📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཨབྷིདྷམྨཏྠསངྒཧོ

གནྠཱརམྦྷཀཐཱ

༡. སམྨཱསམྦུདྡྷམཏུལཾ ¶ ¶ , སསདྡྷམྨགཎུཏྟམཾ.

ཨབྷིཝཱདིཡ བྷཱསིསྶཾ, ཨབྷིདྷམྨཏྠསངྒཧཾ.

ཙཏུཔརམཏྠདྷམྨོ

༢. ཏཏྠ ཝུཏྟཱབྷིདྷམྨཏྠཱ, ཙཏུདྷཱ པརམཏྠཏོ.

ཙིཏྟཾ ཙེཏསིཀཾ རཱུཔཾ, ནིབྦཱནམིཏི སབྦཐཱ.

༡. ཙིཏྟཔརིཙྪེདོ

བྷཱུམིབྷེདཙིཏྟཾ

༣. ཏཏྠ ¶ ཙིཏྟཾ ཏཱཝ ཙཏུབྦིདྷཾ ཧོཏི ཀཱམཱཝཙརཾ རཱུཔཱཝཙརཾ ཨརཱུཔཱཝཙརཾ ལོཀུཏྟརཉྩེཏི.

ཨཀུསལཙིཏྟཾ

༤. ཏཏྠ ཀཏམཾ ཀཱམཱཝཙརཾ? སོམནསྶསཧགཏཾ དིཊྛིགཏསམྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ, སོམནསྶསཧགཏཾ དིཊྛིགཏཝིཔྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ ¶ , ཨུཔེཀྑཱསཧགཏཾ དིཊྛིགཏསམྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ, ཨུཔེཀྑཱསཧགཏཾ དིཊྛིགཏཝིཔྤཡུཏྟཾ ཨསངྑཱརིཀམེཀཾ, སསངྑཱརིཀམེཀནྟི ཨིམཱནི ཨཊྛཔི ལོབྷསཧགཏཙིཏྟཱནི ནཱམ.

༥. དོམནསྶསཧགཏཾ པཊིགྷསམྤཡུཏྟཾ ཨསངྑཱརིཀམེཀཾ, སསངྑཱརིཀམེཀནྟི ཨིམཱནི དྭེཔི པཊིགྷསམྤཡུཏྟཙིཏྟཱནི ནཱམ.

༦. ཨུཔེཀྑཱསཧགཏཾ ཝིཙིཀིཙྪཱསམྤཡུཏྟམེཀཾ, ཨུཔེཀྑཱསཧགཏཾ ཨུདྡྷཙྩསམྤཡུཏྟམེཀནྟི ཨིམཱནི དྭེཔི མོམཱུཧཙིཏྟཱནི ནཱམ.

༧. ཨིཙྩེཝཾ སབྦཐཱཔི དྭཱདསཱཀུསལཙིཏྟཱནི སམཏྟཱནི.

༨. ཨཊྛདྷཱ ལོབྷམཱུལཱནི, དོསམཱུལཱནི ཙ དྭིདྷཱ.

མོཧམཱུལཱནི ཙ དྭེཏི, དྭཱདསཱཀུསལཱ སིཡུཾ.

ཨཧེཏུཀཙིཏྟཾ

༩. ཨུཔེཀྑཱསཧགཏཾ ཙཀྑུཝིཉྙཱཎཾ, ཏཐཱ སོཏཝིཉྙཱཎཾ, གྷཱནཝིཉྙཱཎཾ, ཛིཝ྄ཧཱཝིཉྙཱཎཾ ¶ , དུཀྑསཧགཏཾ ཀཱཡཝིཉྙཱཎཾ, ཨུཔེཀྑཱསཧགཏཾ སམྤཊིཙྪནཙིཏྟཾ, ཨུཔེཀྑཱསཧགཏཾ སནྟཱིརཎཙིཏྟཉྩེཏི ཨིམཱནི སཏྟཔི ཨཀུསལཝིཔཱཀཙིཏྟཱནི ནཱམ.

༡༠. ཨུཔེཀྑཱསཧགཏཾ ཀུསལཝིཔཱཀཾ ཙཀྑུཝིཉྙཱཎཾ, ཏཐཱ སོཏཝིཉྙཱཎཾ, གྷཱནཝིཉྙཱཎཾ, ཛིཝ྄ཧཱཝིཉྙཱཎཾ, སུཁསཧགཏཾ ཀཱཡཝིཉྙཱཎཾ, ཨུཔེཀྑཱསཧགཏཾ སམྤཊིཙྪནཙིཏྟཾ, སོམནསྶསཧགཏཾ སནྟཱིརཎཙིཏྟཾ, ཨུཔེཀྑཱསཧགཏཾ སནྟཱིརཎཙིཏྟཉྩེཏི ཨིམཱནི ཨཊྛཔི ཀུསལཝིཔཱཀཱཧེཏུཀཙིཏྟཱནི ནཱམ.

༡༡. ཨུཔེཀྑཱསཧགཏཾ ¶ པཉྩདྭཱརཱཝཛྫནཙིཏྟཾ, ཏཐཱ མནོདྭཱརཱཝཛྫནཙིཏྟཾ, སོམནསྶསཧགཏཾ ཧསིཏུཔྤཱདཙིཏྟཉྩེཏི ཨིམཱནི ཏཱིཎིཔི ཨཧེཏུཀཀིརིཡཙིཏྟཱནི ནཱམ.

༡༢. ཨིཙྩེཝ སབྦཐཱཔི ཨཊྛཱརསཱཧེཏུཀཙིཏྟཱནི སམཏྟཱནི.

༡༣. སཏྟཱཀུསལཔཱཀཱནི, པུཉྙཔཱཀཱནི ཨཊྛདྷཱ.

ཀྲིཡཙིཏྟཱནི ཏཱིཎཱིཏི, ཨཊྛཱརས ཨཧེཏུཀཱ.

སོབྷནཙིཏྟཾ

༡༤. པཱཔཱཧེཏུཀམུཏྟཱནི, སོབྷནཱནཱིཏི ཝུཙྩརེ.

ཨེཀཱུནསཊྛི ཙིཏྟཱནི, ཨཐེཀནཝུཏཱིཔི ཝཱ.

ཀཱམཱཝཙརསོབྷནཙིཏྟཾ

༡༥. སོམནསྶསཧགཏཾ ཉཱཎསམྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ, སོམནསྶསཧགཏཾ ཉཱཎཝིཔྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ, ཨུཔེཀྑཱསཧགཏཾ ཉཱཎསམྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ. ཨུཔེཀྑཱསཧགཏཾ ཉཱཎཝིཔྤཡུཏྟཾ ཨསངྑཱརིཀམེཀཾ, སསངྑཱརིཀམེཀནྟི ཨིམཱནི ཨཊྛཔི ཀཱམཱཝཙརཀུསལཙིཏྟཱནི ནཱམ.

༡༦. སོམནསྶསཧགཏཾ ཉཱཎསམྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ, སོམནསྶསཧགཏཾ ¶ ཉཱཎཝིཔྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ, ཨུཔེཀྑཱསཧགཏཾ ཉཱཎསམྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ, ཨུཔེཀྑཱསཧགཏཾ ཉཱཎཝིཔྤཡུཏྟཾ ཨསངྑཱརིཀམེཀཾ, སསངྑཱརིཀམེཀནྟི ཨིམཱནི ཨཊྛཔི སཧེཏུཀཀཱམཱཝཙརཝིཔཱཀཙིཏྟཱནི ནཱམ.

༡༧. སོམསྶསཧགཏཾ ཉཱཎསམྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ, སོམནསྶསཧགཏཾ ཉཱཎཝིཔྤཡུཏྟཾ ཨསངྑཱརིཀམེཀཾ ¶ , སསངྑཱརིཀམེཀཾ, ཨུཔེཀྑཱསཧགཏཾ ཉཱཎསམྤཡུཏྟཾ ཨསངྑཱརིཀམེཀཾ, སསངྑཱརིཀམེཀཾ, ཨུཔེཀྑཱསཧགཏཾ ཉཱཎཝིཔྤཡུཏྟཾ ཨསངྑཱརིཀམེཀཾ, སསངྑཱརིཀམེཀནྟི ཨིམཱནི ཨཊྛཔི སཧེཏུཀཀཱམཱཝཙརཀིརིཡཙིཏྟཱནི ནཱམ.

༡༨. ཨིཙྩེཝཾ སབྦཐཱཔི ཙཏུཝཱིསཏི སཧེཏུཀཀཱམཱཝཙརཀུསལཝིཔཱཀཀིརིཡཙིཏྟཱནི སམཏྟཱནི.

༡༩. ཝེདནཱཉཱཎསངྑཱརབྷེདེན ཙཏུཝཱིསཏི.

སཧེཏུཀཱམཱཝཙརཔུཉྙཔཱཀཀྲིཡཱ མཏཱ.

༢༠. ཀཱམེ ཏེཝཱིས པཱཀཱནི, པུཉྙཱཔུཉྙཱནི ཝཱིསཏི.

ཨེཀཱདས ཀྲིཡཱ ཙེཏི, ཙཏུཔཉྙཱས སབྦཐཱ.

རཱུཔཱཝཙརཙིཏྟཾ

༢༡. ཝིཏཀྐཝིཙཱརཔཱིཏིསུཁེཀགྒཏཱསཧིཏཾ པཋམཛ྄ཛྷཱནཀུསལཙིཏྟཾ, ཝིཙཱརཔཱིཏིསུཁེཀགྒཏཱསཧིཏཾ དུཏིཡཛ྄ཛྷཱནཀུསལཙིཏྟཾ, པཱིཏིསུཁེཀགྒཏཱསཧིཏཾ ཏཏིཡཛ྄ཛྷཱནཀུསལཙིཏྟཾ, སུཁེཀགྒཏཱསཧིཏཾ ཙཏུཏྠཛ྄ཛྷཱནཀུསལཙིཏྟཾ, ཨུཔེཀྑེཀགྒཏཱསཧིཏཾ པཉྩམཛ྄ཛྷཱནཀུསལཙིཏྟཉྩེཏི ཨིམཱནི པཉྩཔི རཱུཔཱཝཙརཀུསལཙིཏྟཱནི ནཱམ.

༢༢. ཝིཏཀྐཝིཙཱརཔཱིཏིསུཁེཀགྒཏཱསཧིཏཾ པཋམཛ྄ཛྷཱནཝིཔཱཀཙིཏྟཾ, ཝིཙཱརཔཱིཏིསུཁེཀགྒཏཱསཧིཏཾ དུཏིཡཛ྄ཛྷཱནཝིཔཱཀཙིཏྟཾ, པཱིཏིསུཁེཀགྒཏཱསཧིཏཾ ཏཏིཡཛ྄ཛྷཱནཝིཔཱཀཙིཏྟཾ, སུཁེཀགྒཏཱསཧིཏཾ ¶ ཙཏུཏྠཛ྄ཛྷཱནཝིཔཱཀཙིཏྟཾ, ཨུཔེཀྑེཀགྒཏཱསཧིཏཾ པཉྩམཛ྄ཛྷཱནཝིཔཱཀཙིཏྟཉྩེཏི ཨིམཱནི པཉྩཔི རཱུཔཱཝཙརཝིཔཱཀཙིཏྟཱནི ནཱམ.

༢༣. ཝིཏཀྐཝིཙཱརཔཱིཏིསུཁེཀགྒཏཱསཧིཏཾ པཋམཛ྄ཛྷཱནཀིརིཡཙིཏྟཾ, ཝིཙཱརཔཱིཏིསུཁེཀགྒཏཱསཧིཏཾ དུཏིཡཛ྄ཛྷཱནཀིརིཡཙིཏྟཾ, པཱིཏིསུཁེཀགྒཏཱསཧིཏཾ ཏཏིཡཛ྄ཛྷཱནཀིརིཡཙིཏྟཾ ¶ , སུཁེཀགྒཏཱསཧིཏཾ ཙཏུཏྠཛ྄ཛྷཱནཀིརིཡཙིཏྟཾ, ཨུཔེཀྑེཀགྒཏཱསཧིཏཾ པཉྩམཛ྄ཛྷཱནཀིརིཡཙིཏྟཉྩེཏི ཨིམཱནི པཉྩཔི རཱུཔཱཝཙརཀིརིཡཙིཏྟཱནི ནཱམ.

༢༤. ཨིཙྩེཝཾ སབྦཐཱཔི པནྣརས རཱུཔཱཝཙརཀུསལཝིཔཱཀཀིརིཡཙིཏྟཱནི སམཏྟཱནི.

༢༥. པཉྩདྷཱ ཛྷཱནབྷེདེན, རཱུཔཱཝཙརམཱནསཾ.

པུཉྙཔཱཀཀྲིཡཱབྷེདཱ, ཏཾ པཉྩདསདྷཱ བྷཝེ.

ཨརཱུཔཱཝཙརཙིཏྟཾ

༢༦. ཨཱཀཱསཱནཉྩཱཡཏནཀུསལཙིཏྟཾ, ཝིཉྙཱཎཉྩཱཡཏནཀུསལཙིཏྟཾ, ཨཱཀིཉྩཉྙཱཡཏནཀུསལཙིཏྟཾ, ནེཝསཉྙཱནཱསཉྙཱཡཏནཀུསལཙིཏྟཉྩེཏི ཨིམཱནི ཙཏྟཱརིཔི ཨརཱུཔཱཝཙརཀུསལཙིཏྟཱནི ནཱམ.

༢༧. ཨཱཀཱསཱནཉྩཱཡཏནཝིཔཱཀཙིཏྟཾ, ཝིཉྙཱཎཉྩཱཡཏནཝིཔཱཀཙིཏྟཾ, ཨཱཀིཉྩཉྙཱཡཏནཝིཔཱཀཙིཏྟཾ, ནེཝསཉྙཱནཱསཉྙཱཡཏནཝིཔཱཀཙིཏྟཉྩེཏི ཨིམཱནི ཙཏྟཱརིཔི ཨརཱུཔཱཝཙརཝིཔཱཀཙིཏྟཱནི ནཱམ.

༢༨. ཨཱཀཱསཱནཉྩཱཡཏནཀིརིཡཙིཏྟཾ, ཝིཉྙཱཎཉྩཱཡཏནཀིརིཡཙིཏྟཾ, ཨཱཀིཉྩཉྙཱཡཏནཀིརིཡཙིཏྟཾ, ནེཝསཉྙཱནཱསཉྙཱཡཏནཀིརིཡཙིཏྟཉྩེཏི ཨིམཱནི ཙཏྟཱརིཔི ཨརཱུཔཱཝཙརཀིརིཡཙིཏྟཱནི ནཱམ.

༢༩. ཨིཙྩེཝཾ སབྦཐཱཔི དྭཱདས ཨརཱུཔཱཝཙརཀུསལཝིཔཱཀཀིརིཡཙིཏྟཱནི སམཏྟཱནི.

༣༠. ཨཱལམྦཎཔྤབྷེདེན ¶ , ཙཏུདྷཱརུཔྤམཱནསཾ.

པུཉྙཔཱཀཀྲིཡཱབྷེདཱ, པུན དྭཱདསདྷཱ ཋིཏཾ.

ལོཀུཏྟརཙིཏྟཾ

༣༡. སོཏཱཔཏྟིམགྒཙིཏྟཾ ¶ , སཀདཱགཱམིམགྒཙིཏྟཾ, ཨནཱགཱམིམགྒཙིཏྟཾ, ཨརཧཏྟམགྒཙིཏྟཉྩེཏི ཨིམཱནི ཙཏྟཱརིཔི ལོཀུཏྟརཀུསལཙིཏྟཱནི ནཱམ.

༣༢. སོཏཱཔཏྟིཕལཙིཏྟཾ, སཀདཱགཱམིཕལཙིཏྟཾ, ཨནཱགཱམིཕལཙིཏྟཾ, ཨརཧཏྟཕལཙིཏྟཉྩེཏི ཨིམཱནི ཙཏྟཱརིཔི ལོཀུཏྟརཝིཔཱཀཙིཏྟཱནི ནཱམ.

༣༣. ཨིཙྩེཝཾ སབྦཐཱཔི ཨཊྛ ལོཀུཏྟརཀུསལཝིཔཱཀཙིཏྟཱནི སམཏྟཱནི.

༣༤. ཙཏུམགྒཔྤབྷེདེན, ཙཏུདྷཱ ཀུསལཾ ཏཐཱ.

པཱཀཾ ཏསྶ ཕལཏྟཱཏི, ཨཊྛདྷཱནུཏྟརཾ མཏཾ.

ཙིཏྟགཎནསངྒཧོ

༣༥. དྭཱདསཱཀུསལཱནེཝཾ, ཀུསལཱནེཀཝཱིསཏི.

ཚཏྟིཾསེཝ ཝིཔཱཀཱནི, ཀྲིཡཙིཏྟཱནི ཝཱིསཏི.

༣༦. ཙཏུཔཉྙཱསདྷཱ ཀཱམེ, རཱུཔེ པནྣརསཱིརཡེ.

ཙིཏྟཱནི དྭཱདསཱརུཔྤེ, ཨཊྛདྷཱནུཏྟརེ ཏཐཱ.

༣༧. ཨིཏྠམེཀཱུནནཝུཏིཔབྷེདཾ པན མཱནསཾ.

ཨེཀཝཱིསསཏཾ ཝཱཐ, ཝིབྷཛནྟི ཝིཙཀྑཎཱ.

ཝིཏྠཱརགཎནཱ

༣༨. ཀཐམེཀཱུནནཝུཏིཝིདྷཾ ¶ ཙིཏྟཾ ཨེཀཝཱིསསཏཾ ཧོཏི? ཝིཏཀྐཝིཙཱརཔཱིཏིསུཁེཀགྒཏཱསཧིཏཾ པཋམཛ྄ཛྷཱནསོཏཱཔཏྟིམགྒཙིཏྟཾ, ཝིཙཱརཔཱིཏིསུཁེཀགྒཏཱསཧིཏཾ དུཏིཡཛ྄ཛྷཱནསོཏཱཔཏྟིམགྒཙིཏྟཾ, པཱིཏིསུཁེཀགྒཏཱསཧིཏཾ ཏཏིཡཛ྄ཛྷཱནསོཏཱཔཏྟིམགྒཙིཏྟཾ, སུཁེཀགྒཏཱསཧིཏཾ ཙཏུཏྠཛ྄ཛྷཱནསོཏཱཔཏྟིམགྒཙིཏྟཾ, ཨུཔེཀྑེཀགྒཏཱསཧིཏཾ པཉྩམཛ྄ཛྷཱནསོཏཱཔཏྟིམགྒཙིཏྟཉྩེཏི ཨིམཱནི པཉྩཔི སོཏཱཔཏྟིམགྒཙིཏྟཱནི ནཱམ.

༣༩. ཏཐཱ ¶ སཀདཱགཱམིམགྒཨནཱགཱམིམགྒཨརཧཏྟམགྒཙིཏྟཉྩེཏི སམཝཱིསཏི མགྒཙིཏྟཱནི.

༤༠. ཏཐཱ ཕལཙིཏྟཱནི ཙེཏི སམཙཏྟཱལཱིས ལོཀུཏྟརཙིཏྟཱནི བྷཝནྟཱིཏི.

༤༡. ཛྷཱནངྒཡོགབྷེདེན, ཀཏྭེཀེཀནྟུ པཉྩདྷཱ.

ཝུཙྩཏཱནུཏྟརཾ ཙིཏྟཾ, ཙཏྟཱལཱིསཝིདྷནྟི ཙ.

༤༢. ཡཐཱ ཙ རཱུཔཱཝཙརཾ, གཡ྄ཧཏཱནུཏྟརཾ ཏཐཱ.

པཋམཱདིཛྷཱནབྷེདེ, ཨཱརུཔྤཉྩཱཔི པཉྩམེ.

ཨེཀཱདསཝིདྷཾ ཏསྨཱ, པཋམཱདིཀམཱིརིཏཾ;

ཛྷཱནམེཀེཀམནྟེ ཏུ, ཏེཝཱིསཏིཝིདྷཾ བྷཝེ.

༤༣. སཏྟཏིཾསཝིདྷཾ པུཉྙཾ, དྭིཔཉྙཱསཝིདྷཾ ཏཐཱ.

པཱཀམིཙྩཱཧུ ཙིཏྟཱནི, ཨེཀཝཱིསསཏཾ བུདྷཱ.

ཨིཏི ཨབྷིདྷམྨཏྠསངྒཧེ ཙིཏྟསངྒཧཝིབྷཱགོ ནཱམ

པཋམོ པརིཙྪེདོ.

༢. ཙེཏསིཀཔརིཙྪེདོ

སམྤཡོགལཀྑཎཾ

༡. ཨེཀུཔྤཱདནིརོདྷཱ ¶ ཙ, ཨེཀཱལམྦཎཝཏྠུཀཱ.

ཙེཏོཡུཏྟཱ དྭིཔཉྙཱས, དྷམྨཱ ཙེཏསིཀཱ མཏཱ.

ཨཉྙསམཱནཙེཏསིཀཾ

༢. ཀཐཾ? ཕསྶོ ཝེདནཱ སཉྙཱ ཙེཏནཱ ཨེཀགྒཏཱ ཛཱིཝིཏིནྡྲིཡཾ མནསིཀཱརོ ཙེཏི སཏྟིམེ ཙེཏསིཀཱ སབྦཙིཏྟསཱདྷཱརཎཱ ནཱམ.

༣. ཝིཏཀྐོ ¶ ཝིཙཱརོ ཨདྷིམོཀྑོ ཝཱིརིཡཾ པཱིཏི ཚནྡོ ཙཱཏི ཚ ཨིམེ ཙེཏསིཀཱ པཀིཎྞཀཱ ནཱམ.

༤. ཨེཝམེཏེ ཏེརས ཙེཏསིཀཱ ཨཉྙསམཱནཱཏི ཝེདིཏབྦཱ.

ཨཀུསལཙེཏསིཀཾ

༥. མོཧོ ཨཧིརིཀཾ ཨནོཏྟཔྤཾ ཨུདྡྷཙྩཾ ལོབྷོ དིཊྛི མཱནོ དོསོ ཨིསྶཱ མཙྪརིཡཾ ཀུཀྐུཙྩཾ ཐིནཾ མིདྡྷཾ ཝིཙིཀིཙྪཱ ཙེཏི ཙུདྡསིམེ ཙེཏསིཀཱ ཨཀུསལཱ ནཱམ.

སོབྷནཙེཏསིཀཾ

༦. སདྡྷཱ སཏི ཧིརཱི ཨོཏྟཔྤཾ ཨལོབྷོ ཨདོསོ ཏཏྲམཛ྄ཛྷཏྟཏཱ ཀཱཡཔསྶདྡྷི ཙིཏྟཔསྶདྡྷི ཀཱཡལཧུཏཱ ཙིཏྟལཧུཏཱ ཀཱཡམུདུཏཱ ཙིཏྟམུདུཏཱ ཀཱཡཀམྨཉྙཏཱ ཙིཏྟཀམྨཉྙཏཱ ཀཱཡཔཱགུཉྙཏཱ ¶ ཙིཏྟཔཱགུཉྙཏཱ ཀཱཡུཛུཀཏཱ ཙིཏྟུཛུཀཏཱ ཙེཏི ཨེཀཱུནཝཱིསཏིམེ ཙེཏསིཀཱ སོབྷནསཱདྷཱརཎཱ ནཱམ.

༧. སམྨཱཝཱཙཱ སམྨཱཀམྨནྟོ སམྨཱཨཱཛཱིཝོ ཙེཏི ཏིསྶོ ཝིརཏིཡོ ནཱམ.

༨. ཀརུཎཱ མུདིཏཱ ཨཔྤམཉྙཱཡོ ནཱམཱཏི སབྦཐཱཔི པཉྙིནྡྲིཡེན སདྡྷིཾ པཉྩཝཱིསཏིམེ ཙེཏསིཀཱ སོབྷནཱཏི ཝེདིཏབྦཱ.

༩. ཨེཏྟཱཝཏཱ ཙ –

ཏེརསཉྙསམཱནཱ ཙ, ཙུདྡསཱཀུསལཱ ཏཐཱ;

སོབྷནཱ པཉྩཝཱིསཱཏི, དྭིཔཉྙཱས པཝུཙྩརེ.

སམྤཡོགནཡོ

༡༠. ཏེསཾ ¶ ཙིཏྟཱཝིཡུཏྟཱནཾ, ཡཐཱཡོགམིཏོ པརཾ.

ཙིཏྟུཔྤཱདེསུ པཙྩེཀཾ, སམྤཡོགོ པཝུཙྩཏི.

༡༡. སཏྟ སབྦཏྠ ཡུཛྫནྟི, ཡཐཱཡོགཾ པཀིཎྞཀཱ.

ཙུདྡསཱཀུསལེསྭེཝ, སོབྷནེསྭེཝ སོབྷནཱ.

ཨཉྙསམཱནཙེཏསིཀསམྤཡོགནཡོ

༡༢. ཀཐཾ? སབྦཙིཏྟསཱདྷཱརཎཱ ཏཱཝ སཏྟིམེ ཙེཏསིཀཱ སབྦེསུཔི ཨེཀཱུནནཝུཏིཙིཏྟུཔྤཱདེསུ ལབྦྷནྟི.

༡༣. པཀིཎྞཀེསུ པན ཝིཏཀྐོ ཏཱཝ དྭིཔཉྩཝིཉྙཱཎཝཛྫིཏཀཱམཱཝཙརཙིཏྟེསུ ཙེཝ ཨེཀཱདསསུ པཋམཛ྄ཛྷཱནཙིཏྟེསུ ཙེཏི པཉྩཔཉྙཱསཙིཏྟེསུ ཨུཔྤཛྫཏི.

༡༤. ཝིཙཱརོ ¶ པན ཏེསུ ཙེཝ ཨེཀཱདསསུ དུཏིཡཛ྄ཛྷཱནཙིཏྟེསུ ཙཱཏི ཚསཊྛིཙིཏྟེསུ.

༡༥. ཨདྷིམོཀྑོ དྭིཔཉྩཝིཉྙཱཎཝིཙིཀིཙྪཱསཧགཏཝཛྫིཏཙིཏྟེསུ.

༡༦. ཝཱིརིཡཾ པཉྩདྭཱརཱཝཛྫནདྭིཔཉྩཝིཉྙཱཎསམྤཊིཙྪནསནྟཱིརཎཝཛྫིཏཙིཏྟེསུ.

༡༧. པཱིཏི དོམནསྶུཔེཀྑཱསཧགཏཀཱཡཝིཉྙཱཎཙཏུཏྠཛ྄ཛྷཱནཝཛྫིཏཙིཏྟེསུ.

༡༨. ཚནྡོ ཨཧེཏུཀམོམཱུཧཝཛྫིཏཙིཏྟེསཱུཏི.

༡༩. ཏེ པན ཙིཏྟུཔྤཱདཱ ཡཐཱཀྐམཾ –

ཚསཊྛི པཉྩཔཉྙཱས, ཨེཀཱདས ཙ སོལ༹ས;

སཏྟཏི ཝཱིསཏི ཙེཝ, པཀིཎྞཀཝིཝཛྫིཏཱ.

པཉྩཔཉྙཱས ¶ ཚསཊྛིཊྛསཏྟཏི ཏིསཏྟཏི;

ཨེཀཔཉྙཱས ཙེཀཱུནསཏྟཏི སཔཀིཎྞཀཱ.

ཨཀུསལཙེཏསིཀསམྤཡོགནཡོ

༢༠. ཨཀུསལེསུ པན མོཧོ ཨཧིརིཀཾ ཨནོཏྟཔྤཾ ཨུདྡྷཙྩཉྩཱཏི ཙཏྟཱརོམེ ཙེཏསིཀཱ སབྦཱཀུསལསཱདྷཱརཎཱ ནཱམ, སབྦེསུཔི དྭཱདསཱ ཀུསལེསུ ལབྦྷནྟི.

༢༡. ལོབྷོ ཨཊྛསུ ལོབྷསཧགཏཙིཏྟེསྭེཝ ལབྦྷཏི.

༢༢. དིཊྛི ཙཏཱུསུ དིཊྛིགཏསམྤཡུཏྟེསུ.

༢༣. མཱནོ ཙཏཱུསུ དིཊྛིགཏཝིཔྤཡུཏྟེསུ.

༢༤. དོསོ ¶ ཨིསྶཱ མཙྪརིཡཾ ཀུཀྐུཙྩཉྩཱཏི དྭཱིསུ པཊིགྷསམྤཡུཏྟཙིཏྟེསུ.

༢༥. ཐིནམིདྡྷཾ པཉྩསུ སསངྑཱརིཀཙིཏྟེསུ.

༢༦. ཝིཙིཀིཙྪཱ ཝིཙིཀིཙྪཱསཧགཏཙིཏྟེཡེཝཱཏི.

༢༧. སབྦཱཔུཉྙེསུ ཙཏྟཱརོ,

ལོབྷམཱུལེ ཏཡོ གཏཱ;

དོསམཱུལེསུ ཙཏྟཱརོ,

སསངྑཱརེ དྭཡཾ ཏཐཱ.

ཝིཙིཀིཙྪཱ ཝིཙིཀིཙྪཱ-ཙིཏྟེ ཙཱཏི ཙཏུདྡས;

དྭཱདསཱཀུལེསྭེཝ, སམྤཡུཛྫནྟི པཉྩདྷཱ.

སོབྷནཙེཏསིཀསམྤཡོགནཡོ

༢༨. སོབྷནེསུ པན སོབྷནསཱདྷཱརཎཱ ཏཱཝ ཨེཀཱུནཝཱིསཏིམེ ཙེཏསིཀཱ སབྦེསུཔི ཨེཀཱུནསཊྛིསོབྷནཙིཏྟེསུ སཾཝིཛྫནྟི.

༢༩. ཝིརཏིཡོ ¶ པན ཏིསྶོཔི ལོཀུཏྟརཙིཏྟེསུ སབྦཐཱཔི ནིཡཏཱ ཨེཀཏོཝ ལབྦྷནྟི, ལོཀིཡེསུ པན ཀཱམཱཝཙརཀུསལེསྭེཝ ཀདཱཙི སནྡིསྶནྟི ཝིསུཾ ཝིསུཾ.

༣༠. ཨཔྤམཉྙཱཡོ པན དྭཱདསསུ པཉྩམཛ྄ཛྷཱནཝཛྫིཏམཧགྒཏཙིཏྟེསུ ཙེཝ ཀཱམཱཝཙརཀུསལེསུ ཙ སཧེཏུཀཀཱམཱཝཙརཀིརིཡཙིཏྟེསུ ཙཱཏི ཨཊྛཝཱིསཏིཙིཏྟེསྭེཝ ཀདཱཙི ནཱནཱ ཧུཏྭཱ ཛཱཡནྟི, ཨུཔེཀྑཱསཧགཏེསུ པནེཏྠ ཀརུཎཱམུདིཏཱ ན སནྟཱིཏི ཀེཙི ཝདནྟི.

༣༡. པཉྙཱ པན དྭཱདསསུ ཉཱཎསམྤཡུཏྟཀཱམཱཝཙརཙིཏྟེསུ ཙེཝ སབྦེསུཔི པཉྩཏིཾསམཧགྒཏལོཀུཏྟརཙིཏྟེསུ ཙཱཏི སཏྟཙཏྟཱལཱིསཙིཏྟེསུ སམྤཡོགཾ གཙྪཏཱིཏི.

༣༢. ཨེཀཱུནཝཱིསཏི ¶ དྷམྨཱ, ཛཱཡནྟེཀཱུནསཊྛིསུ.

ཏཡོ སོལ༹སཙིཏྟེསུ, ཨཊྛཝཱིསཏིཡཾ དྭཡཾ.

པཉྙཱ པཀཱསིཏཱ, སཏྟཙཏྟཱལཱིསཝིདྷེསུཔི;

སམྤཡུཏྟཱ ཙཏུདྷེཝཾ, སོབྷནེསྭེཝ སོབྷནཱ.

༣༣. ཨིསྶཱམཙྪེརཀུཀྐུཙྩ-ཝིརཏིཀརུཎཱདཡོ.

ནཱནཱ ཀདཱཙི མཱནོ ཙ, ཐིན མིདྡྷཾ ཏཐཱ སཧ.

༣༤. ཡཐཱཝུཏྟཱནུསཱརེན, སེསཱ ནིཡཏཡོགིནོ.

སངྒཧཉྩ པཝཀྑཱམི, ཏེསཾ དཱནི ཡཐཱརཧཾ.

སངྒཧནཡོ

༣༥. ཚཏྟིཾསཱནུཏྟརེ དྷམྨཱ, པཉྩཏིཾས མཧགྒཏེ.

ཨཊྛཏིཾསཱཔི ལབྦྷནྟི, ཀཱམཱཝཙརསོབྷནེ.

སཏྟཝཱིསཏིཔུཉྙམྷི, དྭཱདསཱཧེཏུཀེཏི ཙ;

ཡཐཱསམྦྷཝཡོགེན, པཉྩདྷཱ ཏཏྠ སངྒཧོ.

ལོཀུཏྟརཙིཏྟསངྒཧནཡོ

༣༦. ཀཐཾ ¶ ? ལོཀུཏྟརེསུ ཏཱཝ ཨཊྛསུ པཋམཛ྄ཛྷཱནིཀཙིཏྟེསུ ཨཉྙསམཱནཱ ཏེརས ཙེཏསིཀཱ, ཨཔྤམཉྙཱཝཛྫིཏཱ ཏེཝཱིསཏི སོབྷནཙེཏསིཀཱ ཙེཏི ཚཏྟིཾས དྷམྨཱ སངྒཧཾ གཙྪནྟི, ཏཐཱ དུཏིཡཛ྄ཛྷཱནིཀཙིཏྟེསུ ཝིཏཀྐཝཛྫཱ, ཏཏིཡཛ྄ཛྷཱནིཀཙིཏྟེསུ ཝིཏཀྐཝིཙཱརཝཛྫཱ, ཙཏུཏྠཛ྄ཛྷཱནིཀཙིཏྟེསུ ཝིཏཀྐཝིཙཱརཔཱིཏིཝཛྫཱ, པཉྩམཛ྄ཛྷཱནིཀཙིཏྟེསུཔི ཨུཔེཀྑཱསཧགཏཱ ཏེ ཨེཝ སངྒཡ྄ཧནྟཱིཏི སབྦཐཱཔི ཨཊྛསུ ལོཀུཏྟརཙིཏྟེསུ པཉྩཀཛ྄ཛྷཱནཝསེན པཉྩདྷཱཝ སངྒཧོ ཧོཏཱིཏི.

༣༧. ཚཏྟིཾས ¶ པཉྩཏིཾས ཙ, ཙཏུཏྟིཾས ཡཐཱཀྐམཾ.

ཏེཏྟིཾསདྭཡམིཙྩེཝཾ, པཉྩདྷཱནུཏྟརེ ཋིཏཱ.

མཧགྒཏཙིཏྟསངྒཧནཡོ

༣༨. མཧགྒཏེསུ པན ཏཱིསུ པཋམཛ྄ཛྷཱནིཀཙིཏྟེསུ ཏཱཝ ཨཉྙསམཱནཱ ཏེརས ཙེཏསིཀཱ, ཝིརཏིཏྟཡཝཛྫིཏཱ དྭཱཝཱིསཏི སོབྷནཙེཏསིཀཱ ཙེཏི པཉྩཏིཾས དྷམྨཱ སངྒཧཾ གཙྪནྟི, ཀརུཎཱམུདིཏཱ པནེཏྠ པཙྩེཀམེཝ ཡོཛེཏབྦཱ, ཏཐཱ དུཏིཡཛ྄ཛྷཱནིཀཙིཏྟེསུ ཝིཏཀྐཝཛྫཱ, ཏཏིཡཛ྄ཛྷཱནིཀཙིཏྟེསུ ཝིཏཀྐཝིཙཱརཝཛྫཱ, ཙཏུཏྠཛ྄ཛྷཱནིཀཙིཏྟེསུ ཝིཏཀྐཝིཙཱརཔཱིཏིཝཛྫཱ, པཉྩམཛ྄ཛྷཱནིཀཙིཏྟེསུ པན པནྣརསསུ ཨཔྤམཉྙཱཡོ ན ལབྦྷནྟཱིཏི སབྦཐཱཔི སཏྟཝཱིསཏིམཧགྒཏཙིཏྟེསུ པཉྩཀཛ྄ཛྷཱནཝསེན པཉྩདྷཱཝ སངྒཧོ ཧོཏཱིཏི.

༣༩. པཉྩཏིཾས ཙཏུཏྟིཾས, ཏེཏྟིཾས ཙ ཡཐཱཀྐམཾ.

བཱཏྟིཾས ཙེཝ ཏིཾསེཏི, པཉྩདྷཱཝ མཧགྒཏེ.

ཀཱམཱཝཙརསོབྷནཙིཏྟསངྒཧནཡོ

༤༠. ཀཱམཱཝཙརསོབྷནེསུ པན ཀུསལེསུ ཏཱཝ པཋམདྭཡེ ཨཉྙསམཱནཱ ཏེརས ཙེཏསིཀཱ, པཉྩཝཱིསཏི སོབྷནཙེཏསིཀཱ ¶ ཙེཏི ཨཊྛཏིཾས དྷམྨཱ སངྒཧཾ གཙྪནྟི, ཨཔྤམཉྙཱཝིརཏིཡོ པནེཏྠ པཉྩཔི པཙྩེཀམེཝ ཡོཛེཏབྦཱ, ཏཐཱ དུཏིཡདྭཡེ ཉཱཎཝཛྫིཏཱ, ཏཏིཡདྭཡེ ཉཱཎསམྤཡུཏྟཱ པཱིཏིཝཛྫིཏཱ, ཙཏུཏྠདྭཡེ ཉཱཎཔཱིཏིཝཛྫིཏཱ ཏེ ཨེཝ སངྒཡ྄ཧནྟི. ཀིརིཡཙིཏྟེསུཔི ཝིརཏིཝཛྫིཏཱ ཏཐེཝ ཙཏཱུསུཔི དུཀེསུ ཙཏུདྷཱཝ སངྒཡ྄ཧནྟི. ཏཐཱ ཝིཔཱཀེསུ ཙ ཨཔྤམཉྙཱཝིརཏིཝཛྫིཏཱ ཏེ ཨེཝ སངྒཡ྄ཧནྟཱིཏི སབྦཐཱཔི ཙཏུཝཱིསཏིཀཱམཱཝཙརསོབྷནཙིཏྟེསུ དུཀཝསེན དྭཱདསདྷཱཝ སངྒཧོ ཧོཏཱིཏི.

༤༡. ཨཊྛཏིཾས སཏྟཏིཾས, དྭཡཾ ཚཏྟིཾསཀཾ སུབྷེ.

པཉྩཏིཾས ཙཏུཏྟིཾས, དྭཡཾ ཏེཏྟིཾསཀཾ ཀྲིཡེ;

ཏེཏྟིཾས པཱཀེ བཱཏྟིཾས, དྭཡེཀཏིཾསཀཾ བྷཝེ;

སཧེཏུཀཱམཱཝཙརཔུཉྙ-པཱཀཀྲིཡཱམནེ.

༤༢. ནཝིཛྫནྟེཏྠ ¶ ཝིརཏཱི, ཀྲིཡེསུ ཙ མཧགྒཏེ.

ཨནུཏྟརེ ཨཔྤམཉྙཱ, ཀཱམཔཱཀེ དྭཡཾ ཏཐཱ;

ཨནུཏྟརེ ཛྷཱནདྷམྨཱ, ཨཔྤམཉྙཱ ཙ མཛ྄ཛྷིམེ;

ཝིརཏཱི ཉཱཎཔཱིཏཱི ཙ, པརིཏྟེསུ ཝིསེསཀཱ.

ཨཀུསལཙིཏྟསངྒཧནཡོ

༤༣. ཨཀུསལེསུ པན ལོབྷམཱུལེསུ ཏཱཝ པཋམེ ཨསངྑཱརིཀེ ཨཉྙསམཱནཱ ཏེརས ཙེཏསིཀཱ, ཨཀུསལསཱདྷཱརཎཱ ཙཏྟཱརོ ཙཱཏི སཏྟརས ལོབྷདིཊྛཱིཧི སདྡྷིཾ ཨེཀཱུནཝཱིསཏི དྷམྨཱ སངྒཧཾ གཙྪནྟི.

༤༤. ཏཐེཝ དུཏིཡེ ཨསངྑཱརིཀེ ལོབྷམཱནེན.

༤༥. ཏཏིཡེ ཏཐེཝ པཱིཏིཝཛྫིཏཱ ལོབྷདིཊྛཱིཧི སཧ ཨཊྛཱརས.

༤༦. ཙཏུཏྠེ ¶ ཏཐེཝ ལོབྷམཱནེན.

༤༧. པཉྩམེ པན པཊིགྷསམྤཡུཏྟེ ཨསངྑཱརིཀེ དོསོ ཨིསྶཱ མཙྪརིཡཾ ཀུཀྐུཙྩཉྩཱཏི ཙཏཱུཧི སདྡྷིཾ པཱིཏིཝཛྫིཏཱ ཏེ ཨེཝ ཝཱིསཏི དྷམྨཱ སངྒཡ྄ཧནྟི, ཨིསྶཱམཙྪརིཡཀུཀྐུཙྩཱནི པནེཏྠ པཙྩེཀམེཝ ཡོཛེཏབྦཱནི.

༤༨. སསངྑཱརིཀཔཉྩཀེཔི ཏཐེཝ ཐིནམིདྡྷེན ཝིསེསེཏྭཱ ཡོཛེཏབྦཱ.

༤༩. ཚནྡཔཱིཏིཝཛྫིཏཱ པན ཨཉྙསམཱནཱ ཨེཀཱདས, ཨཀུསལསཱདྷཱརཎཱ ཙཏྟཱརོ ཙཱཏི པནྣརས དྷམྨཱ ཨུདྡྷཙྩསཧགཏེ སམྤཡུཛྫནྟི.

༥༠. ཝིཙིཀིཙྪཱསཧགཏཙིཏྟེ ཙ ཨདྷིམོཀྑཝིརཧིཏཱ ཝིཙིཀིཙྪཱསཧགཏཱ ཏཐེཝ པནྣརས ¶ དྷམྨཱ སམུཔལབྦྷནྟཱིཏི སབྦཐཱཔི དྭཱདསཱཀུསལཙིཏྟུཔྤཱདེསུ པཙྩེཀཾ ཡོཛིཡམཱནཱཔི གཎནཝསེན སཏྟདྷཱཝ སངྒཧིཏཱ བྷཝནྟཱིཏི.

༥༡. ཨེཀཱུནཝཱིསཱཊྛཱརས, ཝཱིསེཀཝཱིས ཝཱིསཏི.

དྭཱཝཱིས པནྣརསེཏི, སཏྟདྷཱ ཀུསལེཋིཏཱ.

༥༢. སཱདྷཱརཎཱ ཙ ཙཏྟཱརོ, སམཱནཱ ཙ དསཱཔརེ.

ཙུདྡསེཏེ པཝུཙྩནྟི, སབྦཱཀུསལཡོགིནོ.

ཨཧེཏུཀཙིཏྟསངྒཧནཡོ

༥༣. ཨཧེཏུཀེསུ པན ཧསནཙིཏྟེ ཏཱཝ ཚནྡཝཛྫིཏཱ ཨཉྙསམཱནཱ དྭཱདས དྷམྨཱ སངྒཧཾ གཙྪནྟི.

༥༤. ཏཐཱ ཝོཊྛབྦནེ ཚནྡཔཱིཏིཝཛྫིཏཱ.

༥༥. སུཁསནྟཱིརཎེ ཚནྡཝཱིརིཡཝཛྫིཏཱ.

༥༦. མནོདྷཱཏུཏྟིཀཱཧེཏུཀཔཊིསནྡྷིཡུགལེ༹ ཚནྡཔཱིཏིཝཱིརིཡཝཛྫིཏཱ.

༥༧. དྭིཔཉྩཝིཉྙཱཎེ ¶ པཀིཎྞཀཝཛྫིཏཱ ཏེཡེཝ སངྒཡ྄ཧནྟཱིཏི སབྦཐཱཔི ཨཊྛཱརསསུ ཨཧེཏུཀེསུ གཎནཝསེན ཙཏུདྷཱཝ སངྒཧོ ཧོཏཱིཏི.

༥༨. དྭཱདསེཀཱདས དས, སཏྟ ཙཱཏི ཙཏུབྦིདྷོ.

ཨཊྛཱརསཱཧེཏུཀེསུ, ཙིཏྟུཔྤཱདེསུ སངྒཧོ.

༥༩. ཨཧེཏུཀེསུ སབྦཏྠ, སཏྟ སེསཱ ཡཐཱརཧཾ.

ཨིཏི ཝིཏྠཱརཏོ ཝུཏྟོ, ཏེཏྟིཾསཝིདྷསངྒཧོ.

༦༠. ཨིཏྠཾ ¶ ཙིཏྟཱཝིཡུཏྟཱནཾ, སམྤཡོགཉྩ སངྒཧཾ.

ཉཏྭཱ བྷེདཾ ཡཐཱཡོགཾ, ཙིཏྟེན སམམུདྡིསེ.

ཨིཏི ཨབྷིདྷམྨཏྠསངྒཧེ ཙེཏསིཀསངྒཧཝིབྷཱགོ ནཱམ

དུཏིཡོ པརིཙྪེདོ.

༣. པཀིཎྞཀཔརིཙྪེདོ

༡. སམྤཡུཏྟཱ ཡཐཱཡོགཾ, ཏེཔཉྙཱས སབྷཱཝཏོ.

ཙིཏྟཙེཏསིཀཱ དྷམྨཱ, ཏེསཾ དཱནི ཡཐཱརཧཾ.

༢. ཝེདནཱཧེཏུཏོ ཀིཙྩདྭཱརཱལམྦཎཝཏྠུཏོ.

ཙིཏྟུཔྤཱདཝསེནེཝ, སངྒཧོ ནཱམ ནཱིཡཏེ.

ཝེདནཱསངྒཧོ

༣. ཏཏྠ ཝེདནཱསངྒཧེ ཏཱཝ ཏིཝིདྷཱ ཝེདནཱ སུཁཾ དུཀྑཾ ཨདུཀྑམསུཁཱ ཙེཏི, སུཁཾ དུཀྑཾ སོམནསྶཾ དོམནསྶཾ ཨུཔེཀྑཱཏི ཙ བྷེདེན པན པཉྩདྷཱ ཧོཏི.

༤. ཏཏྠ སུཁསཧགཏཾ ཀུསལཝིཔཱཀཾ ཀཱཡཝིཉྙཱཎམེཀམེཝ, ཏཐཱ དུཀྑསཧགཏཾ ཨཀུསལཝིཔཱཀཾ.

༥. སོམནསྶསཧགཏཙིཏྟཱནི ¶ པན ལོབྷམཱུལཱནི ཙཏྟཱརི, དྭཱདས ཀཱམཱཝཙརསོབྷནཱནི, སུཁསནྟཱིརཎཧསནཱནི ཙ དྭེཏི ཨཊྛཱརས ཀཱམཱཝཙརསོམནསྶསཧགཏཙིཏྟཱནི ཙེཝ པཋམདུཏིཡཏཏིཡཙཏུཏྠཛ྄ཛྷཱནསངྑཱཏཱནི ¶ ཙཏུཙཏྟཱལཱིས མཧགྒཏལོཀུཏྟརཙིཏྟཱནི ཙེཏི དྭཱསཊྛིཝིདྷཱནི བྷཝནྟི.

༦. དོམནསྶསཧགཏཙིཏྟཱནི པན དྭེ པཊིགྷསམྤཡུཏྟཙིཏྟཱནེཝ.

༧. སེསཱནི སབྦཱནིཔི པཉྩཔཉྙཱས ཨུཔེཀྑཱསཧགཏཙིཏྟཱནེཝཱཏི.

༨. སུཁཾ དུཀྑམུཔེཀྑཱཏི, ཏིཝིདྷཱ ཏཏྠ ཝེདནཱ.

སོམནསྶཾ དོམནསྶམིཏིབྷེདེན པཉྩདྷཱ.

༩. སུཁམེཀཏྠ དུཀྑཉྩ, དོམནསྶཾ དྭཡེ ཋིཏཾ.

དྭཱསཊྛཱིསུ སོམནསྶཾ, པཉྩཔཉྙཱསཀེཏརཱ.

ཧེཏུསངྒཧོ

༡༠. ཧེཏུསངྒཧེ ཧེཏཱུ ནཱམ ལོབྷོ དོསོ མོཧོ ཨལོབྷོ ཨདོསོ ཨམོཧོ ཙཱཏི ཚབྦིདྷཱ བྷཝནྟི.

༡༡. ཏཏྠ པཉྩདྭཱརཱཝཛྫནདྭིཔཉྩཝིཉྙཱཎསམྤཊིཙྪནསནྟཱིརཎཝོཊྛབྦནཧསནཝསེན ཨཧེཏུཀཙིཏྟཱནི ནཱམ.

༡༢. སེསཱནི སབྦཱནིཔི ཨེཀསཏྟཏི ཙིཏྟཱནི སཧེཏུཀཱནེཝ.

༡༣. ཏཏྠཱཔི དྭེ མོམཱུཧཙིཏྟཱནི ཨེཀཧེཏུཀཱནི.

༡༤. སེསཱནི དས ཨཀུསལཙིཏྟཱནི ཙེཝ ཉཱཎཝིཔྤཡུཏྟཱནི དྭཱདས ཀཱམཱཝཙརསོབྷནཱནི ཙེཏི དྭཱཝཱིསཏི དྭིཧེཏུཀཙིཏྟཱནི.

༡༥. དྭཱདས ¶ ¶ ཉཱཎསམྤཡུཏྟཀཱམཱཝཙརསོབྷནཱནི ཙེཝ པཉྩཏིཾས མཧགྒཏལོཀུཏྟརཙིཏྟཱནི ཙེཏི སཏྟཙཏྟཱལཱིས ཏིཧེཏུཀཙིཏྟཱནཱིཏི.

༡༦. ལོབྷོ དོསོ ཙ མོཧོ ཙ,

ཧེཏཱུ ཨཀུསལཱ ཏཡོ;

ཨལོབྷཱདོསཱམོཧོ ཙ,

ཀུསལཱབྱཱཀཏཱ ཏཐཱ.

༡༧. ཨཧེཏུཀཱཊྛཱརསེཀཧེཏུཀཱ དྭེ དྭཱཝཱིསཏི.

དྭིཧེཏུཀཱ མཏཱ སཏྟཙཏྟཱལཱིསཏིཧེཏུཀཱ.

ཀིཙྩསངྒཧོ

༡༨. ཀིཙྩསངྒཧེ ཀིཙྩཱནི ནཱམ པཊིསནྡྷིབྷཝངྒཱཝཛྫནདསྶནསཝནགྷཱཡནསཱཡནཕུསནསམྤཊིཙྪནསནྟཱིརཎཝོཊྛབྦནཛཝནཏདཱརམྨཎཙུཏིཝསེན ཙུདྡསཝིདྷཱནི བྷཝནྟི.

༡༩. པཊིསནྡྷིབྷཝངྒཱཝཛྫནཔཉྩཝིཉྙཱཎཋཱནཱདིཝསེན པན ཏེསཾ དསདྷཱ ཋཱནབྷེདོ ཝེདིཏབྦོ.

༢༠. ཏཏྠ དྭེ ཨུཔེཀྑཱསཧགཏསནྟཱིརཎཱནི ཙེཝ ཨཊྛ མཧཱཝིཔཱཀཱནི ཙ ནཝ རཱུཔཱརཱུཔཝིཔཱཀཱནི ཙེཏི ཨེཀཱུནཝཱིསཏི ཙིཏྟཱནི པཊིསནྡྷིབྷཝངྒཙུཏིཀིཙྩཱནི ནཱམ.

༢༡. ཨཱཝཛྫནཀིཙྩཱནི པན དྭེ.

༢༢. ཏཐཱ དསྶནསཝནགྷཱཡནསཱཡནཕུསནསམྤཊིཙྪནཀིཙྩཱནི ཙ.

༢༣. ཏཱིཎི སནྟཱིརཎཀིཙྩཱནི.

༢༤. མནོདྭཱརཱཝཛྫནམེཝ ¶ པཉྩདྭཱརེ ཝོཊྛབྦནཀིཙྩཾ སཱདྷེཏི.

༢༥. ཨཱཝཛྫནདྭཡཝཛྫིཏཱནི ཀུསལཱཀུསལཕལཀིརིཡཙིཏྟཱནི པཉྩཔཉྙཱས ཛཝནཀིཙྩཱནི.

༢༦. ཨཊྛ ¶ མཧཱཝིཔཱཀཱནི ཙེཝ སནྟཱིརཎཏྟཡཉྩེཏི ཨེཀཱདས ཏདཱརམྨཎཀིཙྩཱནི.

༢༧. ཏེསུ པན དྭེ ཨུཔེཀྑཱསཧགཏསནྟཱིརཎཙིཏྟཱནི པཊིསནྡྷིབྷཝངྒཙུཏིཏདཱརམྨཎསནྟཱིརཎཝསེན པཉྩཀིཙྩཱནི ནཱམ.

༢༨. མཧཱཝིཔཱཀཱནི ཨཊྛ པཊིསནྡྷིབྷཝངྒཙུཏིཏདཱརམྨཎཝསེན ཙཏུཀིཙྩཱནི ནཱམ.

༢༩. མཧགྒཏཝིཔཱཀཱནི ནཝ པཊིསནྡྷིབྷཝངྒཙུཏིཝསེན ཏིཀིཙྩཱནི ནཱམ.

༣༠. སོམནསྶསནྟཱིརཎཾ སནྟཱིརཎཏདཱརམྨཎཝསེན དུཀིཙྩཾ.

༣༡. ཏཐཱ ཝོཊྛབྦནཾ ཝོཊྛབྦནཱཝཛྫནཝསེན.

༣༢. སེསཱནི པན སབྦཱནིཔི ཛཝནམནོདྷཱཏུཏྟིཀདྭིཔཉྩཝིཉྙཱཎཱནི ཡཐཱསམྦྷཝམེཀཀིཙྩཱནཱིཏི.

༣༣. པཊིསནྡྷཱདཡོ ནཱམ, ཀིཙྩབྷེདེན ཙུདྡས.

དསདྷཱ ཋཱནབྷེདེན, ཙིཏྟུཔྤཱདཱ པཀཱསིཏཱ.

༣༤. ཨཊྛསཊྛི ཏཐཱ དྭེ ཙ, ནཝཱཊྛ དྭེ ཡཐཱཀྐམཾ.

ཨེཀདྭིཏིཙཏུཔཉྩཀིཙྩཋཱནཱནི ནིདྡིསེ.

དྭཱརསངྒཧོ

༣༥. དྭཱརསངྒཧེ ¶ དྭཱརཱནི ནཱམ ཙཀྑུདྭཱརཾ སོཏདྭཱརཾ གྷཱནདྭཱརཾ ཛིཝ྄ཧཱདྭཱརཾ ཀཱཡདྭཱརཾ མནོདྭཱརཉྩེཏི ཚབྦིདྷཱནི བྷཝནྟི.

༣༦. ཏཏྠ ཙཀྑུམེཝ ཙཀྑུདྭཱརཾ.

༣༧. ཏཐཱ སོཏཱདཡོ སོཏདྭཱརཱདཱིནི.

༣༨. མནོདྭཱརཾ ¶ པན བྷཝངྒནྟི པཝུཙྩཏི.

༣༩. ཏཏྠ པཉྩདྭཱརཱཝཛྫནཙཀྑུཝིཉྙཱཎསམྤཊིཙྪནསནྟཱིརཎཝོཊྛབྦནཀཱམཱཝཙརཛཝནཏདཱརམྨཎཝསེན ཚཙཏྟཱལཱིས ཙིཏྟཱནི ཙཀྑུདྭཱརེ ཡཐཱརཧཾ ཨུཔྤཛྫནྟི, ཏཐཱ པཉྩདྭཱརཱཝཛྫནསོཏཝིཉྙཱཎཱདིཝསེན སོཏདྭཱརཱདཱིསུཔི ཚཙཏྟཱལཱིསེཝ བྷཝནྟཱིཏི སབྦཐཱཔི པཉྩདྭཱརེ ཙཏུཔཉྙཱས ཙིཏྟཱནི ཀཱམཱཝཙརཱནེཝ.

༤༠. མནོདྭཱརེ པན མནོདྭཱརཱཝཛྫནཔཉྩཔཉྙཱསཛཝནཏདཱརམྨཎཝསེན སཏྟསཊྛི ཙིཏྟཱནི བྷཝནྟི.

༤༡. ཨེཀཱུནཝཱིསཏི པཊིསནྡྷིབྷཝངྒཙུཏིཝསེན དྭཱརཝིམུཏྟཱནི.

༤༢. ཏེསུ པན པཉྩཝིཉྙཱཎཱནི ཙེཝ མཧགྒཏལོཀུཏྟརཛཝནཱནི ཙེཏི ཚཏྟིཾས ཡཐཱརཧམེཀདྭཱརིཀཙིཏྟཱནི ནཱམ.

༤༣. མནོདྷཱཏུཏྟིཀཾ པན པཉྩདྭཱརིཀཾ.

༤༤. སུཁསནྟཱིརཎཝོཊྛབྦནཀཱམཱཝཙརཛཝནཱནི ཚདྭཱརིཀཙིཏྟཱནི.

༤༥. ཨུཔེཀྑཱསཧགཏསནྟཱིརཎམཧཱཝིཔཱཀཱནི ¶ ཚདྭཱརིཀཱནི ཙེཝ དྭཱརཝིམུཏྟཱནི ཙ.

༤༦. མཧགྒཏཝིཔཱཀཱནི དྭཱརཝིམུཏྟཱནེཝཱཏི.

༤༧. ཨེཀདྭཱརིཀཙིཏྟཱནི, པཉྩཚདྭཱརིཀཱནི ཙ.

ཚདྭཱརིཀཝིམུཏྟཱནི, ཝིམུཏྟཱནི ཙ སབྦཐཱ.

ཚཏྟིཾསཏི ཏཐཱ ཏཱིཎི, ཨེཀཏིཾས ཡཐཱཀྐམཾ;

དསདྷཱ ནཝདྷཱ ཙེཏི, པཉྩདྷཱ པརིདཱིཔཡེ.

ཨཱལམྦཎསངྒཧོ

༤༨. ཨཱལམྦཎསངྒཧེ ¶ ཨཱརམྨཎཱནི ནཱམ རཱུཔཱརམྨཎཾ སདྡཱརམྨཎཾ གནྡྷཱརམྨཎཾ རསཱརམྨཎཾ ཕོཊྛབྦཱརམྨཎཾ དྷམྨཱརམྨཎཉྩེཏི ཚབྦིདྷཱནི བྷཝནྟི.

༤༩. ཏཏྠ རཱུཔམེཝ རཱུཔཱརམྨཎཾ, ཏཐཱ སདྡཱདཡོ སདྡཱརམྨཎཱདཱིནི.

༥༠. དྷམྨཱརམྨཎཾ པན པསཱདསུཁུམརཱུཔཙིཏྟཙེཏསིཀནིབྦཱནཔཉྙཏྟིཝསེན ཚདྷཱ སངྒཡ྄ཧཏི.

༥༡. ཏཏྠ ཙཀྑུདྭཱརིཀཙིཏྟཱནཾ སབྦེསམྤི རཱུཔམེཝ ཨཱརམྨཎཾ, ཏཉྩ པཙྩུཔྤནྣཾ. ཏཐཱ སོཏདྭཱརིཀཙིཏྟཱདཱིནམྤི སདྡཱདཱིནི, ཏཱནི ཙ པཙྩུཔྤནྣཱནིཡེཝ.

༥༢. མནོདྭཱརིཀཙིཏྟཱནཾ པན ཚབྦིདྷམྤི པཙྩུཔྤནྣམཏཱིཏཾ ཨནཱགཏཾ ཀཱལཝིམུཏྟཉྩ ཡཐཱརཧམཱརམྨཎཾ ཧོཏི.

༥༣. དྭཱརཝིམུཏྟཱནཉྩ པཊིསནྡྷིབྷཝངྒཙུཏིསངྑཱཏཱནཾ ཚབྦིདྷམྤི ཡཐཱསམྦྷཝཾ ཡེབྷུཡྻེན བྷཝནྟརེ ¶ ཚདྭཱརགྒཧིཏཾ པཙྩུཔྤནྣམཏཱིཏཾ པཉྙཏྟིབྷཱུཏཾ ཝཱ ཀམྨཀམྨནིམིཏྟགཏིནིམིཏྟསམྨཏཾ ཨཱརམྨཎཾ ཧོཏི.

༥༤. ཏེསུ ཙཀྑུཝིཉྙཱཎཱདཱིནི ཡཐཱཀྐམཾ རཱུཔཱདིཨེཀེཀཱརམྨཎཱནེཝ.

༥༥. མནོདྷཱཏུཏྟིཀཾ པན རཱུཔཱདིཔཉྩཱརམྨཎཾ.

༥༦. སེསཱནི ཀཱམཱཝཙརཝིཔཱཀཱནི ཧསནཙིཏྟཉྩེཏི སབྦཐཱཔི ཀཱམཱཝཙརཱརམྨཎཱནེཝ.

༥༧. ཨཀུསལཱནི ཙེཝ ཉཱཎཝིཔྤཡུཏྟཀཱམཱཝཙརཛཝནཱནི ཙེཏི ལོཀུཏྟརཝཛྫིཏསབྦཱརམྨཎཱནི.

༥༨. ཉཱཎསམྤཡུཏྟཀཱམཱཝཙརཀུསལཱནི ¶ ཙེཝ པཉྩམཛ྄ཛྷཱནསངྑཱཏཾ ཨབྷིཉྙཱཀུསལཉྩེཏི ཨརཧཏྟམགྒཕལཝཛྫིཏསབྦཱརམྨཎཱནི.

༥༩. ཉཱཎསམྤཡུཏྟཀཱམཱཝཙརཀིརིཡཱནི ཙེཝ ཀིརིཡཱབྷིཉྙཱཝོཊྛབྦནཉྩེཏི སབྦཐཱཔི སབྦཱརམྨཎཱནི.

༦༠. ཨཱརུཔྤེསུ དུཏིཡཙཏུཏྠཱནི མཧགྒཏཱརམྨཎཱནི.

༦༡. སེསཱནི མཧགྒཏཙིཏྟཱནི སབྦཱནིཔི པཉྙཏྟཱརམྨཎཱནི.

༦༢. ལོཀུཏྟརཙིཏྟཱནི ནིབྦཱནཱརམྨཎཱནཱིཏི.

༦༣. པཉྩཝཱིས པརིཏྟམྷི, ཚ ཙིཏྟཱནི མཧགྒཏེ.

ཨེཀཝཱིསཏི ཝོཧཱརེ, ཨཊྛ ནིབྦཱནགོཙརེ.

ཝཱིསཱནུཏྟརམུཏྟམྷི ¶ , ཨགྒམགྒཕལུཛ྄ཛྷིཏེ;

པཉྩ སབྦཏྠ ཚཙྩེཏི, སཏྟདྷཱ ཏཏྠ སངྒཧོ.

ཝཏྠུསངྒཧོ

༦༤. ཝཏྠུསངྒཧེ ཝཏྠཱུནི ནཱམ ཙཀྑུསོཏགྷཱནཛིཝ྄ཧཱཀཱཡཧདཡཝཏྠུ ཙེཏི ཚབྦིདྷཱནི བྷཝནྟི.

༦༥. ཏཱནི ཀཱམལོཀེ སབྦཱནིཔི ལབྦྷནྟི.

༦༦. རཱུཔལོཀེ པན གྷཱནཱདིཏྟཡཾ ནཏྠི.

༦༧. ཨརཱུཔལོཀེ པན སབྦཱནིཔི ན སཾཝིཛྫནྟི.

༦༨. ཏཏྠ པཉྩཝིཉྙཱཎདྷཱཏུཡོ ཡཐཱཀྐམཾ ཨེཀནྟེན པཉྩ པསཱདཝཏྠཱུནི ནིསྶཱཡེཝ པཝཏྟནྟི.

༦༩. པཉྩདྭཱརཱཝཛྫནསམྤཊིཙྪནསངྑཱཏཱ པན མནོདྷཱཏུ ཙ ཧདཡཾ ནིསྶིཏཱཡེཝ པཝཏྟནྟི.

༧༠. ཨཝསེསཱ ¶ པན མནོཝིཉྙཱཎདྷཱཏུསངྑཱཏཱ ཙ སནྟཱིརཎམཧཱཝིཔཱཀཔཊིགྷདྭཡཔཋམམགྒཧསནརཱུཔཱཝཙརཝསེན ཧདཡཾ ནིསྶཱཡེཝ པཝཏྟནྟི.

༧༡. ཨཝསེསཱ ཀུསལཱཀུསལཀིརིཡཱནུཏྟརཝསེན པན ནིསྶཱཡ ཝཱ ཨནིསྶཱཡ ཝཱ.

༧༢. ཨཱརུཔྤཝིཔཱཀཝསེན ཧདཡཾ ཨནིསྶཱཡེཝཱཏི.

༧༣. ཚཝཏྠུཾ ¶ ནིསྶིཏཱ ཀཱམེ, སཏྟ རཱུཔེ ཙཏུབྦིདྷཱ.

ཏིཝཏྠུཾ ནིསྶིཏཱརུཔྤེ, དྷཱཏྭེཀཱ ནིསྶིཏཱ མཏཱ.

༧༤. ཏེཙཏྟཱལཱིས ནིསྶཱཡ, དྭེཙཏྟཱལཱིས ཛཱཡརེ.

ནིསྶཱཡ ཙ ཨནིསྶཱཡ, པཱཀཱརུཔྤཱ ཨནིསྶིཏཱ.

ཨིཏི ཨབྷིདྷམྨཏྠསངྒཧེ པཀིཎྞཀསངྒཧཝིབྷཱགོ ནཱམ

ཏཏིཡོ པརིཙྪེདོ.

༤. ཝཱིཐིཔརིཙྪེདོ

༡. ཙིཏྟུཔྤཱདཱནམིཙྩེཝཾ, ཀཏྭཱསངྒཧམུཏྟརཾ.

བྷཱུམིཔུགྒལབྷེདེན, པུབྦཱཔརནིཡཱམིཏཾ.

པཝཏྟིསངྒཧཾ ནཱམ, པཊིསནྡྷིཔཝཏྟིཡཾ;

པཝཀྑཱམི སམཱསེན, ཡཐཱསམྦྷཝཏོ ཀཐཾ.

༢.. ཝཱིཐིམུཏྟཱནཾ པན ཀམྨཀམྨནིམིཏྟགཏིནིམིཏྟཝསེན ཏིཝིདྷཱ ཧོཏི ཝིསཡཔྤཝཏྟི.

༤. ཏཏྠ ཝཏྠུདྭཱརཱརམྨཎཱནི པུབྦེ ཝུཏྟནཡཱནེཝ.

ཝིཉྙཱཎཚཀྐཾ

༥. ཙཀྑུཝིཉྙཱཎཾ ¶ ¶ སོཏཝིཉྙཱཎཾ གྷཱནཝིཉྙཱཎཾ ཛིཝ྄ཧཱཝིཉྙཱཎཾ ཀཱཡཝིཉྙཱཎཾ མནོཝིཉྙཱཎཉྩེཏི ཚ ཝིཉྙཱཎཱནི.

ཝཱིཐིཚཀྐཾ

༦. ཚ ཝཱིཐིཡོ པན ཙཀྑུདྭཱརཝཱིཐི སོཏདྭཱརཝཱིཐི གྷཱནདྭཱརཝཱིཐི ཛིཝ྄ཧཱདྭཱརཝཱིཐི ཀཱཡདྭཱརཝཱིཐི མནོདྭཱརཝཱིཐི ཙེཏི དྭཱརཝསེན ཝཱ, ཙཀྑུཝིཉྙཱཎཝཱིཐི སོཏཝིཉྙཱཎཝཱིཐི གྷཱནཝིཉྙཱཎཝཱིཐི ཛིཝ྄ཧཱཝིཉྙཱཎཝཱིཐི ཀཱཡཝིཉྙཱཎཝཱིཐི མནོཝིཉྙཱཎཝཱིཐི ཙེཏི ཝིཉྙཱཎཝསེན ཝཱ དྭཱརཔྤཝཏྟཱ ཙིཏྟཔྤཝཏྟིཡོ ཡོཛེཏབྦཱ.

ཝཱིཐིབྷེདོ

༧. ཨཏིམཧནྟཾ མཧནྟཾ པརིཏྟཾ ཨཏིཔརིཏྟཉྩེཏི པཉྩདྭཱརེ མནོདྭཱརེ པན ཝིབྷཱུཏམཝིབྷཱུཏཉྩེཏི ཚདྷཱ ཝིསཡཔྤཝཏྟི ཝེདིཏབྦཱ.

པཉྩདྭཱརཝཱིཐི

༨. ཀཐཾ? ཨུཔྤཱདཋིཏིབྷངྒཝསེན ཁཎཏྟཡཾ ཨེཀཙིཏྟཀྑཎཾ ནཱམ.

༩. ཏཱནི པན སཏྟརས ཙིཏྟཀྑཎཱནི རཱུཔདྷམྨཱནམཱཡཱུ.

༡༠. ཨེཀཙིཏྟཀྑཎཱཏཱིཏཱནི ཝཱ བཧུཙིཏྟཀྑཎཱཏཱིཏཱནི ཝཱ ཋིཏིཔྤཏྟཱནེཝ པཉྩཱརམྨཎཱནི པཉྩདྭཱརེ ཨཱཔཱཐམཱགཙྪནྟི. ཏསྨཱ ཡདི ཨེཀཙིཏྟཀྑཎཱཏཱིཏཀཾ རཱུཔཱརམྨཎཾ ཙཀྑུསྶ ཨཱཔཱཐམཱགཙྪཏི, ཏཏོ དྭིཀྑཏྟུཾ བྷཝངྒེ ཙལིཏེ བྷཝངྒསོཏཾ ཝོཙྪིནྡིཏྭཱ ཏམེཝ རཱུཔཱརམྨཎཾ ཨཱཝཛྫནྟཾ པཉྩདྭཱརཱཝཛྫནཙིཏྟཾ ཨུཔྤཛྫིཏྭཱ ནིརུཛ྄ཛྷཏི, ཏཏོ ཏསྶཱནནྟརཾ ཏམེཝ ¶ རཱུཔཾ པསྶནྟཾ ཙཀྑུཝིཉྙཱཎཾ, སམྤཊིཙྪནྟཾ སམྤཊིཙྪནཙིཏྟཾ, སནྟཱིརཡམཱནཾ སནྟཱིརཎཙིཏྟཾ, ཝཝཏྠཔེནྟཾ ཝོཊྛབྦནཙིཏྟཉྩེཏི ཡཐཱཀྐམཾ ཨུཔྤཛྫིཏྭཱ ནིརུཛ྄ཛྷནྟི, ཏཏོ པརཾ ཨེཀཱུནཏིཾས ¶ ཀཱམཱཝཙརཛཝནེསུ ཡཾཀིཉྩི ལདྡྷཔཙྩཡཾ ཡེབྷུཡྻེན སཏྟཀྑཏྟུཾ ཛཝཏི, ཛཝནཱནུབནྡྷཱནི ཙ དྭེ ཏདཱརམྨཎཔཱཀཱནི ཡཐཱརཧཾ པཝཏྟནྟི, ཏཏོ པརཾ བྷཝངྒཔཱཏོ.

༡༡. ཨེཏྟཱཝཏཱ ཙུདྡས ཝཱིཐིཙིཏྟུཔྤཱདཱ, དྭེ བྷཝངྒཙལནཱནི, པུབྦེཝཱཏཱིཏཀམེཀཙིཏྟཀྑཎནྟི ཀཏྭཱ སཏྟརས ཙིཏྟཀྑཎཱནི པརིཔཱུརེནྟི, ཏཏོ པརཾ ནིརུཛ྄ཛྷཏི, ཨཱརམྨཎམེཏཾ ཨཏིམཧནྟཾ ནཱམ གོཙརཾ.

༡༢. ཡཱཝ ཏདཱརམྨཎུཔྤཱདཱ པན ཨཔྤཧོནྟཱཏཱིཏཀམཱཔཱཐམཱགཏཾ ཨཱརམྨཎཾ མཧནྟཾ ནཱམ, ཏཏྠ ཛཝནཱཝསཱནེ བྷཝངྒཔཱཏོཝ ཧོཏི, ནཏྠི ཏདཱརམྨཎུཔྤཱདོ.

༡༣. ཡཱཝ ཛཝནུཔྤཱདཱཔི ཨཔྤཧོནྟཱཏཱིཏཀམཱཔཱཐམཱགཏཾ ཨཱརམྨཎཾ པརིཏྟཾ ནཱམ, ཏཏྠ ཛཝནམྤི ཨནུཔྤཛྫིཏྭཱ དྭཏྟིཀྑཏྟུཾ ཝོཊྛབྦནམེཝ པཝཏྟཏི, ཏཏོ པརཾ བྷཝངྒཔཱཏོཝ ཧོཏི.

༡༤. ཡཱཝ ཝོཊྛབྦནུཔྤཱདཱ ཙ པན ཨཔྤཧོནྟཱཏཱིཏཀམཱཔཱཐམཱགཏཾ ནིརོདྷཱསནྣམཱརམྨཎཾ ཨཏིཔརིཏྟཾ ནཱམ, ཏཏྠ བྷཝངྒཙལནམེཝ ཧོཏི, ནཏྠི ཝཱིཐིཙིཏྟུཔྤཱདོ.

༡༥. ཨིཙྩེཝཾ ཙཀྑུདྭཱརེ, ཏཐཱ སོཏདྭཱརཱདཱིསུ ཙེཏི སབྦཐཱཔི པཉྩདྭཱརེ ཏདཱརམྨཎཛཝནཝོཊྛབྦནམོགྷཝཱརསངྑཱཏཱནཾ ཙཏུནྣཾ ཝཱརཱནཾ ཡཐཱཀྐམཾ ཨཱརམྨཎབྷཱུཏཱ ཝིསཡཔྤཝཏྟི ཙཏུདྷཱ ཝེདིཏབྦཱ.

༡༦. ཝཱིཐིཙིཏྟཱནི སཏྟེཝ, ཙིཏྟུཔྤཱདཱ ཙཏུདྡས.

ཙཏུཔཉྙཱས ཝིཏྠཱརཱ, པཉྩདྭཱརེ ཡཐཱརཧཾ.

ཨཡམེཏྠ པཉྩདྭཱརེ ཝཱིཐིཙིཏྟཔྤཝཏྟིནཡོ.

མནོདྭཱརཝཱིཐི པརིཏྟཛཝནཝཱརོ

༡༧. མནོདྭཱརེ ¶ ¶ པན ཡདི ཝིབྷཱུཏམཱརམྨཎཾ ཨཱཔཱཐམཱགཙྪཏི, ཏཏོ པརཾ བྷཝངྒཙལནམནོདྭཱརཱཝཛྫནཛཝནཱཝསཱནེ ཏདཱརམྨཎཔཱཀཱནི པཝཏྟནྟི, ཏཏོ པརཾ བྷཝངྒཔཱཏོ.

༡༨. ཨཝིབྷཱུཏེ པནཱརམྨཎེ ཛཝནཱཝསཱནེ བྷཝངྒཔཱཏོཝ ཧོཏི, ནཏྠི ཏདཱརམྨཎུཔྤཱདོཏི.

༡༩. ཝཱིཐིཙིཏྟཱནི ཏཱིཎེཝ, ཙིཏྟུཔྤཱདཱ དསེརིཏཱ.

ཝིཏྠཱརེན པནེཏྠེཀ-ཙཏྟཱལཱིས ཝིབྷཱཝཡེ;

ཨཡམེཏྠ པརིཏྟཛཝནཝཱརོ.

ཨཔྤནཱཛཝནཝཱརོ

༢༠. ཨཔྤནཱཛཝནཝཱརེ པན ཝིབྷཱུཏཱཝིབྷཱུཏབྷེདོ ནཏྠི, ཏཐཱ ཏདཱརམྨཎུཔྤཱདོ ཙ.

༢༡. ཏཏྠ ཧི ཉཱཎསམྤཡུཏྟཀཱམཱཝཙརཛཝནཱནམཊྛནྣཾ ཨཉྙཏརསྨིཾ པརིཀམྨོཔཙཱརཱནུལོམགོཏྲབྷུནཱམེན ཙཏུཀྑཏྟུཾ ཏིཀྑཏྟུམེཝ ཝཱ ཡཐཱཀྐམཾ ཨུཔྤཛྫིཏྭཱ ནིརུདྡྷཱནནྟརམེཝ ཡཐཱརཧཾ ཙཏུཏྠཾ, པཉྩམཾ ཝཱ ཚབྦཱིསཏིམཧགྒཏལོཀུཏྟརཛཝནེསུ ཡཐཱབྷིནཱིཧཱརཝསེན ཡཾ ཀིཉྩི ཛཝནཾ ཨཔྤནཱཝཱིཐིམོཏརཏི, ཏཏོ པརཾ ཨཔྤནཱཝསཱནེ བྷཝངྒཔཱཏོཝ ཧོཏི.

༢༢. ཏཏྠ སོམནསྶསཧགཏཛཝནཱནནྟརཾ ཨཔྤནཱཔི སོམནསྶསཧགཏཱཝ པཱཊིཀངྑིཏབྦཱ, ཨུཔེཀྑཱསཧགཏཛཝནཱནནྟརཾ ཨུཔེཀྑཱསཧགཏཱཝ, ཏཏྠཱཔི ཀུསལཛཝནཱནནྟརཾ ཀུསལཛཝནཉྩེཝ ཧེཊྛིམཉྩ ཕལཏྟཡམཔྤེཏི, ཀིརིཡཛཝནཱནནྟརཾ ཀིརིཡཛཝནཾ ཨརཧཏྟཕལཉྩཱཏི.

༢༣. དྭཏྟིཾས ¶ སུཁཔུཉྙམྷཱ, དྭཱདསོཔེཀྑཀཱ པརཾ,

སུཁིཏཀྲིཡཏོ ཨཊྛ, ཚ སམྦྷོནྟི ཨུཔེཀྑཀཱ.

༢༤. པུཐུཛྫནཱན ¶ སེཀྑཱནཾ, ཀཱམཔུཉྙཏིཧེཏུཏོ.

ཏིཧེཏུཀཱམཀྲིཡཏོ, ཝཱིཏརཱགཱནམཔྤནཱ.

ཨཡམེཏྠ མནོདྭཱརེ ཝཱིཐིཙིཏྟཔྤཝཏྟིནཡོ.

ཏདཱརམྨཎནིཡམོ

༢༥. སབྦཏྠཱཔི པནེཏྠ ཨནིཊྛེ ཨཱརམྨཎེ ཨཀུསལཝིཔཱཀཱནེཝ པཉྩཝིཉྙཱཎསམྤཊིཙྪནསནྟཱིརཎཏདཱརམྨཎཱནི.

༢༦. ཨིཊྛེ ཀུསལཝིཔཱཀཱནི.

༢༧. ཨཏིཨིཊྛེ པན སོམནསྶསཧགཏཱནེཝ སནྟཱིརཎཏདཱརམྨཎཱནི, ཏཏྠཱཔི སོམནསྶསཧགཏཀིརིཡཛཝནཱཝསཱནེ སོམནསྶསཧགཏཱནེཝ ཏདཱརམྨཎཱནི བྷཝནྟི, ཨུཔེཀྑཱསཧགཏཀིརིཡཛཝནཱཝསཱནེ ཙ ཨུཔེཀྑཱསཧགཏཱནེཝ ཧོནྟི.

༢༨. དོམནསྶསཧགཏཛཝནཱཝསཱནེ ཙ པན ཏདཱརམྨཎཱནིཙེཝ བྷཝངྒཱནི ཙ ཨུཔེཀྑཱསཧགཏཱནེཝ བྷཝནྟི, ཏསྨཱ ཡདི སོམནསྶཔཊིསནྡྷིཀསྶ དོམནསྶསཧགཏཛཝནཱཝསཱནེ ཏདཱརམྨཎསམྦྷཝོ ནཏྠི, ཏདཱ ཡཾ ཀིཉྩི པརིཙིཏཔུབྦཾ པརིཏྟཱརམྨཎམཱརབྦྷ ཨུཔེཀྑཱསཧགཏསནྟཱིརཎཾ ཨུཔྤཛྫཏི, ཏམནནྟརིཏྭཱ བྷཝངྒཔཱཏོཝ ཧོཏཱིཏི ཝདནྟི ཨཱཙརིཡཱ.

༢༩. ཏཐཱ ཀཱམཱཝཙརཛཝནཱཝསཱནེ ཀཱམཱཝཙརསཏྟཱནཾ ཀཱམཱཝཙརདྷམྨེསྭེཝ ཨཱརམྨཎབྷཱུཏེསུ ཏདཱརམྨཎཾ ཨིཙྪནྟཱིཏི.

༣༠. ཀཱམེ ཛཝནསཏྟཱལམྦཎཱནཾ ནིཡམེ སཏི.

ཝིབྷཱུཏེཏིམཧནྟེ ཙ, ཏདཱརམྨཎམཱིརིཏཾ.

ཨཡམེཏྠ ཏདཱརམྨཎནིཡམོ.

ཛཝནནིཡམོ

༣༡. ཛཝནེསུ ¶ ¶ ཙ པརིཏྟཛཝནཝཱིཐིཡཾ ཀཱམཱཝཙརཛཝནཱནི སཏྟཀྑཏྟུཾ ཚཀྑཏྟུམེཝ ཝཱ ཛཝནྟི.

༣༢. མནྡཔྤཝཏྟིཡཾ པན མརཎཀཱལཱདཱིསུ པཉྩཝཱརམེཝ.

༣༣. བྷགཝཏོ པན ཡམཀཔཱཊིཧཱརིཡཀཱལཱདཱིསུ ལཧུཀཔྤཝཏྟིཡཾ ཙཏྟཱརིཔཉྩ ཝཱ པཙྩཝེཀྑཎཙིཏྟཱནི བྷཝནྟཱིཏིཔི ཝདནྟི.

༣༤. ཨཱདིཀམྨིཀསྶ པན པཋམཀཔྤནཱཡཾ མཧགྒཏཛཝནཱནིཨབྷིཉྙཱཛཝནཱནི ཙ སབྦདཱཔི ཨེཀཝཱརམེཝ ཛཝནྟི, ཏཏོ པརཾ བྷཝངྒཔཱཏོ.

༣༥. ཙཏྟཱརོ པན མགྒུཔྤཱདཱ ཨེཀཙིཏྟཀྑཎིཀཱ, ཏཏོ པརཾ དྭེ ཏཱིཎི ཕལཙིཏྟཱནི ཡཐཱརཧཾ ཨུཔྤཛྫནྟི, ཏཏོ པརཾ བྷཝངྒཔཱཏོ.

༣༦. ནིརོདྷསམཱཔཏྟིཀཱལེ དྭིཀྑཏྟུཾ ཙཏུཏྠཱརུཔྤཛཝནཾ ཛཝཏི, ཏཏོ པརཾ ནིརོདྷཾ ཕུསཏི.

༣༧. ཝུཊྛཱནཀཱལེ ཙ ཨནཱགཱམིཕལཾ ཝཱ ཨརཧཏྟཕལཾ ཝཱ ཡཐཱརཧམེཀཝཱརཾ ཨུཔྤཛྫིཏྭཱ ནིརུདྡྷེ བྷཝངྒཔཱཏོཝ ཧོཏི.

༣༨. སབྦཏྠཱཔི སམཱཔཏྟིཝཱིཐིཡཾ བྷཝངྒསོཏོ ཝིཡ ཝཱིཐིནིཡམོ ནཏྠཱིཏི ཀཏྭཱ བཧཱུནིཔི ལབྦྷནྟཱིཏི.

༣༩. སཏྟཀྑཏྟུཾ པརིཏྟཱནི, མགྒཱབྷིཉྙཱ སཀིཾ མཏཱ.

ཨཝསེསཱནི ལབྦྷནྟི, ཛཝནཱནི བཧཱུནིཔི.

ཨཡམེཏྠ ཛཝནནིཡམོ.

པུགྒལབྷེདོ

༤༠. དུཧེཏུཀཱནམཧེཏུཀཱནཉྩ ¶ ¶ པནེཏྠ ཀིརིཡཛཝནཱནི ཙེཝ ཨཔྤནཱཛཝནཱནི ཙ ལབྦྷནྟི.

༤༡. ཏཐཱ ཉཱཎསམྤཡུཏྟཝིཔཱཀཱནི ཙ སུགཏིཡཾ.

༤༢. དུགྒཏིཡཾ པན ཉཱཎཝིཔྤཡུཏྟཱནི ཙ མཧཱཝིཔཱཀཱནི ན ལབྦྷནྟི.

༤༣. ཏིཧེཏུཀེསུ ཙ ཁཱིཎཱསཝཱནཾ ཀུསལཱཀུསལཛཝནཱནི ན ལབྦྷནྟི.

༤༤. ཏཐཱ སེཀྑཔུཐུཛྫནཱནཾ ཀིརིཡཛཝནཱནི.

༤༥. དིཊྛིགཏསམྤཡུཏྟཝིཙིཀིཙྪཱཛཝནཱནི ཙ སེཀྑཱནཾ.

༤༦. ཨནཱགཱམིཔུགྒལཱནཾ པན པཊིགྷཛཝནཱནི ཙ ན ལབྦྷནྟི.

༤༧. ལོཀུཏྟརཛཝནཱནི ཙ ཡཐཱརཧཾ ཨརིཡཱནམེཝ སམུཔྤཛྫནྟཱིཏི.

༤༨. ཨསེཀྑཱནཾ ཙཏུཙཏྟཱལཱིས སེཀྑཱནམུདྡིསེ.

ཚཔྤཉྙཱསཱཝསེསཱནཾ, ཙཏུཔཉྙཱས སམྦྷཝཱ.

ཨཡམེཏྠ པུགྒལབྷེདོ.

བྷཱུམིཝིབྷཱགོ

༤༩. ཀཱམཱཝཙརབྷཱུམིཡཾ པནེཏཱནི སབྦཱནིཔི ཝཱིཐིཙིཏྟཱནི ཡཐཱརཧམུཔལབྦྷནྟི.

༥༠. རཱུཔཱཝཙརབྷཱུམིཡཾ ¶ པཊིགྷཛཝནཏདཱརམྨཎཝཛྫིཏཱནི.

༥༡. ཨརཱུཔཱཝཙརབྷཱུམིཡཾ པཋམམགྒརཱུཔཱཝཙརཧསནཧེཊྛིམཱརུཔྤཝཛྫིཏཱནི ཙ ལབྦྷནྟི.

༥༢. སབྦཏྠཱཔི ¶ ཙ ཏཾཏཾཔསཱདརཧིཏཱནཾ ཏཾཏཾདྭཱརིཀཝཱིཐིཙིཏྟཱནི ན ལབྦྷནྟེཝ.

༥༣. ཨསཉྙསཏྟཱནཾ པན སབྦཐཱཔི ཙིཏྟཔྤཝཏྟི ནཏྠེཝཱཏི.

༥༤. ཨསཱིཏི ཝཱིཐིཙིཏྟཱནི, ཀཱམེ རཱུཔེ ཡཐཱརཧཾ.

ཙཏུསཊྛི ཏཐཱརཱུཔེ, དྭེཙཏྟཱལཱིས ལབྦྷརེ.

ཨཡམེཏྠ བྷཱུམིཝིབྷཱགོ.

༥༥. ཨིཙྩེཝཾ ཚདྭཱརིཀཙིཏྟཔྤཝཏྟི ཡཐཱསམྦྷཝཾ བྷཝངྒནྟརིཏཱ ཡཱཝཏཱཡུཀམབྦོཙྪིནྣཱ པཝཏྟཏི.

ཨིཏི ཨབྷིདྷམྨཏྠསངྒཧེ ཝཱིཐིསངྒཧཝིབྷཱགོ ནཱམ

ཙཏུཏྠོ པརིཙྪེདོ.

༥. ཝཱིཐིམུཏྟཔརིཙྪེདོ

༡. ཝཱིཐིཙིཏྟཝསེནེཝཾ, པཝཏྟིཡམུདཱིརིཏོ.

པཝཏྟིསངྒཧོ ནཱམ, སནྡྷིཡཾ དཱནི ཝུཙྩཏི.

༢. ཙཏསྶོ བྷཱུམིཡོ, ཙཏུབྦིདྷཱ པཊིསནྡྷི, ཙཏྟཱརི ཀམྨཱནི, ཙཏུདྷཱ མརཎུཔྤཏྟི ཙེཏི ཝཱིཐིམུཏྟསངྒཧེ ཙཏྟཱརི ཙཏུཀྐཱནི ཝེདིཏབྦཱནི.

བྷཱུམིཙཏུཀྐཾ

༣. ཏཏྠ ¶ ཨཔཱཡབྷཱུམི ཀཱམསུགཏིབྷཱུམི རཱུཔཱཝཙརབྷཱུམི ཨརཱུཔཱཝཙརབྷཱུམི ཙེཏི ཙཏསྶོ བྷཱུམིཡོ ནཱམ.

༤. ཏཱསུ ནིརཡོ ཏིརཙྪཱནཡོནི པེཏྟིཝིསཡོ ཨསུརཀཱཡོ ཙེཏི ཨཔཱཡབྷཱུམི ཙཏུབྦིདྷཱ ཧོཏི.

༥. མནུསྶཱ ¶ ཙཱཏུམཧཱརཱཛིཀཱ ཏཱཝཏིཾསཱ ཡཱམཱ ཏུསིཏཱ ནིམྨཱནརཏི པརནིམྨིཏཝསཝཏྟཱི ཙེཏི ཀཱམསུགཏིབྷཱུམི སཏྟཝིདྷཱ ཧོཏི.

༦. སཱ པནཱཡམེཀཱདསཝིདྷཱཔི ཀཱམཱཝཙརབྷཱུམིཙྩེཝ སངྑཾ གཙྪཏི.

༧. བྲཧྨཔཱརིསཛྫཱ བྲཧྨཔུརོཧིཏཱ མཧཱབྲཧྨཱ ཙེཏི པཋམཛ྄ཛྷཱནབྷཱུམི.

༨. པརིཏྟཱབྷཱ ཨཔྤམཱཎཱབྷཱ ཨཱབྷསྶརཱ ཙེཏི དུཏིཡཛ྄ཛྷཱནབྷཱུམི.

༩. པརིཏྟསུབྷཱ ཨཔྤམཱཎསུབྷཱ སུབྷཀིཎྷཱ ཙེཏི ཏཏིཡཛ྄ཛྷཱནབྷཱུམི.

༡༠. ཝེཧཔྥལཱ ཨསཉྙསཏྟཱ སུདྡྷཱཝཱསཱ ཙེཏི ཙཏུཏྠཛ྄ཛྷཱནབྷཱུམཱིཏི རཱུཔཱཝཙརབྷཱུམི སོལ༹སཝིདྷཱ ཧོཏི.

༡༡. ཨཝིཧཱ ཨཏཔྤཱ སུདསྶཱ སུདསྶཱི ཨཀནིཊྛཱ ཙེཏི སུདྡྷཱཝཱསབྷཱུམི པཉྩཝིདྷཱ ཧོཏི.

༡༢. ཨཱཀཱསཱནཉྩཱཡཏནབྷཱུམི ཝིཉྙཱཎཉྩཱཡཏནབྷཱུམི ཨཱཀིཉྩཉྙཱཡཏནབྷཱུམི ནེཝསཉྙཱནཱསཉྙཱཡཏནབྷཱུམི ཙེཏི ཨརཱུཔབྷཱུམི ཙཏུབྦིདྷཱ ཧོཏི.

༡༣. པུཐུཛྫནཱ ¶ ན ལབྦྷནྟི, སུདྡྷཱཝཱསེསུ སབྦཐཱ.

སོཏཱཔནྣཱ ཙ སཀདཱགཱམིནོ ཙཱཔི པུགྒལཱ.

༡༤. ཨརིཡཱ ནོཔལབྦྷནྟི, ཨསཉྙཱཔཱཡབྷཱུམིསུ.

སེསཊྛཱནེསུ ལབྦྷནྟི, ཨརིཡཱནརིཡཱཔི ཙ.

ཨིདམེཏྠ བྷཱུམིཙཏུཀྐཾ.

པཊིསནྡྷིཙཏུཀྐཾ

༡༥. ཨཔཱཡཔཊིསནྡྷི ¶ ཀཱམསུགཏིཔཊིསནྡྷི རཱུཔཱཝཙརཔཊིསནྡྷི ཨརཱུཔཱཝཙརཔཊིསནྡྷི ཙེཏི ཙཏུབྦིདྷཱ པཊིསནྡྷི ནཱམ.

༡༦. ཏཏྠ ཨཀུསལཝིཔཱཀོཔེཀྑཱསཧགཏསནྟཱིརཎཾ ཨཔཱཡབྷཱུམིཡཾ ཨོཀྐནྟིཀྑཎེ པཊིསནྡྷི ཧུཏྭཱ ཏཏོ པརཾ བྷཝངྒཾ པརིཡོསཱནེ ཙཝནཾ ཧུཏྭཱ ཝོཙྪིཛྫཏི, ཨཡམེཀཱཔཱཡཔཊིསནྡྷི ནཱམ.

༡༧. ཀུསལཝིཔཱཀོཔེཀྑཱསཧགཏསནྟཱིརཎཾ པན ཀཱམསུགཏིཡཾ མནུསྶཱནཉྩེཝ ཛཙྩནྡྷཱདཱིནཾ བྷུམྨསྶིཏཱནཉྩ ཝིནིཔཱཏིཀཱསུརཱནཾ པཊིསནྡྷིབྷཝངྒཙུཏིཝསེན པཝཏྟཏི.

༡༨. མཧཱཝིཔཱཀཱནི པན ཨཊྛ སབྦཏྠཱཔི ཀཱམསུགཏིཡཾ པཊིསནྡྷིབྷཝངྒཙུཏིཝསེན པཝཏྟནྟི.

༡༩. ཨིམཱ ནཝ ཀཱམསུགཏིཔཊིསནྡྷིཡོ ནཱམ.

༢༠. སཱ པནཱཡཾ དསཝིདྷཱཔི ཀཱམཱཝཙརཔཊིསནྡྷིཙྩེཝ སངྑཾ གཙྪཏི.

༢༡. ཏེསུ ¶ ཙཏུནྣཾ ཨཔཱཡཱནཾ མནུསྶཱནཾ ཝིནིཔཱཏིཀཱསུརཱནཉྩ ཨཱཡུཔྤམཱཎགཎནཱཡ ནིཡམོ ནཏྠི.

༢༢. ཙཱཏུམཧཱརཱཛིཀཱནཾ པན དེཝཱནཾ དིབྦཱནི པཉྩཝསྶསཏཱནི ཨཱཡུཔྤམཱཎཾ, མནུསྶགཎནཱཡ ནཝུཏིཝསྶསཏསཧསྶཔྤམཱཎཾ ཧོཏི, ཏཏོ ཙཏུགྒུཎཾ ཏཱཝཏིཾསཱནཾ, ཏཏོ ཙཏུགྒུཎཾ ཡཱམཱནཾ, ཏཏོ ཙཏུགྒུཎཾ ཏུསིཏཱནཾ, ཏཏོ ཙཏུགྒུཎཾ ནིམྨཱནརཏཱིནཾ, ཏཏོ ཙཏུགྒུཎཾ པརནིམྨིཏཝསཝཏྟཱིནཾ.

༢༣. ནཝསཏཉྩེཀཝཱིས-ཝསྶཱནཾ ཀོཊིཡོ ཏཐཱ.

ཝསྶསཏསཧསྶཱནི, སཊྛི ཙ ཝསཝཏྟིསུ.

༢༤. པཋམཛ྄ཛྷཱནཝིཔཱཀཾ ¶ པཋམཛ྄ཛྷཱནབྷཱུམིཡཾ པཊིསནྡྷིབྷཝངྒཙུཏིཝསེན པཝཏྟཏི.

༢༥. ཏཐཱ དུཏིཡཛ྄ཛྷཱནཝིཔཱཀཾ ཏཏིཡཛ྄ཛྷཱནཝིཔཱཀཉྩ དུཏིཡཛ྄ཛྷཱནབྷཱུམིཡཾ.

༢༦. ཙཏུཏྠཛ྄ཛྷཱནཝིཔཱཀཾ ཏཏིཡཛ྄ཛྷཱནབྷཱུམིཡཾ.

༢༧. པཉྩམཛ྄ཛྷཱནཝིཔཱཀཾ ཙཏུཏྠཛ྄ཛྷཱནབྷཱུམིཡཾ.

༢༨. ཨསཉྙསཏྟཱནཾ པན རཱུཔམེཝ པཊིསནྡྷི ཧོཏི. ཏཐཱ ཏཏོ པརཾ པཝཏྟིཡཾ ཙཝནཀཱལེ ཙ རཱུཔམེཝ པཝཏྟིཏྭཱ ནིརུཛ྄ཛྷཏི, ཨིམཱ ཚ རཱུཔཱཝཙརཔཊིསནྡྷིཡོ ནཱམ.

༢༩. ཏེསུ བྲཧྨཔཱརིསཛྫཱནཾ དེཝཱནཾ ཀཔྤསྶ ཏཏིཡོ བྷཱགོ ཨཱཡུཔྤམཱཎཾ.

༣༠. བྲཧྨཔུརོཧིཏཱནཾ ཨུཔཌྜྷཀཔྤོ.

༣༡. མཧཱབྲཧྨཱནཾ ཨེཀོ ཀཔྤོ.

༣༢. པརིཏྟཱབྷཱནཾ དྭེ ཀཔྤཱནི.

༣༣. ཨཔྤམཱཎཱབྷཱནཾ ཙཏྟཱརིཀཔྤཱནི.

༣༤. ཨཱབྷསྶརཱནཾ ¶ ཨཊྛ ཀཔྤཱནི.

༣༥. པརིཏྟསུབྷཱནཾ སོལ༹ས ཀཔྤཱནི.

༣༦. ཨཔྤམཱཎསུབྷཱནཾ དྭཏྟིཾས ཀཔྤཱནི.

༣༧. སུབྷཀིཎྷཱནཾ ཙཏུསཊྛི ཀཔྤཱནི.

༣༨. ཝེཧཔྥལཱནཾ ཨསཉྙསཏྟཱནཉྩ པཉྩཀཔྤསཏཱནི.

༣༩. ཨཝིཧཱནཾ ཀཔྤསཧསྶཱནི.

༤༠. ཨཏཔྤཱནཾ དྭེ ཀཔྤསཧསྶཱནི.

༤༡. སུདསྶཱནཾ ཙཏྟཱརི ཀཔྤསཧསྶཱནི.

༤༢. སུདསྶཱིནཾ ཨཊྛ ཀཔྤསཧསྶཱནི.

༤༣. ཨཀནིཊྛཱནཾ ¶ སོལ༹ས ཀཔྤསཧསྶཱནི.

༤༤. པཋམཱརུཔྤཱདིཝིཔཱཀཱནི པཋམཱརུཔྤཱདིབྷཱུམཱིསུ ཡཐཱཀྐམཾ པཊིསནྡྷིབྷཝངྒཙུཏིཝསེན པཝཏྟནྟི. ཨིམཱ ཙཏསྶོ ཨརཱུཔཔཊིསནྡྷིཡོ ནཱམ.

༤༥. ཏེསུ པན ཨཱཀཱསཱནཉྩཱཡཏནཱུཔགཱནཾ དེཝཱནཾ ཝཱིསཏིཀཔྤསཧསྶཱནི ཨཱཡུཔྤམཱཎཾ.

༤༦. ཝིཉྙཱཎཉྩཱཡཏནཱུཔགཱནཾ དེཝཱནཾ ཙཏྟཱལཱིསཀཔྤསཧསྶཱནི.

༤༧. ཨཱཀིཉྩཉྙཱཡཏནཱུཔགཱནཾ དེཝཱནཾ སཊྛིཀཔྤསཧསྶཱནི.

༤༨. ནེཝསཉྙཱནཱསཉྙཱཡཏནཱུཔགཱནཾ དེཝཱནཾ ཙཏུརཱསཱིཏིཀཔྤསཧསྶཱནི.

༤༩. པཊིསནྡྷི བྷཝངྒཉྩ, ཏཐཱ ཙཝནམཱནསཾ.

ཨེཀམེཝ ཏཐེཝེཀཝིསཡཉྩེཀཛཱཏིཡཾ.

ཨིདམེཏྠ པཊིསནྡྷིཙཏུཀྐཾ.

ཀམྨཙཏུཀྐཾ

༥༠. ཛནཀཾ ¶ ཨུཔཏྠམྦྷཀཾ ཨུཔཔཱིལ༹ཀཾ ཨུཔགྷཱཏཀཉྩེཏི ཀིཙྩཝསེན.

༥༡. གརུཀཾ ཨཱསནྣཾ ཨཱཙིཎྞཾ ཀཊཏྟཱཀམྨཉྩེཏི པཱཀདཱནཔརིཡཱཡེན.

༥༢. དིཊྛདྷམྨཝེདནཱིཡཾ ཨུཔཔཛྫཝེདནཱིཡཾ ཨཔརཱཔརིཡཝེདནཱིཡཾ ཨཧོསིཀམྨཉྩེཏི པཱཀཀཱལཝསེན ཙཏྟཱརི ཀམྨཱནི ནཱམ.

༥༣. ཏཐཱ ཨཀུསལཾ ཀཱམཱཝཙརཀུསལཾ རཱུཔཱཝཙརཀུསལཾ ཨརཱུཔཱཝཙརཀུསལཉྩེཏི པཱཀཋཱནཝསེན.

༥༤. ཏཏྠ ¶ ཨཀུསལཾ ཀཱཡཀམྨཾ ཝཙཱིཀམྨཾ མནོཀམྨཉྩེཏི ཀམྨདྭཱརཝསེན ཏིཝིདྷཾ ཧོཏི.

༥༥. ཀཐཾ? པཱཎཱཏིཔཱཏོ ཨདིནྣཱདཱནཾ ཀཱམེསུམིཙྪཱཙཱརོ ཙེཏི ཀཱཡཝིཉྙཏྟིསངྑཱཏེ ཀཱཡདྭཱརེ བཱཧུལླཝུཏྟིཏོ ཀཱཡཀམྨཾ ནཱམ.

༥༦. མུསཱཝཱདོ པིསུཎཝཱཙཱ ཕརུསཝཱཙཱ སམྥཔྤལཱཔོ ཙེཏི ཝཙཱིཝིཉྙཏྟིསངྑཱཏེ ཝཙཱིདྭཱརེ བཱཧུལླཝུཏྟིཏོ ཝཙཱིཀམྨཾ ནཱམ.

༥༧. ཨབྷིཛ྄ཛྷཱ བྱཱཔཱདོ མིཙྪཱདིཊྛི ཙེཏི ཨཉྙཏྲཱཔི ཝིཉྙཏྟིཡཱ མནསྨིཾཡེཝ བཱཧུལླཝུཏྟིཏོ མནོཀམྨཾ ནཱམ.

༥༨. ཏེསུ པཱཎཱཏིཔཱཏོ ཕརུསཝཱཙཱ བྱཱཔཱདོ ཙ དོསམཱུལེན ཛཱཡནྟི.

༥༩. ཀཱམེསུམིཙྪཱཙཱརོ ཨབྷིཛ྄ཛྷཱ མིཙྪཱདིཊྛི ཙ ལོབྷམཱུལེན.

༦༠. སེསཱནི ¶ ཙཏྟཱརིཔི དྭཱིཧི མཱུལེཧི སམྦྷཝནྟི.

༦༡. ཙིཏྟུཔྤཱདཝསེན པནེཏཾ ཨཀུསལཾ སབྦཐཱཔི དྭཱདསཝིདྷཾ ཧོཏི.

༦༢. ཀཱམཱཝཙརཀུསལམྤི ཀཱཡདྭཱརེ པཝཏྟཾ ཀཱཡཀམྨཾ, ཝཙཱིདྭཱརེ པཝཏྟཾ ཝཙཱིཀམྨཾ, མནོདྭཱརེ པཝཏྟཾ མནོཀམྨཉྩེཏི ཀམྨདྭཱརཝསེན ཏིཝིདྷཾ ཧོཏི.

༦༣. ཏཐཱ དཱནསཱིལབྷཱཝནཱཝསེན.

༦༤. ཙིཏྟུཔྤཱདཝསེན པནེཏཾ ཨཊྛཝིདྷཾ ཧོཏི.

༦༥. དཱནསཱིལབྷཱཝནཱཔཙཱཡནཝེཡྻཱཝཙྩཔཏྟིདཱནཔཏྟཱནུམོདནདྷམྨསྶཝནདྷམྨདེསནཱ དིཊྛིཛུཀམྨཝསེན དསཝིདྷཾ ཧོཏི.

༦༦. ཏཾ ¶ པནེཏཾ ཝཱིསཏིཝིདྷམྤི ཀཱམཱཝཙརཀམྨམིཙྩེཝ སངྑཾ གཙྪཏི.

༦༧. རཱུཔཱཝཙརཀུསལཾ པན མནོཀམྨམེཝ, ཏཉྩ བྷཱཝནཱམཡཾ ཨཔྤནཱཔྤཏྟཾ, ཛྷཱནངྒབྷེདེན པཉྩཝིདྷཾ ཧོཏི.

༦༨. ཏཐཱ ཨརཱུཔཱཝཙརཀུསལཉྩ མནོཀམྨཾ, ཏམྤི བྷཱཝནཱམཡཾ ཨཔྤནཱཔྤཏྟཾ. ཨཱརམྨཎབྷེདེན ཙཏུབྦིདྷཾ ཧོཏི.

༦༩. ཨེཏྠཱཀུསལཀམྨམུདྡྷཙྩརཧིཏཾ ཨཔཱཡབྷཱུམིཡཾ པཊིསནྡྷིཾ ཛནེཏི, པཝཏྟིཡཾ པན སབྦམྤི དྭཱདསཝིདྷཾ སཏྟཱཀུསལཔཱཀཱནི སབྦཏྠཱཔི ཀཱམལོཀེ རཱུཔལོཀེ ཙ ཡཐཱརཧཾ ཝིཔཙྩཏི.

༧༠. ཀཱམཱཝཙརཀུསལམྤི ཀཱམསུགཏིཡམེཝ པཊིསནྡྷིཾ ཛནེཏི, ཏཐཱ པཝཏྟིཡཉྩ མཧཱཝིཔཱཀཱནི ¶ , ཨཧེཏུཀཝིཔཱཀཱནི པན ཨཊྛཔི སབྦཏྠཱཔི ཀཱམལོཀེ རཱུཔལོཀེ ཙ ཡཐཱརཧཾ ཝིཔཙྩཏི.

༧༡. ཏཏྠཱཔི ཏིཧེཏུཀམུཀྐཊྛཾ ཀུསལཾ ཏིཧེཏུཀཾ པཊིསནྡྷིཾ དཏྭཱ པཝཏྟེ སོལ༹ས ཝིཔཱཀཱནི ཝིཔཙྩཏི.

༧༢. ཏིཧེཏུཀམོམཀཾ དྭིཧེཏུཀམུཀྐཊྛཉྩ ཀུསལཾ དྭིཧེཏུཀཾ པཊིསནྡྷིཾ དཏྭཱ པཝཏྟེ ཏིཧེཏུཀརཧིཏཱནི དྭཱདས ཝིཔཱཀཱནི ཝིཔཙྩཏི.

༧༣. དྭིཧེཏུཀམོམཀཾ པན ཀུསལཾ ཨཧེཏུཀམེཝ པཊིསནྡྷིཾ དེཏི, པཝཏྟེ ཙ ཨཧེཏུཀཝིཔཱཀཱནེཝ ཝིཔཙྩཏི.

༧༤. ཨསངྑཱརཾ སསངྑཱར-ཝིཔཱཀཱནི ན པཙྩཏི.

སསངྑཱརམསངྑཱར-ཝིཔཱཀཱནཱིཏི ཀེཙན.

ཏེསཾ དྭཱདས པཱཀཱནི, དསཱཊྛ ཙ ཡཐཱཀྐམཾ;

ཡཐཱཝུཏྟཱནུསཱརེན ཡཐཱསམྦྷཝམུདྡིསེ.

༧༥. རཱུཔཱཝཙརཀུསལཾ ¶ པན པཋམཛ྄ཛྷཱནཾ པརིཏྟཾ བྷཱཝེཏྭཱ བྲཧྨཔཱརིསཛྫེསུ ཨུཔྤཛྫཏི.

༧༦. ཏདེཝ མཛ྄ཛྷིམཾ བྷཱཝེཏྭཱ བྲཧྨཔུརོཧིཏེསུ.

༧༧. པཎཱིཏཾ བྷཱཝེཏྭཱ མཧཱབྲཧྨེསུ.

༧༨. ཏཐཱ དུཏིཡཛ྄ཛྷཱནཾ ཏཏིཡཛ྄ཛྷཱནཉྩ པརིཏྟཾ བྷཱཝེཏྭཱ པརིཏྟཱབྷེསུ.

༧༩. མཛ྄ཛྷིམཾ བྷཱཝེཏྭཱ ཨཔྤམཱཎཱབྷེསུ.

༨༠. པཎཱིཏཾ བྷཱཝེཏྭཱ ཨཱབྷསྶརེསུ.

༨༡. ཙཏུཏྠཛ྄ཛྷཱནཾ པརིཏྟཾ བྷཱཝེཏྭཱ པརིཏྟསུབྷེསུ.

༨༢. མཛ྄ཛྷིམཾ ¶ བྷཱཝེཏྭཱ ཨཔྤམཱཎསུབྷེསུ.

༨༣. པཎཱིཏཾ བྷཱཝེཏྭཱ སུབྷཀིཎྷེསུ.

༨༤. པཉྩམཛ྄ཛྷཱནཾ བྷཱཝེཏྭཱ ཝེཧཔྥལེསུ.

༨༥. ཏདེཝ སཉྙཱཝིརཱགཾ བྷཱཝེཏྭཱ ཨསཉྙསཏྟེསུ.

༨༦. ཨནཱགཱམིནོ པན སུདྡྷཱཝཱསེསུ ཨུཔྤཛྫནྟི.

༨༧. ཨརཱུཔཱཝཙརཀུསལཉྩ ཡཐཱཀྐམཾ བྷཱཝེཏྭཱ ཨཱརུཔྤེསུ ཨུཔྤཛྫནྟཱིཏི.

༨༨. ཨིཏྠཾ མཧགྒཏཾ པུཉྙཾ, ཡཐཱབྷཱུམིཝཝཏྠིཏཾ.

ཛནེཏི སདིསཾ པཱཀཾ, པཊིསནྡྷིཔཝཏྟིཡཾ.

ཨིདམེཏྠ ཀམྨཙཏུཀྐཾ.

ཙུཏིཔཊིསནྡྷིཀྐམོ

༨༩. ཨཱཡུཀྑཡེན ཀམྨཀྑཡེན ཨུབྷཡཀྑཡེན ཨུཔཙྪེདཀཀམྨུནཱ ཙེཏི ཙཏུདྷཱ མརཎུཔྤཏྟི ནཱམ.

༩༠. ཏཐཱ ¶ ཙ མརནྟཱནཾ པན མརཎཀཱལེ ཡཐཱརཧཾ ཨབྷིམུཁཱིབྷཱུཏཾ བྷཝནྟརེ པཊིསནྡྷིཛནཀཾ ཀམྨཾ ཝཱ, ཏཾཀམྨཀརཎཀཱལེ རཱུཔཱདིཀམུཔལདྡྷཔུབྦམུཔཀརཎབྷཱུཏཉྩ ཀམྨནིམིཏྟཾ ཝཱ, ཨནནྟརམུཔྤཛྫམཱནབྷཝེ ཨུཔལབྷིཏབྦམུཔབྷོགབྷཱུཏཉྩ གཏིནིམིཏྟཾ ཝཱ ཀམྨབལེན ཚནྣཾ དྭཱརཱནཾ ཨཉྙཏརསྨིཾ པཙྩུཔཊྛཱཏི, ཏཏོ པརཾ ཏམེཝ ཏཐོཔཊྛིཏཾ ཨཱརམྨཎཾ ཨཱརབྦྷ ཝིཔཙྩམཱནཀཀམྨཱནུརཱུཔཾ པརིསུདྡྷཾ ཨུཔཀྐིལིཊྛཾ ཝཱ ཨུཔལབྷིཏབྦབྷཝཱནུརཱུཔཾ ཏཏྠོཎཏཾཝ ཙིཏྟསནྟཱནཾ ཨབྷིཎྷཾ པཝཏྟཏི བཱཧུལླེན, ཏམེཝ ཝཱ པན ཛནཀབྷཱུཏཾ ཀམྨཾ ཨབྷིནཝཀརཎཝསེན དྭཱརཔྤཏྟཾ ཧོཏི.

༩༡. པཙྩཱསནྣམརཎསྶ ¶ ཏསྶ ཝཱིཐིཙིཏྟཱཝསཱནེ བྷཝངྒཀྑཡེ ཝཱ ཙཝནཝསེན པཙྩུཔྤནྣབྷཝཔརིཡོསཱནབྷཱུཏཾ ཙུཏིཙིཏྟཾ ཨུཔྤཛྫིཏྭཱ ནིརུཛ྄ཛྷཏི, ཏསྨིཾ ནིརུདྡྷཱཝསཱནེ ཏསྶཱནནྟརམེཝ ཏཐཱགཧིཏཾ ཨཱརམྨཎཾ ཨཱརབྦྷ སཝཏྠུཀཾ ཨཝཏྠུཀམེཝ ཝཱ ཡཐཱརཧཾ ཨཝིཛྫཱནུསཡཔརིཀྑིཏྟེན ཏཎྷཱནུསཡམཱུལཀེན སངྑཱརེན ཛནིཡམཱནཾ སམྤཡུཏྟེཧི པརིགྒཡ྄ཧམཱནཾ སཧཛཱཏཱནམདྷིཊྛཱནབྷཱཝེན པུབྦངྒམབྷཱུཏཾ བྷཝནྟརཔཊིསནྡྷཱནཝསེན པཊིསནྡྷིསངྑཱཏཾ མཱནསཾ ཨུཔྤཛྫམཱནམེཝ པཏིཊྛཱཏི བྷཝནྟརེ.

༩༢. མརཎཱསནྣཝཱིཐིཡཾ པནེཏྠ མནྡཔྤཝཏྟཱནི པཉྩེཝ ཛཝནཱནི པཱཊིཀངྑིཏབྦཱནི, ཏསྨཱ ཡདི པཙྩུཔྤནྣཱརམྨཎེསུ ཨཱཔཱཐགཏེསུ དྷརནྟེསྭེཝ མརཎཾ ཧོཏི, ཏདཱ པཊིསནྡྷིབྷཝངྒཱནམྤི པཙྩུཔྤནྣཱརམྨཎཏཱ ལབྦྷཏཱིཏི ཀཏྭཱ ཀཱམཱཝཙརཔཊིསནྡྷིཡཱ ཚདྭཱརགྒཧིཏཾ ཀམྨནིམིཏྟཾ གཏིནིམིཏྟཉྩ པཙྩུཔྤནྣམཏཱིཏཱརམྨཎཾ ཨུཔལབྦྷཏི, ཀམྨཾ པན ཨཏཱིཏམེཝ, ཏཉྩ མནོདྭཱརགྒཧིཏཾ, ཏཱནི པན སབྦཱནིཔི པརིཏྟདྷམྨབྷཱུཏཱནེཝཱརམྨཎཱནི.

༩༣. རཱུཔཱཝཙརཔཊིསནྡྷིཡཱ པན པཉྙཏྟིབྷཱུཏཾ ཀམྨནིམིཏྟམེཝཱརམྨཎཾ ཧོཏི.

༩༤. ཏཐཱ ¶ ཨརཱུཔཔཊིསནྡྷིཡཱ ཙ མཧགྒཏབྷཱུཏཾ པཉྙཏྟིབྷཱུཏཉྩ ཀམྨནིམིཏྟམེཝ ཡཐཱརཧམཱརམྨཎཾ ཧོཏི.

༩༥. ཨསཉྙསཏྟཱནཾ པན ཛཱིཝིཏནཝཀམེཝ པཊིསནྡྷིབྷཱཝེན པཏིཊྛཱཏི, ཏསྨཱ ཏེ རཱུཔཔཊིསནྡྷིཀཱ ནཱམ.

༩༦. ཨརཱུཔཱ ཨརཱུཔཔཊིསནྡྷིཀཱ.

༩༧. སེསཱ རཱུཔཱརཱུཔཔཊིསནྡྷིཀཱ.

༩༨. ཨཱརུཔྤཙུཏིཡཱ ཧོནྟི, ཧེཊྛིམཱརུཔྤཝཛྫིཏཱ.

པརམཱརུཔྤསནྡྷཱི ཙ, ཏཐཱ ཀཱམཏིཧེཏུཀཱ.

རཱུཔཱཝཙརཙུཏིཡཱ ¶ , ཨཧེཏུརཧིཏཱ སིཡུཾ;

སབྦཱ ཀཱམཏིཧེཏུམྷཱ, ཀཱམེསྭེཝ པནེཏརཱ.

ཨཡམེཏྠ ཙུཏིཔཊིསནྡྷིཀྐམོ.

༩༩. ཨིཙྩེཝཾ གཧིཏཔཊིསནྡྷིཀཱནཾ པན པཊིསནྡྷིནིརོདྷཱནནྟརཏོ པབྷུཏི ཏམེཝཱརམྨཎམཱརབྦྷ ཏདེཝ ཙིཏྟཾ ཡཱཝ ཙུཏིཙིཏྟུཔྤཱདཱ ཨསཏི ཝཱིཐིཙིཏྟུཔྤཱདེ བྷཝསྶ ཨངྒབྷཱཝེན བྷཝངྒསནྟཏིསངྑཱཏཾ མཱནསཾ ཨབྦོཙྪིནྣཾ ནདཱིསོཏོ ཝིཡ པཝཏྟཏི.

༡༠༠. པརིཡོསཱནེ ཙ ཙཝནཝསེན ཙུཏིཙིཏྟཾ ཧུཏྭཱ ནིརུཛ྄ཛྷཏི.

༡༠༡. ཏཏོ པརཉྩ པཊིསནྡྷཱདཡོ རཐཙཀྐམིཝ ཡཐཱཀྐམཾ ཨེཝ པརིཝཏྟནྟཱ པཝཏྟནྟི.

༡༠༢. པཊིསནྡྷིབྷཝངྒཝཱིཐིཡོ, ཙུཏིཙེཧ ཏཐཱ བྷཝནྟརེ.

པུན སནྡྷི བྷཝངྒམིཙྩཡཾ, པརིཝཏྟཏི ཙིཏྟསནྟཏི.

པཊིསངྑཱཡཔནེཏམདྡྷུཝཾ ¶ , ཨདྷིགནྟྭཱ པདམཙྩུཏཾ བུདྷཱ;

སུསམུཙྪིནྣསིནེཧབནྡྷནཱ, སམམེསྶནྟི ཙིརཱཡ སུབྦཏཱ.

ཨིཏི ཨབྷིདྷམྨཏྠསངྒཧེ ཝཱིཐིམུཏྟསངྒཧཝིབྷཱགོ ནཱམ

པཉྩམོ པརིཙྪེདོ.

༦. རཱུཔཔརིཙྪེདོ

༡. ཨེཏྟཱཝཏཱ ཝིབྷཏྟཱ ཧི, སཔྤབྷེདཔྤཝཏྟིཀཱ.

ཙིཏྟཙེཏསིཀཱ དྷམྨཱ, རཱུཔཾ དཱནི པཝུཙྩཏི.

༢. སམུདྡེསཱ ¶ ཝིབྷཱགཱ ཙ, སམུཊྛཱནཱ ཀལཱཔཏོ.

པཝཏྟིཀྐམཏོ ཙེཏི, པཉྩདྷཱ ཏཏྠ སངྒཧོ.

རཱུཔསམུདྡེསོ

༣. ཙཏྟཱརི མཧཱབྷཱུཏཱནི, ཙཏུནྣཉྩ མཧཱབྷཱུཏཱནཾ ཨུཔཱདཱཡརཱུཔནྟི དུཝིདྷམྤེཏཾ རཱུཔཾ ཨེཀཱདསཝིདྷེན སངྒཧཾ གཙྪཏི.

༤. ཀཐཾ? པཐཝཱིདྷཱཏུ ཨཱཔོདྷཱཏུ ཏེཛོདྷཱཏུ ཝཱཡོདྷཱཏུ བྷཱུཏརཱུཔཾ ནཱམ.

༥. ཙཀྑུ སོཏཾ གྷཱནཾ ཛིཝ྄ཧཱ ཀཱཡོ པསཱདརཱུཔཾ ནཱམ.

༦. རཱུཔཾ སདྡོ གནྡྷོ རསོ ཨཱཔོདྷཱཏུཝིཝཛྫིཏཾ བྷཱུཏཏྟཡསངྑཱཏཾ ཕོཊྛབྦཾ གོཙརརཱུཔཾ ནཱམ.

༧. ཨིཏྠཏྟཾ པུརིསཏྟཾ བྷཱཝརཱུཔཾ ནཱམ.

༨. ཧདཡཝཏྠུ ཧདཡརཱུཔཾ ནཱམ.

༩. ཛཱིཝིཏིནྡྲིཡཾ ཛཱིཝིཏརཱུཔཾ ནཱམ.

༡༠. ཀབལཱི༹ཀཱརོ ཨཱཧཱརོ ཨཱཧཱརརཱུཔཾ ནཱམ.

༡༡. ཨིཏི ¶ ཙ ཨཊྛཱརསཝིདྷམྤེཏཾ རཱུཔཾ སབྷཱཝརཱུཔཾ སལཀྑཎརཱུཔཾ ནིཔྥནྣརཱུཔཾ རཱུཔརཱུཔཾ སམྨསནརཱུཔནྟི ཙ སངྒཧཾ གཙྪཏི.

༡༢. ཨཱཀཱསདྷཱཏུ པརིཙྪེདརཱུཔཾ ནཱམ.

༡༣. ཀཱཡཝིཉྙཏྟི ཝཙཱིཝིཉྙཏྟི ཝིཉྙཏྟིརཱུཔཾ ནཱམ.

༡༤. རཱུཔསྶ ལཧུཏཱ མུདུཏཱ ཀམྨཉྙཏཱ ཝིཉྙཏྟིདྭཡཾ ཝིཀཱརརཱུཔཾ ནཱམ.

༡༥. རཱུཔསྶ ཨུཔཙཡོ སནྟཏི ཛརཏཱ ཨནིཙྩཏཱ ལཀྑཎརཱུཔཾ ནཱམ.

༡༦. ཛཱཏིརཱུཔམེཝ ¶ པནེཏྠ ཨུཔཙཡསནྟཏིནཱམེན པཝུཙྩཏཱིཏི ཨེཀཱདསཝིདྷམྤེཏཾ རཱུཔཾ ཨཊྛཝཱིསཏིཝིདྷཾ ཧོཏི སརཱུཔཝསེན.

༡༧. ཀཐཾ –

བྷཱུཏཔྤསཱདཝིསཡཱ, བྷཱཝོ ཧདཡམིཙྩཔི;

ཛཱིཝིཏཱཧཱརརཱུཔེཧི, ཨཊྛཱརསཝིདྷཾ ཏཐཱ.

པརིཙྪེདོ ཙ ཝིཉྙཏྟི, ཝིཀཱརོ ལཀྑཎནྟི ཙ;

ཨནིཔྥནྣཱ དས ཙེཏི, ཨཊྛཝཱིསཝིདྷཾ བྷཝེ.

ཨཡམེཏྠ རཱུཔསམུདྡེསོ.

རཱུཔཝིབྷཱགོ

༡༨. སབྦཉྩ པནེཏཾ རཱུཔཾ ཨཧེཏུཀཾ སཔྤཙྩཡཾ སཱསཝཾ སངྑཏཾ ལོཀིཡཾ ཀཱམཱཝཙརཾ ཨནཱརམྨཎཾ ཨཔྤཧཱཏབྦམེཝཱཏི ཨེཀཝིདྷམྤི ཨཛ྄ཛྷཏྟིཀབཱཧིརཱདིཝསེན བཧུདྷཱ བྷེདཾ གཙྪཏི.

༡༩. ཀཐཾ? པསཱདསངྑཱཏཾ པཉྩཝིདྷམྤི ཨཛ྄ཛྷཏྟིཀརཱུཔཾ ནཱམ, ཨིཏརཾ བཱཧིརརཱུཔཾ.

༢༠. པསཱདཧདཡསངྑཱཏཾ ¶ ཚབྦིདྷམྤི ཝཏྠུརཱུཔཾ ནཱམ, ཨིཏརཾ ཨཝཏྠུརཱུཔཾ.

༢༡. པསཱདཝིཉྙཏྟིསངྑཱཏཾ སཏྟཝིདྷམྤི དྭཱརརཱུཔཾ ནཱམ, ཨིཏརཾ ཨདྭཱརརཱུཔཾ.

༢༢. པསཱདབྷཱཝཛཱིཝིཏསངྑཱཏཾ ཨཊྛཝིདྷམྤི ཨིནྡྲིཡརཱུཔཾ ནཱམ, ཨིཏརཾ ཨནིནྡྲིཡརཱུཔཾ.

༢༣. པསཱདཝིསཡསངྑཱཏཾ དྭཱདསཝིདྷམྤི ཨོལཱ༹རིཀརཱུཔཾ སནྟིཀེརཱུཔཾ, སཔྤཊིགྷརཱུཔཉྩ, ཨིཏརཾ སུཁུམརཱུཔཾ དཱུརེརཱུཔཾ ཨཔྤཊིགྷརཱུཔཉྩ.

༢༤. ཀམྨཛཾ ¶ ཨུཔཱདིནྣརཱུཔཾ, ཨིཏརཾ ཨནུཔཱདིནྣརཱུཔཾ.

༢༥. རཱུཔཱཡཏནཾ སནིདསྶནརཱུཔཾ, ཨིཏརཾ ཨནིདསྶནརཱུཔཾ.

༢༦. ཙཀྑཱདིདྭཡཾ ཨསམྤཏྟཝསེན, གྷཱནཱདིཏྟཡཾ སམྤཏྟཝསེནཱཏི པཉྩཝིདྷམྤི གོཙརགྒཱཧིཀརཱུཔཾ, ཨིཏརཾ ཨགོཙརགྒཱཧིཀརཱུཔཾ.

༢༧. ཝཎྞོ གནྡྷོ རསོ ཨོཛཱ བྷཱུཏཙཏུཀྐཉྩེཏི ཨཊྛཝིདྷམྤི ཨཝིནིབྦྷོགརཱུཔཾ, ཨིཏརཾ ཝིནིབྦྷོགརཱུཔཾ.

༢༨. ཨིཙྩེཝམཊྛཝཱིསཏི-ཝིདྷམྤི ཙ ཝིཙཀྑཎཱ.

ཨཛ྄ཛྷཏྟིཀཱདིབྷེདེན, ཝིབྷཛནྟི ཡཐཱརཧཾ.

ཨཡམེཏྠ རཱུཔཝིབྷཱགོ.

རཱུཔསམུཊྛཱནནཡོ

༢༩. ཀམྨཾ ཙིཏྟཾ ཨུཏུ ཨཱཧཱརོ ཙེཏི ཙཏྟཱརི རཱུཔསམུཊྛཱནཱནི ནཱམ.

༣༠. ཏཏྠ ཀཱམཱཝཙརཾ རཱུཔཱཝཙརཉྩེཏི པཉྩཝཱིསཏིཝིདྷམྤི ཀུསལཱཀུསལཀམྨམབྷིསངྑཏཾ ཨཛ྄ཛྷཏྟིཀསནྟཱནེ ཀམྨསམུཊྛཱནརཱུཔཾ པཊིསནྡྷིམུཔཱདཱཡ ཁཎེ ཁཎེ སམུཊྛཱཔེཏི.

༣༡. ཨརཱུཔཝིཔཱཀདྭིཔཉྩཝིཉྙཱཎཝཛྫིཏཾ ¶ པཉྩསཏྟཏིཝིདྷམྤི ཙིཏྟཾ ཙིཏྟསམུཊྛཱནརཱུཔཾ པཋམབྷཝངྒམུཔཱདཱཡ ཛཱཡནྟམེཝ སམུཊྛཱཔེཏི.

༣༢. ཏཏྠ ཨཔྤནཱཛཝནཾ ཨིརིཡཱཔཐམྤི སནྣཱམེཏི.

༣༣. ཝོཊྛབྦནཀཱམཱཝཙརཛཝནཱབྷིཉྙཱ པན ཝིཉྙཏྟིམྤི སམུཊྛཱཔེནྟི.

༣༤. སོམནསྶཛཝནཱནི པནེཏྠ ཏེརས ཧསནམྤི ཛནེནྟི.

༣༥. སཱིཏུཎྷོཏུསམཉྙཱཏཱ ¶ ཏེཛོདྷཱཏུ ཋིཏིཔྤཏྟཱཝ ཨུཏུསམུཊྛཱནརཱུཔཾ ཨཛ྄ཛྷཏྟཉྩ བཧིདྡྷཱ ཙ ཡཐཱརཧཾ སམུཊྛཱཔེཏི.

༣༦. ཨོཛཱསངྑཱཏོ ཨཱཧཱརོ ཨཱཧཱརསམུཊྛཱནརཱུཔཾ ཨཛ྄ཛྷོཧརཎཀཱལེ ཋཱནཔྤཏྟོཝ སམུཊྛཱཔེཏི.

༣༧. ཏཏྠ ཧདཡཨིནྡྲིཡརཱུཔཱནི ཀམྨཛཱནེཝ.

༣༨. ཝིཉྙཏྟིདྭཡཾ ཙིཏྟཛམེཝ.

༣༩. སདྡོ ཙིཏྟོཏུཛོ.

༤༠. ལཧུཏཱདིཏྟཡཾ ཨུཏུཙིཏྟཱཧཱརེཧི སམྦྷོཏི.

༤༡. ཨཝིནིབྦྷོགརཱུཔཱནི ཙེཝ ཨཱཀཱསདྷཱཏུ ཙ. ཙཏཱུཧི སམྦྷཱུཏཱནི.

༤༢. ལཀྑཎརཱུཔཱནི ན ཀུཏོཙི ཛཱཡནྟི.

༤༣. ཨཊྛཱརས པནྣརས, ཏེརས དྭཱདསཱཏི ཙ.

ཀམྨཙིཏྟོཏུཀཱཧཱར-ཛཱནི ཧོནྟི ཡཐཱཀྐམཾ.

༤༤. ཛཱཡམཱནཱདིརཱུཔཱནཾ, སབྷཱཝཏྟཱ ཧི ཀེཝལཾ.

ལཀྑཎཱནི ན ཛཱཡནྟི, ཀེཧིཙཱིཏི པཀཱསིཏཾ.

ཨཡམེཏྠ རཱུཔསམུཊྛཱནནཡོ.

ཀལཱཔཡོཛནཱ

༤༥. ཨེཀུཔྤཱདཱ ¶ ཨེཀནིརོདྷཱ ཨེཀནིསྶཡཱ སཧཝུཏྟིནོ ཨེཀཝཱིསཏི རཱུཔཀལཱཔཱ ནཱམ.

༤༦. ཏཏྠ ཛཱིཝིཏཾ ཨཝིནིབྦྷོགརཱུཔཉྩ ཙཀྑུནཱ སཧ ཙཀྑུདསཀནྟི པཝུཙྩཏི. ཏཐཱ ¶ སོཏཱདཱིཧི སདྡྷིཾ སོཏདསཀཾ གྷཱནདསཀཾ ཛིཝ྄ཧཱདསཀཾ ཀཱཡདསཀཾ ཨིཏྠིབྷཱཝདསཀཾ པུམྦྷཱཝདསཀཾ ཝཏྠུདསཀཉྩེཏི ཡཐཱཀྐམཾ ཡོཛེཏབྦཾ. ཨཝིནིབྦྷོགརཱུཔམེཝ ཛཱིཝིཏེན སཧ ཛཱིཝིཏནཝཀནྟི པཝུཙྩཏི. ཨིམེ ནཝ ཀམྨསམུཊྛཱནཀལཱཔཱ.

༤༧. ཨཝིནིབྦྷོགརཱུཔཾ པན སུདྡྷཊྛཀཾ, ཏདེཝ ཀཱཡཝིཉྙཏྟིཡཱ སཧ ཀཱཡཝིཉྙཏྟིནཝཀཾ, ཝཙཱིཝིཉྙཏྟིསདྡེཧི སཧ ཝཙཱིཝིཉྙཏྟིདསཀཾ, ལཧུཏཱདཱིཧི སདྡྷིཾ ལཧུཏཱདེཀཱདསཀཾ, ཀཱཡཝིཉྙཏྟིལཧུཏཱདིདྭཱདསཀཾ, ཝཙཱིཝིཉྙཏྟིསདྡལཧུཏཱདིཏེརསཀཉྩེཏི ཚ ཙིཏྟསམུཊྛཱནཀལཱཔཱ.

༤༨. སུདྡྷཊྛཀཾ སདྡནཝཀཾ ལཧུཏཱདེཀཱདསཀཾ སདྡལཧུཏཱདིདྭཱདསཀཉྩེཏི ཙཏྟཱརོ ཨུཏུསམུཊྛཱནཀལཱཔཱ.

༤༩. སུདྡྷཊྛཀཾ ལཧུཏཱདེཀཱདསཀཉྩེཏི དྭེཨཱཧཱརསམུཊྛཱནཀལཱཔཱ.

༥༠. ཏཏྠ སུདྡྷཊྛཀཾ སདྡནཝཀཉྩེཏི དྭེ ཨུཏུསམུཊྛཱནཀལཱཔཱ བཧིདྡྷཱཔི ལབྦྷནྟི, ཨཝསེསཱ པན སབྦེཔི ཨཛ྄ཛྷཏྟིཀམེཝཱཏི.

༥༡. ཀམྨཙིཏྟོཏུཀཱཧཱར-སམུཊྛཱནཱ ཡཐཱཀྐམཾ.

ནཝ ཚ ཙཏུརོ དྭེཏི, ཀལཱཔཱ ཨེཀཝཱིསཏི.

ཀལཱཔཱནཾ པརིཙྪེད-ལཀྑཎཏྟཱ ཝིཙཀྑཎཱ;

ན ཀལཱཔངྒམིཙྩཱཧུ, ཨཱཀཱསཾ ལཀྑཎཱནི ཙ.

ཨཡམེཏྠ ཀལཱཔཡོཛནཱ.

རཱུཔཔཝཏྟིཀྐམོ

༥༢. སབྦཱནིཔི ¶ པནེཏཱནི རཱུཔཱནི ཀཱམལོཀེ ཡཐཱརཧཾ ཨནཱུནཱནི པཝཏྟིཡཾ ཨུཔལབྦྷནྟི.

༥༣. པཊིསནྡྷིཡཾ ¶ པན སཾསེདཛཱནཉྩེཝ ཨོཔཔཱཏིཀཱནཉྩ ཙཀྑུསོཏགྷཱནཛིཝ྄ཧཱཀཱཡབྷཱཝཝཏྠུདསཀསངྑཱཏཱནི སཏྟ དསཀཱནི པཱཏུབྷཝནྟི ཨུཀྐཊྛཝསེན, ཨོམཀཝསེན པན ཙཀྑུསོཏགྷཱནབྷཱཝདསཀཱནི ཀདཱཙིཔི ན ལབྦྷནྟི, ཏསྨཱ ཏེསཾ ཝསེན ཀལཱཔཧཱནི ཝེདིཏབྦཱ.

༥༤. གབྦྷསེཡྻཀསཏྟཱནཾ པན ཀཱཡབྷཱཝཝཏྠུདསཀསངྑཱཏཱནི ཏཱིཎི དསཀཱནི པཱཏུབྷཝནྟི, ཏཏྠཱཔི བྷཱཝདསཀཾ ཀདཱཙི ན ལབྦྷཏི, ཏཏོ པརཾ པཝཏྟིཀཱལེ ཀམེན ཙཀྑུདསཀཱདཱིནི ཙ པཱཏུབྷཝནྟི.

༥༥. ཨིཙྩེཝཾ པཊིསནྡྷིམུཔཱདཱཡ ཀམྨསམུཊྛཱནཱ, དུཏིཡཙིཏྟམུཔཱདཱཡ ཙིཏྟསམུཊྛཱནཱ, ཋིཏིཀཱལམུཔཱདཱཡ ཨུཏུསམུཊྛཱནཱ, ཨོཛཱཕརཎམུཔཱདཱཡ ཨཱཧཱརསམུཊྛཱནཱ ཙེཏི ཙཏུསམུཊྛཱནརཱུཔཀལཱཔསནྟཏི ཀཱམལོཀེ དཱིཔཛཱལཱ ཝིཡ, ནདཱིསོཏོ ཝིཡ ཙ ཡཱཝཏཱཡུཀམབྦོཙྪིནྣཱ པཝཏྟཏི.

༥༦. མརཎཀཱལེ པན ཙུཏིཙིཏྟོཔརིསཏྟརསམཙིཏྟསྶ ཋིཏིཀཱལམུཔཱདཱཡ ཀམྨཛརཱུཔཱནི ན ཨུཔྤཛྫནྟི, པུརེཏརམུཔྤནྣཱནི ཙ ཀམྨཛརཱུཔཱནི ཙུཏིཙིཏྟསམཀཱལམེཝ པཝཏྟིཏྭཱ ནིརུཛ྄ཛྷནྟི, ཏཏོ པརཾ ཙིཏྟཛཱཧཱརཛརཱུཔཉྩ ཝོཙྪིཛྫཏི, ཏཏོ པརཾ ཨུཏུསམུཊྛཱནརཱུཔཔརམྤརཱ ཡཱཝ མཏཀལེ༹ཝརསངྑཱཏཱ པཝཏྟནྟི.

༥༧. ཨིཙྩེཝཾ མཏསཏྟཱནཾ, པུནདེཝ བྷཝནྟརེ.

པཊིསནྡྷིམུཔཱདཱཡ, ཏཐཱ རཱུཔཾ པཝཏྟཏི.

༥༨. རཱུཔལོཀེ ¶ པན གྷཱནཛིཝ྄ཧཱཀཱཡབྷཱཝདསཀཱནི ཙ ཨཱཧཱརཛཀལཱཔཱནི ཙ ན ལབྦྷནྟི, ཏསྨཱ ཏེསཾ པཊིསནྡྷིཀཱལེ ཙཀྑུསོཏཝཏྠུཝསེན ཏཱིཎི དསཀཱནི ཛཱིཝིཏནཝཀཉྩེཏི ཙཏྟཱརོ ཀམྨསམུཊྛཱནཀལཱཔཱ, པཝཏྟིཡཾ ཙིཏྟོཏུསམུཊྛཱནཱ ཙ ལབྦྷནྟི.

