ཏཱིཀཱ > ཨབྷིདྷམྨཔིཊཀ (ཊཱིཀཱ) > ཨབྷིདྷམྨཱཝཏཱརོ-ནཱམརཱུཔཔརིཙྪེདོ

ཏསྨཱ ཨནཝཛྫཨིཊྛཝིཔཱཀལཀྑཎཾ ཀུསལཾ, ཨཀུསལཝིདྡྷཾསནརསཾ, ཝོདཱནཔཙྩུཔཊྛཱནཾ. ཝཛྫཔཊིཔཀྑཏྟཱ ཨནཝཛྫལཀྑཎཾ ཝཱ ཀུསལཾ, ཝོདཱནབྷཱཝརསཾ, ཨིཊྛཝིཔཱཀཔཙྩུཔཊྛཱནཾ, ཡོནིསོམནསིཀཱརཔདཊྛཱནཾ. སཱཝཛྫཱནིཊྛཝིཔཱཀལཀྑཎམཀུསལཾ. ཏདུབྷཡཝིཔརཱིཏལཀྑཎམབྱཱཀཏཾ, ཨཝིཔཱཀཱརཧཾ ཝཱ.

ཏཏྠ ¶ ཀུསལཙིཏྟཾ ཨེཀཝཱིསཏིཝིདྷཾ ཧོཏི, ཏདིདཾ བྷཱུམིཏོ ཙཏུབྦིདྷཾ ཧོཏི – ཀཱམཱཝཙརཾ, རཱུཔཱཝཙརཾ, ཨརཱུཔཱཝཙརཾ, ལོཀུཏྟརཉྩེཏི.

ཏཏྠ ཀཱམཱཝཙརཀུསལཙིཏྟཾ བྷཱུམིཏོ ཨེཀཝིདྷཾ, སཝཏྠུཀཱཝཏྠུཀབྷེདཏོ དུཝིདྷཾ, ཧཱིནམཛ྄ཛྷིམཔཎཱིཏབྷེདཏོ ཏིཝིདྷཾ, སོམནསྶུཔེཀྑཱཉཱཎཔྤཡོགབྷེདཏོ ཨཊྛཝིདྷཾ ཧོཏི. སེཡྻཐིདཾ – སོམནསྶསཧགཏཾ ཉཱཎསམྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ, སོམནསྶསཧགཏཾ ཉཱཎཝིཔྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ, ཨུཔེཀྑཱསཧགཏཾ ཉཱཎསམྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ, ཨུཔེཀྑཱསཧགཏཾ ཉཱཎཝིཔྤཡུཏྟཾ ཨསངྑཱརིཀམེཀཾ, སསངྑཱརིཀམེཀནྟི ཨིདཾ ཨཊྛཝིདྷམྤི ཀཱམཱཝཙརཀུསལཙིཏྟཾ ནཱམ.

ཨུདྡཱནཏོ དུཝེ ཀཱམཱ, ཀླེསཝཏྠུཝསཱ པན;

ཀིལེསོ ཚནྡརཱགོཝ, ཝཏྠུ ཏེབྷཱུམཝཊྚཀཾ.

ཀིལེསཀཱམོ ¶ ཀཱམེཏི, ཝཏྠུ ཀཱམཱིཡཏཱིཏི ཙ;

སིཛ྄ཛྷཏི དུཝིདྷོཔེས, ཀཱམོ ཝོ ཀཱརཀདྭཡེ.

ཡསྨིཾ ¶ པན པདེསེ སོ, ཀཱམོཡཾ དུཝིདྷོཔི ཙ;

སམྤཏྟཱིནཾ ཝསེནཱཝ-ཙརཏཱིཏི ཙ སོ པན.

པདེསོ ཙཏུཔཱཡཱནཾ, ཚནྣཾ དེཝཱནམེཝ ཙ;

མནུསྶཱནཾ ཝསེནེཝ, ཨེཀཱདསཝིདྷོ པན.

ཀཱམོཝཙརཏཱིཏེཏྠ, ཀཱམཱཝཙརསཉྙིཏོ;

ཨསྶཱབྷིལཀྑིཏཏྟཱ ཧི, སསཏྠཱཝཙརོ ཝིཡ.

སྭཱཡཾ རཱུཔབྷཝོ རཱུཔཾ, ཨེཝཾ ཀཱམོཏི སཉྙིཏོ;

ཨུཏྟརསྶ པདསྶེཝ, ལོཔཾ ཀཏྭཱ ཨུདཱིརིཏོ.

ཏསྨིཾ ¶ ཀཱམེ ཨིདཾ ཙིཏྟཾ, སདཱཝཙརཏཱིཏི ཙ;

ཀཱམཱཝཙརམིཙྩེཝཾ, ཀཐིཏཾ ཀཱམགྷཱཏིནཱ.

པཊིསནྡྷིཾ བྷཝེ ཀཱམེ, ཨཝཙཱརཡཏཱིཏི ཝཱ;

ཀཱམཱཝཙརམིཙྩེཝཾ, པརིཡཱཔནྣནྟི ཏཏྲ ཝཱ.

ཨིདཾ ཨཊྛཝིདྷཾ ཙིཏྟཾ, ཀཱམཱཝཙརསཉྙིཏཾ;

དསཔུཉྙཀྲིཡཝཏྠུ-ཝསེནེཝ པཝཏྟཏི.

གཙྪནྟི སངྒཧཾ དཱནེ, པཏྟིདཱནཱནུམོདནཱ;

ཏཐཱ སཱིལམཡེ པུཉྙེ, ཝེཡྻཱཝཙྩཱཔཙཱཡནཱ.

དེསནཱ སཝནཾ དིཊྛི-ཨུཛུཀཱ བྷཱཝནཱམཡེ;

པུན ཏཱིཎེཝ སམྦྷོནྟི, དས པུཉྙཀྲིཡཱཔི ཙ.

སབྦཱནུསྶཏིཔུཉྙཉྩ, པསཾསཱ སརཎཏྟཡཾ;

ཡནྟི དིཊྛིཛུཀམྨསྨིཾ, སངྒཧཾ ནཏྠི སཾསཡོ.

པུརིམཱ ¶ མུཉྩནཱ ཙེཝ, པརཱ ཏིསྶོཔི ཙེཏནཱ;

ཧོཏི དཱནམཡཾ པུཉྙཾ, ཨེཝཾ སེསེསུ དཱིཔཡེ.

ཨིདཱནི ཨསྶ པནཊྛཝིདྷསྶཱཔི ཀཱམཱཝཙརཀུསལཙིཏྟསྶ ཨཡམུཔྤཏྟིཀྐམོ ཝེདིཏབྦོ. ཡདཱ ཧི ཡོ དེཡྻདྷམྨཔྤཊིགྒཱཧཀཱདིསམྤཏྟིཾ, ཨཉྙཾ ཝཱ སོམནསྶཧེཏུཾ ཨཱགམྨ ཧཊྛཔཧཊྛོ ‘‘ཨཏྠི དིནྣ’’ནྟི ཨཱདིནཡཔྤཝཏྟཾ སམྨཱདིཊྛིཾ པུརཀྑཏྭཱ པརེཧི ཨནུསྶཱཧིཏོ དཱནཱདཱིནི པུཉྙཱནི ཀརོཏི, ཏདཱསྶ སོམནསྶསཧགཏཾ ཉཱཎསམྤཡུཏྟཾ ¶ ཨསངྑཱརིཀཾ ¶ པཋམཾ མཧཱཀུསལཙིཏྟཾ ཨུཔྤཛྫཏི. ཡདཱ པན ཝུཏྟནཡེནེཝ ཧཊྛཔཧཊྛོ སམྨཱདིཊྛིཾ པུརཀྑཏྭཱ པརེཧི ཨུསྶཱཧིཏོ ཀརོཏི, ཏདཱསྶ ཏམེཝ ཙིཏྟཾ སསངྑཱརིཀཾ ཧོཏི. ཨིམསྨིཾ པནཏྠེ སངྑཱརོཏི ཨཏྟནོ ཝཱ པརསྶ ཝཱ པཝཏྟསྶ པུབྦཔྤཡོགསྶཱདྷིཝཙནཾ. ཡདཱ པན ཉཱཏིཛནསྶ པཊིཔཏྟིདསྶནེན ཛཱཏཔརིཙཡཱ བཱལཀཱ བྷིཀྑཱུ དིསྭཱ སོམནསྶཛཱཏཱ སཧསཱ ཡཾ ཀིཉྩི ཧཏྠགཏཾ དདནྟི ཝཱ ཝནྡནྟི ཝཱ, ཏདཱ ཏེསཾ ཏཏིཡཙིཏྟམུཔྤཛྫཏི. ཡདཱ པན ཏེ ‘‘དེཐ ཝནྡཐ, ཨཡྻེ’’ཏི ཝདནྟི, ཨེཝཾ ཉཱཏིཛནེན ཨུསྶཱཧིཏཱ ཧུཏྭཱ ཧཏྠགཏཾ དདནྟི ཝཱ ཝནྡནྟི ཝཱ, ཏདཱ ཏེསཾ ཙཏུཏྠཙིཏྟམུཔྤཛྫཏི. ཡདཱ པན དེཡྻདྷམྨཔྤཊིགྒཱཧཀཱདཱིནཾ ཨསམྤཏྟིཾ ཝཱ ཨཉྙེསཾ ཝཱ སོམནསྶཧེཏཱུནཾ ཨབྷཱཝཾ ཨཱགམྨ ཙཏཱུསུཔི ཝིཀཔྤེསུ སོམནསྶརཧིཏཱ ཧོནྟི, ཏདཱ སེསཱནི ཙཏྟཱརི ཨུཔེཀྑཱསཧགཏཱནི ཨུཔྤཛྫནྟི. ཨེཝཾ སོམནསྶུཔེཀྑཱཉཱཎཔྤཡོགབྷེདཏོ ཨཊྛཝིདྷཾ ཀཱམཱཝཙརཀུསལཙིཏྟཾ ཝེདིཏབྦཾ.

དསཔུཉྙཀྲིཡཱདཱིནཾ, ཝསེན ཙ བཧཱུནིཔི;

ཨེཏཱནི པན ཙིཏྟཱནི, བྷཝནྟཱིཏི པཀཱསཡེ.

སཏྟརས སཧསྶཱནི, དྭེ སཏཱནི ཨསཱིཏི ཙ;

ཀཱམཱཝཙརཔུཉྙཱནི, བྷཝནྟཱིཏི ཝིནིདྡིསེ.

ཏཾ པན ཡཐཱནུརཱུཔཾ ཀཱམཱཝཙརསུགཏིཡཾ བྷཝབྷོགསམྤཏྟིཾ ཨབྷིནིཔྥཱདེཏི.

ཨིཏརེསུ པན རཱུཔཱཝཙརཀུསལཙིཏྟཾ སཝཏྠུཀཏོ ཨེཀཝིདྷཾ, དྭཱིསུ བྷཝེསུ ཨུཔྤཛྫནཏོ དུཝིདྷཾ, ཧཱིནམཛ྄ཛྷིམཔཎཱིཏབྷེདཏོ ཏིཝིདྷཾ, པཊིཔདཱདིབྷེདཏོ ཙཏུབྦིདྷཾ, ཛྷཱནངྒཡོགབྷེདཏོ པཉྩཝིདྷཾ. སེཡྻཐིདཾ – ཀཱམཙྪནྡབྱཱཔཱདཐིནམིདྡྷཨུདྡྷཙྩཀུཀྐུཙྩཝིཙིཀིཙྪཱཝིཔྤཧཱིནཾ ཝིཏཀྐཝིཙཱརཔཱིཏིསུཁཙིཏྟེཀགྒཏཱསམྤཡུཏྟཾ ¶ པཋམཾ, ཝིཏཀྐཝིཔྤཧཱིནཾ ཝིཙཱརཔཱིཏིསུཁཙིཏྟེཀགྒཏཱསམྤཡུཏྟཾ ¶ དུཏིཡཾ, ཝིཏཀྐཝིཙཱརཝིཔྤཧཱིནཾ པཱིཏིསུཁཙིཏྟེཀགྒཏཱསམྤཡུཏྟཾ ཏཏིཡཾ, ཝིཏཀྐཝིཙཱརཔཱིཏིཝིཔྤཧཱིནཾ སུཁཙིཏྟེཀགྒཏཱསམྤཡུཏྟཾ ཙཏུཏྠཾ, ཝིཏཀྐཝིཙཱརཔཱིཏིསུཁཝིཔྤཧཱིནཾ ཨུཔེཀྑཱཙིཏྟེཀགྒཏཱསམྤཡུཏྟཾ པཉྩམནྟི ཨིདཾ པཉྩཝིདྷཾ ¶ རཱུཔཱཝཙརཀུསལཙིཏྟཾ ནཱམ.

ཏཾ པན ཡཐཱསམྦྷཝཾ པཐཝཱིཀསིཎཱདཱིསུ ཨཱརམྨཎེསུ པཝཏྟིཝསེན ཨནེཀཝིདྷཾ ཧོཏི. སབྦཾ པནེཏཾ རཱུཔཱཝཙརབྷཱཝནཱཔུཉྙཝསཔྤཝཏྟཾ ཡཐཱནུརཱུཔཾ རཱུཔཱཝཙརཱུཔཔཏྟིནིཔྥཱདཀཾ ཧོཏི. ཨེཝཾ ཏཱཝ རཱུཔཱཝཙརཀུསལཾ ཝེདིཏབྦཾ.

སེསེསུ པན དྭཱིསུ ཨརཱུཔཱཝཙརཀུསལཙིཏྟཾ ཏཱཝ ཨུཔེཀྑཱཝེདནཱཡོགབྷེདཏོ ཨེཀཝིདྷཾ, སཝཏྠུཀཱཝཏྠུཀབྷེདཏོ དུཝིདྷཾ, ཧཱིནམཛ྄ཛྷིམཔཎཱིཏབྷེདཏོ ཏིཝིདྷཾ, ཨཱརམྨཎབྷེདཏོ ཙཏུབྦིདྷཾ. ཀསིཎུགྒྷཱཊིམཱཀཱསཾ, ཏཏྠ པཝཏྟཝིཉྙཱཎཾ, ཏསྶ ཨཔགམོ, ཨཱཀིཉྩཉྙཱཡཏནནྟི ཨིདམསྶ ཙཏུབྦིདྷམཱརམྨཎཾ. ཡཐཱཔཊིཔཱཊིཡཱ ཨེཏསྶཱརམྨཎསྶ བྷེདཏོ ཙཏུབྦིདྷཾ ཧོཏི. སེཡྻཐིདཾ – སབྦསོ རཱུཔསཉྙཱནཾ སམཏིཀྐམཱ པཊིགྷསཉྙཱནཾ ཨཏྠངྒམཱ ནཱནཏྟསཉྙཱནཾ ཨམནསིཀཱརཱ ཨཱཀཱསཱནཉྩཱཡཏནསཉྙཱསཧགཏཾ, ཝིཉྙཱཎཉྩཱཡཏནསཉྙཱསཧགཏཾ, ཨཱཀིཉྩཉྙཱཡཏནསཉྙཱསཧགཏཾ, ནེཝསཉྙཱནཱསཉྙཱཡཏནསཉྙཱསཧགཏནྟི ཨིདཾ ཙཏུབྦིདྷཾ ཨརཱུཔཱཝཙརཀུསལཙིཏྟཾ ནཱམ. སབྦཾ པནེཏཾ ཨརཱུཔཱཝཙརབྷཱཝནཱཔུཉྙཝསཔྤཝཏྟཾ ཡཐཱནུརཱུཔཾ ཨརཱུཔཱུཔཔཏྟིནིཔྥཱདཀཾ ཧོཏི. ཨེཝཾ ཨརཱུཔཱཝཙརཀུསལཙིཏྟཾ ཝེདིཏབྦཾ.

ཨིཏརཾ པན ལོཀུཏྟརཀུསལཙིཏྟཾ ནིབྦཱནཱརམྨཎཏོ ཨེཀཝིདྷཾ, ནིཡཏཱནིཡཏཝཏྠུཀབྷེདཏོ དུཝིདྷཾ, ཏཱིཧི ཝིམོཀྑམུཁེཧི པཏྟབྦཏོ ཏིཝིདྷཾ, ཙཏུམགྒཡོགབྷེདཏོ ཙཏུབྦིདྷཾ ¶ . སེཡྻཐིདཾ – སཀྐཱཡདིཊྛིཝིཙིཀིཙྪཱསཱིལབྦཏཔརཱམཱསསཉྙོཛནཔྤཧཱནཀརཾ སོཏཱཔཏྟིམགྒཙིཏྟཾ, རཱགདོསམོཧཱནཾ ཏནུཏྟཀརཾ སཀདཱགཱམིམགྒཙིཏྟཾ, ཀཱམརཱགབྱཱཔཱདཱནཾ ནིརཝསེསཔྤཧཱནཀརཾ ཨནཱགཱམིམགྒཙིཏྟཾ, རཱུཔརཱགཨརཱུཔརཱགམཱནཨུདྡྷཙྩཨཝིཛྫཱཔཧཱནཀརཾ ཨརཧཏྟམགྒཙིཏྟནྟི ཨིདཾ ཙཏུབྦིདྷཾ ལོཀུཏྟརཀུསལཙིཏྟཾ ནཱམ. ཨེཀེཀཾ པནེཏྠ ཛྷཱནངྒཡོགབྷེདཏོ པཉྩཝིདྷཾ ཧོཏི, ཏསྨཱ ཝཱིསཏིཝིདྷཾ ཧོཏི. སབྦཾ པནེཏཾ ལོཀུཏྟརབྷཱཝནཱཔུཉྙཝསཔྤཝཏྟཾ མགྒཱནུརཱུཔཕལཔྤཝཏྟིཡཱ ཙཏྟཱརོ ཨརིཡཔུགྒལེ ཨབྷིནིཔྥཱདེཏི. ཨེཝཾ ལོཀུཏྟརཀུསལཾ ཝེདིཏབྦཾ.

ཀཱམེ ¶ ¶ ཨཊྛེཝ རཱུཔེ ཙ, པཉྩ ཙཏྟཱརིརཱུཔིསུ;

ཙཏྟཱརཱནུཏྟརཱནེཝཾ, ཀུསལཱནེཀཝཱིསཏི.

ཨཀུསལཾ པན བྷཱུམིཏོ ཨེཀཝིདྷཾ ཀཱམཱཝཙརམེཝ, ནིཡཏཱནིཡཏཝཏྠུཝསེན ཙ ཨེཀཧེཏུཀདུཧེཏུཀཝསེན ཙ པཊིསནྡྷིཛནཀཱཛནཀཝསེན ཙ དུཝིདྷཾ, ཏཱིཧི ཝེདནཱཧི ཡོགཏོ ཙ ལོབྷམཱུལཾ དོསམཱུལཾ མོཧམཱུལནྟི མཱུལཏོ ཙ ཏིཝིདྷཾ ཧོཏི. ཏཏྠ ལོབྷམཱུལཾ པན སོམནསྶུཔེཀྑཱདིཊྛིཔྤཡོགབྷེདཏོ ཨཊྛཝིདྷཾ ཧོཏི. སེཡྻཐིདཾ – སོམནསྶསཧགཏཾ དིཊྛིགཏསམྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ, སོམནསྶསཧགཏཾ དིཊྛིགཏཝིཔྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ, ཨུཔེཀྑཱསཧགཏཾ དིཊྛིགཏསམྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ, ཨུཔེཀྑཱསཧགཏཾ དིཊྛིགཏཝིཔྤཡུཏྟཾ ཨསངྑཱརིཀམེཀཾ, སསངྑཱརིཀམེཀནྟི.

ཡདཱ ¶ ཧི ‘‘ནཏྠི ཀཱམེསུ ཨཱདཱིནཝོ’’ཏིཨཱདིནཱ ནཡེན མིཙྪཱདིཊྛིཾ པུརཀྑཏྭཱ ཀེཝལཾ ཧཊྛཏུཊྛོ ཀཱམེ ཝཱ པརིབྷུཉྫཏི, དིཊྛམངྒལཱདཱིནི ཝཱ སཱརཏོ པཙྩེཏི སབྷཱཝཏིཀྑེནེཝ ཨནུསྶཱཧིཏེན ཙིཏྟེན, ཏདཱསྶ པཋམཾ ཨཀུསལཙིཏྟཾ ཨུཔྤཛྫཏི. ཡདཱ པན མནྡེན སམུསྶཱཧིཏེན, ཏདཱ དུཏིཡཾ. ཡདཱ མིཙྪཱདིཊྛིཾ ཨཔུརཀྑཏྭཱ ཀེཝལཾ ཧཊྛཏུཊྛོ མེཐུནཾ དྷམྨཾ ཝཱ པརིབྷུཉྫཏི, པརསམྤཏྟིཾ ཝཱ ཨབྷིཛ྄ཛྷཱཡཏི, པརསྶ བྷཎྜཾ ཝཱ ཧརཏི སབྷཱཝཏིཀྑེནེཝ ཨནུསྶཱཧིཏེན ཙིཏྟེན, ཏདཱ ཏཏིཡཾ. ཡདཱ མནྡེན སམུསྶཱཧིཏེན, ཏདཱ ཙཏུཏྠཾ ཨུཔྤཛྫཏི. ཡདཱ པན ཀཱམཱནཾ ཝཱ ཨསམྤཏྟིཾ ཨཱགམྨ ཨཉྙེསཾ ཝཱ སོམནསྶཧེཏཱུནཾ ཨབྷཱཝེན ཙཏཱུསུཔི ཝིཀཔྤེསུ སོམནསྶརཧིཏཱ ཧོནྟི, ཏདཱ སེསཱནི ཙཏྟཱརི ཨུཔེཀྑཱསཧགཏཱནི ཨུཔྤཛྫནྟཱིཏི. ཨེཝཾ སོམནསྶུཔེཀྑཱདིཊྛིཔྤཡོགབྷེདཏོ ཨཊྛཝིདྷཾ ལོབྷམཱུལཾ ཝེདིཏབྦཾ.

དོསམཱུལཾ པན ཨེཀནྟསཝཏྠུཀཏོ ཨེཀཝིདྷཾ, ཨསངྑཱརསསངྑཱརབྷེདཏོ དུཝིདྷཾ དོམནསྶསཧགཏཾ པཊིགྷསམྤཡུཏྟཾ ཨསངྑཱརཾ, སསངྑཱརནྟི. ཨསྶ པན པཱཎཱཏིཔཱཏཱདཱིསུ ཏིཀྑམནྡཔྤཝཏྟིཀཱལེ ཨུཔྤཏྟི ཝེདིཏབྦཱ.

མོཧམཱུལམྤི ¶ ¶ ཝིཙིཀིཙྪུདྡྷཙྩཡོགཏོ དུཝིདྷཾ ཧོཏི ཨུཔེཀྑཱསཧགཏཾ ཝིཙིཀིཙྪཱསམྤཡུཏྟཾ, ཨུཔེཀྑཱསཧགཏཾ ཨུདྡྷཙྩསམྤཡུཏྟནྟི. ཏསྶ ཨསནྣིཊྛཱནཝིཀྑེཔཀཱལེསུ པཝཏྟི ཝེདིཏབྦཱཏི.

ཨེཝཾ ཏཱཝ དྭཱདསཝིདྷཾ ཨཀུསལཙིཏྟཾ ཝེདིཏབྦཾ, སབྦཾ པནེཏཾ ཡཐཱནུརཱུཔཾ ཨཔཱཡེསུ ཨུཔཔཏྟིཡཱ, སུགཏིཡམྤི དུཀྑཝིསེསསྶ ཨབྷིནིཔྥཱདཀཾ ཧོཏི.

ལོབྷམཱུལཝསེནཊྛ, དོསམཱུལཝསཱ དུཝེ;

མོཧམཱུལཝསེན དྭེ, ཨེཝཾ དྭཱདསདྷཱ སིཡུཾ.

པཱཔཱཔཱཔེསྭཔཱཔེན ¶ , ཡཾ ཝུཏྟཾ པཱཔམཱནསཾ;

པཱཔཱཔཱཔཔྤཧཱིནེན, ཏཾ མཡཱ སམུདཱཧཊཾ.

ཨིཏརཾ པན ཨབྱཱཀཏམཝིཔཱཀཱརཧཏོ ཨེཀཝིདྷཾ ཧོཏི, ཛཱཏིབྷེདཏོ དུཝིདྷཾ ཝིཔཱཀཙིཏྟཾ ཀིརིཡཙིཏྟནྟི. ཏཏྠ ཝིཔཱཀཙིཏྟཾ བྷཱུམིབྷེདཏོ ཙཏུབྦིདྷཾ ཀཱམཱཝཙརཾ རཱུཔཱཝཙརཾ ཨརཱུཔཱཝཙརཾ ལོཀུཏྟརནྟི. ཏཏྠ ཀཱམཱཝཙརཾ དུཝིདྷཾ ཀུསལཝིཔཱཀཾ ཨཀུསལཝིཔཱཀནྟི. ཀུསལཝིཔཱཀཾ དུཝིདྷཾ སཧེཏུཀམཧེཏུཀཉྩེཏི.

ཏཏྠ སཧེཏུཀཝིཔཱཀཙིཏྟཾ སཀཀུསལཾ ཝིཡ སོམནསྶུཔེཀྑཱཉཱཎཔྤཡོགབྷེདཏོ ཨཊྛཝིདྷཾ. སེཡྻཐིདཾ – སོམནསྶསཧགཏཾ ཉཱཎསམྤཡུཏྟཾ ཨསངྑཱརཾ, སསངྑཱརཾ, སོམནསྶསཧགཏཾ ཉཱཎཝིཔྤཡུཏྟཾ ཨསངྑཱརཾ, སསངྑཱརཾ, ཨུཔེཀྑཱསཧགཏཾ ཉཱཎསམྤཡུཏྟཾ ཨསངྑཱརཾ, སསངྑཱརཾ, ཨུཔེཀྑཱསཧགཏཾ ཉཱཎཝིཔྤཡུཏྟཾ ཨསངྑཱརཾ, སསངྑཱརནྟི ཨིདཾ ཨཊྛཝིདྷཾ སཧེཏུཀཝིཔཱཀཾ ནཱམ.

ཡཐཱ པནསྶ ཀུསལཾ དཱནཱདིཝསེན ཚསུ ཨཱརམྨཎེསུ པཝཏྟཏི, ན ཨིདཾ ཏཐཱ. ཨིདཾ ཧི པཊིསནྡྷིབྷཝངྒཙུཏིཏདཱརམྨཎཝསེན པརིཏྟདྷམྨཔརིཡཱཔནྣེསུཡེཝ ཚསུ ཨཱརམྨཎེསུ པཝཏྟཏི. སམྤཡུཏྟདྷམྨཱནཉྩ ཝིསེསེ ཨསཏིཔི ཨཱདཱསཏལཱདཱིསུ མུཁནིམིཏྟཾ ཝིཡ ནིརུསྶཱཧཾ ཝིཔཱཀཾ, མུཁཾ ཝིཡ སཨུསྶཱཧཾ ཀུསལནྟི ཝེདིཏབྦཾ. ཨིམེསཾ པན ཝིཔཙྩནཊྛཱནཾ ཝེདིཏབྦཾ. ཨིམཱནི ཧི པཊིསནྡྷིབྷཝངྒཙུཏིཏདཱརམྨཎཱནི ཧུཏྭཱ ཝིཔཙྩནྟི.

ཀཱམཱཝཙརདེཝཱནཾ ¶ , མནུསྶཱནཾ ཨིམེ པན;

དུཧེཏུཀཏིཧེཏཱུནཾ, བྷཝནྟི པཊིསནྡྷིཡོ.

ཏཏོ པཝཏྟིཡཾ ཧུཏྭཱ, བྷཝངྒཾ ཡཱཝཏཱཡུཀཾ;

བལཝཱརམྨཎེ ཧུཏྭཱ, ཏདཱརམྨཎམེཝ ཙ.

ཏཏོ ¶ ¶ མརཎཀཱལསྨིཾ, ཙུཏི ཧུཏྭཱ པཝཏྟརེ;

ཨེཝཾ ཙཏཱུསུ ཋཱནེསུ, ཝིཔཙྩནྟཱིཏི ནིདྡིསེ.

སབྷཱུམིཀུསལེཧེཝ, མཧཱཔཱཀཱ སམཱ ཝིནཱ;

ཀམྨདྭཱརཉྩ ཀམྨཉྩ, པུཉྙཱནཾ ཀྲིཡཝཏྠུཀཾ.

ཨཝིཉྙཏྟིཛནཏྟཱ ཧི, ཨཝིཔཱཀསབྷཱཝཏོ;

ཨཔྤཝཏྟནཏོ ཙེཝ, པཱཀཱ པུཉྙེཧི ནོ སམཱ.

པརིཏྟཱརམྨཎཏྟཱ ཧི, ཏེསམེཀནྟཏོ པན;

ཀརུཎཱམུདིཏཱ ཏེསུ, ན ཛཱཡནྟི ཀདཱཙིཔི.

ཏཐཱ ཝིརཏིཡོ ཏིསྶོ, ན པནེཏེསུ ཛཱཡརེ;

པཉྩ སིཀྑཱཔདཱ ཝུཏྟཱ, ཀུསལཱཏི ཧི སཏྠུནཱ.

ཏཐཱདྷིཔཏིནོཔེཏྠ, ན སནྟཱིཏི ཝིནིདྡིསེ;

ཚནྡཱདཱིནི དྷུརཾ ཀཏྭཱ, ཨནུཔྤཛྫནཏོ པན.

ཨསངྑཱརསསངྑཱར-ཝིདྷཱནཾ པན པུཉྙཏོ;

ཉེཡྻཾ པཙྩཡཏོ ཙེཝ, ཝིཔཱཀེསུ ཙ ཝིཉྙུནཱ.

ཧཱིནཱདཱིནཾ ཝིཔཱཀཏྟཱ, པུཉྙཱནཾ པུཉྙཝཱདིནཱ;

ཧཱིནཱདཡོ བྷཝནྟཱིཏི, ཝིཔཱཀཱ པརིདཱིཔིཏཱ.

ཨིདཾ ཨཊྛཝིདྷཾ ཙིཏྟཾ, ཨེཀནྟེན སཝཏྠུཀཾ;

ཛཱཡཏེ ཀཱམལོཀསྨིཾ, ན པནཉྙཏྠ ཛཱཡཏེ.

ཨེཝཾ ཏཱཝ སཧེཏུཀཝིཔཱཀཙིཏྟཾ ཝེདིཏབྦཾ.

ཨཧེཏུཀཝིཔཱཀཙིཏྟཾ ¶ པན ཨལོབྷཱདིཧེཏུཝིརཧིཏཾ ཨུཔེཀྑཱསཧགཏཾ ཙཀྑུཝིཉྙཱཎཾ, ཨུཔེཀྑཱསཧགཏཾ སོཏཝིཉྙཱཎཾ, ཨུཔེཀྑཱསཧགཏཾ གྷཱནཝིཉྙཱཎཾ, ཨུཔེཀྑཱསཧགཏཾ ཛིཝ྄ཧཱཝིཉྙཱཎཾ, སུཁསཧགཏཾ ཀཱཡཝིཉྙཱཎཾ, ཨུཔེཀྑཱསཧགཏཾ ཨཧེཏུཀམནོདྷཱཏུསམྤཊིཙྪནཾ, སོམནསྶསཧགཏཾ ཨཧེཏུཀམནོཝིཉྙཱཎདྷཱཏུསནྟཱིརཎཾ ¶ , ཨུཔེཀྑཱསཧགཏཾ ཨཧེཏུཀམནོཝིཉྙཱཎདྷཱཏུསནྟཱིརཎནྟི ཨིདཾ པན ཨཊྛཝིདྷཾ ཨཧེཏུཀཝིཔཱཀཙིཏྟཾ ནཱམ.

ཨིདཾ པན ཨཊྛཝིདྷཾ ནིཡཏཝཏྠུཀཏོ ཨེཀཝིདྷཾ, ནིཡཏཱནིཡཏཱརམྨཎཏོ དུཝིདྷཾ. ཏཏྠ ཝིཉྙཱཎཔཉྩཀཾ ནིཡཏཱརམྨཎཾ, སེསཏྟཡཾ ཨནིཡཏཱརམྨཎཾ. སུཁསོམནསྶུཔེཀྑཱཝེདནཱཡོགཏོ ཏིཝིདྷཾ. ཏཏྠ སུཁསཧགཏཾ ཀཱཡཝིཉྙཱཎཾ, དྭིཊྛཱནིཀཾ སནྟཱིརཎཾ སོམནསྶུཔེཀྑཱཡུཏྟཾ, སེསམུཔེཀྑཱཡུཏྟནྟི.

དིཊྛཱརམྨཎསུཏཱརམྨཎམུཏཱརམྨཎདིཊྛསུཏམུཏཱརམྨཎདིཊྛ-སུཏམུཏཝིཉྙཱཏཱརམྨཎཝསེན པཉྩཝིདྷཾ. ཏཏྠ དིཊྛཱརམྨཎཾ ཙཀྑུཝིཉྙཱཎཾ, སུཏཱརམྨཎཾ ¶ སོཏཝིཉྙཱཎཾ, མུཏཱརམྨཎཾ གྷཱནཛིཝ྄ཧཱཀཱཡཝིཉྙཱཎཏྟཡཾ, དིཊྛསུཏམུཏཱརམྨཎཾ མནོདྷཱཏུསམྤཊིཙྪནཾ, དིཊྛསུཏམུཏཝིཉྙཱཏཱརམྨཎཾ སེསམནོཝིཉྙཱཎདྷཱཏུདྭཡནྟི.

ཝཏྠུཏོ ཚབྦིདྷཾ. ཀཐཾ? ཙཀྑུཝིཉྙཱཎསྶ ཙཀྑུམེཝ ཝཏྠུ, ཏཐཱ སོཏགྷཱནཛིཝ྄ཧཱཀཱཡཝིཉྙཱཎཱནཾ སོཏགྷཱནཛིཝ྄ཧཱཀཱཡཝཏྠུ, ཨཝསེསཏྟཡསྶ ཧདཡཝཏྠུམེཝཱཏི.

ཨཱརམྨཎཏོ སཏྟཝིདྷཾ ཧོཏི. ཀཐཾ? རཱུཔཱརམྨཎམེཝ ཙཀྑུཝིཉྙཱཎཾ, ཏཐཱ སདྡགནྡྷརསཕོཊྛབྦཱརམྨཎཱནི པཊིཔཱཊིཡཱ སོཏགྷཱནཛིཝ྄ཧཱཀཱཡཝིཉྙཱཎཱནི, རཱུཔཱདིཔཉྩཱརམྨཎཱ མནོདྷཱཏུ, སེསམནོཝིཉྙཱཎདྷཱཏུདྭཡཾ ཚལཱ༹རམྨཎནྟི.

ཏཾ སབྦཾ པན ཨཧེཏུཀཝིཔཱཀཙིཏྟཾ ཀིཙྩཏོ ཨཊྛཝིདྷཾ ཧོཏི. ཀཐཾ? དསྶནཀིཙྩཾ ཙཀྑུཝིཉྙཱཎཾ, སཝནགྷཱཡནསཱཡནཕུསནསམྤཊིཙྪནསནྟཱིརཎཏདཱརམྨཎཀིཙྩཱནི ཨཝསེསཱནི.

ཏཏྠ ¶ ཙཀྑུཏོ པཝཏྟཾ ཝིཉྙཱཎཾ, ཙཀྑུམྷི སནྣིསྶིཏཾ ཝིཉྙཱཎནྟི ཝཱ ཙཀྑུཝིཉྙཱཎཾ, ཏཐཱ སོཏཝིཉྙཱཎཱདཱིནི. ཏཏྠ ཙཀྑུསནྣིསྶིཏརཱུཔཝིཛཱནནལཀྑཎཾ ཙཀྑུཝིཉྙཱཎཾ ¶ , རཱུཔམཏྟཱརམྨཎརསཾ, རཱུཔཱབྷིམུཁབྷཱཝཔཙྩུཔཊྛཱནཾ, རཱུཔཱརམྨཎཱཡ ཀིརིཡཱམནོདྷཱཏུཡཱ ཨཔགམཔདཊྛཱནཾ. ཏཐཱ སོཏགྷཱནཛིཝ྄ཧཱཀཱཡཝིཉྙཱཎཱནི སོཏཱདིསནྣིསྶིཏསདྡཱདིཝིཛཱནནལཀྑཎཱནི, སདྡཱདིམཏྟཱརམྨཎརསཱནི, སདྡཱདཱིསུ ཨབྷིམུཁབྷཱཝཔཙྩུཔཊྛཱནཱནི, སདྡཱདིཨཱརམྨཎཱནཾ ཀིརིཡཱམནོདྷཱཏཱུནཾ ཨཔགམཔདཊྛཱནཱནི. མནོདྷཱཏུསམྤཊིཙྪནཾ པན ཙཀྑུཝིཉྙཱཎཱདཱིནཾ ཨནནྟརཱ རཱུཔཱདིཝིཛཱནནལཀྑཎཾ, རཱུཔཱདིསམྤཊིཙྪནརསཾ, ཏཐཱབྷཱཝཔཙྩུཔཊྛཱནཾ, ཙཀྑུཝིཉྙཱཎཱདཱིནཾ ཨཔགམཔདཊྛཱནཾ.

སེསཱ པན དྭེ ཨཧེཏུཀམནོཝིཉྙཱཎདྷཱཏུཡོ ཚལཱ༹རམྨཎཝིཛཱནནལཀྑཎཱ, སནྟཱིརཎཱདིརསཱ, ཏཐཱབྷཱཝཔཙྩུཔཊྛཱནཱ, ཧདཡཝཏྠུཔདཊྛཱནཱཏི ཝེདིཏབྦཱ. ཏཏྠ པཋམཱ ཨེཀནྟམིཊྛཱརམྨཎེ པཝཏྟིསབྦྷཱཝཏོ སོམནསྶཡུཏྟཱཝ ཧུཏྭཱ པཉྩདྭཱརེ སནྟཱིརཎཀིཙྩཾ སཱདྷཡམཱནཱ པཉྩསུ དྭཱརེསུ ཋཏྭཱ ཝིཔཙྩཏི, ཚསུ པན དྭཱརེསུ བལཝཱརམྨཎེ ཏདཱརམྨཎཾ ཧུཏྭཱ ཝིཔཙྩཏི. དུཏིཡཱ ¶ པན ཨིཊྛམཛ྄ཛྷཏྟཱརམྨཎེ པཝཏྟིསབྦྷཱཝཏོ ཨུཔེཀྑཱསཧགཏཱ ཧུཏྭཱ སནྟཱིརཎཏདཱརམྨཎཔཊིསནྡྷིབྷཝངྒཙུཏིཝསེན པཝཏྟནཏོ པཉྩསུ ཋཱནེསུ ཝིཔཙྩཏི. ཀཐཾ? མནུསྶལོཀེ ཏཱཝ ཛཙྩནྡྷཛཙྩབདྷིརཛཙྩཛལ༹ཛཙྩུམྨཏྟཀཔཎྜཀཨུབྷཏོབྱཉྫནནཔུཾསཀཱདཱིནཾ པཊིསནྡྷིགྒཧཎཀཱལེ པཊིསནྡྷི ཧུཏྭཱ ཝིཔཙྩཏི. པཊིསནྡྷིཡཱ ཝཱིཏིཝཏྟཱཡ པཝཏྟིཡཾ ཡཱཝཏཱཡུཀཾ བྷཝངྒཾ ཧུཏྭཱ ཝིཔཙྩཏི. ཨིཊྛམཛ྄ཛྷཏྟེ པཉྩཱརམྨཎཝཱིཐིཡཱ སནྟཱིརཎཾ ཧུཏྭཱ, བལཝཱརམྨཎེ ཚདྭཱརེ ཏདཱརམྨཎཾ ཧུཏྭཱ, མརཎཀཱལེ ཙུཏི ཧུཏྭཱཏི ཨིམེསུ པན པཉྩསུ ཋཱནེསུ ཝིཔཙྩཏཱིཏི. ཨེཝཾ ཏཱཝ ཨཧེཏུཀཝིཔཱཀཙིཏྟཱནི ཝེདིཏབྦཱནི.

ཀཱམཱཝཙརཔུཉྙསྶ ¶ , ཝིཔཱཀཱ ཧོནྟི སོལ༹ས;

ཏཾ ཏིཧེཏུཀཔུཉྙསྶ, ཝསེན པརིདཱིཔཡེ.

ཨིདཱནི རཱུཔཱཝཙརཝིཔཱཀཙིཏྟཱནི ཝུཙྩནྟི. ཏཱནི ནིཡཏཝཏྠུཀཏོ ཨེཀཝིདྷཱནི, ཛྷཱནངྒཡོགབྷེདཏོ པཉྩཝིདྷཱནི. ཀཐཾ? ཝིཏཀྐཝིཙཱརཔཱིཏིསུཁཙིཏྟེཀགྒཏཱསམྤཡུཏྟཾ པཋམཾ, ཝིཙཱརཔཱིཏིསུཁཙིཏྟེཀགྒཏཱསམྤཡུཏྟཾ དུཏིཡཾ, པཱིཏིསུཁཙིཏྟེཀགྒཏཱསམྤཡུཏྟཾ ཏཏིཡཾ, སུཁཙིཏྟེཀགྒཏཱསམྤཡུཏྟཾ ཙཏུཏྠཾ, ཨུཔེཀྑཱཙིཏྟེཀགྒཏཱསམྤཡུཏྟཾ པཉྩམནྟི ཨིམཱནི པཉྩཔི རཱུཔཱཝཙརཝིཔཱཀཙིཏྟཱནི ཨུཔཔཏྟིཡཾ པཊིསནྡྷིབྷཝངྒཙུཏིཝསེན པཝཏྟནྟི.

ཨིདཱནི ¶ ཨརཱུཔཱཝཙརཝིཔཱཀཙིཏྟཱནི ཝུཙྩནྟི. ཏཱནི སཀཀུསལཱནི ཝིཡ ཨཱརམྨཎབྷེདཏོ ཙཏུབྦིདྷཱནི ཧོནྟི. ཀཐཾ? ཨཱཀཱསཱནཉྩཱཡཏནསཉྙཱསཧགཏཾ, ཝིཉྙཱཎཉྩཱཡཏནསཉྙཱསཧགཏཾ, ཨཱཀིཉྩཉྙཱཡཏནསཉྙཱསཧགཏཾ, ནེཝསཉྙཱནཱསཉྙཱཡཏནསཉྙཱསཧགཏནྟི ཨིམཱནི ཙཏྟཱརི ཨརཱུཔཱཝཙརཝིཔཱཀཙིཏྟཱནི.

ཀུསལཱནུགཏཾ ཀཏྭཱ, བྷཱཛིཏཾ ཀིཾ མཧགྒཏཾ;

ཨཏྟནོ ཀུསལེཧེཝ, སམཱནཾ སབྦཐཱ ཨིདཾ;

གཛཱདཱིནཾ ཡཐཱ ཚཱཡཱ, གཛཱདིསདིསཱ ཏཐཱ.

ཀཱམཱཝཙརཔུཉྙཾཝ, ནཱཔརཱཔརིཡཝེདནཾ;

ཛྷཱནཱ ཨཔརིཧཱིནསྶ, སཏྟསྶ བྷཝགཱམིནོ.

ཀུསལཱནནྟརཾཡེཝ ¶ , ཕལཾ ཨུཔྤཛྫཏཱིཏི ཙ;

ཉཱཔནཏྠཾ པནེཏསྶ, ཀུསལཱནུགཏཾ ཀཏཾ.

པཊིཔྤདཱཀྐམོ ཙེཝ, ཧཱིནཱདཱིནཉྩ བྷེདཏོ;

ཛྷཱནཱགམནཏོ ཙེཏྠ, ཝེདིཏབྦོ ཝིབྷཱཝིནཱ.

ཨབྷཱཝོདྷིཔཏཱིནཉྩ ¶ , ཨཡམེཝ ཝིསེསཀོ;

སེསཾ སབྦཾ ཙ སེསེན, ཀུསལེན སམཾ མཏཾ. –

ཨེཝཾ རཱུཔཱཝཙརཱརཱུཔཱཝཙརཝིཔཱཀཱ ཝེདིཏབྦཱ.

ཨིདཱནི ལོཀུཏྟརཝིཔཱཀཙིཏྟཱནི ཧོནྟི. ཏཱནི ཙཏུམགྒཡུཏྟཙིཏྟཕལཏྟཱ ཙཏུབྦིདྷཱནི ཧོནྟི. ཀཐཾ? སོཏཱཔཏྟིམགྒཕལཙིཏྟཾ, སཀདཱགཱམིམགྒཕལཙིཏྟཾ, ཨནཱགཱམིམགྒཕལཙིཏྟཾ, ཨརཧཏྟམགྒཕལཙིཏྟནྟི. ཨེཝཾ པནེཏྠ ཨེཀེཀཾ ཛྷཱནངྒཡོགབྷེདཏོ པཉྩཝིདྷཾ, པུན མགྒཝཱིཐིཕལསམཱཔཏྟིཝསེན པཝཏྟིཏོ དུཝིདྷཾ. ཨེཝཾ ལོཀུཏྟརཀུསལཝིཔཱཀཙིཏྟཱནི ཝེདིཏབྦཱནི.

སུཉྙཏཾ ¶ ཨནིམིཏྟནྟི, ཏཐཱཔཎིཧིཏནྟིཔི;

ཨེཏཱནི ཏཱིཎི ནཱམཱནི, མགྒསྶཱནནྟརེ ཕལེ.

ལབྦྷནྟི པརབྷཱགསྨིཾ, ཝལ༹ཉྫནཕལེསུ ན;

ཝིཔསྶནཱཝསེནེཝ, ཏཱནི ནཱམཱནི ལབྦྷརེ.

ཧོནྟི སཱདྷིཔཏཱིནེཝ, ལོཀུཏྟརཕལཱནི ཏུ;

ཝིཔཱཀེདྷིཔཏཱི ནཏྠི, ཋཔེཏྭཱ ཏུ ཨནཱསཝེ.

ཨཏྟནོ མགྒབྷཱཝེན, མགྒོ ‘‘མགྒོ’’ཏི ཝུཙྩཏི;

ཕལཾ མགྒམུཔཱདཱཡ, མགྒོ ནཱམཱཏི ཝུཙྩཏི. –

ཨིདཱནི སཏྟཱཀུསལཝིཔཱཀཱནི ཝུཙྩནྟི. ཨཀུསལཝིཔཱཀཾ ཨུཔེཀྑཱསཧགཏཾ ཙཀྑུཝིཉྙཱཎཾ, ཨུཔེཀྑཱསཧགཏཾ སོཏཝིཉྙཱཎཾ, ཨུཔེཀྑཱསཧགཏཾ གྷཱནཝིཉྙཱཎཾ, ཨུཔེཀྑཱསཧགཏཾ ཛིཝ྄ཧཱཝིཉྙཱཎཾ, དུཀྑསཧགཏཾ ཀཱཡཝིཉྙཱཎཾ, ཨུཔེཀྑཱསཧགཏཾ ཨཧེཏུཀམནོདྷཱཏུསམྤཊིཙྪནཾ, ཨུཔེཀྑཱསཧགཏཾ ཨཧེཏུཀམནོཝིཉྙཱཎདྷཱཏུསནྟཱིརཎནྟི ཨིམཱནི སཏྟ ཨཀུསལཝིཔཱཀཙིཏྟཱནི.

ཨེཏྠ ¶ པན ཨུཔེཀྑཱསཧགཏཱཧེཏུཀམནོཝིཉྙཱཎདྷཱཏུ ཨེཀཱདསཝིདྷེནཱཔི ཨཀུསལཙིཏྟེན ཀམྨེ ཨཱཡཱུཧིཏེ ཀམྨཀམྨནིམིཏྟགཏིནིམིཏྟེསུ ཨཉྙཏརཾ ཨཱརམྨཎཾ ཀཏྭཱ ཙཏཱུསུ ཨཔཱཡེསུ པཊིསནྡྷི ཧུཏྭཱ ཝིཔཙྩཏི, པཊིསནྡྷིཡཱ ཝཱིཏིཝཏྟཱཡ ¶ དུཏིཡཙིཏྟཝཱརཾ ཏཏོ པཊྛཱཡ ཡཱཝཏཱཡུཀཾ བྷཝངྒཾ ཧུཏྭཱ, ཨནིཊྛམཛ྄ཛྷཏྟཱརམྨཎཱཡ པཉྩཝིཉྙཱཎཝཱིཐིཡཱ སནྟཱིརཎཾ ཧུཏྭཱ, བལཝཱརམྨཎེ ཚསུ དྭཱརེསུ ཏདཱརམྨཎཾ ཧུཏྭཱ, མརཎཀཱལེ ཙུཏི ཧུཏྭཱ ཝིཔཙྩཏི. ཨེཝཾ པཉྩསུ ཋཱནེསུ ཝིཔཙྩཏི. ཀེཝལཾ ཧི ཏཱནི ཀུསལཝིཔཱཀཱཧེཏུཀཙིཏྟཱནི ཀུསལཀམྨཔཙྩཡཱནི, ཨིམཱནི ཨཀུསལཀམྨཔཙྩཡཱནི. ཨཡམིམེསཾ, ཏེསཉྩ ཝིསེསོ.

ཨནིཊྛཱནིཊྛམཛ྄ཛྷཏྟགོཙརེ ཝཏྟརེ ཨིམེ;

སུཁཱདིཏྟཡཡུཏྟཱ ཏེ, དུཀྑུཔེཀྑཱཡུཏཱ ཨིམེ.

ཨེཝཾ ¶ ཀཱམཱཝཙརཀུསལཝིཔཱཀསཧེཏུཀམཊྛཝིདྷཾ, ཨཧེཏུཀམཊྛཝིདྷཾ, ཛྷཱནངྒཡོགབྷེདཏོ རཱུཔཱཝཙརཝིཔཱཀཾ པཉྩཝིདྷཾ, ཨཱརམྨཎབྷེདཏོ ཨརཱུཔཱཝཙརཝིཔཱཀཾ ཙཏུབྦིདྷཾ, མགྒསམྤཡུཏྟཙིཏྟཕལབྷེདཏོ ལོཀུཏྟརཝིཔཱཀཾ ཙཏུབྦིདྷཾ, ཙཀྑུཝིཉྙཱཎཱདིབྷེདཏོ ཨཀུསལཝིཔཱཀཾ སཏྟཝིདྷནྟི ཚཏྟིཾསཝིདྷཾ ཝིཔཱཀཙིཏྟཾ ཝེདིཏབྦཾ.

ཨེཝཾ ཚཏྟིཾསདྷཱ པཱཀཾ, པཱཀསཱསནཔཱུཛིཏོ;

སཝིཔཱཀཱཝིཔཱཀེསུ, ཀུསལོ སུགཏོབྲཝི.

ཀིརིཡཱབྱཱཀཏཙིཏྟཾ པན ཨཝིཔཱཀཏོ ཨེཀཝིདྷཾ, པརིཏྟམཧགྒཏཏོ དུཝིདྷཾ, ཀཱམཱཝཙརརཱུཔཱཝཙརཨརཱུཔཱཝཙརབྷཱུམིབྷེདཏོ ཏིཝིདྷཾ. ཏཏྠ ཀཱམཱཝཙརཾ དུཝིདྷཾ སཧེཏུཀམཧེཏུཀནྟི. ཏཏྠ སཧེཏུཀཾ ཨེཀཝིདྷཾ ཨརཧཏོ ཨེཝ ཨུཔྤཛྫནཏོ. སོམནསྶུཔེཀྑཱཉཱཎཔྤཡོགབྷེདཏོ ཀཱམཱཝཙརཀུསལཾ ཝིཡ ཨཊྛཝིདྷཾ ཧོཏི. སེཡྻཐིདཾ – སོམནསྶསཧགཏཾ ཉཱཎསམྤཡུཏྟཾ ཨསངྑཱརིཀཾ, སསངྑཱརིཀཾ, སོམནསྶསཧགཏཾ ¶ ཉཱཎཝིཔྤཡུཏྟཾ ཨསངྑཱརིཀཾ, སསངྑཱརིཀཾ, ཨུཔེཀྑཱསཧགཏཾ ཉཱཎསམྤཡུཏྟཾ ཨསངྑཱརིཀཾ, སསངྑཱརིཀཾ, ཨུཔེཀྑཱསཧགཏཾ ཉཱཎཝིཔྤཡུཏྟཾ ཨསངྑཱརིཀཾ, སསངྑཱརིཀནྟི ཨིམཱནི ཨཊྛ སཧེཏུཀཀིརིཡཙིཏྟཱནི. ཨེཏཱནི པན ཡཐཱནུརཱུཔཾ དཱནཱདིཝསེན ཁཱིཎཱསཝཱནཾཡེཝ པཝཏྟནྟི. ཨེཝཾ སཧེཏུཀཀིརིཡཙིཏྟཱནི ཝེདིཏབྦཱནི.

ཨཧེཏུཀཀིརིཡཙིཏྟཾ པན ཏིཝིདྷཾ ཀིརིཡཱཧེཏུཀམནོདྷཱཏུཨུཔེཀྑཱསཧགཏཱཝཛྫནཙིཏྟཾ, ཀིརིཡཱཧེཏུཀམནོཝིཉྙཱཎདྷཱཏུསོམནསྶསཧགཏཾ ཧསིཏུཔྤཱདཙིཏྟཾ, ཀིརིཡཱཧེཏུཀམནོཝིཉྙཱཎདྷཱཏུཨུཔེཀྑཱསཧགཏཾ ཝོཊྛབྦནཙིཏྟནྟི ¶ .

ཏཏྠ ཀིརིཡཱཧེཏུཀམནོདྷཱཏུ ཨུཔེཀྑཱསཧགཏཱ ཧདཡཝཏྠུཾ ནིསྶཱཡ ཙཀྑུདྭཱརེ ཨིཊྛཨིཊྛམཛ྄ཛྷཏྟཨནིཊྛཨནིཊྛམཛ྄ཛྷཏྟེསུ རཱུཔཱརམྨཎེསུ ཡེན ཀེནཙི པསཱདེ གྷཊྚིཏེ ཏཾ ཏཾ ཨཱརམྨཎཾ གཧེཏྭཱ ཨཱཝཛྫནཝསེན ཙཀྑུཝིཉྙཱཎསྶ པུརེཙཱརཱི ཧུཏྭཱ བྷཝངྒཾ ཨཱཝཊྚཡམཱནཱ ཨུཔྤཛྫཏི. སོཏདྭཱརཱདཱིསུཔི ཨེསེཝ ནཡོ. ཨིཏརཱ པན དྭེ ཨཧེཏུཀམནོཝིཉྙཱཎདྷཱཏུཡོ སཱདྷཱརཎཱསཱདྷཱརཎཱཏི དུཝིདྷཱ ཧོནྟི. ཏཏྠ ཨསཱདྷཱརཎཱ པན ཀིརིཡཱཧེཏུཀམནོཝིཉྙཱཎདྷཱཏུ སོམནསྶསཧགཏཱ ཁཱིཎཱསཝསྶེཝ ཚསུ དྭཱརེསུ ཚསུ ཨནུལཱ༹རེསུ ཨཱརམྨཎེསུ ཧསིཏུཔྤཱདཀིཙྩཱ ནིཡཏཝཏྠུཀཱ ཨུཔྤཛྫཏི. སཱདྷཱརཎཱ པན ཨཧེཏུཀམནོཝིཉྙཱཎདྷཱཏུ ཨུཔེཀྑཱསཧགཏཱ ཚལཱ༹རམྨཎཝིཛཱནནལཀྑཎཱ ¶ , ཏཐཱབྷཱཝཔཙྩུཔཊྛཱནཱ, སཱ ཏཱིསུ བྷཝེསུ སབྦེསཾ སཙིཏྟཀསཏྟཱནཾ སཱདྷཱརཎཱ, ན ཀསྶཙི པན སཙིཏྟཀསྶ ན ཨུཔྤཛྫཏི ནཱམ. ཨུཔྤཛྫམཱནཱ པནཱཡཾ པཉྩདྭཱརམནོདྭཱརེསུ ཝོཊྛབྦནཱཝཛྫནཀིཙྩཱ ཨུཔྤཛྫཏི. ཚ ཨསཱདྷཱརཎཉཱཎཱནིཔི ཨེཏཱཡ གཧིཏཱརམྨཎམེཝ གཎྷནྟི. སབྦཱརམྨཎགཧཎསམཏྠཏཱཡ ¶ སབྦཉྙུཏཉྙཱཎགཏིཀཱཏི ཝེདིཏབྦཱ. ཨིམཱནི ཏཱིཎི ཨཧེཏུཀཀིརིཡཙིཏྟཱནི.

ཨིདྷ ཋཏྭཱ ཧསནཙིཏྟཱནི པརིགྒཎྷིཏབྦཱནི. ཏེརས ཧསནཙིཏྟཱནི. ཀུསལཏོ ཙཏཱུཧི སོམནསྶསཧགཏེཧི, ཨཀུསལཏོ ཙཏཱུཧཱིཏི ཨིམེཧི ཨཊྛཧི ཙིཏྟེཧི པུཐུཛྫནཱ ཧསནྟི, སེཁཱ པན ཀུསལཏོ ཙཏཱུཧི, ཨཀུསལཏོ དྭཱིཧི དིཊྛིགཏཝིཔྤཡུཏྟསོམནསྶསཧགཏེཧཱིཏི ཚཧི ཧསནྟི, ཁཱིཎཱསཝཱ ཀིརིཡཏོ པཉྩཧི སོམནསྶསཧགཏེཧི ཧསནྟཱིཏི.

སོམནསྶཡུཏཱནཊྛ, ཀུསལཱཀུསལཱནི ཙ;

ཀྲིཡཏོ པན པཉྩེཝཾ, ཧཱསཙིཏྟཱནི ཏེརས.

པུཐུཛྫནཱ ཧསནྟེཏྠ, ཙིཏྟེཧི པན ཨཊྛཧི;

ཚཧི སེཁཱ ཨསེཁཱ ཙ, ཧསནྟི པན པཉྩཧི.

ཨིདཱནི རཱུཔཱཝཙརཀིརིཡཙིཏྟཱནི ཧོནྟི. ཝིཏཀྐཝིཙཱརཔཱིཏིསུཁཙིཏྟེཀགྒཏཱསམྤཡུཏྟཾ པཋམཾ, ཝིཙཱརཔཱིཏིསུཁཙིཏྟེཀགྒཏཱསམྤཡུཏྟཾ དུཏིཡཾ, པཱིཏིསུཁཙིཏྟེཀགྒཏཱསམྤཡུཏྟཾ ཏཏིཡཾ, སུཁཙིཏྟེཀགྒཏཱསམྤཡུཏྟཾ ཙཏུཏྠཾ, ཨུཔེཀྑཱཙིཏྟེཀགྒཏཱསམྤཡུཏྟཾ པཉྩམནྟི ཨིམཱནི པཉྩ རཱུཔཱཝཙརཀིརིཡཙིཏྟཱནི.

ཨིདཱནི ¶ ཨརཱུཔཱཝཙརཀིརིཡཙིཏྟཱནི ཝུཙྩནྟི. ཨཱཀཱསཱནཉྩཱཡཏནསཉྙཱསཧགཏཾ, ཝིཉྙཱཎཉྩཱཡཏནསཉྙཱསཧགཏཾ, ཨཱཀིཉྩཉྙཱཡཏནསཉྙཱསཧགཏཾ, ནེཝསཉྙཱནཱསཉྙཱཡཏནསཉྙཱསཧགཏནྟི ཨིམཱནི ཙཏྟཱརི ཨརཱུཔཱཝཙརཀིརིཡཙིཏྟཱནི. ཨིམཱནི པན རཱུཔཱརཱུཔཀིརིཡཙིཏྟཱནི སཀསཀབྷཱུམིཀུསལསདིསཱནི. ཀེཝལཾ པནེཏཱནི ཀིརིཡཙིཏྟཱནི ཁཱིཎཱསཝཱནཾཡེཝ ཨུཔྤཛྫནྟི, ཀུསལཱནི པན སེཁཔུཐུཛྫནཱནཾ. ཨིམཱནི ཙ ཁཱིཎཱསཝཱནཾ བྷཱཝནཱཀཱརཝསཔྤཝཏྟཱནི, ཏཱནི པན སེཁཔུཐུཛྫནཱནཾ བྷཱཝནཱཔུཉྙཝསཔྤཝཏྟཱནཱིཏི ཨཡམེཝ ཨིམེསཾ, ཏེསཉྩ ཝིསེསོ.

ཡཱ ¶ ¶ པུཐུཛྫནཀཱལསྨིཾ, ཨབྷིནིབྦཏྟིཏཱ པན;

རཱུཔཱརཱུཔསམཱཔཏྟི, སཱ ཁཱིཎཱསཝབྷིཀྑུནོ.

ཡཱཝ ཁཱིཎཱསཝོ བྷིཀྑུ, ན སམཱཔཛྫཏེཝ ནཾ;

ཏཱཝ ཏཱ ཀུསལཱ ཨེཝ, སམཱཔནྣཱ སཙེ ཀྲིཡཱ.

ཨེཝཾ སོམནསྶཱདིབྷེདཏོ ཀཱམཱཝཙརསཧེཏུཀཀིརིཡཙིཏྟམཊྛཝིདྷཾ, མནོདྷཱཏུམནོཝིཉྙཱཎདྷཱཏུདྭཡབྷེདཏོ ཨཧེཏུཀཾ ཏིཝིདྷཾ, ཛྷཱནངྒཡོགབྷེདཏོ རཱུཔཱཝཙརཾ པཉྩཝིདྷཾ, ཨཱརམྨཎབྷེདཏོ ཨརཱུཔཱཝཙརཾ ཙཏུབྦིདྷཾ, ཨེཝཾ བྷཱུམིཝསེན ཝཱིསཏིཝིདྷཾ ཀིརིཡཙིཏྟཾ ཝེདིཏབྦནྟི.

ཨེཀཱདསཝིདྷཾ ཀཱམེ, རཱུཔེ པཉྩ ཨརཱུཔིསུ;

ཙཏྟཱརཱིཏི ཙ སབྦཱནི, ཀྲིཡཱཙིཏྟཱནི ཝཱིསཏི.

ལོཀུཏྟརཀྲིཡཙིཏྟཾ, པན ཀསྨཱ ན ཝིཛྫཏི;

ཨེཀཙིཏྟཀྑཎཏྟཱ ཧི, མགྒསྶཱཏི ན ཝིཛྫཏི.

ཨེཏྟཱཝཏཱ ཨེཀཝཱིསཏིཝིདྷཾ ཀུསལཾ, དྭཱདསཝིདྷཾ ཨཀུསལཾ ཚཏྟིཾསཝིདྷཾ ཝིཔཱཀཾ, ཝཱིསཏིཝིདྷཾ ཀིརིཡཙིཏྟནྟི ཨཱདིམྷི ནིཀྑིཏྟཾ ཙིཏྟཾ ཨེཀཱུནནཝུཏིཔྤབྷེདེན ཝིདྷིནཱ པཀཱསིཏཾ ཧོཏཱིཏི.

ཨེཀཝཱིསཏི ¶ པུཉྙཱནི, དྭཱདསཱཀུསལཱནི ཙ;

ཚཏྟིཾསེཝ ཝིཔཱཀཱནི, ཀྲིཡཙིཏྟཱནི ཝཱིསཏི.

ཨེཀཱུནནཝུཏི སབྦེ, ཙིཏྟུཔྤཱདཱ མཧེསིནཱ;

ཨཊྛ ལོཀུཏྟརེ ཀཏྭཱ, ནིདྡིཊྛཱ ཧི སམཱསཏོ.

པིཊཀེ ¶ ¶ ཨབྷིདྷམྨསྨིཾ, ཡེ བྷིཀྑཱུ པཱཊཝཏྠིནོ;

ཏེཧཱཡཾ ཨུགྒཧེཏབྦོ, ཙིནྟེཏབྦོ པུནཔྤུནཾ.

ཨབྷིདྷམྨཱཝཏཱརེན, ཨབྷིདྷམྨམཧོདདྷིཾ;

ཡེ ཏརནྟི ཨིམཾ ལོཀཾ, པརཉྩེཝ ཏརནྟི ཏེཏི.

ཨིཏི ཨབྷིདྷམྨཱཝཏཱརེ ཙིཏྟནིདྡེསོ ནཱམ

ཙིཏྟཱནནྟརམུདྡིཊྛཱ ¶ , ཡེ ཙ ཙེཏསིཀཱ མཡཱ;

ཏེསཾ དཱནི ཀརིསྶཱམི, ཝིབྷཱཛནམིཏོ པརཾ.

ཏཏྠ ཙིཏྟསམྤཡུཏྟཱ, ཙིཏྟེ བྷཝཱ ཝཱ ཙེཏསིཀཱ. ཏེཔི ཙིཏྟཾ ཝིཡ སཱརམྨཎཏོ ཨེཀཝིདྷཱ, སཝིཔཱཀཱཝིཔཱཀཏོ དུཝིདྷཱ, ཀུསལཱཀུསལཱབྱཱཀཏབྷེདཏོ ཏིཝིདྷཱ, ཀཱམཱཝཙརཱདིབྷེདཏོ ཙཏུབྦིདྷཱ.

ཏཏྠ ཀཱམཱཝཙརཙིཏྟསམྤཡུཏྟཱ ཀཱམཱཝཙརཱ. ཏེསུ ཀཱམཱཝཙརཔཋམམཧཱཀུསལཙིཏྟསམྤཡུཏྟཱ ཏཱཝ ནིཡཏཱ སརཱུཔེན ཨཱགཏཱ ཨེཀཱུནཏིཾས དྷམྨཱ ཧོནྟི. སེཡྻཐིདཾ – ཕསྶོ ཝེདནཱ སཉྙཱ ཙེཏནཱ ཝིཏཀྐོ ཝིཙཱརོ པཱིཏི ཙིཏྟེཀགྒཏཱ སདྡྷཱ སཏི ཝཱིརིཡཾ པཉྙཱ ཛཱིཝིཏིནྡྲིཡཾ ཨལོབྷོ ཨདོསོ ཧིརཱི ཨོཏྟཔྤཾ ཀཱཡཔྤསྶདྡྷི ཙིཏྟཔྤསྶདྡྷི ཀཱཡལཧུཏཱ ཙིཏྟལཧུཏཱ ཀཱཡམུདུཏཱ ཙིཏྟམུདུཏཱ ཀཱཡཀམྨཉྙཏཱ ཙིཏྟཀམྨཉྙཏཱ ཀཱཡཔཱགུཉྙཏཱ ཙིཏྟཔཱགུཉྙཏཱ ཀཱཡུཛུཀཏཱ ཙིཏྟུཛུཀཏཱཏི. པུན ཚནྡོ, ཨདྷིམོཀྑོ, ཏཏྲམཛ྄ཛྷཏྟཏཱ, མནསིཀཱརོ ཙཱཏི ཙཏྟཱརོ ནིཡཏཡེཝཱཔནཀཱ ཧོནྟི. ཨིམེཧི ཙཏཱུཧི ཏེཏྟིཾས ཧོནྟི ¶ . པུན ཀརུཎཱ མུདིཏཱ ཀཱཡདུཙྩརིཏཝིརཏི ¶ ཝཙཱིདུཙྩརིཏཝིརཏི མིཙྪཱཛཱིཝཝིརཏི ཙེཏི ཨིམེ པཉྩ ཨནིཡཏཱ. ཨིམེ པན ཀདཱཙི ཨུཔྤཛྫནྟི.

ཨིམེསུ པན ཀརུཎཱམུདིཏཱཝསེན བྷཱཝནཱཀཱལེ ཀརུཎཱཔུབྦབྷཱགོ ཝཱ མུདིཏཱཔུབྦབྷཱགོ ཝཱ ཨེཏཱ ཨུཔྤཛྫནྟི, ན པནེཀཏོ ཨུཔྤཛྫནྟི. ཡདཱ པན ཨིམིནཱ ཙིཏྟེན མིཙྪཱཀམྨནྟཱདཱིཧི ཝིརམཏི, ཏདཱ སམྨཱཀམྨནྟཱདཱིནི པརིཔཱུརེནྟི, ཨེཀཱ ཝིརཏི ཨུཔྤཛྫཏི, ཀརུཎཱམུདིཏཱཧི སཧ, ཨཉྙམཉྙེན ཙ ན ཨུཔྤཛྫནྟི. ཏསྨཱ ཨེཏེསུ ཨེཀེན སཧ ཙཏུཏྟིཾསེཝ དྷམྨཱ ཧོནྟི.

ཨཱདིནཱ ¶ པུཉྙཙིཏྟེན, ཏེཏྟིཾས ནིཡཏཱ མཏཱ;

ཀརུཎཱམུདིཏེཀེན, ཙཏུཏྟིཾས བྷཝནྟི ཏེ.

ཀསྨཱ པནེཏྠ མེཏྟཱ ཙ, ཨུཔེཀྑཱ ཙ ན ཨུདྡྷཊཱ;

ཡེཝཱཔནཀདྷམྨེསུ, དྷམྨརཱཛེན སཏྠུནཱ.

ཨབྱཱཔཱདེན མེཏྟཱཔི, ཏཏྲམཛ྄ཛྷཏྟཏཱཡ ཙ;

ཨུཔེཀྑཱ གཧིཏཱ ཡསྨཱ, ཏསྨཱ ན གཧིཏཱ ཨུབྷོ.

ཀསྨཱ ཡེཝཱཔནཱ དྷམྨཱ, བུདྡྷེནཱདིཙྩབནྡྷུནཱ;

སརཱུཔེནེཝ སབྦེཏེ, པཱལི༹ཡཾ ན ཙ ཨུདྡྷཊཱ.

ཡསྨཱ ཨནིཡཏཱ ཀེཙི, ཡསྨཱ རཱསིཾ བྷཛནྟི ན;

ཡསྨཱ ཙ དུབྦལཱ ཀེཙི, ཏསྨཱ ཝུཏྟཱ ན པཱལི༹ཡཾ.

པུཉྙེསུ ཏེན ནིཡཏཱནིཡཏཱ ཙ སབྦེ,

ཀསྨཱ པནེཏྠ ཕསྶོཝ, པཋམཾ སམུདཱིརིཏོ;

པཋམཱབྷིནིཔཱཏཏྟཱ, ཙིཏྟསྶཱརམྨཎེ ཀིར.

ཕུསིཏྭཱ ¶ ¶ པན ཕསྶེན, ཝེདནཱཡ ཙ ཝེདཡེ;

སཉྫཱནཱཏི ཙ སཉྙཱཡ, ཙེཏནཱཡ ཙ ཙེཏཡེ.

ཕསྶོཝ པཋམཾ ཝུཏྟོ, ཏསྨཱ ཨིདྷ མཧེསིནཱ.

ཨཀཱརཎམིདཾ སབྦཾ, ཙིཏྟཱནཾ ཏུ སཧེཝ ཙ;

ཨེཀུཔྤཱདཱདིབྷཱཝེན, ཙིཏྟཛཱནཾ པཝཏྟིཏོ.

ཨཡཾ ཏུ པཋམུཔྤནྣོ, ཨཡཾ པཙྪཱཏི ནཏྠིདཾ;

བལཝཔཙྩཡཏྟེཔི, ཀཱརཎཉྩ ན དིསྶཏི.

དེསནཱཀྐམཏོ ཙེཝ, པཋམཾ སམུདཱིརིཏོ;

ཨིཙྩེཝཾ པན ཝིཉྙེཡྻཾ, ཝིཉྙུནཱ ན ཝིསེསཏོ.

ན ཙ པརིཡེསིཏབྦོཡཾ, ཏསྨཱ པུབྦཱཔརཀྐམོ;

ཝཙནཏྠལཀྑཎཱདཱིཧི, དྷམྨཱ ཨེཝ ཝིཛཱནཏཱ.

ཡསྨཱ པན ཨིམེ དྷམྨཱ ཝཙནཏྠལཀྑཎཱདཱིཧི ཝུཙྩམཱནཱ པཱཀཊཱ ཧོནྟི སུཝིཉྙེཡྻཱཝ, ཏསྨཱ ཏེསཾ ཝཙནཏྠལཀྑཎཱདཱིནི པཝཀྑཱམི. སེཡྻཐིདཾ – ཕུསཏཱིཏི ཕསྶོ. སྭཱཡཾ ཕུསནལཀྑཎོ, སངྒྷཊྚནརསོ, སནྣིཔཱཏཔཙྩུཔཊྛཱནོ, ཕལཊྛེན ཝེདནཱཔཙྩུཔཊྛཱནོ ཝཱ, ཨཱཔཱཐགཏཝིསཡཔདཊྛཱནོ. ཨཡཾ ཧི ཨརཱུཔདྷམྨོཔི སམཱནོ ཨཱརམྨཎེསུ ཕུསནཱཀཱརེནེཝ ¶ པཝཏྟཏི, སོ དྭིནྣཾ མེཎྜཱནཾ སནྣིཔཱཏོ ཝིཡ དཊྛབྦོ.

སུནྡརཾ མནོཏི སུམནོ, སུམནསྶ བྷཱཝོ སོམནསྶཾ, སོམནསྶམེཝ ཝེདནཱ སོམནསྶཝེདནཱ. སཱ ཝེདཡིཏལཀྑཎཱ, ཨིཊྛཱཀཱརཱནུབྷཝནརསཱ རཱཛཱ ཝིཡ སུབྷོཛནརསཾ, ཙེཏསིཀཨསྶཱདཔཙྩུཔཊྛཱནཱ, པསྶདྡྷིཔདཊྛཱནཱ.

ནཱིལཱདིབྷེདཾ ¶ ཨཱརམྨཎཾ སཉྫཱནཱཏཱིཏི སཉྙཱ. སཱ སཉྫཱནནལཀྑཎཱ, པཙྩཱབྷིཉྙཱཎཀརཎརསཱ ཝཌྜྷཀིསྶ ཨབྷིཉྙཱཎཀརཎམིཝ, ཡཐཱགཧིཏནིམིཏྟཝསེན ཨབྷིནིཝེསཀརཎཔཙྩུཔཊྛཱནཱ, ཡཐོཔཊྛིཏཝིསཡཔདཊྛཱནཱ.

ཙེཏཡཏཱིཏི ¶ ཙེཏནཱ. སདྡྷིཾ ཨཏྟནཱ སམྤཡུཏྟདྷམྨེ ཨཱརམྨཎེ ཨབྷིསནྡཧཏཱིཏི ཨཏྠོ. སཱ ཙེཏཡིཏལཀྑཎཱ, ཨཱཡཱུཧནརསཱ, སཾཝིདཧནཔཙྩུཔཊྛཱནཱ སཀཀིཙྩཔརཀིཙྩསཱདྷཀཱ ཛེཊྛསིསྶམཧཱཝཌྜྷཀིཨཱདཡོ ཝིཡ.

ཝིཏཀྐེཏཱིཏི ཝིཏཀྐོ. ཝིཏཀྐནཾ ཝཱ ཝིཏཀྐོ. སྭཱཡཾ ཨཱརམྨཎེ ཙིཏྟསྶ ཨབྷིནིརོཔནལཀྑཎོ, ཨཱཧནནཔརིཡཱཧནནརསོ, ཨཱརམྨཎེ ཙིཏྟསྶ ཨཱནཡནཔཙྩུཔཊྛཱནོ.

ཨཱརམྨཎེ ཏེན ཙིཏྟཾ ཝིཙརཏཱིཏི ཝིཙཱརོ. ཝིཙརཎཾ ཝཱ ཝིཙཱརོ. ཨནུསཉྩརཎནྟི ཝུཏྟཾ ཧོཏི. སྭཱཡཾ ཨཱརམྨཎཱནུམཛྫནལཀྑཎོ, ཏཏྠ སཧཛཱཏཱནུཡོཛནརསོ, ཙིཏྟསྶ ཨནུཔབནྡྷཔཙྩུཔཊྛཱནོ.

པིནཡཏཱིཏི པཱིཏི. སཱ སམྤིཡཱཡནལཀྑཎཱ, ཀཱཡཙིཏྟཔཱིཎནརསཱ, ཕརཎརསཱ ཝཱ, ཨོདགྱཔཙྩུཔཊྛཱནཱ.

ཙིཏྟསྶ ཨེཀགྒབྷཱཝོ ཙིཏྟེཀགྒཏཱ. སམཱདྷིསྶེཏཾ ནཱམཾ. སོ ཨཝིསཱརལཀྑཎོ, ཨཝིཀྑེཔལཀྑཎོ ཝཱ, སཧཛཱཏཱནཾ སམྤིཎྜནརསོ ནྷཱནིཡཙུཎྞཱནཾ ཨུདཀཾ ཝིཡ, ཨུཔསམཔཙྩུཔཊྛཱནོ, ཝིསེསཏོ སུཁཔདཊྛཱནོ.

སདྡཧནྟི ཨེཏཱཡ, སཡཾ ཝཱ སདྡཧཏི, སདྡཧནམཏྟམེཝ ཝཱ ཨེསཱཏི སདྡྷཱ. སཱ པནེསཱ སདྡཧནལཀྑཎཱ, པསཱདནརསཱ ཨུདཀཔྤསཱདཀམཎི ཝིཡ, ཨཀཱལུསིཡཔཙྩུཔཊྛཱནཱ, སདྡྷེཡྻཝཏྠུཔདཊྛཱནཱ.

སརནྟི ¶ ཨེཏཱཡ, སཡཾ ཝཱ སརཏི, སརཎམཏྟམེཝ ཝཱ ཨེསཱཏི སཏི. སཱ ཨཔིལཱཔནལཀྑཎཱ, ཨསམྨོསརསཱ, ཨཱརཀྑཔཙྩུཔཊྛཱནཱ, ཐིརསཉྙཱཔདཊྛཱནཱ.

ཝཱིརབྷཱཝོ ¶ ཝཱིརིཡཾ. ཝཱིརཱནཾ ཝཱ ཀམྨཾ ཝཱིརིཡཾ. ཏཾ པནེཏཾ ཨུསྶཱཧནལཀྑཎཾ, སཧཛཱཏཱནཾ ཨུཔཏྠམྦྷནརསཾ, ཨསཾསཱིདནབྷཱཝཔཙྩུཔཊྛཱནཾ, སཾཝེགཔདཊྛཱནཾ.

པཛཱནཱཏཱིཏི ¶ པཉྙཱ. སཱ པནེསཱ ཝིཛཱནནལཀྑཎཱ, ཝིསཡོབྷཱསནརསཱ པདཱིཔོ ཝིཡ, ཨསམྨོཧཔཙྩུཔཊྛཱནཱ ཨརཉྙགཏསུདེསཀོ ཝིཡ.

ཛཱིཝནྟི ཏེན ཏཾསམྤཡུཏྟདྷམྨཱཏི ཛཱིཝིཏཾ. ཏཾ པན ཨཏྟནཱ ཨཝིནིབྦྷུཏྟཱནཾ དྷམྨཱནཾ ཨནུཔཱལནལཀྑཎཾ, ཏེསཾ པཝཏྟནརསཾ, ཏེསཾཡེཝ ཋཔནཔཙྩུཔཊྛཱནཾ, ཡཱཔཡིཏབྦདྷམྨཔདཊྛཱནཾ. སནྟེཔི ཙ ཏེསཾ ཨནུཔཱལནལཀྑཎཱདིམྷི ཝིདྷཱནེ ཨཏྠིཀྑཎེཡེཝ ཏཾ ཏེ དྷམྨེ ཨནུཔཱལེཏི ཨུདཀཾ ཝིཡ ཨུཔྤལཱདཱིནི, ཡཐཱསཀཾ པཙྩཡུཔྤནྣེཔི ཙ དྷམྨེ ཨནུཔཱལེཏི དྷཱཏི ཝིཡ ཀུམཱརཾ, སཡཾཔཝཏྟིཏདྷམྨསམྦནྡྷེནེཝ པཝཏྟཏི ནིཡཱམཀོ ཝིཡ, ན བྷངྒཏོ ཨུདྡྷཾ པཝཏྟཡཏི ཨཏྟནོ ཙ པཝཏྟཡིཏབྦཱནཉྩ ཨབྷཱཝཱ, ན བྷངྒཀྑཎེ ཋཔེཏི སཡཾ བྷིཛྫམཱནཏྟཱ ཁཱིཡམཱནོ ཝིཡ ཝཏྟིསྣེཧོཝ པདཱིཔསིཁནྟི.

ན ལུབྦྷནྟི ཏེན, སཡཾ ཝཱ ན ལུབྦྷཏི, ཨལུབྦྷནམཏྟམེཝ ཝཱ ཏནྟི ཨལོབྷོ. སོ ཨཱརམྨཎེ ཙིཏྟསྶ ཨལགྒབྷཱཝལཀྑཎོ ཀམལདལེ ཛལབིནྡུ ཝིཡ, ཨཔརིགྒཧརསོ མུཏྟབྷིཀྑུ ཝིཡ, ཨནལླཱིནབྷཱཝཔཙྩུཔཊྛཱནོ ཨསུཙིམྷི པཏིཏཔུརིསོ ཝིཡ.

ན དུསྶནྟི ཏེན, སཡཾ ཝཱ ན དུསྶཏི, ཨདུསྶནམཏྟམེཝ ཝཱ ཏནྟི ཨདོསོ. སོ ཨཙཎྜིཀྐལཀྑཎོ, ཨཝིརོདྷལཀྑཎོ ཝཱ ཨནུཀཱུལམིཏྟོ ཝིཡ, ཨཱགྷཱཏཝིནཡནརསོ, པརིལཱ༹ཧཝིནཡནརསོ ¶ ཝཱ ཙནྡནཾ ཝིཡ, སོམྨབྷཱཝཔཙྩུཔཊྛཱནོ པུཎྞཙནྡོ ཝིཡ.

ཀཱཡདུཙྩརིཏཱདཱིཧི ཧིརཱིཡཏཱིཏི ཧིརཱི. ལཛྫཱཡེཏཾ ཨདྷིཝཙནཾ. ཏེཧིཡེཝ ཨོཏྟཔྤཏཱིཏི ཨོཏྟཔྤཾ. པཱཔཏོ ཨུབྦེགསྶེཏཾ ཨདྷིཝཙནཾ. ཏཏྠ པཱཔཏོ ཛིགུཙྪནལཀྑཎཱ ཧིརཱི, ཨོཏྟཱསལཀྑཎཾ ཨོཏྟཔྤཾ. ཨུབྷོཔི པཱཔཱནཾ ཨཀརཎརསཱ, པཱཔཏོ སངྐོཙནཔཙྩུཔཊྛཱནཱ, ཨཏྟགཱརཝཔརགཱརཝཔདཊྛཱནཱ. ཨིམེ དྷམྨཱ ལོཀཔཱལཱཏི དཊྛབྦཱ.

ཀཱཡཔསྶམྦྷནཾ ཀཱཡཔསྶདྡྷི. ཙིཏྟཔསྶམྦྷནཾ ཙིཏྟཔསྶདྡྷི. ཀཱཡོཏི ཙེཏྠ ཝེདནཱདཡོ ཏཡོ ཁནྡྷཱ. ཨུབྷོཔི པནེཏཱ ཨེཀཏོ ཧུཏྭཱ ཀཱཡཙིཏྟདརཐཝཱུཔསམལཀྑཎཱ ¶ , ཀཱཡཙིཏྟདརཐནིམྨདནརསཱ, ཀཱཡཙིཏྟཱནཾ ཨཔརིཔྥནྡནསཱིཏིབྷཱཝཔཙྩུཔཊྛཱནཱ, ཀཱཡཙིཏྟཔདཊྛཱནཱ, ཀཱཡཙིཏྟཱནཾ ཨཝཱུཔསམཏཱཨུདྡྷཙྩཱདིཀིལེསཔྤཊིཔཀྑབྷཱུཏཱཏི ཝེདིཏབྦཱ.

ཀཱཡལཧུབྷཱཝོ ¶ ཀཱཡལཧུཏཱ. ཙིཏྟལཧུབྷཱཝོ ཙིཏྟལཧུཏཱ. ཀཱཡཙིཏྟཱནཾ གརུབྷཱཝཝཱུཔསམལཀྑཎཱ, ཀཱཡཙིཏྟགརུབྷཱཝནིམྨདནརསཱ, ཀཱཡཙིཏྟཱནཾ ཨདནྡྷཏཱཔཙྩུཔཊྛཱནཱ, ཀཱཡཙིཏྟཔདཊྛཱནཱ, ཀཱཡཙིཏྟཱནཾ གརུབྷཱཝཀརཐིནམིདྡྷཱདིཀིལེསཔྤཊིཔཀྑབྷཱུཏཱཏི ཝེདིཏབྦཱ.

ཀཱཡམུདུབྷཱཝོ ཀཱཡམུདུཏཱ. ཙིཏྟམུདུབྷཱཝོ ཙིཏྟམུདུཏཱ. ཀཱཡཙིཏྟཱནཾ ཐདྡྷབྷཱཝཝཱུཔསམལཀྑཎཱ, ཀཱཡཙིཏྟཱནཾ ཐདྡྷབྷཱཝནིམྨདནརསཱ, ཨཔྤཊིགྷཱཏཔཙྩུཔཊྛཱནཱ, ཀཱཡཙིཏྟཔདཊྛཱནཱ, ཀཱཡཙིཏྟཱནཾ ཐདྡྷབྷཱཝཀརདིཊྛིམཱནཱདིཀིལེསཔྤཊིཔཀྑབྷཱུཏཱཏི ཝེདིཏབྦཱ.

ཀཱཡཀམྨཉྙབྷཱཝོ ཀཱཡཀམྨཉྙཏཱ. ཙིཏྟཀམྨཉྙབྷཱཝོ ཙིཏྟཀམྨཉྙཏཱ. ཀཱཡཙིཏྟཱནཾ ཨཀམྨཉྙབྷཱཝཝཱུཔསམལཀྑཎཱ, ཀཱཡཙིཏྟཱནཾ ཨཀམྨཉྙབྷཱཝནིམྨདནརསཱ, ཀཱཡཙིཏྟཱནཾ ཨཱརམྨཎཀརཎསམྤཏྟིཔཙྩུཔཊྛཱནཱ, ཀཱཡཙིཏྟཔདཊྛཱནཾ, ཀཱཡཙིཏྟཱནཾ ¶ ཨཀམྨཉྙབྷཱཝཀརཨཝསེསནཱིཝརཎཱདིཀིལེསཔྤཊིཔཀྑབྷཱུཏཱཏི ཝེདིཏབྦཱ.

ཀཱཡཔཱགུཉྙབྷཱཝོ ཀཱཡཔཱགུཉྙཏཱ. ཙིཏྟཔཱགུཉྙབྷཱཝོ ཙིཏྟཔཱགུཉྙཏཱ. ཀཱཡཙིཏྟཱནཾ ཨགེལཉྙབྷཱཝལཀྑཎཱ, ཀཱཡཙིཏྟཱནཾ གེལཉྙནིམྨདནརསཱ, ནིརཱདཱིནཝཔཙྩུཔཊྛཱནཱ, ཀཱཡཙིཏྟཔདཊྛཱནཱ, ཀཱཡཙིཏྟཱནཾ གེལཉྙབྷཱཝཀརཨསྶདྡྷཱདིཀིལེསཔྤཊིཔཀྑབྷཱུཏཱཏི དཊྛབྦཱ.

ཀཱཡསྶ ཨུཛུཀབྷཱཝོ ཀཱཡུཛུཀཏཱ. ཙིཏྟསྶ ཨུཛུཀབྷཱཝོ ཙིཏྟུཛུཀཏཱ. ཀཱཡཙིཏྟཱནཾ ཨཀུཊིལབྷཱཝལཀྑཎཱ, ཀཱཡཙིཏྟཱནཾ ཨཛྫཝལཀྑཎཱ ཝཱ, ཀཱཡཙིཏྟཱནཾ ཀུཊིལབྷཱཝནིམྨདནརསཱ, ཨཛིམྷཏཱཔཙྩུཔཊྛཱནཱ, ཀཱཡཙིཏྟཔདཊྛཱནཱ, ཀཱཡཙིཏྟཱནཾ ཀུཊིལབྷཱཝཀརམཱཡཱསཱཋེཡྻཱདིཀིལེསཔྤཊིཔཀྑབྷཱུཏཱཏི དཊྛབྦཱ.

ཚནྡོཏི ཀཏྟུཀམྱཏཱཡེཏཾ ཨདྷིཝཙནཾ. ཏསྨཱ སོ ཀཏྟུཀམྱཏཱལཀྑཎོ ཚནྡོ, ཨཱརམྨཎཔརིཡེསནརསོ, ཨཱརམྨཎེན ཨཏྠིཀཏཱཔཙྩུཔཊྛཱནོ, ཏདེཝསྶ པདཊྛཱནོ.

ཨདྷིམུཙྩནཾ ¶ ཨདྷིམོཀྑོ. སོ སནྣིཊྛཱནལཀྑཎོ, ཨསཾསཔྤནརསོ, ནིཙྪཡཔཙྩུཔཊྛཱནོ, སནྣིཊྛེཡྻདྷམྨཔདཊྛཱནོ, ཨཱརམྨཎེ ནིཙྩལབྷཱཝེན ཨིནྡཁཱིལོ ཝིཡ དཊྛབྦོ.

ཏེསུ ¶ ཏེསུ དྷམྨེསུ མཛ྄ཛྷཏྟབྷཱཝོ ཏཏྲམཛ྄ཛྷཏྟཏཱ. སཱ ཙིཏྟཙེཏསིཀཱནཾ སམཝཱཧིཏལཀྑཎཱ, ཨཱུནཱདྷིཀཏཱནིཝཱརཎརསཱ, པཀྑཔཱཏུཔཙྪེདནརསཱ ཝཱ, མཛ྄ཛྷཏྟབྷཱཝཔཙྩུཔཊྛཱནཱ.

ཀིརིཡཱ ཀཱརོ, མནསྨིཾ ཀཱརོ མནསིཀཱརོ. པུརིམམནཏོ ཝིསདིསཾ མནཾ ཀརོཏཱིཏི ཙ མནསིཀཱརོ.

སྭཱཡཾ ¶ ཨཱརམྨཎཔཊིཔཱདཀོ, ཝཱིཐིཔཊིཔཱདཀོ, ཛཝནཔཊིཔཱདཀོཏི ཏིཔྤཀཱརོ. ཏཏྠ ཨཱརམྨཎཔཊིཔཱདཀོ མནསྨིཾ ཀཱརོ མནསིཀཱརོ. སོ སཱརཎལཀྑཎོ, སམྤཡུཏྟཱནཾ ཨཱརམྨཎེ སཾཡོཛནརསོ, ཨཱརམྨཎཱབྷིམུཁབྷཱཝཔཙྩུཔཊྛཱནོ, ཨཱརམྨཎཔདཊྛཱནོ, སངྑཱརཀྑནྡྷཔརིཡཱཔནྣོ ཨཱརམྨཎཔཊིཔཱདཀཏྟེན སམྤཡུཏྟཱནཾ སཱརཐཱི ཝིཡ དཊྛབྦོ. ཝཱིཐིཔཊིཔཱདཀོཏི པཉྩདྭཱརཱཝཛྫནསྶེཏཾ ཨདྷིཝཙནཾ, ཛཝནཔཊིཔཱདཀོཏི མནོདྭཱརཱཝཛྫནསྶེཏཾ ཨདྷིཝཙནཾ, ན ཏེ ཨིདྷ ཨདྷིཔྤེཏཱ.

ཀརུཎཱཏི པརདུཀྑེ སཏི སཱདྷཱུནཾ ཧདཡཀམྤནཾ ཀརོཏཱིཏི ཀརུཎཱ, ཀིནཱཏི ཝིནཱསེཏི ཝཱ པརདུཀྑནྟི ཀརུཎཱ. སཱ པརདུཀྑཱཔནཡནཱཀཱརཔྤཝཏྟིལཀྑཎཱ, པརདུཀྑཱསཧནརསཱ, ཨཝིཧིཾསཱཔཙྩུཔཊྛཱནཱ, དུཀྑཱབྷིབྷཱུཏཱནཾ ཨནཱཐབྷཱཝདསྶནཔདཊྛཱནཱ.

མོདནྟི ཏཱཡ, སཡཾ ཝཱ མོདཏཱིཏི མུདིཏཱ. སཱ པམོདནལཀྑཎཱ, ཨནིསྶཱཡནརསཱ, ཨརཏིཝིགྷཱཏཔཙྩུཔཊྛཱནཱ, སཏྟཱནཾ སམྤཏྟིདསྶནཔདཊྛཱནཱ. ཀེཙི པན མེཏྟུཔེཀྑཱཡོཔི ཨནིཡཏེ ཨིཙྪནྟི, ཏཾ ན གཧེཏབྦཾ. ཨཏྠཏོ ཧི ཨདོསོ ཨེཝ མེཏྟཱ, ཏཏྲམཛ྄ཛྷཏྟུཔེཀྑཱཡེཝ ཨུཔེཀྑཱཏི.

ཀཱཡདུཙྩརིཏཏོ ཝིརཏི ཀཱཡདུཙྩརིཏཝིརཏི. ཨེསེཝ ནཡོ སེསེསུཔི དྭཱིསུ. ལཀྑཎཱདིཏོ པན ཨེཏཱ ཏིསྶོཔི ཝིརཏིཡོ ཀཱཡདུཙྩརིཏཱདིཝཏྠཱུནཾ ཨཝཱིཏིཀྐམལཀྑཎཱ, ཀཱཡདུཙྩརིཏཱདིཝཏྠུཏོ སངྐོཙནརསཱ, ཨཀིརིཡཔཙྩུཔཊྛཱནཱ, སདྡྷཱཧིརིཨོཏྟཔྤཨཔྤིཙྪཏཱདིགུཎཔདཊྛཱནཱ. ཀེཙི པན ཨིམཱསུ ཨེཀེཀཾ ནིཡཏཾ ཝིརཏིཾ ཨིཙྪནྟི. ཨེཝཾ ཀཱམཱཝཙརཔཋམམཧཱཀུསལཙིཏྟེན ཨིམེ ཏེཏྟིཾས ཝཱ ཙཏུཏྟིཾས ཝཱ དྷམྨཱ སམྤཡོགཾ གཙྪནྟཱིཏི ཝེདིཏབྦཱ.

ཡཐཱ ¶ ¶ ¶ ཙ པཋམེན, ཨེཝཾ དུཏིཡཙིཏྟེནཱཔི. སསངྑཱརབྷཱཝམཏྟམེཝ ཧི ཨེཏྠ ཝིསེསོ. པུན ཏཏིཡེན ཉཱཎཝིཔྤཡོགཏོ ཋཔེཏྭཱ ཨམོཧཾ ཨཝསེསཱ དྭཏྟིཾས ཝཱ ཏེཏྟིཾས ཝཱ ཝེདིཏབྦཱ. ཏཐཱ ཙཏུཏྠེནཱཔི སསངྑཱརབྷཱཝམཏྟམེཝ ཝིསེསོ, པཋམེ ཝུཏྟེསུ པན ཋཔེཏྭཱ པཱིཏིཾ ཨཝསེསཱ པཉྩམེན སམྤཡོགཾ གཙྪནྟི. སོམནསྶཊྛཱནེ ཙེཏྠ ཨུཔེཀྑཱཝེདནཱ པཝིཊྛཱ. སཱ པན ཨིཊྛཱནིཊྛཝིཔརཱིཏཱནུབྷཝནལཀྑཎཱ, པཀྑཔཱཏུཔཙྪེདནརསཱ. ཡཐཱ ཙ པཉྩམེན, ཨེཝཾ ཚཊྛེནཱཔི. སསངྑཱརམཏྟམེཝ ཧོཏི ཝིསེསོ. སཏྟམེན པན ཋཔེཏྭཱ པཉྙཾ ཨཝསེསཱ ཨེཀཏིཾས ཝཱ དྭཏྟིཾས ཝཱ དྷམྨཱ ཧོནྟི, ཏཐཱ ཨཊྛམེནཱཔི. སསངྑཱརམཏྟམེཝ ཝིསེསོ. ཨེཝཾ ཏཱཝ ཀཱམཱཝཙརཀུསལཙེཏསིཀཱ ཝེདིཏབྦཱ.

ཨུཔེཀྑཱཡུཏྟཙིཏྟེསུ, ན དུཀྑསུཁཔཱིཏིཡོ;

ཛཱཡནྟེཝ ཝིསུཾ པཉྩ, ཀརུཎཱམུདིཏཱདཡོ.

ཨཝསེསེསུ པན རཱུཔཱཝཙརཙིཏྟསམྤཡུཏྟཱ རཱུཔཱཝཙརཱ, ཏཏྠ པཋམཙིཏྟསམྤཡུཏྟཱ ཏཱཝ ཀཱམཱཝཙརཔཋམཙིཏྟེ ཝུཏྟེསུ ཋཔེཏྭཱ ཝིརཏིཏྟཡཾ ཨཝསེསཱ ཝེདིཏབྦཱ. ཝིརཏིཡོ པན ཀཱམཱཝཙརཀུསལལོཀུཏྟརེསྭེཝ ཨུཔྤཛྫནྟི, ན ཨཉྙེསུ. དུཏིཡེན ཝིཏཀྐཝཛྫཱ དྭཏྟིཾས ཝཱ ཏེཏྟིཾས ཝཱ. ཏཏིཡེན ཝིཙཱརཝཛྫཱ ཨེཀཏིཾས ཝཱ དྭཏྟིཾས ཝཱ. ཙཏུཏྠེན ཏཏོ པཱིཏིཝཛྫཱ ཏིཾས ཝཱ ཨེཀཏིཾས ཝཱ. པཉྩམེན ཏཏོ ཀརུཎཱམུདིཏཱཝཛྫཱ ཏིཾས ཧོནྟི, སོམནསྶཊྛཱནེ ཨུཔེཀྑཱ པཝིཊྛཱ. ཨེཝཾ རཱུཔཱཝཙརཀུསལཙེཏསིཀཱ ཝེདིཏབྦཱ.

