📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཨབྷིདྷམྨཱཝཏཱར-པུརཱཎཊཱིཀཱ

༡. པཋམོ པརིཙྪེདོ

ཙིཏྟནིདྡེསཝཎྞནཱ

༨. ཏཏྠ ¶ ¶ ཏེསུ ཙཏུབྦིདྷེསུ པརམཏྠེསུ, ཛཱཏིནིདྡྷཱརཎཾ. ཙིཏྟནྟི ཙིཏྟཾ ནཱམ. ཝིཛཱནཱཏཱིཏི ཝིཛཱནནཾ, ཝིསཡཱནཾ ཝིཛཱནནཾ ཝིསཡཝིཛཱནནཾ. ཙིཏྟསརཱུཔཔརིདཱིཔནམིདཾ ཝཙནཾ. ཏསྶ པན ཙིཏྟསྶ ཀོ ཝཙནཏྠོ ཀོ སདྡཏྠོ. ཝུཙྩཏེ ཨཱཙརིཡེན. སབྦསངྒཱཧཀཝསེན སབྦེསཾ ཙིཏྟཱནཾ སངྒཱཧཀནཡཝསེན. ཨཱརམྨཎཾ ཙིནྟེཏི ཛཱནཱཏཱིཏི ཙིཏྟཾ, ཏདཱ སབྦཾ ཙིཏྟཾ ཨདྷིཔྤེཏཾ. ཛཝནཝཱིཐིཝསེན ཨཏྟསནྟཱནཾ ཙིནོཏཱིཏི ཙིཏྟཾ, ཏདཱ ཀུསལཱཀུསལམཧཱཀིརིཡཱཙིཏྟཾ ཨདྷིཔྤེཏཾ. ཨཉྙེསཾ ཛཝནཱནཾ ཨགྒཧཎཾ ཀཱམཱཝཙརཛཝནཱནི ཨེཝ ཡེབྷུཡྻཝསེན སཏྟཀྑཏྟུཾ ཛཝནྟཱིཏི ཉཱཔནཏྠཾ.

༩. ཝིཙིཏྟཾ ¶ ཀརཎཾ ཡསྶ ཏཾ ཝིཙིཏྟཀརཎཾ, ཏསྶ བྷཱཝོ ཝིཙིཏྟཀརཎཱ. ‘‘ཨིམསྶ རཱུཔསྶ ཨུདྡྷཾ ཨིདཾ ཧོཏུ, ཧེཊྛཱ ཨིདཾ ཧོཏུ, ཨུབྷཡཔསྶེ ཨིད’’ནྟི ཙིནྟེཏྭཱ ཡཐཱཙིནྟིཏེན ཀམེན སེསཙིཏྟརཱུཔནིཔྥཱདནཾ ཧོཏི, ཨེཝཾ ཡཾ ཀིཉྩི ལོཀེ ཝིཙིཏྟཾ སིཔྤཛཱཏཾ, སབྦཾ ཏཾ ཙིཏྟེནེཝ ཀརཱིཡཏི. ཨེཝཾ ཝིཙིཏྟཀརཎཏཱཡ ཙིཏྟཾ. ཏདཱ ཀརཎཏཱཡ ཙིཏྟཾ ཀརོཏཱིཏི ཙིཏྟཾ. ཨིདཾ ཏདྡྷིཏཔདཾ. ཝཱ ཨཡཾ ཨཉྙོ ནཡོ ¶ . ཏཾ ཨཏྟནོ ཙིཏྟཏཱཡ ཨཉྙདེཝ སརཱགཾ ཙིཏྟཾ, ཨཉྙཾ སདོསཾ, ཨཉྙཾ སམོཧཾ. ཨཉྙཾ ཀཱམཱཝཙརཾ, ཨཉྙཾ རཱུཔཱཝཙརཱདིབྷེདཾ. ཨཉྙཾ རཱུཔཱརམྨཎཾ, ཨཉྙཾ སདྡཱདིཨཱརམྨཎཾ. རཱུཔཱརམྨཎེསུཔི ཨཉྙཾ ནཱིལཱརམྨཎཾ, ཨཉྙཾ པཱིཏཱདིཨཱརམྨཎཾ. སདྡཱདིཨཱརམྨཎེསུཔི ཨེསེཝ ནཡོ. སབྦེསུཔི ཏེསུ ཨཉྙཾ ཧཱིནཾ, ཨཉྙཾ མཛ྄ཛྷིམཾ, ཨཉྙཾ པཎཱིཏཾ. ཧཱིནཱདཱིསུཔི ཨཉྙཾ ཚནྡཱདྷིཔཏེཡྻཾ, ཨཉྙཾ ཙིཏྟཱདྷིཔཏེཡྻཾ, ཨཉྙཾ ཝཱིརིཡཱདྷིཔཏེཡྻཾ, ཨཉྙཾ ཝཱིམཾསཱདྷིཔཏེཡྻཾ, ཏསྨཱ ཡསྶ ཨིམེསཾ སམྤཡུཏྟབྷཱུམིཨཱརམྨཎཧཱིནམཛ྄ཛྷིམཔཎཱིཏཱདྷིཔཏཱིནཾ ཝསེན ཨཏྟནོ ཙིཏྟཏཱཡ ཙིཏྟཾ. ཙིཏྟོ ཨེཏསྨིཾ ཨཏྠཱིཏི ཙིཏྟཾ. ཏདཱ སབྦཾ ཙིཏྟཾ. པཉྙཏྟིཡམྤི ཝིཉྙཱཎེ ཝིཙིཏྟེ ཙིཏྟསྶ ཀམྨཾ ཙིཏྟཀམྨཾ, ཙིཏྟཀམྨམེཝ ཙིཏྟཀམྨཀཾ, ཙིཏྟཀམྨཀེ ཝིཙིཏྟེ ཨིདྷ ཨིམསྨིཾ ཨདྷིཀཱརེ ཙིཏྟསམྨུཏི ཙིཏྟསདྡོ ཝིཉྙཱཎེ ཙིཏྟེ ཝིཉྙུནཱ དཊྛབྦོ.

ཏཾ པན སབྦསངྒཱཧཀཝསེན ཙིནྟེཏཱིཏིཨཱདིནཱ ཝུཏྟཔྤཀཱརཾ ཙིཏྟཾ. སཱརམྨཎཏོ སཱརམྨཎབྷཱཝེན ཨེཀཝིདྷཾ. སཝིཔཱཀཱཝིཔཱཀཏོ སཝིཔཱཀཱཝིཔཱཀཝསེན དུཝིདྷཾ. ཏཏྠ ཏསྨིཾ དུཝིདྷེ ཙིཏྟེ སཝིཔཱཀཾ ནཱམ ཙིཏྟཾ ཀུསལཱཀུསལཾ, ཨཝིཔཱཀཾ ཨབྱཱཀཏཾ, ཀུསལཱཀུསལབྷཱཝེན ཨཀཐིཏནྟི ཨཏྠོ. ཀུསལཛཱཏི ཨཀུསལཛཱཏི ཨབྱཱཀཏཛཱཏཱིཏི ཛཱཏིབྷེདཏོ ཏིཝིདྷཾ.

ཏཏྠ ཏསྨིཾ ཝཙནེ ‘‘ཀུསལ’’ནྟི ཨེཏསྶ སདྡསྶ པན ཀོ ཝཙནཏྠོ.

༡༠. ཀུཙྪིཏཱནཾ སལནཏོ པཱཔཀཱནཾ དྷམྨཱནཾ ཀམྤནཏོ ཝིདྡྷཾསནཏོ. ཀུཙྪིཏེནཱཀཱརེན སཡནྟཱིཏི ཀུསཱ, ཀུསཱནཾ ཨཀུསལསངྑཱཏཱནཾ ལཝནེན ཚིནྡནཏོ. ཀུཙྪིཏེ སཱཏི ཏནུཾ ཀརོཏཱིཏི ཀུསཾ, ཀུསེན ཉཱཎེན ལཱཏབྦཏྟཱ གཧེཏབྦཏྟཱ. ཝཱ ཨཡཾ ཨཉྙོ ནཡོ.

༡༡. ཀུསལསདྡོཡཾ ¶ ཨཡཾ ཀུསལསདྡོ ཚེཀེ ཨཏྠེ ཨཱརོགྱཏྠེ ཨནཝཛྫཏྠེ ཨིཊྛཝིཔཱཀེ ཨཏྠེཔི དིཊྛོ ཨམྷེཧི. ཨིདྷ ཨིམསྨིཾ ཨདྷིཀཱརེ ཨནཝཛྫཱདིཀེ ཨཏྠེ དིཊྛོ. ཨཱདི-སདྡེན ཨཱརོགྱཏྠཨིཊྛཝིཔཱཀཏྠཱ ¶ གཧེཏབྦཱ. དིཊྛོ ཡསྨཱ, ཏསྨཱ ཨནཝཛྫཨིཊྛཝིཔཱཀལཀྑཎཾ ཀུསལཾ. ནཏྠི ཨཝཛྫཾ ཀིལེསཱཝཛྫཾ ཀིལེསདོསོ ཀིལེསདརཐོ ཨེཏསྶཱཏི ཨནཝཛྫཾ, ཀམྨེན ཝིཔཙྩཱིཡཏེཏི ཝིཔཱཀོ, ཨིཊྛཱནིཊྛཱདིཨཱརམྨཎཱནུབྷཝནཝསེན, ཨཏྟནོ སབྷཱཝེན ཙ ཨིཊྛོ ཝིཔཱཀོ ཨེཏསྶཱཏི ཨིཊྛཝིཔཱཀཾ, ཨནཝཛྫམེཝ ཨིཊྛཝིཔཱཀཾ, ཏཾ ལཀྑཱིཡཏི ཨནེན ཨཝིཉྙཱཏཾ ལཀྑིཏབྦཾ ཀུསལནྟི ལཀྑཎཾ, ཨནཝཛྫཨིཊྛཝིཔཱཀཾ ལཀྑཎཾ ཨེཏསྶཱཏི ཨནཝཛྫཨིཊྛཝིཔཱཀལཀྑཎཾ. ཨནཝཛྫཨིཊྛཝིཔཱཀམེཝ ཀུསལཾ. ནནུ ཀཐཾ སཡམེཝ ཨཏྟནོ ལཀྑཎཾ བྷཝེཡྻཱཏི ཙོདནཱ བྷཝེཡྻ ཝིཉྙཱཏཱཝིཉྙཱཏསདྡཏྠབྷཱཝེན ལཀྑཎལཀྑིཏབྦབྷཱཝཡུཏྟིཏོ. ཀུསལསདྡཏྠཝསེན ཧི ཨཝིཉྙཱཏཾ ཨཔཱཀཊཾ ཀུསལཾ ལཀྑིཏབྦཾ ཧོཏི. ཨནཝཛྫཨིཊྛཝིཔཱཀསདྡཏྠཝསེན ཝིཉྙཱཏཾ པཱཀཊཾ ཀུསལཾ ལཀྑཎཾ ཧོཏི. ཨཀུསལཝིདྡྷཾསནརསཾ ཨཀུསལཱནཾ ཝིདྡྷཾསནཾ ཨཀུསལཝིདྡྷཾསནཾ, ཏཾ རསོ ཀིཙྩམེཏསྶཱཏི ཨཀུསལཝིདྡྷཾསནརསཾ, ཨཀུསལཝིདྡྷཾསནཀིཙྩཾ. ཝོདཱནབྷཱཝེན པཙྩུཔཊྛཱཏཱིཏི ཝོདཱནཔཙྩུཔཊྛཱནཾ, ཝོདཱནཨུཔཊྛཱནཱཀཱརཾ ཝོདཱནགཡ྄ཧཱཀཱརཾ. ཝཱ ཨཡཾ ཨཉྙོ ནཡོ. ཝཛྫཔཊིཔཀྑཏྟཱ ཨནཝཛྫལཀྑཎམེཝ ཀུསལཾ, ཝཛྫཔཊིཔཀྑལཀྑཎཾ ཀུསལནྟི ཨཏྠོ. ཝོདཱནབྷཱཝརསཾ ཝོདཱནབྷཱཝསམྤཏྟིཀཾ. ཨིཊྛཝིཔཱཀཔཙྩུཔཊྛཱནཾ ཨིཊྛཝིཔཱཀཕལཾ. ཡོནིསོམནསིཀཱརཔདཊྛཱནཾ པདཉྩ ཏཾ ཋཱནཉྩཱཏི པདཊྛཱནཾ, ཨུབྷོ ཀཱརཎཏྠཱདྷིཝཙནཾ, ཏསྨཱ ཨཱསནྣཀཱརཎནྟི ཨཏྠོ, ཨིཏརཐཱ པུནརུཏྟིདོསོ སིཡཱ, ཡོནིསོམནསིཀཱརོ པདཊྛཱནཾ ཨཱསནྣཀཱརཎཾ ཨེཏསྶཱཏི ཡོནིསོམནསིཀཱརཔདཊྛཱནཾ.

སཱཝཛྫཱནིཊྛཝིཔཱཀལཀྑཎཾ ¶ ཨཀུསལཾ. ཏདུབྷཡཝིཔརཱིཏཾ ཏེཧི ཨུབྷཡེཧི ཀུསལཱཀུསལེཧི ཝིཔརཱིཏཾ ཨཝིཔཱཀལཀྑཎཾ ཨེཏསྶཱཏི ཏདུབྷཡཝིཔརཱིཏལཀྑཎཾ ཨབྱཱཀཏཾ. ཝཱ ཨཡཾ ཨཉྙོ ནཡོ. ཨཝིཔཱཀཱརཧཾ ཝིཔཱཀསྶ ཨནནུཙྪཝིཀཾ.

སཝཏྠུཀཱཝཏྠུཀབྷེདཏོཏི སཝཏྠུཀཾ ཧདཡཝཏྠུཀཾ, ཨཝཏྠུཀཾ ཧདཡཝཏྠུཝིརཧིཏཾ.

༡༢. ཨུདྡཱནཏོ སངྑེཔཝསེན ཀིལེསཝཏྠུཝསེན དུཝེ ཀཱམཱ ཧོནྟི. ཚནྡརཱགོཝ ཀིལེསོ, ཏེབྷཱུམཀེ པཝཏྟཾ ཝཊྚསཧིཏཾ ཝཏྠུ, ཝསཏི ཀིལེསོ ཨེཏྠཱཏི ཝཏྠུ.

༡༣. ཀིལེསཀཱམོ ཝཏྠུཾ ཀཱམེཏི ཨིཙྪཏི, ཝཏྠུ ཀིལེསཀཱམེན ཀཱམཱིཡཏི ཨིཙྪཱིཡཏཱིཏི ཀཏྟུཀཱརཀཀམྨཀཱརཀདྭཡེ སཱདྷནདྭཡེ ཨེས ཨེསོ དུཝིདྷོཔི ཀཱམོ སིཛ྄ཛྷཏི.

༡༤-༥. སོ ¶ ཨཡཾ དུཝིདྷོཔི ཀཱམོ ཡསྨིཾ པདེསེ སམྤཏྟཱིནཾ ཝསེན ཨཝཙརཏི, ཨིཏི ཏསྨཱ ཀཱརཎཱ སོ པན པདེསོ ཙཏུཔཱཡཱནཾ ཚནྣཾ དེཝཱནཾ མནུསྶཱནཾ ཝསེན ཨེཝ ཨེཀཱདསཝིདྷོ ཧོཏི.

༡༦. ཀཱམོཝཙརཏཱིཏི ཨེཏྠ ཨེཏསྨིཾ ཨེཀཱདསཝིདྷེ པདེསེ ཀཱམོ ཨཝཙརཏི, ཨིཏི ཏསྨཱ ཀཱརཎཱ སོ པདེསོ ཨསྶ ཀཱམསྶ ཨནེན ཀཱམེན ཨབྷིལཀྑིཏཏྟཱ ཀཱམཱཝཙརསཉྙིཏོ. ཨབྷིལཀྑིཏསདྡཔྤཡོགེ ཏཏིཡཏྠེ ‘‘ཨསྶཱ’’ཏི ཚཊྛཱི ཧོཏཱིཏི སདྡསཏྠཝིདཱུ པཋནྟི. སསཏྠཱཝཙརོ པདེསོ ཝིཡ སཏྟེ སསནྟི ཧིཾསནྟི ཏེཧཱིཏི སཏྠཱ, སཧ སཏྠེཧཱིཏི སསཏྠཱ, སསཏྠཱ པུརིསཱ ཨཝཙརནྟི ཨེཏྠཱཏི སསཏྠཱཝཙརོ. ཡཐཱ ཧི ཡསྨིཾ པདེསེ སསཏྠཱ པུརིསཱ ཨཝཙརནྟི, སོ པདེསོ ཝིཛྫམཱནེསུཔི ¶ ཨཉྙེསུ དྭིཔདཙཏུཔྤདེསུ ཨཝཙརནྟེསུ ཏེསཾ ཨུཔལཀྑིཏཏྟཱ ‘‘སསཏྠཱཝཙརོ’’ཏྭེཝ ཝུཙྩཏི, ཨེཝཾ ཝིཛྫམཱནེསུཔི ཨཉྙེསུ རཱུཔཱཝཙརཱདཱིསུ ཏཏྠ ཨཝཙརནྟེསུ ཏེསཾ ཨབྷིལཀྑིཏཏྟཱ ཨཡཾ པདེསོ ‘‘ཀཱམཱཝཙརོ’’ཏྭེཝ ཝུཙྩཏི.

༡༧. ཡཐཱ རཱུཔབྷཝོ ཨུཏྟརཔདསྶ ལོཔཾ ཀཏྭཱ རཱུཔནྟི ཝུཏྟོ, ཨེཝཾ ཏཐཱ སྭཱཡཾ སོ ཨཡཾ ཨེསོ ཀཱམཱཝཙརོ ཨུཏྟརཔདསྶ ལོཔཾ ཀཏྭཱ ཀཱམོ ཨིཏི སཉྙིཏོ ཀཱམོ ནཱམ ཨུདཱིརིཏོ པཎྜིཏེན ཀཐིཏོ.

༡༨. ཏསྨིཾ ཀཱམེ ཨིདཾ ཙིཏྟཾ ཏསྨིཾ ཀཱམཱཝཙརེ སདཱ ཨཝཙརཏི, ཨིཏི ཏསྨཱ ཀཱརཎཱ ཀཱམཱཝཙརཾ ཨིཏི ཨེཝཾ ཀཱམགྷཱཏིནཱ ཀཱམཱནཾ ཝིནཱསཀེན བུདྡྷེན ཀཐིཏཾ. ཀིཉྩཱཔི ཨེཏཾ རཱུཔཱརཱུཔབྷཝེསུཔི ཨཝཙརཏི, ཡཐཱ པན སངྒཱམེ ཡེབྷུཡྻེན ཨཝཙརཎཏོ ‘‘སངྒཱམཱཝཙརོ’’ཏི ལདྡྷནཱམོ ནཱགོ ནགརེ ཙརནྟོཔི ‘‘སངྒཱམཱཝཙརོ’’ཏྭེཝ ཝུཙྩཏི, ཐལཙརཛལཙརཱ པཱཎིནོ ཨཐལེ ཨཛལེ ཋིཏཱཔི ‘‘ཐལཙརཛལཙརཱ’’ཏྭེཝ ཝུཙྩནྟི, ཨེཝཾ ཨིདཾ ཨཉྙཏྠ ཨཝཙརནྟམྤི ཀཱམཱཝཙརམེཝཱཏི དཊྛབྦཾ. ཨཱརམྨཎཀརཎཝསེན ཝཱ ཨེཏྠ ཀཱམོ ཨཝཙརཏཱིཏིཔི ཀཱམཱཝཙརཾ. ཀཱམཉྩེས རཱུཔཱརཱུཔཱཝཙརེསུཔི ཨཝཙརཏི, ཡཐཱ པན ཝདཏཱིཏི ཝཙྪོ, མཧིཡཾ སེཏཱིཏི མཧིཾསོཏི ཝུཏྟེ ན ཡཏྟཀཱ ཝདནྟི, མཧིཡཾ ཝཱ སེནྟི, སབྦེསཾ ཏཾ ནཱམཾ ཧོཏི, ཨེཝཾསམྤདམིདཾ དཊྛབྦཾ.

༡༩. པཊིསནྡྷིཾ བྷཝེ ཀཱམེ ཀཱམབྷཝསངྑཱཏེ ཀཱམེ པཊིསནྡྷིཾ ཨཝཙཱརཡཏི, ཨིཏི ཏསྨཱ ཀཱམཱཝཙརཾ ¶ . ཨིཏི ཨེཝཾ ཝཱ ཨཡཾ ཨཉྙོ ནཡོ. ཏཏྲ ཏསྨིཾ ཀཱམཱཝཙརེ པརིཡཱཔནྣཾ ཨནྟོགདྷཾ, ཨིཏི ཏསྨཱ ཀཱམཱཝཙརཾ.

༢༠. ཨཊྛཝིདྷཾ ཙིཏྟཾ ཀཱམཱཝཙརསཉྙིཏཾ ཨིདཾ ཨཊྛཝིདྷཾ ཙིཏྟཾ. དསཔུཉྙཀིརིཡཝཏྠུཝསེནེཝ པུཉྙཀིརིཡཱ ཨེཝ ཏེསཾ ཏེསཾ ཕལཱནིསཾསཱནཾ ¶ ཝཏྠཱུནི ཀཱརཎཱནཱིཏི པུཉྙཀིརིཡཝཏྠཱུནི, ཏེསཾ ཝསོ, ཏེན པཝཏྟཏི.

༢༡. དཱནཾ སཱིལཾ བྷཱཝནཱ པཏྟིདཱནཾ ཝེཡྻཱཝཙྩཾ དྷམྨདེསནཱ ཨནུམོདནཱ དིཊྛིཛུབྷཱཝོ སཾསུཏི དྷམྨསྶཝནཉྩ ཨཔཙཱཡོ ཨཔཙཱཡནཾ, ཨེཝཾ ཨིམིནཱ མཡཱ ཝུཏྟཔྤཀཱརེན པུཉྙཱནི ཨེཝ ཝཏྠཱུནི པུཉྙཝཏྠཱུནི, ཏེསཾ པབྷེདོ པུཉྙཝཏྠུཔྤབྷེདོ ཉེཡྻོ པཎྜིཏེན ཛཱནིཏབྦོ.

༢༢-༣. གཙྪནྟི སངྒཧཾ དཱནེ པཏྟིདཱནཱནུམོདནཱ དཱནེ སངྒཧཾ གཙྪནྟི, ཝེཡྻཱཝཙྩཱཔཙཱཡནཱ སཱིལམཡེ པུཉྙེ སངྒཧཾ གཙྪནྟི, དྷམྨདེསནཱ དྷམྨསྶཝནཾ དིཊྛིཨུཛུཀཱ བྷཱཝནཱམཡེ པུཉྙེ སངྒཧཾ གཙྪནྟི, དས པུཉྙཀིརིཡཱཔི ཙ ཏཱིཎི ཨེཝ སམྦྷོནྟི.

༢༤. སབྦཱནུསྶཏིཔུཉྙཉྩ པསཾསཱ སརཎཏྟཡཾ རཏནཏྟཡགུཎཔསཾསཱ ཙ ཨེཏེ དིཊྛིཛུཀམྨམྷི སངྒཡ྄ཧནྟི, ཏསྨིཾ སངྒཧཔཱཔུཎེ སཾསཡོ སནྡེཧོ ནཏྠི.

༢༥. པུརིམཱ ཙེཏནཱ ཏཏོ པུབྦབྷཱགེ པཝཏྟཱ ཙེཏནཱ, མུཉྩཙེཏནཱ པཙྩུཔྤནྣཱ ཙེཏནཱ, པརཙེཏནཱ པཙྪཱཀཱལེ པཝཏྟཱ ཙེཏནཱ, ཏིསྶོཔི ཙེཏནཱ དཱནམཡེ པུཉྙེ ཧོནྟི. ཨེཝནྟི ཡཐཱ ཏིསྶོཔི ཙེཏནཱ དཱནམཡེ པུཉྙེ ཧོནྟི, ཨེཝཾ ཏཐཱ དཱནམཡཔུཉྙཏོ སེསེསུཔི སཱིལམཡབྷཱཝནཱམཡེསུ ཏིསྶོ ཙེཏནཱ པཎྜིཏོ དཱིཔཡེ ཀཐེཡྻ.

ཧི སཙྩཾ ཡདཱ པན ཡོ པུགྒལོ དེཡྻདྷམྨཔཊིགྒཱཧཀཱདིསམྤཏྟིཾ ཨཱགམྨ པཊིཙྩ. པཊིགྒཱཧཀཱདིསམྤཏྟིནྟི ཨེཏྠ ཨཱདི-སདྡེན དེསཀཱལཀལྱཱཎམིཏྟཱདཡོ གཧིཏཱ. ཨཉྙཾ ཝཱ སོམནསྶཧེཏུནྟི ཨཉྙ-གྒཧཎེན སདྡྷཱབཧུལཏཱཝིསུདྡྷིདིཊྛིཏཱཀུསལཀིརིཡཱནིསཾསདསྶིཏཱསོམནསྶཔཊིསནྡྷིཀཏཱདཱིནཾ སངྒཧོ. ཨཏྠི དིནྣཾ དཱནསྶ ཕལཾ ཨཏྠི. ཨཱདི-སདྡེན ¶ ཨཏྠིཧུཏཱདཡོ གཧིཏཱ. པུརཀྑཏྭཱཏི པུརཏོ ཀཏྭཱ. པརེཧི ཨནུསྶཱཧིཏོ ཨཙོདིཏོ དཱནཱདཱིནི པུཉྙཱནི ¶ ཀརོཏི. དཱནཱདཱིནཱིཏི ཝཙནེན དེཡྻདྷམྨཾ ནིསྶཱཡ པཝཏྟདཱནཙེཏནཱ གཧེཏབྦཱ. ཏདཱ ཨསྶ པུགྒལསྶ. སངྑརཎཾ སངྑཱརོ, ནཏྠི སངྑཱརོ ཨེཏསྶཱཏི ཨསངྑཱརོ, ཏཾ ཨེཝ ཨསངྑཱརིཀཾ, ཨཔྤཡོགནྟི ཨཏྠོ. ཝུཏྟནཡེནཱཏི ཝུཏྟནཡོ ནཱམ ‘‘དེཡྻདྷམྨཔཊིགྒཱཧཀཱདིསམྤཏྟི’’ནྟི ཝཙནཾ. ཨིམསྨིཾ པནཏྠེ སངྑརོཏཱིཏི སངྑཱརོ ནཱམ ཨཏྟནོ ཝཱ པཝཏྟསྶ པུབྦཔྤཡོགསྶ ཨདྷིཝཙནཾ, པརསྶ ཝཱ པཝཏྟཔུབྦཔྤཡོགསྶ ཨདྷིཝཙནཾ. ཨཡམསྶ ཨདྷིཔྤཱཡོ – ཡདཱ ཡོ ‘‘དཱནཱདཱིནི ཀརིསྶཱམཱི’’ཏི ཙིཏྟཾ སམུཔྤཱདེཏྭཱ ནཱཀཱསི, པཙྪཱ ཨཏྟནོ པུབྦཙེཏནཱཡ ཨུསྶཱཧིཏོ ཀརོཏི, ཏདཱ སསངྑཱརིཀཾ ཧོཏི, ཨཏྟནོ པུབྦཔྤཡོགེན སཧ པཝཏྟཏཱིཏི ཨཏྠོ. པཊིཔཏྟིདསྶནེན པཊིཔཛྫིཏབྦཱ སཱིལཱདཱིཧི པཊིཔཛྫནྟི ཛཱནནྟི གཙྪནྟི ཝཱ ནིབྦཱནཾ ཨེཏཱཡཱཏི པཊིཔཏྟི, ཏཱཡ དསྶནཾ པཊིཔཏྟིདསྶནཾ, ཏེན. ཛཱཏོ པརིཙཡོ ཨེཏེསནྟི ཛཱཏཔརིཙཡཱ. སཧསཱཏི ཝེགེན. ཙཏཱུསུཔི ཝིཀཔྤེསུ དསྶེཡྻ.

༢༦. དསཔུཉྙཀྲིཡཱདཱིནཾ ཝསེན ཙ བཧཱུནིཔི བྷཝནྟི ཨེཏཱནི པན ཙིཏྟཱནི དསཔུཉྙཀིརིཡཱདཱིནཾ ཝསེནཔི བཧཱུནིཔི བྷཝནྟི ཨིཏི ཨེཝཾ པཀཱསཡེ བྷགཝཱ པཀཱསེཡྻ.

༢༧.

སཏྟརས སཧསྶཱནི, དྭེ སཏཱནི ཨསཱིཏི ཙ;

ཀཱམཱཝཙརཔུཉྙཱནི, བྷཝནྟཱིཏི ཝིནིདྡིསེཏི. –

ཀཱམཱཝཙརཔུཉྙཱནི སཏྟརས སཧསྶཱནི ཙ དྭེ སཏཱནི ཙ ཨསཱིཏི ཙ བྷཝནྟི, ཨིཏི ཝཙནཾ ཝིནིདྡིསེ ཨཱཙརིཡོ ཀཐེཡྻ.

དསཔུཉྙཀྲིཡཱཝཏྠུ, ཚདྭཱརཱདྷིཔཏཱིཧི ཙ;

ཀཱཡཱདཱིཧི ཙ ཏཱིཧེཝ, ཧཱིནཱདཱིཧི ཙ ཏཱིཧི ཏུ.

དྭཱིསུ ¶ བྷཝེསུ ཀཱམབྷཝརཱུཔབྷཝེསུ. པཊིཔདཱདིབྷེདཏོ དུཀྑཱཔཊིཔདཾ དནྡྷཱབྷིཉྙཾ, དུཀྑཱཔཊིཔདཾ ཁིཔྤཱབྷིཉྙཾ, སུཁཱཔཊིཔདཾ དནྡྷཱབྷིཉྙཾ, སུཁཱཔཊིཔདཾ ཁིཔྤཱབྷིཉྙཾ. རཱུཔཱཝཙརབྷཱཝནཱཔུཉྙཝསཔྤཝཏྟཾ རཱུཔཱཝཙརེ པཝཏྟསྶ བྷཱཝནཱཔུཉྙསྶ ཝསེན པཝཏྟཾ རཱུཔཱཝཙརཱུཔཔཏྟིནིཔྥཱདཀཾ རཱུཔཱཝཙརེ ཨུཔཔཏྟིཡཱ པཊིསནྡྷིཡཱ ནིཔྥཱདཀཾ ཧོཏི.

སཝཏྠུཀཱཝཏྠུཀབྷེདཏོཏི ¶ ཨརཱུཔཱཝཙརཾ ཡདཱ ཀཱམརཱུཔེ ཛཱཡཏི, ཏདཱ ཧདཡཝཏྠུཾ ནིསྶཱཡ ཛཱཡཏི, ཨིཏི ཏསྨཱ སཝཏྠུཀཾ ནཱམ ཛཱཏཾ. ཡདཱ ཨརཱུཔེ ཛཱཡཏི, ཏདཱ ཧདཡཝཏྠུཾ ཨནིསྶཱཡ ཛཱཡཏི, ཨིཏི ཏསྨཱ ཨཝཏྠུཀཾ ནཱམ ཛཱཏཾ.

ཨཱཀཱསཱནཉྩཱཡཏནསྶ ཀསིཎུགྒྷཱཊིམཱཀཱསཾ ཨཱརམྨཎཾ. ཝིཉྙཱཎཉྩཱཡཏནསྶ ཏཏྠ པཝཏྟཝིཉྙཱཎཾ, ཏསྨིཾ ཀསིཎུགྒྷཱཊིམཱཀཱསེ པཝཏྟཾ ཝིཉྙཱཎཾ ཙིཏྟཾ ཨཱརམྨཎཾ ཧོཏི. ཨཱཀིཉྩཉྙཱཡཏནསྶ ཏསྶ ཨཔགམོ ཏསྶ ཨཱཀཱསཱནཉྩཱཡཏནསྶ ཨཔགམོ ཨབྷཱཝོ ཝོཧཱརོ ཨཱརམྨཎཾ ཧོཏི. ནེཝསཉྙཱནཱསཉྙཱཡཏནསྶ ཨཱཀིཉྩཉྙཱཡཏནཾ ཨཱརམྨཎཾ ཧོཏི.

རཱུཔེ སཉྙཱ རཱུཔསཉྙཱ. སཉྙཱསཱིསེན ཙིཏྟམྤི གཧིཏཾ. སམཏིཀྐམཱ ཀསིཎུགྒྷཱཊིམཱཀཱསསམཏིཀྐམནེན. པཊིགྷེ དྭཱརཱརམྨཎཱནཾ སངྒྷཊྚནེ པཝཏྟཱ སཉྙཱ པཊིགྷསཉྙཱ. དྭིཔཉྩཝིཉྙཱཎཱནཾ ཨདྷིཝཙནཾ. ཏཱསཾ པཊིགྷསཉྙཱནཾ དྭིཔཉྩཝིཉྙཱཎཱནཾ ཨཏྠངྒམཱ ཨཏྠངྒམེན. ནཱནཱ ཨཏྟཱ སབྷཱཝོ ཨེཏསྶཱཏི ནཱནཏྟཾ, ཨཱརམྨཎཾ, ནཱནཏྟེ ནཱནཱསབྷཱཝེ པཝཏྟཱ སཉྙཱ ནཱནཏྟསཉྙཱ, ནཱནཱ ཨཏྟཱ སབྷཱཝོ ཨེཏིསྶཱཏི ཝཱ ནཱནཏྟཱ, སཱཡེཝ སཉྙཱ ནཱནཏྟསཉྙཱ, ཀཱམཱཝཙརསཉྙཱཏི ཨཏྠོ. ཏཱསཾ ནཱནཏྟསཉྙཱནཾ ཨམནསིཀཱརཱ ཨམནསིཀཱརེན.

ནིཡཏཱནིཡཏཝཏྠུཀབྷེདཏོཏི ¶ སོཏཱཔཏྟིམགྒོ ནིཡཏཝཏྠུཀོ. ཀསྨཱ? ཀཱམརཱུཔེསུཡེཝ ཧདཡཝཏྠུཾ ནིསྶཱཡ ཨུཔྤཛྫནཏོ. ཨིཏརེ པན ཏཡོ མགྒཱ ཨནིཡཏཝཏྠུཀཱ. ཀསྨཱ? ཀཱམརཱུཔེསུ ཧདཡཝཏྠུཾ ནིསྶཱཡ ཛཱཡནྟི, ཨརཱུཔེ ཧདཡཝཏྠུཾ ཨནིསྶཱཡ ཛཱཡནྟི, ཏསྨཱ ཨནིཡཏཝཏྠུཀཱ. ཏཱིཧི ཝིམོཀྑམུཁེཧཱིཏི སུཉྙཏཨནིམིཏྟཨཔྤཎིཧིཏསངྑཱཏེཧི ཏཱིཧི ཝིམོཀྑམུཁེཧི.

ཡསྶ སཾཝིཛྫནྟི, ཏཾ པུགྒལཾ ཝཊྚསྨིཾ སཾཡོཛེནྟི བནྡྷནྟཱིཏི སཾཡོཛནཱ. སཀྐཱཡདིཊྛིཝིཙིཀིཙྪཱསཱིལབྦཏཔརཱམཱསཱཡེཝ སཾཡོཛནཱ སཀྐཱཡདིཊྛིཝིཙིཀིཙྪཱསཱིལབྦཏཔརཱམཱསསཾཡོཛནཱ, ཏེསཾ པཧཱནཾ སཀྐཱཡདིཊྛིཝིཙིཀིཙྪཱསཱིལབྦཏཔརཱམཱསསཾཡོཛནཔྤཧཱནཾ, ཏཾ ཀརོཏཱིཏི སཀྐཱཡདིཊྛིཝིཙིཀིཙྪཱསཱིལབྦཏཔརཱམཱསསཾཡོཛནཔྤཧཱནཀརཾ, སོཏཱཔཏྟིམགྒཙིཏྟཾ. མཱནོཔི ཨེཀདེསཏོ ཨཔཱཡགཱམིཀོཡེཝ པཧིཡྻཏེ. སོཏཱཔཏྟིམགྒེན ནིསྶེསཏོ ན པཧིཡྻཏེ. སེསཀིལེསེསུཔི ¶ ཨེསེཝ ནཡོ. ཨུདྡྷཙྩཾ པན ཨེཀདེསཏོཔི ཨཔཱཡགཱམིཀམྤི ན པཧིཡྻཏི. སཀདཱགཱམིམགྒཙིཏྟཾ རཱགདོསམོཧཱནཾ ཏནུཏྟཀརཾ. སོཏཱཔཏྟིམགྒེན ནཱསིཏསཾཡོཛནཱནཾ པཧཱནཾ ཀསྨཱ ན ཝུཏྟནྟི ཙེ? པཋམམགྒཏོ དུཏིཡམགྒསྶ མཧནྟཏྟཱ པཋམམགྒེན ནཱསིཏཱ སཾཡོཛནཱ དུཏིཡམགྒེན ནཱསིཏཱཏི པཉྙཱཡཏི, ཨིཏི ཡསྨཱ, ཏསྨཱ ན ཝུཏྟཾ. ཏཏིཡཙཏུཏྠམགྒེསུཔི ཨེསེཝ ནཡོ. ཨེཏྠ ཨེཏསྨིཾ ལོཀུཏྟརཙིཏྟེ. ཨེཀེཀནྟི ཝིཙྪཱཝསེན ཝུཏྟཾ. མགྒཱནུརཱུཔནྟི ཝཙནཾ པཋམམགྒསྶ པཋམཕལཉྩ ཨནུརཱུཔནྟི ཝིཉྙཱཔནཏྠཾ.

༢༨. ཀཱམེ ཨཊྛེཝ ཀཱམཱཝཙརེ ཨཊྛ ཨེཝ ཙིཏྟཱནི, རཱུཔེ རཱུཔབྷཝེ པཉྩ ཙིཏྟཱནི, ཨརཱུཔིསུ ཙཏྟཱརི ཙིཏྟཱནི, ཨནུཏྟརཱནི ལོཀུཏྟརཙིཏྟཱནི ཙཏྟཱརི, ཨེཝཾ ཨིམིནཱ མཡཱ ཝུཏྟཔྤཀཱརེན ཀུསལཱནི ཙིཏྟཱནི ཨེཀཝཱིསཏི ཧོནྟི.

༢༩. ཀུསལཱཀུསལཱཔགཏེན ¶ སཏཱ མུནིནཱ ཀུསལཏོ, ཨཀུསལཏོ ཙ ཨཔགཏེན སཏཱ སཏིསམྤནྣེན ཀུསལེ ཀུསལེན ཚེཀེན ཝསིནཱ པཉྩཝསཱིཧི སམནྣཱགཏེན ཡཾ ཀུསལཙིཏྟཾ ཙཏུབྷཱུམིགཏཾ ཙཏཱུསུ བྷཱུམཱིསུ པཝཏྟཾ སཀལཾ སབྦཾ ལཔིཏཾ ཀཐིཏཾ, ཏཾ ཀུསལཙིཏྟཾ མཡཱཔི བུདྡྷདཏྟཱཙརིཡེན ལཔིཏཾ ཀཐིཏཾ.

ནིཡཏཱནིཡཏཝཏྠུཝསེནཱཏི པཊིགྷསམྤཡུཏྟདྭཡཾ ཀཱམེཡེཝ ཧདཡཝཏྠུཾ ནིསྶཱཡ ཛཱཡཏི, ཨཉྙབྷཱུམཱིསུ ན ཛཱཡཏི, ཏསྨཱ ནིཡཏཝཏྠུཀཾ ཧོཏི. ཨིཏརཱནི པན ཨཀུསལཱནི ཀཱམརཱུཔེསུ ཨུཔྤཛྫནཀཱལེ ཧདཡཝཏྠུཾ ནིསྶཱཡ ཛཱཡནྟི, ཨརཱུཔེ ཧདཡཝཏྠུཾ ཨནིསྶཱཡ ཛཱཡནྟི, ཏསྨཱ ཨནིཡཏཝཏྠུཀཱནི, ཏེན. པཊིསནྡྷིཛནཀཱཛནཀཝསེན ཙཱཏི ཨུདྡྷཙྩསཧགཏཾ པཊིསནྡྷིཾ ན ཛནེཏི. ཡདི པཊིསནྡྷིཾ ཛནེཡྻ, ཨཔཱཡེསུཡེཝ ཛནེཡྻ. ཀསྨཱ? སོཏཱཔཏྟིམགྒེན ཨེཀདེསཏོ ཨཔཱཡགཱམིཀམྤི ན ཛཧིཏཾ, སབྦཾ ན ཛཧིཏནྟི ཨཏྠོ. སོཔི མགྒོ ཨཔཱཡགཱམཱི ན ཧོཏི. ཨཉྙེ པན ཀིལེསཱ ཨེཀདེསཝསེན ཨཔཱཡགཱམིཀཱ ཛཧིཏཱ, ཏེན པཋམམགྒེནཱཏི ཏསྨཱ ན ཛནེཏི. ཨེཀཱདསཝིདྷཾ པན པཊིསནྡྷིཾ ཛནེཏི, ཏེན.

དིཊྛམངྒལཱདཱིནཱིཏི ཨཱདི-སདྡེན སུཏམངྒལཱདཱིནི གཧིཏཱནི. སཱརཏོ ཨུཏྟམཏོ པཙྩེཏི སདྡཧཏི. སབྷཱཝཏིཀྑེན སབྷཱཝོ ཏིཀྑོ ཨེཏསྶཱཏི སབྷཱཝཏིཀྑཾ, ཏེན སབྷཱཝཏིཀྑེན.

ཨསྶ ¶ པན པཊིགྷསམྤཡུཏྟསྶ པཱཎཱཏིཔཱཏཱདཱིསུ ཨཀུསལཀམྨེསུ ཏིཀྑཔྤཝཏྟིཀཱལེ ཨསངྑཱརིཀསྶ ཨུཔྤཏྟི, མནྡཔྤཝཏྟིཀཱལེ སསངྑཱརིཀསྶ ཨུཔྤཏྟི ཝེདིཏབྦཱ.

ཏསྶ མོམཱུཧསྶ.

དུཀྑཝིསེསསྶ དུཀྑནཱནཏྟསྶ.

༣༠. ལོབྷམཱུལཝསེན ¶ ཨཊྛ ཙིཏྟཱནི, དོསམཱུལཝསཱ དུཝེ ཙིཏྟཱནི, མོཧམཱུལཝསེན དྭེ ཙིཏྟཱནི. ཨེཝཾ ཨིམིནཱ མཡཱ ཝུཏྟཔྤཀཱརེན ཨཀུསལཱནི དྭཱདསཔྤཀཱརཱནི སིཡུཾ བྷཝེཡྻུཾ.

༣༡. ཡཾ པཱཔམཱནསཾ ཡཾ ཨཀུསལཙིཏྟཾ པཱཔཱཔཱཔེསུ པཱཔཨཔཱཔེསུ ཀུསལཱཀུསལེསུ ཨཔཱཔེན ཨཔྤཝཏྟེན པཱཔཱཔཱཔཔྤཧཱིནེན ཝུཏྟཾ ཨཱིརིཏཾ ཀཐིཏཾ, ཏཾ པཱཔམཱནསཾ ཏཾ ཨཀུསལཙིཏྟཾ མཡཱ སམུདཱཧཊཾ ཀཐིཏཾ.

ཡཐཱ པནསྶ ཡཐཱ པན ཨསྶ ཝིཔཱཀསྶ ཀུསལཾ དཱནཱདིཝསེན དཱནཱདཱིནཾ དསཔུཉྙཀིརིཡཝཏྠཱུནཾ ཝསེན ཚསུ ཨཱརམྨཎེསུ པཝཏྟཏི, ཨིདཾ ཝིཔཱཀཙིཏྟཾ ཏཐཱ ན པཝཏྟཏི. ཧི སཙྩཾ ཨིདཾ ཝིཔཱཀཾ པཊིསནྡྷིབྷཝངྒཙུཏིཏདཱརམྨཎཝསེན པརིཏྟདྷམྨཔརིཡཱཔནྣེསུ ཀཱམཱཝཙརདྷམྨནྟོགདྷེསུ ཚསུ ཨཱརམྨཎེསུ པཝཏྟཏི. སམྤཡུཏྟདྷམྨཱནཉྩ ཝིསེསེ ཨསཏིཔི ཀུསལསམྤཡུཏྟདྷམྨཏོ ཨསྶ ཝིཔཱཀསྶ, སམྤཡུཏྟདྷམྨཱནཉྩ ནཱནཏྟེ ཨསཏིཔི ཨིདཾ ཝིཔཱཀཾ ཨཱདཱསཏལཱདཱིསུ དྷམྨཛཱཏེསུ མུཁནིམིཏྟཾ ཝིཡ ནིརུསྶཱཧཾ. ཨཡམསྶཱདྷིཔྤཱཡོ – ཡཐཱ ཨཱདཱསཏལེ མུཁནིམིཏྟཾ མུཁེ ཙལིཏེ ཙལཏི, ཨཙལིཏེ ན ཙལཏི, མུཁསྶ ཀཱརཎཾ ཝིནཱ མུཁནིམིཏྟསྶ ཝིཡ ཀཱརཎཾ ནཏྠི, ཨེཝཾ ཀུསལཀཱརཎཱ ཝིཔཱཀསྶ ཨཉྙཾ ཀཱརཎཾ ནཏྠི, ནིརུསྶཱཧཾ ཝིཔཱཀཾ.

༣༢. ཀཱམཱཝཙརདེཝཱནཾ མནུསྶཱནཾ ཨིམེ ཨཊྛ མཧཱཝིཔཱཀཱ དུཧེཏུཀཏིཧེཏུཀཱནཾ ཀཱམཱཝཙརདེཝཱནཾ, མནུསྶཱནཉྩ པཊིསནྡྷིཡོ བྷཝནྟི.

༣༣-༤. ཏཏོ པརཾ པཝཏྟིཡཾ ཡཱཝཏཱཡུཀཾ བྷཝངྒཾ ཧུཏྭཱ བལཝཱརམྨཎེ ཨཏིམཧནྟཝིབྷཱུཏཱརམྨཎེ ¶ ཏདཱརམྨཎཉྩ ཧུཏྭཱ ཏཏོ པརཾ མརཎཀཱལསྨིཾ ཙུཏི ཧུཏྭཱ པཝཏྟནྟི ¶ , ཨེཝཾ ཨིམིནཱ མཡཱ ཝུཏྟཔྤཀཱརེན ཙཏཱུསུ ཋཱནེསུ ཝིཔཙྩནྟི ཝིཔཱཀབྷཱཝེན ཛཱཡནྟི.

༣༥. སབྷཱུམིཀུསལེཧེཝ མཧཱཔཱཀཱ སམཱ ཝིནཱ མཧཱཔཱཀཱ ཀམྨདྭཱརཾ ཀམྨཀཱརཎཾ ཝིནཱ, ཀམྨཉྩ མཧཱཔུཉྙཱནཾ ཀིརིཡཝཏྠུཀཾ ཝིནཱ ཝཛྫེཏྭཱ སབྷཱུམིཀུསལེཧེཝ ཨཏྟནོ བྷཱུམིཡཾ པཝཏྟེཧི ཀུསལེཧི ཨེཝ སམཱ སདིསཱ. ཀམྨདྭཱརཾ ནཱམ ཀཱཡཝིཉྙཏྟིཀམྨདྭཱརཾ, ཝཙཱིཝིཉྙཏྟིཀམྨདྭཱརཾ, བྷཝངྒསངྑཱཏཾ མནོདྭཱརཾ, ཨིཏི ཏིཝིདྷཾ ཀམྨདྭཱརཾ ཀམྨཀཱརཎཾ. ཀམྨཾ ནཱམ ཨཊྛཀཱམཱཝཙརཀུསལཙེཏནཱ ཨིདྷ ཨདྷིཔྤེཏཱ.

༣༦. པཱཀཱ ཀུསལཝིཔཱཀཱ ཨཝིཉྙཏྟིཛནཏྟཱ ཙ ཝིཉྙཏྟི ཙ ཝིཉྙཏྟི ཙ ཝིཉྙཏྟིཝིཉྙཏྟིཡོཏི ཝཏྟབྦེ སརཱུཔེཀསེསཾ ཀཏྭཱ ‘‘ཝིཉྙཏྟཱི’’ཏི ཝུཏྟཾ, ཏཱ ཛནེནྟཱིཏི ཝིཉྙཏྟིཛནཱ, ན ཝིཉྙཏྟིཛནཱ ཨཝིཉྙཏྟིཛནཱ, ཏེསཾ བྷཱཝོ ཨཝིཉྙཏྟིཛནཏྟཾ. ཏསྨཱ ཨཝིཉྙཏྟིཛནཏྟཱ ཀཱཡཝིཉྙཏྟིཝཙཱིཝིཉྙཏྟིསངྑཱཏཱནཾ ཀམྨདྭཱརཱནཾ ཨཛནཀཏྟཱ མནོདྭཱརསངྑཱཏསྶ ཀམྨདྭཱརསྶ ཝསེན ཙ ཨཔྤཝཏྟནཏོ ཨཝིཔཱཀསབྷཱཝཏོ ཙ ཨཀམྨབྷཱཝཏོ ཙ ཨཔྤཝཏྟནཏོ ཙེཝ པུཉྙཀིརིཡཝཏྠུཝསེན ཨཔྤཝཏྟནཏོ ཙེཝ པུཉྙེཧི ནོ སམཱ ཨསདིསཱ.

༣༧-༩. པརིཏྟཱརམྨཎཏྟཱ ཧི ཏེསམེཀནྟཏོ ཏེསཾ ཝིཔཱཀཱནཾ ཨེཀནྟཏོ པརིཏྟཱརམྨཎཏྟཱ ཀཱམཱཝཙརཱརམྨཎཏྟཱ ཏེསུ ཝིཔཱཀེསུ སཏྟཔཉྙཏྟིཀཱརམྨཎཱ ཀརུཎཱམུདིཏཱ ཀདཱཙི ཀིསྨིཉྩི ཀཱལེ ན ཛཱཡནྟི, ཏཐཱ ཨེཝཾ ཏིསྶོ པན ཝིརཏིཡོ ཨེཏེསུ ཝིཔཱཀེསུ ན ཛཱཡནྟི, ཧི ཀསྨཱ ཀཱརཎཱ ན ཛཱཡནྟི, པཉྩ སིཀྑཱཔདཱ ཀུསལཱཏི ཀུསལཱ ནཱམཱཏི སཏྠུནཱ ཝུཏྟཱ ཡསྨཱ ཀཱརཎཱ, ཏསྨཱ ན ཛཱཡནྟི. ཏཐཱདྷིཔཏིནོཔེཏྠ ཏཐཱ ཨེཝམེཝ ཙཏྟཱརོ ཨདྷིཔཏིནོཔི ཨེཏེསུ ཝིཔཱཀེསུ ན སནྟི. ཀསྨཱ ¶ ? ཚནྡཱདཱིནི དྷམྨཛཱཏཱནི པུརེཏརཾ ཀཏྭཱ ཨནུཔྤཛྫནཏོ ན སནྟི, ཨིཏི ཝཙནཾ ཝིནིདྡིསེ ཨཱཙརིཡོ ཀཐེཡྻ.

༤༠. ཨསངྑཱརསསངྑཱརཝིདྷཱནཾ པན པུཉྙཏོ ཝིཔཱཀེསུ ཨསངྑཱརསསངྑཱརཝིདྷཱནཾ པུཉྙཏོ ཀུསལཏོ ཨཱགམནཝསེན ཉེཡྻཾ. ཏཏྠ ཨེཀཙྩཱནཾ ཨཱཙརིཡཱནཾ མཏེན མུཁེ ཙལིཏེ ཨཱདཱསཏལེ མུཁནིམིཏྟཙལནཾ ཝིཡ ཨསངྑཱརསྶ ཀུསལསྶ ཝིཔཱཀོ ཨསངྑཱརོ ཧོཏི, སསངྑཱརསྶ ཀུསལསྶ ཝིཔཱཀོ སསངྑཱརོ ཧོཏི, ཨེཝཾ ཨཱགམནཝསེན ཉེཡྻཾ. པཙྩཡཏོ ཙེཝ ཉེཡྻཾ ཏཏྠ ཨེཀཙྩཱནཾ ¶ ཨཱཙརིཡཱནཾ མཏེན བལཝནྟེཧི ཝིབྷཱུཏེཧི པཙྩཡེཧི ཀམྨཱདཱིཧི ཨུཔྤནྣོ ཨསངྑཱརོ དུབྦལེཧི སསངྑཱརོཏི ཨེཝཾ པཙྩཡཝསེན ཝིཉྙེཡྻཾ ཛཱནིཏབྦཾ.

༤༡-༢. ཧཱིནཱདཱིནཾ པུཉྙཱནཾ ཝིཔཱཀཏྟཱ ཧཱིནཱདཡོ ཝིཔཱཀཱ པུཉྙཝཱདིནཱ ཛིནེན པརིདཱིཔིཏཱ བྷཝནྟི, ཨིཏི ཨེཝཾ ཨིམིནཱ ཝུཏྟཔྤཀཱརེན པཝཏྟཾ ཨིདཾ ཨཊྛཝིདྷཾ ཙིཏྟཾ ཨེཀནྟེན སཝཏྠུཀཾ ཀཱམལོཀསྨིཾ ཛཱཡཏེ, ཨཉྙཏྠ པན ཨཉྙཱསུ བྷཱུམཱིསུ ན ཛཱཡཏེ.

ཝིཉྙཱཎཔཉྩཀཾ ནིཡཏཱརམྨཎནྟི ཙཀྑུཝིཉྙཱཎསྶ རཱུཔམེཝ ཨཱརམྨཎཾ, ན སདྡཱདཡོ. སེསཏྟཡཾ ཡདཱ ཙཀྑུཝིཉྙཱཎེན གཧིཏཾ ཨཱརམྨཎཾ ཀརོཏི, ཏདཱསྶ རཱུཔཾ ཨཱརམྨཎཾ ཧོཏི. ཡདཱ སོཏཝིཉྙཱཎེན གཧིཏཾ, ཏདཱསྶ སདྡོ ཨཱརམྨཎོ ཧོཏི. ཡདཱ གྷཱནཛིཝ྄ཧཱཀཱཡཝིཉྙཱཎེཧི གཧིཏཱནི ཨཱརམྨཎཱནི ཀརོནྟི, ཏདཱསྶ གནྡྷརསཕོཊྛབྦཱརམྨཎཱནི ཧོནྟི. མནོཝིཉྙཱཎདྷཱཏུདྭཡཾ ཡདཱ ཏདཱརམྨཎཾ ཧོཏི, ཏདཱ ཚཨཱརམྨཎཾ ཧོཏི, ཨེཝཾ ཨནིཡཏཱརམྨཎཾ ཧོཏི.

རཱུཔཱརམྨཎཱཡ ཀིརིཡཱམནོདྷཱཏུཡཱ ཨཔགམོ པདཊྛཱནཾ ཨཱསནྣཀཱརཎཾ ཨེཏསྶཱཏི ཨཔགམཔདཊྛཱནཾ, ཏཱཡ ཨཱཝཛྫནཾ ¶ ཀཏྭཱ ཋིཏཱཡ ཙཀྑུཝིཉྙཱཎེན དསྶནཀིཙྩཾ ཀརཱིཡཏཱིཏི ཨཏྠོ. ཏཐཱབྷཱཝཔཙྩུཔཊྛཱནཾ སམྤཊིཙྪནབྷཱཝེན གཡ྄ཧཱཀཱརཾ. སནྟཱིརཎཱདིརསཱ སོམནསྶཡུཏྟཱ མནོཝིཉྙཱཎདྷཱཏུསནྟཱིརཎཏདཱརམྨཎརསཱ, ཨུཔེཀྑཱཡུཏྟཱ པན སནྟཱིརཎཏདཱརམྨཎཔཊིསནྡྷིབྷཝངྒཙུཏིརསཱ, ཏཐཱབྷཱཝཔཙྩུཔཊྛཱནཱ སནྟཱིརཎཱདིབྷཱཝེན གཡ྄ཧཱཀཱརཾ.

༤༣. ཀཱམཱཝཙརཔུཉྙསྶ ཀཱམཱཝཙརཀུསལསྶ སོལ༹ས ཝིཔཱཀཱ ཧོནྟི. ཨིཏི ཡཾ ཝཙནཾ ཝུཏྟཾ, ཏཾ ཝཙནཾ ཏིཧེཏུཀཔུཉྙསྶ ཨུཀྐཊྛསྶ ཝསེན ཨཱཙརིཡོ པརིདཱིཔཡེ. ཨཡམེཏྠ ཨཏྠོ – ཚནྡཱདྷིཔཏེཡྻཱདཱིནཾ ཝསེན ཨུཀྐཊྛཏིཧེཏུཀཀུསལཾ ཀཱམསུགཏིཡཾ ཏིཧེཏུཀཔཊིསནྡྷིཾ དཏྭཱ པཝཏྟེ ཨཊྛ ཨཧེཏུཀཀུསལཝིཔཱཀཱནི, ཨཊྛ མཧཱཀུསལཝིཔཱཀཱནཱིཏི སོལ༹ས པཱཀཱནི ནིཔྥཱདེཏི.

༤༤. ཀུསལཱནུགཏཾ ཀཏྭཱ བྷཱཛིཏཾ ཀིཾ མཧགྒཏཾ ཝིཔཱཀཙིཏྟཾ ཀུསལཱནུགཏཾ ཀུསལཾ ཨནུགཏཾ ཀཏྭཱ མཧགྒཏཀུསལཙིཏྟེན སམཱནཾ ཀཏྭཱ བྷགཝཏཱ བྷཱཛིཏཾ དེསིཏཾ. ཀིཾ ཀེན ཀཱརཎེན? ཀཱམཱཝཙརཔུཉྙཾཝ ཀཱམཱཝཙརཀུསལཾ ཨིཝ ཨསམཱནཕལཾ ནཏྠི ཡཏོ ཡསྨཱ ཀཱརཎཱ, ཏསྨཱ ¶ ཝིཔཱཀཾ ཀུསལཱནུགཏཾ ཀཏྭཱ བྷགཝཏཱ བྷཱཛིཏཾ དེསིཏཾ. ཀཱམཱཝཙརཔུཉྙཾཝཱཏི ཡཐཱ ཨཊྛཝིདྷེསུ ཀཱམཱཝཙརཀུསལེསུ ཨུཀྐཊྛཏིཧེཏུཀཀུསལཾ ཀཱམསུགཏིཡཾ ཏིཧེཏུཀཔཊིསནྡྷིཾ དཏྭཱ པཝཏྟེ སོལ༹ས ཀུསལཝིཔཱཀཱནི ནིཔྥཱདེཏི, ཏིཧེཏུཀཨོམཀཉྩ དུཧེཏུཀཨུཀྐཊྛཉྩ ཀཱམསུགཏིཡཾ དུཧེཏུཀཔཊིསནྡྷིཾ དཏྭཱ པཝཏྟེ ཏིཧེཏུཀཝིརཧིཏཱནི ཨཧེཏུཀདུཧེཏུཀསངྑཱཏཱནི ཝིཔཱཀཱནི ནིཔྥཱདེཏི, དུཧེཏུཀཨོམཀཾ པན ཀཱམསུགཏིཡཾ ཨཧེཏུཀཔཊིསནྡྷིཾ དཏྭཱ པཝཏྟེ ཨཊྛ ཨཧེཏུཀཝིཔཱཀཱནི ནིཔྥཱདེཏི, ཨེཝཾ ཀཱམཱཝཙརཔུཉྙཾ ཨསམཱནཕལཾཝ ཧོཏི.

༤༥. གཛཱདཱིནཾ ¶ ཚཱཡཱ གཛཱདིསདིསཱ ཧོཏི ཡཐཱ, ཨེཝཾ མཧགྒཏཝིཔཱཀཾ སབྦཐཱ སབྦཔཀཱརེན ཨཏྟནོ ཀུསལེཧེཝ སམཱནཾ ཧོཏི.

༤༦-༧. ཀཱམཱཝཙརཔུཉྙཾཝ ནཱཔརཱཔརིཡཝེདནཾ ཨིདཾ མཧགྒཏཀུསལཾ ཀཱམཱཝཙརཔུཉྙཾཝ ཨཔརཱཔརིཡཝེདནཾ ཨཔརསྨིཾ བྷཝེ ཕལདཱཡཀཾ ན ཧོཏི, ཛྷཱནཱ ཨཔརིཧཱིནསྶ བྷཝགཱམིནོ པཊིསནྡྷིགཱམིནོ སཏྟསྶ ཀུསལཱནནྟརཾཡེཝ ཕལཾ ཨུཔྤཛྫཏི, ཨིཏི ཙ ཉཱཔནཏྠཾ ཨེཏསྶ མཧགྒཏཝིཔཱཀསྶ ཀུསལཱནུགཏཾ ཀུསལཱནུགམནཾ བྷགཝཏཱ ཀཏཾ.

༤༨. ཨེཏྠ ཨེཏསྨིཾ མཧགྒཏཝིཔཱཀེ པཊིཔདཱཀྐམོ ཏེསཉྩ ཧཱིནཱདཱིནཾ བྷེདཏོ ཛྷཱནཱགམནཏོ མཧགྒཏཀུསལཛྷཱནསྶ ཨཱགམནཝསེན ཝིབྷཱཝིནཱ པཎྜིཏེན ཝེདིཏབྦོ.

༤༩. ཨེཏྠ ཝིཔཱཀེ ཚནྡཱདིཨདྷིཔཏཱིནཾ ཨབྷཱཝོ, ཨཡམེཝ ཝིསེསཏོ ཀུསལཏོ ཨཡཾ ཨེཝ ཝིསེསོ, སེསཾ སབྦཔཀཱརཾ ཨཝིསེསེན ཀུསལེན སམཾ མཏཾ ཀཐིཏཾ བྷགཝཏཱ.

༥༠. སུཉྙཏཾ ཨནིམིཏྟནྟི, ཏཐཱཔཎིཧིཏནྟིཔི སུཉྙཏཾ ཨནཏྟཱ, ཨནིམིཏྟཾ ཨནིཙྩཾ, ཨཔྤཎིཧིཏཾ དུཀྑཾ ཨིཏི ཨེཏཱནི ཏཱིཎི ནཱམཱནི མགྒསྶ ཨནནྟརེ ཙཏུབྦིདྷསྶ མགྒསྶ ཨནནྟརེ ཙཏུབྦིདྷེ ཕལེ ཧོནྟི.

༥༡. ལབྦྷནྟི པརབྷཱགསྨིཾ མགྒཱནནྟརེ པཝཏྟཕལཏོ ཨཉྙསྨིཾ ཀཱལེ ཝལ༹ཉྫནཕལེསུ ཕལསམཱཔཏྟིསམཱཔཛྫནཀཱལེསུ ཨེཏཱནི ཏཱིཎི ནཱམཱནི ན ལབྦྷནྟེ, ཕལེཧི ཝིཔསྶནཱཝསེནེཝ ཨནཏྟཨནིཙྩདུཀྑསངྑཱཏཱནཾ ¶ ཏིཎྞཾ ཝིཔསྶནཱནཾ ཝསེན ཨེཝ ཏཱནི ཏཱིཎི ནཱམཱནི ལབྦྷརེ ཕལེཧི ལབྦྷནྟེ.

༥༢. ཧོནྟི ¶ སཱདྷིཔཏཱིནེཝ ལོཀུཏྟརཕལཱནི ཏུ ཨེཀནྟཏོ སཱདྷིཔཏཱིནི ཨེཝ ཧོནྟི, ལོཀུཏྟརཕལཱནི ཋཔེཏྭཱ ཨཉྙསྨིཾ ཝིཔཱཀེ ཨདྷིཔཏཱི ནཏྠི.

༥༣. མགྒོ ཨཏྟནོ མགྒབྷཱཝེན མགྒོ ནཱམ ཝུཙྩཏེ བྷགཝཏཱ. ཕལཾ མགྒཾ ཨུཔཱདཱཡ ཨཊྛངྒིཀམགྒཾ ནིསྶཡཾ ཀཏྭཱ མགྒོ ནཱམ ཨིཏི ཝཙནཾ ཝུཙྩཏེ བྷགཝཏཱ.

༥༤. ཨིམེ སཏྟ ཨཀུསལཝིཔཱཀཱ. གཱཝོ ཙརནྟི ཨེཏྠཱཏི གོཙརོ, ཏསྶདིསཏྟཱ གོཙརོ ཨཱརམྨཎནྟི ཨཏྠོ, ཨནིཊྛོ ཙ ཨནིཊྛམཛ྄ཛྷཏྟོ ཙ ཨནིཊྛཱནིཊྛམཛ྄ཛྷཏྟཱ, ཏེཡེཝ གོཙརོ ཨནིཊྛཱནིཊྛམཛ྄ཛྷཏྟགོཙརོ, ཏསྨིཾ ཨནིཊྛཱནིཊྛམཛ྄ཛྷཏྟགོཙརེ ཝཏྟརེ ཝཏྟནྟི. སུཁཱདིཏྟཡཡུཏྟཱ ཏེ ཏེ ཨཊྛ ཨཧེཏུཀཀུསལཝིཔཱཀཱ སུཁཱདིཏྟཡཡུཏྟཱ སུཁསོམནསྶཨུཔེཀྑཱཝེདནཱཧི སཧགཏཱ. དུཀྑུཔེཀྑཱཡུཏཱ ཨིམེ ཨིམེ སཏྟ ཨཧེཏུཀཨཀུསལཝིཔཱཀཱ དུཀྑུཔེཀྑཱཝེདནཱཧི སཧགཏཱ.

༥༥. ཨེཝཾ ཚཏྟིཾསདྷཱ པཱཀཾ པཱཀསཱསནཔཱུཛིཏོ སུགཏོ. ཀིཾ ཝིསིཊྛོ? པཱཀཾ ནཱམ ཨསུརཾ, ཏཾ སཱསཏི, པཱཀེན ཨཏྟནོ པུཉྙཕལེན དེཝེ ཨནུསཱསཏཱིཏི ཝཱ པཱཀསཱསནོ, ཀོ སོ? སཀྐོ. ཏེན པཱཀསཱསནེན པཱུཛིཏོ སཝིཔཱཀཱཝིཔཱཀེསུ ཀུསལཝིཔཱཀཀིརིཡེསུ ཀུསལོ ཚེཀོ ཨེཝཾ ཨིམིནཱ མཡཱ ཝུཏྟཔྤཀཱརེན པཱཀཾ ཙིཏྟཾ ཚཏྟིཾསཔྤཀཱརཾ ཨབྲྭི ཨཝོཙ.

ཨནུལཱ༹རེསཱུཏི ཁུདྡཀེསུ. ཏཐཱབྷཱཝཔཙྩུཔཊྛཱནཱ ཚལཱ༹རམྨཎཝིཛཱནནགཡ྄ཧཱཀཱརཱ. སབྦཉྙུཏཉྙཱཎསྶ གཏི ཝིཡ གཏི ཨེཏིསྶཱཏི སབྦཉྙུཏཉྙཱཎགཏིཀཱ.

༥༦. སོམནསྶཡུཏྟཱནཊྛ ¶ , ཀུསལཱཀུསལཱནི ཙ སོམནསྶཡུཏྟཱནི ཨཊྛ ཀུསལཱཀུསལཱནི ཙ, ཀྲིཡཏོ པན པཉྩ ཨེཝཾ ཨིམིནཱ མཡཱ ཝུཏྟཔྤཀཱརེན ཧཱསཙིཏྟཱནི ཏེརས.

༥༧. པུཐུཛྫནཱ ཧསནྟེཏྠ ཨེཏྠ ཨེཏེསུ ཏེརསཙིཏྟེསུ པུཐུཛྫནཱ པན ཨཊྛཧི ཙིཏྟེཧི ཧསནྟི ¶ . སེཁཱ སཏྟ ཨརིཡཱ ཚཧི ཙིཏྟེཧི ཧསནྟི. ཨསེཁཱ ཁཱིཎཱསཝཱ པཉྩཧི ཙིཏྟེཧི ཧསནྟི.

ཀུསལཱནི པན རཱུཔཱརཱུཔཀུསལཱནི སེཁཔུཐུཛྫནཱནཾ ཨུཔྤཛྫནྟི. ཨིམཱནི རཱུཔཱརཱུཔཀིརིཡཱནི ཁཱིཎཱསཝཱནཾ བྷཱཝནཱཡེཝ ཀཱརོ བྷཱཝནཱཀཱརོ, ཏསྶ ཝསོ བྷཱཝནཱཀཱརཝསོ, ཏེན པཝཏྟཱནི. ཏཱནི རཱུཔཱརཱུཔཀུསལཱནི བྷཱཝནཱཔུཉྙཝསཔྤཝཏྟཱནི བྷཱཝནཱཀུསལཝསེན པཝཏྟཱནི. ཨིམེསཾ རཱུཔཱརཱུཔཀིརིཡཱནཾ ཏེསཉྩ རཱུཔཱརཱུཔཀུསལཱནཾ ཨཡམེཝ ཝིསེསོ.

༥༨-༩. ཡཱ པུཐུཛྫནཀཱལསྨིཾ, ཨབྷིནིབྦཏྟིཏཱ པན པུཐུཛྫནཀཱལསྨིཾ པུཐུཛྫནབྷཱཝཊྛིཏེན ཡོགིནཱ ཨབྷིནིབྦཏྟིཏཱ ཡཱ རཱུཔཱརཱུཔསམཱཔཏྟི, སཱ རཱུཔཱརཱུཔསམཱཔཏྟི སོ ཡོགཱི ཁཱིཎཱསཝོ བྷིཀྑུ ཧུཏྭཱ ནཾ རཱུཔཱརཱུཔསམཱཔཏྟིཾ ཡཱཝ ཡཏྟཀཾ ཀཱལཾ ན སམཱཔཛྫཏེ, ཏཱཝ ཏཏྟཀེན ཀཱལེན ཏསྶ ཁཱིཎཱསཝབྷིཀྑུནོ ཀུསལཱ ཨེཝ རཱུཔཱརཱུཔཀུསལཱ ཨེཝ ཧོཏི. ཁཱིཎཱསཝེན སཱ རཱུཔཱརཱུཔསམཱཔཏྟི སཙེ ཡདི སམཱཔནྣཱ སམཱཔཛྫིཏཱ, ཀྲིཡཱ རཱུཔཱརཱུཔཀིརིཡཱ ཧོཏི.

༦༠. ཨེཀཱདསཝིདྷཾ ཀཱམེ ཀཱམཱཝཙརེ ཀིརིཡཙིཏྟཾ ཨེཀཱདསཝིདྷཾ, རཱུཔེ རཱུཔཱཝཙརེ པཉྩ, ཨརཱུཔིསུ ཙཏྟཱརི ཨིཏི སབྦཱནི ཀྲིཡཙིཏྟཱནི ཝཱིསཏི.

༦༡. ལོཀུཏྟརཀྲིཡཙིཏྟཾ, པན ཀསྨཱ ན ཝིཛྫཏི? མགྒསྶ ཨེཀཙིཏྟཀྑཎིཀཏྟཱ ན ཝིཛྫཏི. ཨཡམེཏྠ ཨདྷིཔྤཱཡོ – ཙཏུམགྒཊྛོ ¶ ཁཱིཎཱསཝོ ནཱམ ན ཧོཏི, མགྒཱནནྟརམེཝ ཕལཾ ཨུཔྤཛྫཏི, མགྒོཔི ཨེཀཙིཏྟཀྑཎིཀོ ཡདི ཙིཏྟཾ བཧུཙིཏྟཀྑཎིཀཾ, ཕལསམངྒིནོ ཁཱིཎཱསཝསྶཔི མགྒཙིཏྟཾ བྷཝེཡྻ, ཨེཝཾ སཏི ལོཀུཏྟརཀིརིཡཙིཏྟཾ བྷཝེཡྻཱཏི ཨདྷིཔྤཱཡོ.

༦༢. ཀྲིཡཱཀྲིཡཱཔཏྟིཝིབྷཱགདེསཀོ ཀརཎཾ ཀྲིཡཾ, ཀྲིཡཾ ནཱམ ཝིནཡཔརིཡཱཡེན ཨཀཏྟབྦསྶ ཀརཎཾ, ན ཀརཎཾ ཨཀྲིཡཾ, ཨཀྲིཡཾ ནཱམ ཝིནཡཔརིཡཱཡེན ཀཏྟབྦསྶ ཨཀརཎཾ, ཨཱཔཛྫནཾ ཨཱཔཏྟི, ཀྲིཡཱཡ ཀརཎེན ཨཱཔཏྟི ཀྲིཡཱཔཏྟི, ཨཀྲིཡཱཡ ཨཀརཎེན ཨཱཔཏྟི ཨཀྲིཡཱཔཏྟི, ཀྲིཡཱཔཏྟི ཙ ཨཀྲིཡཱཔཏྟི ཙ ཀྲིཡཱཔཏྱཱཀྲིཡཱཔཏྟིཡོ, ཨེཀསྶ ཨཱཔཏྟི-སདྡསྶ ལོཔཾ ཀཏྭཱ ‘‘ཀྲིཡཱཀྲིཡཱཔཏྟིཡོ’’ཏི ཝུཏྟཾ, ཏཱསཾ ཝིབྷཱགོ ཀྲིཡཱཀྲིཡཱཔཏྟིཝིབྷཱགོ, དེསེཏཱིཏི དེསཀོ, ཏསྶ དེསཀོ ཀྲིཡཱཀྲིཡཱཔཏྟིཝིབྷཱགདེསཀོ. ཎྭུ-ཏུ-པཙྩཡེསུ པརེསུ ཀམྨཏྠེ ཚཊྛཱི ཧོཏཱིཏི ¶ ཝདནྟི. ཛིནོ ཀིཾ ཝིསིཊྛོ? ཀྲིཡཱཀྲིཡཱཔཏྟིཝིབྷཱགདེསཀོ ཧིཏཱཧིཏཱནཾ སཀྲིཡཱཀྲིཡཱརཏོ ཧིཏསྶ སཀྲིཡཱཡ རཏོ, ཨཧིཏསྶ ཨཀྲིཡཱཡ རཏོ, ཡཾ ཀྲིཡཱཀྲིཡཾ, ཀྲིཡཾ ནཱམ ཀྲིཡཙིཏྟཾ, ཨཀྲིཡཾ ནཱམ ཀུསལཱཀུསལཝིཔཱཀཙིཏྟཾ ཨིཙྪནྟི ཨེཀེ. ཏཾ ན. ཀསྨཱ? ཀུསལཱདྷིཀཱརེ ‘‘ཀུསལཾ མུནིནཱ ལཔིཏཾ’’ ཨཀུསལཱདྷིཀཱརེ ‘‘པཱཔམཱནསཾ པཱཔཱཔཱཔེསྭཔཱཔེན ཝུཏྟཾ’’ ཝིཔཱཀཱདྷིཀཱརེ ‘‘པཱཀཾ སུགཏོ ཨབྲཝཱི’’ཏི ཝཏྭཱ པུན ཀྲིཡཱདྷིཀཱརེ ‘‘ཀུསལཱཀུསལཝིཔཱཀཱནི ཨཝོཙཱ’’ཏི ཝཙནསྶ ཝཏྟབྦཱབྷཱཝཏོ. ཏེན ཝཱསྶ ཀྲིཡཱཀྲིཡཾ ཨེཏསྶཱཏི ཀྲིཡཱཀྲིཡཾ, ཀྲིཡཱཀྲིཡསབྷཱཝནྟི ཨཏྠོ. ཨཡམེཝ སཱརཏོ པཙྩེཏབྦོ. ཡཾ ཀྲིཡཱཀྲིཡཾ ཙིཏྟཾ ཀྲིཡཱཀྲིཡཱསབྷཱཝཾ ཨཝོཙ དེསེསི, ཏཾ ཀྲིཡཱཀྲིཡཾ ཀྲིཡཱཀྲིཡསབྷཱཝཾ མཡཱ སམཱིརིཏཾ, སམྨཱ པཀཱརེན ཨཱིརིཏཾ ཀཐིཏཾ.

༦༤. ཨེཀཱུནནཝུཏི ¶ སབྦེ, ཙིཏྟུཔྤཱདཱ མཧེསིནཱ ལོཀུཏྟརེ ཨཊྛ ཀཏྭཱ ཨེཀཱུནནཝུཏི སབྦེ ཙིཏྟུཔྤཱདཱ མཧེསིནཱ ཏཐཱགཏེན སམཱསཏོ སངྑེཔཏོ ནིདྡིཊྛཱ.

༦༥. པིཊཀེ ཨབྷིདྷམྨསྨིཾ, ཡེ བྷིཀྑཱུ པཱཊཝཏྠིནོ ཨབྷིདྷམྨཔིཊཀེ པཊུནོ བྷཱཝོ པཱཊཝཾ, ཏེན ཨཏྠོ པཱཊཝཏྠོ, སོ ཨེཏེསཾ ཨཏྠཱིཏི པཱཊཝཏྠིནོ, ཚེཀབྷཱཝཏྠིཀཱ ཡེ བྷིཀྑཱུ, ཏེཧི བྷིཀྑཱུཧི ཨཡཾ ཨབྷིདྷམྨཱཝཏཱརོ ཨུགྒཧེཏབྦོ སིཀྑིཏབྦོ པུནཔྤུནཾ ཙིནྟིཏབྦོ.

༦༦. ཡེ ཛནཱ ཏསྶངྐཱསེན ཏཾསནྣིབྷེན ཨབྷིདྷམྨཱཝཏཱརེན ཨབྷིདྷམྨམཧོདདྷིཾ མཧཱསཱགརསནྣིབྷཾ ཨབྷིདྷམྨཾ ཏརནྟི, ཏེ ཨིམཾ ལོཀཾ པརལོཀཉྩ ཏརནྟི. ཨིཏཱིཏི པརིསམཱཔནེ.

ཨིཏི ཨབྷིདྷམྨཱཝཏཱརཊཱིཀཱཡ

ཙིཏྟནིདྡེསཝཎྞནཱ ནིཊྛིཏཱ.

པཋམོ པརིཙྪེདོ.

༢. དུཏིཡོ པརིཙྪེདོ

ཙེཏསིཀནིདྡེསཝཎྞནཱ

༦༧. ཙིཏྟཱནནྟརམུདྡིཊྛཱ ¶ , ཡེ ཙ ཙེཏསིཀཱ མཡཱ ཡེ ཙ ཙེཏསིཀཱ ཙིཏྟཱནནྟརཾ མཡཱ ཨུདྡིཊྛཱ, ཨིཏོ པརཾ ཨིདཱནི ཏེསཾ ཙེཏསིཀཱནཾ ཝིབྷཱཛནཾ ཀརིསྶཱམི ཨཧཾ.

ཨིམེསུ པན ཀརུཎཱམུདིཏཱཝསེན བྷཱཝནཱཀཱལེ ཀརུཎཱཔུབྦབྷཱགོ ཝཱ, ཨཔྤནཱཔཏྟཱཡ ཀརུཎཱཡ པུབྦབྷཱགོ, ཏསྨིཾ པུབྦབྷཱགེ, ཀརུཎཱཏོ པུབྦབྷཱགེ ཀཱམཱཝཙརཙིཏྟེཏི ཨཏྠོ. ཨེཀཱ ཀརུཎཱ ཨུཔྤཛྫཏི. མུདིཏཱཔུབྦབྷཱགེ ཝཱ ཨཔྤནཱཔཏྟཱཡ མུདིཏཱཡ པུབྦབྷཱགེ ཨེཀཱ མུདིཏཱ ¶ ཨུཔྤཛྫཏི. ཨིམིནཱ ཀཱམཱཝཙརཙིཏྟེན ཡོགཱི མིཙྪཱཀམྨནྟཱདཱིཧི དྷམྨེཧི ཝིརམཏི. རམུ-དྷཱཏུ ཀཱིལཱ༹ཡཾ, ཝི-སདྡོ ཝིརམཎཏྠོ.

༦༨. ཨཱདིནཱ པུཉྙཙིཏྟེན, ཏེཏྟིཾས ནིཡཏཱ མཏཱ ཨཱདིནཱ པུཉྙཙིཏྟེན པཋམམཧཱཀུསལཙིཏྟེན སཧ ནིཡཏཱ ཏེཏྟིཾས ཙེཏསིཀཱ བྷགཝཏཱ མཏཱཏི, ཨཐ ཝཱ ཀརུཎཱམུདིཏཱ ཨནིཡཏཱ ཨེཀེན དྷམྨེན སཧ ཙཏུཏྟིཾས དྷམྨཱ བྷཝནྟི.

༦༩. ཀསྨཱ པནེཏྠ མེཏྟཱ ཙ, ཨུཔེཀྑཱ ཙ ན ཨུདྡྷཊཱ ཨེཏྠ ཨེཏེསུ ཡེཝཱཔནཀདྷམྨེསུ, ནིདྡྷཱརཎཾ, མེཏྟཱ ཙ ཨུཔེཀྑཱ ཙ དྷམྨརཱཛེན སཏྠུནཱ ན ཨུདྡྷཊཱ ན ཝུཏྟཱ ཀསྨཱ ཀཱརཎཱ.

༧༠. ཨབྱཱཔཱདེན མེཏྟཱཔི ཨབྱཱཔཱདེན མེཏྟཱ གཧིཏཱ, ཨུཔེཀྑཱཏི ཏཏྲམཛ྄ཛྷཏྟཏཱཡ ཙ གཧིཏཱ ཡསྨཱ ཀཱརཎཱ, ཏསྨཱ ཨུབྷོཔེཏཱ བྷགཝཏཱ ན གཧིཏཱ.

༧༡. ཀསྨཱ ཡེཝཱཔནཱ དྷམྨཱ, བུདྡྷེནཱདིཙྩབནྡྷུནཱ སབྦེ ཏེ ཡེཝཱཔནཱ དྷམྨཱ ཡེཝཱཔནནཱམཀཱ པཱལི༹ཡཾ སརཱུཔེན ཨེཝ. བནྡྷཏི སྣེཧེན ཨེཏསྨིནྟི བནྡྷུ, ཨཱདིཙྩསྶ བནྡྷུ ཨཱདིཙྩབནྡྷུ, ཏེན ཨཱདིཙྩབནྡྷུནཱ བུདྡྷེན ན ཙ ཨུདྡྷཊཱ ན དེསིཏཱ.

༧༢. ཀསྨཱ ¶ ཀཱརཎཱ? ཡསྨཱ ཨནིཡཏཱ ཀེཙི ཡེཝཱཔནཀཱ ཨནིཡཏཱ, ཡསྨཱ ཀཱརཎཱ རཱསིཾ དུཀཝགྒཱདིརཱསིཾ ན བྷཛནྟི ན སེཝནྟི, ཡསྨཱ ཀཱརཎཱ ཀེཙི ཡེཝཱཔནཀཱ དུབྦལཱ, ཏསྨཱ པཱལི༹ཡཾ བྷགཝཏཱ ན ཝུཏྟཱ.

༧༣. ཚནྡཱདྷིམོཀྑམུདིཏཱ མནསི ཙ ཀཱརོ,

མཛ྄ཛྷཏྟཏཱ ཙ ཀརུཎཱ ཝིརཏིཏྟཡཉྩ;

པུཉྙེསུ ཏེན ནིཡཏཱནིཡཏཱ ཙ སབྦེ,

ཡེཝཱཔནཱ མུནིཝརེན ན ཙེཝ ཝུཏྟཱ.

ཚནྡཱདྷིམོཀྑོ ¶ མུདིཏཱ མནསིཀཱརོ མཛ྄ཛྷཏྟཏཱ ཀརུཎཱ ཝིརཏིཏྟཡཉྩ པུཉྙེསུཀུསལེསུ ནིཡཏཱ ཙཏྟཱརོ ཨནིཡཏཱ པཉྩ སབྦེ ཡེཝཱཔནཱ ན ཙ ཨེཝ ཏེན མུནིཝརེན ཝུཏྟཱ.

༧༤-༨༠. ཀསྨཱ པནེཏྠ ཕསྶོཝ, པཋམཾ སམུདཱིརིཏོ ཨེཏྠ ཨེཏེསུ ཙེཏསིཀེསུ, ཛཱཏིནིདྡྷཱརཎཾ, ཕསྶོཝ པཋམཾ སམུདཱིརིཏོ ཀཐིཏོ. ཀསྨཱ ཀཱརཎཱ? ཀིར མཡཱ སུཏཾ, ཨཱརམྨཎེ ཙིཏྟསྶ པཋམཾ ཨབྷིནིཔཱཏཏྟཱ ཕསྶོ པཋམཾ སམུདཱིརིཏོ, ཕུསིཏྭཱ པན ཕསྶེན ཕསྶེན ཨཱརམྨཎཾ ཕུསིཏྭཱ ཡོགིནོ ཝེདནཱཡ ཨཱརམྨཎཾ ཝེདཡེ, སཉྙཱཡ སཉྫཱནཱཏི, ཙེཏནཱཡ ཨཱརམྨཎཾ ཙེཏཡེ. སཧཛཱཏཱནཾ ཙེཏསིཀཱནཾ ཕསྶོཝ ཨིདྷ ཨིམསྨིཾ ཙིཏྟེ མཧེསིནཱ པཋམཾ ཝུཏྟོ. ཧི ཀསྨཱ ཀཱརཎཱ? ཡསྨཱ བལཝཔཙྩཡཏྟཱ, ཏསྨཱ ཝུཏྟོ. ཨཀཱརཎམིདཾ སབྦཾ, ཙིཏྟཱནཾ ཏུ སཧེཝ ཙ ‘‘པཋམཱབྷིནིཔཱཏཏྟཱ’’ཏི ཙ ‘‘བལཝཔཙྩཡཏྟཱ’’ཏི ཙ ཨིདཾ སབྦཾ ཝཙནཾ ཨཀཱརཎཾ ཨཧེཏུཀཾ ཨཡུཏྟཾ, ཀསྨཱ ཀཱརཎཱ? ཙིཏྟཛཱནཾ ཙིཏྟེཧི སཧཔྤཝཏྟཱནཾ ཙེཏསིཀཱནཾ ཨེཀུཔྤཱདཱདིབྷཱཝེན སམཱནུཔྤཱདསམཱནནིརོདྷསམཱནཱལམྦཎསམཱནཝཏྠུཀབྷཱཝེན པཝཏྟིཏོ ཨཀཱརཎཾ ཨཡུཏྟཾ. ཨཡཾ ཏུ པཋམུཔྤནྣོ, ཨཡཾ པཙྪཱཏི ནཏྠིདཾ ཨཡཾ དྷམྨོ པཋམུཔྤནྣོ, ཨཡཾ དྷམྨོ པཙྪཱཀཱལེ ཨུཔྤནྣོ ཨིཏི ཨིདཾ ཝཙནཾ ནཏྠི. བལཝཔཙྩཡཏྟེཔི ཀཱརཎཾ ན ཙ དིསྶཏི. དེསནཱཀྐམཏོ ཙེཝ པཋམཾ སམུདཱིརིཏོ ཨིཙྩེཝཾ ཨིཏི ཨེཝཾ ཨིཏི ཨིམིནཱ མཡཱ ཝུཏྟཔྤཀཱརེན ཕསྶསྶ པཋམཾ སམུདཱིརིཏཏཾ ཝིཉྙུནཱ ཝིབྷཱཝིནཱ ཝིཉྙེཡྻཾ, ཝིསེསཏོ ཝིསེསེན ཨཉྙཐཱ ན ཝིཉྙེཡྻཾ. ན ཙ པརིཡེསིཏབྦོཡཾ, ཏསྨཱ པུབྦཱཔརཀྐམོ ཡསྨཱ ཀཱརཎཱ ཨཡཾ པུབྦཱཔརཀྐམོ ཝིཉྙུནཱ ན ཙ པརིཡེསིཏབྦོ ན གཝེསིཏབྦོ, དྷམྨཱ ཨེཝ ཝཙནཏྠལཀྑཎཱདཱིཧི ཝིཛཱནཏཱ པཎྜིཏེན པརིཡེསིཏབྦཱ.

ཨིཊྛཱཀཱརཱནུབྷཝནརསཱ ¶ ¶ ཨིཊྛཱརམྨཎཱནུབྷཝནཀིཙྩཱ སུབྷོཛནརསཾ ཨནུབྷཝནྟོ རཱཛཱ ཝིཡ. ཙེཏསིཀཨསྶཱདཔཙྩུཔཊྛཱནཱ ཙེཏསིཀཔསྶདྡྷིཔདཊྛཱནཱ.

པཙྩཱབྷིཉྙཱཎཀརཎརསཱ པཊིཛཱནནཀིཙྩཱ ཝཌྜྷཀིསྶ ཨབྷིཉྙཱཎཀརཎམིཝ ཝཌྜྷཀིནོ སཀིཾ སཉྫཱནིཏྭཱཔི དཱརུཧརེསུ སུཏྟསྶ པཊིཔསཱརཎཾ ཝིཡཱཏི ཨདྷིཔྤཱཡོ. ཡཐཱགཧིཏནིམིཏྟཝསེནཱཏི ཡཐཱཔཝཏྟིཏནིམིཏྟསྶ ཝསེན. མནསི ཨབྷིནིཝེསཀརཎཾ གཡ྄ཧཱཀཱརཱ.

ཨཱཡཱུཧནརསཱ པཝཏྟནཀིཙྩསཱདྷཀཱ. མཧཱཝཌྜྷཀིཨཱདཡོ ཝིཡ ཡཐཱ མཧཱཝཌྜྷཀཱི སཡམྤི དཱརུཾ ཏཙྪཏི, པརེཔི དཱརུཾ ཏཙྪཱཔེཏི, ཨེཝཾ སཡམྤི ཨཱརམྨཎེ སནྡཧཏི, སམྤཡུཏྟདྷམྨེཔི ཨབྷིསནྡཧཱཔེཏི.

ཨཱཧནནཾ བྷུསོ ཧནནཾ, པརིཡཱཧནནཾ སམནྟཱ ཧནནཾ, ཏཾ རསོ ཨེཏསྶཱཏི ཨཱཧནནཔརིཡཱཧནནརསོ.

ཨཱརམྨཎཱནུམཛྫནལཀྑཎོ ཨཱརམྨཎཔརིམདྡནལཀྑཎོ.

པིནཡཏཱིཏི པཱིཏི, སཧཛཱཏདྷམྨེ ཨཱརམྨཎེ པིནཡཏཱིཏི ཨཏྠོ. ཀཱཡཙིཏྟཕརཎརསཱ. ཨུདགྒསྶ ཙིཏྟསྶ བྷཱཝོ ཨོདགྱཾ, ཏཾ པཙྩུཔཊྛཱནཾ ཨེཏསྶཱཏི ཨོདགྱཔཙྩུཔཊྛཱནཱ.

སདྡཧནྟི ཝཏྠུཏྟཡཾ སདྡཧནྟི. ཨཀཱལུསིཡཔཙྩུཔཊྛཱནཱ ཨནཱཝིལབྷཱཝཔཙྩུཔཊྛཱནཱ. སདྡྷེཡྻཝཏྠུཔདཊྛཱནཱ སདྡཧིཏབྦཝཏྠུཏྟཡཱསནྣཀཱརཎཱ.

ཨརཉྙགཏསུདེསཀོ ཝིཡ ཨརཉྙེ གཏོ མགྒསུདེསཀོ ཝིཡ.

ཨཏྟནཱ ཨཝིནིབྦྷུཏྟཱནཾ དྷམྨཱནནྟི ཨཝིགཏཱནཾ ཙེཏསིཀཱནཾ. ཏེསནྟི ཏེསཾ ཙེཏསིཀཱནཾ དྷམྨཱནཾ. སནྟེཔི ཙ ཏེསཾ ¶ ཙེཏསིཀཱནཾ ཨནུཔཱལནལཀྑཎཱདིམྷི ¶ ཝིདྷཱནེ ཨཏྠིཀྑཎེཡེཝ ཏཾ ཏེསཾ པཱལེཏབྦཱནཾ ཙེཏསིཀཱནཾ པཝཏྟཀྑཎེཡེཝ ཏཾ ཛཱིཝིཏཾ ཏེ དྷམྨེ པཱལེཏབྦེ ཙེཏསིཀེ ཨནུཔཱལེཏི. ཨུདཀཾ ཝིཡཱཏི ཡཐཱ ཨུདཀཾ ཨཏྟནི ཨུཔྤལཱདཱིནི ཨནུཔཱལེཏི, ཏཐཱ ཨནུཔཱལནལཀྑཎཱདིམྷི ཝིདྷཱནེ སནྟེཔི ཏེསཾ ཨཏྠིཀྑཎེཡེཝ ཨནུཔཱལེཏི, ཝིཛྫམཱནཀྑཎེཝ ཨནུཔཱལེཏཱིཏི ཨདྷིཔྤཱཡོ. པཙྩཡུཔྤནྣེཔི ཙ དྷམྨེ ཨནུཔཱལེཏི, དྷཱཏི ཝིཡ ཀུམཱརཾ ཨཉྙཱཡ ཛནིཏཾ ཀུམཱརཾ རཀྑནྟཱི དྷཱཏི ཝིཡ, པརསྶ པུཏྟཾ ཨངྐཱདིནཱ དྷཱརེཏཱིཏི དྷཱཏི. སཡཾཔཝཏྟིཏདྷམྨསམྦནྡྷེནེཝ པཝཏྟཏི ཨཏྟནཱ པཝཏྟིཏེཧི དྷམྨེཧི སམྤཝཏྟཏི. ནིཡཱམཀོ ཝིཡ ཡཐཱ ནིཡཱམཀོ ཨེཀནཱཝཱཡ ཝུཏྠེཧི ཛནེཧི སཧ པཝཏྟཏི, བྷངྒཏོ ཨུདྡྷཾ ཏཾ ཛཱིཝིཏཾ ན པཝཏྟཡཏི, ཨཏྟནོ ཙ ཨབྷཱཝཱ ཋཔཡིཏབྦཱནཾ ཙེཏསིཀཱནཉྩ ཨབྷཱཝཱ, བྷངྒཀྑཎེ ཙེཏསིཀེ ན ཋཔེཏི སཡཾ བྷིཛྫམཱནཏྟཱ, ཝཊྚིསྣེཧོ ཁཱིཡམཱནོ པདཱིཔསིཁཾ ན ཀརོཏི ཡཐཱ.

སོམྨབྷཱཝཔཙྩུཔཊྛཱནོཏི མུདུབྷཱཝཔཙྩུཔཊྛཱནོ, སཱིཏལབྷཱཝཔཙྩུཔཊྛཱནོ ཝཱ.

ཀཱཡོཏི ཙེཏྠ ཝེདནཱདཡོ ཏཡོ ཁནྡྷཱ ཝེདནཱཀྑནྡྷོ སཉྙཱཀྑནྡྷོ སངྑཱརཀྑནྡྷོ ཨིམེ ཁནྡྷཱ གཧིཏཱ.

ནིམྨདྡནརསཱཏི ནིམྨདྡནཀིཙྩཱ. ཀཱཡཙིཏྟཱནཾ ཨཝཱུཔསམཏཱཨུདྡྷཙྩཱདིཀིལེསཔཊིཔཀྑབྷཱུཏཱཏི ཨཱདིགྒཧཎེན ཀུཀྐུཙྩཾ གཧེཏབྦཾ.

ཨིཏི ཨབྷིདྷམྨཱཝཏཱརཊཱིཀཱཡ

ཙེཏསིཀནིདྡེསཝཎྞནཱ ནིཊྛིཏཱ.

དུཏིཡོ པརིཙྪེདོ.

༣. ཏཏིཡོ པརིཙྪེདོ

ཙེཏསིཀཝིབྷཱགནིདྡེསཝཎྞནཱ

༨༩. སབྦེ ¶ ཙེཏསིཀཱ ཝུཏྟཱ, བུདྡྷེནཱདིཙྩབནྡྷུནཱ ཡེ སབྦེ ཙེཏསིཀཱ ཨཱདིཙྩབནྡྷུནཱ བུདྡྷེན ¶ ཝུཏྟཱ, ཏེ སབྦེ ཙེཏསིཀཱ ནཱམསཱམཉྙཏོ ནཱམསམཱནབྷཱཝེན དྭེཔཉྙཱསབྷཝནྟི ཏེ, ཨནོཏྟཔྤཔརིཡོསཱནཱ དྭིཔཉྙཱས བྷཝནྟི.

༩༠-༩༢. ཙཏུཔཉྙཱསདྷཱ ཀཱམེ, རཱུཔེ པཉྩདསེརིཏཱ ཀཱམེ ཀཱམཱཝཙརེ ཙཏུཔཉྙཱས ཙིཏྟཱནི ཨཱིརིཏཱ. རཱུཔེ རཱུཔཱཝཙརེ པཉྩདས ཙིཏྟཱནི ཨཱིརིཏཱ བྷཝནྟི. དྭཱདསཱརཱུཔེ ཨརཱུཔཱཝཙརེ དྭཱདས ཙིཏྟཱནི བྷཝནྟི. ཙཏྟཱལཱིས མནཱསཝཱ ལོཀུཏྟརཙིཏྟཱནི ཙཏྟཱལཱིས བྷཝནྟི, ཨེཀཝཱིསསཏཾ སབྦེ ཙིཏྟུཔྤཱདཱ སམཱསཏོ སངྑེཔཏོ ཨེཀཝཱིསསཏཾ ཧོཏི. ཨེཏེསུ ཏེསམུཔྤཏྟིཾ ཨིཏོ པརཾ ཨེཏེསུ མཡཱ ཝུཏྟེསུ ཙིཏྟེསུ ཏེསཾ ཕསྶཱདཱིནཾ དྷམྨཱནཾ ཨུཔྤཏྟིཾ ཨེཀཾ ཨེཀཾ ཨུདྡྷརིཏྭཱ ཙིཏྟཙེཏསིཀེསུ བྷིཀྑཱུནཾ པཱཊཝཏྠཱཡ ཨཧཾ པཝཀྑཱམི དེསིསྶཱམི.

༩༣. ཨེཀགྒཏཱ ཙིཏྟེཀགྒཏཱ མནཀྐཱརོ མནསིཀཱརོ ཛཱིཝིཏཾ ཕསྶཔཉྩཀཾ ཨེཏེ ཨཊྛ ཙེཏསིཀཱ ཨཝིནིབྦྷོགཱ ཨཉྙམཉྙཏོ ཨཝིགཏཱ ཨེཀུཔྤཱདཱ སམཱནུཔྤཱདཱ སཧཀྑཡཱ སཧཝཡཱ.

༩༤. ཕསྶོ ཙ ཝེདནཱ སཉྙཱ, ཙེཏནཱ ཛཱིཝིཏིནྡྲིཡཾ ཨེཀགྒཏཱ མནཀྐཱརོ ཨིམེ ཙེཏསིཀཱ སབྦསཱདྷཱརཎཱ སབྦཙིཏྟེཧི སཱདྷཱརཎཱ, སབྦཙིཏྟཱནཾ སཱདྷཱརཎཱ ཝཱ.

༩༥. ཝིཏཀྐོ པཉྩཔཉྙཱས-ཙིཏྟེསུ སམུདཱིརིཏོ. ཙཱརོ ཚསཊྛིཙིཏྟེསུ ཝིཏཀྐོ ཏཱཝ དྭིཔཉྩཝིཉྙཱཎཝཛྫིཏཀཱམཱཝཙརེསུ ཙེཝ ཨེཀཱདསསུ པཋམཛ྄ཛྷཱནཙིཏྟེསུ ཙཱཏི པཉྩཔཉྙཱསཙིཏྟེསུ ¶ བྷགཝཏཱ སམུདཱིརིཏོ. ཝིཙཱརོ དྭིཔཉྩཝིཉྙཱཎཝཛྫིཏཀཱམཱཝཙརཙིཏྟེསུ ཨེཀཱདསསུ པཋམཛ྄ཛྷཱནཙིཏྟེསུ ཙ ཨེཀཱདསསུ དུཏིཡཛ྄ཛྷཱནཙིཏྟེསུ ཙཱཏི ཚསཊྛིཙིཏྟེསུ ཛཱཡཏི. ཨེཏྠ ཨེཏསྨིཾ ཝཙནེ སཾསཡོ ནཏྠི.

༩༦. ཨེཀཔཉྙཱསཙིཏྟེསུ, པཱིཏི ཏེསཊྛིཡཱ སུཁཾ པཱིཏིདོམནསྶུཔེཀྑཱསཧགཏཀཱཡཝིཉྙཱཎཙཏུཏྠཛ྄ཛྷཱནཝཛྫིཏེསུ ཨེཀཔཉྙཱསཙིཏྟེསུ ཛཱཡཏི. སུཁཾ དོམནསྶདུཀྑུཔེཀྑཱསཧགཏཝཛྫིཏེསུ ཏེསཊྛིཙིཏྟེསུ ཛཱཡཏི. ཨུཔེཀྑཱ སོམནསྶསུཁདུཀྑསཧགཏཝཛྫིཏེསུ པཉྩཔཉྙཱསཙིཏྟེསུ ཛཱཡཏི. དུཀྑཾ ཨཀུསལཝིཔཱཀཀཱཡཝིཉྙཱཎཔཊིགྷསཧགཏེསུ ཏཱིསུ ཙིཏྟེསུ ཛཱཡཏི.

༩༧. ཧོཏི དྭཱསཊྛིཙིཏྟེསུ, སོམནསྶིནྡྲིཡཾ པན དོམནསྶདུཀྑསུཁུཔེཀྑཱསཧགཏཝཛྫིཏེསུ ¶ དྭཱསཊྛིཙིཏྟེསུ ཛཱཡཏི. དུཀྑིནྡྲིཡཾ པནེཀསྨིཾ ཨཀུསལཝིཔཱཀེ ཀཱཡཝིཉྙཱཎེ ཛཱཡཏི. ཏཐེཀམྷི སུཁིནྡྲིཡཾ ཏཐཱ ཨེཀསྨིཾ པུཉྙཔཱཀེ ཀཱཡཝིཉྙཱཎེ ཧོཏི.

༩༨. པཉྩུཏྟརསཏེ ཙིཏྟེ, ཝཱིརིཡཾ ཨཱཧ ནཱཡཀོ ཛིནོ པཉྩདྭཱརཱཝཛྫནདྭིཔཉྩཝིཉྙཱཎསམྤཊིཙྪནསནྟཱིརཎཝཛྫིཏེ པཉྩུཏྟརསཏེ ཙིཏྟེ ཝཱིརིཡཾ ཨཱཧ ཀཐེསི. ཙཏུཏྟརསཏེ ཙིཏྟེ, སམཱདྷིནྡྲིཡམབྲྭི ཝིཙིཀིཙྪཱསཧགཏདྭིཔཉྩཝིཉྙཱཎསམྤཊིཙྪནསནྟཱིརཎཔཉྩདྭཱརཱཝཛྫནཝཛྫིཏེ ཙཏུཏྟརསཏེ ཙིཏྟེ སམཱདྷིནྡྲིཡཾ ཨཝོཙ.

༩༩. སབྦཱཧེཏུཀཙིཏྟཱནི, ཋཔེཏྭཱ ཙེཀཧེཏུཀེ སབྦཱནི ཨཊྛཱརས ཨཧེཏུཀཙིཏྟཱནི ཨེཀཧེཏུཀཙིཏྟདྭཡཉྩ ཋཔེཏྭཱ སེསསྨིཾ ཨེཀུཏྟརསཏེ ཙིཏྟེ ཚནྡསྶ ཨུཔྤཏྟིཾ ཨུདྡིསེ པཎྜིཏོ ཀཐེཡྻ.

༡༠༠. ཋཔེཏྭཱ ¶ དས ཝིཉྙཱཎེ ཙཀྑུཝིཉྙཱཎཱདིཀེ དས ཝིཉྙཱཎེ ཙ ཝིཙིཀིཙྪཱཡུཏམྤི ཙིཏྟཾ ཋཔེཏྭཱ སེསསྨིཾ དསུཏྟརསཏེ ཙིཏྟེ ཨདྷིམོཀྑོ བྷགཝཏཱ ཨུདཱིརིཏོ.

༡༠༡-༢. སདྡྷཱ སཏི ཧིརཱི ཨོཏྟཔྤཾ ཨལོབྷོ ཨདོསོ ཏཏྲམཛ྄ཛྷཏྟཾ ཚ ཡུགལཱ༹ ཙ ཨིཏི ཨིམེ ཨེཀཱུནཝཱིསཏི དྷམྨཱ ནིཡཏཱ ཧུཏྭཱ ཨེཀནཝུཏིཡཱ ཙིཏྟེ ཛཱཡནྟི. ཨེཀཱུནཝཱིསཏི དྷམྨཱ ཨཧེཏུཀེསུ ཨཊྛཱརསསུ ཨཔུཉྙེསུ དྭཱདསསུ ཨཀུསལེསུ ན ཛཱཡརེ ན ཛཱཡནྟི.

༡༠༣. ཨེཀཱུནཱསཱིཏིཡཱ ཙིཏྟེ, པཉྙཱ ཛཱཡཏི སབྦདཱ པཉྙཱ དྭཱདསཨཀུསལཨཊྛཱརསཨཧེཏུཀམཧཱཀུསལཉཱཎཝིཔྤཡུཏྟམཧཱཝིཔཱཀཉཱཎཝིཔྤཡུཏྟམཧཱཀིརིཡཱཉཱཎཝིཔྤཡུཏྟཝཛྫིཏེ ཨེཀཱུནཱསཱིཏིཡཱ ཙིཏྟེ ཛཱཡཏི. ཨཊྛཝཱིསཏིཡཱ ཙིཏྟེ, ཀརུཎཱམུདིཏཱ སིཡུཾ ཀརུཎཱམུདིཏཱ ཨཊྛསུ མཧཱཀུསལེསུ, ཨཊྛསུ མཧཱཀིརིཡཱསུ, རཱུཔཱཝཙརཔཉྩམཛ྄ཛྷཱནཝཛྫིཏེསུ དྭཱདསརཱུཔཱཝཙརེསུ ཙཱཏི ཨཊྛཝཱིསཏིཡཱ ཙིཏྟེསུ སིཡུཾ བྷཝེཡྻུཾ.

༡༠༤. ཀཱམཱཝཙརཔུཉྙེསུ, སབྦལོཀུཏྟརེསུ ཙ ཀཱམཱཝཙརམཧཱཀུསལེསུ ཙིཏྟེསུ སབྦེསུ ལོཀུཏྟརེསུ ཙཱཏི སཧ ཨཊྛཀེ ཙཏྟཱལཱིསཝིདྷེ ཙིཏྟེ ཝིརཏིཏྟཡཾ ཧོཏི.

༡༠༥. སདྡྷཱ ¶ སཏི ཧིརོཏྟཔྤཾ ཨལོབྷཱདིཏྟཡམྤི ཙ ཡུགལཱ༹ནི ཚ ཙ མཛ྄ཛྷཏྟཾ ཀརུཎཱམུདིཏཱཔི ཙ.

༡༠༦. ཏཐཱ ཏིསྶོ ཝིརཏིཡོ སབྦེ ཏེ པཉྩཝཱིསཏི དྷམྨཱ མཧཱཀུསལཙིཏྟསམྤཡུཏྟཨབྱཱཀཏཙིཏྟསམྤཡུཏྟཱཏི ཀུསལེན སབྦེསུཡེཝ དྷམྨེསུ ཚེཀེན ཝིཛིཏངྒཎེན པཀཱསིཏཱ.

༡༠༧. ཨཧིརཱིཀཾ ¶ ཨནོཏྟཔྤཾ, མོཧོ ཨུདྡྷཙྩམེཝ ཙཱཏི ཨིམེ ཙཏྟཱརོ དྷམྨཱ ནིཡཏཱ ཧུཏྭཱ དྭཱདསཱཔུཉྙཙིཏྟེསུཡེཝ དྭཱདསཨཀུསལཙིཏྟེསུཡེཝ ཛཱཡརེ ཛཱཡནྟི.

༡༠༨-༩. ལོབྷོ དོསོ ཙ མོཧོ ཙ, མཱནོ དིཊྛི ཙ སཾསཡོ ཝིཙིཀིཙྪཱ མིདྡྷཾ ཨུདྡྷཙྩཾ ཀུཀྐུཙྩཾ ཐིནཾ མཙྪརིཡམྤི ཙ ཨཧིརིཀཾ ཨནོཏྟཔྤཾ ཨིསྶཱ ཙ དོམནསྶཀཾ ཨེཏེ དྷམྨཱ ཨཀུསལཱ ཨཀུསལཙིཏྟསམྤཡུཏྟཱ ཨེཀནྟེན མཧེསིནཱ ཝིཛིཏངྒཎཝིགཏམལེན ཝུཏྟཱ.

༡༡༠. ལོབྷོ ཨཊྛསུ ལོབྷམཱུལེསུ ཙིཏྟེསུ བྷགཝཏཱ ནིདྡིཊྛོ དསྶིཏོ. དིཊྛི ཙཏཱུསུ དིཊྛིསམྤཡུཏྟེསུ ཙིཏྟེསུ ཝུཏྟཱ. མཱནོ དིཊྛིཝིཔྤཡུཏྟེསུ ཙཏཱུསུ གཱཧཱུཔཝཱདཔྤབྷིནྡནེན ཝུཏྟོ. དོསོ དྭཱིསུ ཨེཝ པཊིགྷསམྤཡུཏྟེསུ ཙིཏྟེསུ མུནིནྡེན ཝུཏྟོ.

༡༡༡. ཨིསྶཱམཙྪེརཀུཀྐུཙྩཱ དྭཱིསུ དོསམཱུལེསུ ཙིཏྟེསུ ཛཱཡནྟི, ནོ སཧ སཧ ནོ ཛཱཡནྟི, ཨེཀེཀོཝ ཛཱཡནྟཱིཏི ཨཏྠོ. ཝིཙིཀིཙྪཱ པནེཀསྨིཾ ཝིཙིཀིཙྪཱ པན ཨེཀསྨིཾ ཝིཙིཀིཙྪཱསཧགཏཙིཏྟེ ཛཱཡཏི. ཐིནམིདྡྷཾ པཉྩསུ སསངྑཱརིཀཨཀུསལཙིཏྟེསུ ཛཱཡཏི.

༡༡༢-༣. ཕསྶོ ཙ ཝེདནཱ སཉྙཱ, ཙེཏནཱ ཛཱིཝིཏཾ མནོ ཝིཏཀྐོ ཙ ཝིཙཱརོ ཙ པཱིཏི ཝཱིརིཡཾ སམཱདྷི ཙ ཚནྡོ ཙེཝཱདྷིམོཀྑོ ཙ མནསིཀཱརོ ཙ ཙུདྡས དྷམྨཱ ཀུསལཱ ཙ ཀུསལཙེཏསིཀཱ ཙ ཧོནྟི. ཨཀུསལཱ ཙེཝ ཨཀུསལཙེཏསིཀཱ ཙེཝ ཨབྱཱཀཏཱཔི ཙ ཨབྱཱཀཏཙེཏསིཀཱ ཙ ཧོནྟི.

༡༡༤. ཨེཀཱུནཏིཾསཙིཏྟེསུ, ཛྷཱནཾ པཉྩངྒིཀཾ མཏཾ ཙཏཱུསུ སོམནསྶསཧགཏཱཀུསལེསུ, དྭཱདསསུ སོམནསྶསཧགཏམཧཱཀུསལམཧཱཝིཔཱཀམཧཱཀིརིཡཙིཏྟེསུ, སུཁསནྟཱིརཎཧསིཏུཔྤཱདཙིཏྟེསུ ¶ ¶ , ཏཱིསུ རཱུཔཔཋམཛ྄ཛྷཱནཙིཏྟེསུ, ཨཊྛསུ ལོཀུཏྟརཔཋམཛ྄ཛྷཱནཙིཏྟེསུ ཙཱཏི ཨེཀཱུནཏིཾསཙིཏྟེསུ པཉྩངྒིཀཾ པཉྩཱཝཡཝཛྷཱནཡུཏྟཾ ཛྷཱནཾ སུགཏེན མཏཾ. ཨུཔེཀྑཱསཧགཏཱནི ཙཏྟཱརི ལོབྷམཱུལཱནི ཙ དྭེ དོསམཱུལཱནི ཙ དྭེ མོཧམཱུལཱནི ཙ མནོདྷཱཏུཏྟིཀཉྩ ཨུཔེཀྑཱསཧགཏཱ ཏིསྶོ ཨཧེཏུཀམནོཝིཉྙཱཎདྷཱཏུཡོ ཙ དྭཱདསུཔེཀྑཱསཧགཏཱནི མཧཱཀུསལམཧཱཝིཔཱཀཀིརིཡཙིཏྟཱནི ཏཱིཎི རཱུཔདུཏིཡཛ྄ཛྷཱནཙིཏྟཱནི ཨཊྛ ལོཀུཏྟརདུཏིཡཛ྄ཛྷཱནཙིཏྟཱནི ཙཱཏི སཏྟཏིཾས ཙིཏྟཱནི ཙཏུཛྷཱནངྒཡུཏྟཱནི ཙཏུཛྷཱནཱཝཡཝཡུཏྟཱནི ཨིཏི ཨེཝཾ ནིདྡིསེ ཀཐེཡྻ.

༡༡༥. ཨེཀཱདསཝིདྷཾ ཙིཏྟཾ, ཏིཝངྒིཀམུདཱིརིཏཾ ཏཱིཎི རཱུཔཱཝཙརཏཏིཡཛ྄ཛྷཱནཙིཏྟཱནི, ཨཊྛལོཀུཏྟརཏཏིཡཛ྄ཛྷཱནཙིཏྟཱནི ཙཱཏི ཨེཀཱདསཝིདྷཾ ཙིཏྟཾ ཏིཝངྒིཀཾ ཏིཨཝཡཝཛྷཱནཡུཏྟཾ, ཚ རཱུཔཱཝཙརཙཏུཏྠཛ྄ཛྷཱནཔཉྩམཛ྄ཛྷཱནཙིཏྟཱནི, དྭཱདསཱརཱུཔཱཝཙརཙིཏྟཱནི, སོལ༹ས ལོཀུཏྟརཙཏུཏྠཛ྄ཛྷཱནཔཉྩམཛ྄ཛྷཱནཙིཏྟཱནི ཙཱཏི ཙཏུཏིཾསཝིདྷཾ ཙིཏྟཾ དུཝངྒིཀཾ དྭིཨཝཡཝཛྷཱནཡུཏྟཾ ཨུདཱིརིཏཾ ཛིནེན ཨཱིརིཏཾ.

༡༡༦. སབྷཱཝེནཱཝིཏཀྐེསུ, ཛྷཱནངྒཱནི ན ཨུདྡྷརེ སབྷཱཝེན པཀཏིཡཱ ཨཝིཏཀྐེསུ ཝིཏཀྐཝིརཧིཏེསུ དྭིཔཉྩཝིཉྙཱཎེསུ ཛྷཱནངྒཱནི ཛྷཱནཱཝཡཝཱནི ཛིནོ ན ཨུདྡྷརེ. ཨཡམེཏྠཱདྷིཔྤཱཡོ – ཨཉྙཏྠ ཝིཏཀྐོ ཛྷཱནཙིཏྟེན ཝིཔྤཧཱིནོ བྷཱསིཏོ, ཨིམེསུ པན ནེཝ ཛྷཱནཙིཏྟེན པཧཱིནཱ, པཀཏིཡཱ ཝིཏཀྐཝིརཧིཏཱནི དྭིཔཉྩཝིཉྙཱཎཱནི སབྦཱཧེཏུཀཙིཏྟེསུ མགྒངྒཱནི མགྒཱཝཡཝཱནི ཛིནོ ན ཨུདྡྷརེ ན དེསེཡྻ.

༡༡༧. བུདྷོ ཛིནོ དྭིཔཉྩཝིཉྙཱཎེསུ མནོདྷཱཏུཏྟིཀེ ཙ ཏཱིསུ སནྟཱིརཎེསུ ཙཱཏི སོལ༹སཙིཏྟེསུ ཏཱིཎིནྡྲིཡཱནི ¶ ཝདེ ཀཐེཡྻ. ཨེཀསྨིཾ པན ཙཏྟཱརི ཨེཀསྨིཾ ཝིཙིཀིཙྪཱསཧགཏཙིཏྟེ ཙཏྟཱརི ཨིནྡྲིཡཱནི ཧོནྟི, ཨེཀཱདསསུ ཨཀུསལཙིཏྟེསུ ཝིཙིཀིཙྪཱཡུཏྟཙིཏྟཝཛྫིཏེསུ ཧསིཏུཔྤཱདེ ཙེཝ ཝོཊྛབྦནཙིཏྟེ ཙཱཏི ཏེརསསུ ཙིཏྟེསུ པཉྩ ཨིནྡྲིཡཱནི བུདྷོ བྷགཝཱ ཨུདྡྷརེ ཨུདྡྷརེཡྻ.

༡༡༨. སཏྟ དྭཱདསཙིཏྟེསུ, ཨིནྡྲིཡཱནི ཛིནོབྲྭི ཛིནོ བུདྡྷོ ཉཱཎཝིཔྤཡུཏྟམཧཱཀུསལམཧཱཝིཔཱཀམཧཱཀིརིཡཱསངྑཱཏེསུ དྭཱདསཙིཏྟེསུ སཏྟ ཨིནྡྲིཡཱནི ཨབྲྭི ཀཐེསི, ཨེཀེནཱུནེསུ ཨཊྛེཝ, ཙཏྟཱལཱིསམནེསུ ཙ ཛིནོ ཉཱཎསམྤཡུཏྟམཧཱཀུསལམཧཱཝིཔཱཀམཧཱཀིརིཡཱསངྑཱཏེསུ ¶ དྭཱདསསུ ཙིཏྟེསུ, པཉྩདསསུ རཱུཔེསུ, དྭཱདསསུ ཨརཱུཔེསུ ཙཱཏི ཨེཀེནཱུནེསུ ཙཏྟཱལཱིསམནེསུ ཨཊྛེཝ ཨིནྡྲིཡཱནི ཨབྲྭི.

༡༡༩. ཙཏྟཱལཱིསཱཡ ལོཀུཏྟརཙིཏྟེསུ ནཝཀཾ ཨིནྡྲིཡནཝཀཾ ནཱཡཀོ ཨབྲྭི ཀཐེསི. ཨེཝཾ ཨིནྡྲིཡཡོགོཔི, ཝེདིཏབྦོ ཝིབྷཱཝིནཱ ཨེཝཾ ཨིམིནཱ མཡཱ ཝུཏྟཔྤཀཱརེན ཙིཏྟེསུ ཨིནྡྲིཡཡོགོ ཝིབྷཱཝིནཱ ཝིསེསེན པཉྙཾ བྷཱཝེཏུཾ པཀཱསེཏུཾ སཱིལམེཏསྶཱཏི ཝིབྷཱཝཱི, ཏེན ཝེདིཏབྦོ.

༡༢༠. ཨམགྒངྒཱནི ནཱམེཏྠ, ཨཊྛཱརས ཨཧེཏུཀཱ ཨེཏྠ ཨེཏེསུ ཙིཏྟེསུ ཨཊྛཱརས ཨཧེཏུཀཱ ནཏྠི མགྒོ ཨེཏེསཱུཏི ཨམགྒངྒཱནི ནཱམ, ཛྷཱནངྒཱནི ན ཝིཛྫནྟི, ཝིཉྙཱཎེསུ དྭིཔཉྩསུ དྭིཔཉྩཝིཉྙཱཎེསུ ཛྷཱནངྒཱནིཔི ན སཾཝིཛྫནྟི.

༡༢༡. ཨེཀཾ ཙིཏྟཾ དུམགྒངྒཾ ཨེཀཾ ཝིཙིཀིཙྪཱསཧགཏཙིཏྟཾ དུམགྒངྒཾ དུམགྒཱཝཡཝཾ, ཙཏཱུསུ དིཊྛིཝིཔྤཡུཏྟཱཀུསལཙིཏྟེསུ ཙ དྭཱིསུ པཊིགྷཡུཏྟེསུ ཙ ཨུདྡྷཙྩཡུཏྟེསུ ཙཱཏི སཏྟསུ ཙིཏྟེསུ ཙ ཏིམགྒངྒཱནི ཏིམགྒཱཝཡཝཱནི ཧོནྟི. ཙཏྟཱལཱིསཱཡ ཙིཏྟེསུ ¶ , མགྒོ སོ ཙཏུརངྒིཀོ ཙཏཱུསུ དིཊྛིསམྤཡུཏྟཱཀུསལེསུ ཉཱཎཝིཔྤཡུཏྟམཧཱཀུསལམཧཱཝིཔཱཀམཧཱཀིརིཡཱསངྑཱཏེསུ དྭཱདསསུ ཙིཏྟེསུ ཙ རཱུཔཱཝཙརདུཏིཡཏཏིཡཙཏུཏྠཔཉྩམཛ྄ཛྷཱནསངྑཱཏེསུ དྭཱདསསུ རཱུཔཱཝཙརེསུ, དྭཱདསསུ ཨརཱུཔཱཝཙརེསུ ཙཱཏི ཙཏྟཱལཱིསཱཡ ཙིཏྟེསུ ཙཏུརངྒིཀོ མགྒོ ཙཏུརཱཝཡཝོ མགྒོ ཧོཏི.

༡༢༢. པཉྩདྡསསུ ཙིཏྟེསུ, མགྒོ པཉྩངྒིཀོ མཏོ ཉཱཎསམྤཡུཏྟམཧཱཀུསལམཧཱཝིཔཱཀམཧཱཀིརིཡཱསངྑཱཏེསུ དྭཱདསསུ, ཏཱིསུ རཱུཔཔཋམཛ྄ཛྷཱནཙིཏྟེསུ ཙཱཏི པཉྩདྡསསུ ཙིཏྟེསུ པཉྩངྒིཀོ པཉྩཱཝཡཝོ མགྒོ བྷགཝཏཱ མཏོ. དྭཏྟིཾསཙིཏྟེསུ མགྒོ སཏྟངྒིཀོཔི ཙ ལོཀུཏྟརདུཏིཡཏཏིཡཙཏུཏྠཔཉྩམཛ྄ཛྷཱནསངྑཱཏེསུ དྭཏྟིཾསཙིཏྟེསུ མགྒོ སཏྟངྒིཀོ སཏྟཱཝཡཝོ ཧོཏི.

༡༢༣. མགྒོ ཨཊྛསུ ཙིཏྟེསུ མགྒཕལཝསེན ཨཊྛསུ ལོཀུཏྟརཙིཏྟེསུ མགྒོ ཨཊྛངྒིཀོ ཨཊྛཱཝཡཝོ ཧོཏི. ཨིཏི པརིསམཱཔནེ. ཏུ པདཔཱུརཎེ. ཨེཝཾ ཨིམིནཱ མཡཱ ཝུཏྟཔྤཀཱརེན སབྦཙིཏྟེསུ མགྒངྒཱནི མགྒཱཝཡཝཱནི དྷཱིརོ ཨུདྡྷརེཡྻ, དེསེཡྻཱཏི ཨཏྠོ.

༡༢༤. བལཱནི དྭེ དྭིཙིཏྟེསུ ཧསིཏུཔྤཱདཝོཊྛབྦནསངྑཱཏེསུ དྭཱིསུ ཙིཏྟེསུ དྭེ བལཱནི ཧོནྟི ¶ . ཨེཀསྨིཾ ཏཱིཎི དཱིཔཡེ ཨེཀསྨིཾ ཝིཙིཀིཙྪཱཡུཏྟེ ཏཱིཎི བལཱནི དྷཱིརོ དཱིཔཡེ པཀཱསེཡྻ. ཝིཙིཀིཙྪཱཡུཏྟཏོ སེསེསུ ཨེཀཱདསསུ ཨཀུསལེསུ ཙཏྟཱརི བལཱནི ཧོནྟི. ཚ དྭཱདསསུ ཉཱཎཝིཔྤཡུཏྟམཧཱཀུསལམཧཱཝིཔཱཀམཧཱཀིརིཡཱསངྑཱཏེསུ དྭཱདསསུ ཙིཏྟེསུ ཚ བལཱནི ཧོནྟཱིཏི དྷཱིརོ ནིདྡིསེ ཀཐེཡྻ.

༡༢༥. ཨེཀཱུནཱསཱིཏིཡཱ ¶ སཏྟ ཉཱཎསམྤཡུཏྟམཧཱཀུསལམཧཱཝིཔཱཀམཧཱཀིརིཡཱསངྑཱཏེསུ དྭཱདསསུ ཀཱམཱཝཙརཙིཏྟེསུ, སཏྟཝཱིསཏིཡཱ མཧགྒཏཙིཏྟེསུ, ཙཏྟཱལཱིསལོཀུཏྟརཙིཏྟེསུ ཙཱཏི ཨེཀཱུནཱསཱིཏིཡཱ ཙིཏྟེསུ སཏྟ བལཱནི ཧོནྟི. སོལ༹སེཝཱབལཱནི ཏུ དྭིཔཉྩཝིཉྙཱཎཱནི ཙ ཏིསྶོ མནོདྷཱཏུཡོ ཙ ཏཱིཎི སནྟཱིརཎཱནི ཙཱཏི སོལ༹ས ཨེཝ ཙིཏྟཱནི ཨབལཱནི བལཝིརཧིཏཱནི ཧོནྟི, ཨེཝཾ ཨིམིནཱ མཡཱ ཝུཏྟཔྤཀཱརེན ཙིཏྟཾ སབལཾ བལེན སཧགཏཾ ཨབལམྤི ཙ བལཝིརཧིཏཉྩཱཔི ཙིཏྟཾ ཝིཉྙེཡྻཾ དྷཱིརེན ཝིཛཱནིཏབྦཾ.

༡༢༦. ཛྷཱནངྒམགྒངྒབལིནྡྲིཡཱནི, ཙིཏྟེསུ ཛཱཡནྟི ཧི ཡེསུ ཡཱནི ཡེསུ ཙིཏྟེསུ ཡཱནི ཛྷཱནངྒམགྒངྒབལཨིནྡྲིཡཱནི ཛཱཡནྟི, མཡཱ སམཱསེན སམུདྡྷརིཏྭཱ ཨསཾསཊྛཾ ཨུདྡྷརིཏྭཱ ཏེསུ ཙིཏྟེསུ སབྦཱནིཔི ཏཱནི ཛྷཱནངྒམགྒངྒབལཨིནྡྲིཡཱནི སམཱསེན སངྑེཔེན མཡཱ བུདྡྷདཏྟཱཙརིཡེན ཝུཏྟཱནི ཀཐིཏཱནི.

ཨིཏི ཨབྷིདྷམྨཱཝཏཱརཊཱིཀཱཡ

ཙེཏསིཀཝིབྷཱགནིདྡེསཝཎྞནཱ ནིཊྛིཏཱ.

ཏཏིཡོ པརིཙྪེདོ.

༤. ཙཏུཏྠོ པརིཙྪེདོ

ཨེཀཝིདྷཱདིནིདྡེསཝཎྞནཱ

༡༢༧.

ཨིཏོ ¶ པརཾ པཝཀྑཱམི, ནཡམེཀཝིདྷཱདིཀཾ;

ཨཱབྷིདྷམྨིཀབྷིཀྑཱུནཾ, བུདྡྷིཡཱ པན ཝུདྡྷིཡཱ.

ཨཧཾ ཨིཏོ པརཾ ཨིཏོ པརིཙྪེདཏོ པརཾ ཨེཀཝིདྷཱདིཀཾ ནཡཾ ཨཱབྷིདྷམྨིཀབྷིཀྑཱུནཾ བུདྡྷིཡཱ ཝུདྡྷིཏྠཱཡ པཝཀྑཱམི དེསེསྶཱམི.

༡༢༨. སབྦམེཀཝིདྷཾ ¶ ཙིཏྟཾ, ཝིཛཱནནསབྷཱཝཏོ སབྦཾ ཙིཏྟཾ ཝིཛཱནནསབྷཱཝཏོ ཨེཀཝིདྷཾ, དུཝིདྷཉྩ བྷཝེ ཙིཏྟཾ ཨཧེཏུཀསཧེཏུཀཏོ ཨིདཾ ཙིཏྟཾ དུཝིདྷཾ བྷཝེཡྻ.

༡༢༩. པུཉྙཱཔུཉྙཝིཔཱཀཱ ཧི, ཀཱམེ དས ཙ པཉྩ ཙ ཧི སཙྩཾ ཀཱམེ ཀཱམཱཝཙརེ ཀུསལཱཀུསལཝིཔཱཀཱ དས པཉྩ ཙ ཀིརིཡཱ ཏིསྶོ ཨིཏི སབྦེ ཨཊྛཱརས ཙིཏྟུཔྤཱདཱ ཨཧེཏུཀཱ.

༡༣༠. ཨཧེཏུཀཏོ ཙིཏྟུཔྤཱདཏོ སེསཱ ཨེཀསཏྟཏི ཙིཏྟུཔྤཱདཱ སཧེཏུཀཱཏི སཧེཏུཀཱ ནཱམཱཏི མཧེསིནཱ ཏཱདིནཱ ཨཝིཔརཱིཏསབྷཱཝེན ཧེཏུཝཱདིནཱ པཙྩཡཝཱདིནཱ ནིདྡིཊྛཱ.

༡༣༡. སཝཏྠུཀཱཝཏྠུཀཏོ སཝཏྠུཀཨཝཏྠུཀཝསེན ཏཐཱ ཨུབྷཡཝསེན སཝཏྠུཀཝསེན, ཨཝཏྠུཀཝསེན ཙ སབྦཾ ཝུཏྟཔྤཀཱརེན ཙ མཱནསཾ ཏིཝིདྷཾ ཧོཏི.

༡༣༢-༤. སབྦོ ཀཱམཝིཔཱཀོ ཙ, རཱུཔེ པཉྩདསཱཔི ཙ ཙིཏྟུཔྤཱདཱ ཨཱདིམགྒོ པཋམམགྒོ ཧསིཏུཔྤཱདོ མནོདྷཱཏུཀིརིཡཱཔི ཙ དོམནསྶདྭཡཉྩཱཔི ཏེཙཏྟཱལཱིས མཱནསཱ ཝིནཱ ཝཏྠུཾ ཝཏྠུཾ ཝཛྫེཏྭཱ ན ཨུཔྤཛྫནྟི, ཨེཀནྟེན སཝཏྠུཀཱ ནཱམ. ཨརཱུཔཱཝཙརཝིཔཱཀཱ ཙ ཨེཀནྟེན ¶ ཨཝཏྠུཀཱ, མཡཱ ཝུཏྟཏོ ཙིཏྟུཔྤཱདཏོ སེསཱནི དྭེཙཏྟཱལཱིས ཙིཏྟཱནི ཨུབྷཡཐཱ སཝཏྠུཀཱཝཏྠུཀཝསེན སིཡུཾ.

༡༣༥. ཨེཀེཀཱརམྨཎཾ ཙིཏྟཾ, པཉྩཱརམྨཎམེཝ ཙ ཙིཏྟཾ ཚལཱ༹རམྨཎཀཉྩེཏི ཨེཝཾ ཨིམིནཱ མཡཱ ཝུཏྟཔྤཀཱརེནཱཔི ཏིཝིདྷཾ ཙིཏྟཾ སིཡཱ.

༡༣༦-༨. ཝིཉྙཱཎཱནི ཙ དྭེ པཉྩ, ཨཊྛ ལོཀུཏྟརཱནི ཙ ཨབྷིཉྙཱམཱནསཾ ཋཔེཏྭཱ སབྦཾ མཧགྒཏཉྩེཝཱཏི ཏེཙཏྟཱལཱིས ཙིཏྟུཔྤཱདཱ པན ཨེཀེཀཱརམྨཎཱ ཝིཉྙེཡྻཱ དྷཱིརེན. ཏཏྠ ¶ ཙིཏྟེ མནོདྷཱཏུཏྟཡཾ པཉྩཱརམྨཎཾ ཨཱིརིཏཾ བྷགཝཏཱ. མཡཱ ཝུཏྟཙིཏྟཏོ སེསཱནི ཏེཙཏྟཱལཱིས ཙིཏྟཱནི ཚལཱ༹རམྨཎིཀཱནི མཏཱནི སཏྠུནཱ, ཏཐཱ ཨེཝཾ ཙིཏྟཾ ཀུསལཱཀུསལཱདིཏོ ཏིཝིདྷཾ. ཨཱདི-སདྡེན ཨབྱཱཀཏཾ གཧེཏབྦཾ.

༡༣༩. ཨཧེཏུཀཾ ཙིཏྟཾ ཨེཀཧེཏུཀཉྩ ཙིཏྟཾ དྭིཧེཏུཀཉྩ ཙིཏྟཾ ཏིཧེཏུཀཉྩ ཙིཏྟནྟི ཨེཝཾ ཨིམིནཱ པཀཱརེན ཙིཏྟཾ ཙཏུབྦིདྷཾ ཝིབྷཱཝིནཱ ཝིཉྙཱཏབྦཾ.

༡༤༠-༢. ཧེཊྛཱ མཡཱཔི ནིདྡིཊྛཱ ཨཊྛཱརས ཙིཏྟུཔྤཱདཱ ཨཧེཏུཀཱ, ཝིཙིཀིཙྪུདྡྷཙྩསཾཡུཏྟཾ ཙིཏྟཾ ཨེཀཧེཏུཀཾ ཨེཝཾ ཨུདཱིརིཏཾ བྷགཝཏཱ. ཀཱམེ ཀཱམཱཝཙརེ པུཉྙཝིཔཱཀཀྲིཡཏོ ཀུསལཝསེན ཙ ཝིཔཱཀཝསེན ཙ ཀིརིཡཱཝསེན ཙ དྭཱདསདྷཱ ཙིཏྟུཔྤཱདཱ ཨཀུསལཱ ཙ དསདྷཱ ཙཱཏི བཱཝཱིསཏི ཙིཏྟུཔྤཱདཱ དུཧེཏུཀཱ. ཀཱམེ ཀཱམཱཝཙརེ པུཉྙཝིཔཱཀཀྲིཡཏོ པུཉྙཝསེན ཙ ཝིཔཱཀཝསེན ཙ ཀིརིཡཱཝསེན ཙ དྭཱདསདྷཱ ཙིཏྟུཔྤཱདཱ. སབྦཾ མཧགྒཏཉྩེཝ ཨཔྤམཱཎཾ ལོཀུཏྟརཙིཏྟཉྩ ཏིཧེཏུཀཾ.

༡༤༣-༥༠. རཱུཔཱིརིཡཱཔཐཝིཉྙཏྟི-ཛནཀཱཛནཀཱདིཏོཏི རཱུཔཨིརིཡཱཔཐཝིཉྙཏྟིཛནཀཝསེན རཱུཔཨིརིཡཱཔཐཛནཀཝསེན ཙ རཱུཔཛནཀཝསེན ཙ ཏིཀིཙྩཱཛནཀཝསེན ཙཱཏིཨཱདཱིཧི པཀཱརེཧི སབྦཾ ཙིཏྟཾ ཙཏུབྦིདྷཾ ཧོཏི. ཏཏྠ ཏསྨིཾ ཙིཏྟེ དྭཱདསཱཀུསལཱ, ཀཱམདྷཱཏུཡཱ ཀུསལཱ, ཏཐཱ ཀཱམེ དས ཀིརིཡཱ, ཨབྷིཉྙཱམཱནསཾ དྭཡཾ, ཨིམེ བཱཏྟིཾས མཱནསཱ རཱུཔཱནི སམུཊྛཱཔེནྟི, ཨིརིཡཱཔཐཾ ཀཔྤེནྟི, ཝིཉྙཏྟིཾ ཛནཡནྟི. ཀུསལཱ མཧགྒཏམཱནསཱ ཀིརིཡཱ ཙ མཧགྒཏམཱནསཱ, ཨཊྛ ཨནཱསཝཙིཏྟཱནི, ཚབྦཱིསཏི ཙ མཱནསཱ རཱུཔཱནི སམུཊྛཱཔེནྟི, ཨིརིཡཱཔཐཾ ¶ ཀཔྤེནྟི. ཙོཔནཾ ན པཱཔེནྟི ཝིཉྙཏྟིཾ ན ཛནཡནྟཱིཏི ཨཏྠོ. ཨིམེ ཙིཏྟུཔྤཱདཱ དུཀིཙྩནིཡཏཱ ¶ , དས ཝིཉྙཱཎེ ཋཔེཏྭཱ དྭཱིསུ བྷཱུམཱིསུ ཝིཔཱཀཱ མནོདྷཱཏུདྭཡསནྟཱིརཎཏྟཡམཧཱཝིཔཱཀརཱུཔཝིཔཱཀཱནཾ ཝསེན ཨཊྛཱརས པཱཀཱ མནོདྷཱཏུ ཀིརིཡཱ ཙེཝཱཏི ཨིམཱནི ཨེཀཱུནཝཱིསཏི ཙིཏྟཱནི རཱུཔཱནི སམུཊྛཱཔེནྟི, ཨིཏརདྭཡཾ ན ཀརོནྟི, པུན དྭེཔཉྩཝིཉྙཱཎཱ པཋམཾ ‘‘དས ཝིཉྙཱཎེ’’ཏི ཝུཏྟཏྟཱ ‘‘པུནཱ’’ཏི ཝུཏྟཱ. ཨརཱུཔཱིསུ ཝིཔཱཀཱ ཙ སབྦེསཾ སཏྟཱནཾ པཊིསནྡྷིཙིཏྟཉྩ ཨརཧཏོ ཙུཏིཙིཏྟཉྩ ཨིམེ སོལ༹ས མཱནསཱ ཏིཀིཙྩཱནི ན ཀརོནྟི.

༡༥༡. ཨེཀདྭིཏིཙཏུཊྛཱན-པཉྩཊྛཱནཔྤབྷེདཏོ ཨེཀཀིཙྩདྭིཀིཙྩཏིཀིཙྩཙཏུཀིཙྩཔཉྩཀིཙྩབྷེདེན པཉྩདྷཱ ཙིཏྟཾ པཉྩཔཀཱརཾ ཙིཏྟཾ པཉྩནིམྨལལོཙནོ བུདྡྷོ ཨཀྑཱསི ཀཐེསི.

༡༥༢.

ཀུསལཱཀུསལཱ སབྦེ, ཙིཏྟུཔྤཱདཱ མཧཱཀྲིཡཱ;

མཧགྒཏཱ ཀྲིཡཱ ཙེཝ, ཙཏྟཱརོ ཕལམཱནསཱ.

༡༥༣. སབྦེཝ པཉྩཔཉྙཱས ཙིཏྟུཔྤཱདཱ ཛཝནཊྛཱནཏོཡེཝ ཛཝནཀིཙྩཝསེནེཝ ཨེཀཊྛཱནེ ཨེཀཀིཙྩེ ནིཔྤཔཉྩེན སཏྠུནཱ ཏཎྷཱམཱནདིཊྛིཝིརཧིཏེན སཏྠུནཱ ནིཡཱམིཏཱ ཀཐིཏཱ.

༡༥༤. པུན དྭེཔཉྩཝིཉྙཱཎཱ ཙིཏྟུཔྤཱདཱ དསྶནེ སཝནེ ཏཐཱ གྷཱཡནེ སཱཡནཊྛཱནེ ཕུསནེ པཊིཔཱཊིཡཱ སཏྠུནཱ ནིཡཱམིཏཱ.

༡༥༥. མནོདྷཱཏུཏྟིཀཾ ཨཱཝཛྫནེ པཊིཙྪནེ, ཨེཏེ ཨཊྛསཊྛི ཙིཏྟུཔྤཱདཱ ཨེཀཊྛཱནིཀཏཾ ཨེཀཀིཙྩབྷཱཝཾ གཏཱ པཏྟཱ བྷཝནྟི.

༡༥༦-༨. ཙིཏྟདྭཡཾ དྭིཊྛཱནིཀཾ ནཱམ ཨུདཱིརིཏཾ བྷགཝཏཱ, སོམནསྶཡུཏཾ ཙིཏྟཾ པཉྩདྭཱརེ སནྟཱིརཎཾ སིཡཱ. ཚདྭཱརེ ཏདཱལམྦཎཉྩ བལཝཱརམྨཎེ ཨཏིམཧནྟཱརམྨཎེ སཏི སིཡཱ ¶ , ཏཐཱ ཝོཊྛབྦནཾ པཉྩདྭཱརེསུ ཝོཊྛབྦནཾ ཧོཏི. མནོདྭཱརེསུ པན སབྦེསཾ ཨཱརམྨཎཱནཾ ཨཱཝཛྫནཾ ཧོཏི, ཨིདཾ ཙིཏྟདྭཡཾ དྭིཊྛཱནིཀཾ ནཱམ ཧོཏི.

༡༥༩. པཊིསནྡྷིཡཱ ཋཱནཏོ པཊིསནྡྷིཡཱ ཀིཙྩཝསེན བྷཝངྒསྶ ཋཱནཏོ བྷཝངྒསྶ ཀིཙྩཝསེན ཙུཏིཡཱ ཋཱནཏོ ¶ ཙུཏིཡཱ ཀིཙྩཝསེན ཏེ མཧགྒཏཝིཔཱཀཱ ནཝ ཏིཊྛཱནིཀཱ ཏིཀིཙྩཱཏི མུནིནཱ མཏཱ.

༡༦༠-༣. ཨཊྛ ཀཱམཱ མཧཱཔཱཀཱ, པཊིསནྡྷིབྷཝངྒཏོ པཊིསནྡྷིབྷཝངྒཝསེན ཏདཱརམྨཎཏོ ཙེཝ ཏདཱརམྨཎཝསེན ཙ ཨེཝ ཙུཏིཊྛཱནཝསེན ཙ ཨཊྛ ཙིཏྟཱནི ཙཏུཊྛཱནིཀཙིཏྟཱནི ཧོནྟི, ཨིཏི ཝཙནཾ དྷཱིརོ ནིདྡིསེ, ཀུསལཱཀུསལཔཱཀོཔེཀྑཱསཧགཏདྭཡཾ པཉྩདྭཱརེ སནྟཱིརཎཾ བྷཝེ, ཚདྭཱརིཀེསུཔི བལཝཱརམྨཎེ སཏི ཏདཱརམྨཎཏཱ སིཡཱ. པཊིསནྡྷིབྷཝངྒཱནཾ ཋཱནཝསེན ཙ ཙུཏིཊྛཱནཝསེན ཙ ཨིདཾ ཙིཏྟདྭཡཾ པཉྩཊྛཱནིཀཙིཏྟཾ ནཱམཱཏི ཨུདཱིརིཏཾ མུནིནཱ.

༡༦༤. པཉྩཀིཙྩཾ དྭཡཾ ཙིཏྟཾ, ཨཊྛཀཾ པན ཙཏུཀིཙྩཾ, ནཝཀཾ ཏིཀིཙྩཾ, དྭེ ཙིཏྟུཔྤཱདཱ དྭིཀིཙྩཱ, ཨིམེསཾ ཨིམེཧི ཙིཏྟུཔྤཱདེཧི སེསཾ ཨེཀཀཾ ཀིཙྩཾ.

༡༦༥.

བྷཝངྒཱཝཛྫནཉྩེཝ, དསྶནཾ སམྤཊིཙྪནཾ;

སནྟཱིརཎཾ ཝོཊྛབྦནཾ, ཛཝནཾ བྷཝཏི སཏྟམཾ.

༡༦༦. ཚབྦིདྷཾ ཧོཏི ཏཾ ཚནྣཾ ཏཾ ཙིཏྟཾ ཚནྣཾ ཙཀྑུསོཏགྷཱནཛིཝ྄ཧཱཀཱཡམནོཝིཉྙཱཎཱནཾ པབྷེདཏོ ཚབྦིདྷཾ ཧོཏི, ཙཀྑུསོཏགྷཱནཛིཝ྄ཧཱཀཱཡམནོདྷཱཏུམནོཝིཉྙཱཎདྷཱཏཱུནཾ སཏྟནྣཾ ཝསེན ཙིཏྟཾ སཏྟདྷཱ ཧོཏི.

༡༦༧. ཨེཀེཀཱརམྨཎཾ ཚཀྐཾ, པཉྩཱརམྨཎབྷེདཏོ ཚལཱ༹རམྨཎཏོ ཙེཝ ཚལཱ༹རམྨཎཙིཏྟཝསེན མནོ ཙིཏྟཾ ཨཊྛཝིདྷཾ ཧོཏི.

༡༦༨. ཏཏྠ ¶ ཏསྨིཾ ཙིཏྟེ དྭེཔཉྩཝིཉྙཱཎཱ ཨེཀེཀགོཙརཱ ཧོནྟི, དྭེ ཙིཏྟུཔྤཱདཱ རཱུཔཱརམྨཎིཀཱ, དྭེ དྭེ ཙིཏྟུཔྤཱདཱ སདྡཱདིགོཙརཱ.

༡༦༩. པཉྩཱབྷིཉྙཱཝིཝཛྫིཏཾ སབྦཾ མཧགྒཏཾ, སབྦཾ ལོཀུཏྟརཉྩ ཨིཏི ཨིདཾ ཙིཏྟཾ ཨེཀེཀཱརམྨཎཾ བྷཝེ.

༡༧༠. ཨིདཾ ¶ ཚཀྐཾ ཨེཀེཀཱརམྨཎཾ ཝིབྷཱཝིནཱ ཉེཡྻཾ, མནོདྷཱཏུཏྟཡཾ པཉྩཱརམྨཎིཀཾ ནཱམ བྷཝེ.

༡༧༡. ཀཱམཱཝཙརཙིཏྟཱནི ཙཏྟཱལཱིསཾ ཏཐཱ ཨེཀེཀཾ སབྦཱནི ཨབྷིཉྙཱནི ཙ ཚལཱ༹རམྨཎིཀཱནཱིཏི ཚལཱ༹རམྨཎིཀཱནི ནཱམ པཎྜིཏེན ཝིཉྙེཡྻཱནི.

༡༧༢. སཏྟཝིཉྙཱཎདྷཱཏཱུསུ པཙྪིམཾ མནོཝིཉྙཱཎདྷཱཏུཉྩ ཀུསལཱཀུསལཱབྱཱཀཏཝསེན ཏིདྷཱ ཀཏྭཱ ནཝཝིདྷཾ ཙིཏྟཾ ཧོཏི.

༡༧༣. མནོཝིཉྙཱཎདྷཱཏུཡཱ བྷེདོ པུཉྙཱཔུཉྙཝསེནེཝ ཝིཔཱཀཀིརིཡབྷེདཏོ ཚསཏྟཏིཝིདྷོ ཧོཏི.

༡༧༤. མནོདྷཱཏུཾ ཝིཔཱཀཀིརིཡབྷེདཏོ དྭིདྷཱ ཀཏྭཱ པུབྦེ ཝུཏྟེཧི ནཝདྷཱ ཙིཏྟེཧི མཱནསཾ དསདྷཱ ཧོཏི.

༡༧༥. པཙྪིམཾ དྷཱཏུདྭཡཾ མནོདྷཱཏུམནོཝིཉྙཱཎདྷཱཏུདྭཡཾ, མནོདྷཱཏུཾ ཀུསལཝིཔཱཀཨཀུསལཝིཔཱཀཀིརིཡཱཝསེན ཏིདྷཱ ཀཏྭཱ, མནོཝིཉྙཱཎདྷཱཏུཉྩ ཀུསལཱཀུསལཱབྱཱཀཏཝསེན ཏིཝིདྷཱ ཀཏྭཱ ཙཀྑུསོཏགྷཱནཛིཝ྄ཧཱཀཱཡཝིཉྙཱཎེཧི སཧ ཙིཏྟཾ ཨེཀཱདསཝིདྷཾ ཧོཏི, ཨིཏི ཨིདཾ ཝཙནཾ པཎྜིཏོ པརིདཱིཔཡེ.

༡༧༦. མནོཝིཉྙཱཎདྷཱཏུམྤི ཀུསལཱཀུསལཱདིཏོ ཀུསལཱཀུསལཝིཔཱཀཀིརིཡཱཝསེན ཙཏུདྷཱ ཝིབྷཛིཏྭཱན ཏཾ ¶ ཙིཏྟཾ ཙཀྑུསོཏགྷཱནཛིཝ྄ཧཱཀཱཡཝིཉྙཱཎེཧི སཧ ཏིཔྤཀཱརཱཡ མནོདྷཱཏུཡཱ ཙ སཧ དྭཱདསདྷཱཔི དྷཱིརོ ཝདེ.

༡༧༧-༩. ཙིཏྟཾ ཙུདྡསཊྛཱནབྷེདེན ཙུདྡསདྷཱ བྷཝེ, པཊིསནྡྷིཡཱ ཝསེན ཙ བྷཝངྒཝསེན ཙ ཙུཏིཡཱ ཝསེན ཙ ཨཱཝཛྫནསྶ ཝསེན ཙ པཉྩནྣཾ དསྶནཱདཱིནཾ ཀིཙྩཱནཾ ཝསེན ཙ སམྤཊིཙྪནཙེཏསོ ཝསེན ཙ སནྟཱིརཎསྶ ཝསེན ཙ ཝོཊྛབྦནཛཝནཱནཾ ཝསེན ཙ, ཡཐཱ ཨེཝཾ ཏདཱརམྨཎཙིཏྟསྶ ཝསེན ¶ ཙཱཏི ཨེཝཾ ཨིམིནཱ པཀཱརེན ཋཱནབྷེདཏོ ཀིཙྩབྷེདེན ཙུདྡསདྷཱ ཙིཏྟཾ ཧོཏི, ཨིཏི ཨིདཾ ཝཙནཾ དྷཱིརོ པརིདཱིཔཡེ པརིདཱིཔེཡྻ.

༡༨༠. བྷཱུམིཔུགྒལནཱནཏྟཝསེན བྷཱུམིནཱནཏྟཝསེན, པུགྒལནཱནཏྟཝསེན ཙ ཙིཏྟཱནཾ པཝཏྟིཏོ ཨིདཾ ཙིཏྟཾ བཧུདྷཱ ཧོཏི, ཨིཏི ཝཙནཉྩ དྷཱིརོ ཝིབྷཱཝཡེ པཀཱསེཡྻ.

༡༨༡. ཨིདྷ ཨིམསྨིཾ སཱསནེ ཡོ བྷིཀྑུ མཏིམཱ ཨིམསྨིཾ ཨེཀཝིདྷཱདིནཡེ ཀུསལོ ཚེཀོ ཧོཏི, ཨབྷིདྷམྨེ པཝཏྟཱ ཨཏྠཱ ཏསྶ བྷིཀྑུནོ ཧཏྠགཏཱ ཧཏྠཔཝིཊྛཱ ཨཱམལཀཱ ཝིཡ སུདྡྷམཎིཀཱ ཝིཡ ཧོནྟི.

ཨིཏི ཨབྷིདྷམྨཱཝཏཱརཊཱིཀཱཡ

ཨེཀཝིདྷཱདིནིདྡེསཝཎྞནཱ ནིཊྛིཏཱ.

ཙཏུཏྠོ པརིཙྪེདོ.

༥. པཉྩམོ པརིཙྪེདོ

བྷཱུམིཔུགྒལཙིཏྟུཔྤཏྟིནིདྡེསཝཎྞནཱ

༡༨༢.

ཨིཏོ པརཾ པཝཀྑཱམི, བུདྡྷིཝུདྡྷིཀརཾ ནཡཾ;

ཙིཏྟཱནཾ བྷཱུམིསུཔྤཏྟིཾ, པུགྒལཱནཾ ཝསེན ཙ.

ཨཧཾ ¶ ཨིཏོ པརཾ བུདྡྷིཝུདྡྷིཀརཾ ནཡཾ མཏིཝདྡྷིཀརཾ ནཡཾ པཝཀྑཱམི དེསེསྶཱམི. ཙིཏྟཱནཾ བྷཱུམིསུཔྤཏྟིཾ པུགྒལཱནཾ ཝསེན ཙ བྷཱུམཱིསུ ཙིཏྟཱནཾ ཨུཔྤཏྟིཾ, པུགྒལཱནཾ ཝསེན བྷཱུམཱིསུ ཙིཏྟཱནཾ ཨུཔྤཏྟིཉྩ པཝཀྑཱམི.

༡༨༣. དེཝཱ ¶ ཙེཝ མནུསྶཱ ཙ, ཏིསྶོ ཙ ཨཔཱཡབྷཱུམིཡོ ཧོནྟི, གཏིཡོ པཉྩ ཏེསཾ དེཝམནུསྶཏིརཙྪཱནཔེཏནིརཡགཏཱིནཾ ཝསེན པཉྩ གཏིཡོ ནིདྡིཊྛཱ སཏྠུནཱ དསྶིཏཱ བྷགཝཏཱ. ཏཡོ བྷཝཱ པན ཀཱམརཱུཔཱརཱུཔབྷཝཝསེན ཏཡོ སཏྠུནཱ ནིདྡིཊྛཱ དསྶིཏཱ.

༡༨༤-༥. བྷཱུམིཡོ ཏཏྠ ཏིཾསེཝ, ཏཱསུ ཏིཾསེཝ པུགྒལཱ ཏཏྠ ཏེསུ ཏཱིསུ བྷཝེསུ ཏིཾས ཨེཝ བྷཱུམིཡོ ཧོནྟི, ཏཱསུ བྷཱུམཱིསུ ཨུཔྤནྣཱ པུགྒལཱ ཏིཾས ཨེཝ ཧོནྟི, ཨེཏཱསུ བྷཱུམཱིསུ ཨུཔྤནྣཱ སབྦེ ཙ པན པུགྒལཱ པཊིསནྡྷིཀཙིཏྟཱནཾ ཝསེན ཨེཀཱུནཝཱིསཏི ཧོནྟི. པཊིསནྡྷི ཙ ནཱམེསཱ ཨེསཱ པཊིསནྡྷི ཙ ནཱམ དུཝིདྷཱ དྭིཔྤཀཱརཱ སམུདཱིརིཏཱ སཏྠུནཱ ཀཐིཏཱ.

༡༨༦. ཨཙིཏྟཀཱ པཊིསནྡྷི, སཙིཏྟཀཱ པཊིསནྡྷི ཙ ཨིཏི དུཝིདྷཱ པཊིསནྡྷི ཧོཏི, ཨསཉྙིབྲཧྨཱནཾ པཊིསནྡྷི ཨཙིཏྟཀཱ རཱུཔཔཊིསནྡྷི ཧོཏི. སེསཱ རཱུཔཔཊིསནྡྷིཏོ སེསཱ སཙིཏྟཀཱ སཙིཏྟཀཔཊིསནྡྷི ཉེཡྻཱ པཎྜིཏེན ཛཱནིཏབྦཱ. སཱ པན སཙིཏྟཀཱ པཊིསནྡྷི ཨེཀཱུནཝཱིསཏི ཧོཏི.

༡༨༧. པཊིསནྡྷིཝསེནེཝ སཙིཏྟཀཔཊིསནྡྷིཝསེན ཨེཝ ཝཱིསཏི པུགྒལཱ ཧོནྟི. ཨིདྷ ཨིམསྨིཾ ཙིཏྟཱདྷིཀཱརེ ཙིཏྟཱདྷིཀཱརཏྟཱ ཨཙིཏྟཀཔཊིསནྡྷི རཱུཔཔཊིསནྡྷི ན ཙ ཨུདྡྷཊཱ ན ཙ ཀཐིཏཱ མཡཱ.

༡༨༨. ཨཧེཏུདྭིཏིཧེཏཱུཏི, པུགྒལཱ ཏིཝིདྷཱ སིཡུཾ ཨཧེཏུཀདྭིཧེཏུཀཏིཧེཏུཀཱ ཨིཏི ཏིཝིདྷཱ ཏིཔྤཀཱརཱ པུགྒལཱ ¶ སིཡུཾ བྷཝེཡྻུཾ. ཨརིཡཱ པན པུགྒལཱ ཨཊྛ ཨིཏི ཨེཝཾ ཨིམིནཱ མཡཱ ཝུཏྟཔྤཀཱརེན སབྦེ པུགྒལཱ ཨེཀཱདས ཨཱིརིཏཱ ཀཐིཏཱ བྷགཝཏཱ.

༡༨༩. བྷཱུམཱིསུ ཏིཾསབྷཱུམཱིསུ ཙིཏྟཱནཾ ཨུཔྤཏྟིཾ ཨེཏེསཾ པན སབྦེསཾ པུགྒལཱནཾ པབྷེདཏོ བྷཱུམཱིསུ ཙིཏྟཱནཾ ཨུཔྤཏྟིཉྩ གཎྷཏོ གཎྷནྟསྶ མམ ཝཙནཾ ནིབོདྷཐ, ཏུམྷེ ཛཱནཱཐ སུཎཱཐ.

༡༩༠. ཏཱིསུ བྷཱུམཱིསུ ཀཏི ཙིཏྟཱནི ཛཱཡནྟི? མེ མཡ྄ཧཾ ཝད ཏཱནི ཙིཏྟཱནི ཏྭཾ ཀཐེཧི, སབྦཱསུ བྷཱུམཱིསུ ཙུདྡས ཨེཝ ཙིཏྟཱནི. ཏཾ ཡཐཱ –

ཝོཊྛབྦཾ ¶ ཀཱམཔུཉྙཉྩ, ཝིཡུཏྟཱནི ཙ དིཊྛིཡཱ;

ཨུདྡྷཙྩསཧིཏཉྩེཝ, ཧོནྟི སབྦཏྠ ཙུདྡས.

༡༩༡. སདཱ ཝཱིསཏི ཙིཏྟཱནི, ཀཱམེཡེཝ བྷཝེ སིཡུཾ ཝཱིསཏི ཙིཏྟཱནི ཀཱམེཡེཝ བྷཝེ སདཱ སབྦསྨིཾ ཀཱལེ སིཡུཾ བྷཝེཡྻུནྟི. ཏཾ ཡཐཱ –

ཀཱམེ ཨཊྛ མཧཱཔཱཀཱ, དོམནསྶདྭཡམྤི ཙ;

ཏཐཱ གྷཱནཱདིཝིཉྙཱཎཏྟཡཾ པཱཀཱ ཨཔུཉྙཛཱ.

གྷཱནཱདིཝིཉྙཱཎཏྟཡནྟི ཀུསལཝིཔཱཀགྷཱནཱདིཏྟཡཾ. པཱཀཱ ཨཔུཉྙཛཱ ཨཀུསལཏོ ཛཱཏཱ ཨཧེཏུཀཱ སཏྟ ཝིཔཱཀཱ. པཉྩ རཱུཔབྷཝེཡེཝ པཉྩ ཙིཏྟཱནི རཱུཔབྷཝེཡེཝ བྷཝནྟི. ཙཏྟཱརེཝ ཨརཱུཔིསུ ཙཏྟཱརི ཙིཏྟཱནི ཨརཱུཔཱིསུཡེཝ ཧོནྟི. ཏཾ ཡཐཱ –

རཱུཔེཝ རཱུཔཔཱཀཱ ཝཱརུཔྤཔཱཀཱ ཨརཱུཔིསུ;

ནཝ མཧགྒཏཱ པཱཀཱ, རཱུཔཱརཱུཔེཝ ཛཱཡརེ.

༡༩༢. ཀཱམརཱུཔབྷཝེསྭེཝ ཨཊྛཱརས ཙིཏྟཱནི བྷཝནྟི.

ཏཾ ¶ ཡཐཱ –

པུཉྙརཱུཔཱནི པཉྩེཝ, པུཉྙཛཾ སམྤཊིཙྪནཾ;

ཙཀྑུསོཏདྭཡཾ པུཉྙཔཱཀཾ སནྟཱིརཎདྭཡཾ.

པུཉྙཔཱཀཾ ཧསིཏུཔྤཱདམནོདྷཱཏུཀྲིཡཱཔི ཙ;

ཨཊྛཱརསཱདིམགྒེན, པཉྩ རཱུཔཀྲིཡཱཔི ཙ;

ཀཱམརཱུཔབྷཝེསྭེཝ, ཨེཏཱནེཝ སདཱ སིཡུཾ.

དྭེཙཏྟཱལཱིས ཙིཏྟཱནི, ཧོནྟི ཏཱིསུ བྷཝེསུཔི དྭེཙཏྟཱལཱིས ཙིཏྟཱནི ཧོནྟི. ཏཾ ཡཐཱ –

པཊིགྷདྭཡཝཛྫིཏཱནི ¶ , ཨཔུཉྙཱནི དསེཝ ཙ;

མཧཱཔུཉྙཱནི ཨཊྛེཝ, ཝོཊྛབྦནཀྲིཡཱནི ཙ.

པུཉྙཱརུཔྤཱནི ཙཏྟཱརི, ཨཱརུཔྤཀིརིཡཱནི ཙ;

ཀནིཊྛམགྒཝཛྫཱནི, སཏྟ ལོཀུཏྟརཱནི ཙ;

དྭེཙཏྟཱལཱིས ཙིཏྟཱནི, ཧོནྟི ཏཱིསུ བྷཝེསུཔི.

༡༩༣. ཋཔེཏྭཱ པན སབྦེསཾ, ཙཏསྶོཔཱཡབྷཱུམིཡོ ཙཏསྶོ ཨཔཱཡབྷཱུམིཡོ ཋཔེཏྭཱ ཝཛྫེཏྭཱ ཨཔཱཡཏོ སེསཱནཾ སབྦེསཾ པུགྒལཱནཾ ཚབྦཱིསབྷཱུམཱིསུ ཏེརས ཨེཝ ཙིཏྟཱནི ཧོནྟི. ཏཾ ཡཐཱ –

ཙཏུཏྠཱརཱུཔཱཝཙརཾ, ཨནཱགཱམིཕལཱདཡོ;

མཧཱཀྲིཡཱ ཙ ཛཱཡནྟི, ཏེརསཱཔཱཡཝཛྫིཏཱ.

ཨནཱགཱམིཕལཱདཡོཏི ཨཱདི-སདྡེན ཧི ཨརཧཏྟཕལཱནི གཧིཏཱནི.

༡༩༤. ཨཔརཱནི ཙཏསྶོཔི, ཋཔེཏྭཱརུཔྤབྷཱུམིཡོ ཙཏསྶོ ཨརཱུཔབྷཱུམིཡོ ཋཔེཏྭཱ སེསཱསུ ཚབྦཱིསབྷཱུམཱིསུ ཨཔརཱནི ཚ ཙིཏྟཱནི ཛཱཡནྟི. ཏཾ ཡཐཱ –

མནོདྷཱཏུཀྲིཡཉྩེཝ ¶ , པུཉྙཛཾ སམྤཊིཙྪནཾ;

ཙཀྑུསོཏདྭཡཾ པུཉྙཔཱཀཾ སནྟཱིརཎདྭཡཾ;

ཚེཝ ཙིཏྟཱནི ཛཱཡནྟི, ཏཐཱ ཨུཔརིཝཛྫིཏེ.

༡༩༥. སུདྡྷཱཝཱསིཀདེཝཱནཾ, ཋཔེཏྭཱ པཉྩ བྷཱུམིཡོ པཉྩ བྷཱུམིཡོ ཋཔེཏྭཱ པཉྩཝཱིསཏིབྷཱུམཱིསུ པཉྩ ཙིཏྟཱནི ཛཱཡནྟི. ཏཾ ཡཐཱ –

དིཊྛིཡཱ སམྤཡུཏྟཱནཾ, ཝིཙིཀིཙྪཱཡུཏཾ ཏཐཱ;

པཉྩ སབྦཏྠ ཛཱཡནྟི, སུདྡྷཱཝཱསཝིཝཛྫིཏེ.

༡༩༦.

ཨཔརཱནི ¶ དུཝེ ཧོནྟི, པཉྩཝཱིསཏིབྷཱུམིསུ;

ཋཔེཏྭཱ ནེཝསཉྙཉྩ, ཙཏསྶོཔཱཡབྷཱུམིཡོ.

ཙཏསྶོཔཱཡབྷཱུམིཡོ ནེཝསཉྙཱནཱསཉྙཉྩ ཋཔེཏྭཱཡེཝ པཉྩཝཱིསཏིབྷཱུམཱིསུ ཨཔརཱནི དུཝེ ཙིཏྟཱནི ཧོནྟི. ཏཾ ཡཐཱ –

ཋཔེཏྭཱ ནེཝསཉྙཉྩ, ཙཏསྶོཔཱཡབྷཱུམིཡོ;

སེསཱསུ ཏཏིཡཱརུཔྤཛཝནཾ ཛཱཡཏི དྭཡཾ.

༡༩༧. དྭེཔི ཙིཏྟཱནི ཛཱཡནྟི, ཙཏུཝཱིསཏིབྷཱུམིསུ ཙཏསྶོཔཱཡབྷཱུམིཡོ ཨཱཀིཉྩཉྙཉྩ ནེཝསཉྙཉྩ ཋཔེཏྭཱ སེསཱསུ ཙཏུཝཱིསཏིབྷཱུམཱིསུ དྭེཔི ཙིཏྟཱནི ཛཱཡནྟི. ཏཾ ཡཐཱ –

ཙཏུཏྠཏཏིཡཱརུཔྤཾ, ཋཔེཏྭཱཔཱཡབྷཱུམིཡོ;

སེསཱསུ དུཏིཡཱརུཔྤ-ཛཝནཾ ཛཱཡཏི དྭཡཾ.

༡༩༨. ཨཔཱཡབྷཱུམིཡོ ཧིཏྭཱ ཙཏསྶོ ཨཔཱཡབྷཱུམིཡོ ཏིསྶོ ཨུཔརི ཨརཱུཔབྷཱུམིཡོ ཧིཏྭཱ ཚཌྜེཏྭཱ སེསཱསུ ཏེཝཱིསཏིབྷཱུམཱིསུ དྭེཡེཝ པན ཙིཏྟཱནི ཧོནྟི. ཏཾ ཡཐཱ –

ཨཔཱཡབྷཱུམིཡོ ¶ ཧིཏྭཱ, ཏིསྶོཙཱརུཔྤབྷཱུམིཡོ;

སེསཱསུ པཋམཱརུཔྤཾ, ཛཝནདྭཡཾ ཛཱཡཏི.

༡༩༩. ཨརཱུཔེ ཙ ཨཔཱཡེ ཙ ཨཊྛ བྷཱུམིཡོ ཋཔེཏྭཱ སེསཱསུ བཱཝཱིསཏིབྷཱུམཱིསུ ཨེཀཱདསཝིདྷཾ ཙིཏྟཾ ཧོཏི. ཏཾ ཡཐཱ –

སབྦཾ རཱུཔཉྩ ཝིཔཱཀཾ, ཋཔེཏྭཱ སིཏམཱནསཾ;

ཨེཀཱདསེཝ ཛཱཡཏི, ཨཔཱཡཱརཱུཔཝཛྫིཏེ.

༢༠༠. སུདྡྷཱཝཱསེ ¶ ཨཔཱཡེ ཙ ནཝ བྷཱུམིཡོ ཋཔེཏྭཱ སེསཱསུ ཨེཀཝཱིསཱསུ བྷཱུམཱིསུ ནིཙྩམྤི ཙཏྟཱརོ ཨེཝ མཱནསཱ ཧོནྟི. ཏཾ ཡཐཱ –

སོཏཱཔཏྟིཕལཉྩེཝ, སཀདཱགཱམིཕལམྤི ཙ;

སཀདཱགཱམིམགྒོ ཙ, ཋཔེཏྭཱཔཱཡསུདྡྷཀེ;

ཨནཱགཱམིམགྒོ ཙེཝ, ཨེཀཝཱིསཱསུ ཧོནྟི ཧི.

༢༠༡. ཨེཀཾ སཏྟརསསྭེཝ, ཙིཏྟཾ ཛཱཡཏི བྷཱུམིསུ སུདྡྷཱཝཱསཨཔཱཡཱརུཔྤབྷཱུམིཡོ ཋཔེཏྭཱ ཨཝསེསཱསུ སཏྟརསསུ བྷཱུམཱིསུ ཨེཀཾ ཙིཏྟཾ ཛཱཡཏི. ཏཾ ཡཐཱ –

སུདྡྷཱཝཱསེ ཨཔཱཡེ ཙ, ཋཔེཏྭཱརུཔྤབྷཱུམིཡོ;

ཨཱདིམགྒོ ཨེཀོ ཧོཏི, སཏྟརསསུ བྷཱུམིསུ.

༢༠༢.

དྭཱདསེཝ ཏུ ཛཱཡནྟེ, ཨེཀཱདསསུ བྷཱུམིསུ;

ཋཔེཏྭཱ པན སབྦཱཔི, བྷཱུམིཡོ ཧི མཧགྒཏཱ. –

ཨེཀཱུནཝཱིསཏིབྷཱུམིཡོ ཋཔེཏྭཱ སེསཱསུ ཨེཀཱདསསུ བྷཱུམཱིསུ དྭཱདས ཙིཏྟཱནི ཛཱཡནྟི. ཏཾ ཡཐཱ –

དོམནསྶདྭཡཱཔུཉྙཔཱཀཱ སཏྟ ཙ པུཉྙཛཾ;

གྷཱནཱདིཏྟཡཾ སེསཱསུ, ཧིཏྭཱ སབྦཱ མཧགྒཏཱ.

༢༠༣. ཀཱམཱཝཙརདེཝཱནཾ ¶ ཝསེན ཙ མནུསྶཱནཾ ཝསེན ཙ སཏྟསུ ཀཱམཱཝཙརབྷཱུམཱིསུ ཨཊྛ ཙིཏྟཱནི སབྦདཱ ཛཱཡནྟི. ཏཾ ཡཐཱ –

ཀཱམེ དེཝམནུསྶཱནཾ, མཧཱཔཱཀཱནི ཛཱཡརེ;

སདཱ སཏྟསུ ཨེཏཱནི, ཧིཏྭཱ ཏེཝཱིས བྷཱུམིཡོ.

༢༠༤. པཉྩམཛ྄ཛྷཱནཔཱཀེཀོ ¶ , ཛཱཡཏེ ཚསུ བྷཱུམིསུ ཨེཀོ པཉྩམཛ྄ཛྷཱནཝིཔཱཀོ ཝེཧཔྥལཱདཱིསུ ཚསུ བྷཱུམཱིསུ ཛཱཡཏི. ཙཏྟཱརི པན རཱུཔཝིཔཱཀཙིཏྟཱནི ཏཱིསུ ཏཱིསུ བྷཱུམཱིསུ ཛཱཡནྟི. ཨཡམེཏྠཱདྷིཔྤཱཡོ – ཨེཀོ པཋམརཱུཔཝིཔཱཀོ བྲཧྨཔཱརིསཛྫབྲཧྨཔུརོཧིཏམཧཱབྲཧྨཱནཾ ཏཱིསུ བྷཱུམཱིསུ ཛཱཡཏི, ཨེཀོ དུཏིཡརཱུཔཝིཔཱཀོ, ཨེཀོ ཏཏིཡརཱུཔཝིཔཱཀོ ཙ པརིཏྟཱབྷཱཨཔྤམཱཎཱབྷཱཨཱབྷསྶརཱནཾ ཏཱིསུ བྷཱུམཱིསུ ཛཱཡཏི, ཨེཀོ ཙཏུཏྠརཱུཔཝིཔཱཀོ པརིཏྟསུབྷཨཔྤམཱཎསུབྷསུབྷཀིཎྷཱནཾ ཏཱིསུ བྷཱུམཱིསུ ཛཱཡཏི.

༢༠༥. ཙཏྟཱརི པན ཙིཏྟཱནི, ཧོནྟི ཨེཀེཀབྷཱུམིསུ ཨརཱུཔཱཝཙརཝིཔཱཀཱནཾ ཝསེན ཙཏྟཱརི པན ཙིཏྟཱནི ཨེཀེཀབྷཱུམཱིསུ ཨེཀེཀཱསུ བྷཱུམཱིསུ ཧོནྟི, ཨིཏི ཨེཝཾ ཨིམིནཱ མཡཱ ཝུཏྟཔྤཀཱརེན སབྦཱསུ བྷཱུམཱིསུ ཙིཏྟུཔྤཱདཾ པརིདཱིཔཡེ པཎྜིཏོ ཀཐེཡྻ.

༢༠༦-༧. ཀུསལཱཀུསལཱ ཀཱམེ ཀཱམེ ཝཱིསཏི ཀུསལཱཀུསལཱ, ཏེསཾ པཱཀཱ ཨཧེཏུཀཱ ཏེསཾ ཀུསལཱཀུསལཱནཾ ཨཧེཏུཀཱ པཉྩདས ཝིཔཱཀཱ ཨཱཝཛྫནདྭཡཉྩ ཨིཏི ཨེཝཾ ཨིམིནཱ མཡཱ ཝུཏྟཔྤཀཱརེན སཏྟཏིཾས མཱནསཱ ནརཀཱདཱིསུ ཙཏཱུསུ ཨཔཱཡེསུཔི ཛཱཡརེ. ཨཝསེསཱནི དྭིཔཉྙཱས ཙིཏྟཱནི ཀདཱཙིཔི ཀིསྨིཉྩི ཀཱལེཔི ནུཔྤཛྫནྟི. ཏཾ ཡཐཱ –

པཉྩདསཱནི ¶ རཱུཔེ ཏུ, ཨརཱུཔེ དྭཱདསཱིརིཏཱ;

ཨཊྛ ལོཀུཏྟརཱནེཝ, ཀཱམཔཱཀཱ སཧེཏུཀཱ.

ཨཊྛ མཧཱཀྲིཡཱ ཙེཝ, ཧསིཏུཔྤཱདམཱནསཾ;

དྭིཔཉྙཱསཱནི ཙིཏྟཱནི, ཨཔཱཡེསུ ན ཛཱཡརེ.

༢༠༨. ཀཱམེ དེཝམནུསྶཱནཾ ཀཱམཱཝཙརེ དེཝམནུསྶཱནཾ མཧགྒཏཱ ནཝ པཱཀཱ ནེཝ ཛཱཡནྟི, ཨསཱིཏི ཧདཡཱ མཱནསཱ སདཱ ཛཱཡནྟི. ཏཾ ཡཐཱ –

དྭཱདསཱཀུསལཱནེཝ, ཀུསལཱནེཀཝཱིསཏི;

སཏྟཝཱིསཏི པཱཀཱ ཙ, མཧགྒཏཝིཝཛྫིཏཱ.

ཀཱམེ ¶ དེཝམནུསྶཱནཾ, ཀྲིཡཙིཏྟཱནི ཝཱིསཏི;

ཧོནྟི ཨསཱིཏི ཙིཏྟཱནི, ཝིཉྙེཡྻཱནི ཝིབྷཱཝིནཱ.

༢༠༩-༡༢. ཀཱམེ ཀཱམཱཝཙརེ ཨཊྛ མཧཱཝིཔཱཀཱ དོམནསྶདྭཡམྤི ཙ ཏཐཱ གྷཱནཱདིཝིཉྙཱཎཏྟཡཾ ཀུསལཝིཔཱཀཾ ཨཔུཉྙཛཱ སཏྟ པཱཀཱ. ནཏྠི ཨཱརུཔྤཔཱཀཱ ཙ, རཱུཔཱཝཙརབྷཱུམིཡཾ ཨརཱུཔཔཱཀཱ ཙ ཙཏྟཱརོ རཱུཔཱཝཙརབྷཱུམིཡཾ ནཏྠི. ཨཡམེཏྠཱདྷིཔྤཱཡོ – རཱུཔཱཝཙརབྷཱུམིཡཾ ཨཊྛ མཧཱཝིཔཱཀཱ ཀཱམསུགཏིསཏྟཱནཾ དྭིནྣཾ ཝིཔཱཀཙིཏྟཏྟཱ ན ཧོནྟི, ཛྷཱནེན ཝིཀྑམྦྷིཏཏྟཱ དོམནསྶདྭཡམྤི ནཏྠི, གྷཱནཛིཝ྄ཧཱཀཱཡཔསཱདཝིརཧིཏཏྟཱ ཀུསལཝིཔཱཀཾ གྷཱནཱདིཏྟཡཾ ནཏྠི, ཨནིཊྛཱརམྨཎཱནཾ ཨབྷཱཝཏོ སཏྟ ཨཀུསལཝིཔཱཀཱ ཙ ནཏྠི, ཨརཱུཔཔཱཀཱ ཙ ནཏྠི. ཀསྨཱ? ཨརཱུཔཱནཾ ཝིཔཱཀཙིཏྟཏྟཱ. ཨིམེཧི སཧ ཙིཏྟེཧི ཨིམེཧི ཙཏུཝཱིསཏིཙིཏྟེཧི སཧ ཏཡོ མགྒཱ ཕལདྭཡཾ སོཏཱཔཏྟིམགྒོ སཀདཱགཱམིམགྒོ ཨནཱགཱམིམགྒོ ཙ སོཏཱཔཏྟིཕལསཀདཱགཱམིཕལཱནི ཙ ཙཏྟཱརོ དིཊྛིསཾཡུཏྟཱ ཝིཙིཀིཙྪཱསཾཡུཏྟམྤི ཙ ཙཏྟཱརོ ཧེཊྛིམཱ པཱཀཱ ཙ སུདྡྷཱཝཱསེ ན ལབྦྷརེ ན ལབྦྷནྟི. ཨཡམེཏྠཱདྷིཔྤཱཡོ – པུཐུཛྫནསོཏཱཔནྣསཀདཱགཱམིཔུགྒལཱནཾ ཨསཱདྷཱརཎཏྟཱ སུདྡྷོ ཙ ཨཱཝཱསོ, ཨཐ ཝཱ ¶ གྷོརཱཏིཀྐམཊྛིཏཏྟཱ ཨནཱགཱམིཔུགྒལཱ སུདྡྷཱ ནཱམ, ཙཏུརོགྷཏིཎྞཏྟཱ ཁཱིཎཱསཝཱ སུདྡྷཱ ནཱམ, ཏེསཾ སུདྡྷཱནཾ དྭིནྣཾ ཨུཏྟམསཏྟཱནཾ ཨཱཝཱསོཏིཔི སུདྡྷཱཝཱསོ, ཏསྨིཾ.

ཨཡམེཏྠཱདྷིཔྤཱཡོ – སུདྡྷཱཝཱསེ པན སོཏཱཔཏྟིམགྒསོཏཱཔཏྟིཕལསཀདཱགཱམིམགྒསཀདཱགཱམིཕལཨནཱགཱམིམགྒཱ ན ཝིཛྫནྟི. ཀསྨཱཏི ཙེ? ཨནཱགཱམིཕལཊྛཱནཾཡེཝ ཏསྨིཾ ཨུཔྤཛྫནཏོ ཙཏྟཱརོ དིཊྛིསཾཡུཏྟཱ ཙ ཝིཙིཀིཙྪཱཡུཏྟཉྩ པཉྩ ཨཀུསལཙིཏྟཱནཾ སོཏཱཔནྣེན ཝིནཱསིཏཏྟཱ, ཨིཏི ཏསྨཱ ཀཱརཎཱ ན ཛཱཡནྟི. ཙཏྟཱརོ ཧེཊྛིམཝིཔཱཀཱ ཧེཊྛིམཱནཾ རཱུཔབྲཧྨཱནཾ ཝིཔཱཀཙིཏྟཏྟཱ ནཏྠི. སེསཱནི ཨེཀཔཉྙཱས ཙིཏྟཱནི སུདྡྷཱཝཱསེ པན ལབྦྷནྟི. ཏཾ ཡཐཱ –

དིཊྛིཡཱ ཝིཔྤཡུཏྟཱནི, ཨུདྡྷཙྩསཧགཏཾ ཏཐཱ;

ཀཱམཔུཉྙཱནི ཨཊྛ ཙ, རཱུཔཔུཉྙཱནི པཉྩ ཝཱ.

ཨརཱུཔཀུསལཱནེཝ, མགྒོ ཁཱིཎཱསཝསྶ ཙ;

ཙཀྑུསོཏམནོདྷཱཏུ, པུཉྙཛཱ ཏཱིརཎཱ དུཝེ.

པཉྩམཛ྄ཛྷཱནཔཱཀོ ¶ ཙ, ཨནཱགཱམིཕལཱདཡོ;

སུདྡྷཱཝཱསེསུ ལབྦྷནྟི, ཀྲིཡཙིཏྟཱནི ཝཱིསཏི.

རཱུཔཱཝཙརིཀཱ སབྦེ སབྦཱནི རཱུཔཱཝཙརཱནི པཉྩདས ཙིཏྟཱནི, ཀཱམདྷཱཏུཡཱ སབྦེ ཏེཝཱིསཏི ཝིཔཱཀཱ.

༢༡༣. དོམནསྶཱདིམགྒོ ཙ དོམནསྶདྭཡཉྩ ཨཱདིམགྒོ ཙ སོཏཱཔཏྟིམགྒོ ཙ, ཀྲིཡཱ ཙ དྭེ ཨཧེཏུཀཱ པཉྩདྭཱརཱཝཛྫནཧསིཏུཔྤཱདཱནི ཀིརིཡཱནི ཙཱཏི ཏེཙཏྟཱལཱིས ཙིཏྟཱནི ཨརཱུཔབྷཱུམིཡཾ ནཏྠི. པཉྩ རཱུཔཱཝཙརཝིཔཱཀཱ རཱུཔཱིནཾ ཝིཔཱཀཙིཏྟཏྟཱ ནཏྠི. རཱུཔཛཝནཱནི ཧེཊྛིམཛྷཱནཱནཾ ཝིརཏྟཏྟཱ ནཏྠི. ཙཀྑུསོཏཝིཉྙཱཎཱནི པུཉྙཛཱནི པསཱདརཧིཏཏྟཱ ནཏྠི. གྷཱནཱདིཝིཉྙཱཎཱནི པཀཏིཡཱཡེཝ ནཏྠི. ཀུསལཝིཔཱཀཱ མནོདྷཱཏུ ཙཀྑཱདིགྒཧིཏཔཉྩཱརམྨཎཏྟཱ ཨརཱུཔཱནཾ དྷམྨཱརམྨཎཏྟཱ ནཏྠི, ཨསཏི ཙཀྑཱདིཝིཉྙཱཎེ སཱ ཙ པུཉྙཛཱ མནོདྷཱཏུ ¶ ཏཱཡ ཙ ཨསཏིཡཱ ཙཀྑཱདིཝིཉྙཱཎམྤི ནཏྠིཡེཝ. ཀིརིཡཱམནོདྷཱཏུཔི པཉྩཱརམྨཎཏྟཱཡེཝ ནཏྠི, ཧསིཏུཔྤཱདོཔི རཱུཔཀཱཡཱབྷཱཝཱ སིཏསྶཱབྷཱཝཱ ནཏྠི, པུབྦེཝ དིཊྛསཙྩཱ ཨརིཡཱ རཱུཔབྷཱུམིཀཱ, ཏསྨཱ ཨཱདིམགྒོཔི ནཏྠི.

༢༡༤. ཨེཝཾ བྷཱུམིཝསེནེཝ, ཙིཏྟུཔྤཏྟིཾ ཝིབྷཱཝཡེ ཨེཝཾ ཨིམིནཱ མཡཱ ཝུཏྟཔྤཀཱརེན བྷཱུམིཝསེན ཙིཏྟུཔྤཏྟིཾ ཝིབྷཱཝཡེ དྷཱིརོ ཀཐེཡྻ. ཏཐཱ ཨེཝཾ ཨེཀཱདསནྣཾ པུགྒལཱནཾ ཝསེན ཙིཏྟུཔྤཏྟིཾ དྷཱིརོ ཝིབྷཱཝཡེ ཀཐེཡྻ.

༢༡༥.

ཀུསལཱཀུསལཱ ཀཱམེ,

ཏེསཾ པཱཀཱ ཨཧེཏུཀཱ;

ཨཱཝཛྫནདྭཡཉྩཱཏི,

སཏྟཏིཾསེཝ མཱནསཱཏི. –

ཨཡཾ ཝུཏྟཏྠཱ.

༢༡༦. ཨེཝཾ ཙཏཱུསྭཔཱཡབྷཱུམཱིསུ མནུསྶབྷཱུམིཡཉྩཱཏི པཉྩབྷཱུམཱིསུ ཨཧེཏུཀསྶ སཏྟསྶ ཛཱཡནྟེ ¶ ཨུཔྤཛྫནྟི. དྭེཔཉྙཱསཱཝསེསཱནི, ན ཛཱཡནྟི ཀདཱཙིཔི ཨཝསེསཱནི དྭེཔཉྙཱས ཙིཏྟཱནི ཀདཱཙིཔི ན ཛཱཡནྟི ན ཨུཔྤཛྫནྟི, ཏཱནི སརཱུཔཏོ ཝུཏྟཱནེཝ.

༢༡༧. ཨཧེཏུཀསྶ སཏྟསྶ ཨུཔྤཛྫནྟེཧི སཏྟཏིཾསཙིཏྟེཧི སཧ དུཧེཏུཀཱ, ཙཏུམཧཱཝིཔཱཀཱ ཙཱཏི ཙཏྟཱལཱིས ཙིཏྟཱནི ཏཐཱ ཨེཀཀཾ དུཧེཏུཀསྶ སཏྟསྶ ཛཱཡནྟི.

༢༡༨-༢༣. སབྦེ མཧགྒཏཱ ཙེཝ སབྦེ སཏྟཝཱིསཏིཝིདྷཱ མཧགྒཏཱ ཙེཝ སབྦེཔི ཙ ཨནཱསཝཱ སབྦེ ཨཊྛ ལོཀུཏྟརཱ ཙེཝ ཙཏྟཱརོ ཏིཧེཏུཀཝིཔཱཀཱ ཙ ཀཱམེ ཧསིཏུཔྤཱདོ སཧེཏུཀམཧཱཀིརིཡཱ ཙཱཏི ནཝ ཀྲིཡཱཔི ཙེཏི ཙཏྟཱལཱིསཾ ཏཐཱ ཨཊྛ ཙ དུཧེཏུནོ སཏྟསྶ ན ཛཱཡནྟི.

ཨཡམེཏྠཱདྷིཔྤཱཡོ ¶ – དུཧེཏུནོ རཱུཔཱརཱུཔསམཱཔཏྟིཡཱ ཨསམཏྠཏཱཡ སཏྟཝཱིས མཧགྒཏཱ ན ཛཱཡནྟི, མགྒཕལཾ ཨདྷིགནྟུཾ ཨསམཏྠཏཱཡ ཨཊྛ ལོཀུཏྟརཱ ན ཛཱཡནྟི, ཏིཧེཏུཀཝིཔཱཀཱ ཏིཧེཏུཀཱནཾ སཏྟཱནཾ ཝིཔཱཀཙིཏྟཏྟཱ ན ཛཱཡནྟི, ནཝ ཀིརིཡཱནི ཁཱིཎཱསཝཱནཾཡེཝ ཨུཔྤཛྫམཱནཏྟཱ ན ཛཱཡནྟཱིཏི. ཀཱམཱཝཙརསཏྟསྶ, ཏིཧེཏུཔཊིསནྡྷིནོ པུཐུཛྫནསྶ ཙཏུཔཉྙཱས མཱནསཱ ཛཱཡནྟི. ཀཏམཱནི ཏཱནི? དུཧེཏུཀསྶ ཝུཏྟཱནི ཙཏྟཱལཱིས ཙིཏྟཱནི ཏཐཱ ཨེཀཉྩ ཀཱམདྷཱཏུཡཾ ཙཏྟཱརོ ཉཱཎསམྤཡུཏྟཝིཔཱཀཱ རཱུཔཱརཱུཔེསུ ནཝ པུཉྙཱནི ཙཱཏི ཙཏུཔཉྙཱས མཱནསཱ ཛཱཡནྟི. པུཐུཛྫནསྶ ཏིཧེཏུནོ ཀཱམསཏྟསྶ པཉྩཏིཾས ཙིཏྟཱནི ན ཛཱཡརེ ན ཛཱཡནྟི. ཏཾ ཡཐཱ –

ཨཱཝཛྫནདྭཡཾ ཧིཏྭཱ, ཨཊྛཱརས ཀྲིཡཱཔི ཙ;

ནཝ མཧགྒཏཱ པཱཀཱ, ཨཊྛ ལོཀུཏྟརཱནི ཙ.

ཀཱམཔུཐུཛྫནསྶེཝ, ཏིཧེཏུཔཊིསནྡྷིནོ;

པཉྩཏིཾསེཝ ཙིཏྟཱནི, ན ཛཱཡནྟི ཀདཱཙིཔི.

ཚདེཝེསུ མནུསྶེསུ ཙཱཏི སཏྟསུ བྷཱུམཱིསུ ཛཱཏསྶ སོཏཱཔནྣསྶ དེཧིནོ སཏྟསྶ པཉྙཱས ཙིཏྟཱནི ཛཱཡནྟི. ཨིཏི ཝཙནཾ དྷཱིརོ ནིདྡིསེ ཀཐེཡྻ. ཏཾ ཡཐཱ –

དིཊྛིཡཱ ¶ ཝིཔྤཡུཏྟཱནི, དོམནསྶདྭཡམྤི ཙ;

ཨུདྡྷཙྩསཧིཏཉྩེཝ, ཀཱམཔུཉྙཱནི ཨཊྛ ཙ.

ནཝ མཧགྒཏཔུཉྙཱནི, ཨཱཝཛྫནདྭཡམྤི ཙ;

སབྦེ ཀཱམཝིཔཱཀཱ ཙ, སོཏཱཔཏྟིཕལམྤི ཙ.

ཨསྶ སོཏཱཔནྣསྶ ནཝཏིཾསེཝ ཙིཏྟཱནི ན ཨུཔྤཛྫནྟི. ཨིཏི ཝཙནཾ དྷཱིརོ དཱིཔཡེ དེསེཡྻ. ཏཾ ཡཐཱ –

ཨཱཝཛྫནདྭཡཾ ཧིཏྭཱ, ཨཊྛཱརས ཀྲིཡཱཔི ཙ;

ནཝ མཧགྒཏཱ པཱཀཱ, སཏྟ ལོཀུཏྟརཱནི ཙ.

དིཊྛིཡཱ ¶ སམྤཡུཏྟཱནི, ཝིཙིཀིཙྪཱཡུཏཾ ཏཐཱ;

ནཝཏིཾས ན ཛཱཡནྟི, སོཏཱཔནྣསྶ དེཧིནོ.

༢༢༤. པཋམཾ ཕལཾ ཋཔེཏྭཱ སོཏཱཔནྣསྶ པུགྒལསྶ ཝུཏྟཱནི ཙིཏྟཱནི ཨཏྟནོ སཀདཱགཱམིནོ ཕལེན སཀདཱགཱམིཕལེན སཧ སཀདཱགཱམིཔུགྒལསྶ སིཡུཾ.

༢༢༥. སོཏཱཔནྣསྶ ཝུཏྟཱནི, ཋཔེཏྭཱ པཊིགྷདྭཡཾ དུཏིཡཉྩ ཕལཾ སཀདཱགཱམིཕལཉྩ ཧིཏྭཱ ཨཏྟནོ ཨནཱགཱམིཕལེན སཧ སོཏཱཔནྣསྶ སཏྟསྶ ཝུཏྟཱནི ཡཱནི ཨཊྛཙཏྟཱལཱིས ཙིཏྟཱནི ཨཏྠི, ཏཱནི ཨནཱགཱམིསྶ སཏྟསྶ ཛཱཡནྟི. ཨིཏི ཝཙནཾ དྷཱིརོ ཝིནིདྡིསེ.

༢༢༦. ཀཏི ཙིཏྟཱནི ཛཱཡནྟི, ཀཱམེ ཨརཧཏོ པན ཀཱམེ སཏྟསུ ཀཱམབྷཱུམཱིསུ ཛཱཏསྶ ཨརཧཏོ ཁཱིཎཱསཝསྶ ཀཏི ཙིཏྟཱནི ཛཱཡནྟི? ཙཏྟཱརི ཙ ཙཏྟཱརཱིསཉྩ ཙིཏྟཱནི ཀཱམེ སཏྟསུ ཀཱམབྷཱུམཱིསུ ཛཱཏསྶ ཨརཧཏོ སིཡུཾ བྷཝེཡྻུཾ. ཏཾ ཡཐཱ –

ཏེཝཱིས ཀཱམཔཱཀཱནི, ཀྲིཡཙིཏྟཱནི ཝཱིསཏི;

ཨརཧཏྟཕལེནེཝ, ཀཱམེ ཨརཧཏོ སིཡུཾ.

