📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཝིསུདྡྷིམགྒོ

(དུཏིཡོ བྷཱགོ)

༡༢. ཨིདྡྷིཝིདྷནིདྡེསོ

ཨབྷིཉྙཱཀཐཱ

༣༦༥. ཨིདཱནི ¶ ¶ ཡཱསཾ ལོཀིཀཱབྷིཉྙཱནཾ ཝསེན ཨཡཾ སམཱདྷིབྷཱཝནཱ ཨབྷིཉྙཱནིསཾསཱཏི ཝུཏྟཱ, ཏཱ ཨབྷིཉྙཱ སམྤཱདེཏུཾ ཡསྨཱ པཐཝཱིཀསིཎཱདཱིསུ ཨདྷིགཏཙཏུཏྠཛ྄ཛྷཱནེན ཡོགིནཱ ཡོགོ ཀཱཏབྦོ. ཨེཝཉྷིསྶ སཱ སམཱདྷིབྷཱཝནཱ ཨདྷིགཏཱནིསཾསཱ ཙེཝ བྷཝིསྶཏི ཐིརཏརཱ ཙ, སོ ཨདྷིགཏཱནིསཾསཱཡ ཐིརཏརཱཡ སམཱདྷིབྷཱཝནཱཡ སམནྣཱགཏོ སུཁེནེཝ པཉྙཱབྷཱཝནཾ སམྤཱདེསྶཏི. ཏསྨཱ ཨབྷིཉྙཱཀཐཾ ཏཱཝ ཨཱརབྷིསྶཱམ.

བྷགཝཏཱ ཧི ཨདྷིགཏཙཏུཏྠཛ྄ཛྷཱནསམཱདྷཱིནཾ ཀུལཔུཏྟཱནཾ སམཱདྷིབྷཱཝནཱནིསཾསདསྶནཏྠཉྩེཝ ཨུཏྟརུཏྟརི པཎཱིཏཔཎཱིཏདྷམྨདེསནཏྠཉྩ ¶ ‘‘སོ ཨེཝཾ སམཱཧིཏེ ཙིཏྟེ པརིསུདྡྷེ པརིཡོདཱཏེ ཨནངྒཎེ ཝིགཏཱུཔཀྐིལེསེ མུདུབྷཱུཏེ ཀམྨནིཡེ ཋིཏེ ཨཱནེཉྫཔྤཏྟེ ཨིདྡྷིཝིདྷཱཡ ཙིཏྟཾ ཨབྷིནཱིཧརཏི ཨབྷིནིནྣཱམེཏི. སོ ཨནེཀཝིཧིཏཾ ཨིདྡྷིཝིདྷཾ པཙྩནུབྷོཏི ཨེཀོཔི ཧུཏྭཱ བཧུདྷཱ ཧོཏཱི’’ཏིཨཱདིནཱ (དཱི. ནི. ༡.༢༣༨) ནཡེན ཨིདྡྷིཝིདྷཾ, དིབྦསོཏདྷཱཏུཉཱཎཾ, ཙེཏོཔརིཡཉཱཎཾ, པུབྦེནིཝཱསཱནུསྶཏིཉཱཎཾ, སཏྟཱནཾ ཙུཏཱུཔཔཱཏེ ཉཱཎནྟི པཉྩ ལོཀིཀཱབྷིཉྙཱ ཝུཏྟཱ.

ཏཏྠ ¶ ཨེཀོཔི ཧུཏྭཱ བཧུདྷཱ ཧོཏཱིཏིཨཱདིཀཾ ཨིདྡྷིཝིཀུབྦནཾ ཀཱཏུཀཱམེན ཨཱདིཀམྨིཀེན ཡོགིནཱ ཨོདཱཏཀསིཎཔརིཡནྟེསུ ཨཊྛསུ ཀསིཎེསུ ཨཊྛ ཨཊྛ སམཱཔཏྟིཡོ ནིབྦཏྟེཏྭཱ –

ཀསིཎཱནུལོམཏོ, ཀསིཎཔཊིལོམཏོ, ཀསིཎཱནུལོམཔཊིལོམཏོ, ཛྷཱནཱནུལོམཏོ, ཛྷཱནཔཊིལོམཏོ, ཛྷཱནཱནུལོམཔཊིལོམཏོ, ཛྷཱནུཀྐནྟིཀཏོ, ཀསིཎུཀྐནྟིཀཏོ, ཛྷཱནཀསིཎུཀྐནྟིཀཏོ, ཨངྒསངྐནྟིཏོ, ཨཱརམྨཎསངྐནྟིཏོ, ཨངྒཱརམྨཎསངྐནྟིཏོ, ཨངྒཝཝཏྠཱཔནཏོ, ཨཱརམྨཎཝཝཏྠཱཔནཏོཏི.

ཨིམེཧི ཙུདྡསཧི ཨཱཀཱརེཧི ཙིཏྟཾ པརིདམེཏབྦཾ.

༣༦༦. ཀཏམཾ པནེཏྠ ཀསིཎཱནུལོམཾ…པེ… ཀཏམཾ ཨཱརམྨཎཝཝཏྠཱཔནནྟི. ཨིདྷ བྷིཀྑུ པཐཝཱིཀསིཎེ ཛྷཱནཾ སམཱཔཛྫཏི, ཏཏོ ཨཱཔོཀསིཎེཏི ཨེཝཾ པཊིཔཱཊིཡཱ ཨཊྛསུ ཀསིཎེསུ སཏཀྑཏྟུམྤི སཧསྶཀྑཏྟུམྤི སམཱཔཛྫཏི, ཨིདཾ ཀསིཎཱནུལོམཾ ནཱམ.

ཨོདཱཏཀསིཎཏོ པན པཊྛཱཡ ཏཐེཝ པཊིལོམཀྐམེན སམཱཔཛྫནཾ ཀསིཎཔཊིལོམཾ ནཱམ.

པཐཝཱིཀསིཎཏོ པཊྛཱཡ ཡཱཝ ཨོདཱཏཀསིཎཾ, ཨོདཱཏཀསིཎཏོཔི པཊྛཱཡ ཡཱཝ པཐཝཱིཀསིཎནྟི ཨེཝཾ ཨནུལོམཔཊིལོམཝསེན པུནཔྤུནཾ སམཱཔཛྫནཾ ཀསིཎཱནུལོམཔཊིལོམཾ ནཱམ.

པཋམཛ྄ཛྷཱནཏོ པན པཊྛཱཡ པཊིཔཱཊིཡཱ ཡཱཝ ནེཝསཉྙཱནཱསཉྙཱཡཏནཾ, ཏཱཝ པུནཔྤུནཾ སམཱཔཛྫནཾ ཛྷཱནཱནུལོམཾ ནཱམ.

ནེཝསཉྙཱནཱསཉྙཱཡཏནཏོ ¶ པཊྛཱཡ ཡཱཝ པཋམཛ྄ཛྷཱནཾ, ཏཱཝ པུནཔྤུནཾ སམཱཔཛྫནཾ ཛྷཱནཔཊིལོམཾ ནཱམ.

པཋམཛ྄ཛྷཱནཏོ པཊྛཱཡ ཡཱཝ ནེཝསཉྙཱནཱསཉྙཱཡཏནཾ, ནེཝསཉྙཱནཱསཉྙཱཡཏནཏོ པཊྛཱཡ ཡཱཝ པཋམཛ྄ཛྷཱནནྟི ཨེཝཾ ཨནུལོམཔཊིལོམཝསེན པུནཔྤུནཾ སམཱཔཛྫནཾ ཛྷཱནཱནུལོམཔཊིལོམཾ ནཱམ.

པཐཝཱིཀསིཎེ པན པཋམཾ ཛྷཱནཾ སམཱཔཛྫིཏྭཱ ཏཏྠེཝ ཏཏིཡཾ སམཱཔཛྫཏི, ཏཏོ ཏདེཝ ཨུགྒྷཱཊེཏྭཱ ཨཱཀཱསཱནཉྩཱཡཏནཾ, ཏཏོ ཨཱཀིཉྩཉྙཱཡཏནནྟི ¶ ཨེཝཾ ཀསིཎཾ ཨནུཀྐམིཏྭཱ ཛྷཱནསྶེཝ ཨེཀནྟརིཀབྷཱཝེན ཨུཀྐམནཾ ཛྷཱནུཀྐནྟིཀཾ ནཱམ. ཨེཝཾ ཨཱཔོཀསིཎཱདིམཱུལིཀཱཔི ཡོཛནཱ ཀཱཏབྦཱ.

པཐཝཱིཀསིཎེ པཋམཾ ཛྷཱནཾ སམཱཔཛྫིཏྭཱ པུན ཏདེཝ ཏེཛོཀསིཎེ, ཏཏོ ནཱིལཀསིཎེ, ཏཏོ ལོཧིཏཀསིཎེཏི ཨིམིནཱ ནཡེན ཛྷཱནཾ ཨནུཀྐམིཏྭཱ ཀསིཎསྶེཝ ཨེཀནྟརིཀབྷཱཝེན ཨུཀྐམནཾ ཀསིཎུཀྐནྟིཀཾ ནཱམ.

པཐཝཱིཀསིཎེ པཋམཾ ཛྷཱནཾ སམཱཔཛྫིཏྭཱ ཏཏོ ཏེཛོཀསིཎེ ཏཏིཡཾ, ནཱིལཀསིཎཾ ཨུགྒྷཱཊེཏྭཱ ཨཱཀཱསཱནཉྩཱཡཏནཾ, ལོཧིཏཀསིཎཏོ ཨཱཀིཉྩཉྙཱཡཏནནྟི ཨིམིནཱ ནཡེན ཛྷཱནསྶ ཙེཝ ཀསིཎསྶ ཙ ཨུཀྐམནཾ ཛྷཱནཀསིཎུཀྐནྟིཀཾ ནཱམ.

པཐཝཱིཀསིཎེ པན པཋམཾ ཛྷཱནཾ སམཱཔཛྫིཏྭཱ ཏཏྠེཝ ཨིཏརེསམྤི སམཱཔཛྫནཾ ཨངྒསངྐནྟིཀཾ ནཱམ.

པཐཝཱིཀསིཎེ པཋམཾ ཛྷཱནཾ སམཱཔཛྫིཏྭཱ ཏདེཝ ཨཱཔོཀསིཎེ…པེ… ཏདེཝ ཨོདཱཏཀསིཎེཏི ཨེཝཾ སབྦཀསིཎེསུ ཨེཀསྶེཝ ཛྷཱནསྶ སམཱཔཛྫནཾ ཨཱརམྨཎསངྐནྟིཀཾ ནཱམ.

པཐཝཱིཀསིཎེ པཋམཾ ཛྷཱནཾ སམཱཔཛྫིཏྭཱ ཨཱཔོཀསིཎེ དུཏིཡཾ, ཏེཛོཀསིཎེ ཏཏིཡཾ, ཝཱཡོཀསིཎེ ཙཏུཏྠཾ, ནཱིལཀསིཎཾ ཨུགྒྷཱཊེཏྭཱ ཨཱཀཱསཱནཉྩཱཡཏནཾ, པཱིཏཀསིཎཏོ ཝིཉྙཱཎཉྩཱཡཏནཾ ¶ , ལོཧིཏཀསིཎཏོ ཨཱཀིཉྩཉྙཱཡཏནཾ, ཨོདཱཏཀསིཎཏོ ནེཝསཉྙཱནཱསཉྙཱཡཏནནྟི ཨེཝཾ ཨེཀནྟརིཀཝསེན ཨངྒཱནཉྩ ཨཱརམྨཎཱནཉྩ སངྐམནཾ ཨངྒཱརམྨཎསངྐནྟིཀཾ ནཱམ.

པཋམཾ ཛྷཱནཾ པན པཉྩངྒིཀནྟི ཝཝཏྠཔེཏྭཱ དུཏིཡཾ ཏིཝངྒིཀཾ, ཏཏིཡཾ དུཝངྒིཀཾ, ཏཐཱ ཙཏུཏྠཾ ཨཱཀཱསཱནཉྩཱཡཏནཾ…པེ… ནེཝསཉྙཱནཱསཉྙཱཡཏནནྟི ཨེཝཾ ཛྷཱནངྒམཏྟསྶེཝ ཝཝཏྠཱཔནཾ ཨངྒཝཝཏྠཱཔནཾ ནཱམ.

ཏཐཱ ཨིདཾ པཐཝཱིཀསིཎནྟི ཝཝཏྠཔེཏྭཱ ཨིདཾ ཨཱཔོཀསིཎཾ…པེ… ཨིདཾ ཨོདཱཏཀསིཎནྟི ཨེཝཾ ཨཱརམྨཎམཏྟསྶེཝ ཝཝཏྠཱཔནཾ ཨཱརམྨཎཝཝཏྠཱཔནཾ ནཱམ ¶ . ཨངྒཱརམྨཎཝཝཏྠཱཔནམྤི ཨེཀེ ཨིཙྪནྟི. ཨཊྛཀཐཱསུ པན ཨནཱགཏཏྟཱ ཨདྡྷཱ ཏཾ བྷཱཝནཱམུཁཾ ན ཧོཏི.

༣༦༧. ཨིམེཧི པན ཙུདྡསཧི ཨཱཀཱརེཧི ཙིཏྟཾ ཨཔརིདམེཏྭཱ པུབྦེ ཨབྷཱཝིཏབྷཱཝནོ ཨཱདིཀམྨིཀོ ཡོགཱཝཙརོ ཨིདྡྷིཝིཀུབྦནཾ སམྤཱདེསྶཏཱིཏི ནེཏཾ ཋཱནཾ ཝིཛྫཏི. ཨཱདིཀམྨིཀསྶ ཧི ཀསིཎཔརིཀམྨམྤི བྷཱརོ, སཏེསུ སཧསྶེསུ ཝཱ ཨེཀོཝ སཀྐོཏི. ཀཏཀསིཎཔརིཀམྨསྶ ནིམིཏྟུཔྤཱདནཾ བྷཱརོ, སཏེསུ སཧསྶེསུ ཝཱ ཨེཀོཝ སཀྐོཏི. ཨུཔྤནྣེ ནིམིཏྟེ ཏཾ ཝཌྜྷེཏྭཱ ཨཔྤནཱདྷིགམོ བྷཱརོ, སཏེསུ སཧསྶེསུ ཝཱ ཨེཀོཝ སཀྐོཏི. ཨདྷིགཏཔྤནསྶ ཙུདྡསཧཱཀཱརེཧི ཙིཏྟཔརིདམནཾ བྷཱརོ, སཏེསུ སཧསྶེསུ ཝཱ ཨེཀོཝ སཀྐོཏི. ཙུདྡསཧཱཀཱརེཧི པརིདམིཏཙིཏྟསྶཱཔི ཨིདྡྷིཝིཀུབྦནཾ ནཱམ བྷཱརོ, སཏེསུ སཧསྶེསུ ཝཱ ཨེཀོཝ སཀྐོཏི. ཝིཀུབྦནཔྤཏྟསྶཱཔི ཁིཔྤནིསནྟིབྷཱཝོ ནཱམ བྷཱརོ, སཏེསུ སཧསྶེསུ ཝཱ ཨེཀོཝ ཁིཔྤནིསནྟཱི ཧོཏི. ཐེརམྦཏྠལེ མཧཱརོཧཎགུཏྟཏྠེརསྶ གིལཱནུཔཊྛཱནཾ ཨཱགཏེསུ ཏིཾསམཏྟེསུ ཨིདྡྷིམནྟསཧསྶེསུ ཨུཔསམྤདཱཡ ཨཊྛཝསྶིཀོ རཀྑིཏཏྠེརོ ཝིཡ. ཏསྶཱནུབྷཱཝོ པཐཝཱིཀསིཎནིདྡེསེ (ཝིསུདྡྷི. ༡.༧༨ ཨཱདཡོ) ཝུཏྟོཡེཝ. ཏཾ པནསྶཱནུབྷཱཝཾ དིསྭཱ ཐེརོ ཨཱཧ ‘‘ཨཱཝུསོ, སཙེ རཀྑིཏོ ནཱབྷཝིསྶ སབྦེ གརཧཔྤཏྟཱ ཨསྶཱམ ‘ནཱགརཱཛཱནཾ རཀྑིཏུཾ ནཱསཀྑིཾསཱུ’ཏི. ཏསྨཱ ཨཏྟནཱ གཧེཏྭཱ ཝིཙརིཏབྦཾ ཨཱཝུདྷཾ ནཱམ མལཾ སོདྷེཏྭཱཝ གཧེཏྭཱ ཝིཙརིཏུཾ ཝཊྚཏཱི’’ཏི. ཏེ ཐེརསྶ ཨོཝཱདེ ཋཏྭཱ ཏིཾསསཧསྶཱཔི བྷིཀྑཱུ ཁིཔྤནིསནྟིནོ ཨཧེསུཾ.

ཁིཔྤནིསནྟིཡཱཔི ¶ ཙ སཏི པརསྶ པཏིཊྛཱབྷཱཝོ བྷཱརོ, སཏེསུ སཧསྶེསུ ཝཱ ཨེཀོཝ ཧོཏི, གིརིབྷཎྜཝཱཧནཔཱུཛཱཡ མཱརེན ཨངྒཱརཝསྶེ པཝཏྟིཏེ ཨཱཀཱསེ པཐཝིཾ མཱཔེཏྭཱ ཨངྒཱརཝསྶཔརིཏྟཱརཀོ ཐེརོ ཝིཡ.

བལཝཔུབྦཡོགཱནཾ པན བུདྡྷཔཙྩེཀབུདྡྷཨགྒསཱཝཀཱདཱིནཾ ཝིནཱཔི ཨིམིནཱ ཝུཏྟཔྤཀཱརེན བྷཱཝནཱནུཀྐམེན ཨརཧཏྟཔཊིལཱབྷེནེཝ ཨིདཉྩ ཨིདྡྷིཝིཀུབྦནཾ ཨཉྙེ ¶ ཙ པཊིསམྦྷིདཱདིབྷེདཱ གུཎཱ ཨིཛ྄ཛྷནྟི. ཏསྨཱ ཡཐཱ པིལ༹ནྡྷནཝིཀཏིཾ ཀཏྟུཀཱམོ སུཝཎྞཀཱརོ ཨགྒིདྷམནཱདཱིཧི སུཝཎྞཾ མུདུཾ ཀམྨཉྙཾ ཀཏྭཱཝ ཀརོཏི, ཡཐཱ ཙ བྷཱཛནཝིཀཏིཾ ཀཏྟུཀཱམོ ཀུམྦྷཀཱརོ མཏྟིཀཾ སུཔརིམདྡིཏཾ མུདུཾ ཀཏྭཱ ཀརོཏི, ཨེཝམེཝ ཨཱདིཀམྨིཀེན ཨིམེཧི ཙུདྡསཧཱཀཱརེཧི ཙིཏྟཾ པརིདམེཏྭཱ ཚནྡསཱིསཙིཏྟསཱིསཝཱིརིཡསཱིསཝཱིམཾསཱསཱིསསམཱཔཛྫནཝསེན ཙེཝ ཨཱཝཛྫནཱདིཝསཱིབྷཱཝཝསེན ཙ མུདུཾ ཀམྨཉྙཾ ཀཏྭཱ ཨིདྡྷིཝིདྷཱཡ ཡོགོ ཀརཎཱིཡོ. པུབྦཧེཏུསམྤནྣེན པན ཀསིཎེསུ ཙཏུཏྠཛ྄ཛྷཱནམཏྟེ ཙིཎྞཝསིནཱཔི ཀཱཏུཾ ཝཊྚཏི. ཡཐཱ པནེཏྠ ཡོགོ ཀཱཏབྦོ, ཏཾ ཝིདྷིཾ དསྶེནྟོ བྷགཝཱ ‘‘སོ ཨེཝཾ སམཱཧིཏེ ཙིཏྟེ’’ཏིཨཱདིམཱཧ.

༣༦༨. ཏཏྲཱཡཾ པཱལི༹ནཡཱནུསཱརེནེཝ ཝིནིཙྪཡཀཐཱ. ཏཏྠ སོཏི སོ ཨདྷིགཏཙཏུཏྠཛ྄ཛྷཱནོ ཡོགཱི. ཨེཝནྟི ཙཏུཏྠཛ྄ཛྷཱནཀྐམནིདསྶནམེཏཾ. ཨིམིནཱ པཋམཛ྄ཛྷཱནཱདྷིགམཱདིནཱ ཀམེན ཙཏུཏྠཛ྄ཛྷཱནཾ པཊིལབྷིཏྭཱཏི ཝུཏྟཾ ཧོཏི. སམཱཧིཏེཏི ཨིམིནཱ ཙཏུཏྠཛ྄ཛྷཱནསམཱདྷིནཱ སམཱཧིཏེ. ཙིཏྟེཏི རཱུཔཱཝཙརཙིཏྟེ. པརིསུདྡྷེཏིཨཱདཱིསུ པན ཨུཔེཀྑཱསཏིཔཱརིསུདྡྷིབྷཱཝེན པརིསུདྡྷེ. པརིསུདྡྷཏྟཱཡེཝ པརིཡོདཱཏེ, པབྷསྶརེཏི ཝུཏྟཾ ཧོཏི. སུཁཱདཱིནཾ པཙྩཡཱནཾ གྷཱཏེན ཝིཧཏརཱགཱདིཨངྒཎཏྟཱ ཨནངྒཎེ. ཨནངྒཎཏྟཱཡེཝ ཝིགཏཱུཔཀྐིལེསེ. ཨངྒཎེན ཧི ཏཾ ཙིཏྟཾ ཨུཔཀྐིལིསྶཏི. སུབྷཱཝིཏཏྟཱ མུདུབྷཱུཏེ, ཝསཱིབྷཱཝཔྤཏྟེཏི ཝུཏྟཾ ཧོཏི. ཝསེ ཝཏྟམཱནཾ ཧི ཙིཏྟཾ མུདུནྟི ཝུཙྩཏི. མུདུཏྟཱཡེཝ ཙ ཀམྨནིཡེ, ཀམྨཀྑམེ ཀམྨཡོགྒེཏི ཝུཏྟཾ ཧོཏི. མུདུཾ ཧི ཙིཏྟཾ ཀམྨནིཡཾ ཧོཏི སུདནྟམིཝ སུཝཎྞཾ, ཏཉྩ ཨུབྷཡམྤི སུབྷཱཝིཏཏྟཱཡེཝཱཏི. ཡཐཱཧ ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི, ཡཾ ཨེཝཾ བྷཱཝིཏཾ བཧུལཱིཀཏཾ མུདུཉྩ ཧོཏི ཀམྨནིཡཉྩ, ཡཐཡིདཾ, བྷིཀྑཝེ, ཙིཏྟ’’ནྟི (ཨ. ནི. ༡.༢༢).

ཨེཏེསུ པརིསུདྡྷབྷཱཝཱདཱིསུ ཋིཏཏྟཱ ཋིཏེ. ཋིཏཏྟཱཡེཝ ཨཱནེཉྫཔྤཏྟེ, ཨཙལེ ནིརིཉྫནེཏི ཝུཏྟཾ ཧོཏི. མུདུཀམྨཉྙབྷཱཝེན ཝཱ ཨཏྟནོ ཝསེ ཋིཏཏྟཱ ཋིཏེ. སདྡྷཱདཱིཧི པརིགྒཧིཏཏྟཱ ཨཱནེཉྫཔྤཏྟེ ¶ . སདྡྷཱཔརིགྒཧིཏཾ ཧི ཙིཏྟཾ ཨསྶདྡྷིཡེན ན ཨིཉྫཏི. ཝཱིརིཡཔརིགྒཧིཏཾ ཀོསཛྫེན ན ཨིཉྫཏི. སཏིཔརིགྒཧིཏཾ པམཱདེན ན ཨིཉྫཏི. སམཱདྷིཔརིགྒཧིཏཾ ཨུདྡྷཙྩེན ན ཨིཉྫཏི ¶ . པཉྙཱཔརིགྒཧིཏཾ ཨཝིཛྫཱཡ ན ཨིཉྫཏི. ཨོབྷཱསགཏཾ ཀིལེསནྡྷཀཱརེན ན ཨིཉྫཏི. ཨིམེཧི ཚཧི དྷམྨེཧི པརིགྒཧིཏཾ ཨཱནེཉྫཔྤཏྟཾ ཧོཏི. ཨེཝཾ ཨཊྛངྒསམནྣཱགཏཾ ཙིཏྟཾ ཨབྷིནཱིཧཱརཀྑམཾ ཧོཏི ཨབྷིཉྙཱསཙྪིཀརཎཱིཡཱནཾ དྷམྨཱནཾ ཨབྷིཉྙཱསཙྪིཀིརིཡཱཡ.

ཨཔརོ ནཡོ, ཙཏུཏྠཛ྄ཛྷཱནསམཱདྷིནཱ སམཱཧིཏེ. ནཱིཝརཎདཱུརབྷཱཝེན པརིསུདྡྷེ. ཝིཏཀྐཱདིསམཏིཀྐམེན པརིཡོདཱཏེ. ཛྷཱནཔཊིལཱབྷཔཙྩཡཱནཾ ཨིཙྪཱཝཙརཱནཾ ཨབྷཱཝེན ཨནངྒཎེ. ཨབྷིཛ྄ཛྷཱདཱིནཾ ཙིཏྟསྶ ཨུཔཀྐིལེསཱནཾ ཝིགམེན ཝིགཏཱུཔཀྐིལེསེ. ཨུབྷཡམྤི ཙེཏཾ ཨནངྒཎསུཏྟཝཏྠསུཏྟཱནུསཱརེན (མ. ནི. ༡.༥༧ ཨཱདཡོ) ཝེདིཏབྦཾ. ཝསིཔྤཏྟིཡཱ མུདུབྷཱུཏེ. ཨིདྡྷིཔཱདབྷཱཝཱུཔགམེན ཀམྨནིཡེ. བྷཱཝནཱཔཱརིཔཱུརིཡཱ པཎཱིཏབྷཱཝཱུཔགམེན ཋིཏེ ཨཱནེཉྫཔྤཏྟེ. ཡཐཱ ཨཱནེཉྫཔྤཏྟཾ ཧོཏི, ཨེཝཾ ཋིཏེཏི ཨཏྠོ. ཨེཝམྤི ཨཊྛངྒསམནྣཱགཏཾ ཙིཏྟཾ ཨབྷིནཱིཧཱརཀྑམཾ ཧོཏི ཨབྷིཉྙཱསཙྪིཀརཎཱིཡཱནཾ དྷམྨཱནཾ ཨབྷིཉྙཱསཙྪིཀིརིཡཱཡ པཱདཀཾ པདཊྛཱནབྷཱུཏནྟི.

དསཨིདྡྷིཀཐཱ

༣༦༩. ཨིདྡྷིཝིདྷཱཡ ཙིཏྟཾ ཨབྷིནཱིཧརཏི ཨབྷིནིནྣཱམེཏཱིཏི ཨེཏྠ ཨིཛ྄ཛྷནཊྛེན ཨིདྡྷི, ནིཔྥཏྟིཨཏྠེན པཊིལཱབྷཊྛེན ཙཱཏི ཝུཏྟཾ ཧོཏི. ཡཉྷི ནིཔྥཛྫཏི པཊིལབྦྷཏི ཙ, ཏཾ ཨིཛ྄ཛྷཏཱིཏི ཝུཙྩཏི. ཡཐཱཧ ‘‘ཀཱམཾ ཀཱམཡམཱནསྶ, ཏསྶ ཙེཏཾ སམིཛ྄ཛྷཏཱི’’ཏི (སུ. ནི. ༧༧༢). ཏཐཱ ‘‘ནེཀྑམྨཾ ཨིཛ྄ཛྷཏཱིཏི ཨིདྡྷི, པཊིཧརཏཱིཏི པཱཊིཧཱརིཡཾ. ཨརཧཏྟམགྒོ ཨིཛ྄ཛྷཏཱིཏི ཨིདྡྷི, པཊིཧརཏཱིཏི པཱཊིཧཱརིཡ’’ནྟི (པཊི. མ. ༣.༣༢).

ཨཔརོ ནཡོ, ཨིཛ྄ཛྷནཊྛེན ཨིདྡྷི. ཨུཔཱཡསམྤདཱཡེཏམདྷིཝཙནཾ. ཨུཔཱཡསམྤདཱ ཧི ཨིཛ྄ཛྷཏི ཨདྷིཔྤེཏཕལཔྤསཝནཏོ. ཡཐཱཧ – ‘‘ཨཡཾ ཁོ ཙིཏྟོ གཧཔཏི སཱིལཝཱ ཀལྱཱཎདྷམྨོ, སཙེ པཎིདཧིསྶཏི ‘ཨནཱགཏམདྡྷཱནཾ རཱཛཱ ཨསྶཾ ཙཀྐཝཏྟཱི’ཏི, ཏསྶ ཁོ ཨཡཾ ཨིཛ྄ཛྷིསྶཏི སཱིལཝཏོ ཙེཏོཔཎིདྷི ཝིསུདྡྷཏྟཱ’’ཏི (སཾ. ནི. ༤.༣༥༢).

ཨཔརོ ནཡོ, ཨེཏཱཡ སཏྟཱ ཨིཛ྄ཛྷནྟཱིཏི ཨིདྡྷི. ཨིཛ྄ཛྷནྟཱིཏི ཨིདྡྷཱ ཝུདྡྷཱ ཨུཀྐཾསགཏཱ ཧོནྟཱིཏི ¶ ཝུཏྟཾ ཧོཏི. སཱ དསཝིདྷཱ. ཡཐཱཧ ‘‘ཀཏི ཨིདྡྷིཡོཏི དས ཨིདྡྷིཡོ’’. པུན ཙཔརཾ ཨཱཧ ‘‘ཀཏམཱ དས ཨིདྡྷིཡོ ¶ ? ཨདྷིཊྛཱནཱ ཨིདྡྷི, ཝིཀུབྦནཱ ཨིདྡྷི, མནོམཡཱ ཨིདྡྷི, ཉཱཎཝིཔྥཱརཱ ཨིདྡྷི, སམཱདྷིཝིཔྥཱརཱ ཨིདྡྷི, ཨརིཡཱ ཨིདྡྷི, ཀམྨཝིཔཱཀཛཱ ཨིདྡྷི, པུཉྙཝཏོ ཨིདྡྷི, ཝིཛྫཱམཡཱ ཨིདྡྷི, ཏཏྠ ཏཏྠ སམྨཱཔཡོགཔཙྩཡཱ ཨིཛ྄ཛྷནཊྛེན ཨིདྡྷཱི’’ཏི (པཊི. མ. ༣.༩).

༣༧༠. ཏཏྠ ‘‘པཀཏིཡཱ ཨེཀོ བཧུཀཾ ཨཱཝཛྫཏི. སཏཾ ཝཱ སཧསྶཾ ཝཱ སཏསཧསྶཾ ཝཱ ཨཱཝཛྫིཏྭཱ ཉཱཎེན ཨདྷིཊྛཱཏི ‘བཧུཀོ ཧོམཱི’’’ཏི (པཊི. མ. ༣.༡༠) ཨེཝཾ ཝིབྷཛིཏྭཱ དསྶིཏཱ ཨིདྡྷི ཨདྷིཊྛཱནཝསེན ནིཔྥནྣཏྟཱ ཨདྷིཊྛཱནཱ ཨིདྡྷི ནཱམ.

༣༧༡. ‘‘སོ པཀཏིཝཎྞཾ ཝིཛཧིཏྭཱ ཀུམཱརཀཝཎྞཾ ཝཱ དསྶེཏི ནཱགཝཎྞཾ ཝཱ…པེ… ཝིཝིདྷམྤི སེནཱབྱཱུཧཾ དསྶེཏཱི’’ཏི (པཊི. མ. ༣.༡༣) ཨེཝཾ ཨཱགཏཱ ཨིདྡྷི པཀཏིཝཎྞཝིཛཧནཝིཀཱརཝསེན པཝཏྟཏྟཱ ཝིཀུབྦནཱ ཨིདྡྷི ནཱམ.

༣༧༢. ‘‘ཨིདྷ བྷིཀྑུ ཨིམམྷཱ ཀཱཡཱ ཨཉྙཾ ཀཱཡཾ ཨབྷིནིམྨིནཱཏི རཱུཔིཾ མནོམཡ’’ནྟི (པཊི. མ. ༣.༡༤) ཨིམིནཱ ནཡེན ཨཱགཏཱ ཨིདྡྷི སརཱིརབྦྷནྟརེ ཨཉྙསྶེཝ མནོམཡསྶ སརཱིརསྶ ནིཔྥཏྟིཝསེན པཝཏྟཏྟཱ མནོམཡཱ ཨིདྡྷི ནཱམ.

༣༧༣. ཉཱཎུཔྤཏྟིཏོ པན པུབྦེ ཝཱ པཙྪཱ ཝཱ ཏཾཁཎེ ཝཱ ཉཱཎཱནུབྷཱཝནིབྦཏྟོ ཝིསེསོ ཉཱཎཝིཔྥཱརཱ ཨིདྡྷི ནཱམ. ཝུཏྟཉྷེཏཾ – ‘‘ཨནིཙྩཱནུཔསྶནཱཡ ནིཙྩསཉྙཱཡ པཧཱནཊྛོ ཨིཛ྄ཛྷཏཱིཏི ཉཱཎཝིཔྥཱརཱ ཨིདྡྷི…པེ… ཨརཧཏྟམགྒེན སབྦཀིལེསཱནཾ པཧཱནཊྛོ ཨིཛ྄ཛྷཏཱིཏི ཉཱཎཝིཔྥཱརཱ ཨིདྡྷི. ཨཱཡསྨཏོ བཱཀྐུལསྶ ཉཱཎཝིཔྥཱརཱ ཨིདྡྷི. ཨཱཡསྨཏོ སཾཀིཙྩསྶ ཉཱཎཝིཔྥཱརཱ ཨིདྡྷི. ཨཱཡསྨཏོ བྷཱུཏཔཱལསྶ ཉཱཎཝིཔྥཱརཱ ཨིདྡྷཱི’’ཏི (པཊི. མ. ༣.༡༥).

ཏཏྠ ཨཱཡསྨཱ བཱཀྐུལོ དཧརོཝ མངྒལདིཝསེ ནདིཡཱ ནྷཱཔིཡམཱནོ དྷཱཏིཡཱ པམཱདེན སོཏེ པཏིཏོ. ཏམེནཾ མཙྪོ གིལིཏྭཱ བཱརཱཎསཱིཏིཏྠཾ ཨགམཱསི. ཏཏྲ ཏཾ མཙྪབནྡྷོ གཧེཏྭཱ སེཊྛིབྷརིཡཱཡ ཝིཀྐིཎི. སཱ མཙྪེ སིནེཧཾ ཨུཔྤཱདེཏྭཱ ཨཧམེཝ ནཾ པཙིསྶཱམཱིཏི ཕཱལེནྟཱི མཙྪཀུཙྪིཡཾ སུཝཎྞབིམྦཾ ཝིཡ དཱརཀཾ དིསྭཱ པུཏྟོ མེ ལདྡྷོཏི སོམནསྶཛཱཏཱ ཨཧོསི. ཨིཏི མཙྪཀུཙྪིཡཾ ཨརོགབྷཱཝོ ཨཱཡསྨཏོ བཱཀྐུལསྶ ¶ པཙྪིམབྷཝིཀསྶ ཏེན ཨཏྟབྷཱཝེན པཊིལབྷིཏབྦཨརཧཏྟམགྒཉཱཎཱནུབྷཱཝེན ¶ ནིབྦཏྟཏྟཱ ཉཱཎཝིཔྥཱརཱ ཨིདྡྷི ནཱམ. ཝཏྠུ པན ཝིཏྠཱརེན ཀཐེཏབྦཾ.

སཾཀིཙྩཏྠེརསྶ པན གབྦྷགཏསྶེཝ མཱཏཱ ཀཱལམཀཱསི. ཏསྶཱ ཙིཏཀཾ ཨཱརོཔེཏྭཱ སཱུལེཧི ཝིཛ྄ཛྷིཏྭཱ ཛྷཱཔིཡམཱནཱཡ དཱརཀོ སཱུལཀོཊིཡཱ ཨཀྑིཀཱུཊེ པཧཱརཾ ལབྷིཏྭཱ སདྡཾ ཨཀཱསི. ཏཏོ དཱརཀོ ཛཱིཝཏཱིཏི ཨོཏཱརེཏྭཱ ཀུཙྪིཾ ཕཱལེཏྭཱ དཱརཀཾ ཨཡྻིཀཱཡ ཨདཾསུ. སོ ཏཱཡ པཊིཛགྒིཏོ ཝུདྡྷིམནྭཱཡ པབྦཛིཏྭཱ སཧ པཊིསམྦྷིདཱཧི ཨརཧཏྟཾ པཱཔུཎི. ཨིཏི ཝུཏྟནཡེནེཝ དཱརུཙིཏཀཱཡ ཨརོགབྷཱཝོ ཨཱཡསྨཏོ སཾཀིཙྩསྶ ཉཱཎཝིཔྥཱརཱ ཨིདྡྷི ནཱམ.

བྷཱུཏཔཱལདཱརཀསྶ པན པིཏཱ རཱཛགཧེ དལིདྡམནུསྶོ. སོ དཱརཱུནཾ ཨཏྠཱཡ སཀཊེན ཨཊཝིཾ གནྟྭཱ དཱརུབྷཱརཾ ཀཏྭཱ སཱཡཾ ནགརདྭཱརསམཱིཔཾ པཏྟོ. ཨཐསྶ གོཎཱ ཡུགཾ ཨོསྶཛྫིཏྭཱ ནགརཾ པཝིསིཾསུ. སོ སཀཊམཱུལེ པུཏྟཀཾ ནིསཱིདཱཔེཏྭཱ གོཎཱནཾ ཨནུཔདཾ གཙྪནྟོ ནགརམེཝ པཱཝིསི. ཏསྶ ཨནིཀྑནྟསྶེཝ དྭཱརཾ པིཧིཏཾ. དཱརཀསྶ ཝཱལ༹ཡཀྑཱནུཙརིཏེཔི བཧིནགརེ ཏིཡཱམརཏྟིཾ ཨརོགབྷཱཝོ ཝུཏྟནཡེནེཝ ཉཱཎཝིཔྥཱརཱ ཨིདྡྷི ནཱམ. ཝཏྠུ པན ཝིཏྠཱརེཏབྦཾ.

༣༧༤. སམཱདྷིཏོ པུབྦེ ཝཱ པཙྪཱ ཝཱ ཏཾཁཎེ ཝཱ སམཐཱནུབྷཱཝནིབྦཏྟོ ཝིསེསོ སམཱདྷིཝིཔྥཱརཱ ཨིདྡྷི. ཝུཏྟཉྷེཏཾ ‘‘པཋམཛ྄ཛྷཱནེན ནཱིཝརཎཱནཾ པཧཱནཊྛོ ཨིཛ྄ཛྷཏཱིཏི སམཱདྷིཝིཔྥཱརཱ ཨིདྡྷི…པེ… ནེཝསཉྙཱནཱསཉྙཱཡཏནསམཱཔཏྟིཡཱ ཨཱཀིཉྩཉྙཱཡཏནསཉྙཱཡ པཧཱནཊྛོ ཨིཛ྄ཛྷཏཱིཏི སམཱདྷིཝིཔྥཱརཱ ཨིདྡྷི. ཨཱཡསྨཏོ སཱརིཔུཏྟསྶ སམཱདྷིཝིཔྥཱརཱ ཨིདྡྷི, ཨཱཡསྨཏོ སཉྫཱིཝསྶ, ཨཱཡསྨཏོ ཁཱཎུཀོཎྜཉྙསྶ, ཨུཏྟརཱཡ ཨུཔཱསིཀཱཡ, སཱམཱཝཏིཡཱ ཨུཔཱསིཀཱཡ སམཱདྷིཝིཔྥཱརཱ ཨིདྡྷཱི’’ཏི (པཊི. མ. ༣.༡༦).

ཏཏྠ ཡདཱ ཨཱཡསྨཏོ སཱརིཔུཏྟསྶ མཧཱམོགྒལླཱནཏྠེརེན སདྡྷིཾ ཀཔོཏཀནྡརཱཡཾ ཝིཧརཏོ ཛུཎྷཱཡ རཏྟིཡཱ ནཝོརོཔིཏེཧི ཀེསེཧི ཨཛ྄ཛྷོཀཱསེ ནིསིནྣསྶ ཨེཀོ དུཊྛཡཀྑོ སཧཱཡཀེན ཡཀྑེན ཝཱརིཡམཱནོཔི སཱིསེ པཧཱརམདཱསི. ཡསྶ མེགྷསྶ ཝིཡ གཛྫཏོ ¶ སདྡོ ཨཧོསི. ཏདཱ ཐེརོ ཏསྶ པཧརཎསམཡེ སམཱཔཏྟིཾ ཨཔྤེསི. ཨཐསྶ ཏེན པཧཱརེན ན ཀོཙི ཨཱབཱདྷོ ཨཧོསི ¶ . ཨཡཾ ཏསྶཱཡསྨཏོ སམཱདྷིཝིཔྥཱརཱ ཨིདྡྷི. ཝཏྠུ པན ཨུདཱནེ (ཨུདཱ. ༣༤) ཨཱགཏམེཝ.

སཉྫཱིཝཏྠེརཾ པན ནིརོདྷསམཱཔནྣཾ ཀཱལཀཏོཏི སལླཀྑེཏྭཱ གོཔཱལཀཱདཡོ ཏིཎཀཊྛགོམཡཱནི སངྐཌྜྷེཏྭཱ ཨགྒིཾ ཨདཾསུ. ཐེརསྶ ཙཱིཝརེ ཨཾསུམཏྟམྤི ནཛ྄ཛྷཱཡིཏྠ. ཨཡམསྶ ཨནུཔུབྦསམཱཔཏྟིཝསེན པཝཏྟསམཐཱནུབྷཱཝནིབྦཏྟཏྟཱ སམཱདྷིཝིཔྥཱརཱ ཨིདྡྷི. ཝཏྠུ པན སུཏྟེ (མ. ནི. ༡.༥༠༧) ཨཱགཏམེཝ.

ཁཱཎུཀོཎྜཉྙཏྠེརོ པན པཀཏིཡཱཝ སམཱཔཏྟིབཧུལོ. སོ ཨཉྙཏརསྨིཾ ཨརཉྙེ རཏྟིཾ སམཱཔཏྟིཾ ཨཔྤེཏྭཱ ནིསཱིདི. པཉྩསཏཱ ཙོརཱ བྷཎྜཀཾ ཐེནེཏྭཱ གཙྪནྟཱ ‘‘ཨིདཱནི ཨམྷཱཀཾ ཨནུཔཐཾ ཨཱགཙྪནྟཱ ནཏྠཱི’’ཏི ཝིསྶམིཏུཀཱམཱ བྷཎྜཀཾ ཨོརོཔཡམཱནཱ ‘‘ཁཱཎུཀོ ཨཡ’’ནྟི མཉྙམཱནཱ ཐེརསྶེཝ ཨུཔརི སབྦབྷཎྜཀཱནི ཋཔེསུཾ. ཏེསཾ ཝིསྶམིཏྭཱ གཙྪནྟཱནཾ པཋམཾ ཋཔིཏབྷཎྜཀསྶ གཧཎཀཱལེ ཀཱལཔརིཙྪེདཝསེན ཐེརོ ཝུཊྛཱསི. ཏེ ཐེརསྶ ཙལནཱཀཱརཾ དིསྭཱ བྷཱིཏཱ ཝིརཝིཾསུ. ཐེརོ ‘‘མཱ བྷཱཡིཏྠ ཨུཔཱསཀཱ, བྷིཀྑུ ཨཧ’’ནྟི ཨཱཧ. ཏེ ཨཱགནྟྭཱ ཝནྡིཏྭཱ ཐེརགཏེན པསཱདེན པབྦཛིཏྭཱ སཧ པཊིསམྦྷིདཱཧི ཨརཧཏྟཾ པཱཔུཎིཾསུ (དྷ. པ. ཨཊྛ. ༡.༡). ཨཡམེཏྠ པཉྩཧི བྷཎྜཀསཏེཧི ཨཛ྄ཛྷོཏྠཊསྶ ཐེརསྶ ཨཱབཱདྷཱབྷཱཝོ སམཱདྷིཝིཔྥཱརཱ ཨིདྡྷི.

ཨུཏྟརཱ པན ཨུཔཱསིཀཱ པུཎྞསེཊྛིསྶ དྷཱིཏཱ. ཏསྶཱ སིརིམཱ ནཱམ གཎིཀཱ ཨིསྶཱཔཀཏཱ ཏཏྟཏེལཀཊཱཧཾ སཱིསེ ཨཱསིཉྩི. ཨུཏྟརཱ ཏཾཁཎཉྙེཝ མེཏྟཾ སམཱཔཛྫི. ཏེལཾ པོཀྑརཔཏྟཏོ ཨུདཀབིནྡུ ཝིཡ ཝིཝཊྚམཱནཾ ཨགམཱསི. ཨཡམསྶཱ སམཱདྷིཝིཔྥཱརཱ ཨིདྡྷི. ཝཏྠུ པན ཝིཏྠཱརེཏབྦཾ.

སཱམཱཝཏཱི ནཱམ ཨུདེནསྶ རཉྙོ ཨགྒམཧེསཱི. མཱགཎྜིཡབྲཱཧྨཎོ ཨཏྟནོ དྷཱིཏཱཡ ཨགྒམཧེསིཊྛཱནཾ པཏྠཡམཱནོ ཏསྶཱ ཝཱིཎཱཡ ཨཱསཱིཝིསཾ ¶ པཀྑིཔཱཔེཏྭཱ རཱཛཱནཾ ཨཱཧ ‘‘མཧཱརཱཛ, སཱམཱཝཏཱི ཏཾ མཱརེཏུཀཱམཱ ཝཱིཎཱཡ ཨཱསཱིཝིསཾ གཧེཏྭཱ པརིཧརཏཱི’’ཏི. རཱཛཱ ཏཾ དིསྭཱ ཀུཔིཏོ སཱམཱཝཏིཾ ཝདྷིསྶཱམཱིཏི དྷནུཾ ཨཱརོཔེཏྭཱ ཝིསཔཱིཏཾ ཁུརཔྤཾ སནྣཡ྄ཧི. སཱམཱཝཏཱི སཔརིཝཱརཱ རཱཛཱནཾ མེཏྟཱཡ ཕརི. རཱཛཱ ནེཝ སརཾ ཁིཔིཏུཾ ན ཨོརོཔེཏུཾ སཀྐོནྟོ ཝེདྷམཱནོ ཨཊྛཱསི. ཏཏོ ནཾ དེཝཱི ཨཱཧ ‘‘ཀིཾ, མཧཱརཱཛ, ཀིལམསཱི’’ཏི? ‘‘ཨཱམ ཀིལམཱམཱི’’ཏི. ‘‘ཏེན ¶ ཧི དྷནུཾ ཨོརོཔེཧཱི’’ཏི. སརོ རཉྙོ པཱདམཱུལེཡེཝ པཏི. ཏཏོ ནཾ དེཝཱི ‘‘མཧཱརཱཛ, ཨཔྤདུཊྛསྶ ནཔྤདུསྶིཏབྦ’’ནྟི ཨོཝདི. ཨིཏི རཉྙོ སརཾ མུཉྩིཏུཾ ཨཝིསཧནབྷཱཝོ སཱམཱཝཏིཡཱ ཨུཔཱསིཀཱཡ སམཱདྷིཝིཔྥཱརཱ ཨིདྡྷཱིཏི.

༣༧༥. པཊིཀྐཱུལཱདཱིསུ ཨཔྤཊིཀྐཱུལསཉྙིཝིཧཱརཱདིཀཱ པན ཨརིཡཱ ཨིདྡྷི ནཱམ. ཡཐཱཧ – ‘‘ཀཏམཱ ཨརིཡཱ ཨིདྡྷི? ཨིདྷ – བྷིཀྑུ སཙེ ཨཱཀངྑཏི ‘པཊིཀྐཱུལེ ཨཔྤཊིཀྐཱུལསཉྙཱི ཝིཧརེཡྻ’ནྟི, ཨཔྤཊིཀྐཱུལསཉྙཱི ཏཏྠ ཝིཧརཏི…པེ… ཨུཔེཀྑཀོ ཏཏྠ ཝིཧརཏི སཏོ སམྤཛཱནོ’’ཏི (པཊི. མ. ༣.༡༧). ཨཡཉྷི ཙེཏོཝསིཔྤཏྟཱནཾ ཨརིཡཱནཾཡེཝ སམྦྷཝཏོ ཨརིཡཱ ཨིདྡྷཱིཏི ཝུཙྩཏི.

ཨེཏཱཡ ཧི སམནྣཱགཏོ ཁཱིཎཱསཝོ བྷིཀྑུ པཊིཀྐཱུལེ ཨནིཊྛེ ཝཏྠུསྨིཾ མེཏྟཱཕརཎཾ ཝཱ དྷཱཏུམནསིཀཱརཾ ཝཱ ཀརོནྟོ ཨཔྤཊིཀྐཱུལསཉྙཱི ཝིཧརཏི. ཨཔྤཊིཀྐཱུལེ ཨིཊྛེ ཝཏྠུསྨིཾ ཨསུབྷཕརཎཾ ཝཱ ཨནིཙྩནྟི མནསིཀཱརཾ ཝཱ ཀརོནྟོ པཊིཀྐཱུལསཉྙཱི ཝིཧརཏི. ཏཐཱ པཊིཀྐཱུལཱཔཊིཀྐཱུལེསུ ཏདེཝ མེཏྟཱཕརཎཾ ཝཱ དྷཱཏུམནསིཀཱརཾ ཝཱ ཀརོནྟོ ཨཔྤཊིཀྐཱུལསཉྙཱི ཝིཧརཏི. ཨཔྤཊིཀྐཱུལཔཊིཀྐཱུལེསུ ཙ ཏདེཝ ཨསུབྷཕརཎཾ ཝཱ ཨནིཙྩནྟི མནསིཀཱརཾ ཝཱ ཀརོནྟོ པཊིཀྐཱུལསཉྙཱི ཝིཧརཏི. ཙཀྑུནཱ རཱུཔཾ དིསྭཱ ནེཝ སུམནོ ཧོཏཱིཏིཨཱདིནཱ ནཡེན ཝུཏྟཾ པན ཚལ༹ངྒུཔེཀྑཾ པཝཏྟཡམཱནོ པཊིཀྐཱུལེ ཙ ཨཔྤཊིཀྐཱུལེ ཙ ཏདུབྷཡཾ ཨབྷིནིཝཛྫིཏྭཱ ཨུཔེཀྑཀོ ཝིཧརཏི སཏོ སམྤཛཱནོ. པཊིསམྦྷིདཱཡཉྷི ‘‘ཀཐཾ པཊིཀྐཱུལེ ཨཔྤཊིཀྐཱུལསཉྙཱི ཝིཧརཏི? ཨནིཊྛསྨིཾ ཝཏྠུསྨིཾ མེཏྟཱཡ ཝཱ ཕརཏི དྷཱཏུསོ ཝཱ ཨུཔསཾཧརཏཱི’’ཏིཨཱདིནཱ (པཊི. མ. ༣.༡༧) ནཡེན ཨཡམེཝ ཨཏྠོ ཝིབྷཏྟོ. ཨཡཾ ཙེཏོཝསིཔྤཏྟཱནཾ ཨརིཡཱནཾཡེཝ སམྦྷཝཏོ ཨརིཡཱ ཨིདྡྷཱིཏི ཝུཙྩཏི.

༣༧༦. པཀྑཱིཨཱདཱིནཾ པན ¶ ཝེཧཱསགམནཱདིཀཱ ཀམྨཝིཔཱཀཛཱ ཨིདྡྷི ནཱམ. ཡཐཱཧ – ‘‘ཀཏམཱ ཀམྨཝིཔཱཀཛཱ ཨིདྡྷི? སབྦེསཾ པཀྑཱིནཾ སབྦེསཾ དེཝཱནཾ ཨེཀཙྩཱནཾ མནུསྶཱནཾ ཨེཀཙྩཱནཉྩ ཝིནིཔཱཏིཀཱནཾ ཨཡཾ ཀམྨཝིཔཱཀཛཱ ཨིདྡྷཱི’’ཏི (པཊི. མ. ༣.༡༨). ཨེཏྠ ཧི སབྦེསཾ པཀྑཱིནཾ ཛྷཱནཾ ཝཱ ཝིཔསྶནཾ ཝཱ ཝིནཱཡེཝ ཨཱཀཱསེན གམནཾ. ཏཐཱ སབྦེསཾ དེཝཱནཾ པཋམཀཔྤིཀཱནཉྩ ཨེཀཙྩཱནཾ མནུསྶཱནཾ. ཏཐཱ པིཡངྐརམཱཏཱ (སཾ. ནི. ༡.༢༤༠) ཡཀྑིནཱི ¶ ཨུཏྟརམཱཏཱ ཕུསྶམིཏྟཱ དྷམྨགུཏྟཱཏི ཨེཝམཱདཱིནཾ ཨེཀཙྩཱནཾ ཝིནིཔཱཏིཀཱནཾ ཨཱཀཱསེན གམནཾ ཀམྨཝིཔཱཀཛཱ ཨིདྡྷཱིཏི.

༣༧༧. ཙཀྐཝཏྟིཨཱདཱིནཾ ཝེཧཱསགམནཱདིཀཱ པན པུཉྙཝཏོ ཨིདྡྷི ནཱམ. ཡཐཱཧ ‘‘ཀཏམཱ པུཉྙཝཏོ ཨིདྡྷི? རཱཛཱ ཙཀྐཝཏྟཱི ཝེཧཱསཾ གཙྪཏི སདྡྷིཾ ཙཏུརངྒིནིཡཱ སེནཱཡ ཨནྟམསོ ཨསྶབནྡྷགོབནྡྷཔུརིསེ ཨུཔཱདཱཡ. ཛོཏིཀསྶ གཧཔཏིསྶ པུཉྙཝཏོ ཨིདྡྷི. ཛཊིལཀསྶ གཧཔཏིསྶ པུཉྙཝཏོ ཨིདྡྷི. གྷོསིཏསྶ གཧཔཏིསྶ པུཉྙཝཏོ ཨིདྡྷི. མེཎྜཀསྶ གཧཔཏིསྶ པུཉྙཝཏོ ཨིདྡྷི. པཉྩནྣཾ མཧཱཔུཉྙཱནཾ པུཉྙཝཏོ ཨིདྡྷཱི’’ཏི. སངྑེཔཏོ པན པརིཔཱཀཾ གཏེ པུཉྙསམྦྷཱརེ ཨིཛ྄ཛྷནཀཝིསེསོ པུཉྙཝཏོ ཨིདྡྷི.

ཨེཏྠ ཙ ཛོཏིཀསྶ གཧཔཏིསྶ པཐཝིཾ བྷིནྡིཏྭཱ མཎིཔཱསཱདོ ཨུཊྛཧི. ཙཏུསཊྛི ཙ ཀཔྤརུཀྑཱཏི ཨཡམསྶ པུཉྙཝཏོ ཨིདྡྷི. ཛཊིལཀསྶ ཨསཱིཏིཧཏྠོ སུཝཎྞཔབྦཏོ ནིབྦཏྟི. གྷོསིཏསྶ སཏྟསུ ཋཱནེསུ མཱརཎཏྠཱཡ ཨུཔཀྐམེ ཀཏེཔི ཨརོགབྷཱཝོ པུཉྙཝཏོ ཨིདྡྷི. མེཎྜཀསྶ ཨེཀཀརཱིསམཏྟེ པདེསེ སཏྟརཏནམཡཱནཾ མེཎྜཀཱནཾ པཱཏུབྷཱཝོ པུཉྙཝཏོ ཨིདྡྷི. པཉྩ མཧཱཔུཉྙཱ ནཱམ མེཎྜཀསེཊྛི, ཏསྶ བྷརིཡཱ ཙནྡཔདུམསིརཱི, པུཏྟོ དྷནཉྩཡསེཊྛི, སུཎིསཱ སུམནདེཝཱི, དཱསོ པུཎྞོ ནཱམཱཏི. ཏེསུ སེཊྛིསྶ སཱིསཾ ནྷཱཏསྶ ཨཱཀཱསཾ ཨུལློཀནཀཱལེ ཨཌྜྷཏེལ༹སཀོཊྛསཧསྶཱནི ཨཱཀཱསཏོ རཏྟསཱལཱིནཾ པཱུརེནྟི. བྷརིཡཱཡ ནཱལི༹ཀོདནམཏྟམྤི གཧེཏྭཱ སཀལཛམྦུདཱིཔཝཱསིཀེ པརིཝིསམཱནཱཡ བྷཏྟཾ ན ཁཱིཡཏི. པུཏྟསྶ སཧསྶཏྠཝིཀཾ གཧེཏྭཱ སཀལཛམྦུདཱིཔཝཱསིཀཱནམྤི དེནྟསྶ ཀཧཱཔཎཱ ན ཁཱིཡནྟི. སུཎིསཱཡ ཨེཀཾ ¶ ཝཱིཧིཏུམྦཾ གཧེཏྭཱ སཀལཛམྦུདཱིཔཝཱསིཀཱནམྤི བྷཱཛཡམཱནཱཡ དྷཉྙཾ ན ཁཱིཡཏི. དཱསསྶ ཨེཀེན ནངྒལེན ཀསཏོ ཨིཏོ སཏྟ ཨིཏོ སཏྟཱཏི ཙུདྡས མགྒཱ ཧོནྟི. ཨཡཾ ནེསཾ པུཉྙཝཏོ ཨིདྡྷི.

༣༧༨. ཝིཛྫཱདྷརཱདཱིནཾ ཝེཧཱསགམནཱདིཀཱ པན ཝིཛྫཱམཡཱ ཨིདྡྷི. ཡཐཱཧ ‘‘ཀཏམཱ ཝིཛྫཱམཡཱ ཨིདྡྷི? ཝིཛྫཱདྷརཱ ཝིཛྫཾ པརིཛཔིཏྭཱ ཝེཧཱསཾ གཙྪནྟི. ཨཱཀཱསེ ཨནྟལིཀྑེ ཧཏྠིམྤི དསྶེནྟི…པེ… ཝིཝིདྷམྤི སེནཱབྱཱུཧཾ དསྶེནྟཱི’’ཏི (པཊི. མ. ༣.༡༨).

༣༧༩. ཏེན ཏེན པན སམྨཱཔཡོགེན ཏསྶ ཏསྶ ཀམྨསྶ ཨིཛ྄ཛྷནཾ ཏཏྠ ཏཏྠ སམྨཱཔཡོགཔཙྩཡཱ ཨིཛ྄ཛྷནཊྛེན ཨིདྡྷི. ཡཐཱཧ – ‘‘ནེཀྑམྨེན ཀཱམཙྪནྡསྶ པཧཱནཊྛོ ཨིཛ྄ཛྷཏཱིཏི ཏཏྠ ¶ ཏཏྠ སམྨཱཔཡོགཔཙྩཡཱ ཨིཛ྄ཛྷནཊྛེན ཨིདྡྷི…པེ… ཨརཧཏྟམགྒེན སབྦཀིལེསཱནཾ པཧཱནཊྛོ ཨིཛ྄ཛྷཏཱིཏི ཏཏྠ ཏཏྠ སམྨཱཔཡོགཔཙྩཡཱ ཨིཛ྄ཛྷནཊྛེན ཨིདྡྷཱི’’ཏི (པཊི. མ. ༣.༡༨). ཨེཏྠ ཙ པཊིཔཏྟིསངྑཱཏསྶེཝ སམྨཱཔཡོགསྶ དཱིཔནཝསེན པུརིམཔཱལི༹སདིསཱཝ པཱལི༹ ཨཱགཏཱ. ཨཊྛཀཐཱཡཾ པན སཀཊབྱཱུཧཱདིཀརཎཝསེན ཡཾཀིཉྩི སིཔྤཀམྨཾ ཡཾཀིཉྩི ཝེཛྫཀམྨཾ ཏིཎྞཾ བེདཱནཾ ཨུགྒཧཎཾ ཏིཎྞཾ པིཊཀཱནཾ ཨུགྒཧཎཾ ཨནྟམསོ ཀསནཝཔནཱདཱིནི ཨུཔཱདཱཡ ཏཾ ཏཾ ཀམྨཾ ཀཏྭཱ ནིབྦཏྟཝིསེསོ ཏཏྠ ཏཏྠ སམྨཱཔཡོགཔཙྩཡཱ ཨིཛ྄ཛྷནཊྛེན ཨིདྡྷཱིཏི ཨཱགཏཱ. (༡༠)

ཨིཏི ཨིམཱསུ དསསུ ཨིདྡྷཱིསུ ཨིདྡྷིཝིདྷཱཡཱཏི ཨིམསྨིཾ པདེ ཨདྷིཊྛཱནཱ ཨིདྡྷིཡེཝ ཨཱགཏཱ. ཨིམསྨིཾ པནཏྠེ ཝིཀུབྦནཱམནོམཡཱཨིདྡྷིཡོཔི ཨིཙྪིཏབྦཱ ཨེཝ.

༣༨༠. ཨིདྡྷིཝིདྷཱཡཱཏི ཨིདྡྷིཀོཊྛཱསཱཡ, ཨིདྡྷིཝིཀཔྤཱཡ ཝཱ. ཙིཏྟཾ ཨབྷིནཱིཧརཏི ཨབྷིནིནྣཱམེཏཱིཏི སོ བྷིཀྑུ ཝུཏྟཔྤཀཱརཝསེན ཏསྨིཾ ཙིཏྟེ ཨབྷིཉྙཱཔཱདཀེ ཛཱཏེ ཨིདྡྷིཝིདྷཱདྷིགམཏྠཱཡ པརིཀམྨཙིཏྟཾ ཨབྷིནཱིཧརཏི ཀསིཎཱརམྨཎཏོ ཨཔནེཏྭཱ ཨིདྡྷིཝིདྷཱབྷིམུཁཾ པེསེཏི. ཨབྷིནིནྣཱམེཏཱིཏི ཨདྷིགནྟབྦཨིདྡྷིཔོཎཾ ཨིདྡྷིཔབྦྷཱརཾ ཀརོཏི. སོཏི སོ ཨེཝཾ ཀཏཙིཏྟཱབྷིནཱིཧཱརོ བྷིཀྑུ. ཨནེཀཝིཧིཏནྟི ཨནེཀཝིདྷཾ ནཱནཔྤཀཱརཀཾ. ཨིདྡྷིཝིདྷནྟི ཨིདྡྷིཀོཊྛཱསཾ. པཙྩནུབྷོཏཱིཏི པཙྩནུབྷཝཏི, ཕུསཏི ¶ སཙྪིཀརོཏི པཱཔུཎཱཏཱིཏི ཨཏྠོ. ཨིདཱནིསྶ ཨནེཀཝིཧིཏབྷཱཝཾ དསྶེནྟོ ‘‘ཨེཀོཔི ཧུཏྭཱ’’ཏིཨཱདིམཱཧ. ཏཏྠ ཨེཀོཔི ཧུཏྭཱཏི ཨིདྡྷིཀརཎཏོ པུབྦེ པཀཏིཡཱ ཨེཀོཔི ཧུཏྭཱ. བཧུདྷཱ ཧོཏཱིཏི བཧཱུནཾ སནྟིཀེ ཙངྐམིཏུཀཱམོ ཝཱ སཛ྄ཛྷཱཡཾ ཝཱ ཀཏྟུཀཱམོ པཉྷཾ ཝཱ པུཙྪིཏུཀཱམོ ཧུཏྭཱ སཏམྤི སཧསྶམྤི ཧོཏི. ཀཐཾ པནཱཡམེཝཾ ཧོཏི? ཨིདྡྷིཡཱ ཙཏསྶོ བྷཱུམིཡོ ཙཏྟཱརོ པཱདཱ ཨཊྛ པདཱནི སོལ༹ས ཙ མཱུལཱནི སམྤཱདེཏྭཱ ཉཱཎེན ཨདྷིཊྛཧནྟོ.

༣༨༡. ཏཏྠ ཙཏསྶོ བྷཱུམིཡོཏི ཙཏྟཱརི ཛྷཱནཱནི ཝེདིཏབྦཱནི. ཝུཏྟཉྷེཏཾ དྷམྨསེནཱཔཏིནཱ ‘‘ཨིདྡྷིཡཱ ཀཏམཱ ཙཏསྶོ བྷཱུམིཡོ? ཝིཝེཀཛབྷཱུམི པཋམཾ ཛྷཱནཾ, པཱིཏིསུཁབྷཱུམི དུཏིཡཾ ཛྷཱནཾ, ཨུཔེཀྑཱསུཁབྷཱུམི ཏཏིཡཾ ཛྷཱནཾ, ཨདུཀྑམསུཁབྷཱུམི ཙཏུཏྠཾ ཛྷཱནཾ. ཨིདྡྷིཡཱ ཨིམཱ ཙཏསྶོ བྷཱུམིཡོ ཨིདྡྷིལཱབྷཱཡ ཨིདྡྷིཔཊིལཱབྷཱཡ ཨིདྡྷིཝིཀུབྦནཏཱཡ ཨིདྡྷིཝིསཝིཏཱཡ ཨིདྡྷིཝསིཏཱཡ ཨིདྡྷིཝེསཱརཛྫཱཡ སཾཝཏྟནྟཱི’’ཏི (པཊི. མ. ༣.༩). ཨེཏྠ ཙ པུརིམཱནི ཏཱིཎི ཛྷཱནཱནི ཡསྨཱ པཱིཏིཕརཎེན ཙ སུཁཕརཎེན ཙ སུཁསཉྙཉྩ ལཧུསཉྙཉྩ ཨོཀྐམིཏྭཱ ¶ ལཧུམུདུཀམྨཉྙཀཱཡོ ཨིདྡྷིཾ པཱཔུཎཱཏི, ཏསྨཱ ཨིམིནཱ པརིཡཱཡེན ཨིདྡྷིལཱབྷཱཡ སཾཝཏྟནཏོ སམྦྷཱརབྷཱུམིཡོཏི ཝེདིཏབྦཱནི. ཙཏུཏྠཛ྄ཛྷཱནཾ པན ཨིདྡྷིལཱབྷཱཡ པཀཏིབྷཱུམིཡེཝ.

༣༨༢. ཙཏྟཱརོ པཱདཱཏི ཙཏྟཱརོ ཨིདྡྷིཔཱདཱ ཝེདིཏབྦཱ. ཝུཏྟཉྷེཏཾ ‘‘ཨིདྡྷིཡཱ ཀཏམེ ཙཏྟཱརོ པཱདཱ? ཨིདྷ བྷིཀྑུ ཚནྡསམཱདྷིཔདྷཱནསངྑཱརསམནྣཱགཏཾ ཨིདྡྷིཔཱདཾ བྷཱཝེཏི. ཝཱིརིཡ… ཙིཏྟ… ཝཱིམཾསཱསམཱདྷིཔདྷཱནསངྑཱརསམནྣཱགཏཾ ཨིདྡྷིཔཱདཾ བྷཱཝེཏི. ཨིདྡྷིཡཱ ཨིམེ ཙཏྟཱརོ པཱདཱ ཨིདྡྷིལཱབྷཱཡ…པེ… ཨིདྡྷིཝེསཱརཛྫཱཡ སཾཝཏྟནྟཱི’’ཏི (པཊི. མ. ༣.༩). ཨེཏྠ ཙ ཚནྡཧེཏུཀོ ཚནྡཱདྷིཀོ ཝཱ སམཱདྷི ཚནྡསམཱདྷི. ཀཏྟུཀམྱཏཱཚནྡཾ ཨདྷིཔཏིཾ ཀརིཏྭཱ པཊིལདྡྷསམཱདྷིསྶེཏཾ ཨདྷིཝཙནཾ. པདྷཱནབྷཱུཏཱ སངྑཱརཱ པདྷཱནསངྑཱརཱ. ཙཏུཀིཙྩསཱདྷཀསྶ སམྨཔྤདྷཱནཝཱིརིཡསྶེཏཾ ཨདྷིཝཙནཾ. སམནྣཱགཏནྟི ཚནྡསམཱདྷིནཱ ཙ པདྷཱནསངྑཱརེཧི ཙ ཨུཔེཏཾ. ཨིདྡྷིཔཱདནྟི ནིཔྥཏྟིཔརིཡཱཡེན ཝཱ ཨིཛ྄ཛྷནཊྛེན, ཨིཛ྄ཛྷནྟི ཨེཏཱཡ སཏྟཱ ཨིདྡྷཱ ཝུདྡྷཱ ཨུཀྐཾསགཏཱ ཧོནྟཱིཏི ཨིམིནཱ ཝཱ པརིཡཱཡེན ཨིདྡྷཱིཏི སངྑཾ གཏཱནཾ ཨབྷིཉྙཱཙིཏྟསམྤཡུཏྟཱནཾ ཚནྡསམཱདྷིཔདྷཱནསངྑཱརཱནཾ ¶ ཨདྷིཊྛཱནཊྛེན པཱདབྷཱུཏཾ སེསཙིཏྟཙེཏསིཀརཱསིནྟི ཨཏྠོ. ཝུཏྟཉྷེཏཾ ‘‘ཨིདྡྷིཔཱདོཏི ཏཐཱབྷཱུཏསྶ ཝེདནཱཀྑནྡྷོ…པེ… ཝིཉྙཱཎཀྑནྡྷོ’’ཏི (ཝིབྷ. ༤༣༤).

ཨཐ ཝཱ པཛྫཏེ ཨནེནཱཏི པཱདོ. པཱཔུཎཱིཡཏཱིཏི ཨཏྠོ. ཨིདྡྷིཡཱ པཱདོ ཨིདྡྷིཔཱདོ. ཚནྡཱདཱིནམེཏཾ ཨདྷིཝཙནཾ. ཡཐཱཧ – ‘‘ཚནྡཉྩེ, བྷིཀྑཝེ, བྷིཀྑུ ནིསྶཱཡ ལབྷཏི སམཱདྷིཾ, ལབྷཏི ཙིཏྟསྶེཀགྒཏཾ, ཨཡཾ ཝུཙྩཏི ཚནྡསམཱདྷི. སོ ཨནུཔྤནྣཱནཾ པཱཔཀཱནཾ…པེ… པདཧཏི, ཨིམེ ཝུཙྩནྟི པདྷཱནསངྑཱརཱ. ཨིཏི ཨཡཉྩ ཚནྡོ ཨཡཉྩ ཚནྡསམཱདྷི ཨིམེ ཙ པདྷཱནསངྑཱརཱ, ཨཡཾ ཝུཙྩཏི, བྷིཀྑཝེ, ཚནྡསམཱདྷིཔདྷཱནསངྑཱརསམནྣཱགཏོ ཨིདྡྷིཔཱདོ’’ཏི (སཾ. ནི. ༥.༨༢༥). ཨེཝཾ སེསིདྡྷིཔཱདེསུཔི ཨཏྠོ ཝེདིཏབྦོ.

༣༨༣. ཨཊྛ པདཱནཱིཏི ཚནྡཱདཱིནི ཨཊྛ ཝེདིཏབྦཱནི. ཝུཏྟཉྷེཏཾ ‘‘ཨིདྡྷིཡཱ ཀཏམཱནི ཨཊྛ པདཱནི? ཚནྡཉྩེ བྷིཀྑུ ནིསྶཱཡ ལབྷཏི སམཱདྷིཾ, ལབྷཏི ཙིཏྟསྶེཀགྒཏཾ. ཚནྡོ ན སམཱདྷི, སམཱདྷི ན ཚནྡོ. ཨཉྙོ ཚནྡོ, ཨཉྙོ སམཱདྷི. ཝཱིརིཡཉྩེ བྷིཀྑུ… ཙིཏྟཉྩེ བྷིཀྑུ… ཝཱིམཾསཉྩེ བྷིཀྑུ ནིསྶཱཡ ལབྷཏི སམཱདྷིཾ, ལབྷཏི ཙིཏྟསྶེཀགྒཏཾ. ཝཱིམཾསཱ ན སམཱདྷི, སམཱདྷི ན ཝཱིམཾསཱ. ཨཉྙཱ ཝཱིམཾསཱ, ཨཉྙོ སམཱདྷི. ཨིདྡྷིཡཱ ཨིམཱནི ཨཊྛ པདཱནི ཨིདྡྷིལཱབྷཱཡ…པེ… ཨིདྡྷིཝེསཱརཛྫཱཡ སཾཝཏྟནྟཱི’’ཏི (པཊི. མ. ༣.༩). ཨེཏྠ ཧི ཨིདྡྷིམུཔྤཱདེཏུཀཱམཏཱཚནྡོ ¶ སམཱདྷིནཱ ཨེཀཏོ ནིཡུཏྟོཝ ཨིདྡྷིལཱབྷཱཡ སཾཝཏྟཏི; ཏཐཱ ཝཱིརིཡཱདཡོ. ཏསྨཱ ཨིམཱནི ཨཊྛ པདཱནི ཝུཏྟཱནཱིཏི ཝེདིཏབྦཱནི.

༣༨༤. སོལ༹ས མཱུལཱནཱིཏི སོལ༹སཧི ཨཱཀཱརེཧི ཨཱནེཉྫཏཱ ཙིཏྟསྶ ཝེདིཏབྦཱ. ཝུཏྟཉྷེཏཾ – ‘‘ཨིདྡྷིཡཱ ཀཏི མཱུལཱནི? སོལ༹ས མཱུལཱནི – ཨནོནཏཾ ཙིཏྟཾ ཀོསཛྫེ ན ཨིཉྫཏཱིཏི ཨཱནེཉྫཾ, ཨནུནྣཏཾ ཙིཏྟཾ ཨུདྡྷཙྩེ ན ཨིཉྫཏཱིཏི ཨཱནེཉྫཾ, ཨནབྷིནཏཾ ཙིཏྟཾ རཱགེ ན ཨིཉྫཏཱིཏི ཨཱནེཉྫཾ, ཨནཔནཏཾ ཙིཏྟཾ བྱཱཔཱདེ ན ཨིཉྫཏཱིཏི ཨཱནེཉྫཾ, ཨནིསྶིཏཾ ཙིཏྟཾ དིཊྛིཡཱ ན ཨིཉྫཏཱིཏི ཨཱནེཉྫཾ, ཨཔྤཊིབདྡྷཾ ཙིཏྟཾ ཚནྡརཱགེ ན ཨིཉྫཏཱིཏི ཨཱནེཉྫཾ, ཝིཔྤམུཏྟཾ ཙིཏྟཾ ཀཱམརཱགེ ན ཨིཉྫཏཱིཏི ཨཱནེཉྫཾ, ཝིསཾཡུཏྟཾ ཙིཏྟཾ ཀིལེསེ ན ཨིཉྫཏཱིཏི ཨཱནེཉྫཾ, ཝིམརིཡཱདིཀཏཾ ཙིཏྟཾ ཀིལེསམརིཡཱདེ ན ཨིཉྫཏཱིཏི ཨཱནེཉྫཾ, ཨེཀཏྟགཏཾ ཙིཏྟཾ ནཱནཏྟཀིལེསེ ན ཨིཉྫཏཱིཏི ཨཱནེཉྫཾ, སདྡྷཱཡ པརིགྒཧིཏཾ ¶ ཙིཏྟཾ ཨསྶདྡྷིཡེ ན ཨིཉྫཏཱིཏི ཨཱནེཉྫཾ, ཝཱིརིཡེན པརིགྒཧིཏཾ ཙིཏྟཾ ཀོསཛྫེ ན ཨིཉྫཏཱིཏི ཨཱནེཉྫཾ, སཏིཡཱ པརིགྒཧིཏཾ ཙིཏྟཾ པམཱདེ ན ཨིཉྫཏཱིཏི ཨཱནེཉྫཾ, སམཱདྷིནཱ པརིགྒཧིཏཾ ཙིཏྟཾ ཨུདྡྷཙྩེ ན ཨིཉྫཏཱིཏི ཨཱནེཉྫཾ, པཉྙཱཡ པརིགྒཧིཏཾ ཙིཏྟཾ ཨཝིཛྫཱཡ ན ཨིཉྫཏཱིཏི ཨཱནེཉྫཾ, ཨོབྷཱསགཏཾ ཙིཏྟཾ ཨཝིཛྫནྡྷཀཱརེ ན ཨིཉྫཏཱིཏི ཨཱནེཉྫཾ. ཨིདྡྷིཡཱ ཨིམཱནི སོལ༹ས མཱུལཱནི ཨིདྡྷིལཱབྷཱཡ…པེ… ཨིདྡྷིཝེསཱརཛྫཱཡ སཾཝཏྟནྟཱི’’ཏི (པཊི. མ. ༣.༩).

ཀཱམཉྩ ཨེས ཨཏྠོ ཨེཝཾ སམཱཧིཏེ ཙིཏྟེཏིཨཱདིནཱཔི སིདྡྷོཡེཝ, པཋམཛ྄ཛྷཱནཱདཱིནཾ པན ཨིདྡྷིཡཱ བྷཱུམིཔཱདཔདམཱུལབྷཱཝདསྶནཏྠཾ པུན ཝུཏྟོ. པུརིམོ ཙ སུཏྟེསུ ཨཱགཏནཡོ. ཨཡཾ པཊིསམྦྷིདཱཡཾ. ཨིཏི ཨུབྷཡཏྠ ཨསམྨོཧཏྠམྤི པུན ཝུཏྟོ.

༣༨༥. ཉཱཎེན ཨདྷིཊྛཧནྟོཏི སྭཱཡམེཏེ ཨིདྡྷིཡཱ བྷཱུམིཔཱདཔདབྷཱུཏེ དྷམྨེ སམྤཱདེཏྭཱ ཨབྷིཉྙཱཔཱདཀཾ ཛྷཱནཾ སམཱཔཛྫིཏྭཱ ཝུཊྛཱཡ སཙེ སཏཾ ཨིཙྪཏི ‘‘སཏཾ ཧོམི སཏཾ ཧོམཱི’’ཏི པརིཀམྨཾ ཀཏྭཱ པུན ཨབྷིཉྙཱཔཱདཀཾ ཛྷཱནཾ སམཱཔཛྫིཏྭཱ ཝུཊྛཱཡ ཨདྷིཊྛཱཏི, ཨདྷིཊྛཱནཙིཏྟེན སཧེཝ སཏཾ ཧོཏི. སཧསྶཱདཱིསུཔི ཨེསེཝ ནཡོ. སཙེ ཨེཝཾ ན ཨིཛ྄ཛྷཏི པུན པརིཀམྨཾ ཀཏྭཱ དུཏིཡམྤི སམཱཔཛྫིཏྭཱ ཝུཊྛཱཡ ཨདྷིཊྛཱཏབྦཾ. སཾཡུཏྟཊྛཀཐཱཡཾ ཧི ཨེཀཝཱརཾ དྭེཝཱརཾ སམཱཔཛྫིཏུཾ ཝཊྚཏཱིཏི ཝུཏྟཾ. ཏཏྠ པཱདཀཛ྄ཛྷཱནཙིཏྟཾ ནིམིཏྟཱརམྨཎཾ. པརིཀམྨཙིཏྟཱནི སཏཱརམྨཎཱནི ཝཱ སཧསྶཱརམྨཎཱནི ཝཱ, ཏཱནི ཙ ཁོ ཝཎྞཝསེན, ནོ པཎྞཏྟིཝསེན. ཨདྷིཊྛཱནཙིཏྟམྤི ཏཐེཝ སཏཱརམྨཎཾ ¶ ཝཱ སཧསྶཱརམྨཎཾ ཝཱ. ཏཾ པུབྦེ ཝུཏྟཾ ཨཔྤནཱཙིཏྟམིཝ གོཏྲབྷུཨནནྟརཾ ཨེཀམེཝ ཨུཔྤཛྫཏི རཱུཔཱཝཙརཙཏུཏྠཛ྄ཛྷཱནིཀཾ.

༣༨༦. ཡམྤི པཊིསམྦྷིདཱཡཾ ཝུཏྟཾ ‘‘པཀཏིཡཱ ཨེཀོ བཧུཀཾ ཨཱཝཛྫཏི སཏཾ ཝཱ སཧསྶཾ ཝཱ སཏསཧསྶཾ ཝཱ, ཨཱཝཛྫིཏྭཱ ཉཱཎེན ཨདྷིཊྛཱཏི ‘བཧུཀོ ཧོམཱི’ཏི, བཧུཀོ ཧོཏི, ཡཐཱ ཨཱཡསྨཱ ཙཱུལ༹པནྠཀོ’’ཏི (པཊི. མ. ༣.༡༠). ཏཏྲཱཔི ཨཱཝཛྫཏཱིཏི པརིཀམྨཝསེནེཝ ཝུཏྟཾ. ཨཱཝཛྫིཏྭཱ ཉཱཎེན ཨདྷིཊྛཱཏཱིཏི ཨབྷིཉྙཱཉཱཎཝསེན ཝུཏྟཾ. ཏསྨཱ བཧུཀཾ ཨཱཝཛྫཏི, ཏཏོ ཏེསམྤི པརིཀམྨཙིཏྟཱནཾ ཨཝསཱནེ སམཱཔཛྫཏི, སམཱཔཏྟིཏོ ཝུཊྛཧིཏྭཱ པུན བཧུཀོ ཧོམཱིཏི ཨཱཝཛྫིཏྭཱ ཏཏོ པརཾ པཝཏྟཱནཾ ཏིཎྞཾ ཙཏུནྣཾ ཝཱ པུབྦབྷཱགཙིཏྟཱནཾ ཨནནྟརཱ ཨུཔྤནྣེན སནྣིཊྛཱཔནཝསེན ཨདྷིཊྛཱནནྟི ¶ ལདྡྷནཱམེན ཨེཀེནེཝ ཨབྷིཉྙཱཉཱཎེན ཨདྷིཊྛཱཏཱིཏི ཨེཝམེཏྠ ཨཏྠོ དཊྛབྦོ.

ཡཾ པན ཝུཏྟཾ ‘‘ཡཐཱ ཨཱཡསྨཱ ཙཱུལ༹པནྠཀོ’’ཏི, ཏཾ བཧུདྷཱབྷཱཝསྶ ཀཱཡསཀྑིདསྶནཏྠཾ ཝུཏྟཾ. ཏཾ པན ཝཏྠུནཱ དཱིཔེཏབྦཾ. ཏེ ཀིར དྭེབྷཱཏརོ པནྠེ ཛཱཏཏྟཱ པནྠཀཱཏི ནཱམཾ ལབྷིཾསུ. ཏེསཾ ཛེཊྛོ མཧཱཔནྠཀོ, སོ པབྦཛིཏྭཱ སཧ པཊིསམྦྷིདཱཧི ཨརཧཏྟཾ པཱཔུཎི. ཨརཧཱ ཧུཏྭཱ ཙཱུལ༹པནྠཀཾ པབྦཱཛེཏྭཱ –

པདུམཾ ཡཐཱ ཀོཀནདཾ སུགནྡྷཾ, པཱཏོ སིཡཱ ཕུལླམཝཱིཏགནྡྷཾ;

ཨངྒཱིརསཾ པསྶ ཝིརོཙམཱནཾ, ཏཔནྟམཱདིཙྩམིཝནྟལིཀྑེཏི. (ཨ. ནི. ༥.༡༩༥) –

ཨིམཾ གཱཐཾ ཨདཱསི. སོ ཏཾ ཙཏཱུཧི མཱསེཧི པགུཎཾ ཀཱཏུཾ ནཱསཀྑི. ཨཐ ནཾ ཐེརོ ཨབྷབྦོ ཏྭཾ སཱསནེཏི ཝིཧཱརཏོ ནཱིཧརི. ཏསྨིཉྩ ཀཱལེ ཐེརོ བྷཏྟུདྡེསཀོ ཧོཏི. ཛཱིཝཀོ ཐེརཾ ཨུཔསངྐམིཏྭཱ ‘‘སྭེ, བྷནྟེ, བྷགཝཏཱ སདྡྷིཾ པཉྩབྷིཀྑུསཏཱནི གཧེཏྭཱ ཨམྷཱཀཾ གེཧེ བྷིཀྑཾ གཎྷཐཱ’’ཏི ཨཱཧ. ཐེརོཔི ཋཔེཏྭཱ ཙཱུལ༹པནྠཀཾ སེསཱནཾ ཨདྷིཝཱསེམཱིཏི ཨདྷིཝཱསེསི.

ཙཱུལ༹པནྠཀོ དྭཱརཀོཊྛཀེ ཋཏྭཱ རོདཏི. བྷགཝཱ དིབྦཙཀྑུནཱ དིསྭཱ ཏཾ ཨུཔསངྐམིཏྭཱ ཀསྨཱ རོདསཱིཏི ཨཱཧ. སོ ཏཾ པཝཏྟིམཱཙིཀྑི. བྷགཝཱ ན སཛ྄ཛྷཱཡཾ ཀཱཏུཾ ཨསཀྐོནྟོ མམ ¶ སཱསནེ ཨབྷབྦོ ནཱམ ཧོཏི, མཱ སོཙི བྷིཀྑཱུཏི ཏཾ བཱཧཱཡཾ གཧེཏྭཱ ཝིཧཱརཾ པཝིསིཏྭཱ ཨིདྡྷིཡཱ པིལོཏིཀཁཎྜཾ ཨབྷིནིམྨིནིཏྭཱ ཨདཱསི, ཧནྡ བྷིཀྑུ ཨིམཾ པརིམཛྫནྟོ རཛོཧརཎཾ རཛོཧརཎནྟི པུནཔྤུནཾ སཛ྄ཛྷཱཡཾ ཀརོཧཱིཏི. ཏསྶ ཏཐཱ ཀརོཏོ ཏཾ ཀཱལ༹ཝཎྞཾ ཨཧོསི. སོ པརིསུདྡྷཾ ཝཏྠཾ, ནཏྠེཏྠ དོསོ, ཨཏྟབྷཱཝསྶ པནཱཡཾ དོསོཏི སཉྙཾ པཊིལབྷིཏྭཱ པཉྩསུ ཁནྡྷེསུ ཉཱཎཾ ཨོཏཱརེཏྭཱ ཝིཔསྶནཾ ཝཌྜྷེཏྭཱ ཨནུལོམཏོ གོཏྲབྷུསམཱིཔཾ པཱཔེསི. ཨཐསྶ བྷགཝཱ ཨོབྷཱསགཱཐཱ ཨབྷཱསི –

‘‘རཱགོ རཛོ ན ཙ པན རེཎུ ཝུཙྩཏི,

རཱགསྶེཏཾ ཨདྷིཝཙནཾ རཛོཏི;

ཨེཏཾ རཛཾ ཝིཔྤཛཧིཏྭཱ པཎྜིཏཱ,

ཝིཧརནྟི ཏེ ཝིགཏརཛསྶ སཱསནེ.

‘‘དོསོ ¶ …པེ….

‘‘མོཧོ རཛོ ན ཙ པན རེཎུ ཝུཙྩཏི,

མོཧསྶེཏཾ ཨདྷིཝཙནཾ རཛོཏི;

ཨེཏཾ རཛཾ ཝིཔྤཛཧིཏྭཱ པཎྜིཏཱ,

ཝིཧརནྟི ཏེ ཝིགཏརཛསྶ སཱསནེ’’ཏི. (མཧཱནི. ༢༠༩);

ཏསྶ གཱཐཱཔརིཡོསཱནེ ཙཏུཔཊིསམྦྷིདཱཚལ༹བྷིཉྙཱཔརིཝཱརཱ ནཝ ལོཀུཏྟརདྷམྨཱ ཧཏྠགཏཱཝ ཨཧེསུཾ.

སཏྠཱ དུཏིཡདིཝསེ ཛཱིཝཀསྶ གེཧཾ ཨགམཱསི སདྡྷིཾ བྷིཀྑུསངྒྷེན. ཨཐ དཀྑིཎོདཀཱཝསཱནེ ཡཱགུཡཱ དིཡྻམཱནཱཡ ཧཏྠེན པཏྟཾ པིདཧི. ཛཱིཝཀོ ཀིཾ བྷནྟེཏི པུཙྪི. ཝིཧཱརེ ཨེཀོ བྷིཀྑུ ཨཏྠཱིཏི. སོ པུརིསཾ པེསེསི ‘‘གཙྪ, ཨཡྻཾ གཧེཏྭཱ སཱིགྷཾ ཨེཧཱི’’ཏི. ཝིཧཱརཏོ ནིཀྑནྟེ པན བྷགཝཏི,

སཧསྶཀྑཏྟུམཏྟཱནཾ ¶ , ནིམྨིནིཏྭཱན པནྠཀོ;

ནིསཱིདམྦཝནེ རམྨེ, ཡཱཝ ཀཱལཔྤཝེདནཱཏི. (ཐེརགཱ. ༥༦༣);

ཨཐ སོ པུརིསོ གནྟྭཱ ཀཱསཱཝེཧི ཨེཀཔཛྫོཏཾ ཨཱརཱམཾ དིསྭཱ ཨཱགནྟྭཱ བྷིཀྑཱུཧི བྷརིཏོ བྷནྟེ ཨཱརཱམོ, ནཱཧཾ ཛཱནཱམི ཀཏམོ སོ ཨཡྻོཏི ཨཱཧ. ཏཏོ ནཾ བྷགཝཱ ཨཱཧ ‘‘གཙྪ ཡཾ པཋམཾ པསྶསི, ཏཾ ཙཱིཝརཀཎྞེ གཧེཏྭཱ ‘སཏྠཱ ཏཾ ཨཱམནྟེཏཱི’ཏི ཝཏྭཱ ཨཱནེཧཱི’’ཏི. སོ ཏཾ གནྟྭཱ ཐེརསྶེཝ ཙཱིཝརཀཎྞེ ཨགྒཧེསི. ཏཱཝདེཝ སབྦེཔི ནིམྨིཏཱ ཨནྟརདྷཱཡིཾསུ. ཐེརོ ‘‘གཙྪ ཏྭ’’ནྟི ཏཾ ཨུཡྻོཛེཏྭཱ མུཁདྷོཝནཱདིསརཱིརཀིཙྩཾ ནིཊྛཔེཏྭཱ པཋམཏརཾ གནྟྭཱ པཏྟཱསནེ ནིསཱིདི. ཨིདཾ སནྡྷཱཡ ཝུཏྟཾ ‘‘ཡཐཱ ཨཱཡསྨཱ ཙཱུལ༹པནྠཀོ’’ཏི.

ཏཏྲ ཡེ ཏེ བཧཱུ ནིམྨིཏཱ ཏེ ཨནིཡམེཏྭཱ ནིམྨིཏཏྟཱ ཨིདྡྷིམཏཱ སདིསཱཝ ཧོནྟི. ཋཱནནིསཛྫཱདཱིསུ ཝཱ བྷཱསིཏཏུཎྷཱིབྷཱཝཱདཱིསུ ཝཱ ཡཾ ཡཾ ཨིདྡྷིམཱ ཀརོཏི, ཏཾ ཏདེཝ ཀརོནྟི. སཙེ པན ནཱནཱཝཎྞེ ཀཱཏུཀཱམོ ཧོཏི, ཀེཙི པཋམཝཡེ, ཀེཙི མཛ྄ཛྷིམཝཡེ, ཀེཙི པཙྪིམཝཡེ, ཏཐཱ ¶ དཱིགྷཀེསེ, ཨུཔཌྜྷམུཎྜེ, མུཎྜེ, མིསྶཀེསེ, ཨུཔཌྜྷརཏྟཙཱིཝརེ, པཎྜུཀཙཱིཝརེ, པདབྷཱཎདྷམྨཀཐཱསརབྷཉྙཔཉྷཔུཙྪནཔཉྷཝིསྶཛྫནརཛནཔཙནཙཱིཝརསིབྦནདྷོཝནཱདཱིནི ཀརོནྟེ ཨཔརེཔི ཝཱ ནཱནཔྤཀཱརཀེ ཀཱཏུཀཱམོ ཧོཏི, ཏེན པཱདཀཛ྄ཛྷཱནཏོ ཝུཊྛཱཡ ཨེཏྟཀཱ བྷིཀྑཱུ པཋམཝཡཱ ཧོནྟཱུཏིཨཱདིནཱ ནཡེན པརིཀམྨཾ ཀཏྭཱ པུན སམཱཔཛྫིཏྭཱ ཝུཊྛཱཡ ཨདྷིཊྛཱཏབྦཾ. ཨདྷིཊྛཱནཙིཏྟེན སདྡྷིཾ ཨིཙྪིཏིཙྪིཏཔྤཀཱརཱཡེཝ ཧོནྟཱིཏི. ཨེས ནཡོ བཧུདྷཱཔི ཧུཏྭཱ ཨེཀོ ཧོཏཱིཏིཨཱདཱིསུ.

ཨཡཾ པན ཝིསེསོ, ཨིམིནཱ བྷིཀྑུནཱ ཨེཝཾ བཧུབྷཱཝཾ ནིམྨིནིཏྭཱ པུན ‘‘ཨེཀོཝ ཧུཏྭཱ ཙངྐམིསྶཱམི, སཛ྄ཛྷཱཡཾ ཀརིསྶཱམི, པཉྷཾ པུཙྪིསྶཱམཱི’’ཏི ཙིནྟེཏྭཱ ཝཱ, ‘‘ཨཡཾ ཝིཧཱརོ ཨཔྤབྷིཀྑུཀོ, སཙེ ཀེཙི ཨཱགམིསྶནྟི ‘ཀུཏོ ཨིམེ ཨེཏྟཀཱ ཨེཀསདིསཱ བྷིཀྑཱུ, ཨདྡྷཱ ཐེརསྶ ཨེས ཨཱནུབྷཱཝོ’ཏི མཾ ཛཱནིསྶནྟཱི’’ཏི ཨཔྤིཙྪཏཱཡ ཝཱ ཨནྟརཱཝ ‘‘ཨེཀོ ཧོམཱི’’ཏི ཨིཙྪནྟེན པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ‘‘ཨེཀོ ཧོམཱི’’ཏི པརིཀམྨཾ ཀཏྭཱ པུན སམཱཔཛྫིཏྭཱ ཝུཊྛཱཡ ‘‘ཨེཀོ ཧོམཱི’’ཏི ཨདྷིཊྛཱཏབྦཾ. ཨདྷིཊྛཱནཙིཏྟེན སདྡྷིཾཡེཝ ཨེཀོ ཧོཏི. ཨེཝཾ ཨཀརོནྟོ པན ཡཐཱ པརིཙྪིནྣཀཱལཝསེན སཡམེཝ ཨེཀོ ཧོཏི.

༣༨༧. ཨཱཝིབྷཱཝཾ ཏིརོབྷཱཝནྟི ཨེཏྠ ཨཱཝིབྷཱཝཾ ཀརོཏི ཏིརོབྷཱཝཾ ཀརོཏཱིཏི ཨཡམཏྠོ ¶ . ཨིདམེཝ ཧི སནྡྷཱཡ པཊིསམྦྷིདཱཡཾ ཝུཏྟཾ ‘‘ཨཱཝིབྷཱཝནྟི ཀེནཙི ཨནཱཝཊཾ ཧོཏི ཨཔྤཊིཙྪནྣཾ ཝིཝཊཾ པཱཀཊཾ. ཏིརོབྷཱཝནྟི ཀེནཙི ཨཱཝཊཾ ཧོཏི པཊིཙྪནྣཾ པིཧིཏཾ པཊིཀུཛྫིཏ’’ནྟི (པཊི. མ. ༣.༡༡). ཏཏྲཱཡཾ ཨིདྡྷིམཱ ཨཱཝིབྷཱཝཾ ཀཱཏུཀཱམོ ཨནྡྷཀཱརཾ ཝཱ ཨཱལོཀཾ ཀརོཏི, པཊིཙྪནྣཾ ཝཱ ཝིཝཊཾ, ཨནཱཔཱཐཾ ཝཱ ཨཱཔཱཐཾ ཀརོཏི. ཀཐཾ? ཨཡཉྷི ཡཐཱ པཊིཙྪནྣོཔི དཱུརེ ཋིཏོཔི ཝཱ དིསྶཏི, ཨེཝཾ ཨཏྟཱནཾ ཝཱ པརཾ ཝཱ ཀཱཏུཀཱམོ པཱདཀཛ྄ཛྷཱནཏོ ཝུཊྛཱཡ ཨིདཾ ཨནྡྷཀཱརཊྛཱནཾ ཨཱལོཀཛཱཏཾ ཧོཏཱུཏི ཝཱ, ཨིདཾ པཊིཙྪནྣཾ ཝིཝཊཾ ཧོཏཱུཏི ཝཱ, ཨིདཾ ཨནཱཔཱཐཾ ཨཱཔཱཐཾ ཧོཏཱུཏི ཝཱ ཨཱཝཛྫིཏྭཱ པརིཀམྨཾ ཀཏྭཱ ཝུཏྟནཡེནེཝ ཨདྷིཊྛཱཏི, སཧ ཨདྷིཊྛཱནཙིཏྟེན ཡཐཱདྷིཊྛིཏམེཝ ཧོཏི. པརེ དཱུརེ ཋིཏཱཔི པསྶནྟི. སཡམྤི པསྶིཏུཀཱམོ པསྶཏི.

༣༨༨. ཨེཏཾ ¶ པན པཱཊིཧཱརིཡཾ ཀེན ཀཏཔུབྦནྟི? བྷགཝཏཱ. བྷགཝཱ ཧི ཙཱུལ༹སུབྷདྡཱཡ ནིམནྟིཏོ ཝིསྶཀམྨུནཱ ནིམྨིཏེཧི པཉྩཧི ཀཱུཊཱགཱརསཏེཧི སཱཝཏྠིཏོ སཏྟཡོཛནབྦྷནྟརཾ སཱཀེཏཾ གཙྪནྟོ ཡཐཱ སཱཀེཏནགརཝཱསིནོ སཱཝཏྠིཝཱསིཀེ, སཱཝཏྠིཝཱསིནོ ཙ སཱཀེཏཝཱསིཀེ པསྶནྟི, ཨེཝཾ ཨདྷིཊྛཱསི. ནགརམཛ྄ཛྷེ ཙ ཨོཏརིཏྭཱ པཐཝིཾ དྭིདྷཱ བྷིནྡིཏྭཱ ཡཱཝ ཨཝཱིཙིཾ ཨཱཀཱསཉྩ དྭིདྷཱ ཝིཡཱུཧིཏྭཱ ཡཱཝ བྲཧྨལོཀཾ དསྶེསི.

དེཝོརོཧཎེནཔི ཙ ཨཡམཏྠོ ཝིབྷཱཝེཏབྦོ. བྷགཝཱ ཀིར ཡམཀཔཱཊིཧཱརིཡཾ ཀཏྭཱ ཙཏུརཱསཱིཏིཔཱཎསཧསྶཱནི བནྡྷནཱ པམོཙེཏྭཱ ཨཏཱིཏཱ བུདྡྷཱ ཡམཀཔཱཊིཧཱརིཡཱཝསཱནེ ཀུཧིཾ གཏཱཏི ཨཱཝཛྫིཏྭཱ ཏཱཝཏིཾསབྷཝནཾ གཏཱཏི ཨདྡས. ཨཐེཀེན པཱདེན པཐཝཱིཏལཾ ཨཀྐམིཏྭཱ དུཏིཡཾ ཡུགནྡྷརཔབྦཏེ པཏིཊྛཔེཏྭཱ པུན པུརིམཔཱདཾ ཨུདྡྷརིཏྭཱ སིནེརུམཏྠཀཾ ཨཀྐམིཏྭཱ ཏཏྠ པཎྜུཀམྦལསིལཱཏལེ ཝསྶཾ ཨུཔགནྟྭཱ སནྣིཔཏིཏཱནཾ དསསཧསྶཙཀྐཝཱལ༹དེཝཏཱནཾ ཨཱདིཏོ པཊྛཱཡ ཨབྷིདྷམྨཀཐཾ ཨཱརབྷི. བྷིཀྑཱཙཱརཝེལཱཡ ནིམྨིཏབུདྡྷཾ མཱཔེསི. སོ དྷམྨཾ དེསེཏི. བྷགཝཱ ནཱགལཏཱདནྟཀཊྛཾ ཁཱདིཏྭཱ ཨནོཏཏྟདཧེ མུཁཾ དྷོཝིཏྭཱ ཨུཏྟརཀུརཱུསུ པིཎྜཔཱཏཾ གཧེཏྭཱ ཨནོཏཏྟདཧཏཱིརེ པརིབྷུཉྫཏི. སཱརིཔུཏྟཏྠེརོ ཏཏྠ གནྟྭཱ བྷགཝནྟཾ ཝནྡཏི. བྷགཝཱ ཨཛྫ ཨེཏྟཀཾ དྷམྨཾ དེསེསིནྟི ཐེརསྶ ནཡཾ དེཏི. ཨེཝཾ ཏཡོ མཱསེ ཨབྦོཙྪིནྣཾ ཨབྷིདྷམྨཀཐཾ ཀཐེསི. ཏཾ སུཏྭཱ ཨསཱིཏིཀོཊིདེཝཏཱནཾ དྷམྨཱབྷིསམཡོ ཨཧོསི.

ཡམཀཔཱཊིཧཱརིཡེ སནྣིཔཏིཏཱཔི དྭཱདསཡོཛནཱ པརིསཱ བྷགཝནྟཾ པསྶིཏྭཱཝ གམིསྶཱམཱཏི ¶ ཁནྡྷཱཝཱརཾ བནྡྷིཏྭཱ ཨཊྛཱསི. ཏཾ ཙཱུལ༹ཨནཱཐཔིཎྜིཀསེཊྛིཡེཝ སབྦཔཙྩཡེཧི ཨུཔཊྛཱསི. མནུསྶཱ ཀུཧིཾ བྷགཝཱཏི ཛཱནནཏྠཱཡ ཨནུརུདྡྷཏྠེརཾ ཡཱཙིཾསུ. ཐེརོ ཨཱལོཀཾ ཝཌྜྷེཏྭཱ ཨདྡས དིབྦེན ཙཀྑུནཱ ཏཏྠ ཝསྶཱུཔགཏཾ བྷགཝནྟཾ དིསྭཱ ཨཱརོཙེསི.

ཏེ བྷགཝཏོ ཝནྡནཏྠཱཡ མཧཱམོགྒལླཱནཏྠེརཾ ཡཱཙིཾསུ. ཐེརོ པརིསམཛ྄ཛྷེཡེཝ མཧཱཔཐཝིཡཾ ནིམུཛྫིཏྭཱ སིནེརུཔབྦཏཾ ནིབྦིཛ྄ཛྷིཏྭཱ ཏཐཱགཏཔཱདམཱུལེ ¶ བྷགཝཏོ པཱདེ ཝནྡམཱནོཝ ཨུམྨུཛྫིཏྭཱ བྷགཝནྟཾ ཨེཏདཝོཙ ‘‘ཛམྦུདཱིཔཝཱསིནོ, བྷནྟེ, བྷགཝཏོ པཱདེ ཝནྡིཏྭཱ པསྶིཏྭཱཝ གམིསྶཱམཱཏི ཝདནྟཱི’’ཏི. བྷགཝཱ ཨཱཧ ‘‘ཀུཧིཾ པན ཏེ, མོགྒལླཱན, ཨེཏརཧི ཛེཊྛབྷཱཏཱ དྷམྨསེནཱཔཏཱི’’ཏི? ‘‘སངྐསྶནགརེ བྷནྟེ’’ཏི. ‘‘མོགྒལླཱན, མཾ དཊྛུཀཱམཱ སྭེ སངྐསྶནགརཾ ཨཱགཙྪནྟུ, ཨཧཾ སྭེ མཧཱཔཝཱརཎཔུཎྞམཱསཱིཨུཔོསཐདིཝསེ སངྐསྶནགརེ ཨོཏརིསྶཱམཱི’’ཏི. ‘‘སཱདྷུ, བྷནྟེ’’ཏི ཐེརོ དསབལཾ ཝནྡིཏྭཱ ཨཱགཏམགྒེནེཝ ཨོརུཡ྄ཧ མནུསྶཱནཾ སནྟིཀཾ སམྤཱཔུཎི. གམནཱགམནཀཱལེ ཙ ཡཐཱ ནཾ མནུསྶཱ པསྶནྟི, ཨེཝཾ ཨདྷིཊྛཱསི. ཨིདཾ ཏཱཝེཏྠ མཧཱམོགྒལླཱནཏྠེརོ ཨཱཝིབྷཱཝཔཱཊིཧཱརིཡཾ ཨཀཱསི.

སོ ཨེཝཾ ཨཱགཏོ ཏཾ པཝཏྟིཾ ཨཱརོཙེཏྭཱ ‘‘དཱུརནྟི སཉྙཾ ཨཀཏྭཱ ཀཏཔཱཏརཱསཱཝ ནིཀྑམཐཱ’’ཏི ཨཱཧ. བྷགཝཱ སཀྐསྶ དེཝརཉྙོ ཨཱརོཙེསི ‘‘མཧཱརཱཛ, སྭེ མནུསྶལོཀཾ གཙྪཱམཱི’’ཏི. དེཝརཱཛཱ ཝིསྶཀམྨཾ ཨཱཎཱཔེསི ‘‘ཏཱཏ, སྭེ བྷགཝཱ མནུསྶལོཀཾ གནྟུཀཱམོ, ཏིསྶོ སོཔཱནཔནྟིཡོ མཱཔེཧི ཨེཀཾ ཀནཀམཡཾ, ཨེཀཾ རཛཏམཡཾ, ཨེཀཾ མཎིམཡ’’ནྟི. སོ ཏཐཱ ཨཀཱསི. བྷགཝཱ དུཏིཡདིཝསེ སིནེརུམུདྡྷནི ཋཏྭཱ པུརཏྠིམལོཀདྷཱཏུཾ ཨོལོཀེསི, ཨནེཀཱནི ཙཀྐཝཱལ༹སཧསྶཱནི ཝིཝཊཱནི ཧུཏྭཱ ཨེཀངྒཎཾ ཝིཡ པཀཱསིཾསུ. ཡཐཱ ཙ པུརཏྠིམེན, ཨེཝཾ པཙྪིམེནཔི ཨུཏྟརེནཔི དཀྑིཎེནཔི སབྦཾ ཝིཝཊམདྡས. ཧེཊྛཱཔི ཡཱཝ ཨཝཱིཙི, ཨུཔརི ཡཱཝ ཨཀནིཊྛབྷཝནཾ, ཏཱཝ ཨདྡས.

ཏཾ དིཝསཾ ཀིར ལོཀཝིཝརཎཾ ནཱམ ཨཧོསི. མནུསྶཱཔི དེཝེ པསྶནྟི, དེཝཱཔི མནུསྶེ. ཏཏྠ ནེཝ མནུསྶཱ ཨུདྡྷཾ ཨུལློཀེནྟི, ན དེཝཱ ཨདྷོ ཨོལོཀེནྟི, སབྦེ སམྨུཁཱཝ ཨཉྙམཉྙཾ པསྶནྟི. བྷགཝཱ མཛ྄ཛྷེ མཎིམཡེན སོཔཱནེན ཨོཏརཏི, ཚཀཱམཱཝཙརདེཝཱ ཝཱམཔསྶེ ཀནཀམཡེན, སུདྡྷཱཝཱསཱ ཙ མཧཱབྲཧྨཱ ཙ དཀྑིཎཔསྶེ རཛཏམཡེན. དེཝརཱཛཱ པཏྟཙཱིཝརཾ ཨགྒཧེསི, མཧཱབྲཧྨཱ ཏིཡོཛནིཀཾ སེཏཙྪཏྟཾ, སུཡཱམོ ཝཱལ༹བཱིཛནིཾ, པཉྩསིཁོ གནྡྷབྦཔུཏྟོ ¶ ཏིགཱཝུཏམཏྟཾ བེལུ༹ཝཔཎྜུཝཱིཎཾ གཧེཏྭཱ ཏཐཱགཏསྶ པཱུཛཾ ཀརོནྟོ ཨོཏརཏི. ཏཾདིཝསཾ བྷགཝནྟཾ དིསྭཱ བུདྡྷབྷཱཝཱཡ པིཧཾ ཨནུཔྤཱདེཏྭཱ ཋིཏསཏྟོ ནཱམ ནཏྠི. ཨིདམེཏྠ བྷགཝཱ ཨཱཝིབྷཱཝཔཱཊིཧཱརིཡཾ ཨཀཱསི.

ཨཔིཙ ¶ ཏམྦཔཎྞིདཱིཔེ ཏལངྒརཝཱསཱི དྷམྨདིནྣཏྠེརོཔི ཏིསྶམཧཱཝིཧཱརེ ཙེཏིཡངྒཎསྨིཾ ནིསཱིདིཏྭཱ ‘‘ཏཱིཧི, བྷིཀྑཝེ, དྷམྨེཧི སམནྣཱགཏོ བྷིཀྑུ ཨཔཎྞཀཔཊིཔདཾ པཊིཔནྣོ ཧོཏཱི’’ཏི ཨཔཎྞཀསུཏྟཾ (ཨ. ནི. ༣.༡༦) ཀཐེནྟོ ཧེཊྛཱམུཁཾ བཱིཛནིཾ ཨཀཱསི, ཡཱཝ ཨཝཱིཙིཏོ ཨེཀངྒཎཾ ཨཧོསི. ཏཏོ ཨུཔརིམུཁཾ ཨཀཱསི, ཡཱཝ བྲཧྨལོཀཱ ཨེཀངྒཎཾ ཨཧོསི. ཐེརོ ནིརཡབྷཡེན ཏཛྫེཏྭཱ སགྒསུཁེན ཙ པལོབྷེཏྭཱ དྷམྨཾ དེསེསི. ཀེཙི སོཏཱཔནྣཱ ཨཧེསུཾ, ཀེཙི སཀདཱགཱམཱི ཨནཱགཱམཱི ཨརཧནྟོཏི.

༣༨༩. ཏིརོབྷཱཝཾ ཀཱཏུཀཱམོ པན ཨཱལོཀཾ ཝཱ ཨནྡྷཀཱརཾ ཀརོཏི, ཨཔྤཊིཙྪནྣཾ ཝཱ པཊིཙྪནྣཾ, ཨཱཔཱཐཾ ཝཱ ཨནཱཔཱཐཾ ཀརོཏི. ཀཐཾ? ཨཡཉྷི ཡཐཱ ཨཔྤཊིཙྪནྣོཔི སམཱིཔེ ཋིཏོཔི ཝཱ ན དིསྶཏི, ཨེཝཾ ཨཏྟཱནཾ ཝཱ པརཾ ཝཱ ཀཱཏུཀཱམོ པཱདཀཛ྄ཛྷཱནཏོ ཝུཊྛཱཡ ‘‘ཨིདཾ ཨཱལོཀཊྛཱནཾ ཨནྡྷཀཱརཾ ཧོཏཱུ’’ཏི ཝཱ, ‘‘ཨིདཾ ཨཔྤཊིཙྪནྣཾ པཊིཙྪནྣཾ ཧོཏཱུ’’ཏི ཝཱ, ‘‘ཨིདཾ ཨཱཔཱཐཾ ཨནཱཔཱཐཾ ཧོཏཱུ’’ཏི ཝཱ ཨཱཝཛྫིཏྭཱ པརིཀམྨཾ ཀཏྭཱ ཝུཏྟནཡེནེཝ ཨདྷིཊྛཱཏི. སཧ ཨདྷིཊྛཱནཙིཏྟེན ཡཐཱདྷིཊྛིཏམེཝ ཧོཏི. པརེ སམཱིཔེ ཋིཏཱཔི ན པསྶནྟི. སཡམྤི ཨཔསྶིཏུཀཱམོ ན པསྶཏི.

༣༩༠. ཨེཏཾ པན པཱཊིཧཱརིཡཾ ཀེན ཀཏཔུབྦནྟི? བྷགཝཏཱ. བྷགཝཱ ཧི ཡསཾ ཀུལཔུཏྟཾ སམཱིཔེ ནིསིནྣཾཡེཝ ཡཐཱ ནཾ པིཏཱ ན པསྶཏི, ཨེཝམཀཱསི. ཏཐཱ ཝཱིསཡོཛནསཏཾ མཧཱཀཔྤིནསྶ པཙྩུགྒམནཾ ཀཏྭཱ ཏཾ ཨནཱགཱམིཕལེ, ཨམཙྩསཧསྶཉྩསྶ སོཏཱཔཏྟིཕལེ པཏིཊྛཱཔེཏྭཱ, ཏསྶ ཨནུམགྒཾ ཨཱགཏཱ སཧསྶིཏྠིཔརིཝཱརཱ ཨནོཛཱདེཝཱི ཨཱགནྟྭཱ སམཱིཔེ ནིསིནྣཱཔི ཡཐཱ སཔརིསཾ རཱཛཱནཾ ན པསྶཏི, ཏཐཱ ཀཏྭཱ ‘‘ཨཔི, བྷནྟེ, རཱཛཱནཾ པསྶཐཱ’’ཏི ཝུཏྟེ ‘‘ཀིཾ པན ཏེ རཱཛཱནཾ གཝེསིཏུཾ ཝརཾ, ཨུདཱཧུ ཨཏྟཱན’’ནྟི? ‘‘ཨཏྟཱནཾ, བྷནྟེ’’ཏི ཝཏྭཱ ནིསིནྣཱཡ ཏསྶཱ ཏཐཱ དྷམྨཾ དེསེསི, ཡཐཱ སཱ སདྡྷིཾ ཨིཏྠིསཧསྶེན སོཏཱཔཏྟིཕལེ པཏིཊྛཱསི, ཨམཙྩཱ ཨནཱགཱམིཕལེ, རཱཛཱ ཨརཧཏྟེཏི. ཨཔིཙ ཏམྦཔཎྞིདཱིཔཾ ¶ ¶ ཨཱགཏདིཝསེ ཡཐཱ ཨཏྟནཱ སདྡྷིཾ ཨཱགཏེ ཨཝསེསེ རཱཛཱ ན པསྶཏི, ཨེཝཾ ཀརོནྟེན མཧིནྡཏྠེརེནཱཔི ཨིདཾ ཀཏམེཝ (པཱརཱ. ཨཊྛ. ༡.ཏཏིཡསངྒཱིཏིཀཐཱ).

༣༩༡. ཨཔིཙ སབྦམྤི པཱཀཊཾ པཱཊིཧཱརིཡཾ ཨཱཝིབྷཱཝཾ ནཱམ. ཨཔཱཀཊཔཱཊིཧཱརིཡཾ ཏིརོབྷཱཝཾ ནཱམ. ཏཏྠ པཱཀཊཔཱཊིཧཱརིཡེ ཨིདྡྷིཔི པཉྙཱཡཏི ཨིདྡྷིམཱཔི. ཏཾ ཡམཀཔཱཊིཧཱརིཡེན དཱིཔེཏབྦཾ. ཏཏྲ ཧི ‘‘ཨིདྷ ཏཐཱགཏོ ཡམཀཔཱཊིཧཱརིཡཾ ཀརོཏི ཨསཱདྷཱརཎཾ སཱཝཀེཧི. ཨུཔརིམཀཱཡཏོ ཨགྒིཀྑནྡྷོ པཝཏྟཏི, ཧེཊྛིམཀཱཡཏོ ཨུདཀདྷཱརཱ པཝཏྟཏཱི’’ཏི (པཊི. མ. ༡.༡༡༦) ཨེཝཾ ཨུབྷཡཾ པཉྙཱཡིཏྠ. ཨཔཱཀཊཔཱཊིཧཱརིཡེ ཨིདྡྷིཡེཝ པཉྙཱཡཏི, ན ཨིདྡྷིམཱ. ཏཾ མཧཀསུཏྟེན (སཾ. ནི. ༤.༣༤༦) ཙ བྲཧྨནིམནྟནིཀསུཏྟེན (མ. ནི. ༡.༥༠༡ ཨཱདཡོ) ཙ དཱིཔེཏབྦཾ. ཏཏྲ ཧི ཨཱཡསྨཏོ ཙ མཧཀསྶ, བྷགཝཏོ ཙ ཨིདྡྷིཡེཝ པཉྙཱཡིཏྠ, ན ཨིདྡྷིམཱ.

ཡཐཱཧ –

‘‘ཨེཀམནྟཾ ནིསིནྣོ ཁོ ཙིཏྟོ གཧཔཏི ཨཱཡསྨནྟཾ མཧཀཾ ཨེཏདཝོཙ ‘སཱདྷུ མེ, བྷནྟེ, ཨཡྻོ མཧཀོ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ དསྶེཏཱུ’ཏི. ཏེན ཧི ཏྭཾ གཧཔཏི ཨཱལི༹ནྡེ ཨུཏྟརཱསངྒཾ པཉྙཱཔེཏྭཱ ཏིཎཀལཱཔཾ ཨོཀཱསེཧཱིཏི. ‘ཨེཝཾ, བྷནྟེ’ཏི ཁོ ཙིཏྟོ གཧཔཏི ཨཱཡསྨཏོ མཧཀསྶ པཊིསྶུཏྭཱ ཨཱལི༹ནྡེ ཨུཏྟརཱསངྒཾ པཉྙཱཔེཏྭཱ ཏིཎཀལཱཔཾ ཨོཀཱསེསི. ཨཐ ཁོ ཨཱཡསྨཱ མཧཀོ ཝིཧཱརཾ པཝིསིཏྭཱ ཏཐཱརཱུཔཾ ཨིདྡྷཱབྷིསངྑཱརཾ ཨབྷིསངྑཱསི, ཡཐཱ ཏཱལཙྪིགྒལེ༹ན ཙ ཨགྒལ༹ནྟརིཀཱཡ ཙ ཨཙྩི ནིཀྑམིཏྭཱ ཏིཎཱནི ཛྷཱཔེསི, ཨུཏྟརཱསངྒཾ ན ཛྷཱཔེསཱི’’ཏི (སཾ. ནི. ༤.༣༤༦).

ཡཐཱ ཙཱཧ –

‘‘ཨཐ ཁྭཱཧཾ, བྷིཀྑཝེ, ཏཐཱརཱུཔཾ ཨིདྡྷཱབྷིསངྑཱརཾ ཨབྷིསངྑཱསིཾ ‘ཨེཏྟཱཝཏཱ བྲཧྨཱ ཙ བྲཧྨཔརིསཱ ཙ བྲཧྨཔཱརིསཛྫཱ ཙ སདྡཉྩ མེ སོསྶནྟི, ན ཙ མཾ དཀྑིསྶནྟཱི’ཏི ཨནྟརཧིཏོ ཨིམཾ གཱཐཾ ཨབྷཱསིཾ –

‘བྷཝེ ¶ ¶ ཝཱཧཾ བྷཡཾ དིསྭཱ, བྷཝཉྩ ཝིབྷཝེསིནཾ;

བྷཝཾ ནཱབྷིཝདིཾ ཀིཉྩི, ནནྡིཉྩ ན ཨུཔཱདིཡི’’’ནྟི. (མ. ནི. ༡.༥༠༤);

༣༩༢. ཏིརོཀུཊྚཾ ཏིརོཔཱཀཱརཾ ཏིརོཔབྦཏཾ ཨསཛྫམཱནོ གཙྪཏི སེཡྻཐཱཔི ཨཱཀཱསེཏི ཨེཏྠ ཏིརོཀུཊྚནྟི པརཀུཊྚཾ, ཀུཊྚསྶ པརབྷཱགནྟི ཝུཏྟཾ ཧོཏི. ཨེས ནཡོ ཨིཏརེསུ. ཀུཊྚོཏི ཙ གེཧབྷིཏྟིཡཱ ཨེཏམདྷིཝཙནཾ. པཱཀཱརོཏི གེཧཝིཧཱརགཱམཱདཱིནཾ པརིཀྑེཔཔཱཀཱརོ. པབྦཏོཏི པཾསུཔབྦཏོ ཝཱ པཱསཱཎཔབྦཏོ ཝཱ. ཨསཛྫམཱནོཏི ཨལགྒམཱནོ. སེཡྻཐཱཔི ཨཱཀཱསེཏི ཨཱཀཱསེ ཝིཡ. ཨེཝཾ གནྟུཀཱམེན པན ཨཱཀཱསཀསིཎཾ སམཱཔཛྫིཏྭཱ ཝུཊྛཱཡ ཀུཊྚཾ ཝཱ པཱཀཱརཾ ཝཱ སིནེརུཙཀྐཝཱལེ༹སུཔི ཨཉྙཏརཾ པབྦཏཾ ཝཱ ཨཱཝཛྫིཏྭཱ ཀཏཔརིཀམྨེན ཨཱཀཱསོ ཧོཏཱུཏི ཨདྷིཊྛཱཏབྦོ. ཨཱཀཱསོཡེཝ ཧོཏི. ཨདྷོ ཨོཏརིཏུཀཱམསྶ, ཨུདྡྷཾ ཝཱ ཨཱརོཧིཏུཀཱམསྶ སུསིརོ ཧོཏི, ཝིནིཝིཛ྄ཛྷིཏྭཱ གནྟུཀཱམསྶ ཚིདྡོ. སོ ཏཏྠ ཨསཛྫམཱནོ གཙྪཏི.

ཏིཔིཊཀཙཱུལཱ༹བྷཡཏྠེརོ པནེཏྠཱཧ – ‘‘ཨཱཀཱསཀསིཎསམཱཔཛྫནཾ, ཨཱཝུསོ, ཀིམཏྠིཡཾ, ཀིཾ ཧཏྠིཨསྶཱདཱིནི ཨབྷིནིམྨིནིཏུཀཱམོ ཧཏྠིཨསྶཱདི ཀསིཎཱནི སམཱཔཛྫཏི, ནནུ ཡཏྠ ཀཏྠཙི ཀསིཎེ པརིཀམྨཾ ཀཏྭཱ ཨཊྛསམཱཔཏྟིཝསཱིབྷཱཝོཡེཝ པམཱཎཾ. ཡཾ ཡཾ ཨིཙྪཏི, ཏཾ ཏདེཝ ཧོཏཱི’’ཏི. བྷིཀྑཱུ ཨཱཧཾསུ – ‘‘པཱལི༹ཡཱ, བྷནྟེ, ཨཱཀཱསཀསིཎཾཡེཝ ཨཱགཏཾ, ཏསྨཱ ཨཝསྶམེཏཾ ཝཏྟབྦ’’ནྟི. ཏཏྲཱཡཾ པཱལི༹ –

‘‘པཀཏིཡཱ ཨཱཀཱསཀསིཎསམཱཔཏྟིཡཱ ལཱབྷཱི ཧོཏི. ཏིརོཀུཊྚཾ ཏིརོཔཱཀཱརཾ ཏིརོཔབྦཏཾ ཨཱཝཛྫཏི. ཨཱཝཛྫིཏྭཱ ཉཱཎེན ཨདྷིཊྛཱཏི – ‘ཨཱཀཱསོ ཧོཏཱུ’ཏི. ཨཱཀཱསོ ཧོཏི. ཏིརོཀུཊྚཾ ཏིརོཔཱཀཱརཾ ཏིརོཔབྦཏཾ ཨསཛྫམཱནོ གཙྪཏི. ཡཐཱ མནུསྶཱ པཀཏིཡཱ ཨནིདྡྷིམནྟོ ཀེནཙི ཨནཱཝཊེ ཨཔརིཀྑིཏྟེ ཨསཛྫམཱནཱ གཙྪནྟི, ཨེཝམེཝ སོ ཨིདྡྷིམཱ ཙེཏོཝསིཔྤཏྟོ ཏིརོཀུཊྚཾ ཏིརོཔཱཀཱརཾ ཏིརོཔབྦཏཾ ཨསཛྫམཱནོ གཙྪཏི, སེཡྻཐཱཔི ཨཱཀཱསེ’’ཏི (པཊི. མ. ༣.༡༡).

སཙེ ¶ པནསྶ བྷིཀྑུནོ ཨདྷིཊྛཧིཏྭཱ གཙྪནྟསྶ ཨནྟརཱ པབྦཏོ ཝཱ རུཀྑོ ཝཱ ཨུཊྛེཏི, ཀིཾ པུན སམཱཔཛྫིཏྭཱ ཨདྷིཊྛཱཏབྦནྟི? དོསོ ནཏྠི. པུན སམཱཔཛྫིཏྭཱ ཨདྷིཊྛཱནཾ ཧི ¶ ཨུཔཛ྄ཛྷཱཡསྶ སནྟིཀེ ནིསྶཡགྒཧཎསདིསཾ ཧོཏི. ཨིམིནཱ ཙ པན བྷིཀྑུནཱ ཨཱཀཱསོ ཧོཏཱུཏི ཨདྷིཊྛིཏཏྟཱ ཨཱཀཱསོ ཧོཏིཡེཝ. པུརིམཱདྷིཊྛཱནབལེནེཝ ཙསྶ ཨནྟརཱ ཨཉྙོ པབྦཏོ ཝཱ རུཀྑོ ཝཱ ཨུཏུམཡོ ཨུཊྛཧིསྶཏཱིཏི ཨཊྛཱནམེཝེཏཾ. ཨཉྙེན ཨིདྡྷིམཏཱ ནིམྨིཏེ པན པཋམནིམྨཱནཾ བལཝཾ ཧོཏི. ཨིཏརེན ཏསྶ ཨུདྡྷཾ ཝཱ ཨདྷོ ཝཱ གནྟབྦཾ.

༣༩༣. པཐཝིཡཱཔི ཨུམྨུཛྫནིམུཛྫནྟི ཨེཏྠ ཨུམྨུཛྫནྟི ཨུཊྛཱནཾ ཝུཙྩཏི. ནིམུཛྫནྟི སཾསཱིདནཾ. ཨུམྨུཛྫཉྩ ནིམུཛྫཉྩ ཨུམྨུཛྫནིམུཛྫཾ. ཨེཝཾ ཀཱཏུཀཱམེན ཨཱཔོཀསིཎཾ སམཱཔཛྫིཏྭཱ ཨུཊྛཱཡ ཨེཏྟཀེ ཋཱནེ པཐཝཱི ཨུདཀཾ ཧོཏཱུཏི པརིཙྪིནྡིཏྭཱ པརིཀམྨཾ ཀཏྭཱ ཝུཏྟནཡེནེཝ ཨདྷིཊྛཱཏབྦཾ. སཧ ཨདྷིཊྛཱནེན ཡཐཱ པརིཙྪིནྣེ ཋཱནེ པཐཝཱི ཨུདཀམེཝ ཧོཏི. སོ ཏཏྠ ཨུམྨུཛྫནིམུཛྫཾ ཀརོཏི. ཏཏྲཱཡཾ པཱལི༹ –

‘‘པཀཏིཡཱ ཨཱཔོཀསིཎསམཱཔཏྟིཡཱ ལཱབྷཱི ཧོཏི. པཐཝིཾ ཨཱཝཛྫཏི. ཨཱཝཛྫིཏྭཱ ཉཱཎེན ཨདྷིཊྛཱཏི – ‘ཨུདཀཾ ཧོཏཱུ’ཏི. ཨུདཀཾ ཧོཏི. སོ པཐཝིཡཱ ཨུམྨུཛྫནིམུཛྫཾ ཀརོཏི. ཡཐཱ མནུསྶཱ པཀཏིཡཱ ཨནིདྡྷིམནྟོ ཨུདཀེ ཨུམྨུཛྫནིམུཛྫཾ ཀརོནྟི, ཨེཝམེཝ སོ ཨིདྡྷིམཱ ཙེཏོཝསིཔྤཏྟོ པཐཝིཡཱ ཨུམྨུཛྫནིམུཛྫཾ ཀརོཏི, སེཡྻཐཱཔི ཨུདཀེ’’ཏི (པཊི. མ. ༣.༡༡).

ན ཀེཝལཉྩ ཨུམྨུཛྫནིམུཛྫམེཝ, ནྷཱནཔཱནམུཁདྷོཝནབྷཎྜཀདྷོཝནཱདཱིསུ ཡཾ ཡཾ ཨིཙྪཏི, ཏཾ ཏཾ ཀརོཏི. ན ཀེཝལཉྩ ཨུདཀམེཝ, སཔྤིཏེལམདྷུཕཱཎིཏཱདཱིསུཔི ཡཾ ཡཾ ཨིཙྪཏི, ཏཾ ཏཾ ཨིདཉྩིདཉྩ ཨེཏྟཀཾ ཧོཏཱུཏི ཨཱཝཛྫིཏྭཱ པརིཀམྨཾ ཀཏྭཱ ཨདྷིཊྛཧནྟསྶ ཡཐཱདྷིཊྛིཏམེཝ ཧོཏི. ཨུདྡྷརིཏྭཱ བྷཱཛནགཏཾ ཀརོནྟསྶ སཔྤི སཔྤིམེཝ ཧོཏི. ཏེལཱདཱིནི ཏེལཱདཱིནིཡེཝ. ཨུདཀཾ ཨུདཀམེཝ. སོ ཏཏྠ ཏེམིཏུཀཱམོཝ ཏེམེཏི, ན ཏེམིཏུཀཱམོ ན ཏེམེཏི. ཏསྶེཝ ཙ སཱ པཐཝཱི ཨུདཀཾ ཧོཏི སེསཛནསྶ པཐཝཱིཡེཝ. ཏཏྠ མནུསྶཱ པཏྟིཀཱཔི གཙྪནྟི, ཡཱནཱདཱིཧིཔི གཙྪནྟི, ཀསིཀམྨཱདཱིནིཔི ཀརོནྟིཡེཝ. སཙེ པནཱཡཾ ཏེསམྤི ཨུདཀཾ ཧོཏཱུཏི ¶ ཨིཙྪཏི, ཧོཏིཡེཝ. པརིཙྪིནྣཀཱལཾ པན ཨཏིཀྐམིཏྭཱ ཡཾ པཀཏིཡཱ གྷཊཏལཱ༹ཀཱདཱིསུ ཨུདཀཾ, ཏཾ ཋཔེཏྭཱ ཨཝསེསཾ པརིཙྪིནྣཊྛཱནཾ པཐཝཱིཡེཝ ཧོཏི.

༣༩༤. ཨུདཀེཔི ཨབྷིཛྫམཱནེཏི ཨེཏྠ ཡཾ ཨུདཀཾ ཨཀྐམིཏྭཱ སཾསཱིདཏི, ཏཾ བྷིཛྫམཱནནྟི ¶ ཝུཙྩཏི. ཝིཔརཱིཏཾ ཨབྷིཛྫམཱནཾ. ཨེཝཾ གནྟུཀཱམེན པན པཐཝཱིཀསིཎཾ སམཱཔཛྫིཏྭཱ ཝུཊྛཱཡ ཨེཏྟཀེ ཋཱནེ ཨུདཀཾ པཐཝཱི ཧོཏཱུཏི པརིཙྪིནྡིཏྭཱ པརིཀམྨཾ ཀཏྭཱ ཝུཏྟནཡེནེཝ ཨདྷིཊྛཱཏབྦཾ. སཧ ཨདྷིཊྛཱནེན ཡཐཱ པརིཙྪིནྣཊྛཱནེ ཨུདཀཾ པཐཝཱིཡེཝ ཧོཏི. སོ ཏཏྠ གཙྪཏི, ཏཏྲཱཡཾ པཱལི༹ –

‘‘པཀཏིཡཱ པཐཝཱིཀསིཎསམཱཔཏྟིཡཱ ལཱབྷཱི ཧོཏི. ཨུདཀཾ ཨཱཝཛྫཏི. ཨཱཝཛྫིཏྭཱ ཉཱཎེན ཨདྷིཊྛཱཏི – ‘པཐཝཱི ཧོཏཱུ’ཏི. པཐཝཱི ཧོཏི. སོ ཨབྷིཛྫམཱནེ ཨུདཀེ གཙྪཏི. ཡཐཱ མནུསྶཱ པཀཏིཡཱ ཨནིདྡྷིམནྟོ ཨབྷིཛྫམཱནཱཡ པཐཝིཡཱ གཙྪནྟི, ཨེཝམེཝ སོ ཨིདྡྷིམཱ ཙེཏོཝསིཔྤཏྟོ ཨབྷིཛྫམཱནེ ཨུདཀེ གཙྪཏི, སེཡྻཐཱཔི པཐཝིཡ’’ནྟི (པཊི. མ. ༣.༡༡).

ན ཀེཝལཉྩ གཙྪཏི, ཡཾ ཡཾ ཨིརིཡཱཔཐཾ ཨིཙྪཏི, ཏཾ ཏཾ ཀརོཏི. ན ཀེཝལཉྩ པཐཝིམེཝ ཀརོཏི, མཎིསུཝཎྞཔབྦཏརུཀྑཱདཱིསུཔི ཡཾ ཡཾ ཨིཙྪཏི, ཏཾ ཏཾ ཝུཏྟནཡེནེཝ ཨཱཝཛྫིཏྭཱ ཨདྷིཊྛཱཏི, ཡཐཱདྷིཊྛིཏམེཝ ཧོཏི. ཏསྶེཝ ཙ ཏཾ ཨུདཀཾ པཐཝཱི ཧོཏི, སེསཛནསྶ ཨུདཀམེཝ, མཙྪཀཙྪཔཱ ཙ ཨུདཀཀཱཀཱདཡོ ཙ ཡཐཱརུཙི ཝིཙརནྟི. སཙེ པནཱཡཾ ཨཉྙེསམྤི མནུསྶཱནཾ ཏཾ པཐཝིཾ ཀཱཏུཾ ཨིཙྪཏི, ཀརོཏིཡེཝ. པརིཙྪིནྣཀཱལཱཏིཀྐམེན པན ཨུདཀམེཝ ཧོཏི.

༣༩༥. པལླངྐེན ཀམཏཱིཏི པལླངྐེན གཙྪཏི. པཀྑཱི སཀུཎོཏི པཀྑེཧི ཡུཏྟསཀུཎོ. ཨེཝཾ ཀཱཏུཀཱམེན པན པཐཝཱིཀསིཎཾ སམཱཔཛྫིཏྭཱ ཝུཊྛཱཡ སཙེ ནིསིནྣོ གནྟུམིཙྪཏི, པལླངྐཔྤམཱཎཾ ཋཱནཾ པརིཙྪིནྡིཏྭཱ པརིཀམྨཾ ཀཏྭཱ ཝུཏྟནཡེནེཝ ཨདྷིཊྛཱཏབྦཾ. སཙེ ནིཔནྣོ གནྟུཀཱམོ ཧོཏི མཉྩཔྤམཱཎཾ, སཙེ པདསཱ གནྟུཀཱམོ ཧོཏི མགྒཔྤམཱཎནྟི ཨེཝཾ ཡཐཱནུརཱུཔཾ ཋཱནཾ པརིཙྪིནྡིཏྭཱ ཝུཏྟནཡེནེཝ པཐཝཱི ཧོཏཱུཏི ཨདྷིཊྛཱཏབྦཾ, སཧ ཨདྷིཊྛཱནེན པཐཝཱིཡེཝ ཧོཏི. ཏཏྲཱཡཾ པཱལི༹ –

‘‘ཨཱཀཱསེཔི ¶ པལླངྐེན ཀམཏི, སེཡྻཐཱཔི པཀྑཱི སཀུཎོཏི. པཀཏིཡཱ པཐཝཱིཀསིཎསམཱཔཏྟིཡཱ ལཱབྷཱི ཧོཏི, ཨཱཀཱསཾ ཨཱཝཛྫཏི. ཨཱཝཛྫིཏྭཱ ཉཱཎེན ཨདྷིཊྛཱཏི – ‘པཐཝཱི ཧོཏཱུ’ཏི. པཐཝཱི ཧོཏི. སོ ཨཱཀཱསེ ཨནྟལིཀྑེ ཙངྐམཏིཔི ཏིཊྛཏིཔི ¶ ནིསཱིདཏིཔི སེཡྻམྤི ཀཔྤེཏི. ཡཐཱ མནུསྶཱ པཀཏིཡཱ ཨནིདྡྷིམནྟོ པཐཝིཡཾ ཙངྐམནྟིཔི…པེ… སེཡྻམྤི ཀཔྤེནྟི, ཨེཝམེཝ སོ ཨིདྡྷིམཱ ཙེཏོཝསིཔྤཏྟོ ཨཱཀཱསེ ཨནྟལིཀྑེ ཙངྐམཏིཔི…པེ… སེཡྻམྤི ཀཔྤེཏཱི’’ཏི (པཊི. མ. ༣.༡༡).

ཨཱཀཱསེ གནྟུཀཱམེན ཙ བྷིཀྑུནཱ དིབྦཙཀྑུལཱབྷིནཱཔི བྷཝིཏབྦཾ. ཀསྨཱ? ཨནྟརེ ཨུཏུསམུཊྛཱནཱ ཝཱ པབྦཏརུཀྑཱདཡོ ཧོནྟི, ནཱགསུཔཎྞཱདཡོ ཝཱ ཨུསཱུཡནྟཱ མཱཔེནྟི, ནེསཾ དསྶནཏྠཾ. ཏེ པན དིསྭཱ ཀིཾ ཀཱཏབྦནྟི? པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ཨཱཀཱསོ ཧོཏཱུཏི པརིཀམྨཾ ཀཏྭཱ ཨདྷིཊྛཱཏབྦཾ. ཐེརོ པནཱཧ ‘‘སམཱཔཏྟིསམཱཔཛྫནཾ, ཨཱཝུསོ, ཀིམཏྠིཡཾ, ནནུ སམཱཧིཏམེཝསྶ ཙིཏྟཾ, ཏེན ཡཾ ཡཾ ཋཱནཾ ཨཱཀཱསོ ཧོཏཱུཏི ཨདྷིཊྛཱཏི, ཨཱཀཱསོཡེཝ ཧོཏཱི’’ཏི. ཀིཉྩཱཔི ཨེཝམཱཧ, ཨཐ ཁོ ཏིརོཀུཊྚཔཱརིཧཱརིཡེ ཝུཏྟནཡེནེཝ པཊིཔཛྫིཏབྦཾ.

ཨཔིཙ ཨོཀཱསེ ཨོརོཧཎཏྠམྤི ཨིམིནཱ དིབྦཙཀྑུལཱབྷིནཱ བྷཝིཏབྦཾ, ཨཡཉྷི སཙེ ཨནོཀཱསེ ནྷཱནཏིཏྠེ ཝཱ གཱམདྭཱརེ ཝཱ ཨོརོཧཏི. མཧཱཛནསྶ པཱཀཊོ ཧོཏི. ཏསྨཱ དིབྦཙཀྑུནཱ པསྶིཏྭཱ ཨནོཀཱསཾ ཝཛྫེཏྭཱ ཨོཀཱསེ ཨོཏརཏཱིཏི.

༣༩༦. ཨིམེཔི ཙནྡིམསཱུརིཡེ ཨེཝཾམཧིདྡྷིཀེ ཨེཝཾམཧཱནུབྷཱཝེ པཱཎིནཱ པརཱམསཏི པརིམཛྫཏཱིཏི ཨེཏྠ ཙནྡིམསཱུརིཡཱནཾ དྭཱཙཏྟཱལཱིསཡོཛནསཧསྶསྶ ཨུཔརི ཙརཎེན མཧིདྡྷིཀཏཱ, ཏཱིསུ དཱིཔེསུ ཨེཀཀྑཎེ ཨཱལོཀཀརཎེན མཧཱནུབྷཱཝཏཱ ཝེདིཏབྦཱ. ཨེཝཾ ཨུཔརི ཙརཎཨཱལོཀཀརཎེཧི ཝཱ མཧིདྡྷིཀེ ཏེནེཝ མཧཱནུབྷཱཝེ. པརཱམསཏཱིཏི པརིགྒཎྷཏི ཨེཀདེསེ ཝཱ ཚུཔཏི. པརིམཛྫཏཱིཏི སམནྟཏོ ཨཱདཱསཏལཾ ཝིཡ པརིམཛྫཏི. ཨཡཾ པནསྶ ཨིདྡྷི ཨབྷིཉྙཱཔཱདཀཛ྄ཛྷཱནཝསེནེཝ ཨིཛ྄ཛྷཏི, ནཏྠེཏྠ ཀསིཎསམཱཔཏྟིནིཡམོ. ཝུཏྟཉྷེཏཾ པཊིསམྦྷིདཱཡཾ –

‘‘ཨིམེཔི ¶ ཙནྡིམསཱུརིཡེ…པེ… པརིམཛྫཏཱིཏི ཨིདྷ སོ ཨིདྡྷིམཱ ཙེཏོཝསིཔྤཏྟོ ཙནྡིམསཱུརིཡེ ཨཱཝཛྫཏི, ཨཱཝཛྫིཏྭཱ ཉཱཎེན ཨདྷིཊྛཱཏི – ‘ཧཏྠཔཱསེ ཧོཏཱུ’ཏི. ཧཏྠཔཱསེ ཧོཏི. སོ ནིསིནྣཀོ ཝཱ ནིཔནྣཀོ ཝཱ ཙནྡིམསཱུརིཡེ པཱཎིནཱ ཨཱམསཏི པརཱམསཏི པརིམཛྫཏི. ཡཐཱ མནུསྶཱ པཀཏིཡཱ ཨནིདྡྷིམནྟོ ཀིཉྩིདེཝ རཱུཔགཏཾ ཧཏྠཔཱསེ ¶ ཨཱམསནྟི པརཱམསནྟི པརིམཛྫནྟི, ཨེཝམེཝ སོ ཨིདྡྷིམཱ…པེ… པརིམཛྫཏཱི’’ཏི (པཊི. མ. ༣.༡༢).

སྭཱཡཾ ཡདི ཨིཙྪཏི གནྟྭཱ པརཱམསིཏུཾ, གནྟྭཱ པརཱམསཏི, ཡདི པན ཨིདྷེཝ ནིསིནྣཀོ ཝཱ ནིཔནྣཀོ ཝཱ པརཱམསིཏུཀཱམོ ཧོཏི, ཧཏྠཔཱསེ ཧོཏཱུཏི ཨདྷིཊྛཱཏི, ཨདྷིཊྛཱནབལེན ཝཎྚཱ མུཏྟཏཱལཕལཾ ཝིཡ ཨཱགནྟྭཱ ཧཏྠཔཱསེ ཋིཏེ ཝཱ པརཱམསཏི, ཧཏྠཾ ཝཱ ཝཌྜྷེཏྭཱ. ཝཌྜྷེནྟསྶ པན ཀིཾ ཨུཔཱདིཎྞཀཾ ཝཌྜྷཏི, ཨནུཔཱདིཎྞཀནྟི? ཨུཔཱདིཎྞཀཾ ནིསྶཱཡ ཨནུཔཱདིཎྞཀཾ ཝཌྜྷཏི.

ཏཏྠ ཏིཔིཊཀཙཱུལ༹ནཱགཏྠེརོ ཨཱཧ ‘‘ཀིཾ པནཱཝུསོ, ཨུཔཱདིཎྞཀཾ ཁུདྡཀམྤི མཧནྟམྤི ན ཧོཏི, ནནུ ཡདཱ བྷིཀྑུ ཏཱལཙྪིདྡཱདཱིཧི ནིཀྑམཏི, ཏདཱ ཨུཔཱདིཎྞཀཾ ཁུདྡཀཾ ཧོཏི. ཡདཱ མཧནྟཾ ཨཏྟབྷཱཝཾ ཀརོཏི, ཏདཱ མཧནྟཾ ཧོཏི མཧཱམོགྒལླཱནཏྠེརསྶ ཝིཡཱ’’ཏི.

ནནྡོཔནནྡནཱགདམནཀཐཱ

ཨེཀསྨིཾ ཀིར སམཡེ ཨནཱཐཔིཎྜིཀོ གཧཔཏི བྷགཝཏོ དྷམྨདེསནཾ སུཏྭཱ ‘‘སྭེ, བྷནྟེ, པཉྩཧི བྷིཀྑུསཏེཧི སདྡྷིཾ ཨམྷཱཀཾ གེཧེ བྷིཀྑཾ གཎྷཐཱ’’ཏི ནིམནྟེཏྭཱ པཀྐམི. བྷགཝཱ ཨདྷིཝཱསེཏྭཱ ཏཾདིཝསཱཝསེསཾ རཏྟིབྷཱགཉྩ ཝཱིཏིནཱམེཏྭཱ པཙྩཱུསསམཡེ དསསཧསྶིལོཀདྷཱཏུཾ ཨོལོཀེསི. ཨཐསྶ ནནྡོཔནནྡོ ནཱམ ནཱགརཱཛཱ ཉཱཎམུཁེ ཨཱཔཱཐམཱགཙྪི. བྷགཝཱ ‘‘ཨཡཾ ནཱགརཱཛཱ མཡ྄ཧཾ ཉཱཎམུཁེ ཨཱཔཱཐམཱགཙྪི, ཨཏྠི ནུ ཁོ ཨསྶ ཨུཔནིསྶཡོ’’ཏི ཨཱཝཛྫེནྟོ ‘‘ཨཡཾ མིཙྪཱདིཊྛིཀོ ཏཱིསུ རཏནེསུ ཨཔྤསནྣོཏི དིསྭཱ ཀོ ནུ ཁོ ཨིམཾ མིཙྪཱདིཊྛིཏོ ཝིཝེཙེཡྻཱ’’ཏི ཨཱཝཛྫེནྟོ མཧཱམོགྒལླཱནཏྠེརཾ ཨདྡས.

ཏཏོ ¶ པབྷཱཏཱཡ རཏྟིཡཱ སརཱིརཔཊིཛགྒནཾ ཀཏྭཱ ཨཱཡསྨནྟཾ ཨཱནནྡཾ ཨཱམནྟེསི – ‘‘ཨཱནནྡ, པཉྩནྣཾ བྷིཀྑུསཏཱནཾ ཨཱརོཙེཧི ཏཐཱགཏོ དེཝཙཱརིཀཾ གཙྪཏཱི’’ཏི. ཏཾ དིཝསཉྩ ནནྡོཔནནྡསྶ ཨཱཔཱནབྷཱུམིཾ སཛྫཡིཾསུ. སོ དིབྦརཏནཔལླངྐེ དིབྦེན སེཏཙྪཏྟེན དྷཱརིཡམཱནེན ཏིཝིདྷནཱཊཀེཧི ཙེཝ ནཱགཔརིསཱཡ ཙ པརིཝུཏོ དིབྦབྷཱཛནེསུ ཨུཔཊྛཱཔིཏཾ ཨནྣཔཱནཝིདྷིཾ ཨོལོཀཡམཱནོ ནིསིནྣོ ཧོཏི. ཨཐ བྷགཝཱ ཡཐཱ ནཱགརཱཛཱ པསྶཏི, ཏཐཱ ཀཏྭཱ ཏསྶ ཝིཏཱནམཏྠཀེནེཝ པཉྩཧི བྷིཀྑུསཏེཧི སདྡྷིཾ ཏཱཝཏིཾསདེཝལོཀཱབྷིམུཁོ པཱཡཱསི.

ཏེན ¶ ཁོ པན སམཡེན ནནྡོཔནནྡསྶ ནཱགརཱཛསྶ ཨེཝརཱུཔཾ པཱཔཀཾ དིཊྛིགཏཾ ཨུཔྤནྣཾ ཧོཏི – ‘‘ཨིམེ ཧི ནཱམ མུཎྜཀཱ སམཎཀཱ ཨམྷཱཀཾ ཨུཔརཱུཔརིབྷཝནེན དེཝཱནཾ ཏཱཝཏིཾསཱནཾ བྷཝནཾ པཝིསནྟིཔི ནིཀྑམནྟིཔི, ན དཱནི ཨིཏོ པཊྛཱཡ ཨིམེསཾ ཨམྷཱཀཾ མཏྠཀེ པཱདཔཾསུཾ ཨོཀིརནྟཱནཾ གནྟུཾ དསྶཱམཱི’’ཏི ཨུཊྛཱཡ སིནེརུཔཱདཾ གནྟྭཱ ཏཾ ཨཏྟབྷཱཝཾ ཝིཛཧིཏྭཱ སིནེརུཾ སཏྟཀྑཏྟུཾ བྷོགེཧི པརིཀྑིཔིཏྭཱ ཨུཔརི ཕཎཾ ཀཏྭཱ ཏཱཝཏིཾསབྷཝནཾ ཨཝཀུཛྫེན ཕཎེན གཧེཏྭཱ ཨདསྶནཾ གམེསི.

ཨཐ ཁོ ཨཱཡསྨཱ རཊྛཔཱལོ བྷགཝནྟཾ ཨེཏདཝོཙ ‘‘པུབྦེ, བྷནྟེ, ཨིམསྨིཾ པདེསེ ཋིཏོ སིནེརུཾ པསྶཱམི, སིནེརུཔརིབྷཎྜཾ པསྶཱམི, ཏཱཝཏིཾསཾ པསྶཱམི, ཝེཛཡནྟཾ པསྶཱམི, ཝེཛཡནྟསྶ པཱསཱདསྶ ཨུཔརི དྷཛཾ པསྶཱམི. ཀོ ནུ ཁོ, བྷནྟེ, ཧེཏུ ཀོ པཙྩཡོ, ཡཾ ཨེཏརཧི ནེཝ སིནེརུཾ པསྶཱམི…པེ… ན ཝེཛཡནྟསྶ པཱསཱདསྶ ཨུཔརི དྷཛཾ པསྶཱམཱི’’ཏི. ‘‘ཨཡཾ, རཊྛཔཱལ, ནནྡོཔནནྡོ ནཱམ ནཱགརཱཛཱ ཏུམྷཱཀཾ ཀུཔིཏོ སིནེརུཾ སཏྟཀྑཏྟུཾ བྷོགེཧི པརིཀྑིཔིཏྭཱ ཨུཔརི ཕཎེན པཊིཙྪཱདེཏྭཱ ཨནྡྷཀཱརཾ ཀཏྭཱ ཋིཏོ’’ཏི. ‘‘དམེམི ནཾ, བྷནྟེ’’ཏི. ན བྷགཝཱ ཨནུཛཱནི. ཨཐ ཁོ ཨཱཡསྨཱ བྷདྡིཡོ ཨཱཡསྨཱ རཱཧུལོཏི ཨནུཀྐམེན སབྦེཔི བྷིཀྑཱུ ཨུཊྛཧིཾསུ. ན བྷགཝཱ ཨནུཛཱནི.

ཨཝསཱནེ མཧཱམོགྒལླཱནཏྠེརོ ‘‘ཨཧཾ, བྷནྟེ, དམེམི ན’’ནྟི ཨཱཧ. ‘‘དམེཧི མོགྒལླཱནཱ’’ཏི བྷགཝཱ ཨནུཛཱནི. ཐེརོ ཨཏྟབྷཱཝཾ ཝིཛཧིཏྭཱ མཧནྟཾ ནཱགརཱཛཝཎྞཾ ཨབྷིནིམྨིནིཏྭཱ ནནྡོཔནནྡཾ ཙུདྡསཀྑཏྟུཾ བྷོགེཧི པརིཀྑིཔིཏྭཱ ཏསྶ ཕཎམཏྠཀེ ཨཏྟནོ ཕཎཾ ཋཔེཏྭཱ སིནེརུནཱ ¶ སདྡྷིཾ ཨབྷིནིཔྤཱིལེ༹སི. ནཱགརཱཛཱ པདྷཱུམཱཡི. ཐེརོཔི ན ཏུཡ྄ཧཾཡེཝ སརཱིརེ དྷཱུམོ ཨཏྠི, མཡ྄ཧམྤི ཨཏྠཱིཏི པདྷཱུམཱཡི. ནཱགརཱཛསྶ དྷཱུམོ ཐེརཾ ན བཱདྷཏི. ཐེརསྶ པན དྷཱུམོ ནཱགརཱཛཱནཾ བཱདྷཏི. ཏཏོ ནཱགརཱཛཱ པཛྫལི. ཐེརོཔི ན ཏུཡ྄ཧཾཡེཝ སརཱིརེ ཨགྒི ཨཏྠི, མཡ྄ཧམྤི ཨཏྠཱིཏི པཛྫལི. ནཱགརཱཛསྶ ཏེཛོ ཐེརཾ ན བཱདྷཏི. ཐེརསྶ པན ཏེཛོ ནཱགརཱཛཱནཾ བཱདྷཏི. ནཱགརཱཛཱ ཨཡཾ མཾ སིནེརུནཱ ཨབྷིནིཔྤཱིལེ༹ཏྭཱ དྷཱུམཱཡཏི ཙེཝ པཛྫལཏི ཙཱཏི ཙིནྟེཏྭཱ ‘‘བྷོ ཏྭཾ ཀོསཱི’’ཏི པཊིཔུཙྪི. ‘‘ཨཧཾ ཁོ, ནནྡ, མོགྒལླཱནོ’’ཏི. ‘‘བྷནྟེ, ཨཏྟནོ བྷིཀྑུབྷཱཝེན ཏིཊྛཱཧཱི’’ཏི.

ཐེརོ ཏཾ ཨཏྟབྷཱཝཾ ཝིཛཧིཏྭཱ ཏསྶ དཀྑིཎཀཎྞསོཏེན པཝིསིཏྭཱ ཝཱམཀཎྞསོཏེན ནིཀྑམི ¶ , ཝཱམཀཎྞསོཏེན པཝིསིཏྭཱ དཀྑིཎཀཎྞསོཏེན ནིཀྑམི, ཏཐཱ དཀྑིཎནཱསསོཏེན པཝིསིཏྭཱ ཝཱམནཱསསོཏེན ནིཀྑམི, ཝཱམནཱསསོཏེན པཝིསིཏྭཱ དཀྑིཎནཱསསོཏེན ནིཀྑམི. ཏཏོ ནཱགརཱཛཱ མུཁཾ ཝིཝརི. ཐེརོ མུཁེན པཝིསིཏྭཱ ཨནྟོཀུཙྪིཡཾ པཱཙཱིནེན ཙ པཙྪིམེན ཙ ཙངྐམཏི. བྷགཝཱ ‘‘མོགྒལླཱན, མནསིཀརོཧི མཧིདྡྷིཀོ ཨེས ནཱགོ’’ཏི ཨཱཧ. ཐེརོ ‘‘མཡ྄ཧཾ ཁོ, བྷནྟེ, ཙཏྟཱརོ ཨིདྡྷིཔཱདཱ བྷཱཝིཏཱ བཧུལཱིཀཏཱ ཡཱནཱིཀཏཱ ཝཏྠུཀཏཱ ཨནུཊྛིཏཱ པརིཙིཏཱ སུསམཱརདྡྷཱ, ཏིཊྛཏུ, བྷནྟེ, ནནྡོཔནནྡོ, ཨཧཾ ནནྡོཔནནྡསདིསཱནཾ ནཱགརཱཛཱནཾ སཏམྤི སཧསྶམྤི སཏསཧསྶམྤི དམེཡྻ’’ནྟི ཨཱཧ.

ནཱགརཱཛཱ ཙིནྟེསི ‘‘པཝིསནྟོ ཏཱཝ མེ ན དིཊྛོ, ནིཀྑམནཀཱལེ དཱནི ནཾ དཱཋནྟརེ པཀྑིཔིཏྭཱ སངྑཱདིསྶཱམཱི’’ཏི ཙིནྟེཏྭཱ ནིཀྑམ བྷནྟེ, མཱ མཾ ཨནྟོཀུཙྪིཡཾ ཨཔརཱཔརཾ ཙངྐམནྟོ བཱདྷཡིཏྠཱཏི ཨཱཧ. ཐེརོ ནིཀྑམིཏྭཱ བཧི ཨཊྛཱསི. ནཱགརཱཛཱ ཨཡཾ སོཏི དིསྭཱ ནཱསཝཱཏཾ ཝིསྶཛྫི. ཐེརོ ཙཏུཏྠཾ ཛྷཱནཾ སམཱཔཛྫི. ལོམཀཱུཔམྤིསྶ ཝཱཏོ ཙཱལེཏུཾ ནཱསཀྑི. ཨཝསེསཱ བྷིཀྑཱུ ཀིར ཨཱདིཏོ པཊྛཱཡ སབྦཔཱཊིཧཱརིཡཱནི ཀཱཏུཾ སཀྐུཎེཡྻུཾ, ཨིམཾ པན ཋཱནཾ པཏྭཱ ཨེཝཾ ཁིཔྤནིསནྟིནོ ཧུཏྭཱ སམཱཔཛྫིཏུཾ ན སཀྑིསྶནྟཱིཏི ཏེསཾ བྷགཝཱ ནཱགརཱཛདམནཾ ནཱནུཛཱནི.

ནཱགརཱཛཱ ¶ ‘‘ཨཧཾ ཨིམསྶ སམཎསྶ ནཱསཝཱཏེན ལོམཀཱུཔམྤི ཙཱལེཏུཾ ནཱསཀྑིཾ, མཧིདྡྷིཀོ སམཎོ’’ཏི ཙིནྟེསི. ཐེརོ ཨཏྟབྷཱཝཾ ཝིཛཧིཏྭཱ སུཔཎྞརཱུཔཾ ཨབྷིནིམྨིནིཏྭཱ སུཔཎྞཝཱཏཾ དསྶེནྟོ ནཱགརཱཛཱནཾ ཨནུབནྡྷི. ནཱགརཱཛཱ ཏཾ ཨཏྟབྷཱཝཾ ཝིཛཧིཏྭཱ མཱཎཝཀཝཎྞཾ ཨབྷིནིམྨིནིཏྭཱ ‘‘བྷནྟེ, ཏུམྷཱཀཾ སརཎཾ གཙྪཱམཱི’’ཏི ཝདནྟོ ཐེརསྶ པཱདེ ཝནྡི. ཐེརོ ‘‘སཏྠཱ, ནནྡ, ཨཱགཏོ, ཨེཧི གམིསྶཱམཱ’’ཏི ནཱགརཱཛཱནཾ དམཡིཏྭཱ ནིབྦིསཾ ཀཏྭཱ གཧེཏྭཱ བྷགཝཏོ སནྟིཀཾ ཨགམཱསི. ནཱགརཱཛཱ བྷགཝནྟཾ ཝནྡིཏྭཱ ‘‘བྷནྟེ, ཏུམྷཱཀཾ སརཎཾ གཙྪཱམཱི’’ཏི ཨཱཧ. བྷགཝཱ ‘‘སུཁཱི ཧོཧི, ནཱགརཱཛཱ’’ཏི ཝཏྭཱ བྷིཀྑུསངྒྷཔརིཝུཏོ ཨནཱཐཔིཎྜིཀསྶ ནིཝེསནཾ ཨགམཱསི.

ཨནཱཐཔིཎྜིཀོ ‘‘ཀིཾ, བྷནྟེ, ཨཏིདིཝཱ ཨཱགཏཏྠཱ’’ཏི ཨཱཧ. མོགྒལླཱནསྶ ཙ ནནྡོཔནནྡསྶ ཙ སངྒཱམོ ཨཧོསཱིཏི. ཀསྶ, བྷནྟེ, ཛཡོ, ཀསྶ པརཱཛཡོཏི. མོགྒལླཱནསྶ ཛཡོ, ནནྡསྶ པརཱཛཡོཏི. ཨནཱཐཔིཎྜིཀོ ‘‘ཨདྷིཝཱསེཏུ མེ, བྷནྟེ, བྷགཝཱ སཏྟཱཧཾ ¶ ཨེཀཔཊིཔཱཊིཡཱ བྷཏྟཾ, སཏྟཱཧཾ ཐེརསྶ སཀྐཱརཾ ཀརིསྶཱམཱི’’ཏི ཝཏྭཱ སཏྟཱཧཾ བུདྡྷཔམུཁཱནཾ པཉྩནྣཾ བྷིཀྑུསཏཱནཾ མཧཱསཀྐཱརཾ ཨཀཱསི. ཨིཏི ཨིམཾ ཨིམསྨིཾ ནནྡོཔནནྡདམནེ ཀཏཾ མཧནྟཾ ཨཏྟབྷཱཝཾ སནྡྷཱཡེཏཾ ཝུཏྟཾ ‘‘ཡདཱ མཧནྟཾ ཨཏྟབྷཱཝཾ ཀརོཏི, ཏདཱ མཧནྟཾ ཧོཏི མཧཱམོགྒལླཱནཏྠེརསྶ ཝིཡཱ’’ཏི. ཨེཝཾ ཝུཏྟེཔི བྷིཀྑཱུ ཨུཔཱདིཎྞཀཾ ནིསྶཱཡ ཨནུཔཱདིཎྞཀམེཝ ཝཌྜྷཏཱིཏི ཨཱཧཾསུ. ཨཡམེཝ ཙེཏྠ ཡུཏྟི.

སོ ཨེཝཾ ཀཏྭཱ ན ཀེཝལཾ ཙནྡིམསཱུརིཡེ པརཱམསཏི. སཙེ ཨིཙྪཏི པཱདཀཐལིཀཾ ཀཏྭཱ པཱདེ ཋཔེཏི, པཱིཋཾ ཀཏྭཱ ནིསཱིདཏི, མཉྩཾ ཀཏྭཱ ནིཔཛྫཏི, ཨཔསྶེནཕལཀཾ ཀཏྭཱ ཨཔསྶཡཏི. ཡཐཱ ཙ ཨེཀོ, ཨེཝཾ ཨཔརོཔི. ཨནེཀེསུཔི ཧི བྷིཀྑུསཏསཧསྶེསུ ཨེཝཾ ཀརོནྟེསུ ཏེསཉྩ ཨེཀམེཀསྶ ཏཐེཝ ཨིཛ྄ཛྷཏི. ཙནྡིམསཱུརིཡཱནཉྩ གམནམྤི ཨཱལོཀཀརཎམྤི ཏཐེཝ ཧོཏི. ཡཐཱ ཧི པཱཏིསཧསྶེསུ ཨུདཀཔཱུརེསུ སབྦཔཱཏཱིསུ ཙ ཙནྡམཎྜལཱནི དིསྶནྟི. པཱཀཏིཀམེཝ ཙ ཙནྡསྶ གམནཾ ཨཱལོཀཀརཎཉྩ ཧོཏི. ཏཐཱུཔམམེཏཾ པཱཊིཧཱརིཡཾ.

༣༩༧. ཡཱཝ བྲཧྨལོཀཱཔཱིཏི བྲཧྨལོཀམྤི པརིཙྪེདཾ ཀཏྭཱ. ཀཱཡེན ཝསཾ ཝཏྟེཏཱིཏི ཏཏྠ བྲཧྨལོཀེ ཀཱཡེན ཨཏྟནོ ཝསཾ ཝཏྟེཏི. ཏསྶཏྠོ པཱལི༹ཾ ཨནུགནྟྭཱ ཝེདིཏབྦོ. ཨཡཉྷེཏྠ པཱལི༹ –

‘‘ཡཱཝ ¶ བྲཧྨལོཀཱཔི ཀཱཡེན ཝསཾ ཝཏྟེཏཱིཏི. སཙེ སོ ཨིདྡྷིམཱ ཙེཏོཝསིཔྤཏྟོ བྲཧྨལོཀཾ གནྟུཀཱམོ ཧོཏི, དཱུརེཔི སནྟིཀེ ཨདྷིཊྛཱཏི སནྟིཀེ ཧོཏཱུཏི, སནྟིཀེ ཧོཏི. སནྟིཀེཔི དཱུརེ ཨདྷིཊྛཱཏི དཱུརེ ཧོཏཱུཏི, དཱུརེ ཧོཏི. བཧུཀམྤི ཐོཀནྟི ཨདྷིཊྛཱཏི ཐོཀཾ ཧོཏཱུཏི, ཐོཀཾ ཧོཏི. ཐོཀམྤི བཧུཀནྟི ཨདྷིཊྛཱཏི བཧུཀཾ ཧོཏཱུཏི, བཧུཀཾ ཧོཏི. དིབྦེན ཙཀྑུནཱ ཏསྶ བྲཧྨུནོ རཱུཔཾ པསྶཏི. དིབྦཱཡ སོཏདྷཱཏུཡཱ ཏསྶ བྲཧྨུནོ སདྡཾ སུཎཱཏི. ཙེཏོཔརིཡཉཱཎེན ཏསྶ བྲཧྨུནོ ཙིཏྟཾ པཛཱནཱཏི. སཙེ སོ ཨིདྡྷིམཱ ཙེཏོཝསིཔྤཏྟོ དིསྶམཱནེན ཀཱཡེན བྲཧྨལོཀཾ གནྟུཀཱམོ ཧོཏི, ཀཱཡཝསེན ཙིཏྟཾ པརིཎཱམེཏི, ཀཱཡཝསེན ཙིཏྟཾ ཨདྷིཊྛཱཏི, ཀཱཡཝསེན ཙིཏྟཾ པརིཎཱམེཏྭཱ ཀཱཡཝསེན ཙིཏྟཾ ཨདྷིཊྛཧིཏྭཱ སུཁསཉྙཉྩ ལཧུསཉྙཉྩ ཨོཀྐམིཏྭཱ དིསྶམཱནེན ཀཱཡེན བྲཧྨལོཀཾ གཙྪཏི. སཙེ སོ ཨིདྡྷིམཱ ཙེཏོཝསིཔྤཏྟོ ཨདིསྶམཱནེན ཀཱཡེན བྲཧྨལོཀཾ གནྟུཀཱམོ ཧོཏི, ཙིཏྟཝསེན ཀཱཡཾ པརིཎཱམེཏི, ཙིཏྟཝསེན ¶ ཀཱཡཾ ཨདྷིཊྛཱཏི. ཙིཏྟཝསེན ཀཱཡཾ པརིཎཱམེཏྭཱ ཙིཏྟཝསེན ཀཱཡཾ ཨདྷིཊྛཧིཏྭཱ སུཁསཉྙཉྩ ལཧུསཉྙཉྩ ཨོཀྐམིཏྭཱ ཨདིསྶམཱནེན ཀཱཡེན བྲཧྨལོཀཾ གཙྪཏི. སོ ཏསྶ བྲཧྨུནོ པུརཏོ རཱུཔཾ ཨབྷིནིམྨིནཱཏི མནོམཡཾ སབྦངྒཔཉྩངྒིཾ ཨཧཱིནིནྡྲིཡཾ. སཙེ སོ ཨིདྡྷིམཱ ཙངྐམཏི, ནིམྨིཏོཔི ཏཏྠ ཙངྐམཏི. སཙེ སོ ཨིདྡྷིམཱ ཏིཊྛཏི, ནིསཱིདཏི, སེཡྻཾ ཀཔྤེཏི, ནིམྨིཏོཔི ཏཏྠ སེཡྻཾ ཀཔྤེཏི. སཙེ སོ ཨིདྡྷིམཱ དྷཱུམཱཡཏི, པཛྫལཏི, དྷམྨཾ བྷཱསཏི, པཉྷཾ པུཙྪཏི, པཉྷཾ པུཊྛོ ཝིསྶཛྫེཏི, ནིམྨིཏོཔི ཏཏྠ པཉྷཾ པུཊྛོ ཝིསྶཛྫེཏི. སཙེ སོ ཨིདྡྷིམཱ ཏེན བྲཧྨུནཱ སདྡྷིཾ སནྟིཊྛཏི, སལླཔཏི, སཱཀཙྪཾ སམཱཔཛྫཏི, ནིམྨིཏོཔི ཏཏྠ ཏེན བྲཧྨུནཱ སདྡྷིཾ སནྟིཊྛཏི, སལླཔཏི, སཱཀཙྪཾ སམཱཔཛྫཏི. ཡཾ ཡདེཝ ཧི སོ ཨིདྡྷིམཱ ཀརོཏི, ཏཾ ཏདེཝ ནིམྨིཏོ ཀརོཏཱི’’ཏི (པཊི. མ. ༣.༡༢).

ཏཏྠ ¶ དཱུརེཔི སནྟིཀེ ཨདྷིཊྛཱཏཱིཏི པཱདཀཛ྄ཛྷཱནཏོ ཝུཊྛཱཡ དཱུརེ དེཝལོཀཾ ཝཱ བྲཧྨལོཀཾ ཝཱ ཨཱཝཛྫཏི སནྟིཀེ ཧོཏཱུཏི. ཨཱཝཛྫིཏྭཱ པརིཀམྨཾ ཀཏྭཱ པུན སམཱཔཛྫིཏྭཱ ཉཱཎེན ཨདྷིཊྛཱཏི སནྟིཀེ ཧོཏཱུཏི, སནྟིཀེ ཧོཏི. ཨེས ནཡོ སེསཔདེསུཔི.

ཏཏྠ ཀོ དཱུརཾ གཧེཏྭཱ སནྟིཀཾ ཨཀཱསཱིཏི? བྷགཝཱ. བྷགཝཱ ཧི ཡམཀཔཱཊིཧཱརིཡཱཝསཱནེ དེཝལོཀཾ གཙྪནྟོ ཡུགནྡྷརཉྩ སིནེརུཉྩ སནྟིཀེ ཀཏྭཱ པཐཝཱིཏལཏོ ཨེཀཔཱདཾ ཡུགནྡྷརེ པཏིཊྛཔེཏྭཱ དུཏིཡཾ སིནེརུམཏྠཀེ ཋཔེསི. ཨཉྙོ ཀོ ཨཀཱསི? མཧཱམོགྒལླཱནཏྠེརོ. ཐེརོ ཧི སཱཝཏྠིཏོ བྷཏྟཀིཙྩཾ ཀཏྭཱ ནིཀྑནྟཾ དྭཱདསཡོཛནིཀཾ པརིསཾ ཏིཾསཡོཛནཾ སངྐསྶནགརམགྒཾ སངྑིཔིཏྭཱ ཏངྑཎཉྙེཝ སམྤཱཔེསི.