ཨརཱུཔཱཝཙརཙིཏྟསམྤཡུཏྟཱ ཨརཱུཔཱཝཙརཱ, ཏེ པན རཱུཔཱཝཙརཔཉྩམེ ཝུཏྟནཡེན ཝེདིཏབྦཱ. ཨརཱུཔཱཝཙརབྷཱཝོཝེཏྠ ཝིསེསོ.

ལོཀུཏྟརཙིཏྟསམྤཡུཏྟཱ ¶ ལོཀུཏྟརཱ, ཏེ པན པཋམཛ྄ཛྷཱནིཀེ མགྒཙིཏྟེ པཋམརཱུཔཱཝཙརཙིཏྟེ ཝུཏྟནཡེན དུཏིཡཛ྄ཛྷཱནིཀཱདིབྷེདེཔི མགྒཙིཏྟེ དུཏིཡརཱུཔཱཝཙརཙིཏྟཱདཱིསུ ཝུཏྟནཡེནེཝ ཝེདིཏབྦཱ. ཀརུཎཱམུདིཏཱནམབྷཱཝོ ཙ ནིཡཏཝིརཏིབྷཱཝོ ཙ ལོཀུཏྟརབྷཱཝོ ཙེཏྠ ཝིསེསོ. ཨེཝཾ ཏཱཝ ཀུསལཙིཏྟསམྤཡུཏྟཙེཏསིཀཱ ཝེདིཏབྦཱ.

ཨཀུསལཱ པན ཙེཏསིཀཱ བྷཱུམིཏོ ཨེཀཝིདྷཱ ཀཱམཱཝཙརཱཡེཝ, ཏེསུ ལོབྷམཱུལཔཋམཱཀུསལཙིཏྟསམྤཡུཏྟཱ ¶ ཏཱཝ ནིཡཏཱ སརཱུཔེནཱགཏཱ པནྣརས, ཡེཝཱཔནཀཱ ནིཡཏཱ ཙཏྟཱརོཏི ¶ ཨེཀཱུནཝཱིསཏི ཧོནྟི. ཨནིཡཏཱ ཚ ཡེཝཱཔནཀཱཏི སབྦེ པཉྩཝཱིསཏི ཧོནྟི. སེཡྻཐིདཾ – ཕསྶོ སོམནསྶཝེདནཱ སཉྙཱ ཙེཏནཱ ཝིཏཀྐོ ཝིཙཱརོ པཱིཏི ཙིཏྟསྶེཀགྒཏཱ ཝཱིརིཡཾ ཛཱིཝིཏཾ ཨཧིརིཀཾ ཨནོཏྟཔྤཾ ལོབྷོ མོཧོ མིཙྪཱདིཊྛཱིཏི ཨིམེ སརཱུཔེནཱགཏཱ པནྣརས, ཚནྡོ ཨདྷིམོཀྑོ ཨུདྡྷཙྩཾ མནསིཀཱརོཏི ཨིམེ ཙཏྟཱརོ ནིཡཏཡེཝཱཔནཀཱ, ཨིམེ པན པཊིཔཱཊིཡཱ དསསུ ཙིཏྟེསུ ནིཡཏཱ ཧོནྟི, མཱནོ ཨིསྶཱ མཙྪརིཡཾ ཀུཀྐུཙྩཾ ཐིནམིདྡྷནྟི ཨིམེ ཚཡེཝ ཨནིཡཏཡེཝཱཔནཀཱ.

ཨེཝཾ ཡེཝཱཔནཱ སབྦེ, ནིཡཏཱནིཡཏཱ དས;

ནིདྡིཊྛཱ པཱཔཙིཏྟེསུ, ཧཏཔཱཔེན ཏཱདིནཱ.

ཏཏྠ ཕསྶོཏི ཨཀུསལཙིཏྟསཧཛཱཏོ ཕསྶོ. ཨེས ནཡོ སེསེསུཔི. ན ཧིརཱིཡཏཱིཏི ཨཧིརིཀོ, ཨཧིརིཀསྶ བྷཱཝོ ཨཧིརིཀཾ. ཀཱཡདུཙྩརིཏཱདཱིཧི ཨོཏྟཔྤཏཱིཏི ཨོཏྟཔྤཾ, ན ཨོཏྟཔྤཾ ཨནོཏྟཔྤཾ. ཏཏྠ ཀཱཡདུཙྩརིཏཱདཱིཧི ཨཛིགུཙྪནལཀྑཎཾ, ཨལཛྫཱལཀྑཎཾ ཝཱ ཨཧིརིཀཾ, ཨནོཏྟཔྤཾ ཏེཧེཝ ཨསཱརཛྫནལཀྑཎཾ, ཨནུཏྟཱསལཀྑཎཾ ཝཱ.

ལུབྦྷནྟི ¶ ཏེན, སཡཾ ཝཱ ལུབྦྷཏི, ལུབྦྷནམཏྟམེཝ ཝཱ ཏནྟི ལོབྷོ. སོ ཨཱརམྨཎགཧཎལཀྑཎོ མཀྐཊཱལེཔོ ཝིཡ, ཨབྷིསངྒརསོ ཏཏྟཀཔཱལེ པཀྑིཏྟམཾསཔེསི ཝིཡ, ཨཔརིཙྩཱགཔཙྩུཔཊྛཱནོ ཏེལཉྫནརཱགོ ཝིཡ, སཾཡོཛནིཡེསུ དྷམྨེསུ ཨསྶཱདདསྶནཔདཊྛཱནོ.

མུཡ྄ཧནྟི ཏེན, སཡཾ ཝཱ མུཡ྄ཧཏི, མུཡ྄ཧནམཏྟམེཝ ཝཱ ཏནྟི མོཧོ. སོ ཙིཏྟསྶ ཨནྡྷབྷཱཝལཀྑཎོ, ཨཉྙཱཎལཀྑཎོ ཝཱ, ཨསམྤཊིཝེདྷརསོ, ཨཱརམྨཎསབྷཱཝཙྪཱདནརསོ ཝཱ, ཨནྡྷཀཱརཔཙྩུཔཊྛཱནོ, ཨཡོནིསོམནསིཀཱརཔདཊྛཱནོ.

མིཙྪཱ པསྶནྟི ཏཱཡ, སཡཾ ཝཱ མིཙྪཱ པསྶཏི, མིཙྪཱདསྶནམཏྟམེཝ ཝཱ ཨེསཱཏི མིཙྪཱདིཊྛི. སཱ ཨཡོནིསོཨབྷིནིཝེསལཀྑཎཱ, པརཱམཱསརསཱ, མིཙྪཱབྷིནིཝེསཔཙྩུཔཊྛཱནཱ, ཨརིཡཱནཾ ཨདསྶནཀཱམཏཱདིཔདཊྛཱནཱ.

ཨུདྡྷཏབྷཱཝོ ¶ ཨུདྡྷཙྩཾ. ཏཾ ཨཝཱུཔསམལཀྑཎཾ ཝཱཏཱབྷིགྷཱཏཙལཛལཾ ཝིཡ, ཨནཝཊྛཱནརསཾ ཝཱཏཱབྷིགྷཱཏཙལདྷཛཔཊཱཀཱ ཝིཡ, བྷནྟཏྟཔཙྩུཔཊྛཱནཾ པཱསཱཎཱབྷིགྷཱཏསམུདྡྷཏབྷསྨཾ ཝིཡ, ཨཡོནིསོམནསིཀཱརཔདཊྛཱནཾ.

མཉྙཏཱིཏི ¶ མཱནོ. སོ ཨུཎྞཏིལཀྑཎོ, སམྤགྒཧཎརསོ, ཀེཏུཀམྱཏཱཔཙྩུཔཊྛཱནོ, དིཊྛིཝིཔྤཡུཏྟལོབྷཔདཊྛཱནོ.

ཨིསྶཏཱིཏི ཨིསྶཱ. སཱ པརསམྤཏྟཱིནཾ ཨུསཱུཡནལཀྑཎཱ, ཏཏྠེཝ ཨནབྷིརཏིརསཱ, ཏཏོ ཝིམུཁབྷཱཝཔཙྩུཔཊྛཱནཱ, པརསམྤཏྟིཔདཊྛཱནཱ.

མཙྪརབྷཱཝོ མཙྪརིཡཾ. ཏཾ ཨཏྟནོ སམྤཏྟཱིནཾ ནིགུཧཎལཀྑཎཾ, ཏཱསཾཡེཝ པརེཧི སཱདྷཱརཎབྷཱཝཨཀྑམནརསཾ, སངྐོཙནཔཙྩུཔཊྛཱནཾ, ཨཏྟསམྤཏྟིཔདཊྛཱནཾ.

ཀུཙྪིཏཾ ¶ ཀཏཾ ཀུཀཏཾ, ཏསྶ བྷཱཝོ ཀུཀྐུཙྩཾ. ཏཾ པཙྪཱནུཏཱཔལཀྑཎཾ, ཀཏཱཀཏཱནུསོཙནརསཾ, ཝིཔྤཊིསཱརཔཙྩུཔཊྛཱནཾ, ཀཏཱཀཏཔདཊྛཱནཾ.

ཐིནཏཱ ཐིནཾ. མིདྡྷཏཱ མིདྡྷཾ. ཨནུསྶཱཧནསཾསཱིདནཏཱ, ཨསཏྟིཝིགྷཱཏོ ཙཱཏི ཨཏྠོ. ཐིནཉྩ མིདྡྷཉྩ ཐིནམིདྡྷཾ. ཏཏྠ ཐིནཾ ཨནུསྶཱཧནལཀྑཎཾ, ཝཱིརིཡཝིནོདནརསཾ, སཾསཱིདནབྷཱཝཔཙྩུཔཊྛཱནཾ. མིདྡྷཾ ཨཀམྨཉྙཏཱལཀྑཎཾ, ཨོནཧནརསཾ, ལཱིནཏཱཔཙྩུཔཊྛཱནཾ, ཨུབྷཡམྤི ཨཡོནིསོམནསིཀཱརཔདཊྛཱནཾ. སེསཱ ཀུསལེ ཝུཏྟནཡེན ཝེདིཏབྦཱ.

ཨེཏྠ པན ཝིཏཀྐཝཱིརིཡསམཱདྷཱིནཾ མིཙྪཱསངྐཔྤམིཙྪཱཝཱཡཱམམིཙྪཱསམཱདྷཡོ ཝིསེསཀཱ. ཨིཏི ཨིམེ ཨེཀཱུནཝཱིསཏི ཙེཏསིཀཱ པཋམཱཀུསལཙིཏྟེན སམྤཡོགཾ གཙྪནྟཱིཏི ཝེདིཏབྦཱ. ཡཐཱ ཙ པཋམེན, ཨེཝཾ དུཏིཡེནཱཔི. སསངྑཱརབྷཱཝོ ཙེཏྠ ཐིནམིདྡྷསྶ ནིཡཏབྷཱཝོ ཙ ཝིསེསོ. ཏཏིཡེན པཋམེ ཝུཏྟེསུ ཋཔེཏྭཱ དིཊྛིཾ སེསཱ ཨཊྛཱརས ཝེདིཏབྦཱ. མཱནོ པནེཏྠ ཨནིཡཏོ ཧོཏི, དིཊྛིཡཱ སཧ ན ཨུཔྤཛྫཏཱིཏི. ཙཏུཏྠེན དུཏིཡེ ཝུཏྟེསུ ཋཔེཏྭཱ དིཊྛིཾ ཨཝསེསཱ ཝེདིཏབྦཱ. ཨེཏྠཱཔི ཙ མཱནོ ཨནིཡཏོ ཧོཏི. པཉྩམེན པཋམེ ཝུཏྟེསུ ཋཔེཏྭཱ པཱིཏིཾ ཨཝསེསཱ སམྤཡོགཾ གཙྪནྟཱིཏི. སོམནསྶཊྛཱནེ པནེཏྠ ཨུཔེཀྑཱ པཝིཊྛཱ. ཚཊྛེནཱཔི པཉྩམེ ཝུཏྟསདིསཱ ཨེཝ. སསངྑཱརཏཱ ¶ , ཐིནམིདྡྷསྶ ནིཡཏབྷཱཝོ ཙ ཝིསེསོ. སཏྟམེན པཉྩམེ ཝུཏྟེསུ ཋཔེཏྭཱ དིཊྛིཾ ཨཝསེསཱ ཝེདིཏབྦཱ. མཱནོ པནེཏྠ ཨནིཡཏོ. ཨཊྛམེན ཚཊྛེ ཝུཏྟེསུ ཋཔེཏྭཱ དིཊྛིཾ ཨཝསེསཱ ཝེདིཏབྦཱ. ཨེཏྠཱཔི མཱནོ ¶ ཨནིཡཏོ ཧོཏི. ཨེཝཾ ལོབྷམཱུལཙེཏསིཀཱ ཝེདིཏབྦཱ.

དོམནསྶསཧགཏེསུ པཊིགྷསམྤཡུཏྟེསུ དོསམཱུལེསུ དྭཱིསུ པཋམེན ཨསངྑཱརིཀེན སམྤཡུཏྟཱ ནིཡཏཱ སརཱུཔེནཱགཏཱ ¶ ཏེརས. སེཡྻཐིདཾ – ཕསྶོ དོམནསྶཝེདནཱ སཉྙཱ ཙེཏནཱ ཙིཏྟེཀགྒཏཱ ཝིཏཀྐོ ཝིཙཱརོ ཝཱིརིཡཾ ཛཱིཝིཏཾ ཨཧིརིཀཾ ཨནོཏྟཔྤཾ དོསོ མོཧོ ཙེཏི ཨིམེ ཏེརས དྷམྨཱ ཚནྡཱདཱིཧི ཙཏཱུཧི ནིཡཏཡེཝཱཔནཀེཧི སཏྟརས ཧོནྟི ཨིསྶཱམཙྪརིཡཀུཀྐུཙྩེསུ ཨནིཡཏེསུ ཏཱིསུ ཨེཀེན སཧ ཨཊྛཱརས ཧོནྟི, ཨེཏེཔི ཏཡོ ན ཨེཀཏོ ཨུཔྤཛྫནྟི.

ཏཏྠ དུཊྛུ མནོཏི དུམནོ, དུམནསྶ བྷཱཝོ དོམནསྶཾ, དོམནསྶཝེདནཱཡེཏཾ ཨདྷིཝཙནཾ. ཏེན སཧགཏཾ དོམནསྶསཧགཏཾ. ཏཾ ཨནིཊྛཱརམྨཎཱནུབྷཝནལཀྑཎཾ, ཨནིཊྛཱཀཱརསམྦྷོགརསཾ, ཙེཏསིཀཱབཱདྷཔཙྩུཔཊྛཱནཾ, ཨེཀནྟེནེཝ ཧདཡཝཏྠུཔདཊྛཱནཾ.

དུསྶནྟི ཏེན, སཡཾ ཝཱ དུསྶཏི, དུསྶནམཏྟམེཝ ཝཱ ཏནྟི དོསོ. སོ ཙཎྜིཀྐལཀྑཎོ པཧཏཱསཱིཝིསོ ཝིཡ, ཝིསཔྤནརསོ ཝིསནིཔཱཏོ ཝིཡ, ཨཏྟནོ ནིསྶཡདཧནརསོ ཝཱ དཱཝགྒི ཝིཡ, དུསྶནཔཙྩུཔཊྛཱནོ ལདྡྷོཀཱསོ ཝིཡ སཔཏྟོ, ཨཱགྷཱཏཝཏྠུཔདཊྛཱནོ. ཨཝསེསཱ ཧེཊྛཱ ཝུཏྟཔྤཀཱརཱཝ. ཨིཏི ཨིམེ སཏྟརས ཝཱ ཨཊྛཱརས ཝཱ ནཝམེན སམྤཡོགཾ གཙྪནྟཱིཏི ཝེདིཏབྦཱ. ཡཐཱ ཙ ནཝམེན, ཨེཝཾ དསམེནཱཔི. སསངྑཱརཏཱ, པནེཏྠ ཐིནམིདྡྷསམྦྷཝོ ཙ ཝིསེསོ.

དྭཱིསུ པན མོཧམཱུལེསུ ཝིཙིཀིཙྪཱསམྤཡུཏྟེན ཨེཀཱདསམེན སམྤཡུཏྟཱ ཏཱཝ ཕསྶོ ཨུཔེཀྑཱཝེདནཱ སཉྙཱ ཙེཏནཱ ཝིཏཀྐོ ཝིཙཱརོ ཝཱིརིཡཾ ཛཱིཝིཏཾ ཙིཏྟཊྛིཏི ཨཧིརིཀཾ ཨནོཏྟཔྤཾ མོཧོ ཝིཙིཀིཙྪཱཏི སརཱུཔེནཱགཏཱ ཏེརས, ཨུདྡྷཙྩཾ མནསིཀཱརོཏི དྭེ ཡེཝཱཔནཀཱ ནིཡཏཱ. ཏེཧི སདྡྷིཾ པནྣརས ཧོནྟི.

ཏཏྠ ¶ པཝཏྟཊྛིཏིམཏྟཱ ཨེཀགྒཏཱ. ཝིགཏཱ ཙིཀིཙྪཱཏི ཝིཙིཀིཙྪཱ. སབྷཱཝཾ ཝིཙིནནྟོ ¶ ཨེཏཱཡ ཀིཙྪཏི ཀིལམཏཱིཏི ཝིཙིཀིཙྪཱ. སཱ སཾསཡལཀྑཎཱ, ཀམྤནརསཱ, ཨནིཙྪཡཔཙྩུཔཊྛཱནཱ, ཨཡོནིསོམནསིཀཱརཔདཊྛཱནཱ. སེསཱ ཝུཏྟནཡཱ ཨེཝ.

དྭཱདསམེན ཨུདྡྷཙྩསམྤཡུཏྟེན སམྤཡུཏྟཱ སརཱུཔེནཱགཏཱ ¶ ཝིཙིཀིཙྪཱསཧགཏེ ཝུཏྟེསུ ཝིཙིཀིཙྪཱཧཱིནཱ ཨུདྡྷཙྩཾ སརཱུཔེན ཨཱགཏཾ, ཏསྨཱ ཏེརསེཝ ཧོནྟི. ཝིཙིཀིཙྪཱཡ ཨབྷཱཝེན པནེཏྠ ཨདྷིམོཀྑོ ཨུཔྤཛྫཏི, ཏེན སདྡྷིཾ ཙུདྡས ཧོནྟི. ཨདྷིམོཀྑསམྦྷཝཏོ སམཱདྷི བལཝཱ ཧོཏི, ཨདྷིམོཀྑམནསིཀཱརཱ དྭེ ཡེཝཱཔནཀཱ, ཏེཧི སཧ པནྣརསེཝ ཧོནྟི. ཨེཝཾ ཏཱཝ ཨཀུསལཙེཏསིཀཱ ཝེདིཏབྦཱ.

ཨིདཱནི ཨབྱཱཀཏཱ ཝུཙྩནྟི, ཨབྱཱཀཏཱ པན དུཝིདྷཱ ཝིཔཱཀཀིརིཡབྷེདཏོ. ཏཏྠ ཝིཔཱཀཱ ཀུསལཱ ཝིཡ བྷཱུམིཝསེན ཙཏུབྦིདྷཱ ཀཱམཱཝཙརཾ རཱུཔཱཝཙརཾ ཨརཱུཔཱཝཙརཾ ལོཀུཏྟརཉྩེཏི. ཏཏྠ ཀཱམཱཝཙརཝིཔཱཀཱ སཧེཏུཀཱཧེཏུཀཝསེན དུཝིདྷཱ. ཏཏྠ སཧེཏུཀཝིཔཱཀསམྤཡུཏྟཱ སཧེཏུཀཱ. ཏེ སཧེཏུཀཀཱམཱཝཙརཀུསལསམྤཡུཏྟསདིསཱ. ཡཱ པན ཀརུཎཱམུདིཏཱ ཨནིཡཏཱ, ཏཱ སཏྟཱརམྨཎཏྟཱ ཝིཔཱཀེསུ ནུཔྤཛྫནྟི. ཀཱམཱཝཙརཝིཔཱཀཱནཾ ཨེཀནྟཔརིཏྟཱརམྨཎཏྟཱ ཝིརཏིཡོ པནེཏྠ ཨེཀནྟཀུསལཏྟཱ ན ལབྦྷནྟི. ཝིབྷངྒེ ‘‘པཉྩ སིཀྑཱཔདཱ ཀུསལཱཡེཝཱ’’ཏི ཧི ཝུཏྟཾ. ཨེཝཾ ཀཱམཱཝཙརསཧེཏུཀཝིཔཱཀཙེཏསིཀཱ ཝེདིཏབྦཱ.

ཏེཏྟིཾསཱདིདྭཡེ དྷམྨཱ, དྭཏྟིཾསེཝ ཏཏོ པརེ;

བཱཏྟིཾས པཉྩམེ ཚཊྛེ, ཨེཀཏིཾས ཏཏོ པརེ.

ཨཧེཏུཀཙིཏྟསམྤཡུཏྟཱ ¶ པན ཨཧེཏུཀཱ. ཏེསུ ཙཀྑུཝིཉྙཱཎསམྤཡུཏྟཱ ཏཱཝ ཕསྶོ ཨུཔེཀྑཱཝེདནཱ སཉྙཱ ཙེཏནཱ ཛཱིཝིཏཾ ཙིཏྟཊྛིཏཱིཏི སརཱུཔེནཱགཏཱ ཚ, མནསིཀཱརེན ཙ སཏྟ ཧོནྟི. སོཏགྷཱནཛིཝ྄ཧཱཀཱཡཝིཉྙཱཎསམྤཡུཏྟཱཔི སཏྟ སཏྟེཝ ཙེཏསིཀཱ. ཏཏྠ ཀཱཡཝིཉྙཱཎསམྤཡུཏྟེསུ པན ཨུཔེཀྑཱཋཱནེ སུཁཝེདནཱ པཝིཊྛཱ. སཱ ཀཱཡིཀསཱཏལཀྑཎཱ, པཱིཎནརསཱ, སེསཱ ཝུཏྟནཡཱ ཨེཝ.

ཨིཊྛཱརམྨཎཡོགསྨིཾ, ཙཀྑུཝིཉྙཱཎཀཱདིསུ;

སཏི ཀསྨཱ ཨུཔེཀྑཱཝ, ཝུཏྟཱ ཙཏཱུསུ སཏྠུནཱ.

ཨུཔཱདཱཡ ¶ ཙ རཱུཔེན, ཨུཔཱདཱརཱུཔཀེ པན;

སངྒྷཊྚནཱནིགྷཾསསྶ, དུབྦལཏྟཱཏི དཱིཔཡེ.

པསཱདཾ པནཏིཀྐམྨ, ཀཱུཊཾཝ པིཙུཔིཎྜཀཾ;

བྷཱུཏརཱུཔེན བྷཱུཏཱནཾ, གྷཊྚནཱཡ སུཁཱདིཀཾ.

ཏསྨཱ ¶ ཀཱཡཝིཉྙཱཎཾ སུཁཱདིསམྤཡུཏྟནྟི ཝེདིཏབྦཾ. མནོདྷཱཏུནཱ སམྤཡུཏྟཱ སརཱུཔེནཱགཏཱ ཙཀྑུཝིཉྙཱཎེན སདྡྷིཾ ཝུཏྟཱ ཚ, ཝིཏཀྐཝིཙཱརེཧི སཧ ཨཊྛ, ཨདྷིམོཀྑམནསིཀཱརེཧི དྭཱིཧི ཡེཝཱཔནཀེཧི དས དྷམྨཱ ཧོནྟི. ཏཐཱ མནོཝིཉྙཱཎདྷཱཏུཨུཔེཀྑཱསཧགཏེན. སོམནསྶསཧགཏེན པཱིཏིཨདྷིཀཱ ཝེདནཱཔརིཝཏྟནཉྩ ནཱནཏྟཾ. ཏསྨཱཝེཏྠ ཨེཀཱདས དྷམྨཱ ཧོནྟི. ཨེཝཾ ཨཧེཏུཀཱཔི ཀཱམཱཝཙརཝིཔཱཀཙེཏསིཀཱ ཝེདིཏབྦཱ.

རཱུཔཱཝཙརཝིཔཱཀཙིཏྟསམྤཡུཏྟཱ པན རཱུཔཱཝཙརཱ. ཨརཱུཔཱཝཙརཝིཔཱཀཙིཏྟསམྤཡུཏྟཱ ཨརཱུཔཱཝཙརཱ. ཏེ སབྦེཔི ཨཏྟནོ ཨཏྟནོ ཀུསལཙིཏྟསམྤཡུཏྟཙེཏསིཀེཧི སདིསཱཡེཝཱཏི.

ལོཀུཏྟརཝིཔཱཀཙིཏྟསམྤཡུཏྟཱ ¶ ལོཀུཏྟརཱ. ཏེ སབྦེ ཏེསཾཡེཝ ལོཀུཏྟརཝིཔཱཀཙིཏྟཱནཾ སདིསཱ ཀུསལཙིཏྟསམྤཡུཏྟེཧི ཙེཏསིཀེཧི སདིསཱ. ཨེཝཾ རཱུཔཱཝཙརཱརཱུཔཱཝཙརལོཀུཏྟརཝིཔཱཀཙེཏསིཀཱ ཝེདིཏབྦཱ.

ཨཀུསལཝིཔཱཀཙིཏྟསམྤཡུཏྟཱ པན ཨཀུསལཝིཔཱཀཙེཏསིཀཱ ནཱམ. ཏེ པན ཀུསལཝིཔཱཀཱཧེཏུཀཙིཏྟེསུ ཙཀྑུཝིཉྙཱཎཱདཱིསུ ཝུཏྟཙེཏསིཀསདིསཱ. ཨེཏྠ པན ཀཱཡཝིཉྙཱཎེ དུཀྑཝེདནཱ པཝིཊྛཱ. སཱ ཀཱཡིཀཱབཱདྷལཀྑཎཱ. སེསཱ ཝུཏྟནཡཱཡེཝཱཏི. ཨེཝཾ ཚཏྟིཾས ཝིཔཱཀཙིཏྟསམྤཡུཏྟཙེཏསིཀཱ ཝེདིཏབྦཱ.

ཀིརིཡཱབྱཱཀཏཱ ཙ ཙེཏསིཀཱ བྷཱུམིཏོ ཏིཝིདྷཱ ཧོནྟི ཀཱམཱཝཙརཱ རཱུཔཱཝཙརཱ ཨརཱུཔཱཝཙརཱཏི. ཏཏྠ ཀཱམཱཝཙརཱ སཧེཏུཀཱཧེཏུཀཏོ དུཝིདྷཱ ཧོནྟི. ཏེསུ སཧེཏུཀཀིརིཡཙིཏྟསམྤཡུཏྟཱ སཧེཏུཀཱ, ཏེ པན ཨཊྛཧི ཀཱམཱཝཙརཀུསལཙིཏྟསམྤཡུཏྟེཧི སམཱནཱ ཋཔེཏྭཱ ཝིརཏིཏྟཡཾ ཨནིཡཏཡེཝཱཔནཀེསུ ཀརུཎཱམུདིཏཱཡེཝ ཨུཔྤཛྫནྟི. ཨཧེཏུཀཀིརིཡཙིཏྟསམྤཡུཏྟཱ ཨཧེཏུཀཱ, ཏེ ཀུསལཝིཔཱཀཱཧེཏུཀམནོདྷཱཏུམནོཝིཉྙཱཎདྷཱཏུཙིཏྟསམྤཡུཏྟེཧི སམཱནཱ. མནོཝིཉྙཱཎདྷཱཏུདྭཡེ ¶ པན ཝཱིརིཡིནྡྲིཡཾ ཨདྷིཀཾ. ཝཱིརིཡིནྡྲིཡསམྦྷཝཏོ པནེཏྠ བལཔྤཏྟོ སམཱདྷི ཧོཏི. ཧསིཏུཔྤཱདཙིཏྟེན སམྤཡུཏྟཱ དྭཱདས དྷམྨཱ ཧོནྟི པཱིཏིཡཱ སཧ. ཨཡམེཏྠ ཝིསེསོ.

རཱུཔཱཝཙརཀིརིཡཙིཏྟསམྤཡུཏྟཱ པན རཱུཔཱཝཙརཱ. ཨརཱུཔཱཝཙརཀིརིཡཙིཏྟསམྤཡུཏྟཱ ཨརཱུཔཱཝཙརཱ. ཏེ སབྦེཔི སཀསཀབྷཱུམིཀུསལཙིཏྟསམྤཡུཏྟེཧི སམཱནཱཏི. ཨེཝཾ ཝཱིསཏི ཀིརིཡཙིཏྟསམྤཡུཏྟཱ ཙ ཙེཏསིཀཱ ཝེདིཏབྦཱ.

ཨེཏྟཱཝཏཱ ¶ ¶ ཀུསལཱཀུསལཝིཔཱཀཀིརིཡབྷེདབྷིནྣེན ཨེཀཱུནནཝུཏིཡཱ ཙིཏྟེན སམྤཡུཏྟཱ ཙེཏསིཀཱ ནིདྡིཊྛཱ ཧོནྟི.

ཨིཏི ཨབྷིདྷམྨཱཝཏཱརེ ཙེཏསིཀནིདྡེསོ ནཱམ

སབྦེ ¶ ¶ ཙེཏསིཀཱ ཝུཏྟཱ, བུདྡྷེནཱདིཙྩབནྡྷུནཱ;

ནཱམསཱམཉྙཏོཡེཝ, དྭེཔཉྙཱས བྷཝནྟི ཏེ.

སེཡྻཐིདཾ – ཕསྶོ ཝེདནཱ སཉྙཱ ཙེཏནཱ ཝིཏཀྐོ ཝིཙཱརོ པཱིཏི ཙིཏྟེཀགྒཏཱ ཝཱིརིཡཾ ཛཱིཝིཏཾ ཚནྡོ ཨདྷིམོཀྑོ མནསིཀཱརོ ཏཏྲམཛ྄ཛྷཏྟཏཱ སདྡྷཱ སཏི ཧིརཱི ཨོཏྟཔྤཾ ཨལོབྷོ ཨདོསོ ཨམོཧོ ཀཱཡཔྤསྶདྡྷིཨཱདཱིནི ཚ ཡུགཱནི, ཏིསྶོ ཝིརཏིཡོ, ཀརུཎཱ མུདིཏཱ ལོབྷོ དོསོ མོཧོ ཨུདྡྷཙྩཾ མཱནོ དིཊྛི ཨིསྶཱ མཙྪརིཡཾ ཀུཀྐུཙྩཾ ཐིནཾ མིདྡྷཾ ཝིཙིཀིཙྪཱ ཨཧིརིཀཾ ཨནོཏྟཔྤཉྩཱཏི.

ཙཏུཔཉྙཱསདྷཱ ¶ ཀཱམེ, རཱུཔེ པཉྩདསེརིཏཱ;

ཏེ ཧོནྟི དྭཱདསཱརཱུཔེ, ཙཏྟཱལཱིསམནཱསཝཱ.

ཨེཀཝཱིསསཏཾ སབྦེ, ཙིཏྟུཔྤཱདཱ སམཱསཏོ;

ཨེཏེསུ ཏེསམུཔྤཏྟིཾ, ཨུདྡྷརིཏྭཱ པནེཀཀཾ.

ཕསྶཱདཱིནཾ ཏུ དྷམྨཱནཾ, པཝཀྑཱམི ཨིཏོ པརཾ;

པཱཊཝཏྠཱཡ བྷིཀྑཱུནཾ, ཙིཏྟཙེཏསིཀེསྭཧཾ.

ཨེཀགྒཏཱ མནཀྐཱརོ, ཛཱིཝིཏཾ ཕསྶཔཉྩཀཾ;

ཨཊྛེཏེ ཨཝིནིབྦྷོགཱ, ཨེཀུཔྤཱདཱ སཧཀྑཡཱ.

ཕསྶོ ཙ ཝེདནཱ སཉྙཱ, ཙེཏནཱ ཛཱིཝིཏིནྡྲིཡཾ;

ཨེཀགྒཏཱ མནཀྐཱརོ, སབྦསཱདྷཱརཎཱ ཨིམེ.

ཝིཏཀྐོ པཉྩཔཉྙཱས-ཙིཏྟེསུ སམུདཱིརིཏོ;

ཙཱརོ ཚསཊྛིཙིཏྟེསུ, ཛཱཡཏེ ནཏྠི སཾསཡོ.

ཨེཀཔཉྙཱསཙིཏྟེསུ ¶ , པཱིཏི ཏེསཊྛིཡཱ སུཁཾ;

ཨུཔེཀྑཱ པཉྩཔཉྙཱས-ཙིཏྟེ དུཀྑཾ ཏུ ཏཱིསུ ཧི.

ཧོཏི དྭཱསཊྛིཙིཏྟེསུ, སོམནསྶིནྡྲིཡཾ པན;

དུཀྑིནྡྲིཡཾ པནེཀསྨིཾ, ཏཐེཀམྷི སུཁིནྡྲིཡཾ.

པཉྩུཏྟརསཏེ ¶ ཙིཏྟེ, ཝཱིརིཡཾ ཨཱཧ ནཱཡཀོ;

ཙཏུཏྟརསཏེ ཙིཏྟེ, སམཱདྷིནྡྲིཡམབྲཝི.

སབྦཱཧེཏུཀཙིཏྟཱནི, ཋཔེཏྭཱ ཙེཀཧེཏུཀེ;

ཨེཀུཏྟརསཏེ ཙིཏྟེ, ཚནྡསྶུཔྤཏྟིམུདྡིསེ.

ཋཔེཏྭཱ དས ཝིཉྙཱཎེ, ཝིཙིཀིཙྪཱཡུཏམྤི ཙ;

དསུཏྟརསཏེ ཙིཏྟེ, ཨདྷིམོཀྑོ ཨུདཱིརིཏོ.

སདྡྷཱ ¶ སཏི ཧིརོཏྟཔྤཾ, ཨལོབྷཱདོསམཛ྄ཛྷཏཱ;

ཚལེ༹ཝ ཡུགལཱ༹ ཙཱཏི, དྷམྨཱ ཨེཀཱུནཝཱིསཏི.

ཨེཀནཝུཏིཡཱ ཙིཏྟེ, ཛཱཡནྟི ནིཡཏཱ ཨིམེ;

ཨཧེཏུཀེསུ ཙིཏྟེསུ, ཨཔུཉྙེསུ ན ཛཱཡརེ.

ཨེཀཱུནཱསཱིཏིཡཱ ཙིཏྟེ, པཉྙཱ ཛཱཡཏི སབྦདཱ;

ཨཊྛཝཱིསཏིཡཱ ཙིཏྟེ, ཀརུཎཱམུདིཏཱ སིཡུཾ.

ཀཱམཱཝཙརཔུཉྙེསུ, སབྦལོཀུཏྟརེསུ ཙ;

ཙཏྟཱལཱིསཝིདྷེ ཙིཏྟེ, སཱཊྛཀེ ཝིརཏིཏྟཡཾ.

སདྡྷཱ སཏི ཧིརོཏྟཔྤཾ, ཨལོབྷཱདིཏྟཡམྤི ཙ;

ཡུགལཱ༹ནི ཚ མཛ྄ཛྷཏྟཾ, ཀརུཎཱམུདིཏཱཔི ཙ.

ཏཐཱ ཝིརཏིཡོ ཏིསྶོ, སབྦེ ཏེ པཉྩཝཱིསཏི;

ཀུསལཱབྱཱཀཏཱ ཙཱཔི, ཀུསལེན པཀཱསིཏཱ.

ཨཧིརཱིཀམནོཏྟཔྤཾ, མོཧོ ཨུདྡྷཙྩམེཝ ཙ;

དྭཱདསཱཔུཉྙཙིཏྟེསུ, ནིཡཏཱཡེཝ ཛཱཡརེ.

ལོབྷོ ¶ དོསོ ཙ མོཧོ ཙ, མཱནོ དིཊྛི ཙ སཾསཡོ;

མིདྡྷམུདྡྷཙྩཀུཀྐུཙྩཾ, ཐིནཾ མཙྪརིཡམྤི ཙ.

ཨཧིརཱིཀམནོཏྟཔྤཾ, ཨིསྶཱ ཙ དོམནསྶཀཾ;

ཨེཏེ ཨཀུསལཱ ཝུཏྟཱ, ཨེཀནྟེན མཧེསིནཱ.

ལོབྷོ ཨཊྛསུ ནིདྡིཊྛོ, ཝུཏྟཱ ཙཏཱུསུ དིཊྛིཏུ;

མཱནོ དིཊྛིཝིཡུཏྟེསུ, དོསོདྭཱིསྭེཝ ཛཱཡཏེ.

ཨིསྶཱམཙྪེརཀུཀྐུཙྩཱ, དྭཱིསུ ཛཱཡནྟི ནོ སཧ;

ཝིཙིཀིཙྪཱ པནེཀསྨིཾ, ཐིནམིདྡྷཾ ཏུ པཉྩསུ.

ཕསྶོ ¶ ཙ ཝེདནཱ སཉྙཱ, ཙེཏནཱ ཛཱིཝིཏཾ མནོ;

ཝིཏཀྐོ ཙ ཝིཙཱརོ ཙ, པཱིཏི ཝཱིརིཡསམཱདྷི ཙ.

ཚནྡོ ཙེཝཱདྷིམོཀྑོ ཙ, མནསིཀཱརོ ཙ ཙུདྡས;

ཀུསལཱཀུསལཱ ཙེཝ, ཧོནྟི ཨབྱཱཀཏཱཔི ཙ.

ཨེཀཱུནཏིཾསཙིཏྟེསུ, ཛྷཱནཾ པཉྩངྒིཀཾ མཏཾ;

ཙཏུཛྷཱནངྒཡུཏྟཱནི, སཏྟཏིཾསཱཏི ནིདྡིསེ.

ཨེཀཱདསཝིདྷཾ ཙིཏྟཾ, ཏིཝངྒིཀམུདཱིརིཏཾ;

ཙཏུཏིཾསཝིདྷཾ ཙིཏྟཾ, དུཝངྒིཀམུདཱིརིཏཾ.

སབྷཱཝེནཱཝིཏཀྐེསུ ¶ , ཛྷཱནངྒཱནི ན ཨུདྡྷརེ;

སབྦཱཧེཏུཀཙིཏྟེསུ, མགྒངྒཱནི ན ཨུདྡྷརེ.

ཏཱིཎི སོལ༹སཙིཏྟེསུ, ཨིནྡྲིཡཱནི ཝདེ བུདྷོ;

ཨེཀསྨིཾ པན ཙཏྟཱརི, པཉྩ ཏེརསསུདྡྷརེ.

སཏྟ དྭཱདསཙིཏྟེསུ, ཨིནྡྲིཡཱནི ཛིནོབྲཝི;

ཨེཀེནཱུནེསུ ཨཊྛེཝ, ཙཏྟཱལཱིསམནེསུ ཙ.

ཙཏྟཱལཱིསཱཡ ¶ ཙིཏྟེསུ, ནཝཀཾ ནཱཡཀོབྲཝི;

ཨེཝཾ ཨིནྡྲིཡཡོགོཔི, ཝེདིཏབྦོ ཝིབྷཱཝིནཱ.

ཨམགྒངྒཱནི ནཱམེཏྠ, ཨཊྛཱརས ཨཧེཏུཀཱ;

ཛྷཱནངྒཱནི ན ཝིཛྫནྟི, ཝིཉྙཱཎེསུ དྭིཔཉྩསུ.

ཨེཀཾ ཙིཏྟཾ དུམགྒངྒཾ, ཏིམགྒངྒཱནི སཏྟསུ;

ཙཏྟཱལཱིསཱཡ ཙིཏྟེསུ, མགྒོ སོ ཙཏུརངྒིཀོ.

པཉྩདྡསསུ ཙིཏྟེསུ, མགྒོ པཉྩངྒིཀོ མཏོ;

ཝུཏྟོ དྭཏྟིཾསཙིཏྟེསུ, མགྒོ སཏྟངྒིཀོཔི ཙ.

མགྒོ ¶ ཨཊྛསུ ཙིཏྟེསུ, མཏོ ཨཊྛངྒིཀོཏི ཧི;

ཨེཝཾ ཏུ སབྦཙིཏྟེསུ, མགྒངྒཱནི སམུདྡྷརེ.

བལཱནི དྭེ དྭིཙིཏྟེསུ, ཨེཀསྨིཾ ཏཱིཎི དཱིཔཡེ;

ཨེཀཱདསསུ ཙཏྟཱརི, ཚ དྭཱདསསུ ནིདྡིསེ.

ཨེཀཱུནཱསཱིཏིཡཱ སཏྟ, སོལ༹སེཝཱབལཱནི ཏུ;

ཙིཏྟམེཝཾ ཏུ ཝིཉྙེཡྻཾ, སབལཾ ཨབལམྤི ཙ.

ཨིཏི ཨབྷིདྷམྨཱཝཏཱརེ ཙེཏསིཀཝིབྷཱགནིདྡེསོ ནཱམ

ཨིཏོ ¶ ¶ པརཾ པཝཀྑཱམི, ནཡམེཀཝིདྷཱདིཀཾ;

ཨཱབྷིདྷམྨིཀབྷིཀྑཱུནཾ, བུདྡྷིཡཱ པན ཝུདྡྷིཡཱ.

སབྦམེཀཝིདྷཾ ཙིཏྟཾ, ཝིཛཱནནསབྷཱཝཏོ;

དུཝིདྷཉྩ བྷཝེ ཙིཏྟཾ, ཨཧེཏུཀསཧེཏུཏོ.

པུཉྙཱཔུཉྙཝིཔཱཀཱ ཧི, ཀཱམེ དས ཙ པཉྩ ཙ;

ཀྲིཡཱ ཏིསྶོཏི སབྦེཔི, ཨཊྛཱརས ཨཧེཏུཀཱ.

ཨེཀསཏྟཏི སེསཱནི, ཙིཏྟུཔྤཱདཱ མཧེསིནཱ;

སཧེཏུཀཱཏི ནིདྡིཊྛཱ, ཏཱདིནཱ ཧེཏུཝཱདིནཱ.

སཝཏྠུཀཱཝཏྠུཀཏོ ¶ , ཏཐོབྷཡཝསེན ཙ;

སབྦཾ ཝུཏྟཔཀཱརཾ ཏུ, ཏིཝིདྷཾ ཧོཏི མཱནསཾ.

སབྦོ ཀཱམཝིཔཱཀོ ཙ, རཱུཔེ པཉྩདསཱཔི ཙ;

ཨཱདིམགྒོ སིཏུཔྤཱདོ, མནོདྷཱཏུ ཀྲིཡཱཔི ཙ.

དོམནསྶདྭཡཉྩཱཔི, ཏེཙཏྟཱལཱིས མཱནསཱ;

ནུཔྤཛྫནྟི ཝིནཱ ཝཏྠུཾ, ཨེཀནྟེན སཝཏྠུཀཱ.

ཨརཱུཔཱཝཙརཔཱཀཱ ཙ, ཨེཀནྟེན ཨཝཏྠུཀཱ;

དྭཱཙཏྟཱལཱིས སེསཱནི, ཙིཏྟཱནུབྷཡཐཱ སིཡུཾ.

ཨེཀེཀཱརམྨཎཾ ཙིཏྟཾ, པཉྩཱརམྨཎམེཝ ཙ;

ཚལཱ༹རམྨཎཀཉྩེཏི, ཨེཝམྤི ཏིཝིདྷཾ སིཡཱ.

ཝིཉྙཱཎཱནི ཙ དྭེཔཉྩ, ཨཊྛ ལོཀུཏྟརཱནི ཙ;

སབྦཾ མཧགྒཏཉྩེཝ, ཋཔེཏྭཱབྷིཉྙམཱནསཾ.

ཏེཙཏྟཱལཱིས ¶ ཝིཉྙེཡྻཱ, ཨེཀེཀཱརམྨཎཱ པན;

མནོདྷཱཏུཏྟཡཾ ཏཏྠ, པཉྩཱརམྨཎམཱིརིཏཾ.

ཏེཙཏྟཱལཱིས སེསཱནི, ཚལཱ༹རམྨཎིཀཱ མཏཱ;

ཏཐཱ ཙ ཏིཝིདྷཾ ཙིཏྟཾ, ཀུསལཱཀུསལཱདིཏོ.

ཨཧེཏུཾ ཨེཀཧེཏུཉྩ, དྭིཧེཏུཉྩ ཏིཧེཏུཀཾ;

ཨེཝཾ ཙཏུབྦིདྷཾ ཙིཏྟཾ, ཝིཉྙཱཏབྦཾ ཝིབྷཱཝིནཱ.

ཧེཊྛཱ མཡཱཔི ནིདྡིཊྛཱ, ཨཊྛཱརས ཨཧེཏུཀཱ;

ཝིཙིཀིཙྪུདྡྷཙྩསཾཡུཏྟཾ, ཨེཀཧེཏུམུདཱིརིཏཾ.

ཀཱམེ ¶ དྭཱདསདྷཱ པུཉྙ-ཝིཔཱཀཀྲིཡཏོ པན;

དསདྷཱཀུསལཱ ཙཱཏི, བཱཝཱིསཏི དུཧེཏུཀཱ.

ཀཱམེ ¶ དྭཱདསདྷཱ པུཉྙ-ཝིཔཱཀཀྲིཡཏོ པན;

སབྦཾ མཧགྒཏཉྩེཝ, ཨཔྤམཱཎཾ ཏིཧེཏུཀཾ.

རཱུཔཱིརིཡཱཔཐཝིཉྙཏྟི-ཛནཀཱཛནཀཱདིཏོ;

ཨེཝཉྩཱཔི ཧི ཏཾ ཙིཏྟཾ, ཧོཏི སབྦཾ ཙཏུབྦིདྷཾ.

དྭཱདསཱཀུསལཱ ཏཏྠ, ཀུསལཱ ཀཱམདྷཱཏུཡཱ;

ཏཐཱ དས ཀྲིཡཱ ཀཱམེ, ཨབྷིཉྙཱམཱནསཾ དྭཡཾ.

སམུཊྛཱཔེནྟི རཱུཔཱནི, ཀཔྤེནྟི ཨིརིཡཱཔཐཾ;

ཛནཡནྟི ཙ ཝིཉྙཏྟིཾ, ཨིམེ དྭཏྟིཾས མཱནསཱ.

ཀུསལཱ ཙ ཀྲིཡཱ ཙེཝ, ཏེ མཧགྒཏམཱནསཱ;

ཨཊྛཱནཱསཝཙིཏྟཱནི, ཚབྦཱིསཏི ཙ མཱནསཱ.

སམུཊྛཱཔེནྟི རཱུཔཱནི, ཀཔྤེནྟི ཨིརིཡཱཔཐཾ;

ཙོཔནཾ ན ཙ པཱཔེནྟི, དྭིཀིཙྩཱ ནིཡཏཱ ཨིམེ.

ཋཔེཏྭཱ དས ཝིཉྙཱཎེ, ཝིཔཱཀཱ དྭཱིསུ བྷཱུམིསུ;

ཀྲིཡཱ ཙེཝ མནོདྷཱཏུ, ཨིམཱནེཀཱུནཝཱིསཏི.

སམུཊྛཱཔེནྟི ¶ རཱུཔཱནི, ན ཀརོནྟིཏརདྭཡཾ;

པུན དྭེཔཉྩཝིཉྙཱཎཱ, ཝིཔཱཀཱ ཙ ཨརཱུཔིསུ.

སབྦེསཾ སནྡྷིཙིཏྟཉྩ, ཙུཏིཙིཏྟཉྩཱརཧཏོ;

ན ཀརོནྟི ཏིཀིཙྩཱནི, ཨིམེ སོལ༹ས མཱནསཱ.

ཨེཀདྭིཏིཙཏུཊྛཱན-པཉྩཊྛཱནཔབྷེདཏོ;

པཉྩདྷཱ ཙིཏྟམཀྑཱསི, པཉྩནིམྨལལོཙནོ.

ཀུསལཱཀུསལཱ སབྦེ, ཙིཏྟུཔྤཱདཱ མཧཱཀྲིཡཱ;

མཧགྒཏཱ ཀྲིཡཱ ཙེཝ, ཙཏྟཱརོ ཕལམཱནསཱ.

སབྦེཝ ¶ པཉྩཔཉྙཱས, ནིཔྤཔཉྩེན སཏྠུནཱ;

ཛཝནཊྛཱནཏོཡེཝ, ཨེཀཊྛཱནེ ནིཡཱམིཏཱ.

པུན དྭེཔཉྩཝིཉྙཱཎཱ, དསྶནེ སཝནེ ཏཐཱ;

གྷཱཡནེ སཱཡནེ ཋཱནེ, ཕུསནེ པཊིཔཱཊིཡཱ.

མནོདྷཱཏུཏྟིཀཾ ཋཱནེ, ཨཱཝཛྫནེ པཊིཙྪནེ;

ཨཊྛསཊྛི བྷཝནྟེཏེ, ཨེཀཊྛཱནིཀཏཾ གཏཱ.

པུན དྭིཊྛཱནིཀཾ ནཱམ, ཙིཏྟདྭཡམུདཱིརིཏཾ;

སོམནསྶཡུཏཾ པཉྩ-དྭཱརེ སནྟཱིརཎཾ སིཡཱ.

ཏདཱརམྨཎཾ ཚདྭཱརེ, བལཝཱརམྨཎེ སཏི;

ཏཐཱ ཝོཊྛབྦནཾ ཧོཏི, པཉྩདྭཱརེསུ ཝོཊྛབོ.

མནོདྭཱརེསུ སབྦེསཾ, ཧོཏི ཨཱཝཛྫནཾ པན;

ཨིདཾ དྭིཊྛཱནིཀཾ ནཱམ, ཧོཏི ཙིཏྟདྭཡཾ པན.

པཊིསནྡྷིབྷཝངྒསྶ, ཙུཏིཡཱ ཋཱནཏོ པན;

མཧགྒཏཝིཔཱཀཱ ཏེ, ནཝ ཏིཊྛཱནིཀཱ མཏཱ.

ཨཊྛ ¶ ཀཱམཱ མཧཱཔཱཀཱ, པཊིསནྡྷིབྷཝངྒཏོ;

ཏདཱརམྨཎཏོ ཙེཝ, ཙུཏིཊྛཱནཝསེན ཙ.

ཙཏུཊྛཱནིཀཙིཏྟཱནི ¶ , ཨཊྛ ཧོནྟཱིཏི ནིདྡིསེ;

ཀུསལཱཀུསལཔཱཀཾ ཏུ-པེཀྑཱསཧགཏདྭཡཾ.

སནྟཱིརཎཾ བྷཝེ པཉྩ-དྭཱརེ ཚདྭཱརིཀེསུ ཙ;

ཏདཱརམྨཎཏཾ ཡཱཏི, བལཝཱརམྨཎེ སཏི.

པཊིསནྡྷིབྷཝངྒཱནཾ, ཙུཏིཊྛཱནཝསེན ཙ;

པཉྩཊྛཱནིཀཙིཏྟནྟི, ཨིདཾ དྭཡམུདཱིརིཏཾ.

པཉྩཀིཙྩཾ ¶ དྭཡཾ ཙིཏྟཾ, ཙཏུཀིཙྩཾ པནཊྛཀཾ;

ཏིཀིཙྩཾ ནཝཀཾ དྭེ ཏུ, དྭིཀིཙྩཱ སེསམེཀཀཾ.

བྷཝངྒཱཝཛྫནཉྩེཝ, དསྶནཾ སམྤཊིཙྪནཾ;

སནྟཱིརཎཾ ཝོཊྛབྦནཾ, ཛཝནཾ བྷཝཏི སཏྟམཾ.

ཚབྦིདྷཾ ཧོཏི ཏཾ ཚནྣཾ, ཝིཉྙཱཎཱནཾ པབྷེདཏོ;

སཏྟདྷཱ སཏྟཝིཉྙཱཎ-དྷཱཏཱུནཾ ཏུ པབྷེདཏོ.

ཨེཀེཀཱརམྨཎཾ ཚཀྐཾ, པཉྩཱརམྨཎབྷེདཏོ;

ཚལཱ༹རམྨཎཏོ ཙེཝ, ཧོཏི ཨཊྛཝིདྷཾ མནོ.

ཏཏྠ དྭེཔཉྩཝིཉྙཱཎཱ, ཧོནྟི ཨེཀེཀགོཙརཱ;

རཱུཔཱརམྨཎིཀཱ དྭེ ཏུ, དྭེ དྭེ སདྡཱདིགོཙརཱ.

སབྦཾ མཧགྒཏཾ ཙིཏྟཾ, པཉྩཱབྷིཉྙཱཝིཝཛྫིཏཾ;

སབྦཾ ལོཀུཏྟརཉྩེཏི, ཨེཀེཀཱརམྨཎཾ བྷཝེ.

ཨེཀེཀཱརམྨཎཾ ཚཀྐ-མིདཾ ཉེཡྻཾ ཝིབྷཱཝིནཱ;

པཉྩཱརམྨཎིཀཾ ནཱམ, མནོདྷཱཏུཏྟཡཾ བྷཝེ.

ཀཱམཱཝཙརཙིཏྟཱནི, ཙཏྟཱལཱིསཾ ཏཐེཀཀཾ;

ཨབྷིཉྙཱནི ཙ སབྦཱནི, ཚལཱ༹རམྨཎིཀཱནིཏི.

ཙིཏྟཾ ནཝཝིདྷཾ ཧོཏི, སཏྟཝིཉྙཱཎདྷཱཏུསུ;

པཙྪིམཉྩ ཏིདྷཱ ཀཏྭཱ, ཀུསལཱཀུསལཱདིཏོ.

པུཉྙཱཔུཉྙཝསེནེཝ ¶ , ཝིཔཱཀཀྲིཡབྷེདཏོ;

ཚསཏྟཏིཝིདྷོ བྷེདོ, མནོཝིཉྙཱཎདྷཱཏུཡཱ.

མནོདྷཱཏུཾ དྭིདྷཱ ཀཏྭཱ, ཝིཔཱཀཀྲིཡབྷེདཏོ;

ནཝདྷཱ པུབྦཝུཏྟེཧི, དསདྷཱ ཧོཏི མཱནསཾ.

དྷཱཏུདྭཡཾ ¶ ཏིདྷཱ ཀཏྭཱ, པཙྪིམཾ པུན པཎྜིཏོ;

ཨེཀཱདསཝིདྷཾ ཙིཏྟཾ, ཧོཏཱིཏི པརིདཱིཔཡེ.

མནོཝིཉྙཱཎདྷཱཏུམྤི, ཀུསལཱཀུསལཱདིཏོ;

ཙཏུདྷཱ ཝིབྷཛིཏྭཱན, ཝདེ དྭཱདསདྷཱ ཋིཏཾ.

བྷཝེ ¶ ཙུདྡསདྷཱ ཙིཏྟཾ, ཙུདྡསཊྛཱནབྷེདཏོ;

པཊིསནྡྷིབྷཝངྒསྶ, ཙུཏིཡཱཝཛྫནསྶ ཙ.

པཉྩནྣཾ དསྶནཱདཱིནཾ, སམྤཊིཙྪནཙེཏསོ;

སནྟཱིརཎསྶ ཝོཊྛབྦ-ཛཝནཱནཾ ཝསེན ཙ.

ཨེཝཾ ཙུདྡསདྷཱ ཙིཏྟཾ, ཧོཏཱིཏི པརིདཱིཔཡེ.

བྷཱུམིཔུགྒལནཱནཱཏྟ-ཝསེན ཙ པཝཏྟིཏོ;

བཧུདྷཱ པནིདཾ ཙིཏྟཾ, ཧོཏཱིཏི ཙ ཝིབྷཱཝཡེ.

ཨིཏི ཨབྷིདྷམྨཱཝཏཱརེ ཨེཀཝིདྷཱདིནིདྡེསོ ནཱམ

བྷཱུམིཔུགྒལཙིཏྟུཔྤཏྟིནིདྡེསོ

ཨིཏོ ¶ ¶ པརཾ པཝཀྑཱམི, བུདྡྷིཝུདྡྷིཀརཾ ནཡཾ;

ཙིཏྟཱནཾ བྷཱུམཱིསུཔྤཏྟིཾ, པུགྒལཱནཾ ཝསེན ཙ.

དེཝཱཙེཝ ¶ མནུསྶཱ ཙ, ཏིསྶོ ཝཱཔཱཡབྷཱུམིཡོ;

གཏིཡོ པཉྩ ནིདྡིཊྛཱ, སཏྠུནཱ ཏུ ཏཡོ བྷཝཱ.

བྷཱུམིཡོ ཏཏྠ ཏིཾསེཝ, ཏཱསུ ཏིཾསེཝ པུགྒལཱ;

བྷཱུམཱིསྭེཏཱསུ ཨུཔྤནྣཱ, སབྦེ ཙ པན པུགྒལཱ.

པཊིསནྡྷིཀཙིཏྟཱནཾ, ཝསེནེཀཱུནཝཱིསཏི;

པཊིསནྡྷི ཙ ནཱམེསཱ, དུཝིདྷཱ སམུདཱིརིཏཱ.

ཨཙིཏྟཀཱ སཙིཏྟཱ ཙ, ཨསཉྙཱིནམཙིཏྟཀཱ;

སེསཱ སཙིཏྟཀཱ ཉེཡྻཱ, སཱ པནེཀཱུནཝཱིསཏི.

པཊིསནྡྷིཝསེནེཝ, ཧོནྟི ཝཱིསཏི པུགྒལཱ;

ཨིདྷ ཙིཏྟཱདྷིཀཱརཏྟཱ, ཨཙིཏྟཱ ན ཙ ཨུདྡྷཊཱ.

ཨཧེཏུདྭིཏིཧེཏཱུཏི, པུགྒལཱ ཏིཝིདྷཱ སིཡུཾ;

ཨརིཡཱ པན ཨཊྛཱཏི, སབྦེ ཨེཀཱདསེརིཏཱ.

ཨེཏེསཾ པན སབྦེསཾ, པུགྒལཱནཾ པབྷེདཏོ;

ཙིཏྟཱནཾ བྷཱུམཱིསུཔྤཏྟིཾ, བྷཎཏོ མེ ནིབོདྷཐ.

ཏིཾསབྷཱུམཱིསུ ཙིཏྟཱནི, ཀཏི ཛཱཡནྟི མེ ཝད;

ཙུདྡསེཝ ཏུ ཙིཏྟཱནི, ཧོནྟི སབྦཱསུ བྷཱུམིསུ.

སདཱ ཝཱིསཏི ཙིཏྟཱནི, ཀཱམེཡེཝ བྷཝེ སིཡུཾ;

པཉྩ རཱུཔབྷཝེཡེཝ, ཙཏྟཱརེཝ ཨརཱུཔིསུ.

ཀཱམརཱུཔབྷཝེསྭེཝ ¶ , ཨཊྛཱརས བྷཝནྟི ཧི;

དྭེཙཏྟཱལཱིས ཙིཏྟཱནི, ཧོནྟི ཏཱིསུ བྷཝེསུཔི.

ཋཔེཏྭཱ པན སབྦཱསཾ, ཙཏསྶོཔཱཡབྷཱུམིཡོ;

ཏེརསེཝ ཙ ཙིཏྟཱནི, ཧོནྟི ཚབྦཱིསབྷཱུམིསུ.

ཨཔརཱནི ¶ ཙཏསྶོཔི, ཋཔེཏྭཱརུཔྤབྷཱུམིཡོ;

ཙིཏྟཱནི པན ཛཱཡནྟི, ཚ ཙ ཚབྦཱིསབྷཱུམིསུ.

སུདྡྷཱཝཱསིཀདེཝཱནཾ ¶ , ཋཔེཏྭཱ པཉྩ བྷཱུམིཡོ;

པཉྩ ཙིཏྟཱནི ཛཱཡནྟེ, པཉྩཝཱིསཏིབྷཱུམིསུ.

ཨཔརཱནི དུཝེ ཧོནྟི, པཉྩཝཱིསཏིབྷཱུམིསུ;

ཋཔེཏྭཱ ནེཝསཉྙཉྩ, ཙཏསྶོཔཱཡབྷཱུམིཡོ.

དྭེཔི ཙིཏྟཱནི ཛཱཡནྟི, ཙཏུཝཱིསཏིབྷཱུམིསུ;

ཨཱཀིཉྩཉྙཾ ནེཝསཉྙཉྩ, ཋཔེཏྭཱཔཱཡབྷཱུམིཡོ.

ཨཔཱཡབྷཱུམིཡོ ཧིཏྭཱ, ཏིསྶོ ཨཱརུཔྤབྷཱུམིཡོ;

དྭེཡེཝ པན ཙིཏྟཱནི, ཧོནྟི ཏེཝཱིསབྷཱུམིསུ.

ཨརཱུཔེ ཙ ཨཔཱཡེ ཙ, ཋཔེཏྭཱ ཨཊྛ བྷཱུམིཡོ;

ཨེཀཱདསཝིདྷཾ ཙིཏྟཾ, ཧོནྟི དྭཱཝཱིསབྷཱུམིསུ.

སུདྡྷཱཝཱསེ ཨཔཱཡེ ཙ, ཋཔེཏྭཱ ནཝ བྷཱུམིཡོ;

ཨེཀཝཱིསཱསུ ནིཙྩམྤི, ཙཏྟཱརོཝ བྷཝནྟི ཧི.

ཨེཀཾ སཏྟརསསྭེཝ, ཙིཏྟཾ ཛཱཡཏི བྷཱུམིསུ;

སུདྡྷཱཝཱསེ ཋཔེཏྭཱ ཏུ, ཨཔཱཡཱརུཔྤབྷཱུམིཡོ.

དྭཱདསེཝ ཏུ ཛཱཡནྟེ, ཨེཀཱདསསུ བྷཱུམིསུ;

ཋཔེཏྭཱ པན སབྦཱཔི, བྷཱུམིཡོ ཧི མཧགྒཏཱ.

ཀཱམཱཝཙརདེཝཱནཾ, མནུསྶཱནཾ ཝསེན ཏུ;

ཨཊྛ ཙིཏྟཱནི ཛཱཡནྟེ, སདཱ སཏྟསུ བྷཱུམིསུ.

པཉྩམཛ྄ཛྷཱནཔཱཀེཀོ ¶ , ཛཱཡཏེ ཚསུ བྷཱུམིསུ;

ཙཏྟཱརི པན ཙིཏྟཱནི, ཏཱིསུ ཏཱིསྭེཝ བྷཱུམིསུ.

ཙཏྟཱརི ¶ པན ཙིཏྟཱནི, ཧོནྟི ཨེཀེཀབྷཱུམིསུ;

ཨརཱུཔཱཝཙརཔཱཀཱནཾ, ཝསེན པརིདཱིཔཡེ.

ནརཀཱདཱིསྭཔཱཡེསུ, ཙཏཱུསུཔི ཙ ཛཱཡརེ;

དྭེཔཉྙཱསཱཝསེསཱནི, ནུཔྤཛྫནྟི ཀདཱཙིཔི.

ཀཱམེ དེཝམནུསྶཱནཾ, ནཝ པཱཀཱ མཧགྒཏཱ;

ནེཝ ཛཱཡནྟི ཛཱཡནྟི, ཨསཱིཏི ཧདཡཱ སདཱ.

ཀཱམེ ཨཊྛ མཧཱཔཱཀཱ, དོམནསྶདྭཡམྤི ཙ;

ཏཐཱ གྷཱནཱདིཝིཉྙཱཎ-ཏྟཡཾ པཱཀཱ ཨཔུཉྙཛཱ.

ནཏྠི ཨཱརུཔྤཔཱཀཱ ཙ, རཱུཔཱཝཙརབྷཱུམིཡཾ;

ཨིམེཧི སཧ ཙིཏྟེཧི, ཏཡོ མགྒཱ ཕལདྭཡཾ.

ཙཏྟཱརོ དིཊྛིསཾཡུཏྟཱ, ཝིཙིཀིཙྪཱཡུཏམྤི ཙ;

ཙཏྟཱརོ ཧེཊྛིམཱ པཱཀཱ, སུདྡྷཱཝཱསེ ན ལབྦྷརེ.

སེསཱནི ཨེཀཔཉྙཱས, ཙིཏྟཱནི པན ལབྦྷརེ;

རཱུཔཱཝཙརིཀཱ སབྦེ, ཝིཔཱཀཱ ཀཱམདྷཱཏུཡཱ.

དོམནསྶཱདིམགྒོ ཙ, ཀྲིཡཱ ཙ དྭེ ཨཧེཏུཀཱ;

ཏེཙཏྟཱལཱིས ཙིཏྟཱནི, ནཏྠི ཨཱརུཔྤབྷཱུམིཡཾ.

ཨེཝཾ ¶ བྷཱུམིཝསེནེཝ, ཙིཏྟུཔྤཏྟིཾ ཝིབྷཱཝཡེ;

ཏཐཱ ཨེཀཱདསནྣམྤི, པུགྒལཱནཾ ཝསེན ཙ.

ཨཧེཏུཀསྶ སཏྟསྶ, ཛཱཡནྟེ པཉྩབྷཱུམིསུ;

དྭེཔཉྙཱསཱཝསེསཱནི, ན ཛཱཡནྟི ཀདཱཙིཔི.

ཨཧེཏུཀསྶ ཝུཏྟེཧི, ཀཱམཔཱཀཱ དུཧེཏུཀཱ;

དུཧེཏུཀསྶ ཛཱཡནྟེ, ཙཏྟཱལཱིསཾ ཏཐེཀཀཾ.

སབྦེ མཧགྒཏཱ ཙེཝ, སབྦེཔི ཙ ཨནཱསཝཱ;

ཏིཧེཏུཀཱ ཝིཔཱཀཱ ཙ, ཀཱམེ ནཝ ཀྲིཡཱཔི ཙ.

དུཧེཏུནོ ན ཛཱཡནྟི, ཙཏྟཱལཱིསཾ ཏཐཱཊྛ ཙ;

ཀཱམཱཝཙརསཏྟསྶ, ཏིཧེཏུཔཊིསནྡྷིནོ.

པུཐུཛྫནསྶ ཛཱཡནྟེ, ཙཏུཔཉྙཱས མཱནསཱ;

དྭིཧེཏུཀསྶ ཝུཏྟཱནི, ཙཏྟཱལཱིསཾ ཏཐེཀཀཾ.

ཙཏྟཱརོ ཉཱཎསཾཡུཏྟཱ, ཝིཔཱཀཱ ཀཱམདྷཱཏུཡཱ;

རཱུཔཱརཱུཔེསུ པུཉྙཱནི, ཙཏུཔཉྙཱས མཱནསཱ.

པུཐུཛྫནསྶ ཛཱཡནྟེ, པཉྩཏིཾས ན ཛཱཡརེ;

ཚདེཝེསུ མནུསྶེསུ, སོཏཱཔནྣསྶ དེཧིནོ.

པཉྙཱསེཝསྶ ཙིཏྟཱནི, ཛཱཡནྟཱིཏི ཝིནིདྡིསེ;

ནཝཏིཾསེཝ ཙིཏྟཱནི, ནུཔྤཛྫནྟཱིཏི དཱིཔཡེ.

སོཏཱཔནྣསྶ ཝུཏྟཱནི, ཋཔེཏྭཱ པཋམཾ ཕལཾ;

ཨཏྟནོཝ ཕལེནསྶ, སཀདཱགཱམིནོ སིཡུཾ.

སོཏཱཔནྣསྶ ¶ ¶ ཝུཏྟཱནི, ཋཔེཏྭཱ པཊིགྷདྭཡཾ;

དུཏིཡཾ ཙ ཕལཾ ཧིཏྭཱ, ཡཱནི ཙིཏྟཱནི ཏཱནིཏི;

ཨནཱགཱམིསྶ སཏྟསྶ, ཛཱཡནྟཱིཏི ཝིནིདྡིསེ.

ཀཏི ཙིཏྟཱནི ཛཱཡནྟེ, ཀཱམེ ཨརཧཏོ པན;

ཙཏྟཱརཱིསཉྩ ཙཏྟཱརི, ཀཱམེ ཨརཧཏོ སིཡུཾ.

མགྒཊྛཱནཾ ཙཏུནྣམྤི, པུགྒལཱནཾ སཀཾ སཀཾ;

མགྒཙིཏྟཾ སིཡཱ ཏེསཾ, ཨེཀཙིཏྟཀྑཎཱ ཧི ཏེ.

པུཐུཛྫནསྶ ཏཱིསྭེཝ, པཋམཛ྄ཛྷཱནབྷཱུམིསུ;

པཉྩཏིཾསེཝ ཙིཏྟཱནི, ཛཱཡནྟེཏི ཝིནིདྡིསེ.

གྷཱནཱདཱིསུ ཙ ཝིཉྙཱཎ-ཏྟཡཾ སཏྟ ཨཔུཉྙཛཱ;

མཧཱཔཱཀཱ ཏཐཱ པཱཀཱ, ཨུཔརིཛ྄ཛྷཱནབྷཱུམིཀཱ.

ཝིཔཱཀཱཔི ཙ ཨཱརུཔྤཱ, དོམནསྶདྭཡམྤི ཙ;

ཨཊྛཱརས ཀྲིཡཱ ཙེཝ, ཨཊྛ ལོཀུཏྟརཱནི ཙ.

པཋམཛ྄ཛྷཱནནིབྦཏྟ-པུཐུཛྫནསརཱིརིནོ;

ཨེཏཱནི ཙཏུཔཉྙཱས, ཙིཏྟཱནི ན ཙ ལབྦྷརེ.

སོཏཱཔནྣསྶ ¶ ཙིཏྟཱནི, ཏཏྠེཀཏིཾས ཛཱཡརེ;

པུཐུཛྫནསྶ ཝུཏྟེསུ, ཧིཏྭཱ ཙཱཔུཉྙཔཉྩཀཾ.

སཀདཱགཱམིནོ ཏཏྠ, ཋཔེཏྭཱ པཋམཾ ཕལཾ;

ཨེཀཏིཾསེཝ ཛཱཡནྟེ, པཀྑིཔིཏྭཱ སཀཾ ཕལཾ.

ཨནཱགཱམིསྶ ཏཏྠེཝ, ཋཔེཏྭཱ དུཏིཡཾ ཕལཾ;

ཨེཀཏིཾསེཝ ཛཱཡནྟེ, ཕལཙིཏྟེན ཨཏྟནོ.

ཝིཉྙཱཎཾ ཙཀྑུསོཏཱནཾ, པུཉྙཛཾ སམྤཊིཙྪནཾ;

སནྟཱིརཎདྭཡཉྩེཝ, ཀྲིཡཙིཏྟཱནི ཝཱིསཏི.

ཨརཧཏྟཕལཾ ¶ ¶ པཱཀོ, པཋམཛ྄ཛྷཱནསམྦྷཝོ;

སཏྟཝཱིསཏི ཙིཏྟཱནི, ཨརཧནྟསྶ ཛཱཡརེ.

པུཐུཛྫནསྶ ཏཱིསྭེཝ, དུཏིཡཛ྄ཛྷཱནབྷཱུམིསུ;

ཚཏྟིཾས དུཏིཡཛ྄ཛྷཱན-ཏཏིཡཛ྄ཛྷཱནཔཱཀཏོ.

པུཐུཛྫནསྶ ཝུཏྟེསུ, ཧིཏྭཱ ཝཱཔུཉྙཔཉྩཀཾ;

སོཏཱཔནྣསྶ བཱཏྟིཾས, ཕལེན སཧ ཨཏྟནོ.

སོཏཱཔནྣསྶ ཝུཏྟེསུ, ཋཔེཏྭཱ པཋམཾ ཕལཾ;

བཱཏྟིཾས ཕལཙིཏྟེན, སཀདཱགཱམིསྶ ཨཏྟནོ.

སཀདཱགཱམཱིསུ ཝུཏྟེསུ, ཋཔེཏྭཱ དུཏིཡཾ ཕལཾ;

ཨནཱགཱམིཕལེནསྶ, བཱཏྟིཾསེཝ བྷཝནྟི ཧི.

ཨརཧནྟསྶ ཏཱིསྭེཝ, ཨཊྛཝཱིསཏི ཨཏྟནོ;

ཕལེན དུཏིཡཛ྄ཛྷཱན-ཏཏིཡཛ྄ཛྷཱནཔཱཀཏོ.

པརིཏྟཀསུབྷཱདཱིནཾ, དེཝཱནཾ ཏཱིསུ བྷཱུམིསུ;

པཉྩཏིཾསེཝ ཛཱཡནྟེ, ཙཏུཏྠཛ྄ཛྷཱནཔཱཀཏོ.

སོཏཱཔནྣསྶ ཏཏྠེཀ-ཏིཾས ཙིཏྟཱནི ཛཱཡརེ;

སཀདཱགཱམིནོ ཨེཝཾ, ཏཐཱནཱགཱམིནོཔི ཙ.

ཁཱིཎཱསཝསྶ ཏཏྠེཝ, སཏྟཝཱིསཏི མཱནསཱ;

ཏཐཱ ཝེཧཔྥལེ ཙཱཔི, སབྦེསཾ ཧོནྟི མཱནསཱ.

ཨེཀཏིཾསེཝ ཙིཏྟཱནི, སུདྡྷཱཝཱསིཀབྷཱུམིསུ;

ཨནཱགཱམིཀསཏྟསྶ, ཧོནྟཱིཏི པརིདཱིཔཡེ.

ཨརཧཏོ པན ཏཏྠེཝ, མཱནསཱ སཏྟཝཱིསཏི;

ཨེཝཾ རཱུཔཱིསུ ཙིཏྟཱནི, ཝིཉྙེཡྻཱནི ཝིབྷཱཝིནཱ.

ཙཏུཝཱིསཏི ¶ ཙིཏྟཱནི, པཋམཱརུཔྤབྷཱུམིཡཾ;

པུཐུཛྫནསྶ སཏྟསྶ, ཛཱཡནྟཱིཏི ཝིནིདྡིསེ.

སོཏཱཔནྣསྶ ¶ ཏཏྠེཝ, ཋཔེཏྭཱཔུཉྙཔཉྩཀཾ;

སམཝཱིསཏི ཙིཏྟཱནི, ཕལེན སཧ ཨཏྟནོ.

སཀདཱགཱམིནོ ཏཏྠ, ཏཐཱནཱགཱམིནོཔི ཙ;

ཛཱཡནྟི ཝཱིས ཙིཏྟཱནི, པུབྦཔུབྦཕལཾ ཝིནཱ.

ཁཱིཎཱསཝསྶ ཏཏྠེཝ, དསཔཉྩ ཙ མཱནསཱ;

པུཐུཛྫནསྶ སཏྟསྶ, དུཏིཡཱརུཔྤབྷཱུམིཡཾ.

ཧོནྟི ¶ ཏེཝཱིས ཙིཏྟཱནི, ཨིཏི ཝཏྭཱ ཝིབྷཱཝཡེ;

ཏིཎྞནྣམྤེཏྠ སེཁཱནཾ, ཙིཏྟཱནེཀཱུནཝཱིསཏི.

ཙུདྡསེཝ ཏུ ཙིཏྟཱནི, དུཏིཡཱརུཔྤབྷཱུམིཡཾ;

ཀྲིཡཱདྭཱདས པཱཀེཀོ, ཕལཾ ཁཱིཎཱསཝསྶ ཏུ.

པུཐུཛྫནསྶ སཏྟསྶ, ཏཏིཡཱརུཔྤབྷཱུམིཡཾ;

བཱཝཱིསཏི ཙ ཙིཏྟཱནི, བྷཝནྟཱིཏི པཀཱསཡེ.

ཨཊྛཱརསེཝ ཙིཏྟཱནི, སོཏཱཔནྣསྶ ཛཱཡརེ;

སཀདཱགཱམིནོ ཏཱནི, ཋཔེཏྭཱ པཋམཾ ཕལཾ.

སཀདཱགཱམིཝུཏྟེསུ, ཋཔེཏྭཱ དུཏིཡཾ ཕལཾ;

ཨཊྛཱརསེཝ ཙིཏྟཱནི, ཨནཱགཱམིསྶ ཛཱཡརེ.

ཏེརསེཝ ཙ ཙིཏྟཱནི, ཏཏིཡཱརུཔྤབྷཱུམིཡཾ;

ཁཱིཎཱསཝསྶ སཏྟསྶ, བྷཝནྟཱིཏི ཝིནིདྡིསེ.

ཨེཀཝཱིསཏི ཙིཏྟཱནི, ཙཏུཏྠཱརུཔྤབྷཱུམིཡཾ;

པུཐུཛྫནསྶ སཏྟསྶ, ཛཱཡནྟཱིཏི ཝིནིདྡིསེ.

སོཏཱཔནྣསྶ ¶ སཏྟསྶ, སཏྟརས པཀཱསཡེ;

སཀདཱགཱམིནོ ཏཱནི, ཋཔེཏྭཱ པཋམཾ ཕལཾ.

སཀདཱགཱམིཝུཏྟེསུ, ཋཔེཏྭཱ དུཏིཡཾ ཕལཾ;

ཧོནྟི སཏྟརསེཝསྶ, ཨནཱགཱམིསྶ མཱནསཱ.

དྭཱདསེཝ ¶ ཏུ ཙིཏྟཱནི, ཙཏུཏྠཱརུཔྤབྷཱུམིཡཾ;

ཛཱཡནྟི ཨརཧནྟསྶ, ཨིཏི ཝཏྭཱ ཝིབྷཱཝཡེ.

ཧེཊྛིམཱནཾ ཨརཱུཔཱིནཾ, བྲཧྨཱནཾ ཨུཔརཱུཔརི;

ཨརཱུཔཀུསལཱ ཙེཝ, ཨུཔྤཛྫནྟི ཀྲིཡཱཔི ཙ.

ཨུདྡྷམུདྡྷམརཱུཔཱིནཾ, ཧེཊྛིམཱ ཧེཊྛིམཱ པན;

ཨཱརུཔྤཱནེཝ ཛཱཡནྟེ, དིཊྛཱདཱིནཝཏོ ཀིར.

ཋཔེཏྭཱ པཋམཾ མགྒཾ, ཀུསལཱནུཏྟརཱ ཏཡོ;

ཀཱམཱཝཙརཔུཉྙཱནི, ཨཔུཉྙཱནི ཏཐཱ དས.

ཙཏྟཱརཱརུཔྤཔུཉྙཱནི, སབྦེ པཱཀཱ ཨནུཏྟརཱ;

པཋམཱརུཔྤཔཱཀོ ཙ, ནཝ ཀཱམཀྲིཡཱཔི ཙ.

ཨཱརུཔྤཱཔི ཀྲིཡཱ སབྦཱ, ཏེཙཏྟཱལཱིས མཱནསཱ;

ཨུཔྤཛྫནྟི པནེཏཱནི, པཋམཱརུཔྤབྷཱུམིཡཾ.

སབྦོ ཀཱམཝིཔཱཀོ ཙ, སབྦོ རཱུཔོམཧགྒཏོ;

ཙིཏྟུཔྤཱདོ མནོདྷཱཏུ, དོམནསྶདྭཡམྤི ཙ.

ཨཱདིམགྒོ ཏཡོ པཱཀཱ, ཨཱརུཔྤཱ ཙ ཏཐཱུཔརི;

ཚཙཏྟཱལཱིས ནཏྠེཏྠ, པཋམཱརུཔྤབྷཱུམིཡཾ.

ཝུཏྟེསུ པན ཙིཏྟེསུ, པཋམཱརུཔྤབྷཱུམིཡཾ;

ཋཔེཏྭཱ པཋམཱརུཔྤ-ཏྟཡཾ པཱཀོ ཙ ཨཏྟནོ.

ཏཱལཱིསེཏཱནི ¶ ཛཱཡནྟེ, དུཏིཡཱརུཔྤབྷཱུམིཡཾ;

ཨེཝཾ སེསདྭཡེ ཉེཡྻཱ, ཧིཏྭཱ ཧེཊྛིམཧེཊྛིམཾ.

ཨཏྟནོ ¶ ཨཏྟནོ པཱཀཱ, ཙཏྟཱརོ ཙ ཨནཱསཝཱ;

ཝིཔཱཀཱ ཧོནྟི སབྦེཝ, ཙཏཱུསྭཱརུཔྤབྷཱུམིསུ.

ཝོཊྛབྦནེན ཙིཏྟེན, ཀཱམེ ཨཊྛ མཧཱཀྲིཡཱ;

ཙཏསྶོཔི ཙ ཨཱརུཔྤཱ, ཏེརསེཝ ཀྲིཡཱ སིཡུཾ.

ཁཱིཎཱསཝསྶ ¶ ཛཱཡནྟེ, པཋམཱརུཔྤབྷཱུམིཡཾ;

དྭཱདསེཝ ཀྲིཡཱ ཧོནྟི, དུཏིཡཱརུཔྤབྷཱུམིཡཾ.

ཨེཀཱདས ཀྲིཡཱ ཧོནྟི, ཏཏིཡཱརུཔྤབྷཱུམིཡཾ;

དསེཝ ཙ ཀྲིཡཱ ཉེཡྻཱ, ཙཏུཏྠཱརུཔྤབྷཱུམིཡཾ.

ཨརཧཏོ པན ཙིཏྟཱནི, ཧོནྟི ཨེཀཱུནཝཱིསཏི;

ཨརཧཏྟཾ ཀྲིཡཱ སབྦཱ, ཋཔེཏྭཱཝཛྫནདྭཡཾ.

ཙཏུནྣཉྩ ཕལཊྛཱནཾ, ཏིཧེཏུཀཔུཐུཛྫནེ;

ཏེརསེཝ ཙ ཙིཏྟཱནི, བྷཝནྟཱིཏི པཀཱསཡེ.

ཙཏྟཱརོ ཉཱཎསཾཡུཏྟཱ, མཧཱཔཱཀཱ ཏཐཱ ནཝ;

རཱུཔཱརཱུཔཝིཔཱཀཱ ཙ, ཏེརསེཝ བྷཝནྟིམེ.

ཙཏུནྣཉྩ ཕལཊྛཱནཾ, དུཧེཏུཀཔུཐུཛྫནེ;

ཉཱཎཧཱིནཱནི ཙཏྟཱརི, ཝིཔཱཀཱ ཨེཝ ཛཱཡརེ.

པུཐུཛྫནཱནཾ ཏིཎྞམྤི, ཙཏུནྣཾ ཨརིཡདེཧིནཾ;

སཏྟརསེཝ ཙིཏྟཱནི, སཏྟནྣམྤི བྷཝནྟི ཧི.

ཝིཉྙཱཎཱནི དུཝེ པཉྩ, མནོདྷཱཏུཏྟཡམྤི ཙ;

སནྟཱིརཎཱནི ཝོཊྛབྦཾ, ཧོནྟི སཏྟརསེཝིམེ.

ཧེཊྛཱ ཏིཎྞཾ ཕལཊྛཱནཾ, ཏིཧེཏུཀཔུཐུཛྫནེ;

ནཝེཝ ཀུསལཱ ཧོནྟི, ཙཏུནྣམྤི མཧགྒཏཱ.

ཏིཎྞཾ ¶ པུཐུཛྫནཱནཉྩ, ཏིཎྞམརིཡཱནམཱདིཏོ;

ཏེརསེཝ ཏུ ཙིཏྟཱནི, ཨུཔྤཛྫནྟཱིཏི ནིདྡིསེ.

ཨཊྛེཝ ཀཱམཔུཉྙཱནི, དིཊྛིཧཱིནཱ ཨཔུཉྙཏོ;

ཙཏྟཱརོཔི ཙ ཨུདྡྷཙྩ-སཾཡུཏྟཉྩཱཏི ཏེརས.

ཧེཊྛཱ དྭིནྣཾ ཕལཊྛཱནཾ, ཏཐཱ སབྦཔུཐུཛྫནེ;

དོམནསྶཡུཏྟཾ ཙིཏྟཾ, དྭཡམེཝ ཏུ ཛཱཡཏེ.

ཏིཎྞཾ ¶ པུཐུཛྫནཱནཾ ཏུ, པཉྩེཝ པན ཛཱཡརེ;

ཙཏྟཱརི དིཊྛིཡུཏྟཱནི, ཝིཙིཀིཙྪཱཡུཏམྤི ཙ.

མགྒཊྛཱནཾ ཙཏུནྣམྤི, མགྒཙིཏྟཾ སཀཾ སཀཾ;

ཨེཀམེཝ བྷཝེ ཏེསཾ, ཨིཏི ཝཏྭཱ ཝིབྷཱཝཡེ.

མཡཱ བྷཝེསུ ཙིཏྟཱནཾ, པུགྒལཱནཾ ཝསེན ཙ;

བྷིཀྑཱུནཾ པཱཊཝཏྠཱཡ, ཙིཏྟུཔྤཏྟི པཀཱསིཏཱ.

ཨེཝཾ སབྦམིདཾ ཙིཏྟཾ, བྷཱུམིཔུགྒལབྷེདཏོ;

བཧུདྷཱཔི ཙ ཧོཏཱིཏི, ཝིཉྙཱཏབྦཾ ཝིབྷཱཝིནཱ.

སཀྐཱ ¶ ཝུཏྟཱནུསཱརེན, བྷེདོ ཉཱཏུཾ ཝིབྷཱཝིནཱ;

གནྠཝིཏྠཱརབྷཱིཏེན, སཾཁིཏྟཾ པནིདཾ མཡཱ.

པུབྦཱཔརཾ ཝིལོཀེཏྭཱ, ཙིནྟེཏྭཱ ཙ པུནཔྤུནཾ;

ཨཏྠཾ ཨུཔཔརིཀྑིཏྭཱ, གཧེཏབྦཾ ཝིབྷཱཝིནཱ.

ཨིཏི ཨབྷིདྷམྨཱཝཏཱརེ བྷཱུམིཔུགྒལཝསེན ཙིཏྟུཔྤཏྟིནིདྡེསོ ནཱམ

ཨེཏེསཾ ¶ ¶ ¶ པན ཙིཏྟཱནཾ, ཨཱརམྨཎམིཏོ པརཾ;

དསྶཡིསྶཱམཧཾ ཏེན, ཝིནཱ ནཏྠི ཧི སམྦྷཝོ.

རཱུཔཾ སདྡཾ གནྡྷཾ རསཾ, ཕོཊྛབྦཾ དྷམྨམེཝ ཙ;

ཚདྷཱ ཨཱརམྨཎཾ ཨཱཧུ, ཚལཱ༹རམྨཎཀོཝིདཱ.

ཏཏྠ བྷཱུཏེ ཨུཔཱདཱཡ, ཝཎྞོ ཙཏུསམུཊྛིཏོ;

སནིདསྶནཔཊིགྷོ, རཱུཔཱརམྨཎསཉྙིཏོ.

དུཝིདྷོ ཧི སམུདྡིཊྛོ, སདྡོ ཙིཏྟོཏུསམྦྷཝོ;

སཝིཉྙཱཎཀསདྡོཝ, ཧོཏི ཙིཏྟསམུཊྛིཏོ.

དྷརཱིཡཏཱིཏི གཙྪནྟོ, གནྡྷོ སཱུཙནཏོཔི ཝཱ;

ཨཡཾ ཙཏུསམུཊྛཱནོ, གནྡྷཱརམྨཎསམྨཏོ.

རསམཱནཱ རསནྟཱིཏི, རསོཏི པརིཀིཏྟིཏོ;

སོཝ ཙཏུསམུཊྛཱནོ, རསཱརམྨཎནཱམཀོ.

ཕུསཱིཡཏཱིཏི ཕོཊྛབྦཾ, པཐཝཱིཏེཛཝཱཡཝོ;

ཕོཊྛབྦཾ ཙཏུསམྦྷཱུཏཾ, ཕོཊྛབྦཱརམྨཎཾ མཏཾ.

སབྦཾ ནཱམཉྩ རཱུཔཉྩ, ཧིཏྭཱ རཱུཔཱདིཔཉྩཀཾ;

ལཀྑཎཱནི ཙ པཉྙཏྟི-དྷམྨཱརམྨཎསཉྙིཏཾ.

ཚཱརམྨཎཱནི ¶ ལབྦྷནྟི, ཀཱམཱཝཙརབྷཱུམིཡཾ;

ཏཱིཎི རཱུཔེ པནཱརཱུཔེ, དྷམྨཱརམྨཎམེཀཀཾ.

ཁཎཝཏྠུཔརིཏྟཏྟཱ ¶ , ཨཱཔཱཐཾ ན ཝཛནྟི ཡེ;

ཏེ དྷམྨཱརམྨཎཱ ཧོནྟི, ཡེསཾ རཱུཔཱདཡོ ཀིར.

ཏེ པཊིཀྑིཔིཏབྦཱཝ, ཨཉྙམཉྙསྶ གོཙརཾ;

ནེཝ པཙྩནུབྷོནྟཱནཾ, མནོ ཏེསཾ ཏུ གོཙརཾ.

ཏཉྩ ¶ ‘‘པཙྩནུབྷོཏཱི’’ཏི, ཝུཏྟཏྟཱ པན སཏྠུནཱ;

རཱུཔཱདཱརམྨཎཱནེཝ, ཧོནྟི རཱུཔཱདཡོ པན.

དིབྦཙཀྑཱདིཉཱཎཱནཾ, རཱུཔཱདཱིནེཝ གོཙརཱ;

ཨནཱཔཱཐགཏཱནེཝ, ཏཱནཱིཏིཔི ན ཡུཛྫཏི.

ཡཾ རཱུཔཱརམྨཎཾ ཧོནྟཾ, ཏཾ དྷམྨཱརམྨཎཾ ཀཐཾ;

ཨེཝཾ སཏི པནེཏེསཾ, ནིཡམོཏི ཀཐཾ བྷཝེ.

སབྦཾ ཨཱརམྨཎཾ ཨེཏཾ, ཚབྦིདྷཾ སམུདཱིརིཏཾ;

ཏཾ པརིཏྟཏྟིཀཱདཱིནཾ, ཝསེན བཧུདྷཱ མཏཾ.

སབྦོ ཀཱམཝིཔཱཀོ ཙ, ཀྲིཡཱཧེཏུདྭཡམྤི ཙ;

པཉྩཝཱིསཏི ཨེཀནྟཾ, པརིཏྟཱརམྨཎཱ སིཡུཾ.

ཨིཊྛཱདིབྷེདཱ པཉྩེཝ, རཱུཔསདྡཱདཡོ པན;

ཝིཉྙཱཎཱནཾ དྭིཔཉྩནྣཾ, གོཙརཱ པཊིཔཱཊིཡཱ.

རཱུཔཱདིཔཉྩཀཾ སབྦཾ, མནོདྷཱཏུཏྟཡསྶ ཏུ;

ཏེརསནྣཾ པནེཏེསཾ, རཱུཔཀྑནྡྷོཝ གོཙརོ.

ནཱརཱུཔཾ ན ཙ པཉྙཏྟིཾ, ནཱཏཱིཏཾ ན ཙནཱགཏཾ;

ཨཱརམྨཎཾ ཀརོནྟེ ཙ, ཝཏྟམཱནོ ཧི གོཙརོ.

ཏེརསེཏཱནི ཙིཏྟཱནི, ཛཱཡནྟེ ཀཱམདྷཱཏུཡཾ;

ཙཏྟཱརི རཱུཔཱཝཙརེ, ནེཝ ཀིཉྩི ཨརཱུཔིསུ.

མཧཱཔཱཀཱནམཊྛནྣཾ ¶ ¶ , སནྟཱིརཎཏྟཡསྶཔི;

ཚསུ དྭཱརེསུ རཱུཔཱདིཚཔརིཏྟཱནི གོཙརཱ.

རཱུཔཱདཡོ པརིཏྟཱ ཚ, ཧསིཏུཔྤཱདགོཙརཱ;

པཉྩདྭཱརེ པཊུཔྤནྣཱ, མནོདྭཱརེ ཏིཀཱལིཀཱ.

དུཏིཡཱརུཔྤཙིཏྟཉྩ, ཙཏུཏྠཱརུཔྤམཱནསཾ;

ཚབྦིདྷཾ ནིཡཏཾ ཧོཏི, ཏཾ མཧགྒཏགོཙརཾ.

ནིབྦཱནཱརམྨཎཏྟཱ ཧི, ཨེཀནྟེན ཨནཉྙཏོ;

ཨཊྛཱནཱསཝཙིཏྟཱནཾ, ཨཔྤམཱཎོཝ གོཙརོ.

ཙཏྟཱརོ ཉཱཎཧཱིནཱ ཙ, ཀཱམཱཝཙརཔུཉྙཏོ;

ཀྲིཡཏོཔི ཙ ཙཏྟཱརོ, དྭཱདསཱཀུསལཱནི ཙ.

པརིཏྟཱརམྨཎཱ ཙེཝ, ཏེ མཧགྒཏགོཙརཱ;

པཉྙཏྟཱརམྨཎཏྟཱ ཧི, ནཝཏྟབྦཱཝ ཧོནྟི ཏེ.

ཙཏྟཱརོ ཉཱཎསཾཡུཏྟཱ, པུཉྙཏོ ཀྲིཡཏོཔི ཙ;

ཏཐཱབྷིཉྙཱདྭཡཉྩེཝ, ཀྲིཡཱཝོཊྛབྦནམྤི ཙ.

ཨེཀཱདསནྣམེཏེསཾ, ཏིཝིདྷོ ཧོཏི གོཙརོ;

པཉྙཏྟཱརམྨཎཏྟཱ ཧི, ནཝཏྟབྦཱཔི ཧོནྟིམེ.

ཡཱནི ཝུཏྟཱཝསེསཱནི, ཙིཏྟཱནི པན ཏཱནི ཧི;

ནཝཏྟབྦཱརམྨཎཱནཱིཏི, ཝིཉྙེཡྻཱནི ཝིབྷཱཝིནཱ.

དུཏིཡཱརུཔྤཙིཏྟཉྩ ¶ , ཙཏུཏྠཱརུཔྤམཱནསཾ;

ཚབྦིདྷཾ པན ཨེཀནྟ-ཨཏཱིཏཱརམྨཎཾ སིཡཱ.

ཝིཉྙཱཎཱནཾ དྭིཔཉྩནྣཾ, མནོདྷཱཏུཏྟཡསྶ ཙ;

པཉྩ རཱུཔཱདཡོ དྷམྨཱ, པཙྩུཔྤནྣཱཝ གོཙརཱ.

ཨཊྛ ¶ ¶ ཀཱམམཧཱཔཱཀཱ, སནྟཱིརཎཏྟཡམྤི ཙ;

ཧསིཏུཔྤཱདཙིཏྟནྟི, དྭཱདསེཏེ ཏུ མཱནསཱ.

སིཡཱཏཱིཏཱརམྨཎཱ པཙྩུ-པྤནྣཱནཱགཏགོཙརཱ;

ཀུསལཱཀུསལཱ ཀཱམེ, ཀྲིཡཏོ ནཝ མཱནསཱ.

ཨབྷིཉྙཱམཱནསཱ དྭེཔི, སིཡཱཏཱིཏཱདིགོཙརཱ;

སནྟཔཉྙཏྟིཀཱལེཔི, ནཝཏྟབྦཱ བྷཝནྟིམེ.

སེསཱནི པན སབྦཱནི, རཱུཔཱརཱུཔབྷཝེསུཔི;

ནཝཏྟབྦཱནི ཧོནྟེཝ, ཨཏཱིཏཱརམྨཎཱདིནཱ.

ཀཱམཏོ ཙ ཀྲིཡཱ པཉྩ, རཱུཔཏོ པཉྩམཱི ཀྲིཡཱ;

ཙིཏྟཱནཾ ཚནྣམེཏེསཾ, ནཏྠི ཀིཉྩི ཨགོཙརཾ.

ནིབྦཱནཉྩ ཕལཾ མགྒཾ, རཱུཔཉྩཱརཱུཔམེཝ ཙ;

སཀྐོནྟི གོཙརཾ ཀཱཏུཾ, ཀཏི ཙིཏྟཱནི མེ ཝད.

སཀྐོནྟི གོཙརཾ ཀཱཏུཾ, ཙིཏྟཱནེཀཱདསཱཔི ཙ;

ནིབྦཱནཉྩ ཕལཾ མགྒཾ, རཱུཔཉྩཱརཱུཔམེཝ ཙ.

ཙིཏྟེསུ པན སབྦེསུ, ཀཏི ཙིཏྟཱནི མེ ཝད;

ཨརཧཏྟཕལཾ མགྒཾ, ཀཱཏུཾ སཀྐོནྟི གོཙརཾ.

སབྦེསུ པན ཙིཏྟེསུ, ཚ ཙ ཙིཏྟཱནི མེ སུཎ;

ཨརཧཏྟཕལཾ མགྒཾ, ཀཱཏུཾ སཀྐོནྟི གོཙརཾ.

ཙཏྟཱརོ ཉཱཎསཾཡུཏྟཱ, ཀྲིཡཱ ཝོཊྛབྦནམྤི ཙ;

ཀྲིཡཱབྷིཉྙཱ མནོདྷཱཏུ, ཚ ཙ སཀྐོནྟི གོཙརཾ.

ཙཏྟཱརོ ¶ ¶ ཉཱཎསཾཡུཏྟཱ-བྷིཉྙཱཙིཏྟཉྩ པུཉྙཏོ;

ནཱརཧཏྟཾ ཕལཾ མགྒཾ, ཀཱཏུཾ སཀྐོནྟི གོཙརཾ.

ཀསྨཱ ཨརཧཏོ མགྒ-ཙིཏྟཾ ཝཱ ཕལམཱནསཾ;

པུཐུཛྫནཱ ཝཱ སེཀྑཱ ཝཱ, ན སཀྐོནྟི ཧི ཛཱནིཏུཾ.

སཀདཱགཱམཱི ན ཛཱནཱཏི, ཨནཱགཱམིསྶ མཱནསཾ;

ཨནཱགཱམཱི ན ཛཱནཱཏི, ཨརཧནྟསྶ མཱནསཾ.

