིཎྞཾ པུགྒལཱནནྟི པུཐུཛྫནསོཏཱཔནྣསཀདཱགཱམཱིནཾ. དྭིནྣཾ པུགྒལཱནནྟི ཨནཱགཱམིཨརཧནྟཱནཾ. ཨེཏྠཱཏི ཨེཏསྨིཾ པུགྒལོཀཱསཝཱརེ. པུརིམནཡེཏི ‘‘ཏིཎྞཾ པུགྒལཱན’’ནྟིཨཱདིཀེ པུརིམསྨིཾ ཝིསྶཛྫནནཡེ. ཨོཀཱསནྟི ཨུཔྤཏྟིཊྛཱནཾ, ཨིདྷ པན དུཀྑཝེདནཱ ¶ ཝེདིཏབྦཱ. པཙྪིམནཡེཏི ‘‘དྭིནྣཾ པུགྒལཱན’’ནྟིཨཱདིཀེ ཝིསྶཛྫནནཡེ. ཨནོཀཱསཏཱ ཨནནུསཡནཊྛཱནཏཱ.

ཨནུསཡཝཱརཝཎྞནཱ ནིཊྛིཏཱ.

༢. སཱནུསཡཝཱརཝཎྞནཱ

༦༦-༡༣༡. ‘‘སཱནུསཡོ, པཛཧཏི, པརིཛཱནཱཏཱི’’ཏི པུགྒལོ ཝུཏྟོཏི ‘‘ཀཱམརཱགེན སཱནུསཡོ, ཀཱམརཱགཾ པཛཧཏི, ཀཱམརཱགཾ པརིཛཱནཱཏཱི’’ཏིཨཱདཱིསུ ཨནུསཡསམངྒིབྷཱཝེན པཧཱནཔརིཉྙཱཀིརིཡཱཡ ཀཏྟུབྷཱཝེན ཙ པུགྒལོ ཝུཏྟོ, ན དྷམྨོ. བྷཝཝིསེསེན ཝཱཏི ཀེཝལེན བྷཝཝིསེསེན ཝཱ. ཨིཏརེསཱུཏི པཊིགྷཱནུསཡཱདཱིསུ. བྷཝཱནུསཡཝིསེསེན ཝཱཏི ཀཱམབྷཝཱདིབྷཝཝིསིཊྛཱནུསཡཝིསེསེན ཝཱ. སཱནུསཡཏཱནིརནུསཡཏཱདིཀཱཏི ཨེཏྠ ཨཱདི-སདྡེན པཧཱནཱཔཧཱནཔརིཉྙཱཔརིཉྙཱ ¶ སངྒཡ྄ཧནྟི. ནནུ ཙ བྷཝཝིསེསེ ཀེསཉྩི ཨནུསཡཱནཾ ཨཔྤཧཱནནྟི? ན ཏཾ ཨནུསཡཀཏཾ, ཨཐ ཁོ པཙྩཡཝེཀལླཏོ ཨནོཀཱསཏཱཡ ཙཱཏི ནཱཡཾ ཝིརོདྷོ. དྭཱིསུ ཝེདནཱསཱུཏི སུཁཨུཔེཀྑཱསུ ཝེདནཱསུ དུཀྑཱཡ ཝེདནཱཡ ཀཱམརཱགཱནུསཡེན ནིརནུསཡོཏི ཡོཛེཏབྦཾ. ཨིདམྤི ནཏྠི པུགྒལཝསེན ཝུཙྩམཱནཏྟཱ. ཏེནཱཧ ‘‘ན ཧི པུགྒལསྶ…པེ… ཨནུསཡཱན’’ནྟི. ཡདིཔི པུགྒལསྶ ཨནུསཡནོཀཱསོ ཨནོཀཱསོ, ཏསྶ པན སཱནུསཡཏཱདིཧེཏུ ཧོཏཱིཏི དསྶེནྟོ ‘‘ཨནུསཡསྶ པནཱ’’ཏིཨཱདིམཱཧ. ནིརནུསཡཏཱདཱིནནྟི ཨཱདི-སདྡེན ཨཔྤཧཱནཱཔརིཉྙཱ སངྒཎྷཱཏི. པརིཛཱནནཾ སམཏིཀྐམནནྟི པརིཉྙཱཝཱརེཔི ‘‘ཨཔཱདཱནེ ནིསྶཀྐཝཙན’’ནྟི ཝུཏྟཾ.

ཨནུསཡནཊྛཱནཏོཏི ཨནུསཡནཊྛཱནཧེཏུ. ‘‘ཨནནུསཡནཊྛཱནཏོ’’ཏི ཨེཏྠཱཔི ཨེསེཝ ནཡོ. ནིམིཏྟཱཔཱདཱནབྷཱཝདསྶནཏྠནྟི སཱནུསཡཝཱརེ ནིམིཏྟབྷཱཝདསྶནཏྠཾ, པཛཧནཔརིཉྙཱཝཱརེསུ ཨཔཱདཱནབྷཱཝདསྶནཏྠཉྩཱཏི ཡོཛེཏབྦཾ. པཛཧཏཱིཏི ཨེཏྠ ‘‘རཱུཔདྷཱཏུཡཱ ཨརཱུཔདྷཱཏུཡཱ ཏཏོ མཱནཱནུསཡཾ པཛཧཏཱི’’ཏི པཱལི༹པདཾ ཨཱཧརིཏྭཱ ཡོཛེཏབྦཾ, ན པཛཧཏཱིཏི ཨེཏྠ པན ‘‘དུཀྑཱཡ ཝེདནཱཡ ཏཏོ ཀཱམརཱགཱནུསཡཾ ནཔྤཛཧཏཱི’’ཏི. ཨེཝམཱདཱིསཱུཏི ཨཱདི-སདྡེན པརིཉྙཱཝཱརམྤི སངྒཎྷཱཏི. བྷུམྨནིདྡེསེནེཝ ཧེཏུཨཏྠེནེཝ ནིདྡིཊྛཱཏི ཨཏྠོ.

ཙཏུཏྠཔཉྷཝིསྶཛྫནེནཱཏི ¶ ‘‘ཡཏོ ཝཱ པན མཱནཱནུསཡེན སཱནུསཡོ, ཏཏོ ཀཱམརཱགཱནུསཡེན སཱནུསཡོ’’ཏི ཨེཏསྶ པཉྷསྶ ཝིསྶཛྫནེན. ཏཏྠ ཧི ‘‘རཱུཔདྷཱཏུཡཱ ཨརཱུཔདྷཱཏུཡཱ’’ཏིཨཱདིནཱ སརཱུཔཏོ ཨནུསཡནཊྛཱནཱནི དསྶིཏཱནི. ཏདཏྠེཏི ཏཾ ཨནུསཡནཊྛཱནདསྶནཾ ཨཏྠོ ཨེཏསྶཱཏི ཏདཏྠོ, ཏསྨིཾ ཏདཏྠེ. ‘‘ཨནུསཡསྶ ཨུཔྤཏྟིཊྛཱནདསྶནཏྠཾ ཨཡཾ ཝཱརོ ཨཱརདྡྷོ’’ཏིཨཱདིནཱ ‘‘ཡཏོ’’ཏི ཨེཏེན ཨནུསཡནཊྛཱནཾ ཝུཏྟནྟི ཨིམམཏྠཾ ཝིབྷཱཝེཏྭཱ. པམཱདལིཁིཏཾ ཝིཡ དིསྶཏི ཨུཔྤནྣ-སདྡེན ཝཏྟམཱནུཔྤནྣེ ཝུཙྩམཱནེ. ཡཐཱ པན ཨུཔྤཛྫནཝཱརེ ཨུཔྤཛྫཏི-སདྡེན ཨུཔྤཏྟིཡོགདཱིཔཀཏྟཱ ཨུཔྤཏྟིརཧཱ ཝུཙྩནྟི, ཨེཝམིདྷཱཔི ཨུཔྤཏྟིཨརཧེ ཝུཙྩམཱནེ ན ཀོཙི ཝིརོདྷོ. ཡཾ པན ཝཀྑཏི ‘‘ན ཧི ཨཔརིཡཱཔནྣཱནཾ ཨནུསཡུཔྤཏྟིརཧཊྛཱནཏཱ’’ཏི, སོཔི ན དོསོ. ཡཏྠ ཡཏྠ ཧི ཨནུསཡཱ ཨུཔྤཏྟིརཧཱ, ཏདེཝ ཨེཀཛ྄ཛྷཾ གཧེཏྭཱ ‘‘སབྦཏྠཱ’’ཏི ཝུཏྟནྟི. ཏཐེཝ དིསྶཏཱིཏི ཏཾ པམཱདལིཁིཏཾ ཝིཡ དིསྶཏཱིཏི ཨཏྠོ.

ཡཏོ ཨུཔྤནྣེན བྷཝིཏབྦནྟི ཡཏོ ཨནུསཡནཊྛཱནཏོ ཀཱམགཱརཱནུསཡེན ཨུཔྤནྣེན བྷཝིཏབྦཾ, ཏེན ¶ ཀཱམརཱགཱནུསཡེན ཨུཔྤཏྟིརཧཊྛཱནེ ནིསྶཀྐཝཙནཾ ཀཏཾ ‘‘ཡཏོ’’ཏི. ཏཐཱཏི ཨེཏྠ ཏཐཱ-སདྡོ ཡཐཱ ‘‘ཡཏོ ཨུཔྤནྣེནཱ’’ཏི ཨེཏྠ ཨུཔྤཏྟིརཧཊྛཱནཏོ ཨནུསཡསྶ ཨུཔྤཏྟིརཧཏཱ ཝུཏྟཱ, ཏཐཱ ‘‘ཨུཔྤཛྫནཀེནཱ’’ཏི ཨེཏྠཱཔི སཱ ཨེཝ ཝུཙྩཏཱིཏི དཱིཔེཏཱིཏི ཨཱཧ ‘‘སབྦདྷམྨེསུ…པེ… ཨཱཔནྣེནཱ’’ཏི. ཏཏྠ ‘‘ཨུཔྤཛྫནཀོ’’ཏི ཝུཏྟེ ཨནུཔྤཛྫནཀོ ན ཧོཏཱིཏི ཨཡམཏྠོ ཝིཉྙཱཡཏི, ཏཐཱ ཙ སཏི ཏེན ཨནུཔྤཏྟི ནིཙྪིཏཱཏི ཨུཔྤནྣསབྷཱཝཏཱ ཙ པཀཱསིཏཱ ཧོཏཱིཏི. ཏེནཱཧ ‘‘སབྦདྷམྨེསུ…པེ… ཨཔནེཏཱི’’ཏི. ‘‘ཡོ ཡཏོ ཀཱམརཱགཱནུསཡེན ནིརནུསཡོ, སོ ཏཏོ མཱནཱནུསཡེན ནིརནུསཡོ’’ཏི པུཙྪཱཡ ‘‘ཡཏོ ཏཏོ’’ཏི ཨཱགཏཏྟཱ ཝིསྶཛྫནེ ‘‘སབྦཏྠཱ’’ཏི པདསྶ ནིསྶཀྐཝསེནེཝ སཀྐཱ ཡོཛེཏུནྟི དསྶེནྟོ ‘‘སབྦཏྠཱཏི…པེ… ན ན སམྦྷཝཏཱི’’ཏི ཨཱཧ. བྷུམྨཏོ ཨཉྙཏྠཱཔི སདྡཝིདཱུ ཨིཙྪནྟི, ཡཏོ སབྦེསཾ པཱདཀཾ ‘‘སབྦཏྠཔཱདཀ’’ནྟི ཝུཙྩཏི, ཨིདྷ པན ནིསྶཀྐཝསེན ཝེདིཏབྦཾ.

སཱནུསཡཝཱརཝཎྞནཱ ནིཊྛིཏཱ.

༣. པཛཧནཝཱརཝཎྞནཱ

༡༣༢-༡༩༧. ཨཔྤཛཧནསབྦྷཱཝཱཏི ¶ ཨཔྤཧཱནསྶ, ཨཔྤཧཱིཡམཱནསྶ ཝཱ སབྦྷཱཝཱ. ཏསྨཱཏི ཡསྨཱ ཡོ ཀཱམརཱགཱནུསཡཾ པཛཧཏི, ན སོ མཱནཱནུསཡཾ ནིརཝསེསཏོ པཛཧཏི, ཡོ ཙ མཱནཱནུསཡཾ ནིརཝསེསཏོ པཛཧཏི, ན སོ ཀཱམརཱགཱནུསཡཾ པཛཧཏི པགེཝ པཧཱིནཏྟཱ, ཏསྨཱ ‘‘ཡོ ཝཱ པན མཱནཱནུསཡཾ པཛཧཏི, སོ ཀཱམརཱགཱནུསཡཾ པཛཧཏཱིཏི? ནོ’’ཏི ཝུཏྟནྟི ཝེདིཏབྦཾ. ཡདི ཨེཝཾ པཋམཔུཙྪཱཡཾ ཀཐནྟི ཨཱཧ ‘‘ཡསྨཱ པན…པེ… ཝུཏྟ’’ནྟི. ཏཏྠ པཧཱནཀརཎམཏྟམེཝཱཏི པཧཱནཀིརིཡཱསམྦྷཝམཏྟམེཝ, ན ནིརཝསེསཔྤཧཱནནྟི ཨདྷིཔྤཱཡོ. ཏེ ཋཔེཏྭཱཏི དིཊྛིཝིཙིཀིཙྪཱནུསཡཱདཱིནཾ ནིརཝསེསཔཛཧནཀེ ཨཊྛམཀཱདིཀེ ཋཔེཏྭཱ. ཨཝསེསཱཏི ཏསྶ ཏསྶ ཨནུསཡསྶ ནིརཝསེསཔྤཛཧནཀེཧི ཨཝསིཊྛཱ. ཏེསུ ཡེསཾ ཨེཀཙྩེ ཨནུསཡཱ པཧཱིནཱ, ཏེཔི ཨཔྤཛཧནསབྦྷཱཝེནེཝ ནཔྤཛཧནྟཱིཏི ཝུཏྟཱ. ན ཙ ཡཐཱཝིཛྫམཱནེནཱཏི མགྒཀིཙྩབྷཱཝེན ཝིཛྫམཱནཔྤཀཱརེན པཧཱནེན ཝཛྫིཏཱ རཧིཏཱ ཨེཝ ཝུཏྟཱཏི ཡོཛནཱ.

ཀེསཉྩཱིཏི ¶ སོཏཱཔནྣསཀདཱགཱམིམགྒསམངྒིསཀདཱགཱམཱིནཾ. པུན ཀེསཉྩཱིཏི ཨནཱགཱམིཨགྒམགྒསམངྒིཨརཧནྟཱནཾ. ཨུབྷཡནྟི ཀཱམརཱགཝིཙིཀིཙྪཱནུསཡདྭཡཾ. སེསཱནནྟི ‘‘སེསཱ’’ཏི ཝུཏྟཱནཾ ཡཐཱཝུཏྟཔུགྒལཱནཾ. ཏེསནྟི ཝུཏྟཔྤཀཱརཱནཾ དྭིནྣཾ ཨནུསཡཱནཾ. ཨུབྷཡཱཔྤཛཧནསྶཱཏི ཀཱམརཱགཝིཙིཀིཙྪཱནུསཡཱཔྤཛཧནསྶ. ཀཱརཎཾ ན ཧོཏཱིཏི ཡེསཾ ཝིཙིཀིཙྪཱནུསཡོ པཧཱིནོ, ཏེསཾ ཏསྶ པཧཱིནཏཱ, ཡེསཾ ཡཐཱཝུཏྟཾ ཨུབྷཡཔྤཧཱིནཾ, ཏེསཾ ཏདཔྤཛཧནསྶ ཀཱརཎཾ ན ཧོཏཱིཏི ཨཏྠོ. ཏེནཱཧ ‘‘ཏེསཾ པཧཱིནཏྟཱ ‘ནཔྤཛཧནྟཱི’ཏི ན སཀྐཱ ཝཏྟུ’’ནྟི. ཨཐ པན ན ཏཏྠ ཀཱརཎཾ ཝུཏྟཾ, ཡེན ཀཱརཎཝཙནེན ཡཐཱཝུཏྟདོསཱཔཏྟི སིཡཱ, ཀེཝལཾ པན སནྣིཊྛཱནེན ཏེསཾ པུགྒལཱནཾ གཧིཏཏཱདསྶནཏྠཾ ཝུཏྟཾ ‘‘ཀཱམརཱགཱནུསཡཉྩ ནཔྤཛཧནྟཱི’’ཏི, ཨེཝམྤི པུཙྪིཏསྶ སཾསཡཏྠསྶ ཀཱརཎཾ ཝཏྟབྦཾ. ཏཐཱ ཙ སཏི ‘‘སེསཔུགྒལཱ ཏསྶ ཨནུསཡསྶ པཧཱིནཏྟཱ ནཔྤཛཧནྟཱི’’ཏི ཀཱརཎཾ ཝཏྟབྦམེཝཱཏི ཙོདནཾ སནྡྷཱཡཱཧ ‘‘ན ཝཏྟབྦ’’ནྟིཨཱདི. ཏཏྠ ན ཝཏྟབྦནྟི ཝུཏྟནཡེན ཀཱརཎཾ ན ཝཏྟབྦཾ ཀཱརཎབྷཱཝསྶེཝ ཨབྷཱཝཏོ. ‘‘ཨུབྷཡཱཔྤཛཧནསྶ ཀཱརཎཾ ན ཧོཏཱི’’ཏི ཝུཏྟཾ, ཡཐཱ པན ཝཏྟབྦཾ, ཏཾ དསྶེཏུཾ ‘‘ཡོ ཀཱམརཱགཱནུསཡཾ…པེ… ཝཏྟབྦཏྟཱ’’ཏི ཨཱཧ. ཏེན པཧཱིནཱཔྤཧཱིནཝསེན ¶ ཀཱརཎཾ ན ཝཏྟབྦཾ, པཧཱིནཱནཾཡེཝ པན ཝསེན ཝཏྟབྦནྟི དསྶེཏི. སཾསཡཏྠསངྒཧིཏེཏི སཾསཡཏྠེན པདེན སངྒཧིཏེ. སནྣིཊྛཱནཔདསངྒཧིཏཾ པན པཧཱིཡམཱནཏྟཱ ‘‘ནཔྤཛཧཏཱི’’ཏི ན སཀྐཱ ཝཏྟུནྟི.

པཛཧནཝཱརཝཎྞནཱ ནིཊྛིཏཱ.

༥. པཧཱིནཝཱརཝཎྞནཱ

༢༦༤-༢༧༤. ཕལཊྛཝསེནེཝ དེསནཱ ཨཱརདྡྷཱ, ན མགྒཊྛཝསེན, ཀུཏོ པུཐུཛྫནཝསེན. ཀསྨཱ? ཕལཀྑཎེ ཧི ཨནུསཡཱ པཧཱིནཱཏི ཝུཙྩནྟི, མགྒཀྑཎེ པན པཧཱིཡནྟཱིཏི. ཏེནེཝཱཧ ‘‘མགྒསམངྒཱིནཾ ཨགྒཧིཏཏཾ དཱིཔེཏཱི’’ཏི. པཊིལོམེ ཧི པུཐུཛྫནཝསེནཔི དེསནཱ གཧིཏཱ ‘‘ཡསྶ དིཊྛཱནུསཡོ ཨཔྤཧཱིནོ, ཏསྶ ཝིཙིཀིཙྪཱནུསཡོ ཨཔྤཧཱིནོཏི? ཨཱམནྟཱ’’ཏིཨཱདིནཱ. ཨནུསཡཙྩནྟཔཊིཔཀྑེཀཙིཏྟཀྑཎིཀཱནནྟི ཨནུསཡཱནཾ ཨཙྩནྟཾ པཊིཔཀྑབྷཱུཏཨེཀཙིཏྟཀྑཎིཀཱནཾ. མགྒསམངྒཱིནནྟི མགྒཊྛཱནཾ. ཨེཏྠ ཙ ཨནུསཡཱནཾ ཨཙྩནྟཔཊིཔཀྑཏཱགྒཧཎེན ¶ ཨུཔྤཏྟིརཧཏཾ པཊིཀྑིཔཏི. ན ཧི ཏེ ཨཙྩནྟཔཊིཔཀྑསམུཔྤཏྟིཏོ པརཏོ ཨུཔྤཏྟིརཧཱ ཧོནྟི. མགྒསམངྒིཏཱགྒཧཎེན ཨནུཔྤཏྟིརཧཏཱཔཱདིཏཏཾ པཊིཀྑིཔཏི. ན ཧི མགྒཀྑཎེ ཏེ ཨནུཔྤཏྟིརཧཏཾ ཨཱཔཱདིཏཱ ནཱམ ཧོནྟི, ཨཐ ཁོ ཨཱཔཱདཱིཡནྟཱིཏི. ཨེཀཙིཏྟཀྑཎིཀཏཱགྒཧཎེན སནྟཱནབྱཱཔཱརཾ. ཏེནཱཧ ‘‘ན ཀོཙཱི’’ཏིཨཱདི. ཏཏྠ ཏེཏི མགྒསམངྒིནོ. ན ཀེཝལཾ པཧཱིནཝཱརེཡེཝ, ཨཐ ཁོ ཨཉྙེསུཔཱིཏི དསྶེནྟོ ‘‘ཨནུསཡ…པེ… གཧིཏཱ’’ཏི ཨཱཧ.

༢༧༥-༢༩༦. ཡཏྠ ཨནུསཡོ ཨུཔྤཏྟིརཧོ, ཏཏྠེཝསྶ ཨནུཔྤཏྟིརཧཏཱཔཱདནནྟི ‘‘ཨཏྟནོ ཨཏྟནོ ཨོཀཱསེ ཨེཝ ཨནུཔྤཏྟིདྷམྨཏཾ ཨཱཔཱདིཏོ’’ཏི ཨཱཧ. ཏཐཱ ཧི ཝུཏྟཾ ‘‘ཙཀྑུཾ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏཱི’’ཏི (ཝིབྷ. ༢༠༣) ཝཏྭཱ པུན ཝུཏྟཾ ‘‘ཙཀྑུཾ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ པཧཱིཡམཱནཱ པཧཱིཡཏི, ཨེཏྠ ནིརུཛ྄ཛྷམཱནཱ ནིརུཛ྄ཛྷཏཱི’’ཏི (ཝིབྷ. ༢༠༤). ཏསྨཱཏི ཡསྨཱ ཏདོཀཱསཏྟམེཝ ཀཱམདྷཱཏུཨཱདིཨོཀཱསཏྟམེཝ ཨནུསཡཱནཾ དཱིཔེནྟི པཧཱིནཱཔྤཧཱིནཝཙནཱནི, ཏསྨཱ. ཨནོཀཱསེ ཏདུབྷཡཱཝཏྟབྦཏཱ ཝུཏྟཱཏི ཡསྨཱ ཀཱམརཱགཔཊིགྷཱནུསཡཱནཾ དྭིནྣཾ ཨུཔྤཏྟིཊྛཱནཾ, སོ ཨེཝ པཧཱནོཀཱསོཏི ¶ སྭཱཡཾ ཏེསཾ ཨཉྙམཉྙཾ ཨནོཀཱསོ, ཏསྨིཾ ཨནོཀཱསེ ཏདུབྷཡསྶ པཧཱནཱཔྤཧཱནསྶ ནཝཏྟབྦཏཱ ཝུཏྟཱ. ཀཱམརཱགཱནུསཡོཀཱསེ ཧི པཊིགྷཱནུསཡསྶ ཨཔྤཧཱིནཏྟཱ སོ ‘‘ཏཏྠ པཧཱིནོ’’ཏི ན ཝཏྟབྦོ, ཨཊྛིཏཏྟཱ པན ‘‘ཏཏྠ ཨཔྤཧཱིནོ’’ཏི ཙ, ཏསྨཱ ཨནོཀཱསེ ཏདུབྷཡཱཝཏྟབྦཏཱ ཝུཏྟཱཏི. ཏེན སདྡྷིཾ སམཱནོཀཱསེཏི ཏེན ཀཱམརཱགེན སདྡྷིཾ སམཱནོཀཱསེ. ‘‘སཱདྷཱརཎཊྛཱནེ’’ཏི ཝུཏྟེ ཀཱམདྷཱཏུཡཾ སུཁུཔེཀྑཱསུ པཧཱིནོ ནཱམ ཧོཏི, ན སམཱནཀཱལེ པཧཱིནོ ཏཏིཡཙཏུཏྠམགྒཝཛ྄ཛྷཏྟཱ ཀཱམརཱགམཱནཱནུསཡཱནཾ.

པཧཱིནཝཱརཝཎྞནཱ ནིཊྛིཏཱ.

༧. དྷཱཏུཝཱརཝཎྞནཱ

༣༣༢-༣༤༠. ཨཔྤཧཱིནུཔྤཏྟིརཧབྷཱཝཱ ཨིདྷ ཨནུགམནསཡནཱནཱིཏི དསྶེནྟོ ‘‘ཡསྨིཾ ¶ …པེ… ཨཏྠོ’’ཏི ཨཱཧ. ཨིདྷཱཔི ཡུཏྟཱཏི པུབྦེ ཝུཏྟམེཝཏྠཾ པརཱམསཏི. ཏཐཱ ཧི ཝུཏྟཾ ‘‘ཀཱརཎལཱབྷེ ཨུཔྤཏྟིཨརཧཏཾ དསྶེཏཱི’’ཏི (ཡམ. མཱུལཊཱི. ཨནུསཡཡམཀ ༡). ཚ པཊིསེདྷཝཙནཱནཱིཏི ཏིསྶནྣཾ དྷཱཏཱུནཾ ཙུཏཱུཔཔཱཏཝིསིཊྛཱནཾ པཊིསེདྷནཝསེན ཝུཏྟཝཙནཱནི, ཏཏོ ཨེཝ དྷཱཏུཝིསེསནིདྡྷཱརཎཱནི ན ཧོནྟི. པཊིསེདྷོཏི ཧི ཨིདྷ སཏྟཱཔཊིསེདྷོ ཝུཏྟོཏི ཨདྷིཔྤཱཡེན ཝདཏི. ཨཉྙཏྠེ པན ན-ཀཱརེ ནཱཡཾ དོསོ. ཨིམཾ ནཱམ དྷཱཏུཾ. ཏཾམཱུལིཀཱསཱུཏི པཊིསེདྷམཱུལིཀཱསུ. ཨེཝཉྷཱིཏི ‘‘ན ཀཱམདྷཱཏུཡཱ ཙུཏསྶ ཀཱམདྷཱཏུཾ ཨུཔཔཛྫནྟསྶཱ’’ཏིཨཱདིནཱ པཋམཡོཛནཱཡ སཏི. ནཀཱམདྷཱཏུཨཱདཱིསུ ཨུཔཔཏྟིཀིཏྟནེནེཝ ནཀཱམདྷཱཏུཨཱདིགྒཧཎེནཔི དྷཱཏུཝིསེསསྶེཝ གཧིཏཏཱཡ ཨཏྠཏོ ཝིཉྙཱཡམཱནཏྟཱ. ཏེནཱཧ ‘‘ན ཀཱམདྷཱཏུ…པེ… ཝིཉྙཱཡཏཱི’’ཏི. བྷཉྫིཏབྦཱཏི ཝིབྷཛིཏབྦཱ. ཝིབྷཱགོ པནེཏྠ དུཝིདྷོ ཨིཙྪིཏོཏི ཨཱཧ ‘‘དྭིདྷཱ ཀཱཏབྦཱཏི ཨཏྠོ’’ཏི. པུཙྪཱ ཙ ཝིསྶཛྫནཱནི ཙ པུཙྪཱཝིསྶཛྫནཱནི. ཡཐཱ ཨཝུཏྟེ བྷངྒཱབྷཱཝསྶ ཨཝིཉྙཱཏཏྟཱ ‘‘ཨནུསཡཱ བྷངྒཱ ནཏྠཱི’’ཏི ཝཏྟབྦཾ, ཏཐཱ ཏཡིདཾ ‘‘ཀཏི ཨནུསཡཱ བྷངྒཱ’’ཏི ཨེཏདཔེཀྑནྟི ཏདཔི ཝཏྟབྦཾ. པུཙྪཱཔེཀྑཉྷི ཝིསྶཛྫནནྟི.

དྷཱཏུཝཱརཝཎྞནཱ ནིཊྛིཏཱ.

ཨནུསཡཡམཀཝཎྞནཱ ནིཊྛིཏཱ.

༨. ཙིཏྟཡམཀཾ

ཨུདྡེསཝཱརཝཎྞནཱ

༡-༦༢. སརཱགཱདཱིཏི ¶ ཨེཏྠ ཨཱདི-སདྡེན ‘‘ཡསྶ སརཱགཾ ཙིཏྟཾ ཨུཔྤཛྫཏི, ན ནིརུཛ྄ཛྷཏཱི’’ཏི ཨཱརབྷིཏྭཱ ཡཱཝ ‘‘ཡསྶ ཨཝིམུཏྟཾ ཙིཏྟ’’ནྟི ཝཱརོ, ཏཱཝ སངྒཎྷཱཏི. ཀུསལཱདཱིཏི པན ཨཱདི-སདྡེན ‘‘ཡསྶ ཀུསལཾ ཙིཏྟཾ ཨུཔྤཛྫཏི, ན ནིརུཛ྄ཛྷཏཱི’’ཏི ཨཱརབྷིཏྭཱ ཡཱཝ ‘‘ཡསྶ སརཎཾ ཙིཏྟཾ ཨུཔྤཛྫཏི, ན ནིརུཛ྄ཛྷཏཱི’’ཏི ཝཱརོ, ཏཱཝ སངྒཎྷཱཏི, ཏསྨཱ སརཱགཱདིཀུསལཱདཱིཧཱིཏི སརཱགཱདཱིཧི ཨཝིམུཏྟནྟེཧི, ཀུསལཱདཱིཧི ཨརཎནྟེཧི པདེཧི མིསྶཀཱ ཝཱརཱ. སུདྡྷིཀཱཏི ཀེཝལཱ ཡཐཱཝུཏྟསརཱགཱདཱིཧི ཀུསལཱདཱིཧི ཙ ཨམིསྶཀཱ. ཏཡོ ཏཡོཏི པུགྒལདྷམྨཝསེན ¶ ཏཡོ ཏཡོ མཧཱཝཱརཱ. ཡདི ཨེཝཾ ཀཐཾ སོལ༹ས པུགྒལཝཱརཱཏི ཨཱཧ ‘‘ཏཏྠ ཏཏྠ པན ཝུཏྟེ སམྤིཎྜེཏྭཱ’’ཏི. ཏཏྠ ཏཏྠ སོལ༹སཝིདྷེ སརཱགཱདིམིསྶཀཙིཏྟེ ཝུཏྟེ པུགྒལེ ཨེཝ ཨེཀཛ྄ཛྷཾ སམྤིཎྜེཏྭཱ སངྒཧེཏྭཱ ‘‘སོལ༹ས པུགྒལཝཱརཱ’’ཏི ཝུཏྟཾ. ‘‘དྷམྨཔུགྒལདྷམྨཝཱརཱ’’ཏི ཨེཏྠཱཔི ཨེསེཝ ནཡོ. ན ནིརནྟརཾ ཝུཏྟེཏི དྷམྨེ པུགྒལདྷམྨེ ཙ ཨནཱམསིཏྭཱ སོལ༹སསུཔི ཋཱནེསུ ནིརནྟརཾ པུགྒལེ ཨེཝ ཝུཏྟེ སམྤིཎྜེཏྭཱ སོལ༹ས པུགྒལཝཱརཱ ན ཝུཏྟཱཏི ཨཏྠོ.

སཾསགྒཝསེནཱཏི སཾསཛྫནཝསེན དེསནཱཡ ཝིམིསྶནཝསེན. ཨཉྙཐཱ ཧི ཨུཔྤཱདནིརོདྷཱ པཙྩུཔྤནྣཱནཱགཏཀཱལཱ ཙ ཀཐཾ སཾསཛྫཱིཡནྟི. སེསཱནམྤི ཝཱརཱནནྟི ཨུཔྤཱདུཔྤནྣཝཱརཱདཱིནཾ. ཏཾཏཾནཱམཏཱཏི ཡཐཱ ‘‘ཡསྶ ཙིཏྟཾ ཨུཔྤཛྫཏི, ཏསྶ ཙིཏྟཾ ཨུཔྤནྣ’’ནྟིཨཱདིནཱ ཨུཔྤཱདཨུཔྤནྣབྷཱཝཱམསནཏོ ཨུཔྤཱདཨུཔྤནྣཝཱརོཏི ནཱམཾ པཱལི༹ཏོ ཨེཝ ཝིཉྙཱཡཏི, ཨེཝཾ སེསཝཱརཱནམྤཱིཏི ཨཱཧ ‘‘ཏཾཏཾནཱམཏཱ པཱལི༹ཨནུསཱརེན ཝེདིཏབྦཱ’’ཏི.

ཨུདྡེསཝཱརཝཎྞནཱ ནིཊྛིཏཱ.

ནིདྡེསཝཱརཝཎྞནཱ

༦༣. ཏཐཱརཱུཔསྶེཝཱཏི པཙྪིམཙིཏྟསམངྒིནོ ཨེཝ. ཏཉྩ ཙིཏྟནྟི ཏཉྩ ཡཐཱཝུཏྟཀྑཎཾ པཙྪིམཙིཏྟཾ. ‘‘ཨེཝཾཔཀཱར’’ནྟི ཨིམསྶ ཨཏྠཾ དསྶེཏུཾ ‘‘བྷངྒཀྑཎསམངྒིམེཝཱ’’ཏི ཝུཏྟཾ ནིརུཛ྄ཛྷམཱནཱཀཱརསྶ ‘‘ཨེཝཾཔཀཱར’’ནྟི ཝུཏྟཏྟཱ.