༥༩. ཨསཉྙསཏྟཱནཾ པན ཙཀྑུསོཏཝཏྠུསདྡཱཔི ན ལབྦྷནྟི, ཏཐཱ སབྦཱནིཔི ཙིཏྟཛརཱུཔཱནི, ཏསྨཱ ཏེསཾ པཊིསནྡྷིཀཱལེ ཛཱིཝིཏནཝཀམེཝ, པཝཏྟིཡཉྩ སདྡཝཛྫིཏཾ ཨུཏུསམུཊྛཱནརཱུཔཾ ཨཏིརིཙྪཏི.

༦༠. ཨིཙྩེཝཾ ¶ ཀཱམརཱུཔཱསཉྙཱིསངྑཱཏེསུ ཏཱིསུ ཋཱནེསུ པཊིསནྡྷིཔཝཏྟིཝསེན དུཝིདྷཱ རཱུཔཔྤཝཏྟི ཝེདིཏབྦཱ.

༦༡. ཨཊྛཝཱིསཏི ཀཱམེསུ, ཧོནྟི ཏེཝཱིས རཱུཔིསུ.

སཏྟརསེཝ སཉྙཱིནཾ, ཨརཱུཔེ ནཏྠི ཀིཉྩིཔི.

སདྡོ ཝིཀཱརོ ཛརཏཱ, མརཎཉྩོཔཔཏྟིཡཾ;

ན ལབྦྷནྟི པཝཏྟེ ཏུ, ན ཀིཉྩིཔི ན ལབྦྷཏི.

ཨཡམེཏྠ རཱུཔཔཝཏྟིཀྐམོ.

ནིབྦཱནབྷེདོ

༦༢. ནིབྦཱནཾ པན ལོཀུཏྟརསངྑཱཏཾ ཙཏུམགྒཉཱཎེན སཙྪིཀཱཏབྦཾ མགྒཕལཱནམཱརམྨཎབྷཱུཏཾ ཝཱནསངྑཱཏཱཡ ཏཎྷཱཡ ནིཀྑནྟཏྟཱ ནིབྦཱནནྟི པཝུཙྩཏི.

༦༣. ཏདེཏཾ སབྷཱཝཏོ ཨེཀཝིདྷམྤི སཨུཔཱདིསེསནིབྦཱནདྷཱཏུ ཨནུཔཱདིསེསནིབྦཱནདྷཱཏུ ཙེཏི དུཝིདྷཾ ཧོཏི ཀཱརཎཔརིཡཱཡེན.

༦༤. ཏཐཱ ¶ སུཉྙཏཾ ཨནིམིཏྟཾ ཨཔྤཎིཧིཏཉྩེཏི ཏིཝིདྷཾ ཧོཏི ཨཱཀཱརབྷེདེན.

༦༥. པདམཙྩུཏམཙྩནྟཾ, ཨསངྑཏམནུཏྟརཾ.

ནིབྦཱནམིཏི བྷཱསནྟི, ཝཱནམུཏྟཱ མཧེསཡོ.

ཨིཏི ཙིཏྟཾ ཙེཏསིཀཾ, རཱུཔཾ ནིབྦཱནམིཙྩཔི;

པརམཏྠཾ པཀཱསེནྟི, ཙཏུདྷཱཝ ཏཐཱགཏཱ.

ཨིཏི ཨབྷིདྷམྨཏྠསངྒཧེ རཱུཔསངྒཧཝིབྷཱགོ ནཱམ

ཚཊྛོ པརིཙྪེདོ.

༧. སམུཙྩཡཔརིཙྪེདོ

༡. དྭཱསཏྟཏིཝིདྷཱ ¶ ཝུཏྟཱ, ཝཏྠུདྷམྨཱ སལཀྑཎཱ.

ཏེསཾ དཱནི ཡཐཱཡོགཾ, པཝཀྑཱམི སམུཙྩཡཾ.

༢. ཨཀུསལསངྒཧོ མིསྶཀསངྒཧོ བོདྷིཔཀྑིཡསངྒཧོ སབྦསངྒཧོ ཙེཏི སམུཙྩཡསངྒཧོ ཙཏུབྦིདྷོ ཝེདིཏབྦོ.

ཨཀུསལསངྒཧོ

༣. ཀཐཾ? ཨཀུསལསངྒཧེ ཏཱཝ ཙཏྟཱརོ ཨཱསཝཱ – ཀཱམཱསཝོ བྷཝཱསཝོ དིཊྛཱསཝོ ཨཝིཛྫཱསཝོ.

༤. ཙཏྟཱརོ ཨོགྷཱ – ཀཱམོགྷོ བྷཝོགྷོ དིཊྛོགྷོ ཨཝིཛྫོགྷོ.

༥. ཙཏྟཱརོ ཡོགཱ – ཀཱམཡོགོ བྷཝཡོགོ དིཊྛིཡོགོ ཨཝིཛྫཱཡོགོ.

༦. ཙཏྟཱརོ གནྠཱ – ཨབྷིཛ྄ཛྷཱཀཱཡགནྠོ, བྱཱཔཱདོ ཀཱཡགནྠོ, སཱིལབྦཏཔརཱམཱསོ ཀཱཡགནྠོ, ཨིདཾསཙྩཱབྷིནིཝེསོ ཀཱཡགནྠོ.

༧. ཙཏྟཱརོ ¶ ཨུཔཱདཱནཱ – ཀཱམུཔཱདཱནཾ དིཊྛུཔཱདཱནཾ སཱིལབྦཏུཔཱདཱནཾ ཨཏྟཝཱདུཔཱདཱནཾ.

༨. ཚ ནཱིཝརཎཱནི – ཀཱམཙྪནྡནཱིཝརཎཾ བྱཱཔཱདནཱིཝརཎཾ ཐིནམིདྡྷནཱིཝརཎཾ ཨུདྡྷཙྩཀུཀྐུཙྩནཱིཝརཎཾ ཝིཙིཀིཙྪཱནཱིཝརཎཾ ཨཝིཛྫཱནཱིཝརཎཾ.

༩. སཏྟ ¶ ཨནུསཡཱ – ཀཱམརཱགཱནུསཡོ བྷཝརཱགཱནུསཡོ པཊིགྷཱནུསཡོ མཱནཱནུསཡོ དིཊྛཱནུསཡོ ཝིཙིཀིཙྪཱནུསཡོ ཨཝིཛྫཱནུསཡོ.

༡༠. དས སཾཡོཛནཱནི – ཀཱམརཱགསཾཡོཛནཾ རཱུཔརཱགསཾཡོཛནཾ ཨརཱུཔརཱགསཾཡོཛནཾ པཊིགྷསཾཡོཛནཾ མཱནསཾཡོཛནཾ དིཊྛིསཾཡོཛནཾ སཱིལབྦཏཔརཱམཱསསཾཡོཛནཾ ཝིཙིཀིཙྪཱསཾཡོཛནཾ ཨུདྡྷཙྩསཾཡོཛནཾ ཨཝིཛྫཱསཾཡོཛནཾ སུཏྟནྟེ.

༡༡. ཨཔརཱནིཔི དས སཾཡོཛནཱནི – ཀཱམརཱགསཾཡོཛནཾ བྷཝརཱགསཾཡོཛནཾ པཊིགྷསཾཡོཛནཾ མཱནསཾཡོཛནཾ དིཊྛིསཾཡོཛནཾ སཱིལབྦཏཔརཱམཱསསཾཡོཛནཾ ཝིཙིཀིཙྪཱསཾཡོཛནཾ ཨིསྶཱསཾཡོཛནཾ མཙྪརིཡསཾཡོཛནཾ ཨཝིཛྫཱསཾཡོཛནཾ ཨབྷིདྷམྨེ (ཝིབྷ. ༩༦༩).

༡༢. དས ཀིལེསཱ – ལོབྷོ དོསོ མོཧོ མཱནོ དིཊྛི ཝིཙིཀིཙྪཱ ཐིནཾ ཨུདྡྷཙྩཾ ཨཧིརིཀཾ ཨནོཏྟཔྤཾ.

༡༣. ཨཱསཝཱདཱིསུ པནེཏྠ ཀཱམབྷཝནཱམེན ཏབྦཏྠུཀཱ ཏཎྷཱ ཨདྷིཔྤེཏཱ, སཱིལབྦཏཔརཱམཱསོ ཨིདཾསཙྩཱབྷིནིཝེསོ ཨཏྟཝཱདུཔཱདོ ཙ ཏཐཱཔཝཏྟཾ དིཊྛིགཏམེཝ པཝུཙྩཏི.

༡༤. ཨཱསཝོགྷཱ ཙ ཡོགཱ ཙ,

ཏཡོ གནྠཱ ཙ ཝཏྠུཏོ;

ཨུཔཱདཱནཱ དུཝེ ཝུཏྟཱ,

ཨཊྛ ནཱིཝརཎཱ སིཡུཾ.

ཚལེ༹ཝཱནུསཡཱ ¶ ཧོནྟི, ནཝ སཾཡོཛནཱ མཏཱ;

ཀིལེསཱ དས ཝུཏྟོཡཾ, ནཝདྷཱ པཱཔསངྒཧོ.

མིསྶཀསངྒཧོ

༡༥. མིསྶཀསངྒཧེ ཚ ཧེཏཱུ – ལོབྷོ དོསོ མོཧོ ཨལོབྷོ ཨདོསོ ཨམོཧོ.

༡༦. སཏྟ ¶ ཛྷཱནངྒཱནི – ཝིཏཀྐོ ཝིཙཱརོ པཱིཏི ཨེཀགྒཏཱ སོམནསྶཾ དོམནསྶཾ ཨུཔེཀྑཱ.

༡༧. དྭཱདས མགྒངྒཱནི – སམྨཱདིཊྛི སམྨཱསངྐཔྤོ སམྨཱཝཱཙཱ སམྨཱཀམྨནྟོ སམྨཱཨཱཛཱིཝོ སམྨཱཝཱཡཱམོ སམྨཱསཏི སམྨཱསམཱདྷི མིཙྪཱདིཊྛི མིཙྪཱསངྐཔྤོ མིཙྪཱཝཱཡཱམོ མིཙྪཱསམཱདྷི.

༡༨. བཱཝཱིསཏིནྡྲིཡཱནི – ཙཀྑུནྡྲིཡཾ སོཏིནྡྲིཡཾ གྷཱནིནྡྲིཡཾ ཛིཝ྄ཧིནྡྲིཡཾ ཀཱཡིནྡྲིཡཾ ཨིཏྠིནྡྲིཡཾ པུརིསིནྡྲིཡཾ ཛཱིཝིཏིནྡྲིཡཾ མནིནྡྲིཡཾ སུཁིནྡྲིཡཾ དུཀྑིནྡྲིཡཾ སོམནསྶིནྡྲིཡཾ དོམནསྶིནྡྲིཡཾ ཨུཔེཀྑིནྡྲིཡཾ སདྡྷིནྡྲིཡཾ ཝཱིརིཡིནྡྲིཡཾ སཏིནྡྲིཡཾ སམཱདྷིནྡྲིཡཾ པཉྙིནྡྲིཡཾ ཨནཉྙཱཏཉྙསྶཱམཱིཏིནྡྲིཡཾ ཨཉྙིནྡྲིཡཾ ཨཉྙཱཏཱཝིནྡྲིཡཾ.

༡༩. ནཝ བལཱནི – སདྡྷཱབལཾ ཝཱིརིཡབལཾ སཏིབལཾ སམཱདྷིབལཾ པཉྙཱབལཾ ཧིརིབལཾ ཨོཏྟཔྤབལཾ ཨཧིརིཀབལཾ ཨནོཏྟཔྤབལཾ.

༢༠. ཙཏྟཱརོ ཨདྷིཔཏཱི – ཚནྡཱདྷིཔཏི ཝཱིརིཡཱདྷིཔཏི ཙིཏྟཱདྷིཔཏི ཝཱིམཾསཱདྷིཔཏི.

༢༡. ཙཏྟཱརོ ཨཱཧཱརཱ – ཀབལཱི༹ཀཱརོ ཨཱཧཱརོ, ཕསྶོ དུཏིཡོ, མནོསཉྩེཏནཱ ཏཏིཡཱ, ཝིཉྙཱཎཾ ཙཏུཏྠཾ.

༢༢. ཨིནྡྲིཡེསུ ¶ པནེཏྠ སོཏཱཔཏྟིམགྒཉཱཎཾ ཨནཉྙཱཏཉྙསྶཱམཱིཏིནྡྲིཡཾ.

༢༣. ཨརཧཏྟཕལཉཱཎཾ ཨཉྙཱཏཱཝིནྡྲིཡཾ.

༢༤. མཛ྄ཛྷེ ཚ ཉཱཎཱནི ཨཉྙིནྡྲིཡཱནཱིཏི པཝུཙྩནྟི.

༢༥. ཛཱིཝིཏིནྡྲིཡཉྩ རཱུཔཱརཱུཔཝསེན དུཝིདྷཾ ཧོཏི.

༢༦. པཉྩཝིཉྙཱཎེསུ ཛྷཱནངྒཱནི, ཨཝཱིརིཡེསུ བལཱནི, ཨཧེཏུཀེསུ མགྒངྒཱནི ན ལབྦྷནྟི.

༢༧. ཏཐཱ ¶ ཝིཙིཀིཙྪཱཙིཏྟེ ཨེཀགྒཏཱ མགྒིནྡྲིཡབལབྷཱཝཾ ན གཙྪཏི.

༢༨. དྭིཧེཏུཀཏིཧེཏུཀཛཝནེསྭེཝ ཡཐཱསམྦྷཝཾ ཨདྷིཔཏི ཨེཀོཝ ལབྦྷཏཱིཏི.

༢༩. ཚ ཧེཏཱུ པཉྩ ཛྷཱནངྒཱ, མགྒངྒཱ ནཝ ཝཏྠུཏོ.

སོལ༹སིནྡྲིཡདྷམྨཱ ཙ, བལདྷམྨཱ ནཝེརིཏཱ.

ཙཏྟཱརོདྷིཔཏི ཝུཏྟཱ, ཏཐཱཧཱརཱཏི སཏྟདྷཱ;

ཀུསལཱདིསམཱཀིཎྞོ, ཝུཏྟོམིསྶཀསངྒཧོ.

བོདྷིཔཀྑིཡསངྒཧོ

༣༠. བོདྷིཔཀྑིཡསངྒཧེ ཙཏྟཱརོ སཏིཔཊྛཱནཱ ཀཱཡཱནུཔསྶནཱསཏིཔཊྛཱནཾ ཝེདནཱནུཔསྶནཱསཏིཔཊྛཱནཾ ཙིཏྟཱནུཔསྶནཱསཏིཔཊྛཱནཾ དྷམྨཱནུཔསྶནཱསཏིཔཊྛཱནཾ.

༣༡. ཙཏྟཱརོ སམྨཔྤདྷཱནཱ ཨུཔྤནྣཱནཾ པཱཔཀཱནཾ པཧཱནཱཡ ཝཱཡཱམོ, ཨནུཔྤནྣཱནཾ པཱཔཀཱནཾ ཨནུཔྤཱདཱཡ ཝཱཡཱམོ, ཨནུཔྤནྣཱནཾ ཀུསལཱནཾ ཨུཔྤཱདཱཡ ཝཱཡཱམོ, ཨུཔྤནྣཱནཾ ཀུསལཱནཾ བྷིཡྻོབྷཱཝཱཡ ཝཱཡཱམོ.

༣༢. ཙཏྟཱརོ ¶ ཨིདྡྷིཔཱདཱ – ཚནྡིདྡྷིཔཱདོ ཝཱིརིཡིདྡྷིཔཱདོ ཙིཏྟིདྡྷིཔཱདོ ཝཱིམཾསིདྡྷིཔཱདོ.

༣༣. པཉྩིནྡྲིཡཱནི – སདྡྷིནྡྲིཡཾ ཝཱིརིཡིནྡྲིཡཾ སཏིནྡྲིཡཾ སམཱདྷིནྡྲིཡཾ པཉྙིནྡྲིཡཾ.

༣༤. པཉྩ བལཱནི – སདྡྷཱབལཾ ཝཱིརིཡབལཾ སཏིབལཾ སམཱདྷིབལཾ པཉྙཱབལཾ.

༣༥. སཏྟ བོཛ྄ཛྷངྒཱ – སཏིསམྦོཛ྄ཛྷངྒོ དྷམྨཝིཙཡསམྦོཛ྄ཛྷངྒོ ཝཱིརིཡསམྦོཛ྄ཛྷངྒོ པཱིཏིསམྦོཛ྄ཛྷངྒོ པསྶདྡྷིསམྦོཛ྄ཛྷངྒོ སམཱདྷིསམྦོཛ྄ཛྷངྒོ ཨུཔེཀྑཱསམྦོཛ྄ཛྷངྒོ.

༣༦. ཨཊྛ ¶ མགྒངྒཱནི – སམྨཱདིཊྛི སམྨཱསངྐཔྤོ སམྨཱཝཱཙཱ སམྨཱཀམྨནྟོ སམྨཱཨཱཛཱིཝོ སམྨཱཝཱཡཱམོ སམྨཱསཏི སམྨཱསམཱདྷི.

༣༧. ཨེཏྠ པན ཙཏྟཱརོ སཏིཔཊྛཱནཱཏི སམྨཱསཏི ཨེཀཱཝ པཝུཙྩཏི.

༣༨. ཏཐཱ ཙཏྟཱརོ སམྨཔྤདྷཱནཱཏི ཙ སམྨཱཝཱཡཱམོ.

༣༩. ཚནྡོ ཙིཏྟམུཔེཀྑཱ ཙ, སདྡྷཱཔསྶདྡྷིཔཱིཏིཡོ.

སམྨཱདིཊྛི ཙ སངྐཔྤོ, ཝཱཡཱམོ ཝིརཏིཏྟཡཾ.

སམྨཱསཏི སམཱདྷཱིཏི, ཙུདྡསེཏེ སབྷཱཝཏོ;

སཏྟཏིཾསཔྤབྷེདེན, སཏྟདྷཱ ཏཏྠ སངྒཧོ.

༤༠. སངྐཔྤཔསྶདྡྷི ཙ པཱིཏུཔེཀྑཱ,

ཚནྡོ ཙ ཙིཏྟཾ ཝིརཏིཏྟཡཉྩ;

ནཝེཀཋཱནཱ ཝིརིཡཾ ནཝཊྛ,

སཏཱི སམཱདྷཱི ཙཏུ པཉྩ པཉྙཱ;

སདྡྷཱ དུཋཱནུཏྟམསཏྟཏིཾས-

དྷམྨཱནམེསོ པཝརོ ཝིབྷཱགོ.

༤༡. སབྦེ ¶ ལོཀུཏྟརེ ཧོནྟི, ན ཝཱ སངྐཔྤཔཱིཏིཡོ.

ལོཀིཡེཔི ཡཐཱཡོགཾ, ཚབྦིསུདྡྷིཔཝཏྟིཡཾ.

སབྦསངྒཧོ

༤༢. སབྦསངྒཧེ པཉྩཀྑནྡྷཱ – རཱུཔཀྑནྡྷོ ཝེདནཱཀྑནྡྷོ སཉྙཱཀྑནྡྷོ སངྑཱརཀྑནྡྷོ ཝིཉྙཱཎཀྑནྡྷོ.

༤༣. པཉྩུཔཱདཱནཀྑནྡྷཱ ¶ – རཱུཔུཔཱདཱནཀྑནྡྷོ ཝེདནུཔཱདཱནཀྑནྡྷོ སཉྙུཔཱདཱནཀྑནྡྷོ སངྑཱརུཔཱདཱནཀྑནྡྷོ ཝིཉྙཱཎུཔཱདཱནཀྑནྡྷོ.

༤༤. དྭཱདསཱཡཏནཱནི – ཙཀྑཱཡཏནཾ སོཏཱཡཏནཾ གྷཱནཱཡཏནཾ ཛིཝ྄ཧཱཡཏནཾ ཀཱཡཱཡཏནཾ མནཱཡཏནཾ རཱུཔཱཡཏནཾ སདྡཱཡཏནཾ གནྡྷཱཡཏནཾ རསཱཡཏནཾ ཕོཊྛབྦཱཡཏནཾ དྷམྨཱཡཏནཾ.

༤༥. ཨཊྛཱརས དྷཱཏུཡོ – ཙཀྑུདྷཱཏུ སོཏདྷཱཏུ གྷཱནདྷཱཏུ ཛིཝ྄ཧཱདྷཱཏུ ཀཱཡདྷཱཏུ རཱུཔདྷཱཏུ སདྡདྷཱཏུ གནྡྷདྷཱཏུ རསདྷཱཏུ ཕོཊྛབྦདྷཱཏུ ཙཀྑུཝིཉྙཱཎདྷཱཏུ སོཏཝིཉྙཱཎདྷཱཏུ གྷཱནཝིཉྙཱཎདྷཱཏུ ཛིཝ྄ཧཱཝིཉྙཱཎདྷཱཏུ ཀཱཡཝིཉྙཱཎདྷཱཏུ མནོདྷཱཏུ དྷམྨདྷཱཏུ མནོཝིཉྙཱཎདྷཱཏུ.

༤༦. ཙཏྟཱརི ཨརིཡསཙྩཱནི – དུཀྑཾ ཨརིཡསཙྩཾ, དུཀྑསམུདཡོ ཨརིཡསཙྩཾ, དུཀྑནིརོདྷོ ཨརིཡསཙྩཾ, དུཀྑནིརོདྷགཱམིནཱི པཊིཔདཱ ཨརིཡསཙྩཾ.

༤༧. ཨེཏྠ པན ཙེཏསིཀསུཁུམརཱུཔནིབྦཱནཝསེན ཨེཀཱུནསཏྟཏི དྷམྨཱ དྷམྨཱཡཏནདྷམྨདྷཱཏཱུཏི སངྑཾ གཙྪནྟི.

༤༨. མནཱཡཏནམེཝ སཏྟཝིཉྙཱཎདྷཱཏུཝསེན བྷིཛྫཏི.

༤༩. རཱུཔཉྩ ཝེདནཱ སཉྙཱ, སེསཙེཏསིཀཱ ཏཐཱ.

ཝིཉྙཱཎམིཏི པཉྩེཏེ, པཉྩཀྑནྡྷཱཏི བྷཱསིཏཱ.

༥༠. པཉྩུཔཱདཱནཀྑནྡྷཱཏི ¶ , ཏཐཱ ཏེབྷཱུམཀཱ མཏཱ.

བྷེདཱབྷཱཝེན ནིབྦཱནཾ, ཁནྡྷསངྒཧནིསྶཊཾ.

༥༡. དྭཱརཱརམྨཎབྷེདེན, བྷཝནྟཱཡཏནཱནི ཙ.

དྭཱརཱལམྦཏདུཔྤནྣ-པརིཡཱཡེན དྷཱཏུཡོ.

༥༢. དུཀྑཾ ¶ ཏེབྷཱུམཀཾ ཝཊྚཾ, ཏཎྷཱ སམུདཡོ བྷཝེ.

ནིརོདྷོ ནཱམ ནིབྦཱནཾ, མགྒོ ལོཀུཏྟརོ མཏོ.

༥༣. མགྒཡུཏྟཱ ཕལཱ ཙེཝ, ཙཏུསཙྩཝིནིསྶཊཱ.

ཨིཏི པཉྩཔྤབྷེདེན, པཝུཏྟོ སབྦསངྒཧོ.

ཨིཏི ཨབྷིདྷམྨཏྠསངྒཧེ སམུཙྩཡསངྒཧཝིབྷཱགོ ནཱམ

སཏྟམོ པརིཙྪེདོ.

༨. པཙྩཡཔརིཙྪེདོ

༡. ཡེསཾ སངྑཏདྷམྨཱནཾ, ཡེ དྷམྨཱ པཙྩཡཱ ཡཐཱ.

ཏཾ ཝིབྷཱགམིཧེདཱནི, པཝཀྑཱམི ཡཐཱརཧཾ.

༢. པཊིཙྩསམུཔྤཱདནཡོ པཊྛཱནནཡོ ཙེཏི པཙྩཡསངྒཧོ དུཝིདྷོ ཝེདིཏབྦོ.

༣. ཏཏྠ ཏབྦྷཱཝབྷཱཝཱིབྷཱཝཱཀཱརམཏྟོཔལཀྑིཏོ པཊིཙྩསམུཔྤཱདནཡོ, པཊྛཱནནཡོ པན ཨཱཧཙྩཔཙྩཡཊྛིཏིམཱརབྦྷ པཝུཙྩཏི, ཨུབྷཡཾ པན ཝོམིསྶེཏྭཱ པཔཉྩེནྟི ཨཱཙརིཡཱ.

པཊིཙྩསམུཔྤཱདནཡོ

༤. ཏཏྠ ཨཝིཛྫཱཔཙྩཡཱ སངྑཱརཱ, སངྑཱརཔཙྩཡཱ ཝིཉྙཱཎཾ, ཝིཉྙཱཎཔཙྩཡཱ ནཱམརཱུཔཾ, ནཱམརཱུཔཔཙྩཡཱ སལཱ༹ཡཏནཾ, སལཱ༹ཡཏནཔཙྩཡཱ ཕསྶོ, ཕསྶཔཙྩཡཱ ཝེདནཱ, ཝེདནཱཔཙྩཡཱ ཏཎྷཱ, ཏཎྷཱཔཙྩཡཱ ཨུཔཱདཱནཾ, ཨུཔཱདཱནཔཙྩཡཱ བྷཝོ ¶ , བྷཝཔཙྩཡཱ ཛཱཏི, ཛཱཏིཔཙྩཡཱ ¶ ཛརཱམརཎཾ སོཀཔརིདེཝདུཀྑདོམནསྶུཔཱཡཱསཱ སམྦྷཝནྟི. ཨེཝམེཏསྶ ཀེཝལསྶ དུཀྑཀྑནྡྷསྶ སམུདཡོ ཧོཏཱིཏི ཨཡམེཏྠ པཊིཙྩསམུཔྤཱདནཡོ.

༥. ཏཏྠ ཏཡོ ཨདྡྷཱ དྭཱདསངྒཱནི ཝཱིསཏཱཀཱརཱ ཏིསནྡྷི ཙཏུསངྑེཔཱ ཏཱིཎི ཝཊྚཱནི དྭེ མཱུལཱནི ཙ ཝེདིཏབྦཱནི.

༦. ཀཐཾ? ཨཝིཛྫཱསངྑཱརཱ ཨཏཱིཏོ ཨདྡྷཱ, ཛཱཏིཛརཱམརཎཾ ཨནཱགཏོ ཨདྡྷཱ, མཛ྄ཛྷེ ཨཊྛ པཙྩུཔྤནྣོ ཨདྡྷཱཏི ཏཡོ ཨདྡྷཱ.

༧. ཨཝིཛྫཱ སངྑཱརཱ ཝིཉྙཱཎཾ ནཱམརཱུཔཾ སལཱ༹ཡཏནཾ ཕསྶོ ཝེདནཱ ཏཎྷཱ ཨུཔཱདཱནཾ བྷཝོ ཛཱཏི ཛརཱམརཎནྟི དྭཱདསངྒཱནི.

༨. སོཀཱདིཝཙནཾ པནེཏྠ ནིསྶནྡཕལནིདསྶནཾ.

༩. ཨཝིཛྫཱསངྑཱརགྒཧཎེན པནེཏྠ ཏཎྷུཔཱདཱནབྷཝཱཔི གཧིཏཱ བྷཝནྟི, ཏཐཱ ཏཎྷུཔཱདཱནབྷཝགྒཧཎེན ཙ ཨཝིཛྫཱསངྑཱརཱ, ཛཱཏིཛརཱམརཎགྒཧཎེན ཙ ཝིཉྙཱཎཱདིཕལཔཉྩཀམེཝ གཧིཏནྟི ཀཏྭཱ –

༡༠. ཨཏཱིཏེ ཧེཏཝོ པཉྩ, ཨིདཱནི ཕལཔཉྩཀཾ.

ཨིདཱནི ཧེཏཝོ པཉྩ, ཨཱཡཏིཾ ཕལཔཉྩཀནྟི;

ཝཱིསཏཱཀཱརཱ ཏིསནྡྷི, ཙཏུསངྑེཔཱ ཙ བྷཝནྟི.

༡༡. ཨཝིཛྫཱཏཎྷུཔཱདཱནཱ ཙ ཀིལེསཝཊྚཾ, ཀམྨབྷཝསངྑཱཏོ བྷཝེཀདེསོ སངྑཱརཱ ཙ ཀམྨཝཊྚཾ, ཨུཔཔཏྟིབྷཝསངྑཱཏོ བྷཝེཀདེསོ ཨཝསེསཱ ཙ ཝིཔཱཀཝཊྚནྟི ཏཱིཎི ཝཊྚཱནི.

༡༢. ཨཝིཛྫཱཏཎྷཱཝསེན དྭེ མཱུལཱནི ཙ ཝེདིཏབྦཱནི.

༡༣. ཏེསམེཝ ¶ ¶ ཙ མཱུལཱནཾ, ནིརོདྷེན ནིརུཛ྄ཛྷཏི.

ཛརཱམརཎམུཙྪཱཡ, པཱིལི༹ཏཱནམབྷིཎྷསོ;

ཨཱསཝཱནཾ སམུཔྤཱདཱ, ཨཝིཛྫཱ ཙ པཝཏྟཏི.

ཝཊྚམཱབནྡྷམིཙྩེཝཾ, ཏེབྷཱུམཀམནཱདིཀཾ;

པཊིཙྩསམུཔྤཱདོཏི, པཊྛཔེསི མཧཱམུནི.

པཊྛཱནནཡོ

༡༤. ཧེཏུཔཙྩཡོ ཨཱརམྨཎཔཙྩཡོ ཨདྷིཔཏིཔཙྩཡོ ཨནནྟརཔཙྩཡོ སམནནྟརཔཙྩཡོ སཧཛཱཏཔཙྩཡོ ཨཉྙམཉྙཔཙྩཡོ ནིསྶཡཔཙྩཡོ ཨུཔནིསྶཡཔཙྩཡོ པུརེཛཱཏཔཙྩཡོ པཙྪཱཛཱཏཔཙྩཡོ ཨཱསེཝནཔཙྩཡོ ཀམྨཔཙྩཡོ ཝིཔཱཀཔཙྩཡོ ཨཱཧཱརཔཙྩཡོ ཨིནྡྲིཡཔཙྩཡོ ཛྷཱནཔཙྩཡོ མགྒཔཙྩཡོ སམྤཡུཏྟཔཙྩཡོ ཝིཔྤཡུཏྟཔཙྩཡོ ཨཏྠིཔཙྩཡོ ནཏྠིཔཙྩཡོ ཝིགཏཔཙྩཡོ ཨཝིགཏཔཙྩཡོཏི ཨཡམེཏྠ པཊྛཱནནཡོ.

༡༥. ཚདྷཱ ནཱམཾ ཏུ ནཱམསྶ, པཉྩདྷཱ ནཱམརཱུཔིནཾ.

ཨེཀདྷཱ པུན རཱུཔསྶ, རཱུཔཾ ནཱམསྶ ཙེཀདྷཱ.

པཉྙཏྟིནཱམརཱུཔཱནི, ནཱམསྶ དུཝིདྷཱ དྭཡཾ;

དྭཡསྶ ནཝདྷཱ ཙེཏི, ཚབྦིདྷཱ པཙྩཡཱ ཀཐཾ.

༡༦. ཨནནྟརནིརུདྡྷཱ ཙིཏྟཙེཏསིཀཱ དྷམྨཱ པཊུཔྤནྣཱནཾ ཙིཏྟཙེཏསིཀཱནཾ དྷམྨཱནཾ ཨནནྟརསམནནྟརནཏྠིཝིགཏཝསེན, པུརིམཱནི ཛཝནཱནི པཙྪིམཱནཾ ཛཝནཱནཾ ཨཱསེཝནཝསེན, སཧཛཱཏཱ ཙིཏྟཙེཏསིཀཱ དྷམྨཱ ཨཉྙམཉྙཾ སམྤཡུཏྟཝསེནེཏི ཙ ཚདྷཱ ནཱམཾ ནཱམསྶ པཙྩཡོ ཧོཏི.

༡༧. ཧེཏུཛྷཱནངྒམགྒངྒཱནི སཧཛཱཏཱནཾ ནཱམརཱུཔཱནཾ ཧེཏཱདིཝསེན, སཧཛཱཏཱ ཙེཏནཱ སཧཛཱཏཱནཾ ནཱམརཱུཔཱནཾ, ནཱནཱཀྑཎིཀཱ ཙེཏནཱ ཀམྨཱབྷིནིབྦཏྟཱནཾ ནཱམརཱུཔཱནཾ ཀམྨཝསེན, ཝིཔཱཀཀྑནྡྷཱ ¶ ཨཉྙམཉྙཾ སཧཛཱཏཱནཾ རཱུཔཱནཾ ཝིཔཱཀཝསེནེཏི ¶ ཙ པཉྩདྷཱ ནཱམཾ ནཱམརཱུཔཱནཾ པཙྩཡོ ཧོཏི.

༡༨. པཙྪཱཛཱཏཱ ཙིཏྟཙེཏསིཀཱ དྷམྨཱ པུརེཛཱཏསྶ ཨིམསྶ ཀཱཡསྶ པཙྪཱཛཱཏཝསེནེཏི ཨེཀདྷཱཝ ནཱམཾ རཱུཔསྶ པཙྩཡོ ཧོཏི.

༡༩. ཚ ཝཏྠཱུནི པཝཏྟིཡཾ སཏྟནྣཾ ཝིཉྙཱཎདྷཱཏཱུནཾ པཉྩཱརམྨཎཱནི ཙ པཉྩཝིཉྙཱཎཝཱིཐིཡཱ པུརེཛཱཏཝསེནེཏི ཨེཀདྷཱཝ རཱུཔཾ ནཱམསྶ པཙྩཡོ ཧོཏི.

༢༠. ཨཱརམྨཎཝསེན ཨུཔནིསྶཡཝསེནེཏི ཙ དུཝིདྷཱ པཉྙཏྟིནཱམརཱུཔཱནི ནཱམསྶེཝ པཙྩཡཱ ཧོནྟི.

༢༡. ཏཏྠ རཱུཔཱདིཝསེན ཚབྦིདྷཾ ཧོཏི ཨཱརམྨཎཾ.

༢༢. ཨུཔནིསྶཡོ པན ཏིཝིདྷོ ཧོཏི – ཨཱརམྨཎཱུཔནིསྶཡོ ཨནནྟརཱུཔནིསྶཡོ པཀཏཱུཔནིསྶཡོ ཙེཏི.

༢༣. ཏཏྠ ཨཱརམྨཎམེཝ གརུཀཏཾ ཨཱརམྨཎཱུཔནིསྶཡོ.

༢༤. ཨནནྟརནིརུདྡྷཱ ཙིཏྟཙེཏསིཀཱ དྷམྨཱ ཨནནྟརཱུཔནིསྶཡོ.

༢༥. རཱགཱདཡོ པན དྷམྨཱ སདྡྷཱདཡོ ཙ སུཁཾ དུཀྑཾ པུགྒལོ བྷོཛནཾ ཨུཏུསེནཱསནཉྩ ཡཐཱརཧཾ ཨཛ྄ཛྷཏྟཉྩ བཧིདྡྷཱ ཙ ཀུསལཱདིདྷམྨཱནཾ, ཀམྨཾ ཝིཔཱཀཱནནྟི ཙ བཧུདྷཱ ཧོཏི པཀཏཱུཔནིསྶཡོ.

༢༦. ཨདྷིཔཏིསཧཛཱཏཨཉྙམཉྙནིསྶཡཨཱཧཱརཨིནྡྲིཡཝིཔྤཡུཏྟཨཏྠིཨཝིགཏཝསེནེཏི ཡཐཱརཧཾ ནཝདྷཱ ནཱམརཱུཔཱནི ནཱམརཱུཔཱནཾ པཙྩཡཱ བྷཝནྟི.

༢༧. ཏཏྠ ¶ གརུཀཏམཱརམྨཎཾ ཨཱརམྨཎཱདྷིཔཏིཝསེན ནཱམཱནཾ, སཧཛཱཏཱདྷིཔཏི ཙཏུབྦིདྷོཔི སཧཛཱཏཝསེན སཧཛཱཏཱནཾ ནཱམརཱུཔཱནནྟི ཙ དུཝིདྷོ ཧོཏི ཨདྷིཔཏིཔཙྩཡོ.

༢༨. ཙིཏྟཙེཏསིཀཱ དྷམྨཱ ¶ ཨཉྙམཉྙཾ སཧཛཱཏརཱུཔཱནཉྩ, མཧཱབྷཱུཏཱ ཨཉྙམཉྙཾ ཨུཔཱདཱརཱུཔཱནཉྩ, པཊིསནྡྷིཀྑཎེ ཝཏྠུཝིཔཱཀཱ ཨཉྙམཉྙནྟི ཙ ཏིཝིདྷོ ཧོཏི སཧཛཱཏཔཙྩཡོ.

༢༩. ཙིཏྟཙེཏསིཀཱ དྷམྨཱ ཨཉྙམཉྙཾ, མཧཱབྷཱུཏཱ ཨཉྙམཉྙཾ, པཊིསནྡྷིཀྑཎེ ཝཏྠུཝིཔཱཀཱ ཨཉྙམཉྙནྟི ཙ ཏིཝིདྷོ ཧོཏི ཨཉྙམཉྙཔཙྩཡོ.

༣༠. ཙིཏྟཙེཏསིཀཱ དྷམྨཱ ཨཉྙམཉྙཾ སཧཛཱཏརཱུཔཱནཉྩ, མཧཱབྷཱུཏཱ ཨཉྙམཉྙཾ ཨུཔཱདཱརཱུཔཱནཉྩ, ཚ ཝཏྠཱུནི སཏྟནྣཾ ཝིཉྙཱཎདྷཱཏཱུནནྟི ཙ ཏིཝིདྷོ ཧོཏི ནིསྶཡཔཙྩཡོ.

༣༡. ཀབལཱི༹ཀཱརོ ཨཱཧཱརོ ཨིམསྶ ཀཱཡསྶ, ཨརཱུཔིནོ ཨཱཧཱརཱ སཧཛཱཏཱནཾ ནཱམརཱུཔཱནནྟི ཙ དུཝིདྷོ ཧོཏི ཨཱཧཱརཔཙྩཡོ.

༣༢. པཉྩ པསཱདཱ པཉྩནྣཾ ཝིཉྙཱཎཱནཾ, རཱུཔཛཱིཝིཏིནྡྲིཡཾ ཨུཔཱདིནྣརཱུཔཱནཾ, ཨརཱུཔིནོ ཨིནྡྲིཡཱ སཧཛཱཏཱནཾ ནཱམརཱུཔཱནནྟི ཙ ཏིཝིདྷོ ཧོཏི ཨིནྡྲིཡཔཙྩཡོ.

༣༣. ཨོཀྐནྟིཀྑཎེ ཝཏྠུ ཝིཔཱཀཱནཾ, ཙིཏྟཙེཏསིཀཱ དྷམྨཱ སཧཛཱཏརཱུཔཱནཾ སཧཛཱཏཝསེན, པཙྪཱཛཱཏཱ ཙིཏྟཙེཏསིཀཱ དྷམྨཱ པུརེཛཱཏསྶ ཨིམསྶ ཀཱཡསྶ པཙྪཱཛཱཏཝསེན ཚ ཝཏྠཱུནི པཝཏྟིཡཾ སཏྟནྣཾ ཝིཉྙཱཎདྷཱཏཱུནཾ པུརེཛཱཏཝསེནེཏི ཙ ཏིཝིདྷོ ཧོཏི ཝིཔྤཡུཏྟཔཙྩཡོ.

༣༤. སཧཛཱཏཾ པུརེཛཱཏཾ, པཙྪཱཛཱཏཉྩ སབྦཐཱ.

ཀབལཱི༹ཀཱརོ ཨཱཧཱརོ, རཱུཔཛཱིཝིཏམིཙྩཡནྟི. –

པཉྩཝིདྷོ ཧོཏི ཨཏྠིཔཙྩཡོ ཨཝིགཏཔཙྩཡོ ཙ.

༣༥. ཨཱརམྨཎཱུཔནིསྶཡཀམྨཏྠིཔཙྩཡེསུ ¶ ཙ སབྦེཔི པཙྩཡཱ སམོདྷཱནཾ གཙྪནྟི.

༣༦. སཧཛཱཏརཱུཔནྟི ¶ པནེཏྠ སབྦཏྠཱཔི པཝཏྟེ ཙིཏྟསམུཊྛཱནཱནཾ, པཊིསནྡྷིཡཾ ཀཊཏྟཱརཱུཔཱནཉྩ ཝསེན དུཝིདྷཾ ཧོཏཱིཏི ཝེདིཏབྦཾ.

༣༧. ཨིཏི ཏེཀཱལིཀཱ དྷམྨཱ, ཀཱལམུཏྟཱ ཙ སམྦྷཝཱ.

ཨཛ྄ཛྷཏྟཉྩ བཧིདྡྷཱ ཙ, སངྑཏཱསངྑཏཱ ཏཐཱ;

པཉྙཏྟིནཱམརཱུཔཱནཾ, ཝསེན ཏིཝིདྷཱ ཋིཏཱ;

པཙྩཡཱ ནཱམ པཊྛཱནེ, ཙཏུཝཱིསཏི སབྦཐཱ.

༣༨. ཏཏྠ རཱུཔདྷམྨཱ རཱུཔཀྑནྡྷོཝ, ཙིཏྟཙེཏསིཀསངྑཱཏཱ ཙཏྟཱརོ ཨརཱུཔིནོ ཁནྡྷཱ, ནིབྦཱནཉྩེཏི པཉྩཝིདྷམྤི ཨརཱུཔནྟི ཙ ནཱམནྟི ཙ པཝུཙྩཏི.

པཉྙཏྟིབྷེདོ

༣༩. ཏཏོ ཨཝསེསཱ པཉྙཏྟི པན པཉྙཱཔིཡཏྟཱ པཉྙཏྟི, པཉྙཱཔནཏོ པཉྙཏྟཱིཏི ཙ དུཝིདྷཱ ཧོཏི.

༤༠. ཀཐཾ? ཏཾཏཾབྷཱུཏཝིཔརིཎཱམཱཀཱརམུཔཱདཱཡ ཏཐཱ ཏཐཱ པཉྙཏྟཱ བྷཱུམིཔབྦཏཱདིཀཱ, སམྦྷཱརསནྣིཝེསཱཀཱརམུཔཱདཱཡ གེཧརཐསཀཊཱདིཀཱ, ཁནྡྷཔཉྩཀམུཔཱདཱཡ པུརིསཔུགྒལཱདིཀཱ, ཙནྡཱཝཊྚནཱདིཀམུཔཱདཱཡ དིསཱཀཱལཱདིཀཱ, ཨསམྥུཊྛཱཀཱརམུཔཱདཱཡ ཀཱུཔགུཧཱདིཀཱ, ཏཾཏཾབྷཱུཏནིམིཏྟཾ བྷཱཝནཱཝིསེསཉྩ ཨུཔཱདཱཡ ཀསིཎནིམིཏྟཱདིཀཱ ཙེཏི ཨེཝམཱདིཔྤབྷེདཱ པན པརམཏྠཏོ ཨཝིཛྫམཱནཱཔི ཨཏྠཙྪཱཡཱཀཱརེན ཙིཏྟུཔྤཱདཱནམཱརམྨཎབྷཱུཏཱ ཏཾ ཏཾ ཨུཔཱདཱཡ ཨུཔནིདྷཱཡ ཀཱརཎཾ ཀཏྭཱ ཏཐཱ ཏཐཱ པརིཀཔྤིཡམཱནཱ སངྑཱཡཏི སམཉྙཱཡཏི ཝོཧརཱིཡཏི པཉྙཱཔཱིཡཏཱིཏི པཉྙཏྟཱིཏི པཝུཙྩཏི. ཨཡཾ པཉྙཏྟི པཉྙཱཔིཡཏྟཱ པཉྙཏྟི ནཱམ.

༤༡. པཉྙཱཔནཏོ པཉྙཏྟི པན ནཱམནཱམཀམྨཱདིནཱམེན པརིདཱིཔིཏཱ, སཱ ཝིཛྫམཱནཔཉྙཏྟི ཨཝིཛྫམཱནཔཉྙཏྟི, ཝིཛྫམཱནེན ¶ ཨཝིཛྫམཱནཔཉྙཏྟི, ཨཝིཛྫམཱནེན ཝིཛྫམཱནཔཉྙཏྟི ¶ , ཝིཛྫམཱནེན ཝིཛྫམཱནཔཉྙཏྟི, ཨཝིཛྫམཱནེན ཨཝིཛྫམཱནཔཉྙཏྟི ཙེཏི ཚབྦིདྷཱ ཧོཏི.

༤༢. ཏཏྠ ཡདཱ པན པརམཏྠཏོ ཝིཛྫམཱནཾ རཱུཔཝེདནཱདིཾ ཨེཏཱཡ པཉྙཱཔེནྟི, ཏདཱཡཾ ཝིཛྫམཱནཔཉྙཏྟི. ཡདཱ པན པརམཏྠཏོ ཨཝིཛྫམཱནཾ བྷཱུམིཔབྦཏཱདིཾ ཨེཏཱཡ པཉྙཱཔེནྟི, ཏདཱཡཾ ཨཝིཛྫམཱནཔཉྙཏྟཱིཏི པཝུཙྩཏི. ཨུབྷིནྣཾ པན ཝོམིསྶཀཝསེན སེསཱ ཡཐཱཀྐམཾ ཚལ༹བྷིཉྙོ, ཨིཏྠིསདྡོ, ཙཀྑུཝིཉྙཱཎཾ, རཱཛཔུཏྟོཏི ཙ ཝེདིཏབྦཱ.

༤༣. ཝཙཱིགྷོསཱནུསཱརེན, སོཏཝིཉྙཱཎཝཱིཐིཡཱ.

པཝཏྠཱནནྟརུཔྤནྣ-མནོདྭཱརསྶ གོཙརཱ.

ཨཏྠཱ ཡསྶཱནུསཱརེན, ཝིཉྙཱཡནྟི ཏཏོ པརཾ;

སཱཡཾ པཉྙཏྟི ཝིཉྙེཡྻཱ, ལོཀསངྐེཏནིམྨིཏཱ.

ཨིཏི ཨབྷིདྷམྨཏྠསངྒཧེ པཙྩཡསངྒཧཝིབྷཱགོ ནཱམ

ཨཊྛམོ པརིཙྪེདོ.

༩. ཀམྨཊྛཱནཔརིཙྪེདོ

༡. སམཐཝིཔསྶནཱནཾ, བྷཱཝནཱནམིཏོ པརཾ.

ཀམྨཊྛཱནཾ པཝཀྑཱམི, དུཝིདྷམྤི ཡཐཱཀྐམཾ.

སམཐཀམྨཊྛཱནཾ

༢. ཏཏྠ སམཐསངྒཧེ ཏཱཝ དས ཀསིཎཱནི, དས ཨསུབྷཱ, དས ཨནུསྶཏིཡོ, ཙཏསྶོ ཨཔྤམཉྙཱཡོ, ཨེཀཱ སཉྙཱ, ཨེཀཾ ཝཝཏྠཱནཾ, ཙཏྟཱརོ ཨཱརུཔྤཱ ཙེཏི སཏྟཝིདྷེན སམཐཀམྨཊྛཱནསངྒཧོ.

ཙརིཏབྷེདོ

༣. རཱགཙརིཏཱ ¶ ¶ དོསཙརིཏཱ མོཧཙརིཏཱ སདྡྷཱཙརིཏཱ བུདྡྷིཙརིཏཱ ཝིཏཀྐཙརིཏཱ ཙེཏི ཚབྦིདྷེན ཙརིཏསངྒཧོ.

བྷཱཝནཱབྷེདོ

༤. པརིཀམྨབྷཱཝནཱ ཨུཔཙཱརབྷཱཝནཱ ཨཔྤནཱབྷཱཝནཱ ཙེཏི ཏིསྶོ བྷཱཝནཱ.

ནིམིཏྟབྷེདོ

༥. པརིཀམྨནིམིཏྟཾ ཨུགྒཧནིམིཏྟཾ པཊིབྷཱགནིམིཏྟཉྩེཏི ཏཱིཎི ནིམིཏྟཱནི ཙ ཝེདིཏབྦཱནི.

༦. ཀཐཾ? པཐཝཱིཀསིཎཾ ཨཱཔོཀསིཎཾ ཏེཛོཀསིཎཾ ཝཱཡོཀསིཎཾ ནཱིལཀསིཎཾ པཱིཏཀསིཎཾ ལོཧིཏཀསིཎཾ ཨོདཱཏཀསིཎཾ ཨཱཀཱསཀསིཎཾ ཨཱལོཀཀསིཎཉྩེཏི ཨིམཱནི དས ཀསིཎཱནི ནཱམ.

༧. ཨུདྡྷུམཱཏཀཾ ཝིནཱིལཀཾ ཝིཔུབྦཀཾ ཝིཙྪིདྡཀཾ ཝིཀྑཱཡིཏཀཾ ཝིཀྑིཏྟཀཾ ཧཏཝིཀྑིཏྟཀཾ ལོཧིཏཀཾ པུལ༹ཝཀཾ ཨཊྛིཀཉྩེཏི ཨིམེ དས ཨསུབྷཱ ནཱམ.

༨. བུདྡྷཱནུསྶཏི དྷམྨཱནུསྶཏི སཾགྷཱནུསྶཏི སཱིལཱནུསྶཏི ཙཱགཱནུསྶཏི དེཝཏཱནུསྶཏི ཨུཔསམཱནུསྶཏི མརཎཱནུསྶཏི ཀཱཡགཏཱསཏི ཨཱནཱཔཱནསྶཏི ཙེཏི ཨིམཱ དས ཨནུསྶཏིཡོ ནཱམ.

༩. མེཏྟཱ ཀརུཎཱ མུདིཏཱ ཨུཔེཀྑཱ ཙེཏི ཨིམཱ ཙཏསྶོ ཨཔྤམཉྙཱཡོ ནཱམ, བྲཧྨཝིཧཱརོཏི ཙ པཝུཙྩཏི.

༡༠. ཨཱཧཱརེཔཊིཀཱུལསཉྙཱ ཨེཀཱ སཉྙཱ ནཱམ.

༡༡. ཙཏུདྷཱཏུཝཝཏྠཱནཾ ¶ ཨེཀཾ ཝཝཏྠཱནཾ ནཱམ.

༡༢. ཨཱཀཱསཱནཉྩཱཡཏནཱདཡོ ¶ ཙཏྟཱརོ ཨཱརུཔྤཱ ནཱམཱཏི སབྦཐཱཔི སམཐནིདྡེསེ ཙཏྟཱལཱིས ཀམྨཊྛཱནཱནི བྷཝནྟི.

སཔྤཱཡབྷེདོ

༡༣. ཙརིཏཱསུ པན དས ཨསུབྷཱ ཀཱཡགཏཱསཏིསངྑཱཏཱ ཀོཊྛཱསབྷཱཝནཱ ཙ རཱགཙརིཏསྶ སཔྤཱཡཱ.

༡༤. ཙཏསྶོ ཨཔྤམཉྙཱཡོ ནཱིལཱདཱིནི ཙ ཙཏྟཱརི ཀསིཎཱནི དོསཙརིཏསྶ.

༡༥. ཨཱནཱཔཱནཾ མོཧཙརིཏསྶ ཝིཏཀྐཙརིཏསྶ ཙ,

༡༦. བུདྡྷཱནུསྶཏིཨཱདཡོ ཚ སདྡྷཱཙརིཏསྶ.

༡༧. མརཎཨུཔསམསཉྙཱཝཝཏྠཱནཱནི བུདྡྷིཙརིཏསྶ.

༡༨. སེསཱནི པན སབྦཱནིཔི ཀམྨཊྛཱནཱནི སབྦེསམྤི སཔྤཱཡཱནི, ཏཏྠཱཔི ཀསིཎེསུ པུཐུལཾ མོཧཙརིཏསྶ, ཁུདྡཀཾ ཝིཏཀྐཙརིཏསྶེཝཱཏི.

ཨཡམེཏྠ སཔྤཱཡབྷེདོ.

བྷཱཝནཱབྷེདོ

༡༩. བྷཱཝནཱསུ སབྦཏྠཱཔི པརིཀམྨབྷཱཝནཱ ལབྦྷཏེཝ, བུདྡྷཱནུསྶཏིཨཱདཱིསུ ཨཊྛསུ སཉྙཱཝཝཏྠཱནེསུ ཙཱཏི དསསུཀམྨཊྛཱནེསུ ཨུཔཙཱརབྷཱཝནཱཝ སམྤཛྫཏི, ནཏྠི ཨཔྤནཱ.

༢༠. སེསེསུ པན སམཏིཾསཀམྨཊྛཱནེསུ ཨཔྤནཱབྷཱཝནཱཔི སམྤཛྫཏི.

༢༡. ཏཏྠཱཔི ¶ དས ཀསིཎཱནི ཨཱནཱཔཱནཉྩ པཉྩཀཛ྄ཛྷཱནིཀཱནི.

༢༢. དས ¶ ཨསུབྷཱ ཀཱཡགཏཱསཏི ཙ པཋམཛ྄ཛྷཱནིཀཱ.

༢༣. མེཏྟཱདཡོ ཏཡོ ཙཏུཀྐཛ྄ཛྷཱནིཀཱ.

༢༤. ཨུཔེཀྑཱ པཉྩམཛ྄ཛྷཱནིཀཱཏི ཚབྦཱིསཏི རཱུཔཱཝཙརཛ྄ཛྷཱནིཀཱནི ཀམྨཊྛཱནཱནི.

༢༥. ཙཏྟཱརོ པན ཨཱརུཔྤཱ ཨཱརུཔྤཛ྄ཛྷཱནིཀཱཏི.

ཨཡམེཏྠ བྷཱཝནཱབྷེདོ.

གོཙརབྷེདོ

༢༦. ནིམིཏྟེསུ པན པརིཀམྨནིམིཏྟཾ ཨུགྒཧནིམིཏྟཉྩ སབྦཏྠཱཔི ཡཐཱརཧཾ པརིཡཱཡེན ལབྦྷནྟེཝ.

༢༧. པཊིབྷཱགནིམིཏྟཾ པན ཀསིཎཱསུབྷཀོཊྛཱསཨཱནཱཔཱནེསྭེཝ ལབྦྷཏི, ཏཏྠ ཧི པཊིབྷཱགནིམིཏྟམཱརབྦྷ ཨུཔཙཱརསམཱདྷི ཨཔྤནཱསམཱདྷི ཙ པཝཏྟནྟི.

༢༨. ཀཐཾ? ཨཱདིཀམྨིཀསྶ ཧི པཐཝཱིམཎྜལཱདཱིསུ ནིམིཏྟཾ ཨུགྒཎྷནྟསྶ ཏམཱརམྨཎཾ པརིཀམྨནིམིཏྟནྟི པཝུཙྩཏི, སཱ ཙ བྷཱཝནཱ པརིཀམྨབྷཱཝནཱ ནཱམ.

༢༩. ཡདཱ པན ཏཾ ནིམིཏྟཾ ཙིཏྟེན སམུགྒཧིཏཾ ཧོཏི, ཙཀྑུནཱ པསྶནྟསྶེཝ མནོདྭཱརསྶ ཨཱཔཱཐམཱགཏཾ, ཏདཱ ཏམེཝཱརམྨཎཾ ཨུགྒཧནིམིཏྟཾ ནཱམ, སཱ ཙ བྷཱཝནཱ སམཱདྷིཡཏི.

༣༠. ཏཐཱ སམཱཧིཏསྶ པནེཏསྶ ཏཏོ པརཾ ཏསྨིཾ ཨུགྒཧནིམིཏྟེ པརིཀམྨསམཱདྷིནཱ བྷཱཝནམནུཡུཉྫནྟསྶ ཡདཱ ཏཔྤཊིབྷཱགཾ ཝཏྠུདྷམྨཝིམུཙྩིཏཾ པཉྙཏྟིསངྑཱཏཾ བྷཱཝནཱམཡམཱརམྨཎཾ ཙིཏྟེ སནྣིསནྣཾ སམཔྤིཏཾ ཧོཏི, ཏདཱ ཏཾ པཊིབྷཱགནིམིཏྟཾ སམུཔྤནྣནྟི པཝུཙྩཏི.

༣༡. ཏཏོ ¶ པཊྛཱཡ པརིཔནྠཝིཔྤཧཱིནཱ ཀཱམཱཝཙརསམཱདྷིསངྑཱཏཱ ཨུཔཙཱརབྷཱཝནཱ ནིཔྥནྣཱ ནཱམ ཧོཏི.

༣༢. ཏཏོ ¶ པརཾ ཏམེཝ པརིབྷཱགནིམིཏྟཾ ཨུཔཙཱརསམཱདྷིནཱ སམཱསེཝནྟསྶ རཱུཔཱཝཙརཔཋམཛ྄ཛྷཱནམཔྤེཏི.

༣༣. ཏཏོ པརཾ ཏམེཝ པཋམཛ྄ཛྷཱནཾ ཨཱཝཛྫནཾ སམཱཔཛྫནཾ ཨདྷིཊྛཱནཾ ཝུཊྛཱནཾ པཙྩཝེཀྑཎཱ ཙེཏི ཨིམཱཧི པཉྩཧི ཝསིཏཱཧི ཝསཱིབྷཱུཏཾ ཀཏྭཱ ཝིཏཀྐཱདིཀམོལཱ༹རིཀངྒཾ པཧཱནཱཡ ཝིཙཱརཱདིསུཁུམངྒུཔཏྟིཡཱ པདཧཏོ ཡཐཱཀྐམཾ དུཏིཡཛ྄ཛྷཱནཱདཡོ ཡཐཱརཧམཔྤེནྟི.

༣༤. ཨིཙྩེཝཾ པཐཝཱིཀསིཎཱདཱིསུ དྭཱཝཱིསཏིཀམྨཊྛཱནེསུ པཊིབྷཱགནིམིཏྟམུཔལབྦྷཏི.

༣༥. ཨཝསེསེསུ པན ཨཔྤམཉྙཱ སཏྟཔཉྙཏྟིཡཾ པཝཏྟནྟི.

༣༦. ཨཱཀཱསཝཛྫིཏཀསིཎེསུ པན ཡཾ ཀིཉྩི ཀསིཎཾ ཨུགྒྷཱཊེཏྭཱ ལདྡྷམཱཀཱསཾ ཨནནྟཝསེན པརིཀམྨཾ ཀརོནྟསྶ པཋམཱརུཔྤམཔྤེཏི.

༣༧. ཏམེཝ པཋམཱརུཔྤཝིཉྙཱཎཾ ཨནནྟཝསེན པརིཀམྨཾ ཀརོནྟསྶ དུཏིཡཱརུཔྤམཔྤེཏི.

༣༨. ཏམེཝ པཋམཱརུཔྤཝིཉྙཱཎཱབྷཱཝཾ པན ‘‘ནཏྠི ཀིཉྩཱི’’ཏི པརིཀམྨཾ ཀརོནྟསྶ ཏཏིཡཱརུཔྤམཔྤེཏི.

༣༩. ཏཏིཡཱརུཔྤཾ ‘‘སནྟམེཏཾ, པཎཱིཏམེཏ’’ནྟི པརིཀམྨཾ ཀརོནྟསྶ ཙཏུཏྠཱརུཔྤམཔྤེཏི.

༤༠. ཨཝསེསེསུ ཙ དསསུ ཀམྨཊྛཱནེསུ བུདྡྷགུཎཱདིཀམཱརམྨཎམཱརབྦྷ པརིཀམྨཾ ཀཏྭཱ ཏསྨིཾ ནིམིཏྟེ སཱདྷུཀམུགྒཧིཏེ ཏཏྠེཝ པརིཀམྨཉྩ སམཱདྷིཡཏི, ཨུཔཙཱརོ ཙ སམྤཛྫཏི.

༤༡. ཨབྷིཉྙཱཝསེན ¶ པཝཏྟམཱནཾ པན རཱུཔཱཝཙརཔཉྩམཛ྄ཛྷཱནཾ ཨབྷིཉྙཱཔཱདཀཔཉྩམཛ྄ཛྷཱནཱ ཝུཊྛཧིཏྭཱ ཨདྷིཊྛེཡྻཱདིཀམཱཝཛྫེཏྭཱ པརིཀམྨཾ ཀརོནྟསྶ རཱུཔཱདཱིསུ ཨཱརམྨཎེསུ ཡཐཱརཧམཔྤེཏི.

༤༢. ཨབྷིཉྙཱ ¶ ཙ ནཱམ –

ཨིདྡྷིཝིདྷཾ དིབྦསོཏཾ, པརཙིཏྟཝིཛཱནནཱ;

པུབྦེནིཝཱསཱནུསྶཏི, དིབྦཙཀྑཱུཏི པཉྩདྷཱ.

ཨཡམེཏྠ གོཙརབྷེདོ.

ནིཊྛིཏོ ཙ སམཐཀམྨཊྛཱནནཡོ.

ཝིཔསྶནཱཀམྨཊྛཱནཾ

ཝིསུདྡྷིབྷེདོ

༤༣. ཝིཔསྶནཱཀམྨཊྛཱནེ པན སཱིལཝིསུདྡྷི ཙིཏྟཝིསུདྡྷི དིཊྛིཝིསུདྡྷི ཀངྑཱཝིཏརཎཝིསུདྡྷི མགྒཱམགྒཉཱཎདསྶནཝིསུདྡྷི པཊིཔདཱཉཱཎདསྶནཝིསུདྡྷི ཉཱཎདསྶནཝིསུདྡྷི ཙེཏི སཏྟཝིདྷེན ཝིསུདྡྷིསངྒཧོ.

༤༤. ཨནིཙྩལཀྑཎཾ དུཀྑལཀྑཎཾ ཨནཏྟལཀྑཎཉྩེཏི ཏཱིཎི ལཀྑཎཱནི.

༤༥. ཨནིཙྩཱནུཔསྶནཱ དུཀྑཱནུཔསྶནཱ ཨནཏྟཱནུཔསྶནཱ ཙེཏི ཏིསྶོ ཨནུཔསྶནཱ.

༤༦. སམྨསནཉཱཎཾ ཨུདཡབྦཡཉཱཎཾ བྷངྒཉཱཎཾ བྷཡཉཱཎཾ ཨཱདཱིནཝཉཱཎཾ ནིབྦིདཱཉཱཎཾ མུཙྩིཏུཀམྱཏཱཉཱཎཾ པཊིསངྑཱཉཱཎཾ སངྑཱརུཔེཀྑཱཉཱཎཾ ཨནུལོམཉཱཎཉྩེཏི དས ཝིཔསྶནཱཉཱཎཱནི.

༤༧. སུཉྙཏོ ཝིམོཀྑོ, ཨནིམིཏྟོ ཝིམོཀྑོ, ཨཔྤཎིཧིཏོ ཝིམོཀྑོ ཙེཏི ཏཡོ ཝིམོཀྑཱ.

༤༨. སུཉྙཏཱནུཔསྶནཱ ¶ ཨནིམིཏྟཱནུཔསྶནཱ ཨཔྤཎིཧིཏཱནུཔསྶཱནཱ ཙེཏི ཏཱིཎི ཝིམོཀྑམུཁཱནི ཙ ཝེདིཏབྦཱནི.

༤༩. ཀཐཾ ¶ ? པཱཏིམོཀྑསཾཝརསཱིལཾ ཨིནྡྲིཡསཾཝརསཱིལཾ ཨཱཛཱིཝཔཱརིསུདྡྷིསཱིལཾ པཙྩཡསནྣིསྶིཏསཱིལཉྩེཏི ཙཏུཔཱརིསུདྡྷིསཱིལཾ སཱིལཝིསུདྡྷི ནཱམ.

༥༠. ཨུཔཙཱརསམཱདྷི ཨཔྤནཱསམཱདྷི ཙེཏི དུཝིདྷོཔི སམཱདྷི ཙིཏྟཝིསུདྡྷི ནཱམ.

༥༡. ལཀྑཎརསཔཙྩུཔཊྛཱནཔདཊྛཱནཝསེན ནཱམརཱུཔ པརིགྒཧོ དིཊྛིཝིསུདྡྷི ནཱམ.

༥༢. ཏེསམེཝ ཙ ནཱམརཱུཔཱནཾ པཙྩཡཔརིགྒཧོ ཀངྑཱཝིཏརཎཝིསུདྡྷི ནཱམ.

༥༣. ཏཏོ པརཾ པན ཏཐཱཔརིགྒཧིཏེསུ སཔྤཙྩཡེསུ ཏེབྷཱུམཀསངྑཱརེསུ ཨཏཱིཏཱདིབྷེདབྷིནྣེསུ ཁནྡྷཱདིནཡམཱརབྦྷ ཀལཱཔཝསེན སངྑིཔིཏྭཱ ‘‘ཨནིཙྩཾ ཁཡཊྛེན, དུཀྑཾ བྷཡཊྛེན, ཨནཏྟཱ ཨསཱརཀཊྛེནཱ’’ཏི ཨདྡྷཱནཝསེན སནྟཏིཝསེན ཁཎཝསེན ཝཱ སམྨསནཉཱཎེན ལཀྑཎཏྟཡཾ སམྨསནྟསྶ ཏེསྭེཝ པཙྩཡཝསེན ཁཎཝསེན ཙ ཨུདཡབྦཡཉཱཎེན ཨུདཡབྦཡཾ སམནུཔསྶནྟསྶ ཙ –

‘‘ཨོབྷཱསོ པཱིཏི པསྶདྡྷི, ཨདྷིམོཀྑོ ཙ པགྒཧོ;

སུཁཾ ཉཱཎམུཔཊྛཱནམུཔེཀྑཱ ཙ ནིཀནྟི ཙེ’’ཏི. –

ཨོབྷཱསཱདིཝིཔསྶནུཔཀྐིལེསཔརིཔནྠཔརིགྒཧཝསེན མགྒཱམགྒལཀྑཎཝཝཏྠཱནཾ མགྒཱམགྒཉཱཎདསྶནཝིསུདྡྷི ནཱམ.

༥༤. ཏཐཱ པརིཔནྠཝིམུཏྟསྶ པན ཏསྶ ཨུདཡབྦཡཉཱཎཏོ པཊྛཱཡ ཡཱ ཝཱནུལོམཱ ཏིལཀྑཎཾ ཝིཔསྶནཱཔརམྤརཱཡ པཊིཔཛྫནྟསྶ ནཝ ཝིཔསྶནཱཉཱཎཱནི པཊིཔདཱཉཱཎདསྶནཝིསུདྡྷི ནཱམ.

༥༥. ཏསྶེཝཾ པཊིཔཛྫནྟསྶ ¶ པན ཝིཔསྶནཱཔརིཔཱཀམཱགམྨ ‘‘ཨིདཱནི ཨཔྤནཱ ཨུཔྤཛྫིསྶཏཱི’’ཏི བྷཝངྒཾ ཝོཙྪིཛྫིཏྭཱ ཨུཔྤནྣམནོདྭཱརཱཝཛྫནཱནནྟརཾ དྭེ ཏཱིཎི ཝིཔསྶནཱཙིཏྟཱནི ཡཾ ཀིཉྩི ཨནིཙྩཱདིལཀྑཎམཱརབྦྷ པརིཀམྨོཔཙཱརཱནུལོམནཱམེན པཝཏྟནྟི.

༥༦. ཡཱ ¶ སིཁཱཔྤཏྟཱ, སཱ སཱནུལོམཱ སངྑཱརུཔེཀྑཱ ཝུཊྛཱནགཱམིནིཝིཔསྶནཱཏི ཙ པཝུཙྩཏི.

༥༧. ཏཏོ པརཾ གོཏྲབྷུཙིཏྟཾ ནིབྦཱནམཱལམྦིཏྭཱ པུཐུཛྫནགོཏྟམབྷིབྷཝནྟཾ, ཨརིཡགོཏྟམབྷིསམྦྷོནྟཉྩ པཝཏྟཏི.

༥༨. ཏསྶཱནནྟརམེཝ མགྒོ དུཀྑསཙྩཾ པརིཛཱནནྟོ སམུདཡསཙྩཾ པཛཧནྟོ, ནིརོདྷསཙྩཾ སཙྪིཀརོནྟོ, མགྒསཙྩཾ བྷཱཝནཱཝསེན ཨཔྤནཱཝཱིཐིམོཏརཏི.

༥༩. ཏཏོ པརཾ དྭེ ཏཱིཎི ཕལཙིཏྟཱནི པཝཏྟིཏྭཱ བྷཝངྒཔཱཏོཝ ཧོཏི, པུན བྷཝངྒཾ ཝོཙྪིནྡིཏྭཱ པཙྩཝེཀྑཎཉཱཎཱནི པཝཏྟནྟི.

༦༠. མགྒཾ ཕལཉྩ ནིབྦཱནཾ, པཙྩཝེཀྑཏི པཎྜིཏོ.

ཧཱིནེ ཀིལེསེ སེསེ ཙ, པཙྩཝེཀྑཏི ཝཱན ཝཱ.

ཚབྦིསུདྡྷིཀམེནེཝཾ, བྷཱཝེཏབྦོ ཙཏུབྦིདྷོ;

ཉཱཎདསྶནཝིསུདྡྷི, ནཱམ མགྒོ པཝུཙྩཏི.

ཨཡམེཏྠ ཝིསུདྡྷིབྷེདོ.

ཝིམོཀྑབྷེདོ

༦༡. ཏཏྠ ཨནཏྟཱནུཔསྶནཱ ཨཏྟཱབྷིནིཝེསཾ མུཉྩནྟཱི སུཉྙཏཱནུཔསྶནཱ ནཱམ ཝིམོཀྑམུཁཾ ཧོཏི.

༦༢. ཨནིཙྩཱནུཔསྶནཱ ¶ ཝིཔལླཱསནིམིཏྟཾ མུཉྩནྟཱི ཨནིམིཏྟཱནུཔསྶནཱ ནཱམ.

༦༣. དུཀྑཱནུཔསྶནཱ ¶ ཏཎྷཱཔཎིདྷིཾ མུཉྩནྟཱི ཨཔྤཎིཧིཏཱནུཔསྶནཱ ནཱམ.

༦༤. ཏསྨཱ ཡདི ཝུཊྛཱནགཱམིནིཝིཔསྶནཱ ཨནཏྟཏོ ཝིཔསྶཏི, སུཉྙཏོ ཝིམོཀྑོ ནཱམ ཧོཏི མགྒོ.

༦༥. ཡདི ཨནིཙྩཏོ ཝིཔསྶཏི, ཨནིམིཏྟོ ཝིམོཀྑོ ནཱམ.

༦༦. ཡདི དུཀྑཏོ ཝིཔསྶཏི, ཨཔྤཎིཧིཏོ ཝིམོཀྑོ ནཱམཱཏི ཙ མགྒོ ཝིཔསྶནཱགམནཝསེན ཏཱིཎི ནཱམཱནི ལབྷཏི, ཏཐཱ ཕལཉྩ མགྒཱགམནཝསེན མགྒཝཱིཐིཡཾ.

༦༧. ཕལསམཱཔཏྟིཝཱིཐིཡཾ པན ཡཐཱཝུཏྟནཡེན ཝིཔསྶནྟཱནཾ ཡཐཱསཀཕལམུཔྤཛྫམཱནམྤི ཝིཔསྶནཱགམནཝསེནེཝ སུཉྙཏཱདིཝིམོཀྑོཏི ཙ པཝུཙྩཏི, ཨཱརམྨཎཝསེན པན སརསཝསེན ཙ ནཱམཏྟཡཾ སབྦཏྠ སབྦེསམྤི སམམེཝ ཙ.

ཨཡམེཏྠ ཝིམོཀྑབྷེདོ.

པུགྒལབྷེདོ

༦༨. ཨེཏྠ པན སོཏཱཔཏྟིམགྒཾ བྷཱཝེཏྭཱ དིཊྛིཝིཙིཀིཙྪཱཔཧཱནེན པཧཱིནཱཔཱཡགམནོ སཏྟཀྑཏྟུཔརམོ སོཏཱཔནྣོ ནཱམ ཧོཏི.

༦༩. སཀདཱགཱམིམགྒཾ བྷཱཝེཏྭཱ རཱགདོསམོཧཱནཾ ཏནུཀརཏྟཱ སཀདཱགཱམཱི ནཱམ ཧོཏི སཀིདེཝ ཨིམཾ ལོཀཾ ཨཱགནྟྭཱ.

༧༠. ཨནཱགཱམིམགྒཾ ¶ བྷཱཝེཏྭཱ ཀཱམརཱགབྱཱཔཱདཱནམནཝསེསཔྤཧཱནེན ཨནཱགཱམཱི ནཱམ ཧོཏི ཨནཱགནྟྭཱ ཨིཏྠཏྟཾ.

༧༡. ཨརཧཏྟམགྒཾ བྷཱཝེཏྭཱ ཨནཝསེསཀིལེསཔྤཧཱནེན ཨརཧཱ ནཱམ ཧོཏི ཁཱིཎཱསཝོ ལོཀེ ཨགྒདཀྑིཎེཡྻོཏི.

ཨཡམེཏྠ པུགྒལབྷེདོ.

སམཱཔཏྟིབྷེདོ

༧༢. ཕལསམཱཔཏྟིཝཱིཐིཡཾ ¶ པནེཏྠ སབྦེསམྤི ཡཐཱསཀཕལཝསེན སཱདྷཱརཎཱཝ.

༧༣. ནིརོདྷསམཱཔཏྟིསམཱཔཛྫནཾ པན ཨནཱགཱམཱིནཉྩེཝ ཨརཧནྟཱནཉྩ ལབྦྷཏི, ཏཏྠ ཡཐཱཀྐམཾ པཋམཛ྄ཛྷཱནཱདིམཧགྒཏསམཱཔཏྟིཾ སམཱཔཛྫིཏྭཱ ཝུཊྛཱཡ ཏཏྠ གཏེ སངྑཱརདྷམྨེ ཏཏྠ ཏཏྠེཝ ཝིཔསྶནྟོ ཡཱཝ ཨཱཀིཉྩཉྙཱཡཏནཾ གནྟྭཱ ཏཏོ པརཾ ཨདྷིཊྛེཡྻཱདིཀཾ པུབྦཀིཙྩཾ ཀཏྭཱ ནེཝསཉྙཱནཱསཉྙཱཡཏནཾ སམཱཔཛྫཏི, ཏསྶ དྭིནྣཾ ཨཔྤནཱཛཝནཱནཾ པརཏོ ཝོཙྪིཛྫཏི ཙིཏྟསནྟཏི, ཏཏོ ནིརོདྷསམཱཔནྣོ ནཱམ ཧོཏི.

༧༤. ཝུཊྛཱནཀཱལེ པན ཨནཱགཱམིནོ ཨནཱགཱམིཕལཙིཏྟཾ, ཨརཧཏོ ཨརཧཏྟཕལཙིཏྟཾ ཨེཀཝཱརམེཝ པཝཏྟིཏྭཱ བྷཝངྒཔཱཏོ ཧོཏི, ཏཏོ པརཾ པཙྩཝེཀྑཎཉཱཎཾ པཝཏྟཏི.

ཨཡམེཏྠ སམཱཔཏྟིབྷེདོ.

ནིཊྛིཏོ ཙ ཝིཔསྶནཱཀམྨཊྛཱནནཡོ.

ཨུཡྻོཛནཾ

༧༥. བྷཱཝེཏབྦཾ ¶ པནིཙྩེཝཾ, བྷཱཝནཱདྭཡམུཏྟམཾ.

པཊིཔཏྟིརསསྶཱདཾ, པཏྠཡནྟེན སཱསནེཏི.

ཨིཏི ཨབྷིདྷམྨཏྠསངྒཧེ ཀམྨཊྛཱནསངྒཧཝིབྷཱགོ ནཱམ

ནཝམོ པརིཙྪེདོ.

ནིགམནཾ

(ཀ) ཙཱརིཏྟསོབྷིཏཝིསཱལཀུལོདཡེན ¶ ,

སདྡྷཱབྷིཝུཌྜྷཔརིསུདྡྷགུཎོདཡེན;

ནམྤཝ྄ཧཡེན པཎིདྷཱཡ པརཱནུཀམྤཾ,

ཡཾ པཏྠིཏཾ པཀརཎཾ པརིནིཊྛིཏཾ ཏཾ.

(ཁ) པུཉྙེན ཏེན ཝིཔུལེན ཏུ མཱུལསོམཾ;

དྷཉྙཱདྷིཝཱསམུདིཏོདིཏམཱཡུཀནྟཾ;

པཉྙཱཝདཱཏགུཎསོབྷིཏལཛྫིབྷིཀྑཱུ,

མཉྙནྟུ པུཉྙཝིབྷཝོདཡམངྒལཱཡ.

ཨིཏི ཨནུརུདྡྷཱཙརིཡེན རཙིཏཾ

ཨབྷིདྷམྨཏྠསངྒཧཾ ནཱམ པཀརཎཾ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ.

ཨབྷིདྷམྨཏྠཝིབྷཱཝིནཱིཊཱིཀཱ

གནྠཱརམྦྷཀཐཱ

(ཀ) ཝིསུདྡྷཀརུཎཱཉཱཎཾ ¶ ¶ , བུདྡྷཾ སམྦུདྡྷཔཱུཛིཏཾ;

དྷམྨཾ སདྡྷམྨསམྦྷཱུཏཾ, ནཏྭཱ སཾགྷཾ ནིརངྒཎཾ.

(ཁ) སཱརིཔུཏྟཾ མཧཱཐེརཾ, པརིཡཏྟིཝིསཱརདཾ;

ཝནྡིཏྭཱ སིརསཱ དྷཱིརཾ, གརུཾ གཱརཝབྷཱཛནཾ.

(ག) ཝཎྞཡིསྶཾ སམཱསེན, ཨབྷིདྷམྨཏྠསངྒཧཾ;

ཨཱབྷིདྷམྨིཀབྷིཀྑཱུནཾ, པརཾ པཱིཏིཝིཝཌྜྷནཾ.

(གྷ) པོརཱཎེཧི ¶ ཨནེཀཱཔི, ཀཏཱ ཡཱ པན ཝཎྞནཱ;

ན ཏཱཧི སཀྐཱ སབྦཏྠ, ཨཏྠོ ཝིཉྙཱཏཝེ ཨིདྷ.

(ང) ཏསྨཱ ལཱིནཔདཱནེཏྠ, སཱདྷིཔྤཱཡམཧཱཔཡཾ;

ཝིབྷཱཝེནྟོ སམཱསེན, རཙཡིསྶཱམི ཝཎྞནནྟི.

གནྠཱརམྦྷཀཐཱཝཎྞནཱ

༡. པརམཝིཙིཏྟནཡསམནྣཱགཏཾ སཀསམཡསམཡནྟརགཧནཝིགྒཱཧཎསམཏྠཾ སུཝིམལཝིཔུལཔཉྙཱཝེཡྻཏྟིཡཛནནཾ པཀརཎམིདམཱརབྷནྟོཡམཱཙརིཡོ པཋམཾ ཏཱཝ རཏནཏྟཡཔཎཱམཱབྷིདྷེཡྻ ཀརཎཔྤཀཱརཔཀརཎཱབྷིདྷཱནཔཡོཛནཱནི དསྶེཏུཾ ‘‘སམྨཱསམྦུདྡྷ’’ནྟྱཱདིམཱཧ.

ཨེཏྠ ¶ ཧི ‘‘སམྨཱསམྦུདྡྷ…པེ… ཨབྷིཝཱདིཡཱ’’ཏི ཨིམིནཱ རཏནཏྟཡཔཎཱམོ ཝུཏྟོ, ཨབྷིདྷམྨཏྠསངྒཧ’’ནྟི ཨེཏེན ཨབྷིདྷེཡྻཀརཎཔྤཀཱརཔཀརཎཱབྷིདྷཱནཱནི ཨབྷིདྷམྨཏྠཱནཾ ཨིདྷ སངྒཧེཏབྦབྷཱཝདསྶནེན ཏེསཾ ཨིམིནཱ སམུདིཏེན པཊིཔཱདེཏབྦབྷཱཝདཱིཔནཏོ, ཨེཀཏྠ སངྒཡ྄ཧ ཀཐནཱཀཱརདཱིཔནཏོ, ཨཏྠཱནུགཏསམཉྙཱཔརིདཱིཔནཏོ ཙ. པཡོཛནཾ པན སངྒཧཔདེན སཱམཏྠིཡཏོ དསྶིཏམེཝ ཨབྷིདྷམྨཏྠཱནཾ ཨེཀཏྠ སངྒཧེ སཏི ཏདུགྒཧཔརིཔུཙྪཱདིཝསེན ཏེསཾ སརཱུཔཱཝབོདྷསྶ, ཏམྨཱུལིཀཱཡ ཙ དིཊྛདྷམྨིཀསམྤརཱཡིཀཏྠསིདྡྷིཡཱ ཨནཱཡཱསེན སཾསིཛ྄ཛྷནཏོ.

ཏཏྠ རཏནཏྟཡཔཎཱམཔྤཡོཛནཾ ཏཱཝ བཧུདྷཱ པཔཉྩེནྟི ཨཱཙརིཡཱ, ཝིསེསཏོ པན ཨནྟརཱཡནིཝཱརཎཾ པཙྩཱསཱིསནྟི. ཏཐཱ ཧི ཝུཏྟཾ སངྒཧཀཱརེཧི ‘‘ཏསྶཱནུབྷཱཝེན ཧཏནྟརཱཡོ’’ཏི (པཱརཱ. ཨཊྛ. ༡.གནྠཱརམྦྷཀཐཱ). རཏནཏྟཡཔཎཱམོ ཧི ཨཏྠཏོ པཎཱམཀིརིཡཱབྷིནིཔྥཱདིཀཱ ཀུསལཙེཏནཱ, སཱ ཙ ཝནྡནེཡྻཝནྡཀཱནཾ ཁེཏྟཛ྄ཛྷཱསཡསམྤདཱཧི དིཊྛདྷམྨཝེདནཱིཡབྷཱུཏཱ ཡཐཱལདྡྷསམྤཏྟིནིམིཏྟཀསྶ ཀམྨསྶ ཨནུབལཔྤདཱནཝསེན ཏནྣིབྦཏྟིཏཝིཔཱཀསནྟཏིཡཱ ཨནྟརཱཡཀརཱནི ཨུཔཔཱིལ༹ཀཨུཔཙྪེདཀཀམྨཱནི པཊིབཱཧིཏྭཱ ཏནྣིདཱནཱནཾ ཡཐཱདྷིཔྤེཏསིདྡྷིཝིབནྡྷཀཱནཾ རོགཱདིཨནྟརཱཡཱནམཔྤཝཏྟིཾ སཱདྷེཏི. ཏསྨཱ པཀརཎཱརམྦྷེ རཏནཏྟཡཔཎཱམཀརཎཾ ཡཐཱརདྡྷཔཀརཎསྶ ཨནནྟརཱཡེན པརིསམཱཔནཏྠཉྩེཝ སོཏཱུནཉྩ ཝནྡནཱཔུབྦངྒམཱཡ པཊིཔཏྟིཡཱ ཨནནྟརཱཡེན ཨུགྒཧཎདྷཱརཎཱདིསཾསིཛ྄ཛྷནཏྠཉྩ. ཨབྷིདྷེཡྻཀཐནཾ པན ཝིདིཏཱབྷིདྷེཡྻསྶེཝ གནྠསྶ ཝིཉྙཱུཧི ཨུགྒཧཎཱདིཝསེན ¶ པཊིཔཛྫིཏབྦབྷཱཝཏོ. ཀརཎཔྤཀཱརཔྤཡོཛནསནྡསྶནཱནི ཙ སོཏུཛནསམུསྶཱཧཛནནཏྠཾ. ཨབྷིདྷཱནཀཐནཾ པན ཝོཧཱརསུཁཏྠནྟི ཨཡམེཏྠ སམུདཱཡཏྠོ. ཨཡཾ པན ཨཝཡཝཏྠོ ¶ – སསདྡྷམྨགཎུཏྟམཾ ཨཏུལཾ སམྨཱསམྦུདྡྷཾ ཨབྷིཝཱདིཡ ཨབྷིདྷམྨཏྠསངྒཧཾ བྷཱསིསྶནྟི སམྦནྡྷོ.

ཏཏྠ སམྨཱ སཱམཉྩ སབྦདྷམྨེ ཨབྷིསམྦུདྡྷོཏི སམྨཱ སམྦུདྡྷོ, བྷགཝཱ. སོ ཧི སངྑཏཱསངྑཏབྷེདཾ སཀལམྤི དྷམྨཛཱཏཾ ཡཱཐཱཝསརསལཀྑཎཔཊིཝེདྷཝསེན སམྨཱ སཡཾ ཝིཙིཏོཔཙིཏཔཱརམིཏཱསམྦྷཱུཏེན སཡམྦྷཱུཉཱཎེན སཱམཾ བུཛ྄ཛྷི ཨཉྙཱསི. ཡཐཱཧ ‘‘སཡཾ ཨབྷིཉྙཱཡ ཀམུདྡིསེཡྻ’’ནྟི (མཧཱཝ. ༡༡; མ. ནི. ༡.༢༨༥; ༢.༣༤༡; དྷ. པ. ༣༥༣), ཨཐ ཝཱ བུདྷདྷཱཏུསྶ ཛཱགརཎཝིཀསནཏྠེསུཔི པཝཏྟནཏོ སམྨཱ སཱམཉྩ པཊིབུདྡྷོ ཨནཉྙཔཊིབོདྷིཏོ ཧུཏྭཱ སཡམེཝ སཝཱསནསམྨོཧནིདྡཱཡ ཨཙྩནྟཾ ཝིགཏོ, དིནཀརཀིརཎསམཱགམེན པརམརུཙིརསིརིསོབྷགྒཔྤཏྟིཡཱ ཝིཀསིཏམིཝ པདུམཾ ཨགྒམགྒཉཱཎསམཱགམེན ཨཔརིམིཏགུཎགཎཱལངྐཏསབྦཉྙུཏཉྙཱཎཔྤཏྟིཡཱ སམྨཱ སཡམེཝ ཝིཀསིཏོ ཝིཀཱསམནུཔྤཏྟོཏྱཏྠོ. ཡཐཱཝུཏྟཝཙནཏྠཡོགེཔི སམྨཱསམྦུདྡྷསདྡསྶ བྷགཝཏི སམཉྙཱཝསེན པཝཏྟཏྟཱ ‘‘ཨཏུལ’’ནྟི ཨིམིནཱ ཝིསེསེཏི. ཏུལཱཡ སམྨིཏོ ཏུལྱོ, སོཡེཝ ཏུལོ ཡཀཱརལོཔཝསེན. ཨཐ ཝཱ སམྨིཏཏྠེ ཨཀཱརཔཙྩཡཝསེན ཏུལཱཡ སམྨིཏོ ཏུལོ, ན ཏུལོ ཨཏུལོ, སཱིལཱདཱིཧི གུཎེཧི ཀེནཙི ཨསདིསོ, ནཏྠི ཨེཏསྶ ཝཱ ཏུལོ སདིསོཏི ཨཏུལོ སདེཝཀེ ལོཀེ ཨགྒཔུགྒལབྷཱཝཏོ. ཡཐཱཧ ‘‘ཡཱཝཏཱ, བྷིཀྑཝེ, སཏྟཱ ཨཔདཱ ཝཱ དྭིཔདཱ ཝཱ ཙཏུཔྤདཱ ཝཱ…པེ… ཏཐཱགཏོ ཏེསཾ ཨགྒམཀྑཱཡཏཱི’’ཏིཨཱདི (ཨ. ནི. ༤.༣༤; ༥.༣༢; ཨིཏིཝུ. ༩༠).

ཨེཏྟཱཝཏཱ ཙ ཧེཏུཕལསཏྟཱུཔཀཱརསམྤདཱཝསེན ཏཱིཧཱཀཱརེཧི བྷགཝཏོ ཐོམནཱ ཀཏཱ ཧོཏི. ཏཏྠ ཧེཏུསམྤདཱ ནཱམ མཧཱཀརུཎཱསམཱཡོགོ བོདྷིསམྦྷཱརསམྦྷརཎཉྩ ¶ . ཕལསམྤདཱ པན ཉཱཎཔཧཱནཨཱནུབྷཱཝརཱུཔཀཱཡསམྤདཱཝསེན ཙཏུབྦིདྷཱ. ཏཏྠ སབྦཉྙུཏཉྙཱཎཔདཊྛཱནཾ མགྒཉཱཎཾ, ཏམྨཱུལཀཱནི ཙ དསབལཱདིཉཱཎཱནི ཉཱཎསམྤདཱ. སཝཱསནསཀལསཾཀིལེསཱནམཙྩནྟམནུཔྤཱདདྷམྨཏཱཔཱདནཾ པཧཱནསམྤདཱ. ཡཐིཙྪིཏནིཔྥཱདནེ ཨཱདྷིཔཙྩཾ ཨཱནུབྷཱཝསམྤདཱ. སཀལལོཀནཡནཱབྷིསེཀབྷཱུཏཱ པན ལཀྑཎཱནུབྱཉྫནཔྤཊིམཎྜིཏཱ ཨཏྟབྷཱཝསམྤཏྟི རཱུཔཀཱཡསམྤདཱ ནཱམ. སཏྟཱུཔཀཱརོ པན ཨཱསཡཔཡོགཝསེན དུཝིདྷོ. ཏཏྠ དེཝདཏྟཱདཱིསུ ཝིརོདྷིསཏྟེསུཔི ¶ ནིཙྩཾ ཧིཏཛ྄ཛྷཱསཡཏཱ, ཨཔརིཔཱཀགཏིནྡྲིཡཱནཾ ཨིནྡྲིཡཔརིཔཱཀཀཱལཱགམནཉྩ ཨཱསཡོ ནཱམ. ཏདཉྙསཏྟཱནཾ པན ལཱབྷསཀྐཱརཱདིནིརཔེཀྑཙིཏྟསྶ ཡཱནཏྟཡམུཁེན སབྦདུཀྑནིཡྻཱནིཀདྷམྨདེསནཱ པཡོགོ ནཱམ.

ཏཏྠ པུརིམཱ དྭེ ཕལསམྤདཱ ‘‘སམྨཱསམྦུདྡྷ’’ནྟི ཨིམིནཱ དསྶིཏཱ, ཨིཏརཱ པན དྭེ, ཏཐཱ སཏྟཱུཔཀཱརསམྤདཱ ཙ ‘‘ཨཏུལ’’ནྟི ཨེཏེན, ཏདུཔཱཡབྷཱུཏཱ པན ཧེཏུསམྤདཱ དྭཱིཧིཔི སཱམཏྠིཡཏོ དསྶིཏཱ ཏཐཱཝིདྷཧེཏུབྱཏིརེཀེན ཏདུབྷཡསམྤཏྟཱིནམསམྦྷཝཏོ, ཨཧེཏུཀཏྟེ ཙ སབྦཏྠ ཏཱསཾ སམྦྷཝཔྤསངྒཏོ.

ཏདེཝཾ ཏིཝིདྷཱཝཏྠཱསངྒཧིཏཐོམནཱཔུབྦངྒམཾ བུདྡྷརཏནཾ ཝནྡིཏྭཱ ཨིདཱནི སེསརཏནཱནམྤི པཎཱམམཱརབྷནྟོ ཨཱཧ ‘‘སསདྡྷམྨགཎུཏྟམ’’ནྟི. གུཎཱིབྷཱུཏཱནམྤི ཧི དྷམྨསཾགྷཱནཾ ཨབྷིཝཱདེཏབྦབྷཱཝོ སཧཡོགེན ཝིཉྙཱཡཏི ཡཐཱ ‘‘སཔུཏྟདཱརོ ཨཱགཏོཏི པུཏྟདཱརསྶཱཔི ཨཱགམན’’ནྟི.

ཏཏྠ ཨཏྟཱནཾ དྷཱརེནྟེ ཙཏཱུསུ ཨཔཱཡེསུ, ཝཊྚདུཀྑེསུ ཙ ཨཔཏམཱནེ ཀཏྭཱ དྷཱརེཏཱིཏི དྷམྨོ, ཙཏུམགྒཕལནིབྦཱནཝསེན ནཝཝིདྷོ, པརིཡཏྟིཡཱ སཧ དསཝིདྷོ ཝཱ དྷམྨོ. དྷཱརཎཉྩ པནེཏསྶ ཨཔཱཡཱདིནིབྦཏྟཀཀིལེསཝིདྡྷཾསནཾ, ཏཾ ཨརིཡམགྒསྶ ཀིལེསསམུཙྪེདཀབྷཱཝཏོ, ནིབྦཱནསྶ ཙ ¶ ཨཱརམྨཎབྷཱཝེན ཏསྶ ཏདཏྠསིདྡྷིཧེཏུཏཱཡ ནིཔྤརིཡཱཡཏོ ལབྦྷཏི, ཕལསྶ པན ཀིལེསཱནཾ པཊིཔྤསྶམྦྷནཝསེན མགྒཱནུཀཱུལཔྤཝཏྟིཏོ, པརིཡཏྟིཡཱ ཙ ཏདདྷིགམཧེཏུཏཱཡཱཏི ཨུབྷིནྣམྤི པརིཡཱཡཏོཏི དཊྛབྦཾ. སཏཾ སཔྤུརིསཱནཾ ཨརིཡཔུགྒལཱནཾ, སནྟོ ཝཱ སཾཝིཛྫམཱནོ ན ཏིཏྠིཡཔརིཀཔྤིཏོ ཨཏྟཱ ཝིཡ པརམཏྠཏོ ཨཝིཛྫམཱནོ སནྟོ ཝཱ པསཏྠོ སྭཱཀྑཱཏཏཱདིགུཎཡོགཏོ ན བཱཧིརཀདྷམྨོ ཝིཡ ཨེཀནྟནིནྡིཏོ དྷམྨོཏི སདྡྷམྨོ, གཎོ ཙ སོ ཨཊྛནྣཾ ཨརིཡཔུགྒལཱནཾ སམཱུཧབྷཱཝཏོ ཨུཏྟམོ ཙ སུཔྤཊིཔནྣཏཱདིགུཎཝིསེསཡོགཏོ, གཎཱནཾ, གཎེསུ ཝཱ དེཝམནུསྶཱདི སམཱུཧེསུ ཨུཏྟམོ ཡཐཱཝུཏྟགུཎཝསེནཱཏི གཎུཏྟམོ, སཧ སདྡྷམྨེན, གཎུཏྟམེན ཙཱཏི སསདྡྷམྨགཎུཏྟམོ, ཏཾ སསདྡྷམྨགཎུཏྟམཾ.

ཨབྷིཝཱདིཡཱཏི ཝིསེསཏོ ཝནྡིཏྭཱ, བྷཡལཱབྷཀུལཱཙཱརཱདིཝིརཧེན སཀྐཙྩཾ ཨཱདརེན ཀཱཡཝཙཱིམནོདྭཱརེཧི ཝནྡིཏྭཱཏྱཏྠོ. བྷཱསིསྶནྟི ཀཐེསྶཱམི. ནིབྦཏྟིཏཔརམཏྠབྷཱཝེན ཨབྷི ཝིསིཊྛཱ ¶ དྷམྨཱ ཨེཏྠཱཏིཨཱདིནཱ ཨབྷིདྷམྨོ, དྷམྨསངྒཎཱིཨཱདིསཏྟཔཀརཎཾ ཨབྷིདྷམྨཔིཊཀཾ, ཏཏྠ ཝུཏྟཱ ཨཏྠཱ ཨབྷིདྷམྨཏྠཱ, ཏེ སངྒཡ྄ཧནྟི ཨེཏྠ, ཨེཏེནཱཏི ཝཱ ཨབྷིདྷམྨཏྠསངྒཧཾ.

པརམཏྠདྷམྨཝཎྞནཱ

༢. ཨེཝཾ ཏཱཝ ཡཐཱདྷིཔྤེཏཔྤཡོཛནནིམིཏྟཾ རཏནཏྟཡཔཎཱམཱདིཀཾ ཝིདྷཱཡ ཨིདཱནི ཡེསཾ ཨབྷིདྷམྨཏྠཱནཾ སངྒཧཎཝསེན ཨིདཾ པཀརཎཾ པཊྛཔཱིཡཏི, ཏེ ཏཱཝ སངྑེཔཏོ ཨུདྡིསནྟོ ཨཱཧ ‘‘ཏཏྠ ཝུཏྟཱ’’ཏྱཱདི. ཏཏྠ ཏསྨིཾ ཨབྷིདྷམྨེ སབྦཐཱ ཀུསལཱདིཝསེན, ཁནྡྷཱདིཝསེན ཙ ཝུཏྟཱ ཨབྷིདྷམྨཏྠཱ པརམཏྠཏོ སམྨུཏིཾ ཋཔེཏྭཱ ནིབྦཏྟིཏཔརམཏྠཝསེན ཙིཏྟཾ ཝིཉྙཱཎཀྑནྡྷོ, ཙེཏསིཀཾ ཝེདནཱདིཀྑནྡྷཏྟཡཾ, རཱུཔཾ ¶ བྷཱུཏུཔཱདཱཡབྷེདབྷིནྣོ རཱུཔཀྑནྡྷོ, ནིབྦཱནཾ མགྒཕལཱནམཱརམྨཎབྷཱུཏོ ཨསངྑཏདྷམྨོཏི ཨེཝཾ ཙཏུདྷཱ ཙཏཱུཧཱཀཱརེཧི ཋིཏཱཏི ཡོཛནཱ. ཏཏྠ པརམོ ཨུཏྟམོ ཨཝིཔརཱིཏོ ཨཏྠོ, པརམསྶ ཝཱ ཨུཏྟམསྶ ཉཱཎསྶ ཨཏྠོ གོཙརོཏི པརམཏྠོ.

ཙིནྟེཏཱིཏི ཙིཏྟཾ, ཨཱརམྨཎཾ ཝིཛཱནཱཏཱིཏི ཨཏྠོ. ཡཐཱཧ ‘‘ཝིསཡཝིཛཱནནལཀྑཎཾ ཙིཏྟ’’ནྟི (དྷ. ས. ཨཊྛ. ༡ དྷམྨུདེསཝཱརཕསྶཔཉྩམཀརཱསིཝཎྞནཱ). སཏིཔི ཧི ནིསྶཡསམནནྟརཱདིཔཙྩཡེན ཝིནཱ ཨཱརམྨཎེན ཙིཏྟམུཔྤཛྫཏཱིཏི ཏསྶ ཏཾལཀྑཎཏཱ ཝུཏྟཱ, ཨེཏེན ནིརཱརམྨཎཝཱདིམཏཾ པཊིཀྑིཏྟཾ ཧོཏི. ཙིནྟེནྟི ཝཱ ཨེཏེན ཀརཎབྷཱུཏེན སམྤཡུཏྟདྷམྨཱཏི ཙིཏྟཾ. ཨཐ ཝཱ ཙིནྟནམཏྟཾ ཙིཏྟཾ. ཡཐཱཔཙྩཡཾ ཧི པཝཏྟིམཏྟམེཝ ཡདིདཾ སབྷཱཝདྷམྨོ ནཱམ. ཨེཝཉྩ ཀཏྭཱ སབྦེསམྤི པརམཏྠདྷམྨཱནཾ བྷཱཝསཱདྷནམེཝ ནིཔྤརིཡཱཡཏོ ལབྦྷཏི, ཀཏྟུཀརཎཝསེན པན ནིབྦཙནཾ པརིཡཱཡཀཐཱཏི དཊྛབྦཾ. སཀསཀཀིཙྩེསུ ཧི དྷམྨཱནཾ ཨཏྟཔྤདྷཱནཏཱསམཱརོཔནེན ཀཏྟུབྷཱཝོ ཙ, ཏདནུཀཱུལབྷཱཝེན སཧཛཱཏདྷམྨསམཱུཧེ ཀཏྟུབྷཱཝསམཱརོཔནེན པཊིཔཱདེཏབྦདྷམྨསྶ ཀརཎཏྟཉྩ པརིཡཱཡཏོཝ ལབྦྷཏི, ཏཐཱནིདསྶནཾ པན དྷམྨསབྷཱཝཝིནིམུཏྟསྶ ཀཏྟཱདིནོ ཨབྷཱཝཔརིདཱིཔནཏྠནྟི ཝེདིཏབྦཾ. ཝིཙིཏྟཀརཎཱདིཏོཔི ཙིཏྟསདྡཏྠཾ པཔཉྩེནྟི. ཨཡཾ པནེཏྠ སངྒཧོ –

‘‘ཝིཙིཏྟཀརཎཱ ཙིཏྟཾ, ཨཏྟནོ ཙིཏྟཏཱཡ ཝཱ;

ཙིཏཾ ཀམྨཀིལེསེཧི, ཙིཏཾ ཏཱཡཏི ཝཱ ཏཐཱ;

ཙིནོཏི ཨཏྟསནྟཱནཾ, ཝིཙིཏྟཱརམྨཎནྟི ཙཱ’’ཏི.

ཙེཏསི ¶ བྷཝཾ ཏདཱཡཏྟཝུཏྟིཏཱཡཱཏི ཙེཏསིཀཾ. ན ཧི ཏཾ ཙིཏྟེན ཝིནཱ ཨཱརམྨཎགྒཧཎསམཏྠཾ ཨསཏི ཙིཏྟེ སབྦེན སབྦཾ ཨནུཔྤཛྫནཏོ, ཙིཏྟཾ པན ཀེནཙི ཙེཏསིཀེན ཝིནཱཔི ¶ ཨཱརམྨཎེ པཝཏྟཏཱིཏི ཏཾ ཙེཏསིཀམེཝ ཙིཏྟཱཡཏྟཝུཏྟིཀཾ ནཱམ. ཏེནཱཧ བྷགཝཱ ‘‘མནོཔུབྦངྒམཱ དྷམྨཱ’’ཏི (དྷ. པ. ༡-༢), ཨེཏེན སུཁཱདཱིནཾ ཨཙེཏནཏྟནིཙྩཏྟཱདཡོ ཝིཔྤཊིཔཏྟིཡོཔི པཊིཀྑིཏྟཱ ཧོནྟི. ཙེཏསི ནིཡུཏྟཾ ཝཱ ཙེཏསིཀཾ.

རུཔྤཏཱིཏི རཱུཔཾ, སཱིཏུཎྷཱདིཝིརོདྷིཔཙྩཡེཧི ཝིཀཱརམཱཔཛྫཏི, ཨཱཔཱདཱིཡཏཱིཏི ཝཱ ཨཏྠོ. ཏེནཱཧ བྷགཝཱ ‘‘སཱིཏེནཔི རུཔྤཏི, ཨུཎྷེནཔི རུཔྤཏཱི’’ཏྱཱདི (སཾ. ནི. ༣.༧༩), རུཔྤནཉྩེཏྠ སཱིཏཱདིཝིརོདྷིཔཙྩཡསམཝཱཡེ ཝིསདིསུཔྤཏྟིཡེཝ. ཡདི ཨེཝཾ ཨརཱུཔདྷམྨཱནམྤི རཱུཔཝོཧཱརོ ཨཱཔཛྫཏཱིཏི? ནཱཔཛྫཏི སཱིཏཱདིགྒཧཎསཱམཏྠིཡཏོ ཝིབྷཱུཏཏརསྶེཝ རུཔྤནསྶཱདྷིཔྤེཏཏྟཱ. ཨིཏརཐཱ ཧི ‘‘རུཔྤཏཱི’’ཏི ཨཝིསེསཝཙནེནེཝ པརིཡཏྟནྟི ཀིཾ སཱིཏཱདིགྒཧཎེན, ཏཾ པན སཱིཏཱདིནཱ ཕུཊྛསྶ རུཔྤནཾ ཝིབྷཱུཏཏརཾ, ཏསྨཱ ཏདེཝེཏྠཱདྷིཔྤེཏནྟི ཉཱཔནཏྠཾ སཱིཏཱདིགྒཧཎཾ ཀཏཾ. ཡདི ཨེཝཾ ཀཐཾ བྲཧྨལོཀེ རཱུཔཝོཧཱརོ, ན ཧི ཏཏྠ ཨུཔགྷཱཏཀཱ སཱིཏཱདཡོ ཨཏྠཱིཏི? ཀིཉྩཱཔི ཨུཔགྷཱཏཀཱ ནཏྠི, ཨནུགྒཱཧཀཱ པན ཨཏྠི, ཏསྨཱ ཏཾཝསེནེཏྠ རུཔྤནཾ སམྦྷཝཏཱིཏི, ཨཐ ཝཱ ཏཾསབྷཱཝཱནཏིཝཏྟནཏོ ཏཏྠ རཱུཔཝོཧཱརོཏི ཨལམཏིཔྤཔཉྩེན.

བྷཝཱབྷཝཾ ཝིནནཏོ སཾསིབྦནཏོ ཝཱནསངྑཱཏཱཡ ཏཎྷཱཡ ནིཀྑནྟཾ, ནིབྦཱཏི ཝཱ ཨེཏེན རཱགགྒིཨཱདིཀོཏི ནིབྦཱནཾ.

༡. ཙིཏྟཔརིཙྪེདཝཎྞནཱ

བྷཱུམིབྷེདཙིཏྟཝཎྞནཱ

༣. ཨིདཱནི ཡསྨཱ ཝིབྷཱགཝནྟཱནཾ དྷམྨཱནཾ སབྷཱཝཝིབྷཱཝནཾ ཝིབྷཱགེན ཝིནཱ ན ཧོཏི, ཏསྨཱ ཡཐཱཨུདྡིཊྛཱནཾ ཨབྷིདྷམྨཏྠཱནཾ ཨུདྡེསཀྐམེན ཝིབྷཱགཾ དསྶེཏུཾ ཙིཏྟཾ ཏཱཝ བྷཱུམིཛཱཏིསམྤཡོགཱདིཝསེན ¶ ཝིབྷཛིཏྭཱ ནིདྡིསིཏུམཱརབྷནྟོ ཨཱཧ ‘‘ཏཏྠ ཙིཏྟཾ ཏཱཝཱ’’ཏྱཱདི. ཏཱཝ-སདྡོ པཋམནྟི ཨེཏསྶཏྠེ. ཡཐཱཨུདྡིཊྛེསུ ཙཏཱུསུ ཨབྷིདྷམྨཏྠེསུ པཋམཾ ཙིཏྟཾ ནིདྡིསཱིཡཏཱིཏི ¶ ཨཡཉྷེཏྠཏྠོ. ཙཏྟཱརོ ཝིདྷཱ པཀཱརཱ ཨསྶཱཏི ཙཏུབྦིདྷཾ. ཡསྨཱ པནེཏེ ཙཏུབྷུམྨཀཱ དྷམྨཱ ཨནུཔུབྦཔཎཱིཏཱ, ཏསྨཱ ཧཱིནུཀྐཊྛུཀྐཊྛཏརཏམཱནུཀྐམེན ཏེསཾ ནིདྡེསོ ཀཏོ. ཏཏྠ ཀཱམེཏཱིཏི ཀཱམོ, ཀཱམཏཎྷཱ, སཱ ཨེཏྠ ཨཝཙརཏི ཨཱརམྨཎཀརཎཝསེནཱཏི ཀཱམཱཝཙརཾ. ཀཱམཱིཡཏཱིཏི ཝཱ ཀཱམོ, ཨེཀཱདསཝིདྷོ ཀཱམབྷཝོ, ཏསྨིཾ ཡེབྷུཡྻེན ཨཝཙརཏཱིཏི ཀཱམཱཝཙརཾ. ཡེབྷུཡྻེན ཙརཎསྶ ཧི ཨདྷིཔྤེཏཏྟཱ རཱུཔཱརཱུཔབྷཝེསུ པཝཏྟསྶཱཔི ཨིམསྶ ཀཱམཱཝཙརབྷཱཝོ ཨུཔཔནྣོ ཧོཏི. ཀཱམབྷཝོཡེཝ ཝཱ ཀཱམོ ཨེཏྠ ཨཝཙརཏཱིཏི ཀཱམཱཝཙརོ, ཏཏྠ པཝཏྟམྤི ཙིཏྟཾ ནིསྶིཏེ ནིསྶཡཝོཧཱརེན ཀཱམཱཝཙརཾ ‘‘མཉྩཱ ཨུཀྐུཊྛིཾ ཀརོནྟཱི’’ཏྱཱདཱིསུ ཝིཡཱཏི ཨལམཏིཝིསཱརཎིཡཱ ཀཐཱཡ. ཧོཏི ཙེཏྠ –

‘‘ཀཱམོཝཙརཏཱིཏྱེཏྠ, ཀཱམེཝཙརཏཱིཏི ཝཱ;

ཋཱནཱུཔཙཱརཏོ ཝཱཔི, ཏཾ ཀཱམཱཝཙརཾ བྷཝེ’’ཏི.

རཱུཔཱརཱུཔཱཝཙརེསུཔི ཨེསེཝ ནཡོ ཡཐཱརཧཾ དཊྛབྦོ. ཨུཔཱདཱནཀྑནྡྷསངྑཱཏལོཀཏོ ཨུཏྟརཏི ཨནཱསཝབྷཱཝེནཱཏི ལོཀུཏྟརཾ, མགྒཙིཏྟཾ. ཕལཙིཏྟཾ པན ཏཏོ ཨུཏྟིཎྞནྟི ལོཀུཏྟརཾ. ཨུབྷཡམྤི ཝཱ སཧ ནིབྦཱནེན ལོཀཏོ ཨུཏྟརཾ ཨདྷིཀཾ ཡཐཱཝུཏྟགུཎཝསེནེཝཱཏི ལོཀུཏྟརཾ.

བྷཱུམིབྷེདཙིཏྟཝཎྞནཱ ནིཊྛིཏཱ.

ཨཀུསལཙིཏྟཝཎྞནཱ

༤. ཨིམེསུ པན ཙཏཱུསུ ཙིཏྟེསུ ཀཱམཱཝཙརཙིཏྟསྶ ཀུསལཱཀུསལཝིཔཱཀཀིརིཡབྷེདེན ཙཏུབྦིདྷབྷཱཝེཔི པཱཔཱཧེཏུཀཝཛྫཱནཾ ཨེཀཱུནསཊྛིཡཱ, ཨེཀནཝུཏིཡཱ ཝཱ ཙིཏྟཱནཾ སོབྷནནཱམེན ཝོཧཱརཀརཎཏྠཾ ‘‘པཱཔཱཧེཏུཀམུཏྟཱནི ¶ ‘སོབྷནཱནཱི’ཏི ཝུཙྩརེ’’ཏི ཨེཝཾ ཝཀྑམཱནནཡསྶ ཨནུརཱུཔཏོ པཱཔཱཧེཏུཀེཡེཝ པཋམཾ དསྶེནྟོ, ཏེསུ ཙ བྷཝེསུ གཧིཏཔཊིསནྡྷིཀསྶ སཏྟསྶ ཨཱདིཏོ ཝཱིཐིཙིཏྟཝསེན ལོབྷསཧགཏཙིཏྟུཔྤཱདཱནམེཝ སམྦྷཝཏོ ཏེཡེཝ པཋམཾ དསྶེཏྭཱ ཏདནནྟརཾ དྭིཧེཏུཀབྷཱཝསཱམཉྙེན དོམནསྶསཧགཏེ, ཏདནནྟརཾ ཨེཀཧེཏུཀེ ཙ དསྶེཏུཾ ‘‘སོམནསྶསཧགཏ’’ནྟྱཱདིནཱ ¶ ལོབྷམཱུལཾ ཏཱཝ ཝེདནཱདིཊྛིསངྑཱརབྷེདེན ཨཊྛདྷཱ ཝིབྷཛིཏྭཱ དསྶེཏི.

ཏཏྠ སུནྡརཾ མནོ, ཏཾ ཝཱ ཨེཏསྶ ཨཏྠཱིཏི སུམནོ, ཙིཏྟཾ, ཏཾསམངྒིཔུགྒལོ ཝཱ, ཏསྶ བྷཱཝོ ཏསྨིཾ ཨབྷིདྷཱནབུདྡྷཱིནཾ པཝཏྟིཧེཏུཏཱཡཱཏི སོམནསྶཾ, མཱནསིཀསུཁཝེདནཱཡེཏཾ ཨདྷིཝཙནཾ, ཏེན སཧགཏཾ ཨེཀུཔྤཱདཱདིཝསེན སཾསཊྛཾ, ཏེན སཧ ཨེཀུཔྤཱདཱདིབྷཱཝཾ གཏནྟི ཝཱ སོམནསྶསཧགཏཾ. མིཙྪཱ པསྶཏཱིཏི དིཊྛི. སཱམཉྙཝཙནསྶཔི ཧི ཨཏྠཔྤཀརཎཱདིནཱ ཝིསེསཝིསཡཏཱ ཧོཏཱིཏི ཨིདྷ མིཙྪཱདསྶནམེཝ ‘‘དིཊྛཱི’’ཏི ཝུཙྩཏི. དིཊྛིཡེཝ དིཊྛིགཏཾ ‘‘སངྑཱརགཏཾ ཐཱམགཏ’’ནྟྱཱདཱིསུ ཝིཡ གཏ-སདྡསྶ ཏབྦྷཱཝཝུཏྟིཏྟཱ. དྭཱསཊྛིཡཱ ཝཱ དིཊྛཱིསུ གཏཾ ཨནྟོགཏཾ, དིཊྛིཡཱ ཝཱ གམནམཏྟཾ ན ཨེཏྠ གནྟབྦོ ཨཏྟཱདིཀོ ཀོཙི ཨཏྠཱིཏི དིཊྛིགཏཾ, ‘‘ཨིདམེཝ སཙྩཾ མོགྷམཉྙ’’ནྟི པཝཏྟོ ཨཏྟཏྟནིཡཱདིཨབྷིནིཝེསོ, ཏེན སམཾ ཨེཀུཔྤཱདཱདཱིཧི པཀཱརེཧི ཡུཏྟནྟི དིཊྛིགཏསམྤཡུཏྟཾ. སངྑརོཏི ཙིཏྟཾ ཏིཀྑབྷཱཝསངྑཱཏམཎྜནཝིསེསེན སཛྫེཏི, སངྑརཱིཡཏི ཝཱ ཏཾ ཨེཏེན ཡཐཱཝུཏྟནཡེན སཛྫཱིཡཏཱིཏི སངྑཱརོ, ཏཏྠ ཏཏྠ ཀིཙྩེ སཾསཱིདམཱནསྶ ཙིཏྟསྶ ཨནུབལཔྤདཱནཝསེན ཨཏྟནོ ཝཱ པརེསཾ ཝཱ པཝཏྟཔུབྦཔྤཡོགོ, སོ པན ཨཏྟནོ པུབྦབྷཱགཔྤཝཏྟེ ཙིཏྟསནྟཱནེ ཙེཝ པརསནྟཱནེ ཙ པཝཏྟཏཱིཏི ཏནྣིབྦཏྟིཏོ ཙིཏྟསྶ ཏིཀྑབྷཱཝསངྑཱཏོ ཝིསེསོཝིདྷ སངྑཱརོ, སོ ཡསྶ ནཏྠི ཏཾ ཨསངྑཱརཾ ¶ , ཏདེཝ ཨསངྑཱརིཀཾ. སངྑཱརེན སཧིཏཾ སསངྑཱརིཀཾ. ཏཐཱ ཙ ཝདནྟི –

‘‘པུབྦཔྤཡོགསམྦྷཱུཏོ, ཝིསེསོ ཙིཏྟསམྦྷཝཱི;

སངྑཱརོ ཏཾཝསེནེཏྠ, ཧོཏྱཱསངྑཱརིཀཱདིཏཱ’’ཏི.

ཨཐ ཝཱ ‘‘སསངྑཱརིཀཾ ཨསངྑཱརིཀ’’ནྟི ཙེཏཾ ཀེཝལཾ སངྑཱརསྶ བྷཱཝཱབྷཱཝཾ སནྡྷཱཡ ཝུཏྟཾ, ན ཏསྶ སཧཔྤཝཏྟིསབྦྷཱཝཱབྷཱཝཏོཏི བྷིནྣསནྟཱནཔྤཝཏྟིནོཔི སངྑཱརསྶ ཨིདམཏྠིཏཱཡ ཏཾཝསེན ནིབྦཏྟཾ ཙིཏྟཾ སངྑཱརོ ཨསྶ ཨཏྠཱིཏི སསངྑཱརིཀཾ ‘‘སལོམཀོ སཔཀྑཀོ’’ཏྱཱདཱིསུ ཝིཡ སཧ-སདྡསྶ ཝིཛྫམཱནཏྠཔརིདཱིཔནཏོ. ཏབྦིཔརཱིཏཾ པན ཏདབྷཱཝཏོ ཝུཏྟནཡེན ཨསངྑཱརིཀཾ. དིཊྛིགཏེན ཝིཔྤཡུཏྟཾ ཝིསཾསཊྛནྟི དིཊྛིགཏཝིཔྤཡུཏྟཾ. ཨུཔཔཏྟིཏོ ཡུཏྟིཏོ ཨིཀྑཏི ཨནུབྷཝཏི ཝེདཡམཱནཱཔི མཛ྄ཛྷཏྟཱཀཱརསཎྛིཏིཡཱཏི ཨུཔེཀྑཱ. སུཁདུཀྑཱནཾ ཝཱ ཨུཔེཏཱ ཡུཏྟཱ ཨཝིརུདྡྷཱ ཨིཀྑཱ ¶ ཨནུབྷཝནནྟི ཨུཔེཀྑཱ. སུཁདུཀྑཱཝིརོདྷིཏཱཡ ཧེསཱ ཏེསཾ ཨནནྟརམྤི པཝཏྟཏི. ཨུཔེཀྑཱསཧགཏནྟི ཨིདཾ ཝུཏྟནཡམེཝ.

ཀསྨཱ པནེཏྠ ཨཉྙེསུཔི ཕསྶཱདཱིསུ སམྤཡུཏྟདྷམྨེསུ ཝིཛྫམཱནེསུ སོམནསྶསཧགཏཱདིབྷཱཝོཝ ཝུཏྟོཏི? སོམནསྶཱདཱིནམེཝ ཨསཱདྷཱརཎབྷཱཝཏོ. ཕསྶཱདཡོ ཧི ཀེཙི སབྦཙིཏྟསཱདྷཱརཎཱ, ཀེཙི ཀུསལཱདིསཱདྷཱརཎཱ, མོཧཱདཡོ ཙ སབྦཱཀུསལསཱདྷཱརཎཱཏི ན ཏེཧི སཀྐཱ ཙིཏྟཾ ཝིསེསེཏུཾ, སོམནསྶཱདཡོ པན ཀཏྠཙི ཙིཏྟེ ཧོནྟི, ཀཏྠཙི ན ཧོནྟཱིཏི པཱཀཊོཝ ཏཾཝསེན ཙིཏྟསྶ ཝིསེསོ. ཀསྨཱ པནེཏེ ཀཏྠཙི ཧོནྟི, ཀཏྠཙི ན ཧོནྟཱིཏི? ཀཱརཎསྶ སནྣིཧིཏཱསནྣིཧིཏབྷཱཝཏོ. ཀིཾ པན ནེསཾ ཀཱརཎནྟི? ཝུཙྩཏེསབྷཱཝཏོ, པརིཀཔྤཏོ ཝཱ ཧི ཨིཊྛཱརམྨཎཾ, སོམནསྶཔཊིསནྡྷིཀཏཱ, ཨགམྦྷཱིརསབྷཱཝཏཱ ཙ ཨིདྷ སོམནསྶསྶ ¶ ཀཱརཎཾ, ཨིཊྛམཛ྄ཛྷཏྟཱརམྨཎཾ, ཨུཔེཀྑཱཔཊིསནྡྷིཀཏཱ, གམྦྷཱིརསབྷཱཝཏཱ ཙ ཨུཔེཀྑཱཡ, དིཊྛིཝིཔནྣཔུགྒལསེཝནཱ, སསྶཏུཙྪེདཱསཡཏཱ ཙ དིཊྛིཡཱ, བལཝཨུཏུབྷོཛནཱདཡོ པན པཙྩཡཱ ཨསངྑཱརིཀབྷཱཝསྶཱཏི. ཏསྨཱ ཨཏྟནོ ཨནུརཱུཔཀཱརཎཝསེན ནེསཾ ཨུཔྤཛྫནཏོ ཀཏྠཙི ཙིཏྟེཡེཝ སམྦྷཝོཏི སཀྐཱ ཨེཏེཧི ཙིཏྟསྶ ཝིསེསོ པཉྙཱཔེཏུནྟི. ཨེཝཉྩ ཀཏྭཱ ནེསཾ སཏིཔི མོཧཧེཏུཀབྷཱཝེ ལོབྷསཧགཏབྷཱཝོཝ ནིགམནེ ཝུཏྟོ.

ཨིམེསཾ པན ཨཊྛནྣམྤི ཨཡམུཔྤཏྟིཀྐམོ ཝེདིཏབྦོ. ཡདཱ ཧི ‘‘ནཏྠི ཀཱམེསུ ཨཱདཱིནཝོ’’ཏྱཱདིནཱ ནཡེན མིཙྪཱདིཊྛིཾ པུརཀྑཏྭཱ ཧཊྛཏུཊྛོ ཀཱམེ ཝཱ པརིབྷུཉྫཏི, དིཊྛམངྒལཱདཱིནི ཝཱ སཱརཏོ པཙྩེཏི སབྷཱཝཏིཀྑེནེཝ ཨནུསྶཱཧིཏེན ཙིཏྟེན, ཏདཱ པཋམཾ ཨཀུསལཙིཏྟམུཔྤཛྫཏི. ཡདཱ པན མནྡེན སམུསྶཱཧིཏེན ཙིཏྟེན, ཏདཱ དུཏིཡཾ. ཡདཱ པན མིཙྪཱདིཊྛིཾ ཨཔུརཀྑཏྭཱ ཀེཝལཾ ཧཊྛཏུཊྛོ མེཐུནཾ ཝཱ སེཝཏི, པརསམྤཏྟིཾ ཝཱ ཨབྷིཛ྄ཛྷཱཡཏི, པརབྷཎྜཾ ཝཱ ཧརཏི སབྷཱཝཏིཀྑེནེཝ ཨནུསྶཱཧིཏེན ཙིཏྟེན, ཏདཱ ཏཏིཡཾ. ཡདཱ པན མནྡེན སམུསྶཱཧིཏེན ཙིཏྟེན, ཏདཱ ཙཏུཏྠཾ. ཡདཱ པན ཀཱམཱནཾ ཝཱ ཨསམྤཏྟིཾ ཨཱགམྨ, ཨཉྙེསཾ ཝཱ སོམནསྶཧེཏཱུནཾ ཨབྷཱཝེན ཙཏཱུསུཔི ཝིཀཔྤེསུ སོམནསྶརཧིཏཱ ཧོནྟི, ཏདཱ སེསཱནི ཙཏྟཱརི ཨུཔེཀྑཱསཧགཏཱནི ཨུཔྤཛྫནྟཱིཏི. ཨཊྛཔཱིཏི པི-སདྡོ སམྤིཎྜནཏྠོ, ཏེན ཝཀྑམཱནནཡེན ཨཀུསལཀམྨཔཐེསུ ནེསཾ ལབྦྷམཱནཀམྨཔཐཱནུརཱུཔཏོ པཝཏྟིབྷེདཾ ཀཱལདེསསནྟཱནཱརམྨཎཱདིབྷེདེན ཨནེཀཝིདྷཏམྤི སངྒཎྷཱཏི.

༥. དུཊྛུ ¶ མནོ, ཏཾ ཝཱ ཨེཏསྶཱཏི དུམྨནོ, ཏསྶ བྷཱཝོ དོམནསྶཾ, མཱནསིཀདུཀྑཝེདནཱཡེཏཾ ཨདྷིཝཙནཾ, ཏེན ¶ སཧགཏནྟི དོམནསྶསཧགཏཾ. ཨཱརམྨཎེ པཊིཧཉྙཏཱིཏི པཊིགྷོ, དོསོ. ཙཎྜིཀྐསབྷཱཝཏཱཡ ཧེས ཨཱརམྨཎཾ པཊིཧནནྟོ ཝིཡ པཝཏྟཏི. དོམནསྶསཧགཏསྶ ཝེདནཱཝསེན ཨབྷེདེཔི ཨསཱདྷཱརཎདྷམྨཝསེན ཙིཏྟསྶ ཨུཔལཀྑཎཏྠཾ དོམནསྶགྒཧཎཾ, པཊིགྷསམྤཡུཏྟབྷཱཝོ པན ཨུབྷིནྣཾ ཨེཀནྟསཧཙཱརིཏཱ དསྶནཏྠཾ ཝུཏྟོཏི དཊྛབྦཾ. དོམནསྶཉྩེཏྠ ཨནིཊྛཱརམྨཎཱནུབྷཝནལཀྑཎོ ཝེདནཱཀྑནྡྷཔརིཡཱཔནྣོ ཨེཀོ དྷམྨོ, པཊིགྷོ ཙཎྜིཀྐསབྷཱཝོ སངྑཱརཀྑནྡྷཔརིཡཱཔནྣོ ཨེཀོ དྷམྨོཏི ཨཡམེཏེསཾ ཝིསེསོ. ཨེཏྠ ཙ ཡཾ ཀིཉྩི ཨནིཊྛཱརམྨཎཾ, ནཝཝིདྷཨཱགྷཱཏཝཏྠཱུནི ཙ དོམནསྶསྶ ཀཱརཎཾ, པཊིགྷསྶ ཀཱརཎཉྩཱཏི དཊྛབྦཾ. དྭིནྣཾ པན ནེསཾ ཙིཏྟཱནཾ པཱཎཱཏིཔཱཏཱདཱིསུ ཏིཀྑམནྡཔྤཝཏྟིཀཱལེ ཨུཔྤཏྟི ཝེདིཏབྦཱ. ཨེཏྠཱཔི ནིགམནེ པི-སདྡསྶ ཨཏྠོ ཝུཏྟནཡཱནུསཱརེན དཊྛབྦོ.

༦. སབྷཱཝཾ ཝིཙིནནྟོ ཏཱཡ ཀིཙྪཏི ཀིལམཏཱིཏི ཝིཙིཀིཙྪཱ. ཨཐ ཝཱ ཙིཀིཙྪིཏུཾ དུཀྐརཏཱཡ ཝིགཏཱ ཙིཀིཙྪཱ ཉཱཎཔྤཊིཀཱརོ ཨིམིསྶཱཏི ཝིཙིཀིཙྪཱ, ཏཱཡ སམྤཡུཏྟཾ ཝིཙིཀིཙྪཱསམྤཡུཏྟཾ. ཨུདྡྷཏསྶ བྷཱཝོ ཨུདྡྷཙྩཾ. ཨུདྡྷཙྩསྶ སབྦཱཀུསལསཱདྷཱརཎབྷཱཝེཔི ཨིདྷ སམྤཡུཏྟདྷམྨེསུ པདྷཱནཾ ཧུཏྭཱ པཝཏྟཏཱིཏི ཨིདམེཝ ཏེན ཝིསེསེཏྭཱ ཝུཏྟཾ. ཨེཝཉྩ ཀཏྭཱ དྷམྨུདྡེསཔཱལི༹ཡཾ སེསཱཀུསལེསུ ཨུདྡྷཙྩཾ ཡེཝཱཔནཀཝསེན ཝུཏྟཾ, ཨིདྷ པན ‘‘ཨུདྡྷཙྩཾ ཨུཔྤཛྫཏཱི’’ཏི སརཱུཔེནེཝ དེསིཏཾ. ཧོནྟི ཙེཏྠ –

‘‘སབྦཱཀུསལཡུཏྟམྤི, ཨུདྡྷཙྩཾ ཨནྟམཱནསེ;

བལཝཾ ཨིཏི ཏཾཡེཝ, ཝུཏྟམུདྡྷཙྩཡོགཏོ.

‘‘ཏེནེཝ ཧི མུནིནྡེན, ཡེཝཱཔནཀནཱམཏོ;

ཝཏྭཱ སེསེསུ ཨེཏྠེཝ, ཏཾ སརཱུཔེན དེསིཏ’’ནྟི.

ཨིམཱནི ¶ པན དྭེ ཙིཏྟཱནི མཱུལནྟརཝིརཧཏོ ཨཏིསམྨཱུལ༹ྷཏཱཡ, སཾསཔྤནཝིཀྑིཔནཝསེན པཝཏྟཝིཙིཀིཙྪུདྡྷཙྩསམཱཡོགེན ཙཉྩལཏཱཡ ཙ སབྦཏྠཱཔི རཛྫནདུསྶནརཧིཏཱནི ཨུཔེཀྑཱསཧགཏཱནེཝ པཝཏྟནྟི, ཏཏོཡེཝ ཙ སབྷཱཝཏིཀྑཏཱཡ ཨུསྶཱཧེཏབྦཏཱཡ ཨབྷཱཝཏོ སངྑཱརབྷེདོཔི ནེསཾ ནཏྠི. ཧོནྟི ཙེཏྠ –

‘‘མཱུལ༹ྷཏྟཱ ¶ ཙེཝ སཾསཔྤ-ཝིཀྑེཔཱ ཙེཀཧེཏུཀཾ;

སོཔེཀྑཾ སབྦདཱ ནོ ཙ, བྷིནྣཾ སངྑཱརབྷེདཏོ.

‘‘ན ཧི ཏསྶ སབྷཱཝེན, ཏིཀྑཏུསྶཱཧནཱིཡཏཱ;

ཨཏྠི སཾསཔྤམཱནསྶ, ཝིཀྑིཔནྟསྶ སབྦདཱ’’ཏི.

མོཧེན མུཡ྄ཧནྟི ཨཏིསཡེན མུཡ྄ཧནྟི མཱུལནྟརཝིརཧཏོཏི མོམཱུཧཱནི.

༧. ཨིཙྩེཝནྟྱཱདི ཡཐཱཝུཏྟཱནཾ དྭཱདསཱཀུསལཙིཏྟཱནཾ ནིགམནཾ. ཏཏྠ ཨིཏི-སདྡོ ཝཙནཝཙནཱིཡསམུདཱཡནིདསྶནཏྠོ. ཨེཝཾ-སདྡོ ཝཙནཝཙནཱིཡཔཊིཔཱཊིསནྡསྶནཏྠོ. ནིཔཱཏསམུདཱཡོ ཝཱ ཨེས ཝཙནཝཙནཱིཡནིགམནཱརམྦྷེ. ཨིཙྩེཝཾ ཡཐཱཝུཏྟནཡེན སབྦཐཱཔི སོམནསྶུཔེཀྑཱདིཊྛིསམྤཡོགཱདིནཱ པཊིགྷསམྤཡོགཱདིནཱ ཝིཙིཀིཙྪུདྡྷཙྩཡོགེནཱཏི སབྦེནཱཔི སམྤཡོགཱདིཨཱཀཱརེན དྭཱདས ཨཀུསལཙིཏྟཱནི སམཏྟཱནི པརིནིཊྛིཏཱནི, སངྒཧེཏྭཱ ཝཱ ཨཏྟཱནི གཧིཏཱནི, ཝུཏྟཱནཱིཏྱཏྠོ. ཏཏྠ ཀུསལཔཊིཔཀྑཱནི ཨཀུསལཱནི མིཏྟཔྤཊིཔཀྑོ ཨམིཏྟོ ཝིཡ, པཊིཔཀྑབྷཱཝོ ཙ ཀུསལཱཀུསལཱནཾ ཡཐཱཀྐམཾ པཧཱཡཀཔཧཱཏབྦབྷཱཝེན ཝེདིཏབྦོ.

༨. ཨཊྛདྷཱཏྱཱདི སངྒཧགཱཐཱ. ལོབྷོ ཙ སོ སུཔྤཏིཊྛིཏབྷཱཝསཱདྷནེན མཱུལསདིསཏྟཱ མཱུལཉྩ, ཀཾ ཨེཏེསནྟི ལོབྷམཱུལཱནི ཙིཏྟཱནི ཝེདནཱདིབྷེདཏོ ཨཊྛདྷཱ སིཡུཾ ¶ . ཏཐཱ དོསམཱུལཱནི སངྑཱརབྷེདཏོ དྭིདྷཱ. མོཧམཱུལཱནི སུདྡྷོ མོཧོཡེཝ མཱུལམེཏེསནྟི མོཧམཱུལསངྑཱཏཱནི སམྤཡོགབྷེདཏོ དྭེ ཙཱཏི ཨཀུསལཱ དྭཱདས སིཡུནྟྱཏྠོ.

ཨཀུསལཙིཏྟཝཎྞནཱ ནིཊྛིཏཱ.

ཨཧེཏུཀཙིཏྟཝཎྞནཱ

༩. ཨེཝཾ མཱུལབྷེདཏོ ཏིཝིདྷམྤི ཨཀུསལཾ སམྤཡོགཱདིབྷེདཏོ དྭཱདསདྷཱ ཝིབྷཛིཏྭཱ ཨིདཱནི ¶ ཨཧེཏུཀཙིཏྟཱནི ནིདྡིསནྟོ ཏེསཾ ཨཀུསལཝིཔཱཀཱདིཝསེན ཏིཝིདྷབྷཱཝེཔི ཨཀུསལཱནནྟརཾ ཨཀུསལཝིཔཱཀེཡེཝ ཙཀྑཱདིནིསྶཡསམྤཊིཙྪནཱདིཀིཙྩབྷེདེན སཏྟདྷཱ ཝིབྷཛིཏུཾ ‘‘ཨུཔེཀྑཱསཧགཏཾ ཙཀྑུཝིཉྙཱཎ’’ནྟྱཱདིམཱཧ. ཏཏྠ ཙཀྑཏི ཝིཉྙཱཎཱདྷིཊྛིཏཾ ཧུཏྭཱ སམཝིསམཾ ཨཱཙིཀྑནྟཾ ཝིཡ ཧོཏཱིཏི ཙཀྑུ. ཨཐ ཝཱ ཙཀྑཏི རཱུཔཾ ཨསྶཱདེནྟཾ ཝིཡ ཧོཏཱིཏི ཙཀྑུ. ཙཀྑཏཱིཏི ཧི ཨཡཾ སདྡོ ‘‘མདྷུཾ ཙཀྑཏི, བྱཉྫནཾ ཙཀྑཏཱི’’ཏྱཱདཱིསུ ཝིཡ ཨསྶཱདནཏྠོ ཧོཏི. ཏེནཱཧ བྷགཝཱ – ‘‘ཙཀྑུཾ ཁོ པན, མཱགཎྜིཡ, རཱུཔཱརཱམཾ རཱུཔརཏཾ རཱུཔསམྨུདིཏ’’ནྟྱཱདི. ཡདི ཨེཝཾ ‘‘སོཏཾ ཁོ, མཱགཎྜིཡ, སདྡཱརཱམཾ སདྡརཏཾ སདྡསམྨུདིཏ’’ནྟྱཱདིཝཙནཏོ (མ. ནི. ༢.༢༠༩) སོཏཱདཱིནམྤི སདྡཱདིཨསྶཱདནཾ ཨཏྠཱིཏི ཏེསམྤི ཙཀྑུསདྡཱབྷིདྷེཡྻཏཱ ཨཱཔཛྫེཡྻཱཏི? ནཱཔཛྫཏི ནིརུལ༹ྷཏྟཱ, ནིརུལ༹ྷོ ཧེས ཙཀྑུ-སདྡོ དཊྛུཀཱམཏཱནིདཱནཀམྨཛབྷཱུཏཔྤསཱདལཀྑཎེ ཙཀྑུཔྤསཱདེཡེཝ མཡཱུརཱདིསདྡཱ ཝིཡ སཀུཎཝིསེསཱདཱིསུ, ཙཀྑུནཱ སཧཝུཏྟིཡཱ པན བྷམུཀཊྛིཔརིཙྪིནྣོ མཾསཔིཎྜོཔི ‘‘ཙཀྑཱུ’’ཏི ཝུཙྩཏི. ཨཊྛཀཐཱཡཾ པན ཨནེཀཏྠཏྟཱ དྷཱཏཱུནཾ ཙཀྑཏི-སདྡསྶ ཝིབྷཱཝནཏྠཏཱཔི སམྦྷཝཏཱིཏི ‘‘ཙཀྑཏི རཱུཔཾ ཝིབྷཱཝེཏཱིཏི ཙཀྑཱུ’’ཏི (ཝིསུདྡྷི. ༢.༥༡༠) ཝུཏྟཾ. ཙཀྑུསྨིཾ ¶ ཝིཉྙཱཎཾ ཏནྣིསྶིཏཏྠཱཏི ཙཀྑུཝིཉྙཱཎཾ. ཏཐཱ ཧེཏཾ ‘‘ཙཀྑུསནྣིསྶིཏརཱུཔཝིཛཱནནལཀྑཎ’’ནྟི (དྷ. ས. ཨཊྛ. ༤༣༡; ཝིསུདྡྷི. ༢.༤༥༤) ཝུཏྟཾ.

ཨེཝཾ སོཏཝིཉྙཱཎཱདཱིསུཔི ཡཐཱརཧཾ དཊྛབྦཾ. ‘‘ཏཐཱ’’ཏི ཨིམིནཱ ཨུཔེཀྑཱསཧགཏབྷཱཝཾ ཨཏིདིསཏི. ཝིཉྙཱཎཱདྷིཊྛིཏཾ ཧུཏྭཱ སུཎཱཏཱིཏི སོཏཾ. གྷཱཡཏི གནྡྷོཔཱདཱནཾ ཀརོཏཱིཏི གྷཱནཾ. ཛཱིཝིཏནིམིཏྟཾ རསོ ཛཱིཝིཏཾ, ཏཾ ཨཝ྄ཧཱཡཏི ཏསྨིཾ ནིནྣཏཱཡཱཏི ཛིཝ྄ཧཱ ནིརུཏྟིནཡེན. ཀུཙྪིཏཱནཾ པཱཔདྷམྨཱནཾ ཨཱཡོ པཝཏྟིཊྛཱནནྟི ཀཱཡོ. ཀཱཡིནྡྲིཡཉྷི ཕོཊྛབྦགྒཧཎསབྷཱཝཏྟཱ ཏདསྶཱདཝསཔྤཝཏྟཱནཾ, ཏམྨཱུལཀཱནཉྩ པཱཔདྷམྨཱནཾ ཝིསེསཀཱརཎནྟི ཏེསཾ པཝཏྟིཊྛཱནཾ ཝིཡ གཡ྄ཧཏི. སསམྦྷཱརཀཱཡོ ཝཱ ཀུཙྪིཏཱནཾ ཀེསཱདཱིནཾ ཨཱཡོཏི ཀཱཡོ. ཏཾསཧཙརིཏཏྟཱ པན པསཱདཀཱཡོཔི ཏཐཱ ཝུཙྩཏི. དུ ཀུཙྪིཏཾ ཧུཏྭཱ ཁནཏི ཀཱཡིཀསུཁཾ, དུཀྑམནྟི ཝཱ དུཀྑཾ. དུཀྐརམོཀཱསདཱནཾ ཨེཏསྶཱཏི དུཀྑ’’ནྟིཔི ཨཔརེ. པཉྩཝིཉྙཱཎགྒཧིཏཾ རཱུཔཱདིཨཱརམྨཎཾ སམྤཊིཙྪཏི ཏདཱཀཱརཔྤཝཏྟིཡཱཏི སམྤཊིཙྪནཾ. སམྨཱ ཏཱིརེཏི ཡཐཱསམྤཊིཙྪིཏཾ རཱུཔཱདིཨཱརམྨཎཾ ཝཱིམཾསཏཱིཏི སནྟཱིརཎཾ. ཨཉྙམཉྙཝིརུདྡྷཱནཾ ཀུསལཱཀུསལཱནཾ པཱཀཱཏི ཝིཔཱཀཱ, ཝིཔཀྐབྷཱཝམཱཔནྣཱནཾ ཨརཱུཔདྷམྨཱནམེཏཾ ཨདྷིཝཙནཾ. ཨེཝཉྩ ཀཏྭཱ ཀུསལཱཀུསལཀམྨསམུཊྛཱནཱནམྤི ¶ ཀཊཏྟཱརཱུཔཱནཾ ནཏྠི ཝིཔཱཀཝོཧཱརོ. ཨཀུསལསྶ ཝིཔཱཀཙིཏྟཱནི ཨཀུསལཝིཔཱཀཙིཏྟཱནི.