ཧེཊྛིམོ ¶ ཧེཊྛིམོ ནེཝ, ཛཱནཱཏི ཨུཔརཱུཔརི;

ཨུཔརཱུཔརི ཛཱནཱཏི, ཧེཊྛིམསྶ ཙ མཱནསཾ.

ཀུསལཱརམྨཎཾ ཀཱམེ, ཀུསལཱཀུསལསྶ ཙ;

ཨབྷིཉྙཱམཱནསསྶཱཔི, ཀུསལསྶ ཀྲིཡསྶ ཙ.

ཀཱམཱཝཙརཔཱཀསྶ, ཏཐཱ ཀཱམཀྲིཡསྶ ཙ;

ཨེཏེསཾ པན རཱསཱིནཾ, ཚནྣཾ ཨཱརམྨཎཾ སིཡཱ.

རཱུཔཱཝཙརཔུཉྙཱནི, ཀཱམཔཱཀཾ ཏཏོ ཝིནཱ;

པཉྩནྣཾ པན རཱསཱིནཾ, ཧོནྟི ཨཱརམྨཎཱནི ཧི.

ཨཱརུཔྤཀུསལཉྩཱཔི, ཏེབྷཱུམཀུསལསྶ ཙ;

ཏེབྷཱུམཀཀྲིཡསྶཱཔི, ཏཐེཝཱཀུསལསྶཔི.

ཨརཱུཔཱཝཙརཔཱཀཱནཾ ¶ ¶ , དྭིནྣཾ པན ཙཏུཏྠདུ;

ཨིམེསཾ ཨཊྛརཱསཱིནཾ, ཧོཏཱརམྨཎཔཙྩཡོ.

ཨཔརིཡཱཔནྣཔུཉྙམྤི, ཀཱམཱཝཙརཏོཔི ཙ;

རཱུཔཏོ པཉྩམསྶཱཔི, ཀུསལསྶ ཀྲིཡསྶ ཙ.

ཙཏུནྣཾ པན རཱསཱིནཾ, ཧོཏི ཨཱརམྨཎཾ སདཱ;

ཀུསལསྶ ཀྲིཡསྶཱཔི, ཏཐེཝཱཀུསལསྶ ཙ;

ཀཱམཱཝཙརཔཱཀཱནཾ, ཚནྣཾ རཱསཱིནམཱིརིཏཾ.

ཝིཔཱཀཱརམྨཎཾ ཀཱམེ, ཀཱམཱཝཙརཏོཔི ཙ;

རཱུཔཱཝཙརཏོ ཙེཝ, ཀུསལསྶ ཀྲིཡསྶ ཙ.

ཚནྣཉྩ པན རཱསཱིནཾ, ཧོཏཱརམྨཎཔཙྩཡོ.

ཝིཔཱཀཱརམྨཎཾ རཱུཔེ, ཀཱམཱཝཙརཏོཔི ཙ;

རཱུཔཱཝཙརཏོ ཙེཝ, ཀུསལསྶ ཀྲིཡསྶ ཙ.

ཨཔུཉྙསྶཱཏི པཉྩནྣཾ, རཱསཱིནཾ ཧོཏི གོཙརོ;

ཨརཱུཔཱཝཙརཔཱཀེསུ, ཨཡམེཝ ནཡོ མཏོ.

ཨཔརིཡཱཔནྣཔཱཀམྤི, ཀཱམཏོ རཱུཔཏོཔི ཙ;

ཀུསལསྶ ཀྲིཡསྶཱཔི, ཧོཏི ཨཱརམྨཎཾ པན.

ཀྲིཡཙིཏྟམིདཾ ཀཱམེ, ཀཱམཱཝཙརཏོཔི ཙ;

རཱུཔཱཝཙརཏོ ཙེཝ, ཀུསལསྶ ཀྲིཡསྶ ཙ.

ཚནྣཾ རཱསཱིནམེཏེསཾ, ཧོཏཱརམྨཎཔཙྩཡོ.

ཡཾ ¶ ཀྲིཡཱམཱནསཾ རཱུཔེ, ཀཱམཔཱཀཾ ཏཏོ ཝིནཱ;

པཉྩནྣཾ པན རཱསཱིནཾ, ཧོཏི ཨཱརམྨཎཾ པན.

ཀྲིཡཱཙིཏྟཾ ¶ ¶ པནཱརུཔྤེ, ཏེསཾ པཉྩནྣམེཝ ཙ;

ཨཱརུཔྤསྶ ཀྲིཡསྶཱཔི, ཚནྣཾ ཧོཏེཝ གོཙརོ.

རཱུཔཾ ཙཏུསམུཊྛཱནཾ, རཱུཔཱརམྨཎསཉྙིཏཾ;

ཨབྷིཉྙཱདྭཡཙིཏྟསྶ, ཀཱམཔཱཀཀྲིཡསྶ ཙ;

ཚནྣཾ རཱསཱིནམེཏེསཾ, ཧོཏཱརམྨཎཔཙྩཡོ.

ནིབྦཱནཱརམྨཎཾ ཀཱམ-རཱུཔཱཝཙརཏོ པན;

ཀུསལསྶུབྷཡསྶཱཔི, ཀཱམརཱུཔཀྲིཡསྶ ཙ.

ཨཔརིཡཱཔནྣཏོ ཙེཝ, ཕལསྶ ཀུསལསྶ ཙ;

ཚནྣཾ རཱསཱིནམེཏེསཾ, ཧོཏཱརམྨཎཔཙྩཡོ.

ནཱནཔྤཀཱརཀཾ སབྦཾ, པཉྙཏྟཱརམྨཎཾ པན;

ཏེབྷཱུམཀསྶ པུཉྙསྶ, ཏཐེཝཱཀུསལསྶ ཙ.

རཱུཔཱརཱུཔཝིཔཱཀསྶ, ཏེབྷཱུམཀཀྲིཡསྶ ཙ;

ནཝནྣཾ པན རཱསཱིནཾ, ཧོཏཱརམྨཎཔཙྩཡོ.

རཱུཔཱརམྨཎིཀཱ དྭེ ཏུ, དྭེ དྭེ སདྡྷཱདིགོཙརཱ;

པཉྩཱརམྨཎིཀཱ ནཱམ, ཙིཏྟུཔྤཱདཱ ཏཡོ མཏཱ.

ཨིདྷེཀཙཏྟཱལཱིསེཝ, ཚལཱ༹རམྨཎིཀཱ མཏཱ;

པཉྩཱབྷིཉྙཱ ཝིཝཛྫེཏྭཱ, རཱུཔཱརཱུཔཱ ཨནཱསཝཱ;

ཙིཏྟུཔྤཱདཱ ཨིམེ སབྦེ, དྷམྨཱརམྨཎགོཙརཱ.

པཋམཱརུཔྤཀུསལཾ, དུཏིཡཱརུཔྤཙེཏསོ;

ཀུསལསྶ ཝིཔཱཀསྶ, ཀྲིཡསྶཱརམྨཎཾ བྷཝེ.

པཋམཱརུཔྤཔཱཀོཡཾ ¶ , དུཏིཡཱརུཔྤཙེཏསོ;

ཀུསལསྶ ཝིཔཱཀསྶ, ཀྲིཡསྶཱརམྨཎཾ ན ཧི.

པཋམཾ ¶ ཏུ ཀྲིཡཱཙིཏྟཾ, དུཏིཡཱརུཔྤཙེཏསོ;

ན པུཉྙསྶ ན པཱཀསྶ, ཧོཏི ཨཱརམྨཎཾ པན.

པཋམཾ ཏུ ཀྲིཡཱཙིཏྟཾ, དུཏིཡཱརུཔྤཙེཏསོ;

ཀྲིཡསྶཱརམྨཎཾ ཧོཏི, ཨིཏི ཉེཡྻཾ ཝིབྷཱཝིནཱ.

པུཐུཛྫནསྶ སེཀྑསྶ, ཨརཱུཔཱརམྨཎཾ དྭིདྷཱ;

ཀུསལཾ ཀུསལསྶཱཔི, ཝིཔཱཀསྶ ཙ ཏཾ སིཡཱ.

ཁཱིཎཱསཝསྶ བྷིཀྑུསྶ, པཋམཱརུཔྤམཱནསཾ;

ཨཱརམྨཎཾ ཏིདྷཱ ཧོཏི, ཨིཏི ཝུཏྟཾ མཧེསིནཱ.

ཀྲིཡསྶཱཔི ཀྲིཡཱ ཧོཏི, ཀུསལམྤི ཀྲིཡསྶ ཙ;

ཀུསལཾ ཏུ ཝིཔཱཀསྶ, ཨེཝཾ ཧོཏི ཏིདྷཱ པན.

ཏཏིཡཱརུཔྤཙིཏྟམྤི, ཙཏུཏྠཱརུཔྤཙེཏསོ;

ཨེཝམེཝ དྭིདྷཱ ཙེཝ, ཏིདྷཱ ཙཱརམྨཎཾ སིཡཱ.

ཨིཏི ཨབྷིདྷམྨཱཝཏཱརེ ཨཱརམྨཎཝིབྷཱགོ ནཱམ

ཨེཀཱུནཏིཾས ཀམྨཱནི, པཱཀཱ དྭཏྟིཾས དསྶིཏཱ;

ཏཱིསུ དྭཱརེསུ ཀམྨཱནི, ཝིཔཱཀཱ ཚསུ དིསྶརེ.

ཀུསལཾ ཀཱམལོཀསྨིཾ, པཝཏྟེ པཊིསནྡྷིཡཾ;

ཏཾ ཏཾ པཙྩཡམཱགམྨ, དདཱཏི ཝིཝིདྷཾ ཕལཾ.

ཨེཀཱཡ ཙེཏནཱཡེཀཱ, པཊིསནྡྷི པཀཱསིཏཱ;

ནཱནཱཀམྨེཧི ནཱནཱ ཙ, བྷཝནྟི པཊིསནྡྷིཡོ.

ཏིཧེཏུཀཾ ཏུ ཡཾ ཀམྨཾ, ཀཱམཱཝཙརསཉྙིཏཾ;

ཏིཧེཏུཀཾ དུཧེཏུཉྩ, ཝིཔཱཀཾ དེཏྱཧེཏུཀཾ.

དུཧེཏུཀཾ ཏུ ཡཾ ཀམྨཾ, ཏཾ ན དེཏི ཏིཧེཏུཀཾ;

དུཧེཏུཀམཧེཏུཉྩ, ཝིཔཱཀཾ དེཏི ཨཏྟནོ.

ཨསངྑཱརམསངྑཱརཾ ¶ , སསངྑཱརམྤི དེཏི ཧི;

སསངྑཱརམསངྑཱརཾ, སསངྑཱརཾ ཕལཾ ཏཐཱ.

ཨེཀཱཡ ཙེཏནཱཡེཏྠ, ཀུསལསྶ ཙ སོལ༹ས;

ཝིདྷཱ ཝིཔཱཀཙིཏྟཱནི, བྷཝནྟཱིཏི པཀཱསཡེ.

ཨཱརམྨཎེན ཧོཏེཝ, ཝེདནཱཔརིཝཏྟནཾ;

ཏདཱརམྨཎཙིཏྟམྤི, ཛཝནེན ནིཡཱམིཏཾ.

ཀཱམཱཝཙརཙིཏྟེན, ཀུསལེནཱདིནཱ པན;

ཏུལྱེན པཱཀཙིཏྟེན, གཧིཏཱ པཊིསནྡྷི ཙེ.

བལཝཱརམྨཎེ ¶ ཨིཊྛེ, ཙཀྑུསྶཱཔཱཐམཱགཏེ;

མནོདྷཱཏུ བྷཝངྒསྨིཾ, ཏཱཡ ཨཱཝཊྚིཏེ པན.

ཝཱིཐིཙིཏྟེསུ ཛཱཏེསུ, ཙཀྑུཝིཉྙཱཎཀཱདིསུ;

ཛཱཡཏེ ཛཝནཾ ཧུཏྭཱ, པཋམཾ ཀཱམམཱནསཾ.

སཏྟཀྑཏྟུཾ ཛཝིཏྭཱན, པཋམེ ཀུསལེ གཏེ;

ཏདེཝཱརམྨཎཾ ཀཏྭཱ, ཏེནེཝ སདིསཾ པུན.

ཝིཔཱཀཾ ཛཱཡཏེ ཙིཏྟཾ, ཏདཱརམྨཎསཉྙིཏཾ;

སནྡྷིཡཱ ཏུལྱཏོ མཱུལ-བྷཝངྒནྟི པཝུཙྩཏེ.

ཏཉྩ སནྟཱིརཎཾ ཨེཏྠ, དསྶནཾ སམྤཊིཙྪནཾ;

གཎནཱུཔགཙིཏྟཱནི, ཙཏྟཱརེཝ བྷཝནྟི ཧི.

ཡདཱ ཧི དུཏིཡཾ ཙིཏྟཾ, ཀུསལཾ ཛཝནཾ ཏདཱ;

ཏེན ཏུལྱཝིཔཱཀམྤི, ཏདཱརམྨཎཀཾ སིཡཱ.

སནྡྷིཡཱ ཨསམཱནཏྟཱ, དྭེ ནཱམཱནིསྶ ལབྦྷརེ;

‘‘ཨཱགནྟུཀབྷཝངྒ’’ནྟི, ‘‘ཏདཱརམྨཎཀ’’ནྟི ཙ.

ཡདཱ ¶ ¶ ཧི ཏཏིཡཾ པུཉྙཾ, ཛཝནཾ ཧོཏི ཏེན ཙ;

སདིསཾ ཏཏིཡཾ པཱཀཾ, ཏདཱརམྨཎཀཾ སིཡཱ.

‘‘ཨཱགནྟུཀབྷཝངྒ’’ནྟི, ཨིདམྤི ཙ པཝུཙྩཏི;

ཨིམིནཱ པན སདྡྷིཾ ཚ, པུརིམཱནི ཙ པཉྩཔི.

ཡདཱ ཙཏུཏྠཾ ཀུསལཾ, ཛཝནཾ ཧོཏི ཏེན ཙ;

ཏུལྱཾ ཙཏུཏྠཾ པཱཀཾ ཏུ, ཏདཱརམྨཎཏཾ ཝཛེ.

ཨཱགནྟུཀབྷཝངྒཾ ཏུ, ཏདཱརམྨཎནཱམཀཾ;

པུརིམཱནི ཚ པཱཀཱནི, ཨིམིནཱ ཧོནྟི སཏྟ ཏུ.

ཏསྨིཾ དྭཱརེ ཡདཱ ཨིཊྛ-མཛ྄ཛྷཏྟཱརམྨཎཾ པན;

ཨཱགཙྪཏི ཏདཱཔཱཐཾ, ཏདཱ ཝུཏྟནཡེནིདྷ.

ཨུཔེཀྑཱསཧིཏཾ ཏསྨཱ, ཧོཏི སནྟཱིརཎཾ མནོ.

ཨུཔེཀྑཱསཧིཏེསྭེཝ, ཛཝནེསུ ཙཏཱུསུཔི;

ཏེཧི ཏུལྱཱནི ཙཏྟཱརི, པཱཀཙིཏྟཱནི ཛཱཡརེ.

ཝེདནཱཡཱསམཱནཏྟཱ, ཨཙྩནྟཾ པུརིམེཧི ཏུ;

ཧོནྟི པིཊྛིབྷཝངྒཱནི, ཙཏྟཱརཱིཏི ཙ ནཱམཏོ.

པཉྩིམཱནི ཝིཔཱཀཱནི, པུརིམེཧི ཙ སཏྟཧི;

སདྡྷིཾ དྭཱདས པཱཀཱནི, བྷཝནྟཱིཏི ཝིནིདྡིསེ.

ཙཀྑུདྭཱརེ ཏཐཱ ཨེཝཾ, སོཏཱདཱིསྭཔི ནིདྡིསེ;

དྭཱདས དྭཱདས པཱཀཱ, སམསཊྛི བྷཝནྟིམེ.

ཨེཀཱཡ ཙེཏནཱཡེཝ, ཀམྨེ ཨཱཡཱུཧིཏེ པན;

སམསཊྛི ཝིཔཱཀཱནི, ཨུཔྤཛྫནྟི ན སཾསཡོ.

གཧིཏཱགཧཎེནེཏྠ ¶ ¶ , ཙཀྑུདྭཱརེསུ དྭཱདས;

སོཏཝིཉྙཱཎཀཱདཱིནི, ཙཏྟཱརཱིཏི ཙ སོལ༹ས.

ཨེཝམེཝ ¶ སསངྑཱར-ཏིཧེཏུཀུསལེནཔི;

ཨསངྑཱརསསངྑཱརུ-པེཀྑཱསཧགཏེཧིཔི.

ཀམྨེ ཨཱཡཱུཧིཏེ ཏེསཾ, ཝིཔཱཀེཧི ཙ ཏཱིཧིཔི;

ཨེསེཝ ཙ ནཡོ ཏེཧི, དིནྣཱཡ པཊིསནྡྷིཡཱ.

པཋམཾ ཨིཊྛམཛ྄ཛྷཏྟ-གོཙརསྶ ཝསེནིདྷ;

པཝཏྟིཾ པན དསྶེཏྭཱ, ཨུཔེཀྑཱསཧིཏདྭཡེ.

དསྶེཏབྦཱ ཏཔྤཙྪཱ ཏུ, ཨིཊྛསྨིཾ གོཙརེ ཨིདྷ;

ཨེཀེཀསྨིཾ པན དྭཱརེ, དྭཱདས དྭཱདསེཝ ཏུ.

གཧིཏཱགཧཎེནེཏྠ, པཱཀཙིཏྟཱནི སོལ༹ས;

པུབྦེ ཝུཏྟནཡེནེཝ, ཉེཡྻཾ སབྦམསེསཏོ.

ཏིཧེཏུཀེན ཀམྨེན, པཊིསནྡྷི ཏིཧེཏུཀཱ;

བྷཝཏཱིཏི ཨཡཾ ཝཱརོ, ཝུཏྟོ ཨེཏྟཱཝཏཱ མཡཱ.

སནྡྷིམེཀཾ ཏུ ཀམྨེཀཾ, ཛནེཏི ན ཏཏོ པརཾ;

ཨནེཀཱནི ཝིཔཱཀཱནི, སཉྫནེཏི པཝཏྟིཡཾ.

ཨེཀསྨཱ ཧི ཡཐཱ བཱིཛཱ, ཛཱཡཏེ ཨེཀམངྐུརཾ;

སུབཧཱུནི ཕལཱནིསྶ, ཧོནྟི ཧེཏུཔཝཏྟིཏོ.

དུཧེཏུཀེན ཀམྨེན, པཊིསནྡྷི དུཧེཏུཀཱ;

ཧོཏཱིཏི ཧི ཨཡཾ ཝཱརོ, ཨནུཔུབྦེན ཨཱགཏོ.

དུཧེཏུཀེན ཀམྨེན, སོམནསྶཡུཏེནིདྷ;

ཨསངྑཱརིཀཙིཏྟེན, ཀམྨེ ཨཱཡཱུཧིཏེ པན.

ཏེན ¶ ཏུལྱེན པཱཀེན, གཧིཏཱ པཊིསནྡྷི ཙེ;

ཨིཊྛེ ཨཱརམྨཎེ ཙཀྑུ-དྭཱརེ ཨཱཔཱཐམཱགཏེ.

སོམནསྶཡུཏེ ཉཱཎ-ཧཱིནེ ཀུསལམཱནསེ;

སཏྟཀྑཏྟུཾ ཛཝིཏྭཱན, གཏེ ཏསྨིཾ དུཧེཏུཀེ.

ཏདེཝཱརམྨཎཾ ¶ ཀཏྭཱ, ཛཱཡཏེ ཏདནནྟརཾ;

ཏཾསརིཀྑཀམེཀཾ ཏུ, ཨསངྑཱརིཀམཱནསཾ.

ཏཾ ཧི མཱུལབྷཝངྒནྟི, ཏདཱརམྨཎམིཙྩཔི;

ཨུབྷཡམྤི ཙ ཏསྶེཝ, ནཱམནྟི པརིདཱིཔིཏཾ.

དུཧེཏུཀསསངྑཱརེ, ཛཝིཏེཔི ཙ ཏཾསམཾ;

ཧོཏཱགནྟུཀསངྑཱཏཾ, ཏདཱརམྨཎམཱནསཾ.

ཏཐེཝ ཙ དུཧེཏཱུནཾ, ཨིཊྛམཛ྄ཛྷཏྟགོཙརེ;

དྭིནྣཾ ཨུཔེཀྑཱཡུཏྟཱནཾ, ཛཝནཱནམནནྟརཾ.

དྭེ ཏཱདིསཱནི ཛཱཡནྟེ, ཏདཱརམྨཎམཱནསཱ;

ཏེསཾ ‘‘པིཊྛིབྷཝངྒ’’ནྟི, ནཱམཾ ‘‘ཨཱགནྟུཀ’’ནྟི ཙ.

སནྟཱིརཎདྭཡཉྩེཝ, དསྶནཾ སམྤཊིཙྪནཾ;

ཨིམཱནི ཙ བྷཝངྒཱནི, ཙཀྑུདྭཱརེ པནཊྛ ཧི.

ཨེཝམཊྛཊྛ ¶ ཀཏྭཱན, དྭཱརེསུཔི ཙ པཉྩསུ;

ཙཏྟཱལཱིས ཝིཔཱཀཱནི, བྷཝནྟཱིཏི པཝཏྟིཡཾ.

གཧིཏཱགཧཎེནེཏྠ, ཙཀྑུདྭཱརེ པནཊྛ ཙ;

སོཏགྷཱནཱདིནཱ སདྡྷིཾ, དྭཱདསེཝ བྷཝནྟི ཧི.

ཨེཀཱཡ ཙེཏནཱཡེཝཾ, ཀམྨེ ཨཱཡཱུཧིཏེ པན;

དྭཱདསེཝ ཝིཔཱཀཱནི, བྷཝནྟཱིཏི པཀཱསིཏཾ.

དུཧེཏུཀཏྟཡེནཱཔི ¶ , སེསེན སདིསེན ཏུ;

པཱཀེནཱདིནྣསནྡྷིཡཱ, ཨཡམེཝ ནཡོ མཏོ.

དུཧེཏུཀེན ཀམྨེན, པཊིསནྡྷི དུཧེཏུཀཱ;

ཧོཏཱིཏིཔི ཨཡཾ ཝཱརོ, ཝུཏྟོ ཨེཏྟཱཝཏཱ མཡཱ.

དུཧེཏུཀེན ཀམྨེན, པཊིསནྡྷི ཨཧེཏུཀཱ;

ཧོཏཱིཏི ཙ ཨཡཾ ཝཱརོ, ཨནུཔུབྦེན ཨཱགཏོ.

དུཧེཏུཀེསུ ¶ ཙིཏྟེསུ, ཀུསལེསུ ཙཏཱུསུཔི;

ཏེསུ ཨཉྙཏརེནེཝ, ཀམྨེ ཨཱཡཱུཧིཏེ པན.

ཏསྶེཝ པཱཀབྷཱུཏཱཡ, ཨཱདིནྣཔཊིསནྡྷིནོ;

ཨུཔེཀྑཱསཧིཏཱཧེཏུ, མནོཝིཉྙཱཎདྷཱཏུཡཱ.

པཊིསནྡྷི ན ཝཏྟབྦཱ, སཱ ཀམྨསདིསཱཏི ཧི;

ཀམྨཾ དུཧེཏུཀཾ ཧོཏི, པཊིསནྡྷི ཨཧེཏུཀཱ.

ཏསྶ བུདྡྷིམུཔེཏསྶ, ཨིཊྛམཛ྄ཛྷཏྟགོཙརེ;

ཨཱཔཱཐམཱགཏེ ཙཀྑུ-དྭཱརེ པུན ཙ དེཧིནོ.

དུཧེཏཱུནཾ ཙཏུནྣམྤི, པུཉྙཱནཾ ཡསྶ ཀསྶཙི;

ཛཝནསྶཱཝསཱནསྨིཾ, ཨཧེཏུཀམིདཾ མནོ.

ཏདཱརམྨཎབྷཱཝེན, ཛཱཡཏེ ནཏྠི སཾསཡོ;

ཏཾ ཏུ མཱུལབྷཝངྒཉྩ, ཏདཱརམྨཎམེཝ ཙ.

ཝཱིཐིཙིཏྟེསུ ཛཱཏེསུ, ཙཀྑུཝིཉྙཱཎཀཱདིསུ;

ཨུཔེཀྑཱསཧིཏཾཡེཝ, ཧོཏི སནྟཱིརཎམྤི ཙ.

ཏེསུ ཨེཀཾ ཋཔེཏྭཱན, གཧིཏཱགཧཎེནིདྷ;

གཎནཱུཔགཙིཏྟཱནི, ཏཱིཎིཡེཝ བྷཝནྟི ཧི.

ཨིཊྛེ ¶ ཨཱརམྨཎེ ཙཀྑུ-དྭཱརེ ཨཱཔཱཐམཱགཏེ;

ཏདཱ སནྟཱིརཎཉྩེཝ, ཏདཱརམྨཎམཱནསཾ.

སོམནསྶཡུཏཾཡེཝ, གཧེཏྭཱ ཏེསུ ཨེཀཀཾ;

པུརིམཱནི ཙ ཏཱིཎཱིཏི, ཙཏྟཱརོཝ བྷཝནྟི ཧི.

ཨེཝཾ ཙཏྟཱརི ཙིཏྟཱནི, དྭཱརེསུཔི ཙ པཉྩསུ;

ཧོནྟི ཝཱིསཏི ཙིཏྟཱནི, ཝིཔཱཀཱནི པཝཏྟིཡཾ.

ཙཀྑུདྭཱརེ ཏུ ཙཏྟཱརི, གཧིཏཱགཧཎེནིདྷ;

སོཏགྷཱནཱདིནཱ སདྡྷིཾ, ཧོཏེཝཱཧེཏུཀཊྛཀཾ.

ཨཧེཏུཔཊིསནྡྷིསྶ ¶ , ན ཏདཱརམྨཎཾ བྷཝེ;

དུཧེཏུཀཾ ཏིཧེཏུཾ ཝཱ, དུཧེཏུཔཊིསནྡྷིནོ.

ཛཱཏཱ ¶ སུགཏིཡཾ ཡེན, པཱཀེན པཊིསནྡྷི ཏུ;

ཏེན ཏུལྱམྤི ཧཱིནཾ ཝཱ, ཏདཱརམྨཎཀཾ བྷཝེ.

མནུསྶལོཀཾ སནྡྷཱཡ, ཝུཏྟཉྩཱཧེཏུཀཊྛཀཾ;

ཙཏཱུསུཔི ཨཔཱཡེསུ, པཝཏྟེ པན ལབྦྷཏི.

ཐེརོ ནེརཡིཀཱནཾ ཏུ, དྷམྨཾ དེསེཏི ཝསྶཏི;

གནྡྷཾ ཝཱཡུཉྩ མཱཔེཏི, ཡདཱ ཏེསཾ ཏདཱ པན.

ཐེརཾ དིསྭཱ ཙ སུཏྭཱ ཙ, དྷམྨཾ གནྡྷཉྩ གྷཱཡཏཾ;

པིཝཏཉྩ ཛལཾ ཝཱཡུཾ, ཕུསཏཾ མུདུམེཝ ཙ.

ཙཀྑུཝིཉྙཱཎཀཱདཱིནི, པུཉྙཛཱནེཝ པཉྩཔི;

སནྟཱིརཎདྭཡཾ ཨེཀཱ, མནོདྷཱཏཱུཏི ཨཊྛཀཾ.

ཨཡཾ ཏཱཝ ཀཐཱ ཨིཊྛ-ཨིཊྛམཛ྄ཛྷཏྟགོཙརེ;

ཀཱམཱཝཙརཔུཉྙཱནཾ, ཛཝནཱནཾ ཝསེནིདྷ.

ནིཡམཏྠཾ ¶ ཏུ ཡཾ ཝུཏྟཾ, ཏདཱརམྨཎཙེཏསོ;

ཀུསལཾ པན སནྡྷཱཡ, ཏཾ ཝུཏྟནྟི ཧི དཱིཔིཏཾ.

ཨིདྷཱཀུསལཙིཏྟེསུ, སོམནསྶཡུཏེསུཔི;

ཨིཊྛེ ཨཱརམྨཎེ ཏེསུ, ཛཝིཏེསུ ཙཏཱུསུཔི.

སོམནསྶཡུཏཱཧེཏུ-མནོཝིཉྙཱཎདྷཱཏུ ཧི;

ཚསྭཱཀུསལཙིཏྟེསུ, ཨུཔེཀྑཱཡ ཡུཏེསུ ཧི;

གོཙརེ ཨིཊྛམཛ྄ཛྷཏྟེ, ཛཝིཏེསུ ཨནནྟརཾ.

ཨུཔེཀྑཱསཧིཏཱཧེཏུ-མནོཝིཉྙཱཎདྷཱཏུ ཧི;

ཏདཱརམྨཎབྷཱཝེན, ཛཱཡཏེ པན པུཉྙཛཱ.

ཨིཊྛཱརམྨཎཡོགསྨིཾ ¶ , ཀངྑཏོ ཨུདྡྷཏསྶ ཝཱ;

སོམནསྶཡུཏཾ ཧོཏི, ཏདཱརམྨཎམཱནསཾ.

སོམནསྶཡུཏེ ཙིཏྟེ, ཛཝནེ ཛཝིཏེ པན;

གཝེསིཏབྦཱ པཉྩེཝ, ཏདཱརམྨཎམཱནསཱ.

ཨུཔེཀྑཱསཧིཏེ ཙིཏྟེ, ཛཝནེ ཛཝིཏེ པན;

ཚལེ༹ཝ གཝེསིཏབྦཱ, ཏདཱརམྨཎམཱནསཱ.

ཏིཧེཏུསོམནསྶེན, ཨཱདིནྣཔཊིསནྡྷིནོ;

ཛྷཱནཏོ པརིཧཱིནསྶ, ཏཾ ཛྷཱནཾ པཙྩཝེཀྑཏོ.

དོམནསྶཡུཏཾ ཙིཏྟཾ, ཧོཏི ཝིཔྤཊིསཱརིནོ;

ཏསྶ ཀིཾ ཛཱཡཏེ བྲཱུཧི, ཏདཱརམྨཎམཱནསཾ.

པཊྛཱནེ པཊིསིདྡྷཱ ཧི, དོམནསྶཨནནྟརཾ;

སོམནསྶསྶ ཨུཔྤཏྟི, དོམནསྶསྶ ཙསྶ ཝཱ.

མཧགྒཏཾ ¶ པནཱརབྦྷ, ཛཝནེ ཛཝིཏེཔི ཙ;

ཏཏྠེཝ པཊིསིདྡྷཾ ཏུ, ཏདཱརམྨཎམཱནསཾ.

ཏསྨཱ ¶ བྷཝངྒཔཱཏོཝ, ཏདཱརམྨཎམེཝ ཝཱ;

ན ཧོཏི ཀིཾ ནུ ཀཱཏབྦཾ, ཝད ཏྭཾ ཨཱབྷིདྷམྨིཀ.

ཨུཔེཀྑཱསཧིཏཱཧེཏུ-མནོཝིཉྙཱཎདྷཱཏུ ཏུ;

པུཉྙཱཔུཉྙཝིཔཱཀཱ ཧི, ཏདཱརམྨཎིཀཱ སིཡཱ.

ཨཱཝཛྫནཾ ཀིམསྶཱཏི, ནཏྠི ཏཾ ཛཱཡཏེ ཀཐཾ;

བྷཝངྒཱཝཛྫནཱནཾ ཀིཾ, མགྒསྶཱནནྟརསྶ ཙ.

ཕལསྶཔི ནིརོདྷཱ ཙ, ཝུཊྛཧནྟསྶ བྷིཀྑུནོ;

ཕལཙིཏྟསྶ ཝཱ ཨེཝཾ, ནཏྠི ཨཱཝཛྫནཾ ཀིར.

ཝིནཱ ཨཱཝཛྫནེནཱཔི, ཧོཏི ཛཱཡཏུ མཱནསཾ;

ཀིམསྶཱརམྨཎཾ བྲཱུཧི, ཡདི ཛཱནཱསི པཎྜིཏ.

ཝིནཱ ¶ ཨཱརམྨཎེནེཝ, ན ཧི ཛཱཡཏི མཱནསཾ;

རཱུཔཱདཱིསུ པརིཏྟེསུ, ཡཾ ཀིཉྩཱརབྦྷ ཛཱཡཏེ.

ཨུཏུབཱིཛནིཡཱམོ ཙ, ཀམྨདྷམྨནིཡཱམཏཱ;

ཙིཏྟསྶ ཙ ནིཡཱམོཏི, ཉེཡྻཱ པཉྩ ནིཡཱམཏཱ.

ཏཏྠ ཨེཀཔྤཧཱརེན, ཕལཔུཔྥཱདིདྷཱརཎཾ;

རུཀྑཱནཾ པན སབྦེསཾ, ཨཡཾ ཨུཏུནིཡཱམཏཱ.

ཏེསཾ ཏེསཾ ཏུ བཱིཛཱནཾ, ཏཾཏཾཏུལྱཕལུབྦྷཝོ;

མཏྠཀེ ནཱལི༹ཀེརསྶ, ཚིདྡཏྟཾ བཱིཛཛོ ཨཡཾ.

ཏིཧེཏུཀཾ ཏིཧེཏུཉྩ, དུཧེཏུཉྩ ཨཧེཏུཀཾ;

ཝིཔཱཀཾ ཏུ ཡཏོ དེཏི, ཨཡཾ ཀམྨནིཡཱམཏཱ.

ཛཱཏིཡཾ ¶ བོདྷིསཏྟསྶ, མེདནཱིཀམྤནཱདིཀཾ;

ཝིསེསཏྟམནེཀམྤི, ཨཡཾ དྷམྨནིཡཱམཏཱ.

གོཙརེན པསཱདསྨིཾ, གྷཊྚིཏེ པན ཏེནིདྷ;

ཨུཔྤཏྟཱཝཛྫནཱདཱིནཾ, ཨཡཾ ཙིཏྟནིཡཱམཏཱ.

ཨིཏི ཨབྷིདྷམྨཱཝཏཱརེ ཝིཔཱཀཙིཏྟཔྤཝཏྟིནིདྡེསོ ནཱམ

ཨིདཱནི ¶ ¶ པན སབྦེསཾ, ཨེཏེསཾ མཱནསཾ མཡཱ;

པཱཊཝཏྠཱཡ བྷིཀྑཱུནཾ, ཀཐཱིཡཏི པཀིཎྞཀཾ.

པནྠམཀྐཊཀོ ནཱམ, དིསཱསུ པན པཉྩསུ;

ཏཏྠ སུཏྟཾ པསཱརེཏྭཱ, ཛཱལམཛ྄ཛྷེ ནིཔཛྫཏི.

པཋམཱཡ དིསཱཡེཏྠ, སུཏྟེ པན པསཱརིཏེ;

པཱཎཀེན པཊངྒེན, གྷཊྚིཏེ མཀྑིཀཱཡ ཝཱ.

ནིཔནྣཊྛཱནཏོ ཀིཉྩི, ཙལིཏྭཱ ཨུཎྞནཱབྷི ཏུ;

གནྟྭཱ སུཏྟཱནུསཱརེན, ཡཱུསཾ པིཝཏི ཏསྶ སཱ.

པུནཱགནྟྭཱན ཏཏྠེཝ, ནིཔཛྫཏི ཡཐཱསུཁཾ;

ཨེཝམེཝ ཀརོཏེཝ, དིསཱསུ དུཏིཡཱདིསུ.

པསཱདཱ ¶ པཉྩ དཊྛབྦཱ, སུཏྟཾ པཉྩདིསཱསྭིཝ;

ཙིཏྟཾ པན ཙ དཊྛབྦཾ, མཛ྄ཛྷེ མཀྐཊཀོ ཝིཡ.

པཱཎཀཱདཱིཧི སུཏྟསྶ, ཏསྶ སངྒྷཊྚནཱ ཝིཡ;

པསཱདཱནཾ ཏུ དཊྛབྦཱ, གྷཊྚནཱརམྨཎེན ཧི.

ཙལནཾ ཝིཡ ཏཾམཛ྄ཛྷེ, ནིཔནྣཱཡུཎྞནཱབྷིཡཱ;

པསཱདགྷཊྚནཾ ཏཏྠ, གཧེཏྭཱརམྨཎཾ པན.

མནོདྷཱཏུཀྲིཡཱཙིཏྟཾ, བྷཝངྒཱཝཊྚནཾ མཏཾ;

ཏསྶཱ སུཏྟཱནུསཱརཾཝ, ཝཱིཐིཙིཏྟཔཝཏྟནཾ.

སཱིསེ པནསྶ ཝིཛ྄ཛྷིཏྭཱ, ཡཱུསཔཱནཾཝ ཙེཏསོ;

ཨཱརམྨཎེསུ དཊྛབྦཾ, ཛཝནསྶ པཝཏྟནཾ.

པུནཱགནྟྭཱ ¶ ཡཐཱ སུཏྟ-ཛཱལམཛ྄ཛྷེ ནིཔཛྫནཾ;

ཝཏྠུཾཡེཝ ཙ ནིསྶཱཡ, ཙིཏྟསྶ པརིཝཏྟནཾ.

ཨིདཾ ཏུ པན ཨོཔམྨཾ, ཨཏྠཾ དཱིཔེཏི ཀིཾ ཏུ ཧི;

ཨཱརམྨཎེན པཋམཾ, པསཱདེ གྷཊྚིཏེ པན.

པསཱདཝཏྠུཏོ ཙིཏྟཱ, ཝཏྠུསནྣིསྶིཏཾ མནོ;

ཏཏོ ཧི པཋམཾཡེཝ, ཛཱཡཏཱིཏི ཧི དཱིཔིཏཾ.

ཨེཀེཀཱརམྨཎཾ ¶ དྭཱིསུ, དྭཱིསུ དྭཱརེསུ སབྦསོ;

ཨཱགཙྪཏི ཏེནཱཔཱཐཾ, ཨཡམཏྠོཔི དཱིཔིཏོ.

རཱུཔཾ ཙཀྑུཔསཱདམྷི, གྷཊྚིཏྭཱ ཏངྑཎེ པན;

མནོདྭཱརེ ཏཐཱཔཱཐ-མཱགཙྪཏི ནིསཾསཡོ.

ཁགོ ཡཐཱ ཧི རུཀྑགྒེ, ནིལཱིཡནྟོཝ སཱཁིནོ;

སཱཁཾ གྷཊྚེཏི ཏསྶཱིདྷ, ཚཱཡཱ ཕརཏི བྷཱུམིཡཾ.

སཱཁཱཡ ¶ གྷཊྚནཙྪཱཡཱ, ཕརཎཱནི ཙ སབྦསོ;

ཨཔུབྦཱཙརིམཾ ཨེཀ-ཀྑཎསྨིཾཡེཝ ཛཱཡརེ.

ཨེཝམེཝ ཙ རཱུཔསྶ, པསཱདསྶ ཙ གྷཊྚནཾ;

ཏཐེཝ ཙ མནོདྭཱརེ, ཨཱཔཱཐགམནམྤི ཙ;

ཨཔུབྦཱཙརིམཾ ཨེཀ-ཀྑཎསྨིཾཡེཝ ཧོཏིཏི.

ཏཏོ བྷཝངྒཾ ཚིནྡིཏྭཱ, ཙཀྑུདྭཱརེ ཡཐཱཀྐམཾ;

ཨཱཝཛྫནེ སམུཔྤནྣེ, དསྶནེ སམྤཊིཙྪནེ.

སནྟཱིརཎེ སམུཔྤནྣེ, ཏཏོ ཝོཊྛབྦནེཔི ཙ;

ཀུསལཾ ཛཝནཾ ཙིཏྟཾ, ཏཐཱཀུསལམེཝ ཝཱ.

ཨེསོ ཨེཝ ནཡོ སོཏ-དྭཱརཱདཱིསུཔི ཝིཉྙུནཱ;

ཨཝིསེསེན ཝིཉྙེཡྻོ, སདྡཱདཱིནཾ ཏུ གྷཊྚནེ.

དོཝཱརིཀོཔམཱདཱིནི ¶ , ཨེཏསྶཏྠསྶ དཱིཔནེ;

ཨུདྡྷརིཏྭཱན ཏཱནེཏྠ, དསྶེཏབྦཱནི ཝིཉྙུནཱ.

ཨསམྦྷེདེན ཙཀྑུསྶ, རཱུཔཱཔཱཐགམེན ཙ;

ཨཱལོཀནིསྶཡེནཱཔི, སམནཀྐཱརཧེཏུནཱ.

པཙྩཡེཧི པནེཏེཧི, སམེཏེཧི ཙཏཱུཧིཔི;

ཛཱཡཏེ ཙཀྑུཝིཉྙཱཎཾ, སམྤཡུཏྟེཧི ཏཾ སཧ.

ཨསམྦྷེདེན སོཏསྶ, སདྡཱཔཱཐགམེན ཙ;

ཨཱཀཱསནིསྶཡེནཱཔི, སམནཀྐཱརཧེཏུནཱ.

པཙྩཡེཧི པནེཏེཧི, སམེཏེཧི ཙཏཱུཧིཔི;

ཛཱཡཏེ སོཏཝིཉྙཱཎཾ, སམྤཡུཏྟེཧི ཏཾ སཧ.

ཨསམྦྷེདེན ¶ གྷཱནསྶ, གནྡྷཱཔཱཐགམེན ཙ;

ཝཱཡོསནྣིསྶཡེནཱཔི, སམནཀྐཱརཧེཏུནཱ.

པཙྩཡེཧི པནེཏེཧི, སམེཏེཧི ཙཏཱུཧིཔི;

ཛཱཡཏེ གྷཱནཝིཉྙཱཎཾ, སམྤཡུཏྟེཧི ཏཾ སཧ.

ཨསམྦྷེདེན ཛིཝ྄ཧཱཡ, རསཱཔཱཐགམེན ཙ;

ཨཱཔོསནྣིསྶཡེནཱཔི, སམནཀྐཱརཧེཏུནཱ.

པཙྩཡེཧི པནེཏེཧི, སམེཏེཧི ཙཏཱུཧིཔི;

ཛཱཡཏེ ཛིཝ྄ཧཱཝིཉྙཱཎཾ, སམྤཡུཏྟེཧི ཏཾ སཧ.

ཨསམྦྷེདེན ¶ ཀཱཡསྶ, ཕོཊྛབྦཱཔཱཐསངྒམཱ;

པཐཝཱིནིསྶཡེནཱཔི, སམནཀྐཱརཧེཏུནཱ.

པཙྩཡེཧི པནེཏེཧི, སམེཏེཧི ཙཏཱུཧིཔི;

ཛཱཡཏེ ཀཱཡཝིཉྙཱཎཾ, སམྤཡུཏྟེཧི ཏཾ སཧ.

ཨསམྦྷེདཱ མནསྶཱཔི, དྷམྨཱཔཱཐགམེན ཙ;

ཝཏྠུསནྣིསྶཡེནཱཔི, སམནཀྐཱརཧེཏུནཱ.

པཙྩཡེཧི ¶ པནེཏེཧི, སམེཏེཧི ཙཏཱུཧིཔི;

མནོཝིཉྙཱཎམེཝཾ ཏུ, སམྤཡུཏྟེཧི ཛཱཡཏེ.

མནོ བྷཝངྒཙིཏྟནྟི, ཝེདིཏབྦཾ ཝིབྷཱཝིནཱ;

ཨཱཝཛྫནཀྲིཡཱཙིཏྟཾ, སམནཀྐཱརོཏི སཉྙིཏཾ.

ཝཏྠུསནྣིསྶཡེནཱཏི, ནཱཡཾ སབྦཏྠ གཙྪཏི;

བྷཝཾ ཏུ པཉྩཝོཀཱརཾ, སནྡྷཱཡ ཀཐིཏོ པན.

པཊིསནྡྷཱདིཙིཏྟཱནི, སབྦཱནེཀཱུནཝཱིསཏི;

ཀཱམེ དས ཙ རཱུཔེསུ, པཉྩ ཙཏྟཱརིརཱུཔིསུ.

ཀམྨཾ ¶ ཀམྨནིམིཏྟཉྩ, ཏཐཱ གཏིནིམིཏྟཀཾ;

ཨིདཾ ཧི ཏིཝིདྷཾ ཏེསཾ, ཨཱརམྨཎམུདཱིརིཏཾ.

ཀཱམཱཝཙརསནྡྷཱིནཾ, པརིཏྟཱརམྨཎཾ མཏཾ;

པཙྩུཔྤནྣམཏཱིཏཾ ཝཱ, ཧོཏི ནཏྠི ཨནཱགཏཾ.

ཨཊྛེཝ ཙ མཧཱཔཱཀཱ, ཏཱིཎི སནྟཱིརཎཱནི ཙ;

ཨེཀཱདསཝིདྷཾ ཙིཏྟཾ, ཏདཱརམྨཎསཉྙིཏཾ.

ཨེཀཱདསཝིདྷེ ཙིཏྟེ, ཏདཱརམྨཎསཉྙིཏེ;

དས པུཉྙཝིཔཱཀཱནི, ཨེཀཾ ཧོཏི ཨཔུཉྙཛཾ.

མཧཱཔཱཀཱ ན ཛཱཡནྟེ, རཱུཔཱརཱུཔབྷཝདྭཡེ;

ཀཱམེ རཱུཔེ བྷཝེ ཙེཝ, ཧོཏི སནྟཱིརཎཏྟཡཾ.

ཏདཱརམྨཎཙིཏྟཱནི, ཡཱནི ཝུཏྟཱནི སཏྠུནཱ;

ཏེསུ ཙིཏྟཾ པནེཀམྤི, རཱུཔཱརཱུཔབྷཝདྭཡེ.

ན ཏདཱརམྨཎཾ ཧུཏྭཱ, པཝཏྟཏི ཀདཱཙིཔི;

ཀསྨཱ ན ཧོཏི ཙེ ཏཏྠ, བཱིཛསྶཱབྷཱཝཏོ པན.

པཊིསནྡྷིབཱིཛཾ ནཏྠེཏྠ, ཀཱམཱཝཙརསཉྙིཏཾ;

རཱུཔཱདིགོཙརེ ཏསྶ, བྷཝེཡྻ ཛནཀཾ ཏུ ཡཾ.

ཙཀྑུཝིཉྙཱཎཀཱདཱིནཾ ¶ , ནཏྠིཏཱཔཛྫཏཱིཏི ཙེ;

ནིནྡྲིཡཱནཾ པཝཏྟཱནུ-བྷཱཝཏོ ཙིཏྟསམྦྷཝོ.

ཨེཀནྟེན ཡཐཱ ཙེཏཾ, ཏདཱརམྨཎམཱནསཾ;

ནཔྤཝཏྟཏི སབྦམྤི, རཱུཔཱརཱུཔབྷཝདྭཡེ.

ཨཀཱམཱཝཙརདྷམྨེཔི, ཏདེཏཾ ནཱནུབནྡྷཏི;

ཀསྨཱ ཨཛནཀཏྟཱ ཧི, ཛནཀསྶཱསམཱནཏོ.

ཛནཀཾ ¶ ཏེན ཏུལྱཾ ཝཱ, ཀཱམཱཝཙརསཉྙིཏཾ;

ཀུསལཱཀུསལཱདིཾ ཏུ, ཛཝནཾ ཨནུབནྡྷཏི.

ཀཱམཱཝཙརདྷམྨཱཔི ¶ , ཡེ མཧགྒཏགོཙརཱ;

ཧུཏྭཱ ཝཏྟནྟི ཏེ ཙཱཔི, ཨིདཾ ནེཝཱནུབནྡྷཏི.

པརིཏྟཱརམྨཎཏྟཱ ཙ, ཨེཀནྟེན པནསྶ ཧི;

ཏཐཱཔརིཙིཏཏྟཱ ཙ, ནཱནུབནྡྷཏི སབྦདཱ.

ཀིཾ ཏེན ཡུཏྟིཝཱདེན, ཝུཏྟཾ ཨཊྛཀཐཱསུ ཧི;

ཏདཱརམྨཎཙིཏྟཱནི, ཨེཀཱདསཔི སབྦསོ.

ནཱམགོཏྟཾ པནཱརབྦྷ, ཛཝནེ ཛཝིཏེཔི ཙ;

ཏདཱརམྨཎཾ ན གཎྷནྟི, རཱུཔཱརཱུཔབྷཝེསུ ཝཱ.

ཡདཱ པཉྙཏྟིམཱརབྦྷ, ཛཝནེ ཛཝིཏེཔི ཝཱ;

ཏཐཱ ཝིཔསྶནཱཡཱཔི, ལཀྑཎཱརམྨཎཱཡ ཙ.

ཏདཱརམྨཎཱ ན ལབྦྷནྟི, མིཙྪཏྟནིཡཏེསུཔི;

ན ལོཀུཏྟརདྷམྨེཔི, ཨཱརབྦྷ ཛཝནེ གཏེ.

པཊིསམྦྷིདཱཉཱཎཱནི, ཨཱརབྦྷ ཛཝིཏེཔི ཙ.

མནོདྭཱརེཔི སབྦེསཾ, ཛཝནཱནམནནྟརཾ;

ཏདཱརམྨཎཙིཏྟཱནི, བྷཝནྟི ཨནུཔུབྦཏོ.

ན ¶ ཝིཛྫཏི མནོདྭཱརེ, གྷཊྚནཱརམྨཎསྶ ཧི;

ཀཐཾ བྷཝངྒཏོ ཧོཏི, ཝུཊྛཱནཾ པན ཙེཏསོ.

མནོདྭཱརེཔི ཨཱཔཱཐ-མཱགཙྪནྟེཝ གོཙརཱ;

གྷཊྚནཱཡ ཝིནཱ ཏསྨཱ, ཙིཏྟཱནཾ ཧོཏི སམྦྷཝོ.

དྭཱདསཱཔུཉྙཙིཏྟཱནཾ ¶ , ཝིཔཱཀཱ སཏྟསཏྟཏི;

བྷཝནྟི ཙཏུརཱསཱིཏི, པཱཔཔཱཀཱ པཝཏྟིཡཾ.

ཨེཀཱདསཝིདྷཱནཾ ཏུ, ཧིཏྭཱ ཨུདྡྷཙྩམཱནསཾ;

ཨེཀཱདསཝིདྷཱ ཙེཝ, བྷཝནྟི པཊིསནྡྷིཡོ.

ཀྲིཡཙིཏྟེསུ སབྦེསུ, ཛཝནཾ ན ཙ ཧོཏི ཡཾ;

ཏཾ ཝེ ཀརཎམཏྟཏྟཱ, ཝཱཏཔུཔྥསམཾ མཏཾ.

ཛཝནཏྟཾ ཏུ སམྤཏྟཾ, ཀིཙྩསཱདྷནཏོ པན;

ཚིནྣམཱུལསྶ རུཀྑསྶ, པུཔྥཾཝ ཨཕལཾ སིཡཱ.

པཊིཙྩ པན ཨེཏསྨཱ, ཕལམེཏཱིཏི པཙྩཡོ;

ཡོ དྷམྨོ ཡསྶ དྷམྨསྶ, ཋིཏིཡུཔྤཏྟིཡཱཔི ཝཱ.

ཨུཔཀཱརོ ཧི སོ ཏསྶ, པཙྩཡོཏི པཝུཙྩཏི;

སམྦྷཝོཔབྷཝོ ཧེཏུ, ཀཱརཎཾ པཙྩཡོ མཏོ.

ལོབྷཱདི པན ཡོ དྷམྨོ, མཱུལཊྛེནུཔཀཱརཀོ;

ཧེཏཱུཏི པན སོ དྷམྨོ, ཝིཉྙཱཏབྦོ ཝིབྷཱཝིནཱ.

དྷམྨཱནཾ ཀུསལཱདཱིནཾ, ཀུསལཱདིཏྟསཱདྷཀོ;

མཱུལཊྛོཏི ཝདནྟེཝཾ, ཨེཀེ ཨཱཙརིཡཱ པན.

ཨེཝཾ ¶ ¶ སནྟེ ཏུ ཧེཏཱུནཾ, ཏཾསམུཊྛཱནརཱུཔིསུ;

ཧེཏུཔཙྩཡཏཱ ནེཝ, སམྤཛྫཏི ཀདཱཙིཔི.

ན ཧི ཏེ པན རཱུཔཱནཾ, སཱདྷེནྟི ཀུསལཱདིཀཾ;

ན ཏེསཾ པན རཱུཔཱནཾ, པཙྩཡཱ ན ཙ ཧོནྟི ཏེ.

ཏསྨཱ ¶ ཧི ཀུསལཱདཱིནཾ, ཀུསལཱདིཏྟསཱདྷཀོ;

མཱུལཊྛོཏི ན གནྟབྦོ, ཝིཉྙུནཱ སམཡཉྙུནཱ.

སུཔྤཏིཊྛིཏབྷཱཝསྶ, སཱདྷནེནུཔཀཱརཀོ;

མཱུལཊྛོཏི ཙ ཧེཏཱུནཾ, ཝིཉྙཱཏབྦོ ཝིབྷཱཝིནཱ.

ཀུསལཱཀུསལཱ ཧེཏཱུ, ཀྲིཡཱཧེཏཱུ ཙ སབྦསོ;

དྷམྨཱནཾ སམྤཡུཏྟཱནཾ, ཏཾསམུཊྛཱནརཱུཔིནཾ.

ཧེཏུཔཙྩཡཏཾ ཡཱཏཱ, པཉྩཝོཀཱརབྷཱུམིཡཾ;

སམྤཡུཏྟཱནམེཝེཏེ, ཙཏུཝོཀཱརབྷཱུམིཡཾ.

ཀཱམེ ཝིཔཱཀཧེཏཱུཔི, ཀཱམཱཝཙརབྷཱུམིཡཾ;

ཨཏྟནཱ སམྤཡུཏྟཱནཾ, པཊིསནྡྷིཀྑཎེ པན.

ཀཊཏྟཱརཱུཔཛཱཏཱནཾ, ཏཐེཝ ཙ པཝཏྟིཡཾ;

ཙིཏྟཛཱནཉྩ རཱུཔཱནཾ, ཧེཏུཔཙྩཡཏཾ གཏཱ.

རཱུཔེ ཝིཔཱཀཧེཏུ ཙ, རཱུཔཱཝཙརབྷཱུམིཡཾ;

ཏཐཱ ཝུཏྟཔྤཀཱརཱནཾ, ཧོནྟི ཏེ ཧེཏུཔཙྩཡཱ.

ཧེཏུཡོ པཉྩཝོཀཱརེ, ལོཀུཏྟརཝིཔཱཀཛཱ;

ཙིཏྟཛཱནཉྩ རཱུཔཱནཾ, སམྤཡུཏྟཱནམེཝ ཙ.

ཏེ ཧེཏུཔཙྩཡཱ ཧོནྟི, ཙཏུཝོཀཱརབྷཱུམིཡཾ;

བྷཝནྟི སམྤཡུཏྟཱནཾ, ཨིཏརེ ཙ སབྷཱུམིཡཾ.

ཧེཏུཏྠོ ཧེཏུཡོ ཙེཝ, ཧེཏུཔཙྩཡསམྦྷཝོ;

ཨེཝམེཝ ཙ ཝིཉྙེཡྻོ, སཉྫཱཏསུཁཧེཏུནཱ.

ཚནྡོ ¶ ཙིཏྟཉྩ ཝཱིརིཡཾ, ཝཱིམཾསཱ ཙཱཏི སཏྠུནཱ;

ལོཀཱདྷིཔཏིནཱ ཝུཏྟཱ, ཙཏུདྷཱདྷིཔཏཱི སིཡུཾ.

ཚནྡཾ ¶ ཏུ ཛེཊྛཀཾ ཀཏྭཱ, ཚནྡཾ ཀཏྭཱ དྷུརཾ པན;

ཙིཏྟསྶུཔྤཏྟིཀཱལསྨིཾ, ཚནྡཱདྷིཔཏི ནཱམསོ.

ཨེསེཝ ཙ ནཡོ ཉེཡྻོ, སེསེསུཔི ཙ ཏཱིསུཔི;

ཨདྷིཔྤཏཱིཏི ནིདྡིཊྛོ, ཛེཊྛཊྛེནུཔཀཱརཀོ.

ཨིཏི ཨབྷིདྷམྨཱཝཏཱརེ པཀིཎྞཀནིདྡེསོ ནཱམ

བཱཏྟིཾས ¶ པཱཀཙིཏྟཱནི, ལོཀིཀཱནེཝ ཡཱནི ཧི;

ཨེཏེསཾ པཱཀཙིཏྟཱནཾ, པཊིསནྡྷིཔཝཏྟིསུ.

པུཉྙཱཔུཉྙཱདིསངྑཱརཱ, ཡཐཱ ཡེསཉྩ པཙྩཡཱ;

བྷཝཱདཱིསུ ཏཐཱ ཏེཔི, ཝིཉྙཱཏབྦཱ ཝིབྷཱཝིནཱ.

ཏཡོ བྷཝཱ ཙཏསྶོ ཙ, ཡོནིཡོ གཏིཔཉྩཀཾ;

ཝིཉྙཱཎཊྛིཏིཡོ སཏྟ, སཏྟཱཝཱསཱ ནཝེརིཏཱ.

ཀཱམེ ¶ པུཉྙཱབྷིསངྑཱར-སཉྙིཏཱ ཨཊྛ ཙེཏནཱ;

ནཝནྣཾ པཱཀཙིཏྟཱནཾ, ཀཱམེ སུགཏིཡཾ པན.

ནཱནཱཀྑཎིཀཀམྨཱུཔ-ནིསྶཡཔཙྩཡེཧི ཙ;

དྭེདྷཱ ཧི པཙྩཡཱ ཏེསཾ, བྷཝནྟི པཊིསནྡྷིཡཾ.

ཨུཔེཀྑཱསཧིཏཱཧེཏུ-མནོཝིཉྙཱཎདྷཱཏུཡཱ ¶ ;

ཝིནཱ པརིཏྟཔཱཀཱནཾ, ཧོནྟི དྭེདྷཱ པཝཏྟིཡཾ.

ཏཱཡེཝ ཙེཏནཱ རཱུཔ-བྷཝེ དྭེདྷཱཝ པཙྩཡཱ;

པཉྩནྣཾ པཱཀཙིཏྟཱནཾ, བྷཝནྟི ཧི པཝཏྟིཡཾ.

ཨཊྛནྣཾ ཏུ པརིཏྟཱནཾ, ཀཱམེ དུགྒཏིཡཾ ཏཐཱ;

པཝཏྟེ པཙྩཡཱ ཧོནྟི, ན ཧོནྟི པཊིསནྡྷིཡཾ.

ཧོནྟི ཝུཏྟཔྤཀཱརཱཝ, ཀཱམེ སུགཏིཡཾ ཏཐཱ;

སོལ༹སནྣཾ ཝིཔཱཀཱནཾ, པཝཏྟེ པཊིསནྡྷིཡཾ.

རཱུཔེ པུཉྙཱབྷིསངྑཱརཱ, རཱུཔཱཝཙརབྷཱུམིཡཾ;

པཉྩནྣཾ པཱཀཙིཏྟཱནཾ, པཙྩཡཱ པཊིསནྡྷིཡཾ.

ཧོནྟིམཱཔུཉྙསངྑཱརཱ, ཀཱམེ དུགྒཏིཡཾ དྭིདྷཱ;

ཝིཉྙཱཎསྶ པནེཀསྶ, པཙྩཡཱ པཊིསནྡྷིཡཾ.

ཚནྣཾ པན པཝཏྟེཝ, ཧོནྟི ནོ པཊིསནྡྷིཡཾ;

སཏྟནྣམྤི བྷཝནྟེཝ, པཝཏྟེ པཊིསནྡྷིཡཾ.

ཀཱམེ སུགཏིཡཾ ཏེསཾ, སཏྟནྣམྤི ཏཐེཝ ཙ;

པཝཏྟེ པཙྩཡཱ ཧོནྟི, ན ཧོནྟི པཊིསནྡྷིཡཾ.

ཝིཉྙཱཎཱནཾ ཙཏུནྣམྤི, ཏེསཾ རཱུཔབྷཝེ ཏཐཱ;

པཝཏྟེ པཙྩཡཱ ཧོནྟི, ན ཧོནྟི པཊིསནྡྷིཡཾ.

སོ ¶ ཙ ཀཱམབྷཝེནིཊྛ-རཱུཔཱདིཨུཔལདྡྷིཡཾ;

ཨནིཊྛརཱུཔཱདཡོ པན, བྲཧྨལོཀེ ན ཝིཛྫརེ.

ཏཐེཝཱནེཉྫསངྑཱརོ ¶ , ཨརཱུཔཱཝཙརབྷཱུམིཡཾ;

ཙཏུནྣཾ པཱཀཙིཏྟཱནཾ, པཝཏྟེ པཊིསནྡྷིཡཾ.

ཨེཝཾ ¶ ཏཱཝ བྷཝེསྭེཏེ, པཊིསནྡྷིཔཝཏྟིསུ;

ཡཐཱ ཙ པཙྩཡཱ ཧོནྟི, ཏཐཱ ཉེཡྻཱ ཝིབྷཱཝིནཱ.

ཨེསེཝ ཙ ནཡོ ཉེཡྻོ, ཡོནིཨཱདཱིསུ ཏཏྲིདཾ;

ཨཱདིཏོ པན པཊྛཱཡ, མུཁམཏྟནིདསྶནཾ.

ཨཝིསེསེན པུཉྙཱབྷི-སངྑཱརོ དྭིབྷཝེསུཔི;

དཏྭཱན པཊིསནྡྷིཾ ཏུ, སབྦཔཱཀཾ ཛནེཏི སོ.

ཏཐཱ ཙཏཱུསུ ཝིཉྙེཡྻོ, ཨཎྜཛཱདཱིསུ ཡོནིསུ;

བཧུདེཝམནུསྶཱནཾ, གཏཱིསུ དྭཱིསུ ཨེཝ ཙ.

ཏཐཱ ནཱནཏྟཀཱཡཱདི-ཝིཉྙཱཎཱནཾ ཋིཏཱིསུཔི;

ཏཐཱ ཝུཏྟཔྤཀཱརསྨིཾ, སཏྟཱཝཱསེ ཙཏུབྦིདྷེ.

ཨེཝཾ པུཉྙཱབྷིསངྑཱརོ, བྷཝཱདཱིསུ ཡཐཱརཧཾ;

ཨེཀཝཱིསཏིཔཱཀཱནཾ, པཙྩཡོ ཧོཏི ཙ དྭིདྷཱ.

ཀཱམེ ཨཔུཉྙསངྑཱརོ, བྷཝེ ཙཏཱུསུ ཡོནིསུ;

ཏཱིསུ གཏཱིསུ ཨེཀིསྶཱ, ཝིཉྙཱཎཊྛིཏིཡཱཔི ཙ.

ཏཐེཝཱནེཉྫསངྑཱརོ, ཨེཀཱརཱུཔབྷཝེ པུན;

ཨེཀིསྶཱ ཡོནིཡཱ ཙེཝ, ཨེཀིསྶཱ གཏིཡཱཔི ཙ.

ཏཱིསུ ཙིཏྟཊྛིཏཱིསྭེཝ, སཏྟཱཝཱསེ ཙཏུབྦིདྷེ;

ཙཏུནྣཾ པཱཀཙིཏྟཱནཾ, དྭེདྷཱ སོ ཧོཏི པཙྩཡོ.

པཊིསནྡྷིཔཝཏྟཱིནཾ ¶ , ཝསེནེཝ བྷཝཱདིསུ;

ཝིཛཱནིཏབྦཱ སངྑཱརཱ, ཡཐཱ ཡེསཉྩ པཙྩཡཱ.

ན ¶ རཱུཔཱརཱུཔདྷམྨཱནཾ, སངྐནྟི པན ཝིཛྫཏི;

སངྐནྟིབྷཱཝེ ཨསཏི, པཊིསནྡྷི ཀཐཾ སིཡཱ.

ནཏྠི ཙིཏྟསྶ སངྐནྟི, ཨཏཱིཏབྷཝཏོ ཨིདྷ;

ཏཏོ ཧེཏུཾ ཝིནཱ ཏསྶ, པཱཏུབྷཱཝོ ན ཝིཛྫཏི.

སུལདྡྷཔཙྩཡཾ རཱུཔཱ-རཱུཔམཏྟཾ ཏུ ཛཱཡཏི;

ཨུཔྤཛྫམཱནམེཝཾ ཏུ, ལབྷིཏྭཱ པཙྩཡཾ པན.

བྷཝནྟརམུཔེཏཱིཏི, སམཉྙཱཡ པཝུཙྩཏི;

ན ཙ སཏྟོ ན ཙ ཛཱིཝོ, ན ཨཏྟཱ ཝཱཔི ཝིཛྫཏི.

ཏཡིདཾ པཱཀཊཾ ཀཏྭཱ, པཊིསནྡྷིཀྐམཾ པན;

དསྶཡིསྶཱམཧཾ སཱདྷུ, ནིབོདྷཐ སུདུབྦུདྷཾ.

ཨཏཱིཏསྨིཾ ¶ བྷཝེ ཏསྶ, ཨཱསནྣམརཎསྶ ཧི;

ཧརིཏཾ ཏཱལཔཎྞཾཝ, པཀྑིཏྟཾ ཨཱཏཔེ པན.

སུསྶམཱནེ སརཱིརསྨིཾ, ནཊྛེ ཙཀྑུནྡྲིཡཱདིཀེ;

ཧདཡཝཏྠུམཏྟསྨིཾ, ཋིཏེ ཀཱཡཔྤསཱདིཀེ.

ཝཏྠུསནྣིསྶིཏཾ ཙིཏྟཾ, ཧོཏི ཏསྨིཾ ཁཎེཔི ཙ;

པུབྦཱནུསེཝིཏཾ ཀམྨཾ, པུཉྙཾ ཝཱཔུཉྙམེཝ ཝཱ.

ཀམྨཾ ཀམྨནིམིཏྟཾ ཝཱ, ཨཱལམྦིཏྭཱ པཝཏྟཏི;

ཨེཝཾ པཝཏྟམཱནཾ ཏཾ, ཝིཉྙཱཎཾ ལདྡྷཔཙྩཡཾ.

ཨཝིཛྫཱཡ པཊིཙྪནྣཱ-དཱིནཝེ ཝིསཡེ པན;

ཏཎྷཱ ནམེཏི སངྑཱརཱ, ཁིཔནྟི སཧཛཱ པན.

ན མཱིཡམཱནཾ ཏཎྷཱཡ, ཏཾ སནྟཏིཝསཱ པན;

ཨོརིམཱ པན ཏཱིརམྷཱ, ཨཱལམྦིཏྭཱན རཛྫུཀཾ.

མཱཏིཀཱཏིཀྐམོཝེཏཾ ¶ ¶ , པུརིམཾ ཛཧཏི ནིསྶཡཾ;

ཨཔརཾ ཀམྨསམྦྷཱུཏཾ, ལམྦིཏྭཱ ཝཱཔི ནིསྶཡཾ.

ཏཾ པནཱརམྨཎཱདཱིཧི, པཙྩཡེཧི པཝཏྟཏི;

པུརིམཾ ཙཝནཾ ཨེཏྠ, པཙྪིམཾ པཊིསནྡྷི ཏུ.

ཏདེཏཾ ནཱཔི པུརིམཱ, བྷཝཏོཔི ཨིདྷཱགཏཾ;

ཀམྨཱདིཉྩ ཝིནཱ ཧེཏུཾ, པཱཏུབྷཱུཏཾ ན ཙེཝ ཏཾ.

ཨེཏྠ ཙེཏསྶ ཙིཏྟསྶ, པུརིམཱ བྷཝཏོ པན;

ཨིདྷཱནཱགམནེཏཱིཏ-བྷཝཧེཏཱུཧི སམྦྷཝེ.

པཊིགྷོསདཱིཔམུདྡཱདཱི, བྷཝནྟེཏྠ ནིདསྶནཱ;

ཡཐཱ ཨཱགནྟྭཱ ཨཉྙཏྲ, ཧོནྟི སདྡཱདིཧེཏུཀཱ.

ཨེཝམེཝ ཙ ཝིཉྙཱཎཾ, ཝེདིཏབྦཾ ཝིབྷཱཝིནཱ;

སནྟཱནབནྡྷཏོ ནཏྠི, ཨེཀཏཱ ཝཱཔི ནཱནཏཱ.

སཏི སནྟཱནབནྡྷེ ཏུ, ཨེཀནྟེནེཀཏཱ སིཡཱ;

ཁཱིརཏོ དདྷིསམྦྷཱུཏཾ, ན བྷཝེཡྻ ཀདཱཙིཔི.

ཨཐཱཔི པན ཨེཀནྟ-ནཱནཏཱ སཱ བྷཝེཡྻ ཙེ;

ཁཱིརསཱམཱི ནརོ ནེཝ, དདྷིསཱམཱི བྷཝེཡྻ སོ.

ཏསྨཱ ཨེཏྠ པནེཀནྟ-ཨེཀཏཱནཱནཏཱཔི ཝཱ;

ན ཙེཝ ཨུཔགནྟབྦཱ, ཝིཉྙུནཱ སམཡཉྙུནཱ.

ནནུ ཨེཝམསངྐནྟི-པཱཏུབྷཱཝེ ཏསྶ སཏི;

ཡེ ཨིམསྨིཾ མནུསྶཏྟ-བྷཱཝེ ཁནྡྷཱབྷིསམྦྷཝཱ.

ཏེསཾ ཨིདྷ ནིརུདྡྷཏྟཱ, ཀམྨསྶ ཕལཧེཏུནོ;

ཨཉྙསྶ ¶ ཨཉྙཏོ ཙེཝ, ཀམྨཏོ ཏཾ ཕལཾ སིཡཱ;

ཏསྨཱ ན སུནྡརཾ ཨེཏཾ, ཝིདྷཱནཾ སབྦམེཝ ཙ.

སནྟཱནེ ¶ ཡཾ ཕལཾ ཨེཏཾ, ནཱཉྙསྶ ན ཙ ཨཉྙཏོ;

བཱིཛཱནཾ ཨབྷིསངྑཱརོ, ཨེཏསྶཏྠསྶ སཱདྷཀོ.

ཨེཀསྨིཾ པན སནྟཱནེ, ཝཏྟམཱནཾ ཕལཾ པན;

ཨཉྙསྶཱཏིཔི ཝཱ ནེཝ, ཨཉྙཏོ ཝཱ ན ཧོཏི ཏཾ.

བཱིཛཱནཾ ཨབྷིསངྑཱརཱ, ཨེཏསྶཏྠསྶ སཱདྷཀོ;

བཱིཛཱནཾ ཨབྷིསངྑཱརེ, ཀཏེ ཏུ མདྷུཨཱདིནཱ.

ཏསྶ བཱིཛསྶ སནྟཱནེ, པཋམཾ ལདྡྷཔཙྩཡོ;

མདྷུརོ ཕལསོ ཏསྶ, ཧོཏི ཀཱལནྟརེ པན.

ན ཧི ཏཱནི ཧི བཱིཛཱནི, ཨབྷིསངྑརཎམྤི ཝཱ;

པཱཔུཎནྟི ཕལཊྛཱནཾ, ཨེཝཾ ཉེཡྻམིདམྤི ཙ.

བཱལཀཱལེ པཡུཏྟེན, ཝིཛྫཱསིཔྤོསདྷཱདིནཱ;

དཱིཔེཏབྦོ ཨཡཾ ཝུདྡྷ-ཀཱལསྨིཾ ཕལདཱཡིནཱ.

ཨེཝཾ སནྟེཔི ཏཾ ཀམྨཾ, ཝིཛྫམཱནམྤི ཝཱ པན;

ཕལསྶ པཙྩཡོ ཧོཏི, ཨཐ ཝཱཝིཛྫམཱནཀཾ.

ཝིཛྫམཱནཾ སཙེ ཧོཏི, ཏཔྤཝཏྟིཀྑཎེ པན;

བྷཝིཏབྦཾ ཝིཔཱཀེན, སདྡྷིམེཝ ཙ ཧེཏུནཱ.

ཨཐ ཝཱཝིཛྫམཱནཾ ཏཾ, ནིརུདྡྷཾ པཙྩཡོ བྷཝེ;

པཝཏྟིཀྑཎཏོ པུབྦེ, པཙྪཱ ནིཙྩཕལཾ སིཡཱ.

ཀཊཏྟཱ པཙྩཡོ ཀམྨཾ, ཏསྨཱ ནིཙྩཕལཾ ན ཙ;

པཱཊིབྷོགཱདིཀཾ ཀམྨཾ, ཝེདིཏབྦཾ ནིདསྶནཾ.

ཀཊཏྟཱཡེཝ ¶ ཏཾ ཀམྨཾ, ཕལསྶ པན པཙྩཡོ;

ན ཙསྶ ཝིཛྫམཱནཏྟཾ, ཏསྶ ཝཱཝིཛྫམཱནཏཱ.

སོཏབྦོ པན སོཏཱུནཾ, པཱིཏིབུདྡྷིཝིཝཌྜྷནོ.

ཨིཏི ཨབྷིདྷམྨཱཝཏཱརེ པུཉྙཝིཔཱཀཔཙྩཡནིདྡེསོ ནཱམ

ཝུཏྟམཱདིམྷི ¶ ཡཾ རཱུཔཾ, ཙིཏྟཛཱནམནནྟརཾ;

ཏསྶ དཱནི ཀརིསྶཱམི, སམཱསེན ཝིབྷཱཝནཾ.

ཡཾ རུཔྤཏཱིཏི རཱུཔནྟི, ཏཐཱ རཱུཔཡཏཱིཏི ཝཱ;

རཱུཔཱརཱུཔབྷཝཱཏཱིཏོ, སུརཱུཔོ རཱུཔམབྲཝི.

ཏཾ རཱུཔཾ དུཝིདྷཾ ཧོཏི, བྷཱུཏོཔཱདཱཡབྷེདཏོ;

ཙཏུབྦིདྷཱ མཧཱབྷཱུཏཱ, ཨུཔཱདཱ ཙཏུཝཱིསཏི.

མཧནྟཱ པཱཏུབྷཱུཏཱཏི, མཧཱབྷཱུཏསམཱཏི ཝཱ;

ཝཉྩཀཏྟཱ ཨབྷཱུཏེན, མཧཱབྷཱུཏཱཏི སཉྙིཏཱ.

ཙཀྑུ ¶ ¶ སོཏཉྩ གྷཱནཉྩ, ཛིཝ྄ཧཱ ཀཱཡོ ཙ རཱུཔཏཱ;

སདྡོ གནྡྷོ རསོ ཨིཏྠི-པུརིསིནྡྲིཡཛཱིཝིཏཾ.

ཝཏྠུམཱཧཱརཏཱ ཀཱཡ-ཝཙཱིཝིཉྙཏྟིཡོ དུཝེ;

ཨཱཀཱསོ ཙེཝ རཱུཔསྶ, ལཧུཏཱདིཏྟཡམྤི ཙ.

ཨུཔཙཡོ སནྟཏིརཱུཔཾ, ཛརཏཱནིཙྩཏཱཔི ཙ;

ཨུཔཱདཱཏི པཝུཙྩནྟི, ཨིམཱནི ཙཏུཝཱིསཏི.

མཧཱབྷཱུཏཱནི ནིསྶཱཡ, ཨམུཉྩིཏྭཱ པཝཏྟིཏོ;

ཨུཔཱདཱརཱུཔམིཙྩཱཧ, ནིརུཔཱདཱནམཱནསོ.

པཐཝཱི པཏྠཊཏྟཱ ཙ, ཝཱཡོ ཝཱཡནཏོ བྷཝེ;

ཏེཛོ ཏེཛེཏི རཱུཔཱནི, ཨཱཔོ ཨཱཔེཏི པཱལནཱ.

ཏེསཾ དཱནི པཝཀྑཱམི, རཱུཔཱནཾ ལཀྑཎཱདིཀཾ;

ལཀྑཎཱདཱིསུ ཉཱཏེསུ, དྷམྨཱ ཨཱཝི བྷཝནྟི ཧི.

སཱམཉྙཾ ཝཱ སབྷཱཝོ ཝཱ, དྷམྨཱནཾ ལཀྑཎཾ མཏཾ;

ཀིཙྩཾ ཝཱ ཏསྶ སམྤཏྟི, རསོཏི པརིདཱིཔིཏོ.

ཕལཾ ཝཱ པཙྩུཔཊྛཱནཾ, ཨུཔཊྛཱནནཡོཔི ཝཱ;

ཨཱསནྣཀཱརཎཾ ཡཾ ཏུ, ཏཾ པདཊྛཱནསཉྙིཏཾ.

ཏཏྠ ¶ ཀཀྑལ༹ཏྟལཀྑཎཱ པཐཝཱིདྷཱཏུ, པཏིཊྛཱནརསཱ, སམྤཊིཙྪནཔཙྩུཔཊྛཱནཱ. པགྒྷརཎལཀྑཎཱ ཨཱཔོདྷཱཏུ, ཨུཔབྲཱུཧནརསཱ, སངྒཧཔཙྩུཔཊྛཱནཱ. ཨུཎྷཏྟལཀྑཎཱ ཏེཛོདྷཱཏུ, པརིཔཱཙནརསཱ, མདྡཝཱནུཔྤདཱནཔཙྩུཔཊྛཱནཱ. ཝིཏྠམྦྷནལཀྑཎཱ ཝཱཡོདྷཱཏུ, སམུདཱིརཎརསཱ, ཨབྷིནཱིཧཱརཔཙྩུཔཊྛཱནཱ. ཨེཀེཀཱཡ ཙེཏྠ སེསབྷཱུཏཏྟཡཔདཊྛཱནཱཏི ཝེདིཏབྦཱ.

ཙཀྑཏཱིཏི ཙཀྑུ, རཱུཔཾ ཝིབྷཱཝེཏཱིཏི ཨཏྠོ.

ཏཏྠ ¶ ¶ ཙཀྑུ དྭིདྷཱ ཝུཏྟཾ, པཉྙཱམཾསཔྤབྷེདཏོ;

ཏཏྠ པཉྙཱམཡཾ ཙཀྑུ, ཧོཏི པཉྩཝིདྷཾ པན.

བུདྡྷདྷམྨསམནྟེཧི, ཉཱཎདིབྦེཧི ནཱམཏོ;

ཡཐཱནུཀྐམཏོ ཏེསཾ, ནཱནཏྟཾ མེ ནིབོདྷཐ.

ཨཱསཡཱནུསཡེ ཉཱཎཾ, ཨིནྡྲིཡཱནཾ པརོཔརེ;

བུདྡྷཙཀྑུནྟི ནིདྡིཊྛཾ, མུནིནཱ ལོཀཙཀྑུནཱ.

ཧེཊྛཱམགྒཏྟཡེ ཉཱཎཾ, དྷམྨཙཀྑུནྟི སཉྙིཏཾ;

ཉེཡྻཾ སམནྟཙཀྑུནྟི, ཉཱཎཾ སབྦཉྙུཏཱ པན.

ཡཾ ‘‘ཙཀྑུཾ ཨུདཔཱདཱི’’ཏི, ཨཱགཏཾ ཉཱཎཙཀྑུ ཏཾ;

ཨབྷིཉྙཱཙིཏྟཛཱ པཉྙཱ, དིབྦཙཀྑུནྟི ཝུཙྩཏི.

མཾསཙཀྑུཔི དུཝིདྷཾ, སསམྦྷཱརཔསཱདཏོ;

སསམྦྷཱརཉྩ ནཱམེཏྠ, ཨཀྑིཀཱུཔེ པཏིཊྛིཏཾ.

ཨཀྑིཀཱུཔཊྛིནཱ ཧེཊྛཱ, ཨུདྡྷཉྩ བྷམུཀཊྛིནཱ;

ཨུབྷཏོ ཨཀྑིཀཱུཊེཧི, མཏྠལུངྒེན ཨནྟཏོ.

བཧིདྡྷཱ ཨཀྑིལོམེཧི, པརིཙྪིནྣོ ཙ ཡོ པན;

ནྷཱརུསུཏྟེན ཨཱབནྡྷོ, མཾསཔིཎྜོ པཝུཙྩཏི.

པུཐུལཾ ཝིཔུལཾ ནཱིལཾ, ཨིཏི ཛཱནཱཏི ལོཙནཾ.

ཙཀྑུ ནཱམ ན ཏཾ ཧོཏི, ཝཏྠུ ཏསྶཱཏི ཝུཙྩཏི;

ཨིདཾ པན སསམྦྷཱར-ཙཀྑུནྟི པརིདཱིཔིཏཾ.

ཙཀྑུ ¶ ཀཱཡཔྤསཱདོ ཙ, བྷཱཝོ ཛཱིཝིཏམེཝ ཙ;

ཙཏྟཱལཱིསཉྩ རཱུཔཱནི, ཙཏྟཱརི ཏུ བྷཝནྟི ཧི.

ཨིམེསཾ པན རཱུཔཱནཾ, ཝསེན པརིཔིཎྜིཏཾ;

ཨིདཾ སམྦྷཱརཙཀྑུནྟི, པཎྜིཏེཧི པཀཱསིཏཾ.

ཡོ པནེཏྠ སིཏོ ཨཏྠི, པརིབནྡྷོ པརིཏྟཀོ;

ཙཏུནྣཾ པན བྷཱུཏཱནཾ, པསཱདོ ཀམྨསམྦྷཝོ.

ཨིདཾ པསཱདཙཀྑུནྟི, ཨཀྑཱཏཾ པཉྩཙཀྑུནཱ;

ཏདེཏཾ ཏསྶ མཛ྄ཛྷེ ཏུ, སསམྦྷཱརསྶ ཙཀྑུནོ.

སེཏེན མཎྜལེནསྶ, པརིཀྑིཏྟསྶ སབྦསོ;

ཀཎྷམཎྜལམཛ྄ཛྷེ ཝཱ, ནིཝིཊྛེ དིཊྛམཎྜལེ.

སནྡྷཱརཎཱདིཀིཙྩཱཧི, དྷཱཏཱུཧི ཙ ཙཏཱུཧིཔི;

ཀཏཱུཔཀཱརཾ ཧུཏྭཱན, ཨུཏུཙིཏྟཱདིནཱ པན.

ཨུཔཏྠམྦྷིཡམཱནཾ ཏཾ, ཨཱཡུནཱ ཀཏཔཱལནཾ;

ཝཎྞགནྡྷརསཱདཱིཧི, རཱུཔེཧི པརིཝཱརིཏཾ.

ཙཀྑུཝིཉྙཱཎཀཱདཱིནཾ, ཝཏྠུདྭཱརཉྩ སཱདྷཡཾ;

ཨཱུཀཱསིརསམཱནེན, པམཱཎེནེཝ ཏིཊྛཏི.

‘‘ཡེན ཙཀྑུཔསཱདེན, རཱུཔཱནིམནུཔསྶཏི;

པརིཏྟཾ སུཁུམཾ ཨེཏཾ, ཨཱུཀཱསིརསམཱུཔམ’’ནྟི.

སོཏཱདཱིསུ ཙ ཨེསེཝ, ནཡོ ཉེཡྻོ ཝིབྷཱཝིནཱ;

ཝིསེསམཏྟམེཝེཏྠ, པཝཀྑཱམི ཨིཏོ པརཾ.

སུཎཱཏཱིཏི སོཏཾ, ཏཾ ཏནུཏམྦལོམཱཙིཏེ ཨངྒུལིཝེདྷཀསཎྛཱནེ པདེསེ ཝུཏྟཔྤཀཱརཱཧི དྷཱཏཱུཧི ཀཏཱུཔཀཱརཾ ཨུཏུཙིཏྟཱཧཱརེཧི ཨུཔཏྠམྦྷིཡམཱནཾ ཨཱཡུནཱ པརིཔཱལིཡམཱནཾ སོཏཝིཉྙཱཎཱདཱིནཾ ཝཏྠུདྭཱརབྷཱཝཾ སཱདྷཡམཱནཾ ཏིཊྛཏི.

གྷཱཡཏཱིཏི གྷཱནཾ, ཏཾ སསམྦྷཱརགྷཱནབིལསྶ ཨནྟོ ཨཛཔདསཎྛཱནེ པདེསེ ཡཐཱཝུཏྟཔྤཀཱརཱ ཧུཏྭཱ ཏིཊྛཏི.

སཱཡཏཱིཏི ཛིཝ྄ཧཱ, ཛཱིཝིཏམཝ྄ཧཱཡཏཱིཏི ཝཱ ཛིཝ྄ཧཱ, སཱ སསམྦྷཱརཛིཝ྄ཧཱམཛ྄ཛྷསྶ ཨུཔརི ཨུཔྤལདལགྒསཎྛཱནེ པདེསེ ཡཐཱཝུཏྟཔྤཀཱརཱ ཧུཏྭཱ ཏིཊྛཏི.

ཀུཙྪིཏཱནཾ མལཱནཾ ཨཱཡོཏི ཀཱཡོ. ཡཱཝཏཱ པན ཨིམསྨིཾ ཀཱཡེ ཨུཔཱདིནྣཀཾ རཱུཔཾ ཨཏྠི, སབྦཏྠ ཀཱཡཔསཱདོ ཀཔྤཱསཔཊལེ སྣེཧོ ཝིཡ ཡཐཱཝུཏྟཔྤཀཱརོ ཧུཏྭཱ ཏིཊྛཏི.

ཨེཏྠ པནེཏེསཾ ལཀྑཎཱདཱིནི པཝཀྑཱམི – དཊྛུཀཱམཏཱནིདཱནཀམྨསམུཊྛཱནབྷཱུཏཔསཱདལཀྑཎཾ ¶ ཙཀྑུ, རཱུཔེསུ ཨཱཝིཉྪནརསཾ, ཙཀྑུཝིཉྙཱཎསྶ ཨཱདྷཱརབྷཱཝཔཙྩུཔཊྛཱནཾ, དཊྛུཀཱམཏཱནིདཱནཀམྨཛབྷཱུཏཔདཊྛཱནཾ.

སོཏུཀཱམཏཱནིདཱནཀམྨསམུཊྛཱནབྷཱུཏཔསཱདལཀྑཎཾ ¶ སོཏཾ, སདྡེསུ ཨཱཝིཉྪནརསཾ, སོཏཝིཉྙཱཎསྶ ཨཱདྷཱརབྷཱཝཔཙྩུཔཊྛཱནཾ, སོཏུཀཱམཏཱནིདཱནཀམྨཛབྷཱུཏཔདཊྛཱནཾ.

གྷཱཡིཏུཀཱམཏཱནིདཱནཀམྨསམུཊྛཱནབྷཱུཏཔསཱདལཀྑཎཾ གྷཱནཾ, གནྡྷེསུ ཨཱཝིཉྪནརསཾ, གྷཱནཝིཉྙཱཎསྶ ཨཱདྷཱརབྷཱཝཔཙྩུཔཊྛཱནཾ, གྷཱཡིཏུཀཱམཏཱནིདཱནཀམྨཛབྷཱུཏཔདཊྛཱནཾ.

སཱཡིཏུཀཱམཏཱནིདཱནཀམྨསམུཊྛཱནབྷཱུཏཔསཱདལཀྑཎཱཛིཝ྄ཧཱ ¶ , རསེསུ ཨཱཝིཉྪནརསཱ, ཛིཝ྄ཧཱཝིཉྙཱཎསྶ ཨཱདྷཱརབྷཱཝཔཙྩུཔཊྛཱནཱ, སཱཡིཏུཀཱམཏཱནིདཱནཀམྨཛབྷཱུཏཔདཊྛཱནཱ.

ཕུསིཏུཀཱམཏཱནིདཱནཀམྨསམུཊྛཱནབྷཱུཏཔསཱདལཀྑཎོ ཀཱཡོ, ཕོཊྛབྦེསུ ཨཱཝིཉྪནརསོ, ཀཱཡཝིཉྙཱཎསྶ ཨཱདྷཱརབྷཱཝཔཙྩུཔཊྛཱནོ, ཕུསིཏུཀཱམཏཱནིདཱནཀམྨཛབྷཱུཏཔདཊྛཱནོ.

ཏེཛཱདྷིཀཱནཾ བྷཱུཏཱནཾ, པསཱདོ པན ཙཀྑུཏི;

ཨཱཀཱསཱནིལཏོཡུབྦིཨདྷིཀཱནཾ ཏུ སེསཀཱ.

ཏེ པནེཝཾ ཏུ ཝཏྟབྦཱ, ‘‘སུཏྟཾ ཨཱཧརཐཱ’’ཏི ཧི;

སུཏྟམེཝ ཙ ཏེ ཨདྡྷཱ, ན དཀྑིསྶནྟི ཀིཉྩིཔི.

ཝིསེསེ སཏི བྷཱུཏཱནཾ, པསཱདོ ཧི ཀཐཾ བྷཝེ;

སམཱནཱནཾ ཧི བྷཱུཏཱནཾ, པསཱདོ པརིདཱིཔིཏོ.

ཏསྨཱ ནིསྶཡབྷཱུཏཱནཾ, ཙཏུནྣཾ སབྦསོ པན;

པཧཱཡེཝ པནེཏེསཾ, ཝིསེསཔརིཀཔྤནཾ.

ཉེཡྻཱ ཀམྨཝིསེསེན, པསཱདཱནཾ ཝིསེསཏཱ;

ན ཧི བྷཱུཏཝིསེསེན, ཧོཏི ཏེསཾ ཝིསེསཏཱ.

ཨེཝམེཏེསུ ¶ ཙཀྑུཉྩ, སོཏཾ ཨཔཏྟགཱཧཀཾ;

སེསཾ ཏུ པན གྷཱནཱདིཏྟཡཾ སམྤཏྟགཱཧཀཾ.

རཱུཔནྟི རཱུཔཡཏཱིཏི རཱུཔཾ, ཝཎྞཝིཀཱརམཱཔཛྫམཱནཾ ཧདཡངྒཏབྷཱཝཾ པཀཱསེཏཱིཏི ཨཏྠོ. ཏཾ པན ཙཀྑུཔཊིཧནནལཀྑཎཾ, ཙཀྑུཝིཉྙཱཎསྶ ཝིསཡབྷཱཝརསཾ, ཏསྶེཝ གོཙརབྷཱཝཔཙྩུཔཊྛཱནཾ, ཙཏུམཧཱབྷཱུཏཔདཊྛཱནཾ. ཡཐཱ ཙེཏཾ, ཏཐཱ སབྦཱནིཔི ཨུཔཱདཱརཱུཔཱནཱིཏི ¶ .

སདྡོཏི ¶ སདྡཡཏཱིཏི སདྡོ, སོ པན སོཏཔཊིཧནནལཀྑཎོ, སོཏཝིཉྙཱཎསྶ ཝིསཡབྷཱཝརསོ, ཏསྶེཝ གོཙརབྷཱཝཔཙྩུཔཊྛཱནོ.

རསོཏི རསནྟི ཏེནཱཏི རསོ, སོ ཛིཝ྄ཧཱཔཊིཧནནལཀྑཎོ, ཛིཝ྄ཧཱཝིཉྙཱཎསྶ ཝིསཡབྷཱཝརསོ, ཏསྶེཝ གོཙརབྷཱཝཔཙྩུཔཊྛཱནོ.

གནྡྷོཏི ཨཏྟཱནཾ གནྡྷཡཏི སཱུཙཡཏཱིཏི གནྡྷོ, སོ གྷཱནཔཊིཧནནལཀྑཎོ, གྷཱནཝིཉྙཱཎསྶ ཝིསཡབྷཱཝརསོ, ཏསྶེཝ གོཙརབྷཱཝཔཙྩུཔཊྛཱནོ.

ཀམྨཛོ ཨིཏྠིབྷཱཝོཡཾ, པཊིསནྡྷིསམུཊྛིཏོ;

ཡཉྩེཏཾ ཨིཏྠིལིངྒཱདི, ན ཏུ ཏཾ ཨིནྡྲིཡཾ སིཡཱ.

ཨིཏྠིནྡྲིཡཾ པཊིཙྩེཝ, ཨིཏྠིལིངྒཱདཡོ པན;

པཝཏྟེཡེཝ ཛཱཡནྟེ, ན ཏཱནི པཊིསནྡྷིཡཾ.

ན ཙ ཏཾ ཙཀྑུཝིཉྙེཡྻཾ, མནོཝིཉྙེཡྻམེཝ ཏཾ;

ཨིཏྠིལིངྒཱདཡོ ཙཀྑུཝིཉྙེཡྻཱ ཧོནྟི ཝཱ ན ཝཱ.

ཨེསེཝ ཙ ནཡོ ཉེཡྻོ, སེསེཔི པུརིསིནྡྲིཡེ;

ཨིདཾ པཋམཀཔྤཱནཾ, ཨུབྷཡཾ ཏུ པཝཏྟིཡཾ.

སམུཊྛཱཏཱིཏི ¶ ཝིཉྙེཡྻཾ, པརཏོ པཊིསནྡྷིཡཾ;

པཝཏྟེཔི སམུཊྛཱཡ, པཝཏྟེ པརིཝཏྟཏི.

མཧཏཱ པཱཔཀམྨེན, པུརིསཏྟཾ ཝིནསྶཏི;

མཧཏཱ ཀུསལེནེཝ, ཛཱཡཏེ པུརིསིནྡྲིཡཾ.

དུབྦལཱཀུསལེནེཝ, ཨིཏྠིལིངྒཾ ཝིནསྶཏི;

དུབྦལེནེཝ པུཉྙེན, ཨིཏྠིབྷཱཝོ ཧི ཛཱཡཏེ.

ཨུབྷཏོབྱཉྫནསྶཱཔི ¶ , ཨེཀམེཝིནྡྲིཡཾ སིཡཱ;

ཨེཝཾ སནྟེ ཨབྷཱཝོ ཙ, དུཏིཡབྱཉྫནསྶ ཏུ.

ན ཙཱབྷཱཝོ སིཡཱ ཀསྨཱ, ན ཏཾ བྱཉྫནཀཱརཎཾ;

ཏསྶ ཀམྨསཧཱཡཾ ཧི, རཱགཙིཏྟཾ ཏུ ཀཱརཎཾ.

ཨུབྷཡསྶ པནེཏསྶ ལཀྑཎཱདཱིནི ཝུཙྩཏི. ཏཏྠ ཨིཏྠིབྷཱཝལཀྑཎཾ ཨིཏྠིནྡྲིཡཾ, ‘‘ཨིཏྠཱི’’ཏི པཀཱསནརསཾ, ཨིཏྠིལིངྒནིམིཏྟཀུཏྟཱཀཔྤཱནཾ ཀཱརཎབྷཱཝཔཙྩུཔཊྛཱནཾ.

པུརིསབྷཱཝལཀྑཎཾ པུརིསིནྡྲིཡཾ, ‘‘པུརིསོ’’ཏི པཀཱསནརསཾ, པུརིསལིངྒནིམིཏྟཀུཏྟཱཀཔྤཱནཾ ཀཱརཎབྷཱཝཔཙྩུཔཊྛཱནཾ.

ཛཱིཝིཏིནྡྲིཡནིདྡེསེ, ཝཏྟབྦཾ ཡཾ སིཡཱ ཨིདྷ;

ཨརཱུཔཛཱིཝིཏེ ཝུཏྟ-ནཡེནེཝ ཙ ཏཾ ཝདེ.

ལཀྑཎཱདཱིནི ¶ པནསྶ ཨེཝཾ ཝེདིཏབྦཱནི. སཧཛརཱུཔཔརིཔཱལནལཀྑཎཾ ཛཱིཝིཏིནྡྲིཡཾ, ཏེསཾ པཝཏྟནརསཾ, ཏེསམེཝ ཋཔནཔཙྩུཔཊྛཱནཾ, ཡཱཔཡིཏབྦབྷཱུཏཔདཊྛཱནནྟི.

ཡཾ ནིསྶཱཡ མནོདྷཱཏུ-མནོཝིཉྙཱཎདྷཱཏུཡོ;

ཝཏྟནྟི པཉྩཝོཀཱརེ, ཏཾ ‘‘ཝཏྠཱུ’’ཏི པཝུཙྩཏི.

མནོདྷཱཏུམནོཝིཉྙཱཎདྷཱཏཱུནཾ ¶ ནིསྶཡལཀྑཎཾ ཧདཡཝཏྠུ, ཏཱསཉྩེཝ དྷཱཏཱུནཾ ཨཱདྷཱརཎརསཾ, ཨུབྦཱཧནཔཙྩུཔཊྛཱནཾ.

ཨཱཧཱརཏཱཏི ཀབལཱི༹ཀཱརོ ཨཱཧཱརོ. ཨོཛཊྛམཀཾ རཱུཔཾ ཨཱཧརཏཱིཏི ཨཱཧཱརོ.

ཡཱཡ ¶ ཨོཛཱཡ ཡཱཔེནྟི, ཡཏྠ ཡཏྠ ཙ པཱཎིནོ;

ཨཡཾ ཏུ ‘‘ཀབལཱི༹ཀཱརོ, ཨཱཧཱརོ’’ཏི པཝུཙྩཏི.

ཨནྣཔཱནཱདིཀཾ ཝཏྠུ, ཨགྒིཾ ཧརཏི ཀམྨཛཾ;

ཀེཝལཾ ན ཙ སཀྐོཏི, པཱལེཏུཾ ཛཱིཝིཏཾ པན.

ཨོཛཱ སཀྐོཏི པཱལེཏུཾ, ཧརིཏུཾ ན ཙ པཱཙཀཾ;

ཧརིཏུམྤི ཙ པཱལེཏུཾ, ཨུབྷོ སཀྐོནྟི ཨེཀཏོ.

ལཀྑཎཱདིཏོ པནསྶ ཨོཛཱལཀྑཎོ ཀབལཱི༹ཀཱརོ ཨཱཧཱརོ, རཱུཔཱཧརཎརསོ, ཨུཔཏྠམྦྷནཔཙྩུཔཊྛཱནོ, ཀབལ༹ཾ ཀཏྭཱ ཨཛ྄ཛྷོཧརིཏབྦཝཏྠུཔདཊྛཱནོཏི ཝེདིཏབྦོ.