༢༢༧. མགྒཊྛཱནཾ ¶ ཙཏུནྣམྤི ཏེསཾ པུགྒལཱནཾ སཀཾ སཀཾ མགྒཙིཏྟཾ སིཡཱ བྷཝེཡྻ. ཨེཀཙིཏྟཀྑཎཱ ཧི ཏེ ཧི སཙྩཾ ཏཾ མཡཱ ཝུཏྟཾ ཝཙནཾ. ཏེ མགྒཱ ཨེཀཙིཏྟཀྑཎཱ.

༢༢༨. པུཐུཛྫནསྶ ཏཱིསྭེཝ, པཋམཛ྄ཛྷཱནབྷཱུམིསུ ཏཱིསུ ཨེཝ པཋམཛ྄ཛྷཱནབྷཱུམཱིསུ ཛཱཏསྶ པུཐུཛྫནསྶ བྲཧྨུནོ པཉྩཏིཾས ཨེཝ ཙིཏྟཱནི ཛཱཡནྟི. ཨིཏི ཝཙནཾ དྷཱིརོ ཝིནིདྡིསེ ཨུཙྩཱརེཡྻ. ཏཾ ཡཐཱ –

དོམནསྶདྭཡཾ ཧིཏྭཱ, ཨཔུཉྙཱནི དསེཝ ཙ;

ཀཱམཔུཉྙཱནི ཨཊྛེཝ, ནཝ པུཉྙཱ མཧགྒཏཱ.

ཙཀྑུསོཏདྭཡཾ ¶ པུཉྙཔཱཀཾ སནྟཱིརཎདྭཡཾ;

ཨཱཝཛྫནདྭཡཉྩེཝ, པུཉྙཛཾ སམྤཊིཙྪནཾ;

པཋམཛ྄ཛྷཱནཔཱཀོ ཙ, པཉྩཏིཾསེཝ ཛཱཡརེ.

༢༢༩-༢༣༤. གྷཱནཱདཱིསུ པསཱདེསུ པཝཏྟཾ ཀུསལཝིཔཱཀཾ ཝིཉྙཱཎཏྟཡཾ སཏྟ ཨཔུཉྙཛཱ པཱཀཱ ཨཊྛ མཧཱཔཱཀཱ ཏཐཱ ཨུཔརིཛྷཱནབྷཱུམཱིསུ ཛཱཏཱ པཱཀཱ ཨཱརུཔྤཱ ཙཏྟཱརོ ཝིཔཱཀཱཔི ཙ དོམནསྶདྭཡམྤི ཙ ཨཱཝཛྫནདྭཡཝཛྫཱ ཨཊྛཱརས ཀྲིཡཱ ཙེཝ ཨཊྛ ལོཀུཏྟརཱནི ཙ ཨེཏཱནི ཙཏུཔཉྙཱས ཙིཏྟཱནི པཋམཛ྄ཛྷཱནབྷཱུམཱིསུ ཏཱིསུ ནིབྦཏྟསྶ པུཐུཛྫནསྶ དེཧིནོ སཏྟསྶ ན ཙ ལབྦྷརེ ན ལབྦྷནྟི. ཏཱསུ ཏཱིསུ བྷཱུམཱིསུ ནིབྦཏྟསྶ པུཐུཛྫནསྶ བྲཧྨུནོ ཝུཏྟེསུ ཙིཏྟེསུ ཨཔུཉྙཔཉྩཀཾ ཧིཏྭཱ ཏཏྠ ཏཱིསུ པཋམཛ྄ཛྷཱནབྷཱུམཱིསུ ནིབྦཏྟསྶ སོཏཱཔནྣསྶ བྲཧྨུནོ པཋམཕལེན སཧ ཨེཀཏིཾས ཙིཏྟཱནི ཛཱཡརེ ཛཱཡནྟི. སཀདཱགཱམིནོ ཏཏྠ ཏཱིསུ པཋམཛ྄ཛྷཱནབྷཱུམཱིསུ ཛཱཏསྶ སཀདཱགཱམིནོ བྲཧྨུནོ ཏེསུ ཙིཏྟེསུ པཋམཾ ཕལཾ ཋཔེཏྭཱ སཀདཱགཱམིཕལཾ པཀྑིཔིཏྭཱ ཨེཀཏིཾསེཝ ཙིཏྟཱནི ཛཱཡརེ. ཨནཱགཱམིསྶ ཏཏྠེཝ ཏཱིསུ པཋམཛ྄ཛྷཱནབྷཱུམཱིསུ ཨེཝ ཛཱཏསྶ ཨནཱགཱམིསྶ དུཏིཡཾ ཕལཾ ཋཔེཏྭཱ ཨཏྟནོ ཕལཙིཏྟེན སཧ ཨེཀཏིཾསེཝ ཙིཏྟཱནི ཛཱཡནྟི.

༢༣༥.

ཝིཉྙཱཎཾ ཙཀྑུསོཏཱནཾ, པུཉྙཛཾ སམྤཊིཙྪནཾ;

སནྟཱིརཎདྭཡཉྩེཝ, ཀྲིཡཙིཏྟཱནི ཝཱིསཏི.

༢༣༦-༧. ཨརཧཏྟཕལཾ ¶ པཋམཛ྄ཛྷཱནཏོ སམྦྷཝོ པཱཀོ སཏྟཝཱིསཏི ཙིཏྟཱནི ཨརཧནྟསྶ ཁཱིཎཱསཝསྶ ཛཱཡརེ. པུཐུཛྫནསྶ ཏཱིསྭེཝ ཏཱིསུ ཨེཝ དུཏིཡཛ྄ཛྷཱནབྷཱུམཱིསུ ཛཱཏསྶ པུཐུཛྫནསྶ བྲཧྨུནོ དུཏིཡཛ྄ཛྷཱནཏཏིཡཛ྄ཛྷཱནཔཱཀེན སཧ ཚཏྟིཾས ཙིཏྟཱནི ཛཱཡནྟི. ཏཾ ཡཐཱ –

དོམནསྶདྭཡཾ ¶ ཧིཏྭཱ, ཨཔུཉྙཱནི དསེཝ ཙ;

ཀཱམཔུཉྙཱནི ཨཊྛེཝ, ནཝ པུཉྙམཧགྒཏཱ.

ཙཀྑུསོཏདྭཡཾ པུཉྙཔཱཀཾ སནྟཱིརཎདྭཡཾ;

ཨཱཝཛྫནདྭཡཉྩེཝ, པུཉྙཛཾ སམྤཊིཙྪནཾ.

དུཏིཡཛ྄ཛྷཱནཔཱཀེན, ཏཏིཡཛ྄ཛྷཱནཔཱཀཏོ;

ཚཏྟིཾསེཝ ཙ ཙིཏྟཱནི, དུཏིཡཛ྄ཛྷཱནདེཧིནོ.

༢༣༨-༢༤༡. པུཐུཛྫནསྶ ཝུཏྟེསུ, ཧིཏྭཱ ཝཱཔུཉྙཔཉྩཀཾ ཨཏྟནོ ཕལེན སཧ བཱཏྟིཾས ཙིཏྟཱནི སོཏཱཔནྣསྶ ཛཱཡནྟི. སོཏཱཔནྣསྶ ཝུཏྟེསུ, ཋཔེཏྭཱ པཋམཾ ཕལཾ སོཏཱཔནྣསྶ ཝུཏྟེསུ པཋམཾ ཕལཾ ཋཔེཏྭཱ ཨཏྟནོ ཕལཙིཏྟེན སཧ བཱཏྟིཾས ཙིཏྟཱནི, སཀདཱགཱམིསྶ ཝུཏྟེསུ དུཏིཡཾ ཕལཾ ཋཔེཏྭཱ ཨནཱགཱམིཕལེན སཧ བཱཏྟིཾསེཝ ཙིཏྟཱནི ཨསྶ ཨནཱགཱམིནོ བྷཝནྟི. ཨརཧནྟསྶ ཏཱིསྭེཝ, ཨཊྛཝཱིསཏི ཨཏྟནོ ཏཱིསུ ཨེཝ དུཏིཡཛ྄ཛྷཱནབྷཱུམཱིསུ ཛཱཏསྶ ཨརཧཏོ ཨཏྟནོ ཕལེན དུཏིཡཛ྄ཛྷཱནཏཏིཡཛ྄ཛྷཱནཔཱཀཏོ པཱཀེཧི སཧ ཨཊྛཝཱིསཏི ཙིཏྟཱནི ཧོནྟི. ཏཾ ཡཐཱ –

ཝིཉྙཱཎཾ ཙཀྑུསོཏཱནཾ, པུཉྙཛཾ སམྤཊིཙྪནཾ;

སནྟཱིརཎདྭཡཉྩེཝ, ཀྲིཡཙིཏྟཱནི ཝཱིསཏི.

ཨརཧཏྟཕལཾ པཱཀོ, དུཏིཡཛ྄ཛྷཱནསམྦྷཝོ;

ཏཏིཡཛ྄ཛྷཱནཔཱཀོ ཙ, ཨཊྛཝཱིསཏི མཱནསཱ.

༢༤༢-༦. པརིཏྟཀསུབྷཱདཱིནཾ, དེཝཱནཾ ཏཱིསུ བྷཱུམཱིསུ ཙཏུཏྠཛ྄ཛྷཱནཝིཔཱཀེན སཧ པཉྩཏིཾསེཝ ཙིཏྟཱནི ¶ ཛཱཡནྟི. སོཏཱཔནྣསྶ ཏཏྠེཀ-ཏིཾས ཙིཏྟཱནི ཛཱཡརེཏཏྠ ཏཱསུ ཏཱིསུ པརིཏྟཀསུབྷཱདཱིནཾ བྷཱུམཱིསུ སོཏཱཔནྣསྶ ཙ ཨེཀཏིཾས ཙིཏྟཱནི ཛཱཡརེ. ཡཐཱ ཨེཝཾ སཀདཱགཱམིནོ ཨེཀཏིཾས ཙིཏྟཱནི ཛཱཡརེ. ཏཐཱ ཨནཱགཱམིནོ ཨེཀཏིཾས ཛཱཡརེ. ཏཏྠེཝ ¶ ཏཱསུ ཏཱིསུ བྷཱུམཱིསུ ཨེཝ ཛཱཏསྶ ཁཱིཎཱསཝསྶ སཏྟཝཱིསཏི མཱནསཱ ཧོནྟི, ཏཐཱ ཨེཝཾ ཝེཧཔྥལེ ཝེཧཔྥལབྷཱུམིཡཾ ཛཱཏཱནཾ པུཐུཛྫནསེཀྑཱནཾ པཉྩནྣཾ སབྦེསཾ པུགྒལཱནཾ མཱནསཱ ཧོནྟི. པཉྩསུ སུདྡྷཱཝཱསིཀབྷཱུམཱིསུ ཛཱཏསྶ ཨནཱགཱམིནོ སཏྟསྶ ཨེཀཏིཾསེཝ ཙིཏྟཱནི ཧོནྟི. ཨིཏི ཝཙནཾ དྷཱིརོ པརིདཱིཔཡེ དེསེཡྻ. ཏཏྠེཝ ཏཱསུ སུདྡྷཱཝཱསབྷཱུམཱིསུ ཨེཝ ཛཱཏསྶ ཨརཧཏོ སཏྟཝཱིསཏི མཱནསཱ ཧོནྟི. ཨེཝཾ ཨིམིནཱ མཡཱ ཝུཏྟཔྤཀཱརེན རཱུཔཱིསུ པཉྩདསསུ རཱུཔིབྷཱུམཱིསུ ཛཱཏཱནཾ སབྦེསཾ པུགྒལཱནཾ ཙིཏྟཱནི ཝིབྷཱཝིནཱ དྷཱིརེན ཝིཉྙེཡྻཱནི ཛཱནིཏབྦཱནི.

༢༤༧. ཙཏུཝཱིསཏི ཙིཏྟཱནི, པཋམཱརུཔྤབྷཱུམིཡཾ པཋམཨཱརུཔྤབྷཱུམིཡཾ ཛཱཏསྶ པུཐུཛྫནསྶ ཙཏུཝཱིསཏི ཙིཏྟཱནི ཛཱཡནྟི. ཨིཏི ཝཙནཾ དྷཱིརོ ཝིནིདྡིསེ. ཏཾ ཡཐཱ –

དོམནསྶདྭཡཾ ཧིཏྭཱ, ཨཔུཉྙཱནི དསེཝ ཙ;

ཀཱམཔུཉྙཱནི ཨཊྛེཝ, ཨཱརུཔྤཀུསལཱནི ཙ;

པཋམཱརུཔྤཔཱཀོ ཙ, ཀྲིཡཱཝོཊྛབྦནམྤི ཙ.

༢༤༨-༢༥༡. སོཏཱཔནྣསྶ ཏཏྠེཝ, ཋཔེཏྭཱཔུཉྙཔཉྩཀཾཏཏྠ ཏིསྶཾ པཋམཱརུཔྤབྷཱུམིཡཾ ཨེཝ སོཏཱཔནྣསྶ པུགྒལསྶ ཨཔུཉྙཔཉྩཀཾ ཧིཏྭཱ ཨཏྟནོ ཕལེན སཧ ཝཱིསཏི ཙིཏྟཱནི ཧོནྟི. ཏཐཱ ཏཏྠ ཏིསྶཾ པཋམཱརུཔྤབྷཱུམིཡཾ སཀདཱགཱམིནོ, ཨནཱགཱམིནོཔི ཙ པུགྒལསྶ པུབྦཾ པུབྦཾ ཕལཾ ཝིནཱ ཝཛྫེཏྭཱ ཨཏྟནོ ཕལེན སཧ ཝཱིསཏི ཙིཏྟཱནི ཛཱཡནྟི. ཁཱིཎཱསཝསྶ ཏཏྠེཝ ཏཏྠ ཏིསྶཾ པཋམཱརུཔྤབྷཱུམིཡཾ ཨེཝ ཛཱཏསྶ ཁཱིཎཱསཝསྶ དས པཉྩ མཱནསཱ ཙ ཛཱཡནྟི. ཏཾ ཡཐཱ –

མཧཱཀྲིཡཱནི ཨཊྛེཝ, ཙཏྭཱརུཔྤཀྲིཡཱནི ཙ;

ཨརཧཏྟཕལཾ པཱཀོ, ཝོཊྛབྦཉྩཱཔི མཱནསཾ.

དུཏིཡཱརུཔྤབྷཱུམིཡཾ ¶ ཛཱཏསྶ པུཐུཛྫནསྶ སཏྟསྶ ཏེཝཱིསཏི ཙིཏྟཱནི ཧོནྟི. ཏཾ ཡཐཱ –

དོམནསྶདྭཡཾ ¶ ཧིཏྭཱ, ཨཔུཉྙཱནི དསེཝ ཙ;

ཀཱམཔུཉྙཱནི ཨཊྛེཝ, པུཉྙཱརཱུཔཱུཔརཱི ཏཡོ;

དུཏིཡཱརུཔྤཔཱཀོ ཙ, ཝོཊྛབྦཉྩཱཔི མཱནསཾ.

ཨིཏི ཨེཝཾ ཨིམིནཱ པཀཱརེན ཝཏྭཱ ཀཐེཏྭཱ དྷཱིརོ པཎྜིཏོ ཝིབྷཱཝཡེ དེསེཡྻ. ཨེཏྠ ཨེཏིསྶཾ དུཏིཡཱརུཔྤབྷཱུམིཡཾ ཛཱཏཱནཾ ཏིཎྞནྣཾ སེཀྑཱནམྤི ཨེཀཱུནཝཱིསཏི ཙིཏྟཱནི ཧོནྟི. ཏཾ ཡཐཱ –

དིཊྛིཡཱ ཝིཔྤཡུཏྟཱནི, ཨུདྡྷཙྩསཧིཏཾ ཏཐཱ;

ཀཱམཔུཉྙཱནི ཨཊྛེཝ, པུཉྙཱརཱུཔཱུཔརཱི ཏཡོ.

དུཏིཡཱརུཔྤཔཱཀོ ཙ, ཝོཊྛབྦཉྩཱཔི མཱནསཾ;

སཀསཀཕལེནེཝ, ཙིཏྟཱནེཀཱུནཝཱིསཏི.

༢༥༢. ཙུདྡསེཝ ཏུ ཙིཏྟཱནི དུཏིཡཱརུཔྤབྷཱུམིཡཾ ཛཱཏསྶ ཁཱིཎཱསཝསྶ ཀིརིཡཙིཏྟཱནི དྭཱདས ཨེཀོ པཱཀོ ཨརཧཏྟཕལཉྩཱཏི ཙུདྡསེཝ ཙིཏྟཱནི ཧོནྟི. ཏཾ ཡཐཱ –

མཧཱཀྲིཡཱནི ཨཊྛེཝ, ཀྲིཡཱརཱུཔཱུཔརཱི ཏཡོ;

ཝོཊྛབྦཉྩ སཀོ པཱཀོ, ཨརཧཏྟཕལམྤི ཙ.

༢༥༣. པུཐུཛྫནསྶ སཏྟསྶ, ཏཏིཡཱརུཔྤབྷཱུམིཡཾ ཏཏིཡཨརཱུཔབྷཱུམིཡཾ ཛཱཏསྶ པུཐུཛྫནསྶ སཏྟསྶ བཱཝཱིསཏི ཙིཏྟཱནི བྷཝནྟི. ཨིཏི ཝཙནཾ དྷཱིརོ པཀཱསཡེ. ཏཾ ཡཐཱ –

དོམནསྶདྭཡཾ ཧིཏྭཱ, ཨཔུཉྙཱནི དསེཝ ཙ;

ཀཱམཔུཉྙཱནི ཨཊྛེཝ, པུཉྙཱརཱུཔཱུཔརཱི དུཝེ;

ཏཏིཡཱརུཔྤཔཱཀོ ཙ, ཝོཊྛབྦཉྩཱཔི མཱནསཾ.

༢༥༤-༥. ཨཊྛཱརསེཝ ཙིཏྟཱནི, སོཏཱཔནྣསྶ པུགྒལསྶ ཨཊྛཱརས ཨེཝ ཙིཏྟཱནི ཛཱཡརེ. ཏཾ ཡཐཱ –

དིཊྛིཡཱ ¶ ¶ ཝིཔྤཡུཏྟཱནི, ཨུདྡྷཙྩསཧིཏཾ ཏཐཱ;

མཧཱཔུཉྙཱནི ཨཊྛེཝ, པུཉྙཱརཱུཔཱུཔརཱི དུཝེ.

ཨཊྛཱརསེཝ པཱཀེན, སོཏཱཔཏྟིཕལེན ཙ;

ཝོཊྛབྦཉྩཱཔི མཱནསཾ, སོཏཱཔནྣསྶ ཛཱཡརེ.

སཀདཱགཱམིནོ པཋམཾ ཕལཾ ཋཔེཏྭཱ ཨཏྟནོ ཕལེན ཏཱནི ཨཊྛཱརས ཙིཏྟཱནི ཧོནྟི. སཀདཱགཱམིནོ ཝུཏྟེསུ ཙིཏྟེསུ དུཏིཡཾ ཕལཾ ཋཔེཏྭཱ ཨཏྟནོ ཕལེན སཧ ཨཊྛཱརས ཙིཏྟཱནི ཨེཝ ཨནཱགཱམིསྶ ཛཱཡརེ.

༢༥༦. ཏེརསེཝ ཙ ཙིཏྟཱནི, ཏཏིཡཱརུཔྤབྷཱུམིཡཾ ཏཏིཡཨརཱུཔབྷཱུམིཡཾ ཛཱཏསྶ ཁཱིཎཱསཝསྶ ཏེརསེཝ ཙིཏྟཱནི ཛཱཡནྟི. ཨིཏི ཝཙནཾ དྷཱིརོ ཝིནིདྡིསེ. ཏཾ ཡཐཱ –

མཧཱཀྲིཡཱནི ཨཊྛེཝ, ཀྲིཡཱརཱུཔཱུཔརཱི དུཝེ;

ཨརཧཏྟཕལཾ པཱཀོ, ཝོཊྛབྦཉྩཱཔི མཱནསཾ.

༢༥༧. ཨེཀཝཱིསཏི ཙིཏྟཱནི, ཙཏུཏྠཱརུཔྤབྷཱུམིཡཾ ཙཏུཏྠཨརཱུཔབྷཱུམིཡཾ ཛཱཏསྶ པུཐུཛྫནསྶ སཏྟསྶ ཨེཀཝཱིསཏི ཙིཏྟཱནི ཛཱཡནྟི. ཨིཏི ཨིདཾ ཝཙནཾ དྷཱིརོ ཝིནིདྡིསེ. ཏཾ ཡཐཱ –

དོམནསྶདྭཡཾ ཧིཏྭཱ, ཨཔུཉྙཱནི དསེཝ ཙ;

ཀཱམཔུཉྙཱནི ཨཊྛེཝ, ཝོཊྛབྦཉྩཱཔི མཱནསཾ;

ཙཏུཏྠཱརུཔྤཔུཉྙཉྩ, སཔཱཀེནེཀཝཱིསཏི.

༢༥༨-༢༦༠. སོཏཱཔནྣསྶ སཏྟསྶ, སཏྟརས ཙིཏྟཱནི དྷཱིརོ པཀཱསཡེ. ཏཾ ཡཐཱ –

དིཊྛིཡཱ ཝིཔྤཡུཏྟཱནི, ཨུདྡྷཙྩསཧིཏཾ ཏཐཱ;

ཀཱམཔུཉྙཱནི ཨཊྛེཝ, སོཏཱཔཏྟིཕལམྤི ཙ;

ཙཏུཏྠཱརུཔྤཔུཉྙཉྩ, སཔཱཀོ ཝོཊྛབྦམྤི ཙ.

སཀདཱགཱམིནོ ¶ པཋམཾ ཕལཾ ཋཔེཏྭཱ ཏཱནི ཨེཝ ཙིཏྟཱནི སཕལེན ཧོནྟི. སཀདཱགཱམིནོ ཝུཏྟེསུ ཙིཏྟེསུ དུཏིཡཾ ¶ ཕལཾ ཋཔེཏྭཱ ཨཏྟནོ ཕལེན སཏྟརས མཱནསཱ ཨནཱགཱམིསྶ ཧོནྟི. དྭཱདསེཝ ཏུ ཙིཏྟཱནི, ཙཏུཏྠཱརུཔྤབྷཱུམིཡཾ ཛཱཏསྶ ཨརཧནྟསྶ དྭཱདས ཨེཝ ཙིཏྟཱནི ཛཱཡནྟི. ཏཾ ཡཐཱ –

མཧཱཀྲིཡཱནི ཨཊྛེཝ, ཝོཊྛབྦཉྩཱཔི མཱནསཾ;

ཙཏུཏྠཉྩ ཀྲིཡཱརཱུཔཾ, པཱཀོ ཨརཧཏོ ཕལཾ.

ཨིཏི ཨེཝཾ ཨིམིནཱ མཡཱ ཝུཏྟཔྤཀཱརེན པུགྒལཱནཾ ཝསེན བྷཱུམཱིསུ ཙིཏྟཔྤཝཏྟིཾ ཝིདཱུ དྷཱིརོ ཝིབྷཱཝཡེ.

༢༦༡-༢. ཧེཊྛིམཱནཾ ཨརཱུཔཱིནཾ, བྲཧྨཱནཾ ཨུཔརཱུཔརི ཛཱཏཱ ཨརཱུཔཀུསལཱ ཙེཝ ཀིརིཡཱཔི ཙ ཨུཔྤཛྫནྟི. ཨུདྡྷཾ ཨུདྡྷཾ བྷཱགེ ཛཱཏཱནཾ ཨརཱུཔཱིནཾ བྲཧྨཱནཾ ཧེཊྛིམཱ ཧེཊྛིམཱ ཨཱརུཔྤཱ ཧེཊྛཱབྷཱགེ ཛཱཏཱ ཨརཱུཔཱཝཙརཱ པན ནེཝ ཛཱཡནྟི. ཀསྨཱ ཀཱརཎཱཏི? ཀིར མཡཱ སུཏཾ, ཧེཊྛིམཛྷཱནེསུ དིཊྛཱདཱིནཝཏོ དིཊྛདོསབྷཱཝཏོ ནེཝ ཛཱཡནྟི.

༢༦༣-༥. ཋཔེཏྭཱ པཋམཾ མགྒཾ སོཏཱཔཏྟིམགྒཾ ཋཔེཏྭཱ ཀུསལཱནུཏྟརཱ ཏཡོ ཏཡོ ཨནུཏྟརཱ ཀུསལཱ ཏཡོ མགྒཱ, ཀཱམཱཝཙརཔུཉྙཱནི ཨཊྛ, ཏཐཱ དས ཨཔུཉྙཱནི ཙིཏྟཱནི, ཨརཱུཔཔུཉྙཱནི ཙཏྟཱརི. སབྦེ པཱཀཱ ཨནུཏྟརཱ སབྦཱནི ལོཀུཏྟརཕལཱནི, པཋམཱརུཔྤཔཱཀོ ཙ ནཝ ཀཱམཀིརིཡཱཔི ཙ, ཨརཱུཔཱཔི སབྦཱ ཀིརིཡཱ, ཨེཏཱནི པན ཏེཙཏྟཱལཱིས མཱནསཱ པཋམཱརུཔྤབྷཱུམིཡཾ ཨུཔྤཛྫནྟི.

༢༦༦-༧. སབྦོ ཏེཝཱིསཏིཀཱམཝིཔཱཀོ, སབྦོ པནྣརསཝིདྷོ མཧགྒཏོ རཱུཔོ ཙིཏྟུཔྤཱདོ, མནོདྷཱཏུ ཀིརིཡཱམནོདྷཱཏུ, དོམནསྶདྭཡམྤི ཙ ཨཱདིམགྒོ ཙ ཏཐཱ ཨུཔརི ཛཱཏཱ ཏཡོ ཨརཱུཔཔཱཀཱ ཙཱཏི ཚཙཏྟཱལཱིས ཙིཏྟཱནི ཨེཏྠ ཨེཏིསྶཾ པཋམཱརུཔྤབྷཱུམིཡཾ ནཏྠི.

༢༦༨-༩. ཝུཏྟེསུ ¶ པན ཙིཏྟེསུ, པཋམཱརུཔྤབྷཱུམིཡཾ ཝུཏྟེསུ ཙིཏྟེསུ ཀུསལཔཱཀཀིརིཡཱཝསེན པཋམཱརུཔྤཏྟཡཾ ཋཔེཏྭཱ ཨཏྟནོ པཱཀོ ཙཱཏི ཙཏྟཱལཱིས ཙིཏྟཱནི དུཏིཡཱརུཔྤབྷཱུམིཡཾ ¶ ཛཱཡནྟི. ཨེཝཾ ཨིམིནཱ མཡཱ ཝུཏྟཔྤཀཱརེན སེསདྭཡེ པཋམདུཏིཡཱརུཔྤཏོ སེསཨཱཀིཉྩཉྙཱཡཏནནེཝསཉྙཱནཱསཉྙཱཡཏནབྷཱུམིདྭཡེ ཧེཊྛིམཧེཊྛིམཾ ཀུསལཝིཔཱཀཀིརིཡཱཝསེན ཧེཊྛཱབྷཱགེ ཛཱཏཾ ཨརཱུཔཏྟཡཾ ཧིཏྭཱ ཨཏྟནོ ཨཏྟནོ པཱཀཱ ཨེཝཾ ཨིམིནཱ མཡཱ ཝུཏྟཔྤཀཱརེན པཎྜིཏེན ཉེཡྻཱ ཛཱནིཏབྦཱ.

༢༧༠-༣. ཙཏྟཱརོ ཙ ཨནཱསཝཱ, ཝིཔཱཀཱ ཙཏྟཱརི ལོཀུཏྟརཕལཙིཏྟཱནི, སབྦེ སབྦཱནི ཙ ཙཏཱུསུ ཨཱརུཔྤབྷཱུམཱིསུ ཧོནྟི. ཝོཊྛབྦནེན ཙིཏྟེན སཧ ཀཱམེ ཨཊྛ མཧཱཀིརིཡཱ, ཙཏསྶོ ཨརཱུཔཀིརིཡཱཔི ཙཱཏི ཏེརས ཨེཝ ཀིརིཡཱ པཋམཱརུཔྤབྷཱུམིཡཾ ཛཱཏསྶ ཁཱིཎཱསཝསྶ ཛཱཡནྟི. དུཏིཡཱརུཔྤབྷཱུམིཡཾ ཛཱཏསྶ ཁཱིཎཱསཝསྶ པཋམཱརུཔྤཀིརིཡཾ ཧིཏྭཱ དྭཱདས ཨེཝ ཀིརིཡཱ ཧོནྟི. ཏཏིཡཱརུཔྤབྷཱུམིཡཾ ཛཱཏསྶ ཁཱིཎཱསཝསྶ པཋམདུཏིཡཱརུཔྤཀིརིཡཱནི ཧིཏྭཱ ཨེཀཱདས ཀིརིཡཱ ཧོནྟི. ཙཏུཏྠཱརུཔྤབྷཱུམིཡཾ ཛཱཏསྶ ཁཱིཎཱསཝསྶ པཋམདུཏིཡཏཏིཡཱརུཔྤཀིརིཡཱནི ཧིཏྭཱ དསེཝ ཀིརིཡཱ ཉེཡྻཱ ཛཱནིཏབྦཱ.

༢༧༤.

ཨརཧཏོ པན ཙིཏྟཱནི, ཧོནྟི ཨེཀཱུནཝཱིསཏི;

ཨརཧཏྟཾ ཀྲིཡཱ སབྦཱ, ཋཔེཏྭཱཝཛྫནདྭཡཾ.

ཨཱཝཛྫནདྭཡཾ ཋཔེཏྭཱ སབྦཱ ཀིརིཡཱ, ཨརཧཏྟཕལཉྩཱཏི ཨེཀཱུནཝཱིསཏི ཙིཏྟཱནི ཨརཧཏོ པན ཧོནྟི. ཨཱཝཛྫནདྭཡཾ ཀིཉྩཱཔི ཁཱིཎཱསཝསྶ ཧོནྟི, ཨེཝམྤི ཨཉྙེསཾ པུཐུཛྫནསེཀྑཱནམྤི ཧོནྟིཡེཝ. ཨེཀཱུནཝཱིསཏི ཙིཏྟཱནི ཁཱིཎཱསཝསྶ ཨེཝ ཧོནྟི, ན ཨཉྙེསནྟི ཉཱཔནཏྠཾ ‘‘ཨཱཝཛྫནདྭཡཾ ཋཔེཏྭཱ’’ཏི ཝུཏྟཾ.

༢༧༥-༦. ཙཏུནྣཾ ¶ ཕལཊྛཱནཾ པུགྒལཱནཉྩ ཏིཧེཏུཀཔུཐུཛྫནེ ཙ ཏེརསེཝ ཙིཏྟཱནི བྷཝནྟི. ཨིཏི ཝཙནཾ དྷཱིརོ པཀཱསཡེ. ཏཾ ཡཐཱ – ཙཏྟཱརོ ཉཱཎསམྤཡུཏྟཱ མཧཱཝིཔཱཀཱནི, ནཝ རཱུཔཱརཱུཔཔཱཀཱ ཙ ཨིམེ ཏེརསེཝ ཙིཏྟཱནི བྷཝནྟི.

༢༧༧-༩. ཙཏུནྣཾ ཕལཊྛཱནཾ པུགྒལཱནཉྩ དུཧེཏུཀཔུཐུཛྫནེ ཙ ཉཱཎཔརིཧཱིནཱནི ཙཏྟཱརི ཝིཔཱཀཱནི ཨེཝ ཛཱཡརེ. པུཐུཛྫནཱནཾ ཏིཎྞམྤི, ཙཏུནྣཾ ཨརིཡདེཧིནཾ ཨརིཡགཏཱནཾ སཏྟནྣཾ པུགྒལཱནཾ ¶ སཏྟརསེཝ ཙིཏྟཱནི བྷཝནྟི. ཏཾ ཡཐཱ – དུཝེ པཉྩཝིཉྙཱཎཱནི, མནོདྷཱཏུཏྟཡསནྟཱིརཎཱནི, ཝོཊྛབྦནཉྩ ཨིམེ སཏྟརས ཨེཝ ཧོནྟི.

༢༨༠-༥. ཧེཊྛཱ ཏིཎྞཾ ཕལཊྛཱནཾ, ཏིཧེཏུཀཔུཐུཛྫནེ ཙཏུནྣཾ པུགྒལཱནཾ མཧགྒཏཱནི ཨེཝ ཀུསལཱནི ཧོནྟི. ཏིཎྞཾ པུཐུཛྫནཱནཉྩ, ཨཱདིཏོ ཏིཎྞཾ ཨརིཡཱནཾ ཧེཊྛཱ ཨརིཡཱནཾ ཏེརསེཝ ཙིཏྟཱནི ཨུཔྤཛྫནྟི. ཨིཏི ཝཙནཾ དྷཱིརོ ནིདྡིསེ. ཨཊྛེཝ ཀཱམཔུཉྙཱནི, ཨཔུཉྙཏོ ཨཀུསལཝསེན དིཊྛིཧཱིནཱ ཙཏྟཱརོ ཙིཏྟུཔྤཱདཱཔི, ཨུདྡྷཙྩསམྤཡུཏྟཉྩཱཏི ཏེརས ཙིཏྟཱནི ཧོནྟི. ཧེཊྛཱ དྭིནྣཾ ཕལཊྛཱནཾ སོཏཱཔནྣསཀདཱགཱམིཔུགྒལཱནཾ སབྦཔུཐུཛྫནེ ཨཧེཏུཀདུཧེཏུཀཏིཧེཏུཀཔུཐུཛྫནེ དོམནསྶཡུཏྟཾ དྭཡམེཝ ཙིཏྟཾ ཛཱཡཏེ. ཏིཎྞཾ པུཐུཛྫནཱནཉྩ པཉྩ ཨེཝ ཛཱཡརེ. ཏཾ ཡཐཱ –

ཙཏྟཱརི དིཊྛིཡུཏྟཱནི, ཝིཙིཀིཙྪཱཡུཏམྤི ཙ;

མགྒཊྛཱནཾ ཙཏུནྣམྤི, མགྒཙིཏྟཾ སཀཾ སཀཾ.

ཏེསཾ ཙཏུནྣཾ མགྒཊྛཱནཾ པུགྒལཱནཾ སཀཾ སཀཾ ཨེཀམེཝ མགྒཙིཏྟཾ བྷཝེ བྷཝེཡྻ. ཨིཏི ཨེཝཾ ཨིམིནཱ མཡཱ ཝུཏྟཔྤཀཱརེན དྷཱིརོ པཎྜིཏོ ཝིབྷཱཝཡེ ཙིཏྟཔྤཝཏྟིཾ པཀཱསཡེ.

༢༨༦-༩. མཡཱ བྷཝེསུ ཙིཏྟཱནཾ, པུགྒལཱནཾ ཝསེན ཙ. བྷཝེསུ སབྦབྷཝེསུ ཙིཏྟཱནཾ, པུགྒལཱནཾ ཝསེན ཙ ཙིཏྟཔྤཝཏྟི བྷིཀྑཱུནཾ ¶ ཨཱབྷིདྷམྨིཀབྷིཀྑཱུནཾ པཱཊཝཏྠཱཡ ཚེཀབྷཱཝཱཡ མཡཱ པཀཱསིཏཱ. ཨེཝཾ སབྦམིདཾ ཙིཏྟཾ, བྷཱུམིཔུགྒལབྷེདཏོ ཨེཝཾ ཨིམིནཱ མཡཱ ཝུཏྟཔྤཀཱརེན བྷཱུམིཔུགྒལབྷེདཏོ ཨིདཾ སབྦཾ ཙིཏྟཾ བཧུདྷཱཔི ཙ བཧུཔྤཀཱརམྤི ཙ ཧོཏི. ཨིཏི གཧཎཾ ཝིབྷཱཝིནཱ ཝིཉྙཱཏབྦཾ. སཀྐཱ ཝུཏྟཱནུསཱརེན མཡཱ ཝུཏྟསྶ ཨནུསཱརེན བྷེདོ ཙིཏྟབྷེདོ ཝིབྷཱཝིནཱ ཉཱཏུཾ ཝིཛཱནིཏུཾ སཀྐཱ. གནྠཝིཏྠཱརབྷཱིཏེན མཡཱ ཨིདཾ ཙིཏྟཔྤཝཏྟིདཱིཔཀཝཙནཾ སཾཁིཏྟཾ, པུབྦཱཔརཾ ཝིལོཀེཏྭཱ, ཙིནྟེཏྭཱ ཙ པུནཔྤུནཾ ཨཏྠཾ ཨུཔཔརིཀྑིཏྭཱ ཝིབྷཱཝིནཱ གཧེཏབྦཾ.

༢༩༠. ཨིམཉྩཱབྷིདྷམྨཱཝཏཱརཾ སུསཱརཾ, ཝརཾ སཏྟམོཧནྡྷཀཱརཔྤདཱིཔཾ ཨིམཉྩ ཨབྷིདྷམྨཱཝཏཱརཔྤཀརཎཾ སུསཱརཾ སུནྡརསཱརབྷཱུཏཾ ཝརཾ སཏྟཨནྡྷཀཱརསདིསེ མོཧེ པདཱིཔཾ པཛྫོཏཔྤདཱིཔཾ ¶ ཡོ ནརོ སཱདྷུཀཾ ཙིནྟེཏི ཝཱཙེཏིཔི, ཏཾ ནརཾ རཱགདོསཱ ཙིརཾ ཙིརཀཱལཾ ནོཔཡནྟི ན ཨུཔགཙྪནྟི.

ཨིཏི ཨབྷིདྷམྨཱཝཏཱརཊཱིཀཱཡ

བྷཱུམིཔུགྒལཙིཏྟུཔྤཏྟིནིདྡེསཝཎྞནཱ ནིཊྛིཏཱ.

པཉྩམོ པརིཙྪེདོ.

༦. ཚཊྛོ པརིཙྪེདོ

ཨཱརམྨཎཝིབྷཱགཝཎྞནཱ

༢༩༡.

ཨེཏེསཾ པན ཙིཏྟཱནཾ, ཨཱརམྨཎམིཏོ པརཾ;

དསྶཡིསྶཱམཧཾ ཏེན, ཝིནཱ ནཏྠི ཧི སམྦྷཝོ.

ཨིཏོ པརཾ ཨིཏོ པརིཙྪེདཏོ པརཾ ཨཧཾ ཨེཏེསཾ པན ཙིཏྟཱནཾ ཨཱརམྨཎཾ དསྶཡིསྶཱམི. ཧི ཀསྨཱ? ཏེན ཝིནཱ ཏཾ ཨཱརམྨཎཾ ཝཛྫེཏྭཱ ཙིཏྟཱནཾ སམྦྷཝོ ནཏྠི ཡསྨཱ ཀཱརཎཱ, ཏསྨཱ ཀཱརཎཱ དསྶཡིསྶཱམི.

༢༩༢.

རཱུཔཾ ¶ སདྡཾ གནྡྷཾ རསཾ, ཕོཊྛབྦཾ དྷམྨམེཝ ཙ;

ཚདྷཱ ཨཱརམྨཎཾ ཨཱཧུ, ཚལཱ༹རམྨཎཀོཝིདཱ.

ཚལཱ༹རམྨཎེསུ ཚེཀཱ པཎྜིཏཱ ཨཱརམྨཎཾ ཚདྷཱ ཚཔྤཀཱརཾ ཨཱཧུ ཀཐེསུཾ.

༢༩༣. ཏཏྠ བྷཱུཏེ ཨུཔཱདཱཡ. ཏཏྠ ཏེསུ ཨཱརམྨཎེསུ བྷཱུཏེ ཨུཔཱདཱཡ བྷཱུཏེ པཊིཙྩ ཝཎྞོ ཙཏུསམུཊྛིཏོ ¶ ཀམྨཙིཏྟཨུཏུཨཱཧཱརསངྑཱཏེཧི ཙཏཱུཧི པཙྩཡེཧི སམུཊྛིཏོ ནིབྦཏྟོ ནིདསྶནེན སཧ པཝཏྟོ པཊིགྷེན སཧ པཝཏྟོ རཱུཔཱརམྨཎསཉྙིཏོ.

༢༩༤. དུཝིདྷོཔི སམུདྡིཊྛོ, སདྡོ ཙིཏྟོཏུསམྦྷཝོ སདྡོ དུཝིདྷོཔི མུནིནཱ སམུདྡིཊྛོ ཙིཏྟོཏུསམྦྷཝོ, སཝིཉྙཱཎཀསདྡོཝ ཙིཏྟསམུཊྛིཏོ ཧོཏི. ཀཐཾ? ཝཙཱིབྷེདཀཙིཏྟེན བྷཱུཏཱཡ ཛཱཏཱཡ བྷཱུམིཡཱ པཐཝཱིདྷཱཏུཡཱ ཝིཀཱརཏཱ པཐཝཱིལཀྑཎབྷཱཝཏོ ཨཏིཐདྡྷལཀྑཎཏཱ ཝིཀཱརཏཱ ནཱམ. སཱ ཝཙཱིཝིཉྙཏྟི ཝིཉྙཱཡཏཱིཏི ཝིཉྙཏྟིཡཱ ཨུཔཱདིཎྞགྷཊྚནསྶ ཀམྨཛཔཐཝཱིདྷཱཏུཡཱ གྷཊྚནསྶ ཀཱརཎཾ ཙིཏྟཛཔཐཝཱིདྷཱཏུཡཱ ཀམྨཛཔཐཝཱིདྷཱཏུཡཱ གྷཊྚནཉྩ སདྡོ ཙ ཨཔུབྦཾ ཨཙརིམཾ ཧོཏི.

༢༩༥. ཨཝིཉྙཱཎཀསདྡོ ཡོ སོ ཨཝིཉྙཱཎཀསདྡོ ཨུཏུསམུཊྛིཏོ ཧོཏི. ཨཡཾ དུཝིདྷོཔི སདྡོ སདྡཱརམྨཎཏཾ གཏོ སདྡཱརམྨཎབྷཱཝཾ པཏྟོ.

༢༩༦. དྷརཱིཡཏཱིཏི གཙྪནྟོ གཙྪནྟོ ཛནེཧི དྷརཱིཡཏེཏི གནྡྷོ. གམུ སཔྤ གཏིམྷི, དྷར དྷཱརཎེ. སཱུཙནཏོ ཨཏྟནོ སཱདྷཱརཎསྶ པུཔྥཱདིནོ ཝཏྠུསྶ པཀཱསནཏོཔི ཝཱ གནྡྷོ ནཱམ. གནྡྷ སཱུཙནེ. ཨཡཾ གནྡྷོ ཙཏཱུཧི སམུཊྛཱནཾ ཨེཏསྶཱཏི ཙཏུསམུཊྛཱནོ. གནྡྷཱརམྨཎསམྨཏོ.

༢༩༧. རསམཱནཱ ¶ རསནྟཱིཏི, རསོཏི པརིཀིཏྟིཏོ ཛནཱ རསམཱནཱ ཡཾ དྷམྨཛཱཏཾ རསནྟི ཨནུབྷཝནྟི, ཨིཏི ཡསྨཱ ཀཱརཎཱ, ཏསྨཱ ཀཱརཎཱ རསོ ཨིཏི རསོ ནཱམ པཎྜིཏེཧི པརིཀིཏྟིཏོ, སོ རསོ ཙཏུསམྦྷཱུཏོ རསཱརམྨཎནཱམཀོ.

༢༩༨. ཕུསཱིཡཏཱིཏི ཕོཊྛབྦཾ ཡཾ དྷམྨཛཱཏཾ ཛནེཧི ཕུསཱིཡཏཱིཏི ཏསྨཱ ཕོཊྛབྦཾ, པཐཝཱིཏེཛཝཱཡཝོ. ཏཾ ཕོཊྛབྦཾ ཙཏུསམྦྷཱུཏཾ ཕོཊྛབྦཱརམྨཎཾ མཏཾ.

༢༩༩. སབྦཾ ནཱམཉྩ རཱུཔཉྩ, ཧིཏྭཱ རཱུཔཱདིཔཉྩཀཾ རཱུཔཱདིཔཉྩཀཾ ཧིཏྭཱ སབྦཾ ནཱམཉྩ ཙིཏྟཙེཏསིཀནིབྦཱནནཱམཉྩ རཱུཔཉྩ པཉྩཔསཱདསུཁུམརཱུཔཉྩ ལཀྑཎཱནི ཙ ཨནིཙྩདུཀྑཨནཏྟལཀྑཎཱནི ཙ པཉྙཏྟི ཙ དྷམྨཱརམྨཎསཉྙིཏཾ.

༣༠༠. ཚཱརམྨཎཱནི ¶ ལབྦྷནྟི, ཀཱམཱཝཙརབྷཱུམིཡཾ ཀཱམཱཝཙརབྷཱུམིཡཾ ཚཱརམྨཎཱནི ལབྦྷནྟི. ཏཱིཎི རཱུཔཱཝཙརེ རཱུཔསདྡདྷམྨཱརམྨཎཝསེན ལབྦྷནྟི. ཨརཱུཔེ པན ཨེཀེཀཾ དྷམྨཱརམྨཎཾ ལབྦྷཏི.

༣༠༡-༣. ཁཎཝཏྠུཔརིཏྟཏྟཱ, ཨཱཔཱཐཾ ན ཝཛནྟི ཡེ ཡེ རཱུཔཱདཡོ པཉྩ ཝིསཡཱ ཁཎཝཏྠུཔརིཏྟཏྟཱ པཉྩཱརམྨཎཱནཾ ཁཎསྶ པརིཏྟཏྟཱ མནྡཏྟཱ ཏེསཾ ཨཔྤཱཡུཀཏྟཱ ཝཏྠུཔརིཏྟཏྟཱ པཉྩཱརམྨཎཱནཾ ཨཏིཁུདྡཀཝཏྠུཀཏྟཱ ཨཱཔཱཐཾ པཉྩདྭཱརེསུ པཱཀཊབྷཱཝཾ ན ཝཛནྟི, པཉྩཔསཱདེསུ གྷཊྚནཀིཙྩཾ ན སཱདྷེནྟི, ཏེ རཱུཔཱདཡོ པཉྩ ཝིསཡཱ དྷམྨཱརམྨཎཾ ཧོནྟི. ཨིཏི ཡེསཾ ཨེཀཙྩཱནཾ ཨཱཙརིཡཱནཾ མཏཾ ཧོཏི. ཀིརཱཏི ཨནུསྶཝནཏྠེ ནིཔཱཏོ. ཏེ པཊིཀྑིཔིཏབྦཱཝ ཏེ ཨེཝཾ ཝཱདིནོ ཨེཀཙྩེ ཨཱཙརིཡཱ པཊིཀྑིཔིཏབྦཱ, མཡཱ པཊིསེདྷིཏབྦཱ. ཀསྨཱ? ཙཀྑུཝིཉྙཱཎཾ སོཏཝིཉྙཱཎསྶ གོཙརབྷཱུཏཾ སདྡཾ ན པཊིཨནུབྷོཏི, སོཏཝིཉྙཱཎཾ ཙཀྑུཝིཉྙཱཎསྶ གོཙརབྷཱུཏཾ ¶ རཱུཔཾ ན པཊིཨནུབྷོཏི. ཨིཏི ཨཉྙམཉྙསྶ གོཙརཾ ནེཝ པཙྩནུབྷོནྟཱནཾ ཏེསཾ པཉྩནྣཾ ཙཀྑུཝིཉྙཱཎཱདཱིནཾ ཝིཉྙཱཎཱནཾ ཏཉྩ གོཙརཾ མནོདྷཱཏུམནོཝིཉྙཱཎདྷཱཏུསངྑཱཏཾ ཛཝནཾ པན པཙྩནུབྷོཏི. ཨིཏི ཝཙནསྶ བྷགཝཏཱ ཝུཏྟཏྟཱ པཊིཀྑིཔིཏབྦཱ. རཱུཔཱདཡོ པན ཝིསཡཱ རཱུཔཱདིཔཉྩཱརམྨཎཱནི ཨེཝ ཧོནྟི.

༣༠༤-༦. དིབྦཙཀྑཱདིཉཱཎཱནཾ, རཱུཔཱདཱིནེཝ གོཙརཱ ཏཱནི རཱུཔཱདཱིནི ཨེཝ གོཙརཱ དིབྦཙཀྑཱདིཉཱཎཱནཾ ཨནཱཔཱཐགཏཱནཾ ཨེཝ པཱཀཊབྷཱཝཾ ཨཔྤཏྟཱནེཝ. ཨིཏིཔི ཝཙནཾ ཝུཏྟཾ ན ཡུཛྫཏི. ཡཾ དྷམྨཛཱཏཾ རཱུཔཱརམྨཎཾ བྷཝནྟཾ, ཏཾ དྷམྨཛཱཏཾ ཀཐཾ ཀེན པཀཱརེན དྷམྨཱརམྨཎཾ བྷཝེཡྻ? ཨེཝཾ སཏི རཱུཔཱརམྨཎསྶ དྷམྨཱརམྨཎཏྟེ སཏི ཨེཏེསཾ རཱུཔཱརམྨཎདྷམྨཱརམྨཎཱནཾ ནིཡམོཔི ཀཐཾ བྷཝེ ཀེན པཀཱརེན བྷཝེཡྻ? སབྦཾ ཨཱརམྨཎཾ ཨེཏཾ ཨེཏཾ སབྦཾ ཨཱརམྨཎཾ ཚབྦིདྷཾ ཚཔྤཀཱརཾ བྷགཝཏཱ སམུདཱིརིཏཾ. ཏཾ པརིཏྟཏྟིཀཱདཱིནཾ ཝསེན བཧུཔྤཀཱརེཧི མཏཾ.

༣༠༧. སབྦོ ཀཱམཝིཔཱཀོ ཙ སབྦོ ཏེཝཱིསཏིཀཱམཝིཔཱཀོ ཙ ཀྲིཡཱཧེཏུདྭཡམྤི ཙ མནོདྷཱཏུཧསིཏུཔྤཱདཝསེན ཀིརིཡཱཧེཏུདྭཡམྤི ཙཱཏི པཉྩཝཱིསཏི ཙིཏྟུཔྤཱདཱ ཨེཀནྟཔརིཏྟཱརམྨཎཱ ཨེཀནྟཀཱམཱཝཙརཱརམྨཎཱ སིཡུཾ བྷཝེཡྻུཾ.

༣༠༨-༡༠. ཨིཊྛཱདིབྷེདཱ པཉྩེཝ, རཱུཔསདྡཱདཡོ པན དྭིཔཉྩནྣཾ ཝིཉྙཱཎཱནཾ པཊིཔཱཊིཡཱ ཨནུཀྐམེན གོཙརཱ ཧོནྟི. རཱུཔཱདིཔཉྩཀཾ སབྦཾ, མནོདྷཱཏུཏྟཡསྶ ཏུ མནོདྷཱཏུཏྟཡསྶ པན སབྦཾ ¶ རཱུཔཱདིཔཉྩཀཾ ཨཱརམྨཎཾ ཧོཏི, ཨེཏེསཾ ཏེརསནྣཾ པན ཙིཏྟཱནཾ རཱུཔཀྑནྡྷོཝ གོཙརོ ཨཱརམྨཎཾ ཧོཏི. ནཱརཱུཔཾ ནཱམཾ ཨཱརམྨཎཾ ན ཀརོནྟི. ན ཙ པཉྙཏྟིཾ པཉྙཏྟིཾ ཨཱརམྨཎཾ ན ཀརོནྟི. ནཱཏཱིཏཾ ཨཏཱིཏཾ ཨཱརམྨཎཾ ན ཀརོནྟི ¶ . ན ཙནཱགཏཾ ཨནཱགཏཾ ཨཱརམྨཎཾ ན ཀརོནྟི ཨེཝ. ཧི སཙྩཾ ཝཏྟམཱནོ གོཙརོ ཨེཏེསཾ དྭིཔཉྩཝིཉྙཱཎཱནཾ, མནོདྷཱཏུཏྟཡསྶ ཙཱཏི ཏེརསནྣཾ ཙིཏྟཱནཾ ཏཾ ཨཱརམྨཎཾ ཝཏྟམཱནཾ ཨེཝ པཙྩུཔྤནྣཾ ཨེཝ.

༣༡༡. ཏེརསེཏཱནི ཙིཏྟཱནི, ཛཱཡནྟེ ཀཱམདྷཱཏུཡཾ ཨེཏཱནི ཏེརས ཙིཏྟཱནི ཀཱམདྷཱཏུཡཾ ཛཱཡནྟི, རཱུཔཱཝཙརེ པུཉྙཛཱནི ཙཀྑུསོཏཝིཉྙཱཎསམྤཊིཙྪནཱནི, ཀིརིཡཱམནོདྷཱཏུ ཙཱཏི ཙཏྟཱརི ཙིཏྟཱནི ཛཱཡནྟི. ཨརཱུཔིསུ ཨརཱུཔབྷཱུམཱིསུ ནེཝ ཀིཉྩིཔི ཨེཀམྤི ཙིཏྟཾ ནེཝ ཛཱཡཏི.

༣༡༢-༣. མཧཱཔཱཀཱནམཊྛནྣཾ ཨཊྛནྣཾ མཧཱཝིཔཱཀཱནཾ པཝཏྟིཡཾ ཚསུ དྭཱརེསུ ཏདཱརམྨཎཀིཙྩཱནཾ རཱུཔཱདིཚཔརིཏྟཱནི གོཙརཱ. སནྟཱིརཎཏྟཡསྶཔི པཝཏྟིཡཾ པཉྩདྭཱརེ སནྟཱིརཎཏྟཡཀིཙྩསྶ, ཚདྭཱརེསུ ཏདཱལམྦཎཀིཙྩསྶ ཙ རཱུཔཱདིཚཔརིཏྟཱནི གོཙརཱ. རཱུཔཱདཡོ པརིཏྟཱ ཚ, ཧསིཏུཔྤཱདགོཙརཱ ཧསིཏུཔྤཱདསྶ རཱུཔཱདཡོ ཚ པརིཏྟཱ གོཙརཱ ཧོནྟི. པཉྩདྭཱརེ པཊུཔྤནྣཱ པཉྩསུ དྭཱརེསུ ཡེ གོཙརཱ པཙྩུཔྤནྣཱ, མནོདྭཱརེ ཏིཀཱལིཀཱ ཡེ གོཙརཱ ཏིཀཱལིཀཱ ཏཱིསུ ཀཱལེསུ ནིཡུཏྟཱ.

༣༡༤-༥. དུཏིཡཱརུཔྤཙིཏྟཉྩ, ཙཏུཏྠཱརུཔྤམཱནསཾ ཀུསལཝིཔཱཀཀིརིཡཱཝསེན ཚབྦིདྷཾ ཙིཏྟཾ མཧགྒཏགོཙརཾ ནིཡཏཾ ནིཡཏཱརམྨཎཾ ཧོཏི, ཏཾ ཚབྦིདྷཾ ཙིཏྟཾ མཧགྒཏགོཙརཾ པུབྦེ ཨཏྟནཱ ཨདྷིགཏཨཱཀཱསཱནཉྩཱཡཏནཨཱཀིཉྩཉྙཱཡཏནཀུསལཱརམྨཎཾ, ཏེསུ དྭེ དུཏིཡཙཏུཏྠཱརུཔྤཔཱཀཱ ‘‘ཡསྶ ཡསྶ ཀུསལཛྷཱནསྶ ཡཾ ཡཾ ཨཱརམྨཎཾ གཧེཏྭཱ བྲཧྨལོཀེ པཊིསནྡྷི ཧོཏཱི’’ཏི ཝཙནཏོ སཀསཀཀུསལསྶ ཨཱརམྨཎཾ ཨེཝ ཏེསཾ ཝིཔཱཀཱནཾ ཨཱརམྨཎཾ ཧོཏི. ནིབྦཱནཱརམྨཎཏྟཱ ཧི, ཨེཀནྟེན ཨནཉྙཏོ ཨཊྛཱནཱསཝཙིཏྟཱནཾ ཨཔྤམཱཎོཝ ནིབྦཱནཾ ཨེཝ གོཙརཾ ཨཱརམྨཎཾ ཧོཏི ¶ . ཧི ཀསྨཱ ཀཱརཎཱ? ནིབྦཱནཱརམྨཎཏྟཱ, ན ཨཉྙཏོ ཨཱརམྨཎཏོ.

༣༡༦-༣༢༠. ཙཏྟཱརོ ཉཱཎཧཱིནཱ ཙ, ཀཱམཱཝཙརཔུཉྙཏོ ཀཱམཱཝཙརཀུསལཝསེན ཙཏྟཱརོ ཉཱཎཧཱིནཱ ཙ ཀྲིཡཏོ ཀིརིཡཝསེན ཙཏྟཱརོ ཉཱཎཧཱིནཱ ཙ དྭཱདསཱཀུསལཱནི ཙ ཏེ པརིཏྟཱརམྨཎཱ ཙེཝ མཧགྒཏགོཙརཱ ཙ, ཏེ ན ཝཏྟབྦཱ ཙ ཧོནྟི. ཀསྨཱ? པཉྙཏྟཱརམྨཎཏྟཱ ¶ . ཙཏྟཱརོ ཉཱཎསཾཡུཏྟཱ, པུཉྙཏོ ཀུསལཝསེན ཙཏྟཱརོ ཉཱཎསམྤཡུཏྟཱ, ཀྲིཡཏོ ཀིརིཡཝསེན ཙཏྟཱརོ ཉཱཎསམྤཡུཏྟཱ ཙ ཏཐཱ ཨབྷིཉྙཱདྭཡཉྩ ཀིརིཡཱཝོཊྛབྦནམྤི ཙ ཨེཀཱདསནྣཾ ཨེཏེསཾ ཙིཏྟཱནཾ གོཙརོ པརིཏྟམཧགྒཏཨཔྤམཱཎཝསེན ཏིཝིདྷོ ཧོཏི. ཨིམེ ཨེཀཱདས ན ཝཏྟབྦཱཔི ཧོནྟི. ཀསྨཱ? པཉྙཏྟཱརམྨཎཏྟཱ. ཡཱནི ཝུཏྟཱཝསེསཱནི ཝུཏྟཏོ ཙིཏྟཏོ སེསཱནི ཡཱནི ཙིཏྟཱནི, ཏཱནི ན ཝཏྟབྦཱརམྨཎཱནཱིཏི ཝིབྷཱཝིནཱ ཝིཉྙེཡྻཱནི.

པརིཏྟཱརམྨཎཏྟིཀཾ སམཏྟཾ.

༣༢༡.

དུཏིཡཱརུཔྤཙིཏྟཉྩ, ཙཏུཏྠཱརུཔྤམཱནསཾ;

ཚབྦིདྷཾ པན ཨེཀནྟཨཏཱིཏཱརམྨཎཾ སིཡཱ.

༣༢༢-༦. ཝིཉྙཱཎཱནཾ དྭིཔཉྩནྣཾ དྭིནྣཾ པཉྩཝིཉྙཱཎཱནཾ, མནོདྷཱཏུཏྟཡསྶ ཙ ཏེརསནྣཾ ཙིཏྟཱནཾ གོཙརཱ རཱུཔཱདཡོ པཉྩ དྷམྨཱ པཙྩུཔྤནྣཱཝ, ཨཊྛ ཀཱམམཧཱཝིཔཱཀཱ ཏདཱརམྨཎཀིཙྩཝསེན ཨཏཱིཏཱནཱགཏཔཙྩུཔྤནྣགོཙརཱ, ཙུཏིཀིཙྩཝསེན ཨཏཱིཏཱརམྨཎཱ, པཊིསནྡྷིབྷཝངྒཀིཙྩཝསེན པཙྩུཔྤནྣཱཏཱིཏཱརམྨཎཱ. སོམནསྶསནྟཱིརཎཾ སནྟཱིརཎཀིཙྩཝསེན པཙྩུཔྤནྣཱརམྨཎཾ. ཏདཱརམྨཎཀིཙྩཝསེན པཙྩུཔྤནྣཱནཱགཏཱཏཱིཏཱརམྨཎཾ. སེསསནྟཱིརཎདྭཡཾ སནྟཱིརཎཀིཙྩཝསེན པཙྩུཔྤནྣཱརམྨཎཾ ¶ , ཏདཱརམྨཎཀིཙྩཝསེན པཙྩུཔྤནྣཱནཱགཏཱཏཱིཏཱརམྨཎཾ, ཙུཏིཀིཙྩཝསེན ཨཏཱིཏཱརམྨཎཾ, པཊིསནྡྷིབྷཝངྒཀིཙྩཝསེན པཙྩུཔྤནྣཱཏཱིཏཱརམྨཎཾ. ཧསིཏུཔྤཱདཙིཏྟཾ ཛཝནཀིཙྩཝསེན པཙྩུཔྤནྣཱཏཱིཏཱནཱགཏགོཙརཾ. ཨིཏི ཨེཏེ དྭཱདས མཱནསཱ པན སིཡཱཏཱིཏཱརམྨཎཱ ཨཏཱིཏཱརམྨཎཱ སིཡུཾ. པཙྩུཔྤནྣཱནཱགཏགོཙརཱ པཙྩུཔྤནྣཱརམྨཎཱ ཨནཱགཏཱརམྨཎཱ སིཡུཾ. ཀཱམེ ཝཱིསཏི ཀུསལཱཀུསལཱ ཀྲིཡཏོ ཀིརིཡཝསེན ཀཱམེ ནཝ མཱནསཱ, ཝོཊྛབྦཾ ཝོཊྛབྦནཀིཙྩཝསེན པཙྩུཔྤནྣཱརམྨཎཾ, ཨཱཝཛྫནཀིཙྩཝསེན ཏིཀཱལཱརམྨཎཾ. མཧཱཀིརིཡམཱནསཱ ཛཝནཀིཙྩཝསེན ཏིཀཱལཱརམྨཎཱ, སནྟེ པཉྙཏྟིཀཱལེ ནཝཏྟབྦཱརམྨཎཱ. དྭེ ཨབྷིཉྙཱམཱནསཱཔི ཨབྷིཉྙཱཀིཙྩཝསེན ཨཏཱིཏཱདིགོཙརཱ སིཡུཾ. ཨིམེ མཱནསཱ པཉྙཏྟིཀཱལེཔི སནྟེ ནཝཏྟབྦཱ བྷཝནྟི. རཱུཔཱརཱུཔབྷཝེསུ མཡཱ ཝུཏྟཏོ སེསཱནི སབྦཱནི ཙིཏྟཱནི ཨཏཱིཏཱརམྨཎཱདིནཱ ཨཏཱིཏཱརམྨཎཱདིཝསེན པཎྜིཏེན ན ཝཏྟབྦཱནི ན ཀཐིཏབྦཱནི ཧོནྟི ཨེཝ, པཉྙཏྟཱརམྨཎཱནི ཨེཝ ཧོནྟཱིཏི ཨཏྠོ.

༣༢༧. ཀཱམཏོ ¶ ཙ ཀྲིཡཱ པཉྩ ཀཱམཱཝཙརཝསེན པཉྩ ཀིརིཡཱ, རཱུཔཏོ རཱུཔཱཝཙརཝསེན པཉྩམཱི ཀྲིཡཱ ཨབྷིཉྙཱཙིཏྟཾ, ཨེཏེསཾ ཚནྣཾ ཙིཏྟཱནཾ ནཏྠི ཀིཉྩི ཨེཀམྤི ཨགོཙརཾ ཨནཱརམྨཎཾ, སབྦཱརམྨཎནྟི ཨཏྠོ. ‘‘པཉྩམཱི ཀྲིཡཱ’’ཏི ཝཙནཾ ཨབྷིཉྙཱཙིཏྟཝསེན ཝུཏྟཾ. སུདྡྷཛྷཱནསྶ པཉྩམརཱུཔཀིརིཡསྶ པཉྙཏྟཱརམྨཎཾ ཨེཝཱཏི ཝེདིཏབྦཾ.

༣༢༨. ནིབྦཱནཉྩ ཙཏུབྦིདྷཾ ཕལཾ, མགྒཾ རཱུཔཉྩ ཨརཱུཔཾ ཙིཏྟཙེཏསིཀསངྑཱཏཾ ནཱམཉྩ གོཙརཾ ཀཱཏུཾ ཡཱནི ཙིཏྟཱནི སཀྐོནྟི, ཏཱནི ཙིཏྟཱནི མེ ཝད, ཨཱཙརིཡ, ཏཱནི མཡ྄ཧཾ ཀཐེཧི.

༣༢༩-༣༠. ཙཏྟཱརོ ཉཱཎསཾཡུཏྟཱ, པུཉྙཏོ པུཉྙཝསེན ཙཏྟཱརོ ཉཱཎསམྤཡུཏྟཱ, ཀྲིཡཏོ ཏཐཱ ཀིརིཡཝསེན ¶ ཙཏྟཱརོ ཉཱཎསམྤཡུཏྟཱ, དྭེ ཨབྷིཉྙཱམཱནསཱ, ཀིརིཡཱཝོཊྛབྦནམྤི ཙཱཏི ཨེཀཱདས ཙིཏྟཱནི ནིབྦཱནཉྩ ཕལཉྩ མགྒཉྩ རཱུཔཉྩ ཨརཱུཔཾ ནཱམཉྩ གོཙརཾ ཀཱཏུཾ སཀྐོནྟི.

༣༣༡-༤. ཙིཏྟེསུ པན སབྦེསུ ཡཱནི ཙིཏྟཱནི ཨརཧཏྟཕལཾ ཨརཧཏྟམགྒཾ གོཙརཾ ཀཱཏུཾ སཀྐོནྟི, ཏཱནི ཀཏི ཙིཏྟཱནི མེ ཝད ཏཱནི མཡ྄ཧཾ ཏྭཾ ཀཐེཧི. སབྦེསུ པན ཙིཏྟེསུ, ཚ ཙ ཙིཏྟཱནི མེ སུཎ, བྷོ བྷདྡམུཁ, ཏྭཾ མཡ྄ཧཾ ཝཙནཾ སུཎོཧི, སབྦེསུ པན ཙིཏྟེསུ ཚ ཙིཏྟཱནི ཨརཧཏྟཕལཾ ཨརཧཏྟམགྒཾ གོཙརཾ ཀཱཏུཾ སཀྐོནྟི. ཙཏྟཱརོ ཉཱཎསཾཡུཏྟཱ, ཀིརིཡཱ ཙ ཝོཊྛབྦནམྤི ཙ ཀིརིཡཱབྷིཉྙཱམནོ ཙཱཏི ཚ ཙ ཙིཏྟཱནི གོཙརཾ ཀཱཏུཾ སཀྐོནྟི. པུཉྙཏོ པུཉྙཝསེན ཙཏྟཱརོ ཉཱཎསམྤཡུཏྟཱ, པུཉྙཏོ པུཉྙཝསེན ཨབྷིཉྙཱཙིཏྟཉྩ ཨརཧཏྟཕལཾ མགྒཾ གོཙརཾ ཀཱཏུཾ ན སཀྐོནྟི.

༣༣༥-༨. ཨརཧཏོ ཁཱིཎཱསཝསྶ མགྒཙིཏྟཾ ཕལམཱནསཾ ཝཱ པུཐུཛྫནཱ ཝཱ སེཀྑཱ ཝཱ ཝིཛཱནིཏུཾ ན སཀྐོནྟི. ཀསྨཱ ཀཱརཎཱ? པུཐུཛྫནོ སོཏཱཔནྣསྶ མཱནསཾ ན ཛཱནཱཏི, སོཏཱཔནྣོ སཀདཱགཱམིསྶ མཱནསཾ ན ཛཱནཱཏི, སཀདཱགཱམཱི ཨནཱགཱམིསྶ མཱནསཾ ན ཛཱནཱཏི, ཨནཱགཱམཱི ཨརཧནྟསྶ མཱནསཾ ན ཛཱནཱཏི. ཧེཊྛིམོ ཧེཊྛིམོ པུགྒལོ ཨུཔརཱུཔརི ཋིཏསྶ པུགྒལསྶ མཱནསཾ ནེཝ ཛཱནཱཏི, ཨུཔརཱུཔརི ཋིཏོ པུགྒལོཔི ཧེཊྛིམསྶ ཧེཊྛིམསྶ པུགྒལསྶ མཱནསཾ ཛཱནཱཏི.

༣༣༩-༣༤༢. ཡོ ¶ དྷམྨོ ཡསྶ དྷམྨསྶ ཨཱརམྨཎཾ ཧོཏི, ཏཾ ཨཱརམྨཎཾ ཨེཀཾ ཨེཀཾ ཨུདྡྷརིཏྭཱ ཨིཏོ པརཾ པཝཀྑཱམི. ཀུསལཱརམྨཎཾ ཀཱམེ ཀཱམེ ཨཊྛཝིདྷཾ ཀུསལཾ ཨཊྛཝིདྷསྶ ཀཱམཱཝཙརཀུསལསྶ ཨཱརམྨཎཾ ཧོཏི. ཀཐཾ ¶ ? པུབྦེཝ ཀཏཾ ཨཊྛཝིདྷཾ མཧཱཀུསལཾ པཙྪཱ སོམནསྶསཧགཏཉཱཎསམྤཡུཏྟཙིཏྟདྭཡེན ཝཱ སོམནསྶསཧགཏཉཱཎཝིཔྤཡུཏྟཙིཏྟདྭཡེན ཝཱ ཨུཔེཀྑཱསཧགཏཉཱཎསམྤཡུཏྟདྭཡེན ཝཱ ཨུཔེཀྑཱསཧགཏཉཱཎཝིཔྤཡུཏྟདྭཡེན ཝཱ ཨནུསྶརཎཀཨཱལཱདཱིསུ ཏསྶ ཨཊྛཝིདྷསྶ ཀུསལསྶ ཛཝནཀིཙྩཝསེན ཨཱརམྨཎཾ ཧོཏི, ཝིཔྤཊིསཱརཀཱལཱདཱིསུ དྭཱདསཝིདྷསྶ ཨཀུསལསྶ ཨཱརམྨཎཾ ཧོཏི, ཀུསལསྶ ཨབྷིཉྙཱམཱནསསྶ ཙ ཀིརིཡསྶ ཨབྷིཉྙཱམཱནསསྶ ཙ ཨཱརམྨཎཾ ཧོཏི, ཨེཀཱདསཝིདྷསྶ ཀཱམཱཝཙརཝིཔཱཀསྶ ཏདཱརམྨཎཝསེན ཨཱརམྨཎཾ ཧོཏི. ཏཐཱ ཀཱམཀྲིཡསྶཱཏི ཛཝནཀིཙྩཝསེན ཧསནསྶ ཨཱཝཛྫནཀིཙྩཝསེན ཝོཊྛབྦནསྶ ཛཝནཀིཙྩཝསེན མཧཱཀིརིཡསྶ ཨཱརམྨཎཾ ཧོཏི, ཨེཏེསཾ ཚནྣཾ རཱསཱིནཾ ཨཱརམྨཎཾ སིཡཱ བྷཝེཡྻ. རཱུཔཱཝཙརཔུཉྙཱནི པཉྩ ཏཏོ ཚརཱསིཏོ ཀཱམཝིཔཱཀཾ ཝཛྫེཏྭཱ པཉྩནྣཾ རཱསཱིནཾ ཨཱརམྨཎཱནི ཧོནྟི. ཏདཱ ལོབྷམཱུལམོཧམཱུལཝསེན ཨཏྟནཱ པཊིལདྡྷཛྷཱནཱནཾ ཨནུསྶརཎཀཱལེ ཏསྶ དསཝིདྷསྶ ཨཀུསལསྶ ཨཱརམྨཎཾ ཧོཏི, ཏིཧེཏུཀཔཊིསནྡྷིནོ སཏྟསྶ ཛྷཱནཏོ པརིཧཱིནསྶ ཛྷཱནཾ པཙྩཝེཀྑཏོ ཛྷཱནཱརམྨཎཾ དོམནསྶཡུཏྟཾ ཧོཏི, ཏདཱ ཏསྶ པཊིགྷདྭཡསྶ ཨཱརམྨཎཾ ཧོཏི. ཀཱམཀྲིཡསྶཱཏི ཨེཀནྟཔརིཏྟཱརམྨཎཱནི ཀིརིཡཱམནོདྷཱཏུཧསནཱནི ཝཛྫེཏྭཱ ཨཱཝཛྫནཀིཙྩཝསེན ཝོཊྛབྦནསྶ, ཛཝནཀིཙྩཝསེན མཧཱཀིརིཡསྶ ཙ ཨཱརམྨཎཾ ཧོཏི.

༣༤༣. ཨཱརུཔྤཀུསལཉྩཱཔི, ཏེབྷཱུམཀུསལསྶ ཙ མཧཱཀུསལསྶ ཙ ཨབྷིཉྙཱཀིཙྩཝསེན པཉྩམརཱུཔཀུསལསྶ ཙ དུཏིཡཙཏུཏྠཨརཱུཔཀུསལསྶ ཙ ཏེབྷཱུམཀཀྲིཡསྶཱཔི ཝོཊྛབྦནསྶ མཧཱཀིརིཡསྶ ཙ ཨབྷིཉྙཱཀིཙྩཝསེན པཉྩམརཱུཔཀིརིཡསྶ ཙ དུཏིཡཙཏུཏྠཱརུཔྤཀིརིཡསྶ ཙ ཨཱརམྨཎཾ ཧོཏི, དུཏིཡཱརུཔྤཀིརིཡསྶ ཙ པཋམཱརུཔྤཀིརིཡཱཡ ཨཱརམྨཎེན ¶ བྷཝིཏབྦཾ, ཙཏུཏྠཱརུཔྤཀིརིཡསྶ ཙ ཏཏིཡཱརུཔྤཀིརིཡཱཡ ཨཱརམྨཎེན བྷཝིཏབྦཾ, ཨེཝཉྩ སཏི ཀཐཾ པཋམཱརུཔྤཀུསལཾ དུཏིཡཱརུཔྤཀིརིཡསྶ ཨཱརམྨཎཾ ཧོཏི, ཏཏིཡཱརུཔྤཀུསལཉྩ ཙཏུཏྠཱརུཔྤཀིརིཡསྶ ཨཱརམྨཎཾ ཧོཏཱིཏི ཙེ ཝཏྟབྦཾ, ཡདཱ པུཐུཛྫནཡོགཱི ཝཱ སེཀྑོ ཝཱ ཡོགཱི རཱུཔསམཱཔཏྟིཾ སམཱཔཛྫིཏྭཱ ཏཏོ ཝུཊྛཧིཏྭཱ ཨཱཀཱསཱནཉྩཱཡཏནསངྑཱཏཾ པཋམཱརུཔྤསམཱཔཏྟིཾ སམཱཔཛྫིཏྭཱ ཝཱིཏརཱགོ ཧུཏྭཱ ཨཏྟནཱ ཨདྷིགཏཱ སམཱཔཏྟིཡོ གཧེཏྭཱ པུཐུཛྫནསེཀྑཀཱལེ ཨཏྟནཱ ཨནདྷིགཏཾ དུཏིཡཾ ཨརཱུཔསམཱཔཏྟིཾ སམཱཔཛྫི, ཏདཱ ཁཱིཎཱསཝཀཱལེ ¶ སམཱཔཛྫིཏཾ དུཏིཡཾ ཨརཱུཔཀིརིཡཾ པཋམཱརུཔྤཀུསལཾ ཨཱརམྨཎཾ ཀརོཏི, ཨེཝཾ པཋམཱརུཔྤཀུསལཾ དུཏིཡཱརུཔྤཀིརིཡསྶ ཨཱརམྨཎཾ ཧོཏི.

ཡདཱ ཡོགཱི རཱུཔསམཱཔཏྟིཡོ སམཱཔཛྫིཏྭཱ ཏཏོ ཝུཊྛཧིཏྭཱ པཋམཱརུཔྤཀུསལཾ དུཏིཡཱརུཔྤཀུསལཾ ཏཏིཡཱརུཔྤཀུསལཉྩ སམཱཔཛྫིཏྭཱ ཁཱིཎཱསཝོ ཧུཏྭཱ ཨཏྟནཱ ཨདྷིགཏཱ སམཱཔཏྟིཡོ གཧེཏྭཱ ཨཏྟནཱ ཨནདྷིགཏཾ ཙཏུཏྠཾ ཨརཱུཔསམཱཔཏྟིཾ སམཱཔཛྫི, ཏདཱ ཙཏུཏྠཱརུཔྤཀིརིཡཱ ཏཏིཡཱརུཔྤཀུསལཾ ཨཱརམྨཎཾ ཀརོཏི, ཨེཝཾ ཙཏུཏྠཱརུཔྤཀིརིཡསྶ ཏཏིཡཱརུཔྤཀུསལཾ ཨཱརམྨཎཾ ཧོཏི, པཙྪཱ ཁཱིཎཱསཝཀཱལེ སམཱཔཛྫིཏཱ རཱུཔཱརཱུཔསམཱཔཏྟིཡོ ཧོནྟི. ཡཐཱ ཧོཏི, ཏཐཱ ཨེཝ ཨཀུསལསྶཔི ཨཱརམྨཎཾ ཧོཏི.

༣༤༤-༧. ཨརཱུཔཱཝཙརཔཱཀཱནནྟི ཛཱཏིནིདྡྷཱརཎཾ, ཙཏུཏྠདུཏིཡཱནཾ ཨརཱུཔཔཱཀཱནམྤི ཨཱརམྨཎཾ ཧོཏི, ‘‘ཙཏུཏྠདུཏིཡཱན’’ནྟི ཝཏྟབྦེ ཏིཡཱནཾ-སདྡསྶ ལོཔཾ ཀཏྭཱ ‘‘ཙཏུཏྠདཱུ’’ཏི ཝུཏྟཾ, ཏདཱ དྭིནྣཾ ཨརཱུཔཔཱཀཱནཾ པཋམཱརུཔྤཏཏིཡཱརུཔྤཛཝནཱནི ཨཱརམྨཎཱནི ཧོནྟི, ‘‘ཡསྶ ཀུསལསྶ ཛྷཱནསྶ ཡཾ ཨཱརམྨཎཾ གཧེཏྭཱ བྲཧྨལོཀེ པཊིསནྡྷི ཧོཏཱི’’ཏི ཝཙནཏོ སཀསཀཀུསལཱནཾ ཨཱརམྨཎབྷཱུཏཱནི ¶ ཨཱཀཱསཱནཉྩཱཡཏནཨཱཀིཉྩཉྙཱཡཏནཱནི ཏེསཾ དུཏིཡཙཏུཏྠཱརུཔྤཔཱཀཱནཾ ཨཱརམྨཎཱནི ཧོནྟི, ཨེཝཾ ཨརཱུཔཀུསལཾ ཨིམེསཾ ཨཊྛརཱསཱིནཾ ཨཱརམྨཎཔཙྩཡོ ཧོཏི. ཨཔརིཡཱཔནྣཔུཉྙམྤི ཙཏུབྦིདྷལོཀུཏྟརཀུསལམྤི ཀཱམཱཝཙརཏོ ཀཱམཱཝཙརཝསེན ཀུསལསྶ ཉཱཎསམྤཡུཏྟམཧཱཀུསལསྶ ཙ ཀྲིཡསྶ ཝོཊྛབྦནསྶ, ཉཱཎསམྤཡུཏྟཏོ ཀིརིཡསྶ ཙ རཱུཔཏོ རཱུཔཱཝཙརཝསེན པཉྩམསྶ རཱུཔཀུསལསྶ ཙ པཉྩམསྶ རཱུཔཀིརིཡསྶ ཙཱཏི ཙཏུནྣཾ རཱསཱིནཾ ཨཱརམྨཎཾ སདཱ ཧོཏི, ཨཡམེཏྠ ཨདྷིཔྤཱཡོ – སེཀྑཱནཾ ཉཱཎསམྤཡུཏྟམཧཱཀུསལསྶ, ཝོཊྛབྦནསྶ, པཉྩམསྶ རཱུཔཀུསལསྶ ཙ ཏིཝིདྷཾ ལོཀུཏྟརཔུཉྙཾ ཨཱརམྨཎཾ ཧོཏི. ཁཱིཎཱསཝསྶ ཝོཊྛབྦནསྶ, ཉཱཎསམྤཡུཏྟམཧཱཀིརིཡསྶ, པཉྩམསྶ རཱུཔཀིརིཡསྶ ཙ ཨརཧཏྟཔུཉྙཾ ཨཱརམྨཎཾ ཧོཏི. ཡཐཱ ཏཐཱ ཨེཝ སབྦཾ ཨཀུསལཾ ཀཱམཱཝཙརཏོ ཀཱམཱཝཙརཝསེན ཀུསལསྶ མཧཱཀུསལསྶ, ཀྲིཡསྶ ཧསནཝོཊྛབྦནམཧཱཀིརིཡསྶ ཙ རཱུཔཱཝཙརཏོ པན རཱུཔཱཝཙརཝསེན པཉྩམསྶ རཱུཔཀུསལསྶ, པཉྩམསྶ རཱུཔཀིརིཡསྶ ཙ ཨཱརམྨཎཾ ཧོཏི, ཡཐཱ ཏཐཱ ཨེཝ སབྦསྶ ཨཀུསལསྶ ཙ ཀཱམཱཝཙརཝིཔཱཀཱནཾ ཏདཱརམྨཎཀིཙྩཝསེན ཨེཀཱདསནྣཉྩཱཏི ཚནྣཾ རཱསཱིནཾ ཨཱརམྨཎཾ བྷགཝཏཱ ཨཱིརིཏཾ.

༣༤༨-༣༥༢. ཝིཔཱཀཱརམྨཎཾ ¶ ཀཱམེ སབྦཾ ཝིཔཱཀཱརམྨཎཾ ཀཱམཱཝཙརཏོཔི ཀཱམཱཝཙརཝསེནཔི ཀུསལསྶ མཧཱཀུསལསྶ, ཀྲིཡསྶ ཧསནཝོཊྛབྦནམཧཱཀིརིཡསྶ ཙ རཱུཔཱཝཙརཏོ ཙེཝ རཱུཔཱཝཙརཝསེན ཙ ཨེཝ པཉྩམསྶ རཱུཔཀུསལསྶ, པཉྩམསྶ རཱུཔཀིརིཡསྶ ཙ ཀཱམཱཝཙརཔཱཀཱནཾ ཀཱམཱཝཙརཝིཔཱཀཱནཾ ཨེཀཱདསནྣཉྩ ཏཐེཝ ཨཀུསལསྶ ཙ ཚནྣཾ རཱསཱིནཾ ཨཱརམྨཎཾ ཧོཏི. རཱུཔེ ཝིཔཱཀཱརམྨཎཾ ཀཱམཱཝཙརཏོཔི ཙ ཀཱམཱཝཙརཝསེནཔི ཙ ཀུསལསྶ མཧཱཀུསལསྶ ¶ , ཀྲིཡསྶ ཙ ཝོཊྛབྦནམཧཱཀིརིཡསྶ ཙ རཱུཔཱཝཙརཏོ ཙེཝ རཱུཔཱཝཙརཝསེན ཙ ཨེཝ ཀུསལསྶ ཙ ཨཔུཉྙསྶ ཙཱཏི པཉྩནྣཾ རཱསཱིནཾ གོཙརོ ཧོཏི, ཨརཱུཔཱཝཙརཔཱཀེསུ ཨཡཾ ནཡོ བྷགཝཏཱ མཏོ. ཝཊྚེ ན པརིཡཱཔནྣཱ ནཔྤཝིཊྛཱཏི ཨཔརིཡཱཔནྣཱ, ཏེསཾ པུགྒལཱནཾ པཱཀཱཔི ཀཱམཏོ ཀཱམཱཝཙརཝསེན ཀུསལསྶ ཉཱཎསམྤཡུཏྟམཧཱཀུསལསྶ, ཀྲིཡསྶ ཙ ཝོཊྛབྦནཉཱཎསམྤཡུཏྟམཧཱཀིརིཡསྶ ཙ རཱུཔཏོཔི རཱུཔཱཝཙརཝསེནཔི ཀུསལསྶ པཉྩམསྶ རཱུཔཀུསལསྶ, ཀྲིཡསྶ ཙ པཉྩམསྶ རཱུཔཀིརིཡསྶ ཙ ཨེཝཾ ཨཱརམྨཎཾ ཧོཏཱིཏི. ཨེཏྠཱཡམདྷིཔྤཱཡོ ཨཔརིཡཱཔནྣཔུཉྙེ ཝུཏྟནཡེནེཝ ཝེདིཏབྦོ.

༣༥༣-༦. ཀཱམེ ཨིདཾ སབྦཀིརིཡཙིཏྟཾ ཀཱམཱཝཙརཏོཔི ཙ ཀཱམཱཝཙརཝསེནཔི ཙ ཀུསལསྶ མཧཱཀུསལསྶ, ཀྲིཡསྶ ཙ ཧསནཝོཊྛབྦནམཧཱཀིརིཡསྶ ཙ རཱུཔཱཝཙརཏོ ཙེཝ རཱུཔཱཝཙརཝསེན ཙ ཨེཝ ཀུསལསྶ པཉྩམསྶ རཱུཔཀུསལསྶ, ཀྲིཡསྶ ཙ པཉྩམསྶ རཱུཔཀིརིཡསྶ ཙ ཨེཀཱདསཀཱམཱཝཙརཔཱཀསྶ ཙ ཏཐེཝ ཨཀུསལསྶ ཙ ཨེཏེསཾ ཚནྣཾ རཱསཱིནཾ ཨཱརམྨཎཾ ཧོཏི. ཡཾ ཀྲིཡཱམཱནསཾ རཱུཔེ རཱུཔཱཝཙརེ ཡཾ ཀིརིཡཱམཱནསཾ, ཀཱམཔཱཀཾ ཏཏོ ཝིནཱ ཏཏོ རཱསིཏོ ཀཱམཔཱཀཾ ཝིནཱ ཝཛྫེཏྭཱ པཉྩནྣཾ པན རཱསཱིནཾ ཨཱརམྨཎཾ ཧོཏི. ཀཱམཱཝཙརཏོ ཀཱམཱཝཙརཝསེན ཀིརིཡསྶ ཝོཊྛབྦནམཧཱཀིརིཡསྶ ཨཱརམྨཎཾ ཧོཏི, ཧསནཾ ཨེཀནྟཔརིཏྟཱརམྨཎཏྟཱ རཱུཔཀིརིཡཾ ཨཱརམྨཎཾ ན ཀརོཏི. ཀྲིཡཱཙིཏྟཾ པནཱརུཔྤེ ཨརཱུཔཀིརིཡཱཙིཏྟཾ པན ཏེསཾ པཉྩནྣཾ ཨེཝ ཙ རཱསཱིནཾ ཨཱརུཔྤཀྲིཡསྶཱཔི པཋམཱརུཔྤཀིརིཡཾ དུཏིཡཱརུཔྤཀིརིཡསྶ ཨཱརམྨཎཾ ཧོཏི, ཏཏིཡཱརུཔྤཀིརིཡཾ ཙཏུཏྠཱརུཔྤཀིརིཡསྶ ཨཱརམྨཎཾ ཧོཏི. ཨིཏི ཚནྣཾ རཱསཱིནཾ གོཙརོ ཧོཏིཡེཝ.

༣༥༧-༨.

རཱུཔཾ ¶ ཙཏུསམུཊྛཱནཾ, རཱུཔཱརམྨཎསཉྙིཏཾ;

ཀཱམཱཝཙརཔུཉྙསྶ, ཏཐེཝ ཀུསལསྶ ཙ;

ཨབྷིཉྙཱདྭཡཙིཏྟསྶ, ཀཱམཔཱཀཀྲིཡསྶ ཙ.

དྭིཙཀྑུཝིཉྙཱཎམནོདྷཱཏུདྭཡསནྟཱིརཎཏྟཡམཧཱཔཱཀསྶ ¶ ཙ ཀཱམཀིརིཡསྶ ཙཱཏི ཨེཀཱདསཝིདྷསྶ ཀཱམཀིརིཡསྶ ཙ ཚནྣཾ ཨེཏེསཾ རཱསཱིནཾ ཨཱརམྨཎཔཙྩཡོ ཧོཏི.

༣༥༩-༣༦༠. ནིབྦཱནཱརམྨཎཾ ཀཱམརཱུཔཱཝཙརཏོ ཀཱམརཱུཔཱཝཙརཝསེན སེཀྑཱནཾ ཉཱཎསམྤཡུཏྟམཧཱཀུསལསྶ, རཱུཔཱཝཙརཝསེན པཉྩམསྶ རཱུཔཀུསལསྶ ཙ ཀཱམརཱུཔཀིརིཡསྶ ཙ ཁཱིཎཱསཝཱནཾ ཝོཊྛབྦནཉཱཎསམྤཡུཏྟམཧཱཀིརིཡསྶ ཙ པཉྩམརཱུཔཀིརིཡསྶ ཙ ཨུབྷཡསྶཱཔི ཙིཏྟསྶ ཨཱརམྨཎཾ ཧོཏི. ཨཔརིཡཱཔནྣཏོ ཙེཝ ལོཀུཏྟརཝསེན ཙ ཨེཝ ཕལསྶ, ཀུསལསྶ ཙ ཨེཏེསཾ ཚནྣཾ རཱསཱིནཾ ཨཱརམྨཎཔཙྩཡོ ཧོཏི.

༣༦༡-༢. ནཱནཔྤཀཱརཀཾ སབྦཾ, པཉྙཏྟཱརམྨཎཾ པན ཏེབྷཱུམཀསྶ པུཉྙསྶ མཧཱཀུསལསྶ, སུདྡྷཛྷཱནསྶ པཉྩཝིདྷསྶ རཱུཔཀུསལསྶ, པཋམཱརུཔྤཏཏིཡཱརུཔྤཀུསལསྶ ཙ ཏཐེཝ ཨཀུསལསྶ ཙ རཱུཔཱརཱུཔཝིཔཱཀསྶ སབྦསྶ རཱུཔཝིཔཱཀསྶ, པཋམཱརུཔྤཏཏིཡཱརུཔྤཝིཔཱཀསྶ ཙ ཏེབྷཱུམཀཀྲིཡསྶ ཙ ཧསནཝོཊྛབྦནམཧཱཀིརིཡསྶ སབྦསྶ རཱུཔཀིརིཡསྶ, པཋམཱརུཔྤཏཏིཡཱརུཔྤཀིརིཡསྶ ཙཱཏི ནཝནྣཾ པན རཱསཱིནཾ ཨཱརམྨཎཔཙྩཡོ ཧོཏི.

༣༦༣-༤. རཱུཔཱརམྨཎིཀཱ དྭེ ཏུ དྭེ ཙིཏྟུཔྤཱདཱ རཱུཔཱརམྨཎིཀཱ, དྭེ དྭེ སདྡཱདིགོཙརཱ དྭེ དྭེ ཙིཏྟུཔྤཱདཱ སདྡཱརམྨཎཱདིགོཙརཱ, ཏཡོ མནོདྷཱཏུསངྑཱཏཱ ཙིཏྟུཔྤཱདཱ པཉྩཱརམྨཎིཀཱ ནཱམ མཏཱ བྷགཝཏཱ. ཨིདྷ ཨིམསྨིཾ ཀཱམཱཝཙརཱདྷིཀཱརེ ¶ ཨེཀཙཏྟཱལཱིསེཝ ཙིཏྟུཔྤཱདཱ ཚལཱ༹རམྨཎིཀཱ མཏཱ. ཨཡཾ ཀཱམཱཝཙརཙིཏྟཱནཾ ཨཱརམྨཎཀྐམོ.

༣༦༥-༩. པཉྩཱབྷིཉྙཱ ཝིཝཛྫེཏྭཱ, རཱུཔཱརཱུཔཱ ཨནཱསཝཱ ཨིམེ སབྦེ ཙིཏྟུཔྤཱདཱ དྷམྨཱརམྨཎགོཙརཱ ཧོནྟི. པཋམཱརུཔྤཀུསལཾ དུཏིཡཱརུཔྤཙེཏསོ ཀུསལསྶ ཨཱརམྨཎཾ ཧོཏི, དུཏིཡཱརུཔྤཙེཏསོ ཝིཔཱཀསྶ ཙ ཨཱརམྨཎཾ ཧོཏི, དུཏིཡཱརུཔྤཙེཏསོ ཀིརིཡསྶ ཙ ཨཱརམྨཎཾ ཧོཏི. དུཏིཡཱརུཔྤཙེཏསོ ཀིརིཡསྶ པཋམཱརུཔྤཀུསལཱརམྨཎབྷཱཝེ ཀཱརཎཾ ཧེཊྛཱ ཝུཏྟམེཝ. པཋམཱརུཔྤཔཱཀོཡཾ, དུཏིཡཱརུཔྤཙེཏསོ ཀུསལསྶ ཙ དུཏིཡཱརུཔྤཙེཏསོ ཝིཔཱཀསྶ ཙ དུཏིཡཱརུཔྤཙེཏསོ ཀིརིཡསྶ ཙ ཨཱརམྨཎཾ ན ཧོཏི. ཧི ཀསྨཱ? ཏེསཾ དུཏིཡཱརུཔྤཀུསལཝིཔཱཀཀིརིཡཱནཾ པཋམཱརུཔྤཀུསལཱརམྨཎཏྟཱ. པཋམཾ ཏུ ཀྲིཡཱཙིཏྟཾ པཋམཾ ཀིརིཡཱཙིཏྟཾ པན དུཏིཡཱརུཔྤཙེཏསོ པུཉྙསྶ ཨཱརམྨཎཾ ན ཧོཏི. དུཏིཡཱརུཔྤཙེཏསོ ཝིཔཱཀསྶ ཨཱརམྨཎཾ ན ¶ ཧོཏི. རཱུཔཱརཱུཔབྷཝེསུ ཧི ཁཱིཎཱསཝཱ ཝིཔཱཀཙིཏྟཱནི ཙུཏིཝསེན སཀསཀཀུསལཱནཾ ཨཱརམྨཎཾ ཀརོནྟི. པཋམཾ ཏུ ཀྲིཡཱཙིཏྟཾ པན དུཏིཡཱརུཔྤཙེཏསོ ཀིརིཡསྶ ཨཱརམྨཎཾ ཧོཏི. ཨིཏི ཨེཝཾ ཨིམིནཱ མཡཱ ཝུཏྟཔྤཀཱརེན ཙིཏྟཱནཾ ཨཱརམྨཎུཔྤཏྟི ཝིབྷཱཝིནཱ དྷཱིརེན ཉེཡྻཱ.

༣༧༠-༣. པུཐུཛྫནསྶ སེཀྑསྶ, ཨརཱུཔཱརམྨཎཾ དྭིདྷཱ དྭིཔྤཀཱརཾ ཀུསལཾ ཀུསལསྶ དུཏིཡཱརུཔྤཀུསལསྶ ཨཱརམྨཎཾ ཧོཏི, ཏཾ པཋམཱརུཔྤཀུསལཾ དུཏིཡཱརུཔྤཝིཔཱཀསྶ ཨཱརམྨཎཾ སིཡཱ བྷཝེཡྻ. ཁཱིཎཱསཝསྶ བྷིཀྑུསྶ, པཋམཱརུཔྤམཱནསཾ ཨཱརམྨཎཾ ཏིདྷཱ ཏིཔྤཀཱརཾ ཧོཏི. ཨིཏི ཝཙནཾ མཧེསིནཱ ཝུཏྟཾ. ཀྲིཡསྶཱཔི དུཏིཡཱརུཔྤཀིརིཡསྶཱཔི པཋམཱརུཔྤཀིརིཡཱ ཨཱརམྨཎཾ ཧོཏི. ཀུསལམྤི པཋམཱརུཔྤཀུསལམྤི དུཏིཡཱརུཔྤཀིརིཡསྶ ཙ ཨཱརམྨཎཾ ཧོཏི. ཀུསལཾ ¶ པཋམཱརུཔྤཀུསལཾ དུཏིཡཱརུཔྤཝིཔཱཀསྶ ཨཱརམྨཎཾ ཧོཏི. ཨེཝཾ ཨིམིནཱ མཡཱ ཝུཏྟཔྤཀཱརེན པཋམཱརུཔྤམཱནསཾ ཨཱརམྨཎཾ ཏིདྷཱ ཧོཏི. ཏཏིཡཱརུཔྤཙིཏྟམྤི ཙཏུཏྠཱརུཔྤཙེཏསོ ཀུསལསྶ ཨཱརམྨཎཾ ཧོཏི, ཙཏུཏྠཱརུཔྤཙེཏསོ ཝིཔཱཀསྶ ཙ ཏཾ ཨཱརམྨཎཾ ཧོཏི. ཨེཝམེཝ ཡཐཱ པཋམཱརུཔྤམཱནསཾ ཨཱརམྨཎཾ དྭིདྷཱ ཧོཏི, ཨེཝམེཝ ཏཐཱ ཏཏིཡཱརུཔྤཙིཏྟཾ ཨཱརམྨཎཾ དྭིདྷཱ ཧོཏི. ཡཐཱ པཋམཱརུཔྤམཱནསཾ ཨཱརམྨཎཾ ཏིདྷཱ ཧོཏི, ཨེཝམེཝ ཏཐཱ ཏཏིཡཱརུཔྤཙིཏྟཾ ཨཱརམྨཎཾ ཏིདྷཱ སིཡཱ.

༣༧༤. ཡཾ ཡཾ པན ཨིདྷཱརབྦྷ ཨིདྷ ཨིམསྨིཾ ཨདྷིཀཱརེ ཡཾ ཡཾ གོཙརཾ ཨཱརབྦྷ པཊིཙྩ ཡེ ཡེ ཙིཏྟུཔྤཱདཱ ཛཱཡནྟི, སོ སོ གོཙརོ ཏེསཉྩ ཏེསཉྩ ཙིཏྟུཔྤཱདཱནཾ ཨཱརམྨཎཔཙྩཡོ ཧོཏི.

༣༧༥. ཡོ པན ནརོ ཨིམསྶ ཨབྷིདྷམྨཱཝཏཱརསྶ ཀིར པཱརཾ དུཏྟརཾ ཨིདྷ ཨིམསྨིཾ ལོཀེ ཨུཏྟརཏི, སོ ནརོ ཨབྷིདྷམྨམཧཎྞཝེ པཱརཾ དུཏྟརཾ ཨུཏྟརཾ ཨུཏྟརཏི ཨེཝ.

ཨིཏི ཨབྷིདྷམྨཱཝཏཱརཊཱིཀཱཡ

ཨཱརམྨཎཝིབྷཱགཝཎྞནཱ ནིཊྛིཏཱ.

ཚཊྛོ པརིཙྪེདོ.

༧. སཏྟམོ པརིཙྪེདོ

ཝིཔཱཀཙིཏྟཔྤཝཏྟིནིདྡེསཝཎྞནཱ

༣༧༦.

ཨནནྟཉཱཎེན ¶ ནིརངྒཎེན,

གུཎེསིནཱ ཀཱརུཎིཀེན ཏེན;

ཝུཏྟེ ཝིཔཱཀེ མཏིཔཱཊཝཏྠཾ,

ཝིཔཱཀཙིཏྟཔྤབྷཝཾ སུཎཱཐ.

ཡེན ¶ ཛིནེན ཨནནྟཉཱཎེན ནིཀྐིལེསེན གུཎེསིནཱ ཀཱརུཎིཀེན ཏེན ཛིནེན ཝུཏྟེ ཝིཔཱཀསྨིཾ མཏིཔཱཊཝཏྠཾ མཏིཚེཀབྷཱཝཏྠཱཡ ཝིཔཱཀཙིཏྟཔྤབྷཝཾ མཡཱ བྷཎམཱནཾ ཝིཔཱཀཙིཏྟཔྤཝཏྟིཾ ཏུམྷེ སུཎཱཐ.

༣༧༧. ཨེཀཱུནཏིཾས ཀམྨཱནི, པཱཀཱ དྭཏྟིཾས བྷགཝཏཱ དསྶིཏཱ, ཀམྨཱནི ཏཱིསུ དྭཱརེསུ དིསྶརེ, ཝིཔཱཀཱ ཚསུ དྭཱརེསུ དིསྶནྟི.

༣༧༨-༩. ཀུསལཾ ཀཱམལོཀསྨིཾ ཀཱམལོཀམྷི ཀུསལཾ པཝཏྟེ, པཊིསནྡྷིཡཉྩ ཏཾཏཾཔཙྩཡམཱགམྨ ཏཾཏཾཔཙྩཡཾ པཊིཙྩ. སོ སོ པཙྩཡོ ཏཾཏཾཔཙྩཡོ, ‘‘ཏཏཔཙྩཡོ’’ཏི ཝཏྟབྦེ ནིགྒཧཱིཏཱགམཝསེན ‘‘ཏཾཏཾཔཙྩཡོ’’ཏི ཝུཏྟཾ. ཝིཙྪཱཀམྨདྷཱརཡསམཱསོཡཾ. ཝིཝིདྷཾ ཕལཾ དདཱཏི. ཨེཀཱཡ ཙེཏནཱཡ ཨེཀཱ པཊིསནྡྷི བྷགཝཏཱ པཀཱསིཏཱ. ནཱནཱཀམྨེཧི ནཱནཱ པཊིསནྡྷིཡོ ཙ བྷཝནྟི.

༣༨༠-༡. ཏིཧེཏུཀཾ ཏུ ཡཾ ཀམྨཾ ཏིཧེཏུཀཾ ཡཾ ཀམྨཾ པན ཀཱམཱཝཙརསཉྙིཏཾ ཏིཧེཏུཀཾ ཝིཔཱཀཾ དུཧེཏུཉྩ ཝིཔཱཀཾ ཨཧེཏུཉྩ ཝིཔཱཀཾ དེཏི. དུཧེཏུཀཾ ཏུ ཡཾ ཀམྨཾ དུཧེཏུཀཾ ཡཾ ཀམྨཾ པན, ཏཾ ཀམྨཾ ཏིཧེཏུཀཾ ཝིཔཱཀཾ ན དེཏི, ཨཏྟནོ ཝིཔཱཀཾ དུཧེཏུཉྩ ཨཧེཏུཉྩ དེཏི.

༣༨༢-༣. ཏིཧེཏུཀེན ¶ ཀམྨེན, པཊིསནྡྷི ཏིཧེཏུཀཱ ཧོཏི, དུཧེཏུཀཱཔི པཊིསནྡྷི ཧོཏེཝ, ཨཧེཏུཀཱ པཊིསནྡྷི ནེཝ ཧོཏི, ཨུཀྐཊྛཏིཧེཏུཀཀམྨེན ཏིཧེཏུཀཱ པཊིསནྡྷི, ཨོམཀཏིཧེཏུཀཀམྨེན དུཧེཏུཀཱ པཊིསནྡྷི ཧོཏཱིཏི ཨདྷིཔྤཱཡོ. དུཧེཏུཀེན ཀམྨེན དུཧེཏུཀཱ པཊིསནྡྷི, ཨཧེཏུཀཱཔི པཊིསནྡྷི ཧོཏེཝ, ཏིཧེཏུཀཱ པཊིསནྡྷི ནེཝ ཧོཏི. ཨུཀྐཊྛདུཧེཏུཀཀམྨེན དུཧེཏུཀཱ པཊིསནྡྷི, ཨོམཀདུཧེཏུཀཀམྨེན ཨཧེཏུཀཱ པཊིསནྡྷི ཧོཏཱིཏི ཨདྷིཔྤཱཡོ.

༣༨༤. ཨསངྑཱརཀམྨཾ ¶ ཨསངྑཱརཝིཔཱཀཾ དེཏི, སསངྑཱརཝིཔཱཀམྤི དེཏི, སསངྑཱརཀམྨཾ སསངྑཱརཕལཾ, ཏཐཱ ཨསངྑཱརཕལཾ དེཏི.

༣༨༥. ཨེཀཱཡ ཙེཏནཱཡེཏྠ ཨེཏྠ ཨེཏཱསུ ཙེཏནཱསུ ཨེཀཱཡ ཀུསལཱཡ ཙེཏནཱཡ སོལ༹སཝིདྷཱ ཝིཔཱཀཙིཏྟཱནི བྷཝནྟི. ཨིཏི ཝཙནཾ ཛིནོ པཀཱསཡེ.

༣༨༦-༩༢. ཝེདནཱཔརིཝཏྟནཾ ཨཱརམྨཎེན ཧོཏེཝ, ཏདཱརམྨཎཙིཏྟམྤི ཛཝནེན ནིཡཱམིཏཾ, སོམནསྶཡུཏྟེ ཀུསལེ ཛཝནེ ཛཝིཏེ ཏདཱརམྨཎམྤི སོམནསྶཡུཏྟམེཝ ཧོཏཱིཏི ཨཏྠོ. ཨུཔེཀྑཱཡུཏྟཀུསལེཔི ཨེསེཝ ནཡོ. ཀཱམཱཝཙརཙིཏྟེན ཀུསལེནཱདིནཱ པཋམེན ཀུསལེན ཏུལྱེན ཝིཔཱཀཙིཏྟེན. ཏཏིཡཱཝིསེསནཾ. ཡེན སཏྟེན གཧིཏཱ པཊིསནྡྷི ཙེ ཡདི, ཨིཊྛེ བལཝཱརམྨཎེ མནཱཔེ ཨཏིམཧནྟཱརམྨཎེ ཏསྶ སཏྟསྶ ཙཀྑུསྶ ཙཀྑུཔསཱདསྶ ཨཱཔཱཐཾ པཱཀཊབྷཱཝཾ ཨཱགཏེ སཏི མནོདྷཱཏུཡཱ ཏཱཡ བྷཝངྒསྨིཾ ཨཱཝཊྚིཏེ བྷཝངྒསོཏེ ཚིནྡིཏེ སཏི ཙཀྑུཝིཉྙཱཎཀཱདཱིསུ ཝཱིཐིཙིཏྟེསུ ཛཱཏེསུ པཋམཾ ཀུསལཾ ཀཱམམཱནསཾ ཛཝནཾ ཧུཏྭཱ ཛཱཡཏེ. སཏྟཀྑཏྟུཝཱརཱནི ཛཝིཏྭཱན པཋམེ མཧཱཀུསལེ གཏེ ཏདེཝ ཏཾ ཨེཝ ཨིཊྛཾ ཨཱརམྨཎཾ ཀཏྭཱ ཏེནེཝ པཋམམཧཱཀུསལེན སདིསཾ ཏདཱརམྨཎཝིཔཱཀཙིཏྟཾ. སནྡྷིཡཱ ཏུལྱཏོ པཊིསནྡྷིཡཱ ཏུལྱབྷཱཝེན མཱུལབྷཝངྒནྟི མཱུལབྷཝངྒཾ ནཱམ བྷགཝཏཱ པཝུཙྩཏེ. ཏཉྩ ཏདཱརམྨཎཙིཏྟཾ སནྟཱིརཎཾ སོམནསྶཡུཏྟཾ སནྟཱིརཎཾ དསྶནཾ སམྤཊིཙྪནཾ ཨེཏྠ ཨེཏསྨིཾ ཝཱིཐིཙིཏྟེ གཎནཱུཔགཙིཏྟཱནི གཎནཾ ཨུཔགཏཱནི ཙིཏྟཱནི ཙཏྟཱརི ཨེཝ བྷཝནྟི.

༣༩༣-༤. ཡདཱ ཧི དུཏིཡཾ ཙིཏྟཾ, ཀུསལཾ ཛཝནཾ ཡདཱ ཡསྨིཾ ཀཱལེ ཏསྶེཝ སོམནསྶཏིཧེཏུནོ པུགྒལསྶ དུཏིཡཾ ¶ ཀུསལཾ ཙིཏྟཾ ཛཝནཾ ཧོཏི, ཏདཱ ཏསྨིཾ ཀཱལེ ཏེན ཛཝནེན ཏུལྱཝིཔཱཀཾ ཏདཱརམྨཎཾ. ཏསྶ སནྡྷིཡཱ ཨསམཱནཏྟཱ ཏསྶ ཏདཱརམྨཎཙིཏྟསྶ སནྡྷིཡཱ ཨསམཱནཏྟཱ ¶ དྭེ ནཱམཱནི ཨསྶ ཝིཔཱཀཙིཏྟསྶ ཨནེན ཝིཔཱཀཙིཏྟེན ལབྦྷརེ ལབྦྷནྟི, ‘‘ཨཱགནྟུཀབྷཝངྒ’’ནྟི ནཱམཾ ‘‘ཏདཱརམྨཎཀ’’ནྟི ཙ ནཱམཾ ཨིཏི དྭེ ནཱམཱནི ལབྦྷནྟི.

༣༩༥-༦. ཡདཱ ཏསྶེཝ པུགྒལསྶ ཏཏིཡཾ པུཉྙཾ ཛཝནཾ ཧོཏི, ཏདཱ ཏེན ཛཝནེན སདིསཾ ཏཏིཡཾ པཱཀཾ ཏདཱརམྨཎིཀཾ སིཡཱ. ཨིདཾ ཝིཔཱཀཙིཏྟཾ ཨཱགནྟུཀབྷཝངྒནྟི ཨཱགནྟུབྷཝངྒཾ ནཱམ བྷགཝཏཱ ཝུཙྩཏེ, པུརིམཱནི ཙ པཉྩ ཝིཔཱཀཙིཏྟཱནི ཨིམིནཱ པན ཏཏིཡཝིཔཱཀེན པན སདྡྷིཾ ཚ ཙིཏྟཱནི ཧོནྟི.

༣༩༧-༨. ཡདཱ ཙཏུཏྠཾ ཀུསལཾ ཛཝནཾ ཧོཏི, ཏདཱ ཏེན ཛཝནེན ཏུལྱཾ ཙཏུཏྠཝིཔཱཀཾ ཏདཱརམྨཎབྷཱཝཾ ཝཛེ གཙྪེཡྻ. ཙཏུཏྠཝིཔཱཀཾ ཨཱགནྟུཀབྷཝངྒཾ ཏདཱརམྨཎནཱམཀཾ ཧོཏི, པུརིམཱནི ཚ པཱཀཱནི ཨིམིནཱ སཧ ཙཏུཏྠཔཱཀེན སཏྟ ཙིཏྟཱནི ཧོནྟི.

༣༩༩-༤༠༣. ཡདཱ ཡསྨིཾ ཀཱལེ ཏསྨིཾ ཙཀྑུདྭཱརེ ཨིཊྛམཛ྄ཛྷཏྟཱརམྨཎཾ པན ཏཐཱ ཨཱཔཱཐཾ ཨཱགཙྪཏི ཙ, ཏདཱ ཝུཏྟནཡེན ཨཱཝཛྫནདསྶནསམྤཊིཙྪནཙིཏྟེསུ ཛཱཏེསུ ཨིདྷ ཨིམསྨིཾ མཛ྄ཛྷཏྟཱརམྨཎེ ཨཱརམྨཎཝསེན ཝེདནཱ པརིཝཏྟཏི, ཏསྨཱ ཨུཔེཀྑཱསཧགཏཾ སནྟཱིརཎཾ མནོ ཧོཏི. ཨུཔེཀྑཱསཧགཏེསུ ཨེཝ ཙཏཱུསུཔི ཛཝནེསུ ཛཝིཏེསུ ཏེཧི ཛཝནེཧི ཏུལྱཱནི ཙཏྟཱརི ཝིཔཱཀཙིཏྟཱནི ཛཱཡརེ. ཨཙྩནྟཾ ཨེཀནྟེན ཝེདནཱཡ ཨུཔེཀྑཱཝེདནཱཡ པུརིམེཧི སོམནསྶསཧགཏེཧི ཙིཏྟེཧི ཨསམཱནཏྟཱ ཙཏྟཱརི ཙིཏྟཱནི ནཱམཏོ པིཊྛིབྷཝངྒཱནི ནཱམ ཧོནྟི, པིཊྛིབྷཝངྒཱནི སོམནསྶཝིཔཱཀཱནཾ པཙྪཱབྷཱགེ བྷཝངྒཱནཱིཏི ཨཏྠོ. ཨིམཱནི ¶ ཨུཔེཀྑཱསཧགཏཱནི པཉྩ ཝིཔཱཀཱནི པུརིམེཧི སཏྟཧི ཝིཔཱཀེཧི སདྡྷིཾ དྭཱདས ཝིཔཱཀཱནི བྷཝནྟི. ཨིཏི ཝཙནཾ དྷཱིརོ ཝིནིདྡིསེ.

༤༠༤-༦. ཡཐཱ ཙཀྑུདྭཱརེ དྭཱདས ཝིཔཱཀཱནི ཧོནྟི, ཏཐཱ ཨེཝཾ སོཏཱདཱིསུ དྭཱརེསུཔི དྭཱདས པཱཀཱནི ཧོནྟི. ཨིཏི ཝཙནཾ དྷཱིརོ ནིདྡིསེ, ཨིམེ མཡཱ ཝུཏྟཱ ཝིཔཱཀཱ སམསཊྛི བྷཝནྟི. ཨེཝཾ ཨིམིནཱ མཡཱ ཝུཏྟཔྤཀཱརེན ཨེཀཱཡ ཙེཏནཱཡ ཀམྨེ ཨཱཡཱུཧིཏེ པཝཏྟིཏེ སམསཊྛི ཝིཔཱཀཱནི ཨུཔྤཛྫནྟི, ཨིམསྨིཾ ཝཙནེ སཾསཡོ ནཏྠི. གཧིཏཱགྒཧཎེནེཏྠ ཨེཏྠ ཨེཏེསུ ཝིཔཱཀེསུ གཧིཏཱནཾ ཝིཔཱཀཱནཾ ཨགྒཧཎེན ཙཀྑུདྭཱརེ དྭཱདས པཱཀཱ, སོཏཝིཉྙཱཎཀཱདཱིནི ཙཏྟཱརི ཙཱཏི སོལ༹ས པཱཀཱནི ཧོནྟི.

༤༠༧-༡༡. ཨེཀེན ¶ ཏིཧེཏུཀཀུསལེན ཨསངྑཱརིཀེན ཀམྨེན ཨཱཡཱུཧིཏེ ཡཐཱ, ཨེཝམེཝ སསངྑཱརཏིཧེཏུཀཀུསལེནཱཔི ཨསངྑཱརསསངྑཱརཨུཔེཀྑཱསཧགཏེཧིཔི ཀུསལེཧི ཀམྨེ ཨཱཡཱུཧིཏེ པཝཏྟིཏེ ཏེསཾ ཏིཎྞཾ ཀུསལཱནཾ ཝིཔཱཀེཧི ཏཱིཧིཔི དིནྣཱཡ པཊིསནྡྷིཡཱ ཨེསེཝ ནཡོ པཎྜིཏེན ཛཱནིཏབྦོ. ཨིདྷ ཨིམསྨིཾ ཨུཔེཀྑཱསཧགཏདྭཡེ ཨིཊྛམཛ྄ཛྷཏྟགོཙརསྶ ཝསེན ཝིཔཱཀཙིཏྟཔྤཝཏྟིཾ པཋམཾ དསྶེཏྭཱ དསྶེཏབྦཱཐ པཙྪཱ ཏུ, ཨིཊྛསྨིཾ གོཙརེ ཨིདྷ ཨཐ པཙྪཱ མཡཱ ཝུཏྟཙིཏྟཔྤཝཏྟིཏོ པཙྪཱཀཱལེ པན ཨིདྷ ཨིམསྨིཾ ཨིཊྛགོཙརེ ཨེཀེཀསྨིཾ པན དྭཱདས དྭཱདས པཱཀཱ པཎྜིཏེན དསྶེཏབྦཱ. གཧིཏཱགྒཧཎེནེཏྠ ཨེཏྠ ཨེཏེསུ ཝིཔཱཀེསུ གཧིཏཱནཾ ཝིཔཱཀཱནཾ ཨགྒཧཎེན སོལ༹ས པཱཀཙིཏྟཱནི ཧོནྟི. པུབྦེ ཀཱལེ མཡཱ ཝུཏྟནཡེནེཝ སབྦཾ ཝཙནཾ ཨསེསཏོ ཨསེསབྷཱཝེན པཎྜིཏེན ཉེཡྻཾ.

༤༡༢-༤. ཏིཧེཏུཀེན ཀམྨེན, པཊིསནྡྷི ཏིཧེཏུཀཱ བྷཝཏི, ཨིཏི ཨཡཾ ཝཱརོ ཨེཏྟཱཝཏཱ ཨེཏྟཀེན ཝཙནེན མཡཱ ¶ ཝུཏྟོ. ཨེཀཾ ཀམྨཾ ཨེཀསྨིཾ བྷཝེ ཨེཀཾ པཊིསནྡྷིཾ ཛནེཏི, ཏཏོ པཊིསནྡྷིཏོ ཨཔརཾ ཨཉྙཾ དུཏིཡཾ པཊིསནྡྷིཾ ན ཛནེཏི, པཝཏྟིཡཾ ཨནེཀཱནི ཝིཔཱཀཱནི སཉྫནེཏི. ཧི སཙྩཾ ‘‘ཨེཀཾ ཀམྨ’’ནྟིཨཱདིཀཾ ཝཙནཾ. ཨེཀསྨཱ བཱིཛཱ ཨེཀཏོ བཱིཛཏོ ཨེཀཾ ཨངྐུརཾ ཛཱཡཏི, ཨསྶ བཱིཛསྶ བཧཱུནི ཕལཱནི ཧེཏུཔྤཝཏྟིཏོ སལིལཱདིཧེཏུཔྤཏྟིཡཱ ཧོནྟི.

༤༡༥-༢༡. དུཧེཏུཀེན ཀམྨེན, པཊིསནྡྷི དུཧེཏུཀཱ ཧོཏི, ཨིཏི ཝཙནཾ ཨཡཾ ཝཱརོ ཨནུཔུབྦེན ཨནུཔཊིཔཱཊིཡཱ ཨཱགཏོ. ཨིདྷ ཨིམསྨིཾ ཨདྷིཀཱརེ དུཧེཏུཀེན པུཉྙེན སོམནསྶཡུཏྟེན ཨསངྑཱརིཀེན ཙིཏྟེན ཀམྨེ ཨཱཡཱུཧིཏེ པན དུཧེཏུཀེན སོམནསྶཡུཏྟཀུསལེན ཏུལྱེན པཱཀེན ཡེན སཏྟེན གཧིཏཱ པཊིསནྡྷི ཙེ, ཨིཊྛེ ཨཱརམྨཎེ ཏསྶ སཏྟསྶ ཙཀྑུདྭཱརེ ཨཱཔཱཐཾ ཨཱགཏེ སོམནསྶཡུཏྟེ ཉཱཎཧཱིནེ ཀུསལམཱནསེ ཏསྨིཾ དུཧེཏུཀེ སཏྟཀྑཏྟུཾ ཛཝིཏྭཱན གཏེ ཏཾ ཨེཝ ཨཱརམྨཎཾ ཀཏྭཱ ཏདནནྟརཾ ཏསྶ ཛཝནསྶ ཨནནྟརཾ ཏཾསརིཀྑཀཾ ཏེན ཛཝནེན སདིསཾ ཨེཀནྟཾ ཨསངྑཱརིཀམཱནསཾ ཛཱཡཏི. ཏནྟི ཏཾ ཙིཏྟཾ མཱུལབྷཝངྒནྟི མཱུལབྷཝངྒཾ ནཱམ ཏདཱརམྨཎམིཙྩཔི ཏདཱརམྨཎཾ ནཱམ ཨུབྷཡམྤི ནཱམཾ ཏསྶེཝ ནཱམཾ ཏསྶ ཙིཏྟསྶ ཨེཝ ནཱམཾ. ཨིཏི ཨེཝཾ ཨིམིནཱ པཀཱརེན བྷགཝཏཱ པརིདཱིཔིཏཾ. དུཧེཏུཀེ སསངྑཱརེ ཀུསལེ ཛཝནེ ཛཝིཏེཔི ཙ ཏཾསམཾ ཏེན ཙིཏྟེན སདིསཾ ཨཱགནྟུཀསངྑཱཏཾ ཏདཱརམྨཎམཱནསཾ ཧོཏི.

༤༢༢-༩. ཏཐེཝ ཙ ཏཐཱ ཨེཝ ཙ ཨིཊྛམཛ྄ཛྷཏྟགོཙརེ དུཧེཏཱུནཾ དྭིནྣཾ ཨུཔེཀྑཱཡུཏྟཱནཾ ཛཝནཱནཾ ¶ ཨནནྟརཾ ཏཱདིསཱནི ཏེཧི ཛཝནེཧི སདིསཱནི དྭེ ཏདཱརམྨཎམཱནསཱནི ཛཱཡནྟེ, ཏེསཾ ཏདཱརམྨཎམཱནསཱནཾ ‘‘པིཊྛིབྷཝངྒ’’ནྟི ནཱམཾ, ‘‘ཨཱགནྟུཀབྷཝངྒ’’ནྟི ཙ ནཱམཾ ཧོཏི. སནྟཱིརཎདྭཡཉྩེཝ དསྶནཾ ¶ སམྤཊིཙྪནཾ ཨིམཱནི དྭེ བྷཝངྒཱནི ཙཱཏི ཨཊྛ ཝིཔཱཀཱ ཙཀྑུདྭཱརེ ཧོནྟི. ཨེཝཾ ཨིམིནཱ མཡཱ ཝུཏྟཔྤཀཱརེན པཉྩསུ དྭཱརེསུཔི ཙ ཨཊྛ ཨཊྛ ཝིཔཱཀེ ཀཏྭཱ པཝཏྟིཡཾ ཙཏྟཱལཱིས ཝིཔཱཀཱནི བྷཝནྟི. གཧིཏཱགྒཧཎེནེཏྠ, ཙཀྑུདྭཱརེ པནཊྛ ཙ ཨེཏྠ ཨེཏེསུ ཝིཔཱཀེསུ གཧིཏཱནཾ ཝིཔཱཀཱནཾ ཨགྒཧཎེན ཙཀྑུདྭཱརེ ཨཊྛ ཙ ཝིཔཱཀཱ སོཏགྷཱནཱདིནཱ ཝིཔཱཀེན སདྡྷིཾ དྭཱདས ཨེཝ ཝིཔཱཀཱནི བྷཝནྟི. ཨེཀཱཡ ཙེཏནཱཡེཝཾ ཨེཝཾ ཨིམིནཱ མཡཱ ཝུཏྟཔྤཀཱརེན ཨེཀཱཡ ཙེཏནཱཡ ཀམྨེ ཨཱཡཱུཧིཏེ པཝཏྟིཏེ པན སཏི དྭཱདསེཝ ཝིཔཱཀཱནི བྷཝནྟི. ཨིཏི ཝཙནཾ ཝིཛིཏཀུསལཡུདྡྷསངྒཱམེན པཀཱསིཏཾ དེསིཏཾ. དུཧེཏུཀཏྟཡེནཱཔི, སེསེན སདིསེན ཏུ མཡཱ ཝུཏྟཏོ དུཧེཏུཏོ སེསེན དུཧེཏུཀཏྟཡེནཱཔི སདིསེན པཱཀེན ཨཱདིནྣསནྡྷིནོ གཧིཏཔཊིསནྡྷིཀསྶ སཏྟསྶ ཨེཝཾ ནཡོ མཏོ ཀཐིཏོ ནིརངྒཎེན. དུཧེཏུཀེན ཀམྨེན དུཧེཏུཀཱ པཊིསནྡྷི ཧོཏི. ཨིཏི ཨཡཾ ཝཱརོ ཙ ཨེཏྟཱཝཏཱ ཨེཏྟཀེན ཝཙནེན མཡཱ ཝུཏྟོ.

༤༣༠-༨. དུཧེཏུཀེན ཀམྨེན ཨཧེཏུཀཱ པཊིསནྡྷི ཧོཏི, ཨིཏི ཨཡཾ ཝཱརོ ཨནུཔུབྦེན པཊིཔཱཊིཡཱ ཨཱགཏོ. ཏེསུ ཙཏཱུསུཔི དུཧེཏུཀེསུ ཀུསལེསུ ཙིཏྟེསུ ཨཉྙཏརེནེཝ ཧེཏུཀེན ཀམྨེ ཨཱཡཱུཧིཏེ པཝཏྟིཏེ སཏི ཏསྶེཝ དུཧེཏུཀསྶ ཀུསལཛཝནསྶ པཱཀབྷཱུཏཱཡ ཨུཔེཀྑཱསཧགཏཱཧེཏུཀཱཡ མནོཝིཉྙཱཎདྷཱཏུཡཱ ཨཱདིནྣཔཊིསནྡྷིནོ སཏྟསྶ སཱ པཊིསནྡྷི ཀམྨསདིསཱ ནཱམ ན ཝཏྟབྦཱ པཎྜིཏེཧི. ཧི སཙྩཾ ‘‘པཊིསནྡྷི ན ཝཏྟབྦཱ’’ཏིཨཱདིཀཾ ཝཙནཾ. ཀམྨཾ དུཧེཏུཀཾ ཧོཏི, པཊིསནྡྷི ཨཧེཏུཀཱ ཧོཏི. ཏསྶ དེཧིནོ སཏྟསྶ ཝུཌྜྷིམུཔེཏསྶ ཝུཌྜྷིཾ ཨུཔགཏསྶ ཙཀྑུདྭཱརེ པན ཨིཊྛམཛ྄ཛྷཏྟགོཙརེ ཨཱཔཱཐམཱགཏེ སཏི དུཧེཏུཀཱནཾ ཙཏུནྣཾ པུཉྙཱནཾ ཡསྶ ཀསྶཙི ¶ ཛཝནསྶ ཨཝསཱནམྷི ཨིདཾ ཨཧེཏུཀཾ མནོ ཏདཱརམྨཎབྷཱཝེན ཛཱཡཏི. ཨེཏྠ ཨེཏསྨིཾ ཝཙནེ སཾསཡོ སནྡེཧོ ནཏྠི, ཏཾ ཨཧེཏུཀཙིཏྟཾ མཱུལབྷཝངྒཉྩ ཏདཱརམྨཎམེཝ ཙ ཧོཏི. ཙཀྑུཝིཉྙཱཎཀཱདཱིསུཔི ཝཱིཐིཙིཏྟེསུ ཛཱཏེསུ ཨུཔེཀྑཱསཧགཏཾཡེཝ སནྟཱིརཎམྤི ཙ ཧོཏི. ཏེསུ ཨེཀཾ ཋཔེཏྭཱན, གཧིཏཱགྒཧཎེནིདྷ ཏེསུ དྭཱིསུ སནྟཱིརཎཏདཱརམྨཎཀིཙྩེསུ ཝིཔཱཀེསུ ཨེཀཾ སནྟཱིརཎཀིཙྩཾ ཏདཱརམྨཎཀིཙྩཾ ཏཾ ཙིཏྟཾ ཋཔེཏྭཱ གཧིཏཱནཾ ཝིཔཱཀཱནཾ ཨགྒཧཎེན ཨིདྷ ཨིཊྛམཛ྄ཛྷཏྟཱརམྨཎེ གཎནཱུཔགཙིཏྟཱནི ཏཱིཎིཡེཝ བྷཝནྟི.

༤༣༩-༤༡. ཨིཊྛེ ཨཱརམྨཎེ ཙཀྑུ-དྭཱརེ ཨཱཔཱཐམཱགཏེ ཏདཱ སནྟཱིརཎཉྩེཝ སོམནསྶཡུཏྟཾཡེཝ ¶ ཧོཏི, ཏདཱརམྨཎམཱནསཉྩ སོམནསྶཡུཏྟཾཡེཝ ཧོཏི, ཏེསུ སནྟཱིརཎཏདཱརམྨཎཀིཙྩེསུ ཝིཔཱཀེསུ ཨེཀེཀཾ སནྟཱིརཎཀིཙྩཾ, ཏདཱརམྨཎཀིཙྩཾ ཝཱ ཙིཏྟཾ གཧེཏྭཱ པུརིམཱནི ཙ ཏཱིཎི ཙཏྟཱརི ཨེཝ ཝིཔཱཀཱནི བྷཝནྟི. ཨེཝཾ ཨིམིནཱ མཡཱ ཝུཏྟཔྤཀཱརེན པཉྩསུ དྭཱརེསུཔི ཙཏྟཱརི ཙཏྟཱརི ཝིཔཱཀཙིཏྟཱནཱིཏི པཝཏྟིཡཾ ཝིཔཱཀཱནི ཝཱིསཏི ཙིཏྟཱནི ཧོནྟི.

༤༤༢-༨. ཙཀྑུདྭཱརེ ཏུ ཙཏྟཱརི, གཧིཏཱགྒཧཎེནིདྷ གཧིཏཱནཾ ཝིཔཱཀཱནཾ ཨགྒཧཎེན ཙཀྑུདྭཱརེ པན ཙཏྟཱརི ཝིཔཱཀཱནི ཨིདྷ ཨིམསྨིཾ ཨིཊྛཱརམྨཎེ སོཏགྷཱནཱདིནཱ ཝིཔཱཀེན སདྡྷིཾ ཨཧེཏུཀཾ ཨཊྛཀཾ ཧོཏི ཨེཝ. ཨཧེཏུཀཔཊིསནྡྷིསྶ སཏྟསྶ དུཧེཏུཀཾ, ཏིཧེཏུཀཾ ཝཱ ཏདཱརམྨཎཾ ན བྷཝེ ན བྷཝེཡྻ, དུཧེཏུཔཊིསནྡྷིནོ སཏྟསྶ ཏིཧེཏུཀཾ ཏདཱརམྨཎཾ ན བྷཝེ. ཛཱཏཱ སུགཏིཡཾ ཡེན, པཱཀེན པཊིསནྡྷི ཏུ སུགཏིཡཾ ཡེན པཱཀེན པཊིསནྡྷི ཛཱཏཱ, ཏེན ཝིཔཱཀེན ཏུལྱམྤི, ཧཱིནཾ ཝཱ ཏེསཾ ཏདཱརམྨཎཾ བྷཝེཡྻ. མནུསྶལོཀཾ སནྡྷཱཡ, ཝུཏྟཉྩཱཧེཏུཀཊྛཀཾ སུགཏིཡཾ ཨཧེཏུཀཊྛཀཉྩ མནུསྶལོཀཉྩ སནྡྷཱཡ པཊིཙྩ ཀཱརཎཾ ¶ ཀཏྭཱ མཡཱ ཝུཏྟཾ. ཙཏཱུསུཔི ཨཔཱཡེསུ པན ཨཔེཏོ ཨཡོ པཏིཊྛཱ ཨེཏེཧཱིཏི ཨཔཱཡོ, ཏེསུ. པཝཏྟེ ཨཧེཏུཀཾ ཨཊྛཀཾ ཨཱཔཱཡིཀེཧི ལབྦྷཏི. ཐེརོ ནེརཡིཀཱནཾ ཏུ, དྷམྨཾ དེསེཏི ཝསྶཏི ཐིརོ ཐིརཀཱརདྷམྨོ ཡསྨིཾ ཨཏྠཱིཏི ཐེརོ, དུཏིཡཨགྒསཱཝཀབྷཱུཏོ ཨིདྡྷིམཱ མོགྒལླཱནཏྠེརོ ནེརཡིཀཱནཾ ནིརཡེ ཛཱཏཱནཾ སཏྟཱནཾ དྷམྨཾ དེསེཏི ཝསྶཏི, ‘‘ཨུཙྪངྒེ མཾ ནིསཱིདིཏྭཱ’’ཏིཨཱདཱིསུ ཝིཡ དེཝཾ ཝསྶཱཔེཏཱིཏི ཨཏྠོ. གནྡྷཾ ཝཱཡུཉྩ མཱཔེཏི ཡདཱ, ཏདཱ པན ཏེསཾ ནེརཡིཀཱནཾ སཏྟཱནཾ ཏེཧི ནེརཡིཀསཏྟེཧི ཐེརཾ དིསྭཱ, དྷམྨཉྩ སུཏྭཱ, གནྡྷཉྩ གྷཱཡིཏྭཱ ཛལཾ ཨུདཀཉྩ པིཝཏཾ པིཝནྟཱནཾ མུདུཾ ཝཱཡུཉྩ ཏེཧི ཕུསཏཾ ཕུསནྟཱནཾ ཏེསཾ ནེརཡིཀསཏྟཱནཾ ཙཀྑུཝིཉྙཱཎཀཱདཱིནི པཉྩཔི པུཉྙཛཱནི ཨེཝ ཀུསལཝིཔཱཀཱནི ཨེཝ སནྟཱིརཎདྭཡཾ པུཉྙཛཾ ཨེཝ ཀུསལཝིཔཱཀཾ ཨེཝ པུཉྙཛཱ ཨེཝ ཨེཀཱ མནོདྷཱཏུ ཨིཏི ཨཊྛཀཾ ཧོཏི.

༤༤༩-༥༠. ཨཡཾ ཏཱཝ ཀཐཱ ‘‘ཙཀྑུཝིཉྙཱཎཀཱདཱིནི པུཉྙཛཱནེཝཱ’’ཏིཨཱདིཀཱ ཨཡཾ ཀཐཱ ཨིཊྛཨིཊྛམཛ྄ཛྷཏྟགོཙརེ ཀཱམཱཝཙརེ པུཉྙཱནཾ ཛཝནཱནཾ ཝསེན མཡཱ ཝུཏྟཱ. ཏདཱརམྨཎཙེཏསོ ཏདཱརམྨཎཙིཏྟསྶ ཡཾ ནིཡམཏྟཾ ‘‘ཏདཱརམྨཎམཱནསཾ ཛཝནེན ནིཡཱམིཏ’’ནྟིཨཱདིཝཙནེན མཡཱ ཝུཏྟཾ, ཏཾ ནིཡམཏྟཾ ཀུསལཾ སནྡྷཱཡ ཝུཏྟཾ. སོམནསྶཡུཏྟེ ཀཱམཱཝཙརཀུསལེ ཛཝིཏེ ཏདཱརམྨཎམྤི སོམནསྶཡུཏྟམེཝ ཧོཏི, ཨུཔེཀྑཱཡུཏྟེ ཀཱམཱཝཙརཀུསལེ ཛཝིཏེ ཏདཱརམྨཎམྤི ཨུཔེཀྑཱཡུཏྟམེཝ ¶ ཧོཏི, ནེཏཾ ཨཀུསལེ ཨུཔེཀྑཱཡུཏྟེ ཝིཙིཀིཙྪཱདིཀེ ཨཀུསལེ ཛཝནེ པན ཛཝིཏེ སོམནསྶཡུཏྟམྤི ཏདཱརམྨཎཾ ཧོཏཱིཏི ཨདྷིཔྤཱཡོ. ཨིཏིཔི ཝཙནཾ ཨཱཙརིཡེན དཱིཔིཏཾ.

༤༥༡-༧. ཨིདྷ ཨིམསྨིཾ ཨདྷིཔྤཱཡེ ཨཀུསལཙིཏྟེསུ སོམནསྶཡུཏྟེསུ ཙཏཱུསུཔི ཨིཊྛེ ཨཱརམྨཎེ ཏེསུ ཙིཏྟེསུ ¶ ཛཝིཏེསུ སོམནསྶཡུཏྟཱ ཨཧེཏུམནོཝིཉྙཱཎདྷཱཏུ ཏདནནྟརཾ ཏེསཾ ཨཀུསལཛཝནཱནཾ ཨནནྟརཾ ཏདཱརམྨཎབྷཱཝེན ཛཱཡཏི. ཨུཔེཀྑཱཡུཏྟེསུ ཚསུ ཨཀུསལཙིཏྟེསུ ཨིཊྛམཛ྄ཛྷཏྟེ གོཙརེ ཛཝིཏེསུ པུཉྙཛཱ ཨུཔེཀྑཱསཧགཏཱ ཨཧེཏུམནོཝིཉྙཱཎདྷཱཏུ ཨེཝ ཏདནནྟརཾ ཝཱ ཏེསཾ ཨུཔེཀྑཱསཧགཏཱནཾ ཚནྣཾ ཨཀུསལཛཝནཱནཾ ཨནནྟརཾ ཏདཱརམྨཎབྷཱཝེན ཛཱཡཏི. ཨིཊྛཱརམྨཎཡོགསྨིཾ བུདྡྷརཱུཔཱདིཨིཊྛཱརམྨཎཡོགསྨིཾ ཀངྑཏོ ‘‘བུདྡྷོ ནུ ཁོ, ནོ བུདྡྷོ’’ཏི ཀངྑནྟསྶ སཏྟསྶ ཨུདྡྷཏསྶ ཝཱ སཏྟསྶ ཏདཱརམྨཎམཱནསཾ སོམནསྶཡུཏྟཾ ཨཧེཏུཀཾ ཝིཔཱཀཾ ཧོཏི པིཊྛིབྷཝངྒཾ. སོམནསྶཡུཏེ ཙིཏྟེ, ཛཝནེ ཛཝིཏེ པན སོམནསྶཡུཏྟཱ ཨེཝ པཉྩ ཏདཱརམྨཎམཱནསཱ པཎྜིཏེན གཝེསིཏབྦཱ. ཨུཔེཀྑཱསཧགཏེ ཙིཏྟེ ཛཝནེ པན ཛཝིཏེ སཏི ཨུཔེཀྑཱསཧགཏཱ ཚ ཙ ཏདཱརམྨཎམཱནསཱ པཎྜིཏེན གཝེསིཏབྦཱ.

༤༥༨-༦༣. ཏིཧེཏུསོམནསྶེན, ཨཱདིནྣཔཊིསནྡྷིནོ སཏྟསྶ ཛྷཱནཏོ པརིཧཱིནསྶ ཝིཔྤཊིསཱརིནོ ཏཾ ཛྷཱནཾ པཙྩཝེཀྑཏོ པཙྩཝེཀྑནྟསྶ དོམནསྶཡུཏྟཾ ཙིཏྟཾ ཧོཏི. ཏསྶ དོམནསྶསྶ ཨནནྟརཾ ཀིཾ མཱནསཾ ཛཱཡཏེ, ཏྭཾ དོམནསྶཡུཏྟཛཝནསྶ ཨནནྟརམཱནསཾ བྲཱུཧི ཀཐེཧི. པཊྛཱནེ པཊིསིདྡྷཱ ཧི དོམནསྶསྶཱནནྟརཾ སོམནསྶསྶ ཨུཔྤཏྟི པཊྛཱནེ པཊིསིདྡྷཱ པཊྛཱནཔྤཀརཎེ བྷགཝཏཱ ནིཝཱརིཏཱ, ཨསྶ སོམནསྶསྶ ཝཱ ཨནནྟརཾ དོམནསྶསྶ ཨུཔྤཏྟི པཊྛཱནེ པཊྛཱནཔྤཀརཎེ པཊིསིདྡྷཱ བྷགཝཏཱ ནིཝཱརིཏཱ. མཧགྒཏཾ པནཱརབྦྷ མཧགྒཏཾ པཊིཙྩ ཛཝནེ ཛཝིཏེཔི ཙ ཏདཱརམྨཎམཱནསཾ ཏཏྠེཝ ཏསྨིཾ པཊྛཱནེ ཨེཝ པཊིསིདྡྷཾ བྷགཝཏཱ ནིཝཱརིཏཾ. ཏསྨཱ ཀཱརཎཱ བྷཝངྒཔཱཏོ ཝཱ ཏདཱརམྨཎམེཝ ཝཱ ན ཧོཏི. ཀིཾ ནུ ཀཱཏབྦཾ ཏེསཾ བྷཝངྒཏདཱརམྨཎཱནཾ ཨབྷཱཝེ ཀཱརཎཾ ཡཾ ཀཱཏབྦཾ, ཨམྷེཧི ཏཾ ¶ ཀཱརཎཾ ཀིཾ ནུ པུཙྪཱམ, ཏཾ ཏདཏྠཾ ཨཱབྷིདྷམྨིཀབྷཱཝེན ཨཱབྷིདྷམྨིཀ ཏཾ ཀཱརཎཾ ཝད ཝདཱཧི. ཨུཔེཀྑཱསཧགཏཱཧེཏུམནོཝིཉྙཱཎདྷཱཏུ པུཉྙཱཔུཉྙཝིཔཱཀཱ ཏདཱརམྨཎིཀཱ སིཡཱ བྷཝེཡྻ.

༤༦༤-༧. ཨིམསྶ ཏདཱརམྨཎསྶ ཨཱཝཛྫནཾ ཀིཾ ནཏྠི? ཏཾ ཏདཱརམྨཎམཱནསཾ ཀཐཾ ཀེན པཀཱརེན ཛཱཡཏེ? བྷཝངྒཨཱཝཛྫནཱནཾ ཙིཏྟཱནཾ ཀིཾ ཨཱཝཛྫནམཏྟཾ? མགྒསྶ ཨནནྟརསྶ ཙ ཕལསྶཱཔི ཀིཾ ཨཱཝཛྫནཾ ནཏྠི? ནིརོདྷཱ ཙ ནིརོདྷཏོ ཝུཊྛཧནྟསྶ བྷིཀྑུནོ ཕལཙིཏྟསྶ ཝཱཏི ¶ མཡཱ སུཏཾ, ཨེཝཾ ཨིམིནཱ མཡཱ ཝུཏྟཔྤཀཱརེན ཨཱཝཛྫནཾ ནཏྠི. ཝིནཱ ཨཱཝཛྫནེནཱཔི, ཧོཏུ ཛཱཡཏུ མཱནསཾ ཙིཏྟཾ ཨཱཝཛྫནེན ཝིནཱ ཨཱཝཛྫནཾ ཝཛྫེཏྭཱ ཧོཏུ ཛཱཡཏུ, ཀིམསྶཱརམྨཎཾ ཨསྶ ཏདཱརམྨཎམཱནསསྶ ཀིཾ ཨཱརམྨཎཾ, པཎྜིཏ, ཏྭཾ ཨཱརམྨཎཾ ཡདི ཛཱནཱསི, ཏཾ ཨཱརམྨཎཾ བྲཱུཧི མཡ྄ཧཾ ཀཐེཧི. ཝིནཱ ཨཱརམྨཎེནེཏཾ ཨེཏཾ མཱནསཾ ཨཱརམྨཎེན ཝིནཱ ཨཱརམྨཎཾ ཝཛྫེཏྭཱ ན ཛཱཡཏི. ཧི སཙྩཾ ‘‘ཝིནཱ ཨཱརམྨཎེནེཏ’’ནྟིཨཱདིཀཾ ཝཙནཾ, ཏདཱརམྨཎམཱནསཾ ཡདཱ དོམནསྶཡུཏྟཾ ཛཝནཾ མཧགྒཏཱརམྨཎཾ ཛཝཏི, ཏདཱ ཏསྨིཾཡེཝ ཛཝནཙིཏྟཀྑཎེ པརིཏྟེསུ ཀཱམཱཝཙརཱརམྨཎེསུ ཡཾ ཀིཉྩི པརིཏྟཱརམྨཎཾ ཨཱརབྦྷ པཊིཙྩ ཛཱཡཏི.

༤༦༨-༧༣. ཨུཏུབཱིཛནིཡཱམོ ཙ ཨུཏུནིཡཱམོ བཱིཛནིཡཱམོ ཙ ཀམྨདྷམྨནིཡཱམཏཱ ཙ ཀམྨནིཡཱམཏཱ ཙ སཱིལཱདིཔཱརམཱིདྷམྨནིཡཱམཏཱ ཙ ཙིཏྟསྶ ནིཡཱམོ ཙཱཏི པཉྩ ནིཡཱམཏཱ པཎྜིཏེན ཉེཡྻཱ. ཏཏྠ ཏེསུ པཉྩསུ ནིཡཱམེསུ སབྦེསཾ པན རུཀྑཱནཾ ཨེཀཔྤཧཱརེན ཕལཔུཔྥཱདིདྷཱརཎཾ ཨུཏུ, ཨཡཾ ཨུཏུནིཡཱམཏཱ. ཏེསཾ ཏེསཾ ཏུ བཱིཛཱནཾ, ཏཾཏཾཏུལྱཕལུབྦྷཝོ ཏེསཾ ཏེསཾ བཱིཛཱནཾ པན ཏེཧི ཏེཧི བཱིཛེཧི ཏུལྱཱནམྤི སསྶཱནཾ ཕལཱནཾ ཨུཔྤཏྟི, ཨཡཾ བཱིཛནིཡཱམཏཱ ¶ . མཏྠཀེ ནཱལི༹ཀེརསྶ ནཱལི༹ཀེརཕལསྶ མཏྠཀེ ཚིདྡཏྟཾ ཚིདྡབྷཱཝོ, ཨཡཾ བཱིཛཛོ བཱིཛཏོ ཛཱཏོ ནིཡཱམོ. ཏིཧེཏུཀཀམྨཾ ཏིཧེཏུཀཉྩ ཝིཔཱཀཾ དུཧེཏུཀཉྩ ཝིཔཱཀཾ ཨཧེཏུཀཉྩ ཝིཔཱཀཾ ཡཏོ ཡཾ ཀམྨཾ དེཏི, ཨཡཾ ཀམྨནིཡཱམཏཱ. བོདྷིསཏྟསྶ ཛཱཏིཡཾ ཛིནངྐུརསྶ ཛཱཏིཀྑཎེ མེདནཱིཀམྤནཱདིཀཾ ཨནེཀཝིསེསཏྟཾ, ཨཡཾ སཱིལཱདིཔཱརམཱིདྷམྨནིཡཱམཏཱ. ཏེན གོཙརེན པསཱདསྨིཾ གྷཊྚིཏེ སཏི ཨིདྷ ཨིམསྨིཾ ཙིཏྟཝཱིཐིཡཾ ཨཱཝཛྫནཱདཱིནཾ ཙིཏྟཱནཾ ཨུཔྤཏྟི, ཨཡཾ ཙིཏྟནིཡཱམཏཱ.

༤༧༤. ཡོ པུགྒལོ དྷཱིརོ དྷཱིརསམྤནྣོ གུཎསམྤནྣོ ཝིཀྑིཏྟཔཱཔོ མོཧནྡྷཀཱརཱཔགམཾ ཨནྡྷཀཱརམནིསྶཱཡ ཨཝིཛྫཱནིསྶརཎཾ ཡདིཙྪེ སཙེ ཨིཙྪེཡྻ, སོ དྷཱིརོ ཨིམཾ ཨབྷིདྷམྨཱཝཏཱརཔྤཀརཎཾ ཨནྡྷཛྫནཱནཾ ཨནྡྷསདིསབཱལཛནཱནཾ ཧདཡནྡྷཀཱརཾ ཝིདྡྷཾསནཾ ཨནྡྷཀཱརསནྣིསྶིཏསྶ ཡསྶ ཧདཡསྶ ཝིདྡྷཾསནཀརཾ ཛལནྟཾ དཱིཔཾ ཛལམཱནཾ དཱིཔཾ. པཡཏྟོཏི པཀཱརེན ཡཏཏི ཝཱིརིཡཾ ཀརོཏཱིཏི པཡཏྟོ, སཏཏཾ སབྦདཱ སིཀྑེཐ སཛ྄ཛྷཱཡནདྷཱརཎཙིནྟནཝསེན སིཀྑེཡྻ.

ཨིཏི ཨབྷིདྷམྨཱཝཏཱརཊཱིཀཱཡ

ཝིཔཱཀཙིཏྟཔྤཝཏྟིནིདྡེསཝཎྞནཱ ནིཊྛིཏཱ.

སཏྟམོ པརིཙྪེདོ.

༨. ཨཊྛམོ པརིཙྪེདོ

པཀིཎྞཀནིདྡེསཝཎྞནཱ

༤༧༥.

ཨིདཱནི ¶ པན སབྦེསཾ, ཨེཏེསཾ མཱནསཾ མཡཱ;

པཱཊཝཏྠཱཡ བྷིཀྑཱུནཾ, ཀཐཱིཡཏི པཀིཎྞཀཾ.

ཨིདཱནི པན ཀཱལེ ཨེཏེསཾ ཏིཧེཏུཀདྭིཧེཏུཀཨཧེཏུཀཱནཾ སབྦེསཾ པུགྒལཱནཾ པཀིཎྞཀཾ མཱནསཾ བྷིཀྑཱུནཾ པཱཊཝཏྠཱཡ ¶ བྷིཀྑཱུནཾ ཚེཀབྷཱཝཏྠཱཡ མཡཱ ཀཐཱིཡཏེ ཨུཙྩཏེ.

༤༧༦-༨༥. པནྠམཀྐཊཀོ ཨུཎྞནཱབྷི པནྠམཀྐཊཀོ ནཱམ པཉྩསུ དིསཱསུ ཏསྶ སུཏྟཾ པསཱརེཏྭཱ ཛཱལམཛ྄ཛྷེ ནིཔཛྫཏི. པཋམཱཡ དིསཱཡེཏྠ ཨེཏྠ ཨེཏཱསུ དིསཱསུ པཋམཱཡ དིསཱཡ པསཱརིཏེ སུཏྟེ པཱཎཀེན པཊངྒེན ཝཱ མཀྑིཀཱཡ ཝཱ གྷཊྚིཏེ སཏི སཱ ཨུཎྞནཱབྷི ཀིཉྩི ཙལིཏྭཱ ཕནྡནཾ ཀཏྭཱ ནིཔནྣཊྛཱནཏོ སུཏྟཱནུསཱརེན སུཏྟཾ ཨནུསཱརེཏྭཱ ཏསྶ པཱཎཀསྶ ཡཱུསཾ ཡཱུསསངྑཱཏཾ སོཎིཏཾ པིཝཏི. པུནཱགནྟྭཱ ཏཏྠེཝ ཏསྨིཾ ཛཱལམཛ྄ཛྷེཡེཝ ཡཐཱསུཁཾ ནིཔཛྫཏི, ཡཐཱ པཋམཱཡ དིསཱཡ ཙལནཱདིཀཾ ཀིརིཡཾ ཀརོཏི, ཨེཝམེཝ དུཏིཡཱདཱིསུ ཙཏཱུསུ དིསཱསུ ཙལནཱདིཀཾ ཀིརིཡཾ ཀརོཏི, ཨེཝཾ པཉྩསུ དིསཱསུ སུཏྟཾ ཝིཡ པཉྩ པསཱདཱ པཎྜིཏེན དཊྛབྦཱ, མཛ྄ཛྷེ མཀྐཊཀོ ཝིཡ ཙ ཙིཏྟཾ པན པཎྜིཏེན དཊྛབྦཾ. པཱཎཀཱདཱིཧི ཁུདྡཀཏིརཙྪཱནེཧི ཏསྶ སངྒྷཊྚནཱ ཝིཡ ཨཱརམྨཎེ པན པསཱདཱནཾ སངྒྷཊྚནཱ པཎྜིཏེན དཊྛབྦཱ. ཛཱལམཛ྄ཛྷེ ནིཔནྣཱཡ ཨུཎྞནཱབྷིཡཱ ཏཾ ཙལནཾ ཝིཡ པསཱདེ གྷཊྚེཏཱིཏི པསཱདགྷཊྚནཾ, ཀིཾ ཏཾ? ཨཱརམྨཎཾ. ཏཏྠ ཏིསྶཾ ཝཱིཐིཡཾ པསཱདགྷཊྚནཾ ཨཱརམྨཎཾ གཧེཏྭཱ མནོདྷཱཏུཀིརིཡཱཙིཏྟཾ བྷཝངྒཾ ཨཱཝཊྚེཏཱིཏི བྷཝངྒཱཝཊྚནཾ མཏཾ བྷགཝཏཱ. ཏསྶ པནྠམཀྐཊཀསྶ སུཏྟཱནུསཱརཾཝ སུཏྟཾ ཨནུགམནཾ ཝིཡ ཝཱིཐིཙིཏྟཔྤཝཏྟནཾ པཎྜིཏེན དཊྛབྦཾ. སཱིསེ པན ཝིཛ྄ཛྷིཏྭཱ ཨསྶ མཀྐཊསྶ ཡཱུསཔཱནཾ ཝིཡ ཛཝནསྶ ཙིཏྟསྶ ཨཱརམྨཎེསུ པཝཏྟནཾ པཎྜིཏེན དཊྛབྦཾ. པུན ཨཱགནྟྭཱ སུཏྟཛཱལམཛ྄ཛྷེ ནིཔཛྫནཾ ཡཐཱ ཝཏྠུཾཡེཝ ཧདཡཝཏྠུཾ ཨེཝ ནིསྶཱཡ ཙིཏྟསྶ པརིཝཏྟནཾ པཎྜིཏེན དཊྛབྦཾ.

༤༨༦-༩༣. ཨིདཾ ¶ ཏུ པན ཨོཔམྨཾ, ཨཏྠཾ དཱིཔེཏི ཀིཾ ཏུ ཧི ཨིདཾ ཨོཔམྨཾ ཀཾ ཨཏྠཾ དཱིཔེཏི པཀཱསེཏི? པཋམཾ པསཱདེ ཨཱརམྨཎེན ¶ གྷཊྚིཏེ སཏི པསཱདཝཏྠུཏོ པསཱདོ ཝཏྠུ ནིསྶཡོ ཨེཏསྶཱཏི པསཱདཝཏྠུ, ཙིཏྟཾ, ཏཏོ པསཱདཝཏྠུཏོ, པཋམཾ ཨེཝ ཝཏྠུསནྣིསྶིཏཾ བྷཝངྒསངྑཱཏཾ མནོ ཛཱཡཏི, ཨིཏིཔི ཨཏྠོ ཏེན ཨོཔམྨེན དཱིཔིཏོ. ཨེཀེཀཱརམྨཎཾ དྭཱིསུ དྭཱིསུ དྭཱརེསུ སབྦསོ སབྦཔྤཀཱརེན པན ཨཱཔཱཐཾ ཨཱགཙྪཏི, ཨཡམཏྠོཔི ཏེན ཨོཔམྨེན དཱིཔིཏོ ‘‘དྭཱིསུ དྭཱིསུ དྭཱརེསཱུ’’ཏི, ཨེཀཾ རཱུཔཱརམྨཎཾ ཨེཀསྨིཾཡེཝ ཁཎེ ཙཀྑུདྭཱརེ, མནོདྭཱརེ ཙཱཏི དྭཱིསུ དྭཱརེསུ ཨཱཔཱཐཾ ཨཱགཙྪཏཱིཏི ཨཏྠོ. སོཏདྭཱརཱདཱིསུཔི ཨེསེཝ ནཡོ ཉེཡྻོ. རཱུཔཾ ཙཀྑུཔསཱདམྷི གྷཊྚེཏྭཱ ཏངྑཎེ པན ཏསྶ ཁཎེ པན ཏཐཱ མནོདྭཱརེ པན ཨཱཔཱཐཾ ཨཱགཙྪཏི, བྷཝངྒཙལནསྶ པཙྩཡོ ཧོཏཱིཏི ཨཏྠོ. ན སཾསཡོ ཨེཏསྨིཾ ཝཙནེ སཾསཡོ ནཏྠི. ཡཐཱ ཁགོ ཡཐཱ སཀུཎོ. ཧི སཙྩཾ མཡཱ ཝུཏྟཾ ཝཙནཾ. རུཀྑགྒེ རུཀྑཀོཊིཡཾ ནིལཱིཡནྟོཝ སཱཁིནོ སཱཁཾ གྷཊྚེཏི, ཏསྶ ཚཱཡཱ བྷཱུམིཡཾ པཐཝིཡཾ ཕརཏི པཊིཧཉྙཏི. ཨིདྷཱཏི ནིཔཱཏོ. སཱཁཱཡ སཀུཎེན གྷཊྚནཾ བྷཱུམིཡཾ ཚཱཡཱཕརཎཱཔི ཙ ཨཔུབྦཾ ཨཙརིམཾ ཨེཀཀྑཎསྨིཾཡེཝ ཛཱཡརེ ཛཱཡནྟི. ཨེཝམེཝ པན རཱུཔསྶ, པསཱདསྶ ཙ གྷཊྚནཾ, ཏཐེཝ ཨཏྠཏོ ཨཏྠཝསེན བྷཝངྒཙལནསྶཱཔི པཙྩཡཏྟེན པཙྩཡབྷཱཝེན མནོདྭཱརེ ཨཱཔཱཐཾ ཨཱགམནཾ ཨཔུབྦཾ ཨཙརིམཾ ཨེཀཀྑཎེཡེཝ ཧོཏི.

༤༩༤-༧. ཏཏོ པརཾ བྷཝངྒསོཏཾ ཚིནྡིཏྭཱ ཙཀྑུདྭཱརེ ཙཀྑུཔསཱདེ ཡཐཱཀྐམཾ ཨཱཝཛྫནེ སམུཔྤནྣེ, དསྶནེ སམུཔྤནྣེ, སམྤཊིཙྪནེ སམུཔྤནྣེ, སནྟཱིརཎེ སམུཔྤནྣེ, ཏཐཱ ཝོཊྛབྦནེ ཙ སམུཔྤནྣེ ཀུསལཾ ཛཝནཙིཏྟཾ ཛཝཏི, ཏཐཱ ཨཀུསལམེཝ ཙིཏྟཾ ཛཝཏི. སོཏདྭཱརཱདཱིསུཔི སདྡཱདཱིནཾ ཨཱརམྨཎཱནཾ གྷཊྚནེ ཨེསེཝ ནཡོ ཨཝིསེསེན ཝིཉྙུནཱ ཝིཉྙེཡྻོ. ཨེཏསྶ ཨཏྠསྶ དཱིཔནེ དོཝཱརིཀོཔམཱདཱིནི ཝཙནཱནི ¶ ཨུདྡྷརིཏྭཱ ཏཏོ པཀརཎཏོ ནཱིཧརིཏྭཱ ཨེཏྠ ཨེཏསྨིཾ ཝཱིཐིཡཱདྷིཀཱརེ ཝིཉྙུནཱ དསྶེཏབྦཱནི.

༤༩༨-༩. ཨསམྦྷེདེན ཙཀྑུསྶཱཏི ཏསྶཱཔི ཙཀྑུ ཨསམྦྷིནྣཾ ཧོཏི. ཛཱིཝིཏཱ ནིརུདྡྷམྤི པིཏྟེན ཝཱ སེམྷེན ཝཱ རུཧིརེན ཝཱ པལིབུདྡྷཾ ཙཀྑུཝིཉྙཱཎསྶ པཙྩཡོ བྷཝིཏུཾ ཨསཀྐོནྟཾ སམྦྷིནྣཾ ནཱམ, སཀྐོནྟཾ ཨསམྦྷིནྣཾ ནཱམ ཧོཏི. ཏེན ཙཀྑུཔསཱདསྶ ཨསམྦྷིནྣེན རཱུཔཱཔཱཐགམནེན ཨཱལོཀསནྣིསྶཡེནཱཔི. ཏེན ཏིཝིདྷེན པཙྩཡེན སམནཀྐཱརཧེཏུནཱ པཉྩདྭཱརཱཝཛྫནཔཙྩཡེན སཧ པཝཏྟནེན. ཨེཏེཧི པན ཙཏཱུཧི པཙྩཡེཧི སཾ ཨེཀཏོ ཨིནྟི པཝཏྟནྟཱིཏི ¶ སམེཏཱ, སམེཏེཧི སཧགཏེཧི སམཱགམཾ ཨེཀཱིབྷཱཝཾ ཨཱགཏེཧི, ཏཾ ཙཀྑུཝིཉྙཱཎཾ ཙཀྑུཔསཱདནིསྶིཏཾ ཝིཉྙཱཎཾ སམྤཡུཏྟེཧི ཙེཏསིཀེཧི སཧ ཛཱཡཏེ.

༥༠༠-༡. ཨསམྦྷེདེན སོཏསྶ སོཏཔསཱདསྶ ཨསམྦྷིནྣེན སདྡཱཔཱཐགམེན ཙ སདྡསྶ ཨཱཔཱཐགམནེན ཙ. ཨཱཀཱསནིསྶཡེནཱཔི པིཧིཏཀཎྞཙྪིདྡསྶ སོཏཝིཉྙཱཎཾ ནུཔྤཛྫཏི. ཏེན ཏིཝིདྷེན པཙྩཡེན. སམནཀྐཱརཧེཏུནཱ པཉྩདྭཱརཱཝཛྫནཔཙྩཡེན སཧ པཝཏྟེན. ཨེཏེཧི པན ཙཏཱུཧི པཙྩཡེཧི སམེཏེཧི སཧགཏེཧི སམཱགམཾ ཨེཀཱིབྷཱཝཾ ཨཱགཏེཧི ཏཾ སོཏཝིཉྙཱཎཾ སམྤཡུཏྟེཧི སཧ ཛཱཡཏི.

༥༠༢-༣. ཨསམྦྷེདེན གྷཱནསྶ གྷཱནཔསཱདསྶ ཨསམྦྷིནྣེན གནྡྷཱཔཱཐགམེན ཙ གནྡྷསྶ ཨཱཔཱཐགམནེན ཙ. ཝཱཡོསནྣིསྶཡེནཱཔཱིཏི གྷཱནབིལམྷི པཝིསནྟེན ཝཱཡུནཱཏི ཨཏྠོ. ཏེན ཏིཝིདྷེན པཙྩཡེན. སམནཀྐཱརཧེཏུནཱ པཉྩདྭཱརཱཝཛྫནཔཙྩཡེན སཧ པཝཏྟེན. ཨེཏེཧི པན ཙཏཱུཧི པཙྩཡེཧི སམེཏེཧི སཧགཏེཧི སམཱགམཾ ཨེཀཱིབྷཱཝཾ ¶ ཨཱགཏེཧི ཏཾ གྷཱནཝིཉྙཱཎཾ སམྤཡུཏྟེཧི སཧ ཛཱཡཏི.

༥༠༤-༥. ཨསམྦྷེདེན ཛིཝ྄ཧཱཡ ཛིཝ྄ཧཱཡ ཨསམྦྷིནྣེན རསཱཔཱཐགམེན ཙ རསསྶ ཨཱཔཱཐགམནེན ཙ. ཨཱཔོསནྣིསྶཡེནཱཔཱིཏི ཛིཝ྄ཧཱཏེམནཾ ཨཱཔཾ ལདྡྷཱ ཙ ཨུཔྤཛྫཏི, ཏེན ཝིནཱ སུཀྑཁཱདནཱིཡེ ཛིཝ྄ཧཱཡ སཱཡིཏེཔི ཛིཝ྄ཧཱཝིཉྙཱཎཾ ནུཔྤཛྫཏཱིཏི ཨཏྠོ. ཏེན ཏིཝིདྷེན པཙྩཡེན. སམནཀྐཱརཧེཏུནཱ པཉྩདྭཱརཱཝཛྫནཔཙྩཡེན སཧ པཝཏྟེན. ཨེཏེཧི པན ཙཏཱུཧི པཙྩཡེཧི སམེཏེཧི སཧགཏེཧི སམཱགམཾ ཨེཀཱིབྷཱཝཾ ཨཱགཏེཧི ཏཾ ཛིཝ྄ཧཱཝིཉྙཱཎཾ སམྤཡུཏྟེཧི སཧ ཛཱཡཏི.

༥༠༦-༧. ཀཱཡཔསཱདསྶ ཨསམྦྷེདེན ཕོཊྛབྦསྶ ཨཱཔཱཐགམནེན ཙ. པཐཝཱིནིསྶཡེནཱཔཱིཏི ཏེན ཝིནཱ ཀཱཡདྭཱརམྤཱིཏི བཧིདྡྷཱ མཧཱབྷཱུཏཱརམྨཎཾ ཨཛ྄ཛྷཏྟིཀཾ ཀཱཡཔསཱདཾ གྷཊྚེཏྭཱ པསཱདཔཙྩཡེསུ མཧཱབྷཱུཏེསུ པཊིཧཉྙཏི. ཏེན ཏིཝིདྷེན པཙྩཡེན. སམནཀྐཱརཧེཏུནཱ པཉྩདྭཱརཱཝཛྫནཔཙྩཡེན སཧ པཝཏྟེན. ཨེཏེཧི པན ཙཏཱུཧི པཙྩཡེཧི སམེཏེཧི སཧགཏེཧི སམཱགམཾ ཨེཀཱིབྷཱཝཾ ཨཱགཏེཧི ཏཾ ཀཱཡཝིཉྙཱཎཾ སམྤཡུཏྟེཧི སཧ ཛཱཡཏི.

༥༠༨-༩. ཨསམྦྷེདཱ ¶ མནསྶཱཔཱིཏི མནནྟི བྷཝངྒཙིཏྟཾ. ཏཾ ནིརུདྡྷམྤི ཨཱཝཛྫནཙིཏྟསྶ པཙྩཡོ བྷཝིཏུཾ ཨསམཏྠཾ མནྡཏམགཏམེཝ ཝཏྟམཱནམྤི སམྦྷིནྣཾ ནཱམ ཧོཏི. ཨཱཝཛྫནསྶ པཙྩཡོ བྷཝིཏུཾ སམཏྠཾ ཨསམྦྷིནྣཾ ནཱམ. མནསྶ ཨསམྦྷེདེན དྷམྨསྶ ཨཱཔཱཐགམནེན ཙ ཝཏྠུསནྣིསྶཡེན ཧདཡཝཏྠུསནྣིསྶཡེན. ཏེན ཏིཝིདྷེན པཙྩཡེན. སམནཀྐཱརཧེཏུནཱ མནོདྭཱརཱཝཛྫནེན སཧ པཝཏྟེན. ཨེཏེཧི པན ཙཏཱུཧི པཙྩཡེཧི སམེཏེཧི སཧགཏེཧི སམཱགམཾ ¶ ཨེཀཱིབྷཱཝཾ ཨཱགཏེཧི ཏཾ མནོཝིཉྙཱཎཾ ཏཾ མནོཝིཉྙཱཎསངྑཱཏཾ ཛཝནཙིཏྟཾ སམྤཡུཏྟེཧི སཧ ཛཱཡཏེ.

༥༡༠-༡༡. མནོ བྷཝངྒཙིཏྟཾ ནཱམ ཝིབྷཱཝིནཱ ཝེདིཏབྦཾ. ཨཱཝཛྫནཀྲིཡཱཙིཏྟཾ ཨཱཝཛྫནཀིརིཡཱཙིཏྟདྭཡཾ སམནཀྐཱརོ ནཱམ ཝིབྷཱཝིནཱ སཉྙིཏཾ. ཝཏྠུསནྣིསྶཡེན ཨིཏི ཨཡཾ པཱཋོ སབྦཏྠ སབྦེསུ བྷཝེསུ ན གཙྪཏི. པཉྩཧི ཁནྡྷེཧི ཝོཀཱརོ ཝོཀིཎྞོཏི པཉྩཝོཀཱརོ, པཉྩཝོཀཱརབྷཝཾ སནྡྷཱཡ ཀཱརཎཾ ཀཏྭཱ ‘‘ཝཏྠུསནྣིསྶཡེནཱ’’ཏི ཨཡཾ པཱཋོ པན ཀཐིཏོ མཡཱ, པཉྩཝོཀཱརབྷཝོ ནཱམ ཀཱམརཱུཔབྷཝོ, ཨརཱུཔབྷཝོ ཙཏུཝོཀཱརབྷཝོ ནཱམ, ཨསཉྙཱིབྷཝོ ཨེཀཝོཀཱརབྷཝོ ནཱམ. ཨཡཾ པཱཋོ ཙཏུཝོཀཱརཨརཱུཔབྷཝཾ སནྡྷཱཡ ན ཀཐིཏོཏི ཨཏྠོ. ཝཏྠུསྶ རཱུཔཏྟཱ ཨརཱུཔབྷཝེ ཀཐཾ ཝཏྠུསནྣིསྶཡོ བྷཝེཡྻཱཏི ཨཏྠོ.

༥༡༢-༤. པཊིསནྡྷཱདིཙིཏྟཱནི, སབྦཱནེཀཱུནཝཱིསཏི ཧོནྟི, ཀཱམཱཝཙརེསུ དས, རཱུཔེསུ པཉྩ, ཨརཱུཔཱིསུ ཙཏྟཱརི, སབྦཱནི པཊིསནྡྷིཙིཏྟཱནི ཨེཀཱུནཝཱིསཏི ཧོནྟི. ཀམྨཾ ནཱམ ཀུསལཱཀུསལཙེཏནཱ. ཀམྨནིམིཏྟཾ ནཱམ རཱུཔཱནི པཉྩཱརམྨཎཱནི པཉྙཏྟི ཙ མཧགྒཏཙིཏྟཉྩ. ཏཐཱ གཏིནིམིཏྟཀཾ ནཱམ ཀཔྤརུཀྑཱདཡོ, ཨཀུསལཔཀྑེ རཱུཔཱདིཨཱརམྨཎབྷཱུཏཱ ལོཧཀུམྦྷཱདཡོ ཙ. ཨིཏི ཨེཝཾ ཨིམིནཱ མཡཱ ཝུཏྟཔྤཀཱརེན ཏེསཾ པཊིསནྡྷཱདིཙིཏྟཱནཾ ཨཱརམྨཎཾ ཏིཝིདྷཾ བྷགཝཏཱ ཨུདཱིརིཏཾ. ཀཱམཱཝཙརསནྡྷཱིནཾ པརིཏྟཱརམྨཎཾ ཀཱམཱཝཙརཱརམྨཎཾ བྷགཝཏཱ མཏཾ. པཙྩུཔྤནྣཾ རཱུཔཱདིཔཉྩཱརམྨཎཾ, གཏིནིམིཏྟཾ པཉྩཱརམྨཎཉྩ པཙྩུཔྤནྣཉྩ ཧོཏི. ཨཏཱིཏཾ ཝཱ ཀམྨཾ ཀུསལཱཀུསལཙེཏནཱ ཨཏཱིཏཱཡེཝ, ན པཙྩུཔྤནྣཱ. ཨནཱགཏཾ ཨཱརམྨཎཾ ནཏྠི.

༥༡༥-༢༦. ཨཊྛེཝ ཙ མཧཱཝིཔཱཀཱ, ཏཱིཎི སནྟཱིརཎཱནི ཙཱཏི ཨེཀཱདསཝིདྷཾ ཙིཏྟཾ ཏདཱརམྨཎསཉྙིཏཾ. ཨེཀཱདསཝིདྷེ ཙིཏྟེ ¶ ཏདཱརམྨཎསཉྙིཏེ པུཉྙཝིཔཱཀཱནི ཀུསལཝིཔཱཀཱ དས ¶ ཧོནྟི, ཨཔུཉྙཛཾ ཨཀུསལཝིཔཱཀཾ པན ཨེཀཾ ཧོཏི. མཧཱཝིཔཱཀཱ རཱུཔཱརཱུཔབྷཝདྭཡེ ན ཛཱཡནྟི, ཀཱམརཱུཔབྷཝེ སནྟཱིརཎཏྟཡཾ ཧོཏི. ཡཱནི ཏདཱརམྨཎཙིཏྟཱནི སཏྠུནཱ ཛིནེན ཝུཏྟཱནི, ཏེསུ ཏདཱརམྨཎཙིཏྟེསུ ཨེཀམྤི ཏདཱརམྨཎཙིཏྟཾ རཱུཔཱརཱུཔབྷཝདྭཡེ ཏདཱརམྨཎཾ ཧུཏྭཱ ཀདཱཙིཔི ནཔྤཝཏྟཏི. ཀསྨཱ ཀཱརཎཱ? ཏཏྠ ཏསྨིཾ རཱུཔཱརཱུཔབྷཝདྭཡེ ‘‘ཏདཱརམྨཎཾ ན ཧོཏཱི’’ཏི ཝཙནཾ ཙོདཀོ བྷཝེཡྻ, བཱིཛསྶཱབྷཱཝཏོ པན ན ཧོཏཱིཏི པརིཧཱརོ. ཨཀཱམཱཝཙརཱརམྨཎེ ཨཀཱམཱཝཙརདྷམྨེ ཨིདཾ ཏདཱརམྨཎམཱནསཾ ནེཝ ཨནུབནྡྷཏི. ཧི ཀསྨཱ ཀཱརཎཱ? པརིཏྟཱརམྨཎཏྟཱ ཙ ཨེཀནྟེན ཨཝསྶཾ ཏདཱརམྨཎམཱནསསྶ ཀཱམཱཝཙརཱརམྨཎཏྟཱ ཙ ཏཐཱ ཨཔརིཙིཏཏྟཱ ཙ སབྦདཱ ནཱནུབནྡྷཏི. ཏཉྷི ཡཐཱ པིཏརཾ ཝཱ པིཏུསདིསཾ ཝཱ ཉཱཏིཾ ཨནུབནྡྷནྟོཔི ཏརུཎདཱརཀོ གྷརདྭཱརནྟརཝཱིཐིཙཏུཀྐཱདིམྷི པརིཙིཏེཡེཝ དེསེ ཨནུབནྡྷཏི, ན ཨརཉྙཾ ཝཱ ཡུདྡྷབྷཱུམིཾ ཝཱ གཙྪཏི, ཨེཝཾ ཀཱམཱཝཙརེ དྷམྨེ ཨནུབནྡྷནྟམྤི མཧགྒཏལོཀུཏྟརདྷམྨམཱརབྦྷ པཝཏྟམཱནེ དྷམྨེ ནཱནུབནྡྷཏི. ཡསྨཱ ཙསྶ སབྦོ ཀཱམཱཝཙརཔཱཀོ ཙ ཀིརིཡཱམནོདྷཱཏུ ཀིརིཡཱཨཧེཏུཀམནོཝིཉྙཱཎདྷཱཏུ སོམནསྶསཧགཏཱ ཨིམེ དྷམྨཱ པརིཏྟཱརམྨཎཱཏི ཨེཝཾ ཨཙྩནྟཾ པརིཏྟམེཝ ཨཱརམྨཎཾ ཝུཏྟཾ, ཏསྨཱ ཙེཏཾ མཧགྒཏལོཀུཏྟརཱརམྨཎེ ཀཱམཱཝཙརདྷམྨེཔི ནཱནུབནྡྷཏཱིཏི ཝེདིཏབྦཾ.

༥༢༧-༣༢. ཀིཾ ཏེན ཡུཏྟིཝཱདེན, ཝུཏྟཾ ཨཊྛཀཐཱསུ ཧི ‘‘ཛནཀཾ ཏེན ཏུལྱ’’ནྟིཨཱདིཀེན ཏེན, ཡུཏྟིཡཱ ཝཱདོ ཡུཏྟིཝཱདོ, ‘‘ཛནཀཾ ཏེན ཏུལྱ’’ནྟིཨཱདིཀཱཡ ཡུཏྟིཀཐཱཡ ཀིཾ པཡོཛནཾ ཝུཏྟཾ? ཨཊྛཀཐཱསུ ཧི སཙྩཾ ‘‘ཀིཾ ཏེན ཡུཏྟིཝཱདེནཱ’’ཏི ཝཙནཾ, ‘‘ཨཏྠཀཐཱསཱུ’’ཏི ཝཏྟབྦེ སམཱསེ ཧི ཏྠ-སྶ ཊྛ-ཀཱརཾ ཀཏྭཱ ‘‘ཨཊྛཀཐཱསཱུ’’ཏི ཝུཏྟཾ ¶ . ཀཱམཱཝཙརེ དྷམྨེ པཊིཙྩ ཏདཱརམྨཎབྷཱཝདཱིཔཀཾ ཝཙནཾ ཨཱཙརིཡེན ཝུཏྟཾ. ཏདཱརམྨཎཙིཏྟཱནི, ཨེཀཱདསཔི སབྦསོ སབྦཔྤཀཱརེནཔི ཏདཱརམྨཎཙིཏྟཱནི ནཱམགོཏྟཾ པནཱརབྦྷ ཏིསྶཱདིཀཾ ནཱམཔཉྙཏྟིཾ པཊིཙྩ ཀཙྩཱཡནགོཏྟཀསྶཔགོཏྟཱདིཀཾ གོཏྟཔཉྙཏྟིཾ པཊིཙྩ ཛཝནེ ཛཝིཏེཔི ཙ ཏདཱརམྨཎཾ ན གཎྷནྟི, རཱུཔཱརཱུཔབྷཝེསུ ཝཱ ཏདཱརམྨཎཾ ན གཎྷནྟི. ཡདཱ པཉྙཏྟིམཱརབྦྷ, ཛཝནེ ཛཝིཏེཔི ཝཱ ཡདཱ མཡཱ ཝུཏྟཱཡ པཉྙཏྟིཡཱ སེསཔཉྙཏྟིཾ པཊིཙྩ ཛཝནེ ཛཝིཏེཔི ཝཱ ཏདཱརམྨཎཾ ན ལབྦྷཏེ ཨཱཙརིཡེན, ཏཐཱ དུཀྑཨནིཙྩཨནཏྟལཀྑཎཱརམྨཎིཀཱཡ ཝིཔསྶནཱཡ ཏདཱརམྨཎཾ ན ལབྦྷཏེ ཨཱཙརིཡེན. ཏདཱརམྨཎཱ ན ལབྦྷནྟི, མིཙྪཏྟནིཡཏེསུཔི མིཙྪཏྟེ མིཙྪཱསབྷཱཝེ ‘‘ནཏྠི དིནྣ’’ནྟྱཱདིཝསེན ནིཡཏཱནི ཙཏྟཱརི དིཊྛིཡུཏྟཛཝནཱནི མིཙྪཏྟནིཡཏཱནི, མིཙྪཏྟནིཡཏེསུཔི ཏདཱརམྨཎཾ ན ལབྦྷཏེ ཨཱཙརིཡེན, ལོཀུཏྟརདྷམྨེ ཨཱརབྦྷ ¶ ཛཝནེ གཏེཔི ཏདཱརམྨཎཾ ན ལབྦྷཏེ ཨཱཙརིཡེན. ཏཐཱ མཧགྒཏེ དྷམྨེ ཨཱརབྦྷ ཛཝནེ ཛཝིཏེཔི ཏདཱརམྨཎཾ ན ལབྦྷཏེ ཨཱཙརིཡེན, པཊིསམྦྷིདཱཉཱཎཾ ཨཱརབྦྷ ཛཝནེ ཛཝིཏེཔི ཏདཱརམྨཎཾ ན ལབྦྷཏེ ཨཱཙརིཡེན. མནོདྭཱརེཔི སབྦེསཾ ཛཝནཱནཾ ཨནནྟརཾ ཨནུཔུབྦཏོ ཏདཱརམྨཎཙིཏྟཱནི བྷཝནྟི.

༥༣༣-༤. མནོདྭཱརེ ཨཱརམྨཎགྷཊྚནཱ ན ཝིཛྫཏི. བྷཝངྒཏོ ཙེཏསོ ཝཱིཐིཙིཏྟསྶ ཝུཊྛཱནཾ ཀཐཾ ཀེན པཀཱརེན ཧོཏི? མནོདྭཱརེཔི གྷཊྚནཱཡ ཝིནཱ གྷཊྚནཾ ཝཛྫེཏྭཱ ཨཱཔཱཐཾ ཨཱགཙྪནྟེཝ ཡསྨཱ ཀཱརཎཱ, ཏསྨཱ ཝཱིཐིཙིཏྟཱནཾ སམྦྷཝོ ཧོཏི.

༥༣༥-༦. དྭཱདསཱཔུཉྙཙིཏྟཱནཾ དྭཱདསཨཀུསལཙིཏྟཱནཾ ཝིཔཱཀཱ སཏྟསཏྟཏི པཱཔཔཱཀཱ དྭཱདསཔཱཔཙིཏྟཱནཾ ཝིཔཱཀཱ ¶ ཙཏུརཱསཱིཏི པཝཏྟིཡཾ ཧོནྟི. ཨེཀསྶ སོམནསྶཡུཏྟདིཊྛིསམྤཡུཏྟཱཀུསལསྶ ཙཀྑུསོཏགྷཱནཛིཝ྄ཧཱཀཱཡཝིཉྙཱཎཱནི, སམྤཊིཙྪནཾ, ཨུཔེཀྑཱཡུཏྟསནྟཱིརཎཱནི ཙཱཏི སཏྟ ཨཀུསལཔཱཀཱ ཧོནྟི. ཏཐཱ སེསཱནཾ ཨེཀཱདསནྣཾ ཨཀུསལཱནམྤི སཏྟ ཝིཔཱཀཱ ཧོནྟི. ཨེཀཱདསཝིདྷཱནཾ ཏུ, ཧིཏྭཱ ཨུདྡྷཙྩམཱནསཾ ཨུདྡྷཙྩམཱནསཾ ཧིཏྭཱ ཨེཀཱདསཝིདྷཱནཾ པཊིསནྡྷིཡོ ཨེཀཱདསཝིདྷཱ ཙེཝ བྷཝནྟི.

༥༣༧-༨. ཀྲིཡཙིཏྟེསུ སབྦེསུ ཡཾ ཨཱཝཛྫནདྭཡཾ ཛཝནཾ ན ཙ ཧོཏི, ཏཾ ཨཱཝཛྫནདྭཡཾ ཀརཎམཏྟཏྟཱ ཀིརིཡཱམཏྟཏྟཱ ཝཱཏཔུཔྥསམཾ ཝཱཏཔུཔྥེན སདིསཾ མཏཾ བྷགཝཏཱ. ཨཡམེཏྠཱདྷིཔྤཱཡོ – ཁཱིཎཱསཝེ ཨུཔྤནྣཀཱལེ ཝཱ ཏཾ ཨཱཝཛྫནདྭཡཾ ཀིརིཡཙིཏྟཾ བྷཝིཏུཾ ཡུཏྟཾ. སབྦེསུ པུཐུཛྫནེསུ ཨུཔྤནྣཀཱལེ ཀཐཾ ཀིརིཡཱ ཧོཏཱིཏི ཙེ? ཀརཎམཏྟཏྟཱ ཨཕལདཱཡཀཾ ཝཱཏཔུཔྥཾ ཝིཡ ཨཕལདཱཡཀཾ ཀིརིཡཙིཏྟཾ བྷཝིཏུཾ ཡུཏྟིཧཱརོ ཀིརིཡཱ པན ཧོཏི. ཡཾ སབྦཾ ཀིརིཡཙིཏྟཾ ཀིཙྩསཱདྷནཏོ ཛཝནཀིཙྩསཱདྷནཝསེན ཛཝནཏྟཾ ཛཝནབྷཱཝཾ པཏྟཾ ཚིནྣམཱུལསྶ རུཀྑསྶ པུཔྥཾ ཨཕལཾ ཧོཏི ཡཐཱ, ཨེཝཾ ཚིནྣཱཝིཛྫཱཏཎྷཱམཱུལསྶ ཝཱིཏརཱགསྶ ཏཾ སབྦཾ ཀིརིཡཙིཏྟཾ ཨཕལཾ ཝིཔཱཀཝིརཧིཏཾ སིཡཱ བྷཝེཡྻ.

༥༣༩-༤༠. པཊིཙྩ པན ཨེཏསྨཱ, ཕལམེཏཱིཏི པཙྩཡོ ཨེཀཾ དྷམྨཾ པཊིཙྩ ཨེཏསྨཱ དྷམྨཏོ ཕལཾ ཨེཏི པཝཏྟཏི ཏསྨཱ པཙྩཡོ, ཡོ དྷམྨོ ཡསྶ དྷམྨསྶ ཋིཏིཡཱ ཨུཔྤཏྟིཡཱཔི ཨུཔཀཱརོ ¶ ནཱམ ཧོཏི, སོ དྷམྨོ ཏསྶ དྷམྨསྶ པཙྩཡོཏི པཙྩཡོ ནཱམ པཎྜིཏེན པཝུཙྩཏེ. སམྦྷཝོ པབྷཝོ ཧེཏུ ཀཱརཎཾ པཙྩཡོ མཏོ བྷགཝཏཱ. ཨིདཾ ཝཙནཾ ཨཉྙཏྠ དཱིཔནཝཙནཾ.

༥༤༡. ལོབྷཱདི པན ཡོ དྷམྨོ, མཱུལཊྛེནུཔཀཱརཀོ ཡོ ལོབྷཱདི པན དྷམྨོ མཱུལབྷཱཝེན ཕལདྷམྨསྶ ¶ ཨུཔཀཱརཀོ, སོ ལོབྷཱདིདྷམྨོ ཕལདྷམྨསྶ ཧེཏཱུཏི ཧེཏུ ནཱམ ཝིབྷཱཝིནཱ ཝིཉྙཱཏབྦོ.

༥༤༢. ལོབྷོ དོསོ ཙ མོཧོ ཙ ཏཐཱ ཨལོབྷཱདཡོ ཏཡོ ཧེཏཱུ, ཏེ ཚ ཨེཝ ཧེཏུཡོ ཧོནྟི, ཛཱཏིཏོ ཛཱཏིཝསེན ཀུསལཛཱཏིཨཀུསལཛཱཏིཨབྱཱཀཏཛཱཏིཝསེན ནཝདྷཱ ནཝཧི ཀོཊྛཱསེཧི སིཡུཾ.

༥༤༣-༤. དྷམྨཱནཾ ཀུསལཱདཱིནཾ, ཀུསལཱདིཏྟསཱདྷཀོ ཡོ དྷམྨོ ཀུསལཱདཱིནཾ དྷམྨཱནཾ ཀུསལཱདིཏྟསཱདྷཀོ ཀུསལཱདིབྷཱཝསཱདྷཀོ, སོ དྷམྨོ མཱུལཊྛོ ནཱམ. ཨེཝཾ ཝཙནཾ ཨེཀེ ཨེཀཙྩེ ཨཱཙརིཡཱ ཝདནྟི. ཨེཝཾ སནྟེ ཀུསལཱཀུསལཱདཱིནཾ དྷམྨཱནཾ ཀུསལཱདིཏྟསཱདྷཀཝསེན མཱུལཊྛེ སནྟེ ཏཾསམུཊྛཱནརཱུཔཱིསུ ཏེཧི ཙིཏྟེཧི སམུཊྛཱནརཱུཔེསུ ཏེཧི ཙིཏྟེཧི སམུཊྛིཏེསུ ཙིཏྟཛརཱུཔེསུ ཧེཏཱུནཾ ལོབྷཱདིཧེཏཱུནཾ ཧེཏུཔཙྩཡཏཱ ཀདཱཙིཔི ནེཝ སམྤཛྫཏི. ཨཡམེཏྠཱདྷིཔྤཱཡོ – ཡདི ཙིཏྟེསུ རཱུཔཱནི སམུཊྛཱཔེནྟེསུ ཏེ ལོབྷཱདཡོཔི ཙིཏྟཱནཾ སམྤཡུཏྟཙིཏྟཱནཾ ཨེཀུཔྤཱདཏྟཱ ཙ རཱུཔཱནི སམུཊྛཱཔེནྟིཡེཝ. ཏདཱ ཏེསཾ མཏེ ཏེསཾ ཙིཏྟཛརཱུཔཱནཾ ཀུསལཱདིཏྟཾ སིཡཱ. ན ཙ ཀདཱཙི རཱུཔཱནི ཀུསལཱདིནཱམཀཱནི དིསྶནྟི ཡསྨཱ, ཏསྨཱ ཙིཏྟཛརཱུཔཱནཾ ཀུསལཱདིབྷཱཝཉཱཔནཏྠཾ ཏེསཾ ཙིཏྟཛརཱུཔཱནཾ ཏེ ལོབྷཱདཡོ ཧེཏུཔཙྩཡཱ ན ཧོནྟི, ཨིཏི ཝཙནཾ ཝཏྟབྦཾ སིཡཱ. ཨེཝཉྩ སཏི ཙིཏྟཛརཱུཔཱནི ནཱམ ཀདཱཙིཔི ཝིཡུཏྟཱནི ཙརནྟི, ཏསྨཱ ཀུསལཱདིཏྟསཱདྷཀོ མཱུལཊྛོ ན ཧོཏི.

༥༤༥-༦. ཧི སཙྩཾ ‘‘ཨེཝཾ སནྟེ ཏུ ཧེཏཱུན’’ནྟིཨཱདིཀཾ ཝཙནཾ. ཏེ ལོབྷཱདཡོ ཧེཏཱུ ཏེསཾ རཱུཔཱནཾ ཀུསལཱདིཏཾ ཀུསལཱདིབྷཱཝཾ ན སཱདྷེནྟི ན ནིཔྥཱདེནྟི. ཏེ ཧེཏཱུ ཏེསཾ ¶ པན རཱུཔཱནཾ པཙྩཡཱ ན ཙ ན ཧོནྟིཡེཝ, ཏསྨཱ ཀཱརཎཱ ཀུསལཱདཱིནཾ དྷམྨཱནཾ ཀུསལཱདིཏྟསཱདྷཀོ ཡོ དྷམྨོ, སོ དྷམྨོ མཱུལཊྛོཏི མཱུལསབྷཱཝོ ནཱམ སམཡཉྙུནཱ སམཡཝིཛཱནནསཱིལེན ཝིཉྙུནཱ གནྟབྦོ ཛཱནིཏབྦོ.

༥༤༧. སུཔྤཏིཊྛིཏབྷཱཝསྶ ¶ , སཱདྷནེནུཔཀཱརཀོ སུཔྤཏིཊྛིཏབྷཱཝཾ སཱདྷནེན ཨུཔཀཱརཀོ ཡོ ཨཏྠོ, སོ ཨཏྠོ ཧེཏཱུནཾ ལོབྷཱདཱིནཾ མཱུལཊྛོ མཱུལསབྷཱཝོ ཨིཏི ཙ གཧཎཾ ཝིབྷཱཝིནཱ ཝིཉྙཱཏབྦཾ.

༥༤༨-༩. ཀུསལཱཀུསལཱ ཧེཏཱུ ཀུསལཱ ཧེཏཱུ, ཨཀུསལཱ ཧེཏཱུ, ཀྲིཡཱཧེཏཱུ སབྦསོ སབྦཔྤཀཱརེན སབྦེ ཀིརིཡཱཧེཏུཡོ ཙ སམྤཡུཏྟཱནཾ པཉྩཝོཀཱརབྷཱུམིཡཾ སམྤཡུཏྟཱནཾ དྷམྨཱནཾ ཨཉྙམཉྙཔཙྩཡབྷཱཝེན ཧེཏུཔཙྩཡཏཾ ཡཱཏཱ གཏཱ. ཏཾསམུཊྛཱནཱནཾ ཙིཏྟཛརཱུཔཱནཉྩ ཧེཏུཔཙྩཡཏཾ ཡཱཏཱ གཏཱ, ཨེཏེ ཧེཏཱུ ཙཏུཝོཀཱརབྷཱུམིཡཾ སམྤཡུཏྟཱནཾ ཨེཝ དྷམྨཱནཾ ཧེཏུཔཙྩཡཏཾ ཡཱཏཱ གཏཱ.

༥༥༠-༡. ཀཱམེ ཝིཔཱཀཧེཏཱུཔི ཨཏྟནཱ སམྤཡུཏྟཱནཾ ཧེཏུཔཙྩཡཏཾ ཡཱཏཱ, པཊིསནྡྷིཀྑཎེཔི ཀཊཏྟཱརཱུཔཛཱཏཱནཾ ཀམྨཛརཱུཔཱནཾ ཧེཏུཔཙྩཡཏཾ ཡཱཏཱ, ཏསྨཱ པཊིསནྡྷིཙིཏྟུཔྤཱདཀྑཎེཡེཝ ཀམྨཛརཱུཔཱནཾ ཨུཔྤཱདོ ཧོཏི, ཡསྨཱ ཀཱརཎཱ པཝཏྟིཡཾ ཙིཏྟཛཱནཉྩ རཱུཔཱནཾ ཧེཏུཔཙྩཡཏཾ གཏཱ.