ཨཔིཙ ཏམྦཔཎྞིདཱིཔེ ཙཱུལ༹སམུདྡཏྠེརོཔི ཨཀཱསི. དུབྦྷིཀྑསམཡེ ཀིར ཐེརསྶ སནྟིཀཾ པཱཏོཝ སཏྟ བྷིཀྑུསཏཱནི ཨཱགམཾསུ. ཐེརོ ‘‘མཧཱ བྷིཀྑུསངྒྷོ ཀུཧིཾ བྷིཀྑཱཙཱརོ བྷཝིསྶཏཱི’’ཏི ཙིནྟེནྟོ སཀལཏམྦཔཎྞིདཱིཔེ ཨདིསྭཱ ‘‘པརཏཱིརེ པཱཊལིཔུཏྟེ བྷཝིསྶཏཱི’’ཏི དིསྭཱ བྷིཀྑཱུ པཏྟཙཱིཝརཾ གཱཧཱཔེཏྭཱ ‘‘ཨེཐཱཝུསོ, བྷིཀྑཱཙཱརཾ གམིསྶཱམཱ’’ཏི པཐཝིཾ སངྑིཔིཏྭཱ པཱཊལིཔུཏྟཾ གཏོ. བྷིཀྑཱུ ‘‘ཀཏརཾ, བྷནྟེ, ཨིམཾ ནགར’’ནྟི པུཙྪིཾསུ. པཱཊལིཔུཏྟཾ, ཨཱཝུསོཏི. པཱཊལིཔུཏྟཾ ནཱམ དཱུརེ བྷནྟེཏི. ཨཱཝུསོ, མཧལླཀཏྠེརཱ ནཱམ དཱུརེཔི གཧེཏྭཱ སནྟིཀེ ཀརོནྟཱིཏི. མཧཱསམུདྡོ ཀུཧིཾ, བྷནྟེཏི? ནནུ, ཨཱཝུསོ, ཨནྟརཱ ཨེཀཾ ནཱིལམཱཏིཀཾ ཨཏིཀྐམིཏྭཱ ¶ ཨཱགཏཏྠཱཏི? ཨཱམ, བྷནྟེ. མཧཱསམུདྡོ པན མཧནྟོཏི. ཨཱཝུསོ, མཧལླཀཏྠེརཱ ནཱམ མཧནྟམྤི ཁུདྡཀཾ ཀརོནྟཱིཏི.

ཡཐཱ ཙཱཡཾ, ཨེཝཾ ཏིསྶདཏྟཏྠེརོཔི སཱཡནྷསམཡེ ནྷཱཡིཏྭཱ ཀཏུཏྟརཱསངྒོ མཧཱབོདྷིཾ ཝནྡིསྶཱམཱིཏི ཙིཏྟེ ཨུཔྤནྣེ སནྟིཀེ ཨཀཱསི.

སནྟིཀཾ པན གཧེཏྭཱ ཀོ དཱུརམཀཱསཱིཏི? བྷགཝཱ. བྷགཝཱ ཧི ཨཏྟནོ ཙ ཨངྒུལིམཱལསྶ (མ. ནི. ༢.༣༤༨) ཙ ཨནྟརཾ སནྟིཀམྤི དཱུརམཀཱསཱིཏི.

ཨཐ ཀོ བཧུཀཾ ཐོཀཾ ཨཀཱསཱིཏི? མཧཱཀསྶཔཏྠེརོ. རཱཛགཧེ ཀིར ནཀྑཏྟདིཝསེ པཉྩསཏཱ ཀུམཱརིཡོ ཙནྡཔཱུཝེ གཧེཏྭཱ ནཀྑཏྟཀཱིལ༹ནཏྠཱཡ གཙྪནྟིཡོ བྷགཝནྟཾ དིསྭཱ ཀིཉྩི ནཱདཾསུ. པཙྪཏོ ཨཱགཙྪནྟཾ པན ཐེརཾ དིསྭཱ ཨམྷཱཀཾ ཐེརོ ཨེཏི པཱུཝཾ དསྶཱམཱཏི སབྦཱ པཱུཝེ ¶ གཧེཏྭཱ ཐེརཾ ཨུཔསངྐམིཾསུ. ཐེརོ པཏྟཾ ནཱིཧརིཏྭཱ སབྦཾ ཨེཀཔཏྟཔཱུརམཏྟམཀཱསི. བྷགཝཱ ཐེརཾ ཨཱགམཡམཱནོ པུརཏོ ནིསཱིདི. ཐེརོ ཨཱཧརིཏྭཱ བྷགཝཏོ ཨདཱསི.

ཨིལླིསསེཊྛིཝཏྠུསྨིཾ པན མཧཱམོགྒལླཱནཏྠེརོ ཐོཀཾ བཧུཀམཀཱསི, ཀཱཀཝལིཡཝཏྠུསྨིཉྩ བྷགཝཱ. མཧཱཀསྶཔཏྠེརོ ཀིར སཏྟཱཧཾ སམཱཔཏྟིཡཱ ཝཱིཏིནཱམེཏྭཱ དལིདྡསངྒཧཾ ཀརོནྟོ ཀཱཀཝལིཡསྶ ནཱམ དུགྒཏམནུསྶསྶ གྷརདྭཱརེ ཨཊྛཱསི. ཏསྶ ཛཱཡཱ ཐེརཾ དིསྭཱ པཏིནོ པཀྐཾ ཨལོཎམྦིལཡཱགུཾ པཏྟེ ཨཱཀིརི. ཐེརོ ཏཾ གཧེཏྭཱ བྷགཝཏོ ཧཏྠེ ཋཔེསི. བྷགཝཱ མཧཱབྷིཀྑུསངྒྷསྶ པཧོནཀཾ ཀཏྭཱ ཨདྷིཊྛཱསི. ཨེཀཔཏྟེན ཨཱབྷཏཱ སབྦེསཾ པཧོསི. ཀཱཀཝལིཡོཔི སཏྟམེ དིཝསེ སེཊྛིཊྛཱནཾ ཨལཏྠཱཏི.

ན ཀེཝལཉྩ ཐོཀསྶ བཧུཀརཎཾ, མདྷུརཾ ཨམདྷུརཾ, ཨམདྷུརཾ མདྷུརནྟིཨཱདཱིསུཔི ཡཾ ཡཾ ཨིཙྪཏི, སབྦཾ ཨིདྡྷིམཏོ ཨིཛ྄ཛྷཏི. ཏཐཱ ཧི མཧཱཨནུལ༹ཏྠེརོ ནཱམ སམྦཧུལེ བྷིཀྑཱུ པིཎྜཱཡ ཙརིཏྭཱ སུཀྑབྷཏྟམེཝ ལབྷིཏྭཱ གངྒཱཏཱིརེ ནིསཱིདིཏྭཱ པརིབྷུཉྫམཱནེ དིསྭཱ གངྒཱཡ ཨུདཀཾ སཔྤིམཎྜནྟི ཨདྷིཊྛཧིཏྭཱ སཱམཎེརཱནཾ སཉྙཾ ཨདཱསི. ཏེ ཐཱལཀེཧི ཨཱཧརིཏྭཱ བྷིཀྑུསངྒྷསྶ ཨདཾསུ. སབྦེ མདྷུརེན སཔྤིམཎྜེན བྷུཉྫིཾསཱུཏི.

དིབྦེན ¶ ཙཀྑུནཱཏི ཨིདྷེཝ ཋིཏོ ཨཱལོཀཾ ཝཌྜྷེཏྭཱ ཏསྶ བྲཧྨུནོ རཱུཔཾ པསྶཏི. ཨིདྷེཝ ཙ ཋིཏོ སབྦཾ ཏསྶ བྷཱསཏོ སདྡཾ སུཎཱཏི. ཙིཏྟཾ པཛཱནཱཏི. ཀཱཡཝསེན ཙིཏྟཾ པརིཎཱམེཏཱིཏི ཀརཛཀཱཡསྶ ཝསེན ཙིཏྟཾ པརིཎཱམེཏི. པཱདཀཛ྄ཛྷཱནཙིཏྟཾ གཧེཏྭཱ ཀཱཡེ ཨཱརོཔེཏི. ཀཱཡཱནུགཏིཀཾ ཀརོཏི དནྡྷགམནཾ. ཀཱཡགམནཾ ཧི དནྡྷཾ ཧོཏི. སུཁསཉྙཉྩ ལཧུསཉྙཉྩ ཨོཀྐམཏཱིཏི པཱདཀཛ྄ཛྷཱནཱརམྨཎེན ཨིདྡྷིཙིཏྟེན སཧཛཱཏཾ སུཁསཉྙཉྩ ལཧུསཉྙཉྩ ཨོཀྐམཏི པཝིསཏི ཕསྶེཏི སམྤཱཔུཎཱཏི. སུཁསཉྙཱ ནཱམ ཨུཔེཀྑཱསམྤཡུཏྟསཉྙཱ. ཨུཔེཀྑཱ ཧི སནྟཾ སུཁནྟི ཝུཏྟཱ. སཱཡེཝ ཙ སཉྙཱ ནཱིཝརཎེཧི ཙེཝ ཝིཏཀྐཱདཱིཧི པཙྩནཱིཀེཧི ཙ ཝིམུཏྟཏྟཱ ལཧུསཉྙཱཏིཔི ཝེདིཏབྦཱ. ཏཾ ཨོཀྐནྟསྶ པནསྶ ཀརཛཀཱཡོཔི ཏཱུལཔིཙུ ཝིཡ སལླཧུཀོ ཧོཏི. སོ ཨེཝཾ ཝཱཡུཀྑིཏྟཏཱུལཔིཙུནཱ ¶ ཝིཡ སལླཧུཀེན དིསྶམཱནེན ཀཱཡེན བྲཧྨལོཀཾ གཙྪཏི. ཨེཝཾ གཙྪནྟོ ཙ སཙེ ཨིཙྪཏི པཐཝཱིཀསིཎཝསེན ཨཱཀཱསེ མགྒཾ ནིམྨིནིཏྭཱ པདསཱ གཙྪཏི. སཙེ ཨིཙྪཏི ཝཱཡོཀསིཎཝསེན ཝཱཡུཾ ཨདྷིཊྛཧིཏྭཱ ཏཱུལཔིཙུ ཝིཡ ཝཱཡུནཱ གཙྪཏི. ཨཔིཙ གནྟུཀཱམཏཱ ཨེཝ ཨེཏྠ པམཱཎཾ. ‘‘སཏི ཧི གནྟུཀཱམཏཱཡ’’ ཨེཝཾ ཀཏཙིཏྟཱདྷིཊྛཱནོ ཨདྷིཊྛཱནཝེགུཀྑིཏྟོཝ སོ ཨིསྶཱསཁིཏྟསརོ ཝིཡ དིསྶམཱནོ གཙྪཏི.

ཙིཏྟཝསེན ཀཱཡཾ པརིཎཱམེཏཱིཏི ཀཱཡཾ གཧེཏྭཱ ཙིཏྟེ ཨཱརོཔེཏི. ཙིཏྟཱནུགཏིཀཾ ཀརོཏི སཱིགྷགམནཾ. ཙིཏྟགམནཾ ཧི སཱིགྷཾ ཧོཏི. སུཁསཉྙཉྩ ལཧུསཉྙཉྩ ཨོཀྐམཏཱིཏི རཱུཔཀཱཡཱརམྨཎེན ཨིདྡྷིཙིཏྟེན སཧཛཱཏཾ སུཁསཉྙཉྩ ལཧུསཉྙཉྩ ཨོཀྐམཏཱིཏི. སེསཾ ཝུཏྟནཡེནེཝ ཝེདིཏབྦཾ. ཨིདཾ པན ཙིཏྟགམནམེཝ ཧོཏི. ཨེཝཾ ཨདིསྶམཱནེན ཀཱཡེན གཙྪནྟོ པནཱཡཾ ཀིཾ ཏསྶ ཨདྷིཊྛཱནཙིཏྟསྶ ཨུཔྤཱདཀྑཎེ གཙྪཏི, ཨུདཱཧུ ཋིཏིཀྑཎེ བྷངྒཀྑཎེ ཝཱཏི ཝུཏྟེ ཏཱིསུཔི ཁཎེསུ གཙྪཏཱིཏི ཐེརོ ཨཱཧ. ཀིཾ པན སོ སཡཾ གཙྪཏི ནིམྨིཏཾ པེསེཏཱིཏི. ཡཐཱརུཙི ཀརོཏི. ཨིདྷ པནསྶ སཡཾ གམནམེཝ ཨཱགཏཾ.

མནོམཡནྟི ཨདྷིཊྛཱནམནེན ནིམྨིཏཏྟཱ མནོམཡཾ. ཨཧཱིནིནྡྲིཡནྟི ཨིདཾ ཙཀྑུསོཏཱདཱིནཾ སཎྛཱནཝསེན ཝུཏྟཾ. ནིམྨིཏརཱུཔེ པན པསཱདོ ནཱམ ནཏྠི. སཙེ ཨིདྡྷིམཱ ཙངྐམཏི ནིམྨིཏོཔི ཏཏྠ ཙངྐམཏཱིཏིཨཱདི སབྦཾ སཱཝཀནིམྨིཏཾ སནྡྷཱཡ ཝུཏྟཾ. བུདྡྷནིམྨིཏོ པན ཡཾ ཡཾ བྷགཝཱ ཀརོཏི, ཏཾ ཏམྤི ཀརོཏི. བྷགཝཏོ རུཙིཝསེན ཨཉྙམྤི ཀརོཏཱིཏི. ཨེཏྠ ཙ ཡཾ སོ ཨིདྡྷིམཱ ཨིདྷེཝ ཋིཏོ དིབྦེན ཙཀྑུནཱ རཱུཔཾ པསྶཏི, དིབྦཱཡ སོཏདྷཱཏུཡཱ སདྡཾ སུཎཱཏི, ཙེཏོཔརིཡཉཱཎེན ¶ ཙིཏྟཾ པཛཱནཱཏི, ན ཨེཏྟཱཝཏཱ ཀཱཡེན ཝསཾ ཝཏྟེཏི. ཡམྤི སོ ཨིདྷེཝ ཋིཏོ ཏེན བྲཧྨུནཱ སདྡྷིཾ སནྟིཊྛཏི སལླཔཏི སཱཀཙྪཾ སམཱཔཛྫཏི, ཨེཏྟཱཝཏཱཔི ན ཀཱཡེན ཝསཾ ཝཏྟེཏི. ཡམྤིསྶ དཱུརེཔི སནྟིཀེ ཨདྷིཊྛཱཏཱིཏིཨཱདིཀཾ ཨདྷིཊྛཱནཾ, ཨེཏྟཱཝཏཱཔི ན ཀཱཡེན ཝསཾ ཝཏྟེཏི. ཡམྤི སོ དིསྶམཱནེན ཝཱ ཨདིསྶམཱནེན ཝཱ ཀཱཡེན བྲཧྨལོཀཾ གཙྪཏི, ཨེཏྟཱཝཏཱཔི ན ཀཱཡེན ཝསཾ ཝཏྟེཏི. ཡཉྩ ཁོ སོ ཏསྶ བྲཧྨུནོ པུརཏོ རཱུཔཾ ཨབྷིནིམྨིནཱཏཱིཏིཨཱདིནཱ ནཡེན ¶ ཝུཏྟཝིདྷཱནཾ ཨཱཔཛྫཏི, ཨེཏྟཱཝཏཱ ཀཱཡེན ཝསཾ ཝཏྟེཏི ནཱམཾ. སེསཾ པནེཏྠ ཀཱཡེན ཝསཾ ཝཏྟནཱཡ པུབྦབྷཱགདསྶནཏྠཾ ཝུཏྟནྟི ཨཡཾ ཏཱཝ ཨདྷིཊྛཱནཱ ཨིདྡྷི.

༣༩༨. ཝིཀུབྦནཱཡ པན མནོམཡཱཡ ཙ ཨིདཾ ནཱནཱཀརཎཾ. ཝིཀུབྦནཾ ཏཱཝ ཀརོནྟེན ‘‘སོ པཀཏིཝཎྞཾ ཝིཛཧིཏྭཱ ཀུམཱརཀཝཎྞཾ ཝཱ དསྶེཏི, ནཱགཝཎྞཾ ཝཱ དསྶེཏི, སུཔཎྞཝཎྞཾ ཝཱ དསྶེཏི, ཨསུརཝཎྞཾ ཝཱ དསྶེཏི, ཨིནྡཝཎྞཾ ཝཱ དསྶེཏི, དེཝཝཎྞཾ ཝཱ དསྶེཏི, བྲཧྨཝཎྞཾ ཝཱ དསྶེཏི, སམུདྡཝཎྞཾ ཝཱ དསྶེཏི, པབྦཏཝཎྞཾ ཝཱ དསྶེཏི, སཱིཧཝཎྞཾ ཝཱ དསྶེཏི, བྱགྒྷཝཎྞཾ ཝཱ དསྶེཏི, དཱིཔིཝཎྞཾ ཝཱ དསྶེཏི, ཧཏྠིམྤི དསྶེཏི, ཨསྶམྤི དསྶེཏི, རཐམྤི དསྶེཏི, པཏྟིམྤི དསྶེཏི, ཝིཝིདྷམྤི སེནཱབྱཱུཧཾ དསྶེཏཱི’’ཏི (པཊི. མ. ༣.༡༣) ཨེཝཾ ཝུཏྟེསུ ཀུམཱརཀཝཎྞཱདཱིསུ ཡཾ ཡཾ ཨཱཀངྑཏི, ཏཾ ཏཾ ཨདྷིཊྛཱཏབྦཾ. ཨདྷིཊྛཧནྟེན ཙ པཐཝཱིཀསིཎཱདཱིསུ ཨཉྙཏརཱརམྨཎཏོ ཨབྷིཉྙཱཔཱདཀཛ྄ཛྷཱནཏོ ཝུཊྛཱཡ ཨཏྟནོ ཀུམཱརཀཝཎྞོ ཨཱཝཛྫིཏབྦོ. ཨཱཝཛྫིཏྭཱ པརིཀམྨཱཝསཱནེ པུན སམཱཔཛྫིཏྭཱ ཝུཊྛཱཡ ཨེཝརཱུཔོ ནཱམ ཀུམཱརཀོ ཧོམཱིཏི ཨདྷིཊྛཱཏབྦཾ. སཧ ཨདྷིཊྛཱནཙིཏྟེན ཀུམཱརཀོ ཧོཏི དེཝདཏྟོ ཝིཡ (ཙཱུལ༹ཝ. ༣༣༣). ཨེས ནཡོ སབྦཏྠ.

ཧཏྠིམྤི དསྶེཏཱིཏིཨཱདི པནེཏྠ བཧིདྡྷཱཔི ཧཏྠིཨཱདིདསྶནཝསེན ཝུཏྟཾ. ཏཏྠ ཧཏྠཱི ཧོམཱིཏི ཨནདྷིཊྛཧིཏྭཱ ཧཏྠཱི ཧོཏཱུཏི ཨདྷིཊྛཱཏབྦཾ, ཨསྶཱདཱིསུཔི ཨེསེཝ ནཡོཏི. ཨཡཾ ཝིཀུབྦནཱ ཨིདྡྷི.

༣༩༩. མནོམཡཾ ཀཱཏུཀཱམོ པན པཱདཀཛ྄ཛྷཱནཏོ ཝུཊྛཱཡ ཀཱཡཾ ཏཱཝ ཨཱཝཛྫིཏྭཱ ཝུཏྟནཡེནེཝ སུསིརོ ཧོཏཱུཏི ཨདྷིཊྛཱཏི, སུསིརོ ཧོཏི. ཨཐསྶ ཨབྦྷནྟརེ ཨཉྙཾ ཀཱཡཾ ཨཱཝཛྫིཏྭཱ པརིཀམྨཾ ཀཏྭཱ ཝུཏྟནཡེནེཝ ཨདྷིཊྛཱཏི, ཏསྶ ཨབྦྷནྟརེ ཨཉྙོ ཀཱཡོ ཧོཏཱུཏི. སོ ཏཾ མུཉྫམྷཱ ཨཱིསིཀཾ ཝིཡ ཀོསིཡཱ ཨསིཾ ཝིཡ ཀརཎྜཱཡ ཨཧིཾ ཝིཡ ཙ ཨབྦཱཧཏི ¶ . ཏེན ཝུཏྟཾ ‘‘ཨིདྷ བྷིཀྑུ ཨིམམྷཱ ཀཱཡཱ ཨཉྙཾ ཀཱཡཾ ཨབྷིནིམྨིནཱཏི རཱུཔིཾ མནོམཡཾ སབྦངྒཔཙྩངྒིཾ ཨཧཱིནིནྡྲིཡཾ. སེཡྻཐཱཔི པུརིསོ མུཉྫམྷཱ ཨཱིསིཀཾ པཝཱཧེཡྻ, ཏསྶ ཨེཝམསྶ ཨཡཾ མུཉྫོ ཨཡཾ ཨཱིསིཀཱ ¶ , ཨཉྙོ མུཉྫོ ཨཉྙཱ ཨཱིསིཀཱ, མུཉྫམྷཱཏྭེཝ ཨཱིསིཀཱ པཝཱལ༹ྷཱ’’ཏིཨཱདི (པཊི. མ. ༣.༡༤). ཨེཏྠ ཙ ཡཐཱ ཨཱིསིཀཱདཡོ མུཉྫཱདཱིཧི སདིསཱ ཧོནྟི, ཨེཝཾ མནོམཡརཱུཔཾ ཨིདྡྷིམཏཱསདིསམེཝ ཧོཏཱིཏི དསྶནཏྠཾ ཨེཏཱ ཨུཔམཱ ཝུཏྟཱཏི. ཨཡཾ མནོམཡཱ ཨིདྡྷི.

ཨིཏི སཱདྷུཛནཔཱམོཛྫཏྠཱཡ ཀཏེ ཝིསུདྡྷིམགྒེ

ཨིདྡྷིཝིདྷནིདྡེསོ ནཱམ

དྭཱདསམོ པརིཙྪེདོ.

༡༣. ཨབྷིཉྙཱནིདྡེསོ

དིབྦསོཏདྷཱཏུཀཐཱ

༤༠༠. ཨིདཱནི ¶ ¶ དིབྦསོཏདྷཱཏུཡཱ ནིདྡེསཀྐམོ ཨནུཔྤཏྟོ. ཏཏྠ ཏཏོ པརཱསུ ཙ ཏཱིསུ ཨབྷིཉྙཱསུ སོ ཨེཝཾ སམཱཧིཏེ ཙིཏྟེཏིཨཱདཱིནཾ (དཱི. ནི. ༡.༢༤༠ ཨཱདཡོ) ཨཏྠོ ཝུཏྟནཡེནེཝ ཝེདིཏབྦོ. སབྦཏྠ པན ཝིསེསམཏྟམེཝ ཝཎྞཡིསྶཱམ. ཏཏྲ དིབྦཱཡ སོཏདྷཱཏུཡཱཏི ཨེཏྠ དིབྦསདིསཏྟཱ དིབྦཱ. དེཝཱནཾ ཧི སུཙརིཏཀམྨནིབྦཏྟཱ པིཏྟསེམྷརུཧིརཱདཱིཧི ཨཔལིབུདྡྷཱ ཨུཔཀྐིལེསཝིམུཏྟཏཱཡ དཱུརེཔི ཨཱརམྨཎཾ སམྤཊིཙྪནསམཏྠཱ དིབྦཔསཱདསོཏདྷཱཏུ ཧོཏི. ཨཡཉྩཱཔི ཨིམསྶ བྷིཀྑུནོ ཝཱིརིཡབྷཱཝནཱབལནིབྦཏྟཱ ཉཱཎསོཏདྷཱཏུ ཏཱདིསཱཡེཝཱཏི དིབྦསདིསཏྟཱ དིབྦཱ. ཨཔིཙ དིབྦཝིཧཱརཝསེན པཊིལདྡྷཏྟཱ ཨཏྟནཱ ཙ དིབྦཝིཧཱརསནྣིསྶིཏཏྟཱཔི དིབྦཱ. སཝནཊྛེན ནིཛྫཱིཝཊྛེན ཙ སོཏདྷཱཏུ. སོཏདྷཱཏུཀིཙྩཀརཎེན ཙ སོཏདྷཱཏུ ཝིཡཱཏིཔི སོཏདྷཱཏུ. ཏཱཡ དིབྦཱཡ སོཏདྷཱཏུཡཱ.

ཝིསུདྡྷཱཡཱཏི པརིསུདྡྷཱཡ ནིརུཔཀྐིལེསཱཡ. ཨཏིཀྐནྟམཱནུསིཀཱཡཱཏི མནུསྶཱུཔཙཱརཾ ཨཏིཀྐམིཏྭཱ སདྡསཝནེན མཱནུསིཀཾ མཾསསོཏདྷཱཏུཾ ཨཏིཀྐནྟཱཡ ཝཱིཏིཝཏྟིཏྭཱ ཋིཏཱཡ. ཨུབྷོ སདྡེ སུཎཱཏཱིཏི དྭེ སདྡེ སུཎཱཏི. ཀཏམེ དྭེ? དིབྦེ ཙ མཱནུསེ ཙ, དེཝཱནཉྩ མནུསྶཱནཉྩ སདྡེཏི ཝུཏྟཾ ཧོཏི. ཨེཏེན པདེསཔརིཡཱདཱནཾ ཝེདིཏབྦཾ. ཡེ དཱུརེ སནྟིཀེ ཙཱཏི ཡེ སདྡཱ དཱུརེ པརཙཀྐཝཱལེ༹པི ཡེ ཙ སནྟིཀེ ཨནྟམསོ སདེཧསནྣིསྶིཏཔཱཎཀསདྡཱཔི, ཏེ སུཎཱཏཱིཏི ཝུཏྟཾ ཧོཏི. ཨེཏེན ནིཔྤདེསཔརིཡཱདཱནཾ ཝེདིཏབྦཾ.

ཀཐཾ པནཱཡཾ ཨུཔྤཱདེཏབྦཱཏི? ཏེན བྷིཀྑུནཱ ཨབྷིཉྙཱཔཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ པརིཀམྨསམཱདྷིཙིཏྟེན པཋམཏརཾ པཀཏིསོཏཔཐེ དཱུརེ ཨོལཱ༹རིཀོ ཨརཉྙེ སཱིཧཱདཱིནཾ སདྡོ ཨཱཝཛྫིཏབྦོ. ཝིཧཱརེ གྷཎྜིསདྡོ, བྷེརིསདྡོ, སངྑསདྡོ, སཱམཎེརདཧརབྷིཀྑཱུནཾ སབྦཐཱམེན སཛ྄ཛྷཱཡནྟཱནཾ ¶ སཛ྄ཛྷཱཡནསདྡོ, པཀཏིཀཐཾ ཀཐེནྟཱནཾ ‘‘ཀིཾ བྷནྟེ, ཀིམཱཝུསོ’’ཏིཨཱདིསདྡོ, སཀུཎསདྡོ, ཝཱཏསདྡོ, པདསདྡོ, པཀྐུཐིཏཨུདཀསྶ ¶ ཙིཙྩིཊཱཡནསདྡོ, ཨཱཏཔེ སུསྶམཱནཏཱལཔཎྞསདྡོ, ཀུནྠཀིཔིལླིཀཱདིསདྡོཏི ཨེཝཾ སབྦོལཱ༹རིཀཏོ པབྷུཏི ཡཐཱཀྐམེན སུཁུམསདྡཱ ཨཱཝཛྫིཏབྦཱ. ཏེན པུརཏྠིམཱཡ དིསཱཡ སདྡཱནཾ སདྡནིམིཏྟཾ མནསིཀཱཏབྦཾ. པཙྪིམཱཡ, ཨུཏྟརཱཡ, དཀྑིཎཱཡ, ཧེཊྛིམཱཡ, ཨུཔརིམཱཡ དིསཱཡ, པུརཏྠིམཱཡ ཨནུདིསཱཡ, པཙྪིམཱཡ, ཨུཏྟརཱཡ, དཀྑིཎཱཡ ཨནུདིསཱཡ སདྡཱནཾ སདྡནིམིཏྟཾ མནསིཀཱཏབྦཾ. ཨོལཱ༹རིཀཱནམྤི སུཁུམཱནམྤི སདྡཱནཾ སདྡནིམིཏྟཾ མནསིཀཱཏབྦཾ. ཏསྶ ཏེ སདྡཱ པཱཀཏིཀཙིཏྟསྶཱཔི པཱཀཊཱ ཧོནྟི. པརིཀམྨསམཱདྷིཙིཏྟསྶ པན ཨཏིཝིཡ པཱཀཊཱ.

ཏསྶེཝཾ སདྡནིམིཏྟཾ མནསིཀརོཏོ ཨིདཱནི དིབྦསོཏདྷཱཏུ ཨུཔྤཛྫིསྶཏཱིཏི ཏེསུ སདྡེསུ ཨཉྙཏརཾ ཨཱརམྨཎཾ ཀཏྭཱ མནོདྭཱརཱཝཛྫནཾ ཨུཔྤཛྫཏི. ཏསྨིཾ ནིརུདྡྷེ ཙཏྟཱརི པཉྩ ཝཱ ཛཝནཱནི ཛཝནྟི, ཡེསཾ པུརིམཱནི ཏཱིཎི ཙཏྟཱརི ཝཱ པརིཀམྨཨུཔཙཱརཱནུལོམགོཏྲབྷུནཱམཀཱནི ཀཱམཱཝཙརཱནི, ཙཏུཏྠཾ པཉྩམཾ ཝཱ ཨཔྤནཱཙིཏྟཾ རཱུཔཱཝཙརཾ ཙཏུཏྠཛ྄ཛྷཱནིཀཾ. ཏཏྠ ཡཾ ཏེན ཨཔྤནཱཙིཏྟེན སདྡྷིཾ ཨུཔྤནྣཾ ཉཱཎཾ, ཨཡཾ དིབྦསོཏདྷཱཏཱུཏི ཝེདིཏབྦཱ. ཏཏོ པརཾ ཏསྨིཾ སོཏེ པཏིཏོ ཧོཏི. ཏཾ ཐཱམཛཱཏཾ ཀརོནྟེན ‘‘ཨེཏྠནྟརེ སདྡཾ སུཎཱམཱི’’ཏི ཨེཀངྒུལམཏྟཾ པརིཙྪིནྡིཏྭཱ ཝཌྜྷེཏབྦཾ. ཏཏོ དྭངྒུལཙཏུརངྒུལཨཊྛངྒུལཝིདཏྠིརཏནཨནྟོགབྦྷཔམུཁཔཱསཱདཔརིཝེཎསངྒྷཱརཱམགོཙརགཱམཛནཔདཱདིཝསེན ཡཱཝ ཙཀྐཝཱལ༹ཾ ཏཏོ ཝཱ བྷིཡྻོཔི པརིཙྪིནྡིཏྭཱ པརིཙྪིནྡིཏྭཱ ཝཌྜྷེཏབྦཾ.

ཨེཝཾ ཨདྷིགཏཱབྷིཉྙོ ཨེས པཱདཀཛ྄ཛྷཱནཱརམྨཎེན ཕུཊྛོཀཱསབྦྷནྟརགཏེཔི སདྡེ པུན པཱདཀཛ྄ཛྷཱནཾ ཨསམཱཔཛྫིཏྭཱཔི ཨབྷིཉྙཱཉཱཎེན སུཎཱཏིཡེཝ. ཨེཝཾ སུཎནྟོ ཙ སཙེཔི ཡཱཝ བྲཧྨལོཀཱ སངྑབྷེརིཔཎཝཱདིསདྡེཧི ཨེཀཀོལཱཧལཾ ཧོཏི, པཱཊིཡེཀྐཾ ཝཝཏྠཔེཏུཀཱམཏཱཡ སཏི ཨཡཾ སངྑསདྡོ ཨཡཾ བྷེརིསདྡོཏི ཝཝཏྠཔེཏུཾ སཀྐོཏིཡེཝཱཏི.

དིབྦསོཏདྷཱཏུཀཐཱ ནིཊྛིཏཱ.

ཙེཏོཔརིཡཉཱཎཀཐཱ

༤༠༡. ཙེཏོཔརིཡཉཱཎཀཐཱཡ ¶ ¶ ཙེཏོཔརིཡཉཱཎཱཡཱཏི ཨེཏྠ པརིཡཱཏཱིཏི པརིཡཾ, པརིཙྪིནྡཏཱིཏི ཨཏྠོ. ཙེཏསོ པརིཡཾ ཙེཏོཔརིཡཾ. ཙེཏོཔརིཡཉྩ ཏཾ ཉཱཎཉྩཱཏི ཙེཏོཔརིཡཉཱཎཾ. ཏདཏྠཱཡཱཏི ཝུཏྟཾ ཧོཏི. པརསཏྟཱནནྟི ཨཏྟཱནཾ ཋཔེཏྭཱ སེསསཏྟཱནཾ. པརཔུགྒལཱནནྟི ཨིདམྤི ཨིམིནཱ ཨེཀཏྠམེཝ. ཝེནེཡྻཝསེན པན དེསནཱཝིལཱསེན ཙ བྱཉྫནནཱནཏྟཾ ཀཏཾ. ཙེཏསཱ ཙེཏོཏི ཨཏྟནོ ཙིཏྟེན ཏེསཾ ཙིཏྟཾ. པརིཙྩ པཛཱནཱཏཱིཏི པརིཙྪིནྡིཏྭཱ སརཱགཱདིཝསེན ནཱནཔྤཀཱརཏོ ཛཱནཱཏི.

ཀཐཾ པནེཏཾ ཉཱཎཾ ཨུཔྤཱདེཏབྦནྟི? ཨེཏཉྷི དིབྦཙཀྑུཝསེན ཨིཛ྄ཛྷཏི, ཏཾ ཨེཏསྶ པརིཀམྨཾ. ཏསྨཱ ཏེན བྷིཀྑུནཱ ཨཱལོཀཾ ཝཌྜྷེཏྭཱ དིབྦེན ཙཀྑུནཱ པརསྶ ཧདཡརཱུཔཾ ནིསྶཱཡ ཝཏྟམཱནསྶ ལོཧིཏསྶ ཝཎྞཾ པསྶིཏྭཱ ཙིཏྟཾ པརིཡེསིཏབྦཾ. ཡདཱ ཧི སོམནསྶཙིཏྟཾ ཝཏྟཏི, ཏདཱ རཏྟཾ ནིགྲོདྷཔཀྐསདིསཾ ཧོཏི. ཡདཱ དོམནསྶཙིཏྟཾ ཝཏྟཏི, ཏདཱ ཀཱལ༹ཀཾ ཛམྦུཔཀྐསདིསཾ. ཡདཱ ཨུཔེཀྑཱཙིཏྟཾ ཝཏྟཏི, ཏདཱ པསནྣཏིལཏེལསདིསཾ. ཏསྨཱ ཏེན ‘‘ཨིདཾ རཱུཔཾ སོམནསྶིནྡྲིཡསམུཊྛཱནཾ, ཨིདཾ དོམནསྶིནྡྲིཡསམུཊྛཱནཾ, ཨིདཾ ཨུཔེཀྑིནྡྲིཡསམུཊྛཱན’’ནྟི པརསྶ ཧདཡལོཧིཏཝཎྞཾ པསྶིཏྭཱ ཙིཏྟཾ པརིཡེསནྟེན ཙེཏོཔརིཡཉཱཎཾ ཐཱམགཏཾ ཀཱཏབྦཾ. ཨེཝཾ ཐཱམགཏེ ཧི ཏསྨིཾ ཨནུཀྐམེན སབྦམྤི ཀཱམཱཝཙརཙིཏྟཾ རཱུཔཱཝཙརཱརཱུཔཱཝཙརཙིཏྟཉྩ པཛཱནཱཏི ཙིཏྟཱ ཙིཏྟམེཝ སངྐམནྟོ ཝིནཱཔི ཧདཡརཱུཔདསྶནེན. ཝུཏྟམྤི ཙེཏཾ ཨཊྛཀཐཱཡཾ ‘‘ཨཱརུཔྤེ པརསྶ ཙིཏྟཾ ཛཱནིཏུཀཱམོ ཀསྶ ཧདཡརཱུཔཾ པསྶཏི, ཀསྶིནྡྲིཡཝིཀཱརཾ ཨོལོཀེཏཱིཏི? ན ཀསྶཙི. ཨིདྡྷིམཏོ ཝིསཡོ ཨེས ཡདིདཾ ཡཏྠ ཀཏྠཙི ཙིཏྟཾ ཨཱཝཛྫནྟོ སོལ༹སཔྤབྷེདཾ ཙིཏྟཾ ཛཱནཱཏི. ཨཀཏཱབྷིནིཝེསསྶ པན ཝསེན ཨཡཾ ཀཐཱ’’ཏི.

སརཱགཾ ཝཱ ཙིཏྟནྟིཨཱདཱིསུ པན ཨཊྛཝིདྷཾ ལོབྷསཧགཏཾ ཙིཏྟཾ སརཱགཾ ཙིཏྟནྟི ཝེདིཏབྦཾ. ཨཝསེསཾ ཙཏུབྷཱུམཀཾ ཀུསལཱབྱཱཀཏཾ ཙིཏྟཾ ཝཱིཏརཱགཾ. དྭེ དོམནསྶཙིཏྟཱནི དྭེ ཝིཙིཀིཙྪུདྡྷཙྩཙིཏྟཱནཱིཏི ཨིམཱནི པན ཙཏྟཱརི ཙིཏྟཱནི ཨིམསྨིཾ དུཀེ སངྒཧཾ ན གཙྪནྟི. ཀེཙི པན ཐེརཱ ཏཱནིཔི སངྒཎྷནྟི. དུཝིདྷཾ པན དོམནསྶཙིཏྟཾ སདོསཾ ཙིཏྟཾ ནཱམ. སབྦམྤི ཙཏུབྷཱུམཀཾ ¶ ཀུསལཱབྱཱཀཏཾ ཝཱིཏདོསཾ. སེསཱནི དསཱཀུསལཙིཏྟཱནི ཨིམསྨིཾ དུཀེ སངྒཧཾ ན གཙྪནྟི. ཀེཙི པན ཐེརཱ ཏཱནིཔི སངྒཎྷནྟི.

སམོཧཾ ¶ ཝཱིཏམོཧནྟི ཨེཏྠ པན པཱཊིཔུགྒལིཀནཡེན ཝིཙིཀིཙྪུདྡྷཙྩསཧགཏདྭཡམེཝ སམོཧཾ, མོཧསྶ པན སབྦཱཀུསལེསུ སམྦྷཝཏོ དྭཱདསཝིདྷམྤི ཨཀུསལཙིཏྟཾ སམོཧཾ ཙིཏྟནྟི ཝེདིཏབྦཾ. ཨཝསེསཾ ཝཱིཏམོཧཾ. ཐིནམིདྡྷཱནུགཏཾ པན སཾཁིཏྟཾ. ཨུདྡྷཙྩཱནུགཏཾ ཝིཀྑིཏྟཾ. རཱུཔཱཝཙརཱརཱུཔཱཝཙརཾ མཧགྒཏཾ. ཨཝསེསཾ ཨམཧགྒཏཾ. སབྦམྤི ཏེབྷཱུམཀཾ སཨུཏྟརཾ. ལོཀུཏྟརཾ ཨནུཏྟརཾ. ཨུཔཙཱརཔྤཏྟཾ ཨཔྤནཱཔྤཏྟཉྩ སམཱཧིཏཾ. ཨུབྷཡམཔྤཏྟཾ ཨསམཱཧིཏཾ. ཏདངྒཝིཀྑམྦྷནསམུཙྪེདཔཊིཔསྶདྡྷིནིསྶརཎཝིམུཏྟིཔྤཏྟཾ ཝིམུཏྟཾ. པཉྩཝིདྷམྤི ཨེཏཾ ཝིམུཏྟིམཔྤཏྟཾ ཨཝིམུཏྟནྟི ཝེདིཏབྦཾ. ཨིཏི ཙེཏོཔརིཡཉཱཎལཱབྷཱི བྷིཀྑུ སབྦཔྤཀཱརམྤི ཨིདཾ སརཱགཾ ཝཱ ཙིཏྟཾ…པེ… ཨཝིམུཏྟཾ ཝཱ ཙིཏྟཾ ཨཝིམུཏྟཾ ཙིཏྟནྟི པཛཱནཱཏཱིཏི.

ཙེཏོཔརིཡཉཱཎཀཐཱ ནིཊྛིཏཱ.

པུབྦེནིཝཱསཱནུསྶཏིཉཱཎཀཐཱ

༤༠༢. པུབྦེནིཝཱསཱནུསྶཏིཉཱཎཀཐཱཡཾ པུབྦེནིཝཱསཱནུསྶཏིཉཱཎཱཡཱཏི (དཱི. ནི. ༡.༢༤༤) པུབྦེནིཝཱསཱནུསྶཏིམྷི ཡཾ ཉཱཎཾ, ཏདཏྠཱཡ. པུབྦེནིཝཱསོཏི པུབྦེ ཨཏཱིཏཛཱཏཱིསུ ནིཝུཏྠཀྑནྡྷཱ. ནིཝུཏྠཱཏི ཨཛ྄ཛྷཱཝུཏྠཱ ཨནུབྷཱུཏཱ ཨཏྟནོ སནྟཱནེ ཨུཔྤཛྫིཏྭཱ ནིརུདྡྷཱ. ནིཝུཏྠདྷམྨཱ ཝཱ. ནིཝུཏྠཱཏི གོཙརནིཝཱསེན ནིཝུཏྠཱ ཨཏྟནོ ཝིཉྙཱཎེན ཝིཉྙཱཏཱ པརིཙྪིནྣཱ, པརཝིཉྙཱཎཝིཉྙཱཏཱཔི ཝཱ ཚིནྣཝཊུམཀཱནུསྶརཎཱདཱིསུ, ཏེ བུདྡྷཱནཾཡེཝ ལབྦྷནྟི. པུབྦེནིཝཱསཱནུསྶཏཱིཏི ཡཱཡ སཏིཡཱ པུབྦེནིཝཱསཾ ཨནུསྶརཏི, སཱ པུབྦེནིཝཱསཱནུསྶཏི. ཉཱཎནྟི ཏཱཡ སཏིཡཱ སམྤཡུཏྟཉཱཎཾ. ཨེཝམིམསྶ པུབྦེནིཝཱསཱནུསྶཏིཉཱཎསྶ ཨཏྠཱཡ པུབྦེནིཝཱསཱནུསྶཏིཉཱཎཱཡ ཨེཏསྶ ཉཱཎསྶ ཨདྷིགམཱཡ པཏྟིཡཱཏི ཝུཏྟཾ ཧོཏི.

ཨནེཀཝིཧིཏནྟི ཨནེཀཝིདྷཾ, ཨནེཀེཧི ཝཱ པཀཱརེཧི པཝཏྟིཏཾ, སཾཝཎྞིཏནྟི ཨཏྠོ. པུབྦེནིཝཱསནྟི སམནནྟརཱཏཱིཏབྷཝཾ ཨཱདིཾ ཀཏྭཱ ཏཏྠ ཏཏྠ ནིཝུཏྠསནྟཱནཾ. ཨནུསྶརཏཱིཏི ཁནྡྷཔཊིཔཱཊིཝསེན ¶ ཙུཏིཔཊིསནྡྷིཝསེན ཝཱ ཨནུགནྟྭཱ ཨནུགནྟྭཱ སརཏི. ཨིམཉྷི པུབྦེནིཝཱསཾ ཚ ཛནཱ ཨནུསྶརནྟི – ཏིཏྠིཡཱ, པཀཏིསཱཝཀཱ, མཧཱསཱཝཀཱ, ཨགྒསཱཝཀཱ, པཙྩེཀབུདྡྷཱ, བུདྡྷཱཏི.

ཏཏྠ ¶ ཏིཏྠིཡཱ ཙཏྟཱལཱིསཾཡེཝ ཀཔྤེ ཨནུསྶརནྟི, ན ཏཏོ པརཾ. ཀསྨཱ, དུབྦལཔཉྙཏྟཱ. ཏེསཉྷི ནཱམརཱུཔཔརིཙྪེདཝིརཧིཏཏྟཱ དུབྦལཱ པཉྙཱ ཧོཏི. པཀཏིསཱཝཀཱ ཀཔྤསཏམྤི ཀཔྤསཧསྶམྤི ཨནུསྶརནྟིཡེཝ, བལཝཔཉྙཏྟཱ. ཨསཱིཏིམཧཱསཱཝཀཱ སཏསཧསྶཀཔྤེ ཨནུསྶརནྟི. དྭེ ཨགྒསཱཝཀཱ ཨེཀཾ ཨསངྑྱེཡྻཾ སཏསཧསྶཉྩ. པཙྩེཀབུདྡྷཱ དྭེ ཨསངྑྱེཡྻཱནི སཏསཧསྶཉྩ. ཨེཏྟཀོ ཧི ཨེཏེསཾ ཨབྷིནཱིཧཱརོ. བུདྡྷཱནཾ པན པརིཙྪེདོ ནཱམ ནཏྠི.

ཏིཏྠིཡཱ ཙ ཁནྡྷཔཊིཔཱཊིམེཝ སརནྟི, པཊིཔཱཊིཾ མུཉྩིཏྭཱ ཙུཏིཔཊིསནྡྷིཝསེན སརིཏུཾ ན སཀྐོནྟི. ཏེསཉྷི ཨནྡྷཱནཾ ཝིཡ ཨིཙྪིཏཔདེསོཀྐམནཾ ནཏྠི. ཡཐཱ པན ཨནྡྷཱ ཡཊྛིཾ ཨམུཉྩིཏྭཱཝ གཙྪནྟི, ཨེཝཾ ཏེ ཁནྡྷཱནཾ པཊིཔཱཊིཾ ཨམུཉྩིཏྭཱཝ སརནྟི. པཀཏིསཱཝཀཱ ཁནྡྷཔཊིཔཱཊིཡཱཔི ཨནུསྶརནྟི ཙུཏིཔཊིསནྡྷིཝསེནཔི སངྐམནྟི. ཏཐཱ ཨསཱིཏིམཧཱསཱཝཀཱ. དྭིནྣཾ པན ཨགྒསཱཝཀཱནཾ ཁནྡྷཔཊིཔཱཊིཀིཙྩཾ ནཏྠི. ཨེཀསྶ ཨཏྟབྷཱཝསྶ ཙུཏིཾ དིསྭཱ པཊིསནྡྷིཾ པསྶནྟི, པུན ཨཔརསྶ ཙུཏིཾ དིསྭཱ པཊིསནྡྷིནྟི ཨེཝཾ ཙུཏིཔཊིསནྡྷིཝསེནེཝ སངྐམནྟཱ གཙྪནྟི. ཏཐཱ པཙྩེཀབུདྡྷཱ.

བུདྡྷཱནཾ པན ནེཝ ཁནྡྷཔཊིཔཱཊིཀིཙྩཾ, ན ཙུཏིཔཊིསནྡྷིཝསེན སངྐམནཀིཙྩཾ ཨཏྠི. ཏེསཉྷི ཨནེཀཱསུ ཀཔྤཀོཊཱིསུ ཧེཊྛཱ ཝཱ ཨུཔརི ཝཱ ཡཾ ཡཾ ཋཱནཾ ཨིཙྪནྟི, ཏཾ ཏཾ པཱཀཊམེཝ ཧོཏི. ཏསྨཱ ཨནེཀཱཔི ཀཔྤཀོཊིཡོ པེཡྻཱལཔཱལི༹ཾ ཝིཡ སཾཁིཔིཏྭཱ ཡཾ ཡཾ ཨིཙྪནྟི, ཏཏྲ ཏཏྲེཝ ཨོཀྐམནྟཱ སཱིཧོཀྐནྟཝསེན གཙྪནྟི. ཨེཝཾ གཙྪནྟཱནཉྩ ནེསཾ ཉཱཎཾ ཡཐཱ ནཱམ ཀཏཝཱལཝེདྷཔརིཙཡསྶ སརབྷངྒསདིསསྶ དྷནུགྒཧསྶ ཁིཏྟོ སརོ ཨནྟརཱ རུཀྑལཏཱདཱིསུ ཨསཛྫམཱནོ ལཀྑེཡེཝ པཏཏི, ན སཛྫཏི, ན ཝིརཛ྄ཛྷཏི, ཨེཝཾ ཨནྟརནྟརཱསུ ཛཱཏཱིསུ ན སཛྫཏི, ན ཝིརཛ྄ཛྷཏི, ཨསཛྫམཱནཾ ཨཝིརཛ྄ཛྷམཱནཾ ཨིཙྪིཏིཙྪིཏཊྛཱནཾཡེཝ གཎྷཱཏི.

ཨིམེསུ ཙ པན པུབྦེནིཝཱསཾ ཨནུསྶརཎསཏྟེསུ ཏིཏྠིཡཱནཾ པུབྦེནིཝཱསདསྶནཾ ཁཛྫུཔནཀཔབྷཱསདིསཾ ཧུཏྭཱ ཨུཔཊྛཱཏི. པཀཏིསཱཝཀཱནཾ དཱིཔཔྤབྷཱསདིསཾ. མཧཱསཱཝཀཱནཾ ཨུཀྐཱཔབྷཱསདིསཾ ¶ . ཨགྒསཱཝཀཱནཾ ཨོསདྷིཏཱརཀཔྤབྷཱསདིསཾ. པཙྩེཀབུདྡྷཱནཾ ཙནྡཔྤབྷཱསདིསཾ. བུདྡྷཱནཾ རསྨིསཧསྶཔཊིམཎྜིཏསརདསཱུརིཡམཎྜལསདིསཾ ཧུཏྭཱ ཨུཔཊྛཱཏི.

ཏིཏྠིཡཱནཉྩ ¶ པུབྦེནིཝཱསཱནུསྶརཎཾ ཨནྡྷཱནཾ ཡཊྛིཀོཊིགམནཾ ཝིཡ ཧོཏི. པཀཏིསཱཝཀཱནཾ དཎྜཀསེཏུགམནཾ ཝིཡ. མཧཱསཱཝཀཱནཾ ཛངྒྷསེཏུགམནཾ ཝིཡ. ཨགྒསཱཝཀཱནཾ སཀཊསེཏུགམནཾ ཝིཡ. པཙྩེཀབུདྡྷཱནཾ མཧཱཛངྒྷམགྒགམནཾ ཝིཡ. བུདྡྷཱནཾ མཧཱསཀཊམགྒགམནཾ ཝིཡ.

ཨིམསྨིཾ པན ཨདྷིཀཱརེ སཱཝཀཱནཾ པུབྦེནིཝཱསཱནུསྶརཎཾ ཨདྷིཔྤེཏཾ. ཏེན ཝུཏྟཾ ‘‘ཨནུསྶརཏཱིཏི ཁནྡྷཔཊིཔཱཊིཝསེན ཙུཏིཔཊིསནྡྷིཝསེན ཝཱ ཨནུགནྟྭཱ ཨནུགནྟྭཱ སརཏཱི’’ཏི.

༤༠༣. ཏསྨཱ ཨེཝམནུསྶརིཏུཀཱམེན ཨཱདིཀམྨིཀེན བྷིཀྑུནཱ པཙྪཱབྷཏྟཾ པིཎྜཔཱཏཔཊིཀྐནྟེན རཧོགཏེན པཊིསལླིནེན པཊིཔཱཊིཡཱ ཙཏྟཱརི ཛྷཱནཱནི སམཱཔཛྫིཏྭཱ ཨབྷིཉྙཱཔཱདཀཙཏུཏྠཛ྄ཛྷཱནཏོ ཝུཊྛཱཡ སབྦཔཙྪིམཱ ནིསཛྫཱ ཨཱཝཛྫིཏབྦཱ. ཏཏོ ཨཱསནཔཉྙཱཔནཾ, སེནཱསནཔྤཝེསནཾ, པཏྟཙཱིཝརཔཊིསཱམནཾ, བྷོཛནཀཱལོ, གཱམཏོ ཨཱགམནཀཱལོ, གཱམེ པིཎྜཱཡ ཙརིཏཀཱལོ, གཱམཾ པིཎྜཱཡ པཝིཊྛཀཱལོ, ཝིཧཱརཏོ ནིཀྑམནཀཱལོ, ཙེཏིཡངྒཎབོདྷིཡངྒཎཝནྡནཀཱལོ, པཏྟདྷོཝནཀཱལོ, པཏྟཔཊིགྒཧཎཀཱལོ, པཏྟཔཊིགྒཧཎཏོ ཡཱཝ མུཁདྷོཝནཱ ཀཏཀིཙྩཾ, པཙྩཱུསཀཱལེ ཀཏཀིཙྩཾ, མཛ྄ཛྷིམཡཱམེ ཀཏཀིཙྩཾ, པཋམཡཱམེ ཀཏཀིཙྩནྟི ཨེཝཾ པཊིལོམཀྐམེན སཀལཾ རཏྟིནྡིཝཾ ཀཏཀིཙྩཾ ཨཱཝཛྫིཏབྦཾ. ཨེཏྟཀཾ པན པཀཏིཙིཏྟསྶཔི པཱཀཊཾ ཧོཏི. པརིཀམྨསམཱདྷིཙིཏྟསྶ པན ཨཏིཔཱཀཊམེཝ.

སཙེ པནེཏྠ ཀིཉྩི ན པཱཀཊཾ ཧོཏི, པུན པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ཨཱཝཛྫིཏབྦཾ. ཨེཏྟཀེན དཱིཔེ ཛལིཏེ ཝིཡ པཱཀཊཾ ཧོཏི. ཨེཝཾ པཊིལོམཀྐམེནེཝ དུཏིཡདིཝསེཔི ཏཏིཡཙཏུཏྠཔཉྩམདིཝསེཔི དསཱཧེཔི ཨཌྜྷམཱསེཔི མཱསེཔི ཡཱཝ སཾཝཙྪརཱཔི ཀཏཀིཙྩཾ ཨཱཝཛྫིཏབྦཾ. ཨེཏེནེཝ ཨུཔཱཡེན དསཝསྶཱནི ཝཱིསཏིཝསྶཱནཱིཏི ཡཱཝ ཨིམསྨིཾ བྷཝེ ཨཏྟནོ པཊིསནྡྷི, ཏཱཝ ཨཱཝཛྫནྟེན པུརིམབྷཝེ ཙུཏིཀྑཎེ པཝཏྟིཏནཱམརཱུཔཾ ཨཱཝཛྫིཏབྦཾ. པཧོཏི ཧི པཎྜིཏོ བྷིཀྑུ པཋམཝཱརེནེཝ པཊིསནྡྷིཾ ཨུགྒྷཱཊེཏྭཱ ཙུཏིཀྑཎེ ནཱམརཱུཔམཱརམྨཎཾ ཀཱཏུཾ.

ཡསྨཱ ¶ པན པུརིམབྷཝེ ནཱམརཱུཔཾ ཨསེསཾ ནིརུདྡྷཾ ཨཉྙཾ ཨུཔྤནྣཾ, ཏསྨཱ ཏཾ ཋཱནཾ ཨཱཧུནྡརིཀཾ ཨནྡྷཏམམིཝ ཧོཏི དུདྡསཾ དུཔྤཉྙེན. ཏེནཱཔི ‘‘ན སཀྐོམཧཾ ¶ པཊིསནྡྷིཾ ཨུགྒྷཱཊེཏྭཱ ཙུཏིཀྑཎེ པཝཏྟིཏནཱམརཱུཔམཱརམྨཎཾ ཀཱཏུ’’ནྟི དྷུརནིཀྑེཔོ ན ཀཱཏབྦོ. ཏདེཝ པན པཱདཀཛ྄ཛྷཱནཾ པུནཔྤུནཾ སམཱཔཛྫིཏབྦཾ. ཏཏོ ཙ ཝུཊྛཱཡ ཝུཊྛཱཡ ཏཾ ཋཱནཾ ཨཱཝཛྫིཏབྦཾ.

ཨེཝཾ ཀརོནྟོ ཧི སེཡྻཐཱཔི ནཱམ བལཝཱ པུརིསོ ཀཱུཊཱགཱརཀཎྞིཀཏྠཱཡ མཧཱརུཀྑཾ ཚིནྡནྟོ སཱཁཱཔལཱསཙྪེདནམཏྟེནེཝ ཕརསུདྷཱརཱཡ ཝིཔནྣཱཡ མཧཱརུཀྑཾ ཚིནྡིཏུཾ ཨསཀྐོནྟོཔི དྷུརནིཀྑེཔཾ ཨཀཏྭཱཝ ཀམྨཱརསཱལཾ གནྟྭཱ ཏིཁིཎཾ ཕརསུཾ ཀཱརཱཔེཏྭཱ པུན ཨཱགནྟྭཱ ཚིནྡེཡྻ, པུན ཝིཔནྣཱཡ ཙ པུནཔི ཏཐེཝ ཀཱརེཏྭཱ ཚིནྡེཡྻ. སོ ཨེཝཾ ཚིནྡནྟོ ཚིནྣསྶ ཚིནྣསྶ པུན ཚེཏབྦཱབྷཱཝཏོ ཨཙྪིནྣསྶ ཙ ཚེདནཏོ ནཙིརསྶེཝ མཧཱརུཀྑཾ པཱཏེཡྻ, ཨེཝམེཝཾ པཱདཀཛ྄ཛྷཱནཱ ཝུཊྛཱཡ པུབྦེ ཨཱཝཛྫིཏཾ ཨནཱཝཛྫིཏྭཱ པཊིསནྡྷིམེཝ ཨཱཝཛྫནྟོ ནཙིརསྶེཝ པཊིསནྡྷིཾ ཨུགྒྷཱཊེཏྭཱ ཙུཏིཀྑཎེ པཝཏྟིཏནཱམརཱུཔཾ ཨཱརམྨཎཾ ཀརེཡྻཱཏི. ཀཊྛཕཱལཀཀེསོཧཱརཀཱདཱིཧིཔི ཨཡམཏྠོ དཱིཔེཏབྦོ.

ཏཏྠ པཙྪིམནིསཛྫཏོ པབྷུཏི ཡཱཝ པཊིསནྡྷིཏོ ཨཱརམྨཎཾ ཀཏྭཱ པཝཏྟཾ ཉཱཎཾ པུབྦེནིཝཱསཉཱཎཾ ནཱམ ན ཧོཏི. ཏཾ པན པརིཀམྨསམཱདྷིཉཱཎཾ ནཱམ ཧོཏི. ཨཏཱིཏཾསཉཱཎནྟིཔི ཨེཀེ ཝདནྟི. ཏཾ རཱུཔཱཝཙརཾ སནྡྷཱཡ ན ཡུཛྫཏི. ཡདཱ པནསྶ བྷིཀྑུནོ པཊིསནྡྷིཾ ཨཏིཀྐམྨ ཙུཏིཀྑཎེ པཝཏྟིཏནཱམརཱུཔཾ ཨཱརམྨཎཾ ཀཏྭཱ མནོདྭཱརཱཝཛྫནཾ ཨུཔྤཛྫཏི, ཏསྨིཉྩ ནིརུདྡྷེ ཏདེཝཱརམྨཎཾ ཀཏྭཱ ཙཏྟཱརི པཉྩ ཝཱ ཛཝནཱནི ཛཝནྟི. སེསཾ པུབྦེ ཝུཏྟནཡེནེཝ པུརིམཱནི པརིཀམྨཱདིནཱམཀཱནི ཀཱམཱཝཙརཱནི ཧོནྟི. པཙྪིམཾ རཱུཔཱཝཙརཾ ཙཏུཏྠཛ྄ཛྷཱནིཀཾ ཨཔྤནཱཙིཏྟཾ. ཏདཱསྶ ཡཾ ཏེན ཙིཏྟེན སཧ ཉཱཎཾ ཨུཔྤཛྫཏི, ཨིདཾ པུབྦེནིཝཱསཱནུསྶཏིཉཱཎཾ ནཱམ. ཏེན ཉཱཎེན སམྤཡུཏྟཱཡ སཏིཡཱ ཨནེཀཝིཧིཏཾ པུབྦེནིཝཱསཾ ཨནུསྶརཏི. སེཡྻཐིདཾ, ཨེཀམྤི ཛཱཏིཾ དྭེཔི ཛཱཏིཡོ…པེ… ཨིཏི སཱཀཱརཾ སཨུདྡེསཾ ཨནེཀཝིཧིཏཾ པུབྦེནིཝཱསཾ ཨནུསྶརཏཱིཏི (དཱི. ནི. ༡.༢༤༤).

༤༠༤. ཏཏྠ ཨེཀམྤི ཛཱཏིནྟི ཨེཀམྤི པཊིསནྡྷིམཱུལཾ ཙུཏིཔརིཡོསཱནཾ ཨེཀབྷཝཔརིཡཱཔནྣཾ ཁནྡྷསནྟཱནཾ. ཨེས ནཡོ དྭེཔི ཛཱཏིཡོཏིཨཱདཱིསུཔི. ཨནེཀེཔི སཾཝཊྚཀཔྤེཏིཨཱདཱིསུ པན པརིཧཱཡམཱནོ ཀཔྤོ སཾཝཊྚཀཔྤོ, ཝཌྜྷམཱནོ ཝིཝཊྚཀཔྤོཏི ཝེདིཏབྦོ. ཏཏྠ སཾཝཊྚེན སཾཝཊྚཊྛཱཡཱི ¶ གཧིཏོ ¶ ཧོཏི, ཏཾམཱུལཀཏྟཱ. ཝིཝཊྚེན ཙ ཝིཝཊྚཊྛཱཡཱི, ཨེཝཉྷི སཏི ཡཱནི ཏཱནི ‘‘ཙཏྟཱརིམཱནི, བྷིཀྑཝེ, ཀཔྤསྶ ཨསངྑྱེཡྻཱནི. ཀཏམཱནི ཙཏྟཱརི? སཾཝཊྚོ, སཾཝཊྚཊྛཱཡཱི, ཝིཝཊྚོ, ཝིཝཊྚཊྛཱཡཱིཏི (ཨ. ནི. ༤.༡༥༦ ཐོཀཾ ཝིསདིསཾ) ཝུཏྟཱནི, ཏཱནི པརིགྒཧིཏཱནི ཧོནྟི.

ཏཏྠ ཏཡོ སཾཝཊྚཱ – ཨཱཔོསཾཝཊྚོ, ཏེཛོསཾཝཊྚོ, ཝཱཡོསཾཝཊྚོཏི. ཏིསྶོ སཾཝཊྚསཱིམཱ – ཨཱབྷསྶརཱ, སུབྷཀིཎྷཱ, ཝེཧཔྥལཱཏི.

ཡདཱ ཀཔྤོ ཏེཛེན སཾཝཊྚཏི, ཨཱབྷསྶརཏོ ཧེཊྛཱ ཨགྒིནཱ ཌཡ྄ཧཏི. ཡདཱ ཨཱཔེན སཾཝཊྚཏི, སུབྷཀིཎྷཏོ ཧེཊྛཱ ཨུདཀེན ཝིལཱིཡཏི. ཡདཱ ཝཱཡུནཱ སཾཝཊྚཏི, ཝེཧཔྥལཏོ ཧེཊྛཱ ཝཱཏེན ཝིདྡྷཾསཏི. ཝིཏྠཱརཏོ པན སདཱཔི ཨེཀཾ བུདྡྷཁེཏྟཾ ཝིནསྶཏི.

བུདྡྷཁེཏྟཾ ནཱམ ཏིཝིདྷཾ ཧོཏི – ཛཱཏིཁེཏྟཾ, ཨཱཎཱཁེཏྟཾ, ཝིསཡཁེཏྟཉྩ. ཏཏྠ ཛཱཏིཁེཏྟཾ དསསཧསྶཙཀྐཝཱལ༹པརིཡནྟཾ ཧོཏི. ཡཾ ཏཐཱགཏསྶ པཊིསནྡྷིགཧཎཱདཱིསུ ཀམྤཏི. ཨཱཎཱཁེཏྟཾ ཀོཊིསཏསཧསྶཙཀྐཝཱལ༹པརིཡནྟཾ, ཡཏྠ རཏནསུཏྟཾ (ཁུ. པཱ. ༦.༡ ཨཱདཡོ) ཁནྡྷཔརིཏྟཾ (ཙཱུལ༹ཝ. ༢༥༡; ཨ. ནི. ༤.༦༧) དྷཛགྒཔརིཏྟཾ (སཾ. ནི. ༡.༢༤༩) ཨཱཊཱནཱཊིཡཔརིཏྟཾ (དཱི. ནི. ༣.༢༧༥ ཨཱདཡོ) མོརཔརིཏྟནྟི (ཛཱ. ༡.༢.༡༧-༡༨) ཨིམེསཾ པརིཏྟཱནཾ ཨཱནུབྷཱཝོ ཝཏྟཏི. ཝིསཡཁེཏྟཾ ཨནནྟམཔརིམཱཎཾ. ཡཾ ‘‘ཡཱཝཏཱ ཝཱ པན ཨཱཀངྑེཡྻཱ’’ཏི (ཨ. ནི. ༣.༨༡) ཝུཏྟཾ, ཡཏྠ ཡཾ ཡཾ ཏཐཱགཏོ ཨཱཀངྑཏི, ཏཾ ཏཾ ཛཱནཱཏི. ཨེཝམེཏེསུ ཏཱིསུ བུདྡྷཁེཏྟེསུ ཨེཀཾ ཨཱཎཱཁེཏྟཾ ཝིནསྶཏི. ཏསྨིཾ པན ཝིནསྶནྟེ ཛཱཏིཁེཏྟམྤི ཝིནཊྛམེཝ ཧོཏི. ཝིནསྶནྟཉྩ ཨེཀཏོཝ ཝིནསྶཏི, སཎྛཧནྟམྤི ཨེཀཏོ སཎྛཧཏི. ཏསྶེཝཾ ཝིནཱསོ ཙ སཎྛཧནཉྩ ཝེདིཏབྦཾ.

༤༠༥. ཡསྨིཾ ཧི སམཡེ ཀཔྤོ ཨགྒིནཱ ནསྶཏི, ཨཱདིཏོཝ ཀཔྤཝིནཱསཀམཧཱམེགྷོ ཝུཊྛཧིཏྭཱ ཀོཊིསཏསཧསྶཙཀྐཝཱལེ༹ ཨེཀཾ མཧཱཝསྶཾ ཝསྶཏི. མནུསྶཱ ཏུཊྛཧཊྛཱ སབྦབཱིཛཱནི ནཱིཧརིཏྭཱ ཝཔནྟི. སསྶེསུ པན གོཁཱཡིཏཀམཏྟེསུ ཛཱཏེསུ གདྲབྷརཝཾ རཝནྟོ ཨེཀབིནྡུམྤི ན ཝསྶཏི, ཏདཱ པཙྪིནྣཾ པཙྪིནྣམེཝ ཝསྶཾ ཧོཏི. ཨིདཾ སནྡྷཱཡ ཧི བྷགཝཏཱ ‘‘ཧོཏི ཁོ སོ, བྷིཀྑཝེ, སམཡོ ཡཾ བཧཱུནི ཝསྶཱནི བཧཱུནི ཝསྶསཏཱནི ¶ བཧཱུནི ཝསྶསཧསྶཱནི བཧཱུནི ¶ ཝསྶསཏསཧསྶཱནི དེཝོ ན ཝསྶཏཱི’’ཏི (ཨ. ནི. ༧.༦༦) ཝུཏྟཾ. ཝསྶཱུཔཛཱིཝིནོ སཏྟཱ ཀཱལངྐཏྭཱ བྲཧྨལོཀེ ནིབྦཏྟནྟི, པུཔྥཕལཱུཔཛཱིཝིནིཡོ ཙ དེཝཏཱ. ཨེཝཾ དཱིགྷེ ཨདྡྷཱནེ ཝཱིཏིཝཏྟེ ཏཏྠ ཏཏྠ ཨུདཀཾ པརིཀྑཡཾ གཙྪཏི, ཨཐཱནུཔུབྦེན མཙྪཀཙྪཔཱཔི ཀཱལངྐཏྭཱ བྲཧྨལོཀེ ནིབྦཏྟནྟི, ནེརཡིཀསཏྟཱཔི. ཏཏྠ ནེརཡིཀཱ སཏྟམསཱུརིཡཔཱཏུབྷཱཝེ ཝིནསྶནྟཱིཏི ཨེཀེ.

ཛྷཱནཾ ཝིནཱ ནཏྠི བྲཧྨལོཀེ ནིབྦཏྟི, ཨེཏེསཉྩ ཀེཙི དུབྦྷིཀྑཔཱིལི༹ཏཱ ཀེཙི ཨབྷབྦཱ ཛྷཱནཱདྷིགམཱཡ, ཏེ ཀཐཾ ཏཏྠ ནིབྦཏྟནྟཱིཏི. དེཝལོཀེ པཊིལདྡྷཛ྄ཛྷཱནཝསེན. ཏདཱ ཧི ‘‘ཝསྶསཏསཧསྶསྶཙྩཡེན ཀཔྤུཊྛཱནཾ བྷཝིསྶཏཱི’’ཏི ལོཀབྱཱུཧཱ ནཱམ ཀཱམཱཝཙརདེཝཱ མུཏྟསིརཱ ཝིཀིཎྞཀེསཱ རུདམུཁཱ ཨསྶཱུནི ཧཏྠེཧི པུཉྪམཱནཱ རཏྟཝཏྠནིཝཏྠཱ ཨཏིཝིཡ ཝིརཱུཔཝེསདྷཱརིནོ ཧུཏྭཱ མནུསྶཔཐེ ཝིཙརནྟཱ ཨེཝཾ ཨཱརོཙེནྟི ‘‘མཱརིསཱ ཨིཏོ ཝསྶསཏསཧསྶསྶཙྩཡེན ཀཔྤཝུཊྛཱནཾ བྷཝིསྶཏི, ཨཡཾ ལོཀོ ཝིནསྶིསྶཏི, མཧཱསམུདྡོཔི ཨུསྶུསྶིསྶཏི, ཨཡཉྩ མཧཱཔཐཝཱི སིནེརུ ཙ པབྦཏརཱཛཱ ཨུདྡཡ྄ཧིསྶནྟི ཝིནསྶིསྶནྟི. ཡཱཝ བྲཧྨལོཀཱ ལོཀཝིནཱསོ བྷཝིསྶཏི. མེཏྟཾ མཱརིསཱ བྷཱཝེཐ, ཀརུཎཾ, མུདིཏཾ, ཨུཔེཀྑཾ མཱརིསཱ བྷཱཝེཐ, མཱཏརཾ ཨུཔཊྛཧཐ, པིཏརཾ ཨུཔཊྛཧཐ, ཀུལེ ཛེཊྛཱཔཙཱཡིནོ ཧོཐཱ’’ཏི.

ཏེསཾ ཝཙནཾ སུཏྭཱ ཡེབྷུཡྻེན མནུསྶཱ ཙ བྷུམྨདེཝཏཱ ཙ སཾཝེགཛཱཏཱ ཨཉྙམཉྙཾ མུདུཙིཏྟཱ ཧུཏྭཱ མེཏྟཱདཱིནི པུཉྙཱནི ཀརིཏྭཱ དེཝལོཀེ ནིབྦཏྟནྟི. ཏཏྠ དིབྦསུདྷཱབྷོཛནཾ བྷུཉྫིཏྭཱ ཝཱཡོཀསིཎེ པརིཀམྨཾ ཀཏྭཱ ཛྷཱནཾ པཊིལབྷནྟི. ཏདཉྙེ པན ཨཔརཱཔརིཡཝེདནཱིཡེན ཀམྨེན དེཝལོཀེ ནིབྦཏྟནྟི. ཨཔརཱཔརིཡཝེདནཱིཡཀམྨརཧིཏོ ཧི སཾསཱརེ སཾསརམཱནོ སཏྟོ ནཱམ ནཏྠི. ཏེཔི ཏཏྠ ཏཐེཝ ཛྷཱནཾ པཊིལབྷནྟི. ཨེཝཾ དེཝལོཀེ པཊིལདྡྷཛ྄ཛྷཱནཝསེན སབྦེཔི བྲཧྨལོཀེ ནིབྦཏྟནྟཱིཏི.

ཝསྶཱུཔཙྪེདཏོ པན ཨུདྡྷཾ དཱིགྷསྶ ཨདྡྷུནོ ཨཙྩཡེན དུཏིཡོ སཱུརིཡོ པཱཏུབྷཝཏི. ཝུཏྟམྤི ཙེཏཾ བྷགཝཏཱ ‘‘ཧོཏི ཁོ སོ, བྷིཀྑཝེ, སམཡོ’’ཏི སཏྟསཱུརིཡཾ (ཨ. ནི. ༧.༦༦) ཝིཏྠཱརེཏབྦཾ. པཱཏུབྷཱུཏེ ཙ པན ཏསྨིཾ ནེཝ ¶ རཏྟིཔརིཙྪེདོ, ན དིཝཱཔརིཙྪེདོ པཉྙཱཡཏི. ཨེཀོ སཱུརིཡོ ཨུཊྛེཏི, ཨེཀོ ཨཏྠཾ གཙྪཏི. ཨཝིཙྪིནྣསཱུརིཡསནྟཱཔོཝ ལོཀོ ཧོཏི. ཡཐཱ ཙ པཀཏིསཱུརིཡེ སཱུརིཡདེཝཔུཏྟོ ཧོཏི, ཨེཝཾ ཀཔྤཝིནཱསཀསཱུརིཡེ ནཏྠི. ཏཏྠ པཀཏིསཱུརིཡེ ¶ ཝཏྟམཱནེ ཨཱཀཱསེ ཝལཱཧཀཱཔི དྷཱུམསིཁཱཔི ཙརནྟི. ཀཔྤཝིནཱསཀསཱུརིཡེ ཝཏྟམཱནེ ཝིགཏདྷཱུམཝལཱཧཀཾ ཨཱདཱསམཎྜལཾ ཝིཡ ནིམྨལཾ ནབྷཾ ཧོཏི. ཋཔེཏྭཱ པཉྩ མཧཱནདིཡོ སེསཀུནྣདཱིཨཱདཱིསུ ཨུདཀཾ སུསྶཏི.

ཏཏོཔི དཱིགྷསྶ ཨདྡྷུནོ ཨཙྩཡེན ཏཏིཡོ སཱུརིཡོ པཱཏུབྷཝཏི. ཡསྶ པཱཏུབྷཱཝཱ མཧཱནདིཡོཔི སུསྶནྟི.

ཏཏོཔི དཱིགྷསྶ ཨདྡྷུནོ ཨཙྩཡེན ཙཏུཏྠོ སཱུརིཡོ པཱཏུབྷཝཏི. ཡསྶ པཱཏུབྷཱཝཱ ཧིམཝཏི མཧཱནདཱིནཾ པབྷཝཱ ‘‘སཱིཧཔཔཱཏོ ཧཾསཔཱཏནོ ཀཎྞམུཎྜཀོ རཐཀཱརདཧོ ཨནོཏཏྟདཧོ ཚདྡནྟདཧོ ཀུཎཱལདཧོ’’ཏི ཨིམེ སཏྟ མཧཱསརཱ སུསྶནྟི.

ཏཏོཔི དཱིགྷསྶ ཨདྡྷུནོ ཨཙྩཡེན པཉྩམོ སཱུརིཡོ པཱཏུབྷཝཏི. ཡསྶ པཱཏུབྷཱཝཱ ཨནུཔུབྦེན མཧཱསམུདྡེ ཨངྒུལིཔབྦཏེམནམཏྟམྤི ཨུདཀཾ ན སཎྛཱཏི.

ཏཏོཔི དཱིགྷསྶ ཨདྡྷུནོ ཨཙྩཡེན ཚཊྛོ སཱུརིཡོ པཱཏུབྷཝཏི. ཡསྶ པཱཏུབྷཱཝཱ སཀལཙཀྐཝཱལ༹ཾ ཨེཀདྷཱུམཾ ཧོཏི. པརིཡཱདིཎྞསིནེཧཾ དྷཱུམེན. ཡཐཱ ཙིདཾ, ཨེཝཾ ཀོཊིསཏསཧསྶཙཀྐཝཱལཱ༹ནིཔི.

ཏཏོཔི དཱིགྷསྶ ཨདྡྷུནོ ཨཙྩཡེན སཏྟམོ སཱུརིཡོ པཱཏུབྷཝཏི. ཡསྶ པཱཏུབྷཱཝཱ སཀལཙཀྐཝཱལ༹ཾ ཨེཀཛཱལཾ ཧོཏི སདྡྷིཾ ཀོཊིསཏསཧསྶཙཀྐཝཱལེ༹ཧི. ཡོཛནསཏིཀཱདིབྷེདཱནི སིནེརུཀཱུཊཱནིཔི པལུཛྫིཏྭཱ ཨཱཀཱསེཡེཝ ཨནྟརདྷཱཡནྟི. སཱ ཨགྒིཛཱལཱ ཨུཊྛཧིཏྭཱ ཙཱཏུམཧཱརཱཛིཀེ གཎྷཱཏི. ཏཏྠ ཀནཀཝིམཱནརཏནཝིམཱནམཎིཝིམཱནཱནི ཛྷཱཔེཏྭཱ ཏཱཝཏིཾསབྷཝནཾ གཎྷཱཏི. ཨེཏེནེཝ ཨུཔཱཡེན ཡཱཝ པཋམཛ྄ཛྷཱནབྷཱུམིཾ གཎྷཱཏི. ཏཏྠ ཏཡོཔི བྲཧྨལོཀེ ཛྷཱཔེཏྭཱ ཨཱབྷསྶརེ ཨཱཧཙྩ ཏིཊྛཏི. སཱ ཡཱཝ ཨཎུམཏྟམྤི སངྑཱརགཏཾ ཨཏྠི, ཏཱཝ ན ནིབྦཱཡཏི. སབྦསངྑཱརཔརིཀྑཡཱ པན སཔྤིཏེལཛྷཱཔནགྒིསིཁཱ ཝིཡ ཚཱརིཀམྤི ¶ ཨནཝསེསེཏྭཱ ནིབྦཱཡཏི. ཧེཊྛཱཨཱཀཱསེན སཧ ཨུཔརིཨཱཀཱསོ ཨེཀོ ཧོཏི མཧནྡྷཀཱརོ.

༤༠༦. ཨཐ དཱིགྷསྶ ཨདྡྷུནོ ཨཙྩཡེན མཧཱམེགྷོ ཨུཊྛཧིཏྭཱ པཋམཾ སུཁུམཾ སུཁུམཾ ཝསྶཏི ¶ . ཨནུཔུབྦེན ཀུམུདནཱལ༹ཡཊྛིམུསལཏཱལཀྑནྡྷཱདིཔྤམཱཎཱཧི དྷཱརཱཧི ཝསྶནྟོ ཀོཊིསཏསཧསྶཙཀྐཝཱལེ༹སུ སབྦཾ དཌྜྷཊྛཱནཾ པཱུརེཏྭཱ ཨནྟརདྷཱཡཏི. ཏཾ ཨུདཀཾ ཧེཊྛཱ ཙ ཏིརིཡཉྩ ཝཱཏོ སམུཊྛཧིཏྭཱ གྷནཾ ཀརོཏི པརིཝཊུམཾ པདུམིནིཔཏྟེ ཨུདཀབིནྡུསདིསཾ. ཀཐཾ ཏཱཝ མཧནྟཾ ཨུདཀརཱསིཾ གྷནཾ ཀརོཏཱིཏི ཙེ? ཝིཝརསམྤདཱནཏོ. ཏཉྷིསྶ ཏམྷི ཏམྷི ཝིཝརཾ དེཏི. ཏཾ ཨེཝཾ ཝཱཏེན སམྤིཎྜིཡམཱནཾ གྷནཾ ཀརིཡམཱནཾ པརིཀྑཡམཱནཾ ཨནུཔུབྦེན ཧེཊྛཱ ཨོཏརཏི. ཨོཏིཎྞེ ཨོཏིཎྞེ ཨུདཀེ བྲཧྨལོཀཊྛཱནེ བྲཧྨལོཀཱ, ཨུཔརི ཙཏུཀཱམཱཝཙརདེཝལོཀཊྛཱནེ ཙ དེཝལོཀཱ པཱཏུབྷཝནྟི.

པུརིམཔཐཝིཊྛཱནཾ ཨོཏིཎྞེ པན བལཝཝཱཏཱ ཨུཔྤཛྫནྟི. ཏེ ཏཾ པིཧིཏདྭཱརེ དྷམཀརཎེ ཋིཏཨུདཀམིཝ ནིརསྶཱསཾ ཀཏྭཱ རུནྡྷནྟི. མདྷུརོདཀཾ པརིཀྑཡཾ གཙྪམཱནཾ ཨུཔརི རསཔཐཝིཾ སམུཊྛཱཔེཏི. སཱ ཝཎྞསམྤནྣཱ ཙེཝ ཧོཏི གནྡྷརསསམྤནྣཱ ཙ ནིརུདཀཔཱཡཱསསྶ ཨུཔརི པཊལཾ ཝིཡ.

ཏདཱ ཙ ཨཱབྷསྶརབྲཧྨལོཀེ པཋམཏརཱབྷིནིབྦཏྟཱ སཏྟཱ ཨཱཡུཀྑཡཱ ཝཱ པུཉྙཀྑཡཱ ཝཱ ཏཏོ ཙཝིཏྭཱ ཨིདྷཱུཔཔཛྫནྟི. ཏེ ཧོནྟི སཡཾཔབྷཱ ཨནྟལིཀྑཙརཱ. ཏེ ཨགྒཉྙསུཏྟེ (དཱི. ནི. ༣.༡༡༩) ཝུཏྟནཡེན ཏཾ རསཔཐཝིཾ སཱཡིཏྭཱ ཏཎྷཱབྷིབྷཱུཏཱ ཨཱལུཔྤཀཱརཀཾ པརིབྷུཉྫིཏུཾ ཨུཔཀྐམནྟི. ཨཐ ནེསཾ སཡཾཔབྷཱ ཨནྟརདྷཱཡཏི, ཨནྡྷཀཱརོ ཧོཏི. ཏེ ཨནྡྷཀཱརཾ དིསྭཱ བྷཱཡནྟི.

ཏཏོ ནེསཾ བྷཡཾ ནཱསེཏྭཱ སཱུརབྷཱཝཾ ཛནཡནྟཾ པརིཔུཎྞཔཎྞཱསཡོཛནཾ སཱུརིཡམཎྜལཾ པཱཏུབྷཝཏི, ཏེ ཏཾ དིསྭཱ ‘‘ཨཱལོཀཾ པཊིལབྷིམྷཱ’’ཏི ཧཊྛཏུཊྛཱ ཧུཏྭཱ ‘‘ཨམྷཱཀཾ བྷཱིཏཱནཾ བྷཡཾ ནཱསེཏྭཱ སཱུརབྷཱཝཾ ཛནཡནྟོ ཨུཊྛིཏོ, ཏསྨཱ ‘‘སཱུརིཡོ ཧོཏཱུ’’ཏི སཱུརིཡོཏྭེཝསྶ ནཱམཾ ཀརོནྟི.

ཨཐ ¶ སཱུརིཡེ དིཝསཾ ཨཱལོཀཾ ཀཏྭཱ ཨཏྠངྒཏེ ཡམྤི ཨཱལོཀཾ ལབྷིམྷཱ, སོཔི ནོ ནཊྛོཏི པུན བྷཱིཏཱ ཧོནྟི. ཏེསཾ ཨེཝཾ ཧོཏི ‘‘སཱདྷུ ཝཏསྶ སཙེ ཨཉྙཾ ཨཱལོཀཾ ལབྷེཡྻཱམཱ’’ཏི. ཏེསཾ ཙིཏྟཾ ཉཏྭཱ ཝིཡ ཨེཀཱུནཔཎྞཱསཡོཛནཾ ཙནྡམཎྜལཾ པཱཏུབྷཝཏི. ཏེ ཏཾ དིསྭཱ བྷིཡྻོསོ མཏྟཱཡ ཧཊྛཏུཊྛཱ ཧུཏྭཱ ‘‘ཨམྷཱཀཾ ཚནྡཾ ཉཏྭཱ ཝིཡ ཨུཊྛིཏོ, ཏསྨཱ ཙནྡོ ཧོཏཱུ’’ཏི ¶ ཙནྡོཏྭེཝསྶ ནཱམཾ ཀརོནྟི. ཨེཝཾ ཙནྡིམསཱུརིཡེསུ པཱཏུབྷཱུཏེསུ ནཀྑཏྟཱནི ཏཱརཀརཱུཔཱནི པཱཏུབྷཝནྟི.

ཏཏོ པབྷུཏི རཏྟིནྡིཝཱ པཉྙཱཡནྟི, ཨནུཀྐམེན ཙ མཱསདྡྷམཱསཨུཏུསཾཝཙྪརཱ. ཙནྡིམསཱུརིཡཱནཾ པན པཱཏུབྷཱུཏདིཝསེཡེཝ སིནེརུཙཀྐཝཱལ༹ཧིམཝནྟཔབྦཏཱ པཱཏུབྷཝནྟི. ཏེ ཙ ཁོ ཨཔུབྦཾ ཨཙརིམཾ ཕགྒུཎཔུཎྞམདིཝསེཡེཝ པཱཏུབྷཝནྟི. ཀཐཾ? ཡཐཱ ནཱམ ཀངྒུབྷཏྟེ པཙྩམཱནེ ཨེཀཔྤཧཱརེནེཝ པུཔྥུལ༹ཀཱནི ཨུཊྛཧནྟི. ཨེཀེ པདེསཱ ཐཱུཔཐཱུཔཱ ཧོནྟི, ཨེཀེ ནིནྣནིནྣཱ, ཨེཀེ སམསམཱ. ཨེཝམེཝཾ ཐཱུཔཐཱུཔཊྛཱནེ པབྦཏཱ ཧོནྟི, ནིནྣནིནྣཊྛཱནེ སམུདྡཱ, སམསམཊྛཱནེ དཱིཔཱཏི.

ཨཐ ཏེསཾ སཏྟཱནཾ རསཔཐཝིཾ པརིབྷུཉྫནྟཱནཾ ཀམེན ཨེཀཙྩེ ཝཎྞཝནྟོ, ཨེཀཙྩེ དུབྦཎྞཱ ཧོནྟི. ཏཏྠ ཝཎྞཝནྟོ དུབྦཎྞེ ཨཏིམཉྙནྟི. ཏེསཾ ཨཏིམཱནཔཙྩཡཱ སཱཔི རསཔཐཝཱི ཨནྟརདྷཱཡཏི. བྷཱུམིཔཔྤཊཀོ པཱཏུབྷཝཏི. ཨཐ ནེསཾ ཏེནེཝ ནཡེན སོཔི ཨནྟརདྷཱཡཏི. པདཱལཏཱ པཱཏུབྷཝཏི. ཏེནེཝ ནཡེན སཱཔི ཨནྟརདྷཱཡཏི. ཨཀཊྛཔཱཀོ སཱལི པཱཏུབྷཝཏི ཨཀཎོ ཨཐུསོ སུདྡྷོ སུགནྡྷོ ཏཎྜུལཔྥལོ.

ཏཏོ ནེསཾ བྷཱཛནཱནི ཨུཔྤཛྫནྟི. ཏེ སཱལིཾ བྷཱཛནེ ཋཔེཏྭཱ པཱསཱཎཔིཊྛིཡཱ ཋཔེནྟི, སཡམེཝ ཛཱལསིཁཱ ཨུཊྛཧིཏྭཱ ཏཾ པཙཏི. སོ ཧོཏི ཨོདནོ སུམནཛཱཏིཔུཔྥསདིསོ, ན ཏསྶ སཱུཔེན ཝཱ བྱཉྫནེན ཝཱ ཀརཎཱིཡཾ ཨཏྠི. ཡཾ ཡཾ རསཾ བྷུཉྫིཏུཀཱམཱ ཧོནྟི, ཏཾ ཏཾ རསོཝ ཧོཏི. ཏེསཾ ཏཾ ཨོལཱ༹རིཀཾ ཨཱཧཱརཾ ཨཱཧརཡཏཾ ཏཏོ པབྷུཏི མུཏྟཀརཱིསཾ སཉྫཱཡཏི. ཨཐ ནེསཾ ཏསྶ ནིཀྑམནཏྠཱཡ ཝཎམུཁཱནི པབྷིཛྫནྟི, པུརིསསྶ པུརིསབྷཱཝོ, ཨིཏྠིཡཱཔི ཨིཏྠིབྷཱཝོ པཱཏུབྷཝཏི.

ཏཏྲ ¶ སུདཾ ཨིཏྠཱི པུརིསཾ, པུརིསོ ཙ ཨིཏྠིཾ ཨཏིཝེལཾ ཨུཔནིཛ྄ཛྷཱཡཏི. ཏེསཾ ཨཏིཝེལཾ ཨུཔནིཛ྄ཛྷཱཡནཔཙྩཡཱ ཀཱམཔརིལཱ༹ཧོ ཨུཔྤཛྫཏི. ཏཏོ མེཐུནདྷམྨཾ པཊིསེཝནྟི. ཏེ ཨསདྡྷམྨཔཊིསེཝནཔཙྩཡཱ ཝིཉྙཱུཧི གརཧིཡམཱནཱ ཝིཧེཋིཡམཱནཱ ཏསྶ ཨསདྡྷམྨསྶ པཊིཙྪཱདནཧེཏུ ཨགཱརཱནི ཀརོནྟི. ཏེ ཨགཱརཾ ཨཛ྄ཛྷཱཝསམཱནཱ ཨནུཀྐམེན ཨཉྙཏརསྶ ཨལསཛཱཏིཀསྶ སཏྟསྶ དིཊྛཱནུགཏིཾ ཨཱཔཛྫནྟཱ སནྣིདྷིཾ ཀརོནྟི. ཏཏོ པབྷུཏི ཀཎོཔི ཐུསོཔི ཏཎྜུལཾ པརིཡོནནྡྷཏི, ལཱཡིཏཊྛཱནམྤི ན པཊིཝིརཱུཧཏི.

ཏེ ¶ སནྣིཔཏིཏྭཱ ཨནུཏྠུནནྟི ‘‘པཱཔཀཱ ཝཏ བྷོ དྷམྨཱ སཏྟེསུ པཱཏུབྷཱུཏཱ, མཡཾ ཧི པུབྦེ མནོམཡཱ ཨཧུམྷཱ’’ཏི ཨགྒཉྙསུཏྟེ (དཱི. ནི. ༣.༡༢༨) ཝུཏྟནཡེན ཝིཏྠཱརེཏབྦཾ. ཏཏོ མརིཡཱདཾ ཋཔེནྟི. ཨཐ ཨཉྙཏརོ སཏྟོ ཨཉྙསྶ བྷཱགཾ ཨདིནྣཾ ཨཱདིཡཏི. ཏཾ དྭིཀྑཏྟུཾ པརིབྷཱསེཏྭཱ ཏཏིཡཝཱརེ པཱཎིལེཊྚུདཎྜེཧི པཧརནྟི. ཏེ ཨེཝཾ ཨདིནྣཱདཱནགརཧམུསཱཝཱདདཎྜཱདཱནེསུ ཨུཔྤནྣེསུ སནྣིཔཏིཏྭཱ ཙིནྟཡནྟི ‘‘ཡཾནཱུན མཡཾ ཨེཀཾ སཏྟཾ སམྨནྣེཡྻཱམ, ཡོ ནོ སམྨཱ ཁཱིཡིཏབྦཾ ཁཱིཡེཡྻ, གརཧིཏབྦཾ གརཧེཡྻ, པབྦཱཛེཏབྦཾ པབྦཱཛེཡྻ, མཡཾ པནསྶ སཱལཱིནཾ བྷཱགཾ ཨནུཔྤདསྶཱམཱ’’ཏི.

ཨེཝཾ ཀཏསནྣིཊྛཱནེསུ པན སཏྟེསུ ཨིམསྨིཾ ཏཱཝ ཀཔྤེ ཨཡམེཝ བྷགཝཱ བོདྷིསཏྟབྷཱུཏོ ཏེན སམཡེན ཏེསུ སཏྟེསུ ཨབྷིརཱུཔཏརོ ཙ དསྶནཱིཡཏརོ ཙ མཧེསཀྑཏརོ ཙ བུདྡྷིསམྤནྣོ པཊིབལོ ནིགྒཧཔགྒཧཾ ཀཱཏུཾ. ཏེ ཏཾ ཨུཔསངྐམིཏྭཱ ཡཱཙིཏྭཱ སམྨནྣིཾསུ. སོ ཏེན མཧཱཛནེན སམྨཏོཏི མཧཱསམྨཏོ, ཁེཏྟཱནཾ ཨདྷིཔཏཱིཏི ཁཏྟིཡོ, དྷམྨེན སམེན པརེ རཉྫེཏཱིཏི རཱཛཱཏི ཏཱིཧི ནཱམེཧི པཉྙཱཡིཏྠ. ཡཉྷི ལོཀེ ཨཙྪརིཡཊྛཱནཾ, བོདྷིསཏྟོཝ ཏཏྠ ཨཱདིཔུརིསོཏི ཨེཝཾ བོདྷིསཏྟཾ ཨཱདིཾ ཀཏྭཱ ཁཏྟིཡམཎྜལེ སཎྛིཏེ ཨནུཔུབྦེན བྲཱཧྨཎཱདཡོཔི ཝཎྞཱ སཎྛཧིཾསུ.

ཏཏྠ ཀཔྤཝིནཱསཀམཧཱམེགྷཏོ ཡཱཝ ཛཱལུཔཙྪེདོ, ཨིདམེཀཾ ཨསངྑྱེཡྻཾ སཾཝཊྚོཏི ཝུཙྩཏི.

ཀཔྤཝིནཱསཀཛཱལུཔཙྪེདཏོ ¶ ཡཱཝ ཀོཊིསཏསཧསྶཙཀྐཝཱལ༹པརིཔཱུརཀོ སམྤཏྟིམཧཱམེགྷོ, ཨིདཾ དུཏིཡཾ ཨསངྑྱེཡྻཾ སཾཝཊྚཊྛཱཡཱིཏི ཝུཙྩཏི.

སམྤཏྟིམཧཱམེགྷཏོ ཡཱཝ ཙནྡིམསཱུརིཡཔཱཏུབྷཱཝོ, ཨིདཾ ཏཏིཡཾ ཨསངྑྱེཡྻཾ ཝིཝཊྚོཏི ཝུཙྩཏི.

ཙནྡིམསཱུརིཡཔཱཏུབྷཱཝཏོ ཡཱཝ པུན ཀཔྤཝིནཱསཀམཧཱམེགྷོ, ཨིདཾ ཙཏུཏྠཾ ཨསངྑྱེཡྻཾ ཝིཝཊྚཊྛཱཡཱིཏི ཝུཙྩཏི. ཨིམཱནི ཙཏྟཱརི ཨསངྑྱེཡྻཱནི ཨེཀོ མཧཱཀཔྤོ ཧོཏི. ཨེཝཾ ཏཱཝ ཨགྒིནཱ ཝིནཱསོ ཙ སཎྛཧནཉྩ ཝེདིཏབྦཾ.

༤༠༧. ཡསྨིཾ པན སམཡེ ཀཔྤོ ཨུདཀེན ནསྶཏི, ཨཱདིཏོཝ ཀཔྤཝིནཱསཀམཧཱམེགྷོ ཨུཊྛཧིཏྭཱཏི ¶ པུབྦེ ཝུཏྟནཡེནེཝ ཝིཏྠཱརེཏབྦཾ. ཨཡཾ པན ཝིསེསོ, ཡཐཱ ཏཏྠ དུཏིཡསཱུརིཡོ, ཨེཝམིདྷ ཀཔྤཝིནཱསཀོ ཁཱརུདཀམཧཱམེགྷོ ཝུཊྛཱཏི. སོ ཨཱདིཏོ སུཁུམཾ སུཁུམཾ ཝསྶནྟོ ཨནུཀྐམེན མཧཱདྷཱརཱཧི ཀོཊིསཏསཧསྶཙཀྐཝཱལཱ༹ནཾ པཱུརེནྟོ ཝསྶཏི. ཁཱརུདཀེན ཕུཊྛཕུཊྛཱ པཐཝཱིཔབྦཏཱདཡོ ཝིལཱིཡནྟི, ཨུདཀཾ སམནྟཏོ ཝཱཏེཧི དྷཱརིཡཏི. པཐཝིཏོ ཡཱཝ དུཏིཡཛ྄ཛྷཱནབྷཱུམིཾ ཨུདཀཾ གཎྷཱཏི. ཏཏྠ ཏཡོཔི བྲཧྨལོཀེ ཝིལཱིཡཱཔེཏྭཱ སུབྷཀིཎྷེ ཨཱཧཙྩ ཏིཊྛཏི. ཏཾ ཡཱཝ ཨཎུམཏྟམྤི སངྑཱརགཏཾ ཨཏྠི, ཏཱཝ ན ཝཱུཔསམྨཏི. ཨུདཀཱནུགཏཾ པན སབྦསངྑཱརགཏཾ ཨབྷིབྷཝིཏྭཱ སཧསཱ ཝཱུཔསམྨཏི ཨནྟརདྷཱནཾ གཙྪཏི. ཧེཊྛཱཨཱཀཱསེན སཧ ཨུཔརིཨཱཀཱསོ ཨེཀོ ཧོཏི མཧནྡྷཀཱརོཏི སབྦཾ ཝུཏྟསདིསཾ. ཀེཝལཾ པནིདྷ ཨཱབྷསྶརབྲཧྨལོཀཾ ཨཱདིཾ ཀཏྭཱ ལོཀོ པཱཏུབྷཝཏི. སུབྷཀིཎྷཏོ ཙ ཙཝིཏྭཱ ཨཱབྷསྶརཊྛཱནཱདཱིསུ སཏྟཱ ནིབྦཏྟནྟི.

ཏཏྠ ཀཔྤཝིནཱསཀམཧཱམེགྷཏོ ཡཱཝ ཀཔྤཝིནཱསཀུདཀཱུཔཙྪེདོ, ཨིདམེཀཾ ཨསངྑྱེཡྻཾ. ཨུདཀཱུཔཙྪེདཏོ ཡཱཝ སམྤཏྟིམཧཱམེགྷོ, ཨིདཾ དུཏིཡཾ ཨསངྑྱེཡྻཾ. སམྤཏྟིམཧཱམེགྷཏོ…པེ… ཨིམཱནི ཙཏྟཱརི ཨསངྑྱེཡྻཱནི ཨེཀོ མཧཱཀཔྤོ ཧོཏི. ཨེཝཾ ཨུདཀེན ཝིནཱསོ ཙ སཎྛཧནཉྩ ཝེདིཏབྦཾ.

༤༠༨. ཡསྨིཾ ¶ སམཡེ ཀཔྤོ ཝཱཏེན ཝིནསྶཏི, ཨཱདིཏོཝ ཀཔྤཝིནཱསཀམཧཱམེགྷོ ཨུཊྛཧིཏྭཱཏི པུབྦེ ཝུཏྟནཡེནེཝ ཝིཏྠཱརེཏབྦཾ. ཨཡཾ པན ཝིསེསོ, ཡཐཱ ཏཏྠ དུཏིཡསཱུརིཡོ, ཨེཝམིདྷ ཀཔྤཝིནཱསནཏྠཾ ཝཱཏོ སམུཊྛཱཏི. སོ པཋམཾ ཐཱུལརཛཾ ཨུཊྛཱཔེཏི. ཏཏོ སཎྷརཛཾ སུཁུམཝཱལིཀཾ ཐཱུལཝཱལིཀཾ སཀྑརཔཱསཱཎཱདཡོཏི ཡཱཝ ཀཱུཊཱགཱརམཏྟེ པཱསཱཎེ ཝིསམཊྛཱནེ ཋིཏམཧཱརུཀྑེ ཙ ཨུཊྛཱཔེཏི. ཏེ པཐཝིཏོ ནབྷམུགྒཏཱ ན ཙ པུན པཏནྟི. ཏཏྠེཝ ཙུཎྞཝིཙུཎྞཱ ཧུཏྭཱ ཨབྷཱཝཾ གཙྪནྟི.

ཨཐཱནུཀྐམེན ཧེཊྛཱ མཧཱཔཐཝིཡཱ ཝཱཏོ སམུཊྛཧིཏྭཱ པཐཝིཾ པརིཝཏྟེཏྭཱ ཨུདྡྷཾམཱུལཾ ཀཏྭཱ ཨཱཀཱསེ ཁིཔཏི. ཡོཛནསཏཔྤམཱཎཱཔི པཐཝིཔྤདེསཱ དྭིཡོཛནཏིཡོཛནཙཏུཡོཛནཔཉྩཡོཛནསཏཔྤམཱཎཱཔི བྷིཛྫིཏྭཱ ཝཱཏཝེགེན ཁིཏྟཱ ཨཱཀཱསེཡེཝ ཙུཎྞཝིཙུཎྞཱ ཧུཏྭཱ ཨབྷཱཝཾ གཙྪནྟི. ཙཀྐཝཱལ༹པབྦཏམྤི སིནེརུཔབྦཏམྤི ཝཱཏོ ཨུཀྑིཔིཏྭཱ ཨཱཀཱསེ ཁིཔཏི. ཏེ ཨཉྙམཉྙཾ ཨབྷིཧནྟྭཱ ཙུཎྞཝིཙུཎྞཱ ཧུཏྭཱ ཝིནསྶནྟི. ཨེཏེནེཝ ཨུཔཱཡེན བྷུམྨཊྛཀཝིམཱནཱནི ཙ ཨཱཀཱསཊྛཀཝིམཱནཱནི ཙ ཝིནཱསེནྟོ ཚཀཱམཱཝཙརདེཝལོཀེ ཝིནཱསེཏྭཱ ཀོཊིསཏསཧསྶཙཀྐཝཱལཱ༹ནི ¶ ཝིནཱསེཏི. ཏཏྠ ཙཀྐཝཱལཱ༹ ཙཀྐཝཱལེ༹ཧི ཧིམཝནྟཱ ཧིམཝནྟེཧི སིནེརཱུ སིནེརཱུཧི ཨཉྙམཉྙཾ སམཱགནྟྭཱ ཙུཎྞཝིཙུཎྞཱ ཧུཏྭཱ ཝིནསྶནྟི. པཐཝིཏོ ཡཱཝ ཏཏིཡཛ྄ཛྷཱནབྷཱུམིཾ ཝཱཏོ གཎྷཱཏི. ཏཏྠ ཏཡོཔི བྲཧྨལོཀེ ཝིནཱསེཏྭཱ ཝེཧཔྥལཾ ཨཱཧཙྩ ཏིཊྛཏི. ཨེཝཾ སབྦསངྑཱརགཏཾ ཝིནཱསེཏྭཱ སཡམྤི ཝིནསྶཏི. ཧེཊྛཱཨཱཀཱསེན སཧ ཨུཔརིཨཱཀཱསོ ཨེཀོ ཧོཏི མཧནྡྷཀཱརོཏི སབྦཾ ཝུཏྟསདིསཾ. ཨིདྷ པན སུབྷཀིཎྷབྲཧྨལོཀཾ ཨཱདིཾ ཀཏྭཱ ལོཀོ པཱཏུབྷཝཏི. ཝེཧཔྥལཏོ ཙ ཙཝིཏྭཱ སུབྷཀིཎྷཊྛཱནཱདཱིསུ སཏྟཱ ནིབྦཏྟནྟི.

ཏཏྠ ཀཔྤཝིནཱསཀམཧཱམེགྷཏོ ཡཱཝ ཀཔྤཝིནཱསཀཝཱཏཱུཔཙྪེདོ, ཨིདམེཀཾ ཨསངྑྱེཡྻཾ. ཝཱཏཱུཔཙྪེདཏོ ཡཱཝ སམྤཏྟིམཧཱམེགྷོ, ཨིདཾ དུཏིཡཾ ཨསངྑྱེཡྻཾ…པེ… ཨིམཱནི ཙཏྟཱརི ཨསངྑྱེཡྻཱནི ཨེཀོ མཧཱཀཔྤོ ཧོཏི. ཨེཝཾ ཝཱཏེན ཝིནཱསོ ཙ སཎྛཧནཉྩ ཝེདིཏབྦཾ.

༤༠༩. ཀིཾཀཱརཎཱ ¶ ཨེཝཾ ལོཀོ ཝིནསྶཏི? ཨཀུསལམཱུལཀཱརཎཱ. ཨཀུསལམཱུལེསུ ཧི ཨུསྶནྣེསུ ཨེཝཾ ལོཀོ ཝིནསྶཏི. སོ ཙ ཁོ རཱགེ ཨུསྶནྣཏརེ ཨགྒིནཱ ཝིནསྶཏི. དོསེ ཨུསྶནྣཏརེ ཨུདཀེན ཝིནསྶཏི. ཀེཙི པན དོསེ ཨུསྶནྣཏརེ ཨགྒིནཱ. རཱགེ ཨུསྶནྣཏརེ ཨུདཀེནཱཏི ཝདནྟི. མོཧེ ཨུསྶནྣཏརེ ཝཱཏེན ཝིནསྶཏི. ཨེཝཾ ཝིནསྶནྟོཔི ཙ ནིརནྟརམེཝ སཏྟཝཱརེ ཨགྒིནཱ ཝིནསྶཏི. ཨཊྛམེ ཝཱརེ ཨུདཀེན. པུན སཏྟཝཱརེ ཨགྒིནཱ. ཨཊྛམེ ཝཱརེ ཨུདཀེནཱཏི ཨེཝཾ ཨཊྛམེ ཨཊྛམེ ཝཱརེ ཝིནསྶནྟོ སཏྟཀྑཏྟུཾ ཨུདཀེན ཝིནསྶིཏྭཱ པུན སཏྟཝཱརེ ཨགྒིནཱ ནསྶཏི. ཨེཏྟཱཝཏཱ ཏེསཊྛི ཀཔྤཱ ཨཏཱིཏཱ ཧོནྟི. ཨེཏྠནྟརེ ཨུདཀེན ནསྶནཝཱརཾ སམྤཏྟམྤི པཊིབཱཧིཏྭཱ ལདྡྷོཀཱསོ ཝཱཏོ པརིཔུཎྞཙཏུསཊྛིཀཔྤཱཡུཀེ སུབྷཀིཎྷེ ཝིདྡྷཾསེནྟོ ལོཀཾ ཝིནཱསེཏི.

༤༡༠. པུབྦེནིཝཱསཾ ཨནུསྶརནྟོཔི ཙ ཀཔྤཱནུསྶརཎཀོ བྷིཀྑུ ཨེཏེསུ ཀཔྤེསུ ཨནེཀེཔི སཾཝཊྚཀཔྤེ ཨནེཀེཔི ཝིཝཊྚཀཔྤེ ཨནེཀེཔི སཾཝཊྚཝིཝཊྚཀཔྤེ ཨནུསྶརཏི. ཀཐཾ? ‘‘ཨམུཏྲཱསི’’ནྟིཨཱདིནཱ (དཱི. ནི. ༡.༢༤༤) ནཡེན.

ཏཏྠ ཨམུཏྲཱསིནྟི ཨམུམྷི སཾཝཊྚཀཔྤེ ཨཧཾ ཨམུམྷི བྷཝེ ཝཱ ཡོནིཡཱ ཝཱ གཏིཡཱ ཝཱ ཝིཉྙཱཎཊྛིཏིཡཱ ཝཱ སཏྟཱཝཱསེ ཝཱ སཏྟནིཀཱཡེ ཝཱ ཨཱསིཾ. ཨེཝཾནཱམོཏི ཏིསྶོ ཝཱ ཕུསྶོ ཝཱ. ཨེཝཾགོཏྟོཏི ཀཙྩཱནོ ཝཱ ཀསྶཔོ ཝཱ. ཨིདམསྶ ཨཏཱིཏབྷཝེ ཨཏྟནོ ནཱམགོཏྟཱནུསྶརཎཝསེན ¶ ཝུཏྟཾ. སཙེ པན ཏསྨིཾ ཀཱལེ ཨཏྟནོ ཝཎྞསམྤཏྟིཾ ཝཱ ལཱུཁཔཎཱིཏཛཱིཝིཀབྷཱཝཾ ཝཱ སུཁདུཀྑབཧུལཏཾ ཝཱ ཨཔྤཱཡུཀདཱིགྷཱཡུཀབྷཱཝཾ ཝཱ ཨནུསྶརིཏུཀཱམོ ཧོཏི, ཏམྤི ཨནུསྶརཏིཡེཝ. ཏེནཱཧ ‘‘ཨེཝཾཝཎྞོ…པེ… ཨེཝམཱཡུཔརིཡནྟོ’’ཏི.

ཏཏྠ ཨེཝཾཝཎྞོཏི ཨོདཱཏོ ཝཱ སཱམོ ཝཱ. ཨེཝམཱཧཱརོཏི སཱལིམཾསོདནཱཧཱརོ ཝཱ པཝཏྟཕལབྷོཛནོ ཝཱ. ཨེཝཾ སུཁདུཀྑཔཊིསཾཝེདཱིཏི ཨནེཀཔྤཀཱརེན ཀཱཡིཀཙེཏསིཀཱནཾ སཱམིསནིརཱམིསཱདིཔྤབྷེདཱནཾ ཝཱ སུཁདུཀྑཱནཾ པཊིསཾཝེདཱི. ཨེཝམཱཡུཔརིཡནྟོཏི ཨེཝཾ ཝསྶསཏཔརིམཱཎཱཡུཔརིཡནྟོ ཝཱ ཙཏུརཱསཱིཏིཀཔྤསཏསཧསྶཱཡུཔརིཡནྟོ ཝཱ. སོ ཏཏོ ཙུཏོ ཨམུཏྲ ཨུདཔཱདིནྟི སོཧཾ ཏཏོ ¶ བྷཝཏོ ཡོནིཏོ གཏིཏོ ཝིཉྙཱཎཊྛིཏིཏོ སཏྟཱཝཱསཏོ སཏྟནིཀཱཡཏོ ཝཱ ཙུཏོ པུན ཨམུཀསྨིཾ ནཱམ བྷཝེ ཡོནིཡཱ གཏིཡཱ ཝིཉྙཱཎཊྛིཏིཡཱ སཏྟཱཝཱསེ སཏྟནིཀཱཡེ ཝཱ ཨུདཔཱདིཾ. ཏཏྲཱཔཱསིནྟི ཨཐ ཏཏྲཱཔི བྷཝེ ཡོནིཡཱ གཏིཡཱ ཝིཉྙཱཎཊྛིཏིཡཱ སཏྟཱཝཱསེ སཏྟནིཀཱཡེ ཝཱ པུན ཨཧོསིཾ. ཨེཝཾནཱམོཏིཨཱདི ཝུཏྟནཡམེཝ.

ཨཔིཙ ཡསྨཱ ཨམུཏྲཱསིནྟི ཨིདཾ ཨནུཔུབྦེན ཨཱརོཧནྟསྶ ཡཱཝདིཙྪཀཾ ཨནུསྶརཎཾ. སོ ཏཏོ ཙུཏོཏི པཊིནིཝཏྟནྟསྶ པཙྩཝེཀྑཎཾ, ཏསྨཱ ‘‘ཨིདྷཱུཔཔནྣོ’’ཏི ཨིམིསྶཱ ཨིདྷཱུཔཔཏྟིཡཱ ཨནནྟརམེཝསྶ ཨུཔཔཏྟིཊྛཱནཾ སནྡྷཱཡ ‘‘ཨམུཏྲ ཨུདཔཱདི’’ནྟི ཨིདཾ ཝུཏྟནྟི ཝེདིཏབྦཾ. ཏཏྲཱཔཱསིནྟི ཨེཝམཱདི པནསྶ ཏཏྲ ཨིམིསྶཱ ཨུཔཔཏྟིཡཱ ཨནནྟརེ ཨུཔཔཏྟིཊྛཱནེ ནཱམགོཏྟཱདཱིནཾ ཨནུསྶརཎདསྶནཏྠཾ ཝུཏྟཾ. སོ ཏཏོ ཙུཏོ ཨིདྷཱུཔཔནྣོཏི སྭཱཧཾ ཏཏོ ཨནནྟརཱུཔཔཏྟིཊྛཱནཏོ ཙུཏོ ཨིདྷ ཨསུཀསྨིཾ ནཱམ ཁཏྟིཡཀུལེ ཝཱ བྲཱཧྨཎཀུལེ ཝཱ ནིབྦཏྟོཏི. ཨིཏཱིཏི ཨེཝཾ. སཱཀཱརཾ སཨུདྡེསནྟི ནཱམགོཏྟཝསེན སཨུདྡེསཾ, ཝཎྞཱདིཝསེན སཱཀཱརཾ. ནཱམགོཏྟེན ཧི སཏྟོ ཏིསྶོ ཀསྶཔོཏི ཨུདྡིསཱིཡཏི. ཝཎྞཱདཱིཧི སཱམོ ཨོདཱཏོཏི ནཱནཏྟཏོ པཉྙཱཡཏི. ཏསྨཱ ནཱམགོཏྟཾ ཨུདྡེསོ, ཨིཏརེ ཨཱཀཱརཱ. ཨནེཀཝིཧིཏཾ པུབྦེནིཝཱསམནུསྶརཏཱིཏི ཨིདཾ ཨུཏྟཱནཏྠམེཝཱཏི.

པུབྦེནིཝཱསཱནུསྶཏིཉཱཎཀཐཱ ནིཊྛིཏཱ.

ཙུཏཱུཔཔཱཏཉཱཎཀཐཱ

༤༡༡. སཏྟཱནཾ ¶ ཙུཏཱུཔཔཱཏཉཱཎཀཐཱཡ ཙུཏཱུཔཔཱཏཉཱཎཱཡཱཏི (དཱི. ནི. ༡.༢༤༧) ཙུཏིཡཱ ཙ ཨུཔཔཱཏེ ཙ ཉཱཎཱཡ. ཡེན ཉཱཎེན སཏྟཱནཾ ཙུཏི ཙ ཨུཔཔཱཏོ ཙ ཉཱཡཏི, ཏདཏྠཾ དིབྦཙཀྑུཉཱཎཏྠནྟི ཝུཏྟཾ ཧོཏི. ཙིཏྟཾ ཨབྷིནཱིཧརཏི ཨབྷིནིནྣཱམེཏཱིཏི པརིཀམྨཙིཏྟཾ ཨབྷིནཱིཧརཏི ཙེཝ ཨབྷིནིནྣཱམེཏི ཙ. སོཏི སོ ཀཏཙིཏྟཱབྷིནཱིཧཱརོ བྷིཀྑུ. དིབྦེནཱཏིཨཱདཱིསུ པན དིབྦསདིསཏྟཱ དིབྦཾ. དེཝཏཱནཉྷི སུཙརིཏཀམྨནིབྦཏྟཾ པིཏྟསེམྷརུཧིརཱདཱིཧི ཨཔལིབུདྡྷཾ ཨུཔཀྐིལེསཝིམུཏྟཏཱཡ དཱུརེཔི ཨཱརམྨཎཾ སམྤཊིཙྪནསམཏྠཾ དིབྦཾ པསཱདཙཀྑུ ཧོཏི. ཨིདཉྩཱཔི ཝཱིརིཡབྷཱཝནཱབལནིབྦཏྟཾ ཉཱཎཙཀྑུ ¶ ཏཱདིསམེཝཱཏི དིབྦསདིསཏྟཱ དིབྦཾ. དིབྦཝིཧཱརཝསེན པཊིལདྡྷཏྟཱ ཨཏྟནཱ ཙ དིབྦཝིཧཱརསནྣིསྶིཏཏྟཱཔི དིབྦཾ. ཨཱལོཀཔརིགྒཧེན མཧཱཛུཏིཀཏྟཱཔི དིབྦཾ. ཏིརོཀུཊྚཱདིགཏརཱུཔདསྶནེན མཧཱགཏིཀཏྟཱཔི དིབྦཾ. ཏཾ སབྦཾ སདྡསཏྠཱནུསཱརེནེཝ ཝེདིཏབྦཾ.

དསྶནཊྛེན ཙཀྑུ. ཙཀྑུཀིཙྩཀརཎེན ཙཀྑུམིཝཱཏིཔི ཙཀྑུ. ཙུཏཱུཔཔཱཏདསྶནེན དིཊྛིཝིསུདྡྷིཧེཏུཏྟཱ ཝིསུདྡྷཾ. ཡོ ཧི ཙུཏིམཏྟམེཝ པསྶཏི, ན ཨུཔཔཱཏཾ. སོ ཨུཙྪེདདིཊྛིཾ གཎྷཱཏི. ཡོ ཨུཔཔཱཏམཏྟམེཝ པསྶཏི, ན ཙུཏིཾ, སོ ནཝསཏྟཔཱཏུབྷཱཝདིཊྛིཾ གཎྷཱཏི. ཡོ པན ཏདུབྷཡཾ པསྶཏི, སོ ཡསྨཱ དུཝིདྷམྤི ཏཾ དིཊྛིགཏཾ ཨཏིཝཏྟཏི. ཏསྨཱསྶ ཏཾདསྶནཾ དིཊྛིཝིསུདྡྷིཧེཏུ ཧོཏི. ཨུབྷཡམྤི ཙེཏཾ བུདྡྷཔུཏྟཱ པསྶནྟི. ཏེན ཝུཏྟཾ ‘‘ཙུཏཱུཔཔཱཏདསྶནེན དིཊྛིཝིསུདྡྷིཧེཏུཏྟཱ ཝིསུདྡྷ’’ནྟི.

མནུསྶཱུཔཙཱརཾ ཨཏིཀྐམིཏྭཱ རཱུཔདསྶནེན ཨཏིཀྐནྟམཱནུསཀཾ, མཱནུསཀཾ ཝཱ མཾསཙཀྑུཾ ཨཏིཀྐནྟཏྟཱ ཨཏིཀྐནྟམཱནུསཀནྟི ཝེདིཏབྦཾ. ཏེན དིབྦེན ཙཀྑུནཱ ཝིསུདྡྷེན ཨཏིཀྐནྟམཱནུསཀེན. སཏྟེ པསྶཏཱིཏི མནུསྶཱནཾ མཾསཙཀྑུནཱ ཝིཡ སཏྟེ ཨོལོཀེཏི.

ཙཝམཱནེ ཨུཔཔཛྫམཱནེཏི ཨེཏྠ ཙུཏིཀྑཎེ ཨུཔཔཏྟིཀྑཎེ ཝཱ དིབྦཙཀྑུནཱ དཊྛུཾ ན སཀྐཱ. ཡེ པན ཨཱསནྣཙུཏིཀཱ ཨིདཱནི ཙཝིསྶནྟི, ཏེ ཙཝམཱནཱ. ཡེ ཙ གཧིཏཔཊིསནྡྷིཀཱ སམྤཏིནིབྦཏྟཱཝ, ཏེ ཨུཔཔཛྫམཱནཱཏི ཨདྷིཔྤེཏཱ. ཏེ ཨེཝརཱུཔེ ཙཝམཱནེ ཙ ཨུཔཔཛྫམཱནེ ཙ པསྶཏཱིཏི དསྶེཏི.

ཧཱིནེཏི ¶ མོཧནིསྶནྡཡུཏྟཏྟཱ ཧཱིནཱནཾ ཛཱཏིཀུལབྷོགཱདཱིནཾ ཝསེན ཧཱིལི༹ཏེ ཨོཧཱིལི༹ཏེ ཨོཉྙཱཏེ ཨཝཉྙཱཏེ. པཎཱིཏེཏི ཨམོཧནིསྶནྡཡུཏྟཏྟཱ ཏབྦིཔརཱིཏེ. སུཝཎྞེཏི ཨདོསནིསྶནྡཡུཏྟཏྟཱ ཨིཊྛཀནྟམནཱཔཝཎྞཡུཏྟེ. དུབྦཎྞེཏི དོསནིསྶནྡཡུཏྟཏྟཱ ཨནིཊྛཱཀནྟཨམནཱཔཝཎྞཡུཏྟེ. ཨནབྷིརཱུཔེ ཝིརཱུཔེཏིཔི ཨཏྠོ. སུགཏེཏི སུགཏིགཏེ. ཨལོབྷནིསྶནྡཡུཏྟཏྟཱ ཝཱ ཨཌྜྷེ མཧདྡྷནེ. དུགྒཏེཏི དུགྒཏིགཏེ. ལོབྷནིསྶནྡཡུཏྟཏྟཱ ཝཱ དལིདྡེ ཨཔྤནྣཔཱནེ.

ཡཐཱཀམྨུཔགེཏི ཡཾ ཡཾ ཀམྨཾ ཨུཔཙིཏཾ, ཏེན ཏེན ཨུཔགཏེ. ཏཏྠ པུརིམེཧི ཙཝམཱནེཏིཨཱདཱིཧི དིབྦཙཀྑུཀིཙྩཾ ཝུཏྟཾ. ཨིམིནཱ པན པདེན ཡཐཱཀམྨུཔགཉཱཎཀིཙྩཾ. ཏསྶ ཙ ཉཱཎསྶ ཨཡམུཔྤཏྟིཀྐམོ, ཨིདྷ བྷིཀྑུ ཧེཊྛཱ ནིརཡཱབྷིམུཁཾ ¶ ཨཱལོཀཾ ཝཌྜྷེཏྭཱ ནེརཡིཀེ སཏྟེ པསྶཏི མཧཱདུཀྑམནུབྷཝམཱནེ. ཏཾ དསྶནཾ དིབྦཙཀྑུཀིཙྩམེཝ. སོ ཨེཝཾ མནསིཀརོཏི ‘‘ཀིཾ ནུ ཁོ ཀམྨཾ ཀཏྭཱ ཨིམེ སཏྟཱ ཨེཏཾ དུཀྑཾ ཨནུབྷཝནྟཱི’’ཏི. ཨཐསྶ ཨིདཾ ནཱམ ཀཏྭཱཏི ཏཾཀམྨཱརམྨཎཾ ཉཱཎཾ ཨུཔྤཛྫཏི. ཏཐཱ ཨུཔརིདེཝལོཀཱབྷིམུཁཾ ཨཱལོཀཾ ཝཌྜྷེཏྭཱ ནནྡནཝནམིསྶཀཝནཕཱརུསཀཝནཱདཱིསུ སཏྟེ པསྶཏི མཧཱསམྤཏྟིཾ ཨནུབྷཝམཱནེ. ཏམྤི དསྶནཾ དིབྦཙཀྑུཀིཙྩམེཝ. སོ ཨེཝཾ མནསིཀརོཏི ‘‘ཀིཾ ནུ ཁོ ཀམྨཾ ཀཏྭཱ ཨིམེ སཏྟཱ ཨེཏཾ སམྤཏྟིཾ ཨནུབྷཝནྟཱི’’ཏི. ཨཐསྶ ཨིདཾ ནཱམ ཀཏྭཱཏི ཏཾཀམྨཱརམྨཎཾ ཉཱཎཾ ཨུཔྤཛྫཏི. ཨིདཾ ཡཐཱཀམྨུཔགཉཱཎཾ ནཱམ. ཨིམསྶ ཝིསུཾ པརིཀམྨཾ ནཱམ ནཏྠི, ཡཐཱ ཙིམསྶ, ཨེཝཾ ཨནཱགཏཾསཉཱཎསྶཱཔི. དིབྦཙཀྑུཔཱདཀཱནེཝ ཧི ཨིམཱནི དིབྦཙཀྑུནཱ སཧེཝ ཨིཛ྄ཛྷནྟི.

ཀཱཡདུཙྩརིཏེནཱཏིཨཱདཱིསུ དུཊྛུ ཙརིཏཾ, དུཊྛཾ ཝཱ ཙརིཏཾ ཀིལེསཔཱུཏིཀཏྟཱཏི དུཙྩརིཏཾ. ཀཱཡེན དུཙྩརིཏཾ, ཀཱཡཏོ ཝཱ ཨུཔྤནྣཾ དུཙྩརིཏནྟི ཀཱཡདུཙྩརིཏཾ, ཨིཏརེསུཔི ཨེསེཝ ནཡོ. སམནྣཱགཏཱཏི སམངྒཱིབྷཱུཏཱ. ཨརིཡཱནཾ ཨུཔཝཱདཀཱཏི བུདྡྷཔཙྩེཀབུདྡྷསཱཝཀཱནཾ ཨརིཡཱནཾ ཨནྟམསོ གིཧིསོཏཱཔནྣཱནམྤི ཨནཏྠཀཱམཱ ཧུཏྭཱ ཨནྟིམཝཏྠུནཱ ཝཱ གུཎཔརིདྷཾསནེན ཝཱ ཨུཔཝཱདཀཱ ཨཀྐོསཀཱ གརཧཀཱཏི ཝུཏྟཾ ཧོཏི. ཏཏྠ ནཏྠི ཨིམེསཾ སམཎདྷམྨོ, ཨསྶམཎཱ ཨེཏེཏི ཝདནྟོ ཨནྟིམཝཏྠུནཱ ཨུཔཝདཏི. ནཏྠི ཨིམེསཾ ཛྷཱནཾ ཝཱ ཝིམོཀྑོ ཝཱ མགྒོ ཝཱ ཕལཾ ཝཱཏིཨཱདཱིནི ཝདནྟོ གུཎཔརིདྷཾསནཝསེན ཨུཔཝདཏཱིཏི ཝེདིཏབྦོ. སོ ཙ ཛཱནཾ ཝཱ ཨུཔཝདེཡྻ ཨཛཱནཾ ཝཱ, ཨུབྷཡཐཱཔི ཨརིཡཱུཔཝཱདོཝ ཧོཏི. བྷཱརིཡཾ ཀམྨཾ ཨཱནནྟརིཡསདིསཾ སགྒཱཝརཎཉྩ མགྒཱཝརཎཉྩ, སཏེཀིཙྪཾ པན ཧོཏི. ཏསྶ ཨཱཝིབྷཱཝཏྠཾ ཨིདཾ ཝཏྠུ ཝེདིཏབྦཾ.

ཨཉྙཏརསྨིཾ ¶ ཀིར གཱམེ ཨེཀོ ཐེརོ ཙ དཧརབྷིཀྑུ ཙ པིཎྜཱཡ ཙརནྟི. ཏེ པཋམགྷརེཡེཝ ཨུལུ༹ངྐམཏྟཾ ཨུཎྷཡཱགུཾ ལབྷིཾསུ. ཐེརསྶ ཙ ཀུཙྪིཝཱཏོ རུཛ྄ཛྷཏི. སོ ཙིནྟེསི ‘‘ཨཡཾ ཡཱགུ མཡ྄ཧཾ སཔྤཱཡཱ, ཡཱཝ ན སཱིཏལཱ ཧོཏི, ཏཱཝ ནཾ པིཝཱམཱི’’ཏི. སོ མནུསྶེཧི ཨུམྨཱརཏྠཱཡ ཨཱཧཊེ དཱརུཁཎྜེ ནིསཱིདིཏྭཱ པིཝི. ཨིཏརོ ཏཾ ཛིགུཙྪནྟོ ‘‘ཨཏིཁུདྡཱབྷིབྷཱུཏོ མཧལླཀོ, ཨམྷཱཀཾ ལཛྫིཏབྦཀཾ ཨཀཱསཱི’’ཏི ཨཱཧ. ཐེརོ ¶ གཱམེ ཙརིཏྭཱ ཝིཧཱརཾ གནྟྭཱ དཧརབྷིཀྑུཾ ཨཱཧ ‘‘ཨཏྠི ཏེ, ཨཱཝུསོ, ཨིམསྨིཾ སཱསནེ པཏིཊྛཱ’’ཏི? ཨཱམ, བྷནྟེ, སོཏཱཔནྣོ ཨཧནྟི. ཏེན ཧཱཝུསོ, ཨུཔརིམགྒཏྠཱཡ ཝཱཡཱམཾ མཱ ཨཀཱསི. ཁཱིཎཱསཝོ ཏཡཱ ཨུཔཝདིཏོཏི. སོ ཏཾ ཁམཱཔེསི. ཏེནསྶ ཏཾ ཀམྨཾ པཱཀཏིཀཾ ཨཧོསི.

ཏསྨཱ ཡོ ཨཉྙོཔི ཨརིཡཾ ཨུཔཝདཏི, ཏེན གནྟྭཱ སཙེ ཨཏྟནཱ ཝུཌྜྷཏརོ ཧོཏི, ཨུཀྐུཊིཀཾ ནིསཱིདིཏྭཱ ‘‘ཨཧཾ ཨཱཡསྨནྟཾ ཨིདཉྩིདཉྩ ཨཝཙཾ, ཏཾ མེ ཁམཱཧཱི’’ཏི ཁམཱཔེཏབྦོ. སཙེ ནཝཀཏརོ ཧོཏི, ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ‘‘ཨཧཾ, བྷནྟེ, ཏུམྷེ ཨིདཉྩིདཉྩ ཨཝཙཾ, ཏཾ མེ ཁམཐཱ’’ཏི ཁམཱཔེཏབྦོ. སཙེ དིསཱཔཀྐནྟོ ཧོཏི, སཡཾ ཝཱ གནྟྭཱ སདྡྷིཝིཧཱརིཀཱདིཀེ ཝཱ པེསེཏྭཱ ཁམཱཔེཏབྦོ.

སཙེ ཙ ནཱཔི གནྟུཾ, ན པེསེཏུཾ སཀྐཱ ཧོཏི, ཡེ ཏསྨིཾ ཝིཧཱརེ བྷིཀྑཱུ ཝསནྟི, ཏེསཾ སནྟིཀཾ གནྟྭཱ སཙེ ནཝཀཏརཱ ཧོནྟི, ཨུཀྐུཊིཀཾ ནིསཱིདིཏྭཱ, སཙེ ཝུཌྜྷཏརཱ, ཝུཌྜྷེ ཝུཏྟནཡེནེཝ པཊིཔཛྫིཏྭཱ ‘‘ཨཧཾ, བྷནྟེ, ཨསུཀཾ ནཱམ ཨཱཡསྨནྟཾ ཨིདཉྩིདཉྩ ཨཝཙཾ, ཁམཏུ མེ སོ ཨཱཡསྨཱ’’ཏི ཝཏྭཱ ཁམཱཔེཏབྦཾ. སམྨུཁཱ ཨཁམནྟེཔི ཨེཏདེཝ ཀཏྟབྦཾ.

སཙེ ཨེཀཙཱརིཀབྷིཀྑུ ཧོཏི, ནེཝསྶ ཝསནཊྛཱནཾ, ན གཏཊྛཱནཾ པཉྙཱཡཏི, ཨེཀསྶ པཎྜིཏསྶ བྷིཀྑུནོ སནྟིཀཾ གནྟྭཱ ‘‘ཨཧཾ, བྷནྟེ, ཨསུཀཾ ནཱམ ཨཱཡསྨནྟཾ ཨིདཉྩིདཉྩ ཨཝཙཾ, ཏཾ མེ ཨནུསྶརཏོ ཝིཔྤཊིསཱརོ ཧོཏི, ཀིཾ ཀརོམཱི’’ཏི ཝཏྟབྦཾ. སོ ཝཀྑཏི ‘‘ཏུམྷེ མཱ ཙིནྟཡིཏྠ, ཐེརོ ཏུམྷཱཀཾ ཁམཏི, ཙིཏྟཾ ཝཱུཔསམེཐཱ’’ཏི. ཏེནཱཔི ཨརིཡསྶ གཏདིསཱབྷིམུཁེན ཨཉྫལིཾ པགྒཧེཏྭཱ ཁམཏཱུཏི ཝཏྟབྦཾ. སཙེ སོ པརིནིབྦུཏོ ཧོཏི, པརིནིབྦུཏམཉྩཊྛཱནཾ གནྟྭཱ ཡཱཝསིཝཐིཀཾ གནྟྭཱཔི ཁམཱཔེཏབྦཾ. ཨེཝཾ ཀཏེ ནེཝ སགྒཱཝརཎཾ, ན མགྒཱཝརཎཾ ཧོཏི, པཱཀཏིཀམེཝ ཧོཏཱིཏི.

མིཙྪཱདིཊྛིཀཱཏི ¶ ཝིཔརཱིཏདསྶནཱ. མིཙྪཱདིཊྛིཀམྨསམཱདཱནཱཏི མིཙྪཱདིཊྛིཝསེན སམཱདིནྣནཱནཱཝིདྷཀམྨཱ, ཡེ ཙ མིཙྪཱདིཊྛིམཱུལཀེསུ ཀཱཡཀམྨཱདཱིསུ ཨཉྙེཔི སམཱདཔེནྟི. ཨེཏྠ ཙ ཝཙཱིདུཙྩརིཏགྒཧཎེནེཝ ཨརིཡཱུཔཝཱདེ མནོདུཙྩརིཏགྒཧཎེན ཙ མིཙྪཱདིཊྛིཡཱ སངྒཧིཏཱཡཔི ཨིམེསཾ དྭིནྣཾ པུན ཝཙནཾ ¶ མཧཱསཱཝཛྫབྷཱཝདསྶནཏྠནྟི ཝེདིཏབྦཾ. མཧཱསཱཝཛྫོ ཧི ཨརིཡཱུཔཝཱདོ, ཨཱནནྟརིཡསདིསཏྟཱ. ཝུཏྟམྤི ཙེཏཾ ‘‘སེཡྻཐཱཔི, སཱརིཔུཏྟ, བྷིཀྑུ སཱིལསམྤནྣོ སམཱདྷིསམྤནྣོ པཉྙཱསམྤནྣོ དིཊྛེཝ དྷམྨེ ཨཉྙཾ ཨཱརཱདྷེཡྻ, ཨེཝཾསམྤདམིདཾ, སཱརིཔུཏྟ, ཝདཱམི ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ ཡཐཱབྷཏཾ ནིཀྑིཏྟོ, ཨེཝཾ ནིརཡེ’’ཏི (མ. ནི. ༡.༡༤༩). མིཙྪཱདིཊྛིཏོ ཙ མཧཱསཱཝཛྫཏརཾ ནཱམ ཨཉྙཾ ནཏྠི. ཡཐཱཧ ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི, ཡཾ ཨེཝཾ མཧཱསཱཝཛྫཾ, ཡཐཡིདཾ, བྷིཀྑཝེ, མིཙྪཱདིཊྛི. མིཙྪཱདིཊྛིཔརམཱནི, བྷིཀྑཝེ, ཝཛྫཱནཱི’’ཏི (ཨ. ནི. ༡.༣༡༠).

ཀཱཡསྶ བྷེདཱཏི ཨུཔཱདིཎྞཀྑནྡྷཔརིཙྩཱགཱ. པརམྨརཎཱཏི ཏདནནྟརཾ ཨབྷིནིབྦཏྟིཀྑནྡྷགྒཧཎེ. ཨཐ ཝཱ ཀཱཡསྶ བྷེདཱཏི ཛཱིཝིཏིནྡྲིཡསྶ ཨུཔཙྪེདཱ. པརམྨརཎཱཏི ཙུཏིཙིཏྟཏོ ཨུདྡྷཾ. ཨཔཱཡནྟི ཨེཝམཱདི སབྦཾ ནིརཡཝེཝཙནམེཝ.

ནིརཡོ ཧི སགྒམོཀྑཧེཏུབྷཱུཏཱ པུཉྙསམྨཏཱ ཨཡཱ ཨཔེཏཏྟཱ, སུཁཱནཾ ཝཱ ཨཱཡསྶ ཨབྷཱཝཱ ཨཔཱཡོ. དུཀྑསྶ གཏི པཊིསརཎནྟི དུགྒཏི, དོསབཧུལཏཱཡ ཝཱ དུཊྛེན ཀམྨུནཱ ནིབྦཏྟཱ གཏཱིཏི དུགྒཏི. ཝིཝསཱ ནིཔཏནྟི ཨེཏྠ དུཀྐཊཀཱརིནོཏི ཝིནིཔཱཏོ. ཝིནསྶནྟཱ ཝཱ ཨེཏྠ པཏནྟི སཾབྷིཛྫམཱནངྒཔཙྩངྒཱཏིཔི ཝིནིཔཱཏོ. ནཏྠི ཨེཏྠ ཨསྶཱདསཉྙིཏོ ཨཡོཏི ནིརཡོ.

ཨཐ ཝཱ ཨཔཱཡགྒཧཎེན ཏིརཙྪཱནཡོནིཾ དཱིཔེཏི. ཏིརཙྪཱནཡོནི ཧི ཨཔཱཡོ སུགཏིཏོ ཨཔེཏཏྟཱ, ན དུགྒཏི མཧེསཀྑཱནཾ ནཱགརཱཛཱདཱིནཾ སམྦྷཝཏོ. དུགྒཏིགྒཧཎེན པེཏྟིཝིསཡཾ. སོ ཧི ཨཔཱཡོ ཙེཝ དུགྒཏི ཙ, སུགཏིཏོ ཨཔེཏཏྟཱ དུཀྑསྶ ཙ གཏིབྷཱུཏཏྟཱ. ན ཏུ ཝིནིཔཱཏོ ཨསུརསདིསཾ ཨཝིནིཔཏིཏཏྟཱ. ཝིནིཔཱཏགྒཧཎེན ཨསུརཀཱཡཾ. སོ ཧི ཡཐཱཝུཏྟེན ཨཏྠེན ཨཔཱཡོ ཙེཝ དུགྒཏི ཙ སབྦསམུསྶཡེཧི ཙ ཝིནིཔཏིཏཏྟཱ ཝིནིཔཱཏོཏི ཝུཙྩཏི. ནིརཡགྒཧཎེན ¶ ཨཝཱིཙིཨཱདིཨནེཀཔྤཀཱརཾ ནིརཡམེཝཱཏི. ཨུཔཔནྣཱཏི ཨུཔགཏཱ, ཏཏྠ ཨབྷིནིབྦཏྟཱཏི ཨདྷིཔྤཱཡོ. ཝུཏྟཝིཔརིཡཱཡེན སུཀྐཔཀྑོ ཝེདིཏབྦོ.

ཨཡཾ ¶ པན ཝིསེསོ, ཏཏྠ སུགཏིགྒཧཎེན མནུསྶགཏིཔི སངྒཡ྄ཧཏི. སགྒགྒཧཎེན དེཝགཏིཡེཝ. ཏཏྠ སུནྡརཱ གཏཱིཏི སུགཏི. རཱུཔཱདཱིཧི ཝིསཡེཧི སུཊྛུ ཨགྒོཏི སགྒོ. སོ སབྦོཔི ལུཛྫནཔལུཛྫནཊྛེན ལོཀོཏི ཨཡཾ ཝཙནཏྠོ.

‘‘ཨིཏི དིབྦེན ཙཀྑུནཱ’’ཏིཨཱདི སབྦཾ ནིགམནཝཙནཾ. ཨེཝཾ དིབྦེན ཙཀྑུནཱ…པེ… པསྶཏཱིཏི ཨཡམེཏྠ སངྑེཔཏྠོ.

༤༡༢. ཨེཝཾ པསྶིཏུཀཱམེན པན ཨཱདིཀམྨིཀེན ཀུལཔུཏྟེན ཀསིཎཱརམྨཎཾ ཨབྷིཉྙཱཔཱདཀཛ྄ཛྷཱནཾ སབྦཱཀཱརེན ཨབྷིནཱིཧཱརཀྑམཾ ཀཏྭཱ ‘‘ཏེཛོཀསིཎཾ, ཨོདཱཏཀསིཎཾ, ཨཱལོཀཀསིཎ’’ནྟི ཨིམེསུ ཏཱིསུ ཀསིཎེསུ ཨཉྙཏརཾ ཨཱསནྣཾ ཀཱཏབྦཾ. ཨུཔཙཱརཛ྄ཛྷཱནགོཙརཾ ཀཏྭཱ ཝཌྜྷེཏྭཱ ཋཔེཏབྦཾ. ན ཏཏྠ ཨཔྤནཱ ཨུཔྤཱདེཏབྦཱཏི ཨདྷིཔྤཱཡོ. སཙེ ཧི ཨུཔྤཱདེཏི, པཱདཀཛ྄ཛྷཱནནིསྶཡཾ ཧོཏི, ན པརིཀམྨནིསྶཡཾ. ཨིམེསུ ཙ པན ཏཱིསུ ཨཱལོཀཀསིཎཾཡེཝ སེཊྛཏརཾ. ཏསྨཱ ཏཾ ཝཱ ཨིཏརེསཾ ཝཱ ཨཉྙཏརཾ ཀསིཎནིདྡེསེ ཝུཏྟནཡེན ཨུཔྤཱདེཏྭཱ ཨུཔཙཱརབྷཱུམིཡཾཡེཝ ཋཏྭཱ ཝཌྜྷེཏབྦཾ. ཝཌྜྷནཱནཡོཔི ཙསྶ ཏཏྠ ཝུཏྟནཡེནེཝ ཝེདིཏབྦོ.

ཝཌྜྷིཏཊྛཱནསྶ ཨནྟོཡེཝ རཱུཔགཏཾ པསྶིཏབྦཾ. རཱུཔགཏཾ པསྶཏོ པནསྶ པརིཀམྨསྶ ཝཱརོ ཨཏིཀྐམཏི. ཏཏོ ཨཱལོཀོ ཨནྟརདྷཱཡཏི. ཏསྨིཾ ཨནྟརཧིཏེ རཱུཔགཏམྤི ན དིསྶཏི. ཨཐཱནེན པུནཔྤུནཾ པཱདཀཛ྄ཛྷཱནམེཝ པཝིསིཏྭཱ ཏཏོ ཝུཊྛཱཡ ཨཱལོཀོ ཕརིཏབྦོ. ཨེཝཾ ཨནུཀྐམེན ཨཱལོཀོ ཐཱམགཏོ ཧོཏཱིཏི ཨེཏྠ ཨཱལོཀོ ཧོཏཱུཏི ཡཏྟཀཾ ཋཱནཾ པརིཙྪིནྡཏི, ཏཏྠ ཨཱལོཀོ ཏིཊྛཏིཡེཝ. དིཝསམྤི ནིསཱིདིཏྭཱ པསྶཏོ རཱུཔདསྶནཾ ཧོཏི. རཏྟིཾ ཏིཎུཀྐཱཡ མགྒཔཊིཔནྣོ ཙེཏྠ པུརིསོ ཨོཔམྨཾ.

ཨེཀོ ཀིར རཏྟིཾ ཏིཎུཀྐཱཡ མགྒཾ པཊིཔཛྫི. ཏསྶ སཱ ཏིཎུཀྐཱ ཝིཛ྄ཛྷཱཡི. ཨཐསྶ སམཝིསམཱནི ན པཉྙཱཡིཾསུ. སོ ཏཾ ཏིཎུཀྐཾ བྷཱུམིཡཾ གྷཾསིཏྭཱ ཏིཎུཀྐཱ པུན ཨུཛྫཱལེསི. སཱ པཛྫལིཏྭཱ པུརིམཱལོཀཏོ མཧནྟཏརཾ ཨཱལོཀཾ ཨཀཱསི. ཨེཝཾ པུནཔྤུནཾ ཝིཛ྄ཛྷཱཏཾ ¶ ཨུཛྫཱལཡཏོ ཀམེན སཱུརིཡོ ཨུཊྛཱསི. སཱུརིཡེ ཨུཊྛིཏེ ཨུཀྐཱཡ ཀམྨཾ ནཏྠཱིཏི ཏཾ ཚཌྜེཏྭཱ དིཝསམྤི ཨགམཱསི. ཏཏྠ ཨུཀྐཱལོཀོ ཝིཡ པརིཀམྨཀཱལེ ཀསིཎཱལོཀོ. ཨུཀྐཱཡ ¶ ཝིཛ྄ཛྷཱཏཱཡ སམཝིསམཱནཾ ཨདསྶནཾ ཝིཡ རཱུཔགཏཾ པསྶཏོ པརིཀམྨསྶ ཝཱརཱཏིཀྐམེན ཨཱལོཀེ ཨནྟརཧིཏེ རཱུཔགཏཱནཾ ཨདསྶནཾ. ཨུཀྐཱཡ གྷཾསནཾ ཝིཡ པུནཔྤུནཾ པཝེསནཾ. ཨུཀྐཱཡ པུརིམཱལོཀཏོ མཧནྟཏརཱལོཀཀརཎཾ ཝིཡ པུན པརིཀམྨཾ ཀརོཏོ བལཝཏརཱལོཀཕརཎཾ. སཱུརིཡུཊྛཱནཾ ཝིཡ ཐཱམགཏཱལོཀསྶ ཡཐཱཔརིཙྪེདེན ཋཱནཾ. ཏིཎུཀྐཾ ཚཌྜེཏྭཱ དིཝསམྤི གམནཾ ཝིཡ པརིཏྟཱལོཀཾ ཚཌྜེཏྭཱ ཐཱམགཏེནཱལོཀེན དིཝསམྤི རཱུཔདསྶནཾ.

ཏཏྠ ཡདཱ ཏསྶ བྷིཀྑུནོ མཾསཙཀྑུསྶ ཨནཱཔཱཐགཏཾ ཨནྟོཀུཙྪིགཏཾ ཧདཡཝཏྠུནིསྶིཏཾ ཧེཊྛཱཔཐཝཱིཏལནིསྶིཏཾ ཏིརོཀུཊྚཔབྦཏཔཱཀཱརགཏཾ པརཙཀྐཝཱལ༹གཏནྟི ཨིདཾ རཱུཔཾ ཉཱཎཙཀྑུསྶ ཨཱཔཱཐཾ ཨཱགཙྪཏི, མཾསཙཀྑུནཱ དིསྶམཱནཾ ཝིཡ ཧོཏི, ཏདཱ དིབྦཙཀྑུ ཨུཔྤནྣཾ ཧོཏཱིཏི ཝེདིཏབྦཾ. ཏདེཝ ཙེཏྠ རཱུཔདསྶནསམཏྠཾ, ན པུབྦབྷཱགཙིཏྟཱནི.

ཏཾ པནེཏཾ པུཐུཛྫནསྶ པརིབནྡྷོ ཧོཏི. ཀསྨཱ? སོ ཧི ཡསྨཱ ཡཏྠ ཡཏྠ ཨཱལོཀོ ཧོཏཱུཏི ཨདྷིཊྛཱཏི, ཏཾ ཏཾ པཐཝཱིསམུདྡཔབྦཏེ ཝིནིཝིཛ྄ཛྷིཏྭཱཔི ཨེཀཱལོཀཾ ཧོཏི, ཨཐསྶ ཏཏྠ བྷཡཱནཀཱནི ཡཀྑརཀྑསཱདིརཱུཔཱནི པསྶཏོ བྷཡཾ ཨུཔྤཛྫཏི. ཡེན ཙིཏྟཝིཀྑེཔཾ པཏྭཱ ཛྷཱནཝིབྦྷནྟཀོ ཧོཏི, ཏསྨཱ རཱུཔདསྶནེ ཨཔྤམཏྟེན བྷཝིཏབྦཾ.

ཏཏྲཱཡཾ དིབྦཙཀྑུནོ ཨུཔྤཏྟིཀྐམོ. ཝུཏྟཔྤཀཱརམེཏཾ རཱུཔམཱརམྨཎཾ ཀཏྭཱ མནོདྭཱརཱཝཛྫནེ ཨུཔྤཛྫིཏྭཱ ནིརུདྡྷེ ཏདེཝ རཱུཔཾ ཨཱརམྨཎཾ ཀཏྭཱ ཙཏྟཱརི པཉྩ ཝཱ ཛཝནཱནི ཨུཔྤཛྫནྟཱིཏི སབྦཾ པུརིམནཡེནེཝ ཝེདིཏབྦཾ. ཨིདྷཱཔི པུབྦབྷཱགཙིཏྟཱནི སཝིཏཀྐསཝིཙཱརཱནི ཀཱམཱཝཙརཱནི. པརིཡོསཱནེ ཨཏྠསཱདྷཀཙིཏྟཾ ཙཏུཏྠཛ྄ཛྷཱནིཀཾ རཱུཔཱཝཙརཾ. ཏེན སཧཛཱཏཾ ཉཱཎཾ སཏྟཱནཾ ཙུཏཱུཔཔཱཏེ ཉཱཎནྟིཔི དིབྦཙཀྑུཉཱཎནྟིཔི ཝུཙྩཏཱིཏི.

ཙུཏཱུཔཔཱཏཉཱཎཀཐཱ ནིཊྛིཏཱ.

པཀིཎྞཀཀཐཱ

༤༡༣.

ཨིཏི ¶ པཉྩཀྑནྡྷཝིདཱུ, པཉྩ ཨབྷིཉྙཱ ཨཝོཙ ཡཱ ནཱཐོ;

ཏཱ ཉཏྭཱ ཏཱསུ ཨཡཾ, པཀིཎྞཀཀཐཱཔི ཝིཉྙེཡྻཱ.

ཨེཏཱསུ ¶ ཧི ཡདེཏཾ ཙུཏཱུཔཔཱཏཉཱཎསངྑཱཏཾ དིབྦཙཀྑུ, ཏསྶ ཨནཱགཏཾསཉཱཎཉྩ ཡཐཱཀམྨུཔགཉཱཎཉྩཱཏི དྭེཔི པརིབྷཎྜཉཱཎཱནི ཧོནྟི. ཨིཏི ཨིམཱནི ཙ དྭེ ཨིདྡྷིཝིདྷཱདཱིནི ཙ པཉྩཱཏི སཏྟ ཨབྷིཉྙཱཉཱཎཱནི ཨིདྷཱགཏཱནི. ཨིདཱནི ཏེསཾ ཨཱརམྨཎཝིབྷཱགེ ཨསམྨོཧཏྠཾ –

ཨཱརམྨཎཏྟིཀཱ ཝུཏྟཱ, ཡེ ཙཏྟཱརོ མཧེསིནཱ;

སཏྟནྣམཔི ཉཱཎཱནཾ, པཝཏྟིཾ ཏེསུ དཱིཔཡེ.

ཏཏྲཱཡཾ དཱིཔནཱ. ཙཏྟཱརོ ཧི ཨཱརམྨཎཏྟིཀཱ མཧེསིནཱ ཝུཏྟཱ. ཀཏམེ ཙཏྟཱརོ? པརིཏྟཱརམྨཎཏྟིཀོ, མགྒཱརམྨཎཏྟིཀོ, ཨཏཱིཏཱརམྨཎཏྟིཀོ, ཨཛ྄ཛྷཏྟཱརམྨཎཏྟིཀོཏི (དྷ. ས. ཏིཀམཱཏིཀཱ ༡༣, ༡༦, ༡༩, ༢༡).

༤༡༤. ཏཏྠ ཨིདྡྷིཝིདྷཉཱཎཾ པརིཏྟམཧགྒཏཨཏཱིཏཱནཱགཏཔཙྩུཔྤནྣཨཛ྄ཛྷཏྟབཧིདྡྷཱརམྨཎཝསེན སཏྟསུ ཨཱརམྨཎེསུ པཝཏྟཏི. ཀཐཾ? ཏཉྷི ཡདཱ ཀཱཡཾ ཙིཏྟསནྣིསྶིཏཾ ཀཏྭཱ ཨདིསྶམཱནེན ཀཱཡེན གནྟུཀཱམོ ཙིཏྟཝསེན ཀཱཡཾ པརིཎཱམེཏི, མཧགྒཏཙིཏྟེ སམོདཧཏི སམཱརོཔེཏི, ཏདཱ ཨུཔཡོགལདྡྷཾ ཨཱརམྨཎཾ ཧོཏཱིཏི ཀཏྭཱ རཱུཔཀཱཡཱརམྨཎཏོ པརིཏྟཱརམྨཎཾ ཧོཏི. ཡདཱ ཙིཏྟཾ ཀཱཡསནྣིསྶིཏཾ ཀཏྭཱ དིསྶམཱནེན ཀཱཡེན གནྟུཀཱམོ ཀཱཡཝསེན ཙིཏྟཾ པརིཎཱམེཏི, པཱདཀཛ྄ཛྷཱནཙིཏྟཾ རཱུཔཀཱཡེ སམོདཧཏི སམཱརོཔེཏི, ཏདཱ ཨུཔཡོགལདྡྷཾ ཨཱརམྨཎཾ ཧོཏཱིཏི ཀཏྭཱ མཧགྒཏཙིཏྟཱརམྨཎཏོ མཧགྒཏཱརམྨཎཾ ཧོཏི.

ཡསྨཱ པན ཏདེཝ ཙིཏྟཾ ཨཏཱིཏཾ ནིརུདྡྷཾ ཨཱརམྨཎཾ ཀརོཏི, ཏསྨཱ ཨཏཱིཏཱརམྨཎཾ ཧོཏི. མཧཱདྷཱཏུནིདྷཱནེ མཧཱཀསྶཔཏྠེརཱདཱིནཾ ཝིཡ ཨནཱགཏཾ ཨདྷིཊྛཧནྟཱནཾ ཨནཱགཏཱརམྨཎཾ ཧོཏི. མཧཱཀསྶཔཏྠེརོ ཀིར མཧཱདྷཱཏུནིདྷཱནཾ ཀརོནྟོ ‘‘ཨནཱགཏེ ཨཊྛཱརསཝསྶཱདྷིཀཱནི དྭེཝསྶསཏཱནི ཨིམེ གནྡྷཱ མཱ སུསྶིཾསུ, པུཔྥཱནི མཱ མིལཱཡིཾསུ, དཱིཔཱ མཱ ནིབྦཱཡིཾསཱུ’’ཏི ¶ (དྷ. ས. ཨཊྛ. ༡༤༣༤) ཨདྷིཊྛཧི. སབྦཾ ཏཐེཝ ཨཧོསི. ཨསྶགུཏྟཏྠེརོ ཝཏྟནིཡསེནཱསནེ བྷིཀྑུསངྒྷཾ སུཀྑབྷཏྟཾ བྷུཉྫམཱནཾ དིསྭཱ ཨུདཀསོཎྜིཾ དིཝསེ དིཝསེ པུརེབྷཏྟེ དདྷིརསཾ ཧོཏཱུཏི ཨདྷིཊྛཱསི. པུརེབྷཏྟེ གཧིཏཾ དདྷིརསཾ ཧོཏི. པཙྪཱབྷཏྟེ པཱཀཏིཀཨུདཀམེཝ (དྷ. ས. ཨཊྛ. ༡༤༣༤). ཀཱཡཾ པན ཙིཏྟསནྣིསྶིཏཾ ¶ ཀཏྭཱ ཨདིསྶམཱནེན ཀཱཡེན གམནཀཱལེ པཙྩུཔྤནྣཱརམྨཎཾ ཧོཏི.

ཀཱཡཝསེན ཙིཏྟཾ, ཙིཏྟཝསེན ཝཱ ཀཱཡཾ པརིཎཱམནཀཱལེ ཨཏྟནོ ཀུམཱརཀཝཎྞཱདིནིམྨཱནཀཱལེ ཙ སཀཱཡཙིཏྟཱནཾ ཨཱརམྨཎཀརཎཏོ ཨཛ྄ཛྷཏྟཱརམྨཎཾ ཧོཏི. བཧིདྡྷཱ ཧཏྠིཨསྶཱདིདསྶནཀཱལེ པན བཧིདྡྷཱརམྨཎནྟི ཨེཝཾ ཏཱཝ ཨིདྡྷིཝིདྷཉཱཎསྶ སཏྟསུ ཨཱརམྨཎེསུ པཝཏྟི ཝེདིཏབྦཱ.

༤༡༥. དིབྦསོཏདྷཱཏུཉཱཎཾ པརིཏྟཔཙྩུཔྤནྣཨཛ྄ཛྷཏྟབཧིདྡྷཱརམྨཎཝསེན ཙཏཱུསུ ཨཱརམྨཎེསུ པཝཏྟཏི. ཀཐཾ? ཏཉྷི ཡསྨཱ སདྡཾ ཨཱརམྨཎཾ ཀརོཏི, སདྡོ ཙ པརིཏྟོ, ཏསྨཱ པརིཏྟཱརམྨཎཾ ཧོཏི. ཝིཛྫམཱནཾཡེཝ པན སདྡཾ ཨཱརམྨཎཾ ཀཏྭཱ པཝཏྟནཏོ པཙྩུཔྤནྣཱརམྨཎཾ ཧོཏི. ཏཾ ཨཏྟནོ ཀུཙྪིསདྡསཝནཀཱལེ ཨཛ྄ཛྷཏྟཱརམྨཎཾ. པརེསཾ སདྡསཝནཀཱལེ བཧིདྡྷཱརམྨཎནྟི ཨེཝཾ དིབྦསོཏདྷཱཏུཉཱཎསྶ ཙཏཱུསུ ཨཱརམྨཎེསུ པཝཏྟི ཝེདིཏབྦཱ.

༤༡༦. ཙེཏོཔརིཡཉཱཎཾ པརིཏྟམཧགྒཏཨཔྤམཱཎམགྒཨཏཱིཏཱནཱགཏཔཙྩུཔྤནྣབཧིདྡྷཱརམྨཎཝསེན ཨཊྛསུ ཨཱརམྨཎེསུ པཝཏྟཏི. ཀཐཾ? ཏཉྷི པརེསཾ ཀཱམཱཝཙརཙིཏྟཛཱནནཀཱལེ པརིཏྟཱརམྨཎཾ ཧོཏི. རཱུཔཱཝཙརཨརཱུཔཱཝཙརཙིཏྟཛཱནནཀཱལེ མཧགྒཏཱརམྨཎཾ ཧོཏི. མགྒཕལཛཱནནཀཱལེ ཨཔྤམཱཎཱརམྨཎཾ ཧོཏི.

ཨེཏྠ ཙ པུཐུཛྫནོ སོཏཱཔནྣསྶ ཙིཏྟཾ ན ཛཱནཱཏི. སོཏཱཔནྣོ ཝཱ སཀདཱགཱམིསྶཱཏི ཨེཝཾ ཡཱཝ ཨརཧཏོ ནེཏབྦཾ. ཨརཧཱ པན སབྦེསཾ ཙིཏྟཾ ཛཱནཱཏི. ཨཉྙོཔི ཙ ཨུཔརིམོ ཧེཊྛིམསྶཱཏི ཨཡཾ ཝིསེསོ ཝེདིཏབྦོ. མགྒཙིཏྟཱརམྨཎཀཱལེ མགྒཱརམྨཎཾ ཧོཏི. ཡདཱ པན ཨཏཱིཏེ སཏྟདིཝསབྦྷནྟརེ ཙ ཨནཱགཏེ སཏྟདིཝསབྦྷནྟརེ ཙ པརེསཾ ཙིཏྟཾ ཛཱནཱཏི, ཏདཱ ཨཏཱིཏཱརམྨཎཾ ཨནཱགཏཱརམྨཎཉྩ ཧོཏི.

ཀཐཾ ¶ པཙྩུཔྤནྣཱརམྨཎཾ ཧོཏི. པཙྩུཔྤནྣཾ ནཱམ ཏིཝིདྷཾ – ཁཎཔཙྩུཔྤནྣཾ, སནྟཏིཔཙྩུཔྤནྣཾ, ཨདྡྷཱཔཙྩུཔྤནྣཉྩ. ཏཏྠ ཨུཔྤཱདཊྛིཏིབྷངྒཔྤཏྟཾ ཁཎཔཙྩུཔྤནྣཾ. ཨེཀདྭེསནྟཏིཝཱརཔརིཡཱཔནྣཾ སནྟཏིཔཙྩུཔྤནྣཾ. ཏཏྠ ཨནྡྷཀཱརེ ནིསཱིདིཏྭཱ ཨཱལོཀཊྛཱནཾ གཏསྶ ན ཏཱཝ ཨཱརམྨཎཾ པཱཀཊཾ ཧོཏི, ཡཱཝ པན ཏཾ པཱཀཊཾ ཧོཏི ¶ , ཨེཏྠནྟརེ ཨེཀདྭེསནྟཏིཝཱརཱ ཝེདིཏབྦཱ. ཨཱལོཀཊྛཱནེ ཝིཙརིཏྭཱ ཨོཝརཀཾ པཝིཊྛསྶཱཔི ན ཏཱཝ སཧསཱ རཱུཔཾ པཱཀཊཾ ཧོཏི, ཡཱཝ པན ཏཾ པཱཀཊཾ ཧོཏི, ཨེཏྠནྟརེ ཨེཀདྭེསནྟཏིཝཱརཱ ཝེདིཏབྦཱ. དཱུརེ ཋཏྭཱ པན རཛཀཱནཾ ཧཏྠཝིཀཱརཾ, གྷཎྜིབྷེརཱིཨཱཀོཊནཝིཀཱརཉྩ དིསྭཱཔི ན ཏཱཝ སདྡཾ སུཎཱཏི, ཡཱཝ པན ཏཾ སུཎཱཏི, ཨེཏསྨིམྤི ཨནྟརེ ཨེཀདྭེསནྟཏིཝཱརཱ ཝེདིཏབྦཱ. ཨེཝཾ ཏཱཝ མཛ྄ཛྷིམབྷཱཎཀཱ.

སཾཡུཏྟབྷཱཎཀཱ པན རཱུཔསནྟཏི ཨརཱུཔསནྟཏཱིཏི དྭེ སནྟཏིཡོ ཝཏྭཱ ཨུདཀཾ ཨཀྐམིཏྭཱ གཏསྶ ཡཱཝ ཏཱིརེ ཨཀྐནྟཨུདཀལེཁཱ ན ཝིཔྤསཱིདཏི, ཨདྡྷཱནཏོ ཨཱགཏསྶ ཡཱཝ ཀཱཡེ ཨུསུམབྷཱཝོ ན ཝཱུཔསམྨཏི, ཨཱཏཔཱ ཨཱགནྟྭཱ གབྦྷཾ པཝིཊྛསྶ ཡཱཝ ཨནྡྷཀཱརབྷཱཝོ ན ཝིགཙྪཏི, ཨནྟོགབྦྷེ ཀམྨཊྛཱནཾ མནསི ཀརིཏྭཱ དིཝཱ ཝཱཏཔཱནཾ ཝིཝརིཏྭཱ ཨོལོཀེནྟསྶ ཡཱཝ ཨཀྑཱིནཾ ཕནྡནབྷཱཝོ ན ཝཱུཔསམྨཏི, ཨཡཾ རཱུཔསནྟཏི ནཱམ. དྭེ ཏཡོ ཛཝནཝཱརཱ ཨརཱུཔསནྟཏི ནཱམཱཏི ཝཏྭཱ ཏདུབྷཡམྤི སནྟཏིཔཙྩུཔྤནྣཾ ནཱམཱཏི ཝདནྟི.

ཨེཀབྷཝཔརིཙྪིནྣཾ པན ཨདྡྷཱཔཙྩུཔྤནྣཾ ནཱམ. ཡཾ སནྡྷཱཡ བྷདྡེཀརཏྟསུཏྟེ ‘‘ཡོ ཙཱཝུསོ, མནོ ཡེ ཙ དྷམྨཱ ཨུབྷཡམེཏཾ པཙྩུཔྤནྣཾ, ཏསྨིཾ ཙེ པཙྩུཔྤནྣེ ཚནྡརཱགཔྤཊིབདྡྷཾ ཧོཏི ཝིཉྙཱཎཾ, ཚནྡརཱགཔྤཊིབདྡྷཏྟཱ ཝིཉྙཱཎསྶ ཏདབྷིནནྡཏི, ཏདབྷིནནྡནྟོ པཙྩུཔྤནྣེསུ དྷམྨེསུ སཾཧཱིརཏཱི’’ཏི (མ. ནི. ༣.༢༨༤) ཝུཏྟཾ. སནྟཏིཔཙྩུཔྤནྣཉྩེཏྠ ཨཊྛཀཐཱསུ ཨཱགཏཾ. ཨདྡྷཱཔཙྩུཔྤནྣཾ སུཏྟེ.

ཏཏྠ ཀེཙི ཁཎཔཙྩུཔྤནྣཾ ཙིཏྟཾ ཙེཏོཔརིཡཉཱཎསྶ ཨཱརམྨཎཾ ཧོཏཱིཏི ཝདནྟི. ཀིཾ ཀཱརཎཱ? ཡསྨཱ ཨིདྡྷིམཏོ ཙ པརསྶ ཙ ཨེཀཀྑཎེ ཙིཏྟཾ ཨུཔྤཛྫཏཱིཏི. ཨིདཉྩ ནེསཾ ཨོཔམྨཾ, ཡཐཱ ཨཱཀཱསེ ཁིཏྟེ པུཔྥམུཊྛིམྷི ཨཝསྶཾ ཨེཀཾ པུཔྥཾ ཨེཀསྶ ཝཎྚེན ཝཎྚཾ པཊིཝིཛ྄ཛྷཏི, ཨེཝཾ པརསྶ ཙིཏྟཾ ཛཱནིསྶཱམཱིཏི རཱསིཝསེན མཧཱཛནསྶ ཙིཏྟེ ཨཱཝཛྫིཏེ ཨཝསྶཾ ཨེཀསྶ ཙིཏྟཾ ཨེཀེན ཙིཏྟེན ཨུཔྤཱདཀྑཎེ ཝཱ ཋིཏིཀྑཎེ ཝཱ བྷངྒཀྑཎེ ཝཱ པཊིཝིཛ྄ཛྷཏཱིཏི. ཏཾ པན ཝསྶསཏམྤི ཝསྶསཧསྶམྤི ཨཱཝཛྫནྟོ ཡེན ཙ ཙིཏྟེན ཨཱཝཛྫཏི ¶ , ཡེན ཙ ཛཱནཱཏི. ཏེསཾ དྭིནྣཾ སཧཋཱནཱབྷཱཝཏོ ཨཱཝཛྫནཛཝནཱནཉྩ ཨནིཊྛཊྛཱནེ ནཱནཱརམྨཎབྷཱཝཔྤཏྟིདོསཏོ ཨཡུཏྟནྟི ཨཊྛཀཐཱསུ པཊིཀྑིཏྟཾ.

སནྟཏིཔཙྩུཔྤནྣཾ ¶ པན ཨདྡྷཱཔཙྩུཔྤནྣཉྩ ཨཱརམྨཎཾ ཧོཏཱིཏི ཝེདིཏབྦཾ. ཏཏྠ ཡཾ ཝཏྟམཱནཛཝནཝཱིཐིཏོ ཨཏཱིཏཱནཱགཏཝསེན དྭིཏྟིཛཝནཝཱིཐིཔརིམཱཎེ ཀཱལེ པརསྶ ཙིཏྟཾ, ཏཾ སབྦམྤི སནྟཏིཔཙྩུཔྤནྣཾ ནཱམ. ‘‘ཨདྡྷཱཔཙྩུཔྤནྣཾ པན ཛཝནཝཱརེན དཱིཔེཏབྦ’’ནྟི སཾཡུཏྟཊྛཀཐཱཡཾ ཝུཏྟཾ. ཏཾ སུཊྛུ ཝུཏྟཾ.

ཏཏྲཱཡཾ དཱིཔནཱ, ཨིདྡྷིམཱ པརསྶ ཙིཏྟཾ ཛཱནིཏུཀཱམོ ཨཱཝཛྫཏི, ཨཱཝཛྫནཾ ཁཎཔཙྩུཔྤནྣཾ ཨཱརམྨཎཾ ཀཏྭཱ ཏེནེཝ སཧ ནིརུཛ྄ཛྷཏི. ཏཏོ ཙཏྟཱརི པཉྩ ཝཱ ཛཝནཱནི. ཡེསཾ པཙྪིམཾ ཨིདྡྷིཙིཏྟཾ, སེསཱནི ཀཱམཱཝཙརཱནི, ཏེསཾ སབྦེསམྤི ཏདེཝ ནིརུདྡྷཾ ཙིཏྟམཱརམྨཎཾ ཧོཏི, ན ཙ ཏཱནི ནཱནཱརམྨཎཱནི ཧོནྟི, ཨདྡྷཱཝསེན པཙྩུཔྤནྣཱརམྨཎཏྟཱ. ཨེཀཱརམྨཎཏྟེཔི ཙ ཨིདྡྷིཙིཏྟམེཝ པརསྶ ཙིཏྟཾ ཛཱནཱཏི, ན ཨིཏརཱནི. ཡཐཱ ཙཀྑུདྭཱརེ ཙཀྑུཝིཉྙཱཎམེཝ རཱུཔཾ པསྶཏི, ན ཨིཏརཱནཱིཏི. ཨིཏི ཨིདཾ སནྟཏིཔཙྩུཔྤནྣསྶ ཙེཝ ཨདྡྷཱཔཙྩུཔྤནྣསྶ ཙ ཝསེན པཙྩུཔྤནྣཱརམྨཎཾ ཧོཏི. ཡསྨཱ ཝཱ སནྟཏིཔཙྩུཔྤནྣམྤི ཨདྡྷཱཔཙྩུཔྤནྣེཡེཝ པཏཏི, ཏསྨཱ ཨདྡྷཱཔཙྩུཔྤནྣཝསེནེཝེཏཾ པཙྩུཔྤནྣཱརམྨཎནྟི ཝེདིཏབྦཾ. པརསྶ ཙིཏྟཱརམྨཎཏྟཱཡེཝ པན བཧིདྡྷཱརམྨཎཾ ཧོཏཱིཏི ཨེཝཾ ཙེཏོཔརིཡཉཱཎསྶ ཨཊྛསུ ཨཱརམྨཎེསུ པཝཏྟི ཝེདིཏབྦཱ.