ཀཱཡཝིཉྙཏྟིནིདྡེསེ ཀཱཡེན ཨཏྟནོ བྷཱཝཾ ཝིཉྙཱཔེནྟཱནཾ ཀཱཡགྒཧཎཱནུསཱརེན གཧིཏཱཡ ཨེཏཱཡ བྷཱཝོ ཝིཉྙཱཡཏཱིཏི ཝིཉྙཏྟི. སཡཾ ཝཱ ཀཱཡགྒཧཎཱནུསཱརེན ཝིཉྙཱཡཏཱིཏིཔི ཝིཉྙཏྟི. ‘‘ཀཱཡེན སཾཝརོ སཱདྷུ, སཱདྷུ ཝཱཙཱཡ སཾཝརོ’’ཏི ཨཱགཏོ ཙོཔནསངྑཱཏོ ཀཱཡོཝ ཝིཉྙཏྟི ཀཱཡཝིཉྙཏྟི. ཀཱཡཝིཔྥནྡནེན ཨདྷིཔྤཱཡཝིཉྙཱཔནཧེཏུཏྟཱ སཡཉྩ ཏཐཱ ཝིཉྙེཡྻཏྟཱ ཀཱཡེན ཝིཉྙཏྟཱིཏིཔི ཀཱཡཝིཉྙཏྟི.

ཏཏྠ ཡཱ སཧཛཱཏསྶ, ཙིཏྟཛཱནིལདྷཱཏུཡཱ;

རཱུཔསྶ ཙལནེ ཧེཏུ, ཨེཀཱཀཱརཝིཀཱརཏཱ.

ཀཱཡཝིཉྙཏྟི ནཱམཱཡཾ, ཀཱཡདྭཱརནྟི སཱ མཏཱ;

ཏཏྠ ཡཱ ཙེཏནཱསིདྡྷཱ, པུཉྙཱཔུཉྙཝསཱ པན.

ཀཱཡཀམྨནྟི ¶ ནིདྡིཊྛཱ, སཏྠུནཱ སཱ ཧིཏེསིནཱ;

སམྤཝཏྟི པནེཏིསྶཱ, ཝཙཱིདྭཱརེཔི ཛཱཡཏེ.

ལབྷིཏྭཱ ¶ པནུཔཏྠམྦྷཾ, ཨེཀཱཝཛྫནཝཱིཐིཡཾ;

ཧེཊྛཱཧི ཚཧི ཙིཏྟེཧི, ཝཱཡོདྷཱཏུསམུཊྛིཏཾ.

སཏྟམེན ཏུ ཙིཏྟེན, ཝཱཡོདྷཱཏུསམུཊྛིཏཱ;

ཙཱལེཏི སཧཛཾ རཱུཔཾ, ཝིཉྙཏྟིསཧིཏཱཏྟནཱ.

པཙྩཡོ ཙིཏྟཛཱཏཱཡ, ཨུཔཱདིནྣཀགྷཊྚནེ;

ཡོ ཨཱཀཱརཝིཀཱརེཀོ, ཨཡཾ པཐཝིདྷཱཏུཡཱ.

ཝཙཱིཝིཉྙཏྟི ཝིཉྙེཡྻཱ, སཧ སདྡཝསཱ པན;

ཝཙཱིདྭཱརནྟི ནིདྡིཊྛཱ, སཱཝ སཀྱཀུལིནྡུནཱ.

སདྡོ ན ཙིཏྟཛོ ཨཏྠི, ཝིནཱ ཝིཉྙཏྟིགྷཊྚནཾ;

དྷཱཏུསངྒྷཊྚནེནེཝ, སཧ སདྡོ ཧི ཛཱཡཏི.

སཱ ཝིཉྙཱཔནཏོ ཙེཝ, ཨཡཾ ཝིཉྙེཡྻཏོཔི ཙ;

ཝིཉྙཏྟཱིཏི སིཡཱ ཏསྶཱ, སམྦྷཝོ ཀཱརཀདྭཡེ.

ན ཝིཉྙཏྟིདྭཡཾ ཨཊྛ, རཱུཔཱནི ཝིཡ ཙིཏྟཛཾ;

ཙིཏྟཛཱནཾ ཝིཀཱརཏྟཱ, ཙིཏྟཛནྟི པཝུཙྩཏི.

ཏཏྠ ཀཱཡཝིཉྙཏྟི ཨདྷིཔྤཱཡཔཀཱསནརསཱ, ཀཱཡཝིཔྥནྡནཧེཏུབྷཱཝཔཙྩུཔཊྛཱནཱ, ཙིཏྟསམུཊྛཱནཝཱཡོདྷཱཏུཔདཊྛཱནཱ. ཏཐཱ ཝཙཱིཝིཉྙཏྟི ཨདྷིཔྤཱཡཔཀཱསནརསཱ, ཝཙཱིགྷོསསྶ ཧེཏུབྷཱཝཔཙྩུཔཊྛཱནཱ, ཙིཏྟསམུཊྛཱནཔཐཝཱིདྷཱཏུཔདཊྛཱནཱ.

ན ཀསྶཏཱིཏི ཨཱཀཱསོ, རཱུཔཱནཾ ཝིཝརོ པན;

ཡོ རཱུཔཱནཾ པརིཙྪེདོ, སྭཱཀཱསོཏི པཝུཙྩཏི.

སོ ¶ རཱུཔཔརིཙྪེདལཀྑཎོ, རཱུཔཔརིཡནྟཔཀཱསནརསོ, རཱུཔམརིཡཱདཔཙྩུཔཊྛཱནོ, ཨསམྥུཊྛབྷཱཝཚིདྡཝིཝརབྷཱཝཔཙྩུཔཊྛཱནོ ཝཱ, པརིཙྪིནྣརཱུཔཔདཊྛཱནོ.

ཧེཊྛཱ ཝུཏྟནཡེནེཝ, རཱུཔསྶ ལཧུཏཱདིསུ;

ཏིསྶོ རཱུཔཝིཀཱརཱཏི, ཝིཉྙཱཏབྦཱ ཝིབྷཱཝིནཱ.

ཨེཏཱསཾ ¶ པན ཏིསྶནྣཾ, ཀམཏོ ཙ པཝཏྟིཡཾ;

ཨརོགཱི མདྡིཏཾ ཙམྨཾ, དྷནྟཧེམཾ ནིདསྶནཾ.

ཀམྨཾ ཀཱཏུཾ ན སཀྐོཏི, ལཧུཏཱདིཏྟཡཾ པན;

ཨཱཧཱརཱདིཏྟཡཾཡེཝ, ཏཾ ཀརོཏི ཏཏོ ཏིཛཾ.

ཏཏྠ ¶ ཨདནྡྷཏཱལཀྑཎཱ རཱུཔསྶ ལཧུཏཱ, རཱུཔཱནཾ གརུབྷཱཝཝིནོདནརསཱ, ལཧུཔརིཝཏྟིཏཱཔཙྩུཔཊྛཱནཱ, ལཧུརཱུཔཔདཊྛཱནཱ.

ཨཐདྡྷཏཱལཀྑཎཱ རཱུཔསྶ མུདུཏཱ, རཱུཔཱནཾ ཐདྡྷབྷཱཝཝིནོདནརསཱ, སབྦཀིརིཡཱསུ ཨཝིརོདྷིཏཱཔཙྩུཔཊྛཱནཱ, མུདུརཱུཔཔདཊྛཱནཱ.

སརཱིརཀིརིཡཱནུཀཱུལཀམྨཉྙཏཱལཀྑཎཱ རཱུཔསྶ ཀམྨཉྙཏཱ, ཨཀམྨཉྙཏཱཝིནོདནརསཱ, ཨདུབྦལབྷཱཝཔཙྩུཔཊྛཱནཱ, ཀམྨཉྙཏཱརཱུཔཔདཊྛཱནཱ. ཨེཏཱ པན ཏིསྶོཔི ན ཨཉྙམཉྙཾ ཝིཛཧནྟི.

རཱུཔཱནམཱཙཡོ ཡོ ཧི, ཝུཏྟོ ཨུཔཙཡོཏི སོ;

ཨནུཔྤབནྡྷཏཱ ཏེསཾ, སནྟཏཱིཏི པཝུཙྩཏི.

ཨཏྠཏོ ¶ ཨུབྷཡམྤེཏཾ, ཛཱཏིརཱུཔནྟི དཱིཔིཏཾ;

ཝུཏྟམཱཀཱརནཱནཏྟཱ, ཝེནེཡྻཱནཾ ཝསེན ཝཱ.

ལཀྑཎཱདིཏོ པན ཨཱཙཡལཀྑཎོ རཱུཔསྶ ཨུཔཙཡོ, པུབྦནྟཏོ རཱུཔཱནཾ ཨུམྨུཛྫཱཔནརསོ, ནིཡྻཱཏནཔཙྩུཔཊྛཱནོ, པརིཔུཎྞབྷཱཝཔཙྩུཔཊྛཱནོ ཝཱ, ཨུཔཙིཏརཱུཔཔདཊྛཱནོ.

པཝཏྟིལཀྑཎཱ རཱུཔསྶ སནྟཏི, ཨནུཔྤབནྡྷནརསཱ, ཨནུཔཙྪེདཔཙྩུཔཊྛཱནཱ, ཨནུཔྤབནྡྷརཱུཔཔདཊྛཱནཱ.

དུཝིདྷཱཡཾ ཛརཱ ནཱམ, པཱཀཊཱཔཱཀཊཱཏི ཙ;

པཱཀཊཱ རཱུཔདྷམྨེསུ, ཨརཱུཔེསུ ཨཔཱཀཊཱ.

རཱུཔསྶ པརིཔཱཀཏཱལཀྑཎཱ རཱུཔསྶ ཛརཏཱ, ཨུཔནཡནརསཱ, སབྷཱཝཱནཾ ཨཔགམེཔི ནསབྷཱཝཱཔགམཔཙྩུཔཊྛཱནཱ ཝཱིཧིཔུརཱཎབྷཱཝོ ཝིཡ, པརིཔཙྩམཱནརཱུཔཔདཊྛཱནཱ.

པརིབྷེདལཀྑཎཱ རཱུཔསྶ ཨནིཙྩཏཱ, སཾསཱིདནརསཱ, ཁཡཝཡཔཙྩུཔཊྛཱནཱ, པརིབྷིཛྫམཱནརཱུཔཔདཊྛཱནཱཏི ཝེདིཏབྦཱཏི.

ཨེཝཾ ཙཏུཝཱིསཏི ཨུཔཱདཱརཱུཔཱནི ཝེདིཏབྦཱནི.

བྷཱུཏརཱུཔཱནི ཙཏྟཱརི, ཨུཔཱདཱ ཙཏུཝཱིསཏི;

ཨཊྛཝཱིསཏི རཱུཔཱནི, སབྦཱནེཝ བྷཝནྟི ཧི.

ཨིམེསུ པན རཱུཔེསུ, ཨསམྨོཧཏྠམེཝ ཏཾ;

སམོདྷཱནཾ སམུཊྛཱནཾ, ནིཔྥནྣཾ སངྑཏམྤི ཙ.

ཙོདནཾ ¶ པརིཧཱརཉྩ, ནཡམེཀཝིདྷཱདིཀཾ;

སངྑེཔེན པཝཀྑཱམི, པཀིཎྞཀམིདཾ སུཎ.

ཏཏྠ ¶ སམོདྷཱནནྟི སབྦམེཝ ཨིདཾ རཱུཔཾ སབྦསམོདྷཱནཏོ པཐཝཱིདྷཱཏུ ཨཱཔོདྷཱཏུ ཏེཛོདྷཱཏུ ཝཱཡོདྷཱཏུ ཙཀྑཱཡཏནཾ…པེ… ཛརཏཱ ཨནིཙྩཏཱཏི ཨཊྛཝཱིསཏིཝིདྷཾ ཙ ཧོཏི, ཨིཏོ ཨཉྙཾ རཱུཔཾ ནཱམ ནཏྠི. ཀེཙི པན མིདྡྷཝཱདིནོ ‘‘མིདྡྷརཱུཔཾ ནཱམ ཨཏྠཱི’’ཏི ཝདནྟི, ཏེ ‘‘ཨདྡྷཱ མུནཱིསི སམྦུདྡྷོ, ནཏྠི ནཱིཝརཎཱ ཏཝཱ’’ཏི ཙ ‘‘ཐིནམིདྡྷནཱིཝརཎཾ ཨཝིཛྫཱནཱིཝརཎཉྩ ནཱིཝརཎསམྤཡུཏྟ’’ནྟི སམྤཡུཏྟཝཙནཏོ ཙ མཧཱཔཀརཎཔཊྛཱནེ ‘‘ནཱིཝརཎཾ དྷམྨཾ པཊིཙྩ ནཱིཝརཎོ དྷམྨོ ཨུཔྤཛྫཏི ནཔུརེཛཱཏཔཙྩཡཱ’’ཏི ཨརཱུཔེཔི ‘‘ཀཱམཙྪནྡནཱིཝརཎཾ པཊིཙྩ ཐིནམིདྡྷཨུདྡྷཙྩཀུཀྐུཙྩཱཝིཛྫཱནཱིཝརཎ’’ནྟི ཨེཝམཱདཱིཧི པཱལཱི༹ཧི ཝིརུཛ྄ཛྷནཏོ ཙ ཨརཱུཔམེཝ མིདྡྷནྟི པཊིཀྑིཔིཏབྦཱ.

ཨརཱུཔེཔི ¶ པནེཏསྶ, མིདྡྷསྶུཔྤཏྟི པཱཋཏོ;

ནིཊྛམེཏྠཱཝགནྟབྦཱ, ཨརཱུཔནྟི ཙ ཝིཉྙུནཱ.

ཨཔརེ ‘‘བལརཱུཔེན སདྡྷིཾ ཨེཀཱུནཏིཾས, སམྦྷཝརཱུཔེན སདྡྷིཾ ཏིཾས, ཛཱཏིརཱུཔེན སདྡྷིཾ ཨེཀཏིཾས, རོགརཱུཔེན སདྡྷིཾ དྭཏྟིཾས རཱུཔཱནཱི’’ཏི ཝདནྟི. ཏེཔི ཏེསཾ ཝིསུཾ ཝིསུཾ ཨབྷཱཝཾ དསྶེཏྭཱ པཊིཀྑིཔིཏབྦཱ. ཝཱཡོདྷཱཏུཡཱ གཧིཏཱཡ བལརཱུཔཾ གཧིཏམེཝ, ཨཉྙཾ བལརཱུཔཾ ནཱམ ནཏྠི. ཨཱཔོདྷཱཏུཡཱ སམྦྷཝརཱུཔཾ, ཨུཔཙཡསནྟཏཱིཏི ཛཱཏིརཱུཔཾ, ཛརཏཱཨནིཙྩཏཱདཱིཧི རོགརཱུཔཾ གཧིཏཾ, ཨཉྙཾ རོགརཱུཔཾ ནཱམ ནཏྠཱིཏི, ཏསྨཱ ཨཊྛཝཱིསཏིཝིདྷཱནེཝ རཱུཔཱནཱིཏི.

སམུཊྛཱནནྟི ཙཏྟཱརི རཱུཔསམུཊྛཱནཱནི ཨུཏུཙིཏྟཱཧཱརཀམྨཱནཱིཏི.

ཀམྨཾ ¶ ཨུཏུ ཙ ཙིཏྟཉྩ, ཨཱཧཱརོ རཱུཔཧེཏུཡོ;

ཨེཏེཧེཝ ཙ རཱུཔཱནི, ཛཱཡནྟི ན པནཉྙཏོ.

ཏསྨཱ ཨེཀསམུཊྛཱནཱ, ཨེཀཱདས བྷཝནྟི ཧི;

ཨཊྛིནྡྲིཡཱནི ཝཏྠུཉྩ, ཝིཉྙཏྟིདྭཡམེཝ ཙ.

ཨཊྛིནྡྲིཡཱནི ཝཏྠུཉྩ, ཨེཀནྟེནེཝ ཀམྨཛཱ;

ཙིཏྟཛཾཡེཝ ཝིཉྙཏྟི-དྭཡཾ ཝུཏྟཾ མཧེསིནཱ.

ཙིཏྟེན ཨུཏུནཱ ཙེཝ, སདྡོ དྭཱིཧི སམུཊྛིཏོ;

ཨུཏུཨཱཧཱརཙིཏྟེཧི, ལཧུཏཱདིཏྟཡཾ ཀཏཾ.

ཀམྨེན ཝཱིསཏི རཱུཔཱ, སཏྟརས ཏུ ཙེཏསཱ;

ཨུཏུནཱ དསཔཉྩེཝ, ཙུདྡསཱཧཱརཏོ པན.

ཚསཊྛི སབྦཱནེཏཱནི, སམུཊྛཱནཝིབྷཱགཏོ;

ཨཊྛསཊྛི ཙ ཧོནྟེཝ, ཛརཏཱནིཙྩཏཱཧི ཏེ.

ཛརཏཱནིཙྩཏཱ ཙེཝ, ན ཀེནཙི སམུཊྛིཏཱ;

ཛཱཏསྶ པཱཀབྷེདཏྟཱ, ཛཱཡེཡྻུཾ ཡདི ཏཱནིཔི.

ཨེཝཾ སནྟེ ཏུ ཏེསམྤི, པཱཀབྷེདཱ སིཡུཾ ན ཧི;

པཱཀོ པཙྩཏི བྷེདོ ཝཱ, ན ཙ བྷིཛྫཏི ནཏྠི ཏཾ.

ཛཱཏསྶ ¶ པཱཀབྷེདཏྟཱ, དྭཡམེཏཾ ན ཛཱཡཏི;

སིཡཱ ཀཏྠཙི བུདྡྷེཏྠ, ‘‘རཱུཔསྶུཔཙཡོ’’ཏི ཧི.

ཝཙནེན ཡཐཱ ‘‘ཛཱཏི, ཛཱཡཏཱི’’ཏི ཙ དཱིཔིཏཾ;

པཱཀོཔི པཙྩཏེཝཾ ཏུ, བྷེདོཔི པརིབྷིཛྫཏུ.

ན ཙེཝ ཛཱཡཏེ ཛཱཏི, ཨིཏི ཉེཡྻཱ ཝིབྷཱཝིནཱ;

ཛཱཡམཱནསྶ དྷམྨསྶ, ནིབྦཏྟཱིཏི པཀཱསིཏཱ.

ཏཏྠ ཡཐཱ སིཡཱ ཛཱཏི, ཡེསཾ དྷམྨཱནམེཝ སཱ;

ཏཔྤཙྩཡཏྟཝོཧཱརཾ, ཨབྷིནིབྦཏྟིསམྨུཏིཾ.

ལབྷཏེཝ ཏཐཱ ཏེསཾ, པཱཀབྷེདཱ ལབྦྷནྟི ཏེ;

ཏཔྤཙྩཡཏྟཝོཧཱརཾ, ཨབྷིནིབྦཏྟིསམྨུཏིཾ.

ཨེཝཾ ཨིདཾ དྭཡཉྩཱཔི, ཧོཏི ཀམྨཱདིསམྦྷཝཾ;

ན པཱཀབྷེདཱ ཝོཧཱརཾ, ཏཾ ལབྷནྟི ཀདཱཙིཔི.

ཀསྨཱ ¶ ཧི ཛནཀཱནཾ ཏུ, པཙྩཡཱནམབྷཱཝཏོ;

ཨཱནུབྷཱཝཁཎུཔྤཱདེ, ཛཱཏིཡཱ པན ལབྦྷཏི.

ཏཔྤཙྩཡཏྟཝོཧཱརཾ, ཨབྷིནིབྦཏྟིསམྨུཏིཾ;

ཏསྨཱ ལབྷཏི ཛཱཏི ཙ, ལབྷཏཱི ནེཏརདྭཡཾ.

ཛིཡྻཏཱིཏི ན ཝཏྟབྦཾ, ཏཾ དྭཡཾ བྷིཛྫཏཱིཏི ཝཱ;

‘‘ཨནིཙྩཾ སངྑཏཉྩེཏཾ, ཛརཱམརཎ’’མིཙྩཔི;

ཝུཏྟཏྟཱ ཛཱཡཏིཙྩེཏཾ, ཨཐ མཉྙསི ཙེ ཏུཝཾ.

ཨེཝམྤི ཙ ན ཝཏྟབྦཾ, སཱ ཧི པརིཡཱཡདེསནཱ;

ཨནིཙྩཱནཾ ཏུ དྷམྨཱནཾ, ཛརཱམརཎཏོ ཏཐཱ.

ཨནིཙྩཾ ¶ སངྑཏཉྩཱཏི, ཝུཏྟཾ ཝིཉྙཏྟིཡོ ཝིཡ;

ཡདི ཨེཝཾ ཏཡམེཏཾ, ཨཛཱཏཏྟཱ ཙ སབྦཐཱ.

ནཏྠཱིཏི ¶ ཙེ ཁཾཔུཔྥཾཝ, ནིཙྩཾ ཝཱསངྑཏཾ ཝིཡ;

ནོབྷཡཾ པནིདཾ ཀསྨཱ, ནིསྶཡཱཡཏྟཝུཏྟིཏོ.

བྷཱཝེ པཐཝིཡཱདཱིནཾ, ནིསྶཡཱནཾ ཏུ བྷཱཝཏོ;

ཏསྨཱ ཧི ཙ ཁཾཔུཔྥཾཝ, ན ནཏྠི པན ཏཾ ཏཡཾ.

ཡསྨཱ པཐཝིཡཱདཱིནཾ, ཨབྷཱཝེན ཙ ལབྦྷཏི;

ཏསྨཱ ན པན ནིཙྩཾ ཝཱ, ནིབྦཱནཾ ཝིཡ ཏཾ ཏཡཾ.

ནིཔྥནྣནྟི ཨེཏྠ ཙཏྟཱརོ མཧཱབྷཱུཏཱ ཙཀྑུསོཏགྷཱནཛིཝ྄ཧཱཀཱཡརཱུཔསདྡགནྡྷརསཨིཏྠིཔུརིསཛཱིཝིཏིནྡྲིཡཀབལཱི༹ཀཱརཱཧཱརཧདཡཝཏྠཱུཏི ཨཊྛཱརས རཱུཔཱནི ནིཔྥནྣཱནི ནཱམ. སེསཱནི དས ཨནིཔྥནྣཱནི ནཱམ.

ཨཊྛཱརས ནིཔྥནྣཱནི, ཨནིཔྥནྣཱཝསེསཀཱ;

ཡདི ཧོནྟི ཨནིཔྥནྣཱ, བྷཝེཡྻུཾ ཏེ ཨསངྑཏཱ.

ཏེསམེཝ ¶ ཙ རཱུཔཱནཾ, ཝིཀཱརཏྟཱ ཨསངྑཏཱ;

ཀཐཾ ནཱམ བྷཝེཡྻུཾ ཏེ, ནིཔྥནྣཱ ཙེཝ སངྑཏཱ.

ཨིཏྠིབྷཱཝོ པུམཏྟཉྩ, ཛཱིཝིཏཾ སམྦྷཝོཔི ཙ;

ཏཐཱ ཀཱཡཔྤསཱདོཏི, སབྦཊྛཱནཱཏི ཝཎྞིཏཱ.

ཨེཝཾ སནྟེ ཏུ དྷམྨཱནཾ, ཧོཏི སངྐརདོསཏཱ;

ཙཀྑུཀཱཡཔསཱདཱནཾ, ཨེཀཏྟཾ ཨུཔཔཛྫཏི.

ཨཉྙཾ པན ཙ ཨཉྙསྨིཾ, ན ཙཏྠི པརམཏྠཏོ;

ཏསྨཱ ཀཱཡིནྡྲིཡཾ ཙཀྑུ-པསཱདེན ན སངྐརཾ.

ཨཉྙམཉྙཱཝིནིབྦྷོགཝསེན ¶ ཏུ པཝཏྟིཏོ;

ཏེསཾ ཋཱནནྟརཾ ཝཏྟུཾ, ན སཀྐཱ སམཡཉྙུནཱ.

ཡཱཝཏཱ ཨནུཔཱདིནྣསནྟཱནཾ ཨཏྠི ཏཏྠ སོ;

ཨཏྠི ཀཱཡཔསཱདོཏི, ཏསྨཱ ཨེཝམུདཱིརིཏཾ.

ལཀྑཎཱདིཝསེནཱཔི, ནཱནཏྟཾ སམུཔཱགཏཾ;

དྷཛཱནཾ པཉྩཝཎྞཱནཾ, ཚཱཡཱ ཨུཔམཏཾ གཏཱ.

ཏསྨཱ ¶ ཧི པན དྷམྨཱནཾ, ཨཉྙམཉྙཾ ཝིམིསྶཏཱ;

ན ཧོཏེཝཱཏི ཝིཉྙེཡྻཱ, ཝིཉྙུནཱ སམཡཉྙུནཱ.

ཨེཝཾ ནིཔྥནྣཱནིཔྥནྣབྷཱཝོ, ཙོདནཱཔརིཧཱརོ ཙ ཝེདིཏབྦོ.

ལོཀིཀཏྟཱ ¶ ནཧེཏུཏྟཱ, སངྑཏཏྟཱ ཙ སཱསཝཱ;

སབྦམེཀཝིདྷཾ རཱུཔཾ, པཙྩཡཱཡཏྟཝུཏྟིཏོ.

ཨཛ྄ཛྷཏྟིཀབཧིདྡྷཱ ཙ, ཨིནྡྲིཡཱནིནྡྲིཡཱཔི ཙ;

སུཁུམོལཱ༹རིཀཱ ཙེཝ, ཨུཔཱདིནྣཱདིཏོ དྭིདྷཱ.

ཙཀྑུཨཱཡཏནཱདཱིནི, པཉྩ ཨཛ྄ཛྷཏྟིཀཱནི ཏུ;

ཏེཝཱིསཏིཝིདྷཾ སེསཾ, བཱཧིརནྟི པཝུཙྩཏི.

ཙཀྑུསོཏིནྡྲིཡཱདཱིནི, ཨིནྡྲིཡཱནི པནཊྛ ཏུ;

སེསཉྩ ཏུ ཝཱིསཾ རཱུཔཾ, ཨནིནྡྲིཡམུདཱིརིཏཾ.

ཙཀྑུཨཱཡཏནཱདཱིནི, ནཝ ཕོཊྛབྦམེཝ ཙ;

ཏཾ བཱརསཝིདྷཾ རཱུཔཾ, ཨོལཱ༹རིཀམུདཱིརིཏཾ.

སེསཱནི པན རཱུཔཱནི, སུཁུམཱནི ཏུ སོལ༹ས;

ཀམྨཛཾ ཏུ ཨུཔཱདིནྣཾ, ཨནུཔཱདིནྣམཉྙཐཱ.

པུན ¶ སནིདསྶནསཔྤཊིགྷཨནིདསྶནསཔྤཊིགྷ- ཨནིདསྶནཨཔྤཊིགྷབྷེདཏོ ཙ, ཀམྨཛཱཀམྨཛནེཝཀམྨཛཱནཱཀམྨཛབྷེདཏོ ཙ ཏིཝིདྷཾ. ཏཏྠ རཱུཔཱཡཏནཾ སནིདསྶནསཔྤཊིགྷཾ, ཨེཀཱདསཝིདྷཾ སེསོལཱ༹རིཀརཱུཔཾ ཨནིདསྶནསཔྤཊིགྷཾ, སེསཾ སོལ༹སཝིདྷཾ སུཁུམརཱུཔཾ ཨནིདསྶནཨཔྤཊིགྷཾ. ཀམྨཏོ ཛཱཏཾ ཀམྨཛཾ, ཨཊྛིནྡྲིཡཱནི, ཝཏྠུ ཙ ཀམྨཛཾ, ཏདཉྙཔྤཙྩཡཱ ཛཱཏཾ ཨཀམྨཛཾ, ནཀུཏོཙི ཛཱཏཾ ནེཝཀམྨཛཱནཱཀམྨཛཾ ཛརཏཱ ཨནིཙྩཏཱ ཙ. ཨེཝཾ ཏིཝིདྷཾ ཧོཏི.

པུན དིཊྛསུཏམུཏཝིཉྙཱཏཝསེན ཙ, དྭཱརཉྩེཝ ཝཏྠུ ཙ, དྭཱརམེཝ ཧུཏྭཱ ན ཝཏྠུ ཙ, ཝཏྠུམེཝ ཧུཏྭཱ ན དྭཱརཉྩ, ནེཝ དྭཱརཉྩ ན ཝཏྠུ ཙཱཏི ཨེཝཾ བྷེདཏོ ཙ, དྭཱརཉྩེཝིནྡྲིཡཉྩ, དྭཱརཾཡེཝ ཧུཏྭཱ ནེཝིནྡྲིཡཉྩ, ཨིནྡྲིཡམེཝ ཧུཏྭཱ ན དྭཱརཉྩ, ནེཝ དྭཱརཉྩ ནེཝིནྡྲིཡཉྩཱཏི ཨེཝཾ ¶ བྷེདཏོ ཙ, ཝཏྠུ ཙེཝ ཨིནྡྲིཡཉྩ, ཨིནྡྲིཡམེཝ ཧུཏྭཱ ན ཝཏྠུ ཙ, ཝཏྠུམེཝ ཧུཏྭཱ ནེཝིནྡྲིཡཉྩ, ནེཝིནྡྲིཡཾ ན ཝཏྠུ ཙེཏི ཨེཝཾ བྷེདཏོ ཙ ཙཏུབྦིདྷཾ.

ཏཏྠ ¶ དིཊྛཾ ནཱམ རཱུཔཱཡཏནཾ, སུཏཾ ནཱམ སདྡཱཡཏནཾ, མུཏཾ ནཱམ གནྡྷརསཕོཊྛབྦཱཡཏནཏྟཡཾ, ཝིཉྙཱཏཾ ནཱམ ཨཝསེསཙཀྑཱཡཏནཱདིཔཉྩཀཾ, སོལ༹སཝིདྷཾ སུཁུམརཱུཔཉྩ. ཙཀྑཱཡཏནཱདིཔཉྩཀཾ དྭཱརཉྩེཝ ཝཏྠུ ཙ, ཝིཉྙཏྟིདྭཡཾ དྭཱརམེཝ ཧོཏི, ན ཝཏྠུ, ཧདཡཝཏྠུ ཝཏྠུམེཝ ཧོཏི, ན དྭཱརཾ, སེསཾ སབྦཾ རཱུཔཾ ནེཝ དྭཱརཾ ན ཝཏྠུ ཙ. ཏཏིཡཙཏུཀྐེ ཨིནྡྲིཡམེཝ ཧུཏྭཱ ན དྭཱརནྟི ཨིཏྠིནྡྲིཡཔུརིསིནྡྲིཡཛཱིཝིཏིནྡྲིཡཱནི. ཨིམཱནི ཧི ཨིནྡྲིཡཱནེཝ ཧོནྟི, ན དྭཱརཱནི, སེསམནནྟརཙཏུཀྐེ ཝུཏྟནཡེནེཝ ཝེདིཏབྦཾ. ཙཏུཏྠཙཏུཀྐེ ཏཏིཡཔདཾ ཧདཡཝཏྠུཾ སནྡྷཱཡ ཝུཏྟཾ, སེསཾ ཝུཏྟནཡམེཝ. ཨེཝཾ ཙཏུབྦིདྷཾ ཧོཏཱིཏི ཝེདིཏབྦཾ.

པུན ཨེཀཛདྭིཛཏིཛཙཏུཛནཀུཏོཙིཛཱཏབྷེདཏོ, དྭཱརིནྡྲིཡཾ ཝཏྠུ ཙ, དྭཱརམེཝ ཧུཏྭཱ ནེཝིནྡྲིཡཾ ན ཝཏྠུ ཙ, ཝཏྠུམེཝ ཧུཏྭཱ ནེཝིནྡྲིཡཾ ན དྭཱརཉྩ, ཨིནྡྲིཡམེཝ ཧུཏྭཱ ན ཝཏྠུ ན དྭཱརཉྩ, ནེཝིནྡྲིཡཾ ¶ ན ཝཏྠུ ན དྭཱརཉྩཱཏི ཨེཝཾ པབྷེདཏོ པཉྩཝིདྷཾ.

ཨཊྛིནྡྲིཡཱནི ཝཏྠུཉྩ, ཝིཉྙཏྟིདྭཡམེཝ ཙ;

ཨེཀཱདསཝིདྷཾ རཱུཔཾ, ཨེཀཛནྟི པཝུཙྩཏི.

སདྡོ ཨེཀོ དྭིཛོ ནཱམ, ལཧུཏཱདིཏྟཡཾ ཏིཛཾ;

ཨེཀཱདསཝིདྷཾ སེསཾ, ཙཏུཛནྟི པཀཱསིཏཾ.

ཛརཏཱནིཙྩཏཱ ཙེཝ, ནཀུཏོཙི བྷཝེ པན;

ཙཀྑཱདིཔཉྩཀཾ དྭཱརཾ, ཨིནྡྲིཡཾ ཝཏྠུམེཝ ཙ.

ཝིཉྙཏྟཱིནཾ དྭཡཾ དྭཱརཾ, ནེཝིནྡྲིཡཾ ན ཝཏྠུ ཙ;

ཧདཡཝཏྠུ ཝཏྠཱུཝ, ན དྭཱརཾ ནེཝིནྡྲིཡཾ པན.

ཨིཏྠིཔུརིསཛཱིཝིཏིནྡྲིཡཱནི ¶ ཨིནྡྲིཡམེཝ ན ཝཏྠུ ན དྭཱརཉྩ, སེསཾ པན རཱུཔཾ ནེཝིནྡྲིཡཾ ན ཝཏྠུ ན དྭཱརནྟི. ཨེཝཾ པཉྩཝིདྷནྟི ཝེདིཏབྦཾ.

པུན ཀམྨཛཙིཏྟཛཨུཏུཙིཏྟཛཨུཏུཙིཏྟཱཧཱརཛཙཏུཛནཀུཏོཙིཛཱཏབྷེདཏོ, ཙཀྑུཝིཉྙེཡྻསོཏགྷཱནཛིཝ྄ཧཱཀཱཡམནོཝིཉྙེཡྻཝསེན ཚབྦིདྷཾ.

ཏཏྠ ཨཊྛིནྡྲིཡཱནི ཝཏྠུ ཙ ཀམྨཛམེཝ, ཝིཉྙཏྟིདྭཡཾ ཙིཏྟཛམེཝ, སདྡོ ཨུཏུཙིཏྟཛོ, ལཧུཏཱདིཏྟཡཾ ཨུཏུཙིཏྟཱཧཱརཛམེཝ, སེསཾ ཨེཀཱདསཝིདྷཾ ཙཏུཛཾ ནཱམ, ཛརཏཱ ཨནིཙྩཏཱ ནཀུཏོཙིཛཱཏཾ ནཱམ. དུཏིཡཚཀྐེ ཙཀྑུཝིཉྙེཡྻཾ ¶ ནཱམ ཙཀྑུཝིཉྙཱཎེན ཝིཉྙེཡྻཾ རཱུཔཱཡཏནཾ…པེ… ཀཱཡཝིཉྙེཡྻཾ ནཱམ ཕོཊྛབྦཱཡཏནཾ, མནོཝིཉྙེཡྻཾ ནཱམ སེསཱ པཉྩ ཨོལཱ༹རིཀཱ ཙ སོལ༹ས སུཁུམརཱུཔཱནི ཙཱཏི ཨེཀཝཱིསཏིཝིདྷཾ ཧོཏི. ཨེཝཾ ཚབྦིདྷཾ ཧོཏི.

པུན ཚཝཏྠུཨཝཏྠུབྷེདཏོ ཙ, ཙཀྑུཝིཉྙེཡྻཾ སོཏགྷཱནཛིཝ྄ཧཱཀཱཡཝིཉྙེཡྻཾ མནོདྷཱཏུཝིཉྙེཡྻཾ མནོཝིཉྙཱཎདྷཱཏུཝིཉྙེཡྻནྟི སཏྟཝིདྷཾ ཧོཏི.

ཏཏྠ ¶ ཙཀྑཱདིཔཉྩཝཏྠཱུནི ཧདཡཝཏྠུནཱ སདྡྷིཾ ཚ ཝཏྠཱུནི, སེསཾ བཱཝཱིསཏིཝིདྷཾ རཱུཔཾ ཨཝཏྠུ ནཱམ, དུཏིཡསཏྟཀམུཏྟཱནམེཝ. ཨེཝཾ སཏྟཝིདྷཾ ཧོཏི.

པུན སཏྟདྭཱརཱདྭཱརབྷེདཏོ ཨཊྛཝིདྷཾ. ཏཏྠ ཙཀྑུདྭཱརཱདཱིནི པཉྩ ཀཱཡཝིཉྙཏྟིཝཙཱིཝིཉྙཏྟིདྭཱརེཧི སདྡྷིཾ སཏྟ དྭཱརཱནི, སེསམདྭཱརནྟི ཨེཝཾ ཨཊྛཝིདྷཾ ཧོཏི.

པུན ཨཊྛིནྡྲིཡཱནིནྡྲིཡབྷེདཏོ པན ནཝཝིདྷཾ.

པུན ནཝཀམྨཛཱཀམྨཛབྷེདཏོ དསཝིདྷཾ.

བྷཝེསུ རཱུཔཀལཱཔཔཝཏྟིབྷེདཏོ བཧུཝིདྷནྟི ཝེདིཏབྦཾ.

ཨིཏོ པརཾ པཝཀྑཱམི, ཀཱམརཱུཔབྷཝདྭཡེ;

ཨུཔྤཏྟིཾ པན རཱུཔཱནཾ, པཊིསནྡྷིཔཝཏྟིསུ.

བྷུམྨཝཛྫེསུ ¶ དེཝེསུ, ནིརཡེ ནིཛ྄ཛྷཱམཏཎྷིཀེ;

ཡོནིཡོ པུརིམཱ ཏིསྶོ, ན སནྟཱིཏི ཝིནིདྡིསེ.

སེསེ གཏིཏྟཡེ བྷུམྨ-དེཝེསུཔི ཙ ཡོནིཡོ;

ཙཏསྶོ ཙ བྷཝནྟཱིཏི, ཝེདིཏབྦཱ ཝིབྷཱཝིནཱ.

གབྦྷསེཡྻཀསཏྟསྶ, པཊིསནྡྷིཀྑཎེ པན;

ཏིཾས རཱུཔཱནི ཛཱཡནྟེ, སབྷཱཝསྶེཝ དེཧིནོ.

ཨབྷཱཝགབྦྷསེཡྻཱནཾ, ཨཎྜཛཱནཉྩ ཝཱིསཏི;

བྷཝནྟི པན རཱུཔཱནི, ཀཱཡཝཏྠུཝསེན ཏུ.

གཧིཏཱགཧཎེནེཏྠ, ཨེཀཱདས བྷཝནྟི ཏེ;

ཨེསེཝ ཙ ནཡོ ཉེཡྻོ, སབྦེསུ དསཀེསུཔི.

ཛཱིཝིཏེན ཡདཱ སདྡྷིཾ, ཛཱཏེ སུདྡྷཀམཊྛཀཾ;

ཛཱིཝིཏནཝཀཾ ནཱམ, ཧོཏཱིཏི སམུདཱིརིཏཾ.

ཛཱིཝིཏནཝཀཾ ¶ ཀཱཡཔསཱདེནེཀཏོ སིཡཱ;

ཏཾ ཀཱཡདསཀཾ ནཱམ, ཧོཏཱིཏི པརིཡཱཔུཊཾ.

ཨེསེཝ ཙ ནཡོ ཉེཡྻོ, སདྡྷིཾ བྷཱཝེན ཝཏྠུནཱ;

ཙཀྑཱདཱིཧི ཙ ཡོཛེཏྭཱ, དསཀཱ སཏྟ ཝིཉྙུནཱ.

ཨོཔཔཱཏིཀསཏྟཱནཾ, མནུསྶེསཱུཔཔཏྟིཡཾ;

ཀཱམཱཝཙརདེཝཱནཾ, ནིཙྩཾ རཱུཔཱནི སཏྟཏི.

ཙཀྑུ ¶ སོཏཉྩ གྷཱནཉྩ, ཛིཝ྄ཧཱ ཀཱཡོ ཙ ཝཏྠུ ཙ;

བྷཱཝོ ཙཱཏི ཧི སཏྟནྣཾ, དསཀཱནཾ ཝསཱ པན.

བྲཧྨཱནཾ རཱུཔིནཾ ཙཀྑུ-སོཏཝཏྠུཝསཱ པན;

དསཀཱནི ཙ ཏཱིཎེཝ, ནཝཀཾ ཛཱིཝིཏསྶ ཙ.

ཙཏུནྣཾ ཏུ ཀལཱཔཱནཾ, ཝསེན པན རཱུཔིནཾ;

ཙཏྟཱལཱིསེཝ རཱུཔཱནི, ཨེཀཱུནཱནི བྷཝནྟི ཧི.

ཛཱིཝིཏནཝཀེནེཝ ¶ , ཨསཉྙུཔྤཏྟི དཱིཔིཏཱ;

ཛཙྩནྡྷབདྷིརཱགྷཱན-རཧིཏེ ཏུ ནཔུཾསཀེ.

ཝཏྠུནོ ཀཱཡཛིཝ྄ཧཱནཾ, ཝསཱ ཏིཾསཱཝཀཾསཏོ;

ཨུཀྐཾསསྶཱཝཀཾསསྶ, ཨནྟརེ ཨནུརཱུཔཏོ.

པརིཔུཎྞཱནཾ རཱུཔཱནཾ, ཝསེན པན པཱཎིནཾ;

རཱུཔཱནཾ ཏུ སམུཔྤཏྟི, ཝེདིཏབྦཱ ཝིབྷཱཝིནཱ.

སཏྟཝཱིསཏི རཱུཔཱནི, ཀཱམཱཝཙརདེཧིནོ;

ཨཔྤཝཏྟནཏོ ཧོནྟི, དྭིནྣཾ བྷཱཝཱནམེཀཏོ.

གྷཱནཾ ཛིཝ྄ཧཱ ཙ ཀཱཡོ ཙ, ཏཐཱ བྷཱཝདྭཡམྤི ཙ;

བྲཧྨཱནཾ པན རཱུཔཱིནཾ, པཉྩ རཱུཔཱ ན ཝིཛྫརེ.

ཙཏུསནྟཏི ཀཱམསྨིཾ, རཱུཔེ ཧོནྟི ཏིསནྟཏི;

དྭིསནྟཏི ཨསཉྙེསུ, བཧིདྡྷཱ ཨེཀསནྟཏི.

རཱུཔཾ ¶ ནིབྦཏྟམཱནཾ ཏུ, སབྦེསཾ པན པཱཎིནཾ;

པཋམཾ ཀམྨཏོཡེཝ, ནིབྦཏྟཏི ན སཾསཡོ.

གབྦྷསེཡྻཀསཏྟཱནཾ, པཊིསནྡྷིཀྑཎེ པན;

ཏཉྩ ཁོ སནྡྷིཙིཏྟསྶ, ཨུཔྤཱདེཡེཝ ཛཱཡརེ.

ཡཐེཝ ཏསྶ ཨུཔྤཱདེ, ཏིཾས རཱུཔཱནི ཛཱཡརེ;

ཏཐེཝ ཋིཏིབྷངྒེསུ, ཏིཾས ཏིཾསེཝ ཛཱཡརེ.

སབྦཱནེཏཱནི རཱུཔཱནི, རཱུཔཀྑནྡྷོཏི སཉྙིཏོ;

ཨནིཙྩོ ཨདྡྷུཝོནཏྟཱ, དུཀྑཀྑནྡྷོཝ ཀེཝལོ.

རོགཏོ གཎྜཏོ རཱུཔཾ, པརཏོ ཙ པལོཀཏོ;

དིསྭཱན དུཀྑཏོ རཱུཔཾ, རཱུཔེ ཚནྡཾ ཝིརཱཛཡེ.

ཨིཏི ཨབྷིདྷམྨཱཝཏཱརེ རཱུཔཝིབྷཱགོ ནཱམ

རཱུཔཱནནྟརམུདྡིཊྛཾ ¶ , ནིབྦཱནཾ ཡཾ པནཱདིཏོ;

ཏསྶིདཱནི ཨནུཔྤཏྟོ, ཝིབྷཱཝནནཡཀྐམོ.

ཏསྨཱཧཾ ཏསྶ དསྶེཏུཾ, དུཀྐརསྶ ཡཐཱབལཾ;

དུབྦོདྷསྶ པཝཀྑཱམི, ཝིབྷཱཝནམིཏོ པརཾ.

ཏཏྠ ¶ ནིབྦཱནནྟི བྷཝཱབྷཝཾ ཝིནནཏོ ཝཱནཾ ཝུཙྩཏི ཏཎྷཱ, ཝཱནཏོ ནིཀྑནྟཏྟཱ ནིབྦཱནནྟི ཙ པཝུཙྩཏི ཨམཏཾ ཨསངྑཏཾ པརམཾ སུཁཾ. ཝུཏྟཾ ཧེཏཾ ‘‘ཡོ སོ སབྦསངྑཱརསམཐོ སབྦཱུཔདྷིཔཊིནིསྶགྒོ ཏཎྷཱཀྑཡོ ཝིརཱགོ ནིརོདྷོ ནིབྦཱན’’ནྟི.

ཡསྶ ཙཱདྷིགམཱ སབྦ-ཀིལེསཱནཾ ཁཡོ བྷཝེ;

ནིབྦཱནམིཏི ནིདྡིཊྛཾ, ནིབྦཱནཀུསལེན ཏཾ.

ཨེཏཾ ཙ ནིབྦཱནཾ ནཱམ ཏཡིདཾ སནྟིལཀྑཎཾ, ཨཙྩུཏིརསཾ, ཨསྶཱསཀརཎརསཾ ཝཱ, ཨནིམིཏྟཔཙྩུཔཊྛཱནཾ, ནིསྶརཎཔཙྩུཔཊྛཱནཾ ཝཱཏི ཝེདིཏབྦཾ.

ཨེཏྠཱཧ – ན པརམཏྠཏོ ནིབྦཱནཾ ནཱམ ཨེཀོ སབྷཱཝོ ཨཏྠི, ཏིཏྠིཡཱནཾ ཨཏྟཱ ཝིཡ, སསཝིསཱཎཾ ¶ ཝིཡ ཙ ཨནུཔལབྦྷནཱིཡཏོཏི? ན, པཉྙཱཙཀྑུནཱ ཨུཔཔརིཀྑིཡམཱནཱནཾ ཧིཏགཝེསཱིནཾ ཡཐཱནུརཱུཔཱཡ པཊིཔཏྟིཡཱ ཨུཔལབྦྷནཱིཡཏོ. ཡཾ ཧི པུཐུཛྫནཱ ནོཔལབྦྷནྟི, ཏཾ ‘‘ནཏྠཱི’’ཏི ན ཝཏྟབྦཾ. ཨཐཱཡསྨཏཱ སཱརིཔུཏྟཏྠེརེན དྷམྨསེནཱཔཏིནཱ ‘‘ཀཏམཾ ནུ ཁོ, ཨཱཝུསོ, ནིབྦཱན’’ནྟི ནིབྦཱནཾ པུཊྛེན ‘‘ཡོ ཁོ, ཨཱཝུསོ, རཱགཀྑཡོ དོསཀྑཡོ མོཧཀྑཡོ’’ཏི རཱགཱདཱིནཾ ཁཡོཝ དསྶིཏོ, ཏསྨཱ རཱགཱདཱིནཾ ¶ ཁཡམཏྟམེཝ ནིབྦཱནནྟི ཙེ? ཏཾ ན. ཀསྨཱ? ཨརཧཏྟསྶཱཔི རཱགཱདཱིནཾ ཁཡམཏྟཔསངྒདོསཱཔཏྟིཏོ. ཀཐཾ? ནིབྦཱནཾ པུཙྪཱནནྟརམེཝ ‘‘ཀཏམཾ ནུ ཁོ, ཨཱཝུསོ, ཨརཧཏྟ’’ནྟི པུཊྛེན ‘‘ཡོ ཁོ, ཨཱཝུསོ, རཱགཀྑཡོ དོསཀྑཡོ མོཧཀྑཡོ’’ཏི རཱགཱདཱིནཾ ཁཡོཝ ཝུཏྟོ, ཏསྨཱ ཏཝ མཏེན ཨརཧཏྟཕལསྶཱཔི རཱགཱདཱིནཾ ཁཡམཏྟཏཱ བྷཝེཡྻ, ན ཙེཏཾ ཡུཏྟཾ ཨནུཏྟརསྶ ལོཀུཏྟརཕལཙིཏྟསྶ རཱགཱནཾ ཁཡམཏྟཏཱཔཛྫནཾ, ཏསྨཱ མཱ ¶ ཨེཝཾ བྱཉྫནཙྪཱཡཱཡ ཝདེསི, ཨུབྷིནྣཾ པན སུཏྟཱནཾ ཨཏྠོ ཨུཔཔརིཀྑིཏབྦོ.

ཡསྶ པན དྷམྨསྶཱདྷིགམེན རཱགཱདཱིནཾ ཁཡོ ཧོཏི, སོ དྷམྨོ རཱགཱདཱིནཾ ཁཡསྶ ཨུཔནིསྶཡཏྟཱ ཨཀྑཡོཔི སམཱནོ ‘‘རཱགཱདཱིནཾ ཁཡོ ནིབྦཱན’’ནྟི ཁཡོཔཙཱརེན ཝུཏྟོ, ‘‘ཏིཔུསཾ ཛརོ གུལོ༹ སེམྷོ’’ཏིཨཱདཱིསུ ཝིཡ ཕལཱུཔཙཱརེན ཝུཏྟནྟི ཝེདིཏབྦཾ. ཨརཧཏྟཾ པན ཁཡནྟེ ཨུཔྤནྣཏྟཱ ‘‘ཁཡོ’’ཏི ཝུཏྟཾ. ཡདི རཱགཱདཱིནཾ ཁཡམཏྟཾ ནིབྦཱནཾ བྷཝེཡྻ, སབྦེ བཱལཔུཐུཛྫནཱཔི སམདྷིགཏནིབྦཱནཱ སཙྪིཀཏནིརོདྷཱ བྷཝེཡྻུཾ. ཀིཉྩ བྷིཡྻོ – ནིབྦཱནསྶ བཧུཏྟཱདིདོསཱཔཏྟིཏོ ཙ. ཨེཝཉྷི སཏི རཱགཱདིཀྑཡཱནཾ བཧུབྷཱཝཏོ ནིབྦཱནསྶཱཔི བཧུབྷཱཝོ བྷཝེཡྻ, སངྑཏལཀྑཎཉྩ ནིབྦཱནཾ བྷཝེཡྻ, སངྑཏལཀྑཎཏྟཱ སངྑཏཔརིཡཱཔནྣཉྩ, སངྑཏཔརིཡཱཔནྣཏྟཱ ཨནིཙྩཾ དུཀྑཾ ནིབྦཱནཾ བྷཝེཡྻཱཏི.

ཀིཉྩ བྷིཡྻོ – ཡདི ཁཡོ ནིབྦཱནཾ བྷཝེཡྻ, གོཏྲབྷུཝོདཱནམགྒཕལཙིཏྟཱནཾ ཀིཾ ནུ ཨཱརམྨཎཾ ཝདེསི, ཝད བྷདྲམུཁཱཏི? རཱགཱདཱིནཾ ཁཡམེཝ ཝདཱམཱིཏི. ཀིཾ པན རཱགཱདཡོ གོཏྲབྷུཨཱདཱིནཾ ཁཎེ ཁཱིཡནྟི, ཨུདཱཧུ ཁཱིཡིསྶནྟི, ཨཐ ཁཱིཎཱཏི? ཀིཾ པནེཏྠ ‘‘ཁཱིཎེསྭེཝ ཁཡཾ ཝདཱམཱི’’ཏི. སུཊྛུ ཨུཔདྷཱརེཏྭཱ ཝད བྷདྲམུཁཱཏི, ཡདི ཁཱིཎེསྭེཝ ཁཡཾ ཝདེསི, ན གོཏྲབྷུཙིཏྟཱདཱིནཾ ནིབྦཱནཱརམྨཎཏཱ སིཛ྄ཛྷཏཱིཏི. ཀིཾ ཀཱརཎཾ? གོཏྲབྷུཀྑཎེ རཱགཱདཡོ ཁཱིཡིསྶནྟི, ཏཐཱ ཝོདཱནཀྑཎེ, མགྒཀྑཎེ པན ཁཱིཡནྟི, ན ཁཱིཎཱ, ཕལཀྑཎེ ཁཱིཎཱ. ཨེཝཾ སནྟེ བྷཝཏོ མཏེན ཕལམེཝ ཁཡཱརམྨཎཾ, ན ཨིཏརེ, ཨིཏརེསཾ པན ཀིམཱརམྨཎཾ ཝདེསཱིཏི ¶ ? ཨདྡྷཱ སོ ཨཱརམྨཎཾ ཨཔསྶནྟོ ནིརུཏྟརོ ¶ བྷཝིསྶཏི. ཨཔིཙ ཀིལེསཀྑཡོ ནཱམ སཔྤུརིསེཧི ཀརཱིཡཏི, ཡཐཱནུརཱུཔཱཡ པཊིཔཏྟིཡཱ ཨུཔྤཱདཱིཡཏཱིཏི ཨཏྠོ. ནིབྦཱནཾ པན ན ཀེནཙི ཀརཱིཡཏི ན ཨུཔྤཱདཱིཡཏི, ཏསྨཱ ནིབྦཱནམམཏམསངྑཏཾ. ཏམཀཏཾ ¶ ཛཱནཱཏཱིཏི ཨརིཡསཱཝཀོ ‘‘ཨཀཏཉྙཱུ’’ཏི པཝུཙྩཏི. ཝུཏྟཉྩེཏཾ –

ཨཔིཙ ‘‘ནིསྶརཎ’’ནྟི བྷགཝཏཱ ཝུཏྟཏྟཱ ཙ. ‘‘ནིསྶརཎ’’ནྟི ཧི ནིབྦཱནསྶེཏཾ ནཱམཾ. ཡཐཱཧ ‘‘ཏཡོ ཁོམེ, བྷིཀྑཝེ, དྷམྨཱ དུཔྤཊིཝིཛ྄ཛྷཱ. ཀཏམེ ཏཡོ དྷམྨཱ དུཔྤཊིཝིཛ྄ཛྷཱ? ཏིསྶོ ནིསྶརཎདྷཱཏུཡོ. ཀཱམཱནམེཏཾ ནིསྶརཎཾ, ཡདིདཾ ནེཀྑམྨཾ. རཱུཔཱནམེཏཾ ནིསྶརཎཾ, ཡདིདཾ ཨརཱུཔཾ. ཡཾ ཁོ པན ཀིཉྩི བྷཱུཏཾ སངྑཏཾ པཊིཙྩསམུཔྤནྣཾ, ནིརོདྷོ ཏསྶ ནིསྶརཎ’’ནྟི ཧི ཝུཏྟཾ. ཨེཝཾ ཝུཏྟསྶ ཏསྶ ནིབྦཱནསྶ ཨབྷཱཝཔཏྟིདོསཏོ པཋམཛ྄ཛྷཱནཱཀཱསཱནཉྩཱཡཏནཱནམྤི ཨབྷཱཝོ བྷཝེཡྻ, ཏསྨཱ ཨཡུཏྟཾ ཨཀྑཡསྶ ནིབྦཱནསྶ ཁཡདོསཱཔཛྫནནྟི, ན ཏུ ཁཡོ ནིབྦཱནཾ.

‘‘ཨཏྠི ནིསྶརཎཾ ལོཀེ, པཉྙཱཡ མེ སུཕུསིཏ’’ནྟི ཙ ‘‘ཨཏྠི, བྷིཀྑཝེ, ཨཛཱཏཾ ཨབྷཱུཏཾ ཨཀཏཾ ཨསངྑཏ’’ནྟི ཙ དྷམྨསཱམིནཱ ཏཐཱགཏེན སམྨཱསམྦུདྡྷེན ཨནེཀེསུ སུཏྟནྟེསུ པརམཏྠཝསེན ཝུཏྟཏྟཱ ‘‘ཨཏྠི ནིབྦཱནཾ ནཱམ ཨེཀོ དྷམྨོ’’ཏི ནིཊྛམེཏྠ གནྟབྦཾ. ཨཔིཙ པརིཏྟཏྟིཀེ ‘‘ཀཏམེ དྷམྨཱ ཨཔྤམཱཎཱ’’ཏི པདམུདྡྷརིཏྭཱ – ‘‘ཙཏྟཱརོ མགྒཱ ཨཔརིཡཱཔནྣཱ ཙཏྟཱརི ཙ སཱམཉྙཕལཱནི ནིབྦཱནཉྩ, ཨིམེ དྷམྨཱ ཨཔྤམཱཎཱ’’ཏི ཝུཏྟཏྟཱ རཱགཱདཱིནཾ ཁཡསྶ ཨཔྤམཱཎཏྟཾ ཀཐཾ ཡུཛྫཏི, ཏསྨཱ པརམཏྠཏོ ཨཏྠིཡེཝ ནིབྦཱནཾ ནཱམ ཨེཀོ སབྷཱཝོཏི. ཏཾ ¶ པན པཀཏིཝཱདཱིནཾ པཀཏི ཝིཡ, ཏིཏྠིཡཱནཾ ཨཏྟཱ ཝིཡ ཙ སསཝིསཱཎཾ ཝིཡ ཙ ནཱཝིཛྫམཱནཾ.

ཨཐ པཉྙཏྟིམཏྟཾ ནིབྦཱནནྟི ཙེ, ཏམྤི ཨཡུཏྟཾ. ཀསྨཱ? ནིབྦཱནཱརམྨཎཱནཾ ཙིཏྟཙེཏསིཀཱནཾ ནཝཏྟབྦཱརམྨཎཏྟཱ. ཀཐཾ? པརིཏྟཱརམྨཎཏྟིཀེ ཙ པན ‘‘ཀཏམེ དྷམྨཱ ཨཔྤམཱཎཱརམྨཎཱ’’ཏི ¶ པདམུདྡྷརིཏྭཱ ‘‘ཙཏྟཱརོ མགྒཱ ཨཔརིཡཱཔནྣཱ ཙཏྟཱརི ཙ སཱམཉྙཕལཱནི ¶ , ཨིམེ དྷམྨཱ ཨཔྤམཱཎཱརམྨཎཱ’’ཏི ཧི ཝུཏྟཾ. ཡདི པནེཏེསཾ པཉྙཏྟིཨཱརམྨཎཾ སིཡཱ, ཨཔྤམཱཎཱརམྨཎཏཱ ན ཡུཛྫེཡྻ, ནཝཏྟབྦཱརམྨཎཔཀྑཾ བྷཛེཡྻུཾ. ‘‘ནཝཏྟབྦཱརམྨཎཱ པན རཱུཔཱཝཙརཏྟིཀཙཏུཀྐཛ྄ཛྷཱནཱ ཀུསལཏོ ཙ ཝིཔཱཀཏོ ཙ ཀིརིཡཏོ ཙ, ཙཏུཏྠསྶ ཛྷཱནསྶ ཝིཔཱཀོ, ཨཱཀཱསཱནཉྩཱཡཏནཾ ཨཱཀིཉྩཉྙཱཡཏནཾ ཀུསལཏོ ཙ ཝིཔཱཀཏོ ཙ ཀིརིཡཏོ ཙ, ཨིམེ དྷམྨཱ ནཝཏྟབྦཱརམྨཎཱ’’ཏི ཧི ཝུཏྟཾ, ཏསྨཱ ན པཉྙཏྟིམཏྟཾ ནིབྦཱནཾ. ཡསྨཱ ཙ པཎྞཏྟིབྷཱཝོ ནིབྦཱནསྶ ན ཡུཛྫཏི, ཏསྨཱ མགྒཕལཱནཾ ཨཱརམྨཎཔཙྩཡབྷཱུཏཾ ཨུཔྤཱདཱདཱིནམབྷཱཝཏོ ནིཙྩཾ, རཱུཔསབྷཱཝཱབྷཱཝཏོ ཨརཱུཔཾ, པཔཉྩཱབྷཱཝཏོ ནིཔྤཔཉྩཾ ནིབྦཱནཾ ནཱམ ཨཏྠཱིཏི ཨུཔགནྟབྦནྟི.

ཨཙྩནྟམནནྟཾ སནྟཾ, ཨམཏཾ ཨཔལོཀིཏཾ;

པཎཱིཏཾ སརཎཾ ཁེམཾ, ཏཱཎཾ ལེཎཾ པརཱཡཎཾ.

སིཝཉྩ ནིཔུཎཾ སཙྩཾ, དུཀྑཀྑཡམནཱསཝཾ;

སུདུདྡསཾ པརཾ པཱརཾ, ནིབྦཱནམནིདསྶནཾ.

ཏཎྷཱཀྑཡཾ དྷུཝཾ དཱིཔཾ, ཨབྱཱཔཛ྄ཛྷམནཱིཏིཀཾ;

ཝིརཱགཉྩ ནིརོདྷཉྩ, ཝིམུཏྟི མོཀྑམེཝ ཙ;

ཨིམེཧི པན ནཱམེཧི, ནིབྦཱནཾ ཏུ ཀཐཱིཡཏི.

ཨེཝཉྩ ¶ པན ཝིཉྙཱཡ, ནིབྦཱནམྤི ཙ ཨཙྩུཏཾ;

ཏསྶ ཙཱདྷིགམཱུཔཱཡོ, ཀཏྟབྦོ ཝིཉྙུནཱ སདཱ.

སདྡྷཱབུདྡྷིཀརཾ ཏཐཱགཏམཏེ སམྨོཧཝིདྡྷཾསནཾ,

པཉྙཱསམྦྷཝསམྤསཱདནཀརཾ ཛཱནཱཏི ཡོ ཙེ ཨིམཾ;

ཨཏྠབྱཉྫནསཱལིནཾ སུམདྷུརཾ སཱརཉྙུཝིམྷཱཔནཾ,

གམྦྷཱིརེ ནིཔུཎཱབྷིདྷམྨཔིཊཀེ སོ ཡཱབྷིནིཊྛཾ པདཾ.

ཨིཏི ཨབྷིདྷམྨཱཝཏཱརེ ནིབྦཱནནིདྡེསོ ནཱམ

ཨེཏྠཱཧ ¶ ¶ – ‘‘ཀིཾ ཨེཏྟཀམེཝ ཉེཡྻཾ, ཨུདཱཧུ ཨཉྙམྤི ཨཏྠཱི’’ཏི? ཨཏྠི པཉྙཏྟི ནཱམཱཏི. སཱ པནེསཱ པཉྙཔེཏབྦཏོ, པཉྙཱཔནཏོ ཙ ‘‘པཉྙཏྟཱི’’ཏི ཝུཙྩཏི. ཏེནེཝཱཧ – ‘‘ཡཱ ཏེསཾ ཏེསཾ དྷམྨཱནཾ སངྑཱ སམཉྙཱ པཉྙཏྟི ཝོཧཱརོ ནཱམཾ ནཱམཀམྨཾ ནཱམདྷེཡྻཾ ནིརུཏྟི བྱཉྫནཾ ཨབྷིལཱཔོ’’ཏི. ཏཏྠ སངྑཱཡཏཱིཏི སངྑཱ, ཀཐཱིཡཏཱིཏི ཨཏྠོ. ཀིནྟི ཀཐཱིཡཏི? ‘‘ཨཧ’’ནྟི ‘‘མམ’’ནྟི ‘‘པརོ’’ཏི ‘‘པརསྶཱ’’ཏི ‘‘མཉྩོ’’ཏི ‘‘པཱིཋ’’ནྟི ཨནེཀེཧི ཨཱཀཱརེཧི ཀཐཱིཡཏཱིཏི སངྑཱ. སམཉྙཱཡཏཱིཏི སམཉྙཱ. པཉྙཱཔཱིཡཏཱིཏི པཉྙཏྟི. ཝོཧརཱིཡཏཱིཏི ཝོཧཱརོ. ཀིནྟི ཝོཧརཱིཡཏི? ‘‘ཨཧ’’ནྟི ‘‘མམ’’ནྟི ‘‘པརོ’’ཏི ‘‘པརསྶཱ’’ཏི ‘‘མཉྩོ’’ཏི ‘‘པཱིཋ’’ནྟི. ཨེཝཾ ཏཱཝ པཉྙཔེཏབྦཏོ པཉྙཏྟཱིཏི ཝུཏྟཱ. ‘‘ཨཧ’’ནྟི ཧི རཱུཔཱདཡོ དྷམྨེ ཨུཔཱདཱཡ པཊིཙྩ ཀཱརཎཾ ཀཏྭཱ ཡཐཱ ཏེ རཱུཔཱདཡོ དྷམྨཱ ཨུཔྤཱདཝཡཝནྟོ, ན ཨེཝཾཝིདྷཱ, ཀེཝལཾ ལོཀསངྐེཏེན ¶ སིདྡྷཱ ཡཱ ཨཡཾ ‘‘ཨཧ’’ནྟི ཀཐཱིཡཏི ཙེཝ པཉྙཱཔཱིཡཏི ཙ, ཨེསཱ པཉྙཏྟཱིཏི ཨཏྠོ.

ཨིདཱནི པཉྙཱཔནཏོ པཉྙཏྟིཾ པཀཱསེཏུཾ ‘‘ནཱམཾ ནཱམཀམྨ’’ནྟིཨཱདིམཱཧ. ཏཏྠ ནཱམནྟི ཏཾ ཏཾ དྷམྨཾ ‘‘ཨེས ཨིཏྠནྣཱམོ ནཱམཱ’’ཏི པཉྙཔེཏི, ཏསྨཱ ཏཾ པཉྙཏྟཱིཏི པཝུཙྩཏི. ནཱམཀམྨནྟིཨཱདཱིནི ཏསྶཱ ཨེཝ ཝེཝཙནཱནི. ཨཡཾ པཉྙཱཔནཏོ པཉྙཏྟི ནཱམ.

སཱ པནེསཱ ཏཛྫཱཔཉྙཏྟི ཨུཔཱདཱཔཉྙཏྟི ཨུཔནིདྷཱཔཉྙཏྟཱིཏི ཏིཝིདྷཱ ཧོཏི. ཏཏྠ ཏཛྫཱཔཉྙཏྟི ནཱམ ཙཀྑུསོཏརཱུཔསདྡཔཐཝཱིཏེཛོཝཱཡོཏིཨཱདིནཡཔྤཝཏྟཱ. ཨུཔཱདཱཔཉྙཏྟི པན སམཱུཧཱསམཱུཧཝསེན དུཝིདྷཱ ཧོཏི. ཏཏྠ སམཱུཧཔཉྙཏྟི ནཱམ རཱུཔཱརཱུཔདྷམྨེསུ ཨེཀསྶ ཝཱ བཧཱུནཾ ཝཱ ནཱམཾ གཧེཏྭཱ སམཱུཧམེཝོཔཱདཱཡ ཝུཙྩཏི. ཀཐཾ? ཨཙྪཏརཙྪགྷཊཔཊཱདིཔྤབྷེདཱ. ཨཡཾ སམཱུཧཔཉྙཏྟི ¶ ནཱམ. ཨསམཱུཧཔཉྙཏྟི པན དིསཱཀཱསཀཱལནིམིཏྟཱབྷཱཝནིརོདྷཱདིབྷེདཱ.

ཡདཱ པན སཱ ཝིཛྫམཱནཾ པརམཏྠཾ ཛོཏཡཏི, ཏདཱ ‘‘ཝིཛྫམཱནཔཉྙཏྟཱི’’ཏི པཝུཙྩཏི. ཡདཱ ཨཝིཛྫམཱནཾ སམཱུཧཱསམཱུཧབྷེདཾ ནཱམམཏྟཾ ཛོཏཡཏི, ཏདཱ ‘‘ཨཝིཛྫམཱནཔཉྙཏྟཱི’’ཏི པཝུཙྩཏི ¶ . དུཝིདྷཱཔི པནེསཱ སོཏདྭཱརཛཝནཱནནྟརཾ གཧིཏཔུབྦསངྐེཏམནོདྭཱརཛཝནཝིཉྙཱཎེན ཝིཉྙཱཡཏི. ཡཱཡ གཧིཏཔུབྦསངྐེཏེན མནོདྭཱརཛཝནཝིཉྙཱཎེན པཉྙཱཔཱིཡཏི. ཡཾ སནྡྷཱཡ ‘‘ཝིཛྫམཱནཔཉྙཏྟི, ཨཝིཛྫམཱནཔཉྙཏྟི, ཝིཛྫམཱནེན ཨཝིཛྫམཱནཔཉྙཏྟི, ཨཝིཛྫམཱནེན ཝིཛྫམཱནཔཉྙཏྟི, ཝིཛྫམཱནེན ཝིཛྫམཱནཔཉྙཏྟི, ཨཝིཛྫམཱནེན ཨཝིཛྫམཱནཔཉྙཏྟཱི’’ཏི ཚཀྐནཡོ ཝུཏྟོ. ཏཏྠ པརམཏྠཏོ ཝིཛྫམཱནཱནཾ རཱུཔཱདཱིནཾ པཉྙཱཔནཱ ཝིཛྫམཱནཔཉྙཏྟི. ཏཐཱ ཨཝིཛྫམཱནཱནམིཏྠིཔུརིསཱདཱིནཾ པཉྙཱཔནཱ ཨཝིཛྫམཱནཔཉྙཏྟི. ཋཔེཏྭཱ པན ཝཙནཏྠཾ ཀེནཙི ཨཱཀཱརེན ཨནུཔལབྦྷམཱནཱནཾ པཉྩམསཙྩཱདཱིནཾ, ཏིཏྠིཡཔརིཀཔྤིཏཱནཾ ཝཱ པཀཏིཔུརིསཱདཱིནཾ པཉྙཱཔནཱཔི ཨཝིཛྫམཱནཔཉྙཏྟིཡེཝ ¶ . ‘‘ཏེཝིཛྫོ, ཚལ༹བྷིཉྙོ’’ཏི ཨེཝམཱདིནཡཔྤཝཏྟཱ ཝིཛྫམཱནེན ཨཝིཛྫམཱནཔཉྙཏྟི. ‘‘ཨིཏྠིསདྡོ, པུརིསསདྡོ’’ཏི ཨེཝམཱདིཀཱ ཨཝིཛྫམཱནེན ཝིཛྫམཱནཔཉྙཏྟི. ‘‘ཙཀྑུཝིཉྙཱཎཾ, སོཏཝིཉྙཱཎ’’ནྟི ཨེཝམཱདིཀཱ ཝིཛྫམཱནེན ཝིཛྫམཱནཔཉྙཏྟི. ‘‘ཁཏྟིཡཀུམཱརོ, བྲཱཧྨཎཀུམཱརོ, བྷིཀྑུཀུམཱརོ’’ཏི ཨེཝམཱདིཀཱ ཨཝིཛྫམཱནེན ཨཝིཛྫམཱནཔཉྙཏྟཱིཏི ཨེཝཾ ཝུཏྟཱ ཚ པཉྙཏྟིཡོཔི ཨེཏྠེཝ སངྒཧཾ གཙྪནྟི. ཨཡཾ ཨུཔཱདཱཔཉྙཏྟི ནཱམ.

ཨུཔནིདྷཱཔཉྙཏྟིཔི ཨེཏིསྶཱ ཨེཝ པབྷེདཱ, སཱ པན ‘‘དཱིགྷཾ ཨུཔནིདྷཱཡ རསྶོ, རསྶཾ ཨུཔནིདྷཱཡ དཱིགྷོ’’ཏིཨཱདིནཡཔྤཝཏྟཱ ‘‘ཀཔཎཾ མཱནུསཀཾ རཛྫཾ དིབྦསུཁཾ ཨུཔནིདྷཱཡཱ’’ཏི ཨེཝམཱདིཀཱ ཙ, ཏསྨཱ པཉྙཔེཏབྦཏོ ཙ པཉྙཱཔནཏོ ཙ པཉྙཏྟཱིཏི ཝེདིཏབྦཱ. སམཉྙཱ སམཏྟཱ.

པརམཏྠཏོ ཙ པཉྙཏྟི, ཏཏིཡཱ ཀོཊི ན ཝིཛྫཏི;

དྭཱིསུ ཋཱནེསུ ཀུསལོ, པརཝཱདེསུ ན ཀམྤཏི.

ཨིཏི ཨབྷིདྷམྨཱཝཏཱརེ པཉྙཏྟིནིདྡེསོ ནཱམ

ཨེཏྠཱཧ ¶ ¶ – ནིདྡིཊྛཱ ཀུསལཱདཡོ ནཱམ དྷམྨཱ, ན པནེཏེསཾ ཀཱརཀོ ཨཏྟཱ ནིདྡིཊྛོ. ཏསྶ ཧི ཀཱརཀསྶ ཝེདཀསྶ ཨཏྟནོ ཨབྷཱཝེ ཀུསལཱཀུསལཱནཾ དྷམྨཱནཾ ཨབྷཱཝོ སིཡཱ, ཏེསམབྷཱཝེ ཏདཱཡཏྟཝུཏྟཱིནཾ ཏེསཾ ཝིཔཱཀཱནམབྷཱཝོ ཧོཏི, ཏསྨཱ ཀུསལཱདཱིནཾ དྷམྨཱནཾ དེསནཱ ནིརཏྠིཀཱཏི? ཨཏྲ ཝུཙྩཏེ – ནཱཡཾ ¶ ནིརཏྠིཀཱ, སཱཏྠིཀཱཝཱཡཾ དེསནཱ. ཡདི ཀཱརཀསྶཱབྷཱཝཱ ཀུསལཱདཱིནམབྷཱཝོ སིཡཱ, ཏསྶ པརིཀཔྤིཏསྶ ཨཏྟནོཔི ཨབྷཱཝོ སིཡཱ. ཀིཾ ཀཱརཎནྟི ཙེ? ཏསྶ ཨཏྟནོ ཨཉྙསྶ ཀཱརཀསྶཱབྷཱཝཏོ. ཀཱརཀཱབྷཱཝེཔི ཀཏྟཱ ཨཏྟཱ ཨཏྠཱིཏི ཙེ? ཏཐཱ ཀུསལཱདཱིནམྤི ཨསཏིཔི ཀཏྟརི ཨཏྠིཏཱ ཨུཔགནྟབྦཱ, ཀུཏོཡཾ ཏཝ ཏཏྠཱནུརོདྷོ, ཨིདྷ ཝིརོདྷོཏི. ཨཐཱཔི ཡཐཱ པན ལོཀེ ཀཱརཀཱབྷཱཝེཔི པཐཝཱིཨཱཔཏེཛཨུཏུཨཱདཡོ པཊིཙྩ ཨངྐུརཱདཱིནཾ ཨབྷིནིབྦཏྟི དིསྶཏི, ཏཐཱ ཨེཏེསམྤི ཀུསལཱདཱིནཾ དྷམྨཱནཾ ཧེཏུཔཙྩཡསཱམགྒིཡཱ ཨབྷིནིབྦཏྟི ཧོཏཱིཏི ཝེདིཏབྦཱ.

ཨཐཱཔི ཙེཏྠ ཏསྶཱ པཉྙཱཡ པརིཀཔྤིཏོ ནིཙྩོ དྷུཝོ ཀུསལཱདཱིནཾ ཀཏྟཱ ཨཏྟཱ པརམཏྠཏོ ཨཏྠཱིཏི ཙེ? ཏམུཔཔརིཀྑིསྶཱམ ཏཱཝ, སོ པན ཏཱཝ ཨཏྟཱ ཀཱརཀོ ཝེདཀོ ཀིཾ སཙེཏནོ ཝཱ, ཨུདཱཧུ ཨཙེཏནོ ཝཱཏི? ཀིཉྩེཏྠ – ཡདི ཨཙེཏནོ སིཡཱ, པཱཀཱརཏརུཔཱསཱཎསདིསོ སིཡཱ. ཏསྶ ཀཱརཀཝེདཀཏྟཱབྷཱཝོ སིཡཱ. ཡདི སཙེཏནོ, སོ ཙེཏནཱཡ ཨཉྙོ ཝཱ སིཡཱ, ཨནཉྙོ ཝཱ. ཨཐཱནཉྙོ, ཙེཏནཱཡ ནཱསེ ཨཏྟནོཔི ནཱསོ སིཡཱ. ཀིཾ ཀཱརཎནྟི ཙེ? ཙེཏནཱཡ ཨནཉྙཏྟཱ.

ཨཐཱཔི བྷཝཏོ ཨདྷིཔྤཱཡོ ཨེཝཾ སིཡཱ, ཨཏྟནོ པན ནཱསོ ¶ ན བྷཝཏི ནིཙྩཏྟཱ, ཙེཏནཱཡཡེཝ ནཱསོ བྷཝཏཱིཏི? ཝུཙྩཏེ – ཨཏྟནོ ཨནཱསེ སཏི ཙེཏནཱཡཔི ནཱསོ ན བྷཝཏི. ཀིཾ ཀཱརཎནྟི ཙེ? ཙེཏནཱཡ ཨནཉྙཏྟཱ. ཙེཏནཏྟཱནཾ ཨནཉྙཏྟེ སཏི ཙེཏནཱཡཡེཝ ནཱསོ བྷཝཏི, ན ཨཏྟནོཏི ཨཡུཏྟམེཏཾ. ཨཐ ཙེཏནཱཡཡེཝ ཝིནཱསེ ཝིསེསཀཱརཎཾ ནཏྠི, ཨཏྟཱཝ ནསྶཏུ, ཏིཊྛཏུ ཙེཏནཱ. ཨཐ ཙེཏནཱཡ ནཱསེ ཨཏྟནོ ནཱསོ ¶ ན བྷཝཏཱིཏི ཙེ? ཙེཏནཱཡ ཨཏྟཱ ཨཉྙོ སིཡཱ. ཨཐ ཨཉྙསྶ ཨཏྟསྶ ནཱསེ སཏི སཡཾ ནཱསོ ན བྷཝཏི, ཨེཝཉྩ སཏི ‘‘ཙེཏནཱཡ ¶ ཨནཉྙོ ཨཏྟཱ’’ཏི ཏཝ པཊིཉྙཱ ཧཱིནཱ. ཨཐཱཔི ཙེཏནཏྟཱནཾ ཨནཉྙཏྟེ སཏི ཨཏྟནོ ཨནཱསོ ཙེཏནཱཡཔི ཨནཱསོ བྷཝཏུ. ཨཐ ན བྷཝཏི, པཊིཉྙཱ ཧཱིནཱ. ཨཐ ཝུཏྟཔྤཀཱརཏོ ཝིཔརཱིཏཾ ཝཱ སིཡཱ, ཨཏྟཱ ནསྶཏུ, ཙེཏནཱ ཏིཊྛཏུ. ཨཐ པན ཨེཝཾ ན བྷཝཏཱིཏི ཙེ? ཨནཉྙཏྟཔཀྑཾ པརིཙྩཛ. ཨཐ པན ན པརིཙྩཛསི, པཊིཉྙཱཧཱིནོ བྷཝསི.

ཨཐཱཡཾ བྷཝཏོ ཨདྷིཔྤཱཡོ སིཡཱ ‘‘ནཱཡཾ མམ ཨཏྟཱ ཙེཏནཱཡ ཨནཉྙོ, ཨཉྙོཡེཝཱ’’ཏི? ཏཏྲ ཝུཙྩཏེ – ཨིདྷ པན ཨཉྙཏྟཾ དུཝིདྷཾ ཧོཏི ལཀྑཎཀཏམཉྙཏྟཉྩ དེསནྟརཀཏམཉྙཏྟཉྩཱཏི. ཏཏྠ ཀིཾ ཏྭཾ ཙེཏནཏྟཱནཾ ལཀྑཎཀཏམཉྙཏྟཾ ཝདེསི, ཨུདཱཧུ དེསནྟརཀཏམཉྙཏྟནྟི? ཨཧཾ ལཀྑཎཀཏམཉྙཏྟཾ ཝདཱམཱིཏི. ཡཐཱ ཧི རཱུཔརསགནྡྷཱདཱིནམེཀདེསེ ཝཏྟམཱནཱནམྤི ལཀྑཎཏོ ཨཉྙཏྟཾ ཧོཏི, ཨེཝཾ ཙེཏནཏྟཱནམེཀདེསེ ཝཏྟམཱནཱནམྤི ལཀྑཎཏོ ཨཉྙཏྟཾ ཧོཏི, ཏསྨཱ ལཀྑཎཀཏམཉྙཏྟཾ ཝདཱམཱིཏི. ཏཏྲ ཝུཙྩཏེ – ཡཐཱ ཧི ཛཱཏཝེདསྶ ཌཡ྄ཧམཱནེ ཨཱམཀསངྒྷཊེ ཨཱམཀཝཎྞཝིནཱསེ རསཱདཱིནཾ ཝིནཱསོ བྷཝཏི, ཏཐེཝ ཙེཏནཱཡ ཝིནཱསེ ཨཏྟནོཔི ཝིནཱསོ སིཡཱ. ཀིཾ ཀཱརཎནྟི ཙེ? རཱུཔརསཱདཱིནཾ ཝིཡ ཨེཀདེསཏྟཱཏི.

ཨཐེཝཾ བྷཝཏོ མཏི སིཡཱ ‘‘ཨེཀདེསཏྟེ སཏིཔི ཨཏྟནོ པན ནཱསོ ན བྷཝཏི, ཙེཏནཱཡཡེཝ ཝིནཱསོ བྷཝཏཱི’’ཏི? ཨཏྲ ཝུཙྩཏེ – ཨཏྟནོ ཨནཱསེ ཙེཏནཱཡཔི ཨནཱསོཝ ཧོཏི. ཀིཾ ཀཱརཎནྟི ཙེ? རཱུཔརསཱདཱིནཾ ཝིཡ ཨཝིནིབྦྷོགཏོ. ཨཐ སམཱནེ ཨེཀདེསཏྟེ ཨཝིནིབྦྷོགབྷཱཝེཔི ¶ ཀེན ཧེཏུནཱ ཙེཏནཱཡ ཨེཝ ནཱསོ བྷཝཏི, ན པན ཨཏྟནོ. ཨཐ ཝིསེསཀཱརཎཾ ནཏྠི, ཏཝ ལདྡྷིཡཱ ཨཏྟཱཝ ནསྶཏུ, ཏིཊྛཏུ ཙེཏནཱ. ཨཐ ཙེཏནཱཡ ནཱསེ ཨཏྟནོ ནཱསོ ¶ ན བྷཝཏི, ཨུབྷིནྣཾ ཨེཀདེསཏཱ ནཏྠི. ཨེཝཉྩ སཏི ཀོ དོསོཏི ཙེ? ཡཾ པན ཏཡཱ ཝུཏྟཾ, ཡཐཱ རཱུཔརསགནྡྷཱདཱིནཾ ཨེཀདེསེ ཝཏྟམཱནཱནམྤི ལཀྑཎཏོ ཨཉྙཏྟཾ, ཏཐཱ ཙེཏནཏྟཱནམེཀདེསེ ཝཏྟམཱནཱནམྤི ལཀྑཎཏོ ཨཉྙཏྟནྟི? ཏམཡུཏྟནྟི ཏཝ པཊིཉྙཱ ཧཱིནཱ. ཨཐ རཱུཔརསཱདཱིནཾ ཝིཡ སམཱནེཔི ཨེཀདེསཏྟེ ཡདི ཨཏྟནོ ཨནཱསེ ཙེཏནཱཡཔི ཨནཱསོ ན བྷཝཏི, པཊིཉྙཱཧཱིནོ ཨསི. ཨཐ ཝུཏྟཔྤཀཱརཏོ ཝིཔརཱིཏཾ ཝཱ སིཡཱ, ཏཝ ཨཏྟཱ ནསྶཏུ, ཙེཏནཱ ཏིཊྛཏུ. ཨཐེཝཾ ན བྷཝཏཱིཏི ཙེ? ཨེཀདེསཏཱཝ ནཏྠཱིཏི.

ཨཐ དེསནྟརཀཏམཉྙཏྟཾ ཝདེསི, ཙེཏནཏྟཱནཾ ཨཉྙཏྟེ སཏི གྷཊཔཊསཀཊགེཧཱདཱིནཾ ཝིཡ ཨཉྙཏྟཾ སིཡཱ. ཙེཏནཱཡ ཝིནཱ ཨནཉྙཏཱ ཏེ ཨཏྟཱ ན གྷཊེན ཝིནཱ པཊོ ཝིཡ ཨཉྙོ སིཡཱ ¶ . ཨཉྙོ ཙ ཧི གྷཊོ ཨཉྙོ ཙ པཊོཏི? ན, ཨེཝཉྩ སཏི ཀོ དོསོཏི ཙེ? ‘‘ཨཙེཏནོ ཨཏྟཱ’’ཏི པུབྦེ ཝུཏྟདོསཏོ ན པརིམུཙྩཏཱིཏི. ཏསྨཱ པརམཏྠཏོ ན ཀོཙི ཀཏྟཱ ཝཱ ཝེདཀོ ཝཱ ཨཏྟཱ ཨཏྠཱིཏི དཊྛབྦནྟི.

ཝུཏྟནྟི. སཙྩཾ ཨེཝཾ ཝུཏྟཾ བྷགཝཏཱ, ཏཉྩ ཁོ སམྨུཏིཝསེན, ན པརམཏྠཏོ. ནནུ བྷགཝཏཱ ཨིདམྤི ཝུཏྟཾ –

‘‘ཀིཾ ¶ ནུ སཏྟོཏི པཙྩེསི, མཱར དིཊྛིགཏཾ ནུ ཏེ;

སུདྡྷསངྑཱརཔུཉྫོཡཾ, ནཡིདྷ སཏྟུཔལབྦྷཏཱི’’ཏི ཙ.

ཏསྨཱ ན ཝཙནམཏྟམེཝཱཝལམྦིཏབྦཾ, ན ཙ དལ༹ྷམཱུལ༹ྷགཱཧིནཱ ཙ བྷཝིཏབྦཾ, གརུཀུལམུཔསེཝིཏྭཱ སུཏྟཔདཱནཾ ཨདྷིཔྤཱཡོ ཛཱནིཏབྦོ, སུཏྟཔདེསུ ཨབྷིཡོགོ ཀཱཏབྦོ. དྭེ སཙྩཱནི བྷགཝཏཱ ཝུཏྟཱནི – ‘‘སམྨུཏིསཙྩཾ, པརམཏྠསཙྩཉྩཱ’’ཏི. ཏསྨཱ དྭེཔི སམྨུཏིཔརམཏྠསཙྩཱནི ཨསངྐརཏོ ཉཱཏབྦཱནི. ཨེཝཾ ཨསངྐརཏོ ཉཏྭཱ ཀོཙི ཀཱརཀོ ཝཱ ཝེདཀོ ཝཱ ནིཙྩོ དྷུཝོ ཨཏྟཱ པརམཏྠཏོ ནཏྠཱིཏི ཨུཔཔརིཀྑིཏྭཱ པཙྩཡསཱམགྒིཡཱ དྷམྨཱནཾ པཝཏྟིཾ སལླཀྑེཏྭཱ པཎྜིཏེན ཀུལཔུཏྟེན ཨཏྠཀཱམེན དུཀྑསྶནྟཀིརིཡཱཡ པཊིཔཛྫིཏབྦནྟི.

ཡོ ཨིམཾ གནྠཾ ཨཙྩནྟཾ, ཙིནྟེཏི སཏཏམྤི སོ;

ཀམེན པརམཱ པཉྙཱ, ཏསྶ གཙྪཏི ཝེཔུལཾ.

ཨིཏི ཨབྷིདྷམྨཱཝཏཱརེ ཀཱརཀཔཊིཝེདྷནིདྡེསོ ནཱམ

ཨུཏྟརཾ ཏུ མནུསྶཱནཾ, དྷམྨཏོ ཉཱཎདསྶནཾ;

པཏྟུཀཱམེན ཀཱཏབྦཾ, ཨཱདིཏོ སཱིལསོདྷནཾ.

སངྐསྶརསམཱཙཱརེ, དུསྶཱིལེ སཱིལཝཛྫིཏེ;

ནཏྠི ཛྷཱནཾ ཀུཏོ མགྒོ, ཏསྨཱ སཱིལཾ ཝིསོདྷཡེ.

སཱིལཾ ཙཱརིཏྟཝཱརིཏྟཝསེན དུཝིདྷཾ མཏཾ;

ཏཾ པནཱཙྪིདྡམཀྑཎྜམཀམྨཱསམནིནྡིཏཾ.

ཀཏྟབྦཾ ཨཏྠཀཱམེན, ཝིཝེཀསུཁམིཙྪཏཱ;

སཱིལཉྩ ནཱམ བྷིཀྑཱུནཾ, ཨལངྐཱརོ ཨནུཏྟརོ.

རཏནཾ སརཎཾ ཁེམཾ, ཏཱཎཾ ལེཎཾ པརཱཡཎཾ;

ཙིནྟཱམཎི པཎཱིཏོ ཙ, སཱིལཾ ཡཱནམནུཏྟརཾ.

སཱིཏལཾ ¶ སལིལཾ སཱིལཾ, ཀིལེསམལདྷོཝནཾ;

གུཎཱནཾ མཱུལབྷཱུཏཉྩ, དོསཱནཾ བལགྷཱཏི ཙ.

ཏིདིཝཱརོཧཎཉྩེཏཾ, སོཔཱནཾ པརམུཏྟམཾ;

མགྒོ ཁེམོ ཙ ནིབྦཱནནགརསྶ པཝེསནེ.

ཏསྨཱ སུཔརིསུདྡྷཾ ཏཾ, སཱིལཾ དུཝིདྷལཀྑཎཾ;

ཀཏྟབྦཾ ཨཏྠཀཱམེན, པིཡསཱིལེན བྷིཀྑུནཱ.

ཀཱཏབྦོ པན སཱིལསྨིཾ, པརིསུདྡྷེ ཋིཏེནིདྷ;

པལིབོདྷསྶུཔཙྪེདོ, པལིབོདྷཱ དསཱཧུ ཙ.

པལིབོདྷསྶུཔཙྪེདཾ, ཀཏྭཱ དསཝིདྷསྶཔི;

ཨུཔསངྐམིཏབྦོ སོ, ཀམྨཊྛཱནསྶ དཱཡཀོ.

པིཡོ ¶ གརུ བྷཱཝནཱིཡོ, ཝཏྟཱ ཙ ཝཙནཀྑམོ;

གམྦྷཱིརཉྩ ཀཐཾ ཀཏྟཱ, ནོ ཙཊྛཱནེ ནིཡོཛཀོ.

ཨེཝམཱདིགུཎོཔེཏམུཔགནྟྭཱ ཧིཏེསིནཾ;

ཀལྱཱཎམིཏྟཾ ཀཱལེན, ཀམྨཊྛཱནསྶ དཱཡཀཾ.

ཀམྨཊྛཱནཾ གཧེཏབྦཾ, ཝཏྟཾ ཀཏྭཱ པནསྶ ཏུ;

ཏེནཱཔི ཙརིཏཾ ཉཏྭཱ, དཱཏབྦཾ ཏསྶ བྷིཀྑུནོ.

སདྡྷཱབུདྡྷིཝིཏཀྐཱནཾ, ཝསེན ཚབྦིདྷཾ མཏཾ.

ཝོམིསྶཀནཡཱ ཏེསཾ, ཙཏུསཊྛི བྷཝནྟི ཏེ;

ཏེཧི ཨཏྠོ ན ཙཏྠཱིཏི, ན མཡཱ ཨིདྷ དསྶིཏཱ.

ཨསུབྷཱ ¶ ཙ དསེཝེཏྠ, ཏཐཱ ཀཱཡགཏཱསཏི;

ཨེཀཱདས ཨིམེ རཱག-ཙརིཏསྶཱནུཀཱུལཏཱ.

ཙཏསྶོ ཨཔྤམཉྙཱཡོ, སཝཎྞཀསིཎཱ ཨིམེ;

ཨཊྛེཝ ཙ སདཱ དོས-ཙརིཏསྶཱནུཀཱུལཏཱ.

ཏཾ མོཧཙརིཏསྶེཏྠ, ཝིཏཀྐཙརིཏསྶ ཙ;

ཨནུཀཱུལནྟི ནིདྡིཊྛཾ, ཨཱནཱཔཱནཾ པནེཀཀཾ.

པུརིམཱནུསྶཏིཚཀྐཾ, སདྡྷཱཙརིཏདེཧིནོ;

མརཎཱུཔསམཱཡུཏྟཱ, སཏིམཱཧཱརནིསྶིཏཱ.

སཉྙཱ ¶ དྷཱཏུཝཝཏྠཱནཾ, བུདྡྷིཔྤཀཏིཛནྟུནོ;

ཨིམེ པན ཙ ཙཏྟཱརོ, ཨནུཀཱུལཱཏི དཱིཔིཏཱ.

ཙཏྟཱརོཔི ཙ ཨཱརུཔྤཱ, སེསཱནི ཀསིཎཱནི ཙ;

ཨནུཀཱུལཱ ཨིམེ སབྦ-ཙརིཏཱནནྟི ཝཎྞིཏཱ.

ཨིདཾ སབྦཾ པནེཀནྟ-ཝིཔཙྩནཱིཀབྷཱཝཏོ;

ཨཏིསཔྤཱཡཏོ ཝུཏྟ-མིཏི ཉེཡྻཾ ཝིབྷཱཝིནཱ.

ཀམྨཊྛཱནཱནི སབྦཱནི, ཙཏྟཱལཱིསཱཏི ནིདྡིསེ;

ཀསིཎཱནི དས ཙེཝ, ཨསུབྷཱནུསྶཏཱི དས.

ཙཏསྶོ ཨཔྤམཉྙཱཡོ, ཙཏྟཱརོ ཙ ཨརཱུཔིནོ;

ཙཏུདྷཱཏུཝཝཏྠཱནཾ, སཉྙཱ ཙཱཧཱརཏཱ ཨིཏི.

ཀམྨཊྛཱནེསུ ཨེཏེསུ, ཨུཔཙཱརཝཧཱ ཀཏི;

ཨཱནཱཔཱནསཏིཾ ཀཱཡ-གཏཾ ཧིཏྭཱ པནཊྛཔི.

སེསཱནུསྶཏིཡོ སཉྙཱ, ཝཝཏྠཱནནྟི ཏེརས;

ཨུཔཙཱརཝཧཱ ཝུཏྟཱ, སེསཱ ཏེ ཨཔྤནཱཝཧཱ.

ཨཔྤནཱཡཱཝཧེསྭེཏྠ, ཀསིཎཱནི དསཱཔི ཙ;

ཨཱནཱཔཱནསཏཱི ཙེཝ, ཙཏུཀྐཛ྄ཛྷཱནིཀཱ ཨིམེ.

ཨསུབྷཱནི ¶ དས ཙེཏྠ, ཏཐཱ ཀཱཡགཏཱསཏི;

ཨེཀཱདས ཨིམེ དྷམྨཱ, པཋམཛ྄ཛྷཱནིཀཱ སིཡུཾ.

ཨཱདིབྲཧྨཝིཧཱརཱཏི ¶ , ཏིཀཛ྄ཛྷཱནཝཧཱ ཏཡོ;

ཙཏུཏྠཱཔི ཙ ཨཱརུཔྤཱ, ཙཏུཏྠཛ྄ཛྷཱནིཀཱ མཏཱ.

ཝསེནཱརམྨཎངྒཱནཾ, དུཝིདྷོ སམཏིཀྐམོ;

གོཙརཱཏིཀྐམཱརཱུཔེ, རཱུཔེ ཛྷཱནངྒཏིཀྐམོ.

དསེཝ ཀསིཎཱནེཏྠ, ཝཌྜྷེཏབྦཱནི ཧོནྟི ཧི;

ན ཙ ཝཌྜྷནིཡཱ སེསཱ, བྷཝནྟི ཨསུབྷཱདཡོ.

དསེཝ ཀསིཎཱནེཏྠ, ཨསུབྷཱནི དསཱཔི ཙ;

ཨཱནཱཔཱནསཏཱི ཙེཝ, ཏཐཱ ཀཱཡགཏཱསཏི.

པཊིབྷཱགནིམིཏྟཱནི ¶ , ཧོནྟི ཨཱརམྨཎཱནི ཧི;

སེསཱནེཝ པཊིབྷཱག-ནིམིཏྟཱརམྨཎཱ སིཡུཾ.

ཨསུབྷཱནི དསཱཧཱར-སཉྙཱ ཀཱཡགཏཱསཏི;

དེཝེསུ ནཔྤཝཏྟནྟི, དྭཱདསེཏཱནི སབྦདཱ.

ཏཱནི དྭཱདས ཙེཏཱནི, ཨཱནཱཔཱནསཏཱིཔི ཙ;

ཏེརསེཝ པནེཏཱནི, བྲཧྨལོཀེ ན ཝིཛྫརེ.

ཋཔེཏྭཱ ཙཏུརཱརཱུཔེ, ནཏྠི ཀིཉྩི ཨརཱུཔིསུ;

མནུསྶལོཀེ སབྦཱནི, པཝཏྟནྟི ན སཾསཡོ.

ཙཏུཏྠཾ ཀསིཎཾ ཧིཏྭཱ, ཀསིཎཱ ཨསུབྷཱནི ཙ;

དིཊྛེནེཝ གཧེཏབྦཱ, ཨིམེ ཨེཀཱུནཝཱིསཏི.

སཏིཡམྤི ཙ ཀཱཡམྷི, དིཊྛེན ཏཙཔཉྩཀཾ;

སེསམེཏྠ སུཏེནེཝ, གཧེཏབྦནྟི དཱིཔིཏཾ.

ཨཱནཱཔཱནསཏཱི ཨེཏྠ, ཕུཊྛེན པརིདཱིཔིཏཱ;

ཝཱཡོཀསིཎམེཝེཏྠ, དིཊྛཕུཊྛེན གཡ྄ཧཏི.