༡༠. སུཁཡཏི ཀཱཡཙིཏྟཾ, སུཊྛུ ཝཱ ཁནཏི ཀཱཡཙིཏྟཱབཱདྷཾ, སུཁེན ཁམིཏབྦནྟི ཝཱ སུཁཾ. ‘‘སུཀརམོཀཱསདཱནཾ ཨེཏསྶཱཏི སུཁ’’ནྟི ཨཔརེ. ཀསྨཱ པན ཡཐཱ ཨཀུསལཝིཔཱཀསནྟཱིརཎཾ ཨེཀམེཝ ཝུཏྟཾ, ཨེཝམཝཏྭཱ ཀུསལཝིཔཱཀསནྟཱིརཎཾ དྭིདྷཱ ཝུཏྟནྟི? ཨིཊྛཨིཊྛམཛ྄ཛྷཏྟཱརམྨཎཝསེན ཝེདནཱབྷེདསམྦྷཝཏོ. ཡདི ཨེཝཾ ཏཏྠཱཔི ཨནིཊྛཨནིཊྛམཛ྄ཛྷཏྟཱརམྨཎཝསེན ཝེདནཱབྷེདེན བྷཝིཏབྦནྟི? ནཡིདམེཝཾ ཨནིཊྛཱརམྨཎེ ¶ ཨུཔྤཛྫིཏབྦསྶཔི དོམནསྶསྶ པཊིགྷེན ཝིནཱ ཨནུཔྤཛྫནཏོ, པཊིགྷསྶ ཙ ཨེཀནྟཱཀུསལསབྷཱཝསྶ ཨབྱཱཀཏེསུ ཨསམྦྷཝཏོ. ན ཧི བྷིནྣཛཱཏིཀོ དྷམྨོ བྷིནྣཛཱཏིཀེསུ ཨུཔལབྦྷཏི, ཏསྨཱ ཨཏྟནཱ སམཱནཡོགཀྑམསྶ ཨསམྦྷཝཏོ ཨཀུསལཝིཔཱཀེསུ དོམནསྶཾ ན སམྦྷཝཏཱིཏི ཏསྶ ཏཾསཧགཏཏཱ ན ཝུཏྟཱ. ཨཐ ཝཱ ཡཐཱ ཀོཙི བལཝཏཱ པོཐིཡམཱནོ དུབྦལཔུརིསོ ཏསྶ པཊིཔྤཧརིཏུཾ ཨསཀྐོནྟོ ཏསྨིཾ ཨུཔེཀྑཀོཝ ཧོཏི, ཨེཝམེཝ ཨཀུསལཝིཔཱཀཱནཾ པརིདུབྦལབྷཱཝཏོ ཨནིཊྛཱརམྨཎེཔི དོམནསྶུཔྤཱདོ ནཏྠཱིཏི སནྟཱིརཎཾ ཨུཔེཀྑཱསཧགཏམེཝ.

ཙཀྑུཝིཉྙཱཎཱདཱིནི པན ཙཏྟཱརི ཨུབྷཡཝིཔཱཀཱནིཔི ཝཏྠཱརམྨཎགྷཊྚནཱཡ དུབྦལབྷཱཝཏོ ཨནིཊྛེ ཨིཊྛེཔི ཙ ཨཱརམྨཎེ ཨུཔེཀྑཱསཧགཏཱནེཝ. ཏེསཉྷི ཙཏུནྣམྤི ཝཏྠུབྷཱུཏཱནི ཙཀྑཱདཱིནི ཨུཔཱདཱརཱུཔཱནེཝ, ཏཐཱ ཨཱརམྨཎབྷཱུཏཱནིཔི རཱུཔཱདཱིནི, ཨུཔཱདཱརཱུཔཀེན ཙ ཨུཔཱདཱརཱུཔཀསྶ སངྒྷཊྚནཾ ཨཏིདུབྦལཾ པིཙུཔིཎྜཀེན པིཙུཔིཎྜཀསྶ ཕུསནཾ ཝིཡ, ཏསྨཱ ཏཱནི སབྦཐཱཔི ཨུཔེཀྑཱསཧགཏཱནེཝ. ཀཱཡཝིཉྙཱཎསྶ པན ཕོཊྛབྦསངྑཱཏབྷཱུཏཏྟཡམེཝ ཨཱརམྨཎནྟི ཏཾ ཀཱཡཔྤསཱདེ སངྒྷཊྚིཏམྤི ཏཾ ཨཏིཀྐམིཏྭཱ ཏནྣིསྶཡེསུ མཧཱབྷཱུཏེསུ པཊིཧཉྙཏི. བྷཱུཏརཱུཔེཧི ཙ བྷཱུཏརཱུཔཱནཾ སངྒྷཊྚནཾ བལཝཏརཾ ཨདྷིཀརཎིམཏྠཀེ པིཙུཔིཎྜཀཾ ཋཔེཏྭཱ ཀཱུཊེན པཧཊཀཱལེ ཀཱུཊསྶ པིཙུཔིཎྜཀཾ ཨཏིཀྐམིཏྭཱ ཨདྷིཀརཎིགྒཧཎཾ ཝིཡ, ཏསྨཱ ཝཏྠཱརམྨཎགྷཊྚནཱཡ བལཝབྷཱཝཏོ ཀཱཡཝིཉྙཱཎཾ ཨནིཊྛེ དུཀྑསཧགཏཾ, ཨིཊྛེ སུཁསཧགཏནྟི. སམྤཊིཙྪནཡུགལ༹ྷཾ པན ཨཏྟནཱ ཨསམཱནནིསྶཡཱནཾ ཙཀྑུཝིཉྙཱཎཱདཱིནམནནྟརཾ ཨུཔྤཛྫཏཱིཏི སམཱནནིསྶཡཏོ ཨལདྡྷཱནནྟརཔཙྩཡཏཱཡ སབྷཱགཱུཔཏྠམྦྷརཧིཏོ ཝིཡ པུརིསོ ནཱཏིབལཝཾ སབྦཐཱཔི ཝིསཡརསམནུབྷཝིཏུཾ ན སཀྐོཏཱིཏི སབྦཐཱཔི ཨུཔེཀྑཱསཧགཏམེཝ. ཝུཏྟཝིཔརིཡཱཡཏོ ཀུསལཝིཔཱཀསནྟཱིརཎཾ ཨིཊྛཨིཊྛམཛ྄ཛྷཏྟཱརམྨཎེསུ ¶ སུཁོཔེཀྑཱསཧགཏནྟི. ཡདི ཨེཝཾ ཨཱཝཛྫནདྭཡསྶ ¶ ཨུཔེཀྑཱསམྤཡོགཾ ཀསྨཱ ཝཀྑཏི, ནནུ ཏམྤི སམཱནནིསྶཡཱནནྟརཾ པཝཏྟཏཱིཏི? སཙྩཾ, ཏཏྠ པན པུརིམཾ པུབྦེ ཀེནཙི ཨགྒཧིཏེཡེཝ ཨཱརམྨཎེ ཨེཀཝཱརམེཝ པཝཏྟཏི, པཙྪིམམྤི ཝིསདིསཙིཏྟསནྟཱནཔརཱཝཏྟནཝསེན བྱཱཔཱརནྟརསཱཔེཀྑནྟི ན སབྦཐཱཔི ཝིསཡརསམནུབྷཝིཏུཾ སཀྐོཏི, ཏསྨཱ མཛ྄ཛྷཏྟཝེདནཱསམྤཡུཏྟམེཝཱཏི. ཧོནྟི ཙེཏྠ –

‘‘ཝཏྠཱལམྦསབྷཱཝཱནཾ, བྷཱུཏིཀཱནཉྷི གྷཊྚནཾ;

དུབྦལཾ ཨིཏི ཙཀྑཱདི-ཙཏུཙིཏྟམུཔེཀྑཀཾ.

‘‘ཀཱཡནིསྶཡཕོཊྛབྦ-བྷཱུཏཱནཾ གྷཊྚནཱཡ ཏུ;

བལཝཏྟཱ ན ཝིཉྙཱཎཾ, ཀཱཡིཀ མཛ྄ཛྷཝེདནཾ.

‘‘སམཱནནིསྶཡོ ཡསྨཱ, ནཏྠཱནནྟརཔཙྩཡོ;

ཏསྨཱ དུབྦལམཱལམྦེ, སོཔེཀྑཾ སམྤཊིཙྪན’’ནྟི.

ཀུསལསྶ ཝིཔཱཀཱནི, སམྤཡུཏྟཧེཏུཝིརཧཏོ ཨཧེཏུཀཙིཏྟཱནི ཙཱཏི ཀུསལཝིཔཱཀཱཧེཏུཀཙིཏྟཱནི. ནིབྦཏྟཀཧེཏུཝསེན ནིཔྥནྣཱནིཔི ཧེཏཱནི སམྤཡུཏྟཧེཏུཝསེནེཝ ཨཧེཏུཀཝོཧཱརཾ ལབྷནྟི, ཨིཏརཐཱ མཧཱཝིཔཱཀེཧི ཨིམེསཾ ནཱནཏྟཱསམྦྷཝཏོ. ཀིཾ པནེཏྠ ཀཱརཎཾ ཡཐཱ ཨིདྷེཝཾ ཨཀུསལཝིཔཱཀནིགམནེ ཨཧེཏུཀགྒཧཎཾ ན ཀཏནྟི? བྱབྷིཙཱརཱབྷཱཝཏོ. སཏི ཧི སམྦྷཝེ, བྱབྷིཙཱརེ ཙ ཝིསེསནཾ སཱཏྠཀཾ སིཡཱ. ཨཀུསལཝིཔཱཀཱནཾ པན ལོབྷཱདིསཱཝཛྫདྷམྨཝིཔཱཀབྷཱཝེན ཏབྦིདྷུརེཧི, ཨལོབྷཱདཱིཧི སམྤཡོགཱཡོགཏོ, སཡཾ ཨབྱཱཀཏནིརཝཛྫསབྷཱཝཱནཾ ལོབྷཱདིཨཀུསལདྷམྨསམྤཡོགཝིརོདྷཏོ ཙ ནཏྠི ཀདཱཙིཔི སཧེཏུཀཏཱཡ སམྦྷཝོཏི ཨཧེཏུཀབྷཱཝཱབྱབྷིཙཱརཏོ ¶ ན ཏཱནི ཨཧེཏུཀསདྡེན ཝིསེསིཏབྦཱནི.

༡༡. ཨིདཱནི ཨཧེཏུཀཱདྷིཀཱརེ ཨཧེཏུཀཀིརིཡཙིཏྟཱནིཔི ཀིཙྩབྷེདེན ཏིདྷཱ དསྶེཏུཾ ‘‘ཨུཔེཀྑཱསཧགཏ’’ནྟྱཱདི ཝུཏྟཾ. ཙཀྑཱདིཔཉྩདྭཱརེ གྷཊྚིཏམཱརམྨཎཾ ཨཱཝཛྫེཏི ཏཏྠ ཨཱབྷོགཾ ཀརོཏི, ཙིཏྟསནྟཱནཾ ཝཱ བྷཝངྒཝསེན པཝཏྟིཏུཾ ཨདཏྭཱ ཝཱིཐིཙིཏྟབྷཱཝཱཡ པརིཎཱམེཏཱིཏི པཉྩདྭཱརཱཝཛྫནཾ, ཀིརིཡཱཧེཏུཀམནོདྷཱཏུཙིཏྟཾ. ཨཱཝཛྫནསྶ ཨནནྟརཔཙྩཡབྷཱུཏཾ བྷཝངྒཙིཏྟཾ མནོདྭཱརཾ ཝཱིཐིཙིཏྟཱནཾ པཝཏྟིམུཁབྷཱཝཏོ. ཏསྨིཾ དིཊྛསུཏམུཏཱདིཝསེན ཨཱཔཱཐམཱགཏམཱརམྨཎཾ ཨཱཝཛྫེཏི ¶ , ཝུཏྟནཡེན ཝཱ ཙིཏྟསནྟཱནཾ པརིཎཱམེཏཱིཏི མནོདྭཱརཱཝཛྫནཾ, ཀིརིཡཱཧེཏུཀམནོཝིཉྙཱཎདྷཱཏུཨུཔེཀྑཱསཧགཏཙིཏྟཾ. ཨིདམེཝ ཙ པཉྩདྭཱརེ ཡཐཱསནྟཱིརིཏཾ ཨཱརམྨཎཾ ཝཝཏྠཔེཏཱིཏི ཝོཊྛབྦནནྟི ཙ ཝུཙྩཏི. ཧསིཏཾ ཨུཔྤཱདེཏཱིཏི ཧསིཏུཔྤཱདཾ, ཁཱིཎཱསཝཱནཾ ཨནོལཱ༹རིཀཱརམྨཎེསུ པཧཊྛཱཀཱརམཏྟཧེཏུཀཾ ཀིརིཡཱཧེཏུཀམནོཝིཉྙཱཎདྷཱཏུསོམནསྶསཧགཏཙིཏྟཾ.

༡༢. སབྦཐཱཔཱིཏི ཨཀུསལཝིཔཱཀཀུསལཝིཔཱཀཀིརིཡབྷེདེན. ཨཊྛཱརསཱཏི གཎནཔརིཙྪེདོ. ཨཧེཏུཀཙིཏྟཱནཱིཏི པརིཙྪིནྣདྷམྨནིདསྶནཾ.

ཨཧེཏུཀཙིཏྟཝཎྞནཱ ནིཊྛིཏཱ.

སོབྷནཙིཏྟཝཎྞནཱ

༡༤. ཨེཝཾ དྭཱདསཱཀུསལཨཧེཏུཀཱཊྛཱརསཝསེན སམཏིཾས ཙིཏྟཱནི དསྶེཏྭཱ ཨིདཱནི ཏབྦིནིམུཏྟཱནཾ སོབྷནཝོཧཱརཾ ཋཔེཏུཾ ‘‘པཱཔཱཧེཏུཀམུཏྟཱནཱི’’ཏྱཱདི ཝུཏྟཾ. ཨཏྟནཱ ཨདྷིསཡིཏསྶ ཨཔཱཡཱདིདུཀྑསྶ པཱཔནཏོ པཱཔེཧི ¶ , ཧེཏུསམྤཡོགཱབྷཱཝཏོ ཨཧེཏུཀེཧི ཙ མུཏྟཱནི ཙཏུཝཱིསཏིཀཱམཱཝཙརཔཉྩཏིཾསམཧགྒཏལོཀུཏྟརཝསེན ཨེཀཱུནསཊྛིཔརིམཱཎཱནི, ཨཐ ཝཱ ཨཊྛ ལོཀུཏྟརཱནི ཛྷཱནངྒཡོགབྷེདེན པཙྩེཀཾ པཉྩདྷཱ ཀཏྭཱ ཨེཀནཝུཏིཔི ཙིཏྟཱནི སོབྷནགུཎཱཝཧནཏོ, ཨལོབྷཱདིཨནཝཛྫཧེཏུསམྤཡོགཏོ ཙ སོབྷནཱནཱིཏི ཝུཙྩརེ ཀཐཱིཡནྟི.

ཀཱམཱཝཙརསོབྷནཙིཏྟཝཎྞནཱ

༡༥. ཨིདཱནི སོབྷནེསུ ཀཱམཱཝཙརཱནམེཝ པཋམཾ ཨུདྡིཊྛཏྟཱ ཏེསུཔི ཨབྱཱཀཏཱནཾ ཀུསལཔུབྦཀཏྟཱ པཋམཾ ཀཱམཱཝཙརཀུསལཾ, ཏཏོ ཏབྦིཔཱཀཾ, ཏདནནྟརཾ ཏདེཀབྷཱུམིཔརིཡཱཔནྣཾ ཀིརིཡཙིཏྟཉྩ པཙྩེཀཾ ཝེདནཱཉཱཎསངྑཱརབྷེདེན ཨཊྛདྷཱ དསྶེཏུཾ ‘‘སོམནསྶསཧགཏ’’ནྟྱཱདི ཝུཏྟཾ. ཏཏྠ ཛཱནཱཏི ཡཐཱསབྷཱཝཾ པཊིཝིཛ྄ཛྷཏཱིཏི ཉཱཎཾ. སེསཾ ཝུཏྟནཡམེཝ. ཨེཏྠ ཙ བལཝསདྡྷཱཡ དསྶནསམྤཏྟིཡཱ པཙྩཡཔཊིགྒཱཧཀཱདིསམྤཏྟིཡཱཏི ཨེཝམཱདཱིཧི ཀཱརཎེཧི སོམནསྶསཧགཏཏཱ, པཉྙཱསཾཝཏྟནིཀཀམྨཏོ, ཨབྱཱཔཛྫལོཀཱུཔཔཏྟིཏོ, ཨིནྡྲིཡཔརིཔཱཀཏོ, ཀིལེསདཱུརཱིབྷཱཝཏོ ¶ ཙ ཉཱཎསམྤཡུཏྟཏཱ, ཏབྦིཔརིཡཱཡེན ཨུཔེཀྑཱསཧགཏཏཱ ཙེཝ ཉཱཎཝིཔྤཡུཏྟཏཱ ཙ, ཨཱཝཱསསཔྤཱཡཱདིཝསེན ཀཱཡཙིཏྟཱནཾ ཀལླབྷཱཝཏོ, པུབྦེ དཱནཱདཱིསུ ཀཏཔརིཙཡཏཱདཱིཧི ཙ ཨསངྑཱརིཀཏཱ, ཏབྦིཔརིཡཱཡེན སསངྑཱརིཀཏཱ ཙ ཝེདིཏབྦཱ.

ཏཏྠ ཡདཱ པན ཡོ དེཡྻདྷམྨཔཊིགྒཱཧཀཱདིསམྤཏྟིཾ, ཨཉྙཾ ཝཱ སོམནསྶཧེཏུཾ ཨཱགམྨ ཧཊྛཔཧཊྛོ ‘‘ཨཏྠི དིནྣ’’ནྟྱཱདིནཡཔྤཝཏྟཾ སམྨཱདིཊྛིཾ པུརཀྑཏྭཱ མུཏྟཙཱགཏཱདིཝསེན ཨསཾསཱིདནྟོ ཨནུསྶཱཧིཏོ པརེཧི དཱནཱདཱིནི པུཉྙཱནི ཀརོཏི, ཏདཱསྶ ཙིཏྟཾ སོམནསྶསཧགཏཾ ཉཱཎསམྤཡུཏྟཾ ཨསངྑཱརིཀཾ ཧོཏི. ཡདཱ པན ཝུཏྟནཡེནེཝ ཧཊྛཏུཊྛོ སམྨཱདིཊྛིཾ ¶ པུརཀྑཏྭཱཔི ཨམུཏྟཙཱགཏཱདིཝསེན སཾསཱིདམཱནོ པརེཧི ཝཱ ཨུསྶཱཧིཏོ ཀརོཏི, ཏདཱསྶ ཏདེཝ ཙིཏྟཾ སསངྑཱརིཀཾ ཧོཏི. ཡདཱ པན ཉཱཏིཛནསྶ པཊིཔཏྟིདསྶནེན ཛཱཏཔརིཙཡཱ བཱལདཱརཀཱ བྷིཀྑཱུ དིསྭཱ སོམནསྶཛཱཏཱ སཧསཱ ཀིཉྩིདེཝ ཧཏྠགཏཾ དདནྟི ཝཱ ཝནྡནྟི ཝཱ, ཏདཱ ཏེསཾ ཏཏིཡཾ ཙིཏྟཾ ཨུཔྤཛྫཏི. ཡདཱ པན ‘‘དེཐ, ཝནྡཐཱ’’ཏི ཉཱཏཱིཧི ཨུསྶཱཧིཏཱ ཨེཝཾ པཊིཔཛྫནྟི, ཏདཱ ཙཏུཏྠཾ ཙིཏྟཾ ཨུཔྤཛྫཏི. ཡདཱ པན དེཡྻདྷམྨཔཊིགྒཱཧཀཱདཱིནཾ ཨསམྤཏྟིཾ, ཨཉྙེསཾ ཝཱ སོམནསྶཧེཏཱུནཾ ཨབྷཱཝཾ ཨཱགམྨ ཙཏཱུསུཔི ཝིཀཔྤེསུ སོམནསྶརཧིཏཱ ཧོནྟི, ཏདཱ སེསཱནི ཙཏྟཱརི ཨུཔེཀྑཱསཧགཏཱནི ཨུཔྤཛྫནྟཱིཏི. ཨཊྛཔཱིཏི པི-སདྡེན དསཔུཉྙཀིརིཡཱདིཝསེན ཨནེཀཝིདྷཏཾ སམྤིཎྜེཏི. ཏཐཱ ཧི ཝདནྟི –

‘‘ཀམེན པུཉྙཝཏྠཱུཧི, གོཙརཱདྷིཔཏཱིཧི ཙ;

ཀམྨཧཱིནཱདིཏོ ཙེཝ, གཎེཡྻ ནཡཀོཝིདོ’’ཏི.

ཨིམཱནི ཧི ཨཊྛ ཙིཏྟཱནི དསཔུཉྙཀིརིཡཝཏྠུཝསེན པཝཏྟནཏོ པཙྩེཀཾ དས དསཱཏི ཀཏྭཱ ཨསཱིཏི ཙིཏྟཱནི ཧོནྟི, ཏཱནི ཙ ཚསུ ཨཱརམྨཎེསུ པཝཏྟནཏོ པཙྩེཀཾ ཚགྒུཎིཏཱནི སཱསཱིཏིཀཱནི ཙཏྟཱརི སཏཱནི ཧོནྟི, ཨདྷིཔཏིབྷེདེན པན ཉཱཎཝིཔྤཡུཏྟཱནཾ ཙཏྟཱལཱིསཱདྷིཀདྭིསཏཔརིམཱཎཱནཾ ཝཱིམཾསཱདྷིཔཏིསམྤཡོགཱབྷཱཝཏོ ཏཱནི ཏིཎྞཾ ཨདྷིཔཏཱིནཾ ཝསེན ཏིགུཎིཏཱནི ཝཱིསཱདྷིཀཱནི སཏྟསཏཱནི, ཏཐཱ ཉཱཎསམྤཡུཏྟཱནི ཙ ཙཏུནྣཾ ཨདྷིཔཏཱིནཾ ཝསེན ཙཏུགྒུཎིཏཱནི སསཊྛིཀཱནི ནཝ སཏཱནཱིཏི ཨེཝཾ ཨདྷིཔཏིཝསེན སཧསྶཾ སཱསཱིཏིཀཱནི ཙ ཚ སཏཱནི ཧོནྟི, ཏཱནི ཀཱཡཝཙཱིམནོཀམྨསངྑཱཏཀམྨཏྟིཀཝསེན ཏིགུཎིཏཱནི ཙཏྟཱལཱིསཱདྷིཀཱནི པཉྩ ¶ སཧསྶཱནི ཧོནྟི, ཏཱནི ཙ ཧཱིནམཛ྄ཛྷིམཔཎཱིཏབྷེདཏོ ཏིགུཎིཏཱནི ཝཱིསསཏཱདྷིཀཔནྣརསསཧསྶཱནི ཧོནྟི. ཡཾ པན ཝུཏྟཾ ཨཱཙརིཡབུདྡྷདཏྟཏྠེརེན –

‘‘སཏྟརས ¶ སཧསྶཱནི, དྭེ སཏཱནི ཨསཱིཏི ཙ;

ཀཱམཱཝཙརཔུཉྙཱནི, བྷཝནྟཱིཏི ཝིནིདྡིསེ’’ཏི.

ཏཾ ཨདྷིཔཏིཝསེན གཎནཔརིཧཱནིཾ ཨནཱདིཡིཏྭཱ སོཏཔཏིཏཝསེན ཝུཏྟནྟི དཊྛབྦཾ, ཀཱལདེསཱདིབྷེདེན པན ནེསཾ བྷེདོ ཨཔྤམེཡྻོཝ.

ཀུཙྪིཏེ (དྷ. ས. ཨཊྛ. ༡) པཱཔདྷམྨེ སལཡནྟི ཀམྤེནྟི ཝིདྡྷཾསེནྟི ཨཔགམེནྟཱིཏི ཝཱ ཀུསལཱནི. ཨཐ ཝཱ ཀུཙྪིཏཱཀཱརེན སནྟཱནེ སཡནཏོ པཝཏྟནཏོ ཀུསསངྑཱཏེ པཱཔདྷམྨེ ལུནནྟི ཚིནྡནྟཱིཏི ཀུསལཱནི. ཨཐ ཝཱ ཀུཙྪིཏེ པཱཔདྷམྨེ སཱནཏོ ཏནུཀརཎཏོ ཨོསཱནཀརཎཏོ ཝཱ ཀུསསངྑཱཏེན ཉཱཎེན, སདྡྷཱདིདྷམྨཛཱཏེན ཝཱ ལཱཏབྦཱནི སཧཛཱཏཨུཔནིསྶཡབྷཱཝེན ཡཐཱརཧཾ པཝཏྟེཏབྦཱནཱིཏི ཀུསལཱནི, ཏཱནེཝ ཡཐཱཝུཏྟཏྠེན ཀཱམཱཝཙརཱནི ཀུསལཙིཏྟཱནི ཙཱཏི ཀཱམཱཝཙརཀུསལཙིཏྟཱནི.

༡༦. ཡཐཱ པནེཏཱནི པུཉྙཀིརིཡཝསེན, ཀམྨདྭཱརཝསེན, ཀམྨཝསེན, ཨདྷིཔཏིཝསེན ཙ པཝཏྟནྟི, ནེཝཾ ཝིཔཱཀཱནི དཱནཱདིཝསེན ཨཔྤཝཏྟནཏོ, ཝིཉྙཏྟིསམུཊྛཱཔནཱབྷཱཝཏོ, ཨཝིཔཱཀསབྷཱཝཏོ, ཚནྡཱདཱིནི པུརཀྑཏྭཱ ཨཔྤཝཏྟིཏོ ཙ, ཏསྨཱ ཏཾཝསེན པརིཧཱཔེཏྭཱ ཡཐཱརཧཾ གཎནབྷེདོ ཡོཛེཏབྦོ. ཨིམཱནིཔི ཨིཊྛཨིཊྛམཛ྄ཛྷཏྟཱརམྨཎཝསེན ཡཐཱཀྐམཾ སོམནསྶུཔེཀྑཱསཧིཏཱནི. པཊིསནྡྷཱདིཝསཔྤཝཏྟིཡཾ ཀམྨསྶ བལཝཱབལཝབྷཱཝཏོ, ཏདཱརམྨཎཔྤཝཏྟིཡཾ ཡེབྷུཡྻེན ཛཝནཱནུརཱུཔཏོ, ཀདཱཙི ཏཏྠཱཔི ཀམྨཱནུརཱུཔཏོ ཙ ཉཱཎསམྤཡུཏྟཱནི, ཉཱཎཝིཔྤཡུཏྟཱནི ཙ ཧོནྟི. ཡཐཱཔཡོགཾ ཝིནཱ སཔྤཡོགཉྩ ཡཐཱཨུཔཊྛིཏེཧི ཀམྨཱདིཔཙྩཡེཧི ཨུཏུབྷོཛནཱདིསཔྤཱཡཱསཔྤཱཡཝསེན ཨསངྑཱརིཀསསངྑཱརིཀཱནི.

༡༧. ཀིརིཡཙིཏྟཱནམྤི ¶ ཀུསལེ ཝུཏྟནཡེན ཡཐཱརཧཾ སོམནསྶསཧགཏཱདིཏཱ ཝེདིཏབྦཱ.

༡༨. སཧེཏུཀཀཱམཱཝཙརཀུསལཝིཔཱཀཀིརིཡཙིཏྟཱནཱིཏི ཨེཏྠ སཧེཏུཀགྒཧཎཾ ཝིཔཱཀཀིརིཡཱཔེཀྑཾ ¶ ཝིསེསནཾ ཀུསལསྶ ཨེཀནྟསཧེཏུཀཏྟཱ. ཧོཏི ཧི ཡཐཱལཱབྷཡོཛནཱ, ‘‘སཀྑརཀཐལམྤི མཙྪགུམྦམྤི ཙརནྟམྤི ཏིཊྛནྟམྤཱི’’ཏྱཱདཱིསུ (དཱི. ནི. ༡.༢༤༩) ཝིཡ སཀྑརཀཐལསྶ ཙརཎཱཡོགཏོ མཙྪགུམྦཱཔེཀྑཱཡ ཙརཎཀིརིཡཱ ཡོཛཱིཡཏཱིཏི.

༡༩. སཧེཏུཀཱམཱཝཙརཔུཉྙཔཱཀཀིརིཡཱ ཝེདནཱཉཱཎསངྑཱརབྷེདེན པཙྩེཀཾ ཝེདནཱབྷེདཏོ དུཝིདྷཏྟཱ, ཉཱཎབྷེདཏོ ཙཏུབྦིདྷཏྟཱ, སངྑཱརབྷེདཏོ ཨཊྛཝིདྷཏྟཱ ཙ སམྤིཎྜེཏྭཱ ཙཏུཝཱིསཏི མཏཱཏི ཡོཛནཱ. ནནུ ཙ ཝེདནཱབྷེདོ ཏཱཝ ཡུཏྟོ ཏཱསཾ བྷིནྣསབྷཱཝཏྟཱ. ཉཱཎསངྑཱརབྷེདོ པན ཀཐནྟི? ཉཱཎསངྑཱརཱནཾ བྷཱཝཱབྷཱཝཀཏོཔི བྷེདོ ཉཱཎསངྑཱརཀཏོཝ ཡཐཱ ཝསྶཀཏོ སུབྷིཀྑོ དུབྦྷིཀྑོཏི, ཏསྨཱ ཉཱཎསངྑཱརཀཏོ བྷེདོ ཉཱཎསངྑཱརབྷེདོཏི ན ཨེཏྠ ཀོཙི ཝིརོདྷོཏི.

༢༠. ཨིདཱནི སབྦཱནིཔི ཀཱམཱཝཙརཙིཏྟཱནི སམྤིཎྜེཏྭཱ དསྶེཏུཾ ‘‘ཀཱམེ ཏེཝཱིསཱ’’ཏྱཱདི ཝུཏྟཾ. ཀཱམེ བྷཝེ སཏྟ ཨཀུསལཝིཔཱཀཱནི, སཧེཏུཀཱཧེཏུཀཱནི སོལ༹ས ཀུསལཝིཔཱཀཱནཱིཏི ཨེཝཾ ཏེཝཱིསཏི ཝིཔཱཀཱནི དྭཱདས ཨཀུསལཱནི, ཨཊྛ ཀུསལཱནཱིཏི པུཉྙཱཔུཉྙཱནི ཝཱིསཏི ཨཧེཏུཀཱ ཏིསྶོ སཧེཏུཀཱ ཨཊྛཱཏི ཨེཀཱདས ཀིརིཡཱ ཙཱཏི སབྦཐཱཔི ཀུསལཱཀུསལཝིཔཱཀཀིརིཡཱནཾ ཨནྟོགདྷབྷེདེན ཙཏུཔཉྙཱསེཝ ཀཱལདེསསནྟཱནཱདིབྷེདེན ཨནེཀཝིདྷབྷཱཝེཔཱིཏྱཏྠོ.

ཀཱམཱཝཙརསོབྷནཙིཏྟཝཎྞནཱ ནིཊྛིཏཱ.

རཱུཔཱཝཙརཙིཏྟཝཎྞནཱ

༢༡. ཨིདཱནི ¶ ཏདནནྟརུདྡིཊྛསྶ རཱུཔཱཝཙརསྶ ནིདྡེསཀྐམོ ཨནུཔྤཏྟོཏི ཏསྶ ཛྷཱནངྒཡོགབྷེདེན པཉྩདྷཱ ཝིབྷཱགཾ དསྶེཏུཾ ‘‘ཝིཏཀྐ…པེ… སཧིཏ’’ནྟྱཱདིམཱཧ. ཝིཏཀྐོ ཙ ཝིཙཱརོ ཙ པཱིཏི ཙ སུཁཉྩ ཨེཀགྒཏཱ ཙཱཏི ཨིམེཧི སཧིཏཾ ཝིཏཀྐཝིཙཱརཔཱིཏིསུཁེཀགྒཏཱསཧིཏཾ. ཏཏྠ ཨཱརམྨཎཾ ཝིཏཀྐེཏི སམྤཡུཏྟདྷམྨེ ཨབྷིནིརོཔེཏཱིཏི ཝིཏཀྐོ, སོ སཧཛཱཏཱནཾ ཨཱརམྨཎཱབྷིནིརོཔནལཀྑཎོ, ཡཐཱ ཧི ཀོཙི གཱམཝཱསཱི པུརིསོ རཱཛཝལླབྷཾ སམྦནྡྷིནཾ མིཏྟཾ ཝཱ ནིསྶཱཡ རཱཛགེཧཾ ཨནུཔཝིསཏི, ཨེཝཾ ཝིཏཀྐཾ ནིསྶཱཡ ཙིཏྟཾ ཨཱརམྨཎཾ ཨཱརོཧཏི. ཡདི ཨེཝཾ ཀཐཾ ཨཝིཏཀྐཾ ཙིཏྟཾ ཨཱརམྨཎཾ ཨཱརོཧཏཱིཏི? ཏམྤི ཝིཏཀྐབལེནེཝ ¶ ཨབྷིནིརོཧཏི. ཡཐཱ ཧི སོ པུརིསོ པརིཙཡེན ཏེན ཝིནཱཔི ནིརཱསངྐོ རཱཛགེཧཾ པཝིསཏི, ཨེཝཾ པརིཙཡེན ཝིཏཀྐེན ཝིནཱཔི ཨཝིཏཀྐཾ ཙིཏྟཾ ཨཱརམྨཎཾ ཨབྷིནིརོཧཏི. པརིཙཡོཏི ཙེཏྠ སཝིཏཀྐཙིཏྟསྶ སནྟཱནེ ཨབྷིཎྷཔྤཝཏྟིཝསེན ནིབྦཏྟཱ ཙིཏྟབྷཱཝནཱ. ཨཔི ཙེཏྠ པཉྩཝིཉྙཱཎཾ ཨཝིཏཀྐམྤི ཝཏྠཱརམྨཎསངྒྷཊྚནབལེན, དུཏིཡཛ྄ཛྷཱནཱདཱིནི ཙ ཧེཊྛིམབྷཱཝནཱབལེན ཨབྷིརོཧནྟི.

ཨཱརམྨཎེ ཏེན ཙིཏྟཾ ཝིཙརཏཱིཏི ཝིཙཱརོ. སོ ཨཱརཎནུམཛྫནལཀྑཎོ. ཏཐཱ ཧེས ‘‘ཨནུསནྡྷཱནཏཱ’’ཏི (དྷ. ས. ༨) ནིདྡིཊྛོ. ཨེཏྠ ཙ ཝིཙཱརཏོ ཨོལཱ༹རིཀཊྛེན, ཏསྶེཝ པུབྦངྒམཊྛེན ཙ པཋམགྷཎྚཱབྷིགྷཱཏོ ཝིཡ ཙེཏསོ པཋམཱབྷིནིཔཱཏོ ཝིཏཀྐོ, ཨནུརཝོ ཝིཡ ཨནུསཉྩརཎཾ ཝིཙཱརོ. ཝིཔྥཱརཝཱཙེཏྠ ཝིཏཀྐོ ཙིཏྟསྶ པརིཔྥནྡནབྷཱུཏོ, ཨཱཀཱསེ ཨུཔྤཏིཏུཀཱམསྶ སཀུཎསྶ པཀྑཝིཀྑེཔོ ཝིཡ, པདུམཱབྷིམུཁཔཱཏོ ཝིཡ ཙ གནྡྷཱནུབནྡྷཙེཏསཱ བྷམརསྶ, སནྟཝུཏྟི ཝིཙཱརོ ཙིཏྟསྶ ནཱཏིཔརིཔྥནྡནབྷཱུཏོ, ཨཱཀཱསེ ཨུཔྤཏིཏསྶ ¶ སཀུཎསྶ པཀྑཔྤསཱརཎཾ ཝིཡ, པདུམསྶ ཨུཔརིབྷཱགེ པརིབྦྷམནཾ ཝིཡ ཙ པདུམཱབྷིམུཁཔཏིཏསྶ བྷམརསྶ.

པིནཡཏི ཀཱཡཙིཏྟཾ ཏཔྤེཏི, ཝཌྜྷེཏཱིཏི ཝཱ པཱིཏི, སཱ སམྤིཡཱཡནལཀྑཎཱ, ཨཱརམྨཎཾ ཀལླཏོ གཧཎལཀྑཎཱཏི ཝུཏྟཾ ཧོཏི, སམྤཡུཏྟདྷམྨེ སུཁཡཏཱིཏི སུཁཾ, ཏཾ ཨིཊྛཱནུབྷཝནལཀྑཎཾ སུབྷོཛནརསསྶཱདཀོ རཱཛཱ ཝིཡ. ཏཏྠ ཨཱརམྨཎཔྤཊིལཱབྷེ པཱིཏིཡཱ ཝིསེསོ པཱཀཊོ ཀནྟཱརཁིནྣསྶ ཝནནྟོདཀདསྶནེ ཝིཡ, ཡཐཱལདྡྷསྶ ཨནུབྷཝནེ སུཁསྶ ཝིསེསོ པཱཀཊོ ཡཐཱདིཊྛཨུདཀསྶ པཱནཱདཱིསུ ཝིཡཱཏི. ནཱནཱརམྨཎཝིཀྑེཔཱབྷཱཝེན ཨེཀཾ ཨཱརམྨཎཾ ཨགྒཾ ཨིམསྶཱཏི ཨེཀགྒཾ, ཙིཏྟཾ, ཏསྶ བྷཱཝོ ཨེཀགྒཏཱ, སམཱདྷི. སོ ཨཝིཀྑེཔལཀྑཎོ. ཏསྶ ཧི ཝསེན སསམྤཡུཏྟཾ ཙིཏྟཾ ཨཝིཀྑིཏྟཾ ཧོཏི.

པཋམཉྩ དེསནཱཀྐམཏོ ཙེཝ ཨུཔྤཏྟིཀྐམཏོ ཙ ཨཱདིབྷཱུཏཏྟཱ ཏཾ ཛྷཱནཉྩ ཨཱརམྨཎཱུཔནིཛ྄ཛྷཱནཏོ, པཙྩནཱིཀཛྷཱཔནཏོ ཙཱཏི པཋམཛ྄ཛྷཱནཾ, ཝིཏཀྐཱདིཔཉྩཀཾ. ཛྷཱནངྒསམུདཱཡེ ཡེཝ ཧི ཛྷཱནཝོཧཱརོ ནེམིཨཱདིཨངྒསམུདཱཡེ རཐཝོཧཱརོ ཝིཡ, ཏཐཱ ཧི ཝུཏྟཾ ཝིབྷངྒེ ‘‘ཛྷཱནནྟི ཝིཏཀྐོ ཝིཙཱརོ པཱིཏི སུཁཾ ཙིཏྟསྶེཀགྒཏཱ’’ཏི (ཝིབྷ. ༥༦༩). པཋམཛ྄ཛྷཱནེན སམྤཡུཏྟཾ ཀུསལཙིཏྟཾ པཋམཛ྄ཛྷཱནཀུསལཙིཏྟཾ.

ཀསྨཱ ¶ པན ཨཉྙེསུ ཕསྶཱདཱིསུ སམྤཡུཏྟདྷམྨེསུ ཝིཛྫམཱནེསུ ཨིམེཡེཝ པཉྩ ཛྷཱནངྒཝསེན ཝུཏྟཱཏི? ཝུཙྩཏེ – ཨུཔནིཛ྄ཛྷཱནཀིཙྩཝནྟཏཱཡ, ཀཱམཙྪནྡཱདཱིནཾ ཨུཛུཔཊིཔཀྑབྷཱཝཏོ ཙ. ཝིཏཀྐོ ཧི ཨཱརམྨཎེ ཙིཏྟཾ ཨབྷིནིརོཔེཏི. ཝིཙཱརོ ཨནུཔྤབནྡྷེཏི, པཱིཏི ཙསྶ པཱིནནཾ, སུཁཉྩ ཨུཔབྲཱུཧནཾ ཀརོཏི, ཨཐ ནཾ སསམྤཡུཏྟདྷམྨཾ ཨེཏེཧི ཨབྷིནིརོཔནཱནུཔྤབནྡྷནཔཱིནནཨུཔབྲཱུཧནེཧི ཨནུགྒཧིཏཱ ཨེཀགྒཏཱ སམཱདྷཱནཀིཙྩེན ¶ ཨཏྟཱནཾ ཨནུཝཏྟཱཔེནྟཱི ཨེཀཏྟཱརམྨཎེ སམཾ, སམྨཱ ཙ ཨཱདྷིཡཏི. ཨིནྡྲིཡསམཏཱཝསེན སམཾ པཊིཔཀྑདྷམྨཱནཾ དཱུརཱིབྷཱཝེན ལཱིནུདྡྷཙྩཱབྷཱཝེན སམྨཱ ཙ ཋཔེཏཱིཏི ཨེཝམེཏེ སམེཝ ཨུཔནིཛ྄ཛྷཱནཀིཙྩཾ ཨཱཝེཎིཀཾ. ཀཱམཙྪནྡཱདིཔཊིཔཀྑབྷཱཝེ པན སམཱདྷི ཀཱམཙྪནྡསྶ པཊིཔཀྑོ རཱགཔྤཎིདྷིཡཱ ཨུཛུཔཙྩནཱིཀབྷཱཝཏོ. ཀཱམཙྪནྡཝསེན ཧི ནཱནཱརམྨཎེཧི པལོབྷིཏསྶ པརིབྦྷམནྟསྶ ཙིཏྟསྶ སམཱདྷཱནཾ ཨེཀགྒཏཱཡ ཧོཏི. པཱིཏི བྱཱཔཱདསྶ པཱམོཛྫསབྷཱཝཏྟཱ. ཝིཏཀྐོ ཐིནམིདྡྷསྶ ཡོནིསོ སངྐཔྤནཝསེན སཝིཔྥཱརཔྤཝཏྟིཏོ སུཁཾ ཨཝཱུཔསམཱནུཏཱཔསབྷཱཝསྶ ཨུདྡྷཙྩཀུཀྐུཙྩསྶ ཝཱུཔསནྟསཱིཏལསབྷཱཝཏྟཱ. ཝིཙཱརོ ཝིཙིཀིཙྪཱཡ ཨཱརམྨཎེ ཨནུམཛྫནཝསེན པཉྙཱཔཏིརཱུཔསབྷཱཝཏྟཱ. ཨེཝཾ ཨུཔནིཛ྄ཛྷཱནཀིཙྩཝནྟཏཱཡ, ཀཱམཙྪནྡཱདཱིནཾ ཨུཛུཔཊིཔཀྑབྷཱཝཏོ ཙ ཨིམེཡེཝ པཉྩ ཛྷཱནངྒབྷཱཝེན ཝཝཏྠིཏཱཏི. ཡཐཱཧུ –

‘‘ཨུཔནིཛ྄ཛྷཱནཀིཙྩཏྟཱ, ཀཱམཱདིཔཊིཔཀྑཏོ;

སནྟེསུཔི ཙ ཨཉྙེསུ, པཉྩེཝ ཛྷཱནསཉྙིཏཱ’’ཏི.

ཨུཔེཀྑཱ པནེཏྟ སནྟཝུཏྟིསབྷཱཝཏྟཱ སུཁེཝ ཨནྟོགདྷཱཏི དཊྛབྦཾ. ཏེནཱཧུ –

‘‘ཨུཔེཀྑཱ སནྟཝུཏྟིཏྟཱ, སུཁམིཙྩེཝ བྷཱསིཏཱ’’ཏི. (ཝིབྷ. ཨཊྛ. ༢༣༢; ཝིསུདྡྷི. ༢.༦༤༤);

པཧཱནངྒཱདིཝསེན པནསྶ ཝིསེསོ ཨུཔརི ཨཱཝི བྷཝིསྶཏི, ཏཐཱ ཨརཱུཔཱཝཙརལོཀུཏྟརེསུཔི ལབྦྷམཱནཀཝིསེསོ. ཨཐེཏྠ ཀཱམཱཝཙརཀུསལེསུ ཝིཡ སངྑཱརབྷེདོ ཀསྨཱ ན གཧིཏོ. ཨིདམྤི ཧི ཀེཝལཾ སམཐཱནུཡོགཝསེན པཊིལདྡྷཾ སསངྑཱརིཀཾ, མགྒཱདྷིགམཝསེན པཊིལདྡྷཾ ཨསངྑཱརིཀནྟི སཀྐཱ ཝཏྟུནྟི? ནཡིདམེཝཾ མགྒཱདྷིགམཝསེནསཏྟིཏོ ¶ པཊིལདྡྷསྶཱཔི ཨཔརབྷཱགེ པརིཀམྨཝསེནེཝ ཨུཔྤཛྫནཏོ, ཏསྨཱ སབྦསྶཔི ཛྷཱནསྶ པརིཀམྨསངྑཱཏཔུབྦཱབྷིསངྑཱརེན ¶ ཝིནཱ ཀེཝལཾ ཨདྷིཀཱརཝསེན ཨནུཔྤཛྫནཏོ ‘‘ཨསངྑཱརིཀ’’ནྟིཔི, ཨདྷིཀཱརེན ཙ ཝིནཱ ཀེཝལཾ པརིཀམྨཱབྷིསངྑཱརེནེཝ ཨནུཔྤཛྫནཏོ ‘‘སསངྑཱརིཀ’’ནྟིཔི ན སཀྐཱ ཝཏྟུནྟི. ཨཐ ཝཱ པུབྦཱབྷིསངྑཱརཝསེནེཝ ཨུཔྤཛྫམཱནསྶ ན ཀདཱཙི ཨསངྑཱརིཀབྷཱཝོ སམྦྷཝཏཱིཏི ‘‘ཨསངྑཱརིཀ’’ནྟི ཙ བྱབྷིཙཱརཱབྷཱཝཏོ ‘‘སསངྑཱརིཀ’’ནྟི ཙ ན ཝུཏྟནྟི.

པི-སདྡེན ཙེཏྠ ཙཏུཀྐཔཉྩཀནཡཝསེན སུདྡྷིཀནཝཀོ, ཏཉྩ དུཀྑཔྤཊིཔདཱདནྡྷཱབྷིཉྙཱདུཀྑཔྤཊིཔདཱཁིཔྤཱབྷིཉྙཱསུཁཔྤཊིཔདཱདནྡྷཱབྷིཉྙཱསུཁཔྤཊིཔདཱཁིཔྤཱབྷིཉྙཱཝསེན པཊིཔདཱཙཏུཀྐེན ཡོཛེཏྭཱ དེསིཏཏྟཱ ཙཏྟཱརོ ནཝཀཱ, པརིཏྟཾ པརིཏྟཱརམྨཎཾ, པརིཏྟཾ ཨཔྤམཱཎཱརམྨཎཾ, ཨཔྤམཱཎཾ པརིཏྟཱརམྨཎཾ, ཨཔྤམཱཎཾ ཨཔྤམཱཎཱརམྨཎནྟི ཨཱརམྨཎཙཏུཀྐེན ཡོཛིཏཏྟཱ ཙཏྟཱརོ ནཝཀཱ, ‘‘དུཀྑཔྤཊིཔདཾ དནྡྷཱབྷིཉྙཾ པརིཏྟཾ པརིཏྟཱརམྨཎཾ, དུཀྑཔྤཊིཔདཾ དནྡྷཱབྷིཉྙཾ པརིཏྟཾ ཨཔྤམཱཎཱརམྨཎ’’ནྟྱཱདིནཱ ཨཱརམྨཎཔྤཊིཔདཱམིསྶཀནཡཝསེན སོལ༹ས ནཝཀཱཏི པཉྩཝཱིསཏི ནཝཀཱཏི ཨེཝམཱདིབྷེདཾ སངྒཎྷཱཏི.

༢༢. ཛྷཱནཝིསེསེན ནིབྦཏྟིཏཝིཔཱཀོ ཨེཀནྟཏོ ཏཾཏཾཛྷཱནསདིསོཝཱཏི ཝིཔཱཀཾ ཛྷཱནསདིསམེཝ ཝིབྷཏྟཾ. ཨིམམེཝ ཧི ཨཏྠཾ དཱིཔེཏུཾ བྷགཝཏཱ ཝིཔཱཀནིདྡེསེཔི ཀུསལཾ ཨུདྡིསིཏྭཱཝ ཏདནནྟརཾ མཧགྒཏལོཀུཏྟརཝིཔཱཀཱ ཝིབྷཏྟཱ.

༢༥. རཱུཔཱཝཙརམཱནསཾ ཛྷཱནབྷེདེན པཉྩཧི ཙཏཱུཧི ཏཱིཧི དྭཱིཧི པུན དྭཱིཧི ཛྷཱནངྒེཧི སམྤཡོགབྷེདེན པཉྩདྷཱ པཉྩངྒིཀཾ ཙཏུརངྒིཀཾ ཏིཝངྒིཀཾ དུཝངྒིཀཾ པུན དུཝངྒིཀནྟི པཉྩཝིདྷཾ ཧོཏི ཨཝིསེསེན, པུན ཏཾ པུཉྙཔཱཀཀིརིཡཱནཾ པཙྩེཀཾ པཉྩནྣཾ པཉྩནྣཾ བྷེདཱ པཉྩདསདྷཱ བྷཝེཏྱཏྠོ.

རཱུཔཱཝཙརཙིཏྟཝཎྞནཱ ནིཊྛིཏཱ.

ཨརཱུཔཱཝཙརཙིཏྟཝཎྞནཱ

༢༦. ཨིདཱནི ¶ ¶ ཨརཱུཔཱཝཙརཾ ཨཱརམྨཎབྷེདེན ཙཏུདྷཱ ཝིབྷཛིཏྭཱ དསྶེནྟོ ཨཱཧ ‘‘ཨཱཀཱསཱནཉྩཱཡཏནཱ’’ཏིཨཱདི. ཏཏྠ ཨུཔྤཱདཱདིཨནྟརཧིཏཏཱཡ ནཱསྶ ཨནྟོཏི ཨནནྟཾ, ཨཱཀཱསཉྩ ཏཾ ཨནནྟཉྩཱཏི ཨཱཀཱསཱནནྟཾ, ཀསིཎུགྒྷཱཊིམཱཀཱསོ. ‘‘ཨནནྟཱཀཱས’’ནྟི ཙ ཝཏྟབྦེ ‘‘ཨགྱཱཧིཏོ’’ཏྱཱདཱིསུ ཝིཡ ཝིསེསནསྶ པརནིཔཱཏཝསེན ‘‘ཨཱཀཱསཱནནྟ’’ནྟི ཝུཏྟཾ. ཨཱཀཱསཱནནྟམེཝ ཨཱཀཱསཱནཉྩཾ སཀཏྠེ བྷཱཝཔཙྩཡཝསེན. ཨཱཀཱསཱནཉྩམེཝ ཨཱཡཏནཾ སསམྤཡུཏྟདྷམྨསྶ ཛྷཱནསྶ ཨདྷིཊྛཱནཊྛེན དེཝཱནཾ དེཝཱཡཏནཾ ཝིཡཱཏི ཨཱཀཱསཱནཉྩཱཡཏནཾ. ཏསྨིཾ ཨཔྤནཱཔྤཏྟཾ པཋམཱརུཔྤཛ྄ཛྷཱནམྤི ཨིདྷ ‘‘ཨཱཀཱསཱནཉྩཱཡཏན’’ནྟི ཝུཏྟཾ ཡཐཱ པཐཝཱིཀསིཎཱརམྨཎཾ ཛྷཱནཾ ‘‘པཐཝཱིཀསིཎ’’ནྟི. ཨཐ ཝཱ ཨཱཀཱསཱནཉྩཾ ཨཱཡཏནཾ ཨསྶཱཏི ཨཱཀཱསཱནཉྩཱཡཏནཾ, ཛྷཱནཾ, ཏེན སམྤཡུཏྟཾ ཀུསལཙིཏྟཾ ཨཱཀཱསཱནཉྩཱཡཏནཀུསལཙིཏྟཾ.

ཝིཉྙཱཎམེཝ ཨནནྟཾ ཝིཉྙཱཎཱནནྟཾ, པཋམཱརུཔྤཝིཉྙཱཎཾ. ཏཉྷི ཨུཔྤཱདཱདིཨནྟཝནྟམྤི ཨནནྟཱཀཱསེ པཝཏྟནཏོ ཨཏྟཱནཾ ཨཱརབྦྷ པཝཏྟཱཡ བྷཱཝནཱཡ ཨུཔྤཱདཱདིཨནྟཾ ཨགྒཧེཏྭཱ ཨནནྟཏོ ཕརཎཝསེན པཝཏྟནཏོ ཙ ‘‘ཨནནྟ’’ནྟི ཝུཙྩཏི. ཝིཉྙཱཎཱནནྟམེཝ ཝིཉྙཱཎཉྩཾ ཨཱཀཱརསྶ རསྶཏྟཾ, ན-ཀཱརསྶ ལོཔཉྩ ཀཏྭཱ. དུཏིཡཱརུཔྤཝིཉྙཱཎེན ཝཱ ཨཉྩིཏབྦཾ པཱཔུཎིཏབྦནྟི ཝིཉྙཱཎཉྩཾ, ཏདེཝ ཨཱཡཏནཾ དུཏིཡཱརུཔྤསྶ ཨདྷིཊྛཱནཏྟཱཏི ཝིཉྙཱཎཉྩཱཡཏནཾ. སེསཾ པུརིམསམཾ.

ནཱསྶ ¶ པཋམཱརུཔྤསྶ ཀིཉྩནཾ ཨཔྤམཏྟཀཾ ཨནྟམསོ བྷངྒམཏྟམྤི ཨཝསིཊྛཾ ཨཏྠཱིཏི ཨཀིཉྩནཾ, ཏསྶ བྷཱཝོ ཨཱཀིཉྩཉྙཾ, པཋམཱརུཔྤཝིཉྙཱཎཱབྷཱཝོ. ཏདེཝ ཨཱཡཏནནྟྱཱདི པུརིམསདིསཾ.

ཨོལཱ༹རིཀཱཡ སཉྙཱཡ ཨབྷཱཝཏོ, སུཁུམཱཡ ཙ སཉྙཱཡ ཨཏྠིཏཱཡ ནེཝསྶ སསམྤཡུཏྟདྷམྨསྶ སཉྙཱ ཨཏྠི, ནཱཔི ཨསཉྙཾ ཨཝིཛྫམཱནསཉྙནྟི ནེཝསཉྙཱནཱསཉྙཾ, ཙཏུཏྠཱརུཔྤཛ྄ཛྷཱནཾ. དཱིགྷཾ ཀཏྭཱ པན ‘‘ནེཝསཉྙཱནཱསཉྙ’’ནྟི ཝུཏྟཾ. ནེཝསཉྙཱནཱསཉྙམེཝ ཨཱཡཏནཾ མནཱཡཏནདྷམྨཱཡཏནཔརིཡཱཔནྣཏྟཱཏི ནེཝསཉྙཱནཱསཉྙཱཡཏནཾ. ཨཐ ཝཱ སཉྙཱཝ ཝིཔསྶནཱཡ གོཙརབྷཱཝཾ གནྟྭཱ ནིབྦེདཛནནསངྑཱཏསྶ པཊུསཉྙཱཀིཙྩསྶ ཨབྷཱཝཏོ ནེཝསཉྙཱ ཙ ¶ ཨུཎྷོདཀེ ཏེཛོདྷཱཏུ ཝིཡ སངྑཱརཱཝསེསསུཁུམབྷཱཝེན ཝིཛྫམཱནཏྟཱ ན ཨསཉྙཱཏི ནེཝསཉྙཱནཱསཉྙཱ, སཱ ཨེཝ ཨཱཡཏནཾ ཨིམསྶ སསམྤཡུཏྟདྷམྨསྶ ཛྷཱནསྶ ནིསྶཡཱདིབྷཱཝཏོཏི ནེཝསཉྙཱནཱསཉྙཱཡཏནཾ. སཉྙཱཝསེན ཙེཏྠ ཛྷཱནཱུཔལཀྑཎཾ ནིདསྶནམཏྟཾ. ཝེདནཱདཡོཔི ཧི ཏསྨིཾ ཛྷཱནེ ནེཝཝེདནཱནཱཝེདནཱདིཀཱཡེཝཱཏི. ནེཝསཉྙཱནཱསཉྙཱཡཏནེན སམྤཡུཏྟཾ ཀུསལཙིཏྟཾ ནེཝསཉྙཱནཱསཉྙཱཡཏནཀུསལཙིཏྟཾ. པི-སདྡེན ཙེཏྠ ཨཱརམྨཎཔྤཊིཔདཱམིསྶཀནཡཝསེན སོལ༹སཀྑཏྟུཀདེསནཾ (དྷ. ས. ༢༦༥-༢༦༨), ཨཉྙམྤི ཙ པཱལི༹ཡཾ ཨཱགཏནཡབྷེདཾ སངྒཎྷཱཏི.

༣༠. ཨཱརམྨཎཱནཾ ཨཏིཀྐམིཏབྦཱནཾ, ཀསིཎཱཀཱསཝིཉྙཱཎཏདབྷཱཝསངྑཱཏཱནཾ ཨཱལམྦིཏབྦཱནཉྩ ཨཱཀཱསཱདིཙཏུནྣཾ གོཙརཱནཾ པབྷེདེན ཨཱརུཔྤམཱནསཾ ཙཏུབྦིདྷཾ ཧོཏི. ཏཉྷི ཡཐཱཀྐམཾ པཉྩམཛ྄ཛྷཱནཱརམྨཎཾ ཀསིཎནིམིཏྟཾ ཨཏིཀྐམྨ ཏདུགྒྷཱཊེན ལདྡྷཾ ཨཱཀཱསམཱལམྦིཏྭཱ ཏམྤི ཨཏིཀྐམྨ ཏཏྠ པཝཏྟཾ ཝིཉྙཱཎམཱལམྦིཏྭཱ ཏམྤི ཨཏིཀྐམྨ ཏདབྷཱཝབྷཱུཏཾ ཨཀིཉྩནབྷཱཝམཱལམྦིཏྭཱ ཏམྤི ཨཏིཀྐམྨ ཏཏྠ པཝཏྟཾ ཏཏིཡཱརུཔྤཝིཉྙཱཎམཱལམྦིཏྭཱ ¶ པཝཏྟཏི, ན པན རཱུཔཱཝཙརཀུསལཾ ཝིཡ པུརིམཔུརིམཨངྒཱཏིཀྐམཝསེན པུརིམཔུརིམསྶཱཔི ཨཱརམྨཎཾ གཧེཏྭཱ. ཏེནཱཧུ ཨཱཙརིཡཱ –

‘‘ཨཱརམྨཎཱཏིཀྐམཏོ, ཙཏསྶོཔི བྷཝནྟིམཱ;

ཨངྒཱཏིཀྐམམེཏཱསཾ, ན ཨིཙྪནྟི ཝིབྷཱཝིནོ’’ཏི; (དྷ. ས. ཨཊྛ. ༢༦༨);

ཨརཱུཔཱཝཙརཙིཏྟཝཎྞནཱ ནིཊྛིཏཱ.

སོབྷནཙིཏྟཝཎྞནཱ ནིཊྛིཏཱ.

ལོཀུཏྟརཙིཏྟཝཎྞནཱ

༣༡. ཨིདཱནི ལོཀུཏྟརཀུསལཾ ཙཏུམགྒཡོགཏོ, ཕལཉྩ ཏདནུརཱུཔཔྤཝཏྟིཡཱ ཙཏུདྷཱ ཝིབྷཛིཏྭཱ དསྶེཏུཾ ‘‘སོཏཱཔཏྟིམགྒཙིཏྟ’’ནྟྱཱདི ཝུཏྟཾ. ནིབྦཱནཾ པཏིསཝནཏོ ཨུཔགམནཏོ, ནིབྦཱནམཧཱསམུདྡནིནྣཏཱཡ ¶ སོཏསདིསཏྟཱ ཝཱ ‘‘སོཏོ’’ཏི ཝུཙྩཏི ཨརིཡོ ཨཊྛངྒིཀོ མགྒོ, ཏསྶ ཨཱཔཏྟི ཨཱདིཏོ པཛྫནཾ པཱཔུཎནཾ པཋམསམནྣཱགམོ སོཏཱཔཏྟི ཨཱ-ཨུཔསགྒསྶ ཨཱདིཀམྨནི པཝཏྟནཏོ. ནིབྦཱནཾ མགྒེཏི, ནིབྦཱནཏྠིཀེཧི ཝཱ མགྒཱིཡཏི, ཀིལེསེ མཱརེནྟོ གཙྪཏཱིཏི ཝཱ མགྒོ, ཏེན སམྤཡུཏྟཾ ཙིཏྟཾ མགྒཙིཏྟཾ, སོཏཱཔཏྟིཡཱ ལདྡྷཾ མགྒཙིཏྟཾ སོཏཱཔཏྟིམགྒཙིཏྟཾ. ཨཐ ཝཱ ཨརིཡམགྒསོཏསྶ ཨཱདིཏོ པཛྫནཾ ཨེཏསྶཱཏི སོཏཱཔཏྟི, པུགྒལོ, ཏསྶ མགྒོ སོཏཱཔཏྟིམགྒོ, ཏེན སམྤཡུཏྟཾ ཙིཏྟཾ སོཏཱཔཏྟིམགྒཙིཏྟཾ.

སཀིཾ ཨེཀཝཱརཾ པཊིསནྡྷིཝསེན ཨིམཾ མནུསྶལོཀཾ ཨཱགཙྪཏཱིཏི སཀདཱགཱམཱི, ཨིདྷ པཏྭཱ ཨིདྷ པརིནིབྦཱཡཱི, ཏཏྠ པཏྭཱ ཏཏྠ པརིནིབྦཱཡཱི, ཨིདྷ པཏྭཱ ཏཏྠ པརིནིབྦཱཡཱི, ཏཏྠ པཏྭཱ ཨིདྷ པརིནིབྦཱཡཱི, ཨིདྷ པཏྭཱ ཏཏྠ ནིབྦཏྟིཏྭཱ ཨིདྷ པརིནིབྦཱཡཱིཏི པཉྩསུ སཀདཱགཱམཱིསུ པཉྩམཀོ ཨིདྷཱདྷིཔྤེཏོ. སོ ཧི ཨིཏོ ¶ གནྟྭཱ པུན སཀིཾ ཨིདྷ ཨཱགཙྪཏཱིཏི. ཏསྶ མགྒོ སཀདཱགཱམིམགྒོ. ཀིཉྩཱཔི མགྒསམངྒིནོ ཏཐཱགམནཱསམྦྷཝཏོ ཕལཊྛོཡེཝ སཀདཱགཱམཱི ནཱམ, ཏསྶ པན ཀཱརཎབྷཱུཏོ པུརིམུཔྤནྣོ མགྒོ མགྒནྟརཱཝཙྪེདནཏྠཾ ཕལཊྛེན ཝིསེསེཏྭཱ ཝུཙྩཏི ‘‘སཀདཱགཱམིམགྒོ’’ཏི. ཨེཝཾ ཨནཱགཱམིམགྒོཏི. སཀདཱགཱམིམགྒེན སམྤཡུཏྟཾ ཙིཏྟཾ སཀདཱགཱམིམགྒཙིཏྟཾ.

པཊིསནྡྷིཝསེན ཨིམཾ ཀཱམདྷཱཏུཾ ན ཨཱགཙྪཏཱིཏི ཨནཱགཱམཱི, ཏསྶ མགྒོ ཨནཱགཱམིམགྒོ, ཏེན སམྤཡུཏྟཾ ཙིཏྟཾ ཨནཱགཱམིམགྒཙིཏྟཾ. ཨགྒདཀྑིཎེཡྻབྷཱཝེན པཱུཛཱཝིསེསཾ ཨརཧཏཱིཏི ཨརཧཱ, ཨཐ ཝཱ ཀིལེསསངྑཱཏཱ ཨརཡོ, སཾསཱརཙཀྐསྶ ཝཱ ཨརཱ ཀིལེསཱ ཧཏཱ ཨནེནཱཏི ཨརཧཱ, པཱཔཀརཎེ རཧཱབྷཱཝཏོ ཝཱ ཨརཧཱ, ཨཊྛམཀོ ཨརིཡཔུགྒལོ, ཏསྶ བྷཱཝོ ཨརཧཏྟཾ, ཙཏུཏྠཕལསྶེཏཾ ཨདྷིཝཙནཾ, ཏསྶ ཨཱགམནབྷཱུཏོ མགྒོ ཨརཧཏྟམགྒོ, ཏེན སམྤཡུཏྟཾ ཙིཏྟཾ ཨརཧཏྟམགྒཙིཏྟཾ.

པི-སདྡེན ཨེཀེཀསྶ མགྒསྶ ནཡསཧསྶཝསེན ཙཏུནྣཾ ཙཏུསཧསྶབྷེདཾ སཙྩཝིབྷངྒེ (ཝིབྷ. ༢༠༦; ཝིབྷ. ཨཊྛ. ༢༠༦-༢༡༤) ཨཱགཏཾ སཊྛིསཧསྶབྷེདཾ ནཡཾ ཧེཊྛཱ ཝུཏྟནཡེན ཨནེཀཝིདྷཏྟམྤི སངྒཎྷཱཏི. ཏཏྠཱཡཾ ནཡསཧསྶམཏྟཔརིདཱིཔནཱ, ཀཐཾ? སོཏཱཔཏྟིམགྒོ ཏཱཝ ཛྷཱནནཱམེན པཊིཔདཱབྷེདཾ ཨནཱམསིཏྭཱ ཀེཝལཾ སུཉྙཏོ ཨཔྤཎིཧིཏོཏི དྭིདྷཱ ཝིབྷཏྟོ, པུན པཊིཔདཱཙཏུཀྐེན ཡོཛེཏྭཱ པཙྩེཀཾ ཙཏུདྷཱ ཝིབྷཏྟོཏི ཨེཝཾ ཛྷཱནནཱམེན དསདྷཱ ཝིབྷཏྟོ. ཏཐཱ མགྒསཏིཔཊྛཱནསམྨཔྤདྷཱནཨིདྡྷིཔཱདཨིནྡྲིཡབལབོཛ྄ཛྷངྒསཙྩསམཐདྷམྨཁནྡྷཨཱཡཏནདྷཱཏུཨཱཧཱརཕསྶཝེདནཱསཉྙཱཙེཏནཱཙིཏྟནཱམེཧིཔི ¶ པཙྩེཀཾ དསདསཱཀཱརེཧི ཝིབྷཏྟོ ཏཐཱ ཏཐཱ བུཛ྄ཛྷནཀཱནཾ པུགྒལཱནཾ ཝསེན. ཏསྨཱ ¶ ཛྷཱནཝསེན དསམགྒཱདཱིནཾ ཨེཀཱུནཝཱིསཏིཡཱ ཝསེན དས དསཱཏི ཝཱིསཏིཡཱ ཋཱནེསུ དྭེ ནཡསཏཱནི ཧོནྟི. པུན ཏཱནི ཙཏཱུཧི ཨདྷིཔཏཱིཧི ཡོཛེཏྭཱ པཙྩེཀཾ ཙཏུདྷཱ ཝིབྷཏྟཱནཱིཏི ཨེཝཾ ཨདྷིཔཏཱིཧི ཨམིསྶེཏྭཱ དྭེ སཏཱནི, མིསྶེཏྭཱ ཨཊྛ སཏཱནཱིཏི སོཏཱཔཏྟིམགྒེ ནཡསཧསྶཾ ཧོཏི, ཏཐཱ སཀདཱགཱམིམགྒཱདཱིསུཔི.

༣༢. སོཏཱཔཏྟིཡཱ ལདྡྷཾ, སོཏཱཔཏྟིསྶ ཝཱ ཕལཙིཏྟཾ ཝིཔཱཀབྷཱུཏཾ ཙིཏྟཾ སོཏཱཔཏྟིཕལཙིཏྟཾ. ཨརཧཏྟཉྩ ཏཾ ཕལཙིཏྟཉྩཱཏི ཨརཧཏྟཕལཙིཏྟཾ.

༣༤. ཙཏུམགྒཔྤབྷེདེནཱཏི ཨིནྡྲིཡཱནཾ ཨཔཱཊཝཔཱཊཝཏརཏམབྷེདེན བྷིནྣསཱམཏྠིཡཏཱཡ སཀྐཱཡདིཊྛིཝིཙིཀིཙྪཱསཱིལབྦཏཔརཱམཱསཱནཾ ནིརཝསེསཔྤཧཱནཾ ཀཱམརཱགབྱཱཔཱདཱནཾ ཏནུབྷཱཝཱཔཱདནཾ ཏེསམེཝ ནིརཝསེསཔྤཧཱནཾ རཱུཔཱརཱུཔརཱགམཱནུདྡྷཙྩཱཝིཛྫཱནཾ ཨནཝསེསཔྤཧཱནནྟི ཨེཝཾ སཾཡོཛནཔྤཧཱནཝསེན ཙཏུབྦིདྷཱནཾ སོཏཱཔཏྟིམགྒཱདཱིནཾ ཨཊྛངྒིཀམགྒཱནཾ སམྤཡོགབྷེདེན ཙཏུམགྒསངྑཱཏཾ ལོཀུཏྟརཀུསལཾ ཙཏུདྷཱ ཧོཏི, ཝིཔཱཀཾ པན ཏསྶེཝ ཀུསལསྶ ཕལཏྟཱ ཏདནུརཱུཔཏོ ཏཐཱ ཙཏུདྷཱཏི ཨེཝཾ ཨནུཏྟརཾ ཨཏྟནོ ཨུཏྟརིཏརཱབྷཱཝེན ཨནུཏྟརསངྑཱཏཾ ལོཀུཏྟརཾ ཙིཏྟཾ ཨཊྛདྷཱ མཏནྟི ཡོཛནཱ.

ཀིརིཡཱནུཏྟརསྶ པན ཨསམྦྷཝཏོ དྭཱདསཝིདྷཏཱ ན ཝུཏྟཱ. ཀསྨཱ པན ཏསྶ ཨསམྦྷཝོཏི? མགྒསྶ ཨེཀཙིཏྟཀྑཎིཀཏྟཱ. ཡདི ཧི མགྒཙིཏྟཾ པུནཔྤུནཾ ཨུཔྤཛྫེཡྻ, ཏདུཔྤཏྟིཡཱ ཀིརིཡབྷཱཝོ སཀྐཱ ཝཏྟུཾ. ཏཾ པན ཀིལེསསམུཙྪེདཀཝསེནེཝ ཨུཔལབྷིཏབྦཏོ ཨེཀཝཱརཔྤཝཏྟེནེཝ ཙ ཏེན ཨསནིསམྤཱཏེན ཝིཡ ཏརུཨཱདཱིནཾ སམཱུལཝིདྡྷཾསནསྶ ཏཾཏཾཀིལེསཱནཾ ཨཙྩནྟཾ ཨཔྤཝཏྟིཡཱ སཱདྷིཏཏྟཱ པུན ཨུཔྤཛྫམཱནེཔི ཀཱཏབྦཱབྷཱཝཏོ དིཊྛདྷམྨསུཁཝིཧཱརཏྠཉྩ ཕལསམཱཔཏྟིཡཱ ཨེཝ ¶ ནིབྦཱནཱརམྨཎཝསེན པཝཏྟནཏོ ན ཀདཱཙི སེཀྑཱནཾ ཨསེཀྑཱནཾ ཝཱ ཨུཔྤཛྫཏི. ཏསྨཱ ནཏྠི སབྦཐཱཔི ལོཀུཏྟརཀིརིཡཙིཏྟནྟི.

ལོཀུཏྟརཙིཏྟཝཎྞནཱ ནིཊྛིཏཱ.

ཙིཏྟགཎནསངྒཧཝཎྞནཱ

༣༥. ‘‘དྭཱདསཱཀུསལཱནེཝ’’ནྟྱཱདི ¶ ཡཐཱཝུཏྟཱནཾ ཙཏུབྷཱུམིཀཙིཏྟཱནཾ གཎནསངྒཧོ.

༣༦. ཨེཝཾ ཛཱཏིཝསེན སངྒཧཾ དསྶེཏྭཱ པུན བྷཱུམིཝསེན དསྶེཏུཾ ‘‘ཙཏུཔཉྙཱསདྷཱ ཀཱམེ’’ཏྱཱདི ཝུཏྟཾ. ཀཱམེ བྷཝེ ཙིཏྟཱནི ཙཏུཔཉྙཱསདྷཱ ཨཱིརཡེ, རཱུཔེ བྷཝེ པནྣརས ཨཱིརཡེ, ཨཱརུཔྤེ བྷཝེ དྭཱདས ཨཱིརཡེ, ཨནུཏྟརེ པན ནཝཝིདྷེ དྷམྨསམུདཱཡེ ཙིཏྟཱནི ཨཊྛདྷཱ ཨཱིརཡེ, ཀཐེཡྻཱཏྱཏྠོ. ཨེཏྠ ཙ ཀཱམཏཎྷཱདིཝིསཡབྷཱཝེན ཀཱམབྷཝཱདིཔརིཡཱཔནྣཱནི ཙིཏྟཱནི སཀསཀབྷཱུམིཏོ ཨཉྙཏྠ པཝཏྟམཱནཱནིཔི ཀཱམབྷཝཱདཱིསུ ཙིཏྟཱནཱིཏི ཝུཏྟཱནི, ཡཐཱ མནུསྶིཏྠིཡཱ ཀུཙྪིསྨིཾ ནིབྦཏྟོཔི ཏིརཙྪཱནགཏོ ཏིརཙྪཱནཡོནིཔརིཡཱཔནྣཏྟཱ ཏིརཙྪཱནེསྭེཝ སངྒཡ྄ཧཏི. ཀཏྠཙི ཨཔརིཡཱཔནྣཱནི ནཝཝིདྷལོཀུཏྟརདྷམྨསམཱུཧེཀདེསབྷཱུཏཱནི ‘‘རུཀྑེ སཱཁཱ’’ཏྱཱདཱིསུ ཝིཡ ཨནུཏྟརེ ཙིཏྟཱནཱིཏི ཝུཏྟཱནི. ཨཐ ཝཱ ‘‘ཀཱམེ, རཱུཔེ’’ཏི ཙ ཨུཏྟརཔདལོཔནིདྡེསོ. ཨརཱུཔེ བྷཝཱནི ཨཱརུཔྤཱནི. ནཏྠི ཨེཏེསཾ ཨུཏྟརཾ ཙིཏྟནྟི ཨནུཏྟརཱནཱིཏི ཨུཔཡོགབཧུཝཙནཝསེན ཀཱམེ ཀཱམཱཝཙརཱནི ཙིཏྟཱནི ཙཏུཔཉྙཱསདྷཱ ཨཱིརཡེ, རཱུཔེ རཱུཔཱཝཙརཱནི ཙིཏྟཱནི པནྣརས ཨཱིརཡེ, ཨཱརུཔྤེ ཨཱརུཔྤཱནི ཙིཏྟཱནི དྭཱདས ཨཱིརཡེ. ཨནུཏྟརེ ལོཀུཏྟརཱནི ཙིཏྟཱནི ཨཊྛདྷཱ ཨཱིརཡེཏི ཨེཝམེཏྠ སམྦནྡྷོ དཊྛབྦོ.

༣༧. ཨིཏྠཾ ¶ ཡཐཱཝུཏྟེན ཛཱཏིབྷེདབྷིནྣཙཏུབྷཱུམིཀཙིཏྟབྷེདཝསེན ཨེཀཱུནནཝུཏིཔྤབྷེདཾ ཀཏྭཱ མཱནསཾ ཙིཏྟཾ ཝིཙཀྑཎཱ ཝིསེསེན ཨཏྠཙཀྑཎསབྷཱཝཱ པཎྜིཏཱ ཝིབྷཛནྟི. ཨཐ ཝཱ ཨེཀཝཱིསསཏཾ ཨེཀུཏྟརཝཱིསཱདྷིཀཾ སཏཾ ཝིབྷཛནྟི.

ཙིཏྟགཎནསངྒཧཝཎྞནཱ ནིཊྛིཏཱ.

ཝིཏྠཱརགཎནཝཎྞནཱ

༣༨. ཛྷཱནངྒཝསེན པཋམཛ྄ཛྷཱནསདིསཏྟཱ པཋམཛ྄ཛྷཱནཉྩ ཏཾ སོཏཱཔཏྟིམགྒཙིཏྟཉྩེཏི པཋམཛ྄ཛྷཱནསོཏཱཔཏྟིམགྒཙིཏྟཾ. པཱདཀཛ྄ཛྷཱནསམྨསིཏཛ྄ཛྷཱནཔུགྒལཛ྄ཛྷཱསཡེསུཔི, ཧི ཨཉྙཏརཝསེན ཏཾཏཾཛྷཱནསདིསཏྟཱ ¶ ཝིཏཀྐཱདིཨངྒཔཱཏུབྷཱཝེན ཙཏྟཱརོཔི མགྒཱ པཋམཛ྄ཛྷཱནཱདིཝོཧཱརཾ ལབྷནྟཱ པཙྩེཀཾ པཉྩདྷཱ ཝིབྷཛནྟི. ཏེནཱཧ ‘‘ཛྷཱནངྒཡོགབྷེདེནཱ’’ཏྱཱདི, ཏཏྠ པཋམཛ྄ཛྷཱནཱདཱིསུ ཡཾ ཡཾ ཛྷཱནཾ སམཱཔཛྫིཏྭཱ ཏཏོ ཏཏོ ཝུཊྛཱཡ སངྑཱརེ སམྨསནྟསྶ ཝུཊྛཱནགཱམིནིཝིཔསྶནཱ པཝཏྟཱ, ཏཾ པཱདཀཛ྄ཛྷཱནཾ ཝུཊྛཱནགཱམིནིཝིཔསྶནཱཡ པདཊྛཱནབྷཱཝཏོ. ཡཾ ཡཾ ཛྷཱནཾ སམྨསནྟསྶ སཱ པཝཏྟཱ, ཏཾ སམྨསིཏཛ྄ཛྷཱནཾ. ‘‘ཨཧོ ཝཏ མེ པཋམཛ྄ཛྷཱནསདིསོ མགྒོ པཉྩངྒིཀོ, དུཏིཡཛ྄ཛྷཱནཱདཱིསུ ཝཱ ཨཉྙཏརསདིསོ ཙཏུརངྒཱདིབྷེདོ མགྒོ བྷཝེཡྻཱ’’ཏི ཨེཝཾ ཡོགཱཝཙརསྶ ཨུཔྤནྣཛ྄ཛྷཱསཡོ པུགྒལཛ྄ཛྷཱསཡོ ནཱམ.

ཏཏྠ ཡེན པཋམཛ྄ཛྷཱནཱདཱིསུ ཨཉྙཏརཾ ཛྷཱནཾ སམཱཔཛྫིཏྭཱ ཏཏོ ཝུཊྛཱཡ པཀིཎྞཀསངྑཱརེ སམྨསིཏྭཱ མགྒོ ཨུཔྤཱདིཏོ ཧོཏི, ཏསྶ སོ མགྒོ པཋམཛ྄ཛྷཱནཱདཱིསུ ཏཾཏཾཔཱདཀཛ྄ཛྷཱནསདིསོ ཧོཏི. སཙེ པན ཝིཔསྶནཱཔཱདཀཾ ཀིཉྩི ཛྷཱནཾ ནཏྠི, ཀེཝལཾ པཋམཛ྄ཛྷཱནཱདཱིསུ ཨཉྙཏརཾ ཛྷཱནཾ སམྨསིཏྭཱ ¶ མགྒོ ཨུཔྤཱདིཏོ ཧོཏི, ཏསྶ སོ སམྨསིཏཛ྄ཛྷཱནསདིསོ ཧོཏི. ཡདཱ པན ཡཾ ཀིཉྩི ཛྷཱནཾ སམཱཔཛྫིཏྭཱ ཏཏོ ཝུཊྛཱཡ ཨཉྙཏརཾ སམྨསིཏྭཱ མགྒོ ཨུཔྤཱདིཏོ ཧོཏི, ཏདཱ པུགྒལཛ྄ཛྷཱསཡཝསེན དྭཱིསུ ཨཉྙཏརསདིསོ ཧོཏི. སཙེ པན པུགྒལསྶ ཏཐཱཝིདྷོ ཨཛ྄ཛྷཱསཡོ ནཏྠི, ཧེཊྛིམཧེཊྛིམཛ྄ཛྷཱནཏོ ཝུཊྛཱཡ ཨུཔརཱུཔརིཛྷཱནདྷམྨེ སམྨསིཏྭཱ ཨུཔྤཱདིཏམགྒོ པཱདཀཛ྄ཛྷཱནཾ ཨནཔེཀྑིཏྭཱ སམྨསིཏཛ྄ཛྷཱནསདིསོ ཧོཏི. ཨུཔརཱུཔརིཛྷཱནཏོ པན ཝུཊྛཱཡ ཧེཊྛིམཧེཊྛིམཛ྄ཛྷཱནདྷམྨེ སམྨསིཏྭཱ ཨུཔྤཱདིཏམགྒོ སམྨསིཏཛ྄ཛྷཱནཾ ཨནཔེཀྑིཏྭཱ པཱདཀཛ྄ཛྷཱནསདིསོ ཧོཏི. ཧེཊྛིམཧེཊྛིམཛ྄ཛྷཱནཏོ ཧི ཨུཔརཱུཔརིཛྷཱནཾ བལཝཏརནྟི. ཝེདནཱནིཡམོ པན སབྦཏྠཱཔི ཝུཊྛཱནགཱམིནིཝིཔསྶནཱནིཡམེན ཧོཏི. ཏཐཱ སུཀྑཝིཔསྶཀསྶ སཀལཛ྄ཛྷཱནངྒནིཡམོ. ཏསྶ ཧི པཱདཀཛ྄ཛྷཱནཱདཱིནཾ ཨབྷཱཝེན ཏེསཾ ཝསེན ནིཡམཱབྷཱཝཏོ ཝིཔསྶནཱནིཡམེན པཉྩངྒིཀོཝ མགྒོ ཧོཏཱིཏི. ཨཔིཙ སམཱཔཏྟིལཱབྷིནོཔི ཛྷཱནཾ པཱདཀཾ ཨཀཏྭཱ པཀིཎྞཀསངྑཱརེ སམྨསིཏྭཱ ཨུཔྤཱདིཏམགྒོཔི ཝིཔསྶནཱནིཡམེནེཝ པཉྩངྒིཀོཝ ཧོཏཱིཏི ཨཡམེཏྠ ཨཊྛཀཐཱདིཏོ ཨུདྡྷཊོ ཝིནིཙྪཡསཱརོ. ཐེརཝཱདདསྶནཱདིཝསཔྤཝཏྟོ པན པཔཉྩོ ཨཊྛཀཐཱདཱིསུ ཝུཏྟནཡེན ཝེདིཏབྦོ. ཡཐཱ ཙེཏྠ, ཨེཝཾ སབྦཏྠཱཔི ཝིཏྠཱརནཡོ ཏཏྠ ཏཏྠ ཝུཏྟནཡེན གཧེཏབྦོ. གནྠབྷཱིརུཀཛནཱནུགྒཧཏྠཾ པནེཏྠ སངྑེཔཀཐཱ ཨདྷིཔྤེཏཱ.

༤༢. ཡཐཱ རཱུཔཱཝཙརཾ ཙིཏྟཾ པཋམཱདིཔཉྩཝིདྷཛྷཱནབྷེདེན གཡ྄ཧཏི ‘‘པཋམཛ྄ཛྷཱན’’ནྟྱཱདིནཱ ཝུཙྩཏི ¶ , ཏཐཱ ཨནུཏྟརམྤི ཙིཏྟཾ ‘‘པཋམཛ྄ཛྷཱནསོཏཱཔཏྟིམགྒཙིཏྟ’’ནྟྱཱདིནཱ གཡ྄ཧཏི. ཨཱརུཔྤཉྩཱཔི ཨུཔེཀྑེཀགྒཏཱཡོགེན ཨངྒསམཏཱཡ པཉྩམཛ྄ཛྷཱནེ གཡ྄ཧཏི, པཉྩམཛ྄ཛྷཱནཝོཧཱརཾ ལབྷཏཱིཏྱཏྠོ. ཨཐ ཝཱ ¶ རཱུཔཱཝཙརཾ ཙིཏྟཾ ཨནུཏྟརཉྩ པཋམཱདིཛྷཱནབྷེདེ ‘‘པཋམཛ྄ཛྷཱནཀུསལཙིཏྟཾ, པཋམཛ྄ཛྷཱནསོཏཱཔཏྟིམགྒཙིཏྟནྟྱཱདིནཱ ཡཐཱ གཡ྄ཧཏི, ཏཐཱ ཨཱརུཔྤཉྩཱཔི པཉྩམེ ཛྷཱནེ གཡ྄ཧཏཱིཏི ཡོཛནཱ. ཨཱཙརིཡསྶཱཔི ཧི ཨཡམེཝ ཡོཛནཱ ཨདྷིཔྤེཏཱཏི དིསྶཏི ནཱམརཱུཔཔརིཙྪེདེ ཨུཛུཀམེཝ ཏཐཱ ཝུཏྟཏྟཱ. ཝུཏྟཉྷི ཏཏྠ –

‘‘རཱུཔཱཝཙརཙིཏྟཱནི, གཡ྄ཧནྟཱནུཏྟརཱནི ཙ;

པཋམཱདིཛྷཱནབྷེདེ, ཨཱརུཔྤཉྩཱཔི པཉྩམེ’’ཏི. (ནཱམ. པརི. ༢༤);

ཏསྨཱཏི ཡསྨཱ རཱུཔཱཝཙརཾ ཝིཡ ཨནུཏྟརམྤི པཋམཱདིཛྷཱནབྷེདེ གཡ྄ཧཏི, ཨཱརུཔྤཉྩཱཔི པཉྩམེ གཡ྄ཧཏི, ཡསྨཱ ཝཱ ཛྷཱནངྒཡོགབྷེདེན ཨེཀེཀཾ པཉྩདྷཱ ཀཏྭཱ ཨནུཏྟརཾ ཙིཏྟཾ ཙཏྟཱལཱིསཝིདྷནྟི ཝུཙྩཏི, རཱུཔཱཝཙརལོཀུཏྟརཱནི ཝིཡ ཙ པཋམཱདིཛྷཱནབྷེདེ, ཏཐཱ ཨཱརུཔྤཉྩཱཔི པཉྩམེ གཡ྄ཧཏི, ཏསྨཱ པཋམཱདིཀམེཀེཀཾ ཛྷཱནཾ ལོཀིཡཾ ཏིཝིདྷཾ, ལོཀུཏྟརཾ ཨཊྛཝིདྷནྟི ཨེཀཱདསཝིདྷཾ. ཨནྟེ ཏུ ཛྷཱནཾ ཏེཝཱིསཏིཝིདྷཾ ཏིཝིདྷརཱུཔཱཝཙརདྭཱདསཝིདྷཨརཱུཔཱཝཙརཨཊྛལོཀུཏྟརཝསེནཱཏྱཏྠོ.

༤༣. པཱདཀཛ྄ཛྷཱནཱདིཝསེན གཎནཝུཌྜྷི ཀུསལཝིཔཱཀེསྭེཝ སམྦྷཝཏཱིཏི ཏེསམེཝ གཎནཾ ཨེཀཝཱིསསཏགཎནཱཡ ཨངྒབྷཱཝེན དསྶེནྟོ ཨཱཧ ‘‘སཏྟཏིཾསཱ’’ཏྱཱདི.

ཨིཏི ཨབྷིདྷམྨཏྠཝིབྷཱཝིནིཡཱ ནཱམ ཨབྷིདྷམྨཏྠསངྒཧཝཎྞནཱཡ

ཙིཏྟཔརིཙྪེདཝཎྞནཱ ནིཊྛིཏཱ.

༢. ཙེཏསིཀཔརིཙྪེདཝཎྞནཱ

སམྤཡོགལཀྑཎཝཎྞནཱ

༡. ཨེཝཾ ¶ ¶ ཏཱཝ ཙིཏྟཾ བྷཱུམིཛཱཏིསམྤཡོགསངྑཱརཛྷཱནཱརམྨཎམགྒབྷེདེན ཡཐཱརཧཾ ཝིབྷཛིཏྭཱ ཨིདཱནི ཙེཏསིཀཝིབྷཱགསྶ ཨནུཔྤཏྟཏྟཱ པཋམཾ ཏཱཝ ཙཏུབྦིདྷསམྤཡོགལཀྑཎསནྡསྶནཝསེན ཙེཏསིཀལཀྑཎཾ ཋཔེཏྭཱ, ཏདནནྟརཾ ཨཉྙསམཱནཨཀུསལསོབྷནཝསེན ཏཱིཧི རཱསཱིཧི ཙེཏསིཀདྷམྨེ ཨུདྡིསིཏྭཱ, ཏེསཾ སོལ༹སཧཱཀཱརེཧི སམྤཡོགཾ, ཏེཏྟིཾསཝིདྷེན སངྒཧཉྩ དསྶེཏུཾ ‘‘ཨེཀུཔྤཱདནིརོདྷཱ ཙཱ’’ཏྱཱདི ཨཱརདྡྷཾ. ཙིཏྟེན སཧ ཨེཀཏོ ཨུཔྤཱདོ ཙ ནིརོདྷོ ཙ ཡེསཾ ཏེ ཨེཀུཔྤཱདནིརོདྷཱ. ཨེཀཾ ཨཱལམྦཎཉྩ ཝཏྠུ ཙ ཡེསཾ ཏེ ཨེཀཱལམྦཎཝཏྠུཀཱ. ཨེཝཾ ཙཏཱུཧི ལཀྑཎེཧི ཙེཏོཡུཏྟཱ ཙིཏྟེན སམྤཡུཏྟཱ དྭིཔཉྙཱས ལཀྑཎཱ དྷཱརཎཏོ དྷམྨཱ ནིཡཏཡོགིནོ, ཨནིཡཏཡོགིནོ ཙ ཙེཏསིཀཱ མཏཱ.

ཏཏྠ ཡདི ཨེཀུཔྤཱདམཏྟེནེཝ ཙེཏོཡུཏྟཱཏི ཨདྷིཔྤེཏཱ, ཏདཱ ཙིཏྟེན སཧ ཨུཔྤཛྫམཱནཱནཾ རཱུཔདྷམྨཱནམྤི ཙེཏོཡུཏྟཏཱ ཨཱཔཛྫེཡྻཱཏི ཨེཀནིརོདྷགྒཧཎཾ. ཨེཝམྤི ཙིཏྟཱནུཔརིཝཏྟིནོ ཝིཉྙཏྟིདྭཡསྶ པསངྒོ ནསཀྐཱ ནིཝཱརེཏུཾ, ཏཐཱ ‘‘ཨེཀཏོ ཨུཔྤཱདོ ཝཱ ནིརོདྷོ ཝཱ ཨེཏེསནྟི ཨེཀུཔྤཱདནིརོདྷཱ’’ཏི པརིཀཔྤེནྟསྶ པུརེཏརམུཔྤཛྫིཏྭཱ ཙིཏྟསྶ བྷངྒཀྑཎེ ནིརུཛ྄ཛྷམཱནཱནམྤི རཱུཔདྷམྨཱནནྟི ཨེཀཱལམྦཎགྒཧཎཾ. ཡེ ཨེཝཾ ཏིཝིདྷལཀྑཎཱ, ཏེ ནིཡམཏོ ཨེཀཝཏྠུཡེཝཱཏིདསྶནཏྠཾ ཨེཀཝཏྠུཀགྒཧཎནྟི ཨལམཏིཔྤཔཉྩེན.

སམྤཡོགལཀྑཎཝཎྞནཱ ནིཊྛིཏཱ.

ཨཉྙསམཱནཙེཏསིཀཝཎྞནཱ

༢. ཀཐནྟི ¶ སརཱུཔསམྤཡོགཱཀཱརཱནཾ ཀཐེཏུཀམྱཏཱཔུཙྪཱ. ཕུསཏཱིཏི ཕསྶོ (དྷ. ས. ཨཊྛ. ༡ དྷམྨུདེསཝཱརཕསྶཔཉྩམཀརཱསིཝཎྞནཱ), སྭཱཡཾ ¶ ཕུསནལཀྑཎོ. ཨཡཉྷི ཨརཱུཔདྷམྨོཔི སམཱནོ ཨཱརམྨཎེ ཕུསནཱཀཱརེནེཝ པཝཏྟཏི, སཱ ཙསྶ ཕུསནཱཀཱརཔྤཝཏྟི ཨམྦིལཁཱདཀཱདཱིནཾ པསྶནྟསྶ པརསྶ ཁེལུ༹པྤཱདཱདི ཝིཡ དཊྛབྦཱ. ཝེདཡཏི ཨཱརམྨཎརསཾ ཨནུབྷཝཏཱིཏི ཝེདནཱ, སཱ ཝེདཡིཏལཀྑཎཱ. ཨཱརམྨཎརསཱནུབྷཝནཉྷི པཏྭཱ སེསསམྤཡུཏྟདྷམྨཱ ཨེཀདེསམཏྟེནེཝ རསཾ ཨནུབྷཝནྟི, ཨེཀཾསཏོ པན ཨིསྶརཝཏཱཡ ཝེདནཱཝ ཨནུབྷཝཏི. ཏཐཱ ཧེསཱ ‘‘སུབྷོཛནརསཱནུབྷཝནཀརཱཛཱ ཝིཡཱ’’ཏི ཝུཏྟཱ. སུཁཱདིཝསེན པནསྶཱ བྷེདཾ སཡམེཝ ཝཀྑཏི. ནཱིལཱདིབྷེདཾ ཨཱརམྨཎཾ སཉྫཱནཱཏི སཉྙཾ ཀཏྭཱ ཛཱནཱཏཱིཏི སཉྙཱ, སཱ སཉྫཱནནལཀྑཎཱ. སཱ ཧི ཨུཔྤཛྫམཱནཱ དཱརུཨཱདཱིསུ ཝཌྜྷཀིཨཱདཱིནཾ སཉྙཱཎཀརཎཾ ཝིཡ པཙྪཱ སཉྫཱནནསྶ ཀཱརཎབྷཱུཏཾ ཨཱཀཱརཾ གཧེཏྭཱ ཨུཔྤཛྫཏི. ནིམིཏྟཀཱརིཀཱཡ ཏཱཝེཏཾ ཡུཛྫཏི, ནིམིཏྟེན སཉྫཱནནྟིཡཱ པན ཀཐནྟི? སཱཔི པུན ཨཔརཱཡ སཉྙཱཡ སཉྫཱནནསྶ ནིམིཏྟཾ ཨཱཀཱརཾ གཧེཏྭཱ ཨུཔྤཛྫཏཱིཏི ན ཨེཏྠ ཀོཙི ཨསམྦྷཝོ.

ཙེཏེཏི ཨཏྟནཱ སམྤཡུཏྟདྷམྨེ ཨཱརམྨཎེ ཨབྷིསནྡཧཏི, སངྑཏཱབྷིསངྑརཎེ ཝཱ བྱཱཔཱརམཱཔཛྫཏཱིཏི ཙེཏནཱ. ཏཐཱ ཧི ཨཡམེཝ ཨབྷིསངྑརཎེ པདྷཱནཏྟཱ ཝིབྷངྒེ སུཏྟནྟབྷཱཛནིཡེ སངྑཱརཀྑནྡྷཾ ཝིབྷཛནྟེན ‘‘སངྑཏམབྷིསངྑརོནྟཱིཏི སངྑཱརཱ’’ཏི (སཾ. ནི. ༣.༧༩) ཝཏྭཱ ‘‘ཙཀྑུསམྥསྶཛཱ ཙེཏནཱ’’ཏྱཱདིནཱ (ཝིབྷ. ༢༡) ནིདྡིཊྛཱ. སཱ ཙེཏཡིཏལཀྑཎཱ, ཛེཊྛསིསྶམཧཱཝཌྜྷཀིཨཱདཡོ ཝིཡ སཀིཙྩཔརཀིཙྩསཱདྷིཀཱཏི དཊྛབྦཾ. ཨེཀགྒཏཱཝིཏཀྐཝིཙཱརཔཱིཏཱིནཾ སརཱུཔཝིབྷཱཝནཾ ཧེཊྛཱ ཨཱགཏམེཝ.

ཛཱིཝནྟི ¶ ཏེན སམྤཡུཏྟདྷམྨཱཏི ཛཱིཝིཏཾ, ཏདེཝ སཧཛཱཏཱནུཔཱལནེ ཨཱདྷིཔཙྩཡོགེན ཨིནྡྲིཡནྟི ཛཱིཝིཏིནྡྲིཡཾ, ཏཾ ཨནུཔཱལནལཀྑཎཾ ཨུཔྤལཱདིཨནུཔཱལཀཾ ཨུདཀཾ ཝིཡ. ཀརཎཾ ཀཱརོ, མནསྨིཾ ཀཱརོ མནསིཀཱརོ, སོ ཙེཏསོ ཨཱརམྨཎེ སམནྣཱཧཱརལཀྑཎོ. ཝིཏཀྐོ ཧི སཧཛཱཏདྷམྨཱནཾ ཨཱརམྨཎེ ཨབྷིནིརོཔནསབྷཱཝཏྟཱ ཏེ ཏཏྠ པཀྑིཔནྟོ ཝིཡ ཧོཏི, ཙེཏནཱ ཨཏྟནཱ ཨཱརམྨཎགྒཧཎེན ཡཐཱརུལ༹ྷེ དྷམྨེཔི ཏཏྠ ཏཏྠ ནིཡོཛེནྟཱི བལནཱཡཀོ ཝིཡ ཧོཏི, མནསིཀཱརོ ཏེ ཨཱརམྨཎཱབྷིམུཁཾ པཡོཛནཏོ ཨཱཛཱནཱིཡཱནཾ པཡོཛནཀསཱརཐི ཝིཡཱཏི ཨཡམེཏེསཾ ཝིསེསོ. དྷམྨཱནཉྷི ཏཾ ཏཾ ཡཱཐཱཝསརསལཀྑཎཾ སབྷཱཝཏོ པཊིཝིཛ྄ཛྷིཏྭཱ བྷགཝཏཱ ཏེ ཏེ དྷམྨཱ ཝིབྷཏྟཱཏི བྷགཝཏི སདྡྷཱཡ ‘‘ཨེཝཾ ཝིསེསཱ ཨིམེ དྷམྨཱ’’ཏི ཨོཀཔྤེཏྭཱ ཨུགྒཧཎཔརིཔུཙྪཱདིཝསེན ཏེསཾ སབྷཱཝསམདྷིགམཱཡ ཡོགོ ཀརཎཱིཡོ, ན པན ཏཏྠ ཏཏྠ ཝིཔྤཊིཔཛྫནྟེཧི ¶ སམྨོཧོ ཨཱཔཛྫིཏབྦོཏི ཨཡམེཏྠ ཨཱཙརིཡཱནཾ ཨནུསཱསནཱི. སབྦེསམྤི ཨེཀཱུནནཝུཏིཙིཏྟཱནཾ སཱདྷཱརཎཱ ནིཡམཏོ ཏེསུ ཨུཔྤཛྫནཏོཏི སབྦཙིཏྟསཱདྷཱརཎཱ ནཱམ.

༣. ཨདྷིམུཙྩནཾ ཨདྷིམོཀྑོ, སོ སནྣིཊྛཱནལཀྑཎོ, ཨཱརམྨཎེ ནིཙྩལབྷཱཝེན ཨིནྡཁཱིལོ ཝིཡ དཊྛབྦོ. ཝཱིརཱནཾ བྷཱཝོ, ཀམྨཾ, ཝིདྷིནཱ ཨཱིརཡིཏབྦཾ པཝཏྟེཏབྦནྟི ཝཱ ཝཱིརིཡཾ, ཨུསྶཱཧོ, སོ སཧཛཱཏཱནཾ ཨུཔཏྠམྦྷནལཀྑཎོ. ཝཱིརིཡཝསེན ཧི ཏེསཾ ཨོལཱིནཝུཏྟིཏཱ ན ཧོཏི. ཨེཝཉྩ ཀཏྭཱ ཨིམསྶ ཝིཏཀྐཱདཱིཧི ཝིསེསོ སུཔཱཀཊོ ཧོཏི. ཚནྡནཾ ཚནྡོ, ཨཱརམྨཎེན ཨཏྠིཀཏཱ, སོ ཀཏྟུཀཱམཏཱལཀྑཎོ. ཏཐཱ ཧེས ‘‘ཨཱརམྨཎགྒཧཎེ ཙེཏསོ ཧཏྠཔྤསཱརཎཾ ཝིཡཱ’’ཏི (དྷ. ས. ཨཊྛ. ༡ ཡེཝཱཔནཀཝཎྞནཱ) ཝུཙྩཏི. དཱནཝཏྠུཝིསྶཛྫནཝསེན ¶ པཝཏྟཀཱལེཔི ཙེས ཝིསྶཛྫིཏབྦེན ཏེན ཨཏྠིཀོཝ ཁིཔིཏབྦཨུསཱུནཾ གཧཎེ ཨཏྠིཀོ ཨིསྶཱསོ ཝིཡ. སོབྷནེསུ ཏདིཏརེསུ ཙ པཀཱརེན ཀིཎྞཱ ཝིཔྤཀིཎྞཱཏི པཀིཎྞཀཱ.

༤. སོབྷནཱཔེཀྑཱཡ ཨིཏརེ, ཨིཏརཱཔེཀྑཱཡ སོབྷནཱ ཙ ཨཉྙེ ནཱམ, ཏེསཾ སམཱནཱ ན ཨུདྡྷཙྩསདྡྷཱདཡོ ཝིཡ ཨཀུསལཱདིསབྷཱཝཱཡེཝཱཏི ཨཉྙསམཱནཱ.

ཨཉྙསམཱནཙེཏསིཀཝཎྞནཱ ནིཊྛིཏཱ.

ཨཀུསལཙེཏསིཀཝཎྞནཱ

༥. ཨེཝཾ ཏཱཝ སབྦཙིཏྟསཱདྷཱརཎཝསེན, པཀིཎྞཀཝསེན ཙ སོབྷནེཏརསབྷཱཝེ ཏེརས དྷམྨེ ཨུདྡིསིཏྭཱ ཨིདཱནི ཧེཊྛཱ ཙིཏྟཝིབྷཱགེ ནིདྡིཊྛཱནུཀྐམེན ཨཀུསལདྷམྨཔརིཡཱཔནྣེ པཋམཾ, ཏཏོ སོབྷནདྷམྨཔརིཡཱཔནྣེ ཙ དསྶེཏུཾ ‘‘མོཧོ’’ཏྱཱདི ཝུཏྟཾ. ཨཧེཏུཀཱ པན ཨཱཝེཎིཀདྷམྨཱ ནཏྠཱིཏི ན ཏེ ཝིསུཾ ཝུཏྟཱ. ཨཱརམྨཎེ མུཡ྄ཧཏཱིཏི མོཧོ, ཨཉྙཱཎཾ, སོ ཨཱརམྨཎསབྷཱཝཙྪཱདནལཀྑཎོ. ཨཱརམྨཎགྒཧཎཝསཔྤཝཏྟོཔི ཧེས ཏསྶ ཡཐཱསབྷཱཝཔྤཊིཙྪཱདནཱཀཨཱརེནེཝ པཝཏྟཏི. ན ཧིརཱིཡཏི ན ལཛྫཏཱིཏི ཨཧིརིཀོ, པུགྒལོ, དྷམྨསམཱུཧོ ཝཱ. ཨཧིརིཀསྶ བྷཱཝོ ཨཧིརིཀྐཾ, ཏདེཝ ཨཧིརིཀཾ. ན ཨོཏྟཔྤཏཱིཏི ཨནོཏྟཔྤཾ. ཏཏྠ གཱུཐཏོ གཱམསཱུཀརོ ¶ ཝིཡ ཀཱཡདུཙྩརིཏཱདིཏོ ཨཛིགུཙྪནལཀྑཎཾ ཨཧིརིཀཾ, ཨགྒིཏོ སལབྷོ ཝིཡ ཏཏོ ཨནུཏྟཱསལཀྑཎཾ ཨནོཏྟཔྤཾ. ཏེནཱཧུ པོརཱཎཱ –

‘‘ཛིགུཙྪཏི ནཱཧིརིཀོ, པཱཔཱ གཱུཐཱཝ སཱུཀརོ;

ན བྷཱཡཏི ཨནོཏྟཔྤཱི, སལབྷོ ཝིཡ པཱཝཀཱ’’ཏི.

ཨུདྡྷཏསྶ ¶ བྷཱཝོ ཨུདྡྷཙྩཾ, ཏཾ ཙིཏྟསྶ ཨཝཱུཔསམལཀྑཎཾ པཱསཱཎཱབྷིགྷཱཏསམུདྡྷཏབྷསྨཾ ཝིཡ. ལུབྦྷཏཱིཏི ལོབྷོ, སོ ཨཱརམྨཎེ ཨབྷིསངྒལཀྑཎོ མཀྐཊཱལེཔོ ཝིཡ. ཙིཏྟསྶ ཨཱལམྦིཏུཀཱམཏཱམཏྟཾ ཚནྡོ, ལོབྷོ ཏཏྠ ཨབྷིགིཛ྄ཛྷནནྟི ཨཡམེཏེསཾ ཝིསེསོ. ‘‘ཨིདམེཝ སཙྩཾ, མོགྷམཉྙ’’ནྟི མིཙྪཱབྷིནིཝེསལཀྑཎཱ དིཊྛི. ཉཱཎཉྷི ཨཱརམྨཎཾ ཡཐཱསབྷཱཝཏོ ཛཱནཱཏི, དིཊྛི ཡཐཱསབྷཱཝཾ ཝིཛཧིཏྭཱ ཨཡཱཐཱཝཏོ གཎྷཱཏཱིཏི ཨཡམེཏེསཾ ཝིསེསོ. ‘‘སེཡྻོཧམསྨཱི’’ཏྱཱདིནཱ མཉྙཏཱིཏི མཱནོ, སོ ཨུཎྞཏིལཀྑཎོ. ཏཐཱ ཧེས ‘‘ཀེཏུཀམྱཏཱཔཙྩུཔཊྛཱནོ’’ཏི (དྷ. ས. ཨཊྛ. ༤༠༠) ཝུཏྟོ. དུསྶཏཱིཏི དོསོ, སོ ཙཎྜིཀྐལཀྑཎོ པཧཊཱསཱིཝིསོ ཝིཡ, ཨིསྶཏཱིཏི ཨིསྶཱ, སཱ པརསམྤཏྟིཨུསཱུཡནལཀྑཎཱ. མཙྪརསྶ བྷཱཝོ མཙྪརིཡཾ, ‘‘མཱ ཨིདཾ ཨཙྪརིཡཾ ཨཉྙེསཾ ཧོཏུ, མཡ྄ཧམེཝ ཧོཏཱུ’’ཏི པཝཏྟཾ ཝཱ མཙྪརིཡཾ, ཏཾ ཨཏྟསམྤཏྟིནིགཱུཧནལཀྑཎཾ. ཀུཙྪིཏཾ ཀཏནྟི ཀུཀཏཾ. ཀཏཱཀཏདུཙྩརིཏསུཙརིཏཾ. ཨཀཏམྤི ཧི ཀུཀཏ’’ནྟི ཝོཧརནྟི ‘‘ཡཾ མཡཱ ཨཀཏཾ. ཏཾ ཀུཀཏ’’ནྟི. ཨིདྷ པན ཀཏཱཀཏཾ ཨཱརབྦྷ ཨུཔྤནྣོ ཝིཔྤཊིསཱརཙིཏྟུཔྤཱདོ ཀུཀཏཾ, ཏསྶ བྷཱཝོ ཀུཀྐུཙྩཾ, ཏཾ ཀཏཱཀཏདུཙྩརིཏསུཙརིཏཱནུསོཙནལཀྑཎཾ. ཐིནནཾ ཐིནཾ, ཨནུསྶཱཧནཱཝསཾསཱིདནཝསེན སཾཧཏབྷཱཝོ. མིདྡྷནཾ མིདྡྷཾ, ཝིགཏསཱམཏྠིཡཏཱ, ཨསཏྟིཝིགྷཱཏོ ཝཱ, ཏཏྠ ཐིནཾ ཙིཏྟསྶ ཨཀམྨཉྙཏཱལཀྑཎཾ, མིདྡྷཾ ཝེདནཱདིཀྑནྡྷཏྟཡསྶཱཏི ཨཡམེཏེསཾ ཝིསེསོ. ཏཐཱ ཧི པཱལི༹ཡཾ (དྷ. ས. ༡༡༦༢-༡༡༦༣) ‘‘ཏཏྠ ཀཏམཾ ཐིནཾ? ཡཱ ཙིཏྟསྶ ཨཀལླཏཱ ཨཀམྨཉྙཏཱ. ཏཏྠ ཀཏམཾ མིདྡྷཾ? ཡཱ ཀཱཡསྶ ཨཀལླཏཱ ཨཀམྨཉྙཏཱ’’ཏྱཱདིནཱ ཨིམེསཾ ནིདྡེསོ པཝཏྟོ. ནནུ ཙ ‘‘ཀཱཡསྶཱ’’ཏི ཝཙནཏོ རཱུཔཀཱཡསྶཔི ཨཀམྨཉྙཏཱ མིདྡྷནྟི ཏསྶ རཱུཔབྷཱཝོཔི ཨཱཔཛྫཏཱིཏི? ནཱཔཛྫཏི, ཏཏྠ ཏཏྠ ཨཱཙརིཡེཧི ཨཱནཱིཏཀཱརཎཝསེནེཝསྶ ¶ པཊིཀྑིཏྟཏྟཱ. ཏཐཱ ཧི མིདྡྷཝཱདིམཏཔྤཊིཀྑེཔནཏྠཾ ཏེསཾ ཝཱདནིཀྑེཔཔུབྦཀཾ ཨཊྛཀཐཱདཱིསུ བཧུདྷཱ ཝིཏྠཱརེནྟི ཨཱཙརིཡཱ. ཨཡཾ པནེཏྠ སངྒཧོ –

‘‘ཀེཙི ¶ མིདྡྷམྤི རཱུཔནྟི, ཝདནྟེཏཾ ན ཡུཛྫཏི;

པཧཱཏབྦེསུ ཝུཏྟཏྟཱ, ཀཱམཙྪནྡཱདཡོ ཝིཡ.

‘‘པཧཱཏབྦེསུ ཨཀྑཱཏ-མེཏཾ ནཱིཝརཎེསུ ཧི;

རཱུཔནྟུ ན པཧཱཏབྦ-མཀྑཱཏཾ དསྶནཱདིནཱ.

‘‘‘ན ཏུམྷཾ བྷིཀྑཝེ རཱུཔཾ, པཛཧེཐཱ’ཏི པཱཋཏོ;

པཧེཡྻབྷཱཝལེསོཔི, ཡཏྠ རཱུཔསྶ དིསྶཏི.

‘‘ཏཏྠ ཏབྦིསཡཙྪནྡ-རཱགཧཱནི པཀཱསིཏཱ;

ཝུཏྟཉྷི ཏཏྠ ཡོ ཚནྡ-རཱགཀྑེཔོཏིཨཱདིཀཾ.

‘‘རཱུཔཱརཱུཔེསུ མིདྡྷེསུ, ཨརཱུཔཾ ཏཏྠ དེསིཏཾ;

ཨིཏི ཙེ ནཏྠི ཏཾ ཏཏྠ, ཨཝིསེསེན པཱཋཏོ.

‘‘སཀྐཱ ཧི ཨནུམཱཏུཾ ཡཾ, མིདྡྷཾ རཱུཔནྟི ཙིནྟིཏཾ;

ཏམྤི ནཱིཝརཎཾ མིདྡྷ-བྷཱཝཏོ ཨིཏརཾ ཝིཡ.

‘‘སམྤཡོགཱབྷིདྷཱནཱ ཙ, ན ཏཾ རཱུཔནྟི ནིཙྪཡོ;

ཨརཱུཔཱིནཉྷི ཁནྡྷཱནཾ, སམྤཡོགོ པཝུཙྩཏི.

‘‘ཏཐཱརུཔྤེ སམུཔྤཏྟི, པཱཋཏོ ནཏྠི རཱུཔཏཱ;

ནིདྡཱ ཁཱིཎཱསཝཱནནྟུ, ཀཱཡགེལཉྙཏོ སིཡཱ’’ཏི.

ཨཀུསལཙེཏསིཀཝཎྞནཱ ནིཊྛིཏཱ.

སོབྷནཙེཏསིཀཝཎྞནཱ

༦. སདྡཧཏཱིཏི ¶ སདྡྷཱ, བུདྡྷཱདཱིསུ པསཱདོ, སཱ སམྤཡུཏྟདྷམྨཱནཾ པསཱདནལཀྑཎཱ ཨུདཀཔྤསཱདཀམཎི ཝིཡ. སརཎཾ ¶ སཏི, ཨསམྨོསོ, སཱ སམྤཡུཏྟདྷམྨཱནཾ སཱརཎལཀྑཎཱ. ཧིརཱིཡཏི ཀཱཡདུཙྩརིཏཱདཱིཧི ཛིགུཙྪཏཱིཏི ཧིརཱི, སཱ པཱཔཏོ ཛིགུཙྪནལཀྑཎཱ. ཨོཏྟཔྤཏཱིཏི ཨོཏྟཔྤཾ, ཏཾ པཱཔཏོ ཨུཏྟཱསལཀྑཎཾ. ཨཏྟགཱརཝཝསེན པཱཔཏོ ཛིགུཙྪནཏོ ཀུལཝདྷཱུ ཝིཡ ཧིརཱི, པརགཱརཝཝསེན པཱཔཏོ ཨུཏྟཱསནཏོ ཝེསིཡཱ ཝིཡ ཨོཏྟཔྤཾ. ལོབྷཔྤཊིཔཀྑོ ཨལོབྷོ, སོ ཨཱརམྨཎེ ཙིཏྟསྶ ཨལགྒཏཱལཀྑཎོ མུཏྟབྷིཀྑུ ཝིཡ. དོསཔྤཊིཔཀྑོ ཨདོསོ, སོ ཨཙཎྜིཀྐལཀྑཎོ ཨནུཀཱུལམིཏྟོ ཝིཡ. ཏེསུ དྷམྨེསུ མཛ྄ཛྷཏྟཏཱ ཏཏྲམཛ྄ཛྷཏྟཏཱ, སཱ ཙིཏྟཙེཏསིཀཱནཾ ཨཛ྄ཛྷུཔེཀྑནལཀྑཎཱ སམཔྤཝཏྟཱནཾ ཨསྶཱནཾ ཨཛ྄ཛྷུཔེཀྑཀོ སཱརཐི ཝིཡ.

ཀཱཡསྶ པསྶམྦྷནཾ ཀཱཡཔྤསྶདྡྷི. ཙིཏྟསྶ པསྶམྦྷནཾ ཙིཏྟཔྤསྶདྡྷི. ཨུབྷོཔི ཙེཏཱ ཀཱཡཙིཏྟདརཐཝཱུཔསམལཀྑཎཱ. ཀཱཡསྶ ལཧུབྷཱཝོ ཀཱཡལཧུཏཱ. ཏཐཱ ཙིཏྟལཧུཏཱ. ཏཱ ཀཱཡཙིཏྟགརུབྷཱཝཝཱུཔསམལཀྑཎཱ. ཀཱཡསྶ མུདུབྷཱཝོ ཀཱཡམུདུཏཱ. ཏཐཱ ཙིཏྟམུདུཏཱ. ཏཱ ཀཱཡཙིཏྟཐདྡྷབྷཱཝཝཱུཔསམལཀྑཎཱ. ཀམྨནི སཱདྷུ ཀམྨཉྙཾ, ཏསྶ བྷཱཝོ ཀམྨཉྙཏཱ, ཀཱཡསྶ ཀམྨཉྙཏཱ ཀཱཡཀམྨཉྙཏཱ. ཏཐཱ ཙིཏྟཀམྨཉྙཏཱ. ཏཱ ཀཱཡཙིཏྟཨཀམྨཉྙབྷཱཝཝཱུཔསམལཀྑཎཱ. པགུཎསྶ བྷཱཝོ པཱགུཉྙཾ, ཏདེཝ པཱགུཉྙཏཱ, ཀཱཡསྶ པཱགུཉྙཏཱ ཀཱཡཔཱགུཉྙཏཱ. ཏཐཱ ཙིཏྟཔཱགུཉྙཏཱ. ཏཱ ཀཱཡཙིཏྟཱནཾ གེལཉྙཝཱུཔསམལཀྑཎཱ. ཀཱཡསྶ ཨུཛུཀབྷཱཝོ ཀཱཡུཛུཀཏཱ. ཏཐཱ ཙིཏྟུཛུཀཏཱ. ཏཱ ཀཱཡཙིཏྟཱནཾ ཨཛྫཝལཀྑཎཱ. ཡཐཱཀྐམཾ པནེཏཱ ཀཱཡཙིཏྟཱནཾ སཱརམྦྷཱདིཀརདྷཱཏུཀྑོབྷཔཊིཔཀྑཔཙྩཡསམུཊྛཱནཱ, ཀཱཡོཏི ཙེཏྠ ཝེདནཱདིཀྑནྡྷཏྟཡསྶ གཧཎཾ. ཡསྨཱ ཙེཏེ དྭེ དྭེ དྷམྨཱཝ ཨེཀཏོ ཧུཏྭཱ ཡཐཱསཀཾ པཊིཔཀྑདྷམྨེ ཧནནྟི, ཏསྨཱ ཨིདྷེཝ ¶ དུཝིདྷཏཱ ཝུཏྟཱ, ན སམཱདྷིཨཱདཱིསུ. ཨཔིཙ ཙིཏྟཔྤསྶདྡྷིཨཱདཱིཧི ཙིཏྟསྶེཝ པསྶདྡྷཱདིབྷཱཝོ ཧོཏི, ཀཱཡཔྤསྶདྡྷིཨཱདཱིཧི པན རཱུཔཀཱཡསྶཔི ཏཾསམུཊྛཱནཔཎཱིཏརཱུཔཕརཎཝསེནཱཏི ཏདཏྠསནྡསྶནཏྠཉྩེཏྠ དུཝིདྷཏཱ ཝུཏྟཱ. སོབྷནཱནཾ སབྦེསམྤི སཱདྷཱརཎཱ ནིཡམེན ཏེསུ ཨུཔྤཛྫནཏོཏི སོབྷནསཱདྷཱརཎཱ.

༧. སམྨཱ ཝདནྟི ཨེཏཱཡཱཏི སམྨཱཝཱཙཱ, ཝཙཱིདུཙྩརིཏཝིརཏི. སཱ ཙཏུབྦིདྷཱ མུསཱཝཱདཱ ¶ ཝེརམཎི, པིསུཎཝཱཙཱ ཝེརམཎི, ཕརུསཝཱཙཱ ཝེརམཎི, སམྥཔྤལཱཔཱ ཝེརམཎཱིཏི. ཀམྨམེཝ ཀམྨནྟོ སུཏྟནྟཝནནྟཱདཡོ ཝིཡ. སམྨཱ པཝཏྟོ ཀམྨནྟོ སམྨཱཀམྨནྟོ, ཀཱཡདུཙྩརིཏཝིརཏི. སཱ ཏིཝིདྷཱ པཱཎཱཏིཔཱཏཱ ཝེརམཎི, ཨདིནྣཱདཱནཱ ཝེརམཎི, ཀཱམེསུམིཙྪཱཙཱརཱ ཝེརམཎཱིཏི. སམྨཱ ཨཱཛཱིཝནྟི ཨེཏེནཱཏི སམྨཱཨཱཛཱིཝོ, མིཙྪཱཛཱིཝཝིརཏི. སོ པན ཨཱཛཱིཝཧེཏུཀཀཱཡཝཙཱིདུཙྩརིཏཏོ ཝིརམཎཝསེན སཏྟཝིདྷོ, ཀུཧནལཔནཱདིམིཙྪཱཛཱིཝཝིརམཎཝསེན བཧུཝིདྷོ ཝཱ. ཏིཝིདྷཱཔི པནེཏཱ པཙྩེཀཾ སམྤཏྟསམཱདཱནསམུཙྪེདཝིརཏིཝསེན ཏིཝིདྷཱ ཝིརཏིཡོ ནཱམ ཡཐཱཝུཏྟདུཙྩརིཏེཧི ཝིརམཎཏོ.

༨. ཀརོཏི པརདུཀྑེ སཏི སཱདྷཱུནཾ ཧདཡཁེདཾ ཛནེཏི, ཀིརཏི ཝཱ ཝིཀྑིཔཏི པརདུཀྑཾ, ཀིཎཱཏི ཝཱ ཏཾ ཧིཾསཏི, ཀིརིཡཏི ཝཱ དུཀྑིཏེསུ པསཱརིཡཏཱིཏི ཀརུཎཱ, སཱ པརདུཀྑཱཔནཡནཀཱམཏཱལཀྑཎཱ. ཏཱཡ ཧི པརདུཀྑཾ ཨཔནཱིཡཏུ ཝཱ, མཱ ཝཱ, ཏདཱཀཱརེནེཝ སཱ པཝཏྟཏི. མོདནྟི ཨེཏཱཡཱཏི མུདིཏཱ, སཱ པརསམྤཏྟིཨནུམོདནལཀྑཎཱ, ཨཔྤམཱཎསཏྟཱརམྨཎཏྟཱ ཨཔྤམཱཎཱ, ཏཱ ཨེཝ ཨཔྤམཉྙཱ. ནནུ ཙ ‘‘ཙཏསྶོ ཨཔྤམཉྙཱ’’ཏི ཝཀྑཏི, ཀསྨཱ པནེཏྠ དྭེཡེཝ ཝུཏྟཱཏི? ཨདོསཏཏྲམཛ྄ཛྷཏྟཏཱཧི མེཏྟུཔེཀྑཱནཾ གཧིཏཏྟཱ. ཨདོསོཡེཝ ཧི སཏྟེསུ ཧིཏཛ྄ཛྷཱསཡཝསཔྤཝཏྟོ ¶ མེཏྟཱ ནཱམ. ཏཏྲམཛ྄ཛྷཏྟཏཱཡེཝ ཏེསུ པཊིགྷཱནུནཡཝཱུཔསམཔྤཝཏྟཱ ཨུཔེཀྑཱ ནཱམ. ཏེནཱཧུ པོརཱཎཱ –

‘‘ཨབྱཱཔཱདེན མེཏྟཱ ཧི, ཏཏྲམཛ྄ཛྷཏྟཏཱཡ ཙ;

ཨུཔེཀྑཱ གཧིཏཱ ཡསྨཱ, ཏསྨཱ ན གཧིཏཱ ཨུབྷོ’’ཏི. (ཨབྷིདྷ. ༧༠);

པཀཱརེན ཛཱནཱཏི ཨནིཙྩཱདིཝསེན ཨཝབུཛ྄ཛྷཏཱིཏི པཉྙཱ, སཱ ཨེཝ ཡཐཱསབྷཱཝཱཝབོདྷནེ ཨཱདྷིཔཙྩཡོགཏོ ཨིནྡྲིཡནྟི པཉྙིནྡྲིཡཾ. ཨཐ སཉྙཱཝིཉྙཱཎཔཉྙཱནཾ ཀིཾ ནཱནཱཀརཎནྟི? སཉྙཱ ཏཱཝ ནཱིལཱདིཝསེན སཉྫཱནནམཏྟཾ ཀརོཏི, ལཀྑཎཔྤཊིཝེདྷཾ ཀཱཏུཾ ན སཀྐོཏི. ཝིཉྙཱཎཾ ལཀྑཎཔྤཊིཝེདྷམྤི སཱདྷེཏི, ཨུསྶཀྐིཏྭཱ པན མགྒཾ པཱཔེཏུཾ ན སཀྐོཏི. པཉྙཱ པན ཏིཝིདྷམྤི ཀརོཏི, བཱལགཱམིཀཧེརཉྙིཀཱནཾ ཀཧཱཔཎཱཝབོདྷནམེཏྠ ནིདསྶནནྟི. ཉཱཎཝིཔྤཡུཏྟསཉྙཱཡ ཙེཏྠ ཨཱཀཱརགྒཧཎཝསེན ཨུཔྤཛྫནཀཱལེ ཝིཉྙཱཎཾ ཨབྦོཧཱརིཀཾ, སེསཀཱལེ བལཝཾ. ཉཱཎསམྤཡུཏྟཱ པན ཨུབྷོཔི ཏདནུགཏིཀཱ ཧོནྟི. སབྦཐཱཔི པཉྩཝཱིསཏཱིཏི སམྦནྡྷོ.

༩. ‘‘ཏེརསཉྙསམཱནཱ’’ཏྱཱདི ¶ ཏཱིཧི རཱསཱིཧི ཝུཏྟཱནཾ སངྒཧོ.

སོབྷནཙེཏསིཀཝཎྞནཱ ནིཊྛིཏཱ.

སམྤཡོགནཡཝཎྞནཱ

༡༠. ཙིཏྟེན སཧ ཨཝིཡུཏྟཱ ཙིཏྟཱཝིཡུཏྟཱ, ཙེཏསིཀཱཏི ཝུཏྟཾ ཧོཏི. ཨུཔྤཛྫཏཱིཏི ཨུཔྤཱདོ, ཙིཏྟམེཝ ཨུཔྤཱདོ ཙིཏྟུཔྤཱདོ ¶ . ཨཉྙཏྠ པན སསམྤཡུཏྟཾ ཙིཏྟཾ ཙིཏྟུཔྤཱདོཏི ཝུཙྩཏི ‘‘ཨུཔྤཛྫཏི ཙིཏྟཾ ཨེཏེནཱཏི ཨུཔྤཱདོ, དྷམྨསམཱུཧོ, ཙིཏྟཉྩ ཏཾ ཨུཔྤཱདོ ཙཱཏི ཙིཏྟུཔྤཱདོ’’ཏི ཀཏྭཱ. སམཱཧཱརདྭནྡེཔི ཧི པུལླིངྒཾ ཀཏྠཙི སདྡཝིདཱུ ཨིཙྪནྟི. ཏེསཾ ཙིཏྟཱཝིཡུཏྟཱནཾ ཙིཏྟུཔྤཱདེསུ པཙྩེཀཾ སམྤཡོགོ ཨིཏོ པརཾ ཡཐཱཡོགཾ པཝུཙྩཏཱིཏི སམྦནྡྷོ.

ཨཉྙསམཱནཙེཏསིཀསམྤཡོགནཡཝཎྞནཱ

༡༣. སབྷཱཝེན ཨཝིཏཀྐཏྟཱ དྭིཔཉྩཝིཉྙཱཎཱནི ཝཛྫིཏཱནི ཨེཏེཧི, ཏེཧི ཝཱ ཨེཏཱནི ཝཛྫིཏཱནཱིཏི དྭིཔཉྩཝིཉྙཱཎཝཛྫིཏཱནི, ཙཏུཙཏྟཱལཱིས ཀཱམཱཝཙརཙིཏྟཱནི. ཏེསུ ཙེཝ ཨེཀཱདསསུ པཋམཛ྄ཛྷཱནཙིཏྟེསུ ཙ ཝིཏཀྐོ ཛཱཡཏི སེསཱནཾ བྷཱཝནཱབལེན ཨཝིཏཀྐཏྟཱཏི ཨདྷིཔྤཱཡོ.

༡༤. ཏེསུ ཙེཝ པཉྩཔཉྙཱསསཝིཏཀྐཙིཏྟེསུ, ཨེཀཱདསསུ དུཏིཡཛ྄ཛྷཱནཙིཏྟེསུ ཙཱཏི ཚསཊྛིཙིཏྟེསུ ཝིཙཱརོ ཛཱཡཏི.

༡༥. དྭིཔཉྩཝིཉྙཱཎེཧི, ཝིཙིཀིཙྪཱསཧགཏེན ཙཱཏི ཨེཀཱདསཧི ཝཛྫིཏེསུ ཨཊྛསཏྟཏིཙིཏྟེསུ ཨདྷིམོཀྑོ ཛཱཡཏི.

༡༦. པཉྩདྭཱརཱཝཛྫནེན, དྭིཔཉྩཝིཉྙཱཎེཧི, སམྤཊིཙྪནདྭཡེན, སནྟཱིརཎཏྟཡེན ཙཱཏི སོལ༹སཧི ཝཛྫིཏེསུ ཏེསཏྟཏིཡཱ ཙིཏྟེསུ ཝཱིརིཡཾ ཛཱཡཏི.

༡༧. དོམནསྶསཧགཏེཧིདྭཱིཧི ¶ , ཨུཔེཀྑཱསཧགཏེཧི པཉྩཔཉྙཱསཙིཏྟེཧི, ཀཱཡཝིཉྙཱཎདྭཡེན, ཨེཀཱདསཧི ཙཏུཏྠཛ྄ཛྷཱནེཧི ཙཱཏི སཏྟཏིཙིཏྟེཧི ཝཛྫིཏེསུ ཨེཀཔཉྙཱསཙིཏྟེསུ པཱིཏི ཛཱཡཏི.

༡༨. ཨཧེཏུཀེཧི ¶ ཨཊྛཱརསཧི, མོམཱུཧེཧི དྭཱིཧི ཙཱཏི ཝཱིསཏིཡཱ ཙིཏྟེཧི ཝཛྫིཏེསུ ཨེཀཱུནསཏྟཏིཙིཏྟེསུ ཚནྡོ ཛཱཡཏི.

༡༩. ཏེ པནཱཏི པཀིཎྞཀཝིཝཛྫིཏཱ ཏཾསཧགཏཱ ཙ. ཡཐཱཀྐམནྟི ཝིཏཀྐཱདིཚཔཀིཎྞཀཝཛྫིཏཏཾསཧིཏཀམཱནུརཱུཔཏོ. ‘‘ཚསཊྛི པཉྩཔཉྙཱསཱ’’ཏྱཱདི ཨེཀཝཱིསསཏགཎནཝསེན, ཨེཀཱུནནཝུཏིགཎནཝསེན ཙ ཡཐཱརཧཾ ཡོཛེཏབྦཾ.

ཨཉྙསམཱནཙེཏསིཀསམྤཡོགནཡཝཎྞནཱ ནིཊྛིཏཱ.

ཨཀུསལཙེཏསིཀསམྤཡོགནཡཝཎྞནཱ

༢༠. ‘‘སབྦཱཀུསལསཱདྷཱརཎཱ’’ཏི ཝཏྭཱ ཏདེཝ སམཏྠེཏུཾ ‘‘སབྦེསུཔཱི’’ཏྱཱདི ཝུཏྟཾ. ཡོ ཧི ཀོཙི པཱཎཱཏིཔཱཏཱདཱིསུ པཊིཔཛྫཏི, སོ སབྦོཔི མོཧེན ཏཏྠ ཨནཱདཱིནཝདསྶཱཝཱི ཨཧིརིཀེན ཏཏོ ཨཛིགུཙྪནྟོ, ཨནོཏྟཔྤེན ཨནོཏྟཔྤནྟོ, ཨུདྡྷཙྩེན ཨཝཱུཔསནྟོ ཙ ཧོཏི, ཏསྨཱ ཏེ སབྦཱཀུསལེསུ ཨུཔལབྦྷནྟི.

༢༡. ལོབྷསཧགཏཙིཏྟེསྭེཝཱཏི ཨེཝ-ཀཱརོ ཨདྷིཀཱརཏྠཱཡཔི ཧོཏཱིཏི ‘‘དིཊྛིསཧགཏཙིཏྟེསཱུ’’ཏིཨཱདཱིསུཔི ཨཝདྷཱརཎཾ དཊྛབྦཾ. སཀྐཱཡཱདཱིསུ ཧི ཨབྷིནིཝིསནྟསྶ ཏཏྠ མམཱཡནསམྦྷཝཏོ དིཊྛི ལོབྷསཧགཏཙིཏྟེསྭེཝ ལབྦྷཏི. མཱནོཔི ཨཧཾམཱནཝསེན པཝཏྟནཏོ དིཊྛིསདིསོཝ པཝཏྟཏཱིཏི དིཊྛིཡཱ སཧ ཨེཀཙིཏྟུཔྤཱདེན པཝཏྟཏི ཀེསརསཱིཧོ ཝིཡ ཨཔརེན ཏཐཱཝིདྷེན སཧ ཨེཀགུཧཱཡཾ, ན ཙཱཔི དོསམཱུལཱདཱིསུ ཨུཔྤཛྫཏི ཨཏྟསིནེཧསནྣིསྶཡབྷཱཝེན ཨེཀནྟལོབྷཔདཊྛཱནཏྟཱཏི སོ དིཊྛིཝིཔྤཡུཏྟེསྭེཝ ལབྦྷཏི.

༢༤. ཏཐཱ ¶ ¶ པརསམྤཏྟིཾ ཨུསཱུཡནྟསྶ, ཨཏྟསམྤཏྟིཡཱ ཙ པརེཧི སཱདྷཱརཎབྷཱཝཾ ཨནིཙྪནྟསྶ, ཀཏཱཀཏདུཙྩརིཏསུཙརིཏེ ཨནུསོཙནྟསྶ ཙ ཏཏྠ ཏཏྠ པཊིཧནནཝསེནེཝ པཝཏྟནཏོ ཨིསྶཱམཙྪརིཡཀུཀྐུཙྩཱནི པཊིགྷཙིཏྟེསྭེཝ.

༢༥. ཨཀམྨཉྙཏཱཔཀཏིཀསྶ ཏཐཱ སབྷཱཝཏིཀྑེསུ ཨསངྑཱརིཀེསུ པཝཏྟནཱཡོགཏོ ཐིནམིདྡྷཾ སསངྑཱརིཀེསྭེཝ ལབྦྷཏི.

༢༧. སབྦཱཔུཉྙེསྭེཝ ཙཏྟཱརོ ཙེཏསིཀཱ གཏཱ, ལོབྷམཱུལེཡེཝ ཡཐཱསམྦྷཝཾ ཏཡོ གཏཱ, དོསམཱུལེསྭེཝ དྭཱིསུ ཙཏྟཱརོ གཏཱ, ཏཐཱ སསངྑཱརེཡེཝ དྭཡནྟི ཡོཛནཱ. ཝིཙིཀིཙྪཱ ཝིཙིཀིཙྪཱཙིཏྟེ ཙཱཏི ཙ-སདྡོ ཨཝདྷཱརཎེ. ཝིཙིཀིཙྪཱ ཝིཙིཀིཙྪཱཙིཏྟེཡེཝཱཏི སམྦནྡྷོ.

ཨཀུསལཙེཏསིཀསམྤཡོགནཡཝཎྞནཱ ནིཊྛིཏཱ.

སོབྷནཙེཏསིཀསམྤཡོགནཡཝཎྞནཱ

༢༩. ལོཀུཏྟརཙིཏྟེསུ པཱདཀཛ྄ཛྷཱནཱདིཝསེན ཀདཱཙི སམྨཱསངྐཔྤཝིརཧོ སིཡཱ, ན པན ཝིརཏཱིནཾ ཨབྷཱཝོ མགྒསྶ ཀཱཡདུཙྩརིཏཱདཱིནཾ སམུཙྪེདཝསེན, ཕལསྶ ཙ ཏདནུཀཱུལཝསེན པཝཏྟནཏོཏི ཝུཏྟཾ ‘‘ཝིརཏིཡོ པནཱ’’ཏྱཱདི. སབྦཐཱཔཱིཏི སབྦེཧིཔི ཏཾཏཾདུཙྩརིཏདུརཱཛཱིཝཱནཾ ཝིདྷམནཝསཔྤཝཏྟེཧི ཨཱཀཱརེཧི. ན ཧི ཨེཏཱསཾ ལོཀིཡེསུ ཝིཡ ལོཀུཏྟརེསུཔི མུསཱཝཱདཱདཱིནཾ ཝིསུཾ ཝིསུཾ པཧཱནཝསེན པཝཏྟི ཧོཏི སབྦེསམེཝ དུཙྩརིཏདུརཱཛཱིཝཱནཾ ཏེན ཏེན མགྒེན ཀེསཉྩི སབྦསོ, ཀེསཉྩི ཨཔཱཡགམནཱིཡཱདིཨཝཏྠཱཡ པཧཱནཝསེན ཨེཀཀྑཎེ སམུཙྪིནྡནཏོ. ནནུ ཙཱཡམཏྠོ ‘‘ཨེཀཏོཝཱ’’ཏི ཨིམིནཱཝ སིདྡྷོཏི? ཏཾ ན, ཏིསྶནྣཾ ཨེཀཏོཝུཏྟིཔརིདཱིཔནམཏྟེན ཙཏུབྦིདྷཝཙཱིདུཙྩརིཏཱདཱིནཾ པཊིཔཀྑཱཀཱརཔྤཝཏྟིཡཱ ཨདཱིཔིཏཏྟཱ. ཀེཙི པན ཨིམམཏྠཾ ཨསལླཀྑེཏྭཱཝ ¶ ‘‘‘སབྦཐཱཔཱི’ཏི ཨིདཾ ཨཏིརིཏྟ’’ནྟི ཝདནྟི, ཏཏྠ ཏེསཾ ཨཉྙཱཎམེཝ ཀཱརཎཾ. ‘‘ནིཡཏཱ’’ཏི ཨིམིནཱཔི ལོཀིཡེསུ ཝིཡ ཀདཱཙི སམྦྷཝཾ ནིཝཱརེཏི. ཏཐཱ ཧེཏཱ ལོཀིཡེསུ ཡེཝཱཔནཀཝསེན དེསིཏཱ, ཨིདྷ པན སརཱུཔེནེཝ. ཀཱམཱཝཙརཀུསལེསྭེཝཱཏི ཨཝདྷཱརཎེན ¶ ཀཱམཱཝཙརཝིཔཱཀཀིརིཡེསུ མཧགྒཏེསུ ཙ སམྦྷཝཾ ནིཝཱརེཏི. ཏཐཱ ཙེཝ ཨུཔརི ཝཀྑཏི. ཀདཱཙཱིཏི མུསཱཝཱདཱདིཨེཀེཀདུཙྩརིཏེཧི པཊིཝིརམཎཀཱལེ. ཀདཱཙི ཨུཔྤཛྫནྟཱཔི ན ཨེཀཏོ ཨུཔྤཛྫནྟི ཝཱིཏིཀྐམིཏབྦཝཏྠུསངྑཱཏཱནཾ ཨཏྟནོ ཨཱརམྨཎཱནཾ སམྦྷཝཱཔེཀྑཏྟཱཏི ཝུཏྟཾ ‘‘ཝིསུཾ ཝིསུ’’ནྟི.