༤༡༧. པུབྦེནིཝཱསཉཱཎཾ པརིཏྟམཧགྒཏཨཔྤམཱཎམགྒཨཏཱིཏཨཛ྄ཛྷཏྟབཧིདྡྷཱནཝཏྟབྦཱརམྨཎཝསེན ཨཊྛསུ ཨཱརམྨཎེསུ པཝཏྟཏི. ཀཐཾ? ཏཉྷི ཀཱམཱཝཙརཀྑནྡྷཱནུསྶརཎཀཱལེ པརིཏྟཱརམྨཎཾ ཧོཏི. རཱུཔཱཝཙརཱརཱུཔཱཝཙརཀྑནྡྷཱནུསྶརཎཀཱལེ མཧགྒཏཱརམྨཎཾ. ཨཏཱིཏེ ཨཏྟནཱ པརེཧི ཝཱ བྷཱཝིཏམགྒཾ སཙྪིཀཏཕལཉྩ ཨནུསྶརཎཀཱལེ ཨཔྤམཱཎཱརམྨཎཾ. བྷཱཝིཏམགྒམེཝ ཨནུསྶརཎཀཱལེ མགྒཱརམྨཎཾ. ནིཡམཏོ པནེཏཾ ཨཏཱིཏཱརམྨཎམེཝ.

ཏཏྠ ཀིཉྩཱཔི ཙེཏོཔརིཡཉཱཎཡཐཱཀམྨུཔགཉཱཎཱནིཔི ཨཏཱིཏཱརམྨཎཱནི ཧོནྟི, ཨཐ ཁོ ཏེསཾ ཙེཏོཔརིཡཉཱཎསྶ སཏྟདིཝསབྦྷནྟརཱཏཱིཏཾ ཙིཏྟམེཝ ཨཱརམྨཎཾ. ཏཉྷི ཨཉྙཾ ཁནྡྷཾ ཝཱ ཁནྡྷཔཊིབདྡྷཾ ཝཱ ན ཛཱནཱཏི. མགྒསམྤཡུཏྟཙིཏྟཱརམྨཎཏྟཱ པན པརིཡཱཡཏོ མགྒཱརམྨཎནྟི ¶ ཝུཏྟཾ. ཡཐཱཀམྨུཔགཉཱཎསྶ ཙ ཨཏཱིཏཾ ཙེཏནཱམཏྟམེཝ ཨཱརམྨཎཾ. པུབྦེནིཝཱསཉཱཎསྶ པན ཨཏཱིཏཱ ཁནྡྷཱ ཁནྡྷཔཊིབདྡྷཉྩ ཀིཉྩི ཨནཱརམྨཎཾ ནཱམ ནཏྠི ¶ . ཏཉྷི ཨཏཱིཏཀྑནྡྷཁནྡྷཔཊིབདྡྷེསུ དྷམྨེསུ སབྦཉྙུཏཉྙཱཎགཏིཀཾ ཧོཏཱིཏི ཨཡཾ ཝིསེསོ ཝེདིཏབྦོ. ཨཡམེཏྠ ཨཊྛཀཐཱནཡོ. ཡསྨཱ པན ‘‘ཀུསལཱ ཁནྡྷཱ ཨིདྡྷིཝིདྷཉཱཎསྶ ཙེཏོཔརིཡཉཱཎསྶ པུབྦེནིཝཱསཱནུསྶཏིཉཱཎསྶ ཡཐཱཀམྨུཔགཉཱཎསྶ ཨནཱགཏཾསཉཱཎསྶ ཨཱརམྨཎཔཙྩཡེན པཙྩཡོ’’ཏི (པཊྛཱ. ༡.༡.༤༠༤) པཊྛཱནེ ཝུཏྟཾ. ཏསྨཱ ཙཏྟཱརོཔི ཁནྡྷཱ ཙེཏོཔརིཡཉཱཎཡཐཱཀམྨུཔགཉཱཎཱནཾ ཨཱརམྨཎཱ ཧོནྟི. ཏཏྲཱཔི ཡཐཱཀམྨུཔགཉཱཎསྶ ཀུསལཱཀུསལཱ ཨེཝཱཏི.

ཨཏྟནོ ཁནྡྷཱནུསྶརཎཀཱལེ པནེཏཾ ཨཛ྄ཛྷཏྟཱརམྨཎཾ. པརསྶ ཁནྡྷཱནུསྶརཎཀཱལེ བཧིདྡྷཱརམྨཎཾ. ‘‘ཨཏཱིཏེ ཝིཔསྶཱི བྷགཝཱ ཨཧོསི. ཏསྶ མཱཏཱ བནྡྷུམཏཱི, པིཏཱ བནྡྷུམཱ’’ཏིཨཱདིནཱ (དཱི. ནི. ༢.༡༢) ནཡེན ནཱམགོཏྟཔཐཝཱིནིམིཏྟཱདིཨནུསྶརཎཀཱལེ ནཝཏྟབྦཱརམྨཎཾ ཧོཏི. ནཱམགོཏྟནྟི ཙེཏྠ ཁནྡྷཱུཔནིབནྡྷོ སམྨུཏིསིདྡྷོ བྱཉྫནཏྠོ དཊྛབྦོ, ན བྱཉྫནཾ. བྱཉྫནཉྷི སདྡཱཡཏནསངྒཧིཏཏྟཱ པརིཏྟཾ ཧོཏི. ཡཐཱཧ ‘‘ནིརུཏྟིཔཊིསམྦྷིདཱ པརིཏྟཱརམྨཎཱ’’ཏི (ཝིབྷ. ༧༤༩). ཨཡམེཏྠ ཨམྷཱཀཾ ཁནྟི. ཨེཝཾ པུབྦེནིཝཱསཉཱཎསྶ ཨཊྛསུ ཨཱརམྨཎེསུ པཝཏྟི ཝེདིཏབྦཱ.

༤༡༨. དིབྦཙཀྑུཉཱཎཾ པརིཏྟཔཙྩུཔྤནྣཨཛ྄ཛྷཏྟབཧིདྡྷཱརམྨཎཝསེན ཙཏཱུསུ ཨཱརམྨཎེསུ པཝཏྟཏི. ཀཐཾ? ཏཉྷི ཡསྨཱ རཱུཔཾ ཨཱརམྨཎཾ ཀརོཏི, རཱུཔཉྩ པརིཏྟཾ, ཏསྨཱ པརིཏྟཱརམྨཎཾ ཧོཏི. ཝིཛྫམཱནེཡེཝ ཙ རཱུཔེ པཝཏྟཏྟཱ པཙྩུཔྤནྣཱརམྨཎཾ. ཨཏྟནོ ཀུཙྪིགཏཱདིརཱུཔདསྶནཀཱལེ ཨཛ྄ཛྷཏྟཱརམྨཎཾ. པརསྶ རཱུཔདསྶནཀཱལེ བཧིདྡྷཱརམྨཎནྟི ཨེཝཾ དིབྦཙཀྑུཉཱཎསྶ ཙཏཱུསུ ཨཱརམྨཎེསུ པཝཏྟི ཝེདིཏབྦཱ.

༤༡༩. ཨནཱགཏཾསཉཱཎཾ པརིཏྟམཧགྒཏཨཔྤམཱཎམགྒཨནཱགཏཨཛ྄ཛྷཏྟབཧིདྡྷཱནཝཏྟབྦཱརམྨཎཝསེན ཨཊྛསུ ཨཱརམྨཎེསུ པཝཏྟཏི. ཀཐཾ? ཏཉྷི ‘‘ཨཡཾ ཨནཱགཏེ ཀཱམཱཝཙརེ ནིབྦཏྟིསྶཏཱི’’ཏི ཛཱནནཀཱལེ པརིཏྟཱརམྨཎཾ ཧོཏི. ‘‘རཱུཔཱཝཙརེ ཨརཱུཔཱཝཙརེ ཝཱ ནིབྦཏྟིསྶཏཱི’’ཏི ཛཱནནཀཱལེ མཧགྒཏཱརམྨཎཾ. ‘‘མགྒཾ བྷཱཝེསྶཏི, ཕལཾ སཙྪིཀརིསྶཏཱི’’ཏི ཛཱནནཀཱལེ ¶ ཨཔྤམཱཎཱརམྨཎཾ. ‘‘མགྒཾ བྷཱཝེསྶཏི’’ཙྩེཝ ཛཱནནཀཱལེ མགྒཱརམྨཎཾ. ནིཡམཏོ པན ཏཾ ཨནཱགཏཱརམྨཎམེཝ.

ཏཏྠ ¶ ཀིཉྩཱཔི ཙེཏོཔརིཡཉཱཎམྤི ཨནཱགཏཱརམྨཎཾ ཧོཏི, ཨཐ ཁོ ཏསྶ སཏྟདིཝསབྦྷནྟརཱནཱགཏཾ ཙིཏྟམེཝ ཨཱརམྨཎཾ. ཏཉྷི ཨཉྙཾ ཁནྡྷཾ ཝཱ ཁནྡྷཔཊིབདྡྷཾ ཝཱ ན ཛཱནཱཏི. ཨནཱགཏཾསཉཱཎསྶ པུབྦེནིཝཱསཉཱཎེ ཝུཏྟནཡེན ཨནཱགཏེ ཨནཱརམྨཎཾ ནཱམ ནཏྠི. ‘‘ཨཧཾ ཨམུཏྲ ནིབྦཏྟིསྶཱམཱི’’ཏི ཛཱནནཀཱལེ ཨཛ྄ཛྷཏྟཱརམྨཎཾ. ‘‘ཨསུཀོ ཨམུཏྲ ནིབྦཏྟིསྶཏཱི’’ཏི ཛཱནནཀཱལེ བཧིདྡྷཱརམྨཎཾ. ‘‘ཨནཱགཏེ མེཏྟེཡྻོ བྷགཝཱ ཨུཔྤཛྫིསྶཏི (དཱི. ནི. ༣.༡༠༧). སུབྲཧྨཱ ནཱམསྶ བྲཱཧྨཎོ པིཏཱ བྷཝིསྶཏི. བྲཧྨཝཏཱི ནཱམ བྲཱཧྨཎཱི མཱཏཱ’’ཏིཨཱདིནཱ པན ནཡེན ནཱམགོཏྟཛཱནནཀཱལེ པུབྦེནིཝཱསཉཱཎེ ཝུཏྟནཡེནེཝ ན ཝཏྟབྦཱརམྨཎཾ ཧོཏཱིཏི ཨེཝཾ ཨནཱགཏཾསཉཱཎསྶ ཨཊྛསུ ཨཱརམྨཎེསུ པཝཏྟི ཝེདིཏབྦཱ.

༤༢༠. ཡཐཱཀམྨུཔགཉཱཎཾ པརིཏྟམཧགྒཏཨཏཱིཏཨཛ྄ཛྷཏྟབཧིདྡྷཱརམྨཎཝསེན པཉྩསུ ཨཱརམྨཎེསུ པཝཏྟཏི. ཀཐཾ? ཏཉྷི ཀཱམཱཝཙརཀམྨཛཱནནཀཱལེ པརིཏྟཱརམྨཎཾ ཧོཏི. རཱུཔཱཝཙརཱརཱུཔཱཝཙརཀམྨཛཱནནཀཱལེ མཧགྒཏཱརམྨཎཾ. ཨཏཱིཏམེཝ ཛཱནཱཏཱིཏི ཨཏཱིཏཱརམྨཎཾ. ཨཏྟནོ ཀམྨཾ ཛཱནནཀཱལེ ཨཛ྄ཛྷཏྟཱརམྨཎཾ. པརསྶ ཀམྨཾ ཛཱནནཀཱལེ བཧིདྡྷཱརམྨཎཾ ཧོཏི. ཨེཝཾ ཡཐཱཀམྨུཔགཉཱཎསྶ པཉྩསུ ཨཱརམྨཎེསུ པཝཏྟི ཝེདིཏབྦཱ. ཡཉྩེཏྠ ཨཛ྄ཛྷཏྟཱརམྨཎཉྩེཝ བཧིདྡྷཱརམྨཎཉྩཱཏི ཝུཏྟཾ, ཏཾ ཀཱལེན ཨཛ྄ཛྷཏྟཾ ཀཱལེན བཧིདྡྷཱ ཛཱནནཀཱལེ ཨཛ྄ཛྷཏྟབཧིདྡྷཱརམྨཎམྤི ཧོཏིཡེཝཱཏི.

ཨིཏི སཱདྷུཛནཔཱམོཛྫཏྠཱཡ ཀཏེ ཝིསུདྡྷིམགྒེ

ཨབྷིཉྙཱནིདྡེསོ ནཱམ

ཏེརསམོ པརིཙྪེདོ.

༡༤. ཁནྡྷནིདྡེསོ

པཉྙཱཀཐཱ

༤༢༡. ཨིདཱནི ¶ ¶ ཡསྨཱ ཨེཝཾ ཨབྷིཉྙཱཝསེན ཨདྷིགཏཱནིསཾསཱཡ ཐིརཏརཱཡ སམཱདྷིབྷཱཝནཱཡ སམནྣཱགཏེན བྷིཀྑུནཱ སཱིལེ པཏིཊྛཱཡ ནརོ སཔཉྙོ, ཙིཏྟཾ པཉྙཉྩ བྷཱཝཡནྟི ཨེཏྠ ཙིཏྟསཱིསེན ནིདྡིཊྛོ སམཱདྷི སབྦཱཀཱརེན བྷཱཝིཏོ ཧོཏི.

ཏདནནྟརཱ པན པཉྙཱ བྷཱཝེཏབྦཱ. སཱ ཙ ཨཏིསངྑེཔདེསིཏཏྟཱ ཝིཉྙཱཏུམྤི ཏཱཝ ན སུཀརཱ, པགེཝ བྷཱཝེཏུཾ. ཏསྨཱ ཏསྶཱ ཝིཏྠཱརཾ བྷཱཝནཱནཡཉྩ དསྶེཏུཾ ཨིདཾ པཉྷཱཀམྨཾ ཧོཏི.

ཀཱ པཉྙཱ, ཀེནཊྛེན པཉྙཱ, ཀཱནསྶཱ ལཀྑཎརསཔཙྩུཔཊྛཱནཔདཊྛཱནཱནི, ཀཏིཝིདྷཱ པཉྙཱ, ཀཐཾ བྷཱཝེཏབྦཱ, པཉྙཱབྷཱཝནཱཡ ཀོ ཨཱནིསཾསོཏི?

༤༢༢. ཏཏྲིདཾ ཝིསྶཛྫནཾ, ཀཱ པཉྙཱཏི པཉྙཱ བཧུཝིདྷཱ ནཱནཔྤཀཱརཱ. ཏཾ སབྦཾ ཝིབྷཱཝཡིཏུཾ ཨཱརབྦྷམཱནཾ ཝིསྶཛྫནཾ ཨདྷིཔྤེཏཉྩེཝ ཨཏྠཾ ན སཱདྷེཡྻ, ཨུཏྟརི ཙ ཝིཀྑེཔཱཡ སཾཝཏྟེཡྻ, ཏསྨཱ ཨིདྷ ཨདྷིཔྤེཏམེཝ སནྡྷཱཡ ཝདཱམ. ཀུསལཙིཏྟསམྤཡུཏྟཾ ཝིཔསྶནཱཉཱཎཾ པཉྙཱ.

༤༢༣. ཀེནཊྛེན པཉྙཱཏི པཛཱནནཊྛེན པཉྙཱ. ཀིམིདཾ པཛཱནནཾ ནཱམ? སཉྫཱནནཝིཛཱནནཱཀཱརཝིསིཊྛཾ ནཱནཔྤཀཱརཏོ ཛཱནནཾ. སཉྙཱཝིཉྙཱཎཔཉྙཱནཾ ཧི སམཱནེཔི ཛཱནནབྷཱཝེ, སཉྙཱ ‘‘ནཱིལཾ པཱིཏཀ’’ནྟི ཨཱརམྨཎསཉྫཱནནམཏྟམེཝ ཧོཏི. ‘‘ཨནིཙྩཾ དུཀྑམནཏྟཱ’’ཏི ལཀྑཎཔཊིཝེདྷཾ པཱཔེཏུཾ ན སཀྐོཏི. ཝིཉྙཱཎཾ ‘‘ནཱིལཾ པཱིཏཀ’’ནྟི ཨཱརམྨཎཉྩ ཛཱནཱཏི, ལཀྑཎཔཊིཝེདྷཉྩ པཱཔེཏི. ཨུསྶཀྐིཏྭཱ པན མགྒཔཱཏུབྷཱཝཾ པཱཔེཏུཾ ན ¶ སཀྐོཏི. པཉྙཱ ཝུཏྟནཡཝསེན ཨཱརམྨཎཉྩ ཛཱནཱཏི, ལཀྑཎཔཊིཝེདྷཉྩ པཱཔེཏི, ཨུསྶཀྐིཏྭཱ མགྒཔཱཏུབྷཱཝཉྩ པཱཔེཏི.

ཡཐཱ ཧི ཧེརཉྙིཀཕལཀེ ཋཔིཏཾ ཀཧཱཔཎརཱསིཾ ཨེཀོ ཨཛཱཏབུདྡྷིདཱརཀོ, ཨེཀོ གཱམིཀཔུརིསོ, ཨེཀོ ཧེརཉྙིཀོཏི ཏཱིསུ ཛནེསུ པསྶམཱནེསུ ¶ ཨཛཱཏབུདྡྷིདཱརཀོ ཀཧཱཔཎཱནཾ ཙིཏྟཝིཙིཏྟདཱིགྷཙཏུརསྶཔརིམཎྜལབྷཱཝམཏྟམེཝ ཛཱནཱཏི, ‘‘ཨིདཾ མནུསྶཱནཾ ཨུཔབྷོགཔརིབྷོགཾ རཏནསམྨཏ’’ནྟི ན ཛཱནཱཏི. གཱམིཀཔུརིསོ ཙིཏྟཝིཙིཏྟཱདིབྷཱཝཾ ཛཱནཱཏི, ‘‘ཨིདཾ མནུསྶཱནཾ ཨུཔབྷོགཔརིབྷོགཾ རཏནསམྨཏ’’ནྟི ཙ. ‘‘ཨཡཾ ཚེཀོ, ཨཡཾ ཀཱུཊོ, ཨཡཾ ཨདྡྷསཱརོ’’ཏི ཨིམཾ པན ཝིབྷཱགཾ ན ཛཱནཱཏི. ཧེརཉྙིཀོ སབྦེཔི ཏེ པཀཱརེ ཛཱནཱཏི, ཛཱནནྟོ ཙ ཀཧཱཔཎཾ ཨོལོཀེཏྭཱཔི ཛཱནཱཏི, ཨཱཀོཊིཏསྶ སདྡཾ སུཏྭཱཔི, གནྡྷཾ གྷཱཡིཏྭཱཔི, རསཾ སཱཡིཏྭཱཔི, ཧཏྠེན དྷཱརཡིཏྭཱཔི, ཨསུཀསྨིཾ ནཱམ གཱམེ ཝཱ ནིགམེ ཝཱ ནགརེ ཝཱ པབྦཏེ ཝཱ ནདཱིཏཱིརེ ཝཱ ཀཏོཏིཔི, ཨསུཀཱཙརིཡེན ཀཏོཏིཔི ཛཱནཱཏི, ཨེཝཾསམྤདམིདཾ ཝེདིཏབྦཾ.

སཉྙཱ ཧི ཨཛཱཏབུདྡྷིནོ དཱརཀསྶ ཀཧཱཔཎདསྶནཾ ཝིཡ ཧོཏི, ནཱིལཱདིཝསེན ཨཱརམྨཎསྶ ཨུཔཊྛཱནཱཀཱརམཏྟགཧཎཏོ. ཝིཉྙཱཎཾ གཱམིཀསྶ པུརིསསྶ ཀཧཱཔཎདསྶནམིཝ ཧོཏི, ནཱིལཱདིཝསེན ཨཱརམྨཎཱཀཱརགཧཎཏོ, ཨུདྡྷཾཔི ཙ ལཀྑཎཔཊིཝེདྷསམྤཱཔནཏོ. པཉྙཱ ཧེརཉྙིཀསྶ ཀཧཱཔཎདསྶནམིཝ ཧོཏི, ནཱིལཱདིཝསེན ཨཱརམྨཎཱཀཱརཾ གཧེཏྭཱ, ལཀྑཎཔཊིཝེདྷཉྩ པཱཔེཏྭཱ, ཏཏོ ཨུདྡྷམྤི མགྒཔཱཏུབྷཱཝཔཱཔནཏོ. ཏསྨཱ ཡདེཏཾ སཉྫཱནནཝིཛཱནནཱཀཱརཝིསིཊྛཾ ནཱནཔྤཀཱརཏོ ཛཱནནཾ. ཨིདཾ པཛཱནནནྟི ཝེདིཏབྦཾ. ཨིདཾ སནྡྷཱཡ ཧི ཨེཏཾ ཝུཏྟཾ ‘‘པཛཱནནཊྛེན པཉྙཱ’’ཏི.

སཱ པནེསཱ ཡཏྠ སཉྙཱཝིཉྙཱཎཱནི, ན ཏཏྠ ཨེཀཾསེན ཧོཏི. ཡདཱ པན ཧོཏི, ཏདཱ ཨཝིནིབྦྷུཏྟཱ ཏེཧི དྷམྨེཧི ‘‘ཨཡཾ སཉྙཱ, ཨིདཾ ཝིཉྙཱཎཾ, ཨཡཾ པཉྙཱ’’ཏི ཝིནིབྦྷུཛྫིཏྭཱ ཨལབྦྷནེཡྻནཱནཏྟཱ སུཁུམཱ དུདྡསཱ. ཏེནཱཧ ཨཱཡསྨཱ ནཱགསེནོ ‘‘དུཀྐརཾ, མཧཱརཱཛ, བྷགཝཏཱ ཀཏ’’ནྟི. ཀིཾ, བྷནྟེ, ནཱགསེན བྷགཝཏཱ དུཀྐརཾ ཀཏནྟི? ‘དུཀྐརཾ, མཧཱརཱཛ, བྷགཝཏཱ ཀཏཾ ཡཾ ཨརཱུཔཱིནཾ ཙིཏྟཙེཏསིཀཱནཾ དྷམྨཱནཾ ཨེཀཱརམྨཎེ པཝཏྟམཱནཱནཾ ཝཝཏྠཱནཾ ཨཀྑཱཏཾ ཨཡཾ ཕསྶོ, ཨཡཾ ཝེདནཱ, ཨཡཾ སཉྙཱ, ཨཡཾ ཙེཏནཱ, ཨིདཾ ཙིཏྟ’’’ནྟི (མི. པ. ༢.༧.༡༦).

༤༢༤. ཀཱནསྶཱ ¶ ¶ ལཀྑཎརསཔཙྩུཔཊྛཱནཔདཊྛཱནཱནཱིཏི ཨེཏྠ པན དྷམྨསབྷཱཝཔཊིཝེདྷལཀྑཎཱ པཉྙཱ, དྷམྨཱནཾ སབྷཱཝཔཊིཙྪཱདཀམོཧནྡྷཀཱརཝིདྡྷཾསནརསཱ, ཨསམྨོཧཔཙྩུཔཊྛཱནཱ. ‘‘སམཱཧིཏོ ཡཐཱབྷཱུཏཾ ཛཱནཱཏི པསྶཏཱི’’ཏི (ཨ. ནི. ༡༠.༢) ཝཙནཏོ པན སམཱདྷི ཏསྶཱ པདཊྛཱནཾ.

པཉྙཱཔབྷེདཀཐཱ

༤༢༥. ཀཏིཝིདྷཱ པཉྙཱཏི དྷམྨསབྷཱཝཔཊིཝེདྷལཀྑཎེན ཏཱཝ ཨེཀཝིདྷཱ. ལོཀིཡལོཀུཏྟརཝསེན དུཝིདྷཱ. ཏཐཱ སཱསཝཱནཱསཝཱདིཝསེན, ནཱམརཱུཔཝཝཏྠཱཔནཝསེན, སོམནསྶུཔེཀྑཱསཧགཏཝསེན, དསྶནབྷཱཝནཱབྷཱུམིཝསེན ཙ. ཏིཝིདྷཱ ཙིནྟཱསུཏབྷཱཝནཱམཡཝསེན. ཏཐཱ པརིཏྟམཧགྒཏཨཔྤམཱཎཱརམྨཎཝསེན, ཨཱཡཱཔཱཡཨུཔཱཡཀོསལླཝསེན, ཨཛ྄ཛྷཏྟཱབྷིནིཝེསཱདིཝསེན ཙ. ཙཏུབྦིདྷཱ ཙཏཱུསུ སཙྩེསུ ཉཱཎཝསེན ཙཏུཔཊིསམྦྷིདཱཝསེན ཙཱཏི.

༤༢༦. ཏཏྠ ཨེཀཝིདྷཀོཊྛཱསོ ཨུཏྟཱནཏྠོཡེཝ. དུཝིདྷཀོཊྛཱསེ ལོཀིཡམགྒསམྤཡུཏྟཱ ལོཀིཡཱ. ལོཀུཏྟརམགྒསམྤཡུཏྟཱ ལོཀུཏྟརཱཏི ཨེཝཾ ལོཀིཡལོཀུཏྟརཝསེན དུཝིདྷཱ.

དུཏིཡདུཀེ ཨཱསཝཱནཾ ཨཱརམྨཎབྷཱུཏཱ སཱསཝཱ. ཏེསཾ ཨནཱརམྨཎཱ ཨནཱསཝཱ. ཨཏྠཏོ པནེསཱ ལོཀིཡལོཀུཏྟརཱཝ ཧོཏི. ཨཱསཝསམྤཡུཏྟཱ སཱསཝཱ. ཨཱསཝཝིཔྤཡུཏྟཱ ཨནཱསཝཱཏིཨཱདཱིསུཔི ཨེསེཝ ནཡོ. ཨེཝཾ སཱསཝཱནཱསཝཱདིཝསེན དུཝིདྷཱ.

ཏཏིཡདུཀེ ཡཱ ཝིཔསྶནཾ ཨཱརབྷིཏུཀཱམསྶ ཙཏུནྣཾ ཨརཱུཔཀྑནྡྷཱནཾ ཝཝཏྠཱཔནེ པཉྙཱ, ཨཡཾ ནཱམཝཝཏྠཱཔནཔཉྙཱ. ཡཱ རཱུཔཀྑནྡྷསྶ ཝཝཏྠཱཔནེ པཉྙཱ, ཨཡཾ རཱུཔཝཝཏྠཱཔནཔཉྙཱཏི ཨེཝཾ ནཱམརཱུཔཝཝཏྠཱཔནཝསེན དུཝིདྷཱ.

ཙཏུཏྠདུཀེ དྭཱིསུ ཀཱམཱཝཙརཀུསལཙིཏྟེསུ སོལ༹སསུ ཙ པཉྩཀནཡེན ཙཏུཀྐཛ྄ཛྷཱནིཀེསུ མགྒཙིཏྟེསུ པཉྙཱ སོམནསྶསཧགཏཱ. དྭཱིསུ ཀཱམཱཝཙརཀུསལཙིཏྟེསུ ཙཏཱུསུ ཙ པཉྩམཛ྄ཛྷཱནིཀེསུ མགྒཙིཏྟེསུ པཉྙཱ ཨུཔེཀྑཱསཧགཏཱཏི ཨེཝཾ སོམནསྶུཔེཀྑཱསཧགཏཝསེན དུཝིདྷཱ.

པཉྩམདུཀེ ¶ པཋམམགྒཔཉྙཱ ¶ དསྶནབྷཱུམི. ཨཝསེསམགྒཏྟཡཔཉྙཱ བྷཱཝནཱབྷཱུམཱིཏི ཨེཝཾ དསྶནབྷཱཝནཱབྷཱུམིཝསེན དུཝིདྷཱ.

༤༢༧. ཏིཀེསུ པཋམཏྟིཀེ པརཏོ ཨསྶུཏྭཱ པཊིལདྡྷཔཉྙཱ ཨཏྟནོ ཙིནྟཱཝསེན ནིཔྥནྣཏྟཱ ཙིནྟཱམཡཱ. པརཏོ སུཏྭཱ པཊིལདྡྷཔཉྙཱ སུཏཝསེན ནིཔྥནྣཏྟཱ སུཏམཡཱ. ཡཐཱ ཏཐཱ ཝཱ བྷཱཝནཱཝསེན ནིཔྥནྣཱ ཨཔྤནཱཔྤཏྟཱ པཉྙཱ བྷཱཝནཱམཡཱ. ཝུཏྟཉྷེཏཾ –

‘‘ཏཏྠ ཀཏམཱ ཙིནྟཱམཡཱ པཉྙཱ? ཡོགཝིཧིཏེསུ ཝཱ ཀམྨཱཡཏནེསུ ཡོགཝིཧིཏེསུ ཝཱ སིཔྤཱཡཏནེསུ ཡོགཝིཧིཏེསུ ཝཱ ཝིཛྫཱཊྛཱནེསུ ཀམྨསྶཀཏཾ ཝཱ སཙྩཱནུལོམིཀཾ ཝཱ རཱུཔཾ ཨནིཙྩནྟི ཝཱ ཝེདནཱ…པེ… སཉྙཱ… སངྑཱརཱ… ཝིཉྙཱཎཾ ཨནིཙྩནྟི ཝཱ, ཡཾ ཨེཝརཱུཔིཾ ཨནུལོམིཀཾ ཁནྟིཾ དིཊྛིཾ རུཙིཾ མུཏིཾ པེཀྑཾ དྷམྨནིཛ྄ཛྷཱནཁནྟིཾ པརཏོ ཨསྶུཏྭཱ པཊིལབྷཏི, ཨཡཾ ཝུཙྩཏི ཙིནྟཱམཡཱ པཉྙཱ…པེ… སུཏྭཱ པཊིལབྷཏི, ཨཡཾ ཝུཙྩཏི སུཏམཡཱ པཉྙཱ. སབྦཱཔི སམཱཔནྣསྶ པཉྙཱ བྷཱཝནཱམཡཱ པཉྙཱ’’ཏི (ཝིབྷ. ༧༦༨).

ཨེཝཾ ཙིནྟཱསུཏབྷཱཝནཱམཡཝསེན ཏིཝིདྷཱ.

དུཏིཡཏྟིཀེ ཀཱམཱཝཙརདྷམྨེ ཨཱརབྦྷ པཝཏྟཱ པཉྙཱ པརིཏྟཱརམྨཎཱ. རཱུཔཱཝཙརཱརཱུཔཱཝཙརེ ཨཱརབྦྷ པཝཏྟཱ མཧགྒཏཱརམྨཎཱ. སཱ ལོཀིཡཝིཔསྶནཱ. ནིབྦཱནཾ ཨཱརབྦྷ པཝཏྟཱ ཨཔྤམཱཎཱརམྨཎཱ. སཱ ལོཀུཏྟརཝིཔསྶནཱཏི ཨེཝཾ པརིཏྟམཧགྒཏཱཔྤམཱཎཱརམྨཎཝསེན ཏིཝིདྷཱ.

ཏཏིཡཏྟིཀེ ཨཱཡོ ནཱམ ཝུདྡྷི, སཱ དུཝིདྷཱ ཨནཏྠཧཱནིཏོ ཨཏྠུཔྤཏྟིཏོ ཙ. ཏཏྠ ཀོསལླཾ ཨཱཡཀོསལླཾ. ཡཐཱཧ –

‘‘ཏཏྠ ཀཏམཾ ཨཱཡཀོསལླཾ? ཨིམེ མེ དྷམྨེ མནསིཀརོཏོ ཨནུཔྤནྣཱ ཙེཝ ཨཀུསལཱ དྷམྨཱ ན ཨུཔྤཛྫནྟི, ཨུཔྤནྣཱ ཙ ཨཀུསལཱ དྷམྨཱ པཧཱིཡནྟི, ཨིམེ ཝཱ པནིམེ དྷམྨེ མནསིཀརོཏོ ཨནུཔྤནྣཱ ཙེཝ ཀུསལཱ དྷམྨཱ ཨུཔྤཛྫནྟི. ཨུཔྤནྣཱ ཙ ཀུསལཱ དྷམྨཱ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ སཾཝཏྟནྟཱིཏི, ཡཱ ཏཏྠ པཉྙཱ ¶ པཛཱནནཱ…པེ… ཨམོཧོ དྷམྨཝིཙཡོ སམྨཱདིཊྛི, ཨིདཾ ཝུཙྩཏི ཨཱཡཀོསལླ’’ནྟི (ཝིབྷ. ༧༧༡).

ཨཔཱཡོཏི ¶ པན ཨཝུདྡྷི, སཱཔི དུཝིདྷཱ ཨཏྠཧཱནིཏོ ཙ ཨནཏྠུཔྤཏྟིཏོ ཙ. ཏཏྠ ཀོསལླཾ ཨཔཱཡཀོསལླཾ. ཡཐཱཧ ‘‘ཏཏྠ ཀཏམཾ ཨཔཱཡཀོསལླཾ? ཨིམེ དྷམྨེ མནསིཀརོཏོ ཨནུཔྤནྣཱ ཙེཝ ཀུསལཱ དྷམྨཱ ན ཨུཔྤཛྫནྟཱི’’ཏིཨཱདི (ཝིབྷ. ༧༧༡).

སབྦཏྠ པན ཏེསཾ ཏེསཾ དྷམྨཱནཾ ཨུཔཱཡེསུ ནིབྦཏྟིཀཱརཎེསུ ཏཾཁཎཔྤཝཏྟཾ ཋཱནུཔྤཏྟིཀཾ ཀོསལླཾ ཨུཔཱཡཀོསལླཾ ནཱམ. ཡཐཱཧ – ‘‘སབྦཱཔི ཏཏྲུཔཱཡཱ པཉྙཱ ཨུཔཱཡཀོསལླ’’ནྟི (ཝིབྷ. ༧༧༡). ཨེཝཾ ཨཱཡཱཔཱཡཨུཔཱཡཀོསལླཝསེན ཏིཝིདྷཱ.

ཙཏུཏྠཏྟིཀེ ཨཏྟནོ ཁནྡྷེ གཧེཏྭཱ ཨཱརདྡྷཱ ཝིཔསྶནཱ པཉྙཱ ཨཛ྄ཛྷཏྟཱབྷིནིཝེསཱ. པརསྶ ཁནྡྷེ བཱཧིརཾ ཝཱ ཨནིནྡྲིཡབདྡྷརཱུཔཾ གཧེཏྭཱ ཨཱརདྡྷཱ བཧིདྡྷཱབྷིནིཝེསཱ. ཨུབྷཡཾ གཧེཏྭཱ ཨཱརདྡྷཱ ཨཛ྄ཛྷཏྟབཧིདྡྷཱབྷིནིཝེསཱཏི ཨེཝཾ ཨཛ྄ཛྷཏྟཱབྷིནིཝེསཱདིཝསེན ཏིཝིདྷཱ.

༤༢༨. ཙཏུཀྐེསུ པཋམཙཏུཀྐེ དུཀྑསཙྩཾ ཨཱརབྦྷ པཝཏྟཾ ཉཱཎཾ དུཀྑེ ཉཱཎཾ. དུཀྑསམུདཡཾ ཨཱརབྦྷ པཝཏྟཾ ཉཱཎཾ དུཀྑསམུདཡེ ཉཱཎཾ. དུཀྑནིརོདྷཾ ཨཱརབྦྷ པཝཏྟཾ ཉཱཎཾ དུཀྑནིརོདྷེ ཉཱཎཾ. དུཀྑནིརོདྷགཱམིནིཾ པཊིཔདཾ ཨཱརབྦྷ པཝཏྟཾ ཉཱཎཾ དུཀྑནིརོདྷགཱམིནིཡཱ པཊིཔདཱཡ ཉཱཎནྟི ཨེཝཾ ཙཏཱུསུ སཙྩེསུ ཉཱཎཝསེན ཙཏུབྦིདྷཱ.

དུཏིཡཙཏུཀྐེ ཙཏསྶོ པཊིསམྦྷིདཱ ནཱམ ཨཏྠཱདཱིསུ པབྷེདགཏཱནི ཙཏྟཱརི ཉཱཎཱནི. ཝུཏྟཉྷེཏཾ – ‘‘ཨཏྠེ ཉཱཎཾ ཨཏྠཔཊིསམྦྷིདཱ. དྷམྨེ ཉཱཎཾ དྷམྨཔཊིསམྦྷིདཱ. ཏཏྲདྷམྨནིརུཏྟཱབྷིལཱཔེ ཉཱཎཾ ནིརུཏྟིཔཊིསམྦྷིདཱ. ཉཱཎེསུ ཉཱཎཾ པཊིབྷཱནཔཊིསམྦྷིདཱ’’ཏི (ཝིབྷ. ༧༡༨).

ཏཏྠ ཨཏྠོཏི སངྑེཔཏོ ཧེཏུཕལསྶེཏཾ ཨདྷིཝཙནཾ. ཧེཏུཕལཾ ཧི ཡསྨཱ ཧེཏུཨནུསཱརེན ཨརིཡཏི ཨདྷིགམིཡཏི སམྤཱཔུཎིཡཏི, ཏསྨཱ ཨཏྠོཏི ཝུཙྩཏི. པབྷེདཏོ པན ཡཾ ཀིཉྩི པཙྩཡསམྦྷཱུཏཾ, ནིབྦཱནཾ, བྷཱསིཏཏྠོ, ཝིཔཱཀོ, ཀིརིཡཱཏི ཨིམེ པཉྩ དྷམྨཱ ཨཏྠོཏི ཝེདིཏབྦཱ ¶ . ཏཾ ཨཏྠཾ པཙྩཝེཀྑནྟསྶ ཏསྨིཾ ཨཏྠེ པབྷེདགཏཾ ཉཱཎཾ ཨཏྠཔཊིསམྦྷིདཱ. དྷམྨོཏིཔི སངྑེཔཏོ པཙྩཡསྶེཏཾ ཨདྷིཝཙནཾ. པཙྩཡོ ཧི ཡསྨཱ ཏཾ ཏཾ དཧཏི པཝཏྟེཏི ཝཱ སམྤཱཔུཎིཏུཾ ཝཱ དེཏི, ཏསྨཱ དྷམྨོཏི ཝུཙྩཏི. པབྷེདཏོ ¶ པན ཡོ ཀོཙི ཕལནིབྦཏྟཀོ ཧེཏུ, ཨརིཡམགྒོ, བྷཱསིཏཾ, ཀུསལཾ, ཨཀུསལནྟི ཨིམེ པཉྩ དྷམྨཱ དྷམྨོཏི ཝེདིཏབྦཱ. ཏཾ དྷམྨཾ པཙྩཝེཀྑནྟསྶ ཏསྨིཾ དྷམྨེ པབྷེདགཏཾ ཉཱཎཾ དྷམྨཔཊིསམྦྷིདཱ.

ཨཡམེཝ ཧི ཨཏྠོ ཨབྷིདྷམྨེ –

‘‘དུཀྑེ ཉཱཎཾ ཨཏྠཔཊིསམྦྷིདཱ. དུཀྑསམུདཡེ ཉཱཎཾ དྷམྨཔཊིསམྦྷིདཱ. ཧེཏུམྷི ཉཱཎཾ དྷམྨཔཊིསམྦྷིདཱ. ཧེཏུཕལེ ཉཱཎཾ ཨཏྠཔཊིསམྦྷིདཱ. ཡེ དྷམྨཱ ཛཱཏཱ བྷཱུཏཱ སཉྫཱཏཱ ནིབྦཏྟཱ ཨབྷིནིབྦཏྟཱ པཱཏུབྷཱུཏཱ. ཨིམེསུ དྷམྨེསུ ཉཱཎཾ ཨཏྠཔཊིསམྦྷིདཱ. ཡམྷཱ དྷམྨཱ ཏེ དྷམྨཱ ཛཱཏཱ བྷཱུཏཱ སཉྫཱཏཱ ནིབྦཏྟཱ ཨབྷིནིབྦཏྟཱ པཱཏུབྷཱུཏཱ, ཏེསུ དྷམྨེསུ ཉཱཎཾ དྷམྨཔཊིསམྦྷིདཱ. ཛརཱམརཎེ ཉཱཎཾ ཨཏྠཔཊིསམྦྷིདཱ. ཛརཱམརཎསམུདཡེ ཉཱཎཾ དྷམྨཔཊིསམྦྷིདཱ…པེ… སངྑཱརནིརོདྷེ ཉཱཎཾ ཨཏྠཔཊིསམྦྷིདཱ. སངྑཱརནིརོདྷགཱམིནིཡཱ པཊིཔདཱཡ ཉཱཎཾ དྷམྨཔཊིསམྦྷིདཱ. ཨིདྷ བྷིཀྑུ དྷམྨཾ ཛཱནཱཏི སུཏྟཾ གེཡྻཾ…པེ… ཝེདལླཾ. ཨཡཾ ཝུཙྩཏི དྷམྨཔཊིསམྦྷིདཱ. སོ ཏསྶ ཏསྶེཝ བྷཱསིཏསྶ ཨཏྠཾ ཛཱནཱཏི ‘ཨཡཾ ཨིམསྶ བྷཱསིཏསྶ ཨཏྠོ, ཨཡཾ ཨིམསྶ བྷཱསིཏསྶ ཨཏྠོ’ཏི. ཨཡཾ ཝུཙྩཏི ཨཏྠཔཊིསམྦྷིདཱ. ཀཏམེ དྷམྨཱ ཀུསལཱ? ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི…པེ… ཨིམེ དྷམྨཱ ཀུསལཱ. ཨིམེསུ དྷམྨེསུ ཉཱཎཾ དྷམྨཔཊིསམྦྷིདཱ. ཏེསཾ ཝིཔཱཀེ ཉཱཎཾ ཨཏྠཔཊིསམྦྷིདཱ’’ཏིཨཱདིནཱ (ཝིབྷ. ༧༡༩ ཨཱདཡོ) ནཡེན ཝིབྷཛིཏྭཱ དསྶིཏོ.

ཏཏྲདྷམྨནིརུཏྟཱབྷིལཱཔེ ཉཱཎནྟི ཏསྨིཾ ཨཏྠེ ཙ དྷམྨེ ཙ ཡཱ སབྷཱཝནིརུཏྟི ཨབྱབྷིཙཱརཱི ཝོཧཱརོ. ཏདབྷིལཱཔེ ཏསྶ བྷཱསནེ ཨུདཱིརཎེ ཏཾ བྷཱསིཏཾ ལཔིཏཾ ཨུདཱིརིཏཾ སུཏྭཱཝ ཨཡཾ སབྷཱཝནིརུཏྟི, ཨཡཾ ན སབྷཱཝནིརུཏྟཱིཏི ཨེཝཾ ཏསྶཱ དྷམྨནིརུཏྟིསཉྙིཏཱཡ སབྷཱཝནིརུཏྟིཡཱ མཱགདྷིཀཱཡ སབྦསཏྟཱནཾ མཱུལབྷཱསཱཡ པབྷེདགཏཾ ཉཱཎཾ ནིརུཏྟིཔཊིསམྦྷིདཱ. ནིརུཏྟིཔཊིསམྦྷིདཱཔྤཏྟོ ཧི ཕསྶོ ཝེདནཱཏི ཨེཝམཱདིཝཙནཾ སུཏྭཱཝ ཨཡཾ སབྷཱཝནིརུཏྟཱིཏི ཛཱནཱཏི. ཕསྶཱ ཝེདནོཏི ཨེཝམཱདིཀཾ པན ཨཡཾ ན སབྷཱཝནིརུཏྟཱིཏི.

ཉཱཎེསུ ¶ ¶ ཉཱཎནྟི སབྦཏྠ ཉཱཎམཱརམྨཎཾ ཀཏྭཱ པཙྩཝེཀྑནྟསྶ ཉཱཎཱརམྨཎཾ ཉཱཎཾ, ཡཐཱཝུཏྟེསུ ཝཱ ཏེསུ ཉཱཎེསུ སགོཙརཀིཙྩཱདིཝསེན ཝིཏྠཱརཏོ ཉཱཎཾ པཊིབྷཱནཔཊིསམྦྷིདཱཏི ཨཏྠོ.

༤༢༩. ཙཏསྶོཔི ཙེཏཱ པཊིསམྦྷིདཱ དྭཱིསུ ཋཱནེསུ པབྷེདཾ གཙྪནྟི སེཀྑབྷཱུམིཡཉྩ ཨསེཀྑབྷཱུམིཡཉྩ.

ཏཏྠ ཨགྒསཱཝཀཱནཾ མཧཱསཱཝཀཱནཉྩ ཨསེཀྑབྷཱུམིཡཾ པབྷེདགཏཱ. ཨཱནནྡཏྠེརཙིཏྟགཧཔཏིདྷམྨིཀཨུཔཱསཀཨུཔཱལིགཧཔཏིཁུཛྫུཏྟརཱཨུཔཱསིཀཱདཱིནཾ སེཀྑབྷཱུམིཡཾ. ཨེཝཾ དྭཱིསུ བྷཱུམཱིསུ པབྷེདཾ གཙྪནྟིཡོཔི ཙེཏཱ ཨདྷིགམེན པརིཡཏྟིཡཱ སཝནེན པརིཔུཙྪཱཡ པུབྦཡོགེན ཙཱཏི ཨིམེཧི པཉྩཧཱཀཱརེཧི ཝིསདཱ ཧོནྟི.

ཏཏྠ ཨདྷིགམོ ནཱམ ཨརཧཏྟཔྤཏྟི. པརིཡཏྟི ནཱམ བུདྡྷཝཙནསྶ པརིཡཱཔུཎནཾ. སཝནཾ ནཱམ སཀྐཙྩཾ ཨཏྠིཾ ཀཏྭཱ དྷམྨསྶཝནཾ. པརིཔུཙྪཱ ནཱམ པཱལི༹ཨཊྛཀཐཱདཱིསུ གཎྛིཔདཨཏྠཔདཝིནིཙྪཡཀཐཱ, པུབྦཡོགོ ནཱམ པུབྦབུདྡྷཱནཾ སཱསནེ གཏཔཙྩཱགཏིཀབྷཱཝེན ཡཱཝ ཨནུལོམཾ གོཏྲབྷུསམཱིཔཾ, ཏཱཝ ཝིཔསྶནཱནུཡོགོ.

ཨཔརེ ཨཱཧུ –

‘‘པུབྦཡོགོ བཱཧུསཙྩཾ, དེསབྷཱསཱ ཙ ཨཱགམོ;

པརིཔུཙྪཱ ཨདྷིགམོ, གརུསནྣིསྶཡོ ཏཐཱ;

མིཏྟསམྤཏྟི ཙེཝཱཏི, པཊིསམྦྷིདཔཙྩཡཱ’’ཏི.

ཏཏྠ པུབྦཡོགོ ཝུཏྟནཡོཝ. བཱཧུསཙྩཾ ནཱམ ཏེསུ ཏེསུ སཏྠེསུ ཙ སིཔྤཱཡཏནེསུ ཙ ཀུསལཏཱ. དེསབྷཱསཱ ནཱམ ཨེཀསཏཝོཧཱརཀུསལཏཱ. ཝིསེསེན པན མཱགདྷིཀེ ཀོསལླཾ. ཨཱགམོ ནཱམ ཨནྟམསོ ཨོཔམྨཝགྒམཏྟསྶཔི བུདྡྷཝཙནསྶ པརིཡཱཔུཎནཾ. པརིཔུཙྪཱ ནཱམ ཨེཀགཱཐཱཡཔི ཨཏྠཝིནིཙྪཡཔུཙྪནཾ. ཨདྷིགམོ ནཱམ སོཏཱཔནྣཏཱ ཝཱ…པེ… ཨརཧཏྟཾ ཝཱ. གརུསནྣིསྶཡོ ¶ ནཱམ སུཏཔཊིབྷཱནབཧུལཱནཾ གརཱུནཾ སནྟིཀེ ཝཱསོ. མིཏྟསམྤཏྟི ནཱམ ཏཐཱརཱུཔཱནཾཡེཝ མིཏྟཱནཾ པཊིལཱབྷོཏི.

ཏཏྠ བུདྡྷཱ ཙ པཙྩེཀབུདྡྷཱ ཙ པུབྦཡོགཉྩེཝ ཨདྷིགམཉྩ ནིསྶཱཡ པཊིསམྦྷིདཱ པཱཔུཎནྟི. སཱཝཀཱ སབྦཱནིཔི ཨེཏཱནི ཀཱརཎཱནི. པཊིསམྦྷིདཱཔྤཏྟིཡཱ ཙ པཱཊིཡེཀྐོ ¶ ཀམྨཊྛཱནབྷཱཝནཱནུཡོགོ ནཱམ ནཏྠི. སེཀྑཱནཾ པན སེཀྑཕལཝིམོཀྑནྟིཀཱ. ཨསེཀྑཱནཾ ཨསེཀྑཕལཝིམོཀྑནྟིཀཱཝ པཊིསམྦྷིདཱཔྤཏྟི ཧོཏི. ཏཐཱགཏཱནཾ ཧི དསབལཱནི ཝིཡ ཨརིཡཱནཾ ཨརིཡཕལེནེཝ པཊིསམྦྷིདཱ ཨིཛ྄ཛྷནྟཱིཏི ཨིམཱ པཊིསམྦྷིདཱ སནྡྷཱཡ ཝུཏྟཾ ཙཏུཔཊིསམྦྷིདཱཝསེན ཙཏུབྦིདྷཱཏི.

པཉྙཱབྷཱུམི-མཱུལ-སརཱིརཝཝཏྠཱནཾ

༤༣༠. ཀཐཾ བྷཱཝེཏབྦཱཏི ཨེཏྠ པན ཡསྨཱ ཨིམཱཡ པཉྙཱཡ ཁནྡྷཱཡཏནདྷཱཏུཨིནྡྲིཡསཙྩཔཊིཙྩསམུཔྤཱདཱདིབྷེདཱ དྷམྨཱ བྷཱུམི. སཱིལཝིསུདྡྷི ཙེཝ ཙིཏྟཝིསུདྡྷི ཙཱཏི ཨིམཱ དྭེ ཝིསུདྡྷིཡོ མཱུལཾ. དིཊྛིཝིསུདྡྷི, ཀངྑཱཝིཏརཎཝིསུདྡྷི, མགྒཱམགྒཉཱཎདསྶནཝིསུདྡྷི, པཊིཔདཱཉཱཎདསྶནཝིསུདྡྷི, ཉཱཎདསྶནཝིསུདྡྷཱིཏི ཨིམཱ པཉྩ ཝིསུདྡྷིཡོ སརཱིརཾ. ཏསྨཱ ཏེསུ བྷཱུམིབྷཱུཏེསུ དྷམྨེསུ ཨུགྒཧཔརིཔུཙྪཱཝསེན ཉཱཎཔརིཙཡཾ ཀཏྭཱ མཱུལབྷཱུཏཱ དྭེ ཝིསུདྡྷིཡོ སམྤཱདེཏྭཱ སརཱིརབྷཱུཏཱ པཉྩ ཝིསུདྡྷིཡོ སམྤཱདེནྟེན བྷཱཝེཏབྦཱ. ཨཡམེཏྠ སངྑེཔོ.

༤༣༡. ཨཡཾ པན ཝིཏྠཱརོ, ཡཾ ཏཱཝ ཝུཏྟཾ ‘‘ཁནྡྷཱཡཏནདྷཱཏུཨིནྡྲིཡསཙྩཔཊིཙྩསམུཔྤཱདཱདིབྷེདཱ དྷམྨཱ བྷཱུམཱི’’ཏི, ཨེཏྠ ཁནྡྷཱཏི པཉྩ ཁནྡྷཱ རཱུཔཀྑནྡྷོ ཝེདནཱཀྑནྡྷོ སཉྙཱཀྑནྡྷོ སངྑཱརཀྑནྡྷོ ཝིཉྙཱཎཀྑནྡྷོཏི.

རཱུཔཀྑནྡྷཀཐཱ

༤༣༢. ཏཏྠ ཡཾ ཀིཉྩི སཱིཏཱདཱིཧི རུཔྤནལཀྑཎཾ དྷམྨཛཱཏཾ, སབྦཾ ཏཾ ཨེཀཏོ ཀཏྭཱ རཱུཔཀྑནྡྷོཏི ཝེདིཏབྦཾ.

ཏདེཏཾ རུཔྤནལཀྑཎེན ཨེཀཝིདྷམྤི བྷཱུཏོཔཱདཱཡབྷེདཏོ དུཝིདྷཾ.

ཏཏྠ ¶ བྷཱུཏརཱུཔཾ ཙཏུབྦིདྷཾ – པཐཝཱིདྷཱཏུ ཨཱཔོདྷཱཏུ ཏེཛོདྷཱཏུ ཝཱཡོདྷཱཏཱུཏི. ཏཱསཾ ལཀྑཎརསཔཙྩུཔཊྛཱནཱནི ཙཏུདྷཱཏུཝཝཏྠཱནེ ཝུཏྟཱནི. པདཊྛཱནཏོ པན ཏཱ སབྦཱཔི ཨཝསེསདྷཱཏུཏྟཡཔདཊྛཱནཱ.

ཨུཔཱདཱརཱུཔཾ ཙཏུཝཱིསཏིཝིདྷཾ – ཙཀྑུ, སོཏཾ, གྷཱནཾ, ཛིཝ྄ཧཱ, ཀཱཡོ, རཱུཔཾ, སདྡོ, གནྡྷོ, རསོ, ཨིཏྠིནྡྲིཡཾ, པུརིསིནྡྲིཡཾ, ཛཱིཝིཏིནྡྲིཡཾ, ཧདཡཝཏྠུ, ཀཱཡཝིཉྙཏྟི, ཝཙཱིཝིཉྙཏྟི, ཨཱཀཱསདྷཱཏུ, རཱུཔསྶ ལཧུཏཱ, རཱུཔསྶ མུདུཏཱ ¶ , རཱུཔསྶ ཀམྨཉྙཏཱ, རཱུཔསྶ ཨུཔཙཡོ, རཱུཔསྶ སནྟཏི, རཱུཔསྶ ཛརཏཱ, རཱུཔསྶ ཨནིཙྩཏཱ, ཀབལཱི༹ཀཱརོ ཨཱཧཱརོཏི.

༤༣༣. ཏཏྠ རཱུཔཱབྷིགྷཱཏཱརཧཏཔྤསཱདལཀྑཎཾ དཊྛུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎཾ ཝཱ ཙཀྑུ, རཱུཔེསུ ཨཱཝིཉྪནརསཾ, ཙཀྑུཝིཉྙཱཎསྶ ཨཱདྷཱརབྷཱཝཔཙྩུཔཊྛཱནཾ, དཊྛུཀཱམཏཱནིདཱནཀམྨཛབྷཱུཏཔདཊྛཱནཾ.

སདྡཱབྷིགྷཱཏཱརཧབྷཱུཏཔྤསཱདལཀྑཎཾ, སོཏུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎཾ ཝཱ སོཏཾ, སདྡེསུ ཨཱཝིཉྪནརསཾ, སོཏཝིཉྙཱཎསྶ ཨཱདྷཱརབྷཱཝཔཙྩུཔཊྛཱནཾ, སོཏུཀཱམཏཱནིདཱནཀམྨཛབྷཱུཏཔདཊྛཱནཾ.

གནྡྷཱབྷིགྷཱཏཱརཧབྷཱུཏཔྤསཱདལཀྑཎཾ, གྷཱཡིཏུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎཾ ཝཱ གྷཱནཾ, གནྡྷེསུ ཨཱཝིཉྪནརསཾ, གྷཱནཝིཉྙཱཎསྶ ཨཱདྷཱརབྷཱཝཔཙྩུཔཊྛཱནཾ, གྷཱཡིཏུཀཱམཏཱནིདཱནཀམྨཛབྷཱུཏཔདཊྛཱནཾ.

རསཱབྷིགྷཱཏཱརཧབྷཱུཏཔྤསཱདལཀྑཎཱ, སཱཡིཏུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎཱ ཝཱ ཛིཝ྄ཧཱ, རསེསུ ཨཱཝིཉྪནརསཱ, ཛིཝ྄ཧཱཝིཉྙཱཎསྶ ཨཱདྷཱརབྷཱཝཔཙྩུཔཊྛཱནཱ, སཱཡིཏུཀཱམཏཱནིདཱནཀམྨཛབྷཱུཏཔདཊྛཱནཱ.

ཕོཊྛབྦཱབྷིགྷཱཏཱརཧབྷཱུཏཔྤསཱདལཀྑཎོ, ཕུསིཏུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎོ ཝཱ ཀཱཡོ, ཕོཊྛབྦེསུ ཨཱཝིཉྪནརསོ, ཀཱཡཝིཉྙཱཎསྶ ཨཱདྷཱརབྷཱཝཔཙྩུཔཊྛཱནོ, ཕུསིཏུཀཱམཏཱནིདཱནཀམྨཛབྷཱུཏཔདཊྛཱནོ.

༤༣༤. ཀེཙི ¶ པན ‘‘ཏེཛཱདྷིཀཱནཾ བྷཱུཏཱནཾ པསཱདོ ཙཀྑུ, ཝཱཡུཔཐཝཱིཨཱཔཱདྷིཀཱནཾ བྷཱུཏཱནཾ པསཱདཱ སོཏགྷཱནཛིཝ྄ཧཱ, ཀཱཡོ སབྦེསམྤཱི’’ཏི ཝདནྟི. ཨཔརེ ‘‘ཏེཛཱདྷིཀཱནཾ པསཱདོ ཙཀྑུ, ཝིཝརཝཱཡུཨཱཔཔཐཝཱདྷིཀཱནཾ སོཏགྷཱནཛིཝ྄ཧཱཀཱཡཱ’’ཏི ཝདནྟི. ཏེ ཝཏྟབྦཱ ‘‘སུཏྟཾ ཨཱཧརཐཱ’’ཏི. ཨདྡྷཱ སུཏྟམེཝ ན དཀྑིསྶནྟི. ཀེཙི པནེཏྠ ‘‘ཏེཛཱདཱིནཾ གུཎེཧི རཱུཔཱདཱིཧི ཨནུགཡ྄ཧབྷཱཝཏོ’’ཏི ཀཱརཎཾ དསྶེནྟི. ཏེ ཝཏྟབྦཱ ‘‘ཀོ པནེཝམཱཧརཱུཔཱདཡོ ཏེཛཱདཱིནཾ གུཎཱ’ཏི. ཨཝིནིབྦྷོགཝུཏྟཱིསུ ཧི བྷཱུཏེསུ ཨཡཾ ཨིམསྶ གུཎོ ཨཡཾ ཨིམསྶ གུཎོཏི ན ལབྦྷཱ ཝཏྟུ’’ནྟི. ཨཐཱཔི ཝདེཡྻུཾ ‘‘ཡཐཱ ཏེསུ ཏེསུ སམྦྷཱརེསུ ཏསྶ ཏསྶ ¶ བྷཱུཏསྶ ཨདྷིཀཏཱཡ པཐཝཱིཨཱདཱིནཾ སནྡྷཱརཎཱདཱིནི ཀིཙྩཱནི ཨིཙྪཐ, ཨེཝཾ ཏེཛཱདིཨདྷིཀེསུ སམྦྷཱརེསུ རཱུཔཱདཱིནཾ ཨདྷིཀབྷཱཝདསྶནཏོ ཨིཙྪིཏབྦམེཏཾ རཱུཔཱདཡོ ཏེསཾ གུཎཱ’’ཏི. ཏེ ཝཏྟབྦཱ ‘‘ཨིཙྪེཡྻཱམ, ཡདི ཨཱཔཱདྷིཀསྶ ཨཱསཝསྶ གནྡྷཏོ པཐཝཱིཨདྷིཀེ ཀཔྤཱསེ གནྡྷོ ཨདྷིཀཏརོ སིཡཱ, ཏེཛཱདྷིཀསྶ ཙ ཨུཎྷོདཀསྶ ཝཎྞཏོ སཱིཏུདཀསྶ ཝཎྞོ པརིཧཱཡེཐ’’. ཡསྨཱ པནེཏཾ ཨུབྷཡམྤི ནཏྠི, ཏསྨཱ པཧཱཡེཏཾ ཨེཏེསཾ ནིསྶཡབྷཱུཏཱནཾ ཝིསེསཀཔྤནཾ, ‘‘ཡཐཱ ཨཝིསེསེཔི ཨེཀཀལཱཔེ བྷཱུཏཱནཾ རཱུཔརསཱདཡོ ཨཉྙམཉྙཾ ཝིསདིསཱ ཧོནྟི, ཨེཝཾ ཙཀྑུཔསཱདཱདཡོ ཨཝིཛྫམཱནེཔི ཨཉྙསྨིཾ ཝིསེསཀཱརཎེ’’ཏི གཧེཏབྦམེཏཾ.

ཀིཾ པན ཏཾ ཡཾ ཨཉྙམཉྙསྶ ཨསཱདྷཱརཎཾ? ཀམྨམེཝ ནེསཾ ཝིསེསཀཱརཎཾ. ཏསྨཱ ཀམྨཝིསེསཏོ ཨེཏེསཾ ཝིསེསོ, ན བྷཱུཏཝིསེསཏོ. བྷཱུཏཝིསེསེ ཧི སཏི པསཱདོཝ ན ཨུཔྤཛྫཏི. སམཱནཱནཉྷི པསཱདོ, ན ཝིསམཱནཱནནྟི པོརཱཎཱ.

༤༣༥. ཨེཝཾ ཀམྨཝིསེསཏོ ཝིསེསཝནྟེསུ ཙ ཨེཏེསུ ཙཀྑུསོཏཱནི ཨསམྤཏྟཝིསཡགཱཧཀཱནི, ཨཏྟནོ ནིསྶཡཾ ཨནལླཱིནནིསྶཡེ ཨེཝ ཝིསཡེ ཝིཉྙཱཎཧེཏུཏྟཱ. གྷཱནཛིཝ྄ཧཱཀཱཡཱ སམྤཏྟཝིསཡགཱཧཀཱ, ནིསྶཡཝསེན ཙེཝ, སཡཉྩ, ཨཏྟནོ ནིསྶཡཾ ཨལླཱིནེཡེཝ ཝིསཡེ ཝིཉྙཱཎཧེཏུཏྟཱ.

༤༣༦. ཙཀྑུ ཙེཏྠ ཡདེཏཾ ལོཀེ ནཱིལཔཁུམསམཱཀིཎྞཀཎྷསུཀྐམཎྜལཝིཙིཏྟཾ ནཱིལུཔྤལདལསནྣིབྷཾ ཙཀྑཱུཏི ཝུཙྩཏི. ཏསྶ སསམྦྷཱརཙཀྑུནོ སེཏམཎྜལཔརིཀྑིཏྟསྶ ཀཎྷམཎྜལསྶ མཛ྄ཛྷེ ཨབྷིམུཁེ ཋིཏཱནཾ སརཱིརསཎྛཱནུཔྤཏྟིཔདེསེ སཏྟསུ པིཙུཔཊལེསུ ཨཱསིཏྟཏེལཾ པིཙུཔཊལཱནི ཝིཡ སཏྟ ཨཀྑིཔཊལཱནིབྱཱཔེཏྭཱ དྷཱརཎནྷཱཔནམཎྜནབཱིཛནཀིཙྩཱཧི ¶ ཙཏཱུཧི དྷཱཏཱིཧི ཁཏྟིཡཀུམཱརོ ཝིཡ སནྡྷཱརཎབནྡྷནཔརིཔཱཙནསམུདཱིརཎཀིཙྩཱཧི ཙཏཱུཧི དྷཱཏཱུཧི ཀཏཱུཔཀཱརཾ ཨུཏུཙིཏྟཱཧཱརེཧི ཨུཔཏྠམྦྷིཡམཱནཾ ཨཱཡུནཱ ཨནུཔཱལིཡམཱནཾ ¶ ཝཎྞགནྡྷརསཱདཱིཧི པརིཝུཏཾ པམཱཎཏོ ཨཱུཀཱསིརམཏྟཾ ཙཀྑུཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཾ ཏིཊྛཏི. ཝུཏྟམྤི ཙེཏཾ དྷམྨསེནཱཔཏིནཱ –

‘‘ཡེན ཙཀྑུཔསཱདེན, རཱུཔཱནི མནུཔསྶཏི;

པརིཏྟཾ སུཁུམཾ ཨེཏཾ, ཨཱུཀཱསིརསམཱུཔམ’’ནྟི.

སསམྦྷཱརསོཏབིལསྶ ཨནྟོ ཏནུཏམྦལོམཱཙིཏེ ཨངྒུལིཝེདྷཀསཎྛཱནེ པདེསེ སོཏཾ ཝུཏྟཔྤཀཱརཱཧི དྷཱཏཱུཧི ཀཏཱུཔཀཱརཾ ཨུཏུཙིཏྟཱཧཱརེཧི ཨུཔཏྠམྦྷིཡམཱནཾ ཨཱཡུནཱ ཨནུཔཱལིཡམཱནཾ ཝཎྞཱདཱིཧི པརིཝུཏཾ སོཏཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཾ ཏིཊྛཏི.

སསམྦྷཱརགྷཱནབིལསྶ ཨནྟོ ཨཛཔདསཎྛཱནེ པདེསེ གྷཱནཾ ཡཐཱཝུཏྟཔྤཀཱརུཔཀཱརུཔཏྠམྦྷནཱནུཔཱལནཔརིཝཱརཾ གྷཱནཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཾ ཏིཊྛཏི.

སསམྦྷཱརཛིཝ྄ཧཱམཛ྄ཛྷསྶ ཨུཔརི ཨུཔྤལདལགྒསཎྛཱནེ པདེསེ ཛིཝ྄ཧཱ ཡཐཱཝུཏྟཔྤཀཱརུཔཀཱརུཔཏྠམྦྷནཱནུཔཱལནཔརིཝཱརཱ ཛིཝ྄ཧཱཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནཱ ཏིཊྛཏི.

ཡཱཝཏཱ པན ཨིམསྨིཾ ཀཱཡེ ཨུཔཱདིཎྞརཱུཔཾ ནཱམ ཨཏྠི. སབྦཏྠ ཀཱཡོ ཀཔྤཱསཔཊལེ སྣེཧོ ཝིཡ ཝུཏྟཔྤཀཱརུཔཀཱརུཔཏྠམྦྷནཱནུཔཱལནཔརིཝཱརོཝ ཧུཏྭཱ ཀཱཡཝིཉྙཱཎཱདཱིནཾ ཡཐཱརཧཾ ཝཏྠུདྭཱརབྷཱཝཾ སཱདྷཡམཱནོ ཏིཊྛཏི.

ཝམྨིཀཨུདཀཱཀཱསགཱམསིཝཐིཀསངྑཱཏསགོཙརནིནྣཱ ཝིཡ ཙ ཨཧིསུསུམཱརཔཀྑཱིཀུཀྐུརསིངྒཱལཱརཱུཔཱདིསགོཙརནིནྣཱཝ ཨེཏེ ཙཀྑཱདཡོཏི དཊྛབྦཱ.

༤༣༧. ཏཏོ པརེསུ པན རཱུཔཱདཱིསུ ཙཀྑུཔཊིཧནནལཀྑཎཾ རཱུཔཾ, ཙཀྑུཝིཉྙཱཎསྶ ཝིསཡབྷཱཝརསཾ ¶ , ཏསྶེཝ གོཙརཔཙྩུཔཊྛཱནཾ, ཙཏུམཧཱབྷཱུཏཔདཊྛཱནཾ. ཡཐཱ ཙེཏཾ ཏཐཱ སབྦཱནིཔི ཨུཔཱདཱརཱུཔཱནི. ཡཏྠ པན ཝིསེསོ ཨཏྠི, ཏཏྠ ཝཀྑཱམ. ཏཡིདཾ ནཱིལཾ པཱིཏཀནྟིཨཱདིཝསེན ཨནེཀཝིདྷཾ.

སོཏཔཊིཧནནལཀྑཎོ ¶ སདྡོ, སོཏཝིཉྙཱཎསྶ ཝིསཡབྷཱཝརསོ, ཏསྶེཝ གོཙརཔཙྩུཔཊྛཱནོ. བྷེརིསདྡོ མུདིངྒསདྡོཏིཨཱདིནཱ ནཡེན ཨནེཀཝིདྷོ.

གྷཱནཔཊིཧནནལཀྑཎོ གནྡྷོ, གྷཱནཝིཉྙཱཎསྶ ཝིསཡབྷཱཝརསོ, ཏསྶེཝ གོཙརཔཙྩུཔཊྛཱནོ. མཱུལགནྡྷོ སཱརགནྡྷོཏིཨཱདིནཱ ནཡེན ཨནེཀཝིདྷོ.

ཛིཝ྄ཧཱཔཊིཧནནལཀྑཎོ རསོ, ཛིཝ྄ཧཱཝིཉྙཱཎསྶ ཝིསཡབྷཱཝརསོ, ཏསྶེཝ གོཙརཔཙྩུཔཊྛཱནོ. མཱུལརསོ ཁནྡྷརསོཏིཨཱདིནཱ ནཡེན ཨནེཀཝིདྷོ.

༤༣༨. ཨིཏྠིབྷཱཝལཀྑཎཾ ཨིཏྠིནྡྲིཡཾ, ཨིཏྠཱིཏི པཀཱསནརསཾ, ཨིཏྠིལིངྒནིམིཏྟཀུཏྟཱཀཔྤཱནཾ ཀཱརཎབྷཱཝཔཙྩུཔཊྛཱནཾ. པུརིསབྷཱཝལཀྑཎཾ པུརིསིནྡྲིཡཾ, པུརིསོཏི པཀཱསནརསཾ, པུརིསལིངྒནིམིཏྟཀུཏྟཱཀཔྤཱནཾ ཀཱརཎབྷཱཝཔཙྩུཔཊྛཱནཾ. ཏདུབྷཡམྤི ཀཱཡཔྤསཱདོ ཝིཡ སཀལསརཱིརཾ བྱཱཔཀམེཝ, ན ཙ ཀཱཡཔསཱདེན ཋིཏོཀཱསེ ཋིཏནྟི ཝཱ ཨཊྛིཏོཀཱསེ ཋིཏནྟི ཝཱཏི ཝཏྟབྦཏཾ ཨཱཔཛྫཏི, རཱུཔརསཱདཡོ ཝིཡ ཨཉྙམཉྙཾ སངྐརོ ནཏྠི.

༤༣༩. སཧཛརཱུཔཱནུཔཱལནལཀྑཎཾ ཛཱིཝིཏིནྡྲིཡཾ, ཏེསཾ པཝཏྟནརསཾ, ཏེསཉྙེཝ ཋཔནཔཙྩུཔཊྛཱནཾ, ཡཱཔཡིཏབྦབྷཱུཏཔདཊྛཱནཾ. སནྟེཔི ཙ ཨནུཔཱལནལཀྑཎཱདིམྷི ཝིདྷཱནེ ཨཏྠིཀྑཎེཡེཝ ཏཾ སཧཛརཱུཔཱནི ཨནུཔཱལེཏི ཨུདཀཾ ཝིཡ ཨུཔྤལཱདཱིནི. ཡཐཱསཀཾ པཙྩཡུཔྤནྣེཔི ཙ དྷམྨེ པཱལེཏི དྷཱཏི ཝིཡ ཀུམཱརཾ. སཡཾ པཝཏྟིཏདྷམྨསམྦནྡྷེནེཝ ཙ པཝཏྟཏི ནིཡཱམཀོ ཝིཡ. ན བྷངྒཏོ ཨུདྡྷཾ པཝཏྟཏི, ཨཏྟནོ ཙ པཝཏྟཡིཏབྦཱནཉྩ ཨབྷཱཝཱ. ན བྷངྒཀྑཎེ ཋཔེཏི, སཡཾ བྷིཛྫམཱནཏྟཱ. ཁཱིཡམཱནོ ཝིཡ ཝཊྚིསྣེཧོ དཱིཔསིཁཾ. ན ཙ ཨནུཔཱལནཔཝཏྟནཊྛཔནཱནུབྷཱཝཝིརཧིཏཾ, ཡཐཱཝུཏྟཀྑཎེ ཏསྶ ཏསྶ སཱདྷནཏོཏི དཊྛབྦཾ.

༤༤༠. མནོདྷཱཏུམནོཝིཉྙཱཎདྷཱཏཱུནཾ ནིསྶཡལཀྑཎཾ ཧདཡཝཏྠུ, ཏཱསཉྙེཝ དྷཱཏཱུནཾ ཨཱདྷཱརཎརསཾ ¶ , ཨུབྦཧནཔཙྩུཔཊྛཱནཾ. ཧདཡསྶ ཨནྟོ ཀཱཡགཏཱསཏིཀཐཱཡཾ ¶ ཝུཏྟཔྤཀཱརཾ ལོཧིཏཾ ནིསྶཱཡ སནྡྷཱརཎཱདིཀིཙྩེཧི བྷཱུཏེཧི ཀཏཱུཔཀཱརཾ ཨུཏུཙིཏྟཱཧཱརེཧི ཨུཔཏྠམྦྷིཡམཱནཾ ཨཱཡུནཱ ཨནུཔཱལིཡམཱནཾ མནོདྷཱཏུམནོཝིཉྙཱཎདྷཱཏཱུནཉྩེཝ ཏཾསམྤཡུཏྟདྷམྨཱནཉྩ ཝཏྠུབྷཱཝཾ སཱདྷཡམཱནཾ ཏིཊྛཏི.

༤༤༡. ཨབྷིཀྐམཱདིཔཝཏྟཀཙིཏྟསམུཊྛཱནཝཱཡོདྷཱཏུཡཱ སཧཛརཱུཔཀཱཡཐམྦྷནསནྡྷཱརཎཙལནསྶ པཙྩཡོ ཨཱཀཱརཝིཀཱརོ ཀཱཡཝིཉྙཏྟི, ཨདྷིཔྤཱཡཔཀཱསནརསཱ, ཀཱཡཝིཔྥནྡནཧེཏུབྷཱཝཔཙྩུཔཊྛཱནཱ, ཙིཏྟསམུཊྛཱནཝཱཡོདྷཱཏུཔདཊྛཱནཱ. སཱ པནེསཱ ཀཱཡཝིཔྥནྡནེན ཨདྷིཔྤཱཡཝིཉྙཱཔནཧེཏུཏྟཱ, སཡཉྩ ཏེན ཀཱཡཝིཔྥནྡནསངྑཱཏེན ཀཱཡེན ཝིཉྙེཡྻཏྟཱ ‘‘ཀཱཡཝིཉྙཏྟཱི’’ཏི ཝུཙྩཏི. ཏཱཡ ཙ པན ཙལིཏེཧི ཙིཏྟཛརཱུཔེཧི ཨབྷིསམྦནྡྷཱནཾ ཨུཏུཛཱདཱིནམྤི ཙལནཏོ ཨབྷིཀྐམཱདཡོ པཝཏྟནྟཱིཏི ཝེདིཏབྦཱ.

ཝཙཱིབྷེདཔཝཏྟཀཙིཏྟསམུཊྛཱནཔཐཝཱིདྷཱཏུཡཱ ཨུཔཱདིཎྞགྷཊྚནསྶ པཙྩཡོ ཨཱཀཱརཝིཀཱརོ ཝཙཱིཝིཉྙཏྟི, ཨདྷིཔྤཱཡཔྤཀཱསནརསཱ, ཝཙཱིགྷོསཧེཏུབྷཱཝཔཙྩུཔཊྛཱནཱ, ཙིཏྟསམུཊྛཱནཔཐཝཱིདྷཱཏུཔདཊྛཱནཱ. སཱ པནེསཱ ཝཙཱིགྷོསེན ཨདྷིཔྤཱཡཝིཉྙཱཔནཧེཏུཏྟཱ, སཡཉྩ ཏཱཡ ཝཙཱིགྷོསསངྑཱཏཱཡ ཝཱཙཱཡ ཝིཉྙེཡྻཏྟཱ ‘‘ཝཙཱིཝིཉྙཏྟཱི’’ཏི ཝུཙྩཏི. ཡཐཱ ཧི ཨརཉྙེ ཨུསྶཱཔེཏྭཱ བནྡྷགོསཱིསཱདིཨུདཀནིམིཏྟཾ དིསྭཱ ཨུདཀམེཏྠ ཨཏྠཱིཏི ཝིཉྙཱཡཏི, ཨེཝཾ ཀཱཡཝིཔྥནྡནཉྩེཝ ཝཙཱིགྷོསཉྩ གཧེཏྭཱ ཀཱཡཝཙཱིཝིཉྙཏྟིཡོཔི ཝིཉྙཱཡནྟི.

༤༤༢. རཱུཔཔརིཙྪེདལཀྑཎཱ ཨཱཀཱསདྷཱཏུ, རཱུཔཔརིཡནྟཔྤཀཱསནརསཱ, རཱུཔམརིཡཱདཱཔཙྩུཔཊྛཱནཱ, ཨསམྥུཊྛབྷཱཝཙྪིདྡཝིཝརབྷཱཝཔཙྩུཔཊྛཱནཱ ཝཱ, པརིཙྪིནྣརཱུཔཔདཊྛཱནཱ. ཡཱཡ པརིཙྪིནྣེསུ རཱུཔེསུ ཨིདམིཏོ ཨུདྡྷམདྷོ ཏིརིཡནྟི ཙ ཧོཏི.

༤༤༣. ཨདནྡྷཏཱལཀྑཎཱ རཱུཔསྶ ལཧུཏཱ, རཱུཔཱནཾ གརུབྷཱཝཝིནོདནརསཱ, ལཧུཔརིཝཏྟིཏཱཔཙྩུཔཊྛཱནཱ, ལཧུརཱུཔཔདཊྛཱནཱ. ཨཐདྡྷཏཱལཀྑཎཱ རཱུཔསྶ མུདུཏཱ, རཱུཔཱནཾ ཐདྡྷབྷཱཝཝིནོདནརསཱ, སབྦཀིརིཡཱསུ ཨཝིརོདྷིཏཱཔཙྩུཔཊྛཱནཱ, མུདུརཱུཔཔདཊྛཱནཱ. སརཱིརཀིརིཡཱནུཀཱུལཀམྨཉྙབྷཱཝལཀྑཎཱ རཱུཔསྶ ¶ ཀམྨཉྙཏཱ, ཨཀམྨཉྙཏཱཝིནོདནརསཱ, ཨདུབྦལབྷཱཝཔཙྩུཔཊྛཱནཱ, ཀམྨཉྙརཱུཔཔདཊྛཱནཱ.

ཨེཏཱ ¶ པན ཏིསྶོ ན ཨཉྙམཉྙཾ ཝིཛཧནྟི, ཨེཝཾ སནྟེཔི ཡོ ཨརོགིནོ ཝིཡ རཱུཔཱནཾ ལཧུབྷཱཝོ ཨདནྡྷཏཱ ལཧུཔརིཝཏྟིཔྤཀཱརོ རཱུཔདནྡྷཏྟཀརདྷཱཏུཀྑོབྷཔཊིཔཀྑཔཙྩཡསམུཊྛཱནོ, སོ རཱུཔཝིཀཱརོ རཱུཔསྶ ལཧུཏཱ. ཡོ པན སུཔརིམདྡིཏཙམྨསྶེཝ རཱུཔཱནཾ མུདུབྷཱཝོ སབྦཀིརིཡཱཝིསེསེསུ ཝསཝཏྟནབྷཱཝམདྡཝཔྤཀཱརོ རཱུཔཏྠདྡྷཏྟཀརདྷཱཏུཀྑོབྷཔཊིཔཀྑཔཙྩཡསམུཊྛཱནོ, སོ རཱུཔཝིཀཱརོ རཱུཔསྶ མུདུཏཱ. ཡོ པན སུདནྟསུཝཎྞསྶེཝ རཱུཔཱནཾ ཀམྨཉྙབྷཱཝོ སརཱིརཀིརིཡཱནུཀཱུལབྷཱཝཔྤཀཱརོ སརཱིརཀིརིཡཱནཾ ཨནནུཀཱུལཀརདྷཱཏུཀྑོབྷཔཊིཔཀྑཔཙྩཡསམུཊྛཱནོ, སོ རཱུཔཝིཀཱརོ རཱུཔསྶ ཀམྨཉྙཏཱཏི ཨེཝམེཏཱསཾ ཝིསེསོ ཝེདིཏབྦོ.

༤༤༤. ཨཱཙཡལཀྑཎོ རཱུཔསྶ ཨུཔཙཡོ, པུབྦནྟཏོ རཱུཔཱནཾ ཨུམྨུཛྫཱཔནརསོ, ནིཡྻཱཏནཔཙྩུཔཊྛཱནོ, པརིཔུཎྞབྷཱཝཔཙྩུཔཊྛཱནོ ཝཱ, ཨུཔཙིཏརཱུཔཔདཊྛཱནོ. པཝཏྟིལཀྑཎཱ རཱུཔསྶ སནྟཏི, ཨནུཔྤབནྡྷནརསཱ, ཨནུཔཙྪེདཔཙྩུཔཊྛཱནཱ, ཨནུཔྤབནྡྷཀརཱུཔཔདཊྛཱནཱ. ཨུབྷཡམྤེཏཾ ཛཱཏིརཱུཔསྶེཝཱདྷིཝཙནཾ, ཨཱཀཱརནཱནཏྟཏོ པན ཝེནེཡྻཝསེན ཙ ‘‘ཨུཔཙཡོ སནྟཏཱི’’ཏི ཨུདྡེསདེསནཱ ཀཏཱ. ཡསྨཱ པནེཏྠ ཨཏྠཏོ ནཱནཏྟཾ ནཏྠི, ཏསྨཱ ཨིམེསཾ པདཱནཾ ནིདྡེསེ ‘‘ཡོ ཨཱཡཏནཱནཾ ཨཱཙཡོ, སོ རཱུཔསྶ ཨུཔཙཡོ. ཡོ རཱུཔསྶ ཨུཔཙཡོ, སཱ རཱུཔསྶ སནྟཏཱི’’ཏི (དྷ. ས. ༦༤༡-༦༤༢) ཝུཏྟཾ. ཨཊྛཀཐཱཡམྤི ‘‘ཨཱཙཡོ ནཱམ ནིབྦཏྟི, ཨུཔཙཡོ ནཱམ ཝཌྜྷི, སནྟཏི ནཱམ པཝཏྟཱི’’ཏི (དྷ. ས. ཨཊྛ. ༦༤༡) ཝཏྭཱ ‘‘ནདཱིཏཱིརེ ཁཏཀཱུཔཀམྷི ཨུདཀུགྒམནཀཱལོ ཝིཡ ཨཱཙཡོ ནིབྦཏྟི, པརིཔུཎྞཀཱལོ ཝིཡ ཨུཔཙཡོ ཝཌྜྷི, ཨཛ྄ཛྷོཏྠརིཏྭཱ གམནཀཱལོ ཝིཡ སནྟཏི པཝཏྟཱི’’ཏི (དྷ. ས. ཨཊྛ. ༦༤༡) ཨུཔམཱ ཀཏཱ.

ཨུཔམཱཝསཱནེ ཙ ‘‘ཨེཝཾ ཀིཾ ཀཐིཏཾ ཧོཏི? ཨཱཡཏནེན ཨཱཙཡོ ཀཐིཏོ, ཨཱཙཡེན ཨཱཡཏནཾ ཀཐིཏ’’ནྟི ཝུཏྟཾ. ཏསྨཱ ཡཱ རཱུཔཱནཾ པཋམཱབྷིནིབྦཏྟི, སཱ ཨཱཙཡོ. ཡཱ ཏེསཾ ཨུཔརི ཨཉྙེསམྤི ནིབྦཏྟམཱནཱནཾ ནིབྦཏྟི, སཱ ཝཌྜྷིཨཱཀཱརེན ཨུཔཊྛཱནཏོ ཨུཔཙཡོ. ཡཱ ཏེསམྤི ཨུཔརི པུནཔྤུནཾ ¶ ཨཉྙེསཾ ནིབྦཏྟམཱནཱནཾ ནིབྦཏྟི, སཱ ཨནུཔབནྡྷཱཀཱརེན ཨུཔཊྛཱནཏོ སནྟཏཱིཏི ཙ པཝུཙྩཏཱིཏི ཝེདིཏབྦཱ.

རཱུཔཔརིཔཱཀལཀྑཎཱ ཛརཏཱ, ཨུཔནཡནརསཱ, སབྷཱཝཱནཔགམེཔི ནཝབྷཱཝཱཔགམཔཙྩུཔཊྛཱནཱ ཝཱིཧིཔུརཱཎབྷཱཝོ ཝིཡ, པརིཔཙྩམཱནརཱུཔཔདཊྛཱནཱ. ཁཎྜིཙྩཱདིབྷཱཝེན དནྟཱདཱིསུ ཝིཀཱརདསྶནཏོ ¶ ཨིདཾ པཱཀཊཛརཾ སནྡྷཱཡ ཝུཏྟཾ. ཨརཱུཔདྷམྨཱནཾ པན པཊིཙྪནྣཛརཱ ནཱམ ཧོཏི, ཏསྶཱ ཨེས ཝིཀཱརོ ནཏྠི, ཡཱ ཙ པཐཝཱི ཨུདཀཔབྦཏཙནྡིམསཱུརིཡཱདཱིསུ ཨཝཱིཙིཛརཱ ནཱམ.

པརིབྷེདལཀྑཎཱ རཱུཔསྶ ཨནིཙྩཏཱ, སཾསཱིདནརསཱ, ཁཡཝཡཔཙྩུཔཊྛཱནཱ, པརིབྷིཛྫམཱནརཱུཔཔདཊྛཱནཱ.

༤༤༥. ཨོཛཱལཀྑཎོ ཀབལཱི༹ཀཱརོ ཨཱཧཱརོ, རཱུཔཱཧརཎརསོ, ཨུཔཏྠམྦྷནཔཙྩུཔཊྛཱནོ, ཀབལ༹ཾ ཀཏྭཱ ཨཱཧརིཏབྦཝཏྠུཔདཊྛཱནོ. ཡཱཡ ཨོཛཱཡ སཏྟཱ ཡཱཔེནྟི, ཏསྶཱ ཨེཏཾ ཨདྷིཝཙནཾ.

༤༤༦. ཨིམཱནི ཏཱཝ པཱལི༹ཡཾ ཨཱགཏརཱུཔཱནེཝ. ཨཊྛཀཐཱཡཾ པན བལརཱུཔཾ སམྦྷཝརཱུཔཾ ཛཱཏིརཱུཔཾ རོགརཱུཔཾ ཨེཀཙྩཱནཾ མཏེན མིདྡྷརཱུཔནྟི ཨེཝཾ ཨཉྙཱནིཔི རཱུཔཱནི ཨཱཧརིཏྭཱ ‘‘ཨདྡྷཱ མུནཱིསི སམྦུདྡྷོ, ནཏྠི ནཱིཝརཎཱ ཏཝཱ’’ཏིཨཱདཱིནི (སུ. ནི. ༥༤༦) ཝཏྭཱ མིདྡྷརཱུཔཾ ཏཱཝ ནཏྠིཡེཝཱཏི པཊིཀྑིཏྟཾ. ཨིཏརེསུ རོགརཱུཔཾ ཛརཏཱཨནིཙྩཏཱགྒཧཎེན གཧིཏམེཝ, ཛཱཏིརཱུཔཾ ཨུཔཙཡསནྟཏིགྒཧཎེན, སམྦྷཝརཱུཔཾ ཨཱཔོདྷཱཏུགྒཧཎེན, བལརཱུཔཾ ཝཱཡོདྷཱཏུགྒཧཎེན གཧིཏམེཝ. ཏསྨཱ ཏེསུ ཨེཀམྤི ཝིསུཾ ནཏྠཱིཏི སནྣིཊྛཱནཾ ཀཏཾ.

ཨིཏི ཨིདཾ ཙཏུཝཱིསཏིཝིདྷཾ ཨུཔཱདཱརཱུཔཾ པུབྦེ ཝུཏྟཾ ཙཏུབྦིདྷཾ བྷཱུཏརཱུཔཉྩཱཏི ཨཊྛཝཱིསཏིཝིདྷཾ རཱུཔཾ ཧོཏི ཨནཱུནམནདྷིཀཾ.

༤༤༧. ཏཾ སབྦམྤི ན ཧེཏུ ཨཧེཏུཀཾ ཧེཏུཝིཔྤཡུཏྟཾ སཔྤཙྩཡཾ ལོཀིཡཾ སཱསཝམེཝཱཏིཨཱདིནཱ ནཡེན ཨེཀཝིདྷཾ.

ཨཛ྄ཛྷཏྟིཀཾ བཱཧིརཾ, ཨོལཱ༹རིཀཾ སུཁུམཾ, དཱུརེ སནྟིཀེ, ནིཔྥནྣཾ ཨནིཔྥནྣཾ, པསཱདརཱུཔཾ ནཔསཱདརཱུཔཾ, ཨིནྡྲིཡཾ ཨནིནྡྲིཡཾ, ཨུཔཱདིཎྞཾ ཨནུཔཱདིཎྞནྟིཨཱདིཝསེན དུཝིདྷཾ.

ཏཏྠ ¶ ཙཀྑཱདིཔཉྩཝིདྷཾ ཨཏྟབྷཱཝཾ ཨདྷིཀིཙྩ པཝཏྟཏྟཱ ཨཛ྄ཛྷཏྟིཀཾ, སེསཾ ཏཏོ བཱཧིརཏྟཱ བཱཧིརཾ. ཙཀྑཱདཱིནི ནཝ ཨཱཔོདྷཱཏུཝཛྫིཏཱ ཏིསྶོ དྷཱཏུཡོ ཙཱཏི དྭཱདསཝིདྷཾ གྷཊྚནཝསེན གཧེཏབྦཏོ ཨོལཱ༹རིཀཾ, སེསཾ ཏཏོ ཝིཔརཱིཏཏྟཱ སུཁུམཾ. ཡཾ སུཁུམཾ ཏདེཝ དུཔྤཊིཝིཛ྄ཛྷསབྷཱཝཏྟཱ ¶ དཱུརེ, ཨིཏརཾ སུཔྤཊིཝིཛ྄ཛྷསབྷཱཝཏྟཱ སནྟིཀེ. ཙཏསྶོ དྷཱཏུཡོ, ཙཀྑཱདཱིནི ཏེརས, ཀབལཱི༹ཀཱརཱཧཱརོ ཙཱཏི ཨཊྛཱརསཝིདྷཾ རཱུཔཾ པརིཙྪེདཝིཀཱརལཀྑཎབྷཱཝཾ ཨཏིཀྐམིཏྭཱ སབྷཱཝེནེཝ པརིགྒཧེཏབྦཏོ ནིཔྥནྣཾ, སེསཾ ཏབྦིཔརཱིཏཏཱཡ ཨནིཔྥནྣཾ. ཙཀྑཱདིཔཉྩཝིདྷཾ རཱུཔཱདཱིནཾ གཧཎཔཙྩཡབྷཱཝེན ཨཱདཱསཏལཾ ཝིཡ ཝིཔྤསནྣཏྟཱ པསཱདརཱུཔཾ, ཨིཏརཾ ཏཏོ ཝིཔརཱིཏཏྟཱ ནཔསཱདརཱུཔཾ. པསཱདརཱུཔམེཝ ཨིཏྠིནྡྲིཡཱདིཏྟཡེན སདྡྷིཾ ཨདྷིཔཏིཡཊྛེན ཨིནྡྲིཡཾ, སེསཾ ཏཏོ ཝིཔརཱིཏཏྟཱ ཨནིནྡྲིཡཾ. ཡཾ ཀམྨཛནྟི པརཏོ ཝཀྑཱམ, ཏཾ ཀམྨེན ཨུཔཱདིཎྞཏྟཱ ཨུཔཱདིཎྞཾ, སེསཾ ཏཏོ ཝིཔརཱིཏཏྟཱ ཨནུཔཱདིཎྞཾ.

༤༤༨. པུན སབྦམེཝ རཱུཔཾ སནིདསྶནཀམྨཛཱདཱིནཾ ཏིཀཱནཾ ཝསེན ཏིཝིདྷཾ ཧོཏི. ཏཏྠ ཨོལཱ༹རིཀེ རཱུཔཾ སནིདསྶནསཔྤཊིགྷཾ, སེསཾ ཨནིདསྶནསཔྤཊིགྷཾ. སབྦམྤི སུཁུམཾ ཨནིདསྶནཨཔྤཊིགྷཾ. ཨེཝཾ ཏཱཝ སནིདསྶནཏྟིཀཝསེན ཏིཝིདྷཾ. ཀམྨཛཱདིཏྟིཀཝསེན པན ཀམྨཏོ ཛཱཏཾ ཀམྨཛཾ, ཏདཉྙཔཙྩཡཛཱཏཾ ཨཀམྨཛཾ, ནཀུཏོཙིཛཱཏཾ ནེཝ ཀམྨཛཾ ནཱཀམྨཛཾ. ཙིཏྟཏོ ཛཱཏཾ ཙིཏྟཛཾ, ཏདཉྙཔཙྩཡཛཱཏཾ ཨཙིཏྟཛཾ, ནཀུཏོཙིཛཱཏཾ ནེཝ ཙིཏྟཛཾ ནཱཙིཏྟཛཾ, ཨཱཧཱརཏོ ཛཱཏཾ ཨཱཧཱརཛཾ, ཏདཉྙཔཙྩཡཛཱཏཾ ཨནཱཧཱརཛཾ, ནཀུཏོཙིཛཱཏཾ ནེཝ ཨཱཧཱརཛཾ ནཨནཱཧཱརཛཾ. ཨུཏུཏོ ཛཱཏཾ ཨུཏུཛཾ, ཏདཉྙཔཙྩཡཛཱཏཾ ཨནུཏུཛཾ, ནཀུཏོཙིཛཱཏཾ ནེཝ ཨུཏུཛཾ ནཨནུཏུཛནྟི ཨེཝཾ ཀམྨཛཱདིཏྟིཀཝསེན ཏིཝིདྷཾ.

༤༤༩. པུན དིཊྛཱདིརཱུཔརཱུཔཱདིཝཏྠཱདིཙཏུཀྐཝསེན ཙཏུབྦིདྷཾ. ཏཏྠ རཱུཔཱཡཏནཾ དིཊྛཾ ནཱམ དསྶནཝིསཡཏྟཱ, སདྡཱཡཏནཾ སུཏཾ ནཱམ སཝནཝིསཡཏྟཱ, གནྡྷརསཕོཊྛབྦཏྟཡཾ མུཏཾ ནཱམ སམྤཏྟགཱཧཀཨིནྡྲིཡཝིསཡཏྟཱ, སེསཾ ཝིཉྙཱཏཾ ནཱམ ཝིཉྙཱཎསྶེཝ ཝིསཡཏྟཱཏི ཨེཝཾ ཏཱཝ དིཊྛཱདིཙཏུཀྐཝསེན ཙཏུབྦིདྷཾ.

ནིཔྥནྣརཱུཔཾ པནེཏྠ རཱུཔརཱུཔཾ ནཱམ, ཨཱཀཱསདྷཱཏུ པརིཙྪེདརཱུཔཾ ནཱམ, ཀཱཡཝིཉྙཏྟིཨཱདི ཀམྨཉྙཏཱཔརིཡནྟཾ ཝིཀཱརརཱུཔཾ ནཱམ, ཛཱཏིཛརཱབྷངྒཾ ལཀྑཎརཱུཔཾ ནཱམཱཏི ཨེཝཾ རཱུཔརཱུཔཱདིཙཏུཀྐཝསེན ཙཏུབྦིདྷཾ.

ཡཾ ¶ པནེཏྠ ཧདཡརཱུཔཾ ནཱམ, ཏཾ ཝཏྠུ ན དྭཱརཾ. ཝིཉྙཏྟིདྭཡཾ དྭཱརཾ ན ཝཏྠུ. པསཱདརཱུཔཾ ཝཏྠུ ཙེཝ དྭཱརཉྩ. སེསཾ ནེཝ ཝཏྠུ ན དྭཱརནྟི ཨེཝཾ ཝཏྠཱདིཙཏུཀྐཝསེན ཙཏུབྦིདྷཾ.

༤༥༠. པུན ¶ ཨེཀཛཾ, དྭིཛཾ, ཏིཛཾ, ཙཏུཛཾ, ནཀུཏོཙིཛཱཏནྟི ཨིམེསཾ ཝསེན པཉྩཝིདྷཾ. ཏཏྠ ཀམྨཛམེཝ ཙིཏྟཛམེཝ ཙ ཨེཀཛཾ ནཱམ. ཏེསུ སདྡྷིཾ ཧདཡཝཏྠུནཱ ཨིནྡྲིཡརཱུཔཾ ཀམྨཛམེཝ. ཝིཉྙཏྟིདྭཡཾ ཙིཏྟཛམེཝ. ཡཾ པན ཙིཏྟཏོ ཙ ཨུཏུཏོ ཙ ཛཱཏཾ, ཏཾ དྭིཛཾ ནཱམ, ཏཾ སདྡཱཡཏནམེཝ. ཡཾ ཨུཏུཙིཏྟཱཧཱརེཧི ཛཱཏཾ, ཏཾ ཏིཛཾ ནཱམ, ཏཾ པན ལཧུཏཱདིཏྟཡམེཝ. ཡཾ ཙཏཱུཧིཔི ཀམྨཱདཱིཧི ཛཱཏཾ, ཏཾ ཙཏུཛཾ ནཱམ, ཏཾ ལཀྑཎརཱུཔཝཛྫཾ ཨཝསེསཾ ཧོཏི. ལཀྑཎརཱུཔཾ པན ནཀུཏོཙིཛཱཏཾ. ཀསྨཱ? ན ཧི ཨུཔྤཱདསྶ ཨུཔྤཱདོ ཨཏྠི, ཨུཔྤནྣསྶ ཙ པརིཔཱཀབྷེདམཏྟཾ ཨིཏརདྭཡཾ. ཡམྤི ‘‘རཱུཔཱཡཏནཾ སདྡཱཡཏནཾ གནྡྷཱཡཏནཾ རསཱཡཏནཾ ཕོཊྛབྦཱཡཏནཾ ཨཱཀཱསདྷཱཏུ ཨཱཔོདྷཱཏུ རཱུཔསྶ ལཧུཏཱ, རཱུཔསྶ མུདུཏཱ, རཱུཔསྶ ཀམྨཉྙཏཱ, རཱུཔསྶ ཨུཔཙཡོ, རཱུཔསྶ སནྟཏི, ཀབལཱི༹ཀཱརོ ཨཱཧཱརོ, ཨིམེ དྷམྨཱ ཙིཏྟསམུཊྛཱནཱ’’ཏིཨཱདཱིསུ (དྷ. ས. ༡༢༠༡) ཛཱཏིཡཱ ཀུཏོཙིཛཱཏཏྟཾ ཨནུཉྙཱཏཾ, ཏཾ པན རཱུཔཛནཀཔཙྩཡཱནཾ ཀིཙྩཱནུབྷཱཝཀྑཎེ དིཊྛཏྟཱཏི ཝེདིཏབྦཾ.

ཨིདཾ ཏཱཝ རཱུཔཀྑནྡྷེ ཝིཏྠཱརཀཐཱམུཁཾ.

ཝིཉྙཱཎཀྑནྡྷཀཐཱ

༤༥༡. ཨིཏརེསུ པན ཡཾཀིཉྩི ཝེདཡིཏལཀྑཎཾ, སབྦཾ ཏཾ ཨེཀཏོ ཀཏྭཱ ཝེདནཱཀྑནྡྷོ; ཡཾཀིཉྩི སཉྫཱནནལཀྑཎཾ, སབྦཾ ཏཾ ཨེཀཏོ ཀཏྭཱ སཉྙཱཀྑནྡྷོ; ཡཾཀིཉྩི ཨབྷིསངྑརཎལཀྑཎཾ, སབྦཾ ཏཾ ཨེཀཏོ ཀཏྭཱ སངྑཱརཀྑནྡྷོ; ཡཾཀིཉྩི ཝིཛཱནནལཀྑཎཾ, སབྦཾ ཏཾ ཨེཀཏོ ཀཏྭཱ ཝིཉྙཱཎཀྑནྡྷོ ཝེདིཏབྦོ. ཏཏྠ ཡསྨཱ ཝིཉྙཱཎཀྑནྡྷེ ཝིཉྙཱཏེ ཨིཏརེ སུཝིཉྙེཡྻཱ ཧོནྟི, ཏསྨཱ ཝིཉྙཱཎཀྑནྡྷཾ ཨཱདིཾ ཀཏྭཱ ཝཎྞནཾ ཀརིསྶཱམ.

ཡཾཀིཉྩི ཝིཛཱནནལཀྑཎཾ, སབྦཾ ཏཾ ཨེཀཏོ ཀཏྭཱ ཝིཉྙཱཎཀྑནྡྷོ ཝེདིཏབྦོཏི ཧི ཝུཏྟཾ. ཀིཉྩ ཝིཛཱནནལཀྑཎཾ ཝིཉྙཱཎཾ? ཡཐཱཧ ‘‘ཝིཛཱནཱཏི ཝིཛཱནཱཏཱིཏི ཁོ, ཨཱཝུསོ, ཏསྨཱ ཝིཉྙཱཎནྟི ཝུཙྩཏཱི’’ཏི (མ. ནི. ༡.༤༤༩). ཝིཉྙཱཎཾ ཙིཏྟཾ མནོཏི ཨཏྠཏོ ཨེཀཾ. ཏདེཏཾ ཝིཛཱནནལཀྑཎེན སབྷཱཝཏོ ¶ ཨེཀཝིདྷམྤི ཛཱཏིཝསེན ཏིཝིདྷཾ ཀུསལཾ, ཨཀུསལཾ, ཨབྱཱཀཏཉྩ.

༤༥༢. ཏཏྠ ¶ ཀུསལཾ བྷཱུམིབྷེདཏོ ཙཏུབྦིདྷཾ ཀཱམཱཝཙརཾ རཱུཔཱཝཙརཾ ཨརཱུཔཱཝཙརཾ ལོཀུཏྟརཉྩ. ཏཏྠ ཀཱམཱཝཙརཾ སོམནསྶུཔེཀྑཱཉཱཎསངྑཱརབྷེདཏོ ཨཊྛཝིདྷཾ. སེཡྻཐིདཾ – སོམནསྶསཧགཏཾ ཉཱཎསམྤཡུཏྟཾ ཨསངྑཱརཾ སསངྑཱརཉྩ, ཏཐཱ ཉཱཎཝིཔྤཡུཏྟཾ. ཨུཔེཀྑཱསཧགཏཾ ཉཱཎསམྤཡུཏྟཾ ཨསངྑཱརཾ སསངྑཱརཉྩ, ཏཐཱ ཉཱཎཝིཔྤཡུཏྟཾ.

ཡདཱ ཧི དེཡྻདྷམྨཔཊིགྒཱཧཀཱདིསམྤཏྟིཾ ཨཉྙཾ ཝཱ སོམནསྶཧེཏུཾ ཨཱགམྨ ཧཊྛཔཧཊྛོ ‘‘ཨཏྠི དིནྣ’’ནྟིཨཱདིནཡཔྤཝཏྟཾ (མ. ནི. ༡.༤༤༡) སམྨཱདིཊྛིཾ པུརཀྑཏྭཱ ཨསཾསཱིདནྟོ ཨནུསྶཱཧིཏོ པརེཧི དཱནཱདཱིནི པུཉྙཱནི ཀརོཏི, ཏདཱསྶ སོམནསྶསཧགཏཾ ཉཱཎསམྤཡུཏྟཾ ཙིཏྟཾ ཨསངྑཱརཾ ཧོཏི. ཡདཱ པན ཝུཏྟནཡེན ཧཊྛཏུཊྛོ སམྨཱདིཊྛིཾ པུརཀྑཏྭཱ ཨམུཏྟཙཱགཏཱདིཝསེན སཾསཱིདམཱནོ ཝཱ པརེཧི ཝཱ ཨུསྶཱཧིཏོ ཀརོཏི, ཏདཱསྶ ཏདེཝ ཙིཏྟཾ སསངྑཱརཾ ཧོཏི. ཨིམསྨིཉྷི ཨཏྠེ སངྑཱརོཏི ཨེཏཾ ཨཏྟནོ ཝཱ པརེསཾ ཝཱ ཝསེན པཝཏྟསྶ པུབྦཔཡོགསྶཱདྷིཝཙནཾ. ཡདཱ པན ཉཱཏིཛནསྶ པཊིཔཏྟིདསྶནེན ཛཱཏཔརིཙཡཱ བཱལདཱརཀཱ བྷིཀྑཱུ དིསྭཱ སོམནསྶཛཱཏཱ སཧསཱ ཀིཉྩིདེཝ ཧཏྠགཏཾ དདནྟི ཝཱ ཝནྡནྟི ཝཱ, ཏདཱ ཏཏིཡཾ ཙིཏྟཾ ཨུཔྤཛྫཏི. ཡདཱ པན ‘‘དེཐ ཝནྡཐཱཏི’’ ཉཱཏཱིཧི ཨུསྶཱཧིཏཱ ཨེཝཾ པཊིཔཛྫནྟི, ཏདཱ ཙཏུཏྠཾ ཙིཏྟཾ ཨུཔྤཛྫཏི. ཡདཱ པན དེཡྻདྷམྨཔཊིགྒཱཧཀཱདཱིནཾ ཨསམྤཏྟིཾ ཨཉྙེསཾ ཝཱ སོམནསྶཧེཏཱུནཾ ཨབྷཱཝཾ ཨཱགམྨ ཙཏཱུསུཔི ཝིཀཔྤེསུ སོམནསྶརཧིཏཱ ཧོནྟི, ཏདཱ སེསཱནི ཙཏྟཱརི ཨུཔེཀྑཱསཧགཏཱནི ཨུཔྤཛྫནྟཱིཏི. ཨེཝཾ སོམནསྶུཔེཀྑཱཉཱཎསངྑཱརབྷེདཏོ ཨཊྛཝིདྷཾ ཀཱམཱཝཙརཀུསལཾ ཝེདིཏབྦཾ.

རཱུཔཱཝཙརཾ པན ཛྷཱནངྒཡོགབྷེདཏོ པཉྩཝིདྷཾ ཧོཏི. སེཡྻཐིདཾ, ཝིཏཀྐཝིཙཱརཔཱིཏིསུཁསམཱདྷིཡུཏྟཾ པཋམཾ, ཨཏིཀྐནྟཝིཏཀྐཾ དུཏིཡཾ, ཏཏོ ཨཏིཀྐནྟཝིཙཱརཾ ཏཏིཡཾ, ཏཏོ ཝིརཏྟཔཱིཏིཀཾ ཙཏུཏྠཾ, ཨཏྠངྒཏསུཁཾ ཨུཔེཀྑཱསམཱདྷིཡུཏྟཾ པཉྩམནྟི.

ཨརཱུཔཱཝཙརཾ ཙཏུནྣཾ ཨཱརུཔྤཱནཾ ཡོགཝསེན ཙཏུབྦིདྷཾ. ཝུཏྟཔྤཀཱརེན ཧི ཨཱཀཱསཱནཉྩཱཡཏནཛ྄ཛྷཱནེན སམྤཡུཏྟཾ པཋམཾ, ཝིཉྙཱཎཉྩཱཡཏནཱདཱིཧི དུཏིཡཏཏིཡཙཏུཏྠཱནི ¶ . ལོཀུཏྟརཾ ཙཏུམགྒསམྤཡོགཏོ ཙཏུབྦིདྷནྟི ཨེཝཾ ཏཱཝ ཀུསལཝིཉྙཱཎམེཝ ཨེཀཝཱིསཏིཝིདྷཾ ཧོཏི.

༤༥༣. ཨཀུསལཾ ¶ པན བྷཱུམིཏོ ཨེཀཝིདྷཾ ཀཱམཱཝཙརམེཝ, མཱུལཏོ ཏིཝིདྷཾ ལོབྷམཱུལཾ དོསམཱུལཾ མོཧམཱུལཉྩ.

ཏཏྠ ལོབྷམཱུལཾ སོམནསྶུཔེཀྑཱདིཊྛིགཏསངྑཱརབྷེདཏོ ཨཊྛཝིདྷཾ. སེཡྻཐིདཾ, སོམནསྶསཧགཏཾ དིཊྛིགཏསམྤཡུཏྟཾ ཨསངྑཱརཾ སསངྑཱརཉྩ, ཏཐཱ དིཊྛིགཏཝིཔྤཡུཏྟཾ. ཨུཔེཀྑཱསཧགཏཾ དིཊྛིགཏསམྤཡུཏྟཾ ཨསངྑཱརཾ སསངྑཱརཉྩ, ཏཐཱ དིཊྛིགཏཝིཔྤཡུཏྟཾ.

ཡདཱ ཧི ‘‘ནཏྠི ཀཱམེསུ ཨཱདཱིནཝོ’’ཏི (མ. ནི. ༡.༤༦༩) ཨཱདིནཱ ནཡེན མིཙྪཱདིཊྛིཾ པུརཀྑཏྭཱ ཧཊྛཏུཊྛོ ཀཱམེ ཝཱ པརིབྷུཉྫཏི, དིཊྛམངྒལཱདཱིནི ཝཱ སཱརཏོ པཙྩེཏི སབྷཱཝཏིཀྑེནེཝ ཨནུསྶཱཧིཏེན ཙིཏྟེན, ཏདཱ པཋམཾ ཨཀུསལཙིཏྟཾ ཨུཔྤཛྫཏི. ཡདཱ མནྡེན སམུསྶཱཧིཏེན ཙིཏྟེན, ཏདཱ དུཏིཡཾ. ཡདཱ མིཙྪཱདིཊྛིཾ ཨཔུརཀྑཏྭཱ ཀེཝལཾ ཧཊྛཏུཊྛོ མེཐུནཾ ཝཱ སེཝཏི, པརསམྤཏྟིཾ ཝཱ ཨབྷིཛ྄ཛྷཱཡཏི, པརབྷཎྜཾ ཝཱ ཧརཏི སབྷཱཝཏིཀྑེནེཝ ཨནུསྶཱཧིཏེན ཙིཏྟེན, ཏདཱ ཏཏིཡཾ. ཡདཱ མནྡེན སམུསྶཱཧིཏེན ཙིཏྟེན, ཏདཱ ཙཏུཏྠཾ. ཡདཱ པན ཀཱམཱནཾ ཝཱ ཨསམྤཏྟིཾ ཨཱགམྨ ཨཉྙེསཾ ཝཱ སོམནསྶཧེཏཱུནཾ ཨབྷཱཝེན ཙཏཱུསུཔི ཝིཀཔྤེསུ སོམནསྶརཧིཏཱ ཧོནྟི, ཏདཱ སེསཱནི ཙཏྟཱརི ཨུཔེཀྑཱསཧགཏཱནི ཨུཔྤཛྫནྟཱིཏི ཨེཝཾ སོམནསྶུཔེཀྑཱདིཊྛིགཏསངྑཱརབྷེདཏོ ཨཊྛཝིདྷཾ ལོབྷམཱུལཾ ཝེདིཏབྦཾ.

དོསམཱུལཾ པན དོམནསྶསཧགཏཾ པཊིགྷསམྤཡུཏྟཾ ཨསངྑཱརཾ སསངྑཱརནྟི དུཝིདྷམེཝ ཧོཏི, ཏསྶ པཱཎཱཏིཔཱཏཱདཱིསུ ཏིཀྑམནྡཔྤཝཏྟིཀཱལེ པཝཏྟི ཝེདིཏབྦཱ.

མོཧམཱུལཾ ཨུཔེཀྑཱསཧགཏཾ ཝིཙིཀིཙྪཱསམྤཡུཏྟཾ ཨུདྡྷཙྩསམྤཡུཏྟཉྩཱཏི དུཝིདྷཾ. ཏསྶ སནྣིཊྛཱནཝིཀྑེཔཀཱལེ པཝཏྟི ཝེདིཏབྦཱཏི ཨེཝཾ ཨཀུསལཝིཉྙཱཎཾ དྭཱདསཝིདྷཾ ཧོཏི.

༤༥༤. ཨབྱཱཀཏཾ ཛཱཏིབྷེདཏོ དུཝིདྷཾ ཝིཔཱཀཾ ཀིརིཡཉྩ. ཏཏྠ ཝིཔཱཀཾ བྷཱུམིཏོ ཙཏུབྦིདྷཾ ཀཱམཱཝཙརཾ རཱུཔཱཝཙརཾ ཨརཱུཔཱཝཙརཾ ལོཀུཏྟརཉྩ. ཏཏྠ ¶ ཀཱམཱཝཙརཾ དུཝིདྷཾ ཀུསལཝིཔཱཀཾ ཨཀུསལཝིཔཱཀཉྩ. ཀུསལཝིཔཱཀམྤི དུཝིདྷཾ ཨཧེཏུཀཾ སཧེཏུཀཉྩ.

ཏཏྠ ཨལོབྷཱདིཝིཔཱཀཧེཏུཝིརཧིཏཾ ཨཧེཏུཀཾ, ཏཾ ཙཀྑུཝིཉྙཱཎཾ, སོཏགྷཱནཛིཝ྄ཧཱཀཱཡཝིཉྙཱཎཾ ¶ , སམྤཊིཙྪནཀིཙྩཱ མནོདྷཱཏུ, སནྟཱིརཎཱདིཀིཙྩཱ དྭེ མནོཝིཉྙཱཎདྷཱཏུཡོ ཙཱཏི ཨཊྛཝིདྷཾ.

ཏཏྠ ཙཀྑུསནྣིསྶིཏརཱུཔཝིཛཱནནལཀྑཎཾ ཙཀྑུཝིཉྙཱཎཾ, རཱུཔམཏྟཱརམྨཎརསཾ, རཱུཔཱབྷིམུཁབྷཱཝཔཙྩུཔཊྛཱནཾ, རཱུཔཱརམྨཎཱཡ ཀིརིཡམནོདྷཱཏུཡཱ ཨཔགམཔདཊྛཱནཾ. སོཏཱདིསནྣིསྶིཏསདྡཱདིཝིཛཱནནལཀྑཎཱནི སོཏགྷཱནཛིཝ྄ཧཱཀཱཡཝིཉྙཱཎཱནི, སདྡཱདིམཏྟཱརམྨཎརསཱནི, སདྡཱདིཨབྷིམུཁབྷཱཝཔཙྩུཔཊྛཱནཱནི, སདྡཱརམྨཎཱདཱིནཾ ཀིརིཡམནོདྷཱཏཱུནཾ ཨཔགམཔདཊྛཱནཱནི.

ཙཀྑུཝིཉྙཱཎཱདཱིནཾ ཨནནྟརཾ རཱུཔཱདིཝིཛཱནནལཀྑཎཱ མནོདྷཱཏུ, རཱུཔཱདིསམྤཊིཙྪནརསཱ, ཏཐཱབྷཱཝཔཙྩུཔཊྛཱནཱ, ཙཀྑུཝིཉྙཱཎཱདིཨཔགམཔདཊྛཱནཱ.

ཨཧེཏུཀཝིཔཱཀཱ སལཱ༹རམྨཎཝིཛཱནནལཀྑཎཱ དུཝིདྷཱཔི སནྟཱིརཎཱདིཀིཙྩཱ མནོཝིཉྙཱཎདྷཱཏུ, སནྟཱིརཎཱདིརསཱ, ཏཐཱབྷཱཝཔཙྩུཔཊྛཱནཱ, ཧདཡཝཏྠུཔདཊྛཱནཱ. སོམནསྶུཔེཀྑཱཡོགཏོ པན དྭིཔཉྩཊྛཱནབྷེདཏོ ཙ ཏསྶཱ བྷེདོ. ཨེཏཱསུ ཧི ཨེཀཱ ཨེཀནྟམིཊྛཱརམྨཎེ པཝཏྟིསབྦྷཱཝཏོ སོམནསྶསམྤཡུཏྟཱ ཧུཏྭཱ སནྟཱིརཎཏདཱརམྨཎཝསེན པཉྩདྭཱརེ ཙེཝ ཛཝནཱཝསཱནེ ཙ པཝཏྟནཏོ དྭིཊྛཱནཱ ཧོཏི. ཨེཀཱ ཨིཊྛམཛ྄ཛྷཏྟཱརམྨཎེ པཝཏྟིསབྦྷཱཝཏོ ཨུཔེཀྑཱསམྤཡུཏྟཱ ཧུཏྭཱ སནྟཱིརཎཏདཱརམྨཎཔཊིསནྡྷིབྷཝངྒཙུཏིཝསེན པཝཏྟནཏོ པཉྩཊྛཱནཱ ཧོཏི.

ཨཊྛཝིདྷམྤི ཙེཏཾ ཨཧེཏུཀཝིཔཱཀཝིཉྙཱཎཾ ནིཡཏཱནིཡཏཱརམྨཎཏྟཱ དུཝིདྷཾ. ཨུཔེཀྑཱསུཁསོམནསྶབྷེདཏོ ཏིཝིདྷཾ. ཝིཉྙཱཎཔཉྩཀཾ ཧེཏྠ ནིཡཏཱརམྨཎཾ ཡཐཱཀྐམཾ རཱུཔཱདཱིསུཡེཝ པཝཏྟིཏོ, སེསཾ ཨནིཡཏཱརམྨཎཾ. ཏཏྲ ཧི མནོདྷཱཏུ པཉྩསུཔི རཱུཔཱདཱིསུ པཝཏྟཏི, མནོཝིཉྙཱཎདྷཱཏུདྭཡཾ ཚསཱུཏི. ཀཱཡཝིཉྙཱཎཾ པནེཏྠ སུཁཡུཏྟཾ, དྭིཊྛཱནཱ མནོཝིཉྙཱཎདྷཱཏུ སོམནསྶཡུཏྟཱ, སེསཾ ཨུཔེཀྑཱཡུཏྟནྟི. ཨེཝཾ ཏཱཝ ཀུསལཝིཔཱཀཱཧེཏུཀཾ ཨཊྛཝིདྷཾ ཝེདིཏབྦཾ.

ཨལོབྷཱདིཝིཔཱཀཧེཏུསམྤཡུཏྟཾ པན སཧེཏུཀཾ, ཏཾ ཀཱམཱཝཙརཀུསལཾ ཝིཡ སོམནསྶཱདི བྷེདཏོ ཨཊྛཝིདྷཾ. ཡཐཱ པན ཀུསལཾ དཱནཱདིཝསེན ¶ ཚསུ ཨཱརམྨཎེསུ པཝཏྟཏི, ན ཨིདཾ ཏཐཱ. ཨིདཉྷི པཊིསནྡྷིབྷཝངྒཙུཏིཏདཱརམྨཎཝསེན པརིཏྟདྷམྨཔརིཡཱཔནྣེསུཡེཝ ཚསུ ཨཱརམྨཎེསུ པཝཏྟཏི ¶ . སངྑཱརཱསངྑཱརབྷཱཝོ པནེཏྠ ཨཱགམནཱདིཝསེན ཝེདིཏབྦོ. སམྤཡུཏྟདྷམྨཱནཉྩ ཝིསེསེ ཨསཏིཔི ཨཱདཱསཏལཱདཱིསུ མུཁནིམིཏྟཾ ཝིཡ ནིརུསྶཱཧཾ ཝིཔཱཀཾ, མུཁཾ ཝིཡ སཨུསྶཱཧཾ ཀུསལནྟི ཝེདིཏབྦཾ.

ཀེཝལཾ ཧི ཨཀུསལཝིཔཱཀཾ ཨཧེཏུཀམེཝ, ཏཾ ཙཀྑུཝིཉྙཱཎཾ, སོཏགྷཱནཛིཝ྄ཧཱཀཱཡཝིཉྙཱཎཾ, སམྤཊིཙྪནཀིཙྩཱ མནོདྷཱཏུ, སནྟཱིརཎཱདིཀིཙྩཱ པཉྩཊྛཱནཱ མནོཝིཉྙཱཎདྷཱཏཱུཏི སཏྟཝིདྷཾ. ཏཾ ལཀྑཎཱདིཏོ ཀུསལཱཧེཏུཀཝིཔཱཀེ ཝུཏྟནཡེནེཝ ཝེདིཏབྦཾ.

ཀེཝལཉྷི ཀུསལཝིཔཱཀཱནི ཨིཊྛཨིཊྛམཛ྄ཛྷཏྟཱརམྨཎཱནི, ཨིམཱནི ཨནིཊྛཨནིཊྛམཛ྄ཛྷཏྟཱརམྨཎཱནི. ཏཱནི ཙ ཨུཔེཀྑཱསུཁསོམནསྶབྷེདཏོ ཏིཝིདྷཱནི, ཨིམཱནི དུཀྑཨུཔེཀྑཱཝསེན དུཝིདྷཱནི. ཨེཏྠ ཧི ཀཱཡཝིཉྙཱཎཾ དུཀྑསཧགཏམེཝ, སེསཱནི ཨུཔེཀྑཱསཧགཏཱནི. སཱ ཙ ཏེསུ ཨུཔེཀྑཱ ཧཱིནཱ དུཀྑཾ ཝིཡ ནཱཏིཏིཁིཎཱ, ཨིཏརེསུ ཨུཔེཀྑཱ པཎཱིཏཱ སུཁཾ ཝིཡ ནཱཏིཏིཁིཎཱ. ཨིཏི ཨིམེསཾ སཏྟནྣཾ ཨཀུསལཝིཔཱཀཱནཾ པུརིམཱནཉྩ སོལ༹སནྣཾ ཀུསལཝིཔཱཀཱནཾ ཝསེན ཀཱམཱཝཙརཾ ཝིཔཱཀཝིཉྙཱཎཾ ཏེཝཱིསཏིཝིདྷཾ.

རཱུཔཱཝཙརཾ པན ཀུསལཾ ཝིཡ པཉྩཝིདྷཾ. ཀུསལཾ པན སམཱཔཏྟིཝསེན ཛཝནཝཱིཐིཡཾ པཝཏྟཏི. ཨིདཾ ཨུཔཔཏྟིཡཾ པཊིསནྡྷིབྷཝངྒཙུཏིཝསེན. ཡཐཱ ཙ རཱུཔཱཝཙརཾ, ཨེཝཾ ཨརཱུཔཱཝཙརམྤི ཀུསལཾ ཝིཡ ཙཏུབྦིདྷཾ. པཝཏྟིབྷེདོཔིསྶ རཱུཔཱཝཙརེ ཝུཏྟནཡོ ཨེཝ. ལོཀུཏྟརཝིཔཱཀཾ ཙཏུམགྒཡུཏྟཙིཏྟཕལཏྟཱ ཙཏུབྦིདྷཾ, ཏཾ མགྒཝཱིཐིཝསེན ཙེཝ སམཱཔཏྟིཝསེན ཙ དྭིདྷཱ པཝཏྟཏི. ཨེཝཾ སབྦམྤི ཙཏཱུསུ བྷཱུམཱིསུ ཚཏྟིཾསཝིདྷཾ ཝིཔཱཀཝིཉྙཱཎཾ ཧོཏི.

ཀིརིཡཾ པན བྷཱུམིབྷེདཏོ ཏིཝིདྷཾ ཀཱམཱཝཙརཾ རཱུཔཱཝཙརཾ ཨརཱུཔཱཝཙརཉྩ. ཏཏྠ ཀཱམཱཝཙརཾ དུཝིདྷཾ ཨཧེཏུཀཾ སཧེཏུཀཉྩ. ཏཏྠ ཨལོབྷཱདིཀིརིཡཧེཏུཝིརཧིཏཾ ཨཧེཏུཀཾ, ཏཾ མནོདྷཱཏུམནོཝིཉྙཱཎདྷཱཏུབྷེདཏོ དུཝིདྷཾ.

ཏཏྠ ཙཀྑུཝིཉྙཱཎཱདིཔུརེཙརརཱུཔཱདིཝིཛཱནནལཀྑཎཱ མནོདྷཱཏུ, ཨཱཝཛྫནརསཱ, རཱུཔཱདིཨབྷིམུཁབྷཱཝཔཙྩུཔཊྛཱནཱ, བྷཝངྒཝིཙྪེདཔདཊྛཱནཱ, སཱ ཨུཔེཀྑཱཡུཏྟཱཝ ཧོཏི.

མནོཝིཉྙཱཎདྷཱཏུ ¶ ¶ པན དུཝིདྷཱ སཱདྷཱརཎཱ ཨསཱདྷཱརཎཱ ཙ. ཏཏྠ སཱདྷཱརཎཱ ཨུཔེཀྑཱསཧགཏཱཧེཏུཀཀིརིཡཱ སལཱ༹རམྨཎཝིཛཱནནལཀྑཎཱ, ཀིཙྩཝསེན པཉྩདྭཱརམནོདྭཱརེསུ ཝོཊྛབྦནཱཝཛྫནརསཱ, ཏཐཱབྷཱཝཔཙྩུཔཊྛཱནཱ, ཨཧེཏུཀཝིཔཱཀམནོཝིཉྙཱཎདྷཱཏུ བྷཝངྒཱནཾ ཨཉྙཏརཱཔགམཔདཊྛཱནཱ.

ཨསཱདྷཱརཎཱ སོམནསྶསཧགཏཱཧེཏུཀཀིརིཡཱ སལཱ༹རམྨཎཝིཛཱནནལཀྑཎཱ, ཀིཙྩཝསེན ཨརཧཏཾ ཨནུལཱ༹རེསུ ཝཏྠཱུསུ ཧསིཏུཔྤཱདནརསཱ, ཏཐཱབྷཱཝཔཙྩུཔཊྛཱནཱ, ཨེཀནྟཏོ ཧདཡཝཏྠུཔདཊྛཱནཱཏི. ཨིཏི ཀཱམཱཝཙརཀིརིཡཾ ཨཧེཏུཀཾ ཏིཝིདྷཾ.

སཧེཏུཀཾ པན སོམནསྶཱདིབྷེདཏོ ཀུསལཾ ཝིཡ ཨཊྛཝིདྷཾ. ཀེཝལཉྷི ཀུསལཾ སེཀྑཔུཐུཛྫནཱནཾ ཨུཔྤཛྫཏི, ཨིདཾ ཨརཧཏཾཡེཝཱཏི ཨཡམེཏྠ ཝིསེསོ. ཨེཝཾ ཏཱཝ ཀཱམཱཝཙརཾ ཨེཀཱདསཝིདྷཾ.

རཱུཔཱཝཙརཾ པན ཨརཱུཔཱཝཙརཉྩ ཀུསལཾ ཝིཡ པཉྩཝིདྷཾ ཙཏུབྦིདྷཉྩ ཧོཏི. ཨརཧཏཾ ཨུཔྤཏྟིཝསེནེཝ ཙསྶ ཀུསལཏོ ཝིསེསོ ཝེདིཏབྦོཏི. ཨེཝཾ སབྦམྤི ཏཱིསུ བྷཱུམཱིསུ ཝཱིསཏིཝིདྷཾ ཀིརིཡཝིཉྙཱཎཾ ཧོཏི.

༤༥༥. ཨིཏི ཨེཀཝཱིསཏི ཀུསལཱནི དྭཱདསཱཀུསལཱནི ཚཏྟིཾས ཝིཔཱཀཱནི ཝཱིསཏི ཀིརིཡཱནཱིཏི སབྦཱནིཔི ཨེཀཱུནནཝུཏི ཝིཉྙཱཎཱནི ཧོནྟི. ཡཱནི པཊིསནྡྷིབྷཝངྒཱཝཛྫནདསྶནསཝནགྷཱཡནསཱཡནཕུསནསམྤཊིཙྪནསནྟཱིརཎཝོཊྛབྦནཛཝནཏདཱརམྨཎཙུཏིཝསེན ཙུདྡསཧི ཨཱཀཱརེཧི པཝཏྟནྟི.

ཀཐཾ? ཡདཱ ཧི ཨཊྛནྣཾ ཀཱམཱཝཙརཀུསལཱནཾ ཨཱནུབྷཱཝེན དེཝམནུསྶེསུ སཏྟཱ ནིབྦཏྟནྟི, ཏདཱ ནེསཾ མརཎཀཱལེ པཙྩུཔཊྛིཏཾ ཀམྨཀམྨནིམིཏྟགཏིནིམིཏྟཱནཾ ཨཉྙཏརཾ ཨཱརམྨཎཾ ཀཏྭཱ ཨཊྛ སཧེཏུཀཀཱམཱཝཙརཝིཔཱཀཱནི, མནུསྶེསུ པཎྜཀཱདིབྷཱཝཾ ཨཱཔཛྫམཱནཱནཾ དུབྦལདྭིཧེཏུཀཀུསལཝིཔཱཀཨུཔེཀྑཱསཧགཏཱཧེཏུཀཝིཔཱཀམནོཝིཉྙཱཎདྷཱཏུ ཙཱཏི པཊིསནྡྷིཝསེན ནཝ ཝིཔཱཀཙིཏྟཱནི པཝཏྟནྟི. ཡདཱ རཱུཔཱཝཙརཱརཱུཔཱཝཙརཀུསལཱནུབྷཱཝེན རཱུཔཱརཱུཔབྷཝེསུ ནིབྦཏྟནྟི ¶ , ཏདཱ ནེསཾ མརཎཀཱལེ པཙྩུཔཊྛིཏཾ ཀམྨནིམིཏྟམེཝ ཨཱརམྨཎཾ ཀཏྭཱ ནཝ རཱུཔཱརཱུཔཱཝཙརཝིཔཱཀཱནི པཊིསནྡྷིཝསེན པཝཏྟནྟི.

ཡདཱ ¶ པན ཨཀུསལཱནུབྷཱཝེན ཨཔཱཡེ ནིབྦཏྟནྟི, ཏདཱ ནེསཾ མརཎཀཱལེ པཙྩུཔཊྛིཏཾ ཀམྨཀམྨནིམིཏྟགཏིནིམིཏྟཱནཾ ཨཉྙཏརཾ ཨཱརམྨཎཾ ཀཏྭཱ ཨེཀཱ ཨཀུསལཝིཔཱཀཱཧེཏུཀམནོཝིཉྙཱཎདྷཱཏུ པཊིསནྡྷིཝསེན པཝཏྟཏཱིཏི ཨེཝཾ ཏཱཝེཏྠ ཨེཀཱུནཝཱིསཏིཡཱ ཝིཔཱཀཝིཉྙཱཎཱནཾ པཊིསནྡྷིཝསེན པཝཏྟི ཝེདིཏབྦཱ.

པཊིསནྡྷིཝིཉྙཱཎེ པན ནིརུདྡྷེ ཏཾ ཏཾ པཊིསནྡྷིཝིཉྙཱཎམནུབནྡྷམཱནཾ ཏསྶ ཏསྶེཝ ཀམྨསྶ ཝིཔཱཀབྷཱུཏཾ ཏསྨིཉྙེཝ ཨཱརམྨཎེ ཏཱདིསམེཝ བྷཝངྒཝིཉྙཱཎཾ ནཱམ པཝཏྟཏི, པུནཔི ཏཱདིསནྟི ཨེཝཾ ཨསཏི སནྟཱནཝིནིཝཏྟཀེ ཨཉྙསྨིཾ ཙིཏྟུཔྤཱདེ ནདཱིསོཏཾ ཝིཡ སུཔིནཾ ཨཔསྶཏོ ནིདྡོཀྐམནཀཱལཱདཱིསུ ཨཔརིམཱཎསངྑྱམྤི པཝཏྟཏིཡེཝཱཏི ཨེཝཾ ཏེསཉྙེཝ ཝིཉྙཱཎཱནཾ བྷཝངྒཝསེནཱཔི པཝཏྟི ཝེདིཏབྦཱ.

ཨེཝཾ པཝཏྟེ པན བྷཝངྒསནྟཱནེ ཡདཱ སཏྟཱནཾ ཨིནྡྲིཡཱནི ཨཱརམྨཎགཧཎཀྑམཱནི ཧོནྟི, ཏདཱ ཙཀྑུསྶཱཔཱཐགཏེ རཱུཔེ རཱུཔཾ པཊིཙྩ ཙཀྑུཔསཱདསྶ གྷཊྚནཱ ཧོཏི, ཏཏོ གྷཊྚནཱནུབྷཱཝེན བྷཝངྒཙལནཾ ཧོཏི, ཨཐ ནིརུདྡྷེ བྷཝངྒེ ཏདེཝ རཱུཔཾ ཨཱརམྨཎཾ ཀཏྭཱ བྷཝངྒཾ ཝིཙྪིནྡམཱནཱ ཝིཡ ཨཱཝཛྫནཀིཙྩཾ སཱདྷཡམཱནཱ ཀིརིཡམནོདྷཱཏུ ཨུཔྤཛྫཏི. སོཏདྭཱརཱདཱིསུཔི ཨེསེཝ ནཡོ. མནོདྭཱརེ པན ཚབྦིདྷེཔི ཨཱརམྨཎེ ཨཱཔཱཐགཏེ བྷཝངྒཙལནཱནནྟརཾ བྷཝངྒཾ ཝིཙྪིནྡམཱནཱ ཝིཡ ཨཱཝཛྫནཀིཙྩཾ སཱདྷཡམཱནཱ ཨཧེཏུཀཀིརིཡམནོཝིཉྙཱཎདྷཱཏུ ཨུཔྤཛྫཏི ཨུཔེཀྑཱསཧགཏཱཏི ཨེཝཾ དྭིནྣཾ ཀིརིཡཝིཉྙཱཎཱནཾ ཨཱཝཛྫནཝསེན པཝཏྟི ཝེདིཏབྦཱ.

ཨཱཝཛྫནཱནནྟརཾ པན ཙཀྑུདྭཱརེ ཏཱཝ དསྶནཀིཙྩཾ སཱདྷཡམཱནཾ ཙཀྑུཔསཱདཝཏྠུཀཾ ཙཀྑུཝིཉྙཱཎཾ, སོཏདྭཱརཱདཱིསུ སཝནཱདིཀིཙྩཾ སཱདྷཡམཱནཱནི སོཏགྷཱནཛིཝ྄ཧཱཀཱཡཝིཉྙཱཎཱནི པཝཏྟནྟི. ཏཱནི ཨིཊྛཨིཊྛམཛ྄ཛྷཏྟེསུ ཝིསཡེསུ ཀུསལཝིཔཱཀཱནི, ཨནིཊྛཨནིཊྛམཛ྄ཛྷཏྟེསུ ཝིསཡེསུ ཨཀུསལཝིཔཱཀཱནཱིཏི ཨེཝཾ དསནྣཾ ཝིཔཱཀཝིཉྙཱཎཱནཾ དསྶནསཝནགྷཱཡནསཱཡནཕུསནཝསེན པཝཏྟི ཝེདིཏབྦཱ.

‘‘ཙཀྑུཝིཉྙཱཎདྷཱཏུཡཱ ¶ ཨུཔྤཛྫིཏྭཱ ནིརུདྡྷསམནནྟརཱ ཨུཔྤཛྫཏི ཙིཏྟཾ མནོ མཱནསཾ ཏཛྫཱ མནོདྷཱཏཱུ’’ཏིཨཱདིཝཙནཏོ (ཝིབྷ. ༡༨༤) པན ཙཀྑུཝིཉྙཱཎཱདཱིནཾ ཨནནྟརཱ ¶ ཏེསཉྙེཝ ཝིསཡཾ སམྤཊིཙྪམཱནཱ ཀུསལཝིཔཱཀཱནནྟརཾ ཀུསལཝིཔཱཀཱ, ཨཀུསལཝིཔཱཀཱནནྟརཾ ཨཀུསལཝིཔཱཀཱ མནོདྷཱཏུ ཨུཔྤཛྫཏི. ཨེཝཾ དྭིནྣཾ ཝིཔཱཀཝིཉྙཱཎཱནཾ སམྤཊིཙྪནཝསེན པཝཏྟི ཝེདིཏབྦཱ.

‘‘མནོདྷཱཏུཡཱཔི ཨུཔྤཛྫིཏྭཱ ནིརུདྡྷསམནནྟརཱ ཨུཔྤཛྫཏི ཙིཏྟཾ མནོ མཱནསཾ ཏཛྫཱམནོཝིཉྙཱཎདྷཱཏཱུ’’ཏི (ཝིབྷ. ༡༨༤) ཝཙནཏོ པན མནོདྷཱཏུཡཱ སམྤཊིཙྪིཏམེཝ ཝིསཡཾ སནྟཱིརཡམཱནཱ ཨཀུསལཝིཔཱཀམནོདྷཱཏུཡཱ ཨནནྟརཱ ཨཀུསལཝིཔཱཀཱ, ཀུསལཝིཔཱཀཱཡ ཨནནྟརཱ ཨིཊྛཱརམྨཎེ སོམནསྶསཧགཏཱ, ཨིཊྛམཛ྄ཛྷཏྟེ ཨུཔེཀྑཱསཧགཏཱ ཨུཔྤཛྫཏི ཝིཔཱཀཱཧེཏུཀམནོཝིཉྙཱཎདྷཱཏཱུཏི ཨེཝཾ ཏིཎྞཾ ཝིཔཱཀཝིཉྙཱཎཱནཾ སནྟཱིརཎཝསེན པཝཏྟི ཝེདིཏབྦཱ.

སནྟཱིརཎཱནནྟརཾ པན ཏམེཝ ཝིསཡཾ ཝཝཏྠཱཔཡམཱནཱ ཨུཔྤཛྫཏི ཀིརིཡཱཧེཏུཀམནོཝིཉྙཱཎདྷཱཏུ ཨུཔེཀྑཱསཧགཏཱཏི ཨེཝཾ ཨེཀསྶེཝ ཀིརིཡཝིཉྙཱཎསྶ ཝོཊྛབྦནཝསེན པཝཏྟི ཝེདིཏབྦཱ.

ཝོཊྛབྦནཱནནྟརཾ པན སཙེ མཧནྟཾ ཧོཏི རཱུཔཱདིཨཱརམྨཎཾ, ཨཐ ཡཐཱཝཝཏྠཱཔིཏེ ཝིསཡེ ཨཊྛནྣཾ ཝཱ ཀཱམཱཝཙརཀུསལཱནཾ དྭཱདསནྣཾ ཝཱ ཨཀུསལཱནཾ ནཝནྣཾ ཝཱ ཨཝསེསཀཱམཱཝཙརཀིརིཡཱནཾ ཨཉྙཏརཝསེན ཚ སཏྟ ཝཱ ཛཝནཱནི ཛཝནྟི, ཨེསོ ཏཱཝ པཉྩདྭཱརེ ནཡོ.

མནོདྭཱརེ པན མནོདྭཱརཱཝཛྫནཱནནྟརཾ ཏཱནིཡེཝ. གོཏྲབྷུཏོ ཨུདྡྷཾ རཱུཔཱཝཙརཏོ པཉྩ ཀུསལཱནི པཉྩ ཀིརིཡཱནི, ཨརཱུཔཱཝཙརཏོ ཙཏྟཱརི ཀུསལཱནི ཙཏྟཱརི ཀིརིཡཱནི, ལོཀུཏྟརཏོ ཙཏྟཱརི མགྒཙིཏྟཱནི ཙཏྟཱརི ཕལཙིཏྟཱནཱིཏི ཨིམེསུ ཡཾ ཡཾ ལདྡྷཔཙྩཡཾ ཧོཏི, ཏཾ ཏཾ ཛཝཏཱིཏི ཨེཝཾ པཉྩཔཉྙཱསཱཡ ཀུསལཱཀུསལཀིརིཡཝིཔཱཀཝིཉྙཱཎཱནཾ ཛཝནཝསེན པཝཏྟི ཝེདིཏབྦཱ.

ཛཝནཱཝསཱནེ པན སཙེ པཉྩདྭཱརེ ཨཏིམཧནྟཾ, མནོདྭཱརེ ཙ ཝིབྷཱུཏམཱརམྨཎཾ ཧོཏི, ཨཐ ཀཱམཱཝཙརསཏྟཱནཾ ཀཱམཱཝཙརཛཝནཱཝསཱནེ ཨིཊྛཱརམྨཎཱདཱིནཾ པུརིམཀམྨཛཝནཙིཏྟཱདཱིནཉྩ ཝསེན ཡོ ཡོ པཙྩཡོ ལདྡྷོ ཧོཏི, ཏསྶ ཏསྶ ཝསེན ཨཊྛསུ སཧེཏུཀཀཱམཱཝཙརཝིཔཱཀེསུ ཏཱིསུ ¶ ཝིཔཱཀཱཧེཏུཀམནོཝིཉྙཱཎདྷཱཏཱུསུ ཙ ཨཉྙཏརཾ པཊིསོཏགཏཾ ནཱཝཾ ཨནུབནྡྷམཱནཾ ཀིཉྩི ཨནྟརཾ ཨུདཀམིཝ བྷཝངྒསྶཱརམྨཎཏོ ཨཉྙསྨིཾ ཨཱརམྨཎེ ¶ ཛཝིཏཾ ཛཝནམནུབནྡྷཾ དྭིཀྑཏྟུཾ སཀིཾ ཝཱ ཝིཔཱཀཝིཉྙཱཎཾ ཨུཔྤཛྫཏི. ཏདེཏཾ ཛཝནཱཝསཱནེ བྷཝངྒསྶ ཨཱརམྨཎེ པཝཏྟནཱརཧཾ སམཱནཾ ཏསྶ ཛཝནསྶ ཨཱརམྨཎཾ ཨཱརམྨཎཾ ཀཏྭཱ པཝཏྟཏྟཱ ཏདཱརམྨཎནྟི ཝུཙྩཏི. ཨེཝཾ ཨེཀཱདསནྣཾ ཝིཔཱཀཝིཉྙཱཎཱནཾ ཏདཱརམྨཎཝསེན པཝཏྟི ཝེདིཏབྦཱ.

ཏདཱརམྨཎཱཝསཱནེ པན པུན བྷཝངྒམེཝ པཝཏྟཏི, བྷཝངྒེ ཝིཙྪིནྣེ པུན ཨཱཝཛྫནཱདཱིནཱིཏི ཨེཝཾ ལདྡྷཔཙྩཡཙིཏྟསནྟཱནཾ བྷཝངྒཱནནྟརཾ ཨཱཝཛྫནཾ ཨཱཝཛྫནཱནནྟརཾ དསྶནཱདཱིནཱིཏི ཙིཏྟནིཡམཝསེནེཝ པུནཔྤུནཾ ཏཱཝ པཝཏྟཏི, ཡཱཝ ཨེཀསྨིཾ བྷཝེ བྷཝངྒསྶ པརིཀྑཡོ. ཨེཀསྨིཾ ཧི བྷཝེ ཡཾ སབྦཔཙྪིམཾ བྷཝངྒཙིཏྟཾ, ཏཾ ཏཏོ ཙཝནཏྟཱ ཙུཏཱིཏི ཝུཙྩཏི. ཏསྨཱ ཏམྤི ཨེཀཱུནཝཱིསཏིཝིདྷམེཝ ཧོཏི. ཨེཝཾ ཨེཀཱུནཝཱིསཏིཡཱ ཝིཔཱཀཝིཉྙཱཎཱནཾ ཙུཏིཝསེན པཝཏྟི ཝེདིཏབྦཱ.

ཙུཏིཏོ པན པུན པཊིསནྡྷི, པཊིསནྡྷིཏོ པུན བྷཝངྒནྟི ཨེཝཾ བྷཝགཏིཋིཏིནིཝཱསེསུ སཾསརམཱནཱནཾ སཏྟཱནཾ ཨཝིཙྪིནྣཾ ཙིཏྟསནྟཱནཾ པཝཏྟཏིཡེཝ. ཡོ པནེཏྠ ཨརཧཏྟཾ པཱཔུཎཱཏི, ཏསྶ ཙུཏིཙིཏྟེ ནིརུདྡྷེ ནིརུདྡྷམེཝ ཧོཏཱིཏི.

ཨིདཾ ཝིཉྙཱཎཀྑནྡྷེ ཝིཏྠཱརཀཐཱམུཁཾ.

ཝེདནཱཀྑནྡྷཀཐཱ

༤༥༦. ཨིདཱནི ཡཾ ཝུཏྟཾ ‘‘ཡཾཀིཉྩི ཝེདཡིཏལཀྑཎཾ, སབྦཾ ཏཾ ཨེཀཏོ ཀཏྭཱ ཝེདནཱཀྑནྡྷོ ཝེདིཏབྦོ’’ཏི, ཨེཏྠཱཔི ཝེདཡིཏལཀྑཎཾ ནཱམ ཝེདནཱཝ. ཡཐཱཧ – ‘‘ཝེདཡཏི ཝེདཡཏཱིཏི ཁོ ཨཱཝུསོ, ཏསྨཱ ཝེདནཱཏི ཝུཙྩཏཱི’’ཏི (མ. ནི. ༡.༤༥༠). སཱ པན ཝེདཡིཏལཀྑཎེན སབྷཱཝཏོ ཨེཀཝིདྷཱཔི ཛཱཏིཝསེན ཏིཝིདྷཱ ཧོཏི ཀུསལཱ, ཨཀུསལཱ, ཨབྱཱཀཏཱ ཙཱཏི.

ཏཏྠ ཀཱམཱཝཙརཾ སོམནསྶུཔེཀྑཱཉཱཎསངྑཱརབྷེདཏོ ཨཊྛཝིདྷནྟིཨཱདིནཱ ནཡེན ཝུཏྟེན ཀུསལཝིཉྙཱཎེན ¶ སམྤཡུཏྟཱ ཀུསལཱ, ཨཀུསལེན སམྤཡུཏྟཱ ཨཀུསལཱ, ཨབྱཱཀཏེན སམྤཡུཏྟཱ ཨབྱཱཀཏཱཏི ཝེདིཏབྦཱ. སཱ སབྷཱཝབྷེདཏོ པཉྩཝིདྷཱ ཧོཏི – སུཁཾ དུཀྑཾ སོམནསྶཾ དོམནསྶཾ ཨུཔེཀྑཱཏི.

ཏཏྠ ¶ ཀུསལཝིཔཱཀེན ཀཱཡཝིཉྙཱཎེན སམྤཡུཏྟཾ སུཁཾ. ཨཀུསལཝིཔཱཀེན དུཀྑཾ. ཀཱམཱཝཙརཏོ ཙཏཱུཧི ཀུསལེཧི, ཙཏཱུཧི སཧེཏུཀཝིཔཱཀེཧི, ཨེཀེན ཨཧེཏུཀཝིཔཱཀེན, ཙཏཱུཧི སཧེཏུཀཀིརིཡེཧི, ཨེཀེན ཨཧེཏུཀཀིརིཡེན, ཙཏཱུཧི ཨཀུསལེཧི, རཱུཔཱཝཙརཏོ ཋཔེཏྭཱ པཉྩམཛ྄ཛྷཱནཝིཉྙཱཎཾ ཙཏཱུཧི ཀུསལེཧི, ཙཏཱུཧི ཝིཔཱཀེཧི, ཙཏཱུཧི ཀིརིཡེཧི, ལོཀུཏྟརཾ པན ཡསྨཱ ཨཛྷཱནིཀཾ ནཱམ ནཏྠི, ཏསྨཱ ཨཊྛ ལོཀུཏྟརཱནི པཉྩནྣཾ ཛྷཱནཱནཾ ཝསེན ཙཏྟཱལཱིསཾ ཧོནྟི. ཏེསུ ཋཔེཏྭཱ ཨཊྛ པཉྩམཛ྄ཛྷཱནིཀཱནི སེསེཧི དྭཏྟིཾསཱཡ ཀུསལཝིཔཱཀེཧཱིཏི ཨེཝཾ སོམནསྶཾ དྭཱསཊྛིཡཱ ཝིཉྙཱཎེཧི སམྤཡུཏྟཾ. དོམནསྶཾ དྭཱིཧི ཨཀུསལེཧི. ཨུཔེཀྑཱ ཨཝསེསཔཉྩཔཉྙཱསཱཡ ཝིཉྙཱཎེཧི སམྤཡུཏྟཱ.

ཏཏྠ ཨིཊྛཕོཊྛབྦཱནུབྷཝནལཀྑཎཾ སུཁཾ, སམྤཡུཏྟཱནཾ ཨུཔབྲཱུཧནརསཾ, ཀཱཡིཀཨསྶཱདཔཙྩུཔཊྛཱནཾ, ཀཱཡིནྡྲིཡཔདཊྛཱནཾ.

ཨནིཊྛཕོཊྛབྦཱནུབྷཝནལཀྑཎཾ དུཀྑཾ, སམྤཡུཏྟཱནཾ མིལཱཔནརསཾ, ཀཱཡིཀཱབཱདྷཔཙྩུཔཊྛཱནཾ, ཀཱཡིནྡྲིཡཔདཊྛཱནཾ.

ཨིཊྛཱརམྨཎཱནུབྷཝནལཀྑཎཾ སོམནསྶཾ, ཡཐཱ ཏཐཱ ཝཱ ཨིཊྛཱཀཱརསམྦྷོགརསཾ, ཙེཏསིཀཨསྶཱདཔཙྩུཔཊྛཱནཾ, པསྶདྡྷིཔདཊྛཱནཾ.

ཨནིཊྛཱརམྨཎཱནུབྷཝནལཀྑཎཾ དོམནསྶཾ, ཡཐཱ ཏཐཱ ཝཱ ཨནིཊྛཱཀཱརསམྦྷོགརསཾ, ཙེཏསིཀཱབཱདྷཔཙྩུཔཊྛཱནཾ, ཨེཀནྟེནེཝ ཧདཡཝཏྠུཔདཊྛཱནཾ.

མཛ྄ཛྷཏྟཝེདཡིཏལཀྑཎཱ ཨུཔེཀྑཱ, སམྤཡུཏྟཱནཾ ནཱཏིཨུཔབྲཱུཧནམིལཱཔནརསཱ, སནྟབྷཱཝཔཙྩུཔཊྛཱནཱ, ནིཔྤཱིཏིཀཙིཏྟཔདཊྛཱནཱཏི.

ཨིདཾ ཝེདནཱཀྑནྡྷེ ཝིཏྠཱརཀཐཱམུཁཾ.

སཉྙཱཀྑནྡྷཀཐཱ

༤༥༧. ཨིདཱནི ¶ ཡཾ ཝུཏྟཾ ‘‘ཡཾཀིཉྩི སཉྫཱནནལཀྑཎཾ, སབྦཾ ཏཾ ཨེཀཏོ ཀཏྭཱ སཉྙཱཀྑནྡྷོ ཝེདིཏབྦོ’’ཏི, ཨེཏྠཱཔི སཉྫཱནནལཀྑཎཾ ནཱམ སཉྙཱཝ. ཡཐཱཧ – ‘‘སཉྫཱནཱཏི སཉྫཱནཱཏཱིཏི ཁོ, ཨཱཝུསོ, ཏསྨཱ སཉྙཱཏི ཝུཙྩཏཱི’’ཏི ¶ (མ. ནི. ༡.༤༥༠). སཱ པནེསཱ སཉྫཱནནལཀྑཎེན སབྷཱཝཏོ ཨེཀཝིདྷཱཔི ཛཱཏིཝསེན ཏིཝིདྷཱ ཧོཏི ཀུསལཱ, ཨཀུསལཱ, ཨབྱཱཀཏཱ ཙ.

ཏཏྠ ཀུསལཝིཉྙཱཎསམྤཡུཏྟཱ ཀུསལཱ, ཨཀུསལསམྤཡུཏྟཱ ཨཀུསལཱ, ཨབྱཱཀཏསམྤཡུཏྟཱ ཨབྱཱཀཏཱ. ན ཧི ཏཾ ཝིཉྙཱཎཾ ཨཏྠི, ཡཾ སཉྙཱཡ ཝིཔྤཡུཏྟཾ, ཏསྨཱ ཡཏྟཀོ ཝིཉྙཱཎསྶ བྷེདོ, ཏཏྟཀོ སཉྙཱཡཱཏི.

སཱ པནེསཱ ཨེཝཾ ཝིཉྙཱཎེན སམཔྤབྷེདཱཔི ལཀྑཎཱདིཏོ སབྦཱཝ སཉྫཱནནལཀྑཎཱ, ཏདེཝེཏནྟི པུན སཉྫཱནནཔཙྩཡནིམིཏྟཀརཎརསཱ དཱརུཨཱདཱིསུ ཏཙྪཀཱདཡོ ཝིཡ, ཡཐཱགཧིཏནིམིཏྟཝསེན ཨབྷིནིཝེསཀརཎཔཙྩུཔཊྛཱནཱ ཧཏྠིདསྶཀཨནྡྷཱ (ཨུདཱ. ༥༤) ཝིཡ, ཡཐཱཨུཔཊྛིཏཝིསཡཔདཊྛཱནཱ ཏིཎཔུརིསཀེསུ མིགཔོཏཀཱནཾ པུརིསཱཏི ཨུཔྤནྣསཉྙཱ ཝིཡཱཏི.

ཨིདཾ སཉྙཱཀྑནྡྷེ ཝིཏྠཱརཀཐཱམུཁཾ.

སངྑཱརཀྑནྡྷཀཐཱ

༤༥༨. ཡཾ པན ཝུཏྟཾ ‘‘ཡཾཀིཉྩི ཨབྷིསངྑརཎལཀྑཎཾ, སབྦཾ ཏཾ ཨེཀཏོ ཀཏྭཱ སངྑཱརཀྑནྡྷོ ཝེདིཏབྦོ’’ཏི, ཨེཏྠ ཨབྷིསངྑརཎལཀྑཎཾ ནཱམ རཱསིཀརཎལཀྑཎཾ. ཀིཾ པན ཏནྟི, སངྑཱརཱཡེཝ. ཡཐཱཧ – ‘‘སངྑཏམབྷིསངྑརོནྟཱིཏི ཁོ, བྷིཀྑཝེ, ཏསྨཱ སངྑཱརཱཏི ཝུཙྩནྟཱི’’ཏི (སཾ. ནི. ༣.༧༩). ཏེ ཨབྷིསངྑརཎལཀྑཎཱ, ཨཱཡཱུཧནརསཱ, ཝིཔྥཱརཔཙྩུཔཊྛཱནཱ, སེསཁནྡྷཏྟཡཔདཊྛཱནཱ.

ཨེཝཾ ལཀྑཎཱདིཏོ ཨེཀཝིདྷཱཔི ཙ ཛཱཏིཝསེན ཏིཝིདྷཱ ཀུསལཱ, ཨཀུསལཱ, ཨབྱཱཀཏཱཏི ¶ . ཏེསུ ཀུསལཝིཉྙཱཎསམྤཡུཏྟཱ ཀུསལཱ. ཨཀུསལསམྤཡུཏྟཱ ཨཀུསལཱ. ཨབྱཱཀཏསམྤཡུཏྟཱ ཨབྱཱཀཏཱ.

ཏཏྠ ཀཱམཱཝཙརཔཋམཀུསལཝིཉྙཱཎསམྤཡུཏྟཱ ཏཱཝ ནིཡཏཱ སརཱུཔེན ཨཱགཏཱ སཏྟཝཱིསཏི, ཡེཝཱཔནཀཱ ཙཏྟཱརོ, ཨནིཡཏཱ པཉྩཱཏི ཚཏྟིཾས. ཏཏྠ ཕསྶོ, ཙེཏནཱ, ཝིཏཀྐོ, ཝིཙཱརོ, པཱིཏི, ཝཱིརིཡཾ, ཛཱིཝིཏཾ, སམཱདྷི, སདྡྷཱ, སཏི, ཧིརཱི, ཨོཏྟཔྤཾ, ཨལོབྷོ, ཨདོསོ, ཨམོཧོ, ཀཱཡཔསྶདྡྷི, ཙིཏྟཔསྶདྡྷི, ཀཱཡལཧུཏཱ, ཙིཏྟལཧུཏཱ, ཀཱཡམུདུཏཱ, ཙིཏྟམུདུཏཱ, ཀཱཡཀམྨཉྙཏཱ, ཙིཏྟཀམྨཉྙཏཱ, ཀཱཡཔཱགུཉྙཏཱ, ཙིཏྟཔཱགུཉྙཏཱ, ཀཱཡུཛུཀཏཱ, ཙིཏྟུཛུཀཏཱཏི ཨིམེ སརཱུཔེན ¶ ཨཱགཏཱ སཏྟཝཱིསཏི (དྷ. ས. ༡; དྷ. ས. ཨཊྛ. ༡ ཡེཝཱཔནཀཝཎྞནཱ). ཚནྡོ, ཨདྷིམོཀྑོ, མནསིཀཱརོ, ཏཏྲམཛ྄ཛྷཏྟཏཱཏི ཨིམེ ཡེཝཱཔནཀཱ ཙཏྟཱརོ (དྷ. ས. ཨཊྛ. ༡ ཡེཝཱཔནཀཝཎྞནཱ). ཀརུཎཱ, མུདིཏཱ, ཀཱཡདུཙྩརིཏཝིརཏི, ཝཙཱིདུཙྩརིཏཝིརཏི, མིཙྪཱཛཱིཝཝིརཏཱིཏི ཨིམེ ཨནིཡཏཱ པཉྩ. ཨེཏེ ཧི ཀདཱཙི ཨུཔྤཛྫནྟི, ཨུཔྤཛྫམཱནཱཔི ཙ ན ཨེཀཏོ ཨུཔྤཛྫནྟི.

༤༥༩. ཏཏྠ ཕུསཏཱིཏི ཕསྶོ. སྭཱཡཾ ཕུསནལཀྑཎོ. སངྒྷཊྚནརསོ, སནྣིཔཱཏཔཙྩུཔཊྛཱནོ, ཨཱཔཱཐགཏཝིསཡཔདཊྛཱནོ. ཨཡཉྷི ཨརཱུཔདྷམྨོཔི སམཱནོ ཨཱརམྨཎེ ཕུསནཱཀཱརེནེཝ པཝཏྟཏི. ཨེཀདེསེན ཙ ཨནལླིཡམཱནོཔི རཱུཔཾ ཝིཡ ཙཀྑུ, སདྡོ ཝིཡ ཙ སོཏཾ ཙིཏྟཾ ཨཱརམྨཎཉྩ སངྒྷཊྚེཏི, ཏིཀསནྣིཔཱཏསངྑཱཏསྶ ཨཏྟནོ ཀཱརཎསྶ ཝསེན པཝེདིཏཏྟཱ སནྣིཔཱཏཔཙྩུཔཊྛཱནོ. ཏཛྫཱསམནྣཱཧཱརེན ཙེཝ ཨིནྡྲིཡེན ཙ པརིཀྑཏེ ཝིསཡེ ཨནནྟརཱཡེནེཝ ཨུཔྤཛྫནཏོ ཨཱཔཱཐགཏཝིསཡཔདཊྛཱནོཏི ཝུཙྩཏི. ཝེདནཱདྷིཊྛཱནབྷཱཝཏོ པན ནིཙྩམྨགཱཝཱི (སཾ. ནི. ༢.༦༣) ཝིཡ དཊྛབྦོ.

༤༦༠. ཙེཏཡཏཱིཏི ཙེཏནཱ. ཨབྷིསནྡཧཏཱིཏི ཨཏྠོ. སཱ ཙེཏནཱབྷཱཝལཀྑཎཱ, ཨཱཡཱུཧནརསཱ, སཾཝིདཧནཔཙྩུཔཊྛཱནཱ སཀིཙྩཔརཀིཙྩསཱདྷིཀཱ ཛེཊྛསིསྶམཧཱཝཌྜྷཀཱིཨཱདཡོ ཝིཡ. ཨཙྩཱཡིཀཀམྨཱནུསྶརཎཱདཱིསུ ཙ པནཱཡཾ སམྤཡུཏྟཱནཾ ཨུསྶཧནབྷཱཝེན པཝཏྟམཱནཱ པཱཀཊཱ ཧོཏི.

ཝིཏཀྐཝིཙཱརཔཱིཏཱིསུ ཡཾ ཝཏྟབྦཾ སིཡཱ, ཏཾ སབྦཾ པཐཝཱིཀསིཎནིདྡེསེ པཋམཛ྄ཛྷཱནཝཎྞནཱཡཾ (ཝིསུདྡྷི. ༡.༧༡) ཝུཏྟམེཝ.

༤༦༡. ཝཱིརབྷཱཝོ ¶ ཝཱིརིཡཾ. ཏཾ ཨུསྶཧནལཀྑཎཾ, སཧཛཱཏཱནཾ ཨུཔཏྠམྦྷནརསཾ, ཨསཾསཱིདནབྷཱཝཔཙྩུཔཊྛཱནཾ. ‘‘སཾཝིགྒོ ཡོནིསོ པདཧཏཱི’’ཏི (ཨ. ནི. ༤.༡༡༣) ཝཙནཏོ སཾཝེགཔདཊྛཱནཾ, ཝཱིརིཡཱརམྦྷཝཏྠུཔདཊྛཱནཾ ཝཱ, སམྨཱ ཨཱརདྡྷཾ སབྦསམྤཏྟཱིནཾ མཱུལཾ ཧོཏཱིཏི དཊྛབྦཾ.

༤༦༢. ཛཱིཝནྟི ཏེན, སཡཾ ཝཱ ཛཱིཝཏི, ཛཱིཝནམཏྟམེཝ ཝཱ ཏནྟི ཛཱིཝིཏཾ. ལཀྑཎཱདཱིནི པནསྶ རཱུཔཛཱིཝིཏེ ཝུཏྟནཡེནེཝ ཝེདིཏབྦཱནི. ཏཉྷི རཱུཔདྷམྨཱནཾ ཛཱིཝིཏཾ, ཨིདཾ ཨརཱུཔདྷམྨཱནནྟི ཨིདམེཝེཏྠ ནཱནཱཀརཎཾ.

༤༦༣. ཨཱརམྨཎེ ¶ ཙིཏྟཾ སམཾ ཨཱདྷིཡཏི, སམྨཱ ཝཱ ཨཱདྷིཡཏི, སམཱདྷཱནམཏྟམེཝ ཝཱ ཨེཏཾ ཙིཏྟསྶཱཏི སམཱདྷི. སོ ཨཝིསཱརལཀྑཎོ, ཨཝིཀྑེཔལཀྑཎོ ཝཱ, སཧཛཱཏཱནཾ སམྤིཎྜནརསོ ནྷཱནིཡཙུཎྞཱནཾ ཨུདཀཾ ཝིཡ, ཨུཔསམཔཙྩུཔཊྛཱནོ, ཝིསེསཏོ སུཁཔདཊྛཱནོ, ནིཝཱཏེ དཱིཔཙྩཱིནཾ ཋིཏི ཝིཡ ཙེཏསོ ཋིཏཱིཏི དཊྛབྦོ.

༤༦༤. སདྡཧནྟི ཨེཏཱཡ, སཡཾ ཝཱ སདྡཧཏི, སདྡཧནམཏྟམེཝ ཝཱ ཨེསཱཏི སདྡྷཱ. སཱ སདྡཧནལཀྑཎཱ, ཨོཀཔྤནལཀྑཎཱ ཝཱ, པསཱདནརསཱ ཨུདཀཔྤསཱདཀམཎི ཝིཡ, པཀྑནྡནརསཱ ཝཱ ཨོགྷུཏྟརཎོ ཝིཡ. ཨཀཱལུསྶིཡཔཙྩུཔཊྛཱནཱ, ཨདྷིམུཏྟིཔཙྩུཔཊྛཱནཱ ཝཱ, སདྡྷེཡྻཝཏྠུཔདཊྛཱནཱ, སདྡྷམྨསྶཝནཱདིསོཏཱཔཏྟིཡངྒ(དཱི. ནི. ༣.༣༡༡; སཾ. ནི. ༥.༡༠༠༡) པདཊྛཱནཱ ཝཱ, ཧཏྠཝིཏྟབཱིཛཱནི ཝིཡ དཊྛབྦཱ.

༤༦༥. སརནྟི ཏཱཡ, སཡཾ ཝཱ སརཏི སརཎམཏྟམེཝ ཝཱ ཨེསཱཏི སཏི. སཱ ཨཔིལཱཔནལཀྑཎཱ, ཨསམྨོསརསཱ, ཨཱརཀྑཔཙྩུཔཊྛཱནཱ, ཝིསཡཱབྷིམུཁབྷཱཝཔཙྩུཔཊྛཱནཱ ཝཱ, ཐིརསཉྙཱཔདཊྛཱནཱ, ཀཱཡཱདིསཏིཔཊྛཱནཔདཊྛཱནཱ ཝཱ. ཨཱརམྨཎེ དལ༹ྷཔཏིཊྛིཏཏྟཱ པན ཨེསིཀཱ ཝིཡ, ཙཀྑུདྭཱརཱདིརཀྑཎཏོ དོཝཱརིཀོ ཝིཡ ཙ དཊྛབྦཱ.

༤༦༦. ཀཱཡདུཙྩརིཏཱདཱིཧི ཧིརིཡཏཱིཏི ཧིརཱི. ལཛྫཱཡེཏཾ ཨདྷིཝཙནཾ. ཏེཧིཡེཝ ཨོཏྟཔྤཏཱིཏི ཨོཏྟཔྤཾ. པཱཔཏོ ཨུབྦེགསྶེཏཾ ཨདྷིཝཙནཾ. ཏཏྠ པཱཔཏོ ཛིགུཙྪནལཀྑཎཱ ཧིརཱི. ཨུཏྟཱསནལཀྑཎཾ ཨོཏྟཔྤཾ. ལཛྫཱཀཱརེན པཱཔཱནཾ ཨཀརཎརསཱ ཧིརཱི. ཨུཏྟཱསཱཀཱརེན ཨོཏྟཔྤཾ. ཝུཏྟཔྤཀཱརེནེཝ ¶ ཙ པཱཔཏོ སངྐོཙནཔཙྩུཔཊྛཱནཱ ཨེཏཱ, ཨཏྟགཱརཝཔརགཱརཝཔདཊྛཱནཱ. ཨཏྟཱནཾ གརུཾ ཀཏྭཱ ཧིརིཡཱ པཱཔཾ ཛཧཱཏི ཀུལཝདྷཱུ ཝིཡ. པརཾ གརུཾ ཀཏྭཱ ཨོཏྟཔྤེན པཱཔཾ ཛཧཱཏི ཝེསིཡཱ ཝིཡ. ཨིམེ ཙ པན དྭེ དྷམྨཱ ལོཀཔཱལཀཱཏི (ཨ. ནི. ༢.༩) དཊྛབྦཱ.

༤༦༧. ན ལུབྦྷནྟི ཏེན, སཡཾ ཝཱ ན ལུབྦྷཏི, ཨལུབྦྷནམཏྟམེཝ ཝཱ ཏནྟི ཨལོབྷོ. ཨདོསཱམོཧེསུཔི ཨེསེཝ ནཡོ. ཏེསུ ཨལོབྷོ ཨཱརམྨཎེ ཙིཏྟསྶ ཨགེདྷལཀྑཎོ, ཨལགྒབྷཱཝལཀྑཎོ ཝཱ ཀམལདལེ ཛལབིནྡུ ཝིཡ. ཨཔརིགྒཧརསོ མུཏྟབྷིཀྑུ ཝིཡ, ཨནལླཱིནབྷཱཝཔཙྩུཔཊྛཱནོ ཨསུཙིམྷི པཏིཏཔུརིསོ ཝིཡ.

༤༦༨. ཨདོསོ ¶ ཨཙཎྜིཀྐལཀྑཎོ, ཨཝིརོདྷལཀྑཎོ ཝཱ ཨནུཀཱུལམིཏྟོ ཝིཡ, ཨཱགྷཱཏཝིནཡརསོ, པརིལཱ༹ཧཝིནཡརསོ ཝཱ ཙནྡནཾ ཝིཡ, སོམྨབྷཱཝཔཙྩུཔཊྛཱནོ པུཎྞཙནྡོ ཝིཡ.

༤༦༩. ཨམོཧོ ཡཐཱསབྷཱཝཔཊིཝེདྷལཀྑཎོ, ཨཀྑལིཏཔཊིཝེདྷལཀྑཎོ ཝཱ ཀུསལིསྶཱསཁིཏྟཨུསུཔཊིཝེདྷོ ཝིཡ, ཝིསཡོབྷཱསནརསོ པདཱིཔོ ཝིཡ. ཨསམྨོཧཔཙྩུཔཊྛཱནོ ཨརཉྙགཏསུདེསཀོ ཝིཡ. ཏཡོཔི ཙེཏེ སབྦཀུསལཱནཾ མཱུལབྷཱུཏཱཏི དཊྛབྦཱ.

༤༧༠. ཀཱཡསྶ པསྶམྦྷནཾ ཀཱཡཔསྶདྡྷི. ཙིཏྟསྶ པསྶམྦྷནཾ ཙིཏྟཔསྶདྡྷི. ཀཱཡོཏི ཙེཏྠ ཝེདནཱདཡོ ཏཡོ ཁནྡྷཱ. ཨུབྷོཔི པནེཏཱ ཨེཀཏོ ཀཏྭཱ ཀཱཡཙིཏྟདརཐཝཱུཔསམལཀྑཎཱ ཀཱཡཙིཏྟཔསྶདྡྷིཡོ, ཀཱཡཙིཏྟདརཐནིམདྡནརསཱ, ཀཱཡཙིཏྟཱནཾ ཨཔརིཔྥནྡནསཱིཏིབྷཱཝཔཙྩུཔཊྛཱནཱ, ཀཱཡཙིཏྟཔདཊྛཱནཱ. ཀཱཡཙིཏྟཱནཾ ཨཝཱུཔསམཀརཨུདྡྷཙྩཱདིཀིལེསཔཊིཔཀྑབྷཱུཏཱཏི དཊྛབྦཱ.

ཀཱཡསྶ ལཧུབྷཱཝོ ཀཱཡལཧུཏཱ. ཙིཏྟསྶ ལཧུབྷཱཝོ ཙིཏྟལཧུཏཱ. ཏཱ ཀཱཡཙིཏྟགརུབྷཱཝཝཱུཔསམལཀྑཎཱ, ཀཱཡཙིཏྟགརུབྷཱཝནིམདྡནརསཱ, ཀཱཡཙིཏྟཱནཾ ཨདནྡྷཏཱཔཙྩུཔཊྛཱནཱ, ཀཱཡཙིཏྟཔདཊྛཱནཱ. ཀཱཡཙིཏྟཱནཾ གརུབྷཱཝཀརཐིནམིདྡྷཱདིཀིལེསཔཊིཔཀྑབྷཱུཏཱཏི དཊྛབྦཱ.