སུཏེནེཝ ¶ གཧེཏབྦཱ, སེསཱ ཨཊྛཱརསཱཔི ཙ;

ཨུཔེཀྑཱ ཨཔྤམཉྙཱ ཙ, ཨརཱུཔཱ ཙེཝ པཉྩིམེ.

ཨཱདིཏོཝ གཧེཏབྦཱ, ན ཧོནྟཱིཏི པཀཱསིཏཱ;

པཉྩཏིཾསཱཝསེསཱནི, གཧེཏབྦཱནི ཨཱདིཏོ.

ཀམྨཊྛཱནེསུ ཧེཏེསུ, ཨཱཀཱསཀསིཎཾ ཝིནཱ;

ཀསིཎཱ ནཝ ཧོནྟེ ཙ, ཨརཱུཔཱནཾ ཏུ པཙྩཡཱ.

དསཱཔི ཀསིཎཱ ཧོནྟི, ཨབྷིཉྙཱནཾ ཏུ པཙྩཡཱ;

ཏཡོ བྲཧྨཝིཧཱརཱཔི, ཙཏུཀྐསྶ བྷཝནྟི ཏུ.

ཧེཊྛིམཾ ཧེཊྛིམཱརུཔྤཾ, ཨུཔརཱུཔརིམསྶ ཧི;

ཏཐཱ ཙཏུཏྠམཱརུཔྤཾ, ནིརོདྷསྶཱཏི དཱིཔིཏཾ.

སབྦཱནི ཙ པནེཏཱནི, ཙཏྟཱལཱིསཝིདྷཱནི ཏུ;

ཝིཔསྶནཱབྷཝསམྤཏྟི-སུཁཱནཾ པཙྩཡཱ སིཡུཾ.

ཀམྨཊྛཱནཾ ¶ གཧེཏྭཱན, ཨཱཙརིཡསྶ སནྟིཀེ;

ཝསནྟསྶ ཀཐེཏབྦཾ, ཨཱགཏསྶཱགཏཀྑཎེ.

ཨུགྒཧེཏྭཱ ¶ པནཉྙཏྲ, གནྟུཀཱམསྶ བྷིཀྑུནོ;

ནཱཏིསངྑེཔཝིཏྠཱརཾ, ཀཐེཏབྦཾ ཏུ ཏེནཔི.

ཀམྨཊྛཱནཾ གཧེཏྭཱན, སམྨཊྛཱནཾ མནོབྷུནོ;

ཨཊྛཱརསཧི དོསེཧི, ནིཙྩཾ པན ཝིཝཛྫིཏེ.

ཨནུརཱུཔེ ཝིཧཱརསྨིཾ, ཝིཧཱཏབྦཾ ཏུ གཱམཏོ;

ནཱཏིདཱུརེ ནཙྩཱསནྣེ, སིཝེ པཉྩངྒསཾཡུཏེ.

ཁུདྡཀོ པལིབོདྷོཔི, ཚིནྡིཏབྦོ པནཏྠི ཙེ;

དཱིགྷཱ ཀེསཱ ནཁཱ ལོམཱ, ཚིནྡིཏབྦཱ ཝིབྷཱཝིནཱ.

ཙཱིཝརཾ རཛིཏབྦཾ ཏཾ, ཀིལིཊྛཾ ཏུ སཙེ སིཡཱ;

སཙེ པཏྟེ མལཾ ཧོཏི, པཙིཏབྦོཝ སུཊྛུ སོ.

ཨཙྪིནྣཔལིབོདྷེན ¶ , པཙྪཱ ཏེན ཙ བྷིཀྑུནཱ;

པཝིཝིཏྟེ པནོཀཱསེ, ཝསནྟེན ཡཐཱསུཁཾ.

ཝཛྫེཏྭཱ མཏྟིཀཾ ནཱིལཾ, པཱིཏཾ སེཏཉྩ ལོཧིཏཾ;

སཎྷཱཡཱརུཎཝཎྞཱཡ, མཏྟིཀཱཡ མནོརམཾ.

ཀཏྟབྦཾ ཀསིཎཛ྄ཛྷཱནཾ, པཏྟུཀཱམེན དྷཱིམཏཱ;

སེནཱསནེ ཝིཝིཏྟསྨིཾ, བཧིདྡྷཱ ཝཱཔི ཏཱདིསེ.

པཊིཙྪནྣེ པནཊྛཱནེ, པབྦྷཱརེ ཝཱ གུཧནྟརེ;

སཾཧཱརིམཾ ཝཱ ཀཱཏབྦཾ, ཏཾ ཏཏྲཊྛཀམེཝ ཝཱ.

སཾཧཱརིམཾ ཀརོནྟེན, དཎྜཀེསུ ཙཏཱུསྭཔི;

ཙམྨཾ ཝཱ ཀཊསཱརཾ ཝཱ, དུསྶཔཏྟམྤི ཝཱ ཏཐཱ.

བནྡྷིཏྭཱ ཏཐཱ ཀཱཏབྦཾ, མཏྟིཀཱཡ པམཱཎཏོ;

བྷཱུམིཡཾ པཏྠརིཏྭཱ ཙ, ཨོལོཀེཏབྦམེཝ ཏཾ.

ཏཏྲཊྛཾ བྷཱུམིཡཾ ཝཊྚཾ, ཨཱཀོཊིཏྭཱན ཁཱཎུཀེ;

ཝལླཱིཧི ཏཾ ཝིནནྡྷིཏྭཱ, ཀཱཏབྦཾ ཀཎྞིཀཾ སམཾ.

ཝིཏྠཱརཏོ ¶ པམཱཎེན, ཝིདཏྠིཙཏུརངྒུལཾ;

ཝཊྚཾ ཝཏྟཏི ཏཾ ཀཱཏུཾ, ཝིཝཊྚཾ པན མིཙྪཏཱ.

བྷེརཱིཏལསམཾ སཱདྷུ, ཀཏྭཱ ཀསིཎམཎྜལཾ;

སམྨཛྫིཏྭཱན ཏཾ ཋཱནཾ, ནྷཏྭཱ ཨཱགམྨ པཎྜིཏོ.

ཧཏྠཔཱསཔམཱཎསྨིཾ, ཏམྷཱ ཀསིཎམཎྜལཱ;

པདེསེ ཏུ སུཔཉྙཏྟེ, ཨཱསནསྨིཾ སུཨཏྠཏེ.

ཨུཙྩེ ཏཏྠ ནིསཱིདིཏྭཱ, ཝིདཏྠིཙཏུརངྒུལེ;

ཨུཛུཀཱཡཾ པཎིདྷཱཡ, ཀཏྭཱ པརིམུཁཾ སཏིཾ.

ཀཱམེསྭཱདཱིནཝཾ དིསྭཱ, ནེཀྑམྨཾ དཊྛུ ཁེམཏོ;

པརམཾ པཱིཏིཔཱམོཛྫཾ, ཛནེཏྭཱ རཏནཏྟཡེ.

‘‘བྷཱགཱི ¶ ཨསྶམཧཾ ཨདྡྷཱ, ཨིམཱཡ པཊིཔཏྟིཡཱ;

པཝིཝེཀསུཁསྶཱ’’ཏི, ཀཏྭཱ ཨུསྶཱཧམུཏྟམཾ.

ཨཱཀཱརེན ¶ སམེནེཝ, ཨུམྨཱིལིཏྭཱན ལོཙནཾ;

ནིམིཏྟཾ གཎྷཏཱ སཱདྷུ, བྷཱཝེཏབྦཾ པུནཔྤུནཾ.

ན ཝཎྞོ པེཀྑིཏབྦོ སོ, དཊྛབྦཾ ན ཙ ལཀྑཎཾ;

ཝཎྞཾ པན ཨམུཉྩིཏྭཱ, ཨུསྶདསྶ ཝསེན ཧི.

ཙིཏྟཾ པཎྞཏྟིདྷམྨསྨིཾ, ཋཔེཏྭེཀགྒམཱནསོ;

‘‘པཐཝཱི པཐཝི’’ཙྩེཝཾ, ཝཏྭཱ བྷཱཝེཡྻ པཎྜིཏོ.

པཐཝཱི མེདནཱི བྷཱུམི, ཝསུདྷཱ ཙ ཝསུནྡྷརཱ;

ཨེཝཾ པཐཝིནཱམེསུ, ཨེཀཾ ཝཏྟུམྤི ཝཊྚཏི.

ཨུམྨཱིལིཏྭཱ ནིམཱིལིཏྭཱ, ཨཱཝཛྫེཡྻ པུནཔྤུནཾ;

ཡཱཝུགྒཧནིམིཏྟཾ ཏུ, ནུཔྤཛྫཏི ཙ ཏཱཝ སོ.

ཨེཝཾ བྷཱཝཡཏོ ཏསྶ, པུན ཨེཀགྒཙེཏསོ;

ཡདཱ པན ནིམཱིལེཏྭཱ, ཨཱཝཛྫནྟསྶ ཡོགིནོ.

ཡཐཱ ཨུམྨཱིལིཏེཀཱལེ, ཏཐཱཔཱཐཾ ཏུ ཡཱཏི ཙེ;

ཏདུགྒཧནིམིཏྟཾ ཏ-མུཔྤནྣནྟི པཝུཙྩཏི.

ནིམིཏྟེ ¶ པན སཉྫཱཏེ, ཏཏོ པབྷུཏི ཡོགིནཱ;

ནིསཱིདིཏབྦཾ ནོ ཙེཝཾ, ཏསྨིཾ ཋཱནེ ཝིཛཱནཏཱ.

ཨཏྟནོ ཝསནཊྛཱནཾ, པཝིསིཏྭཱན དྷཱིམཏཱ;

ཏེན ཏཏྠ ནིསིནྣེན, བྷཱཝེཏབྦཾ ཡཐཱསུཁཾ.

པཔཉྩཔརིཧཱརཏྠཾ, པཱདཱནཾ པན དྷོཝནེ;

ཏསྶེཀཏལིཀཱ དྭེ ཙ, ཨིཙྪིཏབྦཱ ཨུཔཱཧནཱ.

སམཱདྷིཏརུཎོ ཏསྶ, ཨསཔྤཱཡེན ཀེནཙི;

སཙེ ནསྶཏི ཏཾ ཋཱནཾ, གནྟྭཱཝཱདཱཡ ཏཾ པན.

པཱིཋེ ¶ སུཁནིསིནྣེན, བྷཱཝེཏབྦཾ པུནཔྤུནཾ;

སམནྣཱཧརིཏབྦཉྩ, ཀརེ ཏཀྐཱཧཏམྤི ཙ.

ནིམིཏྟཾ པན ཏཾ ཧིཏྭཱ, ཙིཏྟཾ དྷཱཝཏི ཙེ བཧི;

ནིཝཱརེཏྭཱ ནིམིཏྟསྨིཾ, ཋཔེཏབྦཾ ཏུ མཱནསཾ.

ཡཏྠ ཡཏྠ ནིསཱིདིཏྭཱ, ཏམིཙྪཏི ཏཔོདྷནོ;

ཏཏྠ ཏཏྠ དིཝཱརཏྟིཾ, ཏསྶུཔཊྛཱཏི ཙེཏསོ.

ཨེཝཾ ཏསྶ ཀརོནྟསྶ, ཨནུཔུབྦེན ཡོགིནོ;

ཝིཀྑམྦྷནྟི ཙ སབྦཱནི, པཉྩ ནཱིཝརཎཱནིཔི.

སམཱདྷིཡཏི ཙིཏྟམྤི, ཨུཔཙཱརསམཱདྷིནཱ;

པཊིབྷཱགནིམིཏྟམྤི, ཨུཔྤཛྫཏི ཙ ཡོགིནོ.

ཀོ པནཱཡཾ ཝིསེསོ ཧི, ཨིམསྶ པུརིམསྶ ཝཱ;

ཐཝིཀཱ ནཱིཧཏཱདཱས-མཎྜལཾ ཝིཡ མཛྫིཏཾ.

མེགྷཏོ ཝིཡ ནིཀྑནྟཾ, སམྤུཎྞཙནྡམཎྜལཾ;

པཊིབྷཱགནིམིཏྟཾ ཏཾ, བལཱཀཱ ཝིཡ ཏོཡདེ.

ཏདུགྒཧནིམིཏྟཾ ¶ ཏཾ, པདཱལེཏྭཱཝ ནིགྒཏཾ;

ཏཏོདྷིཀཏརཾ སུདྡྷཾ, ཧུཏྭཱཔཊྛཱཏི ཏསྶ ཏཾ.

ཏནུསཎྛཱནཝནྟཉྩ, ཝཎྞཝནྟཾ ན ཙེཝ ཏཾ;

ཨུཔཊྛཱཀཱརམཏྟཾ ཏཾ, པཉྙཛཾ བྷཱཝནཱམཡཾ.

པཊིབྷཱགེ ¶ སམུཔྤནྣེ, ནིམིཏྟེ བྷཱཝནཱམཡེ;

ཧོནྟི ཝིཀྑམྦྷིཏཱནེཝ, པཉྩ ནཱིཝརཎཱནིཔི.

ཀིལེསཱ སནྣིསིནྣཱཝ, ཡུཏྟཡོགསྶ བྷིཀྑུནོ;

ཙིཏྟཾ སམཱཧིཏཾཡེཝ, ཨུཔཙཱརསམཱདྷིནཱ.

ཨཱཀཱརེཧི པན དྭཱིཧི, སམཱདྷིཡཏི མཱནསཾ;

ཨུཔཙཱརཀྑཎེ ཏསྶ, པཊིལཱབྷེ སམཱདྷིནོ.

ནཱིཝཱརཎཔྤཧཱནེན ¶ , ཨུཔཙཱརཀྑཎེ ཏཐཱ;

ཨངྒཱནཾ པཱཏུབྷཱཝེན, པཊིལཱབྷཀྑཎེ པན.

དྭིནྣཾ པན སམཱདྷཱིནཾ, ཀིཾ ནཱནཱཀརཎཾ པན;

ཨངྒཱནི ཐཱམཛཱཏཱནི, ཨུཔཙཱརཀྑཎེན ཙ.

ཨཔྤནཱཡ པནངྒཱནི, ཐཱམཛཱཏཱནི ཛཱཡརེ;

ཏསྨཱ ཏཾ ཨཔྤནཱཙིཏྟཾ, དིཝསམྤི པཝཏྟཏི.

པལླངྐེན ཙ ཏེནེཝ, ཝཌྜྷེཏྭཱ ཏཾ ནིམིཏྟཀཾ;

ཨཔྤནཾ ཨདྷིགནྟུཾ སོ, སཀྐོཏི ཡདི སུནྡརཾ.

སཏཏཾ ཨཔྤམཏྟེན, རཀྑིཏབྦཾ སཏཱིམཏཱ;

ནིམིཏྟཾ རཀྑཏོ ལདྡྷཾ, པརིཧཱནི ན ཝིཛྫཏི.

ཨཱརཀྑཎེ ཨསནྟམྷི, ལདྡྷཾ ལདྡྷཾ ཝིནསྶཏི;

རཀྑིཏབྦཾ ཧི ཏསྨཱ ཏཾ, ཏཏྲཱཡཾ རཀྑཎཱཝིདྷི.

ཨཱཝཱསོ གོཙརོ བྷསྶཾ, པུགྒལོ བྷོཛནཾ ཨུཏུ;

ཨིརིཡཱཔཐོཏི སཏྟེཏེ, ཨསཔྤཱཡེ ཝིཝཛྫཡེ.

སཔྤཱཡེ ¶ སཏྟ སེཝེཡྻ, ཨེཝཉྷི པཊིཔཛྫཏོ;

ན ཙིརེནེཝ ཀཱལེན, ཧོཏི བྷིཀྑུསྶ ཨཔྤནཱ.

ཡསྶཔྤནཱ ན ཧོཏེཝ, ཨེཝམྤི པཊིཔཛྫཏོ;

ཨཔྤནཱཡ ཙ ཀོསལླཾ, སམྨཱ སམྤཱདཡེ བུདྷོ.

ཨཔྤནཱཡ ཧི ཀོསལླ-མིདཾ དསཝིདྷཾ ཨིདྷ;

གནྠཝིཏྠཱརབྷཱིཏེན, མཡཱ ཝིསྶཛྫིཏནྟི ཙ.

ཨེཝཉྷི ¶ སམྤཱདཡཏོ, ཨཔྤནཱཀོསལླཾ པན;

པཊིལདྡྷེ ནིམིཏྟསྨིཾ, ཨཔྤནཱ སམྤཝཏྟཏི.

ཨེཝམྤི པཊིཔནྣསྶ, སཙེ སཱ ནཔྤཝཏྟཏི;

ཏཐཱཔི ན ཛཧེ ཡོགཾ, ཝཱཡམེཐེཝ པཎྜིཏོ.

ཙིཏྟཔྤཝཏྟིཨཱཀཱརཾ ¶ , ཏསྨཱ སལླཀྑཡཾ བུདྷོ;

སམཏཾ ཝཱིརིཡསྶེཝ, ཡོཛཡེཐ པུནཔྤུནཾ.

ཨཱིསཀམྤི ལཡཾ ཡནྟཾ, པགྒཎྷེཐེཝ མཱནསཾ;

ཨཙྩཱརདྡྷཾ ནིསེདྷེཏྭཱ, སམམེཝ པཝཏྟཡེ.

ལཱིནཏུདྡྷཏབྷཱཝེཧི, མོཙཡིཏྭཱན མཱནསཾ;

པཊིབྷཱགནིམིཏྟཱབྷི-མུཁཾ ཏཾ པཊིཔཱདཡེ.

ཨེཝཾ ནིམིཏྟཱབྷིམུཁཾ, པཊིཔཱདཡཏོ པན;

ཨིདཱནེཝཔྤནཱ ཏསྶ, སཱ སམིཛ྄ཛྷིསྶཏཱིཏི ཙ.

བྷཝངྒཾ པན པཙྪིཛྫ, པཐཝཱིཀསིཎཾ ཏཐཱ;

ཏདེཝཱརམྨཎཾ ཀཏྭཱ, མནོདྭཱརམྷི ཡོགིནོ.

ཛཱཡཏེཝཛྫནཾ ཙིཏྟཾ, ཏཏྲེཝཱརམྨཎེ ཏཏོ;

ཛཝནཱནི ཙ ཛཱཡནྟེ, ཏསྶ ཙཏྟཱརི པཉྩ ཝཱ.

ཨཝསཱནེ པནེཀཾ ཏུ, རཱུཔཱཝཙརིཀཾ བྷཝེ;

ཏཀྐཱདཡོ པནཉྙེཧི, བྷཝནྟི བལཝཏྟརཱ.

ཨཔྤནཱཙེཏསོ ཏཱནི, པརིཀམྨོཔཙཱརཏོ;

ཝུཙྩནྟི པརིཀམྨཱནི, ཨུཔཙཱརཱནི ཙཱཏིཔི.

ཨཔྤནཱཡཱནུལོམཏྟཱ ¶ , ཨནུལོམཱནི ཨེཝ ཙ;

ཡཾ ཏཾ སབྦནྟིམཾ ཨེཏྠ, གོཏྲབྷཱུཏི པཝུཙྩཏི.

གཧིཏཱགཧཎེནེཏྠ, པརིཀམྨཔྤནཱདིཀཾ;

དུཏིཡཾ ཨུཔཙཱརཾ ཏཾ, ཏཏིཡཾ ཨནུལོམཀཾ.

ཙཏུཏྠཾ ¶ གོཏྲབྷུ དིཊྛཾ, པཉྩམཾ ཨཔྤནཱམནོ;

པཋམཾ ཨུཔཙཱརཾ ཝཱ, དུཏིཡཾ ཨནུལོམཀཾ.

ཏཏིཡཾ གོཏྲབྷུ དིཊྛཾ, ཙཏུཏྠཾ ཨཔྤནཱམནོ;

ཙཏུཏྠཾ པཉྩམཾ ཝཱཏི, ཨཔྤེཏི ན ཏཏོ པརཾ.

ཚཊྛེ ཝཱ སཏྟམེ ཝཱཔི, ཨཔྤནཱ ནེཝ ཛཱཡཏི;

ཨཱསནྣཏྟཱ བྷཝངྒསྶ, ཛཝནཾ པཏི ཏཱཝདེ.

པུརིམེཧཱསེཝནཾ ལདྡྷཱ, ཚཊྛཾ ཝཱ སཏྟམམྤི ཝཱ;

ཨཔྤེཏཱིཏི པནེཏྠཱཧ, གོདཏྟོ ཨཱབྷིདྷམྨིཀོ.

ཨེཝམེཝ པནཙྪཊྛེ, སཏྟམེ ཝཱཔི མཱནསོ;

ན སཀྐོཏཱིཏི ཨཔྤེཏུཾ, ཝེདིཏབྦཾ ཝིབྷཱཝིནཱ.

ཨེཀཙིཏྟཀྑཎཱཡེཝ, ཧོཏཱཡཾ ཨཔྤནཱ པན;

ཏཏོ བྷཝངྒཔཱཏོཝ, ཧོཏཱིཏི པརིདཱིཔིཏཾ.

ཏཏོ བྷཝངྒཾ ཚིནྡིཏྭཱ, པཙྩཝེཀྑཎཧེཏུཀཾ;

ཨཱཝཛྫནཾ ཏཏོ ཛྷཱན-པཙྩཝེཀྑཎམཱནསཾ.

ཀཱམཙྪནྡོ ¶ ཙ བྱཱཔཱདོ, ཐིནམིདྡྷཉྩ ཨུདྡྷཏོ;

ཀུཀྐུཙྩཾ ཝིཙིཀིཙྪཱ ཙ, པཧཱིནཱ པཉྩིམེ པན.

ཝིཏཀྐེན ཝིཙཱརེན, པཱིཏིཡཱ ཙ སུཁེན ཙ;

ཨེཀགྒཏཱཡ སཾཡུཏྟཾ, ཛྷཱནཾ པཉྩངྒིཀཾ ཨིདཾ.

ནཱནཱཝིསཡལུདྡྷསྶ ¶ , ཀཱམཙྪནྡཝསཱ པན;

ཨིཏོ ཙིཏོ བྷམནྟསྶ, ཝནེ མཀྐཊཀོ ཝིཡ.

ཨེཀསྨིཾ ¶ ཝིསཡེཡེཝ, སམཱདྷཱནེཝ ཙེཏསོ;

‘‘སམཱདྷི ཀཱམཙྪནྡསྶ, པཊིཔཀྑོ’’ཏི ཝུཙྩཏི.

པཱམོཛྫབྷཱཝཏོ ཙེཝ, སཱིཏལཏྟཱ སབྷཱཝཏོ;

‘‘བྱཱཔཱདསྶ ཏཏོ པཱིཏི, པཊིཔཀྑཱ’’ཏི བྷཱསིཏཱ.

སཝིཔྥཱརིཀབྷཱཝེན, ནེཀྑམྨཱདིཔཝཏྟིཏོ;

‘‘ཝིཏཀྐོ ཐིནམིདྡྷསྶ, པཊིཔཀྑོ’’ཏི ཝཎྞིཏོ.

ཨཝཱུཔསནྟབྷཱཝསྶ, སཡཉྩེཝཱཏིསནྟཏོ;

‘‘སུཁཾ ཨུདྡྷཙྩཀུཀྐུཙྩ-དྭཡསྶ པཊིཔཀྑཀཾ’’.

མཏིཡཱ ཨནུརཱུཔཏྟཱ, ‘‘ཨནུམཛྫནལཀྑཎོ;

ཝིཙཱརོ ཝིཙིཀིཙྪཱཡ, པཊིཔཀྑོ’’ཏི དཱིཔིཏོ.

པཉྩངྒཝིཔྤཡུཏྟཾ ཏཾ, ཛྷཱནཾ པཉྩངྒསཾཡུཏཾ;

སིཝཾ ཏིཝིདྷཀལྱཱཎཾ, དསལཀྑཎསཾཡུཏཾ.

ཨེཝཉྩཱདྷིགཏཾ ཧོཏི, པཋམཾ ཏེན ཡོགིནཱ;

སུཙིརཊྛིཏིཀཱམེན, ཏསྶ ཛྷཱནསྶ སབྦསོ.

ཏཾ སམཱཔཛྫིཏབྦཾ ཏུ, ཝིསོདྷེཏྭཱན པཱཔཀེ;

ཏཾ སམཱཔཛྫཏོ ཏསྶ, སུཙིརཊྛིཏིཀཾ བྷཝེ.

ཙིཏྟབྷཱཝནཝེཔུལླཾ, པཏྠཡནྟེན བྷིཀྑུནཱ;

པཊིབྷཱགནིམིཏྟཾ ཏཾ, ཝཌྜྷེཏབྦཾ ཡཐཱཀྐམཾ.

ཝཌྜྷནཱབྷཱུམིཡོ དྭེ ཙ, ཨུཔཙཱརཉྩ ཨཔྤནཱ;

ཨུཔཙཱརམྤི ཝཱ པཏྭཱ, ཝཌྜྷེཏུཾ ཏཉྩ ཝཏྟཏི.

ཨཔྤནཾ པན པཏྭཱ ཝཱ, ཏཏྲཱཡཾ ཝཌྜྷནཀྐམོ;

ཀསིཏབྦཾ ཡཐཱཋཱནཾ, པརིཙྪིནྡཏི ཀསྶཀོ.

ཡོགིནཱ ཨེཝམེཝམྤི, ཨངྒུལདྭངྒུལཱདིནཱ;

པརིཙྪིཛྫ པརིཙྪིཛྫ, ཝཌྜྷེཏབྦཾ ཡཐིཙྪཀཾ.

པཏྟེཔི ¶ ¶ པཋམེ ཛྷཱནེ, ཨཱཀཱརེཧིཔི པཉྩཧི;

སུཙིཎྞཝསིནཱ ཏེན, བྷཝིཏབྦཾ ཏཔསྶིནཱ.

ཨཱཝཛྫནཾ སམཱཔཏྟི, ཨདྷིཊྛཱནེསུ ཏཱིསུ ཙ;

ཝུཊྛཱནཔཙྩཝེཀྑཱསུ, ཝསིཏཱ པཉྩ བྷཱསིཏཱ.

ཨཱཝཛྫིཏྭཱ ཨདྷིཊྛིཏྭཱ, སམཱཔཛྫ པུནཔྤུནཾ;

ཝུཊྛིཏྭཱ པཙྩཝེཀྑིཏྭཱ, ཝསིཏཱ པཉྩ སཱདྷཡེ.

པཋམེ ¶ ཨཝསིཔཏྟེ, དུཏིཡཾ ཡོ པནིཙྪཏི;

ཨུབྷཏོ བྷཊྛོབྷཝེ ཡོགཱི, པཋམཱ དུཏིཡཱཔི ཙ.

ཀཱམསྶཧགཏཱ སཉྙཱ, མནཀྐཱརཱ ཙརནྟི ཙེ;

པམཱདཡོགིནོ ཛྷཱནཾ, ཧོཏི ཏཾ ཧཱནབྷཱགིཡཾ.

སཏི སནྟིཊྛཏེ ཏསྨིཾ, སནྟཱ ཏདནུདྷམྨཏཱ;

མནྡསྶ ཡོགིནོ ཛྷཱནཾ, ཧོཏི ཏཾ ཋིཏིབྷཱགིཡཾ.

ཨཏཀྐསཧིཏཱ སཉྙཱ, མནཀྐཱརཱ ཙརནྟི ཙེ;

ཨཔྤམཏྟསྶ ཏཾ ཛྷཱནཾ, ཝིསེསབྷཱགིཡཾ སིཡཱ.

ནིབྦིདཱསཾཡུཏཱ སཉྙཱ, མནཀྐཱརཱ ཙརནྟི ཙེ;

ནིབྦེདྷབྷཱགིཡཾ ཛྷཱནཾ, ཧོཏཱིཏི པརིདཱིཔིཏཾ.

ཏསྨཱ པཉྩསུ ཨེཏེསུ, སུཙིཎྞཝསིནཱ པན;

པཋམཱ པགུཎཏོ ཛྷཱནཱ, ཝུཊྛཱཡ ཝིདྷིནཱ ཏཏོ.

ཡསྨཱ ཨཡཾ སམཱཔཏྟི, ཨཱསནྣཱཀུསལཱརིཀཱ;

ཐཱུལཏྟཱ ཏཀྐཙཱརཱནཾ, ཏཏོཡཾ ཨངྒདུབྦལཱ.

ཨིཏི ཨཱདཱིནཝཾ དིསྭཱ, པཋམེ པན ཡོགིནཱ;

དུཏིཡཾ སནྟཏོ ཛྷཱནཾ, ཙིནྟཡིཏྭཱན དྷཱིམཏཱ.

ནིཀནྟིཾ པརིཡཱདཱཡ, ཛྷཱནསྨིཾ པཋམེ པུན;

དུཏིཡཱདྷིགམཏྠཱཡ, ཀཱཏབྦོ བྷཱཝནཀྐམོ.

ཨཐསྶ ¶ པཋམཛ྄ཛྷཱནཱ, ཝུཊྛཱཡ ཝིདྷིནཱ ཡདཱ;

སཏསྶ སམྤཛཱནསྶ, ཛྷཱནངྒཾ པཙྩཝེཀྑཏོ.

ཐཱུལཏོ ¶ ཏཀྐཙཱརཱ ཧི, ཨུཔཏིཊྛནྟི ཡོགིནོ;

སེསམངྒཏྟཡཾ ཏསྶ, སནྟམེཝོཔཏིཊྛཏི.

ཐཱུལངྒཱནཾ པཧཱནཱཡ, ཏདཱ ཏསྶ ཙ ཡོགིནོ;

སནྟངྒཔཊིལཱབྷཱཡ, ནིམིཏྟཾ ཏུ ཏདེཝ ཙ.

‘‘པཐཝཱི པཐཝི’’ཙྩེཝཾ, ཀརོཏོ མནསཱ པུན;

ཨིདཱནི དུཏིཡཛ྄ཛྷཱན-མུཔྤཛྫིསྶཏི ཏཾ ཨིཏི.

བྷཝངྒཾ པན པཙྪིཛྫ, པཐཝཱིཀསིཎཾ པན;

ཏདེཝཱརམྨཎཾ ཀཏྭཱ, མནོདྭཱརམྷི ཡོགིནོ.

ཛཱཡཏཱཝཛྫནཾ ཙིཏྟཾ, ཏསྨིཾ ཨཱརམྨཎེ ཏཏོ;

ཛཝནཱནི ཧི ཛཱཡནྟེ, ཏསྶ ཙཏྟཱརི པཉྩ ཝཱ.

ཨཝསཱནེ པནེཀམྤི, ཏེསཾ ཛཝནཙེཏསཾ;

རཱུཔཱཝཙརིཀཾ ཧོཏི, དུཏིཡཛ྄ཛྷཱནམཱནསཾ.

སམྤསཱདནམཛ྄ཛྷཏྟཾ, པཱིཏིཡཱ ཙ སུཁེན ཙ;

ཨེཀགྒཏཱཡ སཾཡུཏྟཾ, ཛྷཱནཾ ཧོཏི ཏིཝངྒིཀཾ.

ཧེཊྛཱ ཝུཏྟནཡེནེཝ, སེསཾ སམུཔལཀྑཡེ;

ཨེཝཾ དུཝངྒཧཱིནཾ ཏུ, ཏཱིཧི ཨངྒེཧི སཾཡུཏཾ.

ཛྷཱནཾ ¶ ཏིཝིདྷཀལྱཱཎཾ, དསལཀྑཎསཾཡུཏཾ;

དུཏིཡཱདྷིགཏཾ ཧོཏི, བྷིཀྑུནཱ བྷཱཝནཱམཡཾ.

དུཏིཡཱདྷིགཏེ ཛྷཱནེ, ཨཱཀཱརེཧི ཙ པཉྩཧི;

སུཙིཎྞཝསིནཱ ཧུཏྭཱ, དུཏིཡེཔི སཏཱིམཏཱ.

ཏསྨཱ པགུཎཏོ ཛྷཱནཱ, ཝུཊྛཱཡ དུཏིཡཱ པུན;

ཨཱསནྣཏཀྐཙཱརཱརི, སམཱཔཏྟི ཨཡཾ ཨིཏི.

པཱིཏིཡཱ ¶ པིཡཏོ ཏསྶ, ཙེཏསོ ཨུཔྤིལཱཔནཾ;

པཱིཏིཡཱ པན ཐཱུལཏྟཱ, ཏཏོཡཾ ཨངྒདུབྦལཱ.

ཏཏྠ ¶ ཨཱདཱིནཝཾ དིསྭཱ, ཏཏིཡེ སནྟཏོ པན;

ནིཀནྟིཾ པརིཡཱདཱཡ, ཛྷཱནསྨིཾ དུཏིཡེ པུན.

ཏཏིཡཱདྷིགམཏྠཱཡ, ཀཱཏབྦོ བྷཱཝནཀྐམོ;

ཨཐསྶ དུཏིཡཛ྄ཛྷཱནཱ, ཝུཊྛཱཡ ཙ ཡདཱ པན.

སཏསྶ སམྤཛཱནསྶ, ཛྷཱནངྒཾ པཙྩཝེཀྑཏོ;

ཐཱུལཏོ པཱིཏུཔཊྛཱཏི, སུཁཱདི སནྟཏོ པན.

ཐཱུལངྒཱནཾ པཧཱནཱཡ, ཏདཱ ཏསྶ ཙ ཡོགིནོ;

སནྟངྒཔཊིལཱབྷཱཡ, ནིམིཏྟཾ ཏུ ཏདེཝ ཙ.

‘‘པཐཝཱི པཐཝི’’ཙྩེཝཾ, ཀརོཏོ མནསཱ པུན;

ཨིདཱནི ཏཏིཡཾ ཛྷཱན-མུཔྤཛྫིསྶཏི ཏཾ ཨིཏི.

བྷཝངྒཾ མནུཔཙྪིཛྫ, པཐཝཱིཀསིཎཾ པན;

ཏདེཝཱརམྨཎཾ ཀཏྭཱ, མནོདྭཱརམྷི ཡོགིནོ.

ཛཱཡཏཱཝཛྫནཾ ཙིཏྟཾ, ཏསྨིཾ ཨཱརམྨཎེ ཏཏོ;

ཛཝནཱནི ཙ ཛཱཡནྟེ, ཏསྶ ཙཏྟཱརི པཉྩ ཝཱ.

ཨཝསཱནེ པནེཀཾ ཏུ, ཏེསཾ ཛཝནཙེཏསཾ;

རཱུཔཱཝཙརིཀཾ ཧོཏི, ཏཏིཡཛ྄ཛྷཱནམཱནསཾ.

སཏིཡཱ སམྤཛཉྙེན, སམྤནྣཾ ཏུ སུཁེན ཙ;

ཨེཀགྒཏཱཡ སཾཡུཏྟཾ, དུཝངྒཾ ཏཏིཡཾ མཏཾ.

ཧེཊྛཱ ཝུཏྟནཡེནེཝ, སེསཾ སམུཔལཀྑཡེ;

ཨེཝམེཀངྒཧཱིནཾ ཏུ, དྭཱིཧི ཨངྒེཧི སཾཡུཏཾ.

ཛྷཱནཾ ཏིཝིདྷཀལྱཱཎཾ, དསལཀྑཎསཾཡུཏཾ;

ཏཏིཡཱདྷིགཏཾ ཧོཏི, བྷིཀྑུནཱ བྷཱཝནཱམཡཾ.

ཏཏིཡཱདྷིགཏེ ¶ ཛྷཱནེ, ཨཱཀཱརེཧི ཙ པཉྩཧི;

སུཙིཎྞཝསིནཱ ཧུཏྭཱ, ཏསྨིཾ པན སཏཱིམཏཱ.

ཏསྨཱ པགུཎཏོ ཛྷཱནཱ, ཝུཊྛཱཡ ཏཏིཡཱ པུན;

ཨཱསནྣཔཱིཏིདོསཱ ཧི, སམཱཔཏྟི ཨཡནྟི ཙ.

ཡདེཝཙེཏྠ ¶ ཨཱབྷོགོ, སུཁམིཙྩེཝ ཙེཏསོ;

ཨེཝཾ སུཁསྶ ཐཱུལཏྟཱ, ཧོཏཱཡཾ ཨངྒདུབྦལཱ.

ཨིཏི ¶ ཨཱདཱིནཝཾ དིསྭཱ, ཛྷཱནསྨིཾ ཏཏིཡེ པུན;

ཙཏུཏྠཾ སནྟཏོ དིསྭཱ, ཙེཏསཱ པན ཡོགིནཱ.

ནིཀནྟིཾ པརིཡཱདཱཡ, ཛྷཱནསྨིཾ ཏཏིཡེ པུན;

ཙཏུཏྠཱདྷིགམཏྠཱཡ, ཀཱཏབྦོ བྷཱཝནཀྐམོ.

ཨཐསྶ ཏཏིཡཛ྄ཛྷཱནཱ, ཝུཊྛཱཡ ཧི ཡདཱ པན;

སཏསྶ སམྤཛཱནསྶ, ཛྷཱནངྒཾ པཙྩཝེཀྑཏོ.

ཐཱུལཏོ ཏསྶུཔཊྛཱཏི, སུཁཾ ཏཾ མཱནསཾ ཏཏོ;

ཨུཔེཀྑཱ སནྟཏོ ཏསྶ, ཙིཏྟསྶེཀགྒཏཱཔི ཙ.

ཐཱུལངྒསྶ པཧཱནཱཡ, སནྟངྒསྶཱུཔལདྡྷིཡཱ;

ཏདེཝ ཙ ནིམིཏྟཉྷི, ‘‘པཐཝཱི པཐཝཱི’’ཏི ཙ.

ཀརོཏོ མནསཱ ཨེཝ, པུནཔྤུནཉྩ ཡོགིནོ;

ཙཏུཏྠཾ པནིདཾ ཛྷཱནཾ, ཨུཔྤཛྫིསྶཏི ཏཾ ཨིཏི.

བྷཝངྒཾ པནུཔཙྪིཛྫ, པཐཝཱིཀསིཎཾ ཏཐཱ;

ཏདེཝཱརམྨཎཾ ཀཏྭཱ, མནོདྭཱརམྷི ཡོགིནོ.

ཛཱཡཏཱཝཛྫནཾ ཙིཏྟཾ, ཏསྨིཾ ཨཱརམྨཎེ ཏཏོ;

ཛཝནཱནི ཙ ཛཱཡནྟེ, ཏསྶ ཙཏྟཱརི པཉྩ ཝཱ.

ཨཝསཱནེ པནེཀཾ ཏུ, ཏེསཾ ཛཝནཙེཏསཾ;

རཱུཔཱཝཙརིཀཾ ཧོཏི, ཙཏུཏྠཛ྄ཛྷཱནམཱནསཾ.

ཨེཀངྒཝིཔྤཧཱིནཾ ¶ ཏུ, དྭཱིཧི ཨངྒེཧི ཡོགཏོ;

ཙཏུཏྠཾ པནིདཾ ཛྷཱནཾ, དུཝངྒནྟི པཝུཙྩཏི.

ཨེཝཾ ཏིཝིདྷཀལྱཱཎཾ, དསལཀྑཎསཾཡུཏཾ;

ཙཏུཏྠཱདྷིགཏཾ ཧོཏི, བྷིཀྑུནཱ བྷཱཝནཱམཡཾ.

ཡསྨཱ སུཁམུཔེཀྑཱཡ, ན ཧོཏཱསེཝནཾ པན;

ཨུཔེཀྑཱསཧགཏཱནེཝ, ཛཝནཱནི ཛཝནྟི ཙ.

ཨུཔེཀྑཱསཧགཏཾ ¶ ཏསྨཱ, ཙཏུཏྠཾ སམུདཱིརིཏཾ;

ཨཡམེཏྠ ཝིསེསོ ཧི, སེསཾ ཝུཏྟནཡཾ པན.

ཡཾ ཙཏུཀྐནཡེ ཛྷཱནཾ, དུཏིཡཾ ཏཾ དྭིདྷཱ པན;

ཀཏྭཱན པཉྩཀནཡེ, དུཏིཡཾ ཏཏིཡཾ ཀཏཾ.

ཏཏིཡཾ ཏཾ ཙཏུཏྠཉྩ, ཙཏུཏྠཾ པཉྩམཾ ཨིདྷ;

ཨེཝམེཏྟཱཝཏཱ ཝུཏྟཱ, ནཱཏིསངྑེཔཏོ མཡཱ;

ནཱཏིཝིཏྠཱརཏོ ཙཱཡཾ, རཱུཔཱཝཙརབྷཱཝནཱ.

སུམདྷུརཝརཏརཝཙནོ, ཀཾ ནུ ཛནཾ ནེཝ རཉྫཡཏི;

ཨཏིནིསིཏཝིསདབུདྡྷི-པསཱདཛན ཝེདནཱིཡོཡཾ.

ཨིཏི ཨབྷིདྷམྨཱཝཏཱརེ རཱུཔཱཝཙརསམཱདྷིབྷཱཝནཱནིདྡེསོ

རཱུཔཱརཱུཔམཏཱིཏེན ¶ ¶ , རཱུཔཱརཱུཔཱདིཝེདིནཱ;

ཡཱནི ཙཱརཱུཔཔུཉྙཱནི, སརཱུཔེནཱིརིཏཱནི ཏུ.

ཏེསཾ དཱནི པཝཀྑཱམི, བྷཱཝནཱནཡམུཏྟམཾ;

ཡོགཱཝཙརབྷིཀྑཱུནཾ, ཧིཏཏྠཱཡ སམཱསཏོ.

‘‘རཱུཔེ ཁོ ཝིཛྫམཱནསྨིཾ, དཎྜཱདཱནཱདཡོ སིཡུཾ;

ཨནེཀཱཔི པནཱབཱདྷཱ, ཙཀྑུརོགཱདཡོ’’ཨིཏི.

རཱུཔེ ཨཱདཱིནཝཾ དིསྭཱ, རཱུཔེ ནིབྦིནྡམཱནསོ;

ཏསྶཱཏིཀྐམནཏྠཱཡ, ཨརཱུཔཾ པཊིཔཛྫཏི.

ཏམྷཱ ¶ ཀསིཎརཱུཔཱཔི, སོ ནིབྦིཛྫ ཝིསཱརདོ;

ཨཔཀྐམིཏུཀཱམོ ཙ, སཱུཀརཱབྷིཧཏོཝ སཱ.

ཙཏུཏྠེ པན ཛྷཱནསྨིཾ, ཧུཏྭཱ ཙིཎྞཝསཱི ཝསཱི;

ཙཏུཏྠཛ྄ཛྷཱནཏོ དྷཱིམཱ, ཝུཊྛཱཡ ཝིདྷིནཱ པུན.

ཀརོཏི པནིདཾ ཙིཏྟཾ, རཱུཔམཱརམྨཎཾ ཡཏོ;

ཨཱསནྣསོམནསྶཉྩ, ཐཱུལསནྟཝིམོཀྑཏོ.

ཨིཏི ཨཱདཱིནཝཾ དིསྭཱ, ཙཏུཏྠེ ཏཏྠ སབྦསོ;

ནིཀནྟིཾ པརིཡཱདཱཡ, པཋམཱརུཔྤཉྩ སནྟཏོ.

ཙཀྐཝཱལ༹པརིཡནྟཾ, ཡཏྟཀཾ ཝཱ པནིཙྪཏི;

ཏཏྟཀཾ པཏྠརིཏྭཱན, ཕུཊྛོཀཱསཉྩ ཏེན ཏཾ.

ཨུགྒྷཱཊེནྟོ ཧི ཀསིཎཾ, ན སཾཝེལླེཏི ཏཾ པན;

ན ཙུདྡྷརཏི སོ ཡོགཱི, པཱུཝཾ ཝིཡ ཀཔཱལཏོ.

ཀེཝལཾ པན ཏཾ ནེཝ, ཨཱཝཛྫཏི ན པེཀྑཏི;

ནཱཝཛྫནྟོ ནཔེཀྑནྟོ, ཨུགྒྷཱཊེཏི ཧི ནཱམསོ.

ཀསིཎུགྒྷཱཊིམཱཀཱསཾ ¶ , ནིམིཏྟཾ པན ཏཾཝ སོ;

ཨཱཀཱསོ ཨིཏི ཙིཏྟེན, ཨཱཝཛྫཏི པུནཔྤུནཾ.

ཨཱསེཝཏི ¶ ཙ བྷཱཝེཏི, ཏཾ ནིམིཏྟཾ པུནཔྤུནཾ;

ཀརོཏོ པན ཏསྶེཝ, སནྟཙིཏྟསྶ ཡོགིནོ.

ཏཏྲཱཀཱསེ པནཱཔྤེཏི, པཋམཱརུཔྤམཱནསཾ;

ཨིདྷཱཔི པུརིམེ བྷཱགེ, ཏཱིཎི ཙཏྟཱརི ཝཱ པན.

ཛཝནཱནི ཨུཔེཀྑཱཡ, སམྤཡུཏྟཱནི ཧོནྟི ཧི;

ཙཏུཏྠཾ པཉྩམཾ ཝཱཔི, ཧོཏི ཨཱརུཔྤམཱནསཾ.

པུན བྷཱཝེཏུཀཱམེན, དུཏིཡཱརུཔྤམཱནསཾ;

སུཙིཎྞཝསིནཱ ཧུཏྭཱ, པཋམཱརུཔྤམཱནསེ.

ཨཱསནྣརཱུཔཱཝཙར-ཛ྄ཛྷཱནཔཙྩཏྠིཀནྟི ཙ;

དུཏིཡཱརུཔྤཙིཏྟཾཝ, ན ཙ སནྟམིདནྟི ཙ.

ཨེཝམཱདཱིནཝཾ ¶ དིསྭཱ, པཋམཱརུཔྤམཱནསེ;

ནིཀནྟིཾ པརིཡཱདཱཡ, དུཏིཡཾ སནྟཏོ པན.

ཏམཱཀཱསཾ ཕརིཏྭཱན, པཝཏྟམཱནསཾ པན;

ཏཉྩ ཝིཉྙཱཎམིཙྩེཝཾ, ཀཏྟབྦཾ མནསཱ བཧུཾ.

ཨཱཝཛྫནཉྩ ཀཏྟབྦཾ, ཏཐཱ ཏཀྐཱཧཏམྤི ཙ;

‘‘ཨནནྟ’’ནྟི ‘‘ཨནནྟ’’ནྟི, ཀཱཏབྦཾ མནསཱ ནིདྷ.

ཏསྨིཾ པན ནིམིཏྟསྨིཾ, ཝིཙཱརེནྟསྶ མཱནསཾ;

ཨུཔཙཱརེན ཏཾ ཙིཏྟཾ, སམཱདྷིཡཏི ཡོགིནོ.

ཨཱསེཝཏི ཙ བྷཱཝེཏི, ཏཾ ནིམིཏྟཾ པུནཔྤུནཾ;

ཏསྶ ཙེཝཾ ཀརོནྟསྶ, སཏིསམྤནྣཙེཏསོ.

ཨཱཀཱསཾ ཕུསཝིཉྙཱཎེ, དུཏིཡཱརུཔྤམཱནསཾ;

ཨཔྤེཏི ཨཔྤནཱ ཡསྨིཾ, ནཡོ ཝུཏྟནཡོཝ སོ.

ཨཱཀཱསོཡམནནྟོཏི, ཨེཝམཱཀཱསམེཝ ཏཾ;

ཕརིཏྭཱ པཝཏྟཝིཉྙཱཎཾ, ‘‘ཝིཉྙཱཎཉྩ’’ནྟི ཝུཙྩཏི.

མནཀྐཱརཝསེནཱཔི, ཨནནྟཾ པརིདཱིཔིཏཾ;

‘‘ཝིཉྙཱཎཱནནྟ’’མིཙྩེཝ, ཝཏྟབྦཾ པནིདཾ སིཡཱ.

ཨཐ ¶ བྷཱཝེཏུཀཱམེན, ཏཏིཡཱརུཔྤམཱནསཾ;

སུཙིཎྞཝསིནཱ ཧུཏྭཱ, དུཏིཡཱརུཔྤམཱནསེ.

ཨཱསནྣཔཋམཱརུཔྤ-ཙིཏྟཔཙྩཏྠིཀནྟི ཙ;

ཏཏིཡཱརུཔྤཙིཏྟཾཝ, ན ཙ སནྟམིདནྟི ཙ.

ཨེཝམཱདཱིནཝཾ དིསྭཱ, དུཏིཡཱརུཔྤམཱནསེ;

ནིཀནྟིཾ པརིཡཱདཱཡ, ཏཏིཡཾ སནྟཏོ པན.

ཨེཝཾ མནསི ཀཏྭཱན, ཀཱཏབྦོ མནསཱ པུན;

པཋམཱརུཔྤཝིཉྙཱཎཱ-བྷཱཝོ ཏསྶེཝ སུཉྙཏོ.

ཏཾ ¶ ¶ པནཱཀཱསཝིཉྙཱཎཾ, ཨཀཏྭཱ མནསཱ པུན;

‘‘ནཏྠི ནཏྠཱི’’ཏི ཝཱཏེན, ‘‘སུཉྙཾ སུཉྙ’’ནྟི ཝཱ ཏཏོ.

ཨཱཝཛྫིཏབྦམེཝཉྷི, ཀཏྟབྦཾ མནསཱཔི ཙ;

ཏཀྐཱཧཏཉྩ ཀཱཏབྦཾ, པུནཔྤུནཾཝ དྷཱིམཏཱ.

ཏསྨིཾ ནིམིཏྟེ ཏསྶེཝཾ, ཝིཙཱརེནྟསྶ མཱནསཾ;

སཏི ཏིཊྛཏི བྷིཡྻོཔི, སམཱདྷིཡཏི མཱནསཾ.

ཨཱསེཝཏི ཙ བྷཱཝེཏི, ཏཾ ནིམིཏྟཾ པུནཔྤུནཾ;

ཏསྶ ཙེཝཾ ཀརོནྟསྶ, སཏིསམྤནྣཙེཏསོ.

ཀསིཎུགྒྷཱཊིམཱཀཱསཾ, ཕརིཏྭཱན སམནྟཏོ;

ཝིཉྙཱཎསྶ པཝཏྟསྶ, ནཏྠིབྷཱཝེ ཨབྷཱཝཀེ.

ཨཱཀཱསགཏཝིཉྙཱཎཾ, དུཏིཡཱརུཔྤཙཀྑུནཱ;

པསྶནྟོ ཝིཧརིཏྭཱན, ‘‘ནཏྠི ནཏྠཱི’’ཏིཨཱདིནཱ.

པརིཀམྨམནཀྐཱརེ ¶ , ཏསྨིཾ ཨནྟརཧིཏེ པན;

ཏསྶཱཔགམམཏྟཾཝ, པསྶནྟོ ཝསཏཱི ཙ སོ.

སནྣིཔཱཏཾ ཡཐཱ ཀོཙི, དིསྭཱ སངྒྷསྶ ཀཏྠཙི;

གཏེ སངྒྷེ ཏུ ཏཾ ཋཱནཾ, སུཉྙམེཝཱནུཔསྶཏི.

པུན བྷཱཝེཏུཀཱམེན, ཙཏུཏྠཱརུཔྤམཱནསཾ;

སུཙིཎྞཝསིནཱ ཧུཏྭཱ, ཏཏིཡཱརུཔྤམཱནསེ.

ཨཱསནྣདུཏིཡཱརུཔྤ-ཙིཏྟཔཙྩཏྠིཀནྟི ཙ;

ཙཏུཏྠཱརུཔྤཙིཏྟཾཝ, ན ཙ སནྟམིདནྟི ཙ.

ཨེཝམཱདཱིནཝཾ ¶ དིསྭཱ, ཏཏིཡཱརུཔྤམཱནསེ;

ནིཀནྟིཾ པརིཡཱདཱཡ, ཙཏུཏྠཾ སནྟཏོ པན.

ཨེཝཾ མནསི ཀཏྭཱན, པུན ཏཏྠེཝ དྷཱིམཏཱ;

ཨབྷཱཝཱརམྨཎཾ ཀཏྭཱ, སམྤཝཏྟམིདཾ མནོ.

‘‘སནྟཾ སནྟམིདཾ ཙིཏྟ’’-མིཙྩེཝཾ ཏཾ པུནཔྤུནཾ;

ཧོཏི ཨཱཝཛྫིཏབྦཉྩ, ཀཱཏབྦཾ མནསཱཔི ཙ.

ཏསྨིཾ ནིམིཏྟེ ཏསྶེཝཾ, ཝིཙཱརེནྟསྶ མཱནསཾ;

སཏི ཏིཊྛཏི བྷིཡྻོཔི, སམཱདྷིཡཏི མཱནསཾ.

ཨཱསེཝཏི ཙ བྷཱཝེཏི, ཏཾ ནིམིཏྟཾ པུནཔྤུནཾ;

ཏསྶ ཙེཝཾ ཀརོནྟསྶ, སཏིསམྤནྣཙེཏསོ.

ཏཏིཡཱརུཔྤསངྑཱཏ-ཁནྡྷེསུ ཙ ཙཏཱུསུཔི;

ཙཏུཏྠཱརུཔྤཝིཉྙཱཎཾ, ཏཾ པནཱཔྤེཏི ཡོགིནོ.

ཨཔྤནཱཡ ¶ ནཡོཔེཏྠ, ཧེཊྛཱ ཝུཏྟནཡཱུཔམོ;

ཨཔིཙེཏྠ ཝིསེསོཡཾ, ཝེདིཏབྦོ ཝིབྷཱཝིནཱ.

‘‘ཨཧོ སནྟཱ ཝཏཱཡ’’ནྟི, སམཱཔཏྟི པདིསྶཏི;

ཡཱ པནཱབྷཱཝམཏྟམྤི, ཀཏྭཱ ཋསྶཏི གོཙརཾ.

སནྟཱརམྨཎཏཱཡེཝ, ‘‘སནྟཱཡ’’ནྟི ཝིཔསྶཏི;

སནྟཏོ ཙེ མནཀྐཱརོ, ཀཐཉྩ སམཏིཀྐམོ.

ཨནཱཔཛྫིཏུཀཱམཏྟཱ ¶ , ཧོཏེཝ སམཏིཀྐམོ;

‘‘སམཱཔཛྫཱམཧམེཏ’’-མིཙྩཱབྷོགོ ན ཝིཛྫཏི.

སནྟཏོ ཏཾ ཀརོནྟོ ཧི, མནསཱ སུཁུམཾ པརཾ;

ཨསཉྙཾ པན དུབྦལྱཾ, པཱཔུཎཱཏི མཧགྒཏཾ.

ཨེཝམེཝ བྷཝནྟེཏྠ, སུཁུམཱ ཝེདནཱདཡོ;

པཏྟམཀྑནཏེལེན, མགྒསྨིཾ ཨུདཀེན ཙ.

སཱཝེཏབྦོ ཨཡཾ ཨཏྠོ, ཙཏུཏྠཱརུཔྤབོདྷནེ;

པཊུསཉྙཱཡ ཀིཙྩསྶ, ནེཝཀྐརཎཏོ ཨཡཾ.

‘‘ནེཝསཉྙཱ’’ཏི ནིདྡིཊྛཱ, ཙཏུཏྠཱརུཔྤསམྦྷཝཱ;

པཊུསཉྙཱཡ ཀིཙྩཾ སཱ, ཀཱཏུཾ སཀྐོཏི ནེཝ ཙ.

ཡཐཱ དཧནཀིཙྩཾ ཏུ, ཏེཛོདྷཱཏུ སུཁོདཀེ;

སཱ སངྑཱརཱཝསེསཏྟཱ, སུཁུམཏྟེན ཝིཛྫཏི;

ཏསྨཱ པན ཙ སཱ སཉྙཱ, ‘‘ནཱསཉྙཱ’’ཏི པཝུཙྩཏི.

‘‘ཨཱརམྨཎཱཏིཀྐམཏོ, ཙཏསྶོཔི བྷཝནྟིམཱ;

ཨངྒཱཏིཀྐམམེཏཱསཾ, ན ཨིཙྪནྟི ཝིབྷཱཝིནོ.

སངྑེཔེན མཡཱརུཔྤ-སམཱཔཏྟིནཡོ ཨཡཾ;

དསྶིཏོ དསྶིཏོ སུདྡྷ-དསྶིནཱ པིཡདསྶིནཱ.

རཱུཔཱརཱུཔཛ྄ཛྷཱནསམཱཔཏྟིཝིདྷཱནཾ ¶ ,

རཱུཔཱརཱུཔཛ྄ཛྷཱནསམཱཔཏྟཱིསུ དཀྑོ,

རཱུཔཱརཱུཔཾ ཡཱཏི བྷཝཾ སོ ཨབྷིབྷུཡྻ.

ཨིཏི ཨབྷིདྷམྨཱཝཏཱརེ ཨརཱུཔཱཝཙརསམཱདྷིབྷཱཝནཱནིདྡེསོ ནཱམ

ཨིཏོ ¶ པརཾ ཀརིསྶཱམི, པཉྙཱསུདྡྷིཀརཾ པརཾ;

པཉྩནྣམྤི ཨབྷིཉྙཱནཾ, མུཁམཏྟནིདསྶནཾ.

ཙཏུཏྠཛ྄ཛྷཱནམཏྟེཔི, སུཙིཎྞཝསིནཱ སཏཱ;

ཨནུཡོགམབྷིཉྙཱསུ, ཀཱཏུཾ ཝཏྟཏི ཡོགིནོ.

ཨབྷིཉྙཱ ¶ ནཱམ བྷིཀྑཱུནཾ, སཱབྷིཉྙཱནཾ ཨནུཏྟརོ;

ཨལངྐཱརོ ཧི ཏཱཎནྟི, སཏྠནྟི ཙ པཝུཙྩཏི.

ནིབྦཏྟིཏཱསྭབྷིཉྙཱསུ, ཡོགཱཝཙརབྷིཀྑུནཱ;

སམཱདྷིབྷཱཝནཱ ཧིསྶ, ཏདཱ ནིཊྛངྒཏཱ སིཡཱ.

དིབྦཱནི ¶ ཙཀྑུསོཏཱནི, ཨིདྡྷིཙིཏྟཝིཛཱནནཾ;

པུབྦེནིཝཱསཉཱཎནྟི, པཉྩཱབྷིཉྙཱ ཨིམཱ སིཡུཾ.

ཀསིཎཱནུལོམཏཱདཱིཧི, ཙཏུདྡསནཡེཧི ཙ;

དམེཏབྦམབྷིཉྙཱཡོ, པཏྟུཀཱམེན མཱནསཾ.

དནྟེ སམཱཧིཏེ སུདྡྷེ, པརིཡོདཱཏེ ཨནངྒཎེ;

ནུཔཀླེསེ མུདུབྷཱུཏེ, ཀམྨནཱིཡེ ཋིཏཱཙལེ.

ཨིཏི ཨཊྛངྒསམྤནྣེ, ཙིཏྟེ ཨིདྡྷིཝིདྷཱཡ ཙ;

ཨབྷིནཱིཧརཏི ཙེ ཙིཏྟཾ, སིཛ྄ཛྷཏིདྡྷིཝིཀུབྦནཾ.

ཨབྷིཉྙཱཔཱདཀཛ྄ཛྷཱནཾ, སམཱཔཛྫ ཏཏོ པན;

ཝུཊྛཱཡ ཧི སཏཾ ཝཱཔི, སཧསྶཾ ཝཱ ཡདིཙྪཏི.

‘‘སཏཾ ཧོམི སཏཾ ཧོམཱི’’-ཙྩེཝཾ ཀཏྭཱན མཱནསཾ;

ཨབྷིཉྙཱཔཱདཀཛ྄ཛྷཱནཾ, སམཱཔཛྫ ཏཏོ པན.

པཱདཀཛ྄ཛྷཱནཙིཏྟཾ ཏུ, ནིམིཏྟཱརམྨཎཾ སིཡཱ;

པརིཀམྨམནཱནེཏྠ, སཏཱརམྨཎིཀཱནི ཏུ.

ཏདཱདྷིཊྛཱནཙིཏྟམྤི ¶ , སཏཱརམྨཎམེཝ ཏཾ;

པུབྦེ ཝུཏྟཔྤནཱཙིཏྟཾ, ཝིཡ གོཏྲབྷུནནྟརཾ.

ཏམེཀཾ ¶ ཛཱཡཏེ ཏཏྠ, ཙཏུཏྠཛ྄ཛྷཱནིཀཾ མནོ;

པརིཀམྨཝིསེསོཝ, སེསཾ པུབྦསམཾ ཨིདྷ.

དིབྦསོཏམིདཾ ¶ ཏཏྠ, བྷཱཝེཏབྦཾ ཀཐཾ སིཡཱ;

ཨབྷིཉྙཱཔཱདཀཛ྄ཛྷཱནཾ, སམཱཔཛྫ ཏཏོ པུན.

ཝུཊྛཱཡ པརིཀམྨེན, ཀཱམཱཝཙརཙེཏསཱ;

སདྡོ ཨཱཝཛྫིཏབྦོཝ, མཧནྟོ སུཁུམོཔི ཙ.

ཏསྶེཝཾ པན སདྡསྶ, ནིམིཏྟཾ མནསི ཀུབྦཏོ;

དིབྦསོཏམིདཱནིསྶ, ཨུཔྤཛྫིསྶཏི ཏཾ ཨིཏི.

སདྡེསྭཉྙཏརཾ སདྡཾ, ཀཏྭཱ ཨཱརམྨཎཾ ཏཏོ;

ཨུཔྤཛྫིཏྭཱ ནིརུདྡྷེ ཏུ, མནོདྭཱརཱཝཛྫནེ པུན.

ཛཝནཱནི ཧི ཛཱཡནྟེ, ཏསྶ ཙཏྟཱརི པཉྩ ཝཱ;

པུརིམཱནེཏྠ ཙིཏྟེསུ, ཏཱིཎི ཙཏྟཱརི ཝཱ པན.

པརིཀམྨོཔཙཱརཱནུ-ལོམགོཏྲབྷུནཱམཀཱ;

ཙཏུཏྠཾ པཉྩམཾ ཝཱཔི, ཨཔྤནཱཙིཏྟམཱིརིཏཾ.

སཧཛཱཏཾ ཏུ ཡཾ ཉཱཎཾ, ཨཔྤནཱམཱནསེན ཧི;

ཏཾ ཉཱཎཾ དིབྦསོཏནྟི, ཝདནྟི སུཏཀོཝིདཱ.

ཐཱམཛཱཏཾ ཀརོནྟེན, ཏཾ ཉཱཎཾ ཏེན ཡོགིནཱ;

‘‘ཨེཏྠནྟརགཏཾ སདྡཾ, སུཎཱམཱི’’ཏི ཙ ཙེཏསཱ.

ཨིཙྩེཝཾ ཏུ པརིཙྪིཛྫ, ཝཌྜྷེཏབྦཾ ཡཐཱཀྐམཾ;

ཨེསོ ཨདྷིགཏཱབྷིཉྙོ, པཱདཀཱརམྨཎེན ཏུ.

ཕུཊྛོཀཱསགཏེ ¶ སདྡེ, སབྦེ པན སུཎཱཏི སོ;

སུཎནྟོ པཱཊིཡེཀྐམྤི, སལླཀྑེཏུཾ པཧོཏི སོ.

ཀཐཾ ¶ པནུཔྤཱདེཏབྦཾ, ཙེཏོཔརིཡམཱནསཾ;

དིབྦཙཀྑུཝསེནེཝ, ཨིདཾ ཉཱཎཾ པནིཛ྄ཛྷཏི.

ཨཱལོཀཾ པན ཝཌྜྷེཏྭཱ, ཏསྨཱ དིབྦེན ཙཀྑུནཱ;

ཧདཡཾ པན ནིསྶཱཡ, ཝཏྟམཱནཾ ཏུ ལོཧིཏཾ.

དོམནསྶཡུཏེ ཙིཏྟེ, ཝཏྟམཱནེ ཏུ ཀཱལ༹ཀཾ;

ཨུཔེཀྑཱསཧིཏེ ཙིཏྟེ, ཏིལཏེལཱུཔམཾ སིཡཱ.

ཏསྨཱ ¶ པརསྶ སཏྟསྶ, དིསྭཱ ཧདཡལོཧིཏཾ;

ཙེཏོཔརིཡཉཱཎཾ ཏཾ, ཀཱཏབྦཾ ཐཱམཏཾ གཏཾ.

ཨེཝཾ ཐཱམགཏེ ཏསྨིཾ, ཡཐཱནུཀྐམཏོ པན;

ཙིཏྟམེཝ ཝིཛཱནཱཏི, ཝིནཱ ལོཧིཏདསྶནཾ.

ཀཱམཱཝཙརཙིཏྟཉྩ, རཱུཔཱརཱུཔེསུ མཱནསཾ;

སབྦམེཝ ཝིཛཱནཱཏི, སརཱགཱདིཔྤབྷེདཀཾ.

པུབྦེནིཝཱསཉཱཎེན, ཀཏྟབྦཱ ཏདནུསྶཏི;

ཏཾ སམྤཱདེཏུཀཱམེན, ཨཱདིཀམྨིཀབྷིཀྑུནཱ;

ཛྷཱནཱནི པན ཙཏྟཱརི, སམཱཔཛྫཱནུཔུབྦཏོ.

ཨབྷིཉྙཱཔཱདཀཛ྄ཛྷཱནཱ, ཝུཊྛཱཡ ཧི ཏཏོ པུན;

བྷིཀྑུནཱ ཝཛྫིཏབྦཱཝ, ནིསཛྫཱ སབྦཔཙྪིམཱ.

ཏཏོ ¶ ¶ པབྷུཏི སབྦམྤི, པཊིལོམཀྐམཱ པན;

སབྦམཱཝཛྫིཏབྦཾ ཏཾ, དིཝསེ རཏྟིཡཾ ཀཏཾ.

པཊིལོམཀྐམེནེཝ, དུཏིཡེ ཏཏིཡེཔི ཙ;

དིཝསེ པཀྑམཱསེསུ, ཏཐཱ སཾཝཙྪརེསུཔི.

ཡཱཝ ཨསྨིཾ བྷཝེ སནྡྷི, ཏཱཝ ཏེན ཙ བྷིཀྑུནཱ;

ཀཏམཱཝཛྫིཏབྦཾ ཏཾ, པུརིམསྨིཾ བྷཝེཔི ཙ.

ཙུཏིཀྑཎེཔི ནིབྦཏྟཾ, ནཱམརཱུཔཉྩ སཱདྷུཀཾ;

ཨེཝམཱཝཛྫིཏེ ཏསྨིཾ, ནཱམརཱུཔེ ཡདཱ པན.

ཏདེཝཱརམྨཎཾ ཀཏྭཱ, ནཱམརཱུཔཾ ཙུཏིཀྑཎེ;

མནོདྭཱརེ མནཀྐཱརོ, ཨུཔྤཛྫཏི ཏདཱ པན.

ཨཱཝཛྫནེ ནིརུདྡྷསྨིཾ, ཏདེཝཱརམྨཎཾ པན;

ཀཏྭཱ ཛཝནཙིཏྟཱནི, ཧོནྟི ཙཏྟཱརི པཉྩ ཝཱ;

པུབྦེ ཝུཏྟནཡེནེཝ, སེསཾ ཉེཡྻཾ ཝིབྷཱཝིནཱ.

པརིཀམྨཱདིནཱམཱནི, པུརིམཱནི བྷཝནྟི ཏུ;

པཙྪིམཾ ཨཔྤནཱཙིཏྟཾ, རཱུཔཱཝཙརིཀཾ བྷཝེ.

ཏེན ཙིཏྟེན ཡཾ ཉཱཎཾ, སཾཡུཏྟཾ ཏེན ཡཱ པན;

སཾཡུཏྟཱ སཏི སཱ པུབྦེ-ནིཝཱསཱནུསྶཏཱིརིཏཱ.

རཱུཔཾ པསྶིཏུཀཱམེན, བྷིཀྑུནཱ དིབྦཙཀྑུནཱ;

ཀསིཎཱརམྨཎཾ ཛྷཱནཾ, ཨབྷིཉྙཱཔཱདཀཾ པན.

ཨབྷིནཱིཧཱརཀྑམཾ ཀཏྭཱ, ཏེཛོཀསིཎམེཝ ཝཱ;

ཨོདཱཏཀསིཎཾ ཝཱཔི, ཨཱལོཀཀསིཎམྤི ཝཱ.

ཨིམེསུ ¶ ཀཏཔུཉྙེཧི, ཀསིཎེསུ ཙ ཏཱིསུཔི;

ཨཱལོཀཀསིཎཾ ཨེཏྠ, སེཊྛནྟི པརིདཱིཔིཏཾ.

ཏསྨཱ ¶ ¶ ཏམིཏརཾ ཝཱཔི, ཨུཔྤཱདེཏྭཱ ཡཐཱཀྐམཾ;

ཨུཔཙཱརབྷཱུམིཡཾཡེཝ, ཋཏྭཱ ཏཾ པན པཎྜིཏོ.

ཝཌྜྷེཏྭཱན ཋཔེཏབྦཾ, ན ཨུཔྤཱདེཡྻ ཨཔྤནཾ;

ཨུཔྤཱདེཏི སཙེ ཧོཏི, པཱདཀཛ྄ཛྷཱནནིསྶིཏཾ.

ཛྷཱནསྶ ཝཌྜྷིཏསྶནྟོ-གཏཾ རཱུཔཾ ཏུ ཡོགིནཱ;

པསྶིཏབྦཾ བྷཝེ རཱུཔཾ, པསྶཏོ པན ཏསྶ ཏཾ.

པརིཀམྨསྶ ཝཱརོ ཧི, ཨཏིཀྐམཏི ཏཱཝདེ;

ཨཱལོཀོཔི ཏཏོ ཏསྶ, ཁིཔྤམནྟརདྷཱཡཏི.

ཏསྨིཾ ཨནྟརཧིཏེ རཱུཔ-གཏམྤི ཙ ན དིསྶཏི;

ཏེནཱཐ པཱདཀཛ྄ཛྷཱནཾ, པཝིསིཏྭཱ ཏཏོ པུན.

ཝུཊྛཱཡ པན ཨཱལོཀོ, ཕརིཏབྦོཝ བྷིཀྑུནཱ;

ཨེཝཾ ཨནུཀྐམེནེཝ, ཨཱལོཀོ ཐཱམཝཱ སིཡཱ.

དིཝསམྤི ནིསཱིདིཏྭཱ, པསྶཏོ ཧོཏི དསྶནཾ;

ཏིཎུཀྐཱཡ གཏོ མགྒཾ, པུརིསེཏྠ ནིདསྶནཾ.

ཨུཔྤཱདནཀྐམོཔིསྶ, ཏཏྲཱཡཾ དིབྦཙཀྑུནོ;

ཝུཏྟཔྤཀཱརརཱུཔཾ ཏཾ, ཀཏྭཱ ཨཱརམྨཎཾ པན.

མནོདྭཱརེ མནཀྐཱརེ, ཛཱཏེ ཡཱནི ཏདེཝ ཙ;

རཱུཔཾ ཨཱརམྨཎཾ ཀཏྭཱ, ཛཱཡནྟི ཛཝནཱནི ཧི.

ཀཱམཱཝཙརཙིཏྟཱནི ¶ , ཏཱནི ཙཏྟཱརི པཉྩ ཝཱ;

ཧེཊྛཱ ཝུཏྟནཡེནེཝ, སེསཾ ཉེཡྻཾ ཝིབྷཱཝིནཱ.

ཨཏྠསཱདྷཀཙིཏྟཾ ཏཾ, ཙཏུཏྠཛ྄ཛྷཱནིཀཾ མཏཾ;

ཏཾཙིཏྟསཾཡུཏཾ ཉཱཎཾ, དིབྦཙཀྑུནྟི ཝུཙྩཏི.

ཨནཱགཏཾསཉཱཎསྶ ¶ , ཡཐཱཀམྨུཔགསྶ ཙ;

པརིཀམྨཾ ཝིསུཾ ནཏྠི, ཨིཛ྄ཛྷནྟི དིབྦཙཀྑུནཱ.

ཙུཏཱུཔཔཱཏཉཱཎམྤི, དིབྦཙཀྑུནྟི ཝཱ པན;

ཨཏྠཏོ ཨེཀམེཝེདཾ, བྱཉྫནེ པན ནཱནཏཱ.

ཨིཏི ཨབྷིདྷམྨཱཝཏཱརེ ཨབྷིཉྙཱནིདྡེསོ ནཱམ

ཨནཱགཏཾསཉཱཎཉྩ ¶ , ཡཐཱཀམྨུཔགམྤི ཙ;

པཉྩ ཨིདྡྷིཝིདྷཱདཱིནི, སཏྟཱབྷིཉྙཱ ཨིམཱ པན.

ཨེཏཱསཾ ¶ པན སཏྟནྣཾ, ཨབྷིཉྙཱནམིཏོ པརཾ;

པཝཀྑཱམི སམཱསེན, ཨཱརམྨཎཝིནིཙྪཡཾ.

ཨཱརམྨཎཏྟིཀཱ ཝུཏྟཱ, ཡེ ཙཏྟཱརོ མཧེསིནཱ;

སཏྟནྣམེཏྠ ཉཱཎཱནཾ, སམྤཝཏྟིཾ སུཎཱཐ མེ.

ཏཏྠ ཨིདྡྷིཝིདྷཉཱཎཾ, པརིཏྟཱདཱིསུ སཏྟསུ;

ཨཱརམྨཎཝིབྷཱགེསུ, པཝཏྟཏི ཀཐཾ པན.

ཀཱཡེནཱདིསྶམཱནེན, གནྟུཀཱམོ ཡདཱབྷཝེ;

ཙིཏྟསནྣིསྶིཏཾ ཀཏྭཱ, ཀཱཡཾ ཙིཏྟཝསེན ཏཾ.

མཧགྒཏེ ¶ ཙ ཙིཏྟསྨིཾ, སམཱརོཔེཏི སོ ཏདཱ;

ཀཱཡཱརམྨཎཏོ ཉཱཎཾ, པརིཏྟཱརམྨཎཾ སིཡཱ.

དིསྶམཱནེན ཀཱཡེན, གནྟུཀཱམོ ཡདཱ བྷཝེ;

ཀཱཡསནྣིསྶིཏཾ ཀཏྭཱ, ཙིཏྟཾ ཀཱཡཝསེན ཏཾ.

པཱདཀཛ྄ཛྷཱནཙིཏྟཾ ཏཾ, ཀཱཡེ རོཔེཏི སོ ཏདཱ;

ཛྷཱནཱརམྨཎཏོ ཉཱཎཾ, ཏཾ མཧགྒཏགོཙརཾ.

ཨནཱགཏམཏཱིཏཉྩ, ཀརོཏི ཝིསཡཾ ཡདཱ;

ཨཏཱིཏཱརམྨཎཾ ཧོཏི, ཏདཱནཱགཏགོཙརཾ.

ཀཱཡེན དིསྶམཱནེན, གམནེ པན བྷིཀྑུནོ;

པཙྩུཔྤནྣོ བྷཝེ ཏསྶ, གོཙརོཏི ཝིནིདྡིསེ.

ཀཱཡཾ ཙིཏྟཝསེནཱཔི, ཙིཏྟཾ ཀཱཡཝསེན ཝཱ;

པརིཎཱམནཀཱལསྨིཾ, ཨཛ྄ཛྷཏྟཱརམྨཎཾ སིཡཱ.

བཧིདྡྷཱརམྨཎཾ ཧོཏི, བཧིདྡྷཱརཱུཔདསྶནེ;

ཨེཝམིདྡྷིཝིདྷཾ ཉཱཎཾ, སམྤཝཏྟཏི སཏྟསུ.

པཙྩུཔྤནྣེ པརིཏྟེ ཙ, བཧིདྡྷཛ྄ཛྷཏྟིཀེསུཔི;

ཙཏཱུསྭེཏེསུ དྷམྨེསུ, དིབྦསོཏཾ པཝཏྟཏི.

པཙྩུཔྤནྣོ ¶ ¶ པརིཏྟོ ཙ, སདྡོ ཨཱརམྨཎཾ ཡཏོ;

པརིཏྟཱརམྨཎཾ པཙྩུ-པྤནྣཱརམྨཎཏཾ གཏཾ.

ཨཏྟནོ ཀུཙྪིསདྡསྶ, སཝནེཔི པརསྶ ཙ;

ཨཛ྄ཛྷཏྟཱརམྨཎཉྩེཝ, བཧིདྡྷཱརམྨཎམྤི ཙ.

ཙེཏོཔརིཡཉཱཎམྤི, པརིཏྟཱདཱིསུ ཨཊྛསུ;

ཨཱརམྨཎཝིབྷཱགེསུ, པཝཏྟཏི ཀཐཾ པན.

པརིཏྟཱརམྨཎཾ ཧོཏི, པརིཏྟཱནཾ པཛཱནནེ;

ཛཱནནེ མཛ྄ཛྷིམཱནཾ ཏུ, ཏཾ མཧགྒཏགོཙརཾ.

ཛཱནནེ པན མགྒསྶ, ཕལསྶཱཔི པཛཱནནེ;

ཏདཱ པནསྶ ཉཱཎསྶ, ཨཔྤམཱཎོཝ གོཙརོ.

ཏཾ ¶ མགྒཱརམྨཎཾ ཧོཏི, མགྒཙིཏྟསྶ ཛཱནནེ;

པརིཡཱཡེནེཝེཏསྶ, མགྒཱརམྨཎཏཱ མཏཱ.

ཨཏཱིཏེ སཏྟདིཝས-བྦྷནྟརེ ཙ ཡདཱ པན;

ཨནཱགཏེ ཏཐཱ སཏྟ-དིཝསབྦྷནྟརེཔི ཙ.

པརེསཾ པན ཙིཏྟསྶ, ཛཱནནེ སམུདཱིརིཏཾ;

ཨཏཱིཏཱརམྨཎཉྩེཝ, ཏདཱནཱགཏགོཙརཾ.

ཀཐཉྩ པན ཏཾ པཙྩུཔྤནྣགོཙརཏཾ གཏཾ;

པཙྩུཔྤནྣཾ ཏིདྷཱ ཝུཏྟཾ, ཁཎསནྟཏིཨདྡྷཏོ.

ཏཏྠ ཏིཀྑཎསམྤཏྟཾ, པཙྩུཔྤནྣཁཎཱདིཀཾ;

ཨེཀདྭེསནྟཏིཝཱརཔརིཡཱཔནྣམིདཾ པན.

སནྟཏིཔཙྩུཔྤནྣནྟི, ཨཱཧུ སནྟཏིཀོཝིདཱ;

ཨེཀབྦྷཝཔརིཙྪིནྣཾ, པཙྩུཔྤནྣནྟི པཙྪིམཾ.

ཁཎཱདིཀཏྟཡཾ པཙྩུ-པྤནྣཾ ཏམཱཧུ ཀེཙིདྷ;

ཙེཏོཔརིཡཉཱཎསྶ, ཧོཏི ཨཱརམྨཎཾ ཨིཏི.

ཡཐཱ ¶ ཙ པུཔྥམུཊྛིམྷི, ཨུཀྑིཏྟེ གགནེ པན;

ཨཝསྶཾ ཨེཀམེཀསྶ, ཝཎྚཾ ཝཎྚེན ཝིཛ྄ཛྷཏི.

ཨེཝཾ མཧཱཛནསྶཱཔི, ཙིཏྟེ ཨཱཝཛྫིཏེ པན;

ཨེཀསྶ ཙིཏྟམེཀེན, ཨཝསྶཾ པན ཝིཛ྄ཛྷཏི.

ཡེནཱཝཛྫཏི ཙིཏྟེན, ཡེན ཛཱནཱཏི ཙེཏསཱ;

ཏེསཾ དྭིནྣཾ སཧཊྛཱནཱ-བྷཱཝཏོ ཏཾ ན ཡུཛྫཏི.

ཛཝནཱཝཛྫནཱནཾ ཏུ, ནཱནཱརམྨཎཔཏྟིཏོ;

ཨནིཊྛེ པན ཧི ཋཱནེ, ཨཡུཏྟནྟི པཀཱསིཏཾ.

ཏསྨཱ སནྟཏིཨདྡྷཱན-པཙྩུཔྤནྣཱནམེཝ ཏུ;

ཝསེན པཙྩུཔྤནྣཾ ཏཾ, ཧོཏི ཨཱརམྨཎཾ ཨིདཾ.

པཙྩུཔྤནྣམྤི ཨདྡྷཱཁྱཾ, ཨིདཾ ཛཝནཝཱརཏོ;

དཱིཔེཏབྦནྟི ནིདྡིཊྛཾ, ཏཏྲཱཡཾ དཱིཔནཱནཡོ.

ཡདཱ ¶ ¶ པརསྶ ཙིཏྟཉྷི, ཉཱཏུམཱཝཛྫཏིདྡྷིམཱ;

ཨཱཝཛྫནམནོ ཏསྶ, པཙྩུཔྤནྣཁཎཝ྄ཧཡཾ.

ཨཱརམྨཎཾ ཏདཱ ཀཏྭཱ, ཏེན སདྡྷིཾ ནིརུཛ྄ཛྷཏི;

ཛཝནཱནི ཧི ཛཱཡནྟེ, ཏསྶ ཙཏྟཱརི པཉྩ ཝཱ.

ཨེཏེསཾ པཙྪིམཾ ཙིཏྟཾ, ཨིདྡྷིཙིཏྟམུདཱིརིཏཾ;

ཀཱམཱཝཙརཙིཏྟཱནི, སེསཱནཱིཏི ཝིནིདྡིསེ.

ཨེཏེསཾ པན སབྦེསཾ, ནིརུདྡྷཾ ཏུ ཏདེཝ ཙ;

ཙིཏྟཾ ཨཱརམྨཎཾ ཧོཏི, ཏསྨཱ སབྦཱནི ཏཱནིཔི.

ཨེཀཱརམྨཎཏཾ ཡནྟི, ན ནཱནཱརམྨཎཱནི ཧི;

ཨདྡྷཱཝསཱ བྷཝེ པཙྩུ-པྤནྣཱརམྨཎཏོ པན.

ཨེཀཱརམྨཎབྷཱཝེཔི, ཨིདྡྷིམཱནསམེཝ ཙ;

པརསྶ ཙིཏྟཾ ཛཱནཱཏི, ནེཏརཱནི ཡཐཱ པན.

ཙཀྑུདྭཱརེ ¶ ཏུ ཝིཉྙཱཎཾ, རཱུཔཾ པསྶཏི ནེཏརཾ;

ཨེཝམེཝ ཙ ཏཾ ཨིདྡྷི-ཙིཏྟམེཝ ཙ ཛཱནཱཏི.

པརཙིཏྟཱརམྨཎཏྟཱ, བཧིདྡྷཱརམྨཎཾ སིཡཱ;

ཙེཏོཔརིཡཉཱཎམྤི, ཨཊྛསྭེཝ པཝཏྟཏི.

པུབྦེནིཝཱསཉཱཎམྤི, པརིཏྟཱདཱིསུ ཨཊྛསུ;

ཨཱརམྨཎཝིབྷཱགེསུ, པཝཏྟཏི ཀཐཾ པན.

པརིཏྟཱརམྨཎཾཡེཝ, ཧོཏཱིཏི པརིདཱིཔཡེ.

རཱུཔཱཝཙརིཀཱརུཔྤཁནྡྷཱནུསྶརཎེ པན;

བྷཝཏཱིཏི ཧི ཉཱཏབྦཾ, ཏཾ མཧགྒཏགོཙརཾ.

ཨཏཱིཏེ ཨཏྟནཱ མགྒཾ, བྷཱཝིཏཾ ཏུ ཕལམྤི ཝཱ;

སམནུསྶརཏོ ཨེཝ-པྤམཱཎཱརམྨཎཾ སིཡཱ.

སམནུསྶརཏོ མགྒཾ, མགྒཱརམྨཎམེཝ ཏཾ;

ཨཏཱིཏཱརམྨཎཾཡེཝ, ཧོཏི ཨེཀནྟཏོ ཨིདཾ.

ཙེཏོཔརིཡཉཱཎམྤི ¶ , ཡཐཱཀམྨུཔགམྤི ཙ;

ཨཏཱིཏཱརམྨཎཱ ཧོནྟི, ཀིཉྩཱཔི ཨཐ ཁོ པན.

ཙེཏོཔརིཡཉཱཎསྶ, སཏྟདྡིཝསབྦྷནྟརཾ;

ཨཏཱིཏཾ ཙིཏྟམེཝསྶ, ཨཱརམྨཎམུདཱིརིཏཾ.

ཨཏཱིཏེ ཙེཏནཱམཏྟཾ, ཡཐཱཀམྨུཔགསྶཔི;

པུབྦེནིཝཱསཉཱཎསྶ, ནཏྠི ཀིཉྩི ཨགོཙརཾ.

ཨཛ྄ཛྷཏྟཱརམྨཎཾ ཨཏྟ-ཁནྡྷཱནུསྶརཎེ སིཡཱ;

བཧིདྡྷཱརམྨཎཾ ཨཉྙ-ཁནྡྷཱནུསྶརཎེ བྷཝེ.

སརཎེ ནཱམགོཏྟསྶ, ཏཾ ནཝཏྟབྦགོཙརཾ;

པུབྦེནིཝཱསཉཱཎམྤི, ཨཊྛསྭེཝ པཝཏྟཏི.

པཙྩུཔྤནྣེ ¶ པརིཏྟེ ཙ, བཧིདྡྷཛ྄ཛྷཏྟིཀེསུཔི;

ཙཏཱུསྭེཏེསུ དྷམྨེསུ, དིབྦཙཀྑུ པཝཏྟཏི.

དིབྦསོཏསམཾ ¶ དིབྦ-ཙཀྑུཨཱརམྨཎཀྐམེ;

རཱུཔཾ སདྡོཏི དྭིནྣཾ ཏུ, ཨཡམེཝ ཝིསེསཏཱ.

ཨནཱགཏཾསཉཱཎམྤི, པརིཏྟཱདཱིསུ ཨཊྛསུ;

ཨཱརམྨཎཝིབྷཱགེསུ, པཝཏྟཏི ཀཐཾ པན.

ནིབྦཏྟིསྶཏི ཡཾ ཀཱམཱ-ཝཙརེཏི པཛཱནཏོ;

པརིཏྟཱརམྨཎཾ ཧོཏི, རཱུཔཱརཱུཔེསྭནཱགཏེ.

ནིབྦཏྟིསྶཏི ཡཉྩཱཔི, སིཡཱ མཧགྒཏགོཙརཾ;

བྷཱཝེསྶཏི ཨཡཾ མགྒཾ, ཕལཾ སཙྪིཀརིསྶཏི.

ཨེཝཾ པཛཱནནེ ཨཔྤ-མཱཎཱརམྨཎཏཾ བྷཝེ;

མགྒཾ བྷཱཝེསྶཏིཙྩེཝ, ཛཱནནེ མགྒགོཙརཾ.

ཨེཀནྟེན ཨིདཾ ཉཱཎཾ, ཧོཏཱནཱགཏགོཙརཾ;

ཙེཏོཔརིཡཾ ཏུ ཀིཉྩཱཔི, ཧོཏཱནཱགཏགོཙརཾ.

ཙིཏྟམེཝ ཙ ཛཱནཱཏི, ན ཧི ཏཾ ཨཉྙགོཙརཾ.

‘‘ཨཧཾ དེཝོ བྷཝིསྶཱམི’’-ཙྩེཝམཛ྄ཛྷཏྟགོཙརཾ.

ཛཱནནེ ནཱམགོཏྟསྶ, ཡསྶ ཀསྶཙིནཱགཏེ;

པུབྦེནིཝཱསཉཱཎཾཝ, ཏཾ ནཝཏྟབྦགོཙརཾ.

ཡཐཱཀམྨུཔགཉཱཎཾ ¶ , པརིཏྟཱདཱིསུ པཉྩསུ;

ཨཱརམྨཎཝིབྷཱགེསུ, པཝཏྟཏི ཀཐཾ པན.

ཛཱནནེ ཀཱམཀམྨསྶ, པརིཏྟཱརམྨཎཾ སིཡཱ;

ཏཐཱ མཧགྒཏཀམྨསྶ, ཏཾ མཧགྒཏགོཙརཾ.

ཨཏཱིཏམེཝ ཛཱནཱཏི, ཏསྨཱ ཙཱཏཱིཏགོཙརཾ;

ཨཛ྄ཛྷཏྟཱརམྨཎཾ ཧོཏི, ཨཏྟནོ ཀམྨཛཱནནེ.

བཧིདྡྷཱརམྨཎཾ ཧོཏི, པརཀམྨཔཛཱནནེ;

ཨེཝཾ པཝཏྟི ཉཱཏབྦཱ, ཡཐཱཀམྨུཔགསྶཔི.

སཏྟནྣམྤི ཨབྷིཉྙཱནཾ, ཝུཏྟོ ཨཱརམྨཎཀྐམོ;

ཨེཏྠ ཝུཏྟནཡེནེཝ, ཝེདིཏབྦོ ཝིབྷཱཝིནཱ.

ཨིཏི ཨབྷིདྷམྨཱཝཏཱརེ ཨབྷིཉྙཱརམྨཎནིདྡེསོ ནཱམ

སམཱདྷིཾ ¶ ¶ པན སཱབྷིཉྙཾ, བྷཱཝེཏྭཱ ཏདནནྟརཾ;

བྷཱཝེཏབྦཱ ཡཏོ པཉྙཱ, བྷིཀྑུནཱ ཏེན དྷཱིམཏཱ.

ཏཏོཧཾ ¶ དཱནི ཝཀྑཱམི, པཉྙཱབྷཱཝནམུཏྟམཾ;

སམཱསེནེཝ བྷིཀྑཱུནཾ, པརཾ པཱིཏིསུཁཱཝཧཾ.

པཉྙཱ ཝིཔསྶནཱཔཉྙཱ, པུཉྙཙིཏྟསམཱཡུཏཱ;

པཛཱནཱཏཱིཏི པཉྙཱ སཱ, ཛཱནནཱ ཝཱ པཀཱརཏོ.

སཉྙཱཝིཉྙཱཎཔཉྙཱནཾ, ཀོ ཝིསེསོ ཀིམནྟརཾ;

སཉྙཱཝིཉྙཱཎཔཉྙཱནཾ, ཛཱནནཏྟེ སམེཔི ཙ.

ཡཱ སཉྫཱནནམཏྟཾཝ, སཉྙཱ ནཱིལཱདིཏོ པན;

ལཀྑཎཔྤཊིཝེདྷཾ ཏུ, ཀཱཏུཾ སཀྐོཏི ནེཝ སཱ.

ཝིཉྙཱཎཾ པན ཛཱནཱཏི, ནཱིལཔཱིཏཱདིགོཙརཾ;

སཀྐོཏིཔི ཨནིཙྩཱདིལཀྑཎཾ པཊིཝིཛ྄ཛྷིཏུཾ.

ཨུསྶཀྐིཏྭཱ ན སཀྐོཏི, མགྒཾ པཱཔེཏུམེཝ ཏཾ;

པཉྙཱ ཝུཏྟནཡཾ ཀཱཏུཾ, སཀྐོཏི ཏིཝིདྷམྤི ཏཾ.

ཨིམེསཾ པན ཏིཎྞམྤི, ཝིསེསོ སམུདཱིརིཏོ;

སབྦེསཾ པན དྷམྨཱནཾ, སབྷཱཝཔཊིཝེདྷནཾ.

ལཀྑཎཾ པན པཉྙཱཡ, ལཀྑཎཉྙཱུཧི དཱིཔིཏཾ;

སམྨོཧནནྡྷཀཱརསྶ, ཝིདྡྷཾསནརསཱ མཏཱ.

ཨསམྨོཧཔཙྩུཔཊྛཱནཱ ¶ , སམཱདྷཱསནྣཀཱརཎཱ;

ཨེཝམེཏྠ ཙ ཝིཉྙེཡྻཱ, པཉྙཱཡ ལཀྑཎཱདིཀཱ.

ལོཀུཏྟརེན ¶ མགྒེན, ཡུཏྟཱ ལོཀུཏྟརཱ མཏཱ;

ཏིཝིདྷཱཔི སིཡཱ པཉྙཱ, ཙིནྟཱསུཏམཡཱདིཏོ.

ཏཏྠཏྟནོཝ ཙིནྟཱཡ, ནིཔྥནྣཏྟཱཏི ཏསྶ སཱ;

ཧོཏི ཙིནྟཱམཡཱ པཉྙཱ, བྷཱུརིཔཉྙེན དེསིཏཱ.

པརཏོ པན སུཏྭཱན, ལདྡྷཱ པཉྙཱ ཨཡཾ ཨིདྷ;

སུཏེནེཝ ཙ ནིཔྥནྣཱ, པཉྙཱ སུཏམཡཱ མཏཱ.

ཡཐཱ ཝཱཔི ཏཐཱ ཙེཏྠ, བྷཱཝནཱཡ ཝསེན ཏུ;

ནིཔྥནྣཱ ཨཔྤནཱཔཏྟཱ, པཉྙཱ སཱ བྷཱཝནཱམཡཱ.

པཊིསམྦྷིདཱཙཏུཀྐསྶ, ཝསེན ཙཏུདྷཱ སིཡཱ;

ཨཏྠདྷམྨནིརུཏྟཱིསུ, ཉཱཎཾ ཉཱཎེསུ ཏཱིསུཔི.

ཡཾ ཀིཉྩི པཙྩཡུཔྤནྣཾ, ཝིཔཱཀཱ ཙ ཀྲིཡཱ ཏཐཱ;

ནིབྦཱནཾ བྷཱསིཏཏྠོ ཙ, པཉྩེཏེ ཨཏྠསཉྙིཏཱ.

ཕལནིབྦཏྟཀོ ཧེཏུ, ཨརིཡམགྒོ ཙ བྷཱསིཏཾ;

ཀུསལཱཀུསལཉྩེཏི, པཉྩེཏེ དྷམྨསཉྙིཏཱ.

ཏསྨིཾ ཨཏྠེ ཙ དྷམྨེ ཙ, ཡཱ སབྷཱཝནིརུཏྟི ཏུ;

ནིརུཏྟཱིཏི ཙ ནིདྡིཊྛཱ, ནིརུཏྟིཀུསལེན སཱ.

ཉཱཎཾ ཨཱརམྨཎཾ ཀཏྭཱ, ཏིཝིདྷཾ པཙྩཝེཀྑཏོ;

ཏེསུ ཉཱཎེསུ ཡཾ ཉཱཎཾ, པཊིབྷཱནནྟི ཏཾ མཏཾ.

པརིཡཏྟིཔརིཔུཙྪཱཧི ¶ ¶ , སཝནཱདྷིགམེཧི ཙ;

པུབྦཡོགེན གཙྪནྟི, པབྷེདཾ པཊིསམྦྷིདཱ.

ཁནྡྷཱདཱིསུ ཧི དྷམྨེསུ, བྷཱུམིབྷཱུཏེསུ ཡོགིནཱ;

ཨུགྒཧཱདིཝསེནེཏྠ, ཀཏྭཱ པརིཙཡཾ པན.

སཱིལཾ ཙིཏྟཝིསུདྡྷིཉྩ, སམྤཱདེཏྭཱ ཏཏོ པརཾ;

དིཊྛིསུདྡྷཱདཡོ པཉྩ, སམྤཱདེནྟེན སུདྡྷིཡཱ.

ཏཱཡ པཉྙཱཡ ཡུཏྟེན, བྷཱིཏེན ཛནནཱདིཏོ;

བྷཱཝེཏབྦཱ བྷཝཱབྷཱཝཾ, པཏྠཡནྟེན བྷིཀྑུནཱ.

རཱུཔཉྩ ཝེདནཱ སཉྙཱ, སངྑཱརཱ ཙེཝ སབྦསོ;

ཝིཉྙཱཎཉྩེཏི པཉྩེཏེ, ཁནྡྷཱ སམྦུདྡྷདེསིཏཱ.

ཏཏྠ ཡཾ ཀིཉྩི རཱུཔཾ ཏཾ, ཨཏཱིཏཱནཱགཏཱདིཀཾ;

ཨཛ྄ཛྷཏྟཾ ཝཱ བཧིདྡྷཱ ཝཱ, སུཁུམོལཱ༹རིཀམྤི ཝཱ.

ཧཱིནཾ ཝཱཔི པཎཱིཏཾ ཝཱ, ཡཾ དཱུརེ ཡཉྩ སནྟིཀེ;

སབྦཾ ཏམེཀཏོ ཀཏྭཱ, རཱུཔཀྑནྡྷོཏི ཝུཙྩཏི.

ཨིཏརེསུཔི ཡཾ ཀིཉྩི, ཏཾ ཝེདཡིཏལཀྑཎཾ;

སབྦཾ ཏམེཀཏོ ཀཏྭཱ, ཝེདནཱཀྑནྡྷཏཱ ཀཏཱ.

ཙིཏྟཛཾ ¶ པན ཡཾ ཀིཉྩི, ཏཾ སཉྫཱནནལཀྑཎཾ;

སབྦཾ ཏམེཀཏོ ཀཏྭཱ, སཉྙཱཀྑནྡྷོཏི ཝུཙྩཏི.

ཡཾ ཀིཉྩི ཙིཏྟསམྦྷཱུཏཾ, ཨབྷིསངྑཱརལཀྑཎཾ;

སབྦཾ ཏམེཀཏོ ཀཏྭཱ, སངྑཱརཀྑནྡྷཏཱ ཀཏཱ.

ཏཏྠ ཙིཏྟཾ ཏུ ཡཾ ཀིཉྩི, ཏཾ ཝིཛཱནནལཀྑཎཾ;

སབྦཾ ཏམེཀཏོ ཀཏྭཱ, ཝིཉྙཱཎཀྑནྡྷཏཱ ཀཏཱ.