༥༥༢-༥. རཱུཔེ ཝིཔཱཀཧེཏཱུ ཀཱམཱཝཙརབྷཱུམིཡཾ ཧེཏུཡོ ཝིཡ ཧེཏུཔཙྩཡཱ ཧོནྟི, པཉྩཝོཀཱརེ ལོཀུཏྟརཝིཔཱཀཧེཏཝོ ཙིཏྟཛཱནཾ རཱུཔཱནཉྩ སམྤཡུཏྟཱནཉྩ པཉྩཝོཀཱརབྷཱུམིཡཾ ཧེཏུཔཙྩཡཱ ཧོནྟི. ཙཏུཝོཀཱརེ ལོཀུཏྟརཝིཔཱཀཛཱ ཧེཏཝོ སམྤཡུཏྟཱནཾ ཨེཝ ཙཏུཝོཀཱརབྷཱུམིཡཾ ཧེཏུཔཙྩཡཱ བྷཝནྟི. ཨིཏརེ ཙཏུཝོཀཱརེ ཨརཱུཔབྷཝེ ཝིཔཱཀཛཱ ཧེཏཝོ སམྤཡུཏྟཱནཾ ཨེཝ སབྷཱུམིཡཾ ཨཏྟནོ ¶ བྷཱུམིཡཾ ཨརཱུཔབྷཱུམིཡཾ ཧེཏུཔཙྩཡཱ ཧོནྟི. ཧེཏུཏྠོ ཧེཏཱུནཾ ཨཏྠོ ཧེཏུཡོ ཙེཝ ཧེཏུཔཙྩཡོ ཙེཝ ཧེཏུཔཙྩཡསམྦྷཝོ ཧེཏུཔཙྩཡུཔྤཏྟི, ཨེཝམེཝ ཨེཝཾ ཨིམིནཱ པཀཱརེན. སཉྫཱཏོ སུཁཧེཏུ ཡསྶཱཏི སཉྫཱཏསུཁཧེཏུ, ཏེན ཝིཉྙེཡྻོ.

༥༥༦-༨. ཚནྡོ ཙིཏྟཉྩ ཝཱིརིཡཾ ཝཱིམཾསཱ ཙཱཏི ཙཏུདྷཱདྷིཔཏཱི ལོཀཱདྷིཔཏིནཱ སཏྠུནཱ ཝུཏྟཱ. ཚནྡཾ ཛེཊྛཀཾ ཀཏྭཱ ཙིཏྟསྶ ཨུཔྤཏྟིཀཱལསྨིཾ ཡོ ཚནྡོ, སོ ཚནྡཱདྷིཔཏི ནཱམ, ཚནྡཾ དྷུརཾ ཀཏྭཱ སམཱདྷིཀརཎཙིཏྟསྶ ཨེསེཝ ནཡོ སེསེསུཔི ཙ ཏཱིསུ མཡཱ ཝུཏྟཏོ ཚནྡཱདྷིཔཏིཏོ སེསེསུཔི ཙ ཨདྷིཔཏཱིསུ. ཡོ དྷམྨོ ཛེཊྛཊྛེན ཨུཔཀཱརཀོ, སོ དྷམྨོ ཨདྷིཔཏཱིཏི ཨདྷིཔཏི ནཱམ བྷགཝཏཱ ནིདྡིཊྛོ.

༥༥༩.

སུམཏིམཏིཝིབོདྷནཾ ¶ ཝིཙིཏྟཾ,

ཀུམཏིམཏིནྡྷནཔཱཝཀཾ པདྷཱནཾ;

ཨིམམཏིམདྷུརཾ ཨཝེདི ཡོ ཡོ,

ཛིནཝཙནཾ སཀལཾ ཨཝེདི སོ སོ.

ཡོ ཡོ ཛནོ ཨིམཾ ཨབྷིདྷམྨཱཝཏཱརཾ སུམཏིམཏིཝིབོདྷནཾ སུམཏཱིནཾ སུནྡརམཏཱིནཾ པཎྜིཏཱནཾ མཏིཡཱ ཝིབོདྷནཀརཾ ཝིཙིཏྟཾ ཀུམཏཱིནཾ ཀུཙྪིཏམཏཱིནཾ བཱལཱནཾ མཏིཨིནྡྷནེ པདྷཱནཾ པཱཝཀཾ ཨཏིམདྷུརཀརཾ ཨཝེདི ཛཱནི, སོ སོ ཛནོ སཀལཾ ཛིནཝཙནཾ ཨཝེདི ཛཱནི.

ཨིཏི ཨབྷིདྷམྨཱཝཏཱརཊཱིཀཱཡ

པཀིཎྞཀནིདྡེསཝཎྞནཱ ནིཊྛིཏཱ.

ཨཊྛམོ པརིཙྪེདོ.

༩. ནཝམོ པརིཙྪེདོ

པུཉྙཝིཔཱཀཔཙྩཡནིདྡེསཝཎྞནཱ

༥༦༠-༢.

བཱཏྟིཾསཔཱཀཙིཏྟཱནི ¶ , ལོཀིཀཱནེཝ ཡཱནི ཧི;

ཨེཏེསཾ པཱཀཙིཏྟཱནཾ, པཊིསནྡྷིཔཝཏྟིསུ.

ཡཱནི ལོཀིཀཱནི ཨེཝ བཱཏྟིཾས པཱཀཙིཏྟཱནི ཧོནྟི, ཨེཏེསཾ པཱཀཙིཏྟཱནཾ པུཉྙཱཔུཉྙཱདིསངྑཱརཱ བྷཝཱདཱིསུ ཡོནིགཏིཝིཉྙཱཎཊྛིཏིསཏྟཱཝཱསེསུ པཊིསནྡྷིཔཝཏྟཱིསུ ཡཐཱ ཡེན པཀཱརེན པཙྩཡཱ ཧོནྟི ཨེཝ, ཨིམེསཾ ཝིཔཱཀཙིཏྟཱནཾ ཏེཔི སངྑཱརཱ བྷཝཱདཱིསུ ཡོནིགཏིཝིཉྙཱཎཊྛིཏིསཏྟཱཝཱསེསུ པཊིསནྡྷིཔཝཏྟཱིསུ ཏཐཱ ཏེན པཀཱརེན ཝིབྷཱཝིནཱ པཎྜིཏེན ཝིཉྙཱཏབྦཱ. ཏཡོ བྷཝཱ ཙཏསྶོ ཙ ཡོནིཡོ ཀཱམབྷཝརཱུཔབྷཝཨརཱུཔབྷཝཝསེན ཏཡོ བྷཝཱ, ཨཎྜཛཛལཱབུཛསཾསེདཛཨོཔཔཱཏིཀཡོནིཝསེན ཙཏསྶོ ཙ ཡོནིཡོ, ནིརཡགཏིཏིརཙྪཱནགཏིཔེཏགཏིམནུསྶགཏིདེཝགཏིཝསེན ¶ གཏིཔཉྩཀཾ, སནྡྷིསཉྙཱཡ པཊིསནྡྷིསཉྙཱཡ ནཱནཏྟཱ ནཱནཱབྷཱཝཏོ, ཀཱཡསྶཱཔི ཙ རཱུཔཀཱཡསྶཱཔི ཙ ནཱནཏྟཱ ནཱནཱབྷཱཝཏོ ཀཱམསུགཏིཡོ, ནཱནཱ ཨཏྟཱ སབྷཱཝོ ཨེཏསྶཱཏི ནཱནཏྟཱ, ནཱནཏྟོ རཱུཔཀཱཡོ ཨེཏེསནྟི ནཱནཏྟཀཱཡཱ, ནཱནཱ སབྷཱཝོ ཨེཏསྶཱཏི ནཱནཏྟཱ, ནཱནཏྟཱཡེཝ སཉྙཱ ནཱནཏྟསཉྙཱ, སཱ ཨེཏེསཾ ཨཏྠཱིཏི ནཱནཏྟསཉྙཱི ནཱམ, པཋམཛ྄ཛྷཱནབྷཱུམི ཙ ཙཏུརཱཔཱཡབྷཱུམིཡོ ཙ ནཱནཏྟཀཱཡཨེཀཏྟསཉྙཱི ནཱམ, དུཏིཡཛ྄ཛྷཱནབྷཱུམི ཨེཀཏྟཀཱཡནཱནཏྟསཉྙཱི ནཱམ, ཏཏིཡཛ྄ཛྷཱནབྷཱུམིཝེཧཔྥལབྷཱུམིསུདྡྷཱཝཱསབྷཱུམིཡོ ཨེཀཏྟཀཱཡཨེཀཏྟསཉྙཱི ནཱམ, ཧེཊྛཱ ཋིཏཱ རཱུཔེཧི སདྡྷིཾ སཏྟཝིཉྙཱཎཊྛིཏིཡོ, ཏིཊྛནྟི ཝིཉྙཱཎཱནི ཨེཏྠཱཏི ཋིཏིཡོ, ཝིཉྙཱཎཱནཾ ཋིཏིཡོ ཝིཉྙཱཎཊྛིཏིཡོ, ཝིཉྙཱཎསྶ ཨབྷཱཝཏོ ཨསཉྙཱིབྷཱུམི ན གཡ྄ཧཏེ, ཙཏུཏྠཱརུཔྤབྷཱུམི ཙ ¶ པཊུཝིཉྙཱཎཱབྷཱཝཏོ ན གཡ྄ཧཏེ. སཏྟཱཝཱསཝསེན ཨསཉྙཱིབྷཱུམིཾ, ཙཏུཏྠཱརུཔྤབྷཱུམིཉྩ པན གཧེཏྭཱ ཏེ སཏྟཱཝཱསཱ ནཝ ཨེཝ ཧོནྟི.

༥༦༣-༨. ཀཱམེ པུཉྙཱབྷིསངྑཱརསཉྙིཏཱ ཨཊྛ ཙེཏནཱ པཱུརེནྟི ཨཏྟནོ ཀཱརཀཾ པཱུརེནྟི ཙ, ཨཛ྄ཛྷཱསཡཾ པུཛྫཉྩ བྷཝཾ ནིབྦཏྟེནྟཱིཏི པུཉྙཱནི, ཨབྷིསངྑརོནྟི ཝིཔཱཀཾ, ཀམྨཛརཱུཔཉྩཱཏི ཨབྷིསངྑཱརཱ, པུཉྙཱནི ཨེཝ ཨབྷིསངྑཱརཱ པུཉྙཱབྷིསངྑཱརཱ, ཏེཡེཝ སཉྙིཏཱ པུཉྙཱབྷིསངྑཱརསཉྙིཏཱ, ཀཱམེ པུཉྙཱབྷིསངྑཱརསཉྙིཏཱ ཨཊྛ ཙེཏནཱ. ནཝནྣཾ པཱཀཙིཏྟཱནཾ ཨུཔེཀྑཱཡུཏྟཱཧེཏུཀམཧཱཝིཔཱཀཝསེན ནཝནྣཾ པཱཀཙིཏྟཱནཾ ཀཱམསུགཏིཡཾ པན ནཱནཱ ཝཏྟམཱནཙེཏནཱཁཎཏོ པརཾ ཁཎཾ ཨེཏསྶཱཏི ནཱནཱཁཎཾ, ཏཾ ཨེཝ ནཱནཀྑཎིཀཾ, ཏམེཝ ཀམྨཾ ནཱནཀྑཎིཀཀམྨཾ, ཝཏྟམཱནཙེཏནཱཏོ པརཱ ཨཏཱིཏཙེཏནཱཏི ཨཏྠོ. བལཝཱ ནིསྶཡཔཙྩཡོ ཨུཔནིསྶཡཔཙྩཡོ, བལཝཏྠོ ཙེཏྠ ཨུཔ-སདྡོ, བལཝཔཙྩཡོཏི ཨཏྠོ, ནཱནཀྑཎིཀཀམྨཔཙྩཡཝསེན བལཝཔཙྩཡཝསེན ཙཱཏི ཨཏྠོ. དྭེདྷཱ དྭཱིཧི པཀཱརེཧི ཏེསཾ པཊིསནྡྷིཡཾ པཙྩཡཱ བྷཝནྟི, ཏཱ ཨཊྛ ཀཱམཱཝཙརམཧཱཀུསལཙེཏནཱ ཨུཔེཀྑཱསཧིཏཱཧེཏུམནོཝིཉྙཱཎདྷཱཏུཡཱ ཝིནཱ ཨུཔེཀྑཱསཧགཏཱཧེཏུམནོཝིཉྙཱཎདྷཱཏུཾ ཝཛྫེཏྭཱ པརིཏྟཔཱཀཱནཾ ཙཀྑུསོཏགྷཱནཛིཝ྄ཧཱཀཱཡསམྤཊིཙྪནསོམནསྶཡུཏྟཱཧེཏུཀཀུསལཝིཔཱཀཱནཾ དྭེདྷཱ ནཱནཀྑཎིཀཀམྨཱུཔནིསྶཡཔཙྩཡེཧི པཝཏྟིཡཾ པཙྩཡཱ ཧོནྟི. ཏཱཡེཝ ཙེཏནཱ ཏཱ ཨེཝ ཨཊྛ ཀཱམཱཝཙརམཧཱཀུསལཙེཏནཱ རཱུཔབྷཝེ པཉྩནྣཾ པཱཀཙིཏྟཱནཾ ཀུསལཝིཔཱཀཙིཏྟཱནཾ ཙཀྑུསོཏསམྤཊིཙྪནསོམནསྶཡུཏྟཨུཔེཀྑཱཡུཏྟསནྟཱིརཎཱནཾ དྭེདྷཱ ནཱནཀྑཎིཀཀམྨཱུཔནིསྶཡཔཙྩཡེཧི པཝཏྟིཡཾ པཙྩཡཱ ཧོནྟི. ཨཊྛནྣཾ ཏུ པརིཏྟཱནཾ, ཀཱམེ དུགྒཏིཡཾ ཏཐཱ ཨཊྛནྣཾ པརིཏྟཱནཾ ཀུསལཝིཔཱཀཱནཾ ཙཀྑུསོཏགྷཱནཛིཝ྄ཧཱཀཱཡསམྤཊིཙྪནཱནཾ, དྭིནྣཾ ¶ སནྟཱིརཎཱནཉྩ པཝཏྟེ པཝཏྟིཀྑཎེ ¶ པཙྩཡཱ ཧོནྟི, པཊིསནྡྷིཡཾ པཊིསནྡྷིཀྑཎེ པན པཙྩཡཱ ན ཧོནྟི. ཝུཏྟཔྤཀཱརཱཝ ཀཱམེ སུགཏིཡཾ ཡཐཱཝུཏྟཔྤཀཱརཱཝ ཨཊྛ ཀཱམཱཝཙརམཧཱཀུསལཙེཏནཱ ཀཱམསུགཏིཡཾ ཏཐཱ སོལ༹སནྣཾ ཀུསལཝིཔཱཀཱནཾ པཝཏྟེ པཝཏྟིཀྑཎེ དྭེདྷཱ ནཱནཀྑཎིཀཀམྨཱུཔནིསྶཡཔཙྩཡེཧི པཙྩཡཱ ཧོནྟི, པཝཏྟེ པཝཏྟིཀྑཎེ སཏྟནྣཾ ཀུསལཝིཔཱཀཱནཾ པཙྩཡཱ ཧོནྟི. པཊིསནྡྷིཡཾ པཊིསནྡྷིཀྑཎེ ནཝནྣཾ ཀུསལཝིཔཱཀཙིཏྟཱནཾ པཙྩཡཱ ཧོནྟི.

༥༦༩-༧༤. རཱུཔེ པུཉྙཱབྷིསངྑཱརཱ, རཱུཔཱཝཙརབྷཱུམིཡཾ པཉྩནྣཾ པཱཀཙིཏྟཱནཾ པཊིསནྡྷིཡཾ པཊིསནྡྷིཀྑཎེ པཙྩཡཱ ཧོནྟིམཱཔུཉྙསངྑཱརཱ, ཀཱམེ དུགྒཏིཡཾ དྭིདྷཱ ཨིམེ ཨཔུཉྙཱབྷིསངྑཱརཱ, ཨིམཱ ཀུསལཔཊིཔཀྑཱ ཨུདྡྷཙྩཝཛྫཱ ཨེཀཱདས ཙེཏནཱ ཀཱམདུགྒཏིཡཾ ཨེཀསྶ པཊིསནྡྷིཝིཉྙཱཎསྶ པཊིསནྡྷིཡཾ པཊིསནྡྷིཀྑཎེ དྭིདྷཱ ནཱནཀྑཎིཀཀམྨཱུཔནིསྶཡཔཙྩཡེཧི པཙྩཡཱ ཧོནྟི. དྭཱདས ཨཀུསལཙེཏནཱ པཝཏྟེ པཝཏྟིཀྑཎེ ཨེཝ ཚནྣཾ ཙཀྑུསོཏགྷཱནཛིཝ྄ཧཱཀཱཡསམྤཊིཙྪནཱནཾ ཨཀུསལཝིཔཱཀཱནཾ པཙྩཡཱ ཧོནྟི, པཊིསནྡྷིཡཾ པཊིསནྡྷིཀྑཎེ པཙྩཡཱ ནོ ཧོནྟི. སཏྟནྣམྤི བྷཝནྟེཝ པཝཏྟེ པཝཏྟིཀྑཎེ པཊིསནྡྷིཡཾ པཊིསནྡྷིཀྑཎེ ཨཀུསལཝིཔཱཀཱནི སཏྟནྣཾ ཙཀྑུསོཏགྷཱནཛིཝ྄ཧཱཀཱཡསམྤཊིཙྪནསནྟཱིརཎཱནཾ པཙྩཡཱ བྷཝནྟི. ཀཱམེ སུགཏིཡཾ ཏེསཾ, སཏྟནྣམྤི ཏཐེཝ ཙ དྭཱདསཱཀུསལཙེཏནཱ ཀཱམེ སུགཏིཡཾ ཏཐེཝ ཙ ཏེསཾ སཏྟནྣཾ ཨཀུསལཝིཔཱཀཱནཾ པཝཏྟེ པཝཏྟིཀྑཎེ པཙྩཡཱ ཧོནྟི, པཊིསནྡྷིཡཾ པཊིསནྡྷིཀྑཎེ པཙྩཡཱ ན ཧོནྟི. ཝིཉྙཱཎཱནཾ ཙཏུནྣམྤི, ཏེསཾ རཱུཔབྷཝེ ཏཐཱ ཏཱཡེཝ དྭཱདསཱཀུསལཙེཏནཱ རཱུཔབྷཝེ ཏེསཾ ཙཏུནྣཾ ཨཀུསལཝིཔཱཀཱནཾ ཙཀྑུསོཏསམྤཊིཙྪནསནྟཱིརཎསངྑཱཏཱནཾ ཝིཉྙཱཎཱནཾ ཏཐཱ པཝཏྟེ པཝཏྟིཀྑཎེ པཙྩཡཱ ཧོནྟི, པཊིསནྡྷིཡཾ པཊིསནྡྷིཀྑཎེ ¶ པཙྩཡཱ ན ཧོནྟི. སོ ཙ ཀཱམབྷཝེནིཊྛརཱུཔཱདིཨུཔལདྡྷིཡཾ སོ ཙ ཨཔུཉྙཱབྷིསངྑཱརོ ཀཱམབྷཝེ ཨནིཊྛརཱུཔཱདིཨུཔལདྡྷིཡཾ ཨམནཱཔརཱུཔཱདཱིནི ཨཱརམྨཎཱནི ཨུཔལདྡྷིཡཾ ཏེསཾ ཙཏུནྣཾ ཨཔུཉྙཛཱནཾ ཝིཉྙཱཎཱནཾ པཙྩཡོ ཧོཏི. ཧི སཙྩཾ ‘‘སོ ཙ ཀཱམབྷཝེནིཊྛ-རཱུཔཱདིཨུཔལདྡྷིཡ’’ནྟིཨཱདིཀཾ ཝཙནཾ. ཨནིཊྛརཱུཔཱདཡོ ནཱམ ཝིསཡཱ བྲཧྨལོཀེ ན ཝིཛྫརེ ན ཝིཛྫནྟི.

༥༧༥-༦. ཏཐེཝཱནེཉྫསངྑཱརོ ན ཨིཉྫཏི ན ཕནྡཏི ན ཙལཏཱིཏི ཨཱནེཉྫཾ, ཨཱནེཉྫཉྩ ཏཾ སངྑཱརོ ཙཱཏི ཨཱནེཉྫསངྑཱརོ, ཏཐཱ ཨེཝ ཨཱནེཉྫསངྑཱརོ ཨརཱུཔཱཝཙརབྷཱུམིཡཾ ཙཏུནྣཾ པཱཀཙིཏྟཱནཾ པཝཏྟེ པཝཏྟིཀྑཎེ པཊིསནྡྷིཡཾ པཊིསནྡྷིཀྑཎེ པཙྩཡོ ཧོཏི. བྷཝེསྭེཏེ བྷཝེསུ ཨེཏེ ཝུཏྟཔྤཀཱརཱ པཙྩཡཱ ཝུཏྟཔྤཀཱརེན པཊིསནྡྷིཔཝཏྟཱིསུ ཡཐཱ ཙ ཡེན ཡེན ཙ པཀཱརེན ¶ ནཱནཀྑཎིཀཀམྨཱུཔནིསྶཡཔཙྩཡེཧི པཙྩཡཱ ཧོནྟི, ཏེན པཙྩཡཱ ཏཐཱ ཏེན ཏེན པཀཱརེན ཝིབྷཱཝིནཱ ཝིཛཱནནྟེན པཎྜིཏེན ཉེཡྻཱ.

༥༧༧. ཨེསེཝ ཙ ནཡོ ཉེཡྻོ, ཡོནིཨཱདཱིསུ ཡོནིགཏིཝིཉྙཱཎཊྛིཏིསཏྟཱཝཱསེསུ ཨེསེཝ ཙ ནཡོ བྷཝེསུ མཡཱ ཝུཏྟོ ཨེཝ ནཡོ པཎྜིཏེན ཉེཡྻོ. ཏཏྲིདཾ ཏཏྲ བྷཝེསུ ཨཱདིཏོ པཊྛཱཡ ཝུཏྟཾ ཨིདཾ ཝཙནཾ མུཁམཏྟནིདསྶནཾ ཨུཔཱཡམཏྟདཱིཔནཾ ཧོཏི.

༥༧༨-༨༡. ཨཝིསེསེན པུཉྙཱབྷི-སངྑཱརོ དྭིབྷཝེསུཔི ཀཱམཔུཉྙཱབྷིསངྑཱརཝསེན, རཱུཔཔུཉྙཱབྷིསངྑཱརཝསེན ཙ པུཉྙཱབྷིསངྑཱརོ ཨཝིསེསེན སམཱནབྷཱཝེན དྭཱིསུ བྷཝེསུ ཀཱམརཱུཔབྷཝེསུ པཊིསནྡྷིཾ དཏྭཱ སོ སངྑཱརོ སབྦཔཱཀཾ ཛནེཏི ནིབྦཏྟེཏི. ཏཐཱ ཙཏཱུསུ ཝིཉྙེཡྻོ, ཨཎྜཛཱདཱིསུ ཡོནིསུ དྭིབྷཝེསུ པུཉྙཱབྷིསངྑཱརོ ཝིཡ ཏཐཱ ཙཏཱུསུ ཨཎྜཛཱདཱིསུ སོ པུཉྙཱབྷིསངྑཱརོ པཎྜིཏེན ཉེཡྻོ. ‘‘ཨཎྜཛཱདཱིསཱུ’’ཏི ¶ ཝཙནཾ པདུམཔཙྩེཀབུདྡྷཱནཾ མནུསྶཏྟཾ སནྡྷཱཡ ཝུཏྟཾ. བཧུདེཝམནུསྶཱནཾ ཝསེན དྭཱིསུ གཏཱིསུ ཨེཝ ཙ ཏཐཱ སོ པུཉྙཱབྷིསངྑཱརོ པཎྜིཏེན ཉེཡྻོ. ཏཐཱ ནཱནཏྟཀཱཡཱདི-ཝིཉྙཱཎཱནཾ ཋིཏཱིསུཔི ནཱནཏྟཀཱཡནཱནཏྟསཉྙཱིནཱནཏྟཀཨཱཡཨེཀཏྟསཉྙཱི ཨེཀཏྟཀཱཡནཱནཏྟསཉྙཱི ཨེཀཏྟཀཱཡཨེཀཏྟསཉྙཱིནཾ ཝསེན ཙཏཱུསུ ཝིཉྙཱཎཊྛིཏཱིསུ སོ པུཉྙཱབྷིསངྑཱརོ པཎྜིཏེན ཉེཡྻོ. ནཱནཏྟཀཱཡནཱནཏྟསཉྙཱིནཱནཏྟཀཱཡཨེཀཏྟསཉྙཱིཨེཀཏྟཀཱཡནཱནཏྟསཉྙཱིཨེཀཏྟཀཱཡཨེཀཏྟསཉྙཱིནཾ ཝསེན ཝུཏྟཔྤཀཱརསྨིཾ ཙཏུབྦིདྷེ སཏྟཱཝཱསེ ཏཐཱ སོ པུཉྙཱབྷིསངྑཱརོ པཎྜིཏེན ཉེཡྻོ. ཨེཝཾ ཨིམིནཱ མཡཱ ཝུཏྟཔྤཀཱརེན པུཉྙཱབྷིསངྑཱརོ བྷཝཱདཱིསུ བྷཝཡོནིགཏིཝིཉྙཱཎཊྛིཏིསཏྟཱཝཱསེསུ ཡཐཱརཧཾ སོལ༹སནྣཾ ཀཱམཀུསལཔཱཀཱནཾ, པཉྩནྣཾ རཱུཔཔཱཀཱནཉྩཱཏི ཨེཀཝཱིསཏིཔཱཀཱནཾ དྭིདྷཱ ནཱནཀྑཎིཀཀམྨཱུཔནིསྶཡཔཙྩཡེན པཙྩཡོ ཧོཏི.

༥༨༢-༣. ཀཱམེ ཨཔུཉྙསངྑཱརོ ཀཱམབྷཝེ ཨཎྜཛཛལཱབུཛསཾསེདཛཨོཔཔཱཏིཀཡོནིཝསེན ཨཎྜཛཱདཱིསུ ཡོནཱིསུ ནིརཡགཏིཔེཏགཏིཏིརཙྪཱནགཏིཝསེན ཏཱིསུ གཏཱིསུ ནཱནཏྟཀཱཡཨེཀཏྟསཉྙཱིཝསེན ཨེཀིསྶཱ ཝིཉྙཱཎཊྛིཏིཡཱ ནཱནཏྟཀཱཡཨེཀཏྟསཉྙཱིཝསེན ཙ ཨེཀསྨིཾ པན སཏྟཱཝཱསེ དྭིདྷཱ ནཱནཀྑཎིཀཀམྨཱུཔནིསྶཡཔཙྩཡེཧི པཝཏྟེ པཝཏྟིཀྑཎེ པཊིསནྡྷིཡཾ པཊིསནྡྷིཀྑཎེ སོ ཨཔུཉྙཱབྷིསངྑཱརོ པཙྩཡོ ཧོཏི.

༥༨༤-༦. ཏཐེཝཱནེཉྫསངྑཱརོ ¶ ཏཐཱ ཨེཝ ཨཱནེཉྫསངྑཱརོ, ཨེཀཱརཱུཔབྷཝེ ཨེཀསྨིཾ ཨརཱུཔབྷཝེ ཨེཀིསྶཱ ཨོཔཔཱཏིཀཡོནིཡཱ ཙེཝ ཨེཀིསྶཱ དེཝགཏིཡཱཔི ཙ ཨཱཀཱསཱནཉྩཱཡཏནབྷཱུམི ཝིཉྙཱཎཉྩཱཡཏནབྷཱུམི ཨཱཀིཉྩཉྙཱཡཏནབྷཱུམིཝསེན ཏཱིསུ ཨེཝ ཙིཏྟཊྛིཏཱིསུ ཙཏུནྣཾ ཨརཱུཔབྷཱུམཱིནཾ ཝསེན ཙཏུབྦིདྷེ སཏྟཱཝཱསེ ཙཏུནྣཾ ཨརཱུཔཔཱཀཙིཏྟཱནཾ དྭེདྷཱ ¶ ནཱནཀྑཎིཀཀམྨོཔནིསྶཡཔཙྩཡེཧི སོ ཨཱནེཉྫཱབྷིསངྑཱརོ པཙྩཡོ ཧོཏི. པཊིསནྡྷིཔཝཏྟཱིནཾ, ཝསེནེཝཾ བྷཝཱདཱིསུ ཨེཝཾ ཨིམིནཱ མཡཱ ཝུཏྟཔྤཀཱརེན པཊིསནྡྷིཔཝཏྟཱིནཾ ཝསེན བྷཝཱདཱིསུ ཡཐཱ ཡེ སངྑཱརཱ ཨེསཾ པཱཀཙིཏྟཱནཾ པཙྩཡཱ ཧོནྟི, ཏཐཱ ཏེ སངྑཱརཱ ཨེཝཾ ཨིམིནཱ མཡཱ ཝུཏྟཔྤཀཱརེན པཎྜིཏེན ཝིཛཱནིཏབྦཱ.

༥༨༧-༩༠. ན རཱུཔཱརཱུཔདྷམྨཱནཾ, སངྐནྟི པན ཝིཛྫཏི རཱུཔདྷམྨཱནཾ, ཙིཏྟཙེཏསིཀསངྑཱཏཱནཾ ནཱམདྷམྨཱནཉྩ སངྐནྟི པན སངྐམནཾ པན ན ཝིཛྫཏི. སངྐནྟིབྷཱཝེ ཨསཏི ཨཏཱིཏབྷཝཏོ ཨིདྷ ཨིམསྨིཾ བྷཝེ རཱུཔདྷམྨཱནཾ སངྐམནབྷཱཝེ ཨསཏི པཊིསནྡྷིཙིཏྟཾ ཀཐཾ ཀེན པཀཱརེན སིཡཱ བྷཝེཡྻ? ནཏྠི ཙིཏྟསྶ སངྐནྟི, ཨཏཱིཏབྷཝཏོ ཨིདྷ ཨིམསྨིཾ བྷཝེ ཙིཏྟསྶ སངྐནྟི སངྐམནཾ ནཏྠི, ཏཏོ ཨཏཱིཏབྷཝཏོ ཨཏཱིཏཾ ཧེཏུཾ ཝིནཱ ཝཛྫེཏྭཱ ཨིདྷ ཨིམསྨིཾ བྷཝེ ཙིཏྟསྶ པཱཏུབྷཱཝོ ན ཝིཛྫཏི. སུལདྡྷཔཙྩཡཾ རཱུཔཱརཱུཔམཏྟཾ སུཊྛུ ལདྡྷཔཙྩཡཾ རཱུཔནཱམམཏྟཾ ཛཱཡཏི. ཨེཝཾ ཨིམིནཱ མཡཱ ཝུཏྟཔྤཀཱརེན པཙྩཡཾ ལབྷིཏྭཱ ཨུཔྤཛྫམཱནཾ རཱུཔཱརཱུཔམཏྟཾ རཱུཔནཱམམཏྟཾ ཛཱཡཏི. ཨེཝཾ ཨིམིནཱ མཡཱ ཝུཏྟཔྤཀཱརེན པཙྩཡཾ ལབྷིཏྭཱ ཨུཔྤཛྫམཱནཾ རཱུཔཱརཱུཔམཏྟཾ བྷཝནྟརཾ ཨཉྙབྷཝཾ པཊིསནྡྷིཾ ཨུཔེཏི ཨུཔགཙྪཏི. ཨིཏི ཝཙནཾ སམཉྙཱཡ ལོཀིཡཝོཧཱརེན པཝུཙྩཏེ, སཏྟོ ཝཱ ནཏྠི, སཏྟོ ཛཱིཝོཏི ཝེཝཙནཾ, ཨཏྟཱ ཝཱཔི ན ཝིཛྫཏི.

༥༩༡-༩. ཏསྶིདཾ པཱཀཊཾ ཀཏྭཱ, པཊིསནྡྷིཀྐམཾ པན ཏསྶ སཏྟསྶ ཨིདཾ པཊིསནྡྷིཀྐམཾ སུདུབྦུདྷཾ ཨཏིདུབྦིཛཱནཾ པཱཀཊཾ ཀཏྭཱ ཨཧཾ དསྶཡིསྶཱམི, ཏམེཏཾ པཊིསནྡྷིཀྐམཾ སཱདྷུ སཱདྷུཀཾ ནིབོདྷཐ, སཱདྷུ སཱདྷུཀཾ མནསི ཀརོཐ, ཝིཝིདྷེསུ ཨཱརམྨཎེསུ ལོབྷཝསེན ཙིཏྟཾ ཨནཱམེཏྭཱ ཝཛིརམཉྫཱུསཱཡ ཨནགྒྷམཎིརཏནཾ པཀྑིཔནྟོ ཝིཡ ཙིཏྟེ ཋཔེཏྭཱཏི ཨཏྠོ. ཨཏཱིཏསྨིཾ བྷཝེ ཏསྶ, ཨཱསནྣམརཎསྶ ཧིཨིཏོ ¶ བྷཝཏོ ཨཏཱིཏསྨིཾ བྷཝེ ཨཱསནྣམརཎསྶ ཏསྶ སརཱིརསྨིཾ ཨཱཏཔེ པཀྑིཏྟཾ ཧརིཏཾ ཏཱལཔཎྞཾ ཝིཡ སུསྶམཱནེ སཏི ཙཀྑུནྡྲིཡཱདིཀེ ཨིནྡྲིཡེ ནཊྛེ ཧདཡཝཏྠུམཏྟསྨིཾ ཋིཏེ ཀཱཡཔྤསཱདིཀེ ཝིཉྙཱཎེ ཏསྨིཾ ཁཎེ ཝཏྠུསནྣིསྶིཏཾ ཧདཡཝཏྠུནིསྶིཏཾ. ‘‘ཙིཏྟ’’ནྟི ཝཙནཾ བྷཝངྒམནོདྭཱརཱཝཛྫནཛཝནཾ སནྡྷཱཡ ཝུཏྟནྟི ཝེདིཏབྦཾ. པུབྦཱནུསེཝིཏནྟི ¶ ཨིཏོ ཀཱལཱ པུབྦཀཱལེ ཏེན པན ཨནུསེཝིཏཾ ཨནུཙིཎྞཾ པུཉྙཾ ཀམྨཾ ཝཱ ཨཔུཉྙཾ ཨེཝ ཝཱ ཀམྨཾ ཀམྨནིམིཏྟཾ གཏིནིམིཏྟཾ ཝཱ ཀམྨཕལེན དྭཱརེསུ པཙྩུཔཊྛིཏཾ ཨཱལམྦིཏྭཱ མནོདྭཱརཱཝཛྫནཛཝནཝསེན སེཝིཏཙིཏྟཾ པཝཏྟཏི. ཨེཝཾ ཨིམིནཱ མཡཱ ཝུཏྟཔྤཀཱརེན པཝཏྟམཱནཾ ཏཾ ཝིཉྙཱཎཾ ཏཾ ཛཝནཙིཏྟཾ ལདྡྷཔཙྩཡཾ ལདྡྷཱརམྨཎཔཙྩཡཾ. ཨཝིཛྫཱཡ པཊིཙྪནྣཱདཱིནཝེ ཝིསཡེཏི ཨཀུསལཛཝནེ ཛཝིཏེ ཏསྶ ཛཝནསྶ ཨཝིཛྫཱཡ ཨཔྤཊིཙྪནྣདོསེ ཏསྨིཾ ཀམྨཱདིཀེ ཨཱརམྨཎེ ཀུསལཛཝནེ ཛཝིཏེ ཏཏོ ཙིཏྟཝཱིཐིཏོ པུབྦབྷཱགེ པཝཏྟཱཡ ཨཝིཛྫཱཡ པཊིཙྪནྣདོསེ ཏསྨིཾ ཀམྨཱདིཀེ ཨཱརམྨཎེ. ཏཎྷཱཏི ཨཀུསལཛཝནེན སཧཛོ ལོབྷོ, ཨཀུསལཛཝནེ ཝཱ ཛཝིཏེ ཏཏོ ཝཱིཐིཙིཏྟཏོ པུབྦབྷཱགེ པཝཏྟོ ལོབྷོ ཏཎྷཱ. ནམེཏཱིཏི ཨཉྙཾ ཨཱརམྨཎཾ ཨགྒཱཧཱཔེཏྭཱ དལ༹ྷགྒཱཧཝསེན ཏཾ ཨེཝ ཀམྨནིམིཏྟགཏིནིམིཏྟསངྑཱཏཾ ཨཱརམྨཎཾ གཎྷཱཔེཏཱིཏི ཨཏྠོ. སཧཛཱ སངྑཱརཱ པན ཏསྶ ཙིཏྟསྶ སཧཛཱ ཨེཀཏོ ཛཱཏཱ ཙེཏནཱ པན ཏསྨིཾ ཡེཝཱརམྨཎེ ཁིཔནྟི པཝཏྟནྟི. ཨིམསྨིཾ པཙྩུཔྤནྣབྷཝེ ཨེཀསནྟཏིཝསཱ པཝཏྟཱཡ ཏཎྷཱཡ ནམཱིཡམཱནཾ ཏཾ ཝིཉྙཱཎཾ ཨོརིམཱ ཏཱིརམྷཱ རཛྫུཀཾ ཨཱལམྦིཏྭཱ མཱཏིཀཱཏིཀྐམོ པུརིསོ ཝིཡ ཨེཏཾ པུརིམཾ ནིསྶཡབྷཱུཏཾ ཧདཡཝཏྠུཾ ཛཧཏི ཚཌྜེཏི, ཙུཏིཙིཏྟཾ ཨུཔྤཛྫིཏྭཱ ནིརུཛ྄ཛྷཏཱིཏི ཨཏྠོ. ཨཔརཾ ཀམྨསམྦྷཱུཏཾ ནིསྶཡཾ ཨཔརཾ ཨཉྙཀམྨཏོ སམྦྷཱུཏཾ ནིསྶཡབྷཱུཏཾ ཧདཡཝཏྠུཾ ལབྷིཏྭཱ ཝཱ ཨལབྷིཏྭཱཔི ཝཱ ཨཱརམྨཎཱདཱིཧི ¶ པཙྩཡེཧི ཏཾ པཊིསནྡྷིསངྑཱཏཾ མཱནསཾ པཝཏྟཏི. ‘‘ལབྷིཏྭཱ’’ཏི ཝཙནཾ ཀཱམརཱུཔབྷཝཾ སནྡྷཱཡ ཝུཏྟཾ. ‘‘ཨལབྷིཏྭཱ’’ཏི ཝཙནཾ ཨརཱུཔབྷཝཾ སནྡྷཱཡ ཝུཏྟཾ. ཨེཏྠ ཨེཏེསུ ཙིཏྟེསུ པུརིམཾ ‘‘ཛཧཏཱི’’ཏི ཝཙནེན ཝུཏྟཉྩེཝ ཙིཏྟཾ, ཙུཏིཙིཏྟཾ པཙྪིམཾ ‘‘ཨཱརམྨཎཱདཱིཧི པཙྩཡེཧི པཝཏྟཏཱི’’ཏི ཝཙནེན ཝུཏྟཉྩེཝ ཙིཏྟཾ པཊིསནྡྷིཙིཏྟཾ པཎྜིཏེན ཝེདིཏབྦཾ.

༦༠༠-༦. ཏདེཏཾ ཏཾ ཨེཏཾ པཊིསནྡྷིཙིཏྟཾ པུརིམཱ བྷཝཏོ ཨིདྷ ཨིམསྨིཾ པཙྪིམབྷཝེ ནཱཔི ཨཱགཏཾ, ཀམྨཱདིཉྩ ཧེཏུཾ ཝིནཱ ཝཛྫེཏྭཱ པཊིསནྡྷིཙིཏྟཾ པཱཏུབྷཱུཏཾ ན ཙེཝ ཏཾ ཨེཏྠ ཨེཏསྨིཾ ཝཙནེ ཨེཏསྶ པཊིསནྡྷིཙིཏྟསྶ པུརིམཱ བྷཝཏོ ཨིདྷ ཨིམསྨིཾ པཙྩུཔྤནྣབྷཝེ ཨནཱགམནེ ཨཏཱིཏབྷཝཧེཏཱུཧི ཨཏཱིཏབྷཝེ ཀམྨཱདིཔཙྩཡེཧི ཨེཏསྶ པཊིསནྡྷིཙིཏྟསྶ སམྦྷཝེ. པཊིགྷོསདཱིཔམུདྡཱདཱི, བྷཝནྟེཏྠ ནིདསྶནཱ ཨེཏྠ ཨེཏསྨིཾ ཏསྶ པཊིསནྡྷིཙིཏྟསྶ ཨཏཱིཏབྷཝཏོ ཨནཱགམནེ ཨཏཱིཏབྷཝེ ཧེཏཱུཧི སམྦྷཝེ པཊིགྷོསདཱིཔམུདྡཱདིཨཏྠནིདསྶནཱ ཨུཔམཱ བྷཝནྟི. ཨཉྙཏྲ ཨཉྙསྨིཾ པཊིགྷོསཱདཱིནཾ ཨཏྠཱནཾ པཝཏྟིཊྛཱནེ ཨཱགནྟྭཱ སདྡཱདིཧེཏུཀཱ སདྡཱདཡོ པཙྩཡཱ ཧོནྟི ཡཐཱ. ཨིདཾ ཝུཏྟཾ ཧོཏི – ཨིམསྨིཾ ཋཱནེ ཛནེཧི པཝཏྟཱཔིཏཱ སདྡདཱིཔམུདྡཱདཡོ ཨཏྠཱ ¶ པབྦཏནྟརཱདཱིསུ ཨཉྙེསུ ཋཱནེསུ པཝཏྟཱནཾ པཊིགྷོསདཱིཔམུདྡཱདཱིནཾ ཨཏྠཱནཾ ཧེཏུཀཱ ཧོནྟི. ཏེསུ སདྡཱདཱིསུ པཙྩཡེསུ སནྟེསུ ཡེ ཏེ པཊིགྷོསཱདཡོ ཧོནྟི, ཨསནྟེསུ ན ཧོནྟི ཡཐཱ, ཨེཝམེཝ ཙ ཝིཉྙཱཎཾ ཨཏཱིཏབྷཝཏོ པཙྩུཔྤནྣབྷཝཝིཉྙཱཎཝསེན པཝཏྟཾ ཝིཉྙཱཎཾ ཝིབྷཱཝིནཱ ཝེདིཏབྦཾ. སནྟཱནབནྡྷཏོ སནྟཱནབནྡྷཝསེན ཨེཀཏཱ ཨཏཱིཏབྷཝཔཙྩུཔྤནྣབྷཝཝིཉྙཱཎཝསེན པཝཏྟསྶ ཝིཉྙཱཎསྶ ཨེཀཱིབྷཱཝོ ནཏྠི, ནཱནཏཱཔི ཏསྶ ཝིཉྙཱཎསྶ ནཱནཱབྷཱཝོཔི པཙྩེཀབྷཱཝོ ཨཔི. སཏི སནྟཱནབནྡྷེ ཏུ, ཨེཀནྟེནེཀཏཱ སིཡཱ སནྟཱནབནྡྷེ སཏི ཨེཀནྟེན ཏསྶ ¶ ཝིཉྙཱཎསྶ ཨེཀཏཱ ཨེཀཱིབྷཱཝོ སིཡཱ བྷཝེཡྻ, ཁཱིརསབྷཱཝཏོ པགྒྷརཎསབྷཱཝཏོ ཁཱིརཏོ སམྦྷཱུཏཾ གྷནསབྷཱཝཾ ཀདཱཙིཔི ཀིསྨིཉྩིཔི ཀཱལེ ན བྷཝེཡྻ, སབྦདཱ པགྒྷརཎསབྷཱཝཁཱིརམེཝ བྷཝེཡྻཱཏི ཨཏྠོ. ཨཐཱཔི ཨཔརོ ནཡོཔི སཱ ཨེཀནྟནཱནཏཱ ཏསྶ ཝིཉྙཱཎསྶ སོ ཨེཀནྟནཱནཱབྷཱཝོ ཡདི བྷཝེཡྻ, ཁཱིརསཱམིཀོ སོ པུགྒལོ དདྷིསཱམི ན བྷཝེཡྻ. ཁཱིརཀཱལེ ཁཱིརསྶ ཨིསྶརབྷཱུཏོ སཱམིཀོ པགྒྷརཎསབྷཱཝཾ ཛཧིཏྭཱ དདྷིསྶ ཨུཔྤཛྫམཱནཀཱལེ ཏསྶ དདྷིསྶ ཨིསྶརོ ན བྷཝེཡྻ, ཏཏོ ཁཱིརསཱམིཀོ ཨཉྙོ པུགྒལོ ཏསྶ དདྷིསྶ ཨནིསྶརོ ཨསཱམིཀོ བྷཝེཡྻཱཏི ཨཏྠོ. ཡསྨཱ ཀཱརཎཱ ཨེཏྠ ཨེཏསྨིཾ པཊིསནྡྷིཀྐམཝིནིཙྪཡེ ཨེཀནྟཨེཀཏཱཔི ཝཱ ཨེཀནྟནཱནཏཱཔི ཝཱ སམཡཉྙུནཱ ཝིཉྙུནཱ ན ཙེཝ ཨུཔགནྟབྦཱ.

༦༠༧-༡༠. ཨེཝཾ ཨིམིནཱ མཡཱ ཝུཏྟཔྤཀཱརེན ཨསངྐནྟིཔཱཏུབྷཱཝེ སངྐནྟིཔཱཏུབྷཱཝརཧིཏེ བྷཝེ སཏི ཨིམསྨིཾ མནུསྶཏྟབྷཱཝེ ཁནྡྷཱདིསམཏཱ ཨབྷིསམྦྷཱུཏཱ ཡེ ཁནྡྷཱ ཧོནྟི, ཨེཏེསཾ ཨིདྷ ཨིམསྨིཾ མནུསྶཏྟབྷཱཝེ ནིརུདྡྷཏྟཱ ཨིདྷ ཨིམསྨིཾ མནུསྶཏྟབྷཱཝེ ཛནེཧི ཀཏསྶ ཏསྶ ཀམྨསྶ ཕལཧེཏུནོ ཕལསྶ པཙྩཡབྷཱུཏསྶ པརཏྠ པརསྨིཾ ལོཀེ ཨཱགམཏོ ཙེཝ ཨེཝཾ ཨཉྙསྶ སཏྟསྶ ཨཉྙཏོ ཀམྨཏོ ཧི ཏཏོ སཏྟཏོ ཨཉྙེན སཏྟེན ཀཏཏོ ཨཉྙཏོ ཙེཝ ཀམྨཏོ ཏཾ ཕལཾ སིཡཱ བྷཝེཡྻ, ‘‘ཨཉྙསྶ སཏྟསྶཱ’’ཏི ཝཙནེན ཏིཏྠིཡསཏྟསྶཔི ཀམྨཾ ཨཉྙསྶ ཙ ཕལཾ དདེཡྻཱཏི ཨཏྠོ, ཏསྨཱ ཀཱརཎཱ ཨེཏཾ སབྦཾ ཨེཝ ཙ ཏུམྷེཧི ཝུཏྟཝིདྷཱནཾ ན སུནྡརཾ. ཨེཏྠཱཧཱཏི ཨེཏསྨིཾ ཋཱནེ ཋཏྭཱ ཙོདཀོ ཨཱཧ – ནནུ ཨེཝཾ ‘‘ཨསངྐནྟིཔཱཏུབྷཱཝེ བྷཝེ སཏཱི’’ཏིཨཱདིཀཾ ཝཙནཾ ནིཡཏཱིཏི? ཝུཙྩཏེ – སནྟཱནེ ཡཾ ཕལཾ ཨེཏཾ ཨེཀསྨིཾ ¶ སནྟཱནེ པཝཏྟམཱནཾ ཡཾ ཨེཏཾ ཕལཾ ཨཉྙསྶ སཏྟསྶ ན ཧོཏི, ཨཉྙཏོ ཀམྨཏོ ན ཙ ཧོཏི, བཱིཛཱནཾ ཨབྷིསངྑཱརོ ཨེཏསྶཏྠསྶ ‘‘ཨེཀསྨིཾ སནྟཱནེ’’ཏིཨཱདིཀསྶ ཨེཏསྶ ཨཏྠསྶ སཱདྷཀོ ནིཔྥཱདཀོ ཧོཏི.

༦༡༡-༥. ཨེཀསྨིཾ ¶ པན སནྟཱནེ, ཝཏྟམཱནཾ ཕལཾ པན ཨཉྙསྶ སཏྟསྶཱཔི ཝཱ ན ཧོཏི, ཏཾ ཕལཾ ཨཉྙཏོ ཀམྨཏོ ན ཧོཏི. བཱིཛཱནཾ ཨབྷིསངྑཱརོ ཨེཏསྶཏྠསྶ ‘‘ཨེཀསྨིཾ པན སནྟཱནེ’’ཏིཨཱདིཀསྶ ཨེཏསྶ ཨཏྠསྶ སཱདྷཀོ ནིཔྥཱདཀོ ཧོཏི, བཱིཛཱནཾ ཨབྷིསངྑཱརེ མདྷུཨཱདིནཱ ཝཏྠུནཱ ཛནེཧི ཀཏེ ཏསྶ བཱིཛསྶ སནྟཱནེ པཋམཾ ལདྡྷཔཙྩཡོ པཋམཾ ལདྡྷམདྷུཨཱདིཔཙྩཡོ ཏསྶ བཱིཛསྶ ཕལཾ ཀཱལནྟརེ མདྷུཨཱདིནཱ བཱིཛཱབྷིསངྑརཎཏོ ཨཉྙསྨིཾ ཀཱལེ མདྷུརོ ཧོཏི. ཧི སཙྩཾ ‘‘བཱིཛཱནཾ ཨབྷིསངྑཱརེ’’ཏིཨཱདིཀཾ ཝཙནཾ. ཏཱནི ཧི ཏཱནི ཨེཝ པཋམཾ མདྷུཨཱདིནཱ ཛནེཧི རོཔིཏཱནི བཱིཛཱནི ཨབྷིསངྑརཎཏོ ཀཱལནྟརེ མདྷུརབྷཱཝཾ ཕལམྤི ཝཱ ཕལཊྛཾ ཝཱ ན པཱཔུཎནྟི. ཨེཝཾ ཨིམིནཱ པཀཱརེན ཨིདཾ མཡཱ ཝུཏྟཾ ‘‘ཨེཀསྨིཾ པན སནྟཱནེ’’ཏིཨཱདིཀཾ ཝཙནཾ པཎྜིཏེན ཉེཡྻཾ. ཨཔི ཙ ཨཔརོ ནཡོ. བཱལཀཱལེ ཏརུཎཀཱལེ ཏེན ཏརུཎེན པཡུཏྟེན ཝིཛྫཱསིཔྤོསདྷཱདིནཱ ཀམྨེནཱཔི ཏསྶ ཝུདྡྷཀཱལསྨིཾ ཕལདཱནསཱིལེན ཨཡཾ ‘‘ཨེཀསྨིཾ པན སནྟཱནེ’’ཏིཨཱདིཀོ ཨཏྠོ པཎྜིཏེན དཱིཔེཏབྦོ.

༦༡༦-༢༠. ཙོདཀོ པུནཱཧ – ཨེཝཾ སནྟེཔི ཏཾ ཀམྨཾ ཨེཝཾ ཨིམིནཱ མཡཱ ཝུཏྟཔྤཀཱརེན ཀམྨེ སནྟེཔི སཾཝིཛྫམཱནེཔི ཏཾ ཀམྨཾ ཨེཏསྨིཾཡེཝ ཁཎེ ཝིཛྫམཱནམྤི ཝཱ ཕལསྶ པཙྩཡོ ཧོཏི. ཨཐ ཝཱཝིཛྫམཱནཀཾ པཙྩཡོ ན བྷཝེཡྻ. ཨེཏསྨིཾཡེཝ ཁཎེ ཨཝིཛྫམཱནཀཾ ཀམྨཾ ཝཱ ཕལསྶ པཙྩཡོ ཧོཏི. སཙེ ཡདི ཝིཛྫམཱནཾ ཕལསྶ པཙྩཡོ ཧོཏི, ཏཔྤཝཏྟིཀྑཎེ པན ¶ ཏསྶ ཀམྨསྶ པཝཏྟིཀྑཎེ ཏསྶ ཀམྨསྶ ཝིཛྫམཱནཀཱལེ པན ཧེཏུནཱ ཀམྨེནེཝ སདྡྷིཾ པཱཀེན བྷཝིཏབྦཾ. ཨཐ ཝཱ ཨཔརོ ནཡོ. ཝིཛྫམཱནཾ ནིརུདྡྷཾ ཀམྨཾ ཝིཔཱཀསྶ པཙྩཡོ ཡདི བྷཝེཡྻ, པཝཏྟིཀྑཎཏོ ཏསྶ ཀམྨསྶ པཝཏྟིཀྑཎཏོ པུབྦེ ཝཱ ཀཱལེ, ཏསྶ ཀམྨསྶ པཝཏྟིཀྑཎཏོ པཙྪཱ ཝཱ ཨཝིཛྫམཱནཀཱལེཏི ཨཏྠོ. ནིཙྩཕལཾ སིཡཱཏི སབྦདཱ ཀམྨཔཙྩཡཝིརཧིཏཾ ཕལཾ སིཡཱཏི ཨཏྠོ. ཨཱཙརིཡེན ཝུཙྩཏེ – ‘‘ལོབྷཾ, བྷིཀྑཝེ, པཛཧཐ, སོཏཱཔཏྟིཔཊིལཱབྷཱཡ ཨཧམེཝ པཱཊིབྷོགོ’’ཏིཨཱདཱིསུ པཱཋེསུ པཱཊིབྷོགོ ཝིཡ ཀམྨཾ དཊྛབྦཾ. སོཏཱཔཏྟིཕལཾ ཝིཡ ཀམྨཏོ སམྦྷཱུཏཾ ཕལཾ དཊྛབྦཾ. ཀཊཏྟཱཡེཝ ཛནེཧི ཀཊཏྟཱཡེཝ ཏཾ ཀམྨཾ ཕལསྶ པཙྩཡོ ཧོཏི, ཨསྶ ཝིཛྫམཱནཏྟཾ ན ཙ ཧོཏི, ཏསྶ ཨཝིཛྫམཱནསྶ ཀམྨསྶ ཝིཛྫམཱནཏཱ ཝཱ ན ཙ ནེཝ ཧོཏི.

༦༢༡. ཨབྷིདྷམྨཱཝཏཱརོཡཾ ཨབྷིདྷམྨཱཝཏཱརོ ཨཡཾ པརམཏྠཔྤཀཱསནོ བྷཱུཏཏྠདཱིཔནོ སོཏཱུནཾ པུགྒལཱནཾ ¶ པཱིཏིབུདྡྷིཝིཝཌྜྷནོ པཎྜིཏེཧི ཝིཝིདྷེསུ ཨཱརམྨཎེསུ ཙིཏྟཾ ཨནཱམེཏྭཱ སཀྐཙྩེན མནསིཀཱརེན སོཏབྦོ.

ཨིཏི ཨབྷིདྷམྨཱཝཏཱརཊཱིཀཱཡ

པུཉྙཝིཔཱཀཔཙྩཡནིདྡེསཝཎྞནཱ ནིཊྛིཏཱ.

ནཝམོ པརིཙྪེདོ.

༡༠. དསམོ པརིཙྪེདོ

རཱུཔཝིབྷཱགཝཎྞནཱ

༦༢༢. ཝུཏྟམཱདིམྷི ཡཾ རཱུཔཾ, ཙིཏྟཛཱནམནནྟརཾ ཡཾ རཱུཔཾ ཙིཏྟཙེཏསིཀཱནཾ ཨནནྟརཾ ཨཱདིམྷི པཀརཎཱདིམྷི ‘‘ཙིཏྟཾ ཙེཏསིཀཾ ¶ རཱུཔ’’ནྟིཨཱདིནཱ ཝཙནེན ཨཱཙརིཡེན ཝུཏྟཾ, ཨིཏོ པརཾ ཨིདཱནི ཏསྶ རཱུཔསྶ ཝིབྷཱཝནཾ སམཱསེན སངྑེཔེན ཀརིསྶཾ.

༦༢༣. ཡཾ རུཔྤཏཱིཏི རཱུཔནྟི ཡཾ དྷམྨཛཱཏཾ རུཔྤཏི སཱིཏཱདིནཱ ཝིརུདྡྷཔཙྩཡེན ཝིཀཱརམཱཔཛྫཏི. ཏཐཱ རཱུཔཡཏཱིཏི རཱུཔཾ ཡཾ དྷམྨཛཱཏཾ ཝཎྞཝིཀཱརམཱཔཛྫམཱནཾ ཧདཡངྒཏབྷཱཝཾ ཨཛ྄ཛྷཱསཡཾ པཀཱསེཏི, ཨིཏི ཏསྨཱ རཱུཔཾ, ཀིཾ ཏཾ? ཝཎྞཱཡཏནཾ. རཱུཔཱརཱུཔབྷཝཱཏཱིཏོ, སུརཱུཔོ རཱུཔམབྲྭི བྷགཝཱ རཱུཔཱརཱུཔབྷཝཨཏཱིཏོ སུརཱུཔོ རཱུཔཾ ཨབྲྭི ཀཐེསི.

༦༢༥-༦. མཧཱབྷཱུཏེནཱཏི མཧནྟོ བྷཱུཏོ ཨུཔྤཏྟི ཨེཏསྶཱཏི མཧཱབྷཱུཏོ, ཏེན. ཝཉྩཀཏྟཱ མཧཱབྷཱུཏསམཱཏི ཝཱ.

༦༣༠. ནིརུཔཱདཱནམཱནསོཏི ཨུཔཱདཱནཝིརཧིཏཙིཏྟོ.

༦༣༣. ཏསྶ ¶ སམྤཏྟཱིཏི ཏསྶ ཀིཙྩསྶ སམྤཏྟི.

༦༣༤. ཨུཔབྲཱུཧནརསཱཏི ཝཌྜྷནཀིཙྩཱ.

༦༣༧. ཨཱསཡཱནུསཡེ ཉཱཎནྟི ཨེཏྠ ཨཱསཡོ ནཱམ

སསྶཏུཙྪེདདིཊྛཱི ཙ, ཁནྟཱི སཙྩཱནུལོམིཀཾ;

ཡཐཱབྷཱུཏཉྩ ཡཾ ཉཱཎཾ, ཨེཏཾ ཨཱསཡསདྡིཏཾ.

ཨཏྠཱིཏི ཁོ, ཀཙྩཱན, ཨཡམེཀོ ཨནྟོ, ཨནྟོ ཁོ, ཀཙྩཱན, ཨཏྠི ཨིཏི ཨཡཾ ཨེཀོ ཨནྟོ ཀོཊྛཱསོ, ཨཡཾ སསྶཏདིཊྛི. ནཏྠཱིཏི ཁོ, ཀཙྩཱན, ཨཡཾ དུཏིཡོ ཨནྟོ, ཨཡཾ ཨུཙྪེདདིཊྛི. ཁནྟཱི སཙྩཱནུལོམིཀནྟི ཙཏུནྣཾ སཙྩཱནཾ ཨནུལོམིཀཉཱཎཾ, སངྑཱརུཔེཀྑཱཉཱཎནྟི ཨཏྠོ. ཡཐཱབྷཱུཏཉྩ ཡཾ ཉཱཎནྟི སཔྤཙྩཡནཱམརཱུཔདསྶནཾ ཉཱཎཾ. ཨེཏཾ ཨཱསཡསདྡིཏནྟི ¶ ཨེཏཾ ཨཱསཡཾ ཨིཏི ཀཐིཏཾ. ཨེཝཾ ཝུཏྟཔྤཀཱརེན ཨཱསཡེ ཉཱཎཾ ནཱམ. ཨནུསཡོ ནཱམ དིཊྛཱནུསཡཱདཡོ ཨནུསཡཱ སཏྟ. ཨིནྡྲིཡཱནཾ པརོཔརེཏི པརེ ཨདྷིཀབྷཱཝེན ཨོཔརེ ཙ ཏིཀྑཱནུབྷཱཝེན ཨཡཾ སཏྟོ ཏིཀྑསདྡྷིནྡྲིཡོ མུདུསདྡྷིནྡྲིཡོ ཧཱིནསདྡྷིནྡྲིཡོཏི ཨཏྠོ. སམཱདྷིནྡྲིཡཱདཱིསུཔི ཨེསེཝ ནཡོ. ཨིཏི སཏྟཱནཾ ཨིནྡྲིཡཱནཾ པརཨོཔརེ ཉཱཎཾ.

༦༣༨. སབྦཉྙུཏཱ ཉཱཎནྟི ཏིཧེཏུཀཀཱམཱཝཙརཀྲིཡཱཙཏུཀྐཾ གཧེཏབྦཾ.

༦༤༡. ཨཀྑིཀཱུཊེཧི མཏྠལུངྒེན པརིཙྪིནྣོ ཨནྟཏོ.

༦༤༥. བྷཱཝསམྦྷཝསཎྛཱནཱཏི ཨིཏྠིཔུམསམྦྷཝབྷཱུཏཝཎྞཱཡཏནཾ.

༦༤༧. ཨེཏེ དས ཙཏུསམུཊྛཱནཱ སམྦྷཱརཱ ཙཏཱུཧི པཙྩཡེཧི ཙཏྟཱལཱིས བྷཝནྟི.

༦༥༢. ནིཝིཊྛེཏི པཏིཊྛིཏེ.

༦༥༨. ཨུབྦིཨདྷིཀཱནཾ ¶ པཐཝཱིཨདྷིཀཱནཾ.

༦༦༠-༢. ཝིསེསེ སཏཱིཏི ནིསྶཡབྷཱུཏཱནཾ ཙཏུནྣཾ ཝིསེསེ སཏི, སབྦསོ སབྦེསཾ ཝིསེསཔརིཀཔྤནཾ པཧཱཡ ཨེཝ ཀམྨཝིསེསེན པསཱདཱནཾ ཝིསེསཏཱ ཉེཡྻཱ.

༦༦༣. སདྡཱིཡཏཱིཏི ཨུཙྩཱརཱིཡཏེ. རསནྟཱིཏི ཨསྶཱདེནྟི.

༦༦༨. པརཏོཏི པཋམཀཔྤཏོ ཨཔརབྷཱགེ པཊིསནྡྷིཡཾ བྷཱཝདྭཡཾ སམུཊྛཱཏཱིཏི ཝིཉྙེཡྻཾ. ‘‘པཝཏྟེཔི སམུཊྛཱཡཱ’’ཏིཨཱདིཀཾ སོཎཀུམཱརཱདཡོ སནྡྷཱཡ ཝུཏྟཾ.

༦༧༢. ན ཏཾ བྱཉྫནཀཱརཎནྟི ཏཾ ཨིནྡྲིཡདྭཡཾ བྱཉྫནསྶ ཀཱརཎཾ ན སིཡཱ. ཏསྶཱཏི བྱཉྫནསྶ.

༦༧༤. ཨུབྦཱཧནནྟི ¶ ནཱིཧརཎཾ.

༦༧༦-༧. ཨནྣཔཱནཱདིཀཾ ཝཏྠུ ཡཾ ཀམྨཛཾ ཨགྒིཾ ཧརཏི, ཀེཝལཾ ཨེཀཾ ཧུཏྭཱ ཏཾ ཨནྣཔཱནཱདིཀཾ ཝཏྠུ ཛཱིཝིཏཾ པན པཱལེཏུཾ ན ཙ སཀྐོཏི. ཨེཀཏོ ཛཱིཝིཏཾ པཱལེཏུཉྩ སཀྐོནྟི.

ཀཱཡེན རཱུཔཀཱཡེན ཨཏྟནོ བྷཱཝཾ ཝིཉྙཱཔེནྟཱནཾ བྷཱཝོ ཀཱཡགྒཧཎཱནུསཱརེན ཀཱཡགྒཧཎསྶ ཨནུཙིནྟནེན གཧིཏཱཡ ཝཱཡོདྷཱཏུཝིཀཱརསངྑཱཏཱཡ ཨེཏཱཡ དྷམྨཛཱཏིཡཱ པཎྜིཏེཧི ཝིཉྙཱཡཏེ. ཨིཏིཔི ཏསྨཱ ཀཱཡཝིཉྙཏྟི.

༦༨༡. ཨེཀཱཝཛྫནཝཱིཐིཡཾ ཧེཊྛཱ ཚཧི ཙིཏྟེཧི ཝཱཡོདྷཱཏུསམུཊྛིཏཾ ཨུཔཏྠམྦྷཾ ལབྷིཏྭཱ.

༦༨༤. སཧ སདྡེན ཝཱཏི སདྡེན སཧེཝ.

༦༩༠-༡. ཨེཏཱསཾ པན ལཧུཏཱདཱིནཾ ཏིསྶནྣཾ པཝཏྟིཡཾ ནིདསྶནཾ ཀམཏོ ཨཱརོགྱཾ ལཧུཏཱ ¶ , མདྡིཏཾ དྷམྨཾ མུདུཏཱ, དྷནྟཧེམཾ ཀམྨཉྙཏཱ ཧོཏི. ལཧུཏཱདིཏྟཡཾ པན ཀམྨཾ ཀཱཏུཾ ན སཀྐོཏི, ཨཱཧཱརཱདིཏྟཡཾཡེཝ ལཧུཏཱདིཏྟཡཾ ཀརོཏི ཡསྨཱ, ཏཏོ ཏཾ ཏིཛཾ ནཱམ.

༦༩༣. ཝུཏྟམཱཀཱརནཱནཏྟཱཏི ཨེཏྠ ཨཱཀཱརནཱནཏྟཱ ནཱམ ཨཱཙཡཱཀཱརཨནུབནྡྷཏཱཀཱརཝསེན ཝུཏྟཾ. ཝེནེཡྻཱནཾ ཝསེན ཝཱཏི ཨེཀེ ཝེནེཡྻཱ ཨཱཙཡཝསེན ཛཱཏིརཱུཔཾ ཛཱནནྟི, ཨེཀེ ཨནུབནྡྷཏཱཝསེན ཛཱནནྟི. ཨིཏི ཝེནེཡྻཱནཾ ཛཱནནཝསེན ཛཱཏིརཱུཔཾ དྭིདྷཱ ཝུཏྟཾ.

༦༩༤. སབྷཱཝཱནཔགམེ ཨཏྟནོ སབྷཱཝསྶ ཨནཔགམེ སཏི.

ཏེ ¶ མིདྡྷརཱུཔཝཱདཱཙརིཡཱ པཊིཀྑིཔིཏབྦཱ. ཀཐཾ? ཨདྡྷཱ མུནིསི སམྦུདྡྷོ, ནཏྠི ནཱིཝརཎཱ ཏཝཱཏི ཡོ ཏྭཾ ཨདྡྷཱ ཨེཀནྟེན མུནི ཨསི སམྦུདྡྷོ ཨསི ནཱིཝརཎཱ དྷམྨཱ ཏཝ ཏུཡ྄ཧཾ ནཏྠི, ཨིཏི ཝཙནེ སཙེ མིདྡྷཾ ནཱིཝརཎཾ རཱུཔེ པཝིཊྛཾ སིཡཱ. བྷགཝཏཱ རཱུཔཀཱཡསྶ ཝིཛྫམཱནཏྟཱ ‘‘ནཏྠི ནཱིཝརཎཱ ཏཝཱ’’ཏི ཝཙནཾ ཝཏྟབྦཾ སིཡཱ. ཐིནམིདྡྷནཱིཝརཎཾ ཨཝིཛྫཱནཱིཝརཎེན སཧ ནཱིཝརཎཉྩེཝ ཧོཏི, ནཱིཝརཎསམྤཡུཏྟཉྩ ཧོཏི. ཨིཏི སམྤཡུཏྟཝཙནཏོ སམྤཡུཏྟསྶ རཱུཔསྶ ཨབྷཱཝཏོ ཏམྤི ན ཝཏྟབྦཾ སིཡཱ. ན པུརེཛཱཏཔཙྩཡཱཏི ཨཉྙམཉྙཔཙྩཡཱཏི ཨཏྠོ. སཙེ ཐིནམིདྡྷཾ རཱུཔཾ སིཡཱ, ཀཐཾ ཨརཱུཔེཔི ཨཉྙམཉྙཾ སིཡཱ, ན སིཡཱཏི ཨཏྠོ. ཨརཱུཔེཔི ཀཱམཙྪནྡནཱིཝརཎཾ པཊིཙྩ ཐིནམིདྡྷནཱིཝརཎཾ ཨུཔྤཛྫཏི. ཨིཏི ཝཙནེན ཙ ན མིདྡྷརཱུཔཾ སིཡཱ, ཨརཱུཔེ ཀཐཾ སིཡཱཏི ཨཏྠོ. ཨརཱུཔམེཝ མིདྡྷཾ ཨིཏི པཊིཀྑིཔིཏབྦཱ. ཨརཱུཔེཔི ཨེཏསྶ མིདྡྷསྶ ཨུཔྤཏྟིཡཱ སཱདྷཀཝཙནཏོ ནིཊྛཾ ཨེཏྠ ཙ ཨཝགནྟབྦཾ ‘‘ཨརཱུཔ’’ནྟི ཝིཉྙུནཱ.

༧༠༥-༦. ཀམྨེན ཝཱིསཏི རཱུཔཱཏི ཨཊྛིནྡྲིཡཝཏྠུཨཊྛཱཝིནིབྦྷོགསནྟཏཱུཔཙཡཱཀཱསཱ ཀམྨཛཱ. ཙེཏསཱ ཝིཉྙཏྟིདྭཡསདྡལཧུཏཱདིཏྟཡཨཝིནིབྦྷོགསནྟཏཱུཔཙཡཱཀཱསཱ ཙིཏྟཛཱ. ཨུཏུནཱ སདྡལཧུཏཱདིཏྟཡཨཝིནིབྦྷོགསནྟཏཱུཔཙཡཱཀཱསཱ ཨུཏུཛཱ. ཨཱཧཱརཏོ ལཧུཏཱདིཏྟཡཨཝིནིབྦྷོགསནྟཏཱུཔཙཡཱཀཱསཱ ཨཱཧཱརཛཱ.

༧༠༧-༡༧. ཛཱཡེཡྻུཾ ཡདི ཏཱནིཔཱིཏི ཏཱནི ཛརཏཱཨནིཙྩཏཱརཱུཔཱ ཡདི ཛཱཡེཡྻུཾ, ཨེཝཾ སནྟེ ཏུ ཏེསཾ ཛརཏཱཨནིཙྩཏཱ བྷེདཱ སིཡུཾ. ཧི སཙྩཾ ཝཙནཾ པཱཀོ ན པཙྩཏི, བྷེདོ ཝཱ ན ¶ ཙ བྷིཛྫཏི ཡསྨཱ, ཏསྨཱ ཏེསཾ པཱཀབྷེདཱ སིཡུནྟི, ཏཾ ཝཙནཾ ནཏྠི. ཨེཏཾ ཛརཏཱཨནིཙྩཏཱདྭཡཾ ཛཱཏསྶ ནིཔྥནྣརཱུཔསྶ པཱཀབྷེདཏྟཱ ན ཛཱཡཏི. སིཡཱ ཀསྶཙི བུདྡྷེཏྠཱཏི ཨེཏྠ ཛརཏཱཨནིཙྩཏཱཝིནིཙྪཡཱདྷིཀཱརེ ཀསྶཙི ཛནསྶ བུདྡྷི ཉཱཎཾ ཡདི སིཡཱ, ‘‘རཱུཔསྶཱུཔཙཡོ’’ཏི ཝཙནེན ‘‘ཛཱཏི ¶ ཛཱཡཏཱི’’ཏི ཝཙནཾ དཱིཔིཏཾ ཡཐཱ, ཨེཝཾ ཏཐཱ པཱཀོཔི པཙྩཏུ, བྷེདོཔི པརིབྷིཛྫཏུ, ཨེཝཾ བུདྡྷི སིཡཱ. ཛཱཏི ན ཙེཝ ཛཱཡཏེ. ཨིཏི ཨིམིནཱ པཀཱརེན ཝིབྷཱཝིནཱ ཉེཡྻཱ. ཛཱཏི ཛཱཡམཱནསྶ ནིཔྥནྣརཱུཔསྶ ནིབྦཏྟི ནཱམ པཀཱསིཏཱ. ཏཏྠ ཡསྶ སིཡཱ ཏཏྠ ཝཙནེ ཡསྶ ཛནསྶ བུདྡྷི སིཡཱ. ཡེསཾ ནིཔྥནྣརཱུཔདྷམྨཱནཾ ཛཱཏི ཨཏྠི, སཱ ཛཱཏི ཨབྷིནིབྦཏྟིསམྨུཏིཾ ཏཔྤཙྩཡཏྟཝོཧཱརཾ ཏེསཾ ནིཔྥནྣརཱུཔདྷམྨཱནཾ པཙྩཡཊྛེན ལདྡྷཝོཧཱརཾ ཀམྨཛཱདིཀཾ ཝོཧཱརཾ ལབྷཏེཝ ཡཐཱ, ཏཐཱ ཏེསཾ ནིཔྥནྣརཱུཔདྷམྨཱནཾ ཏེ པཱཀབྷེདཱ ཨབྷིནིབྦཏྟིསམྨུཏིཾ ནཱམ ཏཔྤཙྩཡཏྟཝོཧཱརཾ ལབྷནྟི, ཨིཏི བུདྡྷི སིཡཱ. ཏསྶ ཛནསྶ ཨེཝཾ ཝཏྟབྦཾ – ཨིདཾ སནྟཏཱུཔཙཡདྭཡཾ ཀམྨཱདིསམྦྷཝཾ ཧོཏི ཡཐཱ, ཨེཝཾ པཱཀབྷེདཱ ཏཾ ཀམྨཱདིསམྦྷཝཝོཧཱརཾ ཀདཱཙིཔི ན ལབྷནྟི. ཧི སཙྩཾ ཝཙནཾ ཀསྨཱ ཀཱརཎཱ ཛནཀཱནཾ ཀམྨཱདིཔཙྩཡཱནཾ ཨཱནུབྷཱཝསངྑཱཏེ ཁཎུཔྤཱདེ ཏེསཾ པཱཀབྷེདཱནཾ ཨབྷཱཝཏོ ན ལབྷནྟི. ཝུཏྟཔྤཀཱརེན ཁཎུཔྤཱདེ ཛཱཏིཔརམྤརཱབྷཱཝཏོ སཱ ཛཱཏི ལབྦྷཏེ, ཏསྨཱ ཀཱརཎཱ ཛཱཏི ཨེཝ ཨབྷིནིབྦཏྟིསམྨུཏིཾ པཙྩཡཏྟཝོཧཱརཾ ལབྷཏི, ཨིཏརཾ ཛརཏཱཨནིཙྩཏཱདྭཡཾ པན ན ལབྷཏི. ཏཾ ཛརཏཱཨནིཙྩཏཱདྭཡཾ ཛིཡྻཏི ཨིཏི བྷིཛྫཏི ཨིཏི ཝཱ ན ཝཏྟབྦཾ ཧོཏི. ཀསྨཱ? ཀམྨཱདིཔཙྩཡཱནཾ ཨཱནུབྷཱཝཀྑཎེ ཏསྶ ཛརཏཱཨནིཙྩཏཱདྭཡསྶ པཙྩཡཱནཾ ཨབྷཱཝཏོ.

༧༡༨-༢༣. ཨནིཙྩཾ སངྑཏཉྩེཏཾ ཛརཱམརཎཾ ཨནིཙྩསངྑཱཏཾ ཨིཏིཔི ཝཙནསྶ བྷགཝཏཱ ཝུཏྟཏྟཱ ཛརཏཱཨནིཙྩཏཱདྭཡཾ ཛཱཡཏི, ཨེཝཾ ཨིཏི ཏྭཾ ཙེ མཉྙསི, ཨེཝཾ ‘‘ཛཱཡཏི ཨེཝཱ’’ཏི ཝཙནཾ བྷགཝཏཱ ན ཝཏྟབྦཾ. ཧི ཀསྨཱ ཀཱརཎཱ? ‘‘ཨནིཙྩཾ སངྑཏཉྩེཏཾ, ཛརཱམརཎམིཙྩཔཱི’’ཏིཝུཏྟབྷཱཝཱདིནཱ ཨཱཀཱརདེསནཱཔརིཡཱཡེན ལེསེན བྷགཝཏཱ ཨནིཙྩཱནཾ ནིཔྥནྣརཱུཔདྷམྨཱནཾ ཛརཱམརཎསངྑཱཏཾ སབྷཱཝཏོ ཛརཱམརཎཾ ཨནིཙྩཾ སངྑཏཉྩཱཔི ¶ ཙིཏྟཛཱནཾ ཝིཀཱརཏྟཱ ཝིཉྙཏྟིཡོ ‘‘ཙིཏྟཛཱ’’ཏི ཝུཏྟཱ ཝིཡ, ཏཐཱ ཨེཝཾ བྷགཝཏཱ ཝུཏྟཾ. ཡདི ཨེཝཾ ཨཏྠེ སཏི ཨེཏཾ རུཔྤནལཀྑཎཏྟཡཾ ཨཛཱཏཏྟཱ ཙ སབྦཐཱ སབྦཱཀཱརེན ཁཾཔུཔྥཾཝ ནཏྠི, ཨསངྑཏཾ ནིབྦཱནཾ ཝིཡ ནིཙྩཾཝཱཏི ཙ ཙོདཀོ ཝདེཡྻ, ནཏྠི ནིཙྩནྟི ཨིདཾ ཨུབྷཡཝཙནཾ ནོ བྷགཝཏཱ ཝཏྟབྦཾ. ཀསྨཱ? ནིསྶཡདྷམྨཱནཾ ཨཱཡཏྟབྷཱཝེན པཝཏྟིཏོ པཐཝིཡཱདཱིནཾ ནིསྶཡཱནཾ བྷཱཝེ སཏི ཏསྶ ལཀྑཎཏྟཡསྶ བྷཱཝཏོ, ཏསྨཱ ཁཾཔུཔྥཾཝ ཏཾ ལཀྑཎཏྟཡཾ ན ནཏྠི, ཨཏྠཱིཏི ཨཏྠོ. པཐཝཱིཨཱདཱིནཾ ¶ ཨབྷཱཝེ ཏཾ ལཀྑཎཏྟཡཾ ན ཙ ལབྦྷཏི ཡསྨཱ, ཏསྨཱ ནིབྦཱནཾ ཝིཡ, ཏཐཱ ནིཙྩཾ ན.

༧༢༤-༥. པརིཙྪེདཱདཡོ ཨནིཔྥནྣཱ. ཏེསམེཝ ཙ རཱུཔཱནཾ ཏེསམེཝ ནིཔྥནྣརཱུཔདྷམྨཱནཾ ཝིཀཱརཏྟཱ ནིཔྥནྣཱ ཙེཝ སངྑཏཱ སེསཝསེན ཝུཏྟཱནཾ པབྷེདཀཏོཏི དསྶནཏོ. སེསཾ ཨུཏྟཱནཏྠམེཝ.

༧༦༧.

གནྟུཾ པནིཙྪེ པིཊཀེབྷིདྷམྨེ,

ཡོ དྷམྨསེནཱཔཏིནཱ སམཏྟཾ;

ཧིཏཏྠིནཱ ཏེན ཙ བྷིཀྑུནཱཡཾ,

སཀྐཙྩ སམྨཱ པན སིཀྑིཏབྦོ.

ཡོ བྷིཀྑུ ཨབྷིདྷམྨེ པིཊཀེ དྷམྨསེནཱཔཏིནཱ སམཏྟཾ སབྷཱཝཾ གནྟུཾ པཱཔུཎིཏུཾ ཨིཙྪེཡྻ, ཏེན ཙ བྷིཀྑུནཱ ཧིཏཏྠིནཱ སཀྐཙྩཾ ཨཱདརེན སམྨཱ ཏཱིརཎཙིནྟནསཛ྄ཛྷཱཡནེཧི ཨཡཾ ཨབྷིདྷམྨཱཝཏཱརོ སིཀྑིཏབྦོ.

ཨིཏི ཨབྷིདྷམྨཱཝཏཱརཊཱིཀཱཡ

རཱུཔཝིབྷཱགཝཎྞནཱ ནིཊྛིཏཱ.

དསམོ པརིཙྪེདོ.

༡༡. ཨེཀཱདསམོ པརིཙྪེདོ

ནིབྦཱནནིདྡེསཝཎྞནཱ

༧༦༩. བྷཝཱབྷཝཾ ¶ ཝིནནཏོཏི ཁུདྡཀཾ, མཧནྟཾ བྷཝཾ སིབྦནཏོ. སབྦཱུཔདྷིཔཊིནིསྶགྒོཏི སབྦེཧི སངྑཱརཱུཔདྷིཀིལེསཱུཔདྷིཁནྡྷཱུཔདྷཱིཧི པཊིནིསྶཛྫནཾ. ཨཙྩུཏིརསཾ ཨཙུཏིསམྤཏྟིཀཾ. ནིབྦཱནཾ པུཊྛེནཱཏི སུགཏེན ནིབྦཱནཾ པུཊྛེན སཱརིཔུཏྟཏྠེརེན. ཨུབྷིནྣཾ སུཏྟཱནནྟི དྷམྨསེནཱཔཏིཝུཏྟཱནཾ ¶ དྭིནྣཾ སུཏྟཱནནྟི ཨཏྠོ. ཁཡསྶ ཨུཔནིསྶཡཏྟཱཏི ཁཡསྶ བལཝཀཱརཎཏྟཱ. པུཐཱུནཾ དྷམྨཱནཾ ཨཔྤམཏྟཀྑཎེ རཱགཱདིཀྑཡམཏྟཾ ནིབྦཱནཾ བྷཝེཡྻ. སབྦེ བཱལཔུཐུཛྫནཱ སམདྷིགཏནིབྦཱནཱ སཙྪིཀཏནིརོདྷཱ བྷཝེཡྻུཾ. ཀིཉྩ བྷིཡྻོ ཀིཾ ཨུཏྟརི ཀཱརཎཉྩ ཨཏྠཱིཏི ཨཏྠོ. རཱགཱདཱིནཾ སངྑཏཏྟཱ ཏེསཾ སངྑཏཱནཾ ནིབྦཱནཾ སངྑཏལཀྑཎཾ བྷཝེཡྻ. ཀིཾ པནེཏྠཱཏི ཨེཏེསུ ཁཎེསུ ཀིཾ པན ཁཎེ ཏྭཾ ཝདེསི. ཁཱིཎེསྭེཝཱཏི བྷཝཱདཱིསུ ཁཱིཎེསུ ཨེཝ. ནིརུཏྟརོཏི ནིཔྥནྣཧཱརོ.

༧༧༡. ཨསྶདྡྷོཏི བཱཧིརསདྡྷཱཡ ཝིརཧིཏོ. ཝནྟཱསོཏི ཝནྟཱ ཝམིཏཱ ཨཱསཱ ཏཎྷཱ ཡེནཱཏི ཝནྟཱསོ.

ནིསྶརཎིཡཱཏི ནིསྶརཎེ ནིཡུཏྟཱ. ཡདིདཾ ནེཀྑམྨཾ ཡཾ ཨིདཾ ཀཱམཱནཾ ཨེཏཾ ནིསྶརཎཾ ནིརོདྷོ, ཏསྶ ཀིཉྩིབྷཱུཏསྶ སངྑཏསྶ པཊིཙྩསམུཔྤནྣདྷམྨཛཱཏསྶ ནིརོདྷོ ནིསྶརཎནྟི, ཨེཝཾ ཨིམིནཱ པཀཱརེན ཝུཏྟསྶ ཏསྶ ནིསྶརཎནཱམཀསྶ ཨབྷཱཝཔྤཏྟིདོསཏོ ནིསྶརཎནཱམཀཱནཾ པཋམཛ྄ཛྷཱནཨཱཀཱསཱནཉྩཱཡཏནཱནམྤི ཨབྷཱཝོ བྷཝེཡྻ. ཨཏྠི ནིསྶརཎནྟི ཨཏྠི ནིབྦཱནཾ. ཨུཔྤཱདཱདཱིནནྟི ཨུཔྤཱདཊྛིཏིབྷངྒཱནཾ. པཔཉྩཱབྷཱཝཏོཏི ཏཎྷཱམཱནདིཊྛཱིནཾ ཨབྷཱཝཏོ.

༧༧༢. ཨཔལོཀིཏནྟི ཨདསྶནདྷམྨཾ.

༧༧༤. ཨབྱཱཔཛ྄ཛྷནྟི ནིདུཀྑཾ. ཨཀྑརནྟི ཨཁརཾ.

༧༧༧. སདྡྷཱབུདྡྷིཀརཾ ¶ ཏཐཱགཏམཏེ ཛིནཝཙནེ སམྨོཧཝིདྡྷཾསནཾ པཉྙཱསམྦྷཝཾ པཉྙཱཀཱརཎཾ སམྤསཱདནཀརཾ. ཨཏྠབྱཉྫནསཱལིནནྟི ཨཏྠབྱཉྫནསཱརཝནྟཾ སུམདྷུརཾ སཱརཉྙུ ཛིནསཱསནསཱརཉྙཱུ ཝིམྷཱཔནཾ ཨཙྪེརཀརཾ ཨིམཾ ཨེཝཾ ཝུཏྟཔྤཀཱརཾ ཨབྷིདྷམྨཱཝཏཱརཾ ཡོ ཛཱནཱཏི, སོ ཛནོ གམྦྷཱིརེ ནིཔུཎེ ནིཔུཎཉཱཎགོཙརེ ཨབྷིདྷམྨཔིཊཀེ པདཾ ནིཊྛཾ ཨུཏྟམསནྣིཊྛཱནཾ ཡཱཏི པཱཔུཎཱཏི.

ཨིཏི ཨབྷིདྷམྨཱཝཏཱརཊཱིཀཱཡ

ནིབྦཱནནིདྡེསཝཎྞནཱ ནིཊྛིཏཱ.

ཨེཀཱདསམོ པརིཙྪེདོ.

༡༢. དྭཱདསམོ པརིཙྪེདོ

པཉྙཏྟིནིདྡེསཝཎྞནཱ

སངྑཱཡཏཱིཏི ¶ སངྑཱ, ཀཐཱིཡཏཱིཏི ཨཏྠོ. ཀིནྟི ཀིཾ ཨིཏི ཀཐཱིཡཏི. ‘‘ཨཧ’’ནྟི ‘‘མམ’’ནྟི ཀཐཱིཡཏི.

ཏཛྫཱཔཉྙཏྟཱིཏི ཏསྶ ཙཀྑུསོཏཱདིཀསྶ ཨནུརཱུཔཝསེན ཛཱཏཱ པཉྙཏྟཱིཏི ཨཏྠོ.

ཨེཀསྶཝཱཏི ཨེཀསྶ ནཱམདྷམྨསྶ ‘‘ཨཙྪོ’’ཏི ནཱམཾ གཧེཏྭཱ བཧཱུནཾ ནཱམདྷམྨཱནཾ ‘‘ཨཙྪོ’’ཏི ནཱམཾ གཧེཏྭཱ. སམཱུཧམེཝཱཏི ནཱམདྷམྨཱནཾ སམཱུཧཾ ཨེཝ.

གཧིཏོ པུབྦེ སངྐེཏོ ཨེཏེནཱཏི གཧིཏཔུབྦསངྐེཏཾ. ཀིཾ ཏཾ? མནོདྭཱརཱཝཛྫནཛཝནཝིཉྙཱཎཾ. ཏེན གཧིཏཱཡ པཉྙཏྟིཡཱ ཝིཉྙཱཡཏི ‘‘སཏྟཱ’’ཏི ‘‘ཀམྨཛཱ’’ཏི ཀཐཱིཡཏི.

ཨིཏྠཱི ¶ ཙ པུརིསོ ཙ ཨིཏྠིཔུརིསཱ, ཏེ ཨཱདཡོ ཡེསཾ ཏེ ཨིཏྠིཔུརིསཱདཡོ, ཏེསཾ.

༧༧༨. ཏཏིཡཱ ཀོཊཱིཏི ཏཏིཡོ ཀོཊྛཱསོ.

ཨིཏི ཨབྷིདྷམྨཱཝཏཱརཊཱིཀཱཡ

པཉྙཏྟིནིདྡེསཝཎྞནཱ ནིཊྛིཏཱ.

དྭཱདསམོ པརིཙྪེདོ.

༡༣. ཏེརསམོ པརིཙྪེདོ

ཀཱརཀཔཊིཝེདྷཝཎྞནཱ

ཝེདཀསྶཱཏི ¶ སུཁདུཀྑཝེདཀསྶ. ཏདཱཡཏྟཝུཏྟཱིནནྟི ཏེསཾ ཨཱཡཏྟཱ པཊིབདྡྷཱ ཡེསཾ ཝིཔཱཀཱནཾ ཏེ ཏདཱཡཏྟཝུཏྟིནོ, ཏེསཾ. ཨཏྲ ཨིམསྨིཾ ཋཱནེ ཨཱཙརིཡེན པརིཧཱརོ ཝུཙྩཏེ. ཀུཏོཡཾ ཏཝ ཏཏྠཱནུརོདྷོཏི ཏཏྠ ཏསྨིཾ ཨཉྙསྶ ཨཏྟཀཱརཀསྶ ཨབྷཱཝེཔི སཏྟུསངྑཱཏསྶ ཨཏྟནོ བྷཱཝེཔི ཨཡཾ ཏཝ ཨནུརོདྷོ ཨནུནཡོ ཀུཏོ ཀེན ཀཱརཎེན ཨིདྷ ཨིམསྨིཾ ཨསཏི ཀཏྟརི ཀུསལཱདཱིནཾ ཨཏྠིབྷཱཝེ ཀམྨཝིརོདྷོ ཀུཏོ ཀེན ཀཱརཎེན. ཨཐཱཔཱིཏི ཨཔརོ ནཡོཔི. ཀིཉྩེཏྠཱཏི ཨེཏྠ ཨེཏིསྶཾ ཙོདནཱཡཾ ཀིཉྩི ཝཏྟབྦཾ ཨཏྠི, ཨཝསིཊྛཾ ཏཱཝ བྲཱུཧི, ཨཔརིསམཏྟཱ ཏེ ཙོདནཱ. ཏསྶཱཏི ཨཏྟནོ. ཀཱརཀཝེདཀཏྟཱབྷཱཝོཏི ཀཱརཀཝེདཀཏྟསྶ ཨབྷཱཝོ སིཡཱ.

ཨཐ ན བྷཝཏཱིཏི ཨཏྟནོ ཨནཱསེ ཙེཏནཱཔི ཨནཱསོ ཡདི ན བྷཝཏི. པཊིཉྙཱ ཧཱིནཱཏི ‘‘ཙེཏནཱཡ ཨནཉྙོ ཨཏྟཱ’’ཏི པཊིཉྙཱ ཧཱིནཱ. ཝུཏྟཔྤཀཱརཏོཏི ‘‘ཨཏྟནོ ཨནཱསེ ཙེཏནཱཡ ནཱསོ ན བྷཝཏི’’ཨིཏི ཝུཏྟཔྤཀཱརཏོ ¶ . ཝིཔརཱིཏནྟི ‘‘ཨཏྟནོ ཨནཱསེ ཙེཏནཱཡ ཨནཱསོ’’ཨིཏི ཝིཔརཱིཏགྒཧཎཾ སིཡཱ. ཨཏྟཱ ནསྶཏུ, ཙེཏནཱ ཏིཊྛཏུ, ཨཐ པན ཨེཝཾ ན བྷཝཏཱིཏི ཨཏྟཱ ནསྶཏུ, ཙེཏནཱ ཏིཊྛཏུ, ཨེཝཾ གཧཎཾ པན ན བྷཝཏི. ཨནཉྙཏྟཔཀྑཾ པརིཙྩཛ པརིཙྩཛཱཧི ‘‘ཙེཏནཱཡ ཨནཉྙོ ཨཏྟཱ’’ཏི. པཊིཉྙཱ ཧཱིནཱ ཡསྶ སོ པཊིཉྙཱཧཱིནོ.

ཨུབྷིནྣཾ ཙེཏནཏྟཱནཾ ཨེཀདེསཏཱ ཨེཀདེསབྷཱཝོ ནཏྠི. ཨེཝཉྩ སཏཱིཏི ཨེཝཾ ཨུབྷིནྣཾ ཨེཀདེསསྶ ཨབྷཱཝེ སཏི ཀོ དོསོ ཨིཏི ཏྭཾ ཙེ ཝདེཡྻཱསི. ཡཾ པན ཏཡཱ ཝུཏྟཾ ཡཐཱ རཱུཔརསགནྡྷཱདཱིནཾ ཨེཀདེསེ ཝཏྟམཱནཱནམྤི ལཀྑཎཏོ ཨཉྙཏྟནྟི ཡཾ ཝཙནཾ པན ཏཡཱ ཝུཏྟཾ, ཏཾ ཝཙནཾ ཨཡུཏྟཾ, ནཱནུརཱུཔནྟི ཨཏྠོ. ཏཝ པཊིཉྙཱ ཧཱིནཱཏི ‘‘ཨེཀདེསེ ཝཏྟམཱནཱནཾ ཙེཏནཏྟཱནཾ ལཀྑཎཏོ ཨཉྙཏྟ’’ནྟི པཊིཉྙཱ ཧཱིནཱ.

ཨེཝཉྩ སཏཱིཏི ཨེཏཾ ཙེཏནཱཡ ཨཉྙབྷཱཝེ སཏི ཀོ དོསོ ཨིཏི ཙེ བྷཝཾ ཝདེཡྻ. ‘‘ཨཙེཏནོ ¶ ཨཏྟཱ’’ཏི ཝཙནཾ, པུབྦེ ཝུཏྟདོསཏོཏི ‘‘པཱཀཱརཏརུཔཱསཱཎཏིཎསདིསོ སིཡཱ’’ཏི པུབྦེ ཝུཏྟདོསཏོ.

༧༨༠. ཨཏྠི སཏྟོཔཔཱཏིཀོཏི ཨོཔཔཱཏིཀཱ སཏྟཱ ཨཏྠི.

༧༨༡. བྷཱརཱདཱནནྟི བྷཱརགྒཧཎཾ. བྷཱརནིཀྑེཔནནྟི བྷཱརོརོཔནཾ.

༧༨༣. ཨེཀསྶ པུགྒལསྶ ཨཊྛིསཉྩཡོ ཨཊྛིསམཱུཧོ ཨེཀེན ཀཔྤེན པབྦཏསམོ རཱསི སིཡཱ.

༧༨༥. བྷོ མཱར, ཏྭཾ སཏྟོ ཨིཏི པཙྩེསི, ཀཾ སདྡཧསི, ‘‘སཏྟོ’’ཏི གཧཎཾ ཏེ ཏཝ དིཊྛིགཏཾ, སུདྡྷསངྑཱརཔུཉྫོ ཨཡཾ, ཨིདྷ ལོཀེ སཏྟོ ན ཨུཔལབྦྷཏི.

༧༨༧. ཡོ ¶ བྷིཀྑུ ཨིམཾ གནྠཾ ཨཙྩནྟཾ སཏཏམྤི ཙིནྟེཏི, ཏསྶ བྷིཀྑུནོ པརམཱ པཉྙཱ ཝེཔུལཾ ཝིཔུལབྷཱཝཾ གཙྪཏི.

༧༨༨. ཡོ བྷིཀྑུ ཨིམཾ ཨབྷིདྷམྨཱཝཏཱརཾ ཨཏིམཏིཀརཾ ཨུཏྟམཾ ཨབྷིཉྙཱཎཀརཾ ཝིམཏིཝིནཱསཀརཾ ཀངྑཙྪེདཀརཾ པིཡཀྐརཾ པེམཀརཾ སདཱ པཋཏི, སུཎཱཏི, ཏསྶ བྷིཀྑུནོ མཏི ཨིདྷ སཱསནེ ཋིཏེ ཝིཀསཏི པཊིཕུལླཏི.

ཨིཏི ཨབྷིདྷམྨཱཝཏཱརཊཱིཀཱཡ

ཀཱརཀཔཊིཝེདྷཝཎྞནཱ ནིཊྛིཏཱ.

ཏེརསམོ པརིཙྪེདོ.

༡༤. ཙུདྡསམོ པརིཙྪེདོ

རཱུཔཱཝཙརསམཱདྷིབྷཱཝནཱནིདྡེསཝཎྞནཱ

༧༨༩-༩༣. ཧིཏཱནཡནྟི ¶ ཧིཏཱཝཧཾ. མཱནསཉྩ སུགཏནྟི སུཊྛུ པཝཏྟམཱནསཉྩ. མདྷུརཱ ཨཏྠཝཎྞནཱ ཨེཏསྶཱཏི མདྷུརཏྠཝཎྞནཾ. ཨུཏྟརཾ ཏུ མནུསྶཱནཾ, དྷམྨཏོ ཉཱཎདསྶནནྟི མནུསྶཱནཾ ལོཀིཡདྷམྨཏོ ཨུཏྟརིབྷཱུཏཉཱཎདསྶནལོཀུཏྟརཾ. སངྐསྶརསམཱཙཱརེཏི སངྐཱཡ ཀངྑཱཡ སརིཏབྦསམཱཙཱརེ. ཨཙྪིདྡཾ ཨཀྑཎྜཾ ཨཀམྨཱསཾ. ཨཏྠཀཱམེནཱཏི ཨཏྟནོ ཧིཏཀཱམེན.

༧༩༧. དུཝིདྷལཀྑཎཾ ཙཱརིཏྟཝཱརིཏྟལཀྑཎཾ.

༨༠༥. ཏེསཾ ཙརིཏཱནཾ ཝོམིསྶཀནཡཱ.

༨༠༧. སཝཎྞཀསིཎཱཏི ནཱིལཔཱིཏཨོདཱཏལོཧིཏཝཎྞཀསིཎཱ.

༨༠༨. ཏཾ ¶ ཨེཀཀཾ ཨཱནཱཔཱནཾ ཨསྶཱསཔསྶཱསོ.

༨༠༩-༡༠. མརཎཱུཔསམཱཡུཏྟཱ སཏཱིཏི མརཎཱནུསྶཏི ཨུཔསམཱནུསྶཏི. ཨཱཧཱརནིསྶིཏསཉྙཱཏི ཨཱཧཱརེ པཊིཀཱུལསཉྙཱ. དྷཱཏུཝཝཏྠཱནནྟི ཙཏུདྷཱཏུཝཝཏྠཱནཾ.

༨༡༡-༢. ཨནུཀཱུལཱ ཨིམེ སབྦ-ཙརིཏཱནནྟི ཝཎྞིཏཱཏི ཡཾ ཀམྨཊྛཱནཾ སདྡྷཱཙརིཏསྶ ཨནུཀཱུལཾ, ཏམེཝ པཉྙཱཙརིཏསྶ ཨནུཀཱུལནྟི ཨདྷིཔྤཱཡོ. ཨིདཾ སབྦཾ པན ཝཙནཾ ཨེཀནྟཝིཔཙྩནཱིཀབྷཱཝཏོ ཨེཀནྟཔཊིཔཀྑབྷཱཝཏོ ཨཏིསཔྤཱཡཏོ ཝུཏྟཾ, ཨིཏི ཝིབྷཱཝིནཱ ཉེཡྻཾ.

༨༣༥. ཝིཔསྶནཱབྷཝསམྤཏྟི-སུཁཱནཾ པཙྩཡཱ སིཡུཾ ཝིཔསྶནཱསམྤཏྟིསུཁཱནཾ བྷཝསམྤཏྟིསུཁཱནཾ པཙྩཡཱ སིཡུཾ.

༨༣༨. སམྨཊྛཱནཾ ¶ མནོབྷུནོཏི མནོབྷུཧདཡོ ཏསྶ ཧདཡསྶ སམྨཊྛཱནཾ.

༨༤༤. པཏྟུཀཱམེན དྷཱིམཏཱ ཀསིཎཾ ཀཏྟབྦཾ.

༨༤༥. སཾཧཱརིམནྟི ཨིཏོ ཙིཏོ ཙ ཧརིཏབྦཀསིཎཾ. ཏཏྲཊྛཀནྟི ཏསྨིཾ ཋཱནེ ཋིཏཾ ཨིཏོ ཙིཏོ ཙ ཨནཱཧརིཏབྦཾ ཀསིཎཾ.

༨༤༩. ཝིཝཊྚཾ པན མིཙྪཏཱཏི ནིབྦཱནཾ ཨིཙྪནྟེན ཝིདཏྠིཙཏུརངྒུལཾ ཝཊྚཾ ཀཱཏུཾ ཏཾ ཀསིཎཾ ཝཊྚཏི.

༨༥༡-༢. ཧཏྠཔཱསཔྤམཱཎསྨིཾ, ཏམྷཱ ཀསིཎམཎྜལཱཏི ཏཏོ ཀསིཎམཎྜལཏོ ཧཏྠཔཱསཔྤམཱཎསྨིཾ པདེསེ ཝིདཏྠིཙཏུརངྒུལེ ཨུཙྩེ. པརིམུཁཾ སཏིནྟི ཀམྨཊྛཱནཱབྷིམུཁཾ སཏིཾ.

༨༥༣-༤. ནེཀྑམྨནྟི ཛྷཱནཾ. ཁེམཏོ དཊྛུཾ དིསྭཱ ཨཧཾ ཨིམཱཡ པཊིཔཏྟིཡཱ ཨདྡྷཱ ཨེཀནྟེན པཝིཝེཀསུཁསྶ ནིབྦཱནསུཁསྶ བྷཱགཱི ཨསྶཾ བྷཝེཡྻཾ.

༨༥༦. སོ ¶ ཀསིཎསྶ ཝཎྞོ ཏེན ཡོགིནཱ ན པེཀྑིཏབྦོ, ཀསིཎསྶ ལཀྑཎཾ ན པེཀྑིཏབྦཾ ཨུསྶདསྶ ཝསེན ཝཎྞཾ ཨམུཉྩིཏྭཱ.

༨༦༠. ཨེཝཾ ཨིམིནཱ ཝུཏྟཔྤཀཱརེན ཨེཀགྒཙེཏསོ ཨེཀགྒཙིཏྟསྶ ཡོགིནོ ནིམཱིལེཏྭཱ ཨཱཝཛྫནྟསྶ ཡཐཱ ཡེན པཀཱརེན ཀམྨཊྛཱནཾ ཧོཏི ཨུམྨཱིལིཏེ ཀཱལེཔི, ཏཐཱ ཏེན པཀཱརེན ཏཾ ཀམྨཊྛཱནཾ ཨཱཔཱཐཾ ཡཱཏི ཙེ ཡདི ཨཱགཙྪཏི, ཨུགྒཧམེཝ ཨུགྒཧནིམིཏྟཾ.

༨༦༤. པཱདཱནཾ དྷོཝནེ པཔཉྩཔརིཧཱརཏྠཾ. ཨེཀཏལིཀཱཏི ཨེཀཏལམཏྟཱ.

༨༦༥. ཏཾ སཾཧཱརིམཾ ཀསིཎམཱདཱཡ.

༨༦༦. སམནྣཱཧརིཏབྦནྟི ¶ ཀམྨཊྛཱནཾ སུམནེན ཨཱཧརིཏབྦཾ, མནསིཀཱཏབྦནྟི ཨཏྠོ. ཏཀྐཱཧཊནྟི ཝིཏཀྐེན ཨཱཧཊཾ ཕུསིཏཾ ཀརེ ཀརེཡྻ.

༨༦༨. ཏནྟི ཏཾ ནིམིཏྟཾ.

༨༧༡-༤. ཨིམསྶཱཏི པཊིབྷཱགནིམིཏྟསྶ. པུརིམསྶཱཏི ཨུགྒཧནིམིཏྟསྶ. ཀོ པན ཨཡཾ ཝིསེསོ? ཐཝིཀཱ ནཱིཧརིཏཾ ཨཱདཱསམཎྜལཾ མཛྫིཏཾ ཝིཡ. ཏོཡདེ ཀཱལ༹མེགྷེ སེཏབལཱཀཱ ཝིཡ. ཏདཱ ཏཾ ཨུགྒཧནིམིཏྟཾ པདཱལེཏྭཱཝ ནིགྒཏཾ པཊིབྷཱགནིམིཏྟཾ. ཏཏོ ཨུགྒཧནིམིཏྟཏོ. ཏནྟི ཏཾ པཊིབྷཱགནིམིཏྟཾ. སཎྛཱནཝནྟཉྩ ཝཎྞཝནྟཉྩ ན ཙ ཨུཔཊྛཱཀཱརམཏྟཾ. པཉྙཛནྟི པཉྙཱཡ ཛཱཏཾ.

༨༧༧-༨. ཨུཔཙཱརཀྑཎེ ཏསྶཱཏི ཏསྶ སམཱདྷིནོ ཨུཔཙཱརཀྑཎེ. ནཱིཝརཎཔྤཧཱནེན སམཱདྷིནོ པཊིལཱབྷཀྑཎེ པན ཨངྒཱནཾ ཝིཏཀྐཱདཱིནཾ པཱཏུབྷཱཝེན ཨིཏི དྭཱིཧི ཨཱཀཱརེཧི.

༨༧༩. དྭིནྣཾ ¶ སམཱདྷཱིནནྟི ཨུཔཙཱརཔྤནཱསམཱདྷཱིནཾ.

༨༨༢. ཙཀྐཝཏྟིཡགབྦྷོཝ རཏནཾ ཝིཡ ཨསྶ ཨནེན སུདུལླབྷཾ.

༨༨༤. ཨཡནྟི པཊིསནྡྷིསནྠཱརོ.

༨༩༡-༢. སམཏཾ ཝཱིརིཡསྶེཝཱཏི ཝཱིརིཡསམབྷཱཝཾ. ལཡཾ ལཱིནབྷཱཝཾ ཨཱིསཀམྤི ཡནྟཾ གཙྪནྟཾ མཱནསཾ ཨཱཝཛྫནཙིཏྟཾ.

༨༩༥-༩. བྷཝངྒཾ པན པཙྪིཛྫ ཨུཙྪིནྡིཏྭཱ ཏདེཝ པཐཝཱིཀསིཎཾ ཨཱརམྨཎཾ ཀཏྭཱ ཡོགིནོ མནོདྭཱརམྷི ཛཱཡཏི. ཏཏོཏི ཨཱཝཛྫནཏོ ཏཏྲེཝཱརམྨཎེ ཏསྨིཾ པཐཝཱིཀསིཎསངྑཱཏེ ཨཱརམྨཎེ ཏསྶ ཡོགིནོ ཛཝནཱནི ཙཏྟཱརི ཝཱ པཉྩ ཝཱ ཛཱཡནྟེ. ཨཝསཱནེ ཨེཀཾ ཛཝནམཱནསཾ རཱུཔཱཝཙརིཀཾ ཧོཏི, ཏསྨིཾ རཱུཔཱཝཙརིཀེ ཝིཏཀྐཱདཡོ ཨངྒཱ. ཨཉྙེཧི ཨཉྙེསཾ ཙིཏྟཱནཾ ཨཉྙེཧི ཝིཏཀྐཱདཱིཧི བལཝཏརཱ ཧོནྟི. ཏཱནི ཨཔྤནཱབྷཱཝཾ ཨཔྤཏྟཱནི ཨཔྤནཱཙེཏསོ ¶ པརིཀམྨོཔཙཱརཏོ པརིཀམྨབྷཱཝཏོ པརིཀམྨཱནཱིཏི ཝུཙྩནྟེ, ཨུཔཙཱརབྷཱཝཏོ ཨུཔཙཱརཱནཱིཏི ཙ ཝུཙྩནྟེ. ཏཱནི ཛཝནཱནི ཨཔྤནཱཡཱནུལོམཏྟཱ ཨནུལོམཱནི ཨེཝ ཙ ཝུཙྩནྟི. ཨེཏྠ ཨནུལོམཀེསུ ཡཾ སབྦནྟིམཾ ཛཝནཾ, ཏཾ གོཏྲབྷཱུཏི པཝུཙྩཏི.

༩༠༡. གོཏྲབྷུ དིཊྛནྟི གོཏྲབྷུ ནཱམ ཨུདྡིཊྛཾ.

༩༠༤-༥. པུརིམེཧི ཛཝནེཧི ཡཾ ཨཱསེཝནཾ, ཏཾ བལཝཔཙྩཡཾ ལདྡྷཱ ལབྷིཏྭཱ ཚཊྛཾ ཛཝནཾ, སཏྟམཾ ཝཱ ཛཝནཾ ཨཔྤེཏི. ཨིཏི ཝཙནཾ པཝུཙྩཏི, ཨེཏྠ ཝཱདེ གོདཏྟོ ནཱམ ཨཱབྷིདྷམྨིཀོ ཨཱཙརིཡོ ཨཱཧ. ཚིནྣཏཊེ མུཁཾ ཡསྶ ཚིནྣཏཊམུཁོ.

༩༠༨. པཙྩཝེཀྑཎཱ ¶ ཧེཏུ ཡསྶ ཨཱཝཛྫནསྶཱཏི པཙྩཝེཀྑཎཧེཏུཀཾ.

༩༡༡-༢. ཀཱམཙྪནྡསྶ ནཱནཱཝིསཡེ པལུདྡྷསྶ. ཙེཏསོ ཨེཀསྨིཾ ཝིསཡེ སམཱདྷཱནེན སམཱདྷི.

༩༡༥. སཡཉྩ ཨཏིསནྟཏོ སུཁཾ ཨཝཱུཔསནྟསབྷཱཝསྶ ཨུདྡྷཙྩཀུཀྐུཙྩདྭཡསྶ པཊིཔཀྑཏོ ཝུཏྟཾ.

༩༡༧. པཉྩངྒཝིཔྤཡུཏྟནྟི པཉྩནཱིཝརཎཝིཔྤཡུཏྟཾ. པཉྩངྒསཾཡུཏནྟི ཝིཏཀྐཱདཱིཧི ཡུཏྟཾ.

༩༢༠-༡. ཝེཔུལླནྟི ཀམྨཊྛཱནསྶ ཝིཔུལབྷཱཝཾ. ཏཉྩ པཊིབྷཱགནིམིཏྟཾ ཨུཔཙཱརཾ ཝིཙཱརེཏྭཱ ཝཌྜྷེཏུཾ ཝཊྚཏི.

༩༢༨-༣༡. པམཱདཡོགིནོཏི པམཱདཝསེན ཡོགིསམྤནྣསྶ ཀཱམསཧགཏཱ སཉྙཱམནཀྐཱརཱ མནསིཀཱརཱ ཙེ ཙརནྟི, ཏསྶ ཡོགིནོ ཏཾ ཛྷཱནཾ ཧཱནབྷཱགིཡཾ ཧོཏི. སཏི སནྟིཊྛཏེ ཏསྨིཾ, སནྟཱ ཏདནུདྷམྨཏཱ ཏསྨིཾ པཋམཛ྄ཛྷཱནེ ཏདནུདྷམྨཏཱ ཏསྶ པཋམཛ྄ཛྷཱནསྶ ཨནུརཱུཔཱ སཏི ནིཀནྟི སནྟཱ སཾཝིཛྫམཱནཱ སནྟིཊྛཏེ སནྟིཊྛཏི, ཏཾ ཛྷཱནཾ མནྡསྶ ཡོགིནོ ཋིཏིབྷཱགིཡཾ ཧོཏི, ཋིཏིཾ བྷཛཏི. ཝིསེསབྷཱགིཡཾ ཧོཏི, ཝིསེསཾ དུཏིཡཱདིབྷཱཝནཾ པཱཔུཎཱཏཱིཏི ཨཏྠོ. ནིབྦིདཱསཾཡུཏཱ ¶ སཉྙཱ, མནཀྐཱརཱཏི ནིབྦིདཱཝིཔསྶནཱསཾཡུཏྟཱ སཉྙཱམནཀྐཱརཱ. ནིབྦེདྷབྷཱགིཡནྟི ལོཀུཏྟརབྷཱགིཡཾ, ལོཀུཏྟརམགྒབྷཱགིཡནྟི ཨཏྠོ.

༩༣༣. ཨཡཾ སམཱཔཏྟི ཨཱསནྣཱཀུསལཱརཡོ ཨཱསནྣཱཀུསལཱརིཀཱ ཡསྨཱ ཏཀྐཙཱརཱནཾ ཐཱུལཏྟཱ ཙ, ཏསྨཱ ཀཱརཎཱ ཨཡཾ སམཱཔཏྟི ཨངྒདུབྦལཱ.

༩༣༥. ནིཀནྟིནྟི ཏཎྷཾ. པརིཡཱདཱཡཱཏི སོསཱཔེཏྭཱ.

༩༣༦. ཝིདྷིནཱཏི ¶ པུབྦེ ཝུཏྟཝིདྷིནཱ. སཏསྶཱཏི སཏིསམྤནྣསྶ.

༩༣༨. ནིམིཏྟཾ ཏུ ཏདེཝ ཙཱཏི ཏམེཝ པཋམནིམིཏྟཾ ‘‘པཐཝཱི པཐཝཱི’’ཨིཏི ཨེཝཾ མནསཱ ཀརོནྟསྶ.

༩༤༣. སམྤསཱདནནྟི སདྡྷཱ. མཛ྄ཛྷཏྟནྟི ཏཏྲམཛ྄ཛྷཏྟཏཱ.

༩༤༤. དུཝངྒཧཱིནནྟི ཝིཏཀྐཝིཙཱརཧཱིནཾ.

༩༤༨. པཱིཏི ནཱམ ཙེཏསོ ཙིཏྟསྶ ཨུཔྤིལཱཔནཾ ཨུཔྤིལཱཔིཏཏྟཾ ཡཏོ ཡསྨཱ ཀཱརཎཱ.

༩༦༡-༢. ཨཱསནྣཔཱིཏིདོསཱཏི པཱིཏིཡེཝ དོསཱ. ཨེཏྠ ཨེཏསྨིཾ ཏཏིཡཛ྄ཛྷཱནེ ཡདེཝ ཡཾ ཨེཝ སུཁཾ ཨིཏི ཨེཝཾ སུཁཾ ཙེཏསོ ཨཱབྷོགོ མནསིཀཱརོ. ཨེཝཾ ཨིམིནཱ པཀཱརེན སུཁསྶ ཐཱུལཏྟཱ ཨཡཾ སམཱཔཏྟི ཨངྒདུབྦལཱ ཧོཏི.

༩༧༤-༥. སུཁཾ ཨུཔེཀྑཱཡ ཨཱསེཝནཾ པན ན ཧོཏི ཡསྨཱ ཨུཔེཀྑཱཡ ཨཱསེཝནཾ པན ན ཧོཏི, ཡསྨཱ ཨུཔེཀྑཱསཧགཏཱནི ཛཝནཱནི ཛཝནྟི, ཏསྨཱ ཙཏུཏྠཛ྄ཛྷཱནཾ ཨུཔེཀྑཱསཧགཏཾ སམུདཱིརིཏཾ.

༩༧༦. དུཏིཡཛ྄ཛྷཱནཾ དྭིདྷཱ དྭཱིཧི ཀོཊྛཱསེཧི ཋིཏཾ.

༩༧༩. ཨཡཾ ¶ ཨབྷིདྷམྨཱཝཏཱརོ སུམདྷུརཝརཏརཝཙནོ ཀཾ ནུ ཛནཾ ནེཝ རཉྫཡཏི, ཨཏིནིསིཏཝིསདོ བུདྡྷིཔྤཙཱརོ ཡསྶ སོ ཨཏིནིསིཏཝིསདབུདྡྷིཔྤཙཱརོ, སོ ཏེན ཛནེན ཝེདནཱིཡོ ཛཱནིཏབྦོ.

ཨིཏི ཨབྷིདྷམྨཱཝཏཱརཊཱིཀཱཡ

རཱུཔཱཝཙརསམཱདྷིབྷཱཝནཱནིདྡེསཝཎྞནཱ ནིཊྛིཏཱ.

ཙུདྡསམོ པརིཙྪེདོ.

༡༥. པནྣརསམོ པརིཙྪེདོ

ཨརཱུཔཱཝཙརསམཱདྷིབྷཱཝནཱནིདྡེསཝཎྞནཱ

༩༨༢-༣. རཱུཔེ ¶ ཁོ ཝིཛྫམཱནསྨིནྟི རཱུཔཀཱཡེ ཝིཛྫམཱནེ དཎྜཱདཱནཱདཡོ དཎྜགྒཧཎཱདཡོ. ཨིཏི རཱུཔེ རཱུཔཀཱཡེ ཨཱདཱིནཝཾ དིསྭཱ.

༩༨༤. སཱུཀརཱབྷིཧཏོཝ སཱཏི སཱུཀརཾ ཨནུབནྡྷིཏོ སཱ སུནཁོ ཝིཡ.

༩༨༥. ཝསཱིཏི ཡོགཱི.

༩༨༨-༩༩༠. ཕུཊྛོཀཱསཉྩ ཏེན ཏནྟི ཏེན ཙིཏྟེན ཕུཊྛཾ ཏམོཀཱསཾ ‘‘ཨནནྟོ ཨཱཀཱསོ’’ཨིཏི ཙ མནསཱ ཀརོནྟོ ཨེཝ ཨུགྒྷཱཊེཏི. ཨིཏི ཝཙནཾ ཝུཙྩཏེ, ཨཡམཉྙོ ནཡོ, ‘‘ཨཱཀཱསོ’’ ཨིཏི མནསཱ ཀརོནྟོ ཏཾ ཀསིཎཾ ན སཾཝེལླེཏི.

༩༩༨. རཱུཔཱཝཙརཛ྄ཛྷཱནམེཝ པཙྩཏྠིཀཾ རཱུཔཱཝཙརཛ྄ཛྷཱནཔཙྩཏྠིཀཾ.

༡༠༠༤. ཨཱཀཱསཕུཊཝིཉྙཱཎེཏི ¶ ཕུཊམེཝ ཝིཉྙཱཎཾ ཕུཊཝིཉྙཱཎཾ, ཏསྨིཾ ཨཱཀཱསཱརམྨཎེ ཕུཊཝིཉྙཱཎེ.

༡༠༠༥-༦. ཨཡཾ ཨཱཀཱསོ ཨནནྟོ ཨིཏི ཨེཝཾ ཏཾ ཨཱཀཱསམེཝ ཕརིཏྭཱ པཝཏྟཾ ཝིཉྙཱཎཾ ཝིཉྙཱཎཉྩ ཨིཏི ཝཙནཾ ཝུཙྩཏེ. ཝིཉྙཱཎཾ ཨནནྟཾ ནཱམ ན ཧོཏི, ཨནནྟཱརམྨཎཏྟཱ ‘‘ཝིཉྙཱཎཾ ཨནནྟ’’ནྟི ཝུཙྩཏེ, ཏཾ ཝིཉྙཱཎཾ མནཀྐཱརཝསེན ཨཔི ཨནནྟཾ པརིདཱིཔིཏཾ.

༡༠༡༠. པཋམཱརུཔྤཝིཉྙཱཎསྶ ཨབྷཱཝོ ཏསྶ ཨེཝ པཋམཱརུཔྤསྶ སུཉྙཏོ སུཉྙབྷཱཝཏོ.

༡༠༡༣. སཏི ¶ ཏིཊྛཏི བྷིཡྻོ བལཝཱ སཏི ཏིཊྛཏི.

༡༠༡༥. ཨབྷཱཝཀེ ནཏྠིབྷཱཝེ.

༡༠༡༧-༨. དུཏིཡཱརུཔྤཙཀྑུནཱཏི ཙཀྑུནཱ དུཏིཡཱརུཔྤཾ ‘‘ནཏྠི ནཏྠཱི’’ཏིཨཱདིནཱ ཨཱཀཱརེན པརིཀམྨཝསེན མནཀྐཱརེ. ཏསྶཱཔགམམཏྟཉྩ ཏསྶ པཋམཱརུཔྤསྶ ཨཔགམམཏྟཉྩ.

༡༠༢༩. ཡཱ ནཱམ ཨཡཾ སམཱཔཏྟི ཨབྷཱཝམཏྟམྤི གོཙརཾ ཀཏྭཱ ཋསྶཏི, ཨཡཾ སམཱཔཏྟི ཝཏ ཨེཀནྟེན ཨཧོ སནྟཱཏི པདིསྶཏི.

༡༠༣༣. ཡཱཡ སཉྙཱཡ ནེཝསཉྙཱི, ནཱསཉྙཱི ཙ ཧོཏི, ཀེཝལཾ ཨེཀནྟེན ཨཐ ཁོ སཱ སཉྙཱ ཨེདིསཱི ན ཧོཏི.

༡༠༣༥-༧. པཊུསཉྙཱཡ ཀིཙྩསྶ ནེཝ ཀརཎཏོ ཨཡཾ སམཱཔཏྟི ‘‘ནེཝསཉྙཱ’’ཏི ནིདྡིཊྛཱཏི ཙཏུཏྠཨཱརུཔྤཏོ སམྦྷཝཱ པཝཏྟཱ ཏེཛོདྷཱཏུ སུཁོདཀེ དཧནཀིཙྩཾ ཀཱཏུཾ ན སཀྐོཏི ཡཐཱ, སཱ སངྑཱརདྷམྨཱནཾ ཨཝསེསཏྟཱ.

༡༠༤༠. པཱསཱདཏལཉྩ ¶ སཱཊིཀཱ ཙ.

༡༠༤༡. ཡོ པན བྷིཀྑུ ཨིམཾ རཱུཔཱརཱུཔཛ྄ཛྷཱནསམཱཔཏྟིཝིདྷཱནཾ སཱརཏརཾ ཛཱནཱཏི, སོ རཱུཔཱརཱུཔཛ྄ཛྷཱནསམཱཔཏྟིཔུརེཀྑོ སེཀྑོ བྷཝཾ ཀཱམབྷཝཾ ཨབྷིབྷུཡྻ ཨབྷིབྷཝིཏྭཱ རཱུཔཱརཱུཔཾ ཡཱཏི པཱཔུཎཱཏི.

ཨིཏི ཨབྷིདྷམྨཱཝཏཱརཊཱིཀཱཡ

ཨརཱུཔཱཝཙརསམཱདྷིབྷཱཝནཱནིདྡེསཝཎྞནཱ ནིཊྛིཏཱ.

པནྣརསམོ པརིཙྪེདོ.

༡༦. སོལ༹སམོ པརིཙྪེདོ

ཨབྷིཉྙཱནིདྡེསཝཎྞནཱ

༡༠༤༥. སཏཱཏི ¶ སཏིསམྤནྣེན. ཨནུཡོགནྟི ཝཱིརིཡཾ.

༡༠༤༧. ཡོགཱཝཙརབྷིཀྑུནཱ ནིབྦཏྟིཏཱསུ ཨབྷིཉྙཱསུ ཨསྶ ཡོགཱཝཙརསྶ བྷིཀྑུནོ སམཱདྷིབྷཱཝནཱ ནིཊྛཾ པརིཡོསཱནཾ གཏཱ སིཡཱ.

༡༠༥༠. དནྟེཏི དནྟེ ཋིཏེ. ཨཙལེཏི ཨཙལེ ཋིཏེ.

༡༠༥༢-༤. ཨབྷིཉྙཱཡ པཱདཀཾ ཀཱརཎཾ ཨབྷིཉྙཱཔཱདཀཾ ཡོགཱི སཏཾ ཝཱཔི སཧསྶཾ ཝཱཔི ཡདི སཙེ ཨིཙྪཏི, ཨབྷིཉྙཱཔཱདཀཾ ཛྷཱནཾ སམཱཔཛྫིཏྭཱ ཏཏོ ཨབྷིཉྙཱཔཱདཀཛྷཱནཏོ ཝུཊྛཱཡ ཝུཊྛཧིཏྭཱ ‘‘སཏཾ ཧོམི, སཏཾ ཧོམི’’ ཨིཏི ཨེཝཾ ཀཱམཱཝཙརཔརིཀམྨམཱནསཾ ཀཏྭཱ ཨབྷིཉྙཱཡ པཱདཀཾ ཀཱརཎབྷཱུཏཾ ཛྷཱནཾ པུནཱདྷིཊྛཱཏི པུན ཨཱཔཛྫིཏྭཱ ཏཏོ ཛྷཱནཏོ ཝུཊྛཱཡ པུན ཨདྷིཊྛཱཏི ¶ , སཧཱདྷིཊྛཱནེན ཙེཏསཱ ཨདྷིཊྛཱནསངྑཱཏེན ཙཏུཏྠཛ྄ཛྷཱནཙིཏྟེན སཧ སོ ཡོགཱི སཏཾ ཧོཏི. ཨིདྡྷིཝིདྷཉཱཎཾ.

༡༠༦༧-༨. ཨེསོ ཨདྷིགཏཱབྷིཉྙོ ཡོགཱི པཱདཀཱརམྨཎེན ཙཏུཏྠཛ྄ཛྷཱནསྶ པཊིབྷཱགནིམིཏྟསངྑཱཏེན ཨཱརམྨཎེན ཕུཊྛེ ཨོཀཱསེ གཏེ པཝཏྟེ པན སདྡེ སུཎཱཏི. དིབྦསོཏཉཱཎཾ.

༡༠༦༩. པརསྶ ཙིཏྟཾ པརིཡཏི པརིཙྪིཛྫཏཱིཏི ཙེཏོཔརིཡཾ, ཏམེཝ མཱནསཾ ཙེཏོཔརིཡམཱནསཾ.

༡༠༧༠. ཧདཡཾ པན ནིསྶཱཡཱཏི ཧདཡཝཏྠུཾ ནིསྶཱཡ པཝཏྟམཱནལོཧིཏཾ, ཧདཡཀོསེ པཝཏྟཾ རུཧིརནྟི ཨཏྠོ.

༡༠༧༥. ཀཱམཱཝཙརཙིཏྟཉྩཱཏི ¶ ཀཱམཱཝཙརསཏྟཱནཾ ཀཱམཱཝཙརཙིཏྟཉྩ. རཱུཔཱརཱུཔེསུ རཱུཔབྷཝཱརཱུཔབྷཝེསུ སཏྟཱནཾ མཱནསཉྩ. ཀིཾ བྷཱུཏཾ? སརཱགཱདིཔྤབྷེདཀཾ མཱནསཾ སབྦཾ ཙེཏོཔརིཡཉཱཎཾ ཛཱནཱཏི. ཙེཏོཔརིཡཉཱཎཾ.

༡༠༧༧-༨༢. ནིསཛྫཱ སབྦཔཙྪིམཱཏི སབྦེསཾ ཨིརིཡཱཔཐཱནཾ པཙྪཱ ཛཱཏཱ ནིསཛྫཱ བྷིཀྑུནཱ ཨཱཝཛྫིཏབྦཱ. ཏཏོ པབྷུཏི ཏཏོ སབྦཔཙྪིམཏོ ནིསཛྫཱཏོ པབྷུཏི ཏཾ སབྦཾ པཙྪིམནིསཛྫཾ ཨཱདིཾ ཀཏྭཱ པཊིལོམཀྐམཱ པཊིལོམཀྐམེན སབྦཾ ཨཏྟནཱ ཀཏཾ ཨཱཝཛྫིཏབྦཾ. ཨསྨིཾ བྷཝེ ཡཱཝ ཡཏྟཀཾ ཀཱལཾ སནྡྷི པཊིསནྡྷི ཧོཏི, ཏཱཝ ཏཏྟཀཾ ཀཱལཾ ཀཏཾ ཀིརིཡཾ ཏེན བྷིཀྑུནཱ ཨཱཝཛྫིཏབྦཾ. པུརིམསྨིཾ བྷཝེཔི ཙུཏིཀྑཎེཔི ནིབྦཏྟཾ ནཱམརཱུཔཉྩ སཱདྷུཀཾ ཨཱཝཛྫིཏབྦཾ. ཙུཏིཀྑཎེ ནིབྦཏྟེ ཏསྨིཾ ནཱམརཱུཔེ ཨེཝཾ བྷིཀྑུནཱ ཨཱཝཛྫིཏབྦེ ཡདཱ ཏདེཝ ཏམེཝ ནཱམརཱུཔཾ ཨཱརམྨཎཾ ཀཏྭཱ ཙུཏིཀྑཎེ མནོདྭཱརེ མནཀྐཱརོ མནོདྭཱརཱཝཛྫནཙིཏྟཾ ཨུཔྤཛྫཏི. པུབྦེནིཝཱསཱནུསྶཏིཉཱཎཾ.

༡༠༨༦-༩༦. ཨབྷིཉྙཱཔཱདཀཾ ཀསིཎཱརམྨཎཾ ཛྷཱནཾ ཨབྷིནཱིཧཱརཀྑམཾ ཀཏྭཱ ཨིམེསུ ཏཱིསུ ཀསིཎེསུ ཀཏཔུཉྙེཧི. ཏསྨཱ ཏམིཏརཾ ཝཱཔཱིཏི ཨཱལོཀཀསིཎཾ ཝཱ ཨིཏརཾ ཝཱཔི ཀསིཎདྭཡཾ ཡཐཱཀྐམཾ ¶ ཨུཔྤཱདེཏྭཱ ཨུཔཙཱརབྷཱུམིཡཾཡེཝ ཋཏྭཱ ཏཾ ཨཱལོཀཀསིཎཾ ཋཔེཏབྦཾ. ཨཔྤནཾ པཎྜིཏོ ན ཨུཔྤཱདེཡྻ, སཙེ ཨུཔྤཱདེཏི, ཏཾ ཨཱལོཀཀསིཎཾ པཱདཀཛ྄ཛྷཱནནིསྶིཏཾ པཱདཀཛ྄ཛྷཱནསྶ ཨཱརམྨཎཾ ཧོཏི. ཝཌྜྷིཏསྶ ཛྷཱནསྶ ཨནྟོགདྷཾ རཱུཔཾ ཏེན ཡོགིནཱ པསྶིཏབྦཾ བྷཝེ བྷཝེཡྻ. ཏཾ རཱུཔཾ པསྶཏོ པསྶནྟསྶ ཏསྶ ཡོགིནོ པརིཀམྨསྶ ཝཱརོ ཨཏིཀྐམཏི, ཏཱཝདེ ཏསྨིཾཡེཝ ཁཎེ ཨཱལོཀོཔི ཏསྶ ཡོགིནོ ཨཱལོཀོཔི ཁིཔྤཾ ཨནྟརདྷཱཡཏི. ཏསྨིཾ ཨཱལོཀེ ཨནྟརཧིཏེ ¶ རཱུཔགཏཾ རཱུཔཾ ན དིསྶཏི. དིཝསམྤི ནིསཱིདིཏྭཱ པསྶཏོ རཱུཔདསྶནཾ ཧོཏི.

༡༡༠༠-༡. ཏཾཙིཏྟསཾཡུཏནྟི ཏེན ཙཏུཏྠཛ྄ཛྷཱནེན ཡུཏྟཾ ཙིཏྟཾ. ཨནཱགཏཾསཉཱཎསྶ པརིཀམྨཾ, ཡཐཱཀམྨཱུཔགསྶ ཉཱཎསྶ ཙ པརིཀམྨཾ. དིབྦཙཀྑུཉཱཎཾ.

༡༡༠༣. ཡོ བྷིཀྑུ ཨིདྷ ཨིམསྨིཾ སཱསནེ ཨིམཾ པན གནྠཾ སུཎཱཏི, ཙིཏྟེ ཀརོཏི ཙ, སོ བྷིཀྑུ ཨནེན ཏརེན ཨིམིནཱ གནྠེན ཏརིཏྭཱ ཨབྷིདྷམྨམཧཎྞཝཔཱརཾ ཡཱཏི པཱཔུཎཱཏི, ཛཱནཱཏཱིཏི ཨཏྠོ.

ཨིཏི ཨབྷིདྷམྨཱཝཏཱརཊཱིཀཱཡ

ཨབྷིཉྙཱནིདྡེསཝཎྞནཱ ནིཊྛིཏཱ.

སོལ༹སམོ པརིཙྪེདོ.

༡༧. སཏྟརསམོ པརིཙྪེདོ

ཨབྷིཉྙཱརམྨཎནིདྡེསཝཎྞནཱ

༡༡༠༤. ཨནཱགཏཾསཉཱཎཉྩཱཏི ན ཨཱགཏོ ཨནཱགཏོ, ན ཏཱཝ སམྤཏྟོཏི ཨཏྠོ, ཨནཱགཏེ ཨཾསཱ ཀོཊྛཱསཱ ཏེསཾ ཉཱཎཾ ཨནཱགཏཾསཉཱཎཾ. ཡཾ ཡཾ ཀམྨཾ ཡཐཱཀམྨཾ, ཏཾ ཨུཔགཙྪཏི ཛཱནཱཏཱིཏི ཡཐཱཀམྨུཔགཾ, ཝིཔཱཀཙེཏནཱཛཱནནཀཉཱཎཾ.

༡༡༠༧-༩. ཏཏྠ ¶ ཏེསུ ཨཱརམྨཎཏྟིཀེསུ. ཙིཏྟསནྣིསྶིཏཾ ཀཏྭཱཏི ཏཾ ཀཱཡཾ ཙིཏྟཾ སནྣིསྶིཏཾ ཀརིཏྭཱ ཏམེཝ ཀཱཡཙིཏྟཙེཏསིཀཝསེན མཧགྒཏེ ཙིཏྟསྨིཾ སམཱརོཔེཏི ཉཱཎཾ ཨིདྡྷིཝིདྷཉཱཎཾ, ཏཏོ ཀཱཡཱརམྨཎཏོ ཀཱཡསྶ པརིཏྟཏྟཱ ཀཱམཱཝཙརཏྟཱ པརིཏྟཱརམྨཎཾ ཉཱཎཾ སིཡཱ.

༡༡༡༠-༣. དིསྶམཱནེན ¶ ཀཱཡེན, གནྟུཀཱམོ ཡདཱ བྷཝེ ཡོ ཡོགཱི དིསྶམཱནེན ཀཱཡེན གནྟུཀཱམོ ཡདཱ བྷཝེཡྻ, སོ ཡོགཱི ཏདཱ ཙིཏྟཾ ཀཱཡསནྣིསྶིཏཾ ཀཏྭཱ རཱུཔཀཱཡེ སནྣིསྶིཏཾ ཀཏྭཱ ཏཾ པཱདཀཛ྄ཛྷཱནཙིཏྟཾ ཀཱཡཝསེན ཀཱཡེ ཨཱརོཔེཏི, ཏདཱ ཛྷཱནཱརམྨཎཏོ ཏཾ ཉཱཎཾ མཧགྒཏགོཙརཾ ཧོཏི, ཡཾ ཉཱཎཾ ཡདཱ ཨནཱགཏཉྩ དྷམྨཛཱཏཾ, ཨཏཱིཏཉྩ དྷམྨཛཱཏཾ ཝིསཡཾ ཨཱརམྨཎཾ ཀརོཏི, ཏདཱ ཏཾ ཉཱཎཾ ཨཏཱིཏཱརམྨཎཾ ཧོཏི, ཏདཱ ཨནཱགཏཱརམྨཎཾ ཨཱརམྨཎཀརཎཀཱལེ ཨནཱགཏགོཙརཾ ཧོཏི. དིསྶམཱནེན ཀཱཡེན ཏསྶ བྷིཀྑུནོ གམནེ པན སཏི ཏསྶ ཡོགིནོ ཉཱཎསྶ གོཙརོ པཙྩུཔྤནྣོ ནཱམ ཧོཏི, ཨིཏི ཝིནིདྡིསེ.

༡༡༡༤. ཀཱཡཾ ཙིཏྟསྶ ཝསེན ཙིཏྟེ ཨཱརོཔེཏི, ཙིཏྟཾ ཀཱཡསྶ ཝསེན ཀཱཡེ ཨཱརོཔེཏི, ཨིཏི པརིཎཱམནཀཱལསྨིཾ ཏསྶ ཡོགིནོ ཉཱཎཾ ཨཛ྄ཛྷཏྟཱརམྨཎཾ སིཡཱ. སམྤཝཏྟཏི སཏྟསཱུཏི པརིཏྟམཧགྒཏཨཏཱིཏཨནཱགཏཔཙྩུཔྤནྣཨཛ྄ཛྷཏྟབཧིདྡྷཱརམྨཎསངྑཱཏེསུ སཏྟསུ ཨཱརམྨཎེསུ སམྤཝཏྟཏི.

༡༡༢༠. ཛཱནནེ མཛ྄ཛྷིམཱནནྟི མཧགྒཏཱནཾ ཛཱནནེ.

༡༡༢༢. ཨེཏསྶ ཙེཏོཔརིཡཉཱཎསྶ མགྒཱརམྨཎཏཱ པརིཡཱཡེན ཨེཝ མཏཱ ཉཱཏཱ.

༡༡༢༦-༧. ཏཏྠ ཏིཀྑཎསམྤཏྟཾ, པཙྩུཔྤནྣཾ ཁཎཱདིཀཾ.

ཏཏྠ ཏེསུ པཙྩུཔྤནྣེསུ ཡཾ པཙྩུཔྤནྣཾ ཁཎཱདིཀཾ ཏིཀྑཎསམྤཏྟཾ ཨུཔྤཱདཊྛིཏིབྷངྒཀྑཎསམྤཏྟཾ ཁཎཱདིཀཾ ཁཎཱཡེཝ ཏཾ ཁཎཱཝཡཝཾ པཙྩུཔྤནྣཾ ནཱམ. ཨེཀདྭེསནྟཏིཝཱརཔརིཡཱཔནྣནྟི ཨེཀཙིཏྟདྭིཙིཏྟཝཱིཐིཝཱརཔརིཡཱཔནྣཾ སནྟཏིཔཙྩུཔྤནྣཾ ནཱམ. པཙྩུཔྤནྣནྟི པཙྪིམནྟི ཨདྡྷཱཔཙྩུཔྤནྣནྟི ཨཏྠོ.

༡༡༣༡-༢. ཡེན ¶ ¶ ཨཱཝཛྫནཙིཏྟེན དྷམྨེ ཨཱཝཛྫཏི, ཡེན ཙེཏསཱ ཛཱནཱཏི, ཏེསཾ དྭིནྣཾ ཨཱཝཛྫནཛཝནཙིཏྟཱནཾ སཧཊྛཱནསྶ ཨབྷཱཝཱ ཏཾ ‘‘ཁཎཱདིཀཏྟཡཾ པཙྩུཔྤནྣ’’ནྟིཨཱདིཀཾ ‘‘ཨེཀསྶ ཙིཏྟམེཀེན, ཨཝསྶཾ པན ཝིཛ྄ཛྷཏི’’ཨིཏི པརིཡོསཱནཾ ཝཙནཾ ན ཡུཛྫཏི. ཨཱཝཛྫནཛཝནཱནཾ ནཱནཱརམྨཎབྷཱཝཾ པཏྟིཏོ ཨཱཔཛྫནཏོ ཙ ན ཡུཛྫཏི. ཨནིཊྛེ པན ཋཱནེ ཏེསཾ ཨཱཝཛྫནཛཝནཱནཾ ཨེཀཱརམྨཎབྷཱཝེ ཨནིཙྪིཏེ ཏསྨིཾ ཋཱནེ ན ཡུཛྫཏི, ཨཉྙསྨིཾ པན ཋཱནེ མགྒཝཱིཐིཡཾ ཨཱཝཛྫནཔརིཀམྨཛཝནཱནཾ ཀསིཎཱདིཀཾ ཨཱརམྨཎཾ ཧོཏི, གོཏྲབྷུལོཀུཏྟརཙིཏྟཱནཉྩ ནིབྦཱནཾ ཨཱརམྨཎཾ ཧོཏི, ཨེཏྠ ཨཱརམྨཎཛཝནཱནཾ ཨེཀཱརམྨཎཏཱ ཨནིཙྪཏཱ.

༡༡༣༤-༤༡. ‘‘ཨེཀབྦྷཝཔརིཙྪིནྣཾ, པཙྩུཔྤནྣནྟི པཙྪིམ’’ནྟི ཝཏྭཱ པུན ཨཉྙེན པརིཡཱཡེན ཏཾ པཙྩུཔྤནྣཾ དསྶེཏུཾ ཨིདཾ ཨདྡྷཱཁྱཾ ཨདྡྷཱནཱམ པཙྩུཔྤནྣཾ ཛཝནཝཱརཏོ དཱིཔེཏབྦཾ. ཨིཏི ཝཙནཾ ནིདྡིཊྛཾ. ཡདཱ ཨིདྡྷིམཱ ཡོགཱི པརསྶ ཙིཏྟཾ ཉཱཏུཾ ཨཱཝཛྫཏི, ཏསྶ ཨཱཝཛྫནམནོ པཙྩུཔྤནྣཁཎཝ྄ཧཡཾ པཙྩུཔྤནྣཾ མནོདྭཱརཱཝཛྫནཙིཏྟཾ ཨཱརམྨཎཾ ཀཏྭཱ ཏེན ཙིཏྟེན སདྡྷིཾ ནིརུཛ྄ཛྷཏི, ཏེསུ ནིརུདྡྷེསུ ཏསྶ ཡོགིནོ ཙཏྟཱརི, པཉྩ ཝཱ ཛཝནཱནི ཛཱཡནྟི. ཨེཏེསཾ ཙཏུནྣཾ, པཉྩནྣཾ ཛཝནཱནཾ ཡཾ པཙྪིམཾ ཙིཏྟཾ ཨིདྡྷིཙིཏྟམུདཱིརིཏཾ. ཨིདྡྷིཙིཏྟཏོ སེསཱནི ཀཱམཱཝཙརཙིཏྟཱནི. ཨེཏེསཾ ཀཱམཱཝཙརེ ཨིདྡྷིཛཝནཱནཾ ཏདེཝ ཙ པརཙིཏྟཾ ཨཱརམྨཎཾ ཧོཏི ཡསྨཱ, ཏསྨཱ སབྦཱནི ཏཱནི ཛཝནཱནི ཨེཀཱརམྨཎཏཾ ཡནྟི, ཏེསཾ ཛཝནཱནཾ ནཱནཱརམྨཎཏཱ ཨདྡྷཱཝསཱ ན བྷཝེཡྻ, པཙྩུཔྤནྣཱརམྨཎཏོ ཏེསཾ ཛཝནཱནཾ ཨེཀཱརམྨཎབྷཱཝེཔི ཨིདྡྷིམཱནསམེཝ ཙ པརསྶ ཙིཏྟཾ ཛཱནཱཏི. ཨིཏརཱནི ཀཱམཱཝཙརཱནི པན ཙིཏྟཱནི པརསྶ ཙིཏྟཾ ན ཛཱནནྟི. ཡཐཱ ཙཀྑུདྭཱརེ ཏུ ཝིཉྙཱཎནྟི ཙཀྑུཝིཉྙཱཎཾ རཱུཔཾ པསྶཏི, ཏཐཱ ཨིཏརཾ ཙིཏྟཾ ན པསྶཏི.

༡༡༦༡. ཨནཱགཏཾསཉཱཎསྶཱཏི ¶ ཨནཱགཏཾསཉཱཎསྶ ཨནཱགཏཾ དྷམྨཾ ཨགོཙརཾ, གོཙརཾ ན ཧོཏིཡེཝཱཏི ཨཏྠོ.

༡༡༦༩. ཝིཝིདྷཏྠཱནི ཝཎྞཔདཱནི ཡསྨིཾ སོ ཝིཝིདྷཏྠཝཎྞཔདོ, ཏཾ མདྷུརཏྠམཏིནཱིཧརཾ ཨུཏྟམཾ སོཏུཛནསྶ ཧདཡཾ པཱིཏིཀརཾ སཙེཏནོ ཀོ ནཱམ མནུཛོ ན སུཎེཡྻ.

ཨིཏི ཨབྷིདྷམྨཱཝཏཱརཊཱིཀཱཡ

ཨབྷིཉྙཱརམྨཎནིདྡེསཝཎྞནཱ ནིཊྛིཏཱ.

སཏྟརསམོ པརིཙྪེདོ.

༡༨. ཨཊྛཱརསམོ པརིཙྪེདོ

དིཊྛིཝིསུདྡྷིནིདྡེསཝཎྞནཱ

༡༡༧༥. ཡཱ ¶ སཉྫཱནནམཏྟཾཝ, སཉྙཱ ནཱིལཱདིཏོ པནཱཏི སཱ སཉྙཱ ནཱིལཱདིཝསེན སཉྫཱནནམཏྟཾཝ ཀརོཏི. ལཀྑཎཔྤཊིཝེདྷནྟི ཨནིཙྩཱདིལཀྑཎཔཊིབུཛ྄ཛྷནཾ.

༡༡༧༧. ཏཾ ཝིཉྙཱཎཾ ཨུསྶཀྐིཏྭཱ ཨུདྡྷཾ སཀྐཾ ཀཏྭཱ སཏྟེ མགྒཾ པཱཔེཏུཾ ན སཀྐོཏི.

༡༡༧༨-༩. སབྦེསཾ པན དྷམྨཱནཾ སབྷཱཝཔཊིཝེདྷནཾ ཨཝིཔརཱིཏཝསེན པཊིབུཛ྄ཛྷནཾ པཉྙཱཡ ལཀྑཎཾ.

༡༡༨༠. སམཱདྷི ཨཱསནྣཀཱརཎཾ ཨེཏཱཡཱཏི སམཱདྷཱསནྣཀཱརཎཱ.

༡༡༨༡. ལཀྑཎེནེཀདྷཱཏི སབྦདྷམྨཾ པཊིབུཛ྄ཛྷནལཀྑཎེན པཉྙཱཝ ཨེཀདྷཱ ཝུཏྟཱ.

༡༡༨༣. བྷཱུརིཔཉྙེནཱཏི ¶ བྷཱུཏེ ཨཏྠེ ཨཝིཔརཱིཏེ ཨཏྠེ རམཏཱིཏི བྷཱུརི, བྷཱུརི པཉྙཱ ཨེཏསྶཱཏི བྷཱུརིཔཉྙོ, ཏེན.

༡༡༨༦-༩༡. ཏཱིསུ ཨཏྠདྷམྨནིརུཏྟཱིསུ ཙ ཉཱཎེསུ ཨཏྠདྷམྨནིརུཏྟཱིསུ ཛཱཏེསུ ཉཱཎེསུ ཙ ཉཱཎཾ. ཡཾ ཀིཉྩི པཙྩཡུཔྤནྣཾ ཕལཾ དྷམྨཛཱཏཾ. བྷཱསིཏཏྠོཏི པཱལི༹ཡཱ ཨཏྠོ. ཨེཏེ པཉྩ དྷམྨཱ ཨཏྠསཉྙིཏཱ ཨཏྠནཱམཀཱ. ཕལནིབྦཏྟཀོ ཧེཏཱུཏི ཛནནཀོ པཙྩཡོ. བྷཱསིཏནྟི པཱལི༹. དྷམྨསཉྙིཏཱཏི དྷམྨནཱམཀཱ. སབྷཱཝནིརུཏྟཱིཏི ཨཝིཔརཱིཏཝོཧཱརོ. པརིཡཏྟཱིཏི སིཀྑནཾ. སཝནཱདྷིགམེཧི པུབྦཡོགེན པུབྦེ པཝཏྟནཱཡ.

༡༡༩༢. བྷཱུམིབྷཱུཏེསཱུཏི ཝིཔསྶནཱཡ བྷཱུམིབྷཱུཏེསུ.

༡༡༩༤. ཛནནཱདིཏོཏི ¶ ཛཱཏིཨཱདིཏོ བྷཱིཏེན པཉྙཱ བྷཱཝེཏབྦཱ.

༡༢༠༣. ཨེཀཱསཱིཏིཡཱ ཙིཏྟེནཱཏི ལོཀུཏྟརཙིཏྟཝཛྫིཏེན ཝིཔསྶནཱབྷཱུམིབྷཱུཏེན ཨེཀཱསཱིཏིཡཱ ཙིཏྟེན.

༡༢༠༨. སཏྟསམྨོཧགྷཱཏཏྠནྟི སཏྟོཏི སམྨོཧསྶ ཝིནཱསིཏཏྠཾ.

༡༢༡༡. ནིརཱིཧཀནྟི ཨཱིཧཝིརཧིཏཾ བྱཱཔཱརཝིརཧིཏཾ, དཱརུརཛྫུསམཱཡོགེ.

༡༢༡༥. ཨུབྷོ བྷིཛྫནྟི པཙྩཡཱཏི ཨཉྙམཉྙཔཙྩཡཀཱརཎཱ.

༡༢༢༥. ཨནྟདྭཡནྟི ཀཱམསུཁལླིཀཱནུཡོགཨཏྟཀིལམཐཱནུཡོགདྭཡཾ. བྷཱཝཡེཏི དིཊྛིཝིསུདྡྷིཾ ཝཌྜྷེཡྻ.

ཨིཏི ཨབྷིདྷམྨཱཝཏཱརཊཱིཀཱཡ

དིཊྛིཝིསུདྡྷིནིདྡེསཝཎྞནཱ ནིཊྛིཏཱ.

ཨཊྛཱརསམོ པརིཙྪེདོ.

༡༩. ཨེཀཱུནཝཱིསཏིམོ པརིཙྪེདོ

ཀངྑཱཝིཏརཎཝིསུདྡྷིནིདྡེསཝཎྞནཱ

༡༢༣༡. ཨིཙྩེཝམཱདིབཱཏྟིཾསཀོཊྛཱསཱནཾ ¶ པཙྩཡསྶ ཧེཏུཔཙྩཡེ ཏཱཝ ཡོགཱི མནསཱ པརིགྒཎྷཱཏི.

༡༢༣༣. ཧེཏྭངྐུརསྶ བཱིཛཾ ཏུ བཱིཛཾ ཨངྐུརསྶ ཧེཏུཛནཀཾ, པཐཝཱདཡོ ཨངྐུརསྶ པཙྩཡཱ.

༡༢༣༤. པཉྩ ¶ དྷམྨཱཏི ཨཝིཛྫཱཏཎྷུཔཱདཱནཀམྨཱཧཱརཱ ཧེཏུཔཙྩཡཱ དྷམྨཱ.

༡༢༣༥. ཀམྨཾ པུཏྟསྶ ཛནཀོ པིཏཱ ཝིཡ ནཱམརཱུཔསྶ ཛནཀཾ.

༡༢༣༨. པཙྩཡཱཏི པཙྩཡེན.

༡༢༤༠. ཡཱ སཱཏི ཡཱ སཱ ཀངྑཱ. པུབྦནྟེ པུབྦཀོཊྛཱསེ.

༡༢༤༡. སབྦཐཱ སབྦཀོཊྛཱསཏོ ཨནཝསེསཱཝ ཏསྶ ཡོགིནོ སཱ ཀངྑཱ པཧིཡྻཏི ནཱསཱིཡཏེ.

༡༢༤༣. ཨཏྠསཱདྷིཀཱཏི ཀུསལཔཀྑེ དཱནཱདིཨཏྠསཱདྷིཀཱ, ཨཀུསལཔཀྑེ པཱཎཱཏིཔཱཏཱདིཨཏྠསཱདྷིཀཱ.

ཏཾ ཝིཔཱཀནྟི ཨུཔགྷཱཏཀཀམྨསྶ ཏཾ ཝིཔཱཀཾ ཨུཔྤནྣཾ ནཱམ ཧོཏི. ཨེཝཾ ཨེཀོ ཡོགཱི ཀམྨཝིཔཱཀཝསེན ནཱམརཱུཔསྶ པཙྩཡཔརིགྒཧཾ ཀརོཏི.

༡༢༤༦. ཧེཏུཕལསྶ སམྦནྡྷཝསེནཱཏི ཧེཏུཕལསམྦནྡྷཝསེན ཨིདཾ ནཱམརཱུཔཾ ཀེཝལཾ ཨེཀནྟེན པཝཏྟཏི, ཨིཏི སམྨཱ ཨཝིཔརཱིཏཱཀཱརེན སཾ ཨནུཔསྶཏི.

༡༢༤༧. པཱཀཔྤཝཏྟིཏོ ¶ ཨུདྡྷཾ པཱཀཔཊིཝེདཀཾ ན པསྶཏི ན ཛཱནིཡཏེ.

༡༢༥༠-༡. ཨཔྤཝཏྟི ནཱམ ན དིསྶཏི, ཨུཔཔནྣཾ དིསྶཏི. ཏིཏྠིཡཱ ཨེཏམཏྠཾ ཨནཉྙཱཡ ཨཛཱནིཏྭཱ ཨསཡཾཝསཱི སཏྟསཉྙནྟི ‘‘སཏྟོ’’ཏི སཉྙཾ གཧེཏྭཱན སསྶཏཨུཙྪེདདསྶིནོ ཨཉྙམཉྙཾ ཝིརོདྷིནོ ཧུཏྭཱ དྭཱསཊྛིདིཊྛིཾ གཎྷནྟི.

༡༢༥༤. ཨུབྷོཏི ཨུབྷོ ཀམྨཝིཔཱཀཱ ཨཉྙམཉྙཏོ སུཉྙཱ. ན ཙ ཀམྨཾ ཝིནཱ ཕལནྟི ཀམྨཾ ཝིནཱ ཕལཾ ན ཙ ཧོཏི.

༡༢༥༥. སམྦྷཱརེཧཱིཏི ¶ སཱུརིཡཱདིསམྦྷཱརེཧི.

༡༢༥༧. སུཉྙཾ ཏཾ ནཱམརཱུཔདྷམྨཾ.

༡༢༥༨. ཧེཏུསམྦྷཱརཔཙྩཡཱཏི ཧེཏུནཱ ཙ སམྦྷཱརཔཙྩཡེཧི ཙ.

ཨིཏི ཨབྷིདྷམྨཱཝཏཱརཊཱིཀཱཡ

ཀངྑཱཝིཏརཎཝིསུདྡྷིནིདྡེསཝཎྞནཱ ནིཊྛིཏཱ.

ཨེཀཱུནཝཱིསཏིམོ པརིཙྪེདོ.

༢༠. ཝཱིསཏིམོ པརིཙྪེདོ

མགྒཱམགྒཉཱཎདསྶནཝིསུདྡྷིནིདྡེསཝཎྞནཱ

༡༢༦༤. པཙྩུཔྤནྣསྶ དྷམྨསྶཱཏི པཙྩུཔྤནྣསྶ ནཱམརཱུཔདྷམྨསྶ.

༡༢༦༦-༨. ཨུཔྤཛྫཏོ ཨུཔྤཛྫནྟསྶ ནཱམརཱུཔདྷམྨསྶ རཱསིཏོ ནིཙཡཏོ ཨཱགམནཉྩ ནཏྠི. དིསཱགམནནྟི དིསཱཡ གམནཾ ¶ . ནིརུདྡྷསྶཱཔི ནཱམརཱུཔདྷམྨསྶ ཨེཀསྨིཾ ཋཱནེ ནིཙཡོཏི ཙ ནཏྠི.

༡༢༧༠-༡. ཨཝིཛྫཱསམུདཡཱ རཱུཔསམུདཡོ, ཨཝིཛྫཱནིརོདྷཱ རཱུཔནིརོདྷོ. ཏཎྷཱསམུདཡཱ རཱུཔསམུདཡོ, ཏཎྷཱནིརོདྷཱ རཱུཔནིརོདྷོ. ཀམྨསམུདཡཱ རཱུཔསམུདཡོ, ཀམྨནིརོདྷཱ རཱུཔནིརོདྷོ. ཨཱཧཱརནིརོདྷཱ རཱུཔནིརོདྷོ. དྷམྨེཏི སངྑཱརདྷམྨེ.

༡༢༨༠. སམྤཏྟཔཊིཝེདྷསྶཱཏི སམྤཏྟལོཀུཏྟརསངྑཱཏམགྒཕལསྶ སོཏཱཔནྣཱདིཔུགྒལསྶ. ཝིཔྤཊིཔནྣསྶཱཏི པཊིཔཏྟིཡཾ ཨཔྤཊིཔནྣསྶ, ཝིརུདྡྷཝསེན པཊིཔནྣསྶ ཝཱ.

༡༢༨༦. ཀཱཡཙིཏྟཱནཱིཏི ¶ ཀཱཡཱཏི ཝེདནཱསཉྙཱསངྑཱརཱ. ཙིཏྟནྟི ཝིཉྙཱཎཾ.

༡༢༩༠. ཡཏོ ཡཏོ པཙྩཡཱདིཏོ. ཡཾ ཨམཏཾ ནིབྦཱནཾ ཝིཛཱནཏཾ ཝིཛཱནནྟཱནཾ པཱིཏིཔཱམོཛྫཾ, ཏེཧི ལབྷིཏབྦཾ ཨམཏཾ, ཨམཏཾ ཝིཡ པཱིཏིཔཱམོཛྫཾ ཝཱ.

༡༢༩༣. ཨཔྤཏྟེཏི ཨཏྟནི མགྒཕལསྨིཾ ཨཔྤཏྟེ. པཏྟསཉྙཱིཏི མགྒཕལེ ཨཧཾ པཏྟོ ཨསྨི ཨིཏི སཉྙིཏོ ཧོཏི.

༡༢༩༧. སཱརཝེདིནོཏི སཱརཛཱནནསཱིལཱ. ཏནྟི ཏཾ མགྒཱམགྒཉཱཎདསྶནཾ. ཨིདཾ ཉཱཎཾ མགྒཱམགྒཉཱཎདསྶནནྟི མགྒཱམགྒཉཱཎདསྶནཾ ནཱམ.

ཨིཏི ཨབྷིདྷམྨཱཝཏཱརཊཱིཀཱཡ

མགྒཱམགྒཉཱཎདསྶནཝིསུདྡྷིནིདྡེསཝཎྞནཱ ནིཊྛིཏཱ.

ཝཱིསཏིམོ པརིཙྪེདོ.

༢༡. ཨེཀཝཱིསཏིམོ པརིཙྪེདོ

པཊིཔདཱཉཱཎདསྶནཝིསུདྡྷིནིདྡེསཝཎྞནཱ

༡༢༩༩. ཨུཔལླེསཝིམུཏྟཾ ¶ སུཝིསདཾ ཉཱཎནྟི ཨཊྛཝིདྷཉཱཎཾ སནྡྷཱཡཱཧ.

༡༣༠༢. སཙྩཱནུལོམཉཱཎནྟི ཨཡམེཝ པཝུཙྩཏི.

༡༣༠༦. ཨཡཾ སིཁཱཔཏྟཱ ཝིཔསྶནཱ ཨེཝ སཙྩཱནུལོམཉཱཎཾ ནཱམ པཝུཙྩཏི.

༡༣༠༩. བྷཝངྒཱནནྟརཾ སངྑཱརུ-པེཀྑཱགཏནཡེནཱཏི བྷཝངྒཱནནྟརཾ སངྑཱརུཔེཀྑཱསངྑཱཏེན ཉཱཎེན ཀཏནཡེན.

༡༣༡༤-༦. བོདྷིཔཀྑིཡདྷམྨཱནཾ ¶ , ཨུདྡྷཉྩ ཨནུལོམཏོཏི ཨུདྡྷཾ ཝཏྟམཱནཱནཾ བོདྷིཔཀྑིཡདྷམྨཱནཾ ཨནུལོམཏོ, ཨིདཾ ཨནུལོམཉཱཎཾ ཝུཊྛཱནགཱམིནིཡཱ པརིཡོསཱནཾ ནཱམ བྷཱསིཏཾ མཧེསིནཱ ཀཐིཏཾ. སཙྩཱནུལོམཉཱཎཾ ཨཱཧཙྩ ཨུཔྤནྣཱ, སབྦཔྤཀཱརེན གོཏྲབྷུཔརིཡོསཱནཾ.

༡༣༡༨. ཏཏྠཱཏི ཝིཔསྶནཱཡ.

ཨིཏི ཨབྷིདྷམྨཱཝཏཱརཊཱིཀཱཡ

པཊིཔདཱཉཱཎདསྶནཝིསུདྡྷིནིདྡེསཝཎྞནཱ ནིཊྛིཏཱ.

ཨེཀཝཱིསཏིམོ པརིཙྪེདོ.

༢༢. དྭཱཝཱིསཏིམོ པརིཙྪེདོ

ཉཱཎདསྶནཝིསུདྡྷིནིདྡེསཝཎྞནཱ

༡༣༡༩-༢༢. ཨཱཝཛྫནསྶ ཧིཏཾ ཨཱཝཛྫནིཡཾ, ཏཾ ཋཱནཾ ཨེཏསྶཱཏི ཨཱཝཛྫནིཡཋཱནཾ, གོཏྲབྷཱུཏི ཨཏྠོ. ཏཾ གོཏྲབྷུཙིཏྟཾ ¶ མགྒཙིཏྟསྶ ཨཱཝཛྫནིཡཋཱནཏྟཱ. པཊིཔདཱཉཱཎདསྶནཾ ཀུདཱཙནཾ ན ཙ བྷཛཏི, ཏཐེཝ ཉཱཎདསྶནཝིསུདྡྷིཾ ཀུདཱཙནཾ ན བྷཛཏེཝ. ཨུབྷིནྣཾ ཉཱཎཱནཾ ཨནྟརཱ ཨེཀཾ ཨབྦོཧཱརིཀཾ ཝོཧཱརེ ནིཡུཏྟནྟི ཝོཧཱརིཀཾ, ན ཝོཧཱརིཀཾ ཨབྦོཧཱརིཀཾ. ཝིཔསྶནཱཡ སོཏསྨིཾ ཝིཔསྶནཱཡ སོཏེ པཏིཏཏྟཱ ཝིཔསྶནཱ ནཱམ ཝོཧརིཏབྦཱ. ཏཏོ ནིབྦཱནཏོ.

༡༣༢༥. སཱུརཾ ཏིཀྑཾ ཝིཔསྶནནྟི གོཏྲབྷུཙིཏྟཾ སནྡྷཱཡཱཧ.

༡༣༢༦-༩. ཝིསངྑཱརནྟི སངྑཱརེཧི ཝིགཏཾ. པཋམཱཝཛྫནཉྩེཝཱཏི པཋམཱཝཛྫནཾ ཝིཡ. པཋམཱབྷོགཏཱཔི ཙཱཏི པཋམམནསིཀཱརཱ ཝིཡ. མགྒསྶ ཨནནྟརཱདཱིཧི པཙྩཡེཧི. ཏསྶཱཏི མགྒསྶ. སིཁཱཔཏྟཱཡ ཏཱཡ ཝིཔསྶནཱཡ མུདྡྷམྷི མཏྠཀེ. ཨནཱཝཏྟནྟི ཨནིཝཏྟཾ.

༡༣༣༠-༣. ཨེཀེན ¶ ཨཱཝཛྫནེན ཨེཀིསྶཱཡེཝ ཝཱིཐིཡཱ. ཨནུལོམགོཏྲབྷུཙེཏསནྟི ཨནུལོམགོཏྲབྷུཙིཏྟཱནཾ ནཱནཱརམྨཎཏཱ ཝུཏྟཱ. ཏཾ གོཏྲབྷུཙིཏྟཾ ཨནཱཝཛྫནམྤི མགྒསྶ ཨཱཝཛྫནཊྛཱནེ ཋཏྭཱ. སཉྙཾ དཏྭཱ ཝིཡཱཏི ‘‘ཨཧཾ ནིབྦཱནཾ ཨཱརམྨཎཾ ཀརོམི, ཏྭམྤི ཏམེཝཱརམྨཎཾ ཀརོཧི’’ ཨིཏི སཉྙཾ དཏྭཱ ཝིཡཱཏི ཨདྷིཔྤཱཡོ. སཉྙིཏནྟི སཉྙཾ. ཀདཱཙིཔི ཨནིབྦིདྡྷཔུབྦཾ མགྒོ ཨེས ཨེསོ མགྒོ པུབྦེ ཨནིབྦིདྡྷཔུབྦོ.

༡༣༣༦. ཨུཛ྄ཛྷཏཱིཏི ཚིནྡཏི.

༡༣༣༨. ཨནེཀེསཾ ཨཱནིསཾསཱནཾ དཱཡཀེན ཨཱདིམགྒེན སཾཡུཏྟཾ. པཋམམགྒཉཱཎཾ.

༡༣༤༡. ཨེཀསྶཱསེཝནཾ ¶ ནཏྠི ཨེཀསྶ ཙིཏྟུཔྤཱདསྶ ཨཱསེཝནཔཙྩཡོ ནཏྠི, ཏསྨཱ ཀཱརཎཱ དྭེ ཙིཏྟུཔྤཱདཱ ཨནུལོམཀཱ. ཏེཧཱིཏི ཙིཏྟུཔྤཱདེཧི ཨཱསེཝནཔཙྩཡཾ ལདྡྷཱ ལབྷིཏྭཱ ཏཏིཡཾ ཙིཏྟཾ གོཏྲབྷུ ཧོཏི.

༡༣༤༥-༧. མགྒཔེཀྑནཧེཏུ ཡསྶ ཨཱཝཛྫནམནསོ, ཏཾ མགྒཔེཀྑནཧེཏུཀཾ. ཏསྨིཾ ནིརུདྡྷེཏི ཏསྨིཾ ཨཱཝཛྫནཙིཏྟེ ནིརུདྡྷེ མགྒསྶ པཙྩཝེཀྑཎསཉྙིཏཱནི སཏྟ ཛཝནཱནི པཊིཔཱཊིཡཱ ཛཱཡནྟེ. པཙྩཝེཀྑཎཉཱཎཱནི ཨེཀཱུནཝཱིསཏི ཧོནྟི.

༡༣༥༡. ཏཏོ ཏདཱ ཝིཔསྶནཱཝཱིཐིཾ ཨོཏརཏི. དུཏིཡམགྒཉཱཎཾ.

༡༣༦༡. མཱུལགྷཱཏནྟི མཱུལགྷཱཏནཾ. ཏཏིཡམགྒཉཱཎཾ.

༡༣༦༣. ཨནཱཝཏྟིསབྷཱཝཏོཏི ཨནིཝཏྟཏོ. ཙཏུཏྠམགྒཉཱཎཾ.

ཨིཏི ཨབྷིདྷམྨཱཝཏཱརཊཱིཀཱཡ

ཉཱཎདསྶནཝིསུདྡྷིནིདྡེསཝཎྞནཱ ནིཊྛིཏཱ.

དྭཱཝཱིསཏིམོ པརིཙྪེདོ.

༢༣. ཏེཝཱིསཏིམོ པརིཙྪེདོ

ཀིལེསཔཧཱནནིདྡེསཝཎྞནཱ

༡༣༧༥. ཨིདྷ ¶ པན ཨིམསྨིཾ པནཱདྷིཀཱརེ ཀཱརཎཱུཔཙཱརེན ལཱབྷཱདིཀཱརཎསྶ ཝོཧཱརེན, ལཱབྷོ ཨཱདི ཝཏྠུ ཡསྶ ཨནུནཡསྶཱཏི ལཱབྷཱདིཝཏྠུཀོ, ཏསྶ.

སུཁུམཱཏི ཀཱམརཱགཔཊིགྷཱ སུཁུམཱ.

༡༣༧༦. ཡེན ¶ ཡེན པཋམམགྒཱདིཉཱཎེན ཡོ ཡོ སཾཡོཛནཱདིཀོ པཧཱཏབྦོ དྷམྨོ གྷཱཏཾ ཝིནཱསཾ ཡཱཏི, སོ སོ དྷམྨོ ཏེན ཏེན ཨསེསེན ཉཱཎེན ཨེཝཾ སཱདྷུ མཡཱ སནྡསྶིཏོ.

༡༣༨༣. པརིཉྙཱབྷིསམཡེནཱཏི པརིཙྪིནྡིཏྭཱ ཛཱནནེན. དུཀྑཾ ཨབྷིསམེཏཱིཏི དུཀྑཾ པཊིཝིཛ྄ཛྷཏི.

༡༣༩༤. ཡོ ཡོགཱི ཨིམཾ ཝིདིཏྭཱ ཧིཏབྷཱཝནཾ ཝནཾ ཝནེཏབྦཾ ཝིདིཏྭཱ ཛཱནིཏྭཱ ཝེ ཨེཀནྟེན སུཁསཾཧིཏཾ ཧིཏཾ ཨུཔེཏི, ཙིཏྟསྶ ཏམཾ ཨནུཏྟམཾ ཧཱིནཾ ཝིདྷཱུཡ ཝིནཱསེཏྭཱ ཨཝིགྒཧཀམྤདཾ པདཾ ཨཝིགྒཧཀཾ སརཱིརརཧིཏཾ པདཾ པཊིཔཛྫིཏབྦཾ ཉཱཏབྦཾ པདཾ ནིབྦཱནཾ ཨུཔེཏི པཱཔུཎཱཏི ཙ.

ཨིཏི ཨབྷིདྷམྨཱཝཏཱརཊཱིཀཱཡ

ཀིལེསཔཧཱནནིདྡེསཝཎྞནཱ ནིཊྛིཏཱ.

ཏེཝཱིསཏིམོ པརིཙྪེདོ.

༢༤. ཙཏུཝཱིསཏིམོ པརིཙྪེདོ

པཙྩཡནིདྡེསཝཎྞནཱ

༡༣༩༥. རཱུཔཾ ¶ རཱུཔསྶཱཏི རཱུཔཾ རཱུཔསྶ. ཨརཱུཔསྶ ནཱམསྶ.

༡༣༩༦. མིསྶཀསྶཱཏི ནཱམརཱུཔམིསྶཀསྶཱཏི ཨཏྠོ.

༡༣༩༧. ཏིཔཉྩ ཙཱཏི པནྣརས ཙ.

༡༣༩༩. ཨེཀོཏི ¶ ཀམྨཔཙྩཡོ. དྭེཀཱལིཀོཏི ཨཏཱིཏཔཙྩུཔྤནྣཀཱལཝསེན དྭཱིསུ ཀཱལེསུ ནིཡུཏྟོ. དསྶིཏོཏི བྷགཝཏཱ དེསིཏོ.

ཨིཏི ཨབྷིདྷམྨཱཝཏཱརཊཱིཀཱཡ

པཙྩཡནིདྡེསཝཎྞནཱ ནིཊྛིཏཱ.

ཙཏུཝཱིསཏིམོ པརིཙྪེདོ.

ནིགམནཀཐཱཝཎྞནཱ

༡༤༠༡. སུམཏིམཏིཝིཙཱརབོདྷནོཏི སུམཏཱིནཾ སུནྡརཔཉྙཱནཾ ཀཝཱིནཾ མཏིཡཱ ཝིཙཱརསྶ བོདྷནོ. ཝིམཏིཝིམོཧཝིནཱསནོཏི ཝིམཏཱིནཾ བཱལཱནཾ ཝིམོཧསྶ ཝིནཱསནོ. ཀུམཏིམཏིམཧཱཏམོནཱསོཏི ཀུམཏཱིནཾ བཱལཱནཾ མཧཱཏམསནྣིབྷཱཡ མཏིཡཱ ནཱསཀོ. པཊུམཏིབྷཱསཀརོཏི པཊཱུནཾ པཎྜིཏཱནཾ ཏིཀྑཔཉྙཱཡ ཨོབྷཱསཀརོ.

༡༤༠༢. སུམཏིནཱམཀོ བྷིཀྑུ ཨསམཱནཏོ ཨསདིསཱཡ པཱུཛཱཡ མམ ཨཱཡཱཙིཏོ ཡཏོ ཡསྨཱ ¶ ཀཱརཎཱ, ཏཏོ ཏསྨཱ ཀཱརཎཱ ཨཡཾ ཨབྷིདྷམྨཱཝཏཱརོ. པདཱཏོ པདཱཏི ཀོཊྛཱསཏོ ཀོཊྛཱསཏོ. ཧིཏཝིབྷཱཝནཱ བྷཱཝནཱཏི ཧིཏཔྤཀཱསནཱཡ བྷཱཝནཱཡ མཡཱ རཙིཏོ. ཨཐ ཝཱ ཨཧཾ སུམཏིནཱ བྷིཀྑུནཱ ཨསམཱནཏོ མཱནཏོ ཨཱཡཱཙིཏོ ཡཏོ ཡསྨཱ, ཏཏོ ཏསྨཱ.

༡༤༠༥. ཏིཝིདྷཱ བྱཔྤཐཱནཉྷི གཏིཡོཏི བྱཔྤཐཱནཾ ཝཙནཱནཾ ཨཏྠགནྠཡུཏྟིཝསེན ཏིཝིདྷཱ གཏིཡོ.

༡༤༠༦. ནིཀཱཡནྟརལདྡྷཱིཧཱིཏི ཨཉྙསྨིཾ ནིཀཱཡེ ལདྡྷཱིཧི. ཝཱཙནཱམགྒནིསྶིཏོཏི ཝཙནཔྤབནྡྷནིསྶིཏོ.

༡༤༡༠. ཨསཾཀིཎྞཀུལཱཀུལེཏི ¶ ཨསམྨིསྶཀུལེཧི ཨཱཀིཎྞེ. སུཔསནྣསིཏོདཀེཏི མདྷུརསཱིཏོདཀེ.

༡༤༡༡. སངྐཊེཏི སམྦཱདྷེ.

༡༤༡༢. ཀེལཱསསིཁརཱཀཱརཔཱསཱདཔཊིམཎྜིཏེཏི རཛཏཔབྦཏམཏྠཀནིབྷེཧི པཱསཱདེཧི ཨལངྐཏེ.

༡༤༡༣. ཝིཝིདྷཱཀཱརཙཱརུཔཱཀཱརགོཔུརེཏི ཝིཝིདྷསཎྛཱནམནུཉྙཔཱཀཱརདྭཱརཀོཊྛཀེ.

༡༤༡༤. སལླེཁཱཏི སལླེཁཝུཏྟི. སཱཁལྱེཏི སཁིལབྷཱཝེ. སཏཱཏི སཏིསམྤནྣེན.

༡༤༡༥. ཝསྶཝལཱཧཀཱ དེཝཱཏི ཝསྶཝལཱཧཀབྷཱུཏཱ དེཝཱ ཨམརཱ.

ནིགམནཀཐཱཝཎྞནཱ ནིཊྛིཏཱ.

ཨབྷིདྷམྨཱཝཏཱརཔུརཱཎཊཱིཀཱ ནིཊྛིཏཱ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཨབྷིདྷམྨཱཝཏཱར-ཨབྷིནཝཊཱིཀཱ

(པཋམོ བྷཱགོ)

གནྠཱརམྦྷཀཐཱ

(ཀ) ཝིསུདྡྷཀརུཎཱཉཱཎཾ ¶ ¶ , བུདྡྷཾ སམྦུདྡྷཔཱུཛིཏཾ;

དྷམྨཾ སདྡྷམྨསམྦྷཱུཏཾ, ཝནྡེ སཾགྷཾ ནིརངྒཎཾ.

(ཁ) སཱརིཔུཏྟཾ མཧཱཐེརཾ, པརིཡཏྟིཝིསཱརདཾ;

ནམཱམི སནྟཝུཏྟིཾ མེ, གུརུཾ གཱརཝབྷཱཛནཾ.

(ག) ཝནྡནྟེན མཡཱ ཨེཝཾ,

ཡཱ ལདྡྷཱ པུཉྙསམྤདཱ;

ཧིཏྭཱ ཏསྶཱནུབྷཱཝེན,

ཨནྟརཱཡེ ཨསེསཏོ.

(གྷ) མཧཱཝིཧཱརཝཱསཱིནཾ ¶ , ཐེརཱནཾ ཐིརསཱིལིནཾ;

ཝཾསཱལངྐཱརབྷཱུཏེན, བྷཱུཏཱནུགྒཧཀཱརིནཱ.

(ང) ཐེརེན བུདྡྷདཏྟེན, རཙིཏཾ ཡཾ མནོརམཾ;

པིཊཀེ ཨབྷིདྷམྨསྨིཾ, ཨོཏཱརུཔཱཡབྷཱཝཏོ.

(ཙ) ཨབྷིདྷམྨཱཝཏཱརོཏི, ལདྡྷནཱམེན ཝིསྶུཏཾ;

ནཱནཱནིཔུཎགམྦྷཱིརནཡཾ པཀརཎུཏྟམཾ.

(ཚ) ཨཏྠསཾཝཎྞནཾ ཏསྶ, ཨཱརབྷིསྶཾ ཡཐཱབལཾ;

པཱམོཛྫཛནནཏྠཱཡ, ཨཱབྷིདྷམྨིཀབྷིཀྑུནནྟི.

གནྠཱརམྦྷཀཐཱཝཎྞནཱ

༡. པརམནིཔུཎཝིཙིཏྟནཡསམནྣཱགཏཾ ¶ སཀསམཡསམཡནྟརགཧནཝིགྒཱཧཎསམཏྠཾ སུཝིམལཝིཔུལཔཉྙཱཝེཡྻཏྟིཡཛནནཾ པཀརཎམིདམཱརབྷནྟོཡམཱཙརིཡོ པཋམཾ ཏཱཝ རཏནཏྟཡཔྤཎཱམཀརཎེན ཨནྟརཱཡནིཝཱརཎཉྩེཝ པཉྙཱཔཱཊཝཉྩ པཏྠེཏི. རཏནཏྟཡཔྤཎཱམོ ཧི ཨཏྠཏོ པཎཱམཀིརིཡཱབྷིནིཔྥཱདིཀཱ ཀུསལཙེཏནཱ. སཱ ཙ ཝནྡནེཡྻཝནྡཀཱནཾ ཁེཏྟཛ྄ཛྷཱསཡསམྤདཱཧི དིཊྛདྷམྨཝེདནཱིཡབྷཱུཏཱ ཡཐཱལདྡྷསམྤཏྟིནིམིཏྟཀསྶ ཀམྨསྶ ཨནུབལཔྤདཱནཝསེན ཏནྣིབྦཏྟིཏཝིཔཱཀསནྟཏིཡཱ ཨནྟརཱཡཀརཱནི ཨུཔཔཱིལ༹ཀཨུཔཙྪེདཀཀམྨཱནི པཊིབཱཧིཏྭཱ ཏནྣིདཱནཱནཾ ཡཐཱདྷིཔྤེཏསིདྡྷིཝིབནྡྷཀཱནཾ རོགཱདིཨནྟརཱཡཱནམཔྤཝཏྟིཾ སཱདྷེཏི, རཱགཱདིམལཝིཀྑཱལནེན ཙ ཙིཏྟསནྟཱནཾ པརིསོདྷེཏྭཱ ཏནྣིསྶིཏཱཡ པཉྙཱཡ ཡཐཱདྷིཔྤེཏསིདྡྷིསམྤཱདཀཾ ཏིཀྑཝིསདབྷཱཝམཱཝཧཏི. ཀིཉྩི ཨཱཙིཎྞམེཏཾ པཎྜིཏཱནཾ, ཡདིདཾ གནྠསམཱརམྦྷེ རཏནཏྟཡཔྤཎཱམཀརཎཾ, ཏསྨཱ སཔྤུརིསཱཙཱརཱནུརཀྑཎཏྠཉྩ ཨཱདིམྷི རཏནཏྟཡཝནྡནཱ ཨཱརདྡྷཱཏི ཨེཝམཱདིནཱ ཨཉྙཱནིཔི བཧཱུནི པཡོཛནཱནི ནིདྡྷཱརེཏབྦཱནི. ཏཱནི པན ཏཏྠ ཏཏྠ བཧུདྷཱ ཝིཏྠཱརིཏཱནཱིཏི ཏཾ པཔཉྩཔརིསྶམཾ ཋཔེཏྭཱ ཡཐཱནུཔྤཏྟམེཝ ཏཱཝ ཝཎྞཡིསྶཱམ.

ཨེཏྠ ཙ རཏནཏྟཡཔྤཎཱམཾ ཀཏྟུཀཱམོ ཏཐཱགཏམཱུལཀཏྟཱ སེསརཏནཱནཾ པཋམཾ ཏཱཝ ཏཐཱགཏསྶ ¶ ཐོམནཱཔུབྦངྒམཾ པཎཱམམཱརབྷནྟོ ཨཱཧ ‘‘ཨནནྟཀརུཎཱཔཉྙ’’ནྟིཨཱདི. ཐོམནཱཔུབྦངྒམེན ཧི པཎཱམེན སཏྠུ གུཎཱཏིསཡཡོགོ, ཏཏོ ཙསྶ ཨནུཏྟརཝནྡནཱིཡབྷཱཝོ, ཏེན ཙ ཨཏྟནོ ཝནྡནཱཡ ཁེཏྟངྒཏབྷཱཝོ, ཁེཏྟངྒཏཱཡ ཙ ཝནྡནཱཡ ཡཐཱདྷིཔྤེཏནིཔྥཏྟིཡཱ ཧེཏུབྷཱཝོ ཙ དསྶིཏོ ཧོཏི.

ཏཏྠ ¶ ཝནྡིཏྭཱཏི པུབྦཀཱལཀིརིཡཱནིདྡེསོ. ཏསྶ པན ཨོསཱནགཱཐཱཡཾ ‘‘པཝཀྑཱམཱི’’ཏི ཨིམིནཱ ཨཔརཀཱལཀིརིཡཱཝཙནེན སཧ སམྦནྡྷོ. བུདྡྷནྟི ཝནྡནཀིརིཡཱཡ ཀམྨནིདྡེསོ. ‘‘ཨནནྟཀརུཎཱཔཉྙ’’ནྟིཨཱདིཀཾ པན ཏབྦིསེསནཾ. ཏཏྠ ཀིརཏཱིཏི ཀརུཎཱ, པརདུཀྑཾ ཝིཀྑིཔཏི ཨཔནེཏཱིཏི ཨཏྠོ. ཀིརཱིཡཏི དུཀྑིཏེསུ པསཱརཱིཡཏཱིཏི ཝཱ ཀརུཎཱ. ཨཐ ཝཱ ཀརོཏཱིཏི ཀརུཎཱ, པརདུཀྑེ སཏི སཱདྷཱུནཾ ཀམྤནཾ ཧདཡཁེདཾ ཛནཡཏཱིཏི ཨཏྠོ. ཀིཎཱཏཱིཏི ཝཱ ཀརུཎཱ, པརསྶ དུཀྑཾ པཙྩཡཝེཀལླཀརཎཏོ ཧིཾསཏཱིཏི ཨཏྠོ. པཛཱནཱཏཱིཏི པཉྙཱ, ཡཐཱསབྷཱཝཾ པཀཱརེཧི པཊིཝིཛ྄ཛྷཏཱིཏི ཨཏྠོ. ཀརུཎཱ ཙ པཉྙཱ ཙ ཀརུཎཱཔཉྙཱ, ནཏྠི ཨེཏཱསཾ ཨནྟོཏི ཨནནྟཱ, ཨནནྟཱ ཀརུཎཱཔཉྙཱ ཨེཏསྶཱཏི ཨནནྟཀརུཎཱཔཉྙོ, ཏཾ ཨནནྟཀརུཎཱཔཉྙཾ.

ཨེཏྠ ཙ ཨུཔྤཱདཝཡནྟཏཱཝསེན ཙེཝ སནྟཏིཔརིཡོསཱནཝསེན ཙ སཏིཔི བྷགཝཏོ ཀརུཎཱཔཉྙཱནཾ སཔརིཡནྟབྷཱཝེ ཨནནྟཱརམྨཎེསུ པཝཏྟནཏོ ཨནནྟཏཱ ཝེདིཏབྦཱ. སམྨཱསམྦུདྡྷསྶ ཧི སབྦསཏྟཱནཾ དུཀྑཱཔནཡནཱཀཱརཔྤཝཏྟཱ ཨནཉྙསཱདྷཱརཎཱ མཧཱཀརུཎཱ ཀཉྩི སཏྟཾ ཨཝཛྫེཏྭཱ སབྦེསུ སཏྟེསུ ནིརཝསེསེན པཝཏྟཏི, ཏཐཱ སབྦདྷམྨསབྷཱཝབོདྷནསམཏྠཱ སབྦཉྙུཏཉྙཱཎསངྑཱཏཱ པཉྙཱཔི སཀལཉེཡྻདྷམྨེསུ ཨནཝསེསཏོ པཝཏྟཏི, ཏསྨཱ ཨནནྟཱརམྨཎཔྤཝཏྟཀརུཎཱཉཱཎཝནྟཏཱཡ ཨནནྟཀརུཎཱཔཉྙོ བྷགཝཱ. ཀརུཎཱཔཉྙཱགྒཧཎེན ཙེཏྠ བྷགཝཏོ སབྦལོཀིཡལོཀུཏྟརགུཎསམྤཏྟི དསྶིཏཱ ཧོཏི. ཏཐཱ ཧི ཀརུཎཱགྒཧཎེན ལོཀིཡེསུ མཧགྒཏབྷཱཝཔྤཏྟཱསཱདྷཱརཎགུཎདཱིཔནཏོ སཀལལོཀིཡགུཎསམྤཏྟི དསྶིཏཱ, པཉྙཱགྒཧཎེན སབྦཉྙུཏཉྙཱཎཔདཊྛཱནམགྒཉཱཎདཱིཔནཏོ སབྦལོཀུཏྟརགུཎསམྤཏྟི དསྶིཏཱཏི.

ཨཔིཙ ¶ སབྦབུདྡྷགུཎཱནཾ ཀརུཎཱ ཨཱདི, པཉྙཱ པརིཡོསཱནཾ. མཧཱཀརུཎཱསཉྩོདིཏམཱནསོ ཧི བྷགཝཱ སཾསཱརཔངྐཏོ སཏྟཱནཾ སམུདྡྷརཎཏྠཱཡ ཀཏཱབྷིནཱིཧཱརོ ཨནུཔུབྦེན པཱརམིཡོ པཱུརེཏྭཱ ཨནུཏྟརསམྨཱསམྦོདྷིཡཱ ཨདྷིགམེན སཀལབུདྡྷགུཎེ པཊིལབྷི. ཨིཏི ¶ སཀལབུདྡྷགུཎཱནཾ ཏནྣིདཱནབྷཱཝཏོ ཀརུཎཱ སབྦབུདྡྷགུཎཱནམཱདི, སབྦཉྙུཏཉྙཱཎཔདཊྛཱནསྶ པན མགྒཉཱཎསྶ པཊིལབྷནཏོ ཨུཏྟརིཀརཎཱིཡཱབྷཱཝཏོ པཉྙཱ པརིཡོསཱནཾ. ཨཱདིཔརིཡོསཱནདསྶནེན ཙ སཀལབུདྡྷགུཎཱ ནཡཏོ དསྶིཏཱ ཧོནྟི. ནཡགྒཱཧོ ཨེཝ ཧི སབྦབུདྡྷགུཎཱནཾ དསྶནུཔཱཡོ, ཨིཏརཐཱ ཏཱདིསསྶ སབྦཉྙུབུདྡྷསྶཔི ཝཙནཔཐཱཏཱིཏཾ ཏཐཱགཏགུཎཾ ཨནུཔདཾ ཝཎྞེནྟོ ཀོ ནཱམ པརིཡོསཱནམཱཧརིཏུཾ སཀྐུཎེཡྻཱཏི.

ཨེཝཾ ཀརུཎཱཔཉྙཱམུཁེན སངྑེཔཏོ སཀལབུདྡྷགུཎེཧི བྷགཝནྟཾ ཐོམེཏྭཱཔི པུན ཨཏྟནོ བུདྡྷགུཎསཾཀིཏྟནེ ཨཏིཏྟཱབྷཱཝེན ཙེཝ པརེསཉྩ པསཱདབཱཧུལླཛནནཏྠཾ ཏདནྟོགདྷེཔི ཝིསིཊྛགུཎེ པདྷཱནབྷཱཝེན ནཱིཧརིཏྭཱ དསྶེནྟོ ཨཱཧ ‘‘ཏཐཱགཏ’’ནྟིཨཱདི. ཏཏྠ ‘‘ཏཐཱགཏ’’ནྟི ཏཐཱ ཨཱགཏཏཱདཱིཧི ཨཊྛཧི ཀཱརཎེཧི ཏཐཱགཏཾ. ཝུཏྟཉྷེཏཾ (དཱི. ནི. ཨཊྛ. ༡.༧; མ. ནི. ཨཊྛ. ༡.༡༢; བུ. ཝཾ. ཨཊྛ. ༡.༢ ནིདཱནཀཐཱ; ཨ. ནི. ཨཊྛ. ༡.༡.༡༧༠) –

‘‘ཨཊྛཧི ཀཱརཎེཧི བྷགཝཱ ཏཐཱགཏོ, ཏཐཱ ཨཱགཏོཏི ཏཐཱགཏོ, ཏཐཱ གཏོཏི ཏཐཱགཏོ, ཏཐལཀྑཎཾ ཨཱགཏོཏི ཏཐཱགཏོ, ཏཐདྷམྨེ ཡཱཐཱཝཏོ ཨབྷིསམྦུདྡྷོཏི ཏཐཱགཏོ, ཏཐདསྶིཏཱཡ ཏཐཱགཏོ, ཏཐཝཱདིཏཱཡ ཏཐཱགཏོ, ཏཐཱཀཱརིཏཱཡ ཏཐཱགཏོ, ཨབྷིབྷཝནཊྛེན ཏཐཱགཏོ’’ཏི.