༦༥-༨༢. དྭཡམེཏནྟི ¶ ཡཾ ‘‘ཁཎཔཙྩུཔྤནྣམེཝ ཙིཏྟཾ ཨུཔྤཱདཀྑཎཱཔགམེན ཨུཔྤཛྫིཏྠ ནཱམ, ཏདེཝ ཨུཔྤཱདཀྑཎེ ཨུཔྤཱདཾ པཏྟཏྟཱ ཨུཔྤཛྫིཏྠ, ཨནཏཱིཏཏྟཱ ཨུཔྤཛྫཏི ནཱམཱ’’ཏི ཝུཏྟཾ, ཨེཏཾ ཨུབྷཡམྤི. ཨེཝཾ ན སཀྐཱ ཝཏྟུནྟི ཨིམིནཱ ཝུཏྟཔྤཀཱརེན ན སཀྐཱ ཝཏྟུཾ, པཀཱརནྟརེན པན སཀྐཱ ཝཏྟུནྟི ཨདྷིཔྤཱཡོ. ཏཏྠ ‘‘ན ཧཱི’’ཏིཨཱདིནཱ པཋམཔཀྑཾ ཝིབྷཱཝེཏི. ཝིབྷཛིཏབྦཾ སིཡཱཏི ‘‘བྷངྒཀྑཎེ ཏཾ ཙིཏྟཾ ཨུཔྤཛྫིཏྠ, ནོ ཙ ཨུཔྤཛྫཏི, ཨུཔྤཱདཀྑཎེ ཏཾ ཙིཏྟཾ ཨུཔྤཛྫིཏྠ ཙེཝ ཨུཔྤཛྫཏི ཙཱ’’ཏི ཝིབྷཛིཏབྦཾ སིཡཱ, ན ཙ ཝིབྷཏྟཾ ¶ . ‘‘ཨཱམནྟཱ’’ཏི ཝཏྟབྦཾ སིཡཱ ཁཎཔཙྩུཔྤནྣེ ཙིཏྟེ ཝུཏྟནཡེན ཨུབྷཡསྶཔི ལབྦྷམཱནཏྟཱ, ན ཙ ཝུཏྟཾ. ཨིདཱནི ཡེན པཀཱརེན སཀྐཱ ཝཏྟུཾ, ཏཾ དསྶེཏུཾ ‘‘ཙིཏྟསྶ བྷངྒཀྑཎེ’’ཏིཨཱདིམཱཧ. པུགྒལོ ཝུཏྟོ, པུགྒལཝཱརོ ཧེསོཏི ཨདྷིཔྤཱཡོ. ཏསྶཱཏི པུགྒལསྶ. ན ཙ ཀིཉྩི ཙིཏྟཾ ཨུཔྤཛྫཏི ཙིཏྟསྶ བྷངྒཀྑཎསམངྒིབྷཱཝཏོ. ཏཾ པན ཙིཏྟཾ ཨུཔྤཛྫཏི, ཡཾ ཙིཏྟསམངྒཱི སོ པུགྒལོཏི ཨེཝམེཏྠ ཨཏྠོ དཊྛབྦོ. ཡདི ཨནེཀཙིཏྟཝསེནཱཡཾ ཡམཀདེསནཱ པཝཏྟཱཏི ཙོདནཾ སནྡྷཱཡཱཧ ‘‘ཙིཏྟནྟི ཧི…པེ… ཏིཊྛཏཱི’’ཏི. སནྣིཊྛཱནཝསེན ནིཡམོ ཝེདིཏབྦོ, ཨཉྙཐཱ ‘‘ནོ ཙ ཏེསཾ ཙིཏྟཾ ཨུཔྤཛྫཏཱི’’ཏིཨཱདིནཱ པཊིསེདྷོ ན ཡུཛྫེཡྻཱཏི ཨདྷིཔྤཱཡོ. ཏཱདིསནྟི ཏཐཱརཱུཔཾ, ཡདཝཏྠོ ཨུཔྤནྣཨུཔྤཛྫམཱནཏཱདིཔརིཡཱཡེཧི ཝཏྟབྦོ ཧོཏི, ཏདཝཏྠནྟི ཨཏྠོ.

༨༣-༡༡༣. ཨིམསྶ པུགྒལཝཱརཏྟཱཏི ‘‘ཡསྶ ཙིཏྟཾ ཨུཔྤཛྫམཱན’’ནྟིཨཱདིནཡཔྤཝཏྟསྶ ཨིམསྶ ཨཏིཀྐནྟཀཱལཝཱརསྶ པུགྒལཝཱརཏྟཱ. པུགྒལོ པུཙྪིཏོཏི ‘‘ཡསྶ ཙིཏྟཾ ཨུཔྤཛྫམཱནཾ…པེ… ཏསྶ ཙིཏྟ’’ནྟི ཙིཏྟསམངྒིཔུགྒལོ པུཙྪིཏོཏི པུགྒལསྶེཝ ཝིསྶཛྫནེན བྷཝིཏབྦཾ, ཨིཏརཐཱ ཨཉྙཾ པུཙྪིཏཾ ཨཉྙཾ ཝིསྶཛྫིཏཾ སིཡཱ. ན ཀོཙི པུགྒལོ ན གཧིཏོ སབྦསཏྟཱནཾ ཨནིབྦཏྟཙིཏྟཏཱབྷཱཝཏོ. ཏེ ཙ པན སབྦེ པུགྒལཱ. ནིརུཛ྄ཛྷམཱནཀྑཎཱཏཱིཏཙིཏྟཱཏི ནིརུཛ྄ཛྷམཱནཀྑཎཱ ཧུཏྭཱ ཨཏཱིཏཙིཏྟཱ. ཏཐཱ དུཏིཡཏཏིཡཱཏི ཡཐཱ པཋམཔཉྷོ ཨནཝསེསཔུགྒལཝིསཡཏྟཱ པཊིཝཙནེན ཝིསྶཛྫེཏབྦོ སིཡཱ, ཏཐཱ ཏཏོ ཨེཝ དུཏིཡཏཏིཡཔཉྷཱ ‘‘ཨཱམནྟཱ’’ཨིཙྩེཝ ཝིསྶཛྫེཏབྦཱ སིཡུནྟི ཨཏྠོ. ཙཏུཏྠོ པན པཉྷོ ཨེཝཾ ཝིབྷཛིཏྭཱ པུགྒལཝསེནེཝ ཝིསྶཛྫེཏབྦོཏི དསྶེནྟོ ‘‘པཙྪིམཙིཏྟསྶཱ’’ཏིཨཱདིཾ ཝཏྭཱ ཏཐཱ ཨཝཙནེ ཀཱརཎཾ དསྶེནྟོ ‘‘ཙིཏྟཝསེན པུགྒལཝཝཏྠཱནཏོ’’ཏིཨཱདིམཱཧ. ‘‘བྷངྒཀྑཎེ ཙིཏྟཾ ཨུཔྤཱདཀྑཎཾ ¶ ཝཱིཏིཀྐནྟ’’ནྟི ཨིམིནཱ ཝཏྟམཱནསྶ ཙིཏྟསྶ ཝསེན པུགྒལོ ཨུཔྤཱདཀྑཎཱཏཱིཏཙིཏྟོ, ‘‘ཨཏཱིཏཾ ཙིཏྟཾ ཨུཔྤཱདཀྑཎཉྩ ཝཱིཏིཀྐནྟནྟི བྷངྒཀྑཎཉྩ ཝཱིཏིཀྐནྟ’’ནྟི ཨིམིནཱ པན ཨཏཱིཏསྶ ཙིཏྟསྶ ཝསེན པུགྒལོ ཨུཔྤཱདཀྑཎཱཏཱིཏཙིཏྟོ ཝུཏྟོ.

ཏཏྠཱཏི ཏེསུ དྭཱིསུ པུགྒལེསུ. པུརིམསྶཱཏི པཋམཾ ཝུཏྟསྶ སནྣིཊྛཱནཔདསངྒཧིཏསྶ ཙིཏྟཾ ན བྷངྒཀྑཎཾ ཝཱིཏིཀྐནྟཾ. ‘‘ནོ ཙ བྷངྒཀྑཎཾ ཝཱིཏིཀྐནྟ’’ནྟི ཧི ཝུཏྟཾ. པཙྪིམསྶ ཝཱིཏིཀྐནྟཾ ཙིཏྟཾ བྷངྒཀྑཎནྟི སམྦནྡྷོ. ‘‘བྷངྒཀྑཎཉྩ ཝཱིཏིཀྐནྟ’’ནྟི ཧི ཝུཏྟཾ. ཨེཝམཱདིཀོ པུགྒལཝིབྷཱགོཏི དུཏིཡཔཉྷཱདཱིསུ ཝུཏྟཾ སནྡྷཱཡཱཧ. ཏསྶ ཙིཏྟསྶ ཏཾཏཾཁཎཝཱིཏིཀྐམཱཝཱིཏིཀྐམདསྶནཝསེནཱཏི ¶ ཏསྶ ཏསྶ ཨུཔྤཱདཀྑཎསྶ བྷངྒཀྑཎསྶ ཙ ཡཐཱརཧཾ ཝཱིཏིཀྐམསྶ ཨཝཱིཏིཀྐམསྶ ཙ དསྶནཝསེན དསྶིཏོ ཧོཏི པུགྒལཝིབྷཱགོཏི ཡོཛནཱ. ཨིདྷཱཏི ཨིམསྨིཾ ཨཏིཀྐནྟཀཱལཝཱརེ. པུགྒལཝིསིཊྛཾ ཙིཏྟཾ པུཙྪིཏཾ ‘‘ཡསྶ ཙིཏྟཾ ཏསྶ ཙིཏྟ’’ནྟི ཝུཏྟཏྟཱ. ཡདིཔི པུགྒལཔྤདྷཱནཱ པུཙྪཱ པུགྒལཝཱརཏྟཱ. ཨཐཱཔི ཙིཏྟཔྤདྷཱནཱ པུགྒལཾ ཝིསེསནབྷཱཝེན གཧེཏྭཱ ཙིཏྟསྶ ཝིསེསིཏཏྟཱ. ཨུབྷཡཐཱཔི དུཏིཡཔུཙྪཱཡ ‘‘ཨཱམནྟཱ’’ཏི ཝཏྟབྦཾ སིཡཱ ཨནཝསེསཔུགྒལཝིསཡཏྟཱ. ཏཐཱ པན ཨཝཏྭཱ ‘‘ཨཏཱིཏཾ ཙིཏྟ’’ནྟི ཝུཏྟཾ, ཀསྨཱ ནིརོདྷཀྑཎ…པེ… དསྶནཏྠནྟི དཊྛབྦནྟི ཡོཛནཱ. ཨེས ནཡོ ‘‘ན ནིརུཛ྄ཛྷམཱན’’ནྟི ཨེཏྠཱཔཱིཏི ནིརུཛ྄ཛྷམཱནཾ ཁཎཾ ནིརོདྷཀྑཎཾ ཁཎཾ ཝཱིཏིཀྐནྟཀཱལཾ ཀིཾ ཏསྶ ཙིཏྟཾ ན ཧོཏཱིཏི ཨཏྠོ.

༡༡༤-༡༡༦. སརཱགཔཙྪིམཙིཏྟསྶཱཏི སརཱགཙིཏྟེསུ པཙྪིམསྶ ཙིཏྟསྶ, ཨེཀསྶ པུགྒལསྶ རཱགསམྤཡུཏྟཙིཏྟེསུ ཡཾ སབྦཔཙྪིམཾ ཙིཏྟཾ, ཏསྶ. སོ པན པུགྒལོ ཨནཱགཱམཱི ཝེདིཏབྦོ. ན ནིརུཛ྄ཛྷཏི ནིརོདྷཱསམངྒིཏཱཡ. ནིརུཛ྄ཛྷིསྶཏི ཨིདཱནི ནིརོདྷཾ པཱཔུཎིསྶཏི. ཨཔྤཊིསནྡྷིཀཏྟཱ པན ཏཏོ ཨཉྙཾ ནུཔྤཛྫིསྶཏི. ཨིཏརེསནྟི ཡཐཱཝུཏྟསརཱགཔཙྪིམཙིཏྟསམངྒིཾ ཝཱིཏརཱགཙིཏྟསམངྒིཉྩ ཋཔེཏྭཱ ཨཝསེསཱནཾ ཨིཏརསེཀྑཱནཉྩེཝ པུཐུཛྫནཱནཉྩ.

ནིདྡེསཝཱརཝཎྞནཱ ནིཊྛིཏཱ.

ཙིཏྟཡམཀཝཎྞནཱ ནིཊྛིཏཱ.

༩. དྷམྨཡམཀཾ

༡. པཎྞཏྟིཝཱརོ

ཨུདྡེསཝཱརཝཎྞནཱ

༡-༡༦. ཡཐཱ ¶ མཱུལཡམཀེ ཀུསལཱདིདྷམྨཱ དེསིཏཱཏི ཀུསལཱཀུསལཱབྱཱཀཏཱ དྷམྨཱ ཀུསལཀུསལམཱུལཱདིཝིབྷཱགཏོ ¶ མཱུལཡམཀེ ཡམཀཝསེན ཡཐཱ དེསིཏཱ. ཨཉྙཐཱཏི ཀུསལཀུསལམཱུལཱདིཝིབྷཱགཏོ ཨཉྙཐཱ, ཁནྡྷཱདིཝསེནཱཏི ཨཏྠོ.

ཨུདྡེསཝཱརཝཎྞནཱ ནིཊྛིཏཱ.

༢. པཝཏྟིཝཱརཝཎྞནཱ

༣༣-༣༤. ཏཾ པན ཀམྨསམུཊྛཱནཱདིརཱུཔཾ ཨགྒཧེཏྭཱ. ཀེཙཱིཏི དྷམྨསིརིཏྠེརཾ སནྡྷཱཡཱཧ. སོ ཧི ‘‘ཙིཏྟསམུཊྛཱནརཱུཔཝསེན ཝུཏྟ’’ནྟི ཨཊྛཀཐཾ ཨཱཧརིཏྭཱ ‘‘ཨིམསྨིཾ པཉྷེ ཀམྨསམུཊྛཱནཱདིརཱུཔཉྩ ལབྦྷཏཱི’’ཏི ཨཝོཙ. ཏཐཱ ཙ ཝཏྭཱ པཊིལོམཔཱལི༹ཾ དསྶེཏྭཱ ‘‘ཙིཏྟསམུཊྛཱནརཱུཔམེཝ ཨིདྷཱདྷིཔྤེཏཾ. ཀམྨསམུཊྛཱནཱདིརཱུཔེ ན ཝིདྷཱནཾ, ནཱཔི པཊིསེདྷོ’’ཏི ཨཱཧ. ཏཐཱཏི ཡཐཱ ཝུཏྟཔྤཀཱརེ པཱཋེ ཙིཏྟསམུཊྛཱནརཱུཔམེཝ ཨདྷིཔྤེཏཾ, ཏཐཱ ཨེཏྠཱཔཱིཏི ཨཏྠོ. ནོཏི ཝུཏྟནྟི ཝདནྟཱིཏི སམྦནྡྷོ. ཏཾ པནེཏནྟི ཡཐཱ ཨུདྡྷཊསྶ པཱཋསྶ ཨཏྠཝཙནཾ, ཨེཝཾ ན སཀྐཱ ཝཏྟུཾ. ཀསྨཱཏི ཨཱཧ ‘‘ཙིཏྟསྶ བྷངྒཀྑཎེ…པེ… པཊིསེདྷསིདྡྷིཏོ’’ཏི. སྭཱཡཾ པཊིསེདྷོ ཧེཊྛཱ དསྶིཏོཡེཝཱཏི ཨདྷིཔྤཱཡོ.

ཡེ ཙ ཝདནྟཱིཏི ཨེཏྠ ཡེ ཙཱཏི ཝཛིརབུདྡྷིཏྠེརཾ སནྡྷཱཡཱཧ. སོ ཧི ‘‘སོཏཱཔཏྟིམགྒཀྑཎེ’’ཏིཨཱདིནཱ པཊིསམྦྷིདཱམགྒཔཱལི༹ཾ ཨཱཧརིཏྭཱ ‘‘ཡཐཱ ཏཏྠ སཏིཔི ཀམྨཛཱདིརཱུཔེ ཋཔེཏྭཱ ཙིཏྟསམུཊྛཱནརཱུཔནྟི ཙིཏྟཔཊིབདྡྷཏྟཱ ཙིཏྟཛརཱུཔམེཝ ཋཔེཏབྦབྷཱཝེན ཨུདྡྷཊཾ, ཨེཝམིདྷཱཔི ཙིཏྟཛརཱུཔམེཝ ཀཐིཏ’’ནྟི ཝདཏི. ཏཉྩ ནེསཾ ཝཙནཾ ཏཐཱ ན ཧོཏི, ཡཐཱ ཏེཧི ཨུདཱཧཊཾ, ཝིསམོཡཾ ཨུཔཉྙཱསོཏི ཨཏྠོ. ཡཐཱ ཙ ཏཾ ཏཐཱ ན ཧོཏི, ཏཾ དསྶེཏུཾ ‘‘ཡེསཉྷཱི’’ཏིཨཱདི ཝུཏྟཾ. ཏེསནྟི ཀམྨཛཱདཱིནཾ. ཏསྶཱཏི མགྒསྶ. ཏེཏི ཨབྱཱཀཏཱ, ཡེ ཨུཔྤཱདནིརོདྷཝནྟོ. ཨཝིཛྫམཱནེསུ ཙ ཨུཔྤཱདནིརོདྷེསུ ནིབྦཱནསྶ ཝིཡ.

སནྣིཊྛཱནེན ¶ གཧིཏེསུ པུགྒལེསུ. ཏེསུ ཧི ཀེཙི ཨཀུསལཱབྱཱཀཏཙིཏྟཱནཾ ཨུཔྤཱདཀྑཎསམངྒིནོ, ཀེཙི ཨབྱཱཀཏཙིཏྟསྶ, ཀེཙི ཀུསལཱབྱཱཀཏཙིཏྟསྶ, ཏེསུ པུརིམཱ དྭེ ¶ པཋམཀོཊྛཱསེན སངྒཧིཏཱ ཏསྶ ཀུསལུཔྤཏྟིཔཊིསེདྷཔརཏྟཱ, ཏེ པན བྷཝཝསེན ཝིབྷཛིཏྭཱ ཝཏྟབྦཱཏི དསྶེནྟོ ‘‘པཉྩཝོཀཱརེ’’ཏིཨཱདིམཱཧ. ཨེཝནྟི ཡཐཱཝུཏྟནཡེན. སབྦཏྠཱཏི སབྦཔཉྷེསུ.

༧༩. ཏཏོཏི ཨེཀཱཝཛྫནཝཱིཐིཏོ. པུརིམཏརཛཝནཝཱིཐི ཡཱཡ ཝུཊྛཱནགཱམིནཱི སངྒཧིཏཱ, ཏཏྠ ཨུཔྤནྣསྶཔི ཙིཏྟསྶ. ཀུསལཱནཱགཏབྷཱཝཔརིཡོསཱནེནཱཏི ཀུསལདྷམྨཱནཾ ཨནཱགཏབྷཱཝསྶ པརིཡོསཱནབྷཱུཏེན ཨགྒམགྒཱནནྟརཔཙྩཡཏྟེན དཱིཔིཏཾ ཧོཏི སམཱནལཀྑཎཾ སབྦཾ. ཀེན? ཏཱཡ ཨེཝ སམཱནལཀྑཎཏཱཡ. ཨེས ནཡོཏི ཡཐཱ ཀུསལཱནུཔྤཱདོ ཀུསལཱནཱགཏབྷཱཝསྶ པརིཡོསཱནབྷཱུཏཏོ ཝུཏྟཔརིཙྪེདཏོ ཨོརམྤི ལབྦྷཏཱིཏི སོ ཡཐཱཝུཏྟཔརིཙྪེདོ ལཀྑཎམཏྟནྟི སྭཱཡཾ ནཡོ དསྶིཏོ. ཨེས ནཡོ ཨཀུསལཱཏཱིཏབྷཱཝསྶ ཨཱདིམྷི ‘‘དུཏིཡེ ཨཀུསལེ’’ཏི ཝུཏྟཊྛཱནེ, ཨབྱཱཀཏཱཏཱིཏབྷཱཝསྶ ཨཱདིམྷི ‘‘དུཏིཡེ ཙིཏྟེ’’ཏི ཝུཏྟཊྛཱནེཔཱིཏི ཡོཛནཱ. ཨིདཱནི ‘‘ཨེས ནཡོ’’ཏི ཡཐཱཝུཏྟམཏིདེསཾ ‘‘ཡཐཱ ཧཱི’’ཏིཨཱདིནཱ པཱཀཊཏརཾ ཀརོཏི. བྷཱཝནཱཔཧཱནཱནི དསྶིཏཱནི ཧོནྟི ‘‘ཨགྒམགྒསམངྒཱི ཀུསལཉྩ དྷམྨཾ བྷཱཝེཏི, ཨཀུསལཉྩ པཛཧཏཱི’’ཏི. ཨིདྷཱཏི ཨིམསྨིཾ པཝཏྟིཝཱརེ. ཏཾ ཏནྟི ཨཀུསལཱཏཱིཏཏཱདི ཀུསལཱནཱགཏཏཱདི ཙ. ཏེན ཏེནཱཏི ‘‘དུཏིཡེ ཨཀུསལེ ཨགྒམགྒསམངྒཱི’’ཏི ཨེཝམཱདིནཱ ཨནྟེན ཙ.

༡༠༠. པཊིསནྡྷིཙིཏྟཏོཏི ཨིདཾ མརིཡཱདགྒཧཎཾ, ན ཨབྷིཝིདྷིགྒཧཎཾ, ཡཏོ ‘‘སོལ༹སམ’’ནྟི ཨཱཧ. ཨབྷིཝིདྷིགྒཧཎམེཝ ཝཱ སོལ༹སཙིཏྟཀྑཎཱཡུཀམེཝ རཱུཔནྟི ཨིམསྨིཾ པཀྑེ ཨདྷིཔྤེཏེ པཊིཀྑིཏྟོཝཱཡཾ ཝཱདོཏི དསྶེནྟོ ‘‘ཏཏོ པརམྤི ཝཱ’’ཏི ཨཱཧ. ཨཡཉྩ ཝིཙཱརོ ཧེཊྛཱ དསྶིཏོ ཨེཝ. ན ཏཏོ ཨོརནྟི ཝིཉྙཱཡཏི ཏཏོ ཨོརཾ ཨཀུསལནིརོདྷསམཀཱལཾ ཨབྱཱཀཏནིརོདྷསྶ ཨསམྦྷཝཏོ.

པཝཏྟིཝཱརཝཎྞནཱ ནིཊྛིཏཱ.

དྷམྨཡམཀཝཎྞནཱ ནིཊྛིཏཱ.

༡༠. ཨིནྡྲིཡཡམཀཾ

༡. པཎྞཏྟིཝཱརོ

ཨུདྡེསཝཱརཝཎྞནཱ

༡. ཨིནྡྲིཡཡམཀེ ¶ ¶ ཝིབྷངྒེ ཝིཡཱཏི ཡཐཱ ཨིནྡྲིཡཝིབྷངྒེ པུརིསིནྡྲིཡཱནནྟརཾ ཛཱིཝིཏིནྡྲིཡཾ ཨུདྡིཊྛཾ, ན མནིནྡྲིཡཱནནྟརཾ, ཨེཝཾ ཨིམསྨིཾ ཨིནྡྲིཡཡམཀེ. ཏཉྩ སུཏྟདེསནཱནུརོདྷེནཱཏི དསྶེནྟོ ‘‘ཏཱིཎིམཱནི…པེ… སུཏྟེ དེསིཏཀྐམེནཱ’’ཏི ཨཱཧ. སོཡཾ ཡདཏྠཾ ཏསྶ སུཏྟེ དེསིཏཀྐམེན ཨུདྡེསོ, ཏཾ དསྶེཏུཾ ‘‘པཝཏྟིཝཱརེཧཱི’’ཏིཨཱདི ཝུཏྟཾ. ཏཏྠ ཡཐཱ ‘‘ཛཱིཝིཏིནྡྲིཡ’’ནྟི ཨིདཾ རཱུཔཛཱིཝིཏིནྡྲིཡསྶ ཨརཱུཔཛཱིཝིཏིནྡྲིཡསྶ ཙ སཱམཉྙཏོ གཧཎཾ, ཨེཝཾ ཨུཔཱདིནྣསྶ ཨནུཔཱདིནྣསྶ ཙཱཏི ཨཱཧ ‘‘ཀམྨཛཱནཾ ཨཀམྨཛཱནཉྩ ཨནུཔཱལཀ’’ནྟི. ཨཐ ཝཱ སཧཛདྷམྨཱནུཔཱལཀམྤི ཛཱིཝིཏིནྡྲིཡཾ ན ཀེཝལཾ ཁཎཊྛིཏིཡཱ ཨེཝ ཀཱརཎཾ, ཨཐ ཁོ པབནྡྷཱནུཔཙྪེདསྶཔི ཀཱརཎམེཝ. ཨཉྙཐཱ ཨཱཡུཀྑཡམརཎཾ ན སམྦྷཝེཡྻ, ཏསྨཱ ‘‘ཀམྨཛཱནཉྩ ཨནུཔཱལཀ’’ནྟི ཨཝིསེསཏོ ཝུཏྟཾ, ཙུཏིཔཊིསནྡྷཱིསུ ཙ པཝཏྟམཱནཱནཾ ཀམྨཛཱནཾ ཨནུཔཱལཀཾ. ཨིཏཱིཏི ཏསྨཱ. ཏཾམཱུལཀཱནཱིཏི ཛཱིཝིཏིནྡྲིཡམཱུལཀཱནི. ཙུཏིཔཊིསནྡྷིཔཝཏྟིཝསེནཱཏི ཙུཏིཔཊིསནྡྷིཝསེན པཝཏྟིཝསེན ཙ. ཏཏྠ ཡཾ ཨུཔཱདིནྣཾ, ཏཾ ཙུཏིཔཊིསནྡྷིཝསེནེཝ, ཨིཏརཾ ཨིཏརཝསེནཔི ཝཏྟབྦཾ. ཡསྨཱ ཙཀྑུནྡྲིཡཱདཱིསུ པུརིསིནྡྲིཡཱཝསཱནེསུ ཨེཀནྟཨུཔཱདིནྣེསུ ཨཏཾསབྷཱཝཏྟཱ ཡཾ མནིནྡྲིཡཾ མཱུལམེཝ ན ཧོཏི, ཏསྨཱ ཏཾ ཋཔེཏྭཱ ཨཝསེསམཱུལཀཱནི ཙཀྑུནྡྲིཡཱདིམཱུལཀཱནི. ཨཱཡཏནཡམཀེ ཝིཡཱཏི ཡཐཱ ཨཱཡཏནཡམཀེ པཊིསནྡྷིཝསེནཱཡཏནཱནཾ ཨུཔྤཱདོ, མརཎཝསེན ཙ ནིརོདྷོ ཝུཏྟོ, ཨེཝམིདྷཱཔི ཙུཏིཨུཔཔཏྟིཝསེནེཝ ཝཏྟབྦཱནི, ཏསྨཱ ཨཏཾསབྷཱཝཏྟཱ ཛཱིཝིཏིནྡྲིཡཾ ཏེསཾ ཙཀྑུནྡྲིཡཱདཱིནཾ མཛ྄ཛྷེ ཨནུདྡིསིཏྭཱ ཨནྟེ པུརིསིནྡྲིཡཱནནྟརཾ ཨུདྡིཊྛཾ. ཡཾ པན ཙཀྑུནྡྲིཡཱདིམཱུལཀེསུ མནིནྡྲིཡཾ སབྦཔཙྪཱ ཨེཝ གཧིཏཾ, ཏཏྠ ཀཱརཎཾ ཨཊྛཀཐཱཡཾ ཝུཏྟམེཝ.

ཨུདྡེསཝཱརཝཎྞནཱ ནིཊྛིཏཱ.

ནིདྡེསཝཱརཝཎྞནཱ

༩༤. ཀོཙི ¶ སབྷཱཝོ ནཏྠཱིཏི ཀོཙི སབྷཱཝདྷམྨོ ནཏྠི. ཡདི ཨེཝཾ ‘‘ནཏྠཱི’’ཏི པཊིཀྑེཔོ ཨེཝ ཡུཏྟོཏི ཨཱཧ ‘‘ན ཙ རཱུཔཱདཱི’’ཏིཨཱདི. ‘‘སུཁཱ དུཀྑཱ ¶ ཨདུཀྑམསུཁཱ’’ཏིཨཱདཱིསུ སུཁདུཀྑསདྡཱནཾ སཱམཉྙཝཙནབྷཱཝེཔི ཨིནྡྲིཡདེསནཱཡཾ ཏེ ཝིསིཊྛཝིསཡཱ ཨེཝཱཏི དསྶེནྟོ ‘‘སུཁསྶ…པེ… གཧིཏོཡེཝཱ’’ཏི ཨཱཧ. དུཀྑསྶ ཙ བྷེདཾ ཀཏྭཱ.

༡༤༠. པཉྙིནྡྲིཡཱནི ཧོནྟཱིཏི ཨཱམནྟཱཏི ཝུཏྟནྟི པཛཱནནཊྛེན ཨདྷིཔཏེཡྻཊྛེན ཙ པཉྙིནྡྲིཡཱནི ཧོནྟི, དསྶནཊྛེན པན ཙཀྑཱུནི ཙཱཏི ཙཀྑུ, ཨིནྡྲིཡནྟི པུཙྪཱཡ ‘‘ཨཱམནྟཱ’’ཏི ཝུཏྟནྟི ཨདྷིཔྤཱཡོ. ‘‘ཏཎྷཱསོཏམེཝཱཧཱ’’ཏི ཝུཏྟཾ, ‘‘ཡསྶ ཚཏྟིཾསཏི སོཏཱ’’ཏིཨཱདཱིསུ (དྷ. པ. ༣༣༩) པན དིཊྛིཨཱདཱིནམྤི སོཏབྷཱཝོ ཨཱགཏོ.

པཎྞཏྟིནིདྡེསཝཱརཝཎྞནཱ ནིཊྛིཏཱ.

༢. པཝཏྟིཝཱརཝཎྞནཱ

༡༨༦. ཨཉྙདྷམྨནིསྶཡེནཱཏི ‘‘ཡོ ཏེསཾ རཱུཔཱིནཾ དྷམྨཱནཾ ཨཱཡུ ཋིཏཱི’’ཏིཨཱདིནཱ (དྷ. ས. ༦༣༤) ཨཉྙདྷམྨནིསྶཡེན གཧེཏབྦཾ. པཝཏྟིཉྩ གཧེཏྭཱ གཏེསུ ཝིསྶཛྫནེསུ, ཙུཏིཔཊིསནྡྷིཡོ གཧེཏྭཱ གཏེསུ ཡོཛནཱ ན ལབྦྷཏཱིཏི ཨདྷིཔྤཱཡོ. ཨལབྦྷམཱནཱ ཙ སུཁདུཀྑདོམནསྶིནྡྲིཡེཧེཝ ན ལབྦྷཏི. ཏཾམཱུལཀཱ ཙ ནཡཱཏི སུཁིནྡྲིཡཱདིམཱུལཀཱ ཙ ནཡཱ. ཏེཧཱིཏི སུཁིནྡྲིཡཱདཱིཧི. ཡོཛནཱཏི ‘‘པཝཏྟེ སུཁིནྡྲིཡཝིཔྤཡུཏྟཙིཏྟསྶ ཨུཔྤཱདཀྑཎེ’’ཏིཨཱདིནཱ ཨུཔྤཛྫམཱནེཧི ཡོཛནཱ. ཏཾམཱུལཀཱ ཙ ཏཐཱཡོཛནཱམཱུལབྷཱུཏཱ ཙ ནཡཱ ཛཱིཝིཏིནྡྲིཡཱདིམཱུལཀཱ ཙ ནཡཱ. པཱཀཊཱཡེཝཱཏི པཱལི༹གཏིཡཱ ཨེཝ ཝིཉྙཱཡམཱནཡོཛནཏྟཱ སུཝིཉྙེཡྻཱ ཨེཝ.