ཙཏྟཱརོ ¶ ཙ མཧཱབྷཱུཏཱ, ཨུཔཱདཱ ཙཏུཝཱིསཏི;

ཨཊྛཝཱིསཏིདྷཱ ཙེཏཾ, རཱུཔཾ རཱུཔནྟི གཎྷཏི.

ཨེཀཱསཱིཏིཡཱ ¶ ཙིཏྟེན, སཾཡུཏྟཱ ཝེདནཱདཡོ;

ཝེདནཱསཉྙཱསངྑཱར-ཝིཉྙཱཎཀྑནྡྷསཉྙིཏཱ.

ཙཏྟཱརོརཱུཔིནོ ཁནྡྷེ, ནཱམནྟི པརིགཎྷཏི;

རཱུཔཀྑནྡྷོ བྷཝེ རཱུཔཾ, ནཱམཀྑནྡྷཱ ཨརཱུཔིནོ.

རུཔྤནལཀྑཎཾ རཱུཔཾ, ནཱམཾ ནམནལཀྑཎཾ;

ཨིཏི སངྑེཔཏོ ནཱམ-རཱུཔཾ སོ པརིགཎྷཏི.

ཕཱལེནྟོ ཝིཡ ཏཱལསྶ, ཀནྡཾ ཏུ ཡམཀཾ དྭིདྷཱ;

ཝཝཏྠཔེཏི ནཱམཉྩ, རཱུཔཉྩཱཏི དྭིདྷཱ པན.

ཨེཝཾ ཝཝཏྠཔེཏྭཱ སོ, ནཱམརཱུཔཾ སབྷཱཝཏོ;

སཏྟསམྨོཧགྷཱཏཏྠཾ, བཧུསུཏྟཝསེནིདྷ.

ནཱམརཱུཔམཏྟཉྙེཝ, ནཏྠི ཀོཙིདྷ པུགྒལོ;

ཨེཝམེཏྠ པཎྜིཏོ པོསོ, ཝཝཏྠཔེཏི ཏཾ པན.

ཡཐཱཔི ¶ དཱརུཡནྟམྤི, ནིཛྫཱིཝཉྩ ནིརཱིཧཀཾ;

དཱརུརཛྫུསམཱཡོགེ, ཏཾ གཙྪཏིཔི ཏིཊྛཏི.

ཏཐེདཾ ནཱམརཱུཔམྤི, ནིཛྫཱིཝཉྩ ནིརཱིཧཀཾ;

ཨཉྙམཉྙསམཱཡོགེ, ཏཾ གཙྪཏིཔི ཏིཊྛཏི.

དུཀྑསྶ པུཉྫོ ཏིཎཀཊྛསཱདིསོ’’ཏི.

ཨཉྙམཉྙཱུཔནིསྶཱཡ ¶ , དཎྜཀེསུ ཋིཏེསུ ཧི;

ཨེཀསྨིཾ པཏམཱནེ ཏུ, ཏཐེཝ པཏཏཱིཏརོ.

‘‘ཡམཀཾ ནཱམརཱུཔཉྩ, ཨུབྷོ ཨཉྙོཉྙནིསྶིཏཱ;

ཨེཀསྨིཾ བྷིཛྫམཱནསྨིཾ, ཨུབྷོ བྷིཛྫནྟི པཙྩཡཱ’’ཏི.

ཨུཏིནྣཾ ནཱམརཱུཔཱནཾ, ནཱམཾ ནིཏྟེཛམེཏྠ ཏཾ;

སཀེནེཝ ཧི ཏེཛེན, ན སཀྐོཏི པཝཏྟིཏུཾ.

ན བྱཱཧརཏི ནོ སེཏི, ན ཏིཊྛཏི ན གཙྪཏི;

ན བྷེདེཏི ན ཙོརེཏི, ན བྷུཉྫཏི ན ཁཱདཏི.

ཏཐཱ རཱུཔམྤི ནིཏྟེཛཾ, ཝིནཱ ནཱམཉྩ སབྦཐཱ;

སཀེནེཝ ཧི ཏེཛེན, ན སཀྐོཏི པཝཏྟིཏུཾ.

བྷུཉྫཱམཱིཏི པིཝཱམཱིཏི, ཁཱདཱམཱིཏི ཏཐེཝ ཙ;

རོདཱམཱིཏི ཧསཱམཱིཏི, རཱུཔསྶེཏཾ ན ཝིཛྫཏི.

ནཱམཾ ¶ ནིསྶཱཡ རཱུཔཾ ཏུ, རཱུཔཾ ནིསྶཱཡ ནཱམཀཾ;

པཝཏྟཏི སདཱ སབྦཾ, པཉྩཝོཀཱརབྷཱུམིཡཾ.

ཨིམསྶ པན ཨཏྠསྶ, ཨཱཝིབྷཱཝཏྠམེཝ ཙ;

ཛཙྩནྡྷཔཱིཋསཔྤཱིནཾ, ཝཏྟབྦཱ ཨུཔམཱ ཨིདྷ.

ཡཐཱ ཧི ནཱཝཾ ནིསྶཱཡ, མནུསྶཱ ཡནྟི ཨཎྞཝེ;

ཨེཝཾ རཱུཔམྤི ནིསྶཱཡ, ནཱམཀཱཡོ པཝཏྟཏི.

ཡཐཱ ¶ མནུསྶེ ནིསྶཱཡ, ནཱཝཱ གཙྪཏི ཨཎྞཝེ;

ཨེཝཾ ནཱམམྤི ནིསྶཱཡ, རཱུཔཀཱཡོ པཝཏྟཏི.

སཏྟསཉྙཾ ཝིནོདེཏྭཱ, ནཱམརཱུཔསྶ སབྦཐཱ;

ཡཱཐཱཝདསྶནཾ ཨེཏཾ, ‘‘དིཊྛིསུདྡྷཱི’’ཏི ཝུཙྩཏི.

པརིམུཙྩིཏུཀཱམོ ཙ, དུཀྑཏོ ཛཱཏིཨཱདིཏོ;

ཨནྟདྭཡཾ ཝིཝཛྫེཏྭཱ, བྷཱཝཡེ པན པཎྜིཏོ.

ཨིཏི ཨབྷིདྷམྨཱཝཏཱརེ དིཊྛིཝིསུདྡྷིནིདྡེསོ ནཱམ

ཨེཏསྶ ¶ ¶ ནཱམརཱུཔསྶ, ཛཱནིཏྭཱ ཧེཏུཔཙྩཡེ;

ཀངྑཱ ཏཱིསུ པནདྡྷཱསུ, ཝིཏརིཏྭཱ ཋིཏཾ པན.

ཀངྑཱཝིཏརཎཾ ནཱམ, ཉཱཎཾ ཏཾ སམུདཱིརིཏཾ;

ཏཾ སམྤཱདེཏུཀཱམེན, ཨཏྠཀཱམེན བྷིཀྑུནཱ.

ནཱམརཱུཔསྶ ཀོ ཧེཏུ, ཀོནུ ཝཱ པཙྩཡོ བྷཝེ;

ཨཱཝཛྫིཏྭཱ ཏམིཙྩེཝཾ, རཱུཔཀཱཡསྶ ཏཱཝདེ.

ཀེསཱ ལོམཱ ནཁཱ དནྟཱ, ཏཙོ མཾསཾ ནཧཱརུ ཙ;

ཨཊྛིམིཉྫཉྩ ཝཀྐཉྩ, ཧདཡཾ ཡཀནམྤི ཙ.

ཨིཙྩེཝམཱདིབཱཏྟིཾས-ཀོཊྛཱསཔཙྩཡསྶ ཧི;

པརིགྒཎྷཏི ཀཱཡསྶ, མནསཱ ཧེཏུཔཙྩཡེ.

ཨཝིཛྫཱ ¶ ཏཎྷུཔཱདཱནཾ, ཀམྨཾ ཧེཏུ ཙཏུབྦིདྷོ;

ཨེཏསྶ རཱུཔཀཱཡསྶ, ཨཱཧཱརོ པཙྩཡོ མཏོ.

ཨིཏིམེ པཉྩ དྷམྨཱ ཧི, ཧེཏུཔཙྩཡཏཾ གཏཱ;

ཨཝིཛྫཱདཡོ ཏཡོ ཏཏྠ, མཱཏཱཝ ཨུཔནིསྶཡཱ.

ཛནཀཾ པན ཀམྨཾ ཏུ, པུཏྟསྶ ཧི པིཏཱ ཝིཡ;

དྷཱཏཱི ཝིཡ ཀུམཱརསྶ, ཨཱཧཱརོ དྷཱརཀོ བྷཝེ.

ཨིཙྩེཝཾ ¶ རཱུཔཀཱཡསྶ, སོ པཙྩཡཔརིགྒཧཾ;

ཀཏྭཱ པུནཔི ‘‘ཙཀྑུཉྩ, རཱུཔམཱལོཀམེཝ ཙ.

པཊིཙྩ ཙཀྑུཝིཉྙཱཎཾ, ཧོཏི’’ཨིཙྩེཝམཱདིནཱ;

ནཡེན ནཱམཀཱཡསྶ, པཙྩཡཾ པརིགཎྷཏི.

སོ ཨེཝཾ ནཱམརཱུཔསྶ, ཝུཏྟིཾ དིསྭཱན པཙྩཡཱ;

ཡཐཱ ཨེཏརཧིདཾ ཏུ, ཨཏཱིཏེཔི ཏཐེཝིདཾ.

པཙྩཡཱ ཙ པཝཏྟིཏྠ, ཏཐེཝཱནཱགཏེཔི ཙ;

པཝཏྟིསྶཏི ཨདྡྷཱསུ, ཏཱིསྭེཝཾ ཨནུཔསྶཏི.

ཏསྶེཝཾ ¶ པསྶཏོ ཡཱ སཱ, པུབྦནྟེ པཉྩདྷཱ ཏཐཱ;

ཨཔརནྟེ སིཡཱ ཀངྑཱ, པཉྩདྷཱ སམུདཱིརིཏཱ.

པཙྩུཔྤནྣེཔི ཨདྡྷཱནེ, ཚབྦིདྷཱ པརིཀིཏྟིཏཱ;

སབྦཱ ཙཱནཝསེསཱཝ, ཡོགིནོ སཱ པཧིཡྻཏི.

ཨེཀོ ཀམྨཝིཔཱཀཱནཾ, ཝསེནཱཔི ཙ པཎྜིཏོ;

ཨེཏསྶ ནཱམརཱུཔསྶ, པཙྩཡཾ པརིགཎྷཏི.

ཀམྨཾ ཙཏུབྦིདྷཾ དིཊྛ-དྷམྨཝེདནིཡཾ ཏཐཱ;

ཨུཔཔཛྫཱཔརཱཔརིཡཱ-ཧོསིཀམྨཝསཱ པན.

ཏཏྠ ¶ ཨེཀཛཝནཝཱིཐིཡཾ སཏྟསུ ཙིཏྟེསུ ཀུསལཱ ཝཱ ཨཀུསལཱ ཝཱ པཋམཛཝནཙེཏནཱ དིཊྛདྷམྨཝེདནཱིཡཀམྨཾ ནཱམ. ཏཾ ཨིམསྨིཾཡེཝ ཨཏྟབྷཱཝེ ཝིཔཱཀཾ དེཏི, ཏཐཱ ཨསཀྐོནྟཾ པན ‘‘ཨཧོསིཀམྨཾ ནཱཧོསི ཀམྨཝིཔཱཀོ, ན བྷཝིསྶཏི ཀམྨཝིཔཱཀོ, ནཏྠི ཀམྨཝིཔཱཀོ’’ཏི ཨིམསྶ ཏིཀསྶ ཝསེན ཨཧོསིཀམྨཾ ནཱམ ཧོཏི. ཨཏྠསཱདྷིཀཱ པན སཏྟམཛཝནཙེཏནཱ ཨུཔཔཛྫཝེདནཱིཡཀམྨཾ ནཱམ. ཏམནནྟརེ ཨཏྟབྷཱཝེ ཝིཔཱཀཾ དེཏི, ཏཐཱ ཨསཀྐོནྟཾ ཝུཏྟནཡེན ཨཧོསིཀམྨཾ ནཱམ ཧོཏི. ཨུབྷིནྣམནྟརེ པཉྩཛཝནཙེཏནཱ ཨཔརཱཔརིཡཝེདནཱིཡཀམྨཾ ནཱམ. ཏམནཱགཏེ ཡདཱ ཨོཀཱསཾ ལབྷཏི, ཏདཱ ཝིཔཱཀཾ དེཏི, སཏི སཾསཱརཔྤཝཏྟིཡཱ ཨཧོསིཀམྨཾ ནཱམ ན ཧོཏི.

ཨཔརཾ ¶ ཙཏུབྦིདྷཾ ཀམྨཾ, གརུཀཾ བཧུལམྤི ཙ;

ཨཱསནྣཉྩ ཀཊཏྟཱ ཙ, ཀམྨནྟི སམུདཱིརིཏཾ.

ཨཉྙཾ ཙཏུབྦིདྷཾ ཀམྨཾ, ཛནཀཾ ཨུཔཐམྦྷཀཾ;

ཏཐཱུཔཔཱིལ༹ཀཾ ཀམྨ-མུཔགྷཱཏཀམེཝ ཙ.

ཏཏྠ ཛནཀཾ ནཱམ ཀུསལཾ ཝཱ ཨཀུསལཾ ཝཱ ཀམྨཾ པཊིསནྡྷིཡམྤི པཝཏྟེཔི རཱུཔཱརཱུཔཝིཔཱཀཀྑནྡྷེ ཛནེཏི. ཨུཔཏྠམྦྷཀཾ པན ཝིཔཱཀཾ ཛནེཏུཾ ན སཀྐོཏི, ཨཉྙེན ཀམྨེན དིནྣཱཡ པཊིསནྡྷིཡཱ ཛནིཏེ ཝིཔཱཀེ ཨུཔྤཛྫནཀསུཁདུཀྑཾ ཨུཔཏྠམྦྷེཏི, ཨདྡྷཱནཾ པཝཏྟེཏི. ཨུཔཔཱིལ༹ཀཾ པན ཨཉྙེན ཀམྨེན དིནྣཱཡ པཊིསནྡྷིཡཱ ཛནིཏེ ཝིཔཱཀེ ཨུཔྤཛྫནཀསུཁདུཀྑཾ པཱིལེ༹ཏི བཱདྷཏི, ཨདྡྷཱནཾ པཝཏྟིཏུཾ ན དེཏི. ཨུཔགྷཱཏཀཾ པན སཡཾ ཀུསལམྤི ཨཀུསལམྤི སམཱནཾ ¶ ཨཉྙཾ དུབྦལཀམྨཾ གྷཱཏེཏྭཱ ཏསྶ ཝིཔཱཀཾ པཊིབཱཧིཏྭཱ ཨཏྟནོ ཝིཔཱཀསྶ ཨོཀཱསཾ ཀརོཏི. ཨེཝཾ པན ཀམྨེན ཨོཀཱསེ ཀཏེ ཏཾཝིཔཱཀམུཔྤནྣཾ ནཱམ ཧོཏི. ཨིཏི ཨིམཾ དྭཱདསཝིདྷཾ ཀམྨཾ ཀམྨཝཊྚེ པཀྑིཔིཏྭཱ ¶ ཨེཝམེཀོ ཀམྨཝིཔཱཀཝསེན ནཱམརཱུཔསྶ པཙྩཡཔརིགྒཧཾ ཀརོཏི.

ཨིཏི ཨེཝཾ ཀམྨཝིཔཱཀཝཊྚཝསེན ནཱམརཱུཔསྶ པཝཏྟིཾ དིསྭཱ ‘‘ཡཐཱ ཨིདཾ ཨེཏརཧི, ཨེཝམཏཱིཏེཔི ཨདྡྷཱནེ ཀམྨཝིཔཱཀཝསེན པཙྩཡཏོ པཝཏྟིཏྠ, ཨནཱགཏེཔི པཝཏྟིསྶཏཱི’’ཏི ཨིཏི ཀམྨཉྩེཝ ཝིཔཱཀོ ཙཱཏི ཀམྨཝིཔཱཀཝསེན ལོཀོ པཝཏྟཏཱིཏི ཏཾ སམནུཔསྶཏི. ཏསྶེཝཾ སམནུཔསྶཏོ སབྦཱ སོལ༹སཝིདྷཱ ཀངྑཱ པཧིཡྻཏི.

ཀེཝལཾ ནཱམརཱུཔནྟི, སམྨཱ སམནུཔསྶཏི.

ཨེཝཾ ཀཱརཎཏོ ཨུདྡྷཾ, ཀཱརཎཾ ན ཙ པསྶཏི;

པཱཀཔཝཏྟིཏོ ཨུདྡྷཾ, ན པཱཀཔཊིཝེདཀཾ.

‘‘ཀམྨསྶ ཀཱརཀོ ནཏྠི, ཝིཔཱཀསྶ ཙ ཝེདཀོ;

སུདྡྷདྷམྨཱ པཝཏྟནྟི, ཨེཝེཏཾ སམྨདསྶནཾ.

ཨེཝཾ ¶ ཀམྨེ ཝིཔཱཀེ ཙ, ཝཏྟམཱནེ སཧེཏུཀེ;

བཱིཛརུཀྑཱདིཀཱནཾཝ, པུབྦཱ ཀོཊི ན ནཱཡཏི.

ཨནཱགཏེཔི སཾསཱརེ, ཨཔྤཝཏྟི ན དིསྶཏི;

ཨེཏམཏྠམནཉྙཱཡ, ཏིཏྠིཡཱ ཨསཡཾཝསཱི.

སཏྟསཉྙཾ གཧེཏྭཱན, སསྶཏུཙྪེདདསྶིནོ;

དྭཱསཊྛིདིཊྛིཾ གཎྷནྟི, ཨཉྙམཉྙཝིརོདྷིནོ.

དིཊྛིབནྡྷནབདྡྷཱ ཏེ, ཏཎྷཱསོཏེན ཝུཡ྄ཧརེ;

ཏཎྷཱསོཏེན ཝུཡ྄ཧནྟཱ, ན ཏེ དུཀྑཱ པམུཙྩརེ.

ཨེཝམེཏཾ ཨབྷིཉྙཱཡ, བྷིཀྑུ བུདྡྷསྶ སཱཝཀོ;

གམྦྷཱིརཾ ནིཔུཎཾ སུཉྙཾ, པཙྩཡཾ པཊིཝིཛ྄ཛྷཏི.

ཀམྨཾ ¶ ནཏྠི ཝིཔཱཀམྷི, པཱཀོ ཀམྨེ ན ཝིཛྫཏི;

ཨཉྙམཉྙཾ ཨུབྷོ སུཉྙཱ, ན ཙ ཀམྨཾ ཝིནཱ ཕལཾ.

ཡཐཱ ན སཱུརིཡེ ཨགྒི, ན མཎིམྷི ན གོམཡེ;

ན ཏེསཾ བཧི སོ ཨཏྠི, སམྦྷཱརེཧི ཙ ཛཱཡཏི.

ཏཐཱ ན ཨནྟོ ཀམྨསྶ, ཝིཔཱཀོ ཨུཔལབྦྷཏི;

བཧིདྡྷཱཔི ན ཀམྨསྶ, ན ཀམྨཾ ཏཏྠ ཝིཛྫཏི.

ཕལེན ¶ སུཉྙཾ ཏཾ ཀམྨཾ, ཕལཾ ཀམྨེ ན ཝིཛྫཏི;

ཀམྨཉྩ ཁོ ཨུཔཱདཱཡ, ཏཏོ ནིབྦཏྟཏེ ཕལཾ.

ཨེཝཾ ནཱནཔྤཀཱརེཧི, ནཱམརཱུཔསྶ པཙྩཡཾ;

པརིགྒཧེཏྭཱ ཨདྡྷཱསུ, ཏརིཏྭཱ ཀངྑམུཊྛིཏཾ.

ཀངྑཱཝིཏརཎཾ ¶ ནཱམ, ཉཱཎཾ ཏཾ སམུདཱིརིཏཾ;

དྷམྨཊྛིཏི ཡཐཱབྷཱུཏཾ, ཏཾ སམྨཱདསྶནནྟིཔི.

ཨིཏི ཨབྷིདྷམྨཱཝཏཱརེ ཀངྑཱཝིཏརཎཝིསུདྡྷིནིདྡེསོ ནཱམ

མགྒཱམགྒཉཱཎདསྶནཝིསུདྡྷིནིདྡེསོ

པཙྩུཔྤནྣསྶ དྷམྨསྶ, ནིབྦཏྟི ཨུདཡོ མཏོ;

ཝཡོ ཝིཔརིཎཱམོཏི, ཏསྶེཝ སམུདཱིརིཏཱ.

ཨནུཔསྶནཱཔི ¶ ཉཱཎནྟི, ཝརཉཱཎེན དེསིཏཾ;

སོ པནེཝཾ པཛཱནཱཏི, ཡོགཱཝཙརམཱཎཝོ.

ཨིམསྶ ནཱམརཱུཔསྶ, པུབྦེ ཨུཔྤཏྟིཏོ པན;

ནིཙཡོ རཱསི ཝཱ ནཏྠི, ཏཐཱ ཨུཔྤཛྫཏོཔི ཙ.

རཱསིཏོ ནིཙཡཱ ཝཱཔི, ནཏྠི ཨཱགམནནྟི ཙ;

ཏཐཱ ནིརུཛ྄ཛྷམཱནསྶ, ན དིསཱགམནནྟི ཙ.

ནིརུདྡྷསྶཱཔི ཨེཀསྨིཾ, ཋཱནེ ནཏྠི ཙཡོཏི ཙ;

ཨེཏྠ ཝཱིཎཱུཔམཱ ཝུཏྟཱ, ཨེཏསྶཏྠསྶ དཱིཔནེ.

ཀཏྭཱ ཏསྶེཝ ཉཱཎསྶ, ཝིབྷངྒསྶ ཝསེན ཏུ.

‘‘ཨཝིཛྫཱསམུདཡཱ རཱུཔསམུདཡོ’’ཏི ཧི ཨཱདིནཱ;

དས དསཱཏི ཀཏྭཱན, ཝུཏྟཱ པཉྙཱསལཀྑཎཱ;

ཏེསཾ པན ཝསེནཱཔི, དྷམྨེ སམནུཔསྶཏི.

ཨེཝཾ རཱུཔུདཡོ ཧོཏི, ཨེཝམསྶ ཝཡོ ཨིཏི;

ཨུདེཏི ཨེཝཾ རཱུཔམྤི, ཨེཝཾ རཱུཔཾ ཏུ ཝེཏི ཙ.

ཨེཝཾ ¶ པཙྩཡཏོཔེཏྠ, ཁཎཏོ ཨུདཡབྦཡཾ;

པསྶཏོ སབྦདྷམྨཱ ཙ, པཱཀཊཱ ཧོནྟི ཏསྶ ཏེ.

ཨུདཀེ དཎྜརཱཛཱིཝ, ཨཱརགྒེརིཝ སཱསཔོ;

ཝིཛྫུཔྤཱདཱཝ དྷམྨཱ ཏེ, པརིཏྟཊྛཱཡིནོ སིཡུཾ.

ཀདལཱིསུཔིནཱལཱཏཙཀྐམཱཡུཔམཱ ཨིམེ;

ཨསཱརཱ པན ནིསྶཱརཱ, ཧུཏྭཱ ཁཱཡནྟི ཡོགིནོ.

ཨེཝམེཏྟཱཝཏཱ ¶ ཏེན, ཨུདཡབྦཡདསྶནཾ;

ལཀྑཎཱནི ཙ པཉྙཱས, པཊིཝིཛ྄ཛྷ ཋིཏཾ པན.

ཉཱཎཾ ¶ ཨདྷིགཏཾ ཧོཏི, ཏརུཎཾ པཋམཾ པན;

ཡསྶ ཙཱདྷིགམཱ ཡོགཱི, ཧོཏཱརདྡྷཝིཔསྶཀོ.

ཨོབྷཱསོ པཱིཏི པསྶདྡྷི, ཉཱཎཾ སདྡྷཱ སཏཱི སུཁཾ;

ཨུཔེཀྑཱ ཝཱིརིཡཾ ནིཀནྟཱིཏི, ཨུཔཀླེསཱ དསེཝིམེ.

སམྤཏྟཔཊིཝེདྷསྶ, སོཏཱཔནྣཱདིནོཔི ཙ;

ཏཐཱ ཝིཔྤཊིཔནྣསྶ, ཨུཔཀླེསཱ ན ཛཱཡརེ.

སམྨཱཝ པཊིཔནྣསྶ, ཡུཏྟཡོགསྶ བྷིཀྑུནོ;

སདཱ ཝིཔསྶཀསྶེཝ, ཨུཔྤཛྫནྟི ཀིརསྶུ ཏེ.

ཝིཔསྶནཱཡ ཨོབྷཱསོ, ཨོབྷཱསོཏི པཝུཙྩཏི;

ཏསྨིཾ པན སམུཔྤནྣེ, ཡོགཱཝཙརབྷིཀྑུ སོ.

མགྒཔྤཏྟོ ཕལཔྤཏྟོ, ཨཧམསྨཱིཏི གཎྷཏི;

ཨམགྒཾཡེཝ མགྒོཏི, ཏསྶེཝཾ པན གཎྷཏོ.

པཱིཏི ཝིཔྤསྶནཱཔཱིཏི, ཏསྶ ཏསྨིཾ ཁཎེ པན;

ཏདཱ པཉྩཝིདྷཱ པཱིཏི, ཛཱཡནྟེ ཁུདྡིཀཱདིཀཱ.

ཝིཔསྶནཱཡ པསྶདྡྷི, པསྶདྡྷཱིཏི པཝུཙྩཏི;

ཡོགིནོ ཀཱཡཙིཏྟཱནི, པསྶདྡྷཱནེཝ ཧོནྟི ཧི.

ལཧཱུནི ¶ ཙ མུདཱུནེཝ, ཀམྨཉྙཱནེཝ ཧོནྟི ཧི;

པསྶདྡྷཱདཱིཧི སོ བྷིཀྑུ, ཨནུགྒཧིཏམཱནསོ.

‘‘སུཉྙཱགཱརཾ པཝིཊྛསྶ, སནྟཙིཏྟསྶ བྷིཀྑུནོ;

ཨམཱནུསཱི རཏི ཧོཏི, སམྨཱ དྷམྨཾ ཝིཔསྶཏོ.

‘‘ཡཏོ ཡཏོ སམྨསཏི, ཁནྡྷཱནཾ ཨུདཡབྦཡཾ;

ལབྷཏཱི པཱིཏིཔཱམོཛྫཾ, ཨམཏཾ ཏཾ ཝིཛཱནཏ’’ནྟི.

ཉཱཎཱདཡོ ཨུཔཀླེསཱ, ཉེཡྻཱ ཝུཏྟནཡེནིདྷ;

ཨེཏེ དས ཨུཔཀླེསཱ, ཝཛྫནཱིཡཱཝ ཡོགིནཱ.

ཏཾ ¶ ཏམཱཝཛྫམཱནསྶ, བྷཱཝནཱ པརིཧཱཡཏི;

ཨསཏྟེ སཏྟསཉྙཱི ཙ, ཧོཏི ཨཔྤསྶུཏོ ནརོ.

སབྦོབྷཱསཱདཡོ ¶ དྷམྨེ, ན མགྒོཏི ཝིཙཱརཡཾ;

མགྒོ ཝིཔསྶནཱཉཱཎཾ, ཨིཙྩེཝཾ པན པཎྜིཏོ.

ཝཝཏྠཔེཏི མགྒཉྩ, ཨམགྒཉྩེཝ ཙེཏསཱ;

ཏསྶ ཙེཝཾ ཨཡཾ མགྒོ, ནཱཡཾ མགྒོཏི ཡོགིནོ.

མགྒཱམགྒཉྩ ཝིཉྙཱཡ, ཋིཏཉཱཎམིདཾ པན;

མགྒཱམགྒེསུཉཱཎནྟི, བྷཱུརིཉཱཎེན དེསིཏཾ.

ཨིཏི ཨབྷིདྷམྨཱཝཏཱརེ མགྒཱམགྒཉཱཎདསྶནཝིསུདྡྷིནིདྡེསོ

པཊིཔདཱཉཱཎདསྶནཝིསུདྡྷིནིདྡེསོ

ཨཊྛཉཱཎཝསེནེཝ ¶ , སིཁཱཔཀྐཱ ཝིཔསྶནཱ;

ནཝམཾ པཊིཔདཱཉཱཎ-དསྶནནྟི པཝུཙྩཏི.

ཨཊྛ ཉཱཎཱནི ནཱམེཏྠ, ཝེདིཏབྦཱནི ཝིཉྙུནཱ;

ཨུཔཀླེསཝིནིམུཏྟཾ, ཉཱཎཾ སུཝིསདཾ པན.

ཨུདཡབྦཡེ ཙ བྷངྒེ ཙ, བྷཡེ ཨཱདཱིནཝེ ཏཐཱ;

ནིབྦིདཱཔསྶནཱཉཱཎཾ, ཉཱཎཾ མུཙྩིཏུཀམྱཏཱ.

པཊིསངྑཱ ཙ སངྑཱརེ, ཨུཔེཀྑཱཉཱཎམཊྛམཾ;

ཨིམཱནི ཨཊྛ ཉཱཎཱནི, ནཝམཾ སཙྩཱནུལོམཀཾ.

སཙྩཱནུལོམཉཱཎནྟི ¶ , ཨནུལོམཾ པཝུཙྩཏི;

ཏཾ སམྤཱདེཏུཀཱམེན, ཡོགཱཝཙརབྷིཀྑུནཱ.

ཨུདཡབྦཡཉཱཎཾ ཏཾ, ཨཱདིཾ ཀཏྭཱ པནཊྛསུ;

ཨེཏེསུ པན ཉཱཎེསུ, ཡོགོ ཀརཎིཡོ པན.

ཡཐཱནུཀྐམཏོ ¶ ཏསྶ, ཏེསུ ཉཱཎེསུ ཨཊྛསུ;

ཨནིཙྩཱདིཝསེནེཝ, ཡོགཾ ཀཏྭཱ ཋིཏསྶ ཧི.

ཨནིཙྩཾ དུཀྑམནཏྟཱཏི, སངྑཱརེ ཨནུཔསྶཏོ;

ཨཊྛནྣཾ པན ཉཱཎཱནཾ, ཝསེན པན ཡོགིནོ.

ཝིཔསྶནཱ སིཁཱཔཏྟཱ, ཧོཏི ཝུཊྛཱནགཱམིནཱི;

སཙྩཱནུལོམཉཱཎནྟི, ཨཡམེཝ པཝུཙྩཏི.

སངྑཱརུཔེཀྑཱཉཱཎཾ ཏཾ, ཨཱསེཝནྟསྶ ཡོགིནོ;

ཨིདཱནི ཏསྶ མགྒོ ཙ, སམུཔྤཛྫིསྶཏཱིཏི ཧི.

སངྑཱརུཔེཀྑཱ སངྑཱརེ, ཨནིཙྩཱ དུཀྑཱཏི ཝཱ ཏཐཱ;

སམྨསིཏྭཱ བྷཝངྒཾ ཏུ, པུན ཝོཏརཏེཝ སཱ.

བྷཝངྒཱནནྟརཾ སངྑཱརུ-པེཀྑཱགཏནཡེན ཏུ;

ཨནིཙྩཱདིཝསེནེཝ, སངྑཱརེ པན གོཙརཾ.

ཀུརུམཱནཾ མནོདྭཱརེ, ཛཱཡཏཱཝཛྫནཾ ཏཏོ;

བྷཝངྒཱཝཊྚནཾ ཀཏྭཱ, ཛཱཏསྶཱནནྟརཾ པན.

སངྑཱརེ ¶ གོཙརཾ ཀཏྭཱ, པཋམཾ ཛཝནམཱནསཾ;

ཨུཔྤཛྫཏཱིཏི ཏཾ ཙིཏྟཾ, པརིཀམྨནྟི ཝུཙྩཏི.

ཏདནནྟརམེཝཉྙཾ, སངྑཱརཱརམྨཎཾ པུན;

དུཏིཡཾ ཛཝནཾ ཧོཏི, ཨུཔཙཱརནྟི ཏཾ མཏཾ.

ཏདནནྟརཾ ཏཾ ཧོཏི, ཏཐཱ སངྑཱརགོཙརཾ;

ཏཏིཡཾ ཛཝནཙིཏྟཾ, ཨནུལོམནྟི སཉྙིཏཾ.

པུརིམཱནཾ པནཊྛནྣཾ, ཉཱཎཱནཾ ཨནུལོམཏོ;

བོདྷིཔཀྑིཡདྷམྨཱནཾ, ཨུདྡྷཉྩ ཨནུལོམཏོ.

ཏེནེཝ ¶ ཏཾ ཧི སཙྩཱནུལོམཉཱཎཾ པཝུཙྩཏི;

ཨིདཾ ཧི པན སཙྩཱནུ-ལོམཉཱཎཾ མཧེསིནཱ.

‘‘ཝུཊྛཱནགཱམིནཱིཡཱ ¶ ཧི, པརིཡོསཱན’’ནྟི བྷཱསིཏཾ;

ཉེཡྻཾ སབྦཔཀཱརེན, པརིཡོསཱནནྟི གོཏྲབྷུ.

ཨིཏིནེཀེཧི ནཱམེཧི, ཀིཏྟིཏཱཡཱ མཧེསིནཱ;

ཝུཊྛཱནགཱམིནཱི སནྟཱ, པརིསུདྡྷཱ ཝིཔསྶནཱ.

ཝུཊྛཱཏུཀཱམོ སཾསཱརདུཀྑཔངྐཱ མཧབྦྷཡཱ;

ཀརེཡྻ སཏཏཾ ཏཏྠ, ཡོགཾ པཎྜིཏཛཱཏིཀོ.

ཨིཏི ཨབྷིདྷམྨཱཝཏཱརེ པཊིཔདཱཉཱཎདསྶནཝིསུདྡྷིནིདྡེསོ ནཱམ

ཨིཏོ ¶ པརཾ ཏུ བྷིཀྑུསྶ, ཧོཏི གོཏྲབྷུམཱནསཾ;

ཨཱཝཛྫནིཡཋཱནཏྟཱ, མགྒཙིཏྟསྶ ཏཾ པན.

ཉཱཎདསྶནསུདྡྷིཾ ཝཱ, བྷཛཏེ ན ཀུདཱཙནཾ.

ཨུབྷིནྣམནྟརཱ ཨེཏཾ, ཨབྦོཧཱརིཀམེཝ ཏཾ;

ཝིཔསྶནཱཡ སོཏསྨིཾ, པཏིཏཏྟཱ ཝིཔསྶནཱ.

པོཐུཛྫནིཀགོཏྟཾ ཝཱ, ཨབྷིབྷུཡྻ པཝཏྟིཏོ;

གོཏྟཾ ཝུཙྩཏི ནིབྦཱནཾ, ཏཏོ བྷཝཏི གོཏྲབྷུ.

ཉཱཎཾ ཙཏཱུསུ མགྒེསུ, ཉཱཎདསྶནསུདྡྷིཀཾ;

ཏཏྠ ཏཾ པཋམཾ མགྒཾ, སམྤཱདེཏུཾ པནིཙྪཏཱ.

ཨཉྙཾ ¶ ¶ ཀིཉྩིཔི ཀཱཏབྦཾ, བྷིཀྑུནཱ ཏེན ནཏྠི ཏཾ;

ཡཉྷི ཏེན ཙ ཀཱཏབྦཾ, སིཡཱ ཏཾ ཀཏམེཝ ཏུ.

ཨནུལོམཱཝསཱནཉྷི, སཱུརཾ ཏིཀྑཾ ཝིཔསྶནཾ;

ཨུཔྤཱདེནྟེན ཏཾ སབྦཾ, ཀཏམེཝ ཙ ཡོགིནཱ.

ཏསྶཱནུལོམཉཱཎསྶ, ཨནྟེ ཏུ ཨནིམིཏྟཀཾ;

ཝིསངྑཱརཾ ནིརོདྷཉྩ, ནིབྦཱནཾ ཨམཏཾ པདཾ.

གོཙརཾ ཀུརུམཱནཾ ཏཾ, ནིབྦཱནཱརམྨཎེ པན;

མགྒསྶཱནནྟརཱདཱིཧི, པཙྩཡེཧི པནཙྪཧི;

ཝིཔསྶནཱཡ མུདྡྷཉྷི, སིཁཱཔཏྟཱཡ ཏཱཡ ཏཾ;

ཨུཔྤཛྫཏི ཨནཱཝཏྟཾ-རམྨཎཾ ཏསྶ གོཏྲབྷུ.

ཨེཀེནཱཝཛྫནེནེཝ, ཨེཀིསྶཱཡེཝ ཝཱིཐིཡཱ;

ནཱནཱརམྨཎཏཱ ཙཱནུ-ལོམགོཏྲབྷུཙེཏསཾ.

ཋཏྭཱ ¶ ཨཱཝཛྫནཊྛཱནེ, ཏམནཱཝཛྫནམྤི ཙ;

མགྒསྶ པན ཏཾ སཉྙཾ, དཏྭཱ ཝིཡ ནིརུཛ྄ཛྷཏི.

མགྒོཔི ཏེན ཏཾ དིནྣཾ, ཨམུཉྩིཏྭཱཝ སཉྷིཏཾ;

ཏཾ ཉཱཎམནུབནྡྷནྟོ, ཛཱཡཏེ ཏདནནྟརཾ.

ཀདཱཙིཔི ཨནིབྦིདྡྷཔུབྦཾ མགྒོ པནེས ཧི;

ལོབྷཾ དོསཉྩ མོཧཉྩ, ཝིདྡྷཾསནྟོཝ ཛཱཡཏི.

ཀརོཏི ཨཐ ཁོཔཱཡདྭཱརཱནིཔི པིདྷེཏི ཙ.

ཨཔཱརམཏིགྷོརཉྩ, སོསེཏི ཙ ཨསེསཏོ.

མིཙྪཱམགྒཾ ¶ ¶ པནཊྛངྒཾ, ཛཱཡམཱནོ ཙ ཨུཛ྄ཛྷཏི;

སབྦཝེརབྷཡཱནེཏྠ, ནིཙྩཾ ཝཱུཔསམེཏི ཙ.

བུདྡྷསྶོརསཔུཏྟཏྟཾ, ཨུཔནེཏི ནཡཾ པན;

ཨཱནིསཾསེ ཨནེཀེཔི, པཝཏྟཡཏི ཡོགིནོ.

དཱཡཀེནཱནིསཾསཱནཾ, ཨནེཀེསམནེན ཙ;

ཨཱདིམགྒེན སཾཡུཏྟཾ, ཉཱཎནྟི ཉཱཎདསྶནཾ.

ཏསྶེཝཱནནྟརཾ ཏསྶ, ཝིཔཱཀཱ དྭེཔི ཏཱིཎི ཝཱ;

ཕལཙིཏྟཱནི ཛཱཡནྟེ, ན ཛཱཡནྟེ ཏཏོ པརཾ.

ཀེཙི ཨེཀཉྩ དྭེ ཏཱིཎི, ཙཏྟཱརཱིཏི ཝདནྟི ཏུ;

ན པནེཏཾ གཧེཏབྦཾ, ཨཛཱནིཏྭཱ ཝདནྟི ཏེ.

ཨེཀསྶཱསེཝནཾ ནཏྠི, ཏསྨཱ དྭེ ཨནུལོམཀཱ;

ཏེཧི ཨཱསེཝནཾ ལདྡྷཱ, ཏཏིཡཾ ཧོཏི གོཏྲབྷུ.

པཉྩམཾ མགྒཙིཏྟཉྩ, ཕལཱནི དྭེ ཏཏོ པན;

སཏྟཙིཏྟཔརམཱཝ, ཨེཀཱཝཛྫནཝཱིཐི ཧི.

ཨེཏྟཱཝཏཱ པནེསོ ཧི, སོཏཱཔནྣོཏི ཝུཙྩཏི;

ཕལསྶ པརིཡོསཱནེ, བྷཝངྒོཏྟརཎཾ སིཡཱ.

ཏཏོ བྷཝངྒཾ ཚིནྡིཏྭཱ, མགྒཔེཀྑནཧེཏུཀཾ;

ཨུཔྤཛྫཏི མནོདྭཱརེ, ཨཱཝཛྫནམནོ པན.

ཏསྨིཾ ¶ ¶ ནིརུདྡྷེ མགྒསྶ, པཙྩཝེཀྑཎསཉྙིཏཱ;

ཛཝནཱནི ཧི ཛཱཡནྟེ, སཏྟེཝ པཊིཔཱཊིཡཱ.

ཨེསེཝ ཙ ནཡོ ཉེཡྻོ, ཕལཱདཱིནམྤི པེཀྑནེ;

པཙྩཝེཀྑཎཉཱཎཱནི, བྷཝནྟེཀཱུནཝཱིསཏི.

མགྒོ ¶ ཕལཾ པཧཱིནཱ ཙ, ཀིལེསཱ ཨཝསིཊྛཀཱ;

ནིབྦཱནཉྩེཏི པཉྩེཏེ, པཙྩཝེཀྑཎབྷཱུམིཡོ.

ཨེཝཾ སོ པཙྩཝེཀྑིཏྭཱ, སོཏཱཔནྣོཔཔཏྟིཡཱ;

ཡོགམཱརབྷཏེ དྷཱིརོ, དུཏིཡཱཡ ཙ བྷཱུམིཡཱ.

ཁནྡྷཔཉྩཀསངྑཱཏཾ, ཏཾ སངྑཱརགཏཾ པུན;

ཨནིཙྩཾ དུཀྑམནཏྟཱཏི, ཉཱཎེན པརིམཛྫཏི.

ཏཏོ ཝིཔསྶནཱཝཱིཐི-མོགཱཧཏི ཙ ཏཱཝདེ;

ཏསྶེཝཾ པཊིཔནྣསྶ, ཧེཊྛཱ ཝུཏྟནཡེན ཏུ.

ཏཏོ སངྑཱརུཔེཀྑཱཡ, ཨཝསཱནེ ཏཐེཝ ཙ;

ཨེཀཱཝཛྫནཝཱརསྨིཾ, གོཏྲབྷུསྶ ཨནནྟརཾ.

བྱཱཔཱདཀཱམརཱགཱནཾ, ཏནུབྷཱཝཾ ཏུ སཱདྷཡཾ;

སཀདཱགཱམིམགྒོཡཾ, ཛཱཡཏེ དུཏིཡོ པན.

ཨིམསྶཱཔི ཙ ཉཱཎསྶ, ཧེཊྛཱ ཝུཏྟནཡེནིདྷ;

ཕལཙིཏྟཱནི ཉེཡྻཱནི, ཝིཉྙུནཱ དྭེཔི ཏཱིཎི ཝཱ.

ཨེཏྟཱཝཏཱ པནེསོ ཧི, སཀདཱགཱམི ནཱམཡཾ;

སཀིདེཝ ཨིམཾ ལོཀཾ, ཨཱགནྟྭཱནྟཀརོ བྷཝེ.

ཧེཊྛཱ ཝུཏྟནཡེནེཝ, པཉྩདྷཱ པཙྩཝེཀྑཎཾ;

ཨེཝཾ སོ པཙྩཝེཀྑིཏྭཱ, སཀདཱགཱམིཔཏྟིཡཱ.

ཡོགམཱརབྷཏེ ¶ ¶ དྷཱིརོ, ཏཏིཡཱཡ ཙ བྷཱུམིཡཱ;

བྱཱཔཱདཀཱམརཱགཱནཾ, པཧཱནཱཡ ཙ པཎྜིཏོ.

ཁནྡྷཔཉྩཀསངྑཱཏཾ, ཏཾ སངྑཱརགཏཾ པན;

ཨནིཙྩཾ དུཀྑམནཏྟཱཏི, ཉཱཎེན པརིམཛྫཏི.

ཏཏོ ཝིཔསྶནཱཝཱིཐི-མོགཱཧཏི ཙ ཏཱཝདེ;

ཏསྶེཝཾ པཊིཔནྣསྶ, ཧེཊྛཱ ཝུཏྟནཡེན ཏུ.

ཏཏོ སངྑཱརུཔེཀྑཱཡ, ཨཝསཱནེ ཏཐེཝ ཙ;

ཨེཀཱཝཛྫནཝཱིཐིམྷི, གོཏྲབྷུསྶ ཨནནྟརཾ.

བྱཱཔཱདཀཱམརཱགཱནཾ, མཱུལགྷཱཏཾ ཏུ སཱདྷཡཾ;

ཏསྶཱནཱགཱམིམགྒོཡཾ, ཛཱཡཏེ ཏཏིཡོ པན.

ཨིམསྶཱཔི ཙ ཉཱཎསྶ, ཧེཊྛཱ ཝུཏྟནཡེནིདྷ;

པཝཏྟི ཕལཙིཏྟཱནཾ, ཝེདིཏབྦཱ ཝིབྷཱཝིནཱ.

ཨེཏྟཱཝཏཱ པནེསོཔི, ཧོཏིནཱགཱམི ནཱམཡཾ;

ཏཏྠེཝ པརིནིབྦཱཡཱི, ཨནཱཝཏྟིསབྷཱཝཏོ.

ཧེཊྛཱ ¶ ཝུཏྟནཡེནེཝ, པཉྩདྷཱ པཙྩཝེཀྑཎཾ;

ཨེཝཾ སོ པཙྩཝེཀྑིཏྭཱ, ཨནཱགཱམིརིཡསཱཝཀོ.

ཡོགམཱརབྷཏེ དྷཱིརོ, ཙཏུཏྠཱཡ ཙ བྷཱུམིཡཱ;

པཏྟིཡཱརཱུཔརཱགཱདི-པཧཱནཱཡ ཙ པཎྜིཏོ.

ཏཐེཝ སངྑཱརགཏཾ, ཨནིཙྩཱདིཝསེན སོ;

པརིཝཏྟཏི ཉཱཎེན, ཏཐེཝ པརིམཛྫཏི.

ཏཏོ ཝིཔསྶནཱཝཱིཐི-མོགཱཧཏི ཙ ཏཱཝདེ;

ཏསྶེཝཾ པཊིཔནྣསྶ, ཧེཊྛཱ ཝུཏྟནཡེན ཏུ.

ཏཏོ ¶ ¶ སངྑཱརུཔེཀྑཱཡ, ཨཝསཱནེ ཏཐེཝ ཙ;

ཨེཀཱཝཛྫནཝཱརསྨིཾ, གོཏྲབྷུསྶ ཨནནྟརཾ.

ཨིམསྶཱཔི ཙ ཉཱཎསྶ, ཧེཊྛཱ ཝུཏྟནཡེནིདྷ;

པཝཏྟི ཕལཙིཏྟཱནཾ, ཝེདིཏབྦཱ ཝིབྷཱཝིནཱ.

ཨེཏྟཱཝཏཱ ཙཏསྶོཔི, ཉཱཎདསྶནསུདྡྷིཡོ;

ཧིཏཏྠཱཡ ཙ བྷིཀྑཱུནཾ, སངྑེཔེནེཝ དསྶིཏཱ.

ཨིཏི ཨབྷིདྷམྨཱཝཏཱརེ ཉཱཎདསྶནཝིསུདྡྷིནིདྡེསོ ནཱམ

ཨེཏེསུ ¶ ¶ ¶ ཡེན ཡེ དྷམྨཱ, པཧཱཏབྦཱ བྷཝནྟི ཧི;

ཏེསཾ དཱནི ཀརིསྶཱམི, པཀཱསནམིཏོ པརཾ.

ཨིམེསུ པན ཙཏཱུསུ མགྒཉཱཎེསུ ཡེ དྷམྨཱ ཡེན ཉཱཎེན པཧཱཏབྦཱ, ཏེསཾ པཧཱནམེཝཾ ཝེདིཏབྦཾ. ཨེཏཱནི ཧི ཡཐཱཡོགཾ སཾཡོཛནཀིལེསམིཙྪཏྟལོཀདྷམྨམཙྪརིཡཝིཔལླཱསགནྠཱགཏིཨཱསཝ- ཨོགྷཡོགནཱིཝརཎཔརཱམཱསཨུཔཱདཱནཱནུསཡམལཨཀུསལཀམྨཔཐ- ཨཀུསལཙིཏྟུཔྤཱདསངྑཱཏཱནཾ པཧཱནཀརཱནི.

ཏཏྠ སཾཡོཛནཱནཱིཏི དས སཾཡོཛནཱནི. སེཡྻཐིདཾ – རཱུཔརཱགཱརཱུཔརཱགམཱནཨུདྡྷཙྩཱཝིཛྫཱཏི ཨིམེ པཉྩ ཨུདྡྷཾབྷཱགིཡསཾཡོཛནཱནི ནཱམ. སཀྐཱཡདིཊྛི ཝིཙིཀིཙྪཱ སཱིལབྦཏཔརཱམཱསོ ཀཱམརཱགོ པཊིགྷོཏི ཨིམེ པཉྩ ཨདྷོབྷཱགིཡསཾཡོཛནཱནི ནཱམ.

ཀིལེསཱཏི དས ཀིལེསཱ. སེཡྻཐིདཾ – ལོབྷོ དོསོ མོཧོ མཱནོ དིཊྛི ཝིཙིཀིཙྪཱ ཐིནཾ ཨུདྡྷཙྩཾ ཨཧིརིཀཾ ཨནོཏྟཔྤནྟི.

མིཙྪཏྟཱཏི དས མིཙྪཏྟཱ. སེཡྻཐིདཾ – མིཙྪཱདིཊྛི མིཙྪཱསངྐཔྤོ མིཙྪཱཝཱཙཱ མིཙྪཱཀམྨནྟོ མིཙྪཱཨཱཛཱིཝོ མིཙྪཱཝཱཡཱམོ མིཙྪཱསཏི མིཙྪཱསམཱདྷི མིཙྪཱཉཱཎཾ མིཙྪཱཝིམུཏྟཱིཏི.

ལོཀདྷམྨཱཏི ཨཊྛ ལོཀདྷམྨཱ ལཱབྷོ ཨལཱབྷོ ཡསོ ཨཡསོ ནིནྡཱ པསཾསཱ སུཁཾ དུཀྑནྟི. ཨིདྷ པན ཀཱརཎཱུཔཙཱརེན ¶ ལཱབྷཱདིཝཏྠུཀསྶ ཨནུནཡསྶ, ཨལཱབྷཱདིཝཏྠུཀསྶ པཊིགྷསྶ ཙེཏཾ ལོཀདྷམྨགཧཎེན གཧཎཾ ཀཏནྟི ཝེདིཏབྦཾ.

མཙྪརིཡཱནཱིཏི པཉྩ མཙྪརིཡཱནི ཨཱཝཱསམཙྪརིཡཾ ཀུལམཙྪརིཡཾ ལཱབྷམཙྪརིཡཾ དྷམྨམཙྪརིཡཾ ¶ ཝཎྞམཙྪརིཡནྟི. ཨིམཱནི ཨཱཝཱསཱདཱིསུ ཨཉྙེསཾ སཱདྷཱརཎབྷཱཝཾ ཨསཧནཱཀཱརེན པཝཏྟཱནི མཙྪརིཡཱནི.

ཝིཔལླཱསཱཏི ཨནིཙྩདུཀྑཨནཏྟཨསུབྷེསུཡེཝ ¶ ཝཏྠཱུསུ ‘‘ནིཙྩཾ སུཁཾ ཨཏྟཱ སུབྷ’’ནྟི ཨེཝཾ པཝཏྟཱ སཉྙཱཝིཔལླཱསོ ཙིཏྟཝིཔལླཱསོ དིཊྛིཝིཔལླཱསོཏི ཨིམེ ཏཡོ ཝིཔལླཱསཱ.

གནྠཱཏི ཙཏྟཱརོ གནྠཱ ཨབྷིཛ྄ཛྷཱཀཱཡགནྠོ, བྱཱཔཱདོ, སཱིལབྦཏཔརཱམཱསོ, ཨིདཾསཙྩཱབྷིནིཝེསོ ཀཱཡགནྠོཏི.

ཨགཏཱིཏི ཚནྡདོསམོཧབྷཡཱནི. ཨཱསཝཱཏི ཙཏྟཱརོ ཨཱསཝཱ – ཀཱམརཱགབྷཝརཱགམིཙྪཱདིཊྛིཨཝིཛྫཱསཝོཏི. ཨོགྷཡོགཱནཱིཏིཔི ཏེསམེཝཱདྷིཝཙནཾ. ནཱིཝརཎཱནཱིཏི ཀཱམཙྪནྡཱདཡོ. པརཱམཱསོཏི མིཙྪཱདིཊྛིཡཱ ཨདྷིཝཙནཾ.

ཨུཔཱདཱནཱཏི ཙཏྟཱརི ཨུཔཱདཱནཱནི ཀཱམུཔཱདཱནཱདཱིནཱིཏི. ཨནུསཡཱཏི སཏྟ ཨནུསཡཱ ཀཱམརཱགཱནུསཡོ པཊིགྷམཱནདིཊྛིཝིཙིཀིཙྪཱབྷཝརཱགཱཝིཛྫཱནུསཡོཏི. མལཱཏི ཏཡོ མལཱ – ལོབྷོ དོསོ མོཧོཏི.

ཨཀུསལཀམྨཔཐཱཏི དས ཨཀུསལཀམྨཔཐཱ. སེཡྻཐིདཾ – པཱཎཱཏིཔཱཏོ ཨདིནྣཱདཱནཾ ཀཱམེསུམིཙྪཱཙཱརོ མུསཱཝཱདོ པིསུཎཝཱཙཱ ཕརུསཝཱཙཱ སམྥཔྤལཱཔོ ཨབྷིཛ྄ཛྷཱ བྱཱཔཱདོ མིཙྪཱདིཊྛཱིཏི དས.

ཨཀུསལཙིཏྟུཔྤཱདཱཏི ¶ ལོབྷམཱུལཱནི ཨཊྛ, དོསམཱུལཱནི དྭེ, མོཧམཱུལཱནི དྭེཏི ཨིམེ དྭཱདསཱཏི.

ཨེཏེསཾ སཾཡོཛནཱདཱིནཾ ཨེཏཱནི ཡཐཱསམྦྷཝཾ པཧཱནཀརཱནི. ཀཐཾ? སཾཡོཛནེསུ ཏཱཝ སཀྐཱཡདིཊྛིཝིཙིཀིཙྪཱསཱིལབྦཏཔརཱམཱསཱ ཨཔཱཡགམནཱིཡཱ ཀཱམརཱགཔཊིགྷཱཏི ཨེཏེ པཋམམགྒཉཱཎཝཛ྄ཛྷཱ, སེསཱ ཀཱམརཱགཔཊིགྷཱ ཨོལཱ༹རིཀཱ དུཏིཡམགྒཉཱཎཝཛ྄ཛྷཱ, སུཁུམཱ ཏཏིཡམགྒཉཱཎཝཛ྄ཛྷཱ, རཱུཔརཱགཱདཡོ པཉྩཔི ཙཏུཏྠམགྒཉཱཎཝཛ྄ཛྷཱ ཨེཝ.

ཀིལེསེསུ ¶ དིཊྛིཝིཙིཀིཙྪཱ པཋམམགྒཉཱཎཝཛ྄ཛྷཱ, དོསོ ཏཏིཡམགྒཉཱཎཝཛ྄ཛྷོ, ལོབྷམོཧམཱནཐིནཨུདྡྷཙྩཨཧིརིཀཱནོཏྟཔྤཱནི ཙཏུཏྠམགྒཉཱཎཝཛ྄ཛྷཱནི.

མིཙྪཏྟེསུ མིཙྪཱདིཊྛི མུསཱཝཱདོ མིཙྪཱཀམྨནྟོ མིཙྪཱཨཱཛཱིཝོཏི ཨིམེ པཋམམགྒཉཱཎཝཛ྄ཛྷཱ, མིཙྪཱསངྐཔྤོ པིསུཎཝཱཙཱ ཕརུསཝཱཙཱཏི ཨིམེ ཏཏིཡམགྒཉཱཎཝཛ྄ཛྷཱ, ཙེཏནཱཡེཝ ཙེཏྠ མིཙྪཱཝཱཙཱཏི ཝེདིཏབྦཱ, སམྥཔྤལཱཔམིཙྪཱཝཱཡཱམསཏིསམཱདྷིཝིམུཏྟིཉཱཎཱནི ཙཏུཏྠམགྒཉཱཎཝཛ྄ཛྷཱནི.

ལོཀདྷམྨེསུ པཊིགྷོ ཏཏིཡམགྒཉཱཎཝཛ྄ཛྷོ, ཨནུནཡོ ཙཏུཏྠམགྒཉཱཎཝཛ྄ཛྷོ, ཡསེ པསཾསཱཡ ཙ ཨནུནཡོ ཙཏུཏྠམགྒཉཱཎཝཛ྄ཛྷོཏི ཨེཀེ.

མཙྪརིཡཱནི པཋམམགྒཉཱཎཝཛ྄ཛྷཱནི ཨེཝ.

ཝིཔལླཱསེསུ པན ཨནིཙྩེ ནིཙྩཾ, ཨནཏྟནི ཨཏྟཱཏི ཙ སཉྙཱཙིཏྟདིཊྛིཝིཔལླཱསཱ ¶ , དུཀྑེ སུཁཾ, ཨསུབྷེ སུབྷནྟི དིཊྛིཝིཔལླཱསོ ཙཱཏི ཨིམེ པཋམམགྒཉཱཎཝཛ྄ཛྷཱ, ཨསུབྷེ སུབྷནྟི སཉྙཱཙིཏྟཝིཔལླཱསཱ ཏཏིཡམགྒཉཱཎཝཛ྄ཛྷཱ, དུཀྑེ སུཁནྟི ཙཏུཏྠམགྒཉཱཎཝཛ྄ཛྷཱ.

གནྠེསུ སཱིལབྦཏཔརཱམཱསཨིདཾསཙྩཱབྷིནིཝེསཀཱཡགནྠཱ པཋམམགྒཉཱཎཝཛ྄ཛྷཱ, བྱཱཔཱདཀཱཡགནྠོ ཏཏིཡམགྒཉཱཎཝཛ྄ཛྷོ, ཨབྷིཛ྄ཛྷཱཀཱཡགནྠོ ཙཏུཏྠམགྒཉཱཎཝཛ྄ཛྷོཝ.

ཨཱསཝེསུ དིཊྛཱསཝོ པཋམཉཱཎཝཛ྄ཛྷོ, ཀཱམཱསཝོ ཏཏིཡཉཱཎཝཛ྄ཛྷོ, ཨིཏརེ དྭེ ཙཏུཏྠཉཱཎཝཛ྄ཛྷཱ. ཨོགྷཡོགེསུཔི ཨེསེཝ ནཡོ.

ནཱིཝརཎེསུ ཝིཙིཀིཙྪཱནཱིཝརཎཾ པཋམཉཱཎཝཛ྄ཛྷཾ, ཀཱམཙྪནྡོ བྱཱཔཱདོ ཀུཀྐུཙྩནྟི ཏཱིཎི ཏཏིཡཉཱཎཝཛ྄ཛྷཱནི, ཐིནམིདྡྷཨུདྡྷཙྩཱནི ཙཏུཏྠཉཱཎཝཛ྄ཛྷཱནི.

ཨུཔཱདཱནེསུ སབྦེསམྤི ལོཀིཡདྷམྨཱནཾ ཝཏྠུཀཱམཝསེན ‘‘ཀཱམཱ’’ཏི ཨཱགཏཏྟཱ རཱུཔཱརཱུཔེསུ རཱགོཔི ཀཱམུཔཱདཱནེ པཏཏི, ཏསྨཱ ཏཉྩ ཀཱམུཔཱདཱནཾ ཙཏུཏྠཉཱཎཝཛ྄ཛྷཾ, སེསཱནི པཋམཉཱཎཝཛ྄ཛྷཱནི.

ཨནུསཡེསུ དིཊྛིཝིཙིཀིཙྪཱནུསཡཱ པཋམཉཱཎཝཛ྄ཛྷཱ, ཀཱམརཱགཔཊིགྷཱནུསཡཱ ཏཏིཡཉཱཎཝཛ྄ཛྷཱ, མཱནབྷཝརཱགཱཝིཛྫཱནུསཡཱ ཙཏུཏྠཉཱཎཝཛ྄ཛྷཱ.

མལེསུ དོསམལཾ ཏཏིཡཉཱཎཝཛ྄ཛྷཾ, ཨིཏརཱནི ཙཏུཏྠཉཱཎཝཛ྄ཛྷཱནེཝ.

ཨཀུསལཀམྨཔཐེསུ པཱཎཱཏིཔཱཏོ ཨདིནྣཱདཱནཾ མིཙྪཱཙཱརོ མུསཱཝཱདོ མིཙྪཱདིཊྛཱིཏི ཨིམེ པཋམཉཱཎཝཛ྄ཛྷཱ, པིསུཎཝཱཙཱ ཕརུསཝཱཙཱ བྱཱཔཱདོཏི ཏཏིཡཉཱཎཝཛ྄ཛྷཱ, སམྥཔྤལཱཔོ ཨབྷིཛ྄ཛྷཱ ཙཏུཏྠཉཱཎཝཛ྄ཛྷཱཝ.

ཨཀུསལཙིཏྟུཔྤཱདེསུ ཙཏྟཱརོ དིཊྛིགཏཙིཏྟུཔྤཱདཱ, ཝིཙིཀིཙྪཱསམྤཡུཏྟོ ཙཱཏི པཉྩ པཋམཉཱཎཝཛ྄ཛྷཱ, དྭེ པཊིགྷསམྤཡུཏྟཱ ཏཏིཡཉཱཎཝཛ྄ཛྷཱ, སེསཱ ཙཏུཏྠཉཱཎཝཛ྄ཛྷཱཏི.

ཡཉྩ ཡེན ཝཛ྄ཛྷཾ, ཏཾ ཏེན པཧཱཏབྦཾ ནཱམ. ཏེན ཝུཏྟཾ ‘‘ཨེཏེསཾ སཾཡོཛནཱདཱིནཾ དྷམྨཱནཾ ཨེཏཱནི ཡཐཱཡོགཾ པཧཱནཀརཱནཱི’’ཏི.

པརིཉྙཱདཱིནི ¶ ¶ ཀིཙྩཱནི, ཡཱནི ཝུཏྟཱནི སཏྠུནཱ;

སཙྩཱབྷིསམཡེ ཏཱནི, པཝཀྑཱམི ཨིཏོ པརཾ.

པརིཉྙཱདཱིནི ཨེཏཱནི, ཀིཙྩཱནེཀཀྑཎེ པན;

ཡཐཱསབྷཱཝཏོ ཏཱནི, ཛཱནིཏབྦཱནི ཝིཉྙུནཱ.

པདཱིཔོ ཧི ཡཐཱ ལོཀེ, ཨཔུབྦཱཙརིམཾ ཨིདྷ;

ཙཏྟཱརི པན ཀིཙྩཱནི, ཀརོཏེཀཀྑཎེ པན.

ཨཱལོཀཉྩ ཝིདཾསེཏི, ནཱསེཏི ཏིམིརམྤི ཙ;

པརིཡཱདིཡཏི ཏེལཉྩ, ཝཊྚིཾ ཛྷཱཔེཏི ཨེཀཏོ.

ཨེཝཾ ཏཾ མགྒཉཱཎམྤི, ཨཔུབྦཱཙརིམཾ པན;

ཙཏྟཱརིཔི ཙ ཀིཙྩཱནི, ཀརོཏེཀཀྑཎེ པན.

པརིཉྙཱབྷིསམཡེནེཝ, དུཀྑཾ ཨབྷིསམེཏི སོ;

པཧཱནཱབྷིསམཡེནེཝ, ཏཐཱ སམུདཡམྤི ཙ.

བྷཱཝནཱཝིདྷིནཱཡེཝ, མགྒཾ ཨབྷིསམེཏི ཏཾ;

ཨཱརམྨཎཀྲིཡཱཡེཝ, ནིརོདྷཾ སཙྪིཀརོཏི སོ.

ཝུཏྟམྤི ཙེཏཾ ‘‘མགྒསམངྒིསྶ ཉཱཎཾ དུཀྑེཔེཏཾ ཉཱཎཾ, དུཀྑསམུདཡེཔེཏཾ ཉཱཎཾ, དུཀྑནིརོདྷེཔེཏཾ ཉཱཎཾ, དུཀྑནིརོདྷགཱམིནིཡཱ ¶ པཊིཔདཱཡཔེཏཾ ཉཱཎ’’ནྟི. ཏཏྠ ཡཐཱ པདཱིཔོ ཝཊྚིཾ ཛྷཱཔེཏི, ཨེཝཾ མགྒཉཱཎཾ དུཀྑཾ པརིཛཱནཱཏི. ཡཐཱ ཨནྡྷཀཱརཾ ནཱསེཏི, ཨེཝཾ སམུདཡཾ པཛཧཏི. ཡཐཱ ཨཱལོཀཾ ཝིདཾསེཏི, ཨེཝཾ སཧཛཱཏཱདིཔཙྩཡཏཱཡ སམྨཱསངྐཔྤཱདིམགྒཾ བྷཱཝེཏི. ཡཐཱ ཏེལཾ པརིཡཱདིཡཏི, ཨེཝཾ ཀིལེསཔརིཡཱདཱནེན ནིརོདྷཾ སཙྪིཀརོཏཱིཏི ཝེདིཏབྦཾ.

ཨུགྒཙྪནྟོ ཡཐཱདིཙྩོ, ཨཔུབྦཱཙརིམཾ པན;

ཙཏྟཱརི པན ཀིཙྩཱནི, ཀརོཏེཀཀྑཎེ ཨིདྷ.

ཨོབྷཱསེཏི ¶ ཙ རཱུཔཱནི, ནཱསེཏི ཏིམིརམྤི ཙ;

ཨཱལོཀཉྩ ཝིདཾསེཏི, སཱིཏཉྩ པཊིཧཉྙཏི.

ཡཐཱ ཙ མཧཏཱི ནཱཝཱ, ཨཔུབྦཱཙརིམཾ པན;

ཙཏྟཱརི པན ཀིཙྩཱནི, ཀརོཏེཀཀྑཎེ པན.

ཛཧཏཱི ཨོརིམཾ ཏཱིརཾ, སོཏཾ ཚིནྡཏི སཱ པན;

ཏཐཱ ཝཧཏི བྷཎྜཉྩ, ཏཱིརམཔྤེཏི པཱརིམཾ.

ནཱཝཱཡོརིམཏཱིརསྶ, ཡཐཱ པཛཧནཾ པན;

ཏཐེཝ མགྒཉཱཎསྶ, དུཀྑསྶ པརིཛཱནནཾ.

ཡཐཱ ¶ ཚིནྡཏི ཏཾ སོཏཾ, ཏཎྷཾ ཛཧཏི ཏཾ ཏཐཱ;

ཡཐཱ ཝཧཏི ཏཾ བྷཎྜཾ, སཧཛཱཏཱདིནཱ པན.

ཏཐེཝ པཙྩཡཏྟེན, མགྒཾ བྷཱཝེཏི ནཱམ སོ;

ཡཐཱ པཱརཾ པན ཨེཝཾ, ནིརོདྷཱརམྨཎཾ བྷཝེ.

ལོཀུཏྟརེན ནིདྡིཊྛཱ, ཡཱ ལོཀུཏྟརབྷཱཝནཱ;

སཱ སངྑེཔནཡེནེཝཾ, མཡཱ སཱདྷུ པཀཱསིཏཱ.

ཨིཏི ཨབྷིདྷམྨཱཝཏཱརེ ཉཱཎདསྶནཝིསུདྡྷིནིདྡེསོ ནཱམ

ཡེསཾ ¶ ¶ པཙྩཡདྷམྨཱནཾ, ཝསཱ སཔྤཙྩཡཱ ཨིམེ;

དྷམྨཱ ཏེ པཙྩཡེ ཙཱཧཾ, དསྶཡིསྶཱམིཏོ པརཾ.

ཀཏམེ པཙྩཡཱཏི? ཝུཙྩཏེ – ཧེཏཱརམྨཎཱདྷིཔཏིཨནནྟརསམནནྟརསཧཛཱཏ- ཨཉྙམཉྙནིསྶཡཱུཔནིསྶཡཔུརེཛཱཏཔཙྪཱཛཱཏཱསེཝནཀམྨཝིཔཱཀཱཧཱརིནྡྲིཡ- ཛྷཱནམགྒསམྤཡུཏྟཝིཔྤཡུཏྟཨཏྠིནཏྠིཝིགཏཱཝིགཏཝསེན ཙཏུཝཱིསཏིཝིདྷཱ ཧོནྟི.

ཏཏྠ ཧེཏུཔཙྩཡོཏི ལོབྷོ དོསོ མོཧོ ཨལོབྷོ ཨདོསོ ཨམོཧོཏི ཨིམེ ཚ དྷམྨཱ ཧེཏུཔཙྩཡཱ. ཨཱརམྨཎཔཙྩཡོཏི སབྦལོཀིཡལོཀུཏྟརཾ ཡཾ ཡཾ དྷམྨཾ ཨཱརབྦྷ ཡེ ཡེ དྷམྨཱ ཨུཔྤཛྫནྟི ཙིཏྟཙེཏསིཀཱ དྷམྨཱ, ཏེ ཏེ དྷམྨཱ ཏེསཾ ཏེསཾ དྷམྨཱནཾ ཨཱརམྨཎཔཙྩཡེན པཙྩཡོ.

ཨདྷིཔཏིཔཙྩཡོཏི ¶ ཨེཏྠ སཧཛཱཏཱདྷིཔཏིཨཱརམྨཎཱདྷིཔཏིཝསེན དུཝིདྷོ. ཏཏྠ སཧཛཱཏཱདྷིཔཏི ཚནྡཙིཏྟཝཱིརིཡཝཱིམཾསཱཝསེན ཙཏུབྦིདྷོ, ཨཱརམྨཎཱདྷིཔཏི པན དོམནསྶཝིཙིཀིཙྪུདྡྷཙྩཀིརིཡཱབྱཱཀཏཱཀུསལཝིཔཱཀེ ཙ ཨནིཊྛསམྨཏཉྩ རཱུཔཾ ཋཔེཏྭཱ ཨཝསེསཾ. ཨནནྟརཔཙྩཡོཏི ཨནནྟརནིརུདྡྷཱ ཙིཏྟཙེཏསིཀཱ དྷམྨཱ. ཏཐཱ སམནནྟརཔཙྩཡོཔི.

སཧཛཱཏཔཙྩཡོཏི ཙིཏྟཙེཏསིཀཱ, མཧཱབྷཱུཏཱ ཙེཝ ཧདཡཝཏྠུ ཙ. ཏཐཱ ཨཉྙམཉྙཔཙྩཡོཔི. ནིསྶཡཔཙྩཡོཏི ཝཏྠུརཱུཔཱནི ཙེཝ མཧཱབྷཱུཏཱ, ཙིཏྟཙེཏསིཀཱ ཙ. ཨུཔནིསྶཡཔཙྩཡོཏི ཨཱརམྨཎཱནནྟརཔཀཏཱུཔནིསྶཡཝསེན ཏིཝིདྷོ. ཏཏྠ ཨཱརམྨཎཱུཔནིསྶཡོ ཨཱརམྨཎཱདྷིཔཏིཡེཝ, ཨནནྟརཱུཔནིསྶཡོ པན ཨནནྟརཔཙྩཡོཝ, པཀཏཱུཔནིསྶཡོ པན ཀཱཡིཀསུཁདུཀྑཨུཏུབྷོཛནསེནཱསནཔུགྒལཱ སདྡྷཱསཱིལསུཏཙཱགཔཉྙཱརཱགདོསམོཧཱདཡོ ¶ ཙ.

པུརེཛཱཏཔཙྩཡོཏི ཝཏྠཱརམྨཎཝསེན དུཝིདྷོ. ཏཏྠ ཝཏྠུཔུརེཛཱཏོ ནཱམ ཝཏྠུརཱུཔཱནི, ཨཱརམྨཎཔུརེཛཱཏོ ནཱམ པཙྩུཔྤནྣརཱུཔཱདཱིནེཝ. པཙྪཱཛཱཏཔཙྩཡོཏི ཙིཏྟཙེཏསིཀཱ ཙ. ཨཱསེཝནཔཙྩཡོཏི ཋཔེཏྭཱ ཨཱཝཛྫནདྭཡཾ ལོཀིཡཀུསལཱཀུསལཀིརིཡཱབྱཱཀཏཱ དྷམྨཱཝ.

ཀམྨཔཙྩཡོཏི ¶ སཧཛཱཏནཱནཀྑཎིཀཝསེན དུཝིདྷོ. ཏཏྠ སཧཛཱཏཱ ལོཀིཡལོཀུཏྟརཱ ཨེཝ, ནཱནཀྑཎིཀཱ པན སཱསཝཀུསལཱཀུསལཙེཏནཱ, ཨནཱསཝཀུསལཙེཏནཱ ཨནནྟརམེཝ ཨཏྟནོ ཝིཔཱཀསྶ པཙྩཡོ ཧོཏི. ཝིཔཱཀཔཙྩཡོཏི ཝིཔཱཀཙིཏྟཙེཏསིཀཱ. ཨཱཧཱརཔཙྩཡོཏི ཀབལཱི༹ཀཱརཱཧཱརཕསྶཙེཏནཱཝིཉྙཱཎཝསེན ཙཏུབྦིདྷོ.

ཨིནྡྲིཡཔཙྩཡོཏི ¶ རཱུཔསཏྟཀམནཛཱིཝིཏསུཁདུཀྑསོམནསྶདོམནསྶཨུཔེཀྑཱསདྡྷཱཝཱིརིཡ- སཏིསམཱདྷིཔཉྙཱཨནཉྙཱཏཉྙསྶཱམཱིཏིནྡྲིཡཨཉྙིནྡྲིཡཨཉྙཏཱཝིནྡྲིཡཱནཱིཏི ཝཱིསཏིནྡྲིཡཱནི, ཏེསུ ཨིཏྠིནྡྲིཡཔུརིསིནྡྲིཡཱནི ཝཛྫེཏྭཱ ཝཱིསཏིནྡྲིཡཱནི ཧོནྟི. ཛྷཱནཔཙྩཡོཏི ཝིཏཀྐཝིཙཱརཔཱིཏིསུཁཙིཏྟེཀགྒཏཱཝསེན པཉྩཝིདྷོ. མགྒཔཙྩཡོཏི དིཊྛིསངྐཔྤཝཱཡཱམསཏིསམཱདྷིཝཱཙཱཀམྨནྟཱཛཱིཝམིཙྪཱདིཊྛིཝསེན ནཝཝིདྷོ.

སམྤཡུཏྟཔཙྩཡོཏི ཙིཏྟཙེཏསིཀཱཝ. ཝིཔྤཡུཏྟཔཙྩཡོཏི ཝཏྠུཔུརེཛཱཏཱནི ཙེཝ པཙྪཱཛཱཏཱ ཙིཏྟཙེཏསིཀཱ ཙ. ཨཏྠིཔཙྩཡོཏི ཛཱིཝིཏིནྡྲིཡཀབལཱི༹ཀཱརཨཱཧཱརཨཱརམྨཎཔུརེཛཱཏཱནི ཙེཝ ནིསྶཡཔཙྩཡེ ཝུཏྟདྷམྨཱཔི ཙ. ནཏྠིཔཙྩཡོཏི ཨནནྟརཔཙྩཡོཝ. ཏཐཱ ཝིགཏཔཙྩཡོ ཙ. ཨཝིགཏཔཙྩཡོཏི ཨཏྠིཔཙྩཡོཝ. ཨེཝམིམེ ཙཏུཝཱིསཏི པཙྩཡཱ ནཱམ.

ཨེཏྠ པན ཀཏིཧཱཀཱརེཧི རཱུཔཾ རཱུཔསྶ པཙྩཡོ ཧོཏཱིཏི? ཡཐཱརཧཾ སཧཛཱཏཨཉྙམཉྙནིསྶཡཱཧཱརིནྡྲིཡཨཏྠིཨཝིགཏཝསེན སཏྟདྷཱ པཙྩཡོ ཧོཏི.

རཱུཔཾ ཨརཱུཔསྶ ཡཐཱརཧཾ ཨཱརམྨཎཱདྷིཔཏིསཧཛཱཏཨཉྙམཉྙནིསྶཡཱུཔནིསྶཡཔུརེཛཱཏིནྡྲིཡཝིཔྤ- ཡུཏྟཨཏྠིཨཝིགཏཝསེན ཨེཀཱདསཧི ཨཱཀཱརེཧི པཙྩཡོ ཧོཏི.

སཏྟདྷཱ རཱུཔཾ རཱུཔསྶ, བྷཝཏེཀཱདསེཧི ཏཾ;

པཙྩཡོ ནཱམདྷམྨསྶ, མིསྶཀསྶ ན ཀིཉྩི ཏུ.

ཨརཱུཔཾ ཨརཱུཔསྶ ཡཐཱརཧཾ ཧེཏཱརམྨཎཱདྷིཔཏིཨནནྟརསམནནྟརསཧཛཱཏཨཉྙམཉྙནིསྶཡཱུཔནིསྶཡཱ- སེཝནཀམྨཝིཔཱཀཱཧཱརིནྡྲིཡཛྷཱནམགྒསམྤཡུཏྟཨཏྠིནཏྠིཝིགཏཱཝིགཏ- ཝསེན ¶ ¶ ཨེཀཝཱིསཏིདྷཱ པཙྩཡོ ཧོཏི.

ཨརཱུཔཾ ¶ རཱུཔསྶ ཡཐཱརཧཾ ཧེཏཱདྷིཔཏིསཧཛཱཏཨཉྙམཉྙནིསྶཡཔཙྪཱཛཱཏཀམྨཝིཔཱཀཱཧཱརིནྡྲིཡ- ཛྷཱནམགྒཝིཔྤཡུཏྟཨཏྠིཨཝིགཏཝསེན པནྣརསདྷཱ པཙྩཡོ ཧོཏི.

ཨརཱུཔཾ རཱུཔཱརཱུཔསྶ ཡཐཱརཧཾ ཧེཏཱདྷིཔཏིསཧཛཱཏཨཉྙམཉྙནིསྶཡཀམྨཝིཔཱཀཱཧཱརིནྡྲིཡཛྷཱནམགྒ- ཨཏྠིཨཝིགཏཝསེན ཏེརསདྷཱ པཙྩཡོ ཧོཏི.

ཨེཀཝཱིསཏིདྷཱ ནཱམཾ, པཙྩཡོ བྷཝཏཏྟནོ;

ཏིཔཉྩཧི ཏཾ རཱུཔསྶ, ཨུབྷིནྣཾ ཏེརསདྷཱ པན.

རཱུཔཱརཱུཔཾ རཱུཔསྶ ཡཐཱརཧཾ སཧཛཱཏནིསྶཡཨཏྠིཨཝིགཏཝསེན ཙཏུདྷཱ པཙྩཡོ ཧོཏི.

རཱུཔཱརཱུཔཾ ཨརཱུཔསྶ ཡཐཱརཧཾ སཧཛཱཏཨཉྙམཉྙནིསྶཡིནྡྲིཡཨཏྠིཨཝིགཏཝསེན ཚདྷཱ པཙྩཡོ ཧོཏི.

ཨུབྷོཔི རཱུཔདྷམྨསྶ, ཙཏུདྷཱ ཧོནྟི པཙྩཡཱ;

ཚབྦིདྷཱ ནཱམདྷམྨསྶ, མིསྶཀསྶ ན ཀིཉྩི ཏུ.

ཨེཏེསུ པན པཙྩཡེསུ ཀཏི རཱུཔཱ, ཀཏི ཨརཱུཔཱ, ཀཏིམིསྶཀཱཏི? པུརེཛཱཏཔཙྩཡོ ཨེཀོ རཱུཔདྷམྨོཝ, ཧེཏུཨནནྟརསམནནྟརཔཙྪཱཛཱཏཱསེཝནཀམྨཝིཔཱཀཛྷཱནམགྒསམྤཡུཏྟནཏྠི- ཝིགཏཱནཾ ཝསེན དྭཱདས པཙྩཡཱ ཨརཱུཔདྷམྨཱཝ, སེསཱ པན ཨེཀཱདས པཙྩཡཱ རཱུཔཱརཱུཔམིསྶཀཱཏི ཝེདིཏབྦཱ.

པུན ཀཱལཝསེན ཧེཏུསཧཛཱཏཨཉྙམཉྙནིསྶཡཔུརེཛཱཏཔཙྪཱཛཱཏཝིཔཱཀཱཧཱརིནྡྲིཡཛྷཱནམགྒ- སམྤཡུཏྟཝིཔྤཡུཏྟཨཏྠིཨཝིགཏཱནཾ ¶ ཝསེན པནྣརས པཙྩཡཱ པཙྩུཔྤནྣཱཝ ཧོནྟི. ཨནནྟརསམནནྟརཱསེཝནནཏྠིཝིགཏཔཙྩཡཱ ཨཏཱིཏཱཝ, ཀམྨཔཙྩཡོ ཨཏཱིཏོ ཝཱ ཧོཏི པཙྩུཔྤནྣོ ཝཱ, ཨཱརམྨཎཱདྷིཔཏིཨུཔནིསྶཡཔཙྩཡཱ ¶ པན ཏིཀཱལིཀཱ ཧོནྟི ཀཱལཝིནིམུཏྟཱ ཙ.

སབྦེ ¶ པནིམེ ཙཏུཝཱིསཏི པཙྩཡཱ ཡཐཱརཧཾ ཨཱརམྨཎཱུཔནིསྶཡཀམྨཨཏྠིཔཙྩཡཱནཾ ཝསེན ཙཏཱུསུ པཙྩཡེསུ སངྒཧཾ གཙྪནྟཱིཏི ཝེདིཏབྦཱ.

ཨིཏི ཨབྷིདྷམྨཱཝཏཱརེ པཙྩཡནིདྡེསོ ནཱམ

ཨབྷིདྷམྨཱཝཏཱརོཡཾ, ཝརོ པརམགམྦྷཱིརོ;

ཨིཙྪཏཱ ནིཔུཎཾ བུདྡྷིཾ, བྷིཀྑུནཱ པན སོཏབྦོ.

ཨཏྠཏོ ¶ གནྠཏོ ཙཱཔི, ཡུཏྟིཏོ ཙཱཔི ཨེཏྠ ཙ;

ཨཡུཏྟཾ ཝཱ ཝིརུདྡྷཾ ཝཱ, ཡདི དིསྶཏི ཀིཉྩིཔི.

པུབྦཱཔརཾ ཝིལོཀེཏྭཱ, ཝིཙཱརེཏྭཱ པུནཔྤུནཾ;

དྷཱིམཏཱ སངྒཧེཏབྦཾ, གཧེཏབྦཾ ན དོསཏོ.

ཏིཝིདྷཱ བྱཔྤཐཱནཉྷི, གཏིཡོ དུབྦིདྷཱཔི ཙེ;

ཏསྨཱ ཨུཔཔརིཀྑིཏྭཱ, ཝེདིཏབྦཾ ཝིབྷཱཝིནཱ.

ནིཀཱཡནྟརལདྡྷཱིཧི, ཨསམྨིསྶོ ཨནཱཀུལོ;

མཧཱཝིཧཱརཝཱསཱིནཾ, ཝཱཙནཱམགྒནིསྶིཏོ.

མདྷུརཀྑརསཾཡུཏྟོ, ཨཏྠོ ཡསྨཱ པཀཱསིཏོ;

ཏསྨཱ ཧིཏཏྠཀཱམེན, ཀཱཏབྦོ ཨེཏྠ ཨཱདརོ.

སདྡྷམྨཊྛིཏིཀཱམེན, ཀརོནྟེན ཙ ཡཾ མཡཱ;

པུཉྙམདྷིགཏཾ ཏེན, སུཁཾ པཔྤོནྟུ པཱཎིནོ.

ཨནྟརཱཡཾ ཝིནཱ ཙཱཡཾ, ཡཐཱསིདྡྷིམུཔཱགཏོ;

ཏཐཱ ཀལྱཱཎསངྐཔྤཱ, སིདྡྷིཾ གཙྪནྟུ པཱཎིནཾ.

ནརནཱརིགཎཱཀིཎྞེ ¶ , ཨསཾཀིཎྞཀུལཱཀུལེ;

ཕཱིཏེ སབྦངྒསམྤནྣེ, སུཔསནྣསིཏོདཀེ.

ནཱནཱརཏནསམྤུཎྞེ, ཝིཝིདྷཱཔཎསངྐཊེ;

ཀཱཝེརཔཊྚནེ རམྨེ, ནཱནཱརཱམོཔསོབྷིཏེ.

ཀེལཱསསིཁརཱཀཱརཔཱསཱདཔཊིམཎྜིཏེ;

ཀཱརིཏེ ཀཎྷདཱསེན, དསྶནཱིཡེ མནོརམེ.

ཝིཧཱརེ ¶ ཝིཝིདྷཱཀཱརཙཱརུཔཱཀཱརགོཔུརེ;

ཏཏྠ པཱཙཱིནཔཱསཱདེ, མཡཱ ནིཝསཏཱ སདཱ.

ཨསལླེཁམསཱཁལྱེ, སཱིལཱདིགུཎསོབྷིནཱ;

ཨཡཾ སུམཏིནཱ སཱདྷུ, ཡཱཙིཏེན ཀཏོ སཏཱ.

དེཝཱ ¶ ཀཱལེན ཝསྶནྟུ, ཝསྶཾ ཝསྶཝལཱཧཀཱ;

པཱལཡནྟུ མཧཱིཔཱལཱ, དྷམྨཏོ སཀལཾ མཧིཾ.

ཡཱཝ ཏིཊྛཏི ལོཀསྨིཾ, ཧིམཝཱ པབྦཏུཏྟམོ;

ཏཱཝ ཏིཊྛཏུ སདྡྷམྨོ, དྷམྨརཱཛསྶ སཏྠུནོཏི.

ཨུརགཔུརནིཝསནེན ཨཱཙརིཡེན བྷདནྟབུདྡྷདཏྟེན སཱིལཱཙཱརསམྤནྣེན ཀཏོ ཨབྷིདྷམྨཱཝཏཱརོ ནཱམཱཡཾ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

སམྨཱ ¶ ¶ སམྨཱབྷིསམྦུདྡྷཾ, དྷམྨཾ དྷམྨཔྤཀཱསནཾ;

སཾགྷཾ སཾགྷུཏྟམཾ ལོཀེ, ཝནྡིཏྭཱ ཝནྡནཱརཧཾ.

ནཱམརཱུཔཔརིཙྪེདཾ, པཝཀྑཱམི སམཱསཏོ;

མཧཱཝིཧཱརཝཱསཱིནཾ, ཝཎྞནཱནཡནིསྶིཏཾ.

ཏཏྠ ¶ ཙིཏྟཾ ཙེཏསིཀཾ, ནིབྦཱནནྟི མཏཾ ཏིདྷཱ;

ནཱམཾ རཱུཔཾ ཏུ དུཝིདྷཾ, བྷཱུཏོཔཱདཱཡབྷེདཏོ.

ཀཱམབྷཱུམཱདིབྷེདེན, ཏཏྠ ཙིཏྟཾ ཙཏུབྦིདྷཾ;

ཙེཏོཡུཏྟཱ དྭིཔཉྙཱས, དྷམྨཱ ཙེཏསིཀཱ མཏཱ.

ཙཀྑུསོཏགྷཱནཛིཝ྄ཧཱ-ཀཱཡཝིཉྙཱཎདྷཱཏུཡོ;

སམྤཊིཙྪནཙིཏྟཉྩ, ཏཐཱ སནྟཱིརཎདྭཡཾ.

སོམནསྶསཧགཏཾ, ཨུཔེཀྑཱསཧིཏནྟི ཙ;

ཨིཙྩཱཧེཏུཀཙིཏྟཱནི, པུཉྙཔཱཀཱནི ཨཊྛདྷཱ.

སོམནསྶཡུཏཾ ཏཏྠ, ཧིཏྭཱ སནྟཱིརཎཾ ཏཐཱ;

སཏྟཱཀུསལཔཱཀཱནི, ཏཱནེཝཱཏི ཝིནིདྡིསེ.

པཉྩདྭཱརམནོདྭཱརཱཝཛྫནཾ ¶ ཧསནནྟི ཙ;

ཀྲིཡཙིཏྟམུདཱིརིཏཾ, ཏིཝིདྷམྤི ཨཧེཏུཀཾ.

ཨེཝཾ ཨཊྛཱརསཝིདྷཾ, མཱནསཾ ཧོཏིཧེཏུཀཾ;

མཱུལབྷེདེནཱཀུསལཾ, ཙིཏྟཾ ཏུ ཏིཝིདྷཾ མཏཾ.

སོམནསྶསཧགཏཾ, ཨུཔེཀྑཱསཧིཏཾ ཏཐཱ;

དིཊྛིགཏསམྤཡུཏྟཾ, ཝིཔྤཡུཏྟནྟི བྷེདིཏཾ.

ཨསངྑཱརཾ སསངྑཱརམིཏི བྷིནྣཾ པནཊྛདྷཱ;

ལོབྷམཱུལཾ པཀཱསེནྟི, ཏཏྠཱཀུསལམཱནསཾ.

དོསམཱུལམསངྑཱརཾ, སསངྑཱརནྟིཔི དྭིདྷཱ.

ཝིཙིཀིཙྪཱསཧགཏཾ ¶ , ཨུདྡྷཙྩསཧིཏནྟི ཙ;

མོཧམཱུལཉྩ དུཝིདྷཾ, ཨུཔེཀྑཱཡ སམཱཡུཏཾ.

དྭཱདསཱཀུསལཱནེཝཾ, ཙིཏྟཱནཱིཏི ཝིབྷཱཝཡེ;

ཧིཏྭཱཧེཏུཀཔཱཔཱནི, སོབྷནཱནི ཏཏོ པརཾ.

སོམནསྶསཧགཏཾ, ཨུཔེཀྑཱསཧིཏཾ ཏཐཱ;

དྭིདྷཱ ཉཱཎེན སཾཡུཏྟཾ, ཝིཔྤཡུཏྟནྟི བྷེདིཏཾ.

ཨསངྑཱརཾ སསངྑཱརམིཏི བྷིནྣཾ པནཊྛདྷཱ;

སཧེཏུཀཱམཱཝཙར-པུཉྙཔཱཀཀྲིཡཱ བྷཝེ.

ཀཱམེ ཏེཝཱིས པཱཀཱནི, པུཉྙཱཔུཉྙཱནི ཝཱིསཏི;

ཨེཀཱདས ཀྲིཡཱ ཙེཏི, ཙཏུཔཉྙཱས སབྦཐཱ.

ཏཀྐཙཱརཔཱིཏིསུཁེཀགྒཏཱསཧིཏཾ པན;

པཋམཛ྄ཛྷཱནཀུསལཾ, ཝིཔཱཀཉྩ ཀྲིཡཱ ཏཐཱ.

དུཏིཡཾ ཏཀྐཏོ ཧཱིནཾ, ཏཏིཡཾ ཏུ ཝིཙཱརཏོ;

ཙཏུཏྠཾ པཱིཏིཏོ ཧཱིནཾ, ཨུཔེཀྑེཀགྒཏཱཡུཏཾ.

པཉྩམཾ ¶ པཉྩདསདྷཱ, རཱུཔཱཝཙརམཱིརིཏཾ;

པཉྩམཛ྄ཛྷཱནམེཝེཀམརཱུཔཱཝཙརཾ པན.

ཨཱཀཱསཱནཉྩཱཡཏནཾ, པུཉྙཔཱཀཀྲིཡཱ ཏཐཱ;

ཝིཉྙཱཎཉྩཱཡཏནཉྩ, ཨཱཀིཉྩཉྙཱཡཏནཀཾ;

ནེཝསཉྙཱནཱསཉྙཱཡཏནཾ དྭཱདསདྷཱ བྷཝེ.

སོཏཱཔཏྟིམགྒཙིཏྟཾ, ཕལཙིཏྟཾ ཏཐཱཔརཾ;

སཀདཱགཱམཱནཱགཱམི, ཨརཧཏྟནྟི ཨཊྛདྷཱ.

ཛྷཱནངྒཡོགབྷེདེན, ཀཏྭེཀེཀཾ ཏུ པཉྩདྷཱ;

ཝིཏྠཱརཱནུཏྟརཾ ཙིཏྟཾ, ཙཏྟཱལཱིསཝིདྷཾ བྷཝེ.

རཱུཔཱཝཙརཙིཏྟཱནི ¶ , གཡ྄ཧནྟཱནུཏྟརཱནི ཙ;

པཋམཱདིཛ྄ཛྷཱནབྷེདེ, ཨཱརུཔྤཉྩཱཔི པཉྩམེ.

དྭཱདསཱཀུསལཱནེཝཾ, ཀུསལཱནེཀཝཱིསཏི;

ཚཏྟིཾསེཝ ཝིཔཱཀཱནི, ཀྲིཡཙིཏྟཱནི ཝཱིསཏི.

ཨེཀཝཱིསསཏཾ ཝཱཐ, ཨེཀཱུནནཝུཏཱིཝིདྷཾ;

ཙིཏྟཾ ཏཾསམྤཡོགེན, བྷིནྣཱ ཙེཏསིཀཱ ཏཐཱ.

ཕསྶོ ཙ ཝེདནཱ སཉྙཱ, ཙེཏནེཀགྒཏཱ ཏཐཱ;

ཛཱིཝིཏཾ མནསཱིཀཱརོ, སབྦསཱདྷཱརཎཱ མཏཱ.

ཏཀྐཙཱརཱདྷིམོཀྑཱ ཙ, ཝཱིརིཡཾ ཚནྡཔཱིཏིཡོ;

པཀིཎྞཀཱ ཚ ཨཀྑཱཏཱ, ཏེརསཉྙསམཱནཏཱ.

པཀིཎྞཀཱ ན ཝིཉྙཱཎེ, ཝིཏཀྐོ དུཏིཡཱདིསུ;

ཝིཙཱརོ ཏཏིཡཱདིམྷི, ཨདྷིམོཀྑོ ཏུ ཀངྑིཏེ.

སནྟཱིརཎམནོདྷཱཏུཏྟིཀེསུ ཝཱིརིཡཾ ཏཐཱ;

ཙཏུཏྠསུཁིཏེ པཱིཏི, ཚནྡོཧེཏུམྷི མོམུཧེ.

ཚསཊྛི པཉྩཔཉྙཱས, ཨེཀཱདས ཙ སོལ༹ས;

སཏྟཏི ཝཱིསཏི ཙེཝ, ཏཱནི ཙིཏྟཱནི དཱིཔཡེ.

མོཧཱཧིརིཀཱནོཏྟཔྤ-མུདྡྷཙྩཾ ¶ སབྦཔཱཔཛཾ;

ཨིསྶཱམཙྪེརཀུཀྐུཙྩདོསཱ ཏུ པཊིགྷེ ཏཐཱ.

ལོབྷོ ལོབྷེ ཏུ དིཊྛི ཙ, དིཊྛིཡུཏྟེ ཝིཡུཏྟཀེ;

མཱནོ ཙ ཐིནམིདྡྷཾ ཏུ, སསངྑཱརེསུ པཉྩསུ.

ཀངྑིཏེ ཝིཙིཀིཙྪཱཏི, ཙུདྡསཱཀུསལཱནིམེ;

དྭཱདསཱཀུསལེསྭེཝ, ནིཡམེན ཝཝཏྠིཏཱ.

སདྡྷཱ སཏི ཧིརོཏྟཔྤཾ, ཨལོབྷཱདོསམཛ྄ཛྷཏཱ;

ཀཱཡཙིཏྟཱནཾ པསྶདྡྷི, ལཧུཏཱ མུདུཏཱ ཏཐཱ.

ཀམྨཉྙཏཱ ¶ ཙ པཱགུཉྙཨུཛུཏཱཏི ཡུགཱ ཚ ཙ;

ཨེཀཱུནཝཱིསཏི དྷམྨཱ, ཨཉྙམཉྙཱཝིཡོགིནོ;

ཨེཀཱུནསཊྛིཙིཏྟེསུ, སོབྷནེསུ པཝཏྟིཏཱ.

སམྨཱཝཱཙཱ ཙ ཀམྨནྟཱཛཱིཝཱཏི ཝིརཏཱི ཨིམཱ;

ལོཀུཏྟརེ སདཱ སབྦཱ, སཧ ཀཱམསུབྷེ ཝིསུཾ.

ཀརུཎཱམུདིཏཱ ནཱནཱ, རཱུཔེ པཉྩམཝཛྫིཏེ;

ཀདཱཙི ཀཱམེ ཀུསལེ, ཀྲིཡཙིཏྟེ སཧེཏུཀེ.

ཏིཧེཏུཀེསུ ཙིཏྟེསུ, པཉྙཱ སབྦཏྠ ལབྦྷཏི;

ཨེཏེ སདྡྷཱདཡོ དྷམྨཱ, པཉྩཝཱིསཏི སོབྷནཱ.

ཨིསྶཱམཙྪེརཀུཀྐུཙྩཝིརཏཱིཀརུཎཱདཡོ;

ནཱནཱ ཀདཱཙི མཱནོ ཙ, ཐིནམིདྡྷཾ ཏཐཱ སཧ.

སཏྟ སབྦཏྠ ཛཱཡནྟི, ཚ ཏུ དྷམྨཱ ཡཐཱརཧཾ;

ཙུདྡསཱཀུསལེསྭེཝ, སོབྷནེསྭེཝ སོབྷནཱ.

དྭེཔཉྙཱས པནིཙྩེཝཾ, དྷམྨེ སངྒཡ྄ཧ མཱནསེ;

ལབྦྷམཱནེ ཝིབྷཱཝེཡྻ, པཙྩེཀམྤི ཝིཙཀྑཎོ.

སོབྷནཉྙསམཱནཱ ཙ, པཋམེ ཝིརཏཱི ཝིནཱ;

དུཏིཡཱདཱིསུ ཏཀྐཉྩ, ཝིཙཱརཾ ཏཏིཡཱདིསུ.