‘‘ཀཐཾ ¶ བྷགཝཱ ཏཐཱ ཨཱགཏོཏི ཏཐཱགཏོ? ཡཐཱ སབྦལོཀཧིཏཱཡ ཨུསྶུཀྐམཱཔནྣཱ པུརིམཀཱ སམྨཱསམྦུདྡྷཱ ཨཱགཏཱ, ཀིཾ ཝུཏྟཾ ཧོཏི? མནུསྶཏྟཱདིཨཊྛངྒསམནྣཱགཏེན ཡེན ཨབྷིནཱིཧཱརེན ཏེ བྷགཝནྟོ ཨཱགཏཱ, ཏེནེཝ ཙ ཨབྷིནཱིཧཱརེན ཨཡམྤི བྷགཝཱ ཨཱགཏོ, ཡཐཱ ཙ ཏེ བྷགཝནྟོ སམཏིཾས པཱརམིཡོ པཱུརེཏྭཱ པཉྩམཧཱཔརིཙྩཱགཱདཱིནི སམྤཱདེཏྭཱ ཨཱགཏཱ, ཡཐཱ ཙ ཏེ སཏྟཏིཾས བོདྷིཔཀྑིཡདྷམྨེ བྷཱཝེཏྭཱ བྲཱུཧེཏྭཱ ཨཱགཏཱ, ཏཐཱ ཨཡམྤི བྷགཝཱ ཨཱགཏོཏི ཨེཝཾ ཏཱཝ ཏཐཱ ཨཱགཏོ’’ཏི ཏཐཱགཏོ. (༡)

‘‘ཀཐཾ ཏཐཱ གཏོཏི ཏཐཱགཏོ? ཡཐཱ སམྤཏིཛཱཏཱ ཏེ བྷགཝནྟོ སཏྟཔདཝཱིཏིཧཱརེན གཏཱ, ཡཐཱ ཝཱ ཏེ སམཐཝིཔསྶནཱམགྒེཧི ཏཾ ཏཾ ཨཀུསལཔཀྑཾ ཝིདྷམིཏྭཱ གཏཱ, ཏཐཱ ཨཡམྤི བྷགཝཱ གཏོ, ཨེཝཾ ཏཐཱ གཏོཏི ཏཐཱགཏོ. (༢)

‘‘ཀཐཾ ¶ ཏཐལཀྑཎཾ ཨཱགཏོཏི ཏཐཱགཏོ? ཡསྨཱ ཏེསཾ ཏེསཾ དྷམྨཱནཾ ཡཾ སབྷཱཝསརསལཀྑཎཾ ཏཐཾ ཨཝིཏཐཾ, ཏཉྩེས ཏཐལཀྑཎཾ ཨཱགཏོ ཡཱཐཱཝཏོ ཨདྷིགཏོ, ཏསྨཱ ཏཐལཀྑཎཾ ཨཱགཏོཏི ཏཐཱགཏོ གམནཏྠཱནཾ བུཛ྄ཛྷནཏྠསམྦྷཝཏོ. ཏཐཱ ཧི ཝདནྟི ‘ཡེ གཏིཨཏྠཱ, ཏེ བུཛ྄ཛྷནཏྠཱ. ཡེ བུཛ྄ཛྷནཏྠཱ, ཏེ གཏིཨཏྠཱ’ཏི. (༣)

‘‘ཀཐཾ ཏཐདྷམྨེ ཡཱཐཱཝཏོ ཨབྷིསམྦུདྡྷོཏི ཏཐཱགཏོ? ཡསྨཱ ‘ཨིདཾ དུཀྑནྟི, བྷིཀྑཝེ, ཏཐམེཏཾ ཨཝིཏཐམེཏ’ནྟིཨཱདིཝཙནཏོ (སཾ. ནི. ༥.༡༠༩༠) ‘ཨཝིཛྫཱཡ སངྑཱརཱནཾ ¶ པཙྩཡཊྛོ སངྑཱརཱནཾ ཨཝིཛྫཱཔཙྩཡསམྦྷཱུཏསམུདཱགཏཊྛོ ཏཐོ ཨཝིཏཐོ ཨནཉྙཐོ’ཏིཨཱདིཝཙནཏོ ཙ ཏཐདྷམྨསངྑཱཏེ སཙྩཔཊིཙྩསམུཔྤཱདེ ཡཱཐཱཝཏོ ཨཱགཏོ ཨབྷིསམྦུདྡྷོ, ཏསྨཱ ཏཐདྷམྨེ ཡཱཐཱཝཏོ ཨབྷིསམྦུདྡྷོཏི ཏཐཱགཏོ. (༤)

‘‘ཀཐཾ ཏཐདསྶིཏཱཡ ཏཐཱགཏོ? ཡསྨཱ ཨཔརིམཱཎཱསུ ལོཀདྷཱཏཱུསུ ཨཔརིམཱཎཱནཾ སཏྟཱནཾ ཚདྭཱརགྒཧིཏེ ཨཱརམྨཎེ ཨཝིཔརཱིཏམེཝ པསྶཏི ཛཱནཱཏི, ཉཏྭཱ ཙ པནེཝཾ ‘ཀཏམཾ ཏཾ རཱུཔཱཡཏནཾ, ཡཾ ཙཏུནྣཾ མཧཱབྷཱུཏཱནཾ ཨུཔཱདཱཡཱ’ཏིཨཱདིནཱ (དྷ. ས. ༦༡༦ ཨཱདཡོ) ཏཐམེས ཨཝིཔརཱིཏཾ ཝིབྷཛཏི དསྶེཏི, ཏསྨཱ ཏཐཾ ཨཱགཙྪཏི པསྶཏི ཛཱནཱཏི, ཏཾ ཝཱ ཨཱགམཡཏི དསྶེཏཱིཏི ཏཐཱགཏོཏི ཨེཝཾ ཏཐདསྶིཏཱཡ ཏཐཱགཏོ. (༥)

‘‘ཀཐཾ ཏཐཝཱདིཏཱཡ ཏཐཱགཏོ? ཡསྨཱ ཨེས ཨབྷིསམྦོདྷིཏོ ཡཱཝ པརིནིབྦཱནཱ རཱགམདཱདིནིམྨཐནཝསེན ཨེཀསདིསམེཝ དྷམྨཾ ཏཐཾ ཨཝིཏཐཾ བྷཱསཏི, ཏསྨཱ ཏཐཾ གདཏི, ཏཐོ ཨཝིཔརཱིཏོ ཨཱགདོཝཙནམེཏསྶཱཏི ཝཱ ད-ཀཱརསྶ ཏ-ཀཱརཾ ཀཏྭཱ ཏཐཱགཏོཏི ཝུཏྟོཏི ཨེཝཾ ཏཐཝཱདིཏཱཡ ཏཐཱགཏོ. (༦)

‘‘ཀཐཾ ཏཐཱཀཱརིཏཱཡ ཏཐཱགཏོ? བྷགཝཱ ཧི ‘ཡཐཱ ཝཱདཱི ཏཐཱ ཀཱརཱི’ཏི (ཨ. ནི. ༤.༢༣; ཙཱུལ༹ནི. པོསཱལམཱཎཝཔུཙྪཱནིདྡེས ༨༣) ཝཙནཏོ ཨཏྟནོ ཝཱཙཱཡ ཨནུརཱུཔམེཝ ཀརོཏི, ཏསྨཱ ཡཐཱ ཝཱཙཱ, ཏཐཱ ཀཱཡོཔི གཏོ པཝཏྟོ ཨིམསྶཱཏི ཏཐཱགཏོཏི ཨེཝཾ ཏཐཱཀཱརིཏཱཡ ཏཐཱགཏོ. (༧)

‘‘ཀཐཾ ¶ ཨབྷིབྷཝནཊྛེན ཏཐཱགཏོ? ཡསྨཱ པནེས ཨནུཔམཱཡ སཀལལོཀིཡལོཀུཏྟརགུཎསམྤདཱཡ ¶ སམནྣཱགཏཏྟཱ སདེཝཀཾ ལོཀཾ ཨབྷིབྷུཡྻ པཝཏྟཏི, ཏསྨཱ ཨབྷིབྷཝནཊྛེན ཏཐཱགཏོཏི ཝུཙྩཏཱི’’ཏི.

ཏཏྲེཝཾ པདསིདྡྷི ཝེདིཏབྦཱ – ཨགདོ ཝིཡཱཏི ཨགདོ, དེསནཱཝིལཱསོ ཙེཝ པུཉྙུསྶཡོ ཙ. ཏེན ཧེས མཧཱནུབྷཱཝོ བྷིསཀྐོ ཝིཡ དིབྦཱགདེན སཔྤེ སབྦཔརཔྤཝཱདིནོ, སདེཝཀཉྩ ལོཀཾ ཨབྷིབྷཝཏི. ཨིཏི སབྦལོཀཱབྷིབྷཝནེ ཏཐོ ཨཝིཔརཱིཏོ ཡཐཱཝུཏྟོ ཨགདོ ཨེཏསྶཱཏི ད-ཀཱརསྶ ཏ-ཀཱརཾ ཀཏྭཱ ཏཐཱགཏོཏི ཝུཙྩཏཱིཏི ཨཡམེཏྠ སངྑེཔོ. ཝིཏྠཱརོ པན དཱིགྷཱགམསཾཝཎྞནཱདཱིསུ གཧེཏབྦོ. ཨཱཧ ཙེཏྠ –

‘‘ཡཐེཝ ལོཀམྷི ཝིཔསྶིཨཱདཡོ,

སབྦཉྙུབྷཱཝཾ མུནཡོ ཨིདྷཱགཏཱ;

ཏཐཱ ཨཡཾ སཀྱམུནཱིཔི ཨཱགཏོ,

ཏཐཱགཏོ ཝུཙྩཏི ཏེན ཙཀྑུམཱ. (དཱི. ནི. ཨཊྛ. ༡.༧; མ. ནི. ཨཊྛ. ༡.༡༢; ཨ. ནི. ཨཊྛ. ༡.༡.༡༧༠; བུ. ཝཾ. ཨཊྛ. ༡.༢ ནིདཱནཀཐཱ);

‘‘པཧཱཡ ཀཱམཱདིམལེ ཡཐཱ གཏཱ,

སམཱདྷིཉཱཎེཧི ཝིཔསྶིཨཱདཡོ;

མཧེསིནོ སཀྱམུནཱི ཛུཏིནྡྷརོ,

ཏཐཱ གཏོ ཏེན ཏཐཱགཏོ མཏོ.

‘‘ཏཐཉྩ དྷཱཏྭཱཡཏནཱདིལཀྑཎཾ,

སབྷཱཝསཱམཉྙཝིབྷཱགབྷེདཏོ;

སཡམྦྷུཉཱཎེན ཛིནོཡམཱགཏོ,

ཏཐཱགཏོ ཝུཙྩཏི སཀྱཔུངྒཝོ.

‘‘ཏཐཱནི ¶ སཙྩཱནི སམནྟཙཀྑུནཱ,

ཏཐཱ ཨིདཔྤཙྩཡཏཱ ཙ སབྦསོ;

ཨནཉྙཉེཡྻེན ¶ ཡཏོ ཝིབྷཱཝིཏཱ,

ཡཱཐཱཝཏོ ཏེན ཛིནོ ཏཐཱགཏོ.

‘‘ཨནནྟབྷེདཱསུཔི ལོཀདྷཱཏུསུ,

ཛིནསྶ རཱུཔཱཡཏནཱདིགོཙརེ;

ཝིཙིཏྟབྷེདེ ཏཐམེཝ དསྶནཾ,

ཏཐཱགཏོ ཏེན སམནྟལོཙནོ.

‘‘ཡཏོ ཙ དྷམྨཾ ཏཐམེཝ བྷཱསཏི,

ཀརོཏི ཝཱཙཱཡནུལོམམཏྟནོ;

གུཎེཧི ལོཀཾ ཨབྷིབྷུཡྻིརཱིཡཏི,

ཏཐཱགཏོ ཏེནཔི ལོཀནཱཡཀོ’’ཏི. (ཨིཏིཝུ. ཨཊྛ. ༣༨; དཱི. ནི. ཊཱི. ༡.༧);

ཀེནཙི གུཎེན ཨཏྟནོ ཝིསིཊྛསྶ ཀསྶཙི ཨབྷཱཝཏོ ནཏྠི ཨེཏསྶ ཨུཏྟརོཏི ཨནུཏྟརོ. བྷགཝཏོ ཧི ཨཝཱིཙིཏོ པཊྛཱཡ ཡཱཝ བྷཝགྒཾ ཏིརིཡཾ ཨཔརིམཱཎཱསུ ལོཀདྷཱཏཱུསུ ན ཀོཙི ཀེནཙི གུཎེན སམསམོཔི ཨཏྠི, ཀུཏོ པན ཨུཏྟརིཏརོ. ཡཐཱཧ –

‘‘རཱུཔེ སཱིལེ སམཱདྷིམྷི, པཉྙཱཡ ཙ ཨསཱདིསོ;

ཝིམུཏྟིཡཱ སམསམོ, དྷམྨཙཀྐཔྤཝཏྟནེ’’ཏི.

ཝིནྡིཏྭཱཏི ཏཱིཧི ཝནྡནཱཧི ཏནྣིནྣཏཱདིཝསེན ནམསྶིཏྭཱ. ཀཱཡཝཙཱིམནོདྭཱརཝསེན ཧི ཏིསྶོ ཝནྡནཱ. ཡཐཱཧ ‘‘ཏིསྶོ ཨིམཱ, བྷིཀྑཝེ, ཝནྡནཱ ཀཱཡེན ཝནྡཏི, ཝཙསཱ ཝནྡཏི, མནསཱ ཝནྡཏཱི’’ཏི. ཏཏྠ བུདྡྷཱདིགུཎཱརམྨཎཱ ཀཱམཱཝཙརཀུསལཀིརིཡཱནམཉྙཏརཱ ཙེཏནཱ ཀཱཡཝིཉྙཏྟིཾ སམུཊྛཱཔེཏྭཱ ཀཱཡདྭཱརཔྤཝཏྟིཝསེན ཨུཔྤནྣཱ ཀཱཡཝནྡནཱཏི ཝུཙྩཏི, སཱཡེཝ ཝཙཱིཝིཉྙཏྟིཾ སམུཊྛཱཔེཏྭཱ ཝཙཱིདྭཱརཔྤཝཏྟིཝསེན ཨུཔྤནྣཱ ཝཙཱིཝནྡནཱཏི, ཨུབྷཡཝིཉྙཏྟིཡོ པན ཨསམུཊྛཱཔེཏྭཱ ཀེཝལཾ ¶ མནོདྭཱརཔྤཝཏྟིཝསེན ཨུཔྤནྣཱ མནོཝནྡནཱཏི. སིརསཱཏི ཨུཏྟམངྒེན ཀརཎབྷཱུཏེན. ཨབུཛ྄ཛྷི, བོདྷེཏཱིཏི ཝཱ བུདྡྷོ. ཨཡཉྷི ཙཏུསཙྩདྷམྨེ སཡམྤི ཨབུཛ྄ཛྷི, པརེཔི བོདྷེཏི ¶ , ཏསྨཱ བུཛ྄ཛྷནབོདྷནཊྛེན ‘‘བུདྡྷོ’’ཏི ཝུཙྩཏི. ཡཐཱཧ ‘‘བུཛ྄ཛྷིཏཱ སཙྩཱནཱིཏི བུདྡྷོ, བོདྷེཏཱ པཛཱཡཱཏི བུདྡྷོ’’ཏི (མཧཱནི. ༡༩༢; ཙཱུལ༹ནི. པཱརཱཡནཏྠུཏིགཱཐཱནིདྡེས ༩༧; པཊི. མ. ༡.༡༦༢). ཨཐ ཝཱ བུདྷ-སདྡསྶ ཛཱགརཎཝིཀསནཏྠེསུཔི པཝཏྟནཏོ ཨབུཛ྄ཛྷི སཝཱསནསམྨོཧནིདྡཱཡ ཨཙྩནྟཾ ཝིགཏོ, བུདྡྷིཡཱ ཝིཀསིཏཝཱཏི ཝཱ བུདྡྷོ. བྷགཝཱ ཧི ཝཏྠུསབྷཱཝདསྶནཝིབནྡྷིཀཱཡ ཨཝིཛྫཱསངྑཱཏཱཡ ནིདྡཱཡ ཨརིཡམགྒཉཱཎེན སཧ ཝཱསནཱཡ སམུཙྪིནྣཏྟཱ ཏཏོ ཨཙྩནྟཾ ཝིགཏོ. པརམརུཙིརསིརིསོབྷགྒསམཱགམེན ཝིཀསིཏམིཝ པདུམཾ ཨཔརིམིཏགུཎགཎཱལངྐཏསབྦཉྙུཏཉྙཱཎསམཱགམེན ཝིཀསིཏོ ཝིཀཱསམནུཔྤཏྟོ, ཏསྨཱ ཛཱགརཎཝིཀསནཏྠཝསེནཔི ‘‘བུདྡྷོ’’ཏི ཝུཙྩཏི.

ཨེཏྟཱཝཏཱ ཙ དྭཱིཧི ཨཱཀཱརེཧི བྷགཝཏོ ཐོམནཱ ཀཏཱ ཧོཏི ཨཏྟཧིཏསམྤཏྟིཏོ, པརཧིཏཔཊིཔཏྟིཏོ ཙ. ཏཱསུ ཨཏྟཧིཏསམྤཏྟི ཨནཱཝརཎཉཱཎཱདྷིགམོ སཝཱསནསཀལསཾཀིལེསཱནམཙྩནྟཔྤཧཱནཾ ཨནུཔཱདིསེསནིབྦཱནཱདྷིགམོ ཙ, པརཧིཏཔཊིཔཏྟི པན ཨཱསཡཔྤཡོགཝསེན དུཝིདྷཾ པརཧིཏསམཱིཧནཾ. ཏཏྠ དྷམྨདེསནཱཡ ཨབྷཱཛནེསུ དེཝདཏྟཱདཱིསུ ཝིརོདྷིསཏྟེསུཔི ནིཙྩཾ ཧིཏཛ྄ཛྷཱསཡཏཱ ཨཔརིཔཱཀགཏིནྡྲིཡཱནཾ ཨིནྡྲིཡཔརིཔཱཀཀཱལཱགམནཉྩ ཨཱསཡོ ནཱམ. ཏདཉྙསཏྟཱནཾ པན ལཱབྷསཀྐཱརཱདིནིརཔེཀྑཙིཏྟསྶ ཡཱནཏྟཡམུཁེན སབྦདུཀྑནིཡྻཱནིཀདྷམྨདེསནཱ པཡོགོ ནཱམ. དུཝིདྷཱསུ པནེཏཱསུ པརཧིཏཔཊིཔཏྟཱིསུ, ཏིཝིདྷཱསུ ཙ ཨཏྟཧིཏསམྤཏྟཱིསུ ཨནནྟཀརུཎཱ-ཝཙནེན, ཏཐཱ ཨཱགཏཊྛེན ཙ ཏཐཱགཏ-སདྡེན ཨཱསཡཝསེན པརཧིཏཔཊིཔཏྟི དསྶིཏཱ, བོདྷནཊྛེན བུདྡྷ-སདྡེན, ཏཐདསྶནཊྛེན ¶ ཙ ཏཐཱགཏཊྛེན ཙ ཏཐཱགཏསདྡེན པཡོགཝསེན, ཨནནྟཔཉྙཱ-ཝཙནེན, ཉཱཎགཏིདཱིཔཀེན ཏཐཱགཏ-སདྡེན, བུཛ྄ཛྷནཛཱགརཎཝིཀསནཊྛེན ཙ བུདྡྷ-སདྡེན ཏིཝིདྷཱཔི ཨཏྟཧིཏསམྤཏྟི, ཨནུཏྟརཝཙནེན ཙ ཨཏྟཧིཏཔརཧིཏསམྤཏྟི པཀཱསིཏཱཏི ཝེདིཏབྦཱ.

ཨཔིཙ ཧེཏུཕལསཏྟཱུཔཀཱརསམྤདཱཝསེན ཏཱིཧཱཀཱརེཧིཔི བྷགཝཏོ ཐོམནཱ པཝཏྟཏཱིཏི ཏཾཝསེནཔེཏྠ ཐོམནཱ དཊྛབྦཱ. ཏཏྠ ཧེཏུསམྤདཱ ནཱམ མཧཱཀརུཎཱསམཱཡོགོ, བོདྷིསམྦྷཱརསམྦྷརཎཉྩ ཏམྨཱུལཀཏྟཱ སཀལབུདྡྷགུཎཱནཾ. ཕལསམྤདཱ པན ཙཏུབྦིདྷཱ ཉཱཎསམྤདཱ, པཧཱནསམྤདཱ, ཨཱནུབྷཱཝསམྤདཱ, རཱུཔཀཱཡསམྤདཱ ཙཱཏི. ཏཱསུ སབྦཉྙུཏཉྙཱཎཔདཊྛཱནཾ མགྒཉཱཎཾ, མགྒཉཱཎཔདཊྛཱནཾ སབྦཉྙུཏཉྙཱཎཾ, ཏམྨཱུལཀཱནི ཙ དསབལཱདིཉཱཎཱནི ཉཱཎསམྤདཱ ནཱམ. ཨགྒམགྒབྷཱཝནཱཡ སབྦཀིལེསཱནཾ སཧ ཝཱསནཱཧི ཨནུཔྤཏྟིདྷམྨཏཱཔཱདནཾ ¶ པཧཱནསམྤདཱ. ཨཙིནྟེཡྻཱཔརིམིཏཱནཾ སབྦལོཀཧིཏཱནཾ ནིཔྥཱདནེ, སདེཝཀལོཀཱབྷིབྷཝནེ ཙ ཨཱདྷིཔཙྩཾ ཨཱནུབྷཱཝསམྤདཱ. སཀལལོཀནཡནཱབྷིསེཀབྷཱུཏཱ པན ལཀྑཎཱནུབྱཉྫནཔཊིམཎྜིཏཱ ཨཏྟབྷཱཝསམྤཏྟི རཱུཔཀཱཡསམྤདཱ ནཱམ. སཏྟཱུཔཀཱརོ ཧེཊྛཱ ཝུཏྟཔརཧིཏཔཊིཔཏྟིཝསེནེཝ ཝེདིཏབྦོ. ཨིམཱསུ པན ཨནནྟཀརུཎཱ-ཝཙནེན, ཏཐཱ ཨཱགཏཊྛེན ཙ ཏཐཱགཏ-སདྡེན ཧེཏུསམྤདཱ དསྶིཏཱ. ཕལསམྤདཱསུ ཉཱཎསམྤདཱ ཙེཝ པཧཱནསམྤདཱ ཙ ཨནནྟཔཉྙཱ-ཝཙནེན, ཨབྷིསམཡཔརིདཱིཔཀེན ཏཐཱགཏསདྡེན, བུཛ྄ཛྷནཛཱགརཎཝིཀསནཊྛེན, ཙ བུདྡྷ-སདྡེན དསྶིཏཱ, ཨཱནུབྷཱཝསམྤདཱཔི ཨབྷིབྷཝནཊྛེན ཏཐཱགཏ-སདྡེན, ཨནུཏྟར-ཝཙནེན ཙ ཝིབྷཱཝིཏཱ, རཱུཔཀཱཡསམྤདཱ པན རཱུཔགྒཔྤཏྟིདཱིཔཀེན ཨནུཏྟར-སདྡེན དསྶིཏཱཏི དཊྛབྦཾ.

ཨེཝཾ ¶ བུདྡྷརཏནསྶ ཐོམནཱཔུབྦངྒམཾ པཎཱམཾ ཀཏྭཱ ཨིདཱནི སེསརཏནཱནམྤི པཎཱམམཱརབྷནྟོ ཨཱཧ ‘‘དྷམྨཾ སཱདྷུགཎམྤི ཙཱ’’ཏི. བྷགཝཏོ ཐོམནེན ཙ སྭཱཀྑཱཏཏཱདཡོ དྷམྨགུཎཱ, སུཔྤཊིཔནྣཏཱདཡོ སངྒྷགུཎཱ ཙ དསྶིཏཱ ཧོནྟི ཏཔྤབྷཝསྶ ཨནཉྙཐཱབྷཱཝཏོཏི ན ཏེསཾ ཝིསུཾ ཐོམནཱ ཀཏཱ. ཨདྷིགཏམགྒེ སཙྪིཀཏནིརོདྷེ པུགྒལེ ཡཐཱནུསིཊྛཾ པཊིཔཛྫམཱནེ ཙ ཨཔཱཡདུཀྑེསུ ཙེཝ ཝཊྚདུཀྑེསུ ཙ ཨཔཏམཱནེ ཀཏྭཱ དྷཱརེཏཱིཏི དྷམྨོ, སོ ཙཏུནྣཾ ཨརིཡམགྒཱནཾ, ཙཏུནྣཉྩ སཱམཉྙཕལཱནཾ, ནིབྦཱནསྶ, པརིཡཏྟིདྷམྨསྶ ཙ ཝསེན དསཝིདྷོ. ཝུཏྟཉྷེཏཾ ཚཏྟཝིམཱནེ –

‘‘རཱགཝིརཱགམནེཛམསོཀཾ,

དྷམྨམསངྑཏམཔྤཊིཀཱུལཾ;

མདྷུརམིམཾ པགུཎཾ སུཝིབྷཏྟཾ,

དྷམྨམིམཾ སརཎཏྠམུཔེཧཱི’’ཏི. (ཝི. ཝ. ༨༨༧);

ཨེཏྠ ཧི ཀཱམརཱགཱདིབྷེདོ སབྦོཔི རཱགོ ཝིརཛྫཏི ཨེཏེནཱཏི ‘‘རཱགཝིརཱགོ’’ཏི མགྒོ ཀཐིཏོ. ཨེཛཱསངྑཱཏཱཡ ཏཎྷཱཡ, ཨནྟོནིཛ྄ཛྷཱནལཀྑཎསྶ ཙ སོཀསྶ ཏདུཔྤཏྟིཡཾ སབྦསོ པརིཀྑཱིཎཏྟཱ ‘‘ཨནེཛམསོཀ’’ནྟི ཕལཾ ཀཐིཏཾ. ཀེནཙི པཙྩཡེན ཨསངྑཏཏྟཱ ‘‘དྷམྨམསངྑཏ’’ནྟི ནིབྦཱནཾ ཝུཏྟཾ. ཨཝིརོདྷདཱིཔནཏོ པན ཨཏྠབྱཉྫནསྶ སམྤནྣཏཱཡ, པཀཊྛགུཎཝིབྷཱཝནཏོ སུཊྛུ ཝིབྷཛིཏཏྟཱ ཙ ‘‘ཨཔྤཊིཀཱུལ’’ནྟིཨཱདིནཱ སབྦོཔི པརིཡཏྟིདྷམྨོ ཀཐིཏོ. ཏཏྠ ཨརིཡམགྒནིབྦཱནཱནི ནིཔྤརིཡཱཡེནེཝ ཨཔཱཡཱདིཏོ དྷཱརཎཏོ དྷམྨོ, ཕལཔརིཡཏྟིཡོ ¶ པན པརིཡཱཡེན. ཏཐཱ ཧེཏྠ དྷཱརཎཾ ནཱམ ཨཔཱཡཱདིནིབྦཏྟཀཀིལེསཝིདྡྷཾསནཾ. ཨིཏི ཨརིཡམགྒསྶ ཀིལེསསམུཙྪེདཀཏཱཡ, ནིབྦཱནསྶ ཙ ཨཱལམྦཎབྷཱཝེན ཏསྶ ཏདཏྠསིདྡྷིཧེཏུཏཱཡཔི ཨུབྷིནྣམྤི ¶ ནིཔྤརིཡཱཡཏོ ལབྦྷཏི. ཨིཏརེསུ པན ཨརིཡཕལསྶ མགྒེན སམུཙྪིནྣཀིལེསཱནཾ པཊིཔསྶདྡྷཀིཙྩཏཱཡ, མགྒཱནུཀཱུལཔྤཝཏྟིཏོ པརིཡཏྟིདྷམྨསྶ ཙ ཏདདྷིགམཧེཏུཏཱཡཱཏི ཨུབྷིནྣམྤི པརིཡཱཡཏོཝ ལབྦྷཏཱིཏི.

ཨཏྟཧིཏཔརཧིཏཾ སཱདྷེནྟཱིཏི སཱདྷཱུ, ཏེསཾ གཎོ སམུདཱཡོཏི སཱདྷུགཎོ, སཱདྷུ ཙཱཡཾ གཎོ ཙཱཏི ཝཱ སཱདྷུགཎོ, སཱདྷུནོ ཝཱ སམྨཱསམྦུདྡྷསྶ ཨཱཡཏྟོ གཎོ ཏསྶ ཨོརསཔུཏྟབྷཱཝཏོཏི སཱདྷུགཎོ. སོ པན ཙཏུནྣཾ ཨརིཡམགྒསམངྒཱིནཾ, ཙཏུནྣཉྩ ཕལསམངྒཱིནཾ ཝསེན ཨཊྛཝིདྷོ ཨརིཡསངྒྷོ, ཏཾ སཱདྷུགཎཾ. པིཙཱཏི ནིཔཱཏསམུདཱཡོ, ཨེཀོ ཝཱ ནིཔཱཏོ, ཏིཎྞཾ རཏནཱནཾ ཝནྡནཀིརིཡཱཡ སམྤིཎྜནཏྠོ. ཀེཙི ‘‘གཎོ’’ཏི ཨིདྷ པཀརཎཏོཝ ཨརིཡགཎཔུགྒལོཝ ལབྦྷཏཱིཏི སཱདྷཱུཏི བྷཱཝནཔུཾསཀཝསེན ‘‘ཝནྡིཏྭཱ’’ཏི ཨིམིནཱ སཧ ཡོཛེནྟི, ཏདཱ པན སཱདྷཱུཏི བྷཡལཱབྷཱདིཝིརཧེན སཀྐཙྩཾ ཨཱདརནྟི ཨཏྠོ.

༢. ཨེཝཾ པཀརཎཱརམྦྷེ ཡཐཱདྷིཔྤེཏཾ རཏནཏྟཡཔྤཎཱམཾ ཀཏྭཱ ཨིདཱནི ཡཏྠ པཱཊཝཏྠཱཡ ཨིདཾ པཀརཎཾ པཊྛཔཱིཡཏི, ཏཾ སདྡྷིཾ དེསཀདེསཔཊིགྒཱཧཀསམྤཏྟཱིཧི ཝིབྷཱཝེཏྭཱ དསྶེནྟོ ཨཱཧ ‘‘པཎྜུཀམྦལནཱམཱཡཱ’’ཏིཨཱདི. ཏཏྠ དེཝརཱཛསྶ པཎྜུཀམྦལནཱམཱཡ སིལཱཡ ཝིམལེ སཱིཏལེ ཏལེ ནིསིནྣོ ཨཏུལཝིཀྐམོ དེཝདེཝེཧི པཱུཛིཏོ དེཝདེཝོ དེཝཔུརཀྑཏོ དེཝཱནཾ དེཝལོཀསྨིཾ ཡཾ དྷམྨཾ དེསེསཱིཏི སམྦནྡྷོ.

ཨཡཾ པནེཏྠ ཨཏྠོ – པཎྜུཀམྦལསརིཀྑཝཎྞཏཱཡ ‘‘པཎྜུཀམྦལ’’ནྟི ནཱམཾ སམཉྙཱ ཨེཏིསྶཱཏི པཎྜུཀམྦལནཱམཱ. སཱ ཧི སཀྐསྶ ཏཱདིསཔུཉྙཱནུབྷཱཝེན ནིབྦཏྟཱ པཎྜུཀམྦལཛཡསུམནཔུཔྥསམཱནེན ཝཎྞེན སབྦཀཱལཾ ཝིརོཙཏི ¶ , པམཱཎཏོ པན སཊྛིཡོཛནཱཡཱམཱ, པཉྙཱསཡོཛནཝིཏྠཱརཱ, པནྣརསཡོཛནུབྦེདྷཱ ཙ ཧོཏི. སིལཱཡཱཏི ཨཝཡཝསམྦནྡྷེ སཱམིཝཙནཾ. ཏུལཱཡ སམྨིཏོ ཏུལྱོ, ན ཏུལྱོ ཨཏུལྱོ, ཨཏུལྱོ ཝིཀྐམོ བལཾ ཨེཏསྶཱཏི ཨཏུལྱཝིཀྐམོ. སམྨཱསམྦུདྡྷསྶ ཧི པརམཔཱརམིཏཱནུབྷཱཝསཾསིདྡྷེན ཧཏྠིགཎནཱཡ ཀོཊིསཧསྶཧཏྠཱིནཾ, པུརིསགཎནཱཡ དསཀོཊིསཧསྶཔུརིསཱནཾ བལེཧི སམཔྤམཱཎེན ཀཱཡབལེན, ཨཔྤམཱཎེན ཙ ཉཱཎབལེན ན ཀསྶཙི དེཝབྲཧྨཱདཱིསུ ཨཉྙཏརསྶ བལཏུལནཱཡ ཨུཔནེཏབྦཾ ཨཏྠི ¶ . ཨཐ ཝཱ ཨནཉྙསཱདྷཱརཎཏྟཱ ཨཏུལྱོ པརཀྐམསངྑཱཏོ ཨཔརིམཱཎགུཎཝིསེསཱཝཧེན ཨནཉྙསཱདྷཱརཎེན སམྨཔྤདྷཱནེན སམནྣཱགཏཏྟཱ ཝཱ ཨཏུལྱོ སམྨཔྤདྷཱནསངྑཱཏོ ཝིཀྐམོ ཨིམསྶཱཏི ཨཏུལྱཝིཀྐམོ. ‘‘ཨཏུལྱཝིཀྐམོ’’ཏི ཙ ཝཏྟབྦེ གཱཐཱབནྡྷཝསེན ཡ-ཀཱརལོཔཾ ཀཏྭཱ ‘‘ཨཏུལཝིཀྐམོ’’ཏི ཝུཏྟཾ. ཨཐ ཝཱ སམྨིཏཏྠེ ཨ-ཀཱརཔཙྩཡསྶཱཔི སམྦྷཝཏོ ཨཏུལོ ཝིཀྐམོ ཨསྶཱཏི ‘‘ཨཏུལཝིཀྐམོ’’ཏི ཝུཏྟཾ.

དིབྦནྟཱིཏི དེཝཱ, པཉྩཀཱམགུཎཱདཱིཧི ཀཱིལ༹ནྟི, ཏེསུ ཝཱ ཝིཧརནྟི, ཝིཛཡསམཏྠཏཱཡོགེན བཱཧིརབྦྷནྟརིཀེ པཙྩཏྠིཀེ ཝིཛེཏུཾ ཨིཙྪནྟི, ཨིསྶརིཡདྷནཱདིསཀྐཱརདཱནགྒཧཎཾ, ཏཾཏཾཨཏྠཱནུསཱསནཉྩ ཀརོནྟཱ ཝོཧརནྟི, པུཉྙཉཱཎཱནུབྷཱཝཔྤཏྟཱཡ ཛུཏིཡཱ ཛོཏེནྟི, ཡཐཱདྷིཔྤེཏཉྩ ཝིསཡཾ ཨཔྤཊིགྷཱཏེན གཙྪནྟི, ཡཐིཙྪིཏནིཔྥཱདནེ ཙ སཀྐོནྟཱིཏི ཨཏྠོ. ཨཐ ཝཱ དེཝནཱིཡཱ ཏཾཏཾབྱསནནིཏྠརཎཏྠིཀེཧི ‘‘སརཎཾ པརཱཡཎ’’ནྟི གམནཱིཡཱ, ཨབྷིཏྠཝནཱིཡཱ སོབྷཱཝིསེསཡོགེན ཀམནཱིཡཱཏི ཝཱ དེཝཱ, ཏེ ཏིཝིདྷཱ – སམྨུཏིདེཝཱ ཨུཔཔཏྟིདེཝཱ ཝིསུདྡྷིདེཝཱཏི. ཏཏྠ སམྨུཏིདེཝཱ ནཱམ མཧཱསམྨཏཱདཡོ ཁཏྟིཡཱ. ཨུཔཔཏྟིདེཝཱ ནཱམ ¶ ཙཱཏུམཧཱརཱཛིཀེ ཨུཔཱདཱཡ ཏདུཏྟརིདེཝཱ. ཝིསུདྡྷིདེཝཱ ནཱམ ཁཱིཎཱསཝཱ. ཨིདྷ པན ཨུཔཔཏྟིདེཝཱ དཊྛབྦཱ. ནོ ཙ ཁོ ཏེཔི ཨཝིསེསེན, ཋཔེཏྭཱ པན ཡཱམཱདིཀེ ཙཱཏུམཧཱརཱཛིཀཏཱཝཏིཾསཝཱསིནོཝ ཨདྷིཔྤེཏཱ. ཏེསཾ ཙཏཱུཧི སངྒཧཝཏྠཱུཧི རཉྫནཏོ རཱཛཱ, དེཝཱནཾ རཱཛཱ ཨིསྶརོ དེཝརཱཛཱ, ཏསྶ དེཝརཱཛསྶ, ‘‘སཀྐསྶ དེཝརཉྙོ’’ཏི ཨདྷིཔྤཱཡོ. ན ཧི ཨཉྙེསཾ དེཝལོཀེསུ ནིསིནྣོ བྷགཝཱ ཨབྷིདྷམྨཔིཊཀཾ དེསེསཱིཏི.

༣. ཡནྟི ཨནིཡམནིདྡེསོ, ཏསྶ པན ‘‘ཏཏྠཱ’’ཏི ཨིམིནཱ ནིཡམནཾ ཝེདིཏབྦཾ. ཡཐཱཝུཏྟཱནཾ ཏིཎྞམྤི དེཝཱནཾ ཨུཏྟམོ དེཝོ ཏེཧི སབྦེཧི ཨདྷིཀཏརཾ ཀཱིལ༹ནཱདིཡོགཏོཏི དེཝདེཝོ, བྷགཝཱ. སོ ཧི ནིརཏིསཡཱཡ ཨབྷིཉྙཱཀཱིལཱ༹ཡ ཨུཏྟམེཧི དིབྦབྲཧྨཨརིཡཝིཧཱརེཧི སཔརསནྟཱནསིདྡྷཱཡ པཉྩཝིདྷམཱརཝིཛཡིཙྪཱནིབྦཏྟིཡཱ ཙིཏྟིསྶརིཡསཏྟདྷནཱདིསམྨཱཔཊིཔཏྟིཨཝེཙྩཔྤསཱདསཀྐཱརདཱནགྒཧཎསངྑཱཏེན, ཡཐཱཔརཱདྷཡཐཱནུལོམཡཐཱདྷམྨཱནུསཱསནསངྑཱཏེན ཙ ཝོཧཱརཱཏིསཡེན པརམཱཡ པཉྙཱཡ ཙ སརཱིརཔྤབྷཱསངྑཱཏཱཡ ཛུཏིཡཱ ཨནུཔམཱཡ ཉཱཎསརཱིརགཏིཡཱ མཱརཝིཛཡསབྦཉྙུཏཉྙཱཎཔརཧིཏནིཔྥཱདནེསུ ཨཔྤཊིཧཏཱཡ སཏྟིཡཱ ཙ སམནྣཱགཏཏྟཱ སདེཝཀེན ཝཱ ལོཀེན ‘‘སརཎ’’ནྟི གམནཱིཡཏོ, ཨབྷིཏྠཝནཱིཡཏོ, བྷཏྟིཝསེན ཀམནཱིཡཏོ ཙ སབྦེ ཏེ དེཝེ ཏེཧི ཏེཧི གུཎེཧི ཨབྷིབྷུཡྻ ཋིཏོཏི སབྦདེཝེཧི པཱུཛནཱིཡཏརོ དེཝོ ¶ , ཝིསུདྡྷིདེཝབྷཱཝསངྑཱཏསྶ ཝཱ སབྦཉྙུགུཎཱལངྐཱརསྶ ཨདྷིགཏཏྟཱ ཨཉྙེསཉྩ དེཝཱནཾ ཨཏིསཡེན དེཝོཏི དེཝདེཝོ. དེཝཱནནྟི ཏདཱ དྷམྨཔཊིགྒཱཧཀཱནཾ དསསཧསྶཙཀྐཝཱལཱ༹དྷིཝཱསཱིནཾ མཱཏུདེཝཔུཏྟཔྤམུཁཱནཾ ཨུཔཔཏྟིདེཝཱནཾ. ཝིསུདྡྷིདེཝཱནམྤེཏྠ གཧཎནྟི ཝདནྟི. ཏེ པན ཨུཔཔཏྟིདེཝེསྭེཝ སངྒཧིཏཱ མནུསྶཨརཧནྟཱནཾ ཏཏྠ ཨབྷཱཝཏོ ¶ . དེཝདེཝེཧཱིཏི ཝིསུདྡྷིདེཝེཧི. ཝིསུདྡྷིདེཝཱ ཧི ཝུཏྟནཡེན ཨིཏརདེཝེཧི སཱཏིསཡཾ ཀཱིལ༹ནཱདིཡོགཏོ ཨིདྷ ‘‘དེཝདེཝཱ’’ཏི ཨདྷིཔྤེཏཱ, ཏེཧི. པཱུཛིཏོཏི པཱུཛིཏབྦོ, པཱུཛིཏུཾ ཨརཧོཏི ཨཏྠོ. ཨེཏེན ཝིསུདྡྷིདེཝེསུཔི བྷགཝཏོ ཨགྒཔུགྒལཏཾ དཱིཔེཏི. དེསེསཱིཏི མདྷུརཀརཝཱིཀསདྡསདིསཾ བྲཧྨསྶརཾ ནིཙྪཱརེནྟོ པཀཱསེསི. དེཝལོཀསྨིནྟི ཏཱཝཏིཾསདེཝལོཀེ. སབྷཱཝསཱམཉྙལཀྑཎཾ དྷཱརེཏཱིཏི དྷམྨོ, ཀུསལཱདིབྷེདོ ཨབྷིདྷམྨོ, ཨིདྷ པན ཏཔྤཀཱསཀཾ ཨབྷིདྷམྨཔིཊཀཾ ‘‘དྷམྨ’’ནྟི ཝུཏྟཾ. ཏཐཱ ཧི ཝཀྑཏི ‘‘པིཊཀུཏྟམེ’’ཏི. དེཝཔུརཀྑཏོཏི དསསཧསྶཙཀྐཝཱལ༹ཝཱསིདིབྦབྲཧྨེཧི པུརཀྑཏོ, པརིཝཱརིཏོཏི ཨཏྠོ.

ནནུ ཙ ‘‘དེཝཱན’’ནྟི ཝཙནེནེཝ དེཝཔུརཀྑཏབྷཱཝོ སིདྡྷོཏི ཀིཾ ‘‘དེཝཔུརཀྑཏོ’’ཏི ཝཙནེན? ནཱཡཾ དོསོ. བྷགཝཱ ཧི ཀདཱཙི ཙཱུལ༹པནྠཀཏྠེརཱདཱིནཾ ཝིཡ པརམྨུཁེཔི ནིསཱིདིཏྭཱ ཨོབྷཱསཾ ཝིསྶཛྫེཏྭཱ སཏྟཱནཾ སམྨུཁེ ནིསིནྣཾ ཝིཡ དསྶེནྟོ དྷམྨཾ དེསེཏི, ཀདཱཙིཔི པཱརཱཡནིཀབྲཱཧྨཎཱདཱིནཾ ཝིཡ སམྨུཁེཔི ནིསཱིདིཏྭཱ ཨཉྙེཧི ཙ པརིཝུཏོ ཨཉྙེསམྤི དྷམྨཾ དེསེཏི, ཨིདྷ པན ན ཏཐཱ, དེཝེཧིཡེཝ པརིཝུཏོ དེཝཱནཾ དེསེཏཱིཏི དསྶནཏྠཾ ‘‘དེཝཔུརཀྑཏོ’’ཏིཔི ཝཏྟབྦམེཝཱཏི.

༤. ཨེཝམེཏསྨིཾ པཀརཎེ གཱརཝཛནནཏྠཾ ཏེན སམྤཱདེཏབྦཔཱཊཝཝིསཡཾ ཨབྷིདྷམྨཔིཊཀཾ དེསཀཱདིསམྤཏྟཱིཧི སཧ ཝིབྷཱཝེཏྭཱ ཨིདཱནི ཡཐཱདྷིཔྤེཏཔཀརཎཱརམྦྷཔཡོཛནཱབྷིདྷཱནཱབྷིདྷེཡྻསོཏུཛནསམུསྶཱཧནཀརཎཔྤཀཱརཱནི ཙ ཝིབྷཱཝེཏུཾ ‘‘ཏཏྠཱཧ’’ནྟིཨཱདི ཝུཏྟཾ. ཏཏྠ ‘‘པཱཊཝཏྠཱཡཱ’’ཏི ཨིམིནཱ པཀརཎཱརམྦྷཔཡོཛནཾ ཝུཏྟཾ. ‘‘ཨབྷིདྷམྨཱཝཏཱར’’ནྟི ཨིམིནཱ ཨབྷིདྷཱནཱབྷིདྷེཡྻཱནི. ‘‘མདྷུར’’ནྟིཨཱདཱིཧི པཀརཎཾ ཝིསེསེཏི. ‘‘སམཱསེནཱ’’ཏི ཙ ཨིམིནཱ སོཏུཛནསམུསྶཱཧནཀརཎཔྤཀཱརཱནཱིཏི ¶ དཊྛབྦཾ. ‘‘ཨཧ’’ནྟི ཀཏྟུབྷཱུཏཾ ཨཏྟཱནཾ ནིདྡིསཏི. ཏཐཱ ཧི ཡོ པརོ ན ཧོཏི, སོ ནིཡཀཛ྄ཛྷཏྟསངྑཱཏོ ཨཏྟཱ ‘‘ཨཧ’’ནྟི ཝུཙྩཏི.

པཊུནོ བྷཱཝོ པཱཊཝཾ, ཏཾཡེཝ ཨཏྠོ པཡོཛནཊྛེནཱཏི པཱཊཝཏྠོ, ཏདཏྠཱཡ. ཏཾ སནྡྷཱཡ ཝིཝིདྷནཡགྒཧཎསམཏྠསྶ ¶ སུཏམཡཉཱཎསྶ ཨུཔྤཱདནཏྠནྟི ཝུཏྟཾ ཧོཏི. སཾསཱརེ བྷཡཾ ཨིཀྑནྟི, བྷིནྡནྟི ཝཱ པཱཔཀེ ཨཀུསལེ དྷམྨེཏི བྷིཀྑཱུ, ཏེསཾ. པིཊཀཉྩ ཏཾ ཨུཏྟམཉྩཱཏི པིཊཀུཏྟམཾ, ཏསྨིཾ པིཊཀུཏྟམེ, ཨབྷིདྷམྨཔིཊཀེཏི ཨདྷིཔྤཱཡོ. ཏཉྷི པརིཡཏྟིབྷཱཛནཏྠཏོ པིཊཀཾ, ཏཱིསུ པིཊཀེསུ ཝིསིཊྛབྷཱཝཏོ ཨུཏྟམཉྩཱཏི པིཊཀུཏྟམཾ. ཏཏྠ པརིཡཏྟིབྷཱཛནཏྠཏོཏི པརིཡཏྟིཨཏྠེན ཙེཝ བྷཱཛནཏྠེན ཙ. ཏཐཱ ཧི ‘‘མཱ པིཊཀསམྤདཱནེནཱ’’ཏིཨཱདཱིསུ (ཨ. ནི. ༣.༦༦) པརིཡཏྟི པིཊཀནྟི ཝུཙྩཏི. ‘‘ཨཐ པུརིསོ ཨཱགཙྪེཡྻ ཀུདཱལཔིཊཀ’’ནྟིཨཱདཱིསུ (མ. ནི. ༡.༢༢༨; ཨ. ནི. ༣.༧༠) ཡཾ ཀིཉྩི བྷཱཛནམྤི. ཏསྨཱ ཨིདམྤི པརིཡཱཔུཎིཏབྦཊྛེན པརིཡཏྟི, ཨབྷིདྷམྨཏྠཱནམཱདྷཱརཎཏྠེན བྷཱཛནཉྩཱཏི པརིཡཏྟིབྷཱཛནཏྠཏོ པིཊཀནྟི ཝུཙྩཏི. ཏེནེཝཱཧུ –

‘‘པིཊཀཾ པིཊཀཏྠཝིདཱུ,

པརིཡཏྟིབྦྷཱཛནཏྠཏོ ཨཱཧུ;

ཏེན སམོདྷཱནེཏྭཱ,

ཏཡོཔི ཝིནཡཱདཡོ ཉེཡྻཱ’’ཏི. (དཱི. ནི. ཨཊྛ. ༡.པཋམམཧཱསངྒཱིཏིཀཐཱ; པཱརཱ. ཨཊྛ. ༡.པཋམམཧཱསངྒཱིཏིཀཐཱ; དྷ. ས. ཨཊྛ. ནིདཱནཀཐཱ);

ཝིསིཊྛབྷཱཝོ པནསྶ ལོཀཝོཧཱརམཏིཀྐམྨ ཡཐཱསབྷཱཝཝསེན དེསནཏོ, ཝིསིཊྛདྷམྨཀྑནྡྷཝིབྷཱཝནཏོ ཙ ཝེདིཏབྦོ. ཨེཏྠ ཧི ‘‘སཏྟོ པུགྒལོ བྷིཀྑཱུ’’ཏིཨཱདིཀཾ ལོཀཝོཧཱརམཏིཀྐམྨ ‘‘ཁནྡྷདྷཱཏུཨཱཡཏན’’ནྟིཨཱདིནཱ ཡཐཱདྷམྨཝསེནེཝ བཱཧུལླདེསནཱ པཝཏྟཱ, ན ཨིཏརེསུ ཝིཡ ¶ ཡཐཱཝུཏྟཝོཧཱརཝསེན, ཡཏོ ཨིདཾ ཡཐཱདྷམྨསཱསནནྟི ཝུཙྩཏི. སབྦསངྑཏདྷམྨཝིསིཊྛོ ཙེཏྠ པཉྙཱཀྑནྡྷོ ཝིསེསཏོ ཝིབྷཱཝིཏོ, ཏསྨཱ ཏིཎྞམྤི པིཊཀཱནཾ བུདྡྷཝཙནབྷཱཝེཔི ཡཐཱསབྷཱཝཱནཏིཀྐམདེསནཱདིཏོ ཨིདམེཝ ཏཱིསུ པིཊཀེསུ ཝིསིཊྛནྟི ཡུཏྟཾ. ཨཔིཙ དྷམྨཱཏིརེཀདྷམྨཝིསེསབྷཱཝཏོ ཙསྶ ཝིསིཊྛབྷཱཝོ ཝེདིཏབྦོ. ཨབྷིདྷམྨེ ཧི ནིཔྤདེསཏོ ཁནྡྷཱཡཏནཱདིདྷམྨཱནཾ ཝིབྷཏྟཏྟཱ ཨིཏརདྭཡཏོ ཨཏིརེཀཏརཱ, ཝིསིཊྛཱ ཙ པཱལི༹ ཧོཏི, ཏསྨཱ ཨཏིརེཀསྶ, ཝིསིཊྛསྶ ཙ པཱལི༹དྷམྨསྶ ཝསེན ཨིདམེཝ ཏཱིསུ པིཊཀེསུ ཨུཏྟམནྟི ཝཏྟུཾ ཝཊྚཏི. ཡཐཱཝུཏྟཝིསིཊྛབྷཱཝཡོགཏོཡེཝ ཙེཏཾ ‘‘ཨབྷིདྷམྨཔིཊཀ’’ནྟི ཝུཙྩཏི ཨབྷི-སདྡསྶ ཝིསིཊྛབྷཱཝཛོཏནཏོ ¶ . ཨཔིཙ ཝུཌྜྷིམནྟཱདིདྷམྨཱནཾ ཨེཏྠ ཝུཏྟཏྟཱ ཙེཏཾ ཨབྷིདྷམྨཔིཊཀཾ. ཡཐཱཧུ པོརཱཎཱ –

‘‘ཡཾ ཨེཏྠ ཝུཌྜྷིམནྟོ, སལཀྑཎཱ པཱུཛིཏཱ པརིཙྪིནྣཱ;

ཝུཏྟཱདྷིཀཱ ཙ དྷམྨཱ, ཨབྷིདྷམྨོ ཏེན ཨཀྑཱཏོ’’ཏི. (དཱི. ནི. ཨཊྛ. ༡.པཋམམཧཱསངྒཱིཏིཀཐཱ; པཱརཱ. ཨཊྛ. ༡.པཋམམཧཱསངྒཱིཏིཀཐཱ; དྷ. ས. ཨཊྛ. ནིདཱནཀཐཱ);

ཏཐཱ ཧེཏྠ ‘‘རཱུཔཱུཔཔཏྟིཡཱ མགྒཾ བྷཱཝེཏི, མེཏྟཱསཧགཏེན ཙེཏསཱ ཨེཀཾ དིསཾ ཕརིཏྭཱ ཝིཧརཏཱི’’ཏིཨཱདིནཱ (དྷ. ས. ༡༦༠ ཨཱདཡོ) ཝུཌྜྷིམནྟོཔི དྷམྨཱ ཝུཏྟཱ, ‘‘རཱུཔཱརམྨཎཾ ཝཱ སདྡཱརམྨཎཾ ཝཱ’’ཏིཨཱདིནཱ (དྷ. ས. ༡) ནཡེན ཨཱརམྨཎཱདཱིཧི ལཀྑིཏབྦཏྟཱ སལཀྑཎཱཔི ‘‘སེཀྑཱ དྷམྨཱ ཨསེཀྑཱ དྷམྨཱ, ལོཀུཏྟརཱ དྷམྨཱ’’ཏིཨཱདིནཱ ནཡེན པཱུཛིཏཱ པཱུཛཱརཧཱཔི ‘‘ཕསྶོ ཧོཏི, ཝེདནཱ ཧོཏཱི’’ཏིཨཱདིནཱ (དྷ. ས. ༡) ནཡེན སབྷཱཝཔརིཙྪིནྣཏྟཱ པརིཙྪིནྣཱཔི ‘‘མཧགྒཏཱ དྷམྨཱ ཨཔྤམཱཎཱ དྷམྨཱ (དྷ. ས. ཏིཀམཱཏིཀཱ ༡༢, དུཀམཱཏིཀཱ ༩༩), ཨནུཏྟརཱ དྷམྨཱ’’ཏིཨཱདིནཱ ནཡེན ཨདྷིཀཱ ཝིསིཊྛཱཔི དྷམྨཱ ཝུཏྟཱ, ཏསྨཱ ཨབྷི-སདྡསྶ ཝུཌྜྷིཨཱདིཨཏྠེསུཔི པཝཏྟནཏོ ‘‘ཝུཌྜྷིམནྟོ དྷམྨཱ ཨེཏྠཱ’’ཏིཨཱདིནཱ ནིབྦཙནེན ཨིདཾ པིཊཀཾ ¶ ‘‘ཨབྷིདྷམྨ’’ནྟི ཝུཙྩཏི. ཨབྷིདྷམྨཾ ཨོཏརནྟི ཨནེནཱཏི ཨབྷིདྷམྨཱཝཏཱརཾ ནཱམ པཀརཎཾ. ཨིམིནཱ པནསྶ ཨཏྠཱནུགཏམབྷིདྷཱནཾ དསྶེཏི. ཏུ-སདྡོ པདཔཱུརཎེ. ཨཱཙརིཡེན ཧི གཱཐཱཔདཔཱུརཎཏྠཾ ཡེབྷུཡྻེན ཏཏྠ ཏཏྠ ནིཔཱཏཱ ཝུཙྩནྟི. ཡཏྠ པན ནེསཾ པཡོཛནཝིསེསོ དིསྶཏི, ཏཏྠེཝ ཏམཏྠཾ ཝཀྑཱམ. མདྷུརནྟི ནིཔྤརིཡཱཡཏོ མདྷུར-སདྡོཡཾ ཛིཝ྄ཧཱཝིཉྙེཡྻེ རསཝིསེསེ ཝཏྟཏི, ཨིདྷ པན ཨིཊྛབྷཱཝསཱམཉྙེན ཨཏྠབྱཉྫནསམྤཏྟི མདྷུརསདྡེན ཝུཏྟཱ. བྷཝཏི ཧི ཏཾསདིསསྶ ཏཾ-སདྡེནཱབྷིདྷཱནཾ ཡཐཱ ‘‘ཨགྒིམཱཎཝོ’’ཏི. ཏེན པན མདྷུརེན ཡོགཏོ ཨིདམྤི མདྷུརཾ ཡཐཱ ནཱིལགུཎཡོགཏོ ནཱིལུཔྤལནྟི. ནིཔུཎགམྦྷཱིརཱཡ བྱཉྫནསམྤཏྟིཡཱ ཙེཝ ཨཏྠསམྤཏྟིཡཱ ཙ ཨབྷིདྷམྨཝིསཡཾ མཏིཾ ཝཌྜྷེཏཱིཏི མཏིཝཌྜྷནཾ. ཨཐ ཝཱ བྱཉྫནསམྤཏྟིཡཱ ‘‘མདྷུར’’ནྟི ཝུཏྟཾ, ཨཏྠསམྤཏྟིཡཱ ‘‘མཏིཝཌྜྷན’’ནྟི.

༥. ཏཱལ༹ནྟི ཀུཉྩིཀཾ, ཀུཉྩིཀཱསདིསནྟི ཨཏྠོ. མུཡ྄ཧནྟི ཏེནཱཏི མོཧོ, ཨཝིཛྫཱཡེཏཾ ཨདྷིཝཙནཾ, མོཧོཡེཝ ཨབྷིདྷམྨམཧཱཔུརཾ པཝིསནྟཱནཾ པཝེསནནིཝཱརཎཏྟཱ ཀཝཱཊབྷཱུཏོཏི ¶ མོཧཀཝཱཊཾ, ཏསྶ. ཝིགྷཱཊེཏི, ཝིགྷཱཊཱིཡཏི ཨནེནཱཏི ཝཱ ཝིགྷཱཊནཾ. ནནུ ཙ ཨཝིཛྫཱཀཝཱཊཾ པཉྙཱཡ ཨུགྒྷཱཊཱིཡཏི. སཱ ཧི ཏསྶཱ ཨུཛུཝིཔཙྩནཱིཀབྷཱུཏཱཏི? སཙྩཾ, ཨིདམྤི ཏསྶཱ ཀཱརཎབྷཱཝེན ‘‘མོཧཀཝཱཊཝིགྷཱཊནཀར’’ནྟི ཝུཏྟཾ. ཀཱརཎཀཱརཎམྤི ཧི ཀཱརཎཝསེན ཝུཙྩཏི ཡཐཱ ‘‘ཙོརེཧི གཱམོ དཌྜྷོ, ཏིཎེཧི བྷཏྟཾ སིདྡྷ’’ནྟི.

༦. སུདུཏྟརནྟི དྷམྨཏྠདེསནཱཔཊིཝེདྷསངྑཱཏཙཏུགམྦྷཱིརབྷཱཝཔཊིསཾཡུཏྟཏཱཡ མནྡབུདྡྷཱིཧི ཏརིཏུཾ ཨསཀྐུཎེཡྻཏྟཱ ཨཏིདུཏྟརཾ, ཏེནེཝ ཙེདཾ མཧོདདྷིསམཱནཏྟཱ ‘‘མཧོདདྷཱི’’ཏི ཝུཏྟཾ. མཧཎྞཝོཔི ཧི ཙཏུརཱསཱིཏིཡོཛནསཧསྶགམྦྷཱིརོ ན སཀྐཱ ཨཉྙཏྲ སིནེརུཔབྦཏརཱཛཏོ ཀེནཙི པཏིཊྛཾ ལདྡྷུཾ, ཨེཝམིདམྤི ཙཏུགམྦྷཱིརཏཱཔཊིསཾཡུཏྟཾ ཨཉྙཏྲ ཏཐཱགཏཱ ¶ ན ཀེནཙི པཏིཊྛཾ ལདྡྷུཾ སཀྐཱཏི. ཏརནྟཱནནྟི ཨཏྠགྒཧཎཝསེན ཨུཏྟརིཏུཀཱམཱནཾ. ཨེཏྠ ཙ ‘‘ཏརཾཝཱ’’ཏི ཨདྷིཀཱརཝསེན ཝཏྟབྦཾ, ཝཀྑམཱནཾ ཝཱ ཨཱནེཏྭཱ སམྦནྡྷིཏབྦཾ. ཏརནྟཱནནྟི པརཏཱིརསམྤཱཔུཎནཏྠཾ ཨུཏྟརནྟཱནཾ. ཏརཾཝཱཏི ཨུལུ༹མྤཾ ཝིཡ, ཏཾསམཱནནྟི ཨཏྠོ. མཀརཱ ནཱམ མཙྪཛཱཏིཀཱ, ཏེསཾ ཨཱཀརོ ནིཝཱསབྷཱུམཱིཏི མཀརཱཀརོ, ཏཾ.

༧. ཨབྷིདྷམྨེ ནིཡུཏྟཱ ཨཱབྷིདྷམྨིཀཱ, ཏེསཾ. ཧཏྠསཱརཾ ཝིཡཱཏི ཧཏྠསཱརཾ. ཡཐཱ ཧི མནུསྶཱནཾ བཧཱུསུ རཏནཱདཱིསུ ཝིཛྫམཱནེསུཔི ཨཱཔདཱསུ ཙ སུཁཔརིབྷོགཏྠཾ ཧཏྠེ ཀཡིརམཱནཾ སཱརརཏནཱདིཀཾ ‘‘ཧཏྠསཱར’’ནྟི ཝུཙྩཏི, ཨེཝམིདམྤི སཏིཔི མཧནྟེ ཨབྷིདྷམྨཔིཊཀེ ཏསྶ སབྦསོ ཝིཏྟིཎྞཏཱཡ པརིཧརིཏུཾ ཨསཀྐུཎེཡྻཏྟཱ ཏདཏྠསཱརསམྤིཎྜནཝསེན ཀཡིརམཱནཾ ཨཱབྷིདྷམྨིཀབྷིཀྑཱུནཾ སུཁཔརིཧརཎཏྠཱཡ སམྤཛྫཏཱིཏི ཧཏྠསཱརསདིསཏྟཱ ‘‘ཧཏྠསཱར’’ནྟི ཝུཏྟཾ. པཝཀྑཱམཱིཏི པཀཱརེན ཀཐེསྶཱམི, ཨནཱགཏཝཙནཉྩེཏཾ, ཝཏྟམཱནསམཱིཔཏྟཱ ཝཱ ཨནཱགཏེ ཝཏྟམཱནཱུཔཙཱརཏོ ཝཏྟམཱནཝཙནཾ, པཊིཉྙཱནནྟརམེཝ ཝཀྑཏཱིཏི. ཨཏྠཝསེན པཀཱརེན ཀཐེནྟོཔི སདྡཝསེན སངྑིཔིཏྭཱ ཀཐེསྶཱམཱིཏི དསྶེནྟོ ཨཱཧ ‘‘སམཱསེནཱ’’ཏི. སམསནཾ སཾཁིཔནཾ སམཱསོ, ཏེན སམཱསེན, ན བྱཱསཝསེནཱཏི ཝུཏྟཾ ཧོཏི. ཨེཏྟཱཝཏཱ ཙ པཡོཛནཱབྷིདྷཱནཱབྷིདྷེཡྻསོཏུཛནསམུསྶཱཧནཀརཎཔྤཀཱརཱནི དསྶེཏྭཱ ཨིདཱནི ཡསྨཱ སོཏུཛནསམུསྶཱཧནཾ ནཱམ ཏེསཾ སཀྐཙྩསཝནེ ནིཡུཉྫནཾ, ཏསྨཱ ཏེ ཏཏྠ ནིཡོཛེནྟོ ཨཱཧ ‘‘ཏཾ སུཎཱཐ སམཱཧིཏཱ’’ཏི. སཀྐཙྩསཝནཔཊིབདྡྷཱ ཧི སམྨཱཔཊིཔཏྟཱིཏི. ཏཏྠ ཏནྟི ཏཾ མཡཱ ཝཀྑམཱནཾ ཨབྷིདྷམྨཱཝཏཱརཾ སུཎཱཐ ནིསཱམཡཐ. སམཱཧིཏཱ སམྨཱ ཨཱཧིཏཱ, ཨཝིཀྑིཏྟཙིཏྟཱཏི ཨཏྠོ.

གནྠཱརམྦྷཀཐཱཝཎྞནཱ ནིཊྛིཏཱ.

༡. པཋམོ པརིཙྪེདོ

ཙིཏྟནིདྡེསོ

ཀཱམཱཝཙརཀུསལཝཎྞནཱ

༨. ཨེཝཾ ¶ ¶ ཏཱཝ རཏནཏྟཡཔྤཎཱམཱདིཀཾ དསྶེཏྭཱ ཨིདཱནི ཡཐཱརདྡྷཔྤཀརཎསྶ ཨཏྠསརཱིརབྷཱུཏམབྷིདྷམྨཾ སངྑེཔཏོ ཨུདྡིསནྟོ ཨཱཧ ‘‘ཙིཏྟཾ ཙེཏསིཀ’’ནྟིཨཱདི. ཏཏྠ ཙིཏྟསདྡསྶ ཏཱཝ ཝཙནཏྠཾ སཡམེཝ ཨནནྟརཾ ཝིཔཉྩེཏི. ‘‘ཙེཏསིཀ’’ནྟིཨཱདཱིསུ པན ཨཝིཔྤཡོགཱིབྷཱཝེན ཙེཏསི ཙིཏྟེ ནིཡུཏྟཾ, ཏཏྠ ཝཱ བྷཝཾ ཏདཱཡཏྟཝུཏྟིཏཱཡཱཏི ཙེཏསིཀཾ, ཝེདནཱདིཀྑནྡྷཏྟཡསྶེཏཾ ཨདྷིཝཙནཾ. རུཔྤཏི, རཱུཔཱིཡཏཱིཏི ཝཱ རཱུཔཾ, སཱིཏུཎྷཱདཱིཧི ཝིཀཱརམཱཔཛྫཏི, ཨཱཔཱདཱིཡཏཱིཏི ཨཏྠོ, ཙཏུནྣཾ མཧཱབྷཱུཏཱནཾ, ཙཏུཝཱིསཏིཨུཔཱདཱརཱུཔཱནཉྩ ཝསེན ཨཊྛཝཱིསཏིཝིདྷསྶ རཱུཔཀྑནྡྷསྶེཏཾ ཨདྷིཝཙནཾ. བྷཝཱབྷཝཾ ཝིནནཏོ སཾསིབྦནཏོ ཝཱནཾ ཝུཙྩཏི ཏཎྷཱ, ན ཝིཛྫཏི སཱ ཨེཏྠ, ཏཏོ ཝཱ ནིཀྑནྟཾ ཨེཏནྟི ནིབྦཱནཾ, ཨམཏཾ ཨསངྑཏཾ ཝཏྠུ. ཨིཏི-སདྡོ ནིདསྶནེ. ནཏྠི ཨེཏསྶ ཨུཏྟརིཏརོཏི ནིརུཏྟརོ. ཨཐ ཝཱ ཙཏུཝེསཱརཛྫཝིཧཱརཏྟཱ ནཏྠི ཨེཏསྶ ཨུཏྟརཾ པཙྩནཱིཀཝཙནནྟི ནིརུཏྟརོ. ཉཱཎཔྤཧཱནཨནྟརཱཡནིཡྻཱནིཀེསུ ཧི སདེཝཀེ ལོཀེ ན ཀོཙི སཏྠུ སཧདྷམྨིཀཾ ཨུཏྟརཾ ཝཙནཾ ཀཐེཏུཾ སམཏྠོ ཨཏྠཱིཏི. ཏཏྲ བྷགཝཱ ཨུཏྲཱསཱབྷཱཝཏོ ཝིསཱརདོཝ ཧོཏི. ཝུཏྟཉྷེཏཾ བྷགཝཏཱ –

‘‘‘སམྨཱསམྦུདྡྷསྶ ཏེ པཊིཛཱནཏོ ཨིམེ དྷམྨཱ ཨནབྷིསམྦུདྡྷཱཏི ཏཏྲ ཝཏ མཾ སམཎོ ཝཱ བྲཱཧྨཎོ ཝཱ དེཝོ ཝཱ མཱརོ ཝཱ བྲཧྨཱ ཝཱ ཀོཙི ཝཱ ལོཀསྨིཾ སཧདྷམྨེན པཊིཙོདེསྶཏཱིཏི ནིམིཏྟམེཏཾ, སཱརིཔུཏྟ, ན སམནུཔསྶཱམི, ཨེཏམཧཾ, སཱརིཔུཏྟ, ནིམིཏྟཾ ཨསམནུཔསྶནྟོ ཁེམཔྤཏྟོ ཨབྷཡཔྤཏྟོ ཝེསཱརཛྫཔྤཏྟོ ཝིཧརཱམི.

‘‘ཁཱིཎཱསཝསྶ ¶ ཏེ པཊིཛཱནཏོ ཨིམེ ཨཱསཝཱ ཨཔརིཀྑཱིཎཱཏི ཏཏྲ ཝཏ མཾ…པེ… ཝིཧརཱམི.

‘‘ཡེ ¶ ཙ ཁོ པན ཏེ ཨནྟརཱཡིཀཱ དྷམྨཱ ཝུཏྟཱ, ཏེ པཊིསེཝཏོ ནཱལཾ ཨནྟརཱཡཱཡཱཏི ཏཏྲ ཝཏ མཾ…པེ… ཝིཧརཱམི.

‘‘ཡསྶ ཁོ པན ཏེ ཨཏྠཱཡ དྷམྨོ དེསིཏོ, སོ ན ནིཡྻཱཏི ཏཀྐརསྶ སམྨཱ དུཀྑཀྑཡཱཡཱཏི ཏཏྲ ཝཏ མཾ…པེ… ཝིཧརཱམཱི’’ཏི (མ. ནི. ༡.༡༥༠).

ཙཏྟཱརི ཨརིཡསཙྩཱནི པཀཱསེཏཱིཏི ཙཏུསཙྩཔྤཀཱསནོ. དུཀྑསམུདཡནིརོདྷམགྒཝསེན ཧི ཙཏྟཱརི ཨརིཡསཙྩཱནི. ཡཐཱཧ, ‘‘ཙཏྟཱརིམཱནི, བྷིཀྑཝེ, ཨརིཡསཙྩཱནི. ཀཏམཱནི ཙཏྟཱརི? དུཀྑཾ ཨརིཡསཙྩཾ, དུཀྑསམུདཡཾ ཨརིཡསཙྩཾ, དུཀྑནིརོདྷཾ ཨརིཡསཙྩཾ, དུཀྑནིརོདྷགཱམིནཱི པཊིཔདཱ ཨརིཡསཙྩ’’ནྟི (སཾ. ནི. ༥.༡༠༨༣). ཏཏྠ ཏེབྷཱུམཀཱ དྷམྨཱ ཨནེཀུཔདྡཝཱདྷིཊྛཱནཏཱཡ དྷུཝསུབྷཱདིཝིརཧེན, ཀུཙྪིཏཏུཙྪཊྛེན ཙ དུཀྑཾ ནཱམ. ཀམྨཱདིཝིསེསཔཙྩཡསམཝཱཡེ དུཀྑུཔྤཏྟིཀཱརཎབྷཱཝེན ཏཎྷཱ སམུདཡོ ནཱམ ‘‘སམེཙྩ ཨུདེཏི དུཀྑཾ ཨིམསྨཱ’’ཏི ཀཏྭཱ. དུཀྑསྶ ཨནུཔྤཱདནིརོདྷཔཙྩཡཏྟཱ དུཀྑནིརོདྷོ ནིབྦཱནཾ. ཏཾ པན དུཀྑནིརོདྷཾ ཨཱལམྦཎཀརཎཝསེན གམནཏོ པཱཔུཎནཏོ, ཏདདྷིགམཱཡ པཊིཔདཱབྷཱཝཏོ ཙཱཏི ‘‘དུཀྑནིརོདྷགཱམིནཱི པཊིཔདཱ’’ཏི ལོཀུཏྟརམགྒོ ཝུཙྩཏི. སཙྩཊྛོ པན ཏེསཾ ཏཙྪཱཝིཔརཱིཏབྷཱུཏབྷཱཝཏོ ཝེདིཏབྦོ. ཝུཏྟཉྷི ‘‘‘ཨིདཾ དུཀྑནྟི, བྷིཀྑཝེ, ཏཐམེཏཾ ཨཝིཏཐམེཏཾ ཨནཉྙཐམེཏ’’ནྟི (སཾ. ནི. ༥.༡༠༩༠) ཝིཏྠཱརོ. ཨེཏྠ པན ཙཏུནྣཾ ཨརིཡཕལཱནཾ, ཨརིཡམགྒསམྤཡུཏྟཱནཉྩ སཙྩཝིནིསྶཊབྷཱཝེཔི ཨིདྷ མགྒནིབྦཱནཔྤཀཱསནཏཱཝཙནེནེཝ ཏཔྤཀཱསནཏྠམྤི ཝུཏྟཾ ཧོཏི, ཨནཱསཝབྷཱཝེན ¶ ཨེཀལཀྑཎཏྟཱ ཏཾཏཾཧེཏུཀཝིསཡབྷཱཝཏོ ཙཱཏི དཊྛབྦཾ.

ཨེཏྠ ཙ ‘‘ནིརུཏྟརོ ཙཏུསཙྩཔྤཀཱསནོ’’ཏི ཨིམེཧི བྷགཝཏོ ཙིཏྟཱདིཙཏུབྦིདྷདྷམྨདེསནཱནུཀཱུལགུཎཝིསེསཾ དསྶེཏི ཨཏཐཱཝིདྷསྶ ཏཾདེསནཱསཱམཏྠིཡཱཡོགཏོ. ཨཐ ཝཱ ‘‘ནིརུཏྟརོ’’ཏི ཝཙནེན ཙཏུབྦིདྷདྷམྨསྶ ཨནཉྙཐཏྟཾ དཱིཔེཏི. ‘‘ཙཏུསཙྩཔྤཀཱསནོ’’ཏི པན ཨིམིནཱ ཡེ ཏེ དྷམྨཱ བྷགཝཏཱ ཝིནེཡྻཔརིཔཱཙནཏྠཾ དེསིཏཱ, ན ཏེ ཨིདྷ ཨདྷིཔྤེཏཱ. ཡེ པན པརིཔཱཙིཏེཧི ཏེཧི ཨབྷིསམེཏབྦཝསེན དུཀྑཱདཡོ ཙཏུབྦིདྷཱ ཝུཏྟཱ, ཏེཡེཝ ཨུདྡིསིཏབྦཏྠེན ཨདྷིཔྤེཏཱཏི དསྶེཏི.

ཨེཝཾ ¶ སངྑེཔཏོ ཙཏྟཱརོ དྷམྨེ ཨུདྡིསིཏྭཱ ཨིདཱནི ཨུདྡེསོ ནཱམ ནིདྡེསཏྠཱཡ ཧོཏཱིཏི ཡཐཱཨུདྡིཊྛདྷམྨེ ནིདྡིསིཏུཾ ‘‘ཏཏྠ ཙིཏྟ’’ནྟིཨཱདི ཨཱརདྡྷཾ. ཏཏྠ ཏཏྠཱཏི ཏེསུ ཙིཏྟཱདཱིསུ དྷམྨེསུ. ཝིསཡཝིཛཱནནཾ ཙིཏྟནྟི ཡཾ ཝིསཡསངྑཱཏསྶ ཨཱརམྨཎསྶ ཝིཛཱནནཾ ཨུཔལདྡྷི, ཏཾ ཙིཏྟནྟི ཨཏྠོ. ཨིམིནཱ པན ཙིཏྟསྶ ཨཱརམྨཎཔཊིབདྡྷཝུཏྟིཏཾ, ཨནིཙྩཏཾ, ཨཀཱརཀཏཉྩ དཱིཔེཏི. ‘‘ཝིསཡཝིཛཱནན’’ནྟི ཧི ཨཱརམྨཎེན ཙིཏྟཾ ཨུཔལཀྑེནྟོ ཏསྶ ཏདཱཡཏྟཝུཏྟིཏཾ, ཏཾདཱིཔནེན ཙ ཏདབྷིམུཁཀཱལེཡེཝ ཨུཔྤཏྟིདཱིཔནཏོ ཨནིཙྩབྷཱཝཉྩ དཱིཔེཏི. བྷཱཝནིདྡེསེན པན ཝིཛཱནནམཏྟདཱིཔནཏོ ཨཀཱརཀབྷཱཝཾ. ཡཐཱཔཙྩཡཉྷི པཝཏྟིམཏྟམེཝེཏཾ, ཡདིདཾ སབྷཱཝདྷམྨོ ནཱམཱཏི. ཨེཝཉྩ ཀཏྭཱ སབྦེསམྤི ཙིཏྟཙེཏསིཀདྷམྨཱནཾ བྷཱཝསཱདྷནམེཝ ནིཔྤརིཡཱཡཏོ ལབྦྷཏི. ཡཾ པན ‘‘ཙིནྟེཏཱིཏི ཙིཏྟཾ, ཏེན ཙིཏྟཾ ཝིཙརཏཱིཏི ཝིཙཱརོ’’ཏིཨཱདིནཱ ཀཏྟུཀརཎཝསེན ནིབྦཙནཾ ཝུཙྩཏི, ཏཾ པརིཡཱཡཀཐནནྟི ཝེདིཏབྦཾ. སཀསཀཀིཙྩེསུ ཧི དྷམྨཱནཾ ཨཏྟཔྤདྷཱནཏཱསམཱརོཔནེན ཀཏྟུབྷཱཝོ, ཏདནུཀཱུལབྷཱཝེན ཏཾསམྤཡུཏྟདྷམྨསམཱུཧེ ཀཏྟུབྷཱཝསམཱརོཔནེན ཀརཎཏྟཉྩ པརིཡཱཡཏོཝ ¶ ལབྦྷཏཱིཏི. ཏཐཱ ནིདསྶནཾ པན དྷམྨསབྷཱཝཏོ ཨཉྙསྶ ཀཏྟཱདིནོ ཨབྷཱཝཔརིདཱིཔནཏྠནྟི ཝེདིཏབྦཾ.

‘‘ཝིསཡཝིཛཱནན’’ནྟི ཙ ཨེཏེན ཙིཏྟསྶ ཨཱརམྨཎཱུཔལདྡྷིལཀྑཎཏཱ ཝུཏྟཱཏི ཨིདཱནིསྶ རསཱདཱིནི ཝུཙྩནྟི. པུབྦངྒམརསཉྷི ཙིཏྟཾ སནྡྷཱནཔཙྩུཔཊྛཱནཾ ནཱམརཱུཔཔདཊྛཱནཾ. དྭཱརཾ པཏྭཱ ཏདཱརམྨཎཉྷི ཝིབྷཱཝནཊྛེན ཙིཏྟཾ པུབྦངྒམཾ པུརེཙཱརིཀཾ. ཏཐཱ ཧི ཙཀྑུདྭཱརེན དཊྛབྦཾ རཱུཔཱརམྨཎཾ ཙིཏྟེནེཝ ཛཱནཱཏི…པེ… མནོདྭཱརེན ཝིཉྙཱཏབྦཾ དྷམྨཱརམྨཎཾ ཙིཏྟེནེཝ ཛཱནཱཏི. ཡཐཱ ཧི ནགརགུཏྟིཀོ ནགརམཛ྄ཛྷེ སིངྒྷཱཊཀེ ནིསཱིདིཏྭཱ ‘‘ཨཡཾ ནེཝཱསིཀོ, ཨཡཾ ཨཱགནྟུཀོ’’ཏི ཨཱགཏཱགཏཾ ཛནཾ ཨུཔདྷཱརེཏི, ཨེཝཾ སམྤདམིདཾ དཊྛབྦཾ, ཏསྨཱ དྭཱརཾ པཏྭཱ ཏདཱརམྨཎཾ ཝིབྷཱཝནཊྛེན པུརེཙཱརིཀནྟི པུབྦངྒམརསཾ. པཙྪིམཾ པཙྪིམཾ ཨུཔྤཛྫམཱནཾ པུརིམཾ པུརིམཾ ནིརནྟརཾ ཀཏྭཱ སནྡཧམཱནམིཝ ཨུཔཊྛཱཏི, གཧཎབྷཱཝཾ གཙྪཏཱིཏི སནྡྷཱནཔཙྩུཔཊྛཱནཾ. པཉྩཝོཀཱརེ པནསྶ ནིཡམཏོ ནཱམརཱུཔཾ, ཙཏུཝོཀཱརབྷཝེ ནཱམམེཝ པདཊྛཱནནྟི ནཱམརཱུཔཔདཊྛཱནཉྩ ཧོཏི. ནཱནཏྟཾ པན ལཀྑཎཱདཱིནཾ ཨུཔརི ཝཀྑམཱནནཡེན ཝེདིཏབྦཾ. ཝཀྑཏི ཧི རཱུཔཔརིཙྪེདེ –

‘‘སཱམཉྙཾ ཝཱ སབྷཱཝོ ཝཱ, དྷམྨཱནཾ ལཀྑཎཾ མཏཾ;

ཀིཙྩཾ ཝཱ ཏསྶ སམྤཏྟི, རསོཏི པརིདཱིཔིཏོ.

‘‘ཕལཾ ¶ ཝཱ པཙྩུཔཊྛཱནཾ, ཨུཔཊྛཱནནཡོཔི ཝཱ;

ཨཱསནྣཀཱརཎཾ ཡཾ ཏུ, ཏཾ པདཊྛཱནསཉྙིཏ’’ནྟི. (ཨབྷིདྷ. ༦༣༣-༦༣༤);

ཡཏྠ ཡཏྠ པན ལཀྑཎཱདཱིནི ཝུཙྩནྟི, ཏཏྠ ཏཏྠ ཨིམིནཱཝ ནཡེན ཏེསཾ ནཱནཏྟཾ ཝེདིཏབྦཾ.

ཝཙནཏྠཝིཛཱནནེན ཝིདིཏཙིཏྟསཱམཉྙསྶ ཨུཏྟརི ཙིཏྟཝིབྷཱགོ ཝུཙྩམཱནོ སོབྷེཡྻཱཏི ཝཙནཏྠཝིཛཱནནམེཝ ཏཱཝ ¶ ཨཱདིམྷི ཡུཏྟཏརནྟི ཏཾ ཏཱཝ ཀཐེཏུཀམྱཏཱཡ པུཙྪཏི ‘‘ཏསྶ པན ཀོ ཝཙནཏྠོ’’ཏི. པཉྩཝིདྷཱ ཧི པུཙྪཱ – (དཱི. ནི. ཨཊྛ. ༡.༧; མ. ནི. ཨཊྛ. ༡.༤༤༩; སཾ. ནི. ཨཊྛ. ༢.༢.༡; ཨ. ནི. ཨཊྛ. ༡.༡.༡༧༠) ཨདིཊྛཛོཏནཱཔུཙྪཱ དིཊྛསཾསནྡནཱཔུཙྪཱ ཝིམཏིཙྪེདནཱཔུཙྪཱ ཨནུམཏིཔུཙྪཱ ཀཐེཏུཀམྱཏཱཔུཙྪཱཏི. ཏཏྠ ཡཾ ཨཉྙཱཏཾ ཨདིཊྛཾ, ཏསྶ ཉཱཎཱཡ དསྶནཱཡ པཉྷཱཀརཎཾ ཨདིཊྛཛོཏནཱཔུཙྪཱ ནཱམ. ཡཾ པན ཉཱཏཾ དིཊྛཾ, ཏསྶ ཨཉྙེཧི པཎྜིཏེཧི སཾསནྡནཏྠཱཡ པཉྷཱཀརཎཾ དིཊྛསཾསནྡནཱཔུཙྪཱ ནཱམ. པཀཏིཡཱ པན སཾསཡཔཀྑནྡནསྶ ཨཏྟནོ སཾསཡསམུགྒྷཱཊནཏྠཾ པཉྷཱཀརཎཾ ཝིམཏིཙྪེདནཱཔུཙྪཱ ནཱམ. ‘‘ཏཾ ཀིཾ མཉྙཐ, བྷིཀྑཝེ, རཱུཔཾ ནིཙྩཾ ཝཱ ཨནིཙྩཾ ཝཱཏི? ཨནིཙྩཾ, བྷནྟེ. ཡཾ པནཱནིཙྩཾ, དུཀྑཾ ཝཱ ཏཾ སུཁཾ ཝཱ’’ཏིཨཱདིནཱ (སཾ. ནི. ༣.༧༩; མཧཱཝ. ༢༡) ཨནུམཏིགྒཧཎཏྠཾ པཉྷཱཀརཎཾ ཨནུམཏིཔུཙྪཱ ནཱམ. ‘‘ཙཏྟཱརོམེ, བྷིཀྑཝེ, སཏིཔཊྛཱནཱ. ཀཏམེ ཙཏྟཱརོ’’ཏིཨཱདིནཱ (དཱི. ནི. ༢.༣༧༣; སཾ. ནི. ༥.༤༠༢-༤༠༤) པན ཏཾཏཾདྷམྨཱནཾ དེསནཱདྷིཔྤཱཡེན པཉྷཱཀརཎཾ ཀཐེཏུཀམྱཏཱཔུཙྪཱ ནཱམ.

ཏཱསུ པུརིམཱ ཏིསྶོ ཨཱཙརིཡཱནཾ ན སམྦྷཝནྟི. ན ཧི ཏེ གནྠཀརཎཏྠཱཡ ཨཱརབྷིཏྭཱ ཨིདཱནི ཨདིཊྛཾ ཛོཏེནྟི, དིཊྛཾ སཾསནྡེནྟི, སཾསཡཾ ཝཱ པཀྑནྡནྟི ཏབྦིསོདྷནཔུབྦཀམེཝ གནྠཀརཎེ ཨབྷིནིཝེསནཏོ. ཨིཏརཱ པན དྭེ སམྦྷཝནྟི. ཏཱསུ ཨཡཾ ཀཐེཏུཀམྱཏཱཔུཙྪཱ. ཨཔིཙ ཙོདནཾ སམུཊྛཱཔེནྟཱ ཨཱཙརིཡཱ ཨཉྙཾ ཙོདཀཾ པརིཀཔྤེཏྭཱ ཏསྶ ཝཙནཝསེན སམུཊྛཱཔེནྟཱིཏི ཏཾཝསེནེཏྠ ཨདིཊྛཛོཏནཱཝིམཏིཙྪེདནཱཔུཙྪཱཔི ལབྦྷནྟེཝཱཏི དཊྛབྦཾ. ཏསྶཱཏི ཏསྶ ཙིཏྟ-སདྡསྶ. ཙིཏྟེ ཧི ཨདྷིགཏེ ཏསྶ ཝཱཙཀོ སདྡོཔི སཧཙརིཡཏོ ཨདྷིགཏོཝ ཧོཏཱིཏི ཏསྶ ཨིདྷ ཏ-སདྡེན པརིགྒཧོ. ཀེཙི པན ‘‘ཏསྶ ཙིཏྟསྶཱ’’ཏི ཨཏྠཾ ཝདནྟི, ཏཾ ‘‘ཏསྶ ¶ ཀོ ཝཙནཏྠོ’’ཏི ཨིམིནཱ ན སམེཏི. ན ཧི ཙིཏྟསྶ ‘‘ཀོ ཝཙནཏྠོ’’ཏི པུཙྪཱ སམྦྷཝཏཱིཏི.

ཨིདཱནི ¶ ཡཐཱཔུཙྪིཏམཏྠཾ ཝིསྶཛྫེཏུཾ ‘‘ཝུཙྩཏེ’’ཏི ཏཱཝ པཊིཉྙཾ ཀཏྭཱ ‘‘སབྦསངྒཱཧཀཝསེནཱ’’ཏིཨཱདིནཱ ཝིསྶཛྫནམཱརདྡྷཾ. ཏཏྠ སབྦསངྒཱཧཀཝསེནཱཏི ཧེཊྛིམནྟཏོ ཙཀྑུཝིཉྙཱཎཱདཡོ ཨུཔཱདཱཡ སབྦེསཾ ཨཱརམྨཎཝིཛཱནནསབྷཱཝཏྟཱ ཏེསཾ སབྦེསམེཝ སངྒཱཧཀཝསེན, ན པན ཝཀྑམཱནནིབྦཙནེསུ ཝིཡ ཡཐཱལཱབྷཝསེནཱཏི ཨཏྠོ. ཙིནྟེཏཱིཏི ཝིཛཱནཱཏི. ཙིནྟེནྟི ཏེན གོཙརནྟི ཝཱ ཙིཏྟཾ. སམྤཡུཏྟདྷམྨཱནཾ ཀཏྟུཏཱསམཱརོཔནེན ཧིསྶ ཀརཎབྷཱཝོ ལབྦྷཏི. སབྦསངྒཱཧཀཝསེན ཏཱཝ ཨཏྠཾ དསྶེཏྭཱ ཨིདཱནི ཡཐཱལཱབྷཝསེནཔི དསྶེཏུཾ ‘‘ཨཏྟསནྟཱནཾ ཝཱ ཙིནོཏཱིཏིཔཱི’’ཏིཨཱདི ཝུཏྟཾ. སབྦཙིཏྟསཱདྷཱརཎཏྟཱ ཧི ཙིཏྟ-སདྡསྶ ཡཏྠ ཡཏྠ ཡཐཱ ཡཐཱ ཨཏྠོ ལབྦྷཏི, ཏཏྠ ཏཏྠ ཏཐཱ ཏཐཱ གཧེཏབྦོ. ཡསྶ པན ཙིཏྟསྶ ཡཐཱཝུཏྟཨཏྠཝིསེསོ ན ལབྦྷཏི, ཏཾ རུལ༹ྷཱིཝསེན ཙིཏྟནྟི ཝེདིཏབྦཾ. ཡཐཱ ཀིལཉྫཱདཱིཧི ཀཏམྤི ཏཱལཔཎྞེཧི ཀཏསརིཀྑཀཏཱཡ རུལ༹ྷཱིསདྡེན ‘‘ཏཱལཝཎྚ’’ནྟྭེཝ ཝུཙྩཏཱིཏི. ཨཏྟསནྟཱནནྟི སཀསནྟཱནཾ, ཛཝནསནྟཱནནྟི ཨཏྠོ. ཨཏྟ-སདྡསྶ ཧི པརཔཙྩནཱིཀཝཙནཏྟཱ ཨཏྟནོ སནྟཱནོཏི སདིསཝསེན ཨུཔྤཛྫམཱནོ ཛཝནསནྟཱནོ ཝུཙྩཏི. ཏཾ ཙིནོཏི རཱསིཾ ཀརོཏཱིཏི ཨཡམཏྠོ སཱསེཝནཀཱནཾ ཛཝནཙིཏྟཱནཾ ཝསེན དཊྛབྦོ. ཏཱནི ཧི པུརེཛཱཏཱནི པཙྪཱཛཱཏཱནཾ ཨཱསེཝནཔཙྩཡཱ ཧུཏྭཱ ཨཏྟནོ ཛཝནསནྟཱནསྶ པགུཎབལཝབྷཱཝཀརཎེན ཏཾ ཙིནནྟི ནཱམ. ཝཱ-སདྡོ ཨསབྦསངྒཱཧཀཏྠཝིཀཔྤནེ. པི-སདྡོ ཀིརིཡཱསམྤིཎྜནཏྠེ. ཨཐ ཝཱ ‘‘སབྦསངྒཱཧཀཝསེནཱ’’ཏི ཨིམསྶ ཨིདྷཱཔི སམྦནྡྷོ ཧོཏཱིཏི ཨིདམྤི སབྦསངྒཱཧཀཝསེན ཝུཏྟནྟི གཡ྄ཧམཱནེ ཨཏྟསནྟཱནནྟི ཝིཉྙཱཎཝཙནསྶ ཨཏྟ-སདྡསྶ སཀཏྠཝུཏྟིཏྟཱཡེཝ ཏཾཝསེན ཙིཏྟསནྟཱནནྟི ཨཏྠོ. ཨནནྟརཱདིཔཙྩཡཝསེན ཧི ཙིཏྟསནྟཱནསྶ ཨབྦོཙྪིནྣཔྤཝཏྟིཀརཎཏོ སབྦམེཝ ཙིཏྟཛཱཏཾ ཙིཏྟསནྟཱནཾ ཙིནོཏི ནཱམ. ཨིམསྨིཾ པནཏྠེ ¶ ཝཱ-སདྡོ ཀིརིཡཱཝིཀཔྤནཏྠོ. པི-སདྡོ ‘‘ཙིཏྟ’’ནྟི ཨིམསྶ ཨཱཀཌྜྷནཏྠོཏི དཊྛབྦཾ. པུརིམཔཀྑེ པན ཙིཏྟནྟི ཨདྷིཀཱརཏོཝ གཧེཏབྦཾ.

༩. ཝིཙིཏྟཾ ཀརོཏི, ཝིཙིཏྟསྶ ཝཱ ཀརཎནྟི ཝིཙིཏྟཀརཎཾ, ཏཏོ ཝིཙིཏྟཀརཎཱ, ཝིཙིཏྟཙིཏྟཀམྨཱདཱིནཾ ཀརཎཏོཏི ཨཏྠོ. ལོཀསྨིཉྷི ཡཾ ཀིཉྩི ཙིཏྟཀམྨཱདིབྷེདཾ ཝིཙིཏྟཾ སིཔྤཛཱཏཾ, སབྦཾ ཏཾ ཙིཏྟེནེཝ ཙིནྟེཏྭཱ ཀརཱིཡཏཱིཏི. ཏེནཱཧ བྷགཝཱ – ‘‘དིཊྛཾ ཝོ, བྷིཀྑཝེ ¶ , ཙརཎཾ ནཱམ ཙིཏྟནྟི? ཨེཝཾ, བྷནྟེ. ཏམྤི ཁོ, བྷིཀྑཝེ, ཙརཎཾ ནཱམ ཙིཏྟཾ ཙིཏྟེནེཝ ཙིནྟིཏ’’ནྟི (སཾ. ནི. ༣.༡༠༠). སྭཱཡམཏྠོ སཝིཉྙཏྟིཀཱནཾ བཱཏྟིཾསཙིཏྟཱནམུཔལབྦྷཏི. སཱསཝཀུསལཱཀུསལཾ ཝཱ ཝིཙིཏྟགཏིཨཱདིཀརཎཏོ ཝཱ ཝིཙིཏྟཀརཎཊྛེན ཙིཏྟཾ. ནནུ ཙ ཝིཙིཏྟགཏིཨཱདཡོ ཀམྨཝསེན ནིཔྥཛྫནྟི. ཡཐཱཧ –

‘‘ཀམྨནཱནཱཀརཎཾ པཊིཙྩ སཏྟཱནཾ གཏིཡཱ ནཱནཱཀརཎཾ པཉྙཱཡཏི ཨཔདཱ དྭིཔདཱ ཙཏུཔྤདཱ བཧུཔྤདཱ རཱུཔིནོ ཨརཱུཔིནོ སཉྙིནོ ཨསཉྙིནོ ནེཝསཉྙཱིནཱསཉྙིནོ, ཀམྨནཱནཱཀརཎཾ པཊིཙྩ སཏྟཱནཾ ཨུཔཔཏྟིཡཱ ནཱནཱཀརཎཾ པཉྙཱཡཏི ཨུཙྩནཱིཙཏཱ ཧཱིནཔཎཱིཏཏཱ སུགཏདུགྒཏཏཱ, ཀམྨནཱནཱཀརཎཾ པཊིཙྩ སཏྟཱནཾ ཨཏྟབྷཱཝེ ནཱནཱཀརཎཾ པཉྙཱཡཏི སུཝཎྞདུབྦཎྞཏཱ སུཛཱཏདུཛྫཱཏཏཱ སུསཎྛིཏདུསྶཎྛིཏཏཱ, ཀམྨནཱནཱཀརཎཾ པཊིཙྩ སཏྟཱནཾ ལོཀདྷམྨེ ནཱནཱཀརཎཾ པཉྙཱཡཏི ལཱབྷཱལཱབྷེ ཡསཱཡསེ ནིནྡཱཔསཾསཱཡཾ སུཁདུཀྑེ’’ཏི (དྷ. ས. ཨཊྛ. ༡).

ཏསྨཱ ཀམྨབྷེདནིབྦཏྟཏྟཱ གཏིཨཱདཱིནཾ ཙིཏྟཏཱ. ཀམྨནྟི ཙ ཙེཏསིཀདྷམྨབྷཱུཏཱ ཙེཏནཱ, ཨབྷིཛ྄ཛྷཱདཡོ ཙ ཝུཙྩནྟི, ན ཙིཏྟནྟི. ཀཐཾ ཙིཏྟསྶ ཝིཙིཏྟགཏིཨཱདིཀརཎནྟི? ཝུཙྩཏེ ¶ – ཀམྨསྶ ཙིཏྟསནྣིསྶིཏཏྟཱ ཏནྣིཔྥཱདིཏམྤི ཙིཏྟེནེཝ ཀཏཾ ཧོཏི, ཡཐཱ རཱཛཡོདྷེན པརཱཛིཏོ སཏྟུརཉྙཱ ཛིཏོཏི ཝུཙྩཏི. ཝིཙིཏྟཾ ཀརཎམསྶཱཏི ཝཱ ཝིཙིཏྟཀརཎཾ. ཏཏོ ཨེཀཊྛཱནིཀཝཛྫིཏཉྷི ཙིཏྟཾ པཙྩེཀཾ པཊིསནྡྷཱདིཝིཙིཏྟཀིརིཡཝནྟཏཱཡ, སབྦམེཝ ཝཱ ཙིཏྟཾ ཨཱཝཛྫནཱདིཨཉྙམཉྙཝིསདིསཀིརིཡཝནྟཏཱཡ ཝིཙིཏྟཀརཎཾ ཡུཏྟནྟི. སབྦཝིཀཔྤེསུཔི ‘‘རཱུཔབྷཝོ རཱུཔ’’ནྟིཨཱདཱིསུ ཝིཡ ཨུཏྟརཔདལོཔོ ཙིཏྟཔརིཡཱཡེན ཙ ཝིཙིཏྟ-སདྡེན ཝཱ ཝིགྒཧོ ཝི-སདྡལོཔོ ཝཱ དཊྛབྦོ. ཨཐ ཝཱ ‘‘ཝིཙིཏྟཀརཎཱ’’ཏི ཨིདཾ ཙིཏྟཝིཙིཏྟབྷཱཝསྶ ཉཱཔཀཧེཏུནིདསྶནཾ. ཏེན ཡསྨཱ ཨིདཾ ཝིཙིཏྟཀརཎཾ, ཏསྨཱ ཏསྶ ཝིཙིཏྟསྶ ནིཔྥཱདཀཾ སཡམྤི ཏཐེཝ ཝིཙིཏྟནྟི ཝིཉྙཱཏབྦནྟི ཨེཝཾ ཀརཎཝིཙིཏྟཏཱཡ ཝིཙིཏྟཏྟཱ ཙིཏྟནྟི ཨཏྠོ. ཋཔེཏྭཱ ཏཾ ཀརཎཝིཙིཏྟཏཱཡ ཝིཙིཏྟབྷཱཝཾ ཨཏྟནོ ཨེཝ ཛཱཏིབྷཱུམིསམྤཡོགཱདིཝསེན ཝིཙིཏྟཏཱཡ ཙིཏྟནྟི དསྶེནྟོ ཨཱཧ ‘‘ཨཏྟནོ ཙིཏྟཏཱཡ ཝཱ’’ཏི. ཏཏྠ ཡསྨཱ ཨཉྙདེཝ ཀུསལཾ, ཨཉྙཾ ཨཀུསལཾ, ཨཉྙཾ ཨབྱཱཀཏཾ, ཨཉྙཾ ཀཱམཱཝཙརཾ, ཨཉྙཾ རཱུཔཱཝཙརཱདིབྷེདཾ, ཨཉྙཾ སརཱགཾ, ཨཉྙཾ ཝཱིཏརཱགཾ, ཨཉྙཾ སདོསཾ, ཨཉྙཾ ཝཱིཏདོསཾ, ཨཉྙཾ སམོཧཾ, ཨཉྙཾ ཝཱིཏམོཧཾ, ཨཉྙཾ རཱུཔཱརམྨཎཾ, ཨཉྙཾ སདྡཱདིཨཱརམྨཎཾ, རཱུཔཱརམྨཎེསུ ཙ ཨཉྙཾ ནཱིལཱརམྨཎཾ, ཨཉྙཾ ¶ པཱིཏཱདིཨཱརམྨཎཾ. ཨེཝཾ སདྡཱརམྨཎཱདཱིསུཔི ཡཐཱསམྦྷཝཾ. སབྦེསུ ཙེཝ ཏེསུ ཨཉྙཾ ཧཱིནཾ, ཨཉྙཾ མཛ྄ཛྷིམཾ, ཨཉྙཾ པཎཱིཏཾ, ཧཱིནཱདཱིསུ ཙ ཨཉྙཾ ཚནྡཱདྷིཔཏེཡྻཾ, ཨཉྙཾ ཙིཏྟཱདྷིཔཏེཡྻཾ, ཨཉྙཾ ཝཱིརིཡཱདྷིཔཏེཡྻཾ, ཨཉྙཾ ཝཱིམཾསཱདྷིཔཏེཡྻནྟི ཨེཝམཱདིནཱ ཛཱཏིབྷཱུམིསམྤཡུཏྟཨཱརམྨཎཧཱིནམཛ྄ཛྷིམཔཎཱིཏཨདྷིཔཏིཨཱདཱིནཾ ཝསེན ཝིཙིཏྟམནེཀཔྤཀཱརཾ, ཏསྨཱ ཨིམཱཡ ཨཏྟཝིཙིཏྟཏཱཡ ཝཱ ཙིཏྟནྟི ཝུཙྩཏཱིཏི.

ཀཱམཉྩེཏྠ ཨེཀམེཝ ཙིཏྟཾ ཨེཝཾ ཝིཙིཏྟཾ ནཱམ ན ཧོཏི, ཝིཙིཏྟཱནཾ པན ཨནྟོགདྷཏྟཱ ཨེཏེསུ ཡཾ ཀིཉྩི ཨེཀམྤི ཝིཙིཏྟཏཱཡ ¶ ཙིཏྟནྟི ཝཏྟུཾ ཝཊྚཏི སམུདཱཡཝོཧཱརེན ཨཝཡཝསྶཱཔི ཝོཧརིཡམཱནཏྟཱ ཡཐཱ པབྦཏནདཱིསམུདྡཱདཱིནམེཀདེསཱ དིཊྛཱ པབྦཏཱདཡོ དིཊྛཱཏི, ཡཐཱ ཙ ཨེཀེཀཙིཏྟསམྤཡུཏྟཱཔི ཝེདནཱདཡོ རཱསཊྛེན ཁནྡྷཝོཧཱརེན ‘‘ཝེདནཱཀྑནྡྷོ སཉྙཱཀྑནྡྷོ’’ཏིཨཱདིནཱ ཝུཙྩནྟི. ཨཔིཙེཏྠ ཝིཔཱཀཝིཉྙཱཎཾ ཀམྨཀིལེསེཧི ཙིཏནྟི ཙིཏྟཾ, ཏཾ ཀིལེསསཧཱཡེན ཀམྨུནཱ ཕལབྷཱཝེན ནིབྦཏྟིཏཾ ཏེཧི ཙིཏཾ ནཱམ ཧོཏི. ཧོཏུ ཏཱཝིདཾ ལོཀིཡཝིཔཱཀཾ སནྡྷཱཡ, ལོཀུཏྟརཾ པན པཏྭཱ ཀཐནྟི? ཝུཙྩཏེ – ‘‘ཀཏམེ དྷམྨཱ ཀུསལཱ, ཡསྨིཾ སམཡེ ལོཀུཏྟརཾ ཀུསལཾ ཙིཏྟཾ ཨུཔྤནྣཾ ཧོཏི…པེ… ཏསྨིཾ སམཡེ ཨཝིཛྫཱཔཙྩཡཱ སངྑཱརཱ’’ཏིཨཱདིནཱ ཨརིཡམགྒཙེཏནཱཡཔི ཨཝིཛྫཱུཔནིསྶཡབྷཱཝསྶ པཀཱསིཏཏྟཱ ལོཀུཏྟརཀུསལསྶཱཔི ཨནུསཡཱ ཨུཔནིསྶཡཱ ཧོནྟཱིཏི ཏནྣིབྦཏྟིཏསྶ ཝིཔཱཀསྶ ཀམྨཀིལེསསཉྩིཏཏཱཔརིཡཱཡོ ལབྦྷཏཱིཏི. ཙིཏཾ ཏཱཡཏཱིཏི ཝཱ ཙིཏྟཾ. ཀམྨཱདིསཉྩིཏོཔི ཧི ཨཏྟབྷཱཝོ ཝིཉྙཱཎཱུཔརམེ མཏོཏི ཝུཙྩཏི. ཡཐཱཧ –

‘‘ཨཱཡུ ཨུསྨཱ ཙ ཝིཉྙཱཎཾ, ཡདཱ ཀཱཡཾ ཛཧནྟིམཾ;

ཨཔྤཝིདྡྷོ ཏདཱ སེཏི, ནིརཏྠཾཝ ཀལིངྒར’’ནྟི. (སཾ. ནི. ༣.༩༥);

སོ པནཱཡཾ ཙིཏྟ-སདྡོ ཀིཉྩཱཔི ཨནེཀཏྠེསུ དིསྶཏི. ཏཐཱ ཧེས ‘‘ཙིཏྟོ ཙ གཧཔཏཱི’’ཏིཨཱདཱིསུ (ཨ. ནི. ༢.༡༣༣; ༤.༡༧༦) པཉྙཏྟིཡཾ ཨཱགཏོ. ‘‘སབྦོ ལོཀོ པརཙིཏྟེན ཨཙིཏྟོ’’ཏིཨཱདཱིསུ ཝིཉྙཱཎེ. ‘‘ནཱཧཾ, བྷིཀྑཝེ, ཨཉྙཾ ཨེཀནིཀཱཡམྤི སམནུཔསྶཱམི, ཨེཝཾ ཙིཏྟ’’ནྟིཨཱདཱིསུ (སཾ. ནི. ༣.༡༠༠) ཝིཙིཏྟེ, ནཱནཔྤཀཱརེཏི ཨཏྠོ. ‘‘ཙརཎཾ ནཱམ ཙིཏྟ’’ནྟིཨཱདཱིསུ ཙིཏྟཀམྨཀེ. ཨིདྷ པན ཙཏུབྦིདྷདྷམྨེ ནིདྡེསཏོ པཀརཎཝསེན ཡཐཱཝུཏྟཝཙནཏྠཡུཏྟོ ཝིཉྙཱཎཝཙནོཝ དཊྛབྦོཏི ཨིམམཏྠཾ དསྶེནྟོ ཨཱཧ ‘‘པཉྙཏྟིཡམྤཱི’’ཏིཨཱདི ¶ . པཉྙཱཔཱིཡཏི ཨེཏཱཡཱཏི ¶ པཉྙཏྟི, ཏསྶཾ ནཱམཔཉྙཏྟིཡནྟི ཨཏྠོ. ཙིཏྟོཏི ཧི ཨེཀསྶ གཧཔཏིནོ ནཱམཾ. པི-སདྡོ ཝཀྑམཱནསམྤིཎྜནཏྠོ. ཝིཉྙཱཎེཏི སཝིཔཱཀཱཝིཔཱཀབྷེདེ ཙིཏྟེ. ཏཉྷི ཝིཛཱནནཊྛེན ‘‘ཝིཉྙཱཎ’’ནྟི ཝུཙྩཏི. ཡཐཱཧ – ‘‘ཝིཛཱནཱཏཱིཏི ཁོ, བྷིཀྑཝེ, ཝིཉྙཱཎཾ, ཏསྨཱ ཝིཉྙཱཎནྟི ཝུཙྩཏཱི’’ཏི. ཙིཏྟསམྨུཏཱིཏི ཙིཏྟཝོཧཱརོ. དཊྛབྦཱཏི ཝིཉྙཱཏབྦཱ. ཨིདྷཱཏི ཨིམསྨིཾ ཙཏུབྦིདྷདྷམྨནིདྡེསཊྛཱནེ. ཝིཉྙུནཱཏི ཝིཛཱནཏཱ, ཨཱབྷིདྷམྨིཀེནཱཏི ཨཏྠོ.

ཝིབྷཱགཝནྟཱནཾ དྷམྨཱནཾ སབྷཱཝཝིབྷཱཝནཾ ཝིབྷཱགེན ཝིནཱ ན ཧོཏཱིཏི ཙིཏྟསྶ ཝིབྷཱགཾ དསྶེཏུཾ ‘‘སཱརམྨཎཏོ’’ཏིཨཱདི ཨཱརདྡྷཾ. ཏཏྠ ཨཱལམྦནྟི ཏཾ ནིསྶཱཡ པཝཏྟནྟཱིཏི ཨཱརམྨཎཾ, པཙྩཡོ, གོཙརོ ཙ. ཏཐཱ ཧི ‘‘ལབྷཏི མཱརོ ཨཱརམྨཎཾ, ལབྷཏི མཱརོ ཨོཏཱར’’ནྟིཨཱདཱིསུ (དཱི. ནི. ༣.༨༠) པཙྩཡོ ‘‘ཨཱརམྨཎ’’ནྟི ཝུཙྩཏི. ‘‘ནིམིཏྟཾ ཨསྶཱསཔསྶཱསཱ, ཨནཱརམྨཎམེཀཙིཏྟསྶཱ’’ཏིཨཱདཱིསུ (པཊི. མ. ༡.༡༥༩) གོཙརོ. ཨིདྷ པན ཨུབྷཡམྤི ཝཊྚཏི སབྦསྶེཝ ཙིཏྟསྶ སཔྤཙྩཡསགོཙརཏྟཱ. སཧ ཨཱརམྨཎེན ཝཏྟཏི ཏདཝིནཱབྷཱཝཏོཏི སཱརམྨཎཾ. བྷཱཝཔྤདྷཱནནིདྡེསཝསེན ཙེཏྠ སཱརམྨཎབྷཱཝོ སཱརམྨཎ-སདྡེན ཝུཏྟོ ཡཐཱ ‘‘ཨིདམྤི བུདྡྷེ རཏནཾ པཎཱིཏཾ (ཁུ. པཱ. ༦.༣). ཙཀྑུ སུཉྙཾ ཨཏྟེན ཝཱ ཨཏྟནིཡེན ཝཱ’’ཏིཨཱདཱིསུ (སཾ. ནི. ༤.༨༥) རཏནཨཏྟཏྟནིཡཱདིབྷཱཝོ རཏནཱདཱིཧི སདྡེཧཱིཏི, ཏཏོ སཱརམྨཎབྷཱཝཏོཏི ཨཏྠོ. ཨེཝམཉྙཏྠཱཔི ཡཐཱནུརཱུཔཾ དཊྛབྦཾ. ཨེཀཝིདྷནྟི ཨེཀཔྤཀཱརཾ, ཨེཀཀོཊྛཱསནྟི ཨཏྠོ.

སཝིཔཱཀཱཝིཔཱཀཏོཏི ཝིཔཱཀུཔྤཱདནསབྷཱཝསྶ ཝིཛྫམཱནཱཝིཛྫམཱནབྷཱཝཏོ. ཝིཔཱཀ-སདྡོ ཧི དྭཱིསུ ཨཏྠེསུ པཝཏྟཏི. ཀཏྠཙི ཝིཔཀྐབྷཱཝམཱཔནྣེསུ ཨརཱུཔདྷམྨེསུ, ཀཏྠཙི ཝིཔཱཀུཔྤཱདནསབྷཱཝེ ¶ . ཏཐཱ ཧེས ‘‘ཝིཔཱཀཱ དྷམྨཱ’’ཏིཨཱདཱིསུ (དྷ. ས. ཏིཀམཱཏིཀཱ ༣) ཝིཔཀྐབྷཱཝམཱཔནྣེསུ ཨརཱུཔདྷམྨེསུ པཝཏྟཏི. ‘‘ཝིཔཱཀདྷམྨདྷམྨཱ’’ཏིཨཱདཱིསུ (དྷ. ས. ཏིཀམཱཏིཀཱ ༣) ཝིཔཱཀུཔྤཱདནསབྷཱཝེ. ཨིདྷ པན ཝིཔཱཀུཔྤཱདནསབྷཱཝོ དཊྛབྦོ. ཨིཏརཐཱ ཧི ཨབྷིཉྙཱཀུསལཱདཱིནཾ སཝིཔཱཀ-པདེ ཨསངྒཧིཏབྷཱཝཱཔཏྟི སིཡཱ. ཏཐཱ ཧི ཡདི ཝིཔཀྐབྷཱཝམཱཔནྣཱ ཨེཝ དྷམྨཱ ཨིདྷ གཧིཏཱ སིཡུཾ, ཏེ ཡསྶ སནྟི, ཏཾ སཝིཔཱཀམིཏརམཝིཔཱཀནྟི ཨབྷིཉྙཱཀུསལསྶ ཙེཝ ཀདཱཙི ཨཝིཔཱཀསྶ དིཊྛདྷམྨཝེདནཱིཡཱདིཀམྨསྶ བྷཱཝནཱཡཔཧཱཏབྦཱཀུསལསྶ ཙ ཝིཔཱཀུཔྤཏྟིཡཱ ཨབྷཱཝཏོ ཨཝིཔཱཀ-པདསངྒཧོ སིཡཱ, ཨེཝཉྩ ¶ སཏི ‘‘ཨཝིཔཱཀཾ ཨབྱཱཀཏ’’ནྟི ཝཀྑམཱནཏྟཱ ནེསཾ ཨབྱཱཀཏབྷཱཝོ ཨཱཔཛྫཏི, ན ཙེཏམིཊྛཾ ཀུསལཱཀུསལནིདྡེསེཡེཝ ཏེསཾ ནིདྡེསཏོ. ཝིཔཱཀུཔྤཱདནསབྷཱཝེ པན གཧིཏེ ཏཾསབྷཱཝོ ནཱམ ཨནུཔཙྪིནྣཱཝིཛྫམཱནཏཎྷཱནུསཡསྨིཾ སནྟཱནེ སབྱཱཔཱརཔྤཝཏྟི ཨེཝཱཏི ཏསྶཱ ཏེསུཔི ཨཏྠིཏཱཡ ཨསཏིཔི ཝིཔཱཀུཔྤཱདནེ སཝིཔཱཀ-པདསངྒཧོ སིདྡྷོཏི ན ཀོཙི ཨིཊྛཝིགྷཱཏོ ཨཱཔཛྫཏི. ཡེན པན ཀཱརཎེན ཨབྷིཉྙཱཀུསལཱདིཀམཝིཔཱཀཾ, ཡོ ཙེཏྠ ཝཏྟབྦོ ཝིནིཙྪཡོ, ཏཾ སབྦཾ ཏསྶ ཏསྶ ཨཱགཏཊྛཱནེཡེཝ དསྶཡིསྶཱམ.

ཀཏམཾ པནེཏྠ སཝིཔཱཀཾ, ཀཏམམཝིཔཱཀནྟི ཙོདནཾ སནྡྷཱཡཱཧ ‘‘ཏཏྠ སཝིཔཱཀ’’ནྟིཨཱདི. ཨབྱཱཀཏནྟི ཝིཔཱཀཀིརིཡཱཝསེན དུཝིདྷམབྱཱཀཏཾ. ཏེསུ ཝིཔཱཀཙིཏྟཾ ཏཱཝ ཨཱདཱསཏལེ མུཁནིམིཏྟཾ ཝིཡ ནིརུསྶཱཧཏྟཱ ཝིཔཱཀུཔྤཱདནེ ཨསམཏྠཾ. ཀིརིཡཙིཏྟེསུ ཙ ཡདེཏཾ ཁཱིཎཱསཝསནྟཱནེཡེཝ ནིཡཏམཊྛཱརསཝིདྷཾ ཝིཉྙཱཎཾ, ཏཾ ཨུཔཙྪིནྣབྷཝམཱུལཱཡ སནྟཏིཡཾ པཝཏྟཏཱིཏི སམུཙྪིནྣམཱུལཱཡ ལཏཱཡ པུཔྥཾ ¶ ཝིཡ ཕལདཱཡཱི ན ཧོཏི. ཨཱཝཛྫནདྭཡཾ པན ཨནུཔཙྪིནྣབྷཝམཱུལེཔི སནྟཱནེ པཝཏྟམཱནཾ ཨནཱསེཝནབྷཱཝེན དུབྦལཏྟཱ མོགྷཔུཔྥམིཝ བཱིཛབྷཱཝེ ཨསམཏྠཾ ཨཕལམེཝ. ཨིཏི སབྦམེཏཾ ཨབྱཱཀཏཾ ཝིཔཱཀཱརཧཏཱབྷཱཝཏོ ཨཝིཔཱཀནྟི ཝུཏྟཾ ‘‘ཨཝིཔཱཀཾ ཨབྱཱཀཏ’’ནྟི. ཛཱཡནྟི ཨེཏྠ ཨསདིསཱཔི སདིསཱཀཱརཱཏི ཛཱཏི, སམཱནཱཀཱརོ, ཀུསལཱཀུསལཱབྱཱཀཏཱནཾ ཛཱཏི ཀུསལཱཀུསལཱབྱཱཀཏཛཱཏི, ཏསྶཱ བྷེདཏོ ཏིཝིདྷཾ ཀུསལཾ ཨཀུསལཾ ཨབྱཱཀཏནྟི. ཝཙནཏྠཔུཙྪཱཡ པཡོཛནཾ ཝུཏྟམེཝ.

༡༠. ‘‘ཀུཙྪིཏཱན’’ནྟིཨཱདི ཝིསྶཛྫནཾ. ཏཏྠ ཀུཙྪིཏཱནནྟི ནིནྡིཏཱནཾ, ཨསུཙི ཝིཡ ནཱགརིཀེཧི ཝིཉྙཱུཧི གརཧིཏབྦཱནཾ པཱཔདྷམྨཱནནྟི ཨཏྠོ. སལནཏོཏི ཧིཾསནཏོ, ཨཔནཡནཏོ ཝཱ. ཀུསལཉྷི ཡཐཱནུརཱུཔཾ ཏདངྒཱདིཝསེན ཨཀུསལདྷམྨེ པཛཧནྟཾ ཏེ ཧིཾསཏི, ཨཔནཡཏཱིཏི ཝཱ ཝུཙྩཏི. ཨཐ ཝཱ སལནཏོ སཾཝརཎཏོ, པིདཧནཏོཏི ཨཏྠོ. ཀུསལདྷམྨཝསེན ཧི ཨཀུསལཔྤཝཏྟིནིཝཱརཎེན, ཨཔྤཝཏྟིདྷམྨཏཱཔཱདནེན ཙ མནཙྪཊྛེསུ དྭཱརེསུ ཨཔྤཝཏྟིཡཱ སཾཝུཏཱ པིཧིཏཱ ཧོནྟི. ཀུསཱནནྟི རཱགཱདིཨསུཙིསམྤཡོགེན ནཱནཱཝིདྷདུཀྑཧེཏུཏཱཡ ཙ ཀུཙྪིཏེནཱཀཱརེན ཨཔྤཧཱིནབྷཱཝེན སནྟཱནེ སཡནྟི པཝཏྟནྟཱིཏི ཀུསཱ, པཱཔདྷམྨཱ. ཨཐ ཝཱ ཀུཙྪིཏཱནཾ པཱཎཱཏིཔཱཏཱདཱིནཾ སཱཝཛྫདྷམྨཱནཾ སཱནཏོ ནིསཱནཏོ ཏེཛནཏོ ཀུསཱ, དོསལོབྷཱདཡོ. དོསཱདཱིནཉྷི ཝསེན ཙེཏནཱཡ ཏིཀྑབྷཱཝཔྤཏྟིཡཱ པཱཎཱཏིཔཱཏཱདཱིནཾ མཧཱསཱཝཛྫཏཱཏི. ཏེསཾ ལཝནེན ཚིནྡནེན ཡཐཱནུརཱུཔཾ པཛཧནེནཱཏི ཨཏྠོ. ཀུསེནཱཏི ཀུཙྪིཏཱནཾ སཱནཏོ ཏནུཀརཎཏོ, ཨོསཱནཀརཎཏོ ¶ ཝཱ ‘‘ཀུསཱ’’ཏི ལདྡྷནཱམེན ཉཱཎེན. ལཱཏབྦཏྟཱཏི ཨཱདཱཏབྦཏྟཱ, སཧཛཱཏཨུཔནིསྶཡབྷཱཝེན སནྟཱནེ པཝཏྟེཏབྦཏྟཱ. ཉཱཎཉྷི ཏིཧེཏུཀཀུསལཾ སཧཛཱཏབྷཱཝེན ¶ ཙེཝ ཨུཔནིསྶཡབྷཱཝེན ཙ, དུཧེཏུཀཀུསལཾ ཨུཔནིསྶཡབྷཱཝེནེཝ སནྟཱནེ པཝཏྟེཏི. ཨེཝཉྩ ཀཏྭཱ ཀོསལླསམྦྷཱུཏཊྛོ ཀུསལཊྛོཏི སབྦཀུསལཱནཾ སཱདྷཱརཎཝསེན ཨཏྠོ ཝུཙྩཏི. ཨཐ ཝཱ ཀུསེནཱཏི ཛཱཏིསདྡཏཱཡ ཨེཀཝཙནནིདྡེསོ, ཀུསེཧཱིཏི པན ཨཏྠོ. པུཉྙཀིརིཡཱཝསེན ཧི པཝཏྟཱནི སདྡྷཱདཱིནི ཨིནྡྲིཡཱནི ཡཐཱཝུཏྟནཡེན ‘‘ཀུསཱནཱི’’ཏི ཝུཙྩནྟི, ཏེཧི ལཱཏབྦཏྟཱ ཝུཏྟནཡེན པཝཏྟེཏབྦཏྟཱ. ཨཔིཙེཏྠ –

‘‘ཀུསོ ཝིཡ ལུནཱཏཱིཏི, ཀུསཱ ཝིཡ ལུནཱཏི ཝཱ;

ཀུསལཾ ཀུཾ སལེཏཱིཏི, ལུནཱཏི ཀུསམིཙྩཔཱི’’ཏི.

ཏཏྠ ཡཐཱ ཀུསོ གཧིཏོ ཨུབྷཡབྷཱགགཏཾ ཧཏྠཔདེསཾ ལུནཱཏི, ཨེཝམིདམྤི ཨུཔྤནྣཱནུཔྤནྣཝསེན ཨུབྷཡབྷཱགགཏཾ ཀིལེསཔཀྑཾ ལུནཱཏི ཚིནྡཏི, སེཡྻཐཱཔི – ‘‘ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ ཚནྡཾ ཛནེཏི, ཝཱཡམཏི, ཨུཔྤནྣཱནཾ…པེ… པཧཱནཱཡཱ’’ཏི ཨཱགཏཾ སམྨཔྤདྷཱནཾ. ཏསྨཱ ཀུསོ ཝིཡ ལུནཱཏཱིཏི ཀུསལཾ. ཀུསཱ ཝིཡ ལུནཱཏཱིཏི ཨེཏྠ ‘‘ཀུ’’ཨིཏི བྷཱུམི ཝུཙྩཏི, དྷམྨཱནཾ ཨདྷིཊྛཱནབྷཱཝེན ཏཾསདིསཏཱཡ ཨིདྷ རཱུཔཱརཱུཔཀྑནྡྷོ ཝུཏྟོ. ཨཏྟནོ ནིསྶཡབྷཱུཏསྶ ཏསྶ ཨེཏརཧི, ཨཱཡཏིཉྩ ཨནུདཧནཏོ ཝིནཱསནཏོ ཀུཾ སཱཡནྟཱིཏི ཀུསཱ, རཱགཱདཡོ, ཏེ ཝིཡ ཨཏྟནོ ནིསྶཡཾ ལུནཱཏི ཚིནྡཏཱིཏི ཀུསལཾ. པཡོགསམྤཱདིཏཱ ཧི ཀུསལདྷམྨཱ ཨཙྩནྟམེཝ རཱུཔཱརཱུཔདྷམྨེ ཨཔྤཝཏྟིཀརཎེན སམུཙྪིནྡནྟི ཨནུཔཱདིསེསནིབྦཱནདྷཱཏུཔཱཔནཏོཏི. ཝུཏྟནཡེན པན ‘‘ཀུ’’ནྟི ལདྡྷནཱམསྶ རཱུཔཱརཱུཔཀྑནྡྷསྶ སལནཏོ ཨཔནཡནཏོ ཀུཾ སལེཏཱིཏི ཀུསལཾ. ཀུསཾ ལུནཱཏཱིཏི པན ཀུཙྪིཏཱ ཨེཏྠ སཡནྟཱིཏི ཀུསོ, ཀཱཡོ, ཏཾ ལུནཱཏི ཡཐཱཝུཏྟཝསེནེཝཱཏི ཀུསལཾ.

༡༡. ཨིདཱནི ¶ ཀུསལ-སདྡསྶ ཨཏྠུདྡྷཱརདསྶནཏྠམཱཧ ‘‘ཚེཀེ ཀུསལ-སདྡོཡ’’ནྟིཨཱདི. ཏཏྠ ‘‘ཀུསལོ ཏྭཾ རཐསྶ ཨངྒཔཙྩངྒཱནཾ (མ. ནི. ༢.༨༧), ཀུསལཱནཙྩགཱིཏསྶ, སིཀྑིཏཱ ཙཱཏུརིཏྠིཡོ’’ཏིཨཱདཱིསུ (ཛཱ. ༢.༢༢.༩༤) ཚེཀེ དིཊྛོ, ཚེཀཔརིཡཱཡོ པཝཱིཎཏྠོཏི ཨཏྠོ. ‘‘ཀཙྩི ནུ བྷོཏོ ཀུསལཾ, ཀཙྩི བྷོཏོ ཨནཱམཡ’’ནྟིཨཱདཱིསུ (ཛཱ. ༡.༡༥.༡༤༦; ༢.༢༠.༡༢༩) ཨཱརོགྱེ. ‘‘ཀཏམོ པན, བྷནྟེ, ཀཱཡསམཱཙཱརོ ཀུསལོ? ཡོ ཁོ, མཧཱརཱཛ, ཀཱཡསམཱཙཱརོ ¶ ཨནཝཛྫོ’’ཏི (མ. ནི. ༢.༣༦༡) ཙ ‘‘ཨཔརཾ པན, བྷནྟེ, ཨེཏདཱནུཏྟརིཡཾ, ཡཐཱ བྷགཝཱ དྷམྨཾ དེསེཏི ཀུསལེསུ དྷམྨེསཱུ’’ཏི (དཱི. ནི. ༣.༡༤༥) ཙ ཨེཝམཱདཱིསུ ཨནཝཛྫེ. ‘‘ཀུསལཱནཾ དྷམྨཱནཾ སམཱདཱནཧེཏུ ཨེཝམིདཾ པུཉྙཾ ཝཌྜྷཏི (དཱི. ནི. ༣.༨༠), ཀུསལསྶ ཀམྨསྶ ཀཏཏྟཱ ཨུཔཙིཏཏྟཱ’’ཏི (དྷ. ས. ༤༣༡) ཙ ཨཱདཱིསུ ཨིཊྛཝིཔཱཀེ. ཨནཝཛྫཱདིཀེཏི ཨནཝཛྫཨིཊྛཝིཔཱཀེ, ‘‘ཨནཝཛྫཱདིཀེ’’ཏི ཙ ཨཏྟནཱ ཝཀྑམཱནལཀྑཎསྶ ཨནུརཱུཔཏྟཱ ཝུཏྟཾ, ན པན ཨཱརོགྱཏྠསྶ ཨསམྦྷཝཏོ. ཀིལེསརོགསྶ ཧི ཨབྷཱཝཏོ ཀུསལཾ ཨཱརོགྱཾ ཧོཏི.

ཝཛྫཱ རཱགཱདཡོ, ཏེ ཡསྶ ན སནྟི, ཏཾ ཨནཝཛྫཾ, ཨིཊྛོ ཝིཔཱཀོ ཙཏུཀྑནྡྷསངྑཱཏོ ཡསྶ, ཏཾ ཨིཊྛཝིཔཱཀཾ, ཨིཊྛཝིཔཱཀཏཱ ཙསྶ ཏཾསབྷཱཝཝནྟཏཱཡ དཊྛབྦཱ, ན ཏསྶ ཨཝསྶཾ ཨིཊྛཝིཔཱཀསམྦྷཝཏོཡེཝ, ལཀྑཱིཡཏི ཨནེནཱཏི ལཀྑཎཾ, ཨནཝཛྫཉྩ ཏཾ ཨིཊྛཝིཔཱཀཉྩཱཏི ཨནཝཛྫཨིཊྛཝིཔཱཀཾ. ཏཾ ལཀྑཎམསྶཱཏི ཨནཝཛྫཨིཊྛཝིཔཱཀལཀྑཎཾ.

ནནུ ཙ ཀུསལམེཝ ཨནཝཛྫཨིཊྛཝིཔཱཀཾ, ཝུཏྟནིཡཱམེན པན ཨནཝཛྫཨིཊྛཝིཔཱཀཏོ ཨཉྙཾ ཀུསལཾ སིཡཱ. ན ཧི སཡམེཝ ཨཏྟནོ ལཀྑཎནྟི སཀྐཱ ཝཏྟུནྟི? ནཱཡཾ དོསོ པརིཉྙཱཏཱཔརིཉྙཱཏཝཙནཏྠབྷཱཝབྷེདེ ¶ ཨེཀསྶཱཔི ལཀྑིཏབྦལཀྑཎབྷཱཝཔརིཀཔྤནཏོ. ‘‘ཨནཝཛྫཨིཊྛཝིཔཱཀ’’ནྟི ཧི པརིཉྙཱཏཝཙནཏྠཾ. ‘‘ཀུསལ’’ནྟི ཨཔརིཉྙཱཏཝཙནཏྠཾ. ཨེཝཉྩ ཡེན སབྷཱཝེན པརིཉྙཱཏཝཙནཏྠསྶ སདྡསྶ ཨཏྠོ ཧོཏི, ཡེན ཙ ཨཔརིཉྙཱཏཝཙནཏྠསྶ, ཏེསཾ པརིཉྙཱཏཱཔརིཉྙཱཏཝཙནཏྠསབྷཱཝཱནཾ བྷེདེན ཏཾསམངྒིསྶ ཀུསལསྶ ཨེཀསྶཱཔི བྷེདོ པརིཀཔྤཱིཡཏི ཡཐཱ ‘‘པུརེ བྷཝཾ པཊུ ཨཱསི, པཊུཏརོ ཨེཏརཧཱི’’ཏི གུཎབྷེདེན, ཝཏྠུབྷེདེན ཙ པརིཀཔྤཱིཡཏི, ཏསྨཱ པརིཉྙཱཏཝཙནཏྠབྷཱཝེན ལཀྑཎཾ, ཨཔརིཉྙཱཏཝཙནཏྠབྷཱཝེན ལཀྑིཏབྦནྟི ཨེཝཾ པརིཀཔྤིཏབྷེདེ པརིགྒཡ྄ཧམཱནེ ན ཀོཙི དོསོ ཨཱཔཛྫཏི.

ཨཐ ཝཱ ལཀྑཱིཡཏཱིཏི ལཀྑཎཾ, ཨནཝཛྫཨིཊྛཝིཔཱཀཉྩ ཏཾ ལཀྑཎཉྩཱཏི ཨནཝཛྫཨིཊྛཝིཔཱཀལཀྑཎཾ, ཡཾ ཨནཝཛྫཨིཊྛཝིཔཱཀཾ ཧུཏྭཱ ལཀྑཱིཡཏི, ཏཾ ཀུསལནྟི ཨཏྠོ. ཨཐ ཝཱ ཨནཝཛྫ-སདྡེན ཨནཝཛྫབྷཱཝོ ཝུཏྟོ, ཨིཊྛཝིཔཱཀསདྡེན ཨིཊྛཝིཔཱཀབྷཱཝོ, ཏསྨཱ ཨནཝཛྫོ ཙ ཨིཊྛཝིཔཱཀོ ཙ ཨནཝཛྫཨིཊྛཝིཔཱཀཾ, ཏཾ ལཀྑཎམེཏསྶཱཏི ཀརཎཏྠེ, ཀམྨཏྠེ ཝཱ ལཀྑཎ-སདྡེན ཨནཝཛྫཨིཊྛཝིཔཱཀལཀྑཎནྟི ཨནཝཛྫཨིཊྛཝིཔཱཀསབྷཱཝཝནྟཾ, ཨནཝཛྫཨིཊྛཝིཔཱཀབྷཱཝེན ¶ ལཀྑིཏབྦཾ ཝཱཏི ཨཏྠོ. ཀིཾ པནེཏྠ ཀཱརཎཾ པདདྭཡཔརིགྒཧེན, ནནུ ཨེཀེནེཝ པདེན ཨདྷིཔྤེཏཏྠསིདྡྷི སིཡཱ. ཀིཉྩཱཔི ཧི ‘‘ཨནཝཛྫལཀྑཎ’’ནྟི ཝུཏྟེ ‘‘ཨཔརཾ པན, བྷནྟེ, ཨེཏདཱནུཏྟརིཡཾ, ཡཐཱ བྷགཝཱ དྷམྨཾ དེསེཏི ཀུསལེསུ དྷམྨེསཱུ’’ཏིཨཱདཱིསུ (དཱི. ནི. ༣.༡༤༥) ཝིཡ ཝཛྫརཧིཏཏྟཱ ཨབྱཱཀཏསྶཱཔི པསངྒོ སིཡཱཏི ཨིཊྛཝིཔཱཀ-པདཾ ཝཏྟབྦམེཝ, ‘‘ཨིཊྛཝིཔཱཀལཀྑཎ’’ནྟི པན ཝུཏྟེ ཨིཏརཾ ན ཝཏྟབྦཾ ཨབྱཱཀཏསྶ ཝིཔཱཀཱརཧབྷཱཝེན ཨིཊྛཝིཔཱཀཏཱཔསངྒབྷཱཝཏོ? སཙྩམེཏཾ, ཨནཝཛྫ-པདེན ཀུསལསྶ པཝཏྟིསུཁཏཾ, ཨིཊྛཝིཔཱཀ-པདེན ཙ ཝིཔཱཀསུཁཏཾ དསྶེཏུཾ ¶ པདདྭཡཾ ཝུཏྟཾ. ཨནཝཛྫཔདཉྷི ཨཏྟནོ པཝཏྟིསབྷཱཝཝསེན ལཀྑཎཝཙནཾ, ཨིཏརཾ ཀཱལནྟརེ ཝིཔཱཀུཔྤཱདནསམཏྠཏཱཝསེནཱཏི. ཨཐ ཝཱ ཀུསལསྶ ཨཏྠཝིསུདྡྷིཾ དསྶེཏུཾ པུརིམཔདཾ ཝུཏྟཾ, པརིསུདྡྷཝིཔཱཀཏཾ དསྶེཏུཾ པཙྪིམཾ. པུརིམཾ ཝཱ ཀུསལསྶ ཨཀུསལསབྷཱཝཏོ ནིཝཏྟནཾ, པཙྪིམཾ ཨབྱཱཀཏསབྷཱཝཏོཏི ཨལམཏིཔཔཉྩེན. ཨེཏྠ ཙ ‘‘ཨནཝཛྫ…པེ… ལཀྑཎ’’ནྟི ཝཙནེན ཀུསལསྶ སཱམཉྙལཀྑཎཾ ཝུཏྟཾ ཨནཝཛྫཨིཊྛཝིཔཱཀསབྷཱཝསྶ ཀུསལཛཱཏིཡཱ སཱདྷཱརཎཏྟཱ. ཨཀུསལཱདཱིནམསཱདྷཱརཎབྷཱཝེན སབྷཱཝལཀྑཎཾ ཝཱཏི དཊྛབྦཾ.

ཨཀུསལཝིདྡྷཾསནརསནྟི ཡཐཱནུརཱུཔཾ ཨཀུསལཔྤཛཧནཀིཙྩཾ. ཀུསལཉྷི པརིཏྟམཧགྒཏལོཀུཏྟརབྷེདབྷིནྣཾ ཡཐཱཀྐམཾ ཏདངྒཝིཀྑམྦྷནསམུཙྪེདཔྤཧཱནཝསེན ཨཀུསལཔཀྑཾ པཛཧཏི. ཨཐ ཏདངྒཱདིཔྤཧཱནཱནཾ ཀིཾ ནཱནཱཀརཎནྟི? ཝུཙྩཏེ – དཱནཱདིཔུཉྙཀིརིཡཝཏྠུགཏེན ཏེན ཏེན ཀུསལངྒེན ཏསྶ ཏསྶ མཙྪེརཱདིཨཀུསལངྒསྶ པཧཱནཾ ཏདངྒཔྤཧཱནཾ, ཏཾ དཱིཔཱལོཀེན ཨནྡྷཀཱརཝིདྡྷཾསནཾ ཝིཡ དཊྛབྦཾ, ཀཱམཱཝཙརཀུསལཱནཾ པརིཏྟཱནུབྷཱཝཏཱཡ ཏེཧི ཨཏྟནོ ཋིཏིཀྑཎེ ཝིདྡྷཾསིཏཱནམཀུསལཱནཾ ཏདཔགམེ སཏི པུན ཨཱགམེན ཝོཏྠརཎཏོ. ཏེསཾ ཏེསཾ ནཱིཝརཎདྷམྨཱནཾ ཝིཀྑམྦྷནསངྑཱཏཾ པཝཏྟིནིཝཱརཎཝསེན པཧཱནཾ ཝིཀྑམྦྷནཔྤཧཱནཾ, ཏཾ གྷཊཔྤཧཱརེན ཛལཏལེ སེཝཱལཝིཡཱུཧནཾ ཝིཡ དཊྛབྦཾ. ཡཐཱ ཧི བལཝཏཱ གྷཊཔྤཧཱརེན དཱུརཱིཀཏཾ སེཝཱལཾ ཏསྨིཾ ཨཔནཱིཏེཔི ཏཾཔཧཱརཝེགེན སཧསཱ ན ཨོཏྠརཏི, ཨེཝམེཝ ཨུཔཙཱརཔྤནཱབྷེདེན ཛྷཱནེན ཝིཀྑམྦྷིཏཱ ཀཱམཙྪནྡཱདཡོ ཏདཔྤཝཏྟིཀཱལེཔི ཏསྶ བལེན སཧསཱ ན ཨོཏྠརནྟཱིཏི. ཨནུཔྤཏྟིདྷམྨཏཱཔཱདནསངྑཱཏཾ སམྨཱ ཨུཙྪེདཝསེན པཧཱནཾ སམུཙྪེདཔྤཧཱནཾ, ཏཾ པན ཨསནིསམྤཱཏེན རུཀྑཱདཱིནཾ སམཱུལཝིདྡྷཾསནཾ ཝིཡ དཊྛབྦཾ. ན ཧི ཨརིཡམགྒེན ¶ སམུཙྪིནྣཀིལེསཱ ཨནུསཡམཏྟཀེནཱཔི སནྟཱནེ པཝཏྟནྟི. ཡཐཱ པན ཨེཀཝཱརཔྤཝཏྟེནཔི ཨིནྡགྒིནཱ སཧ མཱུལེཧི ཝིདྡྷཾསིཏཱ རུཀྑཱདཡོ ན པུན ཝིརུཧནྟི, ཨེཝམེཝཾ ཨེཀཙིཏྟཀྑཎིཀེནཔི ¶ ཏེན ཨཏྟནོ ཨུཔྤཱདམཏྟེནེཝ ཨནུསཡམཏྟཊྛཱཡིནོཔི ཀིལེསཱ སབྦེན སབྦཾ ཝིདྡྷཾསིཏཱཡེཝ ཧོནྟི.

ཝོདཱནཾ ཝིསུདྡྷི, སཾཀིལེསམལཝིམུཏྟཱིཏི ཨཏྠོ, ཏཐཱ ཧུཏྭཱ པཙྩུཔཊྛཱནམསྶཱཏི ཝོདཱནཔཙྩུཔཊྛཱནཾ, པརིསུདྡྷཱཀཱརེན ཡོགིནོ ཉཱཎསྶ ཨུཔཊྛཱཏཱིཏི ཝུཏྟཾ ཧོཏི.

ཨེཝཾ ཀུསལསྶ ཝཛྫརཧིཏཨིཊྛཝིཔཱཀསབྷཱཝེཧི ལཀྑཎཾ, ཀིཙྩཨུཔཊྛཱནཱཀཱརཝསེན ཙ རསཔཙྩུཔཊྛཱནཱནི ཝཏྭཱ པུན ཝཛྫཔཊིཔཀྑབྷཱཝཝསེན ཙ ལཀྑཎཾ, སམྤཏྟིཕལཝསེན ཙ རསཱདིཀཾ དསྶེཏུཾ ‘‘ཝཛྫཔཊིཔཀྑཏྟཱ’’ཏིཨཱདི ཝུཏྟཾ. ཏཏྠ ཝཛྫཱནཾ པཊིཔཀྑབྷཱཝོ ཝཛྫཔཊིཔཀྑཏྟཾ, ཏཏོ. ཨེཏེན ‘‘ཨནཝཛྫལཀྑཎ’’ནྟི ཨེཏྠ ཨ-ཀཱརོ པཊིཔཀྑཏྠོཏི དསྶེཏི, ཏེན པནསྶ ཨབྱཱཀཏཏོ ནིཝཏྟནཾ ཀཏཾ. ཨིཏརཐཱ ཧི ནཱསྶ ཝཛྫཾ, ཝཛྫཏོ ཨཉྙཾ ཝཱ ཨནཝཛྫནྟི ཨབྱཱཀཏསྶཱཔི ཏཾལཀྑཎཏཱཔསངྒོ སིཡཱ. ‘‘ཝཛྫཔཊིཔཀྑཏྟཱ’’ཏི པན ཝུཏྟེ ཡསྨཱ ཀུསལཱཀུསལཱནམེཝ པཧཱཡཀཔྤཧཱཏབྦབྷཱཝེན ཨཱལོཀནྡྷཀཱརཱནཾ ཝིཡ ཨཉྙམཉྙཾ ཨུཛུཝིཔཙྩནཱིཀབྷཱཝོ, ཏསྨཱ ཀུསལམེཝ ཝཛྫཔཊིཔཀྑཏྟཱ ཨནཝཛྫལཀྑཎཾ, ན ཨཉྙནྟི ཨཡམཏྠོ སིདྡྷོ ཧོཏི. ཝོདཱནབྷཱཝརསནྟི ཝོདཱནབྷཱཝསམྤཏྟིཀཾ, ཀིལེསམལེཧི ཨསཾཀིལིཊྛབྷཱཝེན སམྤཛྫནཀནྟི ཨཏྠོ. པཙྩུཔཊྛཱཔཱིཡཏི ཨུཔནཱིཡཏི ཀཱརཎེན, ཨཏྟནོ ཝཱ ཀཱརཎཾ པཊིཙྩ, ཏཔྤཊིབདྡྷབྷཱཝེན པཊིམུཁཾ ཝཱ ཨུཔཊྛཱཏཱིཏི པཙྩུཔཊྛཱནཾ, ཨིཊྛོ ཝིཔཱཀོ པཙྩུཔཊྛཱནམསྶཱཏི ཨིཊྛཝིཔཱཀཔཙྩུཔཊྛཱནཾ.

ཨསཏི ¶ ཡོནིསོམནསིཀཱརེ ཀུསལསྶ ཨནུཔྤཛྫནཏོ, སཏི ཙ ཏསྨིཾ ཨུཔྤཛྫནཏོ ཏསྶ སོ ཨཱསནྣཀཱརཎནྟི ཨཱཧ ‘‘ཡོནིསོམནསིཀཱརཔདཊྛཱན’’ནྟི. ཏཏྠ ཡོནིསོ པཐེན ཨུཔཱཡེན མནསིཀཱརོ ཡོནིསོམནསིཀཱརོ, ཨཏྠཏོ པན སཱནུསཡསནྟཱནཝཏོ ཚནྣཾ དྭཱརཱནམཱཔཱཐགཏེསྭཱརམྨཎེསུ པཏིརཱུཔདེསཝཱསཱདིསམྤཏྟིཡཱ ཀུསལདྷམྨཱནཾ པཙྩཡབྷཱཝེན བྷཝངྒཾ ཨཱཝཊྚེཏྭཱ ཨུཔྤནྣམཱཝཛྫནཾ ཡོནིསོམནསིཀཱརོ ནཱམ. ཝུཏྟཔཊིཔཀྑཝསེན ཨཡོནིསོམནསིཀཱརོཔི དཊྛབྦོ. ཡཾ པན ནིརནུསཡསནྟཱནསམངྒིསྶ ཀིརིཡཙིཏྟཱནཾ པཙྩཡབྷཱཝེན ཨུཔྤནྣཾ, ཏཾ ཋཔེཏྭཱ ནིརཝཛྫདྷམྨཾ སཱཝཛྫདྷམྨསྶ ཀསྶཙི པཙྩཡབྷཱཝཱནུཔགམནཏོ ཡོནིསོམནསིཀཱརཔཀྑཾ ཝཱ བྷཛེཡྻ. ཁཱིཎཱསཝསནྟཱནགཏཏྟཱ ཡོནིསོཨཡོནིསོབྷཱཝམནཔེཀྑིཏྭཱ ཨཱཔཱཐགཏཱརམྨཎེསུ ཨུཔྤཏྟིམཏྟཾ ¶ ཝིནཱ ན ཀསྶཙི ཀུསལཱཀུསལབྷཱཝསྶ པཙྩཡོ ཧོཏཱིཏི ཏདུབྷཡཝསེན ནཝཏྟབྦཏྟཱ ཨབྱཱཀཏམནསིཀཱརོཏི ཝཱ སངྑཾ གཙྪེཡྻཱཏི.

སཱཝཛྫཱནིཊྛཝིཔཱཀལཀྑཎམཀུསལནྟི ཨེཏྠཱཔི ‘‘ཝཛྫཱ རཱགཱདཡོ, ཏེ ཡསྶ སནྟི, ཏཾ སཱཝཛྫཾ, ཨནིཊྛོ ཝིཔཱཀོ ཡསྶ, ཏཾ ཨནིཊྛཝིཔཱཀ’’ནྟིཨཱདིནཱ ཝུཏྟནཡཱནུསཱརེན པཊིཔཀྑཡོཛནཱ དཊྛབྦཱ. རསཱདིཏོ པནེཏཾ ཨནཏྠཛནནརསཾ, སཾཀིལེསཔཙྩུཔཊྛཱནཾ. ཨཐ ཝཱ གཱརཡ྄ཧབྷཱཝཏོ སཱཝཛྫལཀྑཎམེཝ, སཾཀིལེསབྷཱཝརསཾ, ཨནིཊྛཝིཔཱཀཔཙྩུཔཊྛཱནཾ, ཨཡོནིསོམནསིཀཱརཔདཊྛཱནཾ. ཝཙནཏྠཏོ པན ན ཀུསལནྟི ཨཀུསལཾ, ཀུསལཔཊིཔཀྑནྟི ཨཏྠོ. པཊིཔཀྑཏྠེ ཧི ཨཡཾ ཨཀཱརོ, ན པན ཨཉྙཏྠེ, ནཱཔི ཨབྷཱཝེ. ཨིཏརཐཱ ཧི ཏིཀཾ ན སིཡཱ, དུཀཾ, ཙཏུཀྐཾ ཝཱ ཨཱཔཛྫེཡྻ. ཏཐཱ ཧི ཡདི ཀུསལཏོ ཨཉྙམཀུསལཾ སིཡཱ ¶ , ཏདཱ ཨབྱཱཀཏསྶཱཔི ཏཏོ ཨཉྙབྷཱཝེན ཨཀུསལ-སདྡསངྒཧོཏི ཀུསལཱཀུསལཛཱཏིབྷེདཏོ དུཝིདྷནྟི དུཀཾ ཝཏྟབྦཾ. ཡདི ཙ ཀུསལཱབྷཱཝོ ཨཀུསལཾ, ཏེན ན ཀཱཙི ཛཱཏི གཡ྄ཧཏཱིཏི ཀུསལཱབྱཱཀཏཛཱཏིབྷེདཏོ དུཀམེཝ ཝཏྟབྦཾ. ཨཐ སིཡཱ ‘‘ཨབྷཱཝོཔི ཝིསུཾ གཧེཏབྦོ’’ཏི, ཨེཝཾ སཏི ཏསྶ ཛཱཏིཡཱ ཨབྷཱཝཏོ ཛཱཏི-སདྡེན སཧ སམྦནྡྷོ ན སིཡཱ. ཝིཛྫམཱནསྶ ཧི ཛཱཏི ནཱམ ཧོཏི. ཡཐེཝ ཝཱ ཀུསལསྶ ཨབྷཱཝོ, ཨེཝཾ ཨབྱཱཀཏསྶཱཔི ཨབྷཱཝོ ཨཏྠཱིཏི ཨནབྱཱཀཏཛཱཏིཔི ཝཏྟབྦཱཏི ཙཏུཀྐཾ ཨཱཔཛྫེཡྻ. ན ཙེཏམིཊྛཾ ཀུསལཱདིཝསེན ཏིཝིདྷཛཱཏིཡཱ ཨེཝ ཨིཙྪིཏཏྟཱ, པཱལི༹ཡཉྩ ‘‘ཀུསལཱ དྷམྨཱ ཨཀུསལཱ དྷམྨཱ ཨབྱཱཀཏཱ དྷམྨཱ’’ཏི ཏིཀཝསེནེཝ ཝུཏྟཏྟཱ ‘‘ཀུསལཔཊིཔཀྑ’’ནྟི པན ཝུཙྩམཱནེ མིཏྟཔཊིཔཀྑོ ཨམིཏྟོ ཝིཡ, ལོབྷཔཊིཔཀྑོ ཨལོབྷོ ཝིཡ ཙ ཡཾ དྷམྨཛཱཏཾ ཀུསལསྶ ཨུཛུཝིཔཙྩནཱིཀབྷཱུཏཾ, ཏཾ ཨཀུསལནྟི ཏསྶ ཝསེན ཏིཀཾ ཨུཔཔནྣཾ ཧོཏི, ཨུཛུཝིཔཙྩནཱིཀཏཱ ཙསྶ སཱཝཛྫཱནིཊྛཝིཔཱཀཏྟཱ, ཏེན པཧཱཏབྦབྷཱཝཏོ ཙ ཝེདིཏབྦཱ, ན པན ཀུསལཝིནཱསནཏོ. ན ཧི ཨཀུསལེན ཀུསལཾ པཧཱིཡཏི, མཧཱབལཏྟཱ པན ཀུསལམེཝ ཏཾ པཛཧཏི. ཀུསལཉྷི མཧཱབལཾ, ཨཀུསལཾ དུབྦལཾ. ཏེནེཝཱཧ ‘‘ཨབལཱ ནཾ བལཱིཡནྟི, མདྡནྟེནཾ པརིསྶཡཱ’’ཏི (སུ. ནི. ༧༧༦), ཏསྨཱ ཀུསལམེཝ ཡཐཱཝུཏྟནཡེན ཨཀུསལསྶ པཧཱཡཀཾ, ནཱཀུསལཾ ཨིཏརསྶཱཏི ཝེདིཏབྦཾ.

ཏདུབྷཡ…པེ… ཨབྱཱཀཏནྟི ཡཾ དྷམྨཛཱཏཾ ཀུསལཾ ཝིཡ ན ཨནཝཛྫཨིཊྛཝིཔཱཀལཀྑཎཾ, ནཱཔི ཨཀུསལཾ ཝིཡ སཱཝཛྫཱནིཊྛཝིཔཱཀལཀྑཎཾ, ཨཐ ཁོ ཨཝིཔཱཀཏྟཱ ¶ ཏདུབྷཡཝིཔརཱིཏལཀྑཎཾ, ཏཾ ཨབྱཱཀཏནྟི ཨཏྠོ. ནནུ ཙ ‘‘ཏདུབྷཡཝིཔརཱིཏལཀྑཎ’’ནྟི ཝུཏྟེ སུཁདུཀྑཝེདནཱནཾ ཝིཔརཱིཏཱ ཨུཔེཀྑཱཝེདནཱ ¶ ཝིཡ ཨིཊྛཱནིཊྛཝིཔཱཀཱནཾ ཝིཔརཱིཏོ ཨཉྙོ ཀོཙི ཝིཔཱཀོ ཡསྶ ཨཏྠི, ཏཾ ཨབྱཱཀཏནྟི ཨཱཔཛྫཏཱིཏི? ནཱཔཛྫཏི ཏཐཱ ཨསམྦྷཝཏོ. ཡཐཱ ཧི ཨཱལོཀནྡྷཀཱརཱནཾ ཝིཔརཱིཏོ ཨཉྙོ ཀོཙི ནཏྠི, ཨེཝམིཊྛཱནིཊྛཝིཔཱཀཱནཾ ཝིཔརཱིཏོ ན ཀོཙི ཝིཔཱཀོ ཨཏྠཱིཏི. ཨཐ ཝཱ ཏཾ-སདྡོ ཨིདྷ ཨིཊྛཱནིཊྛཝིཔཱཀནིརཔེཀྑཾ ཀུསལཱཀུསལམཏྟམེཝ པཙྩཱམསཏཱིཏི ཀུསལཱཀུསལཱནཾ སཝིཔཱཀཏྟཱ ཏདུབྷཡཝིཔརཱིཏལཀྑཎཾ, ཏཾ ཨཝིཔཱཀལཀྑཎནྟི ཨཏྠོཏི ཨལམེཏྠ ཨནུཡོགེན. ཀུསལཱཀུསལབྷཱཝེན ན བྱཱཀཏནྟི ཨབྱཱཀཏཾ. ཀུསལཱཀུསལཉྷི ཝཏྭཱ ཨབྱཱཀཏསྶ ཝུཏྟཏྟཱ ཀུསལཱཀུསལབྷཱཝེནེཝ ཨཝུཏྟཏྟཱཏི ཝིཉྙཱཡཏི, ན པཀཱརནྟརེན. ཏཐཱ ཨཝཙནཉྩ ཏསྶ ཏདུབྷཡཝིཔརཱིཏལཀྑཎཏྟཱཡེཝ, ན པན ཨཝཏྟབྦཏྟཱམཏྟེནཱཏི དཊྛབྦཾ. ཨཐ ཝཱ ཝི-སདྡོ ཝིརོདྷིཝཙནོ. ཨཱ-སདྡོ ཨབྷིམུཁབྷཱཝཔྤཀཱསནོ, ཏསྨཱ ཨཏྟནོ པཙྩཡེཧི ཨཉྙམཉྙཾ ཝིརོདྷཱབྷིམུཁཏཾ ཀཏཾ ལཀྑཎཝིརོདྷཏོ པཧཱཡཀཔྤཧཱཏབྦབྷཱཝཏོ ཝཱཏི བྱཱཀཏཾ, ཀུསལཱཀུསལཾ. ཏཏོ ཨཉྙཾ ཨབྱཱཀཏཾ. ཏཉྷི ལཀྑཎཏོ ཨཉྙམཉྙཾ ཀུསལཱཀུསལཾ ཝིཡ ན ཏསྶ ཝིརུདྡྷཾ. ན ཧི ཨཝིཔཱཀཏཾ ཨནིཊྛཝིཔཱཀཏཱ ཝིཡ, ཨིཊྛཝིཔཱཀཏཱཡ ཨིཊྛཝིཔཱཀཏཱ ཝིཡ ཙ ཨནིཊྛཝིཔཱཀཏཱཡ ཨིཊྛཱནིཊྛཝིཔཱཀཏཱཧི ཝིརུཛ྄ཛྷཏི, ན ཙཱཔི ཨབྱཱཀཏཾ ཀུསལཱཀུསལེསུ ཀིཉྩི པཛཧཏི, ན ཙ ཀེནཙི པཧཱཏབྦནྟི. ‘‘ཏདུབྷཡཝིཔརཱིཏལཀྑཎམབྱཱཀཏ’’ནྟི ཝིཉྙཱཡམཱནེ ཨཧོསི ཀམྨཾ, ནཱཧོསི ཀམྨཝིཔཱཀོ, ནཏྠི ཀམྨཝིཔཱཀོ, ན བྷཝིསྶཏི ཀམྨཝིཔཱཀོཏི ཨིམིནཱ ཏིཀེན སངྒཧིཏསྶ གཏིཨུཔདྷིཀཱལཔྤཡོགཝིཔཏྟཱིཧི ཨཝིཔཱཀསྶ དིཊྛདྷམྨཝེདནཱིཡཱདིཀམྨསྶ བྷཱཝནཱཡཔཧཱཏབྦསྶ ཨཀུསལསྶ ཙ ཨབྷིཉྙཱཀུསལསྶ ཙ ཝིཔཱཀུཔྤཱདནཱབྷཱཝཏོ ‘‘སིཡཱ ནུ ཁོ ཨབྱཱཀཏབྷཱཝོ ཝཱ’’ཏི ཀདཱཙི ཀོཙི ཙིནྟེཡྻཱཏི ཏནྣིཝཱརཎཏྠམཱཧ ‘‘ཨཝིཔཱཀཱརཧཾ ཝཱ’’ཏི, ཝིཔཱཀཾ ¶ དཱཏུཾ ནཱརཧཏི ཏཏྠ སཱམཏྠིཡཱབྷཱཝཏོཏི ཨཝིཔཱཀཱརཧཾ. ཨིདཾ ཝུཏྟཾ ཧོཏི – དིཊྛདྷམྨཝེདནཱིཡཱདཡོ ཏཱཝ པཙྩཡཝེཀལླཱདཱིཧི ཀཱརཎེཧི ཨཝིཔཱཀཱ, སཙེ པནེཏེ ཏབྦིདཱུརཱ ཨསྶུ, ཏདཱ ཝིཔཱཀདཱནེ སམཏྠཏཱཡ ཝིཔཱཀཱརཧཱཡེཝ, ཏཾ པན ན ཏཐཱ, ཨཐ ཁོ ཡེན ཀེནཙི ཨཱཀཱརེན ཝིཔཱཀདཱནེ ཨསམཏྠཏཱཡེཝ ཝིཔཱཀཱརཧཾ ན ཧོཏི, ཏཾ ཨབྱཱཀཏཾ ནཱམཱཏི.

ཨིདཱནི ཨེཝཾ ཏིཀཝསེན ནིདྡིཊྛེསུ ཀུསལཱདཱིསུ པཋམཾ ཏཱཝ ཀུསལཙིཏྟཾ ཝིབྷཛནྟོ ‘‘ཏཏྠ ཀུསལཙིཏྟ’’ནྟིཨཱདིནཱ ཏསྶ གཎནཔརིཙྪེདཾ དསྶེཏི. ཨེཀཝཱིསཏིཝིདྷནྟི ཨཊྛ ཀཱམཱཝཙརཱནི ¶ , པཉྩ རཱུཔཱཝཙརཱནི, ཙཏྟཱརི ཨརཱུཔཱཝཙརཱནི, ཙཏྟཱརི ལོཀུཏྟརཱནཱིཏི ཨེཝཾ སངྑེཔཏོ ཨེཀཝཱིསཏིཝིདྷཾ. བྷཱུམིཏོ ཙཏུབྦིདྷནྟི ཀཱམརཱུཔཱརཱུཔལོཀུཏྟརབྷཱུམིསངྑཱཏཱནཾ ཙཏུནྣཾ བྷཱུམཱིནཾ ཝསེན ཏཏྠ པཝཏྟམཱནཾ ཙིཏྟམྤི ཙཏུབྦིདྷཾ ཧོཏི. ཏཏྠ བྷཝནྟི ཨེཏྠཱཏི བྷཱུམི, ཋཱནཾ, ཨཝཏྠཱ ཙ. ཨཝཏྠཱཔི ཧི ཨཝཏྠཝནྟཱནཾ པཝཏྟིཊྛཱནཾ ཝིཡ གཡ྄ཧཏི. ཨེཝཉྷི ནེསཾ སུཁགྒཧཎཾ ཧོཏི. ཨཝཏྠཱཏི ཙེཏྠ དྷམྨཱནཾ ཀཱམཏཎྷཱདཱིཧི པརིཙྪིནྣཱཔརིཙྪིནྣབྷཱཝོ. ཏཏྠ པུརིམཱ ཏིསྶོ བྷཱུམིཡོ ཨུབྷཡཝསེན ཝེདིཏབྦཱ, ཨིཏརཱ ཨཝཏྠཱཝསེནེཝ. ན ཧི ལོཀུཏྟརདྷམྨཱནཾ ཀཱམབྷཝཱདིཏོ ཨཉྙཾ ཋཱནམུཔལབྦྷཏཱིཏི.

ཨཉྙཏྠ པཝཏྟམཱནསྶཱཔི ཝཀྑམཱནནཡེན ཀཱམབྷཱུམིཔརིཡཱཔནྣཏྟཱ བྷཱུམིཏོ ཨེཀཝིདྷནྟི. སཝཏྠུཀཱཝཏྠུཀབྷེདཏོཏི ཙཀྑཱདཱིནི པཉྩ, ཧདཡཉྩཱཏི ཚ ཝཏྠཱུནི. ཀུསལསྶ པན ཙཀྑཱདིནིསྶིཏཏྟཱབྷཱཝཏོ ཧདཡཝཏྠུ ཨིདྷ ཝཏྠཱུཏི ཨདྷིཔྤེཏཾ. ཏེན སཧིཏཾ ཨེཀནྟེན ཏནྣིསྶིཏཔྤཝཏྟིཏོཏི སཝཏྠུཀཾ, ཀཱམརཱུཔདྷཱཏུཡཾ པཝཏྟམཱནཝིཉྙཱཎཾ. ཏཏྠ ཧི ཨརཱུཔསྶ རཱུཔཔཊིབནྡྷཔྤཝཏྟི, ཨརཱུཔདྷཱཏུཡཾ པན རཱུཔཱབྷཱཝཏོ ཝཏྠུཝིརཧིཏམེཝ པཝཏྟཏཱིཏི ཏཏྠ པཝཏྟམཱནཾ ¶ ཨཝཏྠུཀཾ. ཧཱིན…པེ… ཏིཝིདྷནྟི ཨེཏྠ པཙྩཡཏོ, ཕལཏོ ཙ མཛ྄ཛྷིམཔཎཱིཏེཧི ནིཧཱིནཾ, ཏེསཾ ཝཱ གུཎེཧི པརིཧཱིནནྟི ཧཱིནཾ, ཨཏྟནོ པཙྩཡེཧི པདྷཱནབྷཱཝཾ ནཱིཏནྟི པཎཱིཏཾ, ཨུབྷིནྣཾ ཝེམཛ྄ཛྷེ བྷཝཾ མཛ྄ཛྷིམཾ. ཏཏྠ ཧཱིནེན ཚནྡེན ཙིཏྟེན ཝཱིརིཡེན ཝཱིམཾསཱཡ ཝཱ པཝཏྟིཏཾ ཧཱིནཾ, མཛ྄ཛྷིམེཧི ཚནྡཱདཱིཧི པཝཏྟིཏཾ མཛ྄ཛྷིམཾ, པཎཱིཏེཧི པཎཱིཏཾ. ཚནྡཱདཱིནཾ པན ཧཱིནཱདིབྷཱཝོ ཨདྷིམུཏྟིཝསེན དཊྛབྦོ. ཧཱིནཱདྷིམུཏྟིཝསེན ཧི ནེསཾ ཧཱིནཏཱ, པཎཱིཏཱདྷིམུཏྟིཝསེན པཎཱིཏཏཱ, ཏདུབྷཡཝེམཛ྄ཛྷཝསེན མཛ྄ཛྷིམཏཱ. ཡསཀཱམཏཱཡ ཝཱ ཀཏཾ ཀུསལཾ ཧཱིནཾ, པུཉྙཕལཀཱམཏཱཡ མཛ྄ཛྷིམཾ, ‘‘པུཉྙཾ ནཱམེཏཾ སཱདྷཱུཧི ཀཏྟབྦམེཝཱ’’ཏི ཨེཝཾ ཨརིཡབྷཱཝཾ ནིསྶཱཡ ཀཏཾ པཎཱིཏཾ. ‘‘ཨཧམསྨི དཱནཔཏི, ཨིམེ པནཉྙེ དཱནདཱསཱདཡོ’’ཏིཨཱདིནཱ ཨཏྟུཀྐཾསནཔརཝམྦྷནཱཧི ཨུཔཀྐིལིཊྛཾ པཝཏྟིཏཾ ཝཱ ཧཱིནཾ, ཏཐཱ ཨནུཔཀྐིལིཊྛཾ མཛ྄ཛྷིམཾ, མགྒཕལཔདཊྛཱནཾ པཎཱིཏཾ. བྷཝབྷོགསམྤཏྟིནིམིཏྟཾ ཝཱ ཀཏཾ ཧཱིནཾ, སཱཝཀཔཙྩེཀབོདྷིཔཱརམིཏཱཝསེན ཨཏྟནོ ཝིམོཀྑཏྠཱཡ ཀཏཾ མཛ྄ཛྷིམཾ, སམྨཱསམྦོདྷིཔཱརམིཏཱཝསེན སབྦེསཾ ཝིམོཀྑཏྠཱཡ ཀཏཾ པཎཱིཏནྟི.

སོམནསྶུ…པེ… བྷེདཏོཏི བྷེད-སདྡོ པཙྩེཀཾ སམྦནྡྷིཏབྦོ ‘‘སོམནསྶུཔེཀྑཱབྷེདཏོ ཉཱཎབྷེདཏོ པཡོགབྷེདཏོ’’ཏི. ཏཏྠ པཡོགབྷེདཏོཏི སངྑཱརབྷེདཏོཏི ཨཏྠོ. ནནུ ཙ སོམནསྶུཔེཀྑཱབྷེདོ ¶ ཏཱཝ ཡུཏྟོ ཏེསཾ བྷིནྣསབྷཱཝཏྟཱ. ཉཱཎཔྤཡོགབྷེདོ པན ཀཐནྟི? ཝུཙྩཏེ – ཉཱཎཔྤཡོགཀཏོ བྷེདོ ཉཱཎཔྤཡོགབྷེདོ ཏེསཾ བྷཱཝཱབྷཱཝམུཔཱདཱཡ པཝཏྟཏྟཱ. ཨིདཱནི ཏམེཝ སོམནསྶུཔེཀྑཱདིབྷེདཾ ཝིབྷཱགེན དསྶེཏུཾ ‘‘སེཡྻཐིད’’ནྟི པུཙྪིཏྭཱ ‘‘སོམནསྶསཧགཏ’’ནྟིཨཱདིནཱ ཝིསྶཛྫེཏི. ཏཏྠ སེཡྻཐིདནྟི ཏཾ ཀཏམཾ, ཏཾ ཀཐནྟི ཝཱ ཨཏྠོ.

སོབྷནཾ ¶ མནོ, སོབྷནཾ ཝཱ མནོ ཨེཏསྶཱཏི སུམནོ, ཏསྶ བྷཱཝོ སོམནསྶཾ, མཱནསིཀསུཁཝེདནཱཡེཏཾ ཨདྷིཝཙནཾ, སོམནསྶེན ཨུཔྤཱདཏོ ཡཱཝ ནིརོདྷཱ སཧགཏཾ པཝཏྟཾ སཾསཊྛཾ སམྤཡུཏྟནྟི ཨཏྠོ. ཨཐ ཝཱ སོམནསྶེན སཧ ཨེཀུཔྤཱདཱདིབྷཱཝཾ གཏནྟི སོམནསྶསཧགཏཾ. ཛཱནཱཏི ཡཐཱསབྷཱཝཾ པཊིཝིཛ྄ཛྷཏཱིཏི ཉཱཎཾ, ཏེན སམཾ ཨེཀུཔྤཱདཱདཱིཧི པཀཱརེཧི ཡུཏྟནྟི ཉཱཎསམྤཡུཏྟཾ. ནཱསྶ སངྑཱརོ ཨཏྠཱིཏི ཨསངྑཱརཾ, ཨསངྑཱརམེཝ ཨསངྑཱརིཀཾ. སཧ སངྑཱརེན པཝཏྟམཱནཾ སསངྑཱརཾ, ཏདེཝ སསངྑཱརིཀཾ. སངྑཱརོཏི ཙེཏྠ ཨཏྟནོ, པརསྶ ཝཱ པུབྦཔྤཡོགོ ‘‘སངྑརོཏི ཏིཀྑབྷཱཝསངྑཱཏེན མཎྜནཝིསེསེན སཛྫེཏི, སངྑརཱིཡཏི ཝཱ སཛྫཱིཡཏི ཙིཏྟཾ ཨེཏེནཱ’’ཏི ཀཏྭཱ. ཏཏྠ དཱནཱདིཔུཉྙཀརཎཀཱལེ མཙྪེརམལཐིནམིདྡྷཱདཱིཧི ཨུཔཀྐིལེསེཧི སཾསཱིདམཱནེ ཙིཏྟེ ཨུཔཀྐིལེསཝཱུཔསམཝསེན, ཙིཏྟསྶ ཙ ཨུསྶཱཧཛནནཝསེན ཏཱིསུ དྭཱརེསུ པཝཏྟོ སམྨཱཝཱཡཱམོ ཨཏྟནོ པཡོགོ ནཱམ. ཀུསལཀརཎེ ནིརུསྶཱཧསྶ པན ‘‘ཨམྦྷོ, སཔྤུརིས, ཀུསལཀརཎཾ ནཱམ པཎྜིཏེཧི ཨཱསེཝིཏམགྒོ, ཏཏྠ ཏཡཱཔི པཊིཔཛྫིཏུཾ ཝཊྚཏི, ཏསྨཱ དཱནཾ དེཧི, སཱིལཾ རཀྑ, ཏཉྷི ཏེ ཨཏྠཱཡ ཧིཏཱཡ སུཁཱཡ བྷཝིསྶཏཱི’’ཏིཨཱདིནཱ ཀུསལཀརཎཏྠཱཡ ཨུསྶཱཧཛནནཝསེན པརེསཾ ཀཱཡཝཙཱིདྭཱརེསུ པཝཏྟཱ ཨཱཎཏྟི པརཔྤཡོགོ ནཱམ. ཏེསུ པན པུརིམོ པུབྦབྷཱགཔྤཝཏྟཙིཏྟསནྟཱནེ, པཙྪིམོ པརེསཾ ཙིཏྟསནྟཱནེཡེཝ སམྦྷཝཏཱིཏི ཏནྣིབྦཏྟིཏོ ཙིཏྟསྶ ཏིཀྑབྷཱཝསངྑཱཏོ ཝིསེསོ ཨིདྷ ཨུཔཙཱརཏོ སངྑཱརོཏི ཝེདིཏབྦོ. ཏེནཱཧུ ཨཱཙརིཡཱ –

‘‘པུབྦཔྤཡོགསམྦྷཱུཏོ, ཝིསེསོ ཙིཏྟསམྦྷཝཱི;

སངྑཱརོ ཨིཏི སངྑཱར-སབྷཱཝཉྙཱུཧི ཀིཏྟིཏོ’’ཏི.

ཨཐ ¶ ཝཱ ‘‘སསངྑཱརིཀམསངྑཱརིཀ’’ནྟི ཙ ཨེཏཾ ཀེཝལཾ སངྑཱརསྶ བྷཱཝཱབྷཱཝམཏྟཱཔེཀྑཱཡ ཝུཏྟཾ, ན ཏསྶ སཧཔྤཝཏྟིསབྦྷཱཝཱབྷཱཝཏོཏི བྷིནྣསནྟཱནཔྤཝཏྟིནོཔི སངྑཱརསྶ ཨིདམཏྠིཏཱཡ ཏཾཝསེན ནིབྦཏྟཾ ཙིཏྟཾ སངྑཱརོ ཨསྶ ཨཏྠཱིཏི སསངྑཱརིཀཾ སཧ-སདྡསྶ ཝིཛྫམཱནཏྠཔརིདཱིཔནཏོ ¶ ‘‘སལོམཀོ སཔཀྑཀོ’’ཏིཨཱདཱིསུ ཝིཡ. ཏབྦིཔརཱིཏཾ པན ཏདབྷཱཝཏོ ཡཐཱཝུཏྟཝསེནེཝ ཨསངྑཱརིཀཾ. ཨཐ ཝཱ སངྑརཎཾ, སངྑརཱིཡཏི ཝཱ ཨེཏེན ཨཱགནྟུཀསམྦྷཱུཏེན ཙིཏྟསཾསཱིདནསབྷཱཝཱཔནཡནཝསེནེཝ སཛྫཱིཡཏི, སངྑརོཏི ཝཱ ཏཾ ཡཐཱཝུཏྟཝསེནེཝཱཏི སངྑཱརོཏི ཨུཛུཀམེཝ པུབྦཔྤཡོགཛནིཏོ ཏིཀྑབྷཱཝོ ཝུཙྩཏི, ཏདབྷཱཝཏོ ཨསངྑཱརིཀཾ, སབྷཱཝཏིཀྑནྟི ཨཏྠོ. ཏཾསཧགཏཱཡ སསངྑཱརིཀཾ, ཨཐ ཝཱ མཙྪེརམལཱདཱིཧི སངྑརཱིཡཏཱིཏི སངྑཱརོ, ཙིཏྟསྶ སཾསཱིདནསབྷཱཝོ, སོ ཡསྶ ནཏྠཱིཏི ཨསངྑཱརིཀཾ, ཨིཏརཾ སསངྑཱརིཀཾ. པཎཱིཏཨུཏུབྷོཛནཱདིཀོ ཝཱ བལཝཔཙྩཡོ སངྑཱརོ ‘‘སངྑརོཏི ཙིཏྟཾ ཏིཀྑབྷཱཝེན, སངྑརཱིཡཏི ཝཱ ཏཾ ཨེཏེནཱ’’ཏི ཀཏྭཱ. ཨ-ཀཱརསྶ ཝུཌྜྷཏྠཝུཏྟིཏཱཡ ཝུཌྜྷིཔྤཏྟོ སངྑཱརོ ཨསྶཱཏི ཨསངྑཱརིཀཾ, བལཝཔཙྩཡཝནྟནྟི ཨཏྠོ. ཝུཌྜྷིཔརིདཱིཔཀེན པན ཨ-ཀཱརེན ཨཝིསེསིཏཏྟཱ སསངྑཱརིཀཾ སཔྤཙྩཡཾ དུབྦལཔཙྩཡནྟི ཨདྷིཔྤཱཡོ. ཉཱཎེན ཝིཔྤཡུཏྟཾ ཝིརཧིཏནྟི ཉཱཎཝིཔྤཡུཏྟཾ.

ཨུཔེཀྑཏཱིཏི ཨུཔེཀྑཱ, ཝེདིཡམཱནཱཔི ཨཱརམྨཎཾ ཨཛ྄ཛྷུཔེཀྑཏི, མཛ྄ཛྷཏྟཱཀཱརསཎྛིཏིཡཱཏི ཨཏྠོ. ཨཐ ཝཱ ཨིཊྛེ, ཨནིཊྛེ ཙ ཨཱརམྨཎེ པཀྑཔཱཏཱབྷཱཝེན ཨུཔཔཏྟིཏོ ཡུཏྟིཏོ ཨིཀྑཏི ཨནུབྷཝཏཱིཏི ཨུཔེཀྑཱ. ཨཐ ཝཱ ཨུཔེཏཱ སུཁདུཀྑཱནཾ ཨཝིརུདྡྷཱ ཨིཀྑཱ ཨནུབྷཝནནྟི ཨུཔེཀྑཱ. ཨཝིརུདྡྷཏྟཱཡེཝ ཧེསཱ ཏེསཾ ཨནནྟརམྤི པཝཏྟཏི. སུཁདུཀྑཝེདནཱ པན ཝིསུཾ ཝིསུཾ ཝིརུདྡྷསབྷཱཝཏྟཱ ནཱཉྙམཉྙཾ ཨནནྟརཾ པཝཏྟནྟི ¶ . ཏེནེཝ ཧི པཊྛཱནེ སོམནསྶསྶ ཨནནྟརཾ དོམནསྶསྶ, དོམནསྶསྶ ཨནནྟརཾ སོམནསྶསྶ ཙ ཨུཔྤཏྟི པཊིསིདྡྷཱ. ཨཡཉྩ ཨཏྠོ ལོབྷསཧགཏཙིཏྟསམྤཡུཏྟཝེདནཱཡཔི ལབྦྷཏི, པུརིམཱ པན དྭེ ན ཏཐཱ. ན ཧི ལོབྷསཧགཏཱདཱིནཾ མཛ྄ཛྷཏྟཱཀཱརེན ཨཛ྄ཛྷུཔེཀྑནཾ, ཨུཔཔཏྟིཏོ ཨིཀྑནཾ ཝཱ ཨཏྠཱིཏི. ཨུཔེཀྑཱསཧགཏནྟི སབྦཾ ཧེཊྛཱ ཝུཏྟནཡམེཝ.

ནནུ ཙ ཨཉྙེཔི ཕསྶཱདཡོ སམྤཡུཏྟདྷམྨཱ ཨཏྠཱིཏི སོམནསྶཱདཱིནཾ ཝསེནེཝ པན ཨཊྛཝིདྷཏཱ ཀསྨཱ གཧིཏཱཏི? བྷེདཀརབྷཱཝཏོ. ཕསྶཱདཱིནཉྷི སབྦཙིཏྟསཱདྷཱརཎཏྟཱ, སདྡྷཱདཱིནཉྩ སབྦཀུསལསཱདྷཱརཎཏྟཱ ན ཏེཧི ཙིཏྟསྶ ཝིབྷཱགོ, སོམནསྶཱདཡོ པན ཀཏྠཙི ཙིཏྟེ ཧོནྟི, ཀཏྠཙི ན ཧོནྟཱིཏི པཱཀཊོཝ ཏེཧི ཙིཏྟསྶ ཝིབྷཱགོཏི. ཀསྨཱ པནེཏེ ཀཏྠཙི ཙིཏྟེ ཧོནྟི, ཀཏྠཙི ན ཧོནྟཱིཏི? ཀཱརཎསྶ སནྣིཧིཏཱསནྣིཧིཏབྷཱཝཏོ. ཀིཾ པན ནེསཾ ཀཱརཎནྟི? ཝུཙྩཏེ – ཏཏྠ སོམནསྶསཧགཏབྷཱཝོ ཏཱཝ ཨཱརམྨཎཝསེན ཧོཏི. ཨིཊྛཱརམྨཎསྨིཉྷི ¶ སོམནསྶསཧགཏཙིཏྟམུཔྤཛྫཏི. ནནུ ཙ ཨིཊྛཱརམྨཎཾ ལོབྷསྶ ཝཏྠུ རཛྫནཱིཡཏྟཱཏི ཀཐཾ ཏཏྠ ཀུསལཾ ཨུཔྤཛྫཏཱིཏི? ནཡིདམེཀནྟིཀཾ ཨིཊྛེཔི ཨཱརམྨཎེ ནིཡམིཏཱདིཝསེན ཀུསལསྶ ཨུཔྤཛྫནཏོ. ཡསྶ ཧི ‘‘ཀུསལམེཝ མཡཱ ཀཏྟབྦ’’ནྟི ཀུསལཀརཎེཡེཝ ཙིཏྟཾ ནིཡམིཏཾ ཧོཏི, ཨཀུསལཔྤཝཏྟིཏོཝ ནིཝཏྟེཏྭཱ ཀུསལཀརཎེཡེཝ པརིཎཱམིཏཾ, ཨབྷིཎྷཀརཎེན ཙ ཀུསལཾ སམུདཱཙིཎྞཾ, པཊིརཱུཔདེསཝཱསསདྡྷམྨསྶཝནསཔྤུརིསཱུཔནིསྶཡཔུབྦེཀཏཔུཉྙཏཱསངྑཱཏཙཏུཙཀྐཱུཔནིསྶཡཝསེན, ཡོནིསོ ཙ ཨཱབྷོགོ པཝཏྟཏི, ཏསྶ ཨིཊྛེཔི ཨཱརམྨཎེ ཨལོབྷསམྤཡུཏྟམེཝ ཙིཏྟམུཔྤཛྫཏི, ན ལོབྷསམྤཡུཏྟཾ. ཧོཏི ཙེཏྠ –

‘‘ནིཡཱམཔརིཎཱམེཧི ¶ , སམུདཱཙིཎྞཏཱཡ ཙ;

ཉཱཎཔུབྦངྒམཱབྷོགཱ, ཨིཊྛེཔི ཀུསལཾ སིཡཱ’’ཏི.

ཨཔིཙ སདྡྷཱབཧུལཏཱདཱིཧི ཙ ཀཱརཎེཧི ཙིཏྟསྶ སོམནསྶསཧགཏཏཱ ཝེདིཏབྦཱ. ཨསྶདྡྷཱནཾ, ཧི མིཙྪཱདིཊྛིཀཱནཉྩ ཨེཀནྟམིཊྛཱརམྨཎབྷཱུཏཾ ཏཐཱགཏརཱུཔམྤི དིསྭཱ སོམནསྶཾ ན ཨུཔྤཛྫཏི. ཡེ ཙ ཀུསལཔྤཝཏྟིཡཾ ཨཱནིསཾསཾ ན པསྶནྟི, ཏེསཾ པརེཧི ཨུསྶཱཧིཏཱནཾ ཀུསལཾ ཀརོནྟཱནམྤི སོམནསྶཾ ན ཨུཔྤཛྫཏི, ཏསྨཱ སདྡྷཱབཧུལཏཱ ཝིསུདྡྷིདིཊྛིཏཱ ཨཱནིསཾསདསྶཱཝིཏཱཏི ཨིམེཧིཔི ཀཱརཎེཧི ཙིཏྟསྶ སོམནསྶསཧགཏཏཱ ཧོཏི.

ཨཔིཙ ཡེ ཏེ ཨེཀཱདས དྷམྨཱ པཱིཏིསམྦོཛ྄ཛྷངྒསྶ ཨུཔྤཱདཱཡ སཾཝཏྟནྟི. སེཡྻཐིདཾ – བུདྡྷཱནུསྶཏི དྷམྨཱནུསྶཏི སཾགྷཱནུསྶཏི སཱིལཱནུསྶཏི ཙཱགཱནུསྶཏི དེཝཏཱནུསྶཏི ཨུཔསམཱནུསྶཏི ལཱུཁཔུགྒལཔརིཝཛྫནཾ སིནིདྡྷཔུགྒལསེཝནཱ པསཱདནཱིཡསུཏྟནྟཔཙྩཝེཀྑཎཱ ཏདདྷིམུཏྟཏཱཏི ཨིམེཧིཔི ཀཱརཎེཧི ཙིཏྟསྶ སོམནསྶསཧགཏབྷཱཝོ ཝེདིཏབྦོ. བུདྡྷཱདིགུཎེ ཨནུསྶརནྟསྶ ཧི ཡཱཝ ཨུཔཙཱརུཔྤཱདཱ སཀལསརཱིརཾ ཕརམཱནཱ པཱིཏི ཨུཔྤཛྫཏི. ཏཐཱ དཱིགྷརཏྟཾ ཨཀྑཎྜཏཱདིཝསེན ཨཏྟནཱ རཀྑིཏཾ ཙཏུཔཱརིསུདྡྷིསཱིལཾ པཙྩཝེཀྑནྟསྶ, གིཧིནོ དསསཱིལཾ པཉྩསཱིལཾ པཙྩཝེཀྑནྟསྶ, དུབྦྷིཀྑབྷཡཱདཱིསུ པཎཱིཏཾ བྷོཛནཾ སབྲཧྨཙཱརཱིནཾ དཏྭཱ ‘‘ཨེཝཾནཱམ དཱནཾ ཨདཱསི’’ནྟི ཨཏྟནོཙཱགཾ པཙྩཝེཀྑནྟསྶ, གིཧིནོཔི ཏཐཱརཱུཔེ ཀཱལེ སཱིལཝནྟཱནཾ དིནྣདཱནཾ པཙྩཝེཀྑནྟསྶ, ཡེཧི གུཎེཧི སམནྣཱགཏཱ དེཝཱ དེཝཏྟཾ གཏཱ, ཏཐཱརཱུཔཱནཾ གུཎཱནཾ ཨཏྟནི ཨཏྠིཏཾ པཙྩཝེཀྑནྟསྶ, སམཐཝིཔསྶནཱཧི ཝིཀྑམྦྷིཏཀིལེསེ སཊྛིཔི ¶ སཏྟཏིཔི ཝསྶཱནི ཨསམུདཱཙརནྟེ དིསྭཱ ‘‘ཨཧོ མཡ྄ཧཾ ཀིལེསཱ ན སམུདཱཙརནྟཱི’’ཏི ཙིནྟེནྟསྶ, ཙེཏིཡདསྶནཐེརདསྶནེསུ ཨསཀྐཙྩཀིརིཡཱཡ སཾསུཙིཏལཱུཁབྷཱཝེན བུདྡྷཱདཱིསུ པསཱདསིནེཧཱབྷཱཝེན གདྲབྷཔིཊྛེ རཛསདིསེ ལཱུཁཔུགྒལེ ¶ པརིཝཛྫནྟསྶ, བུདྡྷཱདཱིསུ པསཱདབཧུལེ མུདུཙིཏྟེ སིནིདྡྷཔུགྒལེ པཊིསེཝནྟསྶ, རཏནཏྟཡགུཎཔརིདཱིཔཀེ པསཱདནཱིཡསུཏྟནྟེ པཙྩཝེཀྑནྟསྶ, ཋཱནནིསཛྫཱདཱིསུཔི པཱིཏིཨུཔྤཱདནཏྠཾ ཏནྣིནྣཏཱདིཝསེན པཝཏྟེནྟསྶ ཡེབྷུཡྻེན པཱིཏི ཨུཔྤཛྫཏི. པཱིཏིཡཱ ཙ སོམནསྶེན སཧ ཨཝིནཱབྷཱཝཏོ ཏདུཔྤཏྟིཡཱ ཏསྶཱཔི ཨུཔྤཏྟི ནིཡཏཱཏི ཨེཝཾ པཱིཏིཀཱརཎཱནིཔི སོམནསྶཀཱརཎཱནཱིཏི དཊྛབྦཱནི. ཀིཉྩ – ཨགམྦྷཱིརཔཀཏིཏཱ, སོམནསྶཔཊིསནྡྷིཀཏཱཏི ཨིམེཧི དྭཱིཧི ཀཱརཎེཧི སོམནསྶསཧགཏཏཱ ཧོཏི. ཡོ ཧི ཨགམྦྷཱིརཔཀཏིཀོ ཧོཏི, ཨཔྤམཏྟཀེཔི ཧིཏོཔཀརཎེ ཏུསྶཏི, ཡོ ཙ སོམནསྶཔཊིསནྡྷིཀོ ཨཔྤསནྣེསུ ཨཱརམྨཎེསུཔི ཨཔྤཊིཀྐཱུལདསྶཱཝཱི, ཏསྶ ཡེབྷུཡྻེན སོམནསྶསཧགཏཙིཏྟཾ ཨུཔྤཛྫཏི. ཡཐཱཝུཏྟཱནཾ པན སོམནསྶཀཱརཎཱནམབྷཱཝེན མཛ྄ཛྷཏྟཱརམྨཎཏཱཡ ཙ ཨུཔེཀྑཱསཧགཏཏཱ ཝེདིཏབྦཱ.

ཉཱཎསམྤཡུཏྟསྶ པན ཀམྨཏོ ཨུཔཔཏྟིཏོ ཨིནྡྲིཡཔརིཔཱཀཏོ ཀིལེསདཱུརཱིབྷཱཝཏོཏི ཨིམེཧི ཀཱརཎེཧི ཧོཏི. ཡོ ཧི པརེསཾ ཧིཏཛ྄ཛྷཱསཡེན དྷམྨཾ དེསེཏི ཧཱིནུཀྐཊྛཱདཱིནི ཙ ནལ༹ཀཱརམུདྡཱགཎནཱདཱིནི སིཔྤཱཡཏནཱནི, ཝཌྜྷཀཱིཀསིཝཱཎིཛྫཱདཱིནི ཙ ཀམྨཱཡཏནཱནི, ཝིསཧརཎཱདཱིནི ཙ ཝིཛྫཱཡཏནཱནཱིཏི ཨེཝཾ ནིརཝཛྫསིཔྤཱཡཏནཱདཱིནི སིཀྑཱཔེཏི, སཡཾ ཝཱ སིཀྑཏི, དྷམྨཀཐིཀསྶ སཀྐཱརཾ ཀཏྭཱ དྷམྨཾ ཀཐཱཔེཏི, ‘‘ཨཱཡཏིཾ པཉྙཝཱ བྷཝིསྶཱམཱི’’ཏི པཏྠནཾ པཊྛཔེཏྭཱ ནཱནཔྤཀཱརཾ པུཉྙཀམྨཾ ཀརོཏི, ཏསྶེཝཾ ནཱནཔྤཀཱརཾ པཉྙཱསཾཝཏྟནིཀཀམྨཾ སམྤཱདེནྟསྶ ཏཾ ཀམྨཾ ཨུཔནིསྶཱཡ ཨུཔྤཛྫམཱནཾ ཀུསལཾ ཉཱཎསམྤཡུཏྟཾ ཨུཔྤཛྫཏི. ཏཐཱ ཨབྱཱཔཛྫེ ལོཀེ ཨུཔྤནྣསྶ ཨུཔྤཛྫམཱནཾ ཀུསལཾ ཉཱཎསམྤཡུཏྟཾ ཧོཏི. ཝུཏྟཉྷེཏཾ –

‘‘ཏསྶ ¶ ཏཏྠ སུཁིནོ དྷམྨཔདཱནི པིལཝནྟི, དནྡྷོ, བྷིཀྑཝེ, སཏུཔྤཱདོ, ཨཐ སོ སཏྟོ ཁིཔྤམེཝ ཝིསེསབྷཱགཱི ཧོཏཱི’’ཏི (ཨ. ནི. ༤.༡༩༡).

ཏཐཱ པཉྙཱདསཀཾ སམྤཏྟསྶ ཨིནྡྲིཡཔརིཔཱཀཾ ནིསྶཱཡ ཨུཔྤཛྫམཱནཾ ཀུསལཾ ཉཱཎསམྤཡུཏྟཾ ཧོཏི. ཡེན པན སམཐཝིཔསྶནཱབྷཱཝནཱཧི ཀིལེསཱ ཝིཀྑམྦྷིཏཱ, ཏསྶ ཀིལེསདཱུརཱིབྷཱཝཾ ནིསྶཱཡ ཨུཔྤཛྫམཱནཾ ཙིཏྟཾ ཉཱཎསམྤཡུཏྟཾ ཨུཔྤཛྫཏི. ཡཐཱཧ –

‘‘ཡོགཱ ¶ ཝེ ཛཱཡཏེ བྷཱུརི, ཨཡོགཱ བྷཱུརིསངྑཡོ’’ཏི. (དྷ. པ. ༢༨༢).

ཨཔིཙ ཡེ ཏེ དྷམྨཱ དྷམྨཝིཙཡསམྦོཛ྄ཛྷངྒསྶ ཨུཔྤཱདཱཡ སཾཝཏྟནྟི. སེཡྻཐིདཾ – པརིཔུཙྪཀཏཱ ཝཏྠུཝིསདཀིརིཡཱ ཨིནྡྲིཡསམཏྟཔཊིཔཱདནཱ དུཔྤཉྙཔུགྒལཔརིཝཛྫནཱ པཉྙཝནྟཔུགྒལསེཝནཱ གམྦྷཱིརཉཱཎཙརིཡཔཙྩཝེཀྑཎཱ ཏདདྷིམུཏྟཏཱཏི ཨིམེཧི ཀཱརཎེཧི ཉཱཎསམྤཡུཏྟབྷཱཝོ ཧོཏི. ཏཐཱ ཧི ཡོ པཉྙཝནྟེ ཨུཔསངྐམྨ ཁནྡྷདྷཱཏུཨཱཡཏནཨིནྡྲིཡབལབོཛ྄ཛྷངྒམགྒངྒཛྷཱནངྒསམཐཝིཔསྶནཱདཱིནཾ པརིཔུཙྪཱབཧུལོ ཧོཏི, ཏསྶ ཏཾཝསེན ཨུཔྤནྣཾ སུཏམཡཉཱཎཾ ཨཱདིཾ ཀཏྭཱ ཨུཔྤཛྫམཱནཾ ཙིཏྟཾ ཉཱཎསཧགཏཾ ཧོཏི. ཡེན པན ནཁཀེསཙཱིཝརསེནཱསནཱདཱིནི ཨཛ྄ཛྷཏྟིཀབཱཧིརཝཏྠཱུནི པུབྦེ ཨཝིསདཱནི ཚེདནམལཧརཎཱདིནཱ ཝིསདཱནི ཀཏཱནི, ཏསྶེཝཾ ཝིསདཝཏྠུཀསྶ ཨུཔྤནྣེསུ ཙིཏྟཙེཏསིཀེསུ ཝིསདཾ ཉཱཎཾ ཧོཏི པརིསུདྡྷཱནི དཱིཔཀཔལླཀཱདཱིནི ནིསྶཱཡ ཨུཔྤནྣདཱིཔསིཁཱཡ ཨོབྷཱསོ ཝིཡ. ཡསྶ ཙ སདྡྷིནྡྲིཡཱདཱིསུ ཨཉྙཏརཾ བལཝཾ ཧོཏི, ཨིཏརཱནི མནྡཱནི, ཏཏོ ཏཱནི སཀསཀཀིཙྩཾ ཀཱཏུཾ ན སཀྐོནྟི, ཏསྨཱ སོ ཏསྶ བོཛ྄ཛྷངྒཝིབྷངྒེ ཨཱགཏནཡེན ཏེན ཏེན ཨཱཀཱརེན སམཏྟཾ པཊིཔཱདེཏི, ཏསྶེཝཾ ཨིནྡྲིཡཱནཾ སམཏྟཾ པཊིཔཱདེནྟསྶ ཝིཔསྶནཱཉཱཎཱདཱིནཾ ཝསེན ¶ ཙིཏྟཾ ཉཱཎསཧགཏཾ ཧོཏི. ཡོ པན དུཔྤཉྙཔུགྒལེ པརིཝཛྫེཏི, པཉྙཝནྟཔུགྒལེ ཝཱ པཡིརུཔཱསཏི, ཁནྡྷཱདཱིསུ ཨོགཱལ༹ྷཾ བྷགཝཏོ གམྦྷཱིརཉཱཎཙརིཡཾ ཝཱ པཙྩཝེཀྑཏི, ཋཱནནིསཛྫཱདཱིསུ ཏདདྷིམུཏྟཙིཏྟོ ཝཱ ཝིཧརཏི, ཨིམེསམྤི ཨུཔྤཛྫམཱནཾ ཀུསལཾ ཉཱཎསམྤཡུཏྟཾ ཧོཏི. ཨཔིཙ བུདྡྷཱདིགུཎཱནུསྶརཎེནཔི ཙིཏྟཾ ཉཱཎསཧགཏཾ ཧོཏི. ཡཐཱཧ –

‘‘ཡསྨིཾ, མཧཱནཱམ, སམཡེ ཨརིཡསཱཝཀོ ཏཐཱགཏཾ ཨནུསྶརཏི, ནེཝསྶ ཏསྨིཾ སམཡེ རཱགཔརིཡུཊྛིཏཾ ཙིཏྟཾ ཧོཏི, ན དོས…པེ… ན མོཧཔརིཡུཊྛིཏཾ ཙིཏྟཾ ཧོཏི, ཨུཛུགཏམེཝསྶ ཏསྨིཾ སམཡེ ཙིཏྟཾ ཧོཏི ཏཐཱགཏཾ ཨཱརབྦྷ. ཨུཛུགཏཙིཏྟོ ཁོ པན, མཧཱནཱམ, ཨརིཡསཱཝཀོ ལབྷཏི ཨཏྠཝེདཾ, ལབྷཏི དྷམྨཝེདཾ, ལབྷཏི དྷམྨཱུཔསཾཧིཏཾ པཱམོཛྫཾ, པམུདིཏསྶ པཱིཏི ཛཱཡཏི, པཱིཏིམནསྶ ཀཱཡོ པསྶམྦྷཏི, པསྶདྡྷཀཱཡོ སུཁཾ ཝེདེཏི, སུཁིནོ ཙིཏྟཾ སམཱདྷིཡཏི, སམཱཧིཏོ ཡཐཱབྷཱུཏཾ པཛཱནཱཏཱི’’ཏིཨཱདི (ཨ. ནི. ༦.༡༠; ༡༡.༡༡).