ཏཾ ཝཙནཾ. སོམནསྶཝིརཧིཏསཙཀྑུཀཔཊིསནྡྷིནིདསྶནཝསེནཱཏི སོམནསྶཝིརཧིཏསཙཀྑུཀཔཊིསནྡྷིཡེཝ ནིདསྶནནྟི ཡོཛེཏབྦཾ. ཀཐཾ པནེཏཾ ཛཱནིཏབྦཾ ‘‘ནིདསྶནམཏྟམེཏཾ, ན པན གཎནཔརིཙྪིནྡན’’ནྟི ཨཱཧ ‘‘ན ཧི ཙཏུནྣཾཡེཝཱཏི ནིཡམོ ཀཏོ’’ཏི. ཏཾསམཱནལཀྑཎཱཏི ཏཱཡ ¶ སཙཀྑུཀཔཊིསནྡྷིཏཱཡ སམཱནལཀྑཎཱཏི པརིཏྟཝིཔཱཀགྒཧཎཾ. ཏཏྠ སསོམནསྶཔཊིསནྡྷིཡོ སནྡྷཱཡ ཨུཔེཀྑཱཔཊིསནྡྷིཡོ ནིདསྶནབྷཱཝེན ཝུཏྟཱཏི ཀེཙི. པརིཏྟཝིཔཱཀཔཊིསནྡྷི ཙ ཀུསལཝིཔཱཀཱཧེཏུཀཔཊིསནྡྷི ཝེདིཏབྦཱ. སཱཔི ཧི སཙཀྑུཀཱ སིཡཱ. ཏཾསམཱནལཀྑཎཱཏི ཝཱ ཏཱཡ ¶ ཨུཔེཀྑཱསཧགཏཱཡ སམཱནལཀྑཎཱ ཡཐཱཝུཏྟཨཧེཏུཀཔཊིསནྡྷི ཙ པཉྩམཛ྄ཛྷཱནཔཊིསནྡྷི ཙ. ཡདི ཨེཝཾ ‘‘ཙཏུནྣ’’ནྟི ཀསྨཱ གཎནཔརིཙྪེདོཏི ཨཱཧ ‘‘ཀཱམཱཝཙརེ…པེ… ནིདསྶནཾ ཀཏ’’ནྟི. ཏེནཱཏི ཨུཔེཀྑཱསཧགཏམཧཱཝིཔཱཀནིདསྶནེན, ཡེཧི སམཱནཏཱཡ ཨིམེ ནིདསྶནབྷཱཝེན ཝུཏྟཱ, ཏེ ཨེཀཾསེན ཏཾསབྷཱཝཱ ཨེཝཱཏི ཨཡམེཏྠ ཨདྷིཔྤཱཡོ. ཏེནཱཧ ‘‘ཡཐཱ སསོམནསྶ…པེ… ཏོ ཧོཏཱི’’ཏི.

ནནུ ཙ གབྦྷསེཡྻཀེསུ ཨཡམཏྠོ ཨེཀཾསཏོ ན ལབྦྷཏཱིཏི ཨཱསངྐཾ སནྡྷཱཡཱཧ ‘‘གབྦྷསེཡྻཀཱནཉྩ…པེ… དསྶིཏཱ ཧོཏཱི’’ཏི. ཏེནཱཧ ‘‘སཙཀྑུཀཱན’’ནྟིཨཱདི. ཏཏྠ ཡདི སཧེཏུཀཔཊིསནྡྷིཀཱནཾ ཀཱམཱཝཙརཱནཾ ནིཡམཏོ སཙཀྑུཀཱདིབྷཱཝདསྶནཾ གབྦྷསེཡྻཀཝསེན ལབྦྷེཡྻ, ཡུཏྟམེཏཾ སིཡཱཏི ཙོདནཾ སནྡྷཱཡཱཧ ‘‘གབྦྷསེཡྻཀེཔི ཧཱི’’ཏིཨཱདི. ཏཐཱ ཨཱཡཏནཡམཀེ དསྶིཏནྟི ཨིདཾ ཨཱཡཏནཡམཀཝཎྞནཱཡཾ ཨཏྟནཱ ཝུཏྟཾ ‘‘ཨེཝཉྩ ཀཏྭཱ ཨིནྡྲིཡཡམཀེ’’ཏིཨཱདིཝཙནཾ སནྡྷཱཡ ཝུཏྟཾ. ཏཏྠ ཧི སོམནསྶིནྡྲིཡུཔྤཱདཀཀམྨསྶ ཨེཀནྟེན ཙཀྑུནྡྲིཡུཔྤཱདནཏོ གབྦྷེཔི ཡཱཝ ཙཀྑུནྡྲིཡུཔྤཏྟི, ཏཱཝ ཨུཔྤཛྫམཱནཏཱཡ ‘‘ཨབྷིནནྡིཏབྦཏྟཱ’’ཏི ཝུཏྟཾ. སནྣིཊྛཱནེན སངྒཧིཏཱནནྟི ‘‘ཡསྶ ཝཱ པན སོམནསྶིནྡྲིཡཾ ཨུཔྤཛྫཏཱི’’ཏི ཨེཏེན སནྣིཊྛཱནེན སངྒཧིཏཱནཾ. ཨིཏྠཱིནཾ ཨགྷཱནཀཱནཾ ཨུཔཔཛྫནྟཱིནནྟི ཨཱདཱིསཱུཏི ཨཱདི-སདྡེན ‘‘ཨིཏྠཱིནཾ ཨཙཀྑུཀཱནཾ ཨུཔཔཛྫནྟཱིན’’ནྟིཨཱདིཾ སངྒཎྷཱཏི. ཏེ ཨེཝཱཏི གབྦྷསེཡྻཀཱ ཨེཝ.

ཏཾསམཱནལཀྑཎནྟི སོཔེཀྑཨཙཀྑུཀཔཊིསནྡྷིབྷཱཝེན སམཱནལཀྑཎཾ. ཏཏྠཱཏི ཨཧེཏུཀཔཊིསནྡྷིཙིཏྟེ. སམཱདྷིལེསོ དུབྦལསམཱདྷི ཡོ ཙིཏྟཊྛིཏིམཏྟོ. ཏསྨཱཏི ཡསྨཱ ཙིཏྟཊྛིཏི ཝིཡ དུབྦལཾ ཝཱིརིཡཾ ནཏྠི, ཡོ ‘‘ཝཱིརིཡལེསོ’’ཏི ཝཏྟབྦོ, ཏསྨཱ, ལེསམཏྟསྶཔི ཝཱིརིཡསྶ ཨབྷཱཝཱཏི ཨཏྠོ. ཨཉྙེསཱུཏི ཨཧེཏུཀཔཊིསནྡྷིཙིཏྟཏོ ཨཉྙེསུ. ཀེསུཙཱིཏི ཨེཀཙྩེསུ. ཨུབྷཡེནཔི མནོདྭཱརཱཝཛྫནཧསིཏུཔྤཱདཙིཏྟཾ ཝདཏི. ཨིདྷཱཏི ཨཧེཏུཀཔཊིསནྡྷིཙིཏྟེ. སམཱདྷིཝཱིརིཡཱནི ཨིནྡྲིཡཔྤཏྟཱནི ཙ ན ཧོནྟཱིཏི སམཱདྷིཀིཙྩཾ པཊིཀྑིཔཏི, ན སམཱདྷིམཏྟཾ, ན ¶ ཝཱིརིཡལེསསྶ སབྦྷཱཝཏོཏི ཡོཛེཏབྦཾ. ཏེནེཝཱཧ ‘‘ཝིསེསནཉྷི ཝིསེསིཏབྦེ པཝཏྟཏཱི’’ཏི. ཡསྨིཾ ཝཱིརིཡེ སཏི ཨིནྡྲིཡུཔྤཏྟི སིཡཱ, ཏདེཝ ཏཏྠ ནཏྠཱིཏི ཨཏྠོ.

ཨཔཱཡེ ¶ ཨོཔཔཱཏིཀཝསེནཱཏི ཨིདཾ སུགཏིཡཾ ཨོཔཔཱཏིཀོ ཝིཀལིནྡྲིཡོ ན ཧོཏཱིཏི ཀཏྭཱ ཝུཏྟཾ, ‘‘ལབྦྷནྟེཝ ཉཱཎཝིཔྤཡུཏྟཱན’’ནྟི པན ཝུཏྟཏྟཱ ‘‘དུཧེཏུཀཔཊིསནྡྷིཀཱནཾ ཝསེནཱ’’ཏི ཨཊྛཀཐཱཡཾ ཝུཏྟཾ. ཏེསནྟི ཨིཏྠིཔུརིསིནྡྲིཡསནྟཱནཱནཾ. ཨིཏྠིཔུརིསིནྡྲིཡཱནཾ པན ཨུཔྤཱདནིརོདྷཱ ཨབྷིཎྷསོཝ ཧོནྟཱིཏི. པཋམཀཔྤིཀཱདཱིནནྟི ཨེཏྠ ཨཱདི-སདྡེན གཧིཏཱནཾ པརིཝཏྟམཱནལིངྒཱནཾ ཝསེན ཨུཔྤཱདནིརོདྷགྒཧཎཾ ཝེདིཏབྦཾ. པཋམཀཔྤིཀཱནཾ པན ཝསེན ཨུཔྤཱདོ ཨེཝ ལབྦྷཏི. ‘‘ཙུཏིཨུཔཔཏྟིཝསེནེཝ དུཏིཡཔུཙྪཱསུཔི སནྣིཊྛཱནེཧི གཧཎཾ ཝེདིཏབྦ’’ནྟི ཨིདཾ ཨུཔཱདིནྣཨིནྡྲིཡེཧི ནིཡམིཏཏྟཱ ཝུཏྟཾ.

༡༩༠. སནྟཱནུཔྤཏྟིནིརོདྷདསྶནཏོཏི སནྟཱནཝསེན ཨུཔྤཱདནིརོདྷཱནཾ དིསྶམཱནཏྟཱ. ཨེཏེན རཱུཔཛཱིཝིཏིནྡྲིཡསྶ ཙཀྑུནྡྲིཡཱདིསམཱནགཏིཀཏཾ ཡུཏྟིཏོ སཱདྷེཏི. ཨཱགམཏོ པན ‘‘ཝིནཱ སོམནསྶེནཱ’’ཏིཨཱདིནཱ པརཏོ སཱདྷེསྶཏི. ཚེདོཏི ནཱམཾ དཊྛབྦཾ སརཱུཔདསྶནེནེཝ སཾསཡཚེདནཏོ.

ཏསྶཱཏི རཱུཔཛཱིཝིཏིནྡྲིཡསྶ. ཏེ ཙ ཨསཉྙསཏྟཱ. ནནུ ཙ ཨུཔྤཱདོཝ ཛཱིཝིཏིནྡྲིཡསྶ ཙུཏིཨུཔཔཏྟིཝསེན ཝཏྟབྦོ, ན ཨནུཔྤཱདོཏི ཨཱཧ ‘‘ཨནུཔྤཱདོ…པེ… ན པཝཏྟེ’’ཏི. ཨཡཉྩ ནཡོ ན ཀེཝལཾ པུརིམཀོཊྛཱསེ ཨེཝ, ཨཐ ཁོ ཨིཏརཀོཊྛཱསེཔི གཧིཏོ ཨེཝཱཏི དསྶེནྟོ ‘‘པཙྪིམཀོཊྛཱསེཔཱི’’ཏིཨཱདིམཱཧ.

‘‘ཨུཔཔཏྟིཙིཏྟསྶ ཨུཔྤཱདཀྑཎེ’’ཏི ཀསྨཱ ཝུཏྟནྟི ཡེནཱདྷིཔྤཱཡེན ཙོདནཱ ཀཏཱ, ཏམདྷིཔྤཱཡཾ ཝིཝརིཏུཾ ‘‘ནནུ སུདྡྷཱཝཱས’’ནྟིཨཱདི ཝུཏྟཾ. ན ཝཏྟབྦནྟི ‘‘ཨུཔཔཛྫནྟཱན’’ནྟི ན ཝཏྟབྦཾ, ‘‘ཨུཔཔཏྟིཙིཏྟསྶ ཨུཔྤཱདཀྑཎེ’’ཨིཙྩེཝ ཝཏྟབྦནྟི ཨཏྠོ. ཨིདཱནི ཡཐཱ ‘‘ཨུཔཔཛྫནྟཱན’’ནྟི ན ཝཏྟབྦཾ, ཏཾ དསྶེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. སོམནསྶམནིནྡྲིཡཱནནྟི སོམནསྶིནྡྲིཡམནིནྡྲིཡཱནཾ, ཨཡམེཝ ཝཱ པཱཋོ. ཏདཱཏི པཋམསྶ རཱུཔཛཱིཝིཏིནྡྲིཡསྶ དྷརམཱནཀཱལེ. ཏསྨཱཏི ཡསྨཱ རཱུཔཱརཱུཔཛཱིཝིཏིནྡྲིཡཱནཾ ཨཏྠེཝ ཀཱལབྷེདོ, ཨུབྷཡཉྩེཏྠ ཛཱིཝིཏིནྡྲིཡབྷཱཝསཱམཉྙེན ཨེཀཛ྄ཛྷཾ ཀཏྭཱ གཡ྄ཧཏི, ཏསྨཱ. ཨུབྷཡནྟི སོམནསྶིནྡྲིཡཛཱིཝིཏིནྡྲིཡནྟི ¶ ཨིདཾ ཨུབྷཡཾ. ཨུཔྤཱདཀྑཎེན ནིདསྶིཏནྟི ཨེཏེན ‘‘ཨུཔཔཏྟིཙིཏྟསྶ ཨུཔྤཱདཀྑཎེ’’ཏི ཨིདཾ ནིདསྶནམཏྟནྟི དསྶེཏི. ཨིདཱནི ཏམེཝཏྠཾ ཨུདཱཧརཎེན པཱཀཊཏརཾ ཀཱཏུཾ ‘‘ཡཐཱ ཧཱི’’ཏིཨཱདི ཝུཏྟཾ. ཏཏྠ ¶ ཡཐཱ ཏཱདིསཱནཾ ཨནེཀེསཾ ཙིཏྟཱནཾ བྷངྒཀྑཎེ ལབྦྷམཱནཾ ཏདེཀདེསེན སབྦཔཋམསྶ ཨུཔཔཏྟིཙིཏྟསྶ བྷངྒཀྑཎེན ནིདསྶིཏཾ, ཨེཝམིདྷཱཔི ཁཎདྭཡེ ལབྦྷམཱནཾ ཏདེཀདེསེན ཨུཔྤཱདཀྑཎེན ནིདསྶིཏནྟི ཨེཝཾ ནིདསྶནཏྠོ ཝེདིཏབྦོ.

ཏེསནྟི ཛཱིཝིཏིནྡྲིཡཱདཱིནཾ. ཨཉྙཏྠཱཏི པཝཏྟེ. ཨིདྷཱཏི ཨནཱགཏཀཱལབྷེདེ. ན ན སམྦྷཝཏི ཨུཔཔཏྟིཀྑཎསྶ ཝིཡ ཏཏོ པརཾ པཝཏྟིཀྑཎསྶཔི ཨནཱགཏཀཱལབྷཱཝཏོ. ཏསྨཱཏི ཨུཔཔཏྟིཏོ ཨཉྙཏྠཱཔི ཡཐཱདྷིཔྤེཏཨུཔྤཱདསམྦྷཝཏོ. ཨཡཉྩ ཨཏྠོ ཝཱརནྟརེཔི དིསྶཏཱིཏི དསྶེནྟོ ཨཱཧ ‘‘ཨེཝཉྩ ཀཏྭཱ’’ཏིཨཱདི. ན ཧཱིཏིཨཱདིནཱ ཏམེཝཏྠཾ སམཏྠེཏི. ཏཏྠ ཨཔི པཙྪིམ…པེ… སནྡྷིཀསྶཱཏི ཨཔི-སདྡེན ‘‘ཀོ པན ཝཱདོ ཨཔཙྪིམབྷཝིཀསྶ སོམནསྶསཧགཏཔཊིསནྡྷིཀསྶཱ’’ཏི དསྶེཏི. ཨཔཙྪིམབྷཝིཀསྶ ཙུཏིཏོ པཙྪཱ ‘‘སོམནསྶིནྡྲིཡཾ ནིརུཛ྄ཛྷིསྶཏཱི’’ཏི ཝཏྟབྦམེཝ ནཏྠཱིཏི ཨཱཧ ‘‘ཙུཏིཏོ པུབྦེཝཱ’’ཏི. ཨེཏྠ ཧི པཋམཔུཙྪཱསུ སནྣིཊྛཱནཏྠོཏིཨཱདཱིསུ ཨཡཾ སངྑེཔཏྠོ – ཨེཏྠ ‘‘ཡསྶ ཙཀྑུནྡྲིཡཾ ཨུཔྤཛྫིསྶཏཱི’’ཏི ཨེཝམཱདཱིསུ ཡམཀེསུ ཡཱ པཋམཔུཙྪཱ, ཏཱསུ སནྣིཊྛཱནཔདསངྒཧིཏོ ཨཏྠོ. པུཙྪིཏབྦཏྠནིསྶཡོཏི ‘‘ཏསྶ སོམནསྶིནྡྲིཡཾ ཨུཔྤཛྫིསྶཏཱི’’ཏིཨཱདིཀསྶ པུཙྪིཏབྦསྶ ཨཏྠསྶ ནིསྶཡབྷཱུཏོ མཱདིསོཝ མཡཱ སདིསོ ཨེཝ ཨཏྠོ ཨུཔཔཏྟིཨུཔྤཱདིནྡྲིཡཝཱ ཨུཔཔཏྟིཀྑཎེ ཨུཔྤཱདཱཝཏྠཨིནྡྲིཡསཧིཏོ, ཨུབྷཡུཔྤཱདིནྡྲིཡཝཱ པཊིསནྡྷིཔཝཏྟཱིསུ ཨུཔྤཱདཱཝཏྠཨིནྡྲིཡསཧིཏོ ཝཱ. པཊིནིཝཏྟིཏྭཱཔི པུཙྪིཏབྦཏྠསྶ ནིསྶཡོཏི ‘‘ཡསྶ ཝཱ པནཱ’’ཏིཨཱདིནཱ པཊིནིཝཏྟིཏྭཱ པུཙྪིཏབྦསྶཔི སཾསཡཏྠསྶ ནིསྶཡོཏི ཨེཝཾ ཨིམིནཱ ཝིཡ ཨཛ྄ཛྷཱསཡེན ‘‘ཡསྶ ཝཱ པན སོམནསྶིནྡྲིཡཾ ཨུཔྤཛྫིསྶཏཱི’’ཏིཨཱདཱིསུ དུཏིཡཔུཙྪཱསུ སནྣིཊྛཱནཏྠམེཝ སནྣིཊྛཱནཔདསངྒཧིཏམེཝ ཨཏྠཾ ནིཡམེཏི. ཏཏྠེཝ ཏཱསུ ཨེཝ པུབྦེ ཝུཏྟཔཋམཔུཙྪཱསུ ཨེཝ. པུཙྪིཏབྦཾ ‘‘ཏསྶ སོམནསྶིནྡྲིཡཾ ཨུཔྤཛྫིསྶཏཱི’’ཏིཨཱདཱིསུ ཨནཱགཏབྷཱཝམཏྟེན སརཱུཔཏོ གཧིཏཾ ཨུཔྤཱདཾ ཨུཔྤཱདསངྑཱཏཾ, ‘‘ཏསྶ སོམནསྶིནྡྲིཡཾ ནིརུཛ྄ཛྷིསྶཏཱི’’ཏིཨཱདཱིསུ ཨནཱགཏབྷཱཝམཏྟེན སརཱུཔཏོ གཧིཏཾ ནིརོདྷཾ ཝཱ ནིརོདྷསངྑཱཏཾ ཝཱ སཾསཡཏྠཾ ན ནིཡམེཏཱིཏི. ཨེཝནྟི ཝུཏྟཔྤཀཱརེན སནྣིཊྛཱནཏྠསྶ ནིཡམོ ཧོཏི, ན སཾསཡཏྠསྶ, ཏསྨཱ ‘‘ཡསྶ ཝཱ པན…པེ… ཨཱམནྟཱ’’ཏི ཝུཏྟཾ. ཨེས ནཡོཏི ཡྭཱཡཾ ཨུཔྤཱདཝཱརེ ཝིཙཱརོ ཝུཏྟོ, ནིརོདྷཝཱརེཔི ཨེསེཝ ནཡོ. ཏཐཱ ཧི ‘‘ཡསྶ ¶ ¶ ཝཱ པན སོམནསྶིནྡྲིཡཾ ནིརུཛ྄ཛྷིསྶཏི, ཏསྶ ཙཀྑུནྡྲིཡཾ ནིརུཛ྄ཛྷིསྶཏཱིཏི? ཨཱམནྟཱ’’ཏི ཝུཏྟཾ.

ཨེཝཾ ཨཝུཏྟཏྟཱཏི ཨུཔྤཱདནིརོདྷཱནཾ ཨནཱགཏཱནཾ སརཱུཔེན ཨཝུཏྟཏྟཱ. ན ཧི ཏཏྠ ཏེ སརཱུཔེན ཝུཏྟཱ, ཨཐ ཁོ ‘‘ནུཔྤཛྫིསྶཏཱི’’ཏི པཊིཀྑེཔམུཁེན ཝུཏྟཱ. ཏཏྠཱཏི ཨནུལོམེ. ན ཨེཝཾ ཡོཛེཏབྦཱ པཊིལོམེ. ཏམེཝ ཨཡོཛེཏབྦཏཾ ‘‘ཡཐཱ ཧཱི’’ཏིཨཱདིནཱ ཝིཝརཏི. ཨུཔྤཱདནིརོདྷེ ཨཏིཀྐམིཏྭཱ ཨུཔྤཱདནིརོདྷཱ སམྦྷཝནྟི ཡོཛེཏུཾ, ཏཐཱ ཨུཔྤཱདནིརོདྷེ ཨཔྤཏྭཱ ཨུཔྤཱདནིརོདྷཱ སམྦྷཝནྟི ཡོཛེཏུནྟི ཡོཛནཱ. ཨིདཉྩ དྭཡཾ ཡཐཱནུལོམེ སམྦྷཝཏི, ན ཨེཝཾ པཊིལོམེ. ཏེནཱཧ ‘‘ན ཨེཝཾ…པེ… སམྦྷཝནྟཱི’’ཏི. ཏཏྠ ཀཱརཎམཱཧ ‘‘ཨབྷཱུཏཱབྷཱཝསྶ…པེ… སམྦྷཝཱནུཔཔཏྟིཏོ’’ཏི. ཨབྷཱུཏཱབྷཱཝསྶཱཏི ཨབྷཱུཏསྶ ཨབྷཱཝསྶ, ཨབྷཱུཏསྶ ཨུཔྤཱདསྶ ནིརོདྷསྶ ཙ ཨབྷཱཝསྶཱཏི ཨདྷིཔྤཱཡོ. ཏེནཱཧ ‘‘ཨབྷཱུཏུཔྤཱདནིརོདྷཱབྷཱཝོ ཙ པཊིལོམེ པུཙྪིཏོ’’ཏི, ཏསྨཱ ‘‘ཨཱམནྟཱ’’ཏི ཙ ཝུཏྟཾ, ན ཝུཏྟཾ ཝིསྶཛྫནནྟི སམྦནྡྷོ. ཨསྶ ཝིསེསརཧིཏསྶ ཨབྷཱུཏཱབྷཱཝསྶཱཏི ཨིམསྶ ཡཐཱཝུཏྟསྶ ཡཐཱ རཱུཔཱབྷཱཝོ ཝེདནཱབྷཱཝོཏི ཀོཙི ཨབྷཱཝོཔི ཝིསེསསཧིཏོ, ན ཨེཝམཡནྟི ཝིསེསརཧིཏསྶ ཨབྷཱུཏཱབྷཱཝསྶ.

ཀཱལནྟརཡོགཱབྷཱཝཏོཏི ཀཱལཝིསེསཡོགཱབྷཱཝཏོ. ཡཱདིསཱནནྟི ཡཱནི བྷཱུཏཱནི ན ཝཏྟམཱནཱནི སཏི པཙྩཡེ ཨུཔྤཛྫནཱརཧཱནི, ཏེསཾ ཨནཱགཏཱནནྟི ཨཏྠོ. ཨུཔྤཱདནིརོདྷཱབྷཱཝེན པུཙྪིཏབྦསྶཱཏི ‘‘ནུཔྤཛྫིསྶཏི ན ནིརུཛ྄ཛྷིསྶཏཱི’’ཏི ཨེཝཾ ཨུཔྤཱདསྶ ནིརོདྷསྶ ཙ ཨབྷཱཝེན པུཙྪིཏབྦསྶ ཨཏྠསྶ. སནྣིསྶཡོ ནིསྶཡབྷཱུཏོ སནྣིཊྛཱནེན སནྣིཙྪིཏོ སནྣིཊྛཱནཔདསངྒཧིཏོ. སོ ཡཐཱཝུཏྟོ ཨཏྠོ ནིསྶཡོ ཨེཏེསནྟི ཏནྣིསྶཡཱ. ཏཱདིསཱནཾཡེཝ ཨནཱགཏཱནཾཡེཝ ཨུཔཔཏྟིཙུཏིཨུཔྤཱདནིརོདྷཱནཾ ཨུཔཔཏྟིཙུཏིསངྑཱཏཨུཔྤཱདནིརོདྷཱནཾ ཨནུཔྤཱདཱནིརོདྷཱནཾ པཊིཀྑེཔཝསེན. ཛཱིཝིཏཱདཱིནམྤི ཛཱིཝིཏམནིནྡྲིཡཱདཱིནམྤི. ཨནུཔྤཱདཱནིརོདྷཱ སཾསཡཔདེན པུཙྪིཏཱ ཧོནྟི ‘‘ཡསྶ སོམནསྶིནྡྲིཡཾ ནུཔྤཛྫིསྶཏི, ཏསྶ སོམནསྶིནྡྲིཡཾ ན ནིརུཛ྄ཛྷིསྶཏཱི’’ཏི. ‘‘ཨཱམནྟཱ’’ཏི ཝུཏྟཾ ཝིབྷཛིཏྭཱ ཝཏྟབྦསྶ ཨབྷཱཝཏོ. ཏེནཱཧ ‘‘ན ཝུཏྟཾ…པེ… ཝིསྶཛྫན’’ནྟི.

ཡེ ¶ སོཔེཀྑཔཊིསནྡྷིཀཱ བྷཝིསྶནྟི རཱུཔལོཀེ, ཏེ སངྒཧིཏཱཏི ཡོཛནཱ. ཏཾསམཱནལཀྑཎཏཱཡཱཏི ཏེན སོཔེཀྑཔཊིསནྡྷིཀབྷཱཝེན སམཱནལཀྑཎཏཱཡ. ཏཾ པམཱདལིཁིཏཾ དྷམྨཡམཀེ ¶ ཏཱདིསསྶེཝ ཝཙནསྶ ཨབྷཱཝཏོ. ཏཏྠཔི ཡཾ ཝཏྟབྦཾ, ཏཾ ཙིཏྟཡམཀེ ཝུཏྟཾ ‘‘ན ཧི ཁཎཔཙྩུཔྤནྣེ ཨུཔྤཛྫིཏྠཱཏི ཨཏཱིཏཝོཧཱརོ ཨཏྠཱི’’ཏིཨཱདིནཱ.

པཝཏྟིཝཱརཝཎྞནཱ ནིཊྛིཏཱ.

༣. པརིཉྙཱཝཱརཝཎྞནཱ

༤༣༥-༤༨༢. ལོཀིཡཨབྱཱཀཏེཧཱིཏི ཕལདྷམྨནིབྦཱནཝིནིམུཏྟེཧི ཨབྱཱཀཏེཧི. ཏཱནི ཨུཔཱདཱཡཱཏི ཏཱནི ལོཀིཡཨབྱཱཀཏཱནི ཨུཔཱདཱཡ. ཏཾསམཱནགཏིཀཱནཾ མནིནྡྲིཡཱདཱིནཾ ‘‘སོ ཝེདནཱཀྑནྡྷཾ པརིཛཱནཱཏཱིཏི? ཨཱམནྟཱ’’ཏིཨཱདིནཱ (ཡམ. ༡.ཁནྡྷཡམཀ.༢༠༦) ཝེདནཱཀྑནྡྷཱདཱིནཾ ཝིཡ པརིཉྙེཡྻཏཱ ཝུཏྟཱ. ཡཉྷི པརིཛཱནིཏབྦཾ, ཏདེཝ པརིཛཱནཱཏཱིཏིཨཱདིནཱ ཝུཏྟཾ. ཨེཝམཝིཔརཱིཏེ ཨཏྠེ སིདྡྷེཔི ཙོདཀོ ‘‘མིསྶཀཏྟཱ’’ཏི ཨེཏྠ ལབྦྷམཱནཾ ལེསཾ གཧེཏྭཱ ཙོདེཏི ‘‘ཡདི པརིཉྙེཡྻམིསྶཀཏྟཱ’’ཏིཨཱདིནཱ. ཏསྶཏྠོ – ཡཐཱ ཨིདྷ པརིཉྙེཡྻམིསྶཀཱནཾ པརིཉྙེཡྻཏཱ ཝུཏྟཱ, ཨེཝམཉྙཏྠཱཔི སཱ ཏེསཾ ཝཏྟབྦཱ, ཏཐཱ བྷཱཝེཏབྦམིསྶཀཱནཾ བྷཱཝེཏབྦཏཱཏི. ཏེནཱཧ ‘‘ཀསྨཱ དྷམྨཡམཀེ’’ཏིཨཱདི. ཀུསལཱཀུསལེསུ བྷཱཝནཱཔཧཱནཱབྷིནིཝེསོ ཧོཏི, ཡེན ཝུཏྟཾ ‘‘སོ ཏཾ ཨཀུསལཾ པཛཧཏི, ཀུསལཾ བྷཱཝེཏཱི’’ཏིཨཱདི. ན ཨབྱཱཀཏབྷཱཝནྟི ཨེཀེན ཡཐཱ ཕསྶདྭཱརཏོ ཝིཡ ཝིཉྙཱཎདྭཱརཏོ ཀུསལཱདཱིནཾ ཨུཔྤཏྟིཔརིཡཱཡོ, ཨེཝཾ ཝེདནཱཀྑནྡྷཱདཱིནཾ ཝིཡ ན ཨབྱཱཀཏཱདཱིནཾ པརིཉྙེཡྻཏཱཔརིཡཱཡོཏི དསྶེཏི.

ཀུསལཱཀུསལབྷཱཝེན ཨགྒཧིཏཱཏི སམུདཡསབྷཱཝེན ཨགྒཧིཏཱཏི ཨཏྠོ. ཀུསལཱཀུསལཱཔཱིཏི ཀུསལཱཀུསལབྷཱཝཱཔི སམཱནཱ. བྷཱཝེཏབྦཔཧཱཏབྦབྷཱཝེཧི ¶ ཝིནཱཔི ཧོཏི, ཡོ ན མགྒསམུདཡསཙྩཔཀྑིཡོ. ཡཐཱ ‘‘ཨནིཙྩཾ རཱུཔ’’ནྟི ཨེཏྠ ‘‘ཨནིཙྩམེཝ རཱུཔཾ, ན ནིཙྩ’’ནྟི པཊིཡོགིཝིནིཝཏྟནམེཝ ཨེཝ-ཀཱརེན ཀརཱིཡཏི, ན ཏསྶ དུཀྑཱནཏྟཏཱདཡོ ནིཝཱརིཏཱ ཧོནྟི, ཨེཝཾ ‘‘པཧཱཏབྦམེཝཱ’’ཏི ཨེཏྠ ཨེཝ-སདྡེན པཊིཡོགིབྷཱུཏཾ ཨཔྤཧཱཏབྦམེཝ ནིཝཏྟཱིཡཏི, ན ཏཏོ ཨཉྙཝིསེསཱཏི དསྶེནྟོ ཨཱཧ ‘‘ཨེཏེན པཧཱཏབྦམེཝཱ’’ཏིཨཱདི. བྷཱཝེཏབྦབྷཱཝོ ¶ ཨེཝ ཏསྶ ཨཉྙིནྡྲིཡསྶ གཧིཏོ ཨུཀྐཾསགཏིཝིཛཱནནཏོ. ‘‘པརཏོ ལིཁིཏབྦཾ ཨུཔྤཊིཔཱཊིཡཱ ལིཁིཏ’’ནྟི ཀསྨཱ ཝུཏྟཾ. དྭེ པུགྒལཱཏི ཧི ཨཱདི ཨནུལོམེ ཨཱགཏཾ ཨུདྡྷཊཾ, ཙཀྑུནྡྲིཡཾ ན པརིཛཱནཱཏཱིཏིཨཱདི པན པཊིལོམེ. དོམནསྶིནྡྲིཡཾ ན པཛཧནྟི ནཱམཱཏི ཨིདཾ ‘‘ནོ ཙ དོམནསྶིནྡྲིཡཾ པཛཧནྟཱི’’ཏི པཱལི༹པདསྶ ཨཏྠཝཙནཾ. ཡཾ པན ‘‘ཙཀྑུནྡྲིཡམཱུལཀཾ ཨཏིཀྐམིཏྭཱ དོམནསྶིནྡྲིཡམཱུལཀེ ཨིདཾ ཝུཏྟ’’ནྟི ཝུཏྟཾ, པཊིལོམེ ཨཱགཏཾ སནྡྷཱཡ ཝུཏྟཏྟཱ ཏཾ ན ཡུཏྟཾ, ན ཏཾ ཨཊྛཀཐཱཙརིཡཱ པཋམཾ ཨཱགཏཾ པདཾ ལངྒྷིཏྭཱ ཏཱདིསསྶེཝ པཙྪཱ ཨཱགཏཔདསྶ ཨཏྠཝཎྞནཾ ཀརོནྟི. པདཱནུཀྐམཏོ ཨེཝ ཧི ཨཊྛཀཐཱཡཾ ཨཏྠཝཎྞནཱ ཨཱརདྡྷཱ, པརིཡོསཱཔིཏཱ ཙ, ཏསྨཱ ཨནུཔཊིཔཱཊིཡཱཝ ལིཁིཏཾ, ན ཨུཔྤཊིཔཱཊིཡཱཏི དཊྛབྦཾ ‘‘དྭེ པུགྒལཱ’’ཏིཨཱདིཀསྶ ཨནུལོམེ ཨཱགཏསྶ ཨུདྡྷཊཏྟཱ.