ཙཏུཏྠཱདཱིསུ ¶ པཱིཏིཉྩ, ཀརུཎཱདིཉྩ པཉྩམེ;

ཧིཏྭཱ ནེཝ ཝིཡོཛེཡྻ, སངྑིཔིཏྭཱན པཉྩདྷཱ.

པཉྩཏིཾས ཙཏུཏྟིཾས, ཏེཏྟིཾས ཙ ཡཐཱཀྐམཾ;

དྭཏྟིཾས ཏིཾས ཨེཝཱཐ, ཛཱཡནྟཱིཏི མཧགྒཏེ.

གཧེཏྭཱ ཝིརཏཱི སབྦཱ, ཧིཏྭཱན ཀརུཎཱདཡོ;

པཋམེ དུཏིཡཱདིམྷི, ཝིཏཀྐཱདིཾ ཝིནཱ ཏཐཱ.

པཉྩདྷཱཝ ¶ གཎེཡྻེཝཾ, ཚཏྟིཾསཱ ཙ ཡཐཱཀྐམཾ;

པཉྩཏིཾས ཙཏུཏྟིཾས, ཏེཏྟིཾསདྭཡམུཏྟརེ.

སོབྷནཉྙསམཱནཱ ཙ, ཀཱམེསུ ཀུསལེ ཀྲིཡེ;

ཧིཏྭཱ ཝིརཏིཡོ པཱཀེ, ཝིརཏཱིཀརུཎཱདཡོ.

ཉཱཎཡུཏྟེ སོམནསྶེ, ཝིཡུཏྟེ ཉཱཎཝཛྫིཏཱ;

ཨུཔེཀྑཀེ པཱིཏིཧཱིནཱ, ཝིཔྤཡུཏྟེ དྭཡཾ ཝིནཱ.

ཙཏུདྷཱ ཏིཝིདྷེསྭེཝཾ, ཝིགཎེཡྻ དྭཡཾ དྭཡཾ;

ན སནྟུཔེཀྑཱསཧིཏེ, ཀརུཎཱདཱིཏི ཀེཙན.

ཨཊྛཏིཾས སཏྟཏིཾསདྭཡཾ ཚཏྟིཾསཀཾ སུབྷེ;

པཉྩཏིཾས ཙཏུཏྟིཾསདྭཡཾ ཏེཏྟིཾསཀཾ ཀྲིཡེ.

ཏེཏྟིཾས པཱཀེ དྭཏྟིཾསདྭཡེཀཏིཾསཀཾ བྷཝེ;

སཧེཏུཀཱམཱཝཙརཔུཉྙཔཱཀཀྲིཡཱམནེ.

མོཧཱདཡོ སམཱནཱ ཙ, པཋམེ ལོབྷདིཊྛིཡཱ;

ཏཏིཡེ ལོབྷམཱནེན, ཛཱཡནྟེཀཱུནཝཱིསཏི.

ཨཊྛཱརས པཱིཏིཧཱིནཱ, པཉྩམེ སཏྟམེ ཏཐཱ;

ནཝམེ དོསཀུཀྐུཙྩམཙྪརིསྶཱཧི ཝཱིསཏི.

པཋམཱདཱིསུ ཝུཏྟཱཝ, དུཏིཡཱདཱིསུ ཛཱཡརེ;

ཐིནམིདྡྷེནེཀཝཱིས, ཝཱིས དྭེཝཱིསཏིཀྐམཱ.

ཚནྡཔཱིཏིཾ ¶ ཝིནུདྡྷཙྩེ, ཀངྑིཏེ ནིཙྪཡཾ ཝིནཱ;

པཉྩདསེཝ ཀངྑཱཡ, ཨསུབྷེསུ ཝིབྷཱཝཡེ.

སིཏེ སམཱནཱ ནིཙྪནྡཱ, དྭཱདསེཀཱདསེཝ ཏུ;

པཱིཏིཾ ཧིཏྭཱན ཝོཊྛབྦེ, ཝཱིརིཡཾ སུཁཏཱིརཎེ.

དྭཡཾ ཧིཏྭཱ མནོདྷཱཏུ, ཨུཔེཀྑཱཏཱིརཎེ དས;

སཏྟ སཱདྷཱརཎཱ ཨེཝ, པཉྩཝིཉྙཱཎསམྦྷཝཱ.

སུཉྙཏཉྩཱནིམིཏྟཉྩ, ཏཐཱཔཎིཧིཏནྟི ཙ;

ཏིཝིདྷཱཀཱརམཱིརེནྟི, ནིབྦཱནམམཏཾ བུདྷཱ.

ཡཾ ཨཱརབྦྷ པཝཏྟནྟཾ, ཏཏྠཱནུཏྟརམཱནསཾ;

སུཉྙཏཱདིཝིམོཀྑོཏི, ནཱམམཱལམྦཏོ ལབྷེ.

སོཔཱདིསེསནིབྦཱནདྷཱཏུ ཙེཝ ཏཐཱཔརཱ;

ཨནུཔཱདིསེསཱ ཙཱཏི, དུཝིདྷཱ པརིཡཱཡཏོ.

ཏདེཏཾ ཝཱནནིཀྑནྟམཙྩནྟཾ སནྟིལཀྑཎཾ;

ཏཾ ནཱམེཏཱིཏི ནིབྦཱནཾ, ནམནྟཱིཏི ཏཏོཔརེ;

ཏེཔཉྙཱསཱཏི ནཱམཱནི, ཙཏུཔཉྙཱས སབྦཐཱ.

ཨིཏི ནཱམརཱུཔཔརིཙྪེདེ ནཱམཏྟཡཝིབྷཱགོ ནཱམ

སབྷཱཝོ ¶ ལཀྑཎཾ ནཱམ, ཀིཙྩསམྤཛྫནཱ རསོ;

གཡ྄ཧཱཀཱརོ ཨུཔཊྛཱནཾ, པདཊྛཱནཾ ཏུ པཙྩཡོ.

ཨཏྟུཔལདྡྷིསངྑཱཏཱ, སམྤཏྟཱ ཙ པནཏྠཏོ;

ལཀྑཎརསུཔཊྛཱནཱ, ཝོཧཱརཱབྷོགབྷེདིཏཱ.

ཏེཔཉྙཱསསབྷཱཝེསུ, ཏསྨཱ བྷེདཾ ཡཐཱརཧཾ;

ལཀྑཎཱདིཔྤཀཱརེཧི, པཝཀྑཱམི ཨིཏོ པརཾ.

ཙིནྟེཏཱིཏི བྷཝེ ཙིཏྟཾ, ཙིནྟནམཏྟམེཝ ཝཱ;

སམྤཡུཏྟཱཐ ཝཱ ཏེན, ཙིནྟེནྟཱིཏི ཙ གོཙརཾ.

ཕུསཏཱིཏི བྷཝེ ཕསྶོ, ཕུསནཾ ཝཱཐ ཀེཝལཾ;

སམྤཡུཏྟཱཐ ཝཱ ཏེན, ཕུསནྟཱིཏི ཙ གོཙརཾ.

ཨེཝཾ ཀཏྟརི བྷཱཝེ ཙ, ཀརཎེ ཙ ཡཐཱརཧཾ;

ཏེཔཉྙཱསསབྷཱཝེསུ, སདྡནིབྦཙནཾ ནཡེ.

ཨཱལམྦཎམནཾ ཙིཏྟཾ, ཏཾཝིཛཱནནལཀྑཎཾ;

སཧཛཱདྷིཊྛཱནརསཾ, ཙིནྟཱཀཔྤོཏི གཡ྄ཧཏི.

གོཙརཱནུབྷཝརསཱ, ཨནུབྷུཏྟཱིཏི གཡ྄ཧཏི.

ཨཱཀཱརགཧཎཾ ¶ སཉྙཱ, སཱ སཉྫཱནནལཀྑཎཱ;

ནིམིཏྟུཔྤཱདནརསཱ, ཨུཔལཀྑཱཏི གཡ྄ཧཏི.

ཙེཏནཱ ཙིཏྟཝིཔྥཱརཱ, སཱཡཾ བྱཱཔཱརལཀྑཎཱ;

ཀམྨནྟཱཡཱུཧནརསཱ, སཾཝིདྷཱནནྟི གཡ྄ཧཏི.

ཨེཀགྒཏཱ ཨཝིཀྑེཔོ, སཱཝིསཱཧཱརལཀྑཎཱ;

སམྤིཎྜནརསཱ ཙིཏྟཾ, སམོདྷཱནནྟི གཡ྄ཧཏི.

ཛཱིཝིཏཾ ཛཱིཝནརསཾ, ཨཱཡུབནྡྷོཏི གཡ྄ཧཏི.

སཱརཎཱ མནསཱིཀཱརོ, སམནྣཱཧཱརལཀྑཎོ;

སཾཡོཛནརསོ ཙིཏྟ-པཊིཔཏྟཱིཏི གཡ྄ཧཏི.

སངྐཔྤནལཀྑཎོ ཏཀྐོ, སཧཛཱབྷིནིརོཔནོ;

ཨཱལམྦཱཧནནརསོ, སནྣིརུཛ྄ཛྷོཏི གཡ྄ཧཏི.

ཝིཙཱརོ ཨནུསནྡྷཱནོ, ཨནུམཛྫནལཀྑཎོ;

ཙིཏྟཱནུཡོཛནརསོ, ཨནུཔེཀྑཱཏི གཡ྄ཧཏི.

ཨདྷིམོཀྑོ ཨསཾསཔྤོ, སུསནྣིཊྛཱནལཀྑཎོ;

ནིཙྩལཱཔཱདནརསོ, དལ༹ྷཝུཏྟཱིཏི གཡ྄ཧཏི.

ཝཱིརིཡཾ པན ཝཱཡཱམོ, མཧུསྶཱཧནལཀྑཎོ;

ཀིཙྩཱསཾསཱིདནརསོ, ཨུཔཏྠམྦྷོཏི གཡ྄ཧཏི.

ཨཱལམྦཏྠིཀཏཱ ¶ ཚནྡོ, ཀཏྟུཀཱམཏལཀྑཎོ;

ཨཱལམྦཎེསནརསོ, ཧཏྠཱདཱནནྟི གཡ྄ཧཏི.

སམྤཱིནནརསཱ པཱིཏི, པཱམོཛྫམིཏི གཡ྄ཧཏི.

ཙེཏོསདྡཧནཾ སདྡྷཱ, བྷཱུཏོཀཔྤནལཀྑཎཱ;

ཧིཏཔཀྑནྡནརསཱ, ཨདྷིམུཏྟཱིཏི གཡ྄ཧཏི.

ཨསམྨོསཱ ¶ སབྷཱཝེསུ, སཏི དྷཱརཎལཀྑཎཱ;

དྷམྨཱཔིལཱཔནརསཱ, ཨཔྤམཱདོཏི གཡ྄ཧཏི.

ཧིརཱི ཛེགུཙྪཱ པཱཔེསུ, སཱ ཧརཱཡནལཀྑཎཱ;

ཧཱིལ༹སཾཀོཙནརསཱ, པཱཔལཛྫཱཏི གཡ྄ཧཏི.

པཱཔསཱརཛྫམོཏྟཔྤཾ, ཨུབྦེགུཏྟཱསལཀྑཎཾ;

བྷཡསངྐོཙནརསཾ, ཨཝིསྶཱསོཏི གཡ྄ཧཏི.

མུཏྟཔྤཝཏྟནརསོ, ཨསཾསགྒོཏི གཡ྄ཧཏི.

ཨདོསོ ཙིཏྟསཱཁལྱཾ, ཨབྱཱཔཛྫནལཀྑཎོ;

སཎྷཔྤཝཏྟནརསོ, སོམྨབྷཱཝོཏི གཡ྄ཧཏི.

ཨམོཧོ ཁལིཏཱབྷཱཝོ, པཊིཝིཛ྄ཛྷནལཀྑཎོ;

ཝིསཡོབྷཱསནརསོ, པཊིབོདྷོཏི གཡ྄ཧཏི.

ཏཏྲམཛ྄ཛྷཏྟཏོཔེཀྑཱ, སམཱིཀརཎལཀྑཎཱ;

པསྶདྡྷི ཀཱཡཙིཏྟཱནཾ, དརཐཱབྷཱཝལཀྑཎཱ;

ཨཔརིཔྥནྡནརསཱ, སཱིཏིབྷཱཝོཏི གཡ྄ཧཏི.

ལཧུཏཱ ཀཱཡཙིཏྟཱནཾ, ཨདནྡྷཱཀཱརལཀྑཎཱ;

ཨཝིཏྠཱརརསཱ སལླཧུཀཝུཏྟཱིཏི གཡ྄ཧཏི.

མུདུཏཱ ཀཱཡཙིཏྟཱནཾ, ཀཀྑལཱ༹བྷཱཝལཀྑཎཱ;

ཀིཙྩཱཝིརོདྷནརསཱ, ཨནུཀུལྱནྟི གཡ྄ཧཏི.

ཀམྨཉྙཏཱ ¶ ཨུབྷིནྣམྤི, ཨལཾཀིཙྩསྶ ལཀྑཎཱ;

པཝཏྟིསམྤཏྟིརསཱ, ཡོགབྷཱཝོཏི གཡ྄ཧཏི.

ཏཐཱ པཱགུཉྙཏཱ དྭིནྣཾ, ཝིསདཱཀཱརལཀྑཎཱ;

སུཁཔྤཝཏྟནརསཱ, སེརིབྷཱཝོཏི གཡ྄ཧཏི.

ཨུཛུཏཱ ¶ ཀཱཡཙིཏྟཱནཾ, ཀུཊིལཱབྷཱཝལཀྑཎཱ;

ཛིམྷནིམྨདནརསཱ, ཨུཛུཝུཏྟཱིཏི གཡ྄ཧཏི.

སམྨཱཝཱཙཱ ཝཙཱིསུདྡྷི, ཝཱཙཱསཾཡམལཀྑཎཱ;

མིཙྪཱཝཱཙོརམརསཱ, ཝཙཱིཝེལཱཏི གཡ྄ཧཏི.

སམྨཱཀམྨཾ ཀྲིཡཱསུདྡྷཾ, སམྨཱཀརཎལཀྑཎཾ;

མིཙྪཱཀམྨོརམརསཾ, ཀྲིཡཱཝེལཱཏི གཡ྄ཧཏི.

སམྨཱཛཱིཝོ ཝིསུདྡྷེཊྛི, ཨལླིཊྛཱཛཱིཝལཀྑཎོ;

མིཙྪཱཛཱིཝོརམརསོ, སམྨཱཝུཏྟཱིཏི གཡ྄ཧཏི.

ཀརུཎཱ དཱིནསཏྟེསུ, དུཀྑཱཔནཡལཀྑཎཱ;

སོཏྠིཏཱཔཏྠནརསཱ, ཨནུཀམྤཱཏི གཡ྄ཧཏི.

སུཁཊྛིཏེསུ མུདིཏཱ, ཨནུམོདནལཀྑཎཱ;

ཙེཏོཝིཀཱསནརསཱ, ཨཝིརོདྷོཏི གཡ྄ཧཏི.

ཙེཏོསཱརཛྫནཱ ལོབྷོ, ཨཔརིཙྩཱགལཀྑཎོ;

ཨཱལམྦགིཛ྄ཛྷནརསོ, ཨབྷིལགྒོཏི གཡ྄ཧཏི.

ཙེཏོབྱཱཔཛྫནཾ དོསོ, སམྤདུསྶནལཀྑཎོ;

ཨཱལམྦཎགྷཱཏརསོ, ཙཎྜིཀྐམིཏི གཡ྄ཧཏི.

པཱཔཱཛིགུཙྪཱཧིརིཀཾ, ནིལླཛྫཱཀཱརལཀྑཎཾ;

པཱཔོཔལཱཔནརསཾ, མལགྒཱཧོཏི གཡ྄ཧཏི.

ཨསཱརཛྫནམནོཏྟཔྤམནུཏྟཱསནལཀྑཎཾ ¶ ;

པཱཔཔཀྑནྡནརསཾ, པཱགབྦྷམིཏི གཡ྄ཧཏི.

དིཊྛི ¶ དལ༹ྷཝིཔལླཱསོ, སཱ པརཱམཱསལཀྑཎཱ;

ཏུཙྪཱབྷིནིཝེསནརསཱ, མིཙྪཱགཱཧོཏི གཡ྄ཧཏི.

‘‘ཨཧསྨཱི’’ཏི མཉྙམཱནོ, སོ སམུནྣཏིལཀྑཎོ;

ཀེཏུསམྤགྒཧརསོ, ཨཧཾཀཱརོཏི གཡ྄ཧཏི.

པརསམྤཏྟཱིསུ ཨིསྶཱ, ཨཀྑམཱཀཱརལཀྑཎཱ;

ཙེཏོཝིཀུཙནརསཱ, ཝིམུཁཏྟནྟི གཡ྄ཧཏི.

པརིགྒཧེསུ མཙྪེརཾ, སནྣིགཱུཧནལཀྑཎཾ;

སཱམཉྙཱསཧནརསཾ, ཝེཝིཙྪམིཏི གཡ྄ཧཏི.

ཙེཏོཔཧནནཾ ཐཱིནཾ, ཏཾ སཾསཱིདནལཀྑཎཾ;

ཨུསྶཱཧབྷཉྫནརསཾ, སཾཁིཏྟཏྟནྟི གཡ྄ཧཏི.

ཝིགྷཱཏོ སཧཛཱཏཱནཾ, མིདྡྷཾ མོཧནལཀྑཎཾ;

སཏྟིསཾབྷཉྫནརསཾ, ཨཱཏུརཏྟནྟི གཡ྄ཧཏི.

ཨུདྡྷཙྩཾ ཙིཏྟཝིཀྑེཔོ, ཨཝཱུཔསམལཀྑཎཾ;

ཙེཏོནཝཊྛཱནརསཾ, བྷནྟཏྟམིཏི གཡ྄ཧཏི.

ཝིཔྤཊིསཱརོ ཀུཀྐུཙྩམནུསོཙནལཀྑཎཾ;

ཨཏྟཱནུསོཙནརསཾ, པཙྪཱཏཱཔོཏི གཡ྄ཧཏི.

ཀངྑཱཡནཱ ཝིཙིཀིཙྪཱ, ཨསནྣིཊྛཱནལཀྑཎཱ;

ཨནེཀགཱཧནརསཱ, ཨཔྤཏིཊྛཱཏི གཡ྄ཧཏི.

ཨིཙྩེཝཾ ལཀྑཎཱདཱིཧི, ཝིབྷཱཝེཡྻ ཝིཙཀྑཎོ;

ཏེཔཉྙཱསསབྷཱཝེསུ, སབྷཱཝཱཀཱརལཀྑཎཾ.

ཨིཏི ནཱམརཱུཔཔརིཙྪེདེ ལཀྑཎརསུཔཊྛཱནཝིབྷཱགོ ནཱམ

ཨེཝཾ བྷེདསབྷཱཝེསུ, ཏེསྭེཝ པུན སངྒཧཾ;

སབྷཱཝཏྠཝིསེསེཧི, པཝཀྑཱམི ཨིཏོ པརཾ.

ཨསཱདྷཱརཎཉཱཎེཧི, སཏྠཱ ཝཏྠུཝིཝེཙཀོ;

སངྒཧེཏྭཱ སབྷཱགེཧི, དྷམྨེ དསྶེསི ཙཀྑུམཱ.

དིཊྛིབྷིནིཝེསཊྛེན, ཡཐཱབྷཱུཏསབྷཱཝཏོ;

པརམཱམསཏིཙྩེཀཱ, པརཱམཱསོཏི བྷཱསིཏཱ.

ཀིལེསཱསུཙིབྷཱཝེན, ཝཎསྶཱཝརསོ ཝིཡ;

ཨཱལིམྤནྟཱཝ སནྟཱནཾ, སཝནྟཱིཏི པཀཱསིཏཱ.

ཀཱམཏཎྷཱ བྷཝཏཎྷཱ, དིཊྛཱཝིཛྫཱཏི ཨཱསཝཱ;

ཙཏྟཱརོ ཨཱསཝཊྛེན, ཏཡོ དྷམྨཱ སབྷཱཝཏོ.

ཨེཏེཝོ ¶ གྷཱཏི ཝུཏྟཱཝ, དྭཱརཱལམྦཱབྷིཝཱཧིནོ;

ཨོཏྠརིཏྭཱ པརཱབྷཱུཏེ, ཧརནྟཱ པཱཎིནོ བྷཝེ.

ཡོགཱཏི ¶ ཙཱཧུ ཏེ ཨེཝ, པཱཎིནོ བྷཝཡནྟཀེ;

དྭཱརཱལམྦཱབྷིསམྦནྡྷཱ, ཡནྟབནྡྷཱཝ ཡོཛིཏཱ.

སནྟཱནམདྷིགཎྷནྟཱ, མཱལུཝཱཝ མཧཱཏརུཾ;

གཎྷནྟཱ དལ༹ྷམཱལམྦཾ, མཎྜཱུཀམིཝ པནྣགོ.

ཀཱམཏཎྷཱ ཙ དིཊྛི ཙ, ཨུཔཱདཱནཱ ཙཏུབྦིདྷཱ;

དིཊྛི དིཊྛིསཱིལབྦཏ-མཏྟཝཱདོཏི བྷེདིཏཱ.

ཀཱཡེན ཀཱཡཾ གནྠེནྟཱ, དུཔྤམུཉྩཱནུཝེཋིནོ;

ཀཐིཏཱ ཀཱཡགནྠཱཏི, ཏཎྷཱབྱཱཔཱདདིཊྛིཡོ.

སཱིལབྦཏཔརཱམཱསོ, ཨིཏི དིཊྛི ཝིབྷེདིཏཱ;

ཨིདཾསཙྩཱབྷིནིཝེསོ, ཨིཏི ཙེཝཾ ཙཏུབྦིདྷཱ.

ནེཀྑམྨཾ པལིབོདྷེནྟཱ, བྷཱཝནཱཔརིཔནྠཀཱ;

སནྟཱནམཎྜཀོསཱཝ, པརིཡོནནྡྷཀཱཏི ཙ.

ཀཱམཙྪནྡོ ཙ བྱཱཔཱདོ, ཐིནམིདྡྷཉྩ སཾསཡོ;

ཨཝིཛྫུདྡྷཙྩཀུཀྐུཙྩམིཏི ནཱིཝརཎཱ མཏཱ.

ཨཱགཱལ༹ྷཾ པརིཡཱདཱཡ, ཨོགཡ྄ཧནུཔྤཝཏྟིནོ;

ཡོཔྤརོགཱཝ སནྟཱན-མནུསེནྟཱིཏི བྷཱསིཏཱ.

ཀཱམརཱགོ བྷཝརཱགོ, པཊིགྷོ མཱནདིཊྛིཡོ;

ཀངྑཱཝིཛྫཱཏི སཏྟེཝ, ཚ དྷམྨཱནུསཡཱ མཏཱ.

དྭཱརཱལམྦཎབནྡྷེན, པཱཎཱིནཾ བྷཝམཎྜལེ;

སཾཡོཛནཱནི ཝུཏྟཱནི, པཱསབནྡྷཱཝ པཀྑིནཾ.

ཀཱམརཱུཔཱརཱུཔརཱགཱ, པཊིགྷོ མོཧསཾསཡོ;

དིཊྛི སཱིལབྦཏཾ མཱནོ, ཨུདྡྷཙྩེན དསཱ བྷཝེ.

རཱུཔཱརཱུཔརཱགུདྡྷཙྩཾ, ཨབྷིདྷམྨེ ཝིནཱ པུན;

བྷཝརཱགིསྶ མཙྪེརཾ, གཧེཏྭཱ དསདྷཱ སིཡུཾ.

སཾཀླེཔཡནྟི ¶ ¶ སནྟཱནཾ, ཨུཔགྷཱཏེནྟི པཱཎིནོ;

སཧཛཱཏེཀླེསེནྟཱིཏི, ཀིལེསཱཏི པཀཱསིཏཱ.

ནཝསངྒཧིཏཱ ཨེཏྠ, དིཊྛིལོབྷཱ པཀཱསིཏཱ;

སཏྟསངྒཧིཏཱཝིཛྫཱ, པཊིགྷོ པཉྩསངྒཧོ.

ཙཏུསངྒཧིཏཱ ཀངྑཱ, མཱནུདྡྷཙྩཱ ཏིསངྒཧཱ;

དུཀསངྒཧིཏཾ ཐཱིནཾ, ཀུཀྐུཙྩམེཀསངྒཧཾ.

དྭིདྷཱཧིརིཀནོཏྟཔྤ-མིསྶཱམཙྪརིཡཾ ཏཐཱ;

ཨིཙྩེཝཾ དསདྷཱ ཝུཏྟཱ, པཱཔཀེསྭེཝ སངྒཧཱ.

པརཱམཱསཱསཝོགྷཱ ཙ, ཡོགུཔཱདཱནགནྠཏོ;

ནཱིཝཱརཎཱནུསཡཏོ, སཾཡོཛནཀིལེསཏོ.

ཙུདྡསེཝ ཏུ སངྑེཔཱ, སཏྟཔཉྙཱས བྷེདཏོ;

ཡཐཱདྷམྨཱནུསཱརེན, ཙིཏྟུཔྤཱདེསུ ཡོཛཡེ.

ཏཏོཔརེ ནོཔརཱམཱ-སཱདིབྷེདིཏསངྒཧཱ;

ཙིཏྟཾ ཙེཏསིཀཾ རཱུཔཾ, ནིབྦཱནམིཏི དཱིཔཡེ.

ཨིཙྩཱཀུསལདྷམྨཱནཾ, ཉཏྭཱ སངྒཧམུཏྟརཾ;

མིསྶཀཱ ནཱམ ཝིཉྙེཡྻཱ, ཡཐཱསམྦྷཝཏོ ཀཐཾ;

པཱདཔསྶེཝ ¶ མཱུལཱནི, ཐིརབྷཱཝཱཡ པཙྩཡཱ;

མཱུལབྷཱཝེན དྷམྨཱནཾ, ཧེཏཱུ དྷམྨཱ ཚ དཱིཔིཏཱ.

ཝིཏཀྐོ ¶ ཙ ཝིཙཱརོ ཙ, པཱིཏི ཙེཀགྒཏཱ ཏཐཱ;

སོམནསྶཾ དོམནསྶཾ, ཨུཔེཀྑཱཏི ཙ ཝེདནཱ.

ཨཱཧཙྩུཔནིཛ྄ཛྷཱཡནྟཱ, ནིཛ྄ཛྷཱནཊྛེན པཙྩཡཱ;

ཛྷཱནདྷམྨཱཏི སཏྠཱཧ, པཉྩ ཝཏྠུསབྷཱཝཏོ.

སམྨཱདིཊྛི ཙ སངྐཔྤོ, ཝཱཡཱམོ ཝིརཏིཏྟཡཾ;

སམྨཱསཏི སམཱདྷཱི ཙ, མིཙྪཱདིཊྛི ཙ སམྦྷཝཱ.

སམྨཱམིཙྪཱ ཙ ནཱིཡནྟཱ, ནིཡྻཱནཊྛེན པཙྩཡཱ;

མགྒངྒཱ དྭཱདསཀྑཱཏཱ, ནཝ དྷམྨཱ སབྷཱཝཏོ.

ཨཏྟབྷཱཝཾ པཝཏྟེནྟཱ, ཨོཛཊྛམཀཝེདནཾ;

པཊིསནྡྷིནཱམརཱུཔ-མཱཧརནྟཱ ཡཐཱཀྐམཾ.

དྷམྨཱནཾ སཧཛཱཏཱནཾ, ཨིནྡྲིཡཊྛེན པཙྩཡཱ;

ཨཏྟཱནམིསྶརཊྛེན, ཨནུཝཏྟཱཔཀཱ ཏཐཱ.

སདྡྷཱ ཙ སཏི པཉྙཱ ཙ, ཝཱིརིཡེཀགྒཏཱཔི ཙ;

ཝེདནཱ ཛཱིཝིཏཾ ཙིཏྟཾ, ཨཊྛ རཱུཔིནྡྲིཡཱནི ཙ.

ཀཐཾ ཛཱིཝིཏམེཀཾ ཏུ, སུཁཾ དུཀྑནྟི ཝེདནཱ;

སོམནསྶཾ དོམནསྶཾ, ཨུཔེཀྑཱཏི ཙ བྷེདིཏཱ.

པཉྙཱདིམགྒེནཉྙཱཏ-ཉྙསྶཱམཱིཏིནྡྲིཡཾ བྷཝེ;

མཛ྄ཛྷེ ཨཉྙིནྡྲིཡམནྟེ, ཨཉྙཱཏཱཝིནྡྲིཡཾ ཏཐཱ.

སོལ༹སེཝ ¶ སབྷཱཝེན, ཨིནྡྲིཡཊྛཝིབྷཱགཏོ;

ཨིནྡྲིཡཱནཱིཏི ཝུཏྟཱནི, བཱཝཱིསཏི ཝིབྷཱཝཡེ.

དལ༹ྷཱདྷིཊྛིཏསནྟཱནཱ ¶ , ཝིཔཀྑེཧི ཨཀམྤིཡཱ;

བལཝནྟསབྷཱཝེན, བལདྷམྨཱ པཀཱསིཏཱ.

སདྡྷཱ སཏི ཧིརོཏྟཔྤཾ, ཝཱིརིཡེཀགྒཏཱ ཏཐཱ;

པཉྙཱཧིརིཀཱནོཏྟཔྤ-མིཙྩེཝཾ ནཝདྷཱ མཏཱ.

ཛེཊྛཱ པུབྦངྒམཊྛེན, པུཉྙཱཔུཉྙཔཝཏྟིཡཾ;

པཙྩཡཱདྷིཔྤཏེཡྻེན, སཧཛཱནཾ ཡཐཱརཧཾ.

ཙཏྟཱརོདྷིཔཏཱི ཝུཏྟཱ, ཨཱདྷིཔྤཙྩསབྷཱཝཏོ;

ཚནྡོ ཙིཏྟཉྩ ཝཱིརིཡཾ, ཝཱིམཾསཱཏི ཙ ཏཱདིནཱ.

པཉྩསངྒཧིཏཱ པཉྙཱ, ཝཱཡཱམེཀགྒཏཱ པན;

ཙཏུསངྒཧིཏཱ ཙིཏྟཾ, སཏི ཙེཝ ཏིསངྒཧཱ.

སངྐཔྤོ ཝེདནཱ སདྡྷཱ, དུཀསངྒཧིཏཱ མཏཱ;

ཨེཀེཀསངྒཧཱ སེསཱ, ཨཊྛཝཱིསཏི བྷཱསིཏཱ;

ཨིཙྩེཝཾ སཏྟདྷཱ བྷེདོ, ཝུཏྟོ མིསྶཀསངྒཧོ.

ཧེཏུཛྷཱནངྒམགྒངྒཱ, ཨཱཧཱརིནྡྲིཡཏོ ཏཐཱ;

བལཱདྷིཔྤཏིཏོ ཙེཝ, པུཉྙཱཔུཉྙཱདིམིསྶཏཱ;

ཚཏྟིཾསེཝ སབྷཱཝེན, ཙཏུསཊྛི པབྷེདཏོ.

ཨིཙྩེཝཾ སངྒཧེཏྭཱན, ཝིབྷཱཝེཡྻ ཏཏོ པརཾ;

ཙིཏྟུཔྤཱདཔབྷེདེསུ, ཡཐཱསམྦྷཝཏོ ཀཐཾ.

སིཏཱཝཛྫནཝིཉྙཱཎཾ, སམྤཊིཙྪནཏཱིརཎཱ;

ཨཊྛཱརསཱཧེཏུཀཱཝ, མོམཱུཧཱ ཨེཀཧེཏུཀཱ.

སེསཱ ཏུ ཀུསལཱ ཉཱཎཝིཡུཏྟཱ ཙ དྭིཧེཏུཀཱ;

ཙིཏྟུཔྤཱདཱཔརེ སཏྟ-ཙཏྟཱལཱིས ཏིཧེཏུཀཱ.

པཉྩཝིཉྙཱཎམཛ྄ཛྷཱནཾ ¶ , དྭིཛྷཱནངྒིཀམཱིརིཏཾ;

ཙཏུཏྠཔཉྩམཛ྄ཛྷཱནཾ, ཏིཛྷཱནཾ ཏཏིཡཾ མཏཱ.

ཙཏུཛྷཱནཾ ཏུ དུཏིཡཾ, ཀཱམེ ཙ སུཁཝཛྫིཏཱ;

པཉྩཛྷཱནཾ ཏུ པཋམཾ, ཀཱམེ ཙ སུཁིཏཱ མཏཱ.

པཋམཱནུཏྟརཾ ¶ ཛྷཱནཾ, ཨཊྛམགྒངྒིཀཾ མཏཾ;

སཏྟམགྒངྒིཀཾ ནཱམ, སེསཛྷཱནམནུཏྟརཾ.

ལོཀིཡཾ པཋམཾ ཛྷཱནཾ, ཏཐཱ ཀཱམེ ཏིཧེཏུཀཱ;

པཉྩམགྒངྒིཀཱ ནཱམ, ཙིཏྟུཔྤཱདཱ པཀཱསིཏཱ.

སེསཾ མཧགྒཏཾ ཛྷཱནཾ, སམྤཡུཏྟཱ ཙ དིཊྛིཡཱ;

ཉཱཎེན ཝིཔྤཡུཏྟཱ ཙ, ཙཏུམགྒངྒིཀཱ མཏཱ.

པཊིགྷུདྡྷཙྩཡུཏྟཱ ཙ, ཝིཔྤཡུཏྟཱ ཙ དིཊྛིཡཱ;

ཏིམགྒངྒཾ དུམགྒངྒཾ, ཀངྑིཏཾ སམུདཱིརིཏཾ.

ན ཧོནྟཱཧེཏུཀེ མགྒཱ, ཙིཏྟཊྛིཏི ཙ ཀངྑིཏེ;

ཝིདིཏཱ ནིཡཏཏཱ ཙ, ལོཀིཡེསུ ན ཨུདྡྷཊཱ.

ཀཱམེསུ ཀབལཱི༹ཀཱརོ, ཨནཱཧཱརོ ཨསཉྙིནོ;

ཙིཏྟུཔྤཱདེསུ སབྦཏྠ, ཨཱཧཱརཏྟཡམཱིརིཏཾ.

ཨིནྡྲིཡཱནི ཝིབྷཱཝེཡྻ, ནཝདྷཱནུཏྟརེ བུདྷོ;

ཨཊྛདྷཱ སམུདཱིརེཡྻ, ལོཀིཡེསུ ཏིཧེཏུཀེ.

སཏྟདྷཱ པན ཉཱཎེན, ཝིཔྤཡུཏྟེ པཀཱསཡེ;

སིཏཝོཊྛབྦནཱཔུཉྙེ, པཉྩདྷཱ ཀངྑིཏེ པན.

ཙཏུདྷཱ ཏིཝིདྷཱ སེསེ, ཙིཏྟུཔྤཱདེ སམཱིརཡེ;

ཏིཧེཏུཀཱ སཏྟབལཱ, ཚབལཱ ཏུ དུཧེཏུཀཱ.

ཙཏུབལཱ ཨཀུསལཱ, ཀངྑིཏཾ ཏིབལཾ མཏཾ;

དྭིབལཾ སིཏཝོཊྛབྦ-མབལཾ སེསམཱིརིཏཾ.

ཛཝནེདྷིཔཏཱིནཾ ¶ ཏུ, ཡོ ཀོཙེཀོ ཏིཧེཏུཀེ;

དྭིཧེཏུཀེ ཝཱ ཀུསལེ, ཝཱིམཾསཱ ནོཔལབྦྷཏི.

སམྦྷོཏི ¶ ཀཱཡཝིཉྙཱཎེ, པུཉྙཔཱཀེ སུཁིནྡྲིཡཾ;

དུཀྑིནྡྲིཡམྤི ཏཏྠེཝ, པཱཔཔཱཀམྷི བྷཱསིཏཾ.

སནྟཱིརཎཉྩ ཧསནཾ, སོམནསྶཱནི སོལ༹ས;

པཋམཱདིཙཏུཛ྄ཛྷཱནཾ, སོམནསྶཡུཏཾ བྷཝེ.

དོམནསྶཡུཏྟཱ དྭེཝ, ཙིཏྟུཔྤཱདཱ པཀཱསིཏཱ;

ཏདཉྙེ པན སབྦེཔི, པཉྩཔཉྙཱསུཔེཀྑཀཱ.

ཝེདནཱསམྤཡོགཉྩ, ཝིནིབྦྷུཛྫེཝམཊྛདྷཱ;

ཧེཏུཡོགཱདིབྷེདེཧི, ཙིཏྟུཔྤཱདཱ པཀཱསིཏཱ.

ཏཾཏཾཝིཡོགབྷེདཉྩ, པཙྩེཀམཐ མིསྶིཏཾ;

ཡཐཱཝུཏྟཱནུསཱརེན, ཡཐཱསམྦྷཝཏོ ནཡེ.

ཨིཙྩེཝཾ པན ཡོཛེཏྭཱ, ཙིཏྟུཔྤཱདེསུ མིསྶཀཾ;

ཏཏོ ཉེཡྻཱ ཝིསུདྡྷཱ ཙ, བོདྷིཔཀྑིཡསངྒཧཱ.

ཀཱཡེ ཙ ཝེདནཱཙིཏྟེ, དྷམྨེསུ ཙ ཡཐཱརཧཾ;

ཨསུབྷཾ དུཀྑམནིཙྩ-མནཏྟཱཏི སུཔཊྛིཏཱ.

སམྨཱསཏི པནིཙྩེཀཱ, ཀིཙྩགོཙརབྷེདཏོ;

སཏིཔཊྛཱནནཱམེན, ཙཏྟཱརོཏི པཀཱསིཏཱ.

ཨུཔྤནྣཱནུཔྤནྣཔཱཔ-པཧཱནཱནུཔྤཱདནཱཡ ཙ;

ཨནུཔྤནྣུཔྤནྣེཧི ཝཱ, ནིབྦཏྟིཨབྷིཝུདྡྷིཡཱ.

པདཧནྟསྶ ¶ ཝཱཡཱམོ, ཀིཙྩཱབྷོགཝིབྷཱགཏོ;

སམྨཔྤདྷཱནནཱམེན, ཙཏྟཱརོཏི པཀཱསིཏཱ.

ཨིདྡྷིཡཱ པཱདབྷཱུཏཏྟཱ, ཨིདྡྷིཔཱདཱཏི བྷཱསིཏཱ;

ཚནྡོ ཙིཏྟཉྩ ཝཱིརིཡཾ, ཝཱིམཾསཱཏི ཙཏུབྦིདྷཱ.

པཉྩ སདྡྷཱ སཏི པཉྙཱ, ཝཱིརིཡེཀགྒཏཱ ཏཐཱ;

ཨིནྡྲིཡཱནིནྡྲིཡཊྛེན, བལཊྛེན བལཱནི ཙ.

སཏི དྷམྨཝིཙཡོ ཙ, ཏཐཱ ཝཱིརིཡཔཱིཏིཡོ;

པསྶདྡྷེཀགྒཏཱཔེཀྑཱ, བུཛ྄ཛྷནྟསྶངྒབྷཱཝཏོ.

བོཛ྄ཛྷངྒཱཏི ¶ ཝིསེསེན, སཏྟ དྷམྨཱ པཀཱསིཏཱ;

ནིཡྻཱནཊྛེན མགྒངྒཱ, སམྨཱདིཊྛཱདིཨཊྛདྷཱ.

ཚསངྒཧེཏྠ ཝཱཡཱམོ, སཏིཔཉྙཱ སམཱིརིཏཱ;

པཉྩསངྒཧིཏཱ ནཱམ, སམཱདྷི ཙཏུསངྒཧོ.

སདྡྷཱ དུསངྒཧཱ ཝུཏྟཱ, སེསཱ ཨེཀེཀསངྒཧཱ;

ཨིཙྩེཝཾ སཏྟདྷཱ བྷེདོ, བོདྷིཔཀྑིཡསངྒཧོ.

སཏིཔཊྛཱནསམྨཔྤདྷཱནཏོ ཨིདྡྷིཔཱདཏོ;

ཨིནྡྲིཡབལབོཛ྄ཛྷངྒཱ, མགྒབྷེདཱ ཙ བྷཱསིཏཱ.

ཚནྡོ ཙིཏྟམུཔེཀྑཱ ཙ, སདྡྷཱཔསྶདྡྷིཔཱིཏིཡོ;

སམྨཱདིཊྛི ཙ སངྐཔྤོ, ཝཱཡཱམོ ཝིརཏིཏྟཡཾ.

སམྨཱསཏི སམཱདྷཱིཏི, དཱིཔིཏཱ བོདྷིཔཀྑིཡཱ;

ཙུདྡསཱ དྷམྨཏོ ཧོནྟི, སཏྟཏིཾས པབྷེདཏོ.

ཡེཧི དྷམྨེཧི བུཛ྄ཛྷནྟོ, སཙྩཱནི པཊིཝིཛ྄ཛྷཏི;

སམཏྟཱནུཏྟརེ ཧོནྟི, ན ཝཱ སངྐཔྤཔཱིཏིཡོ.

པུབྦབྷཱགེཔི ལབྦྷནྟི, ལོཀིཡམྷི ཡཐཱརཧཾ;

ནིབྦེདྷབྷཱཝནཱཀཱལེ, ཚབྦིསུདྡྷིཔཝཏྟིཡཾ.

ཨིཙྩེཝཾ ¶ ཏིཝིདྷཱ བྷེདཾ, ཝིབྷཱཝེཡྻ ཡཐཱརཧཾ;

སབྷཱཝབྷེདབྷིནྣཱནཾ, སབྷཱགཏྠེཧི སངྒཧཾ.

བྷེདསངྒཧཝིདཱུཧི ཝཎྞིཏཾ, བྷེདསངྒཧཝིམུཏྟིསཱསནེ;

བྷེདསངྒཧནཡཏྠམུཏྟམཾ, བྷེདསངྒཧམུཁཾ པཀཱསིཏཾ.

དྷམྨསབྷཱཝཝིབྷཱགབུདྷེཝཾ, དྷམྨདིསམྤཏིསཱསནདྷམྨེ;

དྷམྨཝིབྷཱུཏིཝིབྷཱུསིཏཙིཏྟཱ, དྷམྨརསཱམཏབྷཱགི བྷཝནྟི.

ཨིཏི ནཱམརཱུཔཔརིཙྪེདེ བྷེདསངྒཧཝིབྷཱགོ ནཱམ

ཨིཏོ ¶ པརཾ ཀིཙྩཏོ ཙ, དྭཱརཱལམྦཎཝཏྠུཏོ;

བྷཱུམིཔུགྒལཏོ ཋཱནཱ, ཛནཀཱ ཙ ཡཐཱརཧཾ.

སངྒཧོ ཙ པཝཏྟི ཙ, པཊིསནྡྷིཔཝཏྟིསུ;

ཙིཏྟུཔྤཱདཝསེནེཝ, སཾཁིཔིཏྭཱན ནིཡྻཏེ.

རཱུཔཱརཱུཔམཧཱཔཱཀཱ, མུཔེཀྑཱཏཱིརཎདྭཡཾ;

ཙུཏིསནྡྷིབྷཝངྒཱནི, ཙིཏྟཱནེཀཱུནཝཱིསཏི.

ཨཱཝཛྫནཾ ཏུ ཡུགལ༹ཾ, དསྶནཾ སཝནཾ ཏཐཱ;

གྷཱཡནཾ སཱཡནཉྩེཝ, ཕུསནཾ སམྤཊིཙྪནཾ.

ཏཱིཎི ཏཱིརཎཙིཏྟཱནི, ཨེཀཾ ཝོཊྛབྦནཾ མཏཾ;

པཉྩདྭཱརེ མནོདྭཱརེ, ཏདཱཝཛྫནནཱམཀཾ.

པཉྩཔཉྙཱས ¶ ཛཝནཀིཙྩཱནཱིཏི ཝིནིདྡིསེ;

ཀྲིཡཱ ཙཱཝཛྫནཾ ཧིཏྭཱ, ཀུསལཱཀུསལཔྥལཾ.

ཏདཱལམྦཎཙིཏྟཱནི, བྷཝནྟེཀཱདསེཝ ཧི;

མཧཱཝིཔཱཀཙིཏྟཱནི, ཨཊྛ སནྟཱིརཎཏྟཡཾ.

པཉྩཀིཙྩནྟི བྷཱསནྟི, ཨུཔེཀྑཱཏཱིརཎདྭཡཾ;

ཙཏུཀིཙྩཱ མཧཱཔཱཀཱ, ཏིཀཀིཙྩཱ མཧགྒཏཱ.

དུཀིཙྩམིཏི ཝོཊྛབྦཾ, སུཁཏཱིརཎམཱིརིཏཾ;

པཉྩཝིཉྙཱཎཛཝནམནོདྷཱཏུཏྟིཀཾ པན.

ཨེཀཀིཙྩཱཏི བྷཱསནྟི, ཨཊྛསཊྛི ཝིབྷཱཝིནོ;

ཨིཙྩེཝཾ ཀིཙྩབྷེདེན, ཙིཏྟུཔྤཱདཱ ཝཝཏྠིཏཱ.

ཙཀྑུསོཏགྷཱནཛིཝ྄ཧཱ-ཀཱཡདྷཱཏུ ཡཐཱཀྐམཾ;

པཉྩདྭཱརཱ བྷཝངྒཾ ཏུ, མནོདྭཱརཾ པཝུཙྩཏི.

གྷཱནཱདཡོ ¶ ཏཡོ རཱུཔེ, པཉྩ ཙཀྑཱདཡོ ཏཐཱ;

ཨརཱུཔེ ནཏྠུབྷཡཏྠ, ཏདཱལམྦཎམཱནསཾ.

ཚ དྭཱརཱ ཝཱིཐིཙིཏྟཱནི, སཏྟ ཀཱམཱིསུ རཱུཔིསུ;

དྭཱརཏྟཡཾ ཚ ཙིཏྟཱནི, མནོདྭཱརམརཱུཔིསུ.

པཊིསནྡྷཱདིབྷཱུཏཱ ཧི, ཨཝསཱནེ ཙུཏིཊྛིཏཱ;

མཛ྄ཛྷེ བྷཝངྒཾ ཚེཏྭཱན, པཙྩེཀཾ ཝཱིཐི ཛཱཡཏི.

རཱུཔཱདཱརམྨཎེ ཙཀྑུ-པསཱདཱདིམྷི གྷཊྚིཏེ;

ཨཱཝཛྫནཱདཡོ ཧོནྟི, བྷཝངྒདྭིཙལཱ པརཾ.

པརིཎཱམེ བྷཝངྒསྶ, ཨཱལམྦེ གཧཎཱརཧེ;

ཏཐཱ ཝཱིཐི མནོདྭཱརེ, ཡཐཱསམྦྷཝཏོ བྷཝེ.

ཨཱཝཛྫཱ པཉྩཝིཉྙཱཎཾ, སམྤཊིཙྪནཏཱིརཎཾ;

སཏྟེཝཾ ¶ ཝཱིཐིཙིཏྟཱནི, ཙིཏྟུཔྤཱདཱ ཙཏུདྡས;

ཙཏུཔཉྙཱས ཝིཏྠཱརཱ, པཉྩདྭཱརེ ཡཐཱརཧཾ.

ཨུཔྤཱདཊྛིཏིབྷངྒཱནཾ, ཝསཱ ཙིཏྟཀྑཎཾ ཏཡཾ;

རཱུཔཱནཾ ཋིཏི ཨེཀཱུན-པཉྙཱསཉྩ དུཀེ དུཀཾ.

པརིཏྟེཏིཔརིཏྟེ ཙ, མཧནྟེཏིམཧནྟཀེ;

ཝོཊྛབྦམོགྷཛཝནཾ, ཏདཱལམྦནྟི ཏཾ ཀམཱ.

ཨཱཝཛྫནཉྩ ཛཝནཾ, མནོདྭཱརེ ཏུ གོཙརེ;

ཝིབྷཱུཏེ ཏུ ཏདཱལམྦཾ, ཝིཏྠཱརཱ སཏྟསཊྛི ཏེ.

ཀཱམེ ཛཝནསཏྟཱལ-མྦཎཱནཾ ནིཡམེ སཏི;

ཝིབྷཱུཏེཏིམཧནྟེ ཙ, ཏདཱལམྦཎམཱིརིཏཾ.

པཉྩདྭཱརེ མནོདྷཱཏུ, པཙྩེཀམྷི ཡཐཱཀྐམཾ;

པཉྩཝིཉྙཱཎཡུགལ༹ཾ, པཙྩེཀཾ ཏུ པཀཱསིཏཾ.

མནོདྭཱརེ ཏུ ཛཝནཾ, མཧགྒཏམནུཏྟརཾ;

སུཁཏཱིརཎཝོཊྛབྦཾ, པརིཏྟཛཝནཾ ཚསུ.

མཧཱཝིཔཱཀཙིཏྟཱནི ¶ , ཨུཔེཀྑཱཏཱིརཎདྭཡཾ;

ཚསུ དྭཱརེསུ ཛཱཡནྟི, ཝཱིཐིམུཏྟཱནི ཙེཀདཱ.

སཏྟཏི ཝཱིཐིཙིཏྟཱནི, ཝིཔཱཀཱ ཏུ མཧགྒཏཱ;

ནཝ ཝཱིཐིཝིམུཏྟཱ ཙ, དུཝིདྷཱཔི དསཱིརིཏཱ.

ཨིཙྩེཝཾ དྭཱརབྷེདེན, ཝིབྷཱཝེཏྭཱ ཏཏོ པརཾ;

ཉེཡྻཱ གོཙརབྷེདེན, ཙིཏྟུཔྤཱདཱ ཡཐཱརཧཾ.

རཱུཔསདྡགནྡྷརསཕོཊྛབྦཱ པཉྩ གོཙརཱ;

སེསཉྩ རཱུཔཔཉྙཏྟིནཱམཉྩ དྷམྨགོཙརཾ.

པཉྩདྭཱརེ ཝཏྟམཱནཾ, པཉྩཱལམྦཾ ཡཐཱཀྐམཾ;

ཚཱལམྦཎཾ མནོདྭཱརེ, ཨཏཱིཏཱནཱགཏམྤི ཙ.

པཉྙཏྟཱཏཱིཏཝཏྟནྟཾ ¶ , ཚདྭཱརགྒཧིཏཾ པན;

ཚལཱ༹རམྨཎསངྑཱཏཾ, ཡེབྷུཡྻེན བྷཝནྟརེ.

ནིམིཏྟགཏིཀམྨཱནཾ, ཀམྨམེཝཱཐ གོཙརཾ;

པཊིསནྡྷིབྷཝངྒཱནཾ, ཙུཏིཡཱཝ ཡཐཱརཧཾ.

པཉྩཱལམྦེ མནོདྷཱཏུ, པཙྩེཀམྷི ཡཐཱཀྐམཾ;

པཉྩཝིཉྙཱཎཡུགལ༹ཾ, པཙྩེཀཾ ཏུ པཀཱསིཏཾ.

ཀཱམཔཱཀཱནི སེསཱནི, ཧསནཉྩ པརིཏྟཀེ;

ཉཱཎཧཱིནཱནིཔུཉྙཱནི, ཛཝནཱནི ཨནིམྨལེ.

ཏིཧེཏུཀཱམཔུཉྙཱནི, པུཉྙཱབྷིཉྙཱ ཙ ལོཀིཡཱ;

སབྦཱལམྦེ པཝཏྟནྟི, ཨགྒམགྒཕལཾ ཝིནཱ.

ཀྲིཡཱབྷིཉྙཱ ཙ ཝོཊྛབྦཾ, ཀྲིཡཱ ཀཱམེ ཏིཧེཏུཀཱ;

སབྦཱལམྦེ པཝཏྟནྟི, ནིབྦཱནེ ནིམྨལཱ སིཡུཾ.

དུཏིཡཉྩ ཙཏུཏྠཉྩ, ཨཱརུཔྤེསུ མཧགྒཏེ;

མཧགྒཏཉྙེ ཝོཧཱརེ, ཨཡམཱལམྦཎེ ནཡོ.

ཙཀྑུསོཏགྷཱནཛིཝ྄ཧཱ-ཀཱཡཧདཡཝཏྠུནཱ;

ཀཱམལོཀེ ཚཝཏྠཱུནི, ནིསྶིཏཱ སཏྟ དྷཱཏུཡོ.

པཉྩཝིཉྙཱཎདྷཱཏཱུ ¶ ཙ, ཏཱསཾ པུབྦཱཔརཏྟཡཾ;

མནོདྷཱཏུ ཏཏོ སེསཱ, མནོཝིཉྙཱཎདྷཱཏུ ཙ.

ཙཏསྶོ དྷཱཏུཡོ རཱུཔེ, ཏཱིཎི ཝཏྠཱུནི ནིསྶིཏཱ;

ཨརཱུཔེ ཏུ ཨནིསྶཱཡ, དྷཱཏྭེཀཱཝ པཝཏྟཏི.

པཉྩཔྤསཱདེ ནིསྶཱཡ, པཙྩེཀཾ ཏུ ཡཐཱཀྐམཾ;

པཉྩཝིཉྙཱཎཡུགལ༹ཾ, བྷཝཏཱིཏི པཀཱསིཏཾ.

ཀཱམཔཱཀཱནི སེསཱནི, མགྒཱཝཛྫནམཱདིཏོ;

ཧསནཾ པཊིགྷཱརཱུཔཱ-ཝཙརཾ ཝཏྠུནིསྶིཏཾ.

དྭེཙཏྟཱལཱིས ¶ ནིསྶཱཡ, ཨནིསྶཱཡ ཙ ཛཱཡརེ;

ཨནིསྶཱཡ ཝིཔཱཀཱནི, ཨཱརུཔྤེཏི སམཱིརིཏཾ.

ཨིཙྩེཝཾ ཝཏྠུབྷེདེན, ཙིཏྟུཔྤཱདཱ པཀཱསིཏཱ;

ཏཏོ པརཾ ཝིབྷཱཝེཡྻ, བྷཱུམིབྷེདེན པཎྜིཏོ.

ནིརཡེ པེཏལོཀེ ཙ, ཏིརཙྪཱནཱསུརེ ཏཐཱ;

པཱཔཀམྨོཔཔཛྫནྟི, པཱཔཔཱཀཱཡ སནྡྷིཡཱ.

བྷཱུམིསྶིཏེསུ དེཝེསུ, མནུསྶེསུཔི ཧཱིནཀཱ;

ཨཧེཏུཀཱཡ ཛཱཡནྟི, པུཉྙཔཱཀཱཡ སནྡྷིཡཱ.

ཙཱཏུམཧཱརཱཛིཀཱ ཙ, ཏཱཝཏིཾསཱ ཙ ཡཱམཀཱ;

ཏུསིཏཱ ཙེཝ ནིམྨཱནརཏིནོ ཝསཝཏྟིནོ.

ཨིཙྩེཝཾ ཚསུ དེཝེསུ, མནུསྶེསུ ཙ ཛཱཡརེ;

མཧཱཝིཔཱཀསནྡྷཱིཧི, ཀཱམཔུཉྙཀཏཱ ཛནཱ.

བྲཧྨཱནཾ པཱརིསཛྫཱ ཙ, ཏཐཱ བྲཧྨཔུརོཧིཏཱ;

མཧཱབྲཧྨཱ ཙ ཛཱཡནྟི, པཋམཛ྄ཛྷཱནསནྡྷིཡཱ.

པརིཏྟཱ ཨཔྤམཱཎཱབྷཱ, ཛཱཡནྟཱབྷསྶརཱ ཏཐཱ;

དུཏིཡཛ྄ཛྷཱནཔཱཀཱཡ, ཏཏིཡཱཡ ཙ སནྡྷིཡཱ.

པརིཏྟསུབྷཔྤམཱཎསུབྷཱ ཙ སུབྷཀིཎྷཀཱ;

ཙཏུཏྠཱཡ ཏུ ཛཱཡནྟི, ཏཏིཡཛ྄ཛྷཱནབྷཱུམིཀཱ.

ཝེཧཔྥལཱ ¶ ཨསཉྙཱི ཙ, སུདྡྷཱཝཱསཱཏི སཏྟསུ;

པཉྩམཱཡ ཙ ཛཱཡནྟི, ཨསཉྙཱིཙིཏྟཝཛྫིཏཱ.

ཨཝིཧཱ ཙ ཨཏཔྤཱ ཙ, སུདསྶཱ ཙ སུདསྶིནོ;

ཨཀནིཊྛཱཏི པཉྩེཏེ, སུདྡྷཱཝཱསཱ པཀཱསིཏཱ.

ཨཱཀཱསཱནཉྩཱཡཏནཔཱཀཱདཱིཧི ཡཐཱཀྐམཾ;

ཨཱཀཱསཱནཉྩཱཡཏནབྷཱུམིཀཱདཱིསུ ཛཱཡརེ.

ཙུཏིསནྡྷིབྷཝངྒཱནཾ ¶ , ཝསཱ པཱཀཱ མཧགྒཏཱ;

ཀཱམེ སཧེཏུཀཱ པཱཀཱ, ཏདཱལམྦཎཏོཔི ཙ.

ཡཐཱཝུཏྟནིཡཱམེན, བྷཱུམཱིསྭེཀཱཝ ཛཱཡརེ;

ཙིཏྟུཔྤཱདེསུ སབྦཏྠ, ན ཏྭེཝཱསཉྙིནོ མཏཱ.

གྷཱནཛིཝ྄ཧཱཀཱཡདྷཱཏུ-ནིསྶིཏཾ མཱནསཾ ཏཐཱ;

པཊིགྷདྭཡམིཙྩེཝམཊྛ ཧོནྟེཝ ཀཱམིསུ.

ཙཀྑུསོཏཉྩ ཝིཉྙཱཎཾ, མནོདྷཱཏུ ཙ ཏཱིརཎཾ;

ཀཱམརཱུཔེསུ ཛཱཡནྟི, ཡཐཱསམྦྷཝཏོ དས.

ཝོཊྛབྦཀཱམཔུཉྙཱནི, ཝིཔྤཡུཏྟཱནི དིཊྛིཡཱ;

ཨུདྡྷཙྩསཧིཏཉྩེཏི, སབྦཏྠེཏཱནི ཙུདྡས.

ཀངྑིཏཾ དིཊྛིཡུཏྟཱནི, སུདྡྷཱཝཱསཝིཝཛྫིཏེ;

སིཏཉྩ རཱུཔཛཝན-མཱརུཔྤཱཔཱཡཝཛྫིཏེ.

ཀཱམཀྲིཡཱ སཧེཏཱུ ཙ, ཨུདྡྷཾ ལོཀུཏྟརཏྟཡཾ;

ཙཏུཏྠཱརུཔྤཛཝནཾ, སབྦཏྠཱཔཱཡཝཛྫིཏེ.

སེསམཱརུཔྤཛཝནཾ, ཧིཏྭཱཔཱཡཾ ཡཐཱཀྐམཾ;

ཨུདྡྷམཱརུཔྤབྷཱུམིཉྩ, ཛཱཡཏཱིཏི ཝིབྷཱཝཡེ.

སོཏཱཔཏྟིཕལཱདཱིནི, ཙཏྟཱརཱནུཏྟརཱནི ཏུ;

སུདྡྷཱཝཱསམཔཱཡཉྩ, ཧིཏྭཱ སབྦཏྠ ཛཱཡརེ.

སུདྡྷཱཝཱསམཔཱཡཉྩ, ཧིཏྭཱརཱུཔཉྩ སབྦཐཱ;

པཋམཱནུཏྟརོ མགྒོ, སེསཊྛཱནེསུ ཛཱཡཏི.

སཏྟཏིཾས ¶ ཨཔཱཡེསུ, ཀཱམེསཱིཏི པཀཱསིཏཱ;

པཉྩཔཉྙཱས སུདྡྷེསུ, རཱུཔེསྭེཀཱུནསཏྟཏི.

ཚཙཏྟཱལཱིས ཨཱརུཔྤེ, ཨུཔྤཛྫནྟི ཡཐཱརཧཾ;

ཨིཙྩེཝཾ བྷཱུམིབྷེདེན, ཙིཏྟུཔྤཱདཱ པཀཱསིཏཱ.

ཏིཧེཏུསཏྟེ ¶ སབྦཱནི, དྭིཧེཏུཀཱཧེཏུཀེ པན;

པརིཏྟཱནི ཝིཝཛྫེཏྭཱ, ཉཱཎཔཱཀཀྲིཡཱཛཝེ.

པུཐུཛྫནཱནཾ སམྦྷོནྟི, དིཊྛིཡུཏྟཉྩ ཀངྑིཏཾ;

སོཏཱཔནྣཱདིཏིཎྞམྤི, ཕལཾ ཧོཏི ཡཐཱསཀཾ.

ཝཱིཏརཱགསྶ ཛཝནཾ, ཀྲིཡཱ ཙནྟིམནུཏྟརཾ;

པུཐུཛྫནཱདིཏིཎྞམྤི, པཊིགྷཾ སམུདཱིརིཏཾ.

ཛཝཱ པུཐུཛྫནཱདཱིནཾ, ཙཏུནྣཾ སེས སཱསཝཱ;

སཱསཝཱཝཛྫཔཱཀཱནི, པཉྩནྣམཔི དཱིཔཡེ.

པུཐུཛྫནེསུ ཏེསཊྛི, སོཏཱཔནྣཱདིཀདྭཡེ;

ཨེཀཱུནསཊྛི ཙིཏྟཱནི, ཨནཱགཱམིཀཔུགྒལེ.

སཏྟཔཉྙཱས ཛཱཡནྟི, ཏེཔཉྙཱས ཨནཱསཝེ;

མགྒཊྛེསུ སཀོ མགྒོ, པུགྒལེསུ ཨཡཾ ནཡོ.

ཏིཧེཏུཀཱམཙུཏིཡཱ, སབྦཱཔི པཊིསནྡྷིཡོ;

དྭིཧེཏཱཧེཏུཙུཏིཡཱ, ཀཱམཱཝཙརསནྡྷིཡོ.

རཱུཔཱཝཙརཙུཏིཡཱ, སཧེཏུཔཊིསནྡྷིཡོ;

ཨཱརུཔྤཱརུཔྤཙུཏིཡཱ, ཧེཊྛིམཱརུཔྤཝཛྫིཏཱ.

པཊིསནྡྷི ཏཐཱ ཀཱམེ, ཏིཧེཏུཔཊིསནྡྷིཡོ;

བྷཝནྟཱིཏི ཙ མེདྷཱཝཱི, ཙུཏིསནྡྷིནཡཾ ནཡེ.

ཙུཏིཡཱནནྟརཾ ཧོཏི, པཊིསནྡྷི ཏཏོ པརཾ;

བྷཝངྒཾ ཏཾ པན ཚེཏྭཱ, ཧོཏི ཨཱཝཛྫནཾ ཏཏོ.

ཨནིཊྛེ པཱཔཔཱཀཱཝ, ཙཀྑུཝིཉྙཱཎཀཱདཡོ;

ཨིཊྛེ ཏུ པུཉྙཔཱཀཱཝ, ཡཐཱསམྦྷཝཏོ སིཡུཾ.

པུབྦེ ¶ ཝུཏྟནཡེནེཝ, ཝཱིཐིཙིཏྟཱནི ཡོཛཡེ;

པཉྩདྭཱརེ ཡཐཱཡོགཾ, མནོདྭཱརེ ཙ པཎྜིཏོ.

སནྟཱིརཎཏདཱལམྦ-མིཊྛཱལམྦེ ¶ པཝཏྟཏི;

སུཁིཏཾ ཨིཊྛམཛ྄ཛྷཏྟེ, ཨནིཊྛེ ཙ ཨུཔེཀྑིཏཾ.

སུཁོཔེཏཾ ཏདཱལམྦཾ, ཨུཔེཀྑཱཀྲིཡཏོ པརཾ;

ན ཧོཏི དོམནསྶམྷཱ, སོམནསྶཾ ཏུ སབྦདཱ.

ཏཐོཔེཀྑཱཏདཱལམྦཾ, སུཁིཏཀྲིཡཏོ པརཾ;

ཨཉྙཏྠ ནིཡམོ ནཏྠི, ཏདཱལམྦཔཝཏྟིཡཱ.

ཏདཱལམྦེ ཨསམྦྷོནྟེ, ཨུཔེཀྑཱཏཱིརཎཾ བྷཝེ.

པརིཀམྨོཔཙཱརཱནུ-ལོམགོཏྲབྷུཏོ པརཾ;

པཉྩམཾ ཝཱ ཙཏུཏྠཾ ཝཱ, ཛཝནཾ ཧོཏི ཨཔྤནཱ.

ཙཏུཛྷཱནཾ སུཁོཔེཏཾ, ཉཱཎཡུཏྟཱནནནྟརཾ;

ཨུཔེཀྑཱཉཱཎཡུཏྟཱནཾ, པཉྩམཾ ཛཱཡཏེ པརཾ.

པུཐུཛྫནཱན སེཀྑཱནཾ, ཀཱམཔུཉྙཏིཧེཏུཏོ;

ཏིཧེཏུཀཱམཀྲིཡཏོ, ཝཱིཏརཱགཱནམཔྤནཱ.

ཨཱཝཛྫཔཉྩཝིཉྙཱཎ-སམྤཊིཙྪནཏཱིརཎཾ;

པཊིསནྡྷིཙུཏི སབྦཱ, རཱུཔཱརཱུཔཱདིཀཔྤནཱ.

ནིརོདྷཱ ཝུཊྛཧནྟསྶ, ཨུཔརིཊྛཕལཾ དྭཡཾ;

པཉྩཱབྷིཉྙཱ ཏཐཱ མགྒཱ, ཨེཀཙིཏྟཀྑཎཱ མཏཱ.

དྭིཀྑཏྟུཾ ཧི ནིརོདྷསྶ, སམཱཔཏྟིཀྑཎེ པན;

ཙཏུཏྠཱརུཔྤཛཝནཾ, ཏདཱལམྦཉྩ སབྦཐཱ.

དྭིཀྑཏྟུཾ ཝཱཐ ཏིཀྑཏྟུཾ, མགྒསྶཱནནྟརཾ ཕལཾ;

བྷཝངྒཱདི ཙ ཝོཊྛབྦཾ, ཛཝནཱདི སཀིཾ པན.

ཏིཀྑཏྟུཾ ཝཱ ཙཏུཀྑཏྟུཾ, མནོདྭཱརེ པཝཏྟཏི.

ཚདྭཱརེསུ ¶ ¶ པནཉྙཏྠ, ཛཝནཾ ཀཱམདྷཱཏུཛཾ;

པཉྩ ཝཱརེ ཚ ཝཱ སཏྟ, སམུཔྤཛྫཏི སམྦྷཝཱ.

སམཱཔཏྟིབྷཝངྒེསུ, ནིཡམོ ན སམཱིརིཏོ;

ཝཱིཐིཙིཏྟཱཝསཱནེ ཏུ, བྷཝངྒཾ ཙུཏི ཝཱ བྷཝེ.

ཨིཙྩཱནནྟརབྷེདེན, ཙིཏྟུཔྤཱདཊྛིཏིཾ ཙུཏིཾ;

ཉཏྭཱ གཎེཡྻ སངྒཡ྄ཧ, ལབྦྷམཱནཝསཱ ཀཐཾ?

པཉྩདྭཱརཱཝཛྫནཏོ, དས ཙིཏྟཱནི དཱིཔཡེ;

སེསཱཝཛྫནཏོ པཉྩ-ཙཏྟཱལཱིསནྟི བྷཱསིཏཾ.

པཉྩཝིཉྙཱཎཏོ པཱཔཝིཔཱཀཱ སམྤཊིཙྪནཱ;

པརམེཀཾ དུཝེ པུཉྙ-ཝིཔཱཀཱ སམྤཊིཙྪནཱ.

སནྟཱིརཎདྭིཧེཏུམྷཱ, པཱཀཱ དྭཱདས ཛཱཡརེ;

ཏིཧེཏུཀཱམཔཱཀམྷཱ, ཨེཀཝཱིསཏི བྷཱསིཏཾ.

རཱུཔཱཝཙརཔཱཀམྷཱ, པརམེཀཱུནཝཱིསཏི;

ནཝཊྛཱརུཔྤཔཱཀམྷཱ, སཏྟ ཚ ཝཱ ཡཐཱཀྐམཾ.

པཊིགྷམྷཱ ཏུ སཏྟེཝ, སིཏམྷཱ ཏེརསབྲཝུཾ;

དྭིཧེཏུཔུཉྙཱཔུཉྙམྷཱ, ཨེཀཝཱིསཏི བྷཱཝཡེ.

དྭིཧེཏུཀཱམཀྲིཡཏོ, ཨཊྛཱརས ཨུཔེཀྑཀཱ;

སུཁིཏམྷཱ སཏྟརས, ཝིབྷཱཝེནྟི ཝིཙཀྑཎཱ.

ཀཱམཔུཉྙཱ ཏིཧེཏུམྷཱ, ཏེཏྟིཾསེཝ ཨུཔེཀྑཀཱ;

སུཁིཏམྷཱ ཏིཔཉྙཱས, བྷཝནྟཱིཏི པཀཱསིཏཾ.

ཏིཧེཏུཀཱམཀྲིཡཏོ, ཙཏུཝཱིསཏིཔེཀྑཀཱ;

སུཁིཏམྷཱ ཏུ དཱིཔེཡྻ, པཉྩཝཱིསཏི པཎྜིཏོ.

ཡཐཱཀྐམཾ པཉྩདས, ཨཱརུཔྤཱ པརིདཱིཔཡེ.

ཕལམྷཱ ¶ ཙུདྡསེཝཱཧུ, མགྒམྷཱ ཏུ སཀཾ ཕལཾ;

པརཾ སངྒཧམིཙྩེཝཾ, ཝིགཎེཡྻ ཝིསཱརདོ.

པཉྩདསམྷཱདྱཱཝཛྫ-མེཀཝཱིསཏིཏོཔརཾ ¶ ;

ཨེཀམྷཱ པཉྩཝིཉྙཱཎཾ, པཉྩམྷཱ སམྤཊིཙྪནཾ.

སུཁསནྟཱིརཎཾ ཧོཏི, པཉྩཝཱིསཏིཏོ པརཾ;

སམྦྷོནྟི སཏྟཏིཾསམྷཱ, ཨུཔེཀྑཱཏཱིརཎདྭཡཾ.

བྷཝནྟི ཙཏྟཱལཱིསམྷཱ, སུཁཔཱཀཱ དྭིཧེཏུཀཱ;

ཏཐེཀཙཏྟཱལཱིསམྷཱ, སུཁཔཱཀཱ དྭིཧེཏུཀཱ;

ཏཐེཀཙཏྟཱལཱིསམྷཱ, ཨུཔེཀྑཱཡ སམཱཡུཏཱ.

ཨེཀཱུནསཊྛིཏོ རཱུཔཱ, པཱཀཱ པཱཀཱ ཨརཱུཔིནོ;

ཀམཱཊྛཙཏྟཱལཱིསམྷཱ, ཏཐེཀདྭིཏིཧཱིནཏོ.

ཕལདྭཡཾ ཙཏུཀྐམྷཱ, པཉྩམྷཱནྟཕལདྭཡཾ;

ཏིཀཱ མཧགྒཏཱ ཛཝཱ, མགྒཱ ཀཱམཛཝཱ དྭཡཱ.

ཙིཏྟུཔྤཱདཱནམིཙྩེཝཾ, གཎིཏོ པུབྦསངྒཧོ;

ཉེཡྻོཡཾ ཋཱནབྷེདོཏི, པུབྦཱཔརནིཡཱམིཏོ.

རཱུཔཔཱཀམཧཱཔཱཀཱ, མནོདྷཱཏུ ཙ ཏཱིརཎཾ;

རཱུཔམེཝ ཛནེནྟཱིཏི, ཝུཏྟཱ ཨེཀཱུནཝཱིསཏི.

ཨིརིཡཱཔཐརཱུཔཱནི, ཛནེཏཱིཏི སམཱིརིཏཾ.

ཝོཊྛབྦཾ ¶ ཀཱམཛཝནམབྷིཉྙཱ ཙ ཡཐཱརཧཾ;

ཨིརིཡཱཔཐཝིཉྙཏྟིརཱུཔཱནཾ ཛནཀཱ སིཡུཾ.

པཉྩཝིཉྙཱཎམཱརུཔྤཱ, ཝིཔཱཀཱ ཙ ན ཀིཉྩིཔི;

སབྦེསཾ པཊིསནྡྷཱི ཙ, ཙུཏི ཙཱརཧཏོ ཏཐཱ.

རཱུཔཱདིཏྟཡམིཙྩེཝཾ ¶ , སམུཊྛཱཔེཏི མཱནསཾ;

ཨུཔྤཛྫམཱནམེཝེཏི, ཉེཡྻོ ཛནཀསངྒཧོ.

ཨིཏི ཀིཙྩཱདིབྷེདེསུ, པཙྩེཀསྨིཾ པཀཱསིཏཾ;

ནཡཾ ཝུཏྟཱནུསཱརེན, སམཱསེཏྭཱ ཝིཡོཛཡེ.

བཧུནཡཝིནིབནྡྷཾ ཀུལླམེཏཾ གཧེཏྭཱ,

ཛིནཝཙནསམུདྡཾ ཀཱམམོགཡ྄ཧ དྷཱིརཱ;

ཨིཏི ནཱམརཱུཔཔརིཙྪེདེ པཀིཎྞཀཝིབྷཱགོ ནཱམ

ཀམྨཔཙྩཡཀམྨནྟི, ཙེཏནཱཝ སམཱིརིཏཱ;

ཏཏྠཱཔི ནཱནཀྑཎིཀཱ, པུཉྙཱཔུཉྙཱཝ ཙེཏནཱ.

དེཏི པཱཀམདྷིཊྛཱཡ, སམྤཡུཏྟེ ཡཐཱརཧཾ;

ཀམྨསྶཱཡཱུཧནཊྛེན, པཝཏྟཏྟཱ ཧི ཙེཏནཱ.

ཀླེསཱནུསཡསནྟཱནེ ¶ , པཱཀདྷམྨཱ ཧི ཛཱཡརེ;

པཧཱིནཱནུསཡཱནཾ ཏུ, ཀྲིཡཱམཏྟཾ པཝཏྟཏི.

མཱུལབྷཱཝཱ ཙ སབྦེསཾ, ཏཐེཝཱཝཛྫནདྭཡཾ;

ཛནིཏཱནི ཙ ཀམྨེཧི, ཝིཔཱཀཱནི པཝཏྟརེ.

ཙིཏྟུཔྤཱདཝསེནེཝ, ཀམྨཾ ཏེཏྟིཾསདྷཱ ཋིཏཾ;

ཀམྨཙཏུཀྐབྷེདེཧི, ཝིབྷཱཝེཡྻ ཝིཙཀྑཎོ.

པཙྩུཔྤནྣཱདིཀཎྷཱདི-ཛནཀཱདིགརཱདིཏོ;

དིཊྛདྷམྨཱདིཀཱམཱདི-བྷེདཱ ཚདྷཱ ཡཐཱཀྐམཾ.

ཡཾ པཱཔཾ སུཁཝོཀིཎྞཾ, ཨཀིཙྪེན ཀརཱིཡཏི;

པཙྩུཔྤནྣསུཁཾ ཀམྨཾ, ཨཱཡཏིཾ དུཀྑཔཱཀཛཾ.

ཀིཙྪེན དུཀྑཝོཀིཎྞཾ, ཡདི པཱཔཾ ཀརཱིཡཏི;

པཙྩུཔྤནྣེ ཙ ཏཾ དུཀྑཾ, ཨཱཡཏིཾ དུཀྑཔཱཀཛཾ.

ཀིཙྪེན ¶ དུཀྑཝོཀིཎྞཾ, ཡདི པུཉྙཾ ཀརཱིཡཏི;

པཙྩུཔྤནྣམྷི ཏཾ དུཀྑཾ, ཨཱཡཏིཾ སུཁཔཱཀཛཾ.

ཡཾ པུཉྙཾ སུཁཝོཀིཎྞཾ, ཨཀིཙྪེན ཀརཱིཡཏི;

པཙྩུཔྤནྣསུཁཉྩེཝ, ཨཱཡཏིཾ སུཁཔཱཀཛཾ.

ཝིསསཾསཊྛམདྷུརཾ, སཝིསཾ ཏིཏྟཀཾ ཏཐཱ;

གོམུཏྟམདྷུབྷེསཛྫ-མིཙྩོཔམྨཾ ཡཐཱཀྐམཾ.

སམཱདཱནེ ཝིཔཱཀེ ཙ, སུཁདུཀྑཔྤབྷེདིཏཾ;

ཀམྨམེཝཾ ཙཏུདྡྷཱཏི, པཀཱསེནྟི ཏཐཱགཏཱ.

ཨཱནནྟརིཡཀམྨཱདི, ཨེཀནྟཀཊུཀཱཝཧཾ;

ཀཎྷཾ ཀཎྷཝིཔཱཀནྟི, ཀམྨཾ དུགྒཏིགཱམིཀཾ.

པཋམཛ྄ཛྷཱནཀམྨཱདི, ཨེཀནྟེན སུཁཱཝཧཾ;

སུཀྐཾ སུཀྐཝིཔཱཀནྟི, ཀམྨཾ སགྒཱུཔཔཏྟིཀཾ.

ཝོཀིཎྞཀམྨ ¶ ཝོཀིཎྞ-སུཁདུཀྑཱུཔཔཏྟིཀཾ;

ཀཎྷསུཀྐཾ ཀཎྷསུཀྐ-ཝིཔཱཀནྟི སམཱིརིཏཾ.

ཨཀཎྷསུཀྐམཱིརེནྟི, ཨཀཎྷསུཀྐཔཱཀདཾ;

ཀམྨཾ ལོཀུཏྟརཾ ལོཀེ, གཏིཀམྨཀྑཡཱཝཧཾ.

ཨིཏི ཝཊྚཔྤཝཏྟམྷི, ཀླེསཝོདཱནབྷེདིཏཾ;

ཀམྨཀྑཡེན སངྒཡ྄ཧ, ཙཏུདྷཱ ཀམྨམཱིརིཏཾ.

ཛནཀཉྩེཝུཔཏྠམྦྷ-མུཔཔཱིལོ༹པགྷཱཏཀཾ;

ཙཏུདྷཱ ཀིཙྩབྷེདེན, ཀམྨམེཝཾ པཝུཙྩཏི.

ཛནེཏི ཛནཀཾ པཱཀཾ, ཏཾ ཚིནྡཏུཔཔཱིལ༹ཀཾ;

ཏཾ པཝཏྟེཏུཔཏྠམྦྷཾ, ཏཾ གྷཱཏེཏོཔགྷཱཏཀཾ.

ཀརོཏི ཨཏྟནོ པཱཀ-སྶཱཝཀཱསནྟི བྷཱསིཏཾ;

པཱཀདཱཡཀཀམྨཾ ཏུ, ཡཾ ཀིཉྩི ཛནཀཾ བྷཝེ.

བཱདྷམཱནཀཀམྨཾ ¶ ཏུ, ཏཾ པཱཀམུཔཔཱིལ༹ཀཾ;

ཨུཔགྷཱཏཀམཱིརེནྟི, ཏདུཔཙྪེདཀཾཔརེ.

གརུཀཱསནྣམཱཙིཎྞཾ, ཀཊཏྟཱཀམྨུནཱ སཧ;

ཀམྨཾ ཙཏུབྦིདྷཾ པཱཀ-པརིཡཱཡཔྤབྷེདཏོ.

མཧགྒཏཱནནྟརིཡཾ, གརུཀམྨནྟི ཝུཙྩཏི;

ཀཏཾ ཙིནྟིཏམཱསནྣ-མཱསནྣམརཎེན ཏུ.

བཱཧུལླེན སམཱཙིཎྞམཱཙིཎྞནྟི པཝུཙྩཏི;

སེསཾ པུཉྙམཔུཉྙཉྩ, ཀཊཏྟཱཀམྨམཱིརིཏཾ.

དིཊྛདྷམྨེ ཝེདནཱིཡམུཔཔཛྫཱཔརེ ཏཐཱ;

པརིཡཱཡཝེདནཱིཡམིཏི ཙཱཧོསིཀམྨུནཱ.

ཙཏུདྷེཝམྤི ཨཀྑཱཏཾ, ཀམྨམཱདིཙྩབནྡྷུནཱ.

དིཊྛདྷམྨེ ཝེདནཱིཡཾ, པཋམཾ ཛཝནཾ བྷཝེ;

ཝེདནཱིཡཾ ¶ ཏུཔཔཛྫཔརིཡོསཱནམཱིརིཏཾ;

པརིནིཊྛིཏཀམྨཏྟཱ, ཝིཔཙྩཏི ཨནནྟརེ.

སེསཱནི ཝེདནཱིཡཱནི, པརིཡཱཡཱཔརེ པན;

ལདྡྷཱསེཝནཏོ པཱཀཾ, ཛནེནྟི སཏི པཙྩཡེ.

ཝུཙྩནྟཱཧོསིཀམྨཱནི, ཀཱལཱཏཱིཏཱནི སབྦཐཱ;

ཨུཙྪིནྣཏཎྷཱམཱུལཱནི, པཙྩཡཱལཱབྷཏོ ཏཐཱ.

ཙཏུདྷཱ པུན ཀཱམཱདིབྷཱུམིབྷེདེན བྷཱསིཏཾ;

པུཉྙཱཔུཉྙཝསཱ དྭེདྷཱ, ཀཱམཱཝཙརིཀཾ བྷཝེ.

ཨཔུཉྙཾ ཏཏྠ སཱཝཛྫ-མནིཊྛཕལདཱཡཀཾ;

ཏཾ ཀམྨཕསྶདྭཱརེཧི, དུཝིདྷཾ སམྤཝཏྟཏི.+

ཀཱཡདྭཱརཾ ¶ ཝཙཱིདྭཱརཾ, མནོདྭཱརནྟི ཏཱདིནཱ;

ཀམྨདྭཱརཏྟཡཾ ཝུཏྟཾ, ཕསྶདྭཱརཱ ཚ དཱིཔིཏཱ.

ཀམྨདྭཱརེ མནོདྭཱརེ, པཉྩདྭཱརཱ སམོཧིཏཱ;

ཕསྶདྭཱརམནོདྭཱརཾ, ཀམྨདྭཱརཏྟཡཾ ཀཏཾ.

ཏཐཱ ཧི ཀཱཡཝིཉྙཏྟིཾ, ཛནེཏྭཱ ཛཱཏཙེཏནཱ;

ཀཱཡཀམྨཾ ཝཙཱིཀམྨཾ, ཝཙཱིབྷེདཔཝཏྟིཀཱ.

ཝིཉྙཏྟིདྭཡསམྤཏྟཱ, མནོཀམྨནྟི ཝུཙྩཏི;

བྷེདོཡཾ པརིཡཱཡེན, ཀམྨཱནམིཏི དཱིཔིཏོ.

པཱཎགྷཱཏཱདིཀཾ ཀམྨཾ, ཀཱཡེ བཱཧུལླཝུཏྟིཏོ;

ཀཱཡཀམྨཾ ཝཙཱིཀམྨཾ, མུསཱཝཱདཱདིཀཾ ཏཐཱ.

ཨབྷིཛ྄ཛྷཱདི མནོཀམྨཾ, ཏཱིསུ དྭཱརེསུ ཛཱཡཏི;

དྭཱིསུ དྭཱརེསུ སེསཱནི, བྷེདོཡཾ པརམཏྠཏོ.

ཕསྶདྭཱརམནོདྭཱརེ, ཝིཉྙཏྟིདྭཡམཱིརིཏཾ;

པཉྩདྭཱརེ དྭཡཾ ནཏྠི, ཨཡམེཏྠ ཝིནིཙྪཡོ.

ཨཀྑནྟིཉཱཎ ཀོསཛྫཾ, དུསྶིལྱཾ མུཊྛསཙྩཏཱ;

ཨིཙྩཱསཾཝརབྷེདེན, ཨཊྛདྭཱརེསུ ཛཱཡཏི.

ཀམྨདྭཱརཏྟཡཉྩེཝ ¶ , པཉྩདྭཱརཱ ཏཐཱཔརེ;

ཨསཾཝརཱནཾ པཉྩནྣཾ, ཨཊྛ དྭཱརཱ པཀཱསིཏཱ.

ཏཏྠ ཀམྨཔཐཔྤཏྟཾ, པཊིསནྡྷིཕལཱཝཧཾ;

པཱཎགྷཱཏཱདིབྷེདེན, དསདྷཱ སམྤཝཏྟཏི.

པཱཎཱཏིཔཱཏོ ཕརུསཾ, བྱཱཔཱདོ ཙ ཏཐཱཔརོ;

ཨིཙྩེཝཾ ཏིཝིདྷཾ ཀམྨཾ, དོསམཱུལེཧི ཛཱཡཏི.

མིཙྪཱཙཱརོ ཨབྷིཛ྄ཛྷཱ ཙ, མིཙྪཱདིཊྛི ཏཐཱཔརཱ;

ཨིཙྩེཝཾ ཏིཝིདྷཾ ཀམྨཾ, ལོབྷམཱུལེཧི ཛཱཡཏི.

ཐེཡྻཱདཱནཾ ¶ མུསཱཝཱདོ, པིསུཎཾ སམྥལཱཔནཾ;

ཀམྨཾ ཙཏུབྦིདྷམྨེཏཾ, དྭིམཱུལེཧི པཝཏྟཏི.

ཚནྡཱདོསཱ བྷཡཱ མོཧཱ, པཱཔཾ ཀུབྦནྟི པཱཎིནོ;

ཏསྨཱ ཚནྡཱདིབྷེདེན, ཙཏྟཱལཱིསཝིདྷཾ བྷཝེ.

ཨིཙྩཱཔུཉྙཾ པཀཱསེནྟི, ཙཏུརཱཔཱཡསཱདྷཀཾ;

ཨཉྙཏྠཱཔི པཝཏྟམྷི, ཝིཔཏྟིཕལསཱདྷནཾ.

ཏིཝིདྷཾ པན པུཉྙཾ ཏུ, ཨནཝཛྫིཊྛཔཱཀདཾ;

དཱནཾ སཱིལཾ བྷཱཝནཱ ཙ, ཏཱིསུ དྭཱརེསུ ཛཱཡཏི.

མཧཏྟགཱརཝཱ སྣེཧཱ, དཡཱ སདྡྷུཔཀཱརཏོ;

བྷོགཛཱིཝཱབྷཡདྷམྨཾ, དདཏོ དཱནམཱིརིཏཾ.

པུཉྙམཱཙཱརཝཱརིཏྟ-ཝཏྟམཱརབྦྷ ཀུབྦཏོ;

པཱཔཱ ཙ ཝིརམནྟསྶ, ཧོཏི སཱིལམཡཾ ཏདཱ.

དཱནསཱིལཝིནིམུཏྟཾ, བྷཱཝནཱཏི པཝུཙྩཏི;

པུཉྙཾ བྷཱཝེནྟི སནྟཱནེ, ཡསྨཱ ཏེན ཧིཏཱཝཧཾ.

ཛནེཏྭཱ ཀཱཡཝིཉྙཏྟིཾ, ཡདཱ པུཉྙཾ ཀརཱིཡཏི;

ཀཱཡཀམྨཾ ཏདཱ ཧོཏི, དཱནཾ སཱིལཉྩ བྷཱཝནཱ.

ཝཙཱིཝིཉྙཏྟིཡཱ ¶ སདྡྷིཾ, ཡདཱ པུཉྙཾ ཀརཱིཡཏི;

ཝཙཱིཀམྨཾ མནོཀམྨཾ, ཝིནཱ ཝིཉྙཏྟིཡཱ ཀཏཾ.

ཏཾཏཾདྭཱརིཀམེཝཱཧུ, ཏཾཏཾདྭཱརིཀཔཱཔཏོ;

ཝིརམནྟསྶ ཝིཉྙཏྟིཾ, ཝིནཱ ཝཱ སཧ ཝཱ པུན.

དཱནཾ སཱིལཾ བྷཱཝནཱ ཙ, ཝེཡྻཱཝཙྩཱཔཙཱཡནཱ;

པཏྟཱནུམོདནཱ པཏྟི-དཱནཾ དྷམྨསྶ དེསནཱ;

སཝནཾ དིཊྛིཛུཀམྨ-མིཙྩེཝཾ དསདྷཱ ཋིཏཾ.

ཀཱམཔུཉྙཾ ¶ པཀཱསེནྟི, ཀཱམེ སུགཏིསཱདྷཀཾ;

ཨཉྙཏྠཱཔི པཝཏྟམྷི, སམྤཏྟིཕལསཱདྷཀཾ.

ཙིཏྟུཔྤཱདཔྤབྷེདེན, ཀམྨཾ ཝཱིསཏིདྷཱ ཋིཏཾ;

ཀཱམཱཝཙརམིཙྩེཝཾ, ཝིབྷཱཝེནྟི ཝིབྷཱཝིནོ.

རཱུཔཱཝཙརིཀཾ ཀམྨ-མཔྤནཱབྷཱཝནཱམཡཾ;

ཀསིཎཱདིཀམཱརབྦྷ, མནོདྭཱརེ པཝཏྟཏི.

ཀསིཎཱནི དསཱིརེནྟི, ཨཱདིཀམྨིཀཡོགིནོ;

ཨུདྡྷུམཱཏཾ ཝིནཱིལཉྩ, ཝིཔུབྦཀཾ ཝིཁཱདིཏཾ.

ཝིཙྪིདྡཀཉྩ ཝིཀྑིཏྟཾ, ཧཏཝིཀྑིཏྟལོཧིཏཾ;

པུལ༹ཝཾ ཨཊྛིཀཉྩེཏི, ཨསུབྷཾ དསདྷཱ ཋིཏཾ.

བུདྡྷེ དྷམྨེ ཙ སངྒྷེ ཙ, སཱིལེ ཙཱགེ ཙ ཨཏྟནོ;

དེཝཏོཔསམཱཡཉྩ, ཝུཏྟཱནུསྶཏིབྷཱཝནཱ.

མརཎེ སཏི ནཱམེཀཱ, ཏཐཱ ཀཱཡགཏཱསཏི;

ཨཱནཱཔཱནསཏིཙྩེཝཾ, དསདྷཱནུསྶཏཱིརིཏཱ.

མེཏྟཱ ¶ ཀརུཎཱ མུདིཏཱ, ཨུཔེཀྑཱ བྷཱཝནཱཏི ཙ;

ཙཏུབྲཧྨཝིཧཱརཱ ཙ, ཨཔྤམཉྙཱཏི བྷཱསིཏཱ.

ཨཱཧཱརེ ཏུ པཊིཀྐཱུལ-སཉྙེཀཱཏི པཀཱསིཏཱ;

ཙཏུདྷཱཏུཝཝཏྠཱནཾ, ཙཏུདྷཱཏུཔརིགྒཧོ.

ཙཏྟཱརོརུཔྤཀཱ ཙེཏི, ཙཏྟཱལཱིས སམཱསཏོ;

ཀམྨཊྛཱནཱནི ཝུཏྟཱནི, སམཐེ བྷཱཝནཱནཡེ.

ཨཱནཱཔཱནཉྩ ¶ ཀསིཎཾ, པཉྩཀཛ྄ཛྷཱནིཀཾ ཏཧིཾ;

པཋམཛ྄ཛྷཱནིཀཱ ཝུཏྟཱ, ཀོཊྛཱསཱསུབྷབྷཱཝནཱ.

མེཏྟཱདཡོ ཙཏུཛ྄ཛྷཱནཱ, ཨུཔེཀྑཱ པཉྩམཱི མཏཱ;

ཨཱརུཔྤཱརུཔྤཀཱ སེསཱ, ཨུཔཙཱརསམཱདྷིཀཱ.

ཀམྨཊྛཱནེསུ སེསེསུ, པཊིབྷཱགོ ན ཝིཛྫཏི;

ཏཐཱ ཧི སཏྟཝོཧཱརེ, ཨཔྤམཉྙཱ པཝཏྟརེ.

ཀསིཎུགྒྷཱཊིམཱཀཱསཾ, པཋམཱརུཔྤམཱནསཾ;

པཋམཱརུཔྤཀཱབྷཱཝ-མཱཀིཉྩཉྙཉྩ གོཙརཾ.

ཨཱརུཔྤཱ སམྤཝཏྟནྟི, ཨཱལམྦིཏྭཱ ཡཐཱཀྐམཾ;

ཨཉྙཏྠ པན སབྦཏྠ, ནཔྤཝཏྟཏི ཨཔྤནཱ.

པརིཀམྨཾ པརིཀམྨ-སམཱདྷི ཙ ཏཏོ པརཾ;

ཨུཔཙཱརཔྤནཱ ཙེཏི, བྷཱཝནཱཡཾ ཙཏུབྦིདྷཾ.

པརིཀམྨནིམིཏྟཉྩ, ཨུགྒཧོ ཙ ཏཏོ པརཾ;

པཊིབྷཱགོཏི ཏཱིཎེཝ, ནིམིཏྟཱནི པཀཱསཡུཾ.

ནིམིཏྟཾ གཎྷཏོ པུབྦ-མཱདིཀམྨིཀཡོགིནོ;

པརིཀམྨནིམིཏྟནྟི, ཀསིཎཱདིཀམཱིརིཏཾ.

ཏསྨིཾ ¶ པན ནིམིཏྟམྷི, ཨཱརབྷནྟསྶ བྷཱཝནཾ;

པཋམཾ པརིཀམྨནྟི, བྷཱཝནཱཔི པཝུཙྩཏི.

ཙིཏྟེནུགྒཧིཏེ ཏསྨིཾ, མནོདྭཱརེ ཝིབྷཱཝིཏེ;

ཏདུགྒཧནིམིཏྟཾ ཏུ, སམུཔྤནྣནྟི ཝུཙྩཏི.

པཉྩདྭཱརཝིནིམུཏྟཱ ¶ , ཏམཱརབྦྷ སམཱཧིཏཱ;

པརིཀམྨསམཱདྷཱིཏི, བྷཱཝནཱ སཱ པཀཱསིཏཱ.

ཨུགྒཧཱཀཱརསམྦྷཱུཏཾ, ཝཏྠུདྷམྨཝིམུཙྩིཏཾ;

པཊིབྷཱགནིམིཏྟནྟི, བྷཱཝནཱམཡམཱིརིཏཾ.

རཱུཔཱདིཝིསཡཾ ཧིཏྭཱ, ཏམཱརབྦྷ ཏཏོ པརཾ;

བྷཝངྒནྟརིཏཾ ཧུཏྭཱ, མནོདྭཱརཾ པཝཏྟཏི.

སིཁཱཔཏྟསམཱདྷཱན-མུཔཀླེསཝིམུཙྩིཏཾ;

ཨུཔཙཱརསམཱདྷཱིཏི, ཀཱམཱཝཙརམཱིརིཏཾ.

པཊིབྷཱགནིམིཏྟམྷི, ཨུཔཙཱརསམཱདྷིཏོ;

བྷཱཝནཱབལནིཔྥནྣཱ, སམུཔྤཛྫཏི ཨཔྤནཱ.

པུརིམཾ པུརིམཾ ཀཏྭཱ, ཝསཱིབྷཱུཏཾ ཏཏོ པརཾ;

ཨོལཱ༹རིཀངྒམོཧཱཡ, སུཁུམངྒཔྤཝཏྟིཡཱ.

ཨཔྤནཱ པདཧནྟསྶ, པཝཏྟཏི ཡཐཱཀྐམཾ;

ཝིཏཀྐཱདིཝིནིམུཏྟཱ, ཝིཙཱརཱདིསམཱཡུཏཱ.

ཨཱཝཛྫནཱ ཙ ཝསིཏཱ, ཏཾསམཱཔཛྫནཱ ཏཐཱ;

ཝུཊྛཱནཱདྷིཊྛཱནཱ པཙྩ-ཝེཀྑཎཱཏི ཙ པཉྩདྷཱ.

ཝིཏཀྐཉྩ ཝིཙཱརཉྩ, སཧཱཏིཀྐམཏོ པན;

ཙཏུཀྐཛ྄ཛྷཱནམཔྤེཏི, པཉྩཀཉྩ ཝིསུཾ ཝིསུཾ.

ཨཔྤནཱཡ ཙ པཙྩེཀཛྷཱནསྶཱཔི ཝིསུཾ ཝིསུཾ;

ཨིཙྪིཏབྦཱ ཧི སབྦཏྠ, པརིཀམྨཱདིབྷཱཝནཱ.

ཏཾ པརིཏྟཾ མཛ྄ཛྷིམཉྩ, པཎཱིཏནྟི ཝིབྷཛྫཏི;

ཝིམོཀྑོ ཙ ཝསཱིབྷཱུཏམབྷིབྷཱཡཏནནྟི ཙ.

པརིཏྟཱདི ¶ པརིཏྟཱདིགོཙརནྟི ཙཏུབྦིདྷཾ;

དུཀྑཱཔཊིཔདཾ དནྡྷཱབྷིཉྙམིཙྩཱདིཏོ ཏཐཱ.

ཏཾ ¶ ཚནྡཙིཏྟཝཱིརིཡཝཱིམཾསཱདྷིཔྤཏེཡྻཏོ;

ཝིསེསཊྛིཏིནིབྦེདྷཧཱནབྷཱགིཡཏོཔི ཙ.

པཉྩདྷཱ ཛྷཱནབྷེདེན, ཙཏུདྷཱལམྦབྷེདཏོ;

སམཱདྷིབྷཱཝནཱཔུཉྙམཔྤནཱཔཏྟམཱིརིཏཾ.

ཨིཏི ཝིཀྑམྦྷིཏཀླེསཾ, རཱུཔལོཀཱུཔཔཏྟིཀཾ;

རཱུཔཱཝཙརཀམྨནྟི, ཝིབྷཱཝེནྟི ཝིསཱརདཱ.