༣༠. ཨཔྤནཱཔྤཏྟཱནཾ ཨཔྤམཉྙཱནཾ ན ཀདཱཙི སོམནསྶརཧིཏཱ པཝཏྟི ཨཏྠཱིཏི ‘‘པཉྩམ…པེ… ཙིཏྟེསུ ཙཱ’’ཏི ཝུཏྟཾ. ཝིནཱིཝརཎཱདིཏཱཡ མཧཏྟཾ གཏཱནི, མཧནྟེཧི ཝཱ ཛྷཱཡཱིཧི གཏཱནི པཏྟཱནཱིཏི མཧགྒཏཱནི. ནཱནཱ ཧུཏྭཱཏི བྷིནྣཱརམྨཎཏྟཱ ཨཏྟནོ ཨཱརམྨཎབྷཱུཏཱནཾ དུཀྑིཏསུཁིཏསཏྟཱནཾ ཨཱཔཱཐགམནཱཔེཀྑཏཱཡ ཝིསུཾ ཝིསུཾ ཧུཏྭཱ. ཨེཏྠཱཏི ཨིམེསུ ཀཱམཱཝཙརཀུསལཙིཏྟེསུ, ཀརུཎཱམུདིཏཱབྷཱཝནཱཀཱལེ ཨཔྤནཱཝཱིཐིཏོ པུབྦེ པརིཙཡཝསེན ཨུཔེཀྑཱསཧགཏཙིཏྟེཧིཔི པརིཀམྨཾ ཧོཏི, ཡཐཱ ཏཾ པགུཎགནྠཾ སཛ྄ཛྷཱཡནྟསྶ ཀདཱཙི ཨཉྙཝིཧིཏསྶཔི སཛ྄ཛྷཱཡནཾ, ཡཐཱ ཙ པགུཎཝིཔསྶནཱཡ སངྑཱརེ སམྨསནྟསྶ ཀདཱཙི པརིཙཡབལེན ཉཱཎཝིཔྤཡུཏྟཙིཏྟེཧིཔི སམྨསནནྟི ཨུཔེཀྑཱསཧགཏཀཱམཱཝཙརེསུ ཀརུཎཱམུདིཏཱནཾ ཨསམྦྷཝཝཱདོ ཀེཙིཝཱདོ ཀཏོ. ཨཔྤནཱཝཱིཐིཡཾ པན ཏཱསཾ ཨེཀནྟཏོ སོམནསྶསཧགཏེསྭེཝ སམྦྷཝོ དཊྛབྦོ བྷིནྣཛཱཏིཀསྶ ཝིཡ བྷིནྣཝེདནསྶཔི ཨཱསེཝནཔཙྩཡཱབྷཱཝཏོ.

༣༢. ཏཡོ སོལ༹སཙིཏྟེསཱུཏི སམྨཱཝཱཙཱདཡོ ཏཡོ དྷམྨཱ ཨཊྛལོཀུཏྟརཀཱམཱཝཙརཀུསལཝསེན སོལ༹སཙིཏྟེསུ ཛཱཡནྟི.

༣༣. ཨེཝཾ ¶ ནིཡཏཱནིཡཏསམྤཡོགཝསེན ཝུཏྟེསུ ཨནིཡཏདྷམྨེ ཨེཀཏོ དསྶེཏྭཱ སེསཱནཾ ནིཡཏབྷཱཝཾ དཱིཔེཏུཾ ‘‘ཨིསྶཱམཙྪེརཱ’’ཏྱཱདི ཝུཏྟཾ. ཨིསྶཱམཙྪེརཀུཀྐུཙྩཝིརཏིཀརུཎཱདཡོ ནཱནཱ ཀདཱཙི ཛཱཡནྟི, མཱནོ ཙ ཀདཱཙི ‘‘སེཡྻོཧམསྨཱི’’ཏྱཱདིཝསཔྤཝཏྟིཡཾ ཛཱཡཏི. ཐིནམིདྡྷཾ ཏཐཱ ཀདཱཙི ཨཀམྨཉྙཏཱཝསཔྤཝཏྟིཡཾ སཧ ཨཉྙམཉྙཾ ཨཝིཔྤཡོགིཝསེན ཛཱཡཏཱིཏི ཡོཛནཱ. ཨཐ ཝཱ མཱནོ ཙཱཏི ཨེཏྠ ཙ-སདྡཾ ‘‘སཧཱ’’ཏི ཨེཏྠཱཔི ཡོཛེཏྭཱ ཐིནམིདྡྷཾ ཏཐཱ ཀདཱཙི སཧ ཙ སསངྑཱརིཀཔཊིགྷེ, དིཊྛིགཏཝིཔྤཡུཏྟསསངྑཱརིཀེསུ ཙ ཨིསྶཱམཙྪརིཡཀུཀྐུཙྩེཧི, མཱནེན ཙ སདྡྷིཾ, ཀདཱཙི ཏདིཏརསསངྑཱརིཀཙིཏྟསམྤཡོགཀཱལེ, ཏཾསམྤཡོགཀཱལེཔི ཝཱ ནཱནཱ ཙ ཛཱཡཏཱིཏི ཡོཛནཱ དཊྛབྦཱ. ཨཔརེ པན ཨཱཙརིཡཱ ‘‘མཱནོ ཙ ཐིནམིདྡྷཉྩ ཏཐཱ ཀདཱཙི ནཱནཱ ཀདཱཙི སཧ ཙ ཛཱཡཏཱི’’ཏི ཨེཏྟཀམེཝ ཡོཛེསུཾ.

༣༤. སེསཱཏི ¶ ཡཐཱཝུཏྟེཧི ཨེཀཱདསཧི ཨནིཡཏེཧི ཨིཏརེ ཨེཀཙཏྟཱལཱིས. ཀེཙི པན ‘‘ཡཐཱཝུཏྟེཧི ཨནིཡཏཡེཝཱཔནཀེཧི སེསཱ ནིཡཏཡེཝཱཔནཀཱ’’ཏི ཝཎྞེནྟི, ཏཾ ཏེསཾ མཏིམཏྟཾ, ཨིདྷ ཡེཝཱཔནཀནཱམེན ཀེསཉྩི ཨནུདྡྷཊཏྟཱ. ཀེཝལཉྷེཏྠ ནིཡཏཱནིཡཏཝསེན ཙིཏྟུཔྤཱདེསུ ཡཐཱརཧཾ ལབྦྷམཱནཙེཏསིཀམཏྟསནྡསྶནཾ ཨཱཙརིཡེན ཀཏཾ, ན ཡེཝཱཔནཀནཱམེན ཀེཙི ཨུདྡྷཊཱཏི.

ཨེཝཾ ཏཱཝ ‘‘ཕསྶཱདཱིསུ ཨཡཾ དྷམྨོ ཨེཏྟཀེསུ ཙིཏྟེསུ ཨུཔལབྦྷཏཱི’’ཏི ཙིཏྟཔརིཙྪེདཝསེན སམྤཡོགཾ དསྶེཏྭཱ ཨིདཱནི ‘‘ཨིམསྨིཾ ཙིཏྟུཔྤཱདེ ཨེཏྟཀཱ ཙེཏསིཀཱ’’ཏི ཙེཏསིཀརཱསིཔརིཙྪེདཝསེན སངྒཧཾ དསྶེཏུཾ ‘‘སངྒཧཉྩཱ’’ཏྱཱདི ཝུཏྟཾ.

སོབྷནཙེཏསིཀསམྤཡོགནཡཝཎྞནཱ ནིཊྛིཏཱ.

སམྤཡོགནཡཝཎྞནཱ ནིཊྛིཏཱ.

སངྒཧནཡཝཎྞནཱ

༣༥. ‘‘ཚཏྟིཾསཱ’’ཏྱཱདི ¶ ཏཏྠ ཏཏྠ ཡཐཱརཧཾ ལབྦྷམཱནཀདྷམྨཝསེན གཎནསངྒཧོ.

༣༦. པཋམཛ྄ཛྷཱནེ ནིཡུཏྟཱནི ཙིཏྟཱནི, ཏཾ ཝཱ ཨེཏེསཾ ཨཏྠཱིཏི པཋམཛ྄ཛྷཱནིཀཙིཏྟཱནི. ཨཔྤམཉྙཱནཾ སཏྟཱརམྨཎཏྟཱ, ལོཀུཏྟརཱནཉྩ ནིབྦཱནཱརམྨཎཏྟཱ ཝུཏྟཾ ‘‘ཨཔྤམཉྙཱཝཛྫིཏཱ’’ཏི. ‘‘ཏཐཱ’’ཏི ཨིམིནཱ ཨཉྙསམཱནཱ, ཨཔྤམཉྙཱཝཛྫིཏཱ སོབྷནཙེཏསིཀཱ ཙ སངྒཧཾ གཙྪནྟཱིཏི ཨཱཀཌྜྷཏི. ཨུཔེཀྑཱསཧགཏཱཏི ཝིཏཀྐཝིཙཱརཔཱིཏིསུཁཝཛྫཱ སུཁཊྛཱནཾ པཝིཊྛཨུཔེཀྑཱཡ སཧགཏཱ. པཉྩཀཛ྄ཛྷཱནཝསེནཱཏི ཝིཏཀྐཝིཙཱརེ ཝིསུཾ ཝིསུཾ ཨཏིཀྐམིཏྭཱ བྷཱཝེནྟསྶ ནཱཏིཏིཀྑཉཱཎསྶ ཝསེན དེསིཏསྶ ཛྷཱནཔཉྩཀསྶ ཝསེན. ཏེ པན ཨེཀཏོ ཨཏིཀྐམིཏྭཱ བྷཱཝེནྟསྶ ཏིཀྑཉཱཎསྶ ཝསེན དེསིཏཙཏུཀྐཛ྄ཛྷཱནཝསེན དུཏིཡཛ྄ཛྷཱནིཀེསུ ཝིཏཀྐཝིཙཱརཝཛྫིཏཱནཾ སམྦྷཝཏོ ཙཏུདྷཱ ཨེཝ སངྒཧོ ཧོཏཱིཏི ཨདྷིཔྤཱཡོ.

༣༧. ཏེཏྟིཾསདྭཡཾ ཙཏུཏྠཔཉྩམཛ྄ཛྷཱནཙིཏྟེསུ.

མཧགྒཏཙིཏྟསངྒཧནཡཝཎྞནཱ

༣༨. ཏཱིསཱུཏི ¶ ཀུསལཝིཔཱཀཀིརིཡཝསེན ཏིཝིདྷེསུ སཱིལཝིསུདྡྷིཝསེན སུཝིསོདྷིཏཀཱཡཝཙཱིཔཡོགསྶ ཀེཝལཾ ཙིཏྟསམཱདྷཱནམཏྟེན མཧགྒཏཛ྄ཛྷཱནཱནི པཝཏྟནྟི, ན པན ཀཱཡཝཙཱིཀམྨཱནཾ ཝིསོདྷནཝསེན, ནཱཔི དུཙྩརིཏདུརཱཛཱིཝཱནཾ སམུཙྪིནྡནཔཊིཔྤསྶམྦྷནཝསེནཱཏི ཝུཏྟཾ ‘‘ཝིརཏིཝཛྫིཏཱ’’ཏི. པཙྩེཀམེཝཱཏི ཝིསུཾ ཝིསུཾཡེཝ. པནྣརསསཱུཏི རཱུཔཱཝཙརཝསེན ཏཱིསུ, ཨཱརུཔྤཝསེན དྭཱདསསཱུཏི པནྣརསསུ. ཨཔྤམཉྙཱཡོ ན ལབྦྷནྟཱིཏི ཨེཏྠ ཀཱརཎཾ ཝུཏྟམེཝ.

མཧགྒཏཙིཏྟསངྒཧནཡཝཎྞནཱ ནིཊྛིཏཱ.

ཀཱམཱཝཙརསོབྷནཙིཏྟསངྒཧནཡཝཎྞནཱ

༤༠. པཙྩེཀམེཝཱཏི ¶ ཨེཀེཀཱཡེཝ. ཨཔྤམཉྙཱནཾ ཧི སཏྟཱརམྨཎཏྟཱ, ཝིརཏཱིནཉྩ ཝཱིཏཀྐམིཏབྦཝཏྠུཝིསཡཏྟཱ ནཏྠི ཏཱསཾ ཨེཀཙིཏྟུཔྤཱདེ སམྦྷཝོཏི ལོཀིཡཝིརཏཱིནཾ ཨེཀནྟཀུསལསབྷཱཝཏྟཱ ནཏྠི ཨབྱཱཀཏེསུ སམྦྷཝོཏི ཝུཏྟཾ ‘‘ཝིརཏིཝཛྫིཏཱ’’ཏི. ཏེནཱཧ ‘‘པཉྩ སིཀྑཱཔདཱ ཀུསལཱཡེཝཱ’’ཏི (ཝིབྷ. ༧༡༥). ཨིཏརཐཱ སདྡྷཱསཏིཨཱདཡོ ཝིཡ ‘‘སིཡཱ ཀུསལཱ, སིཡཱ ཨབྱཱཀཏཱ’’ཏི ཝདེཡྻ. ཕལསྶ པན མགྒཔཊིབིམྦབྷཱུཏཏྟཱ, དུཙྩརིཏདུརཱཛཱིཝཱནཾ པཊིཔྤསྶམྦྷནཏོ ཙ ན ལོཀུཏྟརཝིརཏཱིནཾ ཨེཀནྟཀུསལཏཱ ཡུཏྟཱཏི ཏཱསཾ ཏཏྠ ཨགྒཧཎཾ. ཀཱམཱཝཙརཝིཔཱཀཱནམྤི ཨེཀནྟཔརིཏྟཱརམྨཎཏྟཱ, ཨཔྤམཉྙཱནཉྩ སཏྟཱརམྨཎཏྟཱ, ཝིརཏཱིནམྤི ཨེཀནྟཀུསལཏྟཱ ཝུཏྟཾ ‘‘ཨཔྤམཉྙཱཝིརཏིཝཛྫིཏཱ’’ཏི.

ནནུ ཙ པཉྙཏྟཱདིཨཱརམྨཎམྤི ཀཱམཱཝཙརཀུསལཾ ཧོཏཱིཏི ཏསྶ ཝིཔཱཀེནཔི ཀུསལསདིསཱརམྨཎེན བྷཝིཏབྦཾ ཡཐཱ ཏཾ མཧགྒཏལོཀུཏྟརཝིཔཱཀེཧཱིཏི? ནཡིདམེཝཾ, ཀཱམཏཎྷཱདྷཱིནསྶ ཕལབྷཱུཏཏྟཱ. ཡཐཱ ཧི དཱསིཡཱ པུཏྟོ མཱཏརཱ ཨིཙྪིཏཾ ཀཱཏུཾ ཨསཀྐོནྟོ སཱམིཀེནེཝ ཨིཙྪིཏིཙྪིཏཾ ཀརོཏི, ཨེཝཾ ཀཱམཏཎྷཱཡཏྟཏཱཡ དཱསིསདིསསྶ ཀཱམཱཝཙརཀམྨསྶ ཝིཔཱཀབྷཱུཏཾ ཙིཏྟཾ ཏེན གཧིཏཱརམྨཎཾ ཨགྒཧེཏྭཱ ཀཱམཏཎྷཱརམྨཎམེཝ གཎྷཱཏཱིཏི. དྭཱདསདྷཱཏི ཀུསལཝིཔཱཀཀིརིཡབྷེདེསུ པཙྩེཀཾ ཙཏྟཱརོ ཙཏྟཱརོ དུཀཱཏི ཀཏྭཱ ཏཱིསུ དྭཱདསདྷཱ.

༤༢. ཨིདཱནི ¶ ཨིམེསུ པཋམཛ྄ཛྷཱནིཀཱདཱིཧི དུཏིཡཛ྄ཛྷཱནིཀཱདཱིནཾ བྷེདཀརདྷམྨེ དསྶེཏུཾ ‘‘ཨནུཏྟརེ ཛྷཱནདྷམྨཱ’’ཏྱཱདི ཝུཏྟཾ. ཨནུཏྟརེ ཙིཏྟེ ཝིཏཀྐཝིཙཱརཔཱིཏིསུཁཝསེན ཛྷཱནདྷམྨཱ ཝིསེསཀཱ བྷེདཀཱ. མཛ྄ཛྷིམེ མཧགྒཏེ ཨཔྤམཉྙཱ, ཛྷཱནདྷམྨཱ ¶ ཙ. པརིཏྟེསུ ཀཱམཱཝཙརེསུ ཝིརཏཱི, ཉཱཎཔཱིཏཱི ཙ ཨཔྤམཉྙཱ ཙ ཝིསེསཀཱ, ཏཏྠ ཝིརཏཱི ཀུསལེཧི ཝིཔཱཀཀིརིཡཱནཾ ཝིསེསཀཱ, ཨཔྤམཉྙཱ ཀུསལཀིརིཡེཧི ཝིཔཱཀཱནཾ, ཉཱཎཔཱིཏཱི པན ཏཱིསུ པཋམཡུགལཱ༹དཱིཧི དུཏིཡཡུགལཱ༹དཱིནནྟི དཊྛབྦཾ.

ཀཱམཱཝཙརསོབྷནཙིཏྟསངྒཧནཡཝཎྞནཱ ནིཊྛིཏཱ.

ཨཀུསལཙིཏྟསངྒཧནཡཝཎྞནཱ

༤༤. དུཏིཡེ ཨསངྑཱརིཀེཏི དིཊྛིཝིཔྤཡུཏྟེ ཨསངྑཱརིཀེ ལོབྷམཱནེན ཏཐེཝ ཨཉྙསམཱནཱ, ཨཀུསལསཱདྷཱརཎཱ ཙ ཨེཀཱུནཝཱིསཏི དྷམྨཱཏི སམྦནྡྷོ.

༤༥. ཏཏིཡེཏི ཨུཔེཀྑཱསཧགཏདིཊྛིསམྤཡུཏྟེ ཨསངྑཱརིཀེ.

༤༦. ཙཏུཏྠེཏི དིཊྛིཝིཔྤཡུཏྟེ ཨསངྑཱརིཀེ.

༤༧. ཨིསྶཱམཙྪརིཡཀུཀྐུཙྩཱནི པནེཏྠ པཙྩེཀམེཝ ཡོཛེཏབྦཱནི བྷིནྣཱརམྨཎཏྟཱཡེཝཱཏི ཨདྷིཔྤཱཡོ.

༥༠. ཨདྷིམོཀྑསྶ ནིཙྪཡཱཀཱརཔྤཝཏྟིཏོ དྭེལ༹ྷཀསབྷཱཝེ ཝིཙིཀིཙྪཱཙིཏྟེ སམྦྷཝོ ནཏྠཱིཏི ‘‘ཨདྷིམོཀྑཝིརཧིཏཱ’’ཏི ཝུཏྟཾ.

༥༡. ཨེཀཱུནཝཱིསཏི པཋམདུཏིཡཨསངྑཱརིཀེསུ, ཨཊྛཱརས ཏཏིཡཙཏུཏྠཨསངྑཱརིཀེསུ, ཝཱིས པཉྩམེ ¶ ཨསངྑཱརིཀེ, ཨེཀཝཱིས པཋམདུཏིཡསསངྑཱརིཀེསུ, ཝཱིསཏི ཏཏིཡཙཏུཏྠསསངྑཱརིཀེསུ, དྭཱཝཱིས པཉྩམེ སསངྑཱརིཀེ, པནྣརས མོམཱུཧདྭཡེཏི ཨེཝཾ ཨཀུསལེ སཏྟདྷཱ ཋིཏཱཏི ཡོཛནཱ.

༥༢. སཱདྷཱརཎཱཏི ¶ ཨཀུསལཱནཾ སབྦེསམེཝ སཱདྷཱརཎབྷཱུཏཱ ཙཏྟཱརོ སམཱནཱ ཙ ཚནྡཔཱིཏིཨདྷིམོཀྑཝཛྫིཏཱ ཨཉྙསམཱནཱ ཨཔརེ དསཱཏི ཨེཏེ ཙུདྡས དྷམྨཱ སབྦཱཀུསལཡོགིནོཏི པཝུཙྩནྟཱིཏི ཡོཛནཱ.

ཨཀུསལཙིཏྟསངྒཧནཡཝཎྞནཱ ནིཊྛིཏཱ.

ཨཧེཏུཀཙིཏྟསངྒཧནཡཝཎྞནཱ

༥༤. ‘‘ཏཐཱ’’ཏི ཨིམིནཱ ཨཉྙསམཱནེ པཙྩཱམསཏི.

༥༦. མནོཝིཉྙཱཎདྷཱཏུཡཱ ཝིཡ ཝིསིཊྛམནནཀིཙྩཱཡོགཏོ མནནམཏྟཱ དྷཱཏཱུཏི མནོདྷཱཏུ. ཨཧེཏུཀཔཊིསནྡྷིཡུགལེ༹ཏི ཨུཔེཀྑཱསནྟཱིརཎདྭཡེ.

༥༨. དྭཱདས ཧསནཙིཏྟེ, ཨེཀཱདས ཝོཊྛབྦནསུཁསནྟཱིརཎེསུ, དས མནོདྷཱཏུཏྟིཀཱཧེཏུཀཔཊིསནྡྷིཡུགལ༹ཝསེན པཉྩསུ, སཏྟ དྭིཔཉྩཝིཉྙཱཎེསཱུཏི ཨཊྛཱརསཱཧེཏུཀེསུ ཙིཏྟུཔྤཱདེསུ སངྒཧོ ཙཏུབྦིདྷོ ཧོཏཱིཏི ཡོཛནཱ.

༥༩. ཏེཏྟིཾསཝིདྷསངྒཧོཏི ཨནུཏྟརེ པཉྩ, ཏཐཱ མཧགྒཏེ, ཀཱམཱཝཙརསོབྷནེ དྭཱདས, ཨཀུསལེ སཏྟ, ཨཧེཏུཀེ ཙཏྟཱརོཏི ཏེཏྟིཾསཝིདྷསངྒཧོ.

༦༠. ཨིཏྠཾ ཡཐཱཝུཏྟནཡེན ཙིཏྟཱཝིཡུཏྟཱནཾ ཙེཏསིཀཱནཾ ཙིཏྟཔརིཙྪེདཝསེན ཝུཏྟཾ སམྤཡོགཉྩ ཙེཏསིཀརཱསིཔརིཙྪེདཝསེན ཝུཏྟཾ སངྒཧཉྩ ཉཏྭཱ ཡཐཱཡོགཾ ཙིཏྟེན སམཾ བྷེདཾ ཨུདྡིསེ ‘‘སབྦཙིཏྟསཱདྷཱརཎཱ ཏཱཝ སཏྟ ཨེཀཱུནནཝུཏིཙིཏྟེསུ ཨུཔྤཛྫནཏོ པཙྩེཀཾ ཨེཀཱུནནཝུཏིཝིདྷཱ ¶ , པཀིཎྞཀེསུ ¶ ཝིཏཀྐོ པཉྩཔཉྙཱསཙིཏྟེསུ ཨུཔྤཛྫནཏོ པཉྩཔཉྙཱསཝིདྷོ’’ཏྱཱདིནཱ ཀཐེཡྻཱཏི ཨཏྠོ.

ཨཧེཏུཀཙིཏྟསངྒཧནཡཝཎྞནཱ ནིཊྛིཏཱ.

ཨིཏི ཨབྷིདྷམྨཏྠཝིབྷཱཝིནིཡཱ ནཱམ ཨབྷིདྷམྨཏྠསངྒཧཝཎྞནཱཡ

ཙེཏསིཀཔརིཙྪེདཝཎྞནཱ ནིཊྛིཏཱ.

༣. པཀིཎྞཀཔརིཙྪེདཝཎྞནཱ

༡. ཨིདཱནི ཡཐཱཝུཏྟཱནཾ ཙིཏྟཙེཏསིཀཱནཾ ཝེདནཱདིཝིབྷཱགཏོ, ཏཾཏཾཝེདནཱདིབྷེདབྷིནྣཙིཏྟུཔྤཱདཝིབྷཱགཏོ ཙ པཀིཎྞཀསངྒཧཾ དསྶེཏུཾ ‘‘སམྤཡུཏྟཱ ཡཐཱཡོག’’ནྟྱཱདི ཨཱརདྡྷཾ. ཡཐཱཡོགཾ སམྤཡུཏྟཱ ཙིཏྟཙེཏསིཀཱ དྷམྨཱ སབྷཱཝཏོ ཨཏྟནོ ཨཏྟནོ སབྷཱཝཝསེན ཨེཀཱུནནཝུཏིཝིདྷམྤི ཙིཏྟཾ ཨཱརམྨཎཝིཛཱནནསབྷཱཝསཱམཉྙེན ཨེཀཝིདྷཾ, སབྦཙིཏྟསཱདྷཱརཎོ ཕསྶོ ཕུསནསབྷཱཝེན ཨེཀཝིདྷོཏྱཱདིནཱ ཏེཔཉྙཱས ཧོནྟི.

༢. ཨིདཱནི ཏེསཾ དྷམྨཱནཾ ཡཐཱརཧཾ ཝེདནཱ…པེ… ཝཏྠུཏོ སངྒཧོ ནཱམ ཝེདནཱསངྒཧཱདིནཱམཀོ པཀིཎྞཀསངྒཧོ ཙིཏྟུཔྤཱདཝསེནེཝ ཏཾཏཾཝེདནཱདིབྷེདབྷིནྣཙིཏྟུཔྤཱདཱནཾ ཝསེནེཝ ན ཀཏྠཙི ཏཾཝིརཧེན ནཱིཡཏེ ཨུཔནཱིཡཏེ, ཨཱཧརཱིཡཏཱིཏྱཏྠོ.

ཝེདནཱསངྒཧཝཎྞནཱ

༣. ཏཏྠཱཏི ཏེསུ ཚསུ སངྒཧེསུ. སུཁཱདིཝེདནཱནཾ, ཏཾསཧགཏཙིཏྟུཔྤཱདཱནཉྩ ཝིབྷཱགཝསེན སངྒཧོ ཝེདནཱསངྒཧོ. དུཀྑཏོ, སུཁཏོ ཙ ཨཉྙཱ ཨདུཀྑམསུཁཱ མ-ཀཱརཱགམཝསེན. ནནུ ཙ ‘‘དྭེམཱ, བྷིཀྑཝེ, ཝེདནཱ སུཁཱ དུཀྑཱ’’ཏི (སཾ. ནི. ༤.༢༦༧) ཝཙནཏོ དྭེ ཨེཝ ཝེདནཱཏི? སཙྩཾ, ཏཾ པན ཨནཝཛྫཔཀྑིཀཾ ¶ ཨདུཀྑམསུཁཾ སུཁཝེདནཱཡཾ ¶ , སཱཝཛྫཔཀྑིཀཉྩ དུཀྑཝེདནཱཡཾ སངྒཧེཏྭཱ ཝུཏྟཾ. ཡམྤི ཀཏྠཙི སུཏྟེ ‘‘ཡཾ ཀིཉྩི ཝེདཡིཏམིདམེཏྠ དུཀྑསྶཱ’’ཏི (སཾ. ནི. ༤.༢༥༩) ཝཙནཾ, ཏཾ སངྑཱརདུཀྑཏཱཡ སབྦཝེདནཱནཾ དུཀྑསབྷཱཝཏྟཱ ཝུཏྟཾ. ཡཐཱཧ – ‘‘སངྑཱརཱནིཙྩཏཾ, ཨཱནནྡ, མཡཱ སནྡྷཱཡ བྷཱསིཏཾ སངྑཱརཝིཔརིཎཱམཏཉྩ ཡཾ ཀིཉྩིཝེདཡིཏམིདམེཏྠ དུཀྑསྶཱ’’ཏི (སཾ. ནི. ༤.༢༥༩; ཨིཏིཝུ. ཨཊྛ. ༥༢). ཏསྨཱ ཏིསྶོཡེཝ ཝེདནཱཏི དཊྛབྦཱ. ཏེནཱཧ བྷགཝཱ – ‘‘ཏིསྶོ ཨིམཱ, བྷིཀྑཝེ, ཝེདནཱ སུཁཱ དུཀྑཱ ཨདུཀྑམསུཁཱ ཙཱ’’ཏི (ཨིཏིཝུ. ༥༢-༥༣; སཾ. ནི. ༤.༢༤༩-༢༥༡). ཨེཝཾ ཏིཝིདྷཱཔི པནེཏཱ ཨིནྡྲིཡདེསནཱཡཾ ‘‘སུཁིནྡྲིཡཾ དུཀྑིནྡྲིཡཾ སོམནསྶིནྡྲིཡཾ དོམནསྶིནྡྲིཡཾ ཨུཔེཀྑིནྡྲིཡ’’ནྟི (ཝིབྷ. ༢༡༩) པཉྩདྷཱ དེསིཏཱཏི ཏཾཝསེནཔེཏྠ ཝིབྷཱགཾ དསྶེཏུཾ ‘‘སུཁཾ དུཀྑ’’ནྟྱཱདི ཝུཏྟཾ. ཀཱཡིཀམཱནསིཀསཱཏཱསཱཏབྷེདཏོ ཧི སུཁཾ དུཀྑཉྩ པཙྩེཀཾ དྭིདྷཱ ཝིབྷཛིཏྭཱ ‘‘སུཁིནྡྲིཡཾ སོམནསྶིནྡྲིཡཾ དུཀྑིནྡྲིཡཾ དོམནསྶིནྡྲིཡ’’ནྟི (ཝིབྷ. ༢༡༩) དེསིཏཱ, ཨུཔེཀྑཱ པན བྷེདཱབྷཱཝཏོ ཨུཔེཀྑིནྡྲིཡནྟི ཨེཀདྷཱཝ. ཡཐཱ ཧི སུཁདུཀྑཱནི ཨཉྙཐཱ ཀཱཡསྶ ཨནུགྒཧམུཔགྷཱཏཉྩ ཀརོནྟི, ཨཉྙཐཱ མནསོ, ནེཝཾ ཨུཔེཀྑཱ, ཏསྨཱ སཱ ཨེཀདྷཱཝ དེསིཏཱ, ཏེནཱཧུ པོརཱཎཱ –

‘‘ཀཱཡིཀཾ མཱནསཾ དུཀྑཾ, སུཁཉྩོཔེཀྑཝེདནཱ;

ཨེཀཾ མཱནསམེཝེཏི, པཉྩདྷིནྡྲིཡབྷེདཏོ’’ཏི. (ས. ས. ༧༤);

ཏཏྠ ཨིཊྛཕོཊྛབྦཱནུབྷཝནལཀྑཎཾ སུཁཾ. ཨནིཊྛཕོཊྛབྦཱནུབྷཝནལཀྑཎཾ དུཀྑཾ. སབྷཱཝཏོ, པརིཀཔྤཏོ ཝཱ ཨིཊྛཱནུབྷཝནལཀྑཎཾ སོམནསྶཾ. ཏཐཱ ཨནིཊྛཱནུབྷཝནལཀྑཎཾ དོམནསྶཾ. མཛ྄ཛྷཏྟཱནུབྷཝནལཀྑཎཱ ཨུཔེཀྑཱ.

༥. ཙཏུཙཏྟཱལཱིས པཙྩེཀཾ ལོཀིཡལོཀུཏྟརབྷེདེན ཨེཀཱདསཝིདྷཏྟཱ.

༧. སེསཱནཱིཏི ¶ སུཁདུཀྑསོམནསྶདོམནསྶསཧགཏེཧི ཨཝསེསཱནི ཨཀུསལཏོ ཚ, ཨཧེཏུཀཏོ ཙུདྡས, ཀཱམཱཝཙརསོབྷནཏོ དྭཱདས, པཉྩམཛ྄ཛྷཱནིཀཱནི ཏེཝཱིསཱཏི སབྦཱནིཔི པཉྩཔཉྙཱས.

ཝེདནཱསངྒཧཝཎྞནཱ ནིཊྛིཏཱ.

ཧེཏུསངྒཧཝཎྞནཱ

༡༠. ལོབྷཱདིཧེཏཱུནཾ ¶ ཝིབྷཱགཝསེན, ཏཾསམྤཡུཏྟཝསེན ཙ སངྒཧོ ཧེཏུསངྒཧོ. ཧེཏཝོ ནཱམ ཚབྦིདྷཱ བྷཝནྟཱིཏི སམྦནྡྷོ. ཧེཏུབྷཱཝོ པན ནེསཾ སམྤཡུཏྟཱནཾ སུཔྤཏིཊྛིཏབྷཱཝསཱདྷནསངྑཱཏོ མཱུལབྷཱཝོ. ལདྡྷཧེཏུཔཙྩཡཱ ཧི དྷམྨཱ ཝིརུལ༹ྷམཱུལཱ ཝིཡ པཱདཔཱ ཐིརཱ ཧོནྟི, ན ཨཧེཏུཀཱ ཝིཡ ཛལཏལེ སེཝཱལསདིསཱ. ཨེཝཉྩ ཀཏྭཱ ཨེཏེ མཱུལསདིསཏཱཡ ‘‘མཱུལཱནཱི’’ཏི ཙ ཝུཙྩནྟི. ཨཔརེ པན ‘‘ཀུསལཱདཱིནཾ ཀུསལཱདིབྷཱཝསཱདྷནཾ ཧེཏུབྷཱཝོ’’ཏི ཝདནྟི, ཨེཝཾ སཏི ཧེཏཱུནཾ ཨཏྟནོ ཀུསལཱདིབྷཱཝསཱདྷནོ ཨཉྙོ ཧེཏུ མགྒིཏབྦོ སིཡཱ. ཨཐ སེསསམྤཡུཏྟཧེཏུཔཊིབདྡྷོ ཏེསཾ ཀུསལཱདིབྷཱཝོ, ཨེཝམྤི མོམཱུཧཙིཏྟསམྤཡུཏྟསྶ ཧེཏུནོ ཨཀུསལབྷཱཝོ ཨཔྤཊིབདྡྷོ སིཡཱ. ཨཐ ཏསྶ སབྷཱཝཏོ ཨཀུསལབྷཱཝོཔི སིཡཱ, ཨེཝཾ སཏི སེསཧེཏཱུནམྤི སབྷཱཝཏོཝ ཀུསལཱདིབྷཱཝོཏི ཏེསཾ ཝིཡ སམྤཡུཏྟདྷམྨཱནམྤི སོ ཧེཏུཔཊིབདྡྷོ ན སིཡཱ. ཡདི ཙ ཧེཏུཔཊིབདྡྷོ ཀུསལཱདིབྷཱཝོ, ཏདཱ ཨཧེཏུཀཱནཾ ཨབྱཱཀཏབྷཱཝོ ན སིཡཱཏི ཨལམཏིནིཔྤཱིལ༹ནེན. ཀུསལཱདིབྷཱཝོ པན ཀུསལཱཀུསལཱནཾ ཡོནིསོཨཡོནིསོམནསིཀཱརཔྤཊིབདྡྷོ. ཡཐཱཧ – ‘‘ཡོནིསོ, བྷིཀྑཝེ, མནསིཀརོཏོ ཨནུཔྤནྣཱ ¶ ཙེཝ ཀུསལཱ དྷམྨཱ ཨུཔྤཛྫནྟི, ཨུཔྤནྣཱ ཙ ཀུསལཱ དྷམྨཱ ཨབྷིཝཌྜྷནྟཱི’’ཏྱཱདི (ཨ. ནི. ༡.༦༧), ཨབྱཱཀཏཱནཾ པན ཨབྱཱཀཏབྷཱཝོ ནིརནུསཡསནྟཱནཔྤཊིབདྡྷོ ཀམྨཔྤཊིབདྡྷོ ཨཝིཔཱཀབྷཱཝཔྤཊིབདྡྷོ ཙཱཏི དཊྛབྦཾ.

༡༦. ཨིདཱནི ཧེཏཱུནཾ ཛཱཏིབྷེདཾ དསྶེཏུཾ ‘‘ལོབྷོ དོསོ ཙཱ’’ཏྱཱདི ཝུཏྟཾ.

ཧེཏུསངྒཧཝཎྞནཱ ནིཊྛིཏཱ.

ཀིཙྩསངྒཧཝཎྞནཱ

༡༨. པཊིསནྡྷཱདཱིནཾ ཀིཙྩཱནཾ ཝིབྷཱགཝསེན, ཏཾཀིཙྩཝནྟཱནཉྩ པརིཙྪེདཝསེན སངྒཧོ ཀིཙྩསངྒཧོ. བྷཝཏོ བྷཝསྶ པཊིསནྡྷཱནཾ པཊིསནྡྷིཀིཙྩཾ. ཨཝིཙྪེདཔྤཝཏྟིཧེཏུབྷཱཝེན བྷཝསྶ ཨངྒབྷཱཝོ བྷཝངྒཀིཙྩཾ. ཨཱཝཛྫནཀིཙྩཱདཱིནི ཧེཊྛཱ ཝུཏྟཝཙནཏྠཱནུསཱརེན ཡཐཱརཧཾ ཡོཛེཏབྦཱནི. ཨཱརམྨཎེ ¶ ཏཾཏཾཀིཙྩསཱདྷནཝསེན ཨནེཀཀྑཏྟུཾ, ཨེཀཀྑཏྟུཾ ཝཱ ཛཝམཱནསྶ ཝིཡ པཝཏྟི ཛཝནཀིཙྩཾ. ཏཾཏཾཛཝནགྒཧིཏཱརམྨཎསྶ ཨཱརམྨཎཀརཎཾ ཏདཱརམྨཎཀིཙྩཾ. ནིབྦཏྟབྷཝཏོ པརིགལ༹ྷནཾ ཙུཏིཀིཙྩཾ.

༡༩. ཨིམཱནི པན ཀིཙྩཱནི ཋཱནཝསེན པཱཀཊཱནི ཧོནྟཱིཏི ཏཾ དཱནི པབྷེདཏོ དསྶེཏུཾ ‘‘པཊིསནྡྷཱི’’ཏྱཱདི ཝུཏྟཾ, ཏཏྠ པཊིསནྡྷིཡཱ ཋཱནཾ པཊིསནྡྷིཋཱནཾ. ཀཱམཾ པཊིསནྡྷིཝིནིམུཏྟཾ ཋཱནཾ ནཱམ ནཏྠི, སུཁགྒཧཎཏྠཾ པན ‘‘སིལཱཔུཏྟཀསྶ སརཱིར’’ནྟྱཱདཱིསུ ཝིཡ ཨབྷེདེཔི བྷེདཔརིཀཔྤནཱཏི དཊྛབྦཾ. ཨེཝཾ སེསེསུཔི. དསྶནཱདཱིནཾ པཉྩནྣཾ ཝིཉྙཱཎཱནཾ ཋཱནཾ པཉྩཝིཉྙཱཎཋཱནཾ. ཨཱདི-སདྡེན སམྤཊིཙྪནཋཱནཱདཱིནཾ སངྒཧོ.

ཏཏྠ ¶ ཙུཏིབྷཝངྒཱནཾ ཨནྟརཱ པཊིསནྡྷིཋཱནཾ. པཊིསནྡྷིཨཱཝཛྫནཱནཾ, ཛཝནཱཝཛྫནཱནཾ, ཏདཱརམྨཎཱཝཛྫནཱནཾ, ཝོཊྛབྦནཱཝཛྫནཱནཾ, ཀདཱཙི ཛཝནཙུཏཱིནཾ, ཏདཱརམྨཎཙུཏཱིནཉྩ ཨནྟརཱ བྷཝངྒཋཱནཾ. བྷཝངྒཔཉྩཝིཉྙཱཎཱནཾ, བྷཝངྒཛཝནཱནཉྩ ཨནྟརཱ ཨཱཝཛྫནཋཱནཾ. པཉྩདྭཱརཱཝཛྫནསམྤཊིཙྪནཱནམནྟརཱ པཉྩཝིཉྙཱཎཋཱནཾ. པཉྩཝིཉྙཱཎསནྟཱིརཎཱནམནྟརཱ སམྤཊིཙྪནཋཱནཾ. སམྤཊིཙྪནཝོཊྛབྦནཱནམནྟརཱ སནྟཱིརཎཋཱནཾ. སནྟཱིརཎཛཝནཱནཾ, སནྟཱིརཎབྷཝངྒཱནཉྩ ཨནྟརཱ ཝོཊྛབྦནཋཱནཾ. ཝོཊྛབྦནཏདཱརམྨཎཱནཾ, ཝོཊྛབྦནབྷཝངྒཱནཾ, ཝོཊྛབྦནཙུཏཱིནཾ, མནོདྭཱརཱཝཛྫནཏདཱརམྨཎཱནཾ, མནོདྭཱརཱཝཛྫནབྷཝངྒཱནཾ, མནོདྭཱརཱཝཛྫནཙུཏཱིནཉྩ ཨནྟརཱ ཛཝནཋཱནཾ. ཛཝནབྷཝངྒཱནཾ, ཛཝནཙུཏཱིནཉྩ ཨནྟརཱ ཏདཱརམྨཎཋཱནཾ. ཛཝནཔཊིསནྡྷཱིནཾ, ཏདཱརམྨཎཔཊིསནྡྷཱིནཾ, བྷཝངྒཔཊིསནྡྷཱིནཾ ཝཱ ཨནྟརཱ ཙུཏིཋཱནཾ ནཱམ.

༢༠. དྭེ ཨུཔེཀྑཱསཧགཏསནྟཱིརཎཱནི སུཁསནྟཱིརཎསྶ པཊིསནྡྷིཝསཔྤཝཏྟིབྷཱཝཱབྷཱཝཏོཏིཨདྷིཔྤཱཡོ. ཨེཝཉྩ ཀཏྭཱ པཊྛཱནེ ‘‘ཨུཔེཀྑཱསཧགཏཾ དྷམྨཾ པཊིཙྩ ཨུཔེཀྑཱསཧགཏོ དྷམྨོ ཨུཔྤཛྫཏི ན ཧེཏུཔཙྩཡཱ’’ཏི (པཊྛཱ. ༤.༡༣.༡༧༩) ཨེཝམཱགཏསྶ ཨུཔེཀྑཱསཧགཏཔདསྶ ཝིབྷངྒེ ‘‘ཨཧེཏུཀཾ ཨུཔེཀྑཱསཧགཏཾ ཨེཀཾ ཁནྡྷཾ པཊིཙྩ དྭེ ཁནྡྷཱ, དྭེ ཁནྡྷེ པཊིཙྩ ཨེཀོ ཁནྡྷོ, ཨཧེཏུཀཔཊིསནྡྷིཀྑཎེ ཨུཔེཀྑཱསཧགཏཾ ཨེཀཾ ཁནྡྷཾ པཊིཙྩ དྭེ ཁནྡྷཱ, དྭེ ཁནྡྷེ པཊིཙྩ ཨེཀོ ཁནྡྷོ’’ཏི (པཊྛཱ. ༤.༡༣.༡༧༩) ཨེཝཾ པཝཏྟིཔཊིསནྡྷིཝསེན པཊིཙྩནཡོ ཨུདྡྷཊོ, པཱིཏིསཧགཏསུཁསཧགཏཔདཝིབྷངྒེ པན ‘‘ཨཧེཏུཀཾ པཱིཏིསཧགཏཾ ཨེཀཾ ཁནྡྷཾ པཊིཙྩཏཡོ ཁནྡྷཱ…པེ… དྭེ ཁནྡྷཱ. ཨཧེཏུཀཾ སུཁསཧགཏཾ ཨེཀཾ ཁནྡྷཾ པཊིཙྩ དྭེ ཁནྡྷཱ ¶ …པེ… ཨེཀོ ཁནྡྷོ’’ཏི (པཊྛཱ. ༤.༡༣.༡༤༤, ༡༦༧) པཝཏྟིཝསེནེཝ ཨུདྡྷཊོ, ན པན ‘‘ཨཧེཏུཀཔཊིསནྡྷིཀྑཎེ’’ཏྱཱདིནཱ པཊིསནྡྷིཝསེན, ཏསྨཱ ཡཐཱདྷམྨསཱསནེ ཨཝཙནམྤི ཨབྷཱཝམེཝ དཱིཔེཏཱིཏི ན ཏསྶ པཊིསནྡྷིཝསེན པཝཏྟི ¶ ཨཏྠི. ཡཏྠ པན ལབྦྷམཱནསྶཔི ཀསྶཙི ཨཝཙནཾ, ཏཏྠ ཀཱརཎཾ ཨུཔརི ཨཱཝི བྷཝིསྶཏི.

༢༥. མནོདྭཱརཱཝཛྫནསྶ པརིཏྟཱརམྨཎེ དྭཏྟིཀྑཏྟུཾ པཝཏྟམཱནསྶཔི ནཏྠི ཛཝནཀིཙྩཾ ཏསྶ ཨཱརམྨཎརསཱནུབྷཝནཱབྷཱཝཏོཏི ཝུཏྟཾ ‘‘ཨཱཝཛྫནདྭཡཝཛྫིཏཱནཱི’’ཏི. ཨེཝཉྩ ཀཏྭཱ ཝུཏྟཾ ཨཊྛཀཐཱཡཾ ‘‘ཛཝནཊྛཱནེ ཋཏྭཱ’’ཏི (དྷ. ས. ཨཊྛ. ༤༩༨ ཝིཔཱཀུདྡྷཱརཀཐཱ). ཨིཏརཐཱ ‘‘ཛཝནཾ ཧུཏྭཱ’’ཏི ཝཏྟབྦཾ སིཡཱཏི. ཀུསལཱཀུསལཕལཀིརིཡཙིཏྟཱནཱིཏི ཨེཀཝཱིསཏི ལོཀིཡལོཀུཏྟརཀུསལཱནི, དྭཱདས ཨཀུསལཱནི, ཙཏྟཱརི ལོཀུཏྟརཕལཙིཏྟཱནི, ཨཊྛཱརས ཏེབྷཱུམཀཀིརིཡཙིཏྟཱནི. ཨེཀཙིཏྟཀྑཎིཀམྤི ཧི ལོཀུཏྟརམགྒཱདིཀཾ ཏཾསབྷཱཝཝནྟཏཱཡ ཛཝནཀིཙྩཾ ནཱམ, ཡཐཱ ཨེཀེཀགོཙརཝིསཡམྤི སབྦཉྙུཏཉྙཱཎཾ སཀལཝིསཡཱཝབོདྷནསཱམཏྠིཡཡོགཏོ ན ཀདཱཙི ཏཾནཱམཾ ཝིཛཧཏཱིཏི.

༢༧. ཨེཝཾ ཀིཙྩབྷེདེན ཝུཏྟཱནེཝ ཡཐཱསཀཾ ལབྦྷམཱནཀིཙྩགཎནཝསེན སམྤིཎྜེཏྭཱ དསྶེཏུཾ ‘‘ཏེསུ པནཱ’’ཏྱཱདི ཝུཏྟཾ.

༣༣. པཊིསནྡྷཱདཡོ ཙིཏྟུཔྤཱདཱ ནཱམཀིཙྩབྷེདེན པཊིསནྡྷཱདཱིནཾ ནཱམཱནཾ, ཀིཙྩཱནཉྩ བྷེདེན, ཨཐ ཝཱ པཊིསནྡྷཱདཡོ ནཱམ ཏནྣཱམཀཱ ཙིཏྟུཔྤཱདཱ པཊིསནྡྷཱདཱིནཾ ཀིཙྩཱནཾ བྷེདེན ཙུདྡས, ཋཱནབྷེདེན པཊིསནྡྷཱདཱིནཾཡེཝ ཋཱནཱནཾ བྷེདེན དསདྷཱ པཀཱསིཏཱཏི ཡོཛནཱ. ཨེཀཀིཙྩཋཱནདྭིཀིཙྩཋཱནཏིཀིཙྩཋཱནཙཏུཀིཙྩཋཱནཔཉྩཀིཙྩཋཱནཱནི ཙིཏྟཱནི ཡཐཱཀྐམཾ ཨཊྛསཊྛི, ཏཐཱ དྭེ ཙ ནཝ ཙ ཨཊྛ ཙ དྭེ ཙཱཏི ནིདྡིསེཏི སམྦནྡྷོ.

ཀིཙྩསངྒཧཝཎྞནཱ ནིཊྛིཏཱ.

དྭཱརསངྒཧཝཎྞནཱ

༣༥. དྭཱརཱནཾ ¶ ¶ , དྭཱརཔྤཝཏྟཙིཏྟཱནཉྩ པརིཙྪེདཝསེན སངྒཧོ དྭཱརསངྒཧོ. ཨཱཝཛྫནཱདཱིནཾ ཨརཱུཔདྷམྨཱནཾ པཝཏྟིམུཁབྷཱཝཏོ དྭཱརཱནི ཝིཡཱཏི དྭཱརཱནི.

༣༦. ཙཀྑུམེཝཱཏི པསཱདཙཀྑུམེཝ.

༣༧. ཨཱཝཛྫནཱདཱིནཾ མནཱནཾ, མནོཡེཝ ཝཱ དྭཱརནྟི མནོདྭཱརཾ. བྷཝངྒནྟི ཨཱཝཛྫནཱནནྟརཾ བྷཝངྒཾ. ཏེནཱཧུ པོརཱཎཱ –

‘‘སཱཝཛྫནཾ བྷཝངྒནྟུ, མནོདྭཱརནྟི ཝུཙྩཏཱི’’ཏི;

༣༩. ཏཏྠཱཏི ཏེསུ ཙཀྑཱདིདྭཱརེསུ ཙཀྑུདྭཱརེ ཚཙཏྟཱལཱིས ཙིཏྟཱནི ཡཐཱརཧམུཔྤཛྫནྟཱིཏི སམྦནྡྷོ. པཉྩདྭཱརཱཝཛྫནམེཀཾ, ཙཀྑུཝིཉྙཱཎཱདཱིནི ཨུབྷཡཝིཔཱཀཝསེན སཏྟ, ཝོཊྛབྦནམེཀཾ, ཀཱམཱཝཙརཛཝནཱནི ཙ ཀུསལཱཀུསལནིརཱཝཛྫནཀིརིཡཝསེན ཨེཀཱུནཏིཾས, ཏདཱརམྨཎཱནི ཙ ཨགྒཧིཏགྒཧཎེན ཨཊྛེཝཱཏི ཚཙཏྟཱལཱིས. ཡཐཱརཧནྟི ཨིཊྛཱདིཨཱརམྨཎེ ཡོནིསོཨཡོནིསོམནསིཀཱརནིརནུསཡསནྟཱནཱདཱིནཾ ཨནུརཱུཔཝསེན. སབྦཐཱཔཱིཏི ཨཱཝཛྫནཱདིཏདཱརམྨཎཔརིཡོསཱནེན སབྦེནཔི པཀཱརེན ཀཱམཱཝཙརཱནེཝཱཏི ཡོཛནཱ. སབྦཐཱཔི ཙཏུཔཉྙཱས ཙིཏྟཱནཱིཏི ཝཱ སམྦནྡྷོ. སབྦཐཱཔི ཏཾཏཾདྭཱརིཀཝསེན ཋིཏཱནི ཨགྒཧིཏགྒཧཎེན ཙཀྑུདྭཱརིཀེསུ ཚཙཏྟཱལཱིསཙིཏྟེསུ སོཏཝིཉྙཱཎཱདཱིནཾ ཙཏུནྣཾ ཡུགལཱ༹ནཾ པཀྑེཔེན ཙཏུཔཉྙཱསཔཱིཏྱཏྠོ.

༤༡. ཙཀྑཱདིདྭཱརེསུ ཨཔྤཝཏྟནཏོ, མནོདྭཱརསངྑཱཏབྷཝངྒཏོ ཨཱརམྨཎནྟརགྒཧཎཝསེན ཨཔྤཝཏྟིཏོ ཙ པཊིསནྡྷཱདིཝསེན པཝཏྟཱནི ཨེཀཱུནཝཱིསཏི དྭཱརཝིམུཏྟཱནི.

༤༢. དྭིཔཉྩཝིཉྙཱཎཱནི ¶ སཀསཀདྭཱརེ, ཚབྦཱིསཏི མཧགྒཏལོཀུཏྟརཛཝནཱནི མནོདྭཱརེཡེཝ ཨུཔྤཛྫནཏོ ཚཏྟིཾས ཙིཏྟཱནི ཡཐཱརཧཾ སཀསཀདྭཱརཱནུརཱུཔཾ ཨེཀདྭཱརིཀཙིཏྟཱནི.

༤༥. པཉྩདྭཱརེསུ ¶ སནྟཱིརཎཏདཱརམྨཎཝསེན, མནོདྭཱརེ ཙ ཏདཱརམྨཎཝསེན པཝཏྟནཏོ ཚདྭཱརིཀཱནི ཙེཝ པཊིསནྡྷཱདིཝསཔྤཝཏྟིཡཱ དྭཱརཝིམུཏྟཱནི ཙ.

༤༧. པཉྩདྭཱརིཀཱནི ཙ ཚདྭཱརིཀཱནི ཙ པཉྩཚདྭཱརིཀཱནི. ཚདྭཱརིཀཱནི ཙ ཏཱནི ཀདཱཙི དྭཱརཝིམུཏྟཱནི ཙཱཏི ཚདྭཱརིཀཝིམུཏྟཱནི. ཨཐ ཝཱ ཚདྭཱརིཀཱནི ཙ ཚདྭཱརིཀཝིམུཏྟཱནི ཙཱཏི ཚདྭཱརིཀཝིམུཏྟཱནཱིཏི ཨེཀདེསསརཱུཔེཀསེསོ དཊྛབྦོ.

དྭཱརསངྒཧཝཎྞནཱ ནིཊྛིཏཱ.

ཨཱལམྦཎསངྒཧཝཎྞནཱ

༤༨. ཨཱརམྨཎཱནཾ སརཱུཔཏོ, ཝིབྷཱགཏོ, ཏཾཝིསཡཙིཏྟཏོ ཙ སངྒཧོ ཨཱལམྦཎསངྒཧོ. ཝཎྞཝིཀཱརཾ ཨཱཔཛྫམཱནཾ རཱུཔཡཏི ཧདཡངྒཏབྷཱཝཾ པཀཱསེཏཱིཏི རཱུཔཾ, ཏདེཝ དུབྦལཔུརིསེན དཎྜཱདི ཝིཡ ཙིཏྟཙེཏསིཀེཧི ཨཱལམྦཱིཡཏི, ཏཱནི ཝཱ ཨཱགནྟྭཱ ཨེཏྠ རམནྟཱིཏི ཨཱརམྨཎནྟི རཱུཔཱརམྨཎཾ. སདྡཱིཡཏཱིཏི སདྡོ, སོཡེཝ ཨཱརམྨཎནྟི སདྡཱརམྨཎཾ. གནྡྷཡཏི ཨཏྟནོ ཝཏྠུཾ སཱུཙེཏི ‘‘ཨིདམེཏྠ ཨཏྠཱི’’ཏི པེསུཉྙཾ ཀརོནྟཾ ཝིཡ ཧོཏཱིཏི གནྡྷོ, སོཡེཝ ཨཱརམྨཎཾ གནྡྷཱརམྨཎཾ. རསནྟི ཏཾ སཏྟཱ ཨསྶཱདེནྟཱིཏི རསོ, སོཡེཝ ཨཱརམྨཎཾ རསཱརམྨཎཾ. ཕུསཱིཡཏཱིཏི ཕོཊྛབྦཾ, ཏདེཝ ཨཱརམྨཎཾ ཕོཊྛབྦཱརམྨཎཾ. དྷམྨོཡེཝ ཨཱརམྨཎཾ དྷམྨཱརམྨཎཾ.

༤༩. ཏཏྠཱཏི ¶ ཏེསུ རཱུཔཱདིཨཱརམྨཎེསུ, རཱུཔམེཝཱཏི ཝཎྞཱཡཏནསངྑཱཏཾ རཱུཔམེཝ. སདྡཱདཡོཏི སདྡཱཡཏནཱདིསངྑཱཏཱ སདྡཱདཡོ, ཨཱཔོདྷཱཏུཝཛྫིཏབྷཱུཏཏྟཡསངྑཱཏཾ ཕོཊྛབྦཱཡཏནཉྩ.

༥༠. པཉྩཱརམྨཎཔསཱདཱནི ཋཔེཏྭཱ སེསཱནི སོལ༹ས སུཁུམརཱུཔཱནི.

༥༡. པཙྩུཔྤནྣནྟི ཝཏྟམཱནཾ.

༥༢. ཚབྦིདྷམྤཱིཏི ¶ རཱུཔཱདིཝསེན ཚབྦིདྷམྤི. ཝིནཱསཱབྷཱཝཏོ ཨཏཱིཏཱདིཀཱལཝསེན ནཝཏྟབྦཏྟཱ ནིབྦཱནཾ, པཉྙཏྟི ཙ ཀཱལཝིམུཏྟཾ ནཱམ. ཡཐཱརཧནྟི ཀཱམཱཝཙརཛཝནཨབྷིཉྙཱསེསམཧགྒཏཱདིཛཝནཱནཾ ཨནུརཱུཔཏོ. ཀཱམཱཝཙརཛཝནཱནཉྷི ཧསིཏུཔྤཱདཝཛྫཱནཾ ཚབྦིདྷམྤི ཏིཀཱལིཀཾ, ཀཱལཝིམུཏྟཉྩ ཨཱརམྨཎཾ ཧོཏི. ཧསིཏུཔྤཱདསྶ ཏིཀཱལིཀམེཝ. ཏཐཱ ཧིསྶ ཨེཀནྟཔརིཏྟཱརམྨཎཏཾ ཝཀྑཏི. དིབྦཙཀྑཱདིཝསཔྤཝཏྟསྶ པན ཨབྷིཉྙཱཛཝནསྶ ཡཐཱརཧཾ ཚབྦིདྷམྤི ཏིཀཱལིཀཾ, ཀཱལཝིམུཏྟཉྩ ཨཱརམྨཎཾ ཧོཏི. ཝིབྷཱགོ པནེཏྠ ནཝམཔརིཙྪེདེ ཨཱཝི བྷཝིསྶཏི. སེསཱནཾ པན ཀཱལཝིམུཏྟཾ, ཨཏཱིཏཉྩ ཡཐཱརཧམཱརམྨཎཾ ཧོཏི.

༥༣. དྭཱར…པེ… སངྑཱཏཱནཾ ཚབྦིདྷམྤི ཨཱརམྨཎཾ ཧོཏཱིཏི སམྦནྡྷོ, ཏཾ པན ནེསཾ ཨཱརམྨཎཾ ན ཨཱཝཛྫནསྶ ཝིཡ ཀེནཙི ཨགྒཧིཏམེཝ གོཙརབྷཱཝཾ གཙྪཏི, ན ཙ པཉྩདྭཱརིཀཛཝནཱནཾ ཝིཡ ཨེཀནྟཔཙྩུཔྤནྣཾ, ནཱཔི མནོདྭཱརིཀཛཝནཱནཾ ཝིཡ ཏིཀཱལིཀམེཝ, ཨཝིསེསེན ཀཱལཝིམུཏྟཾ ཝཱ, ནཱཔི མརཎཱསནྣཏོ པུརིམབྷཱགཛཝནཱནཾ ཝིཡ ཀམྨཀམྨནིམིཏྟཱདིཝསེན ཨཱགམསིདྡྷིཝོཧཱརཝིནིམུཏྟནྟི ཨཱཧ ‘‘ཡཐཱསམྦྷཝཾ…པེ… སམྨཏ’’ནྟི. ཏཏྠ ཡཐཱསམྦྷཝནྟི ཏཾཏཾབྷཱུམིཀཔཊིསནྡྷིབྷཝངྒཙུཏཱིནཾ ཏཾཏཾདྭཱརགྒཧིཏཱདིཝསེན སམྦྷཝཱནུརཱུཔཏོ. ཀཱམཱཝཙརཱནཉྷི ¶ པཊིསནྡྷིབྷཝངྒཱནཾ ཏཱཝ རཱུཔཱདིཔཉྩཱརམྨཎཾ ཚདྭཱརགྒཧིཏཾ ཡཐཱརཧཾ པཙྩུཔྤནྣམཏཱིཏཉྩ ཀམྨནིམིཏྟསམྨཏམཱརམྨཎཾ ཧོཏི, ཏཐཱ ཙུཏིཙིཏྟསྶ ཨཏཱིཏམེཝ. དྷམྨཱརམྨཎཾ པན ཏེསཾ ཏིཎྞནྣམྤི མནོདྭཱརགྒཧིཏམེཝ ཨཏཱིཏཾ ཀམྨཀམྨནིམིཏྟསམྨཏཾ, ཏཐཱ རཱུཔཱརམྨཎཾ ཨེཀམེཝ མནོདྭཱརགྒཧིཏཾ ཨེཀནྟཔཙྩུཔྤནྣཾ གཏིནིམིཏྟསམྨཏནྟི ཨེཝཾ ཀཱམཱཝཙརཔཊིསནྡྷཱདཱིནཾ ཡཐཱསམྦྷཝཾ ཚདྭཱརགྒཧིཏཾ པཙྩུཔྤནྣམཏཱིཏཉྩ ཀམྨཀམྨནིམིཏྟགཏིནིམིཏྟསམྨཏམཱརམྨཎཾ ཧོཏི.

མཧགྒཏཔཊིསནྡྷཱདཱིསུ པན རཱུཔཱཝཙརཱནཾ, པཋམཏཏིཡཱརུཔྤཱནཉྩ དྷམྨཱརམྨཎམེཝ མནོདྭཱརགྒཧིཏཾ པཉྙཏྟིབྷཱུཏཾ ཀམྨནིམིཏྟསམྨཏཾ, ཏཐཱ དུཏིཡཙཏུཏྠཱརུཔྤཱནཾ ཨཏཱིཏམེཝཱཏི ཨེཝཾ མཧགྒཏཔཊིསནྡྷིབྷཝངྒཙུཏཱིནཾ མནོདྭཱརགྒཧིཏཾ པཉྙཏྟིབྷཱུཏཾ, ཨཏཱིཏཾ ཝཱ ཀམྨནིམིཏྟསམྨཏམེཝ ཨཱརམྨཎཾ ཧོཏི.

ཡེབྷུཡྻེན བྷཝནྟརེ ཚདྭཱརགྒཧིཏནྟི བཱཧུལླེན ཨཏཱིཏཱནནྟརབྷཝེ མརཎཱསནྣཔྤཝཏྟཚདྭཱརིཀཛཝནེཧི གཧིཏཾ. ཨསཉྙཱིབྷཝཏོ ཙུཏཱནཉྷི པཊིསནྡྷིཝིསཡསྶ ཨནནྟརཱཏཱིཏབྷཝེ ¶ ན ཀེནཙི དྭཱརེན གཧཎཾ ཨཏྠཱིཏི ཏདེཝེཏྠ ཡེབྷུཡྻགྒཧཎེན བྱབྷིཙཱརིཏཾ. ཀེཝལཉྷི ཀམྨབལེནེཝ ཏེསཾ པཊིསནྡྷིཡཱ ཀམྨནིམིཏྟཱདིཀམཱརམྨཎཾ ཨུཔཊྛཱཏི. ཏཐཱ ཧི སཙྩསངྑེཔེ ཨསཉྙཱིབྷཝཏོ ཙུཏསྶ པཊིསནྡྷིནིམིཏྟཾ པུཙྪིཏྭཱ –

‘‘བྷཝནྟརཀཏཾ ཀམྨཾ, ཡམོཀཱསཾ ལབྷེ ཏཏོ;

ཧོཏི སཱ སནྡྷི ཏེནེཝ, ཨུཔཊྛཱཔིཏགོཙརེ’’ཏི. (ས. ས. ༡༧༡) –

ཀེཝལཾ ཀམྨབལེནེཝ པཊིསནྡྷིགོཙརསྶ ཨུཔཊྛཱནཾ ཝུཏྟཾ. ཨིཏརཐཱ ཧི ཛཝནགྒཧིཏསྶཔི ཨཱརམྨཎསྶ ཀམྨབལེནེཝ ཨུཔཊྛཱཔིཡམཱནཏྟཱ ‘‘ཏེནེཝཱ’’ཏི སཱཝདྷཱརཎཝཙནསྶ ཨདྷིཔྤཱཡསུཉྙཏཱ ¶ ཨཱཔཛྫེཡྻཱཏི. ནནུ ཙ ཏེསམྤི པཊིསནྡྷིགོཙརོ ཀམྨབྷཝེ ཀེནཙི དྭཱརེན ཛཝནགྒཧིཏོ སམྦྷཝཏཱིཏི? སཙྩཾ སམྦྷཝཏི ཀམྨཀམྨནིམིཏྟསམྨཏོ, གཏིནིམིཏྟསམྨཏོ པན སབྦེསམྤི མརཎཀཱལེཡེཝ ཨུཔཊྛཱཏཱིཏི ཀུཏོ ཏསྶ ཀམྨབྷཝེ གཧཎསམྦྷཝོ. ཨཔིཙེཏྠ མརཎཱསནྣཔཝཏྟཛཝནེཧི གཧིཏམེཝ སནྡྷཱཡ ‘‘ཚདྭཱརགྒཧིཏ’’ནྟི ཝུཏྟཾ, ཨེཝཉྩ ཀཏྭཱ ཨཱཙརིཡེན ཨིམསྨིཾཡེཝ ཨདྷིཀཱརེ པརམཏྠཝིནིཙྪཡེ ཝུཏྟཾ –

‘‘མརཎཱསནྣསཏྟསྶ, ཡཐོཔཊྛིཏགོཙརཾ;

ཚདྭཱརེསུ ཏམཱརབྦྷ, པཊིསནྡྷི བྷཝནྟརེ’’ཏི. (པརམ. ཝི. ༨༩);

‘‘པཙྩུཔྤནྣ’’ནྟྱཱདིནཱ ཨནཱགཏསྶ པཊིསནྡྷིགོཙརབྷཱཝཾ ནིཝཱརེཏི. ན ཧི ཏཾ ཨཏཱིཏཀམྨཀམྨནིམིཏྟཱནི ཝིཡ ཨནུབྷཱུཏཾ, ནཱཔི པཙྩུཔྤནྣཀམྨནིམིཏྟགཏིནིམིཏྟཱནི ཝིཡ ཨཱཔཱཐགཏཉྩ ཧོཏཱིཏི, ཀམྨཀམྨནིམིཏྟཱདཱིནཉྩ སརཱུཔཾ སཡམེཝ ཝཀྑཏི.

༥༤. ཏེསཱུཏི རཱུཔཱདིཔཙྩུཔྤནྣཱདིཀམྨཱདིཨཱརམྨཎེསུ ཝིཉྙཱཎེསུ. རཱུཔཱདཱིསུ ཨེཀེཀཾ ཨཱརམྨཎཾ ཨེཏེསནྟི རཱུཔཱདིཨེཀེཀཱརམྨཎཱནི.

༥༥. རཱུཔཱདིཀཾ པཉྩཝིདྷམྤི ཨཱརམྨཎམེཏསྶཱཏི རཱུཔཱདིཔཉྩཱརམྨཎཾ.

༥༦. སེསཱནཱིཏི དྭིཔཉྩཝིཉྙཱཎསམྤཊིཙྪནེཧི ཨཝསེསཱནི ཨེཀཱདས ཀཱམཱཝཙརཝིཔཱཀཱནི ¶ . སབྦཐཱཔི ཀཱམཱཝཙརཱརམྨཎཱནཱིཏི སབྦེནཔི ཚདྭཱརིཀདྭཱརཝིམུཏྟཚལཱ༹རམྨཎཝསཔྤཝཏྟཱཀཱརེན ནིབྦཏྟཱནིཔི ཨེཀནྟཀཱམཱཝཙརསབྷཱཝཚལཱ༹རམྨཎགོཙརཱནི. ཨེཏྠ ཧི ཝིཔཱཀཱནི ཏཱཝ སནྟཱིརཎཱདིཝསེན རཱུཔཱདིཔཉྩཱརམྨཎེ, པཊིསནྡྷཱདིཝསེན ཚལཱ༹རམྨཎསངྑཱཏེ ཀཱམཱཝཙརཱརམྨཎེཡེཝ པཝཏྟནྟི.

ཧསནཙིཏྟམྤི ¶ པདྷཱནསཱརུཔྤཊྛཱནཾ དིསྭཱ ཏུསྶནྟསྶ རཱུཔཱརམྨཎེ, བྷཎྜབྷཱཛནཊྛཱནེ མཧཱསདྡཾ སུཏྭཱ ‘‘ཨེཝརཱུཔཱ ལོལུཔྤཏཎྷཱ མེ པཧཱིནཱ’’ཏི ཏུསྶནྟསྶ སདྡཱརམྨཎེ, གནྡྷཱདཱིཧི ཙེཏིཡཔཱུཛནཀཱལེ ཏུསྶནྟསྶ གནྡྷཱརམྨཎེ, རསསམྤནྣཾ པིཎྜཔཱཏཾ སབྲཧྨཙཱརཱིཧི བྷཱཛེཏྭཱ པརིབྷུཉྫནཀཱལེ ཏུསྶནྟསྶ རསཱརམྨཎེ, ཨཱབྷིསམཱཙཱརིཀཝཏྟཔརིཔཱུརཎཀཱལེ ཏུསྶནྟསྶ ཕོཊྛབྦཱརམྨཎེ, པུབྦེནིཝཱསཉཱཎཱདཱིཧི གཧིཏཀཱམཱཝཙརདྷམྨཾ ཨཱརབྦྷ ཏུསྶནྟསྶ དྷམྨཱརམྨཎེཏི ཨེཝཾ པརིཏྟདྷམྨཔརིཡཱཔནྣེསྭེཝ ཚསུ ཨཱརམྨཎེསུ པཝཏྟཏི.

༥༧. དྭཱདསཱཀུསལཨཊྛཉཱཎཝིཔྤཡུཏྟཛཝནཝསེན ཝཱིསཏི ཙིཏྟཱནི ཨཏྟནོ ཛལ༹བྷཱཝཏོ ལོཀུཏྟརདྷམྨེ ཨཱརབྦྷ པཝཏྟིཏུཾ ན སཀྐོནྟཱིཏི ནཝཝིདྷལོཀུཏྟརདྷམྨེ ཝཛྫེཏྭཱ ཏེབྷཱུམཀཱནི, པཉྙཏྟིཉྩ ཨཱརབྦྷ པཝཏྟནྟཱིཏི ཨཱཧ ‘‘ཨཀུསལཱནི ཙེཝཱ’’ཏྱཱདི. ཨིམེསུ ཧི ཨཀུསལཏོ ཙཏྟཱརོ དིཊྛིགཏསམྤཡུཏྟཙིཏྟུཔྤཱདཱ པརིཏྟདྷམྨེ ཨཱརབྦྷ པརཱམསནཨསྶཱདནཱབྷིནནྡནཀཱལེ ཀཱམཱཝཙརཱརམྨཎཱ, ཏེནེཝཱཀཱརེན སཏྟཝཱིསཏི མཧགྒཏདྷམྨེ ཨཱརབྦྷ པཝཏྟིཡཾ མཧགྒཏཱརམྨཎཱ, སམྨུཏིདྷམྨེ ཨཱརབྦྷ པཝཏྟིཡཾ པཉྙཏྟཱརམྨཎཱ. དིཊྛིཝིཔྤཡུཏྟཙིཏྟུཔྤཱདཱཔི ཏེཡེཝ དྷམྨེ ཨཱརབྦྷ ཀེཝལཾ ཨསྶཱདནཱབྷིནནྡནཝསེན པཝཏྟིཡཾ, པཊིགྷསམྤཡུཏྟཱ ཙ དུསྶནཝིཔྤཊིསཱརཝསེན, ཝིཙིཀིཙྪཱསཧགཏོ ཨནིཊྛངྒམནཝསེན, ཨུདྡྷཙྩསཧགཏོ ཝིཀྑིཔནཝསེན, ཨཝཱུཔསམཝསེན ཙ པཝཏྟིཡཾ པརིཏྟམཧགྒཏཔཉྙཏྟཱརམྨཎོ, ཀུསལཏོ ཙཏྟཱརོ, ཀིརིཡཏོ ཙཏྟཱརོཏི ཨཊྛ ཉཱཎཝིཔྤཡུཏྟཙིཏྟུཔྤཱདཱ སེཀྑཔུཐུཛྫནཁཱིཎཱསཝཱནཾ ཨསཀྐཙྩདཱནཔཙྩཝེཀྑཎདྷམྨསྶཝནཱདཱིསུ པརིཏྟདྷམྨེ ཨཱརབྦྷ པཝཏྟིཀཱལེ ཀཱམཱཝཙརཱརམྨཎཱ, ཨཏིཔགུཎཛ྄ཛྷཱནཔཙྩཝེཀྑཎཀཱལེ ¶ མཧགྒཏཱརམྨཎཱ, ཀསིཎནིམིཏྟཱདཱིསུ པརིཀམྨཱདིཀཱལེ པཉྙཏྟཱརམྨཎཱཏི དཊྛབྦཾ.

༥༨. ཨརཧཏྟམགྒཕལཝཛྫིཏསབྦཱརམྨཎཱནི སེཀྑཔུཐུཛྫནསནྟཱནེསྭེཝ པཝཏྟནཏོ. སེཀྑཱཔི ཧི ཋཔེཏྭཱ ལོཀིཡཙིཏྟཾ ཨརཧཏོ མགྒཕལསངྑཱཏཾ པཱཊིཔུགྒལིཀཙིཏྟཾ ཛཱནིཏུཾ ན སཀྐོནྟི ཨནདྷིགཏཏྟཱ, ཏཐཱ པུཐུཛྫནཱདཡོཔི སོཏཱཔནྣཱདཱིནཾ, སེཀྑཱནཾ པན ཨཏྟནོ ཨཏྟནོ མགྒཕལཔཙྩཝེཀྑཎེསུ ¶ པརསནྟཱནགཏམགྒཕལཱརམྨཎཱཡ ཨབྷིཉྙཱཡ པརིཀམྨཀཱལེ, ཨབྷིཉྙཱཙིཏྟེནེཝ མགྒཕལཱནཾ པརིཙྪིནྡནཀཱལེ ཙ ཨཏྟནོ ཨཏྟནོ སམཱནཱནཾ, ཧེཊྛིམཱནཉྩ མགྒཕལདྷམྨེ ཨཱརབྦྷ ཀུསལཛཝནཱནཾ པཝཏྟི ཨཏྠཱིཏི ཨརཧཏྟམགྒཕལསྶེཝ པཊིཀྑེཔོ ཀཏོ. ཀཱམཱཝཙརམཧགྒཏཔཉྙཏྟིནིབྦཱནཱནི པན སེཀྑཔུཐུཛྫནཱནཾ སཀྐཙྩདཱནཔཙྩཝེཀྑཎདྷམྨསྶཝནསངྑཱརསམྨསནཀསིཎཔརིཀམྨཱདཱིསུ ཏཾཏདཱརམྨཎིཀཱབྷིཉྙཱནཾ པརིཀམྨཀཱལེ, གོཏྲབྷུཝོདཱནཀཱལེ, དིབྦཙཀྑཱདཱིཧི རཱུཔཝིཛཱནནཱདིཀཱལེ ཙ ཀུསལཛཝནཱནཾ གོཙརབྷཱཝཾ གཙྪནྟི.

༥༩. སབྦཐཱཔི སབྦཱརམྨཎཱནཱིཏི ཀཱམཱཝཙརམཧགྒཏསབྦལོཀུཏྟརཔཉྙཏྟིཝསེན སབྦཐཱཔི སབྦཱརམྨཎཱནི, ན པན ཨཀུསལཱདཡོ ཝིཡ སཔྤདེསསབྦཱརམྨཎཱནཱིཏྱཏྠོ. ཀིརིཡཛཝནཱནཉྷི སབྦཉྙུཏཉྙཱཎཱདིཝསཔྤཝཏྟིཡཾ, ཝོཊྛབྦནསྶ ཙ ཏཾཏཾཔུརེཙཱརིཀཝསཔྤཝཏྟིཡཾ ན ཙ ཀིཉྩི ཨགོཙརཾ ནཱམ ཨཏྠི.

༦༠. པཋམཏཏིཡཱརུཔྤཱརམྨཎཏྟཱ ཨཱརུཔྤེསུ དུཏིཡཙཏུཏྠཱནི མཧགྒཏཱརམྨཎཱནི.

༦༡. སེསཱནི…པེ… པཉྙཏྟཱརམྨཎཱནཱིཏི པནྣརས རཱུཔཱཝཙརཱནི, པཋམཏཏིཡཱརུཔྤཱནི ཙཱཏི ཨེཀཝཱིསཏི ཀསིཎཱདིཔཉྙཏྟཱིསུ པཝཏྟནཏོ པཉྙཏྟཱརམྨཎཱནི.

༦༣. ཏེཝཱིསཏིཀཱམཱཝཙརཝིཔཱཀཔཉྩདྭཱརཱཝཛྫནཧསནཝསེན ¶ པཉྩཝཱིསཏི ཙིཏྟཱནི པརིཏྠམྷི ཀཱམཱཝཙརཱརམྨཎེ ཡེཝ བྷཝནྟི. ཀཱམཱཝཙརཉྷི མཧགྒཏཱདཡོ ཨུཔཱདཱཡ མནྡཱནུབྷཱཝཏཱཡ པརིསམནྟཏོ ཨཏྟཾ ཁཎྜིཏཾ ཝིཡཱཏི པརིཏྟཾ. ‘‘ཚ ཙིཏྟཱནི མཧགྒཏེཡེཝཱ’’ཏྱཱདིནཱ སབྦཏྠ སཱཝདྷཱརཎཡོཛནཱ དཊྛབྦཱ.

ཨཱལམྦཎསངྒཧཝཎྞནཱ ནིཊྛིཏཱ.

ཝཏྠུསངྒཧཝཎྞནཱ

༦༤. ཝཏྠུཝིབྷཱགཏོ ¶ , ཏབྦཏྠུཀཙིཏྟཔརིཙྪེདཝསེན ཙ སངྒཧོ ཝཏྠུསངྒཧོ. ཝསནྟི ཨེཏེསུ ཙིཏྟཙེཏསིཀཱ ཏནྣིསྶཡཏྟཱཏི ཝཏྠཱུནི.

༦༥. ཏཱནི ཀཱམལོཀེ སབྦཱནིཔི ལབྦྷནྟི པརིཔུཎྞིནྡྲིཡསྶ ཏཏྠེཝ ཨུཔལབྦྷནཏོ. པི-སདྡེན པན ཨནྡྷབདྷིརཱདིཝསེན ཀེསཉྩི ཨསམྦྷཝཾ དཱིཔེཏི.

༦༦. གྷཱནཱདིཏྟཡཾ ནཏྠི བྲཧྨཱནཾ ཀཱམཝིརཱགབྷཱཝནཱཝསེན གནྡྷརསཕོཊྛབྦེསུ ཝིརཏྟཏཱཡ ཏབྦིསཡཔྤསཱདེསུཔི ཝིརཱགསབྷཱཝཏོ. བུདྡྷདསྶནདྷམྨསྶཝནཱདིཨཏྠཾ པན ཙཀྑུསོཏེསུ ཨཝིརཏྟབྷཱཝཏོ ཙཀྑཱདིདྭཡཾ ཏཏྠ ཨུཔལབྦྷཏི.

༦༧. ཨརཱུཔལོཀེ སབྦཱནིཔི ཚ ཝཏྠཱུནི ན སཾཝིཛྫནྟི ཨརཱུཔཱིནཾ རཱུཔཝིརཱགབྷཱཝནཱབལེན ཏཏྠ སབྦེན སབྦཾ རཱུཔཔྤཝཏྟིཡཱ ཨབྷཱཝཏོ.

༦༨. པཉྩཝིཉྙཱཎཱནེཝ ནིསྶཏྟནིཛྫཱིཝཊྛེན དྷཱཏུཡོཏི པཉྩཝིཉྙཱཎདྷཱཏུཡོ.

༦༩. མནནམཏྟཱ དྷཱཏུ མནོདྷཱཏུ.

༧༠. མནོཡེཝ ¶ ཝིསིཊྛཝིཛཱནནཀིཙྩཡོགཏོ ཝིཉྙཱཎཾ ནིསྶཏྟནིཛྫཱིཝཊྛེན དྷཱཏུ ཙཱཏི མནོཝིཉྙཱཎདྷཱཏུ. མནསོ ཝིཉྙཱཎདྷཱཏཱུཏི ཝཱ མནོཝིཉྙཱཎདྷཱཏུ. སཱ ཧི མནཏོཡེཝ ཨནནྟརཔཙྩཡཏོ སམྦྷཱུཡམནསོཡེཝ ཨནནྟརཔཙྩཡབྷཱུཏཱཏི མནསོ སམྦནྡྷིནཱི ཧོཏི. སནྟཱིརཎཏྟཡསྶ, ཨཊྛམཧཱཝིཔཱཀཱནཾ, པཊིགྷདྭཡསྶ, པཋམམགྒསྶ, ཧསིཏུཔྤཱདསྶ, པནྣརསརཱུཔཱཝཙརཱནཉྩ ཝསེན པཝཏྟཱ ཡཐཱཝུཏྟམནོདྷཱཏུཔཉྩཝིཉྙཱཎདྷཱཏཱུཧི ཨཝསེསཱ མནོཝིཉྙཱཎདྷཱཏུ སངྑཱཏཱ ཙ ཏིཾས དྷམྨཱ ན ཀེཝལཾ མནོདྷཱཏུཡེཝ, ཏཐཱ ཧདཡཾ ནིསྶཱཡེཝ པཝཏྟནྟཱིཏི སམྦནྡྷོ.

སནྟཱིརཎམཧཱཝིཔཱཀཱནི ཧི ཨེཀཱདས དྭཱརཱབྷཱཝཏོ, ཀིཙྩཱབྷཱཝཏོ ཙ ཨཱརུཔྤེ ན ཨུཔྤཛྫནྟི ¶ . པཊིགྷསྶ ཨནཱིཝརཎཱཝཏྠསྶ ཨབྷཱཝཏོ ཏཾསཧགཏཾ ཙིཏྟདྭཡཾ རཱུཔལོཀེཔི ནཏྠི, པགེཝ ཨཱརུཔྤེ. པཋམམགྒོཔི པརཏོགྷོསཔཙྩཡཱབྷཱཝེ སཱཝཀཱནཾ ཨནུཔྤཛྫནཏོ, བུདྡྷཔཙྩེཀབུདྡྷཱནཉྩ མནུསྶལོཀཏོ ཨཉྙཏྠ ཨནིབྦཏྟནཏོ, ཧསནཙིཏྟཉྩ ཀཱཡཱབྷཱཝཏོ, རཱུཔཱཝཙརཱནི ཨརཱུཔཱིནཾ རཱུཔཝིརཱགབྷཱཝནཱཝསེན ཏདཱརམྨཎེསུ ཛྷཱནེསུཔི ཝིརཏྟབྷཱཝཏོ ཨརཱུཔབྷཝེ ན ཨུཔྤཛྫནྟཱིཏི སབྦཱནིཔི ཨེཏཱནི ཏེཏྟིཾས ཙིཏྟཱནི ཧདཡཾ ནིསྶཱཡེཝ པཝཏྟནྟི.

༧༡. པཉྩརཱུཔཱཝཙརཀུསལཏོ ཨཝསེསཱནི དྭཱདས ལོཀིཡཀུསལཱནི, པཊིགྷདྭཡཏོ ཨཝསེསཱནི དས ཨཀུསལཱནི, པཉྩདྭཱརཱཝཛྫནཧསནརཱུཔཱཝཙརཀིརིཡེཧི ཨཝསེསཱནི ཏེརས ཀིརིཡཙིཏྟཱནི, པཋམམགྒཏོ ཨཝསེསཱནི སཏྟ ཨནུཏྟརཱནི ཙཱཏི ཨིམེསཾ ཝསེན དྭེཙཏྟཱལཱིསཝིདྷཱ མནོཝིཉྙཱཎདྷཱཏུསངྑཱཏཱ དྷམྨཱ པཉྩཝོཀཱརབྷཝཝསེན ཧདཡཾ ནིསྶཱཡ ཝཱ, ཙཏུཝོཀཱརབྷཝཝསེན ཨནིསྶཱཡཝཱ པཝཏྟནྟི.

༧༣. ཀཱམེ ¶ བྷཝེ ཚཝཏྠུཾ ནིསྶིཏཱ སཏྟ ཝིཉྙཱཎདྷཱཏུཡོ, རཱུཔེ བྷཝེ ཏིཝཏྠུཾ ནིསྶིཏཱ གྷཱནཝིཉྙཱཎཱདིཏྟཡཝཛྫིཏཱ ཙཏུབྦིདྷཱ ཝིཉྙཱཎདྷཱཏུཡོ, ཨཱརུཔྤེ བྷཝེ ཨནིསྶིཏཱ ཨེཀཱ མནོཝིཉྙཱཎདྷཱཏུ མཏཱཏི ཡོཛནཱ.

༧༤. ཀཱམཱཝཙརཝིཔཱཀཔཉྩདྭཱརཱཝཛྫནཔཊིགྷདྭཡཧསནཝསེན སཏྟཝཱིསཏི ཀཱམཱཝཙརཱནི, པནྣརས རཱུཔཱཝཙརཱནི, པཋམམགྒོཏི ཏེཙཏྟཱལཱིས ནིསྶཱཡེཝ ཛཱཡརེ, ཏཏོཡེཝ ཨཝསེསཱ ཨཱརུཔྤཝིཔཱཀཝཛྫིཏཱ དྭེཙཏྟཱལཱིས ནིསྶཱཡ ཙ ཨནིསྶཱཡ ཙ ཛཱཡརེ, པཱཀཱརུཔྤཱ ཙཏྟཱརོ ཨནིསྶིཏཱཡེཝཱཏི སམྦནྡྷོ.

ཝཏྠུསངྒཧཝཎྞནཱ ནིཊྛིཏཱ.

ཨིཏི ཨབྷིདྷམྨཏྠཝིབྷཱཝིནིཡཱ ནཱམ ཨབྷིདྷམྨཏྠསངྒཧཝཎྞནཱཡ

པཀིཎྞཀཔརིཙྪེདཝཎྞནཱ ནིཊྛིཏཱ.

༤. ཝཱིཐིཔརིཙྪེདཝཎྞནཱ

༡. ཨིཙྩེཝཾ ¶ ཡཐཱཝུཏྟནཡེན ཙིཏྟུཔྤཱདཱནཾ ཙཏུནྣཾ ཁནྡྷཱནཾ ཨུཏྟརཾ ཝེདནཱསངྒཧཱདིཝིབྷཱགཏོ ཨུཏྟམཾ པབྷེདསངྒཧཾ ཀཏྭཱ པུན ཀཱམཱཝཙརཱདཱིནཾ ཏིཎྞཾ བྷཱུམཱིནཾ, དྭིཧེཏུཀཱདིཔུགྒལཱནཉྩ བྷེདེན ལཀྑིཏཾ ‘‘ཨིདཾ ཨེཏྟཀེཧི པརཾ, ཨིམསྶ ཨནནྟརཾ ཨེཏྟཀཱནི ཙིཏྟཱནཱི’’ཏི ཨེཝཾ པུབྦཱཔརཙིཏྟེཧི ནིཡཱམིཏཾ པཊིསནྡྷིཔཝཏྟཱིསུ ཙིཏྟུཔྤཱདཱནཾ པཝཏྟིསངྒཧཾ ནཱམ ཏནྣཱམཀཾ སངྒཧཾ ཡཐཱསམྦྷཝཏོ སམཱསེན པཝཀྑཱམཱིཏི ཡོཛནཱ.

༢. ཝཏྠུདྭཱརཱརམྨཎསངྒཧཱ ཧེཊྛཱ ཀཐིཏཱཔི པརིཔུཎྞཾ ཀཏྭཱ པཝཏྟིསངྒཧཾ དསྶེཏུཾ པུན ནིཀྑིཏྟཱ.

༣. ཝིསཡཱནཾ དྭཱརེསུ, ཝིསཡེསུ ཙ ཙིཏྟཱནཾ པཝཏྟི ཝིསཡཔྤཝཏྟི.

༤. ཏཏྠཱཏི ཏེསུ ཚསུ ཚཀྐེསུ.

ཝཱིཐིཚཀྐཝཎྞནཱ

༦. ‘‘ཙཀྑུདྭཱརེ ¶ པཝཏྟཱ ཝཱིཐི ཙིཏྟཔརམྤརཱ ཙཀྑུདྭཱརཝཱིཐཱི’’ཏྱཱདིནཱ དྭཱརཝསེན, ‘‘ཙཀྑུཝིཉྙཱཎསམྦནྡྷིནཱི ཝཱིཐི ཏེན སཧ ཨེཀཱརམྨཎཨེཀདྭཱརིཀཏཱཡ སཧཙརཎབྷཱཝཏོ ཙཀྑུཝིཉྙཱཎཝཱིཐཱི’’ཏྱཱདིནཱ ཝིཉྙཱཎཝསེན ཝཱ ཝཱིཐཱིནཾ ནཱམ ཡོཛནཱ ཀཱཏབྦཱཏི དསྶེཏུཾ ‘‘ཙཀྑུདྭཱརཝཱིཐཱི’’ཏྱཱདི ཝུཏྟཾ.

ཝཱིཐིཚཀྐཝཎྞནཱ ནིཊྛིཏཱ.

ཝཱིཐིབྷེདཝཎྞནཱ

༧. ‘‘ཨཏིམཧནྟ’’ནྟྱཱདཱིསུ ¶ ཨེཀཙིཏྟཀྑཎཱཏཱིཏཾ ཧུཏྭཱ ཨཱཔཱཐཱགཏཾ སོལ༹སཙིཏྟཀྑཎཱཡུཀཾ ཨཏིམཧནྟཾ ནཱམ. དྭིཏིཙིཏྟཀྑཎཱཏཱིཏཾ ཧུཏྭཱ པནྣརསཙུདྡསཙིཏྟཀྑཎཱཡུཀཾ མཧནྟཾ ནཱམ. ཙཏུཙིཏྟཀྑཎཏོ པཊྛཱཡ ཡཱཝ ནཝཙིཏྟཀྑཎཱཏཱིཏཾ ཧུཏྭཱ ཏེརསཙིཏྟཀྑཎཏོ པཊྛཱཡ ཡཱཝ ཨཊྛཙིཏྟཀྑཎཱཡུཏཾ པརིཏྟཾ ནཱམ. དསཙིཏྟཀྑཎཏོ པཊྛཱཡ ཡཱཝ པནྣརསཙིཏྟཀྑཎཱཏཱིཏཾ ཧུཏྭཱ སཏྟཙིཏྟཀྑཎཏོ པཊྛཱཡ ཡཱཝ དྭིཙིཏྟཀྑཎཱཡུཀཾ ཨཏིཔརིཏྟཾ ནཱམ. ཨེཝཉྩ ཀཏྭཱ ཝཀྑཏི ‘‘ཨེཀཙིཏྟཀྑཎཱཏཱིཏཱནཱི’’ཏྱཱདི. ཝིབྷཱུཏཾ པཱཀཊཾ. ཨཝིབྷཱུཏཾ ཨཔཱཀཊཾ.

ཝཱིཐིབྷེདཝཎྞནཱ ནིཊྛིཏཱ.

པཉྩདྭཱརཝཱིཐིཝཎྞནཱ

༨. ཀཐནྟི ཀེན པཀཱརེན ཨཏིམཧནྟཱདིཝསེན ཝིསཡཝཝཏྠཱནནྟི པུཙྪིཏྭཱ ཙིཏྟཀྑཎཝསེན ཏཾ པཀཱསེཏུཾ ‘‘ཨུཔྤཱདཋིཏཱི’’ཏྱཱདི ཨཱརདྡྷཾ. ཨུཔྤཛྫནཾ ཨུཔྤཱདོ, ཨཏྟཔཊིལཱབྷོ. བྷཉྫནཾ བྷངྒོ, སརཱུཔཝིནཱསོ. ཨུབྷིནྣཾ ཝེམཛ྄ཛྷེ བྷངྒཱབྷིམུཁཔྤཝཏྟི ཋིཏི ནཱམ. ཀེཙི པན ཙིཏྟསྶ ཋིཏིཀྑཎཾ པཊིསེདྷེནྟི. ཨཡཉྷི ནེསཾ ཨདྷིཔྤཱཡོ – ཙིཏྟཡམཀེ (ཝིབྷ. མཱུལཊཱི. ༢༠ པཀིཎྞཀཀཐཱཝཎྞནཱ; ཡམ. ༢.ཙིཏྟཡམཀ.༨༡, ༡༠༢) ‘‘ཨུཔྤནྣཾ ཨུཔྤཛྫམཱན’’ནྟི ཨེཝམཱདིཔདཱནཾ ཝིབྷངྒེ ‘‘བྷངྒཀྑཎེ ཨུཔྤནྣཾ ¶ , ནོ ཙ ཨུཔྤཛྫམཱནཾ, ཨུཔྤཱདཀྑཎེ ཨུཔྤནྣཉྩེཝ ཨུཔྤཛྫམཱནཉྩཱ’’ཏྱཱདིནཱ (ཡམ. ༢.ཙིཏྟཡམཀ.༨༡, ༡༠༢) བྷངྒུཔྤཱདཱཝ ཀཐིཏཱ, ན ཋིཏིཀྑཎོ. ཡདི ཙ ཙིཏྟསྶ ཋིཏིཀྑཎོཔི ཨཏྠི, ‘‘ཋིཏིཀྑཎེ བྷངྒཀྑཎེ ཙཱ’’ཏི ཝཏྟབྦཾ སིཡཱ. ཨཐ མཏཾ ‘‘ཨུཔྤཱདོ པཉྙཱཡཏི, ཝཡོ པཉྙཱཡཏི, ཋིཏསྶ ཨཉྙཐཏྟཾ པཉྙཱཡཏཱིཏི (ཨ. ནི. ༣.༤༧) སུཏྟནྟཔཱཋཏོ ཋིཏིཀྑཎོ ཨཏྠཱི’’ཏི, ཏཏྠཔི ཨེཀསྨིཾ དྷམྨེ ཨཉྙཐཏྟསྶ ཨནུཔྤཛྫནཏོ, པཉྙཱཎཝཙནཏོ ཙ པབནྡྷཋིཏིཡེཝ ཨདྷིཔྤེཏཱ, ན ཙ ཁཎཋིཏི, ན ཙ ཨབྷིདྷམྨེ ལབྦྷམཱནསྶ ཨཝཙནེ ཀཱརཎཾ ཨཏྠི, ཏསྨཱ ཡཐཱདྷམྨསཱསནེ ཨཝཙནམྤི ཨབྷཱཝམེཝ དཱིཔེཏཱིཏི. ཏཏྠ ཝུཙྩཏེ ཡཐེཝ ཧི ཨེཀདྷམྨཱདྷཱརབྷཱཝེཔི ཨུཔྤཱདབྷངྒཱནཾ ཨཉྙོ ཨུཔྤཱདཀྑཎོ, ཨཉྙོ བྷངྒཀྑཎོཏི ཨུཔྤཱདཱཝཏྠཱཡ བྷིནྣཱ བྷངྒཱཝཏྠཱ ཨིཙྪིཏཱ. ཨིཏརཐཱ ཧི ‘‘ཨཉྙོཡེཝ དྷམྨོ ཨུཔྤཛྫཏི, ཨཉྙོ ནིརུཛ྄ཛྷཏཱི’’ཏི ཨཱཔཛྫེཡྻ, ཨེཝམེཝ ཨུཔྤཱདབྷངྒཱཝཏྠཱཧི བྷིནྣཱ ¶ བྷངྒཱབྷིམུཁཱཝཏྠཱཔི ཨིཙྪིཏབྦཱ, སཱ ཋིཏི ནཱམ. པཱལི༹ཡཾ པན ཝེནེཡྻཛ྄ཛྷཱསཡཱནུརོདྷཏོ ནཡདསྶནཝསེན སཱ ན ཝུཏྟཱ. ཨབྷིདྷམྨདེསནཱཔི ཧི ཀདཱཙི ཝེནེཡྻཛ྄ཛྷཱསཡཱནུརོདྷེན པཝཏྟཏི, ཡཐཱ རཱུཔསྶ ཨུཔྤཱདོ ཨུཔཙཡོ སནྟཏཱིཏི དྭིདྷཱ བྷིནྡིཏྭཱ དེསིཏོ, སུཏྟེ ཙ ‘‘ཏཱིཎིམཱནི, བྷིཀྑཝེ, སངྑཏསྶ སངྑཏལཀྑཎཱནི. ཀཏམཱནི ཏཱིཎི? ཨུཔྤཱདོ པཉྙཱཡཏི, ཝཡོ པཉྙཱཡཏི, ཋིཏསྶ ཨཉྙཐཏྟཾ པཉྙཱཡཏཱི’’ཏི ཨེཝཾ སངྑཏདྷམྨསྶེཝ ལཀྑཎདསྶནཏྠཾ ཨུཔྤཱདཱདཱིནཾ ཝུཏྟཏྟཱ ན སཀྐཱ པབནྡྷསྶ པཉྙཏྟིསབྷཱཝསྶ ཨསངྑཏསྶ ཋིཏི ཏཏྠ ཝུཏྟཱཏི ཝིཉྙཱཏུཾ. ཨུཔསགྒསྶ ཙ དྷཱཏྭཏྠེཡེཝ པཝཏྟནཏོ ‘‘པཉྙཱཡཏཱི’’ཏི ཨེཏསྶ ཝིཉྙཱཡཏཱིཏི ཨཏྠོ. ཏསྨཱ ན ཨེཏྟཱཝཏཱ ཙིཏྟསྶ ཋིཏིཀྑཎོ པཊིབཱཧིཏུཾ ཡུཏྟོཏི སུཝུཏྟམེཏཾ ‘‘ཨུཔྤཱདཋིཏིབྷངྒཝསེནཱ’’ཏི. ཨེཝཉྩ ཀཏྭཱ ཝུཏྟཾ ཨཊྛཀཐཱཡམྤི ‘‘ཨེཀེཀསྶ ¶ ཨུཔྤཱདཋིཏིབྷངྒཝསེན ཏཡོ ཏཡོ ཁཎཱ’’ཏི (ཝིབྷ. ཨཊྛ. ༢༦ པཀིཎྞཀཀཐཱ).

༩. ཨརཱུཔཾ ལཧུཔརིཎཱམཾ, རཱུཔཾ གརུཔརིཎཱམཾ གཱཧཀགཱཧེཏབྦབྷཱཝསྶ ཏཾཏཾཁཎཝསེན ཨུཔྤཛྫནཏོཏི ཨཱཧ ‘‘ཏཱནཱི’’ཏྱཱདི. ཏཱནཱིཏི ཏཱདིསཱནི. སཏྟརསནྣཾ ཙིཏྟཱནཾ ཁཎཱནི ཝིཡ ཁཎཱནི སཏྟརསཙིཏྟཀྑཎཱནི, ཏཱནི ཙིཏྟཀྑཎཱནི སཏྟརསཱཏི ཝཱ སམྦནྡྷོ. ཝིསུཾ ཝིསུཾ པན ཨེཀཔཉྙཱས ཙིཏྟཀྑཎཱནི ཧོནྟི. རཱུཔདྷམྨཱནནྟི ཝིཉྙཏྟིལཀྑཎརཱུཔཝཛྫཱནཾ རཱུཔདྷམྨཱནཾ. ཝིཉྙཏྟིདྭཡཉྷི ཨེཀཙིཏྟཀྑཎཱཡུཀཾ. ཏཐཱ ཧི ཏཾ ཙིཏྟཱནུཔརིཝཏྟིདྷམྨེསུ ཝུཏྟཾ. ལཀྑཎརཱུཔེསུ ཙ ཛཱཏི ཙེཝ ཨནིཙྩཏཱ ཙ ཙིཏྟསྶ ཨུཔྤཱདབྷངྒཀྑཎེཧི སམཱནཱཡུཀཱ, ཛརཏཱ པན ཨེཀཱུནཔཉྙཱསཙིཏྟཀྑཎཱཡུཀཱ. ཨེཝཉྩ ཀཏྭཱ ཝདནྟི –

‘‘ཏཾ སཏྟརསཙིཏྟཱཡུ, ཝིནཱ ཝིཉྙཏྟིལཀྑཎ’’ནྟི (ས. ས. ༦༠);

ཀེཙི (ཝིབྷ. མཱུལཊཱི. ༢༠) པན ‘‘པཊིཙྩསམུཔྤཱདཊྛཀཐཱཡཾ ‘ཨེཏྟཱཝཏཱ ཨེཀཱདས ཙིཏྟཀྑཎཱ ཨཏཱིཏཱ ཧོནྟི, ཨཐཱཝསེསཔཉྩཙིཏྟཀྑཎཱཡུཀེ’ཏི (ཝིསུདྡྷི. ༢.༦༢༣; ཝིབྷ. ཨཊྛ. ༢༢༧) ཝཙནཏོ སོལ༹སཙིཏྟཀྑཎཱནི རཱུཔདྷམྨཱནམཱཡཱུ. ཨུཔྤཛྫམཱནམེཝ ཧི རཱུཔཾ བྷཝངྒཙལནསྶ པཙྩཡོ ཧོཏཱི’’ཏི ཝདནྟི, ཏཡིདམསཱརཾ ‘‘པཊིསནྡྷིཙིཏྟེན སཧུཔྤནྣཾ ཀམྨཛརཱུཔཾ ཏཏོ པཊྛཱཡ སཏྟརསམེན སདྡྷིཾ ནིརུཛ྄ཛྷཏི, པཊིསནྡྷིཙིཏྟསྶ ཋིཏིཀྑཎེ ཨུཔྤནྣཾ ཨཊྛཱརསམསྶ ཨུཔྤཱདཀྑཎེ ནིརུཛ྄ཛྷཏཱི’’ཏྱཱདིནཱ (ཝིབྷ. ཨཊྛ. ༢༦ པཀིཎྞཀཀཐཱ) ཨཊྛཀཐཱཡམེཝ སཏྟརསཙིཏྟཀྑཎསྶ ཨཱགཏཏྟཱ. ཡཏྠ པན སོལ༹སཙིཏྟཀྑཎཱནེཝ པཉྙཱཡནྟི, ཏཏྠ ཙིཏྟཔྤཝཏྟིཡཱ ¶ པཙྩཡབྷཱཝཡོགྱཀྑཎཝསེན ནཡོ ནཱིཏོ. ཧེཊྛིམཀོཊིཡཱ ཧི ཨེཀཙིཏྟཀྑཎམྤི ¶ ཨཏིཀྐནྟསྶེཝ རཱུཔསྶ ཨཱཔཱཐཱགམནསཱམཏྠིཡནྟི ཨལམཏིཝིཏྠཱརེན.

༡༠. ཨེཀཙིཏྟསྶ ཁཎཾ ཝིཡ ཁཎཾ ཨེཀཙིཏྟཀྑཎཾ, ཏཾ ཨཏཱིཏཾ ཨེཏེསཾ, ཨེཏཱནི ཝཱ ཏཾ ཨཏཱིཏཱནཱིཏི ཨེཀཙིཏྟཀྑཎཱཏཱིཏཱནི. ཨཱཔཱཐམཱགཙྪནྟཱིཏི རཱུཔསདྡཱརམྨཎཱནི སཀསཀཊྛཱནེ ཋཏྭཱཝ གོཙརབྷཱཝཾ གཙྪནྟཱིཏི ཨཱབྷོགཱནུརཱུཔཾ ཨནེཀཀལཱཔགཏཱནི ཨཱཔཱཐཾ ཨཱགཙྪནྟི, སེསཱནི པན གྷཱནཱདིནིསྶཡེསུ ཨལླཱིནཱནེཝ ཝིཉྙཱཎུཔྤཏྟིཀཱརཎཱནཱིཏི ཨེཀེཀཀལཱཔགཏཱནིཔི. ཨེཀེཀཀལཱཔགཏཱཔི ཧི པསཱདཱ ཝིཉྙཱཎསྶ ཨཱདྷཱརབྷཱཝཾ གཙྪནྟི, ཏེ པན བྷཝངྒཙལནསྶ ཨནནྟརཔཙྩཡབྷཱུཏེན བྷཝངྒེན སདྡྷིཾ ཨུཔྤནྣཱ. ‘‘ཨཱཝཛྫནེན སདྡྷིཾ ཨུཔྤནྣཱ’’ཏི ཨཔརེ.

དྭིཀྑཏྟུཾ བྷཝངྒེ ཙལིཏེཏི ཝིསདིསཝིཉྙཱཎུཔྤཏྟིཧེཏུབྷཱཝསངྑཱཏབྷཝངྒཙལནཝསེན པུརིམགྒཧིཏཱརམྨཎསྨིཾཡེཝ དྭིཀྑཏྟུཾ བྷཝངྒེ པཝཏྟེ. པཉྩསུ ཧི པསཱདེསུ ཡོགྱདེསཱཝཏྠཱནཝསེན ཨཱརམྨཎེ གྷཊྚིཏེ པསཱདགྷཊྚནཱནུབྷཱཝེན བྷཝངྒསནྟཏི ཝོཙྪིཛྫམཱནཱ སཧསཱ ཨནོཙྪིཛྫིཏྭཱ ཡཐཱ ཝེགེན དྷཱཝནྟོ ཋཱཏུཀཱམོཔི པུརིསོ ཨེཀདྭིཔདཝཱརེ ཨཏིཀྐམིཏྭཱཝ ཏིཊྛཏི, ཨེཝཾ དྭིཀྑཏྟུཾ ཨུཔྤཛྫིཏྭཱཝ ཨོཙྪིཛྫཏི. ཏཏྠ པཋམཙིཏྟཾ བྷཝངྒསནྟཏིཾ ཙཱལེནྟཾ ཝིཡ ཨུཔྤཛྫཏཱིཏི བྷཝངྒཙལནཾ, དུཏིཡཾ ཏསྶ ཨོཙྪིཛྫནཱཀཱརེན ཨུཔྤཛྫནཏོ བྷཝངྒུཔཙྪེདོཏི ཝོཧརནྟི. ཨིདྷ པན ཨཝིསེསེན ཝུཏྟཾ ‘‘དྭིཀྑཏྟུཾ བྷཝངྒེ ཙལིཏེ’’ཏི.

ནནུ ཙ རཱུཔཱདིནཱ པསཱདེ གྷཊྚིཏེ ཏནྣིསྶིཏསྶེཝ ཙལནཾ ཡུཏྟཾ, ཀཐཾ པན ཧདཡཝཏྠུནིསྶིཏསྶ བྷཝངྒསྶཱཏི? སནྟཏིཝསེན ཨེཀཱབདྡྷཏྟཱ. ཡཐཱ ཧི བྷེརིཡཱ ཨེཀསྨིཾ ཏལེ ཋིཏསཀྑརཱཡ མཀྑིཀཱཡ ནིསིནྣཱཡ ཨཔརསྨིཾ ཏལེ དཎྜཱདིནཱ པཧཊེ ཨནུཀྐམེན བྷེརིཙམྨཝརཏྟཱདཱིནཾ ཙལནེན སཀྑརཱཡ ¶ ཙལིཏཱཡ མཀྑིཀཱཡ ཨུཔྤཏིཏྭཱ གམནཾ ཧོཏི, ཨེཝམེཝ རཱུཔཱདིནཱ པསཱདེ གྷཊྚིཏེ ཏནྣིསྶཡེསུ མཧཱབྷཱུཏེསུ ཙལིཏེསུ ཨནུཀྐམེན ཏཾསམྦནྡྷཱནཾ སེསརཱུཔཱནམྤི ཙལནེན ཧདཡཝཏྠུམྷི ཙལིཏེ ཏནྣིསྶིཏསྶ བྷཝངྒསྶ ཙལནཱཀཱརེན པཝཏྟི ཧོཏི. ཝུཏྟཉྩ –

‘‘གྷཊྚིཏེ ¶ ཨཉྙཝཏྠུམྷི, ཨཉྙནིསྶིཏཀམྤནཾ;

ཨེཀཱབདྡྷེན ཧོཏཱིཏི, སཀྑརོཔམཡཱ ཝདེ’’ཏི. (ས. ས. ༡༧༦);

བྷཝངྒསོཏནྟི བྷཝངྒཔྤཝཱཧཾ. ཨཱཝཛྫནྟནྟི ‘‘ཀིཾ ནཱམེཏ’’ནྟི ཝདནྟཾ ཝིཡ ཨཱབྷོགཾ ཀུརུམཱནཾ. པསྶནྟནྟི པཙྩཀྑཏོ པེཀྑནྟཾ. ནནུ ཙ ‘‘ཙཀྑུནཱ རཱུཔཾ དིསྭཱ’’ཏི (དཱི. ནི. ༡.༢༡༣; ཨ. ནི. ༣.༦༢; ཝིབྷ. ༥༡༧) ཝཙནཏོ ཙཀྑུནྡྲིཡམེཝ དསྶནཀིཙྩཾ སཱདེཏི, ན ཝིཉྙཱཎནྟི? ནཡིདམེཝཾ, རཱུཔསྶ ཨནྡྷབྷཱཝེན རཱུཔདསྶནེ ཨསམཏྠབྷཱཝཏོ. ཡདི ཙ ཏཾ རཱུཔཾ པསྶཏི, ཏཐཱ སཏི ཨཉྙཝིཉྙཱཎསམངྒིནོཔི རཱུཔདསྶནཔྤསངྒོ སིཡཱ. ཡདི ཨེཝཾ ཝིཉྙཱཎསྶ ཏཾ ཀིཙྩཾ སཱདྷེཏི, ཝིཉྙཱཎསྶ ཨཔྤཊིབནྡྷཏྟཱ ཨནྟརིཏརཱུཔསྶཔི དསྶནཾ སིཡཱ. ཧོཏུ ཨནྟརིཏསྶཔི དསྶནཾ, ཡསྶ ཕལིཀཱདིཏིརོཧིཏསྶ ཨཱལོཀཔཊིབནྡྷོ ནཏྠི, ཡསྶ པན ཀུཊྚཱདིཨནྟརིཏསྶ ཨལོཀཔཊིབནྡྷོ ཨཏྠི. ཏཏྠ པཙྩཡཱབྷཱཝཏོ ཝིཉྙཱཎཾ ནུཔྤཛྫཏཱིཏི ན ཏསྶ ཙཀྑུཝིཉྙཱཎེན གཧཎཾ ཧོཏི. ‘‘ཙཀྑུནཱ’’ཏི པནེཏྠ ཏེན དྭཱརེན ཀརཎབྷཱུཏེནཱཏི ཨདྷིཔྤཱཡོ. ཨཐ ཝཱ ནིསྶིཏཀིརིཡཱ ནིསྶཡཔྤཊིབདྡྷཱ ཝུཏྟཱ ཡཐཱ ‘‘མཉྩཱ ཨུཀྐུཊྛིཾ ཀརོནྟཱི’’ཏི.

སམྤཊིཙྪནྟནྟི ཏམེཝ རཱུཔཾ པཊིགྒཎྷནྟཾ ཝིཡ. སནྟཱིརཡམཱནནྟི ཏམེཝ རཱུཔཾ ཝཱིམཾསནྟཾ ཝིཡ. ཝཝཏྠཔེནྟནྟི ཏམེཝ རཱུཔཾ སུཊྛུ སལླཀྑེནྟཾ ཝིཡ. ཡོནིསོམནསིཀཱརཱདིཝསེན ལདྡྷོ པཙྩཡོ ཨེཏེནཱཏི ལདྡྷཔཙྩཡཾ. ཡཾ ཀིཉྩི ཛཝནནྟི སམྦནྡྷོ. མུཙྪཱམརཎཱསནྣཀཱལེསུ ཙ ཚཔྤཉྩཔི ཛཝནཱནི པཝཏྟནྟཱིཏི ཨཱཧ ¶ ‘‘ཡེབྷུཡྻེནཱ’’ཏི. ཛཝནཱནུབནྡྷཱནཱིཏི པཊིསོཏགཱམིནཱཝཾ ནདཱིསོཏོ ཝིཡ ཀིཉྩི ཀཱལཾ ཛཝནཾ ཨནུགཏཱནི. ཏསྶ ཛཝནསྶ ཨཱརམྨཎཾ ཨཱརམྨཎམེཏེསནྟི ཏདཱརམྨཎཱནི ‘‘བྲཧྨསྶརོ’’ཏྱཱདཱིསུ ཝིཡ མཛ྄ཛྷེཔདལོཔཝསེན, ཏདཱརམྨཎཱནི ཙ ཏཱནི པཱཀཱནི ཙཱཏི ཏདཱརམྨཎཔཱཀཱནི. ཡཐཱརཧནྟི ཨཱརམྨཎཛཝནསཏྟཱནུརཱུཔཾ. ཏཐཱ པཝཏྟིཾ པན སཡམེཝ པཀཱསཡིསྶཏི, བྷཝངྒཔཱཏོཏི ཝཱིཐིཙིཏྟཝསེན ཨཔྤཝཏྟིཏྭཱ ཙིཏྟསྶ བྷཝངྒཔཱཏོ ཝིཡ, བྷཝངྒཝསེན ཨུཔྤཏྟཱིཏི ཝུཏྟཾ ཧོཏི. ཨེཏྠ ཙ ཝཱིཐིཙིཏྟཔྤཝཏྟིཡཱ སུཁགྒཧཎཏྠཾ ཨམྦོཔམཱདིཀཾ ཨཱཧརནྟི, ཏཏྲིདཾ ཨམྦོཔམཱམཏྟཾ (དྷ. ས. ཨཊྛ. ༤༩༨ ཝིཔཱཀུདྡྷཱརཀཐཱ) – ཨེཀོ ཀིར པུརིསོ ཕལིཏམྦརུཀྑམཱུལེ སསཱིསཾ པཱརུཔིཏྭཱ ནིདྡཱཡནྟོ ཨཱསནྣེ པཏིཏསྶ ཨེཀསྶ ཨམྦཕལསྶ སདྡེན པབུཛ྄ཛྷིཏྭཱ སཱིསཏོ ཝཏྠཾ ཨཔནེཏྭཱ ཙཀྑུཾ ཨུམྨཱིལེཏྭཱ དིསྭཱ ཙ ཏཾ གཧེཏྭཱ མདྡིཏྭཱ ཨུཔསིངྒྷིཏྭཱ པཀྐབྷཱཝཾ ཉཏྭཱ ¶ པརིབྷུཉྫིཏྭཱ མུཁགཏཾ སཧ སེམྷེན ཨཛ྄ཛྷོཧརིཏྭཱ པུན ཏཏྠེཝ ནིདྡཱཡཏི. ཏཏྠ པུརིསསྶ ནིདྡཱཡནཀཱལོ ཝིཡ བྷཝངྒཀཱལོ, ཕལསྶ པཏིཏཀཱལོ ཝིཡ ཨཱརམྨཎསྶ པསཱདགྷཊྚནཀཱལོ, ཏསྶ སདྡེན པབུདྡྷཀཱལོ ཝིཡ ཨཱཝཛྫནཀཱལོ, ཨུམྨཱིལེཏྭཱ ཨོལོཀིཏཀཱལོ ཝིཡ ཙཀྑུཝིཉྙཱཎཔྤཝཏྟིཀཱལོ, གཧིཏཀཱལོ ཝིཡ སམྤཊིཙྪནཀཱལོ, མདྡནཀཱལོ ཝིཡ སནྟཱིརཎཀཱལོ, ཨུཔསིངྒྷནཀཱལོ ཝིཡ ཝོཊྛབྦནཀཱལོ, པརིབྷོགཀཱལོ ཝིཡ ཛཝནཀཱལོ, མུཁགཏཾ སཧ སེམྷེན ཨཛ྄ཛྷོཧརཎཀཱལོ ཝིཡ ཏདཱརམྨཎཀཱལོ, པུན ནིདྡཱཡནཀཱལོ ཝིཡ པུན བྷཝངྒཀཱལོ.

ཨིམཱཡ ཙ ཨུཔམཱཡ ཀིཾ དཱིཔིཏཾ ཧོཏི? ཨཱརམྨཎསྶ པསཱདགྷཊྚནམེཝ ཀིཙྩཾ, ཨཱཝཛྫནསྶ ཝིསཡཱབྷུཛནམེཝ, ཙཀྑུཝིཉྙཱཎསྶ དསྶནམཏྟམེཝ, སམྤཊིཙྪནཱདཱིནཉྩ པཊིགྒཎྷནཱདིམཏྟམེཝ ¶ , ཛཝནསྶེཝ པན ཨཱརམྨཎརསཱནུབྷཝནཾ, ཏདཱརམྨཎསྶ ཙ ཏེན ཨནུབྷཱུཏསྶེཝ ཨནུབྷཝནནྟི ཨེཝཾ ཀིཙྩཝསེན དྷམྨཱནཾ ཨཉྙམཉྙཾ ཨསཾཀིཎྞཏཱ དཱིཔིཏཱ ཧོཏི. ཨེཝཾ པཝཏྟམཱནཾ པན ཙིཏྟཾ ‘‘ཨཱཝཛྫནཾ ནཱམ ཧུཏྭཱ བྷཝངྒཱནནྟརཾ ཧོཏི, ཏྭཾ དསྶནཱདཱིསུ ཨཉྙཏརཾ ཧུཏྭཱ ཨཱཝཛྫནཱནནྟར’’ནྟྱཱདིནཱ ནིཡུཉྫཀེ ཀཱརཀེ ཨསཏིཔི ཨུཏུབཱིཛནིཡཱམཱདི (དྷ. ས. ཨཊྛ. ༤༩༨ ཝིཔཱཀུདྡྷཱརཀཐཱ) ཝིཡ ཙིཏྟནིཡཱམཝསེནེཝ པཝཏྟཏཱིཏི ཝེདིཏབྦཾ.

༡༡. ཨེཏྟཱཝཏཱ སཏྟརས ཙིཏྟཀྑཎཱནི པརིཔཱུརེནྟཱིཏི སམྦནྡྷོ.

༡༢. ཨཔྤཧོནྟཱཏཱིཏཀནྟི ཨཔྤཧོནྟཾ ཧུཏྭཱ ཨཏཱིཏཾ. ནཏྠི ཏདཱརམྨཎུཔྤཱདོཏི ཙུདྡསཙིཏྟཀྑཎཱཡུཀེ ཏཱཝ ཨཱརམྨཎསྶ ནིརུདྡྷཏྟཱཝ ཏདཱརམྨཎཾ ནུཔྤཛྫཏི. ན ཧི ཨེཀཝཱིཐིཡཾ ཀེསུཙི པཙྩུཔྤནྣཱརམྨཎེསུ ཀཱནིཙི ཨཏཱིཏཱརམྨཎཱནི ཧོནྟི. པནྣརསཙིཏྟཀྑཎཱཡུཀེསུཔི ཛཝནུཔྤཏྟིཏོ པརཾ ཨེཀམེཝ ཙིཏྟཀྑཎཾ ཨཝསིཊྛནྟི དྭིཀྑཏྟུཾ ཏདཱརམྨཎུཔྤཏྟིཡཱ ཨཔྤཧོནཀབྷཱཝཏོ ནཏྠི དུཏིཡཏདཱརམྨཎསྶ ཨུཔྤཏྟཱིཏི པཋམམྤི ནུཔྤཛྫཏི. དྭིཀྑཏྟུམེཝ ཧི ཏདཱརམྨཎུཔྤཏྟི པཱལི༹ཡཾ ནིཡམིཏཱ ཙིཏྟཔྤཝཏྟིགཎནཱཡཾ སབྦཝཱརེསུ ‘‘ཏདཱརམྨཎཱནི དྭེ’’ཏི (ཝིབྷ. ཨཊྛ. ༢༢༧) དྭིནྣམེཝ ཙིཏྟཝཱརཱནཾ ཨཱགཏཏྟཱ. ཡཾ པན པརམཏྠཝིནིཙྪཡེ ཝུཏྟཾ –

‘‘སཀིཾ ¶ དྭེ ཝཱ ཏདཱལམྦཾ, སཀིམཱཝཛྫནཱདཡོ’’ཏི (པརམ. ཝི. ༡༡༦), ཏཾ མཛ྄ཛྷིམབྷཱཎཀམཏཱནུསཱརེན ཝུཏྟནྟི དཊྛབྦཾ. ཡསྨཱ པན མཛ྄ཛྷིམབྷཱཎཀཱནཾ ཝཱདོ ཧེཊྛཱ ཝུཏྟཔཱལི༹ཡཱ ཨསཾསནྡནཏོ སམྨོཧཝིནོདནཱིཡཾ (ཝིབྷ. ཨཊྛ. ༢༢༧) པཊིཀྑིཏྟོཝ, ཏསྨཱ ཨཱཙརིཡེནཔི ཨཏྟནཱ ཨནདྷིཔྤེཏཏྟཱཡེཝ ཨིདྷ ཙེཝ ནཱམརཱུཔཔརིཙྪེདེ ཙ སཀིཾ ཏདཱརམྨཎུཔྤཏྟི ན ཝུཏྟཱ.

༡༣. ཝོཊྛབྦནུཔྤཱདཏོ ¶ པརཾ ཚཙིཏྟཀྑཎཱཝསིཊྛཱཡུཀམྤི ཨཱརམྨཎཾ ཨཔྤཱཡུཀབྷཱཝེན པརིདུབྦལཏྟཱ ཛཝནུཔྤཏྟིཡཱ པཙྩཡོ ན ཧོཏི. ཛཝནཉྷི ཨུཔྤཛྫམཱནཾ ནིཡམེན སཏྟཙིཏྟཀྑཎཱཡུཀེཡེཝ ཨུཔྤཛྫཏཱིཏི ཨདྷིཔྤཱཡེནཱཧ ‘‘ཛཝནམྤི ཨནུཔྤཛྫིཏྭཱ’’ཏི. ཧེཏུམྷི ཙཱཡཾ ཏྭཱཔཙྩཡོ, ཛཝནསྶཔི ཨནུཔྤཏྟིཡཱཏི ཨཏྠོ. ཨིཏརཐཱ ཧི ཨཔརཀཱལཀིརིཡཱཡ སམཱནཀཏྟུཀཏཱ ན ལབྦྷཏཱིཏི. དྭཏྟིཀྑཏྟུནྟི དྭིཀྑཏྟུཾ ཝཱ ཏིཀྑཏྟུཾ ཝཱ. ཀེཙི པན ‘‘ཏིཀྑཏྟུ’ནྟི ཨིདཾ ཝཙནསིལིཊྛཏཱམཏྟཔྤཡོཛན’’ནྟི ཝདནྟི, ཏཾ པན ཏེསཾ ཨབྷིནིཝེསམཏྟཾ. ན ཧི ‘‘དྭིཀྑཏྟུཾ ཝོཊྛབྦནམེཝ པརིཝཏྟཏཱི’’ཏི ཝུཏྟེཔི ཝཙནསྶ ཨསིལིཊྛབྷཱཝོ ཨཏྠི, ན ཙ ཏིཀྑཏྟུཾ པཝཏྟིཡཱ བཱདྷཀཾ ཀིཉྩི ཝཙནཾ ཨཊྛཀཐཱདཱིསུ ཨཏྠི. ཨེཝཉྩ ཀཏྭཱ ཏཏྠ ཏཏྠ སཱིཧལ༹སཾཝཎྞནཱཀཱརཱཔི ‘‘དྭིཀྑཏྟུཾ ཝཱ ཏིཀྑཏྟུཾ ཝཱ’’ཨིཙྩེཝ ཝཎྞེནྟི. ཝོཊྛབྦནམེཝ པརིཝཏྟཏཱིཏི ཝོཊྛབྦནམེཝ པུནཔྤུནཾ ཨུཔྤཛྫཏི. ཏཾ པན ཨཔྤཏྭཱ ཨནྟརཱ ཙཀྑུཝིཉྙཱཎཱདཱིསུ ཋཏྭཱ ཙིཏྟཔྤཝཏྟིཡཱ ནིཝཏྟནཾ ནཏྠི.

ཨཱནནྡཱཙརིཡོ པནེཏྠ (དྷ. ས. མཱུལཊཱི. ༤༩༨ ཝིཔཱཀུདྡྷཱརཀཐཱཝཎྞནཱ) ‘‘ཨཱཝཛྫནཱ ཀུསལཱཀུསལཱནཾ ཁནྡྷཱནཾ ཨནནྟརཔཙྩཡེན པཙྩཡོ’’ཏི (པཊྛཱ. ༡.༡.༤༡༧) ཨཱཝཛྫནཱཡ ཀུསལཱཀུསལཱནཾ ཨནནྟརཔཙྩཡབྷཱཝསྶ ཝུཏྟཏྟཱ ཝོཊྛབྦནཱཝཛྫནཱནཉྩ ཨཏྠནྟརཱབྷཱཝཏོ སཏི ཨུཔྤཏྟིཡཾ ཝོཊྛབྦནཾ ཀཱམཱཝཙརཀུསལཱཀུསལཀིརིཡཛཝནཱནཾ ཨེཀནྟཏོ ཨནནྟརཔཙྩཡབྷཱཝེནེཝ པཝཏྟེཡྻ, ནོ ཨཉྙཐཱཏི མུཙྪཱཀཱལཱདཱིསུ མནྡཱིབྷཱུཏཝེགཏཱཡ ཛཝནཔཱརིཔཱུརིཡཱ པརིཏྟཱརམྨཎཾ ནིཡམིཏབྦཾ, ན ཝོཊྛབྦནསྶ དྭཏྟིཀྑཏྟུཾ པཝཏྟིཡཱཏི དཱིཔེཏི. ཀིཉྩཱཔི ཨེཝཾ དཱིཔེཏི, ཏིཧེཏུཀཝིཔཱཀཱནི པན ཨནནྟརཔཙྩཡབྷཱཝེན ཝུཏྟཱནེཝ. ཁཱིཎཱསཝཱནཾ ཙུཏིཝསེན པཝཏྟཱནི ན ཀསྶཙི ཨནནྟརཔཙྩཡབྷཱཝཾ གཙྪནྟཱིཏི ཏཱནི ཝིཡ ཝོཊྛབྦནམྤི པཙྩཡཝེཀལླཏོ ཀུསལཱཀུསལཱདཱིནཾ ཨནནྟརཔཙྩཡོ ¶ ན ཧོཏཱིཏི ན ན སཀྐཱ ཝཏྟུཾ, ཏསྨཱ ཨཊྛཀཐཱསུ ཨཱགཏནཡེནེཝེཏྠ པརིཏྟཱརམྨཎཾ ནིཡམིཏནྟི.

༡༤. ནཏྠི ¶ ཝཱིཐིཙིཏྟུཔྤཱདོ ཨུཔརིམཀོཊིཡཱ སཏྟཙིཏྟཀྑཎཱཡུཀསྶཔི དྭཏྟིཀྑཏྟུཾ ཝོཊྛབྦནུཔྤཏྟིཡཱ ཨཔྤཧོནཀབྷཱཝཏོ ཝཱིཐིཙིཏྟཱནཾ ཨུཔྤཱདོ ནཏྠི, བྷཝངྒཔཱཏོཝ ཧོཏཱིཏི ཨདྷིཔྤཱཡོ. བྷཝངྒཙལནམེཝཱཏི ཨཝདྷཱརཎཕལཾ དསྶེཏུཾ ‘‘ནཏྠི ཝཱིཐིཙིཏྟུཔྤཱདོ’’ཏི ཝུཏྟཾ. ཨཔརེ པན ‘‘ནཏྠི བྷཝངྒུཔཙྪེདོ’’ཏི ཨཝདྷཱརཎཕལཾ དསྶེནྟི, ཏཾ པན ཝཱིཐིཙིཏྟུཔྤཱདཱབྷཱཝཝཙནེནེཝ སིདྡྷཾ. སཏི ཧི ཝཱིཐིཙིཏྟུཔྤཱདེ བྷཝངྒཾ ཨུཔཙྪིཛྫཏི. བྷཝངྒུཔཙྪེདནཱམེན པན ཧེཊྛཱཔི ཝིསུཾ ཨཝུཏྟཏྟཱ ཨིདྷ ཨཝིསེསེན ཝུཏྟཾ.

༡༥. སབྦསོ ཝཱིཐིཙིཏྟུཔྤཏྟིཡཱ ཨབྷཱཝཏོ པཙྪིམཝཱརོཝིདྷམོགྷཝཱརཝསེན ཝུཏྟོ, ཨཉྙཏྠ (དྷ. ས. ཨཊྛ. ༤༩༨ ཝིཔཱཀུདྡྷཱརཀཐཱ) པན དུཏིཡཏཏིཡཝཱརཱཔི ཏདཱརམྨཎཛཝནེཧི སུཉྙཏྟཱ ‘‘མོགྷཝཱརཱ’’ཏི ཝུཏྟཱ. ཨཱརམྨཎབྷཱུཏཱཏི ཝིསཡབྷཱུཏཱ, པཙྩཡབྷཱུཏཱ ཙ. པཙྩཡོཔི ཧི ‘‘ཨཱརམྨཎ’’ནྟི ཝུཙྩཏི ‘‘ན ལཙྪཏི མཱརོ ཨོཏཱརཾ, ན ལཙྪཏི མཱརོ ཨཱརམྨཎ’’ནྟྱཱདཱིསུ (དཱི. ནི. ༣.༨༠) ཝིཡ. ཏེནེཝེཏྠ མོགྷཝཱརསྶཔི ཨཱརམྨཎབྷཱུཏཱ ཝིསཡཔྤཝཏྟཱིཏི སིདྡྷཾ. ཨཏིཔརིཏྟཱརམྨཎཉྷི མོགྷཝཱརཔཉྙཱཔནསྶ པཙྩཡོ ཧོཏི. ཨིཏརཐཱ ཧི བྷཝངྒཙལནསྶ སཀསཀགོཙརེཡེཝ པཝཏྟནཏོ པཙྪིམཝཱརསྶ ཨཏིཔརིཏྟཱརམྨཎེ པཝཏྟི ནཏྠཱིཏི ‘‘ཙཏུནྣཾ ཝཱརཱནཾ ཨཱརམྨཎབྷཱུཏཱ’’ཏི ཝཙནཾ དུརུཔཔཱདནཾ སིཡཱཏི.

༡༦. པཉྩདྭཱརེ ཡཐཱརཧཾ ཏཾཏཾདྭཱརཱནུརཱུཔཾ, ཏཾཏཾཔཙྩཡཱནུརཱུཔཾ, ཏཾཏཾཨཱརམྨཎཱདིཨནུརཱུཔཉྩ ཨུཔྤཛྫམཱནཱནི ཝཱིཐིཙིཏྟཱནི ཨཱཝཛྫནདསྶནཱདིསམྤཊིཙྪནསནྟཱིརཎཝོཊྛབྦནཛཝནཏདཱརམྨཎཝསེན ཨཝིསེསཏོ སཏྟེཝ ཧོནྟི. ཙིཏྟུཔྤཱདཱ ཙིཏྟཱནཾ ¶ ཝིསུཾ ཝིསུཾ ཨུཔྤཏྟིཝསེན ཨུཔྤཛྫམཱནཙིཏྟཱནིཡེཝ ཝཱ ཙཏུདྡས ཨཱཝཛྫནཱདིཔཉྩཀསཏྟཛཝནཏདཱརམྨཎདྭཡཝསེན. ཝིཏྠཱརཱ པན ཙཏུཔཉྙཱས སབྦེསམེཝ ཀཱམཱཝཙརཱནཾ ཡཐཱསམྦྷཝཾ ཏཏྠ ཨུཔྤཛྫནཏོ,

ཨེཏྠཱཏི ཝིསཡཔྤཝཏྟིསངྒཧེ.

པཉྩདྭཱརཝཱིཐིཝཎྞནཱ ནིཊྛིཏཱ.

མནོདྭཱརཝཱིཐི

པརིཏྟཛཝནཝཱརཝཎྞནཱ

༡༧. མནོདྭཱརིཀཙིཏྟཱནཾ ¶ ཨཏཱིཏཱནཱགཏམྤི ཨཱརམྨཎཾ ཧོཏཱིཏི ཏེསཾ ཨཏིམཧནྟཱདིཝསེན ཝིསཡཝཝཏྠཱནཾ ཀཱཏུཾ ན སཀྐཱཏི ཝིབྷཱུཏཱཝིབྷཱུཏཝསེནེཝེཏཾ ནིཡམེཏུཾ ‘‘ཡདི ཝིབྷཱུཏམཱརམྨཎ’’ནྟྱཱདི ཝུཏྟཾ.

༡༩. ཨེཏྠཱཏི མནོདྭཱརེ. ཨེཀཙཏྟཱལཱིས པཉྩདྭཱརཱཝེཎིཀཱནཾ དྭིཔཉྩཝིཉྙཱཎམནོདྷཱཏུཏྟཡཝསེན ཏེརསཙིཏྟཱནཾ ཏཏྠ ཨཔྤཝཏྟནཏོ.

པརིཏྟཛཝནཝཱརཝཎྞནཱ ནིཊྛིཏཱ.

ཨཔྤནཱཛཝནཝཱརཝཎྞནཱ

༢༠. ཝིབྷཱུཏཱཝིབྷཱུཏབྷེདོ ནཏྠི ཨཱརམྨཎསྶ ཝིབྷཱུཏཀཱལེཡེཝ ཨཔྤནཱསམྦྷཝཏོ.

༢༡. ཏཏྠ ཧི ཚབྦཱིསཏིམཧགྒཏལོཀུཏྟརཛཝནེསུ ཡཾ ཀིཉྩི ཛཝནཾ ཨཔྤནཱཝཱིཐིམོཏརཏཱིཏི སམྦནྡྷོ. པརིཀམྨོཔཙཱརཱནུལོམགོཏྲབྷུནཱམེན ཡཐཱཀྐམཾ ཨུཔྤཛྫིཏྭཱ ནིརུདྡེཏི ¶ ཡོཛནཱ. པཋམཙིཏྟཉྷི ཨཔྤནཱཡ པརིཀམྨཏྟཱ པཊིསངྑཱརཀབྷཱུཏཏྟཱ པརིཀམྨཾ. དུཏིཡཾ སམཱིཔཙཱརིཏྟཱ ཨུཔཙཱརཾ. ནཱཙྩཱསནྣོཔི ཧི ནཱཏིདཱུརཔྤཝཏྟི སམཱིཔཙཱརཱི ནཱམ ཧོཏི, ཨཔྤནཾ ཨུཔེཙྩ ཙརཏཱིཏི ཝཱ ཨུཔཙཱརཾ. ཏཏིཡཾ པུབྦབྷཱགེ པརིཀམྨཱནཾ, ཨུཔརིཨཔྤནཱཡ ཙ ཨནུཀཱུལཏྟཱ ཨནུལོམཾ. ཙཏུཏྠཾ པརིཏྟགོཏྟསྶ, པུཐུཛྫནགོཏྟསྶ ཙ ཨབྷིབྷཝནཏོ, མཧགྒཏགོཏྟསྶ, ལོཀུཏྟརགོཏྟསྶ ཙ བྷཱཝནཏོ ཝཌྜྷནཏོ གོཏྲབྷུ, ཨིམཱནི ཙཏྟཱརི ནཱམཱནི ཙཏུཀྑཏྟུཾ པཝཏྟིཡཾ ཨནཝསེསཏོ ལབྦྷནྟི, ཏིཀྑཏྟུཾ པཝཏྟིཡཾ པན ཨུཔཙཱརཱནུལོམགོཏྲབྷུནཱམེནེཝ ལབྦྷནྟི. ཨཊྛཀཐཱཡཾ (ཝིསུདྡྷི. ༢.༨༠༤) པན པུརིམཱནཾ ཏིཎྞཾ ¶ , དྭིནྣཾ ཝཱ ཨཝིསེསེནཔི པརིཀམྨཱདིནཱམཾ ཝུཏྟཾ, ཙཏུཀྑཏྟུཾ, ཏིཀྑཏྟུམེཝ ཝཱ པཉྩམཾ, ཙཏུཏྠཾ ཝཱ ཨུཔྤཛྫིཏབྦཨཔྤནཱནུརཱུཔཏོཏི ཨདྷིཔྤཱཡོ. པརིཀམྨཱདིནཱམཱནཾ ཨནཝསེསཏོ ལབྦྷམཱནཝཱརདསྶནཏྠཾ ‘‘ཙཏུཀྑཏྟུ’’ནྟི ཨཱདིཏོ ཝུཏྟཾ, གཎནཔཊིཔཱཊིཝསེན པན ‘‘པཉྩམཾ ཝཱ’’ཏི ཨོསཱནེ ཝུཏྟཾ.

ཡཐཱརཧནྟི ཁིཔྤཱབྷིཉྙདནྡྷཱབྷིཉྙཱནུརཱུཔཾ. ཁིཔྤཱབྷིཉྙསྶ ཧི ཏིཀྑཏྟུཾ པཝཏྟཀཱམཱཝཙརཛཝནཱནནྟརཾ ཙཏུཏྠཾ ཨཔྤནཱཙིཏྟམུཔྤཛྫཏི. དནྡྷཱབྷིཉྙསྶ ཙཏུཀྑཏྟུཾ པཝཏྟཛཝནཱནནྟརཾ པཉྩམཾ ཨཔྤནཱ ཨུཔྤཛྫཏི, ཡསྨཱ པན ཨལདྡྷཱསེཝནཾ ཨནུལོམཾ གོཏྲབྷུཾ ཨུཔྤཱདེཏུཾ ན སཀྐོཏི, ལདྡྷཱསེཝནམྤི ཙ ཚཊྛཾ སཏྟམཾ བྷཝངྒསྶ ཨཱསནྣབྷཱཝེན པཔཱཏཱསནྣཔུརིསོ ཝིཡ ཨཔྤནཱཝསེན པཏིཊྛཱཏུཾ ན སཀྐོཏི, ཏསྨཱ ཙཏུཏྠཏོ ཨོརཾ, པཉྩམཏོ པརཾ ཝཱ ཨཔྤནཱ ན ཧོཏཱིཏི དཊྛབྦཾ. ཡཐཱབྷིནཱིཧཱརཝསེནཱཏི རཱུཔཱརཱུཔལོཀུཏྟརམགྒཕལཱནུརཱུཔསམཐཝིཔསྶནཱབྷཱཝནཱཙིཏྟཱབྷིནཱིཧརཎཱནུརཱུཔཏོ, ཨཔྤནཱཡ ཝཱིཐི ཨཔྤནཱཝཱིཐི. ‘‘ཏཏོ པརཾ བྷཝངྒཔཱཏོཝ ཧོཏཱི’’ཏི ཨེཏྟཀེཡེཝ ཝུཏྟེ ཙཏུཏྠཾ, པཉྩམཾ ཝཱ ཨོཏིཎྞཨཔྤནཱཏོ ¶ པརཾ བྷཝངྒཔཱཏོཝ ཧོཏི, ན མགྒཱནནྟརཾ ཕལཙིཏྟཾ, སམཱཔཏྟིཝཱིཐིཡཉྩ ཛྷཱནཕལཙིཏྟཱནི པུནཔྤུནནྟི གཎྷེཡྻུནྟི པུན ‘‘ཨཔྤནཱཝསཱནེ’’ཏི ཝུཏྟཾ. ནིཀཱཡནྟརིཡཱ ཀིར ལོཀིཡཔྤནཱསུ པཋམཀཔྤནཱཏོ པརཾ སཏྟམཛཝནཔཱུརཎཏྠཾ དྭཏྟིཀྑཏྟུཾ ཀཱམཱཝཙརཛཝནཱནམྤི པཝཏྟིཾ ཝཎྞེནྟཱིཏི ཏེསཾ མཏིནིསེདྷནཏྠཾ ‘‘བྷཝངྒཔཱཏོཝཱ’’ཏི སཱཝདྷཱརཎཾ ཝུཏྟཾ.