ཨེཝཾ བུདྡྷཱནུསྶཏིཨཱདཡོཔི རཱགཱདིམལཝིསོདྷནེན ཉཱཎུཔྤཏྟིཧེཏུཀཱཡེཝཱཏི དཊྛབྦཾ. ཀིཉྩ ¶ – ཏིཧེཏུཀཔཊིསནྡྷིཀཏཱ ཉཱཎུཔྤཏྟིཀཱརཎཾ. པཊིསནྡྷིཔཉྙཱ ཧི ཨཱདིཏོ པཊྛཱཡ བྷཝངྒསནྟཏིཝསེན བཧུལཾ པཝཏྟམཱནཱ སནྟཱནཔརིབྷཱཝནེན ཉཱཎུཔྤཏྟིཡཱ སཝིསེསཨུཔནིསྶཡོ ཧོཏི. ཨསངྑཱརིཀཏྟཾ པན སཔྤཱཡཨུཏུབྷོཛནཨཱཝཱསཱདིཔཙྩཡེཧི ཧོཏཱིཏི. ཧོནྟི ཙེཏྠ –

‘‘ཨིཊྛཱརམྨཎཏཱ སདྡྷཱབཱཧུལྱཾ དིཊྛིསུདྡྷི ཙ;

ཕལདསྶཱཝིཏཱ ཙེཝ, པཱིཏིབོཛ྄ཛྷངྒཧེཏུཡོ.

‘‘ཨེཀཱདས ¶ ཏཐཱ དྷམྨཱ, ཨགམྦྷཱིརསབྷཱཝཏཱ;

སོམནསྶཡུཏྟཱ སནྡྷི, ཨིཙྩེཏེ སུཁཧེཏུཡོ.

‘‘ཨབྷཱཝོ སུཁཧེཏཱུནཾ, མཛ྄ཛྷཏྟཱརམྨཎནྟི ཙ;

ཨུཔེཀྑུཔྤཏྟིཧེཏུ ཙ, ཨེཝཾ ཉེཡྻཱ ཝིབྷཱཝིནཱ.

‘‘ཀམྨཱུཔཔཏྟིཏོ ཙེཝ, ཏཐཱ ཨིནྡྲིཡཔཱཀཏོ;

ཀིལེསཱུཔསམཱ དྷམྨ-ཝིཙཡསྶ ཙ ཧེཏུཧི.

‘‘སཏྟདྷམྨེཧི བུདྡྷཱདི-གུཎཱནུསྶརཎེན ཙ;

སཔྤཉྙསནྡྷིཏོ ཙེཝ, ཙིཏྟཾ ཉཱཎཡུཏཾ སིཡཱ.

‘‘ཨུཏུབྷོཛནཨཱཝཱས-སཔྤཱཡཱདཱིཧི ཧེཏུཧི;

ཨསངྑཱརིཀབྷཱཝོཔི, ཝིཉྙཱཏབྦོ ཝིབྷཱཝིནཱ’’ཏི.

ཨེཝཾ ཝེདནཱཉཱཎཔྤཡོགབྷེདཏོ ཨཊྛཝིདྷཾ ཀཱམཱཝཙརཙིཏྟཾ ནིདྡིསིཏྭཱ ཨིདཱནི ཏཾ ནིགམེནྟོ ཨཱཧ ‘‘ཨིདཾ…པེ… ནཱམཱ’’ཏི.

༡༢. ཡེན པནཏྠེན ཨིདཾ ‘‘ཀཱམཱཝཙར’’ནྟི ཝུཙྩཏི, ཏཾ དཱནི དསྶེཏུཾ ‘‘ཨུདྡཱནཏོ’’ཏིཨཱདི ཨཱརདྡྷཾ. ཏཏྠ ཨུདྡཱནཏོཏི ཨུདྡེསཏོ, སངྑེཔཏོཏི ཨཏྠོ. ཀིཉྩཱཔི ཨཝསིཊྛཀིལེསཱདཡོ ཝིཡ ཀིལེསཀཱམོཔི ཨསྶཱདེཏབྦཏཱཡ ཝཏྠུཀཱམེ སངྒཧིཏོ ཉཱཎཾ ཝིཡ ཉེཡྻེཏི ¶ སངྑེཔཏོ ཨེཀོཡེཝ ཀཱམོ སིཡཱ, ཏཐཱཔི ཀིལེསཀཱམོ ཝཏྠུཀཱམབྷཱཝཾ གཙྪནྟོ ཀཱམནཱིཡཊྛེན གཙྪཏི, ན ཀཱམནཝསེན. ཀཱམནཝསེན ཙ པན ཀིལེསཀཱམོཝ ཧོཏི, ན པན ཝཏྠུཀཱམོཏི ཨཱཧ ‘‘ཀླེསཝཏྠུཝསཱ’’ཏིཨཱདི. ཀོ པནེཏྠ ཝཏྠུཀཱམོ, ཀོ ཀིལེསཀཱམོཏི ཙོདནཾ མནསི ནིདྷཱཡ ‘‘ཚནྡོ ཀཱམོ, རཱགོ ཀཱམོ, ཚནྡརཱགོ ཀཱམོ, སངྐཔྤོ ཀཱམོ, རཱགོ ཀཱམོ, སངྐཔྤརཱགོ ཀཱམོ’’ཏི (མཧཱནི. ༡) ཨེཝཾ ནིདྡེསཔཱལི༹ཡཾ ཨཱགཏཱ ནིདྡིཊྛཱ ¶ ཀཱམཏཎྷཱཝ ཨིདྷ ཀིལེསཀཱམོ. ཝཏྠུཀཱམོཏི ཙ ‘‘མནཱཔིཀཱ རཱུཔཱ…པེ… མནཱཔིཀཱ ཕོཊྛབྦཱ…པེ… སབྦེཔི ཀཱམཱཝཙརཱ དྷམྨཱ…པེ… སབྦེཔི རཱུཔཱཝཙརཱ…པེ… སབྦེཔི ཨརཱུཔཱཝཙརཱ…པེ… ཀཱམཱ’’ཏི (མཧཱནི. ༡) ཏཏྠེཝ ནིདྡིཊྛཱ སཝིཉྙཱཎཱཝིཉྙཱཎཔྤབྷེདཱ ཏེབྷཱུམཀདྷམྨཱཏི དསྶེནྟོ ཨཱཧ ‘‘ཀིལེསོ…པེ… ཝཊྚཀ’’ནྟི. ‘‘ཚནྡརཱགོཝཱ’’ཏི ཨཝདྷཱརཎེན ཀིལེསབྷཱཝེན ནིརུལ༹ྷེསུ ལོབྷདོསམོཧཱདཱིསུ དསསུ དོསམོཧཱདཡོ ནཝ ཀིལེསེ པཊིཀྑིཔཏི. ཀཱམརཱུཔཱརཱུཔཏཎྷཱཡ ཝཏྠུ པཏིཊྛཱནཾ, ཀཱརཎབྷཱུཏནྟི ཝཱ ཝཏྠུ.

༡༣. ཀཐཾ པན ཀིལེསཀཱམོ ནཱམ, ཀཐཉྩ ཝཏྠུཀཱམོཏི ཨཱཧ ‘‘ཀིལེསཀཱམོ’’ཏིཨཱདི. ཀཱམེཏཱིཏི ཝཏྠུཀཱམཾ པཏྠེཏི. ཀཱམཱིཡཏཱིཏི ཀིལེསཀཱམེན པཏྠཱིཡཏི. ཨིཏི-སདྡོ ‘‘ཏསྨཱ’’ཏི ཨིམསྶ ཨཏྠེ. ཙ-སདྡོ ཨེཝ-ཀཱརཏྠེ, ཏེན ཡསྨཱ ཀིལེསཀཱམོ ཀཱམེཏཱིཏི ཀཱམོ, ཝཏྠུཀཱམོ ཙ ཀཱམཱིཡཏཱིཏི, ཏསྨཱ ཨེཝ ཀིལེསཀཱམོ, ཝཏྠུཀཱམོ ཙཱཏི དུཝིདྷོཔི ཨེས ཀཱམོ ཀཱརཀདྭཡེ ཀཏྟརི, ཀམྨནི ཙ སིཛ྄ཛྷཏི, ཀཏྟུབྷཱཝཾ, ཀམྨབྷཱཝཉྩ པཙྩནུབྷོཏཱིཏི ཨཏྠོ. ཨཐ ཝཱ དུཝིདྷོཏི དྭིནྣཾ ཀཱམཱནཾ ཝཱཙཀཏོ དུཝིདྷོ. ‘‘ཀཱམོ’’ཏི ཨཡཾ སདྡོ ཀཱརཀདྭཡེ སིཛ྄ཛྷཏི ཡཐཱཝུཏྟཀཱརཀཡུགལེ༹ ནིཔྥཛྫཏི, ཀཏྟརི, ཀམྨནི ཙ ‘‘ཀཱམོ’’ཏི པདསམྦྷཝོ ཧོཏཱིཏི ཨཏྠོ. ཝོ-ཀཱརོ པན ནིཔཱཏམཏྟཾ ‘‘ཨེཝཾ ཝོ ཀཱལཱམཱ’’ཏིཨཱདཱིསུ (ཨ. ནི. ༣.༦༦) ཝིཡ. ཨཐ ཝཱ ཝོཀཱརཀདྭཡེཏི ཁནྡྷདྭཡེཏི ཨཏྠོ. ཀིལེསཀཱམོ ཧི སངྑཱརསབྷཱཝཏྟཱ སངྑཱརཀྑནྡྷེ, ཝཏྠུཀཱམོ ཙ ཝཀྑམཱནནཡེན པཉྩཀཱམགུཎབྷཱུཏོ རཱུཔསབྷཱཝཏྟཱ རཱུཔཀྑནྡྷེཏི ཨེཝཾ དུཝིདྷོཔེས ཀཱམོ ཁནྡྷདྭཡེ སིཛ྄ཛྷཏི ནིཔྥཛྫཏི, ཨནྟོབྷཱཝཾ གཙྪཏཱིཏི.

༡༤. སམྤཛྫནཱནི ¶ སམྤཏྟིཡོ, ཏཱསཾ ཝསེན ཝིསཡཝིསཡཱིབྷཱཝེན ཨཉྙམཉྙཾ སམོསརཎཝསེན, སམྤཱཔུཎནཝསེནཱཏི ཨཏྠོ. ཨིམིནཱ པན ཨིདཾ དཱིཔེཏི – ཡཏྠ དུཝིདྷོཔི ཀཱམོ ཝིསཡཝིསཡཱིབྷཱཝེན སཧིཏོ པཝཏྟཏི, སོཡེཝ ཨེཀཱདསཝིདྷོ པདེསོ ཀཱམཱཝཙརསཉྙིཏོ ¶ . ཡཏྠ པན རཱུཔཱརཱུཔདྷཱཏུཡཾ ཀེཝལཾ ཝཏྠུཀཱམོཝ པཝཏྟཏི, ན སོ པདེསོ ཀཱམཱཝཙརོ ནཱམཱཏི. ནནུ ཙ དུཝིདྷོཔི སཧིཏོ རཱུཔཱརཱུཔདྷཱཏཱུསུ པཝཏྟཏི, རཱུཔཱརཱུཔཱཝཙརདྷམྨཱནཾ ཝཏྠུཀཱམཏྟཱ, ཏདཱརམྨཎབྷཱུཏཱནཉྩ རཱུཔཱརཱུཔཏཎྷཱནཾ ཏཾཡོགེན ཀིལེསཀཱམབྷཱཝསིདྡྷིཏོཏི? ནཡིདམེཝཾ ཨོརམྦྷཱགིཡབྷཱུཏསྶ བཧལཀིལེསསྶེཝ ཀཱམརཱགསྶ ཨིདྷ ཀིལེསཀཱམབྷཱཝེན ཨདྷིཔྤེཏཏྟཱ. ‘‘ཨུདྡཱནཏོ དུཝེ ཀཱམཱ’’ཏི སབྦེ ཀཱམེ ཨུདྡིསིཏྭཱཔི ཧི ‘‘པདེསོ ཙཏུཔཱཡཱན’’ནྟིཨཱདིནཱ ཝིསཡནིཡམནེན ‘‘དུཝིདྷོཔི ཨཡ’’ནྟི ཨེཏྠ ཀཱམེཀདེསབྷཱུཏོ ནཱིཝརཎཱཝཏྠཱཡ ཀཐིཏོ ཀཱམརཱགོ ཀིལེསཀཱམབྷཱཝེན, ཏབྦཏྠུཀཱཡེཝ དྷམྨཱ ཝཏྠུཀཱམབྷཱཝེན གཧིཏཱ, ན རཱུཔཱརཱུཔཏཎྷཱ, ཏབྦཏྠུཀདྷམྨཱ ཙཱཏི ཉཱཔཱིཡཏི. ཨེཝཉྩ ཀཏྭཱ ཨུཔརི ཝཀྑམཱནཱ སསཏྠཱཝཙརཱུཔམཱ ཨུཔཔནྣཱ ཧོཏི, ཡཐཱཝུཏྟཱནམེཝ ཀཱམཱནཾ ཨིདྷ ཨདྷིཔྤེཏཏྟཱ རཱུཔཱརཱུཔདྷཱཏཱུསུ ཝིམཱནཀཔྤརུཀྑཝཏྠཱལངྐཱརཔརིཏྟཀུསལཱདིབྷེདེསུ ཀཱམཱཝཙརདྷམྨེསུ པཝཏྟོ ཚནྡརཱགོ ཀིལེསཀཱམོ ནཱམ ན ཧོཏི, ན ཙ ཏབྦཏྠུབྷཱུཏཾ ཝིམཱནཀཔྤརུཀྑཱདིཔརིཏྟདྷམྨཛཱཏཾ ཝཏྠུཀཱམོ ནཱམཱཏི སིདྡྷཾ. ཏེནེཝཱཧ ‘‘ཀཱམོ ཝཱ ཀཱམསཉྙཱ ཝཱ བྲཧྨལོཀེ ན ཝིཛྫཏཱི’’ཏི. ཀཱམཱཝཙརསཏྟསནྟཱནགཏཏཎྷཱཡ ཝིསཡབྷཱཝེ སཏི པན ཏཾཡོགེན རཱུཔཱརཱུཔདྷཱཏཱུསུཔི པཝཏྟམཱནོ པརིཏྟདྷམྨོ ཝཏྠུཀཱམོཡེཝཱཏི ཝེདིཏབྦཾ. ཨཐ ཝཱ ནིདྡེསེ ཨཱགཏནཡེན ནིརཝསེསོ ཀིལེསཀཱམོ ཀཱམཏཎྷཱབྷཝཏཎྷཱཝིབྷཝཏཎྷཱནིརོདྷཏཎྷཱཔབྷེདོ ཨིདྷ པཝཏྟཏི. ཝཏྠུཀཱམེསུཔི ¶ ཨཔྤཀཾ རཱུཔཱརཱུཔཝིཔཱཀམཏྟཾ ཋཔེཏྭཱ སབྦོཡེཝ ཨིདྷ པཝཏྟཏཱིཏི ཨནཝསེསཔྤཝཏྟིཾ སནྡྷཱཡ ‘‘ཀཱམོཡཾ དུཝིདྷོཔི ཙཱ’’ཏི ཝུཏྟཾ. ཀིཉྩཱཔི ཨེཝཾ ཝུཏྟཾ, ཏེསུ པན བཧལཀིལེསཀཱམབྷཱུཏོ བཧལཀཱམརཱགོ ཙ ཏབྦཏྠུཀཱ པཉྩ ཀཱམགུཎཱ ཙ ཨིདྷ གཧིཏཱཏི དསྶནཏྠཾ ‘‘སམྤཏྟཱིནཾ ཝསེནཱ’’ཏི ཝུཏྟཾ. སམྤཛྫནཝསེན, སམིཛ྄ཛྷནཝསེནཱཏི ཨཏྠོ. ཨཝཙརཏཱིཏི པཝཏྟཏི. ཨིཏི-སདྡོ ཧེཏུམྷི, ཡསྨཱ དུཝིདྷོཔི ཨཡཾ ཀཱམོ ཨཝཙརཏི, ཏསྨཱ ཀཱམོ ཨེཏྠ ཨཝཙརཏཱིཏི ཀཱམཱཝཙརསཉྙིཏོཏི ཨཏྠོ.

༡༥. སགྒམོཀྑཧེཏུབྷཱུཏཱ པུཉྙསམྨཏཱ ཨཡཱ ཡེབྷུཡྻེན ཨཔེཏཱཏི ཨཔཱཡཱ. ནིརཡཱདིཝསེན ཙཏྟཱརོ ཨཔཱཡཱ ཙཏུཔཱཡཱ. ཚནྣནྟི ཙཱཏུམཧཱརཱཛིཀཏཱཝཏིཾསཡཱམཱཏུསིཏཱནིམྨཱནརཏིཔརནིམྨིཏཝསཝཏྟིསངྑཱཏཱནཾ ཚནྣཾ དེཝལོཀཱནཾ. མེརུཔཱདཝཱསིནོ པན ཨསུརཱ ཏཱཝཏིཾསེསུཡེཝ སངྒཡ྄ཧནྟཱིཏི ན ཏེཧི སདྡྷིཾ སཏྟནྣནྟི ཝུཏྟཾ. མནསོ ཨུསྶནྣཏཱཡ མནུསྶཱ, སཏིསཱུརབྷཱཝབྲཧྨཙརིཡཡོགྱཏཱདིགུཎཝསེན ཨུཔཙིཏམཱནསཏཱཡ ཨུཀྐཊྛགུཎཙིཏྟཏཱཡཱཏི ཨཏྠོ, ཏེ པན ནིཔྤརིཡཱཡཏོ ཛམྦུདཱིཔཝཱསིནོ ཝེདིཏབྦཱ. ཡཐཱཧ –

‘‘ཏཱིཧི ¶ , བྷིཀྑཝེ, ཋཱནེཧི ཛམྦུདཱིཔཀཱ མནུསྶཱ ཨུཏྟརཀུརུཀེ ཙ མནུསྶེ ཨདྷིགྒཎྷནྟི དེཝེ ཙ ཏཱཝཏིཾསེ. ཀཏམེཧི ཏཱིཧི? སཱུརཱ སཏིམནྟོ ཨིདྷ བྲཧྨཙརིཡཝཱསོ’’ཏི (ཨ. ནི. ༩.༢༡).

ཏེཧི པན སམཱནརཱུཔཱདིཏཱཡ སདྡྷིཾ པརིཏྟདཱིཔཝཱསཱིཧི ཨིཏརམཧཱདཱིཔཝཱསིནོཔི ‘‘མནུསྶཱ’’ཨིཙྩེཝ པཉྙཱཡིཾསུ. ལོཀིཡཱ པན མནུནོ ཨཔཙྩབྷཱཝེནེཝ ‘‘མནུསྶཱ’’ཏི ཝདནྟི ¶ . ཨེཀཱདསཝིདྷོཏི ཙཏུརཱཔཱཡེསུ ཏིརཙྪཱནཔེཏྟིཝིསཡཱནཾ ཝིསུཾ པརིཙྪིནྣསྶ ཨོཀཱསསྶ ཨབྷཱཝེཔི ཡཏྠ ཏེ ཨརཉྙསམུདྡཔབྦཏཔཱདཱདིཀེ ནིབདྡྷཝཱསཾ ཝསནྟི, ཏཱདིསསྶ ཋཱནསྶ གཧིཏཏྟཱ ཨེཀཱདསཝིདྷོ.

༡༦. ནནུ ཙེཏྠ ཨཉྙེསམྤི དྷམྨཱནཾ པཝཏྟིསམྦྷཝཏོ ཀཱམསྶེཝ ཨཝཙརཎཝསེན ཀཐཾ ནཱམལཱབྷོཏི ཨཱཧ ‘‘ཨསྶཱབྷིལཀྑིཏཏྟཱ’’ཏིཨཱདི. ཏཏྠ ཨསྶཱཏི ཨིམསྶ དུཝིདྷསྶ ཀཱམསྶ. ཨབྷིལཀྑིཏཏྟཱཏི ཨེཀཱདསཝིདྷེ པདེསེ པཱཀཊཏྟཱ. ཨཐ ཝཱ ཨསྶཱཏི ཀརཎཏྠེ སཱམིཝཙནཾ, ཏསྨཱ ཨནེན དུཝིདྷེན ཀཱམེན ཨེཀཱདསཝིདྷསྶ པདེསསྶ ཨབྷིལཀྑིཏཏྟཱ, པཉྙཱཔིཏཏྟཱཏི ཨཏྠོ. ཨཐ ཝཱ ཨུཔཡོགཏྠེ སཱམིཝཙནཝསེན ཨསྶ ཨེཀཱདསཝིདྷསྶ པདེསསྶ ཏེན དུཝིདྷེན ཨབྷིལཀྑིཏཏྟཱཏི ཨཏྠོ. སཧ སཏྠེཧཱིཏི སསཏྠཱ, ཡཏྠ ཏེ ཨཝཙརནྟི, སོ སསཏྠཱཝཙརོ, པདེསོ. སོ ཝིཡ. ཡཐཱ ཧི ཡསྨིཾ པདེསེ སསཏྠཱ པུརིསཱ ཨཝཙརནྟི, སོ ཝིཛྫམཱནེསུཔི ཨཉྙེསུ དྭིཔདཙཏུཔྤདཱདཱིསུ ཨཝཙརནྟེསུ ཏེསཾ ཏཏྠ པཱཀཊཏྟཱ, ཏེཧི ཝཱ ཨབྷིལཀྑིཏཏྟཱ ‘‘སསཏྠཱཝཙརོ’’ཏྭེཝ པཉྙཱཡཏི, ཨེཝཾ ཝིཛྫམཱནེསུཔི ཨཉྙེསུ རཱུཔཱཝཙརཱདཱིསུ ཨཝཙརནྟེསུ ཨབྷིལཀྑཎཝསེན ཨཡཾ པདེསོ ‘‘ཀཱམཱཝཙརོ’’ཏྭེཝ སཉྙིཏོཏི. ཨེས ནཡོ རཱུཔཱརཱུཔཱཝཙརེསུ.

༡༧-༨. ནནུ ཙ ཙིཏྟཾ ཀཱམཱཝཙརནྟི ཝུཏྟཾ, ཡཐཱཝུཏྟནཡེན པན པདེསསྶ གཧིཏཏྟཱ ཀཐཾ ཏཏྠ ཨཝཙརནྟཾ ཀཱམཱཝཙརཾ ནཱམཱཏི ཨཱཧ ‘‘སྭཱཡ’’ནྟིཨཱདི. སོ ཨཡཾ ཀཱམཱཝཙརོ ‘‘ཀཱམོ’’ཏི སཉྙིཏོཏི སམྦནྡྷོ. རཱུཔབྷཝོ རཱུཔནྟི ཡཐཱ རཱུཔབྷཝོ རཱུཔཾ. ཨཝུཏྟོཔི ཧི ཡཐཱསདྡོ ཨེཝཾ-སདྡསནྣིཊྛཱནཏོ ལབྦྷཏི. ཡཐཱ ‘‘རཱུཔཱུཔཔཏྟིཡཱ མགྒཾ བྷཱཝེཏཱི’’ཏི ཨེཏྠ ‘‘རཱུཔབྷཝཱུཔཔཏྟིཡཱ’’ཏི ཝཏྟབྦེ རཱུཔབྷཝོ ¶ ‘‘རཱུཔ’’ནྟི སཉྙིཏོཏི ཨཡམེཏྠ ཨཏྠོ. ཀཐཾ པནེས ཨེཝཾ སཉྙིཏོཏི ཨཱཧ ‘‘ཨུཏྟརསྶཱ’’ཏིཨཱདི. ཨཐ ཝཱ ཡཐཱ ཨུཏྟརསྶ པདསྶ ལོཔཾ ཀཏྭཱ ¶ ཨུདཱིརིཏོ ཨེས རཱུཔབྷཝོ ‘‘རཱུཔ’’ནྟི སཉྙིཏོ, ཨེཝཾ སྭཱཡཾ ཀཱམཱཝཙརོ ཀཱམོཏི སམྦནྡྷོ. ཏསྨིཾ ཀཱམེཏི ཏསྨིཾ ཨུཏྟརཔདལོཔཝསེན ཀཱམསཉྙིཏེ པདེསེ. ཨིདནྟི ཨིདཾ ཨཊྛཝིདྷཾ ཙིཏྟཾ. ཨདྷིཀཱརཝསེན པན ཏསྶ གཧཎེཔི སབྦེསམེཝ པརིཏྟཙིཏྟཱནམཡམཏྠོ ལབྦྷཏི སབྦེསམྤི ཀཱམེ ཨཝཙརཎཏོ. སདཱཏི སབྦཀཱལཾ, བཱཧུལྱེནཱཏི ཨདྷིཔྤཱཡོ. ཨིམིནཱ པན ཨིདཾ དཱིཔེཏི – ཡཐཱ སངྒཱམེ ཡེབྷུཡྻེན ཨཝཙརནྟོ ‘‘སངྒཱམཱཝཙརོ’’ཏི ལདྡྷནཱམོ ཧཏྠཱི ཨཉྙཏྠ ཨཝཙརནྟོཔི བཱཧུལླཔྤཝཏྟིཝསེན ‘‘སངྒཱམཱཝཙརོ’’ཏྭེཝ པཉྙཱཡཏི, ཨེཝམིདཾ ཨཉྙཏྠ ཨཝཙརནྟམྤི ཀཱམལོཀེ བཱཧུལླཝུཏྟིཏོ ‘‘ཀཱམཱཝཙར’’མིཙྩེཝ ཝུཏྟནྟི. ཏེན པན ནནུ ཙེཏཾ རཱུཔཱརཱུཔབྷཝེསུཔི ཨཝཙརཎཏོ རཱུཔཱཝཙརཱདིནཱམམྤི ལབྷེཡྻཱཏི ཨིདཾ ཙོདནཾ པརིཧརཏི. ཧོཏི ཙེཏྠ –

‘‘ཀཱམེཝཙརཏཱིཏྱེཏཾ, ཀཱམཱཝཙརསཉྙིཏཾ;

སེསེ ཨཝཙརནྟམྤི, སངྒཱམཱཝཙརོ ཡཐཱ’’ཏི.

ཨིཏི-སདྡོ ཧེཏུམྷི. ཙ-སདྡོ ཝཏྟབྦནྟརསམུཙྩཡེ. ཏེན ཡསྨཱ ཨུཏྟརཔདལོཔེན ཀཱམཱཝཙརོ ‘‘ཀཱམོ’’ཏི སཉྙིཏོ, ཡསྨཱ ཙ ཏསྨིཾ ཀཱམེ ཨིདཾ ཙིཏྟཾ སདཱ ཨཝཙརཏི, ཏསྨཱ ‘‘ཀཱམཱཝཙར’’མིཙྩེཝ ཀཐིཏཾ, ན པན ཀཱམཱཝཙརཱཝཙརཾ, ནཱཔི རཱུཔཱརཱུཔཱཝཙརནྟི ཝཱཏི ཨདྷིཔྤཱཡོ. ཀཱམགྷཱཏིནཱཏི དེསནཱཉཱཎེན ཝིནེཡྻསནྟཱནགཏསྶ ཀིལེསཀཱམསྶ ཧནནསཱིལེན སམྨཱསམྦུདྡྷེན.

༡༩. པཊིསནྡྷིཾ ¶ …པེ… ཨཝཙཱརཡཏཱིཏི ཝཱཏི ཨཐ ཝཱ ཡསྨཱ ཡཏྠ ཀཏྠཙི ཨུཔྤནྣམྤི ཀཱམེ བྷཝེཡེཝ པཊིསནྡྷིཾ ཨཝཙཱརཡཏི, ཏསྨཱ ཨིདཾ ཀཱམེ ཨཝཙཱརཡཏཱིཏི ‘‘ཀཱམཱཝཙར’’ནྟི ཀཐིཏཾ ཙཱ-སདྡསྶ རསྶཏྟཾ ཀཏྭཱཏི ཨཏྠོ. ཨེཝཾ ཨུཏྟརཔདལོཔཝསེན པདསམྦྷཝཾ དསྶེཏྭཱ ཨིདཱནི ཝིནཱཔི ཨུཏྟརཔདལོཔཾ ཀཱམཱཝཙར-སདྡསྶ སམྦྷཝཾ དསྶེཏུཾ ‘‘པརིཡཱཔནྣནྟི ཏཏྲ ཝཱ’’ཏི ཝུཏྟཾ. ཏཏྲཱཏི ཏསྨིཾ ཀཱམབྷཝེ. པརིཡཱཔནྣནྟི ཨནྟོགདྷཾ. ཨཡཾ པནེཏྠ ཨདྷིཔྤཱཡོ –

‘‘ཀཏམེ དྷམྨཱ ཀཱམཱཝཙརཱ? ཧེཊྛཏོ ཨཝཱིཙིནིརཡཾ པརིཡནྟཾ ཀཏྭཱ ཨུཔརིཏོ པརནིམྨིཏཝསཝཏྟཱི དེཝེ ཨནྟོཀརིཏྭཱ ཡཾ ཨེཏསྨིཾ ཨནྟརེ ཨེཏྠཱཝཙརཱ ཨེཏྠ པརིཡཱཔནྣཱ ཁནྡྷདྷཱཏུཨཱཡཏནཱ ¶ རཱུཔཾ ཝེདནཱ སཉྙཱ སངྑཱརཱ ཝིཉྙཱཎཾ. ཨིམེ དྷམྨཱ ཀཱམཱཝཙརཱ’’ཏི (དྷ. ས. ༡༢༨༧) –

ཝུཏྟཏྟཱ ཡཐཱ མནུསྶིཏྠིཡཱ ཀུཙྪིསྨིཾ ནིབྦཏྟོཔི ཏིརཙྪཱནགཏིཀོ ཏིརཙྪཱནཡོནིཡམེཝ པརིཡཱཔནྣཏྟཱ ‘‘ཏིརཙྪཱནོ’’ཏྭེཝ ཝུཙྩཏི, ཨེཝམིདཾ རཱུཔཱརཱུཔབྷཝེསུ ཨུཔྤནྣམྤི ཀཱམབྷཝཔརིཡཱཔནྣཏྟཱ ‘‘ཀཱམཱཝཙར’’མིཙྩེཝ ཀཐིཏནྟི. ཏཔྤརིཡཱཔནྣཏཱ ཙསྶ ཨཝཱིཙིཔརནིམྨིཏཔརིཙྪིནྣོཀཱསནིནྣཱཡ ཀཱམཏཎྷཱཡ ཝིསཡབྷཱཝཏོཏི ཝེདིཏབྦཱ. ཏཐཱ ཧི ཝུཏྟཾ ཨཱཙརིཡདྷམྨཔཱལཏྠེརེན ནིཀྑེཔཀཎྜེཔི ‘‘‘ཨེཏྠཱཝཙརཱ’ཏི ཝཙནཾ ཨཝཱིཙིཔརནིམྨིཏཔརིཙྪིནྣོཀཱསཱཡ ཀཱམཏཎྷཱཡ ཝིསཡབྷཱཝཾ སནྡྷཱཡ ཝུཏྟ’’ནྟི. པདསམྦྷཝོ པནེཏྠ ཨེཝཾ ཝེདིཏབྦོ – ཀཱམཏཎྷཱ ཀཱམོ, སོ ཨེཏྠ ཨཱརམྨཎཀརཎཝསེན ཨཝཙརཏཱིཏི ཀཱམཱཝཙརནྟི. ནནུ ཙེཏྠ ཀཏམཱ ཀཱམཏཎྷཱ, ཡཱ ཀཱམཱཝཙརདྷམྨཱརམྨཎཱ ཏཎྷཱ. ཀཏམེ ཀཱམཱཝཙརདྷམྨཱ, ཡེ ཀཱམཏཎྷཱཝིསཡཱཏི ཨེཝཾ ཨིཏརཱིཏརནིསྶཡཏཱདོསོ ཨཱཔཛྫཏཱིཏི ¶ ? ནཱཔཛྫཏི, ཨཝཱིཙིཨཱདིཨེཀཱདསོཀཱསནིནྣཏཱཡ ཡཾཀིཉྩི ཏཎྷཾ ཀཱམཏཎྷཱབྷཱཝེན གཧེཏྭཱ ཏཾསབྷཱཝཱཡ ཏཎྷཱཡ ཝིསཡབྷཱཝེན ཀཱམཱཝཙརདྷམྨཱནཾ ཨུཔལཀྑེཏབྦབྷཱཝཏོ. ཨཐ ཝཱ ཀིལེསཝཏྠུཝསེན དུཝིདྷོཔི ཀཱམོ ཡཐཱརཧཾ སཧཛཱཏཝསེན ཨེཏྠ ཨཝཙརཏཱིཏི ཀཱམཱཝཙརཾ, ཨཱརམྨཎཀརཎཝསེན ཝཱ དུཝིདྷེཔི ཀཱམེ ཨེཏཾ ཨཝཙརཏཱིཏི ཀཱམཱཝཙརཾ. ཨཐ ཝཱ མཉྩནིསྶིཏཀེསུ ཨུཀྐུཊྛིཾ ཀརོནྟེསུ ནིསྶཡནིསྶིཏཱནཾ ཨབྷེདསྶ བུདྡྷིཡཱ གཧིཏཏྟཱ ནིསྶིཏཀེསུ ནིསྶཡཱུཔཙཱརཝསེན ‘‘མཉྩཱ ཨུཀྐུཊྛིཾ ཀརོནྟཱི’’ཏི ཝུཙྩཏི, ཨེཝམེཏམྤི ཀཱམཱཝཙརབྷཝེ པཝཏྟནཝསེན ཏནྣིསྶིཏཏྟཱ ནིསྶཡཝོཧཱརེན ‘‘ཀཱམཱཝཙར’’ནྟི ཝུཙྩཏི. ཧོཏི ཙེཏྠ –

‘‘ཀཱམོཝཙརཏཱིཏྱེཏྠ, ཀཱམེཝཙརཏཱིཏི ཝཱ;

ཋཱནཱུཔཙཱརཏོ ཝཱཔི, ཏཾ ཀཱམཱཝཙརཾ བྷཝེ’’ཏི.

༢༠. པུཛྫཕལནིབྦཏྟནཏོ, ཨཏྟསནྟཱནཾ པུནནཏོ ཙ པུཉྙཱནི, ཀཏྟབྦཏཱཡ ཀིརིཡཱ, ཏེསཾ ཏེསཾ ཨཱནིསཾསཱནཾ ཝཏྠུཏཱཡ ཝཏྠཱུནི ཙཱཏི པུཉྙཀིརིཡཝཏྠཱུནི. གཎནཏོ དསཔརིམཱཎཏྟཱ དས ཙ ཏཱནི པུཉྙཀིརིཡཝཏྠཱུནི ཙཱཏི དས པུཉྙཀིརིཡཝཏྠཱུནི, ཏེསཾ ཝསེནཱཏི དསཔུཉྙཀྲིཡཝཏྠུཝསེན, དསཔུཉྙཀིརིཡཝཏྠུབྷཱཝེན ཏཾམཡཾ ཧུཏྭཱཏི ཨཏྠོ. ཨེཝ-ཀཱརེན པན རཱུཔཱརཱུཔལོཀུཏྟརཾ ¶ ཝིཡ ན ཀེཝལཾ བྷཱཝནཱཝསེནེཝཱཏི དསྶེཏི. ཨཐ ཝཱ དསཔུཉྙཀིརིཡཝཏྠུཝསེནེཝ པཝཏྟཏི, ན པན པརེཧི པརིཀཔྤིཏཔརཔསཾསཱདིཔུཉྙཀིརིཡཝཏྠུཝསེནཱཏི ཨེཝ-སདྡེན ཨཝདྷཱརཎཾ. ཡཏོ ཝཀྑཏི ‘‘སབྦཱནུསྶཏིཔུཉྙཉྩཱ’’ཏིཨཱདི.

༢༡. ཀཱནི པན ཏཱནི དསཔུཉྙཀིརིཡཝཏྠཱུནི, ཡེསཾ ཝསེན ཨིདཾ ཨཊྛཝིདྷཾ ཙིཏྟཾ པཝཏྟཏཱིཏི ཝུཏྟནྟི ཨིམཾ ཨནུཡོགཾ སནྡྷཱཡ ཏཱནི སརཱུཔཏོ དསྶེཏུཾ ‘‘དཱནཾ སཱིལ’’ནྟིཨཱདི ཝུཏྟཾ ¶ . ཏཏྠ དིཡྻཏི ཨེཏེནཱཏི དཱནཾ, པརིཙྩཱགཙེཏནཱ. ཨིདྷ པན ཙིཏྟཱདྷིཀཱརཝསེན ཏཾསམྤཡུཏྟཾ གཧེཏབྦཾ. ཏཐཱ ‘‘སཱིལཱ’’དཱིསུཔི. སཱིལཏཱིཏི སཱིལཾ, ཀཱཡཝཙཱིཀམྨཱནི སམཱདཧཏཱིཏི ཨཏྠོ. སུསིལྱཝསེན ཧི ཀཱཡཀམྨཱདཱིནི ཨཝིཔྤཀིཎྞཱནི སམྤཏི, ཨཱཡཏིཉྩ ཧིཏསུཁཱཝཧཱནི སམྨཱ ཋཔིཏཱནི སམཱཧིཏཱནི ཧོནྟི, སཱིལཡཏི ཨུཔདྷཱརེཏཱིཏི ཝཱ སཱིལཾ. ཨུཔདྷཱརཎཾ པནེཏྠ ཀུསལཱནཾ ཨདྷིཊྛཱནབྷཱཝོ. བྷཱཝེཏི ཀུསལདྷམྨེ ཨཱསེཝཏི ཝཌྜྷེཏི ཨེཏཱཡཱཏི བྷཱཝནཱ. ཨཏྟནོ སནྟཱནེ ནིཔྥནྣཱ པཏྟི དིཡྻཏི ཨེཏེནཱཏི པཏྟིདཱནཾ. ཏཾཏཾཀིཙྩཀརཎེ བྱཱཝཊསྶ བྷཱཝོ ཝེཡྻཱཝཙྩཾ. དེསེཏི ཨེཏཱཡཱཏི དེསནཱ. པཏྟིཾ ཨནུམོདཏི ཨེཏེནཱཏི པཏྟཱནུམོདོ. པུབྦཔདལོཔེན པན ‘‘ཨནུམོདོ’’ཏི ཝུཏྟཾ. དིཊྛིཡཱ ཨུཛུབྷཱཝོ དིཊྛིཛུཏྟཾ, སམྨཱདིཊྛིཡཱ ཨུཛུཀརཎནྟི ཨཏྠོ. ཨཏྟནོ, པརསྶ ཝཱ ཧིཏཛ྄ཛྷཱསཡཝསེན སམྨཱ སུཎནྟི ཨེཏཱཡཱཏི སཾསུཏི. པཱུཛཱཝསེན ཨཔཙཱཡཏི སཱམཱིཙིཾ ཀརོཏི ཨེཏེནཱཏི ཨཔཙཱཡོ. པུཉྙཀིརིཡཝཏྠཱུནཾ པབྷེདོ པུཉྙཀིརིཡཝཏྠུཔྤབྷེདོ. མཛ྄ཛྷཔདལོཔཝསེན པན ‘‘པུཉྙཝཏྠུཔྤབྷེདོ’’ཏི ཝུཏྟཾ ཡཐཱ ཨཱཛཉྙཡུཏྟོ རཐོ ‘‘ཨཱཛཉྙརཐོ’’ཏི. ཨཡཾ ཏཱཝེཏྠ པདཝིཙཱརོ.

ཨཡཾ པན ཝིནིཙྪཡོ – ཏཏྠ སེཁཔུཐུཛྫནཱནཾ པརཾ ཨུདྡིསྶ པཱུཛཱནུགྒཧཀཱམཏཱཡ ཨཏྟནོ ཝིཛྫམཱནཝཏྠུཔརིཙྩཛནཝསེན པཝཏྟཱ ཙེཏནཱ དཱནམཡཔུཉྙཀིརིཡཝཏྠུ ནཱམ. ཁཱིཎཱསཝཱནམྤི ཏཐཱ པཝཏྟཱ དཱནམེཝ, སཱ པན པུཉྙཀིརིཡཱ ནཱམ ན ཧོཏཱིཏི ན ཨིདྷ ཨདྷིཔྤེཏཱ. པུཛྫཕལནིབྦཏྟནཏོ, ཧི ཨཏྟསནྟཱནཾ པུནནཏོ ཙ པུཉྙཾ, ན ཙ ཁཱིཎཱསཝསནྟཱནེ པཝཏྟཱ ཕལནིབྦཏྟིཀཱ ཧོཏི, ན ཙ ཏཾ པུནཱཏི ཝིསུདྡྷསནྟཱནཔྤཝཏྟཏྟཱཏི. ཨེཝཾ སེསེསུཔི.

ཡཱ པན ནིཙྩསཱིལཨུཔོསཐསཱིལཱདིཝསེན པཉྩསཱིལཾ ཨཊྛསཱིལཾ དསསཱིལཾ སམཱདིཡནྟསྶ, ཨསམཱདིཡནྟསྶཔི ཀུལཙཱརིཏྟཝསེན ¶ སམྤཏྟཀཱཡདུཙྩརིཏཱདཱིཧི ཝིརམནྟསྶ, ཨུཔསམྤདམཱལ༹ཀེ སཾཝརཾ སམཱདིཡནྟསྶ, པཱཏིམོཀྑཾ པརིཔཱུརེནྟསྶ, ཨཱཔཱཐགཏཝིསཡེསུ ཙཀྑཱདཱིནི ཨིནྡྲིཡཱནི ཐཀེནྟསྶ ¶ , ཙཱིཝརཱདིཀེ ཙ པཙྩཡེ པཙྩཝེཀྑནྟསྶ, ཀུཧནཱདིཝཏྠུཏོ ཨཱཛཱིཝཾ པརིསོདྷེནྟསྶ པཝཏྟཱ ཙེཏནཱ, ཨཡཾ སཱིལམཡཔུཉྙཀིརིཡཝཏྠུནཱམ. ཨེཏྠཱཧ – ‘‘དཱནཾ ནཱམེཏཾ མཡ྄ཧཾ ཀུལཝཾསོ ཀུལཙཱརིཏྟ’’ནྟི ཨེཝཾ ཙཱརིཏྟསཱིལེ ཋཏྭཱ དེནྟསྶ པཝཏྟཱ དཱནམཡཔུཉྙཀིརིཡཝཏྠུ ཀིཾ, ཨུདཱཧུ སཱིལམཡནྟི? སཱིལམཡམེཝ ཙཱརིཏྟསཱིལབྷཱཝཏོ. དེཡྻདྷམྨཔརིཙྩཱགཝསེན པཝཏྟཱཔི ཧེསཱ པུབྦཱབྷིསངྑཱརསྶ ཨཔརབྷཱགེ ཙེཏནཱཡ ཙ ཏཐཱ པཝཏྟཏྟཱ སཱིལམཡམེཝ པུཉྙཀིརིཡཝཏྠུ, ན དཱནམཡཾ. པཱུཛཱནུགྒཧཀཱམཏཱཡ ཧི དིནྣཾ དཱནམཡནྟི.

‘‘ཙཀྑུ ཨནིཙྩ’’ནྟིཨཱདིནཱ པན ཙཀྑཱདིཀེ ཏིལཀྑཎཾ ཨཱརོཔེཏྭཱ སམྨསནྟསྶ པཝཏྟཱ གོཏྲབྷུཝོདཱནཔརིཡོསཱནཱ ཝིཔསྶནཱཙེཏནཱ, ཀསིཎཱདཱིསུ ཨཱརམྨཎེསུ ཨཔྤནཾ ཨཔྤཏྟཱ གོཏྲབྷུཔརིཡོསཱནཱ པརིཀམྨཙེཏནཱ ཙཱཏི ཨཡཾ བྷཱཝནཱམཡཔུཉྙཀིརིཡཝཏྠུ ནཱམ. ཨཔྤནཱཔྤཏྟཱཔི བྷཱཝནཱཡེཝ, སཱ པན ན ཀཱམཱཝཙརཱཏི ཨིདྷ ན གཧིཏཱ. ནིརཝཛྫཝིཛྫཱཡཏནཀམྨཱཡཏནསིཔྤཱཡཏནཱནཾ སིཀྑནཙེཏནཱཔི བྷཱཝནཱམཡེཡེཝ སམོདྷཱནཾ གཙྪཏཱིཏི ཨཱཙརིཡཱ. ཡཱ ཙེཏྠ དེཡྻདྷམྨཾ ཁཡཏོ ཝཡཏོ སམྨསིཏྭཱ དདཏོ པཝཏྟཱ, སཱཔི པུབྦེ ཝིཡ ཨུབྷཡབྷཱགེ ཙེཏནཱནཾ ཏཐཱ པཝཏྟཏྟཱ བྷཱཝནཱམཡཔུཉྙཀིརིཡཝཏྠུཡེཝཱཏི ཝེདིཏབྦཾ.

དཱནཱདིཀཾ ཡཾ ཀིཉྩི སུཙརིཏཀམྨཾ ཀཏྭཱ ‘‘ཨསུཀསྶ ཙ ནཱམ པཏྟི ཧོཏུ, སབྦསཏྟཱནཾ ཝཱ ཧོཏཱུ’’ཏི ཨེཝཾ ཨཏྟནཱ ཀཏསྶ པརེཧི སཱདྷཱརཎབྷཱཝཾ པཙྩཱསཱིསནཝསེན པཝཏྟཱ པཏྟིདཱནམཡཔུཉྙཀིརིཡཝཏྠུ ནཱམ. ཀིཾ པནེཝཾ པཏྟིཾ དདཏོ པུཉྙཀྑཡོ ཧོཏཱིཏི? ན ཧོཏི, ཡཐཱ པན ཨེཀཾ དཱིཔཾ ཛཱལེཏྭཱ ཏཏོ དཱིཔསཧསྶཾ ཛཱལེནྟསྶ པཋམདཱིཔོ ཁཱིཎོཏི ¶ ན ཝཏྟབྦོ, པུརིམཱལོཀེན པན སདྡྷིཾ པཙྪིམཱལོཀསྶ ཨེཀཱིབྷཱཝེ ཨཏིམཧཱཝ ཧོཏི, ཨེཝམེཝ པཏྟིཾ དདཏོ པརིཧཱནི ནཱམ ན ཧོཏི, ཝུཌྜྷིཡེཝ པན ཧོཏཱིཏི དཊྛབྦཱ. ཀཐཾ པནེསཱ དིནྣཱ ནཱམ ཧོཏཱིཏི? ‘‘ཨིདཾ མེ པུཉྙཀམྨཾ སབྦསཏྟཱནཾ, ཨསུཀསྶ ཝཱ པརིཎམཏཱུ’’ཏི ཨེཝཾ པུབྦབྷཱགེ, པཙྪཱཔི ཝཱ ཝཙཱིབྷེདཾ ཀརོནྟེན མནསཱ ཨེཝ ཝཱ ཙིནྟེནྟེན དིནྣཱ ནཱམ ཧོཏི. ཀེཙི པན ‘‘ཡཾ མཡཱ ཀཏཾ སུཙརིཏཾ, ཏསྶ ཕལཾ ‘དམྨཱི’ཏི ཝུཏྟེཔི པཏྟི དིནྣཱཝ ཧོཏཱི’’ཏི ཝདནྟི. ཀུསལཀམྨཱདྷིཀཱརཏྟཱ པན པརེཧི ཙ ཀམྨསྶེཝ ཨནུམོདིཏབྦཏྟཱ ཀམྨམེཝ དཱཏབྦཾ, ཨནུམོདེནྟེནཔི ཀམྨམེཝ ཨནུམོདིཏབྦནྟི ཨིདམེཏྠ ཨཱཙརིཡཱནཾ སནྣིཊྛཱནཾ.

ཙཱིཝརཱདཱིསུ ¶ པཙྩཱསཱརཧིཏསྶ ཨསཾཀིལིཊྛེན ཨཛ྄ཛྷཱསཡེན སམཎབྲཱཧྨཎཱནཾ ཝཏྟཔཊིཝཏྟཀརཎཝསེན, གིལཱནུཔཊྛཱནཝསེན ཙ པཝཏྟཱ ཝེཡྻཱཝཙྩམཡཔུཉྙཀིརིཡཝཏྠུ ནཱམ.

ཨཱམིསཀིཉྩཀྑཱདིནིརཔེཀྑཙིཏྟསྶ ཨཏྟནོ པགུཎཾ དྷམྨཾ ཝིམུཏྟཱཡཏནསཱིསེ ཋཏྭཱ དེསེནྟསྶ, ཏཐེཝ ནིརཝཛྫཝིཛྫཱཡཏནཱདིཀཾ ཨུཔདིསནྟསྶ ཙ པཝཏྟཱ དེསནཱམཡཔུཉྙཀིརིཡཝཏྠུ ནཱམ. པརེཧི ཀཏཾ ཡཾ ཀིཉྩི སུཙརིཏཀམྨཾ དིནྣམདིནྣམྤི ཝཱ ཨིསྶཱམཙྪེརམལཾ པཧཱཡ ‘‘སཱདྷུ སུཊྛཱུ’’ཏི ཨནུམོདནྟསྶ པཝཏྟཱ ཨནུམོདནཔུཉྙཀིརིཡཝཏྠུ ནཱམ, ‘‘ཨཏྠི དིནྣ’’ནྟིཨཱདིནཱ ཀམྨསྶཀཏཱཉཱཎཝསེན དིཊྛིཾ ཨུཛུཾ ཀརོནྟསྶ པཝཏྟཱ དིཊྛིཛུཀམྨཔུཉྙཀིརིཡཝཏྠུ ནཱམ. ཡདི ཨེཝཾ ཉཱཎཝིཔྤཡུཏྟཙིཏྟསྶ དིཊྛིཛུཀམྨཔུཉྙཀིརིཡཏཱ ན ལབྦྷཏཱིཏི? ནོ ན ལབྦྷཏི པུརིམཔཙྪིམཙེཏནཱནམྤི ཏཾཏཾཔུཉྙཀིརིཡཱསྭེཝ སངྒཎྷནཏོ. ཏཐཱ ཧི ཝཀྑཏི –

‘‘པུརིམཱ མུཉྩནཱ ཙེཝ, པརཱ ཏིསྶོཔི ཙེཏནཱ;

ཧོཏི དཱནམཡཾ པུཉྙཾ, ཨེཝཾ སེསེསུ དཱིཔཡེ’’ཏི.

ཏསྨཱ ¶ ཀིཉྩཱཔི ཨུཛུཀརཎཝེལཱཡཾ ཉཱཎསམྤཡུཏྟམེཝ ཙིཏྟཾ ཧོཏི, པུརིམཔཙྪཱབྷཱགེ པན ཉཱཎཝིཔྤཡུཏྟམྤི ཧོཏཱིཏི ཏསྶཱཔི དིཊྛིཛུཀམྨཔུཉྙཀིརིཡབྷཱཝོ ཨུཔྤཛྫཏི.

ཨཔརེ པནཱཧུ – ཝིཉྙཱཎཔཉྙཱཎཝསེན དསྶནཾ དིཊྛི, ཙིཏྟཾ པཉྙཱ ཙ. དིཊྛིཡཱ ཨུཛུབྷཱཝོ དིཊྛིཛུཏྟཾ. ཀིཾ ཏཾ? ཀུསལཉྩ ཝིཉྙཱཎཾ ཀམྨསྶཀཏཱཉཱཎཱདི ཙ སམྨཱདསྶནཾ. ཏཏྠ ཀུསལཝིཉྙཱཎེན ཉཱཎུཔྤཱདེཔི ཨཏྟནོ སུཙརིཏཱནུསྶརཎཔརགུཎཔསཾསཱསརཎགམནཱནཾ སངྒཧོ, ཀམྨསྶཀཏཱཉཱཎེན ཀམྨཔཐསམྨཱདིཊྛིཡཱཏི. དཱནཱདིསམྤཡུཏྟཾ པན ཉཱཎཾ དཱནཱདཱིསྭེཝ ཨནྟོགདྷནྟི ཝེདིཏབྦཾ. ‘‘ཨེཝམིམཾ དྷམྨཾ སུཏྭཱ ཏཏྠ ཝུཏྟནཡེན པཊིཔཛྫནྟོ ལོཀིཡལོཀུཏྟརགུཎཝིསེསཾ ཨདྷིགམིསྶཱམི, བཧུསྶུཏོ ཝཱ ཧུཏྭཱ པརེ དྷམྨདེསནཱཡ ཨནུགྒཎྷིསྶཱམཱི’’ཏི ཨེཝཾ ཨཏྟནོ, པརེསཾ ཝཱ ཝིམུཏྟཱཡཏནསཱིསེན སདྡྷམྨཾ སུཎནྟསྶ པཝཏྟཱ སཝནམཡཔུཉྙཀིརིཡཝཏྠུ ནཱམ. ནིརཝཛྫཝིཛྫཱཡཏནཱདིསཝནཙེཏནཱཔི ཨེཏྠེཝ སངྒཡ྄ཧཏི. པཱུཛཱརཧེ, གརུཊྛཱནིཡེ, མཧལླཀེ ཙ དིསྭཱ ཨཱསནཱ ཝུཊྛཧནྟསྶ པཏྟཙཱིཝརཔཊིགྒཧཎམགྒདཱནཨབྷིཝཱདནཨཉྫལིཀམྨཀརཎཨཱསནཔུཔྥགནྡྷཱདིཨབྷིཧཱརཾ ཀརོནྟསྶ ཙ པཝཏྟཱ བཧུམཱནཙེཏནཱ ཨཔཙིཏིསཧགཏཔུཉྙཀིརིཡཝཏྠུ ¶ ནཱམ. ཝེཡྻཱཝཙྩཱཔཙཱཡནཱནཉྷི ཨཡཾ ཝིསེསོ – ཝཡསཱ, གུཎེན ཙ ཛེཊྛཱནཾ, གིལཱནཱནཉྩ ཏཾཏཾཀིཙྩཀརཎཾ ཝེཡྻཱཝཙྩཾ, སཱམཱིཙིཀིརིཡཱ ཨཔཙཱཡནནྟི.

༢༢-༣. ཨེཝཾ ཨཊྛཀཐཱཡ ཨཱགཏནཡེན དསཔུཉྙཀིརིཡཝཏྠཱུནི དསྶེཏྭཱ ཨིདཱནི སུཏྟེ ཨཱགཏནཡེན དཱནཾ སཱིལཾ བྷཱཝནཱཏི ཏཱིཎིཡེཝ དསྶེཏུཾ ཏེསུ ཨིཏརེསམྤི སངྒཧཾ དཱིཔེནྟོ ཨཱཧ ‘‘གཙྪནྟི སངྒཧ’’ནྟིཨཱདི. ཏཏྠ པཏྟིདཱནཱནུམོདནཱ དཱནེ སངྒཧཾ གཙྪནྟི ཏཾསབྷཱཝཏྟཱ. དཱནམྤི ཧི ཨིསྶཱམཙྪེརཱནཾ པཊིཔཀྑཾ, ཨེཏེཔི, ཏསྨཱ སམཱནཔཊིཔཀྑཏཱཡ ¶ དཱནེན སཧ ཨེཀལཀྑཎཏྟཱ ཨེཏེ དཱནམཡཔུཉྙཀིརིཡཝཏྠུམྷི སངྒཧཾ གཙྪནྟི. ཝེཡྻཱཝཙྩཱཔཙཱཡནཱ སཱིལམཡེ པུཉྙེ སངྒཧཾ གཙྪནྟི ཙཱརིཏྟསཱིལསབྷཱཝཏྟཱ. དེསནཱསཝནདིཊྛིཨུཛུཀཱ པན ཀུསལདྷམྨཱསེཝནཏོ བྷཱཝནཏོ བྷཱཝནཱམཡེ སངྒཧཾ གཙྪནྟི. ཀེཙི པན ‘‘དེསེནྟོ, སུཎནྟོ ཙ དེསནཱནུསཱརེན ཉཱཎཾ པེསེཏྭཱ ལཀྑཎཾ པཊིཝིཛ྄ཛྷ དེསེཏི, སུཎཱཏི ཙ, ཏཱནི ཙ དེསནཱསཝནཱནི པཊིཝེདྷམེཝ ཨཱཧརནྟཱིཏི དེསནཱསཝནཾ བྷཱཝནཱམཡེ སངྒཧཾ གཙྪཏཱི’’ཏི ཝདནྟི. དྷམྨདཱནབྷཱཝཏོ ‘‘དེསནཱ དཱནམཡེ སངྒཧཾ གཙྪཏཱི’’ཏིཔི སཀྐཱ ཝཏྟུཾ. ཏཐཱ དིཊྛིཛུཀམྨཾ སབྦཏྠཱཔི སབྦེསཾ ནིཡམནལཀྑཎཏྟཱཏི. དཱནཱདཱིསུ ཧི ཡཾ ཀིཉྩི ‘‘ཨཏྠི དིནྣ’’ནྟིཨཱདིནཡཔྤཝཏྟཱཡ སམྨཱདིཊྛིཡཱཝ ཝིསོདྷིཏཾ མཧཔྥལཾ ཧོཏི མཧཱནིསཾསནྟི. ཨེཝཉྩ ཀཏྭཱ དཱིགྷནིཀཱཡཊྛཀཐཱཡཾ ‘‘དིཊྛིཛུཀམྨཾ པན སབྦེསཾ ནིཡམནལཀྑཎ’’ནྟི (དཱི. ནི. ཨཊྛ. ༣.༣༠༥) ཝུཏྟཾ. མཧཱསཾགྷིཡཱ པན ཨབྷཡགིརིཝཱསིནོ ཙ དིཊྛིཛུཀམྨཾ ཝིསུཾ པུཉྙཀིརིཡབྷཱཝེན ན གཎྷནྟི. ཏཐཱ ཧི ཏེ དཱནཾ སཱིལཾ བྷཱཝནཱ སཾསུཏི དེསནཱནུསྶཏིམོདནཾ ཝེཡྻཱཝཙྩཔཱུཛཱསརཎཔྤཏྟིཔསཾསཱ ཙཱཏི ཨཏྟནཱ ཀཏཔུཉྙཱནུསྶརཎཾ བུདྡྷཱདཱིསུ སརཎགམནཾ པརགུཎཔསཾསཱཏི ཨིམཱནི ཏཱིཎི པཀྑིཔིཏྭཱ དིཊྛིཛུཀམྨཾ ཨགྒཧེཏྭཱ དྭཱདས པུཉྙཀིརིཡཝཏྠཱུནི པཉྙཱཔེནྟི. པུན ཏཱིཎེཝཱཏི པཋམཾ དསཱཔི སམཱནཱ པུན སངྑེཔཏོ ཏཱིཎེཝ སམྦྷོནྟི.

༢༤. ཨིདཱནི པརེཧི ནིདྡིསིཡམཱནཱནཾ པུཉྙཱནུསྶརཎཱདཱིནཾ ཨཏྟནཱ ནིདྡིཊྛེསྭེཝ སམོདྷཱནཾ དསྶེཏུཾ ‘‘སབྦཱནུསྶཏིཔུཉྙཉྩཱ’’ཏིཨཱདི ཝུཏྟཾ. ཏཏྠ སབྦསྶེཝ ཨཏྟནཱ ཀཏསུཙརིཏསྶ ཨནུསྶརཎཾ སབྦཱནུསྶཏིཔུཉྙཾ ནཱམ. པསཾསཱཏི པརེཧི ཀཏཱཡ པུཉྙཀིརིཡཱཡ, སམྨཱཔཊིཔཏྟིཡཱ ཙ ཝིཔྤསནྣཙིཏྟེན ¶ པསཾསནཾ, སནྟུསྶནནྟི ཨཏྠོ. སརཎཏྟཡནྟི ཨེཏྠ སརནྟི ཧིཾསནྟཱིཏི སརཎཱནི, བུདྡྷཱདཱིནི ཏཱིཎི རཏནཱནི. ཏཱནི ཧི སརཎགཏཱནཾ ཏེནེཝ སརཎགམནེན བྷཡཾ སནྟཱསཾ དུགྒཏིཔརིཀྐིལེསཾ ཧིཾསནྟི ཝིནཱསེནྟི. ཏཡོ ཨཝཡཝཱ ཨསྶཱཏི ཏཡཾ, ཏཱིཧི ཨཝཡཝེཧི ¶ ཡུཏྟསམུདཱཡསྶེཏཾ ཨདྷིཝཙནཾ, སརཎཱནཾ ཏཡཾ སརཎཏྟཡཾ, ཏཱིཎི སརཎཱནཱིཏི ཝུཏྟཾ ཧོཏི. ན ཧི ཨཝཡཝཝིནིམུཏྟོ སམུདཱཡོ ནཱམ ཀོཙི ཨཏྠཱིཏི. ཨིདྷ པན སརཎཏྟཡགྒཧཎེན ཨུཔཙཱརཏོ, ཨུཏྟརཔདལོཔཏོ ཝཱ སརཎགམནཾ ཨདྷིཔྤེཏཾ. ན ཧི སརཎཏྟཡཾ པུཉྙཀིརིཡཝཏྠུ ནཱམ ཧོཏི. ཨཏྠཏོ པནེཏཾ ‘‘སམྨཱསམྦུདྡྷོ ཝཏ སོ བྷགཝཱ, སྭཱཀྑཱཏོ དྷམྨོ, སུཔྤཊིཔནྣོ སཾགྷོ’’ཏིཨཱདིནཱ བུདྡྷཱདཱིསུ པསཱདཔཊིལཱབྷཝསེན པཝཏྟཱ ཙེཏནཱ དིཊྛིཛུཀམྨསྨིཾ སངྒཧཾ ཡནྟི ཏཾཝསེནེཝ ཏེསཾ ཨིཛ྄ཛྷཏོ. ན ཧི ཝིཔརཱིཏདིཊྛིཀསྶ ཨིམཱནི ཏཱིཎི སམྦྷཝནྟི, ཏསྨཱ ཏེ ཨེཀནྟེན དིཊྛིཛུཀམྨཔུཉྙཀིརིཡཝཏྠུསྨིཾ སངྒཧཾ གཙྪནྟི, ན ཝིསུཾ པུཉྙཀིརིཡབྷཱཝེན གཧེཏབྦཱཏི ཨདྷིཔྤཱཡོ. ཏེནཱཧ ‘‘ནཏྠི སཾསཡོ’’ཏི. དིཊྛིཛུཀམྨསྶ བྷཱཝནཱམཡསངྒཧེཔི སངྑེཔནཡེན བྷཱཝནཱམཡེ སངྒཡ྄ཧནྟི, ཝིཏྠཱརནཡེན པན ‘‘ཀཏྠ ནུ ཁོ’’ཏི སཾསཡོ སིཡཱཏི ཨིམེསཾ བྷཱཝནཱམཡསངྒཧོ ན ཝུཏྟོ. དིཊྛིཛུཀམྨསྶ ཝཱ སབྦེསཾ མཧཔྥལབྷཱཝནིཡཱམཀཏྟེན མཱུལབྷཱུཏཏྟཱ ཏསྶ པདྷཱནབྷཱཝཾ དསྶེཏུཾ ཝིསུཾ ཏཏྠ སངྒཡ྄ཧནྟཱིཏི ཝུཏྟཾ. ཨཔརེ པན ‘‘སངྒཎྷནྟོ སངྒཎྷཱཏི, གཎྷནྟོ ‘མུཉྩཏཱི’ཏི ཝཙནཏོ སརཎགམནསྶ སཱིལསམཱདཱནེ ཝིཡ གཧཎཾ སམྦྷཝཏཱིཏི སཱིལམཡེ སངྒཡ྄ཧཏཱི’’ཏི ཝདནྟི. ‘‘སརཎགམནཾ པཎིཔཱཏབྷཱཝཏོ ཨཔཙིཏིསཧགཏེ སངྒཡ྄ཧཏཱི’’ཏི ཀེཙི.

༢༥. ཨིདཱནི ཡཐཱཝུཏྟཔུཉྙཀིརིཡཝཏྠཱུནཾ པུརིམཔཙྪིམབྷཱགཝསེན པཝཏྟམཱནཱཔི ཙེཏནཱ ཏཏྠ ཏཏྠེཝ སངྒཧཾ གཙྪནྟཱིཏི ¶ དསྶེཏུཾ ‘‘པུརིམཱ མུཉྩནཱ’’ཏིཨཱདི ཝུཏྟཾ. ཏཏྠ པུརིམཱཏི དཱནཏྠཱཡ དེཡྻདྷམྨཾ དྷམྨེན སམེན ཨུཔྤཱདེནྟསྶ, ཨུཔྤནྣཾ ‘‘པརིཙྩཛིསྶཱམཱི’’ཏི ཙིནྟེནྟསྶ, དཀྑིཎེཡྻཾ པརིཡེསནྟསྶ ཙ ཡཱཝ ཝཏྠུནོ པཊིགྒཱཧཀསྶ ཧཏྠེ ཝིསྶཛྫནཾ, པརིཎཱམནཾ ཝཱ, ཏཱཝ པཝཏྟཱ པུབྦབྷཱགཙེཏནཱ. པཊིགྒཱཧཀསྶ པན ཧཏྠེ ཝིསྶཛྫནཙེཏནཱ, པརིཎཱམནཙེཏནཱ ཝཱ མུཉྩནཙེཏནཱ ནཱམ. སཱཡེཝ ནིགྒཧཱིཏལོཔེན ‘‘མུཙནཱ’’ཏི ཝུཏྟཱ. ‘‘མུཉྩནཱ’’ཨིཏིཡེཝ ཝཱ པཱཋོ. པརཱཏི ཨཏྟནཱ ཝིསྶཊྛཝཏྠུམྷི ཨཱལཡཾ ཨཀཏྭཱ ‘‘སཱདྷུ སུཊྛུ ཨགྒཾ དཱནཾ མེ དིནྣ’’ནྟི སོམནསྶཙིཏྟེན པཙྩཝེཀྑནྟསྶ ཨུཔྤནྣཱ ཨཔརབྷཱགཙེཏནཱ. ཏིསྶོཔི ཙེཏནཱཏི ཨིཏི ཨཡཉྩ པུརིམཱ ཙེཏནཱ, ཨཡཉྩ མུཉྩནཙེཏནཱ, ཨཡཉྩ ཨཔརཙེཏནཱཏི ཏིསྶོཔི ཙེཏནཱ ཨེཀཏོ ཧུཏྭཱ དཱནམཡཾ པུཉྙཾ ཧོཏི, དཱནམཡཔུཉྙཀིརིཡཝཏྠུ ནཱམ ཧོཏཱིཏི ཨཏྠོ. ‘‘པུཉྙ’’ནྟི པདཾ ཨཔེཀྑིཏྭཱ ‘‘ཧོཏཱི’’ཏི ཨེཀཝཙནནིདྡེསོ. ཨིདཱནི ཡཐཱཝུཏྟམཏྠཾ སེསེསུཔི ཨཏིདིསནྟོ ཨཱཧ ‘‘ཨེཝཾ སེསེསུ དཱིཔཡེ’’ཏི. སེསེསཱུཏི སཱིལཱདཱིསུ པུཉྙཀིརིཡཝཏྠཱུསུ ཨེཝཾ ཡཐཱཝུཏྟནཡེན ‘‘སཱིལཾ ‘རཀྑིསྶཱམཱི’ཏི ཙིནྟེནྟསྶ, ‘པབྦཛིསྶཱམཱི’ཏི ཝིཧཱརཾ གཙྪནྟསྶ པཝཏྟཱ པུརིམཙེཏནཱ, སཱིལཾ ¶ སམཱདིཡནྟསྶ, པབྦཛནྟསྶ, སཱིལཾ པརིཔཱུརེནྟསྶ ཨུཔྤནྣཱ མཛ྄ཛྷིམཙེཏནཱ, ‘པཱུརིཏཾ མེ’ཏི པཙྩཝེཀྑནྟསྶ ཨུཔྤནྣཱ ཨཔརཙེཏནཱཏི ཨེཝཾ ཏིསྶོཔི ཙེཏནཱ ཨེཀཏོ ཧུཏྭཱ སཱིལམཡཔུཉྙཀིརིཡཝཏྠུ ནཱམཱ’’ཏིཨཱདིནཱ དཱིཔཡེ, པཀཱསེཡྻཱཏི ཨཏྠོ. ནནུ ཙ ཨཏྟནཱ ཀཏཔུཉྙཱནུསྶརཎཙེཏནཱ དིཊྛིཛུཀམྨསངྒཧིཏཱ, ཨཡཉྩ ཨཔརཙེཏནཱ སཱཡེཝཱཏི ཀཐམསྶཱ ཏཏྠ སངྒཧོཏི? ནཱཡཾ དོསོ, ཝིསཡབྷེདེན ཨུབྷིནྣམྤི ཝིསེསསབྦྷཱཝཏོ. པུཉྙཱནུསྶརཎཉྷི ཨཏྟནཱ ཀཏཔུཉྙཝིསཡམེཝ. ཨཡཾ པན ཏབྦཏྠུཝིསཡཱཏི པཱཀཊོཡེཝ དྭིནྣཾ ཝིསེསོཏི.

ཨེཏྟཱཝཏཱ ¶ ཙ ཡཾ ཝུཏྟཾ ‘‘དསཔུཉྙཀིརིཡཝཏྠུཝསེནེཝ པཝཏྟཏཱི’’ཏི, ཏཏྠ དསཔུཉྙཀིརིཡཝཏྠཱུནི སརཱུཔཏོ, སངྒཧཏོ ཙ ནིདྡིསིཏྭཱ ཨིདཱནི ཏཐཱཔཝཏྟམཱནསྶ ཙསྶ པཱཊེཀྐཾ པཝཏྟཱཀཱརཝིསཡཾ དསྶེཏུཾ ‘‘ཨིདཱནཱི’’ཏིཨཱདི ཨཱརདྡྷཾ. ཏཏྠ ཨཡནྟི ཝཀྑམཱནནིདསྶནཾ. དཱཏབྦོ དྷམྨོ དེཡྻདྷམྨོ, ཨནྣཱདིདསཝིདྷཾ ཝཏྠུ. ཝུཏྟཉྷི –

‘‘ཨནྣཾ པཱནཾ ཝཏྠཾ ཡཱནཾ, མཱལཱགནྡྷཝིལེཔནཾ;

སེཡྻཱཝསཐཔདཱིཔེཡྻཾ, དཱནཝཏྠཱུ དསཱཝིམེ’’ཏི.

པཊིགྒཱཧཀོ ཨཱདི ཡེསཾ དེསཀཱལམིཏྟཱདཱིནཾ ཏེ པཊིགྒཱཧཀཱདཡོ, དེཡྻདྷམྨསྶ, པཊིགྒཱཧཀཱདཱིནཉྩ སམྤཏྟི སམྤནྣཏཱ དེཡྻདྷམྨཔཊིགྒཱཧཀཱདིསམྤཏྟི. ཏཏྠ དེཡྻདྷམྨསྶ པཎཱིཏམནཱཔབྷཱཝོ དྷམྨེན སམེན ཨུཔྤནྣབྷཱཝོ དེཡྻདྷམྨསམྤཏྟི. པཊིགྒཱཧཀཱནཾ ཨགྒདཀྑིཎེཡྻབྷཱཝོ པཊིགྒཱཧཀསམྤཏྟི. དུལླབྷཨནྣཔཱནཱདིཀོ དེསོ དེསསམྤཏྟི. ཏཱདིསོཝ ཀཱལོ ཀཱལསམྤཏྟི. དུལླབྷཨནྣཔཱནཱདིཀེ ཧི དེསེ, ཀཱལེ ཝཱ དིནྣཾ ཨཛ྄ཛྷཱསཡསྶ བལཝཏཱཡ མཧཔྥལཾ, སོམནསྶཧེཏུཀཉྩ ཧོཏི, ཏསྨཱ ཏེ དཱནསྶ སམྤཏྟིཝསེན ཝུཏྟཱ. མིཏྟསམྤཏྟི པན ཀལྱཱཎམིཏྟབྷཱཝོ. ཀལྱཱཎམིཏྟཉྷི ནིསྶཱཡ དཱནཱདཱིསུ ཙིཏྟཾ ཨོདགྱཔྤཏྟཾ ཧོཏི. པརིཙཱརིཀསམྤཏྟི པན ཨནཱཎཏྟིཡཱཔི ཏཾཏཾཀིཙྩསམྤཱདནེ ཨཔྤམཏྟསྶ པརིཙཱརིཀཛནསྶ པཊིལཱབྷོ. ཨཉྙཾ ཝཱ སོམནསྶཧེཏུནྟི སདྡྷཱབཧུལཏཱཝིསུདྡྷིདིཊྛིཏཱདིབྷེདཾ ཨཉྙཾ སོམནསྶཀཱརཎཾ ཝཱ. ཨཱགམྨཱཏི ཨུཔཱགམྨ, པཊིཙྩཱཏི ཨཏྠོ. ཧཊྛཔཧཊྛོཏི སོམནསྶཝསེན ཧཊྛོ ཙེཝ པཧཊྛོ ཙ. ཨུབྷཡེནཔི ཨདྷིཀསོམནསྶཾ ཝུཏྟཾ. ཨཏྠི…པེ… པཝཏྟནྟི ‘‘ཨཏྠི དིནྣཾ, ཨཏྠི ཡིཊྛཾ, ཨཏྠི ཧུཏཾ, ཨཏྠི སུཀཏདུཀྐཊཱནཾ ཀམྨཱནཾ ཕལཾ ཝིཔཱཀོ, ཨཏྠི ཨཡཾ ལོཀོ, ཨཏྠི པརོ ལོཀོ, ཨཏྠི མཱཏཱ, ཨཏྠི པིཏཱ, ཨཏྠི སཏྟཱ ཨོཔཔཱཏིཀཱ, ཨཏྠི ལོཀེ ¶ སམཎབྲཱཧྨཎཱ སམྨགྒཏཱ ¶ སམྨཱཔཊིཔནྣཱ, ཡེ ཨིམཉྩ ལོཀཾ པརཉྩ ལོཀཾ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརནྟཱི’’ཏི (མ. ནི. ༡.༤༤༡) ཨེཝཾ པཝཏྟཾ དསཝིདྷཾ སམྨཱདིཊྛིཝཏྠུཝསེན ཙེཝ དྷམྨཝིཙཡསམྦོཛ྄ཛྷངྒཊྛཱནིཡཱདཱིནཾ ཝསེན ཙ པཝཏྟཾ. ཨཱདི-སདྡེན ཧི ན ཀེཝལཾ ནཝནྣཾཡེཝ སམྨཱདིཊྛིཝཏྠཱུནཾ གཧཎཾ, ཨཐ ཁོ དྷམྨཝིཙཡསམྦོཛ྄ཛྷངྒཊྛཱནིཡཱནམྤི སངྒཧོ. སམྨཱ ཉཱཡེན པཝཏྟཱ དིཊྛི, པསཏྠཱ ཝཱ དིཊྛཱིཏི སམྨཱདིཊྛི, ཏཾ. པུརཀྑཏྭཱཏི པུབྦངྒམཾ ཀཏྭཱ. ཏཉྩ ཁོ སཧཛཱཏཔུབྦངྒམཝསེན ‘‘མནོཔུབྦངྒམཱ དྷམྨཱ’’ཏིཨཱདཱིསུ (དྷ. པ. ༡-༢) ཝིཡ སམྤཡོགསྶ ཨདྷིཔྤེཏཏྟཱ.

ཨནུསྶཱཧིཏོཏི ལོབྷམཙྪརིཡཱདིཝསེན པུཉྙཀིརིཡཱཡ སངྐོཙཾ ཨནཱཔཛྫནཏོ ཨཏྟནཱ, པརེན ཝཱ ཀེནཙི ཨནུསྶཱཧིཏོ ཧུཏྭཱ. སབྷཱཝཏོ ཧི པུཉྙཔྤཝཏྟིདསྶནམིདཾ. པརེཧཱིཏི པན པརཔཱཀཊུསྶཱཧདསྶནཝསེན ཝུཏྟཾ. པཋམནྟི དེསནཱཀྐམེན, ཨིདྷ ནིདྡིཊྛཀྐམེན ཝཱ པཋམཾ. མཧཱཀུསལཙིཏྟནྟི སོམནསྶསཧགཏཏཱདིཨངྒཔཱརིཔཱུརིཡཱ མཧནྟཾ ཀུསལཙིཏྟཾ. ཨཐ ཝཱ པཙྪིམབྷཝིཀབོདྷིསཏྟཱནཾ པཊིསནྡྷིཨཱཀཌྜྷནཏོ མཧནྟཾ པཱུཛིཏཾ ཀུསལཙིཏྟནྟི མཧཱཀུསལཙིཏྟཾ. སབྦེསམྤི ཧི སབྦཉྙུབོདྷིསཏྟཱནཾ པཊིསནྡྷི མེཏྟཱཔུབྦངྒམསྶ ཏིཧེཏུཀསོམནསྶམཡསྶ ཨསངྑཱརིཀཙིཏྟསྶ ཝིཔཱཀོཏི ཝུཏྟཾ. ཨེཏྠ ‘‘དེཡྻདྷམྨ…པེ… ཧཊྛཔཧཊྛོ’’ཏི ཨེཏྟཱཝཏཱ ཨིམསྶ སོམནསྶསཧགཏབྷཱཝམཱཧ, ‘‘སམྨཱདིཊྛིཾ པུརཀྑཏྭཱ’’ཏི ཉཱཎསམྤཡུཏྟབྷཱཝཾ, ‘‘ཨནུསྶཱཧིཏོ’’ཏི པན ཨིམིནཱ ཨསངྑཱརིཀབྷཱཝནྟི དཊྛབྦཾ.

ཝུཏྟནཡེནེཝཱཏི ‘‘དེཡྻདྷམྨཔཊིགྒཱཧཀཱདིསམྤཏྟིཾ, ཨཉྙཾ ཝཱ སོམནསྶཀཱརཎཾ ཨཱགམྨཱ’’ཏི ཨེཝཾ ཝུཏྟནཡེན. ཨུསྶཱཧིཏོཏི དེཡྻདྷམྨེ སཱཔེཀྑཱདིཏཱཡ, སཱིལསམྤདཱདཱིསུ ཨནདྷིམུཏྟཏཱདཱིཧི ཙ པུཉྙཀིརིཡཱཡ སངྐོཙཱཔཛྫནཏོ ཨཏྟནཱ, པརེན ཝཱ ཀེནཙི ཨུསྶཱཧིཏོ. པརེཧཱིཏི ¶ པན ཝུཏྟནཡམེཝ. ཀརོཏི དཱནཱདཱིནི པུཉྙཱནཱིཏི སམྦནྡྷོ. ཏམེཝཱཏི སོམནསྶསཧགཏཱདིནཱ ཏཾསདིསཏཱཡ ཝུཏྟཾ. ཧོཏི ཧི ཏཾསདིསེཔི ཏཾཝོཧཱརོ ཡཐཱ ཙ ‘‘སཱཡེཝ ཏིཏྟིརཱི, ཏཱནིཡེཝ ཨོསདྷཱནཱི’’ཏི. ཨེཏྠ པན ‘‘ཨུསྶཱཧིཏོ’’ཏི ཨིམིནཱ སསངྑཱརིཀཏཾ དསྶེཏི. སེསཾ ཝུཏྟནཡམེཝ. ཨིམསྨིཾ པནཏྠེཏི ཨིམསྨིཾ སསངྑཱརིཀསདྡཱབྷིདྷེཡྻེ, ཨུསྶཱཧིཏབྦཙིཏྟསངྑཱཏེ ཨཏྠེ ཏཾཝིསཡེཏི ཨཏྠོ. པུབྦཔྤཡོགསྶཱཏི པུཉྙཀིརིཡཱཡ སངྐོཙེ ཛཱཡམཱནེ ཏཏོ ཝིཝེཙེཏྭཱ སམུསྶཱཧནཝསེན པཝཏྟསྶ ཙིཏྟཔྤཡོགསྶ. པུབྦ-གྒཧཎཾ པནེཏྠ ཏཐཱཔཝཏྟཔུབྦཱབྷིསངྑཱརཝསེན ¶ སོ པཡོགོ ཧོཏཱིཏི ཀཏྭཱ ཝུཏྟཾ, ན ཏསྶ པུབྦཀཱལིཀཏཱཡཱཏི ཝུཏྟོཝཱཡམཏྠོ.

པཊིཔཏྟིདསྶནེནཱཏི བྷིཀྑཱུ དིསྭཱ དེཡྻདྷམྨཔརིཙྩཛནཝནྡནཱདིཔཊིཔཏྟིདསྶནེན. བལནྟི ཨནནྟཱིཏི བཱལཱ, ཨསྶཱསིཏཔསྶཱསིཏམཏྟེནེཝ ཛཱིཝནྟི, ན པཉྙཱཛཱིཝིཏེནཱཏི ཨདྷིཔྤཱཡོ. བཱལཱཡེཝ བཱལཀཱ. ཏེ པན ཨིདྷ ‘‘ཨཏྠི དིནྣ’’ནྟིཨཱདིནཡཔྤཝཏྟཱཡ སམྨཱདིཊྛིཡཱ ཨབྷཱཝེན ཨསཉྫཱཏབུདྡྷིནོ དཱརཀཱ. པཱཀཊཝསེན ཙེཏྠ བཱལཀ-གྒཧཎཾ. སཧསཱ ཀརཎཱདིཀཱལེ པན ཨིཏརེསམྤི ཉཱཎཝིཔྤཡུཏྟཾ ཧོཏཱིཏི. སོམནསྶཾ ཛཱཏཾ ཨེཏེསནྟི སོམནསྶཛཱཏཱ, ཛཱཏསོམནསྶཱཏི ཨཏྠོ. སཧསཱཏི སཱིགྷཾ སཱིགྷཾ དཱཏུཀཱམཏཱཡ ཨུཔྤཏྟིསམཀཱལམེཝ.

ཨེཏྠ ཙ ‘‘པཊིཔཏྟིདསྶནེནཱ’’ཏི ཨིམིནཱ པརེསཾ པཡོགཱབྷཱཝམཱཧ, ‘‘ཛཱཏཔརིཙཡཱ’’ཏི ཨཏྟནོ པཡོགཱབྷཱཝཾ. ཨུབྷཡེནཱཔི ཨིམསྶ ཨསངྑཱརིཀབྷཱཝཾ དཱིཔེཏི. ‘‘བཱལཀཱ, སཧསཱ’’ཏི ཙ ཨིམེཧི ཉཱཎཝིཔྤཡུཏྟབྷཱཝམཱཧ, ‘‘བྷིཀྑཱུ…པེ… ཛཱཏཱ’’ཏི སོམནསྶསཧགཏབྷཱཝཾ. ཨཐ ཝཱ ‘‘པཊིཔཏྟི…པེ… པརིཙཡཱ’’ཏི ཨིམིནཱ ཨསངྑཱརིཀབྷཱཝསྶ ‘‘བཱལཀཱ བྷིཀྑཱུ…པེ… ཛཱཏཱ’’ཏི ¶ ཙ ཨིམེཧི ཉཱཎཝིཔྤཡུཏྟསོམནསྶསཧགཏབྷཱཝསྶ ཙ དཱིཔིཏཏྟཱ ‘‘སཧསཱ’’ཏི ཝཙནེན ཡཐཱཝུཏྟམེཝ ཉཱཎཝིཔྤཡུཏྟཨསངྑཱརིཀབྷཱཝཾ པཀཱསེཏི. ཨེཝཾ སཏི པཊིལོམཏོ སོམནསྶསཧགཏཱདིབྷཱཝོ དསྶིཏོ ཧོཏི. ཨནུལོམཏོ པན ‘‘སོམནསྶཛཱཏཱ’’ཏི ཨིམིནཱ སོམནསྶསཧགཏབྷཱཝཾ, སཧསཱ-གྒཧཎེན ཉཱཎཝིཔྤཡུཏྟཱསངྑཱརིཀབྷཱཝཾ དཱིཔེཏི. ‘‘པཊིཔཏྟི…པེ… དིསྭཱ’’ཏི ཨེཏྟཱཝཏཱ པན སོམནསྶསཧགཏཱདིབྷཱཝསྶ ཀཱརཎཾ ཝུཏྟནྟི. ཏེཏི ཏེ ཉཱཏཀཱ, ཏེ བཱལཀཱཏི ཝཱ ཨཏྠོ. ‘‘སོམནསྶཧེཏཱུནཾ ཨབྷཱཝཾ ཨཱགམྨཱ’’ཏི ཨིདཾ ནིདསྶནམཏྟཾ དཊྛབྦཾ. མཛ྄ཛྷཏྟཱརམྨཎཾ ཏཐཱརཱུཔེ ཙེཏོབྷིསངྑཱརཱདཡོཔི ཧི ཨུཔེཀྑཱསཧགཏཏཱཡ ཀཱརཎམེཝཱཏི. ཙིཏྟསྶ སོམནསྶཱབྷཱཝེ པུགྒལསྶཔི སོམནསྶརཧིཏཏཱ ཧོཏཱིཏི ‘‘ཙཏཱུསུཔི…པེ… ཧོནྟཱི’’ཏི པུགྒལཱདྷིཊྛཱནཾ ཀཏྭཱ ཝུཏྟཾ, སོམནསྶརཧིཏཱ ཧོནྟི པུཉྙཾ ཀརོནྟཱཏི ཨདྷིཔྤཱཡོ. ‘‘ཨེཝ’’ནྟིཨཱདི ནིགམནཾ.

ཨིམེསུ པན ཨཊྛསུ ཝིཉྙཱཎེསུ སོམནསྶསཧགཏཏོ ཨུཔེཀྑཱསཧགཏཾ བལཝཏརཾ, ཉཱཎཝིཔྤཡུཏྟཏོ ཉཱཎསམྤཡུཏྟཾ, སསངྑཱརིཀཏོ ཨསངྑཱརིཀཾ སདིསཾ བལཝཏརཾ. ཝིསདིསཾ པན ཝེདནཱཉཱཎཔྤཡོགཝསེན བལཝཾ, དུབྦལཉྩ ཧོཏི. སོམནསྶསཧགཏཏིཧེཏུཀཨསངྑཱརིཀཏོ ཧི ཨུཔེཀྑཱསཧགཏཏིཧེཏུཀསསངྑཱརིཀཾ ¶ བལཝཏརཾ, ཨུཔེཀྑཱསཧགཏདུཧེཏུཀཨསངྑཱརིཀཏོ སོམནསྶསཧགཏཏིཧེཏུཀཨསངྑཱརིཀཾ བལཝཏརཾ. ཨིཏི ཙཏུཏྠཙིཏྟཏོ ཏཏིཡཙིཏྟཾ བལཝཏརཾ, ཏཏོ ཨཊྛམཙིཏྟཾ, ཏཏོ སཏྟམཙིཏྟཾ, ཏཏོ དུཏིཡཙིཏྟཾ, ཏཏོ པཋམཙིཏྟཾ, ཏཏོ ཚཊྛཙིཏྟཾ, ཏཏོ པཉྩམཙིཏྟནྟི ཨེཝམིམེསཾ བལཝབལཝཏརབྷཱཝོ ཝེདིཏབྦོ.

༢༦. ཨེཝཾ ¶ པཱལི༹ཡཾ ཨཱགཏནཡེན ཝེདནཱཉཱཎཔྤཡོགབྷེདཏོ ཨཊྛཝིདྷཏཾ ནིདྡིསིཏྭཱ ཨིདཱནི ཨཊྛཀཐཱཡཾ ཨཱགཏཔུཉྙཀིརིཡཱདཱིནཾ ཝསེནཔི པབྷེདཾ དསྶེཏུཾ ‘‘དས པུཉྙཀྲིཡཱདཱིན’’ནྟིཨཱདི ཝུཏྟཾ. ཨཱདི-སདྡེན ཚནྣཾ ཨཱརམྨཎཱནཾ, ཙཏུནྣཾ ཨདྷིཔཏཱིནཾ, ཏིཎྞཾ ཀམྨཱནཾ, ཧཱིནཱདིབྷེདསྶ ཙ སངྒཧོ དཊྛབྦོ. ཏེནེཝཱཧུ –

‘‘ཀམེན པུཉྙཝཏྠཱུཧི, གོཙརཱདྷིཔཏཱིཧི ཙ;

ཀམྨཧཱིནཱདིཏོ ཙཱཔི, གཎེཡྻ ནཡཀོཝིདོ’’ཏི.

༢༧. ཨིདཱནི ཏཐཱཔཝཏྟམཱནསྶ ཏསྶ ཡོ ཡོ ཏེསཾ ཏེསཾ ཝསེན ལབྦྷམཱནོ གཎནཔརིཙྪེདོ, ཏཾ སམྤིཎྜིཏྭཱ དསྶེཏུཾ ‘‘སཏྟརས སཧསྶཱནཱི’’ཏིཨཱདི ཝུཏྟཾ. ཏཏྠེཝཾ གཎནཱ ཝེདིཏབྦཱ – ཨིམཱནི ཏཱཝ ཨཊྛ ཝིཉྙཱཎཱནི དསནྣཾ པུཉྙཀིརིཡཝཏྠཱུནཾ ཝསེན པཝཏྟནཏོ པཙྩེཀཾ དས དསཱཏི ཀཏྭཱ ཨསཱིཏི ཙིཏྟཱནི ཧོནྟི, ཏཱནི ཙ ཚསུ ཨཱརམྨཎེསུ པཝཏྟནཏོ ཚགྒུཎིཏཱནི སཱསཱིཏིཀཱནི ཙཏྟཱརི སཏཱནི ཧོནྟི, ཏཱནི ཙཏུནྣཾ ཨདྷིཔཏཱིནཾ སཧཡོགཝསེན ཙཏུགྒུཎིཏཱནི སཧསྶཾ, ཝཱིསཱདྷིཀཱནི ཙ ནཝ སཏཱནི ཧོནྟི, ཏཱནི ཙ ཀཱཡཝཙཱིམནོསངྑཱཏཱནཾ ཏིཎྞཾ ཀམྨཱནཾ ཝསེན ཏིགུཎིཏཱནི སསཊྛིསཏྟསཏཱདྷིཀཱནི པཉྩ སཧསྶཱནི ཧོནྟི, ཏཱནི ཙ ཧཱིནམཛ྄ཛྷིམཔཎཱིཏབྷེདཏོ ཏིགུཎིཏཱནི སཱསཱིཏིཀདྭིསཏཱདྷིཀཱནི སཏྟརས སཧསྶཱནི ཧོནྟཱིཏི. ནནུ ཙ ཉཱཎཝིཔྤཡུཏྟཙིཏྟཱནཾ ཝཱིམཾསཱདྷིཔཏིསཧཡོགཱབྷཱཝཏོ ཨདྷིཔཏིཝསེན སཧསྶཾ, སཱསཱིཏིཀཱནི ཙ ཚ སཏཱནི ཧོནྟཱིཏི ཏཱནི ཀམྨཱདཱིནཾ ཝསེན སམྤིཎྜིཏཱནི ཝཱིསསཏཱདྷིཀཱནི པནྣརས སཧསྶཱནི བྷཝནྟཱིཏི? སཙྩམེཏཾ, སོཏཔཏིཏཝསེན པན ཏཾ ཨནཱདིཡིཏྭཱ ཨདྷིཔཏིགཎནཱ གཧིཏཱཏི ན ཏསྶ ཝསེན གཎནཧཱནི ཀཏཱཏི དཊྛབྦཾ.

ནནུ ¶ ཙ ‘‘སཝིཔཱཀཾ ཀུསལ’’ནྟི ཝུཏྟཾ, ཏཾ པན ཀཐཾ, ཀུཧིཾ, ཀིཾ ཕལཏཱིཏི ཙོདནཾ སནྡྷཱཡཱཧ ‘‘ཏཾ པནཱ’’ཏིཨཱདི. ཡསྨཱ ཏིཧེཏུཀཾ ཀུསལཾ ཏིཧེཏུཀཾ ཝཱ དུཧེཏུཀཾ ཝཱ པཊིསནྡྷིཾ དེཏི ¶ , ནཱཧེཏུཀཾ པཊིསནྡྷིཾ དེཏི. ཡདཱ ཙ ཏིཧེཏུཀཾ པཊིསནྡྷིཾ ཛནེཏི, ཏདཱ པཝཏྟེ སོལ༹ས ཝིཔཱཀཱནི ཨབྷིནིཔྥཱདེཏི. ཡདཱ དྭིཧེཏུཀཾ, ཏདཱ དྭཱདས. དུཧེཏུཀཾ པན དུཧེཏུཀམཧེཏུཀཉྩ པཊིསནྡྷིཾ ཛནེཏི, ན ཏིཧེཏུཀཾ. ཡདཱ ཙ དུཧེཏུཀཾ ཛནེཏི, ཏདཱ པཝཏྟིཡཾ དྭཱདས. ཡདཱ ཨཧེཏུཀཾ, ཏདཱ ཨཊྛ. ཡེ པན ཨཱགམནཏོ ཝིཔཱཀསྶ སངྑཱརབྷེདམིཙྪནྟི, ཏེསཾ མཏེན ཏིཧེཏུཀཾ དྭཱདས, དས ཝཱ ཝིཔཙྩཏི, དུཧེཏུཀཾ དས, ཨཊྛ ཝཱ, ཏསྨཱ ཝུཏྟཾ ‘‘ཡཐཱནུརཱུཔ’’ནྟི. ནཱནཱཝིདྷསམྤཏྟིཊྛཱནབྷཱཝཏོ སོབྷནཱ, གནྟབྦཏོ གཏི ཙཱཏི སུགཏི, ཀཱམཱཝཙརབྷཝོཝ སུགཏི ཀཱམཱཝཙརསུགཏི. ཏསྶཾ ཀཱམཱཝཙརསུགཏིཡཾ. བྷཝབྷོགསམྤཏྟིནྟི ཨེཏྠ ཙ བྷཝཏཱིཏི བྷཝོ, ཨུཔཔཏྟིབྷཝསངྑཱཏཱནཾ ཝིཔཱཀཀྑནྡྷཀཊཏྟཱརཱུཔཱནམེཏཾ གཧཎཾ, བྷུཉྫིཏབྦཏོ བྷོགོ, པཝཏྟིཡཾ པཊིལབྷིཏབྦསམྤཏྟི, བྷཝོཏི ཝཱ པཊིསནྡྷི, བྷོགོ སེསཝིཔཱཀཀཊཏྟཱརཱུཔེཧི སཧ པཝཏྟིཡཾ པཊིལབྷིཏབྦཱ སམྤཏྟི, བྷཝོ ཙ བྷོགོ ཙ བྷཝབྷོགོ, ཏེཡེཝ སམྤནྣབྷཱཝཏོ སམྤཏྟི, ཏེསཾ ཝཱ སམྤཏྟི བྷཝབྷོགསམྤཏྟི, ཏཾ ཨབྷིནིཔྥཱདེཏི, ཛནཀཝསེན ཙ ཨུཔནིསྶཡཝསེན ཙ སཱདྷེཏཱིཏི ཨཏྠོ. ཨེཏྠ ཙ བྷཝབྷོགསམྤཏྟཱིནཾ ནིརཝསེསཏོ ལབྦྷམཱནཊྛཱནཾ སནྡྷཱཡ ‘‘ཀཱམཱཝཙརསུགཏིཡ’’ནྟི ཝུཏྟཾ. སཧེཏུཀཝིཔཱཀཝཛྫཾ པན པཝཏྟིཝིཔཱཀཀཊཏྟཱརཱུཔསབྷཱཝཾ བྷཝསམྤཏྟིཾ, ཨེཀཙྩབྷོགསམྤཏྟིཉྩ, བྷོགསམྤདམེཝ ཝཱ ཨཝིསེསེན སུགཏིཡཾ དུགྒཏིཡམྤི ཨབྷིནིཔྥཱདེཏིཡེཝ. ནཱགསུཔཎྞཱདཱིནམྤི ཧིསྶ དེཝསམྤཏྟིསདིསཾ མནུཉྙཾ བྷོགཛཱཏཾ, ཏབྦིསཡཱནི ཙ ཝིཔཱཀཙིཏྟཱནི, སུཝཎྞཏཱསུསྶརཏཱདི ཙ ཏཾ སབྦཾ ཀཱམཱཝཙརཀུསལསྶེཝ ཕལཾ. ན ཧི ཨཀུསལསྶ ཨིཊྛཕལཾ ཨཏྠི. ཝུཏྟཉྷེཏཾ ¶ – ‘‘ཨཊྛཱནམེཏཾ ཨནཝཀཱསོ, ཡཾ ཨཀུསལསྶ ཨིཊྛོ ཀནྟོ ཝིཔཱཀོ སཾཝིཛྫཏཱི’’ཏི.

ཀཱམཱཝཙརཀུསལཝཎྞནཱ ནིཊྛིཏཱ.

རཱུཔཱཝཙརཀུསལཝཎྞནཱ

ཨིདཱནི ཡསྨཱ ཀཱམཱཝཙརཀུསལཱནནྟརཾ ཨུདྡིཊྛསྶ རཱུཔཱཝཙརཀུསལསྶ ནིདྡེསཱཝཀཱསོ ཨནུཔྤཏྟོ, ཏསྨཱ ཏཾ དསྶནཏྠཾ ‘‘ཨིཏརེསཱུ’’ཏིཨཱདི ཨཱརདྡྷཾ. ཏཏྠ ཨིཏརེསཱུཏི ཡཐཱཝུཏྟཀཱམཱཝཙརཀུསལཏོ ཨིཏརེསུ, རཱུཔཱཝཙརཱདཱིསཱུཏི ཨཏྠོ. སཝཏྠུཀཏོ ཨེཀཝིདྷཾ ཨེཀནྟེན ཝཏྠུསནྣིསྶིཏཏྟཱ ¶ . ན ཧི ཨརཱུཔདྷཱཏུཡཾ རཱུཔཱཝཙརདྷམྨཱ ལབྦྷནྟི རཱུཔཝིརཱགབྷཱཝནཱཡ ནིབྦཏྟཏྟཱ པུན རཱུཔཱཝཙརཛ྄ཛྷཱནསམཱཔཏྟིཡཱ ཨབྷཱཝཏོ.

ཧཱིནམཛ྄ཛྷིམཔཎཱིཏབྷེདཏོཏི ཨེཏྠ པུབྦེ ཝིཡ ཨདྷིཔཏཱིནཾ ཧཱིནཱདིབྷཱཝེཧི ཛྷཱནསྶ ཧཱིནཱདིབྷཱཝོ ཡོཛེཏབྦོ. ཨཐ ཝཱ པཊིལདྡྷམཏྟམནཱསེཝིཏཾ ཧཱིནཾ པརིདུབྦལབྷཱཝཏོ, ནཱཏིསུབྷཱཝིཏཾ ཨཔརིཔུཎྞཝསིབྷཱཝཾ མཛ྄ཛྷིམཾ, ཨཏིཝིཡ སུབྷཱཝིཏཾ པན སབྦསོ པརིཔུཎྞཝསིབྷཱཝཾ པཎཱིཏཾ. ཏཐཱ ཨུལཱ༹རཔུཉྙཕལཀཱམཏཱཝསེན པཝཏྟིཏཾ ཧཱིནཾ, ལོཀིཡཱབྷིཉྙཏྠཱཡ པཝཏྟིཏཾ མཛ྄ཛྷིམཾ, ཝིཝེཀཀཱམཏཱཡ ཨརིཡབྷཱཝེ ཋིཏེན པཝཏྟིཏཾ པཎཱིཏཾ. ཨཏྟཧིཏཱཡ ཝཱ པཝཏྟིཏཾ ཧཱིནཾ, ཀེཝལཾ ཨལོབྷཛ྄ཛྷཱསཡེན པཝཏྟིཏཾ མཛ྄ཛྷིམཾ, པརཧིཏཱཡ པཝཏྟིཏཾ པཎཱིཏཾ. ཝཊྚཛ྄ཛྷཱསཡེན ཝཱ པཝཏྟིཏཾ ཧཱིནཾ, ཝིཝེཀཛ྄ཛྷཱསཡེན པཝཏྟིཏཾ མཛ྄ཛྷིམཾ, ཝིཝཊྚཛ྄ཛྷཱསཡེན ལོཀུཏྟརཔཱདཀཏྠཾ པཝཏྟིཏཾ པཎཱིཏཾ.

པཊིཔདཱདིབྷེདཏོཏི དུཀྑཔཊིཔདཱདནྡྷཱབྷིཉྙཱདཱིནཾ པཊིཔདཱབྷིཉྙཱནཾ བྷེདེན. པཊིཔདཱཝཙནེནེཝ ཝཱ ཏདཝིནཱབྷཱཝཏོ ཨབྷིཉྙཱཔི ལབྦྷཏི. ཏཐཱ ཧེཏྠ པཊིཔདཱཙཏུཀྐནྟི ཝོཧརནྟཱིཏི ¶ ཨཱདི-སདྡེན ཨདྷིཔཏིཨཱདཱིནཾ སངྒཧོ དཊྛབྦོ, ཏསྨཱ པཊིཔདཱདིབྷེདཏོཏི པཊིཔདཱབྷེདཏོ, ཨདྷིཔཏིབྷེདཏོ, ཨཱརམྨཎབྷེདཏོ, ཧཱནབྷཱགིཡཱདིབྷེདཏོཏི ཨཏྠོ. ཏཏྠ པཊིཔདཱབྷེདཏོ ཏཱཝ དུཀྑཔཊིཔདཾ དནྡྷཱབྷིཉྙཾ, དུཀྑཔཊིཔདཾ ཁིཔྤཱབྷིཉྙཾ, སུཁཔཊིཔདཾ དནྡྷཱབྷིཉྙཾ, སུཁཔཊིཔདཾ ཁིཔྤཱབྷིཉྙནྟི ཨེཝཾ ཙཏུབྦིདྷཾ ཧོཏི. ཏཏྠ དུཀྑཱ པཊིཔདཱ ཨསྶཱཏི དུཀྑཔཊིཔདཾ. དནྡྷཱ ཨབྷིཉྙཱ ཨསྶཱཏི དནྡྷཱབྷིཉྙཾ. ཨེས ནཡོ ‘‘དུཀྑཔཊིཔདཾ ཁིཔྤཱབྷིཉྙ’’ནྟིཨཱདཱིསུཔི.

ཏཏྠ ཨཔྤཧཱིནནཱིཝརཎསྶ, ཨཝིཀྑམྦྷིཏཛྷཱནནིཀནྟིཀསྶ ཙ ཉཱཎཀིཙྩསྶ ཨཔརིབྱཏྟཏཱཡ པརིནིཊྛིཏསཀལཔུབྦཀིཙྩསྶ ‘‘པཐཝཱི པཐཝཱི’’ཏི ཝཱ ‘‘ཨཱཔོ ཨཱཔོ’’ཏི ཝཱ ཨེཝཾ པཝཏྟཔཋམསམནྣཱཧཱརཏོ པཊྛཱཡ ཡཱཝ ཏསྶ ཏསྶ ཛྷཱནསྶ ཨུཔཙཱརུཔྤཏྟིཡཱ ནཱིཝརཎཔྤཧཱནཾ, ནིཀནྟིཝིཀྑམྦྷནཉྩ ཧོཏི, ཏཱཝ པཝཏྟཱ པུབྦབྷཱགབྷཱཝནཱ པཊིཔདཱ ནཱམ ‘‘པཊིཔཛྫཏི ཛྷཱནཾ ཨེཏཱཡཱ’’ཏི ཀཏྭཱ. པཧཱིནནཱིཝརཎསྶ, པན ཝིཀྑམྦྷིཏཛྷཱནནིཀནྟིཀསྶ ཙ ཉཱཎཀིཙྩསྶ པརིབྱཏྟབྷཱཝཏོ ཨུཔཙཱརཛ྄ཛྷཱནཾ ཨཱདིཾ ཀཏྭཱ ཡཱཝ ཨཔྤནཱཡ ཨུཔྤཏྟི, ཏཱཝ པཝཏྟཱ པཉྙཱ པུབྦབྷཱགཔཉྙཱཡ ཝིསིཊྛབྷཱཝཏོ ཨབྷིཉྙཱ ནཱམ, ཏསྨཱ ཡོ ཨཱདིཏོ ཀིལེསེ ཛྷཱནནིཀནྟིཉྩ ¶ ཝིཀྑམྦྷེནྟོ དུཀྑེན སསངྑཱརེན སཔྤཡོགེན ཀིལམནྟོ ཝིཀྑམྦྷེཏི, ཝིཀྑམྦྷིཏཀིལེསཛྷཱནནིཀནྟི ཙ ཨཔྤནཱཔརིཝཱསཾ ཝསནྟོ ཙིརེན ཨངྒཔཱཏུབྷཱཝཾ པཱཔུཎཱཏི, ཏསྶ དུཀྑཔཊིཔདཾ, དནྡྷཱབྷིཉྙཉྩ ཛྷཱནཾ ཧོཏི. ཡོ པན སསངྑཱརེན ཀིལེསཱདིཀེ ཝིཀྑམྦྷེཏྭཱ ན ཙིརེན ཨངྒཔཱཏུབྷཱཝཾ པཱཔུཎཱཏི, ཏསྶ དུཀྑཔཊིཔདཾ, ཁིཔྤཱབྷིཉྙཉྩ. ཡོ ཀིལེསཱདིཀེ ཝིཀྑམྦྷེནྟོ སུཁེན ཨཀིལམནྟོ ཝིཀྑམྦྷེཏི, ཨཔྤནཱཔརིཝཱསཾ པན ཙིརཱཡཏི, ཏསྶ སུཁཔཊིཔདཾ, དནྡྷཱབྷིཉྙཾ. ཡོ པན སུཁེནེཝ ཀིལེསཱདིཀེ ཝིཀྑམྦྷེཏྭཱ ¶ སཱིགྷམེཝ ཨཔྤནཾ པཱཔུཎཱཏི, ཏསྶ སུཁཔཊིཔདཾ, ཁིཔྤཱབྷིཉྙནྟི ཝེདིཏབྦཾ.

སོ པནཱཡཾ པཊིཔདཱབྷིཉྙཱནཾ བྷེདོ ཀིལེསིནྡྲིཡཱདྷིཀཱརཝསེན ཝེདིཏབྦོ. ཡསྶ ཧི རཱགཱདཡོ ཀིལེསཱ ཏིབྦཱ ཧོནྟི, སདྡྷཱཔཉྩམཀཱནི ཙ ཨིནྡྲིཡཱནི མུདཱུནི. ཡོ ཙ སམཐཝིཔསྶནཱསུ ཨཀཏཱདྷིཀཱརོ, ཏསྶ པཝཏྟཛྷཱནཾ དུཀྑཔཊིཔདཾ, དནྡྷཱབྷིཉྙཉྩ ཧོཏི. ཏསྶ ཧི ཀིལེསསམུདཱཙཱརཏིབྦཏཱཡ ནཱིཝརཎཝིཀྑམྦྷནསྶ ཀིཙྪེན ཀསིརེན སམིཛ྄ཛྷནཏོ པཊིཔདཱ དུཀྑཱ ཨསུཁཱ, ཏསྶེཝ སདྡྷཱདཱིནཾ ཨིནྡྲིཡཱནཾ མུདུཏཱཡ ཨབྷིཉྙཱཔི དནྡྷཱ མནྡཱ ཨསཱིགྷཔྤཝཏྟིནཱི ཧོཏི. བྷཝནྟརེ ཝཱ སམཐེ ཨཀཏཱདྷིཀཱརཏྟཱ པཊིཔདཱ དུཀྑཱ, ཝིཔསྶནཱཡ ཨཀཏཱདྷིཀཱརཏྟཱ ཨབྷིཉྙཱཔི དནྡྷཱ. ཡོ པན ཝུཏྟཝིཔརཱིཏོ ཧོཏི, ཏསྶ ཀིལེསཱནཾ ཨཏིབྦསམུདཱཙཱརཏཱཡ, ཨིནྡྲིཡཱནཉྩ ཏིཁཱིཎཏཱཡ སམཐཝིཔསྶནཱསུ ཀཏཱདྷིཀཱརཏཱཡ ཡཐཱཀྐམཾ སུཁཔཊིཔདཱ, ཁིཔྤཱབྷིཉྙཱ ཙ ཧོཏི. བྷཝནྟརེ ཀཏཔརིཙཡསྶ ཧི ཡཐཱ པགུཎཾ ཀཏྭཱ ཝིསྶཊྛགནྠོ ཨཔྤམཏྟཀེན པཡོགེན སུཔྤཝཏྟི ཝཱཙུགྒཏོ ཙ ཧོཏི, ཨེཝཾ བྷཱཝནཱ ཨཔྤཀསིརེནེཝ ཨིཛ྄ཛྷཏཱིཏི. སྭཱཡཾ ཨཀཏོ, ཀཏོ ཙ ཨདྷིཀཱརོ སམཐནིསྶིཏོ པཊིཔདཱཡཾ ཝུཏྟོ སམཱདྷིཔྤདྷཱནཏྟཱ པཊིཔདཱཡ. ཝིཔསྶནཱནིསྶིཏོ ཨབྷིཉྙཱཡ ཉཱཎཔྤདྷཱནཏྟཱ ཨཔྤནཱཡཱཏི དཊྛབྦཾ.

ཡོ པན ཏིབྦཀིལེསོ ཏིཀྑིནྡྲིཡོ ཝིཔསྶནཱཡམེཝ ཝཱ ཀཏཱདྷིཀཱརོ ཧོཏི, ཏསྶ ཝུཏྟནཡེན དུཀྑཱ པཊིཔདཱ, ཁིཔྤཱ པན ཨབྷིཉྙཱ ཧོཏི, ཏབྦིཔརཱིཏསྶ སུཁཔཊིཔདཱ དནྡྷཱབྷིཉྙཱཏི. ཏསྨཱ ཀིལེསཱནཾ ཏིབྦམནྡབྷཱཝཏོ, ཨིནྡྲིཡཱནཾ ཏིཁིཎམུདུབྷཱཝཏོ, པུབྦཔརིཙཡསྶ ཙ སམྦྷཝཱསམྦྷཝཝསེནཱཏི ཨེཝཾ ཀིལེསིནྡྲིཡཱདྷིཀཱརཝསེན ཨིམཱསཾ བྷེདོ ཝེདིཏབྦོ.

ཨཔིཙ ¶ ཡཱནི པརཏོ སཔྤཱཡཱསཔྤཱཡཱནི, པལིབོདྷུཔཙྪེདཱདཱིནི པུབྦཀིཙྩཱནི, ཨཔྤནཱཀོསལླཱནི ¶ ཙ ཨཱགམིསྶནྟི, ཏེསུ ཡོ ཨུཔཙཱརཱདྷིགམཏོ པུབྦེ, པཙྪཱ ཙ ཨསཔྤཱཡསེཝཱི ཧོཏི, ཏསྶ དུཀྑཱ པཊིཔདཱ, དནྡྷཱ ཙ ཨབྷིཉྙཱ ཧོཏི. ཨུབྷཡཏྠ སཔྤཱཡསེཝིནོ སུཁཱ པཊིཔདཱ, ཁིཔྤཱ ཙ ཨབྷིཉྙཱ. ཡོ པན ཏཏོ པུབྦབྷཱགེ ཨསཔྤཱཡཾ སེཝིཏྭཱ ཨཔརབྷཱགེ སཔྤཱཡསེཝཱི ཧོཏི, ཏསྶ དུཀྑཱ པཊིཔདཱ, ཁིཔྤཱ ཨབྷིཉྙཱ. ཏབྦིཔརཱིཏསྶ སུཁཱ པཊིཔདཱ, དནྡྷཱ ཨབྷིཉྙཱ ཙ ཝེདིཏབྦཱ.

ཏཐཱ པལིབོདྷུཔཙྪེདཱདིཔུབྦཀིཙྩཾ ཨསམྤཱདེཏྭཱ བྷཱཝནམནུཡུཉྫནྟསྶ སཔརིཔནྠཏཱཡ དུཀྑཱ པཊིཔདཱ, ཝིཔརིཡཱཡེན ཨཔརིཔནྠཏཱཡ སུཁཱ. ཨཔྤནཱཀོསལླཱནི ཨསམྤཱདེནྟསྶ ཉཱཎསྶ ཨཝིསདཏཱཡ དནྡྷཱ ཨབྷིཉྙཱ ཧོཏི, སམྤཱདེནྟསྶ ཝིཔརིཡཱཡཏོ ཁིཔྤཱ ཨབྷིཉྙཱཏི. ཀིཉྩ – ཏཎྷཱཝིཛྫཱཏིབྷཝནཝསེན ཨེཏཱསཾ བྷེདོ ཝེདིཏབྦོ. ཏཎྷཱབྷིབྷཱུཏསྶ ཧི དུཀྑཱ པཊིཔདཱ ཧོཏི ཏསྶཱ སམཱདྷིསྶ ཨུཛུཔཊིཔཀྑཏྟཱ སམཐཔཊིཔདཱཡ པརིཔནྠཀབྷཱཝཏོ, ཨནབྷིབྷཱུཏསྶ ཏདབྷཱཝཏོ སུཁཱ. ཨཝིཛྫཱབྷིབྷཱུཏསྶ ཙ ཏསྶཱ པཉྙཱཡ ཨུཛུཔཊིཔཀྑབྷཱཝཏོ དནྡྷཱ ཨབྷིཉྙཱ, ཨིཏརསྶ ཁིཔྤཱ ཨབྷིཉྙཱཏི. སོ པནཱཡཾ པཊིཔདཱབྷེདོ ཀེཝལཾ སམཐབྷཱཝནཱཝསེན པཊིལདྡྷཛ྄ཛྷཱནསྶ, མགྒཱདྷིགམཝསེན པཊིལདྡྷཛ྄ཛྷཱནསྶ པན ནཏྠི དུཀྑཔཊིཔདཱདིབྷེདོ. ཀེཙི པན མགྒཝསེནེཝ ཏསྶ པཊིཔདཱདིབྷེདཾ ཝཎྞེནྟི ‘‘མགྒསྶ ཧི དུཀྑཔཊིཔདཱདིབྷཱཝེ ཏསྨིཾ དུཀྑཔཊིཔདཱདིཀ’’ནྟི.

ཨདྷིཔཏིབྷེདཱདཱིསུ པན ཚནྡཱདྷིཔཏེཡྻཾ ཙིཏྟཱདྷིཔཏེཡྻཾ ཝཱིརིཡཱདྷིཔཏེཡྻཾ ཝཱིམཾསཱདྷིཔཏེཡྻནྟི ཨེཝཾ ཨདྷིཔཏིབྷེདཏོ, པརིཏྟཾ པརིཏྟཱརམྨཎཾ, པརིཏྟཾ ཨཔྤམཱཎཱརམྨཎཾ, ཨཔྤམཱཎཾ པརིཏྟཱརམྨཎཾ ¶ , ཨཔྤམཱཎཾ ཨཔྤམཱཎཱརམྨཎནྟི ཨེཝཾ ཨཱརམྨཎབྷེདཏོ, ཧཱནབྷཱགིཡཾ ཋིཏིབྷཱགིཡཾ ཝིསེསབྷཱགིཡཾ ནིབྦེདྷབྷཱགིཡནྟི ཨེཝཾ ཧཱནབྷཱགིཡཱདིབྷེདཏོ ཙ ཙཏུབྦིདྷཏཱ ཝེདིཏབྦཱ. ཏཏྠ ‘‘ཚནྡཝཏོ ཙེ ཛྷཱནཾ ནིབྦཏྟིསྶཏི, མཡ྄ཧམྤི ནིབྦཏྟིསྶཏཱི’’ཏི ཨེཝཾ ཚནྡཾ དྷུརཾ ཀཏྭཱ ཨུཔྤནྣཾ ཚནྡཱདྷིཔཏེཡྻཾ. ཨེས ནཡོ ‘‘ཙིཏྟཱདྷིཔཏེཡྻཱ’’དཱིསུཔི. ཨཔྤགུཎཾ པན ཨུཔརིཛྷཱནསྶ པཙྩཡོ བྷཝིཏུཾ ཨསཀྐོནྟཾ པརིཏྟཾ, སུཔྤསརཱཝམཏྟེསུ ཨཝཌྜྷིཏཱརམྨཎེསུ ནིབྦཏྟཾ པརིཏྟཱརམྨཎཾ. ཝུཏྟཔཊིཔཀྑཏོ པན ཡཐཱཀྐམཾ ཨཔྤམཱཎཱརམྨཎཱདཱིནི ཝེདིཏབྦཱནི. ཧཱནབྷཱགིཡཱདིཝིསེསཾ སཡམེཝ ཝཀྑཏི.

ཛྷཱནངྒཡོགབྷེདཏོཏི ཀཏྠཙི པཉྩ ཛྷཱནངྒཱནི, ཀཏྠཙི ཙཏྟཱརི, ཀཏྠཙི ཏཱིཎི, ཀཏྠཙི དྭེ ¶ , ཀཏྠཙི ཨཔརཱནི དྭེཏི ཨེཝཾ ཛྷཱནངྒཱནཾ སམྤཡོགབྷེདཏོ. ནནུ ཙེཏྠ ཀཱམཱཝཙརཀུསལེ ཝིཡ སངྑཱརབྷེདོ ཀསྨཱ ན གཧིཏོ. ཨིདམྤི ཧི ཀེཝལཾ སམཐཱནུཡོགཝསེན པཊིལདྡྷཾ སསངྑཱརཾ, མགྒཱདྷིགམཝསེན པཊིལདྡྷམསངྑཱརཾ, ཏསྨཱ ‘‘ཛྷཱནངྒསངྑཱརཡོགབྷེདཏོ དསཝིདྷ’’ནྟི ཝཏྟབྦནྟི? ནཡིདམེཝཾ, མགྒཱདྷིགམཝསེན སཏྟིཏོ པཊིལདྡྷསྶཱཔི ཨཔརབྷཱགེ པརིཀམྨཝསེནེཝ ཨུཔྤཛྫནཏོ, ཏསྨཱ སབྦསྶཔི ཛྷཱནསྶ པརིཀམྨསངྑཱཏཔུབྦཱབྷིསངྑཱརེན ཝིནཱ ཀེཝལཾ ཨདྷིཀཱརཝསེན ཨནུཔྤཛྫནཏོ ‘‘ཨསངྑཱར’’ནྟིཔི ཝཏྟུཾ ན སཀྐཱ, ཨདྷིཀཱརེན ཙ ཝིནཱ ཀེཝལཾ པརིཀམྨཱབྷིསངྑཱརེནེཝ ཨནུཔྤཛྫནཏོ ‘‘སསངྑཱར’’ནྟིཔི ཝཏྟུཾ ན སཀྐཱཏི ཛྷཱནངྒཡོགབྷེདཏོ པཉྩཝིདྷཏཱ ཙ ཝུཏྟཱཏི.

ཀཱམཙྪནྡོ བྱཱཔཱདོ ཐིནམིདྡྷཾ ཨུདྡྷཙྩཀུཀྐུཙྩཾ ཝིཙིཀིཙྪཱཏི ཨིམཱནི པཉྩ ནཱིཝརཎཱནི ཝིཔྤཧཱིནཱནི ཨེཏསྶཱཏི ཀཱམཙྪནྡ…པེ… ཝིཔྤཧཱིནཾ. ‘‘ཨགྱཱཧིཏོ’’ཏི ཨེཏྠ ཨཱཧིཏ-སདྡསྶ ཝིཡ ཝིཔྤཧཱིན-སདྡསྶེཏྠ པརཝཙནཾ དཊྛབྦཾ. ཀཱམཙྪནྡཱདཱིཧི ཝཱ ཝིཔྤཧཱིནཾ ཝིསཾཡུཏྟཾ ཏེསཾ པཧཱཡཀབྷཱཝེནཱཏི ཀཱམཙྪནྡ…པེ… ཝིཔྤཧཱིནཾ. ཏཏྠ ཀཱམེཏཱིཏི ཀཱམོ, ཚནྡནཊྛེན ཚནྡོ ཙཱཏི ¶ ཀཱམཙྪནྡོ, བཧལཀཱམརཱགསྶེཏཾ ཨདྷིཝཙནཾ. བྱཱཔཱདཱདཱིནམཏྠཾ ཝཀྑཏི. ཡསྨཱ ཀཱམཙྪནྡཱདཱིསུ ཨཔྤཧཱིནེསུ ཛྷཱནཾ ནུཔྤཛྫཏི, ཏསྨཱ ཏཱནིསྶ པཧཱནངྒཱནཱིཏི ཝེདིཏབྦཱནི. ནནུ ཨཉྙེཔི ཨཀུསལཱ དྷམྨཱ ཨིམིནཱ ཛྷཱནེན པཧཱིཡནྟི, ཨཐ ཀསྨཱ པཉྩེཝ པཧཱནངྒཝསེན ཝུཏྟཱནཱིཏི? ཝིསེསེན ཛྷཱནནྟརཱཡཀརཏྟཱ. ཀཱམཙྪནྡཝསེན ཧི ནཱནཱཝིསཡཔལོབྷིཏཾ ཙིཏྟཾ ན ཨེཀཏྟཱརམྨཎེ སམཱདྷིཡཏི. ཀཱམཙྪནྡཱབྷིབྷཱུཏཾ ཝཱ ནཱནཱཝིསཡསམུཔབྱཱུལ༹ྷཱཡ ཀཱམདྷཱཏུཡཱ པཧཱནཔཊིཔདཾ ན པཊིཔཛྫཏི, བྱཱཔཱདེན ཙ ཨཱརམྨཎེ པཊིཧཉྙམཱནཾ ན སམཱཧིཏཾ པཝཏྟཏི, ཐིནམིདྡྷཱབྷིབྷཱུཏཾ ཨཀམྨཉྙཾ ཧོཏི, ཨུདྡྷཙྩཀུཀྐུཙྩཔརེཏཾ ཨཝཱུཔསནྟམེཝ ཧུཏྭཱ པརིབྦྷམཏི, ཝིཙིཀིཙྪཱཨུཔཧཏཾ ཛྷཱནཱདྷིགམཔཊིཔདཾ ནཱརོཧཏི ‘‘སམྨཱསམྦུདྡྷོ ནུ ཁོ, ན ནུ ཁོ, པཐཝཱི པཐཝཱི’’ཏིཨཱདིནཱ པཝཏྟམནསིཀཱརེན ‘‘ཛྷཱནཾ སིཡཱ ནུ ཁོ, ན ནུ ཁོ’’ཏིཨཱདིནཱ ཝིཙིཀིཙྪནྟསྶ ཛྷཱནཱདྷིགམཔཊིཔདཱཡ ཨསཾསིཛ྄ཛྷནཏོ. ཡཏོ ཝཀྑཏི –

‘‘བྷཱགཱི ཨསྶམཧཾ ཨདྡྷཱ, ཨིམཱཡ པཊིཔཏྟིཡཱ;

པཝིཝེཀསུཁསྶཱཏི, ཀཏྭཱ ཨུསྶཱཧམུཏྟམ’’ནྟི.

ཏསྨཱ ¶ སམཱདྷིཨཱདཱིནཾ ཨུཛུཝིཔཙྩནཱིཀབྷཱཝེན ཝིསེསེན ཛྷཱནཱདྷིགམསྶ ཨནྟརཱཡཀརཎཏོ ཨེཏཱནེཝ པཧཱནངྒཱནཱིཏི ཝུཏྟཱནི. ཧོཏི ཙེཏྠ –

‘‘པཙྩནཱིཀཱ ཡཏོ པཉྩ, སམཱདྷཱདཱིནམེཏྠ ཧི;

ཛྷཱནནྟརཱཡིཀཱ ཏསྨཱ, པཧཱནངྒེ ནིཡཱམིཏཱ’’ཏི.

ཨེཝམིདཾ པཧཱནངྒཝསེན དསྶེཏྭཱ ཨིདཱནི སམྤཡོགངྒཝསེན དསྶེཏུཾ ‘‘ཝིཏཀྐ…པེ… སམྤཡུཏྟ’’ནྟི ཝུཏྟཾ. ཏཏྠ ཝིཏཀྐཱདཡོ ཝཙནཏྠལཀྑཎཱདིཝསེན ཨུཔརི ཨཱགམིསྶནྟི. ཡསྨཱ པན ཨིམེསུ ཨུཔྤནྣེསུ ཛྷཱནཾ ཨུཔྤནྣཾ ནཱམ ཧོཏི, ཏེནསྶ ཨིམཱནི སམྤཡོགངྒཱནཱིཏི ཝེདིཏབྦཱནི, ཏསྨཱ ན ཨེཏེཧི ¶ སམནྣཱགཏཾ ཨཉྙདེཝ ཛྷཱནཾ ནཱམ ཨཏྠཱིཏི གཧེཏབྦཾ. ཡཐཱ པན ནེམིཨཱདིཨངྒསམུདཱཡེ རཐཱདིཝོཧཱརོ ཧོཏི, ཨེཝཾ ཛྷཱནངྒསམུདཱཡེ ཛྷཱནཝོཧཱརོ. ཝུཏྟམྤི ཧེཏཾ ཝིབྷངྒེ ‘‘ཛྷཱནནྟི ཝིཏཀྐོ ཝིཙཱརོ པཱིཏི སུཁཾ ཙིཏྟསྶེཀགྒཏཱ’’ཏི (ཝིབྷ. ༥༦༩). ཀསྨཱ པན ཨཉྙེསུཔི ཕསྶཱདཱིསུ སམྤཡུཏྟདྷམྨེསུ ཝིཛྫམཱནེསུ ཨིམཱནིཡེཝ པཉྩ ཛྷཱནངྒཝསེན ཝུཏྟཱནཱིཏི? ཝུཙྩཏེ – ཨུཔནིཛ྄ཛྷཱནཀིཙྩཝནྟཏཱཡ, ཀཱམཙྪནྡཱདཱིནཾ ཨུཛུཔཊིཔཀྑབྷཱཝཏོ ཙ. ཝིཏཀྐོ ཧི ཨཱརམྨཎེ ཙིཏྟཾ ཨབྷིནིརོཔེཏི, ཝིཙཱརོ ཨནུབནྡྷཏི. ཨེཝཾ ཛྷཱནཱདྷིགམསྶ ཝིསེསཔཙྩཡབྷཱུཏེཧི ཏེཧི ཨཝིཀྑེཔཱཡ སམཱདཧིཏཔཡོགསྶ ཙེཏསོ པཡོགསམྤཏྟིསམུཊྛཱནཱ པཱིཏི པཱིཎནཾ, སུཁཉྩ ཨུཔབྲཱུཧནཾ ཀརོཏི. ཨཐ ནཾ སསམྤཡུཏྟདྷམྨཾ ཨེཏེཧི ཨབྷིནིརོཔནཱནུབནྡྷནཔཱིཎནཨུཔབྲཱུཧནེཧི ཨནུགྒཧིཏཱ ཨེཀགྒཏཱ སམཱདྷཱནཀིཙྩེན ཨཏྟཱནཾ ཨནུཝཏྟཱཔེནྟཱི ཨེཀཏྟཱརམྨཎེ སམཾ, སམྨཱ ཙ ཨཱདྷིཡཏི, ཨིནྡྲིཡསམཏཱཝསེན སམཾ, པཊིཔཀྑདྷམྨཱནཾ དཱུརཱིབྷཱཝེན ལཱིནུདྡྷཙྩཱབྷཱཝེན སམྨཱ ཙ ཋཔེཏཱིཏི ཨེཝམེཏེསམེཝ ཨུཔནིཛ྄ཛྷཱནཀིཙྩཾ ཨཱཝེཎིཀཾ. ཀཱམཙྪནྡཱདིཔཊིཔཀྑབྷཱཝེན པན སཡམེཝ ཝཀྑཏི. ཨེཝཾ ཨུཔནིཛ྄ཛྷཱནཀིཙྩཝནྟཏཱཡ, ཀཱམཙྪནྡཱདཱིནཾ ཨུཛུཔཊིཔཀྑབྷཱཝཏོ ཙ ཨིམེཡེཝ པཉྩ ཛྷཱནངྒབྷཱཝེན ཝཝཏྠིཏཱཏི. ཡཐཱཧུ –

‘‘ཨུཔནིཛ྄ཛྷཱནཀིཙྩཏྟཱ, ཀཱམཱདིཔཊིཔཀྑཏོ;

སནྟེསུཔི ཙ ཨཉྙེསུ, པཉྩེཝ ཛྷཱནསཉྙིཏཱ’’ཏི.

དེསནཱཀྐམཏོ, མཧགྒཏདྷམྨེསུ པཋམཾ ཨདྷིགནྟབྦཏོ ཙ པཋམཾ, པཋམཾ སམཱཔཛྫིཏབྦནྟིཔི ¶ པཋམནྟི ཝདནྟི. ཏཾ པན ན ཨེཀནྟལཀྑཎཾ ཛྷཱནཔཊིལོམཱདིཝསེན སམཱཔཛྫནེ ཨསམྦྷཝཏོ.

པུརིམཔཙྪིམཙིཏྟེསུ ཨུཔྤཛྫམཱནསྶཱཔི ཨཔྤནཱཀྑཎེ ཨནུཔྤཛྫནཏོ ཝིཏཀྐོ ཝིཔྤཧཱིནོ ཨེཏསྶ, ཏཏོ ཝཱ ཨེཏཾ ཝིཔྤཧཱིནནྟི ¶ ཝིཏཀྐཝིཔྤཧཱིནཾ. བྷཱཝནཱཡ ཧི པཧཱིནཏྟཱ ཝིཏཀྐོ ཛྷཱནཀྑཎེ ནུཔྤཛྫཏི. ཨསཾཀིལིཊྛསབྷཱཝཏྟཱ པན ཨུཔཙཱརབྷཱཝནཱཡ ཙ ཏཾ པཧཱཏུཾ ཨསམཏྠབྷཱཝཏོ པུརིམབྷཱགེ, པཙྪཱབྷཱགེ ཙ ཨཔཙྩནཱིཀཙིཏྟཔྤཝཏྟིཏོ ཨུཔྤཛྫཏིཡེཝཱཏི.

ནནུ ཙ ‘‘ཨསཾཀིལིཊྛསབྷཱཝཏྟཱ’’ཏི ཝུཏྟཾ, ཨཐ ཀཐཾ ཛྷཱནེན ཨེས པཧཱིཡཏི? ན ཧི ཀུསལེཧི ཨསཾཀིལིཊྛདྷམྨསྶ པཧཱནཾ ཨཏྠི རཱགཱདིསཾཀིལིཊྛཱནཾ པཱཔདྷམྨཱནམེཏསྶ ཨུཛུཔཊིཔཀྑབྷཱཝཏོཏི? ཝུཙྩཏེ – ཨསཾཀིལིཊྛསབྷཱཝསྶཱཔི ཨེཏསྶ ཨོལཱ༹རིཀཏཱཡ དུབྦལབྷཱཝཏོ ཛྷཱནཀྑཎེ ཨནུཔྤཏྟིསབྷཱཝཱཔཱདནཏྠཾ ཏཏྠ ནིཀནྟིཝིཀྑམྦྷནཝསེན དུཏིཡཛ྄ཛྷཱནབྷཱཝནཱ ཧོཏཱིཏི ཏསྶཱ བལེན ཏཾ ཛྷཱནཀྑཎེ ཨནུཔྤཛྫནྟཾ ནིཀནྟིཝིཀྑམྦྷནཝསེན ཝཱ ཝིཀྑམྦྷིཏཾ པཧཱིནཾ ནཱམ ཧོཏི. ཡདི ཨེཝཾ ཨུཔཙཱརེནཔི ནིཀནྟི ཝིཀྑམྦྷཱིཡཏཱིཏི ཏཏྠཔིསྶ པཧཱནཾ སིཡཱ, ཡཐཱ པཋམཛ྄ཛྷཱནསྶ ཨུཔཙཱརེ ནཱིཝརཎཱནཱིཏི? ནཡིདམེཝཾ, ནཱིཝརཎཔྤཧཱནསྶ ཝིཡ ཝིཏཀྐཱརམྨཎིཀནིཀནྟི ཝིཀྑམྦྷནསྶ ཨུཔཙཱརེན སཱཏིསཡཾ ཨནིཔྥཛྫནཏོ. སཱཏིསཡཉྷི ཏཏྠ ནིཀནྟིཔྤཧཱནཾ ཨཔྤནཱཡ ཨེཝ ཧོཏི, ཏསྨཱ ཡདཝོཙུམྷཱ ‘‘ཨུཔཙཱརབྷཱཝནཱཡ ཙ ཏཾ པཧཱཏུཾ ཨསམཏྠབྷཱཝཏོ’’ཏི, ཏཾ སུཊྛུ ཨུཔཔརིཀྑིཏྭཱ ཝུཏྟནྟི དཊྛབྦཾ. ‘‘ཝིཙཱརཝིཔྤཧཱིན’’ནྟིཨཱདཱིསུཔི ཝུཏྟནཡཱནུསཱརེན ཨཏྠོ དཊྛབྦོ. དུཏིཡཛ྄ཛྷཱནེཡེཝ པཧཱིནསྶ ཝིཏཀྐསྶ ཨིདྷ ཨཔྤཝཏྟིམཏྟདསྶནཏྠཾ ‘‘ཝིཏཀྐཝིཙཱརཝིཔྤཧཱིན’’ནྟི ཝིཏཀྐ-གྒཧཎཾ ཀཏཾ. ཨེཝཾ ‘‘ཝིཏཀྐཝིཙཱརཔཱིཏིཝིཔྤཧཱིན’’ནྟིཨཱདཱིསུཔི.

ཡཐཱསམྦྷཝནྟི པཐཝཱིཀསིཎཱདཱིསུ ཡཾ ཡཾ ཨཱརམྨཎཾ ཡསྶ ཡསྶ སམྦྷཝཏི, ཏདནཏིཀྐམཏོ. ཀསིཎཱནཱཔཱནེསུ ཧི པཉྩེཝ ཛྷཱནཱནི པཝཏྟནྟི, ཨསུབྷཀཱཡགཏཱསཏཱིསུ པཋམཛ྄ཛྷཱནཾ, ཨནུཔེཀྑཱབྲཧྨཝིཧཱརེསུ པཉྩམཛ྄ཛྷཱནཝཛྫཱནི, ཨུཔེཀྑཱབྲཧྨཝིཧཱརེ པཉྩམཛ྄ཛྷཱནནྟི.

པཐཝཱིཀསིཎཱདཱིསཱུཏི ¶ ¶ ཨེཏྠ ཨཱདི-གྒཧཎེན ཀེཝལཾ ཨཱཔོཀསིཎཱདཱིནམེཝ, ཨཐ ཁོ ཨསུབྷཱདཱིནམྤི ཨཔྤནཱཝཧཀམྨཊྛཱནཱནཾ སངྒཧོཏི དཊྛབྦཾ. ཨེཏྠ ཙ ཨབྷིབྷཱཡཏནཝིམོཀྑཛྷཱནཱནི པཝཏྟཱཀཱརམཏྟཏོ བྷིནྣཱནི, ཨཱརམྨཎཏོ པན ཀསིཎཱཡཏནཱནེཝ ཧོནྟཱིཏི ཀསིཎཱཡཏནཛྷཱནེཧེཝ ཏཱནི སངྒཧིཏཱནི. ‘‘ཡཐཱསམྦྷཝཾ…པེ… ཨནེཀཝིདྷ’’ནྟི ཝཱ ཝཙནེན རཱུཔཱཝཙརཛ྄ཛྷཱནེ སབྦོཔི ལབྦྷམཱནཀབྷེདོ སངྒཧིཏོཏི ཨབྷིབྷཱཡཏནཝིམོཀྑཛྷཱནཱནི ཝིསུཾ ན ཝུཏྟཱནི, ཏཱནི པན སརཱུཔཏོ ཨེཝཾ ཝེདིཏབྦཱནི.

ཏཏྠ ཉཱཎུཏྟརསྶ ཡོགཱཝཙརསྶ པཐཝཱིཀསིཎཱདིཨཱརམྨཎཾ ཨབྷིབྷཝིཏྭཱ ‘‘ན མེཏྠ ཨཔྤནཱནིབྦཏྟནེ བྷཱརོ’’ཏི པཊིཔནྣསྶ ནིམིཏྟུཔྤཏྟིཏོ ཨུདྡྷཾ དུཏིཡཏཏིཡཝཱིཐིཡཾ, ཙཏུཏྠཔཉྩམཝཱིཐིཡཾ ཝཱ པཊིལདྡྷཾ ཛྷཱནཾ ཨབྷིབྷཱཡཏནཾ ནཱམ. ཏཉྷི ཨཱརམྨཎཾ ཨབྷིབྷཝཏཱིཏི ཨབྷིབྷཱུ, ཡོགིནོ སུཁཝིསེསཱནཾ ཨདྷིཊྛཱནཏཱཡ, མནཱཡཏནདྷམྨཱཡཏནཔརིཡཱཔནྣཏཱཡ ཝཱ ཨཱཡཏནནྟི ཨབྷིབྷཱཡཏནཾ, ཨབྷིབྷཝིཏབྦཾ ཝཱ ཨབྷིབྷཱུ, ཨཱལམྦཎཾ, ཏཾ ཨཱཡཏནམསྶཱཏི ཨབྷིབྷཱཡཏནཾ. ཨཐ ཝཱ ཨཱལམྦཎཱབྷིབྷཝནཏོཡེཝ ཨབྷིབྷཱུ, པརིཀམྨཾ, ཉཱཎཾ ཝཱ, ཏཾ ཨཱཡཏནཾ ཀཱརཎམསྶཱཏི ཨབྷིབྷཱཡཏནཾ. པརིཀམྨཾ, ཉཱཎཾ ཝཱ ཨཱལམྦཎཾ ཨབྷིབྷཝིཏྭཱ པཝཏྟམཱནཾ ཨུཔཙཱརུཔྤཏྟིཏོ པཉྩམཝཱིཐིམནཏིཀྐམིཏྭཱ ཨཔྤནཾ ནིབྦཏྟེཏི. པཉྩམཝཱིཐིཏོ པརཾ ནིབྦཏྟཾ པན ཨབྷིབྷཝིཏུཀཱམཏཱཡ ནིབྦཏྟིཏམྤི ཨབྷིབྷཱཡཏནཾ ནཱམ ན ཧོཏི. སཱམཉྙགཏིཡཱ པན ཀསིཎཱཡཏནམེཝ ཧོཏི. ཨིམམེཝ ཧི སཱིགྷཏརཔྤཝཏྟིཾ སནྡྷཱཡ ཨཊྛཀཐཱཡཾ ‘‘ཏཱནི ཨབྷིབྷཝིཏྭཱ སམཱཔཛྫཏི, སཧ ནིམིཏྟུཔྤཱདེནེཝེཏྠ ཨཔྤནཾ ནིབྦཏྟེཏཱི’’ཏི (དྷ. ས. ཨཊྛ. ༢༠༤) ཝུཏྟཾ. ནནུ ཙ ཨཊྛཀཐཱཡཾ ཡཐཱརུཏཝསེནེཝ ཨཏྠོ ཀསྨཱ ན གཡ྄ཧཏི. ‘‘སཧ ནིམིཏྟུཔྤཱདེནེཝཱ’’ཏི (དྷ. ས. ཨཊྛ. ༢༠༤) ཧི ཝུཏྟཏྟཱ ནིམིཏྟུཔྤཏྟིཡཱ སཧུཔྤནྣཾ ཛྷཱནམབྷིབྷཱཡཏནནྟི ¶ ཝིཉྙཱཡཏཱིཏི? ནཡིདམེཝཾ, ནིམིཏྟུཔྤཱདེན སཧ ཨཔྤནཱཡ ཨསམྦྷཝཏོ. ནིམིཏྟུཔྤཱདོཏི ཧི ཨིདྷ པཊིབྷཱགནིམིཏྟསྶ ཨུཔྤཏྟི ཏདཱརམྨཎསྶ ཝཱ ཨུཔཙཱརཛ྄ཛྷཱནསྶ, ཀིཾ ཏཱཝ པཊིབྷཱགནིམིཏྟུཔྤཏྟིཡཱ སཧ ཨཔྤནཱཡ ནིབྦཏྟི ཨུཔཙཱརཛ྄ཛྷཱནེ ཨསཏི ཏསྶཱ ཨསམྦྷཝཏོ, ནཱཔི ཨུཔཙཱརཛ྄ཛྷཱནེན སཧ ཨེཀཝཱིཐིཡཾ ནིབྦཏྟི ཏསྶཱ ཨུཔཙཱརབྷཱཝནཱཔབནྡྷསེཝིཏབྦབྷཱཝེན ཏདཱ ཨསམྦྷཝཏོ, ཏསྨཱ ནཱཏིཙིརཱཡནཔྤཝཏྟིདསྶནཏྠཾ སམཱིཔིམྷི སམཱིཔཀཱརཱིཡཱུཔཙཱརེན ཨཊྛཀཐཱཡཾ ཏཐཱ ཝུཏྟནྟི ཝེདིཏབྦཾ. ཡདི ནིམིཏྟུཔྤཏྟིཏོ ནཱཏིཙིརཔྤཝཏྟམབྷིབྷཱཡཏནཾ, ཀཐཾ ཏསྶ དནྡྷཱབྷིཉྙཱཁིཔྤཱབྷིཉྙཱབྷེདོ པཱལི༹ཡཾ ཝུཏྟོཏི? ཝུཙྩཏེ – ཙཏུཏྠཔཉྩམཛཝནཝཱིཐིཡཾ ཨུཔྤནྣཾ ཙིརཀཱལནིབྦཏྟིཏཱཡ དནྡྷཱབྷིཉྙཾ, དུཏིཡཏཏིཡཝཱིཐིཡཾ ¶ ཨུཔྤནྣཾ ཏབྦིཔརཱིཏལཀྑཎཏཱཡ ཁིཔྤཱབྷིཉྙནྟི. ཀེཙི པན ‘‘ཨབྷིབྷཱཡཏནཾ ནཱམ ཝསིབྷཱཝཔྤཏྟམེཝ, ནེཏར’’ནྟི ཝདནྟི, ཏཾ ཏེསཾ མཏིམཏྟཾ, ཝསིབྷཱཝཔྤཏྟིཡཱ ནིམིཏྟུཔྤཏྟིཏོ དཱུརཏརབྷཱཝེན ‘‘སཧ ནིམིཏྟུཔྤཱདེནེཝེཏྠ ཨཔྤནཾ ནིབྦཏྟེཏཱི’’ཏི ཨཊྛཀཐཱཝཙནེན སཧ ཝིརུཛ྄ཛྷནཏོ.

ཨཔིཙ ཝསིབྷཱཝཔྤཏྟཾ ཛྷཱནཾ ཨབྷིབྷཝནཀཱརཎནིརཔེཀྑཾ ཝསིབྷཱཝབལེནེཝ སཀྐཙྩཾ སམཱཔཛྫིཏུཾ ན སཀྐཱཏི ན ཏཾ ཨབྷིབྷཱཡཏནཾ ནཱམ ཧོཏི, ཏསྨཱ ཨཔྤཏྟཝསིབྷཱཝཱ པཋམུཔྤནྣཱཡེཝ ཨབྷིབྷཱཡཏནནྟི ནིཊྛམེཏྠ གནྟབྦཾ. ཡདི ཨེཝཾ ཀཐཾ ‘‘ཨཔྤམཱཎཾ པརིཏྟཱརམྨཎཾ, ཨཔྤམཱཎཾ ཨཔྤམཱཎཱརམྨཎ’’ནྟི (དྷ. ས. ༢༡༢-༢༡༣) ཨབྷིབྷཱཡཏནདེསནཱཡཾ ཝུཏྟཾ. ཝསིབྷཱཝཔྤཏྟཉྷི ཛྷཱནཾ ཨཔྤམཱཎནྟི ཝུཙྩཏི. ཨིདཉྩ ཨུཔྤནྣམཏྟཏྟཱ པརིཏྟམེཝཱཏི? ནཱཡཾ དོསོ. པཋམཾ ཨབྷིབྷཱཡཏནཝསེན པཊིལདྡྷཛ྄ཛྷཱནཾ པཙྪཱ ཝསིབྷཱཝཔྤཏྟམྤི ཨབྷིབྷཱཡཏནནཱམམེཝ ལབྷཏཱིཏི ཝསིབྷཱཝཔྤཏྟམབྷིབྷཱཡཏནཾ ཨཔྤམཱཎཾ, ཨིཏརཾ པརིཏྟཾ.

ཨཐ ¶ ཝཱ ཝསིབྷཱཝཔྤཏྟཾ ཨཔྤམཱཎནྟི ཨུཀྐཾསགཏིཔརིགྒཧཝསེན ཝུཙྩཏི. ཏཾ པན ཡཾ བལཝཏརཾ, ཏཾ ཨཔྤམཱཎནྟི ཨིམསྶ ཨཏྠསྶ ཨུཔལཀྑཎཾ ཀཏྭཱ ཝདནྟི. བལཝབྷཱཝནིབནྡྷནཾ ཨཔྤམཱཎཏྟཾ. བལཝབྷཱཝོ ཙ པཋམཨཔྤནཱཝཱརཏོ པཙྪིམཔཙྪིམཨཔྤནཱཝཱརཱནཾ བལཝཏཱཡ ཨཝསིཏཱཔཏྟེཔི ཛྷཱནེ སམྦྷཝཏཱིཏི བལཝནྟཾ ཨཔྤམཱཎཾ, ཨིཏརཾ པརིཏྟནྟི ཨེཝཾ ཨཝསིཏཱཔཏྟེཔི ཛྷཱནེ ཨཔྤམཱཎཱདིབྷཱཝོ ཝེདིཏབྦོ. ཨཐ ཝཱ ཨཔྤནཱཡ བལཝབྷཱཝོ ནཱམ ཨུཔཙཱརསྶ བལཝཏཱཡ སཏི ཧོཏི. ཨུཔཙཱརཉྩ ཏཾ བལཝཾ, ཡཾ སཧསཱ ཨཔྤནཾ ཨུཔྤཱདེཏུཾ སཀྐུཎེཡྻ, ཏསྨཱ ཁིཔྤཱབྷིཉྙཱནཾ དྭིནྣཾ ཨབྷིབྷཱཡཏནཛྷཱནཱནཾ ཨུཔཙཱརཝཱིཐིཡཱ ཨནནྟརཾ དུཏིཡཝཱིཐིཡཾ ཨུཔྤནྣཾ ཨུཔཙཱརཛ྄ཛྷཱནསྶ བལཝཏཱཡ སཡམྤི བལཝཏརནྟི ཨཔྤམཱཎཾ ནཱམ ཧོཏི. དུཏིཡཝཱིཐིམཏིཀྐམིཏྭཱ ཏཏིཡཝཱིཐིཡཾ ཨུཔྤནྣཾ ཏདིཏརསབྷཱཝཏཱཡ པརིཏྟཾ. ཏཐཱ དནྡྷཱབྷིཉྙཱནཾ ཙཏུཏྠཝཱིཐིཡཾ ཨུཔྤནྣཾ ཨཔྤམཱཎཾ. པཉྩམཝཱིཐིཡཾ ཨུཔྤནྣཾ པརིཏྟནྟི. ཨཐ ཝཱ ཡཏྠ ཀཏྠཙི ཨཔྤནཱཝཱིཐིཡཾ པཉྩམཾ ཨུཔྤཛྫནཀཨཔྤནཱཏོ ཙཏུཏྠཾ ཨུཔྤཛྫམཱནཱཡ བལཝབྷཱཝོཏི ཏཾཝསེནཱཔེཏྠ པརིཏྟཨཔྤམཱཎཏཱ ཝེདིཏབྦཱ.

ཏཾ པནེཏཾ གཎནཏོ ཨཊྛཝིདྷཾ ཧོཏི. ཡཐཱཧ –

‘‘ཨཛ྄ཛྷཏྟཾ ¶ ཨརཱུཔསཉྙཱི བཧིདྡྷཱ རཱུཔཱནི པསྶཏི པརིཏྟཱནི, ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི ཨེཝཾསཉྙཱི ཧོཏི. ཨཛ྄ཛྷཏྟཾ ཨརཱུཔསཉྙཱི བཧིདྡྷཱ རཱུཔཱནི པསྶཏི པརིཏྟཱནི སུཝཎྞདུབྦཎྞཱནི. ཨཛ྄ཛྷཏྟཾ ཨརཱུཔསཉྙཱི བཧིདྡྷཱ རཱུཔཱནི པསྶཏི ཨཔྤམཱཎཱནི. ཨཛ྄ཛྷཏྟཾ ཨརཱུཔསཉྙཱི བཧིདྡྷཱ རཱུཔཱནི པསྶཏི ཨཔྤམཱཎཱནི སུཝཎྞདུབྦཎྞཱནི, ཏཱནི ཨབྷིབྷུཡྻ ཛཱནཱམི པསྶཱམི. ནཱིལཱནི ནཱིལཝཎྞཱནི ནཱིལནིདསྶནཱནི ནཱིལནིབྷཱསཱནི, ཏཱནི ཨབྷིབྷུཡྻ ཛཱནཱམི པསྶཱམི. པཱིཏཱནི པཱིཏཝཎྞཱནི པཱིཏནིདསྶནཱནི པཱིཏནིབྷཱསཱནི. ལོཧིཏཱནི ལོཧིཏཝཎྞཱནི ལོཧིཏནིདསྶནཱནི ¶ ལོཧིཏནིབྷཱསཱནི. ཨོདཱཏཱནི ཨོདཱཏཝཎྞཱནི ཨོདཱཏནིདསྶནཱནི ཨོདཱཏནིབྷཱསཱནི, ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི ཨེཝཾསཉྙཱི ཧོཏཱི’’ཏི (དཱི. ནི. ༢.༡༧༣; ༣.༣༣༨; མ. ནི. ༢.༢༤༩; ཨ. ནི. ༡.༤༢༧-༤༣༤; ༨.༦༥).

ཏཏྠ ཨཛ྄ཛྷཏྟཾ ཨརཱུཔསཉྙཱིཏི ཨལཱབྷིཏཱཡ ཝཱ ཨནཏྠིཀཏཱཡ ཝཱ ཨཛ྄ཛྷཏྟེསུ ཀེསཱདཱིསུ པརིཀམྨཨཔྤནཱསཉྙཱཝིརཧིཏོ. བཧིདྡྷཱ རཱུཔཱནི པསྶཏཱིཏི བཧིདྡྷཱ ཨཊྛསུ ཀསིཎེསུ, ཙཏཱུསུ བྷཱུཏཀསིཎེསུ ཨེཝ ཝཱ ཀཏཔརིཀམྨཀཏཱཡ པརིཀམྨཝསེན ཙེཝ ཨཔྤནཱཝསེན ཙ ཏཱནི བཧིདྡྷཱ ཨཊྛ, ཙཏྟཱརི ཝཱ ཀསིཎརཱུཔཱནི པསྶཏི. པརིཏྟཱནཱིཏི ཨམཧནྟཱནི. ཨབྷིབྷུཡྻཱཏི ཡཐཱ མཧགྒྷསོ སམྤནྣགཧཎིཀོ པུརིསོ ཀཊཙྪུམཏྟཾ བྷཏྟཾ ལབྷིཏྭཱ ‘‘ཀིཾ ཨེཏྠ བྷུཉྫིཏབྦཾ བྷཏྟཾ ཨཏྠཱི’’ཏི སངྐཌྜྷིཏྭཱ སབྦཾ ཨེཀཀབལ༹མེཝ ཀརོཏི, ཨེཝམེཝ ཉཱཎུཏྟརིཀོ པུགྒལོ ཝིསདཉཱཎོ ‘‘ཀིཾ ཨེཏྠ པརིཏྟཀེ ཨཱརམྨཎེ སམཱཔཛྫིཏབྦཾ ཨཏྠི, ནཱཡཾ མམ བྷཱརོ’’ཏི ཏཱནི རཱུཔཱནི པརིཀམྨེན, ཉཱཎེན ཝཱ ཨབྷིབྷཝིཏྭཱ སམཱཔཛྫཏི. ཧེཊྛཱ ཝུཏྟནཡེན སཱིགྷཾ ཨཔྤནཾ ནིབྦཏྟེཏི. ‘‘ཛཱནཱམི པསྶཱམཱི’’ཏི ཨིམིནཱ པནསྶ པུབྦཱབྷོགོ ཀཐིཏོ, ཏདཱགམནཏོ ཙ ཨནྟོསམཱཔཏྟིཡཾ ཙིཏྟཱབྷིསངྑཱརོ. ཨིཏརཐཱ ཨནེན ཨཱབྷོགམཏྟེ ཀཐིཏེ ཏེན སཱདྷིཏབྦཾ ཛྷཱནཾ ན ཝུཏྟཾ ཧོཏི, ཨབྷིབྷཱཡཏནདེསནཱཝཱཡཾ ཛྷཱནཝིསཡཱཏི. ཨཱགམཊྛཀཐཱསུ པན སམཱཔཏྟིཏོ ཝུཊྛིཏསྶ པུབྦབྷཱགབྷཱཝནཱཝསེན ཛྷཱནཀྑཎེ པཝཏྟམབྷིབྷཝནཱཀཱརཾ གཧེཏྭཱ པཝཏྟམཱབྷོགཾ སནྡྷཱཡ –

‘‘ཨིམིནཱ པནསྶ ཨཱབྷོགོ ཀཐིཏོ. སོ ཙ ཁོ སམཱཔཏྟིཏོ ཝུཊྛིཏསྶ, ན ཨནྟོསམཱཔཏྟིཡ’’ནྟི ¶ (དཱི. ནི. ཨཊྛ. ༢.༡༧༣; མ. ནི. ཨཊྛ. ༢.༢༤༩; ཨ. ནི. ཨཊྛ. ༣.༨.༦༥) ཝུཏྟཾ.

དུཏིཡེ ¶ སུཝཎྞདུབྦཎྞཱནཱིཏི པརིསུདྡྷཱཔརིསུདྡྷཝཎྞཱནི. པརིསུདྡྷཱནི ཧི ནཱིལཱདཱིནི སུཝཎྞཱནི, ཨཔརིསུདྡྷཱནི དུབྦཎྞཱནཱིཏི ཨིདྷ ཨདྷིཔྤེཏཱནི.

ཏཏིཡེ ཨཔྤམཱཎཱནཱིཏི ཝུདྡྷིཔྤམཱཎཱནི ཝིཔུལཱནི ཁལམཎྜལཱདཱིནི. ཝཌྜྷནཝསེན པནེཏྠ ཨཔྤམཱཎཏཱ ན གཧིཏཱ ཀསིཎཝཌྜྷནསྶ ཨིདྷ ཨསམྦྷཝཏོ. ཀསིཎསྶ ཧི དྭེ ཝཌྜྷནབྷཱུམིཡོ ཨུཔཙཱརབྷཱུམི, ཨཔྤནཱབྷཱུམི ཝཱ. ཏཏྠ ན ཏཱཝ ཨིདྷ ཨུཔཙཱརབྷཱུམིཡཾ ཝཌྜྷནཾ སམྦྷཝཏི. ནིམིཏྟུཔྤཏྟིཡཱ སམཀཱལཾ ཝིཡ ཨུཔྤཛྫམཱནེ ཛྷཱནེ ཀུཏོ ཏསྶ ཨོཀཱསོཏི, ནཱཔི ཨཔྤནཱབྷཱུམིཡཾ. ཝཌྜྷིཏསྶ པཋམུཔྤནྣཛྷཱནཱརམྨཎཏཱ ན ཡུཛྫཏི, ཏསྨཱ སབྷཱཝམཧནྟཱནེཝ ཨཱལམྦཎཱནི ཨིདྷ ཨཔྤམཱཎཱནཱིཏི ཨདྷིཔྤེཏཱནི. ཀེཙི པན ‘‘ཝཌྜྷིཏཝསེནེཝ ཨཔྤམཱཎཱནཱིཏི གཧེཏྭཱ པཋམཾ ཨབྷིབྷཝནིཙྪཱཡ ཨབྷཱཝེན ཝཌྜྷེཏྭཱ པཙྪཱ ཨབྷིབྷཝནིཙྪཱཡ སཏི ཨབྷིབྷཝནཱཀཱརེན པཝཏྟོ ཏསྨིཾ ཨཔྤནཾ ནིབྦཏྟེཏཱིཏི ཨཔྤནཾ པཊིལབྷིཏྭཱ ཝཌྜྷིཏནིམིཏྟེསུ ཨིདཾ ཨབྷིབྷཱཡཏནཾ ཝུཏྟ’’ནྟི ཝདནྟི.

ཙཏུཏྠེ ཨབྷིབྷུཡྻཱཏི ཨབྷིབྷཝིཏྭཱ. ཡཐཱ ནཱམ སམྤནྣགཧཎིཀོ མཧགྒྷསོ པུརིསོ ཨེཀཾ བྷཏྟཝཌྜྷིཏཀཾ ལབྷིཏྭཱ ‘‘‘ཨཉྙོཔི ཧོཏུ, ཨཉྙོཔི ཧོཏཱུ’ཏི ཀིཾ ཨེས མཡ྄ཧཾ ཀརིསྶཏཱི’’ཏི ན ཏཾ མཧནྟཏོ པསྶཏི, ཨེཝམེཝ ཉཱཎུཏྟརོ ཝིསདཉཱཎོ པུགྒལོ ‘‘‘ཀིཾ ཨེཏྠ སམཱཔཛྫིཏབྦཾ, ནཡིདཾ ཨཔྤམཱཎ’ནྟི མཡ྄ཧཾ ཙིཏྟེཀགྒཏཱཀརཎེ བྷཱརོ’’ཏི ཨབྷིབྷཝིཏྭཱ སམཱཔཛྫཏི. ཝུཏྟནཡེནེཝ ཨཔྤནཾ ནིབྦཏྟེཏི.

པཉྩམེ ནཱིལཱནི…པེ… ནཱིལནིབྷཱསཱནཱིཏི ཨེཏཱནི པརིཡཱཡནཱམཱནཱིཏི ཏཏྠ ‘‘ནཱིལཱནཱི’’ཏི སབྦསངྒཱཧཀཝསེན ཝུཏྟཾ. ཨེཏྟཀེཡེཝ པན ཝུཏྟེ ཏཾཡོགཏོ ཏབྦོཧཱརེན གུཎཡུཏྟེཔི པསངྒོ སིཡཱཏི ཏནྣིཝཱརཎཏྠཾ ‘‘ནཱིལཝཎྞཱནཱི’’ཏི ཝཎྞཝསེན ཝུཏྟཾ. ཨེཝམྤི ཧི བཧུབྦཱིཧིཝསེན གུཎོཔི པསངྒོ ཧོཏཱིཏི ‘‘ནཱིལནིདསྶནཱནཱི’’ཏི ནིདསྶནཝསེན ཝུཏྟཾ ¶ . ནིདསྶིཏབྦཉྷི ནིདསྶནཾ, ཙཀྑུནཱ དཊྛབྦཾ རཱུཔཾ. ཏཏོ སེཏཱདིནིཝཱརཎཏྠཾ ནཱིལ-སདྡེན སཧ སམཱསོ ཀཏོཏི ཨཔཉྙཱཡམཱནཙཱིཝརཱནི ཨསམྦྷིནྣཝཎྞཱནི ཨེཀནཱིལཱནེཝ ཧུཏྭཱ དིསྶམཱནཱནཱིཏི ¶ ཝུཏྟཾ ཧོཏི. ‘‘ནཱིལནིབྷཱསཱནཱི’’ཏི ཨིདཾ པན ཨོབྷཱསཝསེན ཝུཏྟཾ, ནཱིལོབྷཱསཱནི ནཱིལཔྤབྷཱཡུཏྟཱནཱིཏི ཨཏྠོ. ཨེཏེན ཏེསཾ སུཝིསུདྡྷཏྟཾ དསྶེཏི. ‘པཱིཏཱནཱི’’ཏིཨཱདཱིསུཔི ཨིམིནཱཝ ནཡེན ཨཏྠོ ཝེདིཏབྦོ. ཨཊྛསུ ཙེཏེསུ པུརིམཾ ཨབྷིབྷཝནཱཀཱརེན ཝཎྞཱབྷོགརཧིཏཱནི ཨཊྛཔི ཀསིཎཱནི པརིཏྟཱནི ཨཱརམྨཎཾ ཀཏྭཱ ཨུཔྤནྣཾ སནྡྷཱཡ ཝུཏྟཾ. ཏཏིཡཾ ཏཐཱ ཨཔྤམཱཎཱནི. དུཏིཡཙཏུཏྠཱནིཡེཝ དྭེ ཝཎྞཱབྷོགསཧིཏཱནི ཨཱརབྦྷ ཨུཔྤནྣཾ, ན པན ཝཎྞཀསིཎཝསེན ཨུཔྤནྣཾ ཏསྶ ཝིསུཾ ཝཀྑམཱནཏྟཱ.

པཉྩམཱདཱིནི པན ཏེསུ ཀཏཱདྷིཀཱརེ སནྡྷཱཡ སུཝིསུདྡྷཝཎྞཝསེནེཝ དེསིཏཱནི. ན ཧི ཏེསཾ ཨབྷིབྷཝནསྶ པརིཏྟཏཱ, ཨཔྤམཱཎཏཱ ཝཱ ཀཱརཎཾ, ཨཐ ཁོ སུཝིསུདྡྷནཱིལཱདིབྷཱཝོ. ཏཏྠ ཧི ཏེ ཀཏཱདྷིཀཱརཱཏི. ནནུ ཙ ཨཱགམཊྛཀཐཱསུ ‘‘སུཝཎྞཱནི ཝཱ ཧོནྟུ དུབྦཎྞཱནི ཝཱ, པརིཏྟཨཔྤམཱཎཝསེནེཝ ཨིམཱནི ཨབྷིབྷཱཡཏནཱནི དེསིཏཱནཱི’’ཏི (དཱི. ནི. ཨཊྛ. ༢.༡༧༣; མ. ནི. ཨཊྛ. ༢.༢༤༩; ཨ. ནི. ཨཊྛ. ༣.༨.༦༥) ཝུཏྟནྟི? སཙྩཾ, ཏཾ པན ཨཱགམེ ཨབྷིབྷཱཡཏནཱནཾ ཨཉྙཐཱ ཨཱགཏཏྟཱ ཝུཏྟཾ. ཏཏྠ ཧི –

‘‘ཨཛ྄ཛྷཏྟཾ རཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པརིཏྟཱནི སུཝཎྞདུབྦཎྞཱནི, ཨཔྤམཱཎཱནི སུཝཎྞདུབྦཎྞཱནི, ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པརིཏྟཱནི སུཝཎྞདུབྦཎྞཱནི, ཨཔྤམཱཎཱནི སུཝཎྞདུབྦཎྞཱནཱི’’ཏི (དཱི. ནི. ༢.༡༧༣; ༣.༣༣༨; མ. ནི. ༢.༢༤༩; ཨ. ནི. ༡.༤༢༧-༤༣༤; ༨.༦༥) –

ཨེཝཾ ཙཏྟཱརིཡེཝ ཨབྷིབྷཱཡཏནཱནི ཨཱགཏཱནི, ཏསྨཱ ཏདཊྛཀཐཱསུ ཝཎྞཱབྷོགེ ཝིཛྫམཱནེ ཨཝིཛྫམཱནེཔི པརིཏྟཨཔྤམཱཎཏཱཝསེནེཝ ¶ ཨིམེསཾ དེསིཏབྷཱཝོ ཝུཏྟོ. པརིཏྟཨཔྤམཱཎཏཱ ཧི ཨིམེསུ ཙཏཱུསུ ཨབྷིབྷཝནསྶ ཀཱརཎཾ ཝཎྞཱབྷོགེ ཝིཛྫམཱནེ ཨཝིཛྫམཱནེཔཱིཏི. ནནུ ཙ སབྦཏྠ ‘‘སུཝཎྞདུབྦཎྞཱནཱི’’ཏི ཝཙནཏོ ཝཎྞཱབྷོགསཧིཏཱནིཡེཝ ཏཏྠ གཧིཏཱནཱིཏི? ཏཾ ན, ཝཎྞཱབྷོགརཧིཏཱནི, སཧིཏཱནི ཙ སབྦཱནི པརིཏྟཱནི ཨེཀཏོ ཀཏྭཱ ‘‘པརིཏྟཱནི སུཝཎྞདུབྦཎྞཱནཱི’’ཏི ཝུཏྟཱནི, ཏཐཱ ‘‘ཨཔྤམཱཎཱནི སུཝཎྞདུབྦཎྞཱནཱི’’ཏི. ཡདི ཨེཝཾ ཀཐཾ ཝིསིཊྛཱནཾ ཝཎྞཱབྷོགརཧིཏཱནཾ, སཧིཏཱནཉྩ ཨེཀཛ྄ཛྷཾ མནསིཀཱརོ, ན ཨེཀཛ྄ཛྷཾ, ཝིསུཾཡེཝ ཏེསཾ མནསིཀཱརོ. ཡདི ཨེཝཾ ཝིསུཾ ཀཐམེཀཏྟནྟི? པརིཏྟབྷཱཝསཱམཉྙཏོ. ཡདི ཨེཝཾ སུཝཎྞདུབྦཎྞ-གྒཧཎམཏིརིཙྩཏི ¶ ཨཝསིཊྛོཏི? ནཱཏིརིཙྩཏི པརིཡཱཡདེསནཱབྷཱཝཏོ. ཨཏྠི ཧི ཨེས པརིཡཱཡོ, ཡདིདཾ ཝཎྞཱབྷོགཛནིཏཱཛནིཏཾ ཝིསེསཾ ཨགྒཧེཏྭཱ པརིཏྟབྷཱཝསཱམཉྙེན ཨེཀཏྟཾ ནེཏྭཱ ‘‘པརིཏྟཱནི ཨབྷིབྷུཡྻཱ’’ཏི ཝཏྭཱ པུན ཏདནྟོགདྷམེཝ པབྷེདཾ ཝིནེཡྻཝསེན དསྶེཏུཾ ཏཱནི ཙ ཀདཱཙི ཝཎྞཝསེན ཨཱཝཛྫིཏཱནི ཧོནྟི, ‘‘སུཝཎྞདུབྦཎྞཱནི ཨབྷིབྷུཡྻཱ’’ཏི ཝཏྟབྦཏཱཡ ཝཎྞཱབྷོགརཧིཏཱནི, སཧིཏཱནི ཙ ཝིསུཾ མནསི ཀཏྭཱ ཨུབྷཡཏྠཱཔི ཝཎྞཱབྷོགརཧིཏཔརིཏྟཱབྷིབྷཝནེ, ཏཾསཧིཏཔརིཏྟཱབྷིབྷཝནེ ཙ པརིཏྟཱབྷིབྷཝནསཱམཉྙཾ གཧེཏྭཱ ཨེཀཏྟཾ ཀཏནྟི. ཨབྷིདྷམྨེ པན ནིཔྤརིཡཱཡདེསནཏྟཱ ཝཎྞཱབྷོགརཧིཏཱནི, སཧིཏཱནི ཙ ཝིསུཾ ཝུཏྟཱནི. ཨཏྠི ཧི ཨུབྷཡཏྠཱབྷིབྷཝནཝིསེསོཏི. ཧོཏུ ཏཱཝ, ཨེཝཾ སུཏྟཱབྷིདྷམྨཔཱཋཝིསེསཏོ ཨཊྛཀཐཱཡ པཱཋབྷེདེ པན ཀོ ཨདྷིཔྤཱཡོཏི? ཝུཙྩཏེ – སུཏྟནྟེ ཧི པཋམཝིམོཀྑཾ དྭེདྷཱ བྷིནྡིཏྭཱ པཋམདུཏིཡཨབྷིབྷཱཡཏནཱནི ཝུཏྟཱནི, པརིཡཱཡདེསནཏྟཱ ཝིམོཀྑཱནམྤི ཨབྷིབྷཝནཔརིཡཱཡོ ཝིཛྫཏཱིཏི ‘‘ཨཛ྄ཛྷཏྟཾ རཱུཔསཉྙཱི’’ཏི ཨབྷིབྷཱཡཏནདྭཡཾ ཝུཏྟཾ.

ཏཏིཡཙཏུཏྠཨབྷིབྷཱཡཏནེསུ ¶ དུཏིཡཝིམོཀྑོ, ཝཎྞཱབྷིབྷཱཡཏནེསུ ཏཏིཡཝིམོཀྑོ ཙ ཨབྷིབྷཝནཔྤཝཏྟིཏོ སངྒཧིཏོ, ཨིདྷ པན ནིཔྤརིཡཱཡདེསནཏྟཱ ཝིམོཀྑཱབྷིབྷཱཡཏནཱནི ཨསངྐརཏོ དསྶེཏུཾ ཝིམོཀྑེ ཝཛྫེཏྭཱ ཨབྷིབྷཱཡཏནཱནི ཀཐིཏཱནི. སབྦཱནི ཙ ཝིམོཀྑཀིཙྩཱནི ཝིམོཀྑདེསནཱཡ ཝུཏྟཱནི, ཏདེཏཾ ‘‘ཨཛ྄ཛྷཏྟཾ རཱུཔསཉྙཱི’’ཏི སུཏྟེ ཨཱགཏསྶ ཨབྷིབྷཱཡཏནདྭཡསྶ ཨབྷིདྷམྨེ ཨཝཙནཏོ ‘‘རཱུཔཱི རཱུཔཱནི པསྶཏཱི’’ཏིཨཱདཱིནཉྩ སབྦཝིམོཀྑཀིཙྩསཱདྷཱརཎཝཙནབྷཱཝཏོ ཝཝཏྠཱནཾ ཀཏནྟི ཝིཉྙཱཡཏི. ཨཝསྶཉྩེཏཾ ཨེཝ སམྤཊིཙྪིཏབྦཾ, ན སམྤཊིཙྪནྟེཧི སུཏྟཱབྷིདྷམྨཔཱཋབྷེདེ ཨཉྙཾ ཀཱརཎཾ ཝཏྟབྦཾ. ཨཐ ཀིམེཏྠ ཝཏྟབྦཾ, ནནུ ཨཊྛཀཐཱཡམེཝ ‘‘ཀསྨཱ པན ཡཐཱ སུཏྟནྟེ ‘ཨཛ྄ཛྷཏྟཾ རཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པརིཏྟཱནཱི’ཏིཨཱདི ཝུཏྟཾ, ཨེཝཾ ཨཝཏྭཱ ཨིདྷ ཙཏཱུསུཔི ཨབྷིབྷཱཡཏནེསུ ཨཛ྄ཛྷཏྟཾ ཨརཱུཔསཉྙིཏཱཝ ཝུཏྟཱ’’ཏི ཝཏྭཱ ‘‘ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏོ’’ཏི ཀཱརཎཾ ཝུཏྟནྟི? ན ཏཾ ཏསྶ ཀཱརཎཝཙནཾ, ཨཐ ཁོ ཀཏྠཙི ‘‘ཨཛ྄ཛྷཏྟཾ རཱུཔཱནི པསྶཏཱི’’ཏི ཨཝཏྭཱ སབྦཏྠ ཡཾ ཝུཏྟཾ ‘‘བཧིདྡྷཱ རཱུཔཱནི པསྶཏཱི’’ཏི, ཏསྶ ཙ ཀཱརཎཝཙནཾ. ཏེནེཝ ཧི ཏཏྠ ཝཱ ཨིདྷ ཝཱ ‘‘བཧིདྡྷཱ རཱུཔཱནིཡེཝ ཨབྷིབྷཝིཏབྦཱནཱི’’ཏི ཏཏྠེཝ ཝུཏྟཾ, ཨནབྷིབྷཝནཱིཡཏཱ ཙ ཨཛ྄ཛྷཏྟརཱུཔཱནཾ བཧིདྡྷཱ རཱུཔཱནི ཝིཡ ཨཝིབྷཱུཏཏྟཱ. ན ཧི སུཊྛུ ཝིབྷཱུཏབྷཱཝམནྟརེན ཉཱཎུཏྟརཱནཾ ཨཱརམྨཎཱབྷིབྷཝནཾ སམྦྷཝཏཱིཏི. ནནུ ཙ ཨཊྛཀཐཱཡཾ པཱཋདྭཡཝིསེསསྶ དེསནཱཝིལཱསོ ཀཱརཎབྷཱཝེན ཝུཏྟོཏི? སཙྩཾ ཝུཏྟོ, སོ ཙ ཡཐཱཝུཏྟཝཝཏྠཱནཝསེནེཝ ཝེདིཏབྦོ ¶ . དེསནཱཝིལཱསོ ཧི ནཱམ ཝིནེཡྻཛ྄ཛྷཱསཡཱནུརཱུཔཾ ཝིཛྫམཱནསྶེཝ པརིཡཱཡསྶ ཝིབྷཱཝནཾ, ན ཡསྶ ཀསྶཙཱིཏི. ཨེཝཾ ཏཱཝ ཨབྷིབྷཱཡཏནཾ ཝེདིཏབྦཾ.

ཏཏྠ ¶ ཝིམོཀྑོཏི པཊིལདྡྷཛ྄ཛྷཱནསྶ ཛྷཱནཾ སམཱཔཛྫིཏུཀཱམཏཱཝསཔྤཝཏྟཛཝནཝཱིཐིསམནནྟརམེཝ པིཏུཨངྐེ ཝིསྶཊྛཨངྒཔཙྩངྒསྶ ཝིཡ དཱརཀསྶ ཨཱརམྨཎེ ནིརཱསངྐམེཝ ཧུཏྭཱ པཋམཀཔྤནཱ ཝིཡ ཙ ལཧུཾ ཨཝུཊྛཧིཏྭཱ ཨནྟམསོ ཙཏུཔཉྩཙིཏྟཀྑཎཏོ ཨནོསཀྐིཏྭཱ ཨཱརམྨཎེ ཨབྷིརཏིཝསེན པཝཏྟསྶ ཝསིབྷཱཝཔྤཏྟསྶ ཛྷཱནསྶེཏཾ ཨདྷིཝཙནཾ. ཏཉྷི ཀསིཎཱཡཏནཝསེན ཝཱ ཨབྷིབྷཱཡཏནཝསེན ཝཱ ཨུཔྤནྣཾ པཙྩནཱིཀདྷམྨེཧི སུཊྛུ ཝིམུཏྟཏྟཱ, ཨཱརམྨཎེ ཨདྷིམུཏྟཏཱཡ ཙ ‘‘ཝིམོཀྑོ’’ཏི ཝུཙྩཏི. ཝུཏྟམྤི ཙེཏཾ ཨཊྛཀཐཱཡཾ –

‘‘ཀེནཊྛེན པན ཝིམོཀྑོ ཝེདིཏབྦོཏི? ཨདྷིམུཙྩནཊྛེན. ཀོ ཨཡཾ ཨདྷིམུཙྩནཊྛོ ནཱམ? པཙྩནཱིཀདྷམྨེཧི ཙ སུཊྛུ ཝིམུཙྩནཊྛོ, ཨཱརམྨཎེ ཙ ཨབྷིརཏིཝསེན སུཊྛུ ཨདྷིམུཙྩནཊྛོ’’ཏི (དྷ. ས. ཨཊྛ. ༢༤༨).

ཡདི ཝསིབྷཱཝཔྤཏྟམེཝ ཝིམོཀྑོ, ཀཐམསྶ ཨཱརམྨཎཙཏུཀྐེ པརིཏྟཏཱ པཱལི༹ཡཾ ཝུཏྟཱ. ཨཝསིཏཱཔཏྟཉྷི ཛྷཱནཾ པརིཏྟནྟི ཝུཙྩཏཱིཏི? ནཱཡཾ དོསོ, པརིཔུཎྞཝསིབྷཱཝཔྤཏྟཾ སནྡྷཱཡ ཨཔརིཔུཎྞཝསིབྷཱཝཔྤཏྟསྶ པརིཏྟབྷཱཝེན ཏཏྠ ཨདྷིཔྤེཏཏྟཱ, ཏསྨཱ ཝསིབྷཱཝཔྤཏྟམེཝ ཛྷཱནཾ ཝིམོཀྑོ ནཱམ, ན ཨིཏརཾ. ཨིཏརཾ པན ཡདི ཀསིཎཱཡཏནཝསེན ཨུཔྤནྣཾ, ཀསིཎཱཡཏནཾ. ཨཐ ཨབྷིབྷཱཡཏནཝསེན, ཨབྷིབྷཱཡཏནམེཝཱཏི. ཀེཙི པན ‘‘པཋམཨཔྤནཱཏོ པཙྪིམཔཙྪིམཱཡ པཊིཔཀྑཏོ སུཊྛུ ཝིམུཏྟཏྟཱ ཀསིཎཱཡཏནཝསེན, ཨབྷིབྷཱཡཏནཝསེན ཙ ཨུཔྤནྣཾ པཋམཀཔྤནཾ ཋཔེཏྭཱ སེསཾ ཝིམོཀྑོཡེཝཱ’’ཏི ཝདནྟི.

ཏཾ པནེཏཾ གཎནཏོ ཏིཝིདྷཾ. ཡཐཱཧ –

‘‘རཱུཔཱི ¶ རཱུཔཱནི པསྶཏི, ཨཛ྄ཛྷཏྟཾ ཨརཱུཔསཉྙཱི བཧིདྡྷཱ རཱུཔཱནི པསྶཏི, སུབྷནྟེཝ ཨདྷིམུཏྟོ ཧོཏཱི’’ཏི (དཱི. ནི. ༢.༡༧༤; ༣.༣༣༩; པཊི. མ. ༡.༢༠༩).

ཏཏྠ ¶ རཱུཔཱིཏི ཨཛ྄ཛྷཏྟཾ ཀེསཱདཱིསུ ཨུཔྤཱདིཏཾ རཱུཔཛ྄ཛྷཱནཾ རཱུཔཾ, ཏདསྶ ཨཏྠཱིཏི རཱུཔཱི. རཱུཔཱནི པསྶཏཱིཏི བཧིདྡྷཱཔི ནཱིལཀསིཎཱདིརཱུཔཱནི ཛྷཱནཙཀྑུནཱ པསྶཏི. ཨིམིནཱ ཨཛ྄ཛྷཏྟབཧིདྡྷཝཏྠུཀེསུ ཀསིཎེསུ ཛྷཱནཔཊིལཱབྷོ དསྶིཏོ. ཨཛ྄ཛྷཏྟཾ ཨརཱུཔསཉྙཱིཏི ཨཛ྄ཛྷཏྟཾ ནརཱུཔསཉྙཱི, ཨཏྟནོ ཀེསཱདཱིསུ ཨནུཔྤཱདིཏརཱུཔཱཝཙརཛ྄ཛྷཱནོཏི ཨཏྠོ. ཨིམིནཱ བཧིདྡྷཱ པརིཀམྨཾ ཀཏྭཱ བཧིདྡྷཱཝ པཊིལདྡྷཛ྄ཛྷཱནཏཱ དསྶིཏཱ. ‘‘སུབྷ’’ནྟི ཨིམིནཱ སུཝིསུདྡྷེསུ ནཱིལཱདཱིསུ ཝཎྞཀསིཎེསུ ཛྷཱནཱནི དསྶིཏཱནི. ཏཏྠ ཀིཉྩཱཔི ཨནྟོཨཔྤནཱཡཾ ‘‘སུབྷ’’ནྟི ཨཱབྷོགོ ནཏྠི, ཡོ པན སུཝིསུདྡྷཾ སུབྷཀསིཎཾ ཨཱརམྨཎཾ ཀཏྭཱ ཝིཧརཏི, སོ ཡསྨཱ ‘‘སུབྷ’’ནྟི ཨདྷིམུཙྩནཝསེན པཋམཛ྄ཛྷཱནཾ ཨུཔསམྤཛྫིཏྭཱ ཝིཧརཏི, ཏཐཱ དུཏིཡཱདཱིནི, ཏསྨཱ ཨེཝཾ དེསནཱ ཀཏཱཏི. པཊིསམྦྷིདཱམགྒེ པན ‘‘ཨིདྷ བྷིཀྑུ མེཏྟཱསཧགཏེན ཙེཏསཱ ཨེཀཾ དིསཾ ཕརིཏྭཱ ཝིཧརཏཱི’’ཏིཨཱདིནཱ (པཊི. མ. ༡.༢༡༢) བྲཧྨཝིཧཱརཝསེན སུབྷཝིམོཀྑོ ཝུཏྟོ. དྷམྨསངྒཎིཡཾ པན བྲཧྨཝིཧཱརཱནཾ ཝིསུཾཡེཝ ཨཱགཏཏྟཱ ཏཾ ནཡཾ པཊིཀྑིཔིཏྭཱ སུནཱིལཀཱདིཝསེནེཝ སུབྷཝིམོཀྑོ ཨཊྛཀཐཱཡཾ ཨནུཉྙཱཏོཏི ཨིདྷཱཔི ཏཏྠ ཝུཏྟནཡེནེཝ ཝཝཏྠཱནཾ ཀཏནྟི ཨེཝཾ ཏཱཝ ཝིམོཀྑཛྷཱནཾ ཝེདིཏབྦཾ.

ཡཐཱནུརཱུཔནྟི ཧཱིནཱདིཨནུརཱུཔཾ. པཋམཛ྄ཛྷཱནཉྷི ཧཱིནཾ ཀཔྤསྶ ཏཏིཡབྷཱགཱཡུཀེ བྲཧྨཔཱརིསཛྫེ ཨུཔཔཏྟིཾ ནིཔྥཱདེཏི, མཛ྄ཛྷིམཾ ཨུཔཌྜྷཀཔྤཱཡུཀེ བྲཧྨཔུརོཧིཏེ, པཎཱིཏཾ ཨེཀཀཔྤཱཡུཀེ མཧཱབྲཧྨེ. ཏཐཱ དུཏིཡཛ྄ཛྷཱནཾ, ཏཏིཡཛ྄ཛྷཱནཉྩ ཧཱིནཾ དྭིཀཔྤཱཡུཀེ པརིཏྟཱབྷེ, མཛ྄ཛྷིམཾ ཙཏུཀཔྤཱཡུཀེ ཨཔྤམཱཎཱབྷེ, པཎཱིཏཾ ཨཊྛཀཔྤཱཡུཀེ ཨཱབྷསྶརེ. ཙཏུཏྠཛ྄ཛྷཱནཾ ཧཱིནཾ ¶ སོལ༹སཀཔྤཱཡུཀེ པརིཏྟཱསུབྷེ, མཛ྄ཛྷིམཾ དྭཏྟིཾསཀཔྤཱཡུཀེ ཨཔྤམཱཎསུབྷེ, པཎཱིཏཾ ཙཏུསཊྛིཀཔྤཱཡུཀེ སུབྷཀིཎྷེ. པཉྩམཛ྄ཛྷཱནཾ པན ཏིཝིདྷམྤི པཉྩཀཔྤསཏཱཡུཀེ ཝེཧཔྥལེ ཨུཔཔཏྟིཾ ནིཔྥཱདེཏི, ཏདེཝ ཏིཏྠིཡེཧི སཉྙཱཝིརཱགཝསེན བྷཱཝིཏཾ པཉྩཀཔྤསཏཱཡུཀེཡེཝ ཨསཉྙསཏྟེ. ཨནཱགཱམཱིཧི པན པུཐུཛྫནཱདིཀཱལེ པཙྪཱཔི བྷཱཝིཏཾ སདྡྷཱདིཨིནྡྲིཡཱདྷིམུཏྟཏཱནུཀྐམེན ཡཐཱཀྐམཾ སཧསྶདྭིསཧསྶཙཏུསཧསྶཨཊྛསཧསྶསོལ༹སསཧསྶཀཔྤཱཡུཀེསུ ཨཝིཧཱཨཏཔྤཱསུདསྶཱསུདསྶཱིཨཀནིཊྛནཱམཀེསུ པཉྩསུདྡྷཱཝཱསེསུ ཨུཔཔཏྟིཾ ནིཔྥཱདེཏཱིཏི ཨེཝམེཏཾ ཡཐཱནུརཱུཔཾ སོལ༹སརཱུཔཱཝཙརབྲཧྨལོཀཱུཔཔཏྟིནིཔྥཱདཀནྟི ཨཱཧ ‘‘ཡཐཱནུརཱུཔཾ…པེ… ཧོཏཱི’’ཏི.

ཡསྨཱ པན རཱུཔབྷཝེཔི པཝཏྟིཡཾ ལབྷིཏབྦཱ ཨུཔབྷོགསམྤཏྟི ཀཱམཱཝཙརསྶེཝ ཕལཾ, ཏསྨཱ ¶ ཨིདྷ ‘‘བྷཝབྷོགསམྤཏྟིཾ ནིཔྥཱདེཏཱི’’ཏི ཨཝཏྭཱ ཨུཔཔཏྟིནིཔྥཱདནམེཝ ཝུཏྟནྟི དཊྛབྦཾ. ཨེཏྠ ཙ དུཏིཡཛ྄ཛྷཱནབྷཱུམིཾ ཨུཔཱདཱཡ སབྦཏྠ པརིཔུཎྞསྶ མཧཱཀཔྤསྶ ཝསེན པརིཙྪེདོ དཊྛབྦོ, པཋམཛ྄ཛྷཱནབྷཱུམིཡཾ པན ཨསངྑྱེཡྻཀཔྤཝསེན. ན ཧི ཏཏྠ ཨིཏརཝསེན པརིཙྪེདོ སམྦྷཝཏི ཨེཀཀཔྤེཔི ཨཝིནཱསཱབྷཱཝེན མཧཱཀཔྤསྶ ཙཏུཏྠབྷཱགེཡེཝ ཏསྶ སཎྛཧནཏོ.

རཱུཔཱཝཙརཀུསལཝཎྞནཱ ནིཊྛིཏཱ.

ཨརཱུཔཱཝཙརཀུསལཝཎྞནཱ

ཨིདཱནི ཨརཱུཔཱཝཙརཀུསལསྶ ནིདྡེསཱཝཀཱསོ ཨནུཔྤཏྟོཏི ཏནྣིདྡེསཏྠམཱཧ ‘‘སེསེསུ པནཱ’’ཏིཨཱདི. ཨཱཀཱསཀསིཎཝཛྫིཏསྶ ཡསྶ ཀསྶཙི ཀསིཎསྶ ཨུགྒྷཱཊནཏོ ལདྡྷམཱཀཱསཾ ཀསིཎུགྒྷཱཊིམཱཀཱསཾ. ཏཏྠ པཝཏྟཾ ཝིཉྙཱཎནྟི ཨཱཀཱསཱནཉྩཱཡཏནམཱཧ. ཏཉྷི དུཏིཡཱརུཔྤསྶ ¶ ཨཱརམྨཎཾ ཧོཏི. སབྦསོཏི སབྦཱཀཱརེན, རཱུཔནིམིཏྟདཎྜཱདཱནསམྦྷཝདསྶནཱདིནཱ སབྦེན རཱུཔདྷམྨེསུ, པཐཝཱིཀསིཎཱདིརཱུཔནིམིཏྟེསུ ཏདཱརམྨཎཛ྄ཛྷཱནེསུ ཙ དོསདསྶནཱཀཱརེན, ཏེསུ ཨེཝ ཝཱ རཱུཔནིམིཏྟེསུ ནིཀནྟིཔྤཧཱནཨསམཱཔཛྫིཏུཀཱམཏཱདིནཱ ཨཱཀཱརེནཱཏི ཨཏྠོ. ཨཐ ཝཱ སབྦསོཏི སབྦཱསཾ, ཀུསལཱདིབྷེདེན ཨནཝསེསཱནནྟི ཨཏྠོ. རཱུཔསཉྙཱནནྟི སཉྙཱསཱིསེན ཝུཏྟརཱུཔཱཝཙརཛ྄ཛྷཱནཱནཉྩེཝ ཏདཱརམྨཎཱནཉྩ. རཱུཔཱཝཙརཛ྄ཛྷཱནམྤི ཧི ‘‘རཱུཔ’’ནྟི ཝུཙྩཏི ཨུཏྟརཔདལོཔེན ‘‘རཱུཔཱི རཱུཔཱནི པསྶཏཱི’’ཏིཨཱདཱིསུ ཝིཡ. ཏདཱརམྨཎམྤི ཀསིཎརཱུཔཾ པུརིམཔདལོཔེན ‘‘དེཝེན དཏྟོཏི, བཧིདྡྷཱ རཱུཔཱནི པསྶཏཱི’’ཏིཨཱདཱིསུ ཝིཡ, ཏསྨཱ ཨིདྷ རཱུཔེ རཱུཔཛ྄ཛྷཱནེ ཏཾསཧགཏསཉྙཱ རཱུཔསཉྙཱཏི གཧིཏཱ, སཉྙཱསཱིསེན ཝུཏྟརཱུཔཱཝཙརཛ྄ཛྷཱནཱནམེཏཾ ཨདྷིཝཙནཾ. ‘‘རཱུཔ’’ནྟི སཉྙཱ ཨསྶཱཏི རཱུཔསཉྙཾ, རཱུཔནཱམཝནྟནྟི ཨཏྠོ. ཏཾགཧིཏེན པཐཝཱིཀསིཎཱདིབྷེདསྶ ཏདཱརམྨཎསྶ ཙེཏཾ ནཱམནྟི དཊྛབྦཾ. ‘‘རཱུཔསཉྙཱན’’ནྟི ཧི སརཱུཔེཀསེསཝསེན ནིདྡེསོ ཀཏོ. སམཏིཀྐམཱཏི ཝིརཱགཱ, ནིརོདྷཱ ཙ. ཀིཾ ཝུཏྟཾ ཧོཏི? ཨེཏཱསཾ ཀུསལཝིཔཱཀཀིརིཡཱཝསེན པཉྩདསནྣཾ ཛྷཱནསངྑཱཏཱནཾ རཱུཔསཉྙཱནཾ, ཨེཏེསཉྩ པཐཝཱིཀསིཎཱདིཝསེན ནཝནྣཾ ཨཱརམྨཎསངྑཱཏཱནཾ རཱུཔསཉྙཱནཾ ཨནཝསེསཱནཾ སབྦཱཀཱརེན ཙ, ཏེསུ ཨེཝ ཝཱ ནིཀནྟིཔྤཧཱནཨསམཱཔཛྫིཏུཀཱམཏཱདིནཱ ཨཱཀཱརེན ¶ ཝིརཱགཱ, ནིརོདྷཱ ཙ ཛིགུཙྪནཏོ ཙེཝ ཏཔྤཊིབནྡྷཚནྡརཱགཝིཀྑམྦྷནཏོ ཙ ནིབྦཏྟཾ ཨཱཀཱསཱནཉྩཱཡཏནསཉྙཱཡ སཧགཏཾ ཨརཱུཔཱཝཙརཀུསལཙིཏྟཾ. ན ཧི སཀྐཱ སབྦསོ ཨནཏིཀྐནྟརཱུཔསཉྙེན ཏཾ ནིབྦཏྟེཏུནྟི.