ཨེཏྠཱཏི ཨེཏསྨིཾ པརིཉྙཱཝཱརེ. ཚ པུགྒལཱཏི པུཐུཛྫནེན སདྡྷིཾ ཡཱཝ ཨནཱགཱམིམགྒཊྛཱ ཚ པུགྒལཱ. ཨབྷིནྡིཏྭཱ གཧིཏོ ཏཏྠ བྷབྦཱབྷབྦཱནཾ ཀིཙྩཝིསེསསྶ ཨགྒཧིཏཏྟཱ. ཡཏྠ པན སཏི པུཐུཛྫནགྒཧཎསཱམཉྙེ བྷབྦཱནཾ ཀིཙྩཾ གཧིཏཾ, ཡཏྠ ཙ ཨབྷབྦཱནཾ, ཏཏྠ ཏེ ཨེཝ བྷིནྡིཏྭཱ ཝུཏྟཱ ཧོནྟཱིཏི དསྶེནྟོ ‘‘ཡེ ཙ པུཐུཛྫནཱ མགྒཾ པཊིལབྷིསྶནྟི, ཡེ ཙ པུཐུཛྫནཱ མགྒཾ ན པཊིལབྷིསྶནྟཱི’’ཏི ཙ ཨཱདིམཱཧ. ཨརཧཱཏི ཨརིཡོ, ཨཡམེཝ ཝཱ པཱཋོ. པཋམམགྒཕལསམངྒཱིཏི པུརིམམགྒཕལསམངྒཱི. ཨིཏརོཏི ཨརཧཱ. ཨེཝཾ པུགྒལབྷེདཾ ཉཏྭཱཏི ཨིདྷ པུཐུཛྫནོ སོ ཙ ཨབྷབྦོཏི གཧིཏོ, ཨིདྷ བྷབྦོ ཨིདྷ ཨརིཡཱ, ཡེ ཙ པཋམམགྒཕལསམངྒིནོ ཡཱཝ ཨགྒམགྒཕལསམངྒིནོཏི ཨེཝཾ ཡཐཱཝུཏྟཾ པུགྒལཝིབྷཱགཾ ཉཏྭཱ. ཏཏྠ ཏཏྠཱཏི ཏེསཾ དྭེ པུཐུཛྫནཱ ཨཊྛ ཨརིཡཱཏི ཨིམེསཾ ཡཐཱཝུཏྟཔུགྒལཱནཾ བྷེདཏོ ཨབྷེདཏོ ཙ གཧཎཝསེན ཨཱགཏེ ཏསྨིཾ ཏསྨིཾ པཱཋཔདེསེ. སནྣིཊྛཱནེནཱཏི སནྣིཊྛཱནཔདཝསེན, ནིཙྪཡཝསེནེཝ ཝཱ. ནིདྡྷཱརེཏྭཱཏི ¶ ནཱིཧརིཏྭཱ. ཝིསྶཛྫནཾ ཡོཛེཏབྦནྟི ཝིསྶཛྫནཝསེན པཝཏྟཔཱལི༹ཡཱ ཡཐཱཝུཏྟཨཏྠདསྶནེན སམྦནྡྷཏོ ཝིབྷཱཝེཏབྦོཏི.

པརིཉྙཱཝཱརཝཎྞནཱ ནིཊྛིཏཱ.

ཨིནྡྲིཡཡམཀཝཎྞནཱ ནིཊྛིཏཱ.

ཡམཀཔཀརཎ-ཨནུཊཱིཀཱ སམཏྟཱ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

པཊྛཱནཔཀརཎ-ཨནུཊཱིཀཱ

གནྠཱརམྦྷཝཎྞནཱ

ཀཱམགུཎཱདཱིཧཱིཏི ¶ ¶ ཀཱམགུཎཛྷཱནཱབྷིཉྙཱཙིཏྟིསྶརིཡཱདཱིཧི. ལལ༹ནྟཱིཏི ལལི༹ཏཱནུབྷཝནཝསེན རམནྟི. ཏེསཱུཏི ཀཱམགུཎཱདཱིསུ. ཝིཧརནྟཱིཏི ཨིརིཡཱཔཐཔརིཝཏྟནཱདིནཱ ཝཏྟནྟི. པཙྩཏྠིཀེཏི བཱཧིརབྦྷནྟརབྷེདེ ཨམིཏྟེ. ཨིསྶརིཡཾ ཏཏྠ ཏཏྠ ཨཱདྷིཔཏེཡྻཾ. ཋཱནཾ སེཊྛིསེནཱཔཏིཡུཝརཱཛཱདིཊྛཱནནྟརཾ. ཨཱདི-སདྡེན པརིཝཱརཔརིཙྪེདཱདི སངྒཡ྄ཧཏི. པུཉྙཡོགཱནུབྷཱཝཔྤཏྟཱཡཱཏི དཱནམཡཱདིཔུཉྙཱནུབྷཱཝཱདྷིགཏཱཡ སམཐཝིཔསྶནཱབྷཱཝནཱསངྑཱཏཡོགཱནུབྷཱཝཱདྷིགཏཱཡ ཙ. ཛུཏིཡཱཏི སརཱིརཔྤབྷཱཡ ཙེཝ ཉཱཎཔྤབྷཱཡ ཙ. ཨེཏྠ ཙ དེཝ-སདྡོ ཡཐཱ ཀཱིལཱ༹ཝིཛིགིསཱཝོཧཱརཛུཏིགཏིཨཏྠོ, ཨེཝཾ སཏྟིཨབྷིཏྠཝཀམནཏྠོཔི ཧོཏི དྷཱཏུསདྡཱནཾ ཨནེཀཏྠབྷཱཝཏོཏི ‘‘ཡདིཙྪིཏནིཔྥཱདནེ སཀྐོནྟཱིཏི ཝཱ’’ཏིཨཱདི ཝུཏྟཾ.

ཨིདྡྷིཝིདྷཱདིཏཱམཏྟེན བྷགཝཏོ ཨབྷིཉྙཱདཱིནཾ སཱཝཀེཧི སཱདྷཱརཎཏཱཝཙནཾ, སབྷཱཝཏོ པན སབྦེཔི ¶ བུདྡྷགུཎཱ ཨནཉྙསཱདྷཱརཎཱཡེཝཱཏི དསྶེནྟོ ‘‘ནིརཏིསཡཱཡ ཨབྷིཉྙཱཀཱིལཱ༹ཡ, ཨུཏྟམེཧི དིབྦབྲཧྨཨརིཡཝིཧཱརེཧཱི’’ཏི ཨཱཧ. ཙིཏྟིསྶརིཡསཏྟདྷནཱདཱིནཾ དཱནསངྑཱཏེན སམྨཱཔཊིཔཏྟིཨཝེཙྩཔྤསཱདསཀྐཱརཱནཾ གཧཎསངྑཱཏེནཱཏི ཡོཛནཱ. གཧཎཉྩེཏྠ ཏེསུ ཨུཔལབྦྷམཱནསམྨཱཔཊིཔཏྟིཨཝེཙྩཔྤསཱདཱནཾ ཏེཧི ཨུཔནཱིཡམཱནསཀྐཱརསྶ ཙ ཨབྷིནནྡནཾ ཨནུམོདནཾ སམྤཊིཙྪནཉྩ ཝེདིཏབྦཾ. དྷམྨསབྷཱཝཱནུརཱུཔཱནུསཱསནཱིཝཙནེནེཝ ཙ པན སིཀྑཱཔདཔཉྙཏྟིཔི སངྒཧིཏཱཏི དཊྛབྦཱ ཝཱིཏིཀྐམདྷམྨཱནུརཱུཔཱ ཨནུསཱསནཱིཏི ཀཏྭཱ. ཉཱཎགཏི ཉཱཎེན གནྟབྦསྶ ཉེཡྻསྶ ཨཝབོདྷོ. སམནྣཱགཏཏྟཱཏི ཨིདཾ ‘‘ཨབྷིཉྙཱཀཱིལཱ༹ཡཱ’’ཏིཨཱདཱིསུ པཙྩེཀཾ ཡོཛེཏབྦཾ, ཏཐཱ སདེཝཀེན ལོཀེནཱཏི ཨིདཾ ‘‘གམནཱིཡཏོ’’ཏིཨཱདཱིསུ. ཏེ དེཝེཏི སམྨུཏིདེཝཱདིཀེ དེཝེ. ཏེཧི གུཎེཧཱིཏི ཨབྷིཉྙཱདིགུཎེཧི. པཱུཛནཱིཡཏརོ དེཝོཏི ¶ ཨིདཾ པཱུཛནཱིཡཔརིཡཱཡོ ཨཡཾ ཨཏི-སདྡོཏི ཀཏྭཱ ཝུཏྟཾ. ཨཏིརེཀཏརོཏི ཨདྷིཀཏརོ. ཨུཔཔཏྟིདེཝཱནནྟི ཨིདཾ ཏབྦཧུལཏཱཡ ཝུཏྟཾ. ཝིསུདྡྷིདེཝཱཔི ཧི ཏཏྠ ཝིཛྫནྟེཝ, ཏེསུཔི ཝཱ ལབྦྷམཱནཾ ཨུཔཔཏྟིདེཝབྷཱཝམཏྟམེཝ གཧེཏྭཱ ཏཐཱ ཝུཏྟཾ. པཊིཔཀྑཱནཾ དུསྶཱིལྱམུཊྛསྶཙྩཝིཀྑེཔཱནཾ, སཱིལཝིཔཏྟིཨབྷིཛ྄ཛྷཱདོམནསྶཨཝསིཊྛནཱིཝརཎཱནཾ ཝཱ.

ཨིསཱིནཾ སཏྟམོ, ཨིསཱིསུ སཏྟམོཏི དུཝིདྷམྤི ཨཏྠཾ ཡོཛེཏྭཱ དསྶེནྟོ ‘‘ཙཏུསཙྩཱཝབོདྷགཏིཡཱ…པེ… ཝུཏྟོ’’ཏི ཨཱཧ. སཔརསནྟཱནེསུ སཱིལཱདིགུཎཱནཾ ཨེསནཊྛེན ཝཱ ཨིསཡོ, བུདྡྷཱདཡོ ཨརིཡཱ. ཨིསི ཙ སོ སཏྟམོ ཙཱཏི ཨིསིསཏྟམོཏི ཨེཝམེཏྠ ཨཏྠོ དཊྛབྦོ. ‘‘ནཱམརཱུཔནིརོདྷ’’ནྟི ཨེཏྠ ཡཾ ནཱམརཱུཔཾ ནིརོདྷེཏབྦཾ, ཏཾ དསྶེནྟོ ‘‘ཡཏོ ཝིཉྙཱཎཾ པཙྩུདཱཝཏྟཏཱི’’ཏི ཨཱཧ. ཝཊྚཔརིཡཱཔནྣཉྷི ནཱམརཱུཔཾ ནིརོདྷེཏབྦཾ. ཏསྨིཉྷི ནིརོདྷིཏེ སབྦསོ ནཱམརཱུཔཾ ནིརོདྷིཏམེཝ ཧོཏི. ཡཐཱཧ ‘‘སོཏཱཔཏྟིམགྒཉཱཎེན ཨབྷིསངྑཱརཝིཉྙཱཎསྶ ནིརོདྷེན སཏྟ བྷཝེ ཋཔེཏྭཱ ཨནམཏགྒེ སཾསཱརེ ཡེ ཨུཔྤཛྫེཡྻུཾ ནཱམཉྩ རཱུཔཉྩ, ཨེཏྠེཏེ ནིརུཛ྄ཛྷནྟི…པེ… ཨརཧཏོ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡནྟསྶ ཙརིམཝིཉྙཱཎསྶ ནིརོདྷེན པཉྙཱ ཙ སཏི ཙ ནཱམཉྩ རཱུཔཉྩ, ཨེཏྠེཏེ ནིརུཛ྄ཛྷནྟི ཝཱུཔསམནྟི ཨཏྠཾ གཙྪནྟི པཊིཔྤསྶམྦྷནྟཱི’’ཏི (ཙཱུལ༹ནི. ཨཛིཏམཱཎཝཔུཙྪཱནིདྡེས ༦). ཨཏིགམྦྷཱིརནཡམཎྜིཏདེསནཾ སཱཏིསཡཾ པཙྩཡཱཀཱརསྶ ཝིབྷཱཝནཏོ. སབྷཱཝཏོ ཙ པཙྩཡཱཀཱརོ གམྦྷཱིརོ. ཡཐཱཧ ‘‘ཨདྷིགཏོ ཁོ མྱཱཡཾ དྷམྨོ གམྦྷཱིརོ’’ཏིཨཱདི (དཱི. ནི. ༢.༦༧; མ. ནི. ༡.༢༨༡; ༢.༣༣༧; སཾ. ནི. ༡.༡༧༢; མཧཱཝ. ༧, ༨), ‘‘གམྦྷཱིརོ ཙཱཡཾ, ཨཱནནྡ ¶ , པཊིཙྩསམུཔྤཱདོ གམྦྷཱིརཱཝབྷཱསོ’’ཏི (དཱི. ནི. ༢.༩༥; སཾ. ནི. ༢.༦༠) ཙ ཨཱདི. ཏསྶ ཙཱཡཾ ཨནནྟནཡཔཊྛཱནདེསནཱ ཨཏིགམྦྷཱིརཱཝ.

གནྠཱརམྦྷཝཎྞནཱ ནིཊྛིཏཱ.

པཙྩཡུདྡེསཝཎྞནཱ

སམཱནནེཏི སམཱནནཡནེ, སམཱཧརཎེ, སམཱནཀརཎེ ཝཱ ཨཊྛཀཐཱདྷིཔྤཱཡཾ. ཏཏྠ ‘‘དྭེ ཨནུལོམཱནི དྷམྨཱནུལོམཉྩ པཙྩཡཱནུལོམཉྩཱ’’ཏིཨཱདིནཱ པརཏོ ཝཎྞཡིསྶནྟི.

པཊྛཱནནཱམཏྠོཏི ¶ ‘‘པཊྛཱན’’ནྟི ཨིམསྶ ནཱམསྶ ཨཏྠོ, ཏཾ པན ཡསྨཱ ཨཝཡཝདྭཱརེན སམུདཱཡེ ནིརུལ༹ྷཾ, ཏསྨཱ ཡཐཱ ཨཝཡཝེསུ པཏིཊྛིཏཾ, ཏམེཝ ཏཱཝ དསྶེཏུཾ ‘‘ཏིཀཔཊྛཱནཱདཱིནཾ ཏིཀཔཊྛཱནཱདིནཱམཏྠོ’’ཏི ཝུཏྟཾ. ཨཐ ཝཱ ཨཝཡཝཱནམེཝ པཊྛཱནནཱམཏྠོ ནིདྡྷཱརེཏབྦོ ཏཾསམུདཱཡམཏྟཏྟཱ པཀརཎསྶ. ན ཧི སམུདཱཡོ ནཱམ ཀོཙི ཨཏྠོ ཨཏྠཱིཏི དསྶེཏུཾ ‘‘པཊྛཱནཾ…པེ… ནཱམཏྠོ’’ཏི ཝུཏྟཾ. ཏེནེཝཱཧ ‘‘ཨིམསྶ པཀརཎསྶ…པེ… སམོདྷཱནཏཱ ཙེཏྠ ཝཏྟབྦཱ’’ཏི. ཝཙནསམུདཱཡཏྠཝིཛཱནནེན ཝིདིཏཔཊྛཱནསཱམཉྙཏྠསྶ ཝིཏྠཱརཏོ པཊྛཱནཀཐཱ ཝུཙྩམཱནཱ སུཁགྒཧཎཱ ཧོཏཱིཏི དསྶེནྟོ ཨཱཧ ‘‘ཨེཝཉྷི…པེ… ཧོཏཱི’’ཏི. ཏཏྠཱཏི ཏཱསུ ནཱམཏྠཡཐཱཝུཏྟསམོདྷཱནཏཱསུ. སབྦསཱདྷཱརཎསྶཱཏི སབྦེསཾ ཨཝཡཝབྷཱུཏཱནཾ ཏིཀཔཊྛཱནཱདཱིནཾ སམུདཱཡསྶ ཙ སཱདྷཱརཎསྶ. ཨཏྠཏོ ཨཱཔནྣཾ ནཱནཱཝིདྷབྷཱཝནྟི པཀཱརགྒཧཎེནེཝ པཀཱརཱནཾ ཨནེཀཝིདྷཏཱ ཙ གཧིཏཱཝ ཧོནྟཱིཏི ཝུཏྟཾ. པཀཱརེཧི ཋཱནནྟི ཧི པཊྛཱནཾ, ནཱནཱཝིདྷོ པཙྩཡོ, ཏཾ ཨེཏྠ ཝིབྷཛནཝསེན ཨཏྠཱིཏི པཊྛཱནཾ, པཀརཎཾ, ཏདཝཡཝོ ཙ. ཨེཏསྨིཉྩ ཨཏྠནཡེ སདྡཏོཔི ནཱནཱཝིདྷབྷཱཝསིདྡྷི དསྶིཏཱཏི ཝེདིཏབྦཱ. ཏཏྠ ནཱནཔྤཀཱརཱ པཙྩཡཏཱ, ནཱནཔྤཀཱརཱནཾ པཙྩཡཏཱ ཙ ནཱནཔྤཀཱརཔཙྩཡཏཱཏི ཨུབྷཡམྤི སཱམཉྙནིདྡེསེན ཨེཀསེསནཡེན ཝཱ ཨེཀཛ྄ཛྷཾ གཧིཏནྟི དསྶེནྟོ ‘‘ཨེཀསྶཔི…པེ… ཝེདིཏབྦཱ’’ཏི ཨཱཧ. ཨནེཀདྷམྨབྷཱཝཏོཏི ཨནེཀེ དྷམྨཱ ཨེཏསྶཱཏི ཨནེཀདྷམྨོ, ཏབྦྷཱཝཏོཏི ཡོཛེཏབྦཾ. ནཱནཔྤཀཱརཔཙྩཡཏཱཏི ¶ ནཱནཔྤཀཱརཔཙྩཡབྷཱཝོ, ཡོ ཨཊྛཀཐཱཡཾ ‘‘ནཱནཔྤཀཱརཔཙྩཡཊྛོ’’ཏི ཝུཏྟོ.

ཀཱམཾ དྷམྨསངྒཧཱདཱིསུཔི ཨཏྠེཝ པཙྩཡདྷམྨཝིབྷཱགོ, སོ པན ཏཏྠ པཙྩཡབྷཱཝོ ན ཏཐཱ ཏཔྤརབྷཱཝེན ཝིབྷཏྟོ ཡཐཱ པཊྛཱནེཏི དསྶེནྟོ ‘‘ཨེཏེན…པེ… དསྶེཏཱི’’ཏི ཨཱཧ. སཱཏིསཡཝིབྷཱགཏཾ ཨིམསྶ པཀརཎསྶ ཏཐཱ ཏདཝཡཝཱནཾ.

སབྦཉྙུཏཉྙཱཎསྶ ཡཐཱཝུཏྟགམནཾ ཡདདྷིཀརཎཾ, ཏཾ དསྶེཏུཾ ‘‘ཨེཏྠཱཏི ཝཙནསེསོ’’ཏི. གམནདེསབྷཱཝཏོཏི པཝཏྟིཊྛཱནབྷཱཝཏོ. ཨཉྙེཧི གཏིམནྟེཧཱིཏི ཏཱིསུ ཀཱལེསུ ཨཔྤཊིཧཏཉཱཎཱདཱིཧི. ཏསྶ སབྦཉྙུཏཉྙཱཎསྶ.

ཏིཝིདྷེན ¶ པརིཙྪེདེན དེསིཏེསུ དྷམྨེསུ ཏིཀཝོཧཱརོཏི ཨཱཧ ‘‘ཏིཀཱནནྟི ཏིཀཝསེན ཝུཏྟདྷམྨཱན’’ནྟི. ཏཱིཎི པརིམཱཎཱནི ཨེཏེསནྟི ཧི ཏིཀཱ. སམནྟཱཏི སམནྟཏོ སབྦབྷཱགཏོཏི ཝུཏྟཾ ཧོཏཱིཏི ཨཱཧ ‘‘ཨནུལོམཱདཱིཧི སབྦཔྤཀཱརེཧིཔཱི’’ཏི. གཏཱནཱིཏི པཝཏྟཱནི. སམནྟཙཏུཝཱིསཏིཔཊྛཱནཱནཱིཏི སམནྟཏོ ཨནུལོམཱདིསབྦབྷཱགཏོ སམོདྷཱནཝསེན ཙཏུཝཱིསཏི པཊྛཱནཱནི. ཨནུལོམཱདིསབྦཀོཊྛཱསཏོཏི ཨནུལོམཱདིཙཏུཀོཊྛཱསཏོ. ཏིཀཱདིཚཚབྷཱཝནྟི ཏིཀཱདིདུཀདུཀཔརིཡོསཱནེཧི ཚཚབྷཱཝཾ. ཏེནཱཏི ཡཐཱཝུཏྟདསྶནེན. དྷམྨཱནུལོམཱདིསབྦཀོཊྛཱསཏོཏི པཙྩནཱིཀཱདིདུཀཱདིསཧཛཱཏཝཱརཱདིཔཙྩཡཔཙྩནཱིཡཱདིཨཱརམྨཎམཱུལཱདཱིནཾ གཧཎཾ དཊྛབྦཾ. ཡཐཱཝུཏྟཏོ ཨཉྙསྶ པཀཱརསྶ ཨསམྦྷཝཏོ ‘‘ཨནཱུནེཧི ནཡེཧི པཝཏྟཱནཱིཏི ཝུཏྟཾ ཧོཏཱི’’ཏི ཨཱཧ. ཏཱནི པན ཡཐཱཝུཏྟཱནི སམནྟཔཊྛཱནཱནི. ཨཡཉྩ ཨཏྠཝཎྞནཱ ཨཊྛཀཐཱཝཙནེན ཨཉྙདཏྠུ སཾསནྡཏཱིཏི དསྶེནྟོ ཨཱཧ ‘‘ཏེནེཝཱཧ…པེ… ཝསེནཱ’’ཏི.

ཧེཏུནོཏི ཧེཏུསབྷཱཝསྶ དྷམྨསྶ. སཏིཔི ཧེཏུསབྷཱཝསྶ ཨཱརམྨཎཔཙྩཡཱདིབྷཱཝེ སཝིསེསེ ཏཱཝ པཙྩཡེ དསྶེནྟེན ‘‘ཨདྷིཔཏིཔཙྩཡཱདིབྷཱུཏསྶ ཙཱ’’ཏི ཝུཏྟཾ. ‘‘ཧེཏུ ཧུཏྭཱ པཙྩཡོ’’ཏི ཝུཏྟེ དྷམྨསྶ ཧེཏུསབྷཱཝཏཱ ནིདྡྷཱརིཏཱ, ན པཙྩཡཝིསེསོཏི ཏསྶ ཨདྷིཔཏིཔཙྩཡཱདིབྷཱཝོ ན ནིཝཱརིཏོཏི ཨཱཧ ‘‘ཨེཏེནཔི སོ ཨེཝ དོསོ ཨཱཔཛྫཏཱི’’ཏི. ཏེནཱཏི ཧེཏུབྷཱཝགྒཧཎེན. ཨིདྷཱཏི ‘‘ཧེཏུཔཙྩཡོ’’ཏི ཨེཏྠ. དྷམྨགྒཧཎནྟི ཨལོབྷཱདིདྷམྨགྒཧཎཾ. སཏྟིཝིསེསོ ཨཏྟནོ བལཾ སཏྟིཀཱརཎབྷཱཝོ, ཡོ རསོཏིཔི ཝུཙྩཏི, སྭཱཡཾ ཨནཉྙསཱདྷཱརཎཏཱཡ དྷམྨཏོ ཨནཉྙོཔི པཙྩཡནྟརསམཝཱཡེཡེཝ ¶ ལབྦྷམཱནཏྟཱ ཨཉྙོ ཝིཡ ཀཏྭཱ ཝུཏྟོ. ཏསྶཱཏི ཧེཏུབྷཱཝསངྑཱཏསྶ སཱམཏྠིཡསྶ. ཧེཏུ ཧུཏྭཱཏི ཨེཏྠཱཔི ཧེཏུབྷཱཝཝཱཙཀོ ཧེཏུསདྡོ, ན ཧེཏུསབྷཱཝདྷམྨཝཱཙཀོཏི ཨཱཧ ‘‘ཧེཏུ ཧུཏྭཱ པཙྩཡོཏི ཙ ཝུཏྟ’’ནྟི.

ཨེཝཉྩ ཀཏྭཱཏིཨཱདིནཱ ཡཐཱཝུཏྟམཏྠཾ པཱལི༹ཡཱ སམཏྠེཏི. ཡདི ཨེཝཾ ཨཊྛཀཐཱཡཾ དྷམྨསྶེཝ པཙྩཡཏཱཝཙནཾ ཀཐནྟི ཨཱཧ ‘‘ཨཊྛཀཐཱཡཾ པནཱ’’ཏིཨཱདི ¶ . ཏེནེཝ ཙེཏྠ ཨམྷེཧིཔི ‘‘དྷམྨཏོ ཨནཉྙོཔི ཨཉྙོ ཝིཡ ཀཏྭཱ’’ཏི ཙ ཝུཏྟཾ. ཡདི ཨཊྛཀཐཱཡཾ ‘‘ཡོ ཧི དྷམྨོ, མཱུལཊྛེན ཨུཔཀཱརཀོ དྷམྨོ’’ཏི ཙ ཨཱདཱིསུ དྷམྨེན དྷམྨསཏྟིཝིབྷཱཝནཾ ཀཏཾ, ཨཐ ཀསྨཱ ཨིདྷ ཧེཏུབྷཱཝེན པཙྩཡོཏི དྷམྨསཏྟིཡེཝ ཝིབྷཱཝིཏཱཏི ཙོདནཾ མནསི ཀཏྭཱ ཝུཏྟཾ ‘‘ཨིདྷཱཔི ཝཱ…པེ… དསྶེཏཱི’’ཏི. དྷམྨསཏྟིཝིབྷཱཝནཾ པནེཏྠ ན སཀྐཱ པཊིཀྑིཔིཏུནྟི དསྶེནྟོ ‘‘ན ཧཱི’’ཏིཨཱདིམཱཧ. ཨཏྠོ ཨེཏསྶ ཨཏྠཱིཏི ཨཏྠོ, ཨཏྠཱབྷིདྷཱཡིཝཙནནྟི ཝུཏྟཾ ‘‘ཨེཏཱིཏི ཨེཏསྶ ཨཏྠོ ཝཏྟཏཱི’’ཏི, ཏསྨཱ ཨཏྠོཏི ཨཏྠཝཙནནྟི ཝུཏྟཾ ཧོཏི. ཏེནཱཧ ‘‘ཏཉྩ ཨུཔྤཏྟིཊྛིཏཱིནཾ སཱདྷཱརཎཝཙན’’ནྟི. ཏཉྩཱཏི ཧི ‘‘ཝཏྟཏཱི’’ཏི ཝཙནཾ པཙྩཱམཊྛཾ. ཨཐ ཝཱ ཨེཏཱིཏི ཨེཏསྶ ཨཏྠོཏི ‘‘ཨེཏཱི’’ཏི ཨེཏསྶ པདསྶ ཨཏྠོ ‘‘ཝཏྟཏཱི’’ཏི ཨེཏྠ ཝཏྟནཀིརིཡཱ. ཏཉྩཱཏི ཏཉྩ ཝཏྟནཾ. ཨེཏསྨིཾ པནཏྠེ སཱདྷཱརཎཝཙནནྟི ཨེཏྠ ཝཙན-སདྡོ ཨཏྠཔརིཡཱཡོ ཝེདིཏབྦོ ‘‘ཝུཙྩཏཱི’’ཏི ཀཏྭཱ. ཡདགྒེན ཨུཔྤཏྟིཡཱ པཙྩཡོ, ཏདགྒེན ཋིཏིཡཱཔི པཙྩཡོཏི ཀོཙི ཨཱསངྐེཡྻཱཏི ཏདཱསངྐཱནིཝཏྟནཏྠཾ ཝུཏྟཾ ‘‘ཀོཙི ཧི…པེ… ཧེཏུཨཱདཡོ’’ཏི. ཨེཏྠ ཙ ཡཐཱ ཨུཔྤཛྫནཱརཧཱནཾ ཨུཔྤཏྟིཡཱ པཙྩཡེ སཏིཡེཝ ཨུཔྤཱདོ, ནཱསཏི, ཨེཝཾ ཏིཊྛནྟཱནམྤི ཋིཏིཔཙྩཡཝསེནེཝ ཋཱནཾ ཡཐཱ ཛཱིཝིཏིནྡྲིཡཝསེན སཧཛཱཏདྷམྨཱནནྟི དཊྛབྦཾ. ཡེ པན ཨརཱུཔདྷམྨཱནཾ ཋིཏིཾ པཊིཀྑིཔནྟི, ཡཾ ཝཏྟབྦཾ, ཏཾ ཧེཊྛཱ ཝུཏྟམེཝ.

ཡཐཱ ཨདྷིཀརཎསཱདྷནོ པཏིཊྛཏྠོ ཧེཏུ-སདྡོ, ཨེཝཾ ཀརཎསཱདྷནོ པཝཏྟིཨཏྠོཔི ཡུཛྫཏཱིཏི དསྶེནྟོ ‘‘ཧིནོཏཱི’’ཏིཨཱདིམཱཧ. ‘‘ལོབྷོ ནིདཱནཾ ཀམྨཱནཾ སམུདཡཱཡཱ’’ཏིཨཱདིཝཙནཏོ ཧེཏཱུནཾ ཀམྨནིདཱནབྷཱཝོ ཝེདིཏབྦོ.

ཨེཏེནཱཏི ཧེཏུཔཙྩཡཏོ ཨཉྙེནེཝ ཀུསལབྷཱཝསིདྡྷིཝཙནེན. ཨེཀེ ཨཱཙརིཡཱ. སབྷཱཝཏོཝཱཏི ཨེཏེན ཡཐཱ ཨཉྙེསཾ རཱུཔགཏཾ ཨོབྷཱསེནྟསྶ པདཱིཔསྶ རཱུཔགཏོབྷཱསཀེན ཨཉྙེན པཡོཛནཾ ནཏྠི སཡཾ ཨོབྷཱསནསབྷཱཝཏྟཱ, ཨེཝཾ ཨཉྙེསཾ ཀུསལཱདིབྷཱཝསཱདྷཀཱནཾ ཧེཏཱུནཾ ཨཉྙེན ཀུསལཱདིབྷཱཝསཱདྷཀེན ¶ པཡོཛནཾ ནཏྠི སཡམེཝ ཀུསལཱདིསབྷཱཝཏྟཱཏི དསྶེཏི. ན སབྷཱཝསིདྡྷོ ཨལོབྷཱདཱིནཾ ཀུསལཱདིབྷཱཝོ ཨུབྷཡསབྷཱཝཏྟཱ ཏཾསམྤཡུཏྟཕསྶཱདཱིནཾ ཝིཡཱཏི ¶ ཨིམམཏྠཾ དསྶེཏི ‘‘ཡསྨཱ པནཱ’’ཏིཨཱདིནཱ. སཱ པན ཨཉྙཔཊིབདྡྷཱ ཀུསལཱདིཏཱ.

ན ཀོཙི དྷམྨོ ན ཧོཏཱིཏི རཱུཔཱདིབྷེདེན ཚབྦིདྷེསུ སངྑཏཱསངྑཏཔཉྙཏྟིདྷམྨེསུ ཀོཙིཔི དྷམྨོ ཨཱརམྨཎཔཙྩཡོ ན ན ཧོཏི, སྭཱཡཾ ཨཱརམྨཎཔཙྩཡབྷཱཝོ ཧེཊྛཱ དྷཱཏུཝིབྷངྒཝཎྞནཱཡཾ ཝུཏྟོཡེཝ.

པུརིམཱབྷིསངྑཱརཱུཔནིསྶཡནྟི ‘‘ཚནྡཝཏོ’’ཏིཨཱདིནཱ ཝུཏྟཱཀཱརེན པུརིམསིདྡྷཾ ཙིཏྟཱབྷིསངྑཱརཀསངྑཱཏཾ ཨུཔནིསྶཡཾ. ཙིཏྟེཏི ཙིཏྟསཱིསེནཱཡཾ ནིདྡེསོ དཊྛབྦོ. ན ཧི ཙིཏྟམེཝ ཏཐཱབྷིསངྑརཱིཡཏི, ཨཐ ཁོ ཏཾསམྤཡུཏྟདྷམྨཱཔི. སཱདྷཡམཱནཱཏི ཝསེ ཝཏྟཡམཱནཱ. ཝསཝཏྟནཉྩེཏྠ ཏདཱཀཱརཱནུཝིདྷཱནཾ. ཚནྡཱདཱིསུ ཧི ཧཱིནེསུ མཛ྄ཛྷིམེསུ པཎཱིཏེསུ ཏཾཏཾསམྤཡུཏྟཱཔི ཏཐཱ ཏཐཱ པཝཏྟནྟི. ཏེནཱཧ ‘‘ཧཱིནཱདིབྷཱཝེན ཏདནུཝཏྟནཏོ’’ཏི. ཏེནཱཏི ཨཏྟནོ ཝསེ ཝཏྟཱཔནེན, ཏེསཾ ཝཱ ཝསེ ཝཏྟནེན. ཏེཧི ཚནྡཱདཡོ. ཨདྷིཔཏིཔཙྩཡཱ ཧོནྟི ཨཏྟཱདྷཱིནཱནཾ པཏིབྷཱཝེན པཝཏྟནཏོ. གརུཀཱཏབྦཾ ཨཱརམྨཎཾ མཧགྒཏདྷམྨལོབྷནཱིཡདྷམྨཱདི.