༢༢. ཏཏྠཱཏི ཏེསུ ཨཊྛཉཱཎསམྤཡུཏྟཀཱམཱཝཙརཛཝནེསུ, ཏེསུ ཙ ཚབྦཱིསཏིམཧགྒཏལོཀུཏྟརཛཝནེསུ. ཏཏྠཱཏི ཝཱ ཏསྨིཾ ཨཔྤནཱཝཱརེ. སོམནསྶསཧགཏཛཝནཱནནྟརནྟི སོམནསྶསཧགཏཱནཾ ཙཏུནྣཾ ཀུསལཀིརིཡཛཝནཱནཾ ཨནནྟརཾ. སོམནསྶསཧགཏཱཝཱཏི ཙཏུཀྐཛ྄ཛྷཱནསྶ, སུཀྑཝིཔསྶཀཱདཱིནཾ མགྒཕལསྶ ཙ ཝསེན སོམནསྶསཧགཏཱཝ, ན པན ཨུཔེཀྑཱསཧགཏཱ བྷིནྣཝེདནཱནཾ ཨཉྙམཉྙཾ ཨཱསེཝནཔཙྩཡབྷཱཝསྶ ཨནུདྡྷཊཏྟཱ. པཱཊིཀངྑིཏབྦཱཏི པསཾསིཏབྦཱ, ཨིཙྪིཏབྦཱཏི ཝུཏྟཾ ཧོཏི. ཏཏྠཱཔཱིཏི ཏསྨིཾ ཨེཀཝེདནཛཝནཝཱརེཔི. ཀུསལཛཝནཱནནྟརནྟི ཙཏུབྦིདྷཉཱཎསམྤཡུཏྟཀུསལཛཝནཱནནྟརཾ ཀུསལཛཝནམཔྤེཏི, ན ཀིརིཡཛཝནཾ བྷིནྣསནྟཱནེ ནིབྦཏྟནཏོ. ཧེཊྛིམཉྩ ཕལཏྟཡམཔྤེཏི སམཱཔཏྟིཝཱིཐིཡནྟྱདྷིཔྤཱཡོ.

༢༣. སུཁཔུཉྙམྷཱ ¶ སོམནསྶསཧགཏཏིཧེཏུཀཀུསལདྭཡཏོ པརཾ ཨགྒཕལཝིཔཱཀཀིརིཡཝཛྫིཏལོཀིཡལོཀུཏྟརཙཏུཀྐཛ྄ཛྷཱནཛཝནཝསེན དྭཏྟིཾས, ཨུཔེཀྑཀཱ ཏིཧེཏུཀཀུསལདྭཡཏོ པརཾ ཏཐེཝ པཉྩམཛ྄ཛྷཱནཱནི དྭཱདས, སུཁིཏཀྲིཡཏོ ཏིཧེཏུཀདྭཡཏོ པརཾ ཀིརིཡཛ྄ཛྷཱནཙཏུཀྐསྶ, ཨགྒཕལཙཏུཀྐསྶ ཙ ཝསེན ཨཊྛ, ཨུཔེཀྑཀཱ ཏིཧེཏུཀདྭཡཏོ པརཾ ཨུཔེཀྑཱསཧགཏརཱུཔཱརཱུཔཀིརིཡཔཉྩཀསྶ, ཨགྒཕལསྶ ཙ ཝསེན ཚ ཨཔྤནཱ སམྦྷོནྟི.

༢༤. ཨེཏྠཱཏི ཝཱིཐིསངྒཧཱདྷིཀཱརེ.

ཨཔྤནཱཛཝནཝཱརཝཎྞནཱ ནིཊྛིཏཱ.

མནོདྭཱརཝཱིཐིཝཎྞནཱ ནིཊྛིཏཱ.

ཨཔྤནཱཛཝནཝཱརཝཎྞནཱ ནིཊྛིཏཱ.

ཏདཱརམྨཎནིཡམཝཎྞནཱ

༢༥. སབྦཏྠཱཔཱིཏི ¶ པཉྩདྭཱརམནོདྭཱརེཔི.

༢༦. ཨིཊྛེཏི ཨིཊྛམཛ྄ཛྷཏྟེ. ཨཏིཨིཊྛཱརམྨཎཉྷི ཝིསུཾ ཝཀྑཏི. ཀུསལཝིཔཱཀཱནི པཉྩཝིཉྙཱཎསམྤཊིཙྪནསནྟཱིརཎཏདཱརམྨཎཱནཱིཏི སམྦནྡྷོ. ཨིཊྛམཛ྄ཛྷཏྟེ སནྟཱིརཎཏདཱརམྨཎཱནི ཨུཔེཀྑཱསཧགཏཱནེཝཱཏི ཨཱཧ ‘‘ཨཏིཨིཊྛེ པན སོམནསྶསཧགཏཱནེཝཱ’’ཏི. ཝིཔཱཀསྶ ཧི ཀམྨཱནུབྷཱཝཏོ པཝཏྟམཱནསྶ ཨཱདཱསེ མུཁནིམིཏྟཾ ཝིཡ ནིབྦིཀཔྤཏཱཡ པཀཔྤེཏྭཱ གཧཎཱབྷཱཝཏོ ཡཐཱརམྨཎམེཝ ཝེདནཱཡོགོ ཧོཏི, ཀུསལཱཀུསལཱནཾ པན ཨཔྤཧཱིནཝིཔལླཱསེསུ སནྟཱནེསུ པཝཏྟིཡཱ ཨཏིཨིཊྛེཔི ཨིཊྛམཛ྄ཛྷཏྟཨནིཊྛཱཀཱརཏོ, ཨནིཊྛེཔི ཨིཊྛཨིཊྛམཛ྄ཛྷཏྟཱཀཱརཏོ གཧཎཾ ཧོཏི. ཏཐཱ ཧི ཨསྶདྡྷཱདཱིནཾ བུདྡྷཱདཱིསུ ཨཏིཨིཊྛཱརམྨཎེསུཔི ཨུཔེཀྑཱཛཝནཾ ཧོཏི, ཏིཏྠིཡཱདཱིནཉྩ དོམནསྶཛཝནཾ, གམྦྷཱིརཔཀཏིཀཱདཱིནཉྩ པཊིཀྐཱུལཱརམྨཎེ ཨུཔེཀྑཱཛཝནཾ, སུནཁཱདཱིནཉྩ ཏཏྠ སོམནསྶཛཝནཾ, པུརིམཔཙྪཱབྷཱགཔྤཝཏྟཱནི པན ཝིཔཱཀཱནི ཡཐཱཝཏྠུཀཱནེཝ ¶ . ཨཔིཙ ཨསུཙིདསྶནེ སུམནཱཡམཱནཱནཾ སུནཁཱདཱིནནྟི. ཙཀྑུཝིཉྙཱཎཱདཱིནཾ པན ཨཏིཨིཊྛཱནིཊྛེསུ པཝཏྟམཱནཱནམྤི ཨུཔེཀྑཱསཧགཏབྷཱཝེ ཀཱརཎཾ ཧེཊྛཱ ཀཐིཏམེཝ.

༢༧. ཏཏྠཱཔཱིཏི ཏདཱརམྨཎེསུཔི. སོམནསྶསཧགཏཀིརིཡཛཝནཱཝསཱནེཏི སཧེཏུཀཱཧེཏུཀསུཁསཧགཏཀིརིཡཔཉྩཀཱཝསཱནེ. ཁཱིཎཱསཝཱནཾ ཙིཏྟཝིཔལླཱསཱབྷཱཝེན ཀིརིཡཛཝནཱནིཔི ཡཐཱརམྨཎམེཝ པཝཏྟནྟཱིཏི ཝུཏྟཾ ‘‘སོམནསྶསཧགཏཀིརིཡཛཝནཱཝསཱནེ’’ཏྱཱདི. ཀེཙི པན ཨཱཙརིཡཱ ‘‘པཊྛཱནེ (དྷ. ས. མཱུལཊཱི. ༤༩༨ ཝིཔཱཀུདྡྷཱརཀཐཱཝཎྞནཱ) ‘ཀུསལཱཀུསལེ ནིརུདྡྷེ ཝིཔཱཀོ ¶ ཏདཱརམྨཎཏཱ ཨུཔྤཛྫཏཱི’ཏི (པཊྛཱ. ༣.༡.༩༨) ཀུསལཱཀུསལཱནམེཝཱནནྟརཾ ཏདཱརམྨཎཾ ཝུཏྟནྟི ནཏྠི ཀིརིཡཛཝནཱནནྟརཾ ཏདཱརམྨཎུཔྤཱདོ’’ཏི ཝདནྟི. ཏཏྠ ཝུཙྩཏེ – ཡདི ཨབྱཱཀཏཱནནྟརམྤི ཏདཱརམྨཎཾ ཝུཙྩེཡྻ. པརིཏྟཱརམྨཎེ ཝོཊྛབྦནཱནནྟརམྤི ཏསྶ པཝཏྟིཾ མཉྙེཡྻུནྟི ཀིརིཡཛཝནཱནནྟརཾ ཏདཱརམྨཎཾ ན ཝུཏྟཾ, ན པན ཨལབྦྷནཏོ. ལབྦྷམཱནསྶཔི ཧི ཀེནཙི ཨདྷིཔྤཱཡེན ཀཏྠཙི ཨཝཙནཾ དིསྶཏི, ཡཐཱ ཏཾ དྷམྨསངྒཧེ ལབྦྷམཱནམྤི ཧདཡཝཏྠུ དེསནཱབྷེདཔརིཧཱརཏྠཾ ན ཝུཏྟནྟི.

༢༨. དོམནསྶ…པེ… ཨུཔེཀྑཱསཧགཏཱནེཝ བྷཝནྟི, ན སོམནསྶསཧགཏཱནི ཨཉྙམཉྙཾ ཝིརུདྡྷསབྷཱཝཏྟཱ. ཏེནེཝ ཧི པཊྛཱནེ དོམནསྶཱནནྟརཾ སོམནསྶཾ, ཏདནནྟརཉྩ དོམནསྶཾ ཨནུདྡྷཊཾ. ཏཐཱ ཧི ‘‘སུཁཱཡ ཝེདནཱཡ སམྤཡུཏྟོ དྷམྨོ སུཁཱཡ ཝེདནཱཡ སམྤཡུཏྟསྶ དྷམྨསྶ ཨནནྟརཔཙྩཡེན པཙྩཡོ’’ཏྱཱདིནཱ (པཊྛཱ. ༡.༢.༤༥) སུཁདུཀྑཝེདནཱཡ སམྤཡུཏྟཱ དྷམྨཱ ཨཏྟནོ ཨཏྟནོ སམཱནཝེདནཱསམྤཡུཏྟཱནཾ ཨདུཀྑམསུཁཝེདནཱཡ སམྤཡུཏྟཀཱནཉྩ ཨནནྟརཔཙྩཡབྷཱཝེན དྭཱིསུ དྭཱིསུ ཝཱརེསུ ཝུཏྟཱ, ཨདུཀྑམསུཁཝེདནཱཡ སམྤཡུཏྟཀཱ པན སམཱནཝེདནཱསམྤཡུཏྟཱནཾ, ཨིཏརཝེདནཱདྭཡསམྤཡུཏྟཱནཉྩ དྷམྨཱནཾ ཨནནྟརཔཙྩཡབྷཱཝེན ཏཱིསུ ཝཱརེསཱུཏི ཨེཝཾ ཝེདནཱཏྟིཀེ སཏྟེཝ ཨནནྟརཔཙྩཡཝཱརཱ ཝུཏྟཱ. ཡདི ཙ དོམནསྶཱནནྟརཾ སོམནསྶཾ, སོམནསྶཱནནྟརཾ ཝཱ དོམནསྶཾ ཨུཔྤཛྫེཡྻ, སུཁདུཀྑཝེདནཱསམྤཡུཏྟཱནམྤི ཨཉྙམཉྙཾ ཨནནྟརཔཙྩཡཝསེན དྭེ ཝཱརེ ཝཌྜྷེཏྭཱ ནཝ ཝཱརཱ ཝཏྟབྦཱ སིཡུཾ, ན པནེཝཾ ཝུཏྟཱ. ཏསྨཱ ན ཏེསཾ ཏདནནྟརཾ ཨུཔྤཏྟི ཨཏྠི. ཨེཏྠ ཙ ‘‘སོམནསྶསཧགཏཀིརིཡཛཝནཱཝསཱནེ’’ཏྱཱདིནཱ ཨཡམྤི ནིཡམོ ཨནུཉྙཱཏོ –

‘‘པརིཏྟཀུསལཱདོས-པཱཔསཱཏཀྲིཡཱཛཝཱ ¶ ;

པཉྩསྭེཀཾ ཏདཱལམྦཾ, སུཁིཏེསུ ཡཐཱརཧཾ.

‘‘པཱཔཱཀཱམསུབྷཱ ¶ ཙེཝ, སོཔེཀྑཱ ཙ ཀྲིཡཱཛཝཱ;

སོཔེཀྑེསུ ཏདཱལམྦཾ, ཚསྭེཀམནུརཱུཔཏོ’’ཏི.

ཨཡཉྷི ཛཝནེན ཏདཱརམྨཎནིཡམོ ཨབྱབྷིཙཱརཱི. ‘‘ཉཱཎསམྤཡུཏྟཛཝནཏོ ཉཱཎསམྤཡུཏྟཏདཱརམྨཎ’’ནྟྱཱདིནཡཔྤཝཏྟོ པན ཨནེཀནྟིཀོ. ཡེབྷུཡྻེན ཧི ཨཀུསལཛཝནེསུ པརིཙིཏསྶ ཀདཱཙི ཀུསལཛཝནེསུ ཛཝིཏེསུ, ཀུསལཛཝནེསུ ཝཱ པརིཙིཏསྶ ཀདཱཙི ཨཀུསལཛཝནེསུ ཛཝིཏེསུ ཨཀུསལཱནནྟརཾ པཝཏྟཔརིཙཡེན ཏིཧེཏུཀཛཝནཏོཔི པརཾ ཨཧེཏུཀཏདཱརམྨཎཾ ཧོཏི, ཏཐཱ ཀུསལཱནནྟརཾ པཝཏྟཔརིཙཡེན ཨཀུསལཛཝནཏོ པརཾ ཏིཧེཏུཀཏདཱརམྨཎམྤི, པཊིསནྡྷིནིབྦཏྟཀཀམྨཏོ པན ཨཉྙཀམྨེན ཏདཱརམྨཎཔྤཝཏྟིཡཾ ཝཏྟབྦམེཝ ནཏྠི. ཏཐཱ ཙ ཝུཏྟཾ པཊྛཱནེ ‘‘ཨཧེཏུཀེ ཁནྡྷེ ཨནིཙྩཏོ དུཀྑཏོ ཨནཏྟཏོ ཝིཔསྶནྟི, ཀུསལཱཀུསལེ ནིརུདྡྷེ ཨཧེཏུཀོ ཝིཔཱཀོ ཏདཱརམྨཎཏཱ ཨུཔྤཛྫཏི, ཀུསལཱཀུསལེ ནིརུདྡྷེ སཧེཏུཀོ ཝིཔཱཀོ ཏདཱརམྨཎཏཱ ཨུཔྤཛྫཏཱི’’ཏི (པཊྛཱ. ༣.༡.༩༨).

ཏསྨཱཏི ཡསྨཱ དོམནསྶཛཝནཱཝསཱནེ ཨུཔེཀྑཱསཧགཏཱནེཝ ཧོནྟི. ཏསྨཱ དོམནསྶསཧགཏཛཝནཱཝསཱནེ ཨུཔེཀྑཱསཧགཏསནྟཱིརཎཾ ཨུཔྤཛྫཏཱིཏི སམྦནྡྷོ. ‘སོམནསྶཔཊིསནྡྷིཀསྶཱ’ཏི ཨིམིནཱཝ བྷཝངྒཔཱཏཱབྷཱཝོ དཱིཔིཏོཝ ཧོཏི དོམནསྶཱནནྟརཾ སོམནསྶཱབྷཱཝཏོཏི ཏཾ ཨཝཏྭཱ ཏདཱརམྨཎཱབྷཱཝམེཝ པརིཀཔྤེནྟོ ཨཱཧ ‘‘ཡདི ཏདཱརམྨཎསམྦྷཝོ ནཏྠཱི’’ཏི. སོམནསྶཔཊིསནྡྷིཀསྶ ཏིཏྠིཡཱདིནོ བུདྡྷཱདིཨཏིཨིཊྛཱརམྨཎེ པི པཊིཧཏཙིཏྟསྶ དོམནསྶཛཝནེ ཛཝིཏེ ཝུཏྟནཡེན སོམནསྶཏདཱརམྨཎསྶ ཨཏིཨིཊྛཱརམྨཎེ ཙ ཨུཔེཀྑཱསཧགཏཏདཱརམྨཎསྶ ཨནུཔྤཛྫནཏོ, ཀེནཙི ཝཱ ཨསཔྤཱཡེན པརིཧཱིནལོཀིཡཛ྄ཛྷཱནཾ ཨཱརབྦྷ ‘‘པཎཱིཏདྷམྨོ མེ ནཊྛོ’’ཏི ཝིཔྤཊིསཱརཾ ¶ ཛནེནྟསྶ དོམནསྶཛཝནེ སཏི ཨཀཱམཱཝཙརཱརམྨཎེ ཏདཱརམྨཎཱབྷཱཝཏོ ཡདི ཏདཱརམྨཎསྶ ཨུཔྤཏྟིསམྦྷཝོ ནཏྠཱིཏི ཨདྷིཔྤཱཡོ.

པརིཙིཏཔུབྦནྟི པུབྦེ པརིཙིཏཾ, ཏསྨིཾ བྷཝེ ཡེབྷུཡྻེན གཧིཏཔུབྦཾ. ཨུཔེཀྑཱསཧགཏསནྟཱིརཎཾ ¶ ཨུཔྤཛྫཏི ནིརཱཝཛྫནམྤི. ཡཐཱ ཏཾ ནིརོདྷཱ ཝུཊྛཧནྟསྶ ཕལཙིཏྟནྟྱདྷིཔྤཱཡོ. ཡཐཱཧུ –

‘‘ནིརཱཝཛྫཾ ཀཐཾ ཙིཏྟཾ, ཧོཏི ནེཏཉྷི སམྨཏཾ;

ནིཡམོ ན ཝིནཱཝཛྫཾ, ནིརོདྷཱ ཕལདསྶནཱ’’ཏི.

ཀེན པན ཀིཙྩེན ཨིདཾ ཙིཏྟཾ པཝཏྟཏཱིཏི? ཏདཱརམྨཎཀིཙྩེན ཏཱཝ ན པཝཏྟཏི ཛཝནཱརམྨཎསྶ ཨགྒཧཎཏོ, ནཱཔི སནྟཱིརཎཀིཙྩེན ཡཐཱསམྤཊིཙྪིཏསྶ སནྟཱིརཎཝསེན ཨཔྤཝཏྟནཏོ, པཊིསནྡྷིཙུཏཱིསུ ཝཏྟབྦམེཝ ནཏྠི, པཱརིསེསཏོ པན བྷཝསྶ ཨངྒབྷཱཝཏོ བྷཝངྒཀིཙྩེནཱཏི ཡུཏྟཾ སིཡཱ. ཨཱཙརིཡདྷམྨཔཱལཏྠེརེནཔི (དྷ. ས. ཨནུཊཱི. ༤༩༨ ཝིཔཱཀུདྡྷཱརཀཐཱཝཎྞནཱ) ཧི ཨཡམཏྠོ དསྶིཏོཝ. ཡཾ པན པཊིསནྡྷིབྷཝངྒཱནཾ དྷམྨཏོ, ཨཱརམྨཎཏོ ཙ སམཱནཏཾ ཝཀྑཏི, ཏཾ ཡེབྷུཡྻཏོཏི དཊྛབྦཾ. ན ཧི ཨིདམེཀཾ ཋཱནཾ ཝཛྫེཏྭཱ པཊིསནྡྷིབྷཝངྒཱནཾ ཝིསདིསཏཱ ཨཏྠི. ཏམནནྟརིཏྭཱཏི ཏཾ ཨཏྟནོ ཨནནྟརཾ ཨབྱཝཧིཏཾ ཀཏྭཱ, ཏདནནྟརནྟྱཏྠོ.

༢༩. ཀཱམཱཝཙར…པེ… ཨིཙྪནྟཱིཏི ཨེཏྠ ཀཱམཱཝཙརཛཝནཱཝསཱནེཡེཝ ཏདཱརམྨཎཾ ཨིཙྪནྟི ཀཱམཏཎྷཱནིདཱནཀམྨནིབྦཏྟཏྟཱ. ན ཧི ཏཾ ཀཱམཏཎྷཱཧེཏུཀེན ཀམྨུནཱ ཛནིཏཾ ཨཏཾསབྷཱཝསྶ རཱུཔཱརཱུཔཱཝཙརལོཀུཏྟརཛཝནསྶ ཨནནྟརཾ ཨུཔྤཛྫཏི. ཀིཾཀཱརཎཱ? ཨཛནཀཏྟཱ, ཛནཀསམཱནཏྟཱབྷཱཝཏོ ཙ. ཡཐཱ ཧི གེཧཏོ བཧི ནིཀྑམིཏུཀཱམོ བཱལཀོ ཛནཀཾ, ཏཾསདིསཾ ཝཱ ཨངྒུལིཡཾ གཧེཏྭཱ ནིཀྑམཏི, ནཱཉྙཾ རཱཛཔུརིསཱདིཾ, ཨེཝཾ བྷཝངྒཝིསཡཏོ ¶ ཨཉྙཏྠ པཝཏྟམཱནཾ ཏདཱརམྨཎཾ ཛནཀཾ ཀཱམཱཝཙརཀུསལཱཀུསལཾ, ཏཾསདིསཾ ཝཱ ཀཱམཱཝཙརཀིརིཡཛཝནཾ ཨནུབནྡྷཏི, ན པན ཏསྶ ཝིསདིསཱནི མཧགྒཏལོཀུཏྟརཛཝནཱནི. ཏཐཱ ཀཱམཱཝཙརསཏྟཱནམེཝ ཏདཱརམྨཎཾ ཨིཙྪནྟི, ན བྲཧྨཱནཾ ཏདཱརམྨཎཱུཔནིསྶཡསྶ ཀཱམཱཝཙརཔཊིསནྡྷིབཱིཛསྶཱབྷཱཝཏོ. ཏཐཱ ཀཱམཱཝཙརདྷམྨེསྭེཝ ཨཱརམྨཎབྷཱུཏེསུ ཨིཙྪནྟི. ན ཨིཏརེསུ ཨཔརིཙིཏཏྟཱ. ཡཐཱ ཧི སོ བཱལཀོ ཛནཀཾ, ཏཾསདིསཾ ཝཱ ཨནུགཙྪནྟོཔི ཨརཉྙཱདིཨཔརིཙིཏཊྛཱནཾ གཙྪནྟཾ ཨནནུབནྡྷིཏྭཱ པམུཁངྒཎཱདིམྷི པརིཙིཏཊྛཱནེཡེཝ ཨནུབནྡྷཏི, ཨེཝམིདམྤི རཱུཔཱཝཙརཱདིཨཔརིཙིཏཱརམྨཎཾ ཨཱརབྦྷ པཝཏྟནྟཾ ནཱནུབནྡྷཏི. ཨཔིཙ ཀཱམཏཎྷཱཡཏྟཀམྨཛནིཏཏྟཱཔི ཨེཏཾ ཀཱམཏཎྷཱརམྨཎེསུ པརིཏྟདྷམྨེསྭེཝ པཝཏྟཏཱིཏི ཝུཏྟོཝཱཡམཏྠོ. ཧོནྟི ཙེཏྠ –

‘‘ཛནཀཾ ¶ ཏཾསམཱནཾ ཝཱ, ཛཝནཾ ཨནུབནྡྷཏི;

ན ཏུ ཨཉྙཾ ཏདཱལམྦཾ, བཱལདཱརཀལཱིལཡཱ.

‘‘བཱིཛསྶཱབྷཱཝཏོ ནཏྠི, བྲཧྨཱནམྤི ཨིམསྶ ཧི;

པཊིསནྡྷིམནོ བཱིཛཾ, ཀཱམཱཝཙརསཉྙིཏཾ.

‘‘ཋཱནེ པརིཙིཏེཡེཝ, ཏཾ ཨིདཾ བཱལཀོ ཝིཡ;

ཨནུཡཱཏཱིཏི ནཱཉྙཏྠ, ཧོཏི ཏཎྷཱཝསེན ཝཱ’’ཏི.

ནནུ ཙ ‘‘ཀཱམཱཝཙརཔཊིསནྡྷིབཱིཛཱབྷཱཝཏོ’’ཏི ཝུཏྟཾ, ཏཐཱ ཙ ཙཀྑུཝིཉྙཱཎཱདཱིནམྤི ཨབྷཱཝོ ཨཱཔཛྫཏཱིཏི? ནཱཔཛྫཏི ཨིནྡྲིཡཔྤཝཏྟིཨཱནུབྷཱཝཏོ, དྭཱརཝཱིཐིབྷེདེ ཙིཏྟནིཡམཏོ ཙ.

ཏདཱརམྨཎནིཡམཝཎྞནཱ ནིཊྛིཏཱ.

ཛཝནནིཡམཝཎྞནཱ

༣༢. མནྡཔྤཝཏྟིཡནྟི ¶ མརཎཱསནྣཀཱལེ ཝཏྠུདུབྦལཏཱཡ མནྡཱིབྷཱུཏཝེགཏྟཱ མནྡཾ ཧུཏྭཱ པཝཏྟིཡཾ. མརཎཀཱལཱདཱིསཱུཏི ཨཱདི-སདྡེན མུཙྪཱཀཱལཾ སངྒཎྷཱཏི.

༣༣. བྷགཝཏོ…པེ… ཝདནྟཱིཏི བྷགཝཏོ ཡམཀཔཱཊིཧཱརིཡཀཱལཱདཱིསུ ཨུདཀཀྑནྡྷཨགྒིཀྑནྡྷཔྤཝཏྟནཱདིཨཏྠཾ ཝིསུཾ ཝིསུཾ པཱདཀཛ྄ཛྷཱནཾ སམཱཔཛྫིཏྭཱ ཏཏོ ཝུཊྛཱཡ ཛྷཱནདྷམྨེ ཝིསུཾ ཝིསུཾ ཨཱཝཛྫེནྟསྶ ཨཱཝཛྫནཝསིཏཱཡ མཏྠཀཔྤཏྟིཡཱ ཨཱཝཛྫནཏཔྤརོཝ ཙིཏྟཱབྷིནཱིཧཱརོ ཧོཏཱིཏི ཡཐཱཝཛྫིཏཛྷཱནངྒཱརམྨཎཱནི ཙཏྟཱརི, པཉྩཝཱ པཙྩཝེཀྑཎཛཝནཙིཏྟཱནི པཝཏྟནྟཱིཏི ཝདནྟི (ཝིསུདྡྷི. ༡.༧༨) ཨཊྛཀཐཱཙརིཡཱ. ‘‘བྷགཝཏོ’’ཏི ཙ ཨིདཾ ནིདསྶནམཏྟཾ ཨཉྙེསམྤི དྷམྨསེནཱཔཏིཨཱདཱིནཾ ཨེཝརཱུཔེ ཨཙྩཱཡིཀཀཱལེ ཨཔརིཔུཎྞཛཝནཱནཾ པཝཏྟནཏོ. ཏཐཱ ཙ ཝུཏྟཾ ཨཊྛཀཐཱཡཾ ‘‘ཨཡཉྩ མཏྠཀཔྤཏྟཱ ཝསིཏཱ བྷགཝཏོ ཡམཀཔཱཊིཧཱརིཡཀཱལེ ¶ ཨཉྙེསཾ ཝཱ ཨེཝརཱུཔེ ཀཱལེ’’ཏི (ཝིསུདྡྷི. ༡.༧༨). ‘‘ཙཏྟཱརི པཉྩ ཝཱ’’ཏི ཙ པནེཏཾ ཏིཀྑིནྡྲིཡམུདིནྡྲིཡཝསེན གཧེཏབྦནྟི ཨཱཙརིཡདྷམྨཔཱལཏྠེརེན (ཝིསུདྡྷི. མཧཱ. ༡.༧༨) ཝུཏྟཾ, ཏསྨཱ བྷགཝཏོ ཙཏྟཱརི, ཨཉྙེསཾ པཉྩཔཱིཏི ཡུཏྟཾ ཝིཡ དིསྶཏི.

༣༤. ཨཱདིཀམྨིཀསྶཱཏི ཨཱདིཏོ ཀཏཡོགཀམྨསྶ. པཋམཾ ནིབྦཏྟཱ ཨཔྤནཱ པཋམཀཔྤནཱ. ཨབྷིཉྙཱཛཝནཱནམྤི ‘‘པཋམཀཔྤནཱཡཱ’’ཏི ཨདྷིཀཱརོ སིཡཱཏི ཨཱཧ ‘‘སབྦདཱཔཱི’’ཏི, པཋམུཔྤཏྟིཀཱལེ, ཙིཎྞཝསཱིཀཱལེ ཙ པཉྩཱབྷིཉྙཱཛཝནཱནི ཨེཀཝཱརམེཝ ཛཝནྟཱིཏྱཏྠོ.

༣༥. མགྒཱཡེཝ ཨུཔྤཛྫནཏོ མགྒུཔྤཱདཱ. ཡཐཱརཧནྟི པཉྩམཾ ཝཱ ཙཏུཏྠཾ ཝཱ ཨུཔྤནྣམགྒཱནུརཱུཔཾ. སཏྟཛཝནཔརམཏྟཱ ཧི ཨེཀཱཝཛྫནཝཱིཐིཡཱ ¶ ཙཏུཏྠཾ ཨུཔྤནྣམགྒཏོ པརཾ ཏཱིཏི ཕལཙིཏྟཱནི, པཉྩམཾ ཨུཔྤནྣམགྒཏོ པརཾ དྭེ ཝཱ ཧོནྟི.

༣༦. ནིརོདྷསམཱཔཏྟིཀཱལེཏི ནིརོདྷསྶ པུབྦབྷཱགེ. ཙཏུཏྠཱརུཔྤཛཝནནྟི ཀུསལཀིརིཡཱནཾ ཨཉྙཏརཾ ནེཝསཉྙཱནཱསཉྙཱཡཏནཛཝནཾ. ཨནཱགཱམིཁཱིཎཱསཝཱཡེཝ ནིརོདྷསམཱཔཏྟིཾ སམཱཔཛྫནྟི, ན སོཏཱཔནྣསཀདཱམིནོཏི ཝུཏྟཾ ‘‘ཨནཱགཱམིཕལཾ ཝཱ ཨརཧཏྟཕལཾ ཝཱ’’ཏི. ཝིབྷཏྟིཝིཔལླཱསོ ཙེཏྠ དཊྛབྦོ ‘‘ཨནཱགཱམིཕལེ ཝཱ ཨརཧཏྟཕལེ ཝཱ’’ཏི. ཏེནཱཧ ‘‘ནིརུདྡྷེ’’ཏི. ཡཐཱརཧནྟི ཏཾཏཾཔུགྒལཱནུརཱུཔཾ.

༣༨. སབྦཏྠཱཔི སམཱཔཏྟིཝཱིཐིཡནྟི སཀལཱཡཔི ཛྷཱནསམཱཔཏྟིཝཱིཐིཡཾ, ཕལསམཱཔཏྟིཝཱིཐིཡཉྩ.

༣༩. པརིཏྟཱནི ཛཝནཱནི སཏྟཀྑཏྟུཾ མཏཱནི ཨུཀྐཾསཀོཊིཡཱ. མགྒཱབྷིཉྙཱ པན སཀིཾ ཨེཀཝཱརམེཝ མཏཱ. ཨཝསེསཱནི ཨབྷིཉྙཱམགྒཝཛྫིཏཱནི མཧགྒཏལོཀུཏྟརཛཝནཱནི བཧཱུནིཔི ལབྦྷནྟི སམཱཔཏྟིཝཱིཐིཡཾ ཨཧོརཏྟམྤི པཝཏྟནཏོ. ཨཔི-སདྡེན ལོཀིཡཛ྄ཛྷཱནཱནི པཋམཀཔྤནཱཡཾ, ཨནྟིམཕལདྭཡཉྩ ནིརོདྷཱནནྟརཾ ཨེཀཝཱརཾ, ཕལཙིཏྟཱནི མགྒཱནནྟརཾ དྭཏྟིཀྑཏྟུམྤཱིཏི སམྤིཎྜེཏི.

ཛཝནནིཡམཝཎྞནཱ ནིཊྛིཏཱ.

པུགྒལབྷེདཝཎྞནཱ

༤༠. ཨིདཱནི ¶ དུཧེཏུཀཱཧེཏུཀཱཔཱཡིཀཱཧེཏུཀཏིཧེཏུཀཝསེན ཙཏུབྦིདྷཱནཾ པུཐུཛྫནཱནཾ, མགྒཊྛཕལཊྛཝསེན ཨཊྛཝིདྷཱནཾ ཨརིཡཱནནྟི དྭཱདསནྣཾ པུགྒལཱནཾ ཨུཔྤཛྫནཀཝཱིཐིཙིཏྟཔརིཙྪེདདསྶནཏྠཾ པཋམཾ ཏཱཝ ཏེསཾ ཝཛྫིཏབྦཙིཏྟཱནི དསྶེཏུམཱཧ ‘‘དུཧེཏུཀཱནམཧེཏུཀཱནཉྩཱ’’ཏྱཱདི. པཊིསནྡྷིཝིཉྙཱཎསཧགཏཱལོབྷཱདོསཝསེན དྭེ ཧེཏཱུ ¶ ཨིམེསནྟི དྭིཧེཏུཀཱ. ཏཱདིསཱནཾ ཧེཏཱུནཾ ཨབྷཱཝཏོ ཨཧེཏུཀཱ. མ-ཀཱརོ པདསནྡྷིཀརོ. ཨཔྤནཱཛཝནཱནི ན ལབྦྷནྟི ཝིཔཱཀཱཝརཎསབྦྷཱཝཏོ. དྭིཧེཏུཀཱཧེཏུཀཔཊིསནྡྷི ཧི ‘‘ཝིཔཱཀཱཝརཎ’’ནྟི ཝུཙྩཏི. ཨཔྤནཱཛཝནཱབྷཱཝཏོཡེཝ ཨརཧཏྟཾ ནཏྠཱིཏི ཀིརིཡཛཝནཱནི ན ལབྦྷནྟི.

༤༡. ‘‘སཧེཏུཀཾ (པཊྛཱ. ༣.༡.༡༠༢) བྷཝངྒཾ ཨཧེཏུཀསྶ བྷཝངྒསྶ ཨནནྟརཔཙྩཡེན པཙྩཡོ’’ཏི པཱཋཏོ ཨཧེཏུཀཱནམྤི ནཱནཱཀམྨེན དྭིཧེཏུཀཏདཱརམྨཎཾ སམྦྷཝཏི, དྭིཧེཏུཀཱནཾ ཝཏྟབྦམེཝ ནཏྠི. མཱུལསནྡྷིཡཱ པན ཛལ༹བྷཱཝཏོ ཨུབྷིནྣམྤི ནཏྠི ཏིཧེཏུཀཏདཱརམྨཎནྟི ཨཱཧ ‘‘ཏཐཱ ཉཱཎསམྤཡུཏྟཝིཔཱཀཱནི ཙཱ’’ཏི. ཨཱཙརིཡཛོཏིཔཱལཏྠེརེན པན ‘‘སཧེཏུཀཾ བྷཝངྒ’’ནྟི ཨཝིསེསེན ཝུཏྟཏྟཱ ཨཧེཏུཀཱནམྤི ཏིཧེཏུཀཏདཱརམྨཎཾ ཝཏྭཱ ཨིདྷ ཉཱཎསམྤཡུཏྟཝིཔཱཀཱབྷཱཝཝཙནསྶ པརིཧཱསཝསེན ‘‘སོ ཨེཝ པུཙྪིཏབྦོ, ཡོ ཏསྶ ཀཏྟཱ’’ཏི ཝུཏྟཾ, ཏཾ པན པརིཧཱསཝསེན ཝུཏྟམྤི ཨཱཙརིཡཾ པུཙྪིཏྭཱཝ ཝིཛཱནནཏྠཾ ཝུཏྟཝཙནཾ ཝིཡ ཋིཏཾ. ཏཐཱ ཧི ཨཱཙརིཡེནེཝེཏྠ ཀཱརཎཾ པརམཏྠཝིནིཙྪཡེ ཝུཏྟཾ –

‘‘ཉཱཎཔཱཀཱ ན ཝཏྟནྟི, ཛལ༹ཏྟཱ མཱུལསནྡྷིཡཱ’’ཏི; (པརམ. ཝི. ༢༧༡);

ཨཔརེ པན ‘‘ཡཐཱ ཨཧེཏུཀཱནཾ སཧེཏུཀཏདཱརམྨཎཾ ཧོཏི, ཨེཝཾ དྭིཧེཏུཀཱནཾ ཏིཧེཏུཀཏདཱརམྨཎམྤཱི’’ཏི ཝཎྞེནྟི, ཏེསཾ མཏཱནུརོདྷེན ཙ ཨིདྷཱཔི ཉཱཎསམྤཡུཏྟཝིཔཱཀཔཊིཀྑེཔོ ཨཧེཏུཀེཡེཝ སནྡྷཱཡཱཏི ཝདནྟི. ཏཏྠ པན པམཱཎཔཱཋཱབྷཱཝཏོ ཨཱཙརིཡེན ཨུབྷིནྣམྤི སཱདྷཱརཎཝསེན ཉཱཎསམྤཡུཏྟཝིཔཱཀཱབྷཱཝེ ཀཱརཎཾ ཝཏྭཱ སམཀམེཝ ཙིཏྟཔརིཙྪེདསྶ དསྶིཏཏྟཱ ཏེསཾ ཝཙནཾ ཝཱིམཾསིཏྭཱ སམྤཊིཙྪིཏབྦཾ. ཨཧེཏུཀཱཔེཀྑཱཡ ཙེཏྠ ¶ ‘‘སུགཏིཡ’’ནྟི ཝཙནཾ, ཏཾ པན ཨཏྠཏོ ཨནུཉྙཱཏདྭིཧེཏུཀཝིཔཱཀཱནཾ ཏཏྠེཝ སམྦྷཝདསྶནཔརཾ. ཏེནཱཧ ‘‘དུགྒཏིཡཾ པནཱ’’ཏྱཱདི.

༤༣. ཏིཧེཏུཀེསཱུཏི ¶ པཊིསནྡྷིཝིཉྙཱཎསཧགཏཱལོབྷཱདོསཱམོཧཝསེན ཏིཧེཏུཀེསུ པུཐུཛྫཱདཱིསཱུ ནཝཝིདྷཔུགྒལེསུ.

༤༥. དིཊྛཱི…པེ… སེཀྑཱནནྟི སིཀྑཱཡ ཨཔརིཔཱུརཀཱརིཏཱཡ སིཀྑནསཱིལཏཱཡ ‘‘སེཀྑཱ’’ཏི ལདྡྷནཱམཱནཾ སོཏཱཔནྣསཀདཱགཱམཱིནཾ པུགྒལཱནཾ པཋམམགྒེནེཝ སཀྐཱཡདིཊྛིཝིཙིཀིཙྪཱནཾ པཧཱིནཏྟཱ ཏཾསཧགཏཛཝནཱནི ཙེཝ ཙ-སདྡེན ཨཱཀཌྜྷིཏཱནི ཁཱིཎཱསཝཱཝེཎིཀཱནི ཀིརིཡཛཝནཱནི ཙ ན ལབྦྷནྟི.

༤༦. པཊིགྷཛཝནཱནི ཙཱཏི དོམནསྶཛཝནཱནི ཙེཝ དིཊྛིསམྤཡུཏྟཝིཙིཀིཙྪཱསཧགཏཀིརིཡཛཝནཱནི ཙ.

༤༧. ལོཀུཏྟར…པེ… སམུཔྤཛྫནྟཱིཏི ཙཏུནྣཾ མགྒཱནཾ ཨེཀཙིཏྟཀྑཎིཀབྷཱཝེན པུགྒལནྟརེསུ ཨསམྦྷཝཏོ, ཧེཊྛིམཧེཊྛིམཱནཉྩ ཨུཔརཱུཔརིསམཱཔཏྟིཡཱ ཨནདྷིགཏཏྟཱ, ཨུཔརཱུཔརིཔུགྒལཱནཉྩ ཨསམུགྒྷཱཊིཏཀམྨཀིལེསནིརོདྷེན པུཐུཛྫནེཧི ཝིཡ སོཏཱཔནྣཱནཾ སོཏཱཔནྣཱདཱིཧི པུགྒལནྟརབྷཱཝཱུཔགམནེན པཊིཔྤསྶདྡྷཏྟཱ ཙ ཨཊྛཔི ལོཀུཏྟརཛཝནཱནི ཡཐཱསཀཾ མགྒཕལཊྛཱནཾ ཨརིཡཱནམེཝ སམུཔྤཛྫནྟི.

༤༨. ཨིདཱནི ཏེསཾ ཏེསཾ པུགྒལཱནཾ ཡཐཱཔཊིཀྑིཏྟཛཝནཱནི ཝཛྫེཏྭཱ པཱརིསེསཏོ ལབྦྷམཱནཛཝནཱནི སམྤིཎྜེཏྭཱ དསྶེཏུཾ ‘‘ཨསེཀྑཱན’’ནྟྱཱདི ཝུཏྟཾ. ཏིཝིདྷསིཀྑཱཡ པརིཔཱུརཀཱརིབྷཱཝཏོ ཨསེཀྑཱནཾ ཁཱིཎཱསཝཱནཾ ཏེཏྟིཾསཝིདྷཀུསལཱཀུསལསྶ, ཧེཊྛིམཕལཏྟཡསྶ, ཝཱིཐིམུཏྟཱནཉྩ ནཝམཧགྒཏཝིཔཱཀཱནཾ ཝསེན པཉྩཙཏྟཱལཱིསཝཛྫིཏཱནི སེསཱནི ¶ ཏེཝཱིསཏིཀཨཱམཱཝཙརཝིཔཱཀཝཱིསཏིཀིརིཡཨརཧཏྟཕལཝསེན ཙཏུཙཏྟཱལཱིས ཝཱིཐིཙིཏྟཱནི སམྦྷཝཱ ཡཐཱལཱབྷཾ ཀཱམབྷཝེ ཋིཏཱནཾ ཝསེན ཨུདྡིསེ.

སེཀྑཱནཾ ཨཊྛཱརསཀིརིཡཛཝནདིཊྛིཝིཙིཀིཙྪཱསཧགཏཔཉྩཀཨགྒཕལམཧགྒཏཝིཔཱཀཝསེན ཏེཏྟིཾས ཝཛྫེཏྭཱ ཏེཝཱིསཏིཀཱམཱཝཙརཝིཔཱཀཨཱཝཛྫནདྭཡཨེཀཝཱིསཏིཀུསལསཏྟཱཀུསལཧེཊྛིམཕལཏྟཡཝསེན ཚཔྤཉྙཱས ཝཱིཐིཙིཏྟཱནི ཡཐཱསམྦྷཝཾ ཨུདྡིསེ ཨཝིསེསཏོ. ཝིསེསཏོ པན སོཏཱཔནྣསཀདཱགཱམཱིནཾ ཨེཀཔཉྙཱས, ཨནཱགཱམཱིནཾ ཨེཀཱུནཔཉྙཱས, ཨཝསེསཱནཾ ཙཏུནྣཾ པུཐུཛྫནཱནཾ ¶ ཨཊྛཱརསཀིརིཡཛཝནསབྦལོཀུཏྟརམཧགྒཏཝིཔཱཀཝསེན པཉྩཏིཾས ཝཛྫེཏྭཱ ཨཝསེསཱནི ཀཱམཱཝཙརཝིཔཱཀཨཱཝཛྫནདྭཡལོཀིཡཀུསལཱཀུསལཝསེན ཙཏུཔཉྙཱས ཝཱིཐིཙིཏྟཱནི ཡཐཱསམྦྷཝཏོ ཨུདྡིསེ ཨཝིསེསཏོ. ཝིསེསཏོ པན ཏིཧེཏུཀཱནཾ ཙཏུཔཉྙཱསེཝ ལབྦྷནྟི, དྭིཧེཏུཀཱཧེཏུཀཱནཾ ཉཱཎསམྤཡུཏྟཝིཔཱཀཨཔྤནཱཛཝནཝཛྫིཏཱནི ཨེཀཙཏྟཱལཱིས, ཨཱཔཱཡིཀཱནཾ ཏཱནེཝ དྭིཧེཏུཀཝིཔཱཀཝཛྫིཏཱནི སཏྟཏིཾས ཝཱིཐིཙིཏྟཱནཱིཏི དཊྛབྦཾ.

པུགྒལཱནཾ ཝསེན ཙིཏྟཔྤཝཏྟིབྷེདོ པུགྒལབྷེདོ.

པུགྒལབྷེདཝཎྞནཱ ནིཊྛིཏཱ.

བྷཱུམིཝིབྷཱགཝཎྞནཱ

༤༩. སབྦཱནིཔི ཝཱིཐིཙིཏྟཱནི ཨུཔལབྦྷནྟི ཚནྣཾ དྭཱརཱནཾ, སབྦེསཉྩ པུགྒལཱནཾ ཏཏྠ སམྦྷཝཏོ. ཡཐཱརཧནྟི ཏཾཏཾབྷཝཱནུརཱུཔཾ, ཏཾཏཾཔུགྒལཱནུརཱུཔཉྩ.

༥༢. ཏྱཱདིནཱ ¶ གྷཱནཝིཉྙཱཎཱདཱིནམྤི པཊིཀྑེཔོ ཧེསྶཏཱིཏི རཱུཔཱཝཙརབྷཱུམིཡཾ པཊིགྷཛཝནཏདཱརམྨཎཱནེཝ པཊིཀྑིཏྟཱནི. སབྦཏྠཱཔཱིཏི ཀཱམབྷཝེ, རཱུཔབྷཝེ, ཨརཱུཔབྷཝེ ཙ.

༥༤. ཀཱམབྷཝེ ཡཐཱརཧཾ ཝཱིཐིམུཏྟཝཛྫཱནི ཨསཱིཏི ཝཱིཐིཙིཏྟཱནི, རཱུཔབྷཝེ པཊིགྷདྭཡཨཊྛཏདཱརམྨཎགྷཱནཱདིཝིཉྙཱཎཚཀྐཝཱིཐིམུཏྟཀཝསེན པཉྩཝཱིསཏི ཝཛྫེཏྭཱ སེསཱནི ཨཱཝཛྫནདྭཡནཝཨཧེཏུཀཝིཔཱཀཏེཔཉྙཱསཛཝནཝསེན ཙཏུསཊྛི, ཨརཱུཔེ བྷཝེ ཏེཝཱིསཏིཀཱམཱཝཙརཝིཔཱཀཔཋམམགྒཔཉྩདསརཱུཔཱཝཙརཔཊིགྷདྭཡཨཱརུཔྤཝིཔཱཀཀིརིཡམནོདྷཱཏུཧསནཝསེན སཏྟཙཏྟཱལཱིས ཝཛྫེཏྭཱ སེསཱནི ཚབྦཱིསཏི པརིཏྟཛཝནཨཊྛཨཱརུཔྤཛཝནསཏྟལོཀུཏྟརཛཝནམནོདྭཱརཱཝཛྫནཝསེན དྭེཙཏྟཱལཱིས ཙིཏྟཱནི ལབྦྷརེ ཨུཔལབྦྷནྟི.

ཀེཙི ¶ པན ‘‘རཱུཔབྷཝེ ཨནིཊྛཱརམྨཎཱབྷཱཝཏོ ཨིདྷཱགཏཱནཾཡེཝ བྲཧྨཱནཾ ཨཀུསལཝིཔཱཀསམྦྷཝོཏི ཏཱནི པརིཧཱཔེཏྭཱ པཉྩཔརིཏྟཝིཔཱཀེཧི སདྡྷིཾ རཱུཔབྷཝེ སཊྛིཡེཝ ཝཱིཐིཙིཏྟཱནཱི’’ཏི ཝདནྟི. ཨིདྷ པན ཏཏྠ ཋཏྭཱཔི ཨིམཾ ལོཀཾ པསྶནྟཱནཾ ཨནིཊྛཱརམྨཎསྶ ཨསམྦྷཝོ ན སཀྐཱ ཝཏྟུནྟི ཏེཧི སདྡྷིཾཡེཝ ཏཏྠ ཙཏུསཊྛི ཝུཏྟཱནི. ཨེཝཉྩ ཀཏྭཱ ཝུཏྟཾ དྷམྨཱནུསཱརཎིཡཾ ‘‘ཡདཱ བྲཧྨཱནོ ཀཱམཱཝཙརཾ ཨནིཊྛཱརམྨཎཾ ཨཱལམྦནྟི, ཏདཱ ཏཾ སུགཏིཡམྤི ཨཀུསལཝིཔཱཀཙཀྑུསོཏཝིཉྙཱཎམནོདྷཱཏུསནྟཱིརཎཱནཾ ཨུཔྤཏྟི སམྦྷཝཏཱི’’ཏི.

བྷཱུམིཝསེན ཝིབྷཱགོ བྷཱུམིཝིབྷཱགོ.

བྷཱུམིཝིབྷཱགཝཎྞནཱ ནིཊྛིཏཱ.

༥༥. ཡཐཱསམྦྷཝནྟི ཏཾཏཾདྭཱརེསུ, ཏཾཏཾབྷཝེསུ ཝཱ སམྦྷཝཱནུརཱུཔཏོ. ཡཱཝཏཱཡུཀནྟི པཊིསནྡྷིཏོ པརཾ བྷཝནིཀནྟིཝསེན པཝཏྟམནོདྭཱརིཀཙིཏྟཝཱིཐིཏོ པཊྛཱཡ ཙུཏིཙིཏྟཱཝསཱནཾ ¶ , ཏཏོ པུབྦེ པཝཏྟབྷཝངྒཱཝསཱནཾ ཝཱ ཨབྦོཙྪིནྣཱ ཨསཏི ནིརོདྷསམཱཔཏྟིཡནྟི ཨདྷིཔྤཱཡོ.

ཨིཏི ཨབྷིདྷམྨཏྠཝིབྷཱཝིནིཡཱ ནཱམ ཨབྷིདྷམྨཏྠསངྒཧཝཎྞནཱཡ

ཝཱིཐིཔརིཙྪེདཝཎྞནཱ ནིཊྛིཏཱ.

༥. ཝཱིཐིམུཏྟཔརིཙྪེདཝཎྞནཱ

༡. ཨེཏྟཱཝཏཱ ཝཱིཐིསངྒཧཾ དསྶེཏྭཱ ཨིདཱནི ཝཱིཐིམུཏྟསངྒཧཾ དསྶེཏུམཱརབྷནྟོ ཨཱཧ ‘‘ཝཱིཐིཙིཏྟཝསེནེཝ’’ནྟྱཱདི. ཨེཝཾ ཡཐཱཝུཏྟནཡེན ཝཱིཐིཙིཏྟཝསེན པཝཏྟིཡཾ པཊིསནྡྷིཏོ ཨཔརབྷཱགེ ཙུཏིཔརིཡོསཱནཾ པཝཏྟིསངྒཧོ ནཱམ སངྒཧོ ཨུདཱིརིཏོ, ཨིདཱནི ཏདནནྟརཾ སནྡྷིཡཾ པཊིསནྡྷིཀཱལེ, ཏདཱསནྣཏཱཡ ཏཾགཧཎེནེཝ གཧིཏཙུཏིཀཱལེ ཙ པཝཏྟིསངྒཧོ ཝུཙྩཏཱིཏི ཡོཛནཱ.

བྷཱུམིཙཏུཀྐཝཎྞནཱ

༣. པུཉྙསམྨཏཱ ¶ ཨཡཱ ཡེབྷུཡྻེན ཨཔགཏོཏི ཨཔཱཡོ, སོཡེཝ བྷཱུམི བྷཝནྟི ཨེཏྠ སཏྟཱཏི ཨཔཱཡབྷཱུམི. ཨནེཀཝིདྷསམྤཏྟིཨདྷིཊྛཱནཏཱཡ སོབྷནཱ གནྟབྦཏོ ཨུཔཔཛྫིཏབྦཏོ གཏཱིཏི སུགཏི, ཀཱམཏཎྷཱསཧཙརིཏཱ སུགཏི ཀཱམསུགཏི, སཱཡེཝ བྷཱུམཱིཏི ཀཱམསུགཏིབྷཱུམི. ཨེཝཾ སེསེསུཔི.

༤. ཨཡཏོ སུཁཏོ ནིགྒཏོཏི ནིརཡོ. ཏིརོ ཨཉྩིཏཱཏི ཏིརཙྪཱནཱ, ཏེསཾ ཡོནི ཏིརཙྪཱནཡོནི. ཡཝནྟི ཏཱཡ སཏྟཱ ཨམིསྶིཏཱཔི སམཱནཛཱཏིཏཱཡ མིསྶིཏཱ ཝིཡ ཧོནྟཱིཏི ཡོནི. སཱ པན ཨཏྠཏོ ཁནྡྷཱནཾ པཝཏྟིཝིསེསོ. པཀཊྛེན སུཁཏོ ཨིཏཱ གཏཱཏི པེཏཱ, ནིཛ྄ཛྷཱམཏཎྷིཀཱདིབྷེདཱནཾ པེཏཱནཾ ཝིསཡོ པེཏྟིཝིསཡོ ¶ . ཨེཏྠ པན ཏིརཙྪཱནཡོནིཔེཏྟིཝིསཡགྒཧཎེན ཁནྡྷཱནཾཡེཝ གཧཎཾ ཏེསཾ ཏཱདིསསྶ པརིཙྪིནྣོཀཱསསྶ ཨབྷཱཝཏོ. ཡཏྠ ཝཱ ཏེ ཨརཉྙཔབྦཏཔཱདཱདིཀེ ནིབདྡྷཝཱསཾ ཝསནྟི, ཏཱདིསསྶ ཋཱནསྶ ཝསེན ཨོཀཱསོཔི གཧེཏབྦོ. ན སུརནྟི ཨིསྶརིཡཀཱིལཱ༹དཱིཧི ན དིབྦནྟཱིཏི ཨསུརཱ, པེཏཱསུརཱ. ཨིཏརེ པན ན སུརཱ སུརཔྤཊིཔཀྑཱཏི ཨསུརཱ, ཨིདྷ ཙ པེཏཱསུརཱནམེཝ གཧཎཾ ཨིཏརེསཾ ཏཱཝཏིཾསེསུ གཧཎསྶ ཨིཙྪིཏཏྟཱ. ཏཐཱ ཧི ཝུཏྟཾ ཨཱཙརིཡེན –

‘‘ཏཱཝཏིཾསེསུ དེཝེསུ, ཝེཔཙིཏྟཱསུརཱ གཏཱ’’ཏི; (ནཱམ. པརི. ༤༣༨);

༥. སཏིསཱུརབྷཱཝབྲཧྨཙརིཡཡོགྱཏཱདིགུཎེཧི ཨུཀྐཊྛམནཏཱཡ མནོ ཨུསྶནྣཾ ཨེཏེསནྟི མནུསྶཱ. ཏཐཱ ཧི པརམསཏིནེཔཀྐཱདིཔྤཏྟཱ བུདྡྷཱདཡོཔི མནུསྶབྷཱུཏཱཡེཝ. ཛམྦུདཱིཔཝཱསིནོ ཙེཏྠ ནིཔྤརིཡཱཡཏོ མནུསྶཱ. ཏེཧི པན སམཱནརཱུཔཱདིཏཱཡ སདྡྷིཾ པརིཏྟདཱིཔཝཱསཱིཧི ཨིཏརམཧཱདཱིཔཝཱསིནོཔི ‘‘མནུསྶཱ’’ཏི ཝུཙྩནྟི. ལོཀིཡཱ པན ‘‘མནུནོ ཨཱདིཁཏྟིཡསྶ ཨཔཙྩཾ པུཏྟཱཏི མནུསྶཱ’’ཏི ཝདནྟི. མནུསྶཱནཾ ནིཝཱསབྷཱུཏཱ བྷཱུམི ཨིདྷ མནུསྶཱ. ཨེཝཾ སེསེསུཔི.

ཙཏཱུསུ མཧཱརཱཛེསུ བྷཏྟི ཨེཏེསཾ, ཙཏུནྣཾ ཝཱ མཧཱརཱཛཱནཾ ནིཝཱསཊྛཱནབྷཱུཏེ ཙཱཏུམཧཱརཱཛེ བྷཝཱཏི ཙཱཏུམཧཱརཱཛིཀཱ. མཱགྷེན མཱཎཝེན སདྡྷིཾ ཏེཏྟིཾས སཧཔུཉྙཀཱརིནོ ཨེཏྠ ནིབྦཏྟཱཏི ཏཾསཧཙརིཏཊྛཱནཾ ཏེཏྟིཾསཾ, ཏདེཝ ཏཱཝཏིཾསཾ, ཏཾནིཝཱསོ ཨེཏེསནྟི ཏཱཝཏིཾསཱཏི ཝདནྟི. ཡསྨཱ པན ¶ ‘‘སཧསྶཾ ཙཱཏུམཧཱརཱཛིཀཱནཾ སཧསྶཾ ཏཱཝཏིཾསཱན’’ནྟི (ཨ. ནི. ༣.༨༡) ཝཙནཏོ སེསཙཀྐཝཱལེ༹སུཔི ཚཀཱམཱཝཙརདེཝལོཀཱ ཨཏྠི, ཏསྨཱ ནཱམམཏྟམེཝ ཨེཏཾ ཏསྶ དེཝལོཀསྶཱཏི གཧེཏབྦཾ. དུཀྑཏོ ཡཱཏཱ ཨཔཡཱཏཱཏི ¶ ཡཱམཱ. ཨཏྟནོ སིརིསམྤཏྟིཡཱ ཏུསཾ པཱིཏིཾ ཨིཏཱ གཏཱཏི ཏུསིཏཱ. ནིམྨཱནེ རཏི ཨེཏེསནྟི ནིམྨཱནརཏིནོ. པརནིམྨིཏེསུ བྷོགེསུ ཨཏྟནོ ཝསཾ ཝཏྟེནྟཱིཏི པརནིམྨིཏཝསཝཏྟིནོ.

༧. མཧཱབྲཧྨཱནཾ པརིཙཱརིཀཏྟཱ ཏེསཾ པརིསཏི བྷཝཱཏི བྲཧྨཔཱརིསཛྫཱ. ཏེསཾ པུརོཧིཏཊྛཱནེ ཋིཏཏྟཱ བྲཧྨཔུརོཧིཏཱ. ཏེཧི ཏེཧི ཛྷཱནཱདཱིཧི གུཎཝིསེསེཧི བྲཱུཧིཏཱ པརིཝུདྡྷཱཏི བྲཧྨཱནོ, ཝཎྞཝནྟཏཱཡ ཙེཝ དཱིགྷཱཡུཀཏཱདཱིཧི ཙ བྲཧྨཔཱརིསཛྫཱདཱིཧི མཧནྟཱ བྲཧྨཱནོཏི མཧཱབྲཧྨཱནོ. ཏཡོཔེཏེ པཎཱིཏརཏནཔབྷཱཝབྷཱསིཏསམཱནཏལཝཱསིནོ.

༨. ཨུཔརིམེཧི པརིཏྟཱ ཨཱབྷཱ ཨེཏེསནྟི པརིཏྟཱབྷཱ. ཨཔྤམཱཎཱ ཨཱབྷཱ ཨེཏེསནྟི ཨཔྤམཱཎཱབྷཱ. ཝལཱཧཀཏོ ཝིཛྫུ ཝིཡ ཨིཏོ ཙིཏོ ཙ ཨཱབྷཱ སརཏི ནིསྶརཏི ཨེཏེསཾ སཔྤཱིཏིཀཛ྄ཛྷཱནནིབྦཏྟཀྑནྡྷསནྟཱནཏྟཱཏི ཨཱབྷསྶརཱ. དཎྜདཱིཔིཀཱཡ ཝཱ ཨཙྩི ཝིཡ ཨེཏེསཾ སརཱིརཏོ ཨཱབྷཱ ཚིཛྫིཏྭཱ ཚིཛྫིཏྭཱ པཏནྟཱི ཝིཡ སརཏི ནིསྶརཏཱིཏི ཨཱབྷསྶརཱ. ཡཐཱཝུཏྟཱཡ ཝཱ པབྷཱཡ ཨཱབྷཱསནསཱིལཱཏི ཨཱབྷསྶརཱ. ཨེཏེཔི ཏཡོ པཎཱིཏརཏནཔབྷཱཝབྷཱསིཏེཀཏལཝཱསིནོ.

༩. སུབྷཱཏི ཨེཀགྒྷནཱ ཨཙལཱ སརཱིརཱབྷཱ ཝུཙྩཏི, སཱ ཨུཔརིབྲཧྨེཧི པརིཏྟཱ ཨེཏེསནྟི པརིཏྟསུབྷཱ. ཨཔྤམཱཎཱ སུབྷཱ ཨེཏེསནྟི ཨཔྤམཱཎསུབྷཱ. པབྷཱསམུདཡསངྑཱཏེཧི སུབྷེཧི ཀིཎྞཱ ཨཱཀིཎྞཱཏི སུབྷཀིཎྷཱ. ‘‘སུབྷཱཀིཎྞཱ’’ཏི ཙ ཝཏྟབྦེ ཨཱ-སདྡསྶ རསྶཏྟཾ, ཨནྟིམཎ-ཀཱརསྶ ཙ ཧ-ཀཱརཾ ཀཏྭཱ ‘‘སུབྷཀིཎྷཱ’’ཏི ཝུཏྟཾ. ཨེཏེཔི པཎཱིཏརཏནཔབྷཱཝབྷཱསིཏེཀཏལཝཱསིནོ.

༡༠. ཛྷཱནཔྤབྷཱཝནིབྦཏྟཾ ¶ ཝིཔུལཾ ཕལམེཏེསནྟི ཝེཧཔྥལཱ. སཉྙཱཝིརཱགབྷཱཝནཱནིབྦཏྟརཱུཔསནྟཏིམཏྟཏྟཱ ནཏྠི སཉྙཱ, ཏཾམུཁེན ཝུཏྟཱཝསེསཱ ཨརཱུཔཀྑནྡྷཱ ཙ ཨེཏེསནྟི ཨསཉྙཱ. ཏེཡེཝ སཏྟཱཏི ཨསཉྙསཏྟཱ. ཨེཏེཔི པཎཱིཏརཏནཔབྷཱཝབྷཱསིཏེཀཏལཝཱསིནོ. སུདྡྷཱནཾ ¶ ཨནཱགཱམིཨརཧནྟཱནམེཝ ཨཱཝཱསཱཏི སུདྡྷཱཝཱསཱ. ཨནུནཡཔཊིགྷཱབྷཱཝཏོ ཝཱ སུདྡྷོ ཨཱཝཱསོ ཨེཏེསནྟི སུདྡྷཱཝཱསཱ, ཏེསཾ ནིཝཱསབྷཱུམིཔི སུདྡྷཱཝཱསཱ.

༡༡. ཨིམེསུ པན པཋམཏལཝཱསིནོ ཨཔྤཀེན ཀཱལེན ཨཏྟནོ ཋཱནཾ ན ཝིཛཧནྟཱིཏི ཨཝིཧཱ. དུཏིཡཏལཝཱསིནོ ན ཀེནཙི ཏཔྤནྟཱིཏི ཨཏཔྤཱ. ཏཏིཡཏལཝཱསིནོ པརམསུནྡརརཱུཔཏྟཱ སུཁེན དིསྶནྟཱིཏི སུདསྶཱ. ཙཏུཏྠཏལཝཱསིནོ སུཔརིསུདྡྷདསྶནཏྟཱ སུཁེན པསྶནྟཱིཏི སུདསྶིནོ. པཉྩམཏལཝཱསིནོ པན ཨུཀྐཊྛསམྤཏྟིཀཏྟཱ ནཏྠི ཨེཏེསཾ ཀནིཊྛབྷཱཝོཏི ཨཀནིཊྛཱ.

༡༢. ཨཱཀཱསཱནཉྩཱཡཏནེ པཝཏྟཱ པཋམཱརུཔྤཝིཔཱཀབྷཱུཏཙཏུཀྑནྡྷཱ ཨེཝ, ཏེཧི པརིཙྪིནྣཨོཀཱསོ ཝཱ ཨཱཀཱསཱནཉྩཱཡཏནབྷཱུམི. ཨེཝཾ སེསེསུཔི.

༡༣. པུཐུཛྫནཱ, སོཏཱཔནྣཱ ཙ སཀདཱགཱམིནོ ཙཱཔི པུགྒལཱ སུདྡྷཱཝཱསེསུ སབྦཐཱ ན ལབྦྷནྟཱིཏི སམྦནྡྷོ. པུཐུཛྫནཱདཱིནཉྩ པཊིཀྑེཔེན ཨནཱགཱམིཨརཧནྟཱནམེཝ ཏཏྠ ལཱབྷོ ཝུཏྟོ ཧོཏི.

༡༤. སེསཊྛཱནེསཱུཏི སུདྡྷཱཝཱསཨཔཱཡཨསཉྙིཝཛྫིཏེསུ སེསཊྛཱནེསུ ཨརིཡཱ, ཨནརིཡཱཔི ཙ ལབྦྷནྟི.

བྷཱུམིཙཏུཀྐཝཎྞནཱ ནིཊྛིཏཱ.

པཊིསནྡྷིཙཏུཀྐཝཎྞནཱ

༡༦. ཨོཀྐནྟིཀྑཎེཏི ¶ པཊིསནྡྷིཀྑཎེ.

༡༧. ཛཱཏིཡཱ ཨནྡྷོ ཛཙྩནྡྷོ. ཀིཉྩཱཔི ཛཱཏིཀྑཎེ ཨཎྜཛཛལཱབུཛཱ སབྦེཔི ཨཙཀྑུཀཱཝ ¶ . ཏཐཱཔི ཙཀྑཱདིཨུཔྤཛྫནཱརཧཀཱལེཔི ཙཀྑུཔྤཏྟིཝིབནྡྷཀཀམྨཔྤཊིབཱཧིཏསཱམཏྠིཡེན དིནྣཔཊིསནྡྷིནཱ, ཨིཏརེནཔི ཝཱ ཀམྨེན ཨནུཔྤཱདེཏབྦཙཀྑུཀོ སཏྟོ ཛཙྩནྡྷོ ནཱམ. ཨཔརེ པན ‘‘ཛཙྩནྡྷོཏི པསཱུཏིཡཾཡེཝ ཨནྡྷོ, མཱཏུཀུཙྪིཡཾ ཨནྡྷོ ཧུཏྭཱ ནིཀྑནྟོཏི ཨཏྠོ, ཏེན དུཧེཏུཀཏིཧེཏུཀཱནཾ མཱཏུཀུཙྪིཡཾ ཙཀྑུསྶ ཨཝིཔཛྫནཾ སིདྡྷ’’ནྟི ཝདནྟི. ཛཙྩནྡྷཱདཱིནནྟི ཨེཏྠ ཨཱདིགྒཧཎེན ཛཙྩབདྷིརཛཙྩམཱུགཛཙྩཛལ༹ཛཙྩུམྨཏྟཀཔཎྜཀཨུབྷཏོབྱཉྫནཀནཔུཾསཀམམྨཱདཱིནཾ སངྒཧོ. ཨཔརེ པན ‘‘ཨེཀཙྩེ ཨཧེཏུཀཔཊིསནྡྷིཀཱ ཨཝིཀལིནྡྲིཡཱ ཧུཏྭཱ ཐོཀཾ ཝིཙཱརཎཔཀཏིཀཱ ཧོནྟི, ཏཱདིསཱནམྤི ཨཱདིསདྡེན སངྒཧོ’’ཏི ཝདནྟི. བྷུམྨདེཝེ སིཏཱ ནིསྶིཏཱ ཏགྒཏིཀཏྟཱཏི བྷུམྨསྶིཏཱ. སུཁསམུསྶཡཏོ ཝིནིཔཱཏཱཏི ཝིནིཔཱཏིཀཱ.

༡༨. སབྦཏྠཱཔི ཀཱམསུགཏིཡནྟི དེཝམནུསྶཝསེན སཏྟཝིདྷཱཡཔི ཀཱམསུགཏིཡཾ.

༢༡. ཏེསཱུཏི ཡཐཱཝུཏྟཔཊིསནྡྷིཡུཏྟེསུ པུགྒལེསུ, ཨཔཱཡཱདཱིསུ ཝཱ. ཨཱཡུཔྤམཱཎགཎནཱཡ ནིཡམོ ནཏྠི ཀེསཉྩི ཙིརཱཡུཀཏྟཱ, ཀེསཉྩི ཙིརཏརཱཡུཀཏྟཱ ཙ. ཏཐཱཙཱཧུ –

‘‘ཨཱཔཱཡིཀམནུསྶཱཡུ-

པརིཙྪེདོ ན ཝིཛྫཏི;

ཏཐཱ ཧི ཀཱལོ མནྡྷཱཏཱ,

ཡཀྑཱ ཀེཙི ཙིརཱཡུནོ’’ཏི. –

ཨཔཱཡེསུ ¶ ཧི ཀམྨམེཝ པམཱཎཾ, ཏཏྠ ནིབྦཏྟཱནཾ ཡཱཝ ཀམྨཾ ནཁཱིཡཏི. ཏཱཝ ཙཝནཱབྷཱཝཏོ, ཏཐཱ བྷུམྨདེཝཱནཾ. ཏེསུཔི ཧི ནིབྦཏྟཱ ཀེཙི སཏྟཱཧཱདིཀཱལཾ ཏིཊྛནྟི, ཀེཙི ཀཔྤམཏྟམྤི, ཏཐཱ མནུསྶཱནམྤི ཀདཱཙི ཏེསམྤི ཨསངྑྱེཡྻཱཡུཀཏྟཱ ཀདཱཙི དསཝསྶཱཡུཀཏྟཱ. ‘‘ཡོ ཙིརཾ ཛཱིཝཏི, སོ ཝསྶསཏཾ ཛཱིཝཏི, ཨཔྤཾ ཝཱ བྷིཡྻོ (དཱི. ནི. ༢.༧; སཾ. ནི. ༡.༡༤༥; ཨ. ནི. ༧.༧༤), དུཏིཡཾ ཝསྶསཏཾ ན པཱཔུཎཱཏཱི’’ཏི ཨིདཾ པན ཨཛྫཏནཀཱལིཀེ སནྡྷཱཡ ཝུཏྟཾ.

༢༢. དིབྦཱནི པཉྩཝསྶསཏཱནཱིཏི མནུསྶཱནཾ པཉྙཱས ཝསྶཱནི ཨེཀདིནཾ, ཏདནུརཱུཔཏོ མཱསསཾཝཙྪརེ ¶ པརིཙྪིནྡིཏྭཱ དིབྦཔྤམཱཎཱནི པཉྩཝསྶསཏཱནི ཨཱཡུཔྤམཱཎཾ ཧོཏི. ཝུཏྟམྤི ཙེཏཾ –

‘‘ཡཱནི པཉྙཱས ཝསྶཱནི, མནུསྶཱནཾ དིནོ ཏཧིཾ;

ཏིཾསརཏྟིདིཝོ མཱསོ, མཱསཱ དྭཱདས སཾཝཙྪརཾ;

ཏེན སཾཝཙྪརེནཱཡུ, དིབྦཾ པཉྩསཏཾ མཏ’’ནྟི.

མནུསྶགཎནཱཡཱཏི མནུསྶཱནཾ སཾཝཙྪརགཎནཱཡ. ཏཏོ ཙཏུགྒུཎནྟི ཙཱཏུམཧཱརཱཛིཀཱནཾ པཉྙཱསམཱནུསྶཀཝསྶཔརིམིཏཾ དིཝསཾ, དིབྦཱནི ཙ པཉྩཝསྶསཏཱནི དིགུཎཾ ཀཏྭཱ དིབྦཝསྶསཧསྶཱནི ཏཱཝཏིཾསཱནཾ སམྦྷཝཏཱིཏི ཨེཝཾ དིཝསསཾཝཙྪརདིགུཎཝསེན ཙཏུགྒུཎཾ, ཏཾ པན དིབྦགཎནཱཡ ཝསྶསཧསྶཾ, མནུསྶགཎནཱཡ སཊྛིཝསྶསཏསཧསྶཱདྷིཀཏིཀོཊིཔྤམཱཎཾ ཧོཏི. ཏཏོ ཙཏུགྒུཎཾ ཡཱམཱནནྟི ཏཱཝཏིཾསཱནམཱཡུཔྤམཱཎཏོ ཝུཏྟནཡེན ཙཏུགྒུཎཾ, དིབྦགཎནཱཡ དྭིསཧསྶཾ, མནུསྶགཎནཱཡ ཙཏྟཱལཱིསཝསྶསཏསཧསྶཱདྷིཀཱ ཙུདྡས ཝསྶཀོཊིཡོ ཧོནྟི. ཏཏོ ཙཏུགྒུཎཾ ཏུསིཏཱནནྟི དིབྦཱནི ཙཏྟཱརི ཝསྶསཧསྶཱནི, མནུསྶགཎནཱཡ སཊྛིཝསྶསཏསཧསྶཱདྷིཀཱ སཏྟཔཉྙཱས ¶ ཝསྶཀོཊིཡོ. ཏཏོ ཙཏུགྒུཎཾ ནིམྨཱནརཏཱིནནྟི དིབྦཱནི ཨཊྛཝསྶསཧསྶཱནི, མནུསྶགཎནཱཡ དྭེ ཝསྶཀོཊིསཏཱནི ཙཏྟཱལཱིསཝསྶསཏསཧསྶཱདྷིཀཱ ཏིཾས ཝསྶཀོཊིཡོ ཙ. ཏཏོ ཙཏུགྒུཎཾ པརནིམྨིཏཝསཝཏྟཱིནནྟི དིབྦཱནི སོལ༹ས ཝསྶསཧསྶཱནི.

༢༣. མནུསྶགཎནཾ པན སཡམེཝ དསྶེནྟོ ཨཱཧ ‘‘ནཝསཏཉྩཱ’’ཏྱཱདི. ཝསྶཱནཾ སམྦནྡྷི ནཝསཏཾ ཨེཀཝཱིས ཀོཊིཡོ, ཏཐཱ སཊྛི ཙ ཝསྶསཏསཧསྶཱནི ཝསཝཏྟཱིསུ ཨཱཡུཔྤམཱཎནྟི སམྦནྡྷོ.

༢༥. དུཏིཡཛ྄ཛྷཱནབྷཱུམིཡནྟི ཙཏུཀྐནཡཝསེན ཝུཏྟཾ. ཏཏོ པརཾ པཝཏྟིཡཾ, ཙཝནཀཱལེ ཙ ཏཐཱརཱུཔམེཝ བྷཝངྒཙུཏིཝསེན པཝཏྟིཏྭཱ ནིརུཛ྄ཛྷཏཱིཏི ཡོཛནཱ.

༢༩. ཏེསཱུཏི ཏཱཧི གཧིཏཔཊིསནྡྷིཀེསུ བྲཧྨེསུ. ཀཔྤསྶཱཏི ཨསངྑྱེཡྻཀཔྤསྶ. ན ཧི བྲཧྨཔཱརིསཛྫཱདཱིནཾ ཏིཎྞཾ མཧཱཀཔྤཝསེན ཨཱཡུཔརིཙྪེདོ སམྦྷཝཏི ཨེཀཀཔྤེཔི ཏེསཾ ཨཝིནཱསཱབྷཱཝེན ¶ པརིཔུཎྞཀཔྤེ ཨསམྦྷཝཏོ. ཏཐཱ ཧེས (ཝིསུདྡྷི. ༢.༤༠༩) ལོཀོ སཏྟཝཱརེསུ ཨགྒིནཱ ཝིནསྶཏི, ཨཊྛམེ ཝཱརེ ཨུདཀེན, པུན སཏྟཝཱརེསུ ཨགྒིནཱ, ཨཊྛམེ ཝཱརེ ཨུདཀེནཱཏི ཨེཝཾ ཨཊྛསུ ཨཊྛཀེསུ པརིཔུཎྞེསུ པཙྪིམེ ཝཱརེ ཝཱཏེན ཝིནསྶཏི. ཏཏྠ པཋམཛ྄ཛྷཱནཏལཾ ཨུཔཱདཱཡ ཨགྒིནཱ, དུཏིཡཏཏིཡཛ྄ཛྷཱནཏལཾ ཨུཔཱདཱཡ ཨུདཀེན, ཙཏུཏྠཛ྄ཛྷཱནཏལཾ ཨུཔཱདཱཡ ཝཱཏེན ཝིནསྶཏི. ཝུཏྟམྤི ཙེཏཾ –

‘‘སཏྟ སཏྟགྒིནཱ ཝཱརཱ, ཨཊྛམེ ཨཊྛམེ དཀཱ;

ཙཏུསཊྛི ཡདཱ པུཎྞཱ, ཨེཀོ ཝཱཡུཝརོ སིཡཱ.

‘‘ཨགྒིནཱབྷསྶརཱ ¶ ཧེཊྛཱ, ཨཱཔེན སུབྷཀིཎྷཏོ;

ཝེཧཔྥལཏོ ཝཱཏེན, ཨེཝཾ ལོཀོ ཝིནསྶཏཱི’’ཏི. –

ཏསྨཱ ཏིཎྞམྤི པཋམཛ྄ཛྷཱནཏལཱནཾ ཨེཀཀཔྤེཔི ཨཝིནཱསཱབྷཱཝཏོ སཀལཀཔྤེ ཏེསཾ སམྦྷཝོ ནཏྠཱིཏི ཨསངྑྱེཡྻཀཔྤཝསེན ཏེསཾ ཨཱཡུཔརིཙྪེདོ དཊྛབྦོ. དུཏིཡཛ྄ཛྷཱནཱདིཏལཏོ པཊྛཱཡ པན པརིཔུཎྞསྶ མཧཱཀཔྤསྶ ཝསེན, ན ཨསངྑྱེཡྻཀཔྤཝསེན. ཨསངྑྱེཡྻཀཔྤོཏི ཙ ཡོཛནཱཡཱམཝིཏྠཱརཏོ སེཏསཱསཔརཱསིཏོ ཝསྶསཏཝསྶསཏཙྩཡེན ཨེཀེཀབཱིཛསྶ ཧརཎེན སཱསཔརཱསིནོ པརིཀྑཡེཔི ཨཀྑཡསབྷཱཝསྶ མཧཱཀཔྤསྶ ཙཏུཏྠབྷཱགོ. སོ པན སཏྠརོགདུབྦྷིཀྑཱནཾ ཨཉྙཏརསཾཝཊྚེན བཧཱུསུ ཝིནཱསམུཔགཏེསུ ཨཝསིཊྛསཏྟསནྟཱནཔྤཝཏྟཀུསལཀམྨཱནུབྷཱཝེན དསཝསྶཏོ པཊྛཱཡ ཨནུཀྐམེན ཨསངྑྱེཡྻཱཡུཀཔྤམཱཎེསུ སཏྟེསུ པུན ཨསདྡྷམྨསམཱདཱནཝསེན ཀམེན པརིཧཱཡིཏྭཱ དསཝསྶཱཡུཀེསུ ཛཱཏེསུ རོགཱདཱིནཾ ཨཉྙཏརསཾཝཊྚེན སཏྟཱནཾ ཝིནཱསཔྤཏྟིཡཱཝ ‘‘ཨཡམེཀོ ཨནྟརཀཔྤོ’’ཏི ཨེཝཾ པརིཙྪིནྣསྶ ཨནྟརཀཔྤསྶ ཝསེན ཙཏུསཊྛིཨནྟརཀཔྤཔྤམཱཎོ ཧོཏི, ‘‘ཝཱིསཏིཨནྟརཀཔྤཔྤམཱཎོ’’ཏི ཙ ཝདནྟི.

༤༥. ཨཱཀཱསཱནཉྩཱཡཏནཾ ཨུཔགཙྪནྟཱིཏི ཨཱཀཱསཱནཉྩཱཡཏནཱུཔགཱ.

༤༩. ཨེཀམེཝཱཏི བྷཱུམིཏོ, ཛཱཏིཏོ, སམྤཡུཏྟདྷམྨཏོ, སངྑཱརཏོ ཙ སམཱནམེཝ. ཨེཀཛཱཏིཡནྟི ཨེཀསྨིཾ བྷཝེ.

པཊིསནྡྷིཙཏུཀྐཝཎྞནཱ ནིཊྛིཏཱ.

ཀམྨཙཏུཀྐཝཎྞནཱ

༥༠. ཨིདཱནི ¶ ¶ ཀམྨཙཏུཀྐཾ ཙཏཱུཧཱཀཱརེཧི དསྶེཏུཾ ‘‘ཛནཀ’’ནྟྱཱདི ཨཱརདྡྷཾ, ཛནཡཏཱིཏི ཛནཀཾ. ཨུཔཏྠམྦྷེཏཱིཏི ཨུཔཏྠམྦྷཀཾ. ཨུཔགནྟྭཱ པཱིལེ༹ཏཱིཏི ཨུཔཔཱིལ༹ཀཾ. ཨུཔགནྟྭཱ གྷཱཏེཏཱིཏི ཨུཔགྷཱཏཀཾ.

ཏཏྠ པཊིསནྡྷིཔཝཏྟཱིསུ ཝིཔཱཀཀཊཏྟཱརཱུཔཱནཾ ནིབྦཏྟཀཱ ཀུསལཱཀུསལཙེཏནཱ ཛནཀཾ ནཱམ. སཡཾ ཝིཔཱཀཾ ནིབྦཏྟེཏུཾ ཨསཀྐོནྟམྤི ཀམྨནྟརསྶ ཙིརཏརཝིཔཱཀནིབྦཏྟནེ པཙྩཡབྷཱུཏཾ, ཝིཔཱཀསྶེཝ ཝཱ སུཁདུཀྑབྷཱུཏསྶ ཝིཙྪེདཔཙྩཡཱནུཔྤཏྟིཡཱ, ཨུཔབྲཱུཧནཔཙྩཡུཔྤཏྟིཡཱ ཙ ཛནཀསཱམཏྠིཡཱནུརཱུཔཾ ཙིརཏརཔྤཝཏྟིཔཙྩཡབྷཱུཏཾ ཀུསལཱཀུསལཀམྨཾ ཨུཔཏྠམྦྷཀཾ ནཱམ. ཀམྨནྟརཛནིཏཝིཔཱཀསྶ བྱཱདྷིདྷཱཏུསམཏཱདིནིམིཏྟཝིབཱདྷནེན ཙིརཏརཔྤཝཏྟིཝིནིབནྡྷཀཾ ཡཾ ཀིཉྩི ཀམྨཾ ཨུཔཔཱིལ༹ཀཾ ནཱམ. དུབྦལསྶ པན ཀམྨསྶ ཛནཀསཱམཏྠིཡཾ ཨུཔཧཙྩ ཝིཙྪེདཀཔཙྩཡུཔྤཱདནེན ཏསྶ ཝིཔཱཀཾ པཊིབཱཧིཏྭཱ སཡཾ ཝིཔཱཀནིབྦཏྟཀཀམྨཾ ཨུཔགྷཱཏཀཾ ནཱམ.

ཛནཀོཔགྷཱཏཀཱནཉྷི ཨཡཾ ཝིསེསོ – ཛནཀཾ ཀམྨནྟརསྶ ཝིཔཱཀཾ ཨནུཔཙྪིནྡིཏྭཱཝ ཝིཔཱཀཾ ཛནེཏི, ཨུཔགྷཱཏཀཾ ཨུཔཙྪེདནཔུབྦཀནྟི ཨིདཾ ཏཱཝ ཨཊྛཀཐཱསུ (ཝིསུདྡྷི. ༢.༦༨༧; ཨ. ནི. ཨཊྛ. ༢.༣.༣༤) སནྣིཊྛཱནཾ. ཨཔརེ པན ཨཱཙརིཡཱ ‘‘ཨུཔཔཱིལ༹ཀཀམྨཾ བཧྭཱབཱདྷཏཱདིཔཙྩཡོཔསཾཧཱརེན ཀམྨནྟརསྶ ཝིཔཱཀཾ ཨནྟརནྟརཱ ཝིབཱདྷཏི. ཨུཔགྷཱཏཀཾ པན ཏཾ སབྦསོ ཨུཔཙྪིནྡིཏྭཱ ཨཉྙསྶ ཨོཀཱསཾ དེཏི, ན པན སཡཾ ཝིཔཱཀནིབྦཏྟཀཾ. ཨེཝཉྷི ཛནཀཏོ ཨིམསྶ ཝིསེསོ སུཔཱཀཊོ’’ཏི ཝདནྟི. ཀིཙྩཝསེནཱཏི ཛནནཨུཔཏྠམྦྷནཨུཔཔཱིལ༹ནཨུཔཙྪེདནཀིཙྩཝསེན.

༥༡. གརུཀནྟི མཧཱསཱཝཛྫཾ, མཧཱནུབྷཱཝཉྩ ཨཉྙེན ཀམྨེན པཊིབཱཧིཏུཾ ཨསཀྐུཎེཡྻཀམྨཾ. ཨཱསནྣནྟི མརཎཀཱལེ ཨནུསྶརིཏཾ, ཏདཱ ཀཏཉྩ. ཨཱཙིཎྞནྟི ཨབྷིཎྷསོ ཀཏཾ ¶ , ཨེཀཝཱརཾ ཀཏྭཱཔི ཝཱ ཨབྷིཎྷསོ སམཱསེཝིཏཾ. ཀཊཏྟཱཀམྨནྟི གརུཀཱདིབྷཱཝཾ ཨསམྤཏྟཾ ཀཏམཏྟཏོཡེཝ ཀམྨནྟི ཝཏྟབྦཀམྨཾ.

ཏཏྠ ཀུསལཾ ཝཱ ཧོཏུ ཨཀུསལཾ ཝཱ, གརུཀཱགརུཀེསུ ཡཾ གརུཀཾ ཨཀུསལཔཀྑེ མཱཏུགྷཱཏཀཱདིཀམྨཾ ¶ , ཀུསལཔཀྑེ མཧགྒཏཀམྨཾ ཝཱ, ཏདེཝ པཋམཾ ཝིཔཙྩཏི སཏིཔི ཨཱསནྣཱདིཀམྨེ པརིཏྟཾ ཨུདཀཾ ཨོཏྠརིཏྭཱ གཙྪནྟོ མཧོགྷོ ཝིཡ. ཏཐཱ ཧི ཏཾ ‘‘གརུཀ’’ནྟི ཝུཙྩཏི. ཏསྨིཾ ཨསཏི དཱུརཱསནྣེསུ ཡཾ ཨཱསནྣཾ མརཎཀཱལེ ཨནུསྶརིཏཾ, ཏདེཝ པཋམཾ ཝིཔཙྩཏི, ཨཱསནྣཀཱལེ ཀཏེ ཝཏྟབྦམེཝ ནཏྠི. ཏསྨིམྤི ཨསཏི ཨཱཙིཎྞཱནཱཙིཎྞེསུ ཙ ཡཾ ཨཱཙིཎྞཾ སུསཱིལྱཾ ཝཱ, དུསྶཱིལྱཾ ཝཱ, ཏདེཝ པཋམཾ ཝིཔཙྩཏི. ཀཊཏྟཱཀམྨཾ པན ལདྡྷཱསེཝནཾ པུརིམཱནཾ ཨབྷཱཝེན པཊིསནྡྷིཾ ཨཱཀཌྜྷཏཱིཏི གརུཀཾ སབྦཔཋམཾ ཝིཔཙྩཏི. གརུཀེ ཨསཏི ཨཱསནྣཾ, ཏསྨིམྤི ཨསཏི ཨཱཙིཎྞཾ, ཏསྨིམྤི ཨསཏི ཀཊཏྟཱཀམྨཾ. ཏེནཱཧ ‘‘པཱཀདཱནཔརིཡཱཡེནཱ’’ཏི, ཝིཔཱཀདཱནཱནུཀྐམེནཱཏྱཏྠོ. ཨབྷིདྷམྨཱཝཏཱརཱདཱིསུ པན ཨཱསནྣཏོ ཨཱཙིཎྞཾ པཋམཾ ཝིཔཙྩནྟཾ ཀཏྭཱ ཝུཏྟཾ. ཡཐཱ པན གོགཎཔརིཔུཎྞསྶ ཝཛསྶ དྭཱརེ ཝིཝཊེ ཨཔརབྷཱགེ དམྨགཝབལཝགཝེསུ སནྟེསུཔི ཡོ ཝཛདྭཱརསྶ ཨཱསནྣོ ཧོཏི, ཨནྟམསོ དུབྦལཛརགྒཝོཔི, སོཡེཝ པཋམཏརཾ ནིཀྑམཏི, ཨེཝཾ གརུཀཏོ ཨཉྙེསུ ཀུསལཱཀུསལེསུ སནྟེསུཔི མརཎཀཱལསྶ ཨཱསནྣཏྟཱ ཨཱསནྣམེཝ པཋམཾ ཝིཔཱཀཾ དེཏཱིཏི ཨིདྷ ཏཾ པཋམཾ ཝུཏྟཾ.

༥༢. དིཊྛདྷམྨོ པཙྩཀྑབྷཱུཏོ པཙྩུཔྤནྣོ ཨཏྟབྷཱཝོ, ཏཏྠ ཝེདིཏབྦཾ ཝིཔཱཀཱནུབྷཝནཝསེནཱཏི དིཊྛདྷམྨཝེདནཱིཡཾ. དིཊྛདྷམྨཏོ ཨནནྟརཾ ཨུཔཔཛྫིཏྭཱ ཝེདིཏབྦཾ ཨུཔཔཛྫཝེདནཱིཡཾ. ཨཔརེ ཨཔརེ དིཊྛདྷམྨཏོ ཨཉྙསྨིཾ ཡཏྠ ཀཏྠཙི ཨཏྟབྷཱཝེ ཝེདིཏབྦཾ ཀམྨཾ ཨཔརཱཔརིཡཝེདནཱིཡཾ. ཨཧོསི ཨེཝ ཀམྨཾ ¶ , ན ཏསྶ ཝིཔཱཀོ ཨཧོསི, ཨཏྠི, བྷཝིསྶཏི ཙཱཏི ཨེཝཾ ཝཏྟབྦཀམྨཾ ཨཧོསིཀམྨཾ.

ཏཏྠ པཊིཔཀྑེཧི ཨནབྷིབྷཱུཏཏཱཡ, པཙྩཡཝིསེསེན པཊིལདྡྷཝིསེསཏཱཡ ཙ བལཝབྷཱཝཔྤཏྟཱ ཏཱདིསསྶ པུབྦཱབྷིསངྑཱརསྶ ཝསེན སཱཏིསཡཱ ཧུཏྭཱ ཏསྨིཾཡེཝ ཨཏྟབྷཱཝེ ཕལདཱཡིནཱི པཋམཛཝནཙེཏནཱ དིཊྛདྷམྨཝེདནཱིཡཾ ནཱམ. སཱ ཧི ཝུཏྟཔྤཀཱརེན བལཝཛནསནྟཱནེ གུཎཝིསེསཡུཏྟེསུ ཨུཔཀཱརཱནུཔཀཱརཝསཔྤཝཏྟིཡཱ, ཨཱསེཝནཱལཱབྷེན ཨཔྤཝིཔཱཀཏཱཡ ཙ ཨིཏརདྭཡཾ ཝིཡ པཝཏྟསནྟཱནུཔརམཱཔེཀྑཾ, ཨོཀཱསལཱབྷཱཔེཀྑཉྩ ཀམྨཾ ན ཧོཏཱིཏི ཨིདྷེཝ པུཔྥམཏྟཾ ཝིཡ པཝཏྟིཝིཔཱཀམཏྟཾ ཨཧེཏུཀཕལཾ དེཏི. ཨཏྠསཱདྷིཀཱ པན སཏྟམཛཝནཙེཏནཱ སནྣིཊྛཱཔཀཙེཏནཱབྷཱུཏཱ ཝུཏྟནཡེན པཊིལདྡྷཝིསེསཱ ཨནནྟརཏྟབྷཱཝེ ཝིཔཱཀདཱཡིནཱི ཨུཔཔཛྫཝེདནཱིཡཾ ནཱམ. སཱ ཙ པཊིསནྡྷིཾ དཏྭཱཝ པཝཏྟིཝིཔཱཀཾ དེཏི. པཊིསནྡྷིཡཱ ¶ པན ཨདིནྣཱཡ པཝཏྟིཝིཔཱཀཾ དེཏཱིཏི ནཏྠི. ཙུཏི ཨནནྟརཉྷི ཨུཔཔཛྫཝེདནཱིཡསྶ ཨོཀཱསོ. པཊིསནྡྷིཡཱ པན དིནྣཱཡ ཛཱཏིསཏེཔི པཝཏྟིཝིཔཱཀཾ དེཏཱིཏི ཨཱཙརིཡཱ. ཡཐཱཝུཏྟཀཨཱརཎཝིརཧཏོ དིཊྛདྷམྨཝེདནཱིཡཱདིབྷཱཝཾ ཨསམྤཏྟཱ ཨཱདིཔརིཡོསཱནཙེཏནཱནཾ མཛ྄ཛྷེ པཝཏྟཱ པཉྩ ཙེཏནཱ ཝིཔཱཀདཱནསབྷཱཝསྶ ཨནུཔཙྪིནྣཏྟཱ ཡདཱ ཀདཱཙི ཨོཀཱསལཱབྷེ སཏི པཊིསནྡྷིཔཝཏྟཱིསུ ཝིཔཱཀཾ ཨབྷིནིཔྥཱདེནྟཱི ཨཔརཱཔརིཡཝེདནིཡཾ ནཱམ. སཀསཀཀཱལཱཏཱིཏཾ པན པུརིམཀམྨདྭཡཾ, ཏཏིཡམྤི ཙ སཾསཱརཔྤཝཏྟིཡཱ ཝོཙྪིནྣཱཡ ཨཧོསིཀམྨཾ ནཱམ.

པཱཀཀཱལཝསེནཱཏི པཙྩུཔྤནྣེ, ཏདནནྟརེ, ཡདཱ ཀདཱཙཱིཏི ཨེཝཾ པུརིམཱནཾ ཏིཎྞཾ ཡཐཱཔརིཙྪིནྣཀཱལཝསེན, ཨིཏརསྶ ཏཾཀཱལཱབྷཱཝཝསེན ཙ. ཨཧོསིཀམྨསྶ ཧི ཀཱལཱཏིཀྐམཏོཝ ཏཾ ཝོཧཱརོ.

༥༣. པཱཀཋཱནཝསེནཱཏི ¶ པཊིསནྡྷིཡཱ ཝིཔཙྩནབྷཱུམིཝསེན.

༥༤. ཨིདཱནི ཨཀུསལཱདིཀམྨཱནཾ ཀཱཡཀམྨདྭཱརཱདིཝསེན པཝཏྟིཾ, ཏཾནིདྡེསམུཁེན ཙ ཏེསཾ པཱཎཱཏིཔཱཏཱདིཝསེན དསཝིདྷཱདིབྷེདཉྩ དསྶེཏུཾ ‘‘ཏཏྠ ཨཀུསལ’’ནྟྱཱདི ཨཱརདྡྷཾ. ཀཱཡདྭཱརེ པཝཏྟཾ ཀམྨཾ ཀཱཡཀམྨཾ. ཨེཝཾ ཝཙཱིཀམྨཱདཱིནི.

༥༥. པཱཎསྶ སཎིཀཾ པཏིཏུཾ ཨདཏྭཱ ཨཏཱིཝ པཱཏནཾ པཱཎཱཏིཔཱཏོ. ཀཱཡཝཱཙཱཧི ཨདིནྣསྶ ཨཱདཱནཾ ཨདིནྣཱདཱནཾ. མེཐུནཝཱིཏིཀྐམསངྑཱཏེསུ ཀཱམེསུ མིཙྪཱ ཙརཎཾ ཀཱམེསུ མིཙྪཱཙཱརོ.

ཏཏྠ པཱཎོཏི ཝོཧཱརཏོ སཏྟོ, པརམཏྠཏོ ཛཱིཝིཏིནྡྲིཡཾ. ཏསྨིཾ པཱཎེ པཱཎསཉྙིནོ ཛཱིཝིཏིནྡྲིཡུཔཙྪེདཀཔྤཡོགསམུཊྛཱཔིཀཱ ཝདྷཀཙེཏནཱ པཱཎཱཏིཔཱཏོ. པརབྷཎྜེ ཏཐཱསཉྙིནོ ཏདཱདཱཡཀཔྤཡོགསམུཊྛཱཔིཀཱ ཐེཡྻཙེཏནཱ ཨདིནྣཱདཱནཾ. ཨསདྡྷམྨསེཝནཝསེན ཀཱཡདྭཱརཔྤཝཏྟཱ ཨགནྟབྦཊྛཱནཝཱིཏིཀྐམཙེཏནཱ ཀཱམེསུམིཙྪཱཙཱརོ ནཱམ. སུརཱཔཱནམྤི ཨེཏྠེཝ སངྒཡ྄ཧཏཱིཏི ཝདནྟི རསསངྑཱཏེསུ ཀཱམེསུ མིཙྪཱཙཱརབྷཱཝཏོ. ཀཱཡཝིཉྙཏྟིསངྑཱཏེ ཀཱཡདྭཱརེཏི ཀཱཡེན ཨདྷིཔྤཱཡཝིཉྙཱཔནཏོ, སཡཉྩ ཀཱཡེན ཝིཉྙེཡྻཏྟཱ ཀཱཡཝིཉྙཏྟིསངྑཱཏེ ཨབྷིཀྐམཱདིཛནཀཙིཏྟཛཝཱཡོདྷཱཏྭཱདྷིཀཀལཱཔསྶ ཝིཀཱརབྷཱུཏེ སནྠམྦྷནཱདཱིནཾ སཧཀཱརཱིཀཱརཎབྷཱུཏེ ཙོཔནཀཱཡབྷཱཝཏོ, ཀམྨཱནཾ པཝཏྟིམུཁབྷཱཝཏོ ཙ ཀཱཡདྭཱརསངྑཱཏེ ཀམྨདྭཱརེ.

ཀིཉྩཱཔི ¶ ཧི ཏཾཏཾཀམྨསཧགཏཙིཏྟུཔྤཱདེནེཝ སཱ ཝིཉྙཏྟི ཛནཱིཡཏི. ཏཐཱཔི ཏསྶཱ ཏཐཱ པཝཏྟམཱནཱཡ ཏཾསམུཊྛཱཔཀཀམྨསྶ ཀཱཡཀམྨཱདིཝོཧཱརོ ཧོཏཱིཏི སཱ ཏསྶེཝ པཝཏྟིམུཁབྷཱཝེན ཝཏྟུཾ ལབྦྷཏི. ‘‘ཀཱཡདྭཱརེ ཝུཏྟིཏོ’’ཏི ¶ ཨེཏྟཀེཡེཝ ཝུཏྟེ ‘‘ཡདི ཨེཝཾ ཀམྨདྭཱརཝཝཏྠཱནཾ ན སིཡཱ. ཀཱཡདྭཱརེ ཧི པཝཏྟཾ ‘ཀཱཡཀམྨ’ནྟི ཝུཙྩཏི, ཀཱཡཀམྨསྶ ཙ པཝཏྟིམུཁབྷཱུཏཾ ‘ཀཱཡདྭཱར’ནྟི. པཱཎཱཏིཔཱཏཱདིཀཾ པན ཝཱཙཱཡ ཨཱཎཱཔེནྟསྶ ཀཱཡཀམྨཾ ཝཙཱིདྭཱརེཔི པཝཏྟཏཱིཏི དྭཱརེན ཀམྨཝཝཏྠཱནཾ ན སིཡཱ, ཏཐཱ མུསཱཝཱདཱདིཾ ཀཱཡཝིཀཱརེན ཀརོནྟསྶ ཝཙཱིཀམྨཾ ཀཱཡདྭཱརེཔི པཝཏྟཏཱིཏི ཀམྨེན དྭཱརཝཝཏྠཱནམྤི ན སིཡཱ’’ཏི ཨཡཾ ཙོདནཱ པཙྩུཔཊྛེཡྻཱཏི བཱཧུལླཝུཏྟིཡཱ ཝཝཏྠཱནཾ དསྶེཏུཾ ‘‘བཱཧུལླཝུཏྟིཏོ’’ཏི ཝུཏྟཾ. ཀཱཡཀམྨཉྷི ཀཱཡདྭཱརེཡེཝ བཧུལཾ པཝཏྟཏི, ཨཔྤཾ ཝཙཱིདྭཱརེ, ཏསྨཱ ཀཱཡདྭཱརེཡེཝ བཧུལཾ པཝཏྟནཏོ ཀཱཡཀམྨབྷཱཝོ སིདྡྷོ ཝནཙརཀཱདཱིནཾ ཝནཙརཀཱདིབྷཱཝོ ཝིཡ. ཏཐཱ ཀཱཡཀམྨམེཝ ཡེབྷུཡྻེན ཀཱཡདྭཱརེ པཝཏྟཏི, ན ཨིཏརཱནི, ཏསྨཱ ཀཱཡཀམྨསྶ ཡེབྷུཡྻེན ཨེཏྠེཝ པཝཏྟནཏོ ཀཱཡཀམྨདྭཱརབྷཱཝོ སིདྡྷོ བྲཱཧྨཎགཱམཱདཱིནཾ བྲཱཧྨཎགཱམཱདིབྷཱཝོ ཝིཡཱཏི ནཏྠི ཀམྨདྭཱརཝཝཏྠཱནེ ཀོཙི ཝིབནྡྷོཏི ཨཡམེཏྠཱདྷིཔྤཱཡོ.

༥༦. མུསཱཏི ཨབྷཱུཏཾ ཝཏྠུ, ཏཾ ཏཙྪཏོ ཝདནྟི ཨེཏེནཱཏི མུསཱཝཱདོ. པིསཏི སཱམགྒིཾ སཉྩུཎྞེཏི ཝིཀྑིཔཏི, པིཡབྷཱཝཾ སུཉྙཾ ཀརོཏཱིཏི ཝཱ པིསུཎཱ. ཨཏྟཱནམྤི པརམྤི ཕརུསཾ ཀརོཏི, ཀཀཙོ ཝིཡ ཁརསམྥསྶཱཏི ཝཱ ཕརུསཱ. སཾ སུཁཾ, ཧིཏཉྩ ཕལཏི ཝིསརཏི ཝིནཱསེཏཱིཏི སམྥཾ, ཨཏྟནོ, པརེསཉྩ ཨནུཔཀཱརཾ ཡཾ ཀིཉྩི, ཏཾ པལཔཏི ཨེཏེནཱཏི སམྥཔྤལཱཔོ.

ཏཏྠ ཨབྷཱུཏཾ ཝཏྠུཾ བྷཱུཏཏོ པརཾ ཝིཉྙཱཔེཏུཀཱམསྶ ཏཐཱ ཝིཉྙཱཔནཔྤཡོགསམུཊྛཱཔིཀཱ ཙེཏནཱ མུསཱཝཱདོ. སོ པརསྶ ཨཏྠབྷེདཀརོཝ ཀམྨཔཐོ ཧོཏི, ཨིཏརོ ¶ ཀམྨམེཝ. པརེསཾ བྷེདཀཱམཏཱཡ, ཨཏྟཔྤིཡཀཱམཏཱཡ ཝཱ པརབྷེདཀརཝཙཱིཔཡོགསམུཊྛཱཔིཀཱ སཾཀིལིཊྛཙེཏནཱ པིསུཎཝཱཙཱ, སཱཔི དྭཱིསུ བྷིནྣེསུཡེཝ ཀམྨཔཐོ. པརསྶ མམྨཙྪེདཀརཝཙཱིཔཡོགསམུཊྛཱཔིཀཱ ཨེཀནྟཕརུསཙེཏནཱ ཕརུསཝཱཙཱ. ན ཧི ཙིཏྟསཎྷཏཱཡ སཏི ཕརུསཝཱཙཱ ནཱམ ཧོཏི. སཱིཏཱཧརཎཱདིཨནཏྠཝིཉྙཱཔནཔྤཡོགསམུཊྛཱཔིཀཱ སཾཀིལིཊྛཙེཏནཱ སམྥཔྤལཱཔོ, སོ པན པརེཧི ཏསྨིཾ ཨནཏྠེ གཧིཏེཡེཝ ཀམྨཔཐོ. ཝཙཱིཝིཉྙཏྟིསངྑཱཏེ ཝཙཱིདྭཱརེཏི ཝཱཙཱཡ ཨདྷིཔྤཱཡཾ ཝིཉྙཱཔེཏི, སཡཉྩ ཝཱཙཱཡ ཝིཉྙཱཡཏཱིཏི ཝཙཱིཝིཉྙཏྟིསངྑཱཏེ ཝཙཱིབྷེདཀརཔྤཡོགསམུཊྛཱཔཀཙིཏྟསམུཊྛཱནཔཐཝཱིདྷཱཏྭཱདྷིཀཀལཱཔསྶ ¶ ཝིཀཱརབྷཱུཏེ ཙོཔནཝཱཙཱབྷཱཝཏོ, ཀམྨཱནཾ པཝཏྟིམུཁབྷཱཝཏོ ཙ ཝཙཱིདྭཱརསངྑཱཏེ ཀམྨདྭཱརེ. བཱཧུལླཝུཏྟིཏོཏི ཨིདཾ ཝུཏྟནཡམེཝ.

༥༧. པརསམྤཏྟིཾ ཨབྷིམུཁཾ ཛྷཱཡཏི ལོབྷཝསེན ཙིནྟེཏཱིཏི ཨབྷིཛ྄ཛྷཱ. བྱཱཔཛྫཏི ཧིཏསུཁཾ ཨེཏེནཱཏི བྱཱཔཱདོ. མིཙྪཱ ཝིཔརཱིཏཏོ པསྶཏཱིཏི མིཙྪཱདིཊྛི.

ཏཏྠ ‘‘ཨཧོ ཝཏ ཨིདཾ མམ སིཡཱ’’ཏི ཨེཝཾ པརབྷཎྜཱབྷིཛ྄ཛྷཱཡནཾ ཨབྷིཛ྄ཛྷཱ, སཱ པརབྷཎྜསྶ ཨཏྟནོ ནཱམནེནེཝ ཀམྨཔཐོ ཧོཏི. ‘‘ཨཧོ ཝཏཱཡཾ སཏྟོ ཝིནསྶེཡྻཱ’’ཏི ཨེཝཾ མནོཔདོསོ བྱཱཔཱདོ. ‘‘ནཏྠི དིནྣ’’ནྟྱཱདིནཱ ནཡེན ཝིཔརཱིཏདསྶནཾ མིཙྪཱདིཊྛི. ཨེཏྠ པན ནཏྠིཀཨཧེཏུཀཨཀིརིཡདིཊྛཱིཧིཡེཝ ཀམྨཔཐབྷེདོ. ཨིམེསཾ པན ཨངྒཱདིཝཝཏྠཱནཝསེན པཔཉྩོ ཏཏྠ ཏཏྠ (དཱི. ནི. ཨཊྛ. ༡.༨; དྷ. ས. ཨཊྛ. ༡ ཨཀུསལཀམྨཔཐཀཐཱ; པཱརཱ. ཨཊྛ. ༢.༡༧༢) ཨཱགཏནཡེན དཊྛབྦོ. ཨཉྙཏྲཱཔི ཝིཉྙཏྟིཡཱཏི ཀཱཡཝཙཱིཝིཉྙཏྟིཾ ཝིནཱཔི, ཏཾ ཨསམུཊྛཱཔེཏྭཱཔཱིཏྱཏྠོ. ཝིཉྙཏྟིསམུཊྛཱཔཀཙིཏྟསམྤཡུཏྟཱ ཙེཏྠ ཨབྷིཛ྄ཛྷཱདཡོ ཙེཏནཱཔཀྑིཀཱཝ ཧོནྟི.

༥༨. དོསམཱུལེན ¶ ཛཱཡནྟཱིཏི སཧཛཱཏཱདིཔཙྩཡེན དོསསངྑཱཏམཱུལེན, དོསམཱུལཀཙིཏྟེན ཝཱ ཛཱཡནྟི, ན ལོབྷམཱུལཱདཱིཧི. ཧསམཱནཱཔི ཧི རཱཛཱནོ དོསཙིཏྟེནེཝ པཱཎཝདྷཾ ཨཱཎཱཔེནྟི, ཏཐཱ ཕརུསཝཱཙཱབྱཱཔཱདེསུཔི ཡཐཱརཧཾ དཊྛབྦཾ. མིཙྪཱདསྶནསྶ ཨབྷིནིཝིསིཏབྦཝཏྠཱུསུ ལོབྷཔུབྦངྒམམེཝ ཨབྷིནིཝིསནཏོ ཨཱཧ ‘‘མིཙྪཱདིཊྛི ཙ ལོབྷམཱུལེནཱ’’ཏི. སེསཱནི ཙཏྟཱརིཔི དྭཱིཧི མཱུལེཧི སམྦྷཝནྟཱིཏི ཡོ ཏཱཝ ཨབྷིམཏཾ ཝཏྠུཾ, ཨནབྷིམཏཾ ཝཱ ཨཏྟབནྡྷུཔརིཏྟཱཎཱདིཔྤཡོཛནཾ སནྡྷཱཡ ཧརཏི, ཏསྶ ཨདིནྣཱདཱནཾ ལོབྷམཱུལེན ཧོཏི. ཝེརནིཡྻཱཏནཏྠཾ ཧརནྟསྶ དོསམཱུལེན. ནཱིཏིཔཱཋཀཔྤམཱཎཏོ དུཊྛནིགྒཧཎཏྠཾ པརསནྟཀཾ ཧརནྟཱནཾ རཱཛཱུནཾ, བྲཱཧྨཎཱནཉྩ ‘‘སབྦམིདཾ བྲཱཧྨཎཱནཾ རཱཛཱུཧི དིནྣཾ, ཏེསཾ པན སབྦདུབྦལབྷཱཝེན ཨཉྙེ པརིབྷུཉྫནྟི, ཨཏྟསནྟཀམེཝ བྲཱཧྨཎཱ པརིབྷུཉྫནྟཱི’’ཏྱཱདཱིནི ཝཏྭཱ སཀསཉྙཱཡ ཨེཝཾ ཡཾ ཀིཉྩི ཧརནྟཱནཾ, ཀམྨཕལསམྦནྡྷཱཔཝཱདཱིནཉྩ མོཧམཱུལེན. ཨེཝཾ མུསཱཝཱདཱདཱིསུཔི ཡཐཱརཧཾ ཡོཛེཏབྦཾ.

༦༣. ཚསུ ཨཱརམྨཎེསུ ཏིཝིདྷཀམྨཝསེན ཨུཔྤཛྫམཱནམྤེཏཾ ཏིཝིདྷནིཡམེན ཨུཔྤཛྫཏཱིཏི ཨཱཧ ‘‘ཏཐཱ དཱནསཱིལབྷཱཝནཱཝསེནཱ’’ཏི. དསདྷཱ ནིདྡིསིཡམཱནཱནཾ ཧི དྭིནྣཾ, པུན དྭིནྣཾ, ཏིཎྞཉྩ ¶ ཡཐཱཀྐམཾ དཱནཱདཱིསུ ཏཱིསྭེཝ སངྒཧོ. ཀཱརཎཾ པནེཏྠ པརཏོ ཝཀྑཱམ. ཚལཱ༹རམྨཎེསུ པན ཏིཝིདྷཀམྨདྭཱརེསུ ཙ ནེསཾ པཝཏྟིཡོཛནཱ ཨཊྛཀཐཱདཱིསུ (དྷ. ས. ཨཊྛ. ༡༥༦-༡༥༩) ཨཱགཏནཡེན གཧེཏབྦཱ.

༦༥. དཱིཡཏི ཨེཏེནཱཏི དཱནཾ, པརིཙྩཱགཙེཏནཱ. ཨེཝཾ སེསེསུཔི. སཱིལཏཱིཏི སཱིལཾ, ཀཱཡཝཙཱིཀམྨཱནི སམཱདཧཏི, སམྨཱ ཋཔེཏཱིཏྱཏྠོ, སཱིལཡཏི ཝཱ ཨུཔདྷཱརེཏཱིཏི སཱིལཾ ¶ , ཨུཔདྷཱརཎཾ པནེཏྠ ཀུསལཱནཾ ཨདྷིཊྛཱནབྷཱཝོ. ཏཐཱ ཧི ཝུཏྟཾ ‘‘སཱིལེ པཏིཊྛཱཡཱ’’ཏྱཱདི (སཾ. ནི. ༡.༢༣, ༡༩༢). བྷཱཝེཏི ཀུསལེ དྷམྨེ ཨཱསེཝཏི ཝཌྜྷེཏི ཨེཏཱཡཱཏི བྷཱཝནཱ. ཨཔཙཱཡཏི པཱུཛཱཝསེན སཱམཱིཙིཾ ཀརོཏི ཨེཏེནཱཏི ཨཔཙཱཡནཾ. ཏཾཏཾཀིཙྩཀརཎེ བྱཱཝཊསྶ བྷཱཝོ ཝེཡྻཱཝཙྩཾ. ཨཏྟནོ སནྟཱནེ ནིབྦཏྟཱ པཏྟི དཱིཡཏི ཨེཏེནཱཏི པཏྟིདཱནཾ. པཏྟིཾ ཨནུམོདཏི ཨེཏཱཡཱཏི པཏྟཱནུམོདནཱ. དྷམྨཾ སུཎནྟི ཨེཏེནཱཏི དྷམྨསྶཝནཾ. དྷམྨཾ དེསེནྟི ཨེཏཱཡཱཏི དྷམྨདེསནཱ. དིཊྛིཡཱ ཨུཛུཀརཎཾ དིཊྛིཛུཀམྨཾ.

ཏཏྠ སཱནུསཡསནྟཱནཝཏོ པརེསཾ པཱུཛཱནུགྒཧཀཱམཏཱཡ ཨཏྟནོ ཝིཛྫམཱནཝཏྠུཔརིཙྩཛནཝསཔྤཝཏྟཙེཏནཱ དཱནཾ ནཱམ, དཱནཝཏྠུཔརིཡེསནཝསེན, དིནྣསྶ སོམནསྶཙིཏྟེན ཨནུསྶརཎཝསེན ཙ པཝཏྟཱ པུབྦཔཙྪཱབྷཱགཙེཏནཱ ཨེཏྠེཝ སམོདྷཱནཾ གཙྪནྟི. ཨེཝཾ སེསེསུཔི ཡཐཱརཧཾ དཊྛབྦཾ. ནིཙྩསཱིལཱདིཝསེན པཉྩ, ཨཊྛ, དས ཝཱ སཱིལཱནི སམཱདིཡནྟསྶ, པརིཔཱུརེནྟསྶ, ཨསམཱདིཡིཏྭཱཔི སམྤཏྟཀཱཡཝཙཱིདུཙྩརིཏཏོ ཝིརམནྟསྶ, པབྦཛནྟསྶ, ཨུཔསམྤདམཱལ༹ཀེ སཾཝརཾ སམཱདིཡནྟསྶ, ཙཏུཔཱརིསུདྡྷིསཱིལཾ པརིཔཱུརེནྟསྶ ཙ པཝཏྟཙེཏནཱ སཱིལཾ ནཱམ. ཙཏྟཱལཱིསཱཡ ཀམྨཊྛཱནེསུ, ཁནྡྷཱདཱིསུ ཙ བྷཱུམཱིསུ པརིཀམྨསམྨསནཝསཔྤཝཏྟཱ ཨཔྤནཾ ཨཔྤཏྟཱ གོཏྲབྷུཔརིཡོསཱནཙེཏནཱ བྷཱཝནཱ ནཱམ, ནིརཝཛྫཝིཛྫཱདིཔརིཡཱཔུཎནཙེཏནཱཔི ཨེཏྠེཝ སམོདྷཱནཾ གཙྪཏི.

ཝཡསཱ, གུཎེཧི ཙ ཛེཊྛཱནཾ ཙཱིཝརཱདཱིསུ པཙྩཱསཱརཧིཏེན ཨསཾཀིལིཊྛཛ྄ཛྷཱསཡེན པཙྩུཊྛཱནཨཱསནཱབྷིནཱིཧཱརཱདིཝིདྷིནཱ བཧུམཱནཀརཎཙེཏནཱ ཨཔཙཱཡནཾ ནཱམ. ཏེསམེཝ, གིལཱནཱནཉྩ ཡཐཱཝུཏྟཛ྄ཛྷཱསཡེན ཏཾཏཾཀིཙྩཀརཎཙེཏནཱ ཝེཡྻཱཝཙྩཾ ནཱམ. ཨཏྟནོ སནྟཱནེ ནིབྦཏྟསྶ པུཉྙསྶ པརེཧི ¶ སཱདྷཱརཎབྷཱཝཾ པཙྩཱསཱིསནཙེཏནཱ པཏྟིདཱནཾ ནཱམ. པརེཧི དིནྣསྶ, ཨདིནྣསྶཔི ཝཱ པུཉྙསྶ མཙྪེརམལཝིནིསྶཊེན ཙིཏྟེན ཨབྦྷཱནུམོདནཙེཏནཱ པཏྟཱནུམོདནཱ ནཱམ ¶ . ཨེཝམིམཾ དྷམྨཾ སུཏྭཱ ཏཏྠ ཝུཏྟནཡེན པཊིཔཛྫནྟོ ‘‘ལོཀིཡལོཀུཏྟརགུཎཝིསེསསྶ བྷཱགཱི བྷཝིསྶཱམི, བཧུསྶུཏོ ཝཱ ཧུཏྭཱ པརེསཾ དྷམྨདེསནཱདཱིཧི ཨནུགྒཎྷིསྶཱམཱི’’ཏི ཨེཝཾ ཨཏྟནོ, པརེསཾ ཝཱ ཧིཏཕརཎཝསཔྤཝཏྟེན ཨསཾཀིལིཊྛཛ྄ཛྷཱསཡེན ཧིཏཱུཔདེསསཝནཙེཏནཱ དྷམྨསྶཝནཾ ནཱམ, ནིརཝཛྫཝིཛྫཱདིསཝནཙེཏནཱཔི ཨེཏྠེཝ སངྒཡ྄ཧཏི. ལཱབྷསཀྐཱརཱདིནིརཔེཀྑཏཱཡ ཡོནིསོ མནསི ཀརོཏོ ཧིཏཱུཔདེསཙེཏནཱ དྷམྨདེསནཱ ནཱམ, ནིརཝཛྫཝིཛྫཱདིཨུཔདིསནཙེཏནཱཔི ཨེཏྠེཝ སངྒཧཾ གཙྪཏི. ‘‘ཨཏྠི དིནྣ’’ནྟྱཱདིནཡཔྤཝཏྟསམྨཱདསྶནཝསེན དིཊྛིཡཱ ཨུཛུཀརཎཾ དིཊྛིཛུཀམྨཾ ནཱམ.

ཡདི ཨེཝཾ ཉཱཎཝིཔྤཡུཏྟཙིཏྟུཔྤཱདསྶ དིཊྛིཛུཀམྨཔུཉྙཀིརིཡབྷཱཝོ ན ལབྦྷཏཱིཏི? ནོ ན ལབྦྷཏི པུརིམཔཙྪིམཙེཏནཱནམྤི ཏཾཏཾཔུཉྙཀིརིཡཱསྭེཝ སངྒཎྷནཏོ. ཀིཉྩཱཔི ཧི ཨུཛུཀརཎཝེལཱཡཾ ཉཱཎསམྤཡུཏྟམེཝ ཙིཏྟཾ ཧོཏི, པུརིམཔཙྪཱབྷཱགེ པན ཉཱཎཝིཔྤཡུཏྟམྤི སམྦྷཝཏཱིཏི ཏསྶཔི དིཊྛིཛུཀམྨབྷཱཝོ ཨུཔཔཛྫཏཱིཏི ཨལམཏིཔྤཔཉྩེན.

ཨིམེསུ པན དསསུ པཏྟིདཱནཱནུམོདནཱ དཱནེ སངྒཧཾ གཙྪནྟི ཏཾསབྷཱཝཏྟཱ. དཱནམྤི ཧི ཨིསྶཱམཙྪེརཱནཾ པཊིཔཀྑཾ, ཨེཏེཔི. ཏསྨཱ སམཱནཔྤཊིཔཀྑཏཱཡ ཨེཀལཀྑཎཏྟཱ ཏེ དཱནམཡཔུཉྙཀིརིཡཝཏྠུམྷི སངྒཡ྄ཧནྟི. ཨཔཙཱཡནཝེཡྻཱཝཙྩཱསཱིལམཡཔུཉྙེཝ སངྒཡ྄ཧནྟི ཙཱརིཏྟསཱིལབྷཱཝཏོ. དེསནཱསཝནདིཊྛིཛུཀཱ པན ཀུསལདྷམྨཱསེཝནབྷཱཝཏོ བྷཱཝནཱམཡེ སངྒཧཾ གཙྪནྟཱིཏི (དཱི. ནི. ཊཱི. ༣.༣༠༥) ཨཱཙརིཡདྷམྨཔཱལཏྠེརེན ཝུཏྟཾ. ཨཔརེ པན ‘‘དེསེནྟོ, སུཎནྟོ ཙ དེསནཱནུསཱརེན ཉཱཎཾ ¶ པེསེཏྭཱ ལཀྑཎཱནི པཊིཝིཛ྄ཛྷ པཊིཝིཛ྄ཛྷ དེསེཏི, སུཎཱཏི ཙ, ཏཱནི ཙ དེསནཱསཝནཱནི པཊིཝེདྷམེཝཱཧརནྟཱིཏི དེསནཱསཝནཱབྷཱཝནཱམཡེ སངྒཧཾ གཙྪནྟཱི’’ཏི ཝདནྟི. དྷམྨདཱནསབྷཱཝཏོ དེསནཱ དཱནམཡེ སངྒཧཾ གཙྪཏཱིཏིཔི སཀྐཱ ཝཏྟུཾ. ཏཐཱ ཧི ཝུཏྟཾ ‘‘སབྦདཱནཾ དྷམྨདཱནཾ ཛིནཱཏཱི’’ཏི (དྷ. པ. ༣༥༤). ཏཐཱ དིཊྛིཛུཀམྨཾ སབྦཏྠཱཔི སབྦེསཾ ནིཡམནལཀྑཎཏྟཱ. དཱནཱདཱིསུ ཧི ཡཾ ཀིཉྩི ‘‘ཨཏྠི དིནྣ’’ནྟྱཱདིནཡཔྤཝཏྟཱཡ སམྨཱདིཊྛིཡཱ ཝིསོདྷིཏཾ མཧཔྥལཾ ཧོཏི མཧཱནིསཾསཾ, ཨེཝཉྩ ཀཏྭཱ དཱིགྷནིཀཱཡཊྛཀཐཱཡཾ (དཱི. ནི. ཨཊྛ. ༣.༣༠༥; དྷ. ས. ཨཊྛ. ༡༥༦-༡༥༩ པུཉྙཱཀིརིཡཝཏྠཱདིཀཐཱ) ‘‘དིཊྛིཛུཀམྨཾ སབྦེསཾ ནིཡམལཀྑཎ’’ནྟི ཝུཏྟཾ. ཨེཝཾ དཱནསཱིལབྷཱཝནཱཝསེན ཏཱིསུ ཨིཏརེསཾ སངྒཎྷནཏོ སངྑེཔཏོ ཏིཝིདྷམེཝ པུཉྙཀིརིཡཝཏྠུ ཧོཏཱིཏི དཊྛབྦཾ, ཏཐཱ ཙེཝ ཨཱཙརིཡེན ཧེཊྛཱ དསྶིཏཾ.

༦༧. མནོཀམྨམེཝ ¶ ཝིཉྙཏྟིསམུཊྛཱཔཀཏྟཱབྷཱཝེན ཀཱཡདྭཱརཱདཱིསུ ཨཔྤཝཏྟནཏོ. ཏཉྩ རཱུཔཱཝཙརཀུསལཾ བྷཱཝནཱམཡཾ དཱནཱདིཝསེན ཨཔྤཝཏྟནཏོ. ཨཔྤནཱཔྤཏྟཾ པུབྦབྷཱགཔྤཝཏྟཱནཾ ཀཱམཱཝཙརབྷཱཝཏོ. ཛྷཱནངྒབྷེདེནཱཏི པཊིཔདཱདིབྷེདཏོ ཨནེཀཝིདྷཏྟེཔི ཨངྒཱཏིཀྐམཝསེན ནིབྦཏྟཛ྄ཛྷཱནངྒབྷེདཏོ པཉྩཝིདྷཾ ཧོཏི.

༦༨. ཨཱརམྨཎབྷེདེནཱཏི ཀསིཎུགྒྷཱཊིམཱཀཱསཾ, ཨཱཀཱསཝིསཡཾ མནོ, ཏདབྷཱཝོ, ཏདཱལམྦཾ ཝིཉྙཱཎནྟི ཙཏུབྦིདྷནྟི ཨིམེསཾ ཙཏུནྣཾ ཨཱརམྨཎཱནཾ བྷེདེན.

༦༩. ཨེཏྠཱཏི ཨིམེསུ པཱཀཊྛཱནཝསེན ཙཏུབྦིདྷེསུ ཀམྨེསུ. ཨུདྡྷཙྩརཧིཏནྟི ཨུདྡྷཙྩསཧགཏཙེཏནཱརཧིཏཾ ཨེཀཱདསཝིདྷཾ ཨཀུསལཀམྨཾ. ཀིཾ པནེཏྠ ཀཱརཎཾ ཨདྷིམོཀྑཝིརཧེན སབྦདུབྦལམྤི ཝིཙིཀིཙྪཱསཧགཏཾ པཊིསནྡྷིཾ ཨཱཀཌྜྷཏི, ཨདྷིམོཀྑསམྤཡོགེན ཏཏོ བལཝནྟམྤི ཨུདྡྷཙྩསཧགཏཾ ནཱཀཌྜྷཏཱིཏི ¶ ? པཊིསནྡྷིདཱནསབྷཱཝཱབྷཱཝཏོ. བལཝཾ ཨཱཀཌྜྷཏི, དུབྦལཾ ནཱཀཌྜྷཏཱིཏི ཧི ཨཡཾ ཝིཙཱརཎཱ པཊིསནྡྷིདཱནསབྷཱཝེསུཡེཝ. ཡསྶ པན པཊིསནྡྷིདཱནསབྷཱཝོཡེཝ ནཏྠི, ན ཏསྶ བལཝབྷཱཝོ པཊིསནྡྷིཨཱཀཌྜྷནེ ཀཱརཎཾ.

ཀཐཾ པནེཏཾ ཝིཉྙཱཏབྦཾ ཨུདྡྷཙྩསཧགཏསྶ པཊིསནྡྷིདཱནསབྷཱཝོ ནཏྠཱིཏི? དསྶནེནཔཧཱཏབྦེསུ ཨནཱགཏཏྟཱ. ཏིཝིདྷཱ ཧི ཨཀུསལཱ དསྶནེན པཧཱཏབྦཱ, བྷཱཝནཱཡ པཧཱཏབྦཱ, སིཡཱ དསྶནེན པཧཱཏབྦཱ, སིཡཱ བྷཱཝནཱཡ པཧཱཏབྦཱཏི. ཏཏྠ དིཊྛིསཧགཏཝིཙིཀིཙྪཱསཧགཏཙིཏྟུཔྤཱདཱ དསྶནེན པཧཱཏབྦཱ ནཱམ པཋམཾ ནིབྦཱནདསྶནཝསེན ‘‘དསྶན’’ནྟི ལདྡྷནཱམེན སོཏཱཔཏྟིམགྒེན པཧཱཏབྦཏྟཱ. ཨུདྡྷཙྩསཧགཏཙིཏྟུཔྤཱདོ བྷཱཝནཱཡ པཧཱཏབྦོ ནཱམ ཨགྒམགྒེན པཧཱཏབྦཏྟཱ. ཨུཔརིམགྒཏྟཡཉྷི པཋམམགྒེན དིཊྛནིབྦཱནེ བྷཱཝནཱཝསེན པཝཏྟནཏོ ‘‘བྷཱཝནཱ’’ཏི ཝུཙྩཏི. དིཊྛིཝིཔྤཡུཏྟདོམནསྶསཧགཏཙིཏྟུཔྤཱདཱ པན སིཡཱ དསྶནེན པཧཱཏབྦཱ, སིཡཱ བྷཱཝནཱཡ པཧཱཏབྦཱ ཏེསཾ ཨཔཱཡནིབྦཏྟཀཱཝཏྠཱཡ པཋམམགྒེན, སེསབཧལཱབཧལཱཝཏྠཱཡ ཨུཔརིམགྒེཧི པཧཱིཡམཱནཏྟཱ. ཏཏྠ སིཡཱ དསྶནེན པཧཱཏབྦམྤི དསྶནེན པཧཱཏབྦསཱམཉྙེན ཨིདྷ ‘‘དསྶནེན པཧཱཏབྦ’’ནྟི ཝོཧརནྟི.

ཡདི ཙ ཨུདྡྷཙྩསཧགཏཾ པཊིསནྡྷིཾ དདེཡྻ, ཏདཱ ཨཀུསལཔཊིསནྡྷིཡཱ སུགཏིཡཾ ཨསམྦྷཝཏོ ཨཔཱཡེསྭེཝ དདེཡྻ. ཨཔཱཡགམནཱིཡཉྩ ཨཝསྶཾ དསྶནེན པཧཱཏབྦཾ སིཡཱ. ཨིཏརཐཱ ¶ ཨཔཱཡགམནཱིཡསྶ ཨཔྤཧཱིནཏྟཱ སེཀྑཱནཾ ཨཔཱཡུཔྤཏྟི ཨཱཔཛྫཏི, ན ཙ པནེཏཾ ཡུཏྟཾ ‘‘ཙཏཱུཧཔཱཡེཧི ཙ ཝིཔྤམུཏྟོ (ཁུ. པཱ. ༦.༡༡; སུ. ནི. ༢༣༤), ཨཝིནིཔཱཏདྷམྨོ’’ཏི (པཱརཱ. ༢༡; སཾ. ནི. ༥.༩༩༨) ཨཱདིཝཙནེཧི སཧ ཝིརུཛ྄ཛྷནཏོ. སཏི ཙ པནེཏསྶ དསྶནེན པཧཱཏབྦབྷཱཝེ ‘‘སིཡཱ དསྶནེན པཧཱཏབྦཱ’’ཏི ཨིམསྶ ཝིབྷངྒེ ཝཏྟབྦཾ སིཡཱ, ན ཙ པནེཏཾ ཝུཏྟནྟི ¶ . ཨཐ སིཡཱ ‘‘ཨཔཱཡགཱམིནིཡོ རཱགོ དོསོ མོཧོ ཏདེཀཊྛཱ ཙ ཀིལེསཱ’’ཏི ཨེཝཾ དསྶནེན པཧཱཏབྦེསུ ཝུཏྟཏྟཱ ཨུདྡྷཙྩསཧགཏཙེཏནཱཡ ཏཏྠ སངྒཧོ སཀྐཱ ཝཏྟུནྟི. ཏཾ ན, ཏསྶ ཨེཀནྟཏོ བྷཱཝནཱཡ པཧཱཏབྦབྷཱཝེན ཝུཏྟཏྟཱ. ཝུཏྟཉྷེཏཾ – ‘‘ཀཏམེ དྷམྨཱ བྷཱཝནཱཡ པཧཱཏབྦཱ? ཨུདྡྷཙྩསཧགཏོ ཙིཏྟུཔྤཱདོ’’ཏི (དྷ. ས. ༡༤༠༦), ཏསྨཱ དསྶནེན པཧཱཏབྦེསུ ཨཝཙནཾ ཨིམསྶ པཊིསནྡྷིདཱནཱབྷཱཝཾ སཱདྷེཏི. ནནུ ཙ པཊིསམྦྷིདཱཝིབྷངྒེ –

‘‘ཡསྨིཾ སམཡེ ཨཀུསལཾ ཙིཏྟཾ ཨུཔྤནྣཾ ཧོཏི ཨུཔེཀྑཱསཧགཏཾ ཨུདྡྷཙྩསམྤཡུཏྟཾ རཱུཔཱརམྨཎཾ ཝཱ…པེ… དྷམྨཱརམྨཎཾ ཝཱ, ཡཾ ཡཾ ཝཱ པནཱརབྦྷ ཏསྨིཾ སམཡེ ཕསྶོ ཧོཏི…པེ… ཨཝིཀྑེཔོ ཧོཏི, ཨིམེ དྷམྨཱ ཨཀུསལཱ. ཨིམེསུ དྷམྨེསུ ཉཱཎཾ དྷམྨཔཊིསམྦྷིདཱ, ཏེསཾ ཝིཔཱཀེ ཉཱཎཾ ཨཏྠཔཊིསམྦྷིདཱ’’ཏི (ཝིབྷ. ༧༣༠-༧༣༡) –

ཨེཝཾ ཨུདྡྷཙྩསཧགཏཙིཏྟུཔྤཱདཾ ཨུདྡྷརིཏྭཱ ཏསྶ ཝིཔཱཀོཔི ཨུདྡྷཊོཏི ཀཐམསྶ པཊིསནྡྷིདཱནཱབྷཱཝོ སམྤཊིཙྪིཏབྦོཏི? ནཱཡཾ པཊིསནྡྷིདཱནཾ སནྡྷཱཡ ཨུདྡྷཊོ. ཨཐ ཁོ པཝཏྟིཝིཔཱཀཾ སནྡྷཱཡ. པཊྛཱནེ པན –

‘‘སཧཛཱཏཱ དསྶནེན པཧཱཏབྦཱ ཙེཏནཱ ཙིཏྟསམུཊྛཱནཱནཾ རཱུཔཱནཾ ཀམྨཔཙྩཡེན པཙྩཡོ, ནཱནཱཀྑཎིཀཱ དསྶནེན པཧཱཏབྦཱ ཙེཏནཱ ཝིཔཱཀཱནཾ ཁནྡྷཱནཾ, ཀཊཏྟཱ ཙ རཱུཔཱནཾ ཀམྨཔཙྩཡེན པཙྩཡོ’’ཏི (པཊྛཱ. ༢.༨.༨༩) –

དསྶནེན པཧཱཏབྦཙེཏནཱཡ ཨེཝ སཧཛཱཏནཱནཱཀྑཎིཀཀམྨཔཙྩཡབྷཱཝཾ ཨུདྡྷརིཏྭཱ ‘‘སཧཛཱཏཱ བྷཱཝནཱཡ པཧཱཏབྦཱ ཙེཏནཱ ཙིཏྟསམུཊྛཱནཱནཾ རཱུཔཱནཾ ཀམྨཔཙྩཡེན པཙྩཡོ’’ཏི ¶ (པཊྛཱ. ༢.༨.༨༩) བྷཱཝནཱཡ པཧཱཏབྦཙེཏནཱཡ སཧཛཱཏཀམྨཔཙྩཡབྷཱཝོཝ ཨུདྡྷཊོ, ན པན ནཱནཱཀྑཎིཀཀམྨཔཙྩཡབྷཱཝོ, ན ཙ ནཱནཱཀྑཎིཀཀམྨཔཙྩཡཾ ཝིནཱ པཊིསནྡྷིཨཱཀཌྜྷནཾ ཨཏྠི ¶ , ཏསྨཱ ནཏྠི ཏསྶ སབྦཐཱཔི པཊིསནྡྷིདཱནནྟི. ཡཾ པནེཀེ ཝདནྟི ‘‘ཨུདྡྷཙྩཙེཏནཱ ཨུབྷཡཝིཔཱཀམྤི ན དེཏི པཊྛཱནེ ནཱནཱཀྑཎིཀཀམྨཔཙྩཡབྷཱཝསྶ ཨནུདྡྷཊཏྟཱ’’ཏི, ཏཾ ཏེསཾ མཏིམཏྟཾ པཊིསམྦྷིདཱཝིབྷངྒེ ཨུདྡྷཙྩསཧགཏཱནམྤི པཝཏྟིཝིཔཱཀསྶ ཨུདྡྷཊཏྟཱ, པཊྛཱནེ ཙ པཊིསནྡྷིཝིཔཱཀབྷཱཝམེཝ སནྡྷཱཡ ནཱནཱཀྑཎིཀཀམྨཔཙྩཡབྷཱཝསྶ ཨནུདྡྷཊཏྟཱ. ཡདི ཧི པཝཏྟིཝིཔཱཀཾ སནྡྷཱཡ ནཱནཱཀྑཎིཀཀམྨཔཙྩཡབྷཱཝོ ཝུཙྩེཡྻ, ཏདཱ པཊིསནྡྷིཝིཔཱཀམྤིསྶ མཉྙེཡྻུནྟི ལབྦྷམཱནསྶཔི པཝཏྟིཝིཔཱཀསྶ ཝསེན ནཱནཱཀྑཎིཀཀམྨཔཙྩཡབྷཱཝོ ན ཝུཏྟོ, ཏསྨཱ ན སཀྐཱ ཏསྶ པཝཏྟིཝིཔཱཀཾ ནིཝཱརེཏུཾ. ཏེནཱཧ ‘‘པཝཏྟིཡཾ པནཱ’’ཏྱཱདི. ཨཱཙརིཡབུདྡྷམིཏྟཱདཡོ པན ཨཏྠི ཨུདྡྷཙྩསཧགཏཾ བྷཱཝནཱཡ པཧཱཏབྦམྤི. ཨཏྠི ན བྷཱཝནཱཡ པཧཱཏབྦམྤི, ཏེསུ བྷཱཝནཱཡ པཧཱཏབྦཾ སེཀྑསནྟཱནཔྤཝཏྟཾ, ཨིཏརཾ པུཐུཛྫནསནྟཱནཔྤཝཏྟཾ, ཕལདཱནཉྩ པུཐུཛྫནསནྟཱནཔྤཝཏྟསྶེཝ ན ཨིཏརསྶཱཏི ཨེཝཾ ཨུདྡྷཙྩསཧགཏཾ དྭིདྷཱ ཝིབྷཛིཏྭཱ ཨེཀསྶ ཨུབྷཡཝིཔཱཀདཱནཾ, ཨེཀསྶ སབྦཐཱཔི ཝིཔཱཀཱབྷཱཝཾ ཝཎྞེནྟི. ཡོ པནེཏྠ ཏེསཾ ཝིནིཙྪཡོ, ཡཉྩ ཏསྶ ནིརཱཀརཎཾ, ཡཉྩ སབྦཐཱཔི ཝིཔཱཀཱབྷཱཝཝཱདཱིནཾ མཏཔཊིཀྑེཔནཾ ཨིདྷ ཨཝུཏྟཾ, ཏཾ སབྦཾ པརམཏྠམཉྫཱུསཱདཱིསུ, ཝིསེསཏོ ཙ ཨབྷིདྷམྨཏྠཝིཀཱསིནིཡཱ ནཱམ ཨབྷིདྷམྨཱཝཏཱརསཾཝཎྞནཱཡཾ ཝུཏྟནཡེན ཝེདིཏབྦཾ.