ཀཱཡསྶ མུདུབྷཱཝོ ཀཱཡམུདུཏཱ. ཙིཏྟསྶ མུདུབྷཱཝོ ཙིཏྟམུདུཏཱ. ཏཱ ཀཱཡཙིཏྟཏྠམྦྷཝཱུཔསམལཀྑཎཱ ¶ , ཀཱཡཙིཏྟཐདྡྷབྷཱཝནིམདྡནརསཱ, ཨཔྤཊིགྷཱཏཔཙྩུཔཊྛཱནཱ, ཀཱཡཙིཏྟཔདཊྛཱནཱ. ཀཱཡཙིཏྟཱནཾ ཐདྡྷབྷཱཝཀརདིཊྛིམཱནཱདིཀིལེསཔཊིཔཀྑབྷཱུཏཱཏི དཊྛབྦཱ.

ཀཱཡསྶ ཀམྨཉྙབྷཱཝོ ཀཱཡཀམྨཉྙཏཱ. ཙིཏྟསྶ ཀམྨཉྙབྷཱཝོ ཙིཏྟཀམྨཉྙཏཱ. ཏཱ ཀཱཡཙིཏྟཱཀམྨཉྙབྷཱཝཝཱུཔསམལཀྑཎཱ, ཀཱཡཙིཏྟཱཀམྨཉྙབྷཱཝནིམདྡནརསཱ, ཀཱཡཙིཏྟཱནཾ ཨཱརམྨཎཀརཎསམྤཏྟིཔཙྩུཔཊྛཱནཱ, ཀཱཡཙིཏྟཔདཊྛཱནཱ. ཀཱཡཙིཏྟཱནཾ ཨཀམྨཉྙབྷཱཝཀརཱཝསེསནཱིཝརཎཱདིཔཊིཔཀྑབྷཱུཏཱ, པསཱདནཱིཡཝཏྠཱུསུ པསཱདཱཝཧཱ, ཧིཏཀིརིཡཱསུ ཝིནིཡོགཀྑམབྷཱཝཱཝཧཱ སུཝཎྞཝིསུདྡྷི ཝིཡཱཏི དཊྛབྦཱ.

ཀཱཡསྶ ¶ པཱགུཉྙབྷཱཝོ ཀཱཡཔཱགུཉྙཏཱ. ཙིཏྟསྶ པཱགུཉྙབྷཱཝོ ཙིཏྟཔཱགུཉྙཏཱ. ཏཱ ཀཱཡཙིཏྟཱནཾ ཨགེལཉྙབྷཱཝལཀྑཎཱ, ཀཱཡཙིཏྟགེལཉྙནིམདྡནརསཱ, ནིརཱདཱིནཝཔཙྩུཔཊྛཱནཱ, ཀཱཡཙིཏྟཔདཊྛཱནཱ. ཀཱཡཙིཏྟཱནཾ གེལཉྙཀརཨསདྡྷིཡཱདིཔཊིཔཀྑབྷཱུཏཱཏི དཊྛབྦཱ.

ཀཱཡསྶ ཨུཛུཀབྷཱཝོ ཀཱཡུཛུཀཏཱ. ཙིཏྟསྶ ཨུཛུཀབྷཱཝོ ཙིཏྟུཛུཀཏཱ. ཏཱ ཀཱཡཙིཏྟཨཛྫཝལཀྑཎཱ, ཀཱཡཙིཏྟཀུཊིལབྷཱཝནིམདྡནརསཱ, ཨཛིམྷཏཱཔཙྩུཔཊྛཱནཱ, ཀཱཡཙིཏྟཔདཊྛཱནཱ. ཀཱཡཙིཏྟཱནཾ ཀུཊིལབྷཱཝཀརམཱཡཱསཱཋེཡྻཱདིཔཊིཔཀྑབྷཱུཏཱཏི དཊྛབྦཱ.

༤༧༡. ཚནྡོཏི ཀཏྟུཀཱམཏཱཡེཏཾ ཨདྷིཝཙནཾ. ཏསྨཱ སོ ཀཏྟུཀཱམཏཱལཀྑཎོ ཚནྡོ, ཨཱརམྨཎཔརིཡེསནརསོ, ཨཱརམྨཎེན ཨཏྠིཀཏཱཔཙྩུཔཊྛཱནོ, ཏདེཝསྶ པདཊྛཱནཾ. ཨཱརམྨཎགྒཧཎེ ཨཡཾ ཙེཏསོ ཧཏྠཔྤསཱརཎཾ ཝིཡ དཊྛབྦོ.

༤༧༢. ཨདྷིམུཙྩནཾ ཨདྷིམོཀྑོ. སོ སནྣིཊྛཱནལཀྑཎོ, ཨསཾསཔྤནརསོ, ནིཙྪཡཔཙྩུཔཊྛཱནོ, སནྣིཊྛེཡྻདྷམྨཔདཊྛཱནོ, ཨཱརམྨཎེ ནིཙྩལབྷཱཝེན ཨིནྡཁཱིལོ ཝིཡ དཊྛབྦོ.

༤༧༣. ཀིརིཡཱ ཀཱརོ. མནམྷི ཀཱརོ མནསིཀཱརོ. པུརིམམནཏོ ཝིསདིསམནཾ ཀརོཏཱིཏིཔི མནསིཀཱརོ. སྭཱཡཾ ཨཱརམྨཎཔཊིཔཱདཀོ, ཝཱིཐིཔཊིཔཱདཀོ, ཛཝནཔཊིཔཱདཀོཏི ཏིཔྤཀཱརོ.

ཏཏྠ ¶ ཨཱརམྨཎཔཊིཔཱདཀོ མནམྷི ཀཱརོཏི མནསིཀཱརོ. སོ སཱརཎལཀྑཎོ, སམྤཡུཏྟཱནཾ ཨཱརམྨཎེ སཾཡོཛནརསོ, ཨཱརམྨཎཱབྷིམུཁབྷཱཝཔཙྩུཔཊྛཱནོ, ཨཱརམྨཎཔདཊྛཱནོ. སངྑཱརཀྑནྡྷཔརིཡཱཔནྣོ, ཨཱརམྨཎཔཊིཔཱདཀཏྟེན སམྤཡུཏྟཱནཾ སཱརཐི ཝིཡ དཊྛབྦོ. ཝཱིཐིཔཊིཔཱདཀོཏི པན པཉྩདྭཱརཱཝཛྫནསྶེཏཾ ཨདྷིཝཙནཾ. ཛཝནཔཊིཔཱདཀོཏི མནོདྭཱརཱཝཛྫནསྶེཏཾ ཨདྷིཝཙནཾ. ན ཏེ ཨིདྷ ཨདྷིཔྤེཏཱ.

༤༧༤. ཏེསུ དྷམྨེསུ མཛ྄ཛྷཏྟཏཱ ཏཏྲམཛ྄ཛྷཏྟཏཱ. སཱ ཙིཏྟཙེཏསིཀཱནཾ སམཝཱཧིཏལཀྑཎཱ, ཨཱུནཱདྷིཀཏཱནིཝཱརཎརསཱ, པཀྑཔཱཏུཔཙྪེདནརསཱ ཝཱ, མཛ྄ཛྷཏྟབྷཱཝཔཙྩུཔཊྛཱནཱ, ཙིཏྟཙེཏསིཀཱནཾ ཨཛ྄ཛྷུཔེཀྑནབྷཱཝེན སམཔྤཝཏྟཱནཾ ཨཱཛཱནཱིཡཱནཾ ཨཛ྄ཛྷུཔེཀྑཀསཱརཐི ཝིཡ དཊྛབྦཱ.

ཀརུཎཱམུདིཏཱ ¶ ཙ བྲཧྨཝིཧཱརནིདྡེསེ (ཝིསུདྡྷི. ༡.༢༦༢) ཝུཏྟནཡེནེཝ ཝེདིཏབྦཱ. ཀེཝལཉྷི ཏཱ ཨཔྤནཱཔྤཏྟཱ རཱུཔཱཝཙརཱ, ཨིམཱ ཀཱམཱཝཙརཱཏི ཨཡམེཝ ཝིསེསོ.

ཀེཙི པན མེཏྟུཔེཀྑཱཡོཔི ཨནིཡཏེསུ ཨིཙྪནྟི, ཏཾ ན གཧེཏབྦཾ. ཨཏྠཏོ ཧི ཨདོསོཡེཝ མེཏྟཱ, ཏཏྲམཛ྄ཛྷཏྟུཔེཀྑཱཡེཝ ཨུཔེཀྑཱཏི.

༤༧༥. ཀཱཡདུཙྩརིཏཏོ ཝིརཏི ཀཱཡདུཙྩརིཏཝིརཏི. ཨེས ནཡོ སེསཱསུཔི. ལཀྑཎཱདིཏོ པནེཏཱ ཏིསྶོཔི ཀཱཡདུཙྩརིཏཱདིཝཏྠཱུནཾ ཨཝཱིཏིཀྐམལཀྑཎཱ, ཨམདྡནལཀྑཎཱཏི ཝུཏྟཾ ཧོཏི. ཀཱཡདུཙྩརིཏཱདིཝཏྠུཏོ སངྐོཙནརསཱ, ཨཀིརིཡཔཙྩུཔཊྛཱནཱ, སདྡྷཱཧིརོཏྟཔྤཨཔྤིཙྪཏཱདིགུཎཔདཊྛཱནཱ, པཱཔཀིརིཡཏོ ཙིཏྟསྶ ཝིམུཁབྷཱཝབྷཱུཏཱཏི དཊྛབྦཱ.

༤༧༦. ཨིཏི ཨིམེཝ ཚཏྟིཾས སངྑཱརཱ པཋམེན ཀཱམཱཝཙརཀུསལཝིཉྙཱཎེན སམྤཡོགཾ གཙྪནྟཱིཏི ཝེདིཏབྦཱ. ཡཐཱ ཙ པཋམེན, ཨེཝཾ དུཏིཡེནཱཔི. སསངྑཱརབྷཱཝམཏྟམེཝ ཧེཏྠ ཝིསེསོ.

ཏཏིཡེན པན ཋཔེཏྭཱ ཨམོཧཾ ཨཝསེསཱ ཝེདིཏབྦཱ. ཏཐཱ ཙཏུཏྠེན. སསངྑཱརབྷཱཝམཏྟམེཝ ཧེཏྠ ཝིསེསོ.

པཋམེ ¶ ཝུཏྟེསུ པན ཋཔེཏྭཱ པཱིཏིཾ ཨཝསེསཱ པཉྩམེན སམྤཡོགཾ གཙྪནྟི. ཡཐཱ ཙ པཉྩམེན, ཨེཝཾ ཚཊྛེནཱཔི. སསངྑཱརབྷཱཝམཏྟམེཝ ཧེཏྠ ཝིསེསོ. སཏྟམེན ཙ པན ཋཔེཏྭཱ ཨམོཧཾ ཨཝསེསཱ ཝེདིཏབྦཱ. ཏཐཱ ཨཊྛམེན. སསངྑཱརབྷཱཝམཏྟམེཝ ཧེཏྠ ཝིསེསོ.

པཋམེ ཝུཏྟེསུ ཋཔེཏྭཱ ཝིརཏིཏྟཡཾ སེསཱ རཱུཔཱཝཙརཀུསལེསུ པཋམེན སམྤཡོགཾ གཙྪནྟི. དུཏིཡེན ཏཏོ ཝིཏཀྐཝཛྫཱ. ཏཏིཡེན ཏཏོ ཝིཙཱརཝཛྫཱ. ཙཏུཏྠེན ཏཏོ པཱིཏིཝཛྫཱ. པཉྩམེན ཏཏོ ཨནིཡཏེསུ ཀརུཎཱམུདིཏཱཝཛྫཱ. ཏེཡེཝ ཙཏཱུསུ ཨཱརུཔྤཀུསལེསུ. ཨརཱུཔཱཝཙརབྷཱཝོཡེཝ ཧི ཨེཏྠ ཝིསེསོ.

ལོཀུཏྟརེསུ པཋམཛ྄ཛྷཱནིཀེ ཏཱཝ མགྒཝིཉྙཱཎེ པཋམརཱུཔཱཝཙརཝིཉྙཱཎེ ཝུཏྟནཡེན, དུཏིཡཛ྄ཛྷཱནིཀཱདིབྷེདེ དུཏིཡརཱུཔཱཝཙརཝིཉྙཱཎཱདཱིསུ ཝུཏྟནཡེནེཝ ཝེདིཏབྦཱ. ཀརུཎཱམུདིཏཱནཾ པན ཨབྷཱཝོ, ནིཡཏཝིརཏིཏཱ ¶ , ལོཀུཏྟརཏཱ ཙཱཏི ཨཡམེཏྠ ཝིསེསོ. ཨེཝཾ ཏཱཝ ཀུསལཱཡེཝ སངྑཱརཱ ཝེདིཏབྦཱ.

༤༧༧. ཨཀུསལེསུ ལོབྷམཱུལེ པཋམཱཀུསལསམྤཡུཏྟཱ ཏཱཝ ནིཡཏཱ སརཱུཔེན ཨཱགཏཱ ཏེརས, ཡེཝཱཔནཀཱ ཙཏྟཱརོཏི སཏྟརས. ཏཏྠ ཕསྶོ, ཙེཏནཱ, ཝིཏཀྐོ, ཝིཙཱརོ, པཱིཏི, ཝཱིརིཡཾ, ཛཱིཝིཏཾ, སམཱདྷི, ཨཧིརིཀཾ, ཨནོཏྟཔྤཾ, ལོབྷོ, མོཧོ, མིཙྪཱདིཊྛཱིཏི ཨིམེ སརཱུཔེན ཨཱགཏཱ ཏེརས (དྷ. ས. ༣༦༥; དྷ. ས. ཨཊྛ. ༣༦༥). ཚནྡོ, ཨདྷིམོཀྑོ, ཨུདྡྷཙྩཾ, མནསིཀཱརོཏི ཨིམེ ཡེཝཱཔནཀཱ ཙཏྟཱརོ (དྷ. ས. ཨཊྛ. ༣༦༥).

༤༧༨. ཏཏྠ ན ཧིརིཡཏཱིཏི ཨཧིརིཀོ. ཨཧིརིཀསྶ བྷཱཝོ ཨཧིརིཀཾ. ན ཨོཏཔྤཏཱིཏི ཨནོཏྟཔྤཾ. ཏེསུ ཨཧིརིཀཾ ཀཱཡདུཙྩརིཏཱདཱིཧི ཨཛིགུཙྪནལཀྑཎཾ, ཨལཛྫཱལཀྑཎཾ ཝཱ. ཨནོཏྟཔྤཾ ཏེཧེཝ ཨསཱརཛྫལཀྑཎཾ, ཨནུཏྟཱསལཀྑཎཾ ཝཱ. ཨཡམེཏྠ སངྑེཔོ. ཝིཏྠཱརོ པན ཧིརོཏྟཔྤཱནཾ ཝུཏྟཔཊིཔཀྑཝསེན ཝེདིཏབྦོ.

༤༧༩. ལུབྦྷནྟི ཏེན, སཡཾ ཝཱ ལུབྦྷཏི, ལུབྦྷནམཏྟམེཝ ཝཱ ཏནྟི ལོབྷོ. མུཡ྄ཧནྟི ཏེན, སཡཾ ཝཱ མུཡ྄ཧཏི, མུཡ྄ཧནམཏྟམེཝ ཝཱ ཏནྟི མོཧོ. ཏེསུ ལོབྷོ ཨཱརམྨཎགྒཧཎལཀྑཎོ མཀྐཊཱལེཔོ ཝིཡ, ཨབྷིསངྒརསོ ཏཏྟཀཔཱལེ ཁིཏྟམཾསཔེསི ཝིཡ. ཨཔརིཙྩཱགཔཙྩུཔཊྛཱནོ ཏེལཉྫནརཱགོ ¶ ཝིཡ. སཾཡོཛནིཡདྷམྨེསུ ཨསྶཱདདསྶནཔདཊྛཱནོ. ཏཎྷཱནདཱིབྷཱཝེན ཝཌྜྷམཱནོ སཱིགྷསོཏཱ ནདཱི ཨིཝ མཧཱསམུདྡཾ ཨཔཱཡམེཝ གཧེཏྭཱ གཙྪཏཱིཏི དཊྛབྦོ.

༤༨༠. མོཧོ ཙིཏྟསྶ ཨནྡྷབྷཱཝལཀྑཎོ, ཨཉྙཱཎལཀྑཎོ ཝཱ, ཨསམྤཊིཝེདྷརསོ, ཨཱརམྨཎསབྷཱཝཙྪཱདནརསོ ཝཱ, ཨསམྨཱཔཊིཔཏྟིཔཙྩུཔཊྛཱནོ, ཨནྡྷཀཱརཔཙྩུཔཊྛཱནོ ཝཱ, ཨཡོནིསོམནསིཀཱརཔདཊྛཱནོ, སབྦཱཀུསལཱནཾ མཱུལནྟི དཊྛབྦོ.

༤༨༡. མིཙྪཱ པསྶནྟི ཏཱཡ, སཡཾ ཝཱ མིཙྪཱ པསྶཏི, མིཙྪཱདསྶནམཏྟཾ ཝཱ ཨེསཱཏི མིཙྪཱདིཊྛི. སཱ ཨཡོནིསོ ཨབྷིནིཝེསལཀྑཎཱ, པརཱམཱསརསཱ, མིཙྪཱབྷིནིཝེསཔཙྩུཔཊྛཱནཱ, ཨརིཡཱནཾ ཨདསྶནཀཱམཏཱདིཔདཊྛཱནཱ, པརམཾ ཝཛྫནྟི དཊྛབྦཱ.

༤༨༢. ཨུདྡྷཏབྷཱཝོ ¶ ཨུདྡྷཙྩཾ. ཏཾ ཨཝཱུཔསམལཀྑཎཾ ཝཱཏཱབྷིགྷཱཏཙལཛལཾ ཝིཡ, ཨནཝཊྛཱནརསཾ ཝཱཏཱབྷིགྷཱཏཙལདྷཛཔཊཱཀཱ ཝིཡ, བྷནྟཏྟཔཙྩུཔཊྛཱནཾ པཱསཱཎཱབྷིགྷཱཏསམུདྡྷཏབྷསྨཾ ཝིཡ, ཙེཏསོ ཨཝཱུཔསམེ ཨཡོནིསོམནསིཀཱརཔདཊྛཱནཾ, ཙིཏྟཝིཀྑེཔོཏི དཊྛབྦཾ. སེསཱ ཀུསལེ ཝུཏྟནཡེནེཝ ཝེདིཏབྦཱ. ཨཀུསལབྷཱཝོཡེཝ ཧི ཨཀུསལབྷཱཝེན ཙ ལཱམཀཏྟཾ ཨེཏེསཾ ཏེཧི ཝིསེསོ.

༤༨༣. ཨིཏི ཨིམེ སཏྟརས སངྑཱརཱ པཋམེན ཨཀུསལཝིཉྙཱཎེན སམྤཡོགཾ གཙྪནྟཱིཏི ཝེདིཏབྦཱ. ཡཐཱ ཙ པཋམེན, ཨེཝཾ དུཏིཡེནཱཔི. སསངྑཱརཏཱ པནེཏྠ ཐིནམིདྡྷསྶ ཙ ཨནིཡཏཏཱ ཝིསེསོ.

ཏཏྠ ཐིནནཏཱ ཐིནཾ. མིདྡྷནཏཱ མིདྡྷཾ. ཨནུསྶཱཧསཾཧནནཏཱ ཨསཏྟིཝིགྷཱཏོ ཙཱཏི ཨཏྠོ. ཐིནཉྩ མིདྡྷཉྩ ཐིནམིདྡྷཾ. ཏཏྠ ཐིནཾ ཨནུསྶཱཧལཀྑཎཾ, ཝཱིརིཡཝིནོདནརསཾ, སཾསཱིདནཔཙྩུཔཊྛཱནཾ. མིདྡྷཾ ཨཀམྨཉྙཏཱལཀྑཎཾ, ཨོནཧནརསཾ, ལཱིནཏཱཔཙྩུཔཊྛཱནཾ, པཙལཱཡིཀཱནིདྡཱཔཙྩུཔཊྛཱནཾ ཝཱ. ཨུབྷཡམྤི ཨརཏིཝིཛམྦྷིཀཱདཱིསུ ཨཡོནིསོམནསིཀཱརཔདཊྛཱནཾ.

ཏཏིཡེན པཋམེ ཝུཏྟེསུ ཋཔེཏྭཱ མིཙྪཱདིཊྛིཾ ཨཝསེསཱ ཝེདིཏབྦཱ. མཱནོ པནེཏྠ ཨནིཡཏོ ¶ ཧོཏི. ཨཡཾ ཝིསེསོ, སོ ཨུཎྞཏིལཀྑཎོ, སམྤགྒཧརསོ, ཀེཏུཀམྱཏཱཔཙྩུཔཊྛཱནོ, དིཊྛིཝིཔྤཡུཏྟལོབྷཔདཊྛཱནོ, ཨུམྨཱདོ ཝིཡ དཊྛབྦོ.

ཙཏུཏྠེན དུཏིཡེ ཝུཏྟེསུ ཋཔེཏྭཱ མིཙྪཱདིཊྛིཾ ཨཝསེསཱ ཝེདིཏབྦཱ. ཨེཏྠཱཔི ཙ མཱནོ ཨནིཡཏེསུ ཧོཏིཡེཝ. པཋམེ ཝུཏྟེསུ པན ཋཔེཏྭཱ པཱིཏིཾ ཨཝསེསཱ པཉྩམེན སམྤཡོགཾ གཙྪནྟི. ཡཐཱ ཙ པཉྩམེན, ཨེཝཾ ཚཊྛེནཱཔི. སསངྑཱརཏཱ པནེཏྠ ཐིནམིདྡྷསྶ ཙ ཨནིཡཏབྷཱཝོ ཝིསེསོ. སཏྟམེན པཉྩམེ ཝུཏྟེསུ ཋཔེཏྭཱ དིཊྛིཾ ཨཝསེསཱ ཝེདིཏབྦཱ. མཱནོ པནེཏྠ ཨནིཡཏོ ཧོཏི. ཨཊྛམེན ཚཊྛེ ཝུཏྟེསུ ཋཔེཏྭཱ དིཊྛིཾ ཨཝསེསཱ ཝེདིཏབྦཱ. ཨེཏྠཱཔི ཙ མཱནོ ཨནིཡཏེསུ ཧོཏིཡེཝཱཏི.

༤༨༤. དོསམཱུལེསུ པན དྭཱིསུ པཋམསམྤཡུཏྟཱ ཏཱཝ ནིཡཏཱ སརཱུཔེན ཨཱགཏཱ ཨེཀཱདས, ཡེཝཱཔནཀཱ ཙཏྟཱརོ, ཨནིཡཏཱ ཏཡོཏི ཨཊྛཱརས ¶ . ཏཏྠ ཕསྶོ, ཙེཏནཱ, ཝིཏཀྐོ, ཝིཙཱརོ, ཝཱིརིཡཾ, ཛཱིཝིཏཾ, སམཱདྷི, ཨཧིརིཀཾ, ཨནོཔྤཏྟཾ, དོསོ, མོཧོཏི ཨིམེ སརཱུཔེན ཨཱགཏཱ ཨེཀཱདས (དྷ. ས. ༤༡༣; དྷ. ས. ཨཊྛ. ༤༡༣). ཚནྡོ, ཨདྷིམོཀྑོ, ཨུདྡྷཙྩཾ, མནསིཀཱརོཏི ཨིམེ ཡེཝཱཔནཀཱ ཙཏྟཱརོ (དྷ. ས. ཨཊྛ. ༤༡༣). ཨིསྶཱ, མཙྪརིཡཾ, ཀུཀྐུཙྩནྟི ཨིམེ ཨནིཡཏཱ ཏཡོ (དྷ. ས. ཨཊྛ. ༤༡༣).

༤༨༥. ཏཏྠ དུསྶནྟི ཏེན, སཡཾ ཝཱ དུསྶཏི, དུསྶནམཏྟམེཝ ཝཱ ཏནྟི དོསོ. སོ ཙཎྜིཀྐལཀྑཎོ པཧཊཱསཱིཝིསོ ཝིཡ, ཝིསཔྤནརསོ ཝིསནིཔཱཏོ ཝིཡ, ཨཏྟནོ ནིསྶཡདཧནརསོ ཝཱ དཱཝགྒི ཝིཡ. དཱུསནཔཙྩུཔཊྛཱནོ ལདྡྷོཀཱསོ ཝིཡ སཔཏྟོ, ཨཱགྷཱཏཝཏྠུཔདཊྛཱནོ, ཝིསསཾསཊྛཔཱུཏིམུཏྟཾ ཝིཡ དཊྛབྦོ.

༤༨༦. ཨིསྶཱཡནཱ ཨིསྶཱ. སཱ པརསམྤཏྟཱིནཾ ཨུསཱུཡནལཀྑཎཱ. ཏཏྠེཝ ཨནབྷིརཏིརསཱ, ཏཏོ ཝིམུཁབྷཱཝཔཙྩུཔཊྛཱནཱ, པརསམྤཏྟིཔདཊྛཱནཱ, སཾཡོཛནནྟི དཊྛབྦཱ.

༤༨༧. མཙྪརབྷཱཝོ མཙྪརིཡཾ. ཏཾ ལདྡྷཱནཾ ཝཱ ལབྷིཏབྦཱནཾ ཝཱ ཨཏྟནོ སམྤཏྟཱིནཾ ནིགཱུཧནལཀྑཎཾ, ཏཱསཾཡེཝ པརེཧི སཱདྷཱརཎབྷཱཝཨཀྑམནརསཾ, སངྐོཙནཔཙྩུཔཊྛཱནཾ, ཀཊུཀཉྩུཀཏཱཔཙྩུཔཊྛཱནཾ ཝཱ, ཨཏྟསམྤཏྟིཔདཊྛཱནཾ, ཙེཏསོ ཝིརཱུཔབྷཱཝོཏི དཊྛབྦཾ.

༤༨༨. ཀུཙྪིཏཾ ¶ ཀཏཾ ཀུཀཏཾ. ཏསྶ བྷཱཝོ ཀུཀྐུཙྩཾ. ཏཾ པཙྪཱནུཏཱཔལཀྑཎཾ, ཀཏཱཀཏཱནུསོཙནརསཾ, ཝིཔྤཊིསཱརཔཙྩུཔཊྛཱནཾ, ཀཏཱཀཏཔདཊྛཱནཾ, དཱསབྱམིཝ དཊྛབྦཾ. སེསཱ ཝུཏྟཔྤཀཱརཱཡེཝཱཏི.

ཨིཏི ཨིམེ ཨཊྛཱརས སངྑཱརཱ པཋམེན དོསམཱུལེན སམྤཡོགཾ གཙྪནྟཱིཏི ཝེདིཏབྦཱ. ཡཐཱ ཙ པཋམེན, ཨེཝཾ དུཏིཡེནཱཔི. སསངྑཱརཏཱ པན ཨནིཡཏེསུ ཙ ཐིནམིདྡྷསམྦྷཝོཝ ཝིསེསོ.

༤༨༩. མོཧམཱུལེསུ དྭཱིསུ ཝིཙིཀིཙྪཱསམྤཡུཏྟེན ཏཱཝ ཕསྶོ, ཙེཏནཱ, ཝིཏཀྐོ, ཝིཙཱརོ, ཝཱིརིཡཾ, ཛཱིཝིཏཾ, ཙིཏྟཊྛིཏི, ཨཧིརིཀཾ, ཨནོཏྟཔྤཾ ¶ , མོཧོ, ཝིཙིཀིཙྪཱཏི སརཱུཔེན ཨཱགཏཱ ཨེཀཱདས (དྷ. ས. ༤༢༢; དྷ. ས. ཨཊྛ. ༤༢༢), ཨུདྡྷཙྩཾ, མནསིཀཱརོཏི ཡེཝཱཔནཀཱ དྭེ ཙཱཏི ཏེརས.

༤༩༠. ཏཏྠ ཙིཏྟཊྛིཏཱིཏི པཝཏྟིཊྛིཏིམཏྟོ དུབྦལོ སམཱདྷི. ཝིགཏཱ ཙིཀིཙྪཱཏི ཝིཙིཀིཙྪཱ. སཱ སཾསཡལཀྑཎཱ, ཀམྤནརསཱ, ཨནིཙྪཡཔཙྩུཔཊྛཱནཱ, ཨནེཀཾསགཱཧཔཙྩུཔཊྛཱནཱ ཝཱ, ཝིཙིཀིཙྪཱཡཾ ཨཡོནིསོམནསིཀཱརཔདཊྛཱནཱ, པཊིཔཏྟིཨནྟརཱཡཀརཱཏི དཊྛབྦཱ. སེསཱ ཝུཏྟཔྤཀཱརཱཡེཝ.

ཨུདྡྷཙྩསམྤཡུཏྟེན ཝིཙིཀིཙྪཱསམྤཡུཏྟེ ཝུཏྟེསུ ཋཔེཏྭཱ ཝིཙིཀིཙྪཾ སེསཱ དྭཱདས. ཝིཙིཀིཙྪཱཡ ཨབྷཱཝེན པནེཏྠ ཨདྷིམོཀྑོ ཨུཔྤཛྫཏི. ཏེན སདྡྷིཾ ཏེརསེཝ, ཨདྷིམོཀྑསབྦྷཱཝཏོ ཙ བལཝཏརོ སམཱདྷི ཧོཏི. ཡཉྩེཏྠ ཨུདྡྷཙྩཾ, ཏཾ སརཱུཔེནེཝ ཨཱགཏཾ. ཨདྷིམོཀྑམནསིཀཱརཱ ཡེཝཱཔནཀཝསེནཱཏི ཨེཝཾ ཨཀུསལསངྑཱརཱ ཝེདིཏབྦཱ.

༤༩༡. ཨབྱཱཀཏེསུ ཝིཔཱཀཱབྱཱཀཏཱ ཏཱཝ ཨཧེཏུཀསཧེཏུཀབྷེདཏོ དུཝིདྷཱ. ཏེསུ ཨཧེཏུཀཝིཔཱཀཝིཉྙཱཎསམྤཡུཏྟཱ ཨཧེཏུཀཱ. ཏཏྠ ཀུསལཱཀུསལཝིཔཱཀཙཀྑུཝིཉྙཱཎསམྤཡུཏྟཱ ཏཱཝ ཕསྶོ, ཙེཏནཱ, ཛཱིཝིཏཾ, ཙིཏྟཊྛིཏཱིཏི སརཱུཔེན ཨཱགཏཱ ཙཏྟཱརོ (དྷ. ས. ༤༣༡; དྷ. ས. ཨཊྛ. ༤༣༡), ཡེཝཱཔནཀོ མནསིཀཱརོཡེཝཱཏི པཉྩ. སོཏགྷཱནཛིཝ྄ཧཱཀཱཡཝིཉྙཱཎསམྤཡུཏྟཱཔི ཨེཏེཡེཝ. ཨུབྷཡཝིཔཱཀམནོདྷཱཏུཡཱ ཨེཏེ ཙེཝ ཝིཏཀྐཝིཙཱརཱདྷིམོཀྑཱ ཙཱཏི ¶ ཨཊྛ, ཏཐཱ ཏིཝིདྷཱཡཔི ཨཧེཏུཀམནོཝིཉྙཱཎདྷཱཏུཡཱ. ཡཱ པནེཏྠ སོམནསྶསཧགཏཱ, ཏཱཡ སདྡྷིཾ པཱིཏི ཨདྷིཀཱ ཧོཏཱིཏི ཝེདིཏབྦཱ.

སཧེཏུཀཝིཔཱཀཝིཉྙཱཎསམྤཡུཏྟཱ པན སཧེཏུཀཱ. ཏེསུ ཨཊྛཀཱམཱཝཙརཝིཔཱཀསམྤཡུཏྟཱ ཏཱཝ ཨཊྛཧི ཀཱམཱཝཙརཀུསལེཧི སམྤཡུཏྟསངྑཱརསདིསཱཡེཝ. ཡཱ པན ཏཱ ཨནིཡཏེསུ ཀརུཎཱམུདིཏཱ, ཏཱ སཏྟཱརམྨཎཏྟཱ ཝིཔཱཀེསུ ན སནྟི. ཨེཀནྟཔརིཏྟཱརམྨཎཱ ཧི ཀཱམཱཝཙརཝིཔཱཀཱ. ན ཀེཝལཉྩ ཀརུཎཱམུདིཏཱ, ཝིརཏིཡོཔི ཝིཔཱཀེསུ ན སནྟི. ‘‘པཉྩ སིཀྑཱཔདཱ ཀུསལཱཡེཝཱ’’ཏི ཧི ཝུཏྟཾ.

རཱུཔཱཝཙརཱརཱུཔཱཝཙརལོཀུཏྟརཝིཔཱཀཝིཉྙཱཎསམྤཡུཏྟཱ ¶ པན ཏེསཾ ཀུསལཝིཉྙཱཎསམྤཡུཏྟསངྑཱརེཧི སདིསཱ ཨེཝ.

༤༩༢. ཀིརིཡཱབྱཱཀཏཱཔི ཨཧེཏུཀསཧེཏུཀབྷེདཏོ དུཝིདྷཱ. ཏེསུ ཨཧེཏུཀཀིརིཡཝིཉྙཱཎསམྤཡུཏྟཱ ཨཧེཏུཀཱ. ཏེ ཙ ཀུསལཝིཔཱཀམནོདྷཱཏུཨཧེཏུཀམནོཝིཉྙཱཎདྷཱཏུདྭཡཡུཏྟེཧི སམཱནཱ. མནོཝིཉྙཱཎདྷཱཏུདྭཡེ པན ཝཱིརིཡཾ ཨདྷིཀཾ. ཝཱིརིཡསབྦྷཱཝཏོ བལཔྤཏྟོ སམཱདྷི ཧོཏི. ཨཡམེཏྠ ཝིསེསོ.

སཧེཏུཀཀིརིཡཝིཉྙཱཎསམྤཡུཏྟཱ པན སཧེཏུཀཱ. ཏེསུ ཨཊྛཀཱམཱཝཙརཀིརིཡཝིཉྙཱཎསམྤཡུཏྟཱ ཏཱཝ ཋཔེཏྭཱ ཝིརཏིཡོ ཨཊྛཧི ཀཱམཱཝཙརཀུསལེཧི སམྤཡུཏྟསངྑཱརསདིསཱ. རཱུཔཱཝཙརཱརཱུཔཱཝཙརཀིརིཡསམྤཡུཏྟཱ པན སབྦཱཀཱརེནཔི ཏེསཾ ཀུསལཝིཉྙཱཎསམྤཡུཏྟསདིསཱཡེཝཱཏི ཨེཝཾ ཨབྱཱཀཏཱཔི སངྑཱརཱ ཝེདིཏབྦཱཏི.

ཨིདཾ སངྑཱརཀྑནྡྷེ ཝིཏྠཱརཀཐཱམུཁཾ.

ཨིདཾ ཏཱཝ ཨབྷིདྷམྨེ པདབྷཱཛནཱིཡནཡེན ཁནྡྷེསུ ཝིཏྠཱརཀཐཱམུཁཾ.

ཨཏཱིཏཱདིཝིབྷཱགཀཐཱ

༤༩༣. བྷགཝཏཱ ¶ པན –

‘‘ཡཾཀིཉྩི རཱུཔཾ ཨཏཱིཏཱནཱགཏཔཙྩུཔྤནྣཾ ཨཛ྄ཛྷཏྟཾ ཝཱ བཧིདྡྷཱ ཝཱ ཨོལཱ༹རིཀཾ ཝཱ སུཁུམཾ ཝཱ ཧཱིནཾ ཝཱ པཎཱིཏཾ ཝཱ ཡཾ དཱུརེ སནྟིཀེ ཝཱ, ཏདེཀཛ྄ཛྷཾ ཨབྷིསཾཡཱུཧིཏྭཱ ཨབྷིསངྑིཔིཏྭཱ ཨཡཾ ཝུཙྩཏི རཱུཔཀྑནྡྷོ. ཡཱ ཀཱཙི ཝེདནཱ… ཡཱ ཀཱཙི སཉྙཱ… ཡེ ཀེཙི སངྑཱརཱ… ཡཾཀིཉྩི ཝིཉྙཱཎཾ ཨཏཱིཏཱནཱགཏཔཙྩུཔྤནྣཾ…པེ… ཨབྷིསངྑིཔིཏྭཱ ཨཡཾ ཝུཙྩཏི ཝིཉྙཱཎཀྑནྡྷོ’’ཏི (ཝིབྷ. ༢,༢༦) –

ཨེཝཾ ཁནྡྷཱ ཝིཏྠཱརིཏཱ.

ཏཏྠ ཡཾཀིཉྩཱིཏི ཨནཝསེསཔརིཡཱདཱནཾ. རཱུཔནྟི ཨཏིཔྤསངྒནིཡམནཾ. ཨེཝཾ པདདྭཡེནཱཔི རཱུཔསྶ ཨནཝསེསཔརིགྒཧོ ཀཏོ ཧོཏི. ཨཐསྶ ཨཏཱིཏཱདིནཱ ¶ ཝིབྷཱགཾ ཨཱརབྷཏི. ཏཉྷི ཀིཉྩི ཨཏཱིཏཾ, ཀིཉྩི ཨནཱགཏཱདིབྷེདནྟི. ཨེས ནཡོ ཝེདནཱདཱིསུ.

༤༩༤. ཏཏྠ རཱུཔཾ ཏཱཝ ཨདྡྷཱསནྟཏིསམཡཁཎཝསེན ཙཏུདྷཱ ཨཏཱིཏཾ ནཱམ ཧོཏི. ཏཐཱ ཨནཱགཏཔཙྩུཔྤནྣཾ.

ཏཏྠ ཨདྡྷཱཝསེན ཏཱཝ ཨེཀསྶ ཨེཀསྨིཾ བྷཝེ པཊིསནྡྷིཏོ པུབྦེ ཨཏཱིཏཾ, ཙུཏིཏོ ཨུདྡྷཾ ཨནཱགཏཾ, ཨུབྷིནྣམནྟརེ པཙྩུཔྤནྣཾ.

སནྟཏིཝསེན སབྷཱགཨེཀཨུཏུསམུཊྛཱནཾ ཨེཀཱཧཱརསམུཊྛཱནཉྩ པུབྦཱཔརིཡཝསེན ཝཏྟམཱནམྤི པཙྩུཔྤནྣཾ, ཏཏོ པུབྦེ ཝིསབྷཱགཨུཏུཨཱཧཱརསམུཊྛཱནཾ ཨཏཱིཏཾ, པཙྪཱ ཨནཱགཏཾ. ཙིཏྟཛཾ ཨེཀཝཱིཐིཨེཀཛཝནཨེཀསམཱཔཏྟིསམུཊྛཱནཾ པཙྩུཔྤནྣཾ, ཏཏོ པུབྦེ ཨཏཱིཏཾ, པཙྪཱ ཨནཱགཏཾ. ཀམྨསམུཊྛཱནསྶ པཱཊིཡེཀྐཾ སནྟཏིཝསེན ཨཏཱིཏཱདིབྷེདོ ནཏྠི, ཏེསཉྙེཝ པན ཨུཏུཨཱཧཱརཙིཏྟསམུཊྛཱནཱནཾ ཨུཔཏྠམྦྷཀཝསེན ཏསྶ ཨཏཱིཏཱདིབྷཱཝོ ཝེདིཏབྦོ.

སམཡཝསེན ¶ ཨེཀམུཧུཏྟཔུབྦཎྷསཱཡནྷརཏྟིནྡིཝཱདཱིསུ སམཡེསུ སནྟཱནཝསེན པཝཏྟམཱནཾ ཏཾ ཏཾ སམཡཾ པཙྩུཔྤནྣཾ ནཱམ, ཏཏོ པུབྦེ ཨཏཱིཏཾ, པཙྪཱ ཨནཱགཏཾ.

ཁཎཝསེན ཨུཔྤཱདཱདིཁཎཏྟཡཔརིཡཱཔནྣཾ པཙྩུཔྤནྣཾ, ཏཏོ པུབྦེ ཨནཱགཏཾ, པཙྪཱ ཨཏཱིཏཾ. ཨཔིཙ ཨཏིཀྐནྟཧེཏུཔཙྩཡཀིཙྩཾ ཨཏཱིཏཾ, ནིཊྛིཏཧེཏུཀིཙྩཾ ཨནིཊྛིཏཔཙྩཡཀིཙྩཾ པཙྩུཔྤནྣཾ, ཨུབྷཡཀིཙྩཾ ཨསམྤཏྟཾ ཨནཱགཏཾ. སཀིཙྩཀྑཎེ ཝཱ པཙྩུཔྤནྣཾ, ཏཏོ པུབྦེ ཨནཱགཏཾ, པཙྪཱ ཨཏཱིཏཾ. ཨེཏྠ ཙ ཁཎཱདིཀཐཱཝ ནིཔྤརིཡཱཡཱ. སེསཱ སཔརིཡཱཡཱ.

༤༩༥. ཨཛ྄ཛྷཏྟབཧིདྡྷཱབྷེདོ ཝུཏྟནཡོ ཨེཝ. ཨཔིཙ ཨིདྷ ནིཡཀཛ྄ཛྷཏྟམྤི ཨཛ྄ཛྷཏྟཾ པརཔུགྒལིཀམྤི ཙ བཧིདྡྷཱཏི ཝེདིཏབྦཾ. ཨོལཱ༹རིཀསུཁུམབྷེདོ ཝུཏྟནཡོཝ.

༤༩༦. ཧཱིནཔཎཱིཏབྷེདོ དུཝིདྷོ པརིཡཱཡཏོ ནིཔྤརིཡཱཡཏོ ཙ. ཏཏྠ ཨཀནིཊྛཱནཾ རཱུཔཏོ སུདསྶཱིནཾ རཱུཔཾ ཧཱིནཾ. ཏདེཝ སུདསྶཱནཾ རཱུཔཏོ པཎཱིཏཾ. ཨེཝཾ ཡཱཝ ནརཀསཏྟཱནཾ རཱུཔཾ, ཏཱཝ པརིཡཱཡཏོ ཧཱིནཔཎཱིཏཏཱ ཝེདིཏབྦཱ. ནིཔྤརིཡཱཡཏོ པན ཡཏྠ ཨཀུསལཝིཔཱཀཾ ཨུཔྤཛྫཏི, ཏཾ ཧཱིནཾ. ཡཏྠ ཀུསལཝིཔཱཀཾ, ཏཾ པཎཱིཏཾ.

དཱུརེ ¶ སནྟིཀེཏི ཨིདམྤི ཝུཏྟནཡམེཝ. ཨཔིཙ ཨོཀཱསཏོཔེཏྠ ཨུཔཱདཱཡུཔཱདཱཡ དཱུརསནྟིཀཏཱ ཝེདིཏབྦཱ.

༤༩༧. ཏདེཀཛ྄ཛྷཾ ཨབྷིསཾཡཱུཧིཏྭཱ ཨབྷིསངྑིཔིཏྭཱཏི ཏཾ ཨཏཱིཏཱདཱིཧི པདེཧི ཝིསུཾ ཝིསུཾ ནིདྡིཊྛཾ རཱུཔཾ སབྦཾ རུཔྤནལཀྑཎསངྑཱཏེ ཨེཀཝིདྷབྷཱཝེ པཉྙཱཡ རཱསིཾ ཀཏྭཱ རཱུཔཀྑནྡྷོཏི ཝུཙྩཏཱིཏི ཨཡམེཏྠ ཨཏྠོ. ཨེཏེན སབྦམྤི རཱུཔཾ རུཔྤནལཀྑཎེ རཱསིབྷཱཝཱུཔགམནེན རཱུཔཀྑནྡྷོཏི དསྶིཏཾ ཧོཏི. ན ཧི རཱུཔཏོ ཨཉྙོ རཱུཔཀྑནྡྷོ ནཱམ ཨཏྠི.

༤༩༨. ཡཐཱ ཙ རཱུཔཾ, ཨེཝཾ ཝེདནཱདཡོཔི ཝེདཡིཏལཀྑཎཱདཱིསུ རཱསིབྷཱཝཱུཔགམནེན. ན ཧི ཝེདནཱདཱིཧི ཨཉྙེ ཝེདནཱཀྑནྡྷཱདཡོ ནཱམ ཨཏྠི.

ཨཏཱིཏཱདིཝིབྷཱགེ ¶ པནེཏྠ སནྟཏིཝསེན ཁཎཱདིཝསེན ཙ ཝེདནཱཡ ཨཏཱིཏཱནཱགཏཔཙྩུཔྤནྣབྷཱཝོ ཝེདིཏབྦོ. ཏཏྠ སནྟཏིཝསེན ཨེཀཝཱིཐིཨེཀཛཝནཨེཀསམཱཔཏྟིཔརིཡཱཔནྣཱ ཨེཀཝཱིཐིཝིསཡསམཱཡོགཔྤཝཏྟཱ ཙ པཙྩུཔྤནྣཱ, ཏཏོ པུབྦེ ཨཏཱིཏཱ, པཙྪཱ ཨནཱགཏཱ. ཁཎཱདིཝསེན ཁཎཏྟཡཔརིཡཱཔནྣཱ པུབྦནྟཱཔརནྟམཛ྄ཛྷཏྟགཏཱ སཀིཙྩཉྩ ཀུརུམཱནཱ ཝེདནཱ པཙྩུཔྤནྣཱ, ཏཏོ པུབྦེ ཨཏཱིཏཱ, པཙྪཱ ཨནཱགཏཱ. ཨཛ྄ཛྷཏྟབཧིདྡྷཱབྷེདོ ནིཡཀཛ྄ཛྷཏྟཝསེན ཝེདིཏབྦོ.

༤༩༩. ཨོལཱ༹རིཀསུཁུམབྷེདོ ‘‘ཨཀུསལཱ ཝེདནཱ ཨོལཱ༹རིཀཱ, ཀུསལཱབྱཱཀཏཱ ཝེདནཱ སུཁུམཱ’’ཏིཨཱདིནཱ (ཝིབྷ. ༡༡) ནཡེན ཝིབྷངྒེ ཝུཏྟེན ཛཱཏིསབྷཱཝཔུགྒལལོཀིཡལོཀུཏྟརཝསེན ཝེདིཏབྦོ. ཛཱཏིཝསེན ཏཱཝ ཨཀུསལཱ ཝེདནཱ སཱཝཛྫཀིརིཡཧེཏུཏོ, ཀིལེསསནྟཱཔབྷཱཝཏོ ཙ ཨཝཱུཔསནྟཝུཏྟཱིཏི ཀུསལཝེདནཱཡ ཨོལཱ༹རིཀཱ, སབྱཱཔཱརཏོ, སཨུསྶཱཧཏོ, སཝིཔཱཀཏོ, ཀིལེསསནྟཱཔབྷཱཝཏོ, སཱཝཛྫཏོ ཙ ཝིཔཱཀཱབྱཱཀཏཱཡ ཨོལཱ༹རིཀཱ, སཝིཔཱཀཏོ, ཀིལེསསནྟཱཔབྷཱཝཏོ, སབྱཱབཛ྄ཛྷཏོ, སཱཝཛྫཏོ ཙ ཀིརིཡཱབྱཱཀཏཱཡ ཨོལཱ༹རིཀཱ. ཀུསལཱབྱཱཀཏཱ པན ཝུཏྟཝིཔརིཡཱཡཏོ ཨཀུསལཱཡ སུཁུམཱ. དྭེཔི ཀུསལཱཀུསལཝེདནཱ སབྱཱཔཱརཏོ, སཨུསྶཱཧཏོ, སཝིཔཱཀཏོ ཙ ཡཐཱཡོགཾ དུཝིདྷཱཡཔི ཨབྱཱཀཏཱཡ ཨོལཱ༹རིཀཱ ¶ , ཝུཏྟཝིཔརིཡཱཡེན དུཝིདྷཱཔི ཨབྱཱཀཏཱ ཏཱཧི སུཁུམཱ. ཨེཝཾ ཏཱཝ ཛཱཏིཝསེན ཨོལཱ༹རིཀསུཁུམཏཱ ཝེདིཏབྦཱ.

༥༠༠. སབྷཱཝཝསེན པན དུཀྑཱ ཝེདནཱ ནིརསྶཱདཏོ, སཝིཔྥཱརཏོ, ཁོབྷཀརཎཏོ, ཨུབྦེཛནཱིཡཏོ, ཨབྷིབྷཝནཏོ ཙ ཨིཏརཱཧི དྭཱིཧི ཨོལཱ༹རིཀཱ, ཨིཏརཱ པན དྭེ སཱཏཏོ, སནྟཏོ, པཎཱིཏཏོ, མནཱཔཏོ, མཛ྄ཛྷཏྟཏོ ཙ ཡཐཱཡོགཾ དུཀྑཱཡ སུཁུམཱ. ཨུབྷོ པན སུཁདུཀྑཱ སཝིཔྥཱརཏོ, ཁོབྷཀརཎཏོ, པཱཀཊཏོ ཙ ཨདུཀྑམསུཁཱཡ ཨོལཱ༹རིཀཱ, སཱ ཝུཏྟཝིཔརིཡཱཡེན ཏདུབྷཡཏོ སུཁུམཱ. ཨེཝཾ སབྷཱཝཝསེན ཨོལཱ༹རིཀསུཁུམཏཱ ཝེདིཏབྦཱ.

༥༠༡. པུགྒལཝསེན པན ཨསམཱཔནྣསྶ ཝེདནཱ ནཱནཱརམྨཎེ ཝིཀྑིཏྟབྷཱཝཏོ སམཱཔནྣསྶ ཝེདནཱཡ ཨོལཱ༹རིཀཱ, ཝིཔརིཡཱཡེན ཨིཏརཱ སུཁུམཱ. ཨེཝཾ པུགྒལཝསེན ཨོལཱ༹རིཀསུཁུམཏཱ ཝེདིཏབྦཱ.

ལོཀིཡལོཀུཏྟརཝསེན ¶ པན སཱསཝཱ ཝེདནཱ ལོཀིཡཱ, སཱ ཨཱསཝུཔྤཏྟིཧེཏུཏོ, ཨོགྷནིཡཏོ, ཡོགནིཡཏོ, གནྠནིཡཏོ, ནཱིཝརཎིཡཏོ, ཨུཔཱདཱནིཡཏོ, སཾཀིལེསིཀཏོ, པུཐུཛྫནསཱདྷཱརཎཏོ ཙ ཨནཱསཝཱཡ ཨོལཱ༹རིཀཱ. སཱ ཝིཔརིཡཱཡེན སཱསཝཱཡ སུཁུམཱ. ཨེཝཾ ལོཀིཡལོཀུཏྟརཝསེན ཨོལཱ༹རིཀསུཁུམཏཱ ཝེདིཏབྦཱ.

༥༠༢. ཏཏྠ ཛཱཏིཨཱདིཝསེན སམྦྷེདོ པརིཧརིཏབྦོ. ཨཀུསལཝིཔཱཀཀཨཱཡཝིཉྙཱཎསམྤཡུཏྟཱ ཧི ཝེདནཱ ཛཱཏིཝསེན ཨབྱཱཀཏཏྟཱ སུཁུམཱཔི སམཱནཱ སབྷཱཝཱདིཝསེན ཨོལཱ༹རིཀཱ ཧོཏི. ཝུཏྟཉྷེཏཾ ‘‘ཨབྱཱཀཏཱ ཝེདནཱ སུཁུམཱ. དུཀྑཱ ཝེདནཱ ཨོལཱ༹རིཀཱ. སམཱཔནྣསྶ ཝེདནཱ སུཁུམཱ. ཨསམཱཔནྣསྶ ཝེདནཱ ཨོལཱ༹རིཀཱ. སཱསཝཱ ཝེདནཱ ཨོལཱ༹རིཀཱ. ཨནཱསཝཱ ཝེདནཱ སུཁུམཱ’’ཏི (ཝིབྷ. ༡༡). ཡཐཱ ཙ དུཀྑཱ ཝེདནཱ, ཨེཝཾ སུཁཱདཡོཔི ཛཱཏིཝསེན ཨོལཱ༹རིཀཱ སབྷཱཝཱདིཝསེན སུཁུམཱ ཧོནྟི. ཏསྨཱ ཡཐཱ ཛཱཏིཨཱདིཝསེན སམྦྷེདོ ན ཧོཏི, ཏཐཱ ཝེདནཱནཾ ཨོལཱ༹རིཀསུཁུམཏཱ ཝེདིཏབྦཱ. སེཡྻཐིདཾ – ཨབྱཱཀཏཱ ཛཱཏིཝསེན ཀུསལཱཀུསལཱཧི སུཁུམཱ. ཏཏྠ ཀཏམཱ ཨབྱཱཀཏཱ? ཀིཾ དུཀྑཱ? ཀིཾ སུཁཱ? ཀིཾ སམཱཔནྣསྶ? ཀིཾ ཨསམཱཔནྣསྶ? ཀིཾ སཱསཝཱ ¶ ? ཀིཾ ཨནཱསཝཱཏི? ཨེཝཾ སབྷཱཝཱདིབྷེདོ ན པརཱམསིཏབྦོ. ཨེས ནཡོ སབྦཏྠ.

ཨཔིཙ ཏཾ ཏཾ ཝཱ པན ཝེདནཾ ཨུཔཱདཱཡུཔཱདཱཡ ཝེདནཱ ཨོལཱ༹རིཀསུཁུམཱ དཊྛབྦཱཏི ཝཙནཏོ ཨཀུསལཱདཱིསུཔི ལོབྷསཧགཏཱཡ དོསསཧགཏཱ ཝེདནཱ ཨགྒི ཝིཡ ཨཏྟནོ ནིསྶཡདཧནཏོ ཨོལཱ༹རིཀཱ, ལོབྷསཧགཏཱ སུཁུམཱ. དོསསཧགཏཱཔི ནིཡཏཱ ཨོལཱ༹རིཀཱ, ཨནིཡཏཱ སུཁུམཱ. ནིཡཏཱཔི ཀཔྤཊྛིཏིཀཱ ཨོལཱ༹རིཀཱ, ཨིཏརཱ སུཁུམཱ. ཀཔྤཊྛིཏིཀཱསུཔི ཨསངྑཱརིཀཱ ཨོལཱ༹རིཀཱ, ཨིཏརཱ སུཁུམཱ. ལོབྷསཧགཏཱ པན དིཊྛིསམྤཡུཏྟཱ ཨོལཱ༹རིཀཱ, ཨིཏརཱ སུཁུམཱ. སཱཔི ནིཡཏཱ ཀཔྤཊྛིཏིཀཱ ཨསངྑཱརིཀཱ ཨོལཱ༹རིཀཱ, ཨིཏརཱ སུཁུམཱ. ཨཝིསེསེན ཙ ཨཀུསལཱ བཧུཝིཔཱཀཱ ཨོལཱ༹རིཀཱ, ཨཔྤཝིཔཱཀཱ སུཁུམཱ. ཀུསལཱ པན ཨཔྤཝིཔཱཀཱ ཨོལཱ༹རིཀཱ, བཧུཝིཔཱཀཱ སུཁུམཱ.

ཨཔིཙ ཀཱམཱཝཙརཀུསལཱ ཨོལཱ༹རིཀཱ. རཱུཔཱཝཙརཱ སུཁུམཱ. ཏཏོ ཨརཱུཔཱཝཙརཱ. ཏཏོ ལོཀུཏྟརཱ. ཀཱམཱཝཙརཱ དཱནམཡཱ ཨོལཱ༹རིཀཱ. སཱིལམཡཱ སུཁུམཱ. ཏཏོ བྷཱཝནཱམཡཱ. བྷཱཝནཱམཡཱཔི དུཧེཏུཀཱ ཨོལཱ༹རིཀཱ. ཏིཧེཏུཀཱ སུཁུམཱ. ཏིཧེཏུཀཱཔི སསངྑཱརིཀཱ ཨོལཱ༹རིཀཱ. ཨསངྑཱརིཀཱ སུཁུམཱ. རཱུཔཱཝཙརཱ ཙ པཋམཛ྄ཛྷཱནིཀཱ ཨོལཱ༹རིཀཱ…པེ… པཉྩམཛ྄ཛྷཱནིཀཱ ¶ སུཁུམཱ. ཨརཱུཔཱཝཙརཱ ཙ ཨཱཀཱསཱནཉྩཱཡཏནསམྤཡུཏྟཱ ཨོལཱ༹རིཀཱ…པེ… ནེཝསཉྙཱནཱསཉྙཱཡཏནསམྤཡུཏྟཱ སུཁུམཱཝ. ལོཀུཏྟརཱ ཙ སོཏཱཔཏྟིམགྒསམྤཡུཏྟཱ ཨོལཱ༹རིཀཱ…པེ… ཨརཧཏྟམགྒསམྤཡུཏྟཱ སུཁུམཱཝ. ཨེས ནཡོ ཏཾ ཏཾ བྷཱུམིཝིཔཱཀཀིརིཡཝེདནཱསུ ཙ དུཀྑཱདིཨསམཱཔནྣཱདིསཱསཝཱདིཝསེན ཝུཏྟཝེདནཱསུ ཙ.

ཨོཀཱསཝསེན ཙཱཔི ནིརཡེ དུཀྑཱ ཨོལཱ༹རིཀཱ. ཏིརཙྪཱནཡོནིཡཾ སུཁུམཱ…པེ… པརནིམྨིཏཝསཝཏྟཱིསུ སུཁུམཱཝ. ཡཐཱ ཙ དུཀྑཱ, ཨེཝཾ སུཁཱཔི སབྦཏྠ ཡཐཱནུརཱུཔཾ ཡོཛེཏབྦཱ. ཝཏྠུཝསེན ཙཱཔི ཧཱིནཝཏྠུཀཱ ཡཱ ཀཱཙི ཝེདནཱ ཨོལཱ༹རིཀཱ, པཎཱིཏཝཏྠུཀཱ སུཁུམཱ.

ཧཱིནཔཎཱིཏབྷེདེ ཡཱ ཨོལཱ༹རིཀཱ, སཱ ཧཱིནཱ. ཡཱ ཙ སུཁུམཱ, སཱ པཎཱིཏཱཏི དཊྛབྦཱ.

༥༠༣. དཱུརཔདཾ པན ‘‘ཨཀུསལཱ ཝེདནཱ ཀུསལཱབྱཱཀཏཱཧི ཝེདནཱཧི དཱུརེ’’. སནྟིཀེཔདཾ ‘‘ཨཀུསལཱ ཝེདནཱ ཨཀུསལཱཡ ཝེདནཱཡ སནྟིཀེ’’ཏིཨཱདིནཱ ¶ ནཡེན ཝིབྷངྒེ ཝིབྷཏྟཾ. ཏསྨཱ ཨཀུསལཱ ཝེདནཱ ཝིསབྷཱགཏོ, ཨསཾསཊྛཏོ, ཨསརིཀྑཏོ ཙ ཀུསལཱབྱཱཀཏཱཧི དཱུརེ, ཏཐཱ ཀུསལཱབྱཱཀཏཱ ཨཀུསལཱཡ. ཨེས ནཡོ སབྦཝཱརེསུ. ཨཀུསལཱ པན ཝེདནཱ སབྷཱགཏོ, སརིཀྑཏོ ཙ ཨཀུསལཱཡ སནྟིཀེཏི. ཨིདཾ ཝེདནཱཀྑནྡྷསྶ ཨཏཱིཏཱདིཝིབྷཱགེ ཝིཏྠཱརཀཐཱམུཁཾ. ཏཾཏཾཝེདནཱསམྤཡུཏྟཱནཾ པན སཉྙཱདཱིནམྤི ཨེཝམེཝ ཝེདིཏབྦཾ.

ཀམཱདིཝིནིཙྪཡཀཐཱ

༥༠༤. ཨེཝཾ ཝིདིཏྭཱ ཙ པུན ཨེཏེསྭེཝ –

ཁནྡྷེསུ ཉཱཎབྷེདཏྠཾ, ཀམཏོཐ ཝིསེསཏོ;

ཨནཱུནཱདྷིཀཏོ ཙེཝ, ཨུཔམཱཏོ ཏཐེཝ ཙ.

དཊྛབྦཏོ དྭིདྷཱ ཨེཝཾ, པསྶནྟསྶཏྠསིདྡྷིཏོ;

ཝིནིཙྪཡནཡོ སམྨཱ, ཝིཉྙཱཏབྦོ ཝིབྷཱཝིནཱ.

ཏཏྠ ¶ ཀམཏོཏི ཨིདྷ ཨུཔྤཏྟིཀྐམོ, པཧཱནཀྐམོ, པཊིཔཏྟིཀྐམོ, བྷཱུམིཀྐམོ, དེསནཱཀྐམོཏི བཧུཝིདྷོ ཀམོ.

ཏཏྠ ‘‘པཋམཾ ཀལལཾ ཧོཏི, ཀལལཱ ཧོཏི ཨབྦུད’’ནྟི (སཾ. ནི. ༡.༢༣༥) ཨེཝམཱདི ཨུཔྤཏྟིཀྐམོ. ‘‘དསྶནེན པཧཱཏབྦཱ དྷམྨཱ, བྷཱཝནཱཡ པཧཱཏབྦཱ དྷམྨཱ’’ཏི (དྷ. ས. ཏིཀམཱཏིཀཱ ༨) ཨེཝམཱདི པཧཱནཀྐམོ. ‘‘སཱིལཝིསུདྡྷི, ཙིཏྟཝིསུདྡྷཱི’’ཏི (མ. ནི. ༡.༢༥༩; པཊི. མ. ༣.༤༡) ཨེཝམཱདི པཊིཔཏྟིཀྐམོ. ‘‘ཀཱམཱཝཙརཱ, རཱུཔཱཝཙརཱ’’ཏི (དྷ. ས. ༩༨༧) ཨེཝམཱདི བྷཱུམིཀྐམོ. ‘‘ཙཏྟཱརོ སཏིཔཊྛཱནཱ, ཙཏྟཱརོ སམྨཔྤདྷཱནཱ’’ཏི (དཱི. ནི. ༣.༡༤༥) ཝཱ, ‘‘དཱནཀཐཾ, སཱིལཀཐ’’ནྟི (དཱི. ནི. ༡.༢༩༨) ཝཱ ཨེཝམཱདི དེསནཱཀྐམོ. ཏེསུ ཨིདྷ ཨུཔྤཏྟིཀྐམོ ཏཱཝ ན ཡུཛྫཏི, ཀལལཱདཱིནཾ ཝིཡ ཁནྡྷཱནཾ པུབྦཱཔརིཡཝཝཏྠཱནེན ཨནུཔྤཏྟིཏོ. ན པཧཱནཀྐམོ, ཀུསལཱབྱཱཀཏཱནཾ ཨཔྤཧཱཏབྦཏོ. ནཔཊིཔཏྟིཀྐམོ, ཨཀུསལཱནཾ ཨཔྤཊིཔཛྫནཱིཡཏོ. ན བྷཱུམིཀྐམོ, ཝེདནཱདཱིནཾ ཙཏུབྷཱུམིཔརིཡཱཔནྣཏྟཱ. དེསནཱཀྐམོ པན ཡུཛྫཏི.

ཨབྷེདེན ཧི པཉྩསུ ཁནྡྷེསུ ཨཏྟགཱཧཔཏིཏཾ ཝེནེཡྻཛནཾ སམཱུཧགྷནཝིནིབྦྷོགདསྶནེན ཨཏྟགཱཧཏོ མོཙེཏུཀཱམོ བྷགཝཱ ཧིཏཀཱམོ ¶ ཏསྶ ཏསྶ ཛནསྶ སུཁགཧཎཏྠཾ ཙཀྑུཨཱདཱིནམྤི ཝིསཡབྷཱུཏཾ ཨོལཱ༹རིཀཾ པཋམཾ རཱུཔཀྑནྡྷཾ དེསེསི. ཏཏོ ཨིཊྛཱནིཊྛརཱུཔསཾཝེདནིཀཾ ཝེདནཾ. ‘‘ཡཾ ཝེདཡཏི, ཏཾ སཉྫཱནཱཏཱི’’ཏི ཨེཝཾ ཝེདནཱཝིསཡསྶ ཨཱཀཱརགཱཧིཀཾ སཉྙཾ. སཉྙཱཝསེན ཨབྷིསངྑཱརཀེ སངྑཱརེ. ཏེསཾ ཝེདནཱདཱིནཾ ནིསྶཡཾ ཨདྷིཔཏིབྷཱུཏཉྩ ནེསཾ ཝིཉྙཱཎནྟི ཨེཝཾ ཏཱཝ ཀམཏོ ཝིནིཙྪཡནཡོ ཝིཉྙཱཏབྦོ.

༥༠༥. ཝིསེསཏོཏི ཁནྡྷཱནཉྩ ཨུཔཱདཱནཀྑནྡྷཱནཉྩ ཝིསེསཏོ. ཀོ པན ནེསཾ ཝིསེསོ, ཁནྡྷཱ ཏཱཝ ཨཝིསེསཏོ ཝུཏྟཱ. ཨུཔཱདཱནཀྑནྡྷཱ སཱསཝཨུཔཱདཱནིཡབྷཱཝེན ཝིསེསེཏྭཱ. ཡཐཱཧ –

‘‘པཉྩ ཙེཝ ཝོ, བྷིཀྑཝེ, ཁནྡྷེ དེསེསྶཱམི པཉྩུཔཱདཱནཀྑནྡྷེ ཙ, ཏཾ སུཎཱཐ. ཀཏམེ ཙ, བྷིཀྑཝེ, པཉྩཀྑནྡྷཱ, ཡཾཀིཉྩི, བྷིཀྑཝེ, རཱུཔཾ ཨཏཱིཏཱནཱགཏཔཙྩུཔྤནྣཾ…པེ… སནྟིཀེ ཝཱ, ཨཡཾ ཝུཙྩཏི, བྷིཀྑཝེ, རཱུཔཀྑནྡྷོ. ཡཱ ¶ ཀཱཙི ཝེདནཱ…པེ… ཡཾཀིཉྩི ཝིཉྙཱཎཾ…པེ… སནྟིཀེ ཝཱ, ཨཡཾ ཝུཙྩཏི, བྷིཀྑཝེ, ཝིཉྙཱཎཀྑནྡྷོ. ཨིམེ ཝུཙྩནྟི, བྷིཀྑཝེ, པཉྩཀྑནྡྷཱ. ཀཏམེ ཙ, བྷིཀྑཝེ, པཉྩུཔཱདཱནཀྑནྡྷཱ. ཡཾཀིཉྩི, བྷིཀྑཝེ, རཱུཔཾ…པེ… སནྟིཀེ ཝཱ སཱསཝཾ ཨུཔཱདཱནིཡཾ, ཨཡཾ ཝུཙྩཏི, བྷིཀྑཝེ, རཱུཔུཔཱདཱནཀྑནྡྷོ. ཡཱ ཀཱཙི ཝེདནཱ…པེ… ཡཾཀིཉྩི ཝིཉྙཱཎཾ…པེ… སནྟིཀེ ཝཱ སཱསཝཾ ཨུཔཱདཱནིཡཾ, ཨཡཾ ཝུཙྩཏི, བྷིཀྑཝེ, ཝིཉྙཱཎུཔཱདཱནཀྑནྡྷོ. ཨིམེ ཝུཙྩནྟི, བྷིཀྑཝེ, པཉྩུཔཱདཱནཀྑནྡྷཱ’’ཏི (སཾ. ནི. ༣.༤༨).

ཨེཏྠ ཙ ཡཐཱ ཝེདནཱདཡོ ཨནཱསཝཱཔི ཨཏྠི, ན ཨེཝཾ རཱུཔཾ. ཡསྨཱ པནསྶ རཱསཊྛེན ཁནྡྷབྷཱཝོ ཡུཛྫཏི, ཏསྨཱ ཁནྡྷེསུ ཝུཏྟཾ. ཡསྨཱ རཱསཊྛེན ཙ སཱསཝཊྛེན ཙ ཨུཔཱདཱནཀྑནྡྷབྷཱཝོ ཡུཛྫཏི, ཏསྨཱ ཨུཔཱདཱནཀྑནྡྷེསུ ཝུཏྟཾ. ཝེདནཱདཡོ པན ཨནཱསཝཱཝ ཁནྡྷེསུ ཝུཏྟཱ. སཱསཝཱ ཨུཔཱདཱནཀྑནྡྷེསུ. ཨུཔཱདཱནཀྑནྡྷཱཏི ཙེཏྠ ཨུཔཱདཱནགོཙརཱ ཁནྡྷཱ ཨུཔཱདཱནཀྑནྡྷཱཏི ཨེཝམཏྠོ དཊྛབྦོ. ཨིདྷ པན སབྦེཔེཏེ ཨེཀཛ྄ཛྷཾ ཀཏྭཱ ཁནྡྷཱཏི ཨདྷིཔྤེཏཱ.

༥༠༦. ཨནཱུནཱདྷིཀཏོཏི ཀསྨཱ པན བྷགཝཏཱ པཉྩེཝ ཁནྡྷཱ ཝུཏྟཱ ཨནཱུནཱ ཨནདྷིཀཱཏི. སབྦསངྑཏསབྷཱགེཀསངྒཧཏོ ཨཏྟཏྟནིཡགཱཧཝཏྠུསྶ ཨེཏཔརམཏོ ཨཉྙེསཉྩ ཏདཝརོདྷཏོ. ཨནེཀཔྤབྷེདེསུ ཧི སངྑཏདྷམྨེསུ ¶ སབྷཱགཝསེན སངྒཡ྄ཧམཱནེསུ རཱུཔམྤི རཱུཔསབྷཱགེཀསངྒཧཝསེན ཨེཀོ ཁནྡྷོ ཧོཏི. ཝེདནཱ ཝེདནཱསབྷཱགེཀསངྒཧཝསེན ཨེཀོ ཁནྡྷོ ཧོཏི. ཨེས ནཡོ སཉྙཱདཱིསུ. ཏསྨཱ སབྦསངྑཏསབྷཱགེཀསངྒཧཏོ པཉྩེཝ ཝུཏྟཱ. ཨེཏཔརམཉྩེཏཾ ཨཏྟཏྟནིཡགཱཧཝཏྠུ ཡདིདཾ རཱུཔཱདཡོ པཉྩ. ཝུཏྟཉྷེཏཾ ‘‘རཱུཔེ ཁོ, བྷིཀྑཝེ, སཏི རཱུཔཾ ཨུཔཱདཱཡ རཱུཔཾ ཨབྷིནིཝིསྶ ཨེཝཾ དིཊྛི ཨུཔྤཛྫཏི ‘ཨེཏཾ མམ, ཨེསོཧམསྨི, ཨེསོ མེ ཨཏྟཱ’ཏི. ཝེདནཱཡ, སཉྙཱཡ, སངྑཱརེསུ, ཝིཉྙཱཎེ སཏི ཝིཉྙཱཎཾ ཨུཔཱདཱཡ ཝིཉྙཱཎཾ ཨབྷིནིཝིསྶ ཨེཝཾ དིཊྛི ཨུཔྤཛྫཏི ‘ཨེཏཾ མམ, ཨེསོཧམསྨི, ཨེསོ མེ ཨཏྟཱ’’ཏི (སཾ. ནི. ༣.༢༠༧). ཏསྨཱ ཨཏྟཏྟནིཡགཱཧཝཏྠུསྶ ཨེཏཔརམཏོཔི པཉྩེཝ ཝུཏྟཱ. ཡེཔི ཙཉྙེ སཱིལཱདཡོ པཉྩ དྷམྨཀྑནྡྷཱ ཝུཏྟཱ, ཏེཔི སངྑཱརཀྑནྡྷེ པརིཡཱཔནྣཏྟཱ ཨེཏྠེཝ ཨཝརོདྷཾ གཙྪནྟི. ཏསྨཱ ཨཉྙེསཾ ཏདཝརོདྷཏོཔི པཉྩེཝ ཝུཏྟཱཏི ཨེཝཾ ཨནཱུནཱདྷིཀཏོ ཝིནིཙྪཡནཡོ ཝིཉྙཱཏབྦོ.

༥༠༧. ཨུཔམཱཏོཏི ཨེཏྠ ཧི གིལཱནསཱལུཔམོ རཱུཔུཔཱདཱནཀྑནྡྷོ, གིལཱནུཔམསྶ ཝིཉྙཱཎུཔཱདཱནཀྑནྡྷསྶ ¶ ཝཏྠུདྭཱརཱརམྨཎཝསེན ནིཝཱསཊྛཱནཏོ. གེལཉྙུཔམོ ཝེདནུཔཱདཱནཀྑནྡྷོ, ཨཱབཱདྷཀཏྟཱ. གེལཉྙསམུཊྛཱནུཔམོ སཉྙུཔཱདཱནཀྑནྡྷོ, ཀཱམསཉྙཱདིཝསེན རཱགཱདིསམྤཡུཏྟཝེདནཱསབྦྷཱཝཱ. ཨསཔྤཱཡསེཝནུཔམོ སངྑཱརུཔཱདཱནཀྑནྡྷོ, ཝེདནཱགེལཉྙསྶ ནིདཱནཏྟཱ. ‘‘ཝེདནཾ ཝེདནཏྠཱཡ ཨབྷིསངྑརོནྟཱི’’ཏི (སཾ. ནི. ༣.༧༩) ཧི ཝུཏྟཾ. ཏཐཱ ‘‘ཨཀུསལསྶ ཀམྨསྶ ཀཏཏྟཱ ཨུཔཙིཏཏྟཱ ཝིཔཱཀཾ ཀཱཡཝིཉྙཱཎཾ ཨུཔྤནྣཾ ཧོཏི དུཀྑསཧགཏ’’ནྟི (དྷ. ས. ༥༥༦). གིལཱནུཔམོ ཝིཉྙཱཎུཔཱདཱནཀྑནྡྷོ, ཝེདནཱགེལཉྙེན ཨཔརིམུཏྟཏྟཱ. ཨཔིཙ ཙཱརཀཀཱརཎཨཔརཱདྷཀཱརཎཀཱརཀཨཔརཱདྷིཀུཔམཱ ཨེཏེ བྷཱཛནབྷོཛནབྱཉྫནཔརིཝེསཀབྷུཉྫཀཱུཔམཱ ཙཱཏི ཨེཝཾ ཨུཔམཱཏོ ཝིནིཙྪཡནཡོ ཝིཉྙཱཏབྦོ.

༥༠༨. དཊྛབྦཏོ དྭིདྷཱཏི སངྑེཔཏོ ཝིཏྠཱརཏོ ཙཱཏི ཨེཝཾ དྭིདྷཱ དཊྛབྦཏོཔེཏྠ ཝིནིཙྪཡནཡོ ཝིཉྙཱཏབྦོ. སངྑེཔཏོ ཧི པཉྩུཔཱདཱནཀྑནྡྷཱ ཨཱསཱིཝིསཱུཔམེ (སཾ. ནི. ༤.༢༣༨) ཝུཏྟནཡེན ཨུཀྑིཏྟཱསིཀཔཙྩཏྠིཀཏོ, བྷཱརསུཏྟཝསེན (སཾ. ནི. ༣.༢༢) བྷཱརཏོ, ཁཛྫནཱིཡཔརིཡཱཡཝསེན (སཾ. ནི. ༣.༧༩) ཁཱདཀཏོ, ཡམཀསུཏྟཝསེན (སཾ. ནི. ༣.༨༥) ཨནིཙྩདུཀྑཱནཏྟསངྑཏཝདྷཀཏོ དཊྛབྦཱ. ཝིཏྠཱརཏོ པནེཏྠ ཕེཎཔིཎྜོ ཝིཡ རཱུཔཾ དཊྛབྦཾ, པརིམདྡནཱསཧནཏོ. ཨུདཀཔུབྦུལ༹ཾ ཝིཡ ¶ ཝེདནཱ, མུཧུཏྟརམཎཱིཡཏོ. མརཱིཙིཀཱ ཝིཡ སཉྙཱ, ཝིཔྤལམྦྷནཏོ. ཀདལིཀྑནྡྷོ ཝིཡ སངྑཱརཱ, ཨསཱརཀཏོ. མཱཡཱ ཝིཡ ཝིཉྙཱཎཾ, ཝཉྩཀཏོ. ཝིསེསཏོ ཙ སུལཱ༹རམྤི ཨཛ྄ཛྷཏྟིཀཾ རཱུཔཾ ཨསུབྷནྟི དཊྛབྦཾ. ཝེདནཱ ཏཱིཧི དུཀྑཏཱཧི ཨཝིནིམུཏྟཏོ དུཀྑཱཏི. སཉྙཱསངྑཱརཱ ཨཝིདྷེཡྻཏོ ཨནཏྟཱཏི. ཝིཉྙཱཎཾ ཨུདཡབྦཡདྷམྨཏོ ཨནིཙྩནྟི དཊྛབྦཾ.

༥༠༩. ཨེཝཾ པསྶནྟསྶཏྠསིདྡྷིཏོཏི ཨེཝཉྩ སངྑེཔཝིཏྠཱརཝསེན དྭིདྷཱ པསྶཏོ ཡཱ ཨཏྠསིདྡྷི ཧོཏི, ཏཏོཔི ཝིནིཙྪཡནཡོ ཝིཉྙཱཏབྦོ. སེཡྻཐིདཾ – སངྑེཔཏོ ཏཱཝ པཉྩུཔཱདཱནཀྑནྡྷེ ཨུཀྑིཏྟཱསིཀཔཙྩཏྠིཀཱདིབྷཱཝེན པསྶནྟོ ཁནྡྷེཧི ན ཝིཧཉྙཏི. ཝིཏྠཱརཏོ པན རཱུཔཱདཱིནི ཕེཎཔིཎྜཱདིསདིསབྷཱཝེན པསྶནྟོ ན ཨསཱརེསུ སཱརདསྶཱི ཧོཏི.

ཝིསེསཏོ ཙ ཨཛ྄ཛྷཏྟིཀརཱུཔཾ ཨསུབྷཏོ པསྶནྟོ ཀབལཱི༹ཀཱརཱཧཱརཾ པརིཛཱནཱཏི, ཨསུབྷེ སུབྷནྟི ཝིཔལླཱསཾ པཛཧཏི. ཀཱམོགྷཾ ཨུཏྟརཏི, ཀཱམཡོགེན ཝིསཾཡུཛྫཏི, ཀཱམཱསཝེན ཨནཱསཝོ ཧོཏི, ཨབྷིཛ྄ཛྷཱཀཱཡགནྠཾ བྷིནྡཏི, ཀཱམུཔཱདཱནཾ ན ཨུཔཱདིཡཏི.

ཝེདནཾ ¶ དུཀྑཏོ པསྶནྟོ ཕསྶཱཧཱརཾ པརིཛཱནཱཏི, དུཀྑེ སུཁནྟི ཝིཔལླཱསཾ པཛཧཏི, བྷཝོགྷཾ ཨུཏྟརཏི, བྷཝཡོགེན ཝིསཾཡུཛྫཏི, བྷཝཱསཝེན ཨནཱསཝོ ཧོཏི, བྱཱཔཱདཀཱཡགནྠཾ བྷིནྡཏི, སཱིལབྦཏུཔཱདཱནཾ ན ཨུཔཱདིཡཏི.

སཉྙཾ སངྑཱརེ ཙ ཨནཏྟཏོ པསྶནྟོ མནོསཉྩེཏནཱཧཱརཾ པརིཛཱནཱཏི, ཨནཏྟནི ཨཏྟཱཏི ཝིཔལླཱསཾ པཛཧཏི, དིཊྛོགྷཾ ཨུཏྟརཏི, དིཊྛིཡོགེན ཝིསཾཡུཛྫཏི, དིཊྛཱསཝེན ཨནཱསཝོ ཧོཏི. ཨིདཾསཙྩཱབྷིནིཝེསཀཱཡགནྠཾ བྷིནྡཏི, ཨཏྟཝཱདུཔཱདཱནཾ ན ཨུཔཱདིཡཏི.

ཝིཉྙཱཎཾ ཨནིཙྩཏོ པསྶནྟོ ཝིཉྙཱཎཱཧཱརཾ པརིཛཱནཱཏི, ཨནིཙྩེ ནིཙྩནྟི ཝིཔལླཱསཾ པཛཧཏི, ཨཝིཛྫོགྷཾ ཨུཏྟརཏི, ཨཝིཛྫཱཡོགེན ཝིསཾཡུཛྫཏི, ཨཝིཛྫཱསཝེན ཨནཱསཝོ ཧོཏི, སཱིལབྦཏཔརཱམཱསཀཱཡགནྠཾ བྷིནྡཏི, དིཊྛུཔཱདཱནཾ ན ཨུཔཱདིཡཏི.

ཨེཝཾ ¶ མཧཱནིསཾསཾ, ཝདྷཀཱདིཝསེན དསྶནཾ ཡསྨཱ;

ཏསྨཱ ཁནྡྷེ དྷཱིརོ, ཝདྷཀཱདིཝསེན པསྶེཡྻཱཏི.

ཨིཏི སཱདྷུཛནཔཱམོཛྫཏྠཱཡ ཀཏེ ཝིསུདྡྷིམགྒེ

པཉྙཱབྷཱཝནཱདྷིཀཱརེ

ཁནྡྷནིདྡེསོ ནཱམ

ཙུདྡསམོ པརིཙྪེདོ.

༡༥. ཨཱཡཏནདྷཱཏུནིདྡེསོ

ཨཱཡཏནཝིཏྠཱརཀཐཱ

༥༡༠. ཨཱཡཏནཱནཱིཏི ¶ ¶ དྭཱདསཱཡཏནཱནི – ཙཀྑཱཡཏནཾ, རཱུཔཱཡཏནཾ, སོཏཱཡཏནཾ, སདྡཱཡཏནཾ, གྷཱནཱཡཏནཾ, གནྡྷཱཡཏནཾ, ཛིཝ྄ཧཱཡཏནཾ, རསཱཡཏནཾ, ཀཱཡཱཡཏནཾ, ཕོཊྛབྦཱཡཏནཾ, མནཱཡཏནཾ, དྷམྨཱཡཏནནྟི. ཏཏྠ –

ཨཏྠ ལཀྑཎ ཏཱཝཏྭ, ཀམ སངྑེཔ ཝིཏྠཱརཱ;

ཏཐཱ དཊྛབྦཏོ ཙེཝ, ཝིཉྙཱཏབྦོ ཝིནིཙྪཡོ.

ཏཏྠ ཝིསེསཏོ ཏཱཝ ཙཀྑཏཱིཏི ཙཀྑུ, རཱུཔཾ ཨསྶཱདེཏི ཝིབྷཱཝེཏི ཙཱཏི ཨཏྠོ. རཱུཔཡཏཱིཏི རཱུཔཾ, ཝཎྞཝིཀཱརཾ ཨཱཔཛྫམཱནཾ ཧདཡངྒཏབྷཱཝཾ པཀཱསེཏཱིཏི ཨཏྠོ. སུཎཱཏཱིཏི སོཏཾ. སཔྤཏཱིཏི སདྡོ, ཨུདཱཧརིཡཏཱིཏི ཨཏྠོ. གྷཱཡཏཱིཏི གྷཱནཾ. གནྡྷཡཏཱིཏི གནྡྷོ. ཨཏྟནོ ཝཏྠུཾ སཱུཙཡཏཱིཏི ཨཏྠོ. ཛཱིཝིཏཾ ཨཝ྄ཧཡཏཱིཏི ཛིཝ྄ཧཱ. རསནྟི ཏཾ སཏྟཱཏི རསོ, ཨསྶཱདེནྟཱིཏི ཨཏྠོ. ཀུཙྪིཏཱནཾ སཱསཝདྷམྨཱནཾ ཨཱཡོཏི ཀཱཡོ. ཨཱཡོཏི ཨུཔྤཏྟིདེསོ. ཕུསིཡཏཱིཏི ཕོཊྛབྦཾ. མུནཱཏཱིཏི མནོ. ཨཏྟནོ ལཀྑཎཾ དྷཱརེནྟཱིཏི དྷམྨཱ.

༥༡༡. ཨཝིསེསཏོ པན ཨཱཡཏནཏོ, ཨཱཡཱནཾ ཏནནཏོ, ཨཱཡཏསྶ ཙ ནཡནཏོ ཨཱཡཏནནྟི ཝེདིཏབྦཾ. ཙཀྑུརཱུཔཱདཱིསུ ཧི ཏཾཏཾདྭཱརཱརམྨཎཱ ཙིཏྟཙེཏསིཀཱ དྷམྨཱ སེན སེན ཨནུབྷཝནཱདིནཱ ཀིཙྩེན ཨཱཡཏནྟི ཨུཊྛཧནྟི གྷཊནྟི, ཝཱཡམནྟཱིཏི ཝུཏྟཾ ཧོཏི. ཏེ ཙ ཨཱཡབྷཱུཏེ དྷམྨེ ཨེཏཱནི ཏནོནྟི, ཝིཏྠཱརེནྟཱིཏི ཝུཏྟཾ ཧོཏི, ཨིདཉྩ ཨནམཏགྒེ སཾསཱརེ པཝཏྟཾ ཨཏཱིཝ ཨཱཡཏཾ སཾསཱརདུཀྑཾ ཡཱཝ ན ནིཝཏྟཏི, ཏཱཝ ནཡནྟེཝ, པཝཏྟཡནྟཱིཏི ཝུཏྟཾ ཧོཏི. ཨིཏི ¶ སབྦེཔིམེ དྷམྨཱ ཨཱཡཏནཏོ, ཨཱཡཱནཾ ཏནནཏོ, ཨཱཡཏསྶ ཙ ནཡནཏོ ཨཱཡཏནཾ ཨཱཡཏནནྟི ཝུཙྩནྟི.

༥༡༢. ཨཔིཙ ནིཝཱསཊྛཱནཊྛེན ཨཱཀརཊྛེན སམོསརཎཊྛཱནཊྛེན སཉྫཱཏིདེསཊྛེན ཀཱརཎཊྛེན ཙ ཨཱཡཏནཾ ཝེདིཏབྦཾ. ཏཐཱ ཧི ལོཀེ ‘‘ཨིསྶརཱཡཏནཾ ཝཱསུདེཝཱཡཏན’’ནྟིཨཱདཱིསུ ནིཝཱསཊྛཱནཾ ཨཱཡཏནནྟི ¶ ཝུཙྩཏི. ‘‘སུཝཎྞཱཡཏནཾ རཛཏཱཡཏན’’ནྟིཨཱདཱིསུ ཨཱཀརོ. སཱསནེ པན ‘‘མནོརམྨེ ཨཱཡཏནེ སེཝནྟི ནཾ ཝིཧངྒམཱ’’ཏིཨཱདཱིསུ (ཨ. ནི. ༥.༣༨) སམོསརཎཊྛཱནཾ. ‘‘དཀྑིཎཱཔཐོ གུནྣཾ ཨཱཡཏན’’ནྟིཨཱདཱིསུ སཉྫཱཏིདེསོ. ‘‘ཏཏྲ ཏཏྲེཝ སཀྑིབྷབྦཏཾ པཱཔུཎཱཏི སཏི སཏིཨཱཡཏནེ’’ཏིཨཱདཱིསུ (ཨ. ནི. ༣.༡༠༢) ཀཱརཎཾ.

ཙཀྑུཨཱདཱིསུ ཙཱཔི ཏེ ཏེ ཙིཏྟཙེཏསིཀཱ དྷམྨཱ ནིཝསནྟི ཏདཱཡཏྟཝུཏྟིཏཱཡཱཏི ཙཀྑཱདཡོ ཙ ནེསཾ ནིཝཱསཊྛཱནཾ. ཙཀྑཱདཱིསུ ཙ ཏེ ཨཱཀིཎྞཱ ཏནྣིསྶིཏཏྟཱ ཏདཱརམྨཎཏྟཱ ཙཱཏི ཙཀྑཱདཡོ ནེསཾ ཨཱཀརོ. ཙཀྑཱདཡོ ཙ ནེསཾ སམོསརཎཊྛཱནཾ, ཏཏྠ ཏཏྠ ཝཏྠུདྭཱརཱརམྨཎཝསེན སམོསརཎཏོ. ཙཀྑཱདཡོ ཙ ནེསཾ སཉྫཱཏིདེསོ, ཏནྣིསྶཡཱརམྨཎབྷཱཝེན ཏཏྠེཝ ཨུཔྤཏྟིཏོ. ཙཀྑཱདཡོ ཙ ནེསཾ ཀཱརཎཾ, ཏེསཾ ཨབྷཱཝེ ཨབྷཱཝཏོཏི. ཨིཏི ནིཝཱསཊྛཱནཊྛེན, ཨཱཀརཊྛེན, སམོསརཎཊྛཱནཊྛེན, སཉྫཱཏིདེསཊྛེན, ཀཱརཎཊྛེནཙཱཏི ཨིམེཧིཔི ཀཱརཎེཧི ཨེཏེ དྷམྨཱ ཨཱཡཏནཾ ཨཱཡཏནནྟི ཝུཙྩནྟི.

ཏསྨཱ ཡཐཱཝུཏྟེན ཨཏྠེན ཙཀྑུ ཙ ཏཾ ཨཱཡཏནཉྩཱཏི ཙཀྑཱཡཏནཾ…པེ… དྷམྨཱ ཙ ཏེ ཨཱཡཏནཉྩཱཏི དྷམྨཱཡཏནནྟི ཨེཝཾ ཏཱཝེཏྠ ཨཏྠཏོ ཝིཉྙཱཏབྦོ ཝིནིཙྪཡོ.

༥༡༣. ལཀྑཎཱཏི ཙཀྑཱདཱིནཾ ལཀྑཎཏོཔེཏྠ ཝིཉྙཱཏབྦོ ཝིནིཙྪཡོ. ཏཱནི ཙ པན ཏེསཾ ལཀྑཎཱནི ཁནྡྷནིདྡེསེ ཝུཏྟནཡེནེཝ ཝེདིཏབྦཱནི.

ཏཱཝཏྭཏོཏི ཏཱཝབྷཱཝཏོ. ཨིདཾ ཝུཏྟཾ ཧོཏི – ཙཀྑཱདཡོཔི ཧི དྷམྨཱ ཨེཝ, ཨེཝཾ སཏི དྷམྨཱཡཏནམིཙྩེཝ ཨཝཏྭཱ ཀསྨཱ དྭཱདསཱཡཏནཱནཱིཏི ཝུཏྟཱནཱིཏི ཙེ. ཚཝིཉྙཱཎཀཱཡུཔྤཏྟིདྭཱརཱརམྨཎཝཝཏྠཱནཏོ ཨིདྷ ཚནྣཾ ཝིཉྙཱཎཀཱཡཱནཾ དྭཱརབྷཱཝེན ཨཱརམྨཎབྷཱཝེན ཙ ཝཝཏྠཱནཏོ ཨཡམེཏེསཾ བྷེདོ ཧོཏཱིཏི དྭཱདས ཝུཏྟཱནི, ཙཀྑུཝིཉྙཱཎཝཱིཐིཔརིཡཱཔནྣསྶ ཧི ཝིཉྙཱཎཀཱཡསྶ ¶ ཙཀྑཱཡཏནམེཝ ཨུཔྤཏྟིདྭཱརཾ, རཱུཔཱཡཏནམེཝ ཙཱརམྨཎཾ, ཏཐཱ ཨིཏརཱནི ཨིཏརེསཾ. ཚཊྛསྶ པན བྷཝངྒམནསངྑཱཏོ མནཱཡཏནེཀདེསོཝ ཨུཔྤཏྟིདྭཱརཾ, ཨསཱདྷཱརཎམེཝ ཙ དྷམྨཱཡཏནཾ ཨཱརམྨཎནྟི ¶ . ཨིཏི ཚནྣཾ ཝིཉྙཱཎཀཱཡཱནཾ ཨུཔྤཏྟིདྭཱརཱརམྨཎཝཝཏྠཱནཏོ དྭཱདས ཝུཏྟཱནཱིཏི ཨེཝམེཏྠ ཏཱཝཏྭཏོ ཝིཉྙཱཏབྦོ ཝིནིཙྪཡོ.

༥༡༤. ཀམཏོཏི ཨིདྷཱཔི པུབྦེ ཝུཏྟེསུ ཨུཔྤཏྟིཀྐམཱདཱིསུ དེསནཱཀྐམོཝ ཡུཛྫཏི. ཨཛ྄ཛྷཏྟིཀེསུ ཧི ཨཱཡཏནེསུ སནིདསྶནསཔྤཊིགྷཝིསཡཏྟཱ ཙཀྑཱཡཏནཾ པཱཀཊནྟི པཋམཾ དེསིཏཾ, ཏཏོ ཨནིདསྶནསཔྤཊིགྷཝིསཡཱནི སོཏཱཡཏནཱདཱིནི. ཨཐ ཝཱ དསྶནཱནུཏྟརིཡསཝནཱནུཏྟརིཡཧེཏུབྷཱཝེན བཧཱུཔཀཱརཏྟཱ ཨཛ྄ཛྷཏྟིཀེསུ ཙཀྑཱཡཏནསོཏཱཡཏནཱནི པཋམཾ དེསིཏཱནི, ཏཏོ གྷཱནཱཡཏནཱདཱིནི ཏཱིཎི, པཉྩནྣམྤི གོཙརཝིསཡཏྟཱ ཨནྟེ མནཱཡཏནཾ, ཙཀྑཱཡཏནཱདཱིནཾ པན གོཙརཏྟཱ ཏསྶ ཏསྶ ཨནྟརནྟརཱནི བཱཧིརེསུ རཱུཔཱཡཏནཱདཱིནི. ཨཔིཙ ཝིཉྙཱཎུཔྤཏྟིཀཱརཎཝཝཏྠཱནཏོཔི ཨཡམེཏེསཾ ཀམོ ཝེདིཏབྦོ. ཝུཏྟཉྷེཏཾ ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎཾ…པེ… མནཉྩ པཊིཙྩ དྷམྨེ ཙ ཨུཔྤཛྫཏི མནོཝིཉྙཱཎ’’ནྟི (མ. ནི. ༣.༤༢༡; སཾ. ནི. ༢.༤༣). ཨེཝཾ ཀམཏོཔེཏྠ ཝིཉྙཱཏབྦོ ཝིནིཙྪཡོ.

༥༡༥. སངྑེཔཝིཏྠཱརཱཏི སངྑེཔཏོ ཧི མནཱཡཏནསྶ ཙེཝ དྷམྨཱཡཏནེཀདེསསྶ ཙ ནཱམེན ཏདཝསེསཱནཉྩ ཨཱཡཏནཱནཾ རཱུཔེན སངྒཧིཏཏྟཱ དྭཱདསཱཔི ཨཱཡཏནཱནི ནཱམརཱུཔམཏྟམེཝ ཧོནྟི. ཝིཏྠཱརཏོ པན ཨཛ྄ཛྷཏྟིཀེསུ ཏཱཝ ཙཀྑཱཡཏནཾ ཛཱཏིཝསེན ཙཀྑུཔསཱདམཏྟམེཝ, པཙྩཡགཏིནིཀཱཡཔུགྒལབྷེདཏོ པན ཨནནྟཔྤབྷེདཾ. ཏཐཱ སོཏཱཡཏནཱདཱིནི ཙཏྟཱརི. མནཱཡཏནཾ ཀུསལཱཀུསལཝིཔཱཀཀིརིཡཝིཉྙཱཎབྷེདེན ཨེཀཱུནནཝུཏིཔྤབྷེདཾ ཨེཀཝཱིསུཏྟརསཏཔྤབྷེདཉྩ. ཝཏྠུཔཊིཔདཱདིབྷེདཏོ པན ཨནནྟཔྤབྷེདཾ. རཱུཔསདྡགནྡྷརསཱཡཏནཱནི ཝིསབྷཱགཔཙྩཡཱདིབྷེདཏོ ཨནནྟཔྤབྷེདཱནི. ཕོཊྛབྦཱཡཏནཾ པཐཝཱིདྷཱཏུཏེཛོདྷཱཏུཝཱཡོདྷཱཏུཝསེན ཏིཔྤབྷེདཾ. པཙྩཡཱདིབྷེདཏོ ཨནེཀཔྤབྷེདཾ. དྷམྨཱཡཏནཾ ཝེདནཱསཉྙཱསངྑཱརཀྑནྡྷསུཁུམརཱུཔནིབྦཱནཱནཾ སབྷཱཝནཱནཏྟབྷེདཏོ ཨནེཀཔྤབྷེདནྟི. ཨེཝཾ སངྑེཔཝིཏྠཱརཱ ཝིཉྙཱཏབྦོ ཝིནིཙྪཡོ.

༥༡༦. དཊྛབྦཏོཏི ཨེཏྠ པན སབྦཱནེཝ སངྑཏཱནི ཨཱཡཏནཱནི ཨནཱགམནཏོ ཨནིགྒམནཏོ ཙ དཊྛབྦཱནི. ན ཧི ཏཱནི པུབྦེ ཨུདཡཱ ཀུཏོཙི ཨཱགཙྪནྟི, ནཔི ཨུདྡྷཾ ཝཡཱ ¶ ཀུཧིཉྩི གཙྪནྟི, ཨཐ ཁོ པུབྦེ ཨུདཡཱ ཨཔྤཊིལདྡྷསབྷཱཝཱནི ¶ , ཨུདྡྷཾ ཝཡཱ པརིབྷིནྣསབྷཱཝཱནི, པུབྦནྟཱཔརནྟཝེམཛ྄ཛྷེ པཙྩཡཱཡཏྟཝུཏྟིཏཱཡ ཨཝསཱནི པཝཏྟནྟི. ཏསྨཱ ཨནཱགམནཏོ ཨནིགྒམནཏོ ཙ དཊྛབྦཱནི. ཏཐཱ ནིརཱིཧཀཏོ ཨབྱཱཔཱརཏོ ཙ. ན ཧི ཙཀྑུརཱུཔཱདཱིནཾ ཨེཝཾ ཧོཏི ‘‘ཨཧོ ཝཏ ཨམྷཱཀཾ སཱམགྒིཡཾ ཝིཉྙཱཎཾ ནཱམ ཨུཔྤཛྫེཡྻཱ’’ཏི, ན ཙ ཏཱནི ཝིཉྙཱཎུཔྤཱདནཏྠཾ དྭཱརབྷཱཝེན ཝཏྠུབྷཱཝེན ཨཱརམྨཎབྷཱཝེན ཝཱ ཨཱིཧནྟི, ན བྱཱཔཱརམཱཔཛྫནྟི, ཨཐ ཁོ དྷམྨཏཱཝེསཱ, ཡཾ ཙཀྑུརཱུཔཱདིསཱམགྒིཡཾ ཙཀྑུཝིཉྙཱཎཱདཱིནི སམྦྷཝནྟཱིཏི. ཏསྨཱ ནིརཱིཧཀཏོ ཨབྱཱཔཱརཏོ ཙ དཊྛབྦཱནི. ཨཔིཙ ཨཛ྄ཛྷཏྟིཀཱནི སུཉྙགཱམོ ཝིཡ དཊྛབྦཱནི, དྷུཝསུབྷསུཁཏྟབྷཱཝཝིརཧིཏཏྟཱ. བཱཧིརཱནི གཱམགྷཱཏཀཙོརཱ ཝིཡ, ཨཛ྄ཛྷཏྟིཀཱནཾ ཨབྷིགྷཱཏཀཏྟཱ. ཝུཏྟཉྷེཏཾ ‘‘ཙཀྑུ, བྷིཀྑཝེ, ཧཉྙཏི མནཱཔཱམནཱཔེཧི རཱུཔེཧཱི’’ཏི ཝིཏྠཱརོ. ཨཔིཙ ཨཛ྄ཛྷཏྟིཀཱནི ཚ པཱཎཀཱ ཝིཡ དཊྛབྦཱནི, བཱཧིརཱནི ཏེསཾ གོཙརཱ ཝིཡཱཏི. ཨེཝམེཏྠ དཊྛབྦཏོ ཝིཉྙཱཏབྦོ ཝིནིཙྪཡོ.

ཨིདཾ ཏཱཝ ཨཱཡཏནཱནཾ ཝིཏྠཱརཀཐཱམུཁཾ.

དྷཱཏུཝིཏྠཱརཀཐཱ

༥༡༧. ཏདནནྟརཱ པན དྷཱཏུཡོཏི ཨཊྛཱརས དྷཱཏུཡོ – ཙཀྑུདྷཱཏུ, རཱུཔདྷཱཏུ, ཙཀྑུཝིཉྙཱཎདྷཱཏུ, སོཏདྷཱཏུ, སདྡདྷཱཏུ, སོཏཝིཉྙཱཎདྷཱཏུ, གྷཱནདྷཱཏུ, གནྡྷདྷཱཏུ, གྷཱནཝིཉྙཱཎདྷཱཏུ, ཛིཝ྄ཧཱདྷཱཏུ, རསདྷཱཏུ, ཛིཝ྄ཧཱཝིཉྙཱཎདྷཱཏུ, ཀཱཡདྷཱཏུ, ཕོཊྛབྦདྷཱཏུ, ཀཱཡཝིཉྙཱཎདྷཱཏུ, མནོདྷཱཏུ, དྷམྨདྷཱཏུ, མནོཝིཉྙཱཎདྷཱཏཱུཏི. ཏཏྠ –

ཨཏྠཏོ ལཀྑཎཱདཱིཧི, ཀམ ཏཱཝཏྭསངྑཏོ;

པཙྩཡཱ ཨཐ དཊྛབྦཱ, ཝེདིཏབྦོ ཝིནིཙྪཡོ.

ཏཏྠ ཨཏྠཏོཏི ཙཀྑཏཱིཏི ཙཀྑུ. རཱུཔཡཏཱིཏི རཱུཔཾ. ཙཀྑུསྶ ཝིཉྙཱཎཾ ཙཀྑུཝིཉྙཱཎནྟི ཨེཝམཱདིནཱ ཏཱཝ ནཡེན ཙཀྑཱདཱིནཾ ཝིསེསཏྠཏོ ཝེདིཏབྦོ ཝིནིཙྪཡོ. ཨཝིསེསེན པན ཝིདཧཏི, དྷཱིཡཏེ, ཝིདྷཱནཾ, ཝིདྷཱིཡཏེ ཨེཏཱཡ, ཨེཏྠ ཝཱ དྷཱིཡཏཱིཏི དྷཱཏུ. ལོཀིཡཱ ཧི དྷཱཏུཡོ ཀཱརཎབྷཱཝེན ཝཝཏྠིཏཱ ཧུཏྭཱ སུཝཎྞརཛཏཱདིདྷཱཏུཡོ ཝིཡ སུཝཎྞརཛཏཱདིཾ ¶ , ཨནེཀཔྤཀཱརཾ སཾསཱརདུཀྑཾ ཝིདཧནྟི. བྷཱརཧཱརེཧི ཙ བྷཱརོ ཝིཡ, སཏྟེཧི ¶ དྷཱིཡནྟེ, དྷཱརིཡནྟཱིཏི ཨཏྠོ. དུཀྑཝིདྷཱནམཏྟམེཝ ཙེསཱ, ཨཝསཝཏྟནཏོ. ཨེཏཱཧི ཙ ཀརཎབྷཱུཏཱཧི སཾསཱརདུཀྑཾ སཏྟེཧི ཨནུཝིདྷཱིཡཏི. ཏཐཱཝིཧིཏཉྩ ཏཾ ཨེཏཱསྭེཝ དྷཱིཡཏི, ཋཔིཡཏཱིཏི ཨཏྠོ. ཨིཏི ཙཀྑཱདཱིསུ ཨེཀེཀོ དྷམྨོ ཡཐཱསམྦྷཝཾ ཝིདཧཏི, དྷཱིཡཏཱིཏིཨཱདིནཱ ཨཏྠཝསེན དྷཱཏཱུཏི ཝུཙྩཏི.

༥༡༨. ཨཔིཙ ཡཐཱ ཏིཏྠིཡཱནཾ ཨཏྟཱ ནཱམ སབྷཱཝཏོ ནཏྠི, ན ཨེཝམེཏཱ, ཨེཏཱ པན ཨཏྟནོ སབྷཱཝཾ དྷཱརེནྟཱིཏི དྷཱཏུཡོ. ཡཐཱ ལོཀེ ཝིཙིཏྟཱ ཧརིཏཱལམནོསིལཱདཡོ སེལཱཝཡཝཱ དྷཱཏུཡོཏི ཝུཙྩནྟི, ཨེཝམེཏཱཔི དྷཱཏུཡོ ཝིཡ དྷཱཏུཡོ. ཝིཙིཏྟཱ ཧེཏེ ཉཱཎཉེཡྻཱཝཡཝཱཏི. ཡཐཱ ཝཱ སརཱིརསངྑཱཏསྶ སམུདཱཡསྶ ཨཝཡཝབྷཱུཏེསུ རསསོཎིཏཱདཱིསུ ཨཉྙམཉྙཝིསབྷཱགལཀྑཎཔརིཙྪིནྣེསུ དྷཱཏུསམཉྙཱ, ཨེཝམེཏེསུཔི པཉྩཀྑནྡྷསངྑཱཏསྶ ཨཏྟབྷཱཝསྶ ཨཝཡཝེསུ དྷཱཏུསམཉྙཱ ཝེདིཏབྦཱ. ཨཉྙམཉྙཝིསབྷཱགལཀྑཎཔརིཙྪིནྣཱ ཧེཏེ ཙཀྑཱདཡོཏི. ཨཔིཙ དྷཱཏཱུཏི ནིཛྫཱིཝམཏྟསྶེཝེཏཾ ཨདྷིཝཙནཾ. ཏཐཱ ཧི བྷགཝཱ ‘‘ཚ དྷཱཏུརོ ཨཡཾ བྷིཀྑུ པུརིསོ’’ཏིཨཱདཱིསུ (མ. ནི. ༣.༣༤༤) ཛཱིཝསཉྙཱསམཱུཧནནཏྠཾ དྷཱཏུདེསནཾ ཨཀཱསཱིཏི.

ཏསྨཱ ཡཐཱཝུཏྟེན ཨཏྠེན ཙཀྑུ ཙ ཏཾ དྷཱཏུ ཙ ཙཀྑུདྷཱཏུ…པེ… མནོཝིཉྙཱཎཉྩ ཏཾ དྷཱཏུ ཙ མནོཝིཉྙཱཎདྷཱཏཱུཏི. ཨེཝཾ ཏཱཝེཏྠ ཨཏྠཏོ ཝེདིཏབྦོ ཝིནིཙྪཡོ.

༥༡༩. ལཀྑཎཱདིཏོཏི ཙཀྑཱདཱིནཾ ལཀྑཎཱདིཏོཔེཏྠ ཝེདིཏབྦོ ཝིནིཙྪཡོ. ཏཱནི ཙ པན ནེསཾ ལཀྑཎཱདཱིནི ཁནྡྷནིདྡེསེ ཝུཏྟནཡེནེཝ ཝེདིཏབྦཱནི.

ཀམཏོཏི ཨིདྷཱཔི པུབྦེ ཝུཏྟེསུ ཨུཔྤཏྟིཀྐམཱདཱིསུ དེསནཱཀྐམོཝ ཡུཛྫཏི. སོ ཙ པནཱཡཾ ཧེཏུཕལཱནུཔུབྦཝཝཏྠཱནཝསེན ཝུཏྟོ. ཙཀྑུདྷཱཏུ རཱུཔདྷཱཏཱུཏི ཨིདཉྷི དྭཡཾ ཧེཏུ, ཙཀྑུཝིཉྙཱཎདྷཱཏཱུཏི ཕལཾ. ཨེཝཾ སབྦཏྠ.

༥༢༠. ཏཱཝཏྭཏོཏི ¶ ཏཱཝབྷཱཝཏོ. ཨིདཾ ཝུཏྟཾ ཧོཏི – ཏེསུ ཏེསུ ཧི སུཏྟཱབྷིདྷམྨཔྤདེསེསུ ‘‘ཨཱབྷཱདྷཱཏུ, སུབྷདྷཱཏུ, ཨཱཀཱསཱནཉྩཱཡཏནདྷཱཏུ, ཝིཉྙཱཎཉྩཱཡཏནདྷཱཏུ, ཨཱཀིཉྩཉྙཱཡཏནདྷཱཏུ, ནེཝསཉྙཱནཱསཉྙཱཡཏནདྷཱཏུ, སཉྙཱཝེདཡིཏནིརོདྷདྷཱཏུ’’ (སཾ. ནི. ༢.༩༥), ‘‘ཀཱམདྷཱཏུ ¶ , བྱཱཔཱདདྷཱཏུ, ཝིཧིཾསཱདྷཱཏུ, ནེཀྑམྨདྷཱཏུ, ཨབྱཱཔཱདདྷཱཏུ, ཨཝིཧིཾསཱདྷཱཏུ’’ (ཝིབྷ. ༡༨༢; དཱི. ནི. ༣.༣༠༥; མ. ནི. ༣.༡༢༥), ‘‘སུཁདྷཱཏུ, དུཀྑདྷཱཏུ, སོམནསྶདྷཱཏུ, དོམནསྶདྷཱཏུ, ཨུཔེཀྑཱདྷཱཏུ, ཨཝིཛྫཱདྷཱཏུ’’ (ཝིབྷ. ༡༨༠; མ. ནི. ༣.༡༢༥), ‘‘ཨཱརམྦྷདྷཱཏུ, ནིཀྐམདྷཱཏུ, པརཀྐམདྷཱཏུ’’ (སཾ. ནི. ༥.༡༨༣), ‘‘ཧཱིནདྷཱཏུ, མཛ྄ཛྷིམདྷཱཏུ, པཎཱིཏདྷཱཏུ’’ (དཱི. ནི. ༣.༣༠༥), ‘‘པཐཝཱིདྷཱཏུ, ཨཱཔོདྷཱཏུ, ཏེཛོདྷཱཏུ, ཝཱཡོདྷཱཏུ (དཱི. ནི. ༣.༣༡༡), ཨཱཀཱསདྷཱཏུ, ཝིཉྙཱཎདྷཱཏུ’’ (མ. ནི. ༣.༡༢༥; ཝིབྷ. ༡༧༢), ‘‘སངྑཏདྷཱཏུ, ཨསངྑཏདྷཱཏུ’’ (མ. ནི. ༣.༡༢༥), ‘‘ཨནེཀདྷཱཏུ ནཱནཱདྷཱཏུ ལོཀོ’’ཏི (དཱི. ནི. ༢.༣༦༦; མ. ནི. ༡.༡༤༨) ཨེཝམཱདཡོ ཨཉྙཱཔི དྷཱཏུཡོ དིསྶནྟི. ཨེཝཾ སཏི སབྦཱསཾ ཝསེན པརིཙྪེདཾ ཨཀཏྭཱ ཀསྨཱ ཨཊྛཱརསཱཏི ཨཡམེཝ པརིཙྪེདོ ཀཏོཏི ཙེ. སབྷཱཝཏོ ཝིཛྫམཱནཱནཾ སབྦདྷཱཏཱུནཾ ཏདནྟོགདྷཏྟཱ.

རཱུཔདྷཱཏུཡེཝ ཧི ཨཱབྷཱདྷཱཏུ, སུབྷདྷཱཏུ པན རཱུཔཱདིཔཊིབདྡྷཱ. ཀསྨཱ, སུབྷནིམིཏྟཏྟཱ. སུབྷནིམིཏྟཉྷི སུབྷདྷཱཏུ. ཏཉྩ རཱུཔཱདིཝིནིམུཏྟཾ ན ཝིཛྫཏི. ཀུསལཝིཔཱཀཱརམྨཎཱ ཝཱ རཱུཔཱདཡོ ཨེཝ སུབྷདྷཱཏཱུཏི རཱུཔཱདིམཏྟམེཝེསཱ. ཨཱཀཱསཱནཉྩཱཡཏནདྷཱཏུཨཱདཱིསུ ཙིཏྟཾ མནོཝིཉྙཱཎདྷཱཏུཡེཝ, སེསཱ དྷམྨདྷཱཏུ. སཉྙཱཝེདཡིཏནིརོདྷདྷཱཏུ པན སབྷཱཝཏོ ནཏྠི. དྷཱཏུདྭཡནིརོདྷམཏྟམེཝ ཧི སཱ.

ཀཱམདྷཱཏུ དྷམྨདྷཱཏུམཏྟཾ ཝཱ ཧོཏི. ཡཐཱཧ – ‘‘ཏཏྠ ཀཏམཱ ཀཱམདྷཱཏུ? ཀཱམཔཊིསཾཡུཏྟོ ཏཀྐོ ཝིཏཀྐོ མིཙྪཱསངྐཔྤོ’’ཏི (ཝིབྷ. ༡༨༢). ཨཊྛཱརསཱཔི ཝཱ དྷཱཏུཡོ. ཡཐཱཧ – ‘‘ཧེཊྛཏོ ཨཝཱིཙིནིརཡཾ པརིཡནྟཾ ཀརིཏྭཱ ཨུཔརིཏོ པརནིམྨིཏཝསཝཏྟཱི དེཝེ ཨནྟོཀརིཏྭཱ ཡཾ ཨེཏསྨིཾ ཨནྟརེ ཨེཏྠཱཝཙརཱ ཨེཏྠ པརིཡཱཔནྣཱ ཁནྡྷདྷཱཏུཨཱཡཏནཱ རཱུཔཱ ཝེདནཱ སཉྙཱ སངྑཱརཱ ཝིཉྙཱཎཾ, ཨཡཾ ཝུཙྩཏི ཀཱམདྷཱཏཱུ’’ཏི (ཝིབྷ. ༡༨༢).

ནེཀྑམྨདྷཱཏུ ¶ དྷམྨདྷཱཏུ ཨེཝ, ‘‘སབྦེཔི ཀུསལཱ དྷམྨཱ ནེཀྑམྨདྷཱཏཱུ’’ཏི (ཝིབྷ. ༡༨༢) ཝཙནཏོ མནོཝིཉྙཱཎདྷཱཏུཔི ཧོཏིཡེཝ. བྱཱཔཱདཝིཧིཾསཱ-ཨབྱཱཔཱད-ཨཝིཧིཾསཱསུཁ-དུཀྑ-སོམནསྶ-དོམནསྶུཔེཀྑཱ-ཨཝིཛྫཱཨཱརམྦྷ-ནིཀྐམ-པརཀྐམདྷཱཏུཡོ དྷམྨདྷཱཏུཡེཝ.

ཧཱིནམཛ྄ཛྷིམཔཎཱིཏདྷཱཏུཡོ ཨཊྛཱརས དྷཱཏུམཏྟམེཝ. ཧཱིནཱ ཧི ཙཀྑཱདཡོ ཧཱིནཱ དྷཱཏུ, མཛ྄ཛྷིམཔཎཱིཏཱ ¶ མཛ྄ཛྷིམཱ ཙེཝ པཎཱིཏཱ ཙ. ནིཔྤརིཡཱཡེན པན ཨཀུསལཱ དྷམྨདྷཱཏུམནོཝིཉྙཱཎདྷཱཏུཡོ ཧཱིནདྷཱཏུ, ལོཀིཡཱ ཀུསལཱབྱཱཀཏཱ ཨུབྷོཔི ཙཀྑུདྷཱཏུཨཱདཡོ ཙ མཛ྄ཛྷིམདྷཱཏུ, ལོཀུཏྟརཱ པན དྷམྨདྷཱཏུམནོཝིཉྙཱཎདྷཱཏུཡོ པཎཱིཏདྷཱཏུ.

པཐཝཱིཏེཛོཝཱཡོདྷཱཏུཡོ ཕོཊྛབྦདྷཱཏུཡེཝ, ཨཱཔོདྷཱཏུ ཨཱཀཱསདྷཱཏུ ཙ དྷམྨདྷཱཏུཡེཝ. ཝིཉྙཱཎདྷཱཏུ ཙཀྑུཝིཉྙཱཎཱདིསཏྟཝིཉྙཱཎདྷཱཏུསངྑེཔོཡེཝ.

སཏྟརས དྷཱཏུཡོ དྷམྨདྷཱཏུཨེཀདེསོ ཙ སངྑཏདྷཱཏུ, ཨསངྑཏཱ པན དྷཱཏུ དྷམྨདྷཱཏུཨེཀདེསོཝ. ཨནེཀདྷཱཏུནཱནཱདྷཱཏུལོཀོ པན ཨཊྛཱརས དྷཱཏུཔྤབྷེདམཏྟམེཝཱཏི. ཨིཏི སབྷཱཝཏོ ཝིཛྫམཱནཱནཾ སབྦདྷཱཏཱུནཾ ཏདནྟོགདྷཏྟཱ ཨཊྛཱརསེཝ ཝུཏྟཱཏི.

༥༢༡. ཨཔིཙ ཝིཛཱནནསབྷཱཝེ ཝིཉྙཱཎེ ཛཱིཝསཉྙཱིནཾ སཉྙཱསམཱུཧནནཏྠམྤི ཨཊྛཱརསེཝ ཝུཏྟཱ. སནྟི ཧི སཏྟཱ ཝིཛཱནནསབྷཱཝེ ཝིཉྙཱཎེ ཛཱིཝསཉྙིནོ, ཏེསཾ ཙཀྑུསོཏགྷཱནཛིཝ྄ཧཱཀཱཡམནོདྷཱཏུམནོཝིཉྙཱཎདྷཱཏུབྷེདེན ཏསྶ ཨནེཀཏཾ ཙཀྑུརཱུཔཱདིཔཙྩཡཱཡཏྟཝུཏྟིཏཱཡ ཨནིཙྩཏཉྩ པཀཱསེཏྭཱ དཱིགྷརཏྟཱནུསཡིཏཾ ཛཱིཝསཉྙཾ སམཱུཧནིཏུཀཱམེན བྷགཝཏཱ ཨཊྛཱརས དྷཱཏུཡོ པཀཱསིཏཱ. ཀིཉྩ བྷིཡྻོ ཏཐཱ ཝེནེཡྻཛ྄ཛྷཱསཡཝསེན ཙ. ཡེ ཙ ཨིམཱཡ ཨནཏིསངྑེཔཝིཏྠཱརཱཡ དེསནཱཡ ཝེནེཡྻསཏྟཱ, ཏདཛ྄ཛྷཱསཡཝསེན ཙ ཨཊྛཱརསེཝ པཀཱསིཏཱ.

སངྑེཔཝིཏྠཱརནཡེན ཏཐཱ ཏཐཱ ཧི,

དྷམྨཾ པཀཱསཡཏི ཨེས ཡཐཱ ཡཐཱསྶ;

སདྡྷམྨཏེཛཝིཧཏཾ ཝིལཡཾ ཁཎེན,

ཝེནེཡྻསཏྟཧདཡེསུ ཏམོ པཡཱཏཱིཏི.

ཨེཝམེཏྠ ཏཱཝཏྭཏོ ཝེདིཏབྦོ ཝིནིཙྪཡོ.

༥༢༢. སངྑཏོཏི ¶ ཙཀྑུདྷཱཏུ ཏཱཝ ཛཱཏིཏོ ཨེཀོ དྷམྨོཏྭེཝ སངྑཾ གཙྪཏི ཙཀྑུཔསཱདཝསེན, ཏཐཱ སོཏགྷཱནཛིཝ྄ཧཱཀཱཡརཱུཔསདྡགནྡྷརསདྷཱཏུཡོ སོཏཔྤསཱདཱདིཝསེན, ཕོཊྛབྦདྷཱཏུ པན པཐཝཱིཏེཛོཝཱཡོཝསེན ཏཡོ དྷམྨཱཏི སངྑཾ གཙྪཏི. ཙཀྑུཝིཉྙཱཎདྷཱཏུ ཀུསལཱཀུསལཝིཔཱཀཝསེན ¶ དྭེ དྷམྨཱཏི སངྑཾ གཙྪཏི, ཏཐཱ སོཏགྷཱནཛིཝ྄ཧཱཀཱཡཝིཉྙཱཎདྷཱཏུཡོ. མནོདྷཱཏུ པན པཉྩདྭཱརཱཝཛྫནཀུསལཱཀུསལཝིཔཱཀསམྤཊིཙྪནཝསེན ཏཡོ དྷམྨཱཏི སངྑཾ གཙྪཏི. དྷམྨདྷཱཏུ ཏིཎྞཾ ཨརཱུཔཀྑནྡྷཱནཾ སོལ༹སནྣཾ སུཁུམརཱུཔཱནཾ ཨསངྑཏཱཡ ཙ དྷཱཏུཡཱ ཝསེན ཝཱིསཏི དྷམྨཱཏི སངྑཾ གཙྪཏི. མནོཝིཉྙཱཎདྷཱཏུ སེསཀུསལཱཀུསལཱབྱཱཀཏཝིཉྙཱཎཝསེན ཚསཏྟཏི དྷམྨཱཏི སངྑཾ གཙྪཏི. ཨེཝམེཏྠ སངྑཏོཔི ཝེདིཏབྦོ ཝིནིཙྪཡོ.

༥༢༣. པཙྩཡཱཏི ཨེཏྠ ཙ ཙཀྑུདྷཱཏུ ཏཱཝ ཙཀྑུཝིཉྙཱཎདྷཱཏུཡཱ ཝིཔྤཡུཏྟཔུརེཛཱཏཨཏྠིཨཝིགཏནིསྶཡིནྡྲིཡཔཙྩཡཱནཾ ཝསེན ཚཧི པཙྩཡེཧི པཙྩཡོ ཧོཏི, རཱུཔདྷཱཏུ པུརེཛཱཏཨཏྠིཨཝིགཏཱརམྨཎཔཙྩཡཱནཾ ཝསེན ཙཏཱུཧི པཙྩཡེཧི པཙྩཡོ ཧོཏི. ཨེཝཾ སོཏཝིཉྙཱཎདྷཱཏུཨཱདཱིནཾ སོཏདྷཱཏུསདྡདྷཱཏུཨཱདཡོ. པཉྩནྣཾ པན ནེསཾ ཨཱཝཛྫནམནོདྷཱཏུ ཨནནྟརསམནནྟརནཏྠིཝིགཏཱནནྟརཱུཔནིསྶཡཝསེན པཉྩཧི པཙྩཡེཧི པཙྩཡོ ཧོཏི, ཏཱ ཙ པཉྩཔི སམྤཊིཙྪནམནོདྷཱཏུཡཱ. ཏཐཱ སམྤཊིཙྪནམནོདྷཱཏུ སནྟཱིརཎམནོཝིཉྙཱཎདྷཱཏུཡཱ, སཱ ཙ ཝོཊྛབྦནམནོཝིཉྙཱཎདྷཱཏུཡཱ, ཝོཊྛབྦནམནོཝིཉྙཱཎདྷཱཏུ ཙ ཛཝནམནོཝིཉྙཱཎདྷཱཏུཡཱ. ཛཝནམནོཝིཉྙཱཎདྷཱཏུ པན ཨནནྟརཱཡ ཛཝནམནོཝིཉྙཱཎདྷཱཏུཡཱ ཏེཧི ཙེཝ པཉྩཧི ཨཱསེཝནཔཙྩཡེན ཙཱཏི ཚཧི པཙྩཡེཧི པཙྩཡོ ཧོཏི. ཨེས ཏཱཝ པཉྩདྭཱརེ ནཡོ.

མནོདྭཱརེ པན བྷཝངྒམནོཝིཉྙཱཎདྷཱཏུ ཨཱཝཛྫནམནོཝིཉྙཱཎདྷཱཏུཡཱ. ཨཱཝཛྫནམནོཝིཉྙཱཎདྷཱཏུ ཙ ཛཝནམནོཝིཉྙཱཎདྷཱཏུཡཱ པུརིམེཧི པཉྩཧི པཙྩཡེཧི པཙྩཡོ ཧོཏི. དྷམྨདྷཱཏུ པན སཏྟནྣམྤི ཝིཉྙཱཎདྷཱཏཱུནཾ སཧཛཱཏཨཉྙམཉྙནིསྶཡསམྤཡུཏྟཨཏྠིཨཝིགཏཱདཱིཧི བཧུདྷཱ པཙྩཡོ ཧོཏི. ཙཀྑུདྷཱཏུཨཱདཡོ པན ཨེཀཙྩཱ ཙ དྷམྨདྷཱཏུ ཨེཀཙྩཱཡ མནོཝིཉྙཱཎདྷཱཏུཡཱ ཨཱརམྨཎཔཙྩཡཱདཱིཧིཔི པཙྩཡཱ ཧོནྟི. ཙཀྑུཝིཉྙཱཎདྷཱཏུཨཱདཱིནཉྩ ན ཀེཝལཾ ཙཀྑུརཱུཔཱདཡོ པཙྩཡཱ ཧོནྟི, ཨཐ ཁོ ཨཱལོཀཱདཡོཔི. ཏེནཱཧུ པུབྦཱཙརིཡཱ –

‘‘ཙཀྑུརཱུཔཱལོཀམནསིཀཱརེ ¶ པཊིཙྩ ཨུཔྤཛྫཏི ཙཀྑུཝིཉྙཱཎཾ. སོཏསདྡཝིཝརམནསིཀཱརེ པཊིཙྩ ཨུཔྤཛྫཏི སོཏཝིཉྙཱཎཾ. གྷཱནགནྡྷཝཱཡུམནསིཀཱརེ པཊིཙྩ ཨུཔྤཛྫཏི གྷཱནཝིཉྙཱཎཾ. ཛིཝ྄ཧཱརསཨཱཔམནསིཀཱརེ པཊིཙྩ ཨུཔྤཛྫཏི ཛིཝ྄ཧཱཝིཉྙཱཎཾ. ཀཱཡཕོཊྛབྦཔཐཝཱིམནསིཀཱརེ པཊིཙྩ ཨུཔྤཛྫཏི ཀཱཡཝིཉྙཱཎཾ. བྷཝངྒམནདྷམྨམནསིཀཱརེ པཊིཙྩ ཨུཔྤཛྫཏི མནོཝིཉྙཱཎ’’ནྟི.

ཨཡམེཏྠ ¶ སངྑེཔོ. ཝིཏྠཱརཏོ པན པཙྩཡཔྤབྷེདོ པཊིཙྩསམུཔྤཱདནིདྡེསེ ཨཱཝིབྷཝིསྶཏཱིཏི ཨེཝམེཏྠ པཙྩཡཏོཔི ཝེདིཏབྦོ ཝིནིཙྪཡོ.

༥༢༤. དཊྛབྦཏོཏི དཊྛབྦཏོཔེཏྠ ཝིནིཙྪཡོ ཝེདིཏབྦོཏི ཨཏྠོ. སབྦཱ ཨེཝ ཧི སངྑཏདྷཱཏུཡོ པུབྦནྟཱཔརནྟཝིཝིཏྟཏོ དྷུཝསུབྷསུཁཏྟབྷཱཝསུཉྙཏོ པཙྩཡཱཡཏྟཝུཏྟིཏོ ཙ དཊྛབྦཱ.

ཝིསེསཏོ པནེཏྠ བྷེརིཏལཾ ཝིཡ ཙཀྑུདྷཱཏུ དཊྛབྦཱ, དཎྜོ ཝིཡ རཱུཔདྷཱཏུ, སདྡོ ཝིཡ ཙཀྑུཝིཉྙཱཎདྷཱཏུ. ཏཐཱ ཨཱདཱསཏལཾ ཝིཡ ཙཀྑུདྷཱཏུ, མུཁཾ ཝིཡ རཱུཔདྷཱཏུ, མུཁནིམིཏྟཾ ཝིཡ ཙཀྑུཝིཉྙཱཎདྷཱཏུ. ཨཐ ཝཱ ཨུཙྪུཏིལཱ ཝིཡ ཙཀྑུདྷཱཏུ, ཡནྟཙཀྐཡཊྛི ཝིཡ རཱུཔདྷཱཏུ, ཨུཙྪུརསཏེལཱནི ཝིཡ ཙཀྑུཝིཉྙཱཎདྷཱཏུ. ཏཐཱ ཨདྷརཱརཎཱི ཝིཡ ཙཀྑུདྷཱཏུ, ཨུཏྟརཱརཎཱི ཝིཡ རཱུཔདྷཱཏུ, ཨགྒི ཝིཡ ཙཀྑུཝིཉྙཱཎདྷཱཏུ. ཨེས ནཡོ སོཏདྷཱཏུཨཱདཱིསུ.

མནོདྷཱཏུ པན ཡཐཱསམྦྷཝཏོ ཙཀྑུཝིཉྙཱཎདྷཱཏུཨཱདཱིནཾ པུརེཙརཱནུཙརཱ ཝིཡ དཊྛབྦཱ.

དྷམྨདྷཱཏུཡཱ ཝེདནཱཀྑནྡྷོ སལླམིཝ སཱུལམིཝ ཙ དཊྛབྦོ. སཉྙཱསངྑཱརཀྑནྡྷཱ ཝེདནཱསལླསཱུལཡོགཱཨཱཏུརཱ ཝིཡ, པུཐུཛྫནཱནཾ ཝཱ སཉྙཱ ཨཱསཱདུཀྑཛནནཏོ རིཏྟམུཊྛི ཝིཡ. ཨཡཐཱབྷུཙྩནིམིཏྟགཱཧཀཏོ ཝནམིགོ ཝིཡ. སངྑཱརཱ པཊིསནྡྷིཡཾ པཀྑིཔནཏོ ཨངྒཱརཀཱསུཡཾ ཁིཔནཀཔུརིསཱ ཝིཡ. ཛཱཏི དུཀྑཱནུབནྡྷཏོ རཱཛཔུརིསཱནུབནྡྷཙོརཱ ཝིཡ. སབྦཱནཏྠཱཝཧསྶ ཁནྡྷསནྟཱནསྶ ཧེཏུཏོ ཝིསརུཀྑབཱིཛཱནི ཝིཡ. རཱུཔཾ ནཱནཱཝིདྷུཔདྡཝནིམིཏྟཏོ ཁུརཙཀྐཾ ཝིཡ དཊྛབྦཾ. ཨསངྑཏཱ པན དྷཱཏུ ཨམཏཏོ སནྟཏོ ཁེམཏོ ཙ དཊྛབྦཱ. ཀསྨཱ? སབྦཱནཏྠཱཝཧསྶ པཊིཔཀྑབྷཱུཏཏྟཱ.

མནོཝིཉྙཱཎདྷཱཏུ ¶ ཨཱརམྨཎེསུ ཝཝཏྠཱནཱབྷཱཝཏོ ཨརཉྙམཀྐཊོ ཝིཡ, དུདྡམནཏོ ཨསྶཁལུ༹ངྐོ ཝིཡ, ཡཏྠཀཱམནིཔཱཏིཏོ ཝེཧཱསཀྑིཏྟདཎྜོ ཝིཡ, ལོབྷདོསཱདིནཱནཔྤཀཱརཀིལེསཝེསཡོགཏོ རངྒནཊོ ཝིཡ དཊྛབྦཱཏི.

ཨིཏི སཱདྷུཛནཔཱམོཛྫཏྠཱཡ ཀཏེ ཝིསུདྡྷིམགྒེ

པཉྙཱབྷཱཝནཱདྷིཀཱརེ

ཨཱཡཏནདྷཱཏུནིདྡེསོ ནཱམ

པནྣརསམོ པརིཙྪེདོ.

༡༦. ཨིནྡྲིཡསཙྩནིདྡེསོ

ཨིནྡྲིཡཝིཏྠཱརཀཐཱ

༥༢༥. དྷཱཏཱུནཾ ¶ ¶ ཨནནྟརཾ ཨུདྡིཊྛཱནི པན ཨིནྡྲིཡཱནཱིཏི བཱཝཱིསཏིནྡྲིཡཱནི – ཙཀྑུནྡྲིཡཾ སོཏིནྡྲིཡཾ གྷཱནིནྡྲིཡཾ ཛིཝ྄ཧིནྡྲིཡཾ ཀཱཡིནྡྲིཡཾ མནིནྡྲིཡཾ ཨིཏྠིནྡྲིཡཾ པུརིསིནྡྲིཡཾ ཛཱིཝིཏིནྡྲིཡཾ སུཁིནྡྲིཡཾ དུཀྑིནྡྲིཡཾ སོམནསྶིནྡྲིཡཾ དོམནསྶིནྡྲིཡཾ ཨུཔེཀྑིནྡྲིཡཾ སདྡྷིནྡྲིཡཾ ཝཱིརིཡིནྡྲིཡཾ སཏིནྡྲིཡཾ སམཱདྷིནྡྲིཡཾ པཉྙིནྡྲིཡཾ ཨནཉྙཱཏཉྙསྶཱམཱིཏིནྡྲིཡཾ ཨཉྙིནྡྲིཡཾ ཨཉྙཱཏཱཝིནྡྲིཡནྟི. ཏཏྠ –

ཨཏྠཏོ ལཀྑཎཱདཱིཧི, ཀམཏོ ཙ ཝིཛཱནིཡཱ;

བྷེདཱབྷེདཱ ཏཐཱ ཀིཙྩཱ, བྷཱུམིཏོ ཙ ཝིནིཙྪཡཾ.

ཏཏྠ ཙཀྑཱདཱིནཾ ཏཱཝ ཙཀྑཏཱིཏི ཙཀྑཱུཏིཨཱདིནཱ ནཡེན ཨཏྠོ པཀཱསིཏོ. པཙྪིམེསུ པན ཏཱིསུ པཋམཾ པུབྦབྷཱགེ ཨནཉྙཱཏཾ ཨམཏཾ པདཾ ཙཏུསཙྩདྷམྨཾ ཝཱ ཛཱནིསྶཱམཱིཏི ཨེཝཾ པཊིཔནྣསྶ ཨུཔྤཛྫནཏོ ཨིནྡྲིཡཊྛསམྦྷཝཏོ ཙ ཨནཉྙཱཏཉྙསྶཱམཱིཏིནྡྲིཡནྟི ཝུཏྟཾ. དུཏིཡཾ ཨཱཛཱནནཏོ ཨིནྡྲིཡཊྛསམྦྷཝཏོ ཙ ཨཉྙིནྡྲིཡཾ. ཏཏིཡཾ ཨཉྙཱཏཱཝིནོ ཙཏཱུསུ སཙྩེསུ ནིཊྛིཏཉྙཱཎཀིཙྩསྶ ཁཱིཎཱསཝསྶ ཨུཔྤཛྫནཏོ ཨིནྡྲིཡཊྛསམྦྷཝཏོ ཙ ཨཉྙཱཏཱཝིནྡྲིཡཾ.

ཀོ པན ནེསཾ ཨིནྡྲིཡཊྛོ ནཱམཱཏི? ཨིནྡལིངྒཊྛོ ཨིནྡྲིཡཊྛོ. ཨིནྡདེསིཏཊྛོ ཨིནྡྲིཡཊྛོ. ཨིནྡདིཊྛཊྛོ ཨིནྡྲིཡཊྛོ. ཨིནྡསིཊྛཊྛོ ཨིནྡྲིཡཊྛོ. ཨིནྡཛུཊྛཊྛོ ཨིནྡྲིཡཊྛོ. སོ སབྦོཔི ཨིདྷ ཡཐཱཡོགཾ ཡུཛྫཏི. བྷགཝཱ ཧི སམྨཱསམྦུདྡྷོ པརམིསྶརིཡབྷཱཝཏོ ཨིནྡོ. ཀུསལཱཀུསལཉྩ ཀམྨཾ, ཀམྨེསུ ཀསྶཙི ཨིསྶརིཡཱབྷཱཝཏོ. ཏེནེཝེཏྠ ཀམྨསཉྫནིཏཱནི ཏཱཝ ཨིནྡྲིཡཱནི ཀུསལཱཀུསལཀམྨཾ ¶ ཨུལླིངྒེནྟི. ཏེན ཙ སིཊྛཱནཱིཏི ཨིནྡལིངྒཊྛེན ཨིནྡསིཊྛཊྛེན ཙ ཨིནྡྲིཡཱནི. སབྦཱནེཝ པནེཏཱནི བྷགཝཏཱ ཡཐཱབྷཱུཏཏོ པཀཱསིཏཱནི ཨབྷིསམྦུདྡྷཱནི ཙཱཏི ཨིནྡདེསིཏཊྛེན ཨིནྡདིཊྛཊྛེན ཙ ཨིནྡྲིཡཱནི. ཏེནེཝ བྷགཝཏཱ མུནིནྡེན ཀཱནིཙི གོཙརཱསེཝནཱཡ ཀཱནིཙི བྷཱཝནཱསེཝནཱཡ སེཝིཏཱནཱིཏི ཨིནྡཛུཊྛཊྛེནཱཔི ཨིནྡྲིཡཱནི.

ཨཔིཙ ¶ ཨཱདྷིཔཙྩསངྑཱཏེན ཨིསྶརིཡཊྛེནཱཔི ཨེཏཱནི ཨིནྡྲིཡཱནི. ཙཀྑུཝིཉྙཱཎཱདིཔྤཝཏྟིཡཉྷི ཙཀྑཱདཱིནཾ སིདྡྷཾ ཨཱདྷིཔཙྩཾ, ཏསྨིཾ ཏིཀྑེ ཏིཀྑཏྟཱ མནྡེ ཙ མནྡཏྟཱཏི. ཨཡཾ ཏཱཝེཏྠ ཨཏྠཏོ ཝིནིཙྪཡོ.

ལཀྑཎཱདཱིཧཱིཏི ལཀྑཎརསཔཙྩུཔཊྛཱནཔདཊྛཱནེཧིཔི ཙཀྑཱདཱིནཾ ཝིནིཙྪཡཾ ཝིཛཱནིཡཱཏི ཨཏྠོ. ཏཱནི ཙ ནེསཾ ལཀྑཎཱདཱིནི ཁནྡྷནིདྡེསེ ཝུཏྟཱནེཝ. པཉྙིནྡྲིཡཱདཱིནི ཧི ཙཏྟཱརི ཨཏྠཏོ ཨམོཧོཡེཝ. སེསཱནི ཏཏྠ སརཱུཔེནེཝ ཨཱགཏཱནི.

༥༢༦. ཀམཏོཏི ཨཡམྤི དེསནཱཀྐམོཝ. ཏཏྠ ཨཛ྄ཛྷཏྟདྷམྨེ པརིཉྙཱཡ ཨརིཡབྷཱུམིཔཊིལཱབྷོ ཧོཏཱིཏི ཨཏྟབྷཱཝཔརིཡཱཔནྣཱནི ཙཀྑུནྡྲིཡཱདཱིནི པཋམཾ དེསིཏཱནི. སོ པན ཨཏྟབྷཱཝོ ཡཾ དྷམྨཾ ཨུཔཱདཱཡ ཨིཏྠཱིཏི ཝཱ པུརིསོཏི ཝཱ སངྑཾ གཙྪཏི, ཨཡཾ སོཏི ནིདསྶནཏྠཾ ཏཏོ ཨིཏྠིནྡྲིཡཾ པུརིསིནྡྲིཡཉྩ. སོ དུཝིདྷོཔི ཛཱིཝིཏིནྡྲིཡཔཊིབདྡྷཝུཏྟཱིཏི ཉཱཔནཏྠཾ ཏཏོ ཛཱིཝིཏིནྡྲིཡཾ. ཡཱཝ ཏསྶ པཝཏྟི, ཏཱཝ ཨེཏེསཾ ཝེདཡིཏཱནཾ ཨནིཝཏྟི. ཡཉྩ ཀིཉྩི ཝེདཡིཏཾ, སབྦཾ ཏཾ དུཀྑནྟི ཉཱཔནཏྠཾ ཏཏོ སུཁིནྡྲིཡཱདཱིནི. ཏཾནིརོདྷཏྠཾ པན ཨེཏེ དྷམྨཱ བྷཱཝེཏབྦཱཏི པཊིཔཏྟིདསྶནཏྠཾ ཏཏོ སདྡྷཱདཱིནི. ཨིམཱཡ པཊིཔཏྟིཡཱ ཨེས དྷམྨོ པཋམཾ ཨཏྟནི པཱཏུབྷཝཏཱིཏི པཊིཔཏྟིཡཱ ཨམོགྷབྷཱཝདསྶནཏྠཾ ཏཏོ ཨནཉྙཱཏཉྙསྶཱམཱིཏིནྡྲིཡཾ. ཏསྶེཝ ཕལཏྟཱ ཏཏོ ཨནནྟརཾ བྷཱཝེཏབྦཏོ ཙ ཏཏོ ཨཉྙིནྡྲིཡཾ. ཏཏོ པརཾ བྷཱཝནཱཡ ཨིམསྶ ཨདྷིགམོ, ཨདྷིགཏེ ཙ པན ཨིམསྨིཾ ནཏྠི ཀིཉྩི ཨུཏྟརི ཀརཎཱིཡནྟི ཉཱཔནཏྠཾ ཨནྟེ པརམསྶཱསབྷཱུཏཾ ཨཉྙཱཏཱཝིནྡྲིཡཾ དེསིཏནྟི ཨཡམེཏྠ ཀམོ.

བྷེདཱབྷེདཱཏི ཛཱིཝིཏིནྡྲིཡསྶེཝ ཙེཏྠ བྷེདོ. ཏཉྷི རཱུཔཛཱིཝིཏིནྡྲིཡཾ ཨརཱུཔཛཱིཝིཏིནྡྲིཡནྟི དུཝིདྷཾ ཧོཏི. སེསཱནཾ ཨབྷེདོཏི ཨེཝམེཏྠ བྷེདཱབྷེདཏོ ཝིནིཙྪཡཾ ཝིཛཱནིཡཱ.

༥༢༧. ཀིཙྩཱཏི ¶ ཀིཾ ཨིནྡྲིཡཱནཾ ཀིཙྩནྟི ཙེ. ཙཀྑུནྡྲིཡསྶ ཏཱཝ ‘‘ཙཀྑཱཡཏནཾ ཙཀྑུཝིཉྙཱཎདྷཱཏུཡཱ ཏཾསམྤཡུཏྟཀཱནཉྩ དྷམྨཱནཾ ཨིནྡྲིཡཔཙྩཡེན པཙྩཡོ’’ཏི ཝཙནཏོ ཡཾ ཏཾ ཨིནྡྲིཡཔཙྩཡབྷཱཝེན སཱདྷེཏབྦཾ ཨཏྟནོ ཏིཀྑམནྡཱདིབྷཱཝེན ཙཀྑུཝིཉྙཱཎཱདིདྷམྨཱནཾ ཏིཀྑམནྡཱདིསངྑཱཏཾ ཨཏྟཱཀཱརཱནུཝཏྟཱཔནཾ, ཨིདཾ ཀིཙྩཾ. ཨེཝཾ སོཏགྷཱནཛིཝ྄ཧཱཀཱཡཱནཾ. མནིནྡྲིཡསྶ པན ¶ སཧཛཱཏདྷམྨཱནཾ ཨཏྟནོ ཝསཝཏྟཱཔནཾ. ཛཱིཝིཏིནྡྲིཡསྶ སཧཛཱཏདྷམྨཱནུཔཱལནཾ. ཨིཏྠིནྡྲིཡཔུརིསིནྡྲིཡཱནཾ ཨིཏྠིཔུརིསལིངྒནིམིཏྟཀུཏྟཱཀཔྤཱཀཱརཱནུཝིདྷཱནཾ. སུཁདུཀྑསོམནསྶདོམནསྶིནྡྲིཡཱནཾ སཧཛཱཏདྷམྨེ ཨབྷིབྷཝིཏྭཱ ཡཐཱསཀཾ ཨོལཱ༹རིཀཱཀཱརཱནུཔཱཔནཾ. ཨུཔེཀྑིནྡྲིཡསྶ སནྟཔཎཱིཏམཛ྄ཛྷཏྟཱཀཱརཱནུཔཱཔནཾ. སདྡྷཱདཱིནཾ པཊིཔཀྑཱབྷིབྷཝནཾ སམྤཡུཏྟདྷམྨཱནཉྩ པསནྣཱཀཱརཱདིབྷཱཝསམྤཱཔནཾ. ཨནཉྙཱཏཉྙསྶཱམཱིཏིནྡྲིཡསྶ སཾཡོཛནཏྟཡཔྤཧཱནཉྩེཝ སམྤཡུཏྟཱནཉྩ ཏཔྤཧཱནཱབྷིམུཁབྷཱཝཀརཎཾ. ཨཉྙིནྡྲིཡསྶ ཀཱམརཱགབྱཱཔཱདཱདིཏནུཀརཎཔྤཧཱནཉྩེཝ སཧཛཱཏཱནཉྩ ཨཏྟནོ ཝསཱནུཝཏྟཱཔནཾ. ཨཉྙཱཏཱཝིནྡྲིཡསྶ སབྦཀིཙྩེསུ ཨུསྶུཀྐཔྤཧཱནཉྩེཝ ཨམཏཱབྷིམུཁབྷཱཝཔཙྩཡཏཱ ཙ སམྤཡུཏྟཱནནྟི ཨེཝམེཏྠ ཀིཙྩཏོ ཝིནིཙྪཡཾ ཝིཛཱནིཡཱ.

༥༢༨. བྷཱུམིཏོཏི ཙཀྑུསོཏགྷཱནཛིཝ྄ཧཱཀཱཡཨིཏྠིཔུརིསསུཁདུཀྑདོམནསྶིནྡྲིཡཱནི ཙེཏྠ ཀཱམཱཝཙརཱནེཝ. མནིནྡྲིཡཛཱིཝིཏིནྡྲིཡཨུཔེཀྑིནྡྲིཡཱནི སདྡྷཱཝཱིརིཡསཏིསམཱདྷིཔཉྙིནྡྲིཡཱནི ཙ ཙཏུབྷཱུམིཔརིཡཱཔནྣཱནི. སོམནསྶིནྡྲིཡཾ ཀཱམཱཝཙརརཱུཔཱཝཙརལོཀུཏྟརཝསེན བྷཱུམིཏྟཡཔརིཡཱཔནྣཾ. ཨཝསཱནེ ཏཱིཎི ལོཀུཏྟརཱནེཝཱཏི ཨེཝམེཏྠ བྷཱུམིཏོཔི ཝིནིཙྪཡཾ ཝིཛཱནེཡྻ. ཨེཝཾ ཧི ཝིཛཱནནྟོ –

སཾཝེགབཧུལོ བྷིཀྑུ, ཋིཏོ ཨིནྡྲིཡསཾཝརེ;

ཨིནྡྲིཡཱནི པརིཉྙཱཡ, དུཀྑསྶནྟཾ ཀརིསྶཏཱིཏི.

ཨིདཾ ཨིནྡྲིཡཱནཾ ཝིཏྠཱརཀཐཱམུཁཾ.

སཙྩཝིཏྠཱརཀཐཱ

༥༢༩. ཏདནནྟརཱནི པན སཙྩཱནཱིཏི ཙཏྟཱརི ཨརིཡསཙྩཱནི – དུཀྑཾ ཨརིཡསཙྩཾ, དུཀྑསམུདཡོ ¶ ཨརིཡསཙྩཾ, དུཀྑནིརོདྷོ ཨརིཡསཙྩཾ, དུཀྑནིརོདྷགཱམིནཱི པཊིཔདཱ ཨརིཡསཙྩནྟི. ཏཏྠ –

ཝིབྷཱགཏོ ¶ ནིབྦཙན, ལཀྑཎཱདིཔྤབྷེདཏོ;

ཨཏྠཏྠུདྡྷཱརཏོ ཙེཝ, ཨནཱུནཱདྷིཀཏོ ཏཐཱ.

ཀམཏོ ཛཱཏིཨཱདཱིནཾ, ནིཙྪཡཱ ཉཱཎཀིཙྩཏོ;

ཨནྟོགདྷཱནཾ པབྷེདཱ, ཨུཔམཱཏོ ཙཏུཀྐཏོ.

སུཉྙཏེཀཝིདྷཱདཱིཧི, སབྷཱགཝིསབྷཱགཏོ;

ཝིནིཙྪཡོ ཝེདིཏབྦོ, ཝིཉྙུནཱ སཱསནཀྐམེ.

ཏཏྠ ཝིབྷཱགཏོཏི དུཀྑཱདཱིནཾ ཧི ཙཏྟཱརོ ཙཏྟཱརོ ཨཏྠཱ ཝིབྷཏྟཱ ཏཐཱ ཨཝིཏཐཱ ཨནཉྙཐཱ, ཡེ དུཀྑཱདཱིནི ཨབྷིསམེནྟེཧི ཨབྷིསམེཏབྦཱ. ཡཐཱཧ – ‘‘དུཀྑསྶ པཱིལ༹ནཊྛོ སངྑཏཊྛོ སནྟཱཔཊྛོ ཝིཔརིཎཱམཊྛོ, ཨིམེ ཙཏྟཱརོ དུཀྑསྶ དུཀྑཊྛཱ ཏཐཱ ཨཝིཏཐཱ ཨནཉྙཐཱ. སམུདཡསྶ ཨཱཡཱུཧནཊྛོ ནིདཱནཊྛོ སཾཡོགཊྛོ པལིབོདྷཊྛོ. ནིརོདྷསྶ ནིསྶརཎཊྛོ ཝིཝེཀཊྛོ ཨསངྑཏཊྛོ ཨམཏཊྛོ. མགྒསྶ ནིཡྻཱནཊྛོ ཧེཏུཊྛོ དསྶནཊྛོ ཨདྷིཔཏེཡྻཊྛོ. ཨིམེ ཙཏྟཱརོ མགྒསྶ མགྒཊྛཱ ཏཐཱ ཨཝིཏཐཱ ཨནཉྙཐཱ’’ཏི (པཊི. མ. ༢.༨). ཏཐཱ ‘‘དུཀྑསྶ པཱིལ༹ནཊྛོ སངྑཏཊྛོ སནྟཱཔཊྛོ ཝིཔརིཎཱམཊྛོ ཨབྷིསམཡཊྛོ’’ཏི (པཊི. མ. ༢.༡༡) ཨེཝམཱདི. ཨིཏི ཨེཝཾ ཝིབྷཏྟཱནཾ ཙཏུནྣཾ ཙཏུནྣཾ ཨཏྠཱནཾ ཝསེན དུཀྑཱདཱིནི ཝེདིཏབྦཱནཱིཏི. ཨཡཾ ཏཱཝེཏྠ ཝིབྷཱགཏོ ཝིནིཙྪཡོ.

༥༣༠. ནིབྦཙནལཀྑཎཱདིཔྤབྷེདཏོཏི ཨེཏྠ པན ནིབྦཙནཏོ ཏཱཝ ཨིདྷ དུ-ཨིཏི ཨཡཾ སདྡོ ཀུཙྪིཏེ དིསྶཏི. ཀུཙྪིཏཾ ཧི པུཏྟཾ དུཔྤུཏྟོཏི ཝདནྟི. ཁཾ-སདྡོ པན ཏུཙྪེ. ཏུཙྪཾ ཧི ཨཱཀཱསཾ ‘‘ཁ’’ནྟི ཝུཙྩཏི. ཨིདཉྩ པཋམསཙྩཾ ཀུཙྪིཏཾ ཨནེཀཨུཔདྡཝཱདྷིཊྛཱནཏོ. ཏུཙྪཾ བཱལཛནཔརིཀཔྤིཏདྷུཝསུབྷསུཁཏྟབྷཱཝཝིརཧིཏཏོ. ཏསྨཱ ཀུཙྪིཏཏྟཱ ཏུཙྪཏྟཱ ཙ དུཀྑནྟི ཝུཙྩཏི.

སཾ-ཨིཏི ¶ ཙ ཨཡཾ སདྡོ ‘‘སམཱགམོ སམེཏ’’ནྟིཨཱདཱིསུ (དཱི. ནི. ༢.༣༩༦; ཝིབྷ. ༡༩༩) སཾཡོགཾ དཱིཔེཏི. ཨུ-ཨིཏི ཨཡཾ ‘‘ཨུཔྤནྣཾ ཨུདིཏ’’ནྟིཨཱདཱིསུ (དྷ. ས. ༡; མཧཱཝ. ༨༤) ཨུཔྤཏྟིཾ. ཨཡ-སདྡོ ཀཱརཎཾ དཱིཔེཏི. ཨིདཉྩཱཔི དུཏིཡསཙྩཾ ཨཝསེསཔཙྩཡསམཱཡོགེ སཏི དུཀྑསྶུཔྤཏྟིཀཱརཎཾ. ཨིཏི དུཀྑསྶ སཾཡོགེ ཨུཔྤཏྟིཀཱརཎཏྟཱ དུཀྑསམུདཡནྟི ཝུཙྩཏི.

ཏཏིཡསཙྩཾ ¶ པན ཡསྨཱ ནི-སདྡོ ཨབྷཱཝཾ, རོདྷ-སདྡོ ཙ ཙཱརཀཾ དཱིཔེཏི. ཏསྨཱ ཨབྷཱཝོ ཨེཏྠ སཾསཱརཙཱརཀསངྑཱཏསྶ དུཀྑརོདྷསྶ སབྦགཏིསུཉྙཏྟཱ, སམདྷིགཏེ ཝཱ ཏསྨིཾ སཾསཱརཙཱརཀསངྑཱཏསྶ དུཀྑརོདྷསྶ ཨབྷཱཝོ ཧོཏི, ཏཔྤཊིཔཀྑཏྟཱཏིཔི དུཀྑནིརོདྷནྟི ཝུཙྩཏི. དུཀྑསྶ ཝཱ ཨནུཔྤཱདནིརོདྷཔཙྩཡཏྟཱ དུཀྑནིརོདྷནྟི.

ཙཏུཏྠསཙྩཾ པན ཡསྨཱ ཨེཏཾ དུཀྑནིརོདྷཾ གཙྪཏི ཨཱརམྨཎཝསེན ཏདབྷིམུཁབྷཱུཏཏྟཱ, པཊིཔདཱ ཙ ཧོཏི དུཀྑནིརོདྷཔྤཏྟིཡཱ. ཏསྨཱ དུཀྑནིརོདྷགཱམིནཱི པཊིཔདཱཏི ཝུཙྩཏི.

༥༣༡. ཡསྨཱ པནེཏཱནི བུདྡྷཱདཡོ ཨརིཡཱ པཊིཝིཛ྄ཛྷནྟི, ཏསྨཱ ཨརིཡསཙྩཱནཱིཏི ཝུཙྩནྟི. ཡཐཱཧ ‘‘ཙཏྟཱརིམཱནི, བྷིཀྑཝེ, ཨརིཡསཙྩཱནི. ཀཏམཱནི…པེ… ཨིམཱནི ཁོ, བྷིཀྑཝེ, ཙཏྟཱརི ཨརིཡསཙྩཱནི. ཨརིཡཱ ཨིམཱནི པཊིཝིཛ྄ཛྷནྟི, ཏསྨཱ ཨརིཡསཙྩཱནཱིཏི ཝུཙྩནྟཱི’’ཏི. ཨཔིཙ ཨརིཡསྶ སཙྩཱནཱིཏིཔི ཨརིཡསཙྩཱནི. ཡཐཱཧ ‘‘སདེཝཀེ, བྷིཀྑཝེ, ལོཀེ…པེ… མནུསྶཱཡ ཏཐཱགཏོ ཨརིཡོ, ཏསྨཱ ཨརིཡསཙྩཱནཱིཏི ཝུཙྩནྟཱི’’ཏི (སཾ. ནི. ༥.༡༠༩༨). ཨཐ ཝཱ ཨེཏེསཾ ཨབྷིསམྦུདྡྷཏྟཱ ཨརིཡབྷཱཝསིདྡྷིཏོཔི ཨརིཡསཙྩཱནི. ཡཐཱཧ – ‘‘ཨིམེསཾ ཁོ, བྷིཀྑཝེ, ཙཏུནྣཾ ཨརིཡསཙྩཱནཾ ཡཐཱབྷཱུཏཾ ཨབྷིསམྦུདྡྷཏྟཱ ཏཐཱགཏོ ཨརཧཾ སམྨཱསམྦུདྡྷོ ཨརིཡོཏི ཝུཙྩཏཱི’’ཏི. ཨཔིཙ ཁོ པན ཨརིཡཱནི སཙྩཱནཱིཏིཔི ཨརིཡསཙྩཱནི. ཨརིཡཱནཱིཏི ཏཐཱནི ཨཝིཏཐཱནི ཨཝིསཾཝཱདཀཱནཱིཏི ཨཏྠོ. ཡཐཱཧ – ‘‘ཨིམཱནི ཁོ, བྷིཀྑཝེ, ཙཏྟཱརི ཨརིཡསཙྩཱནི ཏཐཱནི ཨཝིཏཐཱནི ཨནཉྙཐཱནི, ཏསྨཱ ཨརིཡསཙྩཱནཱིཏི ཝུཙྩནྟཱི’’ཏི (སཾ. ནི. ༥.༡༠༩༧) ཨེཝམེཏྠ ནིབྦཙནཏོ ཝིནིཙྪཡོ ཝེདིཏབྦོ.

༥༣༢. ཀཐཾ ལཀྑཎཱདིཔྤབྷེདཏོ? ཨེཏྠ ཧི བཱདྷནལཀྑཎཾ དུཀྑསཙྩཾ, སནྟཱཔནརསཾ, པཝཏྟིཔཙྩུཔཊྛཱནཾ. པབྷཝལཀྑཎཾ སམུདཡསཙྩཾ, ཨནུཔཙྪེདཀརཎརསཾ, པལིབོདྷཔཙྩུཔཊྛཱནཾ. སནྟིལཀྑཎཾ ¶ ནིརོདྷསཙྩཾ, ཨཙྩུཏིརསཾ, ཨནིམིཏྟཔཙྩུཔཊྛཱནཾ. ནིཡྻཱནལཀྑཎཾ མགྒསཙྩཾ, ཀིལེསཔྤཧཱནརསཾ, ཝུཊྛཱནཔཙྩུཔཊྛཱནཾ. ཨཔིཙ པཝཏྟིཔཝཏྟནནིཝཏྟིནིཝཏྟནལཀྑཎཱནི པཊིཔཱཊིཡཱ. ཏཐཱ སངྑཏཏཎྷཱ ཨསངྑཏདསྶནལཀྑཎཱནི ཙཱཏི ཨེཝམེཏྠ ལཀྑཎཱདིཔྤབྷེདཏོ ཝིནིཙྪཡོ ཝེདིཏབྦོ.

༥༣༣. ཨཏྠཏྠུདྡྷཱརཏོ ¶ ཙེཝཱཏི ཨེཏྠ པན ཨཏྠཏོ ཏཱཝ ཀོ སཙྩཊྛོཏི ཙེ? ཡོ པཉྙཱཙཀྑུནཱ ཨུཔཔརིཀྑམཱནཱནཾ མཱཡཱཝ ཝིཔརཱིཏོ, མརཱིཙིཝ ཝིསཾཝཱདཀོ, ཏིཏྠིཡཱནཾ ཨཏྟཱཝ ཨནུཔལབྦྷསབྷཱཝོ ཙ ན ཧོཏི, ཨཐ ཁོ བཱདྷནཔྤབྷཝསནྟིནིཡྻཱནཔྤཀཱརེན ཏཙྪཱཝིཔརཱིཏབྷཱུཏབྷཱཝེན ཨརིཡཉཱཎསྶ གོཙརོ ཧོཏིཡེཝ. ཨེས ཨགྒིལཀྑཎཾ ཝིཡ, ལོཀཔཀཏི ཝིཡ ཙ ཏཙྪཱཝིཔརཱིཏབྷཱུཏབྷཱཝོ སཙྩཊྛོཏི ཝེདིཏབྦོ. ཡཐཱཧ – ‘‘ཨིདཾ དུཀྑནྟི, བྷིཀྑཝེ, ཏཐམེཏཾ ཨཝིཏཐམེཏཾ ཨནཉྙཐམེཏ’’ནྟི (སཾ. ནི. ༥.༡༠༩༠) ཝིཏྠཱརོ. ཨཔིཙ –

ནཱབཱདྷཀཾ ཡཏོ དུཀྑཾ, དུཀྑཱ ཨཉྙཾ ན བཱདྷཀཾ;

བཱདྷཀཏྟནིཡཱམེན, ཏཏོ སཙྩམིདཾ མཏཾ.

ཏཾ ཝིནཱ ནཱཉྙཏོ དུཀྑཾ, ན ཧོཏི ན ཙ ཏཾ ཏཏོ;

དུཀྑཧེཏུནིཡཱམེན, ཨིཏི སཙྩཾ ཝིསཏྟིཀཱ.

ནཱཉྙཱ ནིབྦཱནཏོ སནྟི, སནྟཾ ན ཙ ན ཏཾ ཡཏོ;

སནྟབྷཱཝནིཡཱམེན, ཏཏོ སཙྩམིདཾ མཏཾ.

མགྒཱ ཨཉྙཾ ན ནིཡྻཱནཾ, ཨནིཡྻཱནོ ན ཙཱཔི སོ;

ཏཙྪནིཡྻཱནབྷཱཝཏྟཱ, ཨིཏི སོ སཙྩསམྨཏོ.

ཨིཏི ཏཙྪཱཝིཔལླཱས, བྷཱུཏབྷཱཝཾ ཙཏཱུསྭཔི;

དུཀྑཱདཱིསྭཝིསེསེན, སཙྩཊྛཾ ཨཱཧུ པཎྜིཏཱཏི.

ཨེཝཾ ཨཏྠཏོ ཝིནིཙྪཡོ ཝེདིཏབྦོ.

༥༣༤. ཀཐཾ ¶ ཨཏྠུདྡྷཱརཏོ? ཨིདྷཱཡཾ སཙྩ-སདྡོ ཨནེཀེསུ ཨཏྠེསུ དིསྶཏི. སེཡྻཐིདཾ – ‘‘སཙྩཾ བྷཎེ ན ཀུཛ྄ཛྷེཡྻཱ’’ཏིཨཱདཱིསུ (དྷ. པ. ༢༢༤) ཝཱཙཱསཙྩེ. ‘‘སཙྩེ ཋིཏཱ སམཎབྲཱཧྨཎཱ ཙཱ’’ཏིཨཱདཱིསུ (ཛཱ. ༢.༢༡.༤༣༣) ཝིརཏིསཙྩེ. ‘‘ཀསྨཱ ནུ སཙྩཱནི ཝདནྟི ནཱནཱ པཝཱདིཡཱསེ ཀུསལཱཝདཱནཱ’’ཏིཨཱདཱིསུ (སུ. ནི. ༨༩༡) དིཊྛིསཙྩེ. ‘‘ཨེཀཾ ཧི སཙྩཾ ན དུཏིཡ’’ནྟིཨཱདཱིསུ (སུ. ནི. ༨༩༠) པརམཏྠསཙྩེ ནིབྦཱནེ ཙེཝ མགྒེ ཙ. ‘‘ཙཏུནྣཾ ཨརིཡསཙྩཱནཾ ཀཏི ཀུསལཱ’’ཏིཨཱདཱིསུ (ཝིབྷ. ༢༡༦) ཨརིཡསཙྩེ. སྭཱཡམིདྷཱཔི ཨརིཡསཙྩེ ཝཏྟཏཱིཏི ཨེཝམེཏྠ ཨཏྠུདྡྷཱརཏོཔི ཝིནིཙྪཡོ ཝེདིཏབྦོ.

༥༣༥. ཨནཱུནཱདྷིཀཏོཏི ¶ ཀསྨཱ པན ཙཏྟཱརེཝ ཨརིཡསཙྩཱནི ཝུཏྟཱནི ཨནཱུནཱནི ཨནདྷིཀཱནཱིཏི ཙེ? ཨཉྙསྶཱསམྦྷཝཏོ ཨཉྙཏརསྶ ཙ ཨཔནེཡྻཱབྷཱཝཏོ. ན ཧི ཨེཏེཧི ཨཉྙཾ ཨདྷིཀཾ ཝཱ, ཨེཏེསཾ ཝཱ ཨེཀམྤི ཨཔནེཏབྦཾ སམྦྷོཏི. ཡཐཱཧ – ‘‘ཨིདྷ, བྷིཀྑཝེ, ཨཱགཙྪེཡྻ སམཎོ ཝཱ བྲཱཧྨཎོ ཝཱ ‘ནེཏཾ དུཀྑཾ ཨརིཡསཙྩཾ, ཨཉྙཾ དུཀྑཾ ཨརིཡསཙྩཾ. ཨཧམེཏཾ དུཀྑཾ ཨརིཡསཙྩཾ ཋཔེཏྭཱ ཨཉྙཾ དུཀྑཾ ཨརིཡསཙྩཾ པཉྙཔེསྶཱམཱི’ཏི ནེཏཾ ཋཱནཾ ཝིཛྫཏཱི’’ཏིཨཱདི. ཡཐཱ ཙཱཧ – ‘‘ཡོ ཧི ཀོཙི, བྷིཀྑཝེ, སམཎོ ཝཱ བྲཱཧྨཎོ ཝཱ ཨེཝཾ ཝདེཡྻ ‘ནེཏཾ དུཀྑཾ པཋམཾ ཨརིཡསཙྩཾ ཡཾ སམཎེན གོཏམེན དེསིཏཾ, ཨཧམེཏཾ དུཀྑཾ པཋམཾ ཨརིཡསཙྩཾ པཙྩཀྑཱཡ ཨཉྙཾ དུཀྑཾ པཋམཾ ཨརིཡསཙྩཾ པཉྙཔེསྶཱམཱི’ཏི ནེཏཾ ཋཱནཾ ཝིཛྫཏཱི’’ཏིཨཱདི (སཾ. ནི. ༥.༡༠༨༦).

ཨཔིཙ པཝཏྟིམཱཙིཀྑནྟོ བྷགཝཱ སཧེཏུཀཾ ཨཱཙིཀྑི, ནིཝཏྟིཉྩ སཨུཔཱཡཾ. ཨིཏི པཝཏྟིནིཝཏྟིཏདུབྷཡཧེཏཱུནཾ ཨེཏཔརམཏོ ཙཏྟཱརེཝ ཝུཏྟཱནི. ཏཐཱ པརིཉྙེཡྻཔཧཱཏབྦསཙྪིཀཱཏབྦབྷཱཝེཏབྦཱནཾ, ཏཎྷཱཝཏྠུཏཎྷཱཏཎྷཱནིརོདྷཏཎྷཱནིརོདྷུཔཱཡཱནཾ, ཨཱལཡཨཱལཡཱརཱམཏཱཨཱལཡསམུགྒྷཱཏཨཱལཡསམུགྒྷཱཏུཔཱཡཱནཉྩ ཝསེནཱཔི ཙཏྟཱརེཝ ཝུཏྟཱནཱིཏི ཨེཝམེཏྠ ཨནཱུནཱདྷིཀཏོ ཝིནིཙྪཡོ ཝེདིཏབྦོ.

༥༣༦. ཀམཏོཏི ཨཡམྤི དེསནཱཀྐམོཝ. ཨེཏྠ ཙ ཨོལཱ༹རིཀཏྟཱ, སབྦསཏྟསཱདྷཱརཎཏྟཱ ཙ སུཝིཉྙེཡྻནྟི དུཀྑསཙྩཾ པཋམཾ ཝུཏྟཾ. ཏསྶེཝ ཧེཏུདསྶནཏྠཾ ཏདནནྟརཾ སམུདཡསཙྩཾ. ཧེཏུནིརོདྷཱ ཕལནིརོདྷོཏི ཉཱཔནཏྠཾ ཏཏོ ནིརོདྷསཙྩཾ. ཏདདྷིགམུཔཱཡདསྶནཏྠཾ ཨནྟེ མགྒསཙྩཾ. བྷཝསུཁསྶཱདགདྷིཏཱནཾ ཝཱ སཏྟཱནཾ སཾཝེགཛནནཏྠཾ པཋམཾ དུཀྑམཱཧ. ཏཾ ནེཝ ཨཀཏཾ ཨཱགཙྪཏི ¶ , ན ཨིསྶརནིམྨཱནཱདིཏོ ཧོཏི, ཨིཏོ པན ཧོཏཱིཏི ཉཱཔནཏྠཾ ཏདནནྟརཾ སམུདཡཾ. ཏཏོ སཧེཏུཀེན དུཀྑེན ཨབྷིབྷཱུཏཏྟཱ སཾཝིགྒམཱནསཱནཾ དུཀྑནིསྶརཎགཝེསཱིནཾ ནིསྶརཎདསྶནེན ཨསྶཱསཛནནཏྠཾ ནིརོདྷཾ. ཏཏོ ནིརོདྷཱདྷིགམཏྠཾ ནིརོདྷསམྤཱཔཀཾ མགྒནྟི ཨེཝམེཏྠ ཀམཏོ ཝིནིཙྪཡོ ཝེདིཏབྦོ.