ན ཀེཝལཾ ཨེཏཱསཾཡེཝ སམཏིཀྐམནཏོ ཨིདཾ ནིབྦཏྟཾ, ཨཐ ཁོ པཊིགྷསཉྙཱདཱིནམཏྠངྒམཱདིཏོཔཱིཏི ཨཱཧ ‘‘པཊིགྷསཉྙཱན’’ནྟིཨཱདི. ཏཏྠ ཙཀྑཱདཱིནཾ ཝཏྠཱུནཾ, རཱུཔཱདཱིནཉྩ ཨཱརམྨཎཱནཾ ¶ པཊིགྷཱཏེན ཨཉྙམཉྙསམོདྷཱནསངྑཱཏེན པཊིཧནནེན ཨུཔྤནྣཱ སཉྙཱ པཊིགྷསཉྙཱ, རཱུཔསཉྙཱདིདྭིཔཉྩསཉྙཱནམེཏཾ ཨདྷིཝཙནཾ. ཡཐཱཧ –

‘‘ཏཏྠ ཀཏམཱ པཊིགྷསཉྙཱ? རཱུཔསཉྙཱ སདྡསཉྙཱ གནྡྷསཉྙཱ རསསཉྙཱ ཕོཊྛབྦསཉྙཱ, ཨིམཱ ཝུཙྩནྟི པཊིགྷསཉྙཱཡོ’’ཏི (ཝིབྷ. ༦༠༣).

ཏཱསཾ ཀུསལཱཀུསལཝིཔཱཀབྷཱུཏཱནཾ ཨཏྠངྒམཱ པཧཱནཱ ཨསམུཔྤཱདཱ ཨཔྤཝཏྟིཀརཎེནཱཏི ཝུཏྟཾ ཧོཏི. ནནུ ཙ ཨེཏཱ རཱུཔཱཝཙརཛ྄ཛྷཱནསམཱཔནྣསྶཱཔི ན སནྟི. ན ཧི པཋམཛ྄ཛྷཱནཱདིསམཱཔནྣཀཱལེ པཉྩདྭཱརཝསེན ཙིཏྟཾ པཝཏྟཏཱིཏི? སཙྩམེཏཾ, ཡཐཱ པན ‘‘སུཁསྶ ཙ པཧཱནཱ དུཀྑསྶ ཙ པཧཱནཱ ཨདུཀྑམསུཁཾ ཨུཔེཀྑཱསཏིཔཱརིསུདྡྷིཾ ཙཏུཏྠཛ྄ཛྷཱནཾ ཨུཔསམྤཛྫ ཝིཧརཏཱི’’ཏི ཨེཏྠ པསཾསཱཝསེན ཨཉྙཏྠ པཧཱིནཱནམྤི སུཁདུཀྑཱནཾ ཙཏུཏྠཛ྄ཛྷཱནེ, ‘‘སཀྐཱཡདིཊྛིཝིཙིཀིཙྪཱནཾ པཧཱནཱ རཱགདོསམོཧཱནཾ ཏནུཏྟཱ སཀདཱགཱམིམགྒཾ ཨུཔསམྤཛྫ ཝིཧརཏཱི’’ཏི ཨེཏྠ པཋམམགྒེཡེཝ པཧཱིནཱནཾ སཀྐཱཡདིཊྛཱདཱིནཾ དུཏིཡམགྒེ ཙ ཝཙནཾ, ཨེཝམེཝ ཨིམསྨིཾ ཛྷཱནེ པཊིཔཛྫནཀཱནཾ ཨུསྶཱཧཛནནཏྠཾ ཨིམསྶ ཛྷཱནསྶ པསཾསཱཝསེན ཨེཏཱསཾ ཨེཏྠ ཝཙནནྟི ཝེདིཏབྦཾ. ཨཐ ཝཱ ཀིཉྩཱཔི ཏཱ རཱུཔཱཝཙརསམཱཔནྣསྶཱཔི ན སནྟི, ན པན པཧཱིནཏྟཱ ན སནྟི. ཀིཉྩརཧི པཙྩཡཱབྷཱཝེན. ན ཧི རཱུཔཱཝཙརབྷཱཝནཱ རཱུཔཝིརཱགཱཡ སཾཝཏྟཏི, རཱུཔཱཡཏྟཱ ཨེཝ ཏཱསཾ པཝཏྟཱིཏི. ཨརཱུཔབྷཱཝནཱ པན རཱུཔཝིརཱགཱཡ སཾཝཏྟཏི, ཏསྨཱ ‘‘ཏཱ ཨེཏྠ པཧཱིནཱ’’ཏི ཝཏྟུཾ ཝཊྚཏི. ཏཐཱ ཧི ཨེཏཱསཾ ཨིཏོ པུབྦེ ཨཔྤཧཱིནཏྟཱཡེཝ ‘‘པཋམཛ྄ཛྷཱནཾ སམཱཔནྣསྶ སདྡོ ཀཎྚཀོ’’ཏི ཝུཏྟོ བྷགཝཏཱ. ཨིདྷ ཙ པཧཱིནཏྟཱ ཨེཝ ཨརཱུཔསམཱཔཏྟཱིནཾ ཨཱནེཉྫཱབྷིསངྑཱརཝཙནཱདཱིཧི, ‘‘ཡེ ཏེ སནྟཱ ཝིམོཀྑཱ ཨཏིཀྐམྨ རཱུཔེ ¶ ཨརཱུཔཱ’’ཏིཨཱདིནཱ ཙ ཨཱནེཉྫཏཱ, སནྟཝིམོཀྑཏཱ ཙ ཝུཏྟཱ.

ནཱནཏྟསཉྙཱནནྟི ¶ ནཱནཏྟེ གོཙརེ པཝཏྟཱནཾ, ནཱནཏྟཱནཾ ཝཱ སཉྙཱནཾ, ཝུཏྟཱཝསེསཱནཾ ཙཏུཙཏྟཱལཱིསཀཱམཱཝཙརསཉྙཱནནྟི ཨཏྠོ. ཨེཏཱ ཨེཝ ཧི –

‘‘ཏཏྠ ཀཏམཱ ནཱནཏྟསཉྙཱ? ཨསམཱཔནྣསྶ མནོདྷཱཏུསམངྒིསྶ ཝཱ མནོཝིཉྙཱཎདྷཱཏུསམངྒིསྶ ཝཱ སཉྙཱ སཉྫཱནནཱ སཉྫཱནིཏཏྟཾ, ཨིམཱ ཝུཙྩནྟི ནཱནཏྟསཉྙཱཡོ’’ཏི (ཝིབྷ. ༦༠༤) –

ཨེཝཾ ཝིབྷངྒེ ཝིབྷཛིཏྭཱ ཝུཏྟཱ. ཏཱ པན ཡསྨཱ རཱུཔསདྡཱདིབྷེདེ ནཱནཏྟེ ནཱནཱསབྷཱཝེ ཨཱརམྨཎེ པཝཏྟནྟི, ཡསྨཱ ཙ ཨཊྛ ཀཱམཱཝཙརཀུསལསཉྙཱ, དྭཱདས ཨཀུསལསཉྙཱ, ཨེཀཱདས ཀཱམཱཝཙརཀུསལཝིཔཱཀསཉྙཱ, དྭེ ཨཀུསལཝིཔཱཀསཉྙཱ, ཨེཀཱདས ཀཱམཱཝཙརཀིརིཡསཉྙཱཏི ཨེཝཾ ཙཏུཙཏྟཱལཱིསཔྤབྷེདཱ ནཱནཱསབྷཱཝཱ, ཨཉྙམཉྙཾ ཨསདིསཱ, ཏསྨཱ ‘‘ནཱནཏྟསཉྙཱ’’ཏི ཝུཙྩནྟི. ཨམནསིཀཱརཱཏི སབྦསོ ཨནཱཝཛྫནཱ ཨསམནྣཱཧཱརཱ ཨཔཙྩཝེཀྑཎཧེཏུ ཛཝནཔཊིཔཱདཀེན ཝཱ བྷཝངྒཙིཏྟསྶ ཨནྟོ ཨཀརཎཱ ཋཔེཏྭཱ ཀསིཎུགྒྷཱཊིམཱཀཱསཾ ནཱནཱརམྨཎེ ཙིཏྟསྶ ཨསངྑརཎཏོཏི ཝུཏྟཾ ཧོཏི. ཨིམིནཱ ཧི ནཱནཏྟསཉྙཱམནསིཀཱརཧེཏཱུནཾ རཱུཔདྷམྨཱནཾ སམཏིཀྐམོཔི ཝུཏྟོ, རཱུཔཛ྄ཛྷཱནེ པན ཏདབྷཱཝཏོ ‘‘ནཱནཏྟསཉྙཱནཾ ཨམནསིཀཱརཱ’’ཏི ན ཝུཏྟཾ. ཨཐ སམཏིཀྐམཱདཱིནཾ ཀིཾ ནཱནཱཀརཎནྟི? ཝུཙྩཏེ – ཡསྨཱ རཱུཔསཉྙཱ, པཊིགྷསཉྙཱ ཙ ཨིམིནཱ ཛྷཱནེན ནིབྦཏྟིཏབྷཝེཔི ན ཝིཛྫནྟི, ཨརཱུཔསཉྙཱཡ བྷཱཝནཱཡ ཨབྷཱཝེ ཙུཏིཏོ ཨུདྡྷཾ ཨུཔྤཏྟིརཧཱནཾ རཱུཔསཉྙཱཔཊིགྷསཉྙཱནཾ ཡཱཝ ཨཏྟནོ ¶ ཝིཔཱཀུཔྤཏྟི, ཏཱཝ ཨནུཔྤཏྟིདྷམྨཏཾ ཨཱཔཱདིཡམཱནཏྟཱ, པགེཝ པན ཨིམཾ ཛྷཱནཾ སམཱཔནྣཀཱལེ, ཏསྨཱ ‘‘སམཏིཀྐམཱ, ཨཏྠངྒམཱ’’ཏི ཨུབྷཡཐཱཔི ཏཱསཾ ཨབྷཱཝོཡེཝ དསྶིཏོ. ནཱནཏྟསཉྙཱསུ པན ཡཱ ཏསྨིཾ བྷཝེ ན ཨུཔྤཛྫནྟི ཨེཀནྟརཱུཔནིསྶིཏཏྟཱ, ཏཱ ཨནོཀཱསཏཱཡ ན ཨུཔྤཛྫནྟི, ན ཨརཱུཔབྷཱཝནཱཡ ནིཝཱརིཏཏྟཱ, ཨནིཝཱརིཏཏྟཱ ཙ ཀཱཙི ཨུཔྤཛྫནྟི, ཏསྨཱ ཏཱསཾ ཨམནསིཀཱརོ ཨནཱཝཛྫནཾ ཨཔཙྩཝེཀྑཎཾ ཛཝནཔཊིཔཱདཀེན ཝཱ བྷཝངྒམནསྶ ཨནྟོ ཨཀརཎཾ ཨཔྤཝེསནཾ ཝུཏྟཾ. ཏཏྲ པཝཏྟམཱནཱནམྤི ཧི ཛྷཱནཾ སམཱཔནྣསྶ ཏཱསཾ ཨམནསིཀཱརོཡེཝ ཨིཏརཐཱ ཛྷཱནསམཱཔཏྟིཡཱ ཨབྷཱཝཏོ. ཨིཏི སངྑེཔཏོ ‘‘རཱུཔསཉྙཱནཾ སམཏིཀྐམཱ’’ཏི ཨིམིནཱ སབྦརཱུཔཱཝཙརདྷམྨཱནཾ པཧཱནཾ ཝུཏྟཾ, ‘‘པཊིགྷསཉྙཱནཾ ཨཏྠངྒམཱ ནཱནཏྟསཉྙཱནཾ ཨམནསིཀཱརཱ’’ཏི སབྦེསཾ ཀཱམཱཝཙརཙིཏྟཙེཏསིཀཱནཾ པཧཱནཾ, ཨམནསིཀཱརོ ཙ ཝུཏྟོ, ཏཱིཧི པནེཏེཧི སམཱདྷིསྶ ཐིརབྷཱཝོ ཀཐིཏོཏི.

ཨཱཀཱསཱནཉྩཱཡཏནསཉྙཱསཧགཏནྟི ¶ ཨེཏྠ པན ནཱསྶ ཨནྟོཏི ཨནནྟཾ, ཨནནྟཾ ཨཱཀཱསཾ ཨཱཀཱསཱནནྟཾ, ཀསིཎུགྒྷཱཊིམཱཀཱསཾ, ཨནནྟཏཱ པན ཨུཔྤཱདཝཡནྟཱབྷཱཝཏོ ཨནནྟམནསིཀཱརཝསེན ཝཱ ཝེདིཏབྦཱ. ན ཧི ཨེཏསྶ ཨུཔྤཱདནྟོ, ཝཡནྟོ ཝཱ པཉྙཱཡཏི ཨསབྷཱཝདྷམྨཏྟཱ. སབྷཱཝདྷམྨོ ཧི ཨཧུཏྭཱ སམྦྷཝནཏོ, ཧུཏྭཱ ཙ ཝིནསྶནཏོ ཨུཔྤཱདཝཡནྟཔརིཙྪིནྣོ, ནེཏརོ. ན ཙ པནེཏཾ མནསི ཀརོནྟོ ཡོགཱཝཙརོ ཏསྶ པརིཙྪེདསངྑཱཏམནྟཾ གཎྷཱཏི, ཨཐ ཁོ རཱུཔཝིཝེཀམཏྟསྶེཝ གཧཎེན ཨནནྟཕརཎཱཀཱརེནེཝ མནསིཀཱརཾ པཝཏྟེཏི, ཏསྨཱ ཨུཔྤཱདཝཡནྟཝིརཧཏོ མནསིཀཱརཝསེན ཝཱ ཨེཏམནནྟནྟི ཝེདིཏབྦཾ. ‘‘ཨནནྟཱཀཱས’’ནྟི ཙ ཝཏྟབྦེ ཨནནྟ-སདྡསྶ པརནིཔཱཏཝསེན ‘‘ཨཱཀཱསཱནནྟ’’ནྟི ཝུཙྩཏི. ཨཱཀཱསཱནནྟམེཝ ཨཱཀཱསཱནཉྩཾ ¶ སཾཡོགཔརསྶ ཏ-ཀཱརསྶ ཙ-ཀཱརཾ ཀཏྭཱ, ཏདེཝ ཨཱཡཏནཾ སསམྤཡུཏྟདྷམྨསྶ ཛྷཱནསྶ ཨཱརམྨཎབྷཱཝཏོ ཨདྷིཊྛཱནཊྛེན དེཝཱཡཏནཾ ཝིཡཱཏི ཨཱཀཱསཱནཉྩཱཡཏནཾ, ཏསྨིཾ ཨཔྤནཱཔཏྟཱ སཉྙཱ ཨཱཀཱསཱནཉྩཱཡཏནསཉྙཱ, ཏཱཡ སཧགཏཾ ཝིཉྙཱཎཾ ཨཱཀཱསཱནཉྩཱཡཏནསཉྙཱསཧགཏཾ. ཨཐ ཝཱ ཨཱཀཱསཱནཉྩཾ ཨཱཡཏནམསྶཱ སསམྤཡུཏྟདྷམྨཱཡ སཉྙཱཡཱཏི ཨཱཀཱསཱནཉྩཱཡཏནཱ, སཱཡེཝ སཉྙཱ, ཏཱཡ ཛྷཱནཾ སཧགཏནྟི ཨཱཀཱསཱནཉྩཱཡཏནསཉྙཱསཧགཏཾ.

ཝིཉྙཱཎ…པེ… སཧགཏནྟི ཡདེཏཾ པཋམཱརུཔྤཝིཉྙཱཎཾ, ཏཾསབྷཱཝདྷམྨཏྟཱ ཨུཔྤཱདཱདིཨནྟཝནྟམྤི ཨཱརམྨཎཀརཎཝསེན ཨནནྟཱཀཱསེ ཕརཎཏོ ཨཏྟཱནཾ ཨཱརབྦྷ ཨནྟསྶ ཨགྒཧཎཝསེན པཝཏྟམནསིཀཱརཏོ ཝཱ ཨནནྟཾ ཝིཉྙཱཎནྟི ཝིཉྙཱཎཱནནྟཾ, ‘‘ཝིཉྙཱཎཱནཉྩ’’ནྟི ཝཏྟབྦེ ཝིཉྙཱཎཉྩ-སདྡོ ཏདཏྠེ ནིརཱུལ༹ྷོ ཨཱ-ཀཱར ན-ཀཱརལོཔོཏི ཝཱ ཀཏྭཱ ‘‘ཝིཉྙཱཎཉྩ’’མིཙྩེཝ ཝུཏྟཾ. ཨེཝཉྩ ཀཏྭཱ ཝཀྑཏི –

‘‘ཝིཉྙཱཎཱནནྟམིཙྩེཝཾ, ཝཏྟབྦཾ པནིདཾ སིཡཱ’’ཏི.

ཨཐ ཝཱ དུཏིཡཱརུཔྤཝིཉྙཱཎེན ཨཉྩིཏབྦཾ ཨཱརམྨཎཝསེན པཱཔུཎིཏབྦནྟི ཝིཉྙཱཎཉྩཾ. སེསཾ པུརིམསདིསམེཝ.

ཨཱཀིཉྩཉྙཱ…པེ… སཧགཏནྟི ནཱསྶ པཋམཱརུཔྤཝིཉྙཱཎསྶ ཀིཉྩནནྟི ཨཀིཉྩནཾ, ཨནྟམསོ བྷངྒམཏྟམྤི ཨཝསིཊྛཾ ནཏྠཱིཏི ཝུཏྟཾ ཧོཏི. སཏི ཧི བྷངྒམཏྟེཔི ཏསྶ སཀིཉྩནཏཱ ¶ སིཡཱ. ཨཀིཉྩནསྶ བྷཱཝོ ཨཱཀིཉྩཉྙཾ, ཨཱཀཱསཱནཉྩཱཡཏནཝིཉྙཱཎཱབྷཱཝསྶེཏཾ ཨདྷིཝཙནཾ. སེསཾ ཝུཏྟནཡམེཝ.

ནེཝསཉྙཱ…པེ… སཧགཏནྟི ཧེཊྛིམཛྷཱནེསུ ཝིཡ ཨོལཱ༹རིཀཱཡ སཉྙཱཡ ཨབྷཱཝཏོ ནེཝསྶ སཉྙཱ ཨཏྠཱིཏི ནེཝསཉྙཾ, སུཁུམཱཡ ཙ སཉྙཱཡ ཨཏྠིཏཱཡ ནཱསྶ སཉྙཱ ནཏྠཱིཏི ¶ ནཱསཉྙཾ, ནེཝསཉྙཉྩ ཏཾ ནཱསཉྙཉྩེཏི ནེཝསཉྙཱནཱསཉྙཾ, ཙཏུཏྠཱརུཔྤཛ྄ཛྷཱནཾ. ཡདི ཨེཝཾ ‘‘ནེཝསཉྙནཱསཉྙ’’ནྟི ཝཏྟབྦཾ? སཙྩམེཏཾ. ཝཙནསོབྷནཏྠཾ པན དཱིགྷཾ ཀཏྭཱ ཝུཏྟཾ. ཨཐ ཝཱ ནེཝསྶ སཉྙཱ ནཱསཉྙཱཏི ཨེཝཾ ཨེཀཛ྄ཛྷཾ བཧུབྦཱིཧིསམཱསཝསེན ‘‘ནེཝསཉྙཱནཱསཉྙ’’ནྟི ཝུཏྟཾ. ནེཝསཉྙཱནཱསཉྙཉྩ ཏཾ ཨཱཡཏནཉྩ མནཱཡཏནདྷམྨཱཡཏནཔརིཡཱཔནྣཏྟཱཏི ནེཝསཉྙཱནཱསཉྙཱཡཏནཾ, ཏེན སམྤཡུཏྟཾ སཉྙཱསཧགཏཾ ནེཝསཉྙཱནཱསཉྙཱཡཏནསཉྙཱསཧགཏཾ. ཨཐ ཝཱ སཉྙཱཡེཝ པཊུསཉྙཱཀིཙྩཀརཎེ ཨསམཏྠཏཱཡ ནེཝསཉྙཱ, ཨུཎྷོདཀེ ཏེཛོདྷཱཏུ ཝིཡ སངྑཱརཱཝསེསསུཁུམབྷཱཝཔྤཏྟིཡཱ ནཱསཉྙཱཏི ནེཝསཉྙཱནཱསཉྙཱ, སཱ ཨེཝ སེསདྷམྨཱནཾ ནིསྶཡཔཙྩཡཏཱཡ, ཨདྷིཊྛཱནཊྛེན དྷམྨཱཡཏནཔརིཡཱཔནྣཏཱཡ ཨེཝ ཝཱ ཨཱཡཏནནྟི ནེཝསཉྙཱནཱསཉྙཱཡཏནཾ, ནེཝསཉྙཱནཱསཉྙཱཡཏནབྷཱུཏཱཡ སཉྙཱཡ སཧགཏནྟི ནེཝསཉྙཱནཱསཉྙཱཡཏནསཉྙཱསཧགཏཾ.

ཡཐཱནུརཱུཔཾ…པེ… ནིཔྥཱདཀནྟི ‘‘པཋམཱརུཔྤབྷཱུམིཡཱ པཋམཾ, དུཏིཡཱརུཔྤབྷཱུམིཡཱ དུཏིཡ’’ནྟིཨཱདིནཱ ཨཏྟནོ ཨནུརཱུཔཝསེན ཙཏཱུསུ ཨརཱུཔབྷཱུམཱིསུ ཨུཔཔཏྟིསཱདྷཀཾ. ཏཱསུ པན པཋམཱ ཝཱིསཏིསཧསྶཀཔྤཱཡུཀཱ ཧོཏི, དུཏིཡཱ ཙཏྟཱལཱིསསཧསྶཀཔྤཱཡུཀཱ, ཏཏིཡཱ སཊྛིསཧསྶཀཔྤཱཡུཀཱ, ཙཏུཏྠཱ པན ཙཏུརཱསཱིཏིསཧསྶཀཔྤཱཡུཀཱཏི ཝེདིཏབྦཾ.

ཨརཱུཔཱཝཙརཀུསལཝཎྞནཱ ནིཊྛིཏཱ.

ལོཀུཏྟརཀུསལཝཎྞནཱ

ཨེཝཾ ཏིཝིདྷམྤི ལོཀིཡཀུསལཾ ནིདྡིསིཏྭཱ ཨིདཱནི ལོཀུཏྟརཀུསལཾ ནིདྡིསནྟོ ཨཱཧ ‘‘ཨིཏརཾ ¶ པནཱ’’ཏིཨཱདི. ལུཛྫནཔལུཛྫནཊྛེན ¶ ལོཀོ, སོ ཏིཝིདྷོ – སངྑཱརལོཀོ སཏྟལོཀོ བྷཱཛནལོཀོཏི. ཏཏོ ཨིདཾ ཨུཏྟརཏཱིཏི ལོཀུཏྟརཾ. ཙཏྟཱརོཔི ཧི མགྒཱ ཨུཔཱདཱནཀྑནྡྷསངྑཱཏསངྑཱརལོཀཏོ ཨུཏྟརནྟི ཨནཱསཝབྷཱཝེན. སཏྟལོཀེསུ ཙ སོཏཱཔཏྟིམགྒོ ཨནརིཡལོཀཏོ ཨུཏྟརཏི, སཀདཱགཱམིམགྒོ སོཏཱཔནྣལོཀཏོ, ཨནཱགཱམིམགྒོ སཀདཱགཱམིལོཀཏོ, ཨརཧཏྟམགྒོ ཨནཱགཱམིལོཀཏོ ཨུཏྟརཏི. བྷཱཛནལོཀེསུ པན པཋམམགྒོ ཨཔཱཡལོཀཏོ ཨུཏྟརཏི, སཀདཱགཱམིམགྒོ ཀཱམལོཀེཀདེསཏོ, ཨནཱགཱམིམགྒོ སཀལཀཱམལོཀཏོ, ཨརཧཏྟམགྒོ རཱུཔཱརཱུཔལོཀཏོ ཨུཏྟརཏི. ཨིཏི ཙཏུབྦིདྷམྤི མགྒཙིཏྟཾ ཏིཝིདྷལོཀཏོ ཨུཏྟརཏཱིཏི ལོཀུཏྟརཾ, ཀུཙྪིཏསལནཱདིཏོ པན ཀུསལཾ, ཙིནྟནཱདིཏོ ཙིཏྟཉྩཱཏི ལོཀུཏྟརཀུསལཙིཏྟཾ. ཕལཾ པན ལོཀཏོ ཨུཏྟིཎྞཏྟཱ ལོཀུཏྟརཾ, ཨུབྷཡམྤི ཝཱ སཧ ནིབྦཱནེན ཨུཔཱདཱནཀྑནྡྷསངྑཱཏལོཀཏོ ཨུཏྟརཾ ཝིསིཊྛཏརནྟི ལོཀུཏྟརཾ. ཡཐཱཧ ‘‘ཡཱཝཏཱ, བྷིཀྑཝེ, དྷམྨཱ སངྑཏཱ ཝཱ ཨསངྑཏཱ ཝཱ, ཝིརཱགོ ཏེསཾ དྷམྨཱནཾ ཨགྒམཀྑཱཡཏཱི’’ཏི (ཨ. ནི. ༤.༣༤; ཨིཏིཝུ. ༩༠).

ནིཡཏཱནིཡཏཝཏྠུཀབྷེདཏོཏི སོཏཱཔཏྟིམགྒསྶ པརཏོགྷོསཔཙྩཡེན ཝིནཱ ཨནུཔྤཛྫནཏོ ཨརཱུཔབྷཝེ སམྦྷཝོ ནཏྠཱིཏི ཏཾ ནིཡཏཝཏྠུཀཾ, ཨིཏརཾ པན སཏྟཝིདྷམྤི པརཏོགྷོསཾ ཝིནཱཔི ཝིཔསྶནཱབལེནེཝ ནིཔྥཛྫནཏོ ཏཏྠཱཔི སམྦྷཝཏཱིཏི ཨནིཡཏཝཏྠུཀཾ.

ཏཱིཧི…པེ… ཏིཝིདྷནྟི ལོཀུཏྟརཝིམོཀྑཱནཾ དྭཱརབྷཱཝཏོ ཝིམོཀྑམུཁསངྑཱཏཱཧི སུཉྙཏཱནུཔསྶནཱདཱིཧི ཏཱིཧི ཝུཊྛཱནགཱམིནིཝིཔསྶནཱཧི པཏྟབྦཏོ ཨིདཾ ལོཀུཏྟརཀུསལཾ ཏིཝིདྷཾ སུཉྙཏཾ ཨནིམིཏྟཾ ཨཔྤཎིཧིཏནྟི. ཀཏམེ པན ¶ ཏེ ལོཀུཏྟརཝིམོཀྑཱཏི? ནཝ ལོཀུཏྟརདྷམྨཱ. ཡཐཱཧ ‘‘ཙཏྟཱརོ ཙ ཨརིཡམགྒཱ ཙཏྟཱརི ཙ སཱམཉྙཕལཱནི ནིབྦཱནཉྩ, ཨཡཾ ཨནཱསཝོ ཝིམོཀྑོ’’ཏི (པཊི. མ. ༡.༢༡༣). ཨིམཱནི ཧི སཾཀིལེསདྷམྨེཧི སུཊྛུ ཝིམུཏྟཏྟཱ ཝིམོཀྑཱ ནཱམ. ཏཱནི པན པཙྩེཀཾ སུཉྙཏོ ཝིམོཀྑོ, ཨནིམིཏྟོ ཝིམོཀྑོ, ཨཔྤཎིཧིཏོ ཝིམོཀྑོཏི ཏིཝིདྷཱནི. ཡཐཱཧ ‘‘ཏཡོམེ, བྷིཀྑཝེ, ཝིམོཀྑཱ – སུཉྙཏོ ཝིམོཀྑོ, ཨནིམིཏྟོ ཝིམོཀྑོ, ཨཔྤཎིཧིཏོ ཝིམོཀྑོ’’ཏི (པཊི. མ. ༡.༢༠༩). ཨིདྷ པན ཀུསལཱདྷིཀཱརཏྟཱ ཙཏུམགྒསངྑཱཏཱཡེཝ ལོཀུཏྟརདྷམྨཱ ཨདྷིཔྤེཏཱ.

སུཉྙཏཱདིནཱམལཱབྷོ ཙ ནེསཾ ཨཱགམནཏོ, སགུཎཏོ, ཨཱརམྨཎཏོ ཙ ཝེདིཏབྦོ. ཏཐཱ ཧི ¶ ཨཱགཙྪཏི མགྒོ, ཕལཉྩ ཨེཏེནཱཏི ཨཱགམནཾ. ཏཉྷི དུཝིདྷཾ མགྒཱགམནཾ, ཕལཱགམནཉྩ. ཏེསུ ཝུཊྛཱནགཱམིནིཝིཔསྶནཱ མགྒཱགམནཾ, ཨརིཡམགྒོ ཕལཱགམནཾ. ཏཏྠ མགྒསྶ ཨཱགཏཊྛཱནེ མགྒཱགམནཾ གཧེཏབྦཾ, ཕལསྶ ཨཱགཏཊྛཱནེ ཕལཱགམནཾ. ཨིདྷ པན མགྒསྶ ཨཱགཏཏྟཱ མགྒཱགམནཾ གཧིཏནྟི. ཏཏོ ཨཱགམནཏོ. སགུཎཏོཏི སབྷཱཝཏོ. ཨཱརམྨཎཏོཏི ཨཱརམྨཎདྷམྨཏོ.

ཡོ ཧི སབྦསངྑཱརཱནཾ ཨནཏྟལཀྑཎཔཊིཝེདྷཝསཔྤཝཏྟཱཡ ཨནཏྟཱནུཔསྶནཱཡ ཝསེན མགྒཾ པཊིལབྷཏི, ཏསྶ སཱ ཨནུཔསྶནཱ ཨསུཉྙཏྟཀརཱནཾ ཨཏྟཱབྷིནིཝེསཔཙྩཡཱནཾ དིཊྛེཀཊྛཀིལེསཱནཾ ཝིཀྑམྦྷིཏབྷཱཝེན ཏེབྷཱུམཀདྷམྨཱནཾ ཨཏྟསུཉྙཏཱཡ ཡཱཐཱཝཏོ གཧཎཏོ སུཉྙཏཱནུཔསྶནཱ ནཱམ ཧོཏི. ཏཱཡ པན པཊིལདྡྷམགྒོ སུཉྙཏཱཡ ཨཱགཏཏྟཱ སུཉྙཏོ ནཱམ. ཏེནཱཧ ‘‘ཨནཏྟཏོ མནསིཀརོནྟོ སུཉྙཏཝིམོཀྑེན ཝིམུཙྩཏཱི’’ཏི (པཊི. མ. ༡.༢༢༧).

ཡོ ¶ པན སབྦསངྑཱརཱནཾ ཨནིཙྩལཀྑཎཔཊིཝེདྷཝསཔྤཝཏྟཱཡ ཨནིཙྩཱནུཔསྶནཱཡ མགྒཾ པཊིལབྷཏི, ཏསྶ སཱ ཨནུཔསྶནཱ ནིཙྩནིམིཏྟཱདིགཱཧཀརཱནཾ ཀིལེསཱནཾ ཝིཀྑམྦྷིཏཏྟཱ དྷུཝབྷཱཝཱུཔཊྛཱནསངྑཱཏནིཙྩནིམིཏྟཱདིནོ ཨགྒཧཎཏོ ཨནིམིཏྟཱནུཔསྶནཱ ནཱམ. ཏཱཡ པན ལདྡྷམགྒོ ཨནིམིཏྟཱཡ ཨཱགཏཏྟཱ ཨནིམིཏྟོ ནཱམ. ཏེནཱཧ ‘‘ཨནིཙྩཏོ མནསིཀརོནྟོ ཨནིམིཏྟཝིམོཀྑེན ཝིམུཙྩཏཱི’’ཏི (པཊི. མ. ༡.༢༢༧).

ཡོ པན སབྦསངྑཱརཱནཾ དུཀྑལཀྑཎཔཊིཝེདྷཝསཔྤཝཏྟཱཡ དུཀྑཱནུཔསྶནཱཡ ཝསེན མགྒཾ པཊིལབྷཏི, ཏསྶ སཱ ཨནུཔསྶནཱ ཏཎྷཱཔཎིདྷཱནསྶ ཝིཀྑམྦྷནེན པཎིདྷིཝིརཧིཏཏྟཱ ཨཔྤཎིཧིཏཱནུཔསྶནཱ ནཱམ. ཏཱཡ པན ལདྡྷམགྒོ ཨཔྤཎིཧིཏཱཡ ཨཱགཏཏྟཱ ཨཔྤཎིཧིཏོ ནཱམ. ཏེནཱཧ ‘‘དུཀྑཏོ མནསིཀརོནྟོ ཨཔྤཎིཧིཏཝིམོཀྑེན ཝིམུཙྩཏཱི’’ཏི. ཨཡཾ ཏཱཝསྶ ཨཱགམནཝསེན ནཱམལཱབྷོ.

ཨཏྟནོ པན རཱགཱདཱིཧི སུཉྙཏཏྟཱ, ནིཙྩནིམིཏྟཱདིཝིརཧིཏཏྟཱ, ཏཎྷཱཔཎིདྷིཨབྷཱཝཏོ ཙ སགུཎཏོ, རཱགཱདིསུཉྙསྶེཝ, ནིཙྩནིམིཏྟཱདིཝིརཧིཏསྶ, པཎིདྷིཝིཔྤམུཏྟསྶ ཙ ནིབྦཱནསྶ ཨཱརམྨཎཀརཎཏོ ཨཱརམྨཎཏོ ཙ སུཉྙཏཱདིཝིམོཀྑོ ནཱམ ཧོཏཱིཏི ཨེཝམསྶ སགུཎཱརམྨཎེཧི ནཱམལཱབྷོ དཊྛབྦོ. སོ ཙ ཁོ སུཏྟནྟཔརིཡཱཡེནེཝ, ནོ ཨབྷིདྷམྨཔརིཡཱཡེན. སུཏྟནྟཀཐཱ ཧི པརིཡཱཡདེསནཱ, ཨིཏརཱ ནིཔྤརིཡཱཡདེསནཱ, ཏསྨཱ སགུཎཱརམྨཎཏོ ནཱམསྶ སབྦསཱདྷཱརཎབྷཱཝེན ¶ ཨཝཝཏྠཱནཀརཏྟཱ པརིཡཱཡབྷཱཝཏོ སུཏྟནྟཔརིཡཱཡེནེཝ ལཱབྷོ, ཨཱགམནཏོ པན ཨབྷིདྷམྨཔརིཡཱཡེནཔི ཝཝཏྠཱནཀརབྷཱཝེན ནིཔྤརིཡཱཡཏྟཱ. ཏེནེཝ ཧི ཨཱཙརིཡེན ‘‘ཏཱིཧི ཝིམོཀྑམུཁེཧི པཏྟབྦཏོ ཏིཝིདྷ’’ནྟི ཝིམོཀྑམུཁམེཝ དྷུརཾ ཀཏྭཱ ཝུཏྟཾ, ན ‘‘སུཉྙཏཱདིནཱམཏོ ཏིཝིདྷ’’ནྟི. ཨནིམིཏྟནཱམཾ པནེཏྠ ¶ ཨཱགམནཏོཔི སུཏྟནྟཔརིཡཱཡེནེཝ ལབྦྷཏི ཨབྷིདྷམྨེ མགྒཾ པཏི ཨནིམིཏྟནཱམསྶ ཨནུདྡྷཏཏྟཱ. ཨནུདྡྷཊཏྟཾ པན ན ཨནུདྡྷརིཏབྦཏཱམཏྟེན, ཨཐ ཁོ ནིཔྤརིཡཱཡཏོ ཏསྶ མགྒེ ཨལབྦྷནཏོ. ཀིཉྩཱཔི ཧི ཨཡཾ ཝིཔསྶནཱ ནིཙྩནིམིཏྟཾ ཨུགྒྷཱཊེནྟཱི པཝཏྟཏི, སངྑཱརནིམིཏྟསྶ པན ཨནིསྶཛྫནཏོ ན ནིཔྤརིཡཱཡཏོ ཨནིམིཏྟནཱམཾ ལབྷཏི. ཡཾ པནེཏཾ སུཏྟེ –

‘‘ཨནིམིཏྟཉྩ བྷཱཝེཧི, མཱནཱནུསཡམུཛྫཧ;

ཏཏོ མཱནཱབྷིསམཡཱ, ཨུཔསནྟོ ཙརིསྶསཱི’’ཏི. (སུ. ནི. ༣༤༤) –

མགྒསྶ ཨནིམིཏྟབྷཱཝཝཙནཾ, ཏཾ ཡཐཱཝུཏྟཔརིཡཱཡཝསེན ལབྦྷམཱནཾ གཧེཏྭཱ ཝུཏྟཾ. ཨབྷིདྷམྨེ པན ཡཱ སཡམྤི ནིཔྤརིཡཱཡཏོ ཨནིམིཏྟནཱམཾ ན ལབྷཏི, སཱ ཀཐཾ མགྒསྶ ཏཾ དདེཡྻཱཏི མགྒསྶ ཨནིམིཏྟནཱམཾ ན ཨུདྡྷཊཾ. ཡདི ཨེཝཾ སུཉྙཏནཱམེནཔི ཨིདཾ སམཱནཾ. ཨནཏྟཱནུཔསྶནཱཔི ཧི ཀིཉྩཱཔི པུགྒལསུཉྙཏཾ གཎྷཱཏི, དྷམྨསུཉྙཏཾ པན ན གཎྷཱཏཱིཏི སཡཾ ནིཔྤརིཡཱཡེན སུཉྙཏཱནུཔསྶནཱ ནཱམ ན ཧོཏཱིཏི སུཉྙཏནཱམམྤི མགྒསྶ ན དདེཡྻ. ཨཐ པུགྒལསུཉྙཏཱགྒཧཎམཏྟེན སཡཾ སུཉྙཏཱནུཔསྶནཱ ཧུཏྭཱ མགྒསྶ ཏཾ དདེཡྻ, ཨནིཙྩཱནུཔསྶནཱཔི སངྑཱརནིམིཏྟསྶ གཧཎེཔི ནིཙྩནིམིཏྟཱདིཨུགྒྷཱཊནཏོ སཡཾ ཨནིམིཏྟཱནུཔསྶནཱ ཧུཏྭཱ མགྒསྶ ཨནིམིཏྟནཱམཾ དདེཡྻཱཏི? ན ཨིདམེཝཾ, ནིཙྩཱདིནིམིཏྟུགྒྷཱཊནེན ཨནིམིཏྟབྷཱཝསྶ ནིཔྤརིཡཱཡེན མགྒེ ཨལབྦྷནཏོ ནིཙྩཱདིནིམིཏྟུགྒྷཱཊནསྶཔི པརིཡཱཡབྷཱཝཏོ. ནནུ ཨིདམྤི སབྦཏྠ སམཱནཾ. སུཉྙཏཨཔྤཎིཧིཏབྷཱཝོཔི ཧི ནིཔྤརིཡཱཡེན ཨམགྒེ ན ལབྦྷཏི པུགྒལསུཉྙཏགྒཧཎསྶ, པཎིདྷིསོསནསྶ ཙ ཨུཛུཀཾ མགྒེནེཝ ནིཔྥཛྫནཏོ, ཏསྨཱ སུཉྙཏཱནུཔསྶནཱཔི ཨཔྤཎིཧིཏཱནུཔསྶནཱཔི པརིཡཱཡེནེཝ ཏཾ ཏཾ ནཱམཾ ལབྷནྟཱིཏི མགྒསྶ ནིཔྤརིཡཱཡཏོ ནཱམཾ ན དེནྟཱིཏི? ན, ཏཏོ ¶ ལདྡྷཨརིཡམགྒསྶ ནིཔྤརིཡཱཡཏོ སམྤཡུཏྟདྷམྨཝསེནེཝ སུཉྙཏཨཔྤཎིཧིཏནཱམསམྦྷཝཏོ. ཀཐཾ? ཋཔེཏྭཱ བུདྡྷུཔྤཱདཾ སརབྷངྒསཏྠཱརཱདིཀཱལེཔི དུབྦིཛཱནཱིཡབྷཱཝེན སུཁུམསྶ ཨནཏྟལཀྑཎསྶ པཉྙཱཡ ཨེཝ གོཙརབྷཱཝཏོ ཨནཏྟཱནུཔསྶནཱཡ ཨནུཔསྶནཏོ ¶ མགྒཀྑཎེ པཉྙིནྡྲིཡཾ ཨདྷིམཏྟཾ ཧོཏི. ཡཐཱཧ – ‘‘ཨནཏྟཏོ མནསིཀརོཏོ པཉྙིནྡྲིཡཾ ཨདྷིམཏྟཾ ཧོཏཱི’’ཏི (པཊི. མ. ༡.༢༢༡).

ཏཉྩ པན སཡཾ ཨཏྟཱབྷིནིཝེསསམུགྒྷཱཊནཏོ, ཨརིཡམགྒཔརིཡཱཔནྣཏྟཱ ཙ ནིཔྤརིཡཱཡཏོཝ སུཉྙཏནཱམཾ ལབྷཏི. དུཀྑཱནུཔསྶནཱཡ སམཱདྷིཝིཔཙྩནཱིཀསྶ པཎིདྷིསངྑཱཏརཱགསྶ སོསནཏོ ཏསྶཱ ཝསེན ཨནུཔསྶནྟསྶ མགྒཀྑཎེ སམཱདྷིནྡྲིཡཾ ཨདྷིམཏྟཾ ཧོཏི. ཡཐཱཧ – ‘‘དུཀྑཏོ མནསིཀརོཏོ སམཱདྷིནྡྲིཡཾ ཨདྷིམཏྟཾ ཧོཏཱི’’ཏི. ཏཉྩ པན སཡཾ པཎིདྷིསོསནཏོ, ཨརིཡམགྒཔརིཡཱཔནྣཏྟཱ ཙ ནིཔྤརིཡཱཡཏོཝ ཨཔྤཎིཧིཏནཱམཾ ལབྷཏི. སབྦསངྑཱརཱནཾ པན ཨནིཙྩབྷཱཝཾ ཨཱགམནཏོ སུཏྭཱ པཙྪཱ སཡཾ པཙྩཀྑཏོ པསྶཏོ ‘‘ཨནིཙྩམེཝ ཝཏ སོ བྷགཝཱ ‘ཨནིཙྩ’ནྟི ཨཱཧཱ’’ཏི བྷགཝཏི སདྡྷཱབཱཧུལླཔཊིལཱབྷཏོ ཨནིཙྩཱནུཔསྶནཱཡ མནསིཀརོཏོ མགྒཀྑཎེ སདྡྷིནྡྲིཡཾ ཨདྷིམཏྟཾ ཧོཏི. ཡཐཱཧ – ‘‘ཨནིཙྩཏོ མནསིཀརོཏོ སདྡྷིནྡྲིཡཾ ཨདྷིམཏྟཾ ཧོཏཱི’’ཏི. ཏཾ པན སཡཾ སངྑཱརནིམིཏྟཏོ ཝུཊྛཧནྟམྤི ཨརིཡམགྒཔརིཡཱཔནྣཾ ན ཧོཏཱིཏི ནིཔྤརིཡཱཡཏོ ཨནིམིཏྟནཱམཾ ན ལབྷཏི, ཏསྨཱ ཡཐཱ ཀཱཡཀམྨཱདྷིཀཾ ཙིཏྟཾ ‘‘ཀཱཡཀམྨ’’ནྟི ཝུཙྩཏི, ཨེཝཾ སུཉྙཏསངྑཱཏཔཉྙིནྡྲིཡཱདྷིམཏྟོ མགྒོ སུཉྙཏནཱམཾ ལབྷཏི, ཨཔྤཎིཧིཏསངྑཱཏསམཱདྷིནྡྲིཡཱདྷིམཏྟོ ཨཔྤཎིཧིཏནཱམཾ, སདྡྷིནྡྲིཡཱདྷིམཏྟོ པན སདྡྷཱཡ ཨནིམིཏྟནཱམཱལཱབྷཏོ སཡམྤི ཏཾ ན ལབྷཏི. ཡདི སམྤཡུཏྟདྷམྨཝསེན སུཉྙཏཱདིནཱམཱལཱབྷོ, ཨཐ ཀཐཾ ‘‘ཨཱགམནཏོ’’ཏི ¶ ཝུཏྟཾ? སཙྩཾ, ཨཱགམནཏོ ཨདྷིམཏྟསྶ པན ཨིནྡྲིཡསྶ ཝསེན ལདྡྷནཱམམྤི ཨཱགམནཏོཝ ལདྡྷཾ ཧོཏི.

ཨཐ ཝཱ ཨབྷིདྷམྨཔརིཡཱཡེནཔི སུཉྙཏབྷཱཝོ ནཱམ པུགྒལསུཉྙཏཱཡེཝཱཏི པུགྒལསུཉྙཏགྒཱཧིཏཱཡ ཨནཏྟཱནུཔསྶནཱཡ སུཉྙཏནཱམཾ ནིཔྤརིཡཱཡཏོཝ ལབྦྷཏི. པཎིདྷི ནཱམ རཱགཱདིཀཱ ཨེཝཱཏི རཱགཱདིསོསིཏཱཡ དུཀྑཱནུཔསྶནཱཡ ཨཔྤཎིཧིཏནཱམམྤི ནིཔྤརིཡཱཡཏོཝ ལབྦྷཏི.

ནིམིཏྟནྟི པན ཋཔེཏྭཱ སུཏྟནྟཔརིཡཱཡཾ ཨབྷིདྷམྨཔརིཡཱཡེན སངྑཱརནིམིཏྟཾ ཧོཏཱིཏི སངྑཱརནིམིཏྟགྒཱཧིཏཱཡ ཨནིཙྩཱནུཔསྶནཱཡ ཨནིམིཏྟནཱམཾ ནིཔྤརིཡཱཡཏོ ན ལབྦྷཏི, ཏསྨཱ ནིཔྤརིཡཱཡཏོ སུཉྙཏཨཔྤཎིཧིཏནཱམིཀཱནཾ ཨནཏྟདུཀྑཱནུཔསྶནཱནཾ ཝསེན པཊིལདྡྷམགྒོ ཨཱགམནཏོ སུཉྙཏཨཔྤཎིཧིཏནཱམཾ ལབྷཏི, ཨནིམིཏྟནཱམཾ པན པརིཡཱཡཏོཝ ལབྷཏི. ཏེན ཝུཏྟཾ ¶ – ‘‘ཨནིམིཏྟནཱམཾ པནེཏྠ ཨཱགམནཏོཔི སུཏྟནྟཔརིཡཱཡེནེཝ ལབྦྷཏི ཨབྷིདྷམྨེ མགྒཾ པཏི ཨནིམིཏྟནཱམསྶ ཨནུདྡྷཊཏྟཱ’’ཏི. ཨིཏི ཨིམེསཾ ཏིཎྞཾ ཝིམོཀྑཱནཾ པཝེསནདྭཱརབྷཱཝཏོ སུཉྙཏཱནུཔསྶནཱདིནཱམིཀཱ ཨནཏྟཱནུཔསྶནཱདིཀཱ ཏིསྶོ ཨནུཀྐམེན བལཝབྷཱཝཾ པཏྭཱ ཝུཊྛཱནགཱམིནིཝིཔསྶནཱབྷཱུཏཱ ཏཱིཎི ཝིམོཀྑམུཁཱནཱིཏི ཝེདིཏབྦཱནི. ཝུཏྟཉྷེཏཾ –

‘‘ཏཱིཎི ཁོ པནིམཱནི ཝིམོཀྑམུཁཱནི ལོཀནིཡྻཱནཱཡ སཾཝཏྟནྟི, སབྦསངྑཱརེ པརིཙྪེདཔརིཝཊུམཏོ སམནུཔསྶནཏཱཡ ཨནིམིཏྟཱཡ ཙ དྷཱཏུཡཱ ཙིཏྟསམྤཀྑནྡནཏཱཡ, སབྦསངྑཱརེསུ མནོསམུཏྟེཛནཏཱཡ ཨཔྤཎིཧིཏཱཡ ཙ དྷཱཏུཡཱ ཙིཏྟསམྤཀྑནྡནཏཱཡ, སབྦདྷམྨེ པརཏོ སམནུཔསྶནཏཱཡ སུཉྙཏཱཡ ཙ དྷཱཏུཡཱ ¶ ཙིཏྟསམྤཀྑནྡནཏཱཡ, ཨིམཱནི ཏཱིཎི ཝིམོཀྑམུཁཱནི ལོཀནིཡྻཱནཱཡ སཾཝཏྟནྟཱི’’ཏི (པཊི. མ. ༡.༢༡༩).

ཨེཏྠ ཧི པརིཙྪེདཔརིཝཊུམཏོཏི ཨུདཡབྦཡཝསེན པརིཙྪེདཏོ ཙེཝ པརིཝཊུམཏོ ཙ. ཨནིཙྩཱནུཔསྶནཱ ཧི ‘‘ཨུདཡཏོ པུབྦེ སངྑཱརཱ ནཏྠཱི’’ཏི པརིཙྪིནྡིཏྭཱ ཏེསཾ གཏིཾ སམནྣེསམཱནཱ ཝཡཏོ པརཾ ན གཙྪནྟི, ཨེཏྠེཝ ཨནྟརདྷཱཡནྟཱིཏི པརིཝཊུམཏོ པརིཡནྟཏོ སམནུཔསྶཏི. སམནུཔསྶནཏཱཡཱཏི སམྨདེཝ ཨནུཔསྶནཏཱཡ སཾཝཏྟནྟཱིཏི སམྦནྡྷོ. མནོསམུཏྟེཛནཏཱཡཱཏི ཙིཏྟསཾཝེཛནཏཱཡ. དུཀྑཱནུཔསྶནེན ཧི སངྑཱརེསུ ཙིཏྟཾ སཾཝིཛྫཏི. པརཏོ སམནུཔསྶནཏཱཡཱཏི ‘‘ནཱཧཾ, ན མམ’’ནྟི ཨེཝཾ ཨནཏྟཏོ སམནུཔསྶནཏཱཡ. ཨིཏི ཨིམཱནི ཏཱིཎི པདཱནི ཨནིཙྩཱནུཔསྶནཱདཱིནཾ ཏིཎྞཾ ཝསེན ཝུཏྟཱནཱིཏི ཝེདིཏབྦཱནི. ཏེནེཝ ཙ ཏདནནྟརེ པཉྷཱཝིསྶཛྫནེ –

‘‘ཨནིཙྩཏོ མནསིཀརོཏོ ཁཡཏོ སངྑཱརཱ ཨུཔཊྛཧནྟི, དུཀྑཏོ མནསིཀརོཏོ བྷཡཏོ སངྑཱརཱ ཨུཔཊྛཧནྟི, ཨནཏྟཏོ མནསིཀརོཏོ སུཉྙཏོ སངྑཱརཱ ཨུཔཊྛཧནྟཱི’’ཏི (པཊི. མ. ༡.༢༡༩) –

ཝུཏྟཾ. ནནུ ཙེཏྠ ཨབྷིདྷམྨཱཝཏཱརསྶ བྷཱསམཱནཏྟཱ ཨབྷིདྷམྨཔརིཡཱཡེནེཝ ཝིམོཀྑམུཁཱནི ཙ ཝཝཏྠཔེཏུཾ ཡུཏྟནྟི? སཙྩཾ, ཨནིཙྩཱནུཔསྶནཱཡཔི པན མགྒཝུཊྛཱནཾ ཧོཏཱིཏི པཀཱསནཏྠཾ སུཏྟནྟཔརིཡཱཡེནཔི ¶ ཨེཀཾ ཝཝཏྠཱནཾ ཀཏཾ, ཏཐཱ ཝུཊྛིཏོ པན མགྒོ ཨབྷིདྷམྨཔརིཡཱཡེན སུདྡྷིཀཔཊིཔདཱཡམེཝ སངྒཡ྄ཧཏཱིཏི དཊྛབྦཾ.

ཙཏུམགྒཡོགབྷེདཏོཏི སོཏཱཔཏྟིཨཱདཱིཧི ཙཏཱུཧི ཨརིཡམགྒེཧི སམྤཡོགཔྤབྷེདཏོ. ཨརིཡམགྒཱནཾ པན སམྨཱདིཊྛཱདིཨཊྛངྒསབྷཱཝཏྟཱ, ཏེསཉྩ སབྦལོཀུཏྟརེ ཨཏྠིཏཱཡ ¶ བྷངྒཝསེན ཨབྷེདེཔི ཨིནྡྲིཡཱནཾ ཨཔཱཊཝཔཱཊཝཏརཏམབྷཱཝེན སཙྪིཀིརིཡཱཝིསེསཏོ ཀིལེསཱནཾ པཧཱནབྷེདོ ཧོཏཱིཏི ཏཾཝསེན ཙཏུབྦིདྷཏཱ དཊྛབྦཱ. ཏེནེཝཱཧ ‘‘སཀྐཱཡདིཊྛིཝིཙིཀིཙྪཱ’’ཏིཨཱདི. སཏི ཝིཛྫམཱནེ པཉྩཀྑནྡྷསངྑཱཏེ ཀཱཡེ དིཊྛི སཀྐཱཡདིཊྛི, སཡཾ ཝཱ ཏཏྠ སཏི དིཊྛི སཀྐཱཡདིཊྛི, པཉྩསུ ཁནྡྷེསུ ཨཏྟཏྟནིཡཱབྷིནིཝེསཝསེན པཝཏྟཱཡ མིཙྪཱདིཊྛིཡཱ ཨེཏཾ ཨདྷིཝཙནཾ. སཱ པན ཨེཀེཀསྨིཾ ཁནྡྷེ ཙཏུདྷཱ ཨབྷིནིཝེསནཝསེན ཝཱིསཏིཝིདྷཱ ཧོཏི. ཏཐཱ ཧི ཀོཙི རཱུཔཾ ཨཏྟཏོ སམནུཔསྶཏི ‘‘ཡཾ རཱུཔཾ, སོ ཨཏྟཱ, ཡོ ཨཏྟཱ, ཏཾ རཱུཔཾ, ཡཐཱ དཱིཔསྶ ཝཎྞོཡེཝ ཨཙྩི, ཨཙྩིཡེཝ ཝཎྞོ’’ཏི. རཱུཔཝནྟཾ ཝཱ ཨཏྟཱནཾ སམནུཔསྶཏི, ཚཱཡཱཝནྟཾ ཝིཡ རུཀྑཾ. ཨཏྟནི ཝཱ རཱུཔཾ, པུཔྥེ ཝིཡ གནྡྷཾ. རཱུཔསྨིཾ ཝཱ ཨཏྟཱནཾ, སམུགྒེ ཝིཡ མཎི. ཨེཝཾ ཝེདནཱདཱིསུཔི ‘‘ཝེདནཾ ཨཏྟཏོ སམནུཔསྶཏཱི’’ཏིཨཱདིནཱ ཡོཛེཏབྦཾ. ཏཏྠ ཡོ པཉྩཝིདྷོ ཨབྱཏིརིཏྟཨཏྟཱབྷིནིཝེསོ, སཱ ཨུཙྪེདདིཊྛི. ཡོ པན པནྣརསཝིདྷོ བྱཏིརིཏྟཨཏྟཱབྷིནིཝེསོ, སཱ སསྶཏདིཊྛཱིཏི ཝེདིཏབྦཾ.

སབྷཱཝཾ ཝིཙིནནྟོ ཏཱཡ ཀིཙྪཏི ཀིལམཏཱིཏི ཝིཙིཀིཙྪཱ, ཏིཀིཙྪིཏུཾ དུཀྐརཏཱཡ ཝཱ ཝིགཏཱ ཙིཀིཙྪཱ ཉཱཎཔཏིཀཱརོ ཨིམིསྶཱཏི ཝིཙིཀིཙྪཱ. སཱ པན –

‘‘སཏྠརི ཀངྑཏི ཝིཙིཀིཙྪཏི, དྷམྨེ, སངྒྷེ, སིཀྑཱཡ, པུབྦནྟེ, ཨཔརནྟེ, པུབྦནྟཱཔརནྟེ, ཨིདཔྤཙྩཡཏཱཔཊིཙྩསམུཔྤནྣེསུ དྷམྨེསུ ཀངྑཏི ཝིཙིཀིཙྪཏཱི’’ཏི (དྷ. ས. ༡༠༠༨ ཐོཀཾ. ཝིསདིསཾ) –

ཨེཝཾ བུདྡྷཱདཱིསུ ཀངྑཱཝསེན ཨཊྛཝཏྠུཀཱ,

‘‘ཨཧོསིཾ ནུ ཁོ ཨཧམཏཱིཏམདྡྷཱནཾ, ན ནུ ཁོ ཨཧོསིཾ, ཀིཾ ནུ ཁོ ཨཧོསིཾ, ཀཐཾ ནུ ཁོ ཨཧོསིཾ ¶ , ཀིཾ ཧུཏྭཱ ཀིཾ ཨཧོསིཾ ནུ ཁོ ཨཧམཏཱིཏམདྡྷཱནཾ, བྷཝིསྶཱམི ནུ ཁོ ཨཧམནཱགཏམདྡྷཱནཾ ¶ , ན ནུ ཁོ བྷཝིསྶཱམི, ཀིཾ ནུ ཁོ བྷཝིསྶཱམི, ཀཐཾ ནུ ཁོ བྷཝིསྶཱམི, ཀིཾ ཧུཏྭཱ ཀིཾ བྷཝིསྶཱམི ནུ ཁོ ཨཧམནཱགཏམདྡྷཱནཾ, ཨེཏརཧི ཝཱ པན པཙྩུཔྤནྣམདྡྷཱནཾ ཨཛ྄ཛྷཏྟཾ ཀཐཾཀཐཱི ཧོཏི, ཨཧཾ ནུ ཁོསྨི, ནོ ནུ ཁོསྨི, ཀིཾ ནུ ཁོསྨི, ཀཐཾ ནུ ཁོསྨི, ཨཡཾ ནུ ཁོ སཏྟོ ཀུཏོ ཨཱགཏོ, སོ ཀུཧིཾ གཱམཱི བྷཝིསྶཏཱི’’ཏི (མ. ནི. ༡.༡༨; སཾ. ནི. ༢.༢༠) –

ཨེཝཾ པུབྦནྟཱདཡོ ཨཱརབྦྷ པཝཏྟིཝསེན སོལ༹སཝཏྠུཀཱ ཙ ནིདྡིཊྛཱ.

ཏཏྠ སཏྠརི ཀངྑནྟོ ཏསྶ རཱུཔཀཱཡདྷམྨཀཱཡཱནཾ ཝིཛྫམཱནཏཾ, ཨཝིཛྫམཱནཏཉྩ ཀངྑཏི, དྷམྨེ ཀངྑནྟོ ཏསྶ སྭཱཀྑཱཏདྭཱཀྑཱཏབྷཱཝེ ཀངྑཏི, སངྒྷེ ཀངྑནྟོ ཏསྶ སུཔྤཊིཔནྣཝིཔྤཊིཔནྣཏཱདིབྷཱཝེ ཀངྑཏི, སིཀྑཱཡ ཀངྑནྟོ ཏསྶཱ སུཔཉྙཏྟདུཔྤཉྙཏྟབྷཱཝཾ ཀངྑཏི, པུབྦནྟེ ཀངྑནྟོ སསྶཏཱཀཱརཾ, ཨདྷིཙྩསམུཔྤཏྟིཨཱཀཱརཉྩ ནིསྶཱཡ ཨཏཱིཏེ ཨཏྟནོ ཝིཛྫམཱནཏཾ, ཨཝིཛྫམཱནཏཉྩ ཀངྑཏི, ཨཔརནྟེ ཀངྑནྟོ སསྶཏཱཀཱརཾ, ཨུཙྪེདཱཀཱརཉྩ ནིསྶཱཡ ཨནཱགཏེ ཨཏྟནོ ཨུཔྤཏྟིཾ, ཨནུཔྤཏྟིཉྩ ཀངྑཏི, པུབྦནྟཱཔརནྟེ ཀངྑནྟོ པཙྩུཔྤནྣེ ཨཏྟནོ ཨཏྠིབྷཱཝཾ, ནཏྠིབྷཱཝཉྩ ཀངྑཏི. པཙྩུཔྤནྣོ ཧི ཨདྡྷཱ པུབྦབྷཱགཱཔརབྷཱགཀོཊྛཱསཝནྟཏཱཡ ‘‘པུབྦནྟཱཔརནྟོ’’ཏི ཝུཙྩཏི, ཡུཏྟཾ པན ཏཾ ཨཱརབྦྷ ཀངྑཱཛནནནྟི? ཡུཏྟཾ, ཨཡུཏྟནྟི ཀཱ ཨེཏྠ ཙིནྟཱ. ཨུམྨཏྟཀོ ཝིཡ ཧི བཱལཔུཐུཛྫནོ. ཏསྨཱ སོ ཡཾ ཀིཉྩི ཀངྑཏིཡེཝ. ཏེནེཝ ཙ སོལ༹སཝཏྠུཀཝིཙིཀིཙྪཱནིདྡེསེ ‘‘ཨེཏརཧི ཝཱ པནཱ’’ཏིཨཱདི ཝུཏྟཾ. ཨཱཙརིཡཱ པན ‘‘པུབྦནྟཱཔརནྟོཏི ཨཏཱིཏཱནཱགཏེ ཨེཀཛ྄ཛྷཾ གཧེཏྭཱ ཏདུབྷཡམཱརབྦྷ ¶ ཀངྑནྟོ པུབྦནྟཱཔརནྟེ ཀངྑཏཱི’’ཏིཔི ཝདནྟི. ཨིདཔྤཙྩཡཏཱཔཊིཙྩསམུཔྤནྣེསུ དྷམྨེསུ ཀངྑནྟོ པན ཨཝིཛྫཱདཱིནཾ པཙྩཡཱནཾ, སངྑཱརཱདཱིནཉྩ པཙྩཡུཔྤནྣཱནཾ ཧེཏུཧེཏུསམུཔྤནྣབྷཱཝསྶ སབྦྷཱཝཱསབྦྷཱཝཾ ཀངྑཏཱིཏི ཨེཝཾ ཏཱཝ ཨཊྛཝཏྠུཀཀངྑཱཡ པཝཏྟི ཝེདིཏབྦཱ.

སོལ༹སཝཏྠུཀཱ པན ‘‘ཨཧོསིཾ ནུ ཁོ…པེ… ན ནུ ཁོ ཨཧོསི’’ནྟི ཀངྑནྟོ ཝུཏྟནཡེནེཝ ཨཏཱིཏེ ཨཏྟནོ ཝིཛྫམཱནཱཝིཛྫམཱནཏཾ ཀངྑཏི. ཀིཾ ནུ ཁོ ཨཧོསིནྟི ཛཱཏིལིངྒུཔཔཏྟིཡོ ནིསྶཱཡ ‘‘ཁཏྟིཡོ ནུ ཁོ ཨཧོསིཾ, བྲཱཧྨཎཱདཱིསུ གཧཊྛཱདཱིསུ དེཝཱདཱིསུ ཨཉྙཏརོ ནུ ཁོ’’ཏི ཀངྑཏི. ཀཐཾ ནུ ཁོཏི སཎྛཱནཱཀཱརཾ ནིསྶཱཡ ‘‘དཱིགྷོ ནུ ཁོ ཨཧོསིཾ, རསྶཨོདཱཏཀཱལཱ༹དཱིནཉྩ ཨཉྙཏརོ’’ཏི ཀངྑཏི. ཨིསྶརནིམྨཱནཱདཱིནི ནིསྶཱཡ ‘‘ཀེན ¶ ནུ ཁོ པཀཱརེན ཨཧོསི’’ནྟི ནིབྦཏྟནཱཀཱརཏོ ཀངྑཏཱིཏི ཝདནྟི. ཀིཾ ཧུཏྭཱ ཀིཾ ཨཧོསིནྟི ཛཱཏིཨཱདཱིནི ནིསྶཱཡ ‘‘ཁཏྟིཡོ ཧུཏྭཱ ནུ ཁོ བྲཱཧྨཎོ ཨཧོསིཾ…པེ… དེཝོ ཧུཏྭཱ ནུ ཁོ མནུསྶོ ཨཧོསི’’ནྟི ཨཏྟནོ ཨཔརཱཔརཾ པཝཏྟིཾ ཀངྑཏི. བྷཝིསྶཱམི ནུ ཁོ, ན ནུ ཁོཏི ཧེཊྛཱ ཝུཏྟནཡེནེཝ ཨནཱགཏེ ཨཏྟནོ ཝིཛྫམཱནཱཝིཛྫམཱནཏཾ ཀངྑཏི. ‘‘ཀིཾ ནུ ཁོ བྷཝིསྶཱམཱི’’ཏིཨཱདི ཝུཏྟནཡམེཝ. ཨཧཾ ནུ ཁོསྨི, ན ནུ ཁོསྨཱིཏི ཨིདཱནི ཨཏྟནོ ཨཏྠིབྷཱཝཾ, ནཏྠིབྷཱཝཉྩ ཀངྑཏི. ཏཏྠ ཀཱརཎཾ ཝུཏྟམེཝ. ཀིཾ ནུ ཁོསྨཱིཏི ཁཏྟིཡཱདིཀོཝ སམཱནོ ཨཏྟནོ ཁཏྟིཡཱདིབྷཱཝཾ ཀངྑཏི. ཨེསེཝ ནཡོ སེསེསུཔི. ཀཐཾ ནུ ཁོསྨཱིཏི ‘‘ཨབྦྷནྟརེ ཛཱིཝོ ནཱམ ཨཏྠཱི’’ཏི གཧེཏྭཱ ཏསྶ དཱིགྷཱདིབྷཱཝཾ ཀངྑཏི. པཙྩུཔྤནྣཾ པན ཨཏྟནོ སརཱིརསཎྛཱནཾ ཨཛཱནནྟོ ནཱམ ནཏྠི. ཀུཏོ ཨཱགཏོ, ཀུཧིཾ གཱམཱི བྷཝིསྶཏཱིཏི ཨཏྟབྷཱཝསྶ ཨཱགཏགཏཊྛཱནཱནི ཀངྑཏཱིཏི ཝེདིཏབྦཾ.

སཱིལཉྩ ¶ ཝཏཉྩ སཱིལབྦཏཾ, ཏཏྠ གོསཱིལཱདིཨསུདྡྷིམགྒོ སམཱདཱནཝསེན སཱིལཾ, ཨཝཱིཏིཀྐམཝསེན ཝཏཾ. ཨུབྷཡཐཱཔི ཝཱ སཱིལཾ, ཏཔོཀམྨབྷཱཝེན གཧིཏཏྟཱ ཝཏཾ. གཝཱདིཔཀཏིབྷཱཝཏོ ཨཏྟནོ ཝཱ གཝཱདིབྷཱཝཱདྷིཊྛཱནཾ སཱིལཾ, ‘‘གཙྪནྟོ བྷཀྑེཏི, ཏིཊྛནྟོ མུཏྟེཏཱི’’ཏིཨཱདིནཱ གཝཱདིཀིརིཡཱཡ ཀརཎཾ ཝཏཾ. ཏཾཏཾཨཀིཙྩསམྨསཏོ ཝཱ ནིཝཏྟི སཱིལཾ, ཏཾསམཱདཱནཝཏོ ཝེསབྷོཛནཀིཙྩཙརཎཱདིཝིསེསཔཊིཔཏྟི ཝཏཾ. སབྷཱཝཾ ཨཏིཀྐམྨ པརཏོ ཨཱམསནཾ གཧཎནྟི པརཱམཱསོ, སཱིལབྦཏསྶ པརཱམཱསོ སཱིལབྦཏཔརཱམཱསོ. ཨིཏོ བཧིདྡྷཱ སམཎབྲཱཧྨཎཱནཾ སཱིལེན སུདྡྷི, ཝཏེན སུདྡྷི, སཱིལབྦཏེན སུདྡྷཱིཏི ཨེཝཾ ཨསུདྡྷིམགྒེ ‘‘སུདྡྷིམགྒོ’’ཏི པཝཏྟསྶ མིཙྪཱབྷིནིཝེསསྶེཏཾ ཨདྷིཝཙནཾ. སཀྐཱཡདིཊྛི ཙ ཝིཙིཀིཙྪཱ ཙ སཱིལབྦཏཔརཱམཱསོ ཙཱཏི སཀྐཱཡ…པེ… པརཱམཱསོ, ཏེཡེཝ ཀམྨཝིཔཱཀེསུ, ཝཊྚསྨིཾ ཝཱ སཏྟེ སཾཡོཛེནྟི བནྡྷནྟཱིཏི སཾཡོཛནཱནི, ཏེསཾ དིཊྛིཝིསུདྡྷིཨཱདཱིཧི ཏདངྒཝསེན པཧཱིནཱནཾ ཨནུཔྤཏྟིདྷམྨཏཱཔཱདནེན ཨཙྩནྟསམུཙྪེདཔྤཧཱནཾ ཀརོཏཱིཏི སཀྐཱ…པེ…པྤཧཱནཀརཾ.

ནིབྦཱནཾ པཏི སཝནཏོ སནྡནཏོ སོཏོ ཝུཙྩཏི ཨརིཡོ ཨཊྛངྒིཀམགྒོ, ཏསྶ ཨཱདིཏོ པཛྫནཾ སོཏཱཔཏྟི, ནིབྦཱནཾ མགྒཏི, ནིབྦཱནཏྠིཀེཧི མགྒཱིཡཏི, ཀིལེསེ མཱརེནྟོ གཙྪཏཱིཏི ཝཱ མགྒོ, སོཏཱཔཏྟི ཨེཝ མགྒོ སོཏཱཔཏྟིམགྒོ. ཨཐ ཝཱ སོཏཾ ཨཱདིཏོ པཛྫཏི ཨདྷིགཙྪཏཱིཏི སོཏཱཔཏྟི, པཋམོ ཨརིཡཔུགྒལོ, ཏསྶ མགྒོ སོཏཱཔཏྟིམགྒོ, སམྨཱདིཊྛིཨཱདཱིནི ཨཊྛངྒཱནི, ཏེན སམྤཡུཏྟཾ ཙིཏྟཾ སོཏཱཔཏྟིམགྒཙིཏྟཾ.

རཛྫཏི ¶ ཨབྷིསཛྫཏཱིཏི རཱགོ, སོ ཨིདྷ པཉྩཀཱམཝིསཡཱ, ཀཱམབྷཝཝིསཡཱ ཙ ཏཎྷཱ. དུསྶཏཱིཏི དོསོ, དསཝིདྷཨཱགྷཱཏཝཏྠུཔདཊྛཱནོ ¶ བྱཱཔཱདོ. མུཡ྄ཧཏཱིཏི མོཧོ, དུཀྑཱདཱིསུ ཨཊྛསུ ཨཉྙཱཎཾ. ཨེཏེསཾ ཀིལེསཱནཾ ཏནུཏྟཾ ཏནུབྷཱཝཾ ཀརོཏཱིཏི རཱག…པེ… ཏནུཏྟཀརཾ. ཏཏྠ དྭཱིཧི ཀཱརཎེཧི ཏནུཏྟཾ ཨབྷིཎྷཱནུཔྤཏྟིཏོ, པརིཡུཊྛཱནམནྡཏཱཡ ཙཱཏི. སཀདཱགཱམིསྶ ཧི ཝཊྚཱནུསཱརིམཧཱཛནསྶ ཝིཡ ཀིལེསཱ ཨབྷིཎྷཾ ན ཨུཔྤཛྫནྟི, ཀདཱཙི ཝིརལཱ༹ཀཱརཱ ཧུཏྭཱ ཨུཔྤཛྫནྟི, ཏཐཱ ཨུཔྤཛྫནྟཱཔི མདྡནྟཱ ཚཱདེནྟཱ ཨནྡྷཀཱརཾ ཀརོནྟཱ ནུཔྤཛྫནྟི. དྭཱིཧི པན མགྒེཧི པཧཱིནཏྟཱ མནྡམནྡཱ ཏནུཀཏནུཀཱ ཨུཔྤཛྫནྟི. ཀེཙི པན སཀདཱགཱམིསྶ ཀིལེསཱ ཙིརེན ཨུཔྤཛྫནྟཱཔི བཧལཱཝ ཨུཔྤཛྫནྟི. ཏཐཱ ཧིསྶ པུཏྟདྷཱིཏརོ དིསྶནྟཱིཏི ཝདནྟི. ཏཾ ཨཀཱརཎཾ, ཝཏྠུཔཊིསེཝནེན ཝིནཱཔི གབྦྷགྒཧཎསབྦྷཱཝཏོ, ཏསྨཱ ཝུཏྟནཡེནེཝ དྭཱིཧི ཀཱརཎེཧི ནེསཾ ཏནུབྷཱཝོ ཝེདིཏབྦོ. ཀསྨཱ པནེཏྠ མོཧསྶ ཏནུབྷཱཝོ ཝུཏྟོ, ནནུ ཏཏིཡམགྒཝཛ྄ཛྷཱནམེཝ ཨིམིནཱ ཏནུཏྟཀརཎཾ ཝཏྟབྦཾ, ཨིཏརཐཱ ཧེཊྛཱ ཏཱིཧིཔི མགྒེཧི ཨུཔརིམགྒཝཛ྄ཛྷཀིལེསཱནཾ བཧལཱབཧལཱཝཏྠཱཡ པཧཱིཡམཱནཏྟཱ ཨིདྷ སབྦེསམེཝ ཨུདྡྷམྦྷཱགིཡསཾཡོཛནཱནཾ ཏནུབྷཱཝོ ཝཏྟབྦོ, ཏེནེཝ ཙ པཱལི༹ཡམྤི ‘‘ཀཱམརཱགབྱཱཔཱདཱནཾ ཏནུབྷཱཝཱཡ དུཏིཡཱཡ བྷཱུམིཡཱ པཏྟིཡཱ’’ཏི ཝུཏྟནྟི. སཙྩམེཏཾ, སུཏྟེ པན ཨུཔརིམགྒཝཛ྄ཛྷཱནཾ ཏནུབྷཱཝཔརིཡཱཡཾ གཧེཏྭཱ ‘‘རཱགདོསམོཧཱནཾ ཏནུཏྟཱ སཀདཱགཱམཱི ཧོཏཱི’’ཏི ཧེཏུཏྟཡཏནུབྷཱཝསྶ ཨཱགཏཏྟཱ ཨིདྷཱཔི ཏདནུལོམེན ཝུཏྟཾ. ‘‘ཀཱམརཱགབྱཱཔཱདཱན’’མིཙྩེཝ ཝཱ པཱཋོ. ཏཐཱ ཧི ཨེཏྠེཝ ཨུཔརི དུཏིཡམགྒཉཱཎནིདྡེསེ ‘‘བྱཱཔཱདཀཱམརཱགཱནཾ, ཏནུབྷཱཝཾ ཏུ སཱདྷཡ’’ནྟི (ཨབྷིདྷ. ༡༣༥༣) ཝུཏྟཾ. པཊིསནྡྷིཝསེན སཀིདེཝ ཨིམཾ མནུསྶལོཀཾ ཨཱགཙྪཏཱིཏི སཀདཱགཱམཱི, ཏསྶ མགྒོ སཀདཱགཱམིམགྒོ. ཀིཉྩཱཔི ཧི མགྒཊྛསྶ པཊིསནྡྷིཝསེན ཨཱགམནཱསམྦྷཝཏོ ¶ ཕལཊྛོཡེཝ སཀདཱགཱམཱི ནཱམ ཧོཏི, ཏསྶ པན ཨཱགམནབྷཱུཏོ མགྒོ མགྒནྟརཱཝཙྪེདནཏྠཾ ཏདཱཡཏྟབྷཱཝཱུཔནཡནེན སཀདཱགཱམིམགྒོཏི ཝུཙྩཏི, ཏཾསམྤཡུཏྟཾ ཙིཏྟཾ སཀདཱགཱམིམགྒཙིཏྟཾ.

པཉྩསུ ཀཱམགུཎེསུ, ཀཱམབྷཝེ ཙ རཱགོ ཀཱམརཱགོ. བྱཱཔཛྫཏི ཏེན ཙིཏྟནྟི བྱཱཔཱདོ. པཊིསནྡྷིཝསེན ཨིམཾ ཀཱམདྷཱཏུཾ ན ཨཱགཙྪཏཱིཏི ཨནཱགཱམཱི. རཱུཔབྷཝེ ཚནྡརཱགོ རཱུཔརཱགོ. ཨརཱུཔབྷཝེ ཚནྡརཱགོ ཨརཱུཔརཱགོ. མཱནོ ཨིདྷ ཨརཧཏྟཱདྷིགམཾ པཊིཙྩ ཨུཎྞཏིམཏྟཾ. ཨུདྡྷཙྩམྤི ‘‘ཀོ མེ བྷཱརོ ཀིལེསསམུཙྪེདནེ’’ཏི ཨེཝམཱཀཱརཔྤཝཏྟཾ ཙིཏྟསྶ ཨཝཱུཔསམམཏྟཾ. ཨཝིཛྫཱཔི ཨསུཁེ སུཁསཉྙཱཝིཔལླཱསོ. ཨཱརཀཏྟཱ ཀིལེསེཧི, མིཙྪཱཔཊིཔནྣེཧི ཝཱ, རཱགཱདིཨརཱིནཾ, སཾསཱརཙཀྐསྶ ཨརཱནཉྩ ཧཏཏྟཱ, པཙྩཡཱདཱིནཾ ཨརཧཏྟཱ, རཧོཔི པཱཔཱཀརཎེན པཱཔཀརཎེ ¶ རཧསྶ ཨབྷཱཝཱ, རཧིཏབྦཏོ ཛཧིཏབྦཏོ ‘‘རཧཱ’’ཏི ལདྡྷནཱམཱནཾ ཝཱ པཱཔདྷམྨཱནཾ ཨབྷཱཝཏོ, སཱདྷཱུཧི ཨརཧིཏབྦཏོ ཨཔརིཙྩཛིཏབྦཏོ, རཧསངྑཱཏསྶ ཝཱ གམནསྶ སཾསཱརེ ཨབྷཱཝཏོ ཨརཧཱ, ཨཊྛམོ ཨརིཡཔུགྒལོ, ཏསྶ བྷཱཝོ ཨརཧཏྟཾ, ཨགྒཕལསྶེཏཾ ཨདྷིཝཙནཾ. ཏཉྷི ‘‘ཨརཧཱ’’ཏི ཨབྷིདྷཱནསྶ, བུདྡྷིཡཱ ཙ པཝཏྟིནིབནྡྷནཏྟཱ ཨརཧཏོ བྷཱཝོཏི ཀཏྭཱ ‘‘ཨརཧཏྟ’’ནྟི ཝུཙྩཏི, ཏསྶ ཨཱགམནབྷཱུཏོ མགྒོ ཨརཧཏྟམགྒོ, ཏཾསམྤཡུཏྟཾ ཙིཏྟཾ ཨརཧཏྟམགྒཙིཏྟཾ.

ཛྷཱནངྒཡོགབྷེདཏོཏི རཱུཔཱཝཙརཾ ཝིཡ པཉྩཧི ཛྷཱནངྒེཧི སམྤཡོགབྷེདཏོ. ཀཐཾ པནསྶ བྷེདོཏི? ཨེཏྠ ཏཱཝ ཨཊྛཀཐཱཝཱདོ, ཏཡོ ཙ ཐེརཝཱདཱཏི ཙཏྟཱརོ ཝཱདཱ ཧོནྟི. ཏཐཱ ཧི ཨཊྛཀཐཱཡཾ ཏཱཝ ‘‘སངྑཱརུཔེཀྑཱབྷཱཝཾ པཏྭཱ ཝུཊྛཱནགཱམིནིཝིཔསྶནཱམགྒསྶ ཛྷཱནངྒཾ ནིཡམེཏཱི’’ཏི ཝུཏྟཾ. ཏིཔིཊཀཙཱུལ༹ནཱགཏྠེརོ པན ‘‘མགྒཱསནྣཝིཔསྶནཱཡ ¶ པདཊྛཱནབྷཱུཏཾ པཱདཀཛ྄ཛྷཱནཾ ནིཡམེཏཱི’’ཏི ཨཱཧ. མོརཝཱཔིཝཱསིམཧཱདཏྟཏྠེརོ ‘‘ཝིཔསྶནཱཡ ཨཱརམྨཎབྷཱུཏཱ ཁནྡྷཱ ནིཡམེནྟི. ཡཉྷི ཛྷཱནཾ སམྨསིཏྭཱ ཝུཊྛཱཏི, ཏཾསདིསོཝ ཧོཏཱི’’ཏི ཨཱཧ. ཏིཔིཊཀཙཱུལཱ༹བྷཡཏྠེརོ པན ‘‘པུགྒལཛ྄ཛྷཱསཡོ ནིཡམེཏི, ‘ཨཧོ ཝཏ པཉྩངྒིཀཾ, ཙཏུརངྒིཀཾ ཝཱ མགྒཾ པཱཔུཎེཡྻ’ནྟིཨཱདིནཱ ཡཐཱ ཡཐཱསྶ ཨཛ྄ཛྷཱསཡོ ཧོཏི, ཏཐཱ ཏཐཱ མགྒོ ཧོཏཱི’’ཏི ཨཱཧ.

ཡསྨཱ པན ཨཊྛཀཐཱཝཱདོ པམཱཎཾ, ཏཡོ ཙ ཐེརཱ པཎྜིཏཱ བྱཏྟཱ, ཏསྨཱ ཙཏྟཱརོཔི ཝཱདཱ ཨཉྙམཉྙཾ ཨཔྤཊིབཱཧནཝསེན ཨེཝཾ ཝེདིཏབྦཱ. ཀཐཾ? ཀཱམཱཝཙརདྷམྨེ ཏཱཝ སམྨསིཏྭཱ སུཀྑཝིཔསྶཀསྶ ཨུཔྤནྣམགྒོཔི སམཱཔཏྟིལཱབྷིནོ ཛྷཱནཾ པཱདཀཾ ཨཀཏྭཱ ཨུཔྤཱདིཏམགྒོཔི ཝིཔསྶནཱནིཡཱམེན པཋམཛ྄ཛྷཱནིཀཱཝ ཧོནྟི. སཙེ པན ཀིཉྩི ཛྷཱནཾ པཱདཀཾ ཀཏྭཱ ཨུཔྤཱདིཏོ ཧོཏི, ཏསྶ ཝསེན ཨངྒཔརིཎཱམོ ཧོཏཱིཏི ཏཾཏཾཛྷཱནསདིསོ ཧོཏི. ཡསྨཱ པནེཏྠ ཀཱམཱཝཙརཀྑནྡྷེ ཨཱརབྦྷ པཝཏྟཱ ཝིཔསྶནཱ ཀཱམཱཝཙརདྷམྨེསུ ཙ མཧགྒཏདྷམྨེསུ ཝིཡ བྷཱཝནཱཝིསེསཏོ ཛྷཱནངྒཝིསེསོ ནཏྠི, ཏསྨཱ ‘‘ཝིཔསྶནཱཡ ཨཱརམྨཎབྷཱུཏཱ ཁནྡྷཱ ནིཡམེནྟཱི’’ཏི ཨེཝཾ པཝཏྟོ དུཏིཡཏྠེརཝཱདོ ཨིམཾ ཝཱདཾ ན པཝིསཏི. ཛྷཱནདྷམྨེ སམྨསིཏྭཱ ཨུཔྤཱདིཏམགྒོ སཙེ པཱདཀཛ྄ཛྷཱནཾ ནཏྠི, སམྨསིཏཛ྄ཛྷཱནནིཡཱམེན ཏཾཏཾཛྷཱནིཀོ ཧོཏི. སཙེ པཋམཛ྄ཛྷཱནཏོ ཝུཊྛཱཡ དུཏིཡཱདིཛྷཱནེ སམྨསིཏྭཱ ཨུཔྤཱདིཏོ, པུགྒལཛ྄ཛྷཱསཡནིཡཱམེན དྭཱིསུ ཨཉྙཏརཛ྄ཛྷཱནསདིསོ ཧོཏི. སཙེ པན པུགྒལསྶ ཏཐཱཝིདྷོ ཨཛ྄ཛྷཱསཡོ ནཏྠི, ཏདཱ ཀཐནྟི? ཨེཏྠ ཏཱཝ ཀེཙི ‘‘ནཱནཱཝཛྫནཝཱིཐིཡམེཝ ནིཝཏྟམཱནཔཱདཀཛ྄ཛྷཱནཏོ ཨེཀཱཝཛྫནཝཱིཐིཡཾ ¶ གོཏྲབྷུབྷཱཝཾ པཏྭཱ ནིཝཏྟམཱནཱཡ ཝིཔསྶནཱཡ ཨཱརམྨཎབྷཱུཏཱ ཁནྡྷཱཡེཝ ¶ བལཝནྟོ, ཏསྨཱ སམྨསིཏཀྑནྡྷནིཡཱམེན ཏཾསདིསོ མགྒོ ཧོཏཱི’’ཏི ཝདནྟི. ཨེཝཉྩ སཏི ‘‘པཱདཀཛ྄ཛྷཱནནིཡཱམེན ཧོཏཱི’’ཏི ཨེཝཾ པཝཏྟོ པཋམཏྠེརཝཱདོ པཱདཀཛ྄ཛྷཱནཏོ ཝུཊྛཱཡ ཀཱམཱཝཙརཀྑནྡྷེ སམྨསིཏྭཱ ཨུཔྤཱདིཏམགྒམེཝ སནྡྷཱཡ ཏིཊྛཏཱིཏི.

ཨཔརེ པན ‘‘པཱདཀཛ྄ཛྷཱནཾ མགྒསྶ མཱུལཀཱརཎཝསེན པཙྩཡོ ཧོཏི ཨཱསནྣཀཱརཎཝསེནཔི, སམྨསིཏཀྑནྡྷཱ པན མཱུལཀཱརཎཝསེནེཝ པཙྩཡཱ ཧོནྟི, ཏསྨཱ སམྨསིཏཀྑནྡྷཏོ པཱདཀཛ྄ཛྷཱནམེཝ བལཝཏརནྟི པཱདཀཛ྄ཛྷཱནསདིསོ མགྒོ ཧོཏཱི’’ཏི ཝདནྟི. ཨེཝཾ སནྟེ པན ‘‘སམྨསིཏཀྑནྡྷནིཡཱམེནཱ’’ཏི ཨེཝཾ པཝཏྟོ དུཏིཡཏྠེརཝཱདོ སམཱཔཏྟིཾ པཱདཀཾ ཨཀཏྭཱ ཀེཝལཾ ཛྷཱནདྷམྨེཡེཝ སམྨསིཏྭཱ ཨུཔྤཱདིཏམགྒམེཝ སནྡྷཱཡ ཏིཊྛཏི. ཡསྨཱ པན ཧེཊྛིམཧེཊྛིམཛ྄ཛྷཱནཏོ ཨུཔརཱུཔརིཛྷཱནཾ བལཔྤཏྟཾ ཧོཏི, ཏསྨཱ ཧེཊྛིམཧེཊྛིམཛ྄ཛྷཱནཏོ ཝུཊྛཱཡ ཨུཔརཱུཔརིཛྷཱནདྷམྨེ ཝིཔསྶཏོ ཨུཔྤནྣམགྒོ པཱདཀཛ྄ཛྷཱནཾ ཨནཔེཀྑིཏྭཱ སམྨསིཏཛ྄ཛྷཱནཝསེན ཏཾཏཾཛྷཱནིཀོ ཧོཏི. ཨུཔརཱུཔརིཛྷཱནཏོ པན ཝུཊྛཱཡ ཧེཊྛིམཧེཊྛིམཛ྄ཛྷཱནདྷམྨེ སམྨསིཏྭཱ ཨུཔྤཱདིཏམགྒོ སམྨསིཏཛ྄ཛྷཱནཾ ཨནཔེཀྑིཏྭཱ པཱདཀཛ྄ཛྷཱནསདིསོ ཧོཏཱིཏི ཨིདམེཏྠ སཱརཏརཾ. ཨེཝཉྷི སཏི དྭིནྣམྤི ཐེརཱནཾ ཝཱདཱ ནིཔྤདེསཝིསཡཱ སམཕལཱ ཧོནྟི.

ཏཏིཡཏྠེརཝཱདོ ཙེཏྠ པཱདཀཛ྄ཛྷཱནཾ, སམྨསིཏཛ྄ཛྷཱནཾ ཝཱ ཝིནཱ ཨཛ྄ཛྷཱསཡམཏྟེནེཝ ན ཨིཛ྄ཛྷཏི. ཏཱིསུཔི ཝཱདེསུ ཋཔེཏྭཱ སེསཛྷཱནངྒཔརིཎཱམཾ ཝེདནཱཔརིཎཱམོ ཝིཔསྶནཱནིཡཱམེནེཝ ཧོཏི. ཏཡོཔི ཐེརཝཱདཱ ཝིཔསྶནཱནིཡཱམེན ཝིནཱ ན ཧོནྟཱིཏི དཊྛབྦཾ. ནནུ ཙ ཝེདནཱཔི ཛྷཱནངྒམེཝ, ཏསྨཱ ཏཱཡཔི པཱདཀཛ྄ཛྷཱནནིཡཱམེནེཝ བྷཝིཏབྦནྟི? ཏཾ ན, ཝེདནཱཡཔི པཱདཀཛ྄ཛྷཱནནིཡཱམེན པརིཎཱམེ སཏི ཝིཔསྶནཱནིཡཱམཾ ཨནཔེཀྑིཏྭཱ པཱདཀཛ྄ཛྷཱནནིཡཱམེནེཝ མགྒཀྑཎེ ¶ སེསཛྷཱནངྒཱནི པརིཎཱམཊྛཱནེཡེཝ ཝེདནཱཡཔི པརིཎཱམོ བྷཝེཡྻ, ཏཐཱ པན ཨཧུཏྭཱ ཨེཀཱཝཛྫནཝཱིཐིཡཱ ཨཱདིཏོཝ པརིཎཱམནཏོ མགྒཝུཊྛཱནཝཱིཐིཡཱ ཨཱསནྣཏརཔྤཝཏྟཱཡ ཝིཔསྶནཱཡ ཝསེན ཝེདནཱནིཡཱམོ ཧོཏི.

ཨཐ ཝཱ པཱདཀཛ྄ཛྷཱནསམྨསིཏཛ྄ཛྷཱནཱནཾ སམྦྷཝེ ཏེསུ ཨནུཔྤནྣཱ ཝེདནཱ ཝིཔསྶནཱཡ ན ཧོཏཱིཏི པཱདཀཛ྄ཛྷཱནསམྨསིཏཛ྄ཛྷཱནནིཡཱམེན པརིཎམཏཱིཏིཔི ན སཀྐཱ ཝཏྟུཾ. ཨེཏྠ སིཡཱ – ཡཏྠ ཏཱཝ པཱདཀཛ྄ཛྷཱནཾ ཨཏྠི, ཏཏྠ ཏཾ ནིཡམེཏི. ཡཏྠ པན ཏིཀཙཏུཀྐཔཱདཀཛ྄ཛྷཱནཾ ནཏྠི, ཏསྨིཾ ¶ ཨརཱུཔབྷཝེ ཀིཾ ནིཡམེཏཱིཏི? ཏཏྠཱཔི པཱདཀཛ྄ཛྷཱནམེཝ ནིཡམེཏི. ཡོ ཧི བྷིཀྑུ ཨཊྛསམཱཔཏྟིལཱབྷཱི པཋམཛ྄ཛྷཱནཾ པཱདཀཾ ཀཏྭཱ སོཏཱཔཏྟིམགྒཕལཱནི ནིབྦཏྟེཏྭཱ ཨཔརིཧཱིནཛ྄ཛྷཱནོ ཀཱལཾ ཀཏྭཱ ཨརཱུཔབྷཝེ ནིབྦཏྟོ པཋམཛ྄ཛྷཱནིཀཱཡ སོཏཱཔཏྟིཕལསམཱཔཏྟིཡཱ ཝུཊྛཱཡ ཝིཔསྶནཾ པཊྛཔེཏྭཱ ཨུཔརི ཏཱིཎི མགྒཕལཱནི ནིབྦཏྟེཏི, ཏསྶ ཏཱནི པཋམཛ྄ཛྷཱནིཀཱནེཝ ཧོནྟི. དུཏིཡཛ྄ཛྷཱནིཀཱདཱིསུཔི ཨེསེཝ ནཡོ. ཨརཱུཔེཔི ཧི ལོཀུཏྟརཾ ཏིཀཙཏུཀྐཛ྄ཛྷཱནཾ ཨུཔྤཛྫཏཱིཏི ཨེཝམེཏྠ ཨེཀེཀསྶ ལོཀུཏྟརཀུསལསྶ ཛྷཱནངྒཡོགབྷེདོ ཝེདིཏབྦོཏི.

མགྒཱ…པེ… ནིཔྥཱདེཏཱིཏི ཏེབྷཱུམཀཀུསལཾ ཝིཡ པཊིསནྡྷིཔྤཝཏྟཱིསུ ཨཝིཔཙྩཝནྟམྤི ཨཏྟནོ ཨཏྟནོ ཨནུརཱུཔསྶ ཕལསྶ ནིཔྥཱདནེན ཏཾཏཾཕལཔྤཏྟེ སོཏཱཔནྣོ སཀདཱགཱམཱི ཨནཱགཱམཱི ཨརཧཱཏི སཱམཉྙཏོ ཙཏྟཱརོ ཨརིཡཔུགྒལེ ཨབྷིནིཔྥཱདེཏཱིཏི. ཝིསེསཏོ པན སཏྟཀྑཏྟུཔརམཏཱདིཀེ ཨནེཀེཔི སོཏཱཔནྣཱདཡོ ནིཔྥཱདེཏི.

ལོཀུཏྟརཀུསལཝཎྞནཱ ནིཊྛིཏཱ.

ཙཏུབྷཱུམཀཀུསལཝཎྞནཱ

༢༨. ཨེཝཾ ¶ ཙཏུབྷཱུམཀཀུསལཙིཏྟཾ སརཱུཔཏོ ནིདྡིསིཏྭཱ ཨིདཱནི ཏཾ ནིགམེནྟོ ཨཱཧ ‘‘ཀཱམེ ཨཊྛེཝཱ’’ཏིཨཱདི. ཏཏྠ ཀཱམེཏི ཀཱམབྷཝེ. ཏཐཱ ‘‘རཱུཔེ’’ཏིཨཱདཱིསུ.

༢༩. ཀུསལཱཀུསལཱཔགཏེནཱཏི ཀུསལཱཀུསལཀམྨཏོ ཨཔགཏེན. ཨགྒམགྒསྶ ཧི ཨུཔྤནྣཀཱལཏོ པཊྛཱཡ ཨརཧཏོ སབྦཱནི ཀུསལཱཀུསལཀམྨཱནི པཧཱིནཱནི ནཱམ ཧོནྟི པཙྩཡཝེཀལླེན པཊིསནྡྷིདཱནེ ཨསམཏྠབྷཱཝཏོ. ཡཏོ ཙ ཨརིཡམགྒཉཱཎཾ ‘‘ཀམྨཀྑཡཀར’’ནྟི ཝུཙྩཏི. ཨཐ ཝཱ ཨཧེཏུཨཔཙྩཡཝིསུཛ྄ཛྷནསྶ ཨབྷཱཝཏོ ཀིལེསསམུཙྪེདཀེན མགྒཀུསལེན ཨཀུསལེཧི ཨཔགཏེན. ཀུསལེ ཀུསལེནཱཏི ཀུཙྪིཏཱནཾ སལནཱདཱིཧི ¶ ཀུསལསངྑཱཏཱཡ པཊིཔཏྟིཡཾ དེསནུཔྤཱདནཱདཱིསུ ཚེཀེན. མུནིནཱཏི ཨུབྷཡལོཀམུནནཀེན ཨགྒཕལཉཱཎེན, སབྦཉྙུཏཉྙཱཎེན ཝཱ སམནྣཱགཏཏྟཱ མུནིནཱ. ཏེནཱཧ –

‘‘ཡོ མུནཱཏི ཨུབྷོ ལོཀེ, མུནི ཏེན པཝུཙྩཏཱི’’ཏི.

ཝསིནཱཏི ཚལ༹བྷིཉྙཏཱཡ པརམེན ཙིཏྟཝསིབྷཱཝེན སམནྣཱགཏཏྟཱ, ཛྷཱནཱདཱིསུ པཉྩཝིདྷཝསིསབྦྷཱཝཏོ ཙ ཝསིབྷཱུཏེན ཝསིབྷཱཝཱུཔགཏིནྡྲིཡེན.

ཙཏུབྷཱུམཀཀུསལཝཎྞནཱ ནིཊྛིཏཱ.

ཨཀུསལཝཎྞནཱ

ཨེཏྟཱཝཏཱ ཙ ཡཾ ‘‘ཀུསལཱཀུསལཱབྱཱཀཏཛཱཏིབྷེདཏོ ཏིཝིདྷ’’ནྟི ཨེཏྠ ཝུཏྟཾ ཀུསལཾ, ཏཾ སརཱུཔཏོ ནིདྡིསིཏྭཱ ཨིདཱནི ཏདནནྟརུདྡིཊྛཾ ཨཀུསལཾ ནིདྡིསནྟོ ཨཱཧ ‘‘ཨཀུསལཾ པནཱ’’ཏིཨཱདི. ‘‘བྷཱུམིཏོ ཨེཀཝིདྷ’’ནྟི ཝུཏྟམཏྠཾ ནིཡམེཏྭཱ དསྶེནྟོ ཨཱཧ ‘‘ཀཱམཱཝཙརམེཝཱ’’ཏི. ནིཀཱཡནྟརིཀཱ པན རཱུཔཱརཱུཔཱཝཙརམྤི ཨཀུསལཾ ཨིཙྪནྟཱིཏི ཏེསཾ ¶ མཏིནིསེདྷནཏྠཾ ཨཝདྷཱརཎཾ ཀཏཾ. མཧགྒཏབྷཱུམིཡཾ ཨུཔྤཛྫནྟམྤི ཧེཏཾ ཏཏྠ རཱུཔདྷཱཏུཡཾ པཝཏྟིཝིཔཱཀཾ དེནྟམྤི ཨེཀནྟེན ཀཱམཱཝཙརམེཝཱཏི. ཀུཏོ པནེས ནིཡམོཏི? ཀཱམཏཎྷཱཝིསཡབྷཱཝཏོ. ཀཱམཏཎྷཱཝིསཡཏཱ ཧི ཀཱམཱཝཙརབྷཱཝསྶ ཀཱརཎཾ ཡཐཱ རཱུཔཱརཱུཔཏཎྷཱཝིསཡཏཱ རཱུཔཱརཱུཔབྷཱཝསྶ. ཨེཀཾསེན ཙེཏཾ ཨེཝཾ སམྤཊིཙྪིཏབྦཾ. ཨིཏརཐཱ བྱཱཔིཏལཀྑཎཾ ན སིཡཱ. ཡདི ཧི ཨཱལམྦིཏབྦདྷམྨཝསེན བྷཱུམིཝཝཏྠཱནཾ ཀརེཡྻ, ཨེཝཾ སཏི ཨནཱརམྨཎཱནཾ སངྒཧོ ན སིཡཱ. ཨཐ ཝིཔཱཀདཱནཝསེན, ཨེཝམྤི ཨཝིཔཱཀཱནཾ སངྒཧོ ན སིཡཱ, ཏསྨཱ ཨཱལམྦཎདྷམྨཝསེནེཝ པརིཡཱཔནྣཱནཾ སཱ ཀཱཏབྦཱ. ཨཔརིཡཱཔནྣཱནཾ པན ལོཀཏོ ཨུཏྟིཎྞཏཱཡ ལོཀུཏྟརཏཱ, ཨུཏྟརིཏརཱབྷཱཝཏོ ཨནུཏྟརཏཱ ཙ ཝེདིཏབྦཱཏི.

དོམནསྶསྶ ཨནཱིཝརཎཱཝཏྠཱཡ ཨབྷཱཝེན ཏཾསཧགཏཙིཏྟུཔྤཱདོ ཀཱམབྷཱུམིཡཾཡེཝ པཝཏྟཏཱིཏི སོ ¶ ནིཡཏཝཏྠུཀོ, ཨིཏརེ ཨརཱུཔབྷཱུམིཡམྤི པཝཏྟནཏོ ཨནིཡཏཝཏྠུཀཱཏི ཨཱཧ ‘‘ནིཡཏཱ…པེ… དུཝིདྷ’’ནྟི. ཝིཙིཀིཙྪུདྡྷཙྩསཧགཏཱནཾ མོཧེཀཧེཏུཀཏྟཱ, ཨིཏརེསམྤི ལོབྷམོཧདོསམོཧཝསེན དྭིཧེཏུཀཏྟཱ ཨཱཧ ‘‘ཨེཀཧེཏུཀདུཧེཏུཀཏོ’’ཏི. ཨཱདིཏོ ཨེཀཱདསནྣཾ ཨཀུསལཙིཏྟཱནཾ པཊིསནྡྷིཛནནཏོ, ཨུདྡྷཙྩསཧགཏསྶ ཏདབྷཱཝཏོ ཨཱཧ ‘‘པཊིསནྡྷིཛནཀཱཛནཀཏོ’’ཏི. ཨུདྡྷཙྩསཧགཏཉྷི པཝཏྟིཝིཔཱཀཾ དེནྟམྤི པཊིསནྡྷིཾ ནཱཀཌྜྷཏི. ཡཏོ ཝཀྑཏི –

‘‘ཨེཀཱདསཝིདྷཱནཾ ཏུ, ཧིཏྭཱ ཨུདྡྷཙྩམཱནསཾ;

ཨེཀཱདསཝིདྷཱ ཙེཝ, བྷཝནྟི པཊིསནྡྷིཡོ’’ཏི. (ཨབྷིདྷ. ༥༣༦);

ཡེན པན ཀཱརཎེན ཏཾ པཊིསནྡྷིཾ ནཱཀཌྜྷཏི, ཏཾ པཊིསནྡྷིཝིནིཙྪཡཀཐཱཧི ཨིམིསྶཱ གཱཐཱཡ ཝཎྞནཱཔདེསེཡེཝ ཝཀྑཱམ ¶ . ཏཱིཧི ཝེདནཱཧཱིཏི སུཁདུཀྑོཔེཀྑཱསངྑཱཏཱཧི ཏཱིཧི ཝེདནཱཧི. ཡཐཱཧ – ‘‘ཏིསྶོ ཨིམཱ, བྷིཀྑཝེ, ཝེདནཱ. ཀཏམཱ ཏིསྶོ? སུཁཱ དུཀྑཱ ཨདུཀྑམསུཁཱ’’ཏི (སཾ. ནི. ༤.༢༤༩). ཡཾ པན ཀཏྠཙི སུཏྟེ ‘‘དྭེམཱ, བྷིཀྑཝེ, ཝེདནཱ སུཁཱ དུཀྑཱ’’ཏི (སཾ. ནི. ༤.༢༦༧) ཝཙནཾ, ཏཾ ཀུསལཔཀྑིཀཾ ཨུཔེཀྑཾ སུཁེ, ཨཀུསལཔཀྑིཀཉྩ དུཀྑེ པཀྑིཔིཏྭཱ པརིཡཱཡེན ཝུཏྟནྟི དཊྛབྦཾ. སུཔྤཏིཊྛིཏབྷཱཝཀཱརཎཏྟཱ མཱུལམིཝཱཏི མཱུལཾ, ལོབྷོ མཱུལཾ ཨེཏསྶཱཏི ལོབྷམཱུལཾ. ཀིཉྩཱཔི ཧི མོཧོཔི ལོབྷམཱུལེསུ ཨཏྠི, སོ པན སབྦཱཀུསལསཱདྷཱརཎཏྟཱ ཝཝཏྠཱནཀརོ ན ཧོཏཱིཏི ཨསཱདྷཱརཎདྷམྨཝསེན ‘‘ལོབྷམཱུལ’’ནྟྭེཝ ཝུཏྟཾ ཡཐཱ ‘‘བྷེརིསདྡོ ཡཝངྐུརོ’’ཏི. ཏཐཱ ‘‘དོསམཱུལ’’ནྟི ཨེཏྠཱཔི. མཱུལནྟརཝིརཧཏོ མོཧོ ཨེཝ མཱུལཾ ཨིམསྶ, ནཱཉྙནྟི མོཧམཱུལཾ.

མིཙྪཱཝསེན དསྶནཾ དིཊྛི, དིཊྛིཡེཝ དིཊྛིགཏཾ ཡཐཱ ‘‘ཨཱཀཱསགཏཾ ཐཱམགཏ’’ནྟི. ཨཐ ཝཱ ཝིཔརིཡེསགྒཱཧིཀཱཡ དིཊྛིཡཱ གཏམེཝ, ན ཨེཏྠ གནྟབྦཝཏྠུ ཏཐཱསབྷཱཝནྟི དིཊྛིགཏཾ, དྭཱསཊྛིཡཱ ཝཱ དིཊྛཱིསུ ཨནྟོགདྷནྟི དིཊྛིགཏཾ, ཏེན སམཾ པཀཱརེཧི ཡུཏྟནྟི དིཊྛིགཏསམྤཡུཏྟཾ.

‘‘ཡདཱ ཧཱི’’ཏིཨཱདི ལོབྷམཱུལཙིཏྟཱནཾ པཝཏྟིཨཱཀཱརདསྶནཾ. མིཙྪཱདིཊྛིནྟི ཨུཙྪེདདིཊྛིཨཱདིཾ མིཙྪཱདིཊྛིཾ. ཏཱཡ ཧི ཝིཔལླཏྟཙིཏྟཱ ཏཱཝ ཀོདྷཝིསཡོ, ཡཱཝ ཨིནྡྲིཡགོཙརོཏི ¶ པརལོཀཾ པཊིཀྑིཔིཏྭཱ ‘‘ནཏྠི ཀཱམེསུ ཨཱདཱིནཝོ’’ཏི གཎྷནྟི. ཨཱདི-སདྡེན –

‘‘ཨེས པནྠོཝིཏཐོ དེཝཡཱནེ,

ཡེན ཡནྟི པུཏྟཝནྟོ ཝིསོཀཱ;

ཏཾ པསྶནྟི པསཝོ པཀྑིནོ ཙ,

ཏེན ཏེ མཱཏརིཔི མིཐུནཾ ཙརནྟཱི’’ཏི. –

ཨཱདིནཱ ¶ ནཡེན པུཏྟམུཁདསྶནཾ སགྒམོཀྑམགྒོཏི ཨེཝམཱདིཀཾ མིཙྪཱདིཊྛིཾ སངྒཎྷཱཏི. ཀཱམེ ཝཱཏི ཨེཏྠ ཝཱ-སདྡོ ཨནིཡམཏྠོ. ཏེན ‘‘བྲཱཧྨཎཱནཾ སུཝཎྞཧརཎམེཝ ཨདིནྣཱདཱནེ སཱཝཛྫཾ, ཨིཏརཾ ཨནཝཛྫཾ, གུརཱུནཾ, གུནྣཾ, ཨཏྟནོ ཛཱིཝིཏསྶ, ཝིཝཱཧསྶ ཙ ཨཏྠཱཡ མུསཱཝཱདོ ཨནཝཛྫོ, ཨིཏརོ སཱཝཛྫོ, གུརུཨཱདཱིནཾ ཨཏྠཱཡ པེསུཉྙཀརཎཾ ཨནཝཛྫཾ, ཨིཏརཾ སཱཝཛྫཾ, བྷཱརཏཡུདྡྷསཱིཏཱཧརཎཱདིཀཐཱ པཱཔཝཱུཔསམཱཡ ཧོཏཱི’’ཏི ཨེཝམཱདིཀེ མིཙྪཱགཱཧེ སངྒཎྷཱཏི. དིཊྛམངྒལཱདཱིནཱིཏི དིཊྛསུཏམུཏམངྒལཱནི. སཱརཏོ པཙྩེཏཱིཏི ཝུཌྜྷིཡཱ པུབྦནིམིཏྟབྷཱཝེན ཨགྒཧེཏྭཱ ‘‘ཨིདམེཝ ཝུཌྜྷིཀཱརཎ’’ནྟི ཨེཝཾ སཱརཝསེན གཎྷཱཏི. སབྷཱཝཏིཀྑེནེཝཱཏི ལོབྷསྶ, མིཙྪཱབྷིནིཝེསསྶ ཝཱ ཝསེན སརསེནེཝ ཏིཁིཎེན ཀུརུརེན. མནྡེནཱཏི དནྡྷེན ཨཏིཁིཎེན. ཏཱདིསཾ པན ཨཏྟནོ, པརསྶ ཝཱ སམུསྶཱཧནེན པཝཏྟཏཱིཏི ཨཱཧ ‘‘སམུསྶཱཧིཏེནཱ’’ཏི. པརསྶ བྷཎྜཾ ཝཱ ཧརཏཱིཏི ཝཱ-སདྡེན ཏཐཱཔཝཏྟནཀམུསཱཝཱདཱདཱིནམྤི སངྒཧོ ཝེདིཏབྦོ. ཀཱམཱནཾ ཝཱཏི ཨནུབྷུཡྻམཱནཱནཾ ཀཱམགུཎཱནཾ. ཝཱ-སདྡེན པརསནྟཀསྶ ཨཡཐཱདྷིཔྤེཏཏཱཡ ཡཾ ལདྡྷཾ, ཏཾ གཧེཏབྦནྟི གཧཎཱདིཀཾ སངྒཎྷཱཏི.

སམྤཡུཏྟདྷམྨཝསེན བྷེདཱབྷཱཝཏོ དོསམཱུལཾ ཨསངྑཱརིཀསསངྑཱརིཀབྷེདཏོ དུཝིདྷཾ. ཡདི ཨེཝཾ ཀསྨཱ ‘‘དོམནསྶསཧགཏཾ པཊིགྷསམྤཡུཏྟ’’ནྟི ཝུཏྟཾ? ཨསཱདྷཱརཎདྷམྨེཧི ཏསྶ ཙིཏྟསྶ ཨུཔལཀྑཎཏྠཾ. པཱཎསྶ ཨཏཱིཝ, ཨཏིཀྐམིཏྭཱ ཝཱ པཱཏནཾ པཱཎཱཏིཔཱཏོ. ཨཱདི-སདྡེན ཨདིནྣཱདཱནམུསཱཝཱདཔེསུཉྙཕརུསསམྥཔྤལཱཔབྱཱཔཱདེ སངྒཎྷཱཏི. དསཨཀུསལཀམྨཔཐེསུ ཧི ཀཱམེསུམིཙྪཱཙཱརཨབྷིཛ྄ཛྷཱམིཙྪཱདིཊྛིསངྑཱཏཱ ཏཡོཝ ཀམྨཔཐཱ ཨིམིནཱ ན སིཛ྄ཛྷནྟི. སབྷཱཝཏིཀྑཾ ཧུཏྭཱ པཝཏྟམཱནཾ ཙིཏྟཾ ཨསངྑཱརམེཝ ཧོཏི, ཨིཏརཾ སསངྑཱརནྟི ཨདྷིཔྤཱཡེནཱཧ ‘‘ཏིཀྑམནྡཔྤཝཏྟིཀཱལེ’’ཏི. མནྡཾ ¶ པན ཧུཏྭཱ པཝཏྟམཱནཾ ཨེཀཾསེན སསངྑཱརམེཝཱཏི ན སཀྐཱཝ ¶ ཝིཉྙཱཏུཾ. ཡཾ སསངྑཱརེན སཔྤཡོགེན པཝཏྟཏི, ཏཾ མནྡམེཝ ཧོཏཱིཏི ཀཏྭཱ ཏཐཱ ཝུཏྟནྟི དཊྛབྦཾ.

མོཧམཱུལཾ ཙིཏྟཾ མཱུལནྟརཝིརཧཏོ ཨཏིམཱུལ༹ྷཾ ཝིཙིཀིཙྪུདྡྷཙྩཡོགཏོ ཙཉྩལཉྩཱཏི ཨུཔེཀྑཱསཧགཏམེཝ ཧོཏི, ན ཏསྶ ཀདཱཙིཔི སབྷཱཝཏིཀྑཏཱ ཨཏྠི. ཨཱརམྨཎེ ཧི སཾསཔྤནཝསེན, ཝིཀྑིཔནཝསེན ཙ པཝཏྟམཱནསྶ ཙིཏྟདྭཡསྶ ཀིཾ ཏཱདིསེ ཀིཙྩེ སབྷཱཝཏིཀྑཏཱཡ, ཨུསྶཱཧེཏབྦཏཱཡ ཝཱ བྷཝིཏབྦཾ, ཏསྨཱ ན ཏཏྠ སངྑཱརབྷེདོ ཨཏྠི. ནནུ ཙ ཨུདྡྷཙྩཾ སབྦཱཀུསལསཱདྷཱརཎཾ, ཀསྨཱ པན ཨེཏམེཝ ཏེན ཝིསེསེཏྭཱ ཝུཏྟཾ ‘‘ཨུདྡྷཙྩསཧགཏ’’ནྟི. ཝིསེསཏོ བལཝབྷཱཝཏོ. ཨིདཉྷི ཨེཏསྨིཾ ཙིཏྟེ བལཝཾ, ཏསྨཱ སམྤཡུཏྟདྷམྨེསུ པདྷཱནཾ ཧུཏྭཱ པཝཏྟཏཱིཏི ཨིདམེཝ ཏེན ཝིསེསིཏབྦཾ. ཏེནེཝ ཧི པཱལི༹ཡཾ སེསཱཀུསལེསུ ཨུདྡྷཙྩཾ ཡེཝཱཔནཀཝསེན ཨཱགཏཾ, ཨིདྷ པན སརཱུཔཏོཡེཝ ནིདྡིཊྛཾ. ཨེཝཾ ཨསཱདྷཱརཎཔྤདྷཱནདྷམྨཝསེན མོཧམཱུལཾ ཝིཙིཀིཙྪཱསམྤཡུཏྟཾ ཨུདྡྷཙྩསམྤཡུཏྟནྟི དུཝིདྷཾ ཝུཏྟནྟི དཊྛབྦཾ. ཨསནྣིཊྛཱནཾ སཾསཡོ, ཝིཀྑེཔོ ཨཝཱུཔསམོ, བྷནྟཏཱཏི ཨཏྠོ. ཏཏྠ ཝིཙིཀིཙྪཱསཧགཏསྶ ཨསནྣིཊྛཱནཀཱལེ, ཨུདྡྷཙྩསཧགཏསྶ ཝིཀྑེཔཀཱལེ ཙ པཝཏྟི ཝེདིཏབྦཱ.

ཡཐཱནུརཱུཔནྟི པཊིསནྡྷིཛནཀཱཛནཀསྶ, ཀམྨཔཐབྷཱཝཔྤཏྟཱཔཏྟསྶ ཙ ཨནུརཱུཔཏོ. ཨཐ ཝཱ ཡཐཱནུརཱུཔནྟི ཡོ ཡསྶ ཧེཏུ, ཏདནུརཱུཔཏོ. ཡེབྷུཡྻེན ཧི ལོབྷམཱུལཀེན ཁུཔྤིཔཱསཱདིནིརནྟརཔེཏཝིསཡེ ཨུཔྤཛྫནྟི, དོསམཱུལཀེན དོསོ ཝིཡ ཙཎྜཛཱཏཏཱཡ ཏཾསརིཀྑཀེ ནིརཡེ, མོཧམཱུལཀེན ནིཙྩསམྨཱུལ༹ྷཱཡ ཏིརཙྪཱནཡོནིཡཾ, ཏསྨཱ ལོབྷཱདིཧེཏུཨནུརཱུཔཏོ ཏཏྠ ཏཏྠ ཨཔཱཡེ ཨུཔཔཏྟིཾ ནིཔྥཱདེཏཱིཏི ཨཱཧ ‘‘ཡཐཱནུརཱུཔཾ…པེ… ཨུཔཔཏྟིཡཱ’’ཏི ¶ . ཨཀུསལཝིཔཱཀཱནཾ དུཀྑཔྤདྷཱནཏཱཡ ‘‘དུཀྑཝིསེསསྶཱ’’ཏི ཝུཏྟཾ.

༣༡. ཨཔཱཔེན ཨལཱམཀེན པཱཔཱཔཱཔཔྤཧཱིནེན པཱཔཱཔཱཔེསུ མཱནསེསུ ཡཾ པཱཔམཱནསཾ ཝུཏྟཾ, པཱཔཱཔཱཔེསུ པུགྒལེསུ ཨཔཱཔེན པཱཔཱཔཱཔཔྤཧཱིནེན ཡཾ པཱཔམཱནསཾ ཝུཏྟནྟི ཝཱ སམྦནྡྷོ. ཨཐ ཝཱ པཱཔཱཔཱཔེསུ མཱནསེསུ པཱཔེན པཱཔམཱནསེན པཱཔཝསེན པཱཔཱཔཱཔཔྤཧཱིནེན ཡཾ པཱཔམཱནསཾ ཝུཏྟནྟི ཡོཛནཱ. ཨཡཾ པནེཏྠ ཨདྷིཔྤཱཡོ – ཨསམྨཱསམྦུདྡྷེན ཏཱཝ དྷམྨསབྷཱཝསྶ དུབྦིཛཱནཱིཡཏྟཱ ཀུསལམྤི ཨཀུསལཏོ, ཨཀུསལམྤི ཀུསལཏོ ཝུཙྩེཡྻ, བྷགཝཏོ པན སཧ ཝཱསནཱཧི ¶ ཝིདྡྷཾསིཏཱཀུསལསྶ ཀམྨཀྑཡཀརཉཱཎེན པཙྩཡཝེཀལླཏོ ཝིདྡྷཾསིཏཀུསལཀམྨསྶ ཙ སམྨཱསམྦུདྡྷབྷཱཝཏོ ཨེཀནྟེནེཝ ཨཀུསལདེསནཱ ཨཀུསལདྷམྨཝསེནེཝཱཏི.

ཨཀུསལཝཎྞནཱ ནིཊྛིཏཱ.

ཨབྱཱཀཏཝཎྞནཱ

ཨཉྙམཉྙཝིསིཊྛཱནཾ ཀུསལཱཀུསལཱནཾ པཱཀནྟི ཝིཔཱཀཾ, ཝིཔཀྐབྷཱཝམཱཔནྣཱནམརཱུཔདྷམྨཱནམེཏམདྷིཝཙནཾ. ཡཐཱ ཧི ལོཀེ སཱལིབཱིཛཱདཱིནཾ ཕལཱནི ཏཾསདིསཱནི ནིབྦཏྟཱནི ཝིཔཀྐཱནི ནཱམ ཧོནྟི, ཝིཔཱཀནིརུཏྟིཉྩ ལབྷནྟི, ན མཱུལངྐུརཔཏྟདཎྜནལཱ༹དཱིནི, ཨེཝཾ ཀུསལཱཀུསལཱནཾ ཕལཱནི ཨརཱུཔདྷམྨབྷཱཝེན, སཱརམྨཎབྷཱཝེན ཙ ཏཾསདིསཱནི ཝིཔཀྐབྷཱཝམཱཔནྣཱནཱིཏི ཝིཔཱཀནིརུཏྟིཾ ལབྷནྟི, ན པན ཀམྨཱབྷིནིབྦཏྟཱཔི རཱུཔདྷམྨཱ ཀམྨཝིསདིསཏྟཱ. ཝིཔཱཀམེཝ ཙིཏྟཾ ཝིཔཱཀཙིཏྟཾ. ཀརཎམཏྟཾ ཀིརིཡཱ ཕལདཱནཱསམྦྷཝཏོ. ཡེན པན ཀཱརཎེན ཏསྶ ཕལདཱནཾ ན སམྦྷཝཏི, ཏཾ ཧེཊྛཱ ཝུཏྟམེཝ. ཀིརིཡཱ ¶ ཨེཝ ཙིཏྟཾ ཀིརིཡཙིཏྟཾ. ཝིཔཱཀསྶ ཀཱམཱཝཙརཱདིབྷཱཝོ ཀུསལེ ཝུཏྟནཡེན ཡཐཱསམྦྷཝཾ ཝེདིཏབྦོ. ཨལོབྷཱདིསམྤཡུཏྟཧེཏཱུཧི སཧ ཝཏྟནཏོ སཧེཏུཀཾ. ཏདབྷཱཝཏོ ཨཧེཏུཀཾ. ནིབྦཏྟཀཧེཏུཝསེན སིཛ྄ཛྷམཱནམྤི ཧེཏཾ སམྤཡུཏྟཧེཏུཝསེནེཝ ‘‘སཧེཏུཀམཧེཏུཀ’’ནྟི ཝུཙྩཏི, ཨིཏརཐཱ ཝཝཏྠཱནཱབྷཱཝཏོ.

སཀཀུསལཾ ཝིཡཱཏི ཨཏྟནོ ཛནཀཾ ཀཱམཱཝཙརཀུསལཾ ཝིཡ. ཛནཀཛནིཏབྦསམྦནྡྷཝསེན ཧི ཏཾ ཏཾ ཀུསལཾ ཏསྶ ཏསྶ ཝིཔཱཀསྶ སཀཾ ནཱམཾ ཧོཏི.

‘‘སཀཀུསལཾ ཝིཡཱ’’ཏི ཝུཏྟཏྟཱ པཝཏྟཱཀཱརཨཱརམྨཎཱདིཏོ ཙསྶ ཏཾསདིསཏཱ ཨཱཔཛྫེཡྻཱཏི ཏཾནིཝཱརཎཏྠམཱཧ ‘‘ཡཐཱ པནཱ’’ཏིཨཱདི. ཚསུ ཨཱརམྨཎེསཱུཏི པརིཏྟཱདིཨཏཱིཏཱདིཨཛ྄ཛྷཏྟཱདིབྷེདེསུ ཚསུ རཱུཔཱདིཨཱརམྨཎེསུ. བྷཝནྟརཔཊིསནྡྷཱནཏོ པཊིསནྡྷི. ཨཝིཙྪེདཔྤཝཏྟིཧེཏུབྷཱཝེན བྷཝསྶ ཨངྒནྟི བྷཝངྒཾ. ནིབྦཏྟིཏབྷཝཏོ པརིགཉྙཏཱཡ ཙུཏིཧེཏུཏཱཡ ཙུཏི. པརིཏྟདྷམྨཔརིཡཱཔནྣེསཱུཏི ཀཱམཱཝཙརདྷམྨཔརིཡཱཔནྣེསུ. ཀཱམཱཝཙརདྷམྨཱ ཧི ཀིལེསཝིཀྑམྦྷནཱདཱིསུ ¶ ཨསམཏྠབྷཱཝེན པརིཏྟཱནུབྷཱཝཏཱཡ, ཨོལཱ༹རིཀཱཧི ཝཱ ཀཱམཏཎྷཱདཱིཧི པརིཏོ གཧིཏཏྟཱ ‘‘པརིཏྟཱ’’ཏི ཝུཙྩནྟི. ཝིཔཱཀསྶ སངྐཔྤེཏྭཱ ཨཱརམྨཎགྒཧཎཱབྷཱཝཏོ ཀམྨཱནུརཱུཔམེཝ པཝཏྟཏཱིཏི པརིཏྟཀམྨཝིཔཱཀོ པརིཏྟཱརམྨཎེཡེཝ པཝཏྟིཏུམརཧཏི, ན མཧགྒཏཨཔྤམཱཎཱརམྨཎེཏི ཝུཏྟཾ ‘‘པརིཏྟདྷམྨཔརིཡཱཔནྣེསཱུ’’ཏི. ཡདི ཨེཝཾ མཧགྒཏཝིཔཱཀོཔི མཧགྒཏཱརམྨཎེཡེཝ ཨཱཔཛྫཏཱིཏི? ནཱཔཛྫཏི, སཉྙཱཡཏྟཱརམྨཎསྶ སམཱདྷིཔྤདྷཱནསྶ ཀམྨསྶ ཨཔྤནཱཔཏྟསྶ ཏཱདིསེནེཝ ཝིཔཱཀེན བྷཝིཏབྦཏྟཱ. ཝཎྞལཀྑཎཱདིཀཉྷི ཨགྒཧེཏྭཱ ལོཀསཉྙཱནུརོདྷེནེཝ གཧིཏེ པཐཝཱདིཀེ པརིཀམྨསཉྙཱཡ སམུཔྤཱདིཏཾ ¶ པཊིབྷཱགནིམིཏྟསངྑཱཏམཱརམྨཎཾ སཉྙཱཝསཾ སཉྙཱཡཏྟཾ ཧོཏི, ཏསྨཱ ཏདཱརམྨཎསྶ སམཱདྷིཔྤདྷཱནསྶ ཨཔྤནཱཔཏྟསྶ ཀམྨསྶ ཝིཔཱཀེན སམཱདྷིཔྤདྷཱནཨཔྤནཱཔཏྟེཧི ཝིཡ སཉྙཱཡཏྟཱརམྨཎཏཱཡ ནིབྦིསེསེནེཝ བྷཝིཏབྦཾ. པརིཏྟཝིཔཱཀོ པན མཧགྒཏཨཔྤམཱཎཔཉྙཏྟཱརམྨཎཀམྨནིབྦཏྟོཔི ཧོཏི, སོ པརཏོ ཨཱགམིསྶཏི.

མུཁནིམིཏྟཾ ཝིཡཱཏི མུཁཾ པཊིཙྩ ཨུཔྤནྣནིམིཏྟཾ ཝིཡ. ཡཐཱ ཧི ཏཾ ནིརཱིཧཾ ཨཔརཾ མུཁནིམིཏྟཾ ཨུཔྤཱདེཏུཾ, ཨཉྙཾ ཝཱ ཀིཉྩི ཨཏྟནོ བལེན ཀཱཏུཾ ན སཀྐོཏི, ཨེཝམེཏམྤི ཝིཔཱཀུཔྤཱདནཱདཱིསུ ན ཨུསྶཧཏི. ཏེནཱཧ ‘‘ནིརུསྶཱཧ’’ནྟི. ཨུསྶཱཧོཏི ཙེཏྠ ཨནུཔཙྪིནྣཱཝིཛྫཱཏཎྷཱམཱནཱནུསཡསྨིཾ སནྟཱནེ ཝིཔཱཀུཔྤཱདནསམཏྠཏཱསངྑཱཏོ, ཨཱསེཝནཔཙྩཡབྷཱཝསངྑཱཏོ, ཝིཉྙཏྟིཛནཀཏཱསངྑཱཏོ ཙ བྱཱཔཱརོ. སོ ཝིཔཱཀེ ནཏྠི ཀམྨཝེགུཀྑིཏྟཏྟཱ པཏིཏཾ ཝིཡ ཧུཏྭཱ པཝཏྟམཱནསྶ ཏསྶ ཨེཀནྟེན དུབྦལབྷཱཝཏོཏི ཏཾ ནིརུསྶཱཧཾ.

ཝིཔཙྩནཊྛཱནནྟི ཝིཔཙྩནཝསེན པཝཏྟནཊྛཱནཾ, པཊིསནྡྷིབྷཝངྒཙུཏིཏདཱརམྨཎཝསེན ཙཏུཀིཙྩཱནམེཏེསཾ པཝཏྟིཨོཀཱསོཏི ཨཏྠོ. ཏཏྠ ཙུཏིབྷཝངྒཱནཾ ཨནྟརཱལ༹ཾ པཊིསནྡྷིཀིཙྩཱནཾ ཋཱནཾ, པཊིསནྡྷིཨཱཝཛྫནཱནཾ, ཏདཱརམྨཎཱཝཛྫནཱནཾ, ཛཝནཱཝཛྫནཱནཾ, ཝོཊྛབྦནཱཝཛྫནཱནཉྩ ཨནྟརཱལ༹ཾ བྷཝངྒཀིཙྩཱནཾ ཋཱནཾ, ཏདཱརམྨཎཔཊིསནྡྷཱིནཾ, ཛཝནཔཊིསནྡྷཱིནཾ, བྷཝངྒཔཊིསནྡྷཱིནཾ ཝཱ ཨནྟརཱལ༹ཾ ཙུཏིཀིཙྩཱནཾ ཋཱནཾ, ཛཝནབྷཝངྒཱནཾ ཨནྟརཱལ༹ཾ ཏདཱརམྨཎཀིཙྩཱནཾ ཋཱནནྟི དཊྛབྦཾ. ཡསྨཱ པནེཏཾ ཋཱནཾ དྷམྨཱནཾ ཏཾཏཾཀིཙྩཝསེན པཱཀཊཾ ཧོཏི, ཏསྨཱ ཋཱནཾ ཝེདིཏབྦནྟི ཋཱནཾ ཨུདྡྷརིཏྭཱ པཱཀཊཀིཙྩཝསེནེཝ ཏཾ པཀཱསེཏུཾ ‘‘ཨིམཱནི ཧཱི’’ཏིཨཱདི ¶ ཝུཏྟཾ. ཨཐ ཝཱ ཀིཙྩམྤི ཀིཙྩཝནྟཱནཾ པཝཏྟིཊྛཱནབྷཱཝེན གཡ྄ཧཏཱིཏི ཋཱནནྟིཔི ཀིཙྩམེཝ ཨུདྡྷཊནྟི ཏཾ སརཱུཔཏོ དསྶེཏུཾ ‘‘ཨིམཱནི ཧཱི’’ཏིཨཱདི ཝུཏྟཾ.

༣༢. ཨཎྜཛཛལཱབུཛཡོནིསམྦྷཝཱནཾ ¶ མནུསྶཱནཾ, ཝིནིཔཱཏིཀཱསུརཱནཉྩ ཨཧེཏུཀཔཊིསནྡྷིཡཱཔི སབྦྷཱཝཏོ ཨཱཧ ‘‘དུཧེཏུཀཏིཧེཏཱུན’’ནྟི. པཊིསནྡྷིཝིཉྙཱཎསམྤཡུཏྟཱ དྭེ ཨལོབྷཱདཡོ ཧེཏཱུ ཡེསཾ ཏེ དུཧེཏུཀཱ. ཨེས ནཡོ ཏིཧེཏུཀེསུཔི. ཏཏྠ དུཧེཏུཀཱནཾ ཉཱཎཝིཔྤཡུཏྟཱནི ཙཏྟཱརི, ཏིཧེཏུཀཱནཾ ཉཱཎསམྤཡུཏྟཱནི ཙཏྟཱརི པཊིསནྡྷིཡོ ཧོནྟི, ཏཐཱ བྷཝངྒཙུཏིཡོཔི. ཡེན ཡེན ཧི ཙིཏྟེན པཊིསནྡྷི ཧོཏི, ཏཾ ཏདེཝ བྷཝངྒཙུཏིཝསེནཔི པཝཏྟཏི. ཏདཱརམྨཎཾ པན ཨཝིསེསེན དཊྛབྦཾ དུཧེཏུཀཱནམྤི ཏིཧེཏུཀཏདཱརམྨཎསྶ ཨིཙྪིཏཏྟཱ. ནནུ ཙེཏཾ ཨསམཔེཀྑིཏཱབྷིདྷཱནཾ ཨཱཙརིཡེནེཝ ཨིམསྶ པཊིསིདྡྷཏྟཱ. ཏཐཱ ཧི ཝཀྑཏི –

‘‘ཨཧེཏུཔཊིསནྡྷིསྶ, ན ཏདཱརམྨཎཾ བྷཝེ;

དུཧེཏུཀཾ ཏིཧེཏུཾ ཝཱ, དུཧེཏུཔཊིསནྡྷིནོ’’ཏི. (ཨབྷིདྷ. ༤༤༣);

ནཡིདམསམཔེཀྑིཏཱབྷིདྷཱནཾ པཊིསནྡྷིཛནཀཀམྨཾ སནྡྷཱཡ ཏཏྠ པཊིསིདྡྷཏྟཱ. ཡེན ཧི ཀམྨེན ཡཱ པཊིསནྡྷི ཨཱདིནྣཱ, ན ཏཾ ཏཏོ ཨདྷིཀཏརཾ ཏདཱརམྨཎཾ པཝཏྟེ ཨབྷིནིཔྥཱདེཏི. ཡཾ པན ཨཉྙམྤི ཀིཉྩི ཀམྨཾ ཏདཱལདྡྷཱཝཀཱསཾ སིཡཱ, ན ཏཾ ཏཏྠ ཏཏོ ཨདྷིཀཏརམྤི ཝིཔཱཀཾ ན ནིབྦཏྟེཏཱིཏི ཨཏྠི. ‘‘སཧེཏུཀཾ བྷཝངྒཾ ཨཧེཏུཀསྶ བྷཝངྒསྶ ཨནནྟརཔཙྩཡེན པཙྩཡོ’’ཏི (པཊྛཱ. ༣.༡.༡༠༢) ཧི པཊྛཱནཝཙནེན ཨཧེཏུཀསྶཱཔི ནཱནཱཀམྨེན སུགཏིཡཾ སཧེཏུཀཏདཱརམྨཎམནུཉྙཱཏཾ. ཏེནཱཧུ ཨཱཙརིཡཱ –

‘‘ཧོཏི ཨཉྙེན ཀམྨེན, སཧེཏུཀཾ ཨཧེཏུན’’ནྟི.

ཡཐཱ ¶ ཙ ཨཧེཏུཀསྶ སཧེཏུཀཾ, ཨེཝཾ དུཧེཏུཀསྶ ཏིཧེཏུཀམྤི ཨིཙྪནྟི. ཨཱཙརིཡཛོཏིཔཱལཏྠེརོ པན ‘‘སཧེཏུཀ’’ནྟི ཨཝིསེསེན ཝུཏྟཏྟཱ ཨཧེཏུཀཱནམྤི ཏིཧེཏུཀཏདཱརམྨཎཾ ཨིཙྪཏི. ཝུཏྟཉྷི ཏེན ‘‘སཧེཏུཀ’’ནྟི ཨཝིསེསོཔདེསེན དུཧེཏུཀཾ, ཏིཧེཏུཀཉྩ གཧེཏབྦཾ. ཏཐཱ ཧི ཨཊྛཀཐཱཡཾ ‘‘ཨཧེཏུཀསྶཱཔི ཏིཧེཏུཀཏདཱརམྨཎམབྷིཧིཏཾ, ཡཉྩརཧི ཨཏྠསམཱསེ ཨཧེཏུཀཱནཾ ཏིཧེཏུཀཕལཱནི དེཏཱི’’ཏི ཝུཏྟཾ, ཏཾ ཀཐཾ? སོ ཨེཝ པུཙྪིཏབྦོ, ཡོ ཏསྶ ཀཏྟཱཏི. ཨཔརེ པན ‘‘མཱུལསནྡྷིཡཱ ཛལ༹ཏྟཱ ཏསྶ ཏིཧེཏུཀཏདཱལམྦཎཾ ན ལབྦྷཏིཡེཝཱ’’ཏི ཝདནྟི.

༣༣-༤. ཏཏོཏི ¶ པཊིསནྡྷིཏོ པརཾ, དུཏིཡཙིཏྟཏོ པཊྛཱཡ. སཏིཔི ཨནྟརནྟརཱ ཝཱིཐིཙིཏྟུཔྤཱདེ ཏདཝསཱནེ ཨུཔྤཛྫམཱནསྶ ཡཱཝཏཱཡུཀཾ ཨནིཝཏྟནཏོ ཝུཏྟཾ ‘‘ཡཱཝཏཱཡུཀ’’ནྟི. བལཝཱརམྨཎེཏི ཨཏིམཧནྟཝིབྷཱུཏཱརམྨཎེ. པཉྩདྭཱརེ ཧི ཨཏིམཧནྟཱརམྨཎེ མནོདྭཱརེ ཝིབྷཱུཏཱརམྨཎེ ཏདཱརམྨཎམུཔྤཛྫཏི, ན ཨཉྙེསུ. ཨེཀཱརམྨཎཔྤཝཏྟིཡཱ པཊིསནྡྷཱདཱིནཾ ཏིཎྞམྤི ཨེཀཊྛཱནེ དསྶནཏྠཾ ཨུདྡེསེ ཏདཱརམྨཎསྶ ཨཝསཱནཀརཎཾ, ཨིདྷ པན པཝཏྟིཀྐམཝསེན ཙུཏིཡཱ ཨཝསཱནཀརཎནྟི དཊྛབྦཾ.

༣༥-༦. ཀམྨདྭཱརནྟི ཀཱཡཝཙཱིཀམྨདྭཱརསྶ ཛནཀཝསེན ན པཝཏྟནྟཱིཏི ཝུཏྟཾ ཧོཏི. ཏཏྠ ཀཱཡོཏི ཀཱཡཝིཉྙཏྟི. ཀམྨནྟི ཏཾསམུཊྛཱཔིཀཱ ཙེཏནཱ, ཀཱཡེན ཀཏཾ ཀམྨཾ ཀཱཡཀམྨཾ. ཀིཉྩཱཔི ཧི ཀཱཡོ ཀམྨསྶ ཙཏུཝཱིསཏིཡཱ པཙྩཡེསུ ན ཀེནཙི པཙྩཡེན པཙྩཡོ ཧོཏི, ཏཐཱཔི ཏཾསམུཊྛཱནསྶ ཏསྶ སབྦྷཱཝེཡེཝ ཀཱཡཀམྨཱདིཝོཧཱརོཏི ཏཾ ཏེན ཀཏནྟི ཝུཙྩཏི. ཀཱཡཀམྨསྶ པཝཏྟིཊྛཱནབྷཱུཏཾ དྭཱརཾ ཀཱཡཀམྨདྭཱརཾ. ཡདི ཨེཝཾ ཀམྨདྭཱརཝཝཏྠཱནཾ ན སིཡཱ ¶ . ཀཱཡདྭཱརེན ཧི སིདྡྷཾ ཀམྨཾ ‘‘ཀཱཡཀམྨ’’ནྟི ཝུཙྩཏི. ཏཾ པན ‘‘དྭཱརེ ཙརནྟི ཀམྨཱནཱི’’ཏི (དྷ. ས. ཨཊྛ. ༡ ཀཱཡཀམྨདྭཱར) ཝཙནཏོ ཝཙཱིདྭཱརེཔི སིཛ྄ཛྷཏཱིཏི དྭཱརེན ཀམྨཝཝཏྠཱནཾ ན སིཡཱ, ཏཐཱ ཝཙཱིཀམྨཾ ཀཱཡདྭཱརེཔི སིཛ྄ཛྷཏཱིཏི ཀམྨེན དྭཱརཝཝཏྠཱནམྤི ན སིཡཱཏི? ཏཾ ན, ཏབྦཧུལཝུཏྟིཡཱ ཙེཝ ཡེབྷུཡྻེན ཝུཏྟིཡཱ ཙ ཝཝཏྠིཏཏྟཱ. ཀཱཡཀམྨཉྷི ཀཱཡདྭཱརེཡེཝ བཧུལཾ པཝཏྟཏི, ཨཔྤཾ ཝཙཱིདྭཱརེ, ཏསྨཱ ཀཱཡདྭཱརེ བཧུལཔྤཝཏྟནཏོ ཨེཏསྶ ཀཱཡཀམྨབྷཱཝོ སིདྡྷོ ཝནཙརཀཱདཱིནཾ ཝནཙརཀཱདིབྷཱཝོ ཝིཡ. ཏཐཱ ཀཱཡཀམྨམེཝ ཡེབྷུཡྻེན ཀཱཡདྭཱརེ པཝཏྟཏི, ན ཨིཏརཾ, ཏསྨཱ ཀཱཡཀམྨསྶ ཡེབྷུཡྻེན ཨེཏྠེཝ པཝཏྟིཏོ ཨསྶ ཀཱཡཀམྨདྭཱརབྷཱཝོ སིདྡྷོ བྲཱཧྨཎགཱམཱདཱིནཾ བྲཱཧྨཎགཱམཱདིབྷཱཝོ ཝིཡཱཏི ནེཏྠ ཀམྨདྭཱརཝཝཏྠཱནེ ཀོཙི ཝིབནྡྷོཏི. ཝཙཱིཀམྨདྭཱརེཔི ཨེས པབནྡྷོ ཡཐཱསམྦྷཝཾ དཊྛབྦོ.

མནོཀམྨདྭཱརཾ པན སཡཾ མནོཡེཝ སམཱནཾ ཨཏྟནཱ སཧགཏཙེཏནཱཨནབྷིཛ྄ཛྷཱདིཀམྨཱནཾ པཝཏྟིདྭཱརབྷཱཝེན མནོདྭཱརསངྑཾ ལབྷཏཱིཏི ན ཏཾ ཙིཏྟསྶ ཨུཔྤཏྟིདྭཱརཝསེན གཎྷཱཏི. ན ཧི སཡཾ ཨཏྟཏོཝ པཝཏྟཏི. ཡདི པན ཙིཏྟསམྤཡུཏྟཱ ཀམྨདྭཱརབྷཱཝེན ཨདྷིཔྤེཏཱ, ཏདཱ ཏེསཾ ཀམྨདྭཱརབྷཱཝོ མནསྨིཾ ན ཨུཔཙཱརཱིཡཏཱིཏི སམྤཡུཏྟདྷམྨཱནཾ ཙིཏྟཱདྷིཔཏིབྷཱཝོ ཙིཏྟེ ཝིཡཱཏི ཙིཏྟཾ ‘‘མནོཀམྨདྭཱར’’ནྟི ཝུཙྩཏི. སབྷཱཝཏོ པན ཀམྨདྭཱརཾ ནཱམ སམྤཡུཏྟདྷམྨཱཡེཝཱཏི ཙིཏྟཾ ཏཏོ པཝཏྟནཏོ མནོཀམྨདྭཱརཝསེན པཝཏྟཏི. ཨནནྟརཔཙྩཡབྷཱུཏསྶ པན མནོཀམྨདྭཱརབྷཱཝེ ཝཏྟབྦམེཝ ¶ ནཏྠི. ཨིདྷ པན ‘‘ཨཝིཉྙཏྟིཛནཏྟཱ’’ཏི ཝཙནེན ཀཱཡཝཙཱིཀམྨདྭཱརཝསེནེཝ ཨཔྤཝཏྟིཡཱ སཱདྷིཏཏྟཱ མནོཀམྨདྭཱརཾ ན གཧིཏམེཝ. ན ཧི ‘‘ཨཝིཉྙཏྟིཛནཏྟཱ’’ཏི ཀཱརཎཾ མནོཀམྨདྭཱརཝསེནཔི ཨཔྤཝཏྟིཾ སཱདྷེཏི. ཨཐ ཝཱ ‘‘ཨཝིཔཱཀསབྷཱཝཏོ’’ཏི ¶ ཝཙནེན མནོཀམྨདྭཱརཝསེནཔི ཨཔྤཝཏྟི སཱདྷིཏཱ ཧོཏི. ‘‘ཀམྨདྭཱར’’ནྟི ཨེཏྠ ཀམྨགྒཧནེན ནཱནཀྑཎིཀཀམྨསྶ ཨདྷིཔྤེཏཏྟཱ ཏསྶཱཔི གཧཎཾ དཊྛབྦཾ. ཨིཏི ཨིམེསུ ཀཱཡཝཙཱིཀམྨདྭཱརསངྑཱཏེསུ དྭཱིསུ དྭཱརེསུ, མནོཀམྨདྭཱརེན སཧ ཏཱིསུ ཨེཝ ཝཱ ཡཐཱ ཀུསལཾ པཝཏྟཏི, ན ཨེཝཾ ཝིཔཱཀོ, ཡཐཱ ཙ ཀུསལཾ ཀཱཡཝཙཱིམནོཀམྨསྶ ཨཱཡཱུཧནཝསེན དཱནཱདིཔུཉྙཀིརིཡཝཏྠུཝསེན པཝཏྟཏི, ན ཨེཝམཡཾ. ཨཡཾ པན ནེཝ ཀཱཡཝཙཱིཀམྨདྭཱརེསུ པཝཏྟཏི ཝིཉྙཏྟིསམུཊྛཱཔཀཏྟཱབྷཱཝཏོ, ན ཀམྨཝསེན, མནོཀམྨདྭཱརཝསེནཱཔི ཙ པཝཏྟཏི ཝིཔཱཀུཔྤཱདནབྷཱཝཱབྷཱཝཏོ, ན པུཉྙཀིརིཡཝསེན པཝཏྟཏི དཱནཱདིཝསེན ཨཔྤཝཏྟནཏོཏི དསྶེཏུཾ ‘‘ཀམྨདྭཱརཉྩ…པེ… ནོ སམཱ’’ཏི ཝུཏྟཾ. ཨེཝནྟི དཱནཱདིཝསེན.

༣༧. ‘‘པརིཏྟཱརམྨཎཏྟཱ’’ཏིཨཱདི སམྤཡུཏྟདྷམྨཝསེན ཝིསེསདསྶནཾ. ཡསྨཱ ཨེཏེ པརིཏྟཱརམྨཎཱ, ཀརུཎཱམུདིཏཱ ཙ པཉྙཏྟཱརམྨཎཱ སཏྟཔཉྙཏྟིཡཾ པཝཏྟནཏོ, ཏསྨཱ དྭིནྣམཱལམྦཎཱནཾ ཨེཀཙིཏྟསྶ ཝིསཡབྷཱཝཱནནུགམནཏོ ན ཏེསུ ཀརུཎཱམུདིཏཱ ཀདཱཙིཔི ཛཱཡནྟཱིཏི ཨཡམེཏྠ པཋམགཱཐཱཡ ཨདྷིཔྤཱཡོ.

༣༨. དུཏིཡགཱཐཱཡ པན ཧི-སདྡོ ཡསྨཱཏི ཨིམསྶ ཨཏྠེ. ཡསྨཱ ‘‘པཉྩ སིཀྑཱཔདཱ ཀུསལཱ’’ཏི (ཝིབྷ. ༧༡༥) ཝུཏྟཱ, ཏསྨཱཏི ཨཏྠོ. ཨིདཾ ཝུཏྟཾ ཧོཏི – བྷགཝཏཱ ཧི སིཀྑཱཔདཝིབྷངྒེ ‘‘པཉྩ སིཀྑཱཔདཱ ཀུསལཱ’’ཏི (ཝིབྷ. ༧༡༥) ཨེཝཾ ‘‘པཱཎཱཏིཔཱཏཱ ཝེརམཎཱི’’ཏིཨཱདཱིནཾ པཉྩནྣཾ སིཀྑཱཔདཱནཾ ཀུསལབྷཱཝོ ཝུཏྟོ, ཏེ ཙ ཝིརཏིསབྷཱཝཱ ཨེཝ ཨཱདིཏོ ཏིཎྞཾ སིཀྑཱཔདཱནཾ, པཙྪིམསྶ ཙ སམྨཱཀམྨནྟེ, ཨིཏརསྶ སམྨཱཝཱཙཱཡཾ, པཉྩནྣམྤི མིཙྪཱཛཱིཝཧེཏུཀཔཉྩདུཙྩརིཏཏོ ཝིརམཎཝསེན ¶ པཝཏྟཱནཾ སམྨཱཨཱཛཱིཝེ ཙ ཨནྟོབྷཱཝཏོ, ཏསྨཱ ཏཱ ཨེཀནྟཀུསལབྷཱུཏཱནཾ ཀདཱཙི ཨབྱཱཀཏེ ལབྷནྟི, ཨིཏརཐཱ སདྡྷཱསཏིཨཱདཡོ ཝིཡ ‘‘སིཡཱ ཀུསལཱ, སིཡཱ ཨབྱཱཀཏཱ’’ཏི ཝུཙྩེཡྻུནྟི. ཡདི ཨེཝཾ ལོཀུཏྟརཕལེསུ ཨཊྛ, སཏྟ ཝཱ མགྒངྒཱ ན ལབྦྷནྟཱིཏི? ནོ ན ལབྦྷནྟི ལོཀིཡཝིརཏཱིནམེཝ ཏཏྠ ཨེཀནྟཀུསལབྷཱཝསྶ ཝུཏྟཏྟཱ, ལོཀུཏྟརཝིརཏིཡོ པན ཕལསྶ མགྒཔཊིབིམྦབྷཱུཏཏྟཱ མགྒསདིསཏོ ཨཊྛངྒིཀཏཱཡ, སཏྟངྒིཀཏཱཡ ¶ ཙ བྷཝིཏབྦནྟི ན ཙ ཨེཀནྟཀུསལབྷཱཝེན ཝཝཏྠཱཔེཏུཾ ཡུཏྟཱ. ཨེཝཉྩ ཀཏྭཱ ཨུཔརི ལོཀུཏྟརཕལེསུཔི ཨཊྛངྒིཀཏཱདིབྷེདོ མགྒོ ཨུདྡྷཊོཏི.

༣༩. ‘‘ཏཐཱདྷིཔཏིནོ’’ཏིཨཱདི ཨདྷིཔཏིཝསེན ཝིསེསདསྶནཾ. སབྦེསམྤི ཧི ཏེབྷཱུམཀཀུསལཱནཾ ཨཉྙོ ཨཱཡཱུཧནཀཱལོ, ཨཉྙོ ཝིཔཙྩནཀཱལོ, ཏསྨཱ ན ཏཱནི ཨཏྟནོ ཝིཔཱཀེཧི ཨདྷིཔཏིཾ གཱཧཱཔེཏུཾ སཀྐོནྟཱིཏི ན ཏེ ཚནྡཱདཱིནི དྷུརཾ ཀཏྭཱ པཝཏྟནྟི. ལོཀུཏྟརཀུསལཱནི ཙ པན ཨཱཡཱུཧནཀཱལསྶ, ཝིཔཙྩནཀཱལསྶ ཙ ཨནྟརཱབྷཱཝཏོ ཨཏྟནོ ཚནྡཱདཱིནཾ བལསྶ ཨཝཱུཔསནྟཀཱལེཡེཝ ཝིཔཱཀཾ ནིབྦཏྟེནྟཱིཏི ཨནནྟརཔཙྩཡཱ ཧུཏྭཱ ཝིཔཱཀེཧི ཨདྷིཔཏིཾ གཱཧཱཔེཏུཾ སཀྐོནྟཱིཏི. ཨེཝཉྩ ཀཏྭཱ ཨུཔརི ལོཀུཏྟརཝིཔཱཀཱནཾ ཨདྷིཔཏིཡོགཾ ཝཀྑཏི.

༤༠. ཡསྨཱ མོརཝཱཔིཝཱསིམཧཱདཏྟཏྠེརེན ཝིཔཱཀཱནཾ ཨཱགམནཏོ ཨསངྑཱརིཀསསངྑཱརིཀབྷཱཝོ ཨིཙྪིཏོ, ཏིཔིཊཀཙཱུལ༹ནཱགཏྠེརེན པཙྩཡཏོ, ཏསྨཱ ཨུབྷིནྣམྤི མཏིདསྶནཏྠམཱཧ ‘‘ཨསངྑཱརསསངྑཱརཝིདྷཱན’’ནྟིཨཱདི. པུརིམཏྠེརོ ཧི ཡཐཱ མུཁེ ཙལིཏེ ཨཱདཱསཏལེ མུཁནིམིཏྟཾ ཙལཏི ¶ , ཨེཝཾ ཨསངྑཱརིཀསྶ ཀུསལསྶ ཝིཔཱཀོ ཨསངྑཱརིཀོ, སསངྑཱརིཀསྶ ཝིཔཱཀོ སསངྑཱརིཀོཏི ཨཱཧ, ཏསྨཱ ཏསྶ མཏིདསྶནཏྠཾ ‘‘ཨསངྑཱར…པེ… པུཉྙཏོ’’ཏི ཝུཏྟཾ. དུཏིཡཏྠེརོ པན ཨསངྑཱརིཀཱདཱིསུ ཡེན ཀེནཙིཔི ཙིཏྟེན ཀམྨེ ཨཱཡཱུཧིཏེ ཨཱསནྣམརཎསྶ ཨཏྟནོ, པརེསཾ ཝཱ པཡོགེན ཝིནཱ ཨསངྑཱརེན ཨཔྤཡོགེན ཀམྨཀམྨནིམིཏྟགཏིནིམིཏྟཔཙྩུཔཊྛཱནེ པཊིསནྡྷི ཨུཔྤཛྫམཱནཱ ཨསངྑཱརིཀཱ. ཡསྶ ཀསྶཙི སསངྑཱརེན སཔྤཡོགེན ཀམྨཱདིཔཙྩུཔཊྛཱནེ སསངྑཱརིཀཱ. ཏཐཱ བྷཝངྒཙུཏིཡོཔི. ཏདཱརམྨཎཉྩ པཎཱིཏཱཔཎཱིཏཨུཏུབྷོཛནཱདིཔཙྩཡཝསེན, ཨནནྟརནིརུདྡྷཀུསལཱཀུསལསྶ ཝསེན ཝཱ ཨསངྑཱརསསངྑཱརནྟི ཨེཝཾ པཙྩཡཏོ ཨསངྑཱརིཀཱདིཝིདྷཱནཏམཱཧ, ཏསྨཱ ཏསྶ མཏིདསྶནཏྠཾ ‘‘ཉེཡྻཾ པཙྩཡཏོ ཙེཝཱ’’ཏི ཝུཏྟཾ. ཨིདམེཝ ཙ པན ཨཱཙརིཡཱ པསཾསནྟི.

༤༡-༢. ཧཱིནཱདཱིནཾ ཝིཔཱཀཏྟཱཏི ཨདྷིཔཏིཡོགཱབྷཱཝེཔི ཧཱིནམཛ྄ཛྷིམཔཎཱིཏཱནཾ ཀུསལཱནཾ ཝིཔཱཀཏྟཱ. ཨེཏེན ཨཱགམནཏོ ཧཱིནཱདིབྷཱཝཾ ཝིབྷཱཝེཏི. ཝིནེཡྻསནྟཱནགཏཀིལེསམལཝིདྷམནེན ཏསྶ པུནནཏོ པུཉྙོ ཝཱདོ ཝཙཱིགྷོསོ ཨེཏསྶ, ཝུཏྟནཡེནེཝ པུཉྙཾ ཝདཏཱིཏི ཝཱ པུཉྙཝཱདཱི, ཏེན པུཉྙཝཱདིནཱ. ‘‘ཨེཀནྟེན སཝཏྠུཀ’’ནྟི ཝུཏྟེཔི རཱུཔལོཀེ པཝཏྟི ཨནིཝཱརིཏཱཏི ཨཱཧ ‘‘ཀཱམལོཀསྨི’’ནྟི ¶ . ‘‘ན པནཉྙཏྠ ཛཱཡཏེ’’ཏི ཨིམིནཱ པན བྱཏིརེཀཏོ ལདྡྷམཏྠཾ དསྶེཏཱིཏི.

ཨེཝཾ ཏཱཝ སཧེཏུཀཝིཔཱཀེ ནིདྡིསིཏྭཱ ཨིདཱནི ཨཧེཏུཀེ ནིདྡིསིཏུཾ ‘‘ཨཧེཏུཀཝིཔཱཀཙིཏྟཾ པནཱ’’ཏིཨཱདི ཝུཏྟཾ. ཀསྨཱ པན སཧེཏུཀསྶ ཀམྨསྶ ཨཧེཏུཀཝིཔཱཀོ ཧོཏཱིཏི? ཝུཙྩཏེ – ཙཀྑུཝིཉྙཱཎཱདཱིནཾ ཏཱཝ པཉྩནྣཾ ཨཱརམྨཎཱབྷིནིཔཱཏམཏྟཏྟཱ ཨལོབྷཱདིསམྤཡོགོ ན སམྦྷཝཏི, ཏཐཱ མནྡཏརཀིཙྩེསུ སམྤཊིཙྪནསནྟཱིརཎེསཱུཏི ¶ ཨེཝཾ ཧེཏཱུནཾ ཨུཔྤཏྟིཡཱ ཨསམྦྷཝཏོ ཙ ནེསཾ ཨཧེཏུཀཏཱ དཊྛབྦཱ. ཨུཔེཀྑཱདིཡོགེ པན ཙཀྑུཝིཉྙཱཎཱདཱིནཾ ཏཱཝ ཙཏུནྣཾ ཨིཊྛཱརམྨཎེཔི པཝཏྟམཱནཱནཾ ཝཏྠཱརམྨཎསངྒྷཊྚནཱཡ དུབྦལབྷཱཝཏོ ཨུཔེཀྑཱསཧགཏཏཱ, ཀཱཡཝིཉྙཱཎསྶ ཙ ཏཱཡ བལཝབྷཱཝཏོ སུཁསཧགཏཏཱ ཧོཏི. སམྤཊིཙྪནཾ པན ཨཱརམྨཎགྷཊྚནཡོགྱབྷཱཝེན ཨོལཱ༹རིཀཏྟཱ, ཙཏུཙིཏྟཀྑཎཱཏཱིཏཝསེན ཙིརཛཱཏཏྟཱ ཙ དུབྦལམཏྟནོ ནིསྶཡེན སཧ ཨསམཱནཛཱཏིཀཉྩ ཙཀྑཱདིཝཏྠུཾ ནིསྶཱཡ ཨུཔྤནྣེཧི ཙཀྑུཝིཉྙཱཎཱདཱིཧི ལདྡྷཱནནྟརཔཙྩཡཏཱཡ, ཨཔུབྦནིསྶཡཏཱཡ ཙ ཨཱརམྨཎརསསྶཱདེ དུབྦལནྟི ཨིཊྛཱདཱིསུ ཨཱརམྨཎེསུ ཨུཔེཀྑཱསཧགཏམེཝ. སནྟཱིརཎཾ པན ཝུཏྟཝིཔརཱིཏཏོ ཨིཊྛཱརམྨཎེ སུཁསཧགཏཾ, ཨིཊྛམཛ྄ཛྷཏྟེ ཙ ཨུཔེཀྑཱསཧགཏནྟི དཊྛབྦཾ. མནོཝིཉྙཱཎདྷཱཏུ ཝིཡ ཝིསིཊྛམནནཀིཙྩཱབྷཱཝཏོ མནོམཏྟཱ ནིསྶཏྟནིཛྫཱིཝཱདིཨཏྠེཧི དྷཱཏུ ཙཱཏི མནོདྷཱཏུ. སཱ ཧི སཏིཔི ཝིཉྙཱཎབྷཱཝེ མནོཝིཉྙཱཎཏོ སམྦྷཝསྶ ཝིསིཊྛམནནཀིཙྩསྶ ཨཀརཎཏོ མནནམཏྟཱཡེཝ ཧོཏི. ཝུཏྟལཀྑཎཝིཔརཱིཏཏོ པན མནོ ཙ ཏཾ ཝིཉྙཱཎཉྩཱཏི མནོཝིཉྙཱཎཾ, ཏདེཝ ཡཐཱཝུཏྟཊྛེན དྷཱཏཱུཏི མནོཝིཉྙཱཎདྷཱཏུ.

ཝིཉྙཱཎཔཉྩཀཾ ནིཡཏཱརམྨཎཾ ཡཐཱཀྐམཾ རཱུཔཱདིཨེཀེཀསྶེཝ ཨཱརམྨཎཀརཎཏོ. སེསཏྟཡམནིཡཏཱརམྨཎཾ པཉྩཱརམྨཎིཀཚལཱ༹རམྨཎིཀབྷཱཝཏོ.

དཊྛབྦཏཱཡ དིཊྛཾ, རཱུཔཱཡཏནཾ. སོཏབྦཏཱཡ སུཏཾ, སདྡཱཡཏནཾ. མུནིཏབྦཏཱཡ མུཏཾ, སམྤཏྟསྶེཝ གཧེཏབྦཏཱཡཱཏི ཨཏྠོ, གནྡྷཱདིཏྟཡསྶེཏཾ ནཱམཾ. ཙཀྑཱདཱིཧི ཝིནཱ ཀེཝལཾ མནསཱ ཨེཝ ཝིཛཱནིཏབྦཏཱཡ ཝིཉྙཱཏཾ, དྷམྨཱཡཏནཾ. ཨནཱམཊྛཀཱལཝིསེསཝཙནཏྟཱ ཙ ནེསཾ ཨཏཱིཏཱནཱགཏཱཔི རཱུཔཱདཡོ དིཊྛཱདིསདྡེཧི ཝུཙྩནྟི. ཏེནེཝ ཧི ¶ ‘‘དཊྛབྦཏཱཡཱ’’ཏིཨཱདིནཱ ཀཱལསཱམཉྙེན ¶ ནེསཾ ནིབྦཙནཾ ཝུཏྟཾ. དིཊྛཾ ཨཱརམྨཎཾ ཡསྶ ཏཾ དིཊྛཱརམྨཎཾ. ཨེཝཾ སུཏཱརམྨཎཱདཱིསུ.

ཙཀྑུཏོ པཝཏྟནྟི ཙཀྑུདྭཱརཏོཝ པཝཏྟཾ སབྦཝཱཀྱཱནཾ ཨཝདྷཱརཎཕལཏྟཱ. ཏེན མནོདྷཱཏུཨཱདཱིནཾ ཙཀྑུཝིཉྙཱཎབྷཱཝོ ནིཝཱརིཏོ ཧོཏི ཏེསཾ དྭཱརནྟརཏོཔི པཝཏྟིསམྦྷཝཏོ. ཨཐ ཝཱ ‘‘ཙཀྑུཏོ པཝཏྟ’’ནྟི ཨིདཾ སཉྫཱཏིཔྤཝཏྟིཾ སནྡྷཱཡ ཝུཏྟཾ, ན སཉྩརཎཔྤཝཏྟིཾ, ཏསྨཱ ཡཐཱ ཀུཎྜམུཁཏོ ཨུདཀཾ སཉྩརཎཝསེན པཝཏྟཏི, ན ཨེཝཾ པཝཏྟམིདྷ གཧིཏཾ. ཡཐཱ པན ཙནྡཀནྟཔཱསཱཎཏོ ཨུདཀཾ སཉྫཱཏིཝསེན པཝཏྟཏི, ཨེཝཾ པཝཏྟམེཝ ཙཀྑུཏོ པཝཏྟནྟི གཧིཏཾ. ཡཐཱ ཙ ཀིཾ? ཡཐཱ ཀུཙྪིཏོ སམུཊྛིཏཾ པིཏྟསེམྷརུཧིརཱདི མུཁཏོ སནྡནྟམྤི ‘‘མུཁསྶཝོ’’ཏི ན ཝུཙྩཏི, མུཁཏོཡེཝ པན སམུཊྛཧིཏྭཱ ཏཏོ སཝནྟཾ ཁེལ༹ཾ ‘‘མུཁསྶཝོ’’ཏི ཝུཙྩཏི, ཨེཝཾ ཧདཡཝཏྠུསནྣིསྶཡཏོ སམུཊྛཧིཏྭཱ ཙཀྑུཏོ པཝཏྟམཱནཾ ཙཀྑུཝིཉྙཱཎཾ ནཱམ ན ཧོཏི. ཙཀྑུཏོཡེཝ པན སམུཊྛཧིཏྭཱ ཏཏོ པཝཏྟམཱནཾ ཙཀྑུཝིཉྙཱཎཾ ནཱམཱཏི. ཡོ པན ཨིམམཏྠཾ ཨསལླཀྑེཏྭཱ བྱཉྫནམཏྟསྶེཝ ཨབྷིནིཝིསིཏྭཱ ཏཾདྭཱརཔྤཝཏྟཱནཾ སེསཱནམྤི ཙཀྑུཝིཉྙཱཎབྷཱཝཾ མཉྙེཡྻ, ཏཾ ནིཝཱརེཏུཾ པཀཱརནྟརེནཔི ཝིགྒཧཾ དསྶེནྟོ ཨཱཧ ‘‘ཙཀྑུམྷི སནྣིསྶིཏ’’ནྟི. ཡཐཱ ཙཀྑུཏོ པཝཏྟཾ, ཙཀྑུསནྣིསྶིཏཾ ཝཱ ཝིཉྙཱཎཾ ཙཀྑུཝིཉྙཱཎཾ, ཨེཝཾ སོཏཝིཉྙཱཎཱདཱིསུཔི ‘‘སོཏཏོ པཝཏྟཾ, སོཏསྨིཾ སནྣིསྶིཏཾ ཝཱ ཝིཉྙཱཎཾ སོཏཝིཉྙཱཎ’’ནྟིཨཱདིནཱ ཡོཛནཾ ཨཏིདིསནྟོ ཨཱཧ ‘‘ཏཐཱ སོཏཝིཉྙཱཎཱདཱིནཱི’’ཏི.

ཙཀྑུསནྣིསྶིཏཾ ཧུཏྭཱ རཱུཔསྶ ཝིཛཱནནལཀྑཎམེཏསྶཱཏི ཙཀྑུསནྣིསྶིཏརཱུཔཝིཛཱནནལཀྑཎཾ. ཏཏྠ ཙཀྑུསནྣིསྶིཏཝཙནེན དིབྦཙཀྑཱདིཀཾ ཨཉྙཾ རཱུཔཱརམྨཎཾ ཝིཉྙཱཎཾ ནིཝཏྟེཏི ¶ . ཝིཛཱནན-གྒཧཎེན ཙཀྑུསནྣིསྶིཏེ ཕསྶཱདིདྷམྨེ ནིཝཏྟེཏི. ཙཀྑུརཱུཔ-གྒཧཎེན ནིསྶཡཏོ, ཨཱརམྨཎཏོ ཙ ཙིཏྟཾ ཝིབྷཱཝེཏི ཨུབྷཡཱདྷཱིནཝུཏྟིཀཏྟཱ. ཡདི ཧི ཙཀྑུ ནཱམ ན སིཡཱ, ཨནྡྷཱཔི རཱུཔཾ པསྶེཡྻུཾ, ན ཙ པསྶནྟི. ཡདི ཙ ནཱིལཱདིརཱུཔཾ ནཱམ ན སིཡཱ, དེསཱདིནིཡམེན ན བྷཝིཏབྦཾ, ཨཏྠེཝ ཙ ནིཡམོ. ཨེཀནྟསཱརམྨཎཏཱ ཙ ཙིཏྟསྶ ཝུཏྟཱཏི ཨཱརམྨཎེན ཝིནཱ ནཱིལཱདིཨཱབྷཱསཾ ཙིཏྟཾ པཝཏྟཏཱིཏི ཨེཝཾ པཝཏྟོ ཝཱདོ མིཙྪཱཝཱདོཏི གཧེཏབྦོ. ཏེནཱཧ བྷགཝཱ ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎ’’ནྟིཨཱདི (མ. ནི. ༡.༢༠༤, ༤༠༠; ༣.༤༢༡, ༤༢༥; སཾ. ནི. ༤.༦༠; ཀཐཱ. ༤༦༥). ཨེཏྠ ¶ སིཡཱ – ཀིཾ པནེཏཾ ཙཀྑུ, རཱུཔཉྩ ཝིཉྙཱཎསྶ པཙྩཡོ ཧོནྟཾ ཨེཀམེཝ པཙྩཡོ ཧོཏི, ཨུདཱཧུ ཨནེཀནྟི? ཙཀྑུ ཏཱཝ ཨེཀམྤི, རཱུཔཾ པན ཨནེཀམེཝ སངྒཏཾ. ཀིཾ ཀཱརཎཾ? པཙྩཡབྷཱཝཝིསེསཏོ. ཙཀྑུ ཧི ཙཀྑུཝིཉྙཱཎསྶ ནིསྶཡཔུརེཛཱཏཨིནྡྲིཡཝིཔྤཡུཏྟཔཙྩཡེཧི པཙྩཡོ ཧོནྟཾ ཨཏྠིབྷཱཝེནེཝ ཧོཏི ཏསྨིཾ སཏི ཏསྶ བྷཱཝཏོ, ཨསཏི ཨབྷཱཝཏོ. ཡཏོ ཏཾ ཨཏྠིཨཝིགཏཔཙྩཡེཧིསྶ པཙྩཡོཏི ཝུཏྟཾ, སྭཱཡཾ པཙྩཡབྷཱཝོ ན ཨེཀསྨིཾ ན སམྦྷཝཏཱིཏི ཨེཀམྤི ཙཀྑུཝིཉྙཱཎསྶ པཙྩཡོ ཧོཏི. རཱུཔཾ པན ཡདིཔི ཙཀྑུ ཝིཡ པུརེཛཱཏཨཏྠིཨཝིགཏཔཙྩཡེཧི པཙྩཡོ ཧོཏི པུརེཏརཾ ཨུཔྤནྣཾ ཧུཏྭཱ ཝིཛྫམཱནཀྑཎེཡེཝ ཨུཔཀཱརཀཏྟཱ, ཏཐཱཔི ཨནེཀམེཝ སངྒཏཾ ཧུཏྭཱ པཙྩཡོ ཧོཏི ཨཱརམྨཎབྷཱཝཏོ. ཡཉྷི ཏཾ ཨཱརམྨཎཾ ཏསྶ ཡཐཱ ཏཐཱ ཨུཔལབྦྷནཱིཡཝསེནེཝ ཨཱརམྨཎཔཙྩཡབྷཱཝོ, ཝིཉྙཱཎསྶ ཙ ཨིནྡྲིཡཱདྷཱིནཝུཏྟིཀསྶ ཨཱརམྨཎསབྷཱཝཱུཔལདྡྷི ན ཨེཀདྭིཀལཱཔགཏཝཎྞཝསེན ཧོཏི, ནཱཔི ཀཏིཔཡཀལཱཔགཏཝཎྞཝསེན, ཨཐ ཁོ ཨཱབྷོགཱནུརཱུཔཾ ཨཱཔཱཐགཏཝཎྞཝསེནཱཏི ཨནེཀམེཝ རཱུཔཾ སཾཧཙྩཀཱརིཏཱཡ ཝིཉྙཱཎསྶ པཙྩཡོ ཧོཏཱིཏི. ཨམུམེཝ ¶ ཧི ཝིསེསཾ ཝིབྷཱཝེཏུཾ ‘‘ཙཀྑུཉྩ པཊིཙྩ རཱུཔེ ཙཱ’’ཏི (མ. ནི. ༡.༢༠༤, ༤༠༠; ༣.༤༢༡, ༤༢༥; སཾ. ནི. ༤.༦༠; ཀཐཱ. ༤༦༥) པཱལི༹ཡཾ ཝཙནབྷེདོ ཀཏོཏི. ཨེཝཾ སོཏཝིཉྙཱཎེཔི ཡཐཱརཧཾ ཝཏྟབྦཾ. གྷཱནཝིཉྙཱཎཱདཱིནཾ པན སམྤཏྟགྒཱཧཏཱཡ ཨཏྟནོ ནིསྶཡེན སཧ ཨལླཱིནསྶེཝ གཧཎཏོ ཨེཀཀལཱཔགཏམྤི གནྡྷཱདིཀཾ ཏེསཾ ཨུཔྤཏྟིཡཱ པཙྩཡོ ཧོཏི.

རཱུཔམཏྟཱརམྨཎརསནྟི རཱུཔཱཡཏནམཏྟསྶེཝ ཨཱརམྨཎཀརཎརསཾ. མཏྟ-སདྡེན ཡཐཱ ཨཱརམྨཎནྟརཾ ནིཝཏྟེཏི, ཨེཝཾ རཱུཔཱཡཏནེཔི ལབྦྷམཱནེ ཨེཀཙྩེ ཝིསེསེ ནིཝཏྟེཏི. ན ཧི ཙཀྑུཝིཉྙཱཎཾ ཝཎྞམཏྟཏོ ཨཉྙཾ ཀིཉྩི ནཱིལཱདིཝིསེསཾ ཏཏྠ གཧེཏུཾ སཀྐོཏི. ཏེནཱཧ བྷགཝཱ – ‘‘པཉྩཧི ཝིཉྙཱཎེཧི ན ཀིཉྩི དྷམྨཾ པཊིཝིཛཱནཱཏི ཨཉྙཏྲ ཨབྷིནིཔཱཏམཏྟཱ’’ཏི. ཙཀྑུཝིཉྙཱཎཾ ཨུཔྤཛྫམཱནཾ རཱུཔཱརམྨཎེ ཨེཝ ཨུཔྤཛྫནཏོ ཏདབྷིམུཁབྷཱཝེན གཎྷཱཏཱིཏི ཝུཏྟཾ ‘‘རཱུཔཱབྷིམུཁབྷཱཝཔཙྩུཔཊྛཱན’’ནྟི. ཨཏྟནོ ཨནནྟརཾ ཨུཔྤཛྫམཱནཱནཾ ཨརཱུཔདྷམྨཱནཾ སམནནྟརཝིགཏཱ ཨརཱུཔདྷམྨཱ པཝཏྟིཨོཀཱསདཱནེན ཨནནྟརསམནནྟརནཏྠིཝིགཏཔཙྩཡེཧི ཨུཔཀཱརཀཱ, ནིསྶཡཱརམྨཎཱ དྷམྨཱ ཝིཡ ཨཱསནྣཀཱརཎཱཏི དསྶེནྟོ ཨཱཧ ‘‘རཱུཔཱརམྨཎཱཡ ཀིརིཡཱམནོདྷཱཏུཡཱ ཨཔགམཔདཊྛཱན’’ནྟི. སོཏཝིཉྙཱཎཱདཱིསུཔི ཝུཏྟནཡེནེཝ ཨཏྠོ ཝེདིཏབྦོ. ཀིརིཡཱམནོདྷཱཏུཡཱ ཨཱརམྨཎབྷེདཏོ བྷིནྣསབྷཱཝཏྟཱ ཨཱཧ ‘‘ཀིརིཡཱམནོདྷཱཏཱུན’’ནྟི. ཙཀྑུཝིཉྙཱཎཱདཱིཧི གཧིཏཾ རཱུཔཱདིཨཱརམྨཎཾ ཏདནནྟརམེཝ ཨཔརིཔཏནྟཾ ¶ ཀཏྭཱ སམྤཊིཙྪནྟཾ གཎྷནྟཾ ཝིཡ ཧོཏཱིཏི ཝུཏྟཾ ‘‘རཱུཔཱདིསམྤཊིཙྪནརས’’ནྟི. ཏཐཱབྷཱཝེན སམྤཊིཙྪནབྷཱཝེན པཙྩུཔཊྛཱཏཱིཏི ཏཐཱབྷཱཝཔཙྩུཔཊྛཱནཾ.

ཚསུ ཨཱརམྨཎེསུ ཀདཱཙི པཉྩནྣཾ ཛཙྩནྡྷཱདིཝསེན ཏཏོཔི ཨཱུནཱནཾ, བྲཧྨལོཀེ ཙ དྭིནྣམེཝ ཝིཛཱནནསབྷཱཝཱཔི ཚལཱ༹རམྨཎཝིཛཱནནལཀྑཎཱ ¶ ཝུཏྟཱ ཏཾསབྷཱཝཱནཏིཝཏྟནཏོ, ཚསྭེཝ ཝཱ ཨིཏརེསཾ ཨཱརམྨཎཱནཾ ཨནྟོགདྷཏྟཱ. སནྟཱིརཎཱདིརསཱཏི ཡཐཱསམྦྷཝཾ སནྟཱིརཎཏདཱརམྨཎཱདིཀིཙྩཱ, སནྟཱིརཎཏདཱརམྨཎཔཊིསནྡྷིབྷཝངྒཙུཏིཀིཙྩཱཏི ཨདྷིཔྤཱཡོ. ‘‘ཧདཡཝཏྠུཔདཊྛཱནཱ’’ཏི ཨིདཾ ཨིམཱསཾ དྭིནྣཾ མནོཝིཉྙཱཎདྷཱཏཱུནཾ ཨནིབདྡྷཊྛཱནཏཱཡ ནིབདྡྷཀཱརཎཾ དསྶེཏུཾ ཝུཏྟཾ. ཝུཏྟནཡེན པན ‘‘ཏཾཏཾཨནནྟརཱཏཱིཏཝིཉྙཱཎཱཔགམཔདཊྛཱན’’ནྟིཔི ཝཏྟུཾ ཝཊྚཏིཡེཝ. ཨཧེཏུཀཙིཏྟཱནཾ ཝིསུཾ ཝིསུཾ ལཀྑཎཱདིཀསྶ དསྶིཏཏྟཱ པརིསེསཏོ སཧེཏུཀཙིཏྟཱནཾ ཨེཀསདིསམེཝ ལཀྑཎཱདིཀནྟི ཝིཉྙཱཡཏི. ཏཾ པན ཧེཊྛཱ ཝིབྷཱཝིཏམེཝ.

ཨིདཱནི ཨིམཱསཾ ཨཱརམྨཎཱདིཏོ བྷེདཾ དསྶེཏུཾ ‘‘ཏཏྠ པཋམཱ’’ཏིཨཱདི ཝུཏྟཾ. ཨེཀནྟམིཊྛཱརམྨཎེཏི ཨེཀནྟེནེཝ ཨིཊྛཱརམྨཎེ, ཨཏིཨིཊྛཱརམྨཎེཏི ཨཏྠོ. པཉྩསུ ཋཱནེསཱུཏི སཧེཏུཀཝིཔཱཀཱནཾ ཝུཏྟེསུ ཙཏཱུསུ, སམྤཊིཙྪནཝོཊྛབྦནཱནཾ ཨནྟརཱལ༹སངྑཱཏསནྟཱིརཎཊྛཱནེ ཙཱཏི པཉྩསུ ཋཱནེསུ, པཉྩསུ ཀིཙྩེསཱུཏི ཝཱ ཨཏྠོ. ཀིཉྩཱཔི སོམནསྶཔཊིསནྡྷིཀསྶ དོམནསྶཛཝནཱཝསཱནེ ཏདཱརམྨཎསམྦྷཝེ ཨསཏི ཡཾ ཀིཉྩི པརིཙིཏཔུབྦཾ པརིཏྟཱརམྨཎམཱརབྦྷ ཨུཔེཀྑཱསཧགཏསནྟཱིརཎམུཔྤཛྫཏཱིཏི ཨིཙྪིཏཾ, ཏཐཱ པན ཨུཔྤཛྫམཱནསྶ ཀདཱཙིཡེཝ སམྦྷཝཏོ ཡེབྷུཡྻཔྤཝཏྟིཾ གཧེཏྭཱ ཚ ཋཱནཱནི ཨཝཏྭཱ པཉྩེཝ ཝུཏྟཱནི. ཨཐ ཝཱ ཏཾ ཨུཔྤཛྫམཱནཾ ཏདཱརམྨཎཊྛཱནེཡེཝ ནིབྦཏྟཏཱིཏི ཏཾཝསེནེཝ ཏསྶཱཔི ཋཱནཾ གཧིཏནྟི དཊྛབྦཾ. ཨཙཀྑུསཾཝཏྟནིཀཀམྨནིབྦཏྟཏཱཡ ཛཱཏིཡཱ ཨནྡྷོ ཛཙྩནྡྷོ. ཀིཉྩཱཔི ཧི ཛཱཏིཀྑཎེ ཨཎྜཛཛལཱབུཛཱནཾ སབྦེསམྤི ཙཀྑུ ནཏྠི, ཡསྶ བྷཱཝཱབྷཱཝཏོ ཨནྡྷཱནནྡྷཝིཙཱརཎཱ བྷཝེཡྻ, ཏཐཱཔི ཙཀྑུསྶ ཨུཔྤཛྫམཱནཱརཧཀཱལེཔི ཙཀྑུཝིཔཏྟིཝིབནྡྷཀེན ཀམྨུནཱ པཊིཧཏསཱམཏྠིཡེན པཊིསནྡྷིདཱཡཀེན ¶ ཨིཏརེནཱཔི ཝཱ ཀམྨེན ཏསྶ ཨནུཔཱདིཡམཱནཏྟཱ སཏྟོ ‘‘ཛཙྩནྡྷོ’’ཏི ཝུཙྩཏི. ཨཐ ཝཱ ཛཙྩནྡྷོཏི པསཱུཏིཡཾཡེཝ ཨནྡྷོ, མཱཏུཀུཙྪིཡཾཡེཝ ཨནྡྷོ ཧུཏྭཱ ནིཀྑནྟོཏི ཨཏྠོ. ཏེན དུཧེཏུཀཏིཧེཏུཀཱནཾ མཱཏུཀུཙྪིགཏཀཱལེཔི ཙཀྑུསྶ ཨཝིཔཛྫནཾ སིདྡྷཾ ཧོཏི, ཨེཝཾ ཛཱཏིབདྷིརཱདཱིསུཔི ཡཐཱརཧཾ ཝཏྟབྦཾ. ཛཙྩཛལོ༹ཏི ཛཱཏིཡཱ ཨཉྙཱཎཀོ ¶ . ཀིཉྩཱཔི དུཧེཏུཀཔཊིསནྡྷིཀོཔི ཛཱཏིཡཾ ཨཉྙཱཎཀོ, ཏསྶ པན པཝཏྟིཡཾ པཉྙཱ སམྦྷཝཏཱིཏི ཝུཏྟནཡེན ཡེབྷུཡྻཏོ པཝཏྟིཡམྤི པཉྙཱཡཱསམྦྷཝཏོ ཛཙྩཛལོ༹ ཝེདིཏབྦོ. ཛཙྩུམྨཏྟཀོ སུརཱམེརཡཔཱནཱདིཨུམྨཏྟཀབྷཱཝསཾཝཏྟནིཀཀམྨཔརིབྷཱཝིཏེན ཀམྨེན གཧིཏཔཊིསནྡྷིཀོ. པཎྜཀོཏི པརདཱརགམནཱདིཀམྨཔརིབྷཱཝིཏེན ཀམྨུནཱ གཧིཏཔཊིསནྡྷིཀོ. སོ པཉྩཝིདྷོ ཨཱསིཏྟཔཎྜཀོ ཨུསཱུཡཔཎྜཀོ པཀྑཔཎྜཀོ ཨོཔཀྐམིཀཔཎྜཀོ ནཔུཾསཀཔཎྜཀོཏི. ཨིདྷ པན ཨོཔཀྐམིཀཔཎྜཀསྶ སཧེཏུཀསྶཱཔི བྷཱཝཏོ, ནཔུཾསཀསྶ ཙ ཝིསུཾ གཧཎཏོ ཏཡོ པཎྜཀཱ ཨདྷིཔྤེཏཱ. ཨཱདི-སདྡེན ཛཱཏིམཱུགཛཱཏིཔངྒུལམམྨནཱདཱིནཾ སངྒཧོ. ཀེཙི པན ‘‘ཨེཀཙྩེ ཨཧེཏུཀཔཊིསནྡྷིཀཱ ཨཝིཀལིནྡྲིཡཱ ཧུཏྭཱ ཐོཀཾ ཝིཙཱརཎཔཀཏིཀཱཔི ཧོནྟི, ཏསྨཱ ཏཱདིསཱནམྤི ཨིདྷ ཨཱདི-སདྡེན སངྒཧོ’’ཏི ཝདནྟི. ཨེཏྠ ཙ ཛཙྩནྡྷཱདཱིནམེཝ ཨཡཾ པཊིསནྡྷཱིཏི ན གཧེཏབྦཱ. ཛཙྩནྡྷཱདཡོ པན ཨིམིནཱ པཊིསནྡྷིཾ གཎྷནྟཱིཏི གཧེཏབྦཾ.

༤༣. ཏིཧེཏུཀཔུཉྙསྶཱཏི ཏིཧེཏུཀསྶཔི ཨུཀྐཊྛཔུཉྙསྶ. དུཧེཏུཀམྨསྶ པན སབྦཐཱཔི སོལ༹སནྣཾ ཝིཔཱཀཱནཾ ཨསམྦྷཝཏོ ཏཔྤཊིཀྑེཔཔརཏྟཱ ཙེཏནཱཡ ‘‘ཏིཧེཏུཀཔུཉྙསྶཱ’’ཏི ཨཝིསེསཏོ ཝུཏྟཾ.

ཀཱམཱཝཙརཝིཔཱཀཝཎྞནཱ ནིཊྛིཏཱ.

རཱུཔཱཝཙརཱརཱུཔཱཝཙརཝིཔཱཀཝཎྞནཱ

མཧགྒཏཝིཔཱཀཱནཾ ¶ ཏཾཏཾཀུསལཱགམནཝསེནེཝ ཛྷཱནངྒཧཱནི, ན པན བྷཱཝནཱཝིསེསེནཱཏི ཏེསཾ པཧཱནངྒཱནི ཨནུདྡྷཊཱནི. ཨུཔཔཏྟིཡནྟི ཨུཔཔཏྟིབྷཝེ.

ཨརཱུཔཱཝཙརཝིཔཱཀཙིཏྟཱནི ཝུཙྩནྟཱིཏི སམྦནྡྷོ.

༤༤. ཀུསལཱནུགཏཾ ཀཏྭཱཏི ཀུསལཱནུརཱུཔཾ ཀུསལསདིསཾ ཀཏྭཱ. ཡཐཱ ཀཱམཱཝཙརཝིཔཱཀཾ ཀུསལཏོ ཝིསདིསམྤི ཀཏྭཱ ཝིབྷཏྟཾ, ཨེཝམཀཏྭཱ ཀུསལསདིསམེཝ ཀཏྭཱཏི ཨཏྠཾ ཝདནྟི. ཨཊྛཀཐཱཡཾ ¶ པན ཀུསལཱནནྟརཾ ཀཏྭཱ མཧགྒཏཝིཔཱཀཱནཾ བྷཱཛིཏཔཱལི༹ཾ སནྡྷཱཡ ‘‘ཀུསལཱནུགཏཾ ཀཏྭཱ བྷཱཛིཏ’’ནྟི ཝུཏྟཾ. པཱལི༹ཡཉྷི –

‘‘ཀཏམེ དྷམྨཱ ཨབྱཱཀཏཱ? ཡསྨིཾ སམཡེ ཀཱམཱཝཙརསྶ ཀུསལསྶ ཀམྨསྶ ཀཏཏྟཱ ཨུཔཙིཏཏྟཱ ཝིཔཱཀཾ ཙཀྑུཝིཉྙཱཎཾ ཨུཔྤནྣཾ ཧོཏཱི’’ཏིཨཱདིནཱ (དྷ. ས. ༤༣༡) –

ཀཱམཱཝཙརཝིཔཱཀཾ ཝིབྷཛིཏྭཱ མཧགྒཏཝིཔཱཀཾ ཝིབྷཛནྟེན –

‘‘ཀཏམེ དྷམྨཱ ཨབྱཱཀཏཱ? ཡསྨིཾ སམཡེ རཱུཔཔཏྟིཡཱ མགྒཾ བྷཱཝེཏི, ཝིཝིཙྩེཝ ཀཱམེཧི…པེ… པཋམཾ ཛྷཱནཾ ཨུཔསམྤཛྫ ཝིཧརཏི པཐཝཱིཀསིཎཾ, ཏསྨིཾ སམཡེ ཕསྶོ ཧོཏི…པེ… ཨཝིཀྑེཔོ ཧོཏི, ཨིམེ དྷམྨཱ ཀུསལཱ, ཏསྶེཝ རཱུཔཱཝཙརསྶ ཀུསལསྶ ཀམྨསྶ ཀཏཏྟཱ ཨུཔཙིཏཏྟཱ ཝིཔཱཀཾ ཝིཝིཙྩེཝ ཀཱམེཧི…པེ… པཋམཾ ཛྷཱནཾ ཨུཔསམྤཛྫ ཝིཧརཏི པཐཝཱིཀསིཎཾ…པེ… ཨིམེ དྷམྨཱ ཨབྱཱཀཏཱ’’ཏི (དྷ. ས. ༤༩༨).

ཨེཝཾ ཀུསལཾ ཨུདྡིསིཏྭཱ ཏདནནྟརཾ ཀཏྭཱ མཧགྒཏཾ ཝིཔཱཀཾ ཝིབྷཏྟཾ, ཏསྨཱ ཡཐཱ ཀཱམཱཝཙརཝིཔཱཀཾ, ཨེཝཾ ཨཝིབྷཛིཏྭཱ ¶ ཨིདཾ ཀུསལཱནནྟརཾ ཀཏྭཱ ཝིབྷཏྟནྟི ཨིམམཏྠཾ ཛོཏེཏུཾ ཨཊྛཀཐཱཡཾ ‘‘ཀུསལཱནུགཏཾ ཀཏྭཱ’’ཏི ཝུཏྟཾ. ཨིམིནཱཔི ཙ ཨཱཙརིཡེན པརིཧཱརམུཁེན ཝཀྑམཱནཨཏྠཝིསེསཝཙནིཙྪཱཡ ཏཏྠ ཝུཏྟནཡེནེཝ ཙོདནཱ ཀཏཱ. ཨེཝཉྷི སཏི ཀུསལཱནནྟརཾཡེཝ ཕལཾ ཨུཔྤཛྫཏཱིཏི ཉཱཔནཾ སུཊྛཱུཔཔནྣཾ ཧོཏཱིཏི ཨཡམེཏྠ ཨམྷཱཀཾ ཨཱཙརིཡསྶ མགྒོ.

མཧགྒཏནྟི མཧགྒཏཝིཔཱཀཾ. ཏཉྷི ཨིདྷ ཨདྷིགཏཾ. ཀཱམཱ…པེ… ཡཏོཏི ཡསྨཱ ཀཱམཱཝཙརཀུསལཾ ཨསམཱནཕལཾ ཧོཏི ཏིཧེཏུཀསྶ དུཧེཏུཀཱཧེཏུཀཝིཔཱཀཱནཾ, དུཧེཏུཀསྶ ཙ ཨཧེཏུཀཝིཔཱཀཱནམྤི ཛནནཏོ, ན ཨེཝམིདཾ, ཨིདཾ པན ཨེཀནྟེནེཝ སདིསཝིཔཱཀཛནནཏོ སམཱནཕལམེཝ, ཏསྨཱཏི ཨཏྠོ. ཨེཏྠ ཙ ‘‘ཀུསལ’’ནྟི ཨཝུཏྟེཔི ཀཱམཱཝཙརཔུཉྙཾཝཱཏི ཨུཔམིཏཏྟཱ ཨུཔམེཡྻསྶཔི ཀུསལབྷཱཝོ ཝིཉྙཱཡཏི. ཀསྨཱ པནེཏཾ སདིསཝིཔཱཀཾ, ན ཀཱམཱཝཙརཾ ཝིཡ ཝིསདིསཝིཔཱཀམྤཱིཏི? ཝུཙྩཏེ – ཀཱམཱཝཙརཔུཉྙཉྷི ཨཱཙིནནྟོ རཱུཔཏཎྷཱདིནཱནཱཝཏྠུཀཀཱམཏཎྷཱུཔནིསྶཡཏོ ¶ ཨཱཙིནཏི, ཏསྨཱ ཏདཱུཔནིསྶཡཀུསལཾ ཏདནུརཱུཔཏོ ནཱནཱཝཏྠུཀཾ ཝིཔཱཀཾ ཛནེཏི. མཧགྒཏཾ པན ཨཱཙིནནྟོ ཨེཀཝཏྠུཀཱཡེཝ བྷཝཏཎྷཱཡ ཝསེན ཨཱཙིནཏཱིཏི ཏདནུརཱུཔཏོ ཏཾ ནཱནཱཝཏྠུཾ ཨཛནེཏྭཱ ཨེཀཝཏྠུམེཝ ཛནེཏཱིཏི.

༤༥-༦. སབྦཐཱཏི དྷམྨཏོ ཨཱརམྨཎཏོ པཊིཔདཱདིཏོ ཙ. ཏཐཱ ཧི ཡེ ཕསྶཱདཡོ ཀུསལེ ཙ ལབྦྷནྟི, ཏེ ཝིཔཱཀེཔི ལབྦྷནྟི, ཡསྨིཉྩ ཨཱརམྨཎེ ཀུསལཾ པཝཏྟཏི, ཏཏྠེཝ ཨིདཾ ཝིཔཱཀམྤི. ཡཱཝ པཊིཔདཱདཡོ ཀུསལསྶ ལབྦྷནྟི, ཏཱཝ ཨིམསྶ ཝིཔཱཀསྶཔཱིཏི. ཀཱམཾ ཡསྶ ཀསྶཙི ཚཱཡཱ ཏཾཏཾཝཏྠུསདིསཱཝ, མཧནྟསྶ པན ཀུསལཝིཔཱཀསྶ མཧནྟཱཧིཡེཝ ཨུཔམཱཧི ¶ བྷཝིཏབྦནྟི ‘‘གཛཱདཱིན’’ནྟིཨཱདི ཝུཏྟཾ. ཨཔརེ ཨཔརེ ཨཏྟབྷཱཝེ བྷཝཾ ཝེདནམསྶཱཏི ཨཔརཱཔརིཡཝེདནཾ. ཡདི ཨཔརཱཔརིཡཝེདནཾ ན ཧོཏི, ཀཐཉྩརཧི ཨིམསྶ ཕལུཔྤཏྟཱིཏི ཨཱཧ ‘‘ཛྷཱནཱ ཨཔརིཧཱིནསྶཱ’’ཏིཨཱདི.