ཨརཱུཔཱཝཙརཀམྨཾ, ཙཏུདྷཱརུཔྤསཱདྷནཾ;

རཱུཔདྷམྨཝིབྷཱགེན, བྷཱཝིཏནྟི པཝུཙྩཏི.

ཙཏུཔཱརིསུདྡྷིསཱིལཾ, དྷུཏངྒཔརིཝཱརིཏཾ;

སཱིལཝིསུདྡྷིསངྑཱཏཾ, པཱུརཡིཏྭཱ ཏཏོ པརཾ.

པཏྭཱ ཙིཏྟཝིསུདྡྷིཉྩ, སོཔཙཱརསམཱདྷིཀཾ;

ཏཐཱ དིཊྛིཝིསུདྡྷིཉྩ, ནཱམརཱུཔཔརིགྒཧཾ.

ཀངྑཱཝིཏརཎཾ ནཱམ, པཙྩཡཊྛིཏིདསྶནཾ;

ཝིསོདྷེཏྭཱ མགྒཱམགྒ-ཉཱཎདསྶནམེཝ ཙ.

ཏཏོ པརཾ ཝིཔསྶནྟོ, ཝིསུདྡྷཱིསུ སམཱཧིཏོ;

སམྤཱདེཏྭཱ པཊིཔདཱ-ཉཱཎདསྶནམུཏྟམཾ.

ཏཏོ པཔྤོཏི མེདྷཱཝཱི, ཝིསུདྡྷིཾ ཉཱཎདསྶནཾ;

ཚབྦིསུདྡྷིཀམེནེཝཾ, བྷཱཝེཏབྦཾ ཡཐཱཀྐམཾ;

ཀམྨཾ ལོཀུཏྟརཾ ནཱམ, སབྦདུཀྑཀྑཡཱཝཧཾ.

ཨིཏི ཚནྣཾ ཙཏུཀྐཱནཾ, ཝསཱ ཀམྨཾ ཝིབྷཱཝཡེ;

ཡེན ཀམྨཝིསེསེན, སནྟཱནམབྷིསངྑཏཾ.

བྷཱུམཱིབྷཝཡོནིགཏིཋིཏིཝཱསེསུ སམྦྷཝཱ;

པཊིསནྡྷཱདིབྷཱཝེན, པཱཀཱཡ པརིཝཏྟཏི.

སཱཡཾ ¶ ¶ ཀམྨསམཉྙཱཏཱ, ཀམྨཛཱནི ཡཐཱརཧཾ;

ཛནེཏི རཱུཔཱརཱུཔཱནི, མནོསཉྩེཏནཱ ཀཐཾ.

བྷཱུམི ལོཀུཏྟརཱ ཙེཝ, ལོཀིཡཱཏི དྭིདྷཱ ཋིཏཱ;

པརིཏྟཱ ཙ མཧགྒཏཱ, ཨཔྤམཱཎཱཏི བྷེདིཏཱ.

ཨེཀཱདས ཀཱམབྷཝཱ, བྷཝཱ སོལ༹ས རཱུཔིནོ;

ཙཏྟཱརོརུཔྤཀཱ ཙེཏི, ཏིཝིདྷོ བྷཝ སངྒཧོ.

ཨཱརུཔྤཱ ཙཏུཝོཀཱརཱ, ཨེཀཝོཀཱརསཉྙིནོ;

པཉྩཝོཀཱརཀོ ནཱམ, བྷཝོ སེསོ པཝུཙྩཏི.

ནིརཡེ ཧོཏི དེཝེ ཙ, ཡོནེཀཱ ཨོཔཔཱཏིཀཱ;

ཨཎྜཛཱ ཛལཱབུཛཱ ཙ, སཾསེདཛོཔཔཱཏིཀཱ.

པེཏལོཀེ ཏིརཙྪཱནེ, བྷུམྨདེཝེ ཙ མཱནུསེ;

ཨསུརེ ཙ བྷཝནྟེཝཾ, ཙཏུདྷཱ ཡོནི སངྒཧཱ.

གཏིཡོ ནིརཡཾ པེཏཱ, ཏིརཙྪཱནཱ ཙ མཱནཝཱ;

སབྦེ དེཝཱཏི པཉྩཱཧ, པཉྩནིམྨལལོཙནོ.

ཏཱཝཏིཾསེསུ དེཝེསུ, ཝེཔཙིཏྟཱསུརཱ གཏཱ;

ཀཱལཀཉྩཱསུརཱ ནཱམ, གཏཱ པེཏེསུ སབྦཐཱ.

སནྡྷིསཉྙཱཡ ནཱནཏྟཱ, ཀཱཡསྶཱཔི ཙ ནཱནཏོ;

ནཱནཏྟཀཱཡསཉྙཱིཏི, ཀཱམསུགྒཏིཡོ མཏཱ.

པཋམཛ྄ཛྷཱནབྷཱུམཱི ཙ, ཙཏུརཱཔཱཡབྷཱུམིཡོ;

ནཱནཏྟཀཱཡཨེཀཏྟ-སཉྙཱིཏི སམུདཱིརིཏཱ.

ཨེཀཏྟཀཱཡནཱནཏྟ-སཉྙཱི ¶ དུཏིཡབྷཱུམིཀཱ;

ཨེཀཏྟཀཱཡཨེཀཏྟ-སཉྙཱི ཨུཔརིརཱུཔིནོ.

ཝིཉྙཱཎཊྛིཏིཡོ ¶ སཏྟ, ཏཱིཧཱརུཔྤེཧི ཧེཊྛཏོ;

ཨསཉྙེཏྠ ན གཎྷནྟི, ཝིཉྙཱཎཱབྷཱཝཏོ སདཱ.

ཙཏུཏྠཱརུཔྤབྷཱུམིཉྩ, པཊུཝིཉྙཱཎཧཱནིཏོ;

ཏཾ དྭཡམྤི གཧེཏྭཱན, སཏྟཱཝཱསཱ ནཝེརིཏཱ.

དེཝཱ མནུསྶཱཔཱཡཱཏི, ཏིཝིདྷཱ ཀཱམདྷཱཏུཡོ;

པཋམཛ྄ཛྷཱནབྷཱུམཱདི-བྷེདཱ བྷཱུམི ཙཏུབྦིདྷཱ.

པཋམཱརུཔྤཱདིབྷེདཱ, ཙཏུདྷཱརུཔྤདྷཱཏུཡོ;

སོཏཱཔནྣཱདིབྷེདེན, ཙཏུདྷཱནུཏྟརཱ མཏཱ.

ནིརཡཱདིཔྤབྷེདེན, བྷིནྣཱ པཙྩེཀཏོ པུན;

ཨེཀཏིཾསཝིདྷཱ ཧོནྟི, སཏྟཱནཾ ཛཱཏིབྷཱུམིཡོ.

ཨེཝཾ བྷཱུམཱདིབྷེདེསུ, སཏྟཱ ཛཱཡནྟི སཱསཝཱ;

ཀམྨཱནི ཙ ཝིཔཙྩནྟི, ཡཐཱསམྦྷཝཏོ ཀཐཾ;

ཨཔཱཡམྷཱ ཙུཏཱ སཏྟཱ, ཀཱམདྷཱཏུམྷི ཛཱཡརེ;

སབྦཊྛཱནེསུ ཛཱཡནྟི, སེསཀཱམབྷཝཱ ཙུཏཱ.

སུདྡྷཱཝཱསཱ ཙུཏཱ སུདྡྷཱ-ཝཱསེསུཔརི ཛཱཡརེ;

ཨསཉྙིམྷཱ ཙུཏཱ ཀཱམ-སུགཏིམྷོཔཔཛྫརེ.

སེསརཱུཔཱ ཙུཏཱ སཏྟཱ, ཛཱཡནྟཱཔཱཡཝཛྫིཏེ;

ཨཱརུཔྤཏོཔརི ཀཱམ-སུགཏིམྷི ཏཧིམྤི ཙ.

པུཐུཛྫནཱཝ ཛཱཡནྟི, ཨསཉྙཱཔཱཡབྷཱུམིསུ;

སུདྡྷཱཝཱསེསུ ཛཱཡནྟི, ཨནཱགཱམིཀཔུགྒལཱ.

ཝེཧཔྥལེ ཨཀནིཊྛེ, བྷཝགྒེ ཙ པཏིཊྛིཏཱ;

ན པུནཉྙཏྠ ཛཱཡནྟི, སབྦེ ཨརིཡཔུགྒལཱ.

བྲཧྨལོཀགཏཱ ¶ ཧེཊྛཱ, ཨརིཡཱ ནོཔཔཛྫརེ;

དུཀྑམཱུལསམུཙྪེདཱ, པརིནིབྦནྟིནཱསཝཱ.

ཛཱཡནྟཱནཉྩ ཛཱཏཱན-མིཏི ཝུཏྟནིཡཱམཏོ;

པཝཏྟཱཏཱིཏཀཾ ཀམྨཾ, པཊིསནྡྷིཔཝཏྟིཡཾ.

ཨརཱུཔཾ ¶ ཙཏུཝོཀཱརེ, རཱུཔམེཝ ཨསཉྙིསུ;

ཛནེཏི རཱུཔཱརཱུཔཱནི, པཉྩཝོཀཱརབྷཱུམིཡཾ.

ཨཱརུཔྤཱནུཏྟརཾ ཀམྨཾ, པཱཀམེཝ ཝིཔཙྩཏི;

ཀཊཏྟཱརཱུཔཔཱཀཱནི, ཀཱམརཱུཔནིཡཱམིཏཾ.

ཀཱལོཔདྷིཔྤཡོགཱནཾ, གཏིཡཱ ཙ ཡཐཱརཧཾ;

སམྤཏྟིཉྩ ཝིཔཏྟིཉྩ, ཀམྨམཱགམྨ པཙྩཏི.

ཨཔཱཡེ སནྡྷིམུདྡྷཙྩ-ཧཱིནཱ དཏྭཱ པཝཏྟིཡཾ;

སབྦཱཔི པཉྩཝོཀཱརེ, དྭཱདསཱཔུཉྙཙེཏནཱ.

སཏྟཱཀུསལཔཱཀཱནི, ཝིཔཙྩནྟི ཡཐཱརཧཾ;

ཀཱམཱཝཙརཔུཉྙཱནི, ཀཱམེསུགཏིཡཾ པན.

སཧེཏུཀཱནི པཱཀཱནི, པཊིསནྡྷིཔཝཏྟིཡཾ;

ཛནེནྟི པཉྩཝོཀཱརེ, ཨཧེཏུཔི ཡཐཱརཧཾ.

ཏིཧེཏུཔུཉྙམུཀྐཊྛཾ, པཊིསནྡྷིཾ ཏིཧེཏུཀཾ;

དཏྭཱ སོལ༹ས པཱཀཱནི, པཝཏྟེ ཏུ ཝིཔཙྩཏི.

ཏིཧེཏུཀོམཀུཀྐཊྛཾ, དྭིཧེཏུ ཙ དྭིཧེཏུཀཾ;

སནྡྷིཾ དེཏི པཝཏྟེ ཏུ, ཏིཧེཏུཀཝིཝཛྫིཏཾ.

དྭིཧེཏུཀོམཀཾ པུཉྙཾ, པཊིསནྡྷིམཧེཏུཀཾ;

དཏྭཱཧེཏུཀཔཱཀཱནི, པཝཏྟེ ཏུ ཝིཔཙྩཏི.

ཨསངྑཱརཾ སསངྑཱར-ཝིཔཱཀཱནི ན པཙྩཏི;

སསངྑཱརམསངྑཱར-ཝིཔཱཀཱནཱིཏི ཀེཙན.

པརིཏྟཾ ¶ པཋམཛ྄ཛྷཱནཾ, མཛ྄ཛྷིམཉྩ པཎཱིཏཀཾ;

བྷཱཝེཏྭཱ ཛཱཡརེ བྲཧྨ-པཱརིསཛྫཱདི ཏཱིསུཔི.

ཏཐེཝ དུཏིཡཛ྄ཛྷཱནཾ, ཏཏིཡཉྩ ཡཐཱཀྐམཾ;

བྷཱཝེཏྭཱ ཛཱཡརེ ཛྷཱནཾ, པརིཏྟཱབྷཱདི ཏཱིསུཔི.

ཏཐཱ ཙཏུཏྠཾ ཏིཝིདྷཾ, བྷཱཝེཏྭཱན སམཱཧིཏཱ;

པརིཏྟསུབྷཱདིཀེསུ, ཏཱིསུ ཛཱཡནྟི ཡོགིནོ.

པཉྩམཾ ¶ པན བྷཱཝེཏྭཱ, ཧོནྟི ཝེཧཔྥལཱུཔགཱ;

སཉྙཱཝིརཱགཾ བྷཱཝེཏྭཱ, ཨསཉྙཱིསཱུཔཔཛྫརེ.

སུདྡྷཱཝཱསེསུ ཛཱཡནྟི, ཨནཱགཱམིཀཔུགྒལཱ;

ཨཱརུཔྤཱནི ཏུ བྷཱཝེཏྭཱ, ཨཱརུཔྤེསུ ཡཐཱཀྐམཾ.

ཨེཝཾ མཧགྒཏཾ པུཉྙཾ, ཡཐཱབྷཱུམིཝཝཏྠིཏཾ;

ཛནེཏི སདིསཾ པཱཀཾ, པཊིསནྡྷིཔཝཏྟིཡཾ.

ལོཀུཏྟརཱནི པུཉྙཱནི, ཨུཔྤནྣཱནནྟརཾ པན;

སམཱཔཏྟིཀྑཎེ ཙེཝ, ཛནེནྟི སདིསཾ ཕལཾ.

ཨནནྟརབྷཝཱཏཱིཏཾ, ཀཱལཱཏཱིཏཾ ན པཙྩཏི.

སུཁུམཱལསབྷཱཝཱ ཙ, སུཁུམཏྟཱ མཧགྒཏཱ;

སནྟཱནེ ན ཝིཔཙྩནྟི, པཊིཔཀྑེཧི དཱུསིཏེ.

སམཱནཱསེཝནེ ལདྡྷེ, ཝིཛྫམཱནེ མཧབྦལེ;

ཨལདྡྷཱ ཏཱདིསཾ ཧེཏུཾ, ཨབྷིཉྙཱ ན ཝིཔཙྩཏི.

སཀཾ བྷཱུམིམཏཱིཏཱནཾ, ན ཝིཔཙྩཏཱནུཏྟརཾ;

ཀམྨནྟརསྶདྷིཊྛཱནཱ, སནྟཱནསྶེཏི དཱིཔིཏཾ.

ཨིཏི ཏེཏྟིཾས ཀམྨཱནི, པཱཀཱ ཚཏྟིཾས བྷཱསིཏཱ;

ཙིཏྟུཔྤཱདཱ ཀྲིཡཱ སེསཱ, ཀྲིཡཱམཏྟཔྤཝཏྟིཏོ.

ཙིཏྟུཔྤཱདཝསེནེཝམེཀཱུནནཝུཏཱིཝིདྷཱ ¶ ;

ཏེཔཉྙཱས སབྷཱཝེན, ཙིཏྟཙེཏསིཀཱ མཏཱ.

ཨིཏི ཙིཏྟཾ ཙེཏསིཀཾ, ནིབྦཱནནྟི ནརུཏྟརོ;

ནཱམཾ ཏིདྷཱ པཀཱསེསི, ཙཀྑུམཱ ཝདཏཾ ཝརོ.

ཨིཏི ཀམྨཝིཔཱཀཔཎྜིཏཱ, མིཏཀམྨཝིཔཱཀསཱསནེ;

ཧིཏཀམྨཝིཔཱཀཔཱརགཱུ, ཙཏུཀམྨཝིཔཱཀམབྲཝུཾ.

ཡཏྠཱཡཾ ¶ པརམཏྠཝཏྠུནིཡམེ ཏུལྱེན བཱཧུལྱཏོ,

ཨཏྠཱནཏྠཝིཙཱརཎཾ པཏི ཛནོ སམྨོཧམཱཔཱདིཏོ;

བུདྡྷོ བོདྷིཏལེ ཡམཱཧ སུགཏོ གནྟྭཱན དེཝཱལཡཾ,

སྭཱཡཾ ཀམྨཝིཔཱཀནིཙྪཡནཡོ སངྑེཔཏོ དཱིཔིཏོ.

ཨིཏི ནཱམརཱུཔཔརིཙྪེདེ ཀམྨཝིབྷཱགོ ནཱམ

ཨིཏི པཉྩཔརིཙྪེད-པརིཙྪིནྣཏྠསངྒཧཾ;

ནཱམདྷམྨམསེསེན, ཝིབྷཱཝེཏྭཱ སབྷཱཝཏོ.

སཔྤབྷེདཾ པཝཀྑཱམི, རཱུཔདྷམྨམིཏོ པརཾ;

བྷཱུཏོཔཱདཱཡབྷེདེན, དུཝིདྷམྤི པཀཱསིཏཾ.

ཨུདྡེསལཀྑཎཱདཱིཧི, ཝིབྷཱགཛནཀཱ ཏཐཱ;

ཀལཱཔུཔྤཏྟིཏོ ཙཱཔི, ཡཐཱནུཀྐམཏོ ཀཐཾ?

རུཔྤཏཱིཏི ¶ བྷཝེ རཱུཔཝིཀཱརཔྤཙྩཡེསཏི;

རཱུཔརཱུཔཾ ཏཐཱ རཱུཔཔརིཡཱཔནྣཏོཔརཾ.

བྷཱུཏརཱུཔཾ ཏུ པཐཝཱི, ཨཱཔོ ཏེཛོ ཏཐཱཔརོ;

ཝཱཡོ ཙ བྷཝཏཱུཔཱདཱརཱུཔམེཏྠཱཏི བྷཱསིཏཾ.

བྷཱུཏརཱུཔམུཔཱདཱཡ ¶ , པཝཏྟཏི ན ཙཉྙཐཱ;

ཨིཙྩུཔཱདཱཡརཱུཔནྟི, རཱུཔཾ སེསམུདཱིརིཏཾ.

ཙཀྑུ སོཏཉྩ གྷཱནཉྩ, ཛིཝ྄ཧཱ ཀཱཡོཏི པཉྩདྷཱ;

པསཱདརཱུཔམཀྑཱཏཾ, ནོཔསཱདཾ པནེཏརཾ.

རཱུཔསདྡགནྡྷརསཱ, ཕོཊྛབྦམིཏི པཉྩདྷཱ;

རཱུཔཾ པསཱདཝིསཡཾ, པསཱདོ གོཙརཾཔརཾ.

ཨིཏྠཏྟཾ པུརིསཏྟཉྩ, བྷཱཝརཱུཔམུདཱིརིཏཾ;

ཛཱིཝིཏིནྡྲིཡརཱུཔནྟི, ཨུཔཱདིནྣཔཝཏྟིཀཾ.

ཝཏྠུརཱུཔཾ ཏུ ཧདཡཾ, ཡཾ དྷཱཏུདྭཡནིསྶཡཾ;

ཀབལཱི༹ཀཱརམཱཧཱརརཱུཔམིཙྩཱཧུ པཎྜིཏཱ.

རཱུཔདྷམྨསབྷཱཝཏྟཱ, རཱུཔནྟི པརིདཱིཔིཏཾ;

ཨིཙྩེཝམཊྛཱརསདྷཱ, རཱུཔརཱུཔམུདཱིརིཏཾ.

ཨནིཔྥནྣསབྷཱཝཏྟཱ, རཱུཔཱཀཱརོཔལཀྑིཏཾ;

ཨནིཔྥནྣཾ ནཱམ རཱུཔཾ, དསདྷཱ པརིདཱིཔིཏཾ.

རཱུཔཔྤརིཙྪེདཾ རཱུཔམིཙྩཱཀཱསོ པཀཱསིཏོ;

ཀཱཡབྦཙཱིཝིཉྙཏྟིཀཾ, དྭཡཾ ཝིཉྙཏྟིརཱུཔཀཾ.

ལཧུཏཱ མུདུཏཱ ཀམྨ-ཉྙཏཱ ཝིཉྙཏྟིཡཱ སཧ;

ཝིཀཱརརཱུཔམིཙྩཱཧུ, པཉྩདྷཱ ཙ ཝིབྷཱཝིནོ.

ཨུཔཙཡོ སནྟཏི ཙ, ཛརཏཱནིཙྩཏཱཏི ཙ;

ཙཏུདྷཱ ལཀྑཎརཱུཔཾ, རཱུཔཀཎྜེ ཝིབྷཱཝིཏཾ.

ཨིཙྩེཝམཊྛཝཱིསཏིཝིདྷཱནིཔི ¶ ཝིཙཀྑཎོ;

རཱུཔཱནི ལཀྑཎཱདཱིཧི, ཝིབྷཱཝེཡྻ ཡཐཱཀྐམཾ.

ཁརཏཱ པཐཝཱིདྷཱཏུ, སཱཡཾ ཀཀྑལ༹ལཀྑཎཱ;

ཀལཱཔཱདྷིཊྛཱནརསཱ, པཊིགྒཱཧོཏི གཡ྄ཧཏི.

ཨཱབནྡྷནམཱཔོདྷཱཏུ, སཱ པགྒྷརཎལཀྑཎཱ;

ཀལཱཔཱབནྡྷནརསཱ, སངྒཧཏྟེན གཡ྄ཧཏི.

ཏེཛནཏྟཾ ¶ ཏེཛོདྷཱཏུ, སཱཡམུཎྷཏྟལཀྑཎཱ;

པཱཙནརསཱ མདྡཝཱ-ནུཔྤཱདནནྟི གཡ྄ཧཏི.

ཝཱཡོདྷཱཏུ ཝཱཡནཏྟཾ, སཱ ཝིཏྠམྦྷནལཀྑཎཱ;

སམཱིརཎརསཱབྷིནི-ཧཱརབྷཱཝེན གཡ྄ཧཏི.

སབྦཏྠཱཝིནིབྷུཏྟཱཔི, ཨསམྨིསྶིཏལཀྑཎཱ;

ཏཾཏཾབྷཱཝསམུསྶནྣསམྦྷཱརེསུཔལཀྑིཏཱ.

ཨཉྙམཉྙེནུཔཏྠདྡྷཱ, སེསརཱུཔསྶ ནིསྶཡཱ;

ཙཏུདྡྷེཝཾ ཀལཱཔེསུ, མཧཱབྷཱུཏཱ པཝཏྟརེ.

ཙཀྑུ སམྦྷཱརཙཀྑུམྷི, སཏྟཀྑིཔཊལོཙིཏེ;

ཀཎྷམཎྜལམཛ྄ཛྷམྷི, པསཱདོཏི པཝུཙྩཏི.

ཡེན ཙཀྑུཔསཱདེན, རཱུཔཱནི ཨནུཔསྶཏི;

པརིཏྟཾ སུཁུམཾ ཙེཏཾ, ཨཱུཀཱསིརསམཱུཔམཾ.

ཨནྟོ ཨཛཔདཊྛཱནེ, གྷཱནཾ གྷཱནབིལེ ཋིཏཾ;

ཛིཝ྄ཧཱ ཛིཝ྄ཧཱཡ མཛ྄ཛྷམྷི, ཨུཔྤལཱཀཱརསནྣིབྷེ.

ཨིཙྩེཝཾ ¶ པན ཙཏྟཱརོ, ཏཾཏཾདེསཝཝཏྠིཏཱ;

ཀཱཡཔྤསཱདོ ཀཱཡམྷི, ཨུཔཱདིནྣེཏི པཉྩདྷཱ.

ཀཔྤཱསཔཊལསྣེཧ-སནྣིབྷཱ བྷཱུཏནིསྶིཏཱ;

པསཱདཱ ཛཱིཝིཏཱརཀྑཱ, རཱུཔཱདིཔརིཝཱརིཏཱ.

དྷཱིཏཱ རཱཛཀུམཱརཱཝ, ཀལཱཔནྟརཝུཏྟིནོ;

དྭཱརབྷཱུཏཱཝ པཙྩེཀཾ, པཉྩཝིཉྙཱཎཝཱིཐིཡཱ.

རཱུཔཱདཱབྷིགྷཱཏཱརཧབྷཱུཏཱནཾ ཝཱ ཡཐཱཀྐམཾ;

དཊྛུཀཱམནིདཱནཱདིཀམྨབྷཱུཏཱནམེཝ ཝཱ.

པསཱདལཀྑཎཱ ¶ རཱུཔཱ-དཱཝིཉྫནརསཱ ཏཐཱ;

པཉྩཝིཉྙཱཎཡུགལ༹ཾ, དྭཱརབྷཱཝེན གཡ྄ཧརེ.

རཱུཔཾ ནིབྷཱསོ བྷཱུཏཱནཾ, སདྡོ ནིགྒྷོསནཾ ཏཐཱ;

གནྡྷོཝ གནྡྷནཾ ཏཏྠ, རསོ ཙ རསནཱིཡཏཱ.

ཨིཙྩེཝཾ པན ཙཏྟཱརོ, གོཙརཱ བྷཱུཏནིསྶིཏཱ;

བྷཱུཏཏྟཡཉྩ ཕོཊྛབྦམཱཔོདྷཱཏུཝིཝཛྫིཏཾ.

སདྡོ ཨནིཡཏོ ཏཏྠ, ཏདཉྙོ སཧཝུཏྟིནོ;

ཏཾཏཾསབྷཱཝབྷེདེན, ཏཾཏཾདྭཱརོཔལཀྑིཏོ.

པཉྩེཝ པཉྩཝིཉྙཱཎཝཱིཐིཡཱ ཝིསཡཱ མཏཱ;

པཉྩཝིཉྙཱཎཡུགལཱ༹ལམྦབྷཱཝརསཱ ཏཐཱ;

པཉྩཝིཉྙཱཎཡུགལ༹ཾ, གོཙརཏྟེན གཡ྄ཧརེ.

ཨིཏྠིནྡྲིཡཾ པནིཏྠཏྟམིཏྠིབྷཱཝོཏི བྷཱསིཏོ;

པུརིསཏྟཾ ཏཐཱ བྷཱཝོ, པུརིསིནྡྲིཡནཱམཀོ.

ཏཾ དྭཡཾ པནུཔཱདིནྣཀཱཡེ སབྦཏྠ ལབྦྷཏི;

ཀལཱཔནྟརབྷིནྣཉྩ, བྷིནྣསནྟཱནཝུཏྟི ཙ.

ཝསེ ¶ ཝཏྟེཏི ལིངྒཱན-མིཏྠིཔུམྦྷཱཝལཀྑཎཾ;

ཨིཏྠཱིཏི ཙ པུརིསོཏི, པཀཱསནརསཾ ཏཐཱ.

ཨིཏྠཱིནཾ པུརིསཱནཉྩ, ལིངྒསྶ ཙ ཡཐཱཀྐམཾ;

ནིམིཏྟཀུཏྟཱཀཔྤཱནཾ, ཀཱརཎཏྟེན གཡ྄ཧཏི.

སཏྟཱ མརནྟི ནཱསེན, ཡསྶ པཱཎནྟི ཝུཏྟིཡཱ;

སཛཱིཝམཏཀཱཡཱནཾ, བྷེདོ ཡེནོཔལཀྑིཏོ.

ཛཱིཝིཏཾ ཛཱིཝནརསཾ, ཨཱཡུབདྡྷོཏི གཡ྄ཧཏི.

མནོདྷཱཏུཡཱ ཙ ཏཐཱ, མནོཝིཉྙཱཎདྷཱཏུཡཱ;

ནིསྶཡལཀྑཎཾ ཝཏྠུ-རཱུཔཾ ཧདཡསམྨཏཾ.

སམཱདྷཱནརསཾ ¶ ཏཱས-མུབྦཱཧཏྟེན གཡ྄ཧཏི;

ཡསྨིཾ ཀུཔྤིཏཀཱལམྷི, ཝིཀྑིཏྟཱ ཧོནྟི པཱཎིནོ.

ཀཱཡོ ཡསྶཱནུསཱརེན, ཙིཏྟཀྑེཔེན ཁིཛྫཏི;

ཡསྨིཾ ནིརུདྡྷེ ཝིཉྙཱཎ-སོཏོཔི ཙ ནིརུཛ྄ཛྷཏི.

ཡཾ ནིསྶཱཡ པཏིཊྛཱཏི, པཊིསནྡྷི བྷཝནྟརེ;

ཏདེཏཾ ཀམྨསམྦྷཱུཏཾ, པཉྩཝོཀཱརབྷཱུམིཡཾ.

མཛ྄ཛྷེ ཧདཡཀོསམྷི, ཨཌྜྷཔསཏལོཧིཏེ;

བྷཱུཏརཱུཔམུཔཱདཱཡ, ཙཀྑཱདི ཝིཡ ཝཏྟཏི.

ཀབལཱི༹ཀཱརོ ཨཱཧཱརོ, རཱུཔཱཧརཎལཀྑཎོ;

ཀཱཡཱནུཡཱཔནརསོ, ཨུཔཏྠམྦྷོཏི གཡ྄ཧཏི.

ཨོཛཱཡ ཡཱཡ ཡཱཔེནྟི, ཨཱཧཱརསྣེཧསཏྟིཡཱ;

པཱཎིནོ ཀཱམལོཀམྷི, སཱཡམེཝཾ པཝུཙྩཏི.

ཨཱཀཱསདྷཱཏུ རཱུཔཱནཾ, པརིཡོསཱནལཀྑཎཱ;

པརིཙྪེདརསཱ རཱུཔམརིཡཱདོཏི གཡ྄ཧཏི.

སལཀྑཎཔརིཙྪིནྣརཱུཔདྷམྨཔརིགྒཧེ ¶ ;

ཡོགཱིནམུཔཀཱརཱཡ, ཡཾ དེསེསི དཡཱཔརོ.

པརིཙྪིནྣསབྷཱཝཱནཾ, ཀལཱཔཱནཾ ཡཐཱརཧཾ;

པརིཡནྟཱནམེཝེས, ཏདཱཀཱརོ པཝུཙྩཏི.

གམནཱདིཝཙཱིགྷོསཔཝཏྟམྷི ཡཐཱཀྐམཾ;

ཝཱཡོཔཐཝིདྷཱཏཱུནཾ, ཡོ ཝིཀཱརོ སམཏྠཏཱ.

སཧཛོཔཱདིནྣཀཱནཾ, ཀྲིཡཱཝཱཙཱཔཝཏྟིཡཱ;

ཝིཔྥནྡགྷཊྚནཱཧེཏུ, ཙིཏྟཱནུཔརིཝཏྟཀོ.

ས ཝིཀཱརཝིསེསོཡཾ, ཝིཉྙཏྟཱིཏི པཀཱསིཏོ;

ཝིཉྙཱཔེཏཱིཏི ཀཱཡེན, ཝཱཙཱཡ ཙ ཝིཙིནྟིཏཾ.

ཝཱཡོཔཐཝཱདྷིཀཱནཾ, བྷཱུཏཱནམིཏི ཀེཙན;

པཝུཏྟཱ ཏཱདིནཱ ཀཱཡ-པརིགྒཧསུཁཱཡ ཡཱ.

ལོཀེ པཔཉྩཱ ཝཏྟནྟི, བཧུདྷཱ ཡཱཡ ནིམྨིཏཱ;

ཀཔྤེནྟི ཀཱཡམཏྟཱནཾ, བཱལཱ ཡཱཡ ཙ ཝཉྩིཏཱ.

སཱཡཾ ཀཱཡཝཙཱིཀམྨ-དྭཱརབྷཱཝེན ལཀྑིཏཱ;

བྱཱཔཱརགྷཊྚནཱཧེཏུ-ཝིཀཱརཱཀཱརལཀྑཎཱ.

ཀཱཡཝིཔྥནྡགྷཊྚན-ཧེཏུབྷཱཝེན གཡ྄ཧཏི.

ལཧུཏཱ པན རཱུཔཱནཾ, ཨདནྡྷཱཀཱརལཀྑཎཱ;

ཨཝིཏྠཱནརསཱ སལླ-ཧུཀཝུཏྟཱིཏི གཡ྄ཧཏི.

མུདུཏཱཔི ¶ ཙ རཱུཔཱནཾ, ཀཀྑལཱ༹བྷཱཝལཀྑཎཱ;

ཀིཙྩཱཝིརུཛ྄ཛྷནརསཱ, ཨནུཀུལྱནྟི གཡ྄ཧཏི.

ཀམྨཉྙཏཱ ཙ རཱུཔཱནཾ, ཨལཾཀིཙྩསྶ ལཀྑཎཱ;

པཝཏྟིསམྤཏྟིརསཱ, ཡོགྒབྷཱཝོཏི གཡ྄ཧཏི.

སཔྤཱཡམུཏུམཱཧཱརཾ, ལདྡྷཱ ཙིཏྟམནཱམཡཾ;

ལཧཱུ མུདུ ཙ ཀམྨཉྙཾ, ཡདཱ རཱུཔཾ པཝཏྟཏི.

ཏཐཱ པཝཏྟརཱུཔསྶ, པཝཏྟཱཀཱརབྷེདིཏཾ;

ལཧུཏཱདིཏྟཡམྤེཏཾ, སཧཝུཏྟི ཏདཱ བྷཝེ.

སཔྤཱཡཔཊིཝེདྷཱཡ, པཊིཔཏྟུཔཀཱརིཀཱ;

སཱཀཱརཱ རཱུཔསམྤཏྟི, པཉྙཏྟེཝཾ མཧེསིནཱ.

རཱུཔསྶོཔཙཡོ ནཱམ, རཱུཔསྶཱཙཡལཀྑཎོ;

རཱུཔུམྨུཛྫཱཔནརསོ, པཱརིཔཱུརཱིཏི གཡ྄ཧཏི.

པཝཏྟིལཀྑཎཱ རཱུཔ-སནྟཏཱིཏི པཀཱསིཏཱ;

ཨནུཔྤབནྡྷནརསཱ, ཨཝིཙྪེདོཏི གཡ྄ཧཏི.

རཱུཔམཱཙཡརཱུཔེན ¶ , ཛཱཡཏིཙྩུཔརཱུཔརི;

པེཀྑཏོཔཙཱཡཱཀཱརཱ, ཛཱཏི གཡ྄ཧཏི ཡོགིནཱ.

ཨནུཔྤབནྡྷཱཀཱརེན, ཛཱཡཏཱིཏི སམེཀྑཏོ;

ཏདཱཡཾ སནྟཏཱཀཱརཱ, སམུཔཊྛཱསི ཙེཏསི.

ཨེཝམཱབྷོགབྷེདེན, ཛཱཏིརཱུཔཾ དྭིདྷཱ ཀཏཾ;

ཨཏྠཱུཔལདྡྷིབྷཱཝེན, ཛཱཡནྟཾ ཝཱཐ ཀེཝལཾ.

རཱུཔཝིཝིཏྟམོཀཱསཾ, པུརཀྑཏྟེན ཙཱིཡཏི;

ཨབྷཱཝཱ པན བྷཱཝཱཡ, པཝཏྟམིཏི སནྟཏི.

ཨེཝམཱཀཱརབྷེདཱཔི, སབྦཱཀཱརཝརཱཀརོ;

ཛཱཏིརཱུཔཾ དྭིདྷཱཀཱསི, ཛཱཏིརཱུཔཝིརོཙནོ.

ཛརཏཱ ¶ ཀཱལཧརཎཾ, རཱུཔཱནཾ པཱཀལཀྑཎཱ;

ནཝཏཱཔཱཡནརསཱ, པུརཱཎཏྟནྟི གཡ྄ཧཏི.

ཨནྟིམཀྑཎསམྤཏྟི, པརིབྷིཛྫནལཀྑཎཱ;

ཨནིཙྩཏཱ ཧརཎརསཱ, ཁཡབྷཱཝེན གཡ྄ཧཏི.

ཨིཏི ལཀྑཎརཱུཔཾ ཏུ, ཏིཝིདྷཾ བྷིནྣཀཱལིཀཾ;

སབྷཱཝརཱུཔདྷམྨེསུ, ཏཾཏཾཀཱལོཔལཀྑིཏཾ.

ཡེན ལཀྑཱིཡཏི རཱུཔཾ, བྷིནྣཱཀཱརཾ ཁཎེ ཁཎེ;

ཝིཔསྶནཱནཡཏྠཱཡ, ཏམིཙྩཱཧ ཏཐཱགཏོ.

ཨིཙྩེཝཾ སཔརིཙྪེདཱ, སཝིཀཱརཱ སལཀྑཎཱ;

ཨཀིཙྪཱ པཊིཝེདྷཱཡ, དཡཱཔནྣེན ཏཱདིནཱ.

རཱུཔདྷམྨཱ སབྷཱཝེན, ཝིཛྫམཱནཱཏི བྷཱསིཏཱ;

ཨཛ྄ཛྷཏྟིཀཱདིབྷེདེན, བཧུདྷཱ བྷིཛྫརེ ཀཐཾ;

དྭཱརབྷཱུཏཱ པཝཏྟེནྟི, ཙིཏྟམཏྟཱཏི ཀཔྤིཏཾ;

རཱུཔམཛ྄ཛྷཏྟིཀཾ ཏསྨཱ, པསཱདཱ བཱཧིརཾཔརཾ.

ཝཎྞོ ¶ གནྡྷོ རསོཛཱ ཙ, བྷཱུཏརཱུཔཉྩ བྷཱསིཏཾ;

ཨཝིནིབྦྷོགརཱུཔཾ ཏུ, ཝིནིབྦྷོགཾ པནེཏརཾ.

སཏྟཝིཉྙཱཎདྷཱཏཱུནཾ, ནིསྶཡཏྟཱ ཡཐཱརཧཾ;

པསཱདཱ ཧདཡཉྩེཝ, ཝཏྠུནཱ ཝཏྠུ དེསིཏཾ.

པཉྩཝིཉྙཱཎུཔཱདིནྣ-ལིངྒཱདི ཙ པཝཏྟིཏོ;

པསཱདཱ ཛཱིཝིཏཾ བྷཱཝཱ, ཙེནྡྲིཡཾ ནེནྡྲིཡཾཔརཾ.

པཉྩཝིཉྙཱཎཀམྨཱནཾ, པཝཏྟིམུཁབྷཱཝཏོ;

དྭཱརཾ པསཱདཝིཉྙཏྟི-པརམདྭཱརམཱིརིཏཾ.

ཏསྨཱ སཔྤཊིགྷཾ ནཱམ, རཱུཔམཔྤཊིགྷཾཔརཾ.

དྭཱརཱལམྦཎབྷཱཝེན ¶ , སབྷཱཝེནེཝ པཱཀཊཱ;

ཏེ ཨེཝོལཱ༹རིཀཾ ཏསྨཱ, སེསཾ སུཁུམམཱིརིཏཾ.

ཨོལཱ༹རིཀསབྷཱཝེན, པརིགྒཧསུཁཱ ཏཧིཾ;

ཏེ ཨེཝ སནྟིཀེརཱུཔཾ, དཱུརེརཱུཔཾ པནེཏརཾ.

ཏཎྷཱདིཊྛཱིཧུཔེཏེན, ཀམྨུནཱདིནྣབྷཱཝཏོ;

ཀམྨཛཱཏམུཔཱདིནྣཾ, ཨནུཔཱདིནྣཀཾཔརཾ.

ཙཀྑུནཱ དིསྶམཱནཏྟཱ, སནིདསྶནནཱམཀཾ;

རཱུཔམེཝ ཏཏོ སེས-མནིདསྶནམབྲཝུཾ.

སནིདསྶནརཱུཔཉྩ, རཱུཔཾ སཔྤཊིགྷཾ ཏཐཱ;

ཨནིདསྶནམཉྙཾ ཏུ, ཐཱུལཾ སཔྤཊིགྷཾ མཏཾ.

ཨནིདསྶནརཱུཔཉྩ, སེསཾ ཨཔྤཊིགྷཾ ཏཐཱ;

རཱུཔཾ ཏིཝིདྷམིཙྩེཝཾ, ཝིབྷཛནྟི ཝིཙཀྑཎཱ.

ཨཔྤཏྟགོཙརགྒཱཧིརཱུཔཾ ཙཀྑཱདིཀཾ དྭཡཾ;

སམྤཏྟགྒཱཧི གྷཱནཱདི-ཏྟཡམགྒཱཧིཀཾ རཱུཔཾ.

དིཊྛཾ རཱུཔཾ སུཏཾ སདྡོ, མུཏཾ གནྡྷཱདིཀཏྟཡཾ;

ཝིཉྙཱཎེནེཝ ཉེཡྻཏྟཱ, ཝིཉྙཱཏམཔརཾ བྷཝེ.

ཧདཡཾ ¶ ཝཏྠུམེཝེཏྠ, དྭཱརཾ ཝིཉྙཏྟིཀདྭཡཾ;

པསཱདཱ ཝཏྠུ ཙ དྭཱརཾ, ཨཉྙཾ ཏུབྷཡཝཛྫིཏཾ.

བྷེདིཏྭཱ རཱུཔམིཙྩེཝཾ, ཏསྶེཝ པུན པཎྜིཏོ;

སམུཊྛཱནཛནཀེཧི, ཝིབྷཱཝེཡྻ ཡཐཱརཧཾ.

ཀུསལཱཀུསལཾ ཀམྨ-མཏཱིཏཾ ཀཱམིཀཾ ཏཐཱ;

རཱུཔཱཝཙརམིཙྩེཝཾ, པཉྩཝཱིསཏིདྷཱ ཋིཏཾ.

པཊིསནྡྷིམུཔཱདཱཡ, སཉྫནེཏི ཁཎེ ཁཎེ;

ཀཱམརཱུཔེསུ རཱུཔཱནི, ཀམྨཛཱནི ཡཐཱརཧཾ.

ཛཱཡནྟཾ ¶ པཉྩཝིཉྙཱཎ-པཱཀཱརུཔྤཝིཝཛྫིཏཾ;

བྷཝངྒཱདིམུཔཱདཱཡ, སམུཔྤཱདེཏི མཱནསཾ.

ཨཛ྄ཛྷཏྟཾ པན ཙཏྟཱརོ, བཱཧིརོ ཏུཔལབྦྷཏི;

སབྦེ ཀཱམབྷཝེ རཱུཔེ, ཨཱཧཱརོ ན སམཱིརིཏོ.

པཝཏྟེ ཧོནྟི ཙཏྟཱརོ, ཀམྨམེཝོཔཔཏྟིཡཾ;

ཛཱིཝམཱནསྶ སབྦེཔི, མཏསྶོཏུ སིཡཱ ན ཝཱ.

ཀམྨཾ ཙིཏྟོཏུམཱཧཱར-མིཙྩེཝཾ པན པཎྜིཏཱ;

རཱུཔཱནཾ ཛནཀཏྟེན, པཙྩཡཱཏི པཀཱསཡུཾ.

ཧདཡིནྡྲིཡརཱུཔཱནི, ཀམྨཛཱནེཝ ཙིཏྟཛཾ;

ཝིཉྙཏྟིདྭཡམཱིརེནྟི, སདྡོ ཙིཏྟོཏུཛོ མཏོ.

ཙིཏྟོཏུཀབལཱི༹ཀཱར-སམྦྷཱུཏཱ ལཧུཏཱདཡོ;

ཀམྨཙིཏྟོཏུཀཱཧཱར-ཛཱནི སེསཱནི དཱིཔཡེ.

ཛཱཡམཱནཱདིརཱུཔཱནཾ, སབྷཱཝཏྟཱ ཧི ཀེཝལཾ;

ལཀྑཎཱནི ན ཛཱཡནྟི, ཀེཧིཙཱིཏི པཀཱསིཏཾ.

ཡདིཛཱཏཱདཡོ ¶ ཏེས-མཝསྶཾ ཏཾསབྷཱཝཏཱ;

ཏེསཉྩ ལཀྑཎཱནནྟི, ཨནཝཏྠཱ བྷཝིསྶཏི.

ཀམྨཙིཏྟོཏུཀཱཧཱར-ཛཱནི ཧོནྟི ཡཐཱཀྐམཾ.

ཀལཱཔཱནི ཡཐཱཡོགཾ, ཏཱནི སངྒཡ྄ཧ པཎྜིཏཱ;

ནཝ ཚ ཙཏུརོ དྭེཏི, ཨེཀཝཱིསཏི བྷཱཝཡུཾ.

ཛཱིཝིཏཉྩཱཝིནིབྦྷོག-རཱུཔཉྩ ¶ , སཧཝུཏྟིཏོ;

སངྒཡ྄ཧ ཙཀྑུདསཀཾ, ཙཀྑུམཱདཱཡ བྷཱསིཏཾ.

ཏཐཱ སོཏཉྩ གྷཱནཉྩ, ཛིཝ྄ཧཾ ཀཱཡཾ ཡཐཱཀྐམཾ;

ཨིཏྠིབྷཱཝཉྩ པུམྦྷཱཝཾ, ཝཏྠུམཱདཱཡ དཱིཔཡེ.

ཨཝིནིབྦྷོགརཱུཔེན, ཛཱིཝིཏནཝཀཾ བྷཝེ;

ཨིཙྩེཝཾ ཀམྨཛཱ ནཱམ, ཀལཱཔཱ ནཝདྷཱ ཋིཏཱ.

ཨཝིནིབྦྷོགརཱུཔཉྩ, སུདྡྷཊྛཀམུདཱིརིཏཾ;

ཀཱཡཝིཉྙཏྟིཡཱ སདྡྷིཾ, ནཝཀནྟི པཝུཙྩཏི.

ཝཙཱིཝིཉྙཏྟིསདྡེཧི, དསཀཾ བྷཱསིཏཾ ཏཐཱ;

ལཧུཏཱདེཀཱདསཀཾ, ལཧུཏཱདཱིཧི ཏཱིཧིཔི.

ཀཱཡཝིཉྙཏྟིལཧུཏཱ-དཱིཧི དྭཱདསཀཾ མཏཾ;

ཝཙཱིཝིཉྙཏྟིལཧུཏཱ-དཱིཧི ཏེརསཀཾ ཏཐཱ.

གཧེཏྭཱཀཱརབྷེདཉྩ, ཏཾཏཾཀཱལོཔལཀྑིཏཾ;

ཨིཏི ཙིཏྟསམུཊྛཱནཱ, ཚ ཀལཱཔཱཏི བྷཱསིཏཱ.

སུདྡྷཊྛཀཾ ཏུ པཋམཾ, སདྡེན ནཝཀཾ མཏཾ;

ལཧུཏཱདེཀཱདསཀཾ, ལཧུཏཱདིསམཱཡུཏཾ.

སདྡེན ལཧུཏཱདཱིཧི, ཏཐཱ དྭཱདསཀཾ བྷཝེ;

ཀལཱཔཱ ཨུཏུསམྦྷཱུཏཱ, ཙཏུདྡྷེཝཾ པཀཱསིཏཱ.

སུདྡྷཊྛཀཉྩ ལཧུཏཱ-དེཀཱདསཀམིཙྩཔི;

ཀལཱཔཱཧཱརསམྦྷཱུཏཱ, དུཝིདྷཱཝ ཝིབྷཱཝིཏཱ.

ཀལཱཔཱནཾ ¶ པརིཙྪེད-ལཀྑཎཏྟཱ ཝིཙཀྑཎཱ;

ན ཀལཱཔངྒམིཙྩཱཧུ, ཨཱཀཱསཾ ལཀྑཎཱནི ཙ.

ཨིཙྩེཝཾ ཙཏུསམྦྷཱུཏཱ, ཀལཱཔཱ ཨེཀཝཱིསཏི;

སབྦེ ལབྦྷནྟི ཨཛ྄ཛྷཏྟཾ, བཱཧིརོཏུསམུཊྛིཏཱ.

ཨཊྛཀཾ ¶ སདྡནཝཀ-མིཏི དྭེདྷཱཝ བྷཱསིཏཱ;

མཏཀཱཡེཔི ཏེ ཨེཝ, སིཡུམིཙྩཱཧུ པཎྜིཏཱ.

ཀཱམེ སབྦེཔི ལབྦྷནྟི, སབྷཱཝཱནཾ ཡཐཱརཧཾ;

སམྤུཎྞཱཡཏནཱནཾ ཏུ, པཝཏྟེ ཙཏུསམྦྷཝཱ.

དསཀཱནེཝ སབྦཱནི, ཀམྨཛཱནེཝ ཛཱཏིཡཾ;

ཙཀྑུསོཏགྷཱནབྷཱཝ-དསཀཱནི ན ཝཱ སིཡུཾ.

གབྦྷསེཡྻཀསཏྟཱནཾ, ཏཏོ སེསཱནི སམྦྷཝཱ.

ཨིཙྩེཝཾ ཙཏུསམྦྷཱུཏཱ, རཱུཔསནྟཏི ཀཱམིནཾ;

དཱིཔཛཱལཱཝ སམྦནྡྷཱ, ཡཱཝཛཱིཝཾ པཝཏྟཏི.

ཨཱཡུནོ ཝཱཐ ཀམྨསྶ, ཁཡེནོབྷིནྣམེཝ ཝཱ;

ཨཉྙེན ཝཱ མརནྟཱན-མུཔཙྪེདཀཀམྨུནཱ.

སཏྟརསཙིཏྟཀྑཎམཱཡུ རཱུཔཱནམཱིརིཏཾ;

སཏྟརསམཙིཏྟསྶ, ཙུཏིཙིཏྟོཔརཱི ཏཏོ.

ཋིཏིཀཱལམུཔཱདཱཡ, ཀམྨཛཾ ན པརཾ བྷཝེ;

ཏཏོ བྷིཛྫཏུཔཱདིནྣཾ, ཙིཏྟཛཱཧཱརཛཾ ཏཏོ.

ཨིཙྩེཝཾ མཏསཏྟཱནཾ, པུནདེཝ བྷཝནྟརེ;

པཊིསནྡྷིམུཔཱདཱཡ, ཏཐཱ རཱུཔཾ པཝཏྟཏི.

གྷཱནཛིཝ྄ཧཱཀཱཡབྷཱཝདསཀཱཧཱརཛཾ ¶ པན;

རཱུཔཾ རཱུཔབྷཝེ ནཏྠི, པཊིསནྡྷིཔཝཏྟིཡཾ.

ཏཏྠ ¶ གནྡྷརསོཛཱ ཙ, ན ལབྦྷནྟཱིཏི ཀེཙན;

ཀལཱཔཱ ཙ གཎེཏབྦཱ, ཏཏྠེཏཾ རཱུཔཝཛྫིཏཱ.

ཋིཏིཀྑཎཉྩ ཙིཏྟསྶ, ཏེ ཨེཝ པཊིསེདྷཡུཾ;

ཙིཏྟབྷངྒཀྑཎེ རཱུཔ-སམུཔྤཏྟིཉྩ ཝཱརཡུཾ.

ཙཀྑུསོཏཝཏྠུསདྡཙིཏྟཛམྤི ཨསཉྙིསུ;

ཨརཱུཔེ པན རཱུཔཱནི, སབྦཐཱཔི ན ལབྦྷརེ.

རཱུཔཝིབྷཱགམིམཾ སུཝིབྷཏྟཾ, རཱུཔཡཏོ པན ཙེཏསི ནིཙྩཾ;

རཱུཔསམིདྡྷཛིནེརིཏདྷམྨེ, རཱུཔཝཏཱི ཨབྷིཝཌྜྷཏི པཉྙཱ.

ཨིཏི ནཱམརཱུཔཔརིཙྪེདེ རཱུཔཝིབྷཱགོ ནཱམ

ཙཏུཔཉྙཱས དྷམྨཱ ཧི, ནཱམནཱམེན བྷཱསིཏཱ;

ཨཊྛཱརསཝིདྷཱ ཝུཏྟཱ, རཱུཔདྷམྨཱཏི སབྦཐཱ.

ཨབྷིཉྙེཡྻཱ སབྷཱཝེན, དྭཱསཏྟཏི སམཱིརིཏཱ;

སཙྩིཀཊྛཔརམཏྠཱ, ཝཏྠུདྷམྨཱ སལཀྑཎཱ.

ཏེསཾ ¶ ¶ དཱནི པཝཀྑཱམི, སབྦསངྒཱཧིཀཾ ནཡཾ;

ཨཱབྷིདྷམྨིཀབྷིཀྑཱུནཾ, ཧཏྠསཱརམནུཏྟརཾ.

དུཀཱ ཏིཀཱ ཙ ཁནྡྷཱཡཏནཏོ དྷཱཏུསཙྩཏོ;

པཊིཙྩསམུཔྤཱདཱ ཙ, པཙྩཡཱ ཙ སམཉྙཏོ.

ཨསངྑཱརམནུཔྤཱདཾ, སསྶཏཾ ནིཙྩལཀྑཎཾ.

པཙྩཡཱ ཙེཝ སངྑཱརཱ, སངྑཏཱ ཙ ཏཏོཔརེ;

ཨུཔྤཱདཝཡདྷམྨཱ ཙ, པཙྩཡཊྛིཏིཀཱ ཏཐཱ.

ནིབྦཱནཾ རཱུཔདྷམྨཱ ཙ, ཝིཔྤཡུཏྟཱཝ ཀེཝལཾ;

ཨཱརམྨཎཱ ཨེཝ ནཱམ, ནཱལམྦནྟི ཧི ཀིཉྩིཔི.

ཨེཀུཔྤཱདནིརོདྷཱ ཙ, ཨེཀཱལམྦཎཝཏྠུཀཱ;

སཾསཊྛཱ སམྤཡུཏྟཱ ཙ, སཧཛཱཏཱ ཡཐཱརཧཾ.

ཨཉྙམཉྙེནུཔཏྠདྡྷཱ, སབྦཏྠ སཧཝུཏྟིནོ;

སཱརམྨཎཱརམྨཎཱ ཙ, ཙིཏྟཙེཏསིཀཱ མཏཱ.

ཝིཔསྶནཱཡ བྷཱུམཱིཏི, ཏཏྠ ཏེབྷཱུམཀཱ མཏཱ;

ལོཀིཡཱ པརིཡཱཔནྣཱ, ཝཊྚདྷམྨཱ སཨུཏྟརཱ.

སཀྐཱཡདྷམྨཱ སབྷཡཱ, ཏཱིརམོརིམནཱམཀཾ;

སཾཡོཛནིཡཱ སམལཱ, ཏཐཱ ནཱིཝརཎཱིཡཀཱ.

སཾཀླེསིཀཱ པརཱམཊྛཱ, ཨུཔཱདཱནཱིཡསཱསཝཱ;

ཨོགྷནཱིཡཱ ཡོགནཱིཡཱ, གནྠནཱིཡཱཏི བྷཱསིཏཱ.

ཨཉྙེ ཨཔརིཡཱཔནྣཱ, ཝིཝཊྚཱ ཙཱཝིཔསྶིཡཱ;

ལོཀུཏྟརཱནུཏྟརཱ ཙ, ནོསཾཡོཛནིཡཱདཡོ.

ཀམྨཛཱཏཱ ¶ ཨུཔཱདིནྣཱ, ནཱམ ཝུཙྩནྟི སཱསཝཱ;

ཨནུཔཱདིནྣཀཱ ནཱམ, ཏཏོ སེསཱ པཝུཙྩརེ.

དྷམྨཱ སཔྤཊིབྷཱགཱཏི, ཀུསལཱཀུསལཱ མཏཱ;

ཨཔྤཊིབྷཱགདྷམྨཱཏི, ཏདཉྙེ པརིདཱིཔཡེ.

སརཎཱ ¶ ཙ པཧཱཏབྦཱ, དྭཱདསཱཀུསལཱ པན;

ཏདཉྙེ ཨརཎཱ ནཱམ, པཧཱཏབྦཱ ན ཀེཧིཙི.

རཱུཔིནོ རཱུཔདྷམྨཱ ཙ, ནཱམདྷམྨཱ ཨརཱུཔིནོ;

ཨེཝམཱདིཔྤབྷེདེན, དྭིདྷཱ བྷེདཾ ཝིབྷཱཝཡེ.

བཱལཱ དྷམྨཱ ཏཔནཱིཡཱ, ཀཎྷཱ ཙ ཀཊུཀཔྥལཱ;

ཨསེཝིཏབྦཱ སཱཝཛྫཱ, དྭཱདསཱཀུསལཱ མཏཱ.

པཎྜིཏཱ ཙཱཏཔནཱིཡཱ, སུཀྐཱ ཙ སུཁདཱཡཀཱ;

སེཝིཏབྦཱནཝཛྫཱ ཙ, ཀུསལཱ ཨེཀཝཱིསཏི.

ཀྲིཡཱ ཝིཔཱཀཱ རཱུཔཉྩ, ནིབྦཱནནྟི ཙཏུབྦིདྷཱ;

ཝུཏྟཱ ཨབྱཱཀཏཱ ནཱམ, དྷམྨཱ ཏབྦིཔརཱིཏཏོ.

ཧཱིནཱ དྷམྨཱ པརིཏྟཱ ཙ, ཀཱམཱཝཙརབྷཱུམིཀཱ;

རཱུཔཱརཱུཔཱ པཝུཙྩནྟི, མཛ྄ཛྷིམཱ ཙ མཧགྒཏཱ.

ཨཔྤམཱཎཱ པཎཱིཏཱ ཙ, དྷམྨཱ ལོཀུཏྟརཱ མཏཱ;

སཾཀིལིཊྛསཾཀླེསིཀཱ, དྭཱདསཱཀུསལཱ ཏཐཱ.

ཨསཾཀིལིཊྛསཾཀླེསིཀཱ, དྷམྨཱ ཏེབྷཱུམཀཱཔརེ;

ཨསཾཀླིཊྛཱསཾཀླེསིཀཱ, ནཝ ལོཀུཏྟརཱ སིཡུཾ.

ཝིཔཱཀཱ ཏེ པཝུཙྩནྟི, ཝིཔཱཀཱ ཙཏུབྷཱུམཀཱ;

ཝིཔཱཀདྷམྨཱ ནཱམཱཏི, ཀུསལཱཀུསལཱ མཏཱ.

ཀྲིཡཱ རཱུཔཉྩ ནིབྦཱནཾ, ན པཱཀཾ ན ཏུ པཙྩཏི;

ཨཱཙཡགཱམིནོ དྷམྨཱ, པུཉྙཱཔུཉྙཱཝ སཱསཝཱ.

ཝུཏྟཱཔཙཡགཱམིནོ ¶ , ཀུསལཱནུཏྟརཱ པན;

ཀྲིཡཱ རཱུཔཉྩ ནིབྦཱནཾ, པཱཀཱ ཙོབྷཡཝཛྫིཏཱ.

པཋམཱནུཏྟརོ མགྒོ, དསྶནཾ བྷཱཝནཱཔརེ;

ཏདཉྙེ དྭཡནིམྨུཏྟཱ, སབྦེཔི པརམཏྠཏོ.

སཏྟ ལོཀུཏྟརཱ ཧེཊྛཱ, ཝུཏྟཱ སེཀྑཱཏི ཏཱདིནཱ;

ལོཀིཡཱཔི ¶ ཙ ནིབྦཱནཾ, བྷཱསིཏོབྷཡཝཛྫིཏཱ;

ཨེཝམཱདིཔྤཀཱརེཧི, ཏིཝིདྷཱཏི ཝིབྷཱཝཡེ.

ཨཏཱིཏཱནཱགཏཾ རཱུཔཾ, པཙྩུཔྤནྣམཐཱཔརཾ;

ཨཛ྄ཛྷཏྟཾ ཝཱ བཧིདྡྷཱ ཝཱ, སུཁུམོལཱ༹རིཀཾ ཏཐཱ.

ཧཱིནཾ པཎཱིཏཾ ཡཾ དཱུརེ, སནྟིཀེ ཝཱ ཏདེཀཏོ;

སབྦཾ རཱུཔཾ སམོདྷཱཡ, རཱུཔཀྑནྡྷོཏི ཝུཙྩཏི.

ཏཐེཝ ཝེདནཱཀྑནྡྷོ, ནཱམ ཡཱ ཀཱཙི ཝེདནཱ;

སཉྙཱཀྑནྡྷོཏི སཉྙཱ ཙ, རཱསིབྷཱཝེན བྷཱསིཏཱ.

ཝཊྚདྷམྨེསུ ཨསྶཱདཾ, ཏདསྶཱདོཔསེཝནཾ;

ཝིནིབྷུཛྫ ནིདསྶེཏུཾ, ཁནྡྷདྭཡམུདཱཧཊཾ.

ཝིཝཱདམཱུལསཾསཱར-ཀམཧེཏུནིདསྶནཾ;

སནྡྷཱཡ ཝེདནཱ སཉྙཱ, ཀཏཱ ནཱནཱཏི ཀེཙན.

ཙིཏྟསཾསཊྛདྷམྨཱནཾ, ཙེཏནཱམུཁཏོ པན;

སངྑཱརཀྑནྡྷནཱམེན, དྷམྨཱ ཙེཏསིཀཱ མཏཱ.

སབྦབྷེདཾ ཏཐཱ ཙིཏྟཾ, ཝིཉྙཱཎཀྑནྡྷ སམྨཏཾ;

བྷེདཱབྷཱཝེན ནིབྦཱནཾ, ཁནྡྷསངྒཧནིསྶཊཾ.

ཨཱལམྦནཱིཡབྷཱཝེན, ཨུཔཱདཱནོཔཀཱརཏོ;

པཉྩུཔཱདཱནཀྑནྡྷཱཏི, ལོཀུཏྟརཝིཝཛྫིཏཱ.

ཡཐཱ ¶ ཐཱུལཾ ཧིཏཏྠཱཡ, པརིགྒཱཧཀཡོགིནཾ;

དྷམྨཱ ཏེབྷཱུམཀཱ ཨེཀ-བྷཱུམིབྷཱཝཱཡ དེསིཏཱ.

བྷཱཛནཾ བྷོཛནཾ ཏསྶ, བྱཉྫནཾ བྷོཛཀོ ཏཐཱ;

བྷུཉྫིཏཱ ཙཱཏི པཉྩེཏེ, ཨུཔམེནྟི ཡཐཱཀྐམཾ.

གིལཱནསཱལཱ གེལཉྙཾ, ཨསཔྤཱཡོཔསེཝནཱ;

སམུཊྛཱནཾ གིལཱནོཏི, ཨུཔམེནྟི ཙ པཎྜིཏཱ.

ཙཱརཀོ ཀཱརཎཾ ཏཏྠ, ཨཔརཱདྷོ ཙ ཀཱརཀོ;

ཨཔརཱདྷཀཏོ ཙོརོ, ཨིཏི ཙོཔམིཏཱ པུན.

ནིཙྩཱདྷིཔཱིལ༹ནཊྛེན ¶ , བྷཱརཱཏི པརིདཱིཔིཏཱ;

ཀླེསདུཀྑམུཁེནེཏེ, ཁཱདཀཱ ཙ ནིརནྟརཾ.

ཨནཏྠཱཝཧིཏཱ ནིཙྩམུཀྑིཏྟཱསིཀཝེརིནོ;

མཙྩུམཱརཱབྷིདྷེཡྻཏྟཱ, ཝདྷཀཱཏི ཙ བྷཱསིཏཱ.

ཝིམདྡཱསཧནཾ རཱུཔཾ, ཕེཎཔིཎྜཾཝ དུབྦལཾ;

མུཧུཏྟརམཎཱིཡཏྟཱ, ཝེདནཱ བུབྦུལཱུ༹པམཱ.

མརཱིཙིཀཱུཔམཱ སཉྙཱ, ཝིཔལླཱསཀབྷཱཝཏོ;

སངྑཱརཱཔི ཙ ནིསྶཱརཱ, ཀདལིཀྑནྡྷསཱདིསཱ.

ནཱནཔྤཀཱརཾ ཙིནྟེནྟཾ, ནཱནཱཀླེསཝིམོཧིཏཾ;

པལམྦྷཏཱིཏི ཝིཉྙཱཎཾ, མཱཡཱསམམུདཱིརིཏཾ.

ཨིཙྩེཝཾ པཉྩུཔཱདཱནཀྑནྡྷཱ ཁནྡྷཱ ཙ ཀེཝལཾ;

པཉྩཀྑནྡྷཱཏི ནཱམེན, དེསིཏཱཏི ཝིབྷཱཝཡེ.

ཨཛ྄ཛྷཏྟཉྩ བཧིདྡྷཱ ཙ, ཝིཉྙཱཎུཔྤཏྟིཀཱརཎཾ;

དྭཱརཱལམྦཎབྷེདེན, དྭེདྷཱཡཏནམཱིརིཏཾ.

ཙཀྑཱདཛ྄ཛྷཏྟིཀཾ ཏཏྠ, ཚདྭཱརཱཡཏནཾ བྷཝེ;

བཱཧིརཱཡཏནཾ ནཱམ, ཏཐཱ རཱུཔཱདིགོཙརཾ.

ཨིཏི ¶ ཝཱིཐིཔྤཝཏྟཱནཾ, དྭཱརཱལམྦཎསངྒཧོ;

ཨཱགམེ ཨབྷིདྷམྨེ ཏུ, སབྦཐཱཔི ཡཐཱརཧཾ.

ཏཐཱཧནནྟརཱཏཱིཏོ, ཛཱཡམཱནསྶ པཙྪཏོ;

མནོ སབྦོཔི སབྦསྶ, མནསྶཱཡཏནཾ བྷཝེ.

ཏཐཱ པུབྦངྒམཊྛེན, སཧཛཱནམརཱུཔིནཾ;

དྭཱརབྷཱཝེན ཝིཉྙཱཎཾ, སབྦམཱཡཏནཾ མཏཾ.

པཉྩཝིཉྙཱཎདྷམྨཱནཾ, ཨིཏི ཚདྡྷཱ ཝིབྷཱཝཡེ.

སེསཾ རཱུཔཉྩ ནིབྦཱནཾ, སབྦེ ཙེཏསིཀཱཏི ཙ.

ཨེཀཱུནསཊྛིདྷམྨཱནཾ ¶ , དྷམྨཱཡཏནསངྒཧོ;

ཨིཏི ཚདྡྷཱ པཀཱསེནྟི, བཱཧིརཱཡཏནཾ བུདྷཱ.

སུཉྙགཱམོཝ དཊྛབྦ-མཛ྄ཛྷཏྟིཀམསཱརཏོ;

གཱམགྷཱཏཀཙོརཱཝ, ཏཾ ཧནནྟཾཝ བཱཧིརཾ.

ནཱམཔྤཝཏྟིམུལ༹ྷཱནཾ, ཏདུཔྤཏྟིཀཀཱརཎཾ;

དྭཱདསཱཡཏནཱནཱིཏི, ཝུཏྟམིཏྠཾ མཧེསིནཱ.

སམཏྟཱ བྷཱཝམཏྟེན, དྷཱརེནྟཱིཏི སལཀྑཎཾ;

དྭཱརཱལམྦཏདུཔྤནྣ-པརིཡཱཡེན བྷེདིཏཱ.

མནཱཡཏནམེཏྠཱཧ, སཏྟ ཝིཉྙཱཎདྷཱཏུཡོ;

ཨེཀཱདས ཡཐཱཝུཏྟཱ, ཨིཙྩཊྛཱརས དྷཱཏུཡོ.

ཨནྟཱདིཀཱ མནོདྷཱཏུ, མནོཝིཉྙཱཎདྷཱཏུཡཱ;

པཝེསཱཔགམེ དྭཱར-པརིཡཱཡེན ཏིཊྛཏི.

བྷེརཱིཏལདཎྜགྷོས-སམཾ ཚཀྐཾ ཡཐཱཀྐམཾ;

ཀཊྛཱརཎིཔཱཝཀཱདི-སམཉྩ ཏིཝིདྷཾ བྷཝེ.

དུཀྑཾ ¶ སམུདཡོ ཙེཝ, ནིརོདྷོ ཙ ཏཐཱཔརོ;

མགྒོ ཙཱཏི ཙཏུདྡྷཱཧ, སཙྩཾ སཙྩཔརཀྐམོ.

བྷཱརོ ཙ བྷཱརདཱནཉྩ, བྷཱརནིཀྑེཔནཾ ཏཐཱ;

བྷཱརནིཀྑེཔནཱུཔཱཡོ, ཨིཙྩོཔམྨཾ ཡཐཱཀྐམཾ.

རོགོ རོགནིདཱནཉྩ, རོགཝཱུཔསམོ ཏཐཱ;

རོགབྷེསཛྫམིཙྩེཝ-མུཔམཱཧི ཙ དཱིཔིཏཾ.

ཝིསརུཀྑོ རུཀྑམཱུལཾ, རུཀྑཙྪེདོ ཏཐཱཔརོ;

རུཀྑཙྪེདཀསཏྠནྟི, ཙཏུདྷོཔམིཏཾ ཏཐཱ.

ཏཱིརམོརིམསངྑཱཏཾ, མཧོགྷོ པཱརིམཾ ཏཐཱ;

ཏདཏིཀྐམུཔཱཡོཏི, ཨུཔམེནྟི ཙ ཏཾ བུདྷཱ.

སཙྪིཀཏྭཱན པཙྩཀྑ-མིཙྩོཔམྨཾ ཡཐཱཀྐམཾ;

སམཱཙིཀྑི ཝིམོཀྑཱཡ, སཙྩཾ ཏཙྪནིཡཱམཏོ.

ཏཐཱ ¶ ཧི དུཀྑཾ ནཱབཱདྷཾ, ནཱཉྙཾ དུཀྑཱ ཙ བཱདྷཀཾ;

བཱདྷཀཏྟནིཡཱམེན, དུཀྑསཙྩམིཏཱིརིཏཾ.

ཏཾ ཝིནཱ ནཱཉྙཏོ དུཀྑཾ, ན ཧོཏི ན ཙ ཏཾ ཏཏོ;

དུཀྑཧེཏུནིཡཱམེན, སཙྩམཱཧ ཝིསཏྟིཀཾ.

ནཱཉྙཱ ནིབྦཱནཏོ སནྟི, ན ཙ སནྟཾ ན ཏཾ ཡཏོ;

སནྟབྷཱཝནིཡཱམེན, ནིབྦཱནཾ སཙྩམུཏྟམཾ.

ནཱཉྙཾ མགྒཱཙ ནིཡྻཱནཾ, ཨནིཡྻཱནོ ན ཙཱཔི སོ;

ཏསྨཱ ནིཡྻཱནབྷཱཝེན, མགྒོ སཙྩནྟི སམྨཏོ.

ཨིཏི ཏཙྪཱཝིཔལླཱས-བྷཱུཏབྷཱཝོ ཙཏཱུསུཔི;

སཙྩཊྛོཏི ཝིནིདྡིཊྛོ, དུཀྑཱདཱིསྭཝིསེསཏོ.

པཱིལ༹ནཊྛོ སངྑཏཊྛོ, སནྟཱཔཊྛོ ཙ བྷཱསིཏོ;

ཝིཔརཱིཎཱམཊྛོ ཙཱཏི, དུཀྑསྶེཝཾ ཙཏུབྦིདྷཱ.

ཨཱཡཱུཧནཱ ¶ ནིདཱནཱ ཙ, སཾཡོགཱ པལིབོདྷཏོ;

དུཀྑསྶམུདཡསྶཱཔི, ཙཏུདྷཏྠཱ པཀཱསིཏཱ.

ནིསྶཱརཎཱ ཝིཝེཀཱ ཙཱ-སངྑཏཱམཏཏོ ཏཐཱ;

ཨཏྠཱ དུཀྑནིརོདྷསྶ, ཙཏུདྷཱཝ སམཱིརིཏཱ.

སཙྩིཀཊྛཔརམཏྠཾ, ཏཙྪཱབྷིསམཡཊྛཏོ;

ཏཐཏྠམཔི སཙྩཊྛཾ, པཊྛཔེནྟེཏྠ པཎྜིཏཱ.

ཏདེཏཾ པཊིཝིཛ྄ཛྷནྟི, ཨརིཡཱཝ ཙཏུབྦིདྷཾ;

ཝུཏྟམརིཡསཙྩནྟི, ཏསྨཱ ནཱཐེན ཏཾ ཀཐཾ;

ཛཱཏི ¶ ཛརཱ ཙ མརཎཾ, སོཀོ ཙ པརིདེཝནཱ;

དུཀྑཉྩ དོམནསྶཉྩ, ཨུཔཱཡཱསོ ཏཐཱཔརོ.

ཨཔྤིཡེཧི ཙ སཾཡོགོ, ཝིཔྤཡོགོ པིཡེཧི ཙ;

ཡམྤི ན ལབྷཏིཙྪནྟོ, ཏམྤི དུཀྑམིདཾ མཏཾ.

ཨཔཱཡེསུཔཔཛྫནྟཱ, ཙཝནྟཱ དེཝལོཀཏོ;

མནུསྶེསུ ཙ ཛཱིརནྟཱ, ནཱནཱབྱསནཔཱིལི༹ཏཱ.

སོཙནྟཱ པརིདེཝནྟཱ, ཝེདེནྟཱ དུཀྑཝེདནཾ;

དོམནསྶེཧི སནྟཏྟཱ, ཨུཔཱཡཱསཝིགྷཱཏིནོ.

ཨནིཊྛེཧི ཨཀནྟེཧི, ཨཔྤིཡེཧི སམཱཡུཏཱ;

སངྑཱརེཧི ཙ སཏྟེཧི, ནཱནཱནཏྠཝིདྷཱཡིབྷི.

ཨིཊྛེཧི པིཡཀནྟེཧི, མནཱཔེཧི ཝིཡོཛིཏཱ;

སངྑཱརེཧི ཙ སཏྟེཧི, ནཱནཱསམྤཏྟིདཱཡིབྷི.

དུཀྑཱཔགམམིཙྪནྟཱ ¶ , པཏྠཡནྟཱ སུཁཱགམཾ;

ཨལབྦྷནེཡྻདྷམྨེསུ, པིཔཱསཱཏུརམཱནསཱ.

ཀིཙྪཱདྷིཔནྣཱ ཀཔཎཱ, ཝིཔྥནྡནྟཱ རུདམྨུཁཱ;

ཏཎྷཱདཱསཱ པརཱབྷཱུཏཱ, བྷཝསཾསཱརསཾཀཊེ.

ཡཾ ཏེབྷཱུམཀནིསྶནྡཾ, ཀཊུཀཾ གཱལ༹ྷཝེདནཾ;

ཝེདེནྟི སཾསཱརཕལཾ, ཏཾཛཱཏཱདིཾ ཝིནཱ ཀུཏོ.

ཏསྨཱ ཛཱཏཱདིབྷེདེཧི, བཱདྷམཱནཱ བྷཡཱཝཧཱ;

དུཀྑཱ ཙ དུཀྑཝཏྠུ ཙ, བཧུདྷཱཔི པཔཉྩིཏཱ.

ཏེ སབྦེ པཉྩུཔཱདཱན-ཀྑནྡྷཱ ཨེཝ སམཱསཏོ;

དུཀྑཱདྷིཊྛཱནབྷཱཝེན, དུཀྑཏཱཡ ནིཡཱམིཏཱ.

ཏསྨཱ ཏེབྷཱུམཀཱ དྷམྨཱ, སབྦེ ཏཎྷཱཝིཝཛྫིཏཱ;

དུཀྑསཙྩནྟི དེསེསི, དེསནཱཀུསལོ མུནི.

ཝིརཱགཏེཛཱལཱབྷེན ¶ , ཏཎྷཱསྣེཧསིནེཧིཏཾ;

ཝིསརུཀྑོཝ ཛཱཏཱདིནཱནཱནཏྠཕལོདཡཾ.

ནནྡིརཱགཱནུབནྡྷེན, སནྟཱནམཝཀཌྜྷིཏཾ;

པུནབྦྷཝཱབྷིནིབྦཏྟིབྷཱཝེན པརིཝཏྟཏི.

པཏིཊྛིཏཉྩ ཏཏྠེཏམཏྟསྣེཧཱནུསེཝནཾ;

གོཙརཱནུནཡཱབདྡྷཾ, རཱགམུཙྪཱསམོཧིཏཾ.

ཀླེསརཱསིཔརིཀླིཊྛཾ, བྱསནོཔདྡཝཱཧཏཾ;

དུཀྑསལླསམཱཝིདྡྷཾ, ཝིཧཉྙཏི ནིརནྟརཾ.

ཧཝེ ཝིརཱགཏེཛེན, ཝིཙྪིནྣེ སཏི སབྦཐཱ;

ཀེན བནྡྷེན སནྟཱན-མཱནེསྶཏི བྷཝནྟརཾ.

བྷཝནྟརམསམྤཏྟེ, སནྟཱནམྷི ཝིཝཊྚིཏེ;

ཀིམདྷིཊྛཱཡ ཛཱཏཱདིདུཀྑདྷམྨཱ པཝཏྟརེ.

ཏསྨཱ ¶ མོཀྑཝིཔཀྑེན, ཏཎྷཱདུཀྑཝིདྷཱཡིནཱི;

དུཀྑསམུདཡོ ནཱམ, སཙྩམིཙྩཱཧ ནཱཡཀོ.

སབྦདུཀྑཝིནིམུཏྟཾ, སབྦཀླེསཝིནིསྶཊཾ;

དུཀྑནིརོདྷནཱམེན, སཙྩཾ ཝུཙྩཏི ཨཙྩུཏཾ.

དུཀྑཉྩ པརིཛཱནནྟོ, པཛཧཾ དུཀྑསམྦྷཝཾ;

ནིབྦཱནཾ པདམཱརབྦྷ, བྷཱཝནཱཝཱིཐིམོསཊོ.

ནིཡྻཱནཊྛངྒིཀོ མགྒོ, སབྦདུཀྑཝིམུཏྟིཡཱ;

དུཀྑནིརོདྷགཱམཱིཏི, སཙྩཾ ཏསྨཱ ཏམཱིརིཏཾ.

ཙཏུསཙྩཝིནིམུཏྟཱ, སེསཱ ལོཀུཏྟརཱ མཏཱ;

མགྒངྒསམྤཡུཏྟཱ ཙ, ཕལདྷམྨཱ ཙ སབྦཐཱ.

ཨིཏྠཾ སཧེཏུཀཾ དུཀྑཾ, སོཔཱཡཱམཏནིབྦུཏིཾ;

པཊིཔཏྟིཧིཏཏྠཱཡ, ཝིབྷཱཝེཏི ཝིནཱཡཀོ.

སཔྤཱཊིཧཱརིཡཾ དྷམྨཾ, དེསེཏྭཱན ཨནུཏྟརོ;

ཙཏུདྷཱརིཡསཙྩཱནི, ཝིབྷཛཱིཏི ཝིབྷཱཝཡེ.

ཏབྦྷཱཝབྷཱཝིབྷཱཝེན ¶ , པཙྩཡཱཀཱརལཀྑིཏཾ;

ཏིཡདྡྷཾ དྭཱདསངྒཉྩ, ཝཱིསཏཱཀཱརསངྒཧཾ.

ཏིསནྡྷི ཙཏུསངྑེཔཾ, ཏིཝཊྚཉྩ ཏིལཀྑཎཾ;

ཏེབྷཱུམཀཾ དྭིམཱུལཉྩ, ཙཏུཀྐནཡམཎྜིཏཾ.

པཙྩེཀཾ ཙཏུགམྦྷཱིར-མནུཔུབྦཝཝཏྠིཏཾ;

ཨཝིཛྫཱཀཱུཊསངྑཱཏཾ, བནྡྷཱཝིཙྪེདམཎྜལཾ.

སོཀཱདཱིནཏྠནིསྶནྡཾ, ཀེཝལཾ དུཀྑཔིཎྜིཏཾ;

པཊིཙྩསམུཔྤཱདོཏི, བྷཝཙཀྐཾ པཝུཙྩཏི.

པཊིཝིདྡྷཱཡ ཝིཛྫཱཡ, བྷངྒཱཝིཛྫཱཡ སབྦཐཱ;

ཝིཝཊྚཏཱནུཔུབྦེན, ཧེཏུབྷངྒཱ ཡཐཱཀཐཾ.

ཨསྨིཾ ¶ སཏི ཨིདཾ ཧོཏི, ཨསྶུཔྤཱདཱ ཨིདཾ བྷཝེ;

ཨསཏཱསྨིཾ ན ཏཾ ཧོཏི, ཏསྶ བྷངྒཱཝ བྷིཛྫཏི.

ཨེཏམཏྠཾ པུརཀྑཏྭཱ, པཙྩཡཊྛིཏི དསྶིཏཱ;

པཊིཙྩསམུཔྤཱདསྶ, ཨིདཔྤཙྩཡཏཱ ནཡེ.

ཏཐཱ ཧི ཛཱཏིཡཱཔཱཧ, པཙྩཡཏྟཾ མཧཱམུནི;

ཛརཱམརཎདྷམྨཱནཾ, མཏྟཱབྷེདེཔི ཝཏྠུཏོ.

ཨཱཧཙྩཔཙྩཡཊྛམྷི, ནེདིསཱི པཙྩཡཊྛིཏི;

ཏཏྠ དྷམྨནྟརསྶེཝ, པཙྩཡཊྛོ ཝིབྷཱཝིཏོ.

ཝུཏྟམཱཙརིཡེནེཏཾ, པཊྛཱནནཡསངྒཧེ;

ལབྦྷམཱནནཡཾ ཏཱཝ, དསྶནཏྠཾ པཔཉྩིཏོ.

ཨེཏྠ ཏསྨཱནུཔེཀྑིཏྭཱ, ཨཱཧཙྩ ནིཡམཾ བུདྷོ;

ཏབྦྷཱཝབྷཱཝིམཏྟེན, པཙྩཡཏྠཾ ཝིབྷཱཝཡེ.

ཏཏྠཱཝིཛྫཱ ཙ སངྑཱརཱ, ཨདྡྷཱཏཱིཏོཏི བྷཱསིཏཱ;

ཝིཉྙཱཎཾ ནཱམརཱུཔཉྩ, སལཱ༹ཡཏནསཉྙིཏཾ.

ཕསྶོ ཙ ཝེདནཱ ཏཎྷཱ, ཨུཔཱདཱནཾ བྷཝོཏི ཙ;

པཙྩུཔྤནྣོ བྷཝེ ཨདྡྷཱ, བྷཝེ ཨདྡྷཱ ཨནཱགཏོ.

ཛཱཏི ¶ ཛརཱ མརཎནྟི, དྭེདྷཱ ཧོཏི ཙ སབྦཐཱ;

ཀཱལཏྟཡཝཝཏྠཱནཾ, ཏིཡདྡྷམིཏི དཱིཔཡེ.

ཏཏྠཱཝིཛྫཱཏི ཨཉྙཱཎཾ, ཙཏུསཙྩེསུ བྷཱསིཏཾ;

པུབྦནྟེ ཙཱཔརནྟེ ཙ, པཙྩཡཊྛིཏིཡཾ ཏཐཱ.

ཨཔུཉྙཱཏིསངྑཱརོཏི, ཝུཏྟཱ དྭཱདས ཙེཏནཱ;

ཏཐཱ པུཉྙཱབྷིསངྑཱརོ, ཀཱམརཱུཔེསུ བྷཱསིཏོ.

ཨཱནེཉྫཱཏིསངྑཱརོཏི, ཝུཏྟཱརུཔྤཱ ཙཏུབྦིདྷཱ;

ཀཱཡབྦཙཱིམནོདྭཱརཾ, པཏྭཱ ཏཱཡེཝ ཙེཏནཱ.

ཝུཏྟཱ ¶ ཀཱཡཝཙཱིཙིཏྟསངྑཱརཱཏི མཧེསིནཱ;

སངྑཱརཱཏི ཝིབྷཏྟེཝམེཀཱུནཏིཾས ཙེཏནཱ.

ཨེཀཱུནཝཱིསཏིཝིདྷཾ, པཊིསནྡྷིཀྑཎེ ཏཐཱ;

པཝཏྟེ དྭཏྟིཾསཝིདྷཾ, ཝིཉྙཱཎཾ པཱཀམཱནསཾ.

ཏིཝིདྷཾ ཝེདནཱ སཉྙཱ, སངྑཱརཱཏི ཝིབྷེདིཏཾ;

ནཱམརཱུཔཾ ཏུ དུཝིདྷཾ, བྷཱུཏོཔཱདཱཡབྷེདཏོ.

སལཱ༹ཡཏནསངྑཱཏཾ, ཙཀྑཱདཛ྄ཛྷཏྟིཀཾ མཏཾ;

ཙཀྑུསམྥསྶཱདིབྷེདཱ, ཕསྶོ ཚདྷཱ པཀཱསིཏོ.

སུཁཱ དུཀྑཱ ཨུཔེཀྑཱཏི, ཝེདནཱ ཏིཝིདྷཱ བྷཝེ;

ཀཱམེ བྷཝེ ཙ ཝིབྷཝེ, ཏཎྷཱཏི ཏིཝིདྷཱ མཏཱ.

ཀཱམུཔཱདཱནཱདིབྷེདཱ, ཨུཔཱདཱནཱ ཙཏུབྦིདྷཱ;

ཀམྨོཔཔཏྟིབྷེདེན, བྷཝོ ནཱམ དྭིདྷཱ མཏོ.

ཨཏྟབྷཱཝཱབྷིནིབྦཏྟི, ཛཱཏི ནཱམ ཛརཱ པན;

པུརཱཎབྷཱཝོ མརཎཾ, པརིཡོསཱནམཱིརིཏཾ.

དྭཱདསངྒཔྤབྷེདེན, ཝིབྷཏྟེཝཾ མཧེསིནཱ;

པཊིཙྩསམུཔྤཱདོཏི, པཙྩཡཱ ཨེཝ ཀེཝལཱ.

པཊིཙྩ ཕལབྷཱཝེན, སཱཔེཀྑཾ ཋིཏམཏྟནི;

ཨཔཙྩཀྑཱཡ སངྒནྟྭཱ, ཨུཔྤཱདེནྟཱིཏི པཙྩཡཱ.

ཨཝིཛྫཱསངྑཱརཱནཾ ¶ ཏུ, གཧཎེ གཧིཏཱཝ ཏེ;

ཏཎྷུཔཱདཱནབྷཝཱཔི, ཨིཏི པཉྩེཏྠ ཧེཏུཡོ.

ཏཎྷུཔཱདཱནབྷཝཱནཾ, གཧཎེ གཧིཏཱ པུན;

ཨཝིཛྫཱ སངྑཱརཱ ཙཱཏི, པཉྩེཝེཏྠཱཔི ཧེཏུཡོ.

ཝིཉྙཱཎཱདིསརཱུཔེན, དསྶིཏཾ ཕལཔཉྩཀཾ;

ཛཱཏིཛྫརཱམརཎེན, ཏདེཝ གཧིཏཾ པུན.

ཨཏཱིཏེ ¶ ཧེཏཝོ པཉྩ, ཨིདཱནི ཕལཔཉྩཀཾ;

ཨིདཱནི ཧེཏཝོ པཉྩ, ཨཱཡཏིཾ ཕལཔཉྩཀཾ.

ཨིཏྠཾ བྷེདེན སངྒཡ྄ཧ, དྭཱདསངྒཾ ཝིཙཀྑཎཱ;

ཨཏྠཱཔཏྟིཝིསེསེན, ཝཱིསཏཱཀཱརམཱིརཡུཾ.

ཧེཏུཕལཾ ཕལཧེཏུ, པུན ཧེཏུཕལནྟི ཙ;

ཏིསནྡྷི ཙཏུསངྑེཔཾ, ཏམེཝཱཧུ ཝིབྷཱཝིནོ.

ཨཝིཛྫཱཏཎྷུཔཱདཱནཱ, ཀླེསཝཊྚནྟི བྷཱསིཏཱ;

བྷཝེཀདེསོ སངྑཱརཱ, ཀམྨཝཊྚཾ ཏཏོཔརཾ.

ཝིཔཱཀཝཊྚམིཙྩེཝཾ, ཝིཝཊྚེནཱཝིཝཊྚིཏཾ;

ཏིཝཊྚཝཊྚིཏཾ ཧུཏྭཱ, ཝཊྚམེཏཾ པཝཏྟཏི.

ཨནིཙྩཉྩ ཁཡཊྛེན, དུཀྑམེཏཾ བྷཡཊྛཏོ;

ཨནཏྟཱསཱརཀཊྛེན, ཝཊྚམེཝཾ ཏིལཀྑཎཾ.

སཾསཱརསྶེཝ ཝུཏྟཱཡཾ, པཙྩཡཱནཾ པརམྤརཱ;

པཊིཙྩསམུཔྤཱདོཏི, ཏཏོ ཏེབྷཱུམཀོ མཏོ.

བནྡྷཱཝིཛྫཱཎྜཀོསེན, ཝིཛྫཱདིབྷེདཝཛྫིཏཱ;

ཝིམུཏྟིརསམཔྤཏྟཱ, བྷཝཏཎྷཱཔིཔཱསིཏཱ.

ཨབྷིསངྑཱརབྷཱཝེན, པཊིབནྡྷཏི སནྟཏི;

ཏཐཱབྷིསངྑཏཱ པཱཀ-བྷཱཝཱཡ པརིཝཏྟཏི.

ཝིཔཱཀཱ ¶ པུན ཀམྨཱནི, པཱཀཱནི པུན ཀམྨཏོ;

ཨིཙྩེཝཾ པརིཡཱཡེན, སཾསཱརོཡཾ པཝཏྟཏི.

ཨིཙྩཱཝིཛྫཱབྷཝཏཎྷཱ, ཝཊྚོཔཏྠམྦྷཀཱ མཏཱ;

སམྤཡུཏྟཱནུསཡིཏཱ, ཏསྨཱ ཝཊྚཾ དྭིམཱུལཀཾ.

ནཱནཱབྷཱུཏཱནམེཀནྟཾ, བཱིཛརུཀྑཱདཡོ ཝིཡ.

ཏཐཱཔི ¶ ཏེསཾ དྷམྨཱནཾ, ཝཏྠུལཀྑཎབྷེདཏོ;

དཱིཔཝཊྚིསིཁཱནཾཝ, ནཏྠི ཨེཀནྟམེཀཏཱ.

ཧེཏུཧེཏུསམུཔྤནྣཱ, ཨཱིཧཱབྷོགཝིཝཛྫིཏཱ;

པཙྩཡཱཡ ཙ པཙྩེཏུ-མབྱཱཔཱརཱ ཏཏོ མཏཱ.

ཨཝིཛྫཱདཱིནམེཝཱཐ, སམྦྷཝེ སམྦྷཝནྟི ཙ;

སངྑཱརཱདིསབྷཱཝཱཏི, ཋིཏེཝཾདྷམྨཏཱཡ ཏེ.

ཨིཏྠམེཀཏྟནཱནཏྟཱ, ཨབྱཱཔཱརོ ཏཐཱཔརོ;

ཨེཏྠེཝཾདྷམྨཏཱ ཙེཏི, ནཡཱ ཝུཏྟཱ ཙཏུབྦིདྷཱ.

ཕལཱནཾ པཙྩཡུཔྤཏྟི, པཙྩཡཏྠོ ཙ ཧེཏུསུ;

སབྷཱཝཔཊིཝེདྷོ ཙ, དེསནཱ ཙིཏྟཏཱཏི ཙ.

ཨཏྠདྷམྨཔཊིཝེདྷ-དེསནཱནཾ ཡཐཱཀྐམཾ;

ཨཏིགམྦྷཱིརབྷཱཝེན, ཙཏུགམྦྷཱིརམཱིརིཏཾ.

པདྷཱནཀཱརཎཏྟཱ ཧི, ཨཝིཛྫཱདིཔརམྤརཱ;

ཀམེན སངྑཱརཱདཱིནཾ, པཙྩཡཱཏི ཝཝཏྠིཏཱ.

ཏཐཱ ཧི ཛཱཏིཡཱ ཨེཝ, ཛརཱམརཎསམྦྷཝོ;

ཨཛཱཏཱནཾ ཛརཱ ཝཱཐ, མརཎཾ ཝཱ ཀུཏོ བྷཝེ.

སཱཝོཔཔཏྟིསངྑཱཏཱ, ཛཱཏི ཀམྨབྷཝོདིཏཱ;

ཨངྐུརོ ཝིཡ བཱིཛམྷཱ, ཏཏྠ ཏཏྠོཔལབྦྷཏི.

སམྤཡོགཱནུསཡཏོ, ཨུཔཱདཱནཔྤཏིཊྛིཏཱ;

ཨཱཡཱུཧནྟི ཙ ཀམྨཱནི, ཨཱཀཌྜྷནྟོཔཔཏྟིཀཾ.

ཨུཔཱདཱནིཡདྷམྨེསུ ¶ , ཏཎྷཱསྣེཧཔིཔཱསིཏཱ;

དལ༹ྷཱི ཀུབྦནྟུཔཱདཱནཾ, པིཡརཱུཔཱབྷིནནྡིནོ.

ཝེདནཱིཡེསུ དྷམྨེསུ, ཨསྶཱདམནུཔསྶཏོ;

ཝེདནཱཔཙྩཡཱ ཏཎྷཱ, སམུཊྛཱཡ པཝཌྜྷཏི.

ཨིཊྛཱནིཊྛཉྩ ¶ མཛ྄ཛྷཏྟཾ, ཕུསནྟཱ པན གོཙརཾ;

ཝེདེནྟི ཝེདནཾ ནཱམ, ནཱཕུསནྟཱ ཀུདཱཙནཾ.

ཕུསཏཱལམྦཎཉྩེསོ, སལཱ༹ཡཏནསམྦྷཝེ;

དྭཱརཱབྷཱཝེ ཀུཏོ ཏསྶ, སམུཔྤཏྟི བྷཝིསྶཏི.

སལཱ༹ཡཏནམེཏཉྩ, ནཱམརཱུཔཱུཔནིསྶིཏཾ;

པུབྦངྒམཱདྷིཊྛཱནེན, ཝིཉྙཱཎེན པཏིཊྛཧེ;

ནཱམརཱུཔཾ ཨུཔཏྠདྡྷཾ, པཊིསནྡྷིཔཝཏྟིཡཾ.

སངྑཱརཛནིཏཾ ཧུཏྭཱ, པཏིཊྛཱཏི བྷཝནྟརེ;

ཝིཉྙཱཎཾ ཛནཀཱབྷཱཝེ, ཏསྶུཔྤཏྟི ཀཐཾ བྷཝེ.

ཨཝིཛྫཱཡཱནུསཡིཏེ, པཊིཝེདྷཝིརོདྷིཏེ;

ཝཊྚཱནུགཏསནྟཱནེ, པཊིསནྡྷིཕལཱཝཧེ.

པཱཀདྷམྨཱ སབྷཱཝེན, པཝཏྟནྟི ཧི ཙེཏནཱ;

ཨཝིཛྫཱཔཙྩཡཱ ཧོནྟི, སངྑཱརཱཏི ཏཏོ མཏཱ.

པཊིཝིདྡྷེསུ སཙྩེསུ, པཙྩཡཱནཾ པརམྤརཱ;

ཝིགྷཱཏཱིཡཏི སབྦཱཔི, ཏཏོ ཝཊྚཾ ཝིཝཊྚཏི.

ཨིཙྩཱཝིཛྫཱཝིརོདྷེན, ཏསྶཱ ཝཊྚཔྤཝཏྟིཡཱ;

སངྒྷཱཏནིཀབྷཱཝེན, ཨཝིཛྫཱ ཀཱུཊསམྨཏཱ.

ཛརཱམརཎསངྒྷཱཊ-པཊིཔཱིལི༹ཏཙེཏསཾ;

ཀླེསམུཙྪཱཔརེཏཱནཾ, སཱ ཙཱཝིཛྫཱ པཝཌྜྷཏི.

ཨིཙྩཱབདྡྷམཝིཙྪེདཾ, ཨིདཔྤཙྩཡམཎྜལཾ;

ཙཀྐནེམིསམཱཝཊྚཾ, ཀམེན པརིཝཏྟཏི.

ཝཊྚསྶ ¶ དྭཱདསངྒསྶ, ཏསྶ ཏེབྷཱུམཀསྶ ཏུ;

དུཀྑཀྑནྡྷསྶ དསྶེསི, ནིསྶནྡེན ནིདསྶནཾ.

སོཀཉྩ ¶ པརིདེཝཉྩ, ཏཐཱ དུཀྑཉྩ ཀཱཡིཀཾ;

དོམནསྶམུཔཱཡཱསཾ, ནཱནཱབྱསནསམྦྷཝཾ.

ཨིཙྩཱཏུརམནིཙྩནྟཾ, མཧོཔདྡཝསངྐུལཾ;

བཧུཔཀླེསུཔསྶཊྛཾ, དུཀྑམེཏནྟི པིཎྜིཏཾ.

ཨིཙྩེཝཾ པཉྩུཔཱདཱན-ཀྑནྡྷབྷེདིཏསངྒཧོ;

གཏིཊྛིཏིནིཝཱསེསུ, སཾསརནྟོ ནིརནྟརཾ;

ཙཀྐེནེཏེན ཡཱཏཱིཏི, བྷཝཙཀྐམིདཾ མཏཾ.

ཨཝིཛྫཱཎྜཾ པདཱལེཏྭཱ, པཊིཝེདྷཔྤཝཏྟིཡཱ;

པཙྩཡཔྤཙྩཡུཔྤནྣཱ, སུཔཊྛནྟི སབྷཱཝཏོ.

ཨནིཙྩཱ དུཀྑནཏྟཱ ཙ, བྷངྒཝནྟོ བྷཡཱཝཧཱ;

སཱདཱིནཝཱཏི སངྑཱཡ, ཝིཝཊྚམབྷིཏིཊྛཏི.

ཏཏོ སཱནུསཡཱ ཏཎྷཱ, ནིརུཛ྄ཛྷཏི པུནབྦྷཝེ;

སནྟཱནརཏིཡཱབྷཱཝཱ, ན པཀྑནྡཏི སནྡྷིཡཾ.

ཨཝིརུལ༹ྷིཀབྷཱཝེན, ཏཏྠ ཝཊྚཝིརོདྷིཏེ;

ཨབྷིསངྑཱརབྷཱཝེན, ན པཝཏྟནྟི ཙེཏནཱ.

པཊིསནྡྷིཔཝཏྟཱིཔི, ན ཛནེནྟི བྷཝནྟརེ;