༥༣༧. ཛཱཏིཨཱདཱིནཾ ནིཙྪཡཱཏི ཡེ ཏེ ཨརིཡསཙྩཱནི ནིདྡིསནྟེན བྷགཝཏཱ ‘‘ཛཱཏིཔི དུཀྑཱ, ཛརཱཔི དུཀྑཱ, མརཎམྤི དུཀྑཾ, སོཀཔརིདེཝདུཀྑདོམནསྶུཔཱཡཱསཱཔི དུཀྑཱ, ཨཔྤིཡེཧི སམྤཡོགོ དུཀྑོ, པིཡེཧི ¶ ཝིཔྤཡོགོ དུཀྑོ, ཡམྤིཙྪཾ ན ལབྷཏི ཏམྤི དུཀྑཾ, སཾཁིཏྟེན པཉྩུཔཱདཱནཀྑནྡྷཱ དུཀྑཱ’’ཏི (ཝིབྷ. ༡༩༠) དུཀྑནིདྡེསེ དྭཱདས དྷམྨཱ, ‘‘ཡཱཡཾ ཏཎྷཱ པོནོབྦྷཝིཀཱ ནནྡཱིརཱགསཧགཏཱ ཏཏྲཏཏྲཱབྷིནནྡིནཱི. སེཡྻཐིདཾ, ཀཱམཏཎྷཱ, བྷཝཏཎྷཱ, ཝིབྷཝཏཎྷཱ’’ཏི (ཝིབྷ. ༢༠༣) སམུདཡནིདྡེསེ ཏིཝིདྷཱ ཏཎྷཱ, ‘‘ཡོ ཏསྶཱཡེཝ ཏཎྷཱཡ ཨསེསཝིརཱགནིརོདྷོ ཙཱགོ པཊིནིསྶགྒོ མུཏྟི ཨནཱལཡོ’’ཏི (ཝིབྷ. ༢༠༤) ཨེཝཾ ནིརོདྷནིདྡེསེ ཨཏྠཏོ ཨེཀམེཝ ནིབྦཱནཾ, ‘‘ཀཏམཾ དུཀྑནིརོདྷགཱམིནཱིཔཊིཔདཱ ཨརིཡསཙྩཾ, ཨཡམེཝ ཨརིཡོ ཨཊྛངྒིཀོ མགྒོ. སེཡྻཐིདཾ – སམྨཱདིཊྛི…པེ… སམྨཱསམཱདྷཱི’’ཏི (ཝིབྷ. ༢༠༥) ཨེཝཾ མགྒནིདྡེསེ ཨཊྛ དྷམྨཱཏི ཨིཏི ཙཏུནྣཾ སཙྩཱནཾ ནིདྡེསེ ཛཱཏིཨཱདཡོ དྷམྨཱ ཝུཏྟཱ, ཏེསཾ ཛཱཏིཨཱདཱིནཾ ནིཙྪཡཱཔི ཨེཏྠ ཝིནིཙྪཡོ ཝེདིཏབྦོ.

དུཀྑནིདྡེསཀཐཱ

ཛཱཏིནིདྡེསོ

སེཡྻཐིདཾ, ཨཡཉྷི ཛཱཏི-སདྡོ ཨནེཀཏྠོ. ཏཐཱ ཧེས ‘‘ཨེཀམྤི ཛཱཏིཾ དྭེཔི ཛཱཏིཡོ’’ཏི (དཱི. ནི. ༡.༢༤༤; པཱརཱ. ༡༢) ཨེཏྠ བྷཝེ ཨཱགཏོ. ‘‘ཨཏྠི, ཝིསཱཁེ, ནིགཎྛཱ ནཱམ སམཎཛཱཏཱི’’ཏི (ཨ. ནི. ༣.༧༡) ཨེཏྠ ནིཀཱཡེ. ‘‘ཛཱཏི དྭཱིཧི ཁནྡྷེཧི སངྒཧིཏཱ’’ཏི (དྷཱཏུ. ༧༡) ཨེཏྠ སངྑཏལཀྑཎེ. ‘‘ཡཾ མཱཏུཀུཙྪིསྨིཾ པཋམཾ ཙིཏྟཾ ཨུཔྤནྣཾ, པཋམཾ ཝིཉྙཱཎཾ པཱཏུབྷཱུཏཾ, ཏདུཔཱདཱཡ སཱཝསྶ ཛཱཏཱི’’ཏི (མཧཱཝ. ༡༢༤) ཨེཏྠ པཊིསནྡྷིཡཾ. ‘‘སམྤཏིཛཱཏོ, ཨཱནནྡ, བོདྷིསཏྟོ’’ཏི (མ. ནི. ༣.༢༠༧) ཨེཏྠ པསཱུཏིཡཾ. ‘‘ཨཀྑིཏྟོ ཨནུཔཀུཊྛོ ཛཱཏིཝཱདེནཱ’’ཏི (དཱི. ནི. ༡.༣༣༡) ཨེཏྠ ཀུལེ. ‘‘ཡཏོཧཾ, བྷགིནི, ཨརིཡཱཡ ཛཱཏིཡཱ ཛཱཏོ’’ཏི (མ. ནི. ༢.༣༥༡) ཨེཏྠ ཨརིཡསཱིལེ.

༥༣༨. སྭཱཡམིདྷ ¶ གབྦྷསེཡྻཀཱནཾ པཊིསནྡྷིཏོ པཊྛཱཡ ཡཱཝ མཱཏུཀུཙྪིམྷཱ ནིཀྑམནཾ, ཏཱཝ པཝཏྟེསུ ཁནྡྷེསུ. ཨིཏརེསཾ པཊིསནྡྷིཁནྡྷེསྭེཝཱཏི དཊྛབྦོ. ཨཡམྤི ཙ པརིཡཱཡཀཐཱཝ. ནིཔྤརིཡཱཡཏོ པན ཏཏྠ ཏཏྠ ནིབྦཏྟམཱནཱནཾ སཏྟཱནཾ ཡེ ཡེ ཁནྡྷཱ པཱཏུབྷཝནྟི, ཏེསཾ ཏེསཾ པཋམཔཱཏུབྷཱཝོ ཛཱཏི ནཱམ.

སཱ ¶ པནེསཱ ཏཏྠ ཏཏྠ བྷཝེ པཋམཱབྷིནིབྦཏྟིལཀྑཎཱ, ནིཡྻཱཏནརསཱ, ཨཏཱིཏབྷཝཏོ ཨིདྷ ཨུམྨུཛྫནཔཙྩུཔཊྛཱནཱ, དུཀྑཝིཙིཏྟཏཱཔཙྩུཔཊྛཱནཱ ཝཱ.

༥༣༩. ཀསྨཱ པནེསཱ དུཀྑཱཏི ཙེ? ཨནེཀེསཾ དུཀྑཱནཾ ཝཏྠུབྷཱཝཏོ. ཨནེཀཱནི ཧི དུཀྑཱནི. སེཡྻཐིདཾ – དུཀྑདུཀྑཾ, ཝིཔརིཎཱམདུཀྑཾ, སངྑཱརདུཀྑཾ, པཊིཙྪནྣདུཀྑཾ, ཨཔྤཊིཙྪནྣདུཀྑཾ, པརིཡཱཡདུཀྑཾ, ནིཔྤརིཡཱཡདུཀྑནྟི.

ཏཏྠ ཀཱཡིཀཙེཏསིཀཱ དུཀྑཱ ཝེདནཱསབྷཱཝཏོ ཙ ནཱམཏོ ཙ དུཀྑཏྟཱ དུཀྑདུཀྑནྟི ཝུཙྩཏི.

སུཁཱ ཝེདནཱ ཝིཔརིཎཱམེན དུཀྑུཔྤཏྟིཧེཏུཏོ ཝིཔརིཎཱམདུཀྑཾ.

ཨུཔེཀྑཱ ཝེདནཱ ཙེཝ ཨཝསེསཱ ཙ ཏེབྷཱུམཀཱ སངྑཱརཱ ཨུདཡབྦཡཔྤཊིཔཱིལི༹ཏཏྟཱ སངྑཱརདུཀྑཾ. ཀཎྞསཱུལདནྟསཱུལརཱགཛཔརིལཱ༹ཧདོསཛཔརིལཱ༹ཧཱདི ཀཱཡིཀཙེཏསིཀོ ཨཱབཱདྷོ པུཙྪིཏྭཱ ཛཱནིཏབྦཏོ ཨུཔཀྐམསྶ ཙ ཨཔཱཀཊབྷཱཝཏོ པཊིཙྪནྣདུཀྑཾ ནཱམ. ཨཔཱཀཊདུཀྑནྟིཔི ཝུཙྩཏི.

དྭཏྟིཾསཀམྨཀཱརཎཱདིསམུཊྛཱནོ ཨཱབཱདྷོ ཨཔུཙྪིཏྭཱཝ ཛཱནིཏབྦཏོ ཨུཔཀྐམསྶ ཙ པཱཀཊབྷཱཝཏོ ཨཔྤཊིཙྪནྣདུཀྑཾ ནཱམ. པཱཀཊདུཀྑནྟིཔི ཝུཙྩཏི.

ཋཔེཏྭཱ དུཀྑདུཀྑཾ སེསཾ དུཀྑསཙྩཝིབྷངྒེ ཨཱགཏཾ ཛཱཏིཨཱདི སབྦམྤི ཏསྶ ཏསྶ དུཀྑསྶ ཝཏྠུབྷཱཝཏོ པརིཡཱཡདུཀྑཾ. དུཀྑདུཀྑཾ པན ནིཔྤརིཡཱཡདུཀྑནྟི ཝུཙྩཏི.

ཏཏྲཱཡཾ ¶ ཛཱཏི ཡཾ ཏཾ བཱལཔཎྜིཏསུཏྟཱདཱིསུ (མ. ནི. ༣.༢༤༦ ཨཱདཡོ) བྷགཝཏཱཔི ཨུཔམཱཝསེན པཀཱསིཏཾ ཨཱཔཱཡིཀཾ དུཀྑཾ, ཡཉྩ སུགཏིཡམྤི མནུསྶལོཀེ གབྦྷོཀྐནྟིམཱུལཀཱདིབྷེདཾ དུཀྑཾ ཨུཔྤཛྫཏི, ཏསྶ ཝཏྠུབྷཱཝཏོ དུཀྑཱ.

༥༤༠. ཏཏྲིདཾ གབྦྷོཀྐནྟིམཱུལཀཱདིབྷེདཾ དུཀྑཾ – ཨཡཾ ཧི སཏྟོ མཱཏུཀུཙྪིམྷི ནིབྦཏྟམཱནོ ན ཨུཔྤལཔདུམཔུཎྜརཱིཀཱདཱིསུ ནིབྦཏྟཏི, ཨཐ ཁོ ཧེཊྛཱ ཨཱམཱསཡསྶ ཨུཔརི པཀྐཱསཡསྶ ཨུདརཔཊལཔིཊྛིཀཎྚཀཱནཾ ཝེམཛ྄ཛྷེ པརམསམྦཱདྷེ ཏིབྦནྡྷཀཱརེནཱནཱཀུཎཔགནྡྷཔརིབྷཱཝིཏཔརམདུགྒནྡྷཔཝནཝིཙརིཏེ ཨདྷིམཏྟཛེགུཙྪེ ཀུཙྪིཔདེསེ པཱུཏིམཙྪཔཱུཏིཀུམྨཱསཙནྡནིཀཱདཱིསུ ཀིམི ཝིཡ ནིབྦཏྟཏི. སོ ཏཏྠ ནིབྦཏྟོ དས མཱསེ མཱཏུཀུཙྪིསམྦྷཝེན ཨུསྨནཱ པུཊཔཱཀཾ ཝིཡ པཙྩམཱནོ པིཊྛཔིཎྜི ཝིཡ སེདིཡམཱནོ སམིཉྫནཔསཱརཎཱདིརཧིཏོ ཨདྷིམཏྟཾ དུཀྑམནུབྷོཏཱིཏི, ཨིདཾ ཏཱཝ གབྦྷོཀྐནྟིམཱུལཀཾ དུཀྑཾ.

ཡཾ ¶ པན སོ མཱཏུ སཧསཱ ཨུཔཀྑལནགམནནིསཱིདནཝུཊྛཱནཔརིཝཏྟནཱདཱིསུ སུརཱདྷུཏྟཧཏྠགཏོ ཨེལ༹ཀོ ཝིཡ ཨཧིཏུཎྜིཀཧཏྠགཏོ སཔྤཔོཏཀོ ཝིཡ ཙ ཨཱཀཌྜྷནཔརིཀཌྜྷནཨོདྷཱུནནནིདྡྷཱུནནཱདིནཱ ཨུཔཀྐམེན ཨདྷིམཏྟཾ དུཀྑམནུབྷཝཏི, ཡཉྩ མཱཏུ སཱིཏཱུདཀཔཱནཀཱལེ སཱིཏནརཀུཔཔནྣོ ཝིཡ, ཨུཎྷཡཱགུབྷཏྟཱདིཨཛ྄ཛྷོཧརཎཀཱལེ ཨངྒཱརཝུཊྛིསམྤརིཀིཎྞོ ཝིཡ, ལོཎམྦིལཱདིཨཛ྄ཛྷོཧརཎཀཱལེ ཁཱརཱཔཊིཙྪཀཱདིཀམྨཀཱརཎཔཏྟོ ཝིཡ ཏིབྦཾ དུཀྑམནུབྷོཏི, ཨིདཾ གབྦྷཔརིཧརཎམཱུལཀཾ དུཀྑཾ.

ཡཾ པནསྶ མཱུལ༹ྷགབྦྷཱཡ མཱཏུཡཱ མིཏྟཱམཙྩསུཧཛྫཱདཱིཧིཔི ཨདསྶནཱརཧེ དུཀྑུཔྤཏྟིཊྛཱནེ ཚེདནཕཱལནཱདཱིཧི དུཀྑཾ ཨུཔྤཛྫཏི, ཨིདཾ གབྦྷཝིཔཏྟིམཱུལཀཾ དུཀྑཾ.

ཡཾ ཝིཛཱཡམཱནཱཡ མཱཏུཡཱ ཀམྨཛེཧི ཝཱཏེཧི པརིཝཏྟེཏྭཱ ནརཀཔཔཱཏཾ ཝིཡ ཨཏིབྷཡཱནཀཾ ཡོནིམགྒཾ པཊིཔཱཏིཡམཱནསྶ པརམསམྦཱདྷེན ཡོནིམུཁེན ཏཱལ༹ཙྪིགྒལེ༹ན ཝིཡ ནིཀྐཌྜྷིཡམཱནསྶ མཧཱནཱགསྶ ནརཀསཏྟསྶ ཝིཡ ཙ སངྒྷཱཏཔབྦཏེཧི ཝིཙུཎྞིཡམཱནསྶ དུཀྑཾ ཨུཔྤཛྫཏི, ཨིདཾ ཝིཛཱཡནམཱུལཀཾ དུཀྑཾ.

ཡཾ པན ཛཱཏསྶ ཏརུཎཝཎསདིསསུཁུམཱལསརཱིརསྶ ཧཏྠགཧཎནཧཱཔནདྷོཝནཙོལ༹པརིམཛྫནཱདིཀཱལེ ¶ སཱུཙིམུཁཁུརདྷཱརཱཧི ཝིཛ྄ཛྷནཕཱལནསདིསཾ དུཀྑཾ ཨུཔྤཛྫཏི, ཨིདཾ མཱཏུཀུཙྪིཏོ བཧིནིཀྑམནམཱུལཀཾ དུཀྑཾ.

ཡཾ ཏཏོ པརཾ པཝཏྟིཡཾ ཨཏྟནཱཝ ཨཏྟཱནཾ ཝདྷེནྟསྶ ཨཙེལཀཝཏཱདིཝསེན ཨཱཏཱཔནཔརིཏཱཔནཱནུཡོགམནུཡུཏྟསྶ, ཀོདྷཝསེན ཨབྷུཉྫནྟསྶ, ཨུབྦནྡྷནྟསྶ ཙ དུཀྑཾ ཨུཔྤཛྫཏི, ཨིདཾ ཨཏྟཱུཔཀྐམམཱུལཀཾ དུཀྑཾ. ཡཾ པན པརཏོ ཝདྷབནྡྷནཱདཱིནི ཨནུབྷཝནྟསྶ ཨུཔྤཛྫཏི, ཨིདཾ པརཱུཔཀྐམམཱུལཀཾ དུཀྑནྟི.

ཨིཏི ཨིམསྶ སབྦསྶཱཔི དུཀྑསྶ ཨཡཾ ཛཱཏི ཝཏྠུམེཝ ཧོཏི.

༥༤༡. ཏེནེཏཾ ཝུཙྩཏི –

ཛཱཡེཐ ནོ ཙེ ནརཀེསུ སཏྟོ,

ཏཏྟགྒིདཱཧཱདིཀམཔྤསཡ྄ཧཾ;

ལབྷེཐ དུཀྑཾ ནུ ཀུཧིཾ པཏིཊྛཾ,

ཨིཙྩཱཧ དུཀྑཱཏི མུནཱིདྷ ཛཱཏིཾ.

དུཀྑཾ ¶ ཏིརཙྪེསུ ཀསཱཔཏོད-

དཎྜཱབྷིགྷཱཏཱདིབྷཝཾ ཨནེཀཾ;

ཡཾ ཏཾ ཀཐཾ ཏཏྠ བྷཝེཡྻ ཛཱཏིཾ,

ཝིནཱ ཏཧིཾ ཛཱཏི ཏཏོཔི དུཀྑཱ.

པེཏེསུ དུཀྑཾ པན ཁུཔྤིཔཱསཱ-

ཝཱཏཱཏཔཱདིཔྤབྷཝཾ ཝིཙིཏྟཾ;

ཡསྨཱ ཨཛཱཏསྶ ན ཏཏྠ ཨཏྠི,

ཏསྨཱཔི དུཀྑཾ མུནི ཛཱཏིམཱཧ.

ཏིབྦནྡྷཀཱརེ ¶ ཙ ཨསཡ྄ཧསཱིཏེ,

ལོཀནྟརེ ཡཾ ཨསུརེསུ དུཀྑཾ;

ན ཏཾ བྷཝེ ཏཏྠ ན ཙསྶ ཛཱཏི,

ཡཏོ ཨཡཾ ཛཱཏི ཏཏོཔི དུཀྑཱ.

ཡཉྩཱཔི གཱུཐནརཀེ ཝིཡ མཱཏུགབྦྷེ,

སཏྟོ ཝསཾ ཙིརམཏོ བཧི ནིཀྑམཉྩ;

པཔྤོཏི དུཀྑམཏིགྷོརམིདམྤི ནཏྠི,

ཛཱཏིཾ ཝིནཱ ཨིཏིཔི ཛཱཏི ཨཡཉྷི དུཀྑཱ.

ཀིཾ བྷཱསིཏེན བཧུནཱ ནནུ ཡཾ ཀུཧིཉྩི,

ཨཏྠཱིདྷ ཀིཉྩིདཔི དུཀྑམིདཾ ཀདཱཙི;

ནེཝཏྠི ཛཱཏིཝིརཧེན ཡཏོ མཧེསི,

དུཀྑཱཏི སབྦཔཋམཾ ཨིམམཱཧ ཛཱཏིནྟི.

ཨཡཾ ཏཱཝ ཛཱཏིཡཾ ཝིནིཙྪཡོ.

ཛརཱནིདྡེསོ

༥༤༢. ཛརཱཔི དུཀྑཱཏི ཨེཏྠ དུཝིདྷཱ ཛརཱ སངྑཏལཀྑཎཉྩ, ཁཎྜིཙྩཱདིསམྨཏོ སནྟཏིཡཾ ཨེཀབྷཝཔརིཡཱཔནྣཁནྡྷཔུརཱཎབྷཱཝོ ཙ, སཱ ཨིདྷ ཨདྷིཔྤེཏཱ. སཱ པནེསཱ ཛརཱ ཁནྡྷཔརིཔཱཀལཀྑཎཱ, མརཎཱུཔནཡནརསཱ, ཡོབྦནཝིནཱསཔཙྩུཔཊྛཱནཱ. དུཀྑཱ སངྑཱརདུཀྑབྷཱཝཏོ ཙེཝ དུཀྑཝཏྠུཏོ ཙ ¶ . ཡཾ ཧི ཨངྒཔཙྩངྒསིཐིལཱིབྷཱཝཨིནྡྲིཡཝིཀཱརཝིརཱུཔཏཱཡོབྦནཝིནཱསབལཱུཔགྷཱཏསཏིམཏིཝིཔྤཝཱསཔརཔརིབྷཝཱདིཨནེཀཔཙྩཡཾ ཀཱཡིཀཙེཏསིཀདུཀྑཾ ཨུཔྤཛྫཏི, ཛརཱ ཏསྶ ཝཏྠུ. ཏེནེཏཾ ཝུཙྩཏི –

‘‘ཨངྒཱནཾ སིཐིལཱིབྷཱཝཱ, ཨིནྡྲིཡཱནཾ ཝིཀཱརཏོ;

ཡོབྦནསྶ ཝིནཱསེན, བལསྶ ཨུཔགྷཱཏཏོ.

‘‘ཝིཔྤཝཱསཱ ¶ སཏཱདཱིནཾ, པུཏྟདཱརེཧི ཨཏྟནོ;

ཨཔསཱདནཱིཡཏོ ཙེཝ, བྷིཡྻོ བཱལཏྟཔཏྟིཡཱ.

‘‘པཔྤོཏི དུཀྑཾ ཡཾ མཙྩོ, ཀཱཡིཀཾ མཱནསཾ ཏཐཱ;

སབྦམེཏཾ ཛརཱཧེཏུ, ཡསྨཱ ཏསྨཱ ཛརཱ དུཁཱ’’ཏི.

ཨཡཾ ཛརཱཡཾ ཝིནིཙྪཡོ.

མརཎནིདྡེསོ

༥༤༣. མརཎམྤི དུཀྑནྟི ཨེཏྠཱཔི དུཝིདྷཾ མརཎཾ སངྑཏལཀྑཎཉྩ, ཡཾ སནྡྷཱཡ ཝུཏྟཾ ‘‘ཛརཱམརཎཾ དྭཱིཧི ཁནྡྷེཧི སངྒཧིཏ’’ནྟི (དྷཱཏུ. ༧༡). ཨེཀབྷཝཔརིཡཱཔནྣཛཱིཝིཏིནྡྲིཡཔྤབནྡྷཝིཙྪེདོ ཙ, ཡཾ སནྡྷཱཡ ཝུཏྟཾ ‘‘ནིཙྩཾ མརཎཏོ བྷཡ’’ནྟི (སུ. ནི. ༥༨༡). ཏཾ ཨིདྷ ཨདྷིཔྤེཏཾ. ཛཱཏིཔཙྩཡཱ མརཎཾ ཨུཔཀྐམམརཎཾ སརསམརཎཾ ཨཱཡུཀྑཡམརཎཾ པུཉྙཀྑཡམརཎནྟིཔི ཏསྶེཝ ནཱམཾ. ཏཡིདཾ ཙུཏིལཀྑཎཾ, ཝིཡོགརསཾ, གཏིཝིཔྤཝཱསཔཙྩུཔཊྛཱནཾ. དུཀྑསྶ པན ཝཏྠུབྷཱཝཏོ དུཀྑནྟི ཝེདིཏབྦཾ. ཏེནེཏཾ ཝུཙྩཏི –

‘‘པཱཔསྶ པཱཔཀམྨཱདི-ནིམིཏྟམནུཔསྶཏོ;

བྷདྡསྶཱཔསཧནྟསྶ, ཝིཡོགཾ པིཡཝཏྠུཀཾ;

མཱིཡམཱནསྶ ཡཾ དུཀྑཾ, མཱནསཾ ཨཝིསེསཏོ.

སབྦེསཉྩཱཔི ཡཾ སནྡྷི-བནྡྷནཙྪེདནཱདིཀཾ;

ཝིཏུཛྫམཱནམམྨཱནཾ, ཧོཏི དུཀྑཾ སརཱིརཛཾ.

ཨསཡ྄ཧམཔྤཏིཀཱརཾ, དུཀྑསྶེཏསྶིདཾ ཡཏོ;

མརཎཾ ཝཏྠུ ཏེནེཏཾ, དུཀྑམིཙྩེཝ བྷཱསིཏ’’ནྟི.

ཨཡཾ མརཎེ ཝིནིཙྪཡོ.

སོཀཱདིནིདྡེསཱ

༥༤༤. སོཀཱདཱིསུ ¶ ¶ སོཀོ ནཱམ ཉཱཏིབྱསནཱདཱིཧི ཕུཊྛསྶ ཙིཏྟསནྟཱཔོ. སོ ཀིཉྩཱཔི ཨཏྠཏོ དོམནསྶམེཝ ཧོཏི. ཨེཝཾ སནྟེཔི ཨནྟོནིཛ྄ཛྷཱནལཀྑཎོ, ཙེཏསོ པརིཛ྄ཛྷཱཔནརསོ, ཨནུསོཙནཔཙྩུཔཊྛཱནོ. དུཀྑོ པན དུཀྑདུཀྑཏོ དུཀྑཝཏྠུཏོ ཙ. ཏེནེཏཾ ཝུཙྩཏི –

‘‘སཏྟཱནཾ ཧདཡཾ སོཀོ, ཝིསསལླཾཝ ཏུཛྫཏི;

ཨགྒིཏཏྟོཝ ནཱརཱཙོ, བྷུསཾཝ དཧཏེ པུན.

‘‘སམཱཝཧཏི ཙ བྱཱདྷི-ཛརཱམརཎབྷེདནཾ;

དུཀྑམྤི ཝིཝིདྷཾ ཡསྨཱ, ཏསྨཱ དུཀྑོཏི ཝུཙྩཏཱི’’ཏི.

ཨཡཾ སོཀེ ཝིནིཙྪཡོ.

པརིདེཝོ

༥༤༥. པརིདེཝོ ནཱམ ཉཱཏིབྱསནཱདཱིཧི ཕུཊྛསྶ ཝཙཱིཔལཱཔོ. སོ ལཱལཔྤནལཀྑཎོ, གུཎདོསཀིཏྟནརསོ, སམྦྷམཔཙྩུཔཊྛཱནོ. དུཀྑོ པན སངྑཱརདུཀྑབྷཱཝཏོ དུཀྑཝཏྠུཏོ ཙ. ཏེནེཏཾ ཝུཙྩཏི –

‘‘ཡཾ སོཀསལླཝིཧཏོ པརིདེཝམཱནོ,

ཀཎྛོཊྛཏཱལུཏལསོསཛམཔྤསཡ྄ཧཾ;

བྷིཡྻོདྷིམཏྟམདྷིགཙྪཏིཡེཝ དུཀྑཾ,

དུཀྑོཏི ཏེན བྷགཝཱ པརིདེཝམཱཧཱ’’ཏི.

ཨཡཾ པརིདེཝེ ཝིནིཙྪཡོ.

དུཀྑཾ

༥༤༦. དུཀྑཾ ¶ ནཱམ ཀཱཡིཀཾ དུཀྑཾ, ཏཾ ཀཱཡཔཱིལ༹ནལཀྑཎཾ, དུཔྤཉྙཱནཾ དོམནསྶཀརཎརསཾ, ཀཱཡིཀཱབཱདྷཔཙྩུཔཊྛཱནཾ. དུཀྑཾ པན དུཀྑདུཀྑཏོ མཱནསདུཀྑཱཝཧནཏོ ཙ. ཏེནེཏཾ ཝུཙྩཏི –

‘‘པཱིལེ༹ཏི ཀཱཡིཀམིདཾ, དུཀྑཉྩ མཱནསཾ བྷིཡྻོ;

ཛནཡཏི ཡསྨཱ ཏསྨཱ, དུཀྑནྟི ཝིསེསཏོ ཝུཏྟ’’ནྟི.

ཨཡཾ དུཀྑེ ཝིནིཙྪཡོ.

དོམནསྶཾ

༥༤༧. དོམནསྶཾ ¶ ནཱམ མཱནསཾ དུཀྑཾ. ཏཾ ཙིཏྟཔཱིལ༹ནལཀྑཎཾ, མནོཝིགྷཱཏརསཾ, མཱནསབྱཱདྷིཔཙྩུཔཊྛཱནཾ. དུཀྑཾ པན དུཀྑདུཀྑཏོ ཀཱཡིཀདུཀྑཱཝཧནཏོ ཙ. ཙེཏོདུཀྑསམཔྤིཏཱ ཧི ཀེསེ པཀིརིཡ ཀནྡནྟི, ཨུརཱནི པཊིཔིསནྟི, ཨཱཝཊྚནྟི, ཝིཝཊྚནྟི, ཨུདྡྷཾཔཱདཾ པཔཏནྟི, སཏྠཾ ཨཱཧརནྟི, ཝིསཾ ཁཱདནྟི, རཛྫུཡཱ ཨུབྦནྡྷནྟི, ཨགྒིཾ པཝིསནྟཱིཏི ཏཾ ནཱནཔྤཀཱརཀཾ དུཀྑམནུབྷཝནྟི. ཏེནེཏཾ ཝུཙྩཏི –

‘‘པཱིལེ༹ཏི ཡཏོ ཙིཏྟཾ, ཀཱཡསྶ ཙ པཱིལ༹ནཾ སམཱཝཧཏི;

དུཀྑནྟི དོམནསྶཾ, ཝིདོམནསྶཱ ཏཏོ ཨཱཧཱུ’’ཏི.

ཨཡཾ དོམནསྶེ ཝིནིཙྪཡོ.

ཨུཔཱཡཱསོ

༥༤༨. ཨུཔཱཡཱསོ ནཱམ ཉཱཏིབྱསནཱདཱིཧི ཕུཊྛསྶ ཨདྷིམཏྟཙེཏོདུཀྑཔྤབྷཱཝིཏོ དོསོཡེཝ. སངྑཱརཀྑནྡྷཔརིཡཱཔནྣོ ཨེཀོ དྷམྨོཏི ཨེཀེ. སོ ཙིཏྟཔརིདཧནལཀྑཎོ, ནིཏྠུནནརསོ ¶ , ཝིསཱདཔཙྩུཔཊྛཱནོ. དུཀྑོ པན སངྑཱརདུཀྑབྷཱཝཏོ ཙིཏྟཔརིདཧནཏོ ཀཱཡཝིསཱདནཏོ ཙ. ཏེནེཏཾ ཝུཙྩཏི –

‘‘ཙིཏྟསྶ ཙ པརིདཧནཱ, ཀཱཡསྶ ཝིསཱདནཱ ཙ ཨདྷིམཏྟཾ;

ཡཾ དུཀྑམུཔཱཡཱསོ, ཛནེཏི དུཀྑོ ཏཏོ ཝུཏྟོ’’ཏི.

ཨཡཾ ཨུཔཱཡཱསེ ཝིནིཙྪཡོ.

ཨེཏྠ ཙ མནྡགྒིནཱ ཨནྟོབྷཱཛནེ པཱཀོ ཝིཡ སོཀོ. ཏིཀྑགྒིནཱ པཙྩམཱནསྶ བྷཱཛནཏོ བཧིནིཀྑམནཾ ཝིཡ པརིདེཝོ. བཧིནིཀྑནྟཱཝསེསསྶ ནིཀྑམིཏུཾ ཨཔྤཧོནྟསྶ ཨནྟོབྷཱཛནེཡེཝ ཡཱཝ པརིཀྑཡཱ པཱཀོ ཝིཡ ཨུཔཱཡཱསོ དཊྛབྦོ.

ཨཔྤིཡསམྤཡོགོ

༥༤༩. ཨཔྤིཡསམྤཡོགོ ནཱམ ཨམནཱཔེཧི སཏྟསངྑཱརེཧི སམོདྷཱནཾ. སོ ཨནིཊྛསམོདྷཱནལཀྑཎོ, ཙིཏྟཝིགྷཱཏཀརཎརསོ, ཨནཏྠབྷཱཝཔཙྩུཔཊྛཱནོ. དུཀྑོ པན དུཀྑཝཏྠུཏོ. ཏེནེཏཾ ཝུཙྩཏི –

‘‘དིསྭཱཝ ¶ ཨཔྤིཡེ དུཀྑཾ, པཋམཾ ཧོཏི ཙེཏསི;

ཏདུཔཀྐམསམྦྷཱུཏ-མཐཀཱཡེ ཡཏོ ཨིདྷ.

‘‘ཏཏོ དུཀྑདྭཡསྶཱཔི, ཝཏྠུཏོ སོ མཧེསིནཱ;

དུཀྑོ ཝུཏྟོཏི ཝིཉྙེཡྻོ, ཨཔྤིཡེཧི སམཱགམོ’’ཏི.

ཨཡཾ ཨཔྤིཡསམྤཡོགེ ཝིནིཙྪཡོ.

པིཡཝིཔྤཡོགོ

༥༥༠. པིཡཝིཔྤཡོགོ ནཱམ མནཱཔེཧི སཏྟསངྑཱརེཧི ཝིནཱབྷཱཝོ. སོ ཨིཊྛཝཏྠུཝིཡོགལཀྑཎོ ¶ , སོཀུཔྤཱདནརསོ, བྱསནཔཙྩུཔཊྛཱནོ. དུཀྑོ པན སོཀདུཀྑསྶ ཝཏྠུཏོ. ཏེནེཏཾ ཝུཙྩཏི –

‘‘ཉཱཏིདྷནཱདིཝིཡོགཱ,

སོཀསརསམཔྤིཏཱ ཝིཏུཛྫནྟི;

བཱལཱ ཡཏོ ཏཏོ ཡཾ,

དུཀྑོཏི མཏོ པིཡཝིཔྤཡོགོ’’ཏི.

ཨཡཾ པིཡཝིཔྤཡོགེ ཝིནིཙྪཡོ.

ཨིཙྪིཏཱལཱབྷོ

༥༥༡. ཡམྤིཙྪཾ ན ལབྷཏཱིཏི ཨེཏྠ ‘‘ཨཧོ ཝཏ མཡཾ ན ཛཱཏིདྷམྨཱ ཨསྶཱམཱ’’ཏིཨཱདཱིསུ (དཱི. ནི. ༢.༣༩༨; ཝིབྷ. ༢༠༡) ཨལབྦྷནེཡྻཝཏྠཱུསུ ཨིཙྪཱཝ ཡམྤིཙྪཾ ན ལབྷཏི, ཏམྤི དུཀྑནྟི ཝུཏྟཱ. སཱ ཨལབྦྷནེཡྻཝཏྠུཨིཙྪནལཀྑཎཱ, ཏཔྤརིཡེསནརསཱ, ཏེསཾ ཨཔྤཏྟིཔཙྩུཔཊྛཱནཱ. དུཀྑཱ པན དུཀྑཝཏྠུཏོ. ཏེནེཏཾ ཝུཙྩཏི –

‘‘ཏཾ ཏཾ པཏྠཡམཱནཱནཾ, ཏསྶ ཏསྶ ཨལཱབྷཏོ;

ཡཾ ཝིགྷཱཏམཡཾ དུཀྑཾ, སཏྟཱནཾ ཨིདྷ ཛཱཡཏི.

‘‘ཨལབྦྷནེཡྻཝཏྠཱུནཾ, པཏྠནཱ ཏསྶ ཀཱརཎཾ;

ཡསྨཱ ཏསྨཱ ཛིནོ དུཀྑཾ, ཨིཙྪིཏཱལཱབྷམབྲཝཱི’’ཏི.

ཨཡཾ ཨིཙྪིཏཱལཱབྷེ ཝིནིཙྪཡོ.

པཉྩུཔཱདཱནཀྑནྡྷཱ

༥༥༢. སཾཁིཏྟེན ¶ པཉྩུཔཱདཱནཀྑནྡྷཱ དུཀྑཱཏི ཨེཏྠ པན –

ཛཱཏིཔྤབྷུཏིཀཾ ¶ དུཀྑཾ, ཡཾ ཝུཏྟམིདྷ ཏཱདིནཱ;

ཨཝུཏྟཾ ཡཉྩ ཏཾ སབྦཾ, ཝིནཱ ཨེཏེ ན ཝིཛྫཏི.

ཡསྨཱ ཏསྨཱ ཨུཔཱདཱན-ཀྑནྡྷཱ སངྑེཔཏོ ཨིམེ;

དུཀྑཱཏི ཝུཏྟཱ དུཀྑནྟ-དེསཀེན མཧེསིནཱ.

ཏཐཱ ཧི ཨིནྡྷནམིཝ པཱཝཀོ, ལཀྑམིཝ པཧརཎཱནི, གོརཱུཔཾ ཝིཡ ཌཾསམཀསཱདཡོ, ཁེཏྟམིཝ ལཱཡཀཱ, གཱམཾ ཝིཡ གཱམགྷཱཏཀཱ ཨུཔཱདཱནཀྑནྡྷཔཉྩཀམེཝ ཛཱཏིཨཱདཡོ ནཱནཔྤཀཱརེཧི ཝིབཱདྷེནྟཱ ཏིཎལཏཱདཱིནི ཝིཡ བྷཱུམིཡཾ, པུཔྥཕལཔལླཝཱནི ཝིཡ རུཀྑེསུ ཨུཔཱདཱནཀྑནྡྷེསུཡེཝ ནིབྦཏྟནྟི. ཨུཔཱདཱནཀྑནྡྷཱནཉྩ ཨཱདིདུཀྑཾ ཛཱཏི, མཛ྄ཛྷེདུཀྑཾ ཛརཱ, པརིཡོསཱནདུཀྑཾ མརཎཾ, མཱརཎནྟིཀདུཀྑཱབྷིགྷཱཏེན པརིཌཡ྄ཧནདུཀྑཾ སོཀོ, ཏདསཧནཏོ ལཱལཔྤནདུཀྑཾ པརིདེཝོ, ཏཏོ དྷཱཏུཀྑོབྷསངྑཱཏཨནིཊྛཕོཊྛབྦསམཱཡོགཏོ ཀཱཡསྶ ཨཱབཱདྷནདུཀྑཾ དུཀྑཾ, ཏེན བཱདྷིཡམཱནཱནཾ པུཐུཛྫནཱནཾ ཏཏྠ པཊིགྷུཔྤཏྟིཏོ ཙེཏོབཱདྷནདུཀྑཾ དོམནསྶཾ, སོཀཱདིཝུདྡྷིཡཱ ཛནིཏཝིསཱདཱནཾ ཨནུཏྠུནནདུཀྑཾ ཨུཔཱཡཱསོ, མནོརཐཝིགྷཱཏཔྤཏྟཱནཾ ཨིཙྪཱཝིགྷཱཏདུཀྑཾ ཨིཙྪིཏཱལཱབྷོཏི ཨེཝཾ ནཱནཔྤཀཱརཏོ ཨུཔཔརིཀྑིཡམཱནཱ ཨུཔཱདཱནཀྑནྡྷཱཝ དུཀྑཱཏི. ཡདེཏཾ ཨེཀམེཀཾ དསྶེཏྭཱ ཝུཙྩམཱནཾ ཨནེཀེཧིཔི ཀཔྤེཧི ན སཀྐཱ ཨསེསཏོ ཝཏྟུཾ, ཏསྨཱ ཏཾ སབྦམྤི དུཀྑཾ ཨེཀཛལབིནྡུམྷི སཀལསམུདྡཛལརསཾ ཝིཡ ཡེསུ ཀེསུཙི པཉྩསུ ཨུཔཱདཱནཀྑནྡྷེསུ སཾཁིཔིཏྭཱ དསྶེཏུཾ ‘‘སཾཁིཏྟེན པཉྩུཔཱདཱནཀྑནྡྷཱ དུཀྑཱ’’ཏི བྷགཝཱ ཨཝོཙཱཏི. ཨཡཾ ཨུཔཱདཱནཀྑནྡྷེསུ ཝིནིཙྪཡོ.

ཨཡཾ ཏཱཝ དུཀྑནིདྡེསེ ནཡོ.

སམུདཡནིདྡེསཀཐཱ

༥༥༣. སམུདཡནིདྡེསེ པན ཡཱཡཾ ཏཎྷཱཏི ཡཱ ཨཡཾ ཏཎྷཱ. པོནོབྦྷཝིཀཱཏི པུནབྦྷཝཀརཎཾ པུནོབྦྷཝོ, པུནོབྦྷཝོ སཱིལམེཏིསྶཱཏི ¶ པོནོབྦྷཝིཀཱ. ནནྡཱིརཱགེན སཧགཏཱཏི ནནྡཱིརཱགསཧགཏཱ, ནནྡཱིརཱགེན སདྡྷིཾ ཨཏྠཏོ ཨེཀཏྟམེཝ གཏཱཏི ཝུཏྟཾ ཧོཏི. ཏཏྲ ཏཏྲཱབྷིནནྡིནཱིཏི ཡཏྲ ཡཏྲ ཨཏྟབྷཱཝོ ནིབྦཏྟཏི, ཏཏྲ ཏཏྲཱབྷིནནྡིནཱི. སེཡྻཐིདནྟི ནིཔཱཏོ ¶ , ཏསྶ སཱ ཀཏམཱཏི ཙེཏི ཨཏྠོ. ཀཱམཏཎྷཱ བྷཝཏཎྷཱ ཝིབྷཝཏཎྷཱཏི ཨིམཱ པཊིཙྩསམུཔྤཱདནིདྡེསེ ཨཱཝིབྷཝིསྶནྟི. ཨིདྷ པནཱཡཾ ཏིཝིདྷཱཔི དུཀྑསཙྩསྶ ནིབྦཏྟཀཊྛེན ཨེཀཏྟཾ ཨུཔནེཏྭཱ དུཀྑསམུདཡཾ ཨརིཡསཙྩནྟི ཝུཏྟཱཏི ཝེདིཏབྦཱ.

ཨཡཾ སམུདཡནིདྡེསེ ནཡོ.

ནིརོདྷནིདྡེསཀཐཱ

༥༥༤. དུཀྑནིརོདྷནིདྡེསེ ཡོ ཏསྶཱཡེཝ ཏཎྷཱཡཱཏིཨཱདིནཱ ནཡེན སམུདཡནིརོདྷོ ཝུཏྟོ, སོ ཀསྨཱཏི ཙེ? སམུདཡནིརོདྷེན དུཀྑནིརོདྷོ. སམུདཡནིརོདྷེན ཧི དུཀྑཾ ནིརུཛ྄ཛྷཏི, ན ཨཉྙཐཱ. ཏེནཱཧ –

‘‘ཡཐཱཔི མཱུལེ ཨནུཔདྡཝེ དལ༹ྷེ,

ཚིནྣོཔི རུཀྑོ པུནདེཝ རཱུཧཏི;

ཨེཝམྤི ཏཎྷཱནུསཡེ ཨནཱུཧཏེ,

ནིབྦཏྟཏཱི དུཀྑམིདཾ པུནཔྤུན’’ནྟི. (དྷ. པ. ༣༣༨);

ཨིཏི ཡསྨཱ སམུདཡནིརོདྷེནེཝ དུཀྑཾ ནིརུཛ྄ཛྷཏི, ཏསྨཱ བྷགཝཱ དུཀྑནིརོདྷཾ དེསེནྟོ སམུདཡནིརོདྷེནེཝ དེསེསི. སཱིཧསམཱནཝུཏྟིནོ ཧི ཏཐཱགཏཱ. ཏེ དུཀྑཾ ནིརོདྷེནྟཱ དུཀྑནིརོདྷཉྩ དེསེནྟཱ ཧེཏུམྷི པཊིཔཛྫནྟི, ན ཕལེ. སུཝཱནཝུཏྟིནོ པན ཏིཏྠིཡཱ. ཏེ དུཀྑཾ ནིརོདྷེནྟཱ དུཀྑནིརོདྷཉྩ དེསེནྟཱ ཨཏྟཀིལམཐཱནུཡོགདེསནཱདཱིཧི ཕལེ པཊིཔཛྫནྟི, ན ཧེཏུམྷཱིཏི. ཨེཝཾ ཏཱཝ དུཀྑནིརོདྷསྶ སམུདཡནིརོདྷཝསེན དེསནཱཡ པཡོཛནཾ ཝེདིཏབྦཾ.

༥༥༥. ཨཡཾ པནཏྠོ – ཏསྶཱཡེཝ ཏཎྷཱཡཱཏི ཏསྶཱ ‘‘པོནོབྦྷཝིཀཱ’’ཏི ཝཏྭཱ ཀཱམཏཎྷཱདིཝསེན ཝིབྷཏྟཏཎྷཱཡ. ཝིརཱགོ ཝུཙྩཏི མགྒོ. ‘‘ཝིརཱགཱ ཝིམུཙྩཏཱི’’ཏི (མ. ནི. ༡.༢༤༥; སཾ. ནི. ༣.༡༤) ཧི ཝུཏྟཾ. ཝིརཱགེན ནིརོདྷོ ཝིརཱགནིརོདྷོ. ཨནུསཡསམུགྒྷཱཏཏོ ཨསེསོ ཝིརཱགནིརོདྷོ ཨསེསཝིརཱགནིརོདྷོ. ཨཐ ཝཱ ཝིརཱགོཏི པཧཱནཾ ཝུཙྩཏི, ཏསྨཱ ཨསེསོ ¶ ཝིརཱགོ ཨསེསོ ནིརོདྷོཏི ཨེཝམྤེཏྠ ཡོཛནཱ དཊྛབྦཱ. ཨཏྠཏོ པན སབྦཱནེཝ ¶ ཨེཏཱནི ནིབྦཱནསྶ ཝེཝཙནཱནི. པརམཏྠཏོ ཧི དུཀྑནིརོདྷོ ཨརིཡསཙྩནྟི ནིབྦཱནཾ ཝུཙྩཏི. ཡསྨཱ པན ཏཾ ཨཱགམྨ ཏཎྷཱ ཝིརཛྫཏི ཙེཝ ནིརུཛ྄ཛྷཏི ཙ, ཏསྨཱ ཝིརཱགོཏི ཙ ནིརོདྷོཏི ཙ ཝུཙྩཏི. ཡསྨཱ ཙ ཏདེཝ ཨཱགམྨ ཏསྶཱ ཙཱགཱདཡོ ཧོནྟི, ཀཱམགུཎཱལཡེསུ ཙེཏྠ ཨེཀོཔི ཨཱལཡོ ནཏྠི, ཏསྨཱ ‘‘ཙཱགོ པཊིནིསྶགྒོ མུཏྟི ཨནཱལཡོ’’ཏི ཝུཙྩཏི.

༥༥༦. ཏཡིདཾ སནྟིལཀྑཎཾ, ཨཙྩུཏིརསཾ, ཨསྶཱསཀརཎརསཾ ཝཱ, ཨནིམིཏྟཔཙྩུཔཊྛཱནཾ, ནིཔྤཔཉྩཔཙྩུཔཊྛཱནཾ ཝཱ.

ནིབྦཱནཀཐཱ

༥༥༧. ནཏྠེཝ ནིབྦཱནཾ, སསཝིསཱཎཾ ཝིཡ ཨནུཔལབྦྷནཱིཡཏོཏི ཙེ? ན, ཨུཔཱཡེན ཨུཔལབྦྷནཱིཡཏོ. ཨུཔལབྦྷཏི ཧི ཏཾ ཏདནུརཱུཔཔཊིཔཏྟིསངྑཱཏེན ཨུཔཱཡེན, ཙེཏོཔརིཡཉཱཎེན པརེསཾ ལོཀུཏྟརཙིཏྟཾ ཝིཡ, ཏསྨཱ ‘‘ཨནུཔལབྦྷནཱིཡཏོ ནཏྠཱི’’ཏི ན ཝཏྟབྦཾ. ན ཧི ‘‘ཡཾ བཱལཔུཐུཛྫནཱ ན ཨུཔལབྷནྟི, ཏཾ ནཏྠཱི’’ཏི ཝཏྟབྦཾ.

༥༥༨. ཨཔིཙ ནིབྦཱནཾ ནཏྠཱིཏི ན ཝཏྟབྦཾ, ཀསྨཱ? པཊིཔཏྟིཡཱ ཝཉྫྷབྷཱཝཱཔཛྫནཏོ. ཨསཏི ཧི ནིབྦཱནེ སམྨཱདིཊྛིཔུརེཛཝཱཡ སཱིལཱདིཁནྡྷཏྟཡསངྒཧཱཡ སམྨཱཔཊིཔཏྟིཡཱ ཝཉྫྷབྷཱཝོ ཨཱཔཛྫཏི. ན ཙཱཡཾ ཝཉྫྷཱ, ནིབྦཱནཔཱཔནཏོཏི. ན པཊིཔཏྟིཡཱ ཝཉྫྷབྷཱཝཱཔཏྟི, ཨབྷཱཝཔཱཔཀཏྟཱཏི ཙེ. ན, ཨཏཱིཏཱནཱགཏཱབྷཱཝེཔི ནིབྦཱནཔཏྟིཡཱ ཨབྷཱཝཏོ. ཝཏྟམཱནཱནམྤི ཨབྷཱཝོ ནིབྦཱནནྟི ཙེ. ན, ཏེསཾ ཨབྷཱཝཱསམྦྷཝཏོ, ཨབྷཱཝེ ཙ ཨཝཏྟམཱནབྷཱཝཱཔཛྫནཏོ, ཝཏྟམཱནཀྑནྡྷནིསྶིཏམགྒཀྑཎེ ཙ སོཔཱདིསེསནིབྦཱནདྷཱཏུཔྤཏྟིཡཱ ཨབྷཱཝདོསཏོ. ཏདཱ ཀིལེསཱནཾ ཨཝཏྟམཱནཏྟཱ ན དོསོཏི ཙེ. ན, ཨརིཡམགྒསྶ ནིརཏྠཀབྷཱཝཱཔཛྫནཏོ. ཨེཝཉྷི སཏི ཨརིཡམགྒཀྑཎཏོ པུབྦེཔི ཀིལེསཱ ན སནྟཱིཏི ཨརིཡམགྒསྶ ནིརཏྠཀབྷཱཝོ ཨཱཔཛྫཏི. ཏསྨཱ ཨཀཱརཎམེཏཾ.

༥༥༩. ‘‘ཡོ ཁོ, ཨཱཝུསོ, རཱགཀྑཡོ’’ཏིཨཱདིཝཙནཏོ (སཾ. ནི. ༤.༣༡༥) ‘‘ཁཡོ ནིབྦཱན’’ནྟི ཙེ. ན, ཨརཧཏྟསྶཱཔི ཁཡམཏྟཱཔཛྫནཏོ. ཏམྤི ཧི ¶ ‘‘ཡོ ཁོ, ཨཱཝུསོ ¶ , རཱགཀྑཡོ’’ཏིཨཱདིནཱ (ས. ནི. ༤.༣༡༥) ནཡེན ནིདྡིཊྛཾ. ཀིཉྩ བྷིཡྻོ ནིབྦཱནསྶ ཨིཏྟརཀཱལཱདིཔྤཏྟིདོསཏོ. ཨེཝཉྷི སཏི ནིབྦཱནཾ ཨིཏྟརཀཱལཾ, སངྑཏལཀྑཎཾ, སམྨཱཝཱཡཱམནིརཔེཀྑཱདྷིགམནཱིཡབྷཱཝཉྩ ཨཱཔཛྫཏི. སངྑཏལཀྑཎཏྟཱཡེཝ ཙ སངྑཏཔརིཡཱཔནྣཾ, སངྑཏཔརིཡཱཔནྣཏྟཱ རཱགཱདཱིཧི ཨགྒཱིཧི ཨཱདིཏྟཾ, ཨཱདིཏྟཏྟཱ དུཀྑཉྩཱཏིཔི ཨཱཔཛྫཏི. ཡསྨཱ ཁཡཱ པཊྛཱཡ ན བྷིཡྻོ པཝཏྟི ནཱམ ཧོཏི, ཏསྶ ནིབྦཱནབྷཱཝཏོ ན དོསོཏི ཙེ. ན, ཏཱདིསསྶ ཁཡསྶ ཨབྷཱཝཏོ. བྷཱཝེཔི ཙསྶ ཝུཏྟཔྤཀཱརདོསཱནཏིཝཏྟནཏོ, ཨརིཡམགྒསྶ ཙ ནིབྦཱནབྷཱཝཱཔཛྫནཏོ. ཨརིཡམགྒོ ཧི དོསེ ཁཱིཎེཏི, ཏསྨཱ ཁཡོཏི ཝུཙྩཏི. ཏཏོ ཙ པཊྛཱཡ ན བྷིཡྻོ དོསཱནཾ པཝཏྟཱིཏི.

ཨནུཔྤཏྟིནིརོདྷསངྑཱཏསྶ པན ཁཡསྶ པརིཡཱཡེན ཨུཔནིསྶཡཏྟཱ, ཡསྶ ཨུཔནིསྶཡོ ཧོཏི ཏདུཔཙཱརེན ‘‘ཁཡོ’’ཏི ཝུཏྟཾ. སརཱུཔེནེཝ ཀསྨཱ ན ཝུཏྟནྟི ཙེ. ཨཏིསུཁུམཏྟཱ. ཨཏིསུཁུམཏཱ ཙསྶ བྷགཝཏོ ཨཔྤོསུཀྐབྷཱཝཱཝཧནཏོ, ཨརིཡེན ཙཀྑུནཱ པསྶིཏབྦཏོ ཙ སིདྡྷཱཏི.

༥༦༠. ཏཡིདཾ མགྒསམངྒིནཱ པཏྟབྦཏོ ཨསཱདྷཱརཎཾ, པུརིམཀོཊིཡཱ ཨབྷཱཝཏོ ཨཔྤབྷཝཾ. མགྒབྷཱཝེ བྷཱཝཏོ ན ཨཔྤབྷཝནྟི ཙེ. ན, མགྒེན ཨནུཔྤཱདནཱིཡཏོ. པཏྟབྦམེཝ ཧེཏཾ མགྒེན, ན ཨུཔྤཱདེཏབྦཾ. ཏསྨཱ ཨཔྤབྷཝམེཝ. ཨཔྤབྷཝཏྟཱ ཨཛརཱམརཎཾ. པབྷཝཛརཱམརཎཱནཾ ཨབྷཱཝཏོ ནིཙྩཾ.

ནིབྦཱནསྶེཝ ཨཎུཨཱདཱིནམྤི ནིཙྩབྷཱཝཱཔཏྟཱིཏི ཙེ. ན, ཧེཏུནོ ཨབྷཱཝཱ. ནིབྦཱནསྶ ནིཙྩཏྟཱ ཏེ ནིཙྩཱཏི ཙེ. ན, ཧེཏུལཀྑཎསྶ ཨནུཔཔཏྟིཏོ. ནིཙྩཱ ཨུཔྤཱདཱདཱིནཾ ཨབྷཱཝཏོ ནིབྦཱནཾ ཝིཡཱཏི ཙེ. ན, ཨཎུཨཱདཱིནཾ ཨསིདྡྷཏྟཱ.

༥༦༡. ཡཐཱཝུཏྟཡུཏྟིསབྦྷཱཝཏོ པན ཨིདམེཝ ནིཙྩཾ, རཱུཔསབྷཱཝཱཏིཀྐམཏོ ཨརཱུཔཾ. བུདྡྷཱདཱིནཾ ནིཊྛཱཡ ཝིསེསཱབྷཱཝཏོ ཨེཀཱཝ ནིཊྛཱ. ཡེན བྷཱཝནཱཡ པཏྟཾ, ཏསྶ ཀིལེསཝཱུཔསམཾ, ཨུཔཱདིསེསཉྩ ཨུཔཱདཱཡ པཉྙཱཔནཱིཡཏྟཱ སཧ ཨུཔཱདིསེསེན པཉྙཱཔིཡཏཱིཏི སཨུཔཱདིསེསཾ. ཡོ ཙསྶ སམུདཡཔྤཧཱནེན ཨུཔཧཏཱཡཏིཀམྨཕལསྶ ཙརིམཙིཏྟཏོ ཙ ཨུདྡྷཾ པཝཏྟིཁནྡྷཱནཾ ཨནུཔྤཱདནཏོ, ཨུཔྤནྣཱནཉྩ ཨནྟརདྷཱནཏོ ཨུཔཱདིསེསཱབྷཱཝོ ¶ , ཏཾ ཨུཔཱདཱཡ པཉྙཱཔནཱིཡཏོ ནཏྠི ཨེཏྠ ཨུཔཱདིསེསོཏི ཨནུཔཱདིསེསཾ.

ཨསིཐིལཔརཀྐམསིདྡྷེན ¶ ཉཱཎཝིསེསེན ཨདྷིགམནཱིཡཏོ, སབྦཉྙུཝཙནཏོ ཙ པརམཏྠེན སབྷཱཝཏོ ནིབྦཱནཾ ནཱཝིཛྫམཱནཾ. ཝུཏྟཉྷེཏཾ ‘‘ཨཏྠི, བྷིཀྑཝེ, ཨཛཱཏཾ ཨབྷཱུཏཾ ཨཀཏཾ ཨསངྑཏ’’ནྟི.

ཨིདཾ དུཀྑནིརོདྷནིདྡེསེ ཝིནིཙྪཡཀཐཱམུཁཾ.

མགྒནིདྡེསཀཐཱ

༥༦༢. དུཀྑནིརོདྷགཱམིནིཔཊིཔདཱནིདྡེསེ ཝུཏྟཱ པན ཨཊྛ དྷམྨཱ ཀཱམཾ ཁནྡྷནིདྡེསེཔི ཨཏྠཏོ པཀཱསིཏཱཡེཝ, ཨིདྷ པན ནེསཾ ཨེཀཀྑཎེ པཝཏྟམཱནཱནཾ ཝིསེསཱཝབོདྷནཏྠཾ ཝདཱམ. སངྑེཔཏོ ཧི ཙཏུསཙྩཔཊིཝེདྷཱཡ པཊིཔནྣསྶ ཡོགིནོ ནིབྦཱནཱརམྨཎཾ ཨཝིཛྫཱནུསཡསམུགྒྷཱཏཀཾ པཉྙཱཙཀྑུ སམྨཱདིཊྛི. སཱ སམྨཱ དསྶནལཀྑཎཱ, དྷཱཏུཔྤཀཱསནརསཱ, ཨཝིཛྫནྡྷཀཱརཝིདྡྷཾསནཔཙྩུཔཊྛཱནཱ. ཏཐཱ སམྤནྣདིཊྛིནོ ཏཾསམྤཡུཏྟཾ མིཙྪཱསངྐཔྤནིགྷཱཏཀཾ ཙེཏསོ ནིབྦཱནཔདཱབྷིནིརོཔནཾ སམྨཱསངྐཔྤོ. སོ སམྨཱ ཙིཏྟཱབྷིནིརོཔནལཀྑཎོ, ཨཔྤནཱརསོ, མིཙྪཱསངྐཔྤཔྤཧཱནཔཙྩུཔཊྛཱནོ.

ཏཐཱ པསྶཏོ ཝིཏཀྐཡཏོ ཙ ཏཾསམྤཡུཏྟཱཝ ཝཙཱིདུཙྩརིཏསམུགྒྷཱཏིཀཱ མིཙྪཱཝཱཙཱཡ ཝིརཏི སམྨཱཝཱཙཱ ནཱམ. སཱ པརིགྒཧལཀྑཎཱ, ཝིརམཎརསཱ, མིཙྪཱཝཱཙཱཔྤཧཱནཔཙྩུཔཊྛཱནཱ. ཏཐཱ ཝིརམཏོ ཏཾསམྤཡུཏྟཱཝ མིཙྪཱཀམྨནྟསམུཙྪེདིཀཱ པཱཎཱཏིཔཱཏཱདིཝིརཏི སམྨཱཀམྨནྟོ ནཱམ. སོ སམུཊྛཱཔནལཀྑཎོ, ཝིརམཎརསོ, མིཙྪཱཀམྨནྟཔྤཧཱནཔཙྩུཔཊྛཱནོ. ཡཱ པནསྶ ཏེསཾ སམྨཱཝཱཙཱཀམྨནྟཱནཾ ཝིསུདྡྷིབྷཱུཏཱ ཏཾསམྤཡུཏྟཱཝ ཀུཧནཱདིཨུཔཙྪེདིཀཱ མིཙྪཱཛཱིཝཝིརཏི, སོ སམྨཱཨཱཛཱིཝོ ནཱམ. སོ ཝོདཱནལཀྑཎོ, ཉཱཡཱཛཱིཝཔཝཏྟིརསོ, མིཙྪཱཛཱིཝཔྤཧཱནཔཙྩུཔཊྛཱནོ.

ཨཐསྶ ཡོ ཏསྶཱ སམྨཱཝཱཙཱཀམྨནྟཱཛཱིཝསངྑཱཏཱཡ སཱིལབྷཱུམིཡཾ པཏིཊྛིཏསྶ ཏདནུརཱུཔོ ཏཾསམྤཡུཏྟོཝ ཀོསཛྫསམུཙྪེདཀོ ཝཱིརིཡཱརམྦྷོ, ཨེས སམྨཱཝཱཡཱམོ ནཱམ. སོ པགྒཧལཀྑཎོ, ཨནུཔྤནྣཨཀུསལཱནུཔྤཱདནཱདིརསོ, མིཙྪཱཝཱཡཱམཔྤཧཱནཔཙྩུཔཊྛཱནོ. ཏསྶེཝཾ ཝཱཡམཏོ ཏཾསམྤཡུཏྟོཝ མིཙྪཱསཏིཝིནིདྡྷུནནོ ཙེཏསོ ཨསམྨོསོ ¶ སམྨཱསཏི ནཱམ. སཱ ཨུཔཊྛཱནལཀྑཎཱ, ཨསམྨུསྶནརསཱ, མིཙྪཱསཏིཔྤཧཱནཔཙྩུཔཊྛཱནཱ. ཨེཝཾ ཨནུཏྟརཱཡ སཏིཡཱ སཾརཀྑིཡམཱནཙིཏྟསྶ ¶ ཏཾསམྤཡུཏྟཱཝ མིཙྪཱསམཱདྷིཝིདྡྷཾསིཀཱ ཙིཏྟེཀགྒཏཱ སམྨཱསམཱདྷི ནཱམ. སོ ཨཝིཀྑེཔལཀྑཎོ, སམཱདྷཱནརསོ, མིཙྪཱསམཱདྷིཔྤཧཱནཔཙྩུཔཊྛཱནོཏི. ཨཡཾ དུཀྑནིརོདྷགཱམིནིཔཊིཔདཱནིདྡེསེ ནཡོ. ཨེཝམེཏྠ ཛཱཏིཨཱདཱིནཾ ཝིནིཙྪཡོ ཝེདིཏབྦོ.

༥༦༣. ཉཱཎཀིཙྩཏོཏི སཙྩཉཱཎསྶ ཀིཙྩཏོཔི ཝིནིཙྪཡོ ཝེདིཏབྦོ. དུཝིདྷཾ ཧི སཙྩཉཱཎཾ – ཨནུབོདྷཉཱཎཾ པཊིཝེདྷཉཱཎཉྩ. ཏཏྠ ཨནུབོདྷཉཱཎཾ ལོཀིཡཾ ཨནུསྶཝཱདིཝསེན ནིརོདྷེ མགྒེ ཙ པཝཏྟཏི. པཊིཝེདྷཉཱཎཾ ལོཀུཏྟརཾ ནིརོདྷམཱརམྨཎཾ ཀཏྭཱ ཀིཙྩཏོ ཙཏྟཱརི སཙྩཱནི པཊིཝིཛ྄ཛྷཏི. ཡཐཱཧ – ‘‘ཡོ, བྷིཀྑཝེ, དུཀྑཾ པསྶཏི, དུཀྑསམུདཡམྤི སོ པསྶཏི, དུཀྑནིརོདྷམྤི པསྶཏི, དུཀྑནིརོདྷགཱམིནིཾ པཊིཔདམྤི པསྶཏཱི’’ཏི (སཾ. ནི. ༥.༡༡༠༠) སབྦཾ ཝཏྟབྦཾ. ཏཾ པནསྶ ཀིཙྩཾ ཉཱཎདསྶནཝིསུདྡྷིཡཾ ཨཱཝིབྷཝིསྶཏི.

ཡཾ པནེཏཾ ལོཀིཡཾ, ཏཏྠ དུཀྑཉཱཎཾ པརིཡུཊྛཱནཱབྷིབྷཝཝསེན པཝཏྟམཱནཾ སཀྐཱཡདིཊྛིཾ ནིཝཏྟེཏི. སམུདཡཉཱཎཾ ཨུཙྪེདདིཊྛིཾ. ནིརོདྷཉཱཎཾ སསྶཏདིཊྛིཾ. མགྒཉཱཎཾ ཨཀིརིཡདིཊྛིཾ. དུཀྑཉཱཎཾ ཝཱ དྷུཝསུབྷསུཁཏྟབྷཱཝཝིརཧིཏེསུ ཁནྡྷེསུ དྷུཝསུབྷསུཁཏྟབྷཱཝསཉྙཱསངྑཱཏཾ ཕལེ ཝིཔྤཊིཔཏྟིཾ. སམུདཡཉཱཎཾ ཨིསྶརཔདྷཱནཀཱལསབྷཱཝཱདཱིཧི ལོཀོ པཝཏྟཏཱིཏི ཨཀཱརཎེ ཀཱརཎཱབྷིམཱནཔྤཝཏྟཾ ཧེཏུམྷི ཝིཔྤཊིཔཏྟིཾ. ནིརོདྷཉཱཎཾ ཨརཱུཔལོཀལོཀཐཱུཔིཀཱདཱིསུ ཨཔཝགྒགཱཧབྷཱུཏཾ ནིརོདྷེ ཝིཔྤཊིཔཏྟིཾ. མགྒཉཱཎཾ ཀཱམསུཁལླིཀཨཏྟཀིལམཐཱནུཡོགཔྤབྷེདེ ཨཝིསུདྡྷིམགྒེ ཝིསུདྡྷིམགྒགཱཧཝསེན པཝཏྟཾ ཨུཔཱཡེ ཝིཔྤཊིཔཏྟིཾ ནིཝཏྟེཏི. ཏེནེཏཾ ཝུཙྩཏི –

‘‘ལོཀེ ལོཀཔྤབྷཝེ, ལོཀཏྠགམེ སིཝེ ཙ ཏདུཔཱཡེ;

སམྨུཡ྄ཧཏི ཏཱཝ ནརོ, ན ཝིཛཱནཱཏི ཡཱཝ སཙྩཱནཱི’’ཏི.

ཨེཝམེཏྠ ཉཱཎཀིཙྩཏོཔི ཝིནིཙྪཡོ ཝེདིཏབྦོ.

༥༦༤. ཨནྟོགདྷཱནཾ པབྷེདཱཏི དུཀྑསཙྩསྨིཾ ཧི ཋཔེཏྭཱ ཏཎྷཉྩེཝ ཨནཱསཝདྷམྨེ ཙ སེསཱ སབྦདྷམྨཱ ཨནྟོགདྷཱ. སམུདཡསཙྩེ ཚཏྟིཾས ཏཎྷཱཝིཙརིཏཱནི. ནིརོདྷསཙྩཾ ཨསམྨིསྶཾ. མགྒསཙྩེ སམྨཱདིཊྛིམུཁེན ཝཱིམཾསིདྡྷིཔཱདཔཉྙིནྡྲིཡཔཉྙཱབལདྷམྨཝིཙཡསམྦོཛ྄ཛྷངྒཱནི. སམྨཱསངྐཔྤཱཔདེསེན ཏཡོ ¶ ནེཀྑམྨཝིཏཀྐཱདཡོ. སམྨཱཝཱཙཱཔདེསེན ཙཏྟཱརི ཝཙཱིསུཙརིཏཱནི ¶ . སམྨཱཀམྨནྟཱཔདེསེན ཏཱིཎི ཀཱཡསུཙརིཏཱནི. སམྨཱཛཱིཝམུཁེན ཨཔྤིཙྪཏཱ སནྟུཊྛིཏཱ ཙ. སབྦེསཾཡེཝ ཝཱ ཨེཏེསཾ སམྨཱཝཱཙཱཀམྨནྟཱཛཱིཝཱནཾ ཨརིཡཀནྟསཱིལཏྟཱ ཨརིཡཀནྟསཱིལསྶ ཙ སདྡྷཱཧཏྠེན པཊིགྒཧེཏབྦཏྟཱ ཏེསཾ ཨཏྠིཏཱཡ ཨཏྠིབྷཱཝཏོ སདྡྷིནྡྲིཡསདྡྷཱབལཚནྡིདྡྷིཔཱདཱ. སམྨཱཝཱཡཱམཱཔདེསེན ཙཏུབྦིདྷསམྨཔྤདྷཱནཝཱིརིཡིནྡྲིཡཝཱིརིཡབལཝཱིརིཡསམྦོཛ྄ཛྷངྒཱནི. སམྨཱསཏིཨཔདེསེན ཙཏུབྦིདྷསཏིཔཊྛཱནསཏིནྡྲིཡསཏིབལསཏིསམྦོཛ྄ཛྷངྒཱནི. སམྨཱསམཱདྷིཨཔདེསེན སཝིཏཀྐསཝིཙཱརཱདཡོ ཏཡོ སམཱདྷཱི ཙིཏྟསམཱདྷི སམཱདྷིནྡྲིཡསམཱདྷིབལཔཱིཏིཔསྶདྡྷིསམཱདྷིཨུཔེཀྑཱསམྦོཛ྄ཛྷངྒཱནི ཨནྟོགདྷཱནཱིཏི ཨེཝམེཏྠ ཨནྟོགདྷཱནཾ པབྷེདཏོཔི ཝིནིཙྪཡོ ཝེདིཏབྦོ.

༥༦༥. ཨུཔམཱཏོཏི བྷཱརོ ཝིཡ ཧི དུཀྑསཙྩཾ དཊྛབྦཾ, བྷཱརཱདཱནམིཝ སམུདཡསཙྩཾ, བྷཱརནིཀྑེཔནམིཝ ནིརོདྷསཙྩཾ, བྷཱརནིཀྑེཔནུཔཱཡོ ཝིཡ མགྒསཙྩཾ. རོགོ ཝིཡ ཙ དུཀྑསཙྩཾ, རོགནིདཱནམིཝ སམུདཡསཙྩཾ, རོགཝཱུཔསམོ ཝིཡ ནིརོདྷསཙྩཾ, བྷེསཛྫམིཝ མགྒསཙྩཾ. དུབྦྷིཀྑམིཝ ཝཱ དུཀྑསཙྩཾ, དུབྦུཊྛི ཝིཡ སམུདཡསཙྩཾ, སུབྷིཀྑམིཝ ནིརོདྷསཙྩཾ, སུཝུཊྛི ཝིཡ མགྒསཙྩཾ. ཨཔིཙ ཝེརཱི-ཝེརམཱུལ-ཝེརསམུགྒྷཱཏ-ཝེརསམུགྒྷཱཏུཔཱཡེཧི, ཝིསརུཀྑ-རུཀྑམཱུལ-མཱུལུཔཙྪེད-ཏདུཔཙྪེདུཔཱཡེཧི, བྷཡ-བྷཡམཱུལ-ནིབྦྷཡ-ཏདདྷིགམུཔཱཡེཧི, ཨོརིམཏཱིར-མཧོགྷཔཱརིམཏཱིར-ཏཾསམྤཱཔཀཝཱཡཱམེཧི ཙ ཡོཛེཏྭཱཔེཏཱནི ཨུཔམཱཏོ ཝེདིཏབྦཱནཱིཏི ཨེཝམེཏྠ ཨུཔམཱཏོ ཝིནིཙྪཡོ ཝེདིཏབྦོ.

༥༦༦. ཙཏུཀྐཏོཏི ཨཏྠི ཙེཏྠ དུཀྑཾ ན ཨརིཡསཙྩཾ, ཨཏྠི ཨརིཡསཙྩཾ ན དུཀྑཾ, ཨཏྠི དུཀྑཉྩེཝ ཨརིཡསཙྩཉྩ, ཨཏྠི ནེཝ དུཀྑཾ ན ཨརིཡསཙྩཾ. ཨེས ནཡོ སམུདཡཱདཱིསུ. ཏཏྠ མགྒསམྤཡུཏྟཱ དྷམྨཱ སཱམཉྙཕལཱནི ཙ ‘‘ཡདནིཙྩཾ ཏཾ དུཀྑ’’ནྟི (སཾ. ནི. ༣.༡༥) ཝཙནཏོ སངྑཱརདུཀྑཏཱཡ དུཀྑཾ, ན ཨརིཡསཙྩཾ. ནིརོདྷོ ཨརིཡསཙྩཾ, ན དུཀྑཾ. ཨིཏརཾ པན ཨརིཡསཙྩདྭཡཾ སིཡཱ དུཀྑཾ ཨནིཙྩཏོ, ན པན ཡསྶ པརིཉྙཱཡ བྷགཝཏི བྲཧྨཙརིཡཾ ཝུསྶཏི ཏཐཏྟེན. སབྦཱཀཱརེན པན ཨུཔཱདཱནཀྑནྡྷཔཉྩཀཾ དུཀྑཉྩེཝ ཨརིཡསཙྩཉྩ ཨཉྙཏྲ ཏཎྷཱཡ. མགྒསམྤཡུཏྟཱ དྷམྨཱ སཱམཉྙཕལཱནི ཙ ཡསྶ པརིཉྙཏྠཾ བྷགཝཏི བྲཧྨཙརིཡཾ ཝུསྶཏི ཏཐཏྟེན ནེཝ དུཀྑཾ ན ཨརིཡསཙྩཾ. ཨེཝཾ སམུདཡཱདཱིསུཔི ཡཐཱཡོགཾ ཡོཛེཏྭཱ ཙཏུཀྐཏོཔེཏྠ ཝིནིཙྪཡོ ཝེདིཏབྦོ.

༥༦༧. སུཉྙཏེཀཝིདྷཱདཱིཧཱིཏིཨེཏྠ ¶ ¶ སུཉྙཏོ ཏཱཝ པརམཏྠེན ཧི སབྦཱནེཝ སཙྩཱནི ཝེདཀཀཱརཀནིབྦུཏགམཀཱབྷཱཝཏོ སུཉྙཱནཱིཏི ཝེདིཏབྦཱནི. ཏེནེཏཾ ཝུཙྩཏི –

‘‘དུཀྑམེཝ ཧི, ན ཀོཙི དུཀྑིཏོ;

ཀཱརཀོ ན, ཀིརིཡཱཝ ཝིཛྫཏི.

ཨཏྠི ནིབྦུཏི, ན ནིབྦུཏོ པུམཱ;

མགྒམཏྠི, གམཀོ ན ཝིཛྫཏཱི’’ཏི.

ཨཐ ཝཱ,

དྷུཝསུབྷསུཁཏྟསུཉྙཾ, པུརིམདྭཡམཏྟསུཉྙམམཏཔདཾ;

དྷུཝསུཁཨཏྟཝིརཧིཏོ, མགྒོཨིཏི སུཉྙཏཱ ཏེསུ.

ནིརོདྷསུཉྙཱནི ཝཱ ཏཱིཎི, ནིརོདྷོ ཙ སེསཏྟཡསུཉྙོ. ཕལསུཉྙོ ཝཱ ཨེཏྠ ཧེཏུ སམུདཡེ དུཀྑསྶཱབྷཱཝཏོ, མགྒེ ཙ ནིརོདྷསྶ, ན ཕལེན སགབྦྷོ པཀཏིཝཱདཱིནཾ པཀཏི ཝིཡ. ཧེཏུསུཉྙཉྩ ཕལཾ དུཀྑསམུདཡཱནཾ ནིརོདྷམགྒཱནཉྩ ཨསམཝཱཡཱ, ན ཧེཏུསམཝེཏཾ ཧེཏུཕལཾ སམཝཱཡཝཱདཱིནཾ དྭིཨཎུཀཱདི ཝིཡ. ཏེནེཏཾ ཝུཙྩཏི –

‘‘ཏཡམིདྷ ནིརོདྷསུཉྙཾ, ཏཡེན ཏེནཱཔི ནིབྦུཏི སུཉྙཱ;

སུཉྙོ ཕལེན ཧེཏུ, ཕལམྤི ཏཾཧེཏུནཱ སུཉྙ’’ནྟི.

ཨེཝཾ ཏཱཝ སུཉྙཏོ ཝིནིཙྪཡོ ཝེདིཏབྦོ.

ཨེཀཝིདྷཱདིཝིནིཙྪཡཀཐཱ

༥༦༨. ཨེཀཝིདྷཱདཱིཧཱིཏི སབྦམེཝ ཙེཏྠ དུཀྑཾ ཨེཀཝིདྷཾ པཝཏྟིབྷཱཝཏོ. དུཝིདྷཾ ནཱམརཱུཔཏོ. ཏིཝིདྷཾ ཀཱམརཱུཔཱརཱུཔཱུཔཔཏྟིབྷཝབྷེདཏོ. ཙཏུབྦིདྷཾ ཙཏུཨཱཧཱརབྷེདཏོ. པཉྩཝིདྷཾ པཉྩུཔཱདཱནཀྑནྡྷབྷེདཏོ.

སམུདཡོཔི ¶ ཨེཀཝིདྷོ པཝཏྟཀབྷཱཝཏོ. དུཝིདྷོ དིཊྛིསམྤཡུཏྟཱསམྤཡུཏྟཏོ. ཏིཝིདྷོ ཀཱམབྷཝཝིབྷཝཏཎྷཱབྷེདཏོ. ཙཏུབྦིདྷོ ཙཏུམགྒཔྤཧེཡྻཏོ. པཉྩཝིདྷོ རཱུཔཱབྷིནནྡནཱདིབྷེདཏོ. ཚབྦིདྷོ ཚཏཎྷཱཀཱཡབྷེདཏོ.

ནིརོདྷོཔི ¶ ཨེཀཝིདྷོ ཨསངྑཏདྷཱཏུབྷཱཝཏོ. པརིཡཱཡེན པན དུཝིདྷོ སཨུཔཱདིསེསཨནུཔཱདིསེསབྷེདཏོ. ཏིཝིདྷོ བྷཝཏྟཡཝཱུཔསམཏོ. ཙཏུབྦིདྷོ ཙཏུམགྒཱདྷིགམནཱིཡཏོ. པཉྩཝིདྷོ པཉྩཱབྷིནནྡནཝཱུཔསམཏོ. ཚབྦིདྷོ ཚཏཎྷཱཀཱཡཀྑཡབྷེདཏོ.

མགྒོཔི ཨེཀཝིདྷོ བྷཱཝེཏབྦཏོ. དུཝིདྷོ སམཐཝིཔསྶནཱབྷེདཏོ, དསྶནབྷཱཝནཱབྷེདཏོ ཝཱ. ཏིཝིདྷོ ཁནྡྷཏྟཡབྷེདཏོ. ཨཡཉྷི སཔྤདེསཏྟཱ ནགརཾ ཝིཡ རཛྫེན ནིཔྤདེསེཧི ཏཱིཧི ཁནྡྷེཧི སངྒཧིཏོ. ཡཐཱཧ –

‘‘ན ཁོ, ཨཱཝུསོ ཝིསཱཁ, ཨརིཡེན ཨཊྛངྒིཀེན མགྒེན ཏཡོ ཁནྡྷཱ སངྒཧིཏཱ, ཏཱིཧི ཙ ཁོ, ཨཱཝུསོ ཝིསཱཁ, ཁནྡྷེཧི ཨརིཡོ ཨཊྛངྒིཀོ མགྒོ སངྒཧིཏོ. ཡཱ ཙཱཝུསོ ཝིསཱཁ, སམྨཱཝཱཙཱ, ཡོ ཙ སམྨཱཀམྨནྟོ, ཡོ ཙ སམྨཱཨཱཛཱིཝོ, ཨིམེ དྷམྨཱ སཱིལཀྑནྡྷེ སངྒཧིཏཱ. ཡོ ཙ སམྨཱཝཱཡཱམོ, ཡཱ ཙ སམྨཱསཏི, ཡོ ཙ སམྨཱསམཱདྷི, ཨིམེ དྷམྨཱ སམཱདྷིཀྑནྡྷེ སངྒཧིཏཱ. ཡཱ ཙ སམྨཱདིཊྛི, ཡོ ཙ སམྨཱསངྐཔྤོ, ཨིམེ དྷམྨཱ པཉྙཱཀྑནྡྷེ སངྒཧིཏཱ’’ཏི (མ. ནི. ༡.༤༦༢).

ཨེཏྠ ཧི སམྨཱཝཱཙཱདཡོ ཏཡོ སཱིལམེཝ, ཏསྨཱ ཏེ སཛཱཏིཏོ སཱིལཀྑནྡྷེན སངྒཧིཏཱ. ཀིཉྩཱཔི ཧི པཱལི༹ཡཾ སཱིལཀྑནྡྷེཏི བྷུམྨེན ནིདྡེསོ ཀཏོ, ཨཏྠོ པན ཀརཎཝསེནེཝ ཝེདིཏབྦོ. སམྨཱཝཱཡཱམཱདཱིསུ པན ཏཱིསུ སམཱདྷི ཨཏྟནོ དྷམྨཏཱཡ ཨཱརམྨཎེ ཨེཀགྒབྷཱཝེན ཨཔྤེཏུཾ ན སཀྐོཏི, ཝཱིརིཡེ པན པགྒཧཀིཙྩཾ སཱདྷེནྟེ སཏིཡཱ ཙ ཨཔིལཱཔནཀིཙྩཾ སཱདྷེནྟིཡཱ ལདྡྷུཔཀཱརོ ཧུཏྭཱ སཀྐོཏི.

ཏཏྲཱཡཾ ཨུཔམཱ – ཡཐཱ ཧི ནཀྑཏྟཾ ཀཱིལི༹སྶཱམཱཏི ཨུཡྻཱནཾ པཝིཊྛེསུ ཏཱིསུ སཧཱཡེསུ ཨེཀོ སུཔུཔྥིཏཾ ཙམྤཀརུཀྑཾ དིསྭཱ ཧཏྠཾ ཨུཀྑིཔིཏྭཱ གཧེཏུམྤི ན སཀྐུཎེཡྻ. ཨཐསྶ དུཏིཡོ ཨོནམིཏྭཱ ¶ པིཊྛིཾ དདེཡྻ, སོ ཏསྶ པིཊྛིཡཾ ཋཏྭཱཔི ཀམྤམཱནོ གཧེཏུཾ ན སཀྐུཎེཡྻ. ཨཐསྶ ཨིཏརོ ཨཾསཀཱུཊཾ ཨུཔནཱམེཡྻ. སོ ཨེཀསྶ པིཊྛིཡཾ ཋཏྭཱ ཨེཀསྶ ཨཾསཀཱུཊཾ ཨོལུབྦྷ ཡཐཱརུཙི པུཔྥཱནི ཨོཙིནིཏྭཱ པིལ༹ནྡྷིཏྭཱ ནཀྑཏྟཾ ཀཱིལེ༹ཡྻ. ཨེཝཾསམྤདམིདཾ དཊྛབྦཾ.

ཨེཀཏོ ¶ ཨུཡྻཱནཾ པཝིཊྛཱ ཏཡོ སཧཱཡཱ ཝིཡ ཧི ཨེཀཏོ ཛཱཏཱ སམྨཱཝཱཡཱམཱདཡོ ཏཡོ དྷམྨཱ. སུཔུཔྥིཏཙམྤཀོ ཝིཡ ཨཱརམྨཎཾ. ཧཏྠཾ ཨུཀྑིཔིཏྭཱཔི གཧེཏུཾ ཨསཀྐོནྟོ ཝིཡ ཨཏྟནོ དྷམྨཏཱཡ ཨཱརམྨཎེ ཨེཀགྒབྷཱཝེན ཨཔྤེཏུཾ ཨསཀྐོནྟོ སམཱདྷི. པིཊྛིཾ དཏྭཱ ཨོནཏསཧཱཡོ ཝིཡ ཝཱཡཱམོ. ཨཾསཀཱུཊཾ དཏྭཱ ཋིཏསཧཱཡོ ཝིཡ སཏི. ཡཐཱ ཏེསུ ཨེཀསྶ པིཊྛིཡཾ ཋཏྭཱ ཨེཀསྶ ཨཾསཀཱུཊཾ ཨོལུབྦྷ ཨིཏརོ ཡཐཱརུཙི པུཔྥཾ གཧེཏུཾ སཀྐོཏི, ཨེཝམེཝ ཝཱིརིཡེ པགྒཧཀིཙྩཾ སཱདྷེནྟེ སཏིཡཱ ཙ ཨཔིལཱཔནཀིཙྩཾ སཱདྷེནྟིཡཱ ལདྡྷུཔཀཱརོ སམཱདྷི སཀྐོཏི ཨཱརམྨཎེ ཨེཀགྒབྷཱཝེན ཨཔྤེཏུཾ. ཏསྨཱ སམཱདྷིཡེཝེཏྠ སཛཱཏིཏོ སམཱདྷིཀྑནྡྷེན སངྒཧིཏོ, ཝཱཡཱམསཏིཡོ པན ཀིརིཡཏོ སངྒཧིཏཱ ཧོནྟི.

སམྨཱདིཊྛིསམྨཱསངྐཔྤེསུཔི པཉྙཱ ཨཏྟནོ དྷམྨཏཱཡ ཨནིཙྩཾ དུཀྑམནཏྟཱཏི ཨཱརམྨཎཾ ནིཙྪེཏུཾ ན སཀྐོཏི. ཝིཏཀྐེ པན ཨཱཀོཊེཏྭཱ ཨཱཀོཊེཏྭཱ དེནྟེ སཀྐོཏི. ཀཐཾ? ཡཐཱ ཧི ཧེརཉྙིཀོ ཀཧཱཔཎཾ ཧཏྠེ ཋཔེཏྭཱ སབྦབྷཱགེསུ ཨོལོཀེཏུཀཱམོ སམཱནོཔི ན ཙཀྑུཏལེནེཝ པརིཝཏྟེཏུཾ སཀྐོཏི. ཨངྒུལིཔབྦེཧི པན པརིཝཏྟེཏྭཱ པརིཝཏྟེཏྭཱ ཨིཏོ ཙིཏོ ཙ ཨོལོཀེཏུཾ སཀྐོཏི, ཨེཝམེཝ ན པཉྙཱ ཨཏྟནོ དྷམྨཏཱཡ ཨནིཙྩཱདིཝསེན ཨཱརམྨཎཾ ནིཙྪེཏུཾ སཀྐོཏི. ཨབྷིནིརོཔནལཀྑཎེན པན ཨཱཧནནཔརིཡཱཧནནརསེན ཝིཏཀྐེན ཨཱཀོཊེནྟེན ཝིཡ པརིཝཏྟེནྟེན ཝིཡ ཙ ཨཱདཱཡཱདཱཡ དིནྣམེཝ ནིཙྪེཏུཾ སཀྐོཏི. ཏསྨཱ ཨིདྷཱཔི སམྨཱདིཊྛིཡེཝ སཛཱཏིཏོ པཉྙཱཀྑནྡྷེན སངྒཧིཏཱ, སམྨཱསངྐཔྤོ པན ཀིརིཡཝསེན སངྒཧིཏོ ཧོཏི.

ཨིཏི ཨིམེཧི ཏཱིཧི ཁནྡྷེཧི མགྒོ སངྒཧཾ གཙྪཏི. ཏེན ཝུཏྟཾ ‘‘ཏིཝིདྷོ ཁནྡྷཏྟཡབྷེདཏོ’’ཏི. ཙཏུབྦིདྷོ སོཏཱཔཏྟིམགྒཱདིཝསེནེཝ.

ཨཔིཙ སབྦཱནེཝ སཙྩཱནི ཨེཀཝིདྷཱནི ཨཝིཏཐཏྟཱ, ཨབྷིཉྙེཡྻཏྟཱ ཝཱ. དུཝིདྷཱནི ལོཀིཡལོཀུཏྟརཏོ, སངྑཏཱསངྑཏཏོ ཝཱ. ཏིཝིདྷཱནི དསྶན-བྷཱཝནཱཧི པཧཱཏབྦཏོ, ཨཔྤཧཱཏབྦཏོ ཙ. ཙཏུབྦིདྷཱནི པརིཉྙེཡྻཱདིབྷེདཏོཏི ཨེཝམེཏྠ ཨེཀཝིདྷཱདཱིཧི ཝིནིཙྪཡོ ཝེདིཏབྦོ.

༥༦༩. སབྷཱགཝིསབྷཱགཏོཏི ¶ ¶ སབྦཱནེཝ སཙྩཱནི ཨཉྙམཉྙཾ སབྷཱགཱནི ཨཝིཏཐཏོ ཨཏྟསུཉྙཏོ དུཀྐརཔཊིཝེདྷཏོ ཙ. ཡཐཱཧ –

‘‘ཏཾ ཀིཾ མཉྙསི, ཨཱནནྡ, ཀཏམཾ ནུ ཁོ དུཀྐརཏརཾ ཝཱ དུརབྷིསམྦྷཝཏརཾ ཝཱ, ཡོ ཝཱ དཱུརཏོཝ སུཁུམེན ཏཱལ༹ཙྪིགྒལེ༹ན ཨསནཾ ཨཏིཔཱཏེཡྻ པོངྑཱནུཔོངྑཾ ཨཝིརཱདྷིཏཾ, ཡོ ཝཱ སཏདྷཱ བྷིནྣསྶ ཝཱལསྶ ཀོཊིཡཱ ཀོཊིཾ པཊིཝིཛ྄ཛྷེཡྻཱཏི? ཨེཏདེཝ, བྷནྟེ, དུཀྐརཏརཉྩེཝ དུརབྷིསམྦྷཝཏརཉྩ, ཡོ ཝཱ སཏདྷཱ བྷིནྣསྶ ཝཱལསྶ ཀོཊིཡཱ ཀོཊིཾ པཊིཝིཛ྄ཛྷེཡྻཱཏི. ཏཏོ ཁོ ཏེ, ཨཱནནྡ, དུཔྤཊིཝིཛ྄ཛྷཏརཾ པཊིཝིཛ྄ཛྷནྟི. ཡེ ཨིདཾ དུཀྑནྟི ཡཐཱབྷཱུཏཾ པཊིཝིཛ྄ཛྷནྟི…པེ… ཨཡཾ དུཀྑནིརོདྷགཱམིནཱི པཊིཔདཱཏི ཡཐཱབྷཱུཏཾ པཊིཝིཛ྄ཛྷནྟཱི’’ཏི (སཾ. ནི. ༥.༡༡༡༥).

ཝིསབྷཱགཱནི སལཀྑཎཝཝཏྠཱནཏོ. པུརིམཱནི ཙ དྭེ སབྷཱགཱནི དུརཝགཱཧཏྠེན གམྦྷཱིརཏྟཱ ལོཀིཡཏྟཱ སཱསཝཏྟཱ ཙ. ཝིསབྷཱགཱནི ཕལཧེཏུབྷེདཏོ པརིཉྙེཡྻཔྤཧཱཏབྦཏོ ཙ. པཙྪིམཱནིཔི དྭེ སབྷཱགཱནི གམྦྷཱིརཏྟེན དུརཝགཱཧཏྟཱ ལོཀུཏྟརཏྟཱ ཨནཱསཝཏྟཱ ཙ. ཝིསབྷཱགཱནི ཝིསཡཝིསཡཱིབྷེདཏོ སཙྪིཀཱཏབྦབྷཱཝེཏབྦཏོ ཙ. པཋམཏཏིཡཱནི ཙཱཔི སབྷཱགཱནི ཕལཱཔདེསཏོ. ཝིསབྷཱགཱནི སངྑཏཱསངྑཏཏོ. དུཏིཡཙཏུཏྠཱནི ཙཱཔི སབྷཱགཱནི ཧེཏུཨཔདེསཏོ. ཝིསབྷཱགཱནི ཨེཀནྟཀུསལཱཀུསལཏོ. པཋམཙཏུཏྠཱནི ཙཱཔི སབྷཱགཱནི སངྑཏཏོ. ཝིསབྷཱགཱནི ལོཀིཡལོཀུཏྟརཏོ. དུཏིཡཏཏིཡཱནི ཙཱཔི སབྷཱགཱནི ནེཝསེཀྑཱནཱསེཀྑབྷཱཝཏོ. ཝིསབྷཱགཱནི སཱརམྨཎཱནཱརམྨཎཏོ.

ཨིཏི ཨེཝཾ པཀཱརེཧི, ནཡེཧི ཙ ཝིཙཀྑཎོ;

ཝིཛཉྙཱ ཨརིཡསཙྩཱནཾ, སབྷཱགཝིསབྷཱགཏནྟི.

ཨིཏི སཱདྷུཛནཔཱམོཛྫཏྠཱཡ ཀཏེ ཝིསུདྡྷིམགྒེ

པཉྙཱབྷཱཝནཱདྷིཀཱརེ

ཨིནྡྲིཡསཙྩནིདྡེསོ ནཱམ

སོལ༹སམོ པརིཙྪེདོ.

༡༧. པཉྙཱབྷཱུམིནིདྡེསོ

པཊིཙྩསམུཔྤཱདཀཐཱ

༥༧༠. ཨིདཱནི ¶ ¶ ‘‘ཁནྡྷཱཡཏནདྷཱཏུཨིནྡྲིཡསཙྩཔཊིཙྩསམུཔྤཱདཱདིབྷེདཱ དྷམྨཱ བྷཱུམཱི’’ཏི ཨེཝཾ ཝུཏྟེསུ ཨིམིསྶཱ པཉྙཱཡ བྷཱུམིབྷཱུཏེསུ དྷམྨེསུ ཡསྨཱ པཊིཙྩསམུཔྤཱདོཙེཝ, ཨཱདིསདྡེན སངྒཧིཏཱ པཊིཙྩསམུཔྤནྣཱ དྷམྨཱ ཙ ཨཝསེསཱ ཧོནྟི, ཏསྨཱ ཏེསཾ ཝཎྞནཱཀྐམོ ཨནུཔྤཏྟོ.

ཏཏྠ ཨཝིཛྫཱདཡོ ཏཱཝ དྷམྨཱ པཊིཙྩསམུཔྤཱདོཏི ཝེདིཏབྦཱ. ཝུཏྟཉྷེཏཾ བྷགཝཏཱ –

‘‘ཀཏམོ ཙ, བྷིཀྑཝེ, པཊིཙྩསམུཔྤཱདོ? ཨཝིཛྫཱཔཙྩཡཱ, བྷིཀྑཝེ, སངྑཱརཱ, སངྑཱརཔཙྩཡཱ ཝིཉྙཱཎཾ, ཝིཉྙཱཎཔཙྩཡཱ ནཱམརཱུཔཾ, ནཱམརཱུཔཔཙྩཡཱ སལཱ༹ཡཏནཾ, སལཱ༹ཡཏནཔཙྩཡཱ ཕསྶོ, ཕསྶཔཙྩཡཱ ཝེདནཱ, ཝེདནཱཔཙྩཡཱ ཏཎྷཱ, ཏཎྷཱཔཙྩཡཱ ཨུཔཱདཱནཾ, ཨུཔཱདཱནཔཙྩཡཱ བྷཝོ, བྷཝཔཙྩཡཱ ཛཱཏི, ཛཱཏིཔཙྩཡཱ ཛརཱམརཎཾ སོཀཔརིདེཝདུཀྑདོམནསྶུཔཱཡཱསཱ སམྦྷཝནྟི. ཨེཝམེཏསྶ ཀེཝལསྶ དུཀྑཀྑནྡྷསྶ སམུདཡོ ཧོཏི. ཨཡཾ ཝུཙྩཏི, བྷིཀྑཝེ, པཊིཙྩསམུཔྤཱདོ’’ཏི (སཾ. ནི. ༢.༡).

ཛརཱམརཎཱདཡོ པན པཊིཙྩསམུཔྤནྣཱ དྷམྨཱཏི ཝེདིཏབྦཱ. ཝུཏྟཉྷེཏཾ བྷགཝཏཱ –

‘‘ཀཏམེ ཙ, བྷིཀྑཝེ, པཊིཙྩསམུཔྤནྣཱ དྷམྨཱ? ཛརཱམརཎཾ, བྷིཀྑཝེ, ཨནིཙྩཾ སངྑཏཾ པཊིཙྩསམུཔྤནྣཾ ཁཡདྷམྨཾ ཝཡདྷམྨཾ ཝིརཱགདྷམྨཾ ནིརོདྷདྷམྨཾ. ཛཱཏི, བྷིཀྑཝེ…པེ… བྷཝོ… ཨུཔཱདཱནཾ… ཏཎྷཱ… ཝེདནཱ… ཕསྶོ… སལཱ༹ཡཏནཾ… ནཱམརཱུཔཾ… ཝིཉྙཱཎཾ… སངྑཱརཱ… ཨཝིཛྫཱ, བྷིཀྑཝེ, ཨནིཙྩཱ སངྑཏཱ པཊིཙྩསམུཔྤནྣཱ ¶ ཁཡདྷམྨཱ ཝཡདྷམྨཱ ཝིརཱགདྷམྨཱ ནིརོདྷདྷམྨཱ. ཨིམེ ཝུཙྩནྟི, བྷིཀྑཝེ, པཊིཙྩསམུཔྤནྣཱ དྷམྨཱ’’ཏི (སཾ. ནི. ༢.༢༠).

༥༧༡. ཨཡཾ པནེཏྠ སངྑེཔོ. པཊིཙྩསམུཔྤཱདོཏི པཙྩཡདྷམྨཱ ཝེདིཏབྦཱ. པཊིཙྩསམུཔྤནྣཱ དྷམྨཱཏི ཏེཧི ཏེཧི པཙྩཡེཧི ནིབྦཏྟདྷམྨཱ. ཀཐམིདཾ ཛཱནིཏབྦནྟི ¶ ཙེ? བྷགཝཏོ ཝཙནེན. བྷགཝཏཱ ཧི པཊིཙྩསམུཔྤཱདཔཊིཙྩསམུཔྤནྣདྷམྨདེསནཱསུཏྟེ –

‘‘ཀཏམོ ཙ, བྷིཀྑཝེ, པཊིཙྩསམུཔྤཱདོ? ཛཱཏིཔཙྩཡཱ, བྷིཀྑཝེ, ཛརཱམརཎཾ, ཨུཔྤཱདཱ ཝཱ ཏཐཱགཏཱནཾ ཨནུཔྤཱདཱ ཝཱ ཏཐཱགཏཱནཾ ཋིཏཱཝ སཱ དྷཱཏུ དྷམྨཊྛིཏཏཱ དྷམྨནིཡཱམཏཱ ཨིདཔྤཙྩཡཏཱ. ཏཾ ཏཐཱགཏོ ཨབྷིསམྦུཛ྄ཛྷཏི ཨབྷིསམེཏི, ཨབྷིསམྦུཛ྄ཛྷིཏྭཱ ཨབྷིསམེཏྭཱ ཨཱཙིཀྑཏི དེསེཏི པཉྙཔེཏི པཊྛཔེཏི ཝིཝརཏི ཝིབྷཛཏི ཨུཏྟཱནཱིཀརོཏི, པསྶཐཱཏི ཙཱཧ. ཛཱཏིཔཙྩཡཱ, བྷིཀྑཝེ, ཛརཱམརཎཾ. བྷཝཔཙྩཡཱ, བྷིཀྑཝེ, ཛཱཏི…པེ… ཨཝིཛྫཱཔཙྩཡཱ, བྷིཀྑཝེ, སངྑཱརཱ ཨུཔྤཱདཱ ཝཱ ཏཐཱགཏཱནཾ…པེ… ཨུཏྟཱནཱིཀརོཏི པསྶཐཱཏི ཙཱཧ. ཨཝིཛྫཱཔཙྩཡཱ, བྷིཀྑཝེ, སངྑཱརཱ. ཨིཏི ཁོ, བྷིཀྑཝེ, ཡཱ ཏཏྲ ཏཐཏཱ ཨཝིཏཐཏཱ ཨནཉྙཐཏཱ ཨིདཔྤཙྩཡཏཱ. ཨཡཾ ཝུཙྩཏི, བྷིཀྑཝེ, པཊིཙྩསམུཔྤཱདོ’’ཏི (སཾ. ནི. ༢.༢༠).

༥༧༢. ཨེཝཾ པཊིཙྩསམུཔྤཱདཾ དེསེནྟེན ཏཐཏཱདཱིཧི ཝེཝཙནེཧི པཙྩཡདྷམྨཱཝ པཊིཙྩསམུཔྤཱདོཏི ཝུཏྟཱ. ཏསྨཱ ཛརཱམརཎཱདཱིནཾ དྷམྨཱནཾ པཙྩཡལཀྑཎོ པཊིཙྩསམུཔྤཱདོ, དུཀྑཱནུབནྡྷནརསོ, ཀུམྨགྒཔཙྩུཔཊྛཱནོཏི ཝེདིཏབྦོ.

སོ པནཱཡཾ ཏེཧི ཏེཧི པཙྩཡེཧི ཨནཱུནཱདྷིཀེཧེཝ ཏསྶ ཏསྶ དྷམྨསྶ སམྦྷཝཏོ ཏཐཏཱཏི, སཱམགྒིཾ ཨུཔགཏེསུ པཙྩཡེསུ མུཧུཏྟམྤི ཏཏོ ནིབྦཏྟདྷམྨཱནཾ ཨསམྦྷཝཱབྷཱཝཏོ ཨཝིཏཐཏཱཏི, ཨཉྙདྷམྨཔཙྩཡེཧི ཨཉྙདྷམྨཱནུཔྤཏྟིཏོ ཨནཉྙཐཏཱཏི, ཡཐཱཝུཏྟཱནཾ ཨེཏེསཾ ཛརཱམརཎཱདཱིནཾ པཙྩཡཏོ ཝཱ པཙྩཡསམཱུཧཏོ ཝཱ ཨིདཔྤཙྩཡཏཱཏི ཝུཏྟོ.

༥༧༣. ཏཏྲཱཡཾ ཝཙནཏྠོ, ཨིམེསཾ པཙྩཡཱ ཨིདཔྤཙྩཡཱ. ཨིདཔྤཙྩཡཱ ཨེཝ ཨིདཔྤཙྩཡཏཱ. ཨིདཔྤཙྩཡཱནཾ ཝཱ སམཱུཧོ ཨིདཔྤཙྩཡཏཱ. ལཀྑཎཾ པནེཏྠ སདྡསཏྠཏོ པརིཡེསིཏབྦཾ.

༥༧༤. ཀེཙི ¶ པན པཊིཙྩ སམྨཱ ཙ ཏིཏྠིཡཔརིཀཔྤིཏཔཀཏིཔུརིསཱདིཀཱརཎནིརཔེཀྑོ ཨུཔྤཱདོ པཊིཙྩསམུཔྤཱདོཏི ཨེཝཾ ཨུཔྤཱདམཏྟཾ པཊིཙྩསམུཔྤཱདོཏི ཝདནྟི ¶ , ཏཾ ན ཡུཛྫཏི. ཀསྨཱ? སུཏྟཱབྷཱཝཏོ, སུཏྟཝིརོདྷཏོ, གམྦྷཱིརནཡཱསམྦྷཝཏོ, སདྡབྷེདཏོ ཙ. ‘‘ཨུཔྤཱདམཏྟཾ པཊིཙྩསམུཔྤཱདོ’’ཏི ཧི སུཏྟཾ ནཏྠི. ཏཾ ‘‘པཊིཙྩསམུཔྤཱདོ’’ཏི ཙ ཝདནྟསྶ པདེསཝིཧཱརསུཏྟཝིརོདྷོ ཨཱཔཛྫཏི. ཀཐཾ? བྷགཝཏོ ཧི ‘‘ཨཐ ཁོ བྷགཝཱ རཏྟིཡཱ པཋམཾ ཡཱམཾ པཊིཙྩསམུཔྤཱདཾ ཨནུལོམཔཊིལོམཾ མནསཱཀཱསཱི’’ཏི (མཧཱཝ. ༡) ཨཱདིཝཙནཏོ པཊིཙྩསམུཔྤཱདམནསིཀཱརོ པཋམཱབྷིསམྦུདྡྷཝིཧཱརོ, པདེསཝིཧཱརོ ཙ ཏསྶེཀདེསཝིཧཱརོ. ཡཐཱཧ ‘‘ཡེན སྭཱཧཾ, བྷིཀྑཝེ, ཝིཧཱརེན པཋམཱབྷིསམྦུདྡྷོ ཝིཧརཱམི, ཏསྶ པདེསེན ཝིཧཱསི’’ནྟི (སཾ. ནི. ༥.༡༡). ཏཏྲ ཙ པཙྩཡཱཀཱརདསྶནེན ཝིཧཱསི, ན ཨུཔྤཱདམཏྟདསྶནེནཱཏི. ཡཐཱཧ ‘‘སོ ཨེཝཾ པཛཱནཱམི མིཙྪཱདིཊྛིཔཙྩཡཱཔི ཝེདཡིཏཾ སམྨཱདིཊྛིཔཙྩཡཱཔི ཝེདཡིཏཾ མིཙྪཱསངྐཔྤཔཙྩཡཱཔི ཝེདཡིཏ’’ནྟི (སཾ. ནི. ༥.༡༡) སབྦཾ ཝིཏྠཱརེཏབྦཾ. ཨེཝཾ ཨུཔྤཱདམཏྟཾ ‘‘པཊིཙྩསམུཔྤཱདོ’’ཏི ཝདནྟསྶ པདེསཝིཧཱརསུཏྟཝིརོདྷོ ཨཱཔཛྫཏི. ཏཐཱ ཀཙྩཱནསུཏྟཝིརོདྷོ.

ཀཙྩཱནསུཏྟེཔི ཧི ‘‘ལོཀསམུདཡཾ ཁོ, ཀཙྩཱན, ཡཐཱབྷཱུཏཾ སམྨཔྤཉྙཱཡ པསྶཏོ ཡཱ ལོཀེ ནཏྠིཏཱ, སཱ ན ཧོཏཱི’’ཏི (སཾ. ནི. ༢.༡༥) ཨནུལོམཔཊིཙྩསམུཔྤཱདོ ལོཀཔཙྩཡཏོ ‘‘ལོཀསམུདཡོ’’ཏི ཨུཙྪེདདིཊྛིསམུགྒྷཱཏཏྠཾ པཀཱསིཏོ, ན ཨུཔྤཱདམཏྟཾ. ན ཧི ཨུཔྤཱདམཏྟདསྶནེན ཨུཙྪེདདིཊྛིཡཱ སམུགྒྷཱཏོ ཧོཏི. པཙྩཡཱནུཔརམདསྶནེན པན ཧོཏི. པཙྩཡཱནུཔརམེ ཕལཱནུཔརམཏོཏི. ཨེཝཾ ཨུཔྤཱདམཏྟཾ ‘‘པཊིཙྩསམུཔྤཱདོ’’ཏི ཝདནྟསྶ ཀཙྩཱནསུཏྟཝིརོདྷོཔི ཨཱཔཛྫཏི.

གམྦྷཱིརནཡཱསམྦྷཝཏོཏི ཝུཏྟཾ ཁོ པནེཏཾ བྷགཝཏཱ ‘‘གམྦྷཱིརོ ཙཱཡཾ, ཨཱནནྡ, པཊིཙྩསམུཔྤཱདོ གམྦྷཱིརཱཝབྷཱསོ ཙཱ’’ཏི (དཱི. ནི. ༢.༩༥; སཾ. ནི. ༢.༦༠). གམྦྷཱིརཏྟཉྩ ནཱམ ཙཏུབྦིདྷཾ, ཏཾ པརཏོ ཝཎྞཡིསྶཱམ. ཏཾ ཨུཔྤཱདམཏྟེ ནཏྠི. ཙཏུབྦིདྷནཡཔཊིམཎྜིཏཉྩེཏཾ པཊིཙྩསམུཔྤཱདཾ ཝཎྞཡནྟི, ཏམྤི ནཡཙཏུཀྐཾ ཨུཔྤཱདམཏྟེ ནཏྠཱིཏི གམྦྷཱིརནཡཱསམྦྷཝཏོཔི ན ཨུཔྤཱདམཏྟཾ པཊིཙྩསམུཔྤཱདོ.

༥༧༥. སདྡབྷེདཏོཏི པཊིཙྩསདྡོ ཙ པནཱཡཾ སམཱནེ ཀཏྟརི པུབྦཀཱལེ པཡུཛྫམཱནོ ཨཏྠསིདྡྷིཀརོ ¶ ཧོཏི. སེཡྻཐིདཾ, ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎ’’ནྟི (སཾ. ནི. ༢.༤༣). ཨིདྷ པན བྷཱཝསཱདྷནེན ཨུཔྤཱདསདྡེན ¶ སདྡྷིཾ པཡུཛྫམཱནོ སམཱནསྶ ཀཏྟུ ཨབྷཱཝཏོ སདྡབྷེདཾ གཙྪཏི, ན ཙ ཀིཉྩི ཨཏྠཾ སཱདྷེཏཱིཏི སདྡབྷེདཏོཔི ན ཨུཔྤཱདམཏྟཾ པཊིཙྩསམུཔྤཱདོཏི.

ཏཏྠ སིཡཱ – ‘‘ཧོཏི-སདྡེན སདྡྷིཾ ཡོཛཡིསྶཱམ ‘པཊིཙྩསམུཔྤཱདོ ཧོཏཱི’ཏི’’, ཏཾ ན ཡུཏྟཾ. ཀསྨཱ? ཡོགཱབྷཱཝཏོ ཙེཝ, ཨུཔྤཱདསྶ ཙ ཨུཔྤཱདཔཏྟིདོསཏོ. ‘‘པཊིཙྩསམུཔྤཱདཾ ཝོ, བྷིཀྑཝེ, དེསེསྶཱམི. ཀཏམོ ཙ, བྷིཀྑཝེ, པཊིཙྩསམུཔྤཱདོ…པེ… ཨཡཾ ཝུཙྩཏི, བྷིཀྑཝེ, པཊིཙྩསམུཔྤཱདོ’’ཏི (སཾ. ནི. ༢.༡). ཨིམེསུ ཧི པདེསུ ཨེཀེནཔི སདྡྷིཾ ཧོཏི-སདྡོ ཡོགཾ ན གཙྪཏི, ན ཙ ཨུཔྤཱདོ ཧོཏི. སཙེ བྷཝེཡྻ, ཨུཔྤཱདསྶཱཔི ཨུཔྤཱདོ པཱཔུཎེཡྻཱཏི.

༥༧༦. ཡེཔི མཉྙནྟི ‘‘ཨིདཔྤཙྩཡཱནཾ བྷཱཝོ ཨིདཔྤཙྩཡཏཱ, བྷཱཝོ ཙ ནཱམ ཡོ ཨཱཀཱརོ ཨཝིཛྫཱདཱིནཾ སངྑཱརཱདིཔཱཏུབྷཱཝེ ཧེཏུ, སོ. ཏསྨིཉྩ སངྑཱརཝིཀཱརེ པཊིཙྩསམུཔྤཱདསཉྙཱ’’ཏི, ཏེསཾ ཏཾ ན ཡུཛྫཏི. ཀསྨཱ? ཨཝིཛྫཱདཱིནཾ ཧེཏུཝཙནཏོ. བྷགཝཏཱ ཧི ‘‘ཏསྨཱཏིཧ, ཨཱནནྡ, ཨེསེཝ ཧེཏུ, ཨེཏཾ ནིདཱནཾ, ཨེས སམུདཡོ, ཨེས པཙྩཡོ ཛརཱམརཎསྶ ཡདིདཾ ཛཱཏི…པེ… སངྑཱརཱནཾ, ཡདིདཾ ཨཝིཛྫཱ’’ཏི (དཱི. ནི. ༢.༩༨ ཨཱདཡོ) ཨེཝཾ ཨཝིཛྫཱདཡོཝ ཧེཏཱུཏི ཝུཏྟཱ, ན ཏེསཾ ཝིཀཱརོ. ཏསྨཱ ‘‘པཊིཙྩསམུཔྤཱདོཏི པཙྩཡདྷམྨཱ ཝེདིཏབྦཱ’’ཏི ཨིཏི ཡཾ ཏཾ ཝུཏྟཾ, ཏཾ སམྨཱ ཝུཏྟནྟི ཝེདིཏབྦཾ.

༥༧༧. ཡཱ པནེཏྠ ‘‘པཊིཙྩསམུཔྤཱདོ’’ཏི ཨིམཱཡ བྱཉྫནཙྪཱཡཱཡ ཨུཔྤཱདོཡེཝཱཡཾ ཝུཏྟོཏི སཉྙཱ ཨུཔྤཛྫཏི, སཱ ཨིམསྶ པདསྶ ཨེཝམཏྠཾ གཧེཏྭཱ ཝཱུཔསམེཏབྦཱ. བྷགཝཏཱ ཧི,

དྭེདྷཱ ཏཏོ པཝཏྟེ, དྷམྨསམཱུཧེ ཡཏོ ཨིདཾ ཝཙནཾ;

ཏཔྤཙྩཡོ ཏཏོཡཾ, ཕལོཔཙཱརེན ཨིཏི ཝུཏྟོ.

ཡོ ཧི ཨཡཾ པཙྩཡཏཱཡ པཝཏྟོ དྷམྨསམཱུཧོ, ཏཏྠ པཊིཙྩསམུཔྤཱདོཏི ཨིདཾ ཝཙནཾ དྭིདྷཱ ཨིཙྪནྟི. སོ ཧི ཡསྨཱ པཏཱིཡམཱནོ ཧིཏཱཡ སུཁཱཡ ཙ སཾཝཏྟཏི, ཏསྨཱ པཙྩེཏུམརཧནྟི ¶ ནཾ པཎྜིཏཱཏི པཊིཙྩོ. ཨུཔྤཛྫམཱནོ ཙ སཧ སམྨཱ ཙ ཨུཔྤཛྫཏི, ན ཨེཀེཀཏོ, ནཱཔི ཨཧེཏུཏོཏི སམུཔྤཱདོ. ཨེཝཾ པཊིཙྩོ ཙ སོ སམུཔྤཱདོ ཙཱཏི པཊིཙྩསམུཔྤཱདོ ¶ . ཨཔིཙ སཧ ཨུཔྤཛྫཏཱིཏི སམུཔྤཱདོ, པཙྩཡསཱམགྒིཾ པན པཊིཙྩ ཨཔཙྩཀྑཱཡཱཏི ཨེཝམྤི པཊིཙྩསམུཔྤཱདོ. ཏསྶ ཙཱཡཾ ཧེཏུསམཱུཧོ པཙྩཡོཏི ཏཔྤཙྩཡཏྟཱ ཨཡམྤི, ཡཐཱ ལོཀེ སེམྷསྶ པཙྩཡོ གུལོ༹ སེམྷོ གུལོ༹ཏི ཝུཙྩཏི, ཡཐཱ ཙ སཱསནེ སུཁཔྤཙྩཡོ བུདྡྷཱནཾ ཨུཔྤཱདོ ‘‘སུཁོ བུདྡྷཱནཾ ཨུཔྤཱདོ’’ཏི ཝུཙྩཏི, ཏཐཱ པཊིཙྩསམུཔྤཱདོ ཨིཙྩེཝ ཕལཝོཧཱརེན ཝུཏྟོཏི ཝེདིཏབྦོ.

༥༧༨. ཨཐ ཝཱ,

པཊིམུཁམིཏོཏི ཝུཏྟོ, ཧེཏུསམཱུཧོ ཨཡཾ པཊིཙྩོཏི;

སཧིཏེ ཨུཔྤཱདེཏི ཙ, ཨིཏི ཝུཏྟོ སོ སམུཔྤཱདོ.

ཡོ ཧི ཨེས སངྑཱརཱདཱིནཾ པཱཏུབྷཱཝཱཡ ཨཝིཛྫཱདིཨེཀེཀཧེཏུསཱིསེན ནིདྡིཊྛོ ཧེཏུསམཱུཧོ, སོ སཱདྷཱརཎཕལནིཔྥཱདཀཊྛེན ཨཝེཀལླཊྛེན ཙ སཱམགྒིཨངྒཱནཾ ཨཉྙམཉྙེན པཊིམུཁཾ ཨིཏོ གཏོཏི ཀཏྭཱ པཊིཙྩོཏི ཝུཙྩཏི. སྭཱཡཾ སཧིཏེཡེཝ ཨཉྙམཉྙཾ ཨཝིནིབྦྷོགཝུཏྟིདྷམྨེ ཨུཔྤཱདེཏཱིཏི སམུཔྤཱདོཏིཔི ཝུཏྟོ. ཨེཝམྤི པཊིཙྩོ ཙ སོ སམུཔྤཱདོ ཙཱཏི པཊིཙྩསམུཔྤཱདོ.

༥༧༩. ཨཔརོ ནཡོ –

པཙྩཡཏཱ ཨཉྙོཉྙཾ, པཊིཙྩ ཡསྨཱ སམཾ སཧ ཙ དྷམྨེ;

ཨཡམུཔྤཱདེཏི ཏཏོཔི, ཨེཝམིདྷ བྷཱསིཏཱ མུནིནཱ.

ཨཝིཛྫཱདིསཱིསེན ནིདྡིཊྛཔཙྩཡེསུ ཧི ཡེ པཙྩཡཱ ཡཾ སངྑཱརཱདིཀཾ དྷམྨཾ ཨུཔྤཱདེནྟི, ན ཏེ ཨཉྙམཉྙཾ ཨཔཊིཙྩ ཨཉྙམཉྙཝེཀལླེ སཏི ཨུཔྤཱདེཏུཾ སམཏྠཱཏི. ཏསྨཱ པཊིཙྩ སམཾ སཧ ཙ ན ཨེཀེཀདེསཾ, ནཱཔི པུབྦཱཔརབྷཱཝེན ཨཡཾ པཙྩཡཏཱ དྷམྨེ ཨུཔྤཱདེཏཱིཏི ཨཏྠཱནུསཱརཝོཧཱརཀུསལེན མུནིནཱ ཨེཝམིདྷ བྷཱསིཏཱ, པཊིཙྩསམུཔྤཱདོཏྭེཝ བྷཱསིཏཱཏི ཨཏྠོ.

༥༨༠. ཨེཝཾ ¶ བྷཱསམཱནེན ཙ,

པུརིམེན སསྶཏཱདཱིན, མབྷཱཝོ པཙྪིམེན ཙ པདེན;

ཨུཙྪེདཱདིཝིགྷཱཏོ, དྭཡེན པརིདཱིཔིཏོ ཉཱཡོ.

པུརིམེནཱཏི ¶ པཙྩཡསཱམགྒིཔརིདཱིཔཀེན པཊིཙྩཔདེན པཝཏྟིདྷམྨཱནཾ པཙྩཡསཱམགྒིཡཾ ཨཱཡཏྟཝུཏྟིཏྟཱ སསྶཏཱཧེཏུཝིསམཧེཏུཝསཝཏྟིཝཱདཔྤབྷེདཱནཾ སསྶཏཱདཱིནཾ ཨབྷཱཝོ པརིདཱིཔིཏོ ཧོཏི? ཀིཾ ཧི སསྶཏཱནཾ, ཨཧེཏུཨཱདིཝསེན ཝཱ པཝཏྟཱནཾ པཙྩཡསཱམགྒིཡཱཏི? པཙྪིམེན ཙ པདེནཱཏི དྷམྨཱནཾ ཨུཔྤཱདཔརིདཱིཔཀེན སམུཔྤཱདཔདེན པཙྩཡསཱམགྒིཡཾ དྷམྨཱནཾ ཨུཔྤཏྟིཏོ ཝིཧཏཱ ཨུཙྪེདནཏྠིཀཨཀིརིཡཝཱདཱཏི ཨུཙྪེདཱདིཝིགྷཱཏོ པརིདཱིཔིཏོ ཧོཏི. པུརིམཔུརིམཔཙྩཡཝསེན ཧི པུནཔྤུནཾ ཨུཔྤཛྫམཱནེསུ དྷམྨེསུ ཀུཏོ ཨུཙྪེདོ, ནཏྠིཀཱཀིརིཡཝཱདཱ ཙཱཏི. དྭཡེནཱཏི སཀལེན པཊིཙྩསམུཔྤཱདཝཙནེན ཏསྶཱ ཏསྶཱ པཙྩཡསཱམགྒིཡཱ སནྟཏིཾ ཨཝིཙྪིནྡིཏྭཱ ཏེསཾ ཏེསཾ དྷམྨཱནཾ སམྦྷཝཏོ མཛ྄ཛྷིམཱ པཊིཔདཱ, ‘‘སོ ཀརོཏི སོ པཊིསཾཝེདེཏི, ཨཉྙོ ཀརོཏི ཨཉྙོ པཊིསཾཝེདེཏཱི’’ཏི ཝཱདཔྤཧཱནཾ, ཛནཔདནིརུཏྟིཡཱ ཨནབྷིནིཝེསོ, སམཉྙཱཡ ཨནཏིདྷཱཝནནྟི ཨཡཾ ཉཱཡོ པརིདཱིཔིཏོ ཧོཏཱིཏི ཨཡཾ ཏཱཝ པཊིཙྩསམུཔྤཱདོཏི ཝཙནམཏྟསྶ ཨཏྠོ.

༥༨༡. ཡཱ པནཱཡཾ བྷགཝཏཱ པཊིཙྩསམུཔྤཱདཾ དེསེནྟེན ‘‘ཨཝིཛྫཱཔཙྩཡཱ སངྑཱརཱ’’ཏིཨཱདིནཱ ནཡེན ནིཀྑིཏྟཱ ཏནྟི, ཏསྶཱ ཨཏྠསཾཝཎྞནཾ ཀརོནྟེན ཝིབྷཛྫཝཱདིམཎྜལཾ ཨོཏརིཏྭཱ ཨཱཙརིཡེ ཨནབྦྷཱཙིཀྑནྟེན སཀསམཡཾ ཨཝོཀྐམནྟེན པརསམཡཾ ཨནཱཡཱུཧནྟེན སུཏྟཾ ཨཔྤཊིབཱཧནྟེན ཝིནཡཾ ཨནུལོམེནྟེན མཧཱཔདེསེ ཨོལོཀེནྟེན དྷམྨཾ དཱིཔེནྟེན ཨཏྠཾ སངྒཱཧེནྟེན ཏམེཝཏྠཾ པུནརཱཝཏྟེཏྭཱ ཨཔརེཧིཔི པརིཡཱཡནྟརེཧི ནིདྡིསནྟེན ཙ ཡསྨཱ ཨཏྠསཾཝཎྞནཱ ཀཱཏབྦཱ ཧོཏི, པཀཏིཡཱཔི ཙ དུཀྐརཱཝ པཊིཙྩསམུཔྤཱདསྶ ཨཏྠསཾཝཎྞནཱ. ཡཐཱཧུ པོརཱཎཱ –

‘‘སཙྩཾ སཏྟོ པཊིསནྡྷི, པཙྩཡཱཀཱརམེཝ ཙ;

དུདྡསཱ ཙཏུརོ དྷམྨཱ, དེསེཏུཾ ཙ སུདུཀྐརཱ’’ཏི.

ཏསྨཱ ¶ ཨཉྙཏྲ ཨཱགམཱདྷིགམཔྤཏྟེཧི ན སུཀརཱ པཊིཙྩསམུཔྤཱདསྶཏྠཝཎྞནཱཏི པརིཏུལཡིཏྭཱ,

ཝཏྟུཀཱམོ ¶ ཨཧཾ ཨཛྫ, པཙྩཡཱཀཱརཝཎྞནཾ;

པཏིཊྛཾ ནཱདྷིགཙྪཱམི, ཨཛ྄ཛྷོགཱལ༹ྷོཝ སཱགརཾ.

སཱསནཾ པནིདཾ ནཱནཱ, དེསནཱནཡམཎྜིཏཾ;

པུབྦཱཙརིཡམགྒོ ཙ, ཨབྦོཙྪིནྣོ པཝཏྟཏི.

ཡསྨཱ ཏསྨཱ ཏདུབྷཡཾ, སནྣིསྶཱཡཏྠཝཎྞནཾ;

ཨཱརབྷིསྶཱམི ཨེཏསྶ, ཏཾ སུཎཱཐ སམཱཧིཏཱ.

ཝུཏྟཉྷེཏཾ པུབྦཱཙརིཡེཧི –

‘‘ཡོ ཀོཙི མཾ ཨཊྛིཀཏྭཱ སུཎེཡྻ,

ལབྷེཐ པུབྦཱཔརིཡཾ ཝིསེསཾ;

ལདྡྷཱན པུབྦཱཔརིཡཾ ཝིསེསཾ,

ཨདསྶནཾ མཙྩུརཱཛསྶ གཙྪེ’’ཏི.

༥༨༢. ཨིཏི ཨཝིཛྫཱཔཙྩཡཱ སངྑཱརཱཏིཨཱདཱིསུ ཧི ཨཱདིཏོཡེཝ ཏཱཝ,

དེསནཱབྷེདཏོ ཨཏྠ, ལཀྑཎེཀཝིདྷཱདིཏོ. ཨངྒཱནཉྩ ཝཝཏྠཱནཱ, ཝིཉྙཱཏབྦོ ཝིནིཙྪཡོ.

ཏཏྠ དེསནཱབྷེདཏོཏི བྷགཝཏོ ཧི ཝལླིཧཱརཀཱནཾ ཙཏུནྣཾ པུརིསཱནཾ ཝལླིགཧཎཾ ཝིཡ ཨཱདིཏོ ཝཱ མཛ྄ཛྷཏོ ཝཱ པཊྛཱཡ ཡཱཝ པརིཡོསཱནཾ, ཏཐཱ པརིཡོསཱནཏོ ཝཱ མཛ྄ཛྷཏོ ཝཱ པཊྛཱཡ ཡཱཝ ཨཱདཱིཏི ཙཏུབྦིདྷཱ པཊིཙྩསམུཔྤཱདདེསནཱ.

ཡཐཱ ཧི ཝལླིཧཱརཀེསུ ཙཏཱུསུ པུརིསེསུ ཨེཀོ ཝལླིཡཱ མཱུལམེཝ པཋམཾ པསྶཏི, སོ ཏཾ མཱུལེ ¶ ཚེཏྭཱ སབྦཾ ཨཱཀཌྜྷིཏྭཱ ཨཱདཱཡ ཀམྨེ ཨུཔནེཏི, ཨེཝཾ བྷགཝཱ ‘‘ཨིཏི ཁོ, བྷིཀྑཝེ, ཨཝིཛྫཱཔཙྩཡཱ སངྑཱརཱ…པེ… ཛཱཏིཔཙྩཡཱ ཛརཱམརཎ’’ནྟི (མ. ནི. ༡.༤༠༢; སཾ. ནི. ༢.༢) ཨཱདིཏོ པཊྛཱཡ ཡཱཝ པརིཡོསཱནཱཔི པཊིཙྩསམུཔྤཱདཾ དེསེཏི.

ཡཐཱ པན ཏེསུ པུརིསེསུ ཨེཀོ ཝལླིཡཱ མཛ྄ཛྷཾ པཋམཾ པསྶཏི, སོ མཛ྄ཛྷེ ཚིནྡིཏྭཱ ཨུཔརིབྷཱགཉྙེཝ ཨཱཀཌྜྷིཏྭཱ ཨཱདཱཡ ཀམྨེ ཨུཔནེཏི, ཨེཝཾ བྷགཝཱ ‘‘ཏསྶ ཏཾ ཝེདནཾ ཨབྷིནནྡཏོ ཨབྷིཝདཏོ ཨཛ྄ཛྷོསཱཡ ཏིཊྛཏོ ¶ ཨུཔྤཛྫཏི ནནྡཱི. ཡཱ ཝེདནཱསུ ནནྡཱི, ཏདུཔཱདཱནཾ. ཏསྶུཔཱདཱནཔཙྩཡཱ བྷཝོ, བྷཝཔཙྩཡཱ ཛཱཏཱི’’ཏི (མ. ནི. ༡.༤༠༩; སཾ. ནི. ༣.༥) མཛ྄ཛྷཏོ པཊྛཱཡ ཡཱཝ པརིཡོསཱནཱཔི དེསེཏི.

ཡཐཱ ཙ ཏེསུ པུརིསེསུ ཨེཀོ ཝལླིཡཱ ཨགྒཾ པཋམཾ པསྶཏི, སོ ཨགྒེ གཧེཏྭཱ ཨགྒཱནུསཱརེན ཡཱཝ མཱུལཱ སབྦཾ ཨཱདཱཡ ཀམྨེ ཨུཔནེཏི, ཨེཝཾ བྷགཝཱ ‘‘ཛཱཏིཔཙྩཡཱ ཛརཱམརཎནྟི ཨིཏི ཁོ པནེཏཾ ཝུཏྟཾ, ཛཱཏིཔཙྩཡཱ ནུ ཁོ, བྷིཀྑཝེ, ཛརཱམརཎཾ ནོ ཝཱ ཀཐཾ ཝོ ཨེཏྠ ཧོཏཱིཏི? ཛཱཏིཔཙྩཡཱ, བྷནྟེ, ཛརཱམརཎཾ. ཨེཝཾ ནོ ཨེཏྠ ཧོཏི ཛཱཏིཔཙྩཡཱ ཛརཱམརཎནྟི. བྷཝཔཙྩཡཱ ཛཱཏི…པེ… ཨཝིཛྫཱཔཙྩཡཱ སངྑཱརཱཏི ཨིཏི ཁོ པནེཏཾ ཝུཏྟཾ, ཨཝིཛྫཱཔཙྩཡཱ ནུ ཁོ, བྷིཀྑཝེ, སངྑཱརཱ ནོ ཝཱ ཀཐཾ ཝོ ཨེཏྠ ཧོཏཱི’’ཏི (མ. ནི. ༡.༤༠༣) པརིཡོསཱནཏོ པཊྛཱཡ ཡཱཝ ཨཱདིཏོཔི པཊིཙྩསམུཔྤཱདཾ དེསེཏི.

ཡཐཱ པནེཏེསུ པུརིསེསུ ཨེཀོ ཝལླིཡཱ མཛ྄ཛྷམེཝ པཋམཾ པསྶཏི, སོ མཛ྄ཛྷེ ཚིནྡིཏྭཱ ཧེཊྛཱ ཨོཏརནྟོ ཡཱཝ མཱུལཱ ཨཱདཱཡ ཀམྨེ ཨུཔནེཏི, ཨེཝཾ བྷགཝཱ ‘‘ཨིམེ ཙ, བྷིཀྑཝེ, ཙཏྟཱརོ ཨཱཧཱརཱ ཀིནྣིདཱནཱ, ཀིཾསམུདཡཱ, ཀིཾཛཱཏིཀཱ, ཀིཾཔབྷཝཱ? ཨིམེ ཙཏྟཱརོ ཨཱཧཱརཱ ཏཎྷཱནིདཱནཱ, ཏཎྷཱསམུདཡཱ, ཏཎྷཱཛཱཏིཀཱ, ཏཎྷཱཔབྷཝཱ. ཏཎྷཱ ཀིནྣིདཱནཱ… ཝེདནཱ… ཕསྶོ… སལཱ༹ཡཏནཾ… ནཱམརཱུཔཾ… ཝིཉྙཱཎཾ… སངྑཱརཱ ཀིནྣིདཱནཱ…པེ… སངྑཱརཱ ཨཝིཛྫཱནིདཱནཱ…པེ… ཨཝིཛྫཱཔབྷཝཱ’’ཏི (སཾ. ནི. ༢.༡༡) མཛ྄ཛྷཏོ པཊྛཱཡ ཡཱཝ ཨཱདིཏོ དེསེཏི.

༥༨༣. ཀསྨཱ པནེཝཾ དེསེཏཱིཏི? པཊིཙྩསམུཔྤཱདསྶ སམནྟབྷདྡཀཏྟཱ སཡཉྩ དེསནཱཝིལཱསཔྤཏྟཏྟཱ. སམནྟབྷདྡཀོ ཧི པཊིཙྩསམུཔྤཱདོ, ཏཏོ ཏཏོ ཉཱཡཔཊིཝེདྷཱཡ སཾཝཏྟཏིཡེཝ ¶ . དེསནཱཝིལཱསཔྤཏྟོ ཙ བྷགཝཱ ཙཏུཝེསཱརཛྫཔཊིསམྦྷིདཱཡོགེན ཙཏུབྦིདྷགམྦྷཱིརབྷཱཝཔྤཏྟིཡཱ ཙ. སོ དེསནཱཝིལཱསཔྤཏྟཏྟཱ ནཱནཱནཡེཧེཝ དྷམྨཾ དེསེཏི.

ཝིསེསཏོ པནསྶ ཡཱ ཨཱདིཏོ པཊྛཱཡ ཨནུལོམདེསནཱ, སཱ པཝཏྟིཀཱརཎཝིབྷཱགསཾམཱུལ༹ྷཾ ཝེནེཡྻཛནཾ སམནུཔསྶཏོ ཡཐཱསཀེཧི ཀཱརཎེཧི པཝཏྟིསནྡསྶནཏྠཾ ཨུཔྤཏྟིཀྐམསནྡསྶནཏྠཉྩ པཝཏྟཱཏི ཝིཉྙཱཏབྦཱ. ཡཱ པརིཡོསཱནཏོ པཊྛཱཡ པཊིལོམདེསནཱ, སཱ ‘‘ཀིཙྪཾ ཝཏཱཡཾ ལོཀོ ¶ ཨཱཔནྣོ ཛཱཡཏི ཙ ཛཱིཡཏི ཙ མཱིཡཏི ཙ ཙཝཏི ཙ ཨུཔཔཛྫཏི ཙཱ’’ཏིཨཱདིནཱ (དཱི. ནི. ༢.༥༧; སཾ. ནི. ༢.༤) ནཡེན ཀིཙྪཱཔནྣཾ ལོཀཾ ཨནུཝིལོཀཡཏོ པུབྦབྷཱགཔཊིཝེདྷཱནུསཱརེན ཏསྶ ཏསྶ ཛརཱམརཎཱདིཀསྶ དུཀྑསྶ ཨཏྟནཱ ཨདྷིགཏཀཱརཎསནྡསྶནཏྠཾ. ཡཱ མཛ྄ཛྷཏོ པཊྛཱཡ ཡཱཝ ཨཱདི པཝཏྟཱ, སཱ ཨཱཧཱརནིདཱནཝཝཏྠཱཔནཱནུསཱརེན ཡཱཝ ཨཏཱིཏཾ ཨདྡྷཱནཾ ཨཏིཧརིཏྭཱ པུན ཨཏཱིཏདྡྷཏོ པབྷུཏི ཧེཏུཕལཔཊིཔཱཊིསནྡསྶནཏྠཾ. ཡཱ པན མཛ྄ཛྷཏོ པཊྛཱཡ ཡཱཝ པརིཡོསཱནཾ པཝཏྟཱ, སཱ པཙྩུཔྤནྣེ ཨདྡྷཱནེ ཨནཱགཏདྡྷཧེཏུསམུཊྛཱནཏོ པབྷུཏི ཨནཱགཏདྡྷསནྡསྶནཏྠཾ. ཏཱསུ ཡཱ པཝཏྟིཀཱརཎསམྨཱུལ༹ྷསྶ ཝེནེཡྻཛནསྶ ཡཐཱསཀེཧི ཀཱརཎེཧི པཝཏྟིསནྡསྶནཏྠཾ ཨུཔྤཏྟིཀྐམསནྡསྶནཏྠཉྩ ཨཱདིཏོ པཊྛཱཡ ཨནུལོམདེསནཱ ཝུཏྟཱ, སཱ ཨིདྷ ནིཀྑིཏྟཱཏི ཝེདིཏབྦཱ.

༥༨༤. ཀསྨཱ པནེཏྠ ཨཝིཛྫཱ ཨཱདིཏོ ཝུཏྟཱ, ཀིཾ པཀཏིཝཱདཱིནཾ པཀཏི ཝིཡ ཨཝིཛྫཱཔི ཨཀཱརཎཾ མཱུལཀཱརཎཾ ལོཀསྶཱཏི? ན ཨཀཱརཎཾ. ‘‘ཨཱསཝསམུདཡཱ ཨཝིཛྫཱསམུདཡོ’’ཏི (མ. ནི. ༡.༡༠༣) ཧི ཨཝིཛྫཱཡ ཀཱརཎཾ ཝུཏྟཾ. ཨཏྠི པན པརིཡཱཡོ ཡེན མཱུལཀཱརཎཾ སིཡཱ, ཀོ པན སོཏི? ཝཊྚཀཐཱཡ སཱིསབྷཱཝོ.

བྷགཝཱ ཧི ཝཊྚཀཐཾ ཀཐེནྟོ དྭེ དྷམྨེ སཱིསཾ ཀཏྭཱ ཀཐེཏི, ཨཝིཛྫཾ ཝཱ. ཡཐཱཧ – ‘‘པུརིམཱ, བྷིཀྑཝེ, ཀོཊི ན པཉྙཱཡཏི ཨཝིཛྫཱཡ ‘ཨིཏོ པུབྦེ ཨཝིཛྫཱ ནཱཧོསི, ཨཐ པཙྪཱ སམབྷཝཱི’ཏི, ཨེཝཉྩེཏཾ, བྷིཀྑཝེ, ཝུཙྩཏི, ཨཐ ཙ པན པཉྙཱཡཏི ཨིདཔྤཙྩཡཱ ཨཝིཛྫཱ’’ཏི (ཨ. ནི. ༡༠.༦༡). བྷཝཏཎྷཾ ཝཱ. ཡཐཱཧ – ‘‘པུརིམཱ, བྷིཀྑཝེ, ཀོཊི ན པཉྙཱཡཏི བྷཝཏཎྷཱཡ ‘ཨིཏོ པུབྦེ བྷཝཏཎྷཱ ནཱཧོསི, ཨཐ པཙྪཱ སམབྷཝཱི’ཏི, ཨེཝཉྩེཏཾ, བྷིཀྑཝེ, ཝུཙྩཏི, ཨཐ ཙ པན པཉྙཱཡཏི ཨིདཔྤཙྩཡཱ བྷཝཏཎྷཱ’’ཏི (ཨ. ནི. ༡༠.༦༢).

༥༨༥. ཀསྨཱ ¶ པན བྷགཝཱ ཝཊྚཀཐཾ ཀཐེནྟོ ཨིམེ དྭེ དྷམྨེ སཱིསཾ ཀཏྭཱ ཀཐེཏཱིཏི? སུགཏིདུགྒཏིགཱམིནོ ཀམྨསྶ ཝིསེསཧེཏུབྷཱུཏཏྟཱ. དུགྒཏིགཱམིནོ ཧི ཀམྨསྶ ཝིསེསཧེཏུ ཨཝིཛྫཱ. ཀསྨཱ? ཡསྨཱ ཨཝིཛྫཱབྷིབྷཱུཏོ པུཐུཛྫནོ ཨགྒིསནྟཱཔལགུལཱ༹བྷིགྷཱཏཔརིསྶམཱབྷིབྷཱུཏཱ ཝཛ྄ཛྷགཱཝཱི ཏཱཡ པརིསྶམཱཏུརཏཱཡ ནིརསྶཱདམྤི ཨཏྟནོ ཨནཏྠཱཝཧམྤི ཙ ཨུཎྷོདཀཔཱནཾ ¶ ཝིཡ ཀིལེསསནྟཱཔཏོ ནིརསྶཱདམྤི དུགྒཏིནིཔཱཏནཏོ ཙ ཨཏྟནོ ཨནཏྠཱཝཧམྤི པཱཎཱཏིཔཱཏཱདིཾ ཨནེཀཔྤཀཱརཾ དུགྒཏིགཱམིཀམྨཾ ཨཱརབྷཏི. སུགཏིགཱམིནོ པན ཀམྨསྶ ཝིསེསཧེཏུ བྷཝཏཎྷཱ. ཀསྨཱ? ཡསྨཱ བྷཝཏཎྷཱབྷིབྷཱུཏོ པུཐུཛྫནོ སཱ ཝུཏྟཔྤཀཱརཱ གཱཝཱི སཱིཏཱུདཀཏཎྷཱཡ སཨསྶཱདཾ ཨཏྟནོ པརིསྶམཝིནོདནཉྩ སཱིཏཱུདཀཔཱནཾ ཝིཡ ཀིལེསསནྟཱཔཝིརཧཏོ སཨསྶཱདཾ སུགཏིསམྤཱཔནེན ཨཏྟནོ དུགྒཏིདུཀྑཔརིསྶམཝིནོདནཉྩ པཱཎཱཏིཔཱཏཱ ཝེརམཎིཨཱདིཾ ཨནེཀཔྤཀཱརཾ སུགཏིགཱམིཀམྨཾ ཨཱརབྷཏི.

༥༨༦. ཨེཏེསུ པན ཝཊྚཀཐཱཡ སཱིསབྷཱུཏེསུ དྷམྨེསུ ཀཏྠཙི བྷགཝཱ ཨེཀདྷམྨམཱུལིཀཾ དེསནཾ དེསེཏི. སེཡྻཐིདཾ, ‘‘ཨིཏི ཁོ, བྷིཀྑཝེ, ཨཝིཛྫཱུཔནིསཱ སངྑཱརཱ, སངྑཱརཱུཔནིསཾ ཝིཉྙཱཎ’’ནྟིཨཱདི (སཾ. ནི. ༢.༢༣). ཏཐཱ ‘‘ཨུཔཱདཱནིཡེསུ, བྷིཀྑཝེ, དྷམྨེསུ ཨསྶཱདཱནུཔསྶིནོ ཝིཧརཏོ ཏཎྷཱ པཝཌྜྷཏི, ཏཎྷཱཔཙྩཡཱ ཨུཔཱདཱན’’ནྟིཨཱདི (སཾ. ནི. ༢.༥༢). ཀཏྠཙི ཨུབྷཡམཱུལིཀམྤི. སེཡྻཐིདཾ, ‘‘ཨཝིཛྫཱནཱིཝརཎསྶ, བྷིཀྑཝེ, བཱལསྶ ཏཎྷཱཡ སམྤཡུཏྟསྶ ཨེཝམཡཾ ཀཱཡོ སམུདཱགཏོ. ཨིཏི ཨཡཉྩེཝ ཀཱཡོ བཧིདྡྷཱ ཙ ནཱམརཱུཔཾ ཨིཏྠེཏཾ དྭཡཾ. དྭཡཾ པཊིཙྩ ཕསྶོ སལེ༹ཝཱཡཏནཱནི, ཡེཧི ཕུཊྛོ བཱལོ སུཁདུཀྑཾ པཊིསཾཝེདེཏཱི’’ཏིཨཱདི (སཾ. ནི. ༢.༡༩). ཏཱསུ དེསནཱསུ ‘‘ཨཝིཛྫཱཔཙྩཡཱ སངྑཱརཱ’’ཏི ཨཡམིདྷ ཨཝིཛྫཱཝསེན ཨེཀདྷམྨམཱུལིཀཱ དེསནཱཏི ཝེདིཏབྦཱ. ཨེཝཾ ཏཱཝེཏྠ དེསནཱབྷེདཏོ ཝིཉྙཱཏབྦོ ཝིནིཙྪཡོ.

༥༨༧. ཨཏྠཏོཏི ཨཝིཛྫཱདཱིནཾ པདཱནཾ ཨཏྠཏོ. སེཡྻཐིདཾ, པཱུརེཏུཾ ཨཡུཏྟཊྛེན ཀཱཡདུཙྩརིཏཱདི ཨཝིནྡིཡཾ ནཱམ, ཨལདྡྷབྦནྟི ཨཏྠོ. ཏཾ ཨཝིནྡིཡཾ ཝིནྡཏཱིཏི ཨཝིཛྫཱ. ཏབྦིཔརཱིཏཏོ ཀཱཡསུཙརིཏཱདི ཝིནྡིཡཾ ནཱམ, ཏཾ ཝིནྡིཡཾ ན ཝིནྡཏཱིཏི ཨཝིཛྫཱ. ཁནྡྷཱནཾ རཱསཊྛཾ, ཨཱཡཏནཱནཾ ཨཱཡཏནཊྛཾ, དྷཱཏཱུནཾ སུཉྙཊྛཾ, ཨིནྡྲིཡཱནཾ ཨདྷིཔཏིཡཊྛཾ, སཙྩཱནཾ ཏཐཊྛཾ ཨཝིདིཏཾ ཀརོཏཱིཏིཔི ཨཝིཛྫཱ. དུཀྑཱདཱིནཾ པཱིལ༹ནཱདིཝསེན ཝུཏྟཾ ཙཏུབྦིདྷཾ ཨཏྠཾ ཨཝིདིཏཾ ཀརོཏཱིཏིཔི ཨཝིཛྫཱ. ཨནྟཝིརཧིཏེ སཾསཱརེ སབྦཡོནིགཏིབྷཝཝིཉྙཱཎཊྛིཏིསཏྟཱཝཱསེསུ སཏྟེ ཛཝཱཔེཏཱིཏི ¶ ཨཝིཛྫཱ. པརམཏྠཏོ ཨཝིཛྫམཱནེསུ ཨིཏྠིཔུརིསཱདཱིསུ ཛཝཏི, ཝིཛྫམཱནེསུཔི ཁནྡྷཱདཱིསུ ན ཛཝཏཱིཏི ཨཝིཛྫཱ. ཨཔིཙ ཙཀྑུཝིཉྙཱཎཱདཱིནཾ ¶ ཝཏྠཱརམྨཎཱནཾ པཊིཙྩསམུཔྤཱདཔཊིཙྩསམུཔྤནྣཱནཉྩ དྷམྨཱནཾ ཚཱདནཏོཔི ཨཝིཛྫཱ.

ཡཾ པཊིཙྩ ཕལམེཏི, སོ པཙྩཡོ. པཊིཙྩཱཏི ན ཝིནཱ ཨཔཙྩཀྑཏྭཱཏི ཨཏྠོ. ཨེཏཱིཏི ཨུཔྤཛྫཏི ཙེཝ པཝཏྟཏི ཙཱཏི ཨཏྠོ. ཨཔིཙ ཨུཔཀཱརཀཊྛོ པཙྩཡཊྛོ. ཨཝིཛྫཱ ཙ སཱ པཙྩཡོ ཙཱཏི ཨཝིཛྫཱཔཙྩཡོ. ཏསྨཱ ཨཝིཛྫཱཔཙྩཡཱ.

སངྑཏམབྷིསངྑརོནྟཱིཏི སངྑཱརཱ. ཨཔིཙ ཨཝིཛྫཱཔཙྩཡཱ སངྑཱརཱ, སངྑཱརསདྡེན ཨཱགཏསངྑཱརཱཏི དུཝིདྷཱ སངྑཱརཱ. ཏཏྠ པུཉྙཱཔུཉྙཱནེཉྫཱབྷིསངྑཱརཱ ཏཡོ, ཀཱཡཝཙཱིཙིཏྟསངྑཱརཱ ཏཡོཏི ཨིམེ ཚ ཨཝིཛྫཱཔཙྩཡཱ སངྑཱརཱ. ཏེ སབྦེཔི ལོཀིཡཀུསལཱཀུསལཙེཏནཱམཏྟམེཝ ཧོནྟི.

སངྑཏསངྑཱརོ, ཨབྷིསངྑཏསངྑཱརོ, ཨབྷིསངྑརཎཀསངྑཱརོ, པཡོགཱབྷིསངྑཱརོཏི ཨིམེ པན ཙཏྟཱརོ སངྑཱར-སདྡེན ཨཱགཏསངྑཱརཱ. ཏཏྠ ‘‘ཨནིཙྩཱ ཝཏ སངྑཱརཱ’’ཏིཨཱདཱིསུ (དཱི. ནི. ༢.༢༢༡, ༢༧༢; སཾ. ནི. ༡.༡༨༦) ཝུཏྟཱ སབྦེཔི སཔྤཙྩཡཱ དྷམྨཱ སངྑཏསངྑཱརཱ ནཱམ. ཀམྨནིབྦཏྟཱ ཏེབྷཱུམཀཱ རཱུཔཱརཱུཔདྷམྨཱ ཨབྷིསངྑཏསངྑཱརཱཏི ཨཊྛཀཐཱསུ ཝུཏྟཱ, ཏེཔི ‘‘ཨནིཙྩཱ ཝཏ སངྑཱརཱ’’ཏི (དཱི. ནི. ༢.༢༢༡; ༢༧༢; སཾ. ནི. ༡.༡༨༦) ཨེཏྠེཝ སངྒཧཾ གཙྪནྟི. ཝིསུཾ པན ནེསཾ ཨཱགཏཊྛཱནཾ ན པཉྙཱཡཏི. ཏེབྷཱུམིཀཀུསལཱཀུསལཙེཏནཱ པན ཨབྷིསངྑརཎཀསངྑཱརོཏི ཝུཙྩཏི, ཏསྶ ‘‘ཨཝིཛྫཱགཏོཡཾ, བྷིཀྑཝེ, པུརིསཔུགྒལོ པུཉྙཉྩེཝ སངྑཱརཾ ཨབྷིསངྑརོཏཱི’’ཏིཨཱདཱིསུ (སཾ. ནི. ༢.༥༡) ཨཱགཏཊྛཱནཾ པཉྙཱཡཏི. ཀཱཡིཀཙེཏསིཀཾ པན ཝཱིརིཡཾ པཡོགཱབྷིསངྑཱརོཏི ཝུཙྩཏི, སོ ‘‘ཡཱཝཏིཀཱ ཨབྷིསངྑཱརསྶ གཏི, ཏཱཝཏིཀཱ གནྟྭཱ ཨཀྑཱཧཏཾ མཉྙེ ཨཊྛཱསཱི’’ཏིཨཱདཱིསུ (ཨ. ནི. ༣.༡༥) ཨཱགཏོ.

ན ཀེཝལཉྩ ཨེཏེཡེཝ, ཨཉྙེཔི ‘‘སཉྙཱཝེདཡིཏནིརོདྷཾ སམཱཔཛྫནྟསྶ ཁོ, ཨཱཝུསོ ཝིསཱཁ, བྷིཀྑུནོ པཋམཾ ནིརུཛ྄ཛྷཏི ཝཙཱིསངྑཱརོ, ཏཏོ ཀཱཡསངྑཱརོ, ཏཏོ ཙིཏྟསངྑཱརོ’’ཏིཨཱདིནཱ (མ. ནི. ༡.༤༦༤) ནཡེན སངྑཱར-སདྡེན ཨཱགཏཱ ཨནེཀེ སངྑཱརཱ. ཏེསུ ནཏྠི སོ སངྑཱརོ, ཡོ སངྑཏསངྑཱརེཧི སངྒཧཾ ན གཙྪེཡྻ, ཨིཏོ པརཾ སངྑཱརཔཙྩཡཱ ཝིཉྙཱཎནྟིཨཱདཱིསུ ཝུཏྟཾ ཝུཏྟནཡེནེཝ ཝེདིཏབྦཾ.

ཨཝུཏྟེ ¶ ¶ པན ཝིཛཱནཱཏཱིཏི ཝིཉྙཱཎཾ. ནམཏཱིཏི ནཱམཾ. རུཔྤཏཱིཏི རཱུཔཾ. ཨཱཡེ ཏནོཏི ཨཱཡཏཉྩ ནཡཏཱིཏི ཨཱཡཏནཾ. ཕུསཏཱིཏི ཕསྶོ. ཝེདཡཏཱིཏི ཝེདནཱ. པརིཏསྶཏཱིཏི ཏཎྷཱ. ཨུཔཱདིཡཏཱིཏི ཨུཔཱདཱནཾ. བྷཝཏི བྷཱཝཡཏི ཙཱཏི བྷཝོ. ཛནནཾ ཛཱཏི. ཛིརཎཾ ཛརཱ. མརནྟི ཨེཏེནཱཏི མརཎཾ. སོཙནཾ སོཀོ. པརིདེཝནཾ པརིདེཝོ. དུཀྑཡཏཱིཏི དུཀྑཾ. ཨུཔྤཱདཊྛིཏིཝསེན ཝཱ དྭིདྷཱ ཁཎཏཱིཏིཔི དུཀྑཾ. དུམྨནབྷཱཝོ དོམནསྶཾ. བྷུསོ ཨཱཡཱསོ ཨུཔཱཡཱསོ.

སམྦྷཝནྟཱིཏི ཨབྷིནིབྦཏྟནྟི. ན ཀེཝལཉྩ སོཀཱདཱིཧེཝ, ཨཐ ཁོ སབྦཔདེཧི སམྦྷཝནྟི-སདྡསྶ ཡོཛནཱ ཀཱཏབྦཱ. ཨིཏརཐཱ ཧི ‘‘ཨཝིཛྫཱཔཙྩཡཱ སངྑཱརཱ’’ཏི ཝུཏྟེ ཀིཾ ཀརོནྟཱིཏི ན པཉྙཱཡེཡྻ, སམྦྷཝནྟཱིཏི པན ཡོཛནཱཡ སཏི ཨཝིཛྫཱ ཙ སཱ པཙྩཡོ ཙཱཏི ཨཝིཛྫཱཔཙྩཡོ. ཏསྨཱ ཨཝིཛྫཱཔཙྩཡཱ སངྑཱརཱ སམྦྷཝནྟཱིཏི པཙྩཡཔཙྩཡུཔྤནྣཝཝཏྠཱནཾ ཀཏཾ ཧོཏི. ཨེས ནཡོ སབྦཏྠ.

ཨེཝནྟི ནིདྡིཊྛནཡནིདསྶནཾ. ཏེན ཨཝིཛྫཱདཱིཧེཝ ཀཱརཎེཧི, ན ཨིསྶརནིམྨཱནཱདཱིཧཱིཏི དསྶེཏི. ཨེཏསྶཱཏི ཡཐཱཝུཏྟསྶ. ཀེཝལསྶཱཏི ཨསམྨིསྶསྶ, སཀལསྶ ཝཱ. དུཀྑཀྑནྡྷསྶཱཏི དུཀྑསམཱུཧསྶ, ན སཏྟསྶ, ན སུཁསུབྷཱདཱིནཾ. སམུདཡོཏི ནིབྦཏྟི. ཧོཏཱིཏི སམྦྷཝཏི. ཨེཝམེཏྠ ཨཏྠཏོ ཝིཉྙཱཏབྦོ ཝིནིཙྪཡོ.

༥༨༨. ལཀྑཎཱདིཏོཏི ཨཝིཛྫཱདཱིནཾ ལཀྑཎཱདིཏོ. སེཡྻཐིདཾ – ཨཉྙཱཎལཀྑཎཱ ཨཝིཛྫཱ, སམྨོཧནརསཱ, ཚཱདནཔཙྩུཔཊྛཱནཱ, ཨཱསཝཔདཊྛཱནཱ. ཨབྷིསངྑརཎལཀྑཎཱ སངྑཱརཱ, ཨཱཡཱུཧནརསཱ, ཙེཏནཱཔཙྩུཔཊྛཱནཱ, ཨཝིཛྫཱཔདཊྛཱནཱ. ཝིཛཱནནལཀྑཎཾ ཝིཉྙཱཎཾ, པུབྦངྒམརསཾ, པཊིསནྡྷིཔཙྩུཔཊྛཱནཾ, སངྑཱརཔདཊྛཱནཾ, ཝཏྠཱརམྨཎཔདཊྛཱནཾ ཝཱ. ནམནལཀྑཎཾ ནཱམཾ, སམྤཡོགརསཾ, ཨཝིནིབྦྷོགཔཙྩུཔཊྛཱནཾ, ཝིཉྙཱཎཔདཊྛཱནཾ. རུཔྤནལཀྑཎཾ རཱུཔཾ, ཝིཀིརཎརསཾ, ཨབྱཱཀཏཔཙྩུཔཊྛཱནཾ, ཝིཉྙཱཎཔདཊྛཱནཾ. ཨཱཡཏནལཀྑཎཾ སལཱ༹ཡཏནཾ, དསྶནཱདིརསཾ, ཝཏྠུདྭཱརབྷཱཝཔཙྩུཔཊྛཱནཾ, ནཱམརཱུཔཔདཊྛཱནཾ. ཕུསནལཀྑཎོ ཕསྶོ, སངྒྷཊྚནརསོ, སངྒཏིཔཙྩུཔཊྛཱནོ, སལཱ༹ཡཏནཔདཊྛཱནོ. ཨནུབྷཝནལཀྑཎཱ ཝེདནཱ, ཝིསཡརསསམྦྷོགརསཱ, སུཁདུཀྑཔཙྩུཔཊྛཱནཱ, ཕསྶཔདཊྛཱནཱ. ཧེཏུལཀྑཎཱ ཏཎྷཱ, ཨབྷིནནྡནརསཱ, ཨཏིཏྟབྷཱཝཔཙྩུཔཊྛཱནཱ, ཝེདནཱཔདཊྛཱནཱ. གཧཎལཀྑཎཾ ¶ ཨུཔཱདཱནཾ, ཨམུཉྩནརསཾ, ཏཎྷཱདལ༹ྷཏྟདིཊྛིཔཙྩུཔཊྛཱནཾ, ཏཎྷཱཔདཊྛཱནཾ. ཀམྨཀམྨཕལལཀྑཎོ བྷཝོ, བྷཱཝནབྷཝནརསོ, ཀུསལཱཀུསལཱབྱཱཀཏཔཙྩུཔཊྛཱནོ ¶ , ཨུཔཱདཱནཔདཊྛཱནོ. ཛཱཏིཨཱདཱིནཾ ལཀྑཎཱདཱིནི སཙྩནིདྡེསེ ཝུཏྟནཡེནེཝ ཝེདིཏབྦཱནི. ཨེཝམེཏྠ ལཀྑཎཱདིཏོཔི ཝིཉྙཱཏབྦོ ཝིནིཙྪཡོ.

༥༨༩. ཨེཀཝིདྷཱདིཏོཏི ཨེཏྠ ཨཝིཛྫཱ ཨཉྙཱཎཱདསྶནམོཧཱདིབྷཱཝཏོ ཨེཀཝིདྷཱ. ཨཔྤཊིཔཏྟིམིཙྪཱཔཊིཔཏྟིཏོ དུཝིདྷཱ. ཏཐཱ སསངྑཱརཱསངྑཱརཏོ. ཝེདནཏྟཡསམྤཡོགཏོ ཏིཝིདྷཱ. ཙཏུསཙྩཔཊིཝེདྷཏོ ཙཏུབྦིདྷཱ. གཏིཔཉྩཀཱདཱིནཝཙྪཱདནཏོ པཉྩཝིདྷཱ. དྭཱརཱརམྨཎཏོ པན སབྦེསུཔི ཨརཱུཔདྷམྨེསུ ཚབྦིདྷཏཱ ཝེདིཏབྦཱ.

སངྑཱརཱ སཱསཝཝིཔཱཀདྷམྨདྷམྨཱདིབྷཱཝཏོ ཨེཀཝིདྷཱ. ཀུསལཱཀུསལཏོ དུཝིདྷཱ. ཏཐཱ པརིཏྟམཧགྒཏཧཱིནམཛ྄ཛྷིམམིཙྪཏྟནིཡཏཱནིཡཏཏོ. ཏིཝིདྷཱ པུཉྙཱབྷིསངྑཱརཱདིབྷཱཝཏོ. ཙཏུབྦིདྷཱ ཙཏུཡོནིསཾཝཏྟནཏོ. པཉྩཝིདྷཱ པཉྩགཏིགཱམིཏོ.

ཝིཉྙཱཎཾ ལོཀིཡཝིཔཱཀཱདིབྷཱཝཏོ ཨེཀཝིདྷཾ. སཧེཏུཀཱཧེཏུཀཱདིཏོ དུཝིདྷཾ. བྷཝཏྟཡཔརིཡཱཔནྣཏོ, ཝེདནཏྟཡསམྤཡོགཏོ, ཨཧེཏུཀདྭིཧེཏུཀཏིཧེཏུཀཏོ ཙ ཏིཝིདྷཾ. ཡོནིགཏིཝསེན ཙཏུབྦིདྷཾ, པཉྩཝིདྷཉྩ.

ནཱམརཱུཔཾ ཝིཉྙཱཎསནྣིསྶཡཏོ ཀམྨཔཙྩཡཏོ ཙ ཨེཀཝིདྷཾ. སཱརམྨཎནཱརམྨཎཏོ དུཝིདྷཾ. ཨཏཱིཏཱདིཏོ ཏིཝིདྷཾ. ཡོནིགཏིཝསེན ཙཏུབྦིདྷཾ, པཉྩཝིདྷཉྩ.

སལཱ༹ཡཏནཾ སཉྫཱཏིསམོསརཎཊྛཱནཏོ ཨེཀཝིདྷཾ. བྷཱུཏཔྤསཱདཝིཉྙཱཎཱདིཏོ དུཝིདྷཾ. སམྤཏྟཱསམྤཏྟནོབྷཡགོཙརཏོ ཏིཝིདྷཾ. ཡོནིགཏིཔརིཡཱཔནྣཏོ ཙཏུབྦིདྷཾ པཉྩཝིདྷཉྩཱཏི ཨིམིནཱ ནཡེན ཕསྶཱདཱིནམྤི ཨེཀཝིདྷཱདིབྷཱཝོ ཝེདིཏབྦོཏི ཨེཝམེཏྠ ཨེཀཝིདྷཱདིཏོཔི ཝིཉྙཱཏབྦོ ཝིནིཙྪཡོ.

༥༩༠. ཨངྒཱནཉྩ ཝཝཏྠཱནཱཏི སོཀཱདཡོ ཙེཏྠ བྷཝཙཀྐསྶ ཨཝིཙྪེདདསྶནཏྠཾ ཝུཏྟཱ. ཛརཱམརཎབྦྷཱཧཏསྶ ཧི བཱལསྶ ཏེ སམྦྷཝནྟི. ཡཐཱཧ ¶ – ‘‘ཨསྶུཏཝཱ, བྷིཀྑཝེ, པུཐུཛྫནོ སཱརཱིརིཀཱཡ དུཀྑཱཡ ཝེདནཱཡ ཕུཊྛོ སམཱནོ སོཙཏི ཀིལམཏི པརིདེཝཏི ཨུརཏྟཱལི༹ཾ ཀནྡཏི སམྨོཧམཱཔཛྫཏཱི’’ཏི (སཾ. ནི. ༤.༢༥༢). ཡཱཝ ཙ ཏེསཾ པཝཏྟི, ཏཱཝ ཨཝིཛྫཱཡཱཏི པུནཔི ¶ ཨཝིཛྫཱཔཙྩཡཱ སངྑཱརཱཏི སམྦནྡྷམེཝ ཧོཏི བྷཝཙཀྐཾ. ཏསྨཱ ཏེསཾ ཛརཱམརཎེནེཝ ཨེཀསངྑེཔཾ ཀཏྭཱ དྭཱདསེཝ པཊིཙྩསམུཔྤཱདངྒཱནཱིཏི ཝེདིཏབྦཱནི. ཨེཝམེཏྠ ཨངྒཱནཾ ཝཝཏྠཱནཏོཔི ཝིཉྙཱཏབྦོ ཝིནིཙྪཡོ.

ཨཡཾ ཏཱཝེཏྠ སངྑེཔཀཐཱ.

ཨཝིཛྫཱཔཙྩཡཱསངྑཱརཔདཀཐཱ

༥༦༡. ཨཡཾ པན ཝིཏྠཱརནཡོ – ཨཝིཛྫཱཏི སུཏྟནྟཔརིཡཱཡེན དུཀྑཱདཱིསུ ཙཏཱུསུ ཋཱནེསུ ཨཉྙཱཎཾ, ཨབྷིདྷམྨཔརིཡཱཡེན པུབྦནྟཱདཱིཧི སདྡྷིཾ ཨཊྛསུ. ཝུཏྟཉྷེཏཾ ‘‘ཏཏྠ ཀཏམཱ ཨཝིཛྫཱ, དུཀྑེ ཨཉྙཱཎཾ…པེ… དུཀྑནིརོདྷགཱམིནིཡཱ པཊིཔདཱཡ ཨཉྙཱཎཾ, པུབྦནྟེ ཨཉྙཱཎཾ, ཨཔརནྟེ, པུབྦནྟཱཔརནྟེ, ཨིདཔྤཙྩཡཏཱཔཊིཙྩསམུཔྤནྣེསུ དྷམྨེསུ ཨཉྙཱཎ’’ནྟི (དྷ. ས. ༡༡༠༦). ཏཏྠ ཀིཉྩཱཔི ཋཔེཏྭཱ ལོཀུཏྟརཾ སཙྩདྭཡཾ སེསཊྛཱནེསུ ཨཱརམྨཎཝསེན ཨཝིཛྫཱ ཨུཔྤཛྫཏི, ཨེཝཾ སནྟེཔི པཊིཙྪཱདནཝསེནེཝ ཨིདྷ ཨདྷིཔྤེཏཱ. སཱ ཧི ཨུཔྤནྣཱ དུཀྑསཙྩཾ པཊིཙྪཱདེཏྭཱ ཏིཊྛཏི, ཡཱཐཱཝསརསལཀྑཎཾ པཊིཝིཛ྄ཛྷིཏུཾ ན དེཏི, ཏཐཱ སམུདཡཾ, ནིརོདྷཾ, མགྒཾ, པུབྦནྟསངྑཱཏཾ ཨཏཱིཏཾ ཁནྡྷཔཉྩཀཾ, ཨཔརནྟསངྑཱཏཾ ཨནཱགཏཾ ཁནྡྷཔཉྩཀཾ, པུབྦནྟཱཔརནྟསངྑཱཏཾ ཏདུབྷཡཾ, ཨིདཔྤཙྩཡཏཱཔཊིཙྩསམུཔྤནྣདྷམྨསངྑཱཏཾ ཨིདཔྤཙྩཡཏཉྩེཝ པཊིཙྩསམུཔྤནྣདྷམྨེ ཙ པཊིཙྪཱདེཏྭཱ ཏིཊྛཏི. ‘‘ཨཡཾ ཨཝིཛྫཱ, ཨིམེ སངྑཱརཱ’’ཏི ཨེཝཾ ཡཱཐཱཝསརསལཀྑཎམེཏྠ པཊིཝིཛ྄ཛྷིཏུཾ ན དེཏི. ཏསྨཱ དུཀྑེ ཨཉྙཱཎཾ…པེ… ཨིདཔྤཙྩཡཏཱཔཊིཙྩསམུཔྤནྣེསུ དྷམྨེསུ ཨཉྙཱཎནྟི ཝུཙྩཏི.

༥༩༢. སངྑཱརཱཏི པུཉྙཱདཡོ ཏཡོ ཀཱཡསངྑཱརཱདཡོ ཏཡོཏི ཨེཝཾ པུབྦེ སངྑེཔཏོ ཝུཏྟཱ ཚ, ཝིཏྠཱརཏོ པནེཏྠ པུཉྙཱབྷིསངྑཱརོ དཱནསཱིལཱདིཝསེན པཝཏྟཱ ཨཊྛ ཀཱམཱཝཙརཀུསལཙེཏནཱ ཙེཝ བྷཱཝནཱཝསེན པཝཏྟཱ པཉྩ རཱུཔཱཝཙརཀུསལཙེཏནཱ ཙཱཏི ཏེརས ཙེཏནཱ ཧོནྟི. ཨཔུཉྙཱབྷིསངྑཱརོ པཱཎཱཏིཔཱཏཱདིཝསེན པཝཏྟཱ དྭཱདས ཨཀུསལཙེཏནཱ ¶ . ཨཱནེཉྫཱབྷིསངྑཱརོ བྷཱཝནཱཝསེནེཝ པཝཏྟཱ ཙཏསྶོ ཨརཱུཔཱཝཙརཀུསལཙེཏནཱ ཙཱཏི ཏཡོཔི སངྑཱརཱ ཨེཀཱུནཏིཾས ཙེཏནཱ ཧོནྟི.

ཨིཏརེསུ ¶ པན ཏཱིསུ ཀཱཡསཉྩེཏནཱ ཀཱཡསངྑཱརོ, ཝཙཱིསཉྩེཏནཱ ཝཙཱིསངྑཱརོ, མནོསཉྩེཏནཱ ཙིཏྟསངྑཱརོ. ཨཡཾ ཏིཀོ ཀམྨཱཡཱུཧནཀྑཎེ པུཉྙཱབྷིསངྑཱརཱདཱིནཾ དྭཱརཏོ པཝཏྟིདསྶནཏྠཾ ཝུཏྟོ. ཀཱཡཝིཉྙཏྟིཾ སམུཊྛཱཔེཏྭཱ ཧི ཀཱཡདྭཱརཏོ པཝཏྟཱ ཨཊྛ ཀཱམཱཝཙརཀུསལཙེཏནཱ, དྭཱདས ཨཀུསལཙེཏནཱཏི སམཝཱིསཏི ཙེཏནཱ ཀཱཡསངྑཱརོ ནཱམ. ཏཱ ཨེཝ ཝཙཱིཝིཉྙཏྟིཾ སམུཊྛཱཔེཏྭཱ ཝཙཱིདྭཱརཏོ པཝཏྟཱ ཝཙཱིསངྑཱརོ ནཱམ. ཨབྷིཉྙཱཙེཏནཱ པནེཏྠ པརཏོ ཝིཉྙཱཎསྶ པཙྩཡོ ན ཧོཏཱིཏི ན གཧིཏཱ. ཡཐཱ ཙ ཨབྷིཉྙཱཙེཏནཱ, ཨེཝཾ ཨུདྡྷཙྩཙེཏནཱཔི ན ཧོཏི. ཏསྨཱ སཱཔི ཝིཉྙཱཎསྶ པཙྩཡབྷཱཝེ ཨཔནེཏབྦཱ, ཨཝིཛྫཱཔཙྩཡཱ པན སབྦཱཔེཏཱ ཧོནྟི. ཨུབྷོཔི ཝིཉྙཏྟིཡོ ཨསམུཊྛཱཔེཏྭཱ མནོདྭཱརེ ཨུཔྤནྣཱ པན སབྦཱཔི ཨེཀཱུནཏིཾསཏི ཙེཏནཱ ཙིཏྟསངྑཱརོཏི. ཨིཏི ཨཡཾ ཏིཀོ པུརིམཏྟིཀམེཝ པཝིསཏཱིཏི ཨཏྠཏོ པུཉྙཱབྷིསངྑཱརཱདཱིནཾཡེཝ ཝསེན ཨཝིཛྫཱཡ པཙྩཡབྷཱཝོ ཝེདིཏབྦོ.