སབྦཏྠཱཔི ཀཱམལོཀེཏི སུགཏིདུགྒཏིཝསེན སབྦསྨིམྤི ཀཱམལོཀེ. ཡཐཱརཧནྟི དྭཱརཱརམྨཎཱནུརཱུཔཾ. ཨཔཱཡེསུཔི ཡཾ ནཱགསུཔཎྞཱདཱིནཾ མཧཱསམྤཏྟིཝིསཡཾ ཝིཔཱཀཝིཉྙཱཎཾ, ཡཉྩ ནིརཡཝཱསཱིནཾ མཧཱམོགྒལླཱནཏྠེརདསྶནཱདཱིསུ ཨུཔྤཛྫཏི ཝིཔཱཀཝིཉྙཱཎཾ ¶ , ཏཾ ཀུསལཀམྨསྶེཝ ཕལཾ. ན ཧི ཨཀུསལསྶ ཨིཊྛཝིཔཱཀོ སམྦྷཝཏི. ཝུཏྟཉྷེཏཾ ‘‘ཨཊྛཱནམེཏཾ, བྷིཀྑཝེ, ཨནཝཀཱསོ, ཡཾ ཨཀུསལསྶ ཀམྨསྶ ཨིཊྛོ ཀནྟོ ཝིཔཱཀོ སཾཝིཛྫཏཱི’’ཏི (མ. ནི. ༣.༡༣༡; ཨ. ནི. ༡.༢༨༤-༢༨༦; ཝིབྷ. ༨༠༩), ཏསྨཱ ཀུསལཀམྨཾ ཨཔཱཡེསུཔི ཨཧེཏུཀཝིཔཱཀཱནི ཛནེཏི. ཨཉྙབྷཱུམིཀསྶ ཙ ཀམྨསྶ ཨཉྙབྷཱུམིཀཝིཔཱཀཱབྷཱཝཏོ ཀཱམཝིརཱགབྷཱཝནཱཡ ཀཱམཏཎྷཱཝིསཡཝིཉྙཱཎུཔྤཱདནཱཡོགཏོ ཨེཀནྟསདིསཝིཔཱཀཏྟཱ ཙ མཧགྒཏཱནུཏྟརཀུསལཱནཾ རཱུཔཱཝཙརཀམྨེན ཨཧེཏུཀཝིཔཱཀུཔྤཏྟིཡཱ ཨབྷཱཝཏོ རཱུཔལོཀེཔི ཡཐཱརཧཾ རཱུཔཱདིཝིསཡཱནི ཏཱནི ཨབྷིནིཔྥཱདེཏཱིཏི ཝུཏྟཾ ‘‘སབྦཏྠཱཔི ཀཱམལོཀེ’’ཏྱཱདི.

༧༡. ཨེཝཾ པན ཝིཔཙྩནྟཾ ཀམྨཾ སོལ༹སཀདྭཱདསཀཨཊྛཀཝསེན ཏིདྷཱ ཝིཔཙྩཏཱིཏི དསྶེཏུཾ ‘‘ཏཏྠཱཔི’’ཏྱཱདི ཝུཏྟཾ. ཏཏྠཱཔཱིཏི ཨེཝཾ ཝིཔཙྩམཱནེཔི ཀུསལཀམྨེ. ཨུཀྐཊྛནྟི ཀུསལཔརིཝཱརལཱབྷཏོ ¶ , པཙྪཱ ཨཱསེཝནཔྤཝཏྟིཡཱ ཝཱ ཝིསིཊྛཾ. ཡཉྷི ཀམྨཾ ཨཏྟནོ པཝཏྟིཀཱལེ པུརིམཔཙྪཱབྷཱགཔྤཝཏྟེཧི ཀུསལཀམྨེཧི པརིཝཱརིཏཾ, པཙྪཱ ཝཱ ཨཱསེཝནལཱབྷེན སམུདཱཙིཎྞཾ. ཏཾ ཨུཀྐཊྛཾ. ཡཾ པན ཀརཎཀཱལེ ཨཀུསལཀམྨེཧི པརིཝཱརིཏཾ, པཙྪཱ ཝཱ ‘‘དུཀྐཊམེཏཾ མཡཱ’’ཏི ཝིཔྤཊིསཱརུཔྤཱདནེན པརིབྷཱཝིཏཾ, ཏཾ ཨོམཀནྟི དཊྛབྦཾ.

པཊིསནྡྷིནྟི ཨེཀམེཝ པཊིསནྡྷིཾ. ན ཧི ཨེཀེན ཀམྨེན ཨནེཀཱསུ ཛཱཏཱིསུ པཊིསནྡྷི ཧོཏི, པཝཏྟིཝིཔཱཀོ པན ཛཱཏིསཏེཔི ཛཱཏིསཧསྶེཔི ཧོཏི. ཡཐཱཧ ‘‘ཏིརཙྪཱནགཏེ དཱནཾ དཏྭཱ སཏགུཎཱ དཀྑིཎཱ པཱཊིཀངྑིཏབྦཱ’’ཏི (མ. ནི. ༣.༣༧༩). ཡསྨཱ པནེཏྠ ཉཱཎཾ ཛཙྩནྡྷཱདིཝིཔཏྟིནིམིཏྟསྶ མོཧསྶ, སབྦཱཀུསལསྶེཝ ཝཱ པཊིཔཀྑཾ, ཏསྨཱ ཏཾསམྤཡུཏྟཾ ཀམྨཾ ཛཙྩནྡྷཱདིཝིཔཏྟིཔཙྩཡཾ ན ཧོཏཱིཏི ཏིཧེཏུཀཾ ཨཏིདུབྦལམྤི སམཱནཾ ¶ དུཧེཏུཀཔཊིསནྡྷིམེཝ ཨཱཀཌྜྷཏི, ནཱཧེཏུཀཾ. དུཧེཏུཀཉྩ ཀམྨཾ ཉཱཎསམྤཡོགཱབྷཱཝཏོ ཉཱཎཕལུཔྤཱདནེ ཨསམཏྠཾ, ཡཐཱ ཏཾ ཨལོབྷསམྤཡོགཱབྷཱཝཏོ ཨལོབྷཕལུཔྤཱདནེ ཨསམཏྠཾ ཨཀུསལཀམྨནྟི ཏཾ ཨཏིཨུཀྐཊྛམྤི སམཱནཾ དུཧེཏུཀམེཝ པཊིསནྡྷིཾ ཨཱཀཌྜྷཏི, ན ཏིཧེཏུཀནྟི ཝུཏྟཾ ‘‘ཏིཧེཏུཀམོམཀཾ དུཧེཏུཀམུཀྐཊྛཉྩཱ’’ཏྱཱདི.

ཨེཏྠ སིཡཱ – ཡཐཱ པཊིསམྦྷིདཱམགྒེ ‘‘གཏིསམྤཏྟིཡཱ ཉཱཎསམྤཡུཏྟེ ཨཊྛནྣཾ ཧེཏཱུནཾ པཙྩཡཱ ཨུཔཔཏྟི ཧོཏཱི’’ཏི (པཊི. མ. ༡.༢༣༡) ཀུསལསྶ ཀམྨསྶ ཛཝནཀྑཎེ ཏིཎྞཾ, ནིཀནྟིཀྑཎེ དྭིནྣཾ, པཊིསནྡྷིཀྑཎེ ཏིཎྞཉྩ ཧེཏཱུནཾ ཝསེན ཨཊྛནྣཾ ཧེཏཱུནཾ པཙྩཡཱ ཉཱཎསམྤཡུཏྟཱུཔཔཏྟི, ཏཐཱ ‘‘གཏིསམྤཏྟིཡཱ ཉཱཎཝིཔྤཡུཏྟེ ཚནྣཾ ཧེཏཱུནཾ པཙྩཡཱ ཨུཔཔཏྟི ཧོཏཱི’’ཏི (པཊི. མ. ༡.༢༣༣) ཛཝནཀྑཎེ དྭིནྣཾ, ནིཀནྟིཀྑཎེ དྭིནྣཾ, པཊིསནྡྷིཀྑཎེ དྭིནྣཉྩ ཧེཏཱུནཾ ཝསེན ཚནྣཾ ཧེཏཱུནཾ པཙྩཡཱ ཉཱཎཝིཔྤཡུཏྟཱུཔཔཏྟི ཝུཏྟཱ, ཨེཝཾ ‘‘གཏིསམྤཏྟིཡཱ ཉཱཎཝིཔྤཡུཏྟེ སཏྟནྣཾ ཧེཏཱུནཾ པཙྩཡཱ ཨུཔཔཏྟི ཧོཏཱི’’ཏི ཏིཧེཏུཀཀམྨེན དུཧེཏུཀཔཊིསནྡྷིཡཱ ཨཝུཏྟཏྟཱ ནཏྠི ཏིཧེཏུཀསྶ དུཧེཏུཀཔཊིསནྡྷིཨཱཀཌྜྷནནྟི? ནཡིདམེཝཾ དུཧེཏུཀོམཀཀམྨེན ཨཧེཏུཀཔཊིསནྡྷིཡཱ ཝིཡ ཏིཧེཏུཀོམཀཀམྨེན སཱམཏྠིཡཱནུརཱུཔཏོ དུཧེཏུཀཔཊིསནྡྷིཡཱཝ དཱཏབྦཏྟཱ, ཀམྨསརིཀྑཀཝིཔཱཀདསྶཏྠཾ པན མཧཱཐེརེན སཱཝསེསོ པཱཋོ ཀཏོ. ཨིཏརཐཱ ‘‘ཙཏུནྣཾ ཧེཏཱུནཾ པཙྩཡཱ’’ཏི ཝཙནཱབྷཱཝཏོ དུཧེཏུཀཀམྨེན ཨཧེཏུཀཱུཔཔཏྟིཡཱཔིཨབྷཱཝོ ཨཱཔཛྫཏི, ཏསྨཱ ཡཐཱ སུགཏིཡཾ ཛཙྩནྡྷབདྷིརཱདིཝིཔཏྟིཡཱ ཨཧེཏུཀཱུཔཔཏྟིཾ ཝཛྫེཏྭཱ གཏིསམྤཏྟིཡཱ སཧེཏུཀཱུཔཔཏྟིདསྶནཏྠཾ དུཧེཏུཀཱུཔཔཏྟི ཨེཝ ཨུདྡྷཊཱ, ན ཨཧེཏུཀཱུཔཔཏྟི, ཨེཝཾ ཀམྨསརིཀྑཀཝིཔཱཀདསྶནཏྠཾ ¶ ཏིཧེཏུཀཀམྨེན ¶ ཏིཧེཏུཀཱུཔཔཏྟི ཨེཝ ཨུདྡྷཊཱ, ན དུཧེཏུཀཱུཔཔཏྟི, ན པན ཨལབྦྷནཏོཏི དཊྛབྦཾ.

༧༤. ཨེཝཾ ཨེཀཱཡ ཙེཏནཱཡ སོལ༹ས ཝིཔཱཀཱནི ཨེཏྠེཝ དྭཱདསཀམགྒོ ཨཧེཏུཀཊྛཀམྤཱིཏི པཝཏྟསྶ ཏིཔིཊཀཙཱུལ༹ནཱགཏྠེརཝཱདསྶ ཝསེན ཝིཔཱཀཔྤཝཏྟིཾ དསྶེཏྭཱ ཨིདཱནི ཨེཀཱཡ ཙེཏནཱཡ དྭཱདས ཝིཔཱཀཱནི ཨེཏྠེཝ དསཀམགྒོ ཨཧེཏུཀཊྛཀམྤཱིཏི ཨཱགཏསྶ མོརཝཱཔཱིཝཱསཱིམཧཱདྷམྨརཀྑིཏཏྠེརཝཱདསྶཔི ཝསེན དསྶེཏུཾ ཨསངྑཱརཾ སསངྑཱརཝིཔཱཀཱནཱི’’ཏྱཱདི ཝུཏྟཾ. ཡཐཱ མུཁེ ཙལིཏེ ཨཱདཱསཏལེ མུཁནིམིཏྟཾ ཙལཏི, ཨེཝཾ ཨསངྑཱརཀུསལསྶ ཨསངྑཱརཝིཔཱཀོཝ ཧོཏི, ན སསངྑཱརོཏི ཨེཝཾ ཨཱགམནཏོཝ སངྑཱརབྷེདོཏི ཨཡམེཏྠཱདྷིཔྤཱཡོ. ཡསྨཱ པན ཝིཔཱཀསྶ སངྑཱརབྷེདོ པཙྩཡཝསེན ཨིཙྪིཏོ, ན ཀམྨཝསེན, ཏསྨཱ ཨེས ཀེཙིཝཱདོ ཀཏོ.

ཏེསནྟི ཏེསཾ ཨེཝཾཝཱདཱིནཾ. ཡཐཱཀྐམནྟི ཏིཧེཏུཀུཀྐཊྛཱདཱིནཾ ཨནུཀྐམེན. དྭཱདས ཝིཔཱཀཱནཱིཏི ཏིཧེཏུཀུཀྐཊྛཨསངྑཱརིཀསསངྑཱརིཀཀམྨསྶ ཝསེན ཡཐཱཀྐམཾ སསངྑཱརིཀཙཏུཀྐཝཛྫིཏཱནི, ཨསངྑཱརིཀཙཏུཀྐཝཛྫིཏཱནི ཙ དྭཱདས ཝིཔཱཀཱནི, ཏཐཱ ཏིཧེཏུཀོམཀསྶ, དུཧེཏུཀུཀྐཊྛསྶ ཙ ཀམྨསྶ ཝསེན དུཧེཏུཀསསངྑཱརདྭཡཝཛྫིཏཱནི, དུཧེཏུཀཱསངྑཱརདྭཡཝཛྫིཏཱནི ཙ དས ཝིཔཱཀཱནི, དུཧེཏུཀོམཀསྶ ཝསེན དུཧེཏུཀདྭཡཝཛྫིཏཱནི ཙ ཨཊྛ ཝིཔཱཀཱནི ཡཐཱཝུཏྟསྶ ‘‘ཏིཧེཏུཀམུཀྐཊྛ’’ནྟྱཱདིནཱ ཝུཏྟནཡསྶ ཨནུསཱརེན ཨནུསྶརཎེན ཡཐཱསམྦྷཝཾ ཏསྶ ཏསྶ སམྦྷཝཱནུརཱུཔཏོ ཨུདྡིསེ.

༧༥. པརིཏོ ཨཏྟཾ ཁཎྜིཏཾ ཝིཡ ཨཔྤཱནུབྷཱཝནྟི པརིཏྟཾ. པཀཊྛབྷཱཝཾ ནཱིཏནྟི པཎཱིཏཾ, ཨུབྷིནྣཾ མཛ྄ཛྷེ བྷཝཾ མཛ྄ཛྷིམཾ. ཏཏྠ ‘‘པཊིལདྡྷམཏྟཾ ¶ ཨནཱསེཝིཏཾ པརིཏྟ’’ནྟི ཨཝིསེསཏོཝ ཨཊྛཀཐཱཡཾ ཝུཏྟཾ, ཏཐཱ ‘‘ནཱཏིསུབྷཱཝིཏཾ ཨཔརིཔུཎྞཝསཱིབྷཱཝཾ མཛ྄ཛྷིམཾ. ཨཏིཝིཡ སུབྷཱཝིཏཾ པན སབྦསོ པརིཔུཎྞཝསཱིབྷཱཝཾ པཎཱིཏ’’ནྟི. ཨཱཙརིཡེན པནེཏྠ པརིཏྟམྤི ཨཱིསཀཾ ལདྡྷཱསེཝནམེཝཱདྷིཔྤེཏནྟི དིསྶཏི. ཏཐཱ ཧཱནེན ནཱམརཱུཔཔརིཙྪེདེ –

‘‘སམཱནཱསེཝནེ ¶ ལདྡྷེ, ཝིཛྫམཱནེ མཧབྦལེ;

ཨལདྡྷཱ ཏཱདིསཾ ཧེཏུཾ, ཨབྷིཉྙཱ ན ཝིཔཙྩཏཱི’’ཏི. (ནཱམ. པརི. ༤༧༤);

སམཱནབྷཱུམིཀཏོཝ ཨཱསེཝནལཱབྷེན བལཝབྷཱཝཏོ མཧགྒཏདྷམྨཱནཾ ཝིཔཱཀདཱནཾ ཝཏྭཱ ཏདབྷཱཝཏོ ཨབྷིཉྙཱཡ ཨཝིཔཙྩནཾ ཝུཏྟཾ. ཧཱིནེཧི ཚནྡཙིཏྟཝཱིརིཡཝཱིམཾསཱཧི ནིབྦཏྟིཏཾ ཝཱ པརིཏྟཾ. མཛ྄ཛྷིམེཧི ཚནྡཱདཱིཧི མཛ྄ཛྷིམཾ. པཎཱིཏེཧི པཎཱིཏནྟི ཨལམཏིཔྤཔཉྩེན.

༨༤. པཉྩམཛ྄ཛྷཱནཾ བྷཱཝེཏྭཱཏི ཨབྷིཉྙཱབྷཱཝཾ ཨསམྤཏྟཾ པཉྩམཛ྄ཛྷཱནཾ ཏིཝིདྷམྤི བྷཱཝེཏྭཱ. ཨབྷིཉྙཱབྷཱཝཔྤཏྟསྶ པན ཨཝིཔཱཀབྷཱཝོ ‘‘ཨལདྡྷཱ ཏཱདིས’’ནྟྱཱདིནཱ (ནཱམ. པརི. ༤༧༤) ཨཱཙརིཡེན སཱདྷིཏོ. མཱུལཊཱིཀཱཀཱརཱདཡོ པན ཨཉྙཐཱཔི ཏཾ སཱདྷེནྟི. ཏཾ པན སངྑེཔཏོ, ཏཏྠ ཏཏྠ ཝིཏྠཱརཏོ ཙ ཨབྷིདྷམྨཏྠཝིཀཱསིནིཡཾ ཝུཏྟནཡེན དཊྛབྦཾ. སཉྙཱཝིརཱགཾ བྷཱཝེཏྭཱཏི ‘‘སཉྙཱ རོགོ, སཉྙཱ གཎྜོ’’ཏྱཱདིནཱ, ‘‘དྷཱི ཙིཏྟཾ དྷིབྦཏཾ ཙིཏྟ’’ནྟྱཱདིནཱ ཝཱ ནཡེན ཨརཱུཔཔྤཝཏྟིཡཱ ཨཱདཱིནཝདསྶནེན ཏདབྷཱཝེ ཙ པཎཱིཏབྷཱཝསནྣིཊྛཱནེན ཝཱཡོཀསིཎེ ཀེསཉྩི མཏེན པརིཙྪིནྣཱཀཱསཀསིཎེ ཝཱ བྷཱཝནཱབལེན ཏེན པཊིལབྷིཏབྦབྷཱཝེ ཨརཱུཔསྶ ཨནིབྦཏྟིསབྷཱཝཱཔཱདནཝསེན ཨརཱུཔཝིརཱགབྷཱཝནཾ བྷཱཝེཏྭཱ ཨཉྙསཏྟེསུ ཨུཔྤཛྫནྟི ཀམྨཀིརིཡཝཱདིནོ ཏིཏྠིཡཱ ཨེཝཱཏྱདྷིཔྤཱཡོ ¶ . ཏེ པན ཡེན ཨིརིཡཱཔཐེན ཨིདྷ མརནྟི. ཏེནེཝ ཏཏྠ ནིབྦཏྟནྟཱིཏི དཊྛབྦཾ.

༨༦. ཨནཱགཱམིནོ པན སུདྡྷཱཝཱསེསུ ཨུཔྤཛྫནྟཱིཏི ཨནཱགཱམིནོཡེཝ ཨརིཡཱ པུཐུཛྫནཱདིཀཱལེ, པཙྪཱཔི ཝཱ པཉྩམཛ྄ཛྷཱནཾ ཏིཝིདྷམྤི བྷཱཝེཏྭཱ སདྡྷཱདིཨིནྡྲིཡཝེམཏྟཏཱནུཀྐམེན པཉྩསུ སུདྡྷཱཝཱསེསུ ཨུཔྤཛྫནྟི.

༨༧. ཡཐཱཀྐམཾ བྷཱཝེཏྭཱ ཡཐཱཀྐམཾ ཨཱརུཔྤེསུ ཨུཔྤཛྫནྟཱིཏི ཡོཛནཱ ཡཐཱཀྐམནྟི ཙ པཋམཱརུཔྤཱདིཨནུཀྐམེན. སབྦམྤི ཙེཏཾ ཏསྶ ཏསྶེཝ ཛྷཱནསྶ ཨཱཝེཎིཀབྷཱུམིཝསེན ཝུཏྟཾ. ནིཀནྟིཡཱ པན སཏི པུཐུཛྫནཱདཡོ ཡཐཱལདྡྷཛ྄ཛྷཱནསྶ བྷཱུམིབྷཱུཏེསུ སུདྡྷཱཝཱསཝཛྫིཏེསུ ཡཏྠ ཀཏྠཙི ནིབྦཏྟནྟི, ཏཐཱ ཀཱམབྷཝེཔི ཀཱམཱཝཙརཀམྨབལེན. ‘ཨིཛ྄ཛྷཏི, བྷིཀྑཝེ, སཱིལཝཏོ ཙེཏོཔཎིདྷི ཝིསུདྡྷཏྟཱ’ཏི (ཨ. ནི. ༨.༣༥) ཧི ཝུཏྟཾ. ཨནཱགཱམིནོ པན ཀཱམརཱགསྶ སབྦསོ ¶ པཧཱིནཏྟཱ ཀཱམབྷཝེསུ ནིཀནྟིཾ ན ཨུཔྤཱདེནྟཱིཏི ཀཱམལོཀཝཛྫིཏེ ཡཐཱལདྡྷཛ྄ཛྷཱནབྷཱུམིབྷཱུཏེ ཡཏྠ ཀཏྠཙི ནིབྦཏྟནྟི. སུདྡྷཱཝཱསེསུ ཧི ཨནཱགཱམིནོཡེཝ ནིབྦཏྟནྟཱིཏི ནིཡམོ ཨཏྠི. ཏེ པན ཨཉྙཏྠ ན ནིབྦཏྟནྟཱིཏི ནིཡམོ ནཏྠི. ཨེཝཉྩ ཀཏྭཱ ཝུཏྟཾ ཨཱཙརིཡེན –

‘‘སུདྡྷཱཝཱསེསྭནཱགཱམི-པུགྒལཱཝོཔཔཛྫརེ;

ཀཱམདྷཱཏུམྷི ཛཱཡནྟི, ཨནཱགཱམིཝིཝཛྫིཏཱ’’ཏི. (པརམ. ཝི. ༢༠༥);

སུཀྑཝིཔསྶཀཱཔི པནེཏེ མརཎཀཱལེ ཨེཀནྟེནེཝ སམཱཔཏྟིཾ ནིབྦཏྟེནྟི སམཱདྷིམྷི པརིཔཱུརཀཱརཱིབྷཱཝཏོཏི དཊྛབྦཾ. ‘‘ཨིཏྠིཡོཔི པན ཨརིཡཱ ཝཱ ཨནརིཡཱ ཝཱ ཨཊྛསམཱཔཏྟིལཱབྷིནིཡོ བྲཧྨཔཱརིསཛྫེསུཡེཝ ནིབྦཏྟནྟཱི’’ཏི ཨཊྛཀཐཱཡཾ (ཝིབྷ. ཨཊྛ. ༨༠༩; ཨ. ནི. ཨཊྛ. ༡.༡.༢༧༩ ཨཱདཡོ; མ. ནི. ཨཊྛ. ༣.༡༣༠) ཝུཏྟཾ. ཨཔིཙེཏྠ ཝེཧཔྥལཨཀནིཊྛཙཏུཏྠཱརུཔྤབྷཝཱནཾ སེཊྛབྷཝབྷཱཝཏོ ¶ ཏཏྠ ནིབྦཏྟཱ ཨརིཡཱ ཨཉྙཏྠ ནུཔྤཛྫནྟི, ཏཐཱ ཨཝསེསེསུ ཨུཔརཱུཔརི བྲཧྨལོཀེསུ ནིབྦཏྟཱ ཧེཊྛིམཧེཊྛིམེསུ. ཝུཏྟཉྷེཏཾ ཨཱཙརིཡེན –

‘‘ཝེཧཔྥལེ ཨཀནིཊྛེ, བྷཝགྒེ ཙ པཏིཊྛིཏཱ;

ན པུནཱཉྙཏྠ ཛཱཡནྟི, སབྦེ ཨརིཡཔུགྒལཱ;

བྲཧྨལོཀགཏཱ ཧེཊྛཱ, ཨརིཡཱ ནོཔཔཛྫརེ’’ཏི. (ནཱམ. པརི. ༤༥༢-༤༥༣);

ཀམྨཙཏུཀྐཝཎྞནཱ ནིཊྛིཏཱ.

ཙུཏིཔཊིསནྡྷིཀྐམཝཎྞནཱ

༨༩. ‘‘ཨཱཡུཀྑཡེནཱ’’ཏྱཱདཱིསུ སཏིཔི ཀམྨཱནུབྷཱཝེ ཏཾཏཾགཏཱིསུ ཡཐཱཔརིཙྪིནྣསྶ ཨཱཡུནོ པརིཀྑཡེན མརཎཾ ཨཱཡུཀྑཡམརཎཾ. སཏིཔི ཏཏྠ ཏཏྠ པརིཙྪིནྣཱཡུསེསེ གཏིཀཱལཱདིཔཙྩཡསཱམགྒིཡཉྩ ¶ ཏཾཏཾབྷཝསཱདྷཀསྶ ཀམྨུནོ པརིནིཊྛིཏཝིཔཱཀཏྟཱ མརཎཾ ཀམྨཀྑཡམརཎཾ. ཨཱཡུཀམྨཱནཾ སམཀམེཝ པརིཀྑཱིཎཏྟཱ མརཎཾ ཨུབྷཡཀྑཡམརཎཾ. སཏིཔི ཏསྨིཾ དུཝིམེ པུརིམབྷཝསིདྡྷསྶ ཀསྶཙི ཨུཔཙྪེདཀཀམྨུནོ བལེན སཏྠཧརཎཱདཱིཧི ཨུཔཀྐམེཧི ཨུཔཙྪིཛྫམཱནསནྟཱནཱནཾ, གུཎམཧནྟེསུ ཝཱ ཀཏེན ཀེནཙི ཨུཔཀྐམེན ཨཱཡཱུཧིཏཨུཔཙྪེདཀཀམྨུནཱ པཊིབཱཧིཏསཱམཏྠིཡསྶ ཀམྨསྶ ཏཾཏཾཨཏྟབྷཱཝཔྤཝཏྟནེ ཨསམཏྠབྷཱཝཏོ དུསིམཱརཀལཱབུརཱཛཱདཱིནཾ ཝིཡ ཏངྑཎེཡེཝ ཋཱནཱཙཱཝནཝསེན པཝཏྟམརཎཾ ཨུཔཙྪེདཀམརཎཾ ནཱམ. ཨིདཾ པན ནེརཡིཀཱནཾ ཨུཏྟརཀུརུཝཱསཱིནཾ ཀེསཉྩི དེཝཱནཉྩ ན ཧོཏི. ཏེནཱཧུ –

‘‘ཨུཔཀྐམེན ཝཱ ཀེསཉྩུཔཙྪེདཀཀམྨུནཱ’’ཏི. (ས. ས. ༦༢);

མརཎསྶ ཨུཔྤཏྟི པཝཏྟི མརཎུཔྤཏྟི.

༩༠. མརཎཀཱལེཏི ¶ མརཎཱསནྣཀཱལེ. ཡཐཱརཧནྟི ཏཾཏཾགཏཱིསུ ཨུཔྤཛྫནཀསཏྟཱནུརཱུཔཾ, ཀཏྠཙི པན ཨནུཔྤཛྫམཱནསྶ ཁཱིཎཱསཝསྶ ཡཐོཔཊྛིཏཾ ནཱམརཱུཔདྷམྨཱདིཀམེཝ ཙུཏིཔརིཡོསཱནཱནཾ གོཙརབྷཱཝཾ གཙྪཏི, ན ཀམྨཀམྨནིམིཏྟཱདཡོ. ཨུཔལདྡྷཔུབྦནྟི ཙེཏིཡདསྶནཱདིཝསེན པུབྦེ ཨུཔལདྡྷཾ. ཨུཔཀརཎབྷཱུཏནྟི པུཔྥཱདིཝསེན ཨུཔཀརཎབྷཱུཏཾ. ཨུཔལབྷིཏབྦནྟི ཨནུབྷཝིཏབྦཾ. ཨུཔབྷོགབྷཱུཏནྟི ཨཙྪརཱཝིམཱནཀཔྤརུཀྑནིརཡགྒིཨཱདིཀཾ ཨུཔབྷུཉྫིཏབྦཾ. ཨཙྪརཱཝིམཱནཀཔྤརུཀྑམཱཏུཀུཙྪིཨཱདིགཏཾ ཧི རཱུཔཱཡཏནཾ སུགཏིནིམིཏྟཾ. ནིརཡགྒིནིརཡཔཱལཱདིགཏཾ དུགྒཏིནིམིཏྟཾ. གཏིཡཱ ནིམིཏྟཾ གཏིནིམིཏྟཾ.

ཀམྨབལེནཱཏི པཊིསནྡྷིནིབྦཏྟཀསྶ ཀུསལཱཀུསལཀམྨསྶ ཨཱནུབྷཱཝེན. ཚནྣཾ དྭཱརཱནནྟི ཝཀྑམཱནནཡེན ཡཐཱསམྦྷཝཾ ཚནྣཾ ཨུཔཔཏྟིདྭཱརཱནཾ, ཡདི ཀུསལཀམྨཾ ཝིཔཙྩཏི, ཏདཱ པརིསུདྡྷཾ ཀུསལཙིཏྟཾ པཝཏྟཏི, ཨཐ ཨཀུསལཀམྨཾ, ཏདཱ ཨུཔཀྐིལིཊྛཾ ཨཀུསལཙིཏྟནྟི ཨཱཧ ‘‘ཝིཔཙྩམཱནཀ…པེ… ཀིལིཊྛཾ ཝཱ’’ཏི. ཏེནཱཧ བྷགཝཱ ‘‘ནིམིཏྟསྶཱདགདྷིཏཾ ཝཱ, བྷིཀྑཝེ, ཝིཉྙཱཎཾ ཏིཊྛམཱནཾ ཏིཊྛཏི, ཨནུབྱཉྫནསྶཱདགདྷིཏཾ ཝཱ, ཏསྨིཾ ཙེ སམཡེ ཀཱལཾ ཀརོཏི, ཋཱནམེཏཾ ཝིཛྫཏི, ཡཾ དྭིནྣཾ གཏཱིནཾ ཨཉྙཏརཾ གཏིཾ ཨུཔཔཛྫེཡྻ ནིརཡཾ ཝཱ ཏིརཙྪཱནཡོནིཾ ཝཱ’’ཏི (སཾ. ནི. ༤.༢༣༥). ཏཏྠོཎཏཾ ཝཱཏི ཏསྨིཾ ཨུཔཔཛྫིཏབྦབྷཝེ ཨོཎཏཾ ཝིཡ, ཏཏྠོཎཏཾ ཨེཝཱཏི ཝཱ པདཙྪེདོ. ‘‘བཱཧུལླེནཱ’’ཏི ཨེཏྠ ཨདྷིཔྤཱཡོ ‘‘ཡེབྷུཡྻེན བྷཝནྟརེ’’ཏི ཨེཏྠ ¶ ཝུཏྟནཡེན དཊྛབྦོ. ཨཐ ཝཱ ‘‘ཡཐཱརཧ’’ནྟི ཨིམིནཱཝ སོ སཀྐཱ སངྒཧེཏུནྟི ‘‘བཱཧུལླེནཱ’’ཏི ཨིམིནཱ སཧསཱ ཨོཙྪིཛྫམཱནཛཱིཝིཏཱནཾ སཎིཀཾ མརནྟཱནཾ ཝིཡ ན ཨབྷིཀྑཎམེཝཱཏི དཱིཔིཏནྟི ཝིཉྙཱཡཏི. ཨབྷིནཝཀརཎཝསེནཱཏི ཏངྑཎེ ཀརིཡམཱནཾ ཝིཡ ཨཏྟཱནཾ ཨབྷིནཝཀརཎཝསེན.

༩༡. པཙྩཱསནྣམརཎསྶཱཏི ¶ ཨེཀཝཱིཐིཔྤམཱཎཱཡུཀཝསེན, ཏཏོ ཝཱ ཀིཉྩི ཨདྷིཀཱཡུཀཝསེན སམཱསནྣམརཎསྶ. ཝཱིཐིཙིཏྟཱཝསཱནེཏི ཏདཱརམྨཎཔརིཡོསཱནཱནཾ, ཛཝནཔརིཡོསཱནཱནཾ ཝཱ ཝཱིཐིཙིཏྟཱནཾ ཨཝསཱནེ. ཏཏྠ ‘‘ཀཱམབྷཝཏོ ཙཝིཏྭཱ ཏཏྠེཝ ཨུཔྤཛྫམཱནཱནཾ ཏདཱརམྨཎཔརིཡོསཱནཱནི, སེསཱནཾ ཛཝནཔརིཡོསཱནཱནཱི’’ཏི དྷམྨཱནུསཱརཎིཡཾ ཝུཏྟཾ. བྷཝངྒཀྑཡེཝཱཏི ཡདི ཨེཀཛཝནཝཱིཐིཏོ ཨདྷིཀཏརཱཡུསེསོ སིཡཱ, ཏདཱ བྷཝངྒཱཝསཱནེ ཝཱ ཨུཔྤཛྫིཏྭཱ ནིརུཛ྄ཛྷཏི. ཨཐ ཨེཀཙིཏྟཀྑཎཱཡུསེསོ སིཡཱ, ཏདཱ ཝཱིཐིཙིཏྟཱཝསཱནེ, ཏཉྩ ཨཏཱིཏཀམྨཱདིཝིསཡམེཝ. ‘‘ཏསྶཱནནྟརམེཝཱ’’ཏི ཨིམིནཱ ཨནྟརཱབྷཝཝཱདིམཏཾ པཊིཀྑིཔཏི.

ཡཐཱརཧནྟི ཀམྨཀརཎཀཱལསྶ, ཝིཔཱཀདཱནཀཱལསྶ ཙ ཨནུརཱུཔཝསེན. ཨཐ ཝཱ ཝིཔཙྩམཱནཀཀམྨཱནུརཱུཔཾ ཨནུསཡཝསེན, ཛཝནསཧཛཱཏཝསེན ཝཱ པཝཏྟིཨནུརཱུཔཏོཏྱཏྠོ. ནནུ ཙ ‘‘ཨཝིཛྫཱནུསཡཔརིཀྑིཏྟེནཱ’’ཏྱཱདི ཝུཏྟཾ. ཛཝནསཧཛཱཏཱནཉྩ ཀཐཾ ཨནུསཡབྷཱཝོཏི? ནཱཡཾ དོསོ ཨནུསཡསདིསཏཱཡ ཏཱསམྤི ཨནུསཡཝོཧཱརབྷཱཝཏོ. ཨིཏརཐཱ ཨཀུསལཀམྨསཧཛཱཏཱནཾ བྷཝཏཎྷཱསཧཛཱཏཱནཾ ཝཱ ཙུཏིཨཱསནྣཛཝནསཧཛཱཏཱནཉྩ སངྒཧོ ན སིཡཱ. ཨཝིཛྫཱཝ ཨཔྤཧཱིནཊྛེན ཨནུསཡནཏོ པཝཏྟནཏོ ཨནུསཡོ, ཏེན པརིཀྑིཏྟེན པརིཝཱརིཏེན. ཏཎྷཱནུསཡོཝ མཱུལཾ པདྷཱནཾ སཧཀཱརཱིཀཱརཎབྷཱུཏཾ ཨིམསྶཱཏི ཏཎྷཱནུསཡམཱུལཀོ. སངྑཱརེནཱཏི ཀུསལཱཀུསལཀམྨེན ཀམྨསཧཛཱཏཕསྶཱདིདྷམྨསམུདཱཡེན ཙུཏིཨཱསནྣཛཝནསཧཛཱཏེན ཝཱ, ཏེན ཛནིཡམཱནཾ. ཨཝིཛྫཱཡ ཧི པཊིཙྪནྣཱདཱིནཝཝིསཡེ ཏཎྷཱ ནཱམེཏི, ཁིཔནཀསངྑཱརསམྨཏཱ ཡཐཱཝུཏྟསངྑཱརཱ ཁིཔནྟི, ཡཐཱཧུ –

‘‘ཨཝིཛྫཱཏཎྷཱསངྑཱར-སཧཛེཧི ཨཔཱཡིནཾ;

ཝིསཡཱདཱིནཝཙྪཱདིནམནཀྑིཔཀེཧི ཏུ.

‘‘ཨཔྤཧཱིནེཧི ¶ ¶ སེསཱནཾ, ཚཱདནཾ ནམནམྤི ཙ;

ཁིཔཀཱ པན སངྑཱརཱ, ཀུསལཱཝ བྷཝནྟིཧཱ’’ཏི. (ས. ས. ༡༦༤-༡༦༥);

སམྤཡུཏྟེཧི པརིགྒཡ྄ཧམཱནནྟི ཨཏྟནཱ སམྤཡུཏྟེཧི ཕསྶཱདཱིཧི དྷམྨེཧི སམྤཡུཏྟཔཙྩཡཱདིནཱ པརིཝཱརེཏྭཱ གཡ྄ཧམཱནཾ, སཧཛཱཏཱནམདྷིཊྛཱནབྷཱཝེན པུབྦངྒམབྷཱུཏནྟི ཨཏྟནཱ སཧཛཱཏཱནཾ པཏིཊྛཱནབྷཱཝེན པདྷཱནབྷཱུཏཾ. ‘‘མནོཔུབྦངྒམཱ དྷམྨཱ’’ཏི (དྷ. པ. ༡-༢) ཧི ཝུཏྟཾ. བྷཝནྟརཔཊིསནྡྷཱནཝསེནཱཏི པུརིམབྷཝནྟརསྶ, པཙྪིམབྷཝནྟརསྶ ཙ ཨཉྙམཉྙཾ ཨེཀཱབདྡྷཾ ཝིཡ པཊིསནྡཧནཝསེན ཨུཔྤཛྫམཱནམེཝ པཏིཊྛཱཏི, ན ཨིཏོ གནྟྭཱཏྱདྷིཔྤཱཡོ. ན ཧི པུརིམབྷཝཔརིཡཱཔནྣོ ཀོཙི དྷམྨོ བྷཝནྟརཾ སངྐམཏི, ནཱཔི པུརིམབྷཝཔརིཡཱཔནྣཧེཏཱུཧི ཝིནཱ ཨུཔྤཛྫཏི པཊིགྷོསཔདཱིཔམུདྡཱ ཝིཡཱཏི ཨལམཏིཔྤཔཉྩེན.

༩༢. མནྡཾ ཧུཏྭཱ པཝཏྟཱནི མནྡཔྤཝཏྟཱནི. པཙྩུཔྤནྣཱརམྨཎེསུ ཨཱཔཱཐགཏེསུ མནོདྭཱརེ གཏིནིམིཏྟཝསེན, པཉྩདྭཱརེ ཀམྨནིམིཏྟཝསེནཱཏྱདྷིཔྤཱཡོ. པཊིསནྡྷིབྷཝངྒཱནམྤི པཙྩུཔྤནྣཱརམྨཎཏཱ ལབྦྷཏཱིཏི མནོདྭཱརེ ཏཱཝ པཊིསནྡྷིཡཱ ཙཏུནྣཾ བྷཝངྒཱནཉྩ, པཉྩདྭཱརེ པན པཊིསནྡྷིཡཱཝ པཙྩུཔྤནྣཱརམྨཎབྷཱཝོ ལབྦྷཏི. ཏཐཱ ཧི ཀསྶཙི མནོདྭཱརེ ཨཱཔཱཐམཱགཏཾ པཙྩུཔྤནྣཾ གཏིནིམིཏྟཾ ཨཱརབྦྷ ཨུཔྤནྣཱཡ ཏདཱརམྨཎཔརིཡོསཱནཱཡ ཙིཏྟཝཱིཐིཡཱ ཨནནྟརཾ ཙུཏིཙིཏྟེ ཨུཔྤནྣེ ཏདནནྟརཾ པཉྩཙིཏྟཀྑཎཱཡུཀེ ཨཱརམྨཎེ པཝཏྟཱཡ པཊིསནྡྷིཡཱ ཙཏུནྣཾ བྷཝངྒཱནཾ, པཉྩདྭཱརེ ཙ ཉཱཏཀཱདཱིཧི ཨུཔཊྛཱཔིཏེསུ དེཡྻདྷམྨེསུ ཝཎྞཱདིཀེ ཨཱརབྦྷ ཡཐཱརཧཾ པཝཏྟཱཡ ཙིཏྟཝཱིཐིཡཱ ཙུཏིཙིཏྟསྶ ཙ ཨནནྟརཾ ཨེཀཙིཏྟཀྑཎཱཡུཀེ ཨཱརམྨཎེ པཝཏྟཱཡ པཊིསནྡྷིཡཱ པཙྩུཔྤནྣཱརམྨཎེ པཝཏྟི ཨུཔལབྦྷཏཱིཏི ཨཡམེཏྠ སངྑེཔོ, ཝིཏྠཱརོ ¶ པན ཝིསུདྡྷིམགྒེ(ཝིསུདྡྷི. ༢.༦༢༠ ཨཱདཡོ) ཝིབྷངྒཊྛཀཐཱཡཾ (ཝིབྷ. ཨཊྛ. ༢༢༧) ཝཱ སངྑཱརཔཙྩཡཱཝིཉྙཱཎཔདཝཎྞནཱཡཾ ཝུཏྟནཡེན དཊྛབྦོ. ཚདྭཱརགྒཧིཏནྟི ཀམྨནིམིཏྟཾ ཚདྭཱརགྒཧིཏཾ, གཏིནིམིཏྟཾ ཚཊྛདྭཱརགྒཧིཏནྟི ཡཐཱསམྦྷཝཾ ཡོཛེཏབྦཾ. ཨཔརེ པན ཨཝིསེསཏོ ཝཎྞེནྟི. སཙྩསངྑེཔེཔི ཏེནེཝཱདྷིཔྤཱཡེན ཨིདཾ ཝུཏྟཾ –

‘‘པཉྩདྭཱརེ སིཡཱ སནྡྷི, ཝིནཱ ཀམྨཾ དྭིགོཙརེ’’ཏི; (ས. ས. ༡༧༣);

ཨཊྛཀཐཱཡཾ (ཝིསུདྡྷི. ༢.༦༢༤-༦༢༥; ཝིབྷ. ཨཊྛ. ༢༢༧) ¶ པན ‘‘གཏིནིམིཏྟཾ མནོདྭཱརེ ཨཱཔཱཐམཱགཙྪཏཱི’’ཏི ཝུཏྟཏྟཱ, ཏདཱརམྨཎཱཡ ཙ པཉྩདྭཱརིཀཔཊིསནྡྷིཡཱ ཨདསྶིཏཏྟཱ, མཱུལཊཱིཀཱདཱིསུ ཙ ‘‘ཀམྨབལེན ཨུཔཊྛཱཔིཏཾ ཝཎྞཱཡཏནཾ སུཔིནཾ པསྶནྟསྶ ཝིཡ དིབྦཙཀྑུསྶ ཝིཡ ཙ མནོདྭཱརེཡེཝ གོཙརབྷཱཝཾ གཙྪཏཱི’’ཏི (ཝིསུདྡྷི. མཧཱ. ༢.༦༢༣) ནིཡམེཏྭཱ ཝུཏྟཏྟཱ ཏེསཾ ཝཙནཾ ན སམྤཊིཙྪནྟི ཨཱཙརིཡཱ. ‘‘པཙྩུཔྤནྣཉྩཱ’’ཏི ཨེཏྠ གཏིནིམིཏྟཾ ཏཱཝ པཙྩུཔྤནྣཱརམྨཎཾ ཡུཛྫཏི, ཀམྨནིམིཏྟཾ པན པཊིསནྡྷིཛནཀཀམྨསྶེཝ ནིམིཏྟབྷཱུཏཾ ཨདྷིཔྤེཏནྟི ཀཐཾ ཏསྶ ཙུཏིཨཱསནྣཛཝནེཧི གཧིཏསྶ པཙྩུཔྤནྣབྷཱཝོ སམྦྷཝཏི. ན ཧི ཏདེཝ ཨཱརམྨཎུཔཊྛཱཔཀཾ, ཏདེཝ པཊིསནྡྷིཛནཀཾ བྷཝེཡྻ ཨུཔཙིཏབྷཱཝཱབྷཱཝཏོ ཨནསྶཱདིཏཏྟཱ ཙ. ‘‘ཀཏཏྟཱ ཨུཔཙིཏཏྟཱ’’ཏི (དྷ. ས. ༤༣༡) ཧི ཝཙནཏོ པུནཔྤུནཾ ལདྡྷཱསེཝནམེཝ ཀམྨཾ པཊིསནྡྷིཾ ཨཱཀཌྜྷཏི. པཊིསམྦྷིདཱམགྒེ (པཊི. མ. ༡.༢༣༢) ཙ ནིཀནྟིཀྑཎེ དྭིནྣཾ ཧེཏཱུནཾ པཙྩཡཱཔི སཧེཏུཀཔཊིསནྡྷིཡཱ ཝུཏྟཏྟཱཀཏཱུཔཙིཏམྤི ཀམྨཾ ཏཎྷཱཡ ཨསྶཱདིཏམེཝ ཝིཔཱཀཾ ཨབྷིནིཔྥཱདེཏི, ཏདཱ ཙ པཊིསནྡྷིཡཱ སམཱནཝཱིཐིཡཾ ཝིཡ པཝཏྟམཱནཱནི ཙུཏིཨཱསནྣཛཝནཱནི ཀཐཾ པུནཔྤུནཾ ལདྡྷཱསེཝནཱནི སིཡུཾ, ཀཐཉྩ ཏཱནི ཏདཱ ཀཎྷཱཡ པརཱམཊྛཱནི. ཨཔིཙ པཙྩུཔྤནྣཾ ཀམྨནིམིཏྟཾ ཙུཏིཨཱསནྣཔྤཝཏྟཱནཾ པཉྩདྭཱརིཀཛཝནཱནཾ ཨཱརམྨཎཾ ཧོཏི. ‘‘པཉྩདྭཱརིཀཀམྨཉྩ པཊིསནྡྷིནིམིཏྟཀཾ ན ¶ ཧོཏི པརིདུབྦལབྷཱཝཏོ’’ཏི ཨཊྛཀཐཱཡཾ (ཝིསུདྡྷི. ༢.༦༢༠; ཝིབྷ. ཨཊྛ. ༢༢༧) ཝུཏྟནྟི སཙྩམེཏཾ. ཉཱཏཀཱདཱིཧི ཨུཔཊྛཱཔིཏེསུ པན པུཔྥཱདཱིསུ སནྣིཧིཏེསྭེཝ མརཎསམྦྷཝཏོ ཏཏྠ ཝཎྞཱདིཀཾ ཨཱརབྦྷ ཙུཏིཨཱསནྣཝཱིཐིཏོ པུརིམབྷཱགཔྤཝཏྟཱནཾ པཊིསནྡྷིཛནནསམཏྠཱནཾ མནོདྭཱརིཀཛཝནཱནཾ ཨཱརམྨཎབྷཱུཏེན སཧ སམཱནཏྟཱ ཏདེཀསནྟཏིཔཏིཏཾ ཙུཏིཨཱསནྣཛཝནགྒཧིཏམྤི པཙྩུཔྤནྣཾ ཝཎྞཱདིཀཾ ཀམྨནིམིཏྟབྷཱཝེན ཝུཏྟཾ. ཨེཝཉྩ ཀཏྭཱ ཝུཏྟཾ ཨཱནནྡཱཙརིཡེན ‘‘པཉྩདྭཱརེ ཙ ཨཱཔཱཐམཱགཙྪནྟཾ པཙྩུཔྤནྣཾ ཀམྨནིམིཏྟཾ ཨཱསནྣཀཏཀམྨཱརམྨཎསནྟཏིཡཾ ཨུཔྤནྣཾ, ཏཾསདིསཉྩ དཊྛབྦ’’ནྟི (ཝིབྷ. མཱུལཊཱི. ༢༢༧; ཝིསུདྡྷི. མཧཱ. ༢.༦༢༣).

༩༤. ཡཐཱརཧནྟི དུཏིཡཙཏུཏྠཔཋམཏཏིཡཱནཾ པཊིསནྡྷཱིནཾ ཨནུརཱུཔཏོ.

༩༨. ཨཱརུཔྤཙུཏིཡཱ པརཾ ཧེཊྛིམཱརུཔྤཝཛྫིཏཱ ཨཱརུཔྤཔཊིསནྡྷིཡོ ཧོནྟི ཨུཔརཱུཔརིཨརཱུཔཱིནཾ ཧེཊྛིམཧེཊྛིམཀམྨསྶ ཨནཱཡཱུཧནཏོ, ཨུཔཙཱརཛ྄ཛྷཱནསྶ པན བལཝབྷཱཝཏོ ཏསྶ ཝིཔཱཀབྷཱུཏཱ ཀཱམཏིཧེཏུཀཱ པཊིསནྡྷིཡོ ཧོནྟི. རཱུཔཱཝཙརཙུཏིཡཱ པརཾ ཨཧེཏུཀརཧིཏཱ ཨུཔཙཱརཛ྄ཛྷཱནཱནུབྷཱཝེནེཝ ¶ དུཧེཏུཀཏིཧེཏུཀཔཊིསནྡྷིཡོ སིཡུཾ, ཀཱམཏིཧེཏུམྷཱ ཙུཏིཏོ པརཾ སབྦཱ ཨེཝ ཀཱམརཱུཔཱརཱུཔབྷཝཔརིཡཱཔནྣཱ ཡཐཱརཧཾ ཨཧེཏུཀཱདིཔཊིསནྡྷིཡོ སིཡུཾ. ཨིཏརོ དུཧེཏུཀཱཧེཏུཀཙུཏིཏོ པརཾ ཀཱམེསྭེཝ བྷཝེསུ ཏིཧེཏུཀཱདིཔཊིསནྡྷིཡོ སིཡུཾ.

ཙུཏིཔཊིསནྡྷིཀྐམཝཎྞནཱ ནིཊྛིཏཱ.

༩༩. པཊིསནྡྷིཡཱ ¶ ནིརོདྷསྶ ཨནནྟརཏོ པཊིསནྡྷིནིརོདྷཱནནྟརཏོ. ཏདེཝ ཙིཏྟནྟི ཏཾསདིསཏཱཡ ཏབྦོཧཱརཔྤཝཏྟཏྟཱ ཏདེཝ ཙིཏྟཾ ཡཐཱ ‘‘ཏཱནིཡེཝ ཨོསདྷཱནཱི’’ཏི. ཨསཏི ཝཱིཐིཙིཏྟུཔྤཱདེཏི ཨནྟརནྟརཱ ཝཱིཐིཙིཏྟཱནཾ ཨུཔྤཱདེ ཨསཏི, ཙུཏིཙིཏྟཾ ཧུཏྭཱ ནིརུཛ྄ཛྷཏི ཏདེཝ ཙིཏྟནྟི སམྦནྡྷོ.

༡༠༡. པརིཝཏྟནྟཱ པཝཏྟནྟི ཡཱཝ ཝཊྚམཱུལསམུཙྪེདཱཏྱདྷིཔྤཱཡོ.

༡༠༢. ཡཐཱ ཨིཧ བྷཝེཔཊིསནྡྷི ཙེཝ བྷཝངྒཉྩ ཝཱིཐིཡོ ཙ ཙུཏི ཙ, ཏཐཱ པུན བྷཝནྟརེ པཊིསནྡྷིབྷཝངྒནྟི ཨེཝམཱདིཀཱ ཨཡཾ ཙིཏྟསནྟཏི པརིཝཏྟཏཱིཏི ཡོཛནཱ. ཀེཙི པན ཨིམསྨིཾ པརིཙྪེདེ ཝཱིཐིམུཏྟསངྒཧསྶེཝ དསྶིཏཏྟཱ པཊིསནྡྷིབྷཝངྒཙུཏཱིནམེཝ ཨིདྷ གཧཎཾ ཡུཏྟནྟྱཱདྷིཔྤཱཡེན ‘‘པཊིསནྡྷིབྷཝངྒཝཱིཐིཡོ’’ཏི ཨིམསྶ པཊིསནྡྷིབྷཝངྒཔྤཝཱཧཱཏི ཨཏྠཾ ཝདནྟི, ཏཾ ཏེསཾ མཏིམཏྟཾ པཝཏྟིསངྒཧདསྶནཱཝསཱནེ ཏཏྠ སངྒཧིཏཱནཾ སབྦེསམེཝ ནིགམནསྶ ཨདྷིཔྤེཏཏྟཱ. ཨེཝཉྷི སཏི ‘‘པཊིསངྑཱཡ པནེཏམདྡྷུཝ’’ནྟི ཨེཏྠ སབྦེསམེཝ ཨེཏ-སདྡེན པརཱམསནཾ སུཊྛུ ཨུཔཔནྣཾ ཧོཏི. ཨེཏཾ ཡཐཱཝུཏྟཾ ཝཊྚཔཝཏྟཾ ཨདྡྷུཝཾ ཨནིཙྩཾ པལོཀདྷམྨཾ པཊིསངྑཱཡ པཙྩཝེཀྑིཏྭཱ བུདྷཱ པཎྜིཏཱ ཙིརཱཡ ཙིརཀཱལཾ སུབྦཏཱ ཧུཏྭཱ ཨཙྩུཏཾ དྷུཝཾ ཨཙཝནདྷམྨཾ པདཾ ནིབྦཱནཾ ཨདྷིགནྟྭཱ མགྒཕལཉཱཎེན སཙྪིཀཏྭཱ ཏཏོཡེཝ སུཊྛུ སམུཙྪིནྣསིནེཧབནྡྷནཱ སམཾ ནིརུཔདྷིསེསནིབྦཱནདྷཱཏུཾ ཨེསྶནྟི པཱཔུཎིསྶནྟི.

ཨིཏི ཨབྷིདྷམྨཏྠཝིབྷཱཝིནིཡཱ ནཱམ ཨབྷིདྷམྨཏྠསངྒཧཝཎྞནཱཡ

ཝཱིཐིམུཏྟཔརིཙྪེདཝཎྞནཱ ནིཊྛིཏཱ.

༦. རཱུཔཔརིཙྪེདཝཎྞནཱ

༡. ཨེཝཾ ¶ ¶ ཏཱཝ ཙིཏྟཙེཏསིཀཝསེན དུཝིདྷཾ ཨབྷིདྷམྨཏྠཾ དསྶེཏྭཱ ཨིདཱནི རཱུཔཾ, ཏདནནྟརཉྩ ནིབྦཱནཾ དསྶེཏུམཱརབྷནྟོ ཨཱཧ ‘‘ཨེཏྟཱཝཏཱ’’ཏྱཱདི. སཔྤབྷེདཔྤཝཏྟིཀཱ ཨུདྡེསནིདྡེསཔཊིནིདྡེསཝསེན ཏཱིཧི པརིཙྪེདེཧི ཝུཏྟཔྤབྷེདཝནྟོ, པཝཏྟིཔཊིསནྡྷིཝསེན དྭཱིཧི པརིཙྪེདེཧི ཝུཏྟཔྤཝཏྟིཝནྟོ ཙ ཙིཏྟཙེཏསིཀཱ དྷམྨཱ ཨེཏྟཱཝཏཱ པཉྩཧི པརིཙྪེདེཧི ཝིབྷཏྟཱ ཧི ཡསྨཱ, ཨིདཱནི ཡཐཱནུཔྤཏྟཾ རཱུཔཾ པཝུཙྩཏཱིཏི ཡོཛནཱ.

༢. ཨིདཱནི ཡཐཱཔཊིཉྙཱཏརཱུཔཝིབྷཱགཏྠཾ མཱཏིཀཾ ཋཔེཏུཾ ‘‘སམུདྡེསཱ’’ཏྱཱདི ཝུཏྟཾ. སངྑེཔཏོ ཨུདྡིསནཾ སམུདྡེསོ. ཨེཀཝིདྷཱདིཝསེན ཝིབྷཛནཾ ཝིབྷཱགོ, སམུཊྛཱཏི ཨེཏསྨཱ ཕལནྟི སམུཊྛཱནཾ, ཀམྨཱདཡོ རཱུཔཛནཀཔཙྩཡཱ. ཙཀྑུདསཀཱདཡོ ཀལཱཔཱ. པཝཏྟིཀྐམཏོ ཙེཏི བྷཝཀཱལསཏྟབྷེདེན རཱུཔཱནཾ ཨུཔྤཏྟིཀྐམཏོ.

རཱུཔསམུདྡེསཝཎྞནཱ

༣. ཨུཔཱདིནྣཱནུཔཱདིནྣསནྟཱནེསུ སསམྦྷཱརདྷཱཏུཝསེན མཧནྟཱ ཧུཏྭཱ བྷཱུཏཱ པཱཏུབྷཱུཏཱཏི མཧཱབྷཱུཏཱ (དྷ. ས. ཨཊྛ. ༥༨༤). ཨཐཝཱ ཨནེཀཝིདྷཨབྦྷུཏཝིསེསདསྶནེན, ཨནེཀཱབྷཱུཏདསྶནེན ཝཱ མཧནྟཱནི ཨབྦྷུཏཱནི, ཨབྷཱུཏཱནི ཝཱ ཨེཏེསཱུཏི མཧཱབྷཱུཏཱ, མཱཡཱཀཱརཱདཡོ. ཏེཧི སམཱནཱ སཡཾ ཨནཱིལཱདིསབྷཱཝཱནེཝ ནཱིལཱདིཨུཔཱདཱཡརཱུཔདསྶནཱདིཏོཏི མཧཱབྷཱུཏཱ. མནཱཔཝཎྞསཎྛཱནཱདཱིཧི ཝཱ སཏྟཱནཾ ཝཉྩིཀཱ ཡཀྑིནིཨཱདཡོ ཝིཡ མནཱཔཨིཏྠིཔུརིསརཱུཔདསྶནཱདིནཱ སཏྟཱནཾ ཝཉྩཀཏྟཱ མཧནྟཱནི ཨབྷཱུཏཱནི ཨེཏེསཱུཏི མཧཱབྷཱུཏཱ. ཝུཏྟམྤི ཧེཏཾ –

‘‘མཧནྟཱ ¶ པཱཏུབྷཱུཏཱཏི, མཧཱབྷཱུཏསམཱཏི ཝཱ;

ཝཉྩཀཏྟཱ ཨབྷཱུཏེན, ‘མཧཱབྷཱུཏཱ’ཏི སམྨཏཱ’’ཏི. (ཨབྷིདྷ. ༦༢༦);

ཨཐ ཝཱ མཧནྟཔཱཏུབྷཱཝཏོ མཧནྟཱནི བྷཝནྟི ཨེཏེསུ ཨུཔཱདཱརཱུཔཱནི, བྷཱུཏཱནི ཙཱཏི མཧཱབྷཱུཏཱནི. མཧཱབྷཱུཏེ ཨུཔཱདཱཡ པཝཏྟཾ རཱུཔཾ ཨུཔཱདཱཡརཱུཔཾ. ཡདི ཨེཝཾ ‘‘ཨེཀཾ མཧཱབྷཱུཏཾ པཊིཙྩ ཏཏོ ¶ མཧཱབྷཱུཏཱ’’ཏྱཱདིཝཙནཏོ (པཊྛཱ. ༡.༡.༥༣) ཨེཀེཀམཧཱབྷཱུཏཱ སེསམཧཱབྷཱུཏཱནཾ ནིསྶཡཱ ཧོནྟཱིཏི ཏེསམྤི ཨུཔཱདཱཡརཱུཔཏཱཔསངྒོཏི? ནཡིདམེཝཾ ཨུཔཱདཱཡེཝ པཝཏྟརཱུཔཱནཾ ཏཾསམཉྙཱསིདྡྷིཏོ. ཡཉྷི མཧཱབྷཱུཏེ ཨུཔཱདིཡཏི, སཡཉྩ ཨཉྙེཧི ཨུཔཱདཱིཡཏི. ན ཏཾ ཨུཔཱདཱཡརཱུཔཾ. ཡཾ པན ཨུཔཱདཱིཡཏེཝ, ན ཀེནཙི ཨུཔཱདཱིཡཏི, ཏདེཝ ཨུཔཱདཱཡརཱུཔནྟི ནཏྠི བྷཱུཏཱནཾ ཏབྦོཧཱརཔྤསངྒོ. ཨཔིཙ ཙཏུནྣཾ མཧཱབྷཱུཏཱནཾ ཨུཔཱདཱཡརཱུཔནྟི ཨུཔཱདཱཡརཱུཔལཀྑཎནྟི ནཏྠི ཏཡོ ཨུཔཱདཱཡ པཝཏྟཱནཾ ཨུཔཱདཱཡརཱུཔཏཱཏི.

༤. པཐནཊྛེན པཐཝཱི, ཏརུཔབྦཏཱདཱིནཾ པཀཏིཔཐཝཱི ཝིཡ སཧཛཱཏརཱུཔཱནཾ པཏིཊྛཱནབྷཱཝེན པཀྑཱཡཏི, ཨུཔཊྛཱཏཱིཏི ཝུཏྟཾ ཧོཏི, པཐཝཱི ཨེཝ དྷཱཏུ སལཀྑཎདྷཱརཎཱདིཏོ ནིསྶཏྟནིཛྫཱིཝཊྛེན སརཱིརསེལཱཝཡཝདྷཱཏུསདིསཏྟཱ ཙཱཏི པཐཝཱིདྷཱཏུ. ཨཱཔེཏི སཧཛཱཏརཱུཔཱནི པཏྠརཏི, ཨཱཔཱཡཏི ཝཱ བྲཱུཧེཏི ཝཌྜྷེཏཱིཏི ཨཱཔོ. ཏེཛེཏི པརིཔཱཙེཏི, ནིསེཏི ཝཱ ཏིཀྑབྷཱཝེན སེསབྷཱུཏཏྟཡཾ ཨུསྨཱཔེཏཱིཏི ཏེཛོ. ཝཱཡཏི དེསནྟརུཔྤཏྟིཧེཏུབྷཱཝེན བྷཱུཏསངྒྷཱཏཾ པཱཔེཏཱིཏི ཝཱཡོ. ཙཏསྶོཔི པནེཏཱ ཡཐཱཀྐམཾ ཀཐིནཏྟདཝཏྟཨུཎྷཏྟཝིཏྠམྦྷནཏྟལཀྑཎཱཏི དཊྛབྦཾ.

༥. ཙཀྑཱདཱིནཾ ཝཙནཏྠོ ཧེཊྛཱ ཀཐིཏོཝ. པསཱདརཱུཔཾ ནཱམ ཙཏུནྣཾ མཧཱབྷཱུཏཱནཾ པསནྣབྷཱཝཧེཏུཀཏྟཱ. ཏཾ ¶ པན ཡཐཱཀྐམཾ དཊྛུཀཱམཏཱསོཏུཀཱམཏཱགྷཱཡིཏུཀཱམཏཱསཱཡིཏུཀཱམཏཱཕུསིཏུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎཾ. ཏཏྠ ཙཀྑུ ཏཱཝ མཛ྄ཛྷེ ཀཎྷམཎྜལསྶ ཨཱུཀཱསིརཔྤམཱཎེ ཨབྷིམུཁེ ཋིཏཱནཾ སརཱིརསཎྛཱནུཔྤཏྟིཔདེསེ ཏེལམིཝ པིཙུཔཊལཱནི སཏྟཀྑིཔཊལཱནི བྱཱཔེཏྭཱ དྷཱརཎནཧཱཔནམཎྜནབཱིཛནཀིཙྩཱཧི ཙཏཱུཧི དྷཱཏཱིཧི ཝིཡ ཁཏྟིཡཀུམཱརོ སནྡྷཱརཎབནྡྷནཔརིཔཱཙནསམུདཱིརཎཀིཙྩཱཧི ཙཏཱུཧི དྷཱཏཱུཧི ཀཏཱུཔཀཱརཾ ཨུཏུཙིཏྟཱཧཱརེཧི ཨུཔཏྠམྦྷིཡམཱནཾ ཨཱཡུནཱ པརིཔཱལིཡམཱནཾ ཝཎྞཱདཱིཧི པརིཝཱརིཏཾ ཡཐཱཡོགཾ ཙཀྑུཝིཉྙཱཎཱདཱིནཾ ཝཏྠུདྭཱརབྷཱཝཾ སདྷེནྟཾ པཝཏྟཏི, ཨིཏརཾ ‘‘སསམྦྷཱརཙཀྑཱུ’’ཏི ཝུཙྩཏི. ཨེཝཾ སོཏཱདཡོཔི ཡཐཱཀྐམཾ སོཏབིལབྦྷནྟརེ ཨངྒུལིཝེདྷནཱཀཱརཾ ཨུཔཙིཏཏནུཏམྦལོམཾ, ནཱསིཀབྦྷནྟརེ ཨཛཔདསཎྛཱནཾ, ཛིཝ྄ཧཱམཛ྄ཛྷེ ཨུཔྤལདལགྒསཎྛཱནཾ པདེསཾ ཨབྷིབྱཱཔེཏྭཱ པཝཏྟནྟི, ཨིཏརཾ པན ཋཔེཏྭཱ ཀམྨཛཏེཛསྶ པཏིཊྛཱནཊྛཱནཾ ཀེསགྒལོམགྒནཁགྒསུཀྑཙམྨཱནི ཙ ཨཝསེསཾ སཀལསརཱིརཾ ཕརིཏྭཱ པཝཏྟཏི. ཨེཝཾ སནྟེཔི ཨིཏརེཧི ཏསྶ སངྐརོ ན ཧོཏི བྷིནྣནིསྶཡལཀྑཎཏྟཱ. ཨེཀནིསྶཡཱནིཔི ཧི རཱུཔརསཱདཱིནི ལཀྑཎབྷེདཏོ ཨསཾཀིཎྞཱཏི ཀིཾ པན བྷིནྣནིསྶཡཱ པསཱདཱ.

༦. ཨཱཔོདྷཱཏུཡཱ ¶ སུཁུམབྷཱཝེན ཕུསིཏུཾ ཨསཀྐུཎེཡྻཏྟཱ ཝུཏྟཾ ‘‘ཨཱཔོདྷཱཏུ ཝིཝཛྫིཏཾ བྷཱུཏཏྟཡསངྑཱཏ’’ནྟི. ཀིཉྩཱཔི ཧི སཱིཏཏཱ ཕུསིཏྭཱ གཡ྄ཧཏི, སཱ པན ཏེཛོཡེཝ. མནྡེ ཧི ཨུཎྷཏྟེ སཱིཏབུདྡྷི སཱིཏཏཱསངྑཱཏསྶ ཀསྶཙི གུཎསྶ ཨབྷཱཝཏོ. ཏཡིདཾ སཱིཏབུདྡྷིཡཱ ཨནཝཊྛིཏབྷཱཝཏོ ཝིཉྙཱཡཏི པཱརཱཔཱརེ ཝིཡ. ཏཐཱ ཧི གྷམྨཀཱལེ ཨཱཏཔེ ཋཏྭཱ ཚཱཡཾ པཝིཊྛཱནཾ སཱིཏབུདྡྷི ཧོཏི, ཏཏྠེཝ ཙིརཀཱལཾ ཋིཏཱནཾ ཨུཎྷབུདྡྷི. ཡདི ཙ ཨཱཔོདྷཱཏུ སཱིཏཏཱ སིཡཱ, ཨུཎྷབྷཱཝེན སཧ ཨེཀསྨིཾ ཀལཱཔེ ¶ ཨུཔལབྦྷེཡྻ, ན ཙེཝཾ ཨུཔལབྦྷཏི, ཏསྨཱ ཝིཉྙཱཡཏི ‘‘ན ཨཱཔོདྷཱཏུ སཱིཏཏཱ’’ཏི. ཡེ པན ‘‘དཝཏཱ ཨཱཔོདྷཱཏུ, སཱ ཙ ཕུསིཏྭཱ གཡ྄ཧཏཱི’’ཏི ཝདནྟི, ཏེ ཝཏྟབྦཱ ‘‘དཝཏཱ ནཱམ ཕུསིཏྭཱ གཡ྄ཧཏཱིཏི ཨིདཾ ཨཱཡསྨནྟཱནཾ ཨབྷིམཱནམཏྟཾ སཎྛཱནེ ཝིཡཱ’’ཏི. ཝུཏྟཉྷེཏཾ པོརཱཎེཧི –

‘‘དཝཏཱསཧཝུཏྟཱིནི, ཏཱིཎི བྷཱུཏཱནི སམྥུསཾ;

དཝཏཾ སམྥུསཱམཱིཏི, ལོཀོཡམབྷིམཉྙཏི.

‘‘བྷཱུཏེ ཕུསིཏྭཱ སཎྛཱནཾ, མནསཱ གཎྷཏོ ཡཐཱ;

པཙྩཀྑཏོ ཕུསཱམཱིཏི, ཝིཉྙེཡྻཱ དཝཏཱ ཏཐཱ’’ཏི.

གོཙརརཱུཔཾ ནཱམ པཉྩཝིཉྙཱཎཝིསཡབྷཱཝཏོ. གཱཝོ ཨིནྡྲིཡཱནི ཙརནྟི ཨེཏྠཱཏི གོཙརནྟི ཧི ཨཱརམྨཎསྶེཏཾ ནཱམཾ. ཏཾ པནེཏཾ པཉྩཝིདྷམྤི ཡཐཱཀྐམཾ ཙཀྑུཝིཉྙཱཎཱདཱིནཾ གོཙརབྷཱཝལཀྑཎཾ, ཙཀྑཱདིཔཊིཧནནལཀྑཎཾ ཝཱ.

༧. ཨིཏྠིཡཱ བྷཱཝོ ཨིཏྠཏྟཾ (དྷ. ས. ཨཊྛ. ༦༣༢). པུརིསསྶ བྷཱཝོ པུརིསཏྟཾ. ཏཏྠ ཨིཏྠིལིངྒནིམིཏྟཀུཏྟཱཀཔྤཧེཏུབྷཱཝལཀྑཎཾ ཨིཏྠཏྟཾ, པུརིསལིངྒཱདིཧེཏུབྷཱཝལཀྑཎཾ པུརིསཏྟཾ. ཏཏྠ ཨིཏྠཱིནཾ ཨངྒཛཱཏཾ ཨིཏྠིལིངྒཾ. སརཱདྷིཔྤཱཡཱ ཨིཏྠིནིམིཏྟཾ ‘‘ཨིཏྠཱི’’ཏི སཉྫཱནནསྶ པཙྩཡབྷཱཝཏོ. ཨཝིསདཋཱནགམནནིསཛྫཱདི ཨིཏྠིཀུཏྟཾ. ཨིཏྠིསཎྛཱནཾ ཨིཏྠཱཀཔྤོ. པུརིསལིངྒཱདཱིནིཔི ཝུཏྟནཡེན དཊྛབྦཱནི. ཨཊྛཀཐཱཡཾ པན ཨཉྙཐཱ ཨིཏྠིལིངྒཱདཱིནི ཝཎྞིཏཱནི. ཏཾ པན ཨེཝཾ སངྒཧེཏྭཱ ཝདནྟི –

‘‘ལིངྒཾ ¶ ཧཏྠཱདིསཎྛཱནཾ, ནིམིཏྟཾ མིཧིཏཱདིཀཾ;

ཀུཏྟཾ སུཔྤཱདིནཱ ཀཱིལཱ༹, ཨཱཀཔྤོ གམནཱདིཀ’’ནྟི.

བྷཱཝརཱུཔཾ ནཱམ བྷཝཏི ཨེཏེན ཨིཏྠཱདིཨབྷིདྷཱནཾ, བུདྡྷི ཙཱཏི ཀཏྭཱ. ཏཾ པནེཏཾ ཀཱཡིནྡྲིཡཾ ཝིཡ སཀལསརཱིརཾ ཕརིཏྭཱ ཏིཊྛཏི.

༨. ཧདཡམེཝ ¶ མནོདྷཱཏུམནོཝིཉྙཱཎདྷཱཏཱུནཾ ནིསྶཡཏྟཱ ཝཏྠུ ཙཱཏི ཧདཡཝཏྠུ. ཏཐཱ ཧི ཏཾ དྷཱཏུདྭཡནིསྶཡབྷཱཝལཀྑཎཾ, ཏཉྩ ཧདཡཀོསབྦྷནྟརེ ཨཌྜྷཔསཏམཏྟཾ ལོཧིཏཾ ནིསྶཱཡ པཝཏྟཏི. རཱུཔཀཎྜེ ཨཝུཏྟསྶཔི པནེཏསྶ ཨཱགམཏོ, ཡུཏྟིཏོ ཙ ཨཏྠིབྷཱཝོ དཊྛབྦོ. ཏཏྠ, ཏཾ རཱུཔཾ ནིསྶཱཡ མནོདྷཱཏུ ཙ མནོཝིཉྙཱཎདྷཱཏུ ཙ ཝཏྟནྟི ‘‘ཡཾ རཱུཔཾ མནོདྷཱཏུཡཱ ཙ མནོཝིཉྙཱཎདྷཱཏུཡཱ ཙ ཏཾསམྤཡུཏྟཀཱནཉྩ དྷམྨཱནཾ ནིསྶཡཔཙྩཡེན པཙྩཡོ’’ཏི (པཊྛཱ. ༡.༡.༨) ཨེཝམཱགཏཾ པཊྛཱནཝཙནཾ ཨཱགམོ. ཡུཏྟི པནེཝཾ དཊྛབྦཱ –

‘‘ནིཔྥནྣབྷཱུཏིཀཱདྷཱརཱ, དྭེ དྷཱཏཱུ ཀཱམརཱུཔིནཾ;

རཱུཔཱནུབནྡྷཝུཏྟིཏྟཱ, ཙཀྑུཝིཉྙཱཎཱདཡོ ཝིཡ.

‘‘ཙཀྑཱདིནིསྶིཏཱནེཏཱ, ཏསྶཉྙཱདྷཱརབྷཱཝཏོ;

ནཱཔི རཱུཔཱདིཀེ ཏེསཾ, བཧིདྡྷཱཔི པཝཏྟིཏོ.

‘‘ན ཙཱཔི ཛཱིཝིཏཾ ཏསྶ, ཀིཙྩནྟརནིཡུཏྟིཏོ;

ན ཙ བྷཱཝདྭཡཾ ཏསྨིཾ, ཨསནྟེཔི པཝཏྟིཏོ.

‘‘ཏསྨཱ ཏདཉྙཾ ཝཏྠུ ཏཾ, བྷཱུཏིཀནྟི ཝིཛཱནིཡཾ;

ཝཏྠཱལམྦདུཀཱནནྟུ, དེསནཱབྷེདཏོ ཨིདཾ;

དྷམྨསངྒཎིཔཱཋསྨིཾ, ན ཨཀྑཱཏཾ མཧེསིནཱ’’ཏི.

༩. ཛཱིཝནྟི ཏེནཱཏི ཛཱིཝིཏཾ, ཏདེཝ ཀམྨཛརཱུཔཔརིཔཱལནེ ཨཱདྷིཔཙྩཡོགཏོ ཨིནྡྲིཡནྟི ཛཱིཝིཏིནྡྲིཡཾ. ཏཐཱ ཧེཏཾ ཀམྨཛརཱུཔཔརིཔཱལནལཀྑཎཾ. ཡཐཱསཀཾ ཁཎམཏྟཊྛཱཡཱིནམྤི ཧི སཧཛཱཏཱནཾ ¶ པཝཏྟིཧེཏུབྷཱཝེནེཝ ཨནུཔཱལཀཾ. ན ཧི ཏེསཾ ཀམྨཾཡེཝ ཋིཏིཀཱརཎཾ ཧོཏི ཨཱཧཱརཛཱདཱིནཾ ཨཱཧཱརཱདི ཝིཡ ཀམྨསྶ ཏངྑཎཱབྷཱཝཏོ. ཨིདཾ པན སཧ པཱཙནགྒིནཱ ཨནཝསེསཨུཔཱདིནྣཀཱཡཾ བྱཱཔེཏྭཱ པཝཏྟཏི.

༡༠. ཀབལ༹ཾ ¶ ཀཏྭཱ ཨཛ྄ཛྷོཧརཱིཡཏཱིཏི ཀབལཱི༹ཀཱརོ ཨཱཧཱརོ, ཨིདཉྩ སཝཏྠུཀཾ ཀཏྭཱ ཨཱཧཱརཾ དསྶེཏུཾ ཝུཏྟཾ. སེནྡྲིཡཀཱཡོཔཏྠམྦྷནཧེཏུབྷཱུཏཱ པན ཨངྒམངྒཱནུསཱརཱི རསཧརསངྑཱཏཱ ཨཛ྄ཛྷོཧརིཏབྦཱཧཱརསིནེཧབྷཱུཏཱ ཨོཛཱ ཨིདྷ ཨཱཧཱརརཱུཔཾ ནཱམ. ཏཐཱ ཧེཏཾ སེནྡྲིཡཀཱཡོཔཏྠམྦྷནཧེཏུབྷཱཝལཀྑཎཾ, ཨོཛཊྛམཀརཱུཔཱཧརཎལཀྑཎཾ ཝཱ.

༡༡. ཀཀྑལ༹ཏྟཱདིནཱ ཨཏྟནོ ཨཏྟནོ སབྷཱཝེན ཨུཔལབྦྷནཏོ སབྷཱཝརཱུཔཾ ནཱམ. ཨུཔྤཱདཱདཱིཧི, ཨནིཙྩཏཱདཱིཧི ཝཱ ལཀྑཎེཧི སཧིཏནྟི སལཀྑཎཾ. པརིཙྪེདཱདིབྷཱཝཾ ཝིནཱ ཨཏྟནོ སབྷཱཝེནེཝ ཀམྨཱདཱིཧི པཙྩཡེཧི ནིཔྥནྣཏྟཱ ནིཔྥརཱུཔཾ ནཱམ. རུཔྤནསབྷཱཝོ རཱུཔཾ, ཏེན ཡུཏྟམྤི རཱུཔཾ, ཡཐཱ ‘‘ཨརིསསོ, ནཱིལུཔྤལ’’ནྟི, སྭཱཡཾ རཱུཔ-སདྡོ རུལ༹ྷིཡཱ ཨཏཾསབྷཱཝེཔི པཝཏྟཏཱིཏི ཨཔརེན རཱུཔ-སདྡེན ཝིསེསེཏྭཱ ‘‘རཱུཔརཱུཔ’’ནྟི ཝུཏྟཾ ཡཐཱ ‘‘དུཀྑདུཀྑ’’ནྟི. པརིཙྪེདཱདིབྷཱཝཾ ཨཏིཀྐམིཏྭཱ སབྷཱཝེནེཝ ཨུཔལབྦྷནཏོ ལཀྑཎཏྟཡཱརོཔནེན སམྨསིཏུཾ ཨརཧཏྟཱ སམྨསནརཱུཔཾ.

༡༢. ན ཀསྶཏཱིཏི ཨཀཱསོ. ཨཀཱསོཡེཝ ཨཱཀཱསོ, ནིཛྫཱིཝཊྛེན དྷཱཏུ ཙཱཏི ཨཱཀཱསདྷཱཏུ. ཙཀྑུདསཀཱདིཨེཀེཀཀལཱཔགཏརཱུཔཱནཾ ཀལཱཔནྟརེཧི ཨསཾཀིཎྞབྷཱཝཱཔཱདནཝསེན པརིཙྪེདཀཾ, ཏེཧི ཝཱ པརིཙྪིཛྫམཱནཾ, ཏེསཾ པརིཙྪེདམཏྟཾ ཝཱ རཱུཔཾ པརིཙྪེདརཱུཔཾ. ཏཉྷི ཏཾ ཏཾ རཱུཔཀལཱཔཾ པརིཙྪིནྡནྟཾ ཝིཡ ཧོཏི. ཝིཛྫམཱནེཔི ཙ ཀལཱཔནྟརབྷཱུཏེཧི ཀལཱཔནྟརབྷཱུཏཱནཾ སམྥུཊྛབྷཱཝེ ཏཾཏཾརཱུཔཝིཝིཏྟཏཱ རཱུཔཔརིཡནྟོ ཨཱཀཱསོ. ཡེསཉྩ སོ པརིཙྪེདོ, ཏེཧི སཡཾ ཨསམྥུཊྛོཡེཝ. ཨཉྙཐཱ པརིཙྪིནྣཏཱ ན སིཡཱ ཏེསཾ རཱུཔཱནཾ བྱཱཔཱིབྷཱཝཱཔཏྟིཏོ. ཨབྱཱཔིཏཱ ¶ ཧི ཨསམྥུཊྛཏཱ. ཏེནཱཧ བྷགཝཱ ‘‘ཨསམྥུཊྛཾ ཙཏཱུཧི མཧཱབྷཱུཏེཧཱི’’ཏི (དྷ. ས. ༦༣༧).

༡༣. ཙལམཱནཀཱཡེན ཨདྷིཔྤཱཡཾ ཝིཉྙཱཔེཏི, སཡཉྩ ཏེན ཝིཉྙཱཡཏཱིཏི ཀཱཡཝིཉྙཏྟི. སཝིཉྙཱཎཀསདྡསངྑཱཏཝཱཙཱཡ ཨདྷིཔྤཱཡཾ ཝིཉྙཱཔེཏི, སཡཉྩ ཏཱཡ ཝིཉྙཱཡཏཱིཏི ཝཙཱིཝིཉྙཏྟི. ཏཏྠ ཨབྷིཀྐམཱདིཛནཀཙིཏྟསམུཊྛཱནཝཱཡོདྷཱཏུཡཱ སཧཛཱཏརཱུཔསནྠམྦྷནསནྡྷཱརཎཙལིཏེསུ ¶ སཧཀཱརཱིཀཱརཎབྷཱུཏོ ཕནྡམཱནཀཱཡཕནྡནཏཾཧེཏུཀཝཱཡོདྷཱཏུཝིནིམུཏྟོ མཧནྟཾ པཱསཱཎཾ ཨུཀྑིཔནྟསྶ སབྦཐཱམེན གཧཎཀཱལེ ཨུསྶཱཧནཝིཀཱརོ ཝིཡ རཱུཔཀཱཡསྶ པརིཕནྡནཔཙྩཡབྷཱཝེན ཨུཔལབྦྷམཱནོ ཝིཀཱརོ ཀཱཡཝིཉྙཏྟི. སཱ ཧི ཕནྡམཱནཀཱཡེན ཨདྷིཔྤཱཡཾ ཝིཉྙཱཔེཏི. ན ཧི ཝིཉྙཏྟིཝིཀཱརརཧིཏེསུ རུཀྑཙལནཱདཱིསུ ‘‘ཨིདམེས ཀཱརེཏཱི’’ཏི ཨདྷིཔྤཱཡགྒཧཎཾ དིཊྛནྟི. ཧཏྠཙལནཱདཱིསུ ཙ ཕནྡམཱནཀཱཡགྒཧཎཱནནྟརཾ ཨཝིཉྙཱཡམཱནནྟརེཧི མནོདྭཱརཛཝནེཧི གཡ྄ཧམཱནཏྟཱ སཡཉྩ ཀཱཡེན ཝིཉྙཱཡཏི.

ཀཐཾ པན ཝིཉྙཏྟིཝསེན ཧཏྠཙལནཱདཡོ ཧོནྟཱིཏི? ཝུཙྩཏེ – ཨེཀཱཝཛྫནཝཱིཐིཡཾ སཏྟསུ ཛཝནེསུ སཏྟམཛཝནསམུཊྛཱནཝཱཡོདྷཱཏུ ཝིཉྙཏྟིཝིཀཱརསཧིཏཱཝ པཋམཛཝནཱདིསམུཊྛཱནཱཧི ཝཱཡོདྷཱཏཱུཧི ལདྡྷོཔཏྠམྦྷཱ དེསནྟརུཔྤཏྟིཧེཏུབྷཱཝེན ཙལཡཏི ཙིཏྟཛཾ, པུརིམཛཝནཱདིསམྦྷཱུཏཱ པན སནྠམྦྷནསནྡྷཱརཎམཏྟཀརཱ ཏསྶ ཨུཔཀཱརཱཡ ཧོནྟཱིཏི. ཡཐཱ ཧི སཏྟཧི ཡུགེཧི ཨཱཀཌྜྷིཏབྦསཀཊེ སཏྟམཡུགཡུཏྟཱཡེཝ གོཎཱ ཧེཊྛཱ ཚསུ ཡུགེསུ ཡུཏྟགོཎེཧི ལདྡྷཱུཔཏྠམྦྷཱ སཀཊཾ ཙཱལེནྟི, པཋམཡུགཱདིཡུཏྟཱ པན ཨུཔཏྠམྦྷནསནྡྷཱརཎམཏྟམེཝ སཱདྷེནྟཱ ཏེསཾ ཨུཔཀཱརཱཡ ཧོནྟི, ཨེཝཾསམྤདམིདཾ དཊྛབྦཾ.

དེསནྟརུཔྤཏྟིཡེཝ ¶ ཙེཏྠ ཙལནཾ ཨུཔྤནྣདེསཏོ ཀེསགྒམཏྟམྤི དྷམྨཱནཾ སངྐམནཱབྷཱཝཏོ. ཨིཏརཐཱ ནེསཾ ཨབྱཱཔཱརཀཏཱ, ཁཎིཀཏཱ ཙ ན སིཡཱ. དེསནྟརུཔྤཏྟིཧེཏུབྷཱཝོཏི ཙ ཡཐཱ ཨཏྟནཱ སཧཛརཱུཔཱནི ཧེཊྛིམཛཝནསམུཊྛིཏརཱུཔེཧི པཏིཊྛིཏཊྛཱནཏོ ཨཉྙཏྠ ཨུཔྤཛྫནྟི, ཨེཝཾ ཏེཧི སཧ ཏཏྠ ཨུཔྤཏྟིཡེཝཱཏི དཊྛབྦཾ, ཨེཏྠ པན ཙིཏྟཛེ ཙལིཏེ ཏཾསམྦནྡྷེན ཨིཏརམྤི ཙལཏི ནདཱིསོཏེ པཀྑིཏྟསུཀྑགོམཡཔིཎྜཾ ཝིཡ. ཏཐཱ ཙལཡིཏུཾ ཨསཀྐོནྟི ཡོཔི པཋམཛཝནཱདིསམུཊྛཱནཝཱཡོདྷཱཏུཡོ ཝིཉྙཏྟིཝིཀཱརསཧིཏཱཡེཝ ཡེན དིསཱབྷཱགེན ཨཡཾ ཨབྷིཀྐམཱདཱིནི པཝཏྟེཏུཀཱམོ, ཏདབྷིམུཁབྷཱཝཝིཀཱརསམྦྷཝཏོ. ཨེཝཉྩ ཀཏྭཱ མནོདྭཱརཱཝཛྫནསྶཔི ཝིཉྙཏྟིསམུཊྛཱཔཀཏྟཾ ཝཀྑཏི. ཝཙཱིབྷེདཀརཙིཏྟསམུཊྛཱནཔཐཝཱིདྷཱཏུཡཱ ཨཀྑརུཔྤཏྟིཊྛཱནགཏཨུཔཱདིནྣརཱུཔེཧི སཧ གྷཊྚནཔཙྩཡབྷཱུཏོ ཨེཀོ ཝིཀཱརོ ཝཙཱིཝིཉྙཏྟི. ཡཾ པནེཏྠ ཝཏྟབྦཾ, ཏཾ ཀཱཡཝིཉྙཏྟིཡཾ ཝུཏྟནཡེན དཊྛབྦཾ.

ཨཡཾ པན ཝིསེསོ – ཡཐཱ ཏཏྠ ‘‘ཕནྡམཱནཀཱཡགྒཧཎཱནནྟར’’ནྟི ཝུཏྟཾ, ཨེཝམིདྷ ‘‘སུཡྻམཱནསདྡསཝནཱནནྟར’’ནྟི ཡོཛེཏབྦཾ. ཨིདྷ ཙ སནྠམྦྷནཱདཱིནཾ ཨབྷཱཝཏོ སཏྟམཛཝནསམུཊྛིཏཱཏྱཱདིནཡོ ¶ ན ལབྦྷཏི. གྷཊྚནེན ཧི སདྡྷིཾཡེཝ སདྡོ ཨུཔྤཛྫཏི. གྷཊྚནཉྩ པཋམཛཝནཱདཱིསུཔི ལབྦྷཏེཝ. ཨེཏྠ ཙ ཡཐཱ ཨུསྶཱཔེཏྭཱ བདྡྷགོསཱིསཏཱལཔཎྞཱདིརཱུཔཱནི དིསྭཱ ཏདནནྟརཔྤཝཏྟཱཡ ཨཝིཉྙཱཡམཱནནྟརཱཡ མནོདྭཱརཝཱིཐིཡཱ གོསཱིསཱདཱིནཾ ཨུདཀསཧཙཱརིཏཔྤཀཱརཾ སཉྙཱཎཾ གཧེཏྭཱ ཨུདཀགྒཧཎཾ ཧོཏི, ཨེཝཾ ཝིཔྥནྡམཱནསམུཙྩཱརིཡམཱནཀཱཡསདྡེ གཧེཏྭཱ ཏདནནྟརཔྤཝཏྟཱཡ ཨཝིཉྙཱཡམཱནནྟརཱཡ མནོདྭཱརཝཱིཐིཡཱ པུརིམསིདྡྷསམྦནྡྷཱུཔནིསྶཡཱཡ སཱདྷིཔྤཱཡཝིཀཱརགྒཧཎཾ ཧོཏཱིཏི ཨཡཾ དྭིནྣཾ སཱདྷཱརཎཱ ཨུཔམཱ.

༡༤. ལཧུབྷཱཝོ ¶ ལཧུཏཱ. མུདུབྷཱཝོ མུདུཏཱ. ཀམྨཉྙབྷཱཝོ ཀམྨཉྙཏཱ. ཡཐཱཀྐམཉྩེཏཱ ཨརོགིནོ ཝིཡ རཱུཔཱནཾ ཨགརུཏཱ སུཔརིམདྡིཏཙམྨསྶ ཝིཡ ཨཀཐིནཏཱ སུདྷནྟསུཝཎྞསྶ ཝིཡ སརཱིརཀིརིཡཱནཾ ཨནུཀཱུལབྷཱཝོཏི དཊྛབྦཾ. ཨཉྙམཉྙཾ ཨཝིཛཧནྟསྶཔི ཧི ལཧུཏཱདིཏྟཡསྶ ཏཾཏཾཝིཀཱརཱདྷིཀརཱུཔེཧི ནཱནཏྟཾ ཝུཙྩཏི, དནྡྷཏྟཀརདྷཱཏུཀྑོབྷཔྤཊིཔཀྑཔཙྩཡསམུཊྛཱནོ ཧི རཱུཔཝིཀཱརོ ལཧུཏཱ. ཐདྡྷཏྟཀརདྷཱཏུཀྑོབྷཔྤཊིཔཀྑཔཙྩཡསམུཊྛཱནོ མུདུཏཱ. སརཱིརཀིརིཡཱནཾ ཨནནུཀཱུལབྷཱཝཀརདྷཱཏུཀྑོབྷཔྤཊིཔཀྑཔཙྩཡསམུཊྛཱནོ ཀམྨཉྙཏཱཏི.

༡༥. ཨུཔཙཡནཾ ཨུཔཙཡོ, པཋམཙཡོཏྱཏྠོ ‘‘ཨུཔཉྙཏྟ’’ནྟྱཱདཱིསུ ཝིཡ ཨུཔ-སདྡསྶ པཋམཏྠཛོཏནཏོ. སནྟཱནོ སནྟཏི, པབནྡྷོཏྱཏྠོ. ཏཏྠ པཊིསནྡྷིཏོ པཊྛཱཡ ཡཱཝ ཙཀྑཱདིདསཀཱནཾ ཨུཔྤཏྟི, ཨེཏྠནྟརེ རཱུཔུཔྤཱདོ ཨུཔཙཡོ ནཱམ. ཏཏོ པརཾ སནྟཏི ནཱམ. ཡཐཱསཀཾ ཁཎམཏྟཊྛཱཡཱིནཾ རཱུཔཱནཾ ནིརོདྷཱབྷིམུཁབྷཱཝཝསེན ཛཱིརཎཾ ཛརཱ, སཱཡེཝ ཛརཏཱ, ནིཙྩདྷུཝབྷཱཝེན ན ཨིཙྩཾ ཨནུཔགནྟབྦནྟི ཨནིཙྩཾ, ཏསྶ བྷཱཝོ ཨནིཙྩཏཱ, རཱུཔཔརིབྷེདོ. ལཀྑཎརཱུཔཾ ནཱམ དྷམྨཱནཾ ཏཾཏཾཨཝཏྠཱཝསེན ལཀྑཎཧེཏུཏྟཱ.

༡༦. ཛཱཏིརཱུཔམེཝཱཏི པཊིསནྡྷིཏོ པཊྛཱཡ རཱུཔཱནཾ ཁཎེ ཁཎེ ཨུཔྤཏྟིབྷཱཝཏོ ཛཱཏིསངྑཱཏཾ རཱུཔུཔྤཏྟིབྷཱཝེན ཙཏུསནྟཏིརཱུཔཔྤཊིབདྡྷཝུཏྟིཏྟཱ རཱུཔསམྨཏཉྩ ཛཱཏིརཱུཔམེཝ ཨུཔཙཡསནྟཏིབྷཱཝེན པཝུཙྩཏི པཋམུཔརིནིཙྩཏྟསངྑཱཏཔྤཝཏྟིཨཱཀཱརབྷེདཏོ ཝེནེཡྻཝསེན ‘‘ཨུཔཙཡོ སནྟཏཱི’’ཏི (དྷ. ས. ༦༤༢) ཝིབྷཛིཏྭཱ ཝུཏྟཏྟཱ. ཨེཝཉྩ ཀཏྭཱ ཏཱསཾ ནིདྡེསེ ཨཏྠཏོ ཨབྷེདཾ དསྶེཏུཾ ‘‘ཡོ ཨཱཡཏནཱནཾ ཨཱཙཡོ, སོ རཱུཔསྶ ཨུཔཙཡོ. ཡོ རཱུཔསྶ ཨུཔཙཡོ, སཱ ¶ རཱུཔསྶ སནྟཏཱི’’ཏི (དྷ. ས. ༦༤༡-༦༤༢) ཝུཏྟཾ. ཨེཀཱདསཝིདྷམྤཱིཏི སབྷཱགསངྒཧཝསེན ཨེཀཱདསཔྤཀཱརམྤི.

༡༧. ཙཏྟཱརོ ¶ བྷཱུཏཱ, པཉྩ པསཱདཱ, ཙཏྟཱརོ ཝིསཡཱ, དུཝིདྷོ བྷཱཝོ, ཧདཡརཱུཔམིཙྩཔི ཨིདཾ ཛཱིཝིཏཱཧཱརརཱུཔེཧི དྭཱིཧི སཧ ཨཊྛཱརསཝིདྷཾ, ཏཐཱ པརིཙྪེདོ ཙ དུཝིདྷཱ ཝིཉྙཏྟི, ཏིཝིདྷོ ཝིཀཱརོ, ཙཏུབྦིདྷཾ ལཀྑཎནྟི རཱུཔཱནཾ པརིཙྪེདཝིཀཱརཱདིབྷཱཝཾ ཝིནཱ ཝིསུཾ པཙྩཡེཧི ཨནིབྦཏྟཏྟཱ ཨིམེ ཨནིཔྥནྣཱ དས ཙེཏི ཨཊྛཝཱིསཏིཝིདྷཾ བྷཝེ.

རཱུཔསམུདྡེསཝཎྞནཱ ནིཊྛིཏཱ.

རཱུཔཝིབྷཱགཝཎྞནཱ

༡༨. ཨིདཱནི ཡཐཱཨུདྡིཊྛརཱུཔཱནཾ ཨེཀཝིདྷཱདིནཡདསྶནཏྠཾ ‘‘སབྦཉྩ པནེཏ’’ནྟྱཱདི ཝུཏྟཾ. སམྤཡུཏྟསྶ ཨལོབྷཱདིཧེཏུནོ ཨབྷཱཝཱ ཨཧེཏུཀཾ. ཡཐཱསཀཾ པཙྩཡཝནྟཏཱཡ སཔྤཙྩཡཾ. ཨཏྟཱནཾ ཨཱརབྦྷ པཝཏྟེཧི ཀཱམཱསཝཱདཱིཧི སཧིཏཏྟཱ སཱསཝཾ. པཙྩཡེཧི ཨབྷིསངྑཏཏྟཱ སངྑཏཾ. ཨུཔཱདཱནཀྑནྡྷསངྑཱཏེ ལོཀེ ནིཡུཏྟཏཱཡ ལོཀིཡཾ. ཀཱམཏཎྷཱཡ ཨཝཙརིཏཏྟཱ ཀཱམཱཝཙརཾ. ཨརཱུཔདྷམྨཱནཾ ཝིཡ ཀསྶཙི ཨཱརམྨཎསྶ ཨགྒཧཎཏོ ནཱསྶ ཨཱརམྨཎནྟི ཨནཱརམྨཎཾ. ཏདངྒཱདིཝསེན པཧཱཏབྦཏཱབྷཱཝཏོ ཨཔྤཧཱཏབྦཾ. ཨིཏི-སདྡོ པཀཱརཏྠོ, ཏེན ‘‘ཨབྱཱཀཏ’’ནྟྱཱདིཀཾ སབྦཾ ཨེཀཝིདྷནཡཾ སངྒཎྷཱཏི.

༡༩. ཨཛ྄ཛྷཏྟིཀརཱུཔཾ ཨཏྟབྷཱཝསངྑཱཏཾ ཨཏྟཱནཾ ཨདྷིཀིཙྩ ཨུདྡིསྶ པཝཏྟཏྟཱ. ཀཱམཾ ཨཉྙེཔི ཧི ཨཛ྄ཛྷཏྟསམྦྷཱུཏཱ ཨཏྠི, རུལ༹ྷཱིཝསེན པན ཙཀྑཱདིཀཾཡེཝ ཨཛ྄ཛྷཏྟིཀཾ. ཨཐ ཝཱ ‘‘ཡདི མཡཾ ན ཧོམ, ཏྭཾ ཀཊྛཀལིངྒརཱུཔམོ བྷཝིསྶསཱི’’ཏི ཝདནྟཱ ཝིཡ ཨཏྟབྷཱཝསྶ ¶ སཱཏིསཡཾ ཨུཔཀཱརཏྟཱ ཙཀྑཱདཱིནེཝ ཝིསེསཏོ ཨཛ྄ཛྷཏྟིཀཱནི ནཱམ. ཨཏྟསངྑཱཏཾ ཝཱ ཙིཏྟཾ ཨདྷིཀིཙྩ ཏསྶ དྭཱརབྷཱཝེན པཝཏྟཏཱིཏི ཨཛ྄ཛྷཏྟཾ, ཏདེཝ ཨཛ྄ཛྷཏྟིཀཾ. ཏཏོ བཧིབྷཱུཏཏྟཱ ཨིཏརཾ ཏེཝཱིསཏིཝིདྷཾ བཱཧིརརཱུཔཾ.

༢༠. ཨིཏརཾ བཱཝཱིསཏིཝིདྷཾ ཨཝཏྠུརཱུཔཾ.

༢༢. ཨཊྛཝིདྷམྤི ¶ ཨིནྡྲིཡརཱུཔཾ པཉྩཝིཉྙཱཎེསུ ལིངྒཱདཱིསུ སཧཛརཱུཔཔརིཔཱལནེ ཙ ཨཱདྷིཔཙྩཡོགཏོ. པསཱདརཱུཔསྶ ཧི པཉྩཝིདྷསྶ ཙཀྑུཝིཉྙཱཎཱདཱིསུ ཨཱདྷིཔཙྩཾ ཨཏྟནོ པཊུམནྡཱདིབྷཱཝེན ཏེསམྤི པཊུམནྡཱདིབྷཱཝཱཔཱདནཏོ. བྷཱཝདྭཡསྶཱཔི ཨིཏྠིལིངྒཱདཱིསུ ཨཱདྷིཔཙྩཾ ཡཐཱསཀཾ པཙྩཡེཧི ཨུཔྤཛྫམཱནཱནམྤི ཏེསཾ ཡེབྷུཡྻེན སབྷཱཝཀསནྟཱནེཡེཝ ཏཾཏདཱཀཱརེན ཨུཔྤཛྫནཏོ, ན པན ཨིནྡྲིཡཔཙྩཡབྷཱཝཏོ. ཛཱིཝིཏསྶ ཙ ཀམྨཛཔརིཔཱལནེ ཨཱདྷིཔཙྩཾ ཏེསཾ ཡཐཱསཀཾ ཁཎཊྛཱནསྶ ཛཱིཝིཏིནྡྲིཡཔྤཊིབདྡྷཏྟཱ. སཡཉྩ ཨཏྟནཱ ཋཔིཏདྷམྨསམྦནྡྷེནེཝ པཝཏྟཏི ནཱཝིཀོ ཝིཡ.

༢༣. ཝིསཡཝིསཡིབྷཱཝཔྤཏྟིཝསེན ཐཱུལཏྟཱ ཨོལཱ༹རིཀརཱུཔཾ. ཏཏོཡེཝ གཧཎསྶ སུཀརཏྟཱ སནྟིཀེརཱུཔཾ ཨཱསནྣརཱུཔཾ ནཱམ. ཡོ སཡཾ, ནིསྶཡཝསེན ཙ སམྤཏྟཱནཾ, ཨསམྤཏྟཱནཉྩ པཊིམུཁབྷཱཝོ ཨཉྙམཉྙཔཏནཾ, སོ པཊིགྷོ ཝིཡཱཏི པཊིགྷོ. ཡཐཱ ཧི པཊིགྷཱཏེ སཏི དུབྦལསྶ ཙལནཾ ཧོཏི, ཨེཝཾ ཨཉྙམཉྙཾ པཊིམུཁབྷཱཝེ སཏི ཨརཱུཔསབྷཱཝཏྟཱ དུབྦལསྶ བྷཝངྒསྶ ཙལནཾ ཧོཏི. པཊིགྷོ ཡསྶ ཨཏྠི ཏཾ སཔྤཊིགྷཾ. ཏཏྠ སཡཾ སམྤཏྟི ཕོཊྛབྦསྶ, ནིསྶཡཝསེན སམྤཏྟི གྷཱནཛིཝ྄ཧཱཀཱཡགནྡྷརསཱནཾ, ཨུབྷཡཐཱཔི ཨསམྤཏྟི ཙཀྑུསོཏརཱུཔསདྡཱནནྟི དཊྛབྦཾ. ཨིཏརཾ སོལ༹སཝིདྷཾ ཨོལཱ༹རིཀཏཱདིསབྷཱཝཱབྷཱཝཏོ སུཁུམརཱུཔཱདིཀཾ.

༢༤. ཀམྨཏོ ¶ ཛཱཏཾ ཨཊྛཱརསཝིདྷཾ ཨུཔཱདིནྣརཱུཔཾ ཏཎྷཱདིཊྛཱིཧི ཨུཔེཏེན ཀམྨུནཱ ཨཏྟནོ ཕལབྷཱཝེན ཨཱདིནྣཏྟཱ གཧིཏཏྟཱ. ཨིཏརཾ ཨགྒཧིཏགྒཧཎེནདསཝིདྷཾ ཨནུཔཱདིནྣརཱུཔཾ.

༢༥. དཊྛབྦབྷཱཝསངྑཱཏེན ནིདསྶནེན སཧ ཝཏྟཏཱིཏི སནིདསྶནཾ. ཙཀྑུཝིཉྙཱཎགོཙརབྷཱཝོ ཧི ནིདསྶནནྟི ཝུཙྩཏི ཏསྶ ཙ རཱུཔཱཡཏནཏོ ཨནཉྙཏྟེཔི ཨཉྙེཧི དྷམྨེཧི ཏཾ ཝིསེསེཏུཾ ཨཉྙཾ ཝིཡ ཀཏྭཱ ཝཏྟུཾ ཝཊྚཏཱིཏི སཧ ནིདསྶནེན སནིདསྶནནྟི. དྷམྨབྷཱཝསཱམཉྙེན ཧི ཨེཀཱིབྷཱུཏེསུ དྷམྨེསུ ཡོ ནཱནཏྟཀརོ ཝིསེསོ, སོ ཨཉྙོ ཝིཡ ཀཏྭཱ ཨུཔཙརིཏུཾ ཡུཏྟོ. ཨེཝཉྷི ཨཏྠཝིསེསཱཝབོདྷོ ཧོཏི.

༢༦. ཨསམྤཏྟཝསེནཱཏི ཨཏྟཱནཾ ཨསམྤཏྟསྶ གོཙརསྶ ཝསེན, ཨཏྟནཱ ཝིསཡཔྤདེསཾ ཝཱ ཨསམྤཏྟཝསེན. ཙཀྑུསོཏཱནི ཧི རཱུཔསདྡེཧི ཨསམྤཏྟཱནི, སཡཾ ཝཱ ཏཱནི ཨསམྤཏྟཱནེཝ ཨཱརམྨཎཾ གཎྷནྟི. ཏེནེཏཾ ཝུཙྩཏི –

‘‘ཙཀྑུསོཏཾ ¶ པནེཏེསུ, ཧོཏཱསམྤཏྟགཱཧཀཾ;

ཝིཉྙཱཎུཔྤཏྟིཧེཏུཏྟཱ, སནྟརཱདྷིཀགོཙརེ.

‘‘ཏཐཱ ཧི དཱུརདེསཊྛཾ, ཕལིཀཱདིཏིརོཧིཏཾ;

མཧནྟཉྩ ནགཱདཱིནཾ, ཝཎྞཾ ཙཀྑུ ཨུདིཀྑཏི.

‘‘ཨཱཀཱསཱདིགཏོ ཀུཙྪི-ཙམྨཱནནྟརིཀོཔི ཙ;

མཧནྟོ ཙ གྷཎྚཱདཱིནཾ, སདྡོ སོཏསྶ གོཙརོ.

‘‘གནྟྭཱ ཝིསཡདེསཾ ཏཾ, ཕརིཏྭཱ གཎྷཏཱིཏི ཙེ;

ཨདྷིཊྛཱནཝིདྷཱནེཔི, ཏསྶ སོ གོཙརོ སིཡཱ.

‘‘བྷཱུཏཔྤབནྡྷཏོ སོ ཙེ, ཡཱཏི ཨིནྡྲིཡསནྣིདྷིཾ;

ཀམྨཙིཏྟོཛསམྦྷཱུཏོ, ཝཎྞོ སདྡོ ཙ ཙིཏྟཛོ.

‘‘ན ཏེསཾ གོཙརཱ ཧོནྟི, ན ཧི སམྦྷོནྟི ཏེ བཧི;

ཝུཏྟཱ ཙ ཨཝིསེསེན, པཱཋེ ཏཾཝིསཡཱཝ ཏེ.

‘‘ཡདི ¶ ཙེཏཾ དྭཡཾ ཨཏྟསམཱིཔཾཡེཝ གཎྷཏི;

ཨཀྑིཝཎྞཾ ཏཐཱ མཱུལཾ, པསྶེཡྻ བྷམུཀསྶ ཙ.

‘‘དིསཱདེསཝཝཏྠཱནཾ, སདྡསྶ ན བྷཝེཡྻ ཙ;

སིཡཱ ཙ སརཝེདྷིསྶ, སཀཎྞེ སརཔཱཏན’’ནྟི.

གོཙརགྒཱཧིཀརཱུཔཾ ཝིཉྙཱཎཱདྷིཊྛིཏཾ ཧུཏྭཱ ཏཾཏཾགོཙརགྒཧཎསབྷཱཝཏྟཱ. ཨིཏརཾ ཏེཝཱིསཏིཝིདྷཾ ཨགོཙརགྒཱཧིཀརཱུཔཾ གོཙརགྒཧཎཱབྷཱཝཏོ.

༢༧. ཝཎྞིཏབྦོ དཊྛབྦོཏི ཝཎྞོ. ཨཏྟནོ ཨུདཡཱནནྟརཾ རཱུཔཾ ཛནེཏཱིཏི ཨོཛཱ. ཨཝིནིབྦྷོགརཱུཔཾ ¶ ཀཏྠཙིཔི ཨཉྙམཉྙཾ ཝིནིབྷུཉྫནསྶ ཝིསུཾ ཝིསུཾ པཝཏྟིཡཱ ཨབྷཱཝཏོ. རཱུཔལོཀེ གནྡྷཱདཱིནཾ ཨབྷཱཝཝཱདིམཏམྤི ཧི ཏཏྠ ཏཏྠ (ཝིབྷ. མཱུལཊཱི. ༢༢༧; ཝིབྷ. ཨནུཊཱི. ༢༢༧) ཨཱཙརིཡེཧི པཊིཀྑིཏྟམེཝ.

༢༨. ཨིཙྩེཝནྟི ཨེཏྠཔི ཨིཏི-སདྡོ པཀཱརཏྠོ, ཏེན ཨིདྷ ཨནཱགཏམྤི སབྦཾ དུཀཏིཀཱདིབྷེདཾ སངྒཎྷཱཏི.

རཱུཔཝིབྷཱགཝཎྞནཱ ནིཊྛིཏཱ.

རཱུཔསམུཊྛཱནནཡཝཎྞནཱ

༢༩. ཀཱནི པན ཏཱནི ཀམྨཱདཱིནི, ཀཐཾ, ཀཏྠ, ཀདཱ ཙ རཱུཔསམུཊྛཱནཱནཱིཏི ཨཱཧ ‘‘ཏཏྠཱ’’ཏྱཱདི. པཊིསནྡྷིམུཔཱདཱཡཱཏི པཊིསནྡྷིཙིཏྟསྶ ཨུཔྤཱདཀྑཎཾ ཨུཔཱདཱཡ. ཁཎེ ཁཎེཏི ཨེཀེཀསྶ ཙིཏྟསྶ ཏཱིསུ ཏཱིསུ ཁཎེསུ, ནིརནྟརམེཝཱཏི ཝུཏྟཾ ཧོཏི. ཨཔརེ པན ཙིཏྟསྶ ཋིཏིཀྑཎཾ (ཝིབྷ. མཱུལཊཱི. ༢༠ པཀིཎྞཀཀཐཱཝཎྞནཱ), བྷངྒཀྑཎེ ཙ རཱུཔུཔྤཱདཾ (ཝིབྷ. མཱུལཊཱི. ༢༠ པཀིཎྞཀཀཐཱཝཎྞནཱ) པཊིསེདྷེནྟི. ཏཏྠ ཀིཉྩཱཔི ཋིཏིཀྑཎཱབྷཱཝེ ཏེསཾ ཨུཔཔཏྟི ཙེཝ ཏཏྠ ཝཏྟབྦཉྩ ཧེཊྛཱ ཀཐིཏམེཝ, ཨིདྷཱཔི ¶ པན བྷངྒཀྑཎེ རཱུཔུཔྤཱདཱབྷཱཝེ ཨུཔཔཏྟིཡཱ ཏཏྠ ཝཏྟབྦེན ཙ སཧ སུཁགྒཧཎཏྠཾ སངྒཧེཏྭཱ ཝུཙྩཏི –

‘‘ཨུཔྤནྣུཔྤཛྫམཱནནྟི, ཝིབྷངྒེ ཨེཝམཱདིནཾ;

བྷངྒཀྑཎསྨིཾ ཨུཔྤནྣཾ, ནོ ཙ ཨུཔྤཛྫམཱནཀཾ.

‘‘ཨུཔྤཛྫམཱནམུཔྤཱདེ, ཨུཔྤནྣཉྩཱཏིཨཱདིནཱ;

བྷངྒུཔྤཱདཱཝ ཨཀྑཱཏཱ, ན ཙིཏྟསྶ ཋིཏིཀྑཎོ.

‘‘‘ཨུཔྤཱདོ ¶ ཙ ཝཡོ ཙེཝ, ཨཉྙཐཏྟཾ ཋིཏསྶ ཙ;

པཉྙཱཡཏཱི’ཏི (ཨ. ནི. ༣.༤༧) ཝུཏྟཏྟཱ, ཋིཏི ཨཏྠཱིཏི ཙེ མཏཾ.

‘‘ཨཉྙཐཏྟསྶ ཨེཀསྨིཾ, དྷམྨེ ཨནུཔལདྡྷིཏོ;

པཉྙཱཎཝཙནཱ ཙེཝ, པབནྡྷཊྛིཏི ཏཏྠཔི.

‘‘ཝུཏྟཱ ཏསྨཱ ན ཙིཏྟསྶ, ཋིཏི དིསྶཏི པཱལི༹ཡཾ;

ཨབྷིདྷམྨེ ཨབྷཱཝོཔི, ནིསེདྷོཡེཝ སབྦཐཱ.

‘‘ཡདཱ སམུདཡོ ཡསྶ, ནིརུཛ྄ཛྷཏི ཏདཱསྶ ཀིཾ;

དུཀྑམུཔྤཛྫཏཱིཏྱེཏྠ, པཉྷེ ནོཏི ནིསེདྷཏོ.

‘‘རཱུཔུཔྤཱདོ ན བྷངྒསྨིཾ, ཏསྨཱ སབྦེཔི པཙྩཡཱ;

ཨུཔྤཱདེཡེཝ ཙིཏྟསྶ, རཱུཔཧེཏཱུཏི ཀེཙན.

‘‘ཝུཙྩཏེ ཏཏྠ ཨེཀསྨིཾ, དྷམྨེཡེཝ ཡཐཱ མཏཱ;

ཨུཔྤཱདཱཝཏྠཏོ བྷིནྣཱ, བྷངྒཱཝཏྠཱ ཏཐེཝ ཏུ.

‘‘བྷངྒསྶཱབྷིམུཁཱཝཏྠཱ, ཨིཙྪིཏབྦཱ ཨཡཾ ཋིཏི;

ནཡདསྶནཏོ ཨེསཱ, ཝིབྷངྒེ ན ཏུ དེསིཏཱ.

‘‘ལཀྑཎཾ སངྑཏསྶེཝ, ཝཏྟུམུཔྤཱདཨཱདིནཾ;

དེསིཏཏྟཱ ན ཏཏྠཱཔི, པབནྡྷསྶ ཋིཏཱིརིཏཱ.

‘‘ཨུཔསགྒསྶ དྷཱཏཱུནམཏྠེཡེཝ པཝཏྟིཏོ;

པཉྙཱཡཏཱིཏི ཙེཏསྶ, ཨཏྠོ ཝིཉྙཱཡཏེ ཨིཏི.

‘‘བྷངྒེ ¶ ¶ རཱུཔསྶ ནུཔྤཱདོ, ཙིཏྟཛཱནཾ ཝསེན ཝཱ;

ཨཱརུཔྤཾཝཱབྷིསནྡྷཱཡ, བྷཱསིཏོ ཡམཀསྶ ཧི.

‘‘སབྷཱཝོཡཾ ཡཐཱལཱབྷ-ཡོཛནཱཏི ཏཏོ ནཧི;

ན ཙིཏྟཊྛིཏི བྷངྒེ ཙ, ན རཱུཔསྶ ཨསམྦྷཝོ’’ཏི.

༣༡. རཱུཔཝིརཱགབྷཱཝནཱནིབྦཏྟཏྟཱ ཧེཏུནོ ཏབྦིདྷུརཏཱཡ, ཨནོཀཱསཏཱཡ ཙ ཨརཱུཔཝིཔཱཀཱ, རཱུཔཛནནེ ཝིསེསཔཙྩཡེཧི ཛྷཱནངྒེཧི སམྤཡོགཱབྷཱཝཏོ དྭིཔཉྩཝིཉྙཱཎཱནི ཙཱཏི ཙུདྡས ཙིཏྟཱནི རཱུཔཾ ན སམུཊྛཱཔེནྟཱིཏི ཝུཏྟཾ ‘‘ཨཱརུཔྤཝིཔཱཀདྭིཔཉྩཝིཉྙཱཎཝཛྫིཏ’’ནྟི. པཊིསནྡྷིཙིཏྟཾ, པན ཙུཏིཙིཏྟཉྩ ཨེཀཱུནཝཱིསཏི བྷཝངྒསྶེཝ ཨནྟོགདྷཏྟཱ ཙིཏྟནྟརཾ ན ཧོཏཱིཏི ན ཏསྶ ཝཛྫནཾ ཀཏཾ. ཀིཉྩཱཔི ན ཀཏཾ, པཙྪཱཛཱཏཔཙྩཡརཧིཏཾ, པན ཨཱཧཱརཱདཱིཧི ཙ ཨནུཔཏྠདྡྷཾ དུབྦལཝཏྠུཾ ནིསྶཱཡ པཝཏྟཏྟཱ, ཨཏྟནོ ཙ ཨཱགནྟུཀཏཱཡ ཀམྨཛརཱུཔེཧི ཙིཏྟསམུཊྛཱནརཱུཔཱནཾ ཋཱནཾ གཧེཏྭཱ ཋིཏཏྟཱ ཙ པཊིསནྡྷིཙིཏྟཾ རཱུཔསམུཊྛཱཔཀཾ ན ཧོཏི. ཙུཏིཙིཏྟེ པན ཨཊྛཀཐཱཡཾ (དྷ. ས. ཨཊྛ. ༦༣༦; ཝིབྷ. ཨཊྛ. ༢༦ པཀིཎྞཀཀཐཱ) ཏཱཝ ‘‘ཝཱུཔསནྟཝཊྚམཱུལསྨིཾ སནྟཱནེ སཱཏིསཡཾ སནྟཝུཏྟིཏཱཡ ཁཱིཎཱསཝསྶེཝ ཙུཏིཙིཏྟཾ རཱུཔཾ ན སམུཊྛཱཔེཏཱི’’ཏི (དྷ. ས. མཱུལཊཱི. ༦༣༦) ཝུཏྟཾ. ཨཱནནྡཱཙརིཡཱདཡོ པན ‘‘སབྦེསམྤི ཙུཏིཙིཏྟཾ རཱུཔཾ ན སམུཊྛཱཔེཏཱི’’ཏི ཝདནྟི. ཝིནིཙྪཡོ པན ནེསཾ སངྑེཔཏོ མཱུལཊཱིཀཱདཱིསུ, ཝིཏྠཱརཏོ ཙ ཨབྷིདྷམྨཏྠཝིཀཱསིནིཡཾ ཝུཏྟནཡེན དཊྛབྦོ. པཋམབྷཝངྒམུཔཱདཱཡཱཏི པཊིསནྡྷིཡཱ ཨནནྟརནིབྦཏྟཔཋམབྷཝངྒཏོ པཊྛཱཡ. ཛཱཡནྟམེཝ སམུཊྛཱཔེཏི, ན པན ཋིཏཾ, བྷིཛྫམཱནཾ ཝཱ ཨནནྟརཱདིཔཙྩཡལཱབྷེན ཨུཔྤཱདཀྑཎེཡེཝ ཛནཀསཱམཏྠིཡཡོགཏོ.

༣༢. ཨིརིཡཱཡ ཀཱཡིཀཀིརིཡཱཡ པཝཏྟིཔཐབྷཱཝཏོ ཨིརིཡཱཔཐོ, གམནཱདི, ཨཏྠཏོ ཏདཝཏྠཱ རཱུཔཔྤཝཏྟི. ཏམྤི ¶ སནྡྷཱརེཏི ཡཐཱཔཝཏྟཾ ཨུཔཏྠམྦྷེཏི. ཡཐཱ ཧི ཝཱིཐིཙིཏྟེཧི ཨབྦོཀིཎྞེ བྷཝངྒེ པཝཏྟམཱནེ ཨངྒཱནི ཨོསཱིདནྟི, ན ཨེཝམེཏེསུ དྭཏྟིཾསཝིདྷེསུ, ཝཀྑམཱནེསུ ཙ ཚབྦཱིསཏིཡཱ ཛཱགརཎཙིཏྟེསུ པཝཏྟམཱནེསུ. ཏདཱ པན ཨངྒཱནི ཨུཔཏྠདྡྷཱནི ཡཐཱཔཝཏྟཨིརིཡཱཔཐབྷཱཝེནེཝ པཝཏྟནྟི.

༣༣. ཝིཉྙཏྟིམྤི སམུཊྛཱཔེནྟི, ན ཀེཝལཾ རཱུཔིརིཡཱཔཐཱནེཝ. ཨཝིསེསཝཙནེཔི པནེཏྠ མནོདྭཱརཔྤཝཏྟཱནེཝ ¶ ཝོཊྛབྦནཛཝནཱནི ཝིཉྙཏྟིསམུཊྛཱཔཀཱནི, ཏཐཱ ཧཱསཛནཀཱནི ཙ པཉྩདྭཱརཔྤཝཏྟཱནཾ པརིདུབྦལབྷཱཝཏོཏི དཊྛབྦཾ. ཀཱམཉྩེཏྠ རཱུཔཝིནིམུཏྟོ ཨིརིཡཱཔཐོ, ཝིཉྙཏྟི ཝཱ ནཏྠི, ཏཐཱཔི ན སབྦཾ རཱུཔསམུཊྛཱཔཀཾ ཙིཏྟཾ ཨིརིཡཱཔཐཱུཔཏྠམྦྷཀཾ, ཝིཉྙཏྟིཝིཀཱརཛནཀཉྩ ཧོཏི. ཡཾ པན ཙིཏྟཾ ཝིཉྙཏྟིཛནཀཾ, ཏཾ ཨེཀཾསཏོ ཨིརིཡཱཔཐཱུཔཏྠམྦྷཀཾ ཨིརིཡཱཔཐསྶ ཝིཉྙཏྟིཡཱ སཧ ཨཝིནཱབྷཱཝཏོ. ཨིརིཡཱཔཐཱུཔཏྠམྦྷཀཉྩ རཱུཔཛནཀནྟི ཨིམསྶ ཝིསེསདསྶནཏྠཾ རཱུཔཏོ ཨིརིཡཱཔཐཝིཉྙཏྟཱིནཾ ཝིསུཾ གཧཎཾ.

༣༤. ཏེརསཱཏི ཀུསལཏོ ཙཏྟཱརི, ཨཀུསལཏོ ཙཏྟཱརི, ཀིརིཡཏོ པཉྩཱཏི ཏེརས. ཏེསུ ཧི པུཐུཛྫནཱ ཨཊྛཧི ཀུསལཱཀུསལེཧི ཧསནྟི, སེཀྑཱ དིཊྛིསཧགཏཝཛྫིཏེཧི, ཨསེཀྑཱ པན པཉྩཧི ཀིརིཡཙིཏྟེཧི, ཏཏྠཱཔི བུདྡྷཱ ཙཏཱུཧི སཧེཏུཀཀིརིཡཙིཏྟེཧེཝ ཧསནྟི, ན ཨཧེཏུཀེན ‘‘ཨཏཱིཏཾསཱདཱིསུ ཨཔྤཊིཧཏཉཱཎཾ པཏྭཱ ཨིམེཧི ཏཱིཧི དྷམྨེཧི སམནྣཱགཏསྶ བུདྡྷསྶ བྷགཝཏོ སབྦཾ ཀཱཡཀམྨཾ ཉཱཎཔུབྦངྒམཾ ཉཱཎཱནུཔརིཝཏྟཱི’’ཏི ཝཙནཏོ (མཧཱནི. ༦༩; ཙཱུལ༹ནི. མོགྷརཱཛམཱཎཝཔུཙྪཱནིདྡེས ༨༥; པཊི. མ. ༣.༥). ན ཧི ཝིཙཱརཎཔཉྙཱརཧིཏསྶ ཧསིཏུཔྤཱདསྶ བུདྡྷཱནཾ པཝཏྟི ཡུཏྟཱཏི ཝདནྟི. ཧསིཏུཔྤཱདཙིཏྟེན པན པཝཏྟིཡམཱནམྤི ཏེསཾ སིཏཀརཎཾ པུབྦེནིཝཱསཨནཱགཏཾསསབྦཉྙུཏཉྙཱཎཱནཾ ཨནུཝཏྟཀཏྟཱ ཉཱཎཱནུཔརིཝཏྟིཡེཝཱཏི. ཨེཝཉྩ ཀཏྭཱ ཨཊྛཀཐཱཡཾ ¶ (དྷ. ས. ཨཊྛ. ༥༦༨) ‘‘ཏེསཾ ཉཱཎཱནཾ ཙིཎྞཔརིཡནྟེ ཨིདཾ ཙིཏྟཾ ཧཱསཡམཱནཾ ཨུཔྤཛྫཏཱི’’ཏི ཝུཏྟཾ, ཏསྨཱ ན ཏསྶ བུདྡྷཱནཾ པཝཏྟི སཀྐཱ ནིཝཱརེཏུཾ.

༣༥. པཙྪཱཛཱཏཱདིཔཙྩཡཱུཔཏྠམྦྷལཱབྷེན ཋིཏིཀྑཎེཡེཝ ཨུཏུཨོཛཱནཾ བལཝབྷཱཝོཏི ཝུཏྟཾ ‘‘ཏེཛོདྷཱཏུ ཋིཏིཔྤཏྟཱ’’ཏྱཱདི.

༣༧. ཏཏྠ ཧདཡཨིནྡྲིཡརཱུཔཱནི ནཝ ཀམྨཏོཡེཝ ཛཱཏཏྟཱ ཀམྨཛཱནེཝ. ཡཉྷི ཛཱཏཾ, ཛཱཡཏི, ཛཱཡིསྶཏི ཙ, ཏཾ ‘‘ཀམྨཛ’’ནྟི ཝུཙྩཏི ཡཐཱ དུདྡྷནྟི.

༤༠. པཙྩུཔྤནྣཔཙྩཡཱཔེཀྑཏྟཱ ལཧུཏཱདིཏྟཡཾ ཀམྨཛཾ ན ཧོཏི, ཨིཏརཐཱ སབྦདཱབྷཱཝཱིཧི བྷཝིཏབྦནྟི ཝུཏྟཾ ‘‘ལཧུཏཱདིཏྟཡཾ ཨུཏུཙིཏྟཱཧཱརེཧི སམྦྷོཏཱི’’ཏི.

༤༣. ཨེཀནྟཀམྨཛཱནི ¶ ནཝ, ཙཏུཛེསུ ཀམྨཛཱནི ནཝཱཏི ཨཊྛཱརས ཀམྨཛཱནི, པཉྩཝིཀཱརརཱུཔསདྡཨཝིནིབྦྷོགརཱུཔཨཱཀཱསཝསེན པནྣརས ཙིཏྟཛཱནི, སདྡོ, ལཧུཏཱདིཏྟཡཾ, ཨཝིནིབྦྷོགཱཀཱསརཱུཔཱནི ནཝཱཏི ཏེརས ཨུཏུཛཱནི, ལཧུཏཱདིཏྟཡཨཝིནིབྦྷོགཱཀཱསཝསེན དྭཱདས ཨཱཧཱརཛཱནི.

༤༤. ཀེཝལཾ ཛཱཡམཱནཱདིརཱུཔཱནཾ ཛཱཡམཱནཔརིཔཙྩམཱནབྷིཛྫམཱནརཱུཔཱནཾ སབྷཱཝཏྟཱ སབྷཱཝམཏྟཾ ཝིནཱ ཨཏྟནོ ཛཱཏིཨཱདིལཀྑཎཱབྷཱཝཏོ ལཀྑཎཱནི ཀེཧིཙི པཙྩཡེཧི ན ཛཱཡནྟཱིཏི པཀཱསིཏཾ. ཨུཔྤཱདཱདིཡུཏྟཱནཉྷི ཙཀྑཱདཱིནཾ ཛཱཏིཨཱདཱིནི ལཀྑཎཱནི ཝིཛྫནྟི, ན ཨེཝཾ ཛཱཏིཨཱདཱིནཾ. ཡདི ཏེསམྤི ཛཱཏིཨཱདཱིནི སིཡུཾ, ཨེཝཾ ཨནཝཏྠཱནམེཝ ཨཱཔཛྫེཡྻ. ཡཾ པན ‘‘རཱུཔཱཡཏནཾ…པེ… ཀབལཱི༹ཀཱརོ ཨཱཧཱརོ. ཨིམེ དྷམྨཱ ཙིཏྟསམུཊྛཱནཱ’’ཏྱཱདཱིསུ (དྷ. ས. ༡༢༠༡) ཛཱཏིཡཱ ཀུཏོཙིཛཱཏཏྟཾ ཨནུཉྙཱཏཾ ¶ , ཏམྤི རཱུཔཛནཀཔཙྩཡཱནཾ རཱུཔུཔྤཱདནཾ པཏི ཨནུཔརཏབྱཱཔཱརཱནཾ པཙྩཡབྷཱཝཱུཔགམནཀྑཎེ ཛཱཡམཱནདྷམྨཝིཀཱརབྷཱཝེན ཨུཔལབྦྷམཱནཏཾ སནྡྷཱཡཱཏི དཊྛབྦཾ. ཡམྤི ‘‘ཛཱཏི, བྷིཀྑཝེ, ཨནིཙྩཱ སངྑཏཱ པཊིཙྩསམུཔྤནྣཱ. ཛརཱམརཎཾ, བྷིཀྑཝེ, ཨནིཙྩཾ སངྑཏཾ པཊིཙྩསམུཔྤནྣ’’ནྟི ཝཙནཾ (སཾ. ནི. ༢.༢༠), ཏཏྠཱཔི པཊིཙྩསམུཔྤནྣཱནཾ ལཀྑཎབྷཱཝཏོཏི ཨཡམེཏྠཱབྷིསནྡྷི. ཏེནཱཧུ པོརཱཎཱ –

‘‘པཱཋེ ཀུཏོཙི ཛཱཏཏྟཾ, ཛཱཏིཡཱ པརིཡཱཡཏོ;

སངྑཏཱནཾ སབྷཱཝཏྟཱ, ཏཱིསུ སངྑཏཏོདིཏཱ’’ཏི.

རཱུཔསམུཊྛཱནནཡཝཎྞནཱ ནིཊྛིཏཱ.

ཀལཱཔཡོཛནཱཝཎྞནཱ

༤༥. ཡསྨཱ པནེཏཱནི རཱུཔཱནི ཀམྨཱདིཏོ ཨུཔྤཛྫམཱནཱནིཔི ན ཨེཀེཀཾ སམུཊྛཧནྟི, ཨཐ ཁོ པིཎྜཏོཝ. ཏསྨཱ པིཎྜཱནཾ གཎནཔརིཙྪེདཾ, སརཱུཔཉྩ དསྶེཏུཾ ‘‘ཨེཀུཔྤཱདཱ’’ཏྱཱདི ཝུཏྟཾ ¶ . སཧཝུཏྟིནོཏི ཝིསུཾ ཝིསུཾ ཀལཱཔགཏརཱུཔཝསེན སཧཝུཏྟིནོ, ན སབྦཀལཱཔཱནཾ ཨཉྙམཉྙཾ སཧུཔྤཏྟིཝསེན.

༤༦. དས པརིམཱཎཱ ཨསྶཱཏི དསཀཾ, སམུདཱཡསྶེཏཾ ནཱམཾ, ཙཀྑུནཱ ཨུཔལཀྑིཏཾ, ཏཔྤདྷཱནཾ ཝཱ དསཀཾ ཙཀྑུདསཀཾ. ཨེཝཾ སེསེསུཔི.

༤༧. ཝཙཱིཝིཉྙཏྟིགྒཧཎེན སདྡོཔི སངྒཧིཏོ ཧོཏི ཏསྶཱ ཏདཝིནཱབྷཱཝཏོཏི ཝུཏྟཾ ‘‘ཝཙཱིཝིཉྙཏྟིདསཀ’’ནྟི.

༥༠. ཀིཾ ¶ པནེཏེ ཨེཀཝཱིསཏི ཀལཱཔཱ སབྦེཔི སབྦཏྠ ཧོནྟི, ཨུདཱཧུ ཀེཙི ཀཏྠཙཱིཏི ཨཱཧ ‘‘ཏཏྠཱ’’ཏྱཱདི.

ཀལཱཔཡོཛནཱཝཎྞནཱ ནིཊྛིཏཱ.

རཱུཔཔཝཏྟིཀྐམཝཎྞནཱ

༥༢. ཨིདཱནི ནེསཾ སམྦྷཝཝསེན, པཝཏྟིཔཊིསནྡྷིཝསེན, ཡོནིཝསེན ཙ པཝཏྟིཾ དསྶེཏུཾ ‘‘སབྦཱནིཔི པནེཏཱནཱི’’ཏྱཱདི ཝུཏྟཾ. ཡཐཱརཧནྟི སབྷཱཝཀཔརིཔུཎྞཱཡཏནཱནཾ ཨནུརཱུཔཏོ.

༥༣. ཀམལཀུཧརགབྦྷམལཱདིསཾསེདཊྛཱནེསུ ཛཱཏཱ སཾསེདཛཱ. ཨུཔཔཱཏོ ནེསཾ ཨཏྠཱིཏི ཨོཔཔཱཏིཀཱ, ཨུཀྐཾསགཏིཔརིཙྪེདཝསེན ཙེཏྠ ཝིསིཊྛཨུཔཔཱཏོ གཧིཏོ ཡཐཱ ‘‘ཨབྷིརཱུཔསྶ ཀཉྙཱ དཱཏབྦཱ’’ཏི. སཏྟ དསཀཱནི པཱཏུབྷཝནྟི པརིཔུཎྞཱཡཏནབྷཱཝེན ཨུཔལབྦྷནཏོ. ཀདཱཙི ན ལབྦྷནྟི ཛཙྩནྡྷཛཙྩབདྷིརཛཙྩཱགྷཱནནཔུཾསཀཨཱདིཀཔྤིཀཱནཾ ཝསེན. ཏཏྠ སུགཏིཡཾ མཧཱནུབྷཱཝེན ཀམྨུནཱ ནིབྦཏྟམཱནཱནཾ ཨོཔཔཱཏིཀཱནཾ ཨིནྡྲིཡཝེཀལླཱཡོགཏོ ཙཀྑུསོཏགྷཱནཱལཱབྷོ སཾསེདཛཱནཾ, བྷཱཝཱལཱབྷོ པཋམཀཔྤིཀཨོཔཔཱཏིཀཱནཾ ཝསེནཔི. དུགྒཏིཡཾ པན ཙཀྑུསོཏབྷཱཝཱལཱབྷོ དྭིནྣམྤི ཝསེན, གྷཱནཱལཱབྷོ སཾསེདཛཱནམེཝ ཝསེན, ན ཨོཔཔཱཏིཀཱནཾ ¶ ཝསེནཱཏི དཊྛབྦཾ. ཏཐཱ ཧི དྷམྨཧདཡཝིབྷངྒེ ‘‘ཀཱམདྷཱཏུཡཱ ཨུཔཔཏྟིཀྑཎེ ཀསྶཙི ཨེཀཱདསཱཡཏནཱནི པཱཏུབྷཝནྟི, ཀསྶཙི དས, ཀསྶཙི ཨཔརཱནིཔི དས, ཀསྶཙི ནཝ, ཀསྶཙི སཏྟཱ’’ཏི (ཝིབྷ. ༡༠༠༧) ཝཙནཏོ པརིཔུཎྞིནྡྲིཡསྶ ཨོཔཔཱཏིཀསྶ སདྡཱཡཏནཝཛྫིཏཱནི ཨེཀཱདསཱཡཏནཱནི ཝུཏྟཱནི. ཨནྡྷསྶ ཙཀྑཱཡཏནཝཛྫིཏཱནི ¶ དས, ཏཐཱ བདྷིརསྶ སོཏཱཡཏནཝཛྫིཏཱནི, ཨནྡྷབདྷིརསྶ ཏདུབྷཡཝཛྫིཏཱནི ནཝ, གབྦྷསེཡྻཀསྶ ཙཀྑུསོཏགྷཱནཛིཝ྄ཧཱསདྡཱཡཏནཝཛྫིཏཱནིསཏྟཱཡཏནཱནི ཝུཏྟཱནི. ཡདི པན ཨགྷཱནཀོཔི ཨོཔཔཱཏིཀོ སིཡཱ, ཨནྡྷབདྷིརཱགྷཱནཀཱནཾ ཝསེན ཏིཀྑཏྟུཾ དས, ཨནྡྷབདྷིརཨནྡྷཱགྷཱནཀབདྷིརཱགྷཱནཀཱནཾ ཝསེན ཏིཀྑཏྟུཾ ནཝ, ཨནྡྷབདྷིརཱགྷཱནཀསྶ ཝསེན ཙ ཨཊྛ ཨཱཡཏནཱནི ཝཏྟབྦཱནི སིཡུཾ, ན པནེཝཾ ཝུཏྟཱནི. ཏསྨཱ ནཏྠི ཨོཔཔཱཏིཀསྶ གྷཱནཝེཀལླནྟི. ཏཐཱ ཙ ཝུཏྟཾ ཡམཀཊྛཀཐཱཡཾ ‘‘ཨགྷཱནཀོ ཨོཔཔཱཏིཀོ ནཏྠི. ཡདི བྷཝེཡྻ, ཀསྶཙི ཨཊྛཱཡཏནཱནཱིཏི ཝདེཡྻཱ’’ཏི (ཡམ. ཨཊྛ. ཨཱཡཏནཡམཀ. ༡༨-༢༡).