༤༧. ཀུསལཱནནྟརནྟི ཀུསལབྷཝཱནནྟརཾ. ཡསྨིཉྷི བྷཝེ ཏཾ ཀུསལཾ ཀཏཾ, སོ ཨིདྷ ཀུསལ-སདྡེན ཨུཔཙཱརཏོ གཧིཏོ ཀམྨཱནནྟརཾཡེཝ ཕལསྶ ཨསམྦྷཝཏོ. ན ཧི ཏཾ ལོཀུཏྟརཀུསལཾ ཝིཡ ཨནནྟརཕལནིཔྥཱདཀཾ, ཨཐ ཁོ ཨེཀཙྩཀཱམཱཝཙརཀུསལཾ ཝིཡ ཨཔརཱཔརིཡཝེདནཾ ཨཧུཏྭཱ སཏིཔི ཨནེཀེཡེཝ ཀཱམཱཝཙརཀམྨེ མཧོགྷོ ཝིཡ པརིཏྟཾ ཨུདཀཾ ཏམཛ྄ཛྷོཏྠརིཏྭཱ ཨཏྟནོཡེཝ ཝིཔཱཀདཱནེན ཨེཀནྟེན ཨནནྟརབྷཝེཡེཝ ཕལཾ ནིབྦཏྟེཏི. ནནུ ཙ ཨཔརིཧཱིནཛ྄ཛྷཱནསྶེཝ ཀསྶཙི ནིཀནྟིཝསེན ཀཱམབྷཝེ པཊིསནྡྷི ཧོཏི. ཏཐཱ ཧི ཏིསྶམཧཱབྲཧྨཱ ཨུཔརིབྲཧྨལོཀཱུཔཔཏྟིཡཱ བྷཱཝིཏམགྒོ བྷིཀྑཱུཧི ཡཱཙིཏོ ཏཏོ ཙཝིཏྭཱ མོགྒལིབྲཱཧྨཎསྶ གེཧེ པཊིསནྡྷིཾ ཨགྒཧེསཱིཏི ཝུཏྟནྟི ཏཾ ཀཐནྟི? ནིཀནྟིབལེནེཝ ཛྷཱནཾ པརིཧཱཡཏཱིཏི ཏཏོ པརིཧཱིནཛ྄ཛྷཱནོ ནིབྦཏྟཏཱིཏི ཝདནྟི. ཨཔརེ པན ཨཱཙརིཡཱ ‘‘ཨནཱིཝརཎཱཝཏྠཱཡ ནིཀནྟིཡཱ ཛྷཱནསྶ པརིཧཱནི ཝཱིམཾསིཏྭཱ གཧེཏབྦཱ’’ཏི ཝཏྭཱ ‘‘སཏིཔི མཧགྒཏཀམྨུནོ ཝིཔཱཀཾ པཊིབཱཧནསམཏྠསྶེཝ པརིཏྟཀམྨསྶ ཨབྷཱཝེ ‘ཨིཛ྄ཛྷཏི, བྷིཀྑཝེ, སཱིལཝཏོ ཙེཏོཔཎིདྷི ཝིསུདྡྷཏྟཱ’ཏི (ཨ. ནི. ༨.༣༥) ཝཙནཏོ ཀཱམབྷཝེ ཙེཏོཔཎིདྷི མཧགྒཏཀམྨསྶ ཝིཔཱཀཾ པཊིབཱཧིཏྭཱ པརིཏྟཀམྨུནོ ཝིཔཱཀསྶ ཨོཀཱསཾ ཀརོཏཱི’’ཏི ཝདནྟི, ཏཾ ཡུཏྟཾ. ཨེཏསྶཱཏི ཨིམསྶཏྠསྶ ཉཱཔནཏྠནྟི སམྦནྡྷོ.

༤༨-༩. ཨེཝཾ ¶ ཨཝིསེསེན ཀུསལསདིསཏཾ ཨཏིདིསིཏྭཱ ཨིདཱནི ཝིསེསཾ དསྶེཏུཾ ‘‘པཊིཔདཱཀྐམོ ¶ ཙེཝཱ’’ཏིཨཱདི ཝུཏྟཾ. ཡཐཱ ཧི དུཀྑཔཊིཔདཾ དནྡྷཱབྷིཉྙཾ ཛྷཱནཾ ཨུཔྤཱདེཏྭཱ པུནཔྤུནཾ སམཱཔཛྫནྟསྶ ཏཾ ཛྷཱནཾ ཏཾཔཊིཔདམེཝ ཧོཏི, ཨེཝཾ ཏསྨིཾ ཏསྨིཾ ཨཔརིཧཱིནེ ཏསྶ ཏསྶ ཝིཔཱཀོ ནིབྦཏྟམཱནོ ཏཾཏཾཔཊིཔདོཝ བྷཝིཏུཾ ཨརཧཏི. ཚནྡཱདྷིཔཏེཡྻཱདིབྷཱཝོ པན ཏསྨིཾ ཁཎེ ཝིཛྫམཱནཱནཾ ཚནྡཱདཱིནཾ ཨདྷིཔཏིཔཙྩཡབྷཱཝེན ཧོཏི, ན ཨཱགམནཝསེན. ཏཐཱ ཧི ཨེཀམེཝ ཛྷཱནཾ ནཱནཀྑཎེསུ ནཱནཱདྷིཔཏེཡྻཾ ཧོཏི, ཏསྨཱ ཝིཔཱཀསྶ ཨཱགམནཝསེན ཚནྡཱདྷིཔཏེཡྻཱདིཏཱ ན གཧིཏཱ. ཏེནཱཧ ‘‘ཨབྷཱཝོདྷིཔཏཱིན’’ནྟི. ཏདབྷཱཝཏོཝ སརསཏོ ཏསྶ ཧཱིནཱདིཏཱ ན སམྦྷཝཏཱིཏི སཱཔི ཛྷཱནཱགམནཏོཝ ཝུཏྟཱ.

རཱུཔཱཝཙརཱརཱུཔཱཝཙརཝིཔཱཀཝཎྞནཱ ནིཊྛིཏཱ.

ལོཀུཏྟརཝིཔཱཀཝཎྞནཱ

མགྒཙིཏྟསྶ ཝིཡ ཕལཙིཏྟསྶ མགྒཡོགཏོ བྷེདཱབྷཱཝེན ‘‘ཙཏུམགྒཡོགཏོ’’ཏི ཨཝཏྭཱ ‘‘ཙཏུམགྒསམྤཡུཏྟཙིཏྟཕལཏྟཱ’’ཏི ཝུཏྟཾ, ཙཏཱུཧི ཨརིཡམགྒེཧི སམྤཡུཏྟཀུསལཙིཏྟསྶ ཕལཏྟཱ ཙཏུབྦིདྷསཱམཉྙཕལསམྤཡུཏྟཙིཏྟབྷཱཝཏོཏི ཨཏྠོ. སོཏཱཔཏྟིམགྒསྶ ཕལཾ ཙིཏྟཾ སོཏཱཔཏྟིམགྒཕལཙིཏྟཾ. ཨེཝཾ སེསེསུ. མགྒཝཱིཐིཡཾ དྭིཀྑཏྟུཾ, ཏིཀྑཏྟུཾ ཝཱ ཕལསམཱཔཏྟིཡཱ ཨཔརིཙྪིནྣཔརིམཱཎཾ པཝཏྟམཱནམྤི དྭཱིསྭེཝ ཋཱནེསུ པཝཏྟིཡཱ དུཝིདྷམེཝ ཧོཏཱིཏི ཨཱཧ ‘‘མགྒཝཱིཐིཕལསམཱཔཏྟིཝསེན པཝཏྟིཏོ དུཝིདྷ’’ནྟི.

༥༠-༡. མགྒསྶཱནནྟརེ ཕལེ ལབྦྷནྟི མགྒཱགམནཏོཏི ཨདྷིཔྤཱཡོ. མགྒོ ཧི ཨཱགམནཏོ ‘‘སུཉྙཏོ’’ཏི ལདྡྷནཱམོ སགུཎཱལམྦཎཝསེན ཨནིམིཏྟཨཔྤཎིཧིཏནཱམམྤི ལབྷཏཱིཏི ཕལསྶ ནཱམཏྟཡམྤི དེཏི, ཏཐཱ ཨཱགམནཏོ ཨཔྤཎིཧིཏོ ¶ མགྒོ སགུཎཱརམྨཎཝསེན ཨནིམིཏྟསུཉྙཏཨཔྤཎིཧིཏནཱམཀོཏི ཕལསྶ ནཱམཏྟཡམྤི དེཏི. ཨེཝཉྩ ཀཏྭཱ ཨབྷིདྷམྨེ ཨེཀེཀསྶ ཕལསྶ ཏཱིཎི ཏཱིཎི ནཱམཱནི ཝུཏྟཱནི. ནནུ ཙ ཨབྷིདྷམྨེ ‘‘སགུཎཱརམྨཎཏོ ནཱམཾ ཨནདྷིཔྤེཏ’’ནྟི ཝུཏྟཾ? སཙྩཾ ཝུཏྟཾ, ཏཾ པན ནཱམལཱབྷཾ སནྡྷཱཡ, ན ནཱམདཱནཾ. ཏཏྠ ཧི ཝཝཏྠཱནཀརཏྟཱབྷཱཝཏོ ཏཐཱ ཨནདྷིཔྤེཏཾ, ན ཨལབྦྷནཏོ. ཨིདྷ པན ཨེཀེཀསྶ ¶ ཕལཾ ནཱམཏྟཡམྤི ལབྷཏཱིཏི ཝཝཏྠཱནཔྤཡོཛནཱབྷཱཝཏོ སགུཎཱརམྨཎེཧི ལདྡྷནཱམདཱནསྶ ཨདྷིཔྤེཏཏྟཱ ཏིཝིདྷམྤི ནཱམཾ དེཏི. ཨེཀནྟེན ཙེཏཾ ཨེཝཾ སམྤཊིཙྪིཏབྦཾ, ཨིཏརཐཱ ཝིཔསྶནཱཔི ཝིཔསྶཏོ ལདྡྷནཱམམགྒསྶ ཏཾ ན དདེཡྻཱཏི. པརབྷཱགསྨིནྟི ཨཔརབྷཱགེ. ཝལ༹ཉྫནཕལེསཱུཏི སམཱཔཛྫནཝསེན ཨནུབྷཝིཏབྦཕལེསུ. ‘‘ཝལ༹ཉྫནཕལེསུ ནཱ’’ཏི མགྒཱགམནཾ སནྡྷཱཡ པཊིཀྑིཏྟནྟི ཨཱཧ ‘‘ཝིཔསྶནཱཝསེནེཝཱ’’ཏིཨཱདི. ཝལ༹ཉྫནཕལཉྷི ཝིསུཾ ཝིཔསྶནཱཝསེནེཝ ནིབྦཏྟཏཱིཏི ཏསྶ ཏཾཝསེན ནཱམལཱབྷོ. ཡདི ཨེཝཾ མགྒསྶ ཝིཡ ཨནིམིཏྟནཱམལཱབྷོ ན སིཡཱ? ཏཾ ན, ཡཐཱ མགྒཱནནྟརསྶ ཕལསྶ ཝིཡ ཝལ༹ཉྫནཀཕལསམཱཔཏྟིཡཱཔི མགྒཱགམནཏོ ཙ ཛྷཱནཔཊིཔདཱབྷེདོ ཧོཏི, ཨེཝཾ ཨནིམིཏྟནཱམམྤི ལབྦྷཏཱིཏི.

༥༢-༣. ཧོནྟི སཱདྷིཔཏཱིནེཝཱཏི ཨེཏྠ ཀཱརཎཾ ཝུཏྟམེཝ. མགྒབྷཱཝེནཱཏི སོལ༹སཧི ཨཱཀཱརེཧི ཙཏུསཙྩཔཊིཝེདྷཀམགྒབྷཱཝེན, ཀིལེསམཱརཎཝསེན གམནསངྑཱཏེན, ནིབྦཱནཏྠིཀེཧི མགྒིཏབྦབྷཱཝསངྑཱཏེན ཝཱ མགྒབྷཱཝེན. ཕལཾ…པེ… ཝུཙྩཏཱིཏི སཡཾ ཕལབྷཱཝམྤི མགྒསྶ ཕལཏྟཱ, ཏཾསདིསཏཱཡ ཝཱ ཏམུཔཱདཱཡ མགྒོཏི ཝུཙྩཏི ‘‘མགྒངྒཾ མགྒཔརིཡཱཔནྣ’’ནྟིཨཱདཱིསཱུཏི ཨདྷིཔྤཱཡོ.

ལོཀུཏྟརཝིཔཱཀཝཎྞནཱ ནིཊྛིཏཱ.

ཨཀུསལཝིཔཱཀཝཎྞནཱ

ཡཐཱ ¶ ཨཏིཨིཊྛེ ཨིཊྛམཛ྄ཛྷཏྟེ ཙ ཨཱརམྨཎེ ཝེདནཱབྷེདསམྦྷཝཏོ ཀུསལཝིཔཱཀམནོཝིཉྙཱཎདྷཱཏུ དུཝིདྷཱ ཧོཏི སོམནསྶསཧགཏཱ, ཨུཔེཀྑཱསཧགཏཱཏི, ཨེཝཾ ཨཏིཨནིཊྛེ ཨནིཊྛམཛ྄ཛྷཏྟེ ཙ ཨཱརམྨཎེ ཝེདནཱབྷེདོ ནཏྠཱིཏི ཨཀུསལཝིཔཱཀམནོཝིཉྙཱཎདྷཱཏུ ཨེཀཝིདྷཱཝཱཏི ‘‘སཏྟཱཀུསལཝིཔཱཀཱནཱི’’ཏི ཝུཏྟཾ. སཏི ཧི ཏཏྠ ཝེདནཱབྷེདེ ཨཏིཨནིཊྛེ དོམནསྶེན བྷཝིཏབྦཾ, ན ཙ པཊིགྷེན ཝིནཱ དོམནསྶཾ ཨུཔྤཛྫཏཱིཏི. ཀཱཡཝིཉྙཱཎསྶ དུཀྑསཧགཏཱ ཀུསལཝིཔཱཀེ ཝུཏྟཝིཔརིཡཱཡེན ཝེདིཏབྦཱ. ཨེཏྠ ཙ ཨཀུསལཝིཔཱཀེསུ ལབྦྷམཱནདུཀྑཾ ¶ ཝིཡ ནཱཏིཀཊུཀཱཔི ཨུཔེཀྑཱ ཨེཀནྟནིཧཱིནསྶ ཨཀུསལསྶ ཝིཔཱཀབྷཱཝཏོ དུཀྑསབྷཱཝཏྟཱ ཧཱིནཱ ཨེཝ. ན ཧི ཨཀུསལསྶ ཝིཔཱཀོ ཨདུཀྑོ ཧོཏི, ཨུཔེཀྑཱབྷཱཝོ པནསྶ བལཝཏཱ བཱདྷིཡམཱནསྶ པཊིཔཧརིཏུཾ ཨསཀྐོནྟསྶ དུབྦལཔུརིསསྶ ཏེན ཀརིཡམཱནབཱདྷསྶ ཨུཔེཀྑནཱ ཝིཡཱཏི དཊྛབྦཾ. ཨིམཱནི…པེ… ཙིཏྟཱནཱིཏི ཨིམཱནི སཏྟ ཨེཀེཀསྶ ཨཀུསལསྶ ཝིཔཱཀཙིཏྟཱནི, ན པན ཀུསལཝིཔཱཀེ ཝིཡ ཏིཧེཏུཀཱདིཔུཉྙཝིསེསེན. ཨུདྡྷཙྩསཧགཏསྶཔི ཧི པཝཏྟིཡཾ སཏྟེཝ ཝིཔཱཀཱ ལབྦྷནྟི. ཀསྨཱ པནེཏྠ ཡཐཱ ཀུསལཝིཔཱཀཾ སཧེཏུཀམྤི ཨུདྡྷཊཾ, ན ཨེཝཾ ཨཀུསལཝིཔཱཀནྟི? ཧེཏཱུནཾ ཨསམྦྷཝཏོ. ལོབྷཱདཱིནཉྷི ཨེཀནྟསཱཝཛྫཏཱཡ ཨཡོནིསོམནསིཀཱརཧེཏུཀཱནཾ ནཏྠི ཝིཔཱཀབྷཱཝོ, ཨལོབྷཱདཱིནམྤི ཨེཀནྟམནཝཛྫསབྷཱཝཱནཾ ཝཱ ཀཱརཎསྶ ཏབྦིདཱུརཏཱཡ ནཏྠེཝ ཨཀུསལཝིཔཱཀབྷཱཝོ. ན ཧི ཨལོབྷཱདཱིནཾ པཊིཔཀྑལོབྷཱདཡོ ཏེ ཨབྷིནིཔྥཱདེནྟི, ཏསྨཱ ཨིདཾ སབྦཐཱ སཧེཏུཔྤཝཏྟིཡཱ ཨསམྦྷཝཏོ ཨཧེཏུཀམེཝཱཏི.

ཀམྨཀམྨནིམིཏྟགཏིནིམིཏྟེསཱུཏི ཨེཏྠ ཨཏཱིཏབྷཝེ ཨཱཡཱུཧིཏཾ ཨཔརཱཔརིཡཝེདནཱིཡཾ, ཨུཔཔཛྫཝེདནཱིཡཾ ཝཱ ཀམྨཾ ཀམྨཾ ནཱམ ¶ . ཀམྨཀརཎཀཱལེ ཙེཏནཱཡ གཧིཏམཱརམྨཎཾ ཀམྨནིམིཏྟཾ ནཱམ. ཨུཔཔཛྫིཏབྦབྷཝཔརིཡཱཔནྣོ ནརཀཱདཱིསུ ཨགྒིཛཱལཱདིཝཎྞོ གཏིནིམིཏྟཾ ནཱམ.

༥༤. ཨིམེཏི ཨཀུསལཝིཔཱཀཱ. ཏེསཾ ཨནིཊྛཱནིཊྛམཛ྄ཛྷཏྟཝིསཡེསུ པཝཏྟིཝཙནེན ཏབྦིཔརིཡཱཡེན ཀུསལཝིཔཱཀཱནཾ ཨིཊྛཨིཊྛམཛ྄ཛྷཏྟཝིསཡེསུ པཝཏྟི ཨཏྠཏོ ཨཱཔནྣཱཏི སཱ ཝིསུཾ ན ཝུཏྟཱ. སུཁཱདིཏྟཡཡུཏྟཱཏི སུཁསོམནསྶུཔེཀྑཱཡུཏྟཱ.

‘‘ཨེཝ’’ནྟིཨཱདི ཡཐཱཝུཏྟཝིཔཱཀཱནཾ ནིགམནཾ.

ཨཀུསལཝིཔཱཀཝཎྞནཱ ནིཊྛིཏཱ.

ཝིཔཱཀཙིཏྟཝཎྞནཱ

༥༥. པཱཀསྶ ¶ ཨསུརཀཉྙཱནཾ གབྦྷཔརིཔཱཀསྶ སཱསནཏོ ཝིནཱསནཏོ, པཱཀསངྑཱཏསྶ ཝཱ ཨསུརསྶ ཝིནཱསནཏོ པཱཀསཱསནོ ཝུཙྩཏི སཀྐོ དེཝརཱཛཱ, ཏེན པཱུཛིཏོ པཱཀསཱསནཔཱུཛིཏོ. པཱཀཾ ཝཱ པརིཔཀྐཾ སཱསནམེཏེསཱུཏི པཱཀསཱསནཱ, ཁཱིཎཱསཝཱ, ཏེཧི པཱུཛིཏོཏི པཱཀསཱསནཔཱུཛིཏོ.

ཝིཔཱཀཙིཏྟཝཎྞནཱ ནིཊྛིཏཱ.

དཱནཱདིཝསེནཱཏི པཝཏྟཱཀཱརམཏྟཏོ དཱནཱདིཝསེན, ན པན པུཉྙཀིརིཡཝཏྠུཝསེན ཁཱིཎཱསཝསནྟཱནགཏསྶ པུཉྙཀིརིཡབྷཱཝཱབྷཱཝཏོཏི ཝུཏྟོཝཱཡམཏྠོ.

ཨཱཝཛྫཏཱིཏི ཨཱཝཛྫནཾ, ཨཱབྷུཉྫཏི ཨོཎོཛེཏི པརིཎཱམེཏི ཝཱརེཏཱིཏི ཝཱ ཨཏྠོ. ཏཉྷི ཨཱཔཱཐགཏཾ ཨཱརམྨཎཾ པཋམམཱབྷུཉྫཏི, ཙཀྑུཝིཉྙཱཎཱདཱིནི ཝཱིཐིཙིཏྟཱནི ཨཱཔཱཐགཏཱརམྨཎཱབྷིམུཁཾ ཨོཎོཛེཏི, ཙིཏྟསནྟཱནཾ ཝཱ པུརིམཱཀཱརཏོ ཨཉྙཐཱ པརིཎཱམེཏི, ཨནུཔྤབནྡྷཏོ པཝཏྟནཀཾ བྷཝངྒཙིཏྟསནྟཱནཾ པརཏོ པཝཏྟིཏུཾ ཨདཏྭཱ ཨཱཔཱཐགཏཾ ¶ ཝཱ ཨཱརམྨཎཾ ཨཉྙཏྠ གནྟུཾ ཨདཏྭཱ ཝཱརེཏི. ཧསིཏཾ ཨུཔྤཛྫཏི, ཨུཔྤཱདཱིཡཏི ཝཱ ཨེཏེནཱཏི ཧསིཏུཔྤཱདཾ, ཏདེཝ ཙིཏྟནྟི ཧསིཏུཔྤཱདཙིཏྟཾ. ཝོཊྛཔེཏཱིཏི ཝོཊྛབྦནཾ. ཀསྨཱ པནེཏྠ ཨཱཝཛྫནཝོཊྛབྦནཱནི ཨུཔེཀྑཱསཧགཏཱནི, ཧསིཏུཔྤཱདཉྩ སོམནསྶསཧགཏནྟི? ཝུཙྩཏེ – ཨཱཝཛྫནཾ ཏཱཝ ཨཔུབྦཱརམྨཎེ སཀིདེཝ ཙ པཝཏྟམཱནསནྟཏིཝིཙྪེདཝསེན པཝཏྟནཏོ, དུབྦལབྷཝངྒཔཙྩཡཾ ཝཱ སབྦཐཱ ཝིསཡརསམནུབྷཝིཏུཾ ན སཀྐོཏཱིཏི ཨིཊྛཱདཱིསུ སབྦཏྠ ཨུཔེཀྑཱཡུཏྟམེཝ ཧོཏི. ཝོཊྛབྦནཉྩ ཝུཏྟཝིཔརིཡཱཡེན ཝེདནཱབྷེདཱརཧམྤི སམཱནཾ ཝིཔཱཀཔྤབནྡྷཾ ཝིཙྪིནྡིཏྭཱ ཝིསདིསཙིཏྟཔྤབནྡྷསྶ ནིབྦཏྟནཏོ སནྟཏིཔརིཎཱམནེཡེཝ ཀིཙྩནྟརེ བྱཱཝཊཏྟཱ ཝིཔཱཀཾ ཝིཡ ཨཱརམྨཎརསསྶཱདེ ཨསམཏྠམེཝཱཏི སབྦཏྠ ཨུཔེཀྑཱསཧགཏམེཝ. ཧསིཏུཔྤཱདཾ པན ཝུཏྟཝིཔརཱིཏཏོ པརིཧཱིནཝིཔལླཱསཱནཾ ཁཱིཎཱསཝཱནཾ སནྟཱནེ ཨིཊྛཱརམྨཎེཡེཝ ཨུཔྤཛྫནཏོ སབྦཐཱ སོམནསྶསཧགཏམེཝཱཏི.

ལཀྑཎཱདིཏོ པནེཏཱསུ པུརིམཾ ཙཀྑུཝིཉྙཱཎཱདཱིནཾ པུརེཙརཾ རཱུཔཱདིཝིཛཱནནལཀྑཎཾ, ཨཱཝཛྫནརསཾ ¶ , ཏཐཱབྷཱཝཔཙྩུཔཊྛཱནཾ, བྷཝངྒཝིཙྪེདཔདཊྛཱནཾ. དུཏིཡཾ ཚལཱ༹རམྨཎཝིཛཱནནལཀྑཎཾ, ཨརཧཏཾ ཨནོལཱ༹རིཀེསུ ཝཏྠཱུསུ ཧསིཏུཔྤཱདརསཾ, ཏཐཱབྷཱཝཔཙྩུཔཊྛཱནཾ, ཨེཀནྟཏོ ཧདཡཝཏྠུཔདཊྛཱནཾ. ཏཏིཡམྤི ཚལཱ༹རམྨཎཝིཛཱནནལཀྑཎཾ, པཉྩདྭཱརམནོདྭཱརེསུ ཝོཊྛབྦནཱཝཛྫནརསཾ, ཏཐཱབྷཱཝཔཙྩུཔཊྛཱནཾ, ཨཧེཏུཀཝིཔཱཀམནོཝིཉྙཱཎདྷཱཏུབྷཝངྒཱནཾ ཨཉྙཏརཱཔགམཔདཊྛཱནནྟི.

བྷཝངྒཾ ཨཱཝཊྚཡམཱནཱཏི བྷཝངྒསནྟཱནཾ ཨཱཝཊྚཡནྟཱི ཝིཡ. སཱདྷཱརཎཱཏི སེཀྑཱསེཀྑཔུཐུཛྫནཱནཾ སཱདྷཱརཎཱ. ཨསཱདྷཱརཎཱཏི ཨསེཀྑཱནཾཡེཝ ཨཱཝེཎིཀཱ. ཏེནཱཧ ‘‘ཁཱིཎཱསཝསྶཱ’’ཏི. ཚསུ དྭཱརེསུ…པེ… ཨཱརམྨཎེསཱུཏི ¶ ཙཀྑཱདཱིསུ ཚསུ དྭཱརེསུ, པདྷཱནསཱརུཔྤཊྛཱནཱདིགཏེསུ ཚསུ རཱུཔཱདིཨཱརམྨཎེསུ. པདྷཱནསཱརུཔྤཉྷི ཋཱནཾ དིསྭཱ དིཊྛདྷམྨསུཁཝིཧཱརཏྠཱཡ ‘‘སཱརུཔྤམིདཾ ཋཱནཾ མཡཱ ལདྡྷ’’ནྟི ཏུསནྟསྶ ཙཀྑུདྭཱརེ རཱུཔཱརམྨཎེ, བྷཎྜབྷཱཛནཊྛཱནེ མཧཱསདྡཾ སུཏྭཱ ‘‘ཨེཝརཱུཔཱ ལོལུཔྤཏཎྷཱ མེ པཧཱིནཱ’’ཏི ཏུསནྟསྶ སོཏདྭཱརེ སདྡཱརམྨཎེ, གནྡྷེཧི ཝཱ པུཔྥེཧི ཝཱ ཙེཏིཡཔཱུཛནཀཱལེ ‘‘ཨེཝརཱུཔེན ཝཏ སུགནྡྷེན བྷགཝནྟཾ པཱུཛེམཱི’’ཏི ཏུསནྟསྶ གྷཱནདྭཱརེ གནྡྷཱརམྨཎེ, རསསམྤནྣཾ པིཎྜཔཱཏཾ སབྲཧྨཙཱརཱིཧི སཧ བྷཱཛེཏྭཱ པརིབྷུཉྫནཀཱལེ ‘‘སཱརཎཱིཡདྷམྨོ ཝཏ མེ པཱུརིཏོ’’ཏི ཏུསནྟསྶ ཛིཝ྄ཧཱདྭཱརེ རསཱརམྨཎེ, ཨཱབྷིསམཱཙཱརིཀཝཏྟཔཱུརཎཀཱལེ ‘‘ཀཱཡེན ཝཏྟཔཊིཝཏྟཾ པཱུརེམཱི’’ཏི ཏུསནྟསྶ ཀཱཡདྭཱརེ ཕོཊྛབྦཱརམྨཎེཏི ཨེཝཾ པཉྩདྭཱརེསུ པཉྩཱརམྨཎེསུ པཝཏྟཏི.

མནོདྭཱརེ པན ཡཐཱཝུཏྟེསྭེཝ པཉྩསུ པཙྩུཔྤནྣཱརམྨཎེསུ གྷཊིཀཱརསུཏྟཱདཱིསུ (མ. ནི. ༢.༢༨༢ ཨཱདཡོ) ཝིཡ བྷགཝཏོ པུབྦེནིཝཱསཉཱཎེན པརིཉྙཱཏེ ཨཏཱིཏཱརམྨཎེ, ‘‘ཨཊྛིསྶརོ ནཱམ པཙྩེཀབུདྡྷོ བྷཝིསྶཏཱི’’ཏི (དྷ. པ. ཨཊྛ. ༡.༡༦ དེཝདཏྟཝཏྠུ) ཨཱགཏཊྛཱནཱདཱིསུ ཝིཡ ཨནཱགཏཾསཉཱཎེན པརིཙྪིནྣེ ཨནཱགཏཱརམྨཎེ ཙཱཏི ཨེཝཾ ཚསྭེཝཱརམྨཎེསུ ཧསིཏཾ ཨུཔྤཱདེཏཱིཏི ཝེདིཏབྦཾ. ནནུ ཙ ཨཏཱིཏཾསཱདཱིསུ ཨཔྤཊིཧཏཱདཱིསུ ཨཔྤཊིཧཏཉཱཎཾ ཝཏྭཱ ‘‘ཨིམེཧི ཏཱིཧི དྷམྨེཧི སམནྣཱགཏསྶ བུདྡྷསྶ བྷགཝཏོ སབྦཾ ཀཱཡཀམྨཾ ཉཱཎཔུབྦངྒམཾ ཉཱཎཱནུཔརིཝཏྟ’’ནྟི ཝཙནཏོ ཝིཙཱརཎཔཉྙཱརཧིཏཱཡ ཨེཏཱཡ ཀཐཾ བྷགཝཏོ ཨུཔྤཏྟི ཡུཛྫེཡྻཱཏི? ཧསིཏུཔྤཱདཙིཏྟེན པཝཏྟིཡམཱནམྤི བྷགཝཏོ སིཏཀརཎཾ པུབྦེནིཝཱསཨནཱགཏཾསསབྦཉྙུཏཉྙཱཎཱནཾ ཨནུཝཏྟཀཏྟཱ ཉཱཎཱནུཔརིཝཏྟིཡེཝ, ཨེཝཾ པན ཉཱཎཱནུཔརིཝཏྟིབྷཱཝེ སཏི ན ཀོཙི པཱལི༹ཝིརོདྷོ. ཨེཝཉྩ ཀཏྭཱ ཨཊྛཀཐཱཡཾ ‘‘ཏེསཾ ཉཱཎཱནཾ ཙིཎྞཔརིཡནྟེ ཨིདཾ ¶ ཙིཏྟཾ ཨུཔྤཛྫཏཱི’’ཏི ཝུཏྟཾ. ཨཝསྶཉྩེཏཾ ཨེཝཾ ཨིཙྪིཏབྦཾ, ཨིཏརཐཱ ཨཉྙསྶཱཔི ཝིཉྙཏྟིསམུཊྛཱཔཀསྶ ཨཧེཏུཀཙིཏྟསྶ བྷགཝཏོ ཨུཔྤཏྟི ན ¶ ཡུཛྫེཡྻ. ན ཧི ཝིཉྙཏྟིསམུཊྛཱཔཀསྶ ཏཾསམུཊྛིཏཱཡ ཝིཉྙཏྟིཡཱ ཀཱཡཀམྨཱདིབྷཱཝཾ ཨཱཔཛྫནབྷཱཝོ ཝིབནྡྷཏཱིཏི. ཨེཝཉྩ ཀཏྭཱ པཉྩདྭཱརེ ཨིམིནཱ ཙིཏྟེན སོམནསྶུཔྤཱདནམཏྟཾ དཊྛབྦཾ, ན ཧཱསུཔྤཱདནཾ པཉྩདྭཱརིཀཙིཏྟཱནཾ ཨཝིཉྙཏྟིཛནཀཏྟཱ. མནོདྭཱརེ པན ཧཱསུཔྤཱདནཾ. ཏེནེཝ ཧི ཨཊྛཀཐཱཡཾ པཉྩདྭཱརེ ‘‘སོམནསྶིཏོ ཧོཏཱི’’ཏི (དྷ. ས. ཨཊྛ. ༥༦༨) ཨེཏྟཀམེཝ ཝུཏྟཾ, མནོདྭཱརེ ཙ ‘‘ཧཱསཡམཱན’’ནྟི. ཨིདྷ པན ‘‘ཧསིཏུཔྤཱདཀིཙྩཱ’’ཏི ཨཝིསེསཝཙནཾ པཉྩདྭཱརེ སོམནསྶཀརཎཝསེན པཝཏྟསྶཔི མནོདྭཱརེ ཧཱསཛནནསྶ པཙྩཡབྷཱཝཾ སནྡྷཱཡ ཝུཏྟནྟི ཝེདིཏབྦཾ. ཧསིཏུཔྤཱདཀིཙྩཱཏི ཧསིཏསྶེཝ ཨུཔྤཱདནཀིཙྩཱ. ཏེནེཝ ཧི ཏཾ ‘‘ཧསིཏུཔྤཱད’’ནྟི ཝུཙྩཏི, ན པན ཨཉྙེསཾ ཧསིཏུཔྤཱདཙིཏྟཱནཾ ཨབྷཱཝཏོ. ཏཐཱ ཧི ཝཀྑཏི ‘‘ཀུསལཏོ ཙཏཱུཧཱི’’ཏིཨཱདི.

ཚ ཨསཱདྷཱརཎཉཱཎཱནཱིཏི ཨཱསཡཱནུསཡཉཱཎཾ, ཨིནྡྲིཡཔརོཔརིཡཉཱཎཾ, ཡམཀཔཱཊིཧཱརིཡཉཱཎཾ, མཧཱཀརུཎཱསམཱཔཏྟིཉཱཎཾ, སབྦཉྙུཏཉྙཱཎཾ, ཨནཱཝརཎཉཱཎནྟི ཨིམཱནི ཚ པཙྩེཀབུདྡྷཱདཱིཧི ཨསཱདྷཱརཎཱནི ཉཱཎཱནི. ནནུ ཙ སབྦཉྙུཏཉྙཱཎམེཝ ཨནཱཝརཎཉཱཎཾ, ཨིཏརཐཱ སབྦཉྙུཏཱནཱཝརཎཉཱཎཱནཾ ཨསབྦཉྙུཏསཱཝརཎཉཱཎཏཱ ཙ ཨཱཔཛྫེཡྻ, ཏཐཱ ཧི ཡདི སབྦཉྙུཏཉྙཱཎཏོ ཨཉྙམནཱཝརཎཉཱཎཾ སིཡཱ, ཏསྶ སཱཝརཎཏྟཱ སཱཝརཎེ ཙ ཝིསཡེ སབྷཱཝཔཊིཝེདྷཱབྷཱཝཏོ སབྦཉྙུབྷཱཝཾ ན སིཛ྄ཛྷེཡྻ, ཨནཱཝརཎཉཱཎསྶ ཙ ཨསབྦདྷམྨཱརམྨཎབྷཱཝེན ཡཏྠ ཏཾ ན པཝཏྟཏི, ཏཏྠཱཝརཎསམྦྷཝཏོ ཨནཱཝརཎབྷཱཝོཔི ན ¶ སིཡཱཏི? སཙྩམེཏཾ, ཨེཀམེཝ ཏཾ ཉཱཎཾ ཨནཝསེསསངྑཏཱསངྑཏསམྨུཏིདྷམྨཝིསཡཏྟཱ སབྦཉྙུཏཉྙཱཎཾ, ཏཏྠ ཙ ཨཱཝརཎཱབྷཱཝཏོ ནིསྶངྒཝཱརམུཔཱདཱཡ ཨནཱཝརཎཉཱཎནྟི ཨེཝཾ ཝིསཡཔཝཏྟིབྷེདེན ཨཉྙེཧི ཨསཱདྷཱརཎབྷཱཝདསྶནཏྠཾ དྭེདྷཱ ཝུཏྟནྟི. ཡཐཱཧ –

‘‘སབྦཾ སངྑཏམསངྑཏཾ ཨནཝསེསཾ ཛཱནཱཏཱིཏི སབྦཉྙུཏཉྙཱཎཾ, ཏཏྠ ཨཱཝརཎཾ ནཏྠཱིཏི ཨནཱཝརཎཉཱཎ’’ནྟིཨཱདི (པཊི. མ. ༡.༡༡༩).

ཨིདྷ ཋཏྭཱཏི ཧསིཏསྶ ཨུཔྤཱདནཏོ ཧསིཏསྶ ཨུཔྤཱདནནྟི ཝུཏྟཙིཏྟསྶ ཨཱགཏཊྛཱནེ ཋཏྭཱ. པརིགྒཎྷིཏབྦཱནཱིཏི པརིཙྪིནྡིཏྭཱ གཎྷིཏབྦཱནི. ཀིཉྩཱཔི རཱུཔཱཝཙརཀིརིཡཱནཾ ཛྷཱནངྒཔྤཧཱནཾ ཝིཔཱཀེ ཝིཡ ཨཱགམནཏོ ཨཧུཏྭཱ ཀུསལེ ཝིཡ བྷཱཝནཱཝིསེསེན པཝཏྟཱཀཱརམཏྟཾཝ ¶ ཧོཏི, པཋམཛ྄ཛྷཱནསྶ པན པཧཱནངྒསམྦྷཝཱབྷཱཝཏོ ཨེཀསྶ ཝསེནེཝ ནིདྡིསིཏུཾ སེསཱནམྤི པཧཱནངྒཾ ཨཝཏྭཱ སམྤཡོགངྒམེཝ ཏེསུ དསྶིཏནྟི.

༥༧. ཡསྨཱ པན བྷཱཝནཱཝསེན པཝཏྟཱཀཱརམཏྟཾ ཝིནཱ བྷཱཝནཱཡ ཀཱཏབྦསྶ ནཱིཝརཎཔྤཧཱནཱདིཀིཙྩསྶ ཨབྷཱཝཏོ ཨུཛུཀཾ བྷཱཝནཱ ནཱམ ན ཧོཏི, ཏསྨཱ ‘‘བྷཱཝནཱཀཱརཝསཔྤཝཏྟཱནཱི’’ཏི ཨཱཀཱར-གྒཧཎཾ ཀཏནྟི.

༥༨-༩. ནནྟི ཏཾ ཡཐཱཝུཏྟརཱུཔཱརཱུཔསམཱཔཏྟིཾ. སམཱཔནྣཱ སཙེ ཀྲིཡཱཏི ཨེཏྠ ཀིཉྩཱཔི སཱ ཨེཝ སམཱཔཏྟི སམཱཔཛྫིཏུཾ ན སཀྐཱ, ནིརུདྡྷཱནཾ ཨནུཔྤནྣཏོ, པཊིལདྡྷསམཱཔཏྟིཀསྶེཝ སམཱཔཛྫིཏུཀཱམཏཱཡ སདྡྷིཾཡེཝ སམཱཔཛྫནཏོ, པཋམཛ྄ཛྷཱནཱདིཀམེཝ པཊིལབྷིཏྭཱ དུཏིཡཛ྄ཛྷཱནཱདིཀཾ སམཱཔཛྫིཏུཾ ཨསཀྐུཎེཡྻབྷཱཝཏོ ཙ, པུབྦེ པཊིལདྡྷསམཱཔཏྟིསདིསཾ པུན སམཱཔཛྫནཏོ པུཐུཛྫནཀཱལསྨིཾ ཨབྷིནིབྦཏྟིཏསམཱཔཏྟིསདིསཱ ཨེཏྠ སཱ ཨེཝ ཏཐཱ ཝུཏྟཱ.

༦༡. ཨེཀཙིཏྟཀྑཎཏྟཱཏི ¶ ཨེཀཙིཏྟཀྑཎེཡེཝ པཝཏྟནཏོ. ཡདི ཧི སོ པུནཔྤུནཾ ཨུཔྤཛྫེཡྻ, ཏདཱསྶ ཨརཧཏོ ཨུཔྤཏྟིཡཱ ཀིརིཡབྷཱཝོ ཨིཙྪིཏབྦོ སིཡཱ. སཀིཾཡེཝ པན པཝཏྟཏི ཙཏུསཙྩཔཊིཝེདྷཀིཙྩསྶ ཨེཀཝཱརེནེཝ པརིནིཊྛཱནཏོ, ཏཀྐིཙྩེན ཙ ཝིནཱ ཏསྶ ཨནུཔལབྦྷནཱིཡཏྟཱ. ཏེནཱཧ – ‘‘ན པཱརཾ དིགུཎཾ ཡནྟཱི’’ཏི (སུ. ནི. ༧༡༩), ཏསྨཱ ནཏྠི ལོཀུཏྟརཾ ཀིརིཡཙིཏྟནྟི ཨཡམེཏྠ ཨདྷིཔྤཱཡོ.

༦༢. ཀྲིཡཱ…པེ… དེསཀོཏི ཡཱ ཨཱཔཏྟིཡོ ཀཱཡཝཱཙཱཧི ཨཀཱཏབྦཾ ཀཏྭཱ ཨཱཔཛྫཏི, ཏཱ ཀིརིཡཱ, ཡཱ པན ཨཱཔཏྟིཡོ ཀཱཡཝཱཙཱཧི ཀཱཏབྦཾ ཨཀརོནྟོ ཨཱཔཛྫཏི, ཏཱ ཨཀིརིཡཱ, ཀིརིཡཱ ཙ ཨཀིརིཡཱ ཙཱཏི ཀིརིཡཱཀིརིཡཱ, ཀིརིཡཱཀིརིཡཱ ཙ ཏཱ ཨཱཔཛྫིཏབྦཏོ ཨཱཔཏྟིཡོ ཙཱཏི ཀིརིཡཱཀིརིཡཱཔཏྟིཡོ, ཏཱསཾ ཝིབྷཱགཾ དེསེཏཱིཏི ཀིརིཡཱ…པེ… དེསཀོ. ཨཐ ཝཱ ཀིརིཡཱཛྷཱནབྷཱུཏཱ སམཱཔཏྟིཡོ ཀིརིཡཱཔཏྟིཡོ, ཀུསལབྷཱུཏཱ པན སམཱཔཏྟིཡོ ཨཀིརིཡཱཔཏྟིཡོ, ཏཱསཾ ཝིབྷཱགཾ དེསེཏཱིཏི ཀྲིཡཱ…པེ… དེསཀོ. ཡཾ ཀིརིཡཱཀིརིཡཾ ཙིཏྟནྟི སམྦནྡྷོ. པཉྩནྣཾ མཱརཱནཾ ཛིཏཏྟཱ ཛིནོ. ཧིཏཱཧིཏཱནནྟི ཨཏྠཱནཏྠཱནཾ. སཱཏི སོ ཛིནོ. ཀྲིཡཱཀྲིཡཱརཏོཏི སབྦསཏྟཱནཾ ཧིཏསྶ ཀརཎེ, ཨཧིཏསྶ ཙ ཨཀརཎེ ནིརཏོ. ཨཐ ཝཱ ཨེཀནྟམིཊྛཝིཔཱཀཏྟཱ ཧིཏཱཏི ཀུསལཱནམེཏཾ ཨདྷིཝཙནཾ ¶ . ཏཔྤཊིཔཀྑཏྟཱ ཨཧིཏཱཏི ཨཀུསལཱནམེཏཾ ཨདྷིཝཙནཾ. ཡཐཱཀྐམཾ ཏེསཾ ཀིརིཡཱཡཾ, ཨཀིརིཡཱཡཉྩ རཏོཏི ཧིཏཱཧིཏཱནཾ…པེ… རཏོ. ཨཐ ཝཱ ཧིཏཱཧིཏཱཏི ཀུསལཱཀུསལཱ ཨེཝ, ཏེསཾ ཀིརིཡཱཀིརིཡཱམཏྟམཝིཔཱཀབྷཱཝཾ ཀཱཏུཾ ཨིཙྪཏཱིཏི ཧིཏཱཧིཏཱནཾ…པེ… རཏོ. ཨཐ ཝཱ ཧིཏཱཧིཏཱནཾ པུགྒལཱནཾ སཀིརིཡཱཀིརིཡཱཡ ཨཏྟནོ ཨཏྟནོ ཀིཙྩསྶ ཨིདྷལོཀཔརལོཀནིཔྥཱདནསྶ ¶ ཀརཎེ རཏོ ཨབྷིརཏོཏི ཧིཏཱཧིཏཱནཾ…པེ… རཏོ.

༦༤-༦. སབྦེ ལོཀུཏྟརེ ཨཊྛ ཀཏྭཱ ཡེ ཨེཀཱུནནཝུཏི ཙིཏྟུཔྤཱདཱ ཝུཏྟཱ, ཏཱནི ཙིཏྟཱནི མཡཱ ནིདྡིཊྛཱནཱིཏི སམྦནྡྷོ. པཱཊཝཾ ཨཏྠེནྟི པཏྠེནྟི, པཱཊཝསངྑཱཏོ ཝཱ ཨཏྠོ ཨེཏེསནྟི པཱཊཝཏྠིནོ. ཨུགྒཧེཏབྦོཏི སཝནཔཊིཔུཙྪཱཝསེན ཨུགྒཧིཏབྦོ, ཨུགྒཎྷིཏྭཱ པན ན ཀེཝལཾ ཨུགྒཧཎམཏྟེཡེཝ ཋཱཏབྦནྟི དསྶེནྟོ ཨཱཧ ‘‘ཙིནྟེཏབྦོ པུནཔྤུན’’ནྟི, ན ཧི སཀྐཱ ཨུགྒཧཎམཏྟེནེཝེཏྠ སབྦཐཱ སནྣིཊྛཱནཾ གནྟུནྟི ཨདྷིཔྤཱཡོ. ཨབྷིདྷམྨམཧོདདྷིནྟི དྷམྨསངྒཎཱིཨཱདིསཏྟཔྤཀརཎཝསེན ཋིཏམབྷིདྷམྨཔིཊཀམཧཎྞཝཾ, ཁནྡྷཱཡཏནཱདིཝསེན ཋིཏཾ པརམཏྠམཧཎྞཝཾ ཝཱ. ཏརནྟཱིཏི ཨཏྠགྒཧཎཝསེན ཨུཏྟརནྟི, སུཏམཡཉཱཎམཱུལཀེན ཝཱ བྷཱཝནཱཉཱཎེན ཨོཏརནྟཱིཏི ཨཏྠོ. ཨིམཾ ལོཀནྟི པཙྩུཔྤནྣབྷཝཾ. པརཾ ལོཀནྟི ཨནཱགཏབྷཝཾ. ཏརནྟཱིཏི ཨཏིཀྐམནྟི. ཨིདྷ ལོཀསྨིཉྷི ཚནྡརཱགཔྤཧཱནཝསེན ཨིམཾ ལོཀཾ ཏརནྟི, ཨཱཡཏིཾ བྷཝཱུཔཔཱདཀསྶ ཀམྨསྶ ཀམྨཀྑཡཀརཉཱཎེན ཝིནཱསནཏོ པརལོཀཾ ཏརནྟི, ཨནུཔཱདཱཔརིནིབྦཱནཝསེན པརིནིབྦཱཡནྟཱིཏི ཨཏྠོ.

ཨིཏི ཨབྷིདྷམྨཏྠཝིཀཱསིནིཡཱ ནཱམ

ཨབྷིདྷམྨཱཝཏཱརསཾཝཎྞནཱཡ

ཙིཏྟནིདྡེསཝཎྞནཱ ནིཊྛིཏཱ.

༢. དུཏིཡོ པརིཙྪེདོ

ཙེཏསིཀནིདྡེསཝཎྞནཱ

༦༧. ཨེཏྟཱཝཏཱ ¶ ཙ ཙིཏྟཾ ཙེཏསིཀཾ རཱུཔཾ ནིབྦཱནནྟི ཨེཝཾ ཨུདྡིཊྛེསུ ཙཏཱུསུ དྷམྨེསུ ཙིཏྟཾ ཏཱཝ ཛཱཏིབྷཱུམིསམྤཡོགཔྤཝཏྟཱཀཱརཱདིཝསེན ཝིབྷཱགེན ནིདྡིསིཏྭཱ ཨིདཱནི ཏདནནྟརཾ ཨུདྡིཊྛེ ¶ ཙེཏསིཀདྷམྨེ ནིདྡིསིཏུཾ ‘‘ཙིཏྟཱནནྟརམུདྡིཊྛཱ’’ཏིཨཱདི ཨཱརདྡྷཾ. ཝིབྷཱཛནནྟི ཛཱཏིབྷཱུམིཨཱདིཝསེན ཝིབྷཱགཾ, ཏེསུ ཏེསུ ཙིཏྟེསུ ཡཐཱརཧཾ སམྤཡོགཝསེན ཝིསུཾ ཝིསུཾ བྷཱཛནཉྩ.

ཀཏམེ པན ཙེཏསིཀཱ, ཡེསཾ ཝིབྷཱཛནཾ ཝུཙྩཏཱིཏི ཏེ སཧ ནིབྦཙནེན སརཱུཔཏོ དསྶེཏུཾ ‘‘ཏཏྠ ཙིཏྟསམྤཡུཏྟཱ’’ཏིཨཱདི ཝུཏྟཾ. ཏཏྠ ‘‘ཙིཏྟསམྤཡུཏྟཱ’’ཏི ཨིདཾ ཙེཏསིཀལཀྑཎདསྶནཾ. ཏེན ཡེ ཙིཏྟེན སཧ སམྤཡོགལཀྑཎེན ཡུཏྟཱ, ཏེཡེཝ ཙེཏསིཀཱཏི དསྶེཏི. ཀིཾ པན ཏཾ སམྤཡོགལཀྑཎནྟི? ཨེཀུཔྤཱདཨེཀནིརོདྷཨེཀཝཏྠུཀཨེཀཱརམྨཎསངྑཱཏཱ པཀཱརཱ. སམཾ པཀཱརེཧི ཡུཏྟཱཏི ཧི སམྤཡུཏྟཱ. ཏཏྠ ཡདི ཨེཀུཔྤཱདཏཱམཏྟེནེཝ ཙ སམྤཡུཏྟཏཱ ཨདྷིཔྤེཏཱ, སཧུཔྤཏྟིཀཱནཾ རཱུཔཱརཱུཔདྷམྨཱནཾ ཨཉྙམཉྙསམྤཡུཏྟཏཱ ཨཱཔཛྫེཡྻཱཏི ཨེཀནིརོདྷ-གྒཧཎཾ. ཨེཝམྤི ཨཝིནིབྦྷོགརཱུཔཱནཾ ཨཉྙམཉྙསམྤཡུཏྟཏཱ ཨཱཔཛྫེཡྻཱཏི ཨེཀཝཏྠུཀ-གྒཧཎཾ. ཨེཝམྤི ‘‘ཨཝིནིབྦྷོགརཱུཔེསུ ཨེཀཾ མཧཱབྷཱུཏཾ སེསམཧཱབྷཱུཏོཔཱདཱརཱུཔཱནཾ ནིསྶཡཔཙྩཡོ ཧོཏཱིཏི ཏསྨཱ ཏཱནི ཨེཀཝཏྠུཀཱནཱིཏི, ཙཀྑཱདཱིནཾ ནིསྶཡབྷཱུཏཱནི ཝཱ བྷཱུཏཱནི ཨེཀཾ ཝཏྠུ ཨེཏེསུ ནིསྶིཏནྟི ཨེཀཝཏྠུཀཱནཱི’’ཏི ཀཔྤེནྟསྶ ཏེསཾ སམྤཡུཏྟཏཱཔཏྟི སིཡཱཏི ཏནྣིཝཱརཎཏྠཾ ཨེཀཱརམྨཎ-གྒཧཎཾ.

པཊིལོམཏོ ཝཱ ‘‘ཨེཀཱརམྨཎཱ’’ཏི ཝུཏྟེ ཨེཀཝཱིཐིཡཾ པཉྩཝིཉྙཱཎསམྤཊིཙྪནཱདཱིནཾ, ནཱནཱཝཱིཐིཡཾ པརསནྟཱནེ ཙ ཨེཀསྨིཾ ཨཱརམྨཎེ ཨུཔྤཛྫམཱནཱནཾ བྷིནྣཝཏྠུཀཱནཾ སམྤཡུཏྟཏཱ ཨཱཔཛྫེཡྻཱཏི ཨེཀཝཏྠུཀ-གྒཧཎཾ. ཨེཝམྤི མརཎཱསནྣཝཱིཐིཡཾ སམྤཊིཙྪནསནྟཱིརཎཱདཱིནཾ སམྤཡུཏྟཏཱ ཨཱཔཛྫེཡྻཱཏི ཨེཀནིརོདྷ-གྒཧཎཾ. ཀིཾ པན ནཱནུཔྤཱདཱཔི ཨེཝཾ ཏིཝིདྷལཀྑཎཱ ཧོནྟི ¶ , ཨཐ ཨེཀུཔྤཱདཱ ཨེཝཱཏི ཝིཙཱརཎཱཡ ཨེཀུཔྤཱདཱ ¶ ཨེཝ ཨེཝཾ ཏིཝིདྷལཀྑཎཱ ཧོནྟཱིཏི དསྶནཏྠཾ ‘‘ཨེཀུཔྤཱདཱ’’ཏི ཝུཏྟཾ. ཨིཏི ཨིམེཧི ཙཏཱུཧི སམྤཡོགལཀྑཎེཧི ཡེ ཙིཏྟསམྤཡུཏྟཱ, ཏེ ཙེཏསིཀཱ ནཱམཱཏི ཨེཝཾ ཙེཏསིཀལཀྑཎཾ ཋཔིཏཾ ཧོཏི. ཀཐཾ པནེཏེ ཙེཏསིཀཱ ནཱམཱཏི ཨཱཧ ‘‘ཙིཏྟེ བྷཝཱ’’ཏི. ‘‘ཙེཏསི བྷཝཱ ཙེཏསིཀཱ’’ཏི ཝཏྟབྦེ ཙིཏྟ-སདྡསྶཔི ཙེཏོ-སདྡེན སཧ སམཱནཏྠཏཱཡ ཨཏྠམཏྟཾ དསྶེཏུཾ ‘‘ཙིཏྟེ བྷཝཱ ཙེཏསིཀཱ’’ཏི ཝུཏྟཾ.

ནིཡཏཱཏི ནིཡཏུཔྤཏྟིཀཱ, ཀརུཎཱམུདིཏཱདཡོ ཝིཡ ཀདཱཙི ཨནུཔྤཛྫིཏྭཱ ཡདཱ ཡདཱ ཏཾ ཙིཏྟཾ ཨུཔྤཛྫཏི, ཏདཱ ཏདཱཝ ཏེན ཨཝིནིབྷུཏྟཱ ཧུཏྭཱ ཛཱཡམཱནཱཏི ཨཏྠོ. སརཱུཔེན ཨཱགཏཱཏི ཚནྡཱདཡོ ཝིཡ ‘‘ཡེ ཝཱ པན ཏསྨིཾ སམཡེ ཨཉྙེཔི ཨཏྠི པཊིཙྩསམུཔྤནྣཱ ཨརཱུཔིནོ དྷམྨཱ’’ཏི ཨེཝཾ ཡེཝཱཔནཀཝསེན ཨནཱགནྟྭཱ ‘‘ཕསྶོ ཧོཏི, ཝེདནཱ ཧོཏཱི’’ཏིཨཱདིནཱ (དྷ. ས. ༡) སརཱུཔེནེཝ པཱལི༹ཡཾ ཨཱགཏཱ. ཡེཝཱཔནཱཏི ཨེཝཾ དེསནཱ ཨེཏེསནྟི ཡེཝཱཔནཀཱ. ཨེཀཱུནཏིཾས དྷམྨཱཏི ཀིཙྩབྷེདཾ ཨནཱམསིཏྭཱ ཀེཝལཾ ཨསམྦྷིནྣདྷམྨཝསེནེཝ ཨེཀེནཱུནཱ ཏིཾས དྷམྨཱ. པཱལི༹ཡཾ པན ཙིཏྟེན སཧ ཏིཾས དྷམྨེ གཧེཏྭཱ ཏེསཾ ཀིཙྩབྷེདཏོ གཧཎེན ཚཔྤཉྙཱས དྷམྨཱ ཝུཏྟཱ. སེཡྻཐིདནྟི སརཱུཔཔུཙྪཱ. ཕསྶོ…པེ… ཙིཏྟུཛུཀཏཱཏི ཡཐཱཔུཙྪིཏཱནཾ སརཱུཔདསྶནཾ. ཨིཏི-སདྡོ པརིསམཱཔནེ, ནིདསྶནེ ཝཱ. པུན ཏེཏྟིཾས ཧོནྟཱིཏི སམྦནྡྷོ. ཏེཏྟིཾས ཧོནྟཱིཏི ཏེཡེཝ ཨེཀཱུནཏིཾས དྷམྨཱཏི ཨདྷིཔྤཱཡོ.

‘‘ཀདཱཙི ཨུཔྤཛྫནྟཱི’’ཏི ཝུཏྟཾ, ཏཾ ཀཐཾ དཊྛབྦནྟི ཨཱཧ ‘‘ཨིམེསཱུ’’ཏིཨཱདི. ཀརུཎཱམུདིཏཱཝསེནཱཏི པཋམསམནྣཱཧཱརཏོ པཊྛཱཡ གོཏྲབྷུཔརིཡོསཱནཔྤཝཏྟིཏཀརུཎཱམུདིཏཱཔརིཀམྨཝསེན. ཀརུཎཱཔུབྦབྷཱགོཏི ཀརུཎཱཡ ¶ པུབྦབྷཱགོ, པརིཀམྨཔྤནཱཝསེན པཝཏྟཀརུཎཱབྷཱཝནཱཡ ཨཔྤནཱཀོཊྛཱསཏོ པུརིམཀོཊྛཱསོ, པཋམསམནྣཱཧཱརཏོ པཊྛཱཡ གོཏྲབྷུཔརིཡོསཱནཔྤཝཏྟཔརིཀམྨཀོཊྛཱསོ ཧུཏྭཱཏི ཨཏྠོ. ཨེཝཾ ‘‘མུདིཏཱཔུབྦབྷཱགོ’’ཏི ཨེཏྠཱཔི. བྷཱག-སདྡསྶ དྲབྱཝུཏྟིཏཱཡ ཏཔྤུརིསསྶ ཙ ཨུཏྟརཔདཏྠཔྤདྷཱནཏཱཡ ‘‘ཀརུཎཱཔུབྦབྷཱགོ’’ཏིཨཱདིནཱ པུལླིངྒེན ཝུཏྟཾ. ཨེཏ-སདྡསྶ པན གུཎཝུཏྟིཏཱཡ གུཎཝིསེསཝཏི ཝཏྟམཱནོ ཏསྶ ལིངྒཝསེན པརིཎམཏཱིཏི ཀརུཎཱམུདིཏཱཔེཀྑཱཡ ‘‘ཨེཏཱ’’ཏི ཨིཏྠིལིངྒཝསེན ཝུཏྟནྟི. ན པནེཀཏོ ཨུཔྤཛྫནྟི, ཀིཉྩརཧི ཝིསུཾ ཝིསུཾཡེཝཱཏི ཨཏྠོ. ཏེནེཝ ཧི ‘‘ཀརུཎཱཔུབྦབྷཱགོ ཝཱ མུདིཏཱཔུབྦབྷཱགོ ཝཱ’’ཏི ཝིཀཔྤོ ཝུཏྟོཏི. ཀསྨཱ པནེཏཱ དྭེ ཨེཀཏོ ནུཔྤཛྫནྟཱིཏི? བྷིནྣཱརམྨཎཏྟཱ. ཀརུཎཱ ཧི དུཀྑིཏསཏྟེ ཨཱརབྦྷ ཏེསཾ དུཀྑཱཔནཡནཀཱམཏཱཝསེན པཝཏྟཏི, མུདིཏཱ ¶ སུཁིཏསཏྟེ ཨཱརབྦྷ ཏེསཾ སུཁཱནུམོདནཝསེན, ཏསྨཱ ཨུབྷིནྣམྤི བྷིནྣཝིསཡཏྟཱ ན ཨེཀསྨིཾ ཙིཏྟེ ཨུཔྤཏྟི སམྦྷཝཏཱིཏི. མིཙྪཱཀམྨནྟཱདཱིཧཱིཏི ཨཱདི-སདྡེན མིཙྪཱཝཱཙཱམིཙྪཱཛཱིཝཱནཾ གཧཎཾ. སམྨཱཀམྨནྟཱདཱིནི པརིཔཱུརེནྟཱིཏི སམྨཱཀམྨནྟསམྨཱཝཱཙཱསམྨཱཨཱཛཱིཝཱནི པརིཔཱུརེནྟི. ཀོ ཝིརཏཱིཏི ཏཱིསུ ཨེཀཱ ཝིརཏི ཨུཔྤཛྫཏི, སམྨཱཀམྨནྟཾ པཱུརེནྟཱི པཋམཱ, སམྨཱཝཱཙཾ པཱུརེནྟཱི དུཏིཡཱ, སམྨཱཨཱཛཱིཝཾ པཱུརེནྟཱི ཏཏིཡཱ ཝིརཏི ཨུཔྤཛྫཏཱིཏི ཨཏྠོ. ཀརུཎཱམུདིཏཱཧི སཧ ན ཨུཔྤཛྫནྟི ཏཱསཾ པཉྙཏྟཱརམྨཎཏྟཱ, ཝིརཏིཡཱ ཙ ཨེཀནྟཔརིཏྟཱརམྨཎཏྟཱ. ཨཉྙམཉྙེན ཙ ན ཨུཔྤཛྫནྟི ཨཉྙམཉྙསྶཔི བྷིནྣཝིསཡཏྟཱ. མིཙྪཱཀམྨནྟཱདཱིནཉྷི ཨཱརམྨཎཱནེཝ ཡཐཱཀྐམཾ སམྨཱཀམྨནྟཱདཱིནཾ ཨཱརམྨཎཱནི ཏཏོ ཝིརཏིབྷཱཝཏོ. ཨེཏེསཱུཏི ཨིམེསུ པཉྩསུ.

༦༨. ཝིརཏཱིནམྤི ¶ སངྒཧཎཏྠཾ ‘‘ཀརུཎཱམུདིཏཱདཱིསཱུ’’ཏི ཝཏྟབྦེ གཱཐཱབནྡྷསུཁཏྠཾ ཨཱདི-སདྡལོཔཝསེན ‘‘ཀརུཎཱམུདིཏཱསཱུ’’ཏི ཝུཏྟཾ. ཨེཝཉྩ ཀཏྭཱ ཝུཏྟཾ ‘‘ཨེཀེནཱ’’ཏི, ཨིཏརཐཱ ‘‘ཨེཀཱཡཱ’’ཏི ཝཏྟབྦནྟི.

༦༩-༧༡. ཀིཾ པནེཏྠ ཀཱརཎཾ, ཙཏཱུསུ བྲཧྨཝིཧཱརེསུ དྭེ ཨིདྷ ནིདྡིཊྛཱ, ན ཨིཏརཱཏི ཙོདེནྟོ ཨཱཧ ‘‘ཀསྨཱ པནཱ’’ཏིཨཱདི. ཨུཔེཀྑཱ ཙ ན ཨུདྡྷཊཱཏི སམྦནྡྷོ. ནཝཧི ལོཀུཏྟརདྷམྨེཧི ཛནཾ རཉྫེཏཱིཏི དྷམྨརཱཛཱ. དིཊྛདྷམྨིཀསམྤརཱཡིཀཏྠེཧི སདེཝཀཾ ལོཀཾ ཨནུསཱསཏཱིཏི སཏྠཱ. ཨབྱཱཔཱདེན མེཏྟཱ གཧིཏཱ ཏསྶེཝ ཧིཏཱཀཱརཔྤཝཏྟིཀཱལེ མེཏྟཱབྷཱཝཱུཔགམནཏོ. ཏེནེཝ ཧེས ‘‘མེཏྟཱ མེཏྟཱཡནཱ’’ཏིཨཱདིནཱ ནིདྡིཊྛོ. ཏཏྲམཛ྄ཛྷཏྟཏཱཡ ཨུཔེཀྑཱ གཧིཏཱ ཏཱཡེཝ སཏྟེསུ མཛ྄ཛྷཏྟཱཀཱརཔྤཝཏྟཱཡ ཨུཔེཀྑཱབྲཧྨཝིཧཱརབྷཱཝཏོ. ཨཱདིཙྩེན སཧ སམཱནགོཏྟཏཱཡ, ཨརིཡསཱཝཀབྷཱཝེན ཝཱ ཏསྶ བྷགཝཏོ པུཏྟཏཱཡ ཨཱདིཙྩོ བནྡྷུ ཨིམསྶ, ཨཱདིཙྩསྶ ཝཱ བནྡྷཱུཏི ཨཱདིཙྩབནྡྷུ.

༧༢. རཱསིནྟི ཕསྶཔཉྩཀཱདིསཏྟརསརཱསིཾ. པཋམམཧཱཙིཏྟུཔྤཱདཝསེན ཧི –

‘‘ཕསྶོ ཧོཏི, ཝེདནཱ ཧོཏི, སཉྙཱ ཧོཏི, ཙེཏནཱ ཧོཏི, ཙིཏྟཾ ཧོཏི, ཝིཏཀྐོ ཧོཏི, ཝིཙཱརོ ཧོཏི, པཱིཏི ཧོཏི, སུཁཾ ཧོཏི, ཙིཏྟསྶེཀགྒཏཱ ཧོཏི, སདྡྷིནྡྲིཡཾ ཧོཏི, ཝཱིརིཡིནྡྲིཡཾ ཧོཏི, སཏིནྡྲིཡཾ ཧོཏི, སམཱདྷིནྡྲིཡཾ ཧོཏི, པཉྙིནྡྲིཡཾ ¶ ཧོཏི, མནིནྡྲིཡཾ ཧོཏི, སོམནསྶིནྡྲིཡཾ ཧོཏི, ཛཱིཝིཏིནྡྲིཡཾ ཧོཏི, སམྨཱདིཊྛི ཧོཏི, སམྨཱསངྐཔྤོ ཧོཏི, སམྨཱཝཱཡཱམོ ཧོཏི, སམྨཱསཏི ཧོཏི, སམྨཱསམཱདྷི ཧོཏི, སདྡྷཱབལཾ ཧོཏི, ཝཱིརིཡབལཾ ཧོཏི, སཏིབལཾ ཧོཏི ¶ , སམཱདྷིབལཾ ཧོཏི, པཉྙཱབལཾ ཧོཏི, ཧིརིབལཾ ཧོཏི, ཨོཏྟཔྤབལཾ ཧོཏི, ཨལོབྷོ ཧོཏི, ཨདོསོ ཧོཏི, ཨམོཧོ ཧོཏི, ཨནབྷིཛ྄ཛྷཱ ཧོཏི, ཨབྱཱཔཱདོ ཧོཏི, སམྨཱདིཊྛི ཧོཏི, ཧིརཱི ཧོཏི, ཨོཏྟཔྤཾ ཧོཏི, ཀཱཡཔསྶདྡྷི ཧོཏི, ཙིཏྟཔསྶདྡྷི ཧོཏི, ཀཱཡལཧུཏཱ ཧོཏི, ཙིཏྟལཧུཏཱ ཧོཏི, ཀཱཡམུདུཏཱ ཧོཏི, ཙིཏྟམུདུཏཱ ཧོཏི, ཀཱཡཀམྨཉྙཏཱ ཧོཏི, ཙིཏྟཀམྨཉྙཏཱ ཧོཏི, ཀཱཡཔཱགུཉྙཏཱ ཧོཏི, ཙིཏྟཔཱགུཉྙཏཱ ཧོཏི, ཀཱཡུཛུཀཏཱ ཧོཏི, ཙིཏྟུཛུཀཏཱ ཧོཏི, སཏི ཧོཏི, སམྤཛཉྙཾ ཧོཏི, སམཐོ ཧོཏི, ཝིཔསྶནཱ ཧོཏི, པགྒཱཧོ ཧོཏི, ཨཝིཀྑེཔོ ཧོཏཱི’’ཏི (དྷ. ས. ༡) –

ཨེཝཾ དྷམྨུདྡྷཱརཾ ཀརོནྟེན བྷགཝཏཱ ཕསྶཱདཡོ ཏིཾས དྷམྨེ ཚཔྤཉྙཱས ཀཏྭཱ ཕསྶཔཉྩཀརཱསི ཛྷཱནཔཉྩཀརཱསི ཨིནྡྲིཡཊྛཀརཱསི མགྒཔཉྩཀརཱསི བལསཏྟཀརཱསི ཧེཏུཏྟིཀརཱསི ཀམྨཔཐཏིཀརཱསི ལོཀཔཱལདུཀརཱསི ཚཡུགལ༹དུཀརཱསི ཨུཔཀཱརདུཀརཱསི ཡུགནནྡྷདུཀརཱསི ཝཱིརིཡསམཐདུཀརཱསཱིཏི སཏྟརསནྣཾ རཱསཱིནཾ ཝསེན ཝིབྷཱགོ ཀཏོ.

ཀཐཾ? ཨེཏེསུཔི ཙིཏྟཾ ཏཱཝ ཕསྶཔཉྩཀཾ པཏྭཱ ‘‘ཙིཏྟཾ ཧོཏཱི’’ཏི ཝུཏྟཾ, ཨིནྡྲིཡཱནི པཏྭཱ ‘‘མནིནྡྲིཡ’’ནྟི. ཝིཏཀྐོ ཛྷཱནངྒཱནི པཏྭཱ ‘‘ཝིཏཀྐོ ཧོཏཱི’’ཏི ཝུཏྟོ, མགྒངྒཱནི པཏྭཱ ‘‘སམྨཱསངྐཔྤོ’’ཏི. སདྡྷཱ ཨིནྡྲིཡཱནི པཏྭཱ ‘‘སདྡྷིནྡྲིཡཾ ཧོཏཱི’’ཏི ཝུཏྟཱ, བལཱནི པཏྭཱ ‘‘སདྡྷཱབལ’’ནྟི. ཧིརཱི བལཱནི པཏྭཱ ‘‘ཧིརིབལཾ ཧོཏཱི’’ཏི ཝུཏྟཱ, ལོཀཔཱལདུཀཾ པཏྭཱ ‘‘ཧིརཱི’’ཏི. ཨོཏྟཔྤེཔི ཨེསེཝ ནཡོ. ཨལོབྷོ མཱུལཾ པཏྭཱ ‘‘ཨལོབྷོ ཧོཏཱི’’ཏི ཝུཏྟོ, ཀམྨཔཐཾ པཏྭཱ ‘‘ཨནབྷིཛ྄ཛྷཱ’’ཏི. ཨདོསོ མཱུལཾ པཏྭཱ ¶ ‘‘ཨདོསོ ཧོཏཱི’’ཏི ཝུཏྟོ, ཀམྨཔཐཾ པཏྭཱ ‘‘ཨབྱཱཔཱདོ’’ཏི. ཨིམེ སཏྟ དྭཱིསུ ཋཱནེསུ ཝིབྷཏྟཱ. ཝེདནཱ པན ཕསྶཔཉྩཀཾ པཏྭཱ ‘‘ཝེདནཱ ཧོཏཱི’’ཏི ཝུཏྟཱ, ཛྷཱནངྒཱནི པཏྭཱ ‘‘སུཁ’’ནྟི, ཨིནྡྲིཡཱནི པཏྭཱ ‘‘སོམནསྶིནྡྲིཡ’’ནྟི. ཨེཝམཡཾ ཨེཀོ དྷམྨོ ཏཱིསུ ཋཱནེསུ ཝིབྷཏྟོ. ཝཱིརིཡཾ པན ཨིནྡྲིཡཱནི པཏྭཱ ‘‘ཝཱིརིཡིནྡྲིཡཾ ཧོཏཱི’’ཏི ཝུཏྟཾ, མགྒངྒཱནི པཏྭཱ ‘‘སམྨཱཝཱཡཱམོ’’ཏི, བལཱནི པཏྭཱ ‘‘ཝཱིརིཡབལ’’ནྟི, ཝཱིརིཡསམཐཾ པཏྭཱ ‘‘པགྒཱཧོ’’ཏི. སཏིཔི ཨིནྡྲིཡཱནི པཏྭཱ ‘‘སཏིནྡྲིཡཾ ཧོཏཱི’’ཏི ཝུཏྟཱ, མགྒངྒཱནི པཏྭཱ ‘‘སམྨཱསཏཱི’’ཏི, བལཱནི པཏྭཱ ‘‘སཏིབལ’’ནྟི, ཨུཔཀཱརདུཀཾ པཏྭཱ ‘‘སཏི ཧོཏཱི’’ཏི ¶ . ཨེཝཾ ཨིམེ དྭེ དྷམྨཱ ཙཏཱུསུ ཋཱནེསུ ཝིབྷཏྟཱ. སམཱདྷི པན ཛྷཱནངྒཱནི པཏྭཱ ‘‘ཙིཏྟསྶེཀགྒཏཱ ཧོཏཱི’’ཏི ཝུཏྟོ, ཨིནྡྲིཡཱནི པཏྭཱ ‘‘སམཱདྷིནྡྲིཡ’’ནྟི, མགྒངྒཱནི པཏྭཱ ‘‘སམྨཱསམཱདྷཱི’’ཏི, བལཱནི པཏྭཱ ‘‘སམཱདྷིབལ’’ནྟི, ཡུགནནྡྷདུཀཾ པཏྭཱ ‘‘སམཐོ’’ཏི, ཝཱིརིཡསམཐཾ པཏྭཱ ‘‘ཨཝིཀྑེཔོ ཧོཏཱི’’ཏི. ཨེཝམཡཾ ཨེཀོ དྷམྨོ ཚསུ ཋཱནེསུ ཝིབྷཏྟོ. པཉྙཱ པན ཨིནྡྲིཡཱནི པཏྭཱ ‘‘པཉྙིནྡྲིཡཾ ཧོཏཱི’’ཏི ཝུཏྟཱ, མགྒངྒཱནི པཏྭཱ ‘‘སམྨཱདིཊྛཱི’’ཏི, བལཱནི པཏྭཱ ‘‘པཉྙཱབལ’’ནྟི, མཱུལཱནི པཏྭཱ ‘‘ཨམོཧོ’’ཏི, ཀམྨཔཐཾ པཏྭཱ ‘‘སམྨཱདིཊྛཱི’’ཏི, ཨུཔཀཱརདུཀཾ པཏྭཱ ‘‘སམྤཛཉྙ’’ནྟི, ཡུགནནྡྷདུཀཾ པཏྭཱ ‘‘ཝིཔསྶནཱ’’ཏི. ཨེཝམཡཾ ཨེཀོ དྷམྨོ སཏྟསུ ཋཱནེསུ ཝིབྷཏྟོཏི ཨེཝམེཏེ དྭཱདས དྷམྨཱ ཨིནྡྲིཡཱདིཏཾཏཾཀིཙྩཝནྟཏཱཡ དྭིཊྛཱནིཀཱདིབྷེདེན སཏྟརསསུ རཱསཱིསུ ཝིབྷཏྟཱ. ཨིཏརེ ཨཊྛཱརས ཀིཙྩཝསེན བྷེདཱབྷཱཝཏོ ཨེཀཊྛཱནིཀཱཡེཝཱཏི ཨིམེསུ སཏྟརསསུ རཱསཱིསུ ཡེཝཱཔནཀདྷམྨཱ ཨེཀརཱསིམྤི ན བྷཛནྟི ཏཾཏཾཀིཙྩབྷཱཝཏོཏི ཀཏྭཱ ཝུཏྟཾ ‘‘རཱསིཾ བྷཛནྟི ནཱ’’ཏི.

ནནུ ཙེཏེ ཀིཉྩཱཔི སེསརཱསཡོ ན བྷཛནྟི ཏེསཾ སདིསཀིཙྩསངྒཧཝསེན ཋིཏཏྟཱ. ཕསྶཔཉྩཀརཱསི པན ཁནྡྷསངྒཧཝསེནེཝ ¶ ཋཔིཏོཏི ཙེཏནཱཡ ཝིཡ ནེསཾ སངྑཱརཀྑནྡྷསངྒཧཏོ ཏཏྠ སམཝརོདྷོ ཡུཏྟོཏི? ཏཾ ན, ཁནྡྷསངྒཧཝསེན ཋཔིཏོཔི ཧི ཕསྶཔཉྩཀརཱསི སབྦཙིཏྟསཱདྷཱརཎདྷམྨེ སངྒཧེཏྭཱ ཋཔིཏོཏི ཚནྡཱདཱིནཾ ཏིཎྞཾ པཀིཎྞཀཝསེན ཨུཔྤཛྫམཱནཱནཾ སབྦཙིཏྟསཱདྷཱརཎཏཱཡ ཨབྷཱཝཏོ, མནསིཀཱརསྶ ཙ སཏིཔི སབྦཙིཏྟསཱདྷཱརཎཏྟེ ནིཔྤརིཡཱཡཏོ སངྑཱརཀྑནྡྷསངྒཧཱབྷཱཝཏོ ན ཨེཏེསཾ ཕསྶཔཉྩཀརཱསིབྷཛནམྤི ཡུཏྟནྟི. ཀསྨཱ པན མནསིཀཱརསྶ ནིཔྤརིཡཱཡཏོ སངྑཱརཀྑནྡྷསངྒཧཱབྷཱཝོཏི? ཝུཙྩཏེ – ཋཔེཏྭཱ ཙེཏནཾ སེསདྷམྨཱནཾ སཀསཀཀིཙྩེསུཔི པརཱདྷཱིནབྷཱཝེན པཝཏྟནཏོ ཨབྷིསངྑརཎལཀྑཎཾ ནིཔྤརིཡཱཡཏོ ན ལབྦྷཏི. ཡདི ལབྷེཡྻ, ཙིཏྟེཀགྒཏཱཛཱིཝིཏིནྡྲིཡཱནཾ སབྦཙིཏྟསཱདྷཱརཎཏྟཱ ཝེདནཱཝིཉྙཱཎཱནི ཝིཡ ཏཱནི ཕསྶཔཉྩཀེ ཝཏྟབྦཱནི སིཡུཾ, ན པནེཝཾ ཝུཏྟཱ, ཏསྨཱ ཋཔེཏྭཱ ཙེཏནཾ སེསདྷམྨཱནཾ ཨབྷིསངྑརཎལཀྑཎཾ ནིཔྤརིཡཱཡཏོ ན ལབྦྷཏཱིཏི ན ཏེསཾ ནིཔྤརིཡཱཡཏོ ཁནྡྷསངྒཧོ ལབྦྷཏི. ཙེཏནཱཡཡེཝ པན སཀིཙྩཔརཀིཙྩསཱདྷནཝསེན པཝཏྟནཏོ ནིཔྤརིཡཱཡཏོ ཨབྷིསངྑརཎལཀྑཎསྶ ཨཏྠིཏཱཡ ཁནྡྷསངྒཧོ ལབྦྷཏཱིཏི. ཡདི ཨེཝཾ ཀཐཾ ཕསྶོ ཕསྶཔཉྩཀེ ཝུཏྟོཏི? ‘‘ཕསྶཔཙྩཡཱ ཝེདནཱ (ཝིབྷ. ༢༢༥), ཕུཊྛོ ཝེདེཏི, ཕུཊྛོ སཉྫཱནཱཏཱི’’ཏིཨཱདིཝཙནཏོ (སཾ. ནི. ༤.༩༣) ཝེདནཱ སཉྙཱ ཙེཏནཱ ཝིཉྙཱཎནྟི ཨིམེསཾ ཨརཱུཔཀྑནྡྷཱནཾ ཨུདྡེསཊྛཱནེ ཋཏྭཱ ཏེསཾ པཙྩཡསྶཔི ཨུདྡིསིཏུཀཱམཏཱཡ ཕསྶོ ཏཏྠ ཝུཏྟོ ¶ . དུབྦལཱཏི སཀཝིསཡེཔི པརཱཡཏྟབྷཱཝེནེཝ པཝཏྟནཏོ དུབྦལཱ. ཨདྷིམོཀྑོ ཧི སམཱདྷིསྶ པརིབྱཏྟབྷཱཝེ པརིབྱཏྟབྷཱཝཏོ སམཱདྷཱཡཏྟཝུཏྟི, མནསིཀཱརོཔི ཙེཏནཱཡ པརིབྱཏྟབྷཱཝཏོ ཙེཏནཱཡཏྟཝུཏྟཱིཏི པརཱཡཏྟཱཝ ཏེ ཧོནྟི.

༧༣. མནསཱི ¶ ཙ ཀཱརོཏི མནསིཀཱརོ ཙ. མནསིཀཱརསདྡསྶ ཧི ཨཏྠམཏྟསནྡསྶནཝསེན གཱཐཱབནྡྷསུཁཏྠཾ ཨསམཱསནིདྡེསོ, དཱིགྷཀརཎཾ, མཛ྄ཛྷེ ཙ ཙ-སདྡཝཙནནྟི. ཏེན མུནིཝརེནཱཏི སམྦནྡྷོ.

༧༤-༨༠. པཋམཱབྷིནིཔཱཏཏྟཱཏི ཨཱརམྨཎེ ཕུསནཝསེན པཋམམེཝ ཨབྷིནིཔཏནཏོ. སབྦེཔི ཙེཏསིཀཱ ཙིཏྟཱཡཏྟཱ ཙིཏྟཀིརིཡབྷཱཝེན ཝུཙྩནྟཱིཏི ‘‘ཙིཏྟསྶཱ’’ཏི ཝུཏྟཾ. ཀིརཱཏི ཨརུཙིསཱུཙནཾ. ཨེཝཾ མཧཱསཾགྷིཀམཏཾ དསྶེཏྭཱ ཨིདཱནི ཏམེཝ ཝིཏྠཱརེཏུཾ ‘‘ཕུསིཏྭཱ པནཱ’’ཏིཨཱདི ཝུཏྟཾ. མཧཱསཾགྷིཀཱ ཧི ‘‘པཋམཾ ཕསྶོ ཨཱརམྨཎཾ ཕུསཏི, ཨཐ ཏེན ཕུཊྛཾ དུཏིཡཾ ཝེདནཱ ཝེདིཡཏི, ཨེཝཾ ཨེཏེཧི ཕུཊྛཝེདིཏཾ ཏཏིཡཾ སཉྙཱ སཉྫཱནཱཏི, ཏེཧི པན ཕུཊྛཝེདིཏསཉྙཱཏེ ཙཏུཏྠཾ ཙེཏནཱཡ སམྤཡུཏྟདྷམྨེ ཨབྷིསནྡཧཏཱི’’ཏིཨཱདིནཱ ཝདནྟི. བལཝཔཙྩཡཏྟཱཏི ཡཐཱ པཱསཱདཾ པཏྭཱ ཐམྦྷཱ སེསདབྦསམྦྷཱརཱནཾ བལཝཔཙྩཡཱ, ཨེཝམེས ཡསྨཱ སེསསམྤཡུཏྟཱནཾ བལཝཔཙྩཡོ, ཏསྨཱཏི ཨཏྠོ. ཏསྨཱཏི ཧེཏུནིགམནཾ.

སཧེཝ ཙཱཏི ཙ-སདྡོ ཨཊྛཱནཔྤཡུཏྟོ, སོ ‘‘ཙིཏྟཛཱན’’ནྟི ཨིམསྶ ཨནནྟརཾ དཊྛབྦོ. ཀསྨཱ? ཙིཏྟཱནཾ, ཙིཏྟཛཱནཉྩ ཨེཀུཔྤཱདཱདིབྷཱཝེན སཧེཝ པཝཏྟིཏོཏི ཨེཝམེཏྠ པདསམྦནྡྷོ ཝེདིཏབྦོ. ཨིདནྟི ཨིདཾ ཡཐཱཝུཏྟཝིདྷཱནཾ, ཨེཝཾ ‘‘པཋམཱབྷིནིཔཱཏཏྟཱ’’ཏི ཀཱརཎཾ པརིཧརིཏྭཱ ཨིདཱནི ‘‘བལཝཔཙྩཡཏྟཱ’’ཏི ཨིདཾ པརིཧརནྟོ ཨཱཧ ‘‘བལཝ…པེ… དིསྶཏཱི’’ཏི. ཙ-སདྡོ ཨཝདྷཱརཎེ, ནེཝ དིསྶཏཱིཏི ཨཏྠོ. སེསདྷམྨཱནམྤི ཧི སཧཛཱཏཔཙྩཡབྷཱཝསྶ སཱདྷཱརཎཏྟཱ ཏསྶེཝ བལཝཔཙྩཡབྷཱཝེ ན ཀིཉྩི ཀཱརཎཾ དིསྶཏཱིཏི. ཡདི སབྦམིདམཀཱརཎཾ, ཀཐཉྩརཧི ཕསྶོ པཋམཾ ཝུཏྟོཏི ཨཱཧ ‘‘དེསནཱཀྐམཏོ’’ཏིཨཱདི. ‘‘ཝེདནཱ ཧོཏི, ཕསྶོ ¶ ཧོཏི, སཉྙཱ ཧོཏི, ཕསྶོ ཧོཏི, ཙེཏནཱ ཧོཏི, ཕསྶོ ཧོཏི, ཙིཏྟཾ ཧོཏི, ཕསྶོ ཧོཏི, ཝེདནཱ ཧོཏི, སཉྙཱ ཧོཏི, ཙེཏནཱ ཧོཏི, ཝིཏཀྐོ ཧོཏཱི’’ཏིཨཱདཱིཧི ཨཱཧརིཏུམྤི ཝཊྚེཡྻ, དེསནཱཝཱརེན པན ཕསྶོཝ པཋམཾ ཝུཏྟོཏི ཝེདིཏབྦོ. ཡཐཱ ཙེཏྠ, ཨེཝཾ སེསདྷམྨེསུཔི པུབྦཱཔརཀྐམོ ¶ ནཱམ ན པརིཡེསིཏབྦོ. ཝཙནཏྠལཀྑཎཱདཱིཧཱིཏི ཝཙནཏྠཏོ ཙ ལཀྑཎཱདིཏོ ཙ.

ཕུསཏཱིཏི ཀཏྟུནིདྡེསོ. ཏཏྠ ཀཱརཎཾ ཧེཊྛཱ ཝུཏྟམེཝ, ཕུསནྟི ཨེཏེན ཝཱཏི ཕསྶོ. སམྤཡུཏྟདྷམྨཱ ཧི ཨཱརམྨཎེ པཝཏྟམཱནཱ ཏཾ ཕུསནལཀྑཎེན ཕསྶེན ཕུསནྟཱ ཝིཡ ཧོནྟི, ཨཱརམྨཎཕུསནམཏྟཾ ཝཱ ཕསྶོཏིཔི སཱདྷནཏྟཡམྤི ཡུཛྫཏེཝ. ཕུསནཾ ལཀྑཎམེཏསྶཱཏི ཕུསནལཀྑཎོ, ཝེདནཱཡ པཙྩཡབྷཱཝཊྛེན ཨཱརམྨཎཕུསནལཀྑཎོཏི ཨཏྠོ. སཾགྷཊྚནརསོཏི མནོདྭཱརེ ཙིཏྟཱརམྨཎཱནཾ སཾགྷཊྚནཏོ སཾགྷཊྚནཀིཙྩོ. ཨཡཉྷི ཨཱརམྨཎེ ཨནལླཱིཡམཱནོཔི རཱུཔཾ ཝིཡ ཙཀྑུཾ, སདྡོ ཝིཡ ཙ སོཏཾ ཙིཏྟམཱརམྨཎཉྩ གྷཊྚེཏི. པཉྩདྭཱརེསུ ཝཱ ཝཏྠཱརམྨཎསཾགྷཊྚནེན སམྤཛྫཏཱིཏི སཾགྷཊྚནསམྤཏྟིཀོ ཕསྶོ ‘‘སཾགྷཊྚནརསོ’’ཏི ཝུཏྟོ. ཡཐཱ ‘‘དྭེ པཱཎཱི ཝཛྫེཡྻུ’’ནྟིཨཱདཱིསུ པཱཎིམྷི གྷཊྚནཾ ཏབྦིསེསབྷཱུཏཱ རཱུཔདྷམྨཱ, ཨེཝཾ ཙིཏྟསྶ ཨཱརམྨཎེ སཾགྷཊྚནཾ ཏབྦིསེསབྷཱུཏོ ཨེཀོ ཙེཏསིཀདྷམྨོ དཊྛབྦོ. ཏིཎྞཾ སནྣིཔཱཏསངྑཱཏསྶ ཨཏྟནོ ཀཱརཎསྶ ཝསེན པཝེདིཏཏྟཱ སནྣིཔཱཏཔཙྩུཔཊྛཱནོ. ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎཾ, ཏིཎྞཾ སངྒཏི ཕསྶོ’’ཏི (མ. ནི. ༡.༢༠༤, ༤༠༠; ༣.༤༢༡, ༤༢༥; སཾ. ནི ༢.༤.༦༠; ཀཐཱ. ༤༦༥) ཧི ཝཙནཏོ ཙཀྑུརཱུཔཝིཉྙཱཎཱདཱིནཾ ཏིཎྞཾ སནྣིཔཱཏཝསེན གཧེཏབྦཏཱཡ ཨུཔཊྛཱནཏོ སནྣིཔཱཏསངྑཱཏསྶ ཀཱརཎསྶ ཝསེན ཨུཔཊྛཱནམསྶཱཏི ཨུཔཊྛཱནཊྛེན པཙྩུཔཊྛཱནེན སནྣིཔཱཏཔཙྩུཔཊྛཱནཏཱ ¶ ཝུཏྟཱ. ‘‘ཕསྶཔཙྩཡཱ ཝེདནཱ’’ཏི (ཝིབྷ. ༢༢༥) ཝཙནཏོ ཝེདནཱ ཕལམསྶཱཏི ཝེདནཱཔཙྩུཔཊྛཱནོ. ཏཛྫསམནྣཱཧཱརེན ཙེཝ ཨིནྡྲིཡེན ཙ པརིཀྑཏེ ཝིསཡེ ཨནནྟརཱཡེནེཝ ཨུཔྤཛྫནཏོ ཨཱཔཱཐགཏཝིསཡཔདཊྛཱནོ. ཨཡཉྷི ཏསྶ ཕསྶསྶ ཀཱརཎབྷཱུཏོ ཏདནུརཱུཔབྷཱུཏོ སམནྣཱཧཱརོཏི ཏཛྫསམནྣཱཧཱརསངྑཱཏེན ཨཱཝཛྫནེན ཙེཝ ཙཀྑཱདིཨིནྡྲིཡེན ཙ ཡཐཱཀྐམཾ ཨཱརམྨཎཀརཎཏདབྷིམུཁབྷཱཝཝསེན པརིཀྑཏེ ཨབྷིསངྑཱཏེ ཨཱཔཱཐགཏེཡེཝ ཝིསཡེ ཨེཀནྟེན ཨུཔྤཛྫནཏོ ཨཱཔཱཐགཏོ ཝིསཡོ པདཊྛཱནཾ ཨཱསནྣཀཱརཎཾ ཨིམསྶཱཏི ཨཱཔཱཐགཏཝིསཡཔདཊྛཱནོ.

ནནུ ཙཱཡཾ དྷམྨོ ཙེཏསིཀོ, སྭཱཡཾ ཨརཱུཔདྷམྨོ སམཱནོ ཀཐཾ ཕུསནལཀྑཎོ ཧོཏཱིཏི ཨནྟོལཱིནཙོདནཾ མནསི ཀཏྭཱ ཏསྶཱ སོདྷནཏྠཾ ‘‘ཨརཱུཔདྷམྨོཔི སམཱནོ’’ཏིཨཱདི ཝུཏྟཾ. ཏཏྠ ‘‘ཕུསནཱཀཱརེནེཝ པཝཏྟཏཱི’’ཏི ཨིམིནཱ ཨརཱུཔསྶཱཔི སཏོ ཏསྶ དྷམྨསྶ ཨཡཾ སབྷཱཝོཏི དསྶེཏི. སཱ ཙ ཏསྶ ཕུསནཱཀཱརཔྤཝཏྟི ཨམྦིལཾ ཨམྦཔཀྐཱདིཾ ཁཱདནྟཾ པསྶནྟསྶ པརསྶ ཁེལུ༹པྤཏྟིཔརཾ ¶ བཱདྷིཡམཱནཾ དིསྭཱ དཡཱལུཀསྶ སརཱིརཀམྤནཾ, རུཀྑསཱཁགྒེ དུཊྛིཏཾ པུརིསཾ དིསྭཱ བྷཱུམིཡཾ ཋིཏསྶ པུརིསསྶ ཛངྒྷཙལནཾ, པིསཱཙཱདིབྷཱཡིཏབྦཾ དིསྭཱ ཨཱུརུཔཏྠམྦྷོཏི ཨེཝམཱདི ཝིཡ དཊྛབྦཱ. སོཏི སོ ཡཐཱཝུཏྟལཀྑཎཱདིཀོ ཕསྶོ.

སུནྡརནྟི སུཁཝེདནཱསམྤཡུཏྟཏྟཱ པསཏྠཾ. མནོཏི ཝིཉྙཱཎཾ. སུམནསྶ བྷཱཝོཏི སུམནསངྑཱཏསྶ ཝིཉྙཱཎསྶ བྷཱཝོ. ཡྭཱཡཾ སདྡཔྤཝཏྟིནིབནྡྷནོ ཨཏྠོ, སོ སོམནསྶཾ. སོམནསྶཝེདནཱསམྤཡུཏྟཏྟཱ ཧི སུམན-སདྡོ ཏསྨིཾ ཝིཉྙཱཎེ པཝཏྟཏི. ཝེདེན ཨནུབྷཝནཱཀཱརེན ¶ ཨཡིཏཾ པཝཏྟཾ ཝེདཡིཏཾ, ཏཾ ལཀྑཎམསྶཱཏི ཝེདཡིཏལཀྑཎཱ. ཨིཊྛསྶ ཨིཊྛཱཀཱརཏོཝ ཨནུབྷཝནཾ ཀིཙྩམསྶཱཏི ཨིཊྛཱཀཱརཱནུབྷཝནརསཱ. སཱ ཧི སབྷཱཝཏོ ཨིཊྛམཱརམྨཎཾ ཨིཊྛཝསེན, ཨིཏརཉྩ ཨིཊྛཱཀཱརེནེཝ ཨནུབྷཝཏི, ཏཏྠ ཨིཊྛཱཀཱརཱནུབྷཝནཾ ཀུསལཱཀུསལཙིཏྟསམྤཡུཏྟཝེདནཱཡ ལབྦྷཏི ཏསྶཱ ཨནིཊྛསྶཔི ཀཔྤནཱཝསེན ཨིཊྛཱཀཱརེན གཧཎཏོ, སབྷཱཝཏོ པན ཨིཊྛཱནུབྷཝནཾ ཨབྱཱཀཏཙིཏྟསམྤཡུཏྟཱཡཔི ལབྦྷཏི ཏསྶཱ ཝིཔལླཱསགྒཱཧཱབྷཱཝཏོ. ‘‘རཱཛཱ ཝིཡ སུབྷོཛནརས’’ནྟི ཨིམིནཱ ཨིམཾ དཱིཔེཏི – ཕསྶསྶ ཕུསནམཏྟམེཝ ཧོཏི, སཉྙཱཡ སཉྫཱནནམཏྟམེཝ, ཙེཏནཱཡ སཉྩེཏནཱམཏྟམེཝ, ཝིཉྙཱཎསྶ ཝིཛཱནནམཏྟམེཝ, ཨེཀཾསཏོ པན ཨིསྶརཝཏཱཡ སཱམིབྷཱཝེན ཝེདནཱཝ ཨཱརམྨཎརསཾ ཨནུབྷཝཏི, རཱཛཱ ཝིཡ སཱུདཀཱརེན སམྤཱདིཏསུབྷོཛནརསནྟི. ཨསྶཱདཱིཡཏཱིཏི ཨསྶཱདོ, སུཁཝེདནཱ. ཏེནཱཧ བྷགཝཱ – ‘‘ཡཾ, བྷིཀྑཝེ, པཉྩུཔཱདཱནཀྑནྡྷེ པཊིཙྩ ཨུཔྤཛྫཏི སུཁཾ སོམནསྶཾ, ཨཡཾ ཝུཙྩཏི, བྷིཀྑཝེ, པཉྩུཔཱདཱནཀྑནྡྷེསུ ཨསྶཱདོ’’ཏི. ཙེཏོསནྣིསྶིཏཏྟཱ ཙེཏསི བྷཝོ ཨསྶཱདོཏི ཙེཏསིཀཨསྶཱདོ, ཏཐཱ པཙྩུཔཊྛཱཏཱིཏི ཙེཏསིཀཨསྶཱདཔཙྩུཔཊྛཱནཱ. པསྶདྡྷཀཱཡོ སུཁཾ ཝེདིཡཏཱིཏི ཨཱཧ ‘‘པསྶདྡྷིཔདཊྛཱནཱ’’ཏི. ཨིདཾ པན ནིརཱམིསསོམནསྶཝསེན ཝེདིཏབྦཾ.

ནཱིལཱདིབྷེདསྶ ཨཱརམྨཎསྶ སཉྫཱནནཾ ཏམེཝ སཉྙཾ ཀཏྭཱ ཛཱནནཾ ལཀྑཎཾ ཨེཏསྶཱཏི སཉྫཱནནལཀྑཎཱ. པཙྩཱབྷིཉྙཱཎཀརཎརསཱཏི པཏི ཨབྷིཉྙཱཡཏི ཨེཏེནཱཏི པཙྩཱབྷིཉྙཱཎཾ, ཏདེཝེཏནྟི པུན པཙྩཱབྷིཉྙཱཎནིམིཏྟཾ སཎྛཱནཱདིཀོ ཨཱཀཱརོ, ཏསྶ ཀརཎརསོ ཀིཙྩམསྶཱཏི པཙྩཱབྷིཉྙཱཎཀརཎརསཱ. སཱ ཧི ཨུཔྤཛྫམཱནཱ པཙྪཱ སཉྫཱནནསྶ ཀཱརཎབྷཱུཏཾ སཎྛཱནཱདིཀཾ ཨཱཀཱརཾ གཧེཏྭཱ ¶ ཨུཔྤཛྫཏཱིཏི. ཨིདཉྩ ནིམིཏྟཀཱརིཀཱཡ ནིམིཏྟེན སཉྫཱནནྟིཡཱ ཙ སབྦཱཡ སམཱནསཉྙཱཡ ཡོཛེཏབྦཾ. ནིམིཏྟེན སཉྫཱནནྟཱིཔི ཧི པུན ཨཔརཱཡ སཉྙཱཡ ཙ སཉྫཱནནསྶ ནིམིཏྟཾ ཀརོཏཱིཏི. ཏཉྩ ཀུསལཱཀུསལཀིརིཡཱཛཝནསཉྙཾ དྷུརཾ ¶ ཀཏྭཱ ཝེདིཏབྦཾ. ཏཾ པནེཏཾ ཨབྷིཉྙཱཎཀརཎཾ ཀཐཾ དཊྛབྦནྟི ཨཱཧ ‘‘ཝཌྜྷཀིསྶ ཨབྷིཉྙཱཎཀརཎམིཝཱ’’ཏི. ཡཐཱ ཝཌྜྷཀིསྶ དཱརཱུསུ ‘‘ཨིདཾ ཨུདྡྷཾ, ཨིདཾ ཨདྷོ’’ཏི ཨེཝཾ པཙྪཱ སཉྫཱནནཔཙྩཡབྷཱུཏསྶ སཉྙཱཎསྶ ཀརཎཾ, ཨེཝམསྶཱ པུན སཉྫཱནནཔཙྩཡནིམིཏྟཀརཎནྟི ཝུཏྟཾ ཧོཏི. ཧཏྠིདསྶཀཨནྡྷོ ཝིཡ ‘‘ཨིདམེཝ སཙྩ’’ནྟི སཉྙཱཡ ཡཐཱགཧིཏནིམིཏྟཝསེན ཨབྷིནིཝེསཀརཎཏོ ཡཐཱ…པེ… པཙྩུཔཊྛཱནཱ. ཨེཏེན སཉྙཱཡ ཨཱཀཱརགྒཧཎཾ ཀཏྭཱ ཋིཏསྶ དིཊྛིཨཱདཱིནཾ ཨུཔྤཛྫནཏོ ཨཀུསལསཉྙཱཡ ཨནུརཱུཔཝསེན ཕལཔཙྩུཔཊྛཱནཾ དསྶིཏཾ ཧོཏི. ཨཐ ཝཱ ཨབྷིནིཝེསཀརཎནྟི ‘‘ཨིདམེཝ སཙྩ’’ནྟི སཉྙཱབྷིནིཝེསམཏྟམེཝ, ཏསྨཱ ཨུཔཔརིཀྑཱབྷཱཝེན ཡཐཱགཧིཏནིམིཏྟཝསེན ཨབྷིནིཝེསཱཀཱརེན ཨུཔཊྛཱནཏོ ཨཱཀཱརཔཙྩུཔཊྛཱནཾ ཝུཏྟཾ. ཏིཎཔུརིསཀེསུ མིགཔོཏཀཱནཾ ‘‘པུརིསཱ’’ཏི ཨུཔྤནྣསཉྙཱ ཝིཡ ཨཝིཀཔྤསབྷཱཝཏྟཱ ཡཐཱཨུཔཊྛིཏཝིསཡཔདཊྛཱནཱ. ཨེཏྠ ཙ ཉཱཎཝིཔྤཡུཏྟསཉྙཱཡ ཨཱཀཱརགྒཧཎཝསེན ཨུཔྤཛྫནཀཱལེ ཙིཏྟཾ ཨབྦོཧཱརིཀཾ སཉྙཱནུགཏིཀཾ ཧོཏི. ཉཱཎསམྤཡུཏྟེ ཙིཏྟེ པན སསམྦྷཱརཔཐཝིཡཱ ཨནུགཏཱ སེསདྷཱཏུཡོ ཝིཡ སཉྙཱཙིཏྟཉྩ ཨབྦོཧཱརིཀཾ ཉཱཎཱནུགཏིཀཾ ཧོཏི.

ཨབྷིསནྡཧཏཱིཏི པབནྡྷཏི པཝཏྟེཏི, ‘‘གཎྷཐ གཎྷཐཱ’’ཏི ཝདནྟཱི ཝིཡ སམྤཡུཏྟདྷམྨེ ཨཱརམྨཎེ པཡོཛེཏི, སཀསཀཀིཙྩེ ཙ པཊྛཔེཏཱིཏི ཨཏྠོ. ཙེཏཡིཏལཀྑཎཱཏི ནིདྡོཀྐནྟསྶ པབུདྡྷཀྑཎེ སམྦྷམཔྤཝཏྟི ཝིཡ ཙེཏསོ ཨུསྶཱཧཏཱཝ ¶ ལཀྑཎཱ. ཨཐ ཝཱ ‘‘ཨབྷིསནྡཧཏཱི’’ཏི ཝུཏྟཏྟཱ པཡོཛནལཀྑཎཱཏྭེཝ ཨཏྠོ. ཨཱཡཱུཧནརསཱཏི ཙེཏསིཀཨིརིཡནརསཱ, པཡོགརསཱཏི ཝུཏྟཾ ཧོཏི. ཀུསལཱཀུསལཀིརིཡཱཛཝནསམྤཡུཏྟཱཡཡེཝ པནེཏཾ ལབྦྷཏི. སཾཝིདཧནཔཙྩུཔཊྛཱནཱཏི ‘‘ཏྭཾ ཨིདཾ ཀརོཧཱི’’ཏི ཝིཙཱརེནྟཱི ཝིཡ ཧོཏཱིཏི ཝིཙཱརཎཔཙྩུཔཊྛཱནཱ. ཨེཏཱཡ ཧི པཝཏྟམཱནཱཡ སབྦེཔི སམྤཡུཏྟདྷམྨཱ ཡཐཱ སཀིཙྩཔསུཏཱ ཧོནྟི, ཏེནེཝ ཧེསཱ སཀིཙྩཔརཀིཙྩསཱདྷིཀཱ ཝུཏྟཱ. ཛེཊྛསིསྶོ པརེ སཛ྄ཛྷཱཡནེ ཨུཡྻོཛེནྟོ སཡམྤི སཛ྄ཛྷཱཡཏི. ཏསྨིཉྷི སཛ྄ཛྷཱཡིཏུཾ ཨཱརདྡྷེ སེསསིསྶཱཔི སཛ྄ཛྷཱཡནྟི. མཧཱཝཌྜྷཀིསྨིམྤི ཝཌྜྷཀིཀམྨཾ ཀཱཏུཾ ཨཱརདྡྷེ ཨིཏརེཔི ཀརོནྟི ཡེཝཱཏི ཨཱཧ ‘‘ཛེཊྛསིསྶམཧཱཝཌྜྷཀིཨཱདཡོ ཝིཡཱ’’ཏི. ཨཱདི-སདྡེན ཛེཊྛནྟེཝཱསིཀཱདཱིནཾ གཧཎཾ.

ཡཐཱཔཙྩཡཾ པཝཏྟམཱནཱནཾ དྷམྨཱནཾ ནཏྠི ཀཱཙི ཝསཝཏྟིཏཱཏི ཝསཝཏྟིབྷཱཝནིཝཱརཎཏྠཾ ‘‘ཝིཏཀྐནཾ ཝིཏཀྐོ’’ཏི ཝུཏྟཾ. ཨཱུཧནཾ ཨཱརམྨཎསྶ པརིཀཔྤནཾ, ཏསྨིཾ ཨབྷིནིརོཔནནྟི ཝཱ ཝུཏྟཾ ཧོཏི. ཡསྨཱ ཙིཏྟཾ ཝིཏཀྐབལེན ཨཱརམྨཎཾ ཨབྷིརུལ༹ྷཾ ཝིཡ ཧོཏི, ཏསྨཱ ཝུཏྟཾ ‘‘ཨཱརམྨཎེ ¶ ཙིཏྟསྶ ཨབྷིནིརོཔནལཀྑཎོ’’ཏི. ཡཐཱ ཧི ཀོཙི གཱམཝཱསཱི པུརིསོ རཱཛཝལླབྷཾ, ཏཾསམྦནྡྷིནཾ མིཏྟཾ ཝཱ ནིསྶཱཡ རཱཛགེཧཾ ཨཱརོཧཏི ཨནུཔཝིསཏི, ཨེཝཾ ཝིཏཀྐཾ ནིསྶཱཡ ཙིཏྟཾ ཨཱརམྨཎཾ ཨཱརོཧཏི. ཡདི ཨེཝཾ ཀཐཾ ཨཝིཏཀྐཙིཏྟཾ ཨཱརམྨཎཾ ཨཱརོཧཏི, ན ཧི དྭིཔཉྩཝིཉྙཱཎདུཏིཡཛ྄ཛྷཱནཱདིཀེ ཝིཏཀྐོ ཨུཔལབྦྷཏི, ཡསྶ བལེན ཏཾ ཨཱརམྨཎཾ ཨཱརོཧཏི, ཏསྨཱ སབྷཱཝཏོ བྷཱཝནཱབལེན ཏཏྠ ཨནུཔྤཛྫནཀོ? སཙྩཾ, ཏམྤི ཝིཏཀྐབལེན ཨཱརོཧཏི. ཡཐཱ ཧི སོ པུརིསོ པརིཙཡེན ཏེན ཝིནཱཔི ནིརཱསངྐོ རཱཛགེཧཾ པཝིསཏི, ཨེཝཾ པརིཙཡེན ཝིཏཀྐེན ཝིནཱཔི ཨཝིཏཀྐཙིཏྟཾ ¶ ཨཱརམྨཎཾ ཨཱརོཧཏི. པརིཙཡོཏི ཙེཏྠ སནྟཱནེ ཨབྷིཎྷཾ པཝཏྟཙིཏྟབྷཱཝནཱསངྑཱཏོ པརིཙཡོ. ཝིཏཀྐསྶ ཧི སནྟཱནེ ཨབྷིཎྷཾ པཝཏྟསྶ ཝསེན ཙིཏྟསྶ ཨཱརམྨཎཱབྷིརོཧནཾ ཙིརཔརིཙིཏཾ, ཏེན ཏཾ ཙིཏྟཾ ཀདཱཙི ཝིཏཀྐེན ཝིནཱཔི ཏཏྠ ཝཏྟཏེཝ. ཡཐཱ ཏཾ ཉཱཎསཧིཏཾ ཧུཏྭཱ སམྨསནཝསེན ཙིརཔརིཙིཏཾ ཀདཱཙི ཉཱཎརཧིཏམྤི སམྨསནཝསེན པཝཏྟཏི, ཡཐཱ ཝཱ ཀིལེསསཧིཏཾ ཧུཏྭཱ པཝཏྟཾ སབྦསོ ཀིལེསརཧིཏམྤི པརིཙཡེན ཀིལེསཝཱསནཱཝསེན པཝཏྟཏི, ཨེཝཾསམྤདམིདཾ དཊྛབྦཾ.

ཨཐ ཝཱ དྭིཔཉྩཝིཉྙཱཎཾ ཨཝིཏཀྐམྤི ཝཏྠཱརམྨཎགྷཊྚནསྶ བལཝཏཱཡ, དུཏིཡཛ྄ཛྷཱནཱདཱིནི ཙ ཧེཊྛིམཧེཊྛིམབྷཱཝནཱཡ བལཝཏཱཡ ཨཱརམྨཎཾ ཨཱརོཧཏཱིཏི. ཨཱདིཏོ, ཨབྷིམུཁཾ ཝཱ ཧནནཾ པཧརཎམཏྟཾ ཨཱཧནནཾ, པརིཏོ, པརིཝཏྟེཏྭཱ ཝཱ ཧནནཾ ཝིསེསེན པཧརཎཾ པརིཡཱཧནནཾ, ཏཾ ཀིཙྩམསྶཱཏི ཨཱཧནནཔརིཡཱཧནནརསོ. ཏཐཱ ཧི ཏེན ཡོགཱཝཙརོ ཨཱརམྨཎཾ ཝིཏཀྐཱཧཏཾ ཝིཏཀྐཔརིཡཱཧཏཾ ཀརོཏཱིཏི ཝུཙྩཏི. ཨཱནཡནཾ ཙིཏྟསྶ ཨཱརམྨཎེ ཨུཔནཡནཾ, ཨཱཀཌྜྷནཾ ཝཱ, ཏཐཱ ཧུཏྭཱ པཙྩུཔཊྛཱནམསྶཱཏི ཨཱནཡནཔཙྩུཔཊྛཱནོ.

ཏེནཱཏི ཏེན ཝིཙཱརེན ཀརཎབྷཱུཏེན, ཧེཏུབྷཱུཏེན ཝཱ ཙིཏྟཾ ཨཱརམྨཎེ ཝིཙརཏི ཨནུཝིཙརཏི, ཨཝིཙཱརཙིཏྟསྶ པན ཨཝིཏཀྐཙིཏྟེ ཝུཏྟཱནུསཱརེན པཝཏྟི ཝེདིཏབྦཱ. ཝིཙརཎཾ ཨནུསཉྩརཎཾ ཨནུཔརིགམནཾ. སྭཱཡཾ ཝིསེསོ སནྟཱནམྷི ལབྦྷམཱནོ ཛཝནསནྟཱནེ པཱཀཊོ ཧོཏཱིཏི དཊྛབྦོ. ཨེས ནཡོ སེསེསུཔི. ཨཱརམྨཎསྶ ཨནུམཛྫནཾ ཨནུམསནཾ པརིམཛྫནམསྶ ལཀྑཎནྟི ཨཱརམྨཎཱནུམཛྫནལཀྑཎོ. ཏཐཱ ཧི ཝིཙཱརོ པརིམཛྫནཧཏྠོ ཝིཡ, སཾསརཎཧཏྠོ ཝིཡཱཏི ཝུཙྩཏི. ཏཏྠཱཏི ཨཱརམྨཎེ. སཧཛཱཏཱནཾ ¶ ཨནུཡོཛནཾ ཨཱརམྨཎེ ཨནུཝིཙརཎསངྑཱཏཨནུམཛྫནཝསེན ཝེདིཏབྦཾ. དྷམྨཱནཉྷི སབྷཱཝཝིནིམུཏྟཱ ཀཱཙི ཀིརིཡཱ ནཱམ ནཏྠི. ཏཐཱགཧེཏབྦཱཀཱརོ བོདྷནེཡྻཛནཱནུརོདྷེན པརམཏྠཏོ ཨེཀསབྷཱཝོཔི སབྷཱཝདྷམྨོ པརིཡཱཡཝཙནེཧི ¶ ཝིསཡསམཱརོཔིཏརཱུཔེཧི བཧཱུཧི པཀཱརེཧི པཀཱསཱིཡཏི. ཨེཝཉྷི སོ སུཊྛུ པཀཱསིཏོ ཧོཏཱིཏི. ཨནུཔབནྡྷཔཙྩུཔཊྛཱནོཏི ཨཱརམྨཎེ ཙིཏྟསྶ ཨཝིཙྪིནྣསྶ ཝིཡ པཝཏྟིཔཙྩུཔཊྛཱནོ. ཏཐཱ ཧི སོ ཨནུསནྡྷཱནཏཱཏི ནིདྡིཊྛོ.

ཨེཏྠ ཙ ཝིཙཱརཏོ ཨོལཱ༹རིཀཊྛེན ཏསྶེཝ པུབྦངྒམཊྛེན པཋམགྷཎྚཱབྷིརཝོ ཝིཡ ཙེཏསོ པཋམཱབྷིནིཔཱཏོ ཝིཏཀྐོ, ཨནུརཝོ ཝིཡ ཨནུསཉྩརཎཾ ཝིཙཱརོ. ཡཐཱ ཧི གྷཎྚཱབྷིགྷཱཏཛོ པཋམཱབྷིརཝོ ཨནུརཝཏོ ཨོལཱ༹རིཀོ, པུབྦངྒམོ ཙ ཧོཏི, ཨེཝཾ ཨཱརམྨཎཱབྷིརོཔནཊྛེན ཝིཏཀྐོ ཨོལཱ༹རིཀོ, པུབྦངྒམོ ཝིཡ ཙ ཧོཏི. ཏཏོ སུཁུམཊྛེན ཨནུམཛྫནསབྷཱཝེན ཙ གྷཎྚཱནུརཝོ ཝིཡ ཨནུཔབནྡྷོ ཝིཙཱརོ. ཝིཔྥཱརཝཱ ཙེཏྠ ཝིཏཀྐོ ཙིཏྟསྶ པཋམུཔྤཏྟིཀཱལེ ཙིཏྟསྶ པརིཔྥནྡནབྷཱུཏོ ཨཱཀཱསེ ཨུཔྤཏིཏུཀཱམསྶ སཀུཎསྶ པཀྑཝིཀྑེཔོ ཝིཡ, པདུམཱབྷིམུཁཔཱཏོ ཝིཡ ཙ གནྡྷཱནུབནྡྷཙེཏསོ བྷམརསྶ. སནྟཝུཏྟི ཝིཙཱརོ ཙིཏྟསྶ ནཱཏིཔརིཔྥནྡནབྷཱཝོ, ཨཱཀཱསེ ཨུཔྤཏིཏསྶ སཀུཎསྶ པཀྑཔྤསཱརཎཾ ཝིཡ, པདུམསྶ ཨུཔརིབྷཱགེ པརིབྦྷམནཾ ཝིཡ ཙ པདུམཱབྷིམུཁཔཏིཏསྶ བྷམརསྶ. ཨཱགམཊྛཀཐཱཡཾ པན ཝིཔརིཡཱཡེན ཨཱགཏཾ. ཏཐཱ ཙ ཝུཏྟཾ དུཀནིཔཱཏཊྛཀཐཱཡཾ –

‘‘ཨཱཀཱསེ གཙྪཏོ མཧཱསཀུཎསྶ ཨུབྷོཧི པཀྑེཧི ཝཱཏཾ གཧེཏྭཱ པཀྑེ སནྣིསཱིདཱཔེཏྭཱ གམནཾ ཝིཡ ཨཱརམྨཎེ ཙེཏསོ ཨབྷིནིརོཔནབྷཱཝེན པཝཏྟོ ¶ ཝིཏཀྐོ, ཝཱཏགྒཧཎཏྠཾ པཀྑེ ཕནྡཱཔཡམཱནསྶ གམནཾ ཝིཡ ཨནུམཛྫནབྷཱཝེན པཝཏྟོ ཝིཙཱརོ’’ཏི.

ཏམྤི ཨནུཔབནྡྷེན པཝཏྟིཡཾ ཡུཛྫཏི. ཏཐཱ ཧི ཨུཔཙཱརེ, ཨཔྤནཱཡཾ ཝཱ སནྟཱནེན པཝཏྟིཡཾ ཝིཏཀྐོ ནིཙྩལོ ཧུཏྭཱ ཨཱརམྨཎཾ ཨནུཔཝིསིཏྭཱ ཝིཡ པཝཏྟཏི, ན པཋམཱབྷིནིཔཱཏེ ཝིཡ པཱཀཊོ ཧོཏཱིཏི.

པིནཡཏཱིཏི ཀཱཡཙིཏྟཾ ཨཔྤེཏི, ཝཌྜྷེཏི ཝཱ. སམྤིཡཱཡནལཀྑཎཱཏི ཨཱརམྨཎཾ ཀལླཏོ གཧཎལཀྑཎཱ. པཱིཎནརསཱཏི ཀཱཡཙིཏྟཱནཾ པརིབྲཱུཧནཀིཙྩཱ. ཕརཎརསཱཏི པཎཱིཏརཱུཔེཧི ཀཱཡསྶ བྱཱཔནརསཱ, ཨཏྟནཱ སམྤཡུཏྟཙིཏྟསམུཊྛཱནེཧི རཱུཔེཧི སཀལརཱུཔཀཱཡབྱཱཔནཾ ¶ ཀརོཏཱིཏི ཝུཏྟཾ ཧོཏི. ན ཧི ཨཉྙཐཱ ཨིམིསྶཱ ཕརཎཾ ཧོཏི, དྷམྨཱནཾ ཨབྱཱཔཱརཏཱཡ ཀེསགྒམཏྟམྤི སངྐམནཱབྷཱཝཏོ. ཨུདགྒབྷཱཝོ ཨོདགྱཾ.

ཨེཀཾ ཨཱརམྨཎཾ ཨགྒམེཏསྶཱཏི ཨེཀགྒཾ, ཙིཏྟཾ, ཡེན པན དྷམྨེན ཡོགཏོ ཏཾ ཨེཀགྒཾ ནཱམ ཧོཏི, སོ ཨེཀགྒབྷཱཝོ. སོ པན ཙིཏྟསྶེཝ ཧོཏི, ན ཡསྶ ཀསྶཙཱིཏི ཨཱཧ ‘‘ཙིཏྟསྶ ཨེཀགྒབྷཱཝོ’’ཏི, ནིཝཱཏེ དཱིཔསིཁཱཡ ཋིཏི ཝིཡ ཙིཏྟསྶ ཋིཏཱིཏི ཝུཏྟཾ ཧོཏི. ཝིསཱརསྶ བྱགྒབྷཱཝསྶ པཊིཔཀྑོ སབྷཱཝོ ཨཝིསཱརོ, ན ཝིསཱརཱབྷཱཝམཏྟཾ, ཏཾ ཨིམསྶ ལཀྑཎནྟི ཨཱཧ ‘‘ཨཝིསཱརལཀྑཎོ’’ཏི. ཨཝིཀྑེཔོ སམྤཡུཏྟདྷམྨཱནཾ ཨཝིཀྑིཏྟཏཱ, ཨཝིསཱརཱཝིཀྑེཔཱནཾ སམཱདྷཱནབྷཱཝཏོ ཨཏྠཏོ ཝིསེསཱབྷཱཝེཔི སམུཁེན, སམྤཡུཏྟམུཁེན ཙ ཨུབྷཡཾ ཝུཏྟནྟི དཊྛབྦཾ. ཨཝཱུཔསམལཀྑཎསྶ ཝིཀྑེཔསྶ པཊིཔཀྑཏཱཡ ཙིཏྟསྶ ཨུཔསམནཱཀཱརེན པཙྩུཔཊྛཱཏཱིཏི ཨུཔསམཔཙྩུཔཊྛཱནོ. ཝིསེསཏོཏི ཡེབྷུཡྻེན. སུཁཝིརཧིཏོཔི ཧི ཨཏྠི སམཱདྷཱིཏི སོ ཡེབྷུཡྻེན སུཁཔདཊྛཱནོ ཧོཏི. ཨཐ ཝཱ ¶ ཝིསེསཏོཏི ཨཏིསཡེན. ‘‘སུཁིནོ ཙིཏྟཾ སམཱདྷིཡཏཱི’’ཏི (ཨ. ནི. ༡༡.༡༡) ཝཙནཏོ ཧི སུཁཾ སམཱདྷིསྶ ཝིསེསཀཱརཎཾ སུཁཝིརཧིཏསྶཔི ཏདུཔནིསྶཡེནེཝ སམིཛ྄ཛྷནཏོ.

སདྡཧནྟི ཨེཏཱཡཱཏི ཀམྨཕལཱདིསདྡཧནཀིརིཡཱཡ པཝཏྟམཱནཱནཾ དྷམྨཱནཾ ཏཏྠ ཨཱདྷིཔཙྩབྷཱཝེན སདྡྷཱཡ པཙྩཡཏཾ དསྶེཏི. ཏསྶཱ ཧི དྷམྨཱནཾ ཏཐཱ པཙྩཡབྷཱཝེ སཏི ཏཾསམངྒིཔུགྒལོ ‘‘སདྡཧཏཱི’’ཏི ཝོཧརཱིཡཏི. སདྡཧནཾ སདྡྷེཡྻཝཏྠུནོ པཏྟིཡཱཡནཾ, ཏཾ ལཀྑཎམེཏིསྶཱཏི སདྡཧནལཀྑཎཱ. ཀཱལུསིཡམལཾ ཝིདྷམེཏྭཱ སམྤཡུཏྟཱནཾ, པུགྒལསྶེཝ ཝཱ པསཱདཾ ཨནཱཝིལབྷཱཝཀཱརཎཾ ཀིཙྩམེཏིསྶཱཏི པསཱདནརསཱ. ཡཐཱ ཀཐཾ ཝིཡཱཏི ཨཱཧ ‘‘ཨུདཀཔྤསཱདཀམཎི ཝིཡཱ’’ཏི. ཨཀཱལུསིཡཔཙྩུཔཊྛཱནཱཏི ཨནཱཝིལབྷཱཝཔཙྩུཔཊྛཱནཱ. རཏནཏྟཡཾ ཀམྨཾ ཀམྨཕལཉྩ སདྡྷེཡྻཝཏྠུ, ཏཾ ཨིམིསྶཱ ཨཱསནྣཀཱརཎནྟི སདྡྷེཡྻཝཏྠུཔདཊྛཱནཱ. ན ཧི སདྡྷཱཡ ཨཝཏྠུབྷཱུཏེསུ ཏིཏྠིཡཱདཱིསུ སཱ ཨུཔྤཛྫཏི. སཱ པནཱཡཾ ཀུསལདྷམྨཱནཾ ཨཱདཱནེ ཧཏྠོ ཝིཡ, སབྦསམྤཏྟིསམྤདཱནེ ཝིཏྟཾ ཝིཡ, ཨམཏཀསིཕལཕལནེ བཱིཛཾ ཝིཡ ཙ དཊྛབྦཱ. ‘‘སདྡྷཱཧཏྠོ, མཧཱནཱམ, ཨརིཡསཱཝཀོ, སདྡྷཱིདྷ ཝིཏྟཾ པུརིསསྶ སེཊྛཾ (སཾ. ནི. ༡.༢༤༦; སུ. ནི. ༡༨༤), སདྡྷཱ བཱིཛཾ ཏཔོ ཝུཊྛཱི’’ཏིཨཱདིཝཙནཉྷེཏྠ (སཾ. ནི. ༡.༡༩༧; སུ. ནི. ༧༧) སཱདྷཀཾ.

སརནྟི ༢༣༧ ཨེཏཱཡཱཏི སརཎཀིརིཡཱཡ པཝཏྟམཱནཱནཾ དྷམྨཱནཾ ཏཏྠ ཨཱདྷིཔཙྩབྷཱཝེན སཏིཡཱ པཙྩཡཏཾ དསྶེཏི. ཏསྶཱ ཧི དྷམྨཱནཾ ཏཐཱ པཙྩཡབྷཱཝེ སཏི ཏཾསམངྒིཔུགྒལོ ‘‘སརཏཱི’’ཏི ཝོཧརཱིཡཏི. ཨུདཀེ ཨལཱབུ ཝིཡ པིལཝིཏྭཱ གནྟུཾ ཨདཏྭཱ པཱསཱཎསྶ ཝིཡ ནིཙྩལསྶ ཨཱརམྨཎསྶ ཋཔནཾ ཨསམྨུཊྛཏཱཀརཎཾ ཨཔིལཱཔནཾ, ཏཾ ལཀྑཎམསྶཱཏི ཨཔིལཱཔནལཀྑཎཱ. སཱ ཧི ཨཱརམྨཎེ དལ༹ྷཾ ¶ པཏིཊྛིཏཏྟཱ ཨེསིཀཱ ཝིཡ ཝུཙྩཏི. སམྨོསཔཙྩནཱིཀཀིཙྩཾ ཨསམྨོསརསོ, ན སམྨོསཱབྷཱཝམཏྟཾ. ‘‘སཏཱརཀྑེན ཙེཏསཱ ཝིཧརཏཱི’’ཏི (ཨ. ནི. ༡༠.༢༠) ཝུཏྟཏྟཱ ཙེཏོགུཎརཏནཧཱརཀཱནཾ ཀིལེསཙོརཱནཾ ནིཝཱརཎཏོ ཨཱཧ ‘‘ཨཱརཀྑཔཙྩུཔཊྛཱནཱ’’ཏི. ཏཐཱ ཧེསཱ ཙཀྑུདྭཱརཱདིརཀྑནཏོ དོཝཱརིཀོ ཝིཡཱཏི ཝུཙྩཏི. པཋམཾ སཉྙཱཡ ཐིརུཔྤནྣབྷཱཝེ པཙྪཱ སཏིཡཱ པཏིཊྛཱནབྷཱཝཏོ ཨཱཧ ‘‘ཐིརསཉྙཱཔདཊྛཱནཱ’’ཏི. ཨཐ སཏིསཉྙཱནཾ ཀིཾ ནཱནཱཀརཎནྟི? སཉྙཱ ཏཱཝ པཋམཾ ཨགྒཧིཏནིམིཏྟཾ སཉྫཱནཱཏི, གཧིཏནིམིཏྟེ པུན པཙྩཱབྷིཉྙཱཎཔཙྩཡནིམིཏྟཾ ཀརོཏི, པཋམཾ ཨགྒཧིཏེ པན སཉྙཱཀིཙྩཾ ཨཔྤདྷཱནཾ ཧོཏི, སཏི པན པཋམཾ ཨགྒཧིཏནིམིཏྟམྤི སརཏི གཧིཏནིམིཏྟམྤི, གཧིཏནིམིཏྟེ པན སཏིཀིཙྩཾ གུཎབྷཱུཏཾ ཧོཏཱིཏི ཨིདམེཝ ཏཱསཾ ནཱནཏྟཾ.

ཝཱིརབྷཱཝོཏི ཡེན ཝཱིརིཡེན ཝཱིརོ ནཱམ ཧོཏི, སོ དྷམྨོ. ཝཱིརཱནཾ ཝཱ ཀམྨནྟི ཡེན ཀམྨེན ཝཱིརོ ནཱམ ཧོཏི, ཏཾ ཝཱིརཱནཾ ཀམྨཾ ནཱམ. ཝཱིརིཡཾ པནསྶ སཱདྷཀབྷཱཝཏོ ཏཐཱ ཝུཏྟཾ. དྷམྨཝིནིམུཏྟཾ ཝཱ ཀིཉྩི ཀམྨཾ ནཏྠཱིཏི ཝཱིརིཡམེཝ ཀམྨབྷཱཝེན ཝུཏྟནྟི དཊྛབྦཾ. ཝིདྷིནཱ ཨཱིརེཏབྦཾ པཝཏྟེཏབྦནྟི ཝཱ ཝཱིརིཡཾ. ཨུསྶཱཧོ ཏཾ ཏཾ ཀིཙྩཾ སམཱརམྦྷོ, པརཀྐམོ ཝཱ. ཨུཔཏྠམྦྷནཾ པན སམྤཡུཏྟདྷམྨཱནཾ ཀོསཛྫཔཀྑེ པཏིཏུཾ ཨདཏྭཱ དྷཱརཎཾ ཨནུབལཔྤདཱནཾ. སམྤཡུཏྟདྷམྨཱནཾ སཾསཱིདནབྷཱཝནིཝཱརཀོ དྷམྨོ, ན སཾསཱིདནཱབྷཱཝམཏྟཾ, ཨསཾསཱིདནབྷཱཝེན པཙྩུཔཊྛཱཏཱིཏི ཨསཾསཱིདནབྷཱཝཔཙྩུཔཊྛཱནཾ. ‘‘སཾཝིགྒོ ཡོནིསོ པདཧཏཱི’’ཏི (ཨ. ནི. ༤.༡༡༣) ཝཙནཏོ སཾཝེགཔདཊྛཱནཾ. སཾཝེགོཏི ཙེཏྠ སཾཝེགམཡཾ ཉཱཎཾ. ཨསཾཝེགཔུབྦིཀཱཡ པན ཀུསལཀིརིཡཱཡ ཝཱིརིཡཱརམྦྷཝཏྠུཔདཊྛཱནཾ. ཏཏྠ ཝཱིརིཡཱརམྦྷཝཏྠཱུནི ནཱམ –

‘‘མགྒོ ¶ གནྟབྦོ ཧོཏི, མགྒོ གཏོ. ཀམྨཾ ཀཱཏབྦཾ ཧོཏི, ཀམྨཾ ཀཏཾ. ཨཔྤམཏྟཀོ ཨཱབཱདྷོ ཨུཔྤནྣོ ཧོཏི, གིལཱནཱ ཝུཊྛིཏོ ཧོཏི, ཨཙིརཝུཊྛིཏོ གེལཉྙཱ. གཱམཾ ཝཱ ནིགམཾ ཝཱ པིཎྜཱཡ ཙརནྟོ ན ལབྷཏི, ལཱུཁསྶ ཝཱ པཎཱིཏསྶ ཝཱ བྷོཛནསྶ ཡཱཝདཏྠཾ པཱརིཔཱུརིཾ ལབྷཏི…པེ… པཱརིཔཱུརི’’ནྟི –

ཨེཝཾ ¶ ཝུཏྟཱནི ཨེཏཱནི ཨནུརཱུཔཔཙྩཝེཀྑཎསཧིཏཱནི ཨཊྛ ཝཱིརིཡཱརམྦྷཝཏྠཱུནི, ཏམྨཱུལཀཱནི ཝཱ པཙྩཝེཀྑཎཱནི. ཨེཏྠ ཙ ཝིཏཀྐོ སམྤཡུཏྟདྷམྨེ ཨཱརམྨཎཾ ཨཱརོཔེཏི. ཙེཏནཱ ཏེ ཏཾཏཾཀིཙྩེསུ ནིཡོཛེཏི. ཝཱིརིཡཾ པན ཏེ སཾསཱིདིཏུཾ ཨདཏྭཱ ཨུསྶཱཧེཏཱིཏི ཨཡཾ ཝིཏཀྐཙེཏནཱཝཱིརིཡཱནཾ ཝིསེསོ.

ཝིཛཱནནལཀྑཎཱཏི ཝིསེསེན ཛཱནནལཀྑཎཱ, ཡཐཱསབྷཱཝཔཊིཝེདྷལཀྑཎཱཏི ཨཏྠོ. ཝིསཡསྶ ཨཱརམྨཎསྶ ཨོབྷཱསནཾ པཀཱསནཾ ཏཔྤཊིཙྪཱདཀསམྨོཧནྡྷཀཱརསྶ ཝིདྷམནཏོཏི ཝིསཡོབྷཱསནཾ, ཏཾ ཀིཙྩམསྶཱཏི ཝིསཡོབྷཱསནརསཱ. ཀཏྠཙི ཝིསཡེ ཨསམྨུཡ྄ཧནཱཀཱརེན སམྨོཧཔཊིཔཀྑཏཱཡ ཝཱ པཙྩུཔཊྛཱནཏོ སམྨོཧཱབྷཱཝསྶ པཙྩུཔཊྛཱནཏོ ཝཱ ཨསམྨོཧཔཙྩུཔཊྛཱནཱ.

ཨཏྟནཱ ཨནུཔཱལེཏབྦཱནཾ སཧཛཱཏདྷམྨཱནཾ ཨནུཔཱལནཾ ཛཱིཝིཏསྶ བྱཱཔཱརོ, ཏཉྩ ཏེསཾ ཛཱིཝནནྟི ཏཾ ཏསྶ ཀཱརཎབྷཱཝཾ པུརཀྑཏྭཱ ཝུཏྟཾ ‘‘ཛཱིཝནྟི ཏེནཱ’’ཏི. རཱུཔཱརཱུཔཛཱིཝིཏིནྡྲིཡསྶ ཨནུརཱུཔཏོ ལཀྑཎཱདིཀཾ དསྶེཏུཾ ‘‘ཨཏྟནཱ ཨཝིནིབྷུཏྟཱན’’ནྟི ཝུཏྟཾ. ‘‘སམྤཡུཏྟཱན’’ནྟི ཧི ཝུཙྩམཱནེ རཱུཔདྷམྨཱནཾ སམྤཡོགཱབྷཱཝཏོ རཱུཔཛཱིཝིཏིནྡྲིཡསྶ སངྒཧོ ན སིཡཱ. ‘‘ཨཝིནིབྷུཏྟཱན’’ནྟི པན ཝུཏྟཏྟཱ ཡཱནི ¶ ཨཝིནིབྦྷོགརཱུཔཱནི རཱུཔཛཱིཝིཏིནྡྲིཡེན སདྡྷིཾ ཨཝིནིབྷུཏྟཱནི ཨཝིསཾསཊྛཱནི. ཡེ ཙ ཨརཱུཔདྷམྨཱ ཨརཱུཔཛཱིཝིཏིནྡྲིཡེན སམྤཡུཏྟཱ, ཏེསཾ སབྦེསཾ སངྒཧོ ཧོཏཱིཏི. པཝཏྟནརསནྟི ཨུཔྤཱདཏོ ཡཱཝ བྷངྒཱ ཨནུཔཱལནཏོ ཨནྟརཱ ཨནིཝཏྟནསབྷཱཝསཱདྷནེན ཏེསཾ པཝཏྟནཀིཙྩཾ. ཀེཙི པན ‘‘རཱུཔཛཱིཝིཏིནྡྲིཡཾ ཏེསཾ ཋིཏིཀྑཎཏོ པཊྛཱཡ, ཨརཱུཔཛཱིཝིཏིནྡྲིཡཾ ཨུཔྤཱདཏོ པཊྛཱཡ པཝཏྟིཡཱ པཙྩཡོ’’ཏི ཝདནྟི, ཏཾ ན ཡུཏྟཾ. པཊྛཱནེ ཧི ‘‘ཨབྱཱཀཏཾ དྷམྨཾ པཊིཙྩ ཨསཉྙསཏྟཱནཾ ཨེཀཾ མཧཱབྷཱུཏཾ པཊིཙྩ ཨིནྡྲིཡཔཙྩཡཾ ཀམྨཔཙྩཡསདིས’’ནྟི ཨསཉྙསཏྟཱནཾ ཨིནྡྲིཡཔཙྩཡོ ཀམྨཔཙྩཡསདིསཾ ཀཏྭཱ ཝུཏྟོ, ཏསྨཱ རཱུཔཛཱིཝིཏིནྡྲིཡམྤི ཨུཔྤཱདཏོ པཊྛཱཡ པཙྩཡོ ཧོཏཱིཏི དཊྛབྦཾ. ཨུཔྤཱདཏོ ཡཱཝ བྷངྒཱ ཋཔནཏོ ཋཔནཔཙྩུཔཊྛཱནཾ. ཨནུཔཱལནཝསེན ཡཱཔཡིཏབྦཱ པཝཏྟེཏབྦཱ དྷམྨཱ པདཊྛཱནམསྶཱཏི ཡཱཔཡིཏབྦདྷམྨཔདཊྛཱནཾ. ཡདི ཨེཝཾ ཏེསཾ ཨནུཔཱལནཱདིསཱདྷཀཾ, ཀཐཾ ཏེསཾ ནིརོདྷོ ཧོཏི. ཨེཝཉྷི སབྦཀཱལཾ ཋཱཏབྦནྟི ཨཱཧ ‘‘སནྟེཔི ཙཱ’’ཏིཨཱདི. ཨནུཔཱལནལཀྑཎཱདིམྷཱིཏི ཨཱདི-སདྡེན པཝཏྟནརསཱདིམེཝ སངྒཎྷཱཏི. ཨཏྠིཀྑཎེཡེཝཱཏི ཨཏྟནཱ ཨནུཔཱལེཏབྦཱནཾ, ཨཏྟནོ ཝཱ ཨཏྠིཀྑཎེཡེཝ. ཨུདཀནྟི ཏལཱ༹ཀགཏཛལཾ, དཎྜགཏཛལཾ ཝཱ ¶ . ཏཏྠ ཏལཱ༹ཀགཏཨུདཀསྶ གཧཎེ ཨཏྟནཱ ཨནུཔཱལེཏབྦདྷམྨཱནཾ ཨཏྠིཀྑཎེ ཨནུཔཱལནཾ སཱདྷིཏཾ ཧོཏི, དཎྜགཏཛལསྶ པན གཧཎེ ཨཏྟནོ ཨཏྠིཀྑཎེ ཨནུཔཱལནཾ. ཨཏྟནཱ ཨནུཔྤཱདིཏདྷམྨེ ཀཐཾ པཱལེཏཱིཏི ཨཱཧ ‘‘དྷཱཏི ཝིཡ ཀུམཱར’’ནྟི. ཡདི སེསདྷམྨཱནཾ པཝཏྟིཀཱརཎེན ཀེནཙི བྷཝིཏབྦཾ, ཛཱིཝིཏསྶ པན ཀིཾ པཝཏྟིཀཱརཎནྟི ཨཱཧ ‘‘སཡཾ…པེ… པཝཏྟཏཱི’’ཏི. ཡཐཱ ཀཐཾ ཝིཡཱཏི ཨཱཧ ‘‘ནིཡཱམཀོ ཝིཡཱ’’ཏི. སོཔི ཨཏྟནཱ པཝཏྟིཏནཱཝཱསམྦནྡྷེན པཝཏྟཏི. ཡདི དྷམྨཱནཾ པཝཏྟི ཛཱིཝིཏིནྡྲིཡཔཊིབདྡྷཾ, བྷངྒཏོ ཨུདྡྷམྤི ཀིཾ པན པཝཏྟེཏཱིཏི ཨཱཧ ‘‘ན བྷངྒཏོ ཨུདྡྷ’’ནྟི. ཀསྨཱཏི ཨཱཧ ‘‘ཨཏྟནོ ¶ ཙ པཝཏྟེཏབྦཱནཉྩ ཨབྷཱཝཱ’’ཏི. བྷངྒཀྑཎེ པན ཀཐནྟི ཨཱཧ ‘‘ན བྷངྒཀྑཎེ ཋཔེཏཱི’’ཏི.

ཡསྨཱ པན ལོབྷཔཊིཔཀྑོ ཨལོབྷོ ཧོཏི, ཡེ དྷམྨཱ ཏེན སམྤཡུཏྟཱ, ཏཾསམངྒིནོ ཝཱ སཏྟཱ, ཏེ ན ལུབྦྷནྟི, སཡམྤི ཀདཱཙི ན ལུབྦྷཏེཝ, ཨཏྠཏོ ཝཱ ཨལུབྦྷནཱཀཱརོ ཨེཝ ཙ སོ ཧོཏི, ཏསྨཱ ཝུཏྟཾ ‘‘ན ལུབྦྷནྟི ཏེནཱ’’ཏིཨཱདི. ཨེས ནཡོ ‘‘ན དུསྶནྟི ཏེནཱ’’ཏིཨཱདཱིསུཔི. ཨལགྒབྷཱཝོ ཨཱརམྨཎཾ ནིསྶཱཡ པཝཏྟནྟསྶཔི ཏཏྠ ཨནཱསཏྟཏཱ. ཏེནཱཧ ‘‘ཀམལདལེ ཛལབིནྡུ ཝིཡཱ’’ཏི. ཨཔརིགྒཧོ ཀསྶཙི ཝཏྠུནོ མམཏྟཝསེན ཨསངྒཧོ. མུཏྟབྷིཀྑུ ཝིཡཱཏི ཁཱིཎཱསཝབྷིཀྑུ ཝིཡ. སོ ཧི མུཏྟརཱགཏྟཱ ཀཏྠཙི མམཱཡནརཧིཏོ ཧོཏི. ཨནལླཱིནོ བྷཱཝོ ཨདྷིཔྤཱཡོ ཨེཏསྶཱཏི ཨནལླཱིནབྷཱཝོ. ཨེཝཉྷི ‘‘ཨསུཙིམྷི པཏིཏཔུརིསོ ཝིཡཱ’’ཏི ཨུཔམཱཡ སམེཏི. ཡཐཱ ཧི ཏསྶ པུརིསསྶ སཏིཔི ཀཱཡེན ཨལླཱིཡནེ བྷཱཝོ ཨནལླཱིནོ, ཨེཝཾ ཨལོབྷོཔི ཨཱརམྨཎཀརཎཝསེན གཧིཏེཔི ཨཱརམྨཎེ ཨལགྒབྷཱཝེན ཨནལླཱིནབྷཱཝོ ཨནལླཱིནཱཀཱརོཡེཝ པཝཏྟཏི. ཨེཝཾསབྷཱཝོ ཧི སོ དྷམྨོཏི.

ཙཎྜིཀསྶ བྷཱཝོ ཙཎྜིཀྐཾ, ཕརུསབྷཱཝོ, ཨཏྠཏོ པན ཀོཔོཡེཝ, ཏཔྤཊིཔཀྑོ ཨཕརུསབྷཱཝོ ཨཙཎྜིཀྐཾ. ཨཝིརོདྷོ ཨཝིགྒཧོ ཨཔྤཊིཔཀྑོ སབྷཱཝོ. ཨཱགྷཱཏཝིནཡནརསོཏི ཨེཏྠ ཨཱགྷཱཏོ ནཱམ པརསྶ ཨཏྟཱནཾ, ཨཏྟནོ པརཾ ཨུདྡིསྶ, པརསྶེཝ ཙ པརཾ ཨུདྡིསྶ པཝཏྟོ ཨུཔནཱཧོ བལཝཀོཔོ. ཏསྶ ཝིནཡནརསོ ཨཔནཡནརསོ. སོམྨབྷཱཝོ མཛྫནཝསེན ཧིལཱདནིཡཏཱ སཱིཏལབྷཱཝོ. ཏེནཱཧ ‘‘པུཎྞཙནྡོ ཝིཡཱ’’ཏི.

ཀཱཡདུཙྩརཱིཏཱདཱིཧཱིཏི ¶ ཧེཏུམྷི ཀརཎཝཙནཾ. ཧིརཱིཡཏི ལཛྫནཱཀཱརེན ཛིགུཙྪིཡཏི. ཏེཧིཡེཝཱཏི ཀཱཡདུཙྩརིཏཱདཱིཧིཡེཝ. ཨོཏྟཔྤཏཱིཏི ཨུབྦིཛྫཏི. ཧིརཱི པཱཔེ གཱུཐེ ཝིཡ པསྶནྟཱི ཛིགུཙྪཏཱིཏི ¶ ཨཱཧ ‘‘པཱཔཏོ ཛིགུཙྪནལཀྑཎཱ ཧིརཱི’’ཏི. ཨོཏྟཔྤཾ ཏེ ཨུཎྷཾ ཝིཡ པསྶནྟཾ ཏཏོ ཨུཏྟསཏཱིཏི ཝུཏྟཾ ‘‘ཨུཏྟཱསལཀྑཎཾ ཨོཏྟཔྤ’’ནྟི. ཨུབྷོཔི པཱཔཱནཾ ཨཀརཎརསཱཏི ལཛྫནཱཀཱརེན པཱཔཱནཾ ཨཀརཎརསཱ ཧིརཱི, ཨུཏྟཱསཱཀཱརེན ཨོཏྟཔྤཾ. པཱཔཏོ སངྐོཙནཔཙྩུཔཊྛཱནཱཏི ཝུཏྟཔྤཀཱརེནེཝ པཱཔཏོ སངྐོཙནཱཀཱརེན པཙྩུཔཊྛཱནཱ. ཨཏྟགཱརཝཔརགཱརཝཔདཊྛཱནཱཏི ཨཏྟགཱརཝཔདཊྛཱནཱ ཧིརཱི ཨཛ྄ཛྷཏྟསམུཊྛཱནཏཱཡ, ཨཏྟཱདྷིཔཏིཏཱཡ ཙ. པརགཱརཝཔདཊྛཱནཾ ཨོཏྟཔྤཾ བཧིདྡྷཱསམུཊྛཱནཏཱཡ, ལོཀཱདྷིཔཏིཏཱཡ ཙ. ཨཏྟཱནཉྷི གརུཾ ཀཏྭཱ ཧིརིཡཱ པཱཔཾ པཛཧཏི ཀུལཝདྷཱུ ཝིཡ. པརཾ གརུཾ ཀཏྭཱ ཨོཏྟཔྤེན པཱཔཾ པཛཧཏི ཝེསིཡཱ ཝིཡ. ཨཛ྄ཛྷཏྟསམུཊྛཱནཱདིཏཱ ཙ ནེསཾ ཏཏྠ ཏཏྠ པཱཀཊབྷཱཝེན ཝེདིཏབྦཱ, ན པན ཏེསཾ ཀདཱཙི ཨཉྙམཉྙཝིཡོགཏོ. ན ཧི ལཛྫནཾ ནིབྦྷཡཾ ཝཱ པཱཔབྷཡཾ ཝཱ ཨལཛྫནཾ ཨཏྠཱིཏི. ཧིརིཡཱ བལཝབྷཱཝེ པན ཨོཏྟཔྤཾ ཨབྦོཧཱརིཀཾ ཧོཏི, ཨོཏྟཔྤསྶ བལཝབྷཱཝེ ཧིརཱི ཨབྦོཧཱརིཀཱ. ཨིམེ ཙ དྭེ དྷམྨཱ ‘‘ལོཀཔཱལཱ’’ཏི ཝུཙྩནྟི. ཡཐཱཧ –

‘‘དྭེམེ, བྷིཀྑཝེ, སུཀྐཱ དྷམྨཱ ལོཀཾ པཱལེནྟི. ཀཏམེ དྭེ? ཧིརཱི ཙ ཨོཏྟཔྤཉྩ, ཨིམེ ཁོ, བྷིཀྑཝེ, དྭེ སུཀྐཱ དྷམྨཱ ལོཀཾ ན པཱལེཡྻུཾ, ནཡིདྷ པཉྙཱཡེཐ ‘མཱཏཱ’ཏི ཝཱ ‘མཱཏུཙྪཱ’ཏི ཝཱ ‘མཱཏུལཱནཱི’ཏི ཝཱ’’ཏིཨཱདི (ཨ. ནི. ༢.༩).

པསྶམྦྷནཾ དརཐཝཱུཔསམོ, ཀཱཡ-སདྡོ སམཱུཧཝཙནོ. སོ ཙེཏྠ ཝེདནཱདིཀྑནྡྷཏྟཡཾ. ཝཏྟིཙྪཱཝསེན ཧི སདྡོ ཝིསིཊྛཝུཏྟི ཧོཏཱིཏི ཨཱཧ ‘‘ཀཱཡོཏི ཙེཏྠཱ’’ཏིཨཱདི. ཝེདནཱདཡོཏི ¶ ཝེདནཱཀྑནྡྷོ སཉྙཱཀྑནྡྷོ སངྑཱརཀྑནྡྷོཏི ཏཡོ ཁནྡྷཱ. ཏཐཱ ཙ ཝུཏྟཾ ཏཏྠ ‘‘ཀཏམཱ ཏསྨིཾ སམཡེ ཀཱཡཔསྶདྡྷི ཧོཏི, ཡཱ ཏསྨིཾ སམཡེ ཝེདནཱཀྑནྡྷསྶཱ’’ཏིཨཱདི (དྷ. ས. ༤༠). དརཐོ སཱརམྦྷོ དོམནསྶཔཙྩཡཱནཾ ཨུདྡྷཙྩཱདཱིནཾ ཀིལེསཱནཾ, ཏཐཱ པཝཏྟཱནཾ ཝཱ ཙཏུནྣཾ ཁནྡྷཱནམེཏཾ ཨདྷིཝཙནཾ. ཏསྶ ཝཱུཔསམཾ ལཀྑཎམསྶཱཏི ཀཱཡཙིཏྟདརཐཝཱུཔསམལཀྑཎཱ. ཀཱཡཙིཏྟ…པེ… རསཱཏི ཡཐཱཝུཏྟཱནམེཝ པཊིཔཀྑདྷམྨཱནཾ ཨབྷིབྷཝནརསཱ. དརཐནིམྨདྡནེན པརིལཱ༹ཧཔརིཔྥནྡནཝིརཧིཏོ སཱིཏིབྷཱཝོ ཨཔརིཔྥནྡནསཱིཏིབྷཱཝོ. ཨཝཱུཔསམོ པརིཔྥནྡནཾ ཨསནྟཝུཏྟིཏཱ. ཨུདྡྷཙྩཱདིཀིལེསཱཏི ཨུདྡྷཙྩཔྤདྷཱནཱ ཨུདྡྷཙྩཱདྷིཀཙིཏྟུཔྤཱདསམྤཡུཏྟཱ ཀིལེསཱ. ཏེཔི ཧི ཨུདྡྷཙྩཝསེན ཨཝཱུཔསམཀརཱ. ཨུདྡྷཙྩཾ ཝཱ ཨཱདིཾ ཀཏྭཱ སབྦེཡེཝ ཀིལེསཱ ཨུདྡྷཙྩཱདིཀིལེསཱ. ཨེཝཾ སེསེསུཔི.

གརུབྷཱཝོ ¶ དནྡྷཏཱ, ཐིནམིདྡྷཱདྷིཀཱནཾ ཏཐཱ པཝཏྟཱནཾ ཝཱ ཙཏུནྣཾ ཁནྡྷཱནམེཏཾ ཨདྷིཝཙནཾ. དནྡྷཏཱཡ པཊིཔཀྑོ ཨདནྡྷཏཱ ཨགརུབྷཱཝོ.

ཐདྡྷབྷཱཝོ ཐམྦྷོ. དིཊྛིམཱནཱདྷིཀཱནཾ, ཏཔྤདྷཱནཱནཾ ཝཱ ཙཏུནྣཾ ཁནྡྷཱནཾ ཨེཏཾ ནཱམཾ. ཐདྡྷབྷཱཝནིམྨདྡནཏོཡེཝ ཀཏྠཙི ཨཱརམྨཎེ ཨཔྤཊིཧཏཱཀཱརེན པཙྩུཔཊྛནྟི, སམྤཡུཏྟཱནཾ ཝཱ ཏཏྠ ཨཔྤཊིགྷཱཏཾ པཙྩུཔཊྛཱཔེནྟཱིཏི ཨཔྤཊིགྷཱཏཔཙྩུཔཊྛཱནཱ.

ཀམྨནི སཱདྷུ ཀམྨཉྙཾ, ན ཀམྨཉྙཾ ཨཀམྨཉྙཾ, ཏསྶ བྷཱཝོ ཨཀམྨཉྙབྷཱཝོ, དཱནསཱིལཱདིཔུཉྙཀིརིཡཱཡ ཨསམཏྠཏཱ. ཨཏྠཏོ ཀཱམཙྪནྡཱདིསཾཀིལེསདྷམྨཱ, ཏཔྤདྷཱནཱ ཝཱ ཙཏྟཱརོ ཨཀུསལཀྑནྡྷཱ. ཨཀམྨཉྙབྷཱཝནིམྨདྡནེནེཝ སམྤནྣཱཀཱརེན ཨཱརམྨཎསྶ གཧཎཾ ཨཱརམྨཎཀརཎསམྤཏྟི. ཝུཏྟཱཝསེསཱ ཀཱམཙྪནྡཱདཡོ, ཏདེཀཊྛཱ ཙ སཾཀིལེསདྷམྨཱ སེསནཱིཝརཎཱདཡོ. ཨིམཱ པན དྭེ ཝིནིབནྡྷནིམྨདྡནེན ¶ པསཱདནཱིཡཝཏྠཱུསུ པསཱདཱཝཧཱ, ཧིཏཀིརིཡཱསུ ཝིནིཡོགཀྑམབྷཱཝཱཝཧཱ སུཝཎྞཝིསུདྡྷི ཝིཡཱཏི དཊྛབྦཱ.

གེལཉྙཾ ཨསྶདྡྷིཡཱདཡོ, ཏདེཀཊྛཱ ཙ པཱཔདྷམྨཱ, ཏཔྤཊིཔཀྑོ ཨགེལཉྙབྷཱཝོ ལཀྑཎཾ ཨེཏཱསནྟི ཨགེལཉྙབྷཱཝལཀྑཎཱ. གེལཉྙནིམྨདྡནེནེཝ ནཏྠི ཨེཏཱསཾ ཨཱདཱིནཝོ དོསོ ཨུཔདྡཝོ ཝཱ, ན ཝཱ ཨེཏཱ ཨཱདཱིནཾ ཀཔཎཾ ཝནྟི པཝཏྟནྟཱིཏི ནིརཱདཱིནཝཱ, ཏེནཱཀཱརེན པཙྩུཔཊྛནྟི, ཏཾ ཝཱ སམྤཡུཏྟེསུ པཙྩུཔཊྛཱཔེནྟཱིཏི ནིརཱདཱིནཝཔཙྩུཔཊྛཱནཱ.

ཀཱཡསམྦནྡྷཱི, ཙིཏྟསམྦནྡྷཱི ཙ ཨུཛུབྷཱཝོཏི ལཀྑིཏབྦཏཱཡ ཀཱཡཙིཏྟཱནཾ ཨཛྫཝལཀྑཎཱ. ཀཱཡཙིཏྟཱནཾ ནངྒལསཱིསཙནྡཀོཊིགོམུཏྟཝངྐཏཱསངྑཱཏཱནཾ ཀུཊིལབྷཱཝཱནཾ ཨཏྠཏོ མཱཡཱསཱཋེཡྻཱདིབྷཱུཏཱནཾ ནིམྨདྡནཏོ ཀཱཡཙིཏྟཱནཾ ཀུཊིལབྷཱཝནིམྨདྡནརསཱ. ཏཏོཡེཝ སབྦཐཱཔི ཨཛིམྷབྷཱཝེན པཙྩུཔཊྛནྟི, སམྤཡུཏྟཱནཾ ཝཱ ཨཛིམྷཏཾ པཙྩུཔཊྛཱཔེནྟཱིཏི ཨཛིམྷཏཱཔཙྩུཔཊྛཱནཱ.

ནནུ ཙ ཀཱཡཔསྶདྡྷིཨཱདཱིནཾ དྭིནྣཾ དྭིནྣཾ དྷམྨཱནཾ ཨེཀེཀཔཊིཔཀྑཏྟཱ དརཐནིམྨདྡནཱདིཀིཙྩཾ ཨེཀེཀམེཝ ཀརོཏི. ཀསྨཱ པན དྭེ དྭེ དྷམྨཱ ཝུཏྟཱཏི? ན ཁོ པནེཝཾ ཙིནྟིཏབྦཾ བྷགཝཏཱཔི ཏཐེཝ དེསིཏཏྟཱ. ཀསྨཱ པན བྷགཝཏཱ ཏཐཱ དེསིཏཱ? སབྷཱཝདྷམྨབྷཱཝཏོ. ན ཧི བྷགཝཏཱ པུབྦེ ཨཝིཛྫམཱནཱ ཨེཏེ དྷམྨཱ དེསནཱཝསེན ཨུཔྤཱདིཏཱ, ཨཐ ¶ ཁོ སབྷཱཝཏོ ཝིཛྫམཱནཱཡེཝ སཡམྦྷུཉཱཎེན སམྨཱ སཙྪིཀཏྭཱ ཡཐཱསབྷཱཝཱ དེསིཏཱ, ཏསྨཱ ཀཐམེཏྠ བྷགཝཏཱ སབྷཱཝཏོ ཝིཛྫམཱནསྶ ཧཱཔནཾ ཀཱཏུཾ སཀྐཱ. སབྷཱཝཏོ ཝིཛྫམཱནཏཱཡ ཙེཏྠ བྷགཝཏོ ཝཙནམེཝ པམཱཎཾ. ན ཧི བྷགཝཱ ཡཐཱདྷམྨསཱསནཱདྷིཀཱརེ ཨཡཐཱདྷམྨཾ ཀཐེཡྻཱཏི, ཡསྶ པན ཝིཛྫམཱནསྶཱཔི ཨཀཐནཾ, ཏཾ ཨཉྙཧེཏུཀཾ. ན ཙེཏྠ ཏཱདིསོ ཧེཏུ ཨུཔལབྦྷཏི, ཡེན ཨིམེསུ ¶ ཨེཀེཀདྷམྨསྶ ཨཀཐནནྟི. ཡཐཱ པན དྭིནྣཾ པུརིསཱནཾ ཨེཀོཡེཝ ཝེརིཀོ ཧོཏི, ཏསྶ ཏེ པུརིསཱ ཨོཏཱརཾ དིསྭཱ ཨེཀཏོ ཧུཏྭཱཝ ཧནནྟི, ཨེཝམེཝ དྭེ དྭེ དྷམྨཱ ཨེཀཏོ ཧུཏྭཱ ཨེཀཾ པཊིཔཀྑདྷམྨཾ ཧནནྟི, ཡཐཱ ཙ པནེཏེ ཝིསུཾ དིསྭཱཔི ཏཾ ཝེརིཾ ཧནནྟི, ན ཨེཝམེཏེ ཏཾ ཝིསུཾ ཧནནྟི ཏེསཾ ཨཉྙམཉྙཾ ཨཝིནཱབྷཱཝཏོཏི, ཏསྨཱ ཨེཏེ པཊིཔཀྑདྷམྨཱནཾ ཨེཀེཀབྷཱཝེཔི དྭེ དྭེཡེཝ ཝུཏྟཱཏི, ཨཔིཙ ཙིཏྟཔསྶདྡྷིཨཱདཱིཧི ཙིཏྟམེཝ པསྶདྡྷི ལཧུ མུདུ ཀམྨཉྙཾ པགུཎཾ ཨུཛུཉྩ ཧོཏི. ཀཱཡཔསྶདྡྷིཨཱདཱིཧི པན རཱུཔཀཱཡོཔཱིཏི ཏདཏྠདསྶནཏྠཾ བྷགཝཏཱ ཨེཏྠེཝ དུཝིདྷཏཱ ཝུཏྟཱ, ན སམཱདྷིཨཱདཱིསུ.

ཚནྡནཾ ཚནྡོ, ཨཱརམྨཎེན ཨཏྠིཀཏཱ. ‘‘ཚནྡོ ཀཱམོ’’ཏིཨཱདཱིསུ (མཧཱནི. ༡) པན ཏཎྷཱཔི ཚནྡོཏི ཝུཙྩཏི. ‘‘ཚནྡཾ ཛནེཏི ཝཱཡམཏཱི’’ཏིཨཱདཱིསུ ཝཱིརིཡམྤཱིཏི ཏཏོ ནིཝཏྟནཏྠཾ ཝུཏྟཾ ‘‘ཀཏྟུཀམྱཏཱཡེཏཾ ཨདྷིཝཙན’’ནྟི. ཀཏྟུཀམྱཏཱ ཝུཙྩཏི ཀརཎིཙྪཱ. ཙེཏསིཀསྶ དྷམྨསྶ སཱརམྨཎཏྟཱ ཀརཎིཙྪཱ ནཱམ ཨཱརམྨཎསྶ ཨཱལམྦིཏུཀཱམཏཱམུཁེནེཝ ཧོཏཱིཏི ཨཱརམྨཎཀརཎིཙྪཱལཀྑཎོ ཚནྡོ ‘‘ཀཏྟུཀམྱཏཱལཀྑཎོ’’ཏི ཝུཏྟོ. ཏེནེཝཱཧ ‘‘ཨཱརམྨཎཔརིཡེསནརསོ, ཨཱརམྨཎེན ཨཏྠིཀཏཱཔཙྩུཔཊྛཱནོ’’ཏི ཙ. ཡདགྒེན པནཱཡཾ ཨཏྟནོ ཨཱརམྨཎཔརིཡེསནརསོ, ཏདགྒེན སམྤཡུཏྟདྷམྨཱནམྤི ཧོཏིཡེཝ ཨེཀཱརམྨཎཏཱཡ. ཏེན ཏེསཾ ཨཱརམྨཎགྒཧཎེ ཙེཏསོ ཧཏྠཔྤསཱརཎཾ ཝིཡཱཏི ཝུཙྩཏི. ཀཐཾ པན དཱནཝཏྠུཝིསྶཛྫནཝསེན པཝཏྟམཱནཙེཏནཱསམྤཡུཏྟོ ཚནྡོ ཨཱརམྨཎེན ཨཏྠིཀོ ཧོཏཱིཏི? ནནུ ཨཝོཙུམྷཱ ‘‘ཨཱརམྨཎཀརཎིཙྪཱལཀྑཎོ’’ཏི, ཏསྨཱ སངྒཱམགཏཨིསྶཱསསྶ ཁིཔིཏབྦཨུསཱུནཾ གཧཎེ ཨཏྠིཀཏཱ ཝིཡ དཱནཝཏྠུཝིསྶཛྫནཝསེན ¶ པཝཏྟཙྪནྡོཔི ཝིསྶཛྫིཏབྦེན ཏེན ཨཏྠིཀོཡེཝཱཏི. སྭཱཡཾ ཀུསལེསུ ཨུཔྤནྣོ ཀུསལཙྪནྡོ ནཱམ ཧོཏི ཡོནིསོམནསིཀཱརསམུཊྛཱནཏྟཱ. ཏབྦིཔརཱིཏཏོ པན ཨཀུསལེསུ ཨུཔྤནྣོ ཨཀུསལཙྪནྡོ.

ཨདྷིམུཙྩནཾ ཨཱརམྨཎེ སནྣིཊྛཱནཝསེན ཝེདིཏབྦཾ, ན པསཱདནཝསེན. ཏེནཱཧ ‘‘སནྣིཊྛཱནལཀྑཎོ’’ཏི. ཡཐཱ ཏཐཱ ཧི ཨཱརམྨཎེ ནིཙྪཡནཾ ཨདྷིམུཙྩནཾ ཨནདྷིམུཙྩནྟསྶ པཱཎཱཏིཔཱཏཱདཱིསུ ¶ , དཱནཱདཱིསུ ཝཱ པཝཏྟིཡཱ ཨབྷཱཝཏོ, སདྡྷཱ པན པསཱདནཱིཡེསུ པསཱདཱདྷིམོཀྑོཏི ཨཡམེཏེསཾ ཝིསེསོ. ཝོཊྛབྦནཾ པན ཡཐཱ སནྟཱིརིཏེ ཨཏྠེ ནིཙྪཡནཱཀཱརེན པཝཏྟིཏྭཱ པརཏོ པཝཏྟམཱནཱནཾ ཏཐཱ པཝཏྟིཡཱ པཙྩཡོ ཧོཏི. ཡདི ཨེཝཾ ཝིཙིཀིཙྪཱསམྤཡུཏྟེསུ དྷམྨེསུ ཀཐནྟི? ཏེསམྤི ཨེཀཾསེནེཝ སཾསཔྤནཱཀཱརསྶ པཙྩཡཏཱཡ དཊྛབྦཾ, དཱརཀསྶ ཝིཡ ཨིཏོ ཙིཏོ ཙ སཾསཔྤནསྶ ‘‘ཀརིསྶཱམི, ན ཀརིསྶཱམཱི’’ཏི ཨནིཙྪཡསྶ པཊིཔཀྑཀིརིཡཱ ཨསཾསཔྤནཾ. ཡེསུ ཙིཏྟུཔྤཱདེསུ ཨཡཾ སནྣིཊྛཱནལཀྑཎོ ཨདྷིམོཀྑོ, ཏེསཾ ཨཱརམྨཎདྷམྨོཡེཝ སནྣིཊྛཱཏབྦཏྟཱ སནྣིཊྛེཡྻདྷམྨོ. སོ པདཊྛཱནམསྶཱཏི སནྣིཊྛེཡྻདྷམྨཔདཊྛཱནོ. ཨིནྡཁིལོཏི ཨེསིཀཱཐམྦྷོ ཝུཙྩཏི.

ཏེསུ ཏེསུ དྷམྨེསཱུཏི ཡེསུ དྷམྨེསུ སཡཾ ཨུཔྤནྣཱ, ཏེསུ ཨཏྟནཱ སམྤཡུཏྟེསུ ཙིཏྟཙེཏསིཀདྷམྨེསུ. ཨནཱརམྨཎཏྟེཔི ཧི ཏེསུ སམཔྤཝཏྟེསུ ཨུདཱསཱིནབྷཱཝོ ‘‘ཏཏྲམཛ྄ཛྷཏྟཏཱ’’ཏི ཝུཙྩཏི. སམཾ ཨཝིསམཾ ཝཱཧིཏཾ ཨཏྟནཱ པཝཏྟིཏསམྤཡུཏྟཱནཾ ཝཱ ཡཐཱསཀཀིཙྩེསུ པཝཏྟནཾ ལཀྑཎམེཏིསྶཱཏི སམཝཱཧིཏལཀྑཎཱ. ཏཏྠ སམཾ ཧུཏྭཱ པཝཏྟནལཀྑཎཱཏི ཨཏྠེ ཨཔཀྑཔཏིཏབྷཱཝོ ཝུཏྟོ ཧོཏི, ཨཝིསམཾ ཀཏྭཱ པཝཏྟནལཀྑཎཱཏི ཨཏྠེ ཨཱུནཱདྷིཀཏཱནིཝཱརཎཾ ¶ . ཨུདཱསཱིནབྷཱཝེན པཝཏྟམཱནཱཔི ཧི ཨེསཱ སམྤཡུཏྟདྷམྨེ སམཾ ཀཏྭཱ ཡཐཱསཀཀིཙྩེསུ པཝཏྟེཏི, ཡཐཱ རཱཛཱ ཏུཎྷཱི ནིསིནྣོཔི ཨདྷིཀརཎདྷམྨཊྛེ ཡཐཱསཀཀིཙྩེསུ སམཾ ཨཔྤམཏྟེ པཝཏྟེཏི. ཨལཱིནཱནུདྡྷཏཔྤཝཏྟིཔཙྩཡཱནཾ དྷམྨཱནཾ ཨཱུནཱདྷིཀཏཱཡ ལཱིནུདྡྷཏབྷཱཝསྶ ནིཝཱརཎཀིཙྩཱཏི ཝུཏྟཾ ‘‘ཨཱུནཱདྷིཀཏཱནིཝཱརཎརསཱ’’ཏི. ཡདི ཨེཝཾ ཀཐཾ སཧཛཱཏཱདྷིཔཏཱིནཾ ཨདྷིཔཏིབྷཱཝོ. ཨཱདྷིཔཙྩཉྷི ཏེསཾ ཀིཙྩཏོ ཨདྷིཀབྷཱཝོཏི? ནཱཡཾ དོསོ. ཏམྤི ཏསྶ ཀིཙྩམེཝ, ཡཾ སཧཛཱཏདྷམྨཱནཾ ཨདྷིཔཏིབྷཱཝེ པཝཏྟཱཔནཾ. ཡཐཱ ཧི རངྒམཎྜལཾ གཏོ ནཊཀཱཙརིཡོ ཏེ ཏེ ནཊཀེ ཡཐཱསཀཾ ཨནུརཱུཔཾ བྷཱུམིཡཾ ཡོཛེཏི, ཨེཝམེསཱཔི ཨཏྟནཱ སམྤཡུཏྟདྷམྨེསུ ཨདྷིཔཏིབྷཱཝེ ཋིཏེ ཨདྷིཔཏིབྷཱཝེ ཡོཛེཏི, ཨིནྡྲིཡཏྟེ ཋིཏེ ཨིནྡྲིཡཏྟེ, ན པན སཀསཀཀིཙྩཏོ ཨཱུནཏཾ, ཨདྷིཀཏཾ ཝཱ པཏྟུཾ དེཏཱིཏི. ‘‘ཨིདཾ ནིཧཱིནཀིཙྩཾ ཧོཏུ, ཨིདཾ ཨཏིརེཀཀིཙྩ’’ནྟི ཨེཝཾ པཀྑཔཱཏཝསེན ཝིཡ པཝཏྟི པཀྑཔཱཏོ. ཏཾ ཨུཔཙྪིནྡནྟཱི ཝིཡ ཧོཏཱིཏི པཀྑཔཱཏུཔཙྪེདནརསཱ. སཱ ཙིཏྟཙེཏསིཀཱནཾ ཨཛ྄ཛྷུཔེཀྑནེན སམཔྤཝཏྟེསུ ཨཱཛཱནཱིཡེསུ སཱརཐི ཝིཡ དཊྛབྦཱ.

ཀིརིཡཱ ཀཱརོཏི ཀཱར-སདྡསྶ བྷཱཝསཱདྷནཏཾ ཨཱཧ. ཏེན ཀཱརོཏི ནཱཉྙཾ, ཀིརིཡཱཡེཝཱཏི དཱིཔིཏཾ ¶ ཧོཏི. མནསྨིཾ ཀཱརོཏི མནསི ཨཱརམྨཎསྶ ཀརཎཾ. ཡེན ཧི མནོ ཨཱརམྨཎེ ཀརཱིཡཏི ཨཱརམྨཎེནསྶ སཾཡོཛནཏོ, ཏཏོ ཨེཝ ཏེན ཨཱརམྨཎམྤི མནསི ཀརཱིཡཏཱིཏི. མནསིཀཱརོཏི ཙེཏྠ ཨལུཏྟསམཱསོ དཊྛབྦོ. པུརིམམནཏོཏི བྷཝངྒམནཏོ. ཝིསདིསཾ མནནྟི ཝཱིཐིཛཝནམནཾ, ཏཾ ཀརོཏཱིཏི མནསིཀཱརོ, མནསིཀཱརསཱམཉྙེན ཝཱིཐིཛཝནཔཊིཔཱདཀེ དསྶེཏི. ཨེཏྠ པན ཨུཔཡོགཏྠབྷུམྨཝཙནེ སམཱསོ དཊྛབྦོ. སམྤཡུཏྟདྷམྨེ ཨཱརམྨཎཱབྷིམུཁཾ སཱརེནྟོ པཡོཛེནྟོ ཝིཡ ཧོཏཱིཏི མནསིཀཱརོ ¶ སཱརཎལཀྑཎོཏི ཝུཏྟོ. སཾཡོཛནརསོཏི པཡོཛནརསོ. ཝིཏཀྐོ སམྤཡུཏྟཱནཾ ཨཱརམྨཎེ ཨབྷིནིརོཔནསབྷཱཝཏྟཱ ཨཱརམྨཎེ ཙིཏྟཾ པཀྑིཔནྟོ ཝིཡ ཧོཏི. ཙེཏནཱ ཨཏྟནོ ཨཱརམྨཎཾ གཎྷནྟཱི སམྤཡུཏྟེཔི སཀསཀཀིཙྩཾ ཀཱརེཏཱིཏི ཨཏྟནཱ ཀརཎེན བལཾ ནིཡོཛེནྟོ བལནཱཡཀོ ཝིཡ ཧོཏི. མནསིཀཱརོ སམྤཡུཏྟེ ཨཱརམྨཎེ པཡོཛེཏཱིཏི ཨཱཛཱནཱིཡཔྤཡོཛནཀསཱརཐི ཝིཡཱཏི ཨཡམེཏེསཾ ཝིསེསོ.

ཨཱརམྨཎཱབྷིམུཁབྷཱཝཔཙྩུཔཊྛཱནོཏི ཨཱརམྨཎེ སཾཡོཛནཝསེན ཏདབྷིམུཁབྷཱཝཔཙྩུཔཊྛཱནོ. ཨེཏྠ སཏིཡཱ ཨཔྤམུསྶནཙྪནྡཏཱ ཝིསཡཱབྷིམུཁཔཙྩུཔཊྛཱནཏཱ, མནསིཀཱརསྶ པན སཾཡོཛནཝསེནཱཏི ཨཡམེཏེསཾ ཝིསེསོ. ཨཱརམྨཎཔཊིཔཱདཀསྶ སངྑཱརཀྑནྡྷཔརིཡཱཔནྣཏཱཝཙནཾ ཨིཏརམནསིཀཱརཱནཾ ཝིཉྙཱཎཀྑནྡྷཔརིཡཱཔནྣཏཾ དསྶེཏི. མཧིསཱསཀཱ པན ‘‘ཨཱཝཛྫནསྶ ཝིཉྙཱཎབྷཱཝེ སབྦཉྙུཏཉྙཱཎསྶ སབྦཝིསཡཏཱ པརིཧཱཡེཡྻ, ཏསྨཱ ཏཾ ཛཝནསམྤཡུཏྟསངྑཱརཀྑནྡྷཔརིཡཱཔནྣམེཝཱ’’ཏི ཝདནྟི. ཏེསཉྷི ཨཡམདྷིཔྤཱཡོ – ཡདི ཏཾ ཝིསུཾ ཙིཏྟསབྷཱཝཾ སིཡཱ, པཙྩུཔྤནྣཙིཏྟཾ ཨཱརམྨཎཾ ཀཏྭཱ པཝཏྟསྶ ཏསྶ ཨནནྟརཾ ཨུཔྤཛྫམཱནཛཝནཱནཾ པཙྩུཔྤནྣཱརམྨཎཏཱ ན བྷཝེཡྻ, ཨཉྙདཏྠུ ཨཏཱིཏཱརམྨཎཏཱཝ སིཡཱ, ཨེཝཉྩ སཏི སབྦཉྙུཏཉྙཱཎསྶཱཔི པཙྩུཔྤནྣཙིཏྟཱརམྨཎཏཱཡ ཨབྷཱཝཏོ ཨསབྦཝིསཡཏཱ ཨཱཔཛྫེཡྻ, ཡདགྒེན ཙ ཏཾ ཨསབྦཝིསཡཾ, ཏདགྒེན སཱཝརཎམྤི ཧོཏི ཡཏྠ ན པཝཏྟཏི, ཏཏྠ ཨཱཝརཎསམྦྷཝཏོ, ཏསྨཱསྶ སཀལལོཀསིདྡྷོ སབྦཉྙུབྷཱཝོ, ཨནཱཝརཎབྷཱཝོ ཙ པརིཧཱཡེཐ, ཛཝནསམྤཡུཏྟབྷཱཝེ པན སཏི ཨཱཝཛྫནསྶ ནཱཡཾ ཨིཊྛཝིགྷཱཏོ ཨཱཔཛྫཏཱིཏི. ཏཡིདཾ ཏེསམབྷིནིཝེསམཏྟཾ ‘‘ཨཱཝཛྫནཱ ཀུསལཱནཾ ཁནྡྷཱནཾ, ཨཀུསལཱནཾ ཁནྡྷཱནཾ ཨནནྟརཔཙྩཡེན ¶ པཙྩཡོ’’ཏི (པཊྛཱ. ༡.༡.༤༡༧) ཝཙནེན ཏསྶཱནནྟརཾ ཀུསལཱཀུསལུཔྤཏྟིཡཱ དཱིཔིཏཏྟཱ. སབྦཉྙུཏཉྙཱཎསྶ པན པཙྩུཔྤནྣཙིཏྟཱརམྨཎབྷཱཝོ ཨེཝཾ ཝེདིཏབྦོ – ཨཏཱིཏཱདིཝསེན ཧི ཝིབྷཱགམཀཏྭཱ ‘‘ཨིམསྶ ཙིཏྟཾ ཛཱནཱམཱི’’ཏི པཝཏྟསྶ ཨཱཝཛྫནཾ སཱམཉྙེན ཡཾ ཀིཉྩི ཨབྷིམུཁཱིབྷཱུཏཾ ཙིཏྟམཱཝཛྫཏི, ཏཏོ ཛཝནཱནིཔི ཨཏྟནོ ཨཏྟནོ ¶ ཨབྷིམུཁཱིབྷཱུཏཾ ཙིཏྟམཱརམྨཎཾ ཀཏྭཱ པཝཏྟནྟི, ན ཙེཏྠ ཛཝནཱནཾ བྷིནྣཱརམྨཎཏཱ ཨཱསངྐིཏབྦཱ ཙིཏྟསཱམཉྙེན ཨཱརམྨཎསྶ ཨབྷིནྣཏྟཱ, ཏསྨཱ སབྦཉྙུཏཉྙཱཎསྶ པཙྩུཔྤནྣཙིཏྟཱརམྨཎཏཾ པཊིཙྩ ན ཀཱཙི ཝིཧེསཱ ཨནུབྷཝིཏབྦཱཏི. ཀིཾ ཝཱ ཨེཏེན ཡུཏྟིཝཱདེན, ནནུ ཝུཏྟཾ བྷགཝཏཱ – ‘‘ཨཙིནྟེཡྻོ བུདྡྷཝིསཡོ’’ཏི (ཨ. ནི. ༤.༧༧), ཏསྨཱ ཨཔརིམིཏཔུཉྙསམྦྷཱརེཀཕལསྶ ཨཙིནྟེཡྻསབྷཱཝཏྟཱ ཨཱཝཛྫནེན ཝིནཱཔི ཝིསཡགྒཧཎེ ཝིབནྡྷནཱབྷཱཝཏོ ཡཏྠ ཀཏྠཙི པཝཏྟི ཨཔྤཊིཧཏཱཡེཝཱཏི. ཀེཙི པནེཏྠ ‘‘ཨཱཝཛྫནཾ ཨནཱགཏཙིཏྟམཱརམྨཎཾ ཀཏྭཱ ནིརུཛ྄ཛྷཏི, ཛཝནམེཝ པན པཙྩུཔྤནྣམཱརམྨཎཾ གཎྷཱཏཱི’’ཏི ཝདནྟི. ཡསྨཱ པན ‘‘ཨནཱགཏཱརམྨཎཱ ཨཱཝཛྫནཱ པཙྩུཔྤནྣཱརམྨཎཱནཾ ཁནྡྷཱནཾ ཨནནྟརཔཙྩཡེན པཙྩཡོ’’ཏི པཱལི༹ ནཏྠི, ཏསྨཱ ཏཾ ཨཔྤམཱཎཾ.

ཀརོཏཱིཏི ཀརུཎཱ. ཀིཾ ཀརོཏི, ཀེསཾ ཀིཾ ནིམིཏྟནྟི ཨཱཧ ‘‘པརདུཀྑེ སཏི སཱདྷཱུནཾ ཧདཡཀམྤན’’ནྟི. ཀམྤནནྟི ཙ པརེསཾ དུཀྑཾ དིསྭཱ ཏསྶ ཨསཧནཱཀཱརེན ཙིཏྟསྶ ཨཉྙཐཏྟཾ, ཏདིདཾ སཔྤུརིསཱནཾཡེཝ ཧོཏཱིཏི ཨཱཧ ‘‘སཱདྷཱུན’’ནྟི. སཔྤུརིསཱ ཧི ཨཏྟཧིཏཔརཧིཏསཱདྷནེན ‘‘སཱདྷཱུ’’ཏི ཝུཙྩནྟི. ‘‘ཀིཎཱཏཱི’’ཏི ཨིམསྶ ཨཏྠམཱཧ ‘‘ཝིནཱསེཏཱི’’ཏི, ཨདསྶནཾ གམེཏི ཨཔནེཏཱིཏི ཨཏྠོ. ཏེནཱཧ ‘‘པརདུཀྑཱཔནཡནཱཀཱརཔྤཝཏྟིལཀྑཎཱ’’ཏི. པརེསཾ དུཀྑསྶ ཨཔནཡནཾ ཧོཏུ ཝཱ, མཱ ཝཱ, སོ ¶ པརདུཀྑཱཔནཡནཱཀཱརོ, ཏཐཱཔཝཏྟིལཀྑཎཱཏི པར…པེ… ལཀྑཎཱ. ཨཔནེཏུཀཱམཏཱཡ པརེསཾ དུཀྑསྶ ཨསཧནཾ ཨནདྷིཝཱསནཾ པརདུཀྑཱསཧནཾ. ན ཝིཧིཾསཱ ཨཝིཧིཾསཱ, སཏྟཱནཾ ཨཝིཧེཋནཾ, ཏཾ པཙྩུཔཊྛཱཔེཏི, ཝིཧིཾསཱཡ ཝཱ པཊིཔཀྑབྷཱཝེན པཙྩུཔཊྛཱཏཱིཏི ཨཝིཧིཾསཱཔཙྩུཔཊྛཱནཱ.

པམོདནལཀྑཎཱཏི པརསམྤཏྟིཡཱ པམོདནལཀྑཎཱ. ཨནིསྶཱཡནརསཱཏི ཨིསྶཱཡནསྶ ཨུསཱུཡནསྶ པཊིཔཀྑབྷཱཝཀིཙྩཱ. པནྟསེནཱསནེསུ, ཨདྷིཀུསལདྷམྨེསུ ཙ ཨརམཎཾ ཨརཏི. སཱ ཨཏྠཏོ ཨིསྶཱདྷིཀཾ དོམནསྶསཧགཏཾ, ཐིནམིདྡྷཱདྷིཀཉྩ ཨུདྡྷཙྩཾ. ཏཏྠ པུརིམཾ པརསམྤཏྟིཝིསཡཾ, དུཏིཡཾ པནྟསེནཱསནཱདིཝིསཡནྟི དཊྛབྦཾ. ཨརཏིཡཱ ཝིཧནནཱཀཱརེན པཙྩུཔཊྛཱཏི, ཏསྶཱ ཝིགྷཱཏཾ ཝཱ ཝཱུཔསམཾ པཙྩུཔཊྛཱཔེཏཱིཏི ཨརཏིཝིགྷཱཏཔཙྩུཔཊྛཱནཱ. ‘‘ཨནིཡཏེ ཨིཙྪནྟཱི’’ཏི ཨིམིནཱ ཙེཏསིཀནྟརབྷཱཝེན ཨིཙྪནྟཱིཏི དསྶེཏི.

ཀཱཡདུཙྩརིཏཏོཏི ཝཏྠུཝཱིཏིཀྐམསངྑཱཏདུཙྩརིཏཏོ. ཀཱཡདུཙྩརིཏཱདིཝཏྠཱུནནྟི པརཔཱཎཔརདྷནཔརཨིཏྠིཨཱདཱིནཾ ¶ ཀཱཡདུཙྩརིཏཱདཱིནམཱལམྦཎབྷཱུཏཱནམེཝ ཝཏྠཱུནཾ. ཨཝཱིཏིཀྐམལཀྑཎཱཏི ཨམདྡནལཀྑཎཱ. ཀཱཡདུཙྩརིཏཱདིཝཏྠུཏོ སངྐོཙནཀིརིཡཱཔདེསེན ཀཱཡདུཙྩརིཏཱདིཏོཡེཝ སངྐོཙནཀིརིཡཱ ཝུཏྟཱཏི དཊྛབྦཾ. ན ཧི ཝིརཏིཡོ དུཙྩརིཏཝཏྠུནོ ཨཀིརིཡཔཙྩུཔཊྛཱནཱ ཡུཛྫནྟི, ཨཐ ཁོ དུཙྩརིཏསྶེཝ, ཝིརཏཱིནཉྩ སོརཙྩཝསེན སངྐོཙནཾ, ཨཀིརིཡཱ ཙ ཧིརོཏྟཔྤཱནཾ ཛིགུཙྪཱདིཝསེནཱཏི ཨཡམེཏེསཾ ཝིསེསོ. སདྡྷཱ…པེ… པདཊྛཱནཱཏི ཨེཏྠ སདྡྷཱདཡོ སབྦེཝ དྷམྨཱ ཀཱཡསུཙརིཏཱདཱིནཾ པདཊྛཱནཱཏི ཨེཀེ. ཨཔརེ པན ‘‘ཀམྨཾ ཀམྨཕལཾ སདྡཧནྟསྶ ཀཱཡདུཙྩརིཏཱདིཨཀརཎཏོ, ཧིརོཏྟཔྤསམྤནྣསྶ མུསཱཝཱདཱདིཨཀཐནཏོ, ཨཔྤིཙྪསནྟུཊྛཱིསལླེཁགུཎསམནྣཱགཏསྶ མིཙྪཱཛཱིཝཝིཝཛྫནཏོ ཙ སདྡྷཱདཡོ ¶ ཏིཎྞཾ དྷམྨཱནཾ ཡཐཱཀྐམེན པདཊྛཱནཱ’’ཏི ཝདནྟི. ཀེཙཱིཏི ཨབྷཡགིརིཝཱསིནོ. ཨིམཱསཱུཏི ཨིམཱསུ ཏཱིསུ ཝིརཏཱིསུ. ཨེཀེཀཾ ནིཡཏཾ ཝིརཏིམིཙྪནྟཱིཏི ཨཉྙཾ ཨེཀཾ ཙཏུཏྠནིཡཏཝིརཏིམིཙྪནྟི. ཨཐ ཝཱ ནིདྡྷཱརཎཏྠེ བྷུམྨཝསེན ཨིམཱསཾ ཨནྟརེ ཨེཀཾ ནིཡཏཾ ཝིརཏིམིཙྪནྟཱིཏི ཨཏྠོ. ཨུབྷཡཐཱཔི པན ཏེསཾ ཨིཙྪཱ ན ཡུཛྫཏི ཨཔརཱཡ ཝིརཏིཡཱ དྷམྨསེནཱཔཏིནཱཔི ཨདེསིཏཏྟཱ, ཝིསཡསྶ ཙ སདཱ སནྣིཧིཏཏྟཱབྷཱཝེན ནིཡཏཱཡ ཨེཝ ཨེཀིསྶཱ ཨབྷཱཝཏོ. ཏེནེཝ ཧི ཨབྷཡགིརིཝཱསིནོཡེཝ ཙ ཀེཙི ཨིམཱསཾ ཏིཝིདྷཏྟཾ ཨནིཡཏཏྟམེཝ ཙ ཨིཙྪནྟི. ཝུཏྟཉྷི ཏེཧི –

‘‘ཀརུཎཱམུདིཏཱ སམྨཱཝཱཙཱཀམྨནྟཨཱཛིཝཱ;

ཡེབྷུཡྻཏོ ཨནིཡཏཱ, ཧོནྟི གོཙརབྷེདཏོ’’ཏི. –

ཨེཏྠ པན ‘‘ཡེབྷུཡྻཏོ’’ཏི ཝཙནཾ ལོཀུཏྟརཙིཏྟེསུ སབྦདཱ ཨེཀཏོཡེཝ ཙ ལབྦྷམཱནཏཾ སནྡྷཱཡ ཝུཏྟཾ.

དུཏིཡཙིཏྟེན སམྤཡོགཾ གཙྪནྟཱིཏི སམྦནྡྷོ. ཡཐཱ ཙིཏྟཾ, ཨེཝཾ ཏཾསམྤཡུཏྟདྷམྨཱཔཱིཏི དུཏིཡེ སསངྑཱརཱ ཨེཝཱཏི ཨཱཧ ‘‘སསངྑཱརབྷཱཝམཏྟམེཝ ཧེཏྠ ཝིསེསོ’’ཏི. ཏཐཱཏི ཡཐཱ ཏཏིཡེ, ཏཐཱ ཙཏུཏྠེཔི པཱིཏིཡཱ སུཁཔདཊྛཱནཏྟཱ. སུཁསྶ ཙེཏྠ ཨབྷཱཝཏོ ཨཱཧ ‘‘ཋཔེཏྭཱ པཱིཏི’’ནྟི. ནནུ ཙ ‘‘ཀརུཎཱམུདིཏཱ ཨུཔེཀྑཱསཧགཏེ ན སམྦྷཝནྟཱི’’ཏི ཝདནྟི, ཏསྨཱ ཡཐཱ པཱིཏིཡཱ, ཨེཝཾ ཏཱསམྤི པཊིཀྑེཔོ ཀཱཏབྦོཏི? ན ཀཱཏབྦོ, ཨཔྤནཱཔཏྟིཏོ པུབྦེ ཀརུཎཱམུདིཏཱནཾ ཨུཔེཀྑཱསཧགཏཱནམྤི སམྦྷཝཏོ. ཀརུཎཱམུདིཏཱབྷཱཝནཱཀཱལེ ཧི ཨཔྤནཱཝཱིཐིཏོ པུབྦེ ཨུཔེཀྑཱསཧགཏཙིཏྟེནཱཔི པརིཀམྨཾ ཧོཏི, ཨཔྤནཱཝཱིཐིཡཾ པན སོམནསྶསཧགཏཙིཏྟེནེཝ ཨེཀཱཝཛྫནཝཱིཐིཡཱ ¶ ཝེདནཱཔརིཝཏྟནཱབྷཱཝཏོ, ཏསྨཱ པུབྦབྷཱགཝསེནེཝ ཀརུཎཱམུདིཏཱནམྤི ¶ ཨུཔེཀྑཱསཧགཏེསུ སམྦྷཝོ ཧོཏཱིཏི ཨཱཙརིཡཱ. ཨཔརེ པན སབྦདཱཔི ཏཱསཾ ཨུཔེཀྑཱསཧགཏེསུ སམྦྷཝཾ ན ཨིཙྪནྟི. ‘‘ཨཝསེསཱ པཉྩམེན སམྤཡོགཾ གཙྪནྟཱི’’ཏི ཨཝིསེསེན ཝུཏྟཏྟཱ ཨིདཱནི ཝིསེསདསྶནཏྠམཱཧ ‘‘སོམནསྶཊྛཱནེ ཙཱ’’ཏིཨཱདི.

༨༡. ཀརུཎཱམུདིཏཱདཡོཏི ཀརུཎཱམུདིཏཱ ཙེཝ ཝིརཏིཏྟཡཉྩ. ཏེནཱཧ ‘‘པཉྩཱ’’ཏི.