༥༩༣. ཏཏྠ སིཡཱ – ཀཐཾ པནེཏཾ ཛཱནིཏབྦཾ ‘‘ཨིམེ སངྑཱརཱ ཨཝིཛྫཱ པཙྩཡཱ ཧོནྟཱི’’ཏི? ཨཝིཛྫཱབྷཱཝེ བྷཱཝཏོ. ཡསྶ ཧི དུཀྑཱདཱིསུ ཨཝིཛྫཱསངྑཱཏཾ ཨཉྙཱཎཾ ཨཔྤཧཱིནཾ ཧོཏི, སོ དུཀྑེ ཏཱཝ པུབྦནྟཱདཱིསུ ཙ ཨཉྙཱཎེན སཾསཱརདུཀྑཾ སུཁསཉྙཱཡ གཧེཏྭཱ ཏསྶེཝ ཧེཏུབྷཱུཏེ ཏིཝིདྷེཔི སངྑཱརེ ཨཱརབྷཏི. སམུདཡེ ཨཉྙཱཎེན དུཀྑཧེཏུབྷཱུཏེཔི ཏཎྷཱཔརིཀྑཱརེ སངྑཱརེ སུཁཧེཏུཏོ མཉྙམཱནོ ཨཱརབྷཏི. ནིརོདྷེ པན མགྒེ ཙ ཨཉྙཱཎེན དུཀྑསྶ ཨནིརོདྷབྷཱུཏེཔི གཏིཝིསེསེ དུཀྑནིརོདྷསཉྙཱི ཧུཏྭཱ ནིརོདྷསྶ ཙ ཨམགྒབྷཱུཏེསུཔི ཡཉྙཱམརཏཔཱདཱིསུ ནིརོདྷམགྒསཉྙཱི ཧུཏྭཱ དུཀྑནིརོདྷཾ པཏྠཡམཱནོ ཡཉྙཱམརཏཔཱདིམུཁེན ཏིཝིདྷེཔི སངྑཱརེ ཨཱརབྷཏི.

ཨཔིཙ སོ ཏཱཡ ཙཏཱུསུ སཙྩེསུ ཨཔྤཧཱིནཱཝིཛྫཏཱཡ ཝིསེསཏོ ཛཱཏིཛརཱརོགམརཎཱདིཨནེཀཱདཱིནཝཝོཀིཎྞམྤི པུཉྙཕལསངྑཱཏཾ དུཀྑཾ དུཀྑཏོ ཨཛཱནནྟོ ཏསྶ ཨདྷིགམཱཡ ཀཱཡཝཙཱིཙིཏྟསངྑཱརབྷེདཾ པུཉྙཱབྷིསངྑཱརཾ ¶ ཨཱརབྷཏི དེཝཙྪརཀཱམཀོ ཝིཡ མརུཔྤཔཱཏཾ. སུཁསམྨཏསྶཱཔི ཙ ཏསྶ པུཉྙཕལསྶ ཨནྟེ མཧཱཔརིལཱ༹ཧཛནིཀཾ ཝིཔརིཎཱམདུཀྑཏཾ ཨཔྤསྶཱདཏཉྩ ཨཔསྶནྟོཔི ཏཔྤཙྩཡཾ ཝུཏྟཔྤཀཱརམེཝ པུཉྙཱབྷིསངྑཱརཾ ཨཱརབྷཏི སལབྷོ ཝིཡ དཱིཔསིཁཱབྷིནིཔཱཏཾ, མདྷུབིནྡུགིདྡྷོ ཝིཡ ཙ མདྷུལིཏྟསཏྠདྷཱརཱལེཧནཾ. ཀཱམུཔསེཝནཱདཱིསུ ཙ སཝིཔཱཀེསུ ཨཱདཱིནཝཾ ཨཔསྶནྟོ སུཁསཉྙཱཡ ཙེཝ ཀིལེསཱབྷིབྷཱུཏཏཱཡ ཙ དྭཱརཏྟཡཔྤཝཏྟམྤི ཨཔུཉྙཱབྷིསངྑཱརཾ ཨཱརབྷཏི, བཱལོ ཝིཡ གཱུཐཀཱིལ༹ནཾ, མརིཏུཀཱམོ ཝིཡ ཙ ཝིསཁཱདནཾ. ཨཱརུཔྤཝིཔཱཀེསུ ¶ ཙཱཔི སངྑཱརཝིཔརིཎཱམདུཀྑཏཾ ཨནཝབུཛ྄ཛྷམཱནོ སསྶཏཱདིཝིཔལླཱསེན ཙིཏྟསངྑཱརབྷཱུཏཾ ཨཱནེཉྫཱབྷིསངྑཱརཾ ཨཱརབྷཏི, དིསཱམཱུལ༹ྷོ ཝིཡ པིསཱཙནགརཱབྷིམུཁམགྒགམནཾ.

ཨེཝཾ ཡསྨཱ ཨཝིཛྫཱབྷཱཝཏོཝ སངྑཱརབྷཱཝོ, ན ཨབྷཱཝཏོ. ཏསྨཱ ཛཱནིཏབྦམེཏཾ ‘‘ཨིམེ སངྑཱརཱ ཨཝིཛྫཱཔཙྩཡཱ ཧོནྟཱི’’ཏི. ཝུཏྟམྤི ཙེཏཾ ‘‘ཨཝིདྭཱ, བྷིཀྑཝེ, ཨཝིཛྫཱགཏོ པུཉྙཱབྷིསངྑཱརམྤི ཨབྷིསངྑརོཏི, ཨཔུཉྙཱབྷིསངྑཱརམྤི ཨབྷིསངྑརོཏི, ཨཱནེཉྫཱབྷིསངྑཱརམྤི ཨབྷིསངྑརོཏི. ཡཏོ ཙ ཁོ, བྷིཀྑཝེ, བྷིཀྑུནོ ཨཝིཛྫཱ པཧཱིནཱ, ཝིཛྫཱ ཨུཔྤནྣཱ; སོ ཨཝིཛྫཱཝིརཱགཱ ཝིཛྫུཔྤཱདཱ ནེཝ པུཉྙཱབྷིསངྑཱརཾ ཨབྷིསངྑརོཏཱི’’ཏི.

པཊྛཱནཔཙྩཡཀཐཱ

༥༩༤. ཨེཏྠཱཧ – གཎྷཱམ ཏཱཝ ཨེཏཾ ཨཝིཛྫཱ སངྑཱརཱནཾ པཙྩཡོཏི, ཨིདཾ པན ཝཏྟབྦཾ ཀཏམེསཾ སངྑཱརཱནཾ ཀཐཾ པཙྩཡོ ཧོཏཱིཏི? ཏཏྲིདཾ ཝུཙྩཏི, བྷགཝཏཱ ཧི ‘‘ཧེཏུཔཙྩཡོ, ཨཱརམྨཎཔཙྩཡོ, ཨདྷིཔཏིཔཙྩཡོ, ཨནནྟརཔཙྩཡོ, སམནནྟརཔཙྩཡོ, སཧཛཱཏཔཙྩཡོ, ཨཉྙམཉྙཔཙྩཡོ, ནིསྶཡཔཙྩཡོ, ཨུཔནིསྶཡཔཙྩཡོ, པུརེཛཱཏཔཙྩཡོ, པཙྪཱཛཱཏཔཙྩཡོ, ཨཱསེཝནཔཙྩཡོ, ཀམྨཔཙྩཡོ, ཝིཔཱཀཔཙྩཡོ, ཨཱཧཱརཔཙྩཡོ, ཨིནྡྲིཡཔཙྩཡོ, ཛྷཱནཔཙྩཡོ, མགྒཔཙྩཡོ, སམྤཡུཏྟཔཙྩཡོ, ཝིཔྤཡུཏྟཔཙྩཡོ, ཨཏྠིཔཙྩཡོ, ནཏྠིཔཙྩཡོ, ཝིགཏཔཙྩཡོ, ཨཝིགཏཔཙྩཡོ’’ཏི (པཊྛཱ. ༡.༡.པཙྩཡུདྡེས) ཙཏུཝཱིསཏི པཙྩཡཱ ཝུཏྟཱ.

ཏཏྠ ¶ ཧེཏུ ཙ སོ པཙྩཡོ ཙཱཏི ཧེཏུཔཙྩཡོ, ཧེཏུ ཧུཏྭཱ པཙྩཡོ, ཧེཏུབྷཱཝེན པཙྩཡོཏི ཝུཏྟཾ ཧོཏི. ཨཱརམྨཎཔཙྩཡཱདཱིསུཔི ཨེསེཝ ནཡོ.

༥༩༥. ཏཏྠ ཧེཏཱུཏི ཝཙནཱཝཡཝཀཱརཎམཱུལཱནམེཏཾ ཨདྷིཝཙནཾ. ‘‘པཊིཉྙཱ, ཧེཏཱུ’’ཏིཨཱདཱིསུ ཧི ལོཀེ ཝཙནཱཝཡཝོ ཧེཏཱུཏི ཝུཙྩཏི. སཱསནེ པན ‘‘ཡེ དྷམྨཱ ཧེཏུཔྤབྷཝཱ’’ཏིཨཱདཱིསུ (མཧཱཝ. ༦༠) ཀཱརཎཾ. ‘‘ཏཡོ ཀུསལཧེཏཱུ, ཏཡོ ཨཀུསལཧེཏཱུ’’ཏིཨཱདཱིསུ (དྷ. ས. ༡༠༥༩) མཱུལཾ ཧེཏཱུཏི ཝུཙྩཏི, ཏཾ ཨིདྷ ཨདྷིཔྤེཏཾ. པཙྩཡོཏི ཨེཏྠ པན ཨཡཾ ཝཙནཏྠོ, པཊིཙྩ ཨེཏསྨཱ ཨེཏཱིཏི པཙྩཡོ. ཨཔཙྩཀྑཱཡ ནཾ ཝཏྟཏཱིཏི ཨཏྠོ. ཡོ ཧི དྷམྨོ ཡཾ དྷམྨཾ ཨཔཙྩཀྑཱཡ ཏིཊྛཏི ཝཱ ཨུཔྤཛྫཏི ཝཱ, སོ ཏསྶ ¶ པཙྩཡོཏི ཝུཏྟཾ ཧོཏི. ལཀྑཎཏོ པན ཨུཔཀཱརཀལཀྑཎོ པཙྩཡོ. ཡོ ཧི དྷམྨོ ཡསྶ དྷམྨསྶ ཋིཏིཡཱ ཝཱ ཨུཔྤཏྟིཡཱ ཝཱ ཨུཔཀཱརཀོ ཧོཏི, སོ ཏསྶ པཙྩཡོཏི ཝུཙྩཏི. པཙྩཡོ, ཧེཏུ, ཀཱརཎཾ, ནིདཱནཾ, སམྦྷཝོ, པབྷཝོཏིཨཱདི ཨཏྠཏོ ཨེཀཾ, བྱཉྫནཏོ ནཱནཾ. ཨིཏི མཱུལཊྛེན ཧེཏུ, ཨུཔཀཱརཀཊྛེན པཙྩཡོཏི སངྑེཔཏོ མཱུལཊྛེན ཨུཔཀཱརཀོ དྷམྨོ ཧེཏུཔཙྩཡོ.

སོ སཱལིཨཱདཱིནཾ སཱལིབཱིཛཱདཱིནི ཝིཡ, མཎིཔབྷཱདཱིནཾ ཝིཡ ཙ མཎིཝཎྞཱདཡོ ཀུསལཱདཱིནཾ ཀུསལཱདིབྷཱཝསཱདྷཀོཏི ཨཱཙརིཡཱནཾ ཨདྷིཔྤཱཡོ. ཨེཝཾ སནྟེ པན ཏཾསམུཊྛཱནརཱུཔེསུ ཧེཏུཔཙྩཡཏཱ ན སམྤཛྫཏི. ན ཧི སོ ཏེསཾ ཀུསལཱདིབྷཱཝཾ སཱདྷེཏི, ན ཙ པཙྩཡོ ན ཧོཏི. ཝུཏྟཉྷེཏཾ ‘‘ཧེཏཱུ ཧེཏུསམྤཡུཏྟཀཱནཾ དྷམྨཱནཾ ཏཾསམུཊྛཱནཱནཉྩ རཱུཔཱནཾ ཧེཏུཔཙྩཡེན པཙྩཡོ’’ཏི (པཊྛཱ. ༡.༡.༡). ཨཧེཏུཀཙིཏྟཱནཉྩ ཝིནཱ ཨེཏེན ཨབྱཱཀཏབྷཱཝོ སིདྡྷོ, སཧེཏུཀཱནམྤི ཙ ཡོནིསོམནསིཀཱརཱདིཔཊིབདྡྷོ ཀུསལཱདིབྷཱཝོ, ན སམྤཡུཏྟཧེཏུཔཊིབདྡྷོ. ཡདི ཙ སམྤཡུཏྟཧེཏཱུསུ སབྷཱཝཏོཝ ཀུསལཱདིབྷཱཝོ སིཡཱ, སམྤཡུཏྟེསུ ཧེཏུཔཊིབདྡྷོ ཨལོབྷོ ཀུསལོ ཝཱ སིཡཱ ཨབྱཱཀཏོ ཝཱ. ཡསྨཱ པན ཨུབྷཡཐཱཔི ཧོཏི, ཏསྨཱ ཡཐཱ སམྤཡུཏྟེསུ, ཨེཝཾ ཧེཏཱུསུཔི ཀུསལཱདིཏཱ པརིཡེསིཏབྦཱ.

ཀུསལཱདིབྷཱཝསཱདྷནཝསེན ¶ པན ཧེཏཱུནཾ མཱུལཊྛཾ ཨགཧེཏྭཱ སུཔྤཏིཊྛིཏབྷཱཝསཱདྷནཝསེན གཡ྄ཧམཱནེ ན ཀིཉྩི ཝིརུཛ྄ཛྷཏི. ལདྡྷཧེཏུཔཙྩཡཱ ཧི དྷམྨཱ ཝིརཱུལ༹ྷམཱུལཱ ཝིཡ པཱདཔཱ ཐིརཱ ཧོནྟི སུཔྤཏིཊྛིཏཱ, ཨཧེཏུཀཱ ཏིལབཱིཛཀཱདིསེཝཱལཱ ཝིཡ ན སུཔྤཏིཊྛིཏཱ. ཨིཏི མཱུལཊྛེན ཨུཔཀཱརཀོཏི སུཔྤཏིཊྛིཏབྷཱཝསཱདྷནེན ཨུཔཀཱརཀོ དྷམྨོ ཧེཏུཔཙྩཡོཏི ཝེདིཏབྦོ.

༥༩༦. ཏཏོ པརེསུ ཨཱརམྨཎབྷཱཝེན ཨུཔཀཱརཀོ དྷམྨོ ཨཱརམྨཎཔཙྩཡོ. སོ ‘‘རཱུཔཱཡཏནཾ ཙཀྑུཝིཉྙཱཎདྷཱཏུཡཱ’’ཏི (པཊྛཱ. ༡.༡.༢) ཨཱརབྷིཏྭཱཔི ‘‘ཡཾ ཡཾ དྷམྨཾ ཨཱརབྦྷ ཡེ ཡེ དྷམྨཱ ཨུཔྤཛྫནྟི ཙིཏྟཙེཏསིཀཱ དྷམྨཱ, ཏེ ཏེ དྷམྨཱ ཏེསཾ ཏེསཾ དྷམྨཱནཾ ཨཱརམྨཎཔཙྩཡེན པཙྩཡོ’’ཏི (པཊྛཱ. ༡.༡.༢) ཨོསཱཔིཏཏྟཱ ན ཀོཙི དྷམྨོ ན ཧོཏི. ཡཐཱ ཧི དུབྦལོ པུརིསོ དཎྜཾ ཝཱ རཛྫུཾ ཝཱ ཨཱལམྦིཏྭཱཝ ཨུཊྛཧཏི ཙེཝ ཏིཊྛཏི ཙ, ཨེཝཾ ཙིཏྟཙེཏསིཀཱ དྷམྨཱ རཱུཔཱདིཨཱརམྨཎཾ ཨཱརབྦྷེཝ ཨུཔྤཛྫནྟི ཙེཝ ཏིཊྛནྟི ཙ. ཏསྨཱ སབྦེཔི ཙིཏྟཙེཏསིཀཱནཾ ཨཱརམྨཎབྷཱུཏཱ དྷམྨཱ ཨཱརམྨཎཔཙྩཡོཏི ཝེདིཏབྦཱ.

༥༩༧. ཛེཊྛཀཊྛེན ¶ ཨུཔཀཱརཀོ དྷམྨོ ཨདྷིཔཏིཔཙྩཡོ, སོ སཧཛཱཏཱརམྨཎཝསེན དུཝིདྷོ. ཏཏྠ ‘‘ཚནྡཱདྷིཔཏི ཚནྡསམྤཡུཏྟཀཱནཾ དྷམྨཱནཾ ཏཾསམུཊྛཱནཱནཉྩ རཱུཔཱནཾ ཨདྷིཔཏིཔཙྩཡེན པཙྩཡོ’’ཏིཨཱདིཝཙནཏོ (པཊྛཱ. ༡.༣.༣) ཚནྡཝཱིརིཡཙིཏྟཝཱིམཾསཱསངྑཱཏཱ ཙཏྟཱརོ དྷམྨཱ ཨདྷིཔཏིཔཙྩཡོཏི ཝེདིཏབྦཱ, ནོ ཙ ཁོ ཨེཀཏོ. ཡདཱ ཧི ཚནྡཾ དྷུརཾ ཚནྡཾ ཛེཊྛཀཾ ཀཏྭཱ ཙིཏྟཾ པཝཏྟཏི, ཏདཱ ཚནྡོཝ ཨདྷིཔཏི, ན ཨིཏརེ. ཨེས ནཡོ སེསེསུཔི.

ཡཾ པན དྷམྨཾ གརུཾ ཀཏྭཱ ཨརཱུཔདྷམྨཱ པཝཏྟནྟི, སོ ནེསཾ ཨཱརམྨཎཱདྷིཔཏི. ཏེན ཝུཏྟཾ ‘‘ཡཾ ཡཾ དྷམྨཾ གརུཾ ཀཏྭཱ ཡེ ཡེ དྷམྨཱ ཨུཔྤཛྫནྟི ཙིཏྟཙེཏསིཀཱ དྷམྨཱ, ཏེ ཏེ དྷམྨཱ ཏེསཾ ཏེསཾ དྷམྨཱནཾ ཨདྷིཔཏིཔཙྩཡེན པཙྩཡོ’’ཏི (པཊྛཱ. ༡.༡.༣).

༥༩༨. ཨནནྟརབྷཱཝེན ཨུཔཀཱརཀོ དྷམྨོ ཨནནྟརཔཙྩཡོ. སམནནྟརབྷཱཝེན ཨུཔཀཱརཀོ དྷམྨོ སམནནྟརཔཙྩཡོ. ཨིདཉྩ པཙྩཡདྭཡཾ ¶ བཧུདྷཱ པཔཉྩཡནྟི. ཨཡཾ པནེཏྠ སཱརོ, ཡོ ཧི ཨེས ཙཀྑུཝིཉྙཱཎཱནནྟརཱ མནོདྷཱཏུ, མནོདྷཱཏུཨནནྟརཱ མནོཝིཉྙཱཎདྷཱཏཱུཏིཨཱདི ཙིཏྟནིཡམོ, སོ ཡསྨཱ པུརིམཔུརིམཙིཏྟཝསེནེཝ ཨིཛ྄ཛྷཏི, ན ཨཉྙཐཱ, ཏསྨཱ ཨཏྟནོ ཨཏྟནོ ཨནནྟརཾ ཨནུརཱུཔསྶ ཙིཏྟུཔྤཱདསྶ ཨུཔྤཱདནསམཏྠོ དྷམྨོ ཨནནྟརཔཙྩཡོ. ཏེནེཝཱཧ – ‘‘ཨནནྟརཔཙྩཡོཏི ཙཀྑུཝིཉྙཱཎདྷཱཏུ ཏཾསམྤཡུཏྟཀཱ ཙ དྷམྨཱ མནོདྷཱཏུཡཱ ཏཾསམྤཡུཏྟཀཱནཉྩ དྷམྨཱནཾ ཨནནྟརཔཙྩཡེན པཙྩཡོ’’ཏིཨཱདི (པཊྛཱ. ༡.༡.༤). ཡོ ཨནནྟརཔཙྩཡོ, སྭེཝ སམནནྟརཔཙྩཡོ. བྱཉྫནམཏྟམེཝ ཧེཏྠ ནཱནཾ, ཨུཔཙཡསནྟཏཱིསུ ཝིཡ ཨདྷིཝཙནནིརུཏྟིདུཀཱདཱིསུ ཝིཡ ཙ. ཨཏྠཏོ པན ནཱནཾ ནཏྠི.

ཡམྤི ‘‘ཨཏྠཱནནྟརཏཱཡ ཨནནྟརཔཙྩཡོ, ཀཱལཱནནྟརཏཱཡ སམནནྟརཔཙྩཡོ’’ཏི ཨཱཙརིཡཱནཾ མཏཾ, ཏཾ ‘‘ནིརོདྷཱ ཝུཊྛཧནྟསྶ ནེཝསཉྙཱནཱསཉྙཱཡཏནཀུསལཾ ཕལསམཱཔཏྟིཡཱ སམནནྟརཔཙྩཡེན པཙྩཡོ’’ཏིཨཱདཱིཧི (པཊྛཱ. ༡.༡.༤༡༨) ཝིརུཛ྄ཛྷཏི. ཡམྤི ཏཏྠ ཝདནྟི ‘‘དྷམྨཱནཾ སམུཊྛཱཔནསམཏྠཏཱ ན པརིཧཱཡཏི, བྷཱཝནཱབལེན པན ཝཱརིཏཏྟཱ དྷམྨཱ སམནནྟརཱ ནུཔྤཛྫནྟཱི’’ཏི, ཏམྤི ཀཱལཱནནྟརཏཱཡ ཨབྷཱཝམེཝ སཱདྷེཏི. བྷཱཝནཱབལེན ཧི ཏཏྠ ཀཱལཱནནྟརཏཱ ནཏྠཱིཏི, མཡམྤི ཨེཏདེཝ ཝདཱམ. ཡསྨཱ ཙ ཀཱལཱནནྟརཏཱ ནཏྠི, ཏསྨཱ སམནནྟརཔཙྩཡཏཱ ན ཡུཛྫཏི. ཀཱལཱནནྟརཏཱཡ ཧི ཏེསཾ སམནནྟརཔཙྩཡོ ཧོཏཱིཏི ལདྡྷི. ཏསྨཱ ¶ ཨབྷིནིཝེསཾ ཨཀཏྭཱ བྱཉྫནམཏྟཏོཝེཏྠ ནཱནཱཀརཎཾ པཙྩེཏབྦཾ, ན ཨཏྠཏོ. ཀཐཾ? ནཏྠི ཨེཏེསཾ ཨནྟརནྟི ཧི ཨནནྟརཱ. སཎྛཱནཱབྷཱཝཏོ སུཊྛུ ཨནནྟརཱཏི སམནནྟརཱ.

༥༩༩. ཨུཔྤཛྫམཱནོཝ སཧ ཨུཔྤཱདནབྷཱཝེན ཨུཔཀཱརཀོ དྷམྨོ སཧཛཱཏཔཙྩཡོ པཀཱསསྶ པདཱིཔོ ཝིཡ. སོ ཨརཱུཔཀྑནྡྷཱདིཝསེན ཚབྦིདྷོ ཧོཏི. ཡཐཱཧ – ‘‘ཙཏྟཱརོ ཁནྡྷཱ ཨརཱུཔིནོ ཨཉྙམཉྙཾ སཧཛཱཏཔཙྩཡེན པཙྩཡོ. ཙཏྟཱརོ མཧཱབྷཱུཏཱ ཨཉྙམཉྙཾ, ཨོཀྐནྟིཀྑཎེ ནཱམརཱུཔཾ ཨཉྙམཉྙཾ, ཙིཏྟཙེཏསིཀཱ དྷམྨཱ ཙིཏྟསམུཊྛཱནཱནཾ རཱུཔཱནཾ, མཧཱབྷཱུཏཱ ཨུཔཱདཱརཱུཔཱནཾ, རཱུཔིནོ དྷམྨཱ ཨརཱུཔཱིནཾ དྷམྨཱནཾ ཀིཉྩིཀཱལེ སཧཛཱཏཔཙྩཡེན པཙྩཡོ, ཀིཉྩིཀཱལེ ན སཧཛཱཏཔཙྩཡེན པཙྩཡོ’’ཏི (པཊྛཱ. ༡.༡.༦). ཨིདཾ ཧདཡཝཏྠུམེཝ སནྡྷཱཡ ཝུཏྟཾ.

༦༠༠. ཨཉྙམཉྙཾ ¶ ཨུཔྤཱདནུཔཏྠམྦྷནབྷཱཝེན ཨུཔཀཱརཀོ དྷམྨོ ཨཉྙམཉྙཔཙྩཡོ ཨཉྙམཉྙཱུཔཏྠམྦྷཀཾ ཏིདཎྜཀཾ ཝིཡ. སོ ཨརཱུཔཀྑནྡྷཱདིཝསེན ཏིཝིདྷོ ཧོཏི. ཡཐཱཧ – ‘‘ཙཏྟཱརོ ཁནྡྷཱ ཨརཱུཔིནོ ཨཉྙམཉྙཔཙྩཡེན པཙྩཡོ. ཙཏྟཱརོ མཧཱབྷཱུཏཱ ཨོཀྐནྟིཀྑཎེ ནཱམརཱུཔཾ ཨཉྙམཉྙཔཙྩཡེན པཙྩཡོ’’ཏི (པཊྛཱ. ༡.༡.༧).

༦༠༡. ཨདྷིཊྛཱནཱཀཱརེན ནིསྶཡཱཀཱརེན ཙ ཨུཔཀཱརཀོ དྷམྨོ ནིསྶཡཔཙྩཡོ ཏརུཙིཏྟཀམྨཱདཱིནཾ པཐཝཱིཔཊཱདཡོ ཝིཡ. སོ ‘‘ཙཏྟཱརོ ཁནྡྷཱ ཨརཱུཔིནོ ཨཉྙམཉྙཾ ནིསྶཡཔཙྩཡེན པཙྩཡོ’’ཏི ཨེཝཾ སཧཛཱཏེ ཝུཏྟནཡེནེཝ ཝེདིཏབྦོ. ཚཊྛོ པནེཏྠ ཀོཊྛཱསོ ‘‘ཙཀྑཱཡཏནཾ ཙཀྑུཝིཉྙཱཎདྷཱཏུཡཱ…པེ… སོཏ… གྷཱན… ཛིཝ྄ཧཱ… ཀཱཡཱཡཏནཾ ཀཱཡཝིཉྙཱཎདྷཱཏུཡཱ ཏཾསམྤཡུཏྟཀཱནཉྩ དྷམྨཱནཾ ནིསྶཡཔཙྩཡེན པཙྩཡོ. ཡཾ རཱུཔཾ ནིསྶཱཡ མནོདྷཱཏུ ཙ མནོཝིཉྙཱཎདྷཱཏུ ཙ ཝཏྟནྟི, ཏཾ རཱུཔཾ མནོདྷཱཏུཡཱ ཙ མནོཝིཉྙཱཎདྷཱཏུཡཱ ཙ ཏཾསམྤཡུཏྟཀཱནཉྩ དྷམྨཱནཾ ནིསྶཡཔཙྩཡེན པཙྩཡོ’’ཏི (པཊྛཱ. ༡.༡.༨) ཨེཝཾ ཝིབྷཏྟོ.

༦༠༢. ཨུཔནིསྶཡཔཙྩཡོཏི ཨེཏྠ པན ཨཡཾ ཏཱཝ ཝཙནཏྠོ, ཏདདྷཱིནཝུཏྟིཏཱཡ ཨཏྟནོ ཕལེན ནིསྶིཏོ ན པཊིཀྑིཏྟོཏི ནིསྶཡོ. ཡཐཱ པན བྷུསོ ཨཱཡཱསོ ཨུཔཱཡཱསོ, ཨེཝཾ བྷུསོ ནིསྶཡོ ཨུཔནིསྶཡོ, བལཝཀཱརཎསྶེཏཾ ཨདྷིཝཙནཾ. ཏསྨཱ བལཝཀཱརཎབྷཱཝེན ཨུཔཀཱརཀོ དྷམྨོ ཨུཔནིསྶཡཔཙྩཡོཏི ཝེདིཏབྦོ.

སོ ¶ ཨཱརམྨཎཱུཔནིསྶཡོ ཨནནྟརཱུཔནིསྶཡོ པཀཏཱུཔནིསྶཡོཏི ཏིཝིདྷོ ཧོཏི. ཏཏྠ ‘‘དཱནཾ དཏྭཱ སཱིལཾ སམཱདིཡིཏྭཱ ཨུཔོསཐཀམྨཾ ཀཏྭཱ ཏཾ གརུཾཀཏྭཱ པཙྩཝེཀྑཏི, པུབྦེ སུཙིཎྞཱནི གརུཾཀཏྭཱ པཙྩཝེཀྑཏི, ཛྷཱནཱ ཝུཊྛཧིཏྭཱ ཛྷཱནཾ གརུཾཀཏྭཱ པཙྩཝེཀྑཏི, སེཀྑཱ གོཏྲབྷུཾ གརུཾཀཏྭཱ པཙྩཝེཀྑནྟི, ཝོདཱནཾ གརུཾཀཏྭཱ པཙྩཝེཀྑནྟི. སེཀྑཱ མགྒཱ ཝུཊྛཧིཏྭཱ མགྒཾ གརུཾཀཏྭཱ པཙྩཝེཀྑནྟཱི’’ཏི (པཊྛཱ. ༡.༡.༤༢༣) ཨེཝམཱདིནཱ ནཡེན ཨཱརམྨཎཱུཔནིསྶཡོ ཏཱཝ ཨཱརམྨཎཱདྷིཔཏིནཱ སདྡྷིཾ ནཱནཏྟཾ ཨཀཏྭཱཝ ཝིབྷཏྟོ. ཏཏྠ ཡཾ ཨཱརམྨཎཾ གརུཾཀཏྭཱ ཙིཏྟཙེཏསིཀཱ ཨུཔྤཛྫནྟི, ཏཾ ནིཡམཏོ ཏེསུ ཨཱརམྨཎེསུ བལཝཱརམྨཎཾ ཧོཏི. ཨིཏི གརུཀཏྟབྦམཏྟཊྛེན ¶ ཨཱརམྨཎཱདྷིཔཏི, བལཝཀཱརཎཊྛེན ཨཱརམྨཎཱུཔནིསྶཡོཏི ཨེཝམེཏེསཾ ནཱནཏྟཾ ཝེདིཏབྦཾ.

ཨནནྟརཱུཔནིསྶཡོཔི ‘‘པུརིམཱ པུརིམཱ ཀུསལཱ ཁནྡྷཱ པཙྪིམཱནཾ པཙྪིམཱནཾ ཀུསལཱནཾ ཁནྡྷཱནཾ ཨུཔནིསྶཡཔཙྩཡེན པཙྩཡོ’’ཏིཨཱདིནཱ (པཊྛཱ. ༡.༡.༩) ནཡེན ཨནནྟརཔཙྩཡེན སདྡྷིཾ ནཱནཏྟཾ ཨཀཏྭཱཝ ཝིབྷཏྟོ. མཱཏིཀཱནིཀྑེཔེ པན ནེསཾ ‘‘ཙཀྑུཝིཉྙཱཎདྷཱཏུ ཏཾསམྤཡུཏྟཀཱ ཙ དྷམྨཱ མནོདྷཱཏུཡཱ ཏཾསམྤཡུཏྟཀཱནཉྩ དྷམྨཱནཾ ཨནནྟརཔཙྩཡེན པཙྩཡོ’’ཏིཨཱདིནཱ (པཊྛཱ. ༡.༡.༤) ནཡེན ཨནནྟརསྶ, ‘‘པུརིམཱ པུརིམཱ ཀུསལཱ དྷམྨཱ པཙྪིམཱནཾ པཙྪིམཱནཾ ཀུསལཱནཾ དྷམྨཱནཾ ཨུཔནིསྶཡཔཙྩཡེན པཙྩཡོ’’ཏིཨཱདིནཱ (པཊྛཱ. ༡.༡.༩) ནཡེན ཨུཔནིསྶཡསྶ ཨཱགཏཏྟཱ ནིཀྑེཔེ ཝིསེསོ ཨཏྠི. སོཔི ཨཏྠཏོ ཨེཀཱིབྷཱཝམེཝ གཙྪཏི. ཨེཝཾ སནྟེཔི ཨཏྟནོ ཨཏྟནོ ཨནནྟརཱ ཨནུརཱུཔསྶ ཙིཏྟུཔྤཱདསྶ པཝཏྟནསམཏྠཏཱཡ ཨནནྟརཏཱ, པུརིམཙིཏྟསྶ པཙྪིམཙིཏྟུཔྤཱདནེ བལཝཏཱཡ ཨནནྟརཱུཔནིསྶཡཏཱ ཝེདིཏབྦཱ. ཡཐཱ ཧི ཧེཏུཔཙྩཡཱདཱིསུ ཀིཉྩི དྷམྨཾ ཝིནཱཔི ཙིཏྟཾ ཨུཔྤཛྫཏི, ན ཨེཝཾ ཨནནྟརཙིཏྟཾ ཝིནཱ ཙིཏྟསྶ ཨུཔྤཏྟི ནཱམ ཨཏྠི. ཏསྨཱ བལཝཔཙྩཡོ ཧོཏི. ཨིཏི ཨཏྟནོ ཨཏྟནོ ཨནནྟརཱ ཨནུརཱུཔཙིཏྟུཔྤཱདནཝསེན ཨནནྟརཔཙྩཡོ, བལཝཀཱརཎཝསེན ཨནནྟརཱུཔནིསྶཡོཏི ཨེཝམེཏེསཾ ནཱནཏྟཾ ཝེདིཏབྦཾ.

པཀཏཱུཔནིསྶཡོ པན པཀཏོ ཨུཔནིསྶཡོ པཀཏཱུཔནིསྶཡོ. པཀཏོ ནཱམ ཨཏྟནོ སནྟཱནེ ནིཔྥཱདིཏོ ཝཱ སདྡྷཱསཱིལཱདི ཨུཔསེཝིཏོ ཝཱ ཨུཏུབྷོཛནཱདི. པཀཏིཡཱ ཨེཝ ཝཱ ཨུཔནིསྶཡོ པཀཏཱུཔནིསྶཡོ, ཨཱརམྨཎཱནནྟརེཧི ཨསམྨིསྶོཏི ཨཏྠོ. ཏསྶ པཀཏཱུཔནིསྶཡོ ‘‘སདྡྷཾ ཨུཔནིསྶཱཡ དཱནཾ དེཏི, སཱིལཾ སམཱདིཡཏི, ཨུཔོསཐཀམྨཾ ཀརོཏི, ཛྷཱནཾ ཨུཔྤཱདེཏི, ཝིཔསྶནཾ ¶ ཨུཔྤཱདེཏི, མགྒཾ ཨུཔྤཱདེཏི, ཨབྷིཉྙཾ ཨུཔྤཱདེཏི, སམཱཔཏྟིཾ ཨུཔྤཱདེཏི. སཱིལཾ, སུཏཾ, ཙཱགཾ, པཉྙཾ ཨུཔནིསྶཱཡ དཱནཾ དེཏི…པེ… སམཱཔཏྟིཾ ཨུཔྤཱདེཏི. སདྡྷཱ, སཱིལཾ, སུཏཾ, ཙཱགོ, པཉྙཱ སདྡྷཱཡ, སཱིལསྶ, སུཏསྶ, ཙཱགསྶ, པཉྙཱཡ, ཨུཔནིསྶཡཔཙྩཡེན པཙྩཡོ’’ཏིཨཱདིནཱ (པཊྛཱ. ༡.༡.༤༢༣) ནཡེན ཨནེཀཔྤཀཱརཏོ པབྷེདོ ཝེདིཏབྦོ. ཨིཏི ཨིམེ སདྡྷཱདཡོ པཀཏཱ ཙེཝ བལཝཀཱརཎཊྛེན ཨུཔནིསྶཡཱ ཙཱཏི པཀཏཱུཔནིསྶཡོཏི.

༦༠༣. པཋམཏརཾ ¶ ཨུཔྤཛྫིཏྭཱ ཝཏྟམཱནབྷཱཝེན ཨུཔཀཱརཀོ དྷམྨོ པུརེཛཱཏཔཙྩཡོ. སོ པཉྩདྭཱརེ ཝཏྠཱརམྨཎཧདཡཝཏྠུཝསེན ཨེཀཱདསཝིདྷོ ཧོཏི. ཡཐཱཧ – ‘‘ཙཀྑཱཡཏནཾ ཙཀྑུཝིཉྙཱཎདྷཱཏུཡཱ ཏཾསམྤཡུཏྟཀཱནཉྩ དྷམྨཱནཾ པུརེཛཱཏཔཙྩཡེན པཙྩཡོ. སོཏ…པེ… གྷཱན, ཛིཝ྄ཧཱ, ཀཱཡཱཡཏནཾ, རཱུཔ, སདྡ, གནྡྷ, རས, ཕོཊྛབྦཱཡཏནཾ ཀཱཡཝིཉྙཱཎདྷཱཏུཡཱ ཏཾསམྤཡུཏྟཀཱནཉྩ དྷམྨཱནཾ པུརེཛཱཏཔཙྩཡེན པཙྩཡོ. རཱུཔ, སདྡ, གནྡྷ, རས, ཕོཊྛབྦཱཡཏནཾ མནོདྷཱཏུཡཱ. ཡཾ རཱུཔཾ ནིསྶཱཡ མནོདྷཱཏུ ཙ མནོཝིཉྙཱཎདྷཱཏུ ཙ ཝཏྟནྟི, ཏཾ རཱུཔཾ མནོདྷཱཏུཡཱ ཏཾསམྤཡུཏྟཀཱནཉྩ དྷམྨཱནཾ པུརེཛཱཏཔཙྩཡེན པཙྩཡོ. མནོཝིཉྙཱཎདྷཱཏུཡཱ ཏཾསམྤཡུཏྟཀཱནཉྩ དྷམྨཱནཾ ཀིཉྩིཀཱལེ པུརེཛཱཏཔཙྩཡེན པཙྩཡོ. ཀིཉྩིཀཱལེ ན པུརེཛཱཏཔཙྩཡེན པཙྩཡོ’’ཏི (པཊྛཱ. ༡.༡.༡༠).

༦༠༤. པུརེཛཱཏཱནཾ རཱུཔདྷམྨཱནཾ ཨུཔཏྠམྦྷཀཏྟེན ཨུཔཀཱརཀོ ཨརཱུཔདྷམྨོ པཙྪཱཛཱཏཔཙྩཡོ གིཛ྄ཛྷཔོཏཀསརཱིརཱནཾ ཨཱཧཱརཱསཱཙེཏནཱ ཝིཡ. ཏེན ཝུཏྟཾ ‘‘པཙྪཱཛཱཏཱ ཙིཏྟཙེཏསིཀཱ དྷམྨཱ པུརེཛཱཏསྶ ཨིམསྶ ཀཱཡསྶ པཙྪཱཛཱཏཔཙྩཡེན པཙྩཡོ’’ཏི (པཊྛཱ. ༡.༡.༡༡).

༦༠༥. ཨཱསེཝནཊྛེན ཨནནྟརཱནཾ པགུཎབལཝབྷཱཝཱཡ ཨུཔཀཱརཀོ དྷམྨོ ཨཱསེཝནཔཙྩཡོ གནྠཱདཱིསུ པུརིམཔུརིམཱབྷིཡོགོ ཝིཡ. སོ ཀུསལཱཀུསལཀིརིཡཛཝནཝསེན ཏིཝིདྷོ ཧོཏི. ཡཐཱཧ – ‘‘པུརིམཱ པུརིམཱ ཀུསལཱ དྷམྨཱ པཙྪིམཱནཾ པཙྪིམཱནཾ ཀུསལཱནཾ དྷམྨཱནཾ ཨཱསེཝནཔཙྩཡེན པཙྩཡོ. པུརིམཱ པུརིམཱ ཨཀུསལཱ…པེ… ཀིརིཡཱབྱཱཀཏཱ དྷམྨཱ པཙྪིམཱནཾ པཙྪིམཱནཾ ཀིརིཡཱབྱཱཀཏཱནཾ དྷམྨཱནཾ ཨཱསེཝནཔཙྩཡེན པཙྩཡོ’’ཏི (པཊྛཱ. ༡.༡.༡༢).

༦༠༦. ཙིཏྟཔཡོགསངྑཱཏེན ཀིརིཡབྷཱཝེན ཨུཔཀཱརཀོ དྷམྨོ ཀམྨཔཙྩཡོ. སོ ནཱནཀྑཎིཀཱཡ ཙེཝ ཀུསལཱཀུསལཙེཏནཱཡ སཧཛཱཏཱཡ ཙ སབྦཱཡཔི ཙེཏནཱཡ ཝསེན དུཝིདྷོ ཧོཏི ¶ . ཡཐཱཧ – ‘‘ཀུསལཱཀུསལཾ ཀམྨཾ ཝིཔཱཀཱནཾ ཁནྡྷཱནཾ ཀཊཏྟཱ ཙ རཱུཔཱནཾ ཀམྨཔཙྩཡེན པཙྩཡོ. ཙེཏནཱ སམྤཡུཏྟཀཱནཾ དྷམྨཱནཾ ཏཾསམུཊྛཱནཱནཉྩ རཱུཔཱནཾ ཀམྨཔཙྩཡེན པཙྩཡོ’’ཏི (པཊྛཱ. ༡.༡.༡༣).

༦༠༧. ནིརུསྶཱཧསནྟབྷཱཝེན ¶ ནིརུསྶཱཧསནྟབྷཱཝཱཡ ཨུཔཀཱརཀོ ཝིཔཱཀདྷམྨོ ཝིཔཱཀཔཙྩཡོ. སོ པཝཏྟེ ཏཾསམུཊྛཱནཱནཾ, པཊིསནྡྷིཡཾ ཀཊཏྟཱ ཙ རཱུཔཱནཾ, སབྦཏྠ ཙ སམྤཡུཏྟདྷམྨཱནཾ པཙྩཡོ ཧོཏི. ཡཐཱཧ –‘‘ཝིཔཱཀཱབྱཱཀཏོ ཨེཀོ ཁནྡྷོ ཏིཎྞནྣཾ ཁནྡྷཱནཾ ཙིཏྟསམུཊྛཱནཱནཉྩ རཱུཔཱནཾ ཝིཔཱཀཔཙྩཡེན པཙྩཡོ…པེ… པཊིསནྡྷིཀྑཎེ ཝིཔཱཀཱབྱཱཀཏོ ཨེཀོ ཁནྡྷོ ཏིཎྞནྣཾ ཁནྡྷཱནཾ ཀཊཏྟཱ ཙ རཱུཔཱནཾ. ཏཡོ ཁནྡྷཱ ཨེཀསྶ ཁནྡྷསྶ. དྭེ ཁནྡྷཱ དྭིནྣཾ ཁནྡྷཱནཾ ཀཊཏྟཱ ཙ རཱུཔཱནཾ ཝིཔཱཀཔཙྩཡེན པཙྩཡོ. ཁནྡྷཱ ཝཏྠུསྶ ཝིཔཱཀཔཙྩཡེན པཙྩཡོ’’ཏི.

༦༠༨. རཱུཔཱརཱུཔཱནཾ ཨུཔཏྠམྦྷཀཊྛེན ཨུཔཀཱརཀཱ ཙཏྟཱརོ ཨཱཧཱརཱ ཨཱཧཱརཔཙྩཡོ. ཡཐཱཧ –‘‘ཀབལཱི༹ཀཱརོ ཨཱཧཱརོ ཨིམསྶ ཀཱཡསྶ ཨཱཧཱརཔཙྩཡེན པཙྩཡོ. ཨརཱུཔིནོ ཨཱཧཱརཱ སམྤཡུཏྟཀཱནཾ དྷམྨཱནཾ ཏཾསམུཊྛཱནཱནཉྩ རཱུཔཱནཾ ཨཱཧཱརཔཙྩཡེན པཙྩཡོ’’ཏི (པཊྛཱ. ༡.༡.༡༥). པཉྷཱཝཱརེ པན ‘‘པཊིསནྡྷིཀྑཎེ ཝིཔཱཀཱབྱཱཀཏཱ ཨཱཧཱརཱ སམྤཡུཏྟཀཱནཾ ཁནྡྷཱནཾ ཀཊཏྟཱ ཙ རཱུཔཱནཾ ཨཱཧཱརཔཙྩཡེན པཙྩཡོ’’ཏིཔི (པཊྛཱ. ༡.༡.༤༢༩) ཝུཏྟཾ.

༦༠༩. ཨདྷིཔཏིཡཊྛེན ཨུཔཀཱརཀཱ ཨིཏྠིནྡྲིཡཔུརིསིནྡྲིཡཝཛྫཱ ཝཱིསཏིནྡྲིཡཱ ཨིནྡྲིཡཔཙྩཡོ. ཏཏྠ ཙཀྑུནྡྲིཡཱདཡོ ཨརཱུཔདྷམྨཱནཾཡེཝ, སེསཱ རཱུཔཱརཱུཔཱནཾ པཙྩཡཱ ཧོནྟི. ཡཐཱཧ – ‘‘ཙཀྑུནྡྲིཡཾ ཙཀྑུཝིཉྙཱཎདྷཱཏུཡཱ…པེ… སོཏ… གྷཱན… ཛིཝ྄ཧཱ… ཀཱཡིནྡྲིཡཾ ཀཱཡཝིཉྙཱཎདྷཱཏུཡཱ ཏཾསམྤཡུཏྟཀཱནཉྩ དྷམྨཱནཾ ཨིནྡྲིཡཔཙྩཡེན པཙྩཡོ. རཱུཔཛཱིཝིཏིནྡྲིཡཾ ཀཊཏྟཱརཱུཔཱནཾ ཨིནྡྲིཡཔཙྩཡེན པཙྩཡོ. ཨརཱུཔིནོ ཨིནྡྲིཡཱ སམྤཡུཏྟཀཱནཾ དྷམྨཱནཾ ཏཾསམུཊྛཱནཱནཉྩ རཱུཔཱནཾ ཨིནྡྲིཡཔཙྩཡེན པཙྩཡོ’’ཏི (པཊྛཱ. ༡.༡.༡༦). པཉྷཱཝཱརེ པན ‘‘པཊིསནྡྷིཀྑཎེ ཝིཔཱཀཱབྱཱཀཏཱ ཨིནྡྲིཡཱ སམྤཡུཏྟཀཱནཾ ཁནྡྷཱནཾ ཀཊཏྟཱ ཙ རཱུཔཱནཾ ཨིནྡྲིཡཔཙྩཡེན པཙྩཡོ’’ཏིཔི (པཊྛཱ. ༡.༡.༤༣༠) ཝུཏྟཾ.

༦༡༠. ཨུཔནིཛ྄ཛྷཱཡནཊྛེན ཨུཔཀཱརཀཱནི ཋཔེཏྭཱ དྭིཔཉྩཝིཉྙཱཎེ སུཁདུཀྑཝེདནཱདྭཡཾ སབྦཱནིཔི ¶ ཀུསལཱདིབྷེདཱནི སཏྟ ཛྷཱནངྒཱནི ཛྷཱནཔཙྩཡོ. ཡཐཱཧ –‘‘ཛྷཱནངྒཱནི ཛྷཱནསམྤཡུཏྟཀཱནཾ དྷམྨཱནཾ ཏཾསམུཊྛཱནཱནཉྩ རཱུཔཱནཾ ཛྷཱནཔཙྩཡེན ¶ པཙྩཡོ’’ཏི (པཊྛཱ. ༡.༡.༡༧). པཉྷཱཝཱརེ པན ‘‘པཊིསནྡྷིཀྑཎེ ཝིཔཱཀཱབྱཱཀཏཱནི ཛྷཱནངྒཱནི སམྤཡུཏྟཀཱནཾ ཁནྡྷཱནཾ ཀཊཏྟཱ ཙ རཱུཔཱནཾ ཛྷཱནཔཙྩཡེན པཙྩཡོ’’ཏིཔི (པཊྛཱ. ༡.༡.༤༣༡) ཝུཏྟཾ.

༦༡༡. ཡཏོ ཏཏོ ཝཱ ནིཡྻཱནཊྛེན ཨུཔཀཱརཀཱནི ཀུསལཱདིབྷེདཱནི དྭཱདས མགྒངྒཱནི མགྒཔཙྩཡོ. ཡཐཱཧ – ‘‘མགྒངྒཱནི མགྒསམྤཡུཏྟཀཱནཾ དྷམྨཱནཾ ཏཾསམུཊྛཱནཱནཉྩ རཱུཔཱནཾ མགྒཔཙྩཡེན པཙྩཡོ’’ཏི (པཊྛཱ. ༡.༡.༡༨). པཉྷཱཝཱརེ པན ‘‘པཊིསནྡྷིཀྑཎེ ཝིཔཱཀཱབྱཱཀཏཱནི མགྒངྒཱནི སམྤཡུཏྟཀཱནཾ ཁནྡྷཱནཾ ཀཊཏྟཱ ཙ རཱུཔཱནཾ མགྒཔཙྩཡེན པཙྩཡོ’’ཏིཔི (པཊྛཱ. ༡.༡.༤༣༢) ཝུཏྟཾ. ཨེཏེ པན དྭེཔི ཛྷཱནམགྒཔཙྩཡཱ དྭིཔཉྩཝིཉྙཱཎཱཧེཏུཀཙིཏྟེསུ ན ལབྦྷནྟཱིཏི ཝེདིཏབྦཱ.

༦༡༢. ཨེཀཝཏྠུཀཨེཀཱརམྨཎཨེཀུཔྤཱདེཀནིརོདྷསངྑཱཏེན སམྤཡུཏྟབྷཱཝེན ཨུཔཀཱརཀཱ ཨརཱུཔདྷམྨཱ སམྤཡུཏྟཔཙྩཡོ. ཡཐཱཧ – ‘‘ཙཏྟཱརོ ཁནྡྷཱ ཨརཱུཔིནོ ཨཉྙམཉྙཾ སམྤཡུཏྟཔཙྩཡེན པཙྩཡོ’’ཏི (པཊྛཱ. ༡.༡.༡༩).

༦༡༣. ཨེཀཝཏྠུཀཱདིབྷཱཝཱནུཔགམེན ཨུཔཀཱརཀཱ རཱུཔིནོ དྷམྨཱ ཨརཱུཔཱིནཾ དྷམྨཱནཾ, ཨརཱུཔིནོཔི རཱུཔཱིནཾ ཝིཔྤཡུཏྟཔཙྩཡོ. སོ སཧཛཱཏཔཙྪཱཛཱཏཔུརེཛཱཏཝསེན ཏིཝིདྷོ ཧོཏི. ཝུཏྟཉྷེཏཾ ‘‘སཧཛཱཏཱ ཀུསལཱ ཁནྡྷཱ ཙིཏྟསམུཊྛཱནཱནཾ རཱུཔཱནཾ ཝིཔྤཡུཏྟཔཙྩཡེན པཙྩཡོ. པཙྪཱཛཱཏཱ ཀུསལཱ ཁནྡྷཱ པུརེཛཱཏསྶ ཨིམསྶ ཀཱཡསྶ ཝིཔྤཡུཏྟཔཙྩཡེན པཙྩཡོ’’ཏི (པཊྛཱ. ༡.༡.༤༣༤). ཨབྱཱཀཏཔདསྶ པན སཧཛཱཏཝིབྷངྒེ ‘‘པཊིསནྡྷིཀྑཎེ ཝིཔཱཀཱབྱཱཀཏཱ ཁནྡྷཱ ཀཊཏྟཱརཱུཔཱནཾ ཝིཔྤཡུཏྟཔཙྩཡེན པཙྩཡོ. ཁནྡྷཱ ཝཏྠུསྶ. ཝཏྠུ ཁནྡྷཱནཾ ཝིཔྤཡུཏྟཔཙྩཡེན པཙྩཡོ’’ཏིཔི (པཊྛཱ. ༡.༡.༤༣༤) ཝུཏྟཾ. པུརེཛཱཏཾ པན ཙཀྑུནྡྲིཡཱདིཝཏྠུཝསེནེཝ ཝེདིཏབྦཾ. ཡཐཱཧ – ‘‘པུརེཛཱཏཾ ཙཀྑཱཡཏནཾ ཙཀྑུཝིཉྙཱཎསྶ…པེ… ཀཱཡཱཡཏནཾ ཀཱཡཝིཉྙཱཎསྶ ཝིཔྤཡུཏྟཔཙྩཡེན པཙྩཡོ. ཝཏྠུ ཝིཔཱཀཱབྱཱཀཏཱནཾ ཀིརིཡཱབྱཱཀཏཱནཾ ཁནྡྷཱནཾ…པེ… ཝཏྠུ ཀུསལཱནཾ ཁནྡྷཱནཾ…པེ… ཝཏྠུ ཨཀུསལཱནཾ ཁནྡྷཱནཾ ཝིཔྤཡུཏྟཔཙྩཡེན པཙྩཡོ’’ཏི (པཊྛཱ. ༡.༡.༤༣༤).

༦༡༤. པཙྩུཔྤནྣལཀྑཎེན ¶ ཨཏྠིབྷཱཝེན ཏཱདིསསྶེཝ དྷམྨསྶ ཨུཔཏྠམྦྷཀཏྟེན ཨུཔཀཱརཀོ དྷམྨོ ཨཏྠིཔཙྩཡོ. ཏསྶ ཨརཱུཔཀྑནྡྷམཧཱབྷཱུཏནཱམརཱུཔཙིཏྟཙེཏསིཀམཧཱབྷཱུཏཨཱཡཏནཝཏྠུཝསེན སཏྟདྷཱ མཱཏིཀཱ ¶ ནིཀྑིཏྟཱ. ཡཐཱཧ –‘‘ཙཏྟཱརོ ཁནྡྷཱ ཨརཱུཔིནོ ཨཉྙམཉྙཾ ཨཏྠིཔཙྩཡེན པཙྩཡོ, ཙཏྟཱརོ མཧཱབྷཱུཏཱ, ཨོཀྐནྟིཀྑཎེ ནཱམརཱུཔཾ ཨཉྙམཉྙཾ. ཙིཏྟཙེཏསིཀཱ དྷམྨཱ ཙིཏྟསམུཊྛཱནཱནཾ རཱུཔཱནཾ. མཧཱབྷཱུཏཱ ཨུཔཱདཱརཱུཔཱནཾ. ཙཀྑཱཡཏནཾ ཙཀྑུཝིཉྙཱཎདྷཱཏུཡཱ…པེ… ཀཱཡཱཡཏནཾ…པེ… རཱུཔཱཡཏནཾ…པེ… ཕོཊྛབྦཱཡཏནཾ ཀཱཡཝིཉྙཱཎདྷཱཏུཡཱ ཏཾསམྤཡུཏྟཀཱནཉྩ དྷམྨཱནཾ ཨཏྠིཔཙྩཡེན པཙྩཡོ. རཱུཔཱཡཏནཾ…པེ… ཕོཊྛབྦཱཡཏནཾ མནོདྷཱཏུཡཱ ཏཾསམྤཡུཏྟཀཱནཉྩ དྷམྨཱནཾ. ཡཾ རཱུཔཾ ནིསྶཱཡ མནོདྷཱཏུ ཙ མནོཝིཉྙཱཎདྷཱཏུ ཙ ཝཏྟནྟི, ཏཾ རཱུཔཾ མནོདྷཱཏུཡཱ ཙ མནོཝིཉྙཱཎདྷཱཏུཡཱ ཙ ཏཾསམྤཡུཏྟཀཱནཉྩ དྷམྨཱནཾ ཨཏྠིཔཙྩཡེན པཙྩཡོ’’ཏི (པཊྛཱ. ༡.༡.༢༡).

པཉྷཱཝཱརེ པན སཧཛཱཏཾ པུརེཛཱཏཾ པཙྪཱཛཱཏཾ ཨཱཧཱརཾ ཨིནྡྲིཡནྟིཔི ནིཀྑིཔིཏྭཱ སཧཛཱཏེ ཏཱཝ ‘‘ཨེཀོ ཁནྡྷོ ཏིཎྞནྣཾ ཁནྡྷཱནཾ ཏཾསམུཊྛཱནཱནཉྩ རཱུཔཱནཾ ཨཏྠིཔཙྩཡེན པཙྩཡོ’’ཏིཨཱདིནཱ (པཊྛཱ. ༡.༡.༤༣༥) ནཡེན ནིདྡེསོ ཀཏོ, པུརེཛཱཏེ པུརེཛཱཏཱནཾ ཙཀྑཱདཱིནཾ ཝསེན ནིདྡེསོ ཀཏོ. པཙྪཱཛཱཏེ པུརེཛཱཏསྶ ཨིམསྶ ཀཱཡསྶ པཙྪཱཛཱཏཱནཾ ཙིཏྟཙེཏསིཀཱནཾ པཙྩཡཝསེན ནིདྡེསོ ཀཏོ. ཨཱཧཱརིནྡྲིཡེསུ ‘‘ཀབལཱི༹ཀཱརོ ཨཱཧཱརོ ཨིམསྶ ཀཱཡསྶ ཨཏྠིཔཙྩཡེན པཙྩཡོ. རཱུཔཛཱིཝིཏིནྡྲིཡཾ ཀཊཏྟཱརཱུཔཱནཾ ཨཏྠིཔཙྩཡེན པཙྩཡོ’’ཏི (པཊྛཱ. ༡.༡.༤༣༥) ཨེཝཾ ནིདྡེསོ ཀཏོཏི.

༦༡༥. ཨཏྟནོ ཨནནྟརཱ ཨུཔྤཛྫམཱནཱནཾ ཨརཱུཔདྷམྨཱནཾ པཝཏྟིཨོཀཱསདཱནེན ཨུཔཀཱརཀཱ སམནནྟརནིརུདྡྷཱ ཨརཱུཔདྷམྨཱ ནཏྠིཔཙྩཡོ. ཡཐཱཧ –‘‘སམནནྟརནིརུདྡྷཱ ཙིཏྟཙེཏསིཀཱ དྷམྨཱ པཊུཔྤནྣཱནཾ ཙིཏྟཙེཏསིཀཱནཾ དྷམྨཱནཾ ནཏྠིཔཙྩཡེན པཙྩཡོ’’ཏི.

ཏེ ཨེཝ ཝིགཏབྷཱཝེན ཨུཔཀཱརཀཏྟཱ ཝིགཏཔཙྩཡོ. ཡཐཱཧ – ‘‘སམནནྟརཝིགཏཱ ཙིཏྟཙེཏསིཀཱ དྷམྨཱ པཊུཔྤནྣཱནཾ ཙིཏྟཙེཏསིཀཱནཾ དྷམྨཱནཾ ཝིགཏཔཙྩཡེན པཙྩཡོ’’ཏི.

ཨཏྠི པཙྩཡདྷམྨཱ ཨེཝ ཙ ཨཝིགཏབྷཱཝེན ཨུཔཀཱརཀཏྟཱ ཨཝིགཏཔཙྩཡོཏི ཝེདིཏབྦཱ. དེསནཱཝིལཱསེན ¶ པན ཏཐཱ ཝིནེཏབྦཝེནེཡྻཝསེན ཝཱ ཨཡཾ དུཀོ ཝུཏྟོ, ཨཧེཏུཀདུཀཾ ཝཏྭཱཔི ཧེཏུཝིཔྤཡུཏྟདུཀོ ཝིཡཱཏི.

ཨཝིཛྫཱཔཙྩཡཱསངྑཱརཔདཝིཏྠཱརཀཐཱ

༦༡༦. ཨེཝམིམེསུ ¶ ཙཏུཝཱིསཏིཡཱ པཙྩཡེསུ ཨཡཾ ཨཝིཛྫཱ,

པཙྩཡོ ཧོཏི པུཉྙཱནཾ, དུཝིདྷཱནེཀདྷཱ པན;

པརེསཾ པཙྪིམཱནཾ སཱ, ཨེཀདྷཱ པཙྩཡོ མཏཱཏི.

ཏཏྠ པུཉྙཱནཾ དུཝིདྷཱཏི ཨཱརམྨཎཔཙྩཡེན ཙ ཨུཔནིསྶཡཔཙྩཡེན ཙཱཏི དྭེདྷཱ པཙྩཡོ ཧོཏི. སཱ ཧི ཨཝིཛྫཾ ཁཡཏོ ཝཡཏོ སམྨསནཀཱལེ ཀཱམཱཝཙརཱནཾ པུཉྙཱབྷིསངྑཱརཱནཾ ཨཱརམྨཎཔཙྩཡེན པཙྩཡོ ཧོཏི. ཨབྷིཉྙཱཙིཏྟེན སམོཧཙིཏྟཾ ཛཱནནཀཱལེ རཱུཔཱཝཙརཱནཾ. ཨཝིཛྫཱསམཏིཀྐམཏྠཱཡ པན དཱནཱདཱིནི ཙེཝ ཀཱམཱཝཙརཔུཉྙཀིརིཡཝཏྠཱུནི པཱུརེནྟསྶ, རཱུཔཱཝཙརཛ྄ཛྷཱནཱནི ཙ ཨུཔྤཱདེནྟསྶ དྭིནྣམྤི ཏེསཾ ཨུཔནིསྶཡཔཙྩཡེན པཙྩཡོ ཧོཏི. ཏཐཱ ཨཝིཛྫཱསམྨཱུལ༹ྷཏྟཱ ཀཱམབྷཝརཱུཔབྷཝསམྤཏྟིཡོ པཏྠེཏྭཱ ཏཱནེཝ པུཉྙཱནི ཀརོནྟསྶ.

ཨནེཀདྷཱ པན པརེསནྟི ཨཔུཉྙཱབྷིསངྑཱརཱནཾ ཨནེཀདྷཱ པཙྩཡོ ཧོཏི. ཀཐཾ? ཨེསཱ ཧི ཨཝིཛྫཾ ཨཱརབྦྷ རཱགཱདཱིནཾ ཨུཔྤཛྫནཀཱལེ ཨཱརམྨཎཔཙྩཡེན, གརུཾཀཏྭཱ ཨསྶཱདནཀཱལེ ཨཱརམྨཎཱདྷིཔཏིཨཱརམྨཎཱུཔནིསྶཡེཧི, ཨཝིཛྫཱསམྨཱུལ༹ྷསྶ ཨནཱདཱིནཝདསྶཱཝིནོ པཱཎཱཏིཔཱཏཱདཱིནི ཀརོནྟསྶ ཨུཔནིསྶཡཔཙྩཡེན, དུཏིཡཛཝནཱདཱིནཾ ཨནནྟརསམནནྟརཨནནྟརཱུཔནིསྶཡཱསེཝནནཏྠིཝིགཏཔཙྩཡེཧི, ཡཾཀིཉྩི ཨཀུསལཾ ཀརོནྟསྶ ཧེཏུ སཧཛཱཏ ཨཉྙམཉྙ ནིསྶཡ སམྤཡུཏྟ ཨཏྠི ཨཝིགཏཔཙྩཡེཧཱིཏི ཨནེཀདྷཱ པཙྩཡོ ཧོཏི.

པཙྪིམཱནཾ སཱ ཨེཀདྷཱ པཙྩཡོ མཏཱཏི ཨཱནེཉྫཱབྷིསངྑཱརཱནཾ ཨུཔནིསྶཡཔཙྩཡེནེཝ ཨེཀདྷཱ པཙྩཡོ མཏཱ. སོ པནསྶཱ ཨུཔནིསྶཡབྷཱཝོ པུཉྙཱབྷིསངྑཱརེ ཝུཏྟནཡེནེཝ ཝེདིཏབྦོཏི.

༦༡༧. ཨེཏྠཱཧ – ཀིཾ པནཱཡམེཀཱཝ ཨཝིཛྫཱ སངྑཱརཱནཾ པཙྩཡོ, ཨུདཱཧུ ཨཉྙེཔི པཙྩཡཱ ¶ སནྟཱིཏི? ཀིཾ པནེཏྠ, ཡདི ཏཱཝ ཨེཀཱཝ, ཨེཀཀཱརཎཝཱདོ ཨཱཔཛྫཏི. ཨཐཉྙེཔི སནྟི, ‘‘ཨཝིཛྫཱཔཙྩཡཱ སངྑཱརཱ’’ཏི ཨེཀཀཱརཎནིདྡེསོ ནུཔཔཛྫཏཱིཏི? ན ནུཔཔཛྫཏི. ཀསྨཱ? ཡསྨཱ –

ཨེཀཾ ན ཨེཀཏོ ཨིདྷ, ནཱནེཀམནེཀཏོཔི ནོ ཨེཀཾ;

ཕལམཏྠི ཨཏྠི པན ཨེཀ-ཧེཏུཕལདཱིཔནེ ཨཏྠོ.

ཨེཀཏོ ¶ ཧི ཀཱརཎཏོ ན ཨིདྷ ཀིཉྩི ཨེཀཾ ཕལམཏྠི, ན ཨནེཀཾ. ནཱཔི ཨནེཀེཧི ཀཱརཎེཧི ཨེཀཾ. ཨནེཀེཧི པན ཀཱརཎེཧི ཨནེཀམེཝ ཧོཏི. ཏཐཱ ཧི ཨནེཀེཧི ཨུཏུཔཐཝཱིབཱིཛསལིལསངྑཱཏེཧི ཀཱརཎེཧི ཨནེཀམེཝ རཱུཔགནྡྷརསཱདིཀཾ ཨངྐུརསངྑཱཏཾ ཕལཾ ཨུཔྤཛྫམཱནཾ དིསྶཏི. ཡཾ པནེཏཾ ‘‘ཨཝིཛྫཱཔཙྩཡཱ སངྑཱརཱ, སངྑཱརཔཙྩཡཱ ཝིཉྙཱཎ’’ནྟི ཨེཀེཀཧེཏུཕལདཱིཔནཾ ཀཏཾ, ཏཏྠ ཨཏྠོ ཨཏྠི, པཡོཛནཾ ཝིཛྫཏི.

བྷགཝཱ ཧི ཀཏྠཙི པདྷཱནཏྟཱ, ཀཏྠཙི པཱཀཊཏྟཱ, ཀཏྠཙི ཨསཱདྷཱརཎཏྟཱ དེསནཱཝིལཱསསྶ ཙ ཝེནེཡྻཱནཉྩ ཨནུརཱུཔཏོ ཨེཀམེཝ ཧེཏུཾ ཝཱ ཕལཾ ཝཱ དཱིཔེཏི. ‘‘ཕསྶཔཙྩཡཱ ཝེདནཱ’’ཏི ཧི པདྷཱནཏྟཱ ཨེཀམེཝ ཧེཏུཕལམཱཧ. ཕསྶོ ཧི ཝེདནཱཡ པདྷཱནཧེཏུ ཡཐཱཕསྶཾ ཝེདནཱ ཝཝཏྠཱནཏོ. ཝེདནཱ ཙ ཕསྶསྶ པདྷཱནཕལཾ ཡཐཱཝེདནཾ ཕསྶཝཝཏྠཱནཏོ. ‘‘སེམྷསམུཊྛཱནཱ ཨཱབཱདྷཱ’’ཏི (ཨ. ནི. ༡༠.༦༠) པཱཀཊཏྟཱ ཨེཀཾ ཧེཏུམཱཧ. པཱཀཊོ ཧི ཨེཏྠ སེམྷོ, ན ཀམྨཱདཡོ. ‘‘ཡེ ཀེཙི, བྷིཀྑཝེ, ཨཀུསལཱ དྷམྨཱ, སབྦེ ཏེ ཨཡོནིསོམནསིཀཱརམཱུལཀཱ’’ཏི ཨསཱདྷཱརཎཏྟཱ ཨེཀཾ ཧེཏུམཱཧ. ཨསཱདྷཱརཎོ ཧི ཨཡོནིསོམནསིཀཱརོ ཨཀུསལཱནཾ, སཱདྷཱརཎཱནི ཝཏྠཱརམྨཎཱདཱིནཱིཏི. ཏསྨཱ ཨཡམིདྷ ཨཝིཛྫཱ ཝིཛྫམཱནེསུཔི ཨཉྙེསུ ཝཏྠཱརམྨཎསཧཛཱཏདྷམྨཱདཱིསུ སངྑཱརཀཱརཎེསུ ‘‘ཨསྶཱདཱནུཔསྶིནོ ཏཎྷཱ པཝཌྜྷཏཱི’’ཏི (སཾ. ནི. ༢.༥༢) ཙ ‘‘ཨཝིཛྫཱསམུདཡཱ ཨཱསཝསམུདཡོ’’ཏི (མ. ནི. ༡.༡༠༤) ཙ ཝཙནཏོ ཨཉྙེསམྤི ཏཎྷཱདཱིནཾ སངྑཱརཧེཏཱུནཾ ཧེཏཱུཏི པདྷཱནཏྟཱ, ‘‘ཨཝིདྭཱ, བྷིཀྑཝེ, ཨཝིཛྫཱགཏོ པུཉྙཱབྷིསངྑཱརམྤི ཨབྷིསངྑརོཏཱི’’ཏི པཱཀཊཏྟཱ, ཨསཱདྷཱརཎཏྟཱ ཙ སངྑཱརཱནཾ ཧེཏུབྷཱཝེན དཱིཔིཏཱཏི ཝེདིཏབྦཱ. ཨེཏེནེཝ ཙ ཨེཀེཀཧེཏུཕལདཱིཔནཔརིཧཱརཝཙནེན སབྦཏྠ ཨེཀེཀཧེཏུཕལདཱིཔནེ པཡོཛནཾ ཝེདིཏབྦནྟི.

༦༡༨. ཨེཏྠཱཧ ¶ – ཨེཝཾ སནྟེཔི ཨེཀནྟཱནིཊྛཕལཱཡ སཱཝཛྫཱཡ ཨཝིཛྫཱཡ ཀཐཾ པུཉྙཱནེཉྫཱབྷིསངྑཱརཔཙྩཡཏྟཾ ཡུཛྫཏི? ན ཧི ནིམྦབཱིཛཏོ ཨུཙྪུ ཨུཔྤཛྫཏཱིཏི. ཀཐཾ ན ཡུཛྫིསྶཏི? ལོཀསྨིཉྷི –

ཝིརུདྡྷོ ¶ ཙཱཝིརུདྡྷོ ཙ, སདིསཱསདིསོ ཏཐཱ;

དྷམྨཱནཾ པཙྩཡོ སིདྡྷོ, ཝིཔཱཀཱ ཨེཝ ཏེ ཙ ན.

དྷམྨཱནཾ ཧི ཋཱནསབྷཱཝཀིཙྩཱདིཝིརུདྡྷོ ཙཱཝིརུདྡྷོ ཙ པཙྩཡོ ལོཀེ སིདྡྷོ. པུརིམཙིཏྟཾ ཧི ཨཔརཙིཏྟསྶ ཋཱནཝིརུདྡྷོ པཙྩཡོ, པུརིམསིཔྤཱདིསིཀྑཱ ཙ པཙྪཱ པཝཏྟམཱནཱནཾ སིཔྤཱདིཀིརིཡཱནཾ. ཀམྨཾ རཱུཔསྶ སབྷཱཝཝིརུདྡྷོ པཙྩཡོ, ཁཱིརཱདཱིནི ཙ དདྷིཨཱདཱིནཾ. ཨཱལོཀོ ཙཀྑུཝིཉྙཱཎསྶ ཀིཙྩཝིརུདྡྷོ, གུལཱ༹དཡོ ཙ ཨཱསཝཱདཱིནཾ. ཙཀྑུརཱུཔཱདཡོ པན ཙཀྑུཝིཉྙཱཎཱདཱིནཾ ཋཱནཱཝིརུདྡྷཱ པཙྩཡཱ. པུརིམཛཝནཱདཡོ པཙྪིམཛཝནཱདཱིནཾ སབྷཱཝཱཝིརུདྡྷཱ ཀིཙྩཱཝིརུདྡྷཱ ཙ.

ཡཐཱ ཙ ཝིརུདྡྷཱཝིརུདྡྷཱ པཙྩཡཱ སིདྡྷཱ, ཨེཝཾ སདིསཱསདིསཱཔི. སདིསམེཝ ཧི ཨུཏུཨཱཧཱརསངྑཱཏཾ རཱུཔཾ རཱུཔསྶ པཙྩཡོ, སཱལིབཱིཛཱདཱིནི ཙ སཱལིཕལཱདཱིནཾ. ཨསདིསམྤི རཱུཔཾ ཨརཱུཔསྶ, ཨརཱུཔཉྩ རཱུཔསྶ པཙྩཡོ ཧོཏི, གོལོམཱཝིལོམ-ཝིསཱཎ-དདྷིཏིལཔིཊྛཱདཱིནི ཙ དུབྦཱ-སརབྷཱུཏིཎཀཱདཱིནཾ. ཡེསཉྩ དྷམྨཱནཾ ཏེ ཝིརུདྡྷཱཝིརུདྡྷསདིསཱསདིསཔཙྩཡཱ, ན ཏེ དྷམྨཱ ཏེསཾ དྷམྨཱནཾ ཝིཔཱཀཱ ཨེཝ.

ཨིཏི ཨཡཾ ཨཝིཛྫཱ ཝིཔཱཀཝསེན ཨེཀནྟཱནིཊྛཕལཱ, སབྷཱཝཝསེན ཙ སཱཝཛྫཱཔི སམཱནཱ སབྦེསམྤི ཨེཏེསཾ པུཉྙཱབྷིསངྑཱརཱདཱིནཾ ཡཐཱནུརཱུཔཾ ཋཱནཀིཙྩསབྷཱཝཝིརུདྡྷཱཝིརུདྡྷཔཙྩཡཝསེན, སདིསཱསདིསཔཙྩཡཝསེན ཙ པཙྩཡོ ཧོཏཱིཏི ཝེདིཏབྦཱ. སོ ཙསྶཱ པཙྩཡབྷཱཝོ ‘‘ཡསྶ ཧི དུཀྑཱདཱིསུ ཨཝིཛྫཱསངྑཱཏཾ ཨཉྙཱཎཾ ཨཔྤཧཱིནཾ ཧོཏི, སོ དུཀྑེ ཏཱཝ པུབྦནྟཱདཱིསུ ཙ ཨཉྙཱཎེན སཾསཱརདུཀྑཾ སུཁསཉྙཱཡ གཧེཏྭཱ ཏསྶ ཧེཏུབྷཱུཏེ ཏིཝིདྷེཔི སངྑཱརེ ཨཱརབྷཏཱི’’ཏིཨཱདིནཱ ནཡེན ཝུཏྟོ ཨེཝ.

༦༡༩. ཨཔིཙ ཨཡཾ ཨཉྙོཔི པརིཡཱཡོ –

ཙུཏཱུཔཔཱཏེ ¶ སཾསཱརེ, སངྑཱརཱནཉྩ ལཀྑཎེ;

ཡོ པཊིཙྩསམུཔྤནྣ-དྷམྨེསུ ཙ ཝིམུཡ྄ཧཏི.

ཨབྷིསངྑརོཏི སོ ཨེཏེ, སངྑཱརེ ཏིཝིདྷེ ཡཏོ;

ཨཝིཛྫཱ པཙྩཡོ ཏེསཾ, ཏིཝིདྷཱནམྤཡཾ ཏཏོཏི.

ཀཐཾ ¶ པན ཡོ ཨེཏེསུ ཝིམུཡ྄ཧཏི, སོ ཏིཝིདྷེཔེཏེ སངྑཱརེ ཀརོཏཱིཏི ཙེ. ཙུཏིཡཱ ཏཱཝ ཝིམཱུལ༹ྷོ ‘‘སབྦཏྠ ཁནྡྷཱནཾ བྷེདོ མརཎ’’ནྟི ཙུཏིཾ ཨགཎྷནྟོ ‘‘སཏྟོ མརཏི, སཏྟསྶ དེཧནྟརསངྐམན’’ནྟིཨཱདཱིནི ཝིཀཔྤེཏི.

ཨུཔཔཱཏེ ཝིམཱུལ༹ྷོ ‘‘སབྦཏྠ ཁནྡྷཱནཾ པཱཏུབྷཱཝོ ཛཱཏཱི’’ཏི ཨུཔཔཱཏཾ ཨགཎྷནྟོ ‘‘སཏྟོ ཨུཔཔཛྫཏི, སཏྟསྶ ནཝསརཱིརཔཱཏུབྷཱཝོ’’ཏིཨཱདཱིནི ཝིཀཔྤེཏི.

སཾསཱརེ ཝིམཱུལ༹ྷོ ཡོ ཨེས,

‘‘ཁནྡྷཱནཉྩ པཊིཔཱཊི, དྷཱཏུཨཱཡཏནཱན ཙ;

ཨབྦོཙྪིནྣཾ ཝཏྟམཱནཱ, སཾསཱརོཏི པཝུཙྩཏཱི’’ཏི. –

ཨེཝཾ ཝཎྞིཏོ སཾསཱརོ, ཏཾ ཨེཝཾ ཨགཎྷནྟོ ‘‘ཨཡཾ སཏྟོ ཨསྨཱ ལོཀཱ པརཾ ལོཀཾ གཙྪཏི, པརསྨཱ ལོཀཱ ཨིམཾ ལོཀཾ ཨཱགཙྪཏཱི’’ཏིཨཱདཱིནི ཝིཀཔྤེཏི.

སངྑཱརཱནཾ ལཀྑཎེ ཝིམཱུལ༹ྷོ སངྑཱརཱནཾ སབྷཱཝལཀྑཎཾ སཱམཉྙལཀྑཎཉྩ ཨགཎྷནྟོ སངྑཱརེ ཨཏྟཏོ ཨཏྟནིཡཏོ དྷུཝཏོ སུཁཏོ སུབྷཏོ ཝིཀཔྤེཏི.

པཊིཙྩསམུཔྤནྣདྷམྨེསུ ཝིམཱུལ༹ྷོ ཨཝིཛྫཱདཱིཧི སངྑཱརཱདཱིནཾ པཝཏྟིཾ ཨགཎྷནྟོ ‘‘ཨཏྟཱ ཛཱནཱཏི ཝཱ ན ཛཱནཱཏི ཝཱ, སོ ཨེཝ ཀརོཏི ཙ ཀཱརེཏི ཙ. སོ པཊིསནྡྷིཡཾ ཨུཔཔཛྫཏི, ཏསྶ ཨཎུཨིསྶརཱདཡོ ཀལལཱདིབྷཱཝེན སརཱིརཾ སཎྛཔེནྟོ ཨིནྡྲིཡཱནི སམྤཱདེནྟི. སོ ཨིནྡྲིཡསམྤནྣོ ཕུསཏི, ཝེདིཡཏི, ཏཎྷཱིཡཏི, ཨུཔཱདིཡཏི, གྷཊིཡཏི. སོ པུན བྷཝནྟརེ བྷཝཏཱི’’ཏི ¶ ཝཱ, ‘‘སབྦེ སཏྟཱ ནིཡཏིསངྒཏིབྷཱཝཔརིཎཏཱ’’ཏི (དཱི. ནི. ༡.༡༦༨) ཝཱ ཝིཀཔྤེཏི.

སོ ཨཝིཛྫཱཡ ཨནྡྷཱིཀཏོ ཨེཝཾ ཝིཀཔྤེནྟོ ཡཐཱ ནཱམ ཨནྡྷོ པཐཝིཡཾ ཝིཙརནྟོ མགྒམྤི ཨམགྒམྤི ཐལམྤི ནིནྣམྤི སམམྤི ཝིསམམྤི པཊིཔཛྫཏི, ཨེཝཾ པུཉྙམྤི ཨཔུཉྙམྤི ཨཱནེཉྫཱབྷིསངྑཱརམྤི ཨབྷིསངྑརོཏཱིཏི.

ཏེནེཏཾ ཝུཙྩཏི –

‘‘ཡཐཱཔི ¶ ནཱམ ཛཙྩནྡྷོ, ནརོ ཨཔརིཎཱཡཀོ;

ཨེཀདཱ ཡཱཏི མགྒེན, ཨུམྨགྒེནཱཔི ཨེཀདཱ.

‘‘སཾསཱརེ སཾསརཾ བཱལོ, ཏཐཱ ཨཔརིཎཱཡཀོ;

ཀརོཏི ཨེཀདཱ པུཉྙཾ, ཨཔུཉྙམཔི ཨེཀདཱ.

‘‘ཡདཱ ཙ ཉཏྭཱ སོ དྷམྨཾ, སཙྩཱནི ཨབྷིསམེསྶཏི;

ཏདཱ ཨཝིཛྫཱུཔསམཱ, ཨུཔསནྟོ ཙརིསྶཏཱི’’ཏི.

ཨཡཾ ‘‘ཨཝིཛྫཱཔཙྩཡཱ སངྑཱརཱ’’ཏི པདསྨིཾ ཝིཏྠཱརཀཐཱ.

སངྑཱརཔཙྩཡཱཝིཉྙཱཎཔདཝིཏྠཱརཀཐཱ

༦༢༠. སངྑཱརཔཙྩཡཱ ཝིཉྙཱཎཔདེ – ཝིཉྙཱཎནྟི ཙཀྑུཝིཉྙཱཎཱདི ཚབྦིདྷཾ. ཏཏྠ ཙཀྑུཝིཉྙཱཎཾ ཀུསལཝིཔཱཀཾ ཨཀུསལཝིཔཱཀནྟི དུཝིདྷཾ ཧོཏི. ཏཐཱ སོཏགྷཱནཛིཝ྄ཧཱཀཨཱཡཝིཉྙཱཎཱནི. མནོཝིཉྙཱཎཾ ཀུསལཱཀུསལཝིཔཱཀཱ དྭེ མནོདྷཱཏུཡོ, ཏིསྶོ ཨཧེཏུཀམནོཝིཉྙཱཎདྷཱཏུཡོ, ཨཊྛ སཧེཏུཀཱནི ཀཱམཱཝཙརཝིཔཱཀཙིཏྟཱནི, པཉྩ རཱུཔཱཝཙརཱནི, ཙཏྟཱརི ཨརཱུཔཱཝཙརཱནཱིཏི བཱཝཱིསཏིཝིདྷཾ ཧོཏི. ཨིཏི ཨིམེཧི ཚཧི ཝིཉྙཱཎེཧི སབྦཱནིཔི བཱཏྟིཾས ལོཀིཡཝིཔཱཀཝིཉྙཱཎཱནི ¶ སངྒཧིཏཱནི ཧོནྟི. ལོཀུཏྟརཱནི པན ཝཊྚཀཐཱཡ ན ཡུཛྫནྟཱིཏི ན གཧིཏཱནི.

ཏཏྠ སིཡཱ ‘‘ཀཐཾ པནེཏཾ ཛཱནིཏབྦཾ ཨིདཾ ཝུཏྟཔྤཀཱརཾ ཝིཉྙཱཎཾ སངྑཱརཔཙྩཡཱ ཧོཏཱི’’ཏི? ཨུཔཙིཏཀམྨཱབྷཱཝེ ཝིཔཱཀཱབྷཱཝཏོ. ཝིཔཱཀཾ ཧེཏཾ, ཝིཔཱཀཉྩ ན ཨུཔཙིཏཀམྨཱབྷཱཝེ ཨུཔྤཛྫཏི. ཡདི ཨུཔྤཛྫེཡྻ སབྦེསཾ སབྦཝིཔཱཀཱནི ཨུཔྤཛྫེཡྻུཾ, ན ཙ ཨུཔྤཛྫནྟཱིཏི ཛཱནིཏབྦམེཏཾ སངྑཱརཔཙྩཡཱ ཨིདཾ ཝིཉྙཱཎཾ ཧོཏཱིཏི.

ཀཏརསངྑཱརཔཙྩཡཱ ཀཏརཾ ཝིཉྙཱཎནྟི ཙེ. ཀཱམཱཝཙརཔུཉྙཱབྷིསངྑཱརཔཙྩཡཱ ཏཱཝ ཀུསལཝིཔཱཀཱནི པཉྩ ཙཀྑུཝིཉྙཱཎཱདཱིནི, མནོཝིཉྙཱཎེ ཨེཀཱ མནོདྷཱཏུ, དྭེ མནོཝིཉྙཱཎདྷཱཏུཡོ, ཨཊྛ ཀཱམཱཝཙརམཧཱཝིཔཱཀཱནཱིཏི སོལ༹ས. ཡཐཱཧ –

‘‘ཀཱམཱཝཙརསྶ ཀུསལསྶ ཀམྨསྶ ཀཊཏྟཱ ཨུཔཙིཏཏྟཱ ཝིཔཱཀཾ ཙཀྑུཝིཉྙཱཎཾ ཨུཔྤནྣཾ ཧོཏི… སོཏ… གྷཱན… ཛིཝ྄ཧཱ… ཀཱཡཝིཉྙཱཎཾ ¶ … ཝིཔཱཀཱ མནོདྷཱཏུ ཨུཔྤནྣཱ ཧོཏི. སོམནསྶསཧགཏཱ མནོཝིཉྙཱཎདྷཱཏུ ཨུཔྤནྣཱ ཧོཏི. ཨུཔེཀྑཱསཧགཏཱ མནོཝིཉྙཱཎདྷཱཏུ ཨུཔྤནྣཱ ཧོཏི. སོམནསྶསཧགཏཱ ཉཱཎསམྤཡུཏྟཱ. སོམནསྶསཧགཏཱ ཉཱཎསམྤཡུཏྟཱ སསངྑཱརེན. སོམནསྶསཧགཏཱ ཉཱཎཝིཔྤཡུཏྟཱ. སོམནསྶསཧགཏཱ ཉཱཎཝིཔྤཡུཏྟཱ སསངྑཱརེན. ཨུཔེཀྑཱསཧགཏཱ ཉཱཎསམྤཡུཏྟཱ. ཨུཔེཀྑཱསཧགཏཱ ཉཱཎསམྤཡུཏྟཱ སསངྑཱརེན. ཨུཔེཀྑཱསཧགཏཱ ཉཱཎཝིཔྤཡུཏྟཱ. ཨུཔེཀྑཱསཧགཏཱ ཉཱཎཝིཔྤཡུཏྟཱ སསངྑཱརེནཱ’’ཏི (དྷ. ས. ༤༣༡, ༤༩༨).

རཱུཔཱཝཙརཔུཉྙཱབྷིསངྑཱརཔཙྩཡཱ པན པཉྩ རཱུཔཱཝཙརཝིཔཱཀཱནི. ཡཐཱཧ –

‘‘ཏསྶེཝ རཱུཔཱཝཙརསྶ ཀུསལསྶ ཀམྨསྶ ཀཊཏྟཱ ཨུཔཙིཏཏྟཱ ཝིཔཱཀཾ ཝིཝིཙྩེཝ ཀཱམེཧི པཋམཾ ཛྷཱནཾ…པེ… པཉྩམཾ ཛྷཱནཾ ཨུཔསམྤཛྫ ཝིཧརཏཱི’’ཏི (དྷ. ས. ༤༩༩). ཨེཝཾ པུཉྙཱབྷིསངྑཱརཔཙྩཡཱ ཨེཀཝཱིསཏིཝིདྷཾ ཝིཉྙཱཎཾ ཧོཏི.

ཨཔུཉྙཱབྷིསངྑཱརཔཙྩཡཱ ¶ པན ཨཀུསལཝིཔཱཀཱནི པཉྩ ཙཀྑུཝིཉྙཱཎཱདཱིནི, ཨེཀཱ མནོདྷཱཏུ, ཨེཀཱ མནོཝིཉྙཱཎདྷཱཏཱུཏི ཨེཝཾ སཏྟཝིདྷཾ ཝིཉྙཱཎཾ ཧོཏི. ཡཐཱཧ –

‘‘ཨཀུསལསྶ ཀམྨསྶ ཀཊཏྟཱ ཨུཔཙིཏཏྟཱ ཝིཔཱཀཾ ཙཀྑུཝིཉྙཱཎཾ ཨུཔྤནྣཾ ཧོཏི… སོཏ… གྷཱན… ཛིཝ྄ཧཱ… ཀཱཡཝིཉྙཱཎཾ… ཝིཔཱཀཱ མནོདྷཱཏུ ཝིཔཱཀཱ མནོཝིཉྙཱཎདྷཱཏུ ཨུཔྤནྣཱ ཧོཏཱི’’ཏི (དྷ. ས. ༥༥༦).

ཨཱནེཉྫཱབྷིསངྑཱརཔཙྩཡཱ པན ཙཏྟཱརི ཨརཱུཔཝིཔཱཀཱནཱིཏི ཨེཝཾ ཙཏུབྦིདྷཾ ཝིཉྙཱཎཾ ཧོཏི. ཡཐཱཧ –

‘‘ཏསྶེཝ ཨརཱུཔཱཝཙརསྶ ཀུསལསྶ ཀམྨསྶ ཀཊཏྟཱ ཨུཔཙིཏཏྟཱ ཝིཔཱཀཾ སབྦསོ རཱུཔསཉྙཱནཾ སམཏིཀྐམཱ ཨཱཀཱསཱནཉྩཱཡཏནསཉྙཱསཧགཏཾ…པེ… ཝིཉྙཱཎཉྩཱ…པེ… ཨཱཀིཉྩཉྙཱ…པེ… ནེཝསཉྙཱནཱསཉྙཱཡཏནསཧགཏཾ སུཁསྶ ཙ དུཀྑསྶ ཙ པཧཱནཱ ཙཏུཏྠཾ ཛྷཱནཾ ཨུཔསམྤཛྫ ཝིཧརཏཱི’’ཏི (དྷ. ས. ༥༠༡).

༦༢༡. ཨེཝཾ ¶ ཡཾ སངྑཱརཔཙྩཡཱ ཡཾ ཝིཉྙཱཎཾ ཧོཏི, ཏཾ ཉཏྭཱ ཨིདཱནིསྶ ཨེཝཾ པཝཏྟི ཝེདིཏབྦཱ – སབྦམེཝ ཧི ཨིདཾ པཝཏྟིཔཊིསནྡྷིཝསེན དྭེདྷཱ པཝཏྟཏི. ཏཏྠ དྭེ པཉྩཝིཉྙཱཎཱནི, དྭེ མནོདྷཱཏུཡོ, སོམནསྶསཧགཏཱ ཨཧེཏུཀམནོཝིཉྙཱཎདྷཱཏཱུཏི ཨིམཱནི ཏེརས པཉྩཝོཀཱརབྷཝེ པཝཏྟིཡཉྙེཝ པཝཏྟནྟི. སེསཱནི ཨེཀཱུནཝཱིསཏི ཏཱིསུ བྷཝེསུ ཡཐཱནུརཱུཔཾ པཝཏྟིཡམྤི པཊིསནྡྷིཡམྤི པཝཏྟནྟི.

ཀཐཾ? ཀུསལཝིཔཱཀཱནི ཏཱཝ ཙཀྑུཝིཉྙཱཎཱདཱིནི པཉྩ ཀུསལཝིཔཱཀེན ཨཀུསལཝིཔཱཀེན ཝཱ ནིབྦཏྟསྶ ཡཐཱཀྐམཾ པརིཔཱཀཾ ཨུཔགཏིནྡྲིཡསྶ ཙཀྑཱདཱིནཾ ཨཱཔཱཐགཏཾ ཨིཊྛཾ ཨིཊྛམཛ྄ཛྷཏྟཾ ཝཱ རཱུཔཱདིཨཱརམྨཎཾ ཨཱརབྦྷ ཙཀྑཱདིཔསཱདཾ ནིསྶཱཡ དསྶནསཝནགྷཱཡནསཱཡནཕུསནཀིཙྩཾ སཱདྷཡམཱནཱནི པཝཏྟནྟི. ཏཐཱ ཨཀུསལཝིཔཱཀཱནི པཉྩ. ཀེཝལཉྷི ཏེསཾ ཨནིཊྛཾ ཨནིཊྛམཛ྄ཛྷཏྟཾ ཝཱ ཨཱརམྨཎཾ ཧོཏི. ཨཡམེཝ ཝིསེསོ. དསཔི ཙེཏཱནི ནིཡཏདྭཱརཱརམྨཎཝཏྠུཊྛཱནཱནི ནིཡཏཀིཙྩཱནེཝ ཙ བྷཝནྟི.

ཏཏོ ¶ ཀུསལཝིཔཱཀཱནཾ ཙཀྑུཝིཉྙཱཎཱདཱིནཾ ཨནནྟརཱ ཀུསལཝིཔཱཀཱ མནོདྷཱཏུ ཏེསཾཡེཝ ཨཱརམྨཎཾ ཨཱརབྦྷ ཧདཡཝཏྠུཾ ནིསྶཱཡ སམྤཊིཙྪནཀིཙྩཾ སཱདྷཡམཱནཱ པཝཏྟཏི. ཏཐཱ ཨཀུསལཝིཔཱཀཱནཾ ཨནནྟརཱ ཨཀུསལཝིཔཱཀཱ. ཨིདཉྩ པན དྭཡཾ ཨནིཡཏདྭཱརཱརམྨཎཾ ནིཡཏཝཏྠུཊྛཱནཾ ནིཡཏཀིཙྩཉྩ ཧོཏི.

སོམནསྶསཧགཏཱ པན ཨཧེཏུཀམནོཝིཉྙཱཎདྷཱཏུ ཀུསལཝིཔཱཀམནོདྷཱཏུཡཱ ཨནནྟརཱ ཏསྶཱ ཨེཝ ཨཱརམྨཎཾ ཨཱརབྦྷ ཧདཡཝཏྠུཾ ནིསྶཱཡ སནྟཱིརཎཀིཙྩཾ སཱདྷཡམཱནཱ ཚསུ དྭཱརེསུ བལཝཱརམྨཎེ ཀཱམཱཝཙརསཏྟཱནཾ ཡེབྷུཡྻེན ལོབྷསམྤཡུཏྟཛཝནཱཝསཱནེ བྷཝངྒཝཱིཐིཾ པཙྪིནྡིཏྭཱ ཛཝནེན གཧིཏཱརམྨཎེ ཏདཱརམྨཎཝསེན ཙ སཀིཾ ཝཱ དྭིཀྑཏྟུཾ ཝཱ པཝཏྟཏཱིཏི མཛ྄ཛྷིམཊྛཀཐཱཡཾ ཝུཏྟཾ. ཨབྷིདྷམྨཊྛཀཐཱཡཾ པན ཏདཱརམྨཎེ དྭེ ཙིཏྟཝཱརཱ ཨཱགཏཱ. ཨིདཾ པན ཙིཏྟཾ ཏདཱརམྨཎནྟི ཙ པིཊྛིབྷཝངྒནྟི ཙཱཏི དྭེ ནཱམཱནི ལབྷཏི. ཨནིཡཏདྭཱརཱརམྨཎཾ ནིཡཏཝཏྠུཀཾ ཨནིཡཏཊྛཱནཀིཙྩཉྩ ཧོཏཱིཏི. ཨེཝཾ ཏཱཝ ཏེརས པཉྩཝོཀཱརབྷཝེ པཝཏྟིཡཉྙེཝ པཝཏྟནྟཱིཏི ཝེདིཏབྦཱནི.

སེསེསུ ¶ ཨེཀཱུནཝཱིསཏིཡཱ ན ཀིཉྩི ཨཏྟནོ ཨནུརཱུཔཱཡ པཊིསནྡྷིཡཱ ན པཝཏྟཏི. པཝཏྟིཡཾ པན ཀུསལཱཀུསལཝིཔཱཀཱ ཏཱཝ དྭེ ཨཧེཏུཀམནོཝིཉྙཱཎདྷཱཏུཡོ པཉྩདྭཱརེ ཀུསལཱཀུསལཝིཔཱཀམནོདྷཱཏཱུནཾ ཨནནྟརཱ སནྟཱིརཎཀིཙྩཾ, ཚསུ དྭཱརེསུ པུབྦེ ཝུཏྟནཡེནེཝ ཏདཱརམྨཎཀིཙྩཾ, ཨཏྟནཱ དིནྣཔཊིསནྡྷིཏོ ཨུདྡྷཾ ཨསཏི བྷཝངྒུཔཙྪེདཀེ ཙིཏྟུཔྤཱདེ བྷཝངྒཀིཙྩཾ, ཨནྟེ ཙུཏིཀིཙྩཉྩཱཏི ཙཏྟཱརི ཀིཙྩཱནི སཱདྷཡམཱནཱ ནིཡཏཝཏྠུཀཱ ཨནིཡཏདྭཱརཱརམྨཎཊྛཱནཀིཙྩཱ ཧུཏྭཱ པཝཏྟནྟི.

ཨཊྛ ཀཱམཱཝཙརསཧེཏུཀཙིཏྟཱནི ཝུཏྟནཡེནེཝ ཚསུ དྭཱརེསུ ཏདཱརམྨཎཀིཙྩཾ, ཨཏྟནཱ དིནྣཔཊིསནྡྷིཏོ ཨུདྡྷཾ ཨསཏི བྷཝངྒུཔཙྪེདཀེ ཙིཏྟུཔྤཱདེ བྷཝངྒཀིཙྩཾ, ཨནྟེ ཙུཏིཀིཙྩཉྩཱཏི ཏཱིཎི ཀིཙྩཱནི སཱདྷཡམཱནཱནི ནིཡཏཝཏྠུཀཱནི ཨནིཡཏདྭཱརཱརམྨཎཊྛཱནཀིཙྩཱནི ཧུཏྭཱ པཝཏྟནྟི.

པཉྩ རཱུཔཱཝཙརཱནི ཙཏྟཱརི ཙ ཨཱརུཔྤཱནི ཨཏྟནཱ དིནྣཔཊིསནྡྷིཏོ ཨུདྡྷཾ ཨསཏི བྷཝངྒུཔཙྪེདཀེ ཙིཏྟུཔྤཱདེ བྷཝངྒཀིཙྩཾ, ཨནྟེ ཙུཏིཀིཙྩཉྩཱཏི ཀིཙྩདྭཡཾ སཱདྷཡམཱནཱནི པཝཏྟནྟི ¶ . ཏེསུ རཱུཔཱཝཙརཱནི ནིཡཏཝཏྠཱརམྨཎཱནི ཨནིཡཏཊྛཱནཀིཙྩཱནི, ཨིཏརཱནི ནིཡཏཝཏྠུཀཱནི ནིཡཏཱརམྨཎཱནི ཨནིཡཏཊྛཱནཀིཙྩཱནི ཧུཏྭཱ པཝཏྟནྟཱིཏི ཨེཝཾ ཏཱཝ བཱཏྟིཾསཝིདྷམྤི ཝིཉྙཱཎཾ པཝཏྟིཡཾ སངྑཱརཔཙྩཡཱ པཝཏྟཏི. ཏཏྲཱསྶ ཏེ ཏེ སངྑཱརཱ ཀམྨཔཙྩཡེན ཙ ཨུཔནིསྶཡཔཙྩཡེན ཙ པཙྩཡཱ ཧོནྟི.

༦༢༢. ཡཾ པན ཝུཏྟཾ ‘‘སེསེསུ ཨེཀཱུནཝཱིསཏིཡཱ ན ཀིཉྩི ཨཏྟནོ ཨནུརཱུཔཱཡ པཊིསནྡྷིཡཱ ན པཝཏྟཏཱི’’ཏི, ཏཾ ཨཏིསཾཁིཏྟཏྟཱ དུབྦིཛཱནཾ. ཏེནསྶ ཝིཏྠཱརནཡདསྶནཏྠཾ ཝུཙྩཏི – ཀཏི པཊིསནྡྷིཡོ, ཀཏི པཊིསནྡྷིཙིཏྟཱནི, ཀེན ཀཏྠ པཊིསནྡྷི ཧོཏི, ཀིཾ པཊིསནྡྷིཡཱ ཨཱརམྨཎནྟི?

ཨསཉྙཔཊིསནྡྷིཡཱ སདྡྷིཾ ཝཱིསཏི པཊིསནྡྷིཡོ. ཝུཏྟཔྤཀཱརཱནེཝ ཨེཀཱུནཝཱིསཏི པཊིསནྡྷིཙིཏྟཱནི. ཏཏྠ ཨཀུསལཝིཔཱཀཱཡ ཨཧེཏུཀམནོཝིཉྙཱཎདྷཱཏུཡཱ ཨཔཱཡེསུ པཊིསནྡྷི ཧོཏི. ཀུསལཝིཔཱཀཱཡ མནུསྶལོཀེ ཛཙྩནྡྷཛཱཏིབདྷིརཛཱཏིཨུམྨཏྟཀཛཱཏིཨེལ༹མཱུགནཔུཾསཀཱདཱིནཾ. ཨཊྛཧི སཧེཏུཀཀཱམཱཝཙརཝིཔཱཀེཧི ཀཱམཱཝཙརདེཝེསུ ཙེཝ མནུསྶེསུ ཙ པུཉྙཝནྟཱནཾ པཊིསནྡྷི ཧོཏི. པཉྩཧི རཱུཔཱཝཙརཝིཔཱཀེཧི རཱུཔཱིབྲཧྨལོཀེ. ཙཏཱུཧི ཨརཱུཔཱཝཙརཝིཔཱཀེཧི ཨརཱུཔལོཀེཏི. ཡེན ཙ ཡཏྠ པཊིསནྡྷི ཧོཏི ¶ , སཱ ཨེཝ ཏསྶ ཨནུརཱུཔཱ པཊིསནྡྷི ནཱམ. སངྑེཔཏོ པན པཊིསནྡྷིཡཱ ཏཱིཎི ཨཱརམྨཎཱནི ཧོནྟི ཨཏཱིཏཾ པཙྩུཔྤནྣཾ ནཝཏྟབྦཉྩ. ཨསཉྙཱ པཊིསནྡྷི ཨནཱརམྨཎཱཏི.

ཏཏྠ ཝིཉྙཱཎཉྩཱཡཏནནེཝསཉྙཱནཱསཉྙཱཡཏནཔཊིསནྡྷཱིནཾ ཨཏཱིཏམེཝ ཨཱརམྨཎཾ. དསནྣཾ ཀཱམཱཝཙརཱནཾ ཨཏཱིཏཾ ཝཱ པཙྩུཔྤནྣཾ ཝཱ. སེསཱནཾ ནཝཏྟབྦམེཝ. ཨེཝཾ ཏཱིསུ ཨཱརམྨཎེསུ པཝཏྟམཱནཱ པན པཊིསནྡྷི ཡསྨཱ ཨཏཱིཏཱརམྨཎསྶ ཝཱ ནཝཏྟབྦཱརམྨཎསྶ ཝཱ ཙུཏིཙིཏྟསྶ ཨནནྟརམེཝ པཝཏྟཏི. པཙྩུཔྤནྣཱརམྨཎཾ པན ཙུཏིཙིཏྟཾ ནཱམ ནཏྠི. ཏསྨཱ དྭཱིསུ ཨཱརམྨཎེསུ ཨཉྙཏརཱརམྨཎཱཡ ཙུཏིཡཱ ཨནནྟརཱ ཏཱིསུ ཨཱརམྨཎེསུ ཨཉྙཏརཱརམྨཎཱཡ པཊིསནྡྷིཡཱ སུགཏིདུགྒཏིཝསེན པཝཏྟནཱཀཱརོ ཝེདིཏབྦོ.

༦༢༣. སེཡྻཐིདཾ – ཀཱམཱཝཙརསུགཏིཡཾ ཏཱཝ ཋིཏསྶ པཱཔཀམྨིནོ པུགྒལསྶ ‘‘ཏཱནིསྶ ཏསྨིཾ སམཡེ ཨོལམྦནྟཱི’’ཏིཨཱདིཝཙནཏོ (མ. ནི. ༣.༢༤༨) མརཎམཉྩེ ནིཔནྣསྶ ¶ ཡཐཱུཔཙིཏཾ པཱཔཀམྨཾ ཝཱ ཀམྨནིམིཏྟཾ ཝཱ མནོདྭཱརེ ཨཱཔཱཐམཱགཙྪཏི. ཏཾ ཨཱརབྦྷ ཨུཔྤནྣཱཡ ཏདཱརམྨཎཔརིཡོསཱནཱཡ ཛཝནཝཱིཐིཡཱ ཨནནྟརཾ བྷཝངྒཝིསཡཾ ཨཱརམྨཎཾ ཀཏྭཱ ཙུཏིཙིཏྟཾ ཨུཔྤཛྫཏི. ཏསྨིཾ ནིརུདྡྷེ ཏདེཝ ཨཱཔཱཐགཏཾ ཀམྨཾ ཝཱ ཀམྨནིམིཏྟཾ ཝཱ ཨཱརབྦྷ ཨནུཔཙྪིནྣཀིལེསབལཝིནཱམིཏཾ དུགྒཏིཔརིཡཱཔནྣཾ པཊིསནྡྷིཙིཏྟཾ ཨུཔྤཛྫཏི. ཨཡཾ ཨཏཱིཏཱརམྨཎཱཡ ཙུཏིཡཱ ཨནནྟརཱ ཨཏཱིཏཱརམྨཎཱ པཊིསནྡྷི.

ཨཔརསྶ མརཎསམཡེ ཝུཏྟཔྤཀཱརཀམྨཝསེན ནརཀཱདཱིསུ ཨགྒིཛཱལཝཎྞཱདིཀཾ དུགྒཏིནིམིཏྟཾ མནོདྭཱརེ ཨཱཔཱཐམཱགཙྪཏི, ཏསྶ དྭིཀྑཏྟུཾ བྷཝངྒེ ཨུཔྤཛྫིཏྭཱ ནིརུདྡྷེ ཏཾ ཨཱརམྨཎཾ ཨཱརབྦྷ ཨེཀཾ ཨཱཝཛྫནཾ, མརཎསྶ ཨཱསནྣབྷཱཝེན མནྡཱིབྷཱུཏཝེགཏྟཱ པཉྩ ཛཝནཱནི, དྭེ ཏདཱརམྨཎཱནཱིཏི ཏཱིཎི ཝཱིཐིཙིཏྟཱནི ཨུཔྤཛྫནྟི. ཏཏོ བྷཝངྒཝིསཡཾ ཨཱརམྨཎཾ ཀཏྭཱ ཨེཀཾ ཙུཏིཙིཏྟཾ. ཨེཏྟཱཝཏཱ ཨེཀཱདས ཙིཏྟཀྑཎཱ ཨཏཱིཏཱ ཧོནྟི. ཨཐསྶ ཨཝསེསཔཉྩཙིཏྟཀྑཎཱཡུཀེ ཏསྨིཉྙེཝ ཨཱརམྨཎེ པཊིསནྡྷིཙིཏྟཾ ཨུཔྤཛྫཏི. ཨཡཾ ཨཏཱིཏཱརམྨཎཱཡ ཙུཏིཡཱ ཨནནྟརཱ པཙྩུཔྤནྣཱརམྨཎཱ པཊིསནྡྷི.

ཨཔརསྶ ¶ མརཎསམཡེ པཉྩནྣཾ དྭཱརཱནཾ ཨཉྙཏརསྨིཾ རཱགཱདིཧེཏུབྷཱུཏཾ ཧཱིནམཱརམྨཎཾ ཨཱཔཱཐམཱགཙྪཏི. ཏསྶ ཡཐཱཀྐམེན ཨུཔྤནྣེ ཝོཊྛབྦནཱཝསཱནེ མརཎསྶ ཨཱསནྣབྷཱཝེན མནྡཱིབྷཱུཏཝེགཏྟཱ པཉྩ ཛཝནཱནི, དྭེ ཏདཱརམྨཎཱནི ཙ ཨུཔྤཛྫནྟི. ཏཏོ བྷཝངྒཝིསཡཾ ཨཱརམྨཎཾ ཀཏྭཱ ཨེཀཾ ཙུཏིཙིཏྟཾ. ཨེཏྟཱཝཏཱ ཙ དྭེ བྷཝངྒཱནི, ཨཱཝཛྫནཾ, དསྶནཾ, སམྤཊིཙྪནཾ, སནྟཱིརཎཾ, ཝོཊྛབྦནཾ, པཉྩ ཛཝནཱནི, དྭེ ཏདཱརམྨཎཱནི, ཨེཀཾ ཙུཏིཙིཏྟནྟི པཉྩདས ཙིཏྟཀྑཎཱ ཨཏཱིཏཱ ཧོནྟི. ཨཐཱཝསེསཨེཀཙིཏྟཀྑཎཱཡུཀེ ཏསྨིཉྙེཝ ཨཱརམྨཎེ པཊིསནྡྷིཙིཏྟཾ ཨུཔྤཛྫཏི. ཨཡམྤི ཨཏཱིཏཱརམྨཎཱཡ ཙུཏིཡཱ ཨནནྟརཱ པཙྩུཔྤནྣཱརམྨཎཱ པཊིསནྡྷི. ཨེས ཏཱཝ ཨཏཱིཏཱརམྨཎཱཡ སུགཏིཙུཏིཡཱ ཨནནྟརཱ ཨཏཱིཏཔཙྩུཔྤནྣཱརམྨཎཱཡ དུགྒཏིཔཊིསནྡྷིཡཱ པཝཏྟནཱཀཱརོ.

༦༢༤. དུགྒཏིཡཾ ཋིཏསྶ པན ཨུཔཙིཏཱནཝཛྫཀམྨསྶ ཝུཏྟནཡེནེཝ ཏཾ ཨནཝཛྫཀམྨཾ ཝཱ ཀམྨནིམིཏྟཾ ཝཱ མནོདྭཱརེ ཨཱཔཱཐམཱགཙྪཏཱིཏི ཀཎྷཔཀྑེ སུཀྐཔཀྑཾ ཋཔེཏྭཱ སབྦཾ པུརིམནཡེནེཝ ཝེདིཏབྦཾ. ཨཡཾ ཨཏཱིཏཱརམྨཎཱཡ དུགྒཏིཙུཏིཡཱ ཨནནྟརཱ ཨཏཱིཏཔཙྩུཔྤནྣཱརམྨཎཱཡ སུགཏིཔཊིསནྡྷིཡཱ པཝཏྟནཱཀཱརོ.

༦༢༥. སུགཏིཡཾ ¶ ཋིཏསྶ པན ཨུཔཙིཏཱནཝཛྫཀམྨསྶ ‘‘ཏཱནིསྶ ཏསྨིཾ སམཡེ ཨོལམྦནྟཱི’’ཏིཨཱདིཝཙནཏོ མརཎམཉྩེ ནིཔནྣསྶ ཡཐཱུཔཙིཏཾ ཨནཝཛྫཀམྨཾ ཝཱ ཀམྨནིམིཏྟཾ ཝཱ མནོདྭཱརེ ཨཱཔཱཐམཱགཙྪཏི. ཏཉྩ ཁོ ཨུཔཙིཏཀཱམཱཝཙརཱནཝཛྫཀམྨསྶེཝ. ཨུཔཙིཏམཧགྒཏཀམྨསྶ པན ཀམྨནིམིཏྟམེཝ ཨཱཔཱཐམཱགཙྪཏི. ཏཾ ཨཱརབྦྷ ཨུཔྤནྣཱཡ ཏདཱརམྨཎཔརིཡོསཱནཱཡ སུདྡྷཱཡ ཝཱ ཛཝནཝཱིཐིཡཱ ཨནནྟརཾ བྷཝངྒཝིསཡཾ ཨཱརམྨཎཾ ཀཏྭཱ ཙུཏིཙིཏྟཾ ཨུཔྤཛྫཏི. ཏསྨིཾ ནིརུདྡྷེ ཏམེཝ ཨཱཔཱཐགཏཾ ཀམྨཾ ཝཱ ཀམྨནིམིཏྟཾ ཝཱ ཨཱརབྦྷ ཨནུཔཙྪིནྣཀིལེསབལཝིནཱམིཏཾ སུགཏིཔརིཡཱཔནྣཾ པཊིསནྡྷིཙིཏྟཾ ཨུཔྤཛྫཏི. ཨཡཾ ཨཏཱིཏཱརམྨཎཱཡ ཙུཏིཡཱ ཨནནྟརཱ ཨཏཱིཏཱརམྨཎཱ ཝཱ ནཝཏྟབྦཱརམྨཎཱ ཝཱ པཊིསནྡྷི.

ཨཔརསྶ མརཎསམཡེ ཀཱམཱཝཙརཨནཝཛྫཀམྨཝསེན མནུསྶལོཀེ མཱཏུཀུཙྪིཝཎྞསངྑཱཏཾ ཝཱ དེཝལོཀེ ཨུཡྻཱནཝིམཱནཀཔྤརུཀྑཱདིཝཎྞསངྑཱཏཾ ཝཱ སུགཏིནིམིཏྟཾ མནོདྭཱརེ ཨཱཔཱཐམཱགཙྪཏི, ཏསྶ དུགྒཏིནིམིཏྟེ ¶ དསྶིཏཱནུཀྐམེནེཝ ཙུཏིཙིཏྟཱནནྟརཾ པཊིསནྡྷིཙིཏྟཾ ཨུཔྤཛྫཏི. ཨཡཾ ཨཏཱིཏཱརམྨཎཱཡ ཙུཏིཡཱ ཨནནྟརཱ པཙྩུཔྤནྣཱརམྨཎཱ པཊིསནྡྷི.

ཨཔརསྶ མརཎསམཡེ ཉཱཏཀཱ ‘‘ཨཡཾ ཏཱཏ ཏཝཏྠཱཡ བུདྡྷཔཱུཛཱ ཀརཱིཡཏི ཙིཏྟཾ པསཱདེཧཱི’’ཏི ཝཏྭཱ པུཔྥདཱམཔཊཱཀཱདིཝསེན རཱུཔཱརམྨཎཾ ཝཱ, དྷམྨསྶཝནཏཱུརིཡཔཱུཛཱདིཝསེན སདྡཱརམྨཎཾ ཝཱ, དྷཱུམཝཱསགནྡྷཱདིཝསེན གནྡྷཱརམྨཎཾ ཝཱ, ‘‘ཨིདཾ ཏཱཏ སཱཡསྶུ ཏཝཏྠཱཡ དཱཏབྦདེཡྻདྷམྨ’’ནྟི ཝཏྭཱ མདྷུཕཱཎིཏཱདིཝསེན རསཱརམྨཎཾ ཝཱ, ‘‘ཨིདཾ ཏཱཏ ཕུསསྶུ ཏཝཏྠཱཡ དཱཏབྦདེཡྻདྷམྨ’’ནྟི ཝཏྭཱ ཙཱིནཔཊྚསོམཱརཔཊྚཱདིཝསེན ཕོཊྛབྦཱརམྨཎཾ ཝཱ པཉྩདྭཱརེ ཨུཔསཾཧརནྟི, ཏསྶ ཏསྨིཾ ཨཱཔཱཐགཏེ རཱུཔཱདིཨཱརམྨཎེ ཡཐཱཀྐམེན ཨུཔྤནྣཝོཊྛབྦནཱཝསཱནེ མརཎསྶ ཨཱསནྣབྷཱཝེན མནྡཱིབྷཱུཏཝེགཏྟཱ པཉྩ ཛཝནཱནི, དྭེ ཏདཱརམྨཎཱནི ཙ ཨུཔྤཛྫནྟི. ཏཏོ བྷཝངྒཝིསཡཾ ཨཱརམྨཎཾ ཀཏྭཱ ཨེཀཾ ཙུཏིཙིཏྟཾ, ཏདཝསཱནེ ཏསྨིཉྙེཝ ཨེཀཙིཏྟཀྑཎཊྛིཏིཀེ ཨཱརམྨཎེ པཊིསནྡྷིཙིཏྟཾ ཨུཔྤཛྫཏི. ཨཡམྤི ཨཏཱིཏཱརམྨཎཱཡ ཙུཏིཡཱ ཨནནྟརཱ པཙྩུཔྤནྣཱརམྨཎཱ པཊིསནྡྷི.

༦༢༦. ཨཔརསྶ པན པཐཝཱིཀསིཎཛ྄ཛྷཱནཱདིཝསེན པཊིལདྡྷམཧགྒཏསྶ སུགཏིཡཾ ཋིཏསྶ མརཎསམཡེ ཀཱམཱཝཙརཀུསལཀམྨ-ཀམྨནིམིཏྟ-གཏིནིམིཏྟཱནཾ ཝཱ ཨཉྙཏརཾ, པཐཝཱིཀསིཎཱདིཀཾ ཝཱ ནིམིཏྟཾ, མཧགྒཏཙིཏྟཾ ཝཱ མནོདྭཱརེ ཨཱཔཱཐམཱགཙྪཏི, ཙཀྑུསོཏཱནཾ ཝཱ ཨཉྙཏརསྨིཾ ཀུསལུཔྤཏྟིཧེཏུབྷཱུཏཾ ¶ པཎཱིཏམཱརམྨཎཾ ཨཱཔཱཐམཱགཙྪཏི, ཏསྶ ཡཐཱཀྐམེན ཨུཔྤནྣཝོཊྛབྦནཱཝསཱནེ མརཎསྶ ཨཱསནྣབྷཱཝེན མནྡཱིབྷཱུཏཝེགཏྟཱ པཉྩ ཛཝནཱནི ཨུཔྤཛྫནྟི. མཧགྒཏགཏིཀཱནཾ པན ཏདཱརམྨཎཾ ནཏྠི, ཏསྨཱ ཛཝནཱནནྟརཾཡེཝ བྷཝངྒཝིསཡཾ ཨཱརམྨཎཾ ཀཏྭཱ ཨེཀཾ ཙུཏིཙིཏྟཾ ཨུཔྤཛྫཏི. ཏསྶཱཝསཱནེ ཀཱམཱཝཙརམཧགྒཏསུགཏཱིནཾ ཨཉྙཏརསུགཏིཔརིཡཱཔནྣཾ ཡཐཱུཔཊྛིཏེསུ ཨཱརམྨཎེསུ ཨཉྙཏརཱརམྨཎཾ པཊིསནྡྷིཙིཏྟཾ ཨུཔྤཛྫཏི. ཨཡཾ ནཝཏྟབྦཱརམྨཎཱཡ སུགཏིཙུཏིཡཱ ཨནནྟརཱ ཨཏཱིཏཔཙྩུཔྤནྣནཝཏྟབྦཱརམྨཎཱནཾ ཨཉྙཏརཱརམྨཎཱ པཊིསནྡྷི.

ཨེཏེནཱནུསཱརེན ཨཱརུཔྤཙུཏིཡཱཔི ཨནནྟརཱ པཊིསནྡྷི ཝེདིཏབྦཱ. ཨཡཾ ཨཏཱིཏནཝཏྟབྦཱརམྨཎཱཡ སུགཏིཙུཏིཡཱ ཨནནྟརཱ ཨཏཱིཏནཝཏྟབྦཔཙྩུཔྤནྣཱརམྨཎཱཡ པཊིསནྡྷིཡཱ པཝཏྟནཱཀཱརོ.

༦༢༧. དུགྒཏིཡཾ ¶ ཋིཏསྶ པན པཱཔཀམྨིནོ ཝུཏྟནཡེནེཝ ཏཾ ཀམྨཾ ཀམྨནིམིཏྟཾ གཏིནིམིཏྟཾ ཝཱ མནོདྭཱརེ. པཉྩདྭཱརེ ཝཱ པན ཨཀུསལུཔྤཏྟི ཧེཏུབྷཱུཏཾ ཨཱརམྨཎཾ ཨཱཔཱཐམཱགཙྪཏི, ཨཐསྶ ཡཐཱཀྐམེན ཙུཏིཙིཏྟཱཝསཱནེ དུགྒཏིཔརིཡཱཔནྣཾ ཏེསུ ཨཱརམྨཎེསུ ཨཉྙཏརཱརམྨཎཾ པཊིསནྡྷིཙིཏྟཾ ཨུཔྤཛྫཏི. ཨཡཾ ཨཏཱིཏཱརམྨཎཱཡ དུགྒཏིཙུཏིཡཱ ཨནནྟརཱ ཨཏཱིཏཔཙྩུཔྤནྣཱརམྨཎཱཡ པཊིསནྡྷིཡཱ པཝཏྟནཱཀཱརོཏི. ཨེཏྟཱཝཏཱ ཨེཀཱུནཝཱིསཏིཝིདྷསྶཱཔི ཝིཉྙཱཎསྶ པཊིསནྡྷིཝསེན པཝཏྟི དཱིཔིཏཱ ཧོཏི.

༦༢༨. ཏཡིདཾ སབྦམྤི ཨེཝཾ,

པཝཏྟམཱནཾ སནྡྷིམྷི, དྭེདྷཱ ཀམྨེན ཝཏྟཏི;

མིསྶཱདཱིཧི ཙ བྷེདེཧི, བྷེདསྶ དུཝིདྷཱདིཀོ.

ཨིདཉྷི ཨེཀཱུནཝཱིསཏིཝིདྷམྤི ཝིཔཱཀཝིཉྙཱཎཾ པཊིསནྡྷིམྷི པཝཏྟམཱནཱ དྭེདྷཱ ཀམྨེན ཝཏྟཏི. ཡཐཱསཀཉྷི ཨེཀསྶ ཛནཀཀམྨཾ ནཱནཱཀྑཎིཀཀམྨཔཙྩཡེན ཙེཝ ཨུཔནིསྶཡཔཙྩཡེན ཙ པཙྩཡོ ཧོཏི. ཝུཏྟཉྷེཏཾ ‘‘ཀུསལཱཀུསལཾ ཀམྨཾ ཝིཔཱཀསྶ ཨུཔནིསྶཡཔཙྩཡེན པཙྩཡོ’’ཏི (པཊྛཱ. ༡.༡.༤༢༣). ཨེཝཾ ཝཏྟམཱནསྶ པནསྶ མིསྶཱདཱིཧི བྷེདེཧི དུཝིདྷཱདིཀོཔི བྷེདོ ཝེདིཏབྦོ.

སེཡྻཐིདཾ ¶ – ཨིདཉྷི པཊིསནྡྷིཝསེན ཨེཀདྷཱ པཝཏྟམཱནམྤི རཱུཔེན སཧ མིསྶཱམིསྶབྷེདཏོ དུཝིདྷཾ. ཀཱམརཱུཔཱརཱུཔབྷཝབྷེདཏོ ཏིཝིདྷཾ. ཨཎྜཛཛལཱབུཛ-སཾསེདཛ-ཨོཔཔཱཏིཀཡོནིཝསེན ཙཏུབྦིདྷཾ. གཏིཝསེན པཉྩཝིདྷཾ. ཝིཉྙཱཎཊྛིཏིཝསེན སཏྟཝིདྷཾ. སཏྟཱཝཱསཝསེན ཨཊྛཝིདྷཾ ཧོཏི.

༦༢༩. ཏཏྠ,

མིསྶཾ དྭིདྷཱ བྷཱཝབྷེདཱ, སབྷཱཝཾ ཏཏྠ ཙ དྭིདྷཱ;

དྭེ ཝཱ ཏཡོ ཝཱ དསཀཱ, ཨོམཏོ ཨཱདིནཱ སཧ.

མིསྶཾ དྭིདྷཱ བྷཱཝབྷེདཱཏི ཡཾ ཧེཏཾ ཨེཏྠ ཨཉྙཏྲ ཨརཱུཔབྷཝཱ རཱུཔམིསྶཾ པཊིསནྡྷིཝིཉྙཱཎཾ ཨུཔྤཛྫཏི, ཏཾ རཱུཔབྷཝེ ཨིཏྠིནྡྲིཡཔུརིསིནྡྲིཡསངྑཱཏེན བྷཱཝེན ཝིནཱ ཨུཔྤཏྟིཏོ. ཀཱམབྷཝེ ཨཉྙཏྲ ཛཱཏིཔཎྜཀཔཊིསནྡྷིཡཱ བྷཱཝེན སཧ ཨུཔྤཏྟིཏོ ས-བྷཱཝཾ, ཨ-བྷཱཝནྟི དུཝིདྷཾ ཧོཏི.

སབྷཱཝཾ ¶ ཏཏྠ ཙ དྭིདྷཱཏི ཏཏྠཱཔི ཙ ཡཾ ས-བྷཱཝཾ, ཏཾ ཨིཏྠིཔུརིསབྷཱཝཱནཾ ཨཉྙཏརེན སཧ ཨུཔྤཏྟིཏོ དུཝིདྷམེཝ ཧོཏི.

དྭེ ཝཱ ཏཡོ ཝཱ དསཀཱ ཨོམཏོ ཨཱདིནཱ སཧཱཏི ཡཾ ཧེཏམེཏྠ ‘‘མིསྶཾ ཨམིསྶ’’ནྟི དུཀེ ཨཱདིབྷཱུཏཾ རཱུཔམིསྶཾ པཊིསནྡྷིཝིཉྙཱཎཾ, ཏེན སཧ ཝཏྠུཀཱཡདསཀཝསེན དྭེ ཝཱ, ཝཏྠུཀཱཡབྷཱཝདསཀཝསེན ཏཡོ ཝཱ དསཀཱ ཨོམཏོ ཨུཔྤཛྫནྟི, ནཏྠི ཨིཏོ པརཾ རཱུཔཔརིཧཱནཱིཏི. ཏཾ པནེཏཾ ཨེཝཾ ཨོམཀཔརིམཱཎཾ ཨུཔྤཛྫམཱནཾ ཨཎྜཛཛལཱབུཛནཱམིཀཱསུ དྭཱིསུ ཡོནཱིསུ ཛཱཏིཨུཎྞཱཡ ཨེཀེན ཨཾསུནཱ ཨུདྡྷཊསཔྤིམཎྜཔྤམཱཎཾ ཀལལནྟི ལདྡྷསངྑཾ ཧུཏྭཱ ཨུཔྤཛྫཏི. ཏཏྠ ཡོནཱིནཾ གཏིཝསེན སམྦྷཝབྷེདོ ཝེདིཏབྦོ.

༦༣༠. ཨེཏཱསུ ཧི,

ནིརཡེ བྷུམྨཝཛྫེསུ, དེཝེསུ ཙ ན ཡོནིཡོ;

ཏིསྶོ པུརིམིཀཱ ཧོནྟི, ཙཏསྶོཔི གཏིཏྟཡེ.

ཏཏྠ ¶ དེཝེསུ ཙཱཏི ཙསདྡེན ཡཐཱ ནིརཡེ ཙ བྷུམྨཝཛྫེསུ ཙ དེཝེསུ, ཨེཝཾ ནིཛ྄ཛྷཱམཏཎྷིཀཔེཏེསུ ཙ པུརིམིཀཱ ཏིསྶོ ཡོནིཡོ ན སནྟཱིཏི ཝེདིཏབྦཱ. ཨོཔཔཱཏིཀཱ ཨེཝ ཧི ཏེ ཧོནྟི. སེསེ པན ཏིརཙྪཱནཔེཏྟིཝིསཡམནུསྶསངྑཱཏེ གཏིཏྟཡེ པུབྦེ ཝཛྫིཏབྷུམྨདེཝེསུ ཙ ཙཏསྶོཔི ཡོནིཡོ ཧོནྟི. ཏཏྠ,

ཏིཾས ནཝ ཙེཝ རཱུཔཱིསུ, སཏྟཏི ཨུཀྐཾསཏོཐ རཱུཔཱནི;

སཾསེདུཔཔཱཏཡོནིསུ, ཨཐ ཝཱ ཨཝཀཾསཏོ ཏིཾས.

རཱུཔཱིབྲཧྨེསུ ཏཱཝ ཨོཔཔཱཏིཀཡོནིཀེསུ ཙཀྑུསོཏཝཏྠུདསཀཱནཾ ཛཱིཝིཏནཝཀསྶ ཙཱཏི ཙཏུནྣཾ ཀལཱཔཱནཾ ཝསེན ཏིཾས ཙ ནཝ ཙ པཊིསནྡྷིཝིཉྙཱཎེན སཧ རཱུཔཱནི ཨུཔྤཛྫནྟི. རཱུཔཱི བྲཧྨེ པན ཋཔེཏྭཱ ཨཉྙེསུ སཾསེདཛཨོཔཔཱཏིཀཡོནིཀེསུ ཨུཀྐཾསཏོ ཙཀྑུསོཏགྷཱནཛིཝ྄ཧཱཀཱཡཝཏྠུབྷཱཝདསཀཱནཾ ཝསེན སཏྟཏི, ཏཱནི ཙ ནིཙྩཾ དེཝེསུ. ཏཏྠ ཝཎྞོ གནྡྷོ རསོ ཨོཛཱ ཙཏསྶོ ཙཱཔི དྷཱཏུཡོ ཙཀྑུཔསཱདོ ཛཱིཝིཏནྟི ཨཡཾ དསརཱུཔཔརིམཱཎོ རཱུཔཔུཉྫོ ཙཀྑུདསཀོ ནཱམ. ཨེཝཾ སེསཱ ཝེདིཏབྦཱ ¶ . ཨཝཀཾསཏོ པན ཛཙྩནྡྷབདྷིརཨགྷཱནཀནཔུཾསཀསྶ ཛིཝ྄ཧཱཀཱཡཝཏྠུདསཀཱནཾ ཝསེན ཏིཾས རཱུཔཱནི ཨུཔྤཛྫནྟི. ཨུཀྐཾསཱཝཀཾསཱནཾ པན ཨནྟརེ ཨནུརཱུཔཏོ ཝིཀཔྤོ ཝེདིཏབྦོ.

༦༣༡. ཨེཝཾ ཝིདིཏྭཱ པུན,

ཁནྡྷཱརམྨཎགཏིཧེཏུ-ཝེདནཱཔཱིཏིཝིཏཀྐཝིཙཱརེཧི;

བྷེདཱབྷེདཝིསེསོ, ཙུཏིསནྡྷཱིནཾ པརིཉྙེཡྻོ.

ཡཱ ཧེསཱ མིསྶཱམིསྶཏོ དུཝིདྷཱ པཊིསནྡྷི, ཡཱ ཙསྶཱ ཨཏཱིཏཱནནྟརཱ ཙུཏི, ཏཱསཾ ཨིམེཧི ཁནྡྷཱདཱིཧི བྷེདཱབྷེདཝིསེསོ ཉཱཏབྦོཏི ཨཏྠོ.

ཀཐཾ? ཀདཱཙི ཧི ཙཏུཀྑནྡྷཱཡ ཨཱརུཔྤཙུཏིཡཱ ཨནནྟརཱ ཙཏུཀྑནྡྷཱཝ ཨཱརམྨཎཏོཔི ཨབྷིནྣཱ པཊིསནྡྷི ཧོཏི. ཀདཱཙི ཨམཧགྒཏབཧིདྡྷཱརམྨཎཱཡ མཧགྒཏཨཛ྄ཛྷཏྟཱརམྨཎཱ. ཨཡཾ ཏཱཝ ཨརཱུཔབྷཱུམཱིསུཡེཝ ནཡོ. ཀདཱཙི པན ཙཏུཀྑནྡྷཱཡ ཨརཱུཔཙུཏིཡཱ ཨནནྟརཱ པཉྩཀྑནྡྷཱ ཀཱམཱཝཙརཔཊིསནྡྷི ¶ . ཀདཱཙི པཉྩཀྑནྡྷཱཡ ཀཱམཱཝཙརཙུཏིཡཱ རཱུཔཱཝཙརཙུཏིཡཱ ཝཱ ཨནནྟརཱ ཙཏུཀྑནྡྷཱ ཨརཱུཔཔཊིསནྡྷི. ཨེཝཾ ཨཏཱིཏཱརམྨཎཱཡ ཙུཏིཡཱ པཙྩུཔྤནྣཱརམྨཎཱ པཊིསནྡྷི. ཨེཀཙྩསུགཏིཙུཏིཡཱ ཨེཀཙྩདུགྒཏིཔཊིསནྡྷི. ཨཧེཏུཀཙུཏིཡཱ སཧེཏུཀཔཊིསནྡྷི. དུཧེཏུཀཙུཏིཡཱ ཏིཧེཏུཀཔཊིསནྡྷི. ཨུཔེཀྑཱསཧགཏཙུཏིཡཱ སོམནསྶསཧགཏཔཊིསནྡྷི. ཨཔྤཱིཏིཀཙུཏིཡཱ སཔྤཱིཏིཀཔཊིསནྡྷི. ཨཝིཏཀྐཙུཏིཡཱ སཝིཏཀྐཔཊིསནྡྷི. ཨཝིཙཱརཙུཏིཡཱ སཝིཙཱརཔཊིསནྡྷི. ཨཝིཏཀྐཱཝིཙཱརཙུཏིཡཱ སཝིཏཀྐསཝིཙཱརཔཊིསནྡྷཱིཏི ཏསྶ ཏསྶ ཝིཔརཱིཏཏོ ཙ ཡཐཱཡོགཾ ཡོཛེཏབྦཾ.

༦༣༢.

ལདྡྷཔཙྩཡམིཏི དྷམྨམཏྟམེཏཾ བྷཝནྟརམུཔེཏི;

ནཱསྶ ཏཏོ སངྐནྟི, ན ཏཏོ ཧེཏུཾ ཝིནཱ ཧོཏི.

ཨིཏི ཧེཏཾ ལདྡྷཔཙྩཡཾ རཱུཔཱརཱུཔདྷམྨམཏྟཾ ཨུཔྤཛྫམཱནཾ བྷཝནྟརམུཔེཏཱིཏི ཝུཙྩཏི, ན སཏྟོ, ན ཛཱིཝོ. ཏསྶ ཙ ནཱཔི ཨཏཱིཏབྷཝཏོ ཨིདྷ སངྐནྟི ཨཏྠི. ནཱཔི ཏཏོ ཧེཏུཾ ཝིནཱ ཨིདྷ པཱཏུབྷཱཝོ. ཏཡིདཾ པཱཀཊེན མནུསྶཙུཏིཔཊིསནྡྷིཀྐམེན པཀཱསཡིསྶཱམ.

ཨཏཱིཏབྷཝསྨིཾ ¶ ཧི སརསེན ཨུཔཀྐམེན ཝཱ སམཱསནྣམརཎསྶ ཨསཡ྄ཧཱནཾ སབྦངྒཔཙྩངྒསནྡྷིབནྡྷནཙྪེདཀཱནཾ མཱརཎནྟིཀཝེདནཱསཏྠཱནཾ སནྣིཔཱཏཾ ཨསཧནྟསྶ ཨཱཏཔེ པཀྑིཏྟཧརིཏཏཱལཔཎྞམིཝ ཀམེན ཨུཔསུསྶམཱནེ སརཱིརེ ནིརུདྡྷེསུ ཙཀྑཱདཱིསུ ཨིནྡྲིཡེསུ ཧདཡཝཏྠུམཏྟེ པཏིཊྛིཏེསུ ཀཱཡིནྡྲིཡམནིནྡྲིཡཛཱིཝིཏིནྡྲིཡེསུ ཏངྑཎཱཝསེསཧདཡཝཏྠུསནྣིསྶིཏཾ ཝིཉྙཱཎཾ གརུཀསམཱསེཝིཏཱསནྣཔུབྦཀཏཱནཾ ཨཉྙཏརཾ ལདྡྷཱཝསེསཔཙྩཡསངྑཱརསངྑཱཏཾ ཀམྨཾ, ཏདུཔཊྛཱཔིཏཾ ཝཱ ཀམྨནིམིཏྟགཏིནིམིཏྟསངྑཱཏཾ ཝིསཡཾ ཨཱརབྦྷ པཝཏྟཏི. ཏདེཝཾ པཝཏྟམཱནཾ ཏཎྷཱཝིཛྫཱནཾ ཨཔྤཧཱིནཏྟཱ ཨཝིཛྫཱཔཊིཙྪཱདིཏཱདཱིནཝེ ཏསྨིཾ ཝིསཡེ ཏཎྷཱ ནཱམེཏི, སཧཛཱཏསངྑཱརཱ ཁིཔནྟི. ཏཾ སནྟཏིཝསེན ཏཎྷཱཡ ནཱམིཡམཱནཾ སངྑཱརེཧི ཁིཔྤམཱནཾ ཨོརིམཏཱིརརུཀྑཝིནིབདྡྷརཛྫུམཱལམྦིཏྭཱ མཱཏིཀཱཏིཀྐམཀོ ཝིཡ པུརིམཉྩ ནིསྶཡཾ ཛཧཏི, ཨཔརཉྩ ཀམྨསམུཊྛཱཔིཏཾ ནིསྶཡཾ ཨསྶཱདཡམཱནཾ ཝཱ ཨནསྶཱདཡམཱནཾ ཝཱ ཨཱརམྨཎཱདཱིཧིཡེཝ པཙྩཡེཧི པཝཏྟཏཱིཏི.

ཨེཏྠ ཙ པུརིམཾ ཙཝནཏོ ཙུཏི. པཙྪིམཾ བྷཝནྟརཱདིཔཊིསནྡྷཱནཏོ པཊིསནྡྷཱིཏི ཝུཙྩཏི ¶ . ཏདེཏཾ ནཱཔི པུརིམབྷཝཱ ཨིདྷཱགཏཾ, ནཱཔི ཏཏོ ཀམྨསངྑཱརནཏིཝིསཡཱདིཧེཏུཾ ཝིནཱ པཱཏུབྷཱུཏནྟི ཝེདིཏབྦཾ.

༦༣༣.

སིཡུཾ ནིདསྶནཱནེཏྠ, པཊིགྷོསཱདིཀཱ ཨཐ;

སནྟཱནབནྡྷཏོ ནཏྠི, ཨེཀཏཱ ནཱཔི ནཱནཏཱ.

ཨེཏྠ ཙེཏསྶ ཝིཉྙཱཎསྶ པུརིམབྷཝཏོ ཨིདྷ ཨནཱགམནེ, ཨཏཱིཏབྷཝཔརིཡཱཔནྣཧེཏཱུཏི ཙ ཨུཔྤཱདེ པཊིགྷོས-པདཱིཔ-མུདྡཱ-པཊིབིམྦཔྤཀཱརཱ དྷམྨཱ ནིདསྶནཱནི སིཡུཾ. ཡཐཱ ཧི པཊིགྷོས-པདཱིཔ-མུདྡཱ-ཚཱཡཱ སདྡཱདིཧེཏུཀཱ ཧོནྟི ཨཉྙཏྲ ཨགནྟྭཱ ཨེཝམེཝཾ ཨིདཾ ཙིཏྟཾ.

ཨེཏྠ ཙ སནྟཱནབནྡྷཏོ ནཏྠི ཨེཀཏཱ ནཱཔི ནཱནཏཱ. ཡདི ཧི སནྟཱནབནྡྷེ སཏི ཨེཀནྟམེཀཏཱ བྷཝེཡྻ, ན ཁཱིརཏོ དདྷི སམྦྷཱུཏཾ སིཡཱ. ཨཐཱཔི ཨེཀནྟནཱནཏཱ བྷཝེཡྻ, ན ཁཱིརསྶཱདྷཱིནོ དདྷི སིཡཱ. ཨེས ནཡོ སབྦཧེཏུཧེཏུསམུཔྤནྣེསུ. ཨེཝཉྩ སཏི སབྦལོཀཝོཧཱརལོཔོ ¶ སིཡཱ, སོ ཙ ཨནིཊྛོ. ཏསྨཱ ཨེཏྠ ན ཨེཀནྟམེཀཏཱ ཝཱ ནཱནཏཱ ཝཱ ཨུཔགནྟབྦཱཏི.

༦༣༤. ཨེཏྠཱཧ – ནནུ ཨེཝཾ ཨསངྐནྟིཔཱཏུབྷཱཝེ སཏི ཡེ ཨིམསྨིཾ མནུསྶཏྟབྷཱཝེ ཁནྡྷཱ, ཏེསཾ ནིརུདྡྷཏྟཱ, ཕལཔཙྩཡསྶ ཙ ཀམྨསྶ ཏཏྠ ཨགམནཏོ ཨཉྙསྶ ཨཉྙཏོ ཙ ཏཾ ཕལཾ སིཡཱ, ཨུཔབྷུཉྫཀེ ཙ ཨསཏི ཀསྶ ཏཾ ཕལཾ སིཡཱ, ཏསྨཱ ན སུནྡརམིདཾ ཝིདྷཱནནྟི. ཏཏྲིདཾ ཝུཙྩཏི –

སནྟཱནེ ཡཾ ཕལཾ ཨེཏཾ, ནཱཉྙསྶ ན ཙ ཨཉྙཏོ;

བཱིཛཱནཾ ཨབྷིསངྑཱརོ, ཨེཏསྶཏྠསྶ སཱདྷཀོ.

ཨེཀསནྟཱནསྨིཾ ཧི ཕལཾ ཨུཔྤཛྫམཱནཾ ཏཏྠ ཨེཀནྟཨེཀཏྟནཱནཏྟཱནཾ པཊིསིདྡྷཏྟཱ ཨཉྙསྶཱཏི ཝཱ ཨཉྙཏོཏི ཝཱ ན ཧོཏི. ཨེཏསྶ ཙ པནཏྠསྶ བཱིཛཱནཾ ཨབྷིསངྑཱརོ སཱདྷཀོ. ཨམྦབཱིཛཱདཱིནཾ ཧི ཨབྷིསངྑཱརེསུ ཀཏེསུ ཏསྶ བཱིཛསྶ སནྟཱནེ ལདྡྷཔཙྩཡོ ཀཱལནྟརེ ཕལཝིསེསོ ཨུཔྤཛྫམཱནོ ན ཨཉྙབཱིཛཱནཾ, ནཱཔི ཨཉྙཱབྷིསངྑཱརཔཙྩཡཱ ཨུཔྤཛྫཏི ¶ , ན ཙ ཏཱནི བཱིཛཱནི, ཏེ ཨབྷིསངྑཱརཱ ཝཱ ཕལཊྛཱནཾ པཱཔུཎནྟི, ཨེཝཾ སམྤདམིདཾ ཝེདིཏབྦཾ. ཝིཛྫཱསིཔྤོསདྷཱདཱིཧི ཙཱཔི བཱལསརཱིརེ ཨུཔཡུཏྟེཧི ཀཱལནྟརེ ཝུཌྜྷསརཱིརཱདཱིསུ ཕལདེཧི ཨཡམཏྠོ ཝེདིཏབྦོ.

ཡམྤི ཝུཏྟཾ ‘‘ཨུཔབྷུཉྫཀེ ཙ ཨསཏི ཀསྶ ཏཾ ཕལཾ སིཡཱ’’ཏི, ཏཏྠ,

ཕལསྶུཔྤཏྟིཡཱ ཨེཝ, སིདྡྷཱ བྷུཉྫཀསམྨུཏི;

ཕལུཔྤཱདེན རུཀྑསྶ, ཡཐཱ ཕལཏི སམྨུཏི.

ཡཐཱ ཧི རུཀྑསངྑཱཏཱནཾ དྷམྨཱནཾ ཨེཀདེསབྷཱུཏསྶ རུཀྑཕལསྶ ཨུཔྤཏྟིཡཱ ཨེཝ རུཀྑོ ཕལཏཱིཏི ཝཱ ཕལིཏོཏི ཝཱ ཝུཙྩཏི, ཏཐཱ དེཝམནུསྶསངྑཱཏཱནཾ ཁནྡྷཱནཾ ཨེཀདེསབྷཱུཏསྶ ཨུཔབྷོགསངྑཱཏསྶ སུཁདུཀྑཕལསྶ ཨུཔྤཱདེནེཝ དེཝོ, མནུསྶོ ཝཱ ཨུཔབྷུཉྫཏཱིཏི ཝཱ, སུཁིཏོ, དུཀྑིཏོཏི ཝཱ ཝུཙྩཏི. ཏསྨཱ ན ཨེཏྠ ཨཉྙེན ཨུཔབྷུཉྫཀེན ནཱམ ཀོཙི ཨཏྠོ ཨཏྠཱིཏི.

༦༣༥. ཡོཔི ¶ ཝདེཡྻ ‘‘ཨེཝཾ སནྟེཔི ཨེཏེ སངྑཱརཱ ཝིཛྫམཱནཱ ཝཱ ཕལསྶ པཙྩཡཱ སིཡུཾ, ཨཝིཛྫམཱནཱ ཝཱ, ཡདི ཙ ཝིཛྫམཱནཱ པཝཏྟིཀྑཎེཡེཝ ནེསཾ ཝིཔཱཀེན བྷཝིཏབྦཾ, ཨཐ ཨཝིཛྫམཱནཱ པཝཏྟིཏོ པུབྦེ པཙྪཱ ཙ ནིཙྩཾ ཕལཱཝཧཱ སིཡུ’’ནྟི, སོ ཨེཝཾ ཝཏྟབྦོ –

ཀཏཏྟཱ པཙྩཡཱ ཨེཏེ, ན ཙ ནིཙྩཾ ཕལཱཝཧཱ;

པཱཊིབྷོགཱདིཀཾ ཏཏྠ, ཝེདིཏབྦཾ ནིདསྶནཾ.

ཀཏཏྟཱཡེཝ ཧི སངྑཱརཱ ཨཏྟནོ ཕལསྶ པཙྩཡཱ ཧོནྟི, ན ཝིཛྫམཱནཏྟཱ, ཨཝིཛྫམཱནཏྟཱ ཝཱ. ཡཐཱཧ – ‘‘ཀཱམཱཝཙརསྶ ཀུསལསྶ ཀམྨསྶ ཀཏཏྟཱ ཨུཔཙིཏཏྟཱ ཝིཔཱཀཾ ཙཀྑུཝིཉྙཱཎཾ ཨུཔྤནྣཾ ཧོཏཱི’’ཏིཨཱདི (དྷ. ས. ༤༣༡). ཡཐཱརཧསྶ ཙ ཨཏྟནོ ཕལསྶ པཙྩཡཱ ཧུཏྭཱ ན པུན ཕལཱཝཧཱ ཧོནྟི ཝིཔཱཀཏྟཱ. ཨེཏསྶ ཙཏྠསྶ ཝིབྷཱཝནེ ཨིདཾ པཱཊིབྷོགཱདིཀཾ ནིདསྶནཾ ཝེདིཏབྦཾ. ཡཐཱ ཧི ལོཀེ ཡོ ཀསྶཙི ཨཏྠསྶ ནིཡྻཱཏནཏྠཾ པཱཊིབྷོགོ ཧོཏི, བྷཎྜཾ ཝཱ ཀིཎཱཏི, ཨིཎཾ ཝཱ གཎྷཱཏི, ཏསྶ ཏཾ ཀིརིཡཱཀརཎམཏྟམེཝ ཏདཏྠནིཡྻཱཏནཱདིམྷི ¶ པཙྩཡོ ཧོཏི, ན ཀིརིཡཱཡ ཝིཛྫམཱནཏྟཾ, ཨཝིཛྫམཱནཏྟཾ ཝཱ, ན ཙ ཏདཏྠནིཡྻཱཏནཱདིཏོ པརམྤི དྷཱརཀོཝ ཧོཏི. ཀསྨཱ? ནིཡྻཱཏནཱདཱིནཾ ཀཏཏྟཱ. ཨེཝཾ ཀཏཏྟཱཝ སངྑཱརཱཔི ཨཏྟནོ ཕལསྶ པཙྩཡཱ ཧོནྟི, ན ཙ ཡཐཱརཧཾ ཕལདཱནཏོ པརམྤི ཕལཱཝཧཱ ཧོནྟཱིཏི. ཨེཏྟཱཝཏཱ མིསྶཱམིསྶཝསེན དྭེདྷཱཔི ཝཏྟམཱནསྶ པཊིསནྡྷིཝིཉྙཱཎསྶ སངྑཱརཔཙྩཡཱ པཝཏྟི དཱིཔིཏཱ ཧོཏི.

༦༣༦. ཨིདཱནི སབྦེསྭེཝ ཏེསུ བཱཏྟིཾསཝིཔཱཀཝིཉྙཱཎེསུ སམྨོཧཝིགྷཱཏཏྠཾ,

པཊིསནྡྷིཔཝཏྟཱིནཾ, ཝསེནེཏེ བྷཝཱདིསུ;

ཝིཛཱནིཏབྦཱ སངྑཱརཱ, ཡཐཱ ཡེསཉྩ པཙྩཡཱ.

ཏཏྠ ཏཡོ བྷཝཱ, ཙཏསྶོ ཡོནིཡོ, པཉྩ གཏིཡོ, སཏྟ ཝིཉྙཱཎཊྛིཏིཡོ, ནཝ སཏྟཱཝཱསཱཏི ཨེཏེ བྷཝཱདཡོ ནཱམ. ཨེཏེསུ བྷཝཱདཱིསུ པཊིསནྡྷིཡཾ པཝཏྟེ ཙ ཨེཏེ ཡེསཾ ཝིཔཱཀཝིཉྙཱཎཱནཾ པཙྩཡཱ, ཡཐཱ ཙ པཙྩཡཱ ཧོནྟི, ཏཐཱ ཝིཛཱནིཏབྦཱཏི ཨཏྠོ.

ཏཏྠ ¶ པུཉྙཱབྷིསངྑཱརེ ཏཱཝ ཀཱམཱཝཙརཨཊྛཙེཏནཱབྷེདོ པུཉྙཱབྷིསངྑཱརོ ཨཝིསེསེན ཀཱམབྷཝེ སུགཏིཡཾ ནཝནྣཾ ཝིཔཱཀཝིཉྙཱཎཱནཾ པཊིསནྡྷིཡཾ ནཱནཀྑཎིཀཀམྨཔཙྩཡེན ཙེཝ ཨུཔནིསྶཡཔཙྩཡེན ཙཱཏི དྭེདྷཱ པཙྩཡོ. རཱུཔཱཝཙརཔཉྩཀུསལཙེཏནཱབྷེདོ པུཉྙཱབྷིསངྑཱརོ རཱུཔབྷཝེ པཊིསནྡྷིཡཾ ཨེཝ པཉྩནྣཾ.

ཝུཏྟཔྤབྷེདཀཱམཱཝཙརོ པན ཀཱམབྷཝེ སུགཏིཡཾ ཨུཔེཀྑཱསཧགཏཱཧེཏུམནོཝིཉྙཱཎདྷཱཏུཝཛྫཱནཾ སཏྟནྣཾ པརིཏྟཝིཔཱཀཝིཉྙཱཎཱནཾ ཝུཏྟནཡེནེཝ དྭེདྷཱ པཙྩཡོ པཝཏྟེ, ནོ པཊིསནྡྷིཡཾ. སྭེཝ རཱུཔབྷཝེ པཉྩནྣཾ ཝིཔཱཀཝིཉྙཱཎཱནཾ ཏཐེཝ པཙྩཡོ པཝཏྟེ, ནོ པཊིསནྡྷིཡཾ. ཀཱམབྷཝེ པན དུགྒཏིཡཾ ཨཊྛནྣམྤི པརིཏྟཝིཔཱཀཝིཉྙཱཎཱནཾ ཏཐེཝ པཙྩཡོ པཝཏྟེ, ནོ པཊིསནྡྷིཡཾ. ཏཏྠ ནིརཡེ མཧཱམོགྒལླཱནཏྠེརསྶ ནརཀཙཱརིཀཱདཱིསུ ཨིཊྛཱརམྨཎསམཱཡོགེ སོ པཙྩཡོ ཧོཏི, ཏིརཙྪཱནེསུ པན པེཏམཧིདྡྷིཀེསུ ཙ ཨིཊྛཱརམྨཎཾ ལབྦྷཏིཡེཝ.

སྭེཝ ཀཱམབྷཝེ སུགཏིཡཾ སོལ༹སནྣམྤི ཀུསལཝིཔཱཀཝིཉྙཱཎཱནཾ ཏཐེཝ པཙྩཡོ པཝཏྟེ ཙ ¶ པཊིསནྡྷིཡཉྩ. ཨཝིསེསེན པན པུཉྙཱབྷིསངྑཱརོ རཱུཔབྷཝེ དསནྣཾ ཝིཔཱཀཝིཉྙཱཎཱནཾ ཏཐེཝ པཙྩཡོ པཝཏྟེ ཙ པཊིསནྡྷིཡཉྩ.

དྭཱདསཱཀུསལཙེཏནཱབྷེདོ ཨཔུཉྙཱབྷིསངྑཱརོ ཀཱམབྷཝེ དུགྒཏིཡཾ ཨེཀསྶ ཝིཉྙཱཎསྶ ཏཐེཝ པཙྩཡོ པཊིསནྡྷིཡཾ, ནོ པཝཏྟེ. ཚནྣཾ པཝཏྟེ, ནོ པཊིསནྡྷིཡཾ. སཏྟནྣམྤི ཨཀུསལཝིཔཱཀཝིཉྙཱཎཱནཾ པཝཏྟེ ཙ པཊིསནྡྷིཡཉྩ.

ཀཱམབྷཝེ པན སུགཏིཡཾ ཏེསཾཡེཝ སཏྟནྣཾ ཏཐེཝ པཙྩཡོ པཝཏྟེ, ནོ པཊིསནྡྷིཡཾ. རཱུཔབྷཝེ ཙཏུནྣཾ ཝིཔཱཀཝིཉྙཱཎཱནཾ ཏཐེཝ པཙྩཡོ པཝཏྟེ, ནོ པཊིསནྡྷིཡཾ. སོ ཙ ཁོ ཀཱམཱཝཙརེ ཨནིཊྛརཱུཔདསྶནསདྡསཝནཝསེན, བྲཧྨལོཀེ པན ཨནིཊྛརཱུཔཱདཡོ ནཱམ ནཏྠི. ཏཐཱ ཀཱམཱཝཙརདེཝལོཀེཔི.

ཨཱནེཉྫཱབྷིསངྑཱརོ ཨརཱུཔབྷཝེ ཙཏུནྣཾ ཝིཔཱཀཝིཉྙཱཎཱནཾ ཏཐེཝ པཙྩཡོ པཝཏྟེ ཙ པཊིསནྡྷིཡཉྩ.

ཨེཝཾ ¶ ཏཱཝ བྷཝེསུ པཊིསནྡྷིཔཝཏྟཱིནཾ ཝསེན ཨེཏེ སངྑཱརཱ ཡེསཾ པཙྩཡཱ, ཡཐཱ ཙ པཙྩཡཱ ཧོནྟི, ཏཐཱ ཝིཛཱནིཏབྦཱ. ཨེཏེནེཝ ནཡེན ཡོནིཨཱདཱིསུཔི ཝེདིཏབྦཱ.

༦༣༧. ཏཏྲིདཾ ཨཱདིཏོ པཊྛཱཡ མུཁམཏྟཔཀཱསནཾ – ཨིམེསུ ཧི སངྑཱརེསུ ཡསྨཱ པུཉྙཱབྷིསངྑཱརོ ཏཱཝ དྭཱིསུ བྷཝེསུ པཊིསནྡྷིཾ དཏྭཱ སབྦམཏྟནོ ཝིཔཱཀཾ ཛནེཏི. ཏཐཱ ཨཎྜཛཱདཱིསུ ཙཏཱུསུ ཡོནཱིསུ, དེཝམནུསྶསངྑཱཏཱསུ དྭཱིསུ གཏཱིསུ, ནཱནཏྟཀཱཡནཱནཏྟསཉྙཱིནཱནཏྟཀཱཡཨེཀཏྟསཉྙཱི-ཨེཀཏྟཀཱཡནཱནཏྟསཉྙཱི-ཨེཀཏྟཀཱཡཨེཀཏྟསཉྙཱིསངྑཱཏཱསུ ཙཏཱུསུ ཝིཉྙཱཎཊྛིཏཱིསུ. ཨསཉྙསཏྟཱཝཱསེ པནེས རཱུཔམཏྟམེཝཱབྷིསངྑརོཏཱིཏི ཙཏཱུསུཡེཝ སཏྟཱཝཱསེསུ ཙ པཊིསནྡྷིཾ དཏྭཱ སབྦམཏྟནོ ཝིཔཱཀཾ ཛནེཏི. ཏསྨཱ ཨེས ཨེཏེསུ དྭཱིསུ བྷཝེསུ, ཙཏཱུསུ ཡོནཱིསུ, དྭཱིསུ གཏཱིསུ, ཙཏཱུསུ ཝིཉྙཱཎཊྛིཏཱིསུ, ཙཏཱུསུ སཏྟཱཝཱསེསུ ཙ ཨེཀཝཱིསཏིཡཱ ཝིཔཱཀཝིཉྙཱཎཱནཾ ཝུཏྟནཡེནེཝ པཙྩཡོ ཧོཏི ཡཐཱསམྦྷཝཾ པཊིསནྡྷིཡཾ པཝཏྟེ ཙ.

ཨཔུཉྙཱབྷིསངྑཱརོ པན ཡསྨཱ ཨེཀསྨིཾཡེཝ ཀཱམབྷཝེ ཙཏཱུསུ ཡོནཱིསུ, ཨཝསེསཱསུ ཏཱིསུ གཏཱིསུ ¶ , ནཱནཏྟཀཱཡཨེཀཏྟསཉྙཱིསངྑཱཏཱཡ ཨེཀིསྶཱ ཝིཉྙཱཎཊྛིཏིཡཱ, ཏཱདིསེཡེཝ ཙ ཨེཀསྨིཾ སཏྟཱཝཱསེ པཊིསནྡྷིཝསེན ཝིཔཙྩཏི, ཏསྨཱ ཨེས ཨེཀསྨིཾ བྷཝེ, ཙཏཱུསུ ཡོནཱིསུ, ཏཱིསུ གཏཱིསུ, ཨེཀིསྶཱ ཝིཉྙཱཎཊྛིཏིཡཱ, ཨེཀམྷི ཙ སཏྟཱཝཱསེ སཏྟནྣཾ ཝིཔཱཀཝིཉྙཱཎཱནཾ ཝུཏྟནཡེནེཝ པཙྩཡོ པཊིསནྡྷིཡཾ པཝཏྟེ ཙ.

ཨཱནེཉྫཱབྷིསངྑཱརོ པན ཡསྨཱ ཨེཀསྨིཾཡེཝ ཨརཱུཔབྷཝེ, ཨེཀིསྶཱ ཨོཔཔཱཏིཀཡོནིཡཱ, ཨེཀིསྶཱ དེཝགཏིཡཱ, ཨཱཀཱསཱནཉྩཱཡཏནཱདིཀཱསུ ཏཱིསུ ཝིཉྙཱཎཊྛིཏཱིསུ, ཨཱཀཱསཱནཉྩཱཡཏནཱདིཀེསུ ཙ ཙཏཱུསུ སཏྟཱཝཱསེསུ པཊིསནྡྷིཝསེན ཝིཔཙྩཏི, ཏསྨཱ ཨེས ཨེཀསྨིཾ བྷཝེ, ཨེཀིསྶཱ ཡོནིཡཱ, ཨེཀིསྶཱ གཏིཡཱ, ཏཱིསུ ཝིཉྙཱཎཊྛིཏཱིསུ, ཙཏཱུསུ སཏྟཱཝཱསེསུ ཙཏུནྣཾ ཝིཉྙཱཎཱནཾ ཝུཏྟནཡེནེཝ པཙྩཡོ ཧོཏི པཊིསནྡྷིཡཾ པཝཏྟེ ཙཱཏི. ཨེཝཾ,

པཊིསནྡྷིཔཝཏྟཱིནཾ ¶ , ཝསེནེཏེ བྷཝཱདིསུ;

ཝིཛཱནིཏབྦཱ སངྑཱརཱ, ཡཐཱ ཡེསཉྩ པཙྩཡཱཏི.

ཨཡཾ ‘‘སངྑཱརཔཙྩཡཱ ཝིཉྙཱཎ’’ནྟི པདསྨིཾ ཝིཏྠཱརཀཐཱ.

ཝིཉྙཱཎཔཙྩཡཱནཱམརཱུཔཔདཝིཏྠཱརཀཐཱ

༦༣༨. ཝིཉྙཱཎཔཙྩཡཱ ནཱམརཱུཔཔདེ –

ཝིབྷཱགཱ ནཱམརཱུཔཱནཾ, བྷཝཱདཱིསུ པཝཏྟིཏོ;

སངྒཧཱ པཙྩཡནཡཱ, ཝིཉྙཱཏབྦོ ཝིནིཙྪཡོ.

ཝིབྷཱགཱ ནཱམརཱུཔཱནནྟི ཨེཏྠ ཧི ནཱམནྟི ཨཱརམྨཎཱབྷིམུཁཾ ནམནཏོ ཝེདནཱདཡོ ཏཡོ ཁནྡྷཱ, རཱུཔནྟི ཙཏྟཱརི མཧཱབྷཱུཏཱནི ཙཏུནྣཉྩ མཧཱབྷཱུཏཱནཾ ཨུཔཱདཱཡརཱུཔཾ. ཏེསཾ ཝིབྷཱགོ ཁནྡྷནིདྡེསེ ཝུཏྟོཡེཝཱཏི. ཨེཝཾ ཏཱཝེཏྠ ཝིབྷཱགཱ ནཱམརཱུཔཱནཾ ཝིཉྙཱཏབྦོ ཝིནིཙྪཡོ.

བྷཝཱདཱིསུ པཝཏྟིཏོཏི ཨེཏྠ ཙ ནཱམཾ ཨེཀཾ སཏྟཱཝཱསཾ ཋཔེཏྭཱ སབྦབྷཝཡོནིགཏིཝིཉྙཱཎཊྛིཏིསེསསཏྟཱཝཱསེསུ ¶ པཝཏྟཏི, རཱུཔཾ དྭཱིསུ བྷཝེསུ, ཙཏཱུསུ ཡོནཱིསུ, པཉྩསུ གཏཱིསུ, པུརིམཱསུ ཙཏཱུསུ ཝིཉྙཱཎཊྛིཏཱིསུ, པཉྩསུ སཏྟཱཝཱསེསུ པཝཏྟཏི.

ཨེཝཾ པཝཏྟམཱནེ ཙ ཨེཏསྨིཾ ནཱམརཱུཔེ ཡསྨཱ ཨབྷཱཝཀགབྦྷསེཡྻཀཱནཾ ཨཎྜཛཱནཉྩ པཊིསནྡྷིཀྑཎེ ཝཏྠུཀཱཡདསཀཝསེན རཱུཔཏོ དྭེསནྟཏིསཱིསཱནི, ཏཡོ ཙ ཨརཱུཔིནོ ཁནྡྷཱ པཱཏུབྷཝནྟི, ཏསྨཱ ཏེསཾ ཝིཏྠཱརེན རཱུཔརཱུཔཏོ ཝཱིསཏི དྷམྨཱ, ཏཡོ ཙ ཨརཱུཔིནོ ཁནྡྷཱཏི ཨེཏེ ཏེཝཱིསཏི དྷམྨཱ ཝིཉྙཱཎཔཙྩཡཱ ནཱམརཱུཔནྟི ཝེདིཏབྦཱ. ཨགྒཧིཏགྒཧཎེན པན ཨེཀསནྟཏིསཱིསཏོ ནཝ རཱུཔདྷམྨེ ཨཔནེཏྭཱ ཙུདྡས. སབྷཱཝཀཱནཾ བྷཱཝདསཀཾ པཀྑིཔིཏྭཱ ཏེཏྟིཾས, ཏེསམྤི ཨགྒཧིཏགྒཧཎེན སནྟཏིསཱིསདྭཡཏོ ཨཊྛཱརས རཱུཔདྷམྨེ ཨཔནེཏྭཱ པནྣརས.

ཡསྨཱ ཙ ཨོཔཔཱཏིཀསཏྟེསུ བྲཧྨཀཱཡིཀཱདཱིནཾ པཊིསནྡྷིཀྑཎེ ཙཀྑུསོཏཝཏྠུདསཀཱནཾ, ཛཱིཝིཏིནྡྲིཡནཝཀསྶ ཙ ཝསེན རཱུཔཏོ ཙཏྟཱརི སནྟཏིསཱིསཱནི, ཏཡོ ཙ ཨརཱུཔིནོ ཁནྡྷཱ པཱཏུབྷཝནྟི, ཏསྨཱ ཏེསཾ ཝིཏྠཱརེན རཱུཔརཱུཔཏོ ཨེཀཱུནཙཏྟཱལཱིས དྷམྨཱ, ཏཡོ ཙ ཨརཱུཔིནོ ཁནྡྷཱཏི ¶ ཨེཏེ བཱཙཏྟཱལཱིས དྷམྨཱ ཝིཉྙཱཎཔཙྩཡཱ ནཱམརཱུཔནྟི ཝེདིཏབྦཱ. ཨགྒཧིཏགྒཧཎེན པན སནྟཏིསཱིསཏྟཡཏོ སཏྟཝཱིསཏི དྷམྨེ ཨཔནེཏྭཱ པནྣརས.

ཀཱམབྷཝེ པན ཡསྨཱ སེསཨོཔཔཱཏིཀཱནཾ, སཾསེདཛཱནཾ ཝཱ སབྷཱཝཀཔརིཔུཎྞཱཡཏནཱནཾ པཊིསནྡྷིཀྑཎེ རཱུཔཏོ སཏྟ སནྟཏིསཱིསཱནི, ཏཡོ ཙ ཨརཱུཔིནོ ཁནྡྷཱ པཱཏུབྷཝནྟི, ཏསྨཱ ཏེསཾ ཝིཏྠཱརེན རཱུཔརཱུཔཏོ སཏྟཏི དྷམྨཱ, ཏཡོ ཙ ཨརཱུཔིནོ ཁནྡྷཱཏི ཨེཏེ ཏེསཏྟཏི དྷམྨཱ ཝིཉྙཱཎཔཙྩཡཱ ནཱམརཱུཔནྟི ཝེདིཏབྦཱ. ཨགྒཧིཏགྒཧཎེན པན རཱུཔསནྟཏིསཱིསཚཀྐཏོ ཙཏུཔཉྙཱས དྷམྨེ ཨཔནེཏྭཱ ཨེཀཱུནཝཱིསཏི. ཨེས ཨུཀྐཾསོ. ཨཝཀཾསེན པན ཏཾཏཾརཱུཔསནྟཏིསཱིསཝིཀལཱནཾ ཏསྶ ཏསྶ ཝསེན ཧཱཔེཏྭཱ ཧཱཔེཏྭཱ སངྑེཔཏོ ཝིཏྠཱརཏོ ཙ པཊིསནྡྷིཡཾ ཝིཉྙཱཎཔཙྩཡཱ ནཱམརཱུཔསངྑཱ ཝེདིཏབྦཱ.

ཨརཱུཔཱིནཾ པན ཏཡོཝ ཨརཱུཔིནོ ཁནྡྷཱ. ཨསཉྙཱིནཾ རཱུཔཏོ ཛཱིཝིཏིནྡྲིཡནཝཀམེཝཱཏི. ཨེས ཏཱཝ པཊིསནྡྷིཡཾ ནཡོ.

པཝཏྟེ པན སབྦཏྠ རཱུཔཔྤཝཏྟིདེསེ པཊིསནྡྷིཙིཏྟསྶ ཋིཏིཀྑཎེ པཊིསནྡྷིཙིཏྟེན སཧ པཝཏྟཨུཏུཏོ ¶ ཨུཏུསམུཊྛཱནཾ སུདྡྷཊྛཀཾ པཱཏུབྷཝཏི. པཊིསནྡྷིཙིཏྟཾ པན རཱུཔཾ ན སམུཊྛཱཔེཏི. ཏཉྷི ཡཐཱ པཔཱཏེ པཏིཏཔུརིསོ པརསྶ པཙྩཡོ ཧོཏུཾ ན སཀྐོཏི, ཨེཝཾ ཝཏྠུདུབྦལཏཱཡ དུབྦལཏྟཱ རཱུཔཾ སམུཊྛཱཔེཏུཾ ན སཀྐོཏི. པཊིསནྡྷིཙིཏྟཏོ པན ཨུདྡྷཾ པཋམབྷཝངྒཏོ པབྷུཏི ཙིཏྟསམུཊྛཱནཾ སུདྡྷཊྛཀཾ, སདྡཔཱཏུབྷཱཝཀཱལེ པཊིསནྡྷིཀྑཎཏོ ཨུདྡྷཾ པཝཏྟཨུཏུཏོ ཙེཝ ཙིཏྟཏོ ཙ སདྡནཝཀཾ, ཡེ པན ཀབལཱི༹ཀཱརཱཧཱརཱུཔཛཱིཝིནོ གབྦྷསེཡྻཀསཏྟཱ, ཏེསཾ,

‘‘ཡཉྩསྶ བྷུཉྫཏི མཱཏཱ, ཨནྣཾ པཱནཉྩ བྷོཛནཾ;

ཏེན སོ ཏཏྠ ཡཱཔེཏི, མཱཏུཀུཙྪིགཏོ ནརོ’’ཏི. –

ཝཙནཏོ མཱཏརཱ ཨཛ྄ཛྷོཧརིཏཱཧཱརེན ཨནུགཏེ སརཱིརེ, ཨོཔཔཱཏིཀཱནཾ སབྦཔཋམཾ ཨཏྟནོ མུཁགཏཾ ཁེལ༹ཾ ཨཛ྄ཛྷོཧརཎཀཱལེ ཨཱཧཱརསམུཊྛཱནཾ སུདྡྷཊྛཀནྟི ཨིདཾ ཨཱཧཱརསམུཊྛཱནསྶ སུདྡྷཊྛཀསྶ, ཨུཏུཙིཏྟསམུཊྛཱནཱནཉྩ ཨུཀྐཾསཏོ དྭིནྣཾ ནཝཀཱནཾ ཝསེན ཚབྦཱིསཏིཝིདྷཾ, པུབྦེ ཨེཀེཀཙིཏྟཀྑཎེ ¶ ཏིཀྑཏྟུཾ ཨུཔྤཛྫམཱནཾ ཝུཏྟཾ ཀམྨསམུཊྛཱནཉྩ སཏྟཏིཝིདྷནྟི ཚནྣཝུཏིཝིདྷཾ རཱུཔཾ, ཏཡོ ཙ ཨརཱུཔིནོ ཁནྡྷཱཏི སམཱསཏོ ནཝནཝུཏི དྷམྨཱ. ཡསྨཱ ཝཱ སདྡོ ཨནིཡཏོ ཀདཱཙིདེཝ པཱཏུབྷཱཝཏོ, ཏསྨཱ དུཝིདྷམྤི ཏཾ ཨཔནེཏྭཱ ཨིམེ སཏྟནཝུཏི དྷམྨཱ ཡཐཱསམྦྷཝཾ སབྦསཏྟཱནཾ ཝིཉྙཱཎཔཙྩཡཱ ནཱམརཱུཔནྟི ཝེདིཏབྦཾ. ཏེསཾ ཧི སུཏྟཱནམྤི པམཏྟཱནམྤི ཁཱདནྟཱནམྤི པིཝནྟཱནམྤི དིཝཱ ཙ རཏྟིཉྩ ཨེཏེ ཝིཉྙཱཎཔཙྩཡཱ པཝཏྟནྟི. ཏཉྩ ནེསཾ ཝིཉྙཱཎཔཙྩཡབྷཱཝཾ པརཏོ ཝཎྞཡིསྶཱམ.