སཾསེདཛཱནཾ པན གྷཱནཱབྷཱཝོ ན སཀྐཱ ནིཝཱརེཏུཾ ‘‘ཀཱམདྷཱཏུཡཱ ཨུཔཔཏྟིཀྑཎེ’’ཏྱཱདིཔཱལི༹ཡཱ (ཝིབྷ. ༡༠༠༧) ཨོཔཔཱཏིཀཡོནིམེཝ སནྡྷཱཡ, སཏྟཱཡཏནགྒཧཎསྶ ཙ ཨཉྙེསཾ ཨསམྦྷཝཏོ གབྦྷསེཡྻཀམེཝ སནྡྷཱཡ ཝུཏྟཏྟཱ. ཡཾ པན ‘‘སཾསེདཛཡོནིཀཱ པརིཔུཎྞཱཡཏནབྷཱཝེན ཨོཔཔཱཏིཀསངྒཧཾ ཀཏྭཱ ཝུཏྟཱ’’ཏི ཨཊྛཀཐཱཝཙནཾ, ཏམྤི པརིཔུཎྞཱཡཏནཾཡེཝ སཾསེདཛཱནཾ ཨོཔཔཱཏིཀེསུ སངྒཧཝསེན ཝུཏྟཾ. ཨཔརེ པན ཡམཀེ གྷཱནཛིཝ྄ཧཱནཾ སཧཙཱརིཏཱ ཝུཏྟཱཏི ཨཛིཝ྄ཧསྶ ཨསམྦྷཝཏོ ཨགྷཱནཀསྶཔི ཨབྷཱཝམེཝ ཝཎྞེནྟི, ཏཏྠཱཔི ཡཐཱ ཙཀྑུསོཏཱནི རཱུཔབྷཝེ གྷཱནཛིཝ྄ཧཱཧི ཝིནཱ པཝཏྟནྟི, ན ཨེཝཾ གྷཱནཛིཝ྄ཧཱ ཨཉྙམཉྙཾ ཝིནཱ པཝཏྟནྟི དྭིནྣམྤི རཱུཔབྷཝེ ཨནུཔྤཛྫནཏོཏི ཨེཝཾ ཝིསུཾ ཝིསུཾ ཀཱམབྷཝེ ཨཔྤཝཏྟིཝསེན ཏེསཾ སཧཙཱརིཏཱ ཝུཏྟཱཏི ན ན སཀྐཱ ཝཏྟུནྟི.

༥༤. གབྦྷེ མཱཏུཀུཙྪིཡཾ སེནྟཱིཏི གབྦྷསེཡྻཀཱ, ཏེཡེཝ རཱུཔཱདཱིསུ སཏྟཏཱཡ སཏྟཱཏི གབྦྷསེཡྻཀསཏྟཱ. ཨེཏེ ¶ ཨཎྜཛཛལཱབུཛཱ. ཏཱིཎི དསཀཱནི པཱཏུབྷཝནྟི, ཡཱནི ‘‘ཀལལརཱུཔ’’ནྟི ཝུཙྩནྟི, པརིཔིཎྜིཏཱནི ཙ ཏཱནི ཛཱཏིཨུཎྞཱཡ ཨེཀསྶ ཨཾསུནོ པསནྣཏིལཏེལེ པཀྑིཔིཏྭཱ ཨུདྡྷཊསྶ པགྒྷརིཏྭཱ ཨགྒེ ཋིཏབིནྡུམཏྟཱནི ཨཙྪཱནི ཝིཔྤསནྣཱནི. ཀདཱཙི ན ལབྦྷཏི ཨབྷཱཝཀསཏྟཱནཾ ཝསེན. ཏཏོ པརནྟི པཊིསནྡྷིཏོ པརཾ. པཝཏྟིཀཱལེཏི སཏྟམེ སཏྟཱཧེ, ཊཱིཀཱཀཱརམཏེན ཨེཀཱདསམེ སཏྟཱཧེ ཝཱ. ཀམེནཱཏི ཙཀྑུདསཀཔཱཏུབྷཱཝཏོ སཏྟཱཧཱཏིཀྐམེན སོཏདསཀཾ ¶ , ཏཏོ སཏྟཱཧཱཏིཀྐམེན གྷཱནདསཀཾ, ཏཏོ སཏྟཱཧཱཏིཀྐམེན ཛིཝ྄ཧཱདསཀནྟི ཨེཝཾ ཨནུཀྐམེན. ཨཊྛཀཐཱཡམྤི ཧི ཨཡམཏྠོ དསྶིཏོཝ.

༥༥. ཋིཏིཀཱལནྟི པཊིསནྡྷིཙིཏྟསྶ ཋིཏིཀཱལཾ. པཊིསནྡྷིཙིཏྟསཧཛཱཏཱ ཧི ཨུཏུ ཋཱནཔྤཏྟཱ ཏསྶ ཋིཏིཀྑཎེ སུདྡྷཊྛཀཾ སམུཊྛཱཔེཏི, ཏདཱ ཨུཔྤནྣཱ བྷངྒཀྑཎེཏྱཱདིནཱ ཨནུཀྐམེན ཨུཏུ རཱུཔཾ ཛནེཏི. ཨོཛཱཕརཎམུཔཱདཱཡཱཏི གབྦྷསེཡྻཀསྶ མཱཏུ ཨཛ྄ཛྷོཧཊཱཧཱརཏོ སཾསེདཛོཔཔཱཏིཀཱནཉྩ མུཁགཏསེམྷཱདིཏོ ཨོཛཱཡ རསཧརཎཱིཨནུསཱརེན སརཱིརེ ཕརཎཀཱལཏོ པཊྛཱཡ.

༥༦. ཙུཏིཙིཏྟཾ ཨུཔརིམཾ ཨེཏསྶཱཏི ཙུཏིཙིཏྟོཔརི. ཀམྨཛརཱུཔཱནི ན ཨུཔྤཛྫནྟི ཏདུཔྤཏྟིཡཾ མརཎཱབྷཱཝཏོ. ཀམྨཛརཱུཔཝིཙྪེདེ ཧི ‘‘མཏོ’’ཏི ཝུཙྩཏི. ཡཐཱཧ –

‘‘ཨཱཡུ ཨུསྨཱ ཙ ཝིཉྙཱཎཾ, ཡདཱ ཀཱཡཾ ཛཧནྟིམཾ;

ཨཔཝིདྡྷོ ཏདཱ སེཏི, ནིརཏྠཾཝ ཀལིངྒར’’ནྟི. (སཾ. ནི. ༣.༩༥ ཐོཀཾ ཝིསདིསཾ);

པུརེཏརནྟི སཏྟརསམསྶ ཨུཔྤཱདཀྑཎེ. ཏཏོཔརཾ ཙིཏྟཛཱཧཱརཛརཱུཔཉྩ ཝོཙྪིཛྫཏཱིཏི ཨཛཱིཝཀསནྟཱནེ ཏེསཾ ཨུཔྤཏྟིཡཱ ¶ ཨབྷཱཝཏོ ཡཐཱནིབྦཏྟཾ ཙིཏྟཛཾ, ཨཱཧཱརཛཉྩ ཏཏོ པརཾ ཀིཉྩི ཀཱལཾ པཝཏྟིཏྭཱ ནིརུཛ྄ཛྷཏི. ཨཔརེ པན ཨཱཙརིཡཱ ‘‘ཙིཏྟཛརཱུཔཾ ཙུཏིཙིཏྟཏོ པུརེཏརམེཝ ཝོཙྪིཛྫཏཱི’’ཏི ཝཎྞེནྟི.

༥༨. རཱུཔལོཀེ གྷཱནཛིཝ྄ཧཱཀཱཡཱནཾ ཨབྷཱཝེ ཀཱརཎཾ ཝུཏྟམེཝ. བྷཱཝདྭཡཾ པན བཧལཀཱམརཱགཱུཔནིསྶཡཏྟཱ བྲཧྨཱནཉྩ ཏདབྷཱཝཏོ ཏཏྠ ན པཝཏྟཏི. ཨཱཧཱརཛཀལཱཔཱནི ཙ ན ལབྦྷནྟི ཨཛ྄ཛྷོཧཊཱཧཱརཱབྷཱཝེན སརཱིརགཏསྶཔི ཨཱཧཱརསྶ རཱུཔསམུཊྛཱཔནཱབྷཱཝཏོ. བཱཧིརཉྷི ཨུཏུཾ, ཨཱཧཱརཉྩ ཨུཔནིསྶཡཾ ལབྷིཏྭཱ ཨུཏུཨཱཧཱརཱ རཱུཔཾ སམུཊྛཱཔེནྟི. ཛཱིཝིཏནཝཀནྟི ཀཱཡཱབྷཱཝཏོ ཀཱཡདསཀཊྛཱནིཡཾ ཛཱིཝིཏནཝཀཾ.

༥༩. ཨཏིརིཙྪཏི སེསབྲཧྨཱནཾ པཊིསནྡྷིཡཾ, པཝཏྟེ ཙ ཨུཔལབྷིཏབྦརཱུཔཏོ ཨཝསིཊྛཾ ཧོཏི ¶ , མརཎཀཱལེ པན བྲཧྨཱནཾ སརཱིརནིཀྑེཔཱབྷཱཝཏོ སབྦེསམྤི ཏིསམུཊྛཱནཱནི, དྭིསམུཊྛཱནཱནི ཙ སཧེཝ ནིརུཛ྄ཛྷནྟི.

༦༡. རཱུཔེསུ ཏེཝཱིསཏི གྷཱནཛིཝ྄ཧཱཀཱཡབྷཱཝདྭཡཝསེན པཉྩནྣཾ ཨབྷཱཝཏོ. ཀེཙི པན ‘‘ལཧུཏཱདིཏྟཡམྤི ཏེསུ ནཏྠི དནྡྷཏྟཀརཱདིདྷཱཏུཀྑོབྷཱབྷཱཝཏོ’’ཏི ཝདནྟི, ཏཾ ཨཀཱརཎཾ. ན ཧི ཝཱུཔསམེཏབྦཱཔེཀྑཱ ཏབྦིརོདྷིདྷམྨཔྤཝཏྟི ཏཐཱ སཏི སཧེཏུཀཀིརིཡཙིཏྟེསུ ལཧུཏཱདཱིནཾ ཨབྷཱཝཔྤསངྒཏོ. ‘‘སདྡོ ཝིཀཱརོ’’ཏྱཱདི སབྦེསམྤི སཱདྷཱརཎཝསེན ཝུཏྟཾ.

རཱུཔཔཝཏྟིཀྐམཝཎྞནཱ ནིཊྛིཏཱ.

ནིབྦཱནབྷེདཝཎྞནཱ

༦༢. ཨེཏྟཱཝཏཱ ¶ ཙིཏྟཙེཏསིཀརཱུཔཱནི ཝིབྷཱགཏོ ནིདྡིསིཏྭཱ ཨིདཱནི ནིབྦཱནཾ ནིདྡིསནྟོ ཨཱཧ ‘‘ནིབྦཱནཾ པནཱ’’ཏྱཱདི. ‘‘ཙཏུམགྒཉཱཎེན སཙྪིཀཱཏབྦ’’ནྟི ཨིམིནཱ ནིབྦཱནསྶ ཏཾཏཾཨརིཡཔུགྒལཱནཾ པཙྩཀྑསིདྡྷཏཾ དསྶེཏི. ‘‘མགྒཕལཱནམཱརམྨཎབྷཱུཏ’’ནྟི ཨིམིནཱ ཀལྱཱཎཔུཐུཛྫནཱནཾ ཨནུམཱནསིདྡྷཏཾ. སངྑཏདྷམྨཱརམྨཎཉྷི, པཉྙཏྟཱརམྨཎཾ ཝཱ ཉཱཎཾ ཀིལེསཱནཾ སམུཙྪེདཔཊིཔྤསྶམྦྷནེ ཨསམཏྠཾ, ཨཏྠི ཙ ལོཀེ ཀིལེསསམུཙྪེདཱདི. ཏསྨཱ ཨཏྠི སངྑཏསམྨུཏིདྷམྨཝིཔརཱིཏོ ཀིལེསཱནཾ སམུཙྪེདཔཊིཔྤསྶདྡྷིཀརཱནཾ མགྒཕལཱནཾ ཨཱརམྨཎབྷཱུཏོ ནིབྦཱནཾ ནཱམ ཨེཀོ དྷམྨོཏི སིདྡྷཾ. པཙྩཀྑཱནུམཱནསིདྡྷཏཱསནྡསྶནེན ཙ ཨབྷཱཝམཏྟཾ ནིབྦཱནནྟི ཝིཔྤཊིཔནྣཱནཾ ཝཱདཾ ནིསེདྷེཏཱིཏི ཨལམཏིཔྤཔཉྩེན. ཁནྡྷཱདིབྷེདེ ཏེབྷཱུམཀདྷམྨེ ཧེཊྛུཔརིཡཝསེན ཝིནནཏོ སཾསིབྦནཏོ ཝཱནསངྑཱཏཱཡ ཏཎྷཱཡ ནིཀྑནྟཏྟཱ ཝིསཡཱཏིཀྐམཝསེན ཨཏཱིཏཏྟཱ.

༦༣. སབྷཱཝཏོཏི ཨཏྟནོ སནྟིལཀྑཎེན. ཨུཔཱདཱིཡཏི ཀཱམུཔཱདཱདཱིཧཱིཏི ཨུཔཱདི, པཉྩཀྑནྡྷསྶེཏཾ ཨདྷིཝཙནཾ, ཨུཔཱདིཡེཝ སེསོ ཀིལེསེཧཱིཏི ཨུཔཱདིསེསོ, ཏེན སཧ ཝཏྟཏཱིཏི སཨུཔཱདིསེསཱ ¶ , སཱ ཨེཝ ནིབྦཱནདྷཱཏཱུཏི སཨུཔཱདིསེསནིབྦཱནདྷཱཏུ. ཀཱརཎཔརིཡཱཡེནཱཏི སཨུཔཱདིསེསཱདིཝསེན པཉྙཱཔནེ ཀཱརཎབྷཱུཏསྶ ཨུཔཱདིསེས བྷཱཝཱབྷཱཝསྶ ལེསེན.

༦༤. ཨཱརམྨཎཏོ, སམྤཡོགཏོ ཙ རཱགདོསམོཧེཧི སུཉྙཏྟཱ སུཉྙཾ, སུཉྙམེཝ སུཉྙཏཾ, ཏཐཱ རཱགཱདིནིམིཏྟརཧིཏཏྟཱ ཨནིམིཏྟཾ. རཱགཱདིཔཎིདྷིརཧིཏཏྟཱ ཨཔྤཎིཧིཏཾ. སབྦསངྑཱརེཧི ཝཱ སུཉྙཏྟཱ སུཉྙཏཾ. སབྦསངྑཱརནིམིཏྟཱབྷཱཝཏོ ¶ ཨནིམིཏྟཾ. ཏཎྷཱཔཎིདྷིཡཱ ཨབྷཱཝཏོ ཨཔྤཎིཧིཏཾ.

༦༥. ཙཝནཱབྷཱཝཏོ ཨཙྩུཏཾ. ཨནྟསྶ པརིཡོསཱནསྶ ཨཏིཀྐནྟཏྟཱ ཨཙྩནྟཾ. པཙྩཡེཧི ཨསངྑཏཏྟཱ ཨསངྑཏཾ. ཨཏྟནོ ཨུཏྟརིཏརསྶ ཨབྷཱཝཏོ, སཧདྷམྨེན ཝཏྟབྦསྶ ཨུཏྟརསྶ ཝཱ ཨབྷཱཝཏོ ཨནུཏྟརཾ. ཝཱནཏོ ཏཎྷཱཏོ མུཏྟཏྟཱ སབྦསོ ཨཔགཏཏྟཱ ཝཱནམུཏྟཱ. མཧནྟེ སཱིལཀྑནྡྷཱདིཀེ ཨེསནྟི གཝེསནྟཱིཏི མཧེསཡོ. ‘‘ཨིཏི ཙིཏྟ’’ནྟྱཱདི ཚཧི པརིཙྪེདེཧི ཝིབྷཏྟཱནཾ ཙིཏྟཱདཱིནཾ ནིགམནཾ.

ནིབྦཱནབྷེདཝཎྞནཱ ནིཊྛིཏཱ.

ཨིཏི ཨབྷིདྷམྨཏྠཝིབྷཱཝིནིཡཱ ནཱམ ཨབྷིདྷམྨཏྠསངྒཧཝཎྞནཱཡ

རཱུཔཔརིཙྪེདཝཎྞནཱ ནིཊྛིཏཱ.

༧. སམུཙྩཡཔརིཙྪེདཝཎྞནཱ

༡. སལཀྑཎཱ ཙིནྟནཱདིསལཀྑཎཱ ཙིཏྟཙེཏསིཀནིཔྥནྣརཱུཔནིབྦཱནཝསེན དྭཱསཏྟཏིཔབྷེདཱ ཝཏྠུདྷམྨཱ སབྷཱཝདྷམྨཱ ཝུཏྟཱ, ཨིདཱནི ཏེསཾ ཡཐཱཡོགཾ སབྷཱཝདྷམྨཱནཾ ཨེཀེཀསམུཙྩཡཝསེན ཡོགཱནུརཱུཔཏོ ཨཀུསལསངྒཧཱདིབྷེདཾ སམུཙྩཡཾ རཱསིཾ པཝཀྑཱམཱིཏི ཡོཛནཱ.

༢. ཨཀུསལཱནམེཝ ¶ སབྷཱགདྷམྨཝསེན སངྒཧོ ཨཀུསལསངྒཧོ. ཀུསལཱདིཝསེན མིསྶཀཱནཾ སངྒཧོ མིསྶཀསངྒཧོ, སཙྩཱབྷིསམྦོདྷིསངྑཱཏསྶ ཨརིཡམགྒསྶ པཀྑེ བྷཝཱནཾ བོདྷིཔཀྑིཡཱནཾ དྷམྨཱནཾ སཏིཔཊྛཱནཱདིབྷེདཱནཾ སབྷཱགཝཏྠུཝསེན སངྒཧོ བོདྷིཔཀྑིཡསངྒཧོ. ཁནྡྷཱདིཝསེན སབྦེསཾ སངྒཧོ སབྦསངྒཧོ.

ཨཀུསལསངྒཧཝཎྞནཱ

༣. པུབྦཀོཊིཡཱ ¶ ཨཔཉྙཱཡནཏོ ཙིརཔཱརིཝཱསིཡཊྛེན, ཝཎཏོ ཝཱ ཝིསྶནྡམཱནཡཱུསཱ ཝིཡ ཙཀྑཱདིཏོ ཝིསཡེསུ ཝིསྶནྡནཏོ ཨཱསཝཱ. ཨཐ ཝཱ བྷཝཏོ ཨཱབྷཝགྒཾ དྷམྨཏོ ཨཱགོཏྲབྷུཾ སཝནྟི པཝཏྟནྟཱིཏི ཨཱསཝཱ. ཨཝདྷིཨཏྠོ ཙེཏྠ ཨཱ-ཀཱརོ, ཨཝདྷི ཙ མརིཡཱདཱབྷིཝིདྷིཝསེན དུཝིདྷོ. ཏཏྠ ‘‘ཨཱཔཱཊལིཔུཏྟཾ ཝུཊྛོ དེཝོ’’ཏྱཱདཱིསུ ཝིཡ ཀིརིཡཾ བཧི ཀཏྭཱ པཝཏྟོ མརིཡཱདོ. ‘‘ཨཱབྷཝགྒཾ སདྡོ ཨབྦྷུགྒཏོ’’ཏྱཱདཱིསུ ཝིཡ ཀིརིཡཾ བྱཱཔེཏྭཱ པཝཏྟོ ཨབྷིཝིདྷི. ཨིདྷ པན ཨབྷིཝིདྷིམྷི དཊྛབྦོ. ཏཐཱ ཧེཏེ ནིབྦཏྟིཊྛཱནབྷཱུཏེ ཙ བྷཝགྒེ, གོཏྲབྷུམྷི ཙ ཨཱརམྨཎབྷཱུཏེ པཝཏྟནྟི. ཝིཛྫམཱནེསུ ཙ ཨཉྙེསུ ཨཱབྷཝགྒཾ, ཨཱགོཏྲབྷུཉྩ སཝནྟེསུ མཱནཱདཱིསུ ཨཏྟཏྟནིཡགྒཧཎཝསེན ཨབྷིབྱཱཔནཏོ མདཀརཎཊྛེན ཨཱསཝསདིསཏཱཡ ཙ ཨེཏེཡེཝ ཨཱསཝབྷཱཝེན ནིརུལ༹ྷཱཏི དཊྛབྦཾ. ཀཱམོཡེཝ ཨཱསཝོ ཀཱམཱསཝོ, ཀཱམརཱགོ. རཱུཔཱརཱུཔབྷཝེསུ ཚནྡརཱགོ བྷཝཱསཝོ. ཛྷཱནནིཀནྟིསསྶཏདིཊྛིསཧགཏོ ཙ རཱགོ ཨེཏྠེཝ སངྒཡ྄ཧཏི. ཏཏྠ པཋམོ ཨུཔཔཏྟིབྷཝེསུ རཱགོ, དུཏིཡོ ཀམྨབྷཝེ, ཏཏིཡོ བྷཝདིཊྛིསཧགཏོ. དྭཱསཊྛིཝིདྷཱ དིཊྛི དིཊྛཱསཝོ. དུཀྑཱདཱིསུ ཙཏཱུསུ སཙྩེསུ, པུབྦནྟེ, ཨཔརནྟེ, པུབྦཱཔརནྟེ, པཊིཙྩསམུཔྤཱདེསུ ཙཱཏི ཨཊྛསུ ཋཱནེསུ ཨཉྙཱཎཾ ཨཝིཛྫཱསཝོ.

༤. ཨོཏྠརིཏྭཱ ཧརཎཏོ, ཨོཧནནཏོ ཝཱ ཧེཊྛཱ ཀཏྭཱ ཧནནཏོ ཨོསཱིདཱཔནཏོ ‘‘ཨོགྷོ’’ཏི ཝུཙྩཏི ཛལཔྤཝཱཧོ, ཨེཏེ ཙ སཏྟེ ཨོཏྠརིཏྭཱ ཧནནྟཱ ཝཊྚསྨིཾ སཏྟེ ཨོསཱིདཱཔེནྟཱ ཝིཡ ཧོནྟཱིཏི ཨོགྷསདིསཏཱཡ ཨོགྷཱ ¶ , ཨཱསཝཱཡེཝ པནེཏྠ ཡཐཱཝུཏྟཊྛེན ‘‘ཨོགྷཱ’’ཏི ཙ ཝུཙྩནྟི.

༥. ཝཊྚསྨིཾ, བྷཝཡནྟཀེ ཝཱ སཏྟེ ཀམྨཝིཔཱཀེན བྷཝནྟརཱདཱིཧི, དུཀྑེན ཝཱ སཏྟེ ཡོཛེནྟཱིཏི ཡོགཱ, ཧེཊྛཱ ཝུཏྟདྷམྨཱཝ.

༦. ནཱམཀཱཡེན ¶ རཱུཔཀཱཡཾ, པཙྩུཔྤནྣཀཱཡེན ཝཱ ཨནཱགཏཀཱཡཾ གནྠེནྟི དུཔྤམུཉྩཾ ཝེཋེནྟཱིཏི ཀཱཡགནྠཱ. གོསཱིལཱདིནཱ སཱིལེན, ཝཏེན, ཏདུབྷཡེན ཙ སུདྡྷཱིཏི ཨེཝཾ པརཏོ ཨསབྷཱཝཏོ ཨཱམསནཾ པརཱམཱསོ. ‘‘ཨིདམེཝ སཙྩཾ, མོགྷམཉྙ’’ནྟི ཨབྷིནིཝིསནཾ དལ༹ྷགྒཱཧོ ཨིདཾ སཙྩཱབྷིནིཝེསོ.

༧. མཎྜཱུཀཾ པནྣགོ ཝིཡ བྷུསཾ དལ༹ྷཾ ཨཱརམྨཎཾ ཨཱདིཡནྟཱིཏི ཨུཔཱདཱནཱནི. ཀཱམོཡེཝ ཨུཔཱདཱནཾ, ཀཱམེ ཨུཔཱདིཡཏཱིཏི ཝཱ ཀཱམུཔཱདཱནཾ. ‘‘ཨིམིནཱ མེ སཱིལཝཏཱདིནཱ སཾསཱརསུདྡྷཱི’’ཏི ཨེཝཾ སཱིལཝཏཱདཱིནཾ གཧཎཾ སཱིལབྦཏུཔཱདཱནཾ. ཝདནྟི ཨེཏེནཱཏི ཝཱདོ, ཁནྡྷེཧི བྱཏིརིཏྟཱབྱཏིརིཏྟཝསེན ཝཱིསཏི པརིཀཔྤིཏསྶ ཨཏྟནོ ཝཱདོ ཨཏྟཝཱདོ. སོཡེཝ ཨུཔཱདཱནནྟི ཨཏྟཝཱདུཔཱདཱནཾ.

༨. ཛྷཱནཱདིཝསེན ཨུཔྤཛྫནཀཀུསལཙིཏྟཾ ནིསེདྷེནྟི ཏཐཱ ཏསྶ ཨུཔྤཛྫིཏུཾ ན དེནྟཱིཏི ནཱིཝརཎཱནི, པཉྙཱཙཀྑུནོ ཝཱ ཨཱཝརཎཊྛེན ནཱིཝརཎཱ. པཉྩསུ ཀཱམགུཎེསུ ཨདྷིམཏྟརཱགསངྑཱཏོ ཀཱམོཡེཝ ཚནྡནཊྛེན ཚནྡོ ཙཱཏི ཀཱམཙྪནྡོ. སོཡེཝ ནཱིཝརཎནྟི ཀཱམཙྪནྡནཱིཝརཎཾ. བྱཱཔཛྫཏི ཝིནསྶཏི ཨེཏེན ཙིཏྟནྟི བྱཱཔཱདོ, ‘‘ཨནཏྠཾ མེ ཨཙརཱི’’ཏྱཱདིནཡཔྤཝཏྟནཝཝིདྷཨཱགྷཱཏཝཏྠུཔདཊྛཱནཏཱཡ ནཝཝིདྷོ, ཨཊྛཱནཀོཔེན སཧ དསཝིདྷོ ཝཱ དོསོ, སོཡེཝ ¶ ནཱིཝརཎནྟི བྱཱཔཱདནཱིཝརཎཾ. ཐིནམིདྡྷམེཝ ནཱིཝརཎཾ ཐིནམིདྡྷནཱིཝརཎཾ. ཏཐཱ ཨུདྡྷཙྩཀུཀྐུཙྩནཱིཝརཎཾ. ཀསྨཱ པནེཏེ བྷིནྣདྷམྨཱ དྭེ དྭེ ཨེཀནཱིཝརཎབྷཱཝེན ཝུཏྟཱཏི? ཀིཙྩཱཧཱརཔཊིཔཀྑཱནཾ སམཱནབྷཱཝཏོ. ཐིནམིདྡྷཱནཉྷི ཙིཏྟུཔྤཱདསྶ ལཡཱཔཱདནཀིཙྩཾ སམཱནཾ, ཨུདྡྷཙྩཀུཀྐུཙྩཱནཾ ཨཝཱུཔསནྟབྷཱཝཀཱརཎཾ. ཏཐཱ པུརིམཱནཾ དྭིནྣཾ ཏནྡཱིཝིཛམྦྷིཏཱ ཨཱཧཱརོ, ཧེཏཱུཏྱཏྠོ, པཙྪིམཱནཾ ཉཱཏིབྱསནཱདིཝིཏཀྐནཾ. པུརིམཱནཉྩ དྭིནྣཾ ཝཱིརིཡཾ པཊིཔཀྑབྷཱུཏཾ, པཙྪིམཱནཾ སམཐོཏི, ཏེནཱཧུ པོརཱཎཱ –

‘‘ཀིཙྩཱཧཱརཝིཔཀྑཱནཾ, ཨེཀཏྟཱ ཨེཀམེཏྠ ཧི;

ཀཏམུདྡྷཙྩཀུཀྐུཙྩཾ, ཐིནམིདྡྷཉྩ ཏཱདིནཱ.

‘‘ལཱིནཏཱསནྟཏཱ ཀིཙྩཾ, ཏནྡཱི ཉཱཏིཝིཏཀྐནཾ;

ཧེཏུ ཝཱིརིཡསམཐཱ, ཨིམེ ཏེསཾ ཝིརོདྷིནོ’’ཏི.

༩. ཨཔྤཧཱིནཊྛེན ¶ ཨནུ ཨནུ སནྟཱནེ སེནྟཱིཏི ཨནུསཡཱ, ཨནུརཱུཔཾ ཀཱརཎཾ ལབྷིཏྭཱ ཨུཔྤཛྫནྟཱིཏྱཏྠོ. ཨཔྤཧཱིནཱ ཧི ཀིལེསཱ ཀཱརཎལཱབྷེ སཏི ཨུཔཛྫནཱརཧཱ སནྟཱནེ ཨནུ ཨནུ སཡིཏཱ ཝིཡ ཧོནྟཱིཏི ཏདཝཏྠཱ ‘‘ཨནུསཡཱ’’ཏི ཝུཙྩནྟི. ཏེ པན ནིཔྤརིཡཱཡཏོ ཨནཱགཏཱ ཀིལེསཱ, ཨཏཱིཏཔཙྩུཔྤནྣཱཔི ཏཾསབྷཱཝཏྟཱ ཏཐཱ ཝུཙྩནྟི. ན ཧི ཀཱལབྷེདེན དྷམྨཱནཾ སབྷཱཝབྷེདོ ཨཏྠི, ཡདི ཨཔྤཧཱིནཊྛེན ཨནུསཡཱ, ནནུ སབྦེཔི ཀིལེསཱ ཨཔྤཧཱིནཱ ཨནུསཡཱ བྷཝེཡྻུནྟི? ན མཡཾ ཨཔྤཧཱིནཏཱམཏྟེན ‘‘ཨནུསཡཱ’’ཏི ཝདཱམ, ཨཐ ཁོ ཨཔྤཧཱིནཊྛེན ཐཱམགཏཱ ཀིལེསཱ ཨནུསཡཱཏི. ཐཱམགམནཉྩ ཨནཉྙསཱདྷཱརཎོ ཀཱམརཱགཱདཱིནམེཝ ཨཱཝེཎིཀོ སབྷཱཝོཏི ཨལཾ ཝིཝཱདེན. ཀཱམརཱགོཡེཝ ཨནུསཡོ ཀཱམརཱགཱནུསཡོ.

༡༠. སཾཡོཛེནྟི བནྡྷནྟཱིཏི སཾཡོཛནཱནི.

༡༢. ཙིཏྟཾ ¶ ཀིལིསྶཏི ཨུཔཏཔྤཏི, བཱདྷཱིཡཏི ཝཱ ཨེཏེཧཱིཏི ཀིལེསཱ.

༡༣. ཀཱམབྷཝནཱམེནཱཏི ཀཱམབྷཝསངྑཱཏཱནཾ ཨཱརམྨཎཱནཾ ནཱམེན. ཏཐཱཔཝཏྟནྟི སཱིལབྦཏཱདཱིནཾ པརཏོ ཨཱམསནཱདིཝསེན པཝཏྟཾ.

༡༤. ཨཱསཝཱ ཙ ཨོགྷཱ ཙ ཡོགཱ ཙ གནྠཱ ཙ ཝཏྠུཏོ དྷམྨཏོ ཝུཏྟནཡེན ཏཡོ. ཏཐཱ ཨུཔཱདཱནཱ དུཝེ ཝུཏྟཱ ཏཎྷཱདིཊྛིཝསེན. ནཱིཝརཎཱ ཨཊྛ སིཡུཾ ཐིནམིདྡྷཨུདྡྷཙྩཀུཀྐུཙྩཱནཾ ཝིསུཾ གཧཎཏོ. ཨནུསཡཱ ཚལེ༹ཝ ཧོནྟི ཀཱམརཱགབྷཝརཱགཱནུསཡཱནཾ ཏཎྷཱསབྷཱཝེན ཨེཀཏོ གཧིཏཏྟཱ. ནཝ སཾཡོཛནཱ མཏཱ ཨུབྷཡཏྠ ཝུཏྟཱནཾ ཏཎྷཱསབྷཱཝཱནཾ, དིཊྛིསབྷཱཝཱནཉྩ ཨེཀེཀཾ སངྒཧིཏཏྟཱ. ཀིལེསཱ པན སུཏྟནྟཝསེན, ཨབྷིདྷམྨཝསེནཔི དས. ཨིཏི ཨེཝཾ པཱཔཱནཾ ཨཀུསལཱནཾ སངྒཧོ ནཝདྷཱ ཝུཏྟོ. ཨེཏྠ ཙ –

ནཝཱཊྛསངྒཧཱ ལོབྷ-དིཊྛིཡོ སཏྟསངྒཧཱ;

ཨཝིཛྫཱ པཊིགྷོ པཉྩ-སངྒཧོ ཙཏུསངྒཧཱ;

ཀངྑཱ ཏིསངྒཧཱ མཱནུདྡྷཙྩཱ ཐིནཾ དྭིསངྒཧཾ.

ཀུཀྐུཙྩམིདྡྷཱཧིརིཀཱ-ནོཏྟཔྤིསྶཱ ¶ ནིགཱུཧནཱ;

ཨེཀསངྒཧིཏཱ པཱཔཱ, ཨིཙྩེཝཾ ནཝསངྒཧཱ.

ཨཀུསལསངྒཧཝཎྞནཱ ནིཊྛིཏཱ.

མིསྶཀསངྒཧཝཎྞནཱ

༡༥. ཧེཏཱུསུ ཝཏྟབྦཾ ཧེཊྛཱ ཝུཏྟམེཝ.

༡༦. ཨཱརམྨཎཾ ཨུཔགནྟྭཱ ཙིནྟནསངྑཱཏེན ཨུཔནིཛ྄ཛྷཱཡནཊྛེན ཡཐཱརཧཾ པཙྩནཱིཀདྷམྨཛྷཱཔནཊྛེན ཙ ཛྷཱནཱནི ཙ ཏཱནི ཨངྒཱནི ཙ སམུདིཏཱནཾ ¶ ཨཝཡཝབྷཱཝེན ཨངྒཱིཡནྟི ཉཱཡནྟཱིཏི ཛྷཱནངྒཱནི. ཨཝཡཝཝིནིམུཏྟསྶ ཙ སམུདཱཡསྶ ཨབྷཱཝེཔི སེནངྒརཐངྒཱདཡོ ཝིཡ ཝིསུཾ ཝིསུཾ ཨངྒབྷཱཝེན ཝུཙྩནྟི ཨེཀཏོ ཧུཏྭཱ ཛྷཱནབྷཱཝེན. དོམནསྶཉྩེཏྠ ཨཀུསལཛྷཱནངྒཾ, སེསཱནི ཀུསལཱཀུསལཱབྱཱཀཏཛྷཱནངྒཱནི.

༡༧. སུགཏིདུགྒཏཱིནཾ, ནིབྦཱནསྶ ཙ ཨབྷིམུཁཾ པཱཔནཏོ མགྒཱ, ཏེསཾ པཐབྷཱུཏཱནི ཨངྒཱནི, མགྒསྶ ཝཱ ཨཊྛངྒིཀསྶ ཨངྒཱནི མགྒངྒཱནི. སམྨཱ ཨཝིཔརཱིཏཏོ པསྶཏཱིཏི སམྨཱདིཊྛི. སཱ པན ‘‘ཨཏྠི དིནྣ’’ནྟྱཱདིཝསེན དསཝིདྷཱ, པརིཉྙཱདིཀིཙྩཝསེན ཙཏུབྦིདྷཱ ཝཱ. སམྨཱ སངྐཔྤེནྟི ཨེཏེནཱཏི སམྨཱསངྐཔྤོ. སོ ནེཀྑམྨསངྐཔྤཨབྱཱཔཱདསངྐཔྤཨཝིཧིཾསཱསངྐཔྤཝསེན ཏིཝིདྷོ. སམྨཱཝཱཙཱདཡོ ཧེཊྛཱ ཝིབྷཱཝིཏཱཝ. སམྨཱ ཝཱཡམནྟི ཨེཏེནཱཏི སམྨཱཝཱཡཱམོ. སམྨཱ སརནྟི ཨེཏཱཡཱཏི སམྨཱསཏི. ཨིམེསཾ པན བྷེདཾ ཨུཔརི ཝཀྑཏི. སམྨཱ སཱམཉྩ ཨཱདྷཱིཡཏི ཨེཏེན ཙིཏྟནྟི སམྨཱསམཱདྷི, པཋམཛ྄ཛྷཱནཱདིཝསེན པཉྩཝིདྷཱ ཨེཀགྒཏཱ. མིཙྪཱདིཊྛིཨཱདཡོ དུགྒཏིམགྒཏྟཱ མགྒངྒཱནི.

༡༨. དསྶནཱདཱིསུ ཙཀྑུཝིཉྙཱཎཱདཱིཧི, ཡེབྷུཡྻེན ཏཾསཧིཏསནྟཱནཔྤཝཏྟིཡཾ ལིངྒཱདཱིཧི, ཛཱིཝནེ ཛཱིཝནྟེཧི ཀམྨཛརཱུཔསམྤཡུཏྟདྷམྨེཧི, མནནེ ཛཱནནེ སམྤཡུཏྟདྷམྨེཧི, སུཁིཏཱདིབྷཱཝེ སུཁིཏཱདཱིཧི ¶ སཧཛཱཏེཧི, སདྡཧནཱདཱིསུ སདྡཧནཱདིཝསཔྤཝཏྟེཧི ཏེཧེཝ, ‘‘ཨནཉྙཱཏཾ ཉསྶཱམཱི’’ཏི པཝཏྟིཡཾ ཏཐཱཔཝཏྟེཧི སཧཛཱཏེཧི, ཨཱཛཱནནེ ཨཉྙབྷཱཝིབྷཱཝེ ཙ ཨཱཛཱནནཱདིཝསཔྤཝཏྟེཧི སཧཛཱཏེཧི ཨཏྟཱནཾ ཨནུཝཏྟཱཔེནྟཱ དྷམྨཱ ཨིསྶརཊྛེན ཨིནྡྲིཡཱནི ནཱམཱཏི ཨཱཧ ‘‘ཙཀྑུནྡྲིཡ’’ནྟྱཱདི. ཨཊྛཀཐཱཡཾ (ཝིབྷ. ཨཊྛ. ༢༡༩; ཝིསུདྡྷི. ༢.༥༢༥) པན ཨཔརེཔི ཨིནྡལིངྒཊྛཱདཡོ ཨིནྡྲིཡཊྛཱ ཝུཏྟཱ. ཛཱིཝིཏིནྡྲིཡནྟི རཱུཔཱརཱུཔཝསེན དུཝིདྷཾ ཛཱིཝིཏིནྡྲིཡཾ. ‘‘ཨནམཏགྒེ སཾསཱརེ ཨནཉྙཱཏཾ ¶ ཨམཏཾ པདཾ, ཙཏུསཙྩདྷམྨམེཝ ཝཱ ཉསྶཱམཱི’’ཏི ཨེཝམཛ྄ཛྷཱསཡེན པཊིཔནྣསྶ ཨིནྡྲིཡཾ ཨནཉྙཱཏཉྙསྶཱམཱིཏིནྡྲིཡཾ. ཨཱཛཱནཱཏི པཋམམགྒེན དིཊྛམརིཡཱདཾ ཨནཏིཀྐམིཏྭཱ ཛཱནཱཏི ཨིནྡྲིཡཉྩཱཏི ཨཉྙིནྡྲིཡཾ. ཨཉྙཱཏཱཝིནོ ཙཏྟཱརི སཙྩཱནི པཊིཝིཛ྄ཛྷིཏྭཱ ཋིཏསྶ ཨརཧཏོ ཨིནྡྲིཡཾ ཨཉྙཱཏཱཝིནྡྲིཡཾ. དྷམྨསརཱུཔཝིབྷཱཝནཏྠཉྩེཏྠ པཉྙིནྡྲིཡགྒཧཎཾ, པུགྒལཛ྄ཛྷཱསཡཀིཙྩཝིསེསཝིབྷཱཝནཏྠཾ ཨནཉྙཱཏཉྙསྶཱམཱིཏིནྡྲིཡཱདཱིནཾ གཧཎཾ.

ཨེཏྠ ཙ སཏྟཔཉྙཏྟིཡཱ ཝིསེསནིསྶཡཏྟཱ ཨཛ྄ཛྷཏྟིཀཱཡཏནཱནི ཨཱདིཏོ ཝུཏྟཱནི, མནིནྡྲིཡཾ པན ཨཛ྄ཛྷཏྟིཀཱཡཏནབྷཱཝསཱམཉྙེན ཨེཏྠེཝ ཝཏྟབྦམྤི ཨརཱུཔིནྡྲིཡེཧི སཧ ཨེཀཏོ དསྶནཏྠཾ ཛཱིཝིཏིནྡྲིཡཱནནྟརཾ ཝུཏྟཾ, སཱཡཾ པཉྙཏྟི ཨིམེསཾ ཝསེན ‘‘ཨིཏྠཱི པུརིསོ’’ཏི ཝིབྷཱགཾ གཙྪཏཱིཏི དསྶནཏྠཾ ཏདནནྟརཾ བྷཱཝདྭཡཾ, ཏཡིམེ ཨུཔཱདིནྣདྷམྨཱ ཨིམསྶ ཝསེན ཏིཊྛནྟཱིཏི དསྶནཏྠཾ ཏཏོ པརཾ ཛཱིཝིཏིནྡྲིཡཾ, སཏྟསཉྙིཏོ དྷམྨཔུཉྫོ པབནྡྷཝསེན པཝཏྟམཱནོ ཨིམཱཧི ཝེདནཱཧི སཾཀིལིསྶཏཱིཏི དསྶནཏྠཾ ཏཏོ ཝེདནཱཔཉྩཀཾ, ཏཱཧི པན ཝིསུདྡྷིཀཱམཱནཾ ཝོདཱནསམྦྷཱརདསྶནཏྠཾ ཏཏོ སདྡྷཱདིཔཉྩཀཾ, སམྦྷཱུཏཝོདཱནསམྦྷཱརཱ ཙ ཨིམེཧི ཝིསུཛ྄ཛྷནྟཱིཏི ཝིསུདྡྷིཔྤཏྟཱ, ནིཊྛིཏཀིཙྩཱ ཙ ཧོནྟཱིཏི དསྶནཏྠཾ ཨནྟེ ཏཱིཎི ཝུཏྟཱནི. ཨེཏྟཱཝཏཱ ཨདྷིཔྤེཏཏྠསིདྡྷཱིཏི ཨཉྙེསཾ ཨགྒཧཎནྟི ཨིདམེཏེསཾ ཨནུཀྐམེན དེསནཱཡ ཀཱརཎནྟི ཨལམཏིཔྤཔཉྩེན.

༡༩. ཨསདྡྷིཡཀོསཛྫཔམཱདཨུདྡྷཙྩཨཝིཛྫཱཨཧིརིཀཨནོཏྟཔྤསངྑཱཏེཧི པཊིཔཀྑདྷམྨེཧི ཨཀམྤིཡཊྛེན, སམྤཡུཏྟདྷམྨེསུ ཐིརབྷཱཝེན ཙ སདྡྷཱདཱིནི སཏྟ བལཱནི, ཨཧིརིཀཱནོཏྟཔྤདྭཡཾ པན སམྤཡུཏྟདྷམྨེསུ ཐིརབྷཱཝེནེཝ.

༢༠. ཨཏྟཱདྷཱིནཔྤཝཏྟཱིནཾ པཏིབྷཱུཏཱ དྷམྨཱ ཨདྷིཔཏཱི. ‘‘ཚནྡཝཏོ ཀིཾནཱམ ན སིཛ྄ཛྷཏཱི’’ཏྱཱདིཀཾ ཧི པུབྦཱབྷིསངྑཱརཱུཔནིསྶཡཾ ལབྷིཏྭཱ ¶ ཨུཔྤཛྫམཱནེ ཙིཏྟེ ཚནྡཱདཡོ དྷུརབྷཱུཏཱ ¶ སཡཾ སམྤཡུཏྟདྷམྨེ སཱདྷཡམཱནཱ ཧུཏྭཱ པཝཏྟནྟི, ཏེ ཙ ཏེསཾ ཝསེན པཝཏྟནྟི, ཏེན ཏེ ཨཏྟཱདྷཱིནཱནཾ པཏིབྷཱཝེན པཝཏྟནྟི. ཨཉྙེསཾ ཨདྷིཔཏིདྷམྨཱནཾ ཨདྷིཔཏིབྷཱཝནིཝཱརཎཝསེན ཨིསྶརིཡཾ ཨདྷིཔཏིཏཱ. སནྟེསུཔི ཨིནྡྲིཡནྟརེསུ ཀེཝལཾ དསྶནཱདཱིསུ ཙཀྑུཝིཉྙཱཎཱདཱིཧི ཨནུཝཏྟཱཔནམཏྟཾ ཨིནྡྲིཡཏཱཏི ཨཡཾ ཨདྷིཔཏིཨིནྡྲིཡཱནཾ ཝིསེསོ.

༢༡. ཨོཛཊྛམཀརཱུཔཱདཡོ ཨཱཧརནྟཱིཏི ཨཱཧཱརཱ. ཀབལཱི༹ཀཱརཱཧཱརོ ཧི ཨོཛཊྛམཀརཱུཔཾ ཨཱཧརཏི, ཕསྶཱཧཱརོ ཏིསྶོ ཝེདནཱ, མནོསཉྩེཏནཱཧཱརསངྑཱཏཾ ཀུསལཱཀུསལཀམྨཾ ཏཱིསུ བྷཝེསུ པཊིསནྡྷིཾ. ཝིཉྙཱཎཱཧཱརསངྑཱཏཾ པཊིསནྡྷིཝིཉྙཱཎཾ སཧཛཱཏནཱམརཱུཔེཨཱཧརཏི, ཀིཉྩཱཔི སཀསཀཔཙྩཡུཔྤནྣེ ཨཱཧརནྟཱ ཨཉྙེཔི ཨཏྠི. ཨཛ྄ཛྷཏྟིཀསནྟཏིཡཱ པན ཝིསེསཔཙྩཡཏྟཱ ཨིམེཡེཝ ཙཏྟཱརོ ‘‘ཨཱཧཱརཱ’’ཏི ཝུཏྟཱ.

ཀབལཱི༹ཀཱརཱཧཱརབྷཀྑཱནཉྷི སཏྟཱནཾ རཱུཔཀཱཡསྶ ཀབལཱི༹ཀཱརཱཧཱརོ ཝིསེསཔཙྩཡོ ཀམྨཱདིཛནིཏསྶཔི ཏསྶ ཀབལཱི༹ཀཱརཱཧཱརཱུཔཏྠམྦྷབལེནེཝ དསཝསྶཱདིཔྤཝཏྟིསམྦྷཝཏོ. ཏཐཱ ཧེས ‘‘དྷཱཏི ཝིཡ ཀུམཱརསྶ, ཨུཔཏྠམྦྷནཀཡནྟཾ ཝིཡ གེཧསྶཱ’’ཏི ཝུཏྟོ. ཕསྶོཔི སུཁཱདིཝཏྠུབྷཱུཏཾ ཨཱརམྨཎཾ ཕུསནྟོཡེཝ སུཁཱདིཝེདནཱཔཝཏྟནེན སཏྟཱནཾ ཋིཏིཡཱ པཙྩཡོ ཧོཏི. མནོསཉྩེཏནཱ ཀུསལཱཀུསལཀམྨཝསེན ཨཱཡཱུཧམཱནཱཡེཝ བྷཝམཱུལནིཔྥཱདནཏོ སཏྟཱནཾ ཋིཏིཡཱ པཙྩཡོ ཧོཏི. ཝིཉྙཱཎཾ ཝིཛཱནནྟམེཝ ནཱམརཱུཔཔྤཝཏྟནེན སཏྟཱནཾ ཋིཏིཡཱ པཙྩཡོ ཧོཏཱིཏི ཨེཝམེཏེཡེཝ ཨཛ྄ཛྷཏྟསནྟཱནསྶ ཝིསེསཔཙྩཡཏྟཱ ‘‘ཨཱཧཱརཱ’’ཏི ཝུཏྟཱ, ཕསྶཱདཱིནཾ དུཏིཡཱདིབྷཱཝོ དེསནཱཀྐམཏོ, ན ཨུཔྤཏྟིཀྐམཏོ.

༢༦. པཉྩཝིཉྙཱཎཱནཾ ¶ ཝིཏཀྐཝིརཧེན ཨཱརམྨཎེསུ ཨབྷིནིཔཱཏམཏྟཏྟཱ ཏེསུ ཝིཛྫམཱནཱནིཔི ཨུཔེཀྑཱསུཁདུཀྑཱནི ཨུཔནིཛ྄ཛྷཱནཱཀཱརསྶ ཨབྷཱཝཏོ ཛྷཱནངྒབྷཱཝེན ན ཨུདྡྷཊཱནི. ‘‘ཝིཏཀྐཔཙྪིམཀཾ ཧི ཛྷཱནངྒ’’ནྟི ཝུཏྟཾ. དྭིཔཉྩཝིཉྙཱཎམནོདྷཱཏུཏྟིཀསནྟཱིརཎཏྟིཀཝསེན སོལ༹སཙིཏྟེསུ ཝཱིརིཡཱབྷཱཝཏོ ཏཏྠ ཝིཛྫམཱནོཔི སམཱདྷི བལབྷཱཝཾ ན གཙྪཏི. ‘‘ཝཱིརིཡཔཙྪིམཀཾ བལ’’ནྟི ཧི ཝུཏྟཾ. ཏཐཱ ཨཊྛཱརསཱཧེཏུཀེསུ ཧེཏུཝིརཧཏོ མགྒངྒཱནི ན ལབྦྷནྟི. ‘‘ཧེཏུཔཙྪིམཀཾ མགྒངྒ’’ནྟི (དྷ. ས. ཨཊྛ. ༤༣༨) ཧི ཝུཏྟནྟི ཨིམམཏྠཾ མནསི ནིདྷཱཡཱཧ ‘‘དྭིཔཉྩཝིཉྙཱཎེསཱུ’’ཏྱཱདི. ཛྷཱནངྒཱནི ན ལབྦྷནྟཱིཏི སམྦནྡྷོ.

༢༧. ཨདྷིམོཀྑཝིརཧཏོ ¶ ཝིཙིཀིཙྪཱཙིཏྟེ ཨེཀགྒཏཱ ཙིཏྟཊྛིཏིམཏྟཾ, ན པན མིཙྪཱསམཱདྷིསམཱདྷིནྡྲིཡསམཱདྷིབལཝོཧཱརཾ གཙྪཏཱིཏི ཨཱཧ ‘‘ཏཐཱ ཝིཙིཀིཙྪཱཙིཏྟེ’’ཏྱཱདི.

༢༨. དྭིཧེཏུཀཏིཧེཏུཀགྒཧཎེན ཨེཀཧེཏུཀེསུ ཨདྷིཔཏཱིནཾ ཨབྷཱཝཾ དསྶེཏི. ཛཝནེསྭེཝཱཏི ཨཝདྷཱརཎཾ ལོཀིཡཝིཔཱཀེསུ ཨདྷིཔཏཱིནཾ ཨསམྦྷཝདསྶནཏྠཾ. ན ཧི ཏེ ཚནྡཱདཱིནི པུརཀྑཏྭཱ པཝཏྟནྟི. ཝཱིམཾསཱདྷིཔཏིནོ དྭིཧེཏུཀཛཝནེསུ ཨསམྦྷཝཏོ ཙིཏྟཱབྷིསངྑཱརཱུཔནིསྶཡསྶ ཙ སམྦྷཝཱནུརཱུཔཏོ ལབྦྷམཱནཏཾ སནྡྷཱཡཱཧ ‘‘ཡཐཱསམྦྷཝ’’ནྟི. ཨེཀོཝ ལབྦྷཏི, ཨིཏརཐཱ ཨདྷིཔཏིབྷཱཝཱཡོགཏོ, ཏེནེཝ ཧི བྷགཝཏཱ ‘‘ཧེཏཱུ ཧེཏུསམྤཡུཏྟཀཱནཾ དྷམྨཱནཾ ཧེཏུཔཙྩཡེན པཙྩཡོ’’ཏྱཱདིནཱ (པཊྛཱ. ༡.༡.༡) ཧེཏུཔཙྩཡནིདྡེསེ ཝིཡ ‘‘ཨདྷིཔཏཱི ཨདྷིཔཏིསམྤཡུཏྟཀཱན’’ནྟྱཱདིནཱ ཨཝཏྭཱ ‘‘ཚནྡཱདྷིཔཏི ཚནྡསམྤཡུཏྟཀཱན’’ནྟྱཱདིནཱ (པཊྛཱ. ༡.༡.༣) ཨེཀེཀཱདྷིཔཏིཝསེནེཝ ཨདྷིཔཏིཔཙྩཡོ ཨུདྡྷཊོ.

༢༩. ཝཏྠུཏོ ¶ དྷམྨཝསེན ཧེཏུདྷམྨཱ ཚ, ཛྷཱནངྒཱནི པཉྩ སོམནསྶདོམནསྶུཔེཀྑཱནཾ ཝེདནཱཝསེན ཨེཀཏོ གཧིཏཏྟཱ, མགྒངྒཱ ནཝ མིཙྪཱསངྐཔྤཝཱཡཱམསམཱདྷཱིནཾ ཝིཏཀྐཝཱིརིཡཙིཏྟེཀགྒཏཱསབྷཱཝེན སམྨཱསངྐཔྤཱདཱིཧི ཨེཀཏོ གཧིཏཏྟཱ. ཨིནྡྲིཡདྷམྨཱ སོལ༹ས པཉྩནྣཾ ཝེདནིནྡྲིཡཱནཾ ཝེདནཱསཱམཉྙེན, ཏིཎྞཾ ལོཀུཏྟརིནྡྲིཡཱནཾ པཉྙིནྡྲིཡསྶ ཙ ཉཱཎསཱམཉྙེན ཨེཀཏོ གཧིཏཏྟཱ, རཱུཔཱརཱུཔཛཱིཝིཏིནྡྲིཡཱནཉྩ ཝིསུཾ གཧིཏཏྟཱ, བལདྷམྨཱ པན ཡཐཱཝུཏྟནཡེནེཝ ནཝ ཨཱིརིཏཱ, ཨདྷིཔཏིདྷམྨཱ ཙཏྟཱརོ ཝུཏྟཱ, ཨཱཧཱརཱ ཏཐཱ ཙཏྟཱརོ ཝུཏྟཱཏི ཀུསལཱདཱིཧི ཏཱིཧི སམཱཀིཎྞོ ཏཏོཡེཝ མིསྶཀསངྒཧོ ཨེཝཾནཱམཀོ སངྒཧོ སཏྟདྷཱ ཝུཏྟོ. ཨེཏྠ ཙ –

པཉྩསངྒཧིཏཱ པཉྙཱ, ཝཱཡཱམེཀགྒཏཱ པན;

ཙཏུསངྒཧིཏཱ ཙིཏྟཾ, སཏི ཙེཝ ཏིསངྒཧཱ.

སངྐཔྤོ ཝེདནཱ སདྡྷཱ, དུཀསངྒཧིཏཱ མཏཱ;

ཨེཀེཀསངྒཧཱ སེསཱ, ཨཊྛཝཱིསཏི བྷཱསིཏཱ.

མིསྶཀསངྒཧཝཎྞནཱ ནིཊྛིཏཱ.

བོདྷིཔཀྑིཡསངྒཧཝཎྞནཱ

༣༠. པཊྛཱཏཱིཏི ¶ པཊྛཱནཾ, ཨསུབྷགྒཧཎཱདིཝསེན ཨནུཔཝིསིཏྭཱ ཀཱཡཱདིཨཱརམྨཎེ པཝཏྟཏཱིཏྱཏྠོ, སཏིཡེཝ པཊྛཱནཾ སཏིཔཊྛཱནཾ. ཏཾ པན ཀཱཡཝེདནཱཙིཏྟདྷམྨེསུ ཨསུབྷདུཀྑཱནིཙྩཱནཏྟཱཀཱརགྒཧཎཝསེན, སུབྷསུཁནིཙྩཨཏྟསཉྙཱཝིཔལླཱསཔྤཧཱནཝསེན ཙ ཙཏུབྦིདྷནྟི ཝུཏྟཾ ‘‘ཙཏྟཱརོ སཏིཔཊྛཱནཱ’’ཏི. ཀུཙྪིཏཱནཾ ཀེསཱདཱིནཾ ཨཱཡོཏི ཀཱཡོ, སརཱིརཾ, ཨསྶཱསཔསྶཱསཱནཾ ཝཱ སམཱུཧོ ཀཱཡོ ¶ , ཏསྶ ཨནུཔསྶནཱ པརིཀམྨཝསེན, ཝིཔསྶནཱཝསེན ཙ སརཎཾ ཀཱཡཱནུཔསྶནཱ. དུཀྑདུཀྑཝིཔརིཎཱམདུཀྑསངྑཱརདུཀྑབྷཱུཏཱནཾ ཝེདནཱནཾ ཝསེན ཨནུཔསྶནཱ ཝེདནཱནུཔསྶནཱ. ཏཐཱ སརཱགམཧགྒཏཱདིཝསེན སམྤཡོགབྷཱུམིབྷེདེན བྷིནྣསྶེཝ ཙིཏྟསྶ ཨནུཔསྶནཱ ཙིཏྟཱནུཔསྶནཱ. སཉྙཱསངྑཱརཱནཾ དྷམྨཱནཾ བྷིནྣལཀྑཎཱནམེཝ ཨནུཔསྶནཱ དྷམྨཱནུཔསྶནཱ.

༣༡. སམྨཱ པདཧནྟི ཨེཏེནཱཏི སམྨཔྤདྷཱནཾ, ཝཱཡཱམོ. སོ ཙ ཀིཙྩབྷེདེན ཙཏུབྦིདྷོཏི ཨཱཧ ‘‘ཙཏྟཱརོ སམྨཔྤདྷཱནཱ’’ཏྱཱདི. ཨསུབྷམནསིཀཱརཀམྨཊྛཱནཱནུཡུཉྫནཱདིཝསེན ཝཱཡམནཾ ཝཱཡཱམོ. བྷིཡྻོབྷཱཝཱཡཱཏི ཨབྷིཝུདྡྷིཡཱ.

༣༢. ཨིཛ྄ཛྷཏི ཨདྷིཊྛཱནཱདིཀཾ ཨེཏཱཡཱཧི ཨིདྡྷི, ཨིདྡྷིཝིདྷཉཱཎཾ ཨིདྡྷིཡཱ པཱདོ ཨིདྡྷིཔཱདོ, ཚནྡོཡེཝ ཨིདྡྷིཔཱདོ ཚནྡིདྡྷིཔཱདོ.

༣༥. བུཛ྄ཛྷཏཱིཏི བོདྷི, ཨཱརདྡྷཝིཔསྶཀཏོ པཊྛཱཡ ཡོགཱཝཙརོ. ཡཱཡ ཝཱ སོ སཏིཨཱདིཀཱཡ དྷམྨསཱམགྒིཡཱ བུཛ྄ཛྷཏི སཙྩཱནི པཊིཝིཛ྄ཛྷཏི, ཀིལེསནིདྡཱཏོ ཝཱ ཝུཊྛཱཏི, ཀིལེསསངྐོཙཱབྷཱཝཏོ ཝཱ མགྒཕལཔྤཏྟིཡཱ ཝིཀསཏི, སཱ དྷམྨསཱམགྒཱི བོདྷི, ཏསྶ བོདྷིསྶ, ཏསྶཱ ཝཱ བོདྷིཡཱ ཨངྒབྷཱུཏཱ ཀཱརཎབྷཱུཏཱཏི བོཛ྄ཛྷངྒཱ, ཏེ པན དྷམྨཝསེན སཏྟཝིདྷཱཏི ཨཱཧ ‘‘སཏིསམྦོཛ྄ཛྷངྒོ’’ཏྱཱདི. སཏིཡེཝ སུནྡརོ བོཛ྄ཛྷངྒོ, སུནྡརསྶ ཝཱ བོདྷིསྶ, སུནྡརཱཡ ཝཱ བོདྷིཡཱ ཨངྒོཏི སཏིསམྦོཛ྄ཛྷངྒོ. དྷམྨེ ཝིཙིནཱཏི ཨུཔཔརིཀྑཏཱིཏི དྷམྨཝིཙཡོ, ཝིཔསྶནཱཔཉྙཱ. ཨུཔེཀྑཱཏི ཨིདྷ ཏཏྲམཛ྄ཛྷཏྟུཔེཀྑཱ.

༤༠. ‘‘སཏྟདྷཱ ¶ ཏཏྠ སངྒཧོ’’ཏི ཝཏྭཱན པུན ཏཾ དསྶེཏུཾ ‘‘སངྐཔྤཔསྶདྡྷི ཙཱ’’ཏྱཱདི ཝུཏྟཾ ¶ . ཏཏྠ ཝཱིརིཡཾ ནཝཊྛཱནཾ སམྨཔྤདྷཱནཙཏུཀྐཝཱིརིཡིདྡྷིཔཱདཝཱིརིཡིནྡྲིཡཝཱིརིཡབལསམྦོཛ྄ཛྷངྒསམྨཱཝཱཡཱམཝསེན ནཝཀིཙྩཏྟཱ, སཏི ཨཊྛཊྛཱནཱ སཏིཔཊྛཱནཙཏུཀྐསཏིནྡྲིཡསཏིབལསཏིསམྦོཛ྄ཛྷངྒསམྨཱསཏིཝསེན ཨཊྛཀིཙྩཏྟཱ. སམཱདྷི ཙཏུཊྛཱནོ སམཱདྷིནྡྲིཡསམཱདྷིབལསམཱདྷིསམྦོཛ྄ཛྷངྒསམྨཱསམཱདྷིཝསེན ཙཏུཀིཙྩཏྟཱ, པཉྙཱ པཉྩཊྛཱནཱ ཝཱིམཾསིདྡྷིཔཱདཔཉྙིནྡྲིཡཔཉྙཱབལདྷམྨཝིཙཡསམྦོཛ྄ཛྷངྒསམྨཱདིཊྛིཝསེན པཉྩཀིཙྩཏྟཱ, སདྡྷཱ དྭིཊྛཱནཱ སདྡྷིནྡྲིཡསདྡྷཱབལཝསེན དྭིཀིཙྩཏྟཱ. ཨེསོ ཨུཏྟམཱནཾ བོདྷིཔཀྑིཡབྷཱཝེན ཝིསིཊྛཱནཾ སཏྟཏིཾས དྷམྨཱནཾ པཝརོ ཨུཏྟམོ ཝིབྷཱགོ.

༤༡. ལོཀུཏྟརེ ཨཊྛཝིདྷེཔི སབྦེ སཏྟཏིཾས དྷམྨཱ ཧོནྟི, སངྐཔྤཔཱིཏིཡོ ན ཝཱ ཧོནྟི, དུཏིཡཛ྄ཛྷཱནིཀེ སངྐཔྤསྶ, ཙཏུཏྠཔཉྩམཛ྄ཛྷཱནིཀེ པཱིཏིཡཱ ཙ ཨསམྦྷཝཏོ ན ཧོནྟི ཝཱ, ལོཀིཡེཔི ཙིཏྟེ སཱིལཝིསུདྡྷཱདི ཚབྦིསུདྡྷིཔཝཏྟིཡཾ ཡཐཱཡོགཾ ཏཾཏཾཀིཙྩསྶ ཨནུརཱུཔཝསེན ཀེཙི ཀཏྠཙི ཝིསུཾ ཝིསུཾ ཧོནྟི, ཀཏྠཙི ན ཝཱ ཧོནྟི.

བོདྷིཔཀྑིཡསངྒཧཝཎྞནཱ ནིཊྛིཏཱ.

སབྦསངྒཧཝཎྞནཱ

༤༢. ཨཏཱིཏཱནཱགཏཔཙྩུཔྤནྣཱདིབྷེདབྷིནྣཱ ཏེ ཏེ སབྷཱགདྷམྨཱ ཨེཀཛ྄ཛྷཾ རཱསཊྛེན ཁནྡྷཱ. ཏེནཱཧ བྷགཝཱ – ‘‘ཏདེཀཛ྄ཛྷཾ ཨབྷིསཾཡཱུཧིཏྭཱ ཨབྷིསངྑིཔིཏྭཱ ཨཡཾ ཝུཙྩཏི རཱུཔཀྑནྡྷོ’’ཏྱཱདི (ཝིབྷ. ༢), ཏེ པནེཏེ ཁནྡྷཱ བྷཱཛནབྷོཛནབྱཉྫནབྷཏྟཀཱརཀབྷུཉྫཀཝིཀཔྤཝསེན པཉྩེཝ ཝུཏྟཱཏི ཨཱཧ ‘‘རཱུཔཀྑནྡྷོ’’ཏྱཱདི ¶ . རཱུཔཉྷི ཝེདནཱནིསྶཡཏྟཱ བྷཱཛནཊྛཱནིཡཾ, ཝེདནཱ བྷུཉྫིཏབྦཏྟཱ བྷོཛནཊྛཱནིཡཱ, སཉྙཱ ཝེདནཱསྶཱདལཱབྷཧེཏུཏྟཱ བྱཉྫནཊྛཱནིཡཱ, སངྑཱརཱ ཨབྷིསངྑརཎཏོ བྷཏྟཀཱརཀཊྛཱནིཡཱ, ཝིཉྙཱཎཾ ཨུཔབྷུཉྫཀཏྟཱ བྷུཉྫཀཊྛཱནིཡཾ. ཨེཏྟཱཝཏཱ ཙ ཨདྷིཔྤེཏཏྠསིདྡྷཱིཏི པཉྩེཝ ཝུཏྟཱ. དེསནཱཀྐམེཔི ཨིདམེཝ ཀཱརཎཾ ཡཏྠ བྷུཉྫཏི, ཡཉྩ བྷུཉྫཏི, ཡེན ཙ བྷུཉྫཏི, ཡོ ཙ བྷོཛཀོ, ཡོ ཙ བྷུཉྫིཏཱ, ཏེསཾ ཨནུཀྐམེན དསྶེཏུཀཱམཏྟཱ.

༤༣. ཨུཔཱདཱནཱནཾ ¶ གོཙརཱ ཁནྡྷཱ ཨུཔཱདཱནཀྑནྡྷཱ, ཏེ པན ཨུཔཱདཱནཝིསཡབྷཱཝེན གཧིཏཱ རཱུཔཱདཡོ པཉྩེཝཱཏི ཝུཏྟཾ ‘‘རཱུཔུཔཱདཱནཀྑནྡྷོ’’ཏྱཱདི. སབྦསབྷཱགདྷམྨསངྒཧཏྠཾ ཧི སཱསཝཱ, ཨནཱསཝཱཔི དྷམྨཱ ཨཝིསེསཏོ ‘‘པཉྩཀྑནྡྷཱ’’ཏི དེསིཏཱ. ཝིཔསྶནཱབྷཱུམིསནྡསྶནཏྠཾ པན སཱསཝཱཝ ‘‘ཨུཔཱདཱནཀྑནྡྷཱ’’ཏི. ཡཐཱ པནེཏྠ ཝེདནཱདཡོ སཱསཝཱ, ཨནཱསཝཱ ཙ, ན ཨེཝཾ རཱུཔཾ, ཨེཀནྟཀཱམཱཝཙརཏྟཱ. སབྷཱགརཱསིཝསེན པན ཏཾ ཁནྡྷེསུ དེསིཏཾ, ཨུཔཱདཱནིཡབྷཱཝེན, པན རཱསིཝསེན ཙ ཨུཔཱདཱནཀྑནྡྷེསཱུཏི དཊྛབྦཾ.

༤༤. ཨཱཡཏནྟི ཨེཏྠ ཏཾཏཾདྭཱརཱརམྨཎཱ ཙིཏྟཙེཏསིཀཱ ཏེན ཏེན ཀིཙྩེན གྷཊྚེནྟི ཝཱཡམནྟི, ཨཱཡབྷཱུཏེ ཝཱ ཏེ དྷམྨེ ཨེཏཱནི ཏནོནྟི ཝིཏྠཱརེནྟི, ཨཱཡཏཾ ཝཱ སཾསཱརདུཀྑཾ ནཡནྟི པཝཏྟེནྟི, ཙཀྑུཝིཉྙཱཎཱདཱིནཾ ཀཱརཎབྷཱུཏཱནཱིཏི ཝཱ ཨཱཡཏནཱནི. ཨཔིཙ ལོཀེ ནིཝཱསཨཱཀརསམོསརཎསཉྫཱཏིཊྛཱནཾ ‘‘ཨཱཡཏན’’ནྟི ཝུཙྩཏི, ཏསྨཱ ཨེཏེཔི ཏཾཏཾདྭཱརིཀཱནཾ, ཏཾཏདཱརམྨཎཱནཉྩ ཙཀྑུཝིཉྙཱཎཱདཱིནཾ ནིཝཱསཊྛཱནཏཱཡ, ཏེསམེཝ ཨཱཀིཎྞབྷཱཝེན པཝཏྟཱནཾ ཨཱཀརཊྛཱནཏཱཡ, དྭཱརཱརམྨཎཏོ སམོསརནྟཱནཾ སམོསརཎཊྛཱནཏཱཡ, ཏཏྠེཝ ཨུཔྤཛྫནྟཱནཾ སཉྫཱཏིཊྛཱནཏཱཡ ཙ ཨཱཡཏནཱནི. ཏཱནི པན དྭཱརབྷཱུཏཱནི ཨཛ྄ཛྷཏྟིཀཱཡཏནཱནི ¶ ཚ, ཨཱརམྨཎབྷཱུཏཱནི ཙ བཱཧིརཱཡཏནཱནི ཚཱཏི དྭཱདསཝིདྷཱནཱིཏི ཨཱཧ ‘‘ཙཀྑཱཡཏན’’ནྟྱཱདི. ཙཀྑུ ཙ ཏཾ ཨཱཡཏནཉྩཱཏི ཙཀྑཱཡཏནཾ. ཨེཝཾ སེསེསུཔི.

ཨེཏྠ ཨཛ྄ཛྷཏྟིཀཱཡཏནེསུ སནིདསྶནསཔྤཊིགྷཱརམྨཎཏྟཱ ཙཀྑཱཡཏནཾ ཝིབྷཱུཏནྟི ཏཾ པཋམཾ ཝུཏྟཾ, ཏདནནྟརཾ ཨནིདསྶནསཔྤཊིགྷཱརམྨཎཱནི ཨིཏརཱནི, ཏཏྠཱཔི ཨསམྤཏྟགྒཱཧཀསཱམཉྙེན ཙཀྑཱཡཏནཱནནྟརཾ སོཏཱཡཏནཾ ཝུཏྟཾ, ཨིཏརེསུ སཱིགྷཏརཾ ཨཱརམྨཎགྒཧཎསམཏྠཏྟཱ གྷཱནཱཡཏནཾ པཋམཾ ཝུཏྟཾ. པུརཏོ ཋཔིཏམཏྟསྶ ཧི བྷོཛནཱདིཀསྶ གནྡྷོ ཝཱཏཱནུསཱརེན གྷཱནེ པཊིཧཉྙཏི, ཏདནནྟརཾ པན པདེསཝུཏྟིསཱམཉྙེན ཛིཝ྄ཧཱཡཏནཾ ཝུཏྟཾ, ཏཏོ སབྦཊྛཱནིཀཾ ཀཱཡཱཡཏནཾ, ཏཏོ པཉྩནྣམྤི གོཙརགྒཧཎསམཏྠཾ མནཱཡཏནཾ, ཡཐཱཝུཏྟཱནཾ པན ཨནུཀྐམེན ཏེསཾ ཏེསཾ ཨཱརམྨཎཱནི རཱུཔཱཡཏནཱདཱིནི ཝུཏྟཱནི.

༤༥. ཨཏྟནོ སབྷཱཝཾ དྷཱརེནྟཱིཏི དྷཱཏུཡོ. ཨཐ ཝཱ ཡཐཱསམྦྷཝཾ ཨནེཀཔྤཀཱརཾ སཾསཱརདུཀྑཾ ཝིདཧནྟི, བྷཱརཧཱརེཧི ཝིཡ ཙ བྷཱརོ སཏྟེཧི དྷཱིཡནྟི དྷཱརིཡནྟི, ཨཝསཝཏྟནཏོ དུཀྑཝིདྷཱནམཏྟམེཝ ཙེཏཱ, སཏྟེཧི ཙ སཾསཱརདུཀྑཾ ཨནུཝིདྷཱིཡཏི ཨེཏཱཧི, ཏཐཱཝིཧིཏཉྩ ཨེཏཱསྭེཝ ¶ མཱིཡཏི ཋཔིཡཏི, རསསོཎིཏཱདིསརཱིརཱཝཡཝདྷཱཏུཡོ ཝིཡ, ཧརིཏཱལམནོསིལཱདིསེལཱཝཡཝདྷཱཏུཡོ ཝིཡ ཙ ཉེཡྻཱཝཡཝབྷཱུཏཱ ཙཱཏི དྷཱཏུཡོ. ཡཐཱཧུ –

‘‘ཝིདཧཏི ཝིདྷཱནཉྩ, དྷཱིཡཏེ ཙ ཝིདྷཱིཡཏེ;

ཨེཏཱཡ དྷཱིཡཏེ ཨེཏྠ, ཨིཏི ཝཱ དྷཱཏུསམྨཏཱ;

སརཱིརསེལཱཝཡཝ-དྷཱཏུཡོ ཝིཡ དྷཱཏུཡོ’’ཏི.

ཏཱ པན མནཱཡཏནཾ སཏྟཝིཉྙཱཎདྷཱཏུཝསེན སཏྟདྷཱ བྷིནྡིཏྭཱ ཨཝསེསེཧི ཨེཀཱདསཱཡཏནེཧི སཧ ཨཊྛཱརསདྷཱཏཱུ ¶ ཝུཏྟཱཏི ཨཱཧ ‘‘ཙཀྑུདྷཱཏཱུ’’ཏྱཱདི. ཀམཀཱརཎཾ ཝུཏྟནཡེན དཊྛབྦཾ.

༤༦. ཨརིཡཀརཏྟཱ ཨརིཡཱནི, ཏཙྪབྷཱཝཏོ སཙྩཱནཱིཏི ཨརིཡསཙྩཱནི. ཨིམཱནི ཧི ཙཏྟཱརོ པཊིཔནྣཀེ, ཙཏྟཱརོ ཕལཊྛེཏི ཨཊྛཨརིཡཔུགྒལེ སཱདྷེནྟི ཨསཏི སཙྩཔྤཊིཝེདྷེ ཏེསཾ ཨརིཡབྷཱཝཱནུཔགམནཏོ, སཏི ཙ ཏསྨིཾ ཨེཀནྟེན ཏབྦྷཱཝཱུཔགམནཏོ ཙ. དུཀྑསམུདཡནིརོདྷམགྒཱནམེཝ པན ཡཐཱཀྐམཾ བཱདྷཀཏྟཾ པབྷཝཏྟཾ ནིསྶརཎཏྟཾ ནིཡྻཱནིཀཏྟཾ, ནཱཉྙེསཾ, བཱདྷཀཱདིབྷཱཝོཡེཝ ཙ དུཀྑཱདཱིནཾ, ན ཨབཱདྷཀཱདིབྷཱཝོ, ཏསྨཱ ཨཉྙཏྠཱབྷཱཝཏཏྠབྱཱཔིཏཱསངྑཱཏེན ལཀྑཎེན ཨེཏཱནི ཏཙྪཱནི. ཏེནཱཧུ པོརཱཎཱ –

‘‘བོདྷཱནུརཱུཔཾ ཙཏྟཱརོ, ཚིནྡནྟེ ཙཏུརོ མལེ;

ཁཱིཎདོསེ ཙ ཙཏྟཱརོ, སཱདྷེནྟཱརིཡཔུགྒལེ.

‘‘ཨཉྙཏྠ བཱདྷཀཏྟཱདི, ན ཧི ཨེཏེཧི ལབྦྷཏི;

ནཱབཱདྷཀཏྟམེཏེསཾ, ཏཙྪཱནེཏཱནིཝེཏཏོ’’ཏི.

ཨརིཡཱནཾ ཝཱ སཙྩཱནི ཏེཧི པཊིཝིཛ྄ཛྷིཏབྦཏྟཱ, ཨརིཡསྶ ཝཱ སམྨཱསམྦུདྡྷསྶ སཙྩཱནི ཏེན དེསིཏཏྟཱཏི ཨརིཡསཙྩཱནི. ཏཱནི པན སཾཀིལིཊྛཱསཾཀིལིཊྛཕལཧེཏུཝསེན ཙཏུབྦིདྷཱནཱིཏི ཨཱཧ ‘‘ཙཏྟཱརི ཨརིཡསཙྩཱནཱི’’ཏྱཱདི. ཏཏྠ ཀུཙྪིཏཏྟཱ, ཏུཙྪཏྟཱ ཙ དུཀྑཾ. ཀམྨཱདིཔཙྩཡསནྣིཊྛཱནེ དུཀྑུཔྤཏྟིནིམིཏྟཏཱཡ སམུདཡོ སམུདེཏི ཨེཏསྨཱ དུཀྑནྟི ཀཏྭཱ, དུཀྑསྶ ¶ སམུདཡོ དུཀྑསམུདཡོ. དུཀྑསྶ ཨནུཔྤཱདནིརོདྷོ ཨེཏྠ, ཨེཏེནཱཏི ཝཱ དུཀྑནིརོདྷོ. དུཀྑནིརོདྷཾ གཙྪཏི, པཊིཔཛྫནྟི ཙ ཏཾ ཨེཏཱཡཱཏི དུཀྑནིརོདྷགཱམིནིཔཊིཔདཱ.

༤༧. ཙེཏསིཀཱནཾ, སོལ༹སསུཁུམརཱུཔཱནཾ, ནིབྦཱནསྶ ཙ ཝསེན ཨེཀཱུནསཏྟཏི དྷམྨཱ ཨཱཡཏནེསུ དྷམྨཱཡཏནཾ, དྷཱཏཱུསུ དྷམྨདྷཱཏཱུཏི ཙ སངྑཾ གཙྪནྟི.

༤༩. སེསཱ ¶ ཙེཏསིཀཱཏི ཝེདནཱསཉྙཱཧི སེསཱ པཉྙཱས ཙེཏསིཀཱ. ཀསྨཱ པན ཝེདནཱསཉྙཱ ཝིསུཾ ཀཏཱཏི? ཝཊྚདྷམྨེསུ ཨསྶཱདཏདུཔཀརཎབྷཱཝཏོ. ཏེབྷཱུམཀདྷམྨེསུ ཧི ཨསྶཱདཝསཔྤཝཏྟཱ ཝེདནཱ, ཨསུབྷེ སུབྷཱདིསཉྙཱཝིཔལླཱསཝསེན ཙ ཏསྶཱ ཏདཱཀཱརཔྤཝཏྟཱིཏི ཏདུཔཀརཎབྷཱུཏཱ སཉྙཱ, ཏསྨཱ སཾསཱརསྶ པདྷཱནཧེཏུཏཱཡ ཨེཏཱ ཝིནིབྷུཛྫིཏྭཱ དེསིཏཱཏི. ཝུཏྟཉྷེཏཾ ཨཱཙརིཡེན –

‘‘ཝཊྚདྷམྨེསུ ཨསྶཱདཾ, ཏདསྶཱདུཔསེཝནཾ;

ཝིནིབྷུཛྫ ནིདསྶེཏུཾ, ཁནྡྷདྭཡམུདཱཧཊ’’ནྟི. (ནཱམ. པརི. ༦༤༩);

༥༠. ནནུ ཙ ཨཱཡཏནདྷཱཏཱུསུ ནིབྦཱནཾ སངྒཧིཏཾ, ཁནྡྷེསུ ཀསྨཱ ན སངྒཧིཏནྟི ཨཱཧ ‘‘བྷེདཱབྷཱཝེནཱ’’ཏྱཱདི. ཨཏཱིཏཱདིབྷེདབྷིནྣཱནཉྷི རཱསཊྛེན ཁནྡྷཝོཧཱརོཏི ནིབྦཱནཾ བྷེདཱབྷཱཝཏོ ཁནྡྷསངྒཧཏོ ནིསྶཊཾ, ཝིནིམུཏྟནྟྱཏྠོ.

༥༡. ཚནྣཾ དྭཱརཱནཾ, ཚནྣཾ ཨཱརམྨཎཱནཉྩ བྷེདེན ཨཱཡཏནཱནི དྭཱདས བྷཝནྟི, ཚནྣཾ དྭཱརཱནཾ ཚནྣཾ ཨཱརམྨཎཱནཾ ཏདུབྷཡཾ ནིསྶཱཡ ཨུཔྤནྣཱནཾ ཏཏྟཀཱནམེཝ ཝིཉྙཱཎཱནཾ པརིཡཱཡེན ཀམེན དྷཱཏུཡོ ཨཊྛཱརས བྷཝནྟི.

༥༢. ཏིསྶོ བྷཱུམིཡོ ཨིམསྶཱཏི ཏིབྷཱུམཾ, ཏིབྷཱུམཾཡེཝ ཏེབྷཱུམཀཾ. ཝཏྟཏི ཨེཏྠ ཀམྨཾ, ཏབྦིཔཱཀོ ཙཱཏི ཝཊྚཾ. ཏཎྷཱཏི ཀཱམཏཎྷཱདིཝསེན ཏིཝིདྷཱ, པུན ཚལཱ༹རམྨཎཝསེན ཨཊྛཱརསཝིདྷཱ, ཨཏཱིཏཱནཱགཏཔཙྩུཔྤནྣཝསེན ཙཏུཔཉྙཱསཝིདྷཱ, ཨཛ྄ཛྷཏྟིཀབཱཧིརཝསེན ཨཊྛསཏཔྤབྷེདཱ ཏཎྷཱ. ཀསྨཱ པན ཨཉྙེསུཔི དུཀྑཧེཏཱུསུ སནྟེསུ ཏཎྷཱཡེཝ སམུདཡོཏི ཝུཏྟཱཏི? པདྷཱནཀཱརཎཏྟཱ. ཀམྨཝིཙིཏྟཏཱཧེཏུབྷཱཝེན, ཧི ཀམྨསཧཱཡབྷཱཝཱུཔགམནེན ཙ དུཀྑཝིཙིཏྟཏཱཀཱརཎཏྟཱ ¶ ཏཎྷཱ དུཀྑསྶ ཝིསེསཀཱརཎནྟི ¶ . མགྒོ དུཀྑནིརོདྷགཱམིནིཔཊིཔདཱནཱམེན ཝུཏྟོ མགྒོ ལོཀུཏྟརོ མཏོཏི མགྒོཏི པུན མགྒགྒཧཎཾ ཡོཛེཏབྦཾ.

༥༣. མགྒཡུཏྟཱ ཨཊྛངྒིཀཝིནིམུཏྟཱ སེསཱ མགྒསམྤཡུཏྟཱ ཕསྶཱདཡོ ཕལཉྩེཝ སསམྤཡུཏྟནྟི ཨེཏེ ཙཏཱུཧི སཙྩེཧི ཝིནིསྶཊཱ ཝིནིགྒཏཱ ནིཔྤརིཡཱཡཏོ, པརིཡཱཡཏོ པན ཨཉྙཱཏཱཝིནྡྲིཡནིདྡེསེཔི ‘‘མགྒངྒཾ མགྒཔརིཡཱཔནྣ’’ནྟི (དྷ. ས. ༥༥༥) ཝུཏྟཏྟཱ ཕལདྷམྨེསུ སམྨཱདིཊྛཱདཱིནཾ མགྒསཙྩེ, ཨིཏརེསཉྩ མགྒཕལསམྤཡུཏྟཱནཾ སངྑཱརདུཀྑསཱམཉྙེན དུཀྑསཙྩེ སངྒཧོ སཀྐཱ ཀཱཏུཾ. ཨེཝཉྷི སཏི སཙྩདེསནཱཡཔི སབྦསངྒཱཧིཀཏཱ ཨུཔཔནྣཱ ཧོཏི. ཀསྨཱ པནེཏེ ཁནྡྷཱདཡོ བཧཱུ དྷམྨཱ ཝུཏྟཱཏི? བྷགཝཏཱཔི ཏཐེཝ དེསིཏཏྟཱ. བྷགཝཏཱཔི ཀསྨཱ ཏཐཱ དེསིཏཱཏི? ཏིཝིདྷསཏྟཱནུགྒཧསྶ ཨདྷིཔྤེཏཏྟཱ. ནཱམརཱུཔཏདུབྷཡསམྨུལ༹ྷཝསེན ཧི ཏིཀྑནཱབྷིཏིཀྑམུདིནྡྲིཡཝསེན, སངྑིཏྟམཛ྄ཛྷིམཝིཏྠཱརརུཙིཝསེན ཙ ཏིཝིདྷཱ སཏྟཱ. ཏེསུ ནཱམསམྨུལ༹ྷཱནཾ ཁནྡྷགྒཧཎཾ ནཱམསྶ ཏཏྠ ཙཏུདྷཱ ཝིབྷཏྟཏྟཱ, རཱུཔསམྨུལ༹ྷཱནཾ ཨཱཡཏནགྒཧཎཾ རཱུཔསྶ ཏཏྠ ཨཌྜྷེཀཱདསདྷཱ ཝིབྷཏྟཏྟཱ, ཨུབྷཡམུལ༹ྷཱནཾ དྷཱཏུགྒཧཎཾ ཨུབྷཡེསམྤི ཏཏྠ ཝིཏྠཱརཏོ ཝིབྷཏྟཏྟཱ, ཏཐཱ ཏིཀྑིནྡྲིཡཱནཾ, སངྑིཏྟརུཙིཀཱནཉྩ ཁནྡྷཱགྒཧཎནྟྱཱདི ཡོཛེཏབྦཾ. ཏཾ པནེཏཾ ཏིཝིདྷམྤི པཝཏྟིནིཝཏྟིཏདུབྷཡཧེཏུཝསེན དིཊྛམེཝ ཨུཔཀཱརཱཝཧཾ. ནོ ཨཉྙཐཱཏི སཙྩགྒཧཎནྟི དཊྛབྦཾ.

སབྦསངྒཧཝཎྞནཱ ནིཊྛིཏཱ.

ཨིཏི ཨབྷིདྷམྨཏྠཝིབྷཱཝིནིཡཱ ནཱམ ཨབྷིདྷམྨཏྠསངྒཧཝཎྞནཱཡ

སམུཙྩཡཔརིཙྪེདཝཎྞནཱ ནིཊྛིཏཱ.

༨. པཙྩཡཔརིཙྪེདཝཎྞནཱ

༡. ཨིདཱནི ¶ ཡཐཱཝུཏྟནཱམརཱུཔདྷམྨཱནཾ པཊིཙྩསམུཔྤཱདཔཊྛཱནནཡཝསེན པཙྩཡེ དསྶེཏུཾ ‘‘ཡེས’’ནྟྱཱདི ཨཱརདྡྷཾ. ཡེསཾ པཙྩཡེཧི སངྑཏཏྟཱ སངྑཏཱནཾ པཙྩཡུཔྤནྣདྷམྨཱནཾ ཡེ པཙྩཡདྷམྨཱ ཡཐཱ ཡེནཱཀཱརེན པཙྩཡཱ ཋིཏིཡཱ, ཨུཔྤཏྟིཡཱ ཙ ཨུཔཀཱརཀཱ, ཏཾ ཝིབྷཱགཾ ཏེསཾ པཙྩཡུཔྤནྣཱནཾ, ཏེསཾ ¶ པཙྩཡཱནཾ, ཏསྶ ཙ པཙྩཡཱཀཱརསྶ པབྷེདཾ ཨིཧ ཨིམསྨིཾ སམུཙྩཡསངྒཧཱནནྟརེ ཋཱནེ ཡཐཱརཧཾ ཏཾཏཾཔཙྩཡུཔྤནྣདྷམྨེ སཏི ཏཾཏཾཔཙྩཡཱནཾ ཏཾཏཾཔཙྩཡབྷཱཝཱཀཱརཱནུརཱུཔཾ ཨིདཱནི པཝཀྑཱམཱིཏི ཡོཛནཱ.

༢. ཏཏྠ པཙྩཡསཱམགྒིཾ པཊིཙྩ སམཾ གནྟྭཱ ཕལཱནཾ ཨུཔྤཱདོ ཨེཏསྨཱཏི པཊིཙྩསམུཔྤཱདོ, པཙྩཡཱཀཱརོ. ནཱནཔྤཀཱརཱནི ཋཱནཱནི པཙྩཡཱ ཨེཏྠཱཏྱཱདིནཱ པཊྛཱནཾ, ཨནནྟནཡསམནྟཔཊྛཱནམཧཱཔཀརཎཾ, ཏཏྠ དེསིཏནཡོ པཊྛཱནནཡོ.

༣. ཏཏྠཱཏི ཏེསུ དྭཱིསུ ནཡེསུ. ཏསྶ པཙྩཡདྷམྨསྶ བྷཱཝེན བྷཝནསཱིལསྶ བྷཱཝོ ཏབྦྷཱཝབྷཱཝཱིབྷཱཝོ, སོཡེཝ ཨཱཀཱརམཏྟཾ, ཏེན ཨུཔལཀྑིཏོ ཏབྦྷཱཝབྷཱཝཱིབྷཱཝཱཀཱརམཏྟོཔལཀྑིཏོ. ཨེཏེནེཝ ཏདབྷཱཝཱབྷཱཝཱཀཱརམཏྟོཔལཀྑིཏཏཱཔི ཨཏྠཏོ དསྶིཏཱ ཧོཏི. ཨནྭཡབྱཏིརེཀཝསེན ཧི པཙྩཡལཀྑཎཾ དསྶེཏབྦཾ. ཏེནཱཧ བྷགཝཱ – ‘‘ཨིམསྨིཾ སཏི ཨིདཾ ཧོཏི, ཨིམསྶུཔྤཱདཱ ཨིདམུཔྤཛྫཏི. ཨིམསྨིཾ ཨསཏི ཨིདཾ ན ཧོཏི, ཨིམསྶ ནིརོདྷཱ ཨིདཾ ནིརུཛ྄ཛྷཏཱི’’ཏི (མ. ནི. ༡.༤༠༤, ༤༠༦; སཾ. ནི. ༢.༢༡; ཨུདཱ. ༡, ༢). པཊིཙྩ ཕལཾ ཨེཏི ཨེཏསྨཱཏི པཙྩཡོ. ཏིཊྛཏི ཕལཾ ཨེཏྠ ཏདཱཡཏྟཝུཏྟིཏཱཡཱཏི ཋིཏི, ཨཱཧཙྩ ཝིསེསེཏྭཱ པཝཏྟཱ པཙྩཡསངྑཱཏཱ ཋིཏི ཨཱཧཙྩཔཙྩཡཊྛིཏི. པཊིཙྩསམུཔྤཱདནཡོ ཧི ཏབྦྷཱཝབྷཱཝཱིབྷཱཝཱཀཱརམཏྟཾ ཨུཔཱདཱཡ པཝཏྟཏྟཱ ཧེཏཱདིཔཙྩཡནིཡམཝིསེསཾ ཨནཔེཀྑིཏྭཱ ¶ ཨཝིསེསཏོཝ པཝཏྟཏི, ཨཡཾ པན ཧེཏཱདིཏཾཏཾཔཙྩཡཱནཾ ཏསྶ ཏསྶ དྷམྨནྟརསྶ ཏཾཏཾཔཙྩཡབྷཱཝསཱམཏྠིཡཱཀཱརཝིསེསཾ ཨུཔཱདཱཡ ཝིསེསེཏྭཱ པཝཏྟོཏི ཨཱཧཙྩཔཙྩཡཊྛིཏིམཱརབྦྷ པཝུཙྩཏཱིཏི. ཀེཙི པན ‘‘ཨཱཧཙྩ ཀཎྛཏཱལུཨཱདཱིསུ པཧརིཏྭཱ ཝུཏྟཱ ཋིཏི ཨཱཧཙྩཔཙྩཡཊྛིཏཱི’’ཏི ཝཎྞེནྟི. ཏཾ པན སཝནམཏྟེནེཝ ཏེསཾ ཨཝཧསིཏབྦཝཙནཏཾ པཀཱསེཏི. ན ཧི པཊིཙྩསམུཔྤཱདནཡོ, ཨཉྙོ ཝཱ ཀོཙི ནཡོ ཀཎྛཏཱལུཨཱདཱིསུ ཨནཱཧཙྩ དེསེཏུཾ སཀྐཱཏི. ཝོམིསྶེཏྭཱཏི པཊྛཱནནཡམྤི པཊིཙྩསམུཔྤཱདེཡེཝ པཀྑིཔིཏྭཱ ཏབྦྷཱཝབྷཱཝཱིབྷཱཝེན ཧེཏཱདིཔཙྩཡཝསེན ཙ མིསྶེཏྭཱ ཨཱཙརིཡཱ སངྒཧཀཱརཱདཡོ པཔཉྩེནྟི ཝིཏྠཱརེནྟི, མཡཾ པན ཝིསུཾ ཝིསུཾཡེཝ དསྶཡིསྶཱམཱཏྱདྷིཔྤཱཡོ.

པཊིཙྩསམུཔྤཱདནཡཝཎྞནཱ

༤. ན ¶ ཝིཛཱནཱཏཱིཏི ཨཝིཛྫཱ, ཨཝིནྡིཡཾ ཝཱ ཀཱཡདུཙྩརིཏཱདིཾ ཝིནྡཏི པཊིལབྷཏི, ཝིནྡིཡཾ ཝཱ ཀཱཡསུཙརིཏཱདིཾ ན ཝིནྡཏི, ཝེདིཏབྦཾ ཝཱ ཙཏུསཙྩཱདིཀཾ ན ཝིདིཏཾ ཀརོཏི, ཨཝིཛྫམཱནེ ཝཱ ཛཝཱཔེཏི, ཝིཛྫམཱནེ ཝཱ ན ཛཝཱཔེཏཱིཏི ཨཝིཛྫཱ, ཙཏཱུསུ ཨརིཡསཙྩེསུ པུབྦནྟཱདཱིསུ ཙཏཱུསུ ཨཉྙཱཎསྶེཏཾ ནཱམཾ. ཨཝིཛྫཱ ཨེཝ པཙྩཡོ ཨཝིཛྫཱཔཙྩཡོ. ཏཏོ ཨཝིཛྫཱཔཙྩཡཱ སངྑཏམབྷིསངྑརོནྟཱིཏི སངྑཱརཱ, ཀུསལཱཀུསལཀམྨཱནི. ཏེ ཏིཝིདྷཱ པུཉྙཱབྷིསངྑཱརོ ཨཔུཉྙཱབྷིསངྑཱརོ ཨཱནེཉྫཱབྷིསངྑཱརོཏི. ཏཏྠཀཱམརཱུཔཱཝཙརཱ ཏེརས ཀུསལཙེཏནཱ པུཉྙཱབྷིསངྑཱརོ, དྭཱདས ཨཀུསལཙེཏནཱ ཨཔུཉྙཱབྷིསངྑཱརོ, ཙཏསྶོ ཨཱརུཔྤཙེཏནཱ ཨཱནེཉྫཱབྷིསངྑཱརོཏི ཨེཝམེཏཱ ཨེཀཱུནཏིཾས ཙེཏནཱ སངྑཱརཱ ནཱམ. པཊིསནྡྷིཝསེན ཨེཀཱུནཝཱིསཏིཝིདྷཾ, པཝཏྟིཝསེན དྭཏྟིཾསཝིདྷཾ ཝིཔཱཀཙིཏྟཾ ཝིཉྙཱཎཾ ནཱམ. ནཱམཉྩ རཱུཔཉྩ ནཱམརཱུཔཾ. ཏཏྠ ནཱམཾ ཨིདྷ ཝེདནཱདིཀྑནྡྷཏྟཡཾ, རཱུཔཾ པན བྷཱུཏུཔཱདཱཡབྷེདཏོ དུཝིདྷཾ ¶ ཀམྨསམུཊྛཱནརཱུཔཾ, ཏདུབྷཡམྤི ཨིདྷ པཊིསནྡྷིཝིཉྙཱཎསཧགཏནྟི དཊྛབྦཾ. ནཱམརཱུཔཔཙྩཡཱཏི ཨེཏྠ ནཱམཉྩ རཱུཔཉྩ ནཱམརཱུཔཉྩ ནཱམརཱུཔནྟི སརཱུཔེཀསེསོ ཝེདིཏབྦོ. ཙཀྑཱདཱིནི ཚ ཨཛ྄ཛྷཏྟིཀཱཡཏནཱནི, ཀེསཉྩི མཏེན རཱུཔཱདཱིནི ཚ བཱཧིརཱཡཏནཱནིཔི ཝཱ ཨཱཡཏནཾ ནཱམ. ཚ ཨཱཡཏནཱནི ཙ ཚཊྛཱཡཏནཉྩ སལཱ༹ཡཏནཾ. ཙཀྑུསམྥསྶཱདིཝསེན ཚདྭཱརིཀོ ཕསྶོ ཕསྶོ ནཱམ. སུཁདུཀྑུཔེཀྑཱཝསེན ཏིཝིདྷཱ ཝེདནཱ.

ཀཱམཏཎྷཱ བྷཝཏཎྷཱ ཝིབྷཝཏཎྷཱཏི ཏིཝིདྷཱ ཏཎྷཱ. ཚལཱ༹རམྨཎཱདིཝསེན པན ཨཊྛསཏཔྤབྷེདཱ ཧོནྟི ཀཱམུཔཱདཱནཱདིཝསེན ཙཏྟཱརི ཨུཔཱདཱནཱནི. ཨེཏྠ ཙ དུབྦལཱ ཏཎྷཱ ཏཎྷཱ ནཱམ, བལཝཏཱི ཨུཔཱདཱནཾ. ཨསམྤཏྟཝིསཡཔཏྠནཱ ཝཱ ཏཎྷཱ ཏམསི ཙོརཱནཾ ཧཏྠཔྤསཱརཎཾ ཝིཡ, སམྤཏྟཝིསཡགྒཧཎཾ ཨུཔཱདཱནཾ ཙོརཱནཾ ཧཏྠཔྤཏྟསྶ གཧཎཾ ཝིཡ. ཨཔྤིཙྪཏཱཔཊིཔཀྑཱ ཏཎྷཱ, སནྟོསཔྤཊིཔཀྑཾ ཨུཔཱདཱནཾ. པརིཡེསནདུཀྑམཱུལཾ ཏཎྷཱ, ཨཱརཀྑདུཀྑམཱུལཾ ཨུཔཱདཱནནྟི ཨཡམེཏེསཾ ཝིསེསོ. ཀམྨབྷཝོ ཨུཔཔཏྟིབྷཝོཏི དུཝིདྷོ བྷཝོ. ཏཏྠ པཋམོ བྷཝཏི ཨེཏསྨཱ ཕལནྟི བྷཝོ, སོ ཀཱམཱཝཙརཀུསལཱཀུསལཱདིཝསེན ཨེཀཱུནཏིཾསཝིདྷོ. དུཏིཡོ པན བྷཝཏཱིཏི བྷཝོ, སོ ཀཱམབྷཝཱདིཝསེན ནཝཝིདྷོ. ཨུཔཱདཱནཔཙྩཡཱ བྷཝོཏི ཙེཏྠ ཨུཔཔཏྟིབྷཝོཔི ཨདྷིཔྤེཏོ. བྷཝཔཙྩཡཱ ཛཱཏཱིཏི ཀམྨབྷཝོཝ. སོ ཧི ཛཱཏིཡཱ པཙྩཡོ ཧོཏི, ན ཨིཏརོ. སོ ཧི པཋམཱབྷིནིབྦཏྟཀྑནྡྷསབྷཱཝོ ཛཱཏིཡེཝ, ན ཙ ¶ ཏདེཝ ཏསྶ ཀཱརཎཾ ཡུཏྟཾ. ཏེསཾ ཏེསཾ སཏྟཱནཾ ཏཾཏཾགཏིཨཱདཱིསུ ཨཏྟབྷཱཝཔཊིལཱབྷོ ཛཱཏི. ཏཐཱནིབྦཏྟསྶ ཙ ཨཏྟབྷཱཝསྶ པུརཱཎབྷཱཝོ ཛརཱ. ཨེཏསྶེཝ ཨེཀབྷཝཔརིཙྪིནྣསྶ པརིཡོསཱནཾ མརཎཾ. ཉཱཏིབྱསནཱདཱིཧི ཕུཊྛསྶ ཙིཏྟསནྟཱཔོ སོཀོ. ཏསྶེཝ ཝཙཱིཔལཱཔོ པརིདེཝོ. ཀཱཡིཀདུཀྑཝེདནཱ ¶ དུཀྑཾ. མཱནསིཀདུཀྑཝེདནཱ དོམནསྶཾ. ཉཱཏིབྱསནཱདཱིཧི ཕུཊྛསྶ ཨདྷིམཏྟཙེཏོདུཀྑཔྤབྷཱཝིཏོ བྷུསོ ཨཱཡཱསོ ཨུཔཱཡཱསོ.

ཨེཏྠ ཙ སཏིཔི ཝཏྠཱརམྨཎཱདིཀེ པཙྩཡནྟརེ ཨཝིཛྫཱདིཨེཀེཀཔཙྩཡགྒཧཎཾ པདྷཱནབྷཱཝཏོ, པཱཀཊབྷཱཝཏོ ཙཱཏི དཊྛབྦཾ. ཨེཏྠ ཙ ཨཝིཛྫཱནུསཡིཏེཡེཝ སནྟཱནེ སངྑཱརཱནཾ ཝིཔཱཀདྷམྨབྷཱཝེན པཝཏྟནཏོ ཨཝིཛྫཱཔཙྩཡཱསངྑཱརཱསམྦྷཝནྟི, ཝིཉྙཱཎཉྩ སངྑཱརཛནིཏཾ ཧུཏྭཱ བྷཝནྟརེ པཏིཊྛཱཏི. ན ཧི ཛནཀཱབྷཱཝེ ཏསྶུཔྤཏྟི སིཡཱ, ཏསྨཱ སངྑཱརཔཙྩཡཱ ཝིཉྙཱཎཾ. ནཱམརཱུཔཉྩ པུབྦངྒམཱདྷིཊྛཱནབྷཱུཏཝིཉྙཱཎུཔཏྠདྡྷཾ པཊིསནྡྷིཔཝཏྟཱིསུ པཏིཊྛཧཏཱིཏི ཝིཉྙཱཎཔཙྩཡཱནཱམརཱུཔཾ, སལཱ༹ཡཏནཉྩ ནཱམརཱུཔནིསྶཡམེཝ ཚབྦིདྷཕསྶསྶ དྭཱརབྷཱཝེན ཡཐཱརཧཾ པཝཏྟཏི, ནོ ཨཉྙཐཱཏི ནཱམརཱུཔཔཙྩཡཱ སལཱ༹ཡཏནཾ. ཕསྶོ ཙ སལཱ༹ཡཏནསམྦྷཝེཡེཝ ཨཱརམྨཎཾ ཕུསཏི. ན ཧི དྭཱརཱབྷཱཝེ ཏསྶུཔྤཏྟི སིཡཱཏི སལཱ༹ཡཏནཔཙྩཡཱ ཕསྶོ. ཨིཊྛཱནིཊྛམཛ྄ཛྷཏྟཉྩ ཨཱརམྨཎཾ ཕུསནྟོཡེཝ ཝེདནཾ ཝེདཡཏི, ནོ ཨཉྙཐཱཏི ཕསྶཔཙྩཡཱ ཝེདནཱ. ཝེདནཱིཡེསུ ཙ དྷམྨེསུ ཨསྶཱདཱནུཔསྶིནོ ཝེདནཱཧེཏུཀཱ ཏཎྷཱ སམུཊྛཱཏཱིཏི ཝེདནཱཔཙྩཡཱ ཏཎྷཱ. ཏཎྷཱསིནེཧཔིཔཱསིཏཱཡེཝ ཙ ཨུཔཱདཱནིཡེསུ དྷམྨེསུ ཨུཔཱདཱཡ དལ༹ྷབྷཱཝཱཡ སཾཝཏྟནྟི. ཏཎྷཱཡ ཧི རཱུཔཱདཱིནི ཨསྶཱདེཏྭཱ ཨསྶཱདེཏྭཱ ཀཱམེསུ པཱཏབྱཏཾ ཨཱཔཛྫནྟཱིཏི ཏཎྷཱ ཀཱམུཔཱདཱནསྶ པཙྩཡོ. ཏཐཱ རཱུཔཱདིབྷེདེགདྷིཏོ ‘‘ནཏྠི དིནྣ’’ནྟྱཱདིནཱ མིཙྪཱདསྶནཾ སཾསཱརཏོ མུཙྩིཏུཀཱམོ ཨསུདྡྷིམགྒེ སུདྡྷིམགྒཔརཱམཱསཾ ཁནྡྷེསུ ཨཏྟཏྟནིཡགཱཧབྷཱུཏཾ ཨཏྟཝཱདདསྶནདྭཡཉྩ གཎྷཱཏི, ཏསྨཱ དིཊྛུཔཱདཱདཱིནམྤི པཙྩཡོཏི ཏཎྷཱཔཙྩཡཱ ཨུཔཱདཱནཾ. ཡཐཱརཧཾ སམྤཡོགཱནུསཡཝསེན ཨུཔཱདཱནཔཏིཊྛིཏཱཡེཝ སཏྟཱ ཀམྨཱཡཱུཧནཱཡ སཾཝཏྟནྟཱིཏི ཨུཔཱདཱནཾ བྷཝསྶ པཙྩཡོ. ཨུཔཔཏྟིབྷཝསངྑཱཏཱ ཙ ཛཱཏི ཀམྨབྷཝཧེཏུཀཱཡེཝ ¶ . བཱིཛཏོ ཨངྐུརོ ཝིཡ ཏཏྠ ཏཏྠ སམུཔལབྦྷཏཱིཏི བྷཝོ ཛཱཏིཡཱ པཙྩཡོ ནཱམ. སཏི ཙ ཛཱཏིཡཱ ཨེཝ ཛརཱམརཎསམྦྷཝོ. ན ཧི ཨཛཱཏཱནཾ ཛརཱམརཎསམྦྷཝོ ཧོཏཱིཏི ཛཱཏི ཛརཱམརཎཱནཾ པཙྩཡོཏི ཨེཝམེཏེསཾ ཏབྦྷཱཝབྷཱཝཱིབྷཱཝོ དཊྛབྦོ.

ཨེཝམེཏསྶ ཀེཝལསྶ དུཀྑཀྑནྡྷསྶ སམུདཡོ ཧོཏཱིཏི ཡཐཱཝུཏྟེན པཙྩཡཔརམྤརཝིདྷིནཱ, ན ¶ པན ཨིསྶརནིམྨཱནཱདཱིཧི ཨེཏསྶ ཝཊྚསངྑཱཏསྶ ཀེཝལསྶ སུཁཱདཱིཧི ཨསམྨིསྶསྶ, སཀལསྶ ཝཱ དུཀྑཀྑནྡྷསྶ དུཀྑརཱསིསྶ ན སུཁསུབྷཱདཱིནཾ སམུདཡོ ནིབྦཏྟི ཧོཏི. ཨེཏྠ ཨིམསྨིཾ པཙྩཡསངྒཧཱདྷིཀཱརེ.

༥. ཨཏཏི སཏཏཾ གཙྪཏི པཝཏྟཏཱིཏི ཨདྡྷཱ, ཀཱལོ.

༦. ཨཝིཛྫཱསངྑཱརཱ ཨཏཱིཏོ ཨདྡྷཱ ཨཏཱིཏབྷཝཔརིཡཱཔནྣཧེཏཱུནམེཝེཏྠ ཨདྷིཔྤེཏཏྟཱ, ཨདྡྷཱགྒཧཎེན ཙ ཨཝིཛྫཱདཱིནཾ དྷམྨཱནམེཝ གཧཎཾ ཏབྦིནིམུཏྟསྶ ཀསྶཙི ཀཱལསྶ ཨནུཔལབྦྷནཏོ. ནིརུདྡྷཱནུཔྤཱདཱ ཨེཝ ཧི དྷམྨཱ ཨཏཱིཏཱནཱགཏཀཱལཝསེན ཨུཔྤཱདཱདིཀྑཎཏྟཡཔརིཡཱཔནྣཱ ཙ པཙྩུཔྤནྣཀཱལཝསེན ཝོཧརཱིཡནྟི. ཛཱཏིཛརཱམརཎཾ ཨནཱགཏོ ཨདྡྷཱ པཙྩུཔྤནྣཧེཏུཏོ ཨནཱགཏེ ནིབྦཏྟནཏོ. མཛ྄ཛྷེ པཙྩུཔྤནྣོ ཨདྡྷཱ ཨཏཱིཏཧེཏུཏོ ཨིདྷ ནིབྦཏྟནཀཕལསབྷཱཝཏྟཱ, ཨནཱགཏཕལསྶ ཨིདྷ ཧེཏུསབྷཱཝཏྟཱ ཙ མཛ྄ཛྷེ ཝིཉྙཱཎཱདཱིནི ཨཊྛངྒཱནི པཙྩུཔྤནྣོ ཨདྡྷཱ.

༨. ནནུ སོཀཔརིདེཝཱདཡོཔི ཨངྒབྷཱཝེན ཝཏྟབྦཱཏི ཨཱཧ ‘‘སོཀཱདིཝཙན’’ནྟྱཱདི. སོཀཱདིཝཙནཾ ཛཱཏིཡཱ ནིསྶནྡསྶ ཨམུཁྱཕལམཏྟསྶ ནིདསྶནཾ, ན པན ཝིསུཾ ཨངྒདསྶནནྟྱཏྠོ.

༩. ཏཎྷུཔཱདཱནབྷཝཱཔི ¶ གཧིཏཱ ཧོནྟཱིཏི ཀིལེསབྷཱཝསཱམཉྙཏོ ཨཝིཛྫཱགྒཧཎེན ཏཎྷུཔཱདཱནཱནི, ཀམྨབྷཝསཱམཉྙཏོ སངྑཱརགྒཧཎེན ཀམྨབྷཝོ གཧིཏོ. ཏཐཱ ཏཎྷུཔཱདཱནབྷཝགྒཧཎེན ཙ ཨཝིཛྫཱསངྑཱརཱ གཧིཏཱཏི སམྦནྡྷོ. ཨེཏྠཱཔི ཝུཏྟནཡེན ཏེསཾ གཧཎེན ཏེསཾ སངྒཧོ དཊྛབྦོ, ཝིཉྙཱཎནཱམརཱུཔསལཱ༹ཡཏནཕསྶཝེདནཱནཾ ཛཱཏིཛརཱབྷངྒཱཝ ཛཱཏིཛརཱམརཎནྟི ཙ ཝུཏྟཱཏི ཨཱཧ ‘‘ཛཱཏིཛརཱམརཎགྒཧཎེནཱ’’ཏྱཱདི.

༡༠. ཨཏཱིཏེ ཧེཏཝོ པཉྩཱཏི སརཱུཔཏོ ཝུཏྟཱནཾ དྭིནྣཾ ཨཝིཛྫཱསངྑཱརཱནཾ, སངྒཧཝསེན གཧིཏཱནཾ ཏིཎྞཾ ཏཎྷུཔཱདཱནབྷཝཱནཉྩ ཝསེན པཙྩུཔྤནྣཕལསྶ པཙྩཡཱ ཨཏཱིཏབྷཝེ ནིབྦཏྟཱ ཧེཏཝོ པཉྩ, ཨིདཱནི ཕལཔཉྩཀནྟི ཨཏཱིཏཧེཏུཔཙྩཡཱ ཨིདྷ པཙྩུཔྤནྣེ ནིབྦཏྟཾ ཝིཉྙཱཎཱདིཕལཔཉྩཀཾ. ཨིདཱནི ཧེཏཝོ པཉྩཱཏི སརཱུཔཏོ ཝུཏྟཱནཾ ཏཎྷཱདཱིནཾ ཏིཎྞཾ, སངྒཧཏོ ལདྡྷཱནཾ ¶ ཨཝིཛྫཱསངྑཱརཱནཾ དྭིནྣཉྩ ཝསེན ཨཱཡཏིཾ ཕལསྶ པཙྩཡཱ ཨིདཱནི ཧེཏཝོ པཉྩ. ཨཱཡཏིཾ ཕལཔཉྩཀནྟི ཛཱཏིཛརཱམརཎགྒཧཎེན ཝུཏྟཾ པཙྩུཔྤནྣཧེཏུཔཙྩཡཱ ཨནཱགཏེ ནིབྦཏྟནཀཝིཉྙཱཎཱདིཕལཔཉྩཀནྟི ཨེཝཾ ཝཱིསཏི ཨཏཱིཏཱདཱིསུ ཏཏྠ ཏཏྠ ཨཱཀིརིཡནྟཱིཏི ཨཱཀཱརཱ.

ཨཏཱིཏཧེཏཱུནཾ, ཨིདཱནི ཕལཔཉྩཀསྶ ཙ ཨནྟརཱ ཨེཀོ སནྡྷི, ཨིདཱནི ཕལཔཉྩཀསྶ, ཨིདཱནི ཧེཏཱུནཉྩ ཨནྟརཱ ཨེཀོ, ཨིདཱནི ཧེཏཱུནཾ, ཨཱཡཏིཾ ཕལསྶ ཙ ཨནྟརཱ ཨེཀོཏི ཨེཝཾ ཏིསནྡྷི. ཝུཏྟཉྷེཏཾ – ‘‘སངྑཱརཝིཉྙཱཎཱནམནྟརཱ ཨེཀོ, ཝེདནཱཏཎྷཱནམནྟརཱ ཨེཀོ, བྷཝཛཱཏཱིནམནྟརཱ ཨེཀོ སནྡྷཱི’’ཏི. ཨེཏྠ ཧི ཧེཏུཏོཕལསྶ ཨཝིཙྪེདཔྤཝཏྟིབྷཱཝཏོ ཧེཏུཕལསམྦནྡྷབྷཱུཏོ པཋམོ སནྡྷི, ཏཐཱ ཏཏིཡོ, དུཏིཡོ པན ཕལཏོ ཧེཏུནོ ཨཝིཙྪེདཔྤཝཏྟིབྷཱཝཏོ ཕལཧེཏུསམྦནྡྷབྷཱུཏོ. ཕལབྷཱུཏོཔི ཧི ¶ དྷམྨོ ཨཉྙསྶ ཧེཏུསབྷཱཝསྶ དྷམྨསྶ པཙྩཡོཏི. སངྑིཔཱིཡནྟི ཨེཏྠ ཨཝིཛྫཱདཡོ, ཝིཉྙཱཎཱདཡོ ཙཱཏི སངྑེཔོ, ཨཏཱིཏཧེཏུ, ཨེཏརཧི ཝིཔཱཀོ, ཨེཏརཧི ཧེཏུ ཨཱཡཏིཾ ཝིཔཱཀོཏི ཙཏྟཱརོ སངྑེཔཱཏི ཙཏུསངྑེཔཱ.

༡༡. ཀམྨབྷཝསངྑཱཏོ བྷཝེཀདེསོཏི ཨེཏྠ ཨཱཡཏིཾ པཊིསནྡྷིཡཱ པཙྩཡཙེཏནཱ བྷཝོ ནཱམ, པུརིམཀམྨབྷཝསྨིཾ ཨིདྷ པཊིསནྡྷིཡཱ པཙྩཡཙེཏནཱ སངྑཱརཱཏི ཝེདིཏབྦཱ. ཨཝསེསཱ ཙཱཏི ཝིཉྙཱཎཱདིཔཉྩཀཛཱཏིཛརཱམརཎཝསེན སཏྟཝིདྷཱ པཙྩུཔྤནྣཕལཝསེན ཝུཏྟདྷམྨཱ. ཨུཔཔཏྟིབྷཝསངྑཱཏོ བྷཝེཀདེསོཏི པན ཨནཱགཏཔརིཡཱཔནྣཱ ཝེདིཏབྦཱ. བྷཝ-སདྡེན ཀམྨབྷཝསྶཔི ཝུཙྩམཱནཏྟཱ བྷཝེཀདེས-སདྡོ ཝུཏྟོ.

༡༢. པུབྦནྟསྶ ཨཝིཛྫཱ མཱུལཾ. ཨཔརནྟསྶ ཏཎྷཱ མཱུལནྟི ཨཱཧ ཨཝིཛྫཱཏཎྷཱཝསེན དྭེ མཱུལཱནཱི’’ཏི.

༡༣. ཏེསམེཝ ཨཝིཛྫཱཏཎྷཱསངྑཱཏཱནཾ ཝཊྚམཱུལཱནཾ ནིརོདྷེན ཨནུཔྤཱདདྷམྨཏཱཔཏྟིཡཱ སཙྩཔྤཊིཝེདྷཏོ སིདྡྷཱཡ ཨཔྤཝཏྟིཡཱ ཝཊྚཾ ནིརུཛ྄ཛྷཏི. ཨབྷིཎྷསོ ཨབྷིཀྑཎཾ ཛརཱམརཎསངྑཱཏཱཡ མུཙྪཱཡ པཱིལི༹ཏཱནཾ སཏྟཱནཾ སོཀཱདིསམཔྤིཏཱནཾ ཀཱམཱསཝཱདིཨཱསཝཱནཾ སམུཔྤཱདཏོ པུན ཨཝིཛྫཱ ཙ པཝཏྟཏི. ‘‘ཨཱསཝསམུདཡཱ ཨཝིཛྫཱསམུདཡོ’’ཏི (མ. ནི. ༡.༡༠༣) ཧི ཝུཏྟཾ. ཨེཏེན ཨཝིཛྫཱཡཔི པཙྩཡོ དསྶིཏོ ཧོཏི, ཨིཏརཐཱ པཊིཙྩསམུཔྤཱདཙཀྐཾ ¶ ཨབདྡྷཾ སིཡཱཏི. ཨིཙྩེཝཾ ཝུཏྟནཡེན ཨཱབདྡྷཾ ཨཝིཙྪིནྣཾ ཨནཱདིཀཾ ཨཱདིརཧིཏཾ ཏིབྷཱུམཀཔརིཡཱཔནྣཏྟཱ ཏེབྷཱུམཀཾ ཀིལེསཀམྨཝིཔཱཀཝསེན ཏིཝཊྚབྷཱུཏཾ པཊིཙྩསམུཔྤཱདོཏི པཊྛཔེསི པཉྙཔེསི མཧཱམུནི སམྨཱསམྦུདྡྷོ.

པཊིཙྩསམུཔྤཱདནཡཝཎྞནཱ ནིཊྛིཏཱ.

པཊྛཱནནཡཝཎྞནཱ

༡༤. ཨེཝཾ ¶ པཊིཙྩསམུཔྤཱདནཡཾ ཝིབྷཱགཏོ དསྶེཏྭཱ ཨིདཱནི པཊྛཱནནཡཾ དསྶེཏུཾ ‘‘ཧེཏུཔཙྩཡོ’’ཏྱཱདི ཝུཏྟཾ. ཏཏྠ ཧིནོཏི པཏིཊྛཱཏི ཨེཏེནཱཏི ཧེཏུ. ཨནེཀཏྠཏྟཱ དྷཱཏུསདྡཱནཾ ཧི-སདྡོ ཨིདྷ པཏིཊྛཏྠོཏི དཊྛབྦོ. ཧིནོཏི ཝཱ ཨེཏེན ཀམྨནིདཱནབྷཱུཏེན ཨུདྡྷཾ ཨོཛཾ ཨབྷིཧརནྟེན མཱུལེན ཝིཡ པཱདཔོ ཏཔྤཙྩཡཾ ཕལཾ གཙྪཏི པཝཏྟཏི ཝུདྡྷིཾ ཝིརཱུལ༹ྷིཾ ཨཱཔཛྫཏཱིཏི ཧེཏུ. ཧེཏུ ཙ སོ པཙྩཡོ ཙཱཏི ཧེཏུཔཙྩཡོ. ཧེཏུ ཧུཏྭཱ པཙྩཡོ, ཧེཏུབྷཱཝེན པཙྩཡོཏི ཝུཏྟཾ ཧོཏི. མཱུལཊྛེན ཧེཏུ, ཨུཔཀཱརཊྛེན པཙྩཡོཏི སངྑེཔཏོ མཱུལཊྛེན ཨུཔཀཱརཀོ དྷམྨོ ཧེཏུཔཙྩཡོ. སོ པན པཝཏྟེ ཙིཏྟསམུཊྛཱནཱནཾ, པཊིསནྡྷིཡཾ ཀམྨསམུཊྛཱནཱནཉྩ རཱུཔཱནཾ ཨུབྷཡཏྠ སམྤཡུཏྟཱནཾ ནཱམདྷམྨཱནཉྩ རུཀྑསྶ མཱུལཱནི ཝིཡ སུཔྤཏིཊྛིཏབྷཱཝསཱདྷནསངྑཱཏམཱུལཊྛེན ཨུཔཀཱརཀཱ ཚ དྷམྨཱཏི དཊྛབྦཾ.

ཨཱལམྦཱིཡཏི དུབྦལེན ཝིཡ དཎྜཱདིཀཾ ཙིཏྟཙེཏསིཀེཧི གཡ྄ཧཏཱིཏི ཨཱརམྨཎཾ. ཙིཏྟཙེཏསིཀཱ ཧི ཡཾ ཡཾ དྷམྨཾ ཨཱརབྦྷ པཝཏྟནྟི, ཏེ ཏེ དྷམྨཱ ཏེསཾ ཏེསཾ དྷམྨཱནཾ ཨཱརམྨཎཔཙྩཡོ ནཱམ. ན ཧི སོ དྷམྨོ ཨཏྠི, ཡོ ཙིཏྟཙེཏསིཀཱནཾ ཨཱརམྨཎཔཙྩཡབྷཱཝཾ ན གཙྪེཡྻ. ཨཏྟཱདྷཱིནཔྤཝཏྟཱིནཾ པཏིབྷཱུཏོ པཙྩཡོ ཨདྷིཔཏིཔཙྩཡོ.

ན ཝིཛྫཏི པཙྩཡུཔྤནྣེན སཧ ཨནྟརཾ ཨེཏསྶ པཙྩཡསྶཱཏི ཨནནྟརཔཙྩཡོ. སཎྛཱནཱབྷཱཝེན སུཊྛུ ཨནནྟརཔཙྩཡོ སམནནྟརཔཙྩཡོ. ཨཏྟནོ ཨཏྟནོ ཨནནྟརཾ ཨནུརཱུཔཙིཏྟུཔྤཱདཛནནསམཏྠོ པུརིམཔུརིམནིརུདྡྷོ དྷམྨོ ‘‘ཨནནྟརཔཙྩཡོ’’, ‘‘སམནནྟརཔཙྩཡོ’’ཏི ཙ ¶ ཝུཙྩཏི. བྱཉྫནམཏྟེནེཝ ཧི ནེསཾ ཝིསེསོ. ཨཏྠཏོ པན ཨུབྷཡམྤི སམནནྟརནིརུདྡྷསྶེཝཱདྷིཝཙནཾ. ན ཧི ཏེསཾ ཨཏྠཏོ བྷེདོ ཨུཔལབྦྷཏི ¶ . ཡཾ པན ཀེཙི ཝདནྟི ‘‘ཨཏྠཱནནྟརཏཱཡ ཨནནྟརཔཙྩཡོ, ཀཱལཱནནྟརཏཱཡ སམནནྟརཔཙྩཡོ’’ཏི, ཏཾ ‘‘ནིརོདྷཱ ཝུཊྛཧནྟསྶ ནེཝསཉྙཱནཱསཉྙཱཡཏནཾ ཕལསམཱཔཏྟིཡཱ སམནནྟརཔཙྩཡེན པཙྩཡོ’’ཏྱཱདཱིཧི (པཊྛཱ. ༡.༡.༤༡༧) ཝིརུཛ྄ཛྷཏི. ནེཝསཉྙཱནཱསཉྙཱཡཏནཾ ཧི སཏྟཱཧཱདིཀཱལཾ ནིརུདྡྷཾ ཕལསམཱཔཏྟིཡཱ སམནནྟརཔཙྩཡོ, ཏསྨཱ ཨབྷིནིཝེསཾ ཨཀཏྭཱ བྱཉྫནམཏྟཏོཝེཏྠ ནཱནཱཀརཎཾ པཙྩེཏབྦཾ, ན ཨཏྠཏོ. པུབྦདྷམྨནིརོདྷསྶ ཧི པཙྪཱཛཱཏདྷམྨུཔྤཱདནསྶ ཙ ཨནྟརཱབྷཱཝེན ཨུཔྤཱདནསམཏྠཏཱཡ ནིརོདྷོ ཨནནྟརཔཙྩཡཏཱ, ‘‘ཨིདམིཏོ ཨུདྡྷཾ, ཨིདཾ ཧེཊྛཱ, ཨིདཾ སམནྟཏོ’’ཏི ཨཏྟནཱ ཨེཀཏྟཾ ཨུཔནེཏྭཱ ཝིཡ སུཊྛུ ཨནནྟརབྷཱཝེན ཨུཔྤཱདེཏུཾ སམཏྠཾ ཧུཏྭཱ ནིརོདྷོ སམནནྟརཔཙྩཡཏཱཏི ཨེཝཾ བྱཉྫནམཏྟཏོཝ བྷེདོ. ནིརོདྷཔཙྩཡསྶཔི ཧི ནེཝསཉྙཱནཱསཉྙཱཡཏནསྶ ཨསཉྙུཔྤཏྟིཡཱ པུརིམསྶ ཙ ཙུཏིཙིཏྟསྶ ཀཱལནྟརེཔི ཨུཔྤཛྫནྟཱནཾ ཕལཔཊིསནྡྷཱིནཾ ཨནྟརཱ སམཱནཛཱཏིཡེན ཨརཱུཔདྷམྨེན བྱཝདྷཱནཱབྷཱཝཏོ བྷིནྣཛཱཏིཀཱནཉྩ རཱུཔདྷམྨཱནཾ བྱཝདྷཱནཀརཎེ ཨསམཏྠཏཱཡ ནིརནྟརུཔྤཱདནེ ཨེཀཏྟཾ ཨུཔནེཏྭཱ ཝིཡ ཨུཔྤཱདནེ ཙ སམཏྠཏཱ ཨཏྠཱིཏི ཏེསམྤི ཨནནྟརསམནནྟརཔཙྩཡཏཱ ལབྦྷཏི, ཏསྨཱ དྷམྨཏོ ཨཝིསེསེཔི ཏཐཱ ཏཐཱ བུཛ྄ཛྷནཀཱནཾ ཝེནེཡྻཱནཾ ཝསེན ཨུཔསགྒཏྠཝིསེསམཏྟཏོཝ བྷེདོ པཙྩེཏབྦོཏི.

ཨཏྟནོ ཨནུཔྤཏྟིཡཱ སཧུཔྤནྣཱནམྤི ཨནུཔྤཏྟིཏོ པཀཱསསྶ པདཱིཔོ ཝིཡ སཧུཔྤནྣཱནཾ སཧུཔྤཱདབྷཱཝེན པཙྩཡོ སཧཛཱཏཔཙྩཡོ, ཨརཱུཔིནོ ཙཏུཀྑནྡྷཱ, ཙཏྟཱརོ མཧཱབྷཱུཏཱ, པཊིསནྡྷིཀྑཎེ ཝཏྠུཝིཔཱཀཱ ཙ དྷམྨཱ.

ཨཉྙམཉྙཾ ཨུཔཏྠམྦྷཡམཱནཾ ཏིདཎྜཾ ཝིཡ ཨཏྟནོ ཨུཔཀཱརཀདྷམྨཱནཾ ཨུཔཏྠམྦྷཀབྷཱཝེན པཙྩཡོ ཨཉྙམཉྙཔཙྩཡོ. ཨཉྙམཉྙཏཱཝསེནེཝ ¶ ཙ ཨུཔཀཱརཀཏཱ ཨཉྙམཉྙཔཙྩཡཏཱ, ན སཧཛཱཏམཏྟེནཱཏི ཨཡམེཏེསཾ དྭིནྣཾ ཝིསེསོ. ཏཐཱ ཧི སཧཛཱཏཔཙྩཡབྷཱཝཱིཡེཝ ཀོཙི ཨཉྙམཉྙཔཙྩཡོ ན ཧོཏི ཙིཏྟཛརཱུཔཱནཾ སཧཛཱཏཔཙྩཡབྷཱཝིནོ ནཱམསྶ ཨུཔཱདཱརཱུཔཱནཾ སཧཛཱཏཔཙྩཡབྷཱཝཱིནཾ མཧཱབྷཱུཏཱནཉྩ ཨཉྙམཉྙཔཙྩཡབྷཱཝསྶ ཨནུདྡྷཊཏྟཱ. ཡདི ཧི སཧཛཱཏབྷཱཝེནེཝ ཨཏྟནོ ཨུཔཀཱརཀཱནཾ ཨུཔཀཱརཀཏཱ ཨཉྙམཉྙཔཙྩཡཏཱ སིཡཱ, ཏདཱ སཧཛཱཏཨཉྙམཉྙཔཙྩཡེཧི སམཱནེཧི བྷཝིཏབྦནྟི.

ཙིཏྟཀམྨསྶ ¶ པཊོ ཝིཡ སཧཛཱཏནཱམརཱུཔཱནཾ ནིསྶཡབྷཱུཏཱ ཙཏུཀྑནྡྷཱ, ཏརུཔབྦཏཱདཱིནཾ པཐཝཱི ཝིཡ ཨཱདྷཱརཎཏོཡེཝ སཧཛཱཏརཱུཔསཏྟཝིཉྙཱཎདྷཱཏཱུནཾ ཡཐཱཀྐམཾ ནིསྶཡཱ བྷཱུཏརཱུཔཾ, ཝཏྠུ ཙཱཏི ཨིམེ ནིསྶཡཔཙྩཡོ ནཱམ ནིསྶཱིཡཏི ནིསྶིཏཀེཧཱིཏི ཀཏྭཱ, བལཝབྷཱཝེན ནིསྶཡོ པཙྩཡོ ཨུཔནིསྶཡཔཙྩཡོ ཨུཔ-སདྡསྶ ཨཏིསཡཛོཏཀཏྟཱ, ཏསྶ པན བྷེདཾ ཝཀྑཏི.

ཚ ཝཏྠཱུནི, ཚ ཨཱརམྨཎཱནི ཙཱཏི ཨིམེ པཙྩཡུཔྤནྣཏོ པཋམཾ ཨུཔྤཛྫིཏྭཱ པཝཏྟམཱནབྷཱཝེན ཨུཔཀཱརཀོ པུརེཛཱཏཔཙྩཡོ. པཙྪཱཛཱཏཔཙྩཡེ ཨསཏི སནྟཱནཊྛིཏིཧེཏུབྷཱཝཾ ཨཱགཙྪནྟསྶ ཀཱཡསྶ ཨུཔཏྠམྦྷནབྷཱཝེན ཨུཔཀཱརཀཱ པཙྪཱཛཱཏཱ ཙིཏྟཙེཏསིཀཱ དྷམྨཱ པཙྪཱཛཱཏཔཙྩཡོ. སོ གིཛ྄ཛྷཔོཏཀསརཱིརཱནཾ ཨཱཧཱརཱསཱ ཙེཏནཱ ཝིཡ དཊྛབྦོ.

པུརིམཔུརིམཔརིཙིཏགནྠོ ཝིཡ ཨུཏྟརཨུཏྟརགནྠསྶ ཀུསལཱདིབྷཱཝེན ཨཏྟསདིསསྶ པགུཎབལཝབྷཱཝཝིསིཊྛཨཏྟསམཱནཛཱཏིཡཏཱགཱཧཎཾ ཨཱསེཝནཾ, ཏེན པཙྩཡཱ སཛཱཏིཡདྷམྨཱནཾ སཛཱཏིཡདྷམྨཱཝ ཨཱསེཝནཔཙྩཡོ. བྷིནྣཛཱཏིཀཱ ཧི བྷིནྣཛཱཏིཀེཧི ཨཱསེཝནཔགུཎེན པགུཎབལཝབྷཱཝཝིསིཊྛཾ ཀུསལཱདིབྷཱཝསངྑཱཏཾ ཨཏྟནོ གཏིཾ ¶ གཱཧཱཔེཏུཾ ན སཀྐོནྟི, ན ཙ སཡཾ ཏཏོ གཎྷནྟི, ཏེ པན ཨནནྟརཱཏཱིཏཱནི ལོཀིཡཀུསལཱཀུསལཱནི ཙེཝ ཨནཱཝཛྫནཀིརིཡཛཝནཱནི ཙཱཏི དཊྛབྦཾ. ཙིཏྟཔྤཡོགསངྑཱཏཀིརིཡཱབྷཱཝེན སཧཛཱཏཱནཾ ནཱནཱཀྑཎིཀཱནཾ ཝིཔཱཀཱནཾ, ཀཊཏྟཱརཱུཔཱནཉྩ ཨུཔཀཱརིཀཱ ཙེཏནཱ ཀམྨཔཙྩཡོ.

ཨཏྟནོ ནིརུསྶཱཧསནྟབྷཱཝེན སཧཛཱཏནཱམརཱུཔཱནཾ ནིརུསྶཱཧསནྟབྷཱཝཱཡ ཨུཔཀཱརཀཱ ཝིཔཱཀཙིཏྟཙེཏསིཀཱ ཝིཔཱཀཔཙྩཡོ. ཏེ ཧི པཡོགེན ཨསཱདྷེཏབྦཏཱཡ ཀམྨསྶ ཀཊཏྟཱ ནིཔྥཛྫམཱནམཏྟཏོ ནིརུསྶཱཧསནྟབྷཱཝཱ ཧོནྟི, ན ཀིལེསཝཱུཔསམསནྟབྷཱཝཱ. ཏཐཱ སནྟབྷཱཝཏོཡེཝ ཧི བྷཝངྒཱདཡོ དུབྦིཉྙེཡྻཱ. ཨབྷིནིཔཱཏསམྤཊིཙྪནསནྟཱིརཎམཏྟཱ པན ཝིཔཱཀཱ དུབྦིཉྙེཡྻཱཝ. ཛཝནཔྤཝཏྟིཡཱཝ ནེསཾ རཱུཔཱདིགྒཧིཏཏཱ ཝིཉྙཱཡཏི.

རཱུཔཱརཱུཔཱནཾ ཨུཔཏྠམྦྷཀཏྟེན ཨུཔཀཱརཀཱ ཙཏྟཱརོ ཨཱཧཱརཱ ཨཱཧཱརཔཙྩཡོ. སཏིཔི ཧི ཛནཀབྷཱཝེ ཨུཔཏྠམྦྷཀཏྟམེཝ ཨཱཧཱརསྶ པདྷཱནཀིཙྩཾ. ཛནཡནྟོཔི ཨཱཧཱརོ ཨཝིཙྪེདཝསེན ཨུཔཏྠམྦྷེནྟོ ཝ ཛནེཏཱིཏི ཨུཔཏྠམྦྷཀབྷཱཝོ ཝ ཨཱཧཱརབྷཱཝོ. ཏེསུ ཏེསུ ཀིཙྩེསུ པཙྩཡུཔྤནྣདྷམྨེཧི ཨཏྟཱནཾ ཨནུཝཏྟཱཔནསངྑཱཏཱདྷིཔཏིཡཊྛེན པཙྩཡོ ཨིནྡྲིཡཔཙྩཡོ.

ཨཱརམྨཎཱུཔནིཛ྄ཛྷཱནལཀྑཎཱུཔནིཛ྄ཛྷཱནཝསེན ¶ ཨུཔགནྟྭཱ ཨཱརམྨཎནིཛ྄ཛྷཱནཀཱ ཝིཏཀྐཱདཡོ ཛྷཱནཔཙྩཡོ. སུགཏིཏོ པུཉྙཏོ, དུགྒཧིཏོ པཱཔཏོ ཝཱ ནིཡྻཱནཊྛེན ཨུཔཀཱརཀཱ སམྨཱདིཊྛཱདཡོ མགྒཔཙྩཡོ.

པརམཏྠཏོ བྷིནྣཱཔི ཨེཀཱིབྷཱཝགཏཱ ཝིཡ ཨེཀུཔྤཱདཱདིབྷཱཝསངྑཱཏསམྤཡོགལཀྑཎེན ཨུཔཀཱརཀཱ ནཱམདྷམྨཱ ཝ སམྤཡུཏྟཔཙྩཡོ. ཨཉྙམཉྙསམྦནྡྷཏཱཡ ཡུཏྟཱཔི སམཱནཱ ཝིཔྤཡུཏྟབྷཱཝེན ¶ ཝིསཾསཊྛཏཱཡ ནཱནཏྟུཔགམནེན ཨུཔཀཱརཀཱ ཝཏྠུཙིཏྟཙེཏསིཀཱ ཝིཔྤཡུཏྟཔཙྩཡོ.

པཙྩུཔྤནྣསབྷཱཝསངྑཱཏེན ཨཏྠིབྷཱཝེན ཏཱདིསསྶེཝ དྷམྨསྶ ཨུཔཏྠམྦྷཀཏྟེན ཨུཔཀཱརཀཱ ‘‘སཧཛཱཏཾ པུརེཛཱཏ’’ནྟྱཱདིནཱ ཝཀྑམཱནདྷམྨཱ ཨཏྠིཔཙྩཡོ. སཏིཔི ཧི ཛནཀཏྟེ ཋིཏིཡཾཡེཝ སཱཏིསཡོ ཨཏྠིཔཙྩཡཱནཾ བྱཱཔཱརོཏི ཨུཔཏྠམྦྷཀཏཱཝ ཏེསཾ གཧིཏཱ. ཨེཀསྨིཾ ཕསྶཱདིསམུདཱཡེ པཝཏྟམཱནེ དུཏིཡསྶ ཨབྷཱཝཏོ ཨཏྟནོ ཋིཏིཡཱ ཨོཀཱསཾ ཨལབྷནྟཱནཾ ཨནནྟརམུཔྤཛྫམཱནཀཙིཏྟཙེཏསིཀཱནཾ ཨོཀཱསདཱནཝསེན ཨུཔཀཱརཀཱ ཨནནྟརནིརུདྡྷཱ ཙིཏྟཙེཏསིཀཱ ནཏྠིཔཙྩཡོ.

ཨཏྟནོ སབྷཱཝཱཝིགམནེན ཨཔྤཝཏྟམཱནཱནཾ ཝིགཏབྷཱཝེན ཨུཔཀཱརཀཱཡེཝ དྷམྨཱ ཝིགཏཔཙྩཡོ. ནིརོདྷཱནུཔགམནཝསེན ཨུཔཀཱརཀཱ ཨཏྠིཔཙྩཡཱ ཝ ཨཝིགཏཔཙྩཡོ. སསབྷཱཝཏཱམཏྟེན ཨུཔཀཱརཀཏཱ ཨཏྠིཔཙྩཡཏཱ, ནིརོདྷཱནུཔགམནཝསེན ཨུཔཀཱརཀཏཱ ཨཝིགཏཔཙྩཡཏཱཏི པཙྩཡཏཱཝིསེསོ ནེསཾ དྷམྨཱཝིསེསེཔི དཊྛབྦོ. དྷམྨཱནཉྷི སམཏྠཏཱཝིསེསཾ སབྦཱཀཱརེན ཉཏྭཱ བྷགཝཏཱ ཙཏུཝཱིསཏིཔཙྩཡཱ དེསིཏཱཏི བྷགཝཏི སདྡྷཱཡ ‘‘ཨེཝཾ ཝིསེསཱ ཨེཏེ དྷམྨཱ’’ཏི སུཏམཡཉཱཎཾ ཨུཔྤཱདེཏྭཱ ཙིནྟཱབྷཱཝནཱམཡཉཱཎེཧི ཏདབྷིསམཡཱཡ ཡོགོ ཀརཎཱིཡོ. ཨཝིསེསེཔི ཧི དྷམྨསཱམགྒིཡསྶ ཏཐཱ ཏཐཱ ཝིནེཏབྦཔུགྒལཱནཾ ཝསེན ཧེཊྛཱ ཝུཏྟོཔི པཙྩཡོ པུན པཀཱརནྟེན ཝུཙྩཏི ཨཧེཏུཀདུཀཾ ཝཏྭཱཔི ཧེཏུཝིཔྤཡུཏྟདུཀཾ ཝིཡཱཏི དཊྛབྦཾ.