ཏདནནྟརུཔྤཱདནིཡམོཏི ཏསྶ ཏསྶེཝ ཙིཏྟསྶ ཨནནྟརཾ ཨུཔྤཛྫམཱནཏཾ. ཏཾཏཾསཧཀཱརཱིཔཙྩཡཝིསིཊྛསྶཱཏི ཏེན ཏེན ཨཱརམྨཎཱདིནཱ སཧཀཱརཱིཀཱརཎེན ཏདུཔྤཱདནསམཏྠཏཱསངྑཱཏཾ ཝིསེསཾ པཏྟསྶ. ཏཱཡཡེཝཱཏི ཡཱ ཝེཁཱདཱནེ པུཔྥནསམཏྠཏཱ ཝེཁཱཔགམེ ལདྡྷོཀཱསཱ, ཏཱཡམེཝ.

ཨུཔསགྒཝསེནཔི ཨཏྠཝིསེསོ ཧོཏཱིཏི ཝུཏྟཾ ‘‘སདྡཏྠམཏྟཏོ ནཱནཱཀརཎ’’ནྟི. ཝཙནཱིཡཏྠཏོཏི བྷཱཝཏྠཏོ. བྷཱཝཏྠོཔི ཧི ཝཙནགྒཧཎཱནུསཱརེན ཝིཉྙེཡྻཏྟཱ ‘‘ཝཙནཱིཡོ’’ཏི ཝུཙྩཏི. ནིརོདྷུཔྤཱདནྟརཱབྷཱཝཏོཏི པུརིམནིརོདྷསྶ པཙྪིམུཔྤཱདསྶ ཙ བྱཝདྷཱཡཀཱབྷཱཝཏོ. ནིརནྟརུཔྤཱདནསམཏྠཏཱཏི ཨེཏེན ནིརོདྷཱནཾ ནིརོདྷསམཀཱལུཔྤཱདཝཱདཾ ནིཝཱརེཏི. སཏི ཧི སམཀཱལཏྟེ བྱཝདྷཱནཱསངྐཱ ཨེཝ ན སིཡཱ སཎྛཱནཱབྷཱཝཏོ. ཨིདམིཏོ ཧེཊྛཱ ཨུདྡྷཾ ཏིརིཡནྟི ཝིབྷཱགཱབྷཱཝཱ ཨཏྟནཱ ཨེཀཏྟམིཝ ཨུཔནེཏྭཱཏི ཡོཛནཱ. སཎྛཱནཱབྷཱཝེན ཧི ཨཔྤཊིགྷབྷཱཝཱུཔལཀྑཎེན ¶ ཝིབྷཱགཱབྷཱཝཾ, ཏེན ཨེཀཏྟམིཝཱུཔནཡནཾ སུཊྛུ ཨནནྟརབྷཱཝཾ སཱདྷེཏི, སཧཱཝཊྛཱནཱབྷཱཝེན པན ཨནནྟརམེཝ ཨུཔྤཱདནཾ.

ཝིབྷཱགཏོ ¶ ཉཱཎེན ཨཱཀརཱིཡཏཱིཏི ཨཱཀཱརོ, དྷམྨཱནཾ པཝཏྟིབྷེདོ. ནེཝསཉྙཱནཱསཉྙཱཡཏནཕལསམཱཔཏྟཱིནཾ ནིརོདྷུཔྤཱདཱནནྟརཏཱཡཱཏི ཡོཛནཱ. པུརིམཙུཏཱིཏི ཨསཉྙསཏྟུཔྤཏྟིཏོ པུརིམཙུཏི. ཡདི ཀཱལནྟརཏཱ ནཏྠི, ཀཐམིདཾ ‘‘སཏྟཱཧཾ ནིརོདྷཾ སམཱཔཛྫིཏྭཱ པཉྩ ཀཔྤསཏཱནི ཨཏིཀྐམིཏྭཱ’’ཏི ཝཙནནྟི ཨཱཧ ‘‘ན ཧི ཏེསཾ…པེ… ཝུཙྩེཡྻཱ’’ཏི. ནནུ ཏེསཾ ཨནྟརཱ རཱུཔསནྟཱནོ པཝཏྟཏེཝཱཏི ཨནུཡོགཾ སནྡྷཱཡཱཧ ‘‘ན ཙ…པེ… ཨཉྙསནྟཱནཏྟཱ’’ཏི. ཡདི ཨེཝཾ ཏེསཾ ཨཉྙབྷིནྣསནྟཱནཾ ཝིཡ ཨཉྙམཉྙཱུཔཀཱརེནཔི བྷཝིཏབྦནྟི ཙོདནཱཡ ཝུཏྟཾ ‘‘རཱུཔཱརཱུཔ…པེ… ཧོནྟཱི’’ཏི. ཏེནེཏཾ དསྶེཏི – ཡདིཔི རཱུཔཱརཱུཔདྷམྨཱ ཨེཀསྨིཾ པུགྒལེ ཝཏྟམཱནཱ ཝིསེསཏོ ཨཉྙམཉྙཱུཔཀཱརཀབྷཱཝེན ཝཏྟནྟི, ཨཉྙམཉྙཾ པན ཝིསདིསསབྷཱཝཏཱཡ ཝིསུཾཡེཝ སནྟཱནབྷཱཝེན པཝཏྟནཏོ བྱཝདྷཱཡཀཱ ན ཧོནྟི སནྟཏིཝསེན མིཐུ ཨཔརིཡཱཔནྣཏྟཱ, ཡཏོ ‘‘ཨཉྙམཉྙཾ ཝིཔྤཡུཏྟཱ, ཝིསཾསཊྛཱ’’ཏི ཙ ཝུཏྟནྟི. ཨུཔཀཱརཀོ ཙ ནཱམ ཨཙྩནྟཾ བྷིནྣསནྟཱནཱནམྤི ཧོཏིཡེཝཱཏི ན ཏཱཝཏཱ སནྟཱནཱབྷེདོཏི བྷིཡྻོཔི ནེསཾ བྱཝདྷཱཡཀཏཱབྷཱཝོ ཝེདིཏབྦོ. ཡཐཱ སམཱནཛཱཏིཀཱནཾ ཙིཏྟུཔྤཱདཱནཾ ནིརནྟརཏཱ སུཊྛུ ཨནནྟརབྷཱཝེན པཱཀཊཱ, ན ཏཐཱ ཨསམཱནཛཱཏིཀཱནནྟི ཨདྷིཔྤཱཡེན ‘‘ཛཝནཱནནྟརསྶ ཛཝནསྶ ཝིཡ བྷཝངྒཱནནྟརསྶ བྷཝངྒསྶ ཝིཡཱ’’ཏི ཝུཏྟཾ.

པཙྩཡབྷཱཝོ ཙེཏྠཱཏི ཨེཏྠ ཙ-སདྡོ བྱཏིརེཀོ. སོ ཡེན ཝིསེསེནེཏྠ ཨུཔྤཱདཀྑཎཾ, ཏཾ ཝིསེསཾ ཛོཏེཏི. ཨནནྟརཔཙྩཡཱདཱིནནྟི ཨཱདི-སདྡེན སམནནྟརཔཙྩཡཾ སངྒཎྷཱཏི. པུརེཔཙྪཱབྷཱཝཱ, ཏདུཔཱདིཀཱ ཝཱ ཨུཔྤཱདནིརོདྷཱ པུབྦནྟཱཔརནྟཔརིཙྪེདོ, ཏེན གཧིཏཱནཾ ཁཎཏྟཡཔརིཡཱཔནྣཱནནྟི ཨཏྠོ. ཏེནཱཧ ‘‘ཨུཔྤཛྫཏཱིཏི ཝཙནཾ ཨལབྷནྟཱན’’ནྟི. ཨུཔྤཱདཀྑཎསམངྒཱི ཧི ‘‘ཨུཔྤཛྫཏཱི’’ཏི ཝུཙྩཏི. ཏཐཱ ཧི ཝུཏྟཾ ‘‘ཨུཔྤཱདཀྑཎེ ཨུཔྤཛྫམཱནཾ, ནོ ཙ ཨུཔྤནྣཾ, བྷངྒཀྑཎེ ཨུཔྤནྣཾ ནོ ཙ ཨུཔྤཛྫམཱན’’ནྟི (ཡམ. ༢.ཙིཏྟཡམཀ.༨༡). སོཏི ཨནནྟརཱདིཔཙྩཡབྷཱཝོ. ཨཔརིཙྪེདནྟི ཀཱལཝསེན པརིཙྪེདརཧིཏཾ. ཡཏོཏི པུབྦནྟཱཔརནྟཝསེན པརིཙྪེདཱབྷཱཝཏོ. ཏེནེཝཱཏི ཀཱལཝསེན པརིཙྪིཛྫ ཨེཝ དྷམྨཱནཾ གཧཎཏོ.

ཨུཔྤཏྟིཡཱ ¶ པཙྩཡབྷཱཝེན པཱཀཊེནཱཏི ཨིདཾ ཏསྶ ནིདསྶནབྷཱཝནིདསྶནཾ. སིདྡྷཉྷི ནིདསྶནཾ. པཙྩཡུཔྤནྣཱནནྟི པཙྩཡནིབྦཏྟཱནཾ, ཨཏྟནོ ཕལབྷཱུཏཱནནྟི ¶ ཨདྷིཔྤཱཡོ. སཧཛཱཏབྷཱཝེནཱཏི སཧ ཨུཔྤནྣབྷཱཝེན. ཨཏྟནཱ སཧུཔྤནྣདྷམྨཱནཉྷི སཧུཔྤནྣབྷཱཝེན ཨུཔཀཱརཀཏཱ སཧཛཱཏཔཙྩཡཏཱ. ཏེན ཋིཏིཀྑཎེཔི ནེསཾ ཨུཔཀཱརཀཏཱ ཝེདིཏབྦཱ. ཨེཝཉྷི ‘‘པཀཱསསྶ པདཱིཔོ ཝིཡཱ’’ཏི ནིདསྶནམྤི སུཊྛུ ཡུཛྫཏི. པདཱིཔོ ཧི པཀཱསསྶ ཋིཏིཡཱཔི པཙྩཡོཏི.

ཨཉྙམཉྙཏཱཝསེནེཝཱཏི ཨིམིནཱ སཧཛཱཏཱདིབྷཱཝེན ཨཏྟནོ ཨུཔཀཱརཀསྶ ཨུཔཀཱརཀཏཱམཏྟཾ ན ཨཉྙམཉྙཔཙྩཡཏཱ, ཨཐ ཁོ ཨཉྙམཉྙཔཙྩཡབྷཱཝཝསེནཱཏི ལཀྑཎསངྐརཱབྷཱཝཾ དསྶེཏི, ན སཧཛཱཏཱདིཔཙྩཡེཧི ཝིནཱ ཨཉྙམཉྙཔཙྩཡསྶ པཝཏྟི. ཏེནེཝཱཧ ‘‘ན སཧཛཱཏཏཱདིཝསེནཱ’’ཏི. ཡདིཔི ཨཉྙམཉྙཔཙྩཡོ སཧཛཱཏཱདིཔཙྩཡེཧི ཝིནཱ ན ཧོཏི, སཧཛཱཏཱདིཔཙྩཡཱ པན ཏེན ཝིནཱཔི ཧོནྟཱིཏི སཧཛཱཏཏཱདིཝིདྷུརེནེཝ པཀཱརེན ཨཉྙམཉྙཔཙྩཡསྶ པཝཏྟཱིཏི དསྶེནྟོ ‘‘སཧཛཱཏཱདི…པེ… ན ཧོཏཱི’’ཏི ཝཏྭཱ ཏམེཝཏྠཾ པཱཀཊཏརཾ ཀཱཏུཾ ‘‘ན ཙ པུརེཛཱཏ…པེ… ཧོནྟཱི’’ཏི ཨཱཧ. སཧཛཱཏཏཱདཱིཏི ཙ ཨཱདི-སདྡེན ནིསྶཡཨཏྠིཨཝིགཏཱདཱིནཾ གཧཎཾ ཝེདིཏབྦཾ.

པཐཝཱིདྷཱཏུཡཾ པཏིཊྛཱཡ ཨེཝ སེསདྷཱཏུཡོ ཨུཔཱདཱརཱུཔཱནི ཝིཡ ཡཐཱསཀཀིཙྩཾ ཀརོནྟཱིཏི ཝུཏྟཾ ‘‘ཨདྷིཊྛཱནཱཀཱརེན པཐཝཱིདྷཱཏུ སེསདྷཱཏཱུན’’ནྟི. ཨེཏྠ ཨདྷིཊྛཱནཱཀཱརེནཱཏི ཨཱདྷཱརཱཀཱརེན. ཨཱདྷཱརཱཀཱརོ ཙེཏྠ ནེསཾ སཱཏིསཡཾ ཏདདྷཱིནཝུཏྟིཏཱཡ ཝེདིཏབྦོ, ཡཏོ བྷཱུཏཱནི ཨནིདྡིསིཏབྦཊྛཱནཱནི ཝུཙྩནྟི. ཨེཝཉྩ ཀཏྭཱ ཙཀྑཱདཱིནམྤི ཨདྷིཊྛཱནཱཀཱརེན ཨུཔཀཱརཀཏཱ སུཊྛུ ཡུཛྫཏི. ན ཧི ཡཐཱཝུཏྟཾ ཏདདྷཱིནཝུཏྟིཡཱ ཝིསེསཾ མུཉྩིཏྭཱ ཨཉྙོ ཙཀྑཱདཱིསུ ཨདེསཀཱནཾ ཨརཱུཔདྷམྨཱནཾ ཨདྷིཊྛཱནཱཀཱརོ སམྦྷཝཏི. ཡདིཔི ཡཾ ཡཾ དྷམྨཾ པཊིཙྩ ཡེ ཡེ དྷམྨཱ པཝཏྟནྟི, ཏེསཾ སབྦེསཾ ཏདདྷཱིནཝུཏྟིབྷཱཝོ, ཡེན པན པཙྩཡབྷཱཝཝིསེསེན ཙཀྑཱདཱིནཾ པཊུམནྡབྷཱཝེསུ ཙཀྑུཝིཉྙཱཎཱདཡོ ཏདནུཝིདྷཱནཱཀཱརེནེཝ པཝཏྟནྟི, སྭཱཡམིདཾ ཏེསཾ ཏདདྷཱིནཝུཏྟིཡཱ སིདྡྷོ ཝིསེསོཏི ཝུཏྟོ. ཨེཝཉྷི པཙྩཡབྷཱཝསཱམཉྙེ སཏིཔི ཨཱརམྨཎཔཙྩཡཏོ ནིསྶཡཔཙྩཡསྶ ཝིསེསོ སིདྡྷོཏི ཝེདིཏབྦོ. སྭཱཡཾ དྷཱཏུཝིབྷངྒེ ཝིབྷཱཝིཏོཡེཝ. ཁནྡྷཱདཡོ ཏཾཏཾནིསྶཡཱནཾ ཁནྡྷཱདཱིནནྟི ‘‘ཨུཔཀཱརཀཱ’’ཏི ཨཱནེཏྭཱ སམྦནྡྷིཏབྦཾ.

ཡཾ ¶ ¶ ཀིཉྩི ཀཱརཎཾ ནིསྶཡོཏི ཝདཏི, ན ཝུཏྟལཀྑཎཱུཔཔནྣམེཝ. ཨེཏེན པཙྩཡཊྛོ ཨིདྷ ནིསྶཡཊྛོཏི དསྶེཏི. ཏཏྠཱཏི ནིདྡྷཱརཎེ བྷུམྨཾ. ཏེན ཝུཏྟཾ ‘‘ནིདྡྷཱརེཏཱི’’ཏི.

སུཊྛུཀཏཏཾ དཱིཔེཏི, ཀསྶ? ‘‘ཨཏྟནོ’’ཏི ཝུཏྟསྶ པཀཏསདྡེན ཝིསེསིཡམཱནསྶ པཙྩཡསྶ. ཀེན ཀཏནྟི? ཨཏྟནོ ཀཱརཎེཧཱིཏི སིདྡྷོཝཱཡམཏྠོ. ཏཐཱཏི ཕལསྶ ཨུཔྤཱདནསམཏྠབྷཱཝེན. ཨཐ ཝཱ ཏཐཱཏི ནིཔྥཱདནཝསེན ཨུཔསེཝནཝསེན ཙ. ཏཏྠ ནིཔྥཱདནཾ ཧེཏུཔཙྩཡསམོདྷཱནེན ཕལསྶ ནིབྦཏྟནཾ, ཏཾ སུཝིཉྙེཡྻནྟི ཨནཱམསིཏྭཱ ཨུཔསེཝནམེཝ ཝིབྷཱཝེནྟོ ‘‘ཨུཔསེཝིཏོ ཝཱ’’ཏི ཨཱཧ. ཏཏྠ ཨལླཱིཡཱཔནཾ པརིབྷོགཝསེན ཝེདིཏབྦཾ. ཏེནཱཧ ‘‘ཨུཔབྷོགཱུཔསེཝན’’ནྟི. ཝིཛཱནནཱདིཝསེནཱཏི ཝིཛཱནནསཉྫཱནནཱནུབྷཝནཱདིཝསེན. ཏེནཱཏི ཡཐཱཝུཏྟཨུཔསེཝིཏསྶ པཀཏབྷཱཝེན. ཨནཱགཏཱནམྤི…པེ… ཝུཏྟཱ ཧོཏི, པགེཝ ཨཏཱིཏཱནཾ པཙྩུཔྤནྣཱནཉྩཱཏི ཨདྷིཔྤཱཡོ. པཙྩུཔྤནྣསྶཔི ཧི ‘‘པཙྩུཔྤནྣཾ ཨུཏུ བྷོཛནཾ སེནཱསནཾ ཨུཔནིསྶཱཡ ཛྷཱནཾ ཨུཔྤཱདེནྟཱི’’ཏིཨཱདིཝཙནཏོ (པཊྛཱ. ༢.༡༨.༨) པཀཏཱུཔནིསྶཡབྷཱཝེ ལབྦྷཏཱིཏི.

ཡཐཱ ཡེ དྷམྨཱ ཡེསཾ དྷམྨཱནཾ པཙྪཱཛཱཏཔཙྩཡཱ ཧོནྟི, ཏེ ཏེསཾ ཨེཀཾསེན ཝིཔྤཡུཏྟཨཏྠིཨཝིགཏཔཙྩཡཱཔི ཧོནྟི, ཏཐཱ ཡེ དྷམྨཱ ཡེསཾ དྷམྨཱནཾ པུརེཛཱཏཔཙྩཡཱ ཧོནྟི, ཏེ ཏེསཾ ནིསྶཡཱརམྨཎཔཙྩཡཱཔི ཧོནྟཱིཏི ཨུབྷཡེསུ ཨུབྷཡེསཾ པཙྩཡཱཀཱརཱནཾ ལཀྑཎཏོ སངྐརཱབྷཱཝཾ དསྶེཏུཾ ‘‘ཝིཔྤཡུཏྟཱཀཱརཱདཱིཧི ཝིསིཊྛཱ, ནིསྶཡཱརམྨཎཱཀཱརཱདཱིཧི ཝིསིཊྛཱ’’ཏི ཙ ཝུཏྟཾ. ཡཐཱ ཧི པཙྪཱཛཱཏཔུརེཛཱཏཱཀཱརཱ ཨཉྙམཉྙཝིསིཊྛཱ, ཨེཝཾ པཙྪཱཛཱཏཝིཔྤཡུཏྟཱཀཱརཱདཡོ པུརེཛཱཏནིསྶཡཱཀཱརཱདཡོ ཙ ཨཉྙམཉྙཝིབྷཏྟསབྷཱཝཱ ཨེཝཱཏི.

མནོསཉྩེཏནཱཧཱརཝསེན པཝཏྟམཱནེཧཱིཏི ཨིམིནཱ ཙེཏནཱཡ སམྤཡུཏྟདྷམྨཱནམྤི ཏདནུགུཎཾ ཨཏྟནོ པཙྩཡུཔྤནྣེསུ པཝཏྟིམཱཧ. ཏེནེཝཱཏི ཙེཏནཱཧཱརཝསེན ཨུཔཀཱརཀཏྟཱ ཨེཝ.

པཡོགེན ཀརཎཱིཡསྶཱཏི ཨེཏེན བྷིནྣཛཱཏི ཡཾ ཏཱདིསཾ པཡོགེན ཀཱཏུཾ ན སཀྐཱ, ཏཾ ནིཝཏྟེཏི. ཨནེཀཝཱརཾ པཝཏྟིཡཱ ཨཱསེཝནཊྛསྶ པཱཀཊབྷཱཝོཏི ཀཏྭཱ ཝུཏྟཾ ‘‘པུནཔྤུནཾ ཀརཎ’’ནྟི. ཨེཀསྶ པན ¶ པཙྩཡདྷམྨསྶ ཨེཀཝཱརམེཝ པཝཏྟི. ཨཏྟསདིསསྶཱཏི ཨརཱུཔདྷམྨསཱརམྨཎཏཱསུཀྐཀཎྷཱདིབྷཱཝེཧི ཨཏྟནཱ སདིསསྶ. ཨིདཾ པཙྩཡུཔྤནྣཝིསེསནཾ, ‘‘ཨཏྟསདིསསབྷཱཝཏཱཔཱདན’’ནྟི ¶ ཨིདཾ པན པཙྩཡབྷཱཝཝིསེསནཾ, ཏཉྩ བྷིནྣཛཱཏིཡཏཱདིམེཝ ཝིསདིསསབྷཱཝཏཾ ནིཝཏྟེཏི, ན བྷཱུམནྟརཏཱདི. ན ཧི པརིཏྟཱ དྷམྨཱ མཧགྒཏཨཔྤམཱཎཱནཾ དྷམྨཱནཾ ཨཱསེཝནཔཙྩཡཱ ན ཧོནྟཱིཏི. ཝཱསནཾ ཝཱསཾ གཱཧཱཔནཾ, ཨིདྷ པན ཝཱསནཾ ཝིཡ ཝཱསནཾ, བྷཱཝནནྟི ཨཏྠོ. གནྠཱདཱིསཱུཏི གནྠསིཔྤཱདཱིསུ. ཝིསཡེ ཙེཏཾ བྷུམྨཾ, ན ནིདྡྷཱརཎེ. ཏེན གནྠསིཔྤཱདིཝིསཡཱ པུརིམསིདྡྷཱ ཨཛ྄ཛྷཡནཱདིཀིརིཡཱ ‘‘གནྠཱདཱིསུ པུརིམཱ པུརིམཱ’’ཏི ཝུཏྟཱ, སཱ པན ཨཱསེཝནཱཀཱརཱ ཨིདྷ ཨུདཱཧརཎབྷཱཝེན ཨདྷིཔྤེཏཱཏི ཨཱཧ ‘‘པུརིམཱ པུརིམཱ ཨཱསེཝནཱ ཝིཡཱཏི ཨདྷིཔྤཱཡོ’’ཏི. ནིདྡྷཱརཎེ ཨེཝ ཝཱ ཨེཏཾ བྷུམྨཾ. གནྠཱདིཝིསཡཱ ཧི ཨཱསེཝནཱ གནྠཱདཱིཏི ཝུཏྟཱ ཡཐཱ རཱུཔཝིསཡཛ྄ཛྷཱནཾ རཱུཔནྟི ཝུཏྟཾ ‘‘རཱུཔཱི རཱུཔཱནི པསྶཏཱི’’ཏིཨཱདཱིསུ (མ. ནི. ༢.༢༤༨; ༣.༣༡༢; པཊི. མ. ༡.༢༠༩; དྷ. ས. ༢༤༨).

ཨཏྟནོ ཝིཡ སམྤཡུཏྟདྷམྨཱནམྤི ཀིཙྩསཱདྷིཀཱ ཙེཏནཱ ཙིཏྟསྶ བྱཱཔཱརབྷཱཝེན ལཀྑཱིཡཏཱིཏི ཨཱཧ ‘‘ཙིཏྟཔཡོགོ ཙེཏནཱ’’ཏི. ཏཱཡཱཏི ཏཱཡ ཙེཏནཱཡ. ཨུཔྤནྣཀིརིཡཏཱཝིསིཊྛེཏི ཙིཏྟཔཡོགསངྑཱཏཱཡ ཙེཏནཱཀིརིཡཱཡ ཨུཔྤཏྟིཡཱ ཝིསིཊྛེ ཝིསེསཾ ཨཱཔནྣེ. ཡསྨིཉྷི སནྟཱནེ ཀུསལཱཀུསལཙེཏནཱ ཨུཔྤཛྫཏི, ཏཏྠ ཡཐཱབལཾ ཏཱདིསཾ ཝིསེསཱདྷཱནཾ ཀཏྭཱ ནིརུཛ྄ཛྷཏི, ཡཏོ ཏཏྠེཝ ཨཝསེསཔཙྩཡསམཝཱཡེ ཏསྶཱ ཕལབྷཱུཏཱནི ཝིཔཱཀཀཊཏྟཱརཱུཔཱནི ནིབྦཏྟིསྶནྟི. ཏེནཱཧ ‘‘སེསཔཙྩཡ…པེ… ན ཨཉྙཐཱ’’ཏི. ཏེསནྟི ཝིཔཱཀཀཊཏྟཱརཱུཔཱནཾ. ཏེནཱཏི ཙིཏྟཀིརིཡབྷཱཝེན. ཀིཾ ཝཏྟབྦནྟི ཨསཧཛཱཏཱནམྤི བྷཱཝཱིནཾ ཨུཔཀཱརིཀཱ ཙེཏནཱ སཧཛཱཏཱནཾ ཨུཔཀཱརིཀཱཏི ཝཏྟབྦམེཝ ནཏྠཱིཏི ཨཏྠོ.

ནིརུསྶཱཧསནྟབྷཱཝེནཱཏི ཨུསྶཱཧནཾ ཨུསྶཱཧོ, ནཏྠི ཨེཏསྶ ཨུསྶཱཧོཏི ནིརུསྶཱཧོ, སོ ཨེཝ སནྟབྷཱཝོཏི ནིརུསྶཱཧསནྟབྷཱཝོ, ཏེན. ཨུསྶཱཧོཏི ཙ ཀིརིཡམཡཙིཏྟུཔྤཱདསྶ པཝཏྟིཨཱཀཱརོ ཝེདིཏབྦོ, ཡོ བྱཱཔཱརོཏི ཙ ཝུཙྩཏི, ན ཝཱིརིཡུསྶཱཧོ. སྭཱཡཾ ཡཐཱ ཨསམུགྒྷཱཏིཏཱནུསཡཱནཾ ཀིརིཡམཡཙིཏྟུཔྤཱདེསུ སཱཏིསཡོ ¶ ལབྦྷཏི, ན ཏཐཱ ནིརནུསཡཱནཾ. ཏཏོ ཨེཝ ཏེ སནྟསབྷཱཝཱ ཝིཔཱཀུཔྤཱདནབྱཱཔཱརརཧིཏཱཝ ཧོནྟི, ཀིརིཡམཡཙིཏྟུཔྤཱདཏཱཡ པན སཨུསྶཱཧཱ ཨེཝཱཏི ཏཏོཔི ཝིསེསནཏྠཾ ‘‘ནིརུསྶཱཧསནྟབྷཱཝེནཱ’’ཏི ཝུཏྟཾ. ཨེཏེནཱཏི ནིརུསྶཱཧསནྟབྷཱཝགྒཧཎེན. སཱརམྨཎཱདིབྷཱཝེནཱཏི སཱརམྨཎཨརཱུཔདྷམྨཙིཏྟཙེཏསིཀཕསྶཱདིབྷཱཝེན. ཝིསདིསཝིཔཱཀབྷཱཝཾ དསྶེཏི ཡཐཱཝུཏྟཨུསྶཱཧམཏྟརཧིཏསནྟབྷཱཝསྶ ཝིཔཀྐབྷཱཝམཱཔནྣེསུ ཨརཱུཔདྷམྨེསུ ཨེཝ ལབྦྷནཏོ. སོཏི ཝིཔཱཀབྷཱཝོ. ཝིཔཱཀཱནཾ པཡོགེན ཨསཱདྷེཏབྦཏཱཡཱཏི ¶ ‘‘ཚནྡཝཏོ ཀིཾ ནཱམན སིཛ྄ཛྷཏཱི’’ཏིཨཱདིནཱ ཙིཏྟཱབྷིསངྑཱརཔཡོགེན ཡཐཱ ཀུསལཱཀུསལཱ ནིཔྥཱདཱིཡནྟི, ཨེཝཾ ཝིཔཱཀཱནཾ པཡོགེན ཨནིཔྥཱདེཏབྦཏྟཱ. པཡོགེནཱཏི ཀམྨཕལུཔྤཏྟིམཱུལཧེཏུབྷཱུཏེན པུརིམཔཡོགེན. ཡཾ སནྡྷཱཡ ཝུཏྟཾ ‘‘པཡོགསམྤཏྟིཾ ཨཱགམྨ ཝིཔཙྩནྟཱི’’ཏིཨཱདི. ཨཉྙཐཱཏི པཡོགེན ཝིནཱ. སེསཔཙྩཡེསཱུཏི ཀམྨསྶ ཝིཔཱཀུཔྤཱདནེ སཧཀཱརཱིཀཱརཎེསུ. ཀམྨསྶ ཀཊཏྟཱཡེཝ པཡོགེ སཏི ཨསཏིཔཱིཏི ཝུཏྟམེཝཏྠཾ ཨཝདྷཱརཎེན དསྶེནྟོ ཝིཔཱཀཱནཾ ནིརུསྶཱཧཏཾ པཱཀཊཾ ཀརོཏི. ན ཀིལེསཝཱུཔསམསནྟབྷཱཝོ ཡཐཱ ཏཾ སནྟཱནེསུ ཛྷཱནསམཱཔཏྟཱིསཱུཏི ཨདྷིཔྤཱཡོ. ཨཡཉྩ ཝིཔཱཀཱནཾ སནྟབྷཱཝོ ནཱནུམཱནིཀོ, ཨཐ ཁོ པཙྩཀྑསིདྡྷོཏི དསྶེནྟོ ‘‘སནྟབྷཱཝཏོཡེཝཱ’’ཏིཨཱདིམཱཧ. ཏཏྠ ཨབྷིནིཔཱཏགྒཧཎེན ཀིཙྩཏོ པཉྩཝིཉྙཱཎཱནི དསྶེཏི. ཏེནེཝཱཧ ‘‘པཉྩཧི ཝིཉྙཱཎེཧི ན ཀིཉྩི དྷམྨཾ པཊིཛཱནཱཏི ཨཉྙཏྲ ཨབྷིནིཔཱཏམཏྟཱ’’ཏི. ཏཔྤཙྩཡཝཏནྟི ཝིཔཱཀཔཙྩཡཝནྟཱནཾ, ཝིཔཱཀཔཙྩཡེན ཨུཔཀཏྟབྦཱནནྟི ཨཏྠོ. ཨཝིཔཱཀཱནཾ རཱུཔདྷམྨཱནཾ. ཝིཔཱཀཱནུཀུལཾ པཝཏྟིནྟི སནྟསབྷཱཝཾ པཙྩཡབྷཱཝམཱཧ.

ཡཐཱསཀཾ པཙྩཡེཧི ནིབྦཏྟཱནཾ པཙྩཡུཔྤནྣཱནཾ ཨནུབལཔྤདཱནཾ ཨུཔཏྠམྦྷཀཏྟཾ, ཏཡིདཾ ཨཱཧཱརེསུ ན ནིཡཏཾ ཏཏོ ཨཉྙཐཱཔི པཝཏྟནཏོ. ཏཐཱ སཏི ཏདེཝ ཏཏྠ ཀསྨཱ གཧིཏནྟི ཙོདནཾ མནསི ཀཏྭཱ ཨཱཧ ‘‘སཏིཔི…པེ… ཨུཔཏྠམྦྷཀཏྟེནཱ’’ཏི. ཏེན པདྷཱནཱཔྤདྷཱནེསུ པདྷཱནེན ནིདྡེསོ ཉཱཡགཏོཏི དསྶེཏི. ཀཱམཉྩེཏྠ ‘‘རཱུཔཱརཱུཔཱནཾ ཨུཔཏྠམྦྷཀཏྟེནཱ’’ཏི ཨཝིསེསཏོ ཝུཏྟཾ, སཱམཉྙཛོཏནཱ པན ཝིསེསེ ཨཝཏིཊྛཏཱིཏི ཡཐཱརཧཾ པཙྩཡབྷཱཝོ ནིདྡྷཱརེཏབྦོ. སྭཱཡཾ ཏེསཾ ཨུཔཏྠམྦྷཀཏྟསྶ པདྷཱནབྷཱཝཝིབྷཱཝནེནེཝ ཨཱཝི བྷཝཏཱིཏི ཏམེཝ དསྶེནྟོ ¶ ‘‘ཨུཔཏྠམྦྷཀཏྟཉྷཱི’’ཏིཨཱདིམཱཧ. ཕསྶམནོསཉྩེཏནཱཝིཉྙཱཎཱནི ཨཏྟནཱ སཧཛཱཏདྷམྨཱནཾ སཧུཔྤཱདནབྷཱཝེན པཙྩཡཱ ཧོནྟཱིཏི ཨཱཧ ‘‘སཏིཔི ཛནཀཏྟེ ཨརཱུཔཱིནཾ ཨཱཧཱརཱན’’ནྟི. ཨུཔཏྠམྦྷཀཏྟཾ ཧོཏི ཨུཔྤཱདཏོ པརམྤི ནེསཾ པཙྩཡབྷཱཝཏོ. ཨསཏིཔི ཛནཀཏྟེ ཨུཔཏྠམྦྷིཡམཱནསྶ རཱུཔསྶ ཨཉྙེཧི ཡཐཱསཀཾ པཙྩཡེཧི ཛནིཏཏྟཱ. ཏེནཱཧ ‘‘ཙཏུསམུཊྛཱནིཀརཱུཔཱུཔཏྠམྦྷཀརཱུཔཱཧཱརསྶཱ’’ཏི. ཡདགྒེན རཱུཔཱརཱུཔཱཧཱརཱ ཨཏྟནོ ཕལསྶ ཨུཔྤཏྟིཡཱ པཙྩཡཱ ཧོནྟི, ཏདགྒེན ཋིཏིཡཱཔི པཙྩཡཱ ཧོནྟིཡེཝཱཏི ཨུཔཏྠམྦྷཀཏྟཾ ཛནཀཏྟཾ ན བྱབྷིཙརཏི, ཏསྨཱ ཨནུཔཏྠམྦྷཀསྶ ཨཱཧཱརསྶ ཀུཏོ ཛནཀཏཱ. ཏེནཱཧ ‘‘ཨསཏི པན…པེ… ནཏྠཱིཏི ཨུཔཏྠམྦྷཀཏྟཾ པདྷཱན’’ནྟི. ཡསྨཱ ཛནཀོ ཨཛནཀོཔི ཧུཏྭཱ ཨཱཧཱརོ ཨུཔཏྠམྦྷཀོ ཧོཏི, ཨནུཔཏྠམྦྷཀོ པན ཧུཏྭཱ ཛནཀོ ན ཧོཏིཡེཝ, ཏསྨཱསྶ ཨུཔཏྠམྦྷཀཏྟཾ པདྷཱནནྟི ¶ ཨཏྠོ. ཨིདཱནི ཛནཀཏྟམྤི ཨཱཧཱརཱནཾ ཨུཔཏྠམྦྷནཝསེནེཝ ཧོཏཱིཏི དསྶེནྟོ ‘‘ཛནཡམཱནོཔི ཧཱི’’ཏིཨཱདིམཱཧ. ཨཝིཙྪེདཝསེནཱཏི སནྟཏིཡཱ གྷཊྚནཝསེན.