ཨེཝཾ ཀཱམཱཝཙརཀུསལཙིཏྟསམྤཡུཏྟེ དསྶེཏྭཱ ཨིདཱནི རཱུཔཱཝཙརཀུསལཙིཏྟསམྤཡུཏྟདྷམྨེ དསྶེཏུཾ ‘‘ཨཝསེསེསུ པནཱ’’ཏིཨཱདིམཱཧ. ཏཏྠ ཋཔེཏྭཱ ཝིརཏིཏྟཡནྟི ཝིརཏིཏྟཡཾ ཝཛྫེཏྭཱ. ཀསྨཱ པནེཏྠ ཝིརཏིཏྟཡཾ པརིཙྩཏྟནྟི? ཝུཙྩཏེ – སུཝིསུདྡྷཀཱཡཀམྨཱདིཀསྶ ཙིཏྟསམཱདྷཱནཝསེན རཱུཔཱརཱུཔཱཝཙརཀུསལཔྤཝཏྟི, ན ཀཱཡཀམྨཱདཱིནཾ སོདྷནཝསེན, ནཱཔི དུཙྩརིཏདུརཱཛཱིཝཱནཾ སམུཙྪིནྡནཝསེན. ཏཐཱ ཧི ནཱིཝརཎཱདིདྷམྨཱནཾ ཨཝཏྠཏྟཡཾ ཧོཏི ཝཱིཏིཀྐམཱཝཏྠཱ པརིཡུཊྛཱནཱཝཏྠཱ ཨནུསཡཱཝཏྠཱཏི. ཏཏྠ ཝཱིཏིཀྐམཱཝཏྠཱཡ པཊིཔཀྑཾ ཀཱམཱཝཙརཀུསལཾ པརིཡུཊྛཱནཱཝཏྠཱཡ རཱུཔཱརཱུཔཱཝཙརཾ, ཨནུསཡཱཝཏྠཱཡ ལོཀུཏྟརཀུསལཾ. དུཙྩརིཏདུརཱཛཱིཝཱནཾ པན ཋཔེཏྭཱ ཝཱིཏིཀྐམཱཝཏྠཾ, ཨནུསཡཱཝཏྠཉྩ ཝཱིཏིཀྐམཱཝཏྠཱཡ ཝིསུཾ པརིཡུཊྛཱནཱཝཏྠཱ ན ཨུཔལབྦྷཏི. ཡསྶཱ ཝིཔཙྩནཱིཀཾ རཱུཔཱརཱུཔཱཝཙརཀུསལཾ སིཡཱ, ཏསྨཱ ཏཾ ནེཝ ཀཱམཱཝཙརཀུསལཾ ཝིཡ ཏེསཾ ཝཱིཏིཀྐམཱཝཏྠཾ སོདྷེཏི, ན ཙ ལོཀུཏྟརཾ ཝིཡ ཨནུསཡཱཝཏྠཾ སམུཙྪིནྡཏི, པཊིཔསྶམྦྷེཏི ཝཱ. སཱིལཝིསུདྡྷིཡཾ སཱིལསོདྷནཝསེན ཀཱམཱཝཙརཀུསལེནེཝ ཝིགཏཝཱིཏིཀྐམསྶ པརིསུདྡྷཀཱཡཀམྨཱདིཀསྶ ཡོགིནོ ཙིཏྟསམཱདྷཱནཝསེན པཝཏྟཏཱིཏི མཧགྒཏཙིཏྟུཔྤཱདེ ཝིརཏཱིནཾ ཨསམྦྷཝོཡེཝ. ཨིམམེཝ ཧི ཨཏྠཾ སཱདྷེཏུཾ ‘‘ཝིརཏིཡོ པནཱ’’ཏིཨཱདི ཨཱརདྡྷཾ. ཏེཏྟིཾས ཝཱ ཀརུཎཱདིཛྷཱནཝསེན པཝཏྟནཀཱལེ ¶ . ཏཏོཏི ཏཏོ ཏཏིཡེ ཝུཏྟཙེཏསིཀཏོ. ཀརུཎཱམུདིཏཱནཾ ཨཔྤནཱཔཏྟཱནམེཀནྟསོམནསྶསཧགཏཏྟཱ ཨཱཧ ‘‘པཉྩམེན…པེ… ཀརུཎཱམུདིཏཱཝཛྫཱ’’ཏི.

རཱུཔཱཝཙརཔཉྩམེ ཝུཏྟནཡེནཱཏི ཏིཾསེཝཱཏི ཨདྷིཔྤཱཡོ. ཡདི ཨེཝཾ རཱུཔཱཝཙརཏོ ཀོ ཝིསེསོཏི ཨཱཧ ‘‘ཨརཱུཔཱཝཙརབྷཱཝོཝེཏྠ ཝིསེསོ’’ཏི, པཉྩམེ རཱུཔསཉྙཱབྷཱཝཏོ རཱུཔཱཝཙརབྷཱཝོ, ཨིདྷ པན རཱུཔསཉྙཱསམཏིཀྐམེན པཏྟབྦཏྟཱ ཨརཱུཔཱཝཙརབྷཱཝོཏི ཨཡམེཝསྶ ཏཏོ ཝིསེསོཏི ཨཏྠོ.

པཋམཛ྄ཛྷཱནིཀེཏི ¶ པཋམཛ྄ཛྷཱནཝཏི. མགྒཙིཏྟེཏི ཙཏུབྦིདྷེཔི མགྒཉཱཎེ. དུཏིཡཛ྄ཛྷཱནིཀཱདིབྷེདེཏི དུཏིཡཏཏིཡཙཏུཏྠཔཉྩམཛ྄ཛྷཱནིཀེ. ཝུཏྟནཡེནཱཏི ‘‘དུཏིཡེན ཝིཏཀྐཝཛྫཱ’’ཏིཨཱདིནཱ ཝུཏྟནཡེན. ཀིཾ ཨཝིསེསེནཱཏི ཙེ, ནོཏི ཨཱཧ ‘‘ཀརུཎཱམུདིཏཱན’’ནྟིཨཱདི. མགྒདྷམྨེསུ པཱདཀཛ྄ཛྷཱནཱདིཝསེན ཀདཱཙི སམྨཱསངྐཔྤཝིརཧོ སིཡཱ, ན པན ཝིརཏིཝིརཧོ, ཀཱཡདུཙྩརིཏཱདཱིནཾ སམུཙྪིནྣཝསེནེཝ ཨརིཡམགྒསྶ པཝཏྟནཏོཏི ཨཱཧ ‘‘ནིཡཏཝིརཏིབྷཱཝོ’’ཏི. ལོཀུཏྟརབྷཱཝོཏི ཚབྦིསུདྡྷིཔརམྤརཱཡ པཏྟབྦཏྟཱ ལོཀཏོ ཨུཏྟརཎབྷཱཝོ.

ཨེཝཾ ཀུསལཙེཏསིཀཱནཾ སམྤཡོགཝཙནཏྠལཀྑཎཱདཱིནི དསྶེཏྭཱ ཨིདཱནི ཨཀུསལཙེཏསིཀཱནི དསྶེཏུཾ ‘‘ཨཀུསལཱ པནཱ’’ཏིཨཱདི ཨཱརདྡྷཾ. ཚ ཡེཝཱཔནཀཱཏི ཀིཉྩཱཔི པཋམེ ཨནིཡཏཡེཝཱཔནཀཱ ན ལབྦྷནྟི, ཨཀུསལེསུ པན ལབྦྷམཱནཀཡེཝཱཔནདྷམྨེ ཨེཀཏྠ དསྶེཏུཾ ཏེསམྤི ཨིདྷེཝ ཝཙནཾ དཊྛབྦཾ. ཨེཝཉྩ ཀཏྭཱ ཨུཔརི དྷམྨཱནཾ ཨུདྡེསཱནནྟརཾ ‘‘ཨེཝཾ ཡེཝཱཔནཱ’’ཏིཨཱདི ཝུཏྟཾ. ཝིཙིཀིཙྪཱསཧགཏེ ཚནྡཱདྷིམོཀྑཱནཾ, ཨུདྡྷཙྩསཧགཏེ ཚནྡསྶ ཙ ཨབྷཱཝཏོ ཝུཏྟཾ ‘‘པཊིཔཱཊིཡཱ དསསུ ཙིཏྟེསཱུ’’ཏི.

༨༢. ནིདྡིཊྛཱཏི ¶ ནིསྶེསེན དསྶིཏཱ. ཧཏཱ ཝིཧཏཱ ཝིདྡྷསྟཱ པཱཔཱ ཨཔཱཡཱདིདུཀྑཔཱཔནཏོ ‘‘པཱཔཱ’’ཏི སངྑཱཏཱ ཨཀུསལདྷམྨཱ ཡེན སོ བྷགཝཱ ཧཏཔཱཔོ, ཏེན. ལཱབྷོ ཨལཱབྷོ, ཡསོ ཨཡསོ, ནིནྡཱ པསཾསཱ, སུཁཾ དུཀྑནྟི ཨིམེསུ ཨཊྛསུ ལོཀདྷམྨེསུ ཨཀམྤནཊྛེན ཏཱདིནཱ སམྨཱསམྦུདྡྷེན. སོ ཧི ལཱབྷཱདཱིསུ ཡཱདིསོ, ཨལཱབྷཱདཱིསུཔི ཏཱདིསོཡེཝཱཏི ‘‘ཏཱདཱི’’ཏི ཝུཙྩཏི.

ན ཧིརཱིཡཏཱིཏི ན ལཛྫཏི. ཨཧིརིཀོཏི པུགྒལོ དྷམྨསམཱུཧོ ཝཱ. ‘‘ཨཧིརིཀྐ’’ནྟི ཝཏྟབྦེ ཨེཀསྶ ཀ-ཀཱརསྶ ལོཔཾ ཀཏྭཱ ‘‘ཨཧིརིཀ’’ནྟི ཝུཏྟཾ. ན ཨོཏྟཔྤནྟི ཨོཏྟཔྤསྶ པཊིཔཀྑབྷཱུཏཾ དྷམྨམཱཧ. ཨཛིགུཙྪནཾ ཨཧཱིལ༹ནཾ. ཨལཛྫནཾ ཨཝིལཱ. ཨཛིགུཙྪནལཀྑཎནྟི སབྷཱཝཝསེན ཝུཏྟཾ, ཨལཛྫནལཀྑཎནྟི ཀུསལཱབྱཱཀཏསྶ སཱདྷཱརཎཱཡ ཧིརིཡཱ པཊིཔཀྑཝསེན. ཏེཧེཝཱཏི ཀཱཡདུཙྩརིཏཱདཱིཧི ཨེཝ. ཨསཱརཛྫནཾ ནིབྦྷཡཏཱ. ཨནུཏྟཱསོ ཨསམྦྷམོ. རསཱདཱིནི ཧིརིཨོཏྟཔྤེསུ ཝུཏྟཔཊིཔཀྑཝསེན གཧེཏབྦཱནཱིཏི ན ཏཱནི ཨིདྷ ཝུཏྟཱནི. ཏེསུ ཧི ཨལཛྫནཱཀཱརེན པཱཔཱནཾ ཀརཎརསཾ ཨཧིརིཀཾ. ཨནུཏྟཱསཱཀཱརེན ཨནོཏྟཔྤཾ ¶ . ཝུཏྟཔྤཀཱརེནེཝ པཱཔཏོ ཨསངྐོཙནཔཙྩུཔཊྛཱནཱནི. ཨཏྟནི, པརེསུ ཙ ཨགཱརཝཔདཊྛཱནཱནི. གཱམསཱུཀརསྶ ཝིཡ ཨསུཙིཏོ ཀིལེསཱསུཙིཏོ ཨཛིགུཙྪནཾ ཨཧིརིཀེན ཧོཏི. སལབྷསྶ ཝིཡ ཨགྒིཏོ པཱཔཏོ ཨནུཏྟཱསོ ཨནོཏྟཔྤེན ཧོཏི. ཡཐཱཧུ པོརཱཎཱ –

‘‘ཛིགུཙྪཏི ནཱཧིརིཀོ, པཱཔཱ གཱུཐཱཝ སཱུཀརོ;

ན བྷཱཡཏི ཨནོཏྟཔྤོ, སལབྷོ ཝིཡ པཱཝཀཱ’’ཏི.

ཨེཏྠ ¶ ཙ ཡཐཱ ཧིརིཡཱ བལཝབྷཱཝེ ཨོཏྟཔྤཾ ཨབྦོཧཱརིཀཾ ཧོཏི, ཨོཏྟཔྤསྶ བལཝབྷཱཝེ ཧིརཱི ཨབྦོཧཱརིཀཱ, ཨེཝཾ ཨཧིརིཀསྶ བལཝབྷཱཝེ ཨནོཏྟཔྤཾ ཨབྦོཧཱརིཀཾ, ཨནོཏྟཔྤསྶ བལཝབྷཱཝེ ཨཧིརིཀཾ ཨབྦོཧཱརིཀཾ ཧོཏཱིཏི ཀེཙི, ཏཾ ན ཡུཛྫཏི. ཡཐཱ ཧི ཨསུཙིནཱ ཨཏྟཱནཾ མཀྑེནྟོ, སཔྤམུཁེ ཧཏྠཾ པཝེསེནྟོ བཱལདཱརཀོ ཏཏྠ པཊིཀྐཱུལབྷཱཝསྶ, ཨཱདཱིནཝསྶ ཙ ཨནུཔཔརིཀྑནཏོ ནེཝ ཛིགུཙྪཏི, ན ཙ ཨུཏྟསཏི, ཨེཝམེཝཾ དྷམྨསབྷཱཝསྶ ཨཉྙཱཎཏོ མོཧོ པཱཔཏོ ནེཝ ཛིགུཙྪཏི, ན ཨུཏྟསཏི, ཏསྨཱ ཏཾསམྤཡུཏྟཙིཏྟུཔྤཱདེ ཨུབྷཡམྤི བལཝཏརཾ ཧོཏཱིཏི.

ལུབྦྷནྟཱིཏི ཨབྷིགིཛ྄ཛྷནྟི, ཨལླཱིཡནྟཱིཏི ཝུཏྟཾ ཧོཏི. ཨཱརམྨཎགྒཧཎལཀྑཎོཏི ཨེཏྠ ཨཱརམྨཎགྒཧཎཾ ནཱམ ‘‘མམ ཨིད’’ནྟི ཏཎྷཱབྷིནིཝེསཝསེན ཨབྷིནིཝིཊྛསྶ ཨཱརམྨཎསྶ ཨཝིསྶཛྫནཾ, ན ཨཱརམྨཎཀརཎམཏྟཾ. ཨབྷིསངྒོ ཨཏིསཡཝཏཱཡ ཨཱསཏྟིཡཱ དུམྨོཙནཱིཡབྷཱཝོ. ཨཔརིཙྩཱགོ ཨཝིཛཧནཾ. ཏེལཉྫནརཱགོ ཝིཡཱཏི དྷོཝིཏྭཱཔི པརིཙྩཛིཏུཾ ཨསཀྐུཎེཡྻོ ཏེལམཀྑིཏཨཉྫནརཱགོ ཝིཡ. ‘‘ཨསྶཱདཱནུཔསྶིནོ ཏཎྷཱ པཝཌྜྷཏཱི’’ཏི ཝཙནཏོ ཝུཏྟཾ ‘‘ཨསྶཱདདསྶནཔདཊྛཱནོ’’ཏི. ཏཏྠ ཨསྶཱདཝསེན དསྶནཾ ཨསྶཱདདསྶནཾ. ནནུ ཙ ཨསྶཱདདསྶནམྤི ཨཏྠཏོ ལོབྷོཡེཝཱཏི ཀཐཾ སཡཾ ཨཏྟནོ པདཊྛཱནཾ ཧོཏཱིཏི? སཙྩཾ, པཋམཾ ནཱཏིབལཝལོབྷཝསེན ཨསྶཱདདསྶནོ པཙྪཱ བལཝལོབྷོ ཧོཏཱིཏི ཏསྶ ཏཾཔདཊྛཱནཏཱ ཝུཏྟཱ. ཏེནེཝ ཙ ‘‘ཏཎྷཱ པཝཌྜྷཏཱི’’ཏི ཝུཏྟཾ. ཨཔརེ པན ‘‘ཨསྶཱདོ ནཱམ སུཁཝེདནཱ, ཨསྶཱདདསྶནནྟི ཨསྶཱདདིཊྛཱི’’ཏི ཝདནྟི. སུཁཝེདནཱཡ ཝཱ ཀཱརཎབྷཱུཏཾ སུབྷནིམིཏྟཾ ཨསྶཱདོ ནཱམ, ཨསུབྷེ ‘‘སུབྷ’’ནྟི པཝཏྟཱ ཏཡོ ཝིཔལླཱསཱ ཨསྶཱདདསྶནཾ ནཱམཱཏི ཀེཙི.

མུཡ྄ཧནྟཱིཏི ¶ ན བུཛ྄ཛྷནྟི. དྷམྨསབྷཱཝསྶ ཡཱཐཱཝཏོ ཨདསྶནཾ ཙིཏྟསྶ ཨནྡྷབྷཱཝོ. ཨཉྙཱཎཾ ¶ ཉཱཎཔཊིཔཀྑོ དྷམྨོ. ཏཏྠ པུརིམལཀྑཎཾ སབྷཱཝཝསེན ཝུཏྟཾ, ཨིཏརཾ པཊིཔཀྑཝསེན. ཨཐ ཝཱ ཨཉྙཱཎལཀྑཎོཏི ཀིཙྩཝསེན ཝུཏྟཾ. སོ ཧི ཨསམྤཊིཝེདྷརསོཏི ཝུཏྟོ. དྷམྨསབྷཱཝཾ པཊིཝིཛ྄ཛྷིཏུཾ ཨསམཏྠཏཱ ཨསམྤཊིཝེདྷོ. ཨཱརམྨཎསབྷཱཝཙྪཱདནརསོཏི ཡཐཱ ཨཉྙཱཎཾ, མོཧསམངྒིཔུགྒལོ ཝཱ ཨཱརམྨཎསབྷཱཝཾ པཊིཝིཛ྄ཛྷིཏུཾ ན ལབྷཏི, མོཧསྶ ཏཐཱ པཝཏྟི ཨཱརམྨཎསབྷཱཝཙྪཱདནཾ. ཨེཏྠ ཙ ཉཱཎཾ ཨཱརམྨཎཾ ཡཐཱསབྷཱཝཏོ ཛཱནཱཏི, དིཊྛི ཡཐཱསབྷཱཝཾ ཝིཛཧིཏྭཱ ཨཡཱཐཱཝཏོ གཎྷཱཏི, མོཧོ པན ན ཀཐཉྩི ཝིཛཱནཱཏི. ཡདི ཨེཝཾ ཨཱརམྨཎགྒཧཎཀཱལོ ཀཐཾ ཏདཱ སོ ཨཱརམྨཎཾ ཛཱནཱཏེཝཱཏི? ཏདཱཔི ན ཛཱནཱཏི. ཡཐཱ པན ཕསྶཱདཡོ ཕུསནཱཀཱརཱདིམཏྟཝསེནེཝ ཨཱརམྨཎཾ གཎྷནྟི, ན ཛཱནནཝསེན, ཨེཝམཡཾ ཨཱརམྨཎཾ གཧེཏྭཱ ཨུཔྤཛྫམཱནོ པཊིཙྪཱདནཱཀཱརེནེཝ གཎྷཱཏི, ན པན ཛཱནནཱཀཱརེནཱཏི. ཡསྶ ཨུཔྤཛྫཏི, ཏསྶ ཨནྡྷཀརཎཾ ཨནྡྷཀཱརོ, ཏཐཱ པཙྩུཔཊྛཱཏི, ཏཾ ཝཱ པཙྩུཔཊྛཱཔེཏཱིཏི ཨནྡྷཀཱརཔཙྩུཔཊྛཱནོ.

མིཙྪཱ པསྶནྟཱིཏི དྷམྨསབྷཱཝསྶ ཝིཔརཱིཏཝསེན ཨནིཙྩཱདིཾ ནིཙྩཱདིཝསེན པསྶནྟི. ཨཡོནིསོ ཨབྷིནིཝེསོ ཨུཔྤཐཱབྷིནིཝེསོ. དྷམྨསབྷཱཝཾ ཨཏིཀྐམིཏྭཱ པརཏོ ནིཙྩཱདིཏོ ཝཱ པརཔྤཙྩཡཏོ ཝཱ ཨཱམསནཾ པརཱམཱསོ, ཝིཔརཱིཏགྒཱཧཝསེན ‘‘ཨིདམེཝ སཙྩཾ, མོགྷམཉྙ’’ནྟི ཨབྷིནིཝེསནཾ མིཙྪཱབྷིནིཝེསོ. ཨརིཡཱནཾ ཨདསྶནཀཱམཏཱདཱིཏི ཨཱདི-སདྡེན སདྡྷམྨཨསོཏུཀཱམཏཱདིཾ སངྒཎྷཱཏི.

ཡསྶ དྷམྨསྶ ཝསེན ཨུདྡྷཏཾ ཧོཏི ཙིཏྟཾ, ཏཾསམྤཡུཏྟདྷམྨཱ ཝཱ, སོ དྷམྨོ ཨུདྡྷཙྩཾ. ཏེནཱཧ ‘‘ཨུདྡྷཏབྷཱཝོ’’ཏི. ཨཝཱུཔསམོཏི ཨསནྣིསིནྣབྷཱཝོ. ཝཱཏཱ…པེ… པཊཱཀཱ ཝིཡཱཏི ¶ ཡཐཱ པཊཱཀཱ ཡོཏྟབལེན དྷཛཡཊྛིཾ ཨམུཉྩནྟཱིཔི ཝཱཏཱབྷིགྷཱཏེན ཨེཏྠ ཨཝཊྛཱཏུཾ ན སཀྐོཏི, ཨེཝམིདམྤི ཨདྷིམོཀྑབལེན ཨཱརམྨཎཾ ཨམུཉྩནྟམྤི ཨཡོནིསོམནསིཀཱརབལེན ཨཱརམྨཎེ ཨཙལཾ ཨཝཊྛཱཏུཾ ན སཀྐོཏཱིཏི ཝཱཏཔྤཧཱརེནེཝ ཙལདྷཛཔཊཱཀཱ ཝིཡ ཨནཝཊྛཱནཀིཙྩཾ. བྷནྟཏྟཾ པརིབྦྷམནཱཀཱརོ. ཨུདྡྷཙྩསྶ སབྦཱཀུསལསཱདྷཱརཎཏྟཱ, ཨཉྙེསཉྩ ཨཀུསལསཱདྷཱརཎཱནཾ ཝིསུཾ པདཊྛཱནསྶ ལབྦྷམཱནཏྟཱ ཝུཏྟཾ ‘‘ཨཡོནིསོ…པེ… པདཊྛཱན’’ནྟི. ཡེནཱཀཱརེན ཝཱ མནསིཀརོཏོ ཨུདྡྷཙྩཾ ཨུཔྤཛྫཏི, ཏེནཱཀཱརེན མནསིཀརཎཾ ཨིདྷ ཨཡོནིསོམནསིཀཱརོ. ཨཐ ཝཱ ཨུདྡྷཙྩནིམིཏྟསྶ ཨཱརམྨཎསྶ མནསིཀརཎཾ ཨིདྷ ཨཡོནིསོམནསིཀཱརོ.

མཉྙཏཱིཏི ¶ ཨབྷིམཉྙཏི, ཨཧཾཀཱརཾ ཀརོཏཱིཏི ཨཏྠོ. སེཡྻཱདིཝསེན ཨུཙྩཏོ ནམནཾ ཨུཎྞཏི. སམྤགྒཧརསོཏི ཨུཎྞཏིཝསེནེཝ ཨཏྟནོ, སམྤཡུཏྟདྷམྨཱནཾ ཝཱ སམྤགྒཎྷནཀིཙྩོ, ན ཝཱིརིཡཾ ཝིཡ ཏཾཏཾཀིཙྩསཱདྷནེན. ཨབྷིབྷུསྶཧནཝསེན ཧཱིནསྶ ཨཏྟཱནཾ ནཱིཙཾ ཀཏྭཱ གཧཎམྤི པགྒཎྷནཝསེནེཝཱཏི ཝེདིཏབྦཾ. ཀེཏུ…པེ… པཙྩུཔཊྛཱནོཏི ཨེཏྠ ཀེཏུ ཝུཙྩཏི ཨཙྩུགྒཏདྷཛོ, ཨིདྷ པན ཀེཏུ ཝིཡཱཏི ཀེཏུ, ཨུལཱ༹རཏམཱདིབྷཱཝོ, ཏཾ ཀེཏུབྷཱཝསངྑཱཏཾ ཀེཏུཾ ཀམྱཏཱིཏི ཀེཏུཀམྱཾ, ཡསྶ དྷམྨསྶ ཝསེན ཏཾ ཀེཏུཀམྱཾ, སོ ཀེཏུཀམྱཏཱ. ‘‘ཨཧ’’ནྟི པཝཏྟནཏོ མཱནསྶ དིཊྛིསདིསཱི པཝཏྟཏཱིཏི དིཊྛིམཱནཱ ཨེཀཙིཏྟུཔྤཱདེ ན པཝཏྟནྟི, དྭེ ཀེསརསཱིཧཱ ཝིཡ ཨེཀགུཧཱཡཾ, ཏསྨཱ མཱནོ དིཊྛིཝིཔྤཡུཏྟཙིཏྟེ སབྦདཱ ཨནུཔྤཛྫམཱནོཔི དིཊྛིསམྤཡུཏྟཙིཏྟེ ནིཡམེན ཨནུཔྤཛྫནཏོ དིཊྛིཝིཔྤཡུཏྟལོབྷཔདཊྛཱནོ. མཱནོ དྷམྨསམཱུཧགྒཧཎེ བལཝཾ ཧུཏྭཱ ཨཏྟུཀྐཾསནབྷཱཝེན ¶ པཝཏྟཏི, དིཊྛི ཨེཀེཀདྷམྨམྤི ནིཙྩཱདིཨཱཀཱརེན གཎྷནྟཱི པཝཏྟཏི. ཨཏྟསིནེཧསནྣིསྶཡོ ཝཱ མཱནོ, ཨཏྟཀིལམཐཱནུཡོགསནྣིསྶཡཱ དིཊྛཱིཏི ཨཡམེཏེསཾ ཝིསེསོ.

ཨིསྶཏཱིཏི ཨུསཱུཡཏི. ཏཏྠེཝཱཏི པརསམྤཏྟཱིསུཡེཝ. ཨིསྶཱཝསེན པརསམྤཏྟཱིསུ ཨཏུསྶནཏོ ཝུཏྟཾ ‘‘ཨནབྷིརཏིརསཱ’’ཏི. ཏེནེཝེཏཾ ཝུཙྩཏི –

‘‘ཨིསྶཱནལསིཁཱ ཡེསཾ, ཧདཡེ ཛལཏཱིདྷ ཏེ;

ནེཝ ཝིནྡནྟི པཱམོཛྫཾ, སམྦུདྡྷཱདཱིཧི སེཝིཏ’’ནྟི.

མཙྪརཡོགེན མཙྪརིནི པཝཏྟཾ མཙྪར-སདྡཾ གཧེཏྭཱ ཨཱཧ ‘‘མཙྪརབྷཱཝོ མཙྪརིཡ’’ནྟི. ནིརུཏྟིནཡེན པན ‘‘མཱ ཨིདཾ ཨཙྪརིཡཾ ཨཉྙེསཾ ཧོཏུ, མཡ྄ཧཾཝ ཧོཏཱུ’’ཏི མཙྪརིཡནྟི པོརཱཎཱ. ནིགུཧཎཾ ཨཏྟནོ སམྤཏྟིཡཱ པརེསཾ ཨདསྶནཾ. སངྐོཙནཾ ཨཏྟསམྤཏྟཱིནཾ པརེཧི སཱདྷཱརཎབྷཱཝཀརཎསྶ ཨརུཙྩནཱཀཱརེན པཊིཀུཊནཾ. ‘‘མཱ ཨིདཾ པརསྶ ཧོཏཱུ’’ཏི པརེསུ པཊིཧནནཝསེན ཨཏྟསནྟཀསྶ ཨཱརམྨཎཀརཎཏོ མཙྪེརཾ པཊིགྷཙིཏྟེསྭེཝ ལབྦྷཏཱིཏི ཝདནྟི, ཏཾ ན ཡུཏྟཾ ཨེཀསྶེཝ དྷམྨསྶ ཨཉྙཏྠ པཊིཧཉྙིཏྭཱ ཨཉྙཱརམྨཎབྷཱཝཔྤསངྒཏོ. པརེཧི སཱདྷཱརཎབྷཱཝེ པཊིཧནནཝསེན པན ཏཾ ཨཱརབྦྷ པཝཏྟནཏོ མཙྪེརཾ པཊིགྷཙིཏྟེསུ ཨུཔྤཛྫཏཱིཏི ཡུཏྟཾ. ཨཏྟསམྤཏྟཱིཏི ཨཱཝཱསཱདིསམྤཏྟི.

ཀུཙྪིཏཾ ཀཏནྟི ཨེཏྠ ཀཏམྤི ཨཀཏམྤི གརཧིཏབྦཏྟཱ ཀུཙྪིཏཾ ཀཏཾ ནཱམ ཧོཏི. ཨེཝཉྷི ¶ ཝཏྟཱརོ ཧོནྟི ‘‘ཡཾ མཡཱ ན ཀཏཾ, ཏཾ ཀུཀཏ’’ནྟི. ཏཐཱ ཧི ཝཀྑཏི ‘‘ཀཏཱཀཏཱནུསོཙནརས’’ནྟི. ཨེཝཾ ཀཏཱཀཏཾ དུཙྩརིཏཾ སུཙརིཏམྤི ཀུཙྪིཏཾ ཀཏཾ ནཱམ. སུཙརིཏམྤི ཧི གརཧནྟསྶ ཀུཙྪིཏཾ ཀཏནྟི ཧོཏི ¶ . ཡཐཱ པན པཐཝཱིཀསིཎཱརམྨཎཾ ཛྷཱནཾ པཐཝཱིཀསིཎཾ, ཨེཝཾ ཀུཀཏཾ ཨཱརབྦྷ ཝིཔྤཊིསཱརཝསེན པཝཏྟཾ ཙིཏྟཾ ཏཾསཧཙརིཏཏཱཡ ཨིདྷ ཀུཀཏནྟི གཧེཏབྦཾ. ཨཐ ཝཱ ཀཏཱཀཏཾ ཨཱརབྦྷ ཨུཔྤཛྫནཀཝིཔྤཊིསཱརཙིཏྟཾཡེཝ གརཧིཏབྦཏོ ‘‘ཀུཙྪིཏཾ ཀཏཾ ཀུཀཏ’’ནྟི ཝུཙྩཏི. ཡསྶ དྷམྨསྶ ཝསེན ཏཾ ཙིཏྟཾ ཀུཀཏཾ ནཱམ ཧོཏི, སོ དྷམྨོ ཀུཀྐུཙྩཾ. ཏེནཱཧ ‘‘ཀུཀཏཾ, ཏསྶ བྷཱཝོ’’ཏི. པཙྪཱ ཨནུཏཔྤནཾ ཝིཧེཋནཾ པཙྪཱནུཏཱཔོ. ཀཏཱཀཏཱནུསོཙནཾ ཀཏཱཀཏསྶ སུཙརིཏདུཙྩརིཏསྶ ཨནུསོཙནཾ, ‘‘ཨཀཏཾ ཝཏ མེ ཀལྱཱཎ’’ནྟིཨཱདིནཱ ཨནུཏཔྤནཾ, ‘‘ཨཀཏཾ མཡཱ པུབྦེ ཀལྱཱཎཀམྨཾ, ཨིཏོ དཱནི པཊྛཱཡ ཀརོམཱི’’ཏི པཝཏྟཾ པན ཀུསལཔཀྑིཀཾ ཝཱིརིཡམེཝ, ན ཀཏཱཀཏཱནུསོཙནཾ, ཀཏཱཀཏཱཀཱརཝིསིཊྛསྶ སུཙརིཏདུཙྩརིཏསྶ ཨནུསོཙནཝསེན ཝིརཱུཔཾ པཊིསརཎཾ ཝིཔྤཊིསཱརོ. ཀཏཱཀཏཱནུསོཙནཉྷི ཨཝཌྜྷིསམྤཱདནཏོ ཝིརཱུཔཾ པཊིསརཎཾ, ཏཾ པརཱཡཏྟཏཱཧེཏུཏཱཡ དཱསབྱཾ ཝིཡ དཊྛབྦཾ. ཡཐཱ ཧི དཱསབྱེ སཏི དཱསོ པརཱཡཏྟོ ཧོཏི, ཨེཝཾ ཀུཀྐུཙྩེ སཏི ཏཾསམངྒཱིཔུགྒལོ. ན ཧི སོ ཨཏྟནོ དྷམྨཏཱཡ ཀུསལེ པཝཏྟིཏུཾ སཀྐོཏི. ཨཐ ཝཱ ཀཏཱཀཏཀུསལཱཀུསལཱནུསོཙནཝསེན ཨཱཡཏྟཏཱཡ ཏདུབྷཡཝསེན ཀུཀྐུཙྩེན ཏཾསམངྒཱི ཧོཏཱིཏི ཏཾ དཱསབྱཾ ཝིཡ ཧོཏི.

ཨནུསྶཱཧནཱཝསཱིདནཝསེན སཾཧཏབྷཱཝོ ཐིནཾ, ཏེན ཡོགཏོ ཙིཏྟཾ ཐིནཾ, ཏསྶ བྷཱཝོ ཐིནཏཱ. ཏེནཱཧ ‘‘ཨནུསྶཱཧསཾཧནནཏཱ’’ཏི. ཨསམཏྠཏཱཝིགྷཱཏཝསེན ཨཀམྨཉྙཏཱ མིདྡྷཾ. ཏེནཱཧ ‘‘ཨསཏྟིཝིགྷཱཏོ’’ཏི. ཡསྨཱ མིདྡྷཝསེནེཝ ཏེན སམྤཡུཏྟདྷམྨཱ མེདྷིཏཱ ཝིཧཏསཱམཏྠིཡཱ ཧོནྟི, ཏསྨཱ ‘‘མིདྡྷཏཱ མིདྡྷ’’ནྟི ཝུཏྟཾ. ན ཝིཛྫཏི ཨུསྶཱཧོ ཨསྶཱཏི ཨནུསྶཱཧཾ, ཏབྦྷཱཝོཔི ཨནུསྶཱཧཾ. ཨནུསྶཱཧསངྑཱཏོ སཾཧནནབྷཱཝོ ཨནུསྶཱཧསཾསཱིདནཏཱ, ཀུསཱིཏབྷཱཝོཏི ¶ ཝུཏྟཾ ཧོཏི. ཨསཏྟིཝིགྷཱཏོཏི ཡསྨཱ ཏཾ མིདྡྷཾ ཨུཔྤཛྫམཱནམེཝ སཏྟིཝིནཱསཝསེན ཨུཔྤཛྫཏི, ཏསྨཱ ནཏྠི ཨེཏསྶ སཏྟཱིཏི ཏཾ སམྤཡུཏྟཙིཏྟཾ ཨསཏྟི, ཏསྶ བྷཱཝོཔི, ཨསཏྟིཡེཝ ཝིགྷཱཏོཏི ཨསཏྟིཝིགྷཱཏོ.

ཨནུསྶཱཧནལཀྑཎནྟི ཨུསྶཱཧཔཊིཔཀྑལཀྑཎཾ. ཝཱིརིཡསྶ ཝིནོདནཾ ཁེཔནཾ ཝཱིརིཡཝིནོདནཾ. སམྤཡུཏྟདྷམྨཱནཾ སཾསཱིདནཱཀཱརེན པཙྩུཔཊྛཱཏི, ཏེསཾ ཝཱ སཾསཱིདནཾ པཙྩུཔཊྛཱཔེཏཱིཏི ¶ སཾསཱིདནཔཙྩུཔཊྛཱནཾ. ཨཀམྨཉྙཏཱལཀྑཎནྟི ཨེཏྠ ཀཱམཾ ཐིནམྤི ཨཀམྨཉྙཏཱསབྷཱཝམེཝ, ཏཾ པན ཙིཏྟསྶ ཨཀམྨཉྙཾ, མིདྡྷཾ ཝེདནཱདིཀྑནྡྷཏྟཡསྶཱཏི ཨཡམེཏྠ ཝིསེསོ. ཏཐཱ ཧི པཱལི༹ཡཾ ‘‘ཏཏྠ ཀཏམཾ ཐིནཾ? ཡཱ ཙིཏྟསྶ ཨཀལླཏཱ ཨཀམྨཉྙཏཱ. ཀཏམཾ མིདྡྷཾ? ཡཱ ཀཱཡསྶ ཨཀལླཏཱ ཨཀམྨཉྙཏཱ’’ཏི (དྷ. ས. ༡༡༦༢) ཙ ཨཱདིནཱ ཨིམེསཾ ནིདྡེསོ པཝཏྟོ. ཨོཎཧནཾ ཝིཉྙཱཎདྭཱརཱནཾ པིདཧནཾ, སམྤཡུཏྟཱནཾ བནྡྷནཾ ཝཱ. ལཱིནཏཱ ལཱིནཱཀཱརོ, ཨཱརམྨཎགྒཧཎེ སངྐོཙོ. ཡསྨཱ ཐིནེན ཙིཏྟསྶེཝ སཾཧནནཾ ཧོཏི, མིདྡྷེན པན ཝེདནཱདིཀྑནྡྷཏྟཡསྶ ཝིཡ རཱུཔཀཱཡསྶཔི, ཏསྨཱ ཏཾ པཙལཱཡིཀཱནིདྡཾ པཙྩུཔཊྛཱཔེཏཱིཏི པཙལཱཡིཀཱནིདྡཱཔཙྩུཔཊྛཱནནྟིཔི ཝཊྚཏི. པོཏྠརཱུཔཔཊིཙྪཱདཀཔཊོ ཝིཡ ཨཱརམྨཎསབྷཱཝཱཝཙྪཱདཀོ མོཧོ. མུཁེ བནྡྷཔཊོ ཝིཡ སམྤཡུཏྟདྷམྨེ པཏྠརིཏུཾ ཨདེནྟཾ མིདྡྷནྟི ཨཡམེཏེསཾ ཝིསེསོ.

སེསཱཏི ཨིདྷ ལཀྑཎཱདིཝསེན ཝུཏྟཱཝསེསཱ ཕསྶཱདཡོ. ཀུསལེསུ ཝུཏྟནཡེནཱཏི ལཀྑཎཱདིཏོ ཝུཏྟནཡེན. ན ཀོཙི ཨེཏྠ ཝིསེསོ ཨཏྠཱིཏི ཙེ, ནོ ནཏྠཱིཏི ཨཱཧ ‘‘ཨེཏྠ པནཱ’’ཏིཨཱདི, ཝིཏཀྐཱདཱིནཾ ཏིཎྞཾ ཡཐཱཀྐམཾ མིཙྪཱསངྐཔྤཱདིནཱམམཏྟམེཝ ཝིསེསོཏི ཨཏྠོ. ཨེཀཱུནཝཱིསཏཱིཏི ¶ ཋཔེཏྭཱ མཱནཱདཡོ ཚ ཨནིཡཏཡེཝཱཔནཀེ སེསཱ སརཱུཔེནཱགཏཱ པནྣརས ཚནྡཱདཡོ ཙ ཙཏྟཱརོ ནིཡཏཡེཝཱཔནཀཱཏི ཨིམེ ཨེཀེན ཨཱུནཱ ཝཱིསཏི ཙེཏསིཀཱ. ཨནིཡཏཡེཝཱཔནཀཱནཾ པན ཨིདྷ ཨལབྷནྟཱནམྤི ཨེཏྠ ཝཙནེ ཀཱརཎཾ ཝུཏྟམེཝ.

ཐིནམིདྡྷསྶ ཨནིཡཏབྷཱཝོཏི ཐིནམིདྡྷསྶ ཨནིཡཏསྶ ཨིདྷ ཨུཔྤཛྫནཀབྷཱཝམཱཧ, ན པན པཋམེ ནིཡཏབྷཱཝཾ ཏཏྠ སབྦསོཝ ཨནུཔྤཛྫནཏོ. ན ཧི སབྷཱཝཏིཁིཎཾ ཙིཏྟཾ ཐིནམིདྡྷཡོགཱི ཧོཏཱིཏི. ཏཏིཡེ མཱནསྶ ཨནིཡཏསྶ སམྦྷཝེཔི ནིཡཏདྷམྨེ སནྡྷཱཡ ‘‘ཨཊྛཱརསཱ’’ཏི ཝུཏྟཾ. ཏེནཱཧ ‘‘མཱནོ པནེཏྠ ཨནིཡཏོ’’ཏི. དིཊྛིཡཱ སཧ ན ཨུཔྤཛྫཏཱིཏི ཨེཏྠ ཀཱརཎཾ ཝུཏྟམེཝ. ཙཏུཏྠེ ཨཝསེསཱཏི ཨཊྛཱརསེཝ, པཉྩམེ ཋཔེཏྭཱ པཱིཏིཾ དིཊྛིཡཱ སཧ ཨཊྛཱརསེཝ, ཏཐཱ ཚཊྛེཔི. སཏྟམེ པཱིཏིཡཱ, དིཊྛིཡཱ ཙ ཨབྷཱཝཏོ སཏྟརས, ཏཐཱ ཨཊྛམེཔི.

ཨེཏེཔི ཏཡོཏི ན ཀེཝལཾ ཀརུཎཱམུདིཏཱ ཨེཝ, ཨེཏེཔི ཏཡོ ཨེཀཏོ ན ཨུཔྤཛྫནྟི ཨཉྙམཉྙཾ ཝིསཡབྷེདཏོཡེཝ. ཏཐཱ ཧི ཨིསྶཱ པརསམྤཏྟིཝིསཡཱ, མཙྪརིཡཾ ཨཏྟསམྤཏྟིཡཱ པརེཧི ¶ སཱདྷཱརཎཱབྷཱཝཝིསཡཾ, ཀུཀྐུཙྩཾ ཀཏཱཀཏཝིསཡནྟི, ཏསྨཱ ཡཾ ཨབྷཡགིརིཝཱསིནོ ཝདནྟི ‘‘ཨིསྶཱམཙྪེརཾ ཡདིཙྪཱཝསེན ཨེཀཏོཔི ཨུཔྤཛྫཏཱི’’ཏི, ན ཏཾ གཧེཏབྦཾ.

སབྷཱཝཏོ, པརིཀཔྤནཏོ ཝཱ ཨནིཊྛསྶ ཨཱརམྨཎསྶ ཨནིཊྛཱཀཱརཾ ཝཱ ཨཱརམྨཎསྶ ཨནུབྷཝནཾ སམྦྷུཉྫནཾ ཨནིཊྛཱརམྨཎཱནུབྷཝནཾ, ཏཾ ལཀྑཎམསྶཱཏི ཨནིཊྛཱརམྨཎཱནུབྷཝནལཀྑཎཾ. ཏེནཱཧ ‘‘ཨནིཊྛཱཀཱརསམྦྷོགརས’’ནྟི, ཡཐཱབྷཱུཏེན ཝཱ ཨཡཐཱབྷཱུཏེན ཝཱ ཨནིཊྛཱཀཱརེན ཨཱརམྨཎསྶ སམྦྷུཉྫནརསཾ, པཙྩཱནུབྷཝནཀིཙྩནྟི ཨཏྠོ. ཏིཏྠིཡཱདཱིནཉྷི སབྷཱཝཏོ ཨིཊྛེ བུདྡྷཱདིཨཱརམྨཎེཔི ཨནིཊྛཱཀཱརཏོ གཧཎཝསེན ¶ དོམནསྶཾ ཨུཔྤཛྫཏི. དོམནསྶསྶ ཨེཀནྟེན ཀཱམདྷཱཏུཡཾཡེཝ པཝཏྟནཏོ ཨཱཧ ‘‘ཧདཡཝཏྠུཔདཊྛཱན’’ནྟི. ཏསྶ ཧི ཨནཱིཝརཎཱཝཏྠཱཡ ཨབྷཱཝཏོ རཱུཔཱརཱུཔདྷཱཏུཡཾ ཨསམྦྷཝོ.

ཨཏྟནོ པཝཏྟིཨཱཀཱརཝསེན ཨནིཊྛརཱུཔསམུཊྛཱཔནཝསེན ཝཱ ཝིརཱུཔཾ སཔྤནཾ ཝིསཔྤནཾ, ཨནིཊྛརཱུཔསམུཊྛཱཔནཝསེནེཝ ཝཱ ཝིསཔྤནཾ སརཱིརཀམྤནཾ, ཏཾ རསོ ཀིཙྩཾ, སམྤཏྟི ཝཱ ཨསྶཱཏི ཝིསཔྤནརསོ, ནིསྶཡསྶ ཧདཡཝཏྠུནོ, སཀལསྶེཝ ཝཱ ཀཱཡསྶ ཝིཛ྄ཛྷཏྟབྷཱཝཱཔཱདནཏོ ཨཱཧ ‘‘ཨཏྟནོ ནིསྶཡདཧནརསོ ཝཱ’’ཏི, ཝིཛ྄ཛྷཏྟབྷཱཝཱཔཱདནཏོཏི ཙ མིལཱཏབྷཱཝཱཔཱདནཏོཏི ཨཏྠོ. ཡཐཱ ཀཐཾ ཝིཡཱཏི ཨཱཧ ‘‘དཱཝགྒི ཝིཡཱ’’ཏི. སོ ཧི ཝནགྷཊེཡེཝ ཨུཔྤནྣོ ཏམེཝ དཧཏི. དུསྶནཔཙྩུཔཊྛཱནོཏི ཨཏྟནོ, པརསྶ ཙ དཱུསནཱཀཱརེན པཙྩུཔཊྛཱནོ. སོ ཧི ཡསྶ སནྟཱནེ ཨུཔྤནྣོ, ཏཾ ཨེཀནྟེན ཨནྟམསོ ཝིརཱུཔབྷཱཝཱཔཱདནེནཔི དཱུསེཏི, པརཾ པན དཱུསེཏུ ཝཱ, མཱ ཝཱ ཧཏྠེན གཧིཏཨསུཙི ཝིཡ. ‘‘ཨནཏྠཾ མེ ཨཙརཱི’’ཏིཨཱདཱིནི ནཝ ཨཱགྷཱཏཝཏྠཱུནི པདཊྛཱནམསྶཱཏི ཨཱགྷཱཏཝཏྠུཔདཊྛཱནོ. སོ ཨུཔཡོགཕལཀཱལེསུ ཨནིཊྛཏྟཱ ཝིསསཾསཊྛཔཱུཏིམུཏྟཾ ཝིཡ དཊྛབྦོ. ཨཊྛཱརས ཝཱཏི ཨིསྶཱདཱིསུ ཨནིཡཏེསུ ཨེཀེན སདྡྷིཾ ཨཊྛཱརས ཝཱ.

པཝཏྟིཊྛིཏིམཏྟཱཏི ཙེཏསོ པཝཏྟིསངྑཱཏཱ ཋིཏིམཏྟཱ, མགྒངྒཱདིབྷཱཝཾ ན གཙྪཏི ཨདྷིམོཀྑཝིརཧཏོཏི ཨཏྠོ. ཨཐ ཝཱ པཝཏྟིཊྛིཏིམཏྟཱཏི ཁཎཊྛིཏིམཏྟཱ. ‘‘ནིཝཱཏེ དཱིཔཙྩཱིནཾ ཋིཏི ཝིཡཱ’’ཏི ཧི ཝུཏྟཾ. ཙིཏྟཊྛིཏི ཝིཡ སནྟཱནཊྛིཏིཡཱ པཙྩཡོ བྷཝིཏུཾ ཨསམཏྠཏྟཱ ནིཙྪཡཱབྷཱཝེན ཨསཎྛཧནཏོ ཙེཏསོ པཝཏྟིཔཙྩཡམཏྟཏཱཡ པཝཏྟིཊྛིཏིམཏྟཱ ཁཎཊྛིཏིམཏྟཱ པཝཏྟིཔཙྩཡམཏྟཱ ཋིཏི པཝཏྟིཊྛིཏཱིཏི ཀཏྭཱ. ཝིགཏཱ ཙིཀིཙྪཱཏི ནིསྶཀྐེ པཙྩཏྟཝཙནཾ ‘‘པིསུཎཱ ¶ ཝཱཙཱ པཊིཝིརཏོ’’ཏིཨཱདཱིསུ ¶ ཝིཡ, ཝིགཏཱ ཏིཀིཙྪཱཡཱཏི ཨཏྠོ. ཨཡམེཝ ཝཱ པཱཋོ. ‘‘ཝིགཏཱ ཙིཀིཙྪཱ’’ཏི ཙིཀིཙྪིཏུཾ དུཀྐརཏཱཡ ཙེཏཾ ཝུཏྟཾ, ན སབྦཐཱ ཙིཀིཙྪཱཡ ཨབྷཱཝཏོ. ‘‘ཨེཝཾ ནུ ཁོ, ན ནུ ཁོ’’ཏིཨཱདིནཱ སཾསཔྤནཝསེན སེཏི, སམནྟཏོ ཝཱ སེཏཱིཏི སཾསཡོ. ཀམྤནརསཱཏི ཙིཏྟསྶ ཀམྤནཀིཙྩཱ. ཨུདྡྷཙྩཉྷི ཨཏྟནཱ གཧིཏཱཀཱརེཡེཝ ཋཏྭཱ བྷམཏཱིཏི ཨེཀཱརམྨཎསྨིཾ ཨེཝ ཝིཔྥནྡནཝསེན པཝཏྟཏི, ཝིཙིཀིཙྪཱ པན ཡདིཔི ཨེཀསྨིཾ ཨཱརམྨཎེ ཨུཔྤཛྫཏི, ཏཐཱཔི ‘‘ཨེཝཾ ནུ ཁོ, ན ནུ ཁོ’’ཏི ཨཉྙཾ གཧེཏབྦཱཀཱརཾ ཨཔེཀྑཏཱིཏི ནཱནཱརམྨཎེ ཀམྤནཾ ཧོཏི. ཨནིཙྪཡཱཀཱརེན དྭེལ༹ྷཀཱཀཱརེན པཙྩུཔཊྛཱཏི, ཨནིཙྪཡཾ ཝཱ པཙྩུཔཊྛཱཔེཏཱིཏི ཨནིཙྪཡཔཙྩུཔཊྛཱནཱ.

ཨདྷིམོཀྑཝིཙིཀིཙྪཱནཾ ཨཉྙམཉྙཾ ཝིཔརཱིཏཀིཙྩཏཱཡ ཨཱཧ ‘‘ཝིཙིཀིཙྪཱཡ ཨབྷཱཝེནཱ’’ཏི. སམཱདྷཱིཏི ཙིཏྟེཀགྒཏཱ. སཱ ཧི ཨཱརམྨཎེ ཙིཏྟསྶ སམྨཱ ཨཱདྷཱནཏོ ‘‘སམཱདྷཱི’’ཏི ཝུཙྩཏི. བལཝཱ ཧོཏཱིཏི བལཝམིཏྟེན དིནྣཔིཊྛིབལོ པུརིསོ ཝིཡ བལཝཱ ཧོཏི, བལཱདིབྷཱཝཾ གཙྪཏཱིཏི ཨདྷིཔྤཱཡོ.

སཏྟཱརམྨཎཏྟཱཏི སཏྟཔཉྙཏྟཱརམྨཎཏྟཱ. ནནུ པཉྙཏྟཱརམྨཎཱཔི ཝིཔཱཀཱ ཧོནྟཱིཏི ཙོདནཾ སནྡྷཱཡཱཧ ‘‘ཀཱམཱཝཙརཝིཔཱཀཱནཾ ཨེཀནྟཔརིཏྟཱརམྨཎཏྟཱ’’ཏི. ཀུཏོ པན ཝིརཏཱིནཾ ཀུསལཏྟམེཝཱཏི ཙཱརིཏནྟི ཨཱཧ ‘‘པཉྩ སིཀྑཱཔདཱ ཀུསལཱཏི (ཝིབྷ. ༧༡༥) ཧི ཝུཏྟ’’ནྟི. ཡདི ཨེཝཾ ལོཀུཏྟརཝིཔཱཀེསུ ཝིརཏིཡོ ན ལབྦྷནྟཱིཏི? ནོ ན ལབྦྷནྟི སིཀྑཱཔདཝིབྷངྒེ ལོཀིཡཝིརཏིཡོཡེཝ སནྡྷཱཡ ཝུཏྟཏྟཱ. ཏེན ལོཀིཡཝིཔཱཀེསུཡེཝ ཝིརཏིཡོ ན སམྦྷཝནྟཱིཏི གཧེཏབྦཾ.

ཀཱཡཔསཱདསནྣིསྶིཏཏྟཱ ¶ ཀཱཡེ བྷཝོ སཱཏབྷཱཝོ ལཀྑཎམསྶཱཏི ཀཱཡིཀསཱཏལཀྑཎཱ. ཙེཏསིཀསུཁེ ཝུཏྟནཡེན པཙྩུཔཊྛཱནཱདཡོ ནེཏབྦཱཏི ཨཱཧ ‘‘སེསཱ ཝུཏྟནཡཱ ཨེཝཱ’’ཏི.

༨༤-༦. ནནུ ཙ ཨིཊྛེ ཨཱརམྨཎེ སུཁཝེདནཱ ཨུཔྤཛྫཏི, ཨནིཊྛེ དུཀྑཝེདནཱ, ཨིཊྛཱནིཊྛམཛ྄ཛྷཏྟེ ཨུཔེཀྑཱཝེདནཱ, ཙཀྑུཝིཉྙཱཎཱདཡོ ཙ ཀུསལཝིཔཱཀཱ ཨིཊྛེ, ཨིཊྛམཛ྄ཛྷཏྟེ ཝཱ ཨཱརམྨཎེ ཨུཔྤཛྫནྟི, ཏཏྠ ཡུཏྟོ ཏཱཝ ཨིཊྛམཛ྄ཛྷཏྟེ ཨུཔེཀྑཱཝེདནཱཡོགོ, ན པན ཨིཊྛཱརམྨཎེ, ན ཙཱཔི ཨེཏཾ སཀྐཱ ཝཏྟུཾ པརིཀཔྤནཱཝསེན ཨིཊྛཱརམྨཎམྤི ཨིཊྛམཛ྄ཛྷཏྟཏོ གཎྷནྟི ཡཐཱ ‘‘ཀམྨཝིཉྙཱཎ’’ནྟི ཝིཔཱཀཱནཾ ཨཝཉྩནཱིཡབྷཱཝཏོ, ཏསྨཱ ཀཐཾ ཨིཊྛེ, ཨིཊྛམཛ྄ཛྷཏྟེ ཙ ཨུཔྤཛྫམཱནེསུ ¶ ཙཀྑུསོཏགྷཱནཛིཝ྄ཧཱཝིཉྙཱཎེསུ ཨུཔེཀྑཱཝེདནཱཡེཝ སམྦྷཝཏི, ན སུཁཝེདནཱ, ཡཏོ ཏེསུ ཨུཔེཀྑཱཝེདནཱ ཝུཏྟཱཏི ཨིམཾ ཙོདནཾ སངྑེཔཏོ དསྶེཏུཾ ‘‘ཨིཊྛཱརམྨཎཡོགསྨི’’ནྟིཨཱདིཾ ཝཏྭཱ པུན ཏསྶཱ སོདྷནཏྠཾ ‘‘ཨུཔཱདཱཡ ཙ རཱུཔེནཱ’’ཏིཨཱདི ཝུཏྟཾ. བྷཱུཏརཱུཔཾ ཨུཔཱདཱཡ ནིསྶཱཡ པཝཏྟཾ རཱུཔཾ ཨུཔཱདཱཡརཱུཔཾ. ‘‘ཨུཔཱདཱཡ ཙ རཱུཔེནཱ’’ཏི པན ‘‘མནསཱི ཙ ཀཱརོ’’ཏི ཨེཏྠ ཝུཏྟནཡམེཝ. ‘‘ཨུཔཱདཱཡཀརཱུཔེནཱ’’ཏི ཝཱ པཱཋོ, ཙཀྑུཝིཉྙཱཎསྶ ཝཏྠུབྷཱུཏེན ཙཀྑུཔསཱདེན, ཏཐཱ སོཏཝིཉྙཱཎཱདཱིནཾ ཝཏྠུབྷཱུཏེན སོཏཔསཱདཱདིནཱ ཙ ཨུཔཱདཱཡརཱུཔེནཱཏི ཨཏྠོ. ཨུཔཱདཱརཱུཔཀེ པནཱཏི ཡ-ཀཱརལོཔཾ ཀཏྭཱ ནིདྡེསོ ‘‘པཊིསངྑཱ ཡོནིསོ’’ཏིཨཱདཱིསུ ཝིཡ, ཡཐཱཀྐམཾ ཙཀྑུཝིཉྙཱཎཱདཱིནཾ ཨཱརམྨཎབྷཱུཏེ རཱུཔསདྡཱདིཀེ ཨུཔཱདཱཡརཱུཔེཏི ཨཏྠོ. སཾགྷཊྚནཱནིགྷཾསསྶཱཏི སཾགྷཊྚནཱསངྑཱཏསྶ ནིགྷཾསསྶ. སཾགྷཊྚནཱཡེཝ ཨཉྙམཉྙཝིསཡཝིསཡཱིབྷཱཝསྶ ཨནུརཱུཔདེསུཔྤཏྟིསངྑཱཏནིགྷཾསོ ཝིཡཱཏི ནིགྷཾསོཏི ཝུཙྩཏི. ཨཐ ཝཱ སམྤཏྟཱསམྤཏྟགྒཧཎཝསེན སཾགྷཊྚནཱཡ ནིགྷཾསསྶ ཙཱཏི ཨཏྠོ. ཙཀྑུརཱུཔསོཏསདྡཱ ཧི ¶ ཨཉྙམཉྙཾ ཨསམྤཏྟཱཡེཝ ཨནུརཱུཔདེསུཔྤཏྟིཡཱ ཨཉྙམཉྙཾ གྷཊྚནྟི ནཱམ. ཏཏོ ཏེསཾ ཝསེན གྷཊྚནཱཀཱརབྷཱུཏོ ཨཉྙམཉྙཱབྷིམུཁབྷཱཝོ ‘‘སཾགྷཊྚནཱ’’ཏི ཝུཏྟོ. གྷཱནགནྡྷཱ, པན ཛིཝ྄ཧཱརསཱ ཙ ཨཉྙམཉྙཾ སམྤཏྟཱཡེཝ ཨཱསནྣཏརདེསེ ཨུཔྤནྣཱ ཨཉྙམཉྙཾ ནིགྷཾསེནྟི ཨཱཧཙྩ ཏིཊྛནྟི. ཏཏོ ཏེསཾ ཝསེན ནིགྷཾསོ ཝུཏྟོཏི. དུབྦལཏྟཱཏི ཨདྷིཀརཎཱིམཏྠཀེ པིཙུཔིཎྜཀཾ ཋཔེཏྭཱ པིཙུཔིཎྜེནེཝ པཧཏཀཱལེ ཝིཡ ཕུཊྛམཏྟབྷཱཝེན དུབྦལཏྟཱ. དཱིཔཡེཏི ཨེཝཾ སཾགྷཊྚནཱནིགྷཾསསྶ དུབྦལཏྟཱ ཝེདནཱ མཛ྄ཛྷཏྟཊྛཱནེ ཏིཊྛཏཱིཏི ཨུཔེཀྑཱཡོགཾ པཀཱསེཡྻ. ཡདི ཨེཝཾ ཀཱཡཝིཉྙཱཎེཔི ཨིདཾ སམཱནནྟི, ནོཏི ཨཱཧ ‘‘པསཱདཾ པནཱ’’ཏིཨཱདི. ཡཐཱ ཧི ཨདྷིཀརཎཱིམཏྠཀེ ཀཔྤཱསཔིཙུཔིཎྜཾ ཋཔེཏྭཱ ཀཱུཊེན པཧརནྟསྶ ཀཱུཊཾ པིཙུཔིཎྜམཏིཀྐམྨ ཨདྷིཀརཎིཾ གཎྷཱཏི, ཨེཝམེཝཾ ཀཱཡདྭཱརེ བཧིདྡྷཱ མཧཱབྷཱུཏཱརམྨཎཾ ཨཛ྄ཛྷཏྟིཀཀཱཡཔསཱདཾ གྷཊྚེཏྭཱ ཏཾ ཨཏིཀྐམྨ པསཱདཔཙྩཡེསུ མཧཱབྷཱུཏེསུ པཊིཧཉྙཏི, ནིགྷཾསོ བལཝཱ ཧོཏི, ཏསྨཱ ཨིཊྛཱརམྨཎེ ཀཱཡཝིཉྙཱཎསམྤཡུཏྟཱ སུཁཝེདནཱ ཧོཏི, ཨནིཊྛཱརམྨཎེ པན ཝུཏྟནཡེན དུཀྑཝེདནཱཏི ཝུཏྟཾ ཧོཏི.

མནོདྷཱཏུནཱཏི ཨེཏྠ ཀིཉྩཱཔི དྷཱཏུ-སདྡོ ཨིདྷ ཨིཏྠིལིངྒེཡེཝ དིསྶཏི, ཨིམིནཱཡེཝ པན ཨཱཙརིཡསྶ ཝཙནེན པུལླིངྒོ ཨཏྠཱིཏི སིདྡྷཾ. ཀེཙི པན ‘‘སཀྐཊཝོཧཱརེན ཝུཏྟ’’ནྟི ཝདནྟི. སམྤཡུཏྟཱ དས དྷམྨཱཏི སམྦནྡྷོ. ཏསྨཱཝེཏྠཱཏི ཨེཏྠ ཝ-ཀཱརོ པདསནྡྷིམཏྟཀརོ.

ཀཱཡཝིཉྙཱཎེ དུཀྑཝེདནཱཏི ཀིཉྩཱཔི སུཁཱདིཀནྟི ཨཱདི-སདྡེན ཨཀུསལཝིཔཱཀཀཱཡཝིཉྙཱཎསྶ ¶ དུཀྑཝེདནཱསམྤཡོགོ ཝུཏྟོ, ཨིདྷ པནསྶཱ ལཀྑཎཱདིདསྶནཏྠཾ པུན ‘‘ཀཱཡཝིཉྙཱཎེ དུཀྑཝེདནཱ’’ཏི ཨུཔཉྙཱསོ ཀཏོ, རསཱདཡོ ¶ པནསྶ ཀུསལཝིཔཱཀེ སུཁཝེདནཱཡ ཝུཏྟཝིཔརིཡཱཡེན ཡོཛེཏབྦཱཏི ཨིདྷ ན ཝུཏྟཱ. སེསཱཏི སེསཙེཏསིཀཱ.

བལཔྤཏྟོཏི སེསཱཧེཏུཀཙིཏྟསམྤཡུཏྟསམཱདྷིཏོ ཨཡཾ ཝཱིརིཡིནྡྲིཡཡོགེན བལཝབྷཱཝཔྤཏྟོ, ན པན བལརཱསིཔྤཏྟོཏི ཨཏྠོ. ཡདི ཨེཝཾ ཀསྨཱ ཙེཏསིཀཝིབྷཱགནིདྡེསེ ‘‘བལཱནི དྭེ དྭིཙིཏྟེསཱུ’’ཏི ཝུཏྟཾ? ཏཏྠ ཧི ཀིརིཡཱཧེཏུཀམནོཝིཉྙཱཎཡུགལ༹ཾ སནྡྷཱཡ ཏཐཱ ཝུཏྟཾ. སབྦཾ སེསཱཧེཏུཀཙིཏྟེསུ ཙིཏྟེཀགྒཏཱཡ ཝིབྷངྒེ –

‘‘ཀཏམཱ ཏསྨིཾ སམཡེ ཙིཏྟསྶ ཨེཀགྒཏཱ ཧོཏི? ཡཱ ཏསྨིཾ སམཡེ ཙིཏྟསྶ ཋིཏཱི’’ཏི (དྷ. ས. ༡༡) –

ཨེཏྟཀམེཝ ཝཏྭཱ ཀིརིཡཱཧེཏུཀམནོཝིཉྙཱཎདྷཱཏུསམྤཡུཏྟཱཡ ཨེཀགྒཏཱཡ ཝིབྷངྒེ –

‘‘ཀཏམཱ ཏསྨིཾ སམཡེ ཙིཏྟསྶ ཨེཀགྒཏཱ ཧོཏི? ཡཱ ཏསྨིཾ སམཡེ ཙིཏྟསྶ ཋིཏི སཎྛིཏི ཨཝཊྛིཏི ཨཝིསཱཧཱརོ ཨཝིཀྑེཔོ ཨཝིསཱཧཊམཱནསཏཱ སམཐོ སམཱདྷིནྡྲིཡཾ སམཱདྷིབལ’’ནྟི (དྷ. ས. ༡༡) –

བལཔརིཡོསཱནཾ ཀཏྭཱ ཝིབྷཛིཏཏྟཱ ཝཱིརིཡཝིབྷངྒེ ཙ –

‘‘ཀཏམཾ ཏསྨིཾ སམཡེ ཝཱིརིཡིནྡྲིཡཾ ཧོཏི? ཡོ ཏསྨིཾ སམཡེ ཙེཏསིཀོ ཝཱིརིཡཱརམྦྷོ ནིཀྐམོ པརཀྐམོ ཨུཡྻཱམོ ཝཱཡཱམོ ཨུསྶཱཧོ ཨུསྶོལ༹ྷཱི ཐཱམོ དྷིཏི ཨསིཐིལཔརཀྐམཏཱ ཨནིཀྑིཏྟཚནྡཏཱ ཨནིཀྑིཏྟདྷུརཏཱ དྷུརསམྤགྒཱཧོ ཝཱིརིཡཾ ཝཱིརིཡིནྡྲིཡཾ ཝཱིརིཡབལ’’ནྟི (དྷ. ས. ༡༣) –

བལཔརིཡོསཱནཾ ¶ ཀཏྭཱ ཝིབྷཛིཏཏྟཱ ཝིབྷངྒཝཱརེ ཨཱགཏཾ སམཱདྷིབལཾ, ཝཱིརིཡབལཉྩ སནྡྷཱཡ ‘‘བལཱནི དྭེ དྭིཙིཏྟེསཱུ’’ཏི ཝུཏྟཾ, ན པན དྷམྨུདྡེསཝཱརེ བལརཱསིཡཾ ཨཱགཏབལཾ སནྡྷཱཡ སབྦཱཧེཏུཀཙིཏྟེསུ དྷམྨུདྡེསསྶ མགྒརཱསིཏོ པཊྛཱཡ པརིཧཱིནཏྟཱ.

༨༧. ཝིཔཱཀཀིརིཡཱཧདཡེཧཱིཏི ¶ ཝིཔཱཀཀིརིཡཙིཏྟེཧི. ཧདཡཾ མནོ མཱནསཾ ཙིཏྟནྟི ཧི པརིཡཱཡཝཙནཾ. སོབྷནཾ གཏཾ གམནམསྶཱཏི སུགཏོ. བྷགཝཏོ ཧི ཝིནེཡྻཛནཱུཔསངྐམནཾ ཨེཀནྟེན ཏེསཾ ཧིཏསུཁནིཔྥཱདནཏོ སོབྷནཾ, ཏཐཱ ལཀྑཎཱནུབྱཉྫནཔཊིམཎྜིཏརཱུཔཀཱཡཏཱཡ དྷུཏཝིལམྦིཏཱདིདོསརཧིཏཾ ཨཝཧསིཏརཱཛཧཾསཝསབྷཝཱརཎམིགརཱཛགམནཾ ཀཱཡགམནཾ, ཉཱཎགམནཉྩ ནིམྨལཝིཔུལཀརུཎཱསཏིཝཱིརིཡཱདིགུཎཝིསེསསམངྒཱིབྷཱུཏམབྷིནཱིཧཱརཏོ ཡཱཝ མཧཱབོདྷིཾ ཨནཝཛྫཏཱཡ སོབྷནམེཝཱཏི. ཨཐ ཝཱ སཀལམྤི ལོཀཾ པརིཉྙཱབྷིསམཡཝསེན སཡམྦྷུཉཱཎེན པརིཛཱནནྟོ སམྨཱ གཏོ ཨཝགཏོཏི སུགཏོ, ཏཐཱ ལོཀསམུདཡཾ པཧཱནཱབྷིསམཡཝསེན པཛཧནྟོ ཨནུཔྤཏྟིདྷམྨཏཾ ཨཱཔཱདེནྟོ སམྨཱ གཏོ ཨཏཱིཏོཏི སུགཏོ, ལོཀནིརོདྷསངྑཱཏཾ ནིབྦཱནཾ སཙྪིཀིརིཡཱབྷིསམཡཝསེན སམྨཱ གཏོ ཨདྷིགཏོཏི སུགཏོ, ལོཀནིརོདྷགཱམིནིཔཊིཔདཱསངྑཱཏཾ མགྒཾ བྷཱཝནཱབྷིསམཡཝསེན སམྨཱ གཏོ པཏྟོཏི སུགཏོ. ཨཐ ཝཱ སམྨཱ གདཏཱིཏི སུགཏོ. བྷགཝཱ ཧི བྷཱུཏཾ ཏཙྪཾ ཨཏྠསཾཧིཏཾ ཝིནེཡྻཱནཾ ཡཐཱརཧཾ ཀཱལཡུཏྟམེཝ དྷམྨཾ བྷཱསཏི, ཏསྨཱ སམྨཱ གདཏཱིཏི ད-ཀཱརསྶ ཏ-ཀཱརཾ ཀཏྭཱ ‘‘སུགཏོ’’ཏི ཝུཏྟོ. ཨཐ ཝཱ སུནྡརཾ ཋཱནཾ སམྨཱསམྦོདྷིཾ, ནིབྦཱནམེཝ ཝཱ གཏོཏི སུགཏོ, ཏེན སུགཏེན.

༨༨. ‘‘ཨཝགཙྪཏཱི’’ཏིཨཱདཱིསུ ཡོ བྷིཀྑུ ཨནཱུནཾ ཨཏྠཏོ ཝཱ བྱཉྫནཏོ ཝཱ ཨནཱུནཾ སུཔརིཔུཎྞཾ ཏཏོཡེཝ པརམཾ ¶ ཝིསིཊྛཾ ཨིམཾ ཨབྷིདྷམྨཱཝཏཱརཾ ནཱམ པཀརཎཾ ཨཝགཙྪཏི ཨཝབུཛ྄ཛྷཏི, སམྨཱཨུགྒཧཎདྷཱརཎཱདིསམྤཱདནཝསེན ཨོགཱཧིཏྭཱ ཛཱནཱཏི. ཨཐ ཝཱ པརམནཡདཱིཔནཏོ པརམཾ ཨིམཾ པཀརཎཾ ཡོ ཨནཱུནཾ ཀཏྭཱ ཨཝགཙྪཏི ཛཱནཱཏི, ཏསྶེཝཾ ཨཝགཙྪཏོ ཡཐཱསབྷཱཝཾ མནནཏོ མཏིསངྑཱཏཱ པཉྙཱ དུརཱསདེ མཾསཙཀྑུནཱ པརམཱཎུ ཝིཡ ལོཀིཡཉཱཎེན དུརཱསདེ དུརཱདྷིགནྟབྦེ ཨདྷིགནྟུཾ དུཀྐརཏརེ, ཨཏིགམྦྷཱིརཊྛཱནེ ཋཔེཏྭཱ སིནེརུཔབྦཏརཱཛཱནཾ རཱཧུཨཱདཱིཧི མཧཱཀཱཡེཧིཔི སབྦེན སབྦཾ ཨཛ྄ཛྷོགཱཧིཏུཾ ཨསཀྐུཎེཡྻཏཱཡ མཧཱསམུདྡེ ཝིཡ ཋཔེཏྭཱ སམྨཱསམྦུདྡྷཾ སཱརིཔུཏྟཱདཱིཧིཔི མཧཱཉཱཎེཧི སཱཝཀེཧི སབྦེན སབྦཾ ཨཛ྄ཛྷོགཱཧིཏུཾ ཨསཀྐུཎེཡྻརཱུཔེ ཨབྷིདྷམྨནཡེ ཝིཛམྦྷཏེ ཧེམནྟསཱལཔནྟི ཝིཡ པཏྠརཏི, ཨབྷིམུཁཱབྷིམུཁེཡེཝ དྷམྨེ པཝཏྟཏཱིཏི ཝཱ ཨཏྠོ.

ཨིཏི ཨབྷིདྷམྨཏྠཝིཀཱསིནིཡཱ ནཱམ

ཨབྷིདྷམྨཱཝཏཱརསཾཝཎྞནཱཡ

ཙེཏསིཀནིདྡེསཝཎྞནཱ ནིཊྛིཏཱ.

༣. ཏཏིཡོ པརིཙྪེདོ

ཙེཏསིཀཝིབྷཱགནིདྡེསཝཎྞནཱ

༨༩. ནཱམསཱམཉྙཏོཡེཝ ¶ དྭེཔཉྙཱསཱཏི ཕསྶཱདིནཱམསཱམཉྙེན དྭཱིཧི ཨདྷིཀཱ པཎྞཱས ཧོནྟི, སམྤཡུཏྟདྷམྨབྷེདཏོ པན ཨེཀཱུནནཝུཏིཙིཏྟསམྤཡུཏྟོ ཕསྶོ ཨེཀཱུནནཝུཏིཝིདྷོཏི ཨེཝམཱདིནཱ བཧུཝིདྷཱཔི ཧོནྟཱིཏི ཨཏྠོ.

ནནུ ཙ ཕསྶཱདཡོ ཧེཊྛཱ པཱལི༹ཀྐམེན དསྶིཏཱ, ཨིདྷ པན ཀསྨཱ ན ཏཐཱ ཝུཏྟཱཏི? ཨེཀེཀསབྷཱཝཝནྟཱནཾ ཏཾཏཾསཱམཉྙཱཔེཀྑཱཡ ¶ ཨེཀསྨིཾ ཋཱནེ ནིདྡིསིཏུཀཱམཏྟཱ. ཕསྶཱདཡོ ཧི མནཀྐཱརཱཝསཱནཱ ཏེརས ཀུསལཱཀུསལཱབྱཱཀཏསཱམཉྙཏོ ཨེཀཏོ ཝུཏྟཱ, མཛ྄ཛྷཏྟཱདཡོ མུདིཏཱཝསཱནཱ པཉྩཝཱིསཏི ཀུསལཱབྱཱཀཏསཱམཉྙཏོ, ལོབྷཱདཡོ པན ཨནོཏྟཔྤཱཝསཱནཱ ཨཀུསལབྷཱཝསཱམཉྙཏོཏི ཨེཝཾ ཏཾཏཾསཱམཉྙཱཔེཀྑཱཡ སམཱནསབྷཱཝཱ དྷམྨཱ ཨེཀཏོ ཝུཏྟཱཏི.

༩༠. ཨེཝཾ ཕསྶཱདཡོ དྷམྨེ ཨུདྡིསིཏྭཱ ཨིདཱནི ‘‘ཨེཏྟཀེསུ ཨཡཾ དྷམྨོ སམུཔལབྦྷཏཱི’’ཏི ཙིཏྟུཔྤཱདེསུ ཏེསཾ པཡོགཾ དསྶེཏུཾ པཋམཾ ཏཱཝ ཙིཏྟགཎནཾ དསྶེནྟོ ཨཱཧ ‘‘ཙཏུཔཉྙཱསདྷཱ’’ཏིཨཱདི. ཀཱམེཏི ཀཱམཱཝཙརེཏི ཝུཏྟཾ ཧོཏི. ཨེཝཾ ‘‘རཱུཔེ ཨརཱུཔེ’’ཏི ཨེཏྠཱཔི. ཨཱསཝཝིསཡཏྟཱབྷཱཝཏོ ན ཝིཛྫནྟི ཨེཏེསུ ཨཱསཝཱཏི ཨནཱསཝཱ.

༩༡-༢. སམཱསཏོཏི ཝིཏྠཱརཱཔེཀྑཱཡ ཝུཏྟཾ, ན ཨིཏོཔི སམཱསསྶ ཨབྷཱཝཏོ. ཨཏིསངྑེཔཏོ པན ཨེཀཱུནནཝུཏི ཙིཏྟུཔྤཱདཱ ཧོནྟི. ཨེཏེསཱུཏི ཨིམེསུ ཙིཏྟུཔྤཱདེསུ. ཏེསཾ ཕསྶཱདཱིནཾ དྷམྨཱནཾ ཨུཔྤཏྟིཾ ཨེཀེཀཾ ཨུདྡྷརིཏྭཱ ཙིཏྟཙེཏསིཀེསུ བྷིཀྑཱུནཾ པཱཊཝཏྠཱཡ པཝཀྑཱམཱིཏི སམྦནྡྷོ. ཨེཀཀནྟི ཨེཀེཀཾ, གཱཐཱབནྡྷཝསེན ཨེ-ཀཱརལོཔོ.

༩༣. ཙེཏསིཀཝིབྷཱགཾ ཝཏྟུཀཱམོཔི ཨཝིནིབྦྷོགདྷམྨེ དསྶེཏུཾ ཙིཏྟེན སཧ ཨེཀཏོ ཀཏྭཱ ¶ ཨཱཧ ‘‘ཕསྶཔཉྩཀ’’ནྟི. ཨེཀཏོ ཨུཔྤཱདོ ཨེཏེསནྟི ཨེཀུཔྤཱདཱ, སཧ ཁཱིཡནྟཱིཏི སཧཀྑཡཱ, ཨེཀཏོ ཨུཔྤཛྫིཏྭཱ ཨེཀཏོ ནིརུཛ྄ཛྷནཀཱཏི ཨཏྠོ.

༩༤. སབྦེསྭེཝ ཨེཀཝཱིསསཏེསུ ཙིཏྟེསུ སམུཔལབྦྷནཏོ སབྦསཱདྷཱརཎཱ. ཀིཉྩཱཔི ཨནནྟརགཱཐཱཡ ཙིཏྟེན ¶ སཧ ཨེཀུཔྤཱདཱདིབྷཱཝཀཐནེནེཝ ཨིམེསཾ སབྦསཱདྷཱརཎཏཱ ཝུཏྟཱ, ཏཏྠ པན ཨེཀུཔྤཱདཱདིམཏྟཀཐནམེཝ ཨིཙྪིཏཾ, ན སབྦསཱདྷཱརཎཏཱ. ཝུཏྟོཔི ཝཱཡམཏྠོ ཏཏྠ ཨཔཱཀཊཏྟཱ པུན པཱཀཊཾ ཀཏྭཱ ཨིདྷ ཝུཏྟོཏི.

༩༥-༡༠༠. དྭིཔཉྩཝིཉྙཱཎཝཛྫིཏཙཏུཙཏྟཱལཱིསཀཱམཱཝཙརཙིཏྟེསུ, ལོཀིཡལོཀུཏྟརཝསེན ཨེཀཱདསསུ པཋམཛ྄ཛྷཱནིཀཙིཏྟེསུ ཙཱཏི པཉྩཔཉྙཱསཙིཏྟེསུ ཝིཏཀྐསྶ དེསིཏཏྟཱ ཨཱཧ ‘‘ཝིཏཀྐོ…པེ… སམུདཱིརིཏོ’’ཏི. ཝིཙཱརོ པཉྩཔཉྙཱསསཝིཏཀྐཙིཏྟེསུ ཙེཝ ཨེཀཱདསསུ དུཏིཡཛ྄ཛྷཱནིཀཙིཏྟེསུ ཙཱཏི ཚསཊྛིཙིཏྟེསུ ཨུཔྤཛྫཏཱིཏི ཨཱཧ ‘‘ཙཱརོ…པེ… ཛཱཡཏེ’’ཏི.

ཨེཀཔཉྙཱསཙིཏྟེསུ པཱིཏཱིཏི ཀཱཡཝིཉྙཱཎཝཛྫིཏེསུ ཨཊྛཱརསསུ སོམནསྶསཧགཏཀཱམཱཝཙརཙིཏྟེསུ ཙེཝ ཙཏུཏྠཔཉྩམཛ྄ཛྷཱནཝཛྫིཏཏེཏྟིཾསརཱུཔཛ྄ཛྷཱནིཀཙིཏྟེསུ ཙཱཏི ཨེཀཔཉྙཱསཙིཏྟེསུ པཱིཏི ཛཱཡཏི. ཏེསཊྛིཡཱ སུཁནྟི ཨེཀཔཎྞཱསསཔྤཱིཏིཀཙིཏྟེསུ ཙེཝ ཨེཀཱདསསུ ཙཏུཏྠཛ྄ཛྷཱནིཀཙིཏྟེསུ, ཀུསལཝིཔཱཀཀཱཡཝིཉྙཱཎེ ཙཱཏི ཏེསཊྛིཡཱ ཙིཏྟེསུ སུཁཾ ཛཱཡཏི. ཏེསཊྛིསུཁསཧགཏཙིཏྟཱནི ཙེཝ ཏཱིཎི ཙ དུཀྑསཧགཏཱནཱིཏི ཚསཊྛིཙིཏྟེ ཝཛྫེཏྭཱ ཨཝསེསཔཉྩཔཎྞཱསཙིཏྟེསུ ཨུཔེཀྑཱ ཨུཔྤཛྫཏཱིཏི ཨཱཧ ‘‘ཨུཔེཀྑཱ པཉྩཔཉྙཱསཙིཏྟེསཱུ’’ཏི. དུཀྑཾ ཏཱིསཱུཏི དྭཱིསུ པཊིགྷཙིཏྟེསུ ཙེཝ ཨཀུསལཝིཔཱཀཀཱཡཝིཉྙཱཎེ ཙཱཏི ཏཱིསུ ཙིཏྟེསུ དུཀྑཾ ཛཱཡཏི. ཧོཏི…པེ… སོམནསྶིནྡྲིཡནྟི ཏེསཊྛིཡཱ སུཁསཧགཏཙིཏྟེསུ ཨེཀམེཝ ཀཱཡཝིཉྙཱཎཾ ཨཔནེཏྭཱ ཨཝསེསེསུ སོམནསྶིནྡྲིཡཾ ཧོཏི. ཨཀུསལཝིཔཱཀཀཱཡཝིཉྙཱཎཝསེན ཨེཀམེཝ དུཀྑིནྡྲིཡསཧགཏཾ, ཏཐཱ ཀུསལཝིཔཱཀཀཱཡཝིཉྙཱཎམེཝ སུཁིནྡྲིཡསམྤཡུཏྟནྟི ཨཱཧ ‘‘དུཀྑིནྡྲིཡཾ…པེ… སུཁིནྡྲིཡ’’ནྟི.

ཨཧེཏུཀཝིཔཱཀཀིརིཡཱམནོདྷཱཏུཝཛྫིཏེསུ ¶ མཛ྄ཛྷིམགཎནཱཡ པཉྩཱདྷིཀསཏཔརིམིཏེསུ ཀུསལཱཀུསལཝིཔཱཀཀིརིཡཱཙིཏྟེསུ ཝཱིརིཡཾ དེསིཏནྟི ཨཱཧ ‘‘པཉྩུཏྟར…པེ… ཨཱཧཱ’’ཏི. དིཊྛདྷམྨིཀསམྤརཱཡིཀཏྠེསུ ¶ སཏྟེ ཝིནེཏི, ཝིགཏོ ཝཱ ནཱཡཀོ ཨིམསྶ, ཝིསིཊྛོ ཝཱ སབྦལོཀསྶ ནཱཡཀོ སཱམི, ཝིསེསེན ཝཱ ཝིནེཡྻསཏྟེ ནིབྦཱནཔུརཾ ནེཏཱིཏི ཝིནཱཡཀོ. སམཱདྷིནྡྲིཡཾ ཝིཙིཀིཙྪཱཝཛྫིཏཝཱིརིཡསཧགཏཙིཏྟེསུ ཝུཏྟནྟི ཨཱཧ ‘‘ཙཏུཏྟརསཏེ’’ཏིཨཱདི.

ཨཊྛཱརས ཨཧེཏུཀཙིཏྟཱནི, དྭེ ཨེཀཧེཏུཀཙིཏྟཱནི ཙ ཝཛྫེཏྭཱ ཨཝསེསཨེཀུཏྟརསཏེ ཙིཏྟེ ཚནྡོ ཨུཔྤཛྫཏཱིཏི དསྶེཏུཾ ‘‘སབྦཱཧེཏུཀཙིཏྟཱནཱི’’ཏིཨཱདི ཝུཏྟཾ. དས ཝིཉྙཱཎེཏི ཀུསལཱཀུསལཝིཔཱཀཝསེན དྭིགུཎིཏེ ཙཀྑཱདིཀེ པཉྩཝིཉྙཱཎེ.

༡༠༢-༦. ནིཡཏཱ ན ཡེཝཱཔནཀཱ ཝིཡ ཀདཱཙཱིཏི ཨཏྠོ. ཀཐཾ པནེཏེ ཨེཀནཝུཏིཡཱ ཙིཏྟེསྭེཝ ཛཱཡནྟཱིཏི ཨཱཧ ‘‘ཨཧེཏུཀེསཱུ’’ཏིཨཱདི. ཨེཀཱུནཱསཱིཏིཡཱཏི དྭཱདས ཉཱཎསམྤཡུཏྟཀཱམཱཝཙརཱནི, པཉྩདས རཱུཔཱཝཙརཱནི, དྭཱདས ཨརཱུཔཱཝཙརཱནི, སམཙཏྟཱལཱིས ལོཀུཏྟརཙིཏྟཱནཱིཏི ཨེཝཾ ཨེཀཱུནཱསཱིཏིཡཱ ཏིཧེཏུཀཙིཏྟེསུ. ཨཊྛཝཱིསཏིཡཱ ཙིཏྟེཏི སོལ༹སསུ ཀཱམཱཝཙརཀུསལམཧཱཀིརིཡཱསུ, དྭཱདསསུ ཙ ལོཀིཡཙཏུཏྠཛ྄ཛྷཱནཙིཏྟེསུ ཙཱཏི ཨཊྛཝཱིསཏིཙིཏྟེསུ. སཱཊྛཀེ ཙཏྟཱལཱིསཝིདྷེཏི ཨཊྛསཧིཏེ ཙཏྟཱལཱིསཝིདྷེ, ཨཊྛཙཏྟཱལཱིསཝིདྷེཏི ཝུཏྟཾ ཧོཏི. ཚ ཡུགལཱ༹ནཱིཏི ཀཱཡཔསྶདྡྷིཙིཏྟཔསྶདྡྷཱདཱིནི ཚ ཡུགལཱ༹ནི. ཀུསལཱབྱཱཀཏཱ ཙཱཏི ཀུསལཙིཏྟསམྤཡོགཏོ ཀུསལཱ, ཨབྱཱཀཏཙིཏྟསམྤཡོགཏོ ཨབྱཱཀཏཱཏི ཀུསལེནཔཀཱསནཝིདྷཱནེསུ ཚེཀེན སཏྠུནཱ པཀཱསིཏཱ དེསིཏཱཏི ཨཏྠོ.

༡༠༨-༡༡༡. སཾསཡོཏི ¶ ཝིཙིཀིཙྪཱ. སཱ ཧི སཾསེཏི སམནྟཏོ སེཏི, ‘‘ཨེཝཾ ནུ ཁོ, ནོ ནུ ཁོ’’ཏི པརིསཔྤཏཱིཏི སཾསཡོ. མཧནྟེ སཱིལཀྑནྡྷཱདིཀེ ཨེསཏི གཝེསཏཱིཏི མཧེསཱི. ཏེན མཧེསིནཱ སམྨཱསམྦུདྡྷེན. ཨཊྛསཱུཏི ཨཊྛལོབྷསཧགཏཙིཏྟེསུ. ཙཏཱུསཱུཏི ཏེསྭེཝ དིཊྛིསཧགཏཙིཏྟེསུ. དིཊྛིཝིཡུཏྟེསུ ཙཏཱུསཱུཏི སམྦནྡྷོ. དྭཱིསྭེཝཱཏི དྭཱིསུ དོསམཱུལཀཙིཏྟེསུ. དྭཱིསུ ཛཱཡནྟི ནོ སཧཱཏི དོསམཱུལེསྭེཝ དྭཱིསུ ཛཱཡནྟི, སཧ པན ན ཨུཔྤཛྫནྟི, ཨུསཱུཡནཀཱལེ ཨིསྶཱ, མཙྪརཎཀཱལེ མཙྪེརནྟིཨཱདིནཱ ནཱནཱ ཧུཏྭཱཝ ཨུཔྤཛྫནྟི. པཉྩསཱུཏི པཉྩསུ སསངྑཱརིཀཙིཏྟེསུ.

༡༡༢. ཙིཏྟསྶ ཙེཏསིཀཏྟཱབྷཱཝེཔི ཀུསལཱཀུསལཱབྱཱཀཏདྷམྨཱནཾ གཎནཊྛཱནཏོ ‘‘མནོ’’ཏི ཙིཏྟམྤི ཝུཏྟཾ.

༡༡༤-༥. ཨེཏྟཱཝཏཱ ¶ ཙེཏསིཀཝིབྷཱགཾ དསྶེཏྭཱ ཨིདཱནི ཨེཀེཀསྨིཾ ཙིཏྟུཔྤཱདེ ལབྦྷམཱནརཱསཱིསུ ཨངྒཝིབྷཱགདསྶནཏྠཾ ‘‘ཨེཀཱུནཏིཾསཙིཏྟེསཱུ’’ཏིཨཱདི ཝུཏྟཾ. ནནུ ཙ ཕསྶཔཉྩམཀརཱསི སབྦཔཋམཾ ཨཱགཏཱ, སཱ ཀསྨཱ ན ཝུཏྟཱཏི? སབྦསཱདྷཱརཎབྷཱཝཏོ. ན ཧི སོ ཙིཏྟུཔྤཱདོ ཨཏྠི, ཡོ ཕསྶཔཉྩམཀཝིནིམུཏྟོཏི. ཨེཀཱདས པཋམཛ྄ཛྷཱནིཀཱནི སོམནསྶསཧགཏཱནི, དྭཱདས སཧེཏུཀཀཱམཱཝཙརཱནི, ཏཐཱ ཙཏྟཱརི ཨཀུསལཱནི, སུཁསནྟཱིརཎཧསིཏུཔྤཱདཱནི དྭེཏི ཨེཀཱུནཏིཾསཙིཏྟེསུ པཉྩངྒིཀཾ ཛྷཱནཾ པཉྩཀརཱསིསངྑཱཏཾ མཏཾ. ཙཏུ…པེ… ནིདྡིསེཏི ཨེཀཱདས དུཏིཡཛ྄ཛྷཱནིཀཱནི, ཀུསལཝིཔཱཀཀིརིཡཱཝསེན དྭཱདས ཨུཔེཀྑཱསཧགཏསཧེཏུཀཀཱམཱཝཙརཱནི, ཨུཔེཀྑཱདོམནསྶསཧགཏཱནི ཨཊྛ ཨཀུསལཱནི, དྭིཔཉྩཝིཉྙཱཎཝཛྫིཏཨུཔེཀྑཱསཧགཏཱནི ཚ ཨཧེཏུཀཙིཏྟཱནི ཙཱཏི ཨིམཱནི སཏྟཏིཾས ཙིཏྟཱནི ཡཐཱཡོགཾ ཙཏཱུཧི ཛྷཱནངྒེཧི ཡུཏྟཱནི. ཨེཏྠ ¶ ཧི ཨེཀཱདས དུཏིཡཛ྄ཛྷཱནིཀཱནི ཝིཙཱརཔཱིཏིསུཁསམཱདྷཱིཧི སཧགཏཱནི, ཨིཏརཱནི ཡཐཱཡོགཾ ཨུཔེཀྑཱདོམནསྶེསུ ཨེཀེཀེན ཝིཏཀྐཝིཙཱརསམཱདྷཱིཧཱིཏི ཙཏཱུཧི སམྤཡུཏྟཱནི.

ཨེཀཱདསཝིདྷནྟི ཨེཀཱདསཝིདྷཾ ཏཏིཡཛ྄ཛྷཱནིཀཙིཏྟཾ པཱིཏིསུཁཙིཏྟེཀགྒཏཱཡོགཏོ ཏིཝངྒིཀམུདཱིརིཏཾ. ཙཏུཏྟིཾས…པེ… མུདཱིརིཏནྟི དྭཱདས ཨརཱུཔཱཝཙརཙིཏྟཱནི, དྭཱཝཱིསཏི ཙཏུཏྠཔཉྩམཛ྄ཛྷཱནིཀཱནི སཱསཝཱནཱསཝཱནཱིཏི ཙཏུཏྟིཾས ཙིཏྟཱནི ཡཐཱཡོགཾ ཨུཔེཀྑེཀགྒཏཱཡོགཏོ, སུཁེཀགྒཏཱཡོགཏོ ཙ དུཝངྒིཀམུདཱིརིཏཾ. ཙཏུཏྠཛ྄ཛྷཱནིཀཱནི ཧི ཨེཀཱདས སུཁེཀགྒཏཱསཧིཏཱནི, སེསཱནི ཏེཝཱིསཏི ཨུཔེཀྑེཀགྒཏཱསཧིཏཱནི.

༡༡༦. སབྷཱཝེནཱཝིཏཀྐེསཱུཏི དུཏིཡཛ྄ཛྷཱནཱདཡོ ཝིཡ བྷཱཝནཱབལེན ཝིནཱ སབྷཱཝེནེཝ ཨཝིཏཀྐེསུ དྭིཔཉྩཝིཉྙཱཎེསུ. ཏེསུ ཧི ཝིཛྫམཱནཱནིཔི སེསཛྷཱནངྒཱནི ཝིཏཀྐཝིརཧེན ཨུཔནིཛ྄ཛྷཱནཀིཙྩེསུ ཨསམཏྠཱནི. ཏེནེཝ ཧི ཨཊྛཀཐཱཡམྤི ‘‘ཝིཏཀྐཔཙྪིམཀཉྷི ཛྷཱནངྒཾ ནཱམཱ’’ཏི ཝུཏྟཾ. བྷཱཝནཱཡ ཨཝིཏཀྐབྷཱཝཔྤཏྟཱནི པན བྷཱཝནཱབལེནེཝ ཨུཔནིཛ྄ཛྷཱནཀིཙྩེསུ པཊུཏརཱ, ཏསྨཱ སབྷཱཝེནཱཝིཏཀྐེསུ ཛྷཱནངྒཱནི ན ཨུདྡྷརེཡྻ. ‘‘ན ཨུདྡྷཊཱ’’ཏི ཝཱ པཱཋོ, ན ཨུདྡྷཊཱནཱིཏི ཨཏྠོ.

ཡདི ཨེཝཾ ཀསྨཱ དྭིཔཉྩཝིཉྙཱཎེསུ སརཱུཔེནེཝ ཙིཏྟེཀགྒཏཱ ཝུཏྟཱ, ནནུ ཏསྶཱ ཝིཏཀྐཝིརཧེན ཛྷཱནངྒཀིཙྩེ ཨསམཏྠཏཱཡ རཱསིབྷཛནཱབྷཱཝཏོ ཡེཝཱཔནཀཝསེན ཝཙནཾ ཡུཏྟནྟི ¶ ? ཝུཙྩཏེ – ཀུསལཱཀུསལེསུ ཨཝིཛྫམཱནདྷམྨསྶ ཝིཔཱཀེསུཔི ཨནུཔལབྦྷནཏོ ཛྷཱནངྒཀིཙྩསྶ ཨཀརཎེཔི ཀུསལཱཀུསལེསུ དེསིཏནིཡཱམེནེཝ སརཱུཔེན ཨིདྷཱཔི ཝུཏྟཱ. ཧོཏུ ཏཱཝ ཨེཏཾ, ཛྷཱནརཱསིཡཾ ཝེདནཱ ཀསྨཱ ཝུཏྟཱ. སཱ ཧི སབྦཙིཏྟསཱདྷཱརཎབྷཱཝཏོ ¶ ཕསྶཔཉྩཀརཱསིམྷི ཙེཝ, ཨུཔེཀྑཱདིཨིནྡྲིཡབྷཱཝཏོ ཨིནྡྲིཡརཱསིམྷིཡེཝ ཝཏྟབྦཱ, ན ཨིཏརཏྠ ཏདབྷཱཝཏོཏི? སཙྩཾ, ཝེདནཱ པན སབྦཝེདནཱནཾ སཱམཉྙསབྷཱཝེན ཕསྶཔཉྩཀེ ཨཱགཏཝེདནཱ ཙ ཨཔརེན ཝིསེསཝཙནེན ཏཏྠ ནིདྡིཊྛཱ, ན ཏཏྠ ཨནྟོཀརཎཏྠཾ. ཏེནེཝ ཧི དྷམྨསངྒཎིཡཾ དྭིཔཉྩཝིཉྙཱཎེསུ སངྒཧཝཱརེ ཛྷཱནངྒརཱསི ན ཨུདྡྷཊཱཏི རཱུཔདྷཱཏུཡཾ ཏིཎྞཾ མཧཱབྷཱུཏཱནཾ ཨཔྤཊིགྷབྷཱཝེཔི ཀཱམདྷཱཏུཡཾ སཔྤཊིགྷམཧཱབྷཱུཏེཧི སམཱནབྷཱཝཏོ ཏཏྠཱཔི སཔྤཊིགྷབྷཱཝོ ཝིཡ དྭིཔཉྩཝིཉྙཱཎེསུ ཝེདནཱཙིཏྟེཀགྒཏཱནཾ ཝིཏཀྐཝིཡོགེན ཛྷཱནཀིཙྩཱཀརཎེཔི སཝིཏཀྐཙིཏྟེསུ ཛྷཱནཙིཏྟསམངྒཱིཝེདནཱདཱིཧི སམཱནཏྟཱ ཛྷཱནངྒབྷཱཝེན ཝཙནཾ ནཱམ ཡུཏྟཾ. ཏེནེཝ ཙ ནཱམརཱུཔསམཱསེ ‘‘ཕསྶཔཉྩཀརཱསིཛྷཱནདུཀརཱསིཨིནྡྲིཡཏྟིཀརཱསཱི’’ཏི ཝུཏྟནྟི. ཨཐ ཝཱ ཀིཾ ཨེཏཱཡ ཡུཏྟིཙིནྟཱཡ, དྷམྨསབྷཱཝཝེདིནཱ ཏཐཱགཏེན དྷམྨསབྷཱཝཾ ཨཝིརཛ྄ཛྷིཏྭཱ དེསིཏནྟི ན ཨེཏྠ ཨནུཡོགོ ཀཱཏབྦོཏི. ཨཧེཏུཀཙིཏྟཱནཾ ཨཱརམྨཎེ སུཔྤཏིཊྛིཏཏཱབྷཱཝེན ཨནིཡྻཱནིཀཏྟཱ ཝུཏྟཾ ‘‘སབྦཱ…པེ… ན ཨུདྡྷརེ’’ཏི. ཝུཏྟཉྷེཏཾ ཨཊྛཀཐཱཡམྤི ‘‘ཧེཏུཔཙྪིམཀོ མགྒོ’’ཏི.

༡༡༧. ཏཱིཎི སོལ༹སཙིཏྟེསཱུཏི པནྣརསསུ ཨཧེཏུཀཝིཔཱཀཙིཏྟེསུ ཙེཝ ཀིརིཡཱམནོདྷཱཏུམྷི ཙཱཏི སོལ༹སསུ ཙིཏྟེསུ. མནིནྡྲིཡཾ ཛཱིཝིཏིནྡྲིཡཾ ཝེདནིནྡྲིཡེསུ ལབྦྷམཱནམེཀནྟི ཏཱིཎིནྡྲིཡཱནི ཧོནྟི. ཨིམེསུཔི ཀུསལཝིཔཱཀཀཱཡཝིཉྙཱཎདྷཱཏུཡཾ མནིནྡྲིཡསུཁིནྡྲིཡཛཱིཝིཏིནྡྲིཡཝསེན ཏཱིཎིནྡྲིཡཱནི, ཨཀུསལཝིཔཱཀཀཱཡཝིཉྙཱཎདྷཱཏུཡཾ དུཀྑིནྡྲིཡེན སཧ ཏཱིཎི, སུཁསནྟཱིརཎེ སོམནསྶིནྡྲིཡེན སཧ ཏཱིཎི, ཨཝསེསཏེརསཙིཏྟེསུ ཨུཔེཀྑིནྡྲིཡེན སཧ ཏཱིཎཱིཏི. ཨེཏྠ ཙིཏྟནྟི སསམྤཡུཏྟདྷམྨསྶ ཙིཏྟུཔྤཱདསྶ ཨདྷིཔྤེཏཏྟཱ མནིནྡྲིཡསྶཱཔི ཨཱདྷཱརབྷཱཝོ ཡུཛྫེཡྻ. ཨིཏརཐཱ ཧི མནིནྡྲིཡནྟི ¶ ཙིཏྟསྶེཝ གཧཎེ ཏསྶ ཨཏྟནོ ཙ ཨཱདྷཱརབྷཱཝོ ན ཡུཛྫཏཱིཏི. ཨེཀསྨིཾ པན ཙཏྟཱརཱིཏི ཨེཀསྨིཾ ཝིཙིཀིཙྪཱསཧགཏེ ཝཱིརིཡིནྡྲིཡམནིནྡྲིཡཛཱིཝིཏིནྡྲིཡཨུཔེཀྑིནྡྲིཡཝསེན ཙཏྟཱརི. པཉྩ ཏེརསསཱུཏི ཋཔེཏྭཱ ཝིཙིཀིཙྪཱསཧགཏཾ ཨཝསེསཱནི ཨེཀཱདས ཨཀུསལཙིཏྟཱནི, ཀིརིཡཱཧེཏུཀམནོཝིཉྙཱཎདྷཱཏུདྭཡནྟི ཏེརསསུ ཙིཏྟེསུ ཝཱིརིཡིནྡྲིཡཱདཱིནི ཏཱིཎི, སམཱདྷིནྡྲིཡཾ, ཝེདནིནྡྲིཡེསུ ལབྦྷམཱནཾ ཨེཀནྟི པཉྩིནྡྲིཡཱནི. ཨེཏྠ ཧི དྭཱིསུ དོསམཱུལེསུ ཝཱིརིཡིནྡྲིཡསམཱདྷིནྡྲིཡམནིནྡྲིཡཛཱིཝིཏིནྡྲིཡདོམནསྶིནྡྲིཡཝསེན ¶ པཉྩ, པཉྩསུ སོམནསྶསཧགཏེསུ པུརིམཱནི ཙཏྟཱརི སོམནསྶིནྡྲིཡེན སདྡྷིཾ པཉྩ, སེསེསུ ཨུཔེཀྑིནྡྲིཡེན སདྡྷིཾ པཉྩ ཧོནྟི.

༡༡༨. སཏྟ དྭཱདསཙིཏྟེསཱུཏི དྭཱདསསུ ཉཱཎཝིཔྤཡུཏྟཙིཏྟེསུ སདྡྷཱསཏིསམཱདྷིཝཱིརིཡཛཱིཝིཏམནིནྡྲིཡཱནི ཙ ཝེདནིནྡྲིཡེསུ ལབྦྷམཱནམེཀནྟི སཏྟ ཨིནྡྲིཡཱནི. ཏཏྠ ཧི ཚསུ སོམནསྶསཧགཏེསུ སདྡྷིནྡྲིཡཱདཱིནི ཚ སོམནསྶིནྡྲིཡེན སདྡྷིཾ སཏྟ, ཨིཏརེསུ ཚསུ ཨུཔེཀྑིནྡྲིཡེན སདྡྷིཾ སཏྟ ཧོནྟི. ཨེཀེནཱུནེསུ…པེ… མནེསུ ཙཱཏི དྭཱདས ཉཱཎསམྤཡུཏྟཱནི ཀཱམཱཝཙརཱནི, སཏྟཝཱིསཏི ལོཀིཡཛ྄ཛྷཱནཙིཏྟཱནི ཙཱཏི ཨེཀཱུནཙཏྟཱལཱིསཝིདྷེསུ ལོཀིཡཙིཏྟེསུ པུརིམཱནི སཏྟ, པཉྙིནྡྲིཡཉྩཱཏི ཨཊྛེཝ ཨིནྡྲིཡཱནི. ཨེཏྠ ཧི སོམནསྶསཧགཏེསུ ཚསུ ཀཱམཱཝཙརེསུ, དྭཱདསསུ རཱུཔཱཝཙརཙཏུཀྐཛ྄ཛྷཱནེསུ ཙཱཏི ཨཊྛཱརསཙིཏྟེསུ སོམནསྶིནྡྲིཡེན, སེསེསུ ཙ ཨུཔེཀྑིནྡྲིཡེན སདྡྷིཾ ཡོཛེཏྭཱ ཨཊྛིནྡྲིཡཱནི ཝེདིཏབྦཱནི.

༡༡༩. ཙཏྟཱལཱིསཱཡ ཙིཏྟེསུ ནཝཀནྟི སམཙཏྟཱལཱིསཝིདྷེསུ ལོཀུཏྟརཙིཏྟེསུ པུརིམཱནི ཨཊྛཨིནྡྲིཡཱནི, ཨནཉྙཱཏཉྙསྶཱམཱིཏིནྡྲིཡཾ ཨཉྙིནྡྲིཡཾ ཨཉྙཱཏཱཝིནྡྲིཡནྟི ཨིམེསུ ལབྦྷམཱནམེཀནྟི ཨིནྡྲིཡཱནཾ ནཝཀཱ. སོཏཱཔཏྟིམགྒེསུ ཧི ཨནཉྙཱཏཉྙསྶཱམཱིཏིནྡྲིཡཾ ¶ ལབྦྷཏི. སོཏཱཔཏྟིཕལཏོ པཊྛཱཡ ཨརཧཏྟམགྒཔརིཡོསཱནེསུ ཏཾ ན ལབྦྷཏི. ཏསྶ ཋཱནེ ཨཉྙིནྡྲིཡཾ. ཨརཧཏྟཕལེ ཏམྤི ན ལབྦྷཏི. ཏསྶ ཋཱནེ ཨཉྙཱཏཱཝིནྡྲིཡཾ ཏིཊྛཏཱིཏི. ཨེཝནྟི ཚཧི ཨིནྡྲིཡེཧི སམྤཡུཏྟསྶ ཨབྷཱཝཏོ ཀཏྠཙི ཏཱིཎི, ཀཏྠཙི ཙཏྟཱརི, ཀཏྠཙི པཉྩ, ཀཏྠཙི སཏྟ, ཀཏྠཙི ཨཊྛ, ཀཏྠཙི ནཝིནྡྲིཡཱནཱིཏི ཨེཝཾ ཚཧི ཨཱཀཱརེཧི ཨིནྡྲིཡཡོགོཔི, ན ཀེཝལཾ ཛྷཱནངྒཡོགོཝ, ཨཐ ཁོ ཨིནྡྲིཡེཧི སཧ ཙིཏྟུཔྤཱདཱནཾ སམྤཡོགོཔི ཝེདིཏབྦོཏི.

༡༢༠-༣. ཨིདཱནི མགྒངྒསམྤཡོགཾ དསྶེནྟོ པཋམཾ ཏཱཝ ཡེསུ ཙིཏྟེསུ མགྒངྒཱནི ན ལབྦྷནྟི, ཏཱནི དསྶེཏྭཱ པཙྪཱ མགྒངྒཡོགཙིཏྟུཔྤཱདེ དསྶེཏུཾ ‘‘ཨམགྒངྒཱནཱི’’ཏིཨཱདིམཱཧ. ཨེཏྠཱཏི ཨེཏསྨིཾ ཨེཀཝཱིསསཏཔྤབྷེདེ ཙིཏྟསྨིཾ, ཨིམསྨིཾ མགྒངྒཱདྷིཀཱརེ ཝཱ. ཝིཉྙཱཎེསུ དྭིཔཉྩསཱུཏི སབྷཱཝཱཝིཏཀྐེསུ ཙཀྑཱདཱིསུ དྭིཔཉྩཝིཉྙཱཎེསུ. ཀིཉྩཱཔི ཧེཊྛཱ དྭིཔཉྩཝིཉྙཱཎེསུ ཛྷཱནངྒཱབྷཱཝོ, ཨཧེཏུཀེསུ ཙ མགྒངྒཱབྷཱཝོ ཝུཏྟོཝ, ཨཛྷཱནངྒཱནི པན ཏཏྠ ཨདྷིཀཱརཝསེན ཝུཏྟཱནི, ཨིདྷ པསངྒཱགཏཝསེན. ཨམགྒངྒཱནི ཏཏྠ པསངྒཱགཏཝསེན, ཨིདྷ ཨདྷིཀཱརཝསེནཱཏི ན ཀོཙི པུནརུཏྟིདོསོ.

ཨེཀནྟི ¶ ཝིཙིཀིཙྪཱསམྤཡུཏྟཾ ཙིཏྟཾ. ཏཉྷི མིཙྪཱསངྐཔྤམིཙྪཱཝཱཡཱམཡོགཏོ དྭེ མགྒངྒཱནི ཨེཏྠཱཏི དུམགྒངྒཾ. ཏིམགྒངྒཱནི སཏྟསཱུཏི ཙཏྟཱརི དིཊྛིཝིཔྤཡུཏྟཱནི, དྭེ དོསམཱུལཱནི, ཨུདྡྷཙྩསཧགཏཙིཏྟནྟི སཏྟསུ མིཙྪཱསངྐཔྤམིཙྪཱཝཱཡཱམམིཙྪཱསམཱདྷིཡོགཏོ ཏིམགྒངྒཱནི. ཙཏྟཱལཱིས…པེ… ཙཏུརངྒིཀོཏི དྭཱདས ཉཱཎཝིཔྤཡུཏྟཱནི, ཙཏྟཱརི དིཊྛིསམྤཡུཏྟཱནི, པཋམཛ྄ཛྷཱནིཀཝཛྫཱནི ཙཏུཝཱིསཏི མཧགྒཏཙིཏྟཱནཱིཏི ཙཏྟཱལཱིསཙིཏྟེསུ ཡོ མགྒོ ལབྦྷཏི, སོ ཡཐཱཡོགཾ སམྨཱསངྐཔྤསམྨཱཝཱཡཱམསམྨཱསཏིསམྨཱསམཱདྷིཡོགཏོ, མིཙྪཱདིཊྛིམིཙྪཱསངྐཔྤམིཙྪཱཝཱཡཱམམིཙྪཱསམཱདྷིཡོགཏོ, སམྨཱདིཊྛིསམྨཱཝཱཡཱམསམྨཱསཏིསམྨཱསམཱདྷིཡོགཏོ ¶ ཙ ཙཏུརངྒིཀོ མཏོ. ཏཏྠ ཉཱཎཝིཔྤཡུཏྟེསུ དྭཱདསསུ པཋམཱནི ཙཏྟཱརི, དིཊྛིསམྤཡུཏྟེསུ མཛ྄ཛྷིམཱནི, སེསེསུ པཙྪིམཱནི ལབྦྷནྟི.

པཉྩདྡསསུ…པེ… པཉྩངྒིཀོཏི དྭཱདསསུ ཉཱཎསམྤཡུཏྟཀཱམཱཝཙརེསུ ཙེཝ ཏཱིསུ ལོཀིཡཔཋམཛ྄ཛྷཱནིཀེསུ ཙཱཏི པནྣརསསུ ཙིཏྟེསུ སམྨཱདིཊྛིསམྨཱསངྐཔྤསམྨཱཝཱཡཱམསམྨཱསཏིསམྨཱསམཱདྷིཝསེན པཉྩངྒིཀོ མགྒོ. ནནུ ཙ སམྨཱཝཱཙཱདཡོ ཀཱམཱཝཙརེསུ ལབྦྷནྟཱིཏི? སཙྩཾ ལབྦྷནྟི, པཱཋེ པན ཨནཱགཏཏྟཱ ཨིདྷ པརིཙྩཏྟཱཏི. དྭཏྟིཾསཙིཏྟེསཱུཏི པཋམཛ྄ཛྷཱནིཀཝཛྫེསུ དྭཏྟིཾསལོཀུཏྟརཙིཏྟེསུ. སཏྟངྒིཀོཏི ཨཝིཏཀྐཏྟཱ སམྨཱསངྐཔྤོ ན ལབྦྷཏཱིཏི ཏཾ པརིཙྩཛིཏྭཱ ཨཝསེསསཏྟམགྒངྒཝསེན སཏྟངྒིཀོ ཝུཏྟོ.

ཡཏྠ པན སམྨཱསངྐཔྤོ ལབྦྷཏི, ཏཏྠ ཏེན སཧ ཨཊྛངྒིཀོཏི ཨཱཧ ‘‘མགྒོ ཨཊྛསཱུ’’ཏིཨཱདི. ཏཏྠ ཨཊྛསུ ཙིཏྟེསཱུཏི པཋམཛ྄ཛྷཱནིཀེསུ ཨཊྛསུ ལོཀུཏྟརཙིཏྟེསུ. ཨེཝནྟི ཚཧི མགྒངྒེཧི སམྤཡུཏྟསྶ ཨབྷཱཝཏོ ཀཏྠཙི དྭེ མགྒངྒཱནི, ཀཏྠཙི ཏཱིཎི, ཀཏྠཙི ཙཏྟཱརི, ཀཏྠཙི པཉྩ, ཀཏྠཙི སཏྟ, ཀཏྠཙི ཨཊྛཱཏི ཨེཝཾ ཚཧི པཀཱརེཧི.

༡༢༤-༦. ཨིདཱནི བལསམྤཡོགཾ དསྶེནྟོ ཨཱཧ ‘‘བལཱནི དྭེ’’ཏིཨཱདི. ཏཏྠ ཝཱིརིཡབལསམཱདྷིབལཝསེན དྭེ བལཱནི ཀིརིཡཱཧེཏུཀམནོཝིཉྙཱཎདྷཱཏུདྭཡེ ཝིབྷངྒཝཱརེ ཨཱགཏཱནི ཝཱིརིཡབལསམཱདྷིབལཱནི པཙྩེཀཾ ལབྦྷནྟཱིཏི ‘‘དྭེ དྭིཙིཏྟེསཱུ’’ཏི ཝུཏྟཾ. ཨེཀསྨིཾ ཏཱིཎཱིཏི ཨེཀསྨིཾ ཝིཙིཀིཙྪཱསཧགཏེ ཝཱིརིཡབལཨཧིརིཀབལཨནོཏྟཔྤབལཝསེན ཏཱིཎི བལཱནི. ཨེཀཱདསསུ ཙཏྟཱརཱིཏི ཝིཙིཀིཙྪཱསཧགཏཝཛྫེསུ ཨེཀཱདསསུ ཨཀུསལཙིཏྟེསུ སམཱདྷིབལཉྩེཝ པུབྦེ ¶ ཝུཏྟཱནི ཏཱིཎཱིཏི ཙཏྟཱརིབལཱནི. ཚ དྭཱདསསཱུཏི དྭཱདསསུ ཉཱཎཝིཔྤཡུཏྟཙིཏྟེསུ སདྡྷཱཝཱིརིཡསཏིསམཱདྷིཧིརིཨོཏྟཔྤཝསེན ཚ བལཱནི.

ཨེཀཱུནཱསཱིཏིཡཱ ¶ སཏྟཱཏི དྭཱདསསུ ཉཱཎསམྤཡུཏྟཀཱམཱཝཙརཙིཏྟེསུ ཙེཝ སཏྟཝཱིསཏིམཧགྒཏཙིཏྟེསུ ཙ ཙཏྟཱལཱིསཱཡ ལོཀུཏྟརཙིཏྟེསུ ཙཱཏི ཨེཀཱུནཱསཱིཏིཝིདྷེསུ ཙིཏྟེསུ སདྡྷཱཝཱིརིཡསཏིསམཱདྷིཔཉྙཱཧིརིཨོཏྟཔྤཝསེན སཏྟ བལཱནི. སོལ༹སེཝཱབལཱནཱིཏི པཉྩདས ཨཧེཏུཀཝིཔཱཀཱནི, ཀིརིཡཱམནོདྷཱཏུཨཱཝཛྫནཉྩཱཏི སོལ༹ས བལཝིཔྤཡོགཏོ ཨབལཙིཏྟཱནི. ཨེཝནྟི པཉྩཧི བལེཧི སམྤཡུཏྟསྶ ཨབྷཱཝཏོ ཀཏྠཙི དྭེ, ཀཏྠཙི ཏཱིཎི, ཀཏྠཙི ཙཏྟཱརི, ཀཏྠཙི ཚ, ཀཏྠཙི སཏྟཱཏི པཉྩཧི ཨཱཀཱརེཧི སབལཾ, ཨིམེསུ ཨེཀསྶཱཔི ཨབྷཱཝཏོ ཨབལམྤི ཙ ཝིཉྙེཡྻཾ, ཝིཛཱནིཏབྦནྟི ཨཏྠོ. ཧེཏུརཱསིཨཱདཡོ ཝིནིཙྪཡབྷཱཝཏོ ན ཝུཏྟཱཏི ཝེདིཏབྦཾ. ཡེསུ ཙིཏྟེསུ ཡཱནི ཛྷཱནངྒམགྒངྒབལིནྡྲིཡཱནི ཛཱཡནྟཱིཏི སམྦནྡྷོ. གཱཐཱབནྡྷསུཁཏྠཾ ཨིནྡྲིཡཱནཾ ཨོསཱནཀརཎཾ.

ཨིཏི ཨབྷིདྷམྨཏྠཝིཀཱསིནིཡཱ ནཱམ

ཨབྷིདྷམྨཱཝཏཱརསཾཝཎྞནཱཡ

ཙེཏསིཀཝིབྷཱགནིདྡེསཝཎྞནཱ ནིཊྛིཏཱ.

༤. ཙཏུཏྠོ པརིཙྪེདོ

ཨེཀཝིདྷཱདིནིདྡེསཝཎྞནཱ

༡༢༨-༣༠. ཝིཛཱནནསབྷཱཝཏོཏི ཨཱརམྨཎཝིཛཱནནསབྷཱཝཏྟཱ. ནནུ ཙ ཧེཊྛཱ སཱརམྨཎཏོ ཨེཀཝིདྷབྷཱཝོ ཝུཏྟོཏི? སཙྩཾ ཝུཏྟོ, སོ པན ཙེཏསིཀཱནཉྩ སཱདྷཱརཎོཏི ཨིདྷ ཏབྦིཝཛྫནཏྠཾ ཝིཛཱནནལཀྑཎཏཱཝ ཝུཏྟཱ. སངྑེཔགཎནཝསེན ཙ སཧེཏུཀཱནཾ ཨེཀསཏྟཏིཝིདྷཏཱ ཝུཏྟཱ. ཧེཏུཝཱདིནཱཏི ཀུསལཱཀུསལཱབྱཱཀཏཧེཏཱུནཾ བྱཱཀརཎཀུསལེན ¶ . ཨཐ ཝཱ ‘‘ཡེ དྷམྨཱ ཧེཏུཔྤབྷཝཱ ¶ , ཏེསཾ ཧེཏུཾ ཏཐཱགཏོ ཨཱཧཱ’’ཏི (ཨཔ. ཐེར ༡.༡.༢༨༦; མཧཱཝ. ༦༠) ཝཙནཏོ ཏཾཏཾཔཙྩཡུཔྤནྣདྷམྨཱནཾ ཏཾཏཾཔཙྩཡཝཱདིནཱ.

༡༣༡-༤. སཝཏྠུཀཱཝཏྠུཀཏོཏི ཨེཀནྟེན སབྦཝཏྠུནིསྶིཏབྷཱཝཏོ ཙེཝ ཏདབྷཱཝཏོ ཙ. ཀེཙི པན ཧདཡཝཏྠུཝསེན སཝཏྠུཀཱཝཏྠུཀཏཾ ཝཎྞེནྟི, ཏཾ ན ཡུཛྫཏི སཝཏྠུཀནིདྡེསེ ‘‘སབྦོ ཀཱམཝིཔཱཀོ’’ཏི པསཱདནིསྶིཏཱནམྤི སངྒཧིཏཏྟཱ. ཨུབྷཡཝསེནཱཏི སཝཏྠུཀཱཝཏྠུཀཝསེན. ཀཱནིཙི ཧི ཙིཏྟཱནི ཨེཀནྟེན སཝཏྠུཀཱནི, ཀཱནིཙི ཨཝཏྠུཀཱནེཝ, ཀཱནིཙི ཨུབྷཡསབྷཱཝཱནི. ཏཐཱ ཙེཝ ནིདྡིསཏི ‘‘སབྦོ ཀཱམཝིཔཱཀོ ཙཱ’’ཏིཨཱདི.

སབྦོ ཀཱམཝིཔཱཀོ ཙཱཏི སཧེཏུཀཱཧེཏུཀབྷིནྣོ སབྦོ ཏེཝཱིསཏིཝིདྷོ ཀཱམཱཝཙརཝིཔཱཀོ ཙ. ཨཱདིམགྒོཏི སོཏཱཔཏྟིམགྒོ. སོ ཧི སབྦལོཀུཏྟརེསུ ཨཱདིཏོ ཨུཔྤཛྫནཏོ, ཨཊྛསུ ཨརིཡཔུགྒལེསུ ཨཱདིཔུགྒལསྶ སམྦནྡྷཱིཏི ཝཱ ‘‘ཨཱདིམགྒོ’’ཏི ཝུཙྩཏི. ཝིནཱ ཝཏྠུནྟི སཀསཀཝཏྠུཾ ཝིནཱ ནུཔྤཛྫནྟི. ཏེནེཝ ཧེཏཱནི ཨརཱུཔབྷཝེ ནུཔྤཛྫནྟི ཏཏྠ ཝཏྠཱུནཾ ཨབྷཱཝཏོ. ‘‘ནུཔྤཛྫནྟི ཝིནཱ ཝཏྠུ’’ནྟི ཙ ཨིདཾ ཨནྟོབྷཱཝིཏཀཱརཎཏྠཾ ཀཏྭཱ ཝུཏྟཾ. ཏེན ཡསྨཱ ཝཏྠུཾ ཝིནཱ ནུཔྤཛྫནྟི, ཏསྨཱ ཨེཀནྟེན སཝཏྠུཀཱཏི ཝུཏྟཾ ཧོཏི.

ཨེཀནྟེན ཨཝཏྠུཀཱ ཨརཱུཔབྷཝེཡེཝ པཊིསནྡྷཱདིཝསེན པཝཏྟནཏོ. ཀཐཾ པན རཱུཔསནྣིསྶཡེན ཝིནཱ ཏཏྠ ཨརཱུཔཾ པཝཏྟཏི, ཀསྨཱ ན པཝཏྟཏི པཉྩཝོཀཱརེཏི? ཏཐཱ ཨདསྶནཏོ. ཡདི ཨེཝཾ ཀབལཱི༹ཀཱརཱཧཱརེནཔི ཝིནཱ རཱུཔདྷཱཏུཡཾ རཱུཔེན པཝཏྟིཏབྦཾ, ཀིཾ ཀཱརཎཱ? ཀཱམདྷཱཏུཡཾ ཏཐཱ ཨདསྶནཏོ. ཨཔི ཏུ ཡསྶ ཙིཏྟསནྟཱནསྶ པཝཏྟིཀཱརཎཾ ¶ རཱུཔེ ཨཝིགཏཏཎྷཾ, ཏསྶ སཧ རཱུཔེན པཝཏྟི. ཡསྶ པན ནིབྦཏྟིཀཱརཎཾ རཱུཔེ ཝིགཏཏཎྷཾ, ཏསྶ ཝིནཱ རཱུཔེན པཝཏྟི ཀཱརཎསྶ ཏཾཝིམུཁཏཱཡཱཏི རཱུཔསནྣིསྶཡེན ཝིནཱ ཏཏྠ ཨརཱུཔཾ པཝཏྟཏི. དྭེཙཏྟཱལཱིས སེསཱནཱིཏི མནོདྭཱརཱཝཛྫནཾ ཀུསལཀིརིཡཱཝསེན སོལ༹ས ཀཱམཱཝཙརཱནི, ཏཐེཝ ཨཊྛ ཨརཱུཔཱཝཙརཱནི, པཋམམགྒཝཛྫཱནི སཏྟ ལོཀུཏྟརཱནི, པཊིགྷདྭཡཝཛྫིཏདསཨཀུསལཱནི ཙེཏི དྭེཙཏྟཱལཱིས ཝུཏྟཱཝསེསཙིཏྟཱནི.

༡༣༥-༧. རཱུཔཱདཱིསུ ཨེཀེཀམེཝ ཨཱརམྨཎཾ ཨིམསྶཱཏི ཨེཀེཀཱརམྨཎཾ. ཏསྶ ཏསྶ ཨཱརམྨཎསྶ ཨཱཔཱཐགཏཀཱལེ ཏཾཏཾཝིཛཱནནཝསེན པཉྩཔི ཨཱརམྨཎཱནི ཨིམསྶཱཏི པཉྩཱརམྨཎཾ. ཨེཝམྤཱིཏི ¶ ན ཀེཝལཾ སཝཏྠུཀཱདིཝསེནེཝ, ཨཐ ཁོ ཨེཀེཀཱརམྨཎཱདིཏོཔི. ཨབྷིཉྙཱཝཛྫིཏཱནཾ སབྦམཧགྒཏཱནམྤི དྷམྨཱརམྨཎབྷཱཝེན ཨེཀཱརམྨཎཏྟཱ ཨཱཧ ‘‘སབྦཾ མཧགྒཏ’’ནྟི. པཎྞཏྟཱརམྨཎཏོ ཨེཀཱརམྨཎནྟི ཀེཙི. ཏཾ ཨརཱུཔཱཝཙརདུཏིཡཙཏུཏྠཛ྄ཛྷཱནཱནི པཏྭཱ ན ཡུཛྫཏི ཏེསཾ མཧགྒཏཱརམྨཎཏྟཱ. ཨབྷིཉྙཱདྭཡསྶ ཚལཱ༹རམྨཎིཀབྷཱཝེན, ཏསྶ ཙ རཱུཔཱཝཙརཔཉྩམཛ྄ཛྷཱནཏོ ཨབྷིནྣཏྟཱ ཏཾ པཧཱཡ ‘‘ཏེཙཏྟཱལཱིསཱ’’ཏི ཝུཏྟཾ.

༡༤༡. པུཉྙཝིཔཱཀཀིརིཡཏོ ཀཱམེ དྭཱདསཱཏི སམྦནྡྷོ. དྷཱཏི ནིཔཱཏམཏྟཾ. པུཉྙཝིཔཱཀཀྲིཡཏོཏི ཉཱཎཝིཔྤཡུཏྟཀུསལཝིཔཱཀཀིརིཡཏོ.

༡༤༣-༩. ཨིརིཡཱཡ ཀཱཡིཀཱཡ ཀིརིཡཱཡ པཝཏྟིཔཐབྷཱཝཏོ ཨིརིཡཱཔཐོ, གམནཱདི. ཨཏྠཏོ ཏདཝཏྠཱ རཱུཔཔྤཝཏྟི. ཀཱམཉྩེཏྠ རཱུཔཝིནིམུཏྟོ ཨིརིཡཱཔཐོ, ཝིཉྙཏྟི ཝཱ ནཏྠི, ཏཐཱཔི སབྦཾ རཱུཔསམུཊྛཱཔཀཙིཏྟཾ ཨིརིཡཱཔཐུཔཏྠམྦྷཀཾ, ཝིཉྙཏྟིཝིཀཱརུཔྤཱདནཉྩ ཧོཏི. ཡཾ པན ཙིཏྟཾ ཝིཉྙཏྟིཛནཀཾ ¶ , ཏཾ ཨེཀཾསཏོ ཨིཏརདྭཡསྶ ཛནཀཾ ཨཝིནཱབྷཱཝཏོ, ཏཐཱ ཨིརིཡཱཔཐུཔཏྠམྦྷཀཾ རཱུཔསྶཱཏི ཨིམསྶ ཝིསེསསྶ དསྶནཏྠཾ ‘‘རཱུཔཱིརིཡཱཔཐཝིཉྙཏྟི-ཛནཀཱཛནཀཱདིཏོ’’ཏི ཨིརིཡཱཔཐཝིཉྙཏྟཱིནཾ ཝིསུཾ གཧཎཾ. ཛནཀཱཛནཀཱདིཏོཏི ཏིཎྞམྤི ཛནཀཏོ, ཀསྶཙིཔི ཨཛནཀཏོ, དྭིནྣཾ ཨེཀསྶ ཙ ཛནཀཏོ. ཀཱནིཙི ཧི ཙིཏྟཱནི རཱུཔཾ སམུཊྛཱཔེནྟི, ཨིརིཡཱཔཐཾ ཀཔྤེནྟི, ཝིཉྙཏྟིཾ ཛནཡནྟི. ཀཱནིཙི རཱུཔཾ སམུཊྛཱཔེནྟི, ཨིརིཡཱཔཐཾ ཀཔྤེནྟི, ཝིཉྙཏྟིཾ ན ཛནཡནྟི. ཀཱནིཙི རཱུཔམེཝ སམུཊྛཱཔེནྟི, ཨིཏརདྭཡཾ ན ཀརོནྟི. ཀཱནིཙི ཏཱིཎི ན ཀརོནྟེཝ. ཏཐཱ ཙེཝ དསྶེཏི ‘‘དྭཱདསཱཀུསལཱ’’ཏིཨཱདི. ཨེཝཉྩཱཔི ཧི ཏཾ ཙིཏྟནྟི ན ཀེཝལཾ ཨཧེཏུཀཱདིཏོཝ, ཨེཝཾ རཱུཔཱདིཛནཀཱདིཏོཔི ཏཾ ཙཏུབྦིདྷཾ. ‘‘ཨེཝཉྩཱདིམྷི ཏ’’ནྟིཔི ལིཁནྟི. ཏསྶ པན ཨཱདིམྷི ནིཀྑིཏྟཾ ཙིཏྟཾ ཨེཝཉྩ ཙཏུབྦིདྷནྟི ཨཏྠཾ ཝདནྟི. ཏཏྠཱཏི ཏེསུ རཱུཔཛནཀཱདཱིསུ. དས ཀིརིཡཱཏི མནོདྷཱཏུཝཛྫཱ དས ཀིརིཡཱ.

སམུཊྛཱཔེནྟི རཱུཔཱནཱིཏི ཨཏྟནོ ཨུཔྤཱདཀྑཎེཡེཝ ཨཏྟནཱ ཛནེཏབྦརཱུཔཱནི སམུཊྛཱཔེནྟི. ཀཔྤེནྟཱིཏི སནྣཱམེནྟི. ཡཐཱཔཝཏྟཾ ཨིརིཡཱཔཐཾ ཨུཔཏྠམྦྷེནྟི. ཡཐཱ ཧི ཨནྟརནྟརཱ ཨུཔྤཛྫམཱནེཧི ཝཱིཐིཙིཏྟེཧི ཨབྦོཀིཎྞེ བྷཝངྒེ པཝཏྟམཱནེ ཨངྒཱནི ཨོསཱིདནྟི, པཝེདྷནྟཱ ཝིཡ ཧོནྟི, ན ཨེཝཾ དྭཏྟིཾསཝིདྷེསུ ཝཀྑམཱནེསུ ཙ ཚབྦཱིསཏིཝིདྷེསུ ཛཱགརཎཙིཏྟེསུ པཝཏྟམཱནེསུ. ཏདཱ པན ཨངྒཱནི ¶ ཨུཔཏྠདྡྷཱནི ཡཐཱཔཝཏྟཨིརིཡཱཔཐབྷཱཝེནེཝ པཝཏྟནྟི. ཛནཡནྟི ཙ ཝིཉྙཏྟིནྟི མནོདྭཱརེ པཝཏྟཱ ཨེཝ ཝིཉྙཏྟིཾ ཛནཡནྟི, ན པན པཉྩདྭཱརེ པཝཏྟཱཏི དཊྛབྦཾ.

དྭིཔཉྩཝིཉྙཱཎཱནཾ ཛྷཱནངྒཡོགཱབྷཱཝེན རཱུཔཱཛནཀཏྟཱ ཨཱཧ ‘‘དྭེཔཉྩཝིཉྙཱཎཱ’’ཏི. ཛྷཱནངྒཱནི ཧི ཙིཏྟེན སཧ རཱུཔསམུཊྛཱཔཀཱནི, ཏེསཾ ཨནུབལཔྤདཱཡཀཱནི མགྒངྒཱདཱིནི ཏེསུ ¶ ཝིཛྫམཱནེསུ སཝིསེསཾ རཱུཔཔྤཝཏྟིདསྶནཏོ. ཨརཱུཔཝིཔཱཀཱ པན རཱུཔཝིརཱགབྷཱཝནཱཡ ནིབྦཏྟཏྟཱ ཧེཏུནོ ཏཾཝིམུཁཏཱཡ རཱུཔཾ ན སམུཊྛཱཔེནྟཱིཏི ཨཱཧ ‘‘ཝིཔཱཀཱ ཙ ཨརཱུཔིསཱུ’’ཏི.

༡༥༠. སབྦེསཾ སནྡྷིཙིཏྟནྟི སབྦེསཾ སཏྟཱནཾ པཊིསནྡྷིཙིཏྟཾ. ཏཉྷི ཝཏྠུདུབྦལཏཱཡ, ཨཔྤཏིཊྛིཏཏཱཡ, པཙྩཡཝེཀལླཏོ, ཨཱགནྟུཀཏཱཡ ཙ རཱུཔཾ ན སམུཊྛཱཔེཏི. ཏཐཱ ཧི པཊིསནྡྷིཝིཉྙཱཎེན སཧཛཱཏཾ ཝཏྠུ པཙྪཱཛཱཏཔཙྩཡརཧིཏཾ, ཨཱཧཱརཱདཱིཧི ཙ ཨནུཔཏྠདྡྷཾ དུབྦལཾ, ཏསྶ ཙ དུབྦལཏྟཱ ཏནྣིསྶིཏཝིཉྙཱཎམྤི དུབྦལནྟི. ཡཐཱ ཙ པཔཱཏེ པཏིཏོ ཨཉྙསྶ ནིསྶཡོ བྷཝིཏུཾ ན སཀྐོཏི, ཨེཝཾ ཏམྤི བྷིནྣསནྟཏིཡཾ ཀམྨཀྑིཏྟཏཱཡ པཔཱཏེ པཏིཏཾ ཝིཡ ཨཔྤཏིཊྛིཏཾ ན རཱུཔསམུཊྛཱཔནེ ཨུསྶཧཏི ཙ ཝཏྠུནོ ཙ ཨཏྟནཱ སཧ ཨཔཙྪཱ ཨཔུརེ ཨུཔྤཛྫམཱནཏྟཱ པུརེཛཱཏཔཙྩཡསྶ ཨལཱབྷཏོ. ཡཐཱ པན ཨཱགནྟུཀོ པུརིསོ ཨགཏཔུབྦཾ དེསཾ གཏོ ཨཉྙེསཾ ‘‘ཨེཐ བྷོ ཨནྟོགཱམེ ཝོ ཨནྣཔཱནགནྡྷམཱལཱདཱིནི དསྶཱམཱི’’ཏི ཝཏྟུཾ ན སཀྐོཏི ཨཏྟནོ ཨཝིསཡཏཱཡ, ཨཔྤཧུཏཱཡ ཙ, ཨེཝམེཝཾ པཊིསནྡྷིཙིཏྟམྤི ཨཱགནྟུཀནྟི. ཨེཝཾ ཝཏྠུདུབྦལཏཱདཱིཧི ཀཱརཎེཧི རཱུཔཾ ན སམུཊྛཱཔེཏི. ཨཔིཙ ཨཱཧཱརིནྡྲིཡཱདིཝསེན ཡེཧཱཀཱརེཧི ཙིཏྟསམུཊྛཱནརཱུཔཱནཾ ཙིཏྟཙེཏསིཀཱ པཙྩཡཱ ཧོནྟི, ཏེཧི སབྦེཧི པཊིསནྡྷིཡཾ ཙིཏྟཙེཏསིཀཱ སམཏིཾསཀམྨཛརཱུཔཱནཾ ཡཐཱཡོགཾ པཙྩཡཱ ཧོནྟི. ཝུཏྟཉྷེཏཾ པཊྛཱནེ –

‘‘པཊིསནྡྷིཀྑཎེ ཝིཔཱཀཱབྱཱཀཏཱ ཨཱཧཱརཱ སམྤཡུཏྟཱནཾ ཁནྡྷཱནཾ ཀཊཏྟཱ ཙ རཱུཔཱནཾ ཨཱཧཱརཔཙྩཡེན པཙྩཡོ’’ཏིཨཱདི (པཊྛཱ. ༡.༡.༤༢༩).

ཏསྨཱ ¶ སམཏིཾསཀམྨཛརཱུཔཱནི ཙིཏྟསམུཊྛཱནརཱུཔཱནཾ ཋཱནཾ གཧེཏྭཱ ཋིཏཱནཱིཏི པཊིསནྡྷིཙིཏྟཾ རཱུཔཾ ན སམུཊྛཱཔེཏཱིཏི ཝེདིཏབྦཾ.

ཙུཏིཙིཏྟཉྩཱརཧཏོཏི ཨེཏྠ ཁཱིཎཱསཝསྶ ཙུཏིཙིཏྟཾ ཨུཔསནྟཝཊྚམཱུལསྨིཾ སནྟཱནེ སཱཏིསཡཾ སནྟཝུཏྟིཏཱཡ ¶ རཱུཔཾ ན སམུཊྛཱཔེཏི, ཨནཱགཱམིཨཱདཱིནཾ ཏདབྷཱཝཏོཏི ཝདནྟི. ཊཱིཀཱཀཱརོ པན ཨཱནནྡཱཙརིཡོ བྷཎཏི –

‘‘ཀཱམཱཝཙརཱནཾ པཙྪིམཙིཏྟསྶ ཨུཔྤཱདཀྑཎེ ཡསྶ ཙིཏྟསྶ ཨནནྟརཱ ཀཱམཱཝཙརཱནཾ པཙྪིམཙིཏྟཾ ཨུཔྤཛྫིསྶཏི, རཱུཔཱཝཙརེ, ཨརཱུཔཱཝཙརེ པཙྪིམབྷཝིཀཱནཾ, ཡེ ཙ རཱུཔཱཝཙརཾ, ཨརཱུཔཱཝཙརཾ ཨུཔཔཛྫིཏྭཱ པརིནིབྦཱཡིསྶནྟི, ཏེསཾ ཙཝནྟཱནཾ, ཏེསཾ ཝཙཱིསངྑཱརོ ནིརུཛ྄ཛྷིསྶཏི, ནོ ཙ ཏེསཾ ཀཱཡསངྑཱརོ ནིརུཛ྄ཛྷིསྶཏཱིཏི ཝཙནཏོ ཨཉྙེསམྤི ཙུཏིཙིཏྟཾ རཱུཔཾ ན སམུཊྛཱཔེཏཱི’’ཏི.

ཨཱཙརིཡསྶ ཧི ཨཡམདྷིཔྤཱཡོ – ‘‘ཀཱམཱཝཙརཱནཾ པཙྪིམཙིཏྟསྶཱ’’ཏི ཨེཏེན ཨཝིསེསེན ཀཱམཱཝཙརསཏྟཱནཾ ཙུཏིཙིཏྟསྶ, ‘‘ཡེ ཙ རཱུཔཱཝཙརཾ…པེ… ནིརུཛ྄ཛྷིསྶཏཱི’’ཏི ཨིམིནཱ ཀཱམབྷཝཏོ ཙཝིཏྭཱ རཱུཔཱརཱུཔབྷཝཱུཔཔཛྫནཀཱནཾ ཀཱམཱཝཙརཙུཏིཙིཏྟསྶཱཔི ཨུཔྤཱདཀྑཎཏོ ཨུདྡྷཾ ཝཙཱིསངྑཱརསྶ ནིརོདྷཾ ཝཏྭཱ ཀཱཡསངྑཱརསྶ ཏདབྷཱཝཝཙནཏོ ཙུཏིཙིཏྟསྶ ཀཱཡསངྑཱརཱསམུཊྛཱཔནཾ སིདྡྷཾ. ཡདགྒེན ཙ ཏཾ ཀཱཡསངྑཱརཾ ན སམུཊྛཱཔེཏི, ཏདགྒེན ཏཾ སེསརཱུཔམྤི ན ཛནེཏི. ན ཧི རཱུཔསམུཊྛཱཔཀསྶ གབྦྷགཏཏཱདིཝིབནྡྷཱབྷཱཝེ ཀཱཡསངྑཱརཱསམུཊྛཱཔནེ ཀཱརཎཾ ཨཏྠི. ན ཙ ཡུཏྟཾ ཙུཏིཏོ ཨུདྡྷཾ ཙིཏྟསམུཊྛཱནཉྩསྶ རཱུཔཾ པཝཏྟཏཱིཏི, ནཱཔི ‘‘ཙུཏིཙིཏྟཾ རཱུཔཾ སམུཊྛཱཔེཏཱི’’ཏི པཱལི༹ ཨཏྠི, ན ཙཱཔི ཝཊྚམཱུལཱནུཔསམོ ཙུཏིཙིཏྟསྶ རཱུཔུཔྤཱདནེ ¶ ཀཱརཎཾ ཙུཏིཙིཏྟེན ན ཨུཔྤནྣཱནམྤི ཏཏོ པུརིམཏརེཧི ཨུཔྤནྣཱནཾ ཝིཡ བྷཝནྟརེ ཨནུཔྤཛྫནཏོ, ཏསྨཱ སབྦེསམྤི ཙུཏིཙིཏྟཾ རཱུཔཾ ན སམུཊྛཱཔེཏཱིཏི. ཡདི ཀཱཡསངྑཱརསམུཊྛཱཔནམེཝ རཱུཔཛནནཱརཧབྷཱཝཾ སཱདྷེཏི, ཏདཱ ཙཏུཏྠཛ྄ཛྷཱནེ ཀཐནྟི? ནཱཡཾ དོསོ, ཏསྶ བྷཱཝནཱབལེན སཱཏིསཡཾ སནྟཝུཏྟིཏཱཡ ཀཱཡསངྑཱརཱསམུཊྛཱཔནེཔི མརཎཱསནྣཙིཏྟཱནཾ ཝིཡ པརིདུབྦལཏྟཱབྷཱཝཏོ རཱུཔསམུཊྛཱཔནེ ཝིབནྡྷོ ནཏྠཱིཏི. ཀུཏོ པན པཊྛཱཡ ཙིཏྟཛརཱུཔཾ ནུཔྤཛྫཏཱིཏི? ཡཏོ པཊྛཱཡ ཀཱཡསངྑཱརེ ནུཔྤཛྫཏི. ཀདཱ ཙ ཀཱཡསངྑཱརོ ནུཔྤཛྫཏཱིཏི? ཙུཏིཏོ པུབྦེ དྭཏྟིཾསམཙིཏྟཀྑཎཏོ པཊྛཱཡ ནུཔྤཛྫཏི, ཏེཏྟིཾསམཙིཏྟཀྑཎེ ཨུཔྤནྣཾ པཙྪིམསོལ༹སཀཏོ པུརེཏརམེཝ ནིརུཛ྄ཛྷཏཱིཏི ཝདནྟི. ‘‘ཡསྶ ཀཱཡསངྑཱརོ ན ནིརུཛ྄ཛྷཏི, ཏསྶ ཙིཏྟསངྑཱརོ ན ནིརུཛ྄ཛྷིསྶཏཱི’’ཏི (ཡམ. ༢.སངྑཱརཡམཀ.༡༡༣) པཉྷེ ‘‘པཙྪིམཙིཏྟསྶ བྷངྒཀྑཎེ ཏེསཾ ཀཱཡསངྑཱརོ ཙ ན ནིརུཛ྄ཛྷཏི, ཙིཏྟསངྑཱརོ ཙ ན ནིརུཛ྄ཛྷིསྶཏཱི’’ཏི པཙྪིམཙིཏྟསྶེཝ ཝཛྫིཏཏྟཱ ཙུཏིཏོ དུཏིཡཏཏིཡཙིཏྟེནཱཔི སཧ ནིརུཛ྄ཛྷཏཱིཏི ཨཔརེ. ཡསྶ ཙིཏྟསྶ ཨནནྟརཱ ཀཱམཱཝཙརཱནཾ ¶ པཙྪིམཙིཏྟཾ ཨུཔྤཛྫཏཱིཏི ཨེཏྠ ‘‘ཡསྶཱ’’ཏི ཀཱམཱཝཙརཙུཏིཙིཏྟསྶ ཨནནྟརཔཙྩཡབྷཱུཏཾ ཙིཏྟཾ སནྡྷཱཡ ཝུཏྟནྟི ཏསྶ ཨུཔྤཱདཏོཔི ཨུདྡྷཾ ཀཱཡསངྑཱརཱབྷཱཝཝཙནེན ཧེཊྛིམཀོཊིཡཱ ཙུཏིཏོ ཏཏིཡཙིཏྟེནེཝ སཧ ནིརུཛ྄ཛྷཏི. དུཏིཡཙིཏྟཾ ན པཱཔུཎཱཏཱིཏི ཨེཀེ.

༡༥༡-༧. ཨེཀཾ དྭེ ཏཱིཎི ཙཏྟཱརི ཋཱནཱནི ཨིམསྶཱཏི ཨེཀདྭིཏིཙཏུཊྛཱནཾ, ཨེཀདྭིཏིཙཏུཊྛཱནཏྟཱཏི ཨཏྠོ. ཋཱནནྟི ཙ ཨིདྷ ཀིཙྩམདྷིཔྤེཏཾ. ཏཉྷི ཏིཊྛནྟི ཨེཏྠ དྷམྨཱ ཨཝཊྛིཏཱ ཝིཡ ཧོནྟཱིཏི ‘‘ཋཱན’’ནྟི ཝུཙྩཏི. མཾསཙཀྑུདིབྦཙཀྑུཉཱཎཙཀྑུབུདྡྷཙཀྑུསམནྟཙཀྑུཝསེན པཉྩ ནིམྨལཱནི ལོཙནཱནི ཨིམསྶཱཏི པཉྩནིམྨལལོཙནོ.

ནིཔྤཔཉྩེནཱཏི ¶ རཱགཱདིཔཔཉྩརཧིཏེན. རཱགཱདཡོ ཧི སཾསཱརེ པཔཉྩནཏོ ‘‘པཔཉྩཱ’’ཏི ཝུཙྩནྟི.

ཨཱཝཛྫནེ པཊིཙྪནེ ཋཱནེ མནོདྷཱཏུཏྟིཀནྟི སམྦནྡྷོ, ཀིརིཡཱམནོདྷཱཏུ ཨཱཝཛྫནཊྛཱནེ, ཝིཔཱཀདྭཡཾ སམྤཊིཙྪནཊྛཱནེཏི ཨཏྠོ.

‘‘སོམནསྶཡུཏྟསནྟཱིརཎཾ པཉྩདྭཱརེ སནྟཱིརཎཾ སིཡཱ’’ཏི ཝཏྟབྦེ ‘‘སནྟཱིརཎ’’ནྟི ཨདྷིཀཱརཏོཝ ལབྦྷཏཱིཏི གཱཐཱབནྡྷསུཁཏྠཾ ‘‘སོམནསྶཡུཏ’’ནྟི ཨེཏྟཀམེཝ ཝུཏྟཾ.

བལཝཱརམྨཎེ སཏཱིཏི ཏདཱརམྨཎཀིཙྩསྶ བལཝཱརམྨཎེཡེཝ ལབྦྷནཏོ ཝུཏྟཾ, ན ཨིམསྶེཝ ཨཱཝེཎིཀབྷཱཝེན སབྦེསམྤི ཏདཱརམྨཎཱནཾ བལཝཱརམྨཎེཡེཝ ཨུཔྤཛྫནཏོ. ཝོཊྛབྦནནྟི ཀིརིཡཱམནོཝིཉྙཱཎདྷཱཏུསངྑཱཏཾ ཝོཊྛབྦནཀིཙྩཾ ཙིཏྟཾ.

༡༥༨-༩. སབྦེསནྟི སབྦེསཾ ཀཱམརཱུཔཱརཱུཔབྷཝིཀསཏྟཱནཾ. ཨིམིནཱ ཨིདཾ དསྶེཏི – པཉྩདྭཱརེསུ ཝོཊྛབྦནཀིཙྩཾ ཀེསཉྩིདེཝ སཏྟཱནཾ ཨརཱུཔབྷཝེ སབྦསོ པཉྩདྭཱརིཀཙིཏྟཔྤཝཏྟིཡཱ, རཱུཔབྷཝེ ཙ དྭཱརཏྟཡཔྤཝཏྟིཡཱ ཨབྷཱཝཏོ. མནོདྭཱརེ ཨཱཝཛྫནཀིཙྩཾ པན སབྦེསམེཝ སཙིཏྟཀསཏྟཱནཾ ཀརོཏཱིཏི. དྭིཊྛཱནིཀཾ ནཱམ ཧོཏཱིཏི ཡཐཱཝུཏྟཊྛཱནདྭཡཝནྟཏཱཡ དྭིཊྛཱནིཀཙིཏྟཾ ནཱམ ཧོཏི. ཀེཙི པན ‘‘སོམནསྶསཧགཏསནྟཱིརཎཾ ཀཱམསུགཏིཡཾ པཊིསནྡྷིཾ ཨཱཀཌྜྷཏི ¶ , ཏསྨཱ ཏཾ པཉྩཊྛཱནིཀ’’ནྟི ཝདནྟི, ཏཾ ཏེསཾ མཏིམཏྟཾ པཊྛཱནེ ཏཐཱ ཨདཱིཔིཏཏྟཱ. ཏཏྠ ཧི –

‘‘ཨུཔེཀྑཱསཧགཏཾ དྷམྨཾ པཊིཙྩ ཨུཔེཀྑཱསཧགཏོ དྷམྨོ ཨུཔྤཛྫཏི ནཧེཏུཔཙྩཡཱ’’ཏི ཨེཏྠ (པཊྛཱ. ༢.༧.༨) ‘‘ཨཧེཏུཀཾ ཨུཔེཀྑཱསཧགཏཾ ཨེཀཾ ཁནྡྷཾ པཊིཙྩ ཏཡོ ཁནྡྷཱ, ཏཡོ ཁནྡྷེ པཊིཙྩ ཨེཀོ ཁནྡྷོ, དྭེ ཁནྡྷེ པཊིཙྩ དྭེ ཁནྡྷཱ ¶ , ཨཧེཏུཀཔཊིསནྡྷིཀྑཎེ ཨུཔེཀྑཱསཧགཏཾ ཨེཀཾ ཁནྡྷཾ པཊིཙྩ ཏཡོ ཁནྡྷཱ, ཏཡོ ཁནྡྷེ པཊིཙྩ ཨེཀོ ཁནྡྷོ, དྭེ ཁནྡྷེ པཊིཙྩ དྭེ ཁནྡྷཱ’’ཏི (པཊྛཱ. ༢.༧.༨) –

ཨེཝཾ ཨུཔེཀྑཱསཧགཏ-པདསྶ པཝཏྟིཔཊིསནྡྷིཝསེན པཊིཙྩནཡོ ཨུདྡྷཊོ. པཱིཏིསཧགཏསུཁསཧགཏ-པདཱནཾ པན –

‘‘པཱིཏིསཧགཏཾ དྷམྨཾ པཊིཙྩ པཱིཏིསཧགཏོ དྷམྨོ ཨུཔྤཛྫཏི ནཧེཏུཔཙྩཡཱ. ཨཧེཏུཀཾ པཱིཏིསཧགཏཾ ཨེཀཾ ཁནྡྷཾ པཊིཙྩ ཏཡོ ཁནྡྷཱ, ཏཡོ ཁནྡྷེ པཊིཙྩ ཨེཀོ ཁནྡྷོ, དྭེ ཁནྡྷེ པཊིཙྩ དྭེ ཁནྡྷཱ. སུཁསཧགཏཾ དྷམྨཾ པཊིཙྩ སུཁསཧགཏོ དྷམྨོ ཨུཔྤཛྫཏི ནཧེཏུཔཙྩཡཱ. ཨཧེཏུཀཾ སུཁསཧགཏཾ ཨེཀཾ ཁནྡྷཾ པཊིཙྩ ཏཡོ ཁནྡྷཱ, ཏཡོ ཁནྡྷེ པཊིཙྩ ཨེཀོ ཁནྡྷོ, དྭེ ཁནྡྷེ པཊིཙྩ དྭེ ཁནྡྷཱ’’ཏི (པཊྛཱ. ༢.༧.༦) –

ཨེཝཾ པཝཏྟིཝསེནེཝ ཨུདྡྷཊོ, ན ‘‘ཨཧེཏུཀཔཊིསནྡྷིཀྑཎེ’’ཏིཨཱདིནཱ པཊིསནྡྷིཝསེན, ཏསྨཱ ཡཐཱདྷམྨསཱསནེ ཨཝཙནམྤི ཨབྷཱཝམེཝ དཱིཔེཏཱིཏི ན ཏསྶ པཊིསནྡྷིདཱནཾ ཨཏྠཱིཏི དྭིཊྛཱནིཀཏཱཝ ཝུཏྟཱཏི. ཏེ མཧགྒཏཝིཔཱཀཱ ནཝཱཏི སམྦནྡྷོ.

༡༦༢. ཚདྭཱརཱ ཨེཝ ཚདྭཱརིཀཱ. ཨཐ ཝཱ ཚདྭཱརིཀེསཱུཏི ཚདྭཱརིཀཙིཏྟེསཱུཏི ཨཏྠོ.

༡༦༤-༦. ‘‘པཉྩཀིཙྩ’’ནྟིཨཱདི ཡཐཱཝུཏྟཱནམེཝ ནིགམནཾ. སེསནྟི ཨཊྛསཊྛིཝིདྷཾ ཙིཏྟཾ. ཨེཀཀིཙྩཡོགཏོ, ཨེཀཾ ཀིཙྩམསྶཱཏི ཝཱ ཨེཀཾ, ཨེཀམེཝ ཨེཀཀཾ. སབྦཙིཏྟཱནཾ ཀིཙྩཝསེན ནིདྡེསཊྛཱནེཡེཝ ཀིཙྩཱནཾ པཊིཔཱཊིམྤི དསྶེཏུཾ ‘‘བྷཝངྒཱཝཛྫན’’ནྟིཨཱདི ཝུཏྟཾ. ཡདི ཨེཝཾ པཊིསནྡྷིཏོ པཊྛཱཡ ཙུཏིཔརིཡོསཱནཾ ཝཏྟབྦནྟི? སཙྩཾ, ཙུཏིཔཊིསནྡྷཱིནཾ པན པཱཀཊཏྟཱ ¶ ཏཐཱ ¶ ན ཝུཏྟཾ. བྷཝསྶ ཧི པཊིསནྡྷི ཨཱདི, ཙུཏི པརིཡོསཱནནྟི པཱཀཊམེཝ, ཏསྨཱ པཱཀཊཊྛཱནཾ པཧཱཡ ཨཔཱཀཊཊྛཱནཏོ པཊྛཱཡ དསྶེཏུཾ བྷཝངྒམེཝ ཨཱདིཏོ ཝུཏྟཾ. ཏདཱརམྨཎཾ པན ཀིཉྩཱཔི ཨཔཱཀཊཾ, ཨཐ ཁོ ཨནེཀནྟིཀཾ ཀིསྨིཉྩི བྷཝེ ཀཏྠཙི ཛཝནཝཱིཐིཡཾ ཨལབྦྷནཏོཏི ཨེཀནྟལབྦྷམཱནཔརིདཱིཔནཏྠཾ ཏཾ ན ཝུཏྟཾ. ཨཐ ཝཱ ཏདཱརམྨཎཙིཏྟམྤི ཡེབྷུཡྻེན བྷཝངྒནཱམཾ ལབྦྷཏཱིཏི པུརིམཛཝནཝཱིཐིཡཾ ཏདཱརམྨཎཾ པཙྪིམཛཝནཝཱིཐིཡཱ ཨཱཝཛྫནསྶ པུརེཙརབྷཱུཏཾ བྷཝངྒ-གྒཧཎེནེཝ སངྒཧིཏནྟི ཝིསུཾ ན ཝུཏྟཾ. ཀེཙི པན ‘‘པཉྩདྭཱརེསུ པཝཏྟིཝསེན པཉྩཝིདྷཏཱཡ དསྶནཏྠཾ ‘བྷཝངྒཱཝཛྫན’ནྟིཨཱདི ཝུཏྟ’’ནྟི ཝདནྟི, ཏཏྠ པན ཨཔྤཝཏྟམཱནཱནཾ ཀེསཉྩི སབྦྷཱཝཏོ ཏཾ ན ཡུཛྫཏི, ཚདྭཱརཔྤཝཏྟིཝསེན ཚབྦིདྷཏྟནཡདསྶནཏྠནྟི ཝཏྟུཾ ཝཊྚཏི. ཡཐཱ ཙེཏྠ ‘‘བྷཝངྒཱཝཛྫན’’ནྟིཨཱདིནཱ ཙཀྑུདྭཱརེ ཝུཏྟཾ, ཨེཝཾ སོཏདྭཱརཱདཱིསུཔི དསྶནཱདིཾ ཨཔནེཏྭཱ སཝནཱདིཾ པཀྑིཔིཏྭཱ ཀིཙྩཔྤཝཏྟི ཡོཛེཏབྦཱ. མནོདྭཱརེ པན –

‘‘བྷཝངྒཾ པཋམཾ ཧོཏི, ཏཏོ ཨཱཝཛྫནཾ མཏཾ;

དུཏིཡཾ ཏམཏིཀྐམྨ, ཛཝནཾ ཏཏིཡཾ སིཡཱ’’ཏི. –

ཡོཛནཱ དཊྛབྦཱ. ཚནྣཾ ཝིཉྙཱཎཱནནྟི ཙཀྑུཝིཉྙཱཎཱདཱིནཾ པཉྩནྣཾ, མནོཝིཉྙཱཎསྶ ཙ. སཏྟཝིཉྙཱཎདྷཱཏཱུནནྟི ཙཀྑུཝིཉྙཱཎདྷཱཏཱདཱིནཾ པཉྩནྣཾ, མནོདྷཱཏུམནོཝིཉྙཱཎདྷཱཏུདྭཡསྶཱཏི སཏྟནྣཾ ཝིཉྙཱཎདྷཱཏཱུནཾ.

༡༦༩-༧༡. པཉྩཱབྷིཉྙཱཝིཝཛྫིཏནྟི –

‘‘ཨིདྡྷིཝིདྷཾ དིབྦསོཏོ, པརཙིཏྟཝིཛཱནནཱ;

པུབྦེནིཝཱསཱནུསྶཏི, དིབྦཙཀྑཱུཏི པཉྩདྷཱ’’ཏི. –

ཨེཝམཱགཏཱཧི པཉྩཧི ཨབྷིཉྙཱཧི ཡུཏྟེན རཱུཔཱཝཙརཔཉྩམཛ྄ཛྷཱནཙིཏྟེན ཝཛྫིཏཾ. དིབྦསོཏཱདཱིནཾ ཨེཀེཀཱརམྨཎཏྟེཔི པཉྩནྣམྤི ཨབྷིཉྙཱནཾ ཨེཀསྶེཝ ཙིཏྟསྶ ཨཝཏྠཱབྷེདབྷཱཝཏོ ཝུཏྟཾ ‘‘པཉྩཱབྷིཉྙཱཝིཝཛྫིཏ’’ནྟི ¶ . ཀེཙི པན ‘‘ཨིདྷ ཨེཀནྟེན དྷམྨཱརམྨཎིཀཙིཏྟཱནམེཝ ཝཙནཏོ ¶ པརཙིཏྟཝིཛཱནནཾ ཝཛྫེཏྭཱ ཨནཱགཏཾསཉཱཎེན སཧ པཉྩཱབྷིཉྙཱནཾ པཊིཀྑེཔོ’’ཏི ཝདནྟི.

དྭིཔཉྩཝིཉྙཱཎཱནཾ, མནོདྷཱཏུཏྟཡསྶ ཙ པརིཙྩཱགེན ཨེཀཙཏྟཱལཱིས ཧོནྟཱིཏི ཨཱཧ ‘‘ཙཏྟཱལཱིསཾ ཏཐེཀཀ’’ནྟི. ཨབྷིཉྙཱནི ཙཱཏི ཙ-སདྡོ ཨཊྛཱནཔྤཡུཏྟོ, སོ ‘‘ཙཏྟཱལཱིསཾ ཏཐེཀཀ’’ནྟི ཨིམསྶཱནནྟརཾ དཊྛབྦོ, ཏེན པན ཨབྷིཉྙཱཙིཏྟདྭཡཾ སངྒཎྷཱཏི. ཨཐ ཝཱ ཨབྷིཉྙཱ ནཱམ ཧེཊྛཱ ཨེཀེཀཱརམྨཎིཀེསུ ཝུཏྟསྶ པཉྩམཛ྄ཛྷཱནསྶེཝ ཨཝཏྠཱཝིསེསོཏི ཨབྷིཉྙཱཙིཏྟཱནཾ ཚལཱ༹རམྨཎིཀེསུ ཨགྒཧཎནྟི དཊྛབྦཾ.

༡༧༢-༣. ཏིདྷཱ ཀཏྭཱཏི ཏིདྷཱ ཀརཎཧེཏུ. ཧེཏྭཏྠོ ཧི ཨཡཾ ཏྭཱ-སདྡོ ཡཐཱ ‘‘སཱིཧཾ དིསྭཱ བྷཡཾ ཚམྦྷིཏཏྟཾ ཨུཔྤཛྫཏི, པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟཱི’’ཏི. ‘‘པུཉྙཱཔུཉྙཝསེནཱ’’ཏིཨཱདིནཱ ཛཱཏིབྷཱུམིཧེཏུཝེདནཱདིཝསེན ཡཱཝ ཚསཏྟཏིཝིདྷོ བྷེདོ, ཏཱཝ མནོཝིཉྙཱཎདྷཱཏུཾ བྷིནྡིཏྭཱ ཏཾཝསེན ཙིཏྟཝིབྷཱགདསྶནཏྠཾ ནཡདཱནཾ ཀཏནྟི ཝེདིཏབྦཾ.

༡༧༥. ཏིདྷཱ ཀཏྭཱཏི པཋམཾ ཝིཔཱཀདྭཡཀིརིཡཱབྷེདཏོ, དུཏིཡཾ ཀུསལཱཀུསལཱདིཏོཏི ཨེཝཾ དྷཱཏུདྭཡཾ པཙྩེཀཾ ཏིདྷཱ ཀཏྭཱ.

༡༨༠. བྷཱུམི…པེ… ཝིབྷཱཝཡེཏི ཏིཾསབྷཱུམཱིནཾ ནཱནཏྟཝསེན པཝཏྟིཏོ ཏིཾསཝིདྷཾ, ཏཏྠེཝ ཏིཾསཔུགྒལཱནཾ ནཱནཏྟཝསེན པཝཏྟིཏོ ཙ ཏིཾསཝིདྷནྟིཨཱདིནཱ ཨིདཾ ཡཐཱནིདྡིཊྛཙིཏྟཾ བཧུདྷཱ ཧོཏཱིཏི ཙ ཝིབྷཱཝེཡྻཱཏི ཨཏྠོ.

༡༨༡. ཨིདྷཱཏི ¶ ཨིམསྨིཾ སཱསནེ. ཧཏྠགཏཱམལཀཱ ཝིཡ ཧོནྟཱིཏི ཡཐཱ ཧཏྠགཏཾ ཨཱམལཀཾ ཙཀྑུམཏོ སུཔཱཀཊཾ ཧོཏི, ཨེཝམིམསྶ མཏིམཏོ བྷིཀྑུནོ ཨབྷིདྷམྨཔིཊཀགཏཱ ཨཏྠཱ སུཔཱཀཊཱ ཧོནྟི, ཨཱཝཛྫིཏཱཝཛྫིཏཀྑཎེ སུཝིསདཱཝ པཉྙཱཡནྟཱིཏི ཨཏྠོ.

ཨིཏི ཨབྷིདྷམྨཏྠཝིཀཱསིནིཡཱ ནཱམ

ཨབྷིདྷམྨཱཝཏཱརསཾཝཎྞནཱཡ

ཨེཀཝིདྷཱདིནིདྡེསཝཎྞནཱ ནིཊྛིཏཱ.

༥. པཉྩམོ པརིཙྪེདོ

བྷཱུམིཔུགྒལཙིཏྟུཔྤཏྟིནིདྡེསཝཎྞནཱ

༡༨༢-༨. བུདྡྷིཡཱ ¶ ཝུདྡྷིཾ ཝིརུལ༹ྷིཾ ཀརོཏཱིཏི བུདྡྷིཝུདྡྷིཀརཾ. ཡསྶ ཡསྶ ནཡསྶ ཀཐནཾ པཊིཉྙཱཏཾ, ཏཾ ཏཾ དསྶེནྟོ ཨཱཧ ‘‘ཙིཏྟཱནཾ བྷཱུམཱིསུཔྤཏྟི’’ནྟི. ཏཾ ཝཏྭཱ བྷཱུམཱིནཾ ཨཱདྷཱརཝསེན པསངྒཱགཏཾ གཏིབྷེདཾ, བྷཝབྷེདཉྩ དསྶེཏུཾ ‘‘དེཝཱ ཙེཝཱ’’ཏིཨཱདི ཝུཏྟཾ. ‘‘ཙཏསྶོཔཱཡབྷཱུམིཡོ’’ཏི ཝཏྭཱ ཨསུརགཏིཡཱ པེཏགཏིཡཾཡེཝ སངྒཧིཏཏྟཱ ‘‘གཏིཡོ པཉྩཱ’’ཏི ཝུཏྟནྟི ཝདནྟི. མཡཾ པན ‘‘ཏིསྶོཝཱཔཱཡབྷཱུམིཡོ’’ཏི པཱཋེན བྷཝིཏབྦནྟི མཉྙཱམ. ན ཧི ཨེས ཨནཱཀུལཝཙནོ ཨཱཙརིཡོ ཨཱིདིསཾ པུབྦཱཔརཝིརུདྡྷཾ ཝིཡ སམྨོཧཛནཀཾ ཝཙནཾ བྷཱསཏི. པཱལི༹ཡམྤི ཧི –

‘‘པཉྩ ཁོ ཨིམཱ, སཱརིཔུཏྟ, གཏིཡོ. ཀཏམཱ པཉྩ? ནིརཡོ ཏིརཙྪཱནཡོནི པེཏྟིཝིསཡོ མནུསྶཱ དེཝཱ’’ཏི (ཨ. ནི. ༩.༦༨) –

ཨེཝཾ ¶ ཏིཎྞམེཝ ཨཔཱཡཱནཾ ཝསེན ཝུཏྟཾ. ཀཱམརཱུཔཱརཱུཔཝསེན ཏཡོ བྷཝཱ. ཏཏྠཱཏི ཏེསུ ཏཱིསུ བྷཝེསུ. ཏིཾསེཝཱཏི ཙཏསྶོ ཨཔཱཡབྷཱུམིཡོ, སཏྟཝིདྷཱ ཀཱམསུགཏིབྷཱུམི, སོལ༹ས རཱུཔཱིབྲཧྨལོཀཱ, ཙཏསྶོ ཨརཱུཔབྷཱུམིཡོཏི ཨེཀཏིཾསབྷཱུམཱིནམནྟརེ ཙིཏྟཔྤཝཏྟིཨདྷིཀཱརཏྟཱ ཨསཉྙབྷཱུམིཾ ཨཔནེཏྭཱ ཨཝསེསཱ ཏིཾསེཝ བྷཱུམིཡོཏི ཨཏྠོ. ཏཱསུ ཏིཾསེཝ པུགྒལཱཏི ཏཱསུ བྷཱུམཱིསུ ཨུཔྤནྣཱ པུགྒལཱ བྷཱུམིགཎནཝསེན ཏིཾསེཝ ཧོནྟི. བྷཱུམིཝསེན ཏིཾསཝིདྷཱཔི པན པཊིསནྡྷིཙིཏྟགཎནཱཡ ཨེཀཱུནཝཱིསཏི ཧོནྟཱིཏི དསྶེནྟོ ཨཱཧ ‘‘བྷཱུམཱིསྭེཏཱསཱུ’’ཏིཨཱདི.

པཊིསནྡྷིཀཙིཏྟཱནནྟི དས ཀཱམཱཝཙརཔཊིསནྡྷིཙིཏྟཱནི, པཉྩ རཱུཔཱཝཙརཔཊིསནྡྷིཙིཏྟཱནི, ཙཏྟཱརི ཨརཱུཔཱཝཙརཔཊིསནྡྷིཙིཏྟཱནཱིཏི ཨིམེསཾ ཨེཀཱུནཝཱིསཏིཔཊིསནྡྷིཙིཏྟཱནཾ ཝསེན. ཨསཉྙཱིནམཙིཏྟཀཱཏི ཨསཉྙསཏྟཱནཾ ཨཙིཏྟཀཱ པཊིསནྡྷི. ཝུཏྟཉྷེཏཾ –

‘‘ཨསཉྙསཏྟཱ ¶ དེཝཱ ཨཧེཏུཀཱ ཨནཱཧཱརཀཱ ཨཕསྶཀཱ ཨཝེདནཀཱ ཨསཉྙཀཱ ཨཙེཏནཀཱ ཨཙིཏྟཀཱ པཱཏུབྷཝནྟཱི’’ཏི.

ཡདི པཊིསནྡྷིཝསེན ཝཱིསཏི པུགྒལཱ, ཀཐཾ བྷཱུམིཝསེན ཏིཾསཱཏི ཝུཏྟཱ. ཨེཀཏིཾསཱཏི ཧི ཝཏྟབྦནྟི ཨཱཧ ‘‘ཨིདྷཱ’’ཏིཨཱདི.

ན ཝིཛྫཏི ཧེཏུ ཨིམེསནྟི ཨཧེཏཱུ, དུཝེ, ཏཱིཎི ཙ ཧེཏཱུ ཨིམེསནྟི དྭིཏིཧེཏཱུ, པཊིསནྡྷིཝསེན ཨཧེཏུཀཱ, དུཧེཏུཀཱ, ཏིཧེཏུཀཱ ཙཱཏི ཨཏྠོ. ཏཏྠ ཨཧེཏུཀཱ ཨཱཔཱཡིཀཱ ཙ, ཨེཀཙྩེ བྷཱུམདེཝཱ, མནུསྶེསུ ཛཙྩནྡྷཛཙྩབདྷིརཛཙྩུམྨཏྟཀནཔུཾསཀཨུབྷཏོབྱཉྫནཀཱདཡོ ཙ. ཝུཏྟཱཝསེསཱ ཀཱམསུགཏིཝཱསིནོཝ དུཧེཏུཀཱ. ཏིཧེཏུཀཱ པན ཀཱམསུགཏིཝཱསིནོཝ. ཨརིཡཱ པན ཨཊྛཱཏི ཙཏུནྣཾ ཨརིཡམགྒསམངྒཱིནཾ, ཙཏུནྣཉྩ ཨརིཡཕལསམངྒཱིནཾ ཝསེན ཨཊྛ ཨརིཡཔུགྒལཱ ¶ . ནནུ ཙ ཨརིཡཱཔི ཏིཧེཏུཀཱཡེཝཱཏི? སཙྩཾ, ཙིཏྟུཔྤཱདཾ པན པཏྭཱ ཏེསཾ ཝིསེསསབྦྷཱཝཏོ ཝིསུཾཡེཝ ཨུདྡྷཊཱཏི དཊྛབྦཾ.

༡༨༩-༩༢. ‘‘བྷཱུམཱིསུཔྤཏྟིཾ བྷཎཏོ མེ ནིབོདྷཐཱ’’ཏི སུཏྭཱ ཙོདཀོ ‘‘ཏིཾསབྷཱུམཱིསཱུ’’ཏིཨཱདིནཱ སབྦེསཾ བྷཱུམཱིནཾ སཱདྷཱརཎཙིཏྟཱནི པུཙྪཏི, ཨིཏརོ ‘‘ཙུདྡསེཝཱ’’ཏི ཝིསྶཛྫེཏི. ཏཏྠ ཨཊྛ པརིཏྟཀུསལཱནི, ཙཏྟཱརི དིཊྛིཝིཔྤཡུཏྟཱནི, ཨུདྡྷཙྩསཧགཏཾ, མནོདྭཱརཱཝཛྫནཉྩཱཏི ཙུདྡསེཝ, ན ཨཱུནཱནི ནཱདྷིཀཱནི, སབྦཱསུ ཏིཾསབྷཱུམཱིསུ ཧོནྟི, སབྦབྷཱུམཱིནཾ སཱདྷཱརཎཱནཱིཏི ཨཏྠོ.

སདཱ…པེ… སིཡུནྟི དྭེ དོསམཱུལཱནི, ཀུསལཝིཔཱཀཙཀྑུསོཏཝིཉྙཱཎསམྤཊིཙྪནསནྟཱིརཎདྭཡཝཛྫིཏཱནི ཨཊྛཱརས ཀཱམཱཝཙརཝིཔཱཀཙིཏྟཱནཱིཏི ཝཱིསཏི ཙིཏྟཱནི སདཱ ཀཱམེཡེཝ བྷཝེ སིཡུཾ, ན ཀདཱཙི ཨཉྙཏྠ ཨུཔྤཛྫནྟཱིཏི ཨཏྠོ. ནནུ ཙ བྲཧྨཱུནམྤི ཨཀུསལཝིཔཱཀཱནི ཨུཔྤཛྫནྟཱིཏི? སཙྩཾ ཨུཔྤཛྫནྟི, ཏཱནི ཀཱམབྷཝེ ཨནིཊྛརཱུཔཱདཡོ ཨཱརབྦྷ ཨུཔྤཛྫནྟི བྲཧྨལོཀེ ཏེསཾ ཨབྷཱཝཏོཏི ཀཱམབྷཝེཡེཝ ནིཡམིཏཱནི. རཱུཔཱཝཙརཝིཔཱཀཙིཏྟཱནི པཉྩ རཱུཔཱཝཙརབྷཝེཡེཝ སིཡུཾ, ཙཏྟཱརོ ཙ ཨརཱུཔཱཝཙརཝིཔཱཀཱ ཨརཱུཔཱིསཱུཏི ཨཱཧ ‘‘པཉྩ རཱུཔབྷཝེ’’ཏིཨཱདི.

ཀཱམ ¶ …པེ… བྷཝནྟཱིཏི རཱུཔཱཝཙརཀུསལཀིརིཡཙིཏྟཱནི ཙེཝ ཀུསལཝིཔཱཀཱནི ཙ ཙཀྑུསོཏཝིཉྙཱཎསམྤཊིཙྪནསནྟཱིརཎཱནི ཝོཊྛབྦནཝཛྫཱནི ཙ དྭེ ཨཧེཏུཀཀིརིཡཙིཏྟཱནི པཋམམགྒཝིཉྙཱཎནྟི ཨཊྛཱརས ཙིཏྟཱནི ཀཱམརཱུཔབྷཝེཡེཝ བྷཝནྟི, ན ཨརཱུཔབྷཝེ. ཏཏྠ ཧི སབྦསོ རཱུཔསཉྙཱནཾ སམཏིཀྐནྟཏྟཱ རཱུཔཱཝཙརཀུསལཀིརིཡཱ ནུཔྤཛྫནྟི. ཙཀྑུཝིཉྙཱཎཱདཱིནི ཝཏྠུདྭཱརཝིརཧཏོ, ཧསིཏུཔྤཱདོ ཨེཀནྟཝཏྠུནིསྶཡཏྟཱ, སོཏཱཔཏྟིམགྒོ པརཏོགྷོསཔཙྩཡཱཡེཝ ནིབྦཏྟནཏོ ¶ ན ཨུཔྤཛྫཏི. དྭེཙཏྟཱལཱིསཱཏི ཨཊྛ པརིཏྟཀུསལཱནི, ཙཏྟཱརི ཨརཱུཔཀུསལཱནི, པཋམམགྒཝཛྫཱནི སཏྟ ལོཀུཏྟརཙིཏྟཱནི, པཊིགྷདྭཡཝཛྫིཏཱནི ཙ དས ཨཀུསལཙིཏྟཱནི, པུབྦེ ཝུཏྟཨཧེཏུཀཀིརིཡཱདྭཡཝཛྫིཏཱནི ནཝ ཀཱམཱཝཙརཀིརིཡཙིཏྟཱནི, ཙཏྟཱརི ཨརཱུཔཱཝཙརཀིརིཡཙིཏྟཱནཱིཏི ཨེཝཾ དྭེཙཏྟཱལཱིས ཙིཏྟཱནི ཏཱིསུ བྷཝེསུ ཧོནྟི.

༡༩༣-༢༠༤. ཨེཝཾ བྷཝཝསེན ཙིཏྟུཔྤཏྟིཾ དསྶེཏྭཱ ཨིདཱནི ཀཱལཝསེན དསྶེནྟོ ཨཱཧ ‘‘ཋཔེཏྭཱ པནཱ’’ཏིཨཱདི. སབྦཱསནྟི ནིདྡྷཱརཎཏྠེ སཱམིཝཙནཾ. ཨཊྛ མཧཱཀིརིཡཱ, ཨརཧཏྟམགྒཕལཙིཏྟཱནི, ཨནཱགཱམིཕལཾ, ནེཝསཉྙཱནཱསཉྙཱཡཏནཀུསལཀིརིཡཱཏི ཏེརསེཝ ཙིཏྟཱནི ཨཔཱཡརཧིཏཱསུ ཚབྦཱིསབྷཱུམཱིསུ ཧོནྟི ཨཔཱཡེསུ ཝིཔཱཀཱཝརཎསབྦྷཱཝེ ཨེཏེསཾ ཨནུཔྤཛྫནཏོ. ཨཔརཱནི ཚ ཙིཏྟཱནཱིཏི སམྦནྡྷོ. ཏཱནི པན རཱུཔབྷཝསཱདྷཱརཎཱནཾ པཉྩཔརིཏྟཝིཔཱཀཱནཾ, ཀིརིཡམནོདྷཱཏུཡཱ ཙ ཝསེན ཝེདིཏབྦཱནི.

པཉྩ ཙིཏྟཱནཱིཏི དིཊྛིསམྤཡུཏྟཝིཙིཀིཙྪཱཝསེན པཉྩ ཙིཏྟཱནི. ཏཱནི ཧི པཉྩསུ སུདྡྷཱཝཱསབྷཱུམཱིསུ ན ལབྦྷནྟི. ཏཏྠ ཨནཱགཱམིཁཱིཎཱསཝཱནམེཝ ཨདྷིཝུཏྠཏྟཱ, ཏེསཉྩ པཋམམགྒེནེཝ ཨིམེསཾ པཉྩནྣཾ ཝིཉྙཱཎཱནཾ ཨནུཔྤཱདདྷམྨཏཾ ཨཱཔཱདིཏཏྟཱ.

ཨཔརཱནི དུཝེཏི ཏཏིཡཱརུཔྤཀུསལཀིརིཡཙིཏྟཱནི. ཏཱནི ཧི ནེཝསཉྙཱནཱསཉྙཱཡཏནེསུ ཨཏིཀྐནྟཱརམྨཎཏྟཱ, ཨཔཱཡེསུ ཙ ཨཧེཏུཀཔཊིསནྡྷིཀཏྟཱ ནུཔྤཛྫནྟི. ཙཏུཝཱིསཏཱིབྷཱུམིསུ དྭེ ཙཱཏི ཝིཉྙཱཎཉྩཱཡཏནཀུསལཀིརིཡཱཝསེན དྭེ ཙིཏྟཱནི. ཏེཝཱིསབྷཱུམིསུ དྭེཡེཝཱཏི ཨཱཀཱསཱནཉྩཱཡཏནཀུསལཀིརིཡཙིཏྟཱནི.

ཨེཀཱདསཝིདྷནྟི རཱུཔཱཝཙརཀུསལཀིརིཡཱ ཧསིཏུཔྤཱདོཏི ཨེཀཱདས. སོཏཱཔཏྟིཕལཾ ཡཱཝ ཨནཱགཱམིམགྒོ ཙཏྟཱརི ཙ ཙིཏྟཱནི སུདྡྷཱཝཱསཨཔཱཡཝཛྫཱསུ ཨེཀཝཱིསཏིབྷཱུམཱིསུ བྷཝནྟི. ཨེཀཾ ¶ ¶ སོཏཱཔཏྟིམགྒཙིཏྟཾ སུདྡྷཱཝཱསཨཔཱཡཨརཱུཔབྷཱུམིཝཛྫེསུ སཏྟརསསུ བྷཱུམཱིསུ ཛཱཡཏི. དྭེ དོསམཱུལཱནི, ཀུསལཝིཔཱཀགྷཱནཛིཝ྄ཧཱཀཱཡཝིཉྙཱཎཱནི, སཏྟ ཨཀུསལཝིཔཱཀཱཏི དྭཱདས ཙིཏྟཱནི མཧགྒཏབྷཱུམིཝཛྫཱསུ ཨེཀཱདསསུ ཀཱམབྷཱུམཱིསུ ཛཱཡནྟི. ཨཊྛ མཧཱཝིཔཱཀཙིཏྟཱནི ཀཱམཱཝཙརདེཝམནུསྶཝསེན སཏྟབྷཱུམཱིསུ ཛཱཡནྟི. ཚསུ བྷཱུམིསཱུཏི ཝེཧཔྥལསུདྡྷཱཝཱསསངྑཱཏཱསུ ཚསུ པཉྩམཛ྄ཛྷཱནབྷཱུམཱིསུ.

ཙཏྟཱརི…པེ… བྷཱུམིསཱུཏི ཙཏུཏྠཛ྄ཛྷཱནཝིཔཱཀོ པརིཏྟསུབྷཨཔྤམཱཎསུབྷསུབྷཀིཎྷཝསེན ཏཱིསུ བྷཱུམཱིསུ ཛཱཡཏི, དུཏིཡཛ྄ཛྷཱནཝིཔཱཀོ, ཏཏིཡཛ྄ཛྷཱནཝིཔཱཀོ ཙ པརིཏྟཱབྷཱཨཔྤམཱཎཱབྷཱཨཱབྷསྶརཝསེན ཏཱིསུ བྷཱུམཱིསུ, པཋམཛ྄ཛྷཱནཝིཔཱཀོ བྲཧྨཔཱརིསཛྫབྲཧྨཔུརོཧིཏམཧཱབྲཧྨཱཝསེན ཏཱིསུ བྷཱུམཱིསུ ཧོཏཱིཏི ཨེཝཾ ཙཏྟཱརི ཙིཏྟཱནི ཨེཀེཀཝསེན ཏཱིསུ ཏཱིསུ བྷཱུམཱིསུ ཛཱཡནྟི.

༢༠༦-༩. ཨེཝཾ ཨེཏྟཀཱནེཝ ཙིཏྟཱནི ཨེཏྟཀཱསུ བྷཱུམཱིསུ ཨུཔྤཛྫནྟཱིཏི ཙིཏྟནིཡམཝསེན ཨུཔྤཏྟིཾ དསྶེཏྭཱ ཨིདཱནི ཨེཏྟཀཱསུ ཨེཝ བྷཱུམཱིསུ ཨེཏྟཀཱནེཝ ཙིཏྟཱནི ཨུཔྤཛྫནྟཱིཏི བྷཱུམིནིཡམཝསེན དསྶེཏུཾ ‘‘ཀུསལཱཀུསལཱ ཀཱམེ’’ཏིཨཱདི ཨཱརདྡྷཾ. ཏཏྠ ཀཱམེ ཀུསལཱཀུསལཱ ཝཱིསཏི, ཏེསཾ པནྣརས ཨཧེཏུཀཱ པཱཀཱ, ཨཱཝཛྫནདྭཡཉྩཱཏི སཏྟཏིཾསེཝ མཱནསཱ ནརཀཱདཱིསུ ཙཏཱུསུཔི ཨཔཱཡེསུ ཛཱཡརེ. ཨཝསེསཱནི པན སཏྟརས ཀཱམཱཝཙརཝིཔཱཀཀིརིཡཙིཏྟཱནི, པཉྩཏིཾས མཧགྒཏལོཀུཏྟརཱནཱིཏི དྭེཔཉྙཱས མཱནསཱ ཀདཱཙིཔི ཏེསུ ནུཔྤཛྫནྟི ཨབྷཱུམིབྷཱཝཏོཏི ཨཏྠོ.

ཨསཱིཏི ཧདཡཱཏི ཝུཏྟཱཝསེསཱནི ཨསཱིཏི ཙིཏྟཱནི. གྷཱནཱདིཝིཉྙཱཎཏྟཡནྟི ཀུསལཝིཔཱཀགྷཱནཱདིཝིཉྙཱཎཏྟཡཾ. ‘‘ཨཔུཉྙཛཱ པཱཀཱ’’ཏི ཨཀུསལཝིཔཱཀཱནཾ སབྦེསམེཝ གཧིཏཏྟཱ གྷཱནཱདིཝིཉྙཱཎཏྟཡཾ ཨགྒཧིཏཝིསེསམྤི པཱརིསེསཉཱཡེན ཀུསལཝིཔཱཀམེཝ ཝིཉྙཱཡཏི.

༢༡༣. དོམནསྶནྟི ¶ དོམནསྶསཧགཏཾ. ཀྲིཡཱ ཙ དྭེཏི ཝོཊྛབྦནཝཛྫིཏཱ དྭེ ཨཧེཏུཀཀིརིཡཱ.

༢༡༤. བྷཱུམིཝསེནེཝཱཏི པུགྒལེ ཨནཱམསིཏྭཱ ཀེཝལཾ བྷཱུམིཝསེན. པུགྒལཱནཾ ཝསེན ཙ བྷཱུམིཝསེན ཙ ཙིཏྟུཔྤཏྟིཾ ཝིབྷཱཝཡེཏི སམྦནྡྷོ.

༢༡༦-༨. པཉྩབྷཱུམིསཱུཏི ¶ ཙཏུརཱཔཱཡམནུསྶཝསེན པཉྩབྷཱུམཱིསུ. ཨཧེཏུཀཱནཾ པཊིསནྡྷིསདིསཏདཱརམྨཎཝསེན ‘‘སཏྟཏིཾསེཝཱ’’ཏི ཝུཏྟཾ, ཨཉྙཀམྨེན པན དྭིཧེཏུཀཏདཱརམྨཎསྶཱཔི སམྦྷཝཏོ ཨེཀཙཏྟཱལཱིས ཧོནྟི. ཨཱཙརིཡཛོཏིཔཱལཏྠེརསྶ ཨདྷིཔྤཱཡེན ཏིཧེཏུཀཝིཔཱཀེཧིཔི སདྡྷིཾ པཉྩཙཏྟཱལཱིསེཝཱཏི དཊྛབྦཾ. ཨཧེཏུཀསྶ ཝུཏྟེཧཱིཏི ཨཧེཏུཀསཏྟསྶ ཝུཏྟེཧི སཏྟཏིཾསམཱནསེཧི སཧ. ནཝ ཀྲིཡཱཏི ཨཊྛ མཧཱཀིརིཡཱ, ཧསིཏུཔྤཱདོ ཙཱཏི ཨིམཱནི ཨསཱདྷཱརཎཀིརིཡཙིཏྟཱནི ནཝ.

༢༢༠-༡. ‘‘ཙཏུཔཉྙཱས མཱནསཱ’’ཏི ཝཏྭཱ ཏེསཾ སརཱུཔཏོ དསྶནཏྠཾ ཨཱཧ ‘‘དྭིཧེཏུཀསྶཱ’’ཏིཨཱདི. པུན ‘‘ཙཏུཔཉྙཱསཱ’’ཏིཨཱདི པན ནིགམནཾ.

༢༢༣-༤. པཉྙཱསེཝསྶ ཙིཏྟཱནཱིཏི ཏིཧེཏུཀསྶ པུཐུཛྫནསྶ ཝུཏྟཙཏུཔཉྙཱསཙིཏྟེསུ དིཊྛིཝིཙིཀིཙྪཱསཧགཏཝཛྫཱནི ཨེཀཱུནཔཉྙཱས, སོཏཱཔཏྟིཕལནྟི ཨིམཱནི པཉྙཱསེཝ ཙིཏྟཱནི ཨསྶ ཀཱམཱཝཙརསྶ སོཏཱཔནྣདེཧིནོ ཛཱཡནྟེ. ནཝཏིཾསེཝཱཏི ཨེཀཱུནཙཏྟཱལཱིསཙིཏྟཱནི. པཋམཾ ཕལནྟི སོཏཱཔཏྟིཕལཾ.

༢༢༥-༨. དུཏིཡཉྩ ཕལཾ ཧིཏྭཱཏི སཀདཱགཱམིཕལཾ ཧིཏྭཱ. ཙ-སདྡེན སོཏཱཔཏྟིཕལཉྩ ཧིཏྭཱཏི ཨཏྠོ. ཨཏྟནོ ཕལེན ¶ སཧ ཡཱནི ཨཊྛཙཏྟཱལཱིས ཙིཏྟཱནི, ཏཱནི ཨནཱགཱམིསྶ སཏྟསྶ ཛཱཡནྟི. ཙཏྟཱལཱིསཉྩ ཙཏྟཱརཱིཏི ཏེཝཱིསཏི ཀཱམཱཝཙརཝིཔཱཀཙིཏྟཱནི, ཝཱིསཏི ཀིརིཡཙིཏྟཱནི, ཨརཧཏྟཕལཉྩཱཏི ཙཏུཙཏྟཱལཱིས ཙིཏྟཱནི. སཀཾ སཀནྟི ‘‘སོཏཱཔནྣསྶ སོཏཱཔཏྟིམགྒཙིཏྟཾ, སཀདཱགཱམིནོ སཀདཱགཱམིམགྒཙིཏྟ’’ནྟིཨཱདིནཱ ཨཏྟནོ ཨཏྟནོ མགྒཙིཏྟཾ. ཀསྨཱ པན ཏེསཾ ཨེཀེཀམེཝ ཙིཏྟཾ ཧོཏཱིཏི ཨཱཧ ‘‘ཨེཀཙིཏྟཀྑཎཱཧི ཏེ’’ཏི. པཉྩཏིཾསེཝཱཏི སཏྟརས ཀཱམརཱུཔཱརཱུཔཀུསལཙིཏྟཱནི, པཊིགྷདྭཡཝཛྫཱནི དས ཨཀུསལཱནི, རཱུཔབྷཝེ ལབྦྷམཱནཀཱནི པཉྩ ཨཧེཏུཀཝིཔཱཀཱནི, ཨཱཝཛྫནདྭཡཾ, པཋམཛ྄ཛྷཱནཝིཔཱཀོ ཙཱཏི པཉྩཏིཾས ཙིཏྟཱནི ཏཱིསུ པཋམཛ྄ཛྷཱནབྷཱུམཱིསུ པུཐུཛྫནསྶ ཛཱཡནྟི.

༢༣༢-༥. ཧིཏྭཱ ཙཱཏི ཨེཏྠ ཙ-སདྡེན པཋམཕལསྶ གཧཎཾ དསྶེཏི. ཏེན ཨཔུཉྙཔཉྩཀཾ ཧིཏྭཱ པཋམཾ ཕལཾ གཧེཏྭཱ ཙཱཏི ཨཏྠོ. ཨཔུཉྙཔཉྩཀནྟི དིཊྛིསམྤཡུཏྟཝིཙིཀིཙྪཱསཧགཏཝསེན ¶ པཉྩ ཨཀུསལཙིཏྟཱནི. ཏཏྠཱཏི ཏེསུ སོཏཱཔནྣསྶ ཝུཏྟེསུ. ཏཏྠེཝཱཏི སཀདཱགཱམིསྶ ཝུཏྟེསུ. པུཉྙཛཾ སམྤཊིཙྪནཾ སནྟཱིརཎདྭཡཉྩེཝཱཏི སམྦནྡྷོ.

༢༣༧. ཨེཝཾ པཋམཛ྄ཛྷཱནབྷཱུམིཡཾ པུཐུཛྫནསོཏཱཔནྣཱདིཝསེན ཙིཏྟསམྦྷཝཾ དསྶེཏྭཱ ཨིདཱནི ཏེསམེཝ ཝསེན དུཏིཡཛ྄ཛྷཱནབྷཱུམིཡཾ དསྶེཏུཾ ‘‘པུཐུཛྫནསྶཱ’’ཏིཨཱདི ཨཱརདྡྷཾ. དུཏིཡཛ྄ཛྷཱནཏཏིཡཛ྄ཛྷཱནཝིཔཱཀཱནཾ ཨེཀསཏྟསྶེཝ ཨསམྦྷཝེཔི དུཏིཡཛ྄ཛྷཱནཏལེ ནིབྦཏྟེ པུཐུཛྫནཱདཡོ པུཐུཛྫནཱདིབྷཱཝསཱམཉྙེན ཨེཀཏོ གཧེཏྭཱ ‘‘དུཏིཡཛ྄ཛྷཱནཏཏིཡཛ྄ཛྷཱནཔཱཀཏོ’’ཏི ཝུཏྟཾ.