ཡམྤནེཏམེཏྠ ཀམྨཛརཱུཔཾ, ཏཾ བྷཝཡོནིགཏིཋིཏིསཏྟཱཝཱསེསུ སབྦཔཋམཾ པཏིཊྛཧནྟམྤི ཏིསམུཊྛཱནིཀརཱུཔེན ཨནུཔཏྠདྡྷཾ ན སཀྐོཏི སཎྛཱཏུཾ, ནཱཔི ཏིསམུཊྛཱནིཀཾ ཏེན ཨནུཔཏྠདྡྷཾ. ཨཐ ཁོ ཝཱཏབྦྷཱཧཏཱཔི ཙཏུདྡིསཱ ཝཝཏྠཱཔིཏཱ ནལ༹ཀལཱཔིཡོ ཝིཡ, ཨཱུམིཝེགབྦྷཱཧཏཱཔི མཧཱསམུདྡེ ཀཏྠཙི ལདྡྷཔཏིཊྛཱ བྷིནྣཝཱཧནིཀཱ ཝིཡ ཙ ཨཉྙམཉྙུཔཏྠདྡྷཱནེཝེཏཱནི ཨཔཏམཱནཱནི སཎྛཧིཏྭཱ ཨེཀམྤི ཝསྶཾ དྭེཔི ཝསྶཱནི…པེ… ཝསྶསཏམྤི ཡཱཝ ཏེསཾ སཏྟཱནཾ ཨཱཡུཀྑཡོ ཝཱ པུཉྙཀྑཡོ ཝཱ, ཏཱཝ པཝཏྟནྟཱིཏི. ཨེཝཾ བྷཝཱདཱིསུ པཝཏྟིཏོཔེཏྠ ཝིཉྙཱཏབྦོ ཝིནིཙྪཡོ.

༦༣༩. སངྒཧཱཏི ཨེཏྠ ཙ ཡཾ ཨཱརུཔྤེ པཝཏྟིཔཊིསནྡྷཱིསུ, པཉྩཝོཀཱརབྷཝེ ཙ པཝཏྟིཡཾ ཝིཉྙཱཎཔཙྩཡཱ ¶ ནཱམམེཝ, ཡཉྩ ཨསཉྙེསུ སབྦཏྠ, པཉྩཝོཀཱརབྷཝེ ཙ པཝཏྟིཡཾ ཝིཉྙཱཎཔཙྩཡཱ རཱུཔམེཝ, ཡཉྩ པཉྩཝོཀཱརབྷཝེ སབྦཏྠ ཝིཉྙཱཎཔཙྩཡཱ ནཱམརཱུཔཾ, ཏཾ སབྦཾ ནཱམཉྩ རཱུཔཉྩ ནཱམརཱུཔཉྩ ནཱམརཱུཔནྟི ཨེཝཾ ཨེཀདེསསརཱུཔེཀསེསནཡེན སངྒཧེཏྭཱ ཝིཉྙཱཎཔཙྩཡཱ ནཱམརཱུཔནྟི ཝེདིཏབྦཾ.

ཨསཉྙེསུ ཝིཉྙཱཎཱབྷཱཝཱ ཨཡུཏྟནྟི ཙེ, ནཱཡུཏྟཾ. ཨིདམྤི,

ནཱམརཱུཔསྶ ཡཾ ཧེཏུ, ཝིཉྙཱཎཾ ཏཾ དྭིདྷཱ མཏཾ;

ཝིཔཱཀམཝིཔཱཀཉྩ, ཡུཏྟམེཝ ཡཏོ ཨིདཾ.

ཡཉྷི ནཱམརཱུཔསྶ ཧེཏུ ཝིཉྙཱཎཾ, ཏཾ ཝིཔཱཀཱཝིཔཱཀབྷེདཏོ དྭེདྷཱ མཏཾ. ཨིདཉྩ ཨསཉྙསཏྟེསུ ཀམྨསམུཊྛཱནཏྟཱ པཉྩཝོཀཱརབྷཝེ པཝཏྟཨབྷིསངྑཱརཝིཉྙཱཎཔཙྩཡཱ རཱུཔཾ. ཏཐཱ པཉྩཝོཀཱརེ པཝཏྟིཡཾ ཀུསལཱདིཙིཏྟཀྑཎེ ཀམྨསམུཊྛཱནནྟི ཡུཏྟམེཝ ཨིདཾ. ཨེཝཾ སངྒཧཏོཔེཏྠ ཝིཉྙཱཏབྦོ ཝིནིཙྪཡོ.

༦༤༠. པཙྩཡནཡཱཏི ¶ ཨེཏྠ ཧི,

ནཱམསྶ པཱཀཝིཉྙཱཎཾ, ནཝདྷཱ ཧོཏི པཙྩཡོ;

ཝཏྠུརཱུཔསྶ ནཝདྷཱ, སེསརཱུཔསྶ ཨཊྛདྷཱ.

ཨབྷིསངྑཱརཝིཉྙཱཎཾ, ཧོཏི རཱུཔསྶ ཨེཀདྷཱ;

ཏདཉྙཾ པན ཝིཉྙཱཎཾ, ཏསྶ ཏསྶ ཡཐཱརཧཾ.

ཡཉྷེཏཾ པཊིསནྡྷིཡཾ པཝཏྟིཡཾ ཝཱ ཝིཔཱཀསངྑཱཏཾ ནཱམཾ, ཏསྶ རཱུཔམིསྶསྶ ཝཱ ཨམིསྶསྶ ཝཱ པཊིསནྡྷིཀཾ ཝཱ ཨཉྙཾ ཝཱ ཝིཔཱཀཝིཉྙཱཎཾ སཧཛཱཏཨཉྙམཉྙནིསྶཡསམྤཡུཏྟཝིཔཱཀཱཧཱརིནྡྲིཡཨཏྠིཨཝིགཏཔཙྩཡེཧི ནཝདྷཱ པཙྩཡོ ཧོཏི.

ཝཏྠུརཱུཔསྶ པཊིསནྡྷིཡཾ སཧཛཱཏཨཉྙམཉྙནིསྶཡཝིཔཱཀཱཧཱརིནྡྲིཡཝིཔྤཡུཏྟཨཏྠིཨཝིགཏཔཙྩཡེཧི ¶ ནཝདྷཱ པཙྩཡོ ཧོཏི. ཋཔེཏྭཱ པན ཝཏྠུརཱུཔཾ སེསརཱུཔསྶ ཨིམེསུ ནཝསུ ཨཉྙམཉྙཔཙྩཡཾ ཨཔནེཏྭཱ སེསེཧི ཨཊྛཧི པཙྩཡེཧི པཙྩཡོ ཧོཏི.

ཨབྷིསངྑཱརཝིཉྙཱཎཾ པན ཨསཉྙསཏྟརཱུཔསྶ ཝཱ པཉྩཝོཀཱརབྷཝེ ཝཱ ཀམྨཛསྶ རཱུཔསྶ སུཏྟནྟིཀཔརིཡཱཡཏོ ཨུཔནིསྶཡཝསེན ཨེཀདྷཱཝ པཙྩཡོ ཧོཏི. ཨཝསེསཾ པཋམབྷཝངྒཏོ པབྷུཏི སབྦམྤི ཝིཉྙཱཎཾ ཏསྶ ཏསྶ ནཱམརཱུཔསྶ ཡཐཱརཧཾ པཙྩཡོ ཧོཏཱིཏི ཝེདིཏབྦཾ. ཝིཏྠཱརཏོ པན ཏསྶ པཙྩཡནཡེ དསྶིཡམཱནེ སབྦཱཔི པཊྛཱནཀཐཱ ཝིཏྠཱརེཏབྦཱ ཧོཏཱིཏི ན ནཾ ཨཱརབྷཱམ.

ཏཏྠ སིཡཱ – ཀཐཾ པནེཏཾ ཛཱནིཏབྦཾ ‘‘པཊིསནྡྷིནཱམརཱུཔཾ ཝིཉྙཱཎཔཙྩཡཱ ཧོཏཱི’’ཏི? སུཏྟཏོ ཡུཏྟིཏོ ཙ. སུཏྟེ ཧི ‘‘ཙིཏྟཱནུཔརིཝཏྟིནོ དྷམྨཱ’’ཏིཨཱདིནཱ (དྷ. ས. དུཀམཱཏིཀཱ ༦༢) ནཡེན བཧུདྷཱ ཝེདནཱདཱིནཾ ཝིཉྙཱཎཔཙྩཡཏཱ སིདྡྷཱ. ཡུཏྟིཏོ པན,

ཙིཏྟཛེན ཧི རཱུཔེན, ཨིདྷ དིཊྛེན སིཛ྄ཛྷཏི;

ཨདིཊྛསྶཱཔི རཱུཔསྶ, ཝིཉྙཱཎཾ པཙྩཡོ ཨིཏི.

ཙིཏྟེ ཧི པསནྣེ ཨཔྤསནྣེ ཝཱ ཏདནུརཱུཔཱནི རཱུཔཱནི ཨུཔྤཛྫམཱནཱནི དིཊྛཱནི. དིཊྛེན ཙ ཨདིཊྛསྶ ཨནུམཱནཾ ཧོཏཱིཏི ཨིམིནཱ ཨིདྷ དིཊྛེན ཙིཏྟཛརཱུཔེན ཨདིཊྛསྶཱཔི པཊིསནྡྷིརཱུཔསྶ ཝིཉྙཱཎཾ པཙྩཡོ ཧོཏཱིཏི ཛཱནིཏབྦམེཏཾ. ཀམྨསམུཊྛཱནསྶཱཔི ¶ ཧི ཏསྶ ཙིཏྟསམུཊྛཱནསྶེཝ ཝིཉྙཱཎཔཙྩཡཏཱ པཊྛཱནེ ཨཱགཏཱཏི. ཨེཝཾ པཙྩཡནཡཏོཔེཏྠ ཝིཉྙཱཏབྦོ ཝིནིཙྪཡོཏི.

ཨཡཾ ‘‘ཝིཉྙཱཎཔཙྩཡཱ ནཱམརཱུཔ’’ནྟི པདསྨིཾ ཝིཏྠཱརཀཐཱ.

ནཱམརཱུཔཔཙྩཡཱསལཱ༹ཡཏནཔདཝིཏྠཱརཀཐཱ

༦༤༡. ནཱམརཱུཔཔཙྩཡཱ སལཱ༹ཡཏནཔདེ –

ནཱམཾ ཁནྡྷཏྟཡཾ རཱུཔཾ, བྷཱུཏཝཏྠཱདིཀཾ མཏཾ;

ཀཏེཀསེསཾ ཏཾ ཏསྶ, ཏཱདིསསྶེཝ པཙྩཡོ.

ཡཉྷེཏཾ ¶ སལཱ༹ཡཏནསྶེཝ པཙྩཡབྷཱུཏཾ ནཱམརཱུཔཾ, ཏཏྠ ནཱམནྟི ཝེདནཱདིཀྑནྡྷཏྟཡཾ, རཱུཔཾ པན སསནྟཏིཔརིཡཱཔནྣཾ ནིཡམཏོ ཙཏྟཱརི བྷཱུཏཱནི ཚ ཝཏྠཱུནི ཛཱིཝིཏིནྡྲིཡནྟི ཨེཝཾ བྷཱུཏཝཏྠཱདིཀཾ མཏནྟི ཝེདིཏབྦཾ. ཏཾ པན ནཱམཉྩ རཱུཔཉྩ ནཱམརཱུཔཉྩ ནཱམརཱུཔནྟི ཨེཝཾ ཀཏེཀསེསཾ ཚཊྛཱཡཏནཉྩ སལཱ༹ཡཏནཉྩ སལཱ༹ཡཏནནྟི ཨེཝཾ ཀཏེཀསེསསྶེཝ སལཱ༹ཡཏནསྶ པཙྩཡོཏི ཝེདིཏབྦཾ. ཀསྨཱ? ཡསྨཱ ཨཱརུཔྤེ ནཱམམེཝ པཙྩཡོ, ཏཉྩ ཚཊྛཱཡཏནསྶེཝ ན ཨཉྙསྶ. ‘‘ནཱམཔཙྩཡཱ ཚཊྛཱཡཏན’’ནྟི (ཝིབྷ. ༣༢༢) ཧི ཝིབྷངྒེ ཝུཏྟཾ.

ཏཏྠ སིཡཱ – ཀཐཾ པནེཏཾ ཛཱནིཏབྦཾ ‘‘ནཱམརཱུཔཾ སལཱ༹ཡཏནསྶ པཙྩཡོ’’ཏི? ནཱམརཱུཔབྷཱཝེ བྷཱཝཏོ. ཏསྶ ཏསྶ ཧི ནཱམསྶ རཱུཔསྶ ཙ བྷཱཝེ ཏཾ ཏཾ ཨཱཡཏནཾ ཧོཏི, ན ཨཉྙཐཱ. སཱ པནསྶ ཏབྦྷཱཝབྷཱཝིཏཱ པཙྩཡནཡསྨིཾ ཡེཝ ཨཱཝིབྷཝིསྶཏི. ཏསྨཱ,

པཊིསནྡྷིཡཱ པཝཏྟེ ཝཱ, ཧོཏི ཡཾ ཡསྶ པཙྩཡོ;

ཡཐཱ ཙ པཙྩཡོ ཧོཏི, ཏཐཱ ནེཡྻཾ ཝིབྷཱཝིནཱ.

ཏཏྲཱཡམཏྠདཱིཔནཱ –

ནཱམམེཝ ཧི ཨཱརུཔྤེ, པཊིསནྡྷིཔཝཏྟིསུ;

པཙྩཡོ སཏྟདྷཱ ཚདྷཱ, ཧོཏི ཏཾ ཨཝཀཾསཏོ.

ཀཐཾ? པཊིསནྡྷིཡཾ ཏཱཝ ཨཝཀཾསཏོ སཧཛཱཏཨཉྙམཉྙནིསྶཡསམྤཡུཏྟཝིཔཱཀཨཏྠིཨཝིགཏཔཙྩཡེཧི སཏྟདྷཱ ནཱམཾ ཚཊྛཱཡཏནསྶ པཙྩཡོ ཧོཏི. ཀིཉྩི པནེཏྠ ཧེཏུཔཙྩཡེན, ཀིཉྩི ཨཱཧཱརཔཙྩཡེནཱཏི ཨེཝཾ ¶ ཨཉྙཐཱཔི པཙྩཡོ ཧོཏི, ཏསྶ ཝསེན ཨུཀྐཾསཱཝཀཾསོ ཝེདིཏབྦོ.

པཝཏྟེཔི ཝིཔཱཀཾ ཝུཏྟནཡེནེཝ པཙྩཡོ ཧོཏི, ཨིཏརཾ པན ཨཝཀཾསཏོ ཝུཏྟཔྤཀཱརེསུ པཙྩཡེསུ ཝིཔཱཀཔཙྩཡཝཛྫེཧི ཚཧི པཙྩཡེཧི པཙྩཡོ ཧོཏི. ཀིཉྩི པནེཏྠ ཧེཏུཔཙྩཡེན, ཀིཉྩི ཨཱཧཱརཔཙྩཡེནཱཏི ཨེཝཾ ཨཉྙཐཱཔི པཙྩཡོ ཧོཏི, ཏསྶ ཝསེན ཨུཀྐཾསཱཝཀཾསོ ཝེདིཏབྦོ.

ཨཉྙསྨིམྤི ¶ བྷཝེ ནཱམཾ, ཏཐེཝ པཊིསནྡྷིཡཾ;

ཚཊྛསྶ ཨིཏརེསཾ ཏཾ, ཚཧཱཀཱརེཧི པཙྩཡོ.

ཨཱརུཔྤཏོ ཧི ཨཉྙསྨིམྤི པཉྩཝོཀཱརབྷཝེ ཏཾ ཝིཔཱཀནཱམཾ ཧདཡཝཏྠུནོ སཧཱཡཾ ཧུཏྭཱ ཚཊྛསྶ མནཱཡཏནསྶ ཡཐཱ ཨཱརུཔྤེ ཝུཏྟཾ, ཏཐེཝ ཨཝཀཾསཏོ སཏྟདྷཱ པཙྩཡོ ཧོཏི. ཨིཏརེསཾ པན ཏཾ པཉྩནྣཾ ཙཀྑཱཡཏནཱདཱིནཾ ཙཏུམཧཱབྷཱུཏསཧཱཡཾ ཧུཏྭཱ སཧཛཱཏནིསྶཡཝིཔཱཀཝིཔྤཡུཏྟཨཏྠིཨཝིགཏཝསེན ཚཧཱཀཱརེཧི པཙྩཡོ ཧོཏི. ཀིཉྩི པནེཏྠ ཧེཏུཔཙྩཡེན, ཀིཉྩི ཨཱཧཱརཔཙྩཡེནཱཏི ཨེཝཾ ཨཉྙཐཱཔི པཙྩཡོ ཧོཏི, ཏསྶ ཝསེན ཨུཀྐཾསཱཝཀཾསོ ཝེདིཏབྦོ.

པཝཏྟེཔི ཏཐཱ ཧོཏི, པཱཀཾ པཱཀསྶ པཙྩཡོ;

ཨཔཱཀཾ ཨཝིཔཱཀསྶ, ཚདྷཱ ཚཊྛསྶ པཙྩཡོ.

པཝཏྟེཔི ཧི པཉྩཝོཀཱརབྷཝེ ཡཐཱ པཊིསནྡྷིཡཾ, ཏཐེཝ ཝིཔཱཀནཱམཾ ཝིཔཱཀསྶ ཚཊྛཱཡཏནསྶ ཨཝཀཾསཏོ སཏྟདྷཱ པཙྩཡོ ཧོཏི. ཨཝིཔཱཀཾ པན ཨཝིཔཱཀསྶ ཚཊྛསྶ ཨཝཀཾསཏོཝ ཏཏོ ཝིཔཱཀཔཙྩཡཾ ཨཔནེཏྭཱ ཚདྷཱ པཙྩཡོ ཧོཏི. ཝུཏྟནཡེནེཝ པནེཏྠ ཨུཀྐཾསཱཝཀཾསོ ཝེདིཏབྦོ.

ཏཏྠེཝ སེསཔཉྩནྣཾ, ཝིཔཱཀཾ པཙྩཡོ བྷཝེ;

ཙཏུདྷཱ ཨཝིཔཱཀམྤི, ཨེཝམེཝ པཀཱསིཏཾ.

ཏཏྠེཝ ཧི པཝཏྟེ སེསཱནཾ ཙཀྑཱཡཏནཱདཱིནཾ པཉྩནྣཾ ཙཀྑུཔསཱདཱདིཝཏྠུཀཾ ཨིཏརམྤི ཝིཔཱཀནཱམཾ པཙྪཱཛཱཏཝིཔྤཡུཏྟཨཏྠིཨཝིགཏཔཙྩཡེཧི ཙཏུདྷཱ པཙྩཡོ ཧོཏི. ཡཐཱ ཙ ཝིཔཱཀཾ, ཨཝིཔཱཀམྤི ཨེཝམེཝ པཀཱསིཏཾ. ཏསྨཱ ཀུསལཱདིབྷེདམྤི ཏེསཾ ཙཏུདྷཱ པཙྩཡོ ཧོཏཱིཏི ཝེདིཏབྦཾ. ཨེཝཾ ¶ ཏཱཝ ནཱམམེཝ པཊིསནྡྷིཡཾ པཝཏྟེ ཝཱ ཡསྶ ཡསྶ ཨཱཡཏནསྶ པཙྩཡོ ཧོཏི, ཡཐཱ ཙ པཙྩཡོ ཧོཏི, ཏཐཱ ཝེདིཏབྦཾ.

རཱུཔཾ པནེཏྠ ཨཱརུཔྤེ, བྷཝེ བྷཝཏི པཙྩཡོ;

ན ཨེཀཱཡཏནསྶཱཔི, པཉྩཀྑནྡྷབྷཝེ པན.

རཱུཔཏོ ¶ སནྡྷིཡཾ ཝཏྠུ, ཚདྷཱ ཚཊྛསྶ པཙྩཡོ;

བྷཱུཏཱནི ཙཏུདྷཱ ཧོནྟི, པཉྩནྣཾ ཨཝིསེསཏོ.

རཱུཔཏོ ཧི པཊིསནྡྷིཡཾ ཝཏྠུརཱུཔཾ ཚཊྛསྶ མནཱཡཏནསྶ སཧཛཱཏཨཉྙམཉྙནིསྶཡཝིཔྤཡུཏྟཨཏྠིཨཝིགཏཔཙྩཡེཧི ཚདྷཱ པཙྩཡོ ཧོཏི. ཙཏྟཱརི པན བྷཱུཏཱནི ཨཝིསེསཏོ པཊིསནྡྷིཡཾ པཝཏྟེ ཙ ཡཾ ཡཾ ཨཱཡཏནཾ ཨུཔྤཛྫཏི, ཏསྶ ཏསྶ ཝསེན པཉྩནྣམྤི ཙཀྑཱཡཏནཱདཱིནཾ སཧཛཱཏནིསྶཡཨཏྠིཨཝིགཏཔཙྩཡེཧི ཙཏུདྷཱ པཙྩཡཱ ཧོནྟི.

ཏིདྷཱ ཛཱིཝིཏམེཏེསཾ, ཨཱཧཱརོ ཙ པཝཏྟིཡཾ;

ཏཱནེཝ ཚདྷཱ ཚཊྛསྶ, ཝཏྠུ ཏསྶེཝ པཉྩདྷཱ.

ཨེཏེསཾ པན ཙཀྑཱདཱིནཾ པཉྩནྣཾ པཊིསནྡྷིཡཾ པཝཏྟེ ཙ ཨཏྠི ཨཝིགཏཨིནྡྲིཡཝསེན རཱུཔཛཱིཝིཏཾ ཏིདྷཱ པཙྩཡོ ཧོཏི. ཨཱཧཱརོ ཙ ཨཏྠིཨཝིགཏཱཧཱརཝསེན ཏིཝིདྷཱ པཙྩཡོ ཧོཏི, སོ ཙ ཁོ ཡེ སཏྟཱ ཨཱཧཱརཱུཔཛཱིཝིནོ, ཏེསཾ ཨཱཧཱརཱནུགཏེ ཀཱཡེ པཝཏྟིཡཾཡེཝ, ནོ པཊིསནྡྷིཡཾ. ཏཱནི པན པཉྩ ཙཀྑཱཡཏནཱདཱིནི ཚཊྛསྶ ཙཀྑུ སོཏགྷཱནཛིཝ྄ཧཱཀཱཡཝིཉྙཱཎསངྑཱཏསྶ མནཱཡཏནསྶ ནིསྶཡཔུརེཛཱཏཨིནྡྲིཡཝིཔྤཡུཏྟཨཏྠིཨཝིགཏཝསེན ཚཧཱཀཱརེཧི པཙྩཡཱ ཧོནྟི པཝཏྟེ, ནོ པཊིསནྡྷིཡཾ. ཋཔེཏྭཱ པན པཉྩཝིཉྙཱཎཱནི ཏསྶེཝ ཨཝསེསམནཱཡཏནསྶ ཝཏྠུརཱུཔཾ ནིསྶཡཔུརེཛཱཏཝིཔྤཡུཏྟཨཏྠིཨཝིགཏཝསེན པཉྩདྷཱ པཙྩཡོ ཧོཏི པཝཏྟེཡེཝ, ནོ པཊིསནྡྷིཡཾ. ཨེཝཾ རཱུཔམེཝ པཊིསནྡྷིཡཾ པཝཏྟེ ཝཱ ཡསྶ ཡསྶ ཨཱཡཏནསྶ པཙྩཡོ ཧོཏི, ཡཐཱ ཙ པཙྩཡོ ཧོཏི, ཏཐཱ ཝེདིཏབྦཾ.

ནཱམརཱུཔཾ པནུབྷཡཾ, ཧོཏི ཡཾ ཡསྶ པཙྩཡོ;

ཡཐཱ ཙ ཏམྤི སབྦཏྠ, ཝིཉྙཱཏབྦཾ ཝིབྷཱཝིནཱ.

སེཡྻཐིདཾ ¶ . པཊིསནྡྷིཡཾ ཏཱཝ པཉྩཝོཀཱརབྷཝེ ཁནྡྷཏྟཡཝཏྠུརཱུཔསངྑཱཏཾ ནཱམརཱུཔཾ ཚཊྛཱཡཏནསྶ སཧཛཱཏཨཉྙམཉྙནིསྶཡཝིཔཱཀསམྤཡུཏྟཝིཔྤཡུཏྟཨཏྠིཨཝིགཏཔཙྩཡཱདཱིཧི པཙྩཡོ ཧོཏཱིཏི. ཨིདམེཏྠ མུཁམཏྟཾ. ཝུཏྟནཡཱནུསཱརེན པན སཀྐཱ སབྦཾ ཡོཛེཏུནྟི ན ཨེཏྠ ཝིཏྠཱརོ དསྶིཏོཏི.

ཨཡཾ ‘‘ནཱམརཱུཔཔཙྩཡཱ སལཱ༹ཡཏན’’ནྟི པདསྨིཾ ཝིཏྠཱརཀཐཱ.

སལཱ༹ཡཏནཔཙྩཡཱཕསྶཔདཝིཏྠཱརཀཐཱ

༦༤༢. སལཱ༹ཡཏནཔཙྩཡཱ ¶ ཕསྶཔདེ –

སལེ༹ཝ ཕསྶཱ སངྑེཔཱ, ཙཀྑུསམྥསྶཨཱདཡོ;

ཝིཉྙཱཎམིཝ བཱཏྟིཾས, ཝིཏྠཱརེན བྷཝནྟི ཏེ.

སངྑེཔེན ཧི སལཱ༹ཡཏནཔཙྩཡཱ ཕསྶོཏི ཙཀྑུསམྥསྶོ, སོཏསམྥསྶོ, གྷཱནསམྥསྶོ, ཛིཝ྄ཧཱསམྥསྶོ, ཀཱཡསམྥསྶོ, མནོསམྥསྶོཏི ཨིམེ ཙཀྑུསམྥསྶཱདཡོ ཚ ཨེཝ ཕསྶཱ བྷཝནྟི. ཝིཏྠཱརེན པན ཙཀྑུསམྥསྶཱདཡོ པཉྩ ཀུསལཝིཔཱཀཱ, པཉྩ ཨཀུསལཝིཔཱཀཱཏི དས, སེསཱ བཱཝཱིསཏི-ལོཀིཡཝིཔཱཀཝིཉྙཱཎསམྤཡུཏྟཱ ཙ བཱཝཱིསཏཱིཏི ཨེཝཾ སབྦེཔི སངྑཱརཔཙྩཡཱ ཝུཏྟཝིཉྙཱཎམིཝ བཱཏྟིཾས ཧོནྟི.

ཡཾ པནེཏསྶ བཱཏྟིཾསཝིདྷསྶཱཔི ཕསྶསྶ པཙྩཡོ སལཱ༹ཡཏནཾ, ཏཏྠ,

ཚཊྛེན སཧ ཨཛ྄ཛྷཏྟཾ, ཙཀྑཱདིཾ བཱཧིརེཧིཔི;

སལཱ༹ཡཏནམིཙྪནྟི, ཚཧི སདྡྷིཾ ཝིཙཀྑཎཱ.

ཏཏྠ ཡེ ཏཱཝ ‘‘ཨུཔཱདིཎྞཀཔཝཏྟིཀཐཱ ཨཡ’’ནྟི སཀསནྟཏིཔརིཡཱཔནྣམེཝ པཙྩཡཾ པཙྩཡུཔྤནྣཉྩ དཱིཔེནྟི, ཏེ ‘‘ཚཊྛཱཡཏནཔཙྩཡཱ ཕསྶོ’’ཏི (ཝིབྷ. ༣༢༢) པཱལི༹ཨནུསཱརཏོ ཨཱརུཔྤེ ཚཊྛཱཡཏནཉྩ, ཨཉྙཏྠ སབྦསངྒཧཏོ སལཱ༹ཡཏནཉྩ ཕསྶསྶ པཙྩཡོཏི ཨེཀདེསསརཱུཔེཀསེསཾ ཀཏྭཱ ཚཊྛེན སཧ ཨཛ྄ཛྷཏྟཾ ཙཀྑཱདིཾ སལཱ༹ཡཏནནྟི ཨིཙྪནྟི. ཏཉྷི ཚཊྛཱཡཏནཉྩ སལཱ༹ཡཏནཉྩ སལཱ༹ཡཏནནྟྭེཝ སངྑཾ གཙྪཏི.

ཡེ པན པཙྩཡུཔྤནྣམེཝ ཨེཀསནྟཏིཔརིཡཱཔནྣཾ དཱིཔེནྟི, པཙྩཡཾ པན བྷིནྣསནྟཱནམྤི, ཏེ ཡཾ ཡཾ ཨཱཡཏནཾ ཕསྶསྶ པཙྩཡོ ཧོཏི, ཏཾ སབྦམྤི ¶ དཱིཔེནྟཱ བཱཧིརམྤི པརིགྒཧེཏྭཱ ཏདེཝ ཚཊྛེན སཧ ཨཛ྄ཛྷཏྟཾ བཱཧིརེཧིཔི རཱུཔཱཡཏནཱདཱིཧི སདྡྷིཾ སལཱ༹ཡཏནནྟི ཨིཙྪནྟི. ཏམྤི ཧི ཚཊྛཱཡཏནཉྩ སལཱ༹ཡཏནཉྩ སལཱ༹ཡཏནནྟི ཨེཏེསཾ ཨེཀསེསེ ཀཏེ སལཱ༹ཡཏནནྟྭེཝ སངྑཾ གཙྪཏི.

ཨེཏྠཱཧ ¶ – ན སབྦཱཡཏནེཧི ཨེཀོ ཕསྶོ སམྦྷོཏི, ནཱཔི ཨེཀམྷཱ ཨཱཡཏནཱ སབྦེ ཕསྶཱ, ཨཡཉྩ སལཱ༹ཡཏནཔཙྩཡཱ ཕསྶོཏི ཨེཀོཝ ཝུཏྟོ, སོ ཀསྨཱཏི. ཏཏྲིདཾ ཝིསྶཛྫནཾ – སཙྩམེཏཾ, སབྦེཧི ཨེཀོ, ཨེཀམྷཱ ཝཱ སབྦེ ན སམྦྷོནྟི, སམྦྷོཏི པན ཨནེཀེཧི ཨེཀོ. ཡཐཱ ཙཀྑུསམྥསྶོ ཙཀྑཱཡཏནཱ རཱུཔཱཡཏནཱ ཙཀྑུཝིཉྙཱཎསངྑཱཏཱ མནཱཡཏནཱ ཨཝསེསསམྤཡུཏྟདྷམྨཱཡཏནཱ ཙཱཏི ཨེཝཾ སབྦཏྠ ཡཐཱནུརཱུཔཾ ཡོཛེཏབྦཾ. ཏསྨཱ ཨེཝ ཧི,

ཨེཀོཔནེཀཱཡཏནཔྤབྷཝོ ཨིཏི དཱིཔིཏོ;

ཕསྶོཡཾ ཨེཀཝཙནནིདྡེསེནཱིདྷ ཏཱདིནཱ.

ཨེཀཝཙནནིདྡེསེནཱཏི སལཱ༹ཡཏནཔཙྩཡཱ ཕསྶོཏི ཨིམིནཱ ཨེཀཝཙནནིདྡེསེན ཨནེཀེཧི ཨཱཡཏནེཧི ཨེཀོ ཕསྶོ ཧོཏཱིཏི ཏཱདིནཱ དཱིཔིཏོཏི ཨཏྠོ. ཨཱཡཏནེསུ པན,

ཚདྷཱ པཉྩ ཏཏོ ཨེཀཾ, ནཝདྷཱ བཱཧིརཱནི ཚ;

ཡཐཱསམྦྷཝམེཏསྶ, པཙྩཡཏྟེ ཝིབྷཱཝཡེ.

ཏཏྲཱཡཾ ཝིབྷཱཝནཱ – ཙཀྑཱཡཏནཱདཱིནི ཏཱཝ པཉྩ ཙཀྑུསམྥསྶཱདིབྷེདཏོ པཉྩཝིདྷསྶ ཕསྶསྶ ནིསྶཡཔུརེཛཱཏིནྡྲིཡཝིཔྤཡུཏྟཨཏྠིཨཝིགཏཝསེན ཚདྷཱ པཙྩཡཱ ཧོནྟི. ཏཏོ པརཾ ཨེཀཾ ཝིཔཱཀམནཱཡཏནཾ ཨནེཀབྷེདསྶ ཝིཔཱཀམནོསམྥསྶསྶ སཧཛཱཏཨཉྙམཉྙནིསྶཡཝིཔཱཀཱཧཱརཨིནྡྲིཡསམྤཡུཏྟཨཏྠིཨཝིགཏཝསེན ནཝདྷཱ པཙྩཡོ ཧོཏི. བཱཧིརེསུ པན རཱུཔཱཡཏནཾ ཙཀྑུསམྥསྶསྶ ཨཱརམྨཎཔུརེཛཱཏཨཏྠིཨཝིགཏཝསེན ཙཏུདྷཱ པཙྩཡོ ཧོཏི. ཏཐཱ སདྡཱཡཏནཱདཱིནི སོཏསམྥསྶཱདཱིནཾ. མནོསམྥསྶསྶ པན ཏཱནི ཙ དྷམྨཱཡཏནཉྩ ཏཐཱ ཙ ¶ ཨཱརམྨཎཔཙྩཡམཏྟེནེཝ ཙཱཏི ཨེཝཾ བཱཧིརཱནི ཚ ཡཐཱསམྦྷཝམེཏསྶ པཙྩཡཏྟེ ཝིབྷཱཝཡེཏི.

ཨཡཾ ‘‘སལཱ༹ཡཏནཔཙྩཡཱ ཕསྶོ’’ཏི པདསྨིཾ ཝིཏྠཱརཀཐཱ.

ཕསྶཔཙྩཡཱཝེདནཱཔདཝིཏྠཱརཀཐཱ

༦༤༣. ཕསྶཔཙྩཡཱ ཝེདནཱཔདེ –

དྭཱརཏོ ¶ ཝེདནཱ ཝུཏྟཱ, ཙཀྑུསམྥསྶཛཱདིཀཱ;

སལེ༹ཝ ཏཱ པབྷེདེན, ཨེཀཱུནནཝུཏཱི མཏཱ.

ཨེཏསྶཔི པདསྶ ཝིབྷངྒེ ‘‘ཙཀྑུསམྥསྶཛཱ ཝེདནཱ. སོཏ… གྷཱན… ཛིཝ྄ཧཱ… ཀཱཡ… མནོསམྥསྶཛཱ ཝེདནཱ’’ཏི (ཝིབྷ. ༢༣༡) ཨེཝཾ དྭཱརཏོ སལེ༹ཝ ཝེདནཱ ཝུཏྟཱ, ཏཱ པན པབྷེདེན ཨེཀཱུནནཝུཏིཡཱ ཙིཏྟེཧི སམྤཡུཏྟཏྟཱ ཨེཀཱུནནཝུཏི མཏཱ.

ཝེདནཱསུ པནེཏཱསུ, ཨིདྷ བཱཏྟིཾས ཝེདནཱ;

ཝིཔཱཀཙིཏྟཡུཏྟཱཝ, ཨདྷིཔྤེཏཱཏི བྷཱསིཏཱ.

ཨཊྛདྷཱ ཏཏྠ པཉྩནྣཾ, པཉྩདྭཱརམྷི པཙྩཡོ;

སེསཱནཾ ཨེཀདྷཱ ཕསྶོ, མནོདྭཱརེཔི སོ ཏཐཱ.

ཏཏྠ ཧི པཉྩདྭཱརེ ཙཀྑུཔསཱདཱདིཝཏྠུཀཱནཾ པཉྩནྣཾ ཝེདནཱནཾ ཙཀྑུསམྥསྶཱདིཀོ ཕསྶོ སཧཛཱཏཨཉྙམཉྙནིསྶཡཝིཔཱཀཨཱཧཱརསམྤཡུཏྟཨཏྠིཨཝིགཏཝསེན ཨཊྛདྷཱ པཙྩཡོ ཧོཏི. སེསཱནཾ པན ཨེཀེཀསྨིཾ དྭཱརེ སམྤཊིཙྪནསནྟཱིརཎཏདཱརམྨཎཝསེན པཝཏྟཱནཾ ཀཱམཱཝཙརཝིཔཱཀཝེདནཱནཾ སོ ཙཀྑུསམྥསྶཱདིཀོ ཕསྶོ ཨུཔནིསྶཡཝསེན ཨེཀདྷཱཝ པཙྩཡོ ཧོཏི.

མནོདྭཱརེཔི སོ ཏཐཱཏི མནོདྭཱརེཔི ཧི ཏདཱརམྨཎཝསེན པཝཏྟཱནཾ ཀཱམཱཝཙརཝིཔཱཀཝེདནཱནཾ སོ སཧཛཱཏམནོསམྥསྶསངྑཱཏོ ཕསྶོ ཏཐེཝ ཨཊྛདྷཱ པཙྩཡོ ཧོཏི, པཊིསནྡྷིབྷཝངྒཙུཏིཝསེན པཝཏྟཱནཾ ཏེབྷཱུམཀཝིཔཱཀཝེདནཱནམྤི. ཡཱ པན ཏཱ མནོདྭཱརེ ཏདཱརམྨཎཝསེན ¶ པཝཏྟཱ ཀཱམཱཝཙརཝེདནཱ, ཏཱསཾ མནོདྭཱརཱཝཛྫནསམྤཡུཏྟོ མནོསམྥསྶོ ཨུཔནིསྶཡཝསེན ཨེཀདྷཱཝ པཙྩཡོ ཧོཏཱིཏི.

ཨཡཾ ‘‘ཕསྶཔཙྩཡཱ ཝེདནཱ’’ཏི པདསྨིཾ ཝིཏྠཱརཀཐཱ.

ཝེདནཱཔཙྩཡཱཏཎྷཱཔདཝིཏྠཱརཀཐཱ

༦༤༤. ཝེདནཱཔཙྩཡཱ ¶ ཏཎྷཱཔདེ –

རཱུཔཏཎྷཱདིབྷེདེན, ཚ ཏཎྷཱ ཨིདྷ དཱིཔིཏཱ;

ཨེཀེཀཱ ཏིཝིདྷཱ ཏཏྠ, པཝཏྟཱཀཱརཏོ མཏཱ.

ཨིམསྨིཾ ཧི པདེ སེཊྛིཔུཏྟོ བྲཱཧྨཎཔུཏྟོཏི པིཏིཏོ ནཱམཝསེན པུཏྟོ ཝིཡ ‘‘རཱུཔཏཎྷཱ. སདྡ… གནྡྷ… རས… ཕོཊྛབྦ… དྷམྨཏཎྷཱ’’ཏི (ཝིབྷ. ༢༣༢) ཨཱརམྨཎཏོ ནཱམཝསེན ཝིབྷངྒེ ཚ ཏཎྷཱ དཱིཔིཏཱ.

ཏཱསུ པན ཏཎྷཱསུ ཨེཀེཀཱ ཏཎྷཱ པཝཏྟིཨཱཀཱརཏོ ཀཱམཏཎྷཱ, བྷཝཏཎྷཱ, ཝིབྷཝཏཎྷཱཏི ཨེཝཾ ཏིཝིདྷཱ མཏཱ. རཱུཔཏཎྷཱཡེཝ ཧི ཡདཱ ཙཀྑུསྶ ཨཱཔཱཐམཱགཏཾ རཱུཔཱརམྨཎཾ ཀཱམསྶཱདཝསེན ཨསྶཱདཡམཱནཱ པཝཏྟཏི, ཏདཱ ཀཱམཏཎྷཱ ནཱམ ཧོཏི. ཡདཱ ཏདེཝཱརམྨཎཾ ‘‘དྷུཝཾ སསྶཏ’’ནྟི པཝཏྟཱཡ སསྶཏདིཊྛིཡཱ སདྡྷིཾ པཝཏྟཏི, ཏདཱ བྷཝཏཎྷཱ ནཱམ ཧོཏི. སསྶཏདིཊྛིསཧགཏོ ཧི རཱགོ བྷཝཏཎྷཱཏི ཝུཙྩཏི. ཡདཱ པན ཏདེཝཱརམྨཎཾ ‘‘ཨུཙྪིཛྫཏི ཝིནསྶཏཱི’’ཏི པཝཏྟཱཡ ཨུཙྪེདདིཊྛིཡཱ སདྡྷིཾ པཝཏྟཏི, ཏདཱ ཝིབྷཝཏཎྷཱ ནཱམ ཧོཏི. ཨུཙྪེདདིཊྛིསཧགཏོ ཧི རཱགོ ཝིབྷཝཏཎྷཱཏི ཝུཙྩཏི. ཨེས ནཡོ སདྡཏཎྷཱདཱིསུཔཱིཏི. ཨེཏཱ ཨཊྛཱརས ཏཎྷཱ ཧོནྟི.

ཏཱ ཨཛ྄ཛྷཏྟརཱུཔཱདཱིསུ ཨཊྛཱརས, བཧིདྡྷཱ ཨཊྛཱརསཱཏི ཚཏྟིཾས. ཨིཏི ཨཏཱིཏཱ ཚཏྟིཾས, ཨནཱགཏཱ ཚཏྟིཾས, པཙྩུཔྤནྣཱ ཚཏྟིཾསཱཏི ཨཊྛསཏཾ ཏཎྷཱ ཧོནྟི. ཏཱ པུན སངྑེཔྤམཱཎཱ རཱུཔཱདིཨཱརམྨཎཝསེན ཚ, ཀཱམཏཎྷཱདིཝསེན ཝཱ ཏིསྶོཝ ཏཎྷཱ ཧོནྟཱིཏི ཝེདིཏབྦཱ.

ཡསྨཱ པནིམེ སཏྟཱ པུཏྟཾ ཨསྶཱདེཏྭཱ པུཏྟེ མམཏྟེན དྷཱཏིཡཱ ཝིཡ རཱུཔཱདིཨཱརམྨཎཝསེན ཨུཔྤཛྫམཱནཾ ཝེདནཾ ཨསྶཱདེཏྭཱ ཝེདནཱཡ མམཏྟེན ¶ རཱུཔཱདིཨཱརམྨཎདཱཡཀཱནཾ ཙིཏྟཀཱར-གནྡྷབྦ-གནྡྷིཀ-སཱུད-ཏནྟཝཱཡརསཱཡནཝིདྷཱཡཀཝེཛྫཱདཱིནཾ མཧཱསཀྐཱརཾ ཀརོནྟི. ཏསྨཱ སབྦཱཔེསཱ ཝེདནཱཔཙྩཡཱ ཏཎྷཱ ཧོཏཱིཏི ཝེདིཏབྦཱ.

ཡསྨཱ ¶ ཙེཏྠ ཨདྷིཔྤེཏཱ, ཝིཔཱཀསུཁཝེདནཱ;

ཨེཀཱཝ ཨེཀདྷཱཝེསཱ, ཏསྨཱ ཏཎྷཱཡ པཙྩཡོ.

ཨེཀདྷཱཏི ཨུཔནིསྶཡཔཙྩཡེནེཝ པཙྩཡོ ཧོཏི. ཡསྨཱ ཝཱ,

དུཀྑཱི སུཁཾ པཏྠཡཏི, སུཁཱི བྷིཡྻོཔི ཨིཙྪཏི;

ཨུཔེཀྑཱ པན སནྟཏྟཱ, སུཁམིཙྩེཝ བྷཱསིཏཱ.

ཏཎྷཱཡ པཙྩཡཱ ཏསྨཱ, ཧོནྟི ཏིསྶོཔི ཝེདནཱ;

ཝེདནཱཔཙྩཡཱ ཏཎྷཱ, ཨིཏི ཝུཏྟཱ མཧེསིནཱ.

ཝེདནཱཔཙྩཡཱ ཙཱཔི, ཡསྨཱ ནཱནུསཡཾ ཝིནཱ;

ཧོཏི ཏསྨཱ ན སཱ ཧོཏི, བྲཱཧྨཎསྶ ཝུསཱིམཏོཏི.

ཨཡཾ ‘‘ཝེདནཱཔཙྩཡཱ ཏཎྷཱ’’ཏི པདསྨིཾ ཝིཏྠཱརཀཐཱ.

ཏཎྷཱཔཙྩཡཱཨུཔཱདཱནཔདཝིཏྠཱརཀཐཱ

༦༤༥. ཏཎྷཱཔཙྩཡཱ ཨུཔཱདཱནཔདེ –

ཨུཔཱདཱནཱནི ཙཏྟཱརི, ཏཱནི ཨཏྠཝིབྷཱགཏོ;

དྷམྨསངྑེཔཝིཏྠཱརཱ, ཀམཏོ ཙ ཝིབྷཱཝཡེ.

ཏཏྲཱཡཾ ཝིབྷཱཝནཱ – ཀཱམུཔཱདཱནཾ, དིཊྛུཔཱདཱནཾ, སཱིལབྦཏུཔཱདཱནཾ, ཨཏྟཝཱདུཔཱདཱནནྟི ཨིམཱནི ཏཱཝེཏྠ ཙཏྟཱརི ཨུཔཱདཱནཱནི. ཏེསཾ ཨཡཾ ཨཏྠཝིབྷཱགོ – ཝཏྠུསངྑཱཏཾ ཀཱམཾ ཨུཔཱདིཡཏཱིཏི ཀཱམུཔཱདཱནཾ, ཀཱམོ ཙ སོ ཨུཔཱདཱནཉྩཱཏིཔི ཀཱམུཔཱདཱནཾ. ཨུཔཱདཱནནྟི དལ༹ྷགྒཧཎཾ. དལ༹ྷཏྠོ ཧེཏྠ ཨུཔསདྡོ ཨུཔཱཡཱསཨུཔཀཊྛཱདཱིསུ ཝིཡ. ཏཐཱ དིཊྛི ཙ སཱ ཨུཔཱདཱནཉྩཱཏི དིཊྛུཔཱདཱནཾ. དིཊྛིཾ ཨུཔཱདིཡཏཱིཏི ཝཱ དིཊྛུཔཱདཱནཾ. ‘‘སསྶཏོ ཨཏྟཱ ཙ ལོཀོ ཙཱ’’ཏིཨཱདཱིསུ ¶ (དཱི. ནི. ༡.༣༡) ཧི པུརིམདིཊྛིཾ ཨུཏྟརདིཊྛི ཨུཔཱདིཡཏི. ཏཐཱ སཱིལབྦཏཾ ཨུཔཱདིཡཏཱིཏི སཱིལབྦཏུཔཱདཱནཾ. སཱིལབྦཏཉྩ ཏཾ ཨུཔཱདཱནཉྩཱཏིཔི སཱིལབྦཏུཔཱདཱནཾ. གོསཱིལགོཝཏཱདཱིནི ཧི ‘‘ཨེཝཾ སུདྡྷཱི’’ཏི ཨབྷིནིཝེསཏོ སཡམེཝ ཨུཔཱདཱནཱནི. ཏཐཱ ཝདནྟི ཨེཏེནཱཏི ཝཱདོ. ཨུཔཱདིཡནྟི ¶ ཨེཏེནཱཏི ཨུཔཱདཱནཾ. ཀིཾ ཝདནྟི, ཨུཔཱདིཡནྟི ཝཱ? ཨཏྟཱནཾ. ཨཏྟནོ ཝཱདུཔཱདཱནཾ ཨཏྟཝཱདུཔཱདཱནཾ. ཨཏྟཝཱདམཏྟམེཝ ཝཱ ཨཏྟཱཏི ཨུཔཱདིཡནྟི ཨེཏེནཱཏི ཨཏྟཝཱདུཔཱདཱནཾ. ཨཡཾ ཏཱཝ ཏེསཾ ཨཏྠཝིབྷཱགོ.

དྷམྨསངྑེཔཝིཏྠཱརེ པན ཀཱམུཔཱདཱནཾ ཏཱཝ ‘‘ཏཏྠ ཀཏམཾ ཀཱམུཔཱདཱནཾ? ཡོ ཀཱམེསུ ཀཱམཙྪནྡོ ཀཱམརཱགོ ཀཱམནནྡཱི ཀཱམཏཎྷཱ ཀཱམསྣེཧོ ཀཱམཔརིལཱ༹ཧོ ཀཱམམུཙྪཱ ཀཱམཛ྄ཛྷོསཱནཾ, ཨིདཾ ཝུཙྩཏི ཀཱམུཔཱདཱན’’ནྟི (དྷ. ས. ༡༢༢༠; ཝིབྷ. ༩༣༨) ཨཱགཏཏྟཱ སངྑེཔཏོ ཏཎྷཱདལ༹ྷཏྟཾ ཝུཙྩཏི. ཏཎྷཱདལ༹ྷཏྟཾ ནཱམ པུརིམཏཎྷཱཨུཔནིསྶཡཔཙྩཡེན དལ༹ྷསམྦྷཱུཏཱ ཨུཏྟརཏཎྷཱཝ. ཀེཙི པནཱཧུ ‘‘ཨཔྤཏྟཝིསཡཔཏྠནཱ ཏཎྷཱ ཨནྡྷཀཱརེ ཙོརསྶ ཧཏྠཔྤསཱརཎཾ ཝིཡ, སམྤཏྟཝིསཡགྒཧཎཾ ཨུཔཱདཱནཾ ཏསྶེཝ བྷཎྜགྒཧཎཾ ཝིཡ. ཨཔྤིཙྪཏཱསནྟུཊྛིཏཱཔཊིཔཀྑཱ ཙ ཏེ དྷམྨཱ. ཏཐཱ པརིཡེསནཱརཀྑདུཀྑམཱུལཱ’’ཏི. སེསུཔཱདཱནཏྟཡཾ པན སངྑེཔཏོ དིཊྛིམཏྟམེཝ.

ཝིཏྠཱརཏོ པན པུབྦེ རཱུཔཱདཱིསུ ཝུཏྟཨཊྛསཏཔྤབྷེདཱཡཔི ཏཎྷཱཡ དལ༹ྷབྷཱཝོ ཀཱམུཔཱདཱནཾ. དསཝཏྠུཀཱ མིཙྪཱདིཊྛི དིཊྛུཔཱདཱནཾ. ཡཐཱཧ – ‘‘ཏཏྠ ཀཏམཾ དིཊྛུཔཱདཱནཾ? ནཏྠི དིནྣཾ, ནཏྠི ཡིཊྛཾ…པེ… སཙྪིཀཏྭཱ པཝེདེནྟཱིཏི ཡཱ ཨེཝརཱུཔཱ དིཊྛི…པེ… ཝིཔརིཡེསགྒཱཧོ. ཨིདཾ ཝུཙྩཏི དིཊྛུཔཱདཱན’’ནྟི (དྷ. ས. ༡༢༢༡; ཝིབྷ. ༩༣༨). སཱིལབྦཏེཧི སུདྡྷཱིཏི པརཱམསནཾ པན སཱིལབྦཏུཔཱདཱནཾ. ཡཐཱཧ – ‘‘ཏཏྠ ཀཏམཾ སཱིལབྦཏུཔཱདཱནཾ? སཱིལེན སུདྡྷི, ཝཏེན སུདྡྷི, སཱིལབྦཏེན སུདྡྷཱིཏི ཡཱ ཨེཝརཱུཔཱ དིཊྛི…པེ… ཝིཔརིཡེསགྒཱཧོ. ཨིདཾ ཝུཙྩཏི སཱིལབྦཏུཔཱདཱན’’ནྟི (དྷ. ས. ༡༢༢༢; ཝིབྷ. ༩༣༨). ཝཱིསཏིཝཏྠུཀཱ སཀྐཱཡདིཊྛི ཨཏྟཝཱདུཔཱདཱནཾ. ཡཐཱཧ – ‘‘ཏཏྠ ཀཏམཾ ཨཏྟཝཱདུཔཱདཱནཾ? ཨིདྷ ཨསྶུཏཝཱ པུཐུཛྫནོ…པེ… སཔྤུརིསདྷམྨེ ཨཝིནཱིཏོ རཱུཔཾ ཨཏྟཏོ སམནུཔསྶཏི…པེ… ཝིཔརིཡེསགྒཱཧོ, ཨིདཾ ཝུཙྩཏི ཨཏྟཝཱདུཔཱདཱན’’ནྟི (དྷ. ས. ༡༢༢༣; ཝིབྷ. ༩༣༨). ཨཡམེཏྠ དྷམྨསངྑེཔཝིཏྠཱརོ.

ཀམཏོཏི ཨེཏྠ པན ཏིཝིདྷོ ཀམོ ཨུཔྤཏྟིཀྐམོ པཧཱནཀྐམོ དེསནཱཀྐམོ ཙ. ཏཏྠ ཨནམཏགྒེ ¶ སཾསཱརེ ཨིམསྶ པཋམཾ ཨུཔྤཏྟཱིཏི ཨབྷཱཝཏོ ཀིལེསཱནཾ ནིཔྤརིཡཱཡེན ཨུཔྤཏྟིཀྐམོ ན ཝུཙྩཏི. པརིཡཱཡེན པན ཡེབྷུཡྻེན ཨེཀསྨིཾ བྷཝེ ཨཏྟགྒཱཧཔུབྦངྒམོ སསྶཏུཙྪེདཱབྷིནིཝེསོ, ཏཏོ ‘‘སསྶཏོ ཨཡཾ ཨཏྟཱ’’ཏི གཎྷཏོ ཨཏྟཝིསུདྡྷཏྠཾ སཱིལབྦཏུཔཱདཱནཾ, ‘‘ཨུཙྪིཛྫཏཱི’’ཏི གཎྷཏོ པརལོཀནིརཔེཀྑསྶ ཀཱམུཔཱདཱནནྟི ¶ ཨེཝཾ པཋམཾ ཨཏྟཝཱདུཔཱདཱནཾ, ཏཏོ དིཊྛིསཱིལབྦཏཀཱམུཔཱདཱནཱནཱིཏི ཨཡམེཏེསཾ ཨེཀསྨིཾ བྷཝེ ཨུཔྤཏྟིཀྐམོ.

དིཊྛུཔཱདཱནཱདཱིནི ཙེཏྠ པཋམཾ པཧཱིཡནྟི སོཏཱཔཏྟིམགྒཝཛ྄ཛྷཏྟཱ. ཀཱམུཔཱདཱནཾ པཙྪཱ, ཨརཧཏྟམགྒཝཛ྄ཛྷཏྟཱཏི ཨཡམེཏེསཾ པཧཱནཀྐམོ.

མཧཱཝིསཡཏྟཱ པན པཱཀཊཏྟཱ ཙ ཨེཏེསུ ཀཱམུཔཱདཱནཾ པཋམཾ དེསིཏཾ. མཧཱཝིསཡཾ ཧི ཏཾ ཨཊྛཙིཏྟསམྤཡོགཱ, ཨཔྤཝིསཡཱནི ཨིཏརཱནི ཙཏུཙིཏྟསམྤཡོགཱ, ཡེབྷུཡྻེན ཙ ཨཱལཡརཱམཏྟཱ པཛཱཡ པཱཀཊཾ ཀཱམུཔཱདཱནཾ, ན ཨིཏརཱནི. ཀཱམུཔཱདཱན ཝཱ ཀཱམཱནཾ སམདྷིགམཏྠཾ ཀོཏཱུཧལམངྒལཱདིབཧུལོ ཧོཏི, སཱསྶ དིཊྛཱིཏི ཏདནནྟརཾ དིཊྛུཔཱདཱནཾ, ཏཾ པབྷིཛྫམཱནཾ སཱིལབྦཏཨཏྟཝཱདུཔཱདཱནཝསེན དུཝིདྷཾ ཧོཏི. ཏསྨིཾ དྭཡེ གོཀིརིཡཾ ཀུཀྐུརཀིརིཡཾ ཝཱ དིསྭཱཔི ཝེདིཏབྦཏོ ཨོལཱ༹རིཀནྟི སཱིལབྦཏུཔཱདཱནཾ པཋམཾ དེསིཏཾ. སུཁུམཏྟཱ ཨནྟེ ཨཏྟཝཱདུཔཱདཱནནྟི ཨཡམེཏེསཾ དེསནཱཀྐམོ.

ཏཎྷཱ ཙ པུརིམསྶེཏྠ, ཨེཀདྷཱ ཧོཏི པཙྩཡོ;

སཏྟདྷཱ ཨཊྛདྷཱ ཝཱཔི, ཧོཏི སེསཏྟཡསྶ སཱ.

ཨེཏྠ ཙ ཨེཝཾ དེསིཏེ ཨུཔཱདཱནཙཏུཀྐེ པུརིམསྶ ཀཱམུཔཱདཱནསྶ ཀཱམཏཎྷཱ ཨུཔནིསྶཡཝསེན ཨེཀདྷཱཝ པཙྩཡོ ཧོཏི, ཏཎྷཱབྷིནནྡིཏེསུ ཝིསཡེསུ ཨུཔྤཏྟིཏོ. སེསཏྟཡསྶ པན སཧཛཱཏཨཉྙམཉྙནིསྶཡསམྤཡུཏྟཨཏྠིཨཝིགཏཧེཏུཝསེན སཏྟདྷཱ ཝཱ, ཨུཔནིསྶཡེན སཧ ཨཊྛདྷཱ ཝཱཔི པཙྩཡོ ཧོཏི. ཡདཱ ཙ སཱ ཨུཔནིསྶཡཝསེན པཙྩཡོ ཧོཏི, ཏདཱ ཨསཧཛཱཏཱཝ ཧོཏཱིཏི.

ཨཡཾ ‘‘ཏཎྷཱཔཙྩཡཱ ཨུཔཱདཱན’’ནྟི པདསྨིཾ ཝིཏྠཱརཀཐཱ.

ཨུཔཱདཱནཔཙྩཡཱབྷཝཔདཝིཏྠཱརཀཐཱ

༦༤༦. ཨུཔཱདཱནཔཙྩཡཱ ¶ བྷཝཔདེ –

ཨཏྠཏོ དྷམྨཏོ ཙེཝ, སཱཏྠཏོ བྷེདསངྒཧཱ;

ཡཾ ཡསྶ པཙྩཡོ ཙེཝ, ཝིཉྙཱཏབྦོ ཝིནིཙྪཡོ.

ཏཏྠ ¶ བྷཝཏཱིཏི བྷཝོ. སོ ཀམྨབྷཝོ ཨུཔཔཏྟིབྷཝོ ཙཱཏི དུཝིདྷོ ཧོཏི. ཡཐཱཧ – ‘‘བྷཝོ དུཝིདྷེན ཨཏྠི ཀམྨབྷཝོ, ཨཏྠི ཨུཔཔཏྟིབྷཝོ’’ཏི (ཝིབྷ. ༢༣༤). ཏཏྠ ཀམྨམེཝ བྷཝོ ཀམྨབྷཝོ, ཏཐཱ ཨུཔཔཏྟིཡེཝ བྷཝོ ཨུཔཔཏྟིབྷཝོ. ཨེཏྠ ཙ ཨུཔཔཏྟི བྷཝཏཱིཏི བྷཝོ. ཀམྨཾ པན ཡཐཱ སུཁཀཱརཎཏྟཱ ‘‘སུཁོ བུདྡྷཱནཾ ཨུཔྤཱདོ’’ཏི (དྷ. པ. ༡༩༤) ཝུཏྟོ, ཨེཝཾ བྷཝཀཱརཎཏྟཱ ཕལཝོཧཱརེན བྷཝོཏི ཝེདིཏབྦནྟི. ཨེཝཾ ཏཱཝེཏྠ ཨཏྠཏོ ཝིཉྙཱཏབྦོ ཝིནིཙྪཡོ.

༦༤༧. དྷམྨཏོ པན ཀམྨབྷཝོ ཏཱཝ སངྑེཔཏོ ཙེཏནཱ ཙེཝ ཙེཏནཱསམྤཡུཏྟཱ ཙ ཨབྷིཛ྄ཛྷཱདཡོ ཀམྨསངྑཱཏཱ དྷམྨཱ. ཡཐཱཧ – ‘‘ཏཏྠ ཀཏམོ ཀམྨབྷཝོ? པུཉྙཱབྷིསངྑཱརོ ཨཔུཉྙཱབྷིསངྑཱརོ ཨཱནེཉྫཱབྷིསངྑཱརོ (ཝིབྷ. ༢༣༤) པརིཏྟབྷཱུམཀོ ཝཱ མཧཱབྷཱུམཀོ ཝཱ, ཨཡཾ ཝུཙྩཏི ཀམྨབྷཝོ. སབྦམྤི བྷཝགཱམིཀམྨཾ ཀམྨབྷཝོ’’ཏི (ཝིབྷ. ༢༣༤). ཨེཏྠ ཧི པུཉྙཱབྷིསངྑཱརོཏི ཏེརས ཙེཏནཱ. ཨཔུཉྙཱབྷིསངྑཱརོཏི དྭཱདས. ཨཱནེཉྫཱབྷིསངྑཱརོཏི ཙཏསྶོ ཙེཏནཱ. ཨེཝཾ པརིཏྟབྷཱུམཀོ ཝཱ མཧཱབྷཱུམཀོ ཝཱཏི ཨེཏེན ཏཱསཾཡེཝ ཙེཏནཱནཾ མནྡབཧུཝིཔཱཀཏཱ ཝུཏྟཱ. སབྦམྤི བྷཝགཱམིཀམྨནྟི ཨིམིནཱ པན ཙེཏནཱསམྤཡུཏྟཱ ཨབྷིཛ྄ཛྷཱདཡོ ཝུཏྟཱ.

ཨུཔཔཏྟིབྷཝོ པན སངྑེཔཏོ ཀམྨཱབྷིནིབྦཏྟཱ ཁནྡྷཱ, པབྷེདཏོ ནཝཝིདྷོ ཧོཏི. ཡཐཱཧ – ‘‘ཏཏྠ ཀཏམོ ཨུཔཔཏྟིབྷཝོ? ཀཱམབྷཝོ རཱུཔབྷཝོ ཨརཱུཔབྷཝོ སཉྙཱབྷཝོ ཨསཉྙཱབྷཝོ ནེཝསཉྙཱནཱསཉྙཱབྷཝོ, ཨེཀཝོཀཱརབྷཝོ ཙཏུཝོཀཱརབྷཝོ པཉྩཝོཀཱརབྷཝོ, ཨཡཾ ཝུཙྩཏི ཨུཔཔཏྟིབྷཝོ’’ཏི (ཝིབྷ. ༢༣༤). ཏཏྠ ཀཱམསངྑཱཏོ བྷཝོ ཀཱམབྷཝོ. ཨེས ནཡོ རཱུཔཱརཱུཔབྷཝེསུ. སཉྙཱཝཏཾ བྷཝོ, སཉྙཱ ཝཱ ཨེཏྠ བྷཝེ ཨཏྠཱིཏི སཉྙཱབྷཝོ. ཝིཔརིཡཱཡེན ཨསཉྙཱབྷཝོ. ཨོལཱ༹རིཀཱཡ སཉྙཱཡ ཨབྷཱཝཱ སུཁུམཱཡ ཙ བྷཱཝཱ ནེཝསཉྙཱ, ནཱསཉྙཱ ཨསྨིཾ ¶ བྷཝེཏི ནེཝསཉྙཱནཱསཉྙཱབྷཝོ. ཨེཀེན རཱུཔཀྑནྡྷེན ཝོཀིཎྞོ བྷཝོ ཨེཀཝོཀཱརབྷཝོ. ཨེཀོ ཝཱ ཝོཀཱརོ ཨསྶ བྷཝསྶཱཏི ཨེཀཝོཀཱརབྷཝོ. ཨེས ནཡོ ཙཏུཝོཀཱརཔཉྩཝོཀཱརབྷཝེསུ. ཏཏྠ ཀཱམབྷཝོ པཉྩ ཨུཔཱདིཎྞཀྑནྡྷཱ. ཏཐཱ རཱུཔབྷཝོ. ཨརཱུཔབྷཝོ ཙཏྟཱརོ ¶ , སཉྙཱབྷཝོ པཉྩ. ཨསཉྙཱབྷཝོ ཨེཀོ ཨུཔཱདིཎྞཀྑནྡྷོ. ནེཝསཉྙཱནཱསཉྙཱབྷཝོ ཙཏྟཱརོ. ཨེཀཝོཀཱརབྷཝཱདཡོ ཨེཀཙཏུཔཉྩཀྑནྡྷཱ ཨུཔཱདིཎྞཀྑནྡྷེཧཱིཏི ཨེཝམེཏྠ དྷམྨཏོཔི ཝིཉྙཱཏབྦོ ཝིནིཙྪཡོ.

༦༤༨. སཱཏྠཏོཏི ཡཐཱ ཙ བྷཝནིདྡེསེ, ཏཐེཝ ཀཱམཾ སངྑཱརནིདྡེསེཔི པུཉྙཱབྷིསངྑཱརཱདཡོཝ ཝུཏྟཱ, ཨེཝཾ སནྟེཔི པུརིམེ ཨཏཱིཏཀམྨཝསེན ཨིདྷ པཊིསནྡྷིཡཱ པཙྩཡཏྟཱ, ཨིམེ པཙྩུཔྤནྣཀམྨཝསེན ཨཱཡཏིཾ པཊིསནྡྷིཡཱ པཙྩཡཏྟཱཏི པུནཝཙནཾ སཱཏྠཀམེཝ, པུབྦེ ཝཱ ‘‘ཏཏྠ ཀཏམོ པུཉྙཱབྷིསངྑཱརོ? ཀུསལཱ ཙེཏནཱ ཀཱམཱཝཙརཱ’’ཏི (ཝིབྷ. ༢༢༦) ཨེཝམཱདིནཱ ནཡེན ཙེཏནཱཝ སངྑཱརཱཏི ཝུཏྟཱ. ཨིདྷ པན ‘‘སབྦམྤི བྷཝགཱམིཀམྨ’’ནྟི (ཝིབྷ. ༢༣༤) ཝཙནཏོ ཙེཏནཱསམྤཡུཏྟཱཔི. པུབྦེ ཙ ཝིཉྙཱཎཔཙྩཡམེཝ ཀམྨཾ ‘‘སངྑཱརཱ’’ཏི ཝུཏྟཾ. ཨིདཱནི ཨསཉྙཱབྷཝནིབྦཏྟཀམྤི. ཀིཾ ཝཱ བཧུནཱ, ‘‘ཨཝིཛྫཱཔཙྩཡཱ སངྑཱརཱ’’ཏི ཨེཏྠ པུཉྙཱབྷིསངྑཱརཱདཡོཝ ཀུསལཱཀུསལཱ དྷམྨཱ ཝུཏྟཱ. ‘‘ཨུཔཱདཱནཔཙྩཡཱ བྷཝོ’’ཏི ཨིདྷ པན ཨུཔཔཏྟིབྷཝསྶཱཔི སངྒཧིཏཏྟཱ ཀུསལཱཀུསལཱབྱཱཀཏཱ དྷམྨཱ ཝུཏྟཱ. ཏསྨཱ སབྦཐཱཔི སཱཏྠཀམེཝིདཾ པུནཝཙནནྟི ཨེཝམེཏྠ སཱཏྠཏོཔི ཝིཉྙཱཏབྦོ ཝིནིཙྪཡོ.

༦༤༩. བྷེདསངྒཧཱཏི ཨུཔཱདཱནཔཙྩཡཱ བྷཝསྶ བྷེདཏོ ཙེཝ སངྒཧཏོ ཙ. ཡཉྷི ཀཱམུཔཱདཱནཔཙྩཡཱ ཀཱམབྷཝནིབྦཏྟཀཾ ཀམྨཾ ཀརཱིཡཏི, སོ ཀམྨབྷཝོ. ཏདབྷིནིབྦཏྟཱ ཁནྡྷཱ ཨུཔཔཏྟིབྷཝོ. ཨེས ནཡོ རཱུཔཱརཱུཔབྷཝེསུ. ཨེཝཾ ཀཱམུཔཱདཱནཔཙྩཡཱ དྭེ ཀཱམབྷཝཱ, ཏདནྟོགདྷཱ ཙ སཉྙཱབྷཝཔཉྩཝོཀཱརབྷཝཱ, དྭེ རཱུཔབྷཝཱ, ཏདནྟོགདྷཱ ཙ སཉྙཱབྷཝཨསཉྙཱབྷཝཨེཀཝོཀཱརབྷཝཔཉྩཝོཀཱརབྷཝཱ, དྭེ ཨརཱུཔབྷཝཱ, ཏདནྟོགདྷཱ ཙ སཉྙཱབྷཝནེཝསཉྙཱནཱསཉྙཱབྷཝཙཏུཝོཀཱརབྷཝཱཏི སདྡྷིཾ ཨནྟོགདྷེཧི ཚ བྷཝཱ. ཡཐཱ ཙ ཀཱམུཔཱདཱནཔཙྩཡཱ སདྡྷིཾ ཨནྟོགདྷེཧི ཚ བྷཝཱ. ཏཐཱ སེསུཔཱདཱནཔཙྩཡཱཔཱིཏི ཨེཝཾ ཨུཔཱདཱནཔཙྩཡཱ བྷེདཏོ སདྡྷིཾ ཨནྟོགདྷེཧི ཙཏུཝཱིསཏི བྷཝཱ.

སངྒཧཏོ པན ཀམྨབྷཝཾ ཨུཔཔཏྟིབྷཝཉྩ ཨེཀཏོ ཀཏྭཱ ཀཱམུཔཱདཱནཔཙྩཡཱ སདྡྷིཾ ཨནྟོགདྷེཧི ¶ ཨེཀོ ཀཱམབྷཝོ. ཏཐཱ རཱུཔཱརཱུཔབྷཝཱཏི ཏཡོ བྷཝཱ. ཏཐཱ སེསུཔཱདཱནཔཙྩཡཱ པཱིཏི. ཨེཝཾ ཨུཔཱདཱནཔཙྩཡཱ སངྒཧཏོ སདྡྷིཾ ཨནྟོགདྷེཧི དྭཱདས བྷཝཱ. ཨཔིཙ ¶ ཨཝིསེསེན ཨུཔཱདཱནཔཙྩཡཱ ཀཱམབྷཝཱུཔགཾ ཀམྨཾ ཀམྨབྷཝོ. ཏདབྷིནིབྦཏྟཱ ཁནྡྷཱ ཨུཔཔཏྟིབྷཝོ. ཨེས ནཡོ རཱུཔཱརཱུཔབྷཝེསུ. ཨེཝཾ ཨུཔཱདཱནཔཙྩཡཱ སདྡྷིཾ ཨནྟོགདྷེཧི དྭེ ཀཱམབྷཝཱ, དྭེ རཱུཔབྷཝཱ, དྭེ ཨརཱུཔབྷཝཱཏི ཨཔརེན པརིཡཱཡེན སངྒཧཏོ ཚ བྷཝཱ. ཀམྨབྷཝཨུཔཔཏྟིབྷཝབྷེདཾ ཝཱ ཨནུཔགམྨ སདྡྷིཾ ཨནྟོགདྷེཧི ཀཱམབྷཝཱདིཝསེན ཏཡོ བྷཝཱ ཧོནྟི. ཀཱམབྷཝཱདིབྷེདམྤི ཨནུཔགམྨ ཀམྨབྷཝཨུཔཔཏྟིབྷཝཝསེན དྭེ བྷཝཱ ཧོནྟི. ཀམྨུཔཔཏྟིབྷེདཉྩཱཔི ཨནུཔགམྨ ཨུཔཱདཱནཔཙྩཡཱ བྷཝོཏི བྷཝཝསེན ཨེཀོཝ བྷཝོ ཧོཏཱིཏི ཨེཝམེཏྠ ཨུཔཱདཱནཔཙྩཡསྶ བྷཝསྶ བྷེདསངྒཧཱཔི ཝིཉྙཱཏབྦོ ཝིནིཙྪཡོ.

༦༥༠. ཡཾ ཡསྶ པཙྩཡོ ཙེཝཱཏི ཡཉྩེཏྠ ཨུཔཱདཱནཾ ཡསྶ པཙྩཡོ ཧོཏི, ཏཏོཔི ཝིཉྙཱཏབྦོ ཝིནིཙྪཡོཏི ཨཏྠོ. ཀིཾ པནེཏྠ ཀསྶ པཙྩཡོ ཧོཏི? ཡཾཀིཉྩི ཡསྶ ཀསྶཙི པཙྩཡོ ཧོཏིཡེཝ. ཨུམྨཏྟཀོ ཝིཡ ཧི པུཐུཛྫནོ. སོ ཨིདཾ ཡུཏྟཾ ཨིདཾ ཨཡུཏྟནྟི ཨཝིཙཱརེཏྭཱ ཡསྶ ཀསྶཙི ཨུཔཱདཱནསྶ ཝསེན ཡཾཀིཉྩི བྷཝཾ པཏྠེཏྭཱ ཡཾཀིཉྩི ཀམྨཾ ཀརོཏིཡེཝ. ཏསྨཱ ཡདེཀཙྩེ སཱིལབྦཏུཔཱདཱནེན རཱུཔཱརཱུཔབྷཝཱ ན ཧོནྟཱིཏི ཝདནྟི, ཏཾ ན གཧེཏབྦཾ. སབྦེན པན སབྦོ ཧོཏཱིཏི གཧེཏབྦཾ.

སེཡྻཐིདཾ – ཨིདྷེཀཙྩོ ཨནུསྶཝཝསེན ཝཱ དིཊྛཱནུསཱརེན ཝཱ ‘‘ཀཱམཱ ནཱམེཏེ མནུསྶལོཀེ ཙེཝ ཁཏྟིཡམཧཱསཱལཀུལཱདཱིསུ, ཚ ཀཱམཱཝཙརདེཝལོཀེ ཙ སམིདྡྷཱ’’ཏི ཙིནྟེཏྭཱ ཏེསཾ ཨདྷིགམཏྠཾ ཨསདྡྷམྨསྶཝནཱདཱིཧི ཝཉྩིཏོ ‘‘ཨིམིནཱ ཀམྨེན ཀཱམཱ སམྤཛྫནྟཱི’’ཏི མཉྙམཱནོ ཀཱམུཔཱདཱནཝསེན ཀཱཡདུཙྩརིཏཱདཱིནིཔི ཀརོཏི, སོ དུཙྩརིཏཔཱརིཔཱུརིཡཱ ཨཔཱཡེ ཨུཔཔཛྫཏི. སནྡིཊྛིཀེ ཝཱ པན ཀཱམེ པཏྠཡམཱནོ པཊིལདྡྷེ ཙ གོཔཡམཱནོ ཀཱམུཔཱདཱནཝསེན ཀཱཡདུཙྩརིཏཱདཱིནི ཀརོཏི, སོ དུཙྩརིཏཔཱརིཔཱུརིཡཱ ཨཔཱཡེ ཨུཔཔཛྫཏི. ཏཏྲཱསྶ ཨུཔཔཏྟིཧེཏུབྷཱུཏཾ ཀམྨཾ ཀམྨབྷཝོ. ཀམྨཱབྷིནིབྦཏྟཱ ཁནྡྷཱ ཨུཔཔཏྟིབྷཝོ. སཉྙཱབྷཝཔཉྩཝོཀཱརབྷཝཱ པན ཏདནྟོགདྷཱ ཨེཝ.

ཨཔརོ ¶ པན སདྡྷམྨསྶཝནཱདཱིཧི ཨུཔབྲཱུཧིཏཉཱཎོ ‘‘ཨིམིནཱ ཀམྨེན ཀཱམཱ སམྤཛྫནྟཱི’’ཏི མཉྙམཱནོ ཀཱམུཔཱདཱནཝསེན ཀཱཡསུཙརིཏཱདཱིནི ཀརོཏི. སོ སུཙརིཏཔཱརིཔཱུརིཡཱ ¶ དེཝེསུ ཝཱ མནུསྶེསུ ཝཱ ཨུཔཔཛྫཏི. ཏཏྲཱསྶ ཨུཔཔཏྟིཧེཏུབྷཱུཏཾ ཀམྨཾ ཀམྨབྷཝོ. ཀམྨཱབྷིནིབྦཏྟཱ ཁནྡྷཱ ཨུཔཔཏྟིབྷཝོ. སཉྙཱབྷཝཔཉྩཝོཀཱརབྷཝཱ པན ཏདནྟོགདྷཱ ཨེཝ. ཨིཏི ཀཱམུཔཱདཱནཾ སཔྤབྷེདསྶ སཱནྟོགདྷསྶ ཀཱམབྷཝསྶ པཙྩཡོ ཧོཏི.

ཨཔརོ ‘‘རཱུཔཱརཱུཔབྷཝེསུ ཏཏོ སམིདྡྷཏརཱ ཀཱམཱ’’ཏི སུཏྭཱ པརིཀཔྤེཏྭཱ ཝཱ ཀཱམུཔཱདཱནཝསེནེཝ རཱུཔཱརཱུཔསམཱཔཏྟིཡོ ནིབྦཏྟེཏྭཱ སམཱཔཏྟིབལེན རཱུཔཱརཱུཔབྲཧྨལོཀེ ཨུཔཔཛྫཏི. ཏཏྲཱསྶ ཨུཔཔཏྟིཧེཏུབྷཱུཏཾ ཀམྨཾ ཀམྨབྷཝོ. ཀམྨཱབྷིནིབྦཏྟཱ ཁནྡྷཱ ཨུཔཔཏྟིབྷཝོ. སཉྙཱ-ཨསཉྙཱ-ནེཝསཉྙཱནཱསཉྙཱ-ཨེཀ-ཙཏུ-པཉྩཝོཀཱརབྷཝཱ པན ཏདནྟོགདྷཱ ཨེཝ. ཨིཏི ཀཱམུཔཱདཱནཾ སཔྤབྷེདཱནཾ སཱནྟོགདྷཱནཾ རཱུཔཱརཱུཔབྷཝཱནམྤི པཙྩཡོ ཧོཏི.

ཨཔརོ ‘‘ཨཡཾ ཨཏྟཱ ནཱམ ཀཱམཱཝཙརསམྤཏྟིབྷཝེ ཝཱ རཱུཔཱརཱུཔབྷཝཱནཾ ཝཱ ཨཉྙཏརསྨིཾ ཨུཙྪིནྣེ སུཨུཙྪིནྣོ ཧོཏཱི’’ཏི ཨུཙྪེདདིཊྛིཾ ཨུཔཱདཱཡ ཏདུཔགཾ ཀམྨཾ ཀརོཏི, ཏསྶ ཏཾ ཀམྨཾ ཀམྨབྷཝོ. ཀམྨཱབྷིནིབྦཏྟཱ ཁནྡྷཱ ཨུཔཔཏྟིབྷཝོ. སཉྙཱབྷཝཱདཡོ པན ཏདནྟོགདྷཱ ཨེཝ. ཨིཏི དིཊྛུཔཱདཱནཾ སཔྤབྷེདཱནཾ སཱནྟོགདྷཱནཾ ཏིཎྞམྤི ཀཱམརཱུཔཱརཱུཔབྷཝཱནཾ པཙྩཡོ ཧོཏི.

ཨཔརོ ‘‘ཨཡཾ ཨཏྟཱ ནཱམ ཀཱམཱཝཙརསམྤཏྟིབྷཝེ ཝཱ རཱུཔཱརཱུཔབྷཝཱནཾ ཝཱ ཨཉྙཏརསྨིཾ སུཁཱི ཧོཏི ཝིགཏཔརིལཱ༹ཧོ’’ཏི ཨཏྟཝཱདུཔཱདཱནེན ཏདུཔགཾ ཀམྨཾ ཀརོཏི, ཏསྶ ཏཾ ཀམྨཾ ཀམྨབྷཝོ. ཏདབྷིནིབྦཏྟཱ ཁནྡྷཱ ཨུཔཔཏྟིབྷཝོ. སཉྙཱབྷཝཱདཡོ པན ཏདནྟོགདྷཱ ཨེཝ. ཨིཏི ཨཏྟཝཱདུཔཱདཱནཾ སཔྤབྷེདཱནཾ སཱནྟོགདྷཱནཾ ཏིཎྞཾ བྷཝཱནཾ པཙྩཡོ ཧོཏི.

ཨཔརོ ‘‘ཨིདཾ སཱིལབྦཏཾ ནཱམ ཀཱམཱཝཙརསམྤཏྟིབྷཝེ ཝཱ རཱུཔཱརཱུཔབྷཝཱནཾ ཝཱ ཨཉྙཏརསྨིཾ པརིཔཱུརེནྟསྶ སུཁཾ པཱརིཔཱུརིཾ གཙྪཏཱི’’ཏི སཱིལབྦཏུཔཱདཱནཝསེན ཏདུཔགཾ ཀམྨཾ ཀརོཏི, ཏསྶ ཏཾ ཀམྨཾ ཀམྨབྷཝོ. ཏདབྷིནིབྦཏྟཱ ཁནྡྷཱ ཨུཔཔཏྟིབྷཝོ. སཉྙཱབྷཝཱདཡོ པན ཏདནྟོགདྷཱ ཨེཝ. ཨིཏི སཱིལབྦཏུཔཱདཱནཾ སཔྤབྷེདཱནཾ སཱནྟོགདྷཱནཾ ཏིཎྞཾ བྷཝཱནཾ པཙྩཡོ ཧོཏི. ཨེཝམེཏྠ ཡཾ ཡསྶ པཙྩཡོ ཧོཏི, ཏཏོཔི ཝིཉྙཱཏབྦོ ཝིནིཙྪཡོ.

ཀིཾ པནེཏྠ ¶ ཀསྶ བྷཝསྶ ཀཐཾ པཙྩཡོ ཧོཏཱིཏི ཙེ?

རཱུཔཱརཱུཔབྷཝཱནཾ ¶ , ཨུཔནིསྶཡཔཙྩཡོ ཨུཔཱདཱནཾ;

སཧཛཱཏཱདཱིཧིཔི ཏཾ, ཀཱམབྷཝསྶཱཏི ཝིཉྙེཡྻཾ.

རཱུཔཱརཱུཔབྷཝཱནཾ ཧི, ཀཱམབྷཝཔརིཡཱཔནྣསྶ ཙ ཀམྨབྷཝེ ཀུསལཀམྨསྶེཝ, ཨུཔཔཏྟིབྷཝསྶ ཙེཏཾ ཙཏུབྦིདྷམྤི ཨུཔཱདཱནཾ ཨུཔནིསྶཡཔཙྩཡཝསེན ཨེཀདྷཱཝ པཙྩཡོ ཧོཏི. ཀཱམབྷཝེ ཨཏྟནཱ སམྤཡུཏྟཱཀུསལཀམྨབྷཝསྶ སཧཛཱཏཨཉྙམཉྙནིསྶཡསམྤཡུཏྟཨཏྠིཨཝིགཏཧེཏུཔཙྩཡཔྤབྷེདེཧི སཧཛཱཏཱདཱིཧི པཙྩཡོ ཧོཏི. ཝིཔྤཡུཏྟསྶ པན ཨུཔནིསྶཡཔཙྩཡེནེཝཱཏི.

ཨཡཾ ‘‘ཨུཔཱདཱནཔཙྩཡཱ བྷཝོ’’ཏི པདསྨིཾ ཝིཏྠཱརཀཐཱ.

བྷཝཔཙྩཡཱཛཱཏིཨཱདིཝིཏྠཱརཀཐཱ

༦༥༡. བྷཝཔཙྩཡཱ ཛཱཏཱིཏིཨཱདཱིསུ ཛཱཏིཨཱདཱིནཾ ཝིནིཙྪཡོ སཙྩནིདྡེསེ ཝུཏྟནཡེནེཝ ཝེདིཏབྦོ. བྷཝོཏི པནེཏྠ ཀམྨབྷཝོཝ ཨདྷིཔྤེཏོ. སོ ཧི ཛཱཏིཡཱ པཙྩཡོ, ན ཨུཔཔཏྟིབྷཝོ. སོ ཙ པན ཀམྨཔཙྩཡཨུཔནིསྶཡཔཙྩཡཝསེན དྭེདྷཱ པཙྩཡོ ཧོཏཱིཏི.

ཏཏྠ སིཡཱ – ཀཐཾ པནེཏཾ ཛཱནིཏབྦཾ བྷཝོ ཛཱཏིཡཱ པཙྩཡོཏི ཙེ? བཱཧིརཔཙྩཡསམཏྟེཔི ཧཱིནཔཎཱིཏཏཱདིཝིསེསདསྶནཏོ. བཱཧིརཱནཾ ཧི ཛནཀཛནནཱིསུཀྐསོཎིཏཱཧཱརཱདཱིནཾ པཙྩཡཱནཾ སམཏྟེཔི སཏྟཱནཾ ཡམཀཱནམྤི སཏཾ ཧཱིནཔཎཱིཏཏཱདིཝིསེསོ དིསྶཏི. སོ ཙ ན ཨཧེཏུཀོ སབྦདཱ ཙ སབྦེསཉྩ ཨབྷཱཝཏོ, ན ཀམྨབྷཝཏོ ཨཉྙཧེཏུཀོ ཏདབྷིནིབྦཏྟཀསཏྟཱནཾ ཨཛ྄ཛྷཏྟསནྟཱནེ ཨཉྙསྶ ཀཱརཎསྶ ཨབྷཱཝཏོཏི ཀམྨབྷཝཧེཏུཀོཝ. ཀམྨཾ ཧི སཏྟཱནཾ ཧཱིནཔཎཱིཏཏཱདིཝིསེསསྶ ཧེཏུ. ཏེནཱཧ བྷགཝཱ ‘‘ཀམྨཾ སཏྟེ ཝིབྷཛཏི ཡདིདཾ ཧཱིནཔྤཎཱིཏཏཱཡཱ’’ཏི (མ. ནི. ༣.༢༨༩). ཏསྨཱ ཛཱནིཏབྦམེཏཾ ‘‘བྷཝོ ཛཱཏིཡཱ པཙྩཡོ’’ཏི.

ཡསྨཱ ཙ ཨསཏི ཛཱཏིཡཱ ཛརཱམརཎཾ ནཱམ, སོཀཱདཡོ ཝཱ དྷམྨཱ ན ཧོནྟི. ཛཱཏིཡཱ པན སཏི ཛརཱམརཎཉྩེཝ, ཛརཱམརཎསངྑཱཏདུཀྑདྷམྨཕུཊྛསྶ ཙ བཱལཛནསྶ ཛརཱམརཎཱབྷིསམྦནྡྷཱ ¶ ཝཱ ཏེན ཏེན དུཀྑདྷམྨེན ཕུཊྛསྶ ¶ ཨནབྷིསམྦནྡྷཱ ཝཱ སོཀཱདཡོ ཙ དྷམྨཱ ཧོནྟི. ཏསྨཱ ཨཡམྤི ཛཱཏི ཛརཱམརཎསྶ ཙེཝ སོཀཱདཱིནཉྩ པཙྩཡོ ཧོཏཱིཏི ཝེདིཏབྦཱ. སཱ པན ཨུཔནིསྶཡཀོཊིཡཱ ཨེཀདྷཱཝ པཙྩཡོ ཧོཏཱིཏི.

ཨཡཾ ‘‘བྷཝཔཙྩཡཱ ཛཱཏཱི’’ཏིཨཱདཱིསུ ཝིཏྠཱརཀཐཱ.

བྷཝཙཀྐཀཐཱ

༦༥༢. ཡསྨཱ པནེཏྠ སོཀཱདཡོ ཨཝསཱནེ ཝུཏྟཱ, ཏསྨཱ ཡཱ སཱ ཨཝིཛྫཱཔཙྩཡཱ སངྑཱརཱཏི ཨེཝམེཏསྶ བྷཝཙཀྐསྶ ཨཱདིམྷི ཝུཏྟཱ, སཱ,

སོཀཱདཱིཧི ཨཝིཛྫཱ, སིདྡྷཱ བྷཝཙཀྐམཝིདིཏཱདིམིདཾ;

ཀཱརཀཝེདཀརཧིཏཾ, དྭཱདསཝིདྷསུཉྙཏཱསུཉྙཾ.

སཏཏཾ སམིཏཾ པཝཏྟཏཱིཏི ཝེདིཏབྦཾ.

ཀཐཾ པནེཏྠ སོཀཱདཱིཧི ཨཝིཛྫཱ སིདྡྷཱ, ཀཐམིདཾ བྷཝཙཀྐཾ ཨཝིདིཏཱདི, ཀཐཾ ཀཱརཀཝེདཀརཧིཏཾ, ཀཐཾ དྭཱདསཝིདྷསུཉྙཏཱསུཉྙནྟི ཙེ? ཨེཏྠ ཧི སོཀདོམནསྶུཔཱཡཱསཱ ཨཝིཛྫཱཡ ཨཝིཡོགིནོ, པརིདེཝོ ཙ ནཱམ མཱུལ༹ྷསྶཱཏི ཏེསུ ཏཱཝ སིདྡྷེསུ སིདྡྷཱ ཧོཏི ཨཝིཛྫཱ. ཨཔིཙ ‘‘ཨཱསཝསམུདཡཱ ཨཝིཛྫཱསམུདཡོ’’ཏི (མ. ནི. ༡.༡༠༣) ཝུཏྟཾ. ཨཱསཝསམུདཡཱ ཙེཏེ སོཀཱདཡོ ཧོནྟི.

ཀཐཾ? ཝཏྠུཀཱམཝིཡོགེ ཏཱཝ སོཀོ ཀཱམཱསཝསམུདཡཱ ཧོཏི. ཡཐཱཧ –

‘‘ཏསྶ ཙེ ཀཱམཡཱནསྶ, ཚནྡཛཱཏསྶ ཛནྟུནོ;

ཏེ ཀཱམཱ པརིཧཱཡནྟི, སལླཝིདྡྷོཝ རུཔྤཏཱི’’ཏི. (སུ. ནི. ༧༧༣);

ཡཐཱ ཙཱཧ – ‘‘ཀཱམཏོ ཛཱཡཏི སོཀོ’’ཏི. (དྷ. པ. ༢༡༥).

སབྦེཔི ¶ ཙེཏེ དིཊྛཱསཝསམུདཡཱ ཧོནྟི. ཡཐཱཧ –

‘‘ཏསྶ ‘ཨཧཾ རཱུཔཾ མམ རཱུཔ’ནྟི པརིཡུཊྛཊྛཱཡིནོ རཱུཔཝིཔརིཎཱམཉྙཐཱབྷཱཝཱ ཨུཔྤཛྫནྟི སོཀཔརིདེཝདུཀྑདོམནསྶུཔཱཡཱསཱ’’ཏི (སཾ. ནི. ༣.༡).

ཡཐཱ ཙ དིཊྛཱསཝསམུདཡཱ, ཨེཝཾ བྷཝཱསཝསམུདཡཱཔི. ཡཐཱཧ –

‘‘ཡེཔི ¶ ཏེ དེཝཱ དཱིགྷཱཡུཀཱ ཝཎྞཝནྟོ སུཁབཧུལཱ ཨུཙྩེསུ ཝིམཱནེསུ ཙིརཊྛིཏིཀཱ, ཏེཔི ཏཐཱགཏསྶ དྷམྨདེསནཾ སུཏྭཱ བྷཡཾ སནྟཱསཾ སཾཝེགམཱཔཛྫནྟཱི’’ཏི (སཾ. ནི. ༣.༧༨). པཉྩ པུབྦནིམིཏྟཱནི དིསྭཱ མརཎབྷཡེན སནྟཛྫིཏཱནཾ དེཝཱནཾ ཝིཡ.

ཡཐཱ ཙ བྷཝཱསཝསམུདཡཱ, ཨེཝཾ ཨཝིཛྫཱསཝསམུདཡཱཔི. ཡཐཱཧ –

‘‘ས ཁོ སོ, བྷིཀྑཝེ, བཱལོ ཏིཝིདྷཾ དིཊྛེཝ དྷམྨེ དུཀྑཾ དོམནསྶཾ པཊིསཾཝེདེཏཱི’’ཏི (མ. ནི. ༣.༢༤༦).

ཨིཏི ཡསྨཱ ཨཱསཝསམུདཡཱ ཨེཏེ དྷམྨཱ ཧོནྟི, ཏསྨཱ ཨེཏེ སིཛ྄ཛྷམཱནཱ ཨཝིཛྫཱཡ ཧེཏུབྷཱུཏེ ཨཱསཝེ སཱདྷེནྟི. ཨཱསཝེསུ ཙ སིདྡྷེསུ པཙྩཡབྷཱཝེ བྷཱཝཏོ ཨཝིཛྫཱཔི སིདྡྷཱཝ ཧོཏཱིཏི. ཨེཝཾ ཏཱཝེཏྠ སོཀཱདཱིཧི ཨཝིཛྫཱ སིདྡྷཱ ཧོཏཱིཏི ཝེདིཏབྦཱ.

ཡསྨཱ པན ཨེཝཾ པཙྩཡབྷཱཝེ བྷཱཝཏོ ཨཝིཛྫཱཡ སིདྡྷཱཡ པུན ཨཝིཛྫཱཔཙྩཡཱ སངྑཱརཱ, སངྑཱརཔཙྩཡཱ ཝིཉྙཱཎནྟི ཨེཝཾ ཧེཏུཕལཔརམྤརཱཡ པརིཡོསཱནཾ ནཏྠི. ཏསྨཱ ཏཾ ཧེཏུཕལསམྦནྡྷཝསེན པཝཏྟཾ དྭཱདསངྒཾ བྷཝཙཀྐཾ ཨཝིདིཏཱདཱིཏི སིདྡྷཾ ཧོཏི.

ཨེཝཾ སཏི ཨཝིཛྫཱཔཙྩཡཱ སངྑཱརཱཏི ཨིདཾ ཨཱདིམཏྟཀཐནཾ ཝིརུཛ྄ཛྷཏཱིཏི ཙེ. ནཡིདཾ ཨཱདིམཏྟཀཐནཾ. པདྷཱནདྷམྨཀཐནཾ པནེཏཾ. ཏིཎྞནྣཾ ཧི ཝཊྚཱནཾ ཨཝིཛྫཱ པདྷཱནཱ. ཨཝིཛྫཱགྒཧཎེན ཧི ཨཝསེསཀིལེསཝཊྚཉྩ ཀམྨཱདཱིནི ཙ བཱལཾ པལིབོདྷེནྟི. སཔྤསིརགྒཧཎེན སེསསཔྤསརཱིརཾ ཝིཡ བཱཧཾ. ཨཝིཛྫཱསམུཙྪེདེ པན ཀཏེ ཏེཧི ཝིམོཀྑོ ཧོཏི ¶ . སཔྤསིརཙྪེདེ ཀཏེ པལིབོདྷིཏབཱཧཱཝིམོཀྑོ ཝིཡ. ཡཐཱཧ – ‘‘ཨཝིཛྫཱཡཏྭེཝ ཨསེསཝིརཱགནིརོདྷཱ སངྑཱརནིརོདྷོ’’ཏིཨཱདི (སཾ. ནི. ༢.༡; མཧཱཝ. ༡). ཨིཏི ཡཾ གཎྷཏོ བནྡྷོ, མུཙྩཏོ ཙ མོཀྑོ ཧོཏི, ཏསྶ པདྷཱནདྷམྨསྶ ཀཐནམིདཾ, ན ཨཱདིམཏྟཀཐནནྟི. ཨེཝམིདཾ བྷཝཙཀྐཾ ཨཝིདིཏཱདཱིཏི ཝེདིཏབྦཾ.

ཏཡིདཾ ¶ ཡསྨཱ ཨཝིཛྫཱདཱིཧི ཀཱརཎེཧི སངྑཱརཱདཱིནཾ པཝཏྟི, ཏསྨཱ ཏཏོ ཨཉྙེན ‘‘བྲཧྨཱ མཧཱབྲཧྨཱ སེཊྛོ སཛིཏཱ’’ཏི (དཱི. ནི. ༡.༤༢) ཨེཝཾ པརིཀཔྤིཏེན བྲཧྨཱདིནཱ ཝཱ སཾསཱརསྶ ཀཱརཀེན, ‘‘སོ ཁོ པན མེ ཨཡཾ ཨཏྟཱ ཝདོ ཝེདེཡྻོ’’ཏི ཨེཝཾ པརིཀཔྤིཏེན ཨཏྟནཱ ཝཱ སུཁདུཀྑཱནཾ ཝེདཀེན རཧིཏཾ. ཨིཏི ཀཱརཀཝེདཀརཧིཏནྟི ཝེདིཏབྦཾ.

ཡསྨཱ པནེཏྠ ཨཝིཛྫཱ ཨུདཡབྦཡདྷམྨཀཏྟཱ དྷུཝབྷཱཝེན, སཾཀིལིཊྛཏྟཱ སཾཀིལེསིཀཏྟཱ ཙ སུབྷབྷཱཝེན, ཨུདཡབྦཡཔཊིཔཱིལི༹ཏཏྟཱ སུཁབྷཱཝེན, པཙྩཡཱཡཏྟཝུཏྟིཏྟཱ ཝསཝཏྟནབྷཱུཏེན ཨཏྟབྷཱཝེན ཙ སུཉྙཱ. ཏཐཱ སངྑཱརཱདཱིནིཔི ཨངྒཱནི. ཡསྨཱ ཝཱ ཨཝིཛྫཱ ན ཨཏྟཱ, ན ཨཏྟནོ, ན ཨཏྟནི, ན ཨཏྟཝཏཱི. ཏཐཱ སངྑཱརཱདཱིནིཔི ཨངྒཱནི. ཏསྨཱ དྭཱདསཝིདྷསུཉྙཏཱསུཉྙམེཏཾ བྷཝཙཀྐནྟི ཝེདིཏབྦཾ.

༦༥༣. ཨེཝཉྩ ཝིདིཏྭཱ པུན,

ཏསྶཱཝིཛྫཱཏཎྷཱ, མཱུལམཏཱིཏཱདཡོ ཏཡོ ཀཱལཱ;

དྭེ ཨཊྛ དྭེ ཨེཝ ཙ, སརཱུཔཏོ ཏེསུ ཨངྒཱནི.

ཏསྶ ཁོ པནེཏསྶ བྷཝཙཀྐསྶ ཨཝིཛྫཱ ཏཎྷཱ ཙཱཏི དྭེ དྷམྨཱ མཱུལནྟི ཝེདིཏབྦཱ. ཏདེཏཾ པུབྦནྟཱཧརཎཏོ ཨཝིཛྫཱམཱུལཾ ཝེདནཱཝསཱནཾ, ཨཔརནྟསནྟཱནཏོ ཏཎྷཱམཱུལཾ ཛརཱམརཎཱཝསཱནནྟི དུཝིདྷཾ ཧོཏི. ཏཏྠ པུརིམཾ དིཊྛིཙརིཏཝསེན ཝུཏྟཾ, པཙྪིམཾ ཏཎྷཱཙརིཏཝསེན. དིཊྛིཙརིཏཱནཾ ཧི ཨཝིཛྫཱ, ཏཎྷཱཙརིཏཱནཉྩ ཏཎྷཱ སཾསཱརནཱཡིཀཱ. ཨུཙྪེདདིཊྛིསམུགྒྷཱཏཱཡ ཝཱ པཋམཾ, ཕལུཔྤཏྟིཡཱ ཧེཏཱུནཾ ཨནུཔཙྪེདཔྤཀཱསནཏོ, སསྶཏདིཊྛིསམུགྒྷཱཏཱཡ དུཏིཡཾ, ཨུཔྤནྣཱནཾ ཛརཱམརཎཔྤཀཱསནཏོ. གབྦྷསེཡྻཀཝསེན ཝཱ པུརིམཾ, ཨནུཔུབྦཔཝཏྟིདཱིཔནཏོ, ཨོཔཔཱཏིཀཝསེན པཙྪིམཾ, སཧུཔྤཏྟིདཱིཔནཏོ.

ཨཏཱིཏཔཙྩུཔྤནྣཱནཱགཏཱ ¶ ཙསྶ ཏཡོ ཀཱལཱ. ཏེསུ པཱལི༹ཡཾ སརཱུཔཏོ ཨཱགཏཝསེན ‘‘ཨཝིཛྫཱ, སངྑཱརཱ ཙཱ’’ཏི དྭེ ཨངྒཱནི ཨཏཱིཏཀཱལཱནི. ཝིཉྙཱཎཱདཱིནི བྷཝཱཝསཱནཱནི ཨཊྛ པཙྩུཔྤནྣཀཱལཱནི. ཛཱཏི ཙེཝ ཛརཱམརཎཉྩ དྭེ ཨནཱགཏཀཱལཱནཱིཏི ཝེདིཏབྦཱནི.

༦༥༤. པུན ¶ ,

‘‘ཧེཏུཕལཧེཏུཔུབྦཀ-ཏིསནྡྷིཙཏུབྷེདསངྒཧཉྩེཏཾ;

ཝཱིསཏི ཨཱཀཱརཱརཾ, ཏིཝཊྚམནཝཊྛིཏཾ བྷམཏི’’.

ཨིཏིཔི ཝེདིཏབྦཾ.

ཏཏྠ སངྑཱརཱནཉྩ པཊིསནྡྷིཝིཉྙཱཎསྶ ཙ ཨནྟརཱ ཨེཀོ ཧེཏུཕལསནྡྷི ནཱམ. ཝེདནཱཡ ཙ ཏཎྷཱཡ ཙ ཨནྟརཱ ཨེཀོ ཕལཧེཏུསནྡྷི ནཱམ. བྷཝསྶ ཙ ཛཱཏིཡཱ ཙ ཨནྟརཱ ཨེཀོ ཧེཏུཕལསནྡྷཱིཏི ཨེཝམིདཾ ཧེཏུཕལཧེཏུཔུབྦཀཏིསནྡྷཱིཏི ཝེདིཏབྦཾ.

སནྡྷཱིནཾ ཨཱདིཔརིཡོསཱནཝཝཏྠིཏཱ པནསྶ ཙཏྟཱརོ སངྒཧཱ ཧོནྟི. སེཡྻཐིདཾ – ཨཝིཛྫཱསངྑཱརཱ ཨེཀོ སངྒཧོ. ཝིཉྙཱཎནཱམརཱུཔསལཱ༹ཡཏནཕསྶཝེདནཱ དུཏིཡོ. ཏཎྷུཔཱདཱནབྷཝཱ ཏཏིཡོ. ཛཱཏིཛརཱམརཎཾ ཙཏུཏྠོཏི. ཨེཝམིདཾ ཙཏུབྷེདསངྒཧནྟི ཝེདིཏབྦཾ.

ཨཏཱིཏེ ཧེཏཝོ པཉྩ, ཨིདཱནི ཕལཔཉྩཀཾ;

ཨིདཱནི ཧེཏཝོ པཉྩ, ཨཱཡཏིཾ ཕལཔཉྩཀནྟི.

ཨེཏེཧི པན ཝཱིསཏིཡཱ ཨཱཀཱརསངྑཱཏེཧི ཨརེཧི ཝཱིསཏིཨཱཀཱརཱརནྟི ཝེདིཏབྦཾ. ཏཏྠ ཨཏཱིཏེ ཧེཏཝོ པཉྩཱཏི ཨཝིཛྫཱ སངྑཱརཱ ཙཱཏི ཨིམེ ཏཱཝ དྭེ ཝུཏྟཱ ཨེཝ. ཡསྨཱ པན ཨཝིདྭཱ པརིཏསྶཏི, པརིཏསྶིཏོ ཨུཔཱདིཡཏི, ཏསྶུཔཱདཱནཔཙྩཡཱ བྷཝོ. ཏསྨཱ ཏཎྷུཔཱདཱནབྷཝཱཔི གཧིཏཱ ཧོནྟི. ཏེནཱཧ ‘‘པུརིམཀམྨབྷཝསྨིཾ མོཧོ ཨཝིཛྫཱ, ཨཱཡཱུཧནཱ སངྑཱརཱ, ནིཀནྟི ཏཎྷཱ, ཨུཔགམནཾ ཨུཔཱདཱནཾ, ཙེཏནཱ བྷཝོཏི ཨིམེ པཉྩ དྷམྨཱ པུརིམཀམྨབྷཝསྨིཾ ཨིདྷ པཊིསནྡྷིཡཱ པཙྩཡཱ’’ཏི (པཊི. མ. ༡.༤༧).

ཏཏྠ ¶ པུརིམཀམྨབྷཝསྨིནྟི པུརིམེ ཀམྨབྷཝེ, ཨཏཱིཏཛཱཏིཡཾ ཀམྨབྷཝེ ཀརིཡམཱནེཏི ཨཏྠོ. མོཧོ ཨཝིཛྫཱཏི ཡོ ཏདཱ དུཀྑཱདཱིསུ མོཧོ, ཡེན མཱུལ༹ྷོ ཀམྨཾ ཀརོཏི, སཱ ཨཝིཛྫཱ. ཨཱཡཱུཧནཱ སངྑཱརཱཏི ཏཾ ཀམྨཾ ཀརོཏོ ཡཱ པུརིམཙེཏནཱཡོ, ཡཐཱ ‘‘དཱནཾ དསྶཱམཱི’’ཏི ཙིཏྟཾ ཨུཔྤཱདེཏྭཱ མཱསམྤི སཾཝཙྪརམྤི དཱནུཔཀརཎཱནི སཛྫེནྟསྶ ཨུཔྤནྣཱ པུརིམཙེཏནཱཡོ. པཊིགྒཱཧཀཱནཾ པན ཧཏྠེ དཀྑིཎཾ པཏིཊྛཱཔཡཏོ ཙེཏནཱ བྷཝོཏི ཝུཙྩཏི. ཨེཀཱཝཛྫནེསུ ཝཱ ཚསུ ཛཝནེསུ ཙེཏནཱ ཨཱཡཱུཧནཱ སངྑཱརཱ ནཱམ ¶ . སཏྟམེ བྷཝོ. ཡཱ ཀཱཙི ཝཱ པན ཙེཏནཱ བྷཝོ. སམྤཡུཏྟཱ ཨཱཡཱུཧནཱ སངྑཱརཱ ནཱམ. ནིཀནྟི ཏཎྷཱཏི ཡཱ ཀམྨཾ ཀརོནྟསྶ ཕལེ ཨུཔཔཏྟིབྷཝེ ནིཀཱམནཱ པཏྠནཱ, སཱ ཏཎྷཱ ནཱམ. ཨུཔགམནཾ ཨུཔཱདཱནནྟི ཡཾ ཀམྨབྷཝསྶ པཙྩཡབྷཱུཏཾ ‘‘ཨིདཾ ཀཏྭཱ ཨསུཀསྨིཾ ནཱམ ཋཱནེ ཀཱམེ སེཝིསྶཱམི ཨུཙྪིཛྫིསྶཱམཱི’’ཏིཨཱདིནཱ ནཡེན པཝཏྟཾ ཨུཔགམནཾ གཧཎཾ པརཱམསནཾ, ཨིདཾ ཨུཔཱདཱནཾ ནཱམ. ཙེཏནཱ བྷཝོཏི ཨཱཡཱུཧནཱཝསཱནེ ཝུཏྟཱ ཙེཏནཱ བྷཝོཏི ཨེཝམཏྠོ ཝེདིཏབྦོ.

ཨིདཱནི ཕལཔཉྩཀནྟི ཝིཉྙཱཎཱདིཝེདནཱཝསཱནཾ པཱལི༹ཡཾ ཨཱགཏམེཝ. ཡཐཱཧ – ‘‘ཨིདྷ པཊིསནྡྷི ཝིཉྙཱཎཾ, ཨོཀྐནྟི ནཱམརཱུཔཾ, པསཱདོ ཨཱཡཏནཾ, ཕུཊྛོ ཕསྶོ, ཝེདཡིཏཾ ཝེདནཱ, ཨིམེ པཉྩ དྷམྨཱ ཨིདྷཱུཔཔཏྟིབྷཝསྨིཾ པུརེཀཏསྶ ཀམྨསྶ པཙྩཡཱ’’ཏི (པཊི. ༡.༤༧). ཏཏྠ པཊིསནྡྷི ཝིཉྙཱཎནྟི ཡཾ བྷཝནྟརཔཊིསནྡྷཱནཝསེན ཨུཔྤནྣཏྟཱ པཊིསནྡྷཱིཏི ཝུཙྩཏི, ཏཾ ཝིཉྙཱཎཾ. ཨོཀྐནྟི ནཱམརཱུཔནྟི ཡཱ གབྦྷེ རཱུཔཱརཱུཔདྷམྨཱནཾ ཨོཀྐནྟི ཨཱགནྟྭཱ པཝིསནཾ ཝིཡ, ཨིདཾ ནཱམརཱུཔཾ. པསཱདོ ཨཱཡཏནནྟི ཨིདཾ ཙཀྑཱདིཔཉྩཱཡཏནཝསེན ཝུཏྟཾ. ཕུཊྛོ ཕསྶོཏི ཡོ ཨཱརམྨཎཾ ཕུཊྛོ ཕུསནྟོ ཨུཔྤནྣོ, ཨཡཾ ཕསྶོ. ཝེདཡིཏཾ ཝེདནཱཏི ཡཾ པཊིསནྡྷིཝིཉྙཱཎེན ཝཱ སལཱ༹ཡཏནཔཙྩཡེན ཝཱ ཕསྶེན སཧ ཨུཔྤནྣཾ ཝིཔཱཀཝེདཡིཏཾ, སཱ ཝེདནཱཏི ཨེཝམཏྠོ ཝེདིཏབྦོ.

ཨིདཱནི ཧེཏཝོ པཉྩཱཏི ཏཎྷཱདཡོ པཱལི༹ཡཾ ཨཱགཏཱ ཏཎྷུཔཱདཱནབྷཝཱ. བྷཝེ པན གཧིཏེ ཏསྶ པུབྦབྷཱགཱ ཏཾསམྤཡུཏྟཱ ཝཱ སངྑཱརཱ གཧིཏཱཝ ཧོནྟི. ཏཎྷུཔཱདཱནགྒཧཎེན ཙ ཏཾསམྤཡུཏྟཱ, ཡཱཡ ཝཱ མཱུལ༹ྷོ ཀམྨཾ ཀརོཏི, སཱ ཨཝིཛྫཱ གཧིཏཱཝ ཧོཏཱིཏི. ཨེཝཾ པཉྩ. ཏེནཱཧ ‘‘ཨིདྷ པརིཔཀྐཏྟཱ ཨཱཡཏནཱནཾ མོཧོ ཨཝིཛྫཱ, ཨཱཡཱུཧནཱ སངྑཱརཱ, ནིཀནྟི ཏཎྷཱ, ཨུཔགམནཾ ཨུཔཱདཱནཾ, ཙེཏནཱ བྷཝོཏི ཨིམེ པཉྩ དྷམྨཱ ཨིདྷ ཀམྨབྷཝསྨིཾ ཨཱཡཏིཾ པཊིསནྡྷིཡཱ པཙྩཡཱ’’ཏི ¶ (པཊི. མ. ༡.༤༧). ཏཏྠ ཨིདྷ པརིཔཀྐཏྟཱ ཨཱཡཏནཱནནྟི པརིཔཀྐཱཡཏནསྶ ཀམྨཀརཎཀཱལེ སམྨོཧོ དསྶིཏོ. སེསཾ ཨུཏྟཱནཏྠམེཝ.

ཨཱཡཏིཾ ཕལཔཉྩཀནྟི ཝིཉྙཱཎཱདཱིནི པཉྩ. ཏཱནི ཛཱཏིགྒཧཎེན ཝུཏྟཱནི. ཛརཱམརཎཾ པན ཏེསཾཡེཝ ཛརཱམརཎཾ. ཏེནཱཧ – ‘‘ཨཱཡཏིཾ པཊིསནྡྷི ཝིཉྙཱཎཾ ¶ , ཨོཀྐནྟི ནཱམརཱུཔཾ, པསཱདོ ཨཱཡཏནཾ, ཕུཊྛོ ཕསྶོ, ཝེདཡིཏཾ ཝེདནཱ, ཨིམེ པཉྩ དྷམྨཱ ཨཱཡཏིཾ ཨུཔཔཏྟིབྷཝསྨིཾ ཨིདྷ ཀཏསྶ ཀམྨསྶ པཙྩཡཱ’’ཏི (པཊི. མ. ༡.༤༧). ཨེཝམིདཾ ཝཱིསཏི ཨཱཀཱརཱརཾ ཧོཏི.

ཏིཝཊྚམནཝཊྛིཏཾ བྷམཏཱིཏི ཨེཏྠ པན སངྑཱརབྷཝཱ ཀམྨཝཊྚཾ, ཨཝིཛྫཱཏཎྷུཔཱདཱནཱནི ཀིལེསཝཊྚཾ, ཝིཉྙཱཎནཱམརཱུཔསལཱ༹ཡཏནཕསྶཝེདནཱ ཝིཔཱཀཝཊྚནྟི ཨིམེཧི ཏཱིཧི ཝཊྚེཧི ཏིཝཊྚམིདཾ བྷཝཙཀྐཾ ཡཱཝ ཀིལེསཝཊྚཾ ན ཨུཔཙྪིཛྫཏི, ཏཱཝ ཨནུཔཙྪིནྣཔཙྩཡཏྟཱ ཨནཝཊྛིཏཾ པུནཔྤུནཾ པརིཝཏྟནཏོ བྷམཏིཡེཝཱཏི ཝེདིཏབྦཾ.

༦༥༥. ཏཡིདམེཝཾ བྷམམཱནཾ,

སཙྩཔྤབྷཝཏོ ཀིཙྩཱ, ཝཱརཎཱ ཨུཔམཱཧི ཙ;

གམྦྷཱིརནཡབྷེདཱ ཙ, ཝིཉྙཱཏབྦཾ ཡཐཱརཧཾ.

ཏཏྠ ཡསྨཱ ཀུསལཱཀུསལཾ ཀམྨཾ ཨཝིསེསེན སམུདཡསཙྩནྟི སཙྩཝིབྷངྒེ ཝུཏྟཾ, ཏསྨཱ ཨཝིཛྫཱཔཙྩཡཱ སངྑཱརཱཏི ཨཝིཛྫཱཡ སངྑཱརཱ དུཏིཡསཙྩཔྤབྷཝཾ དུཏིཡསཙྩཾ. སངྑཱརེཧི ཝིཉྙཱཎཾ དུཏིཡསཙྩཔྤབྷཝཾ པཋམསཙྩཾ. ཝིཉྙཱཎཱདཱིཧི ¶ ནཱམརཱུཔཱདཱིནི ཝིཔཱཀཝེདནཱཔརིཡོསཱནཱནི པཋམསཙྩཔྤབྷཝཾ པཋམསཙྩཾ. ཝེདནཱཡ ཏཎྷཱ པཋམསཙྩཔྤབྷཝཾ དུཏིཡསཙྩཾ. ཏཎྷཱཡ ཨུཔཱདཱནཾ དུཏིཡསཙྩཔྤབྷཝཾ དུཏིཡསཙྩཾ. ཨུཔཱདཱནཏོ བྷཝོ དུཏིཡསཙྩཔྤབྷཝཾ པཋམདུཏིཡསཙྩདྭཡཾ. བྷཝཏོ ཛཱཏི དུཏིཡསཙྩཔྤབྷཝཾ པཋམསཙྩཾ. ཛཱཏིཡཱ ཛརཱམརཎཾ པཋམསཙྩཔྤབྷཝཾ པཋམསཙྩནྟི ཨེཝཾ ཏཱཝིདཾ སཙྩཔྤབྷཝཏོ ཝིཉྙཱཏབྦཾ ཡཐཱརཧཾ.

༦༥༦. ཡསྨཱ པནེཏྠ ཨཝིཛྫཱ ཝཏྠཱུསུ ཙ སཏྟེ སམྨོཧེཏི, པཙྩཡོ ཙ ཧོཏི སངྑཱརཱནཾ ¶ པཱཏུབྷཱཝཱཡ. ཏཐཱ སངྑཱརཱ སངྑཏཉྩ ཨབྷིསངྑརོནྟི, པཙྩཡཱ ཙ ཧོནྟི ཝིཉྙཱཎསྶ. ཝིཉྙཱཎམྤི ཝཏྠུཉྩ པཊིཝིཛཱནཱཏི, པཙྩཡོ ཙ ཧོཏི ནཱམརཱུཔསྶ. ནཱམརཱུཔམྤི ཨཉྙམཉྙཉྩ ཨུཔཏྠམྦྷེཏི, པཙྩཡོ ཙ ཧོཏི སལཱ༹ཡཏནསྶ. སལཱ༹ཡཏནམྤི སཝིསཡེ ཙ པཝཏྟཏི, པཙྩཡོ ཙ ཧོཏི ཕསྶསྶ. ཕསྶོཔི ཨཱརམྨཎཉྩ ཕུསཏི, པཙྩཡོ ཙ ཧོཏི ཝེདནཱཡ. ཝེདནཱཔི ཨཱརམྨཎརསཉྩ ཨནུབྷཝཏི, པཙྩཡོ ཙ ཧོཏི ཏཎྷཱཡ. ཏཎྷཱཔི རཛྫནཱིཡེ ཙ དྷམྨེ རཛྫཏི, པཙྩཡོ ཙ ཧོཏི ཨུཔཱདཱནསྶ. ཨུཔཱདཱནམྤི ཨུཔཱདཱནིཡེ ཙ དྷམྨེ ཨུཔཱདིཡཏི, པཙྩཡོ ཙ ཧོཏི བྷཝསྶ. བྷཝོཔི ནཱནཱགཏཱིསུ ཙ ཝིཀྑིཔཏི, པཙྩཡོ ཙ ཧོཏི ཛཱཏིཡཱ. ཛཱཏིཔི ཁནྡྷེ ཙ ཛནེཏི ཏེསཾ ཨབྷིནིབྦཏྟིབྷཱཝེན པཝཏྟཏྟཱ, པཙྩཡོ ཙ ཧོཏི ཛརཱམརཎསྶ. ཛརཱམརཎམྤི ཁནྡྷཱནཾ པཱཀབྷེདབྷཱཝཉྩ ཨདྷིཏིཊྛཏི, པཙྩཡོ ཙ ཧོཏི བྷཝནྟརཔཱཏུབྷཱཝཱཡ སོཀཱདཱིནཾ ཨདྷིཊྛཱནཏྟཱ. ཏསྨཱ སབྦཔདེསུ དྭེདྷཱ པཝཏྟིཀིཙྩཏོཔི ཨིདཾ ཝིཉྙཱཏབྦཾ ཡཐཱརཧཾ.

༦༥༧. ཡསྨཱ ཙེཏྠ ཨཝིཛྫཱཔཙྩཡཱ སངྑཱརཱཏི ཨིདཾ ཀཱརཀདསྶནནིཝཱརཎཾ. སངྑཱརཔཙྩཡཱ ཝིཉྙཱཎནྟི ཨཏྟསངྐནྟིདསྶནནིཝཱརཎཾ. ཝིཉྙཱཎཔཙྩཡཱ ནཱམརཱུཔནྟི ‘‘ཨཏྟཱ’’ཏིཔརིཀཔྤིཏཝཏྠུབྷེདདསྶནཏོ གྷནསཉྙཱནིཝཱརཎཾ. ནཱམརཱུཔཔཙྩཡཱ སལཱ༹ཡཏནནྟིཨཱདི ཨཏྟཱ པསྶཏི…པེ… ཝིཛཱནཱཏི, ཕུསཏི, ཝེདཡཏི, ཏཎྷིཡཏི, ཨུཔཱདིཡཏི, བྷཝཏི, ཛཱཡཏི, ཛཱིཡཏི, མཱིཡཏཱིཏིཨེཝམཱདིདསྶནནིཝཱརཎཾ. ཏསྨཱ མིཙྪཱདསྶནནིཝཱརཎཏོཔེཏཾ བྷཝཙཀྐཾ ཝིཉྙཱཏབྦཾ ཡཐཱརཧཾ.

༦༥༨. ཡསྨཱ ¶ པནེཏྠ སལཀྑཎསཱམཉྙལཀྑཎཝསེན དྷམྨཱནཾ ཨདསྶནཏོ ཨནྡྷོ ཝིཡ ཨཝིཛྫཱ. ཨནྡྷསྶ ཨུཔཀྑལནཾ ཝིཡ ཨཝིཛྫཱཔཙྩཡཱ སངྑཱརཱ. ཨུཔཀྑལིཏསྶ པཏནཾ ཝིཡ སངྑཱརཔཙྩཡཱ ཝིཉྙཱཎཾ. པཏིཏསྶ གཎྜཔཱཏུབྷཱཝོ ཝིཡ ཝིཉྙཱཎཔཙྩཡཱ ནཱམརཱུཔཾ. གཎྜབྷེདཔཱིལ༹ཀཱ ཝིཡ ནཱམརཱུཔཔཙྩཡཱ སལཱ༹ཡཏནཾ. གཎྜཔཱིལ༹ཀཱགྷཊྚནཾ ཝིཡ སལཱ༹ཡཏནཔཙྩཡཱ ཕསྶོ. གྷཊྚནདུཀྑཾ ཝིཡ ཕསྶཔཙྩཡཱ ཝེདནཱ, དུཀྑསྶ པཊིཀཱརཱབྷིལཱསོ ཝིཡ ཝེདནཱཔཙྩཡཱ ཏཎྷཱ. པཊིཀཱརཱབྷིལཱསེན ཨསཔྤཱཡགྒཧཎཾ ཝིཡ ཏཎྷཱཔཙྩཡཱ ཨུཔཱདཱནཾ. ཨུཔཱདིཎྞཨསཔྤཱཡཱལེཔནཾ ཝིཡ ཨུཔཱདཱནཔཙྩཡཱ བྷཝོ. ཨསཔྤཱཡཱལེཔནེན གཎྜཝིཀཱརཔཱཏུབྷཱཝོ ཝིཡ བྷཝཔཙྩཡཱ ཛཱཏི. གཎྜཝིཀཱརཏོ གཎྜབྷེདོ ཝིཡ ཛཱཏིཔཙྩཡཱ ཛརཱམརཎཾ. ཡསྨཱ ཝཱ པནེཏྠ ཨཝིཛྫཱ ཨཔྤཊིཔཏྟིམིཙྪཱཔཊིཔཏྟིབྷཱཝེན སཏྟེ ཨབྷིབྷཝཏི པཊལཾ ཝིཡ ཨཀྑཱིནི ¶ . ཏདབྷིབྷཱུཏོ ཙ བཱལོ པུནབྦྷཝིཀེཧི སངྑཱརེཧི ཨཏྟཱནཾ ཝེཋེཏི ཀོསཀཱརཀིམི ཝིཡ ཀོསཔྤདེསེཧི. སངྑཱརཔརིགྒཧིཏཾ ཝིཉྙཱཎཾ གཏཱིསུ པཏིཊྛཾ ལབྷཏི པརིཎཱཡཀཔརིགྒཧིཏོ ཝིཡ རཱཛཀུམཱརོ རཛྫེ. ཨུཔཔཏྟིནིམིཏྟཔརིཀཔྤནཏོ ཝིཉྙཱཎཾ པཊིསནྡྷིཡཾ ཨནེཀཔྤཀཱརཾ ནཱམརཱུཔཾ ཨབྷིནིབྦཏྟེཏི མཱཡཱཀཱརོ ཝིཡ མཱཡཾ. ནཱམརཱུཔེ པཏིཊྛིཏཾ སལཱ༹ཡཏནཾ ཝུདྡྷིཾ ཝིརཱུལ༹ྷིཾ ཝེཔུལླཾ པཱཔུཎཱཏི སུབྷཱུམིཡཾ པཏིཊྛིཏོ ཝནཔྤགུམྦོ ཝིཡ. ཨཱཡཏནགྷཊྚནཏོ ཕསྶོ ཛཱཡཏི ཨརཎིསཧིཏཱབྷིམནྠནཏོ ཨགྒི ཝིཡ. ཕསྶེན ཕུཊྛསྶ ཝེདནཱ པཱཏུབྷཝཏི ཨགྒིནཱ ཕུཊྛསྶ དཱཧོ ཝིཡ. ཝེདཡམཱནསྶ ཏཎྷཱ པཝཌྜྷཏི ལོཎཱུདཀཾ པིཝཏོ པིཔཱསཱ ཝིཡ. ཏསིཏོ བྷཝེསུ ཨབྷིལཱསཾ ཀརོཏི པིཔཱསིཏོ ཝིཡ པཱནཱིཡེ. ཏདསྶུཔཱདཱནཾ, ཨུཔཱདཱནེན བྷཝཾ ཨུཔཱདིཡཏི ཨཱམིསལོབྷེན མཙྪོ བལི༹སཾ ཝིཡ. བྷཝེ སཏི ཛཱཏི ཧོཏི བཱིཛེ སཏི ཨངྐུརོ ཝིཡ. ཛཱཏསྶ ཨཝསྶཾ ཛརཱམརཎཾ ཨུཔྤནྣསྶ རུཀྑསྶ པཏནཾ ཝིཡ. ཏསྨཱ ཨེཝཾ ཨུཔམཱཧིཔེཏཾ བྷཝཙཀྐཾ ཝིཉྙཱཏབྦཾ ཡཐཱརཧཾ.

༦༥༩. ཡསྨཱ ཙ བྷགཝཏཱ ཨཏྠཏོཔི དྷམྨཏོཔི དེསནཏོཔི པཊིཝེདྷཏོཔི གམྦྷཱིརབྷཱཝཾ སནྡྷཱཡ ‘‘གམྦྷཱིརོ ཙཱཡཾ, ཨཱནནྡ, པཊིཙྩསམུཔྤཱདོ གམྦྷཱིརཱཝབྷཱསོ ཙཱ’’ཏི (དཱི. ནི. ༢.༩༥; སཾ. ནི. ༢.༦༠) ཝུཏྟཾ, ཏསྨཱ གམྦྷཱིརབྷེདཏོཔེཏཾ བྷཝཙཀྐཾ ཝིཉྙཱཏབྦཾ ཡཐཱརཧཾ.

ཏཏྠ ¶ ཡསྨཱ ན ཛཱཏིཏོ ཛརཱམརཎཾ ན ཧོཏི, ན ཙ ཛཱཏིཾ ཝིནཱ ཨཉྙཏོ ཧོཏི, ཨིཏྠཉྩ ཛཱཏིཏོ སམུདཱགཙྪཏཱིཏི ཨེཝཾ ཛཱཏིཔཙྩཡསམུདཱགཏཊྛསྶ དུརཝབོདྷནཱིཡཏོ ཛརཱམརཎསྶ ཛཱཏིཔཙྩཡསམྦྷཱུཏསམུདཱགཏཊྛོ གམྦྷཱིརོ. ཏཐཱ ཛཱཏིཡཱ བྷཝཔཙྩཡ…པེ… སངྑཱརཱནཾ ཨཝིཛྫཱཔཙྩཡསམྦྷཱུཏསམུདཱགཏཊྛོ གམྦྷཱིརོ. ཏསྨཱ ཨིདཾ བྷཝཙཀྐཾ ཨཏྠགམྦྷཱིརནྟི ཨཡཾ ཏཱཝེཏྠ ཨཏྠགམྦྷཱིརཏཱ. ཧེཏུཕལཉྷི ཨཏྠོཏི ཝུཙྩཏི. ཡཐཱཧ – ‘‘ཧེཏུཕལེ ཉཱཎཾ ཨཏྠཔཊིསམྦྷིདཱ’’ཏི (ཝིབྷ. ༧༢༠).

ཡསྨཱ པན ཡེནཱཀཱརེན ཡདཝཏྠཱ ཙ ཨཝིཛྫཱ ཏེསཾ ཏེསཾ སངྑཱརཱནཾ པཙྩཡོ ཧོཏི, ཏསྶ དུརཝབོདྷནཱིཡཏོ ཨཝིཛྫཱཡ སངྑཱརཱནཾ པཙྩཡཊྛོ གམྦྷཱིརོ. ཏཐཱ སངྑཱརཱནཾ…པེ… ཛཱཏིཡཱ ཛརཱམརཎསྶ པཙྩཡཊྛོ གམྦྷཱིརོ, ཏསྨཱ ཨིདཾ བྷཝཙཀྐཾ དྷམྨགམྦྷཱིརནྟི ཨཡམེཏྠ དྷམྨགམྦྷཱིརཏཱ. ཧེཏུནོ ཧི དྷམྨོཏི ནཱམཾ. ཡཐཱཧ – ‘‘ཧེཏུམྷི ཉཱཎཾ དྷམྨཔཊིསམྦྷིདཱ’’ཏི (ཝིབྷ. ༧༢༠).

ཡསྨཱ ¶ ཙསྶ ཏེན ཏེན ཀཱརཎེན ཏཐཱ ཏཐཱ པཝཏྟེཏབྦཏྟཱ དེསནཱཔི གམྦྷཱིརཱ, ན ཏཏྠ སབྦཉྙུཏཉྙཱཎཏོ ཨཉྙཾ ཉཱཎཾ པཏིཊྛཾ ལབྷཏི. ཏཐཱཧེཏཾ ཀཏྠཙི སུཏྟེ ཨནུལོམཏོ, ཀཏྠཙི པཊིལོམཏོ, ཀཏྠཙི ཨནུལོམཔཊིལོམཏོ, ཀཏྠཙི ཝེམཛ྄ཛྷཏོ པཊྛཱཡ ཨནུལོམཏོ ཝཱ པཊིལོམཏོ ཝཱ, ཀཏྠཙི ཏིསནྡྷིཙཏུསངྑེཔཾ, ཀཏྠཙི དྭིསནྡྷིཏིསངྑེཔཾ, ཀཏྠཙི ཨེཀསནྡྷིདྭིསངྑེཔཾ དེསིཏཾ, ཏསྨཱ ཨིདཾ བྷཝཙཀྐཾ དེསནཱགམྦྷཱིརནྟི ཨཡཾ དེསནཱགམྦྷཱིརཏཱ.

ཡསྨཱ ཙེཏྠ ཡོ སོ ཨཝིཛྫཱདཱིནཾ སབྷཱཝོ, ཡེན པཊིཝིདྡྷེན ཨཝིཛྫཱདཡོ སམྨཱ སལཀྑཎཏོ པཊིཝིདྡྷཱ ཧོནྟི, སོ དུཔྤརིཡོགཱཧཏྟཱ གམྦྷཱིརོ, ཏསྨཱ ཨིདཾ བྷཝཙཀྐཾ པཊིཝེདྷགམྦྷཱིརཾ. ཏཐཱ ཧེཏྠ ཨཝིཛྫཱཡ ཨཉྙཱཎཱདསྶནསཙྩཱསམྤཊིཝེདྷཊྛོ གམྦྷཱིརོ, སངྑཱརཱནཾ ཨབྷིསངྑརཎཱཡཱུཧནསརཱགཝིརཱགཊྛོ, ཝིཉྙཱཎསྶ སུཉྙཏཨབྱཱཔཱརཨསངྐནྟིཔཊིསནྡྷིཔཱཏུབྷཱཝཊྛོ, ནཱམརཱུཔསྶ ཨེཀུཔྤཱདཝིནིབྦྷོགཱཝིནིབྦྷོགནམནརུཔྤནཊྛོ, སལཱ༹ཡཏནསྶ ཨདྷིཔཏིལོཀདྭཱརཁེཏྟཝིསཡིབྷཱཝཊྛོ, ཕསྶསྶ ཕུསནསངྒྷཊྚནསངྒཏིསནྣིཔཱཏཊྛོ ¶ , ཝེདནཱཡ ཨཱརམྨཎརསཱནུབྷཝནསུཁདུཀྑམཛ྄ཛྷཏྟབྷཱཝནིཛྫཱིཝཝེདཡིཏཊྛོ. ཏཎྷཱཡ ཨབྷིནནྡིཏཛ྄ཛྷོསཱནསརིཏཱལཏཱནདཱིཏཎྷཱསམུདྡདུཔྤཱུརཊྛོ, ཨུཔཱདཱནསྶ ཨཱདཱནགྒཧཎཱབྷིནིཝེསཔརཱམཱསདུརཏིཀྐམཊྛོ, བྷཝསྶ ཨཱཡཱུཧནཱབྷིསངྑརཎཡོནིགཏིཋིཏིནིཝཱསེསུཁིཔནཊྛོ, ཛཱཏིཡཱ ཛཱཏི སཉྫཱཏི ཨོཀྐནྟི ནིབྦཏྟི པཱཏུབྷཱཝཊྛོ, ཛརཱམརཎསྶ ཁཡཝཡབྷེདཝིཔརིཎཱམཊྛོ གམྦྷཱིརོཏི ཨཡམེཏྠ པཊིཝེདྷགམྦྷཱིརཏཱ.

༦༦༠. ཡསྨཱ པནེཏྠ ཨེཀཏྟནཡོ, ནཱནཏྟནཡོ, ཨབྱཱཔཱརནཡོ, ཨེཝཾདྷམྨཏཱནཡོཏི ཙཏྟཱརོ ཨཏྠནཡཱ ཧོནྟི, ཏསྨཱ ནཡབྷེདཏོཔེཏཾ བྷཝཙཀྐཾ ཝིཉྙཱཏབྦཾ ཡཐཱརཧཾ.

ཏཏྠ ཨཝིཛྫཱཔཙྩཡཱ སངྑཱརཱ, སངྑཱརཔཙྩཡཱ ཝིཉྙཱཎནྟི ཨེཝཾ བཱིཛསྶ ཨངྐུརཱདིབྷཱཝེན རུཀྑབྷཱཝཔྤཏྟི ཝིཡ སནྟཱནཱནུཔཙྪེདོ ཨེཀཏྟནཡོ ནཱམ. ཡཾ སམྨཱ པསྶནྟོ ཧེཏུཕལསམྦནྡྷེན སནྟཱནསྶ ཨནུཔཙྪེདཱཝབོདྷཏོ ཨུཙྪེདདིཊྛིཾ པཛཧཏི. མིཙྪཱ པསྶནྟོ ཧེཏུཕལསམྦནྡྷེན པཝཏྟམཱནསྶ སནྟཱནཱནུཔཙྪེདསྶ ཨེཀཏྟགཧཎཏོ སསྶཏདིཊྛིཾ ཨུཔཱདིཡཏི.

ཨཝིཛྫཱདཱིནཾ པན ཡཐཱསཀཾལཀྑཎཝཝཏྠཱནཾ ནཱནཏྟནཡོ ནཱམ. ཡཾ སམྨཱ པསྶནྟོ ནཝནཝཱནཾ ¶ ཨུཔྤཱདདསྶནཏོ སསྶཏདིཊྛིཾ པཛཧཏི. མིཙྪཱ པསྶནྟོ ཨེཀསནྟཱནཔཏིཏསྶ བྷིནྣསནྟཱནསྶེཝ ནཱནཏྟགྒཧཎཏོ ཨུཙྪེདདིཊྛིཾ ཨུཔཱདིཡཏི.

ཨཝིཛྫཱཡ སངྑཱརཱ མཡཱ ཨུཔྤཱདེཏབྦཱ, སངྑཱརཱནཾ ཝཱ ཝིཉྙཱཎཾ ཨམྷེཧཱིཏི ཨེཝམཱདིབྱཱཔཱརཱབྷཱཝོ ཨབྱཱཔཱརནཡོ ནཱམ. ཡཾ སམྨཱ པསྶནྟོ ཀཱརཀསྶ ཨབྷཱཝཱཝབོདྷཏོ ཨཏྟདིཊྛིཾ པཛཧཏི. མིཙྪཱ པསྶནྟོ ཡོ ཨསཏིཔི བྱཱཔཱརེ ཨཝིཛྫཱདཱིནཾ སབྷཱཝནིཡམསིདྡྷོ ཧེཏུབྷཱཝོ, ཏསྶ ཨགྒཧཎཏོ ཨཀིརིཡདིཊྛིཾ ཨུཔཱདིཡཏི.

ཨཝིཛྫཱདཱིཧི པན ཀཱརཎེཧི སངྑཱརཱདཱིནཾཡེཝ སམྦྷཝོ ཁཱིརཱདཱིཧི དདྷིཨཱདཱིནཾ ཝིཡ, ན ཨཉྙེསནྟི ཨཡཾ ཨེཝཾདྷམྨཏཱནཡོ ནཱམ. ཡཾ སམྨཱ པསྶནྟོ པཙྩཡཱནུརཱུཔཏོ ཕལཱཝབོདྷཱ ཨཧེཏུཀདིཊྛིཾ ཨཀིརིཡདིཊྛིཉྩ པཛཧཏི. མིཙྪཱ པསྶནྟོ པཙྩཡཱནུརཱུཔཾ ཕལཔྤཝཏྟིཾ ཨགྒཧེཏྭཱ ཡཏོ ཀུཏོཙི ¶ ཡསྶ ཀསྶཙི ཨསམྦྷཝགྒཧཎཏོ ཨཧེཏུཀདིཊྛིཉྩེཝ ནིཡཏཝཱདཉྩ ཨུཔཱདིཡཏཱིཏི ཨེཝམིདཾ བྷཝཙཀྐཾ,

སཙྩཔྤབྷཝཏོ ཀིཙྩཱ, ཝཱརཎཱཨུཔམཱཧི ཙ;

གམྦྷཱིརནཡབྷེདཱ ཙ, ཝིཉྙཱཏབྦཾ ཡཐཱརཧཾ.

༦༦༡. ཨིདཉྷི ཨཏིགམྦྷཱིརཏོ ཨགཱདྷཾ. ནཱནཱནཡགཧནཏོ དུརཏིཡཱནཾ. ཉཱཎཱསིནཱ སམཱདྷིཔཝརསིལཱཡཾ སུནིསིཏེན,

བྷཝཙཀྐམཔདཱལེཏྭཱ, ཨསནིཝིཙཀྐམིཝ ནིཙྩནིམྨཐནཾ;

སཾསཱརབྷཡམཏཱིཏོ, ན ཀོཙི སུཔིནནྟརེཔྱཏྠི.

ཝུཏྟམྤི ཧེཏཾ བྷགཝཏཱ – ‘‘གམྦྷཱིརོ ཙཱཡཾ, ཨཱནནྡ, པཊིཙྩསམུཔྤཱདོ གམྦྷཱིརཱཝབྷཱསོ ཙ. ཨེཏསྶ ཙཱནནྡ, དྷམྨསྶ ཨནནུབོདྷཱ ཨཔྤཊིཝེདྷཱ ཨེཝམཡཾ པཛཱ ཏནྟཱཀུལཀཛཱཏཱ ཀུལཱགཎྛིཀཛཱཏཱ མུཉྫཔབྦཛབྷཱུཏཱ ཨཔཱཡཾ དུགྒཏིཾ ཝིནིཔཱཏཾ སཾསཱརཾ ནཱཏིཝཏྟཏཱི’’ཏི (མཧཱཝ. ༩༥; སཾ. ནི. ༢.༦༠). ཏསྨཱ ཨཏྟནོ ཝཱ པརེསཾ ཝཱ ཧིཏཱཡ ཙ སུཁཱཡ ཙ པཊིཔནྣོ ཨཝསེསཀིཙྩཱནི པཧཱཡ,

གམྦྷཱིརེ ¶ པཙྩཡཱཀཱརཔྤབྷེདེ ཨིདྷ པཎྜིཏོ;

ཡཐཱ གཱདྷཾ ལབྷེཐེཝམནུཡུཉྫེ སདཱ སཏོཏི.

ཨིཏི སཱདྷུཛནཔཱམོཛྫཏྠཱཡ ཀཏེ ཝིསུདྡྷིམགྒེ

པཉྙཱབྷཱཝནཱདྷིཀཱརེ

པཉྙཱབྷཱུམིནིདྡེསོ ནཱམ

སཏྟརསམོ པརིཙྪེདོ.

༡༨. དིཊྛིཝིསུདྡྷིནིདྡེསོ

ནཱམརཱུཔཔརིགྒཧཀཐཱ

༦༦༢. ཨིདཱནི ¶ ¶ ཡཱ ‘‘ཨིམེསུ བྷཱུམིབྷཱུཏེསུ དྷམྨེསུ ཨུགྒཧཔརིཔུཙྪཱཝསེན ཉཱཎཔརིཙཡཾ ཀཏྭཱ ‘སཱིལཝིསུདྡྷི ཙེཝ ཙིཏྟཝིསུདྡྷི ཙཱ’ཏི དྭེ མཱུལབྷཱུཏཱ ཝིསུདྡྷིཡོ སམྤཱདེཏབྦཱ’’ཏི ཝུཏྟཱ. ཏཏྠ སཱིལཝིསུདྡྷི ནཱམ སུཔརིསུདྡྷཾ པཱཏིམོཀྑསཾཝརཱདིཙཏུབྦིདྷཾ སཱིལཾ, ཏཉྩ སཱིལནིདྡེསེ ཝིཏྠཱརིཏམེཝ. ཙིཏྟཝིསུདྡྷི ནཱམ སཨུཔཙཱརཱ ཨཊྛ སམཱཔཏྟིཡོ, ཏཱཔི ཙིཏྟསཱིསེན ཝུཏྟསམཱདྷིནིདྡེསེ སབྦཱཀཱརེན ཝིཏྠཱརིཏཱ ཨེཝ. ཏསྨཱ ཏཱ ཏཏྠ ཝིཏྠཱརིཏནཡེནེཝ ཝེདིཏབྦཱ.

ཡཾ པན ཝུཏྟཾ ‘‘དིཊྛིཝིསུདྡྷི, ཀངྑཱཝིཏརཎཝིསུདྡྷི, མགྒཱམགྒཉཱཎདསྶནཝིསུདྡྷི, པཊིཔདཱཉཱཎདསྶནཝིསུདྡྷི, ཉཱཎདསྶནཝིསུདྡྷཱིཏི ཨིམཱ པན པཉྩ ཝིསུདྡྷིཡོ སརཱིར’’ནྟི, ཏཏྠ ནཱམརཱུཔཱནཾ ཡཱཐཱཝདསྶནཾ དིཊྛིཝིསུདྡྷི ནཱམ.

༦༦༣. ཏཾ སམྤཱདེཏུཀཱམེན སམཐཡཱནིཀེན ཏཱཝ ཋཔེཏྭཱ ནེཝསཉྙཱནཱསཉྙཱཡཏནཾ ཨཝསེསརཱུཔཱརཱུཔཱཝཙརཛ྄ཛྷཱནཱནཾ ཨཉྙཏརཏོ ཝུཊྛཱཡ ཝིཏཀྐཱདཱིནི ཛྷཱནངྒཱནི, ཏཾསམྤཡུཏྟཱ ཙ དྷམྨཱ ལཀྑཎརསཱདིཝསེན པརིགྒཧེཏབྦཱ. པརིགྒཧེཏྭཱ སབྦམྤེཏཾ ཨཱརམྨཎཱབྷིམུཁཾ ནམནཏོ ནམནཊྛེན ནཱམནྟི ཝཝཏྠཔེཏབྦཾ.

ཏཏོ ཡཐཱ ནཱམ པུརིསོ ཨནྟོགེཧེ སཔྤཾ དིསྭཱ ཏཾ ཨནུབནྡྷམཱནོ ཏསྶ ཨཱསཡཾ པསྶཏི, ཨེཝམེཝ ཨཡམྤི ཡོགཱཝཙརོ ཏཾ ནཱམཾ ཨུཔཔརིཀྑནྟོ ‘‘ཨིདཾ ནཱམཾ ཀིཾ ནིསྶཱཡ པཝཏྟཏཱི’’ཏི པརིཡེསམཱནོ ཏསྶ ནིསྶཡཾ ཧདཡརཱུཔཾ པསྶཏི. ཏཏོ ཧདཡརཱུཔསྶ ནིསྶཡབྷཱུཏཱནི, བྷཱུཏནིསྶིཏཱནི ཙ སེསུཔཱདཱཡརཱུཔཱནཱིཏི རཱུཔཾ པརིགྒཎྷཱཏི. སོ སབྦམྤེཏཾ རུཔྤནཏོ ¶ རཱུཔནྟི ཝཝཏྠཔེཏི. ཏཏོ ནམནལཀྑཎཾ ནཱམཾ, རུཔྤནལཀྑཎཾ རཱུཔནྟི སངྑེཔཏོ ནཱམརཱུཔཾ ཝཝཏྠཔེཏི.

༦༦༤. སུདྡྷཝིཔསྶནཱཡཱནིཀོ པན ཨཡམེཝ ཝཱ སམཐཡཱནིཀོ ཙཏུདྷཱཏུཝཝཏྠཱནེ ཝུཏྟཱནཾ ཏེསཾ ཏེསཾ དྷཱཏུཔརིགྒཧམུཁཱནཾ ཨཉྙཏརམུཁཝསེན སངྑེཔཏོ ཝཱ ཝིཏྠཱརཏོ ཝཱ ཙཏསྶོ དྷཱཏུཡོ པརིགྒཎྷཱཏི. ཨཐསྶ ཡཱཐཱཝསརསལཀྑཎཏོ ཨཱཝིབྷཱུཏཱསུ དྷཱཏཱུསུ ཀམྨསམུཊྛཱནམྷི ¶ ཏཱཝ ཀེསེ ‘‘ཙཏསྶོ དྷཱཏུཡོ, ཝཎྞོ, གནྡྷོ, རསོ, ཨོཛཱ, ཛཱིཝིཏཾ, ཀཱཡཔྤསཱདོ’’ཏི ཨེཝཾ ཀཱཡདསཀཝསེན དས རཱུཔཱནི, ཏཏྠེཝ བྷཱཝསྶ ཨཏྠིཏཱཡ བྷཱཝདསཀཝསེན དས, ཏཏྠེཝ ཨཱཧཱརསམུཊྛཱནཾ ཨོཛཊྛམཀཾ, ཨུཏུསམུཊྛཱནཾ, ཙིཏྟསམུཊྛཱནནྟི ཨཔརཱནིཔི ཙཏུཝཱིསཏཱིཏི ཨེཝཾ ཙཏུསམུཊྛཱནེསུ ཙཏུཝཱིསཏིཀོཊྛཱསེསུ ཙཏུཙཏྟཱལཱིས ཙཏུཙཏྟཱལཱིས རཱུཔཱནི, སེདོ, ཨསྶུ, ཁེལོ༹, སིངྒྷཱཎིཀཱཏི ཨིམེསུ པན ཙཏཱུསུ ཨུཏུཙིཏྟསམུཊྛཱནེསུ དྭིནྣཾ ཨོཛཊྛམཀཱནཾ ཝསེན སོལ༹ས སོལ༹ས རཱུཔཱནི, ཨུདརིཡཾ, ཀརཱིསཾ, པུབྦོ, མུཏྟནྟི ཨིམེསུ ཙཏཱུསུ ཨུཏུསམུཊྛཱནེསུ ཨུཏུསམུཊྛཱནསྶེཝ ཨོཛཊྛམཀསྶ ཝསེན ཨཊྛ ཨཊྛ རཱུཔཱནི པཱཀཊཱནི ཧོནྟཱིཏི. ཨེས ཏཱཝ དྭཏྟིཾསཱཀཱརེ ནཡོ.

ཡེ པན ཨིམསྨིཾ དྭཏྟིཾསཱཀཱརེ ཨཱཝིབྷཱུཏེ ཨཔརེ དས ཨཱཀཱརཱ ཨཱཝིབྷཝནྟི. ཏཏྠ ཨསིཏཱདིཔརིཔཱཙཀེ ཏཱཝ ཀམྨཛེ ཏེཛོཀོཊྛཱསམྷི ཨོཛཊྛམཀཉྩེཝ ཛཱིཝིཏཉྩཱཏི ནཝ རཱུཔཱནི, ཏཐཱ ཙིཏྟཛེ ཨསྶཱསཔསྶཱསཀོཊྛཱསེཔི ཨོཛཊྛམཀཉྩེཝ སདྡོ ཙཱཏི ནཝ, སེསེསུ ཙཏུསམུཊྛཱནེསུ ཨཊྛསུ ཛཱིཝིཏནཝཀཉྩེཝ ཏཱིཎི ཙ ཨོཛཊྛམཀཱནཱིཏི ཏེཏྟིཾས རཱུཔཱནི པཱཀཊཱནི ཧོནྟི.

ཏསྶེཝཾ ཝིཏྠཱརཏོ དྭཱཙཏྟཱལཱིསཱཀཱརཝསེན ཨིམེསུ བྷཱུཏུཔཱདཱཡརཱུཔེསུ པཱཀཊེསུ ཛཱཏེསུ ཝཏྠུདྭཱརཝསེན པཉྩ ཙཀྑུདསཀཱདཡོ, ཧདཡཝཏྠུདསཀཉྩཱཏི ཨཔརཱནིཔི སཊྛིརཱུཔཱནི པཱཀཊཱནི ཧོནྟི. སོ སབྦཱནིཔི ཏཱནི རུཔྤནལཀྑཎེན ཨེཀཏོ ཀཏྭཱ ‘‘ཨེཏཾ རཱུཔ’’ནྟི པསྶཏི.

ཏསྶེཝཾ པརིགྒཧིཏརཱུཔསྶ དྭཱརཝསེན ཨརཱུཔདྷམྨཱ པཱཀཊཱ ཧོནྟི. སེཡྻཐིདཾ – དྭེཔཉྩཝིཉྙཱཎཱནི, ཏིསྶོ མནོདྷཱཏུཡོ, ཨཊྛསཊྛི མནོཝིཉྙཱཎདྷཱཏུཡོཏི ཨེཀཱསཱིཏི ལོཀིཡཙིཏྟཱནི, ཨཝིསེསེན ཙ ཏེཧི ཙིཏྟེཧི སཧཛཱཏོ ཕསྶོ, ཝེདནཱ, སཉྙཱ, ཙེཏནཱ, ཛཱིཝིཏཾ, ཙིཏྟཊྛིཏི, མནསིཀཱརོཏི ཨིམེ སཏྟ སཏྟ ཙེཏསིཀཱཏི. ལོཀུཏྟརཙིཏྟཱནི པན ནེཝ སུདྡྷཝིཔསྶཀསྶ ¶ , ན སམཐཡཱནིཀསྶ པརིགྒཧཾ གཙྪནྟི ཨནདྷིགཏཏྟཱཏི. སོ སབྦེཔི ཏེ ཨརཱུཔདྷམྨེ ནམནལཀྑཎེན ཨེཀཏོ ཀཏྭཱ ‘‘ཨེཏཾ ནཱམ’’ནྟི པསྶཏི. ཨེཝམེཀོ ཙཏུདྷཱཏུཝཝཏྠཱནམུཁེན ཝིཏྠཱརཏོ ནཱམརཱུཔཾ ཝཝཏྠཔེཏི.

༦༦༥. ཨཔརོ ¶ ཨཊྛཱརསདྷཱཏུཝསེན. ཀཐཾ? ཨིདྷ བྷིཀྑུ ཨཏྠི ཨིམསྨིཾ ཨཏྟབྷཱཝེ ཙཀྑུདྷཱཏུ…པེ… མནོཝིཉྙཱཎདྷཱཏཱུཏི དྷཱཏུཡོ ཨཱཝཛྫིཏྭཱ ཡཾ ལོཀོ སེཏཀཎྷམཎྜལཝིཙིཏྟཾ ཨཱཡཏཝིཏྠཏཾ ཨཀྑིཀཱུཔཀེ ནྷཱརུསུཏྟཀེན ཨཱབདྡྷཾ མཾསཔིཎྜཾ ‘‘ཙཀྑཱུ’’ཏི སཉྫཱནཱཏི, ཏཾ ཨགྒཧེཏྭཱ ཁནྡྷནིདྡེསེ ཨུཔཱདཱརཱུཔེསུ ཝུཏྟཔྤཀཱརཾ ཙཀྑུཔསཱདཾ ‘‘ཙཀྑུདྷཱཏཱུ’’ཏི ཝཝཏྠཔེཏི.

ཡཱནི པནསྶ ནིསྶཡབྷཱུཏཱ ཙཏསྶོ དྷཱཏུཡོ, པརིཝཱརཀཱནི ཙཏྟཱརི ཝཎྞ-གནྡྷ-རས-ཨོཛཱ-རཱུཔཱནི, ཨནུཔཱལཀཾ ཛཱིཝིཏིནྡྲིཡནྟི ནཝ སཧཛཱཏརཱུཔཱནི, ཏཏྠེཝ ཋིཏཱནི ཀཱཡདསཀབྷཱཝདསཀཝསེན ཝཱིསཏི ཀམྨཛརཱུཔཱནི, ཨཱཧཱརསམུཊྛཱནཱདཱིནཾ ཏིཎྞཾ ཨོཛཊྛམཀཱནཾ ཝསེན ཙཏུཝཱིསཏི ཨནུཔཱདིནྣརཱུཔཱནཱིཏི ཨེཝཾ སེསཱནི ཏེཔཎྞཱས རཱུཔཱནི ཧོནྟི, ན ཏཱནི ཙ ‘‘ཙཀྑུདྷཱཏཱུ’’ཏི ཝཝཏྠཔེཏི. ཨེས ནཡོ སོཏདྷཱཏུཨཱདཱིསུཔི. ཀཱཡདྷཱཏུཡཾ པན ཨཝསེསཱནི ཏེཙཏྟཱལཱིས རཱུཔཱནི ཧོནྟི. ཀེཙི པན ཨུཏུཙིཏྟསམུཊྛཱནཱནི སདྡེན སཧ ནཝ ནཝ ཀཏྭཱ པཉྩཙཏྟཱལཱིསཱཏི ཝདནྟི.

ཨིཏི ཨིམེ པཉྩ པསཱདཱ, ཏེསཉྩ ཝིསཡཱ རཱུཔསདྡགནྡྷརསཕོཊྛབྦཱ པཉྩཱཏི དས རཱུཔཱནི དས དྷཱཏུཡོ ཧོནྟི. ཨཝསེསརཱུཔཱནི དྷམྨདྷཱཏུཡེཝ ཧོནྟི. ཙཀྑུཾ པན ནིསྶཱཡ རཱུཔཾ ཨཱརབྦྷ པཝཏྟཾ ཙིཏྟཾ ཙཀྑུཝིཉྙཱཎདྷཱཏུ ནཱམཱཏི ཨེཝཾ དྭེཔཉྩཝིཉྙཱཎཱནི པཉྩ ཝིཉྙཱཎདྷཱཏུཡོ ཧོནྟི. ཏཱིཎི མནོདྷཱཏུཙིཏྟཱནི ཨེཀཱ མནོདྷཱཏུ, ཨཊྛསཊྛི མནོཝིཉྙཱཎདྷཱཏུཙིཏྟཱནི མནོཝིཉྙཱཎདྷཱཏཱུཏི སབྦཱནིཔི ཨེཀཱསཱིཏི ལོཀིཡཙིཏྟཱནི སཏྟ ཝིཉྙཱཎདྷཱཏུཡོ. ཏཾསམྤཡུཏྟཱ ཕསྶཱདཡོ དྷམྨདྷཱཏཱུཏི ཨེཝམེཏྠ ཨཌྜྷེཀཱདས དྷཱཏུཡོ རཱུཔཾ, ཨཌྜྷཊྛམཱ དྷཱཏུཡོ ནཱམནྟི ཨེཝམེཀོ ཨཊྛཱརསདྷཱཏུཝསེན ནཱམརཱུཔཾ ཝཝཏྠཔེཏི.

༦༦༦. ཨཔརོ དྭཱདསཱཡཏནཝསེན. ཀཐཾ? ཙཀྑུདྷཱཏུཡཾ ཝུཏྟནཡེནེཝ ཋཔེཏྭཱ ཏེཔཎྞཱས རཱུཔཱནི ཙཀྑུཔསཱདམཏྟཾ ‘‘ཙཀྑཱཡཏན’’ནྟི ཝཝཏྠཔེཏི. ཏཏྠ ཝུཏྟནཡེནེཝ ཙ སོཏགྷཱནཛིཝ྄ཧཱཀཱཡདྷཱཏུཡོ ‘‘སོཏགྷཱནཛིཝ྄ཧཱཀཱཡཱཡཏནཱནཱི’’ཏི, ཏེསཾ ཝིསཡབྷཱུཏེ པཉྩདྷམྨེ ‘‘རཱུཔསདྡགནྡྷརསཕོཊྛབྦཱཡཏནཱནཱི’’ཏི ¶ , ལོཀིཡསཏྟཝིཉྙཱཎདྷཱཏུཡོ ‘‘མནཱཡཏན’’ནྟི, ཏཾསམྤཡུཏྟཱ ཕསྶཱདཡོ སེསརཱུཔཉྩ ‘‘དྷམྨཱཡཏན’’ནྟི ཨེཝམེཏྠ ¶ ཨཌྜྷེཀཱདས ཨཱཡཏནཱནི རཱུཔཾ, དིཡཌྜྷཨཱཡཏནཱནི ནཱམནྟི ཨེཝམེཀོ དྭཱདསཱཡཏནཝསེན ནཱམརཱུཔཾ ཝཝཏྠཔེཏི.

༦༦༧. ཨཔརོ ཏཏོ སཾཁིཏྟཏརཾ ཁནྡྷཝསེན ཝཝཏྠཔེཏི. ཀཐཾ? ཨིདྷ བྷིཀྑུ ཨིམསྨིཾ སརཱིརེ ཙཏུསམུཊྛཱནཱ ཙཏསྶོ དྷཱཏུཡོ, ཏཾནིསྶིཏོ ཝཎྞོ, གནྡྷོ, རསོ, ཨོཛཱ, ཙཀྑུཔསཱདཱདཡོ པཉྩ པསཱདཱ, ཝཏྠུརཱུཔཾ, བྷཱཝོ, ཛཱིཝིཏིནྡྲིཡཾ, དྭིསམུཊྛཱནོ སདྡོཏི ཨིམཱནི སཏྟརས རཱུཔཱནི སམྨསནུཔགཱནི ནིཔྥནྣཱནི རཱུཔརཱུཔཱནི. ཀཱཡཝིཉྙཏྟི, ཝཙཱིཝིཉྙཏྟི, ཨཱཀཱསདྷཱཏུ, རཱུཔསྶ ལཧུཏཱ, མུདུཏཱ, ཀམྨཉྙཏཱ, ཨུཔཙཡོ, སནྟཏི, ཛརཏཱ, ཨནིཙྩཏཱཏི ཨིམཱནི པན དས རཱུཔཱནི ན སམྨསནུཔགཱནི, ཨཱཀཱརཝིཀཱརཨནྟརཔརིཙྪེདམཏྟཀཱནི, ན ནིཔྥནྣརཱུཔཱནི, ན རཱུཔརཱུཔཱནི. ཨཔིཙ ཁོ རཱུཔཱནཾ ཨཱཀཱརཝིཀཱརཨནྟརཔརིཙྪེདམཏྟཏོ རཱུཔནྟི སངྑཾ གཏཱནི. ཨིཏི སབྦཱནི པེཏཱནི སཏྟཝཱིསཏི རཱུཔཱནི རཱུཔཀྑནྡྷོ, ཨེཀཱསཱིཏིཡཱ ལོཀིཡཙིཏྟེཧི སདྡྷིཾ ཨུཔྤནྣཱ ཝེདནཱ ཝེདནཱཀྑནྡྷོ, ཏཾསམྤཡུཏྟཱ སཉྙཱ སཉྙཱཀྑནྡྷོ, སངྑཱརཱ སངྑཱརཀྑནྡྷོ, ཝིཉྙཱཎཾ ཝིཉྙཱཎཀྑནྡྷོཏི. ཨིཏི རཱུཔཀྑནྡྷོ རཱུཔཾ, ཙཏྟཱརོ ཨརཱུཔིནོ ཁནྡྷཱ ནཱམནྟི ཨེཝམེཀོ པཉྩཀྑནྡྷཝསེན ནཱམརཱུཔཾ ཝཝཏྠཔེཏི.

༦༦༨. ཨཔརོ ‘‘ཡཾཀིཉྩི རཱུཔཾ སབྦཾ རཱུཔཾ ཙཏྟཱརི མཧཱབྷཱུཏཱནི ཙཏུནྣཉྩ མཧཱབྷཱུཏཱནཾ ཨུཔཱདཱཡརཱུཔ’’ནྟི (མ. ནི. ༡.༣༤༧; ཨ. ནི. ༡༡.༡༧) ཨེཝཾ སཾཁིཏྟེནེཝ ཨིམསྨིཾ ཨཏྟབྷཱཝེ རཱུཔཾ པརིགྒཧེཏྭཱ, ཏཐཱ མནཱཡཏནཉྩེཝ དྷམྨཱཡཏནེཀདེསཉྩ ནཱམནྟི པརིགྒཧེཏྭཱ ‘‘ཨིཏི ཨིདཉྩ ནཱམཾ ཨིདཉྩ རཱུཔཾ, ཨིདཾ ཝུཙྩཏི ནཱམརཱུཔ’’ནྟི སངྑེཔཏོ ནཱམརཱུཔཾ ཝཝཏྠཔེཏི.

༦༦༩. སཙེ པནསྶ ཏེན ཏེན མུཁེན རཱུཔཾ པརིགྒཧེཏྭཱ ཨརཱུཔཾ པརིགྒཎྷཏོ སུཁུམཏྟཱ ཨརཱུཔཾ ན ཨུཔཊྛཱཏི, ཏེན དྷུརནིཀྑེཔཾ ཨཀཏྭཱ རཱུཔམེཝ པུནཔྤུནཾ སམྨསིཏབྦཾ མནསིཀཱཏབྦཾ པརིགྒཧེཏབྦཾ ཝཝཏྠཔེཏབྦཾ. ཡཐཱ ཡཐཱ ཧིསྶ རཱུཔཾ སུཝིཀྑཱལིཏཾ ཧོཏི ནིཛྫཊཾ སུཔརིསུདྡྷཾ, ཏཐཱ ཏཐཱ ཏདཱརམྨཎཱ ཨརཱུཔདྷམྨཱ སཡམེཝ པཱཀཊཱ ཧོནྟི.

ཡཐཱ ཧི ཙཀྑུམཏོ པུརིསསྶ ཨཔརིསུདྡྷེ ཨཱདཱསེ མུཁནིམིཏྟཾ ཨོལོཀེནྟསྶ ནིམིཏྟཾ ན པཉྙཱཡཏི, སོ ‘‘ནིམིཏྟཾ ན པཉྙཱཡཏཱི’’ཏི ན ཨཱདཱསཾ ¶ ཚཌྜེཏི, ཨཐ ཁོ ནཾ པུནཔྤུནཾ པརིམཛྫཏི ¶ . ཏསྶ པརིསུདྡྷེ ཨཱདཱསེ ནིམིཏྟཾ སཡམེཝ པཱཀཊཾ ཧོཏི. ཡཐཱ ཙ ཏེལཏྠིཀོ ཏིལཔིཊྛཾ དོཎིཡཾ ཨཱཀིརིཏྭཱ ཨུདཀེན པརིཔྥོསེཏྭཱ ཨེཀཝཱརཾ དྭེཝཱརཾ པཱིལ༹ནམཏྟེན ཏེལེ ཨནིཀྑམནྟེ ན ཏིལཔིཊྛཾ ཚཌྜེཏི, ཨཐ ཁོ ནཾ པུནཔྤུནཾ ཨུཎྷོདཀེན པརིཔྥོསེཏྭཱ མདྡིཏྭཱ པཱིལེ༹ཏི. ཏསྶེཝཾ ཀརོཏོ ཝིཔྤསནྣཾ ཏིལཏེལཾ ནིཀྑམཏི. ཡཐཱ ཝཱ པན ཨུདཀཾ པསཱདེཏུཀཱམོ ཀཏཀཊྛིཾ གཧེཏྭཱ ཨནྟོགྷཊེ ཧཏྠཾ ཨོཏཱརེཏྭཱ ཨེཀདྭེཝཱརེ གྷཾསནམཏྟེན ཨུདཀེ ཨཝིཔྤསཱིདནྟེ ན ཀཏཀཊྛིཾ ཚཌྜེཏི, ཨཐ ཁོ ནཾ པུནཔྤུནཾ གྷཾསཏི. ཏསྶེཝཾ ཀརོནྟསྶ ཀལལཀདྡམཾ སནྣིསཱིདཏི. ཨུདཀཾ ཨཙྪཾ ཧོཏི ཝིཔྤསནྣཾ, ཨེཝམེཝཾ ཏེན བྷིཀྑུནཱ དྷུརནིཀྑེཔཾ ཨཀཏྭཱ རཱུཔམེཝ པུནཔྤུནཾ སམྨསིཏབྦཾ མནསིཀཱཏབྦཾ པརིགྒཧེཏབྦཾ ཝཝཏྠཔེཏབྦཾ.

ཡཐཱ ཡཐཱ ཧིསྶ རཱུཔཾ སུཝིཀྑཱལིཏཾ ཧོཏི ནིཛྫཊཾ སུཔརིསུདྡྷཾ, ཏཐཱ ཏཐཱ ཏཔྤཙྩནཱིཀཀིལེསཱ སནྣིསཱིདནྟི, ཀདྡམུཔརི ཨུདཀཾ ཝིཡ ཙིཏྟཾ པསནྣཾ ཧོཏི. ཏདཱརམྨཎཱ ཨརཱུཔདྷམྨཱ སཡམེཝ པཱཀཊཱ ཧོནྟི. ཨེཝཾ ཨཉྙཱཧིཔི ཨུཙྪུཙོརགོཎདདྷིམཙྪཱདཱིཧི ཨུཔམཱཧི ཨཡམཏྠོ པཀཱསེཏབྦོ.

ཨརཱུཔདྷམྨཱནཾ ཨུཔཊྛཱནཱཀཱརཀཐཱ

༦༧༠. ཨེཝཾ སུཝིསུདྡྷརཱུཔཔརིགྒཧསྶ པནསྶ ཨརཱུཔདྷམྨཱ ཏཱིཧི ཨཱཀཱརེཧི ཨུཔཊྛཧནྟི ཕསྶཝསེན ཝཱ ཝེདནཱཝསེན ཝཱ ཝིཉྙཱཎཝསེན ཝཱ. ཀཐཾ? ཨེཀསྶ ཏཱཝ ‘‘པཐཝཱིདྷཱཏུ ཀཀྑལ༹ལཀྑཎཱ’’ཏིཨཱདིནཱ ནཡེན དྷཱཏུཡོ པརིགྒཎྷནྟསྶ པཋམཱབྷིནིཔཱཏོ ཕསྶོ, ཏཾསམྤཡུཏྟཱ ཝེདནཱ ཝེདནཱཀྑནྡྷོ, སཉྙཱ སཉྙཱཀྑནྡྷོ, སདྡྷིཾ ཕསྶེན ཙེཏནཱ སངྑཱརཀྑནྡྷོ, ཙིཏྟཾ ཝིཉྙཱཎཀྑནྡྷོཏི ཨུཔཊྛཱཏི. ཏཐཱ ‘‘ཀེསེ པཐཝཱིདྷཱཏུ ཀཀྑལ༹ལཀྑཎཱ…པེ… ཨསྶཱསཔསྶཱསེ པཐཝཱིདྷཱཏུ ཀཀྑལ༹ལཀྑཎཱ’’ཏི (ཝིསུདྡྷི. ༡.༣༠༧) པཋམཱབྷིནིཔཱཏོ ཕསྶོ, ཏཾསམྤཡུཏྟཱ ཝེདནཱ ཝེདནཱཀྑནྡྷོ…པེ… ཙིཏྟཾ ཝིཉྙཱཎཀྑནྡྷོཏི ཨུཔཊྛཱཏི. ཨེཝཾ ཨརཱུཔདྷམྨཱ ཕསྶཝསེན ཨུཔཊྛཧནྟི.

ཨེཀསྶ ‘‘པཐཝཱིདྷཱཏུ ཀཀྑལ༹ལཀྑཎཱ’’ཏི ཏདཱརམྨཎརསཱནུབྷཝནཀཝེདནཱ ཝེདནཱཀྑནྡྷོ, ཏཾསམྤཡུཏྟཱ སཉྙཱ སཉྙཱཀྑནྡྷོ, ཏཾསམྤཡུཏྟོ ཕསྶོ ¶ ཙ ཙེཏནཱ ཙ སངྑཱརཀྑནྡྷོ, ཏཾསམྤཡུཏྟཾ ཙིཏྟཾ ཝིཉྙཱཎཀྑནྡྷོཏི ཨུཔཊྛཱཏི. ཏཐཱ ‘‘ཀེསེ པཐཝཱིདྷཱཏུ ཀཀྑལ༹ལཀྑཎཱ ¶ …པེ… ཨསྶཱསཔསྶཱསེ པཐཝཱིདྷཱཏུ ཀཀྑལ༹ལཀྑཎཱ’’ཏི ཏདཱརམྨཎརསཱནུབྷཝནཀཝེདནཱ ཝེདནཱཀྑནྡྷོ…པེ… ཏཾསམྤཡུཏྟཾ ཙིཏྟཾ ཝིཉྙཱཎཀྑནྡྷོཏི ཨུཔཊྛཱཏི. ཨེཝཾ ཝེདནཱཝསེན ཨརཱུཔདྷམྨཱ ཨུཔཊྛཧནྟི.