ཡདི ཨདྷིཔཏིཡཊྛོ ཨིནྡྲིཡཔཙྩཡཏཱ, ཨེཝཾ སནྟེ ཨདྷིཔཏིཔཙྩཡཏོ ཨིནྡྲིཡཔཙྩཡསྶ ཀིཾ ནཱནཱཀརཎནྟི ཙོདནཾ མནསི ཀཏྭཱ ཏཾ ཏེསཾ ནཱནཱཀརཎཾ དསྶེནྟོ ‘‘ན ཨདྷིཔཏིཔཙྩཡདྷམྨཱནཾ ཝིཡཱ’’ཏིཨཱདིམཱཧ. ཏཏྠ པཝཏྟིནིཝཱརཀེཏི ཨཏྟནོ ཨདྷིཔཏིཔཙྩཡཔཝཏྟིཡཱ ནིཝཱརཀེ ཨཉྙེ ཨདྷིཔཏིཔཙྩཡདྷམྨེ. ཨབྷིབྷཝིཏྭཱ པཝཏྟནེནཱཏི པུརིམཱབྷིསངྑཱརསིདྡྷེན དྷོརེཡྻབྷཱཝེན ཨབྷིབྷུཡྻ པཝཏྟིཡཱ. གརུབྷཱཝོཏི ཛེཊྛཀབྷཱཝོ. ཨཡཉྷེཏྠ སངྑེཔཏྠོ – ཡེན ཛེཊྛཀབྷཱཝེན ཚནྡཱདཡོ ཨཏྟནོ པཝཏྟིཝིབནྡྷཀེ ཏུལྱཡོགཱིདྷམྨེ ཏདཉྙདྷམྨེ ཝིཡ ཨབྷིབྷུཡྻ པཝཏྟནྟི, ན སོ ཨིནྡྲིཡཔཙྩཡཏཱཡ ཨདྷིཔཏིཡཊྛོཏི ཨདྷིཔྤེཏོཏི. ཨཐ ཀོ ཙརཧཱིཏི ཨཱཧ ‘‘ཨཐ ཁོ’’ཏིཨཱདི. དསྶནཱདིཀིཙྩེསུ ནིམིཏྟབྷཱུཏེསུ ཙཀྑུཝིཉྙཱཎཱདཱིཧི ཙཀྑཱདཱིཧི པཙྩཡེཧི ཙཀྑཱདཱིནཾ ཨནུཝཏྟནཱིཡཏཱཏི སམྦནྡྷོ. ཛཱིཝནེ ཨནུཔཱལནེ ཛཱིཝནྟེཧི སཧཛཱཏདྷམྨེཧི ཛཱིཝིཏསྶ, སུཁིཏཱདཱིཧི སུཁིཏདུཀྑིཏསོམནསྶིཏདོམནསྶིཏུཔེཀྑིཏེཧི སཧཛཱཏདྷམྨེཧི སུཁཱདཱིནཾ ཨནུཝཏྟནཱིཡཏཱཏི ཡོཛནཱ. ཏཾཏཾཀིཙྩེསཱུཏི ཝུཏྟམེཝ དསྶནཱདིཀིཙྩཾ པཙྩཱམསཏི. ཙཀྑཱདཡོ ¶ པཙྩཡཱ ཨེཏེསནྟི ཙཀྑཱདིཔཙྩཡཱ, ཙཀྑུཝིཉྙཱཎཱདཡོ. ཏེཧི ཙཀྑཱདིཔཙྩཡེཧི. ཙཀྑཱདཱིནནྟི ཙཀྑཱདིཛཱིཝིཏསུཁཱདིསདྡྷཱདཱིནཾ.

ཏེསུ ཀིཙྩེསཱུཏི དསྶནཱདིཀིཙྩེསུ. ཙཀྑཱདཱིནཾ ཨིསྶརིཡཾ ཨདྷིཔཏིཡཊྛོ, སཱ ཨིནྡྲིཡཔཙྩཡཏཱཏི ཨཏྠོ. ཏཔྤཙྩཡཱནཾ ཙཀྑུཝིཉྙཱཎཱདཱིནཾ ཏདནུཝཏྟནེན ཏེསཾ ཙཀྑཱདཱིནཾ ཨནུཝཏྟནེན. ཏཏྠ དསྶནཱདིཀིཙྩེ. པཝཏྟཱིཏི ཙ ཨིདཾ ཏསྶ ཨདྷིཔཏིཡཊྛསྶ པཱཀཊཀརཎཾ. ཨནུཝཏྟཀེན ཧི ཨནུཝཏྟནཱིཡོ ཨདྷིཔཏིཡཊྛོ པཱཀཊོ ཧོཏི. ཡཐཱ ཙཀྑཱདཱིནཾ ཀིཙྩཝསེན ཨདྷིཔཏིཡཊྛོ, ན ཨེཝཾ བྷཱཝདྭཡསྶ. ཏསྶ པན ཏཱདིསེན ཀཱརཎཏཱམཏྟེནཱཏི དསྶེནྟོ ‘‘ཨིཏྠིཔུརིསིནྡྲིཡཱནཾ པནཱ’’ཏིཨཱདིམཱཧ. པཙྩཡེཧཱིཏི ཀམྨཱདིཔཙྩཡེཧི. ཏཏོཏི ཨིཏྠཱདིགྒཧཎཔཙྩཡབྷཱཝཏོ. ཏཾསཧིཏསནྟཱནེཏི ཨིཏྠིནྡྲིཡཱདིསཧིཏསནྟཱནེ. ‘‘སུཁིནྡྲིཡདུཀྑིནྡྲིཡཱནིཔི ཙཀྑཱདིགྒཧཎེན གཧིཏཱནཱི’’ཏི ཨིདཾ ཨིནྡྲིཡཔཙྩཡམེཝ སནྡྷཱཡ ཝུཏྟཾ, པཙྪཱཛཱཏཱདཱིཧི པན ཏཱནི རཱུཔདྷམྨཱནམྤི པཙྩཡཱ ཧོནྟིཡེཝ.

ལཀྑཎཱརམྨཎཱུཔནིཛ྄ཛྷཱནབྷཱུཏཱནནྟི ཨནིཙྩཏཱདིལཀྑཎསྶ པཐཝཱིཀསིཎཱདིཨཱརམྨཎསྶ ཙ ཨུཔནིཛ྄ཛྷཱནཝསེན ¶ པཝཏྟཱནཾ. ཝིཏཀྐཱདཱིནནྟི ཝིཏཀྐཝིཙཱརཔཱིཏིཝེདནཱཙིཏྟེཀགྒཏཱནཾ. ཨུཔགནྟྭཱ ནིཛ྄ཛྷཱནནྟི ཨུཔནིཀཙྩ ནིཛ྄ཛྷཱནཛ྄ཛྷཱནཱརམྨཎསྶ ཛྷཱནཙཀྑུནཱ བྱཏྟཏརཾ ཨོལོཀནཾ ཨཏྠཏོ ཙིནྟནམེཝ ཧོཏཱིཏི ཝུཏྟཾ ‘‘པེཀྑནཾ ཙིནྟནཉྩཱ’’ཏི. ཏེནེཝཱཧ ‘‘ཝིཏཀྐནཱདིཝསེནཱ’’ཏི. ཝིཏཀྐཱདཱིནཾཡེཝ སཱདྷཱརཎོ, ཡེན ཏེཡེཝ ‘‘ཛྷཱནངྒཱནཱི’’ཏི ཝུཙྩནྟི. སུཁདུཀྑཝེདནཱདྭཡནྟི སཱམཉྙཝཙནམྤི ཨུཔནིཛ྄ཛྷཱཡནཊྛསྶ ཨདྷིཀཏཏྟཱ ཨནུཔནིཛ྄ཛྷཱནསབྷཱཝམེཝ ཏཾ བོདྷེཏཱིཏི ཨཱཧ ‘‘སུཁིནྡྲིཡདུཀྑིནྡྲིཡདྭཡ’’ནྟི. ཏཉྷི ཨིདྷཱདྷིཔྤེཏབྦཾ, ན སོམནསྶདོམནསྶིནྡྲིཡཾ. ཏེན ཝུཏྟཾ ‘‘ཨདྷིཔྤཱཡོ’’ཏི. ཨཛྷཱནངྒཱ ཨུཔེཀྑཱཙིཏྟེཀགྒཏཱ པཉྩཝིཉྙཱཎསཧགཏཱ དཊྛབྦཱ ཝིཏཀྐཔཙྪིམཀཏྟཱ ཛྷཱནངྒཱནཾ. ཡདི ཨེཝནྟི ཛྷཱནངྒཝཙནེནེཝ ཨཛྷཱནངྒཱནཾ ནིཝཏྟནཾ ཀཏཾ, ཨེཝཾ སནྟེ. ཨེཀནྟེན ན ཨུཔེཀྑཱཡ ཝིཡ ཨནེཀནྟེན. ཨནེཀནྟིཀཉྷི ཨུཔེཀྑཱཡ ཨཛྷཱནངྒཏྟཾ. ཡདི ཨེཀནྟེན ཨཛྷཱནངྒཾ སུཁདུཀྑིནྡྲིཡཾ, ཨཐ ཀཐཾ པསངྒོཏི ཨཱཧ ‘‘ཛྷཱནངྒཊྛཱནེ ནིདྡིཊྛཏྟཱ’’ཏི. ཨཐ ཝཱ ཡདི ཨེཀནྟེན ཨཛྷཱནངྒཏཾ ཝེདནཱདྭཡཾ, ཀཐཾ ཛྷཱནངྒཝོཧཱརོཏི ཨཱཧ ‘‘ཛྷཱནངྒཊྛཱནེ ནིདྡིཊྛཏྟཱ’’ཏི. སཏིཔི…པེ… དསྶནཏྠཾ ‘‘ཋཔེཏྭཱ སུཁདུཀྑིནྡྲིཡདྭཡ’’ནྟི ཝུཏྟནྟི ཡོཛནཱ ¶ . ཡདི ཨེཝཾ ཡཐཱཝུཏྟཝེདནཱདྭཡེན སདྡྷིཾ ཏཱདིསཱ ཨུཔེཀྑཱཙིཏྟེཀགྒཏཱ ཀསྨཱ ན ཋཔིཏཱཏི ཨཱཧ ‘‘ཨུཔེཀྑཱ…པེ… ཨཏྠཱི’’ཏི, པཉྩཝིཉྙཱཎསཧགཏཱནཾ ཛྷཱནཔཙྩཡབྷཱཝོ པན ནཏྠི, ན ཨིཏརེསནྟི ཨདྷིཔྤཱཡོ. གཧཎཾ ཀཏཾ ཨུཔེཀྑཱཙིཏྟེཀགྒཏཱནནྟི ཨཱནེཏྭཱ ཡོཛནཱ.

ཡཏོ ཏཏོ ཝཱཏི དུགྒཏིཏོ ཝཱ སུགཏིཏོ ཝཱ སཾཀིལེསཏོ ཝཱ ཝོདཱནཏོ ཝཱ ནིཡྻཱནཊྛོ, སྭཱཡཾ ཡཐཱཀྐམཾ སམྨཱ མིཙྪཱ ཝཱ ཧོཏཱིཏི ཨཱཧ ‘‘སམྨཱ ཝཱ མིཙྪཱ ཝཱཏི ཨཏྠོ’’ཏི. ཨཧེཏུཀཙིཏྟེསུ ན ལབྦྷནྟཱིཏི ཨེཏྠ ཨཧེཏུཀཙིཏྟེསུ ཨེཝ ན ལབྦྷནྟཱིཏི ཨེཝམཝདྷཱརཎཾ གཧེཏབྦཾ, ན ཨཧེཏུཀཙིཏྟེསུ ན ལབྦྷནྟི ཨེཝཱཏི. ཏསྨཱ པུརིམསྨིཉྷི ཨཝདྷཱརཎེ ཨཧེཏུཀཙིཏྟེསུ ཨལཱབྷོ ནིཡཏོཏི སོ པཏིཡོགཱིསུ ནིཝཏྟིཏོ ཧོཏི. ཏེནཱཧ ‘‘སཧེཏུཀཙིཏྟེསུ ཨལཱབྷཱབྷཱཝདསྶནཏྠཾ ཝུཏྟ’’ནྟི. དུཏིཡེ པན ཨཧེཏུཀཙིཏྟཱནི ཨལཱབྷེ ནིཡཏཱནཱིཏི ཏེསུ ཨནཝསེསཏོ ཨལཱབྷེན བྷཝིཏབྦཾ. ཏཐཱ སཏི ཡོ ཀེསུཙི ཨཧེཏུཀཙིཏྟེསུ ཛྷཱནཔཙྩཡོ ལབྦྷཏི, སོཔི ནིཝཱརིཏོ སིཡཱ. ཏེན ཝུཏྟཾ ‘‘ན ཨཧེཏུཀཙིཏྟེསཱུ’’ཏིཨཱདི. ཏཏྠ ལཱབྷཱབྷཱཝདསྶནཏྠནྟི ལཱབྷཱབྷཱཝསྶེཝ དསྶནཏྠཾ ན ཝུཏྟནྟི ཨཏྠོ. ཏེན ཨེཀཙྩཱལཱབྷོ ཨཔཊིཀྑིཏྟོ ཧོཏི. ཏེནེཝཱཧ ‘‘ཀཏྠཙི ཀསྶཙི ལཱབྷོ ན ནིཝཱརིཏོ’’ཏི. ཨེཝཾ ཨཏྠེ གཡ྄ཧམཱནེཏི ཨེཝཾ ཝུཏྟནཡེན པཋམཔདཱཝདྷཱརཎཝསེན ཨཏྠེ ཝིཉྙཱཡམཱནེ. ཨེཏྟཀམེཝ ཝིཉྙཱཡེཡྻཱཏི ཨཧེཏུཀཙིཏྟེསུ ཀེསུཙི ཙིཏྟེསུ ཛྷཱནམགྒཔཙྩཡེསུ ཀསྶཙི ¶ པཙྩཡསྶ ལཱབྷོ ན ནིཝཱརིཏོཏི ཨེཏྟཀམེཝ ཝིཉྙཱཡེཡྻ ཨཝིསེསེན ཝུཏྟཏྟཱ. ཀིཾ པནེཏྠ ཨུཔརི ཀཱཏབྦནྟི ཨཱཧ ‘‘ན སཝིཏཀྐ…པེ… ཀཏ’’ནྟི. ཡདིཔི ན ཀཏཾ, ཨཏྠཏོ པན ཏཾ ཀཏམེཝཱཏི ཝེདིཏབྦཾ.

ཨཧེཏུཀཙིཏྟེསུ ཝཱ ལཱབྷཱབྷཱཝདསྶནཏྠེཏིཨཱདི པཙྪིམཔདཱཝདྷཱརཎཝསེན ཨཏྠདསྶནཾ. ཏསྨཱཏི ཡསྨཱ ཨཧེཏུཀཙིཏྟེསུ ན ལབྦྷནྟི ཨེཝཱཏི ཨེཝཾ ནིཡམེ ཀརིཡམཱནེ ཡཐཱཝུཏྟོ ཨཏྠོ སམྦྷཝཏི, ཏསྨཱ. ཨཡཉྩ ཨཏྠོ པཱཋནྟརེནཔི སཾསནྡཏཱིཏི དསྶེཏུཾ ‘‘ཡེན ཨལཱབྷེནཱ’’ཏིཨཱདི ཝུཏྟཾ. ཏཾ ཨལཱབྷནྟི ཏཾ དྷམྨསངྒཎིཡཾ པཀཱསིཏཾ ཨལཱབྷཾ. ཨེསཱཏི ཨེས ཨིདྷ པཊྛཱནཝཎྞནཱཡཾ ‘‘ཨཧེཏུཀཙིཏྟེསུ ན ལབྦྷནྟཱི’’ཏི ¶ ཨལཱབྷོ ཝུཏྟོ. ཀཱིདིསོ པན ཨལཱབྷོཏི ཏཾ དསྶེནྟོ ‘‘ཡཐཱ ཧཱི’’ཏིཨཱདིམཱཧ. ཏཏྠ སཧེཏུཀེསཱུཏི སཧེཏུཀཙིཏྟེསུ. སངྐཌྜྷིཏྭཱཏི ཨཝིསཊེ ཀཏྭཱ. ཨེཀཏྟགཏབྷཱཝཀརཎནྟི ཨེཀབྷཱཝཱཔཱདནཾ. ཨིམསྨིཾ པན པཀརཎེ ཛྷཱནཔཙྩཡོ ཝུཏྟོཝ ཡཐཱལཱབྷཔཙྩཡཱཀཱརཝིབྷཱཝནེ དེསནཱཡ ཏཔྤརབྷཱཝཏོ.

སམནྟི ཨཝིསམཾ, སམྨཱ, སཧ ཝཱ. པཀཱརེཧཱིཏི ཨེཀཝཏྠུཀཏཱདིཔྤཀཱརེཧི. ཡུཏྟཏཱཡཱཏི སཾསཊྛཏཱཡ. སཱ པན སཾསཊྛཏཱ ཡསྨཱ སབྷཱཝཏོ ཨནེཀེསམྤི སཏཾ ཨེཀཏྟགམནཾ ཝིཡ ཧོཏི, ཏསྨཱ ཝུཏྟཾ ‘‘ཨེཀཱིབྷཱཝོཔགམནེན ཝིཡ ཨུཔཀཱརཀཏཱ’’ཏི. ཨེཝཾ ཨུཔཀཱརཀཏཱ ཙ ཏེསཾ བཧཱུནཾ སཧཙྩ ཨེཀཏྟཀཱརིཏཱཡ ནིདསྶེཏབྦཱ.

ཡུཏྟཱནམྤི སཏནྟི ཝུཏྟཔྤཀཱརེན སཾསཊྛཏཱཡ ཨཉྙམཉྙསམྦནྡྷཏཱཡ ཡུཏྟཱནམྤི སམཱནཱནཾ. ཨཡཉྩ ཡུཏྟཏཱ ན སམྤཡུཏྟཔཙྩཡཏཱཡ ཝིཡ པཙྩཡདྷམྨེསུ པཙྩཡུཔྤནྣདྷམྨེསུ ཙ ཝེདིཏབྦཱ, ཀེཝལཾ ཏཏྠ ཨརཱུཔསབྷཱཝཏྟཱ ཨུབྷཡཾ སམདྷུརཾ, ཨིདྷ རཱུཔཱརཱུཔསབྷཱཝཏྟཱ ཝིདྷུརནྟི ཨཡཾ ཝིསེསོ. ཝིཔྤཡུཏྟབྷཱཝེནཱཏི ཝིསཾསཊྛབྷཱཝེན. ཏེན ཝུཏྟཾ ‘‘ནཱནཏྟཱུཔགམེནཱ’’ཏི. ཨིདཉྷེཏྠ ཝིཔྤཡུཏྟཏཱཡ ཝིསེསནཾ ཡཱ ནཱནཏྟཱུཔགམནསངྑཱཏཱ ཝིཔྤཡུཏྟཏཱ, ན སཱ ‘‘ཉཱཎཝིཔྤཡུཏྟ’’ནྟིཨཱདཱིསུ ཝིཡ ཨབྷཱཝམཏྟནྟི, ཨཡཉྩ ཨུཔཀཱརཀཏཱ ཝིནཱ སཾསགྒེན སཧཱཝཊྛཱཡིཏཱཡ ཀིཙྩཀཱརིཏཱདཱིཧི ནིདསྶེཏབྦཱ. ན ཧཱིཏིཨཱདི ‘‘ཡུཏྟཱན’’ནྟི ཝུཏྟསྶ ཨཏྠསྶ སམཏྠནཾ ‘‘ཏཱདིསེ ཡོགེ སཏིཡེཝ ཝིཔྤཡུཏྟཔཙྩཡཏཱ’’ཏི. ཏེནཱཧ ‘‘ན ཧཱི’’ཏིཨཱདི. ཏསྶཏྠོ – ཡཐཱ ‘‘ཝཏྠུ ཁནྡྷཱནཾ, སཧཛཱཏཱ ཀུསལཱ ཁནྡྷཱ ཙིཏྟསམུཊྛཱནཱནཾ རཱུཔཱནཾ, པཙྪཱཛཱཏཱ ཀུསལཱ ཁནྡྷཱ པུརེཛཱཏསྶ ཨིམསྶ ཀཱཡསྶ ཝིཔྤཡུཏྟཔཙྩཡེན པཙྩཡོ’’ཏིཨཱདིཝཙནཏོ (པཊྛཱ. ༡.༡.༤༣༤) ཝཏྠུསཧཛཱཏཔཙྪཱཛཱཏཝསེན ཡུཏྟཱནཾ ¶ ཨཏྠི ཝིཔྤཡུཏྟཔཙྩཡཏཱ, ན ཨེཝཾ ཨཡུཏྟཱནཾ ཝཏྠུསཧཛཱཏ…པེ… ཨཏྠཱིཏི. ཡདི ཨེཝཾ རཱུཔཱནཾ རཱུཔེཧི ཀསྨཱ ཝིཔྤཡུཏྟཔཙྩཡོ ན ཝུཏྟོཏི ཨཱཧ ‘‘རཱུཔཱནཾ པནཱ’’ཏིཨཱདི. ཝིཔྤཡོགོཡེཝ ནཏྠི སམྤཡོགཱསངྐཱཡ ཨབྷཱཝཏོ. སམྤཡུཛྫམཱནཱནཉྷི ཨརཱུཔཱནཾ རཱུཔེཧི, རཱུཔཱནཉྩ ཏེཧི སིཡཱ སམྤཡོགཱསངྐཱ, སམྤཡོགལཀྑཎཾ པན ནཏྠཱིཏི ཏེསཾ ཝིཔྤཡོགོ ཝུཏྟོ. ཏེནཱཧ ‘‘ཙཏཱུཧི སམྤཡོགོ ཙཏཱུཧི ཝིཔྤཡོགོ’’ཏི.

ཨཏྠི ¶ མེ པཱཔཀམྨཾ ཀཏནྟི ཀཏབྷཱཝཝིསིཊྛཱ ཨཏྠིཏཱ ཝུཙྩམཱནཱ ཀིརིཡཱཡ སིདྡྷབྷཱཝམེཝ དཱིཔེཏི, ན སིཛ྄ཛྷམཱནཏནྟི ཨཱཧ ‘‘ནིབྦཏྟཏཱལཀྑཎཾ ཨཏྠིབྷཱཝ’’ནྟི. ཨཏྠཏོ པན ཀམྨསྶ ཨནིབྦཏྟཕལཏཱཡ ཨེཝམེཏྠ ཨཏྠིཏཱ ཝེདིཏབྦཱ. ཨཏྠི པུགྒལོཏི པནེཏྠ ཏསྶཱ པཉྙཏྟིཡཱ གཧེཏབྦཏཱ, ཏདུཔཱདཱནསྶ ཝཱ པབནྡྷཱཝིཙྪེདོ ལབྦྷཏེཝཱཏི ཝུཏྟཾ ‘‘ཨུཔལབྦྷམཱནཏཱལཀྑཎཾ ཨཏྠིབྷཱཝ’’ནྟི. པཙྩཡདྷམྨསྶ ཡདིཔི ཨུཔྤཱདཏོ པཊྛཱཡ ཡཱཝ བྷངྒཱ ལབྦྷམཱནཏཱ ཨཏྠིབྷཱཝོ, ཏཐཱཔི ཏསྶ ཡཐཱ ཨུཔྤཱདཀྑཎཏོ ཋིཏིཀྑཎེ སཱཏིསཡོ བྱཱཔཱརོ, ཨེཝཾ པཙྩཡུཔྤནྣེཔཱིཏི ཝུཏྟཾ ‘‘སཏིཔི ཛནཀཏྟེ ཨུཔཏྠམྦྷཀཔྤཊྛཱནཱ ཨཏྠིབྷཱཝེན ཨུཔཀཱརཀཏཱ’’ཏི. ཝཏྠཱརམྨཎསཧཛཱཏཱདཱིནནྟི ཨཱདི-སདྡེན པུརེཛཱཏཔཙྪཱཛཱཏཱདཱིནི སངྒཎྷཱཏི. ཨཏྠིབྷཱཝེནེཝ ན ནིསྶཡཱདིབྷཱཝེནཱཏི ‘‘སཱདྷཱརཎ’’ནྟི ཝུཏྟཾ ཨུཔཀཱརཀཏྟཾ ཝིབྷཱཝེཏི.

ཕསྶཱདཱིནཾ ཨནེཀེསཾ སཧབྷཱཝོ ནཏྠཱིཏི ཨིདཾ ན ཨེཀཙིཏྟུཔྤཱདཔརིཡཱཔནྣེ སནྡྷཱཡ, ཨཐ ཁོ ནཱནཱཙིཏྟུཔྤཱདཔརིཡཱཔནྣེཏི དསྶེནྟོ ‘‘ཨེཀསྨིཾ ཕསྶཱདིསམུདཱཡེ སཏི དུཏིཡོ ན ཧོཏཱི’’ཏི ཨཱཧ. སྭཱཡམཏྠོ ‘‘སཧབྷཱཝོ ནཏྠཱི’’ཏི སཧབྷཱཝཔཊིཀྑེཔེནེཝ ཝིཉྙཱཡཏི. ཨེཏྟཱཝཏཱ པན ཨནཝབུཛ྄ཛྷནྟཱནཾ ཝསེན ཝིཝརིཏྭཱ ཝུཏྟོ. ཏེནཱཏི ཨནེཀེསཾ ཕསྶཱདཱིནཾ སཧབྷཱཝཱབྷཱཝེན. ཡདི ནཏྠིཏཱམཏྟེན ཨུཔཀཱརཀཏཱ ནཏྠིཔཙྩཡཏཱ, ཨནཱནནྟརཱཏཱིཏཝསེནཔི སིཡཱཏི ཙོདནཾ སནྡྷཱཡཱཧ ‘‘སཏིཔཱི’’ཏིཨཱདི. ཏཱནཱིཏི པུརིམཏརཙིཏྟཱནི. དདམཱནཾ ཝིཡཱཏི ཀསྨཱ ཝུཏྟཾ, ནནུ ཨོཀཱསཾ དེཏིཡེཝ. ཏཐཱ ཧི ཝུཏྟཾ ‘‘པཝཏྟིཨོཀཱསདཱནེན ཨུཔཀཱརཀཏཱ’’ཏི? སཙྩམེཏཾ, ཨེཝམཛ྄ཛྷཱསཡཱ ཝིཡ པཙྩཡདྷམྨཱ ཨབྷཱཝཾ གཙྪནྟཱིཏི དསྶནཏྠཾ ཝིཡ-སདྡགྒཧཎཾ.

ནཏྠིཏཱཝིགམཱནཾ སཏིཔི པཙྩཡསྶ དྷམྨསྶ ཨནུཔལདྡྷིཏཱསཱམཉྙེ ནཏྠིཝིགཏཔཙྩཡེསུ ལབྦྷམཱནཾ ཝིསེསམཏྠཾ ཝིབྷཱཝེཏུཾ ‘‘ཨེཏྠ ཙཱ’’ཏིཨཱདི ཝུཏྟཾ. ཨབྷཱཝམཏྟེནཱཏི ཧུཏྭཱ ཨབྷཱཝམཏྟེན. ཏེནེཏྠ ནིརོདྷཱནནྟརཾ པཙྩཡདྷམྨསྶ ཨུཔཀཱརཀཏྟཾ ཨཱཧ, ཡཐཱ ཏཾ ‘‘ཨོཀཱསདཱན’’ནྟི ¶ ཝུཏྟཾ. སབྷཱཝཝིགམེནཱཏི ཨེཏེན ནིརོདྷཏོ པརམྤི ཡཏོ ‘‘ཝིགཏཏཱ ནིརོདྷཔྤཏྟཏཱ’’ཏི ཝུཏྟཾ. པཙྩཡདྷམྨེ ཡཱསཾ ནཏྠིཏཱཝིགཏཏཱནཾ ཝསེན ནཏྠིཝིགཏཔཙྩཡཱ ཝུཏྟཱ, ཏཱསཾ ཝིསེསེ དསྶིཏེ ནཏྠིཝིགཏཔཙྩཡཱནཾ ཝིསེསོ ¶ དསྶིཏོ ཧོཏཱིཏི ‘‘ནཏྠིཏཱ ཙ ནིརོདྷཱནནྟརསུཉྙཏཱ ཝིགཏཏཱ ནིརོདྷཔྤཏྟཏཱ’’ཏི ཝུཏྟཾ, ཏཏྠ ནིརོདྷཱནནྟརཱ ན ནིརོདྷསམཀཱལཱཏི ཨདྷིཔྤཱཡོ. ཏཐཱཏི ཨིམིནཱ ཡཐཱ པཙྩཡདྷམྨཱཝིསེསེཔི ནཏྠིཝིགཏཔཙྩཡབྷཱཝཝིསེསོ ནིདྡྷཱརིཏོ, ཏཐཱ ཨཏྠིཨཝིགཏཔཙྩཡབྷཱཝཝིསེསོཏི ཨིམམཏྠཾ ཨུཔསཾཧརཏི. ཡཐཱ ཧི ནིརོདྷཱནནྟརནིརོདྷཔྤཏྟཱིཧི ནཏྠིཝིགཏཏཱནཾ བྷེདོ ལཀྑིཏོ, ཨེཝཾ པཙྩཡདྷམྨསྶ དྷརམཱནཏཱནིརོདྷཱནུཔགམེཧི ཨཏྠིཨཝིགཏཏཱནནྟི. ཀཐཾ པནཱཡཾ དྷམྨཱཝིསེསེ པཙྩཡབྷཱཝཝིསེསོ དུཝིཉྙེཡྻརཱུཔེན ཋིཏོ སམྨཱ ཝིབྷཱཝིསྶཏཱིཏི ཨཱཧ ‘‘དྷམྨཱནཉྷཱི’’ཏིཨཱདི. ཏདབྷིསམཡཱཡ ཏེསཾ པཙྩཡཝིསེསཱནཾ ཨདྷིགམཏྠཾ.

ཙཏཱུསུ ཁནྡྷེསུ ཨེཀསྶཔི ཨསངྒཧིཏཏྟཱབྷཱཝཏོ ཨནནྟརཱདཱིཧཱིཏི ཝིབྷཏྟིཾ པརིཎཱམེཏྭཱ ཡོཛནཱ. ཨཉྙནྟི སུཁུམརཱུཔཾ. ན ཧི ཏཾ པུརེཛཱཏཔཙྩཡོ ཧོཏི. ནནུ ཙ རཱུཔརཱུཔམྤི པུརེཛཱཏཔཙྩཡབྷཱཝེན ཀུསལཏྟིཀེ ནཱགཏནྟི ཨཱཧ ‘‘རཱུཔརཱུཔཾ པནཱ’’ཏིཨཱདི. ཨཉྙཏྠ ཨཱགཏམེཝཱཏི ཡདིཔི ཀུསལཏྟིཀེ ནཱགཏཾ, སནིདསྶནཏྟིཀཱདཱིསུ པན ཨཱགཏཏྟཱ ན སཀྐཱ རཱུཔརཱུཔསྶ པུརེཛཱཏཔཙྩཡཏཾ པཊིཀྑིཔིཏུནྟི ཨཏྠོ.

པཙྩཡུདྡེསཝཎྞནཱ ནིཊྛིཏཱ.