༡༥. ནཱམཾ ཙཏུཀྑནྡྷསངྑཱཏཾ ནཱམཾ ཏཱདིསསྶེཝ ནཱམསྶ ཚདྷཱ ཚཧཱཀཱརེཧི པཙྩཡོ ཧོཏི, ཏདེཝ ནཱམརཱུཔཱིནཾ སམུདིཏཱནཾ ¶ པཉྩདྷཱ པཙྩཡོ ཧོཏི, རཱུཔསྶ པུན བྷཱུཏུཔཱདཱཡབྷེདསྶ ཨེཀདྷཱ པཙྩཡོ ཧོཏི, རཱུཔཉྩ ནཱམསྶ ཨེཀདྷཱ པཙྩཡོ, པཉྙཏྟིནཱམརཱུཔཱནི ནཱམསྶ དྭིདྷཱ དྭིཔྤཀཱརཱ ¶ པཙྩཡཱ ཧོནྟི, དྭཡཾ པན ནཱམརཱུཔདྭཡཾ སམུདིཏཾ དྭཡསྶ ཏཱདིསསྶེཝ ནཱམརཱུཔདྭཡསྶ ནཝདྷཱ པཙྩཡོ ཙེཏི ཨེཝཾ པཙྩཡཱ ཚབྦིདྷཱ ཋིཏཱ.

༡༦. ཝིཔཱཀབྱཱཀཏཾ ཀམྨཝསེན ཝིཔཱཀབྷཱཝཔྤཏྟཾ ཀམྨཝེགཀྑིཏྟཔཏིཏཾ ཝིཡ ཧུཏྭཱ པཝཏྟམཱནཾ ཨཏྟནོ སབྷཱཝཾ གཱཧེཏྭཱ པརིབྷཱཝེཏྭཱ ནེཝ ཨཉྙཾ པཝཏྟེཏི, ན ཙ པུརིམཝིཔཱཀཱནུབྷཱཝཾ གཧེཏྭཱ ཨུཔྤཛྫཏི. ‘‘ན མགྒཔཙྩཡཱ ཨཱསེཝནེ ཨེཀ’’ནྟི (པཊྛཱ. ༡.༡.༢༢༡) ཝཙནཏོ ཙ ཨཧེཏུཀཀིརིཡེསུ ཧསིཏུཔྤཱདསྶེཝ ཨཱསེཝནཏཱཨུདྡྷརཎེན ཨཱཝཛྫནདྭཡཾ ཨཱསེཝནཔཙྩཡོ ན ཧོཏི, ཏསྨཱ ཛཝནཱནེཝ ཨཱསེཝནཔཙྩཡབྷཱཝཾ གཙྪནྟཱིཏི ཨཱཧ ‘‘པུརིམཱནི ཛཝནཱནཱི’’ཏྱཱདི. ཨཝིསེསཝཙནེཔེཏྠ ལོཀིཡཀུསལཱཀུསལཱབྱཱཀཏཛཝནཱནེཝ དཊྛབྦཱནི ལོཀུཏྟརཛཝནཱནཾ ཨཱསེཝནབྷཱཝསྶ ཨནུདྡྷཊཏྟཱ.

ཨེཝཉྩ ཀཏྭཱ ཝུཏྟཾ པཊྛཱནཊྛཀཐཱཡཾ (པཊྛཱ. ཨཊྛ. ༡.༡༢) ‘‘ལོཀུཏྟརོ པན ཨཱསེཝནཔཙྩཡོ ནཱམ ནཏྠཱི’’ཏི. ཏཏྠ ཧི ཀུསལཾ བྷིནྣཛཱཏིཀསྶ པུརེཙརཏྟཱ ན ཏེན ཨཱསེཝནགུཎཾ གཎྷཱཔེཏི, ཕལཙིཏྟཱནི ཙ ཛཝནཝསེན ཨུཔྤཛྫམཱནཱནིཔི ཝིཔཱཀཱབྱཱཀཏེ ཝུཏྟནཡེན ཨཱསེཝནཾ ན གཎྷནྟི, ན ཙ ཨཉྙཾ གཱཧཱཔེནྟི. ཡམྤི ‘‘ཨཱསེཝནཝིནིམུཏྟཾ ཛཝནཾ ནཏྠཱི’’ཏི ཨཱཙརིཡདྷམྨཔཱལཏྠེརེན ཝུཏྟཾ, ཏམྤི ཡེབྷུཡྻཝསེན ཝུཏྟནྟི ཝིཉྙཱཡཏི. ཨིཏརཐཱ ཨཱཙརིཡསྶ ཨསམཔེཀྑིཏཱབྷིདྷཱཡཀཏྟཔྤསངྒོ སིཡཱ. མགྒོ པན གོཏྲབྷུཏོ ཨཱསེཝནཾ ན གཎྷཱཏཱིཏི ནཏྠི བྷཱུམིཨཱདིཝསེན ནཱནཱཛཱཏིཏཱཡ ཨནདྷིཔྤེཏཏྟཱ. ཏཐཱ ཧི ཝུཏྟཾ པཊྛཱནེ ‘‘གོཏྲབྷུ ¶ མགྒསྶ ཨཱསེཝནཔཙྩཡེན པཙྩཡོ, ཝོདཱནཾ མགྒསྶ ཨཱསེཝནཔཙྩཡེན པཙྩཡོ’’ཏི (པཊྛཱ. ༡.༡.༤༢༦). ཨེཀུཔྤཱདཱདིཙཏུབྦིདྷསམྤཡོགལཀྑཎཱབྷཱཝཏོ སཧུཔྤནྣཱནམྤི རཱུཔདྷམྨཱནཾ སམྤཡུཏྟཔཙྩཡཏཱ ནཏྠཱིཏི ཝུཏྟཾ ‘‘ཙིཏྟཙེཏསིཀཱ དྷམྨཱ ཨཉྙམཉྙ’’ནྟི.

༡༧. ཧེཏུཛྷཱནངྒམགྒངྒཱནི སཧཛཱཏཱནཾ ནཱམ རཱུཔཱནནྟི ཏཡོཔེཏེ པཊིསནྡྷིཡཾ ཀམྨསམུཊྛཱནཱནཾ, པཝཏྟིཡཾ ཙིཏྟསམུཊྛཱནཱནཉྩ རཱུཔཱནཾ, ཨུབྷཡཏྠ སཧཛཱཏཱནཾ ནཱམཱནཉྩ ཧེཏཱདིཔཙྩཡེན པཙྩཡཱ ཧོནྟི. ‘‘སཧཛཱཏརཱུཔནྟི ཧི སབྦཏྠ པཊིསནྡྷིཡཾ ཀམྨསམུཊྛཱནཱནཾ, པཝཏྟིཡཾ ཙིཏྟསམུཊྛཱནཱན’’ནྟི ཝཀྑཏི. སཧཛཱཏཱ ཙེཏནཱཏི ཨནྟམསོ ཙཀྑུཝིཉྙཱཎཱདཱིཧིཔི སཧཛཱཏཙེཏནཱ. སཧཛཱཏཱནཾ ནཱམ རཱུཔཱནནྟི སབྦཱཔི ཙེཏནཱ ནཱམཱནཾ, པཊིསནྡྷིསཧགཏཱ ཙེཏནཱ ཀམྨསམུཊྛཱནརཱུཔཱནཾ, པཝཏྟིཡཾ རཱུཔསམུཊྛཱཔཀཙིཏྟསཧགཏཱ ཙེཏནཱ ཙིཏྟསམུཊྛཱནརཱུཔཱནཉྩ. ནཱནཱཀྑཎིཀཱ ¶ ཙེཏནཱཏི ཝིཔཱཀཀྑཎཏོ ནཱནཱཀྑཎེ ཨཏཱིཏབྷཝཱདཱིསུ ནིབྦཏྟཱ ཀུསལཱཀུསལཙེཏནཱ. ནཱམརཱུཔཱནནྟི ཨུབྷཡཏྠཱཔི ནཱམརཱུཔཱནཾ. ཝིཔཱཀཀྑནྡྷཱཏི པཊིསནྡྷིཝིཉྙཱཎཱདིཀཱ ཝིཔཱཀཱ ཨརཱུཔཀྑནྡྷཱ. ཀམྨསམུཊྛཱནམྤི ཧི རཱུཔཾ ཝིཔཱཀཝོཧཱརཾ ན ལབྷཏི ཨརཱུཔདྷམྨབྷཱཝེན, སཱརམྨཎབྷཱཝེན ཙ ཀམྨསདིསེསུ ཨརཱུཔདྷམྨེསྭེཝ ཝིཔཱཀ-སདྡསྶ ནིརུལ༹ྷཏྟཱ.

༡༨. པུརེཛཱཏསྶ ཨིམསྶ ཀཱཡསྶཱཏི པཙྩཡདྷམྨཏོ པུརེ ཨུཔྤནྣསྶ ཨིམསྶ རཱུཔཀཱཡསྶ. ཀཐཾ པན པཙྩཡུཔྤནྣསྶ པུརེ ནིབྦཏྟིཡཾ པཙྪཱཛཱཏསྶ པཙྩཡཏཱཏི? ནནུ ཝུཏྟཾ ‘‘པཙྪཱཛཱཏཔཙྩཡེ ཨསཏི སནྟཱནཊྛིཏིཧེཏུཀབྷཱཝཾ ཨཱགཙྪནྟསྶཱ’’ཏི, ཏསྨཱ སནྟཱནཔྤཝཏྟསྶ ཧེཏུབྷཱཝུཔཏྠམྦྷནེ ཨིམསྶ བྱཱཔཱརོཏི ན ཀོཙི ཝིརོདྷོ.

༡༩. པཊིསནྡྷིཡཾ ¶ ཙཀྑཱདིཝཏྠཱུནཾ ཨསམྦྷཝཏོ, སཏི ཙ སམྦྷཝེ ཏཾཏཾཝིཉྙཱཎཱནཾ པཙྩཡབྷཱཝཱནུཔགམནཏོ, ཧདཡཝཏྠུནོ ཙ པཊིསནྡྷིཝིཉྙཱཎེན སཧུཔྤནྣསྶ པུརེཛཱཏཀཏཱབྷཱཝཏོ ཝུཏྟཾ ‘‘ཚཝཏྠཱུནི པཝཏྟིཡ’’ནྟི. ‘‘པཉྩཱརམྨཎཱནི པཉྩཝིཉྙཱཎཝཱིཐིཡཱ’’ཏི ཙ ཨིདཾ ཨཱརམྨཎཔུརེཛཱཏནིདྡེསེ ཨཱགཏཾ སནྡྷཱཡ ཝུཏྟཾ. པཉྷཱཝཱརེ པན ‘‘སེཀྑཱ ཝཱ པུཐུཛྫནཱ ཝཱ ཙཀྑུཾ ཨནིཙྩཏོ དུཀྑཏོ ཨནཏྟཏོ ཝིཔསྶནྟཱི’’ཏྱཱདིནཱ (པཊྛཱ. ༡.༡.༤༢༤) ཨཝིསེསེན པཙྩུཔྤནྣཙཀྑཱདཱིནམྤི གཧིཏཏྟཱ དྷམྨཱརམྨཎམྤི ཨཱརམྨཎཔུརེཛཱཏཾ མནོཝིཉྙཱཎཝཱིཐིཡཱ ལབྦྷཏི. ཨཏྠཏོ ཧེཏཾ སིདྡྷཾ, ཡཾ པཙྩུཔྤནྣདྷམྨཱརམྨཎཾ གཧེཏྭཱ མནོདྭཱརིཀཝཱིཐི པཝཏྟཏི, ཏཾ ཏསྶ ཨཱརམྨཎཔུརེཛཱཏཾ ཧོཏཱིཏི.

༢༢. པཀཏིཡཱ ཨེཝ པཙྩཡནྟརརཧིཏེན ཨཏྟནོ སབྷཱཝེནེཝ ཨུཔནིསྶཡོ པཀཏཱུཔནིསྶཡོ. ཨཱརམྨཎཱནནྟརེཧི ཨསཾམིསྶོ པུཐགེཝ ཀོཙི ཨུཔནིསྶཡོཏི ཝུཏྟཾ ཧོཏི. ཨཐ ཝཱ པཀཏོ ཨུཔནིསྶཡོ པཀཏཱུཔནིསྶཡོ. པཀཏོཏི ཙེཏྠ པ-ཀཱརོ ཨུཔསགྒོ, སོ ཨཏྟནོ ཕལསྶ ཨུཔྤཱདནསམཏྠབྷཱཝེན སནྟཱནེ ནིཔྥཱདིཏབྷཱཝཾ, ཨཱསེཝིཏབྷཱཝཉྩ དཱིཔེཏི, ཏསྨཱ ཨཏྟནོ སནྟཱནེ ནིཔྥནྣོ རཱགཱདི, སདྡྷཱདི, ཨུཔསེཝིཏོ ཝཱ ཨུཏུབྷོཛནཱདི པཀཏཱུཔནིསྶཡོ. ཏཐཱ ཙེཝ ནིདྡིསཏི.

༢༣. གརུཀཏནྟི གརུཾ ཀཏྭཱ པཙྩཝེཀྑིཏཾ. ཏཐཱ ཧི ‘‘དཱནཾ དཏྭཱ སཱིལཾ སམཱདིཡིཏྭཱ ¶ ཨུཔོསཐཀམྨཾ ཀཏྭཱ ཏཾ གརུཾ ཀཏྭཱ པཙྩཝེཀྑཏཱི’’ཏྱཱདིནཱ (པཊྛཱ. ༡.༡.༤༡༣) དཱནསཱིལཨུཔོསཐཀམྨཔུབྦེཀཏསུཙིཎྞཛྷཱནགོཏྲབྷུཝོདཱནམགྒཱདཱིནི གརུཾ ཀཏྭཱ པཙྩཝེཀྑཎཝསེན ཨསྶ ནིདྡེསོ པཝཏྟོ.

༢༤. ‘‘པུརིམཱ ¶ པུརིམཱ ཀུསལཱ ཁནྡྷཱ པཙྪིམཱནཾ པཙྪིམཱནཾ ཀུསལཱནཾ ཁནྡྷཱནཾ ཨུཔནིསྶཡཔཙྩཡེན པཙྩཡོ’’ཏྱཱདིནཱ (པཊྛཱ. ༡.༡.༤༢༣) ནཡེན ཨནནྟརཔཙྩཡེན སདྡྷིཾ ནཱནཏྟཾ ཨཀཏྭཱ ཨནནྟརཱུཔནིསྶཡསྶ ཨཱགཏཏྟཱ ཝུཏྟཾ ‘‘ཨནནྟརནིརུདྡྷཱ’’ཏྱཱདི. ཨེཝཾ སནྟེཔི ཨཏྟནོ ཨནནྟརཾ ཨནུརཱུཔཙིཏྟུཔྤཱདཝསེན ཨནནྟརཔཙྩཡོ, བལཝཀཱརཎཝསེན ཨནནྟརཱུཔནིསྶཡཔཙྩཡོཏི ཨཡམེཏེསཾ ཝིསེསོ.

༢༥. ཡཐཱརཧཾ ཨཛ྄ཛྷཏྟཉྩ བཧིདྡྷཱ ཙ རཱགཱདཡོ…པེ… སེནཱསནཉྩཱཏི ཡོཛནཱ. རཱགཱདཡོ ཧི ཨཛ྄ཛྷཏྟཾ ནིཔྥཱདིཏཱ, པུགྒལཱདཡོ བཧིདྡྷཱ སེཝིཏཱ. ཏཐཱ ཧི ཝུཏྟཾ ཨཱཙརིཡེན –

‘‘རཱགསདྡྷཱདཡོ དྷམྨཱ, ཨཛ྄ཛྷཏྟམནུཝཱསིཏཱ;

སཏྟསངྑཱརདྷམྨཱ ཙ, བཧིདྡྷོཔནིསེཝིཏཱ’’ཏི. (ནཱམ. པརི. ༨༢༧);

ཨཐ ཝཱ ཨཛ྄ཛྷཏྟཉྩ བཧིདྡྷཱ ཙ ཀུསལཱདིདྷམྨཱནནྟི ཡཐཱཋིཏཝསེནེཝ ཡོཛནཱ ཨཏྟནོ ཧི རཱགཱདཡོ ཙ ཨཏྟནོ ཀུསལཱདིདྷམྨཱནཾ ཀལྱཱཎམིཏྟསྶ སདྡྷཱདིཀེ ནིསྶཱཡ ཀུསལཾ ཀརོནྟཱནཾ པརེསཉྩ ནིསྶཡཱ ཧོནྟི.

ཏཏྠ ཀཱམརཱགཱདཡོ ནིསྶཱཡ ཀཱམབྷཝཱདཱིསུ ནིབྦཏྟནཏྠཾ, རཱགཱདིཝཱུཔསམཏྠཉྩ དཱནསཱིལཨུཔོསཐཛ྄ཛྷཱནཱབྷིཉྙཱཝིཔསྶནཱམགྒབྷཱཝནཱ, རཱགཱདིཧེཏུཀཱ ཙ ཨུཔརཱུཔརིརཱགཱདཡོ ཧོནྟཱིཏི ཡཐཱརཧཾ དཊྛབྦཾ. ཡཾ ཡཉྷི ནིསྶཱཡ ཡསྶ ཡསྶ སམྦྷཝོ, ཏཾ ཏཾ ཏསྶ ཏསྶ པཀཏཱུཔནིསྶཡོ ཧོཏི. པཙྩཡམཧཱཔདེསོ ཧེས, ཡདིདཾ ‘‘ཨུཔནིསྶཡཔཙྩཡོ’’ཏི ཝུཏྟཾ. ཏཐཱ ཙཱཧ ‘‘བཧུདྷཱ ཧོཏི པཀཏཱུཔནིསྶཡོ’’ཏི. སདྡྷཱདཡོཏི སཱིལསུཏཙཱགཔཉྙཱ. ཨཏྟནོ སདྡྷཱདིཀཉྷི ཨུཔནིསྶཱཡ ཨཏྟནོ དཱནསཱིལཱདཡོ, ཏཐཱ ཀལྱཱཎམིཏྟཱནཾ སདྡྷཱདཡོ ཨུཔནིསྶཱཡ ¶ པརེསཉྩ དཱནསཱིལཱདཡོ ¶ ཧོནྟཱིཏི པཱཀཊམེཏཾ. སུཁཾ དུཀྑནྟི ཀཱཡིཀཾ སུཁཾ དུཀྑཾ. པུགྒལོཏི ཀལྱཱཎམིཏྟཱདིཔུགྒལོ. བྷོཛནནྟི སཔྤཱཡཱདིབྷོཛནཾ, ཨུཏུཔི ཏཱདིསོཝ.

༢༧. ‘‘ཨདྷིཔཏི…པེ… པཙྩཡཱ ཧོནྟཱི’’ཏི སངྑེཔེན ཝུཏྟམཏྠཾ ཝིཏྠཱརེཏུཾ ‘‘ཏཏྠ གརུཀཏམཱརམྨཎ’’ནྟྱཱདི ཝུཏྟཾ. གརུཀཏམཱརམྨཎནྟི པཙྩཝེཀྑཎཨསྶཱདཱདིནཱ གརུཀཏཾ ཨཱརམྨཎཾ. ཏཉྷི ཛྷཱནམགྒཕལཝིཔསྶནཱནིབྦཱནཱདིབྷེདཾ པཙྩཝེཀྑཎཨསྶཱདཱདིམགྒཕལཱདིདྷམྨེ ཨཏྟཱདྷཱིནེ ཀརོཏཱིཏི ཨཱརམྨཎཱདྷིཔཏི ནཱམ. གརུཀཱཏབྦཏཱམཏྟེན ཨཱརམྨཎཱདྷིཔཏི. གརུཀཏོཔི བལཝཀཱརཎཊྛེན ཨཱརམྨཎཱུཔནིསྶཡོཏི ཨཡམེཏེསཾ ཝིསེསོ. སཧཛཱཏཱ…པེ… ནཱམརཱུཔཱནནྟི ཚནྡཙིཏྟཝཱིརིཡཝཱིམཾསཱནཾ, ཝསེན ཙཏུབྦིདྷོཔི སཧཛཱཏཱདྷིཔཏི ཡཐཱརཧཾ སཧཛཱཏནཱམརཱུཔཱནཾ པཝཏྟིཡཾཡེཝ སཧཛཱཏཱདྷིཔཏིཝསེན པཙྩཡོ.

༢༨. རཱུཔདྷམྨསྶ ཨརཱུཔདྷམྨཾ པཏི སཧཛཱཏཔཙྩཡཏཱ པཊིསནྡྷིཡཾ ཝཏྠུཝསེན ཝུཏྟཱཏི ཨཱཧ ‘‘ཝཏྠུཝིཔཱཀཱ ཨཉྙམཉྙ’’ནྟི –

༣༠. ཡསྨཱ པན ཨཉྙམཉྙུཔཏྠམྦྷནཝསེནེཝ ཨཉྙམཉྙཔཙྩཡཏཱ, ན སཧཛཱཏམཏྟཏོཏི པཝཏྟིཡཾ རཱུཔཾ ནཱམཱནཾ ཨཉྙམཉྙཔཙྩཡོ ན ཧོཏི, ཏསྨཱ ཝུཏྟཾ ‘‘ཙིཏྟཙེཏསིཀཱ དྷམྨཱ ཨཉྙམཉྙ’’ནྟི. ཏཐཱ ཨུཔཱདཱརཱུཔཱནི ཙ བྷཱུཏརཱུཔཱནཾ ཨཉྙམཉྙཔཙྩཡཱ ན ཧོནྟཱིཏི ཝུཏྟཾ ‘‘མཧཱབྷཱུཏཱ ཨཉྙམཉྙ’’ནྟི.

༣༡. ནནུ ཙ ‘‘ཨརཱུཔིནོ ཨཱཧཱརཱ སཧཛཱཏཱནཾ ནཱམརཱུཔཱན’’ནྟི ཝུཏྟཾ, ཨེཝཉྩ སཏི ཨསཉྙཱིནཾ སཧཛཱཏཱཧཱརསྶ ཨསམྦྷཝཏོ ‘‘སབྦེ སཏྟཱ ཨཱཧཱརཊྛིཏིཀཱ’’ཏི ཀཐམིདཾ ནཱིཡཏཱིཏི? ཝུཙྩཏེ – མནོསཉྩེཏནཱཧཱརཝསཔྤཝཏྟསྶ ཀམྨསྶ ¶ , ཏཾསཧགཏཱནམྤི ཝཱ སེསཱཧཱརཱནཾ ཀམྨཱུཔནིསྶཡཔཙྩཡེཧི པཙྩཡཏྟཔརིཡཱཡཾ གཧེཏྭཱ སབྦསཏྟཱནཾ ཨཱཧཱརཊྛིཏིཀཏཱ ཝུཏྟཱ, ན ཨཱཧཱརཔཙྩཡབྷཱཝཏོཏི.

༣༢. ‘‘པཉྩ པསཱདཱ’’ཏྱཱདཱིསུ ནནུ ཨིཏྠིནྡྲིཡཔུརིསིནྡྲིཡཱ ན གཧིཏཱཏི? སཙྩཾ ན གཧིཏཱ. ཡདིཔི ཏེསཾ ལིངྒཱདཱིཧི ཨནུཝཏྟནཱིཡཏཱ ཨཏྠི, སཱ པན ན པཙྩཡབྷཱཝཏོ. ཡཐཱ ཧི ཛཱིཝིཏཱཧཱརཱ ཡེསཾ པཙྩཡཱ ཧོནྟི, ཏེསཾ ཨནུཔཱལཀཱ ཨུཔཏྠམྦྷཀཱ ཨཏྠི, ཨཝིགཏཔཙྩཡབྷཱུཏཱ ཙ ¶ ཧོནྟི, ན ཨེཝཾ ཨིཏྠིཔུརིསབྷཱཝཱ ལིངྒཱདཱིནཾ ཀེནཙི ཨུཔཀཱརེན ཨུཔཀཱརཱ ཧོནྟི. ཀེཝལཾ པན ཡཐཱསཀེཧེཝ ཀམྨཱདིཔཙྩཡེཧི པཝཏྟམཱནཾ ལིངྒཱདཱིནཾ ཡཐཱ ཨིཏྠཱདིགྒཧཎསྶ པཙྩཡབྷཱཝོ ཧོཏི, ཏཏོ ཨཉྙེནཱཀཱརེན ཏཾ-སཧིཏསནྟཱནེ ཨཔྤཝཏྟིཏོ ལིངྒཱདཱིཧི ཨནུཝཏྟནཱིཡཏཱ, ཨིནྡྲིཡཏཱ ཙ ནེསཾ ཝུཙྩཏི, ཏསྨཱ ན ཏེསཾ ཨིནྡྲིཡཔཙྩཡབྷཱཝོ ཝུཏྟོ.

༣༣. ཡེསཾ ནཱམཱནཾ ཙཀྑཱདཱིནཾ ཨབྦྷནྟརཏོ ནིཀྑམནྟཱནཾ ཝིཡ པཝཏྟཱནཾ, ཡེསཉྩ རཱུཔཱནཾ ནཱམསནྣིསྶཡེནེཝ ཨུཔྤཛྫམཱནཱནཾ སམྤཡོགཱསངྐཱ ཧོཏི, ཏེསམེཝ ཝིཔྤཡུཏྟཔཙྩཡཏཱ. རཱུཔཱནཾ པན རཱུཔེཧི སཱསངྐཱ ནཏྠི. ཝཏྠུསནྣིསྶཡེནེཝ ཛཱཡནྟཱནཾ ཝིསཡབྷཱཝམཏྟཾ ཨཱརམྨཎནྟི ཏེནཱཔི ཏེསཾ སམྤཡོགཱསངྐཱ ནཏྠཱིཏི ཡེསཾ སམྤཡོགཱསངྐཱ ཨཏྠི, ཏེསམེཝ ཝིཔྤཡུཏྟཔཙྩཡཏཱཔི ཝུཏྟཱཏི ཨཱཧ ‘‘ཨོཀྐནྟིཀྑཎེ ཝཏྠཱུ’’ཏྱཱདི.

༣༤. སབྦཐཱ སབྦཱཀཱརེན ཡཐཱརཧཾ ནཱམཝསེན ཝུཏྟཾ ཏིཝིདྷཾ སཧཛཱཏཾ, དུཝིདྷཾ པུརེཛཱཏཾ, ཨེཀཝིདྷཾ པཙྪཱཛཱཏཉྩ པཙྩཡཛཱཏཾ, ཨཱཧཱརེསུ ཀབལཱི༹ཀཱརོ ཨཱཧཱརོ, རཱུཔཛཱིཝིཏིནྡྲིཡནྟི ཨཡཾ པཉྩཝིདྷོཔི ཨཏྠིཔཙྩཡོ, ཨཝིགཏཔཙྩཡོ ཙ ཧོཏི. པཙྩུཔྤནྣསབྷཱཝེན ཨཏྠིབྷཱཝེན ཏཱདིསསྶེཝ དྷམྨསྶ ¶ ཨུཔཏྠམྦྷཀཏྟཱ ཨཏྠིབྷཱཝཱབྷཱཝེན ཨནུཔཀཱརཀཱནམེཝ ཨཏྠིབྷཱཝེན ཨུཔཀཱརཀཏཱ ཨཏྠིཔཙྩཡབྷཱཝོཏི ནཏྠི ནིབྦཱནསྶ སབྦདཱ བྷཱཝིནོ ཨཏྠིཔཙྩཡཏཱ, ཨཝིགཏཔཙྩཡཏཱ ཙ. ཨུཔྤཱདཱདིཡུཏྟཱནཾ ཝཱ ནཏྠིབྷཱཝོཔཀཱརཀཏཱཝིརུདྡྷོ, ཝིགཏབྷཱཝོཔཀཱརཀཏཱཝིརུདྡྷོ ཙ ཨུཔཀཱརཀབྷཱཝོ ཨཏྠིཔཙྩཡཏཱདིཀཱཏི ན ཏསྶ ཏཔྤཙྩཡཏྟཔྤསངྒོ. རཱུཔཛཱིཝིཏིནྡྲིཡཉྩེཏྠ ཨོཛཱ ཝིཡ ཋིཏིཀྑཎེཝ ཨུཔཀཱརཀཏྟཱ སཧཛཱཏཔཙྩཡེསུ ན གཡ྄ཧཏཱིཏི ཝིསུཾ ཝུཏྟཾ.

༣༥. ཨིདཱནི སབྦེཔི པཙྩཡཱ སངྑེཔཏོཔི ཙཏུདྷཱཡེཝཱཏི དསྶེཏུཾ ‘‘ཨཱརམྨཎཱུ…པེ… གཙྪནྟཱི’’ཏི ཝུཏྟཾ. ན ཧི སོ ཀོཙི པཙྩཡོ ཨཏྠི, ཡོ ཙིཏྟཙེཏསིཀཱནཾ ཨཱརམྨཎབྷཱཝཾ ན གཙྪེཡྻ, སཀསཀཔཙྩཡུཔྤནྣསྶ ཙ ཨུཔནིསྶཡབྷཱཝཾ ན གཙྪཏི, ཀམྨཧེཏུཀཏྟཱ ཙ ལོཀཔྤཝཏྟིཡཱ ཕལཧེཏཱུཔཙཱརཝསེན སབྦེཔི ཀམྨསབྷཱཝཾ ནཱཏིཝཏྟནྟི, ཏེ ཙ པརམཏྠཏོ ལོཀསམྨུཏིཝསེན ཙ ཝིཛྫམཱནཱཡེཝཱཏི སབྦེཔི ཙཏཱུསུ སམོདྷཱནཾ གཙྪནྟི.

༣༦. ཨིདཱནི ཡཾ ཝུཏྟཾ ཏཏྠ ཏཏྠ ‘‘སཧཛཱཏརཱུཔ’’ནྟི, ཏཾ སབྦཾ ན ཨཝིསེསཏོ དཊྛབྦནྟི ¶ དསྶེཏུཾ ‘‘སཧཛཱཏརཱུཔ’’ནྟྱཱདི ཝུཏྟཾ. པཊིསནྡྷིཡཉྷི ཙིཏྟསམུཊྛཱནརཱུཔཱབྷཱཝཏོ པཝཏྟིཡཾ ཀམྨསམུཊྛཱནཱནཉྩ ཙིཏྟཙེཏསིཀེཧི སཧུཔྤཏྟིནིཡམཱབྷཱཝཏོ སཧཛཱཏརཱུཔནྟི སབྦཏྠཱཔི པཝཏྟེ ཙིཏྟསམུཊྛཱནཱནཾ རཱུཔཱནཾ, པཊིསནྡྷིཡཾ ཀཊཏྟཱརཱུཔསངྑཱཏཀམྨཛརཱུཔཱནཉྩ ཝསེན དུཝིདྷཾ ཧོཏི. ཀམྨསྶ ཀཏཏྟཱ ནིབྦཏྟམཱནཱནི རཱུཔཱནི ཀཊཏྟཱརཱུཔཱནི.

༣༧. ཨིཏི ཨེཝཾ ཝུཏྟནཡེན སམྦྷཝཱ ཡཐཱསམྦྷཝཾ ཏེཀཱལིཀཱ ཨནནྟརསམནནྟརཨཱསེཝནནཏྠིཝིགཏཝསེན པཉྩནྣཾ ཨཏཱིཏཀཱལིཀཱནཾ, ཀམྨཔཙྩཡསྶ ཨཏཱིཏཝཏྟམཱནཝསེན དྭིཀཱལིཀསྶ, ཨཱརམྨཎཨདྷིཔཏིཨུཔནིསྶཡཔཙྩཡཱནཾ ཏིཀཱལིཀཱནཾ ¶ , ཨིཏརེསཾ པནྣརསནྣཾ པཙྩུཔྤནྣཀཱལིཀཱནཉྩ ཝསེན ཀཱལཏྟཡཝནྟོ, ནིབྦཱནཔཉྙཏྟིཝསེན ཀཱལཝིམུཏྟཱ ཙ, ཙཀྑཱདིརཱགཱདིསདྡྷཱདིཝསེན ཨཛ྄ཛྷཏྟིཀཱ ཙ, པུགྒལཨུཏུབྷོཛནཱདིཝསེན ཏཏོ བཧིདྡྷཱ ཙ, པཙྩཡུཔྤནྣབྷཱཝེན སངྑཏཱ ཙ, ཀཐཱ ཏཔྤཊིཔཀྑབྷཱཝེན ཨསངྑཏཱ ཙ དྷམྨཱ པཉྙཏྟིནཱམརཱུཔཱནཾ ཝསེན སངྑེཔཏོ ཏིཝིདྷཱ ཋིཏཱ སབྦཐཱ པཊྛཱནེ ཨནནྟནཡསམནྟཔཊྛཱནེ པཀརཎེ ཙཏུཝཱིསཏིསངྑཱཏཱ པཙྩཡཱ ནཱམཱཏི ཡོཛནཱ.

༣༨. ཏཏྠཱཏི ཏེསུ པཉྙཏྟིནཱམརཱུཔེསུ.

པཊྛཱནནཡཝཎྞནཱ ནིཊྛིཏཱ.

པཉྙཏྟིབྷེདཝཎྞནཱ

༣༩. ཝཙནཱིཡཝཱཙཀབྷེདཱ དུཝིདྷཱ པཉྙཏྟཱིཏི ཝུཏྟཾ ‘‘པཉྙཱཔིཡཏྟཱ’’ཏྱཱདི. པཉྙཱཔིཡཏྟཱཏི ཏེན ཏེན པཀཱརེན ཉཱཔེཏབྦཏྟཱ, ཨིམིནཱ རཱུཔཱདིདྷམྨཱནཾ སམཱུཧསནྟཱནཱདིཨཝཏྠཱཝིསེསཱདིབྷེདཱ སམྨུཏིསཙྩབྷཱུཏཱ ཨུཔཱདཱཔཉྙཏྟིསངྑཱཏཱ ཨཏྠཔཉྙཏྟི ཝུཏྟཱ. སཱ ཧི ནཱམཔཉྙཏྟིཡཱ པཉྙཱཔཱིཡཏི. པཉྙཱཔནཏོཏི པཀཱརེཧི ཨཏྠཔཉྙཏྟིཡཱ ཉཱཔནཏོ. ཨིམིནཱ ཧི པཉྙཱཔེཏཱིཏི ‘‘པཉྙཏྟཱི’’ཏི ལདྡྷནཱམཱནཾ ཨཏྠཱནཾ ཨབྷིདྷཱནསངྑཱཏཱ ནཱམཔཉྙཏྟི ཝུཏྟཱ.

༤༠. བྷཱུཏཔརིཎཱམཱཀཱརམུཔཱདཱཡཱཏི ¶ པཐཝཱདིཀཱནཾ མཧཱབྷཱུཏཱནཾ པབནྡྷཝསེན པཝཏྟམཱནཱནཾ པཏྠཊསངྒཧཏཱདིཨཱཀཱརེན པརིཎཱམཱཀཱརཾ པརིཎཏབྷཱཝསངྑཱཏཾ ཨཱཀཱརཾ ཨུཔཱདཱཡ ནིསྶཡཾ ཀཏྭཱ. ཏཐཱ ཏཐཱཏི བྷཱུམཱདིཝསེན. བྷཱུམིཔབྦཏཱདིཀཱཏི བྷཱུམིཔབྦཏརུཀྑཱདིཀཱ སནྟཱནཔཉྙཏྟི. སམྦྷཱརསནྣིཝེསཱཀཱརནྟི དཱརུམཏྟིཀཱཏནྟཱདཱིནཾ སམྦྷཱརཱནཾ ཨུཔཀརཎཱནཾ ¶ སནྣིཝེསཱཀཱརཾ རཙནཱདིཝིསིཊྛཏཾཏཾསཎྛཱནཱདིཨཱཀཱརཾ. རཐསཀཊཱདིཀཱཏི རཐསཀཊགཱམགྷཊཔཊཱདིཀཱ སམཱུཧཔཉྙཏྟི. ཙནྡཱཝཊྚནཱདིཀནྟི ཙནྡིམསཱུརིཡནཀྑཏྟཱནཾ སིནེརུཾ པདཀྑིཎཝསེན ཨུདཡཱདིཨཱཝཊྚནཱཀཱརཾ. དིསཱཀཱལཱདིཀཱཏི པུརཏྠིམདིསཱདིཀཱ དིསཱཔཉྙཏྟི, པུབྦཎྷཱདིཀཱ ཀཱལཔཉྙཏྟི, མཱསོཏུཝེསཱཁམཱསཱདིཀཱ ཏཾཏཾནཱམཝིསིཊྛཱ མཱསཱདིཔཉྙཏྟི ཙ. ཨསམྥུཊྛཱཀཱརནྟི ཏཾཏཾརཱུཔཀལཱཔེཧི ཨསམྥུཊྛཾ སུསིརཱདིཨཱཀཱརཾ. ཀཱུཔགུཧཱདིཀཱ ཏི ཀཱུཔགུཧཚིདྡཱདིཀཱ ཨཱཀཱསཔཉྙཏྟི. ཏཾཏཾབྷཱུཏནིམིཏྟནྟི པཐཝཱིཀསིཎཱདིཏཾཏཾབྷཱུཏནིམིཏྟཾ. བྷཱཝནཱཝིསེསནྟི པརིཀམྨཱདིབྷེདཾ བྷཱཝནཱཡ པབནྡྷཝིསེསཾ. ཀསིཎནིམིཏྟཱདིཀཱཏི ཀསིཎཱསུབྷནིམིཏྟཱདིབྷེདཱ ཡོགཱིནཾ ཨུཔཊྛིཏཱ ཨུགྒཧཔཊིབྷཱགཱདིབྷེདཱ ནིམིཏྟཔཉྙཏྟི. ཨེཝམཱདིཔྤབྷེདཱཏི ཀསིཎུགྒྷཱཊིམཱཀཱསནིརོདྷཀསིཎཱདིབྷེདཱ ཙ. ཨཏྠཙྪཱཡཱཀཱརེནཱཏི པརམཏྠདྷམྨསྶ ཚཱཡཱཀཱརེན པཊིབྷཱགཱཀཱརེན.

༤༡. ནཱམནཱམཀམྨཱདིནཱམེནཱཏི ནཱམཾ ནཱམཀམྨཾ ནཱམདྷེཡྻཾ ནིརུཏྟི བྱཉྫནཾ ཨབྷིལཱཔོཏི ཨིམེཧི ཚཧི ནཱམེཧི. ཏཏྠ ཨཏྠེསུ ནམཏཱིཏི ནཱམཾ. ཏཾ ཨནྭཏྠརུལ༹ྷཱིཝསེན དུཝིདྷཾ, སཱམཉྙགུཎཀིརིཡཱཡདིཙྪཱཝསེན ཙཏུབྦིདྷཾ. ནཱམམེཝ ནཱམཀམྨཾ. ཏཐཱ ནཱམདྷེཡྻཾ. ཨཀྑརདྭཱརེན ཨཏྠཾ ནཱིཧརིཏྭཱ ཨུཏྟི ཀཐནཾ ནིརུཏྟི, ཨཏྠཾ བྱཉྫཡཏཱིཏི བྱཉྫནཾ. ཨབྷིལཔཏཱིཏི ཨབྷིལཱཔོ, སདྡགཏཨཀྑརསནྣིཝེསཀྐམོ. སཱ པནཱཡཾ ནཱམཔཉྙཏྟི ཝིཛྫམཱནཨཝིཛྫམཱནཏདུབྷཡསཾཡོགཝསེན ཚབྦིདྷཱ ཧོཏཱིཏི དསྶེཏུཾ ‘‘ཝིཛྫམཱནཔཉྙཏྟཱི’’ཏྱཱདི ཝུཏྟཾ, ཨེཏཱཡ པཉྙཱཔེནྟཱིཏི ‘‘རཱུཔཝེདནཱ’’ཏྱཱདིནཱ པཀཱསེནྟི.

༤༢. ཨུབྷིནྣནྟི ཝིཛྫམཱནཱཝིཛྫམཱནཱནཾ དྭིནྣཾ. པཉྩཱབྷིཉྙཱ, ཨཱསཝཀྑཡཉཱཎནྟི ཚ ཨབྷིཉྙཱ ཨསྶཱཏི ཚལ༹བྷིཉྙོ. ཨེཏྠ ¶ ཙ ཨབྷིཉྙཱནཾ ཝིཛྫམཱནཏྟཱ, ཏཔྤཊིལཱབྷིནོ པུགྒལསྶ ཨཝིཛྫམཱནཏྟཱ ཙ ཨཡཾ ཝིཛྫམཱནེན ཨཝིཛྫམཱནཔཉྙཏྟི ནཱམ. ཏཐཱ ཨིཏྠིཡཱ ཨཝིཛྫམཱནཏྟཱ, སདྡསྶ ཙ ཝིཛྫམཱནཏྟཱ ཨིཏྠིསདྡོཏི ཨཝིཛྫམཱནེན ཝིཛྫམཱནཔཉྙཏྟི. པསཱདཙཀྑུནོ, ཏནྣིསྶིཏཝིཉྙཱཎསྶ ཙ ཝིཛྫམཱནཏྟཱ ཙཀྑུཝིཉྙཱཎནྟི ཝིཛྫམཱནེན ཝིཛྫམཱནཔཉྙཏྟི ¶ . རཉྙོ ཙ པུཏྟསྶ ཙ སམྨུཏིསཙྩབྷཱུཏཏྟཱ རཱཛཔུཏྟོཏི ཨཝིཛྫམཱནེན ཨཝིཛྫམཱནཔཉྙཏྟི.

༤༣. ཝཙཱིགྷོསཱནུསཱརེནཱཏི བྷཱུམིཔབྦཏརཱུཔཝེདནཱདིཝཙཱིམཡསདྡསྶ ཨནུསཱརེན ཨནུགམནེན ཨནུསྶརཎེན ཨཱརམྨཎཀརཎེན པཝཏྟཱཡ སོཏཝིཉྙཱཎཝཱིཐིཡཱ པཝཏྟིཏོ ཨནནྟརཾ ཨུཔྤནྣསྶ མནོདྭཱརསྶ ནཱམཙིནྟནཱཀཱརཔྤཝཏྟསྶ མནོདྭཱརིཀཝིཉྙཱཎསནྟཱནསྶ ‘‘ཨིདམཱིདིསསྶ ཨཏྠསྶ ནཱམ’’ནྟི པུབྦེཡེཝ གཧིཏསངྐེཏོཔནིསྶཡསྶ གོཙརཱ ཨཱརམྨཎབྷཱུཏཱ ཏཏོ ནཱམགྒཧཎཏོ པརཾ ཡསྶཱ སམྨུཏིཔརམཏྠཝིསཡཱཡ ནཱམཔཉྙཏྟིཡཱ ཨནུསཱརེན ཨནུགམནེན ཨཏྠཱ སམྨུཏིཔརམཏྠབྷེདཱ ཝིཉྙཱཡནྟི, སཱཡཾ བྷཱུམིཔབྦཏརཱུཔཝེདནཱདིཀཱ པཉྙཱཔེཏབྦཏྠཔཉྙཱཔིཀཱ ལོཀསངྐེཏེན ནིམྨིཏཱ ལོཀཝོཧཱརེན སིདྡྷཱ, མནོདྭཱརགྒཧིཏཱ ཨཀྑརཱཝལིབྷཱུཏཱ པཉྙཏྟི ཝིཉྙེཡྻཱ པཉྙཱཔནཏོ པཉྙཏྟིསངྑཱཏཱ ནཱམཔཉྙཏྟཱིཏི ཝིཉྙེཡྻཱ.

ཨེཏྠ ཙ སོཏཝིཉྙཱཎཝཱིཐིཡཱ ཨནནྟརབྷཱཝིནིཾ མནོདྭཱརིཀཝཱིཐིམྤི སོཏཝིཉྙཱཎཝཱིཐིགྒཧཎེནེཝ སངྒཧེཏྭཱ ‘‘སོཏཝིཉྙཱཎཝཱིཐིཡཱ’’ཏི ཝུཏྟཾ. གྷཊཱདིསདྡཉྷི སུཎནྟསྶ ཨེཀམེཀཾ སདྡཾ ཨཱརབྦྷ པཙྩུཔྤནྣཱཏཱིཏཱརམྨཎཝསེན དྭེ དྭེ ཛཝནཝཱརཱ, བུདྡྷིཡཱ གཧིཏནཱམཔཎྞཏྟིབྷཱུཏཾ ཨཀྑརཱཝལིམཱརབྦྷ ཨེཀོཏི ཨེཝཾ སོཏཝིཉྙཱཎཝཱིཐིཡཱ ཨནནྟརཱཡ ཨཏཱིཏསདྡཱརམྨཎཱཡ ¶ ཛཝནཝཱིཐིཡཱ ཨནནྟརཾ ནཱམཔཉྙཏྟིཡཱ གཧཎཾ, ཏཏོ པརཾ ཨཏྠཱཝབོདྷོཏི ཨཱཙརིཡཱ.

པཉྙཏྟིབྷེདཝཎྞནཱ ནིཊྛིཏཱ.

ཨིཏི ཨབྷིདྷམྨཏྠཝིབྷཱཝིནིཡཱ ནཱམ ཨབྷིདྷམྨཏྠསངྒཧཝཎྞནཱཡ

པཙྩཡཔརིཙྪེདཝཎྞནཱ ནིཊྛིཏཱ.

༩. ཀམྨཊྛཱནཔརིཙྪེདཝཎྞནཱ

༡. ཨིཏོ ¶ པཙྩཡནིདྡེསཏོ པརཾ ནཱིཝརཎཱནཾ སམནཊྛེན སམཐསངྑཱཏཱནཾ, ཨནིཙྩཱདིཝིཝིདྷཱཀཱརཏོ དསྶནཊྛེན ཝིཔསྶནཱསངྑཱཏཱནཉྩ དྭིནྣཾ བྷཱཝནཱནཾ དུཝིདྷམྤི ཀམྨཊྛཱནཾ དུཝིདྷབྷཱཝནཱཀམྨསྶ པཝཏྟིཊྛཱནཏཱཡ ཀམྨཊྛཱནབྷཱུཏམཱརམྨཎཾ ཨུཏྟརུཏྟརཡོགཀམྨསྶ པདཊྛཱནཏཱཡ ཀམྨཊྛཱནབྷཱུཏཾ བྷཱཝནཱཝཱིཐིཉྩ ཡཐཱཀྐམཾ སམཐཝིཔསྶནཱནུཀྐམེན པཝཀྑཱམཱིཏི ཡོཛནཱ.

སམཐཀམྨཊྛཱནཾ

ཙརིཏབྷེདཝཎྞནཱ

༣. རཱགོ ཝ ཙརིཏཱ པཀཏཱིཏི རཱགཙརིཏཱ. ཨེཝཾ དོསཙརིཏཱདཡོཔི. ཙརིཏསངྒཧོཏི མཱུལཙརིཏཝསེན པུགྒལསངྒཧོ, སཾསགྒཝསེན པན ཏེསཊྛི ཙརིཏཱ ཧོནྟི. ཝུཏྟཉྷི –

‘‘རཱགཱདིཀེ ཏིཀེ སཏྟ, སཏྟ སདྡྷཱདིཀེ ཏིཀེ;

ཨེཀདྭིཏིཀམཱུལམྷི, མིསྶཏོ སཏྟསཏྟཀ’’ནྟི.

ཨེཏྠ ཧི རཱགཙརིཏཱ དོསཙརིཏཱ མོཧཙརིཏཱ རཱགདོསཙརིཏཱ རཱགམོཧཙརིཏཱ དོསམོཧཙརིཏཱ རཱགདོསམོཧཙརིཏཱཏི ¶ ཨེཝཾ རཱགཱདིཀེ ཏིཀེ སཏྟཀམེཀཾ. ཏཐཱ སདྡྷཱཙརིཏཱ བུདྡྷིཙརིཏཱ ཝིཏཀྐཙརིཏཱ སདྡྷཱབུདྡྷིཙརིཏཱ སདྡྷཱབུདྡྷིཝིཏཀྐཙརིཏཱ བུདྡྷིཝིཏཀྐཙརིཏཱ སདྡྷཱབུདྡྷིཝིཏཀྐཙརིཏཱཏི སདྡྷཱདིཀེཔི ཏིཀེ ཨེཀནྟི ཨེཝཾ དྭེ ཏིཀེ ཨམིསྶེཏྭཱ ཙུདྡས ཙརིཏཱ ཧོནྟི. རཱགཱདིཏིཀེ པན ཨེཀདྭིཏིཀམཱུལཝསེན སདྡྷཱདིཏིཀེན སཧ ཡོཛིཏེ རཱགསདྡྷཱཙརིཏཱ རཱགབུདྡྷིཙརིཏཱ རཱགཝིཏཀྐཙརིཏཱ རཱགསདྡྷཱབུདྡྷིཙརིཏཱ རཱགསདྡྷཱཝིཏཀྐཙརིཏཱ རཱགབུདྡྷིཝིཏཀྐཙརིཏཱ རཱགསདྡྷཱབུདྡྷིཝིཏཀྐཙརིཏཱཏི རཱགམཱུལནཡེ ཨེཀཾ སཏྟཀཾ, ཏཐཱ ‘‘དོསསདྡྷཱཙརིཏཱ དོསབུདྡྷིཙརིཏཱ དོསཝིཏཀྐཙརིཏཱ’’ཏྱཱདིནཱ དོསམཱུལནཡེཔི ཨེཀཾ, ‘‘མོཧསདྡྷཱཙརིཏཱ’’ཏྱཱདིནཱ མོཧམཱུལནཡེཔི ཨེཀནྟི ཨེཝཾ ཨེཀམཱུལནཡེ སཏྟཀཏྟཡཾ ཧོཏི. ཡཐཱ ¶ ཙེཏྠ, ཨེཝཾ དྭིམཱུལཀནཡེཔི ‘‘རཱགདོསསདྡྷཱཙརིཏཱ རཱགདོསབུདྡྷིཙརིཏཱ རཱགདོསཝིཏཀྐཙརིཏཱ’’ཏྱཱདིནཱ སཏྟཀཏྟཡཾ. ཏིམཱུལཀནཡེ པན ‘‘རཱགདོསམོཧསདྡྷཱཙརིཏཱ’’ཏྱཱདིནཱ ཨེཀཾ སཏྟཀནྟི ཨེཝཾ མིསྶཏོ སཏྟསཏྟཀཝསེན ཨེཀཱུནཔཉྙཱས ཙརིཏཱ ཧོནྟི. ཨིཏི ཨིམཱ ཨེཀཱུནཔཉྙཱས, པུརིམཱ ཙ ཙུདྡསཱཏི ཏེསཊྛི ཙརིཏཱ དཊྛབྦཱ. ཀེཙི པན དིཊྛིཡཱ སདྡྷིཾ ‘‘ཙཏུསཊྛཱི’’ཏི ཝཎྞེནྟི.

ཙརིཏབྷེདཝཎྞནཱ ནིཊྛིཏཱ.

བྷཱཝནཱབྷེདཝཎྞནཱ

༤. བྷཱཝནཱཡ པཊིསངྑཱརཀམྨབྷཱུཏཱ, ཨཱདིཀམྨབྷཱུཏཱ ཝཱ པུབྦབྷཱགབྷཱཝནཱ པརིཀམྨབྷཱཝནཱ ནཱམ. ནཱིཝརཎཝིཀྑམྦྷནཏོ པཊྛཱཡ གོཏྲབྷཱུཔརིཡོསཱནཱ ཀཱམཱཝཙརབྷཱཝནཱ ཨུཔཙཱརབྷཱཝནཱ ནཱམ. ཨཔྤནཱཡ སམཱིཔཙཱརིཏྟཱ གཱམཱུཔཙཱརཱདཡོ ཝིཡ. མཧགྒཏབྷཱཝཔྤཏྟཱ ཨཔྤནཱབྷཱཝནཱ ནཱམ ཨཔྤནཱསངྑཱཏཝིཏཀྐཔམུཁཏྟཱ ¶ . སམྤཡུཏྟདྷམྨེཧི ཨཱརམྨཎེ ཨཔྤེནྟོ ཝིཡ པཝཏྟཏཱིཏི ཝིཏཀྐོ ཨཔྤནཱ. ཏཐཱ ཧི སོ ‘‘ཨཔྤནཱ བྱཔྤནཱ’’ཏི (དྷ. ས. ༧) ནིདྡིཊྛོ. ཏཔྤམུཁཏཱཝསེན པན སབྦེཔི མཧགྒཏཱནུཏྟརཛྷཱནདྷམྨཱ ‘‘ཨཔྤནཱ’’ཏི ཝུཙྩནྟི.

བྷཱཝནཱབྷེདཝཎྞནཱ ནིཊྛིཏཱ.

ནིམིཏྟབྷེདཝཎྞནཱ

༥. པརིཀམྨསྶ ནིམིཏྟཾ ཨཱརམྨཎཏྟཱཏི པརིཀམྨནིམིཏྟཾ, ཀསིཎམཎྜལཱདི. ཏདེཝ ཙཀྑུནཱ དིཊྛཾ ཝིཡ མནསཱ ཨུགྒཧེཏབྦཾ ནིམིཏྟཾ, ཨུགྒཎྷནྟསྶ ཝཱ ནིམིཏྟནྟི ཨུགྒཧནིམིཏྟཾ. ཏཔྤཊིབྷཱགཾ ཝཎྞཱདིཀསིཎདོསརཧིཏཾ ནིམིཏྟཾ ཨུཔཙཱརཔྤནཱནཾ ཨཱརམྨཎཏྟཱཏི པཊིབྷཱགནིམིཏྟཾ.

༦. པཐཝཱིཡེཝ ¶ ཀསིཎཾ ཨེཀདེསེ ཨཊྛཏྭཱ ཨནནྟསྶ ཕརིཏབྦཏཱཡ སཀལཊྛེནཱཏི པཐཝཱིཀསིཎཾ, ཀསིཎམཎྜལཾ. པཊིབྷཱགནིམིཏྟཾ, ཏདཱརམྨཎཉྩ ཛྷཱནཾ ‘པཐཝཱིཀསིཎ’ནྟི ཝུཙྩཏི. ཏཐཱ ཨཱཔོཀསིཎཱདཱིསུཔི. ཏཏྠ པཐཝཱདཱིནི ཙཏྟཱརི བྷཱུཏཀསིཎཱནི. ནཱིལཱདཱིནི ཙཏྟཱརི ཝཎྞཀསིཎཱནི, པརིཙྪིནྣཱཀཱསོ ཨཱཀཱསཀསིཎཾ, ཙནྡཱདིཨཱལོཀོ ཨཱལོཀཀསིཎནྟི དཊྛབྦཾ.

༧. ཨུདྡྷཾ དྷུམཱཏཾ སཱུནཾ ཚཝསརཱིརཾ ཨུདྡྷུམཱཏཾ, ཏདེཝ ཀུཙྪིཏཊྛེནཨུདྡྷུམཱཏཀཾ. ཨེཝཾ སེསེསུཔི. སེཏརཏྟཱདིནཱ ཝིམིསྶིཏཾ ཡེབྷུཡྻེན ནཱིལཝཎྞཾ ཚཝསརཱིརཾ ཝིནཱིལཀཾ ཝིསེསཏོ ནཱིལཀནྟི ཀཏྭཱ. ཝིསྶཝནྟཔུབྦཀཾ ཝིཔུབྦཀཾ. མཛ྄ཛྷེ དྭིདྷཱ ཚིནྣཾ ཝིཙྪིདྡཀཾ. སོཎསིངྒཱལཱདཱིཧི ཝིཝིདྷཱཀཱརེན ཁཱཡིཏཾ ¶ ཝིཀྑཱཡིཏཀཾ. སོཎསིངྒཱལཱདཱིཧི ཝིཝིདྷེནཱཀཱརེན ཁཎྜིཏྭཱ ཏཏྠ ཏཏྠ ཁིཏྟཾ ཝིཀྑིཏྟཀཾ. ཀཱཀཔདཱདིཨཱཀཱརེན སཏྠེན ཧནིཏྭཱ ཝིཝིདྷཾ ཁིཏྟཾ ཧཏཝིཀྑིཏྟཀཾ. ལོཧིཏཔགྒྷརཎཀཾ ལོཧིཏཀཾ. ཀིམིཀུལཔགྒྷརཎཀཾ པུལ༹ཝཀཾ. ཨནྟམསོ ཨེཀམྤི ཨཊྛི ཨཊྛིཀཾ.

༨. ཨནུ ཨནུ སརཎཾ ཨནུསྶཏི, ཨརཧཏཱདིབུདྡྷགུཎཱརམྨཎཱ ཨནུསྶཏི བུདྡྷཱནུསྶཏི. སྭཱཀྑཱཏཏཱདིདྷམྨགུཎཱརམྨཎཱ ཨནུསྶཏི དྷམྨཱནུསྶཏི. སུཔྤཊིཔནྣཏཱདིསཾགྷགུཎཱརམྨཎཱ ཨནུསྶཏི སཾགྷཱནུསྶཏི. ཨཁཎྜཏཱདིནཱ སུཔརིསུདྡྷསྶ ཨཏྟནོ སཱིལགུཎསྶ ཨནུསྶརཎཾ སཱིལཱནུསྶཏི. ཝིགཏམལམཙྪེརཏཱདིཝསེན ཨཏྟནོ ཙཱགཱནུསྶརཎཾ ཙཱགཱནུསྶཏི. ‘‘ཡེཧི སདྡྷཱདཱིཧི སམནྣཱགཏཱ དེཝཱ དེཝཏྟཾ གཏཱ, ཏཱདིསཱ གུཎཱ མཡི སནྟཱི’’ཏི ཨེཝཾ དེཝཏཱ སཀྑིཊྛཱནེ ཋཔེཏྭཱ ཨཏྟནོ སདྡྷཱདིགུཎཱནུསྶརཎཾ དེཝཏཱནུསྶཏི. སབྦདུཀྑཱུཔསམབྷཱུཏསྶ ནིབྦཱནསྶ གུཎཱནུསྶརཎཾ ཨུཔསམཱནུསྶཏི. ཛཱིཝིཏིནྡྲིཡུཔཙྪེདབྷཱུཏསྶ མརཎསྶ ཨནུསྶརཎཾ མརཎཱནུསྶཏི. ཀེསཱདིཀཱཡཀོཊྛཱསེ གཏཱ པཝཏྟཱ སཏི ཀཱཡགཏཱསཏི. ཨཱནཉྩ ཨཔཱནཉྩ ཨཱནཱཔཱནཾ, ཨསྶཱསཔསྶཱསཱ, ཏདཱརམྨཎཱ སཏི ཨཱནཱཔཱནསྶཏི.

༩. མིཛྫཏི སིནིཡ྄ཧཏཱིཏི མེཏྟཱ, མིཏྟེསུ བྷཝཱཏི ཝཱ མེཏྟཱ, སཱ སཏྟཱནཾ ཧིཏསུཁཱུཔསཾཧརཎལཀྑཎཱ. པརདུཀྑཱཔནཡནཀཱམཏཱལཀྑཎཱ ཀརུཎཱ. པརསམྤཏྟིཔམོདལཀྑཎཱ མུདིཏཱ. ཨིཊྛཱནིཊྛེསུ མཛ྄ཛྷཏྟཱཀཱརཔྤཝཏྟིལཀྑཎཱ ཨུཔེཀྑཱ. ཨཔྤམཱཎསཏྟཱརམྨཎཏྟཱ ཨཔྤམཉྙཱ. ཨུཏྟམཝིཧཱརབྷཱཝཏོ, ཨུཏྟམཱནཾ ཝཱ ཝིཧཱརབྷཱཝཏོ བྲཧྨཝིཧཱརོ.

༡༠. གམནཔརིཡེསནཔརིབྷོགཱདིཔཙྩཝེཀྑཎཝསེན ¶ ¶ ཀབལཱི༹ཀཱརཱཧཱརེ པཊིཀཱུལནྟི པཝཏྟཱ སཉྙཱ ཨཱཧཱརེ པཊིཀཱུལསཉྙཱ.

༡༡. པཐཝཱིདྷཱཏུཨཱདཱིནཾ ཙཏུནྣཾ དྷཱཏཱུནཾ སལཀྑཎཏོ ཀེསཱདིསསམྦྷཱརཱདིཏོ ཙ ཝཝཏྠཱནཾ ཙཏུདྷཱཏུཝཝཏྠཱནཾ.

༡༢. ཨརཱུཔེ ཨཱརམྨཎེ པཝཏྟཱ ཨཱརུཔྤཱ.

ནིམིཏྟབྷེདཝཎྞནཱ ནིཊྛིཏཱ.

སཔྤཱཡབྷེདཝཎྞནཱ

༡༣. ཨིདཱནི ཏསྶ ཏསྶ པུགྒལསྶ ཙརིཏཱནུཀཱུལཀམྨཊྛཱནཾ དསྶེཏུཾ ‘‘ཙརིཏཱསུ པནཱ’’ཏྱཱདིམཱཧ. རཱགོ ཝ ཙརིཏཾ པཀཏི ཨེཏསྶཱཏི རཱགཙརིཏོ, རཱགབཧུལོ པུགྒལོ, རཱགསྶ ཨུཛུཝིཔཙྩནཱིཀབྷཱཝཏོ ཨསུབྷཀམྨཊྛཱནཾ ཏསྶ སཔྤཱཡཾ. ཨཱནཱཔཱནཾ མོཧཙརིཏསྶ, ཝིཏཀྐཙརིཏསྶ ཙ སཔྤཱཡཾ བུདྡྷིཝིསཡབྷཱཝེན མོཧཔྤཊིཔཀྑཏྟཱ, ཝིཏཀྐསནྡྷཱཝནསྶ ནིཝཱརཀཏྟཱ ཙ. ཚ བུདྡྷཱནུསྶཏིཨཱདཡོ སདྡྷཱཙརིཏསྶ སཔྤཱཡཱ སདྡྷཱཝུདྡྷིཧེཏུབྷཱཝཏོ.

༡༧. མརཎཨུཔསམསཉྙཱཝཝཏྠཱནཱནི བུདྡྷིཙརིཏསྶ སཔྤཱཡཱནི གམྦྷཱིརབྷཱཝཏོ བུདྡྷིཡཱ ཨེཝ ཝིསཡཏྟཱ.

༡༨. སེསཱནཱིཏི ཙཏུབྦིདྷབྷཱུཏཀསིཎཨཱཀཱསཨཱལོཀཀསིཎཨཱརུཔྤཙཏུཀྐཝསེན དསཝིདྷཱནི. ཏཏྠཱཔཱིཏི ཏེསུ དསསུ ཀམྨཊྛཱནེསུ. པུཐུལཾ མོཧཙརིཏསྶ སཔྤཱཡཾ སམྦཱདྷེ ཨོཀཱསེ ཙིཏྟསྶ བྷིཡྻོསོམཏྟཱཡ སམྨུཡ྄ཧནཏོ. ཁུདྡཀཾ ཝིཏཀྐཙརིཏསྶ སཔྤཱཡཾ མཧནྟཱརམྨཎསྶ ཝིཏཀྐསནྡྷཱཝནཔཙྩཡཏྟཱ. ཨུཛུཝིཔཙྩནཱིཀཏོ ཙེཝ ཨཏིསཔྤཱཡཏཱཡ ¶ ཙེཏཾ ཝུཏྟཾ. རཱགཱདཱིནཾ པན ཨཝིཀྑམྦྷིཀཱ, སདྡྷཱདཱིནཾ ཝཱ ཨནུཔཀཱརིཀཱ ཀསིཎཱདིབྷཱཝནཱ ནཱམ ནཏྠི.

སཔྤཱཡབྷེདཝཎྞནཱ ནིཊྛིཏཱ.

བྷཱཝནཱབྷེདཝཎྞནཱ

༡༩. སབྦཏྠཱཔཱིཏི ¶ ཙཏྟཱལཱིསཀམྨཊྛཱནེསུཔི ནཏྠི ཨཔྤནཱ, བུདྡྷགུཎཱདཱིནཾ པརམཏྠབྷཱཝཏོ, ཨནེཀཝིདྷཏྟཱ, ཨེཀསྶཔི གམྦྷཱིརབྷཱཝཏོ ཙ. བུདྡྷཱནུསྶཏིཨཱདཱིསུ དསསུ ཀམྨཊྛཱནེསུ ཨཔྤནཱཝསེན སམཱདྷིསྶ པཏིཊྛཱཏུཾ ཨསཀྐུཎེཡྻཏྟཱ ཨཔྤནཱབྷཱཝཾ ཨཔྤཏྭཱ སམཱདྷི ཨུཔཙཱརབྷཱཝེན པཏིཊྛཱཏི. ལོཀུཏྟརསམཱདྷི, པན དུཏིཡཙཏུཏྠཱརུཔྤསམཱདྷི ཙ སབྷཱཝདྷམྨེཔི བྷཱཝནཱཝིསེསཝསེན ཨཔྤནཾ པཱཔུཎཱཏི. ཝིསུདྡྷིབྷཱཝནཱནུཀྐམཝསེན ཧི ལོཀུཏྟརོ ཨཔྤནཾ པཱཔུཎཱཏི. ཨཱརམྨཎསམཏིཀྐམབྷཱཝནཱཝསེན ཨཱརུཔྤསམཱདྷི. ཨཔྤནཱཔྤཏྟསྶེཝ ཧི ཙཏུཏྠཛ྄ཛྷཱནསམཱདྷིནོ ཨཱརམྨཎསམཏིཀྐམནམཏྟཾ ཧོཏི.

༢༡. པཉྩཔི ཛྷཱནཱནི ཨེཏེསམཏྠི, ཏཏྠ ནིཡུཏྟཱནཱིཏི ཝཱ པཉྩཀཛ྄ཛྷཱནིཀཱནི.

༢༢. ཨསུབྷབྷཱཝནཱཡ པཊིཀཱུལཱརམྨཎཏྟཱ ཙཎྜསོཏཱཡ ནདིཡཱ ཨརིཏྟབལེན ནཱཝཱ ཝིཡ ཝིཏཀྐབལེནེཝ ཏཏྠ ཙིཏྟཾ པཝཏྟཏཱིཏི ཨསུབྷཀམྨཊྛཱནེ ཨཝིཏཀྐཛ྄ཛྷཱནཱསམྦྷཝཏོ ‘‘པཋམཛ྄ཛྷཱནིཀཱ’’ཏི ཝུཏྟཾ.

༢༣. མེཏྟཱཀརུཎཱམུདིཏཱནཾ དོམནསྶསཧགཏབྱཱཔཱདཝིཧིཾསཱནབྷིརཏཱིནཾ པཧཱཡཀཏྟཱ དོམནསྶཔྤཊིཔཀྑེན སོམནསྶེནེཝ སཧགཏཏཱ ཡུཏྟཱཏི ‘‘མེཏྟཱདཡོ ཏཡོ ཙཏུཀྐཛ྄ཛྷཱནིཀཱ’’ཏི ཝུཏྟཱ.

༢༤. ‘‘སབྦེ ¶ སཏྟཱ སུཁིཏཱ ཧོནྟུ, དུཀྑཱ མུཙྩནྟུ, ལདྡྷསུཁསམྤཏྟིཏོ མཱ ཝིགཙྪནྟཱུ’’ཏི མེཏྟཱདིཝསཔྤཝཏྟབྱཱཔཱརཏྟཡཾ པཧཱཡ ཀམྨསྶཀཏཱདསྶནེན སཏྟེསུ མཛ྄ཛྷཏྟཱཀཱརཔྤཝཏྟབྷཱཝནཱནིབྦཏྟཱཡ ཏཏྲམཛ྄ཛྷཏྟུཔེཀྑཱཡ བལཝཏརཏྟཱ ཨུཔེཀྑཱབྲཧྨཝིཧཱརསྶ སུཁསཧགཏཱསམྦྷཝཏོ ‘‘ཨུཔེཀྑཱ པཉྩམཛ྄ཛྷཱནིཀཱ’’ཏི ཝུཏྟཱ.

བྷཱཝནཱབྷེདཝཎྞནཱ ནིཊྛིཏཱ.

གོཙརབྷེདཝཎྞནཱ

༢༦. ཡཐཱརཧནྟི ¶ ཏཾཏཾཨཱརམྨཎཱནུརཱུཔཏོ. ཀསྶཙི ཨཱརམྨཎསྶ ཨཔརིབྱཏྟཏཱཡ ‘‘པརིཡཱཡེནཱ’’ཏི ཝུཏྟཾ.

༢༧. ཀསིཎཱསུབྷཀོཊྛཱསཱནཱཔཱནསྶཏཱིསྭེཝ ཧི པརིབྱཏྟནིམིཏྟསམྦྷཝོཏི.

༢༨. པཐཝཱིམཎྜལཱདཱིསུ ནིམིཏྟཾ ཨུགྒཎྷནྟསྶཱཏི ཨཱདིམྷི ཏཱཝ ཙཏུཔཱརིསུདྡྷིསཱིལཾ ཝིསོདྷེཏྭཱ དསཝིདྷཾ པལིབོདྷཾ ཨུཔཙྪིནྡིཏྭཱ པིཡགརུབྷཱཝནཱིཡཱདིགུཎསམནྣཱགཏཾ ཀལྱཱཎམིཏྟཾ ཨུཔསངྐམིཏྭཱ ཨཏྟནོ ཙརིཡཱནུཀཱུལཾ ཀམྨཊྛཱནཾ གཧེཏྭཱ ཨཊྛཱརསཝིདྷཾ ཨནནུརཱུཔཝིཧཱརཾ པཧཱཡ པཉྩངྒསམནྣཱགཏེ ཨནུརཱུཔཝིཧཱརེ ཝིཧརནྟསྶ ཀེསནཁཧརཎཱདིཁུདྡཀཔལིབོདྷུཔཙྪེདཾ ཀཏྭཱ ཀསིཎམཎྜལཱདཱིནི པུརཏོ ཀཏྭཱ ཨཱནཱཔཱནཀོཊྛཱསཱདཱིསུ ཙིཏྟཾ ཋཔེཏྭཱ ནིསཱིདིཏྭཱ ‘‘པཐཝཱི པཐཝཱི’’ཏྱཱདིནཱ ཏཾཏཾབྷཱཝནཱནུཀྐམེན པཐཝཱིཀསིཎཱདཱིསུ ཏཾཏདཱརམྨཎེསུ ནིམིཏྟཾ ཨུགྒཎྷནྟསྶ. ཨཡམེཏྠ སངྑེཔོ. ཝིཏྠཱརཏོ པན བྷཱཝནཱ ཝིསུདྡྷིམགྒཏོ (ཝིསུདྡྷི. ༡.༥༤ ཨཱདཡོ) གཧེཏབྦཱ. དུཝིདྷམྤི ཧི བྷཱཝནཱཝིདྷཱནཾ ཨིདྷ ཨཱཙརིཡེན ¶ ཨཏིསངྑེཔཏོ ཝུཏྟཾ, ཏདཏྠདསྶནཏྠཉྩ ཝིཏྠཱརནཡེ ཨཱཧརིཡམཱནེ ཨཏིཔྤཔཉྩོ སིཡཱཏི མཡམྤི ཏཾ ན ཝིཏྠཱརེསྶཱམ. ཡདཱ པན ཏཾ ནིམིཏྟཾ ཙིཏྟེན སམུགྒཧིཏནྟི ཨེཝཾ པཝཏྟཱནུཔུབྦབྷཱཝནཱཝསེན ཡདཱ ཏཾ པརིཀམྨནིམིཏྟཾ ཙིཏྟེན སམྨཱ ཨུགྒཧིཏཾ ཧོཏི. མནོདྭཱརསྶ ཨཱཔཱཐམཱགཏནྟི ཙཀྑུཾ ནིམྨཱིལེཏྭཱ, ཨཉྙཏྠ གནྟྭཱ ཝཱ མནསི ཀརོནྟསྶ ཀསིཎམཎྜལསདིསམེཝ ཧུཏྭཱ མནོདྭཱརིཀཛཝནཱནཾ ཨཱཔཱཐཾ ཨཱགཏཾ ཧོཏི.

༢༩. སམཱདྷིཡཏཱིཏི ཝིསེསཏོ ཙིཏྟེཀགྒཏཱཔཏྟིཡཱ སམཱཧིཏཱ ཧོཏི.

༣༠. ཙིཏྟསམཱདྷཱནཝསེན པུགྒལོཔི སམཱཧིཏོཡེཝཱཏི ཝུཏྟཾ ‘‘ཏཐཱ སམཱཧིཏསྶཱ’’ཏི. ཏཔྤཊིབྷཱགནྟི ཨུགྒཧནིམིཏྟསདིསཾ, ཏཏོཡེཝ ཧི ཏཾ ‘‘པཊིབྷཱགནིམིཏྟ’’ནྟི ཝུཙྩཏི. ཏཾ པན ཨུགྒཧནིམིཏྟཏོ ཨཏིཔརིསུདྡྷཾ ཧོཏི. ཝཏྠུདྷམྨཝིམུཙྩིཏནྟི པརམཏྠདྷམྨཏོ ཝིམུཏྟཾ, ཝཏྠུདྷམྨཏོ ཝཱ ཀསིཎམཎྜལགཏཀསིཎདོསཏོ ཝིནིམུཏྟཾ. བྷཱཝནཱཡ ནིབྦཏྟཏྟཱ བྷཱཝནཱམཡཾ. སམཔྤིཏནྟི སུཊྛུ ཨཔྤིཏཾ.

༣༡. ཏཏོ པཊྛཱཡཱཏི པཊིབྷཱགནིམིཏྟུཔྤཏྟིཏོ པཊྛཱཡ.

༣༣. པཉྩསུ ཛྷཱནངྒེསུ ཨེཀེཀཱརམྨཎེ ཨུཔྤནྣཱཝཛྫནཱནནྟརཾ ཙཏུཔཉྩཛཝནཀཏིཔཡབྷཝངྒཏོ ¶ པརཾ ཨགནྟྭཱ ཨཔརཱཔརཾ ཛྷཱནངྒཱཝཛྫནསམཏྠཏཱ ཨཱཝཛྫནཝསིཏཱ ནཱམ. སམཱཔཛྫིཏུཀཱམཏཱནནྟརཾ ཀཏིཔཡབྷཝངྒཏོ པརཾ ཨགནྟྭཱ ཨུཔྤནྣཱཝཛྫནཱནནྟརཾ སམཱཔཛྫིཏུཾ སམཏྠཏཱ སམཱཔཛྫནཝསིཏཱ ནཱམ. སེཏུ ཝིཡ སཱིགྷསོཏཱཡ ནདིཡཱ ཨོགྷཾ བྷཝངྒཝེགཾ ཨུཔཙྪིནྡིཏྭཱ ཡཐཱཔརིཙྪིནྣཀཱལཾ ཛྷཱནཾ ཋཔེཏུཾ སམཏྠཏཱ བྷཝངྒཔཱཏཏོ རཀྑཎཡོགྱཏཱ ཨདྷིཊྛཱནཝསིཏཱ ནཱམ. ཡཐཱ པརིཙྪིནྣཀཱལཾ ཨནཏིཀྐམིཏྭཱ ཛྷཱནཏོ ཝུཊྛཱནསམཏྠཏཱ ཝུཊྛཱནཝསིཏཱ ནཱམ. ཨཐ ཝཱ ཡཐཱཔརིཙྪིནྣཀཱལཏོ ཨུདྡྷཾ གནྟུཾ ཨདཏྭཱ ཋཔནསམཏྠཏཱ ཨདྷིཊྛཱནཝསིཏཱ ¶ ནཱམ. ཡཐཱཔརིཙྪིནྣཀཱལཏོ ཨནྟོ ཨཝུཊྛཧིཏྭཱ ཡཐཱཀཱལཝསེནེཝ ཝུཊྛཱནསམཏྠཏཱ ཝུཊྛཱནཝསིཏཱ ནཱམཱཏི ཨལམཏིཔྤཔཉྩེན. པཙྩཝེཀྑཎཝསིཏཱ པན ཨཱཝཛྫནཝསིཏཱཡ ཨེཝ སིདྡྷཱ. ཨཱཝཛྫནཱནནྟརཛཝནཱནེཝ ཧི པཙྩཝེཀྑཎཛཝནཱནི ནཱམ. ཝིཏཀྐཱདིཨོལཱ༹རིཀངྒཾ པཧཱནཱཡཱཏི དུཏིཡཛ྄ཛྷཱནཱདཱིཧི ཝིཏཀྐཱདིཨོལཱ༹རིཀངྒཱནཾ ཛྷཱནཀྑཎེ ཨནུཔྤཱདཱཡ. པདཧཏོཏི པརིཀམྨཾ ཀརོནྟསྶ. ཏསྶ པན ཨུཔཙཱརབྷཱཝནཱ ནིཔྥནྣཱ ནཱམ ཧོཏི ཝིཏཀྐཱདཱིསུ ནིཀནྟིཝིཀྑམྦྷནཏོ པཊྛཱཡཱཏི དཊྛབྦཾ. ཡཐཱརཧནྟི ཏཾཏཾཛྷཱནིཀཀསིཎཱདིཨཱརམྨཎཱནུརཱུཔཾ.

༣༦. ཨཱཀཱསཀསིཎསྶ ཨུགྒྷཱཊེཏུཾ ཨསཀྐུཎེཡྻཏྟཱ ཝུཏྟཾ ‘‘ཨཱཀཱསཝཛྫིཏེསཱུ’’ཏི. ཀསིཎནྟི ཀསིཎཔཊིབྷཱགནིམིཏྟཾ. ཨུགྒྷཱཊེཏྭཱཏི ཨམནསིཀཱརཝསེན ཨུདྡྷརིཏྭཱ. ཨནནྟཝསེན པརིཀམྨཾ ཀརོནྟསྶཱཏི ‘‘ཨནནྟཾ ཨཱཀཱསཾ, ཨནནྟཾ ཨཱཀཱས’’ནྟི ཨཱཀཱསཾ ཨཱརབྦྷ པརིཀམྨཾ ཀརོནྟསྶ, ན པན ཀེཝལཾ ‘‘ཨནནྟཾ ཨནནྟ’’ནྟི. ཨེཝཾ ཝིཉྙཱཎཉྩཱཡཏནེཔི. ‘‘ཨནནྟ’’ནྟི ཨཝཏྭཱཔི ‘‘ཨཱཀཱསོ ཨཱཀཱསོ (ཝིསུདྡྷི. ༡.༢༧༦), ཝིཉྙཱཎཾ ཝིཉྙཱཎ’’ནྟི (ཝིསུདྡྷི. ༡.༢༨༡) མནསི ཀཱཏུཾ ཝཊྚཏཱིཏི ཨཱཙརིཡཱ.

༣༩. ‘‘སནྟམེཏཾ, པཎཱིཏམེཏ’’ནྟི པརིཀམྨཾ ཀརོནྟསྶཱཏི ཨབྷཱཝམཏྟཱརམྨཎཏཱཡ ‘‘ཨེཏཾ སནྟཾ, ཨེཏཾ པཎཱིཏ’’ནྟི བྷཱཝེནྟསྶ.

༤༠. ཨཝསེསེསུ ཙཱཏི ཀསིཎཱདཱིཧི སཧ ཨཔྤནཱཝཧཀམྨཊྛཱནཏོ ཨཝསེསེསུ བུདྡྷཱནུསྶཏིཨཱདཱིསུ ཨཊྛསུ ¶ , སཉྙཱཝཝཏྠཱནེསུ ཙཱཏི དསསུ ཀམྨཊྛཱནེསུ. པརིཀམྨཾ ཀཏྭཱཏི ‘‘སོ བྷགཝཱ ཨིཏིཔི ཨརཧཾ, ཨིཏིཔི སམྨཱསམྦུདྡྷོ’’ཏྱཱདིནཱ (ཝིསུདྡྷི. ༡.༡༢༤) ཝུཏྟཝིདྷཱནེན པརིཀམྨཾ ཀཏྭཱ. སཱདྷུཀམུགྒཧིཏེཏི བུདྡྷཱདིགུཎནིནྣཔོཎཔབྦྷཱརཙིཏྟཏཱཝསེན སུཊྛུ ཨུགྒཧིཏེ. པརིཀམྨཉྩ སམཱདྷིཡཏཱིཏི པརིཀམྨབྷཱཝནཱ སམཱཧིཏཱ ནིཔྥཛྫཏི. ཨུཔཙཱརོ ཙ སམྤཛྫཏཱིཏི ནཱིཝརཎཱནི ཝིཀྑམྦྷེནྟོ ཨུཔཙཱརསམཱདྷི ཙ ཨུཔྤཛྫཏི.

༤༡. ཨབྷིཉྙཱཝསེན ¶ པཝཏྟམཱནནྟི ཨབྷིཝིསེསཏོ ཛཱནནཊྛེན ཨབྷིཉྙཱསངྑཱཏཾ ཨིདྡྷིཝིདྷཱདིཔཉྩལོཀིཡཱབྷིཉྙཱཝསེན པཝཏྟམཱནཾ, ཨབྷིཉྙཱཔཱདཀཔཉྩམཛ྄ཛྷཱནཱ ཝུཊྛཧིཏྭཱཏི ཀསིཎཱནུལོམཱདཱིཧི ཙུདྡསཧཱཀཱརེཧི (ཝིསུདྡྷི. ༢.༣༦༥) ཙིཏྟཾ པརིདམེཏྭཱ ཨབྷིནཱིཧཱརཀྑམཾ ཀཏྭཱ ཨུཔེཀྑེཀགྒཏཱཡོགཏོ ཨནུརཱུཔཏྟཱ ཙ རཱུཔཱཝཙརཔཉྩམཛ྄ཛྷཱནམེཝ ཨབྷིཉྙཱནཾ པཱདཀཾ པཏིཊྛཱབྷཱུཏཾ པཐཝཱདིཀསིཎཱརམྨཎཾ པཉྩམཛ྄ཛྷཱནཾ, ཏཾ སམཱཔཛྫིཏྭཱ ཏཏོ ཝུཊྛཱཡ. ཨདྷིཊྛེཡྻཱདིཀམཱཝཛྫེཏྭཱཏི ཨིདྡྷིཝིདྷཉཱཎསྶ པརིཀམྨཀཱལེ ཨདྷིཊྛཱཏབྦཾ ཝིཀུབྦནཱིཡཾ སཏཱདིཀཾ ཀོམཱརརཱུཔཱདིཀཾ, དིབྦསོཏསྶ པརིཀམྨཀཱལེ ཐཱུལསུཁུམབྷེདཾ སདྡཾ, ཙེཏོཔརིཡཉཱཎསྶ པརིཀམྨཀཱལེ པརསྶ ཧདཡངྒཏཝཎྞདསྶནེན སརཱགཱདིབྷེདཾ ཙིཏྟཾ, པུབྦེནིཝཱསཱནུསྶཏིཉཱཎསྶ པརིཀམྨསམཡེ པུརིམབྷཝེསུ ཙུཏིཙིཏྟཱདིབྷེདཾ པུབྦེ ནིཝུཏྠཀྑནྡྷཾ, དིབྦཙཀྑུསྶ པརིཀམྨསམཡེ ཨོབྷཱསཕརིཏཊྛཱནགཏཾ རཱུཔཾ ཝཱ ཨཱཝཛྫེཏྭཱ.

པརིཀམྨཾ ཀརོནྟསྶཱཏི ‘‘སཏཾ ཧོམི, སཧསྶཾ ཧོམཱི’’ཏྱཱདིནཱ པརིཀམྨཾ ཀརོནྟསྶ. རཱུཔཱདཱིསཱུཏི པརིཀམྨཝིསཡབྷཱུཏེསུ རཱུཔཔཱདཀཛ྄ཛྷཱནསདྡཔརཙིཏྟཔུབྦེནིཝུཏྠཀྑནྡྷཱདིབྷེདེསུ ཨཱརམྨཎེསུ. ཨེཏྠ ཧི ཨིདྡྷིཝིདྷཉཱཎསྶ ཏཱཝ པཱདཀཛ྄ཛྷཱནཾ, ཀཱཡོ, རཱུཔཱདིཨདྷིཊྛཱནེ རཱུཔཱདཱིནི ཙཱཏི ཚ ཨཱརམྨཎཱནི ¶ . ཏཏྠ པཱདཀཛ྄ཛྷཱནཾ ཨཏཱིཏམེཝ, ཀཱཡོ པཙྩུཔྤནྣོ, ཨིཏརཾ པཙྩུཔྤནྣམནཱགཏཾ ཝཱ. དིབྦསོཏསྶ པན སདྡོཡེཝ, སོ ཙ ཁོ པཙྩུཔྤནྣོ. པརཙིཏྟཝིཛཱནནཱཡ པན ཨཏཱིཏེ སཏྟདིཝསེསུ, ཨནཱགཏེ སཏྟདིཝསེསུ ཙ པཝཏྟཾ པརིཏྟཱདཱིསུ ཡཾ ཀིཉྩི ཏིཀཱལིཀཾ ཙིཏྟམེཝ ཨཱརམྨཎཾ ཧོཏཱིཏི མཧཱཨཊྛཀཐཱཙརིཡཱ (ཝིསུདྡྷི. ༢.༤༡༦; དྷ. ས. ཨཊྛ. ༡༤༣༤).

སངྒཧཀཱརཱ པན ‘‘ཙཏྟཱརོཔི ཁནྡྷཱ’’ཏི (དྷ. ས. ཨཊྛ. ༡༤༣༤) ཝདནྟི, ཀཐཾ པནསྶཱ པཙྩུཔྤནྣཙིཏྟཱརམྨཎཏཱ, ནནུ ཙ ཨཱཝཛྫནཱཡ གཧིཏམེཝ ཨིདྡྷིཙིཏྟསྶ ཨཱརམྨཎཾ ཧོཏི, ཨཱཝཛྫནཱཡ ཙ པཙྩུཔྤནྣཙིཏྟམཱརམྨཎཾ ཀཏྭཱ ནིརུཛ྄ཛྷམཱནཱཡ ཏཾསམཀཱལམེཝ པརསྶ ཙིཏྟམྤི ནིརུཛ྄ཛྷཏཱིཏི ཨཱཝཛྫནཛཝནཱནཾ ཀཱལཝསེན ཨེཀཱརམྨཎཏཱ ན སིཡཱ, མགྒཕལཝཱིཐིཏོ ཨཉྙཏྠ ཨཱཝཛྫནཛཝནཱནཾ ཀཐཉྩ ནཱནཱརམྨཎཏཱ ན ཨདྷིཔྤེཏཱཏི? ཨཊྛཀཐཱཡཾ (ཝིསུདྡྷི. ༢.༤༡༦; དྷ. ས. ཨཊྛ. ༡༤༣༤) ཏཱཝ སནྟཏིཨདྡྷཱཔཙྩུཔྤནྣཱརམྨཎཏཱ ཡོཛིཏཱ. ཨཱནནྡཱཙརིཡོ (དྷ. ས. མཱུལཊཱི. ༡༤༣༤ ཐོཀ ཝིསདིསཾ) པན བྷཎཏི ‘‘པཱདཀཛ྄ཛྷཱནཏོ ཝུཊྛཱཡ པཙྩུཔྤནྣཱདིཝིབྷཱགཾ ཨཀཏྭཱ ཀེཝལཾ ‘ཨིམསྶ ཙིཏྟཾ ¶ ཛཱནཱམི’ཙྩེཝ པརིཀམྨཾ ཀཏྭཱ པུནཔི པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ཨཝིསེསེནེཝ ཙིཏྟཾ ཨཱཝཛྫེཏྭཱ ཏིཎྞཾ, ཙཏུནྣཾ ཝཱ པརིཀམྨཱནཾ ཨནནྟརཾ ཙེཏོཔརིཡཉཱཎེན པརསྶ ཙིཏྟཾ པཊིཝིཛ྄ཛྷཏི རཱུཔཾ ཝིཡ དིབྦཙཀྑུནཱ. པཙྪཱ ཀཱམཱཝཙརཙིཏྟེན སརཱགཱདིཝཝཏྠཱནམྤི ཀརོཏི ནཱིལཱདིཝཝཏྠཱནཾ ཝིཡ. ཏཱནི ཙ སབྦཱནི ཨབྷིམུཁཱིབྷཱུཏཙིཏྟཱརམྨཎཱནེཝ, ཨནིཊྛེ ཙ ཋཱནེ ནཱནཱརམྨཎཏཱདོསོ ནཏྠི ཨབྷིནྣཱཀཱརཔྤཝཏྟིཏོ’’ཏི. པུབྦེནིཝཱསཱནུསྶཏིཉཱཎསྶ པུབྦེ ནིཝུཏྠཀྑནྡྷཱ, ཁནྡྷཔྤཊིབདྡྷཱནི ཙ ནཱམགོཏྟཱནི, ནིབྦཱནཉྩ ཨཱརམྨཎཾ ཧོཏི, དིབྦཙཀྑུསྶ པན རཱུཔམེཝ ¶ པཙྩུཔྤནྣནྟི ཨཡམེཏེསཾ ཨཱརམྨཎཝིབྷཱགོ. ཡཐཱརཧམཔྤེཏཱིཏི ཏཾཏཾཔརིཀམྨཱནུརཱུཔཏོ ཨཔྤེཏི.

༤༢. ཨིདཱནི ཨཱརམྨཎཱནཾ བྷེདེན ཨབྷིཉྙཱབྷེདཾ དསྶེཏུཾ ‘‘ཨིདྡྷིཝིདྷཱ’’ཏྱཱདིམཱཧ. ཨདྷིཊྛཱནཱདི ཨིདྡྷིཔྤབྷེདོ ཨེཏིསྶཱཏི ཨིདྡྷིཝིདྷཱ. དིབྦཱནཾ སོཏསདིསཏཱཡ, དིབྦཝིཧཱརསནྣིསྶིཏཏཱཡ ཙ དིབྦཉྩ ཏཾ སོཏཉྩཱཏི དིབྦསོཏཾ. པརེསཾ ཙིཏྟཾ ཝིཉྙཱཡཏི ཨེཏཱཡཱཏི པརཙིཏྟཝིཛཱནནཱ. ཨཏྟནོ སནྟཱནེ ནིཝུཏྠཝསེན ཙེཝ གོཙརནིཝཱསཝསེན ཙ པུབྦེ ཨཏཱིཏབྷཝེསུ ཁནྡྷཱདཱིནཾ ཨནུསྶརཎཾ པུབྦེནིཝཱསཱནུསྶཏི. ཝུཏྟནཡེན དིབྦཉྩ ཏཾ ཙཀྑུ ཙཱཏི དིབྦཙཀྑུ. ‘ཙུཏཱུཔཔཱཏཉཱཎ’ནྟི པན དིབྦཙཀྑུམེཝ ཝུཙྩཏི. ཡཐཱཀམྨཱུཔགཉཱཎཨནཱགཏཾསཉཱཎཱནིཔི དིབྦཙཀྑུཝསེནེཝ ཨིཛ྄ཛྷནྟི. ན ཧི ཏེསཾ ཝིསུཾ པརིཀམྨཾ ཨཏྠི. ཏཏྠ ཨནཱགཏཾསཉཱཎསྶ ཏཱཝ ཨནཱགཏེ སཏྟདིཝསཏོ པརཾ པཝཏྟནཀཾ ཙིཏྟཙེཏསིཀཾ དུཏིཡདིཝསཏོ པཊྛཱཡ པཝཏྟནཀཉྩ ཡཾ ཀིཉྩི ཨཱརམྨཎཾ ཧོཏི. ཏཉྷི སཝིསཡེ སབྦཉྙུཏཉྙཱཎགཏིཀནྟི. ཡཐཱ ཀམྨཱུཔགཉཱཎསྶ པན ཀུསལཱཀུསལསངྑཱཏཱ ཙེཏནཱ, ཙཏྟཱརོཔི ཝཱ ཁནྡྷཱ ཨཱརམྨཎནྟི དཊྛབྦཾ.

གོཙརཝསེན བྷེདོ གོཙརབྷེདོ.

གོཙརབྷེདཝཎྞནཱ ནིཊྛིཏཱ.

སམཐཀམྨཊྛཱནཝཎྞནཱ ནིཊྛིཏཱ.

ཝིཔསྶནཱཀམྨཊྛཱནཾ

ཝིསུདྡྷིབྷེདཝཎྞནཱ

༤༣. ཨནིཙྩཱདིཝསེན ¶ ཝིཝིདྷཱཀཱརེན པསྶཏཱིཏི ཝིཔསྶནཱ, ཨནིཙྩཱནུཔསྶནཱདིཀཱ བྷཱཝནཱཔཉྙཱ. ཏསྶཱ ཀམྨཊྛཱནཾ, སཱཡེཝ ཝཱ ཀམྨཊྛཱནནྟི ཝིཔསྶནཱཀམྨཊྛཱནཾ. ཏསྨིཾ ཝིཔསྶནཱཀམྨཊྛཱནེ སཏྟཝིདྷེན ཝིསུདྡྷིསངྒཧོཏི སམྦནྡྷོ.

༤༤. ཨནིཙྩཏཱཡེཝ ¶ ལཀྑཎཾ ལཀྑིཏབྦཾ, ལཀྑཱིཡཏི ཨནེནཱཏི ཝཱ ཨནིཙྩལཀྑཎཾ. ཨུདཡཝཡཔཊིཔཱིལ༹ནསངྑཱཏདུཀྑབྷཱཝོ ཝ ལཀྑཎནྟི དུཀྑལཀྑཎཾ. པརཔརིཀཔྤིཏསྶ ཨཏྟནོ ཨབྷཱཝོ ཨནཏྟཏཱ, ཏདེཝ ལཀྑཎནྟི ཨནཏྟལཀྑཎཾ.

༤༥. ཏིཎྞཾ ལཀྑཎཱནཾ ཨནུ ཨནུ པསྶནཱ ཨནིཙྩཱནུཔསྶནཱདིཀཱ.

༤༦. ཁནྡྷཱདཱིནཾ ཀལཱཔཏོ སམྨསནཝསཔྤཝཏྟཾ ཉཱཎཾ སམྨསནཉཱཎཾ. ཨུཔྤཱདབྷངྒཱནུཔསྶནཱཝསཔྤཝཏྟཉཱཎཾ ཨུདཡབྦཡཉཱཎཾ. ཨུདཡཾ མུཙྩིཏྭཱ ཝཡེ པཝཏྟཾ ཉཱཎཾ བྷངྒཉཱཎཾ. སངྑཱརཱནཾ བྷཡཏོ ཨནུཔསྶནཱཝསེན པཝཏྟཾ ཉཱཎཾ བྷཡཉཱཎཾ, དིཊྛབྷཡཱནཾ ཨཱདཱིནཝཏོ པེཀྑཎཝསེན པཝཏྟཾ ཉཱཎཾ ཨཱདཱིནཝཉཱཎཾ, དིཊྛཱདཱིནཝེསུ ནིབྦིནྡནཝསཔྤཝཏྟཾ ཉཱཎཾ ནིབྦིདཱཉཱཎཾ. ནིབྦིནྡིཏྭཱ སངྑཱརེཧི མུཙྩིཏུཀམྱཏཱཝསེན པཝཏྟཾ ཉཱཎཾ མུཙྩིཏུཀམྱཏཱཉཱཎཾ. མུཙྩནསྶ ཨུཔཱཡསམྤཊིཔཱདནཏྠཾ པུན སངྑཱརཱནཾ པརིགྒཧཝསཔྤཝཏྟཾ ཉཱཎཾ པཊིསངྑཱཉཱཎཾ. པཊིསངྑཱཏདྷམྨེསུ བྷཡནནྡཱིཝིཝཛྫནཝསེན ཨཛ྄ཛྷུཔེཀྑིཏྭཱ པཝཏྟཾ ཉཱཎཾ སངྑཱརུཔེཀྑཱཉཱཎཾ. པུརིམཱནཾ ནཝནྣཾ ཀིཙྩནིཔྥཏྟིཡཱ, ཨུཔརི ཙ སཏྟཏིཾསཱཡ བོདྷིཔཀྑིཡདྷམྨཱནཾ ཨནུཀཱུལཾ ཉཱཎཾ ཨནུལོམཉཱཎཾ.

༤༧. ཨཏྟསུཉྙཏཱཡ སུཉྙཏོ. སཾཡོཛནཱདཱིཧི ཝིམུཙྩནཊྛེན ཝིམོཀྑོ. ནིཙྩནིམིཏྟཱདིནོ ཨབྷཱཝཏོ ཨནིམིཏྟོ. པཎིཧིཏསྶ ཏཎྷཱཔཎིདྷིསྶ ཨབྷཱཝཏོ ཨཔྤཎིཧིཏོ.

༤༩. ཡོ ¶ ནཾ པཱཏི, ཏཾ མོཀྑེཏི ཨཔཱཡཱདཱིཧི དུཀྑེཧཱིཏི པཱཏིམོཀྑཾ, ཏདེཝ ཀཱཡདུཙྩརིཏཱདཱིཧི སཾཝརཎཏོ སཾཝརོ, སམཱདྷཱནོཔདྷཱརཎཊྛེན སཱིལཉྩཱཏི པཱཏིམོཀྑསཾཝརསཱིལཾ. མནཙྪཊྛཱནཾ ཨིནྡྲིཡཱནཾ རཱུཔཱདཱིསུ སཾཝརཎཝསེན ¶ པཝཏྟཾ སཱིལཾ ཨིནྡྲིཡསཾཝརསཱིལཾ. མིཙྪཱཛཱིཝ ཝིཝཛྫནེན ཨཱཛཱིཝསྶ པརིསུདྡྷིཝསཔྤཝཏྟཾ ཨཱཛཱིཝཔཱརིསུདྡྷིསཱིལཾ. པཙྩཡེ སནྣིསྶིཏཾ ཏེསཾ ཨིདམཏྠིཀཏཱཡ པཙྩཝེཀྑཎསཱིལཾ པཙྩཡསནྣིསྶིཏསཱིལཾ. ཙཏུབྦིདྷཏྟཱ དེསནཱསཾཝརཔརིཡེཊྛིཔཙྩཝེཀྑཎཝསེན, པརིསུདྡྷཏྟཱ ཙ ཙཏུཔཱརིསུདྡྷིསཱིལཾ ནཱམ.

༥༠. ཙིཏྟཝིསུདྡྷི ནཱམ ཙིཏྟསྶ ཝིནཱིཝརཎབྷཱཝཱཔཱདནཝསེན ཝིསོདྷནཏོ, ཙིཏྟསཱིསེན ནིདྡིཊྛཏྟཱ, ཝིསུདྡྷཏྟཱ ཙཱཏི ཝཱ ཀཏྭཱ.

༥༡. ‘‘དྷམྨཱནཾ སཱམཉྙསབྷཱཝོ ལཀྑཎཾ, ཀིཙྩསམྤཏྟིཡོ རསོ, ཨུཔཊྛཱནཱཀཱརོ, ཕལཉྩ པཙྩུཔཊྛཱན’’ནྟི ཨེཝཾ ཝུཏྟཱནཾ ལཀྑཎཱདཱིནཾ ‘‘ཕུསནལཀྑཎོ ཕསྶོ, ཀཀྑལ༹ལཀྑཎཱ པཐཝཱི’’ཏྱཱདིནཱ ཝིཏྠཱརཏོ, ‘‘ནམནལཀྑཎཾ ནཱམཾ, རུཔྤནལཀྑཎཾ རཱུཔ’’ནྟྱཱདིནཱ སངྑེཔཏོ ཙ པརིགྒཧོ པཙྩཏྟལཀྑཎཱདིཝསེན པརིཙྪིཛྫ གཧཎཾ དུཀྑསཙྩཝཝཏྠཱནཾ དིཊྛིཝིསུདྡྷི ནཱམ ‘‘ནཱམརཱུཔཏོ ཨཏྟཱ ནཏྠཱི’’ཏི དསྶནཏོ དིཊྛི ཙ ཨཏྟདིཊྛིམལཝིསོདྷནཏོ ཝིསུདྡྷི ཙཱཏི ཀཏྭཱ.

༥༢. པཙྩཡཔརིགྒཧོཏི ནཱམཉྩ རཱུཔཉྩ པཊིསནྡྷིཡཾ ཏཱཝ ཨཝིཛྫཱཏཎྷཱཨུཔཱདཱནཀམྨཧེཏུཝསེན ནིབྦཏྟཏི. པཝཏྟིཡཉྩ རཱུཔཾ ཀམྨཙིཏྟཨུཏུཨཱཧཱརཔཙྩཡཝསེན, ནཱམཉྩ ཙཀྑུརཱུཔཱདིནིསྶཡཱརམྨཎཱདིཔཙྩཡཝསེན, ཝིསེསཏོ ཙ ཡོནིསོམནསིཀཱརཱདིཙཏུཙཀྐསམྤཏྟིཡཱ ཀུསལཾ, ཏབྦིཔརིཡཱཡེན ཨཀུསལཾ, ཀུསལཱཀུསལཝསེན ཝིཔཱཀོ བྷཝངྒཱདིཝསེན ཨཱཝཛྫནཾ, ཁཱིཎཱསཝསནྟཱནཝསེན ཀིརིཡཛཝནཾ, ཨཱཝཛྫནཉྩ ཨུཔྤཛྫཏཱིཏི ཨེཝཾ སཱདྷཱརཎཱསཱདྷཱརཎཝསེན ཏཱིསུ ཨདྡྷཱསུ ནཱམརཱུཔཔྤཝཏྟིཡཱ པཙྩཀྑཱདིསིདྡྷསྶ ཀམྨཱདིཔཙྩཡསྶ པརིགྒཎྷནཾ སམུདཡསཙྩསྶ ཝཝཏྠཱནཾ ཀངྑཱཝིཏརཎཝིསུདྡྷི ནཱམ ‘‘ཨཧོསིཾ ནུ ཁོ ཨཧམཏཱིཏམདྡྷཱན’’ནྟྱཱདིཀཱཡ ¶ (མ. ནི. ༡.༡༨; སཾ. ནི. ༢.༢༠) སོལ༹སཝིདྷཱཡ, ‘‘སཏྠརིཀངྑཏཱི’’ཏྱཱདིཀཱཡ (དྷ. ས. ༡༡༢༣; ཝིབྷ. ༩༡༥) ཨཊྛཝིདྷཱཡ ཙ ཀངྑཱཡ ཝིཏརཎཏོ ཨཏིཀྐམནཏོ ཀངྑཱཝིཏརཎཱ, ཨཧེཏུཀཝིསམཧེཏུདིཊྛིམལཝིསོདྷནཏོ ཝིསུདྡྷི ཙཱཏི ཀཏྭཱ.

༥༣. ཏཏོ ¶ པཙྩཡཔརིགྒཧཏོ པརཾ ཏཐཱཔརིགྒཧིཏེསུ པཙྩཏྟལཀྑཎཱདིཝཝཏྠཱནཝསེན, པཙྩཡཝཝཏྠཱནཝསེན ཙ པརིགྒཧིཏེསུ ལོཀུཏྟརཝཛྫེསུ ཏིབྷཱུམིཔརིཡཱཔནྣེསུ ནཱམརཱུཔེསུ ཨཏཱིཏཱདིབྷེདབྷིནྣེསུ ཁནྡྷཱདིནཡམཱརབྦྷ པཉྩཀྑནྡྷཚདྭཱརཚལཱ༹རམྨཎཚདྭཱརཔྤཝཏྟདྷམྨཱདིཝསེན ཨཱགཏཾ ཁནྡྷཱདིནཡཾ ཨཱརབྦྷ ཀལཱཔཝསེན པིཎྜཝསེན སངྑིཔིཏྭཱ ཡཾ ཨཏཱིཏེ ཛཱཏཾ རཱུཔཾ, ཏཾ ཨཏཱིཏེཝ ནིརུདྡྷཾ. ཡཾ ཨནཱགཏེ བྷཱཝི རཱུཔཾ, ཏམྤི ཏཏྠེཝ ནིརུཛ྄ཛྷིསྶཏི. ཡཾ པཙྩུཔྤནྣཾ, ཏཾ ཨནཱགཏཾ ཨཔྤཏྭཱ ཨེཏྠེཝ ནིརུཛ྄ཛྷཏི, ཏཐཱ ཨཛ྄ཛྷཏྟབཧིདྡྷསུཁུམཨོལཱ༹རིཀཧཱིནཔཎཱིཏརཱུཔཱདཡོ. ཏསྨཱ ‘‘ཨནིཙྩཾ ཨཏྟཱདིཝསེན ན ཨིཙྩཾ ཨནུཔགནྟབྦཾ ཁཡཊྛེན ཁཡགམནཏོ, དུཀྑཾ བྷཡཊྛེན བྷཡཀརཏྟཱ, ཨནཏྟཱ ཨསཱརཀཊྛེན ཨཏྟསཱརཱདིཨབྷཱཝེནཱ’’ཏི ཙ ‘‘ཙཀྑུཾ ཨནིཙྩཾ…པེ… མནོ. རཱུཔཾ…པེ… དྷམྨཱ. ཙཀྑུཝིཉྙཱཎཾ…པེ… མནོཝིཉྙཱཎཾ ཨནིཙྩཾ དུཀྑཾ ཨནཏྟཱ’’ཏྱཱདིནཱ (པཊི. མ. ༡.༤༨) ཨཏཱིཏཱདིཨདྡྷཱཝསེན, ཨཏཱིཏཱདིསནྟཱནཝསེན, ཨཏཱིཏཱདིཁཎཝསེན ཙ སམྨསནཉཱཎེན ཧུཏྭཱཨབྷཱཝཨུདཡབྦཡཔཊིཔཱིལ༹ནཨཝསཝཏྟནཱཀཱརསངྑཱཏལཀྑཎཏྟཡསམྨསནཝསཔྤཝཏྟེན ཀལཱཔསམྨསནཉཱཎེན ལཀྑཎཏྟཡཾ སམྨསནྟསྶ པརིམཛྫནྟསྶ.

སམྨསནཉཱཎེ པན ཨུཔྤནྣེ པུན ཏེསྭེཝ སངྑཱརེསུ ‘‘ཨཝིཛྫཱསམུདཡཱ རཱུཔསམུདཡོ, ཏཎྷཱཀམྨཨཱཧཱརསམུདཡཱ རཱུཔསམུདཡོ, ཏཐཱ ཨཝིཛྫཱནིརོདྷཱ རཱུཔནིརོདྷོ, ཏཎྷཱཀམྨཨཱཧཱརནིརོདྷཱ རཱུཔནིརོདྷོ’’ཏི ¶ (པཊི. མ. ༡.༥༠) ཨེཝཾ རཱུཔཀྑནྡྷེ ཝེདནཱསཉྙཱསངྑཱརཀྑནྡྷེསུཔི ཨཱཧཱརཾ ཨཔནེཏྭཱ ‘‘ཕསྶསམུདཡཱ ཕསྶནིརོདྷཱ’’ཏི ཙ ཨེཝཾ ཕསྶཾ པཀྑིཔིཏྭཱ, ཝིཉྙཱཎཀྑནྡྷེ ‘‘ནཱམརཱུཔསམུདཡཱ ནཱམརཱུཔནིརོདྷཱ’’ཏི ནཱམརཱུཔཾ པཀྑིཔིཏྭཱ པཙྩཡསམུདཡཝསེན, པཙྩཡནིརོདྷཝསེན ཙ, པཙྩཡེ ཨནཱམསིཏྭཱ པཙྩུཔྤནྣཀྑནྡྷེསུ ནིབྦཏྟིལཀྑཎམཏྟསྶ, ཝིཔརིཎཱམལཀྑཎམཏྟསྶ ཙ དསྶནེན ཁཎཝསེན ཙཱཏི ཨེཀེཀསྨིཾ ཁནྡྷེ པཙྩཡཝསེན ཙཏུདྷཱ, ཁཎཝསེན ཨེཀདྷཱ ཙཱཏི པཉྩདྷཱ ཨུདཡཾ, པཉྩདྷཱ ཝཡནྟི དསདསཨུདཡབྦཡདསྶནཝསེན སམཔཉྙཱསཱཀཱརེཧི ཨུདཡབྦཡཉཱཎེན ཨུདཡབྦཡཾ སམནུཔསྶནྟསྶ ཨཱརདྡྷཝིཔསྶཀསྶ ཡོགིནོ ཝིཔསྶནཱཙིཏྟསམུཊྛཱནོ སརཱིརཏོ ནིཙྪརཎཀཨཱལོཀསངྑཱཏོ ཨོབྷཱསོ, ཝིཔསྶནཱཙིཏྟསཧཛཱཏཱ ཁུདྡིཀཱདིཔཉྩཝིདྷཱ (དྷ. ས. ཨཊྛ. ༡ དྷམྨུདྡེསཝཱར ཛྷཱནངྒརཱསིཝཎྞནཱ) པཱིཏི, ཏཐཱ ཀཱཡཙིཏྟདརཐཝཱུཔསམལཀྑཎཱ ཀཱཡཙིཏྟཝསེན དུཝིདྷཱ པསྶདྡྷི, བལཝསདྡྷིནྡྲིཡསངྑཱཏོ ཨདྷིམོཀྑོ, སམྨཔྤདྷཱནཀིཙྩསཱདྷཀོ ཝཱིརིཡསམྦོཛ྄ཛྷངྒསངྑཱཏོ པགྒཧོ, ཨཏིཔཎཱིཏཾ སུཁཾ, ཨིནྡཝིསྶཊྛཝཛིརསདིསཾ ཏིལཀྑཎཝིཔསྶནཱབྷཱུཏཾ ¶ ཉཱཎཾ, སཏིཔཊྛཱནབྷཱུཏཱ ཙིརཀཏཱདིཨནུསྶརཎསམཏྠཱ ཨུཔཊྛཱནསངྑཱཏཱ སཏི, སམཔྤཝཏྟཝིཔསྶནཱསཧཛཱཏཱ ཨུཔེཀྑཱསམྦོཛ྄ཛྷངྒབྷཱུཏཱ ཏཏྲམཛ྄ཛྷཏྟུཔེཀྑཱ, མནོདྭཱརེ ཨཱཝཛ྄ཛྷནུཔེཀྑཱ ཙཱཏི དུཝིདྷཱཔི ཨུཔེཀྑཱ, ཨོབྷཱསཱདཱིསུ ཨུཔྤནྣེསུ ‘‘ན ཝཏ མེ ཨིཏོ པུབྦེ ཨེཝརཱུཔོ ཨོབྷཱསོ ཨུཔྤནྣཔུབྦོ’’ཏྱཱདིནཱ (ཝིསུདྡྷི. ༢.༧༣༣) ནཡེན ཏཏྠ ཨཱལཡཾ ཀུརུམཱནཱ སུཁུམཏཎྷཱ རཱུཔནིཀནྟིཙཱཏི ཨོབྷཱསཱདཱིསུ དསསུ ཝིཔསྶནུཔཀྐིལེསེསུ ཨུཔྤནྣེསུ ‘‘ན ཝཏ མེ ཨིཏོ པུབྦེ ཨེཝརཱུཔཱ ཨོབྷཱསཱདཡོ ཨུཔྤནྣཔུབྦཱ ཨདྡྷཱ མགྒཔྤཏྟོསྨི, ཕལཔྤཏྟོསྨཱི’’ཏི (ཝིསུདྡྷི. ༢.༧༣༣) ཨགྒཧེཏྭཱ ‘‘ཨིམེ ཨོབྷཱསཱདཡོ ¶ ཏཎྷཱདིཊྛིམཱནཝཏྠུཏཱཡ ན མགྒོ, ཨཐ ཁོ ཝིཔསྶནུཔཀྐིལེསཱ ཨེཝ, ཏབྦིནིམུཏྟཾ པན ཝཱིཐིཔཊིཔནྣཾ ཝིཔསྶནཱཉཱཎཾ མགྒོ’’ཏི ཨེཝཾ མགྒཱམགྒལཀྑཎསྶ ཝཝཏྠཱནཾ ནིཙྪཡནཾ མགྒཱམགྒསྶ ཛཱནནཏོ, དསྶནཏོ, ཨམགྒེ མགྒསཉྙཱཡ ཝིསོདྷནཏོ ཙ མགྒཱམགྒཉཱཎདསྶནཝིསུདྡྷི ནཱམ.

༥༤. ཡཱཝཱནུལོམཱཏི ཡཱཝ སཙྩཱནུལོམཉཱཎཱ. ནཝ ཝིཔསྶནཱཉཱཎཱནཱིཏི (ཝིསུདྡྷི. ༢.༧༣༧ ཨཱདཡོ) ཁནྡྷཱནཾ ཨུདཡཉྩ ཝཡཉྩ ཛཱནནཀཾ ཨུདཡབྦཡཉཱཎཾ, ཨུདཡཾ མུཉྩིཏྭཱ བྷངྒམཏྟཱནུཔེཀྑཀཾ བྷངྒཉཱཎཾ, བྷངྒཝསེན ཨུཔཊྛིཏཱནཾ སཱིཧཱདཱིནཾ ཝིཡ བྷཱཡིཏབྦཱཀཱརཱནུཔེཀྑཀཾ བྷཡཉཱཎཾ, ཏཐཱནུཔེཀྑིཏཱནཾ ཨཱདིཏྟགྷརསྶ ཝིཡ ཨཱདཱིནཝཱཀཱརཱནུཔེཀྑཀཾ ཨཱདཱིནཝཉཱཎཾ, དིཊྛཱདཱིནཝེསུ ནིབྦིནྡནཝསེན པཝཏྟཾ ནིབྦིདཱཉཱཎཾ, ཛཱལཱདིཏོ མཙྪཱདིཀཱ ཝིཡ ཏེཧི ཏེབྷཱུམཀདྷམྨེཧི མུཙྩིཏུཀཱམཏཱཝསེན པཝཏྟཾ མུཙྩིཏུཀམྱཏཱཉཱཎཾ, མུཙྩནུཔཱཡསམྤཱདནཏྠཾ དིཊྛཱདཱིནཝེསུཔི སམུདྡསཀུཎཱི ཝིཡ པུནཔྤུནཾ སམྨསནཝསཔྤཏྟཾ པཊིསངྑཱནུཔསྶནཱཉཱཎཾ, ཙཏྟབྷརིཡོ པུརིསོ ཝིཡ དིཊྛཱདཱིནཝེསུ ཏེསུ སངྑཱརེསུ ཨུཔེཀྑནཱཀཱརཔྤཝཏྟཾ སངྑཱརུཔེཀྑཱཉཱཎཾ, ཨནིཙྩཱདིལཀྑཎཝིཔསྶནཏཱཡ ཧེཊྛཱ པཝཏྟཱནཾ ཨཊྛནྣཾ ཝིཔསྶནཱཉཱཎཱནཾ, ཨུདྡྷཾ མགྒཀྑཎེ ཨདྷིགནྟབྦཱནཾ སཏྟཏིཾསབོདྷིཔཀྑིཡདྷམྨཱནཉྩ ཨནུལོམཏོ མགྒཝཱིཐིཡཾ གོཏྲབྷུཏོ པུབྦེ པཝཏྟཾ སཙྩཱནུལོམིཀཉཱཎསངྑཱཏཾ ནཝམཾ ཨནུལོམཉཱཎནྟི ཨིམཱནི ནཝ ཉཱཎཱནི ཉཱཎདསྶནཝིསུདྡྷིཡཱ པཊིཔདཱབྷཱཝཏོ ཏིལཀྑཎཛཱནནཊྛེན, པཙྩཀྑཏོ དསྶནཊྛེན, པཊིཔཀྑཏོ ཝིསུདྡྷཏྟཱ ཙ པཊིཔདཱཉཱཎདསྶནཝིསུདྡྷི ནཱམ.

༥༥. ཝིཔསྶནཱཡ པརིཔཱཀོ ཝིཔསྶནཱཔརིཔཱཀོ, སངྑཱརུཔེཀྑཱཉཱཎཾ. ཏཾ ཨཱགམྨ པཊིཙྩ. ཨིདཱནི ཨཔྤནཱ ཨུཔྤཛྫིསྶཏཱིཏི ¶ ‘‘ཨིདཱནི ཨཔྤནཱསངྑཱཏོ ལོཀུཏྟརམགྒོ ཨུཔྤཛྫིསྶཏཱི’’ཏི ཝཏྟབྦཀྑཎེ. ཡཾ ཀིཉྩཱིཏི སངྑཱརུཔེཀྑཱཡ གཧིཏེསུ ཏཱིསུ ཨེཀཾ ཡཾ ཀིཉྩི.

༥༦. ཝིཔསྶནཱཡ ¶ མཏྠཀཔྤཏྟིཡཱ སིཁཱཔྤཏྟཱ. ཨནུལོམཉཱཎསཧིཏཏཱཡ སཱནུལོམཱ. སཱ ཨེཝ སངྑཱརེསུ ཨུདཱསཱིནཏྟཱ སངྑཱརུཔེཀྑཱ. ཡཐཱནུརཱུཔཾ ཨཔཱཡཱདིཏོ, སངྑཱརནིམིཏྟཏོ ཙ ཝུཊྛཧནཏོ ཝུཊྛཱནསངྑཱཏཾ མགྒཾ གཙྪཏཱིཏི ཝུཊྛཱནགཱམིནཱི.

༥༧. ཨབྷིསམྦྷོནྟནྟི པཱཔུཎནྟཾ.

༥༨. པརིཛཱནནྟོཏི ‘‘ཨེཏྟཀཾ དུཀྑཾ, ན ཨིཏོ ཨཱུནཱདྷིཀ’’ནྟི པརིཙྪིཛྫ ཛཱནནྟོ. སཙྪིཀརོནྟོཏི ཨཱརམྨཎཀརཎཝསེན པཙྩཀྑཾ ཀརོནྟོ. མགྒསཙྩཾ བྷཱཝནཱཝསེནཱཏི མགྒསཙྩསངྑཱཏསྶ སམྤཡུཏྟམགྒསངྑཱཏསྶ ཙཏུཏྠསཙྩསྶ སཧཛཱཏཱདིཔཙྩཡོ ཧུཏྭཱ ཝཌྜྷནཝསེན. ཨེཀསྶེཝ ཉཱཎསྶ ཙཏུཀིཙྩསཱདྷནཾ པདཱིཔཱདཱིནཾ ཝཊྚིདཱཧཱདིཙཏུཀིཙྩདསྶནཏོ, ‘‘ཡོ, བྷིཀྑཝེ, དུཀྑཾ པསྶཏཱི’’ཏྱཱདི (སཾ. ནི. ༥.༡༡༠༠; ཝིསུདྡྷི. ༢.༨༣༩) ཨཱགམཏོ ཙ སམྤཊིཙྪིཏབྦཾ.

༥༩. དྭེ ཏཱིཎི ཕལཙིཏྟཱནི པཝཏྟིཏྭཱཏི མགྒུཔྤཏྟིཡཱ ཨནུརཱུཔཏོ དྭེ ཝཱ ཏཱིཎི ཝཱ ཕལཙིཏྟཱནི ཨཔནཱིཏགྒིམྷི ཋཱནེ ཨུཎྷཏྟནིབྦཱཔནཏྠཱཡ གྷཊེཧི ཨབྷིསིཉྩམཱནམུདཀཾ ཝིཡ སམུཙྪིནྣཀིལེསེཔི སནྟཱནེ དརཐཔཊིཔྤསྶམྦྷཀཱནི ཧུཏྭཱ པཝཏྟིཏྭཱ, ཏེསཾ པཝཏྟིཡཱཏི ཝུཏྟཾ ཧོཏི. པཙྩཝེཀྑཎཉཱཎཱནཱིཏི མགྒཕལཱདིཝིསཡཱནི ཀཱམཱཝཙརཉཱཎཱནི, ཡཱནི སནྡྷཱཡ ‘‘ཝིམུཏྟསྨིཾ ཝིམུཏྟམིཏི ཉཱཎཾ ཧོཏཱི’’ཏི (མཧཱཝ. ༢༣) ཝུཏྟཾ.

༦༠. ཨིདཱནི པཙྩཝེཀྑཎཱཡ བྷཱུམིཾ དསྶེཏུཾ ‘‘མགྒཾ ཕལཉྩཱ’’ཏྱཱདི ཝུཏྟཾ. ཏཏྠ ‘‘ཨིམིནཱཝ ཝཏཱཧཾ མགྒེན ཨཱགཏོ’’ཏི ¶ མགྒཾ པཙྩཝེཀྑཏི. ཏཏོ ‘‘ཨཡཾ ནཱམ མེ ཨཱནིསཾསོ ལདྡྷོ’’ཏི ཏསྶ ཕལཾ, ཏཏོ ‘‘ཨཡཾ ནཱམ མེ དྷམྨོ ཨཱརམྨཎཏོ སཙྪིཀཏོ’’ཏི ནིབྦཱནཉྩ པཎྜིཏོ པཙྩཝེཀྑཏི. ཏཏོ ‘‘ཨིམེ ནཱམ མེ ཀིལེསཱ པཧཱིནཱ’’ཏི པཧཱིནེ ཀིལེསེ, ‘‘ཨིམེ ནཱམ ཨཝསིཊྛཱ’’ཏི ཨཝསིཊྛཀིལེསེ པཙྩཝེཀྑཏི ཝཱ, ན ཝཱ. ཀོཙི སེཀྑོ པཙྩཝེཀྑཏི, ཀོཙི ན པཙྩཝེཀྑཏི. ཏཏྠ ཀཱམཙཱརོཏྱདྷིཔྤཱཡོ. ཏཐཱ ཧི མཧཱནཱམོ སཀྐོ ‘‘ཀོ སུ ནཱམ མེ དྷམྨོ ཨཛ྄ཛྷཏྟཾ ཨཔྤཧཱིནོ’’ཏི (མ. ནི. ༡.༡༧༥; ཝིསུདྡྷི. ༢.༨༡༢) ཨཔྤཧཱིནེ ཀིལེསེ པུཙྪི. ཨརཧཏོ པན ཨཝསིཊྛཀིལེསཔཙྩཝེཀྑཎཾ ནཏྠི སབྦཀིལེསཱནཾ ¶ པཧཱིནཏྟཱ, ཏསྨཱ ཏིཎྞཾ སེཀྑཱནཾ པནྣརས ཨརཧཏོ ཙཏྟཱརཱིཏི ཨེཀཱུནཝཱིསཏི པཙྩཝེཀྑཎཉཱཎཱནཱིཏི དཊྛབྦཾ.

ཚབྦིསུདྡྷིཀམེནཱཏི (ཝིསུདྡྷི. ༢.༦༦༢ ཨཱདཡོ) སཱིལཙིཏྟཝིསུདྡྷཱིནཾ ཝསེན མཱུལབྷཱུཏཱནཾ དྭིནྣཾ, དིཊྛིཝིསུདྡྷིཨཱདཱིནཾ ཝསེན སརཱིརབྷཱུཏཱནཾ ཙཏུནྣནྟི ཨེཏཱསཾ ཚནྣཾ ཝིསུདྡྷཱིནཾ ཀམེན. ཙཏུནྣཾ སཙྩཱནཾ ཛཱནནཏཱ, པཙྩཀྑཀརཎཏོ, ཀིལེསམལེཧི ཝིསུདྡྷཏྟཱ ཙ ཉཱཎདསྶནཝིསུདྡྷི ནཱམ.

ཨེཏྠཱཏི ཝིཔསྶནཱཀམྨཊྛཱནེ.

ཝིསུདྡྷིབྷེདཝཎྞནཱ ནིཊྛིཏཱ.

ཝིམོཀྑབྷེདཝཎྞནཱ

༦༡. ཏཏྠ ཏསྨིཾ ཨུདྡེསེ. སངྑཱརེསུ ‘‘ཡོ ཨཏྟཱབྷིནིཝེསོ ཀམྨསྶ ཀཱརཀོ ཕལསྶ ཙ ཝེདཀོ ཨེསོ མེ ཨཏྟཱ’’ཏི ཨེཝཾ ཨབྷིནིཝེསོ དལ༹ྷགྒཱཧོ, ཏཾ མུཉྩནྟཱི ¶ ‘‘ཨནཏྟཱ’’ཏི པཝཏྟཱ ཨནུཔསྶནཱཝ ཨཏྟསུཉྙཏཱཀཱརཱནུཔསྶནཏོ སུཉྙཏཱནུཔསྶནཱ ནཱམ ཝིམོཀྑམུཁཾ པཊིཔཀྑཏོ ཝིམུཏྟིཝསེན ཝིམོཀྑསངྑཱཏསྶ ལོཀུཏྟརཾ མགྒཕལསྶ དྭཱརཾ ཧོཏི.

༦༢. སངྑཱརེསུ ‘‘ཨནིཙྩ’’ནྟི པཝཏྟཱ ཨནུཔསྶནཱ ཨནིཙྩེ ‘‘ནིཙྩ’’ནྟི (ཨ. ནི. ༤.༤༩; པཊི. མ. ༡.༢༣༦; ཝིབྷ. ༩༣༩) པཝཏྟཾ སཉྙཱཙིཏྟདིཊྛིཝིཔལླཱསསངྑཱཏཾ ཝིཔལླཱསནིམིཏྟཾ མུཉྩནྟཱི པཛཧནྟཱི ཝིཔལླཱསནིམིཏྟརཧིཏཱཀཱརཱནུཔསྶནཏོ ཨནིམིཏྟཱནུཔསྶནཱ ནཱམ ཝིམོཀྑམུཁཾ ཧོཏཱིཏི སམྦནྡྷོ.

༦༣. ‘‘དུཀྑ’’ནྟི པཝཏྟཱནུཔསྶནཱ སངྑཱརེསུ ‘‘ཨེཏཾ མམ, ཨེཏཾ སུཁ’’ནྟྱཱདིནཱ ནཡེན པཝཏྟཾ ¶ ཀཱམབྷཝཏཎྷཱསངྑཱཏཾ ཏཎྷཱཔཎིདྷིཾ ཏཎྷཱཔཏྠནཾ མུཉྩནྟཱི དུཀྑཱཀཱརདསྶནེན པརིཙྩཛནྟཱི པཎིདྷིརཧིཏཱཀཱརཱནུཔསྶནཏོ ཨཔྤཎིཧིཏཱནུཔསྶནཱ ནཱམ.

༦༤. ཏསྨཱཏི ཡསྨཱ ཨེཏཱསཾ ཏིསྶནྣཾ ཨེཏཱནི ཏཱིཎི ནཱམཱནི, ཏསྨཱ ཡདི ཝུཊྛཱནགཱམིནིཝིཔསྶནཱ ཨནཏྟཏོ ཝིཔསྶཏི. མགྒོ སུཉྙཏོ ནཱམ ཝིམོཀྑོ ཧོཏི ཨཱགམནཝསེན ལདྡྷནཱམཏྟཱ.

༦༦. ཝིཔསྶནཱགམནཝསེནཱཏི ཝིཔསྶནཱསངྑཱཏཱགམནཝསེན. ཨཱགཙྪཏི ཨེཏེན མགྒོ, ཕལཉྩཱཏི ཝིཔསྶནཱམགྒོ ཨིདྷ ཨཱགམནཾ ནཱམ.

༦༧. ཡཐཱཝུཏྟནཡེནཱཏི པུབྦེ ཝུཏྟཨནཏྟཱནུཔསྶནཱདིཝསེན. ཡཐཱསཀཾ ཕལམུཔྤཛྫམཱནམྤཱིཏི ཡཐཱལདྡྷམགྒསྶ ཕལབྷཱུཏཾ ཨཏྟནོ ཨཏྟནོ ཕལཾ ཨུཔྤཛྫམཱནམྤི མགྒཱགམནཝསེན ཨལབྷིཏྭཱ ཝིཔསྶནཱགམནཝསེནེཝ ཏཱིཎི ནཱམཱནི ལབྷཏི ¶ ཕལསམཱཔཏྟིཀཱལེ ཏདཱ མགྒཔྤཝཏྟཱབྷཱཝེན ཏསྶ དྭཱརབྷཱཝཱཡོགཏོ. ཨཱརམྨཎཝསེནཱཏི སབྦསངྑཱརསུཉྙཏཏྟཱ, སངྑཱརནིམིཏྟརཧིཏཏྟཱ, ཏཎྷཱཔཎིདྷིརཧིཏཏྟཱ ཙ སུཉྙཏཨནིམིཏྟཨཔྤཎིཧིཏནཱམཝནྟཾ ནིབྦཱནཾ ཨཱརབྦྷ པཝཏྟཏྟཱ ཏསྶ ཝསེན. སརསཝསེནཱཏི རཱགཱདིསུཉྙཏཏྟཱ, རཱུཔནིམིཏྟཱདིཨཱརམྨཎརཧིཏཏྟཱ, ཀིལེསཔཎིདྷིརཧིཏཏྟཱ ཨཏྟནོ གུཎཝསེན. སབྦཏྠཱཏི མགྒཝཱིཐིཡཾ, ཕལསམཱཔཏྟིཝཱིཐིཡཉྩ. སབྦེསམྤཱིཏི མགྒསྶ, ཕལསྶཔི.

ཝིམོཀྑབྷེདཝཎྞནཱ ནིཊྛིཏཱ.

པུགྒལབྷེདཝཎྞནཱ

༦༨. སཏྟཀྑཏྟུཾ སཏྟསུ ཝཱརེསུ ཀཱམསུགཏིཡཾ པཊིསནྡྷིགྒཧཎཾ པརམཾ ཨེཏསྶཱཏི སཏྟཀྑཏྟུཔརམོ ན པན ཨཊྛམཱདིཀཱམབྷཝགཱམཱིཏྱདྷིཔྤཱཡོ. ཡཾ སནྡྷཱཡ ཝུཏྟཾ ‘‘ན ཏེ བྷཝཾ ཨཊྛམམཱདིཡནྟཱི’’ཏི ¶ (ཁུ. པཱ. ༦.༩; སུ. ནི. ༢༣༢; ནེཏྟི. ༡༡༥). རཱུཔཱརཱུཔསུགཏིབྷཝཾ པན སཏྟཝཱརཏོ པརམྤི གཙྪཏཱིཏི ཨཱཙརིཡཱ.

༦༩. རཱགདོསམོཧཱནནྟི མོཧགྒཧཎཾ རཱགདོསེཀཊྛམོཧཾ སནྡྷཱཡཱཏི དཊྛབྦཾ.

༧༠. ཁཱིཎཱ ཙཏྟཱརོ ཨཱསཝཱ ཨེཏསྶཱཏི ཁཱིཎཱསཝོ. དཀྑིཎཱརཧེསུ ཨགྒཏྟཱ ཨགྒདཀྑིཎེཡྻོ.

པུགྒལབྷེདཝཎྞནཱ ནིཊྛིཏཱ.

སམཱཔཏྟིབྷེདཝཎྞནཱ

༧༢. སབྦེསམྤཱིཏི ཙཏུནྣམྤི ཨརིཡཔུགྒལཱནཾ.

༧༣. ཙིཏྟཙེཏསིཀཱནཾ ¶ ཨཔྤཝཏྟིསངྑཱཏསྶ ནིརོདྷསྶ སམཱཔཏྟི ནིརོདྷསམཱཔཏྟི, དིཊྛེཝ དྷམྨེ ཙིཏྟནིརོདྷཾ པཏྭཱ ཝིཧརཎཾ. ཨནཱགཱམཱིནཉྩཱཏི ཀཱམརཱུཔབྷཝཊྛཱནཾ ཨཊྛསམཱཔཏྟིལཱབྷཱིནམེཝ ཨནཱགཱམཱིནཾ, ཏཐཱ ཁཱིཎཱསཝཱནཉྩ. ཏཏྠཱཏི ནིརོདྷསམཱཔཏྟིཡཾ. ཡཱཝ ཨཱཀིཉྩཉྙཱཡཏནཾ གནྟྭཱཏི ཨེཝཾ སམཐཝིཔསྶནཱནཾ ཡུགནདྡྷབྷཱཝཱཔཱདནཝསེན ཡཱཝ ཨཱཀིཉྩཉྙཱཡཏནཾ, ཏཱཝ གནྟྭཱ. ཨདྷིཊྛེཡྻཱདིཀནྟི ཀཱཡཔཊིབདྡྷཾ ཋཔེཏྭཱ ཝིསུཾ ཝིསུཾ ཋཔིཏཙཱིཝརཱདིཔརིཀྑཱརགེཧཱདཱིནཾ ཨགྒིཨཱདིནཱ ཨཝིནཱསནཱདྷིཊྛཱནཾ, སཾགྷཔཊིམཱནནསཏྠུཔཀྐོསནཱནཾ པུརེཏརཾ ཝུཊྛཱནཾ, སཏྟཱཧབྦྷནྟརེ ཨཱཡུསངྑཱརཔྤཝཏྟིཨོལོཀནནྟི ཙཏུབྦིདྷཾ ཨདྷིཊྛཱནཱདིཀཾ པུབྦཀིཙྩཾ ཀཏྭཱ.

སམཱཔཏྟིབྷེདཝཎྞནཱ ནིཊྛིཏཱ.

ཝིཔསྶནཱཀམྨཊྛཱནཝཎྞནཱ ནིཊྛིཏཱ.

ཨུཡྻོཛནཝཎྞནཱ

༧༥. པཊིཔཏྟིརསསྶཱདནྟི ¶ ཛྷཱནསུཁཕལསུཁཱདིབྷེདཾ སམཐཝིཔསྶནཱཔཊིཔཏྟིརསསྶཱདཾ.

ཨིཏི ཨབྷིདྷམྨཏྠཝིབྷཱཝིནིཡཱ ནཱམ ཨབྷིདྷམྨཏྠསངྒཧཝཎྞནཱཡ

ཀམྨཊྛཱནཔརིཙྪེདཝཎྞནཱ ནིཊྛིཏཱ.

ནིགམནཝཎྞནཱ

(ཀ) ཙཱརིཏྟེན ཀུལཱཙཱརེན སོབྷིཏེ ཝིསཱལཀུལེ ཨུདཡོ ནིབྦཏྟི ཡསྶ, ཏེན, ཀམྨཱདིཝིསཡཱཡ སདྡྷཱཡ ཨབྷིཝུདྡྷོ པརིསུདྡྷོ ཙ དཱནསཱིལཱདིགུཎཱནཾ ཨུདཡོ ཡསྶ, ཏེན, ནམྤཝ྄ཧཡེན ནམྤནཱམཀེན, པརཱནུཀམྤཾ སཱསནེ སུཁོཏརཎཔརིཔཱཙནལཀྑཎཾ པརཱནུགྒཧཾ, པཎིདྷཱཡ པཏྠེཏྭཱ ཡཾ པཀརཎཾ པཏྠིཏཾ ཨབྷིཡཱཙིཏཾ, ཏཾ ཨེཏྟཱཝཏཱ པརིནིཊྛིཏནྟི ཡོཛནཱ.

(ཁ) ཏེན ¶ པཀརཎཔྤསུཏེན ཝིཔུལེན པུཉྙེན པཉྙཱཝདཱཏེན ཨརིཡམགྒཔཉྙཱཔརིསུདྡྷེན སཱིལཱདིགུཎེན སོབྷིཏཱ. ཏཏོཡེཝ ལཛྫིནོ བྷིཀྑཱུ, དྷཉྙཱནཾ ཨདྷིཝཱསབྷཱུཏཾ, ཨུདིཏོདིཏཾ ཨཙྩནྟཔྤསིདྡྷཾ, མཱུལསོམཾ ནཱམ ཝིཧཱརཾ, པུཉྙཝིབྷཝསྶ ཨུདཡསངྑཱཏཱཡ མངྒལཏྠཱཡ ཨཱཡུཀནྟཾ མཉྙནྟུ, ཏཏྠ ནིཝཱསིནོ བྷིཀྑཱུ ཨཱིདིསཱ ཧོནྟཱུཏྱདྷིཔྤཱཡོ.

ནིགམནཝཎྞནཱ ནིཊྛིཏཱ.

ནིཊྛིཏཱ ཙཱཡཾ ཨབྷིདྷམྨཏྠཝིབྷཱཝིནཱི ནཱམ.

ཨབྷིདྷམྨཏྠསངྒཧཊཱིཀཱ.

ནིགམནཀཐཱ

༡. རམྨེ པུལཏྠིནགརེ ནགརཱདྷིརཱཛེ,

རཉྙཱ པརཀྐམབྷུཛེན མཧཱབྷུཛེན;

ཀཱརཱཔིཏེ ¶ ཝསཏི ཛེཏཝནེ ཝིཧཱརེ;

ཡོ རམྨཧམྨིཡཝརཱུཔཝནཱབྷིརཱམེ.

༢. སམྤནྣསཱིལདམསཾཡམཏོསིཏེཧི,

སམྨཱནིཏོ ཝསིགཎེཧི གུཎཱཀརེཧི;

པཏྟོ མུནིནྡཝཙནཱདིསུ ནེཀགནྠ-

ཛཱཏེསུ ཙཱཙརིཡཏཾ མཧིཏཾ ཝིདཱུཧི.

༣. ཉཱཎཱནུབྷཱཝམིཧ ཡསྶ ཙ སཱུཙཡནྟཱི,

སཾཝཎྞནཱ ཙ ཝིནཡཊྛཀཐཱདིཀཱནཾ;

སཱརཏྠདཱིཔནིམུཁཱ མདྷུརཏྠསཱར-

སནྡཱིཔནེན སུཛནཾ པརིཏོསཡནྟཱི.

༤. ཏསྶཱནུཀམྤམཝལམྦིཡ ¶ སཱརིཔུཏྟ-

ཏྠེརསྶ ཐཱམགཏསཱརགུཎཱཀརསྶ;

ཡོ ནེཀགནྠཝིསཡཾ པཊུཏཾ ཨལཏྠཾ,

ཏསྶེས ཉཱཎཝིབྷཝོ ཝིབྷཝེཀཧེཏུ.

༥. སོཧམེཏསྶ སཾསུདྡྷ-ཝཱཡཱམསྶཱནུབྷཱཝཏོ.

ཨདྡྷཱསཱསནདཱཡཱདོ, ཧེསྶཾ མེཏྟེཡྻསཏྠུནོ.

༦. ཛོཏཡནྟཾ ཏདཱ ཏསྶ, སཱསནཾ སུདྡྷམཱནསཾ.

པསྶེཡྻཾ སཀྐརེཡྻཉྩ, གརུཾ མེ སཱརིསམྦྷཝཾ.

༧. དིནེཧི ཙཏུཝཱིསེཧི, ཊཱིཀཱཡཾ ནིཊྛིཏཱ ཡཐཱ.

ཏཐཱ ཀལྱཱཎསངྐཔྤཱ, སཱིགྷཾ སིཛ྄ཛྷནྟུ པཱཎིནནྟི.

ཨིཏི བྷདནྟསཱརིཔུཏྟམཧཱཐེརསྶ སིསྶེན རཙིཏཱ

ཨབྷིདྷམྨཏྠཝིབྷཱཝིནཱི ནཱམ

ཨབྷིདྷམྨཏྠསངྒཧཊཱིཀཱ ནིཊྛིཏཱ.