པཙྩཡནིདྡེསོ

༡. ཧེཏུཔཙྩཡནིདྡེསཝཎྞནཱ

༡. ཧེཏུཔཙྩཡེན པཙྩཡབྷཱཝོ ཧེཏུཔཙྩཡོཏི ཨུདྡིཊྛོ, ན ཧེཏུཔཙྩཡདྷམྨོཏི ཨཏྠོ. སོཏི ཧེཏུབྷཱཝེན པཙྩཡོ. ཨེཏྠ ཙ པཋམཝིཀཔྤེ ཡོ ཧེཏུཔཙྩཡེན པཙྩཡབྷཱཝོ ཝུཏྟོ, ཡོ ཙ དུཏིཡཝིཀཔྤེ ཧེཏུབྷཱཝེན པཙྩཡོ ཝུཏྟོ, སོ ཡསྨཱ ཨཏྠཏོ ཡཐཱཝུཏྟསྶ པཙྩཡདྷམྨསྶ ཡཐཱཝུཏྟཱནཾ ¶ པཙྩཡུཔྤནྣཱནཾ ཧེཏུཔཙྩཡབྷཱཝོཡེཝ, ཏསྨཱ ཝུཏྟཾ ‘‘ཨུབྷཡཐཱཔི ཧེཏུབྷཱཝེན ཨུཔཀཱརཀཏཱ ཧེཏུཔཙྩཡོཏི ཨུདྡིཊྛོཏི དསྶིཏཾ ཧོཏཱི’’ཏི. ཡཐཱ ཙེཏྠ, ཨེཝཾ ‘‘ཨཱརམྨཎཔཙྩཡེན པཙྩཡབྷཱཝོ, ཨཱརམྨཎབྷཱཝེན ཝཱ པཙྩཡོ ཨཱརམྨཎཔཙྩཡོ’’ཏིཨཱདིནཱ ཨཱརམྨཎཔཙྩཡཱདཱིསུ ཨཏྠོ ནེཏབྦོཏི དསྶེནྟོ ¶ ‘‘ཨེས ནཡོ སེསཔཙྩཡེསུཔཱི’’ཏི ཨཱཧ. དྷམྨསབྷཱཝོ ཨེཝ, ན དྷམྨཏོ ཨཉྙཱ དྷམྨསཏྟི ནཱམ ཨཏྠཱིཏི. ཨུཔཀཱརཀཾ དྷམྨནྟི པཙྩཡདྷམྨཾ ཨཱཧ. ཨུཔཀཱརཀཏནྟི པཙྩཡཏཾ.

པཙྩཏྟནིདྡིཊྛོཏི པཙྩཏྟཝསེན ནིདྡིཊྛོ, པཋམཱཡ ཝིབྷཏྟིཡཱ ནིདྡིཊྛོཏི ཨཏྠོ. ཏེནཱཏི པཙྩཡདྷམྨནིདྡེསབྷཱུཏེན པཙྩཏྟནིདྡིཊྛེན པཋམེན ཧེཏུསདྡེན. ཨེཏསྶཱཏི ཧེཏུསདྡཱབྷིདྷེཡྻམཏྠམཱཧ. སོ ཧི ཚབྦིདྷོ ནཝཝིདྷོ དྭཱདསཝིདྷོཏི ཨནེཀབྷེདེན བྷིནྣོཔི ཧེཏུབྷཱཝསཱམཉྙེན ཨེཀཛ྄ཛྷཾ ཀཏྭཱ ཨེཀཝཙནེན ཝུཏྟོ. དུཏིཡོ ཧེཏུསདྡོཏི ཨཱནེཏྭཱ ཡོཛནཱ. ཧེཏུནཱ སམྤཡུཏྟཱནནྟི ཨདྷིཀཏཏྟཱ ཝུཏྟཾ ‘‘ཧེཏུ སམྤཡུཏྟཱནཾ པཙྩཡོ ཧོནྟོ ཧེཏུནཱ སམྤཡུཏྟཱནམེཝ པཙྩཡོ ཧོཏི, ན ཝིཔྤཡུཏྟཱན’’ནྟི ཨེཝཾ པདམེཏཾ. ན ཧི སབྦེན སབྦཾ ཧེཏུཝིཔྤཡུཏྟདྷམྨཱནཾ ཧེཏུཔཙྩཡོ ན ཧོཏཱིཏི. སམྤཡུཏྟསདྡསྶ སམྦནྡྷཱིསདྡཏྟཱ ‘‘སམྤཡུཏྟསདྡསྶ སཱཔེཀྑཏྟཱ’’ཏི ཝུཏྟཾ. སམྤཡུཏྟོཏི ཧི ཝུཏྟེ ཀེན སམྤཡུཏྟོཏི ཨེཀནྟཏོ སམྦནྡྷིཨནྟརཾ ཨཔེཀྑིཏབྦཾ. ཏེནཱཧ ‘‘ཨཉྙསྶ…པེ… ཝིཉྙཱཡཏཱི’’ཏི. ནཱཡཾ ཨེཀནྟོཏི ཡྭཱཡཾ ‘‘དུཏིཡེ ཧེཏུསདྡེ ཨཝིཛྫམཱནེ’’ཏིཨཱདིནཱ ཝུཏྟོ ཨཏྠོ, ཨཡམེཀནྟོ ན ཧོཏི, ཨཉྙཱཔེཀྑོཔི སདྡོ ཨཉྙསྶ ཝིསེསནཾ ཧོཏཱིཏི ཨིདཾ ན སབྦཏྠེཝ སམྦྷཝཏཱིཏི ཨཏྠོ. ‘‘པཙྩཏྟནིདྡིཊྛོ’’ཏི ཨིམིནཱ པཋམསྶ ཧེཏུསདྡསྶ སམྤཡུཏྟསདྡཱནཔེཀྑཏཾ ཨཱཧ. ཏེན ཝུཏྟཾ ‘‘ཧེཧུཔཙྩཡེན པཙྩཡོཏི ཨེཏྠེཝ བྱཱཝཊོ’’ཏི. ཨཝིསིཊྛཱཏི ན ཝིསེསིཏཱ. ཨེཝནྟི ཡཐཱ ཧེཏུསདྡེན ཨཉྙཏྠ བྱཱཝཊེན སམྤཡུཏྟཱ ན ཝིསེསིཡནྟི ཀིཙྩནྟརཔསུཏཏྟཱ, ཨེཝཾ སམྤཡུཏྟསདྡེན ཧེཏུསདྡཝིསེསནརཧིཏེན ཏདཏྠམཏྟབྱཱཝཊཏྟཱ ཨཝིསེསཏོ སམྤཡུཏྟཱནཾ གཧཎཾ སིཡཱ. ཏེན ཝུཏྟཾ ‘‘སམྤཡུཏྟསདྡེནཱ’’ཏིཨཱདི. ཨཱཧཱརིནྡྲིཡཱསམྤཡུཏྟསྶ ཨབྷཱཝཏོཏི ཨཱཧཱརེཧི ཨིནྡྲིཡེཧི ཙ ནསམྤཡུཏྟསྶ དྷམྨསྶ ཨབྷཱཝཏོ. ན ཧི ཕསྶཙེཏནཱཝིཉྙཱཎཝེདནཱཛཱིཝིཏཝིརཧིཏོ ཙིཏྟུཔྤཱདོ ཨཏྠི. ཏེནཱཧ ‘‘ཝཛྫེཏབྦཱ…པེ… ཏཾ ན ཀཏ’’ནྟི. ཝཛྫེཏབྦཾ ཧེཏུཝིཔྤཡུཏྟཾ.

ཨེཝམྤཱིཏི དུཏིཡེན ཧེཏུསདྡེན གཡ྄ཧམཱནེཔི ནཱཔཛྫཏི. ཡདིཔི ཧེཏཝོ བཧཝོ, སཱམཉྙནིདྡེསོ ཙཱཡཾ, ཏཐཱཔི སཱམཉྙཛོཏནཱཡ ཝིསེསནིདྡིཊྛཏྟཱཏི ¶ ཨདྷིཔྤཱཡོ. ཏེན ཝུཏྟཾ ‘‘པཙྩཏྟ…པེ… ཝུཏྟཏྟཱ’’ཏི. ཝིནཱཔི དུཏིཡེན ཧེཏུསདྡེན ཧེཏུསམྤཡུཏྟབྷཱཝེ སིདྡྷེཔཱིཏི ཨིམིནཱ ཡཾ ¶ ཝུཏྟཾ ‘‘ནཱཡམེཀནྟོ’’ཏི, ཏམེཝ ཨུལླིངྒེཏི. ན པན ཧེཏཱུནནྟི ཨིདཾ ཧེཏུསྶ པཙྩཡབྷཱཝེན གཧིཏཏྟཱ པཙྩཡུཔྤནྣབྷཱཝེན གཧཎཾ ན ཡུཛྫེཡྻཱཏི ཨཱསངྐམཱནཾ སནྡྷཱཡ ཝུཏྟཾ. ཏེནེཝཱཧ ‘‘ཨེཝམྤི གཧཎཾ སིཡཱ’’ཏི. སོཏི དུཏིཡོ ཧེཏུསདྡོ. ཨཔརེ པན ‘‘ཧེཏུསམྤཡུཏྟཀཱན’’ནྟི ཨེཏྠ ཧེཏཱུནཉྩ སམྤཡུཏྟཀཱནཉྩཱཏི སམཱསཾ ཝིཀཔྤེནྟི. པཏིཊྛཱམཏྟཱདིབྷཱཝེན ནིརཔེཀྑཱཏི ཧེཏུཛྷཱནམགྒདྷམྨཱ པཏིཊྛཱནཨུཔནིཛ྄ཛྷཱནནིཡྻཱནམཏྟེན ཨཉྙདྷམྨནིརཔེཀྑཱ ཧེཏུཛྷཱནམགྒཔཙྩཡཀིཙྩཾ ཀརོནྟི. སཱཔེཀྑཱ ཨེཝཱཏི ཨཉྙསཱཔེཀྑཱ ཨེཝ. ཨཱཧརིཏབྦཨིསིཏབྦཱ ཨཱཧཱརིནྡྲིཡཔཙྩཡེཧི ཨུཔཀཏྟབྦདྷམྨཱ. ཏསྨཱཏི ཡསྨཱ ཡེཧི སཱཔེཀྑཱ, ཏེ ཨཏྟནོ པཙྩཡུཔྤནྣདྷམྨེ པཙྩཡབྷཱཝེནེཝ པརིཙྪིནྡིཏྭཱ ཏིཊྛནྟི, ཏསྨཱ. ཏེནཱཧ ‘‘ཏེ ཝིནཱཔི…པེ… ན ཀཏ’’ནྟི. པརིཙྪིནྡནྟི ཝིསེསེནྟི. ཏནྟི དུཏིཡཾ ཨཱཧཱརིནྡྲིཡགྒཧཎཾ. ཏཏྠཱཏི ཨཱཧཱརིནྡྲིཡཔཙྩཡནིདྡེསེ. ན ཀེཝལཉྩ ཏཏྠེཝ, ཨིདྷ ཙ ཧེཏུཔཙྩཡནིདྡེསེ དུཏིཡེན ཧེཏུགྒཧཎེན པཙྩཡུཔྤནྣཱནཾ པུན ཝིསེསནཀིཙྩཾ ནཏྠི, ཀསྨཱ? པཙྩཡབྷཱུཏེནེཝ ཧེཏུནཱ སམྤཡུཏྟཱནཾ ཨཉྙེསཉྩ ཧེཏཱུནཾ ཨཝིཙྪིནྣཏྟཱ.

པུརིམཝཙནཱཔེཀྑོ ཝུཏྟསྶེཝ ནིདྡེསོཏི ཏཾ-སདྡསྶ པཊིནིདྡེསབྷཱཝམཱཧ. པཱཀཊཱིབྷཱུཏེ ཨེཝ ཨཏྠེ པཝཏྟཏི, པཱཀཊཱིབྷཱཝོ ཙ ཨཉྙཱནཔེཀྑེན སདྡེན པཀཱསིཏཏྟཱ ཝེདིཏབྦོ. ཨནཔེཀྑནཱིཡོ ཨཏྠནྟརབྱཱཝཊཏྟཱ. ཨཉྙོཏི ཧེཏུསདྡཏོ ཨཉྙོ. ནིདྡིསིཏབྦཔཀཱསཀོ ཝུཏྟོ ནཏྠི, ཡོ ཏཾ-སདྡེན པཊིནིདྡེསཾ ལབྷེཡྻ.

ཡདི ཨེཝཾ ‘‘ཏཾསམུཊྛཱནཱན’’ནྟི ཨེཏྠ ཀཐནྟི ཨཱཧ ‘‘ཧེཏུསམྤཡུཏྟཀཱནནྟི ཨིམིནཱ པནཱ’’ཏིཨཱདི. ཏཏྠ པན-སདྡོ སཏིཔི ཧེཏཱུ ཧེཏུསམྤཡུཏྟཀཱནཾ ནིདྡེསབྷཱཝེ ཧེཏུསམྤཡུཏྟཀསདྡེ ལབྦྷམཱནཱནཾ ནིདྡིསིཏབྦཱནཾ པཱཀཊཱིཀརཎསངྑཱཏཾ ཧེཏུསདྡཏོ ཝིསེསཾ ཛོཏེཏི. ‘‘ཧེཏུསམྤཡུཏྟཀཱན’’ནྟི ཨིམསྶ སམཱསཔདསྶ ཨུཏྟརཔདཏྠཔྤདྷཱནཏྟམཱཧ ‘‘པཙྩཡུཔྤནྣཝཙནེནཱ’’ཏི. ཏེན ཙ ཡཐཱདྷིཔྤེཏསྶ ཨཏྠསྶ ཨེཀདེསོཝ ཝུཙྩཏི དྷམྨཱནཾ ཝིསེསནབྷཱཝཏོཏི ཨཱཧ ‘‘ཨསམཏྟེནཱ’’ཏི. ཝིསེསནཾ ནཱམ ཝིསེསིཏབྦཱཔེཀྑནྟི ཨཱཧ ‘‘པཙྩཡུཔྤནྣཝཙནནྟརཱཔེཀྑེནཱ’’ཏི. ཝུཏྟཏཱཡ ཝིནཱ པཊིནིདྡེསཏཱ ནཏྠཱིཏི ‘‘པུབྦེ ཝུཏྟེནཱ’’ཏི ཝུཏྟཾ.

ཏཾ-སདྡེན ¶ ནིདྡིསིཏབྦནྟི ‘‘ཏཾསམུཊྛཱནཱན’’ནྟི ཨེཏྠ ཏཾ-སདྡེན ནིདྡིསིཏབྦཾ ཧེཏུསམྤཡུཏྟཀསདྡེ པཱཀཊཱིབྷཱུཏཾ ཀིཾ པནཱཏི པུཙྪཏི. ཏེ ཧེཏཱུ ཙེཝ…པེ… ཧེཏུསམྤཡུཏྟཀཱ ཙ ¶ ཏཾ-སདྡེན ནིདྡིསིཏབྦཱ ཧེཏུསམྤཡུཏྟཀསདྡེ པཱཀཊཱིབྷཱུཏཱཏི སམྦནྡྷོ. ཨཉྙཐཱཏི ‘‘ཡེཧི ཧེཏཱུཧཱི’’ཏིཨཱདིནཱ ཝུཏྟཔྤཀཱརཏོ ཨཉྙཐཱ ཨཉྙེན པཀཱརེན. ཏཾ ཨཉྙཾ པཀཱརཾ དསྶེནྟོ ‘‘ཏེ ཧེཏཱུ…པེ… སམྦནྡྷེ སཏཱི’’ཏི ཨཱཧ. ཨིདྷཱཏི ཨནནྟརཾ ཝུཏྟསམྦནྡྷནཾ བྷུམྨནིདྡེསེན པརཱམསཏི. ཏེནེཝཱཏི པཋམེནེཝ ཧེཏུསདྡེན. ཏཾ-སདྡེན ནིདྡིསིཏབྦཱཏི ‘‘ཏཾསམུཊྛཱནཱན’’ནྟི ཨེཏྠ ཏཾ-སདྡེན ནིདྡིསིཏབྦཱ ཡཐཱ པཱཀཊཱ, ཨེཝཾ པུབྦེ ‘‘ཏཾསམྤཡུཏྟཀཱན’’ནྟི ཝུཏྟཙོདནཱཡམྤི ཨེཝམེཝ ཏེནེཝ ཏཾ-སདྡེན ནིདྡིསིཏབྦཱ པཱཀཊཱ བྷཝིཏུཾ ཨརཧནྟི. ཏཐཱ ཙ སཏི ནིདྡིསིཏབྦསྶ…པེ… ན ཡུཛྫེཡྻ. དུཝིདྷམྤི ཝཱ ཧེཏུགྒཧཎཾ ཨཔནེཏྭཱཏི ‘‘ཧེཏཱུ ཧེཏུསམྤཡུཏྟཀཱན’’ནྟི ཨེཏྠ ཀཏཾ དྭིཔྤཀཱརཧེཏུགྒཧཎཾ ཨཝིཙཱརེཏྭཱ ‘‘ཏཾསམྤཡུཏྟཀཱནནྟི ཨཝཏྭཱ’’ཏིཨཱདིནཱ ཏཾ-སདྡཝཙནཱིཡཏཾ ཙོདེཏི, ‘‘ནིདྡིསིཏབྦསྶ ཨཔཱཀཊཏྟཱ’’ཏིཨཱདིནཱ པརིཧརཏི ཙ. ཧེཏཱུ ཧི པཙྩཡཱཏི ཨིདཾ ཨཡཾ ཧེཏུཔཙྩཡཀཐཱཏི ཀཏྭཱ ཝུཏྟཾ.

ཏཾ ན ཝུཏྟནྟི ཙིཏྟསམུཊྛཱནཝཙནཾ ན ཝུཏྟཾ. ཏསྶཱཏི སཧཛཱཏཔཙྩཡསྶ. ཀཊཏྟཱརཱུཔསྶ པཙྩཡབྷཱཝོ ན ཝུཏྟོ བྷཝེཡྻ, ཝུཏྟོཝ སོ ‘‘ཝིཔཱཀཱབྱཱཀཏོ ཨེཀོ ཁནྡྷོ ཏིཎྞནྣཾ ཁནྡྷཱནཾ ཀཊཏྟཱ ཙ རཱུཔཱནཾ སཧཛཱཏཔཙྩཡེན པཙྩཡོ, ཏཡོ ཁནྡྷཱ ཨེཀསྶ ཁནྡྷསྶ ཀཊཏྟཱ ཙ རཱུཔཱན’’ནྟིཨཱདིནཱ, ཏསྨཱ ཙིཏྟཙེཏསིཀཱནཾ ཀཊཏྟཱརཱུཔཔཙྩཡབྷཱཝོ ན སཀྐཱ ནིཝཱརེཏུཾ. ཏཏྠཱཏི སཧཛཱཏཔཙྩཡནིདྡེསེ. ཏཏྠ ཧི ‘‘ཙིཏྟཙེཏསིཀཱ དྷམྨཱ ཙིཏྟསམུཊྛཱནཱནཾ རཱུཔཱནཾ སཧཛཱཏཔཙྩཡེན པཙྩཡོ’’ཏི ཙིཏྟསམུཊྛཱནརཱུཔཱནི ཨེཝ ནིདྡིཊྛཱནི. ཨིདྷཱཔཱིཏི ཨིམསྨིཾ ཧེཏུཔཙྩཡནིདྡེསེཔི. ཨེཝཾ བྷཝིཏབྦནྟི ‘‘ཙིཏྟསམུཊྛཱནཱན’’ནྟི ནིདྡེསེན བྷཝིཏབྦཾ. ཡདི ཨེཝཾ ཀསྨཱ ཏཐཱ ན ཝུཏྟནྟི ཨཱཧ ‘‘ཙིཏྟསམུཊྛཱནཱནནྟི པནཱ’’ཏིཨཱདི. ཝིསེསིཏཾ ཧོཏི སབྦཙིཏྟཙེཏསིཀཱསམུཊྛཱནབྷཱཝེན. ཝཙནེནཱཏི ཡཐཱདསྶིཏེན སཧཛཱཏཔཙྩཡནིདྡེསཝཙནེན. ཙིཏྟཙེཏསིཀཱནཾ པཙྩཡབྷཱཝོ ཨེཝ ཧི ཏཏྠ པཙྩཡནིདྡེསེ ཝུཏྟོ, ན ཙིཏྟཙེཏསིཀཱནཾ སམུཊྛཱནབྷཱཝོཏི ཨདྷིཔྤཱཡོ.

ཧེཏུཨཱདིཔཊིབདྡྷཏཉྩ དསྶེཏི ཡདགྒེན ཏཱནི ཙིཏྟཔཊིབདྡྷཝུཏྟཱིནི, ཏདགྒེན ཏཾསམྤཡུཏྟདྷམྨཔཊིབདྡྷཝུཏྟཱིནིཔི ཧོནྟཱིཏི. ཨཱརམྨཎམེཏཾ ཧོཏཱིཏི ¶ ཡདེཏཾ ཀུསལཱཀུསལཙེཏནཱཝསེན མནོདྭཱརེ ཙེཏནཾ སེསདྭཱརེསུ ཀཱཡཝཙཱིཔཡོགཝསེན སངྐཔྤནཾ, ཡཉྩ ཀཱམརཱགཱདཱིནཾ སནྟཱནེ ཨནུསཡནཾ, ཨེཏཾ ཨཱརམྨཎཾ ཨེསོ པཙྩཡོ ཀམྨཝིཉྙཱཎསྶ ཋིཏིཡཱ པཏིཊྛཱནཱཡ. པཏིཊྛིཏེཏི ཀམྨཾ ཛཝཱཔེཏྭཱ པཊིསནྡྷིཨཱཀཌྜྷནསམཏྠཏཱཔཏིཊྛཱཔཏྟེ ཀམྨཝིཉྙཱཎེ ཝིརུལ༹ྷེཏི ¶ ཏཏོ ཨེཝ ཀམྨཝིཉྙཱཎཏོ པཊིསནྡྷིཝིཉྙཱཎབཱིཛེ ཝིརུལ༹ྷེ ཝིརུཧནྟེཏི ཨཏྠོ. ཨཐ ཝཱ པཏིཊྛཱ ཝིཉྙཱཎསྶ ཧོཏཱིཏི ཀིལེསཱབྷིསངྑཱརསངྑཱཏེ ཀམྨཝིཉྙཱཎསྶ ཋིཏིཡཱ པཝཏྟིཡཱ ཨཱརམྨཎེ པཙྩཡེ པཊིསིདྡྷེ ཨཱཡཏིཔཊིསནྡྷིཝིཉྙཱཎསྶ པཏིཊྛཱ ཧོཏི, ཏསྨིཾ པཊིསནྡྷིཝིཉྙཱཎེ པུནབྦྷཝཱབྷིནིབྦཏྟིཝསེན པཏིཊྛིཏེ པཏིཊྛཧནྟེ ཝིརུལ༹ྷེ བཱིཛབྷཱཝེན ཝིརུཧནྟེ ནཱམརཱུཔསྶ ཨཝཀྐནྟི ཧོཏཱིཏི ཨེཝམེཏྠ ཨཏྠོ ཝེདིཏབྦོ. ཏེནཱཧ ‘‘པཊིསནྡྷིནཱམརཱུཔསྶ ཝིཉྙཱཎཔཙྩཡཏཱ ཝུཏྟཱ’’ཏི.

པུརིམཏརསིདྡྷཱཡཱཏི ཁེཏྟབྷཱཝནིབྦཏྟིཡཱ པུརེཏརམེཝ སིདྡྷཱཡ པཐཝིཡཱ. ཨཏྟལཱབྷོཡེཝ ཙེཏྠ པཏིཊྛཱནཾ, ན པཊིལདྡྷཏྟབྷཱཝཱནཾ ཨཝཊྛཱནནྟི དསྶེནྟོ ‘‘པཏིཊྛཱནཾ ཀམྨསྶ ཀཊཏྟཱ ཨུཔྤཏྟཱིཏི ཝུཏྟཾ ཧོཏཱི’’ཏི ཨཱཧ.

སེསརཱུཔཱནནྟི པཊིསནྡྷིཀྑཎེ པཐཝཱིདྷཱཏུཨཱདཱིནཾ སེསརཱུཔཱནཾ, པཝཏྟེ པན ཏིསནྟཏིརཱུཔཱནམྤི. སཧབྷཝནམཏྟཾ ཝཱ དསྶེཏི. སཧབྷཱཝེནཔི ཧི ཨཏྠི ཀཱཙི ཝིསེསམཏྟཱ. ཀཏྠཙི ཀཏྠཙཱིཏི པཀཏིཀཱལབྷཝཝིསེསཱདིཀེ. ཏཏིཡཔཀཏིཡཉྷི པཋམཀཔྤིཀཀཱལེ ཙ བྷཱཝཀལཱཔོ ནཏྠི, རཱུཔབྷཝེ ཀཱཡཀལཱཔོཔི. ཨཱདི-སདྡེན ཏཏྠེཝ གྷཱནཛིཝ྄ཧཱཀལཱཔཱ, ཀཱམབྷཝེ ཙ ཨནྡྷཱདཱིནཾ ཙཀྑཱདིཀལཱཔཱ སངྒཡ྄ཧནྟི. ཀཏྠཙི ཨབྷཱཝཱབྷཱཝཏོཏི ནཱམརཱུཔོཀཱསེ ཀཏྠཙིཔི ཨབྷཱཝཱབྷཱཝཏོ.

ཏེསནྟི པཝཏྟིཡཾ ཀཊཏྟཱརཱུཔཱདཱིནཾ. ན ཧི ཧེཏུ པཝཏྟིཡཾ ཀཊཏྟཱརཱུཔསྶ པཙྩཡོ ཧོཏི, ཨུཏུཨཱཧཱརཛཱནཾ པན སམྦྷཝོཡེཝ ནཏྠི. ཏེན ཝུཏྟཾ ‘‘པཙྩཡབྷཱཝཔྤསངྒོཡེཝ ནཏྠཱི’’ཏི. ན པན ལབྦྷཏི པཙྩཡཔཙྩནཱིཡེ ཏཱདིསསྶ ཝཱརསྶ ཨནུདྡྷཊཏྟཱ. ཨིདནྟི ‘‘པཝཏྟིཡཾ ཀཊཏྟཱརཱུཔཱདཱིནཾ པཙྩཡབྷཱཝཔཊིབཱཧནཏོ’’ཏི ཨིདཾ ‘‘ཧེཏཱུ སཧཛཱཏཱན’’ནྟི ཨདེསནཱཡ པརིཧཱརཝཙནཾ, ཨཱིདིསཱི པན ཙོདནཱ ཨནོཀཱསཱ ཨེཝཱཏི དསྶེཏུཾ ‘‘བྷགཝཱ པནཱ’’ཏིཨཱདི ¶ ཝུཏྟཾ. ཡོ ཧི དྷམྨོ ཡཐཱ བྷགཝཏཱ དེསིཏོ, སོ ཏཐེཝ གཧེཏབྦོཏི.

ཧེཏུཔཙྩཡནིདྡེསཝཎྞནཱ ནིཊྛིཏཱ.

༢. ཨཱརམྨཎཔཙྩཡནིདྡེསཝཎྞནཱ

༢. ཨུཔྤཛྫནཀྑཎེཡེཝཱཏི ¶ ཨེཏྠ ཨུཔྤཱདཏོ པཊྛཱཡ ཡཱཝ བྷངྒཱ ཨུདྡྷཾ པཛྫནཾ གམནཾ པཝཏྟནཾ ཨུཔྤཛྫནཾ, ཏསྶ ཁཎོ, ཏསྨིཾ ཨུཔྤཛྫནཀྑཎེཏི ཨེཝཾ ཝཱ ཨཏྠོ དཊྛབྦོ. ཨེཝཉྷི སཏི ཨུཔྤཛྫནསདྡེན ཨུཔྤནྣསདྡེན ཝིཡ སབྦེ པཝཏྟམཱནབྷཱཝཱ སངྒཧིཏཱ ཧོནྟི, ན ཨུཔྤཱདམཏྟཾ. ཏེནཱཏི ཙཀྑུཝིཉྙཱཎཱདཱིནཾ ཝཏྟམཱནཀྑཎེཡེཝ རཱུཔཱདཱིནཾ ཨཱརམྨཎཔཙྩཡཏྟེན. ཨནཱལམྦིཡམཱནཱནནྟི སབྦེན སབྦཾ ནཱལམྦིཡམཱནཱནནྟི ཨཏྠོ. ཨཉྙཐཱ ཧི ཡཐཱཝུཏྟཱནཾ རཱུཔཱདཱིནཾ ཡདཱ ཨཱརམྨཎཔཙྩཡཏྟཱབྷཱཝོ, ཏདཱ ཨནཱལམྦིཡམཱནཏཱཝཱཏི. སབྦརཱུཔཱནཱིཏི སབྦཱནི རཱུཔཱཡཏནཱནི, ཡཏྟཀཱནི ཏཱནི ཨཱཔཱཐགཏཱནི ཡོགྱདེསེ ཋིཏཱནི, ཏཱནི སབྦཱནཱིཏི ཨཏྠོ. སཧ ན ཧོནྟཱིཏི ཨེཀཛ྄ཛྷཾ ཨཱརམྨཎཾ ན ཧོནྟི. སཏིཔི ཧི ཨནེཀེསཾ ཨེཀཛ྄ཛྷཾ ཨཱཔཱཐགམནེ ཡཏྠ ཡཏྠ པུབྦཱབྷོགོ, ཏཾ ཏཾཡེཝ ཨཱརམྨཎཾ ཧོཏི, ན སབྦཾ. ནཱིལཱདིསངྒྷཱཏཝསེན ཙེཏཾ ཝུཏྟཾ, ན པཙྩེཀཾ ནཱིལཱདིརཱུཔཱཡཏནམཏྟཝསེན. སམུདིཏཱནིཡེཝ ཧི རཱུཔཱཡཏནཱནི ཙཀྑུཝིཉྙཱཎསྶ ཨཱརམྨཎཾ, ན ཝིསུཾ ཝིསུནྟི དྷཱཏུཝིབྷངྒཝཎྞནཱཡཾ དསྶིཏོཡཾ ནཡོ. ཡཾ པན ཨཊྛཀཐཱཡཾ ‘‘ཏེ ཏེ ཝིསུཾ ཝིསུཾ ཨཱརམྨཎཔཙྩཡོ ཧོནྟཱི’’ཏིཔི ཝུཏྟཾ, ཏམྤི ཡཐཱཝུཏྟམེཝཏྠཾ སནྡྷཱཡ ཝུཏྟཾ. ཨཉྙཐཱ རཱུཔཱཡཏནཾ མནིནྡྲིཡགོཙརཾ ནཱམ ན སིཡཱ. སདྡཱདཱིསུཔི ཨེསེཝ ནཡོ. ཏེནེཝཱཧ ‘‘ཏཐཱ སདྡཱདཡོཔཱི’’ཏི. ‘‘སཧ ན ཧོནྟཱི’’ཏི ཝུཏྟམཏྠཾ པཱལི༹ཡཱ ཝིབྷཱཝེཏུཾ ‘‘ཡཾ ཡནྟི ཧི ཝཙནཾ རཱུཔཱདཱིནི བྷིནྡཏཱི’’ཏི ཨཱཧ.

‘‘ཡེ ཨེཏེ’’ཏིཨཱདིཀོ པུརིམོ ཨཏྠོ, ‘‘ན ཨེཀཏོ ཧོནྟཱི’’ཏིཨཱདིཀོ པན པཙྪིམོ, ‘‘སབྦཱརམྨཎཏཱདིཝསེན ཝཱ ཨིདྷཱཔི ཨཏྠོ གཧེཏབྦོ’’ཏི ཀསྨཱ ཝུཏྟཾ. ན ཧི ‘‘ཡཾ ཡཾ ཝཱ པནཱརབྦྷཱ’’ཏི ཨིམིསྶཱ པཱལི༹ཡཱ ཝིཡ ‘‘ཡཾ ཡཾ དྷམྨཾ ཨཱརབྦྷཱ’’ཏི ཨིམསྶ པཱཋསྶ པུརཏོ མནོཝིཉྙཱཎསྶ སབྦཱརམྨཎཏཱ ནཱགཏཱ. ཝུཏྟཉྷི ‘‘སབྦེ དྷམྨཱ མནོཝིཉྙཱཎདྷཱཏུཡཱ ཏཾསམྤཡུཏྟཀཱནཉྩ དྷམྨཱནཾ ཨཱརམྨཎཔཙྩཡེན པཙྩཡོ’’ཏི. ན ¶ ཧི ཨནནྟརམེཝ པཱལི༹ཡཾ སརཱུཔཏོ ཨཱགཏམཏྠཾ གཧེཏྭཱ པདནྟརཾ སཾཝཎྞེཏབྦཾ. ཏཏྠ ཧི ‘‘རཱུཔཱརམྨཎཾ ཝཱ’’ཏིཨཱདིནཱ ནིཡམཝསེན ཚ ཨཱརམྨཎཱནི ཝཏྭཱ ‘‘ཡཾ ཡཾ ཝཱ པནཱརབྦྷཱ’’ཏི ཝཙནཾ སབྦཱརམྨཎཏཱདིདསྶནནྟི ཡུཏྟམེཝེཏནྟི, ཨིདྷ པན སབྦཱརམྨཎཏཾ ཝཏྭཱ པུན ‘‘ཡཾ ཡཾ དྷམྨཾ ཨཱརབྦྷཱ’’ཏི ཝུཙྩམཱནཾ སབྦཱརམྨཎཏཱདསྶནནྟི ཀཐམིདཾ ཡུཛྫེཡྻ? ཀམཱབྷཱཝོཔི ‘‘སབྦེ དྷམྨཱ’’ཏི ཨཝིསེསཝཙནེནེཝ སིདྡྷོ ཨཱརམྨཎཱནུཔུབྦིཡཱཝ ཨགྒཧིཏཏྟཱ. ན ཧི མནོདྷཱཏུཡཱ ཝིཡ ¶ མནོཝིཉྙཱཎདྷཱཏུཡཱ ཨིདྷ ཨཱརམྨཎཱནི ཨནུཔུབྦཏོ གཧིཏཱནི, ཏཏྠ ཝིཡ ཝཱ ཨེཏེནེཝ ནིཡམཱབྷཱཝོཔི སཾཝཎྞིཏོཏི ཝེདིཏབྦོ. ཏསྨཱ ཨཊྛཀཐཱཡཾ ཝུཏྟནཡེནེཝེཏྠ ཨཏྠོ གཧེཏབྦོ.

པཝཏྟནྟི པཝཏྟནཾ. ནདིཡཱ སནྡནཾ པབྦཏསྶ ཋཱནནྟི ཧི ཝུཏྟཱ ཨཝིརཏམཝིཙྪེདནཱཡཾ ཏཐཱཔཝཏྟིཀིརིཡཱཝ. ཏེནཱཧ ‘‘ཨཝིརཏཾ ཨཝིཙྪིནྣཾ སནྡནྟཱི’’ཏི. ཨེཝནྟི ཡཐཱ ‘‘སནྡནྟཱི’’ཏི ཝཏྟམཱནཝཙནཾ ཝུཏྟཾ, ཨེཝཾ ‘‘ཡེ ཡེ དྷམྨཱ ཨུཔྤཛྫནྟཱི’’ཏི སབྦསངྒཧཝསེན ཨུཔྤཛྫནསྶ གཧིཏཏྟཱ ཨཱརམྨཎཔཝགྒཏོ ‘‘ཨུཔྤཛྫནྟཱི’’ཏི ཝཏྟམཱནཝཙནཾ ཝུཏྟནྟི ཨཏྠོ. ཏེནཱཧ ཨཊྛཀཐཱཡཾ ‘‘སབྦཀཱལསངྒཧཝསེནཱ’’ཏིཨཱདི. ཏཐཱ ཙ ཝུཏྟཾ ‘‘ཨཏཱིཏཱནཱགཏ…པེ… ཨདྷིཔྤཱཡོ’’ཏི, ཨཏཱིཏཱནཱགཏཔཙྩུཔྤནྣཱནཾ ཙིཏྟཙེཏསིཀཱནནྟི ཨཏྠོ. སམུདཱཡཝསེནཱཏི ཙིཏྟེན རཱསཱིཀརཎཝསེན. ཨདྷིཔྤཱཡོཏི ཨིམིནཱ ཝཏྟམཱནུཔཙཱརེན ཝིནཱཝ ‘‘ཡེ ཡེ དྷམྨཱ ཨུཔྤཛྫནྟཱི’’ཏི ཨེཏྠ ཝཏྟམཱནཏྠཾ སཀྐཱ ཡོཛེཏུནྟི ཨིམམཏྠཾ ཨུལླིངྒེཏི. ཏེནཱཧ ‘‘ཨིམེ པནཱ’’ཏིཨཱདི. ཡདིཔི པཙྩཡདྷམྨཱ ཀེཙི ཨཏཱིཏཱ ཨནཱགཏཱཔི ཧོནྟི, པཙྩཡུཔྤནྣདྷམྨོ པན པཙྩུཔྤནྣོ ཨེཝཱཏི ཨཱཧ ‘‘ཨཏཱིཏཱནཱགཏཱནཾ ན ཧོནྟཱི’’ཏི. ཨུཔྤཱདེ ཝཱ ཧི པཙྩཡུཔྤནྣསྶ པཙྩཡེན བྷཝིཏབྦཾ ཋིཏིཡཾ ཝཱཏི. ཏསྨཱཏི ཡསྨཱ ཨཏཱིཏཱནཱགཏཱ པརམཏྠཏོ ནཏྠི, ཏསྨཱ. ཏེསཱུཏི པཙྩཡུཔྤནྣེསུ. ཏཾཏཾཔཙྩཡཱཏི ཏཾ ཏཾ རཱུཔཱདིཨཱརམྨཎཾ པཙྩཡོ ཨེཏེསནྟི ཏཾཏཾཔཙྩཡཱ. ཨཡམཏྠོ དསྶིཏོ ཧོཏི སམཱནསབྷཱཝཏྟཱ. ན ཧི ཨཏྠཱབྷེདེན སབྷཱཝབྷེདོ ཨཏྠི. ན པན ཏཾཏཾཔཙྩཡཝནྟཏཱ དསྶིཏཱ ཧོཏི ཨཏཱིཏཱནཱགཏེསུ ནིཔྤརིཡཱཡེན ཏདབྷཱཝཏོ. ཡསྨཱ པཙྩཡཝནྟོ པཙྩཡུཔྤནྣཱཡེཝ, ཏེ ཙ པཙྩུཔྤནྣཱཡེཝཱཏི.

ཡཾ ¶ ཡཾ དྷམྨཾ ཏེ ཏེ དྷམྨཱཏི ཡཾནིམིཏྟཱཡཾཝཙནབྷེདོ, ཏཾ དསྶེཏུཾ ‘‘ཨེཏྠ ཙཱ’’ཏིཨཱདི ཨཱརདྡྷཾ. རཱུཔཱརཱུཔདྷམྨཱ ཧི ཀལཱཔཏོ པཝཏྟམཱནཱཔི ཙིཏྟཙེཏསིཀཱནཾ ཀདཱཙི ཝིསུཾ ཝིསུཾ ཨཱརམྨཎཾ ཧོནྟི, ཀདཱཙི ཨེཀཛ྄ཛྷཾ, ན ཨེཏྠ ནིཡམོ ཨཏྠི, པུརིམཱབྷོགོཡེཝ པན ཏཐཱགཧཎེ ཀཱརཎཾ. ཏཡིམཾ དཱིཔེཏུཾ བྷགཝཏཱ ཡཾཝཙནབྷེདོ ཀཏོཏི ཙ སཀྐཱ ཝཏྟུཾ, ཡསྨཱ པན ཨེཀཀལཱཔཔརིཡཱཔནྣཱནམྤི དྷམྨཱནཾ ཨེཀཛ྄ཛྷཾ གཧཎེ ན སམུདཱཡོ གཡ྄ཧཏི ཏདཱབྷོགཱབྷཱཝཏོ, ཨཐ ཁོ སམུདིཏཱ དྷམྨཱ ཨེཝཱཏི སཧགྒཧཎམྤི ཝིསུཾགཧཎགཏིཀཾ, ཏསྨཱ ཝིསུཾགཧཎསབྦྷཱཝདཱིཔནཏྠཾ ‘‘ཡཾ ཡ’’ནྟི ཝཏྭཱ སཏིཔི ཝིསུཾགཧཎེ ཏེ སབྦེ ཨེཀཛ྄ཛྷཾ ཨཱརམྨཎཔཙྩཡོ ཧོནྟཱིཏི དསྶནཏྠཾ ‘‘ཏེ ཏེ’’ཏི ཝུཏྟནྟི ཨིམམཏྠཾ དསྶེནྟོ ‘‘ཙཏྟཱརོ ཧི ཁནྡྷཱ’’ཏིཨཱདིམཱཧ. ཏཏྠ ཝེདནཱདཱིསཱུཏི ཝེདནཱདཱིསུ ཙཏཱུསུ ཁནྡྷེསུ ཨབྷིནྡིཏྭཱ གཧཎཝསེན, བྷིནྡིཏྭཱ པན གཧཎཝསེན ཕསྶཱདཱིསུ. ཡོ ¶ ཙ རཱུཔཱདིཀོཏི ཨིདཾ ཝིཉྙཱཎནྟརསྶ སཱདྷཱརཎཱརམྨཎཝསེན ཝུཏྟཾ, ཡེ ཙ ཨནེཀེ ཕསྶཱདཡོཏི ཨིདཾ ཨསཱདྷཱརཎཱརམྨཎཝསེན. ཏེ སབྦེཏི ཏེ སཱདྷཱརཎཱསཱདྷཱརཎཔྤབྷེདེ སབྦེཔི ཨཱརམྨཎདྷམྨེ. ཨེཀེཀམེཝ ཨཱརབྦྷ ཨུཔྤཛྫནྟཱིཏི ཨེཏྠ ཡཾ ཝཏྟབྦཾ, ཏཾ ཧེཊྛཱ ཝུཏྟམེཝ. རཱུཔཱརམྨཎདྷམྨཱ ཙ ཨནེཀེ ནཱིལཱདིབྷེདཏོ. ཏཐཱཏི ཨནེཀེ. ཏེན བྷེརིསདྡཱདིཀེ, མཱུལགནྡྷཱདིཀེ, མཱུལརསཱདིཀེ, ཀཐིནསམྥསྶཱདིཀེ, ཝེདནཱདིཀེ ཙ སངྒཎྷཱཏི. ཨནེཀེཏི ཧི ཨིམིནཱ ཨནེཀཀལཱཔགཏཱནཾཡེཝ ཝཎྞཱདཱིནཾ ཨིནྡྲིཡཝིཉྙཱཎཱརམྨཎབྷཱཝམཱཧ. སཱམཉྙཏོ ཧི ཝུཏྟཾ ཡཐཱརཧཾ བྷིནྡིཏྭཱ ནིདསྶིཏབྦཾ ཧོཏཱིཏི.

ཀུསལཝིཔཱཀསྶཱཏི ཀུསལསྶ ཝིཔཱཀསྶ ཙ. ན ཧི ནིབྦཱནཾ པུབྦེ ནིཝུཏྠནྟི ཨིདཾ ‘‘དིཊྛནིབྦཱནོཡེཝཱ’’ཏིཨཱདིནཱ ཝཀྑམཱནམེཝ ཨཏྠཾ ཧདཡེ ཋཔེཏྭཱ ཝུཏྟཾ. པུབྦེནིཝཱསཱནུསྶཏིཉཱཎེན ཧི ནིབྦཱནཝིབྷཱཝནཾ ཨདིཊྛསཙྩསྶ ཝཱ སིཡཱ དིཊྛསཙྩསྶཔི ཝཱ. ཏཏྠ ཨདིཊྛསཙྩེན ཏཱཝ ཏཾ ཝིབྷཱཝེཏུམེཝ ན སཀྐཱ ཨཔྤཊིཝིདྡྷཏྟཱ, ཨིཏརསྶ པན པགེཝ ཝིབྷཱུཏམེཝཱཏི ཏཾ ཏེན ཝིབྷཱཝིཏཾ ནཱམ ཧོཏཱིཏི ཨདྷིཔྤཱཡོ. ཨེཏྠ ཙ ‘‘ན ཙ ཏཾ ཝུཏྟ’’ནྟི ཨིམིནཱ པུབྦེནིཝཱསཱནུསྶཏིཉཱཎསྶ ནིབྦཱནཱརམྨཎཀརཎཱབྷཱཝཾ ཨཱགམཏོ དསྶེཏྭཱ ‘‘ན ཧི ནིབྦཱན’’ནྟིཨཱདིནཱ ཡུཏྟིཏོ དསྶེཏི. ཏཏྠ ‘‘ན པུབྦེ ནིཝུཏྠཾ ཨསངྑཏཏྟཱ’’ཏི ཀསྨཱ ཝུཏྟཾ? གོཙརཱསེཝནཱཡ ཨཱསེཝིཏསྶཔི ནིཝུཏྠནྟི ཨིཙྪིཏཏྟཱ. དིཊྛསཙྩོཡེཝ ཧི པུབྦེནིཝཱསཱནུསྶཏིཉཱཎེན ¶ ནིབྦཱནཾ ཝིབྷཱཝེཏི, ན ཨདིཊྛསཙྩོ. ཏཾ པན ཉཱཎཾ ཁནྡྷེ ཝིཡ ཁནྡྷཔཊིབདྡྷེཔི ཝིབྷཱཝེཏཱིཏི ནིབྦཱནཱརམྨཎཁནྡྷཝིབྷཱཝནེ ནིབྦཱནམྤི ཝིབྷཱཝེཏཱིཏི སཀྐཱ ཝིཉྙཱཏུཾ. ཨེཏེན པཡོཛནཱབྷཱཝཙོདནཱ པཊིཀྑིཏྟཱཏི དཊྛབྦཱ. ཨེཝཾ ཨནཱགཏཾསཉཱཎེཔི ཡོཛེཏབྦནྟི ཡཐཱ པུབྦེནིཝཱསཱནུསྶཏིཉཱཎསྶ ནིབྦཱནཱརམྨཎཏཱ དསྶིཏཱ, ཨེཝཾ ཨནཱགཏཾསཉཱཎེཔི ཡཐཱརཧཾ ཡོཛེཏབྦཾ. ཏཏྠ པན ‘‘ཁནྡྷཔཊིབདྡྷཝིབྷཱཝནཀཱལེ’’ཏིཨཱདིནཱ ཡོཛནཱ ཝེདིཏབྦཱ. ཏེན ཝུཏྟཾ ‘‘ཡཐཱརཧ’’ནྟི. ཀསྶཙི ཨབྷིཉྙཱཔྤཏྟསྶཔི རཱུཔཱཝཙརསྶ, པགེཝ ཨིཏརསྶ.

ཨཱརམྨཎཔཙྩཡནིདྡེསཝཎྞནཱ ནིཊྛིཏཱ.

༣. ཨདྷིཔཏིཔཙྩཡནིདྡེསཝཎྞནཱ

༣. དྷུརསཧཙརིཡཏོ ¶ དྷོརེཡྻོ ‘‘དྷུར’’ནྟི ཝུཏྟོཏི ཨཱཧ ‘‘དྷུརནྟི དྷུརགྒཱཧ’’ནྟི. ཚནྡསྶ པུབྦངྒམཏཱསིདྡྷཾ པཱསཾསབྷཱཝཾ ཨུཔཱདཱཡ ཨཊྛཀཐཱཡཾ ‘‘ཛེཊྛཀ’’ནྟི ཝུཏྟནྟི ཏམེཝཏྠཾ དཱིཔེནྟོ ‘‘སེཊྛ’’ནྟི ཨཱཧ. ཏཐཱ ཧི ཝུཏྟཾ ཨཊྛསཱལིནིཡཾ ‘‘ཚནྡཾ པུབྦངྒམཾ ཀཏྭཱ ཨཱཡཱུཧིཏ’’ནྟི. པུརིམཚནྡསྶཱཏི ‘‘ཚནྡཱདྷིཔཏཱི’’ཏི པུརིམསྨིཾ པདེ ནིདྡེསཝསེན ཝུཏྟསྶ ཚནྡསདྡསྶ སམཱནརཱུཔེན སདིསཱཀཱརེན. ཏདནནྟརཾ ནིདྡིཊྛེནཱཏི ཏསྶ པུརིམསྶ ཚནྡསདྡསྶ ཨནནྟརཾ ནིདྡེསཝསེན ཝུཏྟེན. ཏཏོ ཨེཝ ཙ ཏཾསམཱནཏྠཏཱཡ ཙ ཏཾསམྦནྡྷེན ‘‘ཚནྡསམྤཡུཏྟཀཱན’’ནྟི ཨེཏྠ ཚནྡསདྡེནེཝ ཨདྷིཔཏིསདྡརཧིཏེནཱཏི ཨཏྠོ. པཙྩཡབྷཱུཏསྶཱཏི ཨདྷིཔཏིཔཙྩཡབྷཱུཏསྶ. སམྤཡུཏྟཀཝིསེསནབྷཱཝོཏི ཨཏྟནཱ སམྤཡུཏྟདྷམྨཱནཾ སོ ཨེཝ ཨདྷིཔཏིཔཙྩཡཏཱསངྑཱཏོ ཝིསེསནབྷཱཝོ. ཨེས ནཡོཏི ཨིམིནཱ ‘‘ཝཱིརིཡཱདྷིཔཏི ཝཱིརིཡསམྤཡུཏྟཀཱནནྟིཨཱདཱིསུ པུརིམཝཱིརིཡསྶ སམཱནརཱུཔེནཱ’’ཏིཨཱདིནཱ ཝཏྟབྦཾ ཨཏྠཝཙནཾ ཨཏིདིསཏི.

ཀུསལཱབྱཱཀཏཱནཾ པཝཏྟིནྟི ཀུསལཱབྱཱཀཏཱནཾ ཨདྷིཔཏཱིནཾ པཝཏྟནཱཀཱརཾ. ཨལདྡྷཾ ཨཱརམྨཎཾ ལདྡྷབྦཾ ལབྦྷནཱིཡཾ, ལདྡྷུཾ ཝཱ སཀྐུཎེཡྻཾ, དུཏིཡེ པན ཨཏྠེ ལཱབྷམརཧཏཱིཏི ལདྡྷབྦཾ. ཨཝཉྙཱཏནྟི པགེཝ ཨནཝཉྙཱཏནྟི ཨཏྠོ.

ཨཔྤནཱཔྤཏྟཱ ཀུསལཀིརིཡདྷམྨཱ མཧཱབལཱ སཱདྷིཔཏིཀཱ ཨེཝ ཧོནྟི, ཏཐཱ མིཙྪཏྟནིཡཏཱཔཱིཏི ཨཱཧ ‘‘ཨཔྤནཱསདིསཱ…པེ… ནུཔྤཛྫནྟཱི’’ཏི. ཨཔྤནཱསདིསཱཏི ¶ ཨཔྤནཱཔྤཏྟསདིསཱ. ཀམྨཀིལེསཱཝརཎབྷཱུཏཱ ཙ ཏེཏི ཏེ མིཙྪཏྟནིཡཏདྷམྨཱ ཀམྨཱཝརཎབྷཱུཏཱ, ཡེ ཨཱནནྟརིཡཔྤཀཱརཱ ཀིལེསཱཝརཎབྷཱུཏཱ, ཡེ ནིཡཏམིཙྪཱདིཊྛིདྷམྨཱ, སམྤཡུཏྟཙེཏནཱཡ པནེཏྠ ཀིལེསཱཝརཎཔཀྑིཀཏཱ དཊྛབྦཱ ཨཱནནྟརིཡཙེཏནཱསམྤཡུཏྟསྶ པཊིགྷསྶ ཀམྨཱཝརཎཔཀྑིཀཏཱ ཝིཡ. པཙྩཀྑགཏི ཨནནྟརཏཱཡ ཝིནཱ བྷཱཝིནཱིཏི ཝུཏྟཾ ‘‘པཙྩཀྑསགྒཱནཾ ཀཱམཱཝཙརདེཝཱནམྤཱི’’ཏི. ཏེན ཏེསུ ཨཱནནྟརིཡཱ ཝིཡ ཨསམྦྷཱཝིནོ ཨཧེཏུཀཱབྷིནིཝེསཱདཡོཔཱིཏི དསྶེཏི.

ཏིཝིདྷོཔི ཀིརིཡཱརམྨཎཱདྷིཔཏཱིཏི ཨེཏྠ ཨཡཾ ཀིརིཡཱརམྨཎཱདྷིཔཏཱིཏི ཨཛ྄ཛྷཏྟཱརམྨཎོ ཨདྷིཔྤེཏོ, ཨུདཱཧུ བཧིདྡྷཱརམྨཎོཏི ཨུབྷཡཐཱཔི ན སམྦྷཝོ ཨེཝཱཏི དསྶེནྟོ ‘‘ཀཱམཱཝཙརཱདིབྷེདཏོ པནཱ’’ཏིཨཱདིམཱཧ. ཏཏྠ པརསནྟཱནགཏཱནཾ སཱརམྨཎདྷམྨཱནཾ ཨདྷིཔཏིཔཙྩཡཏཱ ¶ ནཏྠཱིཏི སམྦནྡྷོ. ཨབྷཱཝཏོཏི ཨཝཙནཏོ. ཨཝཙནཉྷི ནཱམ ཡཐཱདྷམྨསཱསནེ ཨབྷིདྷམྨེ ཨབྷཱཝོ ཨེཝཱཏི ཨེཏེནེཝ ཨནུདྡྷཊཏཱཔི ཨཝུཏྟཏོ ཝེདིཏབྦཱ. ཨཛ྄ཛྷཏྟཱརམྨཎབཧིདྡྷཱརམྨཎདྭཡཝིནིམུཏྟསྶ སཱརམྨཎདྷམྨསྶ ཨབྷཱཝཏོ ནཏྠཱིཏི ཝིཉྙཱཡཏཱིཏི ཝཏྟབྦེ ཏམེཝ ཝིཉྙཱཡམཱནཏཾ སམྦྷཱཝེནྟོ ‘‘ནཏྠཱིཏི ཝིཉྙཱཡམཱནེཔཱི’’ཏི ཨཱཧ. ཏེན ཝུཏྟཾ ‘‘བཧིདྡྷཱ ཁནྡྷེ’’ཏིཨཱདི. རཱུཔེ ཨེཝ བྷཝིཏུཾ ཨརཧཏི ཨེདིསེསུ ཋཱནེསུ ཨརཱུཔེ ཨསམྦྷཝཏོཏི ཨདྷིཔྤཱཡོ. ཨསམྦྷཝཏོ ཙ ཡཐཱཝུཏྟཔཱལི༹ཨནུསཱརཏོཏི ཝེདིཏབྦནྟི. ‘‘ཝིཙཱརིཏ’’ནྟི ཀསྨཱ ཝུཏྟཾ, ནནུ ‘‘ཨཏཱིཏཱརམྨཎེ ཨནཱགཏེ ཁནྡྷེ གརུཾ ཀཏྭཱ ཨསྶཱདེཏཱི’’ཏིཨཱདིཝཙནཏོ ཨརཱུཔེཔི ཨེདིསེསུ ཋཱནེསུ ཁནྡྷསདྡོ པཝཏྟཏེཝ. ཨཱཝཛྫནཀིརིཡསབྦྷཱཝཏོ པནཱཏི ཨིདཾ ཡཐཱདསྶིཏཔཱལི༹ཡཱ ཝིརོདྷཔརིཧརཎཱདྷིཔྤཱཡེན ཝུཏྟཾ, ཨཝཙནཾ པན ཀཏྠཙི ཝིནེཡྻཛ྄ཛྷཱསཡེན, ཀཏྠཙི ནཡདསྶནེན ཧོཏཱིཏི ཀུཏོ ཝིརོདྷཱཝསརོ.

ཨདྷིཔཏིཔཙྩཡནིདྡེསཝཎྞནཱ ནིཊྛིཏཱ.

༤. ཨནནྟརཔཙྩཡནིདྡེསཝཎྞནཱ

༤. ཡཐཱཝུཏྟཱ ནིརོདྷཱནནྟརསུཉྙཏཱ ནིརོདྷཔྤཏྟཏཱ ཨོཀཱསདཱནཝིསེསོ, ཨཏྟནོ ཨནུརཱུཔཙིཏྟུཔྤཱདནསམཏྠཏཱ ཙིཏྟནིཡམཧེཏུཏཱ, ཏཏྠ ¶ ཨནནྟརུཔྤཱདནསམཏྠཏཱ ཙ སཎྛཱནཱབྷཱཝཏོ སུཊྛུཏརཾ ནིརནྟརུཔྤཱདནསམཏྠཏཱ ཙ ཙིཏྟནིཡམཧེཏུཝིསེསོ དཊྛབྦོ. དྷཱཏུཝསེནཱཏི ཝིཉྙཱཎདྷཱཏུམནོདྷཱཏུམནོཝིཉྙཱཎདྷཱཏུཝསེན. ཨེཏྟཀཱ ཨེཝ ཧི དྷཱཏུཡོ བྷིནྣསབྷཱཝཱ ཨནནྟརཔཙྩཡཏཱཡ ནིཡམེཏྭཱ ཝཏྟབྦཱ, ཨབྷིནྣསབྷཱཝཱ པན ཝིསེསཱབྷཱཝཏོ པུརིམཏཱམཏྟཾཡེཝ ཝིསེསཾ པུརཀྑཏྭཱ ཝཏྟབྦཱཏི ཏཱ ཀུསལཱདིབྷེདེན ཏཐཱ ཝུཏྟཱ. ཏེནཱཧ ‘‘ཀུསལཱདིཝསེན ཙཱ’’ཏི. ཡཱ པན མནོདྷཱཏུམནོཝིཉྙཱཎདྷཱཏུཝསེན ཨནནྟརཔཙྩཡཏཱ ཝཏྟབྦཱ, ཏཏྠ མནོཝིཉྙཱཎདྷཱཏུ མནོདྷཱཏུཡཱ ཨནནྟརཔཙྩཡེན པཙྩཡོཏི ཝུཙྩམཱནོ སམྨོཧོ སིཡཱ, པུརེ མནོདྷཱཏུཡཱ ཨནནྟརཔཙྩཡབྷཱཝེན ཝུཏྟཱ, ཨིདཱནི མནོཝིཉྙཱཎདྷཱཏུ མནོདྷཱཏུཡཱཏི པཙྩཡཔཙྩཡུཔྤནྣཝིསེསཱ ན ཝིཉྙཱཡེཡྻ, མནོདྷཱཏུཡཱ པན ཙཀྑུཝིཉྙཱཎཱདིདྷཱཏཱུནཾ ཨནནྟརཔཙྩཡབྷཱཝེ ཝུཙྩམཱནེ ནིཡམོ ནཏྠི. ཏེནཱཧ ‘‘མནོདྷཱཏུ ཙཀྑུཝིཉྙཱཎདྷཱཏུཡཱཏི ཙཱ’’ཏི ¶ . ཏཐེཝཱཏི ནིཡམཱབྷཱཝཏོ ཨེཝཱཏི ཨཏྠོ. ཏསྨཱཏི ཡསྨཱ ཨིཏོ ཨཉྙཐཱ དེསནཱཡ པཙྩཡཔཙྩཡུཔྤནྣཱནཾ ཝིསེསཱབྷཱཝོ ཙིཏྟཝིསེསདསྶནཝིཙྪེདོ ནིཡམཱབྷཱཝོ ཙཱཏི ཨིམེ དོསཱ ཨཱཔཛྫནྟི, ཏསྨཱ. ནིདསྶནེནཱཏི དྷཱཏུཝསེན ནིདསྶནེན. ནཡཾ དསྶེཏྭཱཏི ‘‘མནོཝིཉྙཱཎདྷཱཏུ ཏཾསམྤཡུཏྟཀཱ ཙ དྷམྨཱ མནོདྷཱཏུཡཱ ཏཾསམྤཡུཏྟཀཱནཉྩ དྷམྨཱནཾ ཨནནྟརཔཙྩཡེན པཙྩཡོ’’ཏི ཨེཝམཱདིཀསྶ ཨནནྟརཔཙྩཡཏཱགྒཧཎསྶ ནཡཾ དསྶེཏྭཱ. ནིརཝསེསདསྶནཏྠནྟི ནིརཝསེསསྶ ཨནནྟརཔཙྩཡབྷཱཝིནོ ཙིཏྟུཔྤཱདསྶ དསྶནཏྠཾ.

སདིསཀུསལཱནནྟི སམཱནཀུསལཱནཾ, སམཱནཏཱ ཙེཏྠ ཨེཀཝཱིཐིཔརིཡཱཔནྣཏཱཡ ཝེདིཏབྦཱ. ཏེནེཝཱཧ ‘‘བྷཱུམིབྷིནྣཱནམྤི པཙྩཡབྷཱཝོ ཝུཏྟོ ཧོཏཱི’’ཏི. སམཱནཝཱིཐིཏཱ ཙ ཡསྨཱ སམཱནཝེདནཱ སམཱནཧེཏུཀཱ ཙ ཧོནྟི, ཏསྨཱ ‘‘ཝེདནཱཡ ཝཱ ཧེཏཱུཧི ཝཱ སདིསཀུསལཱན’’ནྟི ཨཱཧ. ཝཱ-སདྡོ ཙེཏྠ ཨནིཡམཏྠོ. ཏེན ཉཱཎསངྑཱརཱདིབྷེདསྶཔི ཝིཀཔྤནཝསེན སངྒཧོ དཊྛབྦོ. ཙུཏིཔི གཧིཏཱ ཏཾསབྷཱཝཏྟཱ. བྷཝངྒཙིཏྟམེཝ ཧི པརིཡོསཱནེ ‘‘ཙུཏཱི’’ཏི ཝུཙྩཏི. ཀུསལཱཀུསལཱནནྟརཉྩ ཀདཱཙི སཱ ཨུཔྤཛྫཏཱིཏི ཏདཱརམྨཎམྤི གཧིཏནྟི དཊྛབྦཾ, ཀིརིཡཛཝནཱནནྟརཾ ཏདཱརམྨཎུཔྤཏྟིཡནྟི ཨདྷིཔྤཱཡོ.

ཀཱམཱཝཙརཀིརིཡཱཡ ¶ ཨཱཝཛྫནསྶཱཏི ཨཡམེཏྠ ཨཏྠོ ཨདྷིཔྤེཏོཏི དསྶེནྟོ ‘‘ཨཱཝཛྫནགྒཧཎེན ཀཱམཱཝཙརཀིརིཡཾ ཝིསེསེཏཱི’’ཏི ཨཱཧ. ཏམེཝ ཧི ཨཏྠཾ པཱཀཊཏརཾ ཀཱཏུཾ ‘‘ཀཱམཱཝཙརཝིཔཱཀོ’’ཏིཨཱདི ཝུཏྟཾ. ཝོཊྛབྦནམྤི གཧིཏཾ སནྟཱིརཎཱནནྟརཏྟཱཏི ཨདྷིཔྤཱཡོ.

ཨནནྟརཔཙྩཡནིདྡེསཝཎྞནཱ ནིཊྛིཏཱ.

༦. སཧཛཱཏཔཙྩཡནིདྡེསཝཎྞནཱ

༦. པོརཱཎཔཱཋོཏི པུརཱཏནོ ཨཊྛཀཐཱཔཱཋོ. ཨིམསྶཱཏི ཨིམསྶ པདསྶ. ཨཝུཏྟསྶཱཏི པཱལི༹ཡཾ ཨཝུཏྟསྶ. ཡདིཔི སཧགཏསདྡསྶ ཨཏྠསཾཝཎྞནཱཡཾ སཾསཊྛསདྡསྶ ཝིཡ སམཱནཏྠསྶཔི ཀཏྠཙི སདྡནྟརསྶ ཨཏྠོ ཝུཙྩཏི པརིཡཱཡཝིསེསབོདྷནཏྠཾ, ཏཐཱཔི ན མཱུལསདྡསྶ ཨཏྠོ ཝིབྷཱཝིཏོ ¶ ཧོཏཱིཏི དསྶེནྟོ ཨཱཧ ‘‘ན ཙ…པེ… ཧོཏཱི’’ཏི. ‘‘ཨཉྙམཉྙ’’ནྟི ཙ ‘‘ཨཉྙཨཉྙ’’ནྟི ཝཏྟབྦེ མ-ཀཱརཱགམཾ ཀཏྭཱ ནིདྡེསོ, ཀམྨབྱཏིཧཱརེ ཙེཏཾ པདཾ, ཏསྨཱ ཨིཏརེཏརནྟི ཝུཏྟཾ ཧོཏི. པཙྩཡཔཙྩཡུཔྤནྣཱནཾ ཨེཀསྨིཾཡེཝ ཁཎེ པཙྩཡུཔྤནྣཔཙྩཡབྷཱཝསྶ ཨིཙྪིཏཏྟཱ ཡོ ཧི ཡསྶ པཙྩཡོ ཡསྨིཾ ཁཎེ, ཏསྨིཾཡེཝ ཁཎེ སོཔི ཏསྶ པཙྩཡོཏི ཨཡམེཏྠ ཨཉྙམཉྙཔཙྩཡཏཱ. ཏཐཱ ཧི ཨཊྛཀཐཱཡཾ ‘‘ཨཉྙོ ཨཉྙསྶཱ’’ཏི ཝཏྭཱ ‘‘ཨིམིནཱ…པེ… དཱིཔེཏཱི’’ཏི ཝུཏྟཾ. ཨོཀྐམནཾ པཝིསནནྟི ཨཏྠོ. ཨཱསནཀྑཎེ ཧི དྷམྨཱ པུརིམབྷཝཏོ ཨིམཾ བྷཝཾ པཝིསནྟཱ ཝིཡ ཧོནྟི. ཏེན ཝུཏྟཾ ‘‘པརལོཀཏོ ཨིམཾ ལོཀཾ ཨཱགནྟྭཱ པཝིསནྟཾ ཝིཡ ཨུཔྤཛྫཏཱི’’ཏི. ཏསྨཱ ཨཝིསེསེན པཊིསནྡྷི ཨོཀྐནྟིསདྡཱབྷིདྷེཡྻཱཏི ཨདྷིཔྤཱཡེན ཝུཏྟཾ ‘‘ཨོཀྐནྟི…པེ… ཨདྷིཔྤཱཡེནཱཧཱ’’ཏི. ཏཾནིཝཱརཎཏྠནྟི ཏསྶ ཁཎནྟརེ རཱུཔཱིནཾ སཧཛཱཏཔཙྩཡབྷཱཝསྶ ‘‘ཀཉྩི ཀཱལེ ན སཧཛཱཏཔཙྩཡེན པཙྩཡོ’’ཏི ནིཝཱརཎཏྠཾ. ཏེན པདདྭཡེན སམཱནེསུ པཙྩཡཔཙྩཡུཔྤནྣདྷམྨེསུ པུརིམཏོ པཙྪིམསྶ ཝིསེསམཏྠཾ དསྶེཏི.