ཨཔརསྶ ‘‘པཐཝཱིདྷཱཏུ ཀཀྑལ༹ལཀྑཎཱ’’ཏི ཨཱརམྨཎཔཊིཝིཛཱནནཾ ཝིཉྙཱཎཾ ཝིཉྙཱཎཀྑནྡྷོ, ཏཾསམྤཡུཏྟཱ ཝེདནཱ ཝེདནཱཀྑནྡྷོ, སཉྙཱ སཉྙཱཀྑནྡྷོ, ཕསྶོ ཙ ཙེཏནཱ ཙ སངྑཱརཀྑནྡྷོཏི ཨུཔཊྛཱཏི. ཏཐཱ ‘‘ཀེསེ པཐཝཱིདྷཱཏུ ཀཀྑལ༹ལཀྑཎཱ…པེ… ཨསྶཱསཔསྶཱསེ པཐཝཱིདྷཱཏུ ཀཀྑལ༹ལཀྑཎཱ’’ཏི ཨཱརམྨཎཔཊིཝིཛཱནནཾ ཝིཉྙཱཎཾ ཝིཉྙཱཎཀྑནྡྷོ, ཏཾསམྤཡུཏྟཱ ཝེདནཱ ཝེདནཱཀྑནྡྷོ, སཉྙཱ སཉྙཱཀྑནྡྷོ, ཕསྶོ ཙ ཙེཏནཱ ཙ སངྑཱརཀྑནྡྷོཏི ཨུཔཊྛཱཏི. ཨེཝཾ ཝིཉྙཱཎཝསེན ཨརཱུཔདྷམྨཱ ཨུཔཊྛཧནྟི.

ཨེཏེནེཝ ཨུཔཱཡེན ‘‘ཀམྨསམུཊྛཱནེ ཀེསེ པཐཝཱིདྷཱཏུ ཀཀྑལ༹ལཀྑཎཱ’’ཏིཨཱདིནཱ ནཡེན དྭཱཙཏྟཱལཱིསཱཡ དྷཱཏུཀོཊྛཱསེསུ ཙཏུནྣཾ ཙཏུནྣཾ དྷཱཏཱུནཾ ཝསེན, སེསེསུ ཙ ཙཀྑུདྷཱཏུཨཱདཱིསུ རཱུཔཔརིགྒཧམུཁེསུ སབྦཾ ནཡབྷེདཾ ཨནུགནྟྭཱ ཡོཛནཱ ཀཱཏབྦཱ.

༦༧༡. ཡསྨཱ ཙ ཨེཝཾ སུཝིསུདྡྷརཱུཔཔརིགྒཧསྶེཝ ཏསྶ ཨརཱུཔདྷམྨཱ ཏཱིཧཱཀཱརེཧི པཱཀཊཱ ཧོནྟི. ཏསྨཱ སུཝིསུདྡྷརཱུཔཔརིགྒཧེནེཝ ཨརཱུཔཔརིགྒཧཱཡ ཡོགོ ཀཱཏབྦོ, ན ཨིཏརེན. སཙེ ཧི ཨེཀསྨིཾ ཝཱ རཱུཔདྷམྨེ ཨུཔཊྛིཏེ དྭཱིསུ ཝཱ རཱུཔཾ པཧཱཡ ཨརཱུཔཔརིགྒཧཾ ཨཱརབྷཏི ཀམྨཊྛཱནཏོ པརིཧཱཡཏི, པཐཝཱིཀསིཎབྷཱཝནཱཡ ཝུཏྟཔྤཀཱརཱ པབྦཏེཡྻཱ གཱཝཱི ཝིཡ. སུཝིསུདྡྷརཱུཔཔརིགྒཧསྶ པན ཨརཱུཔཔརིགྒཧཱཡ ཡོགཾ ཀརོཏོ ཀམྨཊྛཱནཾ ཝུདྡྷིཾ ཝིརཱུལ༹ྷིཾ ཝེཔུལླཾ པཱཔུཎཱཏི.

སོ ཨེཝཾ ཕསྶཱདཱིནཾ ཝསེན ཨུཔཊྛིཏེ ཙཏྟཱརོ ཨརཱུཔིནོ ཁནྡྷེ ནཱམནྟི, ཏེསཾ ཨཱརམྨཎབྷཱུཏཱནི ཙཏྟཱརི མཧཱབྷཱུཏཱནི, ཙཏུནྣཉྩ མཧཱབྷཱུཏཱནཾ ཨུཔཱདཱཡརཱུཔཾ རཱུཔནྟི ཝཝཏྠཔེཏི. ཨིཏི ཨཊྛཱརས དྷཱཏུཡོ དྭཱདསཱཡཏནཱནི པཉྩཀྑནྡྷཱཏི སབྦེཔི ཏེབྷཱུམཀེ དྷམྨེ ཁགྒེན སམུགྒཾ ཝིཝརམཱནོ ¶ ཝིཡ ཡམཀཏཱལཀནྡཾ ཕཱལཡམཱནོ ཝིཡ ཙ ནཱམཉྩ རཱུཔཉྩཱཏི དྭེདྷཱ ཝཝཏྠཔེཏི. ནཱམརཱུཔམཏྟཏོ ཨུདྡྷཾ ཨཉྙོ སཏྟོ ཝཱ པུགྒལོ ཝཱ དེཝོ ཝཱ བྲཧྨཱ ཝཱ ནཏྠཱིཏི ནིཊྛཾ གཙྪཏི.

སམྦཧུལསུཏྟནྟསཾསནྡནཱ

༦༧༢. སོ ¶ ཨེཝཾ ཡཱཐཱཝསརསཏོ ནཱམརཱུཔཾ ཝཝཏྠཔེཏྭཱ སུཊྛུཏརཾ ‘‘སཏྟོ པུགྒལོ’’ཏི ཨིམིསྶཱ ལོཀསམཉྙཱཡ པཧཱནཏྠཱཡ སཏྟསམྨོཧསྶ སམཏིཀྐམཏྠཱཡ ཨསམྨོཧབྷཱུམིཡཾ ཙིཏྟཾ ཋཔནཏྠཱཡ སམྦཧུལསུཏྟནྟཝསེན ‘‘ནཱམརཱུཔམཏྟམེཝིདཾ, ན སཏྟོ, ན པུགྒལོ ཨཏྠཱི’’ཏི ཨེཏམཏྠཾ སཾསནྡེཏྭཱ ཝཝཏྠཔེཏི. ཝུཏྟཉྷེཏཾ –

‘‘ཡཐཱཔི ཨངྒསམྦྷཱརཱ, ཧོཏི སདྡོ རཐོ ཨིཏི;

ཨེཝཾ ཁནྡྷེསུ སནྟེསུ, ཧོཏི སཏྟོཏི སམྨུཏཱི’’ཏི. (སཾ. ནི. ༡.༡༧༡);

ཨཔརམྤི ཝུཏྟཾ, ‘‘སེཡྻཐཱཔི, ཨཱཝུསོ, ཀཊྛཉྩ པཊིཙྩ ཝལླིཉྩ པཊིཙྩ མཏྟིཀཉྩ པཊིཙྩ ཏིཎཉྩ པཊིཙྩ ཨཱཀཱསོ པརིཝཱརིཏོ ཨགཱརནྟྭེཝ སངྑཾ གཙྪཏི, ཨེཝམེཝ ཁོ, ཨཱཝུསོ, ཨཊྛིཉྩ པཊིཙྩ ནྷཱརུཉྩ པཊིཙྩ མཾསཉྩ པཊིཙྩ ཙམྨཉྩ པཊིཙྩ ཨཱཀཱསོ པརིཝཱརིཏོ རཱུཔནྟྭེཝ སངྑཾ གཙྪཏཱི’’ཏི (མ. ནི. ༡.༣༠༦).

ཨཔརམྤི ཝུཏྟཾ –

‘‘དུཀྑམེཝ ཧི སམྦྷོཏི, དུཀྑཾ ཏིཊྛཏི ཝེཏི ཙ;

ནཱཉྙཏྲ དུཀྑཱ སམྦྷོཏི, ནཱཉྙཾ དུཀྑཱ ནིརུཛ྄ཛྷཏཱི’’ཏི. (སཾ. ནི. ༡.༡༧༡);

ཨུཔམཱཧི ནཱམརཱུཔཝིབྷཱཝནཱ

༦༧༣. ཨེཝཾ ཨནེཀསཏེཧི སུཏྟནྟེཧི ནཱམརཱུཔམེཝ དཱིཔིཏཾ, ན སཏྟོ ན པུགྒལོ. ཏསྨཱ ཡཐཱ ཨཀྑཙཀྐཔཉྫརཨཱིསཱདཱིསུ ཨངྒསམྦྷཱརེསུ ཨེཀེནཱཀཱརེན སཎྛིཏེསུ རཐོཏི ཝོཧཱརམཏྟཾ ཧོཏི, པརམཏྠཏོ ཨེཀེཀསྨིཾ ཨངྒེ ཨུཔཔརིཀྑིཡམཱནེ རཐོ ནཱམ ནཏྠི. ཡཐཱ ཙ ཀཊྛཱདཱིསུ གེཧསམྦྷཱརེསུ ཨེཀེནཱཀཱརེན ཨཱཀཱསཾ པརིཝཱརེཏྭཱ ཋིཏེསུ གེཧནྟི ཝོཧཱརམཏྟཾ ཧོཏི, པརམཏྠཏོ གེཧཾ ནཱམ ནཏྠི. ཡཐཱ ཙ ཨངྒུལིཨངྒུཊྛཱདཱིསུ ཨེཀེནཱཀཱརེན ཋིཏེསུ མུཊྛཱིཏི ཝོཧཱརམཏྟཾ ¶ ཧོཏི. དོཎིཏནྟིཨཱདཱིསུ ཝཱིཎཱཏི. ཧཏྠིཨསྶཱདཱིསུ སེནཱཏི. པཱཀཱརགེཧགོཔུརཱདཱིསུ ¶ ནགརནྟི. ཁནྡྷསཱཁཱཔལཱསཱདཱིསུ ཨེཀེནཱཀཱརེན ཋིཏེསུ རུཀྑོཏི ཝོཧཱརམཏྟཾ ཧོཏི, པརམཏྠཏོ ཨེཀེཀསྨིཾ ཨཝཡཝེ ཨུཔཔརིཀྑིཡམཱནེ རུཀྑོ ནཱམ ནཏྠི. ཨེཝམེཝཾ པཉྩསུ ཨུཔཱདཱནཀྑནྡྷེསུ སཏི ‘‘སཏྟོ, པུགྒལོ’’ཏི ཝོཧཱརམཏྟཾ ཧོཏི, པརམཏྠཏོ ཨེཀེཀསྨིཾ དྷམྨེ ཨུཔཔརིཀྑིཡམཱནེ ‘‘ཨསྨཱིཏི ཝཱ ཨཧནྟི ཝཱ’’ཏི གཱཧསྶ ཝཏྠུབྷཱུཏོ སཏྟོ ནཱམ ནཏྠི. པརམཏྠཏོ པན ནཱམརཱུཔམཏྟམེཝ ཨཏྠཱིཏི. ཨེཝཾ པསྶཏོ ཧི དསྶནཾ ཡཐཱབྷཱུཏདསྶནཾ ནཱམ ཧོཏི.

༦༧༤. ཡོ པནེཏཾ ཡཐཱབྷཱུཏདསྶནཾ པཧཱཡ ‘‘སཏྟོ ཨཏྠཱི’’ཏི གཎྷཱཏི. སོ ཏསྶ ཝིནཱསཾ ཨནུཛཱནེཡྻ ཨཝིནཱསཾ ཝཱ. ཨཝིནཱསཾ ཨནུཛཱནནྟོ སསྶཏེ པཏཏི. ཝིནཱསཾ ཨནུཛཱནནྟོ ཨུཙྪེདེ པཏཏི. ཀསྨཱ? ཁཱིརནྭཡསྶ དདྷིནོ ཝིཡ ཏདནྭཡསྶ ཨཉྙསྶ ཨབྷཱཝཏོ. སོ ‘‘སསྶཏོ སཏྟོ’’ཏི གཎྷནྟོ ཨོལཱིཡཏི ནཱམ. ‘‘ཨུཙྪིཛྫཏཱི’’ཏི གཎྷནྟོ ཨཏིདྷཱཝཏི ནཱམ. ཏེནཱཧ བྷགཝཱ –

‘‘དྭཱིཧི, བྷིཀྑཝེ, དིཊྛིགཏེཧི པརིཡུཊྛིཏཱ དེཝམནུསྶཱ ཨོལཱིཡནྟི ཨེཀེ, ཨཏིདྷཱཝནྟི ཨེཀེ, ཙཀྑུམནྟོ ཙ པསྶནྟི.

‘‘ཀཐཉྩ, བྷིཀྑཝེ, ཨོལཱིཡནྟི ཨེཀེ? བྷཝཱརཱམཱ, བྷིཀྑཝེ, དེཝམནུསྶཱ བྷཝརཏཱ བྷཝསམུདིཏཱ. ཏེསཾ བྷཝནིརོདྷཱཡ དྷམྨེ དེསིཡམཱནེ ཙིཏྟཾ ན པཀྑནྡཏི ནཔྤསཱིདཏི ན སནྟིཊྛཏི ནཱདྷིམུཙྩཏི. ཨེཝཾ ཁོ, བྷིཀྑཝེ, ཨོལཱིཡནྟི ཨེཀེ.

‘‘ཀཐཉྩ, བྷིཀྑཝེ, ཨཏིདྷཱཝནྟི ཨེཀེ? བྷཝེནེཝ ཁོ པནེཀེ ཨཊྚཱིཡམཱནཱ ཧརཱཡམཱནཱ ཛིགུཙྪམཱནཱ ཝིབྷཝཾ ཨབྷིནནྡནྟི, ཡཏོ ཀིར བྷོ ཨཡཾ ཨཏྟཱ ཀཱཡསྶ བྷེདཱ ཨུཙྪིཛྫཏི ཝིནསྶཏི, ན ཧོཏི པརཾམརཎཱ, ཨེཏཾ སནྟཾ, ཨེཏཾ པཎཱིཏཾ, ཨེཏཾ ཡཱཐཱཝནྟི. ཨེཝཾ ཁོ, བྷིཀྑཝེ, ཨཏིདྷཱཝནྟི ཨེཀེ.

‘‘ཀཐཉྩ, བྷིཀྑཝེ, ཙཀྑུམནྟོ པསྶནྟི? ཨིདྷ, བྷིཀྑཝེ, བྷིཀྑུ བྷཱུཏཾ བྷཱུཏཏོ ¶ པསྶཏི, བྷཱུཏཾ བྷཱུཏཏོ དིསྭཱ བྷཱུཏསྶ ནིབྦིདཱཡ ཝིརཱགཱཡ ནིརོདྷཱཡ པཊིཔནྣོ ཧོཏི. ཨེཝཾ ཁོ, བྷིཀྑཝེ, ཙཀྑུམནྟོ པསྶནྟཱི’’ཏི (ཨིཏིཝུ. ༤༩).

༦༧༥. ཏསྨཱ ¶ ཡཐཱ དཱརུཡནྟཾ སུཉྙཾ ནིཛྫཱིཝཾ ནིརཱིཧཀཾ, ཨཐ ཙ པན དཱརུརཛྫུཀསམཱཡོགཝསེན གཙྪཏིཔི ཏིཊྛཏིཔི. སཨཱིཧཀཾ སབྱཱཔཱརཾ ཝིཡ ཁཱཡཏི, ཨེཝམིདཾ ནཱམརཱུཔམྤི སུཉྙཾ ནིཛྫཱིཝཾ ནིརཱིཧཀཾ, ཨཐ ཙ པན ཨཉྙམཉྙསམཱཡོགཝསེན གཙྪཏིཔི ཏིཊྛཏིཔི. སཨཱིཧཀཾ སབྱཱཔཱརཾ ཝིཡ ཁཱཡཏཱིཏི དཊྛབྦཾ. ཏེནཱཧུ པོརཱཎཱ –

‘‘ནཱམཉྩ རཱུཔཉྩ ཨིདྷཏྠི སཙྩཏོ,

ན ཧེཏྠ སཏྟོ མནུཛོ ཙ ཝིཛྫཏི;

སུཉྙཾ ཨིདཾ ཡནྟམིཝཱབྷིསངྑཏཾ,

དུཀྑསྶ པུཉྫོ ཏིཎཀཊྛསཱདིསོ’’ཏི.

ན ཀེཝལཉྩེཏཾ དཱརུཡནྟུཔམཱཡ, ཨཉྙཱཧིཔི ནལ༹ཀལཱཔཱིཨཱདཱིཧི ཨུཔམཱཧི ཝིབྷཱཝེཏབྦཾ – ཡཐཱ ཧི དྭཱིསུ ནལ༹ཀལཱཔཱིསུ ཨཉྙམཉྙཾ ནིསྶཱཡ ཋཔིཏཱསུ ཨེཀཱ ཨེཀིསྶཱ ཨུཔཏྠམྦྷོ ཧོཏི, ཨེཀིསྶཱ པཏམཱནཱཡ ཨིཏརཱཔི པཏཏི, ཨེཝམེཝཾ པཉྩཝོཀཱརབྷཝེ ནཱམརཱུཔཾ ཨཉྙམཉྙཾ ནིསྶཱཡ པཝཏྟཏི, ཨེཀཾ ཨེཀསྶ ཨུཔཏྠམྦྷོ ཧོཏི. མརཎཝསེན ཨེཀསྨིཾ པཏམཱནེ ཨིཏརམྤི པཏཏི. ཏེནཱཧུ པོརཱཎཱ –

‘‘ཡམཀཾ ནཱམརཱུཔཉྩ, ཨུབྷོ ཨཉྙོཉྙནིསྶིཏཱ;

ཨེཀསྨིཾ བྷིཛྫམཱནསྨིཾ, ཨུབྷོ བྷིཛྫནྟི པཙྩཡཱ’’ཏི.

༦༧༦. ཡཐཱ ཙ དཎྜཱབྷིཧཏཾ བྷེརིཾ ནིསྶཱཡ སདྡེ པཝཏྟམཱནེ ཨཉྙཱ བྷེརཱི, ཨཉྙོ སདྡོ, བྷེརིསདྡཱ ཨསམྨིསྶཱ, བྷེརཱི སདྡེན སུཉྙཱ, སདྡོ བྷེརིཡཱ སུཉྙོ, ཨེཝམེཝཾ ཝཏྠུདྭཱརཱརམྨཎསངྑཱཏཾ རཱུཔཾ ནིསྶཱཡ ནཱམེ པཝཏྟམཱནེ ཨཉྙཾ རཱུཔཾ, ཨཉྙཾ ནཱམཾ, ནཱམརཱུཔཱ ཨསམྨིསྶཱ, ནཱམཾ རཱུཔེན སུཉྙཾ, རཱུཔཾ ནཱམེན སུཉྙཾ, ཨཔིཙ ཁོ བྷེརིཾ པཊིཙྩ སདྡོ ཝིཡ རཱུཔཾ པཊིཙྩ ནཱམཾ པཝཏྟཏི. ཏེནཱཧུ པོརཱཎཱ –

‘‘ན ¶ ཙཀྑུཏོ ཛཱཡརེ ཕསྶཔཉྩམཱ,

ན རཱུཔཏོ ནོ ཙ ཨུབྷིནྣམནྟརཱ;

ཧེཏུཾ པཊིཙྩཔྤབྷཝནྟི སངྑཏཱ,

ཡཐཱཔི སདྡོ པཧཊཱཡ བྷེརིཡཱ.

‘‘ན ¶ སོཏཏོ ཛཱཡརེ ཕསྶཔཉྩམཱ,

ན སདྡཏོ ནོ ཙ ཨུབྷིནྣམནྟརཱ…པེ….

‘‘ན གྷཱནཏོ ཛཱཡརེ ཕསྶཔཉྩམཱ,

ན གནྡྷཏོ ནོ ཙ ཨུབྷིནྣམནྟརཱ…པེ….

‘‘ན ཛིཝ྄ཧཱཏོ ཛཱཡརེ ཕསྶཔཉྩམཱ,

ན རསཏོ ནོ ཙ ཨུབྷིནྣམནྟརཱ…པེ….

‘‘ན ཀཱཡཏོ ཛཱཡརེ ཕསྶཔཉྩམཱ,

ན ཕསྶཏོ ནོ ཙ ཨུབྷིནྣམནྟརཱ…པེ….

‘‘ན ཝཏྠུརཱུཔཱ པབྷཝནྟི སངྑཏཱ,

ན ཙཱཔི དྷམྨཱཡཏནེཧི ནིགྒཏཱ;

ཧེཏུཾ པཊིཙྩཔྤབྷཝནྟི སངྑཏཱ,

ཡཐཱཔི སདྡོ པཧཊཱཡ བྷེརིཡཱ’’ཏི.

༦༧༧. ཨཔིཙེཏྠ ནཱམཾ ནིཏྟེཛཾ ན སཀེན ཏེཛེན པཝཏྟིཏུཾ སཀྐོཏི, ན ཁཱདཏི, ན པིཝཏི, ན བྱཱཧརཏི, ན ཨིརིཡཱཔཐཾ ཀཔྤེཏི. རཱུཔམྤི ནིཏྟེཛཾ ན སཀེན ཏེཛེན པཝཏྟིཏུཾ སཀྐོཏི. ན ཧི ཏསྶཱ ཁཱདིཏུཀཱམཏཱ, ནཱཔི པིཝིཏུཀཱམཏཱ, ན བྱཱཧརིཏུཀཱམཏཱ, ན ཨིརིཡཱཔཐཾ ཀཔྤེཏུཀཱམཏཱ, ཨཐ ཁོ ནཱམཾ ནིསྶཱཡ རཱུཔཾ པཝཏྟཏི, རཱུཔཾ ནིསྶཱཡ ནཱམཾ པཝཏྟཏི, ནཱམསྶ ཁཱདིཏུཀཱམཏཱཡ པིཝིཏུཀཱམཏཱཡ བྱཱཧརིཏུཀཱམཏཱཡ ཨིརིཡཱཔཐཾ ཀཔྤེཏུཀཱམཏཱཡ སཏི རཱུཔཾ ཁཱདཏི, པིཝཏི, བྱཱཧརཏི, ཨིརིཡཱཔཐཾ ཀཔྤེཏི.

ཨིམསྶ ¶ པནཏྠསྶ ཝིབྷཱཝནཏྠཱཡ ཨིམཾ ཨུཔམཾ ཨུདཱཧརནྟི – ཡཐཱ ཛཙྩནྡྷོ ཙ པཱིཋསཔྤཱི ཙ དིསཱཔཀྐམིཏུཀཱམཱ ཨསྶུ, ཛཙྩནྡྷོ པཱིཋསཔྤིཾ ཨེཝམཱཧ ‘‘ཨཧཾ ཁོ བྷཎེ, སཀྐོམི པཱདེཧི པཱདཀརཎཱིཡཾ ཀཱཏུཾ, ནཏྠི ཙ མེ ཙཀྑཱུནི ཡེཧི སམཝིསམཾ པསྶེཡྻ’’ནྟི. པཱིཋསཔྤཱིཔི ཛཙྩནྡྷཾ ཨེཝམཱཧ ‘‘ཨཧཾ ཁོ བྷཎེ, སཀྐོམི ཙཀྑུནཱ ཙཀྑུཀརཎཱིཡཾ ཀཱཏུཾ, ནཏྠི ཙ མེ པཱདཱནི ཡེཧི ཨབྷིཀྐམེཡྻཾ ཝཱ པཊིཀྐམེཡྻཾ ཝཱ’’ཏི. སོ ཏུཊྛཧཊྛོ ཛཙྩནྡྷོ པཱིཋསཔྤིཾ ཨཾསཀཱུཊཾ ཨཱརོཔེསི. པཱིཋསཔྤཱི ཛཙྩནྡྷསྶ ཨཾསཀཱུཊེ ནིསཱིདིཏྭཱ ཨེཝམཱཧ ‘‘ཝཱམཾ མུཉྩ དཀྑིཎཾ གཎྷ, དཀྑིཎཾ མུཉྩ ཝཱམཾ གཎྷཱ’’ཏི. ཏཏྠ ཛཙྩནྡྷོཔི ནིཏྟེཛོ ¶ དུབྦལོ ན སཀེན ཏེཛེན སཀེན བལེན གཙྪཏི, པཱིཋསཔྤཱིཔི ནིཏྟེཛོ དུབྦལོ ན སཀེན ཏེཛེན སཀེན བལེན གཙྪཏི, ན ཙ ཏེསཾ ཨཉྙམཉྙཾ ནིསྶཱཡ གམནཾ ནཔྤཝཏྟཏི, ཨེཝམེཝཾ ནཱམམྤི ནིཏྟེཛཾ ན སཀེན ཏེཛེན ཨུཔྤཛྫཏི, ན ཏཱསུ ཏཱསུ ཀིརིཡཱསུ པཝཏྟཏི. རཱུཔམྤི ནིཏྟེཛཾ ན སཀེན ཏེཛེན ཨུཔྤཛྫཏི, ན ཏཱསུ ཏཱསུ ཀིརིཡཱསུ པཝཏྟཏི, ན ཙ ཏེསཾ ཨཉྙམཉྙཾ ནིསྶཱཡ ཨུཔྤཏྟི ཝཱ པཝཏྟི ཝཱ ན ཧོཏི. ཏེནེཏཾ ཝུཙྩཏི –

‘‘ན སཀེན བལེན ཛཱཡརེ,

ནོཔི སཀེན བལེན ཏིཊྛརེ;

པརདྷམྨཝསཱནུཝཏྟིནོ,

ཛཱཡརེ སངྑཏཱ ཨཏྟདུབྦལཱ.

‘‘པརཔཙྩཡཏོ ཙ ཛཱཡརེ,

པརཨཱརམྨཎཏོ སམུཊྛིཏཱ;

ཨཱརམྨཎཔཙྩཡེཧི ཙ,

པརདྷམྨེཧི ཙིམེ པབྷཱཝིཏཱ.

‘‘ཡཐཱཔི ནཱཝཾ ནིསྶཱཡ, མནུསྶཱ ཡནྟི ཨཎྞཝེ;

ཨེཝམེཝ རཱུཔཾ ནིསྶཱཡ, ནཱམཀཱཡོ པཝཏྟཏི.

‘‘ཡཐཱ ཙ མནུསྶེ ནིསྶཱཡ, ནཱཝཱ གཙྪཏི ཨཎྞཝེ;

ཨེཝམེཝ ནཱམཾ ནིསྶཱཡ, རཱུཔཀཱཡོ པཝཏྟཏི.

‘‘ཨུབྷོ ¶ ནིསྶཱཡ གཙྪནྟི, མནུསྶཱ ནཱཝཱ ཙ ཨཎྞཝེ;

ཨེཝཾ ནཱམཉྩ རཱུཔཉྩ, ཨུབྷོ ཨཉྙོཉྙནིསྶིཏཱ’’ཏི.

ཨེཝཾ ནཱནཱནཡེཧི ནཱམརཱུཔཾ ཝཝཏྠཱཔཡཏོ སཏྟསཉྙཾ ཨབྷིབྷཝིཏྭཱ ཨསམྨོཧབྷཱུམིཡཾ ཋིཏཾ ནཱམརཱུཔཱནཾ ཡཱཐཱཝདསྶནཾ དིཊྛིཝིསུདྡྷཱིཏི ཝེདིཏབྦཾ. ནཱམརཱུཔཝཝཏྠཱནནྟིཔི སངྑཱརཔརིཙྪེདོཏིཔི ཨེཏསྶེཝ ཨདྷིཝཙནཾ.

ཨིཏི སཱདྷུཛནཔཱམོཛྫཏྠཱཡ ཀཏེ ཝིསུདྡྷིམགྒེ

པཉྙཱབྷཱཝནཱདྷིཀཱརེ

དིཊྛིཝིསུདྡྷིནིདྡེསོ ནཱམ

ཨཊྛཱརསམོ པརིཙྪེདོ.

༡༩. ཀངྑཱཝིཏརཎཝིསུདྡྷིནིདྡེསོ

པཙྩཡཔརིགྒཧཀཐཱ

༦༧༨. ཨེཏསྶེཝ ¶ ¶ པན ནཱམརཱུཔསྶ པཙྩཡཔརིགྒཧཎེན ཏཱིསུ ཨདྡྷཱསུ ཀངྑཾ ཝིཏརིཏྭཱ ཋིཏཾ ཉཱཎཾ ཀངྑཱཝིཏརཎཝིསུདྡྷི ནཱམ.

ཏཾ སམྤཱདེཏུཀཱམོ བྷིཀྑུ ཡཐཱ ནཱམ ཀུསལོ བྷིསཀྐོ རོགཾ དིསྭཱ ཏསྶ སམུཊྛཱནཾ པརིཡེསཏི. ཡཐཱ ཝཱ པན ཨནུཀམྤཀོ པུརིསོ དཧརཾ ཀུམཱརཾ མནྡཾ ཨུཏྟཱནསེཡྻཀཾ རཐིཀཱཡ ནིཔནྣཾ དིསྭཱ ‘‘ཀསྶ ནུ ཁོ ཨཡཾ པུཏྟཀོ’’ཏི ཏསྶ མཱཏཱཔིཏརོ ཨཱཝཛྫཏི, ཨེཝམེཝ ཏསྶ ནཱམརཱུཔསྶ ཧེཏུཔཙྩཡཔརིཡེསནཾ ཨཱཔཛྫཏི.

སོ ཨཱདིཏོཝ ཨིཏི པཊིསཉྩིཀྑཏི ‘‘ན ཏཱཝིདྷཾ ནཱམརཱུཔཾ ཨཧེཏུཀཾ, སབྦཏྠ སབྦདཱ སབྦེསཉྩ ཨེཀསདིསབྷཱཝཱཔཏྟིཏོ, ན ཨིསྶརཱདིཧེཏུཀཾ, ནཱམརཱུཔཏོ ཨུདྡྷཾ ཨིསྶརཱདཱིནཾ ཨབྷཱཝཏོ. ཡེཔི ནཱམརཱུཔམཏྟམེཝ ཨིསྶརཱདཡོཏི ཝདནྟི, ཏེསཾ ཨིསྶརཱདིསངྑཱཏནཱམརཱུཔསྶ ཨཧེཏུཀབྷཱཝཔྤཏྟིཏོ. ཏསྨཱ བྷཝིཏབྦམསྶ ཧེཏུཔཙྩཡེཧི, ཀེ ནུ ཁོ ཏེ’’ཏི.

༦༧༩. སོ ཨེཝཾ ནཱམརཱུཔསྶ ཧེཏུཔཙྩཡེ ཨཱཝཛྫེཏྭཱ ཨིམསྶ ཏཱཝ རཱུཔཀཱཡསྶ ཨེཝཾ ཧེཏུཔཙྩཡེ པརིགྒཎྷཱཏི – ‘‘ཨཡཾ ཀཱཡོ ནིབྦཏྟམཱནོ ནེཝ ཨུཔྤལཔདུམཔུཎྜརཱིཀསོགནྡྷིཀཱདཱིནཾ ཨབྦྷནྟརེ ནིབྦཏྟཏི, ན མཎིམུཏྟཱཧཱརཱདཱིནཾ, ཨཐ ཁོ ཨཱམཱསཡཔཀྐཱསཡཱནཾ ཨནྟརེ ཨུདརཔཊལཾ པཙྪཏོ པིཊྛིཀཎྚཀཾ པུརཏོ ཀཏྭཱ ཨནྟཨནྟགུཎཔརིཝཱརིཏོ སཡམྤི དུགྒནྡྷཛེགུཙྪཔཊིཀྐཱུལོ དུགྒནྡྷཛེགུཙྪཔཊིཀྐཱུལེ པརམསམྦཱདྷེ ཨོཀཱསེ པཱུཏིམཙྪཔཱུཏིཀུམྨཱསཨོལི༹གལླཙནྡནིཀཱདཱིསུ ཀིམིཝ ནིབྦཏྟཏི. ཏསྶེཝཾ ནིབྦཏྟམཱནསྶ ‘ཨཝིཛྫཱ ཏཎྷཱ ཨུཔཱདཱནཾ ཀམྨ’ནྟི ཨིམེ ཙཏྟཱརོ དྷམྨཱ ནིབྦཏྟཀཏྟཱ ཧེཏུ, ཨཱཧཱརོ ཨུཔཏྠམྦྷཀཏྟཱ པཙྩཡོཏི པཉྩ ¶ དྷམྨཱ ཧེཏུཔཙྩཡཱ ཧོནྟི. ཏེསུཔི ཨཝིཛྫཱདཡོ ཏཡོ ཨིམསྶ ཀཱཡསྶ མཱཏཱ ཝིཡ དཱརཀསྶ ཨུཔནིསྶཡཱ ཧོནྟི. ཀམྨཾ པིཏཱ ཝིཡ པུཏྟསྶ ཛནཀཾ ¶ . ཨཱཧཱརོ དྷཱཏི ཝིཡ དཱརཀསྶ སནྡྷཱརཀོ’’ཏི. ཨེཝཾ རཱུཔཀཱཡསྶ པཙྩཡཔརིགྒཧཾ ཀཏྭཱ, པུན ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎ’’ནྟིཨཱདིནཱ (སཾ. ནི. ༢.༤༣) ནཡེན ནཱམཀཱཡསྶ པཙྩཡཔརིགྒཧཾ ཀརོཏི.

སོ ཨེཝཾ པཙྩཡཏོ ནཱམརཱུཔསྶ པཝཏྟིཾ དིསྭཱ ཡཐཱ ཨིདཾ ཨེཏརཧི, ཨེཝཾ ཨཏཱིཏེཔི ཨདྡྷཱནེ པཙྩཡཏོ པཝཏྟིཏྠ, ཨནཱགཏེཔི པཙྩཡཏོ པཝཏྟིསྶཏཱིཏི སམནུཔསྶཏི.

༦༨༠. ཏསྶེཝཾ སམནུཔསྶཏོ ཡཱ སཱ པུབྦནྟཾ ཨཱརབྦྷ ‘‘ཨཧོསིཾ ནུ ཁོ ཨཧཾ ཨཏཱིཏམདྡྷཱནཾ, ན ནུ ཁོ ཨཧོསིཾ ཨཏཱིཏམདྡྷཱནཾ, ཀིཾ ནུ ཁོ ཨཧོསིཾ ཨཏཱིཏམདྡྷཱནཾ, ཀཐཾ ནུ ཁོ ཨཧོསིཾ ཨཏཱིཏམདྡྷཱནཾ, ཀིཾ ཧུཏྭཱ ཀིཾ ཨཧོསིཾ ནུ ཁོ ཨཧཾ ཨཏཱིཏམདྡྷཱན’’ནྟི (མ. ནི. ༡.༡༨; སཾ. ནི. ༢.༢༠) པཉྩཝིདྷཱ ཝིཙིཀིཙྪཱ ཝུཏྟཱ, ཡཱཔི ཨཔརནྟཾ ཨཱརབྦྷ ‘‘བྷཝིསྶཱམི ནུ ཁོ ཨཧཾ ཨནཱགཏམདྡྷཱནཾ, ན ནུ ཁོ བྷཝིསྶཱམི ཨནཱགཏམདྡྷཱནཾ, ཀིཾ ནུ ཁོ བྷཝིསྶཱམི ཨནཱགཏམདྡྷཱནཾ, ཀཐཾ ནུ ཁོ བྷཝིསྶཱམི ཨནཱགཏམདྡྷཱནཾ, ཀིཾ ཧུཏྭཱ ཀིཾ བྷཝིསྶཱམི ནུ ཁོ ཨཧཾ ཨནཱགཏམདྡྷཱན’’ནྟི པཉྩཝིདྷཱ ཝིཙིཀིཙྪཱ ཝུཏྟཱ, ཡཱཔི པཙྩུཔྤནྣཾ ཨཱརབྦྷ ‘‘ཨེཏརཧི ཝཱ པན པཙྩུཔྤནྣཾ ཨདྡྷཱནཾ ཨཛ྄ཛྷཏྟཾ ཀཐཾཀཐཱི ཧོཏི – ཨཧཾ ནུ ཁོསྨི, ནོ ནུ ཁོསྨི, ཀིཾ ནུ ཁོསྨི, ཀཐཾ ནུ ཁོསྨི, ཨཡཾ ནུ ཁོ སཏྟོ ཀུཏོ ཨཱགཏོ, སོ ཀུཧིཾ གཱམཱི བྷཝིསྶཏཱི’’ཏི (མ. ནི. ༡.༡༨) ཚབྦིདྷཱ ཝིཙིཀིཙྪཱ ཝུཏྟཱ, སཱ སབྦཱཔི པཧཱིཡཏི.

༦༨༡. ཨཔརོ སཱདྷཱརཎཱསཱདྷཱརཎཝསེན དུཝིདྷཾ ནཱམསྶ པཙྩཡཾ པསྶཏི, ཀམྨཱདིཝསེན ཙཏུབྦིདྷཾ རཱུཔསྶ. དུཝིདྷོ ཧི ནཱམསྶ པཙྩཡོ སཱདྷཱརཎོ ཨསཱདྷཱརཎོ ཙ. ཏཏྠ ཙཀྑཱདཱིནི ཚ དྭཱརཱནི, རཱུཔཱདཱིནི ཚ ཨཱརམྨཎཱནི ནཱམསྶ སཱདྷཱརཎོ པཙྩཡོ, ཀུསལཱདིབྷེདཏོ སབྦཔྤཀཱརསྶཱཔི ཏཏོ པཝཏྟིཏོ. མནསིཀཱརཱདིཀོ ཨསཱདྷཱརཎོ. ཡོནིསོ མནསིཀཱརསདྡྷམྨསྶཝནཱདིཀོ ཧི ཀུསལསྶེཝ ཧོཏི, ཝིཔརཱིཏོ ཨཀུསལསྶ, ཀམྨཱདིཀོ ཝིཔཱཀསྶ, བྷཝངྒཱདིཀོ ཀིརིཡསྶཱཏི.

རཱུཔསྶ ¶ པན ཀམྨཾ ཙིཏྟཾ ཨུཏུ ཨཱཧཱརོཏི ཨཡཾ ཀམྨཱདིཀོ ཙཏུབྦིདྷོ པཙྩཡོ. ཏཏྠ ཀམྨཾ ཨཏཱིཏམེཝ ཀམྨསམུཊྛཱནསྶ རཱུཔསྶ པཙྩཡོ ཧོཏི ¶ . ཙིཏྟཾ ཙིཏྟསམུཊྛཱནསྶ ཨུཔྤཛྫམཱནཾ. ཨུཏུཨཱཧཱརཱ ཨུཏུཨཱཧཱརསམུཊྛཱནསྶ ཋིཏིཀྑཎེ པཙྩཡཱ ཧོནྟཱིཏི. ཨེཝམེཝེཀོ ནཱམརཱུཔསྶ པཙྩཡཔརིགྒཧཾ ཀརོཏི.

སོ ཨེཝཾ པཙྩཡཏོ ནཱམརཱུཔསྶ པཝཏྟིཾ དིསྭཱ ཡཐཱ ཨིདཾ ཨེཏརཧི, ཨེཝཾ ཨཏཱིཏེཔི ཨདྡྷཱནེ པཙྩཡཏོ པཝཏྟིཏྠ, ཨནཱགཏེཔི པཙྩཡཏོ པཝཏྟིསྶཏཱིཏི སམནུཔསྶཏི. ཏསྶེཝཾ སམནུཔསྶཏོ ཝུཏྟནཡེནེཝ ཏཱིསུཔི ཨདྡྷཱསུ ཝིཙིཀིཙྪཱ པཧཱིཡཏི.

༦༨༢. ཨཔརོ ཏེསཾཡེཝ ནཱམརཱུཔསངྑཱཏཱནཾ སངྑཱརཱནཾ ཛརཱཔཏྟིཾ ཛིཎྞཱནཉྩ བྷངྒཾ དིསྭཱ ཨིདཾ སངྑཱརཱནཾ ཛརཱམརཎཾ ནཱམ ཛཱཏིཡཱ སཏི ཧོཏི, ཛཱཏི བྷཝེ སཏི, བྷཝོ ཨུཔཱདཱནེ སཏི, ཨུཔཱདཱནཾ ཏཎྷཱཡ སཏི, ཏཎྷཱ ཝེདནཱཡ སཏི, ཝེདནཱ ཕསྶེ སཏི, ཕསྶོ སལཱ༹ཡཏནེ སཏི, སལཱ༹ཡཏནཾ ནཱམརཱུཔེ སཏི, ནཱམརཱུཔཾ ཝིཉྙཱཎེ སཏི, ཝིཉྙཱཎཾ སངྑཱརེསུ སཏི, སངྑཱརཱ ཨཝིཛྫཱཡ སཏཱིཏི ཨེཝཾ པཊིལོམཔཊིཙྩསམུཔྤཱདཝསེན ནཱམརཱུཔསྶ པཙྩཡཔརིགྒཧཾ ཀརོཏི. ཨཐསྶ ཝུཏྟནཡེནེཝ ཝིཙིཀིཙྪཱ པཧཱིཡཏི.

༦༨༣. ཨཔརོ ‘‘ཨིཏི ཁོ ཨཝིཛྫཱཔཙྩཡཱ སངྑཱརཱ’’ཏི (སཾ. ནི. ༢.༢) པུབྦེ ཝིཏྠཱརེཏྭཱ དསྶིཏཨནུལོམཔཊིཙྩསམུཔྤཱདཝསེནེཝ ནཱམརཱུཔསྶ པཙྩཡཔརིགྒཧཾ ཀརོཏི. ཨཐསྶ ཝུཏྟནཡེནེཝ ཀངྑཱ པཧཱིཡཏི.

༦༨༤. ཨཔརོ ‘‘པུརིམཀམྨབྷཝསྨིཾ མོཧོ ཨཝིཛྫཱ, ཨཱཡཱུཧནཱ སངྑཱརཱ, ནིཀནྟི ཏཎྷཱ, ཨུཔགམནཾ ཨུཔཱདཱནཾ, ཙེཏནཱ བྷཝོཏི ཨིམེ པཉྩ དྷམྨཱ པུརིམཀམྨབྷཝསྨིཾ ཨིདྷ པཊིསནྡྷིཡཱ པཙྩཡཱ, ཨིདྷ པཊིསནྡྷི ཝིཉྙཱཎཾ, ཨོཀྐནྟི ནཱམརཱུཔཾ, པསཱདོ ཨཱཡཏནཾ, ཕུཊྛོ ཕསྶོ, ཝེདཡིཏཾ ཝེདནཱཏི ཨིམེ པཉྩ དྷམྨཱ ཨིདྷཱུཔཔཏྟིབྷཝསྨིཾ པུརེཀཏསྶ ཀམྨསྶ པཙྩཡཱ. ཨིདྷ པརིཔཀྐཏྟཱ ཨཱཡཏནཱནཾ མོཧོ ཨཝིཛྫཱ…པེ… ཙེཏནཱ བྷཝོཏི ཨིམེ པཉྩ དྷམྨཱ ཨིདྷ ཀམྨབྷཝསྨིཾ ཨཱཡཏིཾ པཊིསནྡྷིཡཱ པཙྩཡཱ’’ཏི (པཊི. མ. ༡.༤༧) ཨེཝཾ ཀམྨཝཊྚཝིཔཱཀཝཊྚཝསེན ནཱམརཱུཔསྶ པཙྩཡཔརིགྒཧཾ ཀརོཏི.

༦༨༥. ཏཏྠ ¶ ཙཏུབྦིདྷཾ ཀམྨཾ – དིཊྛདྷམྨཝེདནཱིཡཾ, ཨུཔཔཛྫཝེདནཱིཡཾ, ཨཔརཱཔརིཡཝེདནཱིཡཾ, ཨཧོསིཀམྨནྟི. ཏེསུ ཨེཀཛཝནཝཱིཐིཡཾ སཏྟསུ ཙིཏྟེསུ ཀུསལཱ ¶ ཝཱ ཨཀུསལཱ ཝཱ པཋམཛཝནཙེཏནཱ དིཊྛིདྷམྨཝེདནཱིཡཀམྨཾ ནཱམ. ཏཾ ཨིམསྨིཉྙེཝ ཨཏྟབྷཱཝེ ཝིཔཱཀཾ དེཏི. ཏཐཱ ཨསཀྐོནྟཾ པན ‘‘ཨཧོསིཀམྨཾ ནཱཧོསི ཀམྨཝིཔཱཀོ, ན བྷཝིསྶཏི ཀམྨཝིཔཱཀོ, ནཏྠི ཀམྨཝིཔཱཀོ’’ཏི (པཊི. མ. ༡.༢༣༤) ཨིམསྶ ཏིཀསྶ ཝསེན ཨཧོསིཀམྨཾ ནཱམ ཧོཏི. ཨཏྠསཱདྷིཀཱ པན སཏྟམཛཝནཙེཏནཱ ཨུཔཔཛྫཝེདནཱིཡཀམྨཾ ནཱམ. ཏཾ ཨནནྟརེ ཨཏྟབྷཱཝེ ཝིཔཱཀཾ དེཏི. ཏཐཱ ཨསཀྐོནྟཾ ཝུཏྟནཡེནེཝ ཨཧོསིཀམྨཾ ནཱམ ཧོཏི. ཨུབྷིནྣཾ ཨནྟརེ པཉྩ ཛཝནཙེཏནཱ ཨཔརཱཔརིཡཝེདནཱིཡཀམྨཾ ནཱམ. ཏཾ ཨནཱགཏེ ཡདཱ ཨོཀཱསཾ ལབྷཏི, ཏདཱ ཝིཔཱཀཾ དེཏི. སཏི སཾསཱརཔྤཝཏྟིཡཱ ཨཧོསིཀམྨཾ ནཱམ ན ཧོཏི.

༦༨༦. ཨཔརམྤི ཙཏུབྦིདྷཾ ཀམྨཾ – ཡཾ གརུཀཾ, ཡཾ བཧུལཾ, ཡདཱསནྣཾ, ཀཊཏྟཱ ཝཱ པན ཀམྨནྟི. ཏཏྠ ཀུསལཾ ཝཱ ཧོཏུ ཨཀུསལཾ ཝཱ, གརུཀཱགརུཀེསུ ཡཾ གརུཀཾ མཱཏུགྷཱཏཱདིཀམྨཾ ཝཱ མཧགྒཏཀམྨཾ ཝཱ, ཏདེཝ པཋམཾ ཝིཔཙྩཏི. ཏཐཱ བཧུལཱབཧུལེསུཔི ཡཾ བཧུལཾ ཧོཏི སུསཱིལྱཾ ཝཱ དུསྶཱིལྱཾ ཝཱ, ཏདེཝ པཋམཾ ཝིཔཙྩཏི. ཡདཱསནྣཾ ནཱམ མརཎཀཱལེ ཨནུསྶརིཏཀམྨཾ. ཡཉྷི ཨཱསནྣམརཎོ ཨནུསྶརིཏུཾ སཀྐོཏི, ཏེནེཝ ཨུཔཔཛྫཏི. ཨེཏེཧི པན ཏཱིཧི མུཏྟཾ པུནཔྤུནཾ ལདྡྷཱསེཝནཾ ཀཊཏྟཱ ཝཱ པན ཀམྨཾ ནཱམ ཧོཏི, ཏེསཾ ཨབྷཱཝེ ཏཾ པཊིསནྡྷིཾ ཨཱཀཌྜྷཏི.

༦༨༧. ཨཔརམྤི ཙཏུབྦིདྷཾ ཀམྨཾ – ཛནཀཾ, ཨུཔཏྠམྦྷཀཾ, ཨུཔཔཱིལ༹ཀཾ, ཨུཔགྷཱཏཀནྟི. ཏཏྠ ཛནཀཾ ནཱམ ཀུསལམྤི ཧོཏི ཨཀུསལམྤི. ཏཾ པཊིསནྡྷིཡམྤི པཝཏྟེཔི རཱུཔཱརཱུཔཝིཔཱཀཀྑནྡྷེ ཛནེཏི. ཨུཔཏྠམྦྷཀཾ པན ཝིཔཱཀཾ ཛནེཏུཾ ན སཀྐོཏི, ཨཉྙེན ཀམྨེན དིནྣཱཡ པཊིསནྡྷིཡཱ ཛནིཏེ ཝིཔཱཀེ ཨུཔྤཛྫམཱནཀསུཁདུཀྑཾ ཨུཔཏྠམྦྷེཏི, ཨདྡྷཱནཾ པཝཏྟེཏི. ཨུཔཔཱིལ༹ཀཾ ཨཉྙེན ཀམྨེན དིནྣཱཡ པཊིསནྡྷིཡཱ ཛནིཏེ ཝིཔཱཀེ ཨུཔྤཛྫམཱནཀསུཁདུཀྑཾ པཱིལེ༹ཏི བཱདྷཏི, ཨདྡྷཱནཾ པཝཏྟིཏུཾ ན དེཏི. ཨུཔགྷཱཏཀཾ པན སཡཾ ཀུསལམྤི ཨཀུསལམྤི སམཱནཾ ཨཉྙཾ དུབྦལཀམྨཾ གྷཱཏེཏྭཱ ཏསྶ ཝིཔཱཀཾ པཊིབཱཧིཏྭཱ ཨཏྟནོ ཝིཔཱཀསྶ ཨོཀཱསཾ ཀརོཏི. ཨེཝཾ པན ཀམྨེན ཀཏེ ཨོཀཱསེ ཏཾ ཝིཔཱཀཾ ཨུཔྤནྣཾ ནཱམ ཝུཙྩཏི.

ཨིཏི ¶ ཨིམེསཾ དྭཱདསནྣཾ ཀམྨཱནཾ ཀམྨནྟརཉྩེཝ ཝིཔཱཀནྟརཉྩ བུདྡྷཱནཾ ཀམྨཝིཔཱཀཉཱཎསྶེཝ ¶ ཡཱཐཱཝསརསཏོ པཱཀཊཾ ཧོཏི, ཨསཱདྷཱརཎཾ སཱཝཀེཧི. ཝིཔསྶཀེན པན ཀམྨནྟརཉྩ ཝིཔཱཀནྟརཉྩ ཨེཀདེསཏོ ཛཱནིཏབྦཾ. ཏསྨཱ ཨཡཾ མུཁམཏྟདསྶནེན ཀམྨཝིསེསོ པཀཱསིཏོཏི.

༦༨༨. ཨིཏི ཨིམཾ དྭཱདསཝིདྷཾ ཀམྨཾ ཀམྨཝཊྚེ པཀྑིཔིཏྭཱ ཨེཝཾ ཨེཀོ ཀམྨཝཊྚཝིཔཱཀཝཊྚཝསེན ནཱམརཱུཔསྶ པཙྩཡཔརིགྒཧཾ ཀརོཏི. སོ ཨེཝཾ ཀམྨཝཊྚཝིཔཱཀཝཊྚཝསེན པཙྩཡཏོ ནཱམརཱུཔསྶ པཝཏྟིཾ དིསྭཱ ‘‘ཡཐཱ ཨིདཾ ཨེཏརཧི, ཨེཝཾ ཨཏཱིཏེཔི ཨདྡྷཱནེ ཀམྨཝཊྚཝིཔཱཀཝཊྚཝསེན པཙྩཡཏོ པཝཏྟིཏྠ, ཨནཱགཏེཔི ཀམྨཝཊྚཝིཔཱཀཝཊྚཝསེནེཝ པཙྩཡཏོ པཝཏྟིསྶཏཱི’’ཏི. ཨིཏི ཀམྨཉྩེཝ ཀམྨཝིཔཱཀོ ཙ, ཀམྨཝཊྚཉྩ ཝིཔཱཀཝཊྚཉྩ, ཀམྨཔཝཏྟཉྩ ཝིཔཱཀཔཝཏྟཉྩ, ཀམྨསནྟཏི ཙ ཝིཔཱཀསནྟཏི ཙ, ཀིརིཡཱ ཙ ཀིརིཡཱཕལཉྩ.

ཀམྨཱ ཝིཔཱཀཱ ཝཏྟནྟི, ཝིཔཱཀོ ཀམྨསམྦྷཝོ;

ཀམྨཱ པུནབྦྷཝོ ཧོཏི, ཨེཝཾ ལོཀོ པཝཏྟཏཱིཏི. –

སམནུཔསྶཏི. ཏསྶེཝཾ སམནུཔསྶཏོ ཡཱ སཱ པུབྦནྟཱདཡོ ཨཱརབྦྷ ‘‘ཨཧོསིཾ ནུ ཁོ ཨཧ’’ནྟིཨཱདིནཱ ནཡེན ཝུཏྟཱ སོལ༹སཝིདྷཱ ཝིཙིཀིཙྪཱ, སཱ སབྦཱ པཧཱིཡཏི. སབྦབྷཝཡོནིགཏིཊྛིཏིནིཝཱསེསུ ཧེཏུཕལསམྦནྡྷཝསེན པཝཏྟམཱནཾ ནཱམརཱུཔམཏྟམེཝ ཁཱཡཏི. སོ ནེཝ ཀཱརཎཏོ ཨུདྡྷཾ ཀཱརཀཾ པསྶཏི, ན ཝིཔཱཀཔྤཝཏྟིཏོ ཨུདྡྷཾ ཝིཔཱཀཔཊིསཾཝེདཀཾ. ཀཱརཎེ པན སཏི ‘‘ཀཱརཀོ’’ཏི, ཝིཔཱཀཔྤཝཏྟིཡཱ སཏི ‘‘པཊིསཾཝེདཀོ’’ཏི སམཉྙཱམཏྟེན པཎྜིཏཱ ཝོཧརནྟིཙྩེཝསྶ སམྨཔྤཉྙཱཡ སུདིཊྛཾ ཧོཏི.

༦༨༩. ཏེནཱཧུ པོརཱཎཱ –

‘‘ཀམྨསྶ ཀཱརཀོ ནཏྠི, ཝིཔཱཀསྶ ཙ ཝེདཀོ;

སུདྡྷདྷམྨཱ པཝཏྟནྟི, ཨེཝེཏཾ སམྨདསྶནཾ.

‘‘ཨེཝཾ ཀམྨེ ཝིཔཱཀེ ཙ, ཝཏྟམཱནེ སཧེཏུཀེ;

བཱིཛརུཀྑཱདིཀཱནཾཝ, པུབྦཱ ཀོཊི ན ནཱཡཏི;

ཨནཱགཏེཔི སཾསཱརེ, ཨཔྤཝཏྟཾ ན དིསྶཏི.

‘‘ཨེཏམཏྠཾ ¶ ¶ ཨནཉྙཱཡ, ཏིཏྠིཡཱ ཨསཡཾཝསཱི;

སཏྟསཉྙཾ གཧེཏྭཱན, སསྶཏུཙྪེདདསྶིནོ;

དྭཱསཊྛིདིཊྛིཾ གཎྷནྟི, ཨཉྙམཉྙཝིརོདྷིཏཱ.

‘‘དིཊྛིབནྡྷནབདྡྷཱ ཏེ, ཏཎྷཱསོཏེན ཝུཡ྄ཧརེ;

ཏཎྷཱསོཏེན ཝུཡ྄ཧནྟཱ, ན ཏེ དུཀྑཱ པམུཙྩརེ.

‘‘ཨེཝམེཏཾ ཨབྷིཉྙཱཡ, བྷིཀྑུ བུདྡྷསྶ སཱཝཀོ;

གམྦྷཱིརཾ ནིཔུཎཾ སུཉྙཾ, པཙྩཡཾ པཊིཝིཛ྄ཛྷཏི.

‘‘ཀམྨཾ ནཏྠི ཝིཔཱཀམྷི, པཱཀོ ཀམྨེ ན ཝིཛྫཏི;

ཨཉྙམཉྙཾ ཨུབྷོ སུཉྙཱ, ན ཙ ཀམྨཾ ཝིནཱ ཕལཾ.

‘‘ཡཐཱ ན སཱུརིཡེ ཨགྒི, ན མཎིམྷི ན གོམཡེ;

ན ཏེསཾ བཧི སོ ཨཏྠི, སམྦྷཱརེཧི ཙ ཛཱཡཏི.

‘‘ཏཐཱ ན ཨནྟོ ཀམྨསྶ, ཝིཔཱཀོ ཨུཔལབྦྷཏི;

བཧིདྡྷཱཔི ན ཀམྨསྶ, ན ཀམྨཾ ཏཏྠ ཝིཛྫཏི.

‘‘ཕལེན སུཉྙཾ ཏཾ ཀམྨཾ, ཕལཾ ཀམྨེ ན ཝིཛྫཏི;

ཀམྨཉྩ ཁོ ཨུཔཱདཱཡ, ཏཏོ ནིབྦཏྟཏེ ཕལཾ.

‘‘ན ཧེཏྠ དེཝོ བྲཧྨཱ ཝཱ, སཾསཱརསྶཏྠིཀཱརཀོ;

སུདྡྷདྷམྨཱ པཝཏྟནྟི, ཧེཏུསམྦྷཱརཔཙྩཡཱ’’ཏི.

༦༩༠. ཏསྶེཝཾ ཀམྨཝཊྚཝིཔཱཀཝཊྚཝསེན ནཱམརཱུཔསྶ པཙྩཡཔརིགྒཧཾ ཀཏྭཱ ཏཱིསུ ཨདྡྷཱསུ པཧཱིནཝིཙིཀིཙྪསྶ སབྦེ ཨཏཱིཏཱནཱགཏཔཙྩུཔྤནྣདྷམྨཱ ཙུཏིཔཊིསནྡྷིཝསེན ཝིདིཏཱ ཧོནྟི, སཱསྶ ཧོཏི ཉཱཏཔརིཉྙཱ.

སོ ¶ ཨེཝཾ པཛཱནཱཏི – ཡེ ཨཏཱིཏེ ཀམྨཔཙྩཡཱ ནིབྦཏྟཱ ཁནྡྷཱ, ཏེ ཏཏྠེཝ ནིརུདྡྷཱ, ཨཏཱིཏཀམྨཔཙྩཡཱ པན ཨིམསྨིཾ བྷཝེ ཨཉྙེ ནིབྦཏྟཱ, ཨཏཱིཏབྷཝཏོ ཨིམཾ བྷཝཾ ཨཱགཏོ ཨེཀདྷམྨོཔི ནཏྠི, ཨིམསྨིམྤི བྷཝེ ཀམྨཔཙྩཡེན ནིབྦཏྟཱ ཁནྡྷཱ ནིརུཛ྄ཛྷིསྶནྟི, པུནབྦྷཝེ ཨཉྙེ ནིབྦཏྟིསྶནྟི, ཨིམམྷཱ བྷཝཱ པུནབྦྷཝཾ ཨེཀདྷམྨོཔི ན གམིསྶཏི. ཨཔིཙ ཁོ ཡཐཱ ན ཨཱཙརིཡམུཁཏོ སཛ྄ཛྷཱཡོ ཨནྟེཝཱསིཀསྶ མུཁཾ པཝིསཏི, ན ཙ ཏཔྤཙྩཡཱ ཏསྶ ¶ མུཁེ སཛ྄ཛྷཱཡོ ན ཝཏྟཏི, ན དཱུཏེན མནྟོདཀཾ པཱིཏཾ རོགིནོ ཨུདརཾ པཝིསཏི, ན ཙ ཏསྶ ཏཔྤཙྩཡཱ རོགོ ན ཝཱུཔསམྨཏི, ན མུཁེ མཎྜནཝིདྷཱནཾ ཨཱདཱསཏལཱདཱིསུ མུཁནིམིཏྟཾ གཙྪཏི, ན ཙ ཏཏྠ ཏཔྤཙྩཡཱ མཎྜནཝིདྷཱནཾ ན པཉྙཱཡཏི, ན ཨེཀིསྶཱ ཝཊྚིཡཱ དཱིཔསིཁཱ ཨཉྙཾ ཝཊྚིཾ སངྐམཏི, ན ཙ ཏཏྠ ཏཔྤཙྩཡཱ དཱིཔསིཁཱ ན ནིབྦཏྟཏི, ཨེཝམེཝ ན ཨཏཱིཏབྷཝཏོ ཨིམཾ བྷཝཾ, ཨིཏོ ཝཱ པུནབྦྷཝཾ ཀོཙི དྷམྨོ སངྐམཏི, ན ཙ ཨཏཱིཏབྷཝེ ཁནྡྷཱཡཏནདྷཱཏུཔཙྩཡཱ ཨིདྷ, ཨིདྷ ཝཱ ཁནྡྷཱཡཏནདྷཱཏུཔཙྩཡཱ པུནབྦྷཝེ ཁནྡྷཱཡཏནདྷཱཏུཡོ ན ནིབྦཏྟནྟཱིཏི.

ཡཐེཝ ཙཀྑུཝིཉྙཱཎཾ, མནོདྷཱཏུཨནནྟརཾ;

ན ཙེཝ ཨཱགཏཾ ནཱཔི, ན ནིབྦཏྟཾ ཨནནྟརཾ.

ཏཐེཝ པཊིསནྡྷིམྷི, ཝཏྟཏེ ཙིཏྟསནྟཏི;

པུརིམཾ བྷིཛྫཏེ ཙིཏྟཾ, པཙྪིམཾ ཛཱཡཏེ ཏཏོ.

ཏེསཾ ཨནྟརིཀཱ ནཏྠི, ཝཱིཙི ཏེསཾ ན ཝིཛྫཏི;

ན ཙིཏོ གཙྪཏི ཀིཉྩི, པཊིསནྡྷི ཙ ཛཱཡཏཱིཏི.

༦༩༡. ཨེཝཾ ཙུཏིཔཊིསནྡྷིཝསེན ཝིདིཏསབྦདྷམྨསྶ སབྦཱཀཱརེན ནཱམརཱུཔསྶ པཙྩཡཔརིགྒཧཉཱཎཾ ཐཱམགཏཾ ཧོཏི, སོལ༹སཝིདྷཱ ཀངྑཱ སུཊྛུཏརཾ པཧཱིཡཏི. ན ཀེཝལཉྩ སཱ ཨེཝ, ‘‘སཏྠརི ཀངྑཏཱི’’ཏི (དྷ. ས. ༡༠༠༨) ཨཱདིནཡཔྤཝཏྟཱ ཨཊྛཝིདྷཱཔི ཀངྑཱ པཧཱིཡཏིཡེཝ, དྭཱསཊྛི དིཊྛིགཏཱནི ཝིཀྑམྦྷནྟི. ཨེཝཾ ནཱནཱནཡེཧི ནཱམརཱུཔཔཙྩཡཔརིགྒཧཎེན ཏཱིསུ ཨདྡྷཱསུ ཀངྑཾ ཝིཏརིཏྭཱ ཋིཏཾ ཉཱཎཾ ཀངྑཱཝིཏརཎཝིསུདྡྷཱིཏི ཝེདིཏབྦཾ. དྷམྨཊྛིཏིཉཱཎནྟིཔི ཡཐཱབྷཱུཏཉཱཎནྟིཔི སམྨཱདསྶནནྟིཔི ཨེཏསྶེཝཱདྷིཝཙནཾ. ཝུཏྟཉྷེཏཾ –

‘‘ཨཝིཛྫཱ ¶ པཙྩཡོ, སངྑཱརཱ པཙྩཡསམུཔྤནྣཱ. ཨུབྷོཔེཏེ དྷམྨཱ པཙྩཡསམུཔྤནྣཱཏི པཙྩཡཔརིགྒཧེ པཉྙཱ དྷམྨཊྛིཏིཉཱཎ’’ནྟི (པཊི. མ. ༡.༤༦).

‘‘ཨནིཙྩཏོ མནསིཀརོནྟོ ཀཏམེ དྷམྨེ ཡཐཱབྷཱུཏཾ ཛཱནཱཏི པསྶཏི, ཀཐཾ སམྨཱདསྶནཾ ཧོཏི, ཀཐཾ ཏདནྭཡེན སབྦེ སངྑཱརཱ ཨནིཙྩཏོ སུདིཊྛཱ ཧོནྟི, ཀཏྠ ཀངྑཱ པཧཱིཡཏི? དུཀྑཏོ…པེ… ཨནཏྟཏོ མནསིཀརོནྟོ ཀཏམེ དྷམྨེ ཡཐཱབྷཱུཏཾ ཛཱནཱཏི པསྶཏི…པེ… ཀཏྠ ཀངྑཱ པཧཱིཡཏཱིཏི?

‘‘ཨནིཙྩཏོ ¶ མནསིཀརོནྟོ ནིམིཏྟཾ ཡཐཱབྷཱུཏཾ ཛཱནཱཏི པསྶཏི, ཏེན ཝུཙྩཏི སམྨཱདསྶནཾ. ཨེཝཾ ཏདནྭཡེན སབྦེ སངྑཱརཱ ཨནིཙྩཏོ སུདིཊྛཱ ཧོནྟི. ཨེཏྠ ཀངྑཱ པཧཱིཡཏི. དུཀྑཏོ མནསིཀརོནྟོ པཝཏྟཾ ཡཐཱབྷཱུཏཾ ཛཱནཱཏི པསྶཏི…པེ… ཨནཏྟཏོ མནསིཀརོནྟོ ནིམིཏྟཉྩ པཝཏྟཉྩ ཡཐཱབྷཱུཏཾ ཛཱནཱཏི པསྶཏི, ཏེན ཝུཙྩཏི སམྨཱདསྶནཾ. ཨེཝཾ ཏདནྭཡེན སབྦེ དྷམྨཱ ཨནཏྟཏོ སུདིཊྛཱ ཧོནྟི. ཨེཏྠ ཀངྑཱ པཧཱིཡཏི.

‘‘ཡཉྩ ཡཐཱབྷཱུཏཉཱཎཾ ཡཉྩ སམྨཱདསྶནཾ ཡཱ ཙ ཀངྑཱཝིཏརཎཱ, ཨིམེ དྷམྨཱ ནཱནཏྠཱ ཙེཝ ནཱནཱབྱཉྫནཱ ཙ, ཨུདཱཧུ ཨེཀཏྠཱ བྱཉྫནམེཝ ནཱནནྟི? ཡཉྩ ཡཐཱབྷཱུཏཉཱཎཾ ཡཉྩ སམྨཱདསྶནཾ ཡཱ ཙ ཀངྑཱཝིཏརཎཱ, ཨིམེ དྷམྨཱ ཨེཀཏྠཱ, བྱཉྫནམེཝ ནཱན’’ནྟི (པཊི. མ. ༡.༢༢༧).

ཨིམིནཱ པན ཉཱཎེན སམནྣཱགཏོ ཝིཔསྶཀོ བུདྡྷསཱསནེ ལདྡྷསྶཱསོ ལདྡྷཔཏིཊྛོ ནིཡཏགཏིཀོ ཙཱུལ༹སོཏཱཔནྣོ ནཱམ ཧོཏི.

ཏསྨཱ བྷིཀྑུ སདཱ སཏོ, ནཱམརཱུཔསྶ སབྦསོ;

པཙྩཡེ པརིགྒཎྷེཡྻ, ཀངྑཱཝིཏརཎཏྠིཀོཏི.

ཨིཏི སཱདྷུཛནཔཱམོཛྫཏྠཱཡ ཀཏེ ཝིསུདྡྷིམགྒེ

པཉྙཱབྷཱཝནཱདྷིཀཱརེ

ཀངྑཱཝིཏརཎཝིསུདྡྷིནིདྡེསོ ནཱམ

ཨེཀཱུནཝཱིསཏིམོ པརིཙྪེདོ.

༢༠. མགྒཱམགྒཉཱཎདསྶནཝིསུདྡྷིནིདྡེསོ

སམྨསནཉཱཎཀཐཱ

༦༩༢. ཨཡཾ ¶ ¶ མགྒོ, ཨཡཾ ན མགྒོཏི ཨེཝཾ མགྒཉྩ ཨམགྒཉྩ ཉཏྭཱ ཋིཏཾ ཉཱཎཾ པན མགྒཱམགྒཉཱཎདསྶནཝིསུདྡྷི ནཱམ.

ཏཾ སམྤཱདེཏུཀཱམེན ཀལཱཔསམྨསནསངྑཱཏཱཡ ནཡཝིཔསྶནཱཡ ཏཱཝ ཡོགོ ཀརཎཱིཡོ. ཀསྨཱ? ཨཱརདྡྷཝིཔསྶཀསྶ ཨོབྷཱསཱདིསམྦྷཝེ མགྒཱམགྒཉཱཎསམྦྷཝཏོ. ཨཱརདྡྷཝིཔསྶཀསྶ ཧི ཨོབྷཱསཱདཱིསུ སམྦྷཱུཏེསུ མགྒཱམགྒཉཱཎཾ ཧོཏི, ཝིཔསྶནཱཡ ཙ ཀལཱཔསམྨསནཾ ཨཱདི. ཏསྨཱ ཨེཏཾ ཀངྑཱཝིཏརཎཱནནྟརཾ ཨུདྡིཊྛཾ. ཨཔིཙ ཡསྨཱ ཏཱིརཎཔརིཉྙཱཡ ཝཏྟམཱནཱཡ མགྒཱམགྒཉཱཎཾ ཨུཔྤཛྫཏི, ཏཱིརཎཔརིཉྙཱ ཙ ཉཱཏཔརིཉྙཱནནྟརཱ, ཏསྨཱཔི ཏཾ མགྒཱམགྒཉཱཎདསྶནཝིསུདྡྷིཾ སམྤཱདེཏུཀཱམེན ཀལཱཔསམྨསནེ ཏཱཝ ཡོགོ ཀཱཏབྦོ.

༦༩༣. ཏཏྲཱཡཾ ཝིནིཙྪཡོ – ཏིསྶོ ཧི ལོཀིཡཔརིཉྙཱ ཉཱཏཔརིཉྙཱ ཏཱིརཎཔརིཉྙཱ པཧཱནཔརིཉྙཱ ཙ. ཡཱ སནྡྷཱཡ ཝུཏྟཾ ‘‘ཨབྷིཉྙཱཔཉྙཱ ཉཱཏཊྛེ ཉཱཎཾ. པརིཉྙཱཔཉྙཱ ཏཱིརཎཊྛེ ཉཱཎཾ. པཧཱནཔཉྙཱ པརིཙྩཱགཊྛེ ཉཱཎ’’ནྟི (པཊི. མ. ༡.༧༥). ཏཏྠ ‘‘རུཔྤནལཀྑཎཾ རཱུཔཾ, ཝེདཡིཏལཀྑཎཱ ཝེདནཱ’’ཏི ཨེཝཾ ཏེསཾ ཏེསཾ དྷམྨཱནཾ པཙྩཏྟལཀྑཎསལླཀྑཎཝསེན པཝཏྟཱ པཉྙཱ ཉཱཏཔརིཉྙཱ ནཱམ. ‘‘རཱུཔཾ ཨནིཙྩཾ, ཝེདནཱ ཨནིཙྩཱ’’ཏིཨཱདིནཱ ནཡེན ཏེསཾཡེཝ དྷམྨཱནཾ སཱམཉྙལཀྑཎཾ ཨཱརོཔེཏྭཱ པཝཏྟཱ ལཀྑཎཱརམྨཎིཀཝིཔསྶནཱ པཉྙཱ ཏཱིརཎཔརིཉྙཱ ནཱམ. ཏེསུཡེཝ པན དྷམྨེསུ ནིཙྩསཉྙཱདིཔཛཧནཝསེན པཝཏྟཱ ལཀྑཎཱརམྨཎིཀཝིཔསྶནཱ པཉྙཱ པཧཱནཔརིཉྙཱ ནཱམ.

ཏཏྠ སངྑཱརཔརིཙྪེདཏོ པཊྛཱཡ ཡཱཝ པཙྩཡཔརིགྒཧཱ ཉཱཏཔརིཉྙཱཡ བྷཱུམི. ཨེཏསྨིཾ ཧི ཨནྟརེ ¶ དྷམྨཱནཾ པཙྩཏྟལཀྑཎཔཊིཝེདྷསྶེཝ ཨཱདྷིཔཙྩཾ ཧོཏི. ཀལཱཔསམྨསནཏོ པན པཊྛཱཡ ཡཱཝ ཨུདཡབྦཡཱནུཔསྶནཱ ཏཱིརཎཔརིཉྙཱཡ བྷཱུམི. ཨེཏསྨིཾ ཧི ཨནྟརེ སཱམཉྙལཀྑཎཔཊིཝེདྷསྶེཝ ཨཱདྷིཔཙྩཾ ཧོཏི. བྷངྒཱནུཔསྶནཾ ཨཱདིཾ ཀཏྭཱ ཨུཔརི པཧཱནཔརིཉྙཱཡ བྷཱུམི ¶ . ཏཏོ པཊྛཱཡ ཧི ཨནིཙྩཏོ ཨནུཔསྶནྟོ ནིཙྩསཉྙཾ པཛཧཏི, དུཀྑཏོ ཨནུཔསྶནྟོ སུཁསཉྙཾ, ཨནཏྟཏོ ཨནུཔསྶནྟོ ཨཏྟསཉྙཾ, ནིབྦིནྡནྟོ ནནྡིཾ, ཝིརཛྫནྟོ རཱགཾ, ནིརོདྷེནྟོ སམུདཡཾ, པཊིནིསྶཛྫནྟོ ཨཱདཱནཾ པཛཧཏཱིཏི (པཊི. མ. ༡.༥༢) ཨེཝཾ ནིཙྩསཉྙཱདིཔཧཱནསཱདྷིཀཱནཾ སཏྟནྣཾ ཨནུཔསྶནཱནཾ ཨཱདྷིཔཙྩཾ. ཨིཏི ཨིམཱསུ ཏཱིསུ པརིཉྙཱསུ སངྑཱརཔརིཙྪེདསྶ ཙེཝ པཙྩཡཔརིགྒཧསྶ ཙ སཱདྷིཏཏྟཱ ཨིམིནཱ ཡོགིནཱ ཉཱཏཔརིཉྙཱཝ ཨདྷིགཏཱ ཧོཏི, ཨིཏརཱ ཙ ཨདྷིགནྟབྦཱ. ཏེན ཝུཏྟཾ ‘‘ཡསྨཱ ཏཱིརཎཔརིཉྙཱཡ ཝཏྟམཱནཱཡ མགྒཱམགྒཉཱཎཾ ཨུཔྤཛྫཏི, ཏཱིརཎཔརིཉྙཱ ཙ ཉཱཏཔརིཉྙཱནནྟརཱ, ཏསྨཱཔི ཏཾ མགྒཱམགྒཉཱཎདསྶནཝིསུདྡྷིཾ སམྤཱདེཏུཀཱམེན ཀལཱཔསམྨསནེ ཏཱཝ ཡོགོ ཀཱཏབྦོ’’ཏི.

༦༩༤. ཏཏྲཱཡཾ པཱལི༹ –

‘‘ཀཐཾ ཨཏཱིཏཱནཱགཏཔཙྩུཔྤནྣཱནཾ དྷམྨཱནཾ སངྑིཔིཏྭཱ ཝཝཏྠཱནེ པཉྙཱ སམྨསནེ ཉཱཎཾ? ཡཾཀིཉྩི རཱུཔཾ ཨཏཱིཏཱནཱགཏཔཙྩུཔྤནྣཾ ཨཛ྄ཛྷཏྟཾ ཝཱ…པེ… ཡཾ དཱུརེ སནྟིཀེ ཝཱ, སབྦཾ རཱུཔཾ ཨནིཙྩཏོ ཝཝཏྠཔེཏི, ཨེཀཾ སམྨསནཾ. དུཀྑཏོ ཝཝཏྠཔེཏི, ཨེཀཾ སམྨསནཾ. ཨནཏྟཏོ ཝཝཏྠཔེཏི, ཨེཀཾ སམྨསནཾ. ཡཱ ཀཱཙི ཝེདནཱ…པེ… ཡཾཀིཉྩི ཝིཉྙཱཎཾ…པེ… ཨནཏྟཏོ ཝཝཏྠཔེཏི, ཨེཀཾ སམྨསནཾ.

‘‘ཙཀྑུཾ…པེ… ཛརཱམརཎཾ ཨཏཱིཏཱནཱགཏཔཙྩུཔྤནྣཾ ཨནིཙྩཏོ ཝཝཏྠཔེཏི, ཨེཀཾ སམྨསནཾ. དུཀྑཏོ ཨནཏྟཏོ ཝཝཏྠཔེཏི, ཨེཀཾ སམྨསནཾ.

‘‘རཱུཔཾ ཨཏཱིཏཱནཱགཏཔཙྩུཔྤནྣཾ ཨནིཙྩཾ ཁཡཊྛེན, དུཀྑཾ བྷཡཊྛེན, ཨནཏྟཱ ཨསཱརཀཊྛེནཱཏི སངྑིཔིཏྭཱ ཝཝཏྠཱནེ པཉྙཱ སམྨསནེ ཉཱཎཾ. ཝེདནཾ… ཝིཉྙཱཎཾ… ཙཀྑུཾ…པེ… ཛརཱམརཎཾ…པེ… སམྨསནེ ཉཱཎཾ.

‘‘རཱུཔཾ ཨཏཱིཏཱནཱགཏཔཙྩུཔྤནྣཾ ཨནིཙྩཾ སངྑཏཾ པཊིཙྩསམུཔྤནྣཾ ཁཡདྷམྨཾ ཝཡདྷམྨཾ ཝིརཱགདྷམྨཾ ¶ ནིརོདྷདྷམྨནྟི སངྑིཔིཏྭཱ ཝཝཏྠཱནེ པཉྙཱ སམྨསནེ ཉཱཎཾ. ཝེདནཾ… ཝིཉྙཱཎཾ… ཙཀྑུཾ… ཛརཱམརཎཾ ཨཏཱིཏཱནཱགཏཔཙྩུཔྤནྣཾ ཨནིཙྩཾ སངྑཏཾ…པེ… ནིརོདྷདྷམྨནྟི སངྑིཔིཏྭཱ ཝཝཏྠཱནེ པཉྙཱ སམྨསནེ ཉཱཎཾ.

‘‘ཛཱཏིཔཙྩཡཱ ¶ ཛརཱམརཎཾ, ཨསཏི ཛཱཏིཡཱ ནཏྠི ཛརཱམརཎནྟི སངྑིཔིཏྭཱ ཝཝཏྠཱནེ པཉྙཱ སམྨསནེ ཉཱཎཾ. ཨཏཱིཏམྤི ཨདྡྷཱནཾ, ཨནཱགཏམྤི ཨདྡྷཱནཾ ཛཱཏིཔཙྩཡཱ ཛརཱམརཎཾ, ཨསཏི ཛཱཏིཡཱ ནཏྠི ཛརཱམརཎནྟི སངྑིཔིཏྭཱ ཝཝཏྠཱནེ པཉྙཱ སམྨསནེ ཉཱཎཾ. བྷཝཔཙྩཡཱ ཛཱཏི…པེ… ཨཝིཛྫཱཔཙྩཡཱ སངྑཱརཱ, ཨསཏི ཨཝིཛྫཱཡ ནཏྠི སངྑཱརཱཏི སངྑིཔིཏྭཱ ཝཝཏྠཱནེ པཉྙཱ སམྨསནེ ཉཱཎཾ. ཨཏཱིཏམྤི ཨདྡྷཱནཾ, ཨནཱགཏམྤི ཨདྡྷཱནཾ ཨཝིཛྫཱཔཙྩཡཱ སངྑཱརཱ, ཨསཏི ཨཝིཛྫཱཡ ནཏྠི སངྑཱརཱཏི སངྑིཔིཏྭཱ ཝཝཏྠཱནེ པཉྙཱ སམྨསནེ ཉཱཎཾ.

‘‘ཏཾ ཉཱཏཊྛེན ཉཱཎཾ. པཛཱནནཊྛེན པཉྙཱ. ཏེན ཝུཙྩཏི ཨཏཱིཏཱནཱགཏཔཙྩུཔྤནྣཱནཾ དྷམྨཱནཾ སངྑིཔིཏྭཱ ཝཝཏྠཱནེ པཉྙཱ སམྨསནེ ཉཱཎ’’ནྟི (པཊི. མ. ༡.༤༨).

ཨེཏྠ ཙ ཙཀྑུཾ…པེ… ཛརཱམརཎནྟི ཨིམིནཱ པེཡྻཱལེན དྭཱརཱརམྨཎེཧི སདྡྷིཾ དྭཱརཔྤཝཏྟཱ དྷམྨཱ, པཉྩཀྑནྡྷཱ, ཚ དྭཱརཱནི, ཚ ཨཱརམྨཎཱནི, ཚ ཝིཉྙཱཎཱནི, ཚ ཕསྶཱ, ཚ ཝེདནཱ, ཚ སཉྙཱ, ཚ ཙེཏནཱ, ཚ ཏཎྷཱ, ཚ ཝིཏཀྐཱ, ཚ ཝིཙཱརཱ, ཚ དྷཱཏུཡོ, དས ཀསིཎཱནི, དྭཏྟིཾསཀོཊྛཱསཱ, དྭཱདསཱཡཏནཱནི, ཨཊྛཱརས དྷཱཏུཡོ, བཱཝཱིསཏི ཨིནྡྲིཡཱནི, ཏིསྶོ དྷཱཏུཡོ, ནཝ བྷཝཱ, ཙཏྟཱརི ཛྷཱནཱནི, ཙཏསྶོ ཨཔྤམཉྙཱ, ཙཏསྶོ སམཱཔཏྟིཡོ, དྭཱདས པཊིཙྩསམུཔྤཱདངྒཱནཱིཏི ཨིམེ དྷམྨརཱསཡོ སཾཁིཏྟཱཏི ཝེདིཏབྦཱ.

ཝུཏྟཾ ཧེཏཾ ཨབྷིཉྙེཡྻནིདྡེསེ –

‘‘སབྦཾ, བྷིཀྑཝེ, ཨབྷིཉྙེཡྻཾ. ཀིཉྩ, བྷིཀྑཝེ, སབྦཾ ཨབྷིཉྙེཡྻཾ? ཙཀྑུ, བྷིཀྑཝེ, ཨབྷིཉྙེཡྻཾ. རཱུཔཱ… ཙཀྑུཝིཉྙཱཎཾ… ཙཀྑུསམྥསྶོ… ཡམྤིདཾ ཙཀྑུསམྥསྶཔཙྩཡཱ ཨུཔྤཛྫཏི ཝེདཡིཏཾ སུཁཾ ཝཱ དུཀྑཾ ཝཱ ཨདུཀྑམསུཁཾ ཝཱ, ཏམྤི ¶ ཨབྷིཉྙེཡྻཾ. སོཏཾ…པེ… ཡམྤིདཾ མནོསམྥསྶཔཙྩཡཱ ཨུཔྤཛྫཏི ཝེདཡིཏཾ སུཁཾ ཝཱ དུཀྑཾ ཝཱ ཨདུཀྑམསུཁཾ ཝཱ, ཏམྤི ཨབྷིཉྙེཡྻཾ.

‘‘རཱུཔཾ…པེ… ཝིཉྙཱཎཾ… ཙཀྑུ…པེ… མནོ… རཱུཔཱ…པེ… དྷམྨཱ… ཙཀྑུཝིཉྙཱཎཾ…པེ… མནོཝིཉྙཱཎཾ… ཙཀྑུསམྥསྶོ…པེ… མནོསམྥསྶོ….

‘‘ཙཀྑུསམྥསྶཛཱ ¶ ཝེདནཱ…པེ… མནོསམྥསྶཛཱ ཝེདནཱ… རཱུཔསཉྙཱ…པེ… དྷམྨསཉྙཱ… རཱུཔསཉྩེཏནཱ…པེ… དྷམྨསཉྩེཏནཱ… རཱུཔཏཎྷཱ…པེ… དྷམྨཏཎྷཱ… རཱུཔཝིཏཀྐོ…པེ… དྷམྨཝིཏཀྐོ… རཱུཔཝིཙཱརོ…པེ… དྷམྨཝིཙཱརོ….

‘‘པཐཝཱིདྷཱཏུ…པེ… ཝིཉྙཱཎདྷཱཏུ… པཐཝཱིཀསིཎཾ…པེ… ཝིཉྙཱཎཀསིཎཾ… ཀེསཱ…པེ… མུཏྟཾ… མཏྠལུངྒཾ….

‘‘ཙཀྑཱཡཏནཾ…པེ… དྷམྨཱཡཏནཾ… ཙཀྑུདྷཱཏུ…པེ… མནོདྷཱཏུ… མནོཝིཉྙཱཎདྷཱཏུ… ཙཀྑུནྡྲིཡཾ…པེ… ཨཉྙཱཏཱཝིནྡྲིཡཾ….

‘‘ཀཱམདྷཱཏུ… རཱུཔདྷཱཏུ… ཨརཱུཔདྷཱཏུ… ཀཱམབྷཝོ… རཱུཔབྷཝོ… ཨརཱུཔབྷཝོ… སཉྙཱབྷཝོ… ཨསཉྙཱབྷཝོ… ནེཝསཉྙཱནཱསཉྙཱབྷཝོ… ཨེཀཝོཀཱརབྷཝོ… ཙཏུཝོཀཱརབྷཝོ… པཉྩཝོཀཱརབྷཝོ….

‘‘པཋམཾ ཛྷཱནཾ…པེ… ཙཏུཏྠཾ ཛྷཱནཾ… མེཏྟཱཙེཏོཝིམུཏྟི…པེ… ཨུཔེཀྑཱཙེཏོཝིམུཏྟི… ཨཱཀཱསཱནཉྩཱཡཏནསམཱཔཏྟི…པེ… ནེཝསཉྙཱནཱསཉྙཱཡཏནསམཱཔཏྟི… ཨཝིཛྫཱ ཨབྷིཉྙེཡྻཱ…པེ… ཛརཱམརཎཾ ཨབྷིཉྙེཡྻ’’ནྟི (པཊི. མ. ༡.༣; སཾ. ནི. ༤.༤༦).

ཏཾ ཏཏྠ ཨེཝཾ ཝིཏྠཱརེན ཝུཏྟཏྟཱ ཨིདྷ སབྦཾ པེཡྻཱལེན སཾཁིཏྟཾ. ཨེཝཾ སཾཁིཏྟེ པནེཏྠ ཡེ ལོཀུཏྟརཱ དྷམྨཱ ཨཱགཏཱ, ཏེ ཨསམྨསནུཔགཏྟཱ ཨིམསྨིཾ ཨདྷིཀཱརེ ན གཧེཏབྦཱ. ཡེཔི ཙ སམྨསནུཔགཱ ¶ , ཏེསུ ཡེ ཡསྶ པཱཀཊཱ ཧོནྟི སུཁེན པརིགྒཧཾ གཙྪནྟི, ཏེསུ ཏེན སམྨསནཾ ཨཱརབྷིཏབྦཾ.

༦༩༥. ཏཏྲཱཡཾ ཁནྡྷཝསེན ཨཱརབྦྷཝིདྷཱནཡོཛནཱ – ཡཾཀིཉྩི རཱུཔཾ…པེ… སབྦཾ རཱུཔཾ ཨནིཙྩཏོ ཝཝཏྠཔེཏི, ཨེཀཾ སམྨསནཾ. དུཀྑཏོ ཨནཏྟཏོ ཝཝཏྠཔེཏི, ཨེཀཾ སམྨསནནྟི. ཨེཏྟཱཝཏཱ ཨཡཾ བྷིཀྑུ ‘‘ཡཾཀིཉྩི རཱུཔ’’ནྟི ཨེཝཾ ཨནིཡམནིདྡིཊྛཾ སབྦམྤི རཱུཔཾ ཨཏཱིཏཏྟིཀེན ཙེཝ ཙཏཱུཧི ཙ ཨཛ྄ཛྷཏྟཱདིདུཀེཧཱིཏི ཨེཀཱདསཧི ཨོཀཱསེཧི པརིཙྪིནྡིཏྭཱ སབྦཾ རཱུཔཾ ཨནིཙྩཏོ ཝཝཏྠཔེཏི, ཨནིཙྩནྟི སམྨསཏི.

ཀཐཾ ¶ ? པརཏོ ཝུཏྟནཡེན. ཝུཏྟཉྷེཏཾ – ‘‘རཱུཔཾ ཨཏཱིཏཱནཱགཏཔཙྩུཔྤནྣཾ ཨནིཙྩཾ ཁཡཊྛེནཱ’’ཏི (པཊི. མ. ༡.༤༨).

ཏསྨཱ ཨེས ཡཾ ཨཏཱིཏཾ རཱུཔཾ, ཏཾ ཡསྨཱ ཨཏཱིཏེཡེཝ ཁཱིཎཾ, ནཡིམཾ བྷཝཾ སམྤཏྟནྟི ཨནིཙྩཾ ཁཡཊྛེན.

ཡཾ ཨནཱགཏཾ ཨནནྟརབྷཝེ ནིབྦཏྟིསྶཏི, ཏམྤི ཏཏྠེཝ ཁཱིཡིསྶཏི, ན ཏཏོ པརཾ བྷཝཾ གམིསྶཏཱིཏི ཨནིཙྩཾ ཁཡཊྛེན.

ཡཾ པཙྩུཔྤནྣཾ རཱུཔཾ, ཏམྤི ཨིདྷེཝ ཁཱིཡཏི, ན ཨིཏོ གཙྪཏཱིཏི ཨནིཙྩཾ ཁཡཊྛེན.

ཡཾ ཨཛ྄ཛྷཏྟཾ, ཏམྤི ཨཛ྄ཛྷཏྟམེཝ ཁཱིཡཏི, ན བཧིདྡྷཱབྷཱཝཾ གཙྪཏཱིཏི ཨནིཙྩཾ ཁཡཊྛེན.

ཡཾ བཧིདྡྷཱ…པེ… ཨོལཱ༹རིཀཾ…པེ… སུཁུམཾ…པེ… ཧཱིནཾ…པེ… པཎཱིཏཾ…པེ… དཱུརེ…པེ… སནྟིཀེ, ཏམྤི ཏཏྠེཝ ཁཱིཡཏི, ན དཱུརབྷཱཝཾ གཙྪཏཱིཏི ཨནིཙྩཾ ཁཡཊྛེནཱཏི སམྨསཏི.

ཨིདཾ སབྦམྤི ‘‘ཨནིཙྩཾ ཁཡཊྛེནཱ’’ཏི ཨེཏསྶ ཝསེན ཨེཀཾ སམྨསནཾ. བྷེདཏོ པན ཨེཀཱདསཝིདྷཾ ཧོཏི.

སབྦམེཝ ཙ ཏཾ དུཀྑཾ བྷཡཊྛེན. བྷཡཊྛེནཱཏི སཔྤཊིབྷཡཏཱཡ. ཡཉྷི ཨནིཙྩཾ, ཏཾ བྷཡཱཝཧཾ ཧོཏི སཱིཧོཔམསུཏྟེ (སཾ. ནི. ༣.༧༨; ཨ. ནི. ༤.༣༣) དེཝཱནཾ ཝིཡ. ཨིཏི ¶ ཨིདམྤི ‘‘དུཀྑཾ བྷཡཊྛེནཱ’’ཏི ཨེཏསྶ ཝསེན ཨེཀཾ སམྨསནཾ. བྷེདཏོ པན ཨེཀཱདསཝིདྷཾ ཧོཏི.

ཡཐཱ ཙ དུཀྑཾ, ཨེཝཾ སབྦམྤི ཏཾ ཨནཏྟཱ ཨསཱརཀཊྛེན. ཨསཱརཀཊྛེནཱཏི ‘‘ཨཏྟཱ ནིཝཱསཱི ཀཱརཀོ ཝེདཀོ སཡཾཝསཱི’’ཏི ཨེཝཾ པརིཀཔྤིཏསྶ ཨཏྟསཱརསྶ ཨབྷཱཝེན. ཡཉྷི ཨནིཙྩཾ, དུཀྑཾ, ཏཾ ཨཏྟནོཔི ཨནིཙྩཏཾ ཝཱ ཨུདཡབྦཡཔཱིལ༹ནཾ ཝཱ ཝཱརེཏུཾ ན སཀྐོཏི, ཀུཏོ ཏསྶ ཀཱརཀཱདིབྷཱཝོ. ཏེནཱཧ – ‘‘རཱུཔཉྩ ཧིདཾ, བྷིཀྑཝེ, ཨཏྟཱ ཨབྷཝིསྶ. ནཡིདཾ རཱུཔཾ ཨཱབཱདྷཱཡ སཾཝཏྟེཡྻཱ’’ཏིཨཱདི (སཾ. ནི. ༣.༥༩). ཨིཏི ཨིདམྤི ‘‘ཨནཏྟཱ ཨསཱརཀཊྛེནཱ’’ཏི ¶ ཨེཏསྶ ཝསེན ཨེཀཾ སམྨསནཾ. བྷེདཏོ པན ཨེཀཱདསཝིདྷཾ ཧོཏི. ཨེས ནཡོ ཝེདནཱདཱིསུ.

༦༩༦. ཡཾ པན ཨནིཙྩཾ, ཏཾ ཡསྨཱ ནིཡམཏོ སངྑཏཱདིབྷེདཾ ཧོཏི. ཏེནསྶ པརིཡཱཡདསྶནཏྠཾ, ནཱནཱཀཱརེཧི ཝཱ མནསིཀཱརཔྤཝཏྟིདསྶནཏྠཾ ‘‘རཱུཔཾ ཨཏཱིཏཱནཱགཏཔཙྩུཔྤནྣཾ ཨནིཙྩཾ སངྑཏཾ པཊིཙྩསམུཔྤནྣཾ ཁཡདྷམྨཾ ཝཡདྷམྨཾ ཝིརཱགདྷམྨཾ ནིརོདྷདྷམྨ’’ནྟི པུན པཱལི༹ ཝུཏྟཱ. ཨེས ནཡོ ཝེདནཱདཱིསཱུཏི.

ཙཏྟཱརཱིསཱཀཱརཨནུཔསྶནཱཀཐཱ

༦༩༧. སོ ཏསྶེཝ པཉྩསུ ཁནྡྷེསུ ཨནིཙྩདུཀྑཱནཏྟསམྨསནསྶ ཐིརབྷཱཝཏྠཱཡ, ཡཾ ཏཾ བྷགཝཏཱ ‘‘ཀཏམེཧི ཙཏྟཱརཱིསཱཡ ཨཱཀཱརེཧི ཨནུལོམིཀཾ ཁནྟིཾ པཊིལབྷཏི, ཀཏམེཧི ཙཏྟཱརཱིསཱཡ ཨཱཀཱརེཧི སམྨཏྟནིཡཱམཾ ཨོཀྐམཏཱི’’ཏི ཨེཏསྶ ཝིབྷངྒེ –

‘‘པཉྩཀྑནྡྷེ ཨནིཙྩཏོ, དུཀྑཏོ, རོགཏོ, གཎྜཏོ, སལླཏོ, ཨགྷཏོ, ཨཱབཱདྷཏོ, པརཏོ, པལོཀཏོ, ཨཱིཏིཏོ, ཨུཔདྡཝཏོ, བྷཡཏོ, ཨུཔསགྒཏོ, ཙལཏོ, པབྷངྒུཏོ, ཨདྡྷུཝཏོ, ཨཏཱཎཏོ, ཨལེཎཏོ, ཨསརཎཏོ, རིཏྟཏོ, ཏུཙྪཏོ, སུཉྙཏོ, ཨནཏྟཏོ, ཨཱདཱིནཝཏོ, ཝིཔརིཎཱམདྷམྨཏོ, ཨསཱརཀཏོ, ཨགྷམཱུལཏོ, ཝདྷཀཏོ, ཝིབྷཝཏོ, སཱསཝཏོ, སངྑཏཏོ, མཱརཱམིསཏོ, ཛཱཏིདྷམྨཏོ, ཛརཱདྷམྨཏོ, བྱཱདྷིདྷམྨཏོ, མརཎདྷམྨཏོ ¶ , སོཀདྷམྨཏོ, པརིདེཝདྷམྨཏོ, ཨུཔཱཡཱསདྷམྨཏོ, སཾཀིལེསིཀདྷམྨཏོ’’ཏི (པཊི. མ. ༣.༣༧) –

ཙཏྟཱརཱིསཱཡ ཨཱཀཱརེཧི,

‘‘པཉྩཀྑནྡྷེ ཨནིཙྩཏོ པསྶནྟོ ཨནུལོམིཀཾ ཁནྟིཾ པཊིལབྷཏི. པཉྩནྣཾ ཁནྡྷཱནཾ ནིརོདྷོ ནིཙྩཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏཱི’’ཏིཨཱདིནཱ (པཊི. མ. ༣.༣༨) ནཡེན,

ཨནུལོམཉཱཎཾ ཝིབྷཛནྟེན པབྷེདཏོ ཨནིཙྩཱདིསམྨསནཾ ཝུཏྟཾ. ཏསྶཱཔི ཝསེན ཨིམེ པཉྩཀྑནྡྷེ སམྨསཏི.

༦༩༨. ཀཐཾ ¶ ? སོ ཧི ཨེཀེཀཾ ཁནྡྷཾ ཨནཙྩནྟིཀཏཱཡ, ཨཱདིཨནྟཝནྟཏཱཡ ཙ ཨནིཙྩཏོ. ཨུཔྤཱདཝཡཔཊིཔཱིལ༹ནཏཱཡ, དུཀྑཝཏྠུཏཱཡ ཙ དུཀྑཏོ. པཙྩཡཡཱཔནཱིཡཏཱཡ, རོགམཱུལཏཱཡ ཙ རོགཏོ. དུཀྑཏཱསཱུལཡོགིཏཱཡ, ཀིལེསཱསུཙིཔགྒྷརཎཏཱཡ, ཨུཔྤཱདཛརཱབྷངྒེཧི ཨུདྡྷུམཱཏཔརིཔཀྐཔབྷིནྣཏཱཡ ཙ གཎྜཏོ. པཱིལཱ༹ཛནཀཏཱཡ, ཨནྟོཏུདནཏཱཡ, དུནྣཱིཧརཎཱིཡཏཱཡ ཙ སལླཏོ. ཝིགརཧཎཱིཡཏཱཡ, ཨཝཌྜྷིཨཱཝཧནཏཱཡ, ཨགྷཝཏྠུཏཱཡ ཙ ཨགྷཏོ. ཨསེརིབྷཱཝཛནཀཏཱཡ, ཨཱབཱདྷཔདཊྛཱནཏཱཡ ཙ ཨཱབཱདྷཏོ. ཨཝསཏཱཡ, ཨཝིདྷེཡྻཏཱཡ ཙ པརཏོ. བྱཱདྷིཛརཱམརཎེཧི པལུཛྫནཏཱཡ པལོཀཏོ. ཨནེཀབྱསནཱཝཧནཏཱཡ ཨཱིཏིཏོ. ཨཝིདིཏཱནཾཡེཝ ཝིཔུལཱནཾ ཨནཏྠཱནཾ ཨཱཝཧནཏོ, སབྦུཔདྡཝཝཏྠུཏཱཡ ཙ ཨུཔདྡཝཏོ. སབྦབྷཡཱནཾ ཨཱཀརཏཱཡ, དུཀྑཝཱུཔསམསངྑཱཏསྶ པརམསྶཱསསྶ པཊིཔཀྑབྷཱུཏཏཱཡ ཙ བྷཡཏོ. ཨནེཀེཧི ཨནཏྠེཧི ཨནུབདྡྷཏཱཡ, དོསཱུཔསཊྛཏཱཡ, ཨུཔསགྒོ ཝིཡ ཨནདྷིཝཱསནཱརཧཏཱཡ ཙ ཨུཔསགྒཏོ. བྱཱདྷིཛརཱམརཎེཧི ཙེཝ ལཱབྷཱལཱབྷཱདཱིཧི ཙ ལོཀདྷམྨེཧི པཙལིཏཏཱཡ ཙལཏོ. ཨུཔཀྐམེན ཙེཝ སརསེན ཙ པབྷངྒུཔགམནསཱིལཏཱཡ པབྷངྒུཏོ. སབྦཱཝཏྠནིཔཱཏིཏཱཡ, ཐིརབྷཱཝསྶ ཙ ཨབྷཱཝཏཱཡ ཨདྡྷུཝཏོ. ཨཏཱཡནཏཱཡ ཙེཝ, ཨལབྦྷནེཡྻཁེམཏཱཡ ཙ ཨཏཱཎཏོ. ཨལླཱིཡིཏུཾ ཨནརཧཏཱཡ, ཨལླཱིནཱནམྤི ཙ ལེཎཀིཙྩཱཀཱརིཏཱཡ ཨལེཎཏོ. ནིསྶིཏཱནཾ བྷཡསཱརཀཏྟཱབྷཱཝེན ཨསརཎཏོ. ཡཐཱཔརིཀཔྤིཏེཧི དྷུཝསུབྷསུཁཏྟབྷཱཝེཧི རིཏྟཏཱཡ རིཏྟཏོ. རིཏྟཏཱཡེཝ ཏུཙྪཏོ ཨཔྤཀཏྟཱ ཝཱ, ཨཔྤཀམྤི ཧི ལོཀེ ཏུཙྪནྟི ཝུཙྩཏི. སཱམི-ནིཝཱསི-ཀཱརཀ-ཝེདཀཱདྷིཊྛཱཡཀཝིརཧིཏཏཱཡ ¶ སུཉྙཏོ. སཡཉྩ ཨསྶཱམིཀབྷཱཝཱདིཏཱཡ ཨནཏྟཏོ. པཝཏྟིདུཀྑཏཱཡ, དུཀྑསྶ ཙ ཨཱདཱིནཝཏཱཡ ཨཱདཱིནཝཏོ, ཨཐ ཝཱ ཨཱདཱིནཾ ཝཱཏི གཙྪཏི པཝཏྟཏཱིཏི ཨཱདཱིནཝོ, ཀཔཎམནུསྶསྶེཏཾ ཨདྷིཝཙནཾ, ཁནྡྷཱཔི ཙ ཀཔཎཱཡེཝཱཏི ཨཱདཱིནཝསདིསཏཱཡ ཨཱདཱིནཝཏོ. ཛརཱཡ ཙེཝ མརཎེན ཙཱཏི དྭེདྷཱ པརིཎཱམཔཀཏིཏཱཡ ཝིཔརིཎཱམདྷམྨཏོ. དུབྦལཏཱཡ, ཕེགྒུ ཝིཡ སུཁབྷཉྫནཱིཡཏཱཡ ཙ ཨསཱརཀཏོ. ཨགྷཧེཏུཏཱཡ ཨགྷམཱུལཏོ. མིཏྟམུཁསཔཏྟོ ¶ ཝིཡ ཝིསྶཱསགྷཱཏིཏཱཡ ཝདྷཀཏོ. ཝིགཏབྷཝཏཱཡ, ཝིབྷཝསམྦྷཱུཏཏཱཡ ཙ ཝིབྷཝཏོ. ཨཱསཝཔདཊྛཱནཏཱཡ སཱསཝཏོ. ཧེཏུཔཙྩཡེཧི ཨབྷིསངྑཏཏཱཡ སངྑཏཏོ. མཙྩུམཱརཀིལེསམཱརཱནཾ ཨཱམིསབྷཱུཏཏཱཡ མཱརཱམིསཏོ. ཛཱཏི-ཛརཱ-བྱཱདྷིམརཎཔཀཏིཏཱཡ ཛཱཏི-ཛརཱ-བྱཱདྷི-མརཎདྷམྨཏོ. སོཀ-པརིདེཝ-ཨུཔཱཡཱསཧེཏུཏཱཡ སོཀ-པརིདེཝཨུཔཱཡཱསདྷམྨཏོ. ཏཎྷཱདིཊྛིདུཙྩརིཏསཾཀིལེསཱནཾ ཝིསཡདྷམྨཏཱཡ སཾཀིལེསིཀདྷམྨཏོཏི ཨེཝཾ པབྷེདཏོ ཝུཏྟསྶ ཨནིཙྩཱདིསམྨསནསྶ ཝསེན སམྨསཏི.

ཨེཏྠ ཧི ཨནིཙྩཏོ, པལོཀཏོ, ཙལཏོ, པབྷངྒུཏོ, ཨདྡྷུཝཏོ, ཝིཔརིཎཱམདྷམྨཏོ, ཨསཱརཀཏོ, ཝིབྷཝཏོ, སངྑཏཏོ, མརཎདྷམྨཏོཏི ཨེཀེཀསྨིཾ ཁནྡྷེ དས དས ཀཏྭཱ པཉྙཱས ཨནིཙྩཱནུཔསྶནཱནི. པརཏོ, རིཏྟཏོ, ཏུཙྪཏོ, སུཉྙཏོ, ཨནཏྟཏོཏི ཨེཀེཀསྨིཾ ཁནྡྷེ པཉྩ པཉྩ ཀཏྭཱ པཉྩཝཱིསཏི ཨནཏྟཱནུཔསྶནཱནི. སེསཱནི དུཀྑཏོ, རོགཏོཏིཨཱདཱིནི ཨེཀེཀསྨིཾ ཁནྡྷེ པཉྩཝཱིསཏི པཉྩཝཱིསཏི ཀཏྭཱ པཉྩཝཱིསཏིསཏཾ དུཀྑཱནུཔསྶནཱནཱིཏི.

ཨིཙྩསྶ ཨིམིནཱ དྭིསཏབྷེདེན ཨནིཙྩཱདིསམྨསནེན པཉྩཀྑནྡྷེ སམྨསཏོ ཏཾ ནཡཝིཔསྶནཱསངྑཱཏཾ ཨནིཙྩདུཀྑཱནཏྟསམྨསནཾ ཐིརཾ ཧོཏི. ཨིདཾ ཏཱཝེཏྠ པཱལི༹ནཡཱནུསཱརེན སམྨསནཱརམྦྷཝིདྷཱནཾ.

ཨིནྡྲིཡཏིཀྑཀཱརཎནཝཀཀཐཱ

༦༩༩. ཡསྶ པན ཨེཝཾ ནཡཝིཔསྶནཱཡ ཡོགཾ ཀརོཏོཔི ནཡཝིཔསྶནཱ ན སམྤཛྫཏི, ཏེན ‘‘ནཝཧཱཀཱརེཧི ཨིནྡྲིཡཱནི ཏིཀྑཱནི བྷཝནྟི – ཨུཔྤནྣུཔྤནྣཱནཾ སངྑཱརཱནཾ ཁཡམེཝ པསྶཏི, ཏཏྠ ཙ སཀྐཙྩཀིརིཡཱཡ སམྤཱདེཏི, སཱཏཙྩཀིརིཡཱཡ སམྤཱདེཏི, སཔྤཱཡཀིརིཡཱཡ སམྤཱདེཏི, སམཱདྷིསྶ ཙ ནིམིཏྟགྒཱཧེན, བོཛ྄ཛྷངྒཱནཉྩ ཨནུཔཝཏྟནཏཱཡ, ཀཱཡེ ཙ ཛཱིཝིཏེ ཙ ¶ ཨནཔེཀྑཏཾ ཨུཔཊྛཱཔེཏི, ཏཏྠ ཙ ཨབྷིབྷུཡྻ ནེཀྑམྨེན, ཨནྟརཱ ཙ ཨབྱོསཱནེནཱ’’ཏི ཨེཝཾ ཝུཏྟཱནཾ ནཝནྣཾ ཨཱཀཱརཱནཾ ཝསེན ཨིནྡྲིཡཱནི ཏིཀྑཱནི ཀཏྭཱ པཐཝཱིཀསིཎནིདྡེསེ ཝུཏྟནཡེན སཏྟ ཨསཔྤཱཡཱནི ཝཛྫེཏྭཱ སཏྟ སཔྤཱཡཱནི སེཝམཱནེན ཀཱལེན རཱུཔཾ སམྨསིཏབྦཾ, ཀཱལེན ཨརཱུཔཾ. རཱུཔཾ སམྨསནྟེན རཱུཔསྶ ནིབྦཏྟི པསྶིཏབྦཱ.

རཱུཔནིབྦཏྟིཔསྶནཱཀཱརཀཐཱ

༧༠༠. སེཡྻཐིདཾ ¶ – ཨིདཾ རཱུཔཾ ནཱམ ཀམྨཱདིཝསེན ཙཏཱུཧི ཀཱརཎེཧི ནིབྦཏྟཏི. ཏཏྠ སབྦེསཾ སཏྟཱནཾ རཱུཔཾ ནིབྦཏྟམཱནཾ པཋམཾ ཀམྨཏོ ནིབྦཏྟཏི. པཊིསནྡྷིཀྑཎེཡེཝ ཧི གབྦྷསེཡྻཀཱནཾ ཏཱཝ ཏིསནྟཏིཝསེན ཝཏྠུ-ཀཱཡ-བྷཱཝདསཀསངྑཱཏཱནི ཏིཾས རཱུཔཱནི ནིབྦཏྟནྟི, ཏཱནི ཙ ཁོ པཊིསནྡྷིཙིཏྟསྶ ཨུཔྤཱདཀྑཎེཡེཝ. ཡཐཱ ཙ ཨུཔྤཱདཀྑཎེ, ཏཐཱ ཋིཏིཀྑཎེཔི བྷངྒཀྑཎེཔི.

ཏཏྠ རཱུཔཾ དནྡྷནིརོདྷཾ གརུཔརིཝཏྟི, ཙིཏྟཾ ཁིཔྤནིརོདྷཾ ལཧུཔརིཝཏྟི. ཏེནཱཧ – ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི, ཡཾ ཨེཝཾ ལཧུཔརིཝཏྟཾ ཡཐཡིདཾ, བྷིཀྑཝེ, ཙིཏྟ’’ནྟི (ཨ. ནི. ༡.༤༨). རཱུཔེ དྷརནྟེཡེཝ ཧི སོལ༹སཝཱརེ བྷཝངྒཙིཏྟཾ ཨུཔྤཛྫིཏྭཱ ནིརུཛ྄ཛྷཏི. ཙིཏྟསྶ ཨུཔྤཱདཀྑཎོཔི ཋིཏིཀྑཎོཔི བྷངྒཀྑཎོཔི ཨེཀསདིསཱ. རཱུཔསྶ པན ཨུཔྤཱདབྷངྒཀྑཎཱཡེཝ ལཧུཀཱ, ཏེཧི སདིསཱ. ཋིཏིཀྑཎོ པན མཧཱ, ཡཱཝ སོལ༹ས ཙིཏྟཱནི ཨུཔྤཛྫིཏྭཱ ནིརུཛ྄ཛྷནྟི, ཏཱཝ ཝཏྟཏི. པཊིསནྡྷིཙིཏྟསྶ ཨུཔྤཱདཀྑཎེ ཨུཔྤནྣཾ ཋཱནཔྤཏྟཾ པུརེཛཱཏཾ ཝཏྠུཾ ནིསྶཱཡ དུཏིཡཾ བྷཝངྒཾ ཨུཔྤཛྫཏི. ཏེན སདྡྷིཾ ཨུཔྤནྣཾ ཋཱནཔྤཏྟཾ པུརེཛཱཏཾ ཝཏྠུཾ ནིསྶཱཡ ཏཏིཡཾ བྷཝངྒཾ ཨུཔྤཛྫཏི. ཨིམིནཱ ནཡེན ཡཱཝཏཱཡུཀཾ ཙིཏྟཔྤཝཏྟི ཝེདིཏབྦཱ. ཨཱསནྣམརཎསྶ པན ཨེཀམེཝ ཋཱནཔྤཏྟཾ པུརེཛཱཏཾ ཝཏྠུཾ ནིསྶཱཡ སོལ༹ས ཙིཏྟཱནི ཨུཔྤཛྫནྟི.

པཊིསནྡྷིཙིཏྟསྶ ཨུཔྤཱདཀྑཎེ ཨུཔྤནྣཾ རཱུཔཾ པཊིསནྡྷིཙིཏྟཏོ ཨུདྡྷཾ སོལ༹སམེན ཙིཏྟེན སདྡྷིཾ ནིརུཛ྄ཛྷཏི. ཋཱནཀྑཎེ ཨུཔྤནྣཾ སཏྟརསམསྶ ཨུཔྤཱདཀྑཎེན སདྡྷིཾ ནིརུཛ྄ཛྷཏི. བྷངྒཀྑཎེ ཨུཔྤནྣཾ སཏྟརསམསྶ ཋཱནཀྑཎཾ པཏྭཱ ནིརུཛ྄ཛྷཏི. ཡཱཝ པཝཏྟི ནཱམ ཨཏྠི, ཨེཝམེཝ པཝཏྟཏི. ཨོཔཔཱཏིཀཱནམྤི སཏྟསནྟཏིཝསེན སཏྟཏི རཱུཔཱནི ཨེཝམེཝ པཝཏྟནྟི.

༧༠༡. ཏཏྠ ¶ ཀམྨཾ, ཀམྨསམུཊྛཱནཾ, ཀམྨཔཙྩཡཾ, ཀམྨཔཙྩཡཙིཏྟསམུཊྛཱནཾ, ཀམྨཔཙྩཡཨཱཧཱརསམུཊྛཱནཾ, ཀམྨཔཙྩཡཨུཏུསམུཊྛཱནནྟི ཨེས ཝིབྷཱགོ ཝེདིཏབྦོ. ཏཏྠ ཀམྨཾ ནཱམ ཀུསལཱཀུསལཙེཏནཱ. ཀམྨསམུཊྛཱནཾ ནཱམ ཝིཔཱཀཀྑནྡྷཱ ཙ, ཙཀྑུདསཀཱདི སམསཏྟཏིརཱུཔཉྩ. ཀམྨཔཙྩཡཾ ནཱམ ཏདེཝ, ཀམྨཾ ཧི ཀམྨསམུཊྛཱནསྶ ཨུཔཏྠམྦྷཀཔཙྩཡོཔི ཧོཏི. ཀམྨཔཙྩཡཙིཏྟསམུཊྛཱནཾ ནཱམ ཝིཔཱཀཙིཏྟསམུཊྛཱནཾ རཱུཔཾ. ཀམྨཔཙྩཡཨཱཧཱརསམུཊྛཱནཾ ནཱམ ཀམྨསམུཊྛཱནརཱུཔེསུ ¶ ཋཱནཔྤཏྟཱ ཨོཛཱ ཨཉྙཾ ཨོཛཊྛམཀཾ སམུཊྛཱཔེཏི, ཏཏྲཱཔི ཨོཛཱ ཋཱནཾ པཏྭཱ ཨཉྙནྟི ཨེཝཾ ཙཏསྶོ ཝཱ པཉྩ ཝཱ པཝཏྟིཡོ གྷཊེཏི. ཀམྨཔཙྩཡཨུཏུསམུཊྛཱནཾ ནཱམ ཀམྨཛཏེཛོདྷཱཏུ ཋཱནཔྤཏྟཱ ཨུཏུསམུཊྛཱནཾ ཨོཛཊྛམཀཾ སམུཊྛཱཔེཏི, ཏཏྲཱཔི ཨུཏུ ཨཉྙཾ ཨོཛཊྛམཀནྟི ཨེཝཾ ཙཏསྶོ ཝཱ པཉྩ ཝཱ པཝཏྟིཡོ གྷཊེཏི. ཨེཝཾ ཏཱཝ ཀམྨཛརཱུཔསྶ ནིབྦཏྟི པསྶིཏབྦཱ.

༧༠༢. ཙིཏྟཛེསུཔི ཙིཏྟཾ, ཙིཏྟསམུཊྛཱནཾ, ཙིཏྟཔཙྩཡཾ, ཙིཏྟཔཙྩཡཨཱཧཱརསམུཊྛཱནཾ, ཙིཏྟཔཙྩཡཨུཏུསམུཊྛཱནནྟི ཨེས ཝིབྷཱགོ ཝེདིཏབྦོ. ཏཏྠ ཙིཏྟཾ ནཱམ ཨེཀཱུནནཝུཏིཙིཏྟཱནི.

ཏེསུ དྭཏྟིཾས ཙིཏྟཱནི, ཚབྦཱིསེཀཱུནཝཱིསཏི;

སོལ༹ས རཱུཔིརིཡཱཔཐཝིཉྙཏྟིཛནཀཱ མཏཱ.

ཀཱམཱཝཙརཏོ ཧི ཨཊྛ ཀུསལཱནི, དྭཱདསཱཀུསལཱནི, མནོདྷཱཏུཝཛྫཱ དས ཀིརིཡཱ, ཀུསལཀིརིཡཏོ དྭེ ཨབྷིཉྙཱཙིཏྟཱནཱིཏི དྭཏྟིཾས ཙིཏྟཱནི རཱུཔཾ, ཨིརིཡཱཔཐཾ, ཝིཉྙཏྟིཉྩ ཛནེནྟི. ཝིཔཱཀཝཛྫཱནི སེསདསརཱུཔཱཝཙརཱནི, ཨཊྛ ཨརཱུཔཱཝཙརཱནི, ཨཊྛ ལོཀུཏྟརཙིཏྟཱནཱིཏི ཚབྦཱིསཏི ཙིཏྟཱནི རཱུཔཾ, ཨིརིཡཱཔཐཉྩ ཛནཡནྟི, ན ཝིཉྙཏྟིཾ. ཀཱམཱཝཙརེ དས བྷཝངྒཙིཏྟཱནི, རཱུཔཱཝཙརེ པཉྩ, ཏིསྶོ མནོདྷཱཏུཡོ, ཨེཀཱ ཝིཔཱཀཱཧེཏུཀམནོཝིཉྙཱཎདྷཱཏུསོམནསྶསཧགཏཱཏི ཨེཀཱུནཝཱིསཏི ཙིཏྟཱནི རཱུཔམེཝ ཛནཡནྟི, ན ཨིརིཡཱཔཐཾ, ན ཝིཉྙཏྟིཾ. དྭེཔཉྩཝིཉྙཱཎཱནི, སབྦསཏྟཱནཾ པཊིསནྡྷིཙིཏྟཾ, ཁཱིཎཱསཝཱནཾ ཙུཏིཙིཏྟཾ, ཙཏྟཱརི ཨཱརུཔྤཝིཔཱཀཱནཱིཏི སོལ༹ས ཙིཏྟཱནི ནེཝ རཱུཔཾ ཛནཡནྟི, ན ཨིརིཡཱཔཐཾ, ན ཝིཉྙཏྟིཾ. ཡཱནི ཙེཏྠ རཱུཔཾ ཛནེནྟི, ཏཱནི ན ཋིཏིཀྑཎེ, བྷངྒཀྑཎེ ཝཱ, ཏདཱ ཧི ཙིཏྟཾ དུབྦལཾ ཧོཏི. ཨུཔྤཱདཀྑཎེ པན བལཝཾ, ཏསྨཱ ཏཾ ཏདཱ པུརེཛཱཏཾ ཝཏྠུཾ ནིསྶཱཡ རཱུཔཾ སམུཊྛཱཔེཏི.

ཙིཏྟསམུཊྛཱནཾ ¶ ནཱམ ཏཡོ ཨརཱུཔིནོ ཁནྡྷཱ, ‘‘སདྡནཝཀཾ, ཀཱཡཝིཉྙཏྟི, ཝཙཱིཝིཉྙཏྟི, ཨཱཀཱསདྷཱཏུ, ལཧུཏཱ, མུདུཏཱ, ཀམྨཉྙཏཱ, ཨུཔཙཡོ, སནྟཏཱི’’ཏི སཏྟརསཝིདྷཾ རཱུཔཉྩ. ཙིཏྟཔཙྩཡཾ ནཱམ ‘‘པཙྪཱཛཱཏཱ ཙིཏྟཙེཏསིཀཱ དྷམྨཱ པུརེཛཱཏསྶ ཨིམསྶ ཀཱཡསྶཱ’’ཏི (པཊྛཱ. ༡.༡.༡༡) ཨེཝཾ ཝུཏྟཾ ཙཏུསམུཊྛཱནརཱུཔཾ. ཙིཏྟཔཙྩཡཨཱཧཱརསམུཊྛཱནཾ ནཱམ ཙིཏྟསམུཊྛཱནརཱུཔེསུ ཋཱནཔྤཏྟཱ ¶ ཨོཛཱ ཨཉྙཾ ཨོཛཊྛམཀཾ སམུཊྛཱཔེཏི, ཨེཝཾ དྭེ ཏིསྶོ པཝཏྟིཡོ གྷཊེཏི. ཙིཏྟཔཙྩཡཨུཏུསམུཊྛཱནཾ ནཱམ ཙིཏྟསམུཊྛཱནོ ཨུཏུ ཋཱནཔྤཏྟོ ཨཉྙཾ ཨོཛཊྛམཀཾ སམུཊྛཱཔེཏི, ཨེཝཾ དྭེ ཏིསྶོ པཝཏྟིཡོ གྷཊེཏི. ཨེཝཾ ཙིཏྟཛརཱུཔསྶ ནིབྦཏྟི པསྶིཏབྦཱ.

༧༠༣. ཨཱཧཱརཛེསུཔི ཨཱཧཱརོ, ཨཱཧཱརསམུཊྛཱནཾ, ཨཱཧཱརཔཙྩཡཾ, ཨཱཧཱརཔཙྩཡཨཱཧཱརསམུཊྛཱནཾ, ཨཱཧཱརཔཙྩཡཨུཏུསམུཊྛཱནནྟི ཨེས ཝིབྷཱགོ ཝེདིཏབྦོ. ཏཏྠ ཨཱཧཱརོ ནཱམ ཀབལཱི༹ཀཱརོ ཨཱཧཱརོ. ཨཱཧཱརསམུཊྛཱནཾ ནཱམ ཨུཔཱདིཎྞཾ ཀམྨཛརཱུཔཾ པཙྩཡཾ ལབྷིཏྭཱ ཏཏྠ པཏིཊྛཱཡ ཋཱནཔྤཏྟཱཡ ཨོཛཱཡ སམུཊྛཱཔིཏཾ ཨོཛཊྛམཀཾ, ཨཱཀཱསདྷཱཏུ, ལཧུཏཱ, མུདུཏཱ, ཀམྨཉྙཏཱ, ཨུཔཙཡོ, སནྟཏཱིཏི ཙུདྡསཝིདྷཾ རཱུཔཾ. ཨཱཧཱརཔཙྩཡཾ ནཱམ ‘‘ཀབལཱི༹ཀཱརོ ཨཱཧཱརོ ཨིམསྶ ཀཱཡསྶ ཨཱཧཱརཔཙྩཡེན པཙྩཡོ’’ཏི (པཊྛཱ. ༡.༡.༡༥) ཨེཝཾ ཝུཏྟཾ ཙཏུསམུཊྛཱནརཱུཔཾ. ཨཱཧཱརཔཙྩཡཨཱཧཱརསམུཊྛཱནཾ ནཱམ ཨཱཧཱརསམུཊྛཱནེསུ རཱུཔེསུ ཋཱནཔྤཏྟཱ ཨོཛཱ ཨཉྙཾ ཨོཛཊྛམཀཾ སམུཊྛཱཔེཏི, ཏཏྲཱཔི ཨོཛཱ ཨཉྙནྟི ཨེཝཾ དསདྭཱདསཝཱརེ པཝཏྟིཾ གྷཊེཏི. ཨེཀདིཝསཾ པརིབྷུཏྟཱཧཱརོ སཏྟཱཧམྤི ཨུཔཏྠམྦྷེཏི. དིབྦཱ པན ཨོཛཱ ཨེཀམཱསཾ དྭེམཱསམྤི ཨུཔཏྠམྦྷེཏི. མཱཏརཱ པརིབྷུཏྟཱཧཱརོཔི དཱརཀསྶ སརཱིརཾ ཕརིཏྭཱ རཱུཔཾ སམུཊྛཱཔེཏི. སརཱིརེ མཀྑིཏཱཧཱརོཔི རཱུཔཾ སམུཊྛཱཔེཏི. ཀམྨཛཱཧཱརོ ཨུཔཱདིཎྞཀཱཧཱརོ ནཱམ. སོཔི ཋཱནཔྤཏྟོ རཱུཔཾ སམུཊྛཱཔེཏི, ཏཏྲཱཔི ཨོཛཱ ཨཉྙཾ སམུཊྛཱཔེཏཱིཏི ཨེཝཾ ཙཏསྶོ ཝཱ པཉྩ ཝཱ པཝཏྟིཡོ གྷཊེཏི. ཨཱཧཱརཔཙྩཡཨུཏུསམུཊྛཱནཾ ནཱམ ཨཱཧཱརསམུཊྛཱནཱ ཏེཛོདྷཱཏུ ཋཱནཔྤཏྟཱ ཨུཏུསམུཊྛཱནཾ ཨོཛཊྛམཀཾ སམུཊྛཱཔེཏི. ཏཏྲཱཡཾ ཨཱཧཱརོ ཨཱཧཱརསམུཊྛཱནཱནཾ ཛནཀོ ཧུཏྭཱ པཙྩཡོ ཧོཏི, སེསཱནཾ ནིསྶཡཱཧཱརཨཏྠིཨཝིགཏཝསེནཱཏི ཨེཝཾ ཨཱཧཱརཛརཱུཔསྶ ནིབྦཏྟི པསྶིཏབྦཱ.

༧༠༤. ཨུཏུཛེསུཔི ཨུཏུ, ཨུཏུསམུཊྛཱནཾ, ཨུཏུཔཙྩཡཾ, ཨུཏུཔཙྩཡཨུཏུསམུཊྛཱནཾ, ཨུཏུཔཙྩཡཨཱཧཱརསམུཊྛཱནནྟི ཨེས ཝིབྷཱགོ ཝེདིཏབྦོ. ཏཏྠ ཨུཏུ ནཱམ ཙཏུསམུཊྛཱནཱ ཏེཛོདྷཱཏུ, ཨུཎྷཨུཏུ སཱིཏཨུཏཱུཏི ཨེཝཾ པནེས དུཝིདྷོ ཧོཏི. ཨུཏུསམུཊྛཱནཾ ནཱམ ཙཏུསམུཊྛཱནོ ཨུཏུ ཨུཔཱདིཎྞཀཾ པཙྩཡཾ ལབྷིཏྭཱ ཋཱནཔྤཏྟོ སརཱིརེ རཱུཔཾ སམུཊྛཱཔེཏི. ཏཾ སདྡནཝཀཾ, ཨཱཀཱསདྷཱཏུ ¶ ¶ , ལཧུཏཱ, མུདུཏཱ, ཀམྨཉྙཏཱ, ཨུཔཙཡོ, སནྟཏཱིཏི པནྣརསཝིདྷཾ ཧོཏི. ཨུཏུཔཙྩཡཾ ནཱམ ཨུཏུ ཙཏུསམུཊྛཱནིཀརཱུཔཱནཾ པཝཏྟིཡཱ ཙ ཝིནཱསསྶ ཙ པཙྩཡོ ཧོཏི. ཨུཏུཔཙྩཡཨུཏུསམུཊྛཱནཾ ནཱམ ཨུཏུསམུཊྛཱནཱ ཏེཛོདྷཱཏུ ཋཱནཔྤཏྟཱ ཨཉྙཾ ཨོཛཊྛམཀཾ སམུཊྛཱཔེཏི, ཏཏྲཱཔི ཨུཏུ ཨཉྙནྟི ཨེཝཾ དཱིགྷམྤི ཨདྡྷཱནཾ ཨནུཔཱདིཎྞཔཀྑེ ཋཏྭཱཔི ཨུཏུསམུཊྛཱནཾ པཝཏྟཏིཡེཝ. ཨུཏུཔཙྩཡཨཱཧཱརསམུཊྛཱནཾ ནཱམ ཨུཏུསམུཊྛཱནཱ ཋཱནཔྤཏྟཱ ཨོཛཱ ཨཉྙཾ ཨོཛཊྛམཀཾ སམུཊྛཱཔེཏི, ཏཏྲཱཔི ཨོཛཱ ཨཉྙནྟི ཨེཝཾ དསདྭཱདསཝཱརེ པཝཏྟིཾ གྷཊེཏི. ཏཏྲཱཡཾ ཨུཏུ ཨུཏུསམུཊྛཱནཱནཾ ཛནཀོ ཧུཏྭཱ པཙྩཡོ ཧོཏི, སེསཱནཾ ནིསྶཡཨཏྠིཨཝིགཏཝསེནཱཏི ཨེཝཾ ཨུཏུཛརཱུཔསྶ ནིབྦཏྟི པསྶིཏབྦཱ. ཨེཝཉྷི རཱུཔསྶ ནིབྦཏྟིཾ པསྶནྟོ ཀཱལེན རཱུཔཾ སམྨསཏི ནཱམ.

ཨརཱུཔནིབྦཏྟིཔསྶནཱཀཱརཀཐཱ

༧༠༥. ཡཐཱ ཙ རཱུཔཾ སམྨསནྟེན རཱུཔསྶ, ཨེཝཾ ཨརཱུཔཾ སམྨསནྟེནཔི ཨརཱུཔསྶ ནིབྦཏྟི པསྶིཏབྦཱ. སཱ ཙ ཁོ ཨེཀཱསཱིཏི ལོཀིཡཙིཏྟུཔྤཱདཝསེནེཝ.

སེཡྻཐིདཾ – ཨིདཉྷི ཨརཱུཔཾ ནཱམ པུརིམབྷཝེ ཨཱཡཱུཧིཏཀམྨཝསེན པཊིསནྡྷིཡཾ ཏཱཝ ཨེཀཱུནཝཱིསཏིཙིཏྟུཔྤཱདཔྤབྷེདཾ ནིབྦཏྟཏི. ནིབྦཏྟནཱཀཱརོ པནསྶ པཊིཙྩསམུཔྤཱདནིདྡེསེ ཝུཏྟནཡེནེཝ ཝེདིཏབྦོ. ཏདེཝ པཊིསནྡྷིཙིཏྟསྶ ཨནནྟརཙིཏྟཏོ པཊྛཱཡ བྷཝངྒཝསེན, ཨཱཡུཔརིཡོསཱནེ ཙུཏིཝསེན. ཡཾ ཏཏྠ ཀཱམཱཝཙརཾ, ཏཾ ཚསུ དྭཱརེསུ བལཝཱརམྨཎེ ཏདཱརམྨཎཝསེན.

པཝཏྟེ པན ཨསམྦྷིནྣཏྟཱ ཙཀྑུསྶ ཨཱཔཱཐགཏཏྟཱ རཱུཔཱནཾ ཨཱལོཀསནྣིསྶིཏཾ མནསིཀཱརཧེཏུཀཾ ཙཀྑུཝིཉྙཱཎཾ ནིབྦཏྟཏི སདྡྷིཾ སམྤཡུཏྟདྷམྨེཧི. ཙཀྑུཔསཱདསྶ ཧི ཋིཏིཀྑཎེ ཋིཏིཔྤཏྟམེཝ རཱུཔཾ ཙཀྑུཾ གྷཊྚེཏི. ཏསྨིཾ གྷཊྚིཏེ དྭིཀྑཏྟུཾ བྷཝངྒཾ ཨུཔྤཛྫིཏྭཱ ནིརུཛ྄ཛྷཏི. ཏཏོ ཏསྨིཾཡེཝ ཨཱརམྨཎེ ཀིརིཡམནོདྷཱཏུ ཨཱཝཛྫནཀིཙྩཾ སཱདྷཡམཱནཱ ཨུཔྤཛྫཏི. ཏདནནྟརཾ ཏདེཝ རཱུཔཾ པསྶམཱནཾ ཀུསལཝིཔཱཀཾ ཨཀུསལཝིཔཱཀཾ ཝཱ ཙཀྑུཝིཉྙཱཎཾ. ཏཏོ ཏདེཝ རཱུཔཾ སམྤཊིཙྪམཱནཱ ཝིཔཱཀམནོདྷཱཏུ. ཏཏོ ཏདེཝ རཱུཔཾ སནྟཱིརཡམཱནཱ ཝིཔཱཀཱཧེཏུཀམནོཝིཉྙཱཎདྷཱཏུ. ཏཏོ ཏདེཝ རཱུཔཾ ཝཝཏྠཱཔཡམཱནཱ ཀིརིཡཱཧེཏུཀམནོཝིཉྙཱཎདྷཱཏུ ¶ ཨུཔེཀྑཱསཧགཏཱ ¶ . ཏཏོ པརཾ ཀཱམཱཝཙརཀུསལཱཀུསལཀིརིཡཙིཏྟེསུ ཨེཀཾ ཝཱ ཨུཔེཀྑཱསཧགཏཱཧེཏུཀཾ ཙིཏྟཾ པཉྩ སཏྟ ཝཱ ཛཝནཱནི. ཏཏོ ཀཱམཱཝཙརསཏྟཱནཾ ཨེཀཱདསསུ ཏདཱརམྨཎཙིཏྟེསུ ཛཝནཱནུརཱུཔཾ ཡཾཀིཉྩི ཏདཱརམྨཎནྟི. ཨེས ནཡོ སེསདྭཱརེསུཔི. མནོདྭཱརེ པན མཧགྒཏཙིཏྟཱནིཔི ཨུཔྤཛྫནྟཱིཏི. ཨེཝཾ ཚསུ དྭཱརེསུ ཨརཱུཔསྶ ནིབྦཏྟི པསྶིཏབྦཱ. ཨེཝཉྷི ཨརཱུཔསྶ ནིབྦཏྟིཾ པསྶནྟོ ཀཱལེན ཨརཱུཔཾ སམྨསཏི ནཱམ.

ཨེཝཾ ཀཱལེན རཱུཔཾ ཀཱལེན ཨརཱུཔཾ སམྨསིཏྭཱཔི ཏིལཀྑཎཾ ཨཱརོཔེཏྭཱ ཨནུཀྐམེན པཊིཔཛྫམཱནོ ཨེཀོ པཉྙཱབྷཱཝནཾ སམྤཱདེཏི.

རཱུཔསཏྟཀསམྨསནཀཐཱ

༧༠༦. ཨཔརོ རཱུཔསཏྟཀཨརཱུཔསཏྟཀཝསེན ཏིལཀྑཎཾ ཨཱརོཔེཏྭཱ སངྑཱརེ སམྨསཏི. ཏཏྠ ཨཱདཱནནིཀྑེཔནཏོ, ཝཡོཝུཌྜྷཏྠངྒམཏོ, ཨཱཧཱརམཡཏོ, ཨུཏུམཡཏོ, ཀམྨཛཏོ, ཙིཏྟསམུཊྛཱནཏོ, དྷམྨཏཱརཱུཔཏོཏི ཨིམེཧི ཨཱཀཱརེཧི ཨཱརོཔེཏྭཱ སམྨསནྟོ རཱུཔསཏྟཀཝསེན ཨཱརོཔེཏྭཱ སམྨསཏི ནཱམ. ཏེནཱཧུ པོརཱཎཱ –

‘‘ཨཱདཱནནིཀྑེཔནཏོ, ཝཡོཝུཌྜྷཏྠགཱམིཏོ;

ཨཱཧཱརཏོ ཙ ཨུཏུཏོ, ཀམྨཏོ ཙཱཔི ཙིཏྟཏོ;

དྷམྨཏཱརཱུཔཏོ སཏྟ, ཝིཏྠཱརེན ཝིཔསྶཏཱི’’ཏི.

ཏཏྠ ཨཱདཱནནྟི པཊིསནྡྷི. ནིཀྑེཔནནྟི ཙུཏི. ཨིཏི ཡོགཱཝཙརོ ཨིམེཧི ཨཱདཱནནིཀྑེཔེཧི ཨེཀཾ ཝསྶསཏཾ པརིཙྪིནྡིཏྭཱ སངྑཱརེསུ ཏིལཀྑཎཾ ཨཱརོཔེཏི. ཀཐཾ? ཨེཏྠནྟརེ སབྦེ སངྑཱརཱ ཨནིཙྩཱ. ཀསྨཱ? ཨུཔྤཱདཝཡཝཏྟིཏོ, ཝིཔརིཎཱམཏོ, ཏཱཝཀཱལིཀཏོ, ནིཙྩཔཊིཀྑེཔཏོ ཙ. ཡསྨཱ པན ཨུཔྤནྣཱ སངྑཱརཱ ཋིཏིཾ པཱཔུཎནྟི, ཋིཏིཡཾ ཛརཱཡ ཀིལམནྟི, ཛརཾ པཏྭཱ ཨཝསྶཾ བྷིཛྫནྟི, ཏསྨཱ ཨབྷིཎྷསམྤཊིཔཱིལ༹ནཏོ, དུཀྑམཏོ དུཀྑཝཏྠུཏོ, སུཁཔཊིཀྑེཔཏོ ཙ དུཀྑཱ. ཡསྨཱ ཙ ‘‘ཨུཔྤནྣཱ སངྑཱརཱ ཋིཏིཾ མཱ པཱཔུཎནྟུ, ཋཱནཔྤཏྟཱ མཱ ཛཱིརནྟུ, ཛརཔྤཏྟཱ མཱ བྷིཛྫནྟཱུ’’ཏི ཨིམེསུ ཏཱིསུ ¶ ཋཱནེསུ ཀསྶཙི ཝསཝཏྟིབྷཱཝོ ¶ ནཏྠི, སུཉྙཱ ཏེན ཝསཝཏྟནཱཀཱརེན, ཏསྨཱ སུཉྙཏོ, ཨསྶཱམིཀཏོ, ཨཝསཝཏྟིཏོ, ཨཏྟཔཊིཀྑེཔཏོ ཙ ཨནཏྟཱཏི.

༧༠༧. ཨེཝཾ ཨཱདཱནནིཀྑེཔནཝསེན ཝསྶསཏཔརིཙྪིནྣེ རཱུཔེ ཏིལཀྑཎཾ ཨཱརོཔེཏྭཱ ཏཏོ པརཾ ཝཡོཝུཌྜྷཏྠངྒམཏོ ཨཱརོཔེཏི. ཏཏྠ ཝཡོཝུཌྜྷཏྠངྒམོ ནཱམ ཝཡཝསེན ཝུཌྜྷསྶ ཝཌྜྷིཏསྶ རཱུཔསྶ ཨཏྠངྒམོ. ཏསྶ ཝསེན ཏིལཀྑཎཾ ཨཱརོཔེཏཱིཏི ཨཏྠོ.

ཀཐཾ? སོ ཏམེཝ ཝསྶསཏཾ པཋམཝཡེན མཛ྄ཛྷིམཝཡེན པཙྪིམཝཡེནཱཏི ཏཱིཧི ཝཡེཧི པརིཙྪིནྡཏི. ཏཏྠ ཨཱདིཏོ ཏེཏྟིཾས ཝསྶཱནི པཋམཝཡོ ནཱམ. ཏཏོ ཙཏུཏྟིཾས མཛ྄ཛྷིམཝཡོ ནཱམ. ཏཏོ ཏེཏྟིཾས པཙྪིམཝཡོ ནཱམཱཏི. ཨིཏི ཨིམེཧི ཏཱིཧི ཝཡེཧི པརིཙྪིནྡིཏྭཱ, ‘‘པཋམཝཡེ པཝཏྟཾ རཱུཔཾ མཛ྄ཛྷིམཝཡཾ ཨཔྤཏྭཱ ཏཏྠེཝ ནིརུཛ྄ཛྷཏི, ཏསྨཱ ཏཾ ཨནིཙྩཾ. ཡདནིཙྩཾ, ཏཾ དུཀྑཾ. ཡཾ དུཀྑཾ, ཏདནཏྟཱ. མཛ྄ཛྷིམཝཡེ པཝཏྟརཱུཔམྤི པཙྪིམཝཡཾ ཨཔྤཏྭཱ ཏཏྠེཝ ནིརུཛ྄ཛྷཏི, ཏསྨཱ ཏམྤི ཨནིཙྩཾ དུཀྑམནཏྟཱ. པཙྪིམཝཡེ ཏེཏྟིཾས ཝསྶཱནི པཝཏྟརཱུཔམྤི མརཎཏོ པརཾ གམནསམཏྠཾ ནཱམ ནཏྠི, ཏསྨཱ ཏམྤི ཨནིཙྩཾ དུཀྑམནཏྟཱ’’ཏི ཏིལཀྑཎཾ ཨཱརོཔེཏི.

༧༠༨. ཨེཝཾ པཋམཝཡཱདིཝསེན ཝཡོཝུཌྜྷཏྠངྒམཏོ ཏིལཀྑཎཾ ཨཱརོཔེཏྭཱ པུན ‘‘མནྡདསཀཾ, ཁིཌྜཱདསཀཾ, ཝཎྞདསཀཾ, བལདསཀཾ, པཉྙཱདསཀཾ, ཧཱནིདསཀཾ, པབྦྷཱརདསཀཾ, ཝངྐདསཀཾ, མོམཱུཧདསཀཾ, སཡནདསཀ’’ནྟི ཨིམེསཾ དསནྣཾ དསཀཱནཾ ཝསེན ཝཡོཝུཌྜྷཏྠངྒམཏོ ཏིལཀྑཎཾ ཨཱརོཔེཏི.

ཏཏྠ དསཀེསུ ཏཱཝ ཝསྶསཏཛཱིཝིནོ པུགྒལསྶ པཋམཱནི དས ཝསྶཱནི མནྡདསཀཾ ནཱམ, ཏདཱ ཧི སོ མནྡོ ཧོཏི ཙཔལོ ཀུམཱརཀོ. ཏཏོ པརཱནི དས ཁིཌྜཱདསཀཾ ནཱམ, ཏདཱ ཧི སོ ཁིཌྜཱརཏིབཧུལོ ཧོཏི. ཏཏོ པརཱནི དས ཝཎྞདསཀཾ ནཱམ, ཏདཱ ཧིསྶ ཝཎྞཱཡཏནཾ ཝེཔུལླཾ པཱཔུཎཱཏི. ཏཏོ པརཱནི དས བལདསཀཾ ནཱམ, ཏདཱ ཧིསྶ བལཉྩ ཐཱམོ ཙ ཝེཔུལླཾ པཱཔུཎཱཏི. ཏཏོ པརཱནི དས པཉྙཱདསཀཾ ནཱམ, ཏདཱ ཧིསྶ པཉྙཱ སུཔྤཏིཊྛིཏཱ ཧོཏི, པཀཏིཡཱ ཀིར དུབྦལཔཉྙསྶཱཔི ¶ ཏསྨིཾ ཀཱལེ ཨཔྤམཏྟཀཱ པཉྙཱ ཨུཔྤཛྫཏིཡེཝ. ཏཏོ པརཱནི དས ཧཱནིདསཀཾ ནཱམ, ཏདཱ ཧིསྶ ཁིཌྜཱརཏིཝཎྞབལཔཉྙཱ པརིཧཱཡནྟི. ཏཏོ པརཱནི ¶ དས པབྦྷཱརདསཀཾ ནཱམ, ཏདཱ ཧིསྶ ཨཏྟབྷཱཝོ པུརཏོ པབྦྷཱརོ ཧོཏི. ཏཏོ པརཱནི དས ཝངྐདསཀཾ ནཱམ, ཏདཱ ཧིསྶ ཨཏྟབྷཱཝོ ནངྒལཀོཊི ཝིཡ ཝངྐོ ཧོཏི. ཏཏོ པརཱནི དས མོམཱུཧདསཀཾ ནཱམ. ཏདཱ ཧི སོ མོམཱུཧོ ཧོཏི, ཀཏཾ ཀཏཾ པམུསྶཏི. ཏཏོ པརཱནི དས སཡནདསཀཾ ནཱམ, ཝསྶསཏིཀོ ཧི སཡནབཧུལོཝ ཧོཏི.

ཏཏྲཱཡཾ ཡོགཱི ཨེཏེསཾ དསཀཱནཾ ཝསེན ཝཡོཝུཌྜྷཏྠངྒམཏོ ཏིལཀྑཎཾ ཨཱརོཔེཏུཾ ཨིཏི པཊིསཉྩིཀྑཏི – ‘‘པཋམདསཀེ པཝཏྟརཱུཔཾ དུཏིཡདསཀཾ ཨཔྤཏྭཱ ཏཏྠེཝ ནིརུཛ྄ཛྷཏི, ཏསྨཱ ཏཾ ཨནིཙྩཾ དུཀྑམནཏྟཱ. དུཏིཡདསཀེ…པེ… ནཝམདསཀེ པཝཏྟརཱུཔཾ དསམདསཀཾ ཨཔྤཏྭཱ ཏཏྠེཝ ནིརུཛ྄ཛྷཏི. དསམདསཀེ པཝཏྟརཱུཔཾ པུནབྦྷཝཾ ཨཔྤཏྭཱ ཨིདྷེཝ ནིརུཛ྄ཛྷཏི, ཏསྨཱ ཏམྤི ཨནིཙྩཾ དུཀྑམནཏྟཱ’’ཏི ཏིལཀྑཎཾ ཨཱརོཔེཏི.

༧༠༩. ཨེཝཾ དསཀཝསེན ཝཡོཝུཌྜྷཏྠངྒམཏོ ཏིལཀྑཎཾ ཨཱརོཔེཏྭཱ པུན ཏདེཝ ཝསྶསཏཾ པཉྩཔཉྩཝསྶཝསེན ཝཱིསཏིཀོཊྛཱསེ ཀཏྭཱ ཝཡོཝུཌྜྷཏྠངྒམཏོ ཏིལཀྑཎཾ ཨཱརོཔེཏི. ཀཐཾ? སོ ཧི ཨིཏི པཊིསཉྩིཀྑཏི – ‘‘པཋམེ ཝསྶཔཉྩཀེ པཝཏྟརཱུཔཾ དུཏིཡཾ ཝསྶཔཉྩཀཾ ཨཔྤཏྭཱ ཏཏྠེཝ ནིརུཛ྄ཛྷཏི, ཏསྨཱ ཏཾ ཨནིཙྩཾ དུཀྑམནཏྟཱ. དུཏིཡེ ཝསྶཔཉྩཀེ པཝཏྟརཱུཔཾ ཏཏིཡཾ…པེ… ཨེཀཱུནཝཱིསཏིམེ ཝསྶཔཉྩཀེ པཝཏྟརཱུཔཾ ཝཱིསཏིམཾ ཝསྶཔཉྩཀཾ ཨཔྤཏྭཱ ཏཏྠེཝ ནིརུཛ྄ཛྷཏི. ཝཱིསཏིམེ ཝསྶཔཉྩཀེ པཝཏྟརཱུཔཾ མརཎཏོ པརཾ གམནསམཏྠཾ ནཱམ ནཏྠི, ཏསྨཱ ཏམྤི ཨནིཙྩཾ དུཀྑམནཏྟཱ’’ཏི.

ཨེཝཾ ཝཱིསཏིཀོཊྛཱསཝསེན ཝཡོཝུཌྜྷཏྠངྒམཏོ ཏིལཀྑཎཾ ཨཱརོཔེཏྭཱ པུན པཉྩཝཱིསཏི ཀོཊྛཱསེ ཀཏྭཱ ཙཏུནྣཾ ཙཏུནྣཾ ཝསྶཱནཾ ཝསེན ཨཱརོཔེཏི. ཏཏོ ཏེཏྟིཾས ཀོཊྛཱསེ ཀཏྭཱ ཏིཎྞཾ ཏིཎྞཾ ཝསྶཱནཾ ཝསེན, པཉྙཱས ཀོཊྛཱསེ ཀཏྭཱ དྭིནྣཾ དྭིནྣཾ ཝསྶཱནཾ ཝསེན, སཏཾ ཀོཊྛཱསེ ཀཏྭཱ ཨེཀེཀཝསྶཝསེན. ཏཏོ ཨེཀཾ ཝསྶཾ ཏཡོ ¶ ཀོཊྛཱསེ ཀཏྭཱ ཝསྶཱནཧེམནྟགིམྷེསུ ཏཱིསུ ཨུཏཱུསུ ཨེཀེཀཨུཏུཝསེན ཏསྨིཾ ཝཡོཝུཌྜྷཏྠངྒམརཱུཔེ ཏིལཀྑཎཾ ཨཱརོཔེཏི.

ཀཐཾ? ‘‘ཝསྶཱནེ ཙཏུམཱསཾ པཝཏྟརཱུཔཾ ཧེམནྟཾ ཨཔྤཏྭཱ ཏཏྠེཝ ནིརུདྡྷཾ. ཧེམནྟེ པཝཏྟརཱུཔཾ གིམྷཾ ཨཔྤཏྭཱ ཏཏྠེཝ ནིརུདྡྷཾ. གིམྷེ པཝཏྟརཱུཔཾ པུན ཝསྶཱནཾ ཨཔྤཏྭཱ ཏཏྠེཝ ནིརུདྡྷཾ, ཏསྨཱ ཏཾ ཨནིཙྩཾ དུཀྑམནཏྟཱ’’ཏི. ཨེཝཾ ཨཱརོཔེཏྭཱ པུན ཨེཀཾ ཝསྶཾ ཚ ཀོཊྛཱསེ ཀཏྭཱ – ‘‘ཝསྶཱནེ ¶ དྭེམཱསཾ པཝཏྟརཱུཔཾ སརདཾ ཨཔྤཏྭཱ ཏཏྠེཝ ནིརུདྡྷཾ. སརདེ པཝཏྟརཱུཔཾ ཧེམནྟཾ. ཧེམནྟེ པཝཏྟརཱུཔཾ སིསིརཾ. སིསིརེ པཝཏྟརཱུཔཾ ཝསནྟཾ. ཝསནྟེ པཝཏྟརཱུཔཾ གིམྷཾ. གིམྷེ པཝཏྟརཱུཔཾ པུན ཝསྶཱནཾ ཨཔྤཏྭཱ ཏཏྠེཝ ནིརུདྡྷཾ, ཏསྨཱ ཨནིཙྩཾ དུཀྑམནཏྟཱ’’ཏི ཨེཝཾ ཏསྨིཾ ཝཡོཝུཌྜྷཏྠངྒམརཱུཔེ ཏིལཀྑཎཾ ཨཱརོཔེཏི.

ཨེཝཾ ཨཱརོཔེཏྭཱ ཏཏོ ཀཱལ༹ཛུཎྷཝསེན – ‘‘ཀཱལེ༹ པཝཏྟརཱུཔཾ ཛུཎྷཾ ཨཔྤཏྭཱ. ཛུཎྷེ པཝཏྟརཱུཔཾ ཀཱལ༹ཾ ཨཔྤཏྭཱ ཏཏྠེཝ ནིརུདྡྷཾ, ཏསྨཱ ཨནིཙྩཾ དུཀྑམནཏྟཱ’’ཏི ཏིལཀྑཎཾ ཨཱརོཔེཏི. ཏཏོ རཏྟིནྡིཝཝསེན – ‘‘རཏྟིཾ པཝཏྟརཱུཔཾ དིཝསཾ ཨཔྤཏྭཱ ཏཏྠེཝ ནིརུདྡྷཾ. དིཝསཾ པཝཏྟརཱུཔམྤི རཏྟིཾ ཨཔྤཏྭཱ ཏཏྠེཝ ནིརུདྡྷཾ, ཏསྨཱ ཨནིཙྩཾ དུཀྑམནཏྟཱ’’ཏི ཏིལཀྑཎཾ ཨཱརོཔེཏི. ཏཏོ ཏདེཝ རཏྟིནྡིཝཾ པུབྦཎྷཱདིཝསེན ཚ ཀོཊྛཱསེ ཀཏྭཱ – ‘‘པུབྦཎྷེ པཝཏྟརཱུཔཾ མཛ྄ཛྷནྷཾ ཨཔྤཏྭཱ. མཛ྄ཛྷནྷེ པཝཏྟརཱུཔཾ སཱཡནྷཾ. སཱཡནྷེ པཝཏྟརཱུཔཾ པཋམཡཱམཾ. པཋམཡཱམེ པཝཏྟརཱུཔཾ མཛ྄ཛྷིམཡཱམཾ. མཛ྄ཛྷིམཡཱམེ པཝཏྟརཱུཔཾ པཙྪིམཡཱམཾ ཨཔྤཏྭཱ ཏཏྠེཝ ནིརུདྡྷཾ. པཙྪིམཡཱམེ པཝཏྟརཱུཔཾ པུན པུབྦཎྷཾ ཨཔྤཏྭཱ ཏཏྠེཝ ནིརུདྡྷཾ, ཏསྨཱ ཨནིཙྩཾ དུཀྑམནཏྟཱ’’ཏི ཏིལཀྑཎཾ ཨཱརོཔེཏི.

༧༡༠. ཨེཝཾ ཨཱརོཔེཏྭཱ པུན ཏསྨིཾཡེཝ རཱུཔེ ཨབྷིཀྐམཔཊིཀྐམཨཱལོཀནཝིལོཀནསམིཉྫནཔསཱརཎཝསེན – ‘‘ཨབྷིཀྐམེ པཝཏྟརཱུཔཾ པཊིཀྐམཾ ཨཔྤཏྭཱ ཏཏྠེཝ ནིརུཛ྄ཛྷཏི. པཊིཀྐམེ པཝཏྟརཱུཔཾ ཨཱལོཀནཾ. ཨཱལོཀནེ པཝཏྟརཱུཔཾ ཝིལོཀནཾ. ཝིལོཀནེ པཝཏྟརཱུཔཾ སམིཉྫནཾ. སམིཉྫནེ པཝཏྟརཱུཔཾ པསཱརཎཾ ཨཔྤཏྭཱ ཏཏྠེཝ ནིརུཛ྄ཛྷཏི. ཏསྨཱ ཨནིཙྩཾ དུཀྑམནཏྟཱ’’ཏི ཏིལཀྑཎཾ ཨཱརོཔེཏི.

ཏཏོ ཨེཀཔདཝཱརཾ ཨུདྡྷརཎ ཨཏིཧརཎཝཱིཏིཧརཎཝོསྶཛྫནསནྣིཀྑེཔནསནྣིརུམྦྷནཝསེན ཚ ཀོཊྛཱསེ ཀརོཏི.

ཏཏྠ ¶ ཨུདྡྷརཎཾ ནཱམ པཱདསྶ བྷཱུམིཏོ ཨུཀྑིཔནཾ. ཨཏིཧརཎཾ ནཱམ པུརཏོ ཧརཎཾ. ཝཱིཏིཧརཎཾ ནཱམ ཁཱཎུཀཎྚཀདཱིགྷཛཱཏིཨཱདཱིསུ ཀིཉྩིདེཝ དིསྭཱ ཨིཏོ ཙིཏོ ཙ པཱདསཉྩཱརཎཾ. ཝོསྶཛྫནཾ ནཱམ པཱདསྶ ཧེཊྛཱ ཨོརོཔནཾ. སནྣིཀྑེཔནཾ ནཱམ པཐཝཱིཏལེ ཋཔནཾ. སནྣིརུམྦྷནཾ ནཱམ པུན པཱདུདྡྷརཎཀཱལེ པཱདསྶ པཐཝིཡཱ སདྡྷིཾ ཨབྷིནིཔྤཱིལ༹ནཾ. ཏཏྠ ཨུདྡྷརཎེ པཐཝཱིདྷཱཏུ ¶ ཨཱཔོདྷཱཏཱུཏི དྭེ དྷཱཏུཡོ ཨོམཏྟཱ ཧོནྟི མནྡཱ, ཨིཏརཱ དྭེ ཨདྷིམཏྟཱ ཧོནྟི བལཝཏིཡོ. ཏཐཱ ཨཏིཧརཎཝཱིཏིཧརཎེསུ. ཝོསྶཛྫནེ ཏེཛོདྷཱཏུ ཝཱཡོདྷཱཏཱུཏི དྭེ དྷཱཏུཡོ ཨོམཏྟཱ ཧོནྟི མནྡཱ, ཨིཏརཱ དྭེ ཨདྷིམཏྟཱ ཧོནྟི བལཝཏིཡོ. ཏཐཱ སནྣིཀྑེཔནསནྣིརུམྦྷནེསུ. ཨེཝཾ ཚ ཀོཊྛཱསེ ཀཏྭཱ ཏེསཾ ཝསེན ཏསྨིཾ ཝཡོཝུཌྜྷཏྠངྒམརཱུཔེ ཏིལཀྑཎཾ ཨཱརོཔེཏི.

ཀཐཾ? སོ ཨིཏི པཊིསཉྩིཀྑཏི – ‘‘ཡཱ ཨུདྡྷརཎེ པཝཏྟཱ དྷཱཏུཡོ, ཡཱནི ཙ ཏདུཔཱདཱཡརཱུཔཱནི, སབྦེ ཏེ དྷམྨཱ ཨཏིཧརཎཾ ཨཔྤཏྭཱ ཨེཏྠེཝ ནིརུཛ྄ཛྷནྟི, ཏསྨཱ ཨནིཙྩཱ དུཀྑཱ ཨནཏྟཱ. ཏཐཱ ཨཏིཧརཎེ པཝཏྟཱ ཝཱིཏིཧརཎཾ. ཝཱིཏིཧརཎེ པཝཏྟཱ ཝོསྶཛྫནཾ. ཝོསྶཛྫནེ པཝཏྟཱ སནྣིཀྑེཔནཾ. སནྣིཀྑེཔནེ པཝཏྟཱ སནྣིརུམྦྷནཾ ཨཔྤཏྭཱ ཨེཏྠེཝ ནིརུཛ྄ཛྷནྟི. ཨིཏི ཏཏྠ ཏཏྠ ཨུཔྤནྣཱ ཨིཏརཾ ཨིཏརཾ ཀོཊྛཱསཾ ཨཔྤཏྭཱ ཏཏྠ ཏཏྠེཝ པབྦཾ པབྦཾ སནྡྷི སནྡྷི ཨོདྷི ཨོདྷི ཧུཏྭཱ ཏཏྟཀཔཱལེ པཀྑིཏྟཏིལཱ ཝིཡ ཏཊཏཊཱཡནྟཱ སངྑཱརཱ བྷིཛྫནྟི. ཏསྨཱ ཨནིཙྩཱ དུཀྑཱ ཨནཏྟཱ’’ཏི. ཏསྶེཝཾ པབྦཔབྦགཏེ སངྑཱརེ ཝིཔསྶཏོ རཱུཔསམྨསནཾ སུཁུམཾ ཧོཏི.

༧༡༡. སུཁུམཏྟེ ཙ པནསྶ ཨིདཾ ཨོཔམྨཾ. ཨེཀོ ཀིར དཱརུཏིཎུཀྐཱདཱིསུ ཀཏཔརིཙཡོ ཨདིཊྛཔུབྦཔདཱིཔོ པཙྩནྟཝཱསིཀོ ནགརམཱགམྨ ཨནྟརཱཔཎེ ཛལམཱནཾ པདཱིཔཾ དིསྭཱ ཨེཀཾ པུརིསཾ པུཙྪི ཨམྦྷོ ‘‘ཀིཾ ནཱམེཏཾ ཨེཝཾ མནཱཔ’’ནྟི? ཏམེནཾ སོ ཨཱཧ ‘‘ཀིམེཏྠ མནཱཔཾ, པདཱིཔོ ནཱམེས ཏེལཀྑཡེན ཝཊྚིཀྑཡེན ཙ གཏམགྒོཔིསྶ ན པཉྙཱཡིསྶཏཱི’’ཏི. ཏམཉྙོ ཨེཝམཱཧ ‘‘ཨིདཾ ཨོལཱ༹རིཀཾ, ཨིམིསྶཱ ཧི ཝཊྚིཡཱ ཨནུཔུབྦེན ཌཡ྄ཧམཱནཱཡ ཏཏིཡབྷཱགེ ཏཏིཡབྷཱགེ ཛཱལཱ ཨིཏརཱིཏརཾ པདེསཾ ཨཔྤཏྭཱཝ ནིརུཛ྄ཛྷིསྶཏཱི’’ཏི. ཏམཉྙོ ཨེཝམཱཧ ‘‘ཨིདམྤི ཨོལཱ༹རིཀཾ, ཨིམིསྶཱ ཧི ཨངྒུལངྒུལནྟརེ ཨཌྜྷངྒུལཌྜྷངྒུལནྟརེ ¶ ཏནྟུམྷི ཏནྟུམྷི ཨཾསུམྷི ཨཾསུམྷི ཛཱལཱ ཨིཏརཱིཏརཾ ཨཾསུཾ ཨཔྤཏྭཱཝ ནིརུཛ྄ཛྷིསྶཏི. ཨཾསུཾ པན མུཉྩིཏྭཱ ན སཀྐཱ ཛཱལཾ པཉྙཱཔེཏུ’’ནྟི.

ཏཏྠ ‘‘ཏེལཀྑཡེན ཝཊྚིཀྑཡེན ཙ པདཱིཔསྶ གཏམགྒོཔི ན པཉྙཱཡིསྶཏཱི’’ཏི པུརིསསྶ ཉཱཎཾ ཝིཡ ཡོགིནོ ཨཱདཱནནིཀྑེཔནཏོ ཝསྶསཏེན པརིཙྪིནྣརཱུཔེ ཏིལཀྑཎཱརོཔནཾ. ‘‘ཝཊྚིཡཱ ཏཏིཡབྷཱགེ ཏཏིཡབྷཱགེ ཛཱལཱ ཨིཏརཱིཏརཾ པདེསཾ ཨཔྤཏྭཱཝ ནིརུཛ྄ཛྷིསྶཏཱི’’ཏི ¶ པུརིསསྶ ཉཱཎཾ ཝིཡ ཡོགིནོ ཝསྶསཏསྶ ཏཏིཡཀོཊྛཱསཔརིཙྪིནྣེ ཝཡོཝུཌྜྷཏྠངྒམརཱུཔེ ཏིལཀྑཎཱརོཔནཾ. ‘‘ཨངྒུལངྒུལནྟརེ ཛཱལཱ ཨིཏརཱིཏརཾ ཨཔྤཏྭཱཝ ནིརུཛ྄ཛྷིསྶཏཱི’’ཏི པུརིསསྶ ཉཱཎཾ ཝིཡ ཡོགིནོ དསཝསྶ པཉྩཝསྶ ཙཏུཝསྶ ཏིཝསྶ དྭིཝསྶ ཨེཀཝསྶ པརིཙྪིནྣེ རཱུཔེ ཏིལཀྑཎཱརོཔནཾ. ‘‘ཨཌྜྷངྒུལཌྜྷངྒུལནྟརེ ཛཱལཱ ཨིཏརཱིཏརཾ ཨཔྤཏྭཱཝ ནིརུཛ྄ཛྷིསྶཏཱི’’ཏི པུརིསསྶ ཉཱཎཾ ཝིཡ ཡོགིནོ ཨེཀེཀཨུཏུཝསེན ཨེཀཾ ཝསྶཾ ཏིདྷཱ, ཚདྷཱ ཙ ཝིབྷཛིཏྭཱ ཙཏུམཱས-དྭིམཱསཔརིཙྪིནྣེ རཱུཔེ ཏིལཀྑཎཱརོཔནཾ. ‘‘ཏནྟུམྷི ཏནྟུམྷི ཛཱལཱ ཨིཏརཱིཏརཾ ཨཔྤཏྭཱཝ ནིརུཛ྄ཛྷིསྶཏཱི’’ཏི པུརིསསྶ ཉཱཎཾ ཝིཡ ཡོགིནོ ཀཱལ༹ཛུཎྷཝསེན, རཏྟིནྡིཝཝསེན, ཨེཀརཏྟིནྡིཝཾ ཚ ཀོཊྛཱསེ ཀཏྭཱ པུབྦཎྷཱདིཝསེན ཙ པརིཙྪིནྣེ རཱུཔེ ཏིལཀྑཎཱརོཔནཾ. ‘‘ཨཾསུམྷི ཨཾསུམྷི ཛཱལཱ ཨིཏརཱིཏརཾ ཨཔྤཏྭཱཝ ནིརུཛ྄ཛྷིསྶཏཱི’’ཏི པུརིསསྶ ཉཱཎཾ ཝིཡ ཡོགིནོ ཨབྷིཀྐམཱདིཝསེན ཙེཝ ཨུདྡྷརཎཱདཱིསུ ཙ ཨེཀེཀཀོཊྛཱསཝསེན པརིཙྪིནྣེ རཱུཔེ ཏིལཀྑཎཱརོཔནནྟི.

༧༡༢. སོ ཨེཝཾ ནཱནཱཀཱརེཧི ཝཡོཝུཌྜྷཏྠངྒམརཱུཔེ ཏིལཀྑཎཾ ཨཱརོཔེཏྭཱ པུན ཏདེཝ རཱུཔཾ ཝིསངྑརིཏྭཱ ཨཱཧཱརམཡཱདིཝསེན ཙཏྟཱརོ ཀོཊྛཱསེ ཀཏྭཱ ཨེཀེཀཀོཊྛཱསེ ཏིལཀྑཎཾ ཨཱརོཔེཏི. ཏཏྲཱསྶ ཨཱཧཱརམཡཾ རཱུཔཾ ཚཱཏསུཧིཏཝསེན པཱཀཊཾ ཧོཏི. ཚཱཏཀཱལེ སམུཊྛིཏཾ རཱུཔཾ ཧི ཛྷཏྟཾ ཧོཏི ཀིལནྟཾ, ཛྷཱམཁཱཎུཀོ ཝིཡ, ཨངྒཱརཔཙྪིཡཾ ནིལཱིནཀཱཀོ ཝིཡ ཙ དུབྦཎྞཾ དུསྶཎྛིཏཾ. སུཧིཏཀཱལེ སམུཊྛིཏཾ དྷཱཏཾ པཱིཎིཏཾ མུདུ སིནིདྡྷཾ ཕསྶཝནྟཾ ཧོཏི. སོ ཏཾ པརིགྒཧེཏྭཱ ‘‘ཚཱཏཀཱལེ ¶ པཝཏྟརཱུཔཾ སུཧིཏཀཱལཾ ཨཔྤཏྭཱ ཨེཏྠེཝ ནིརུཛ྄ཛྷཏི. སུཧིཏཀཱལེ སམུཊྛིཏམྤི ཚཱཏཀཱལཾ ཨཔྤཏྭཱ ཨེཏྠེཝ ནིརུཛ྄ཛྷཏི, ཏསྨཱ ཏཾ ཨནིཙྩཾ དུཀྑམནཏྟཱ’’ཏི ཨེཝཾ ཏཏྠ ཏིལཀྑཎཾ ཨཱརོཔེཏི.

༧༡༣. ཨུཏུམཡཾ སཱིཏུཎྷཝསེན པཱཀཊཾ ཧོཏི. ཨུཎྷཀཱལེ སམུཊྛིཏཾ རཱུཔཾ ཧི ཛྷཏྟཾ ཧོཏི ཀིལནྟཾ དུབྦཎྞཾ. སཱིཏཨུཏུནཱ སམུཊྛིཏཾ རཱུཔཾ དྷཱཏཾ པཱིཎིཏཾ སིནིདྡྷཾ ཧོཏི. སོ ཏཾ པརིགྒཧེཏྭཱ ‘‘ཨུཎྷཀཱལེ པཝཏྟརཱུཔཾ སཱིཏཀཱལཾ ཨཔྤཏྭཱ ཨེཏྠེཝ ནིརུཛ྄ཛྷཏི. སཱིཏཀཱལེ པཝཏྟརཱུཔཾ ཨུཎྷཀཱལཾ ཨཔྤཏྭཱ ཨེཏྠེཝ ནིརུཛ྄ཛྷཏི, ཏསྨཱ ཏཾ ཨནིཙྩཾ དུཀྑམནཏྟཱ’’ཏི ཨེཝཾ ཏཏྠ ཏིལཀྑཎཾ ཨཱརོཔེཏི.

༧༡༤. ཀམྨཛཾ ཨཱཡཏནདྭཱརཝསེན པཱཀཊཾ ཧོཏི. ཙཀྑུདྭཱརསྨིཾ ཧི ཙཀྑུཀཱཡབྷཱཝདསཀཝསེན ¶ ཏིཾས ཀམྨཛརཱུཔཱནི, ཨུཔཏྠམྦྷཀཱནི པན ཏེསཾ ཨུཏུཙིཏྟཱཧཱརསམུཊྛཱནཱནི ཙཏུཝཱིསཏཱིཏི ཙཏུཔཎྞཱས ཧོནྟི. ཏཐཱ སོཏགྷཱནཛིཝ྄ཧཱདྭཱརེསུ. ཀཱཡདྭཱརེ ཀཱཡབྷཱཝདསཀཝསེན ཙེཝ ཨུཏུསམུཊྛཱནཱདིཝསེན ཙ ཙཏུཙཏྟཱལཱིས. མནོདྭཱརེ ཧདཡཝཏྠུཀཱཡབྷཱཝདསཀཝསེན ཙེཝ ཨུཏུསམུཊྛཱནཱདིཝསེན ཙ ཙཏུཔཎྞཱསམེཝ.

སོ སབྦམྤི ཏཾ རཱུཔཾ པརིགྒཧེཏྭཱ ‘‘ཙཀྑུདྭཱརེ པཝཏྟརཱུཔཾ སོཏདྭཱརཾ ཨཔྤཏྭཱ ཨེཏྠེཝ ནིརུཛ྄ཛྷཏི. སོཏདྭཱརེ པཝཏྟརཱུཔཾ གྷཱནདྭཱརཾ. གྷཱནདྭཱརེ པཝཏྟརཱུཔཾ ཛིཝ྄ཧཱདྭཱརཾ. ཛིཝ྄ཧཱདྭཱརེ པཝཏྟརཱུཔཾ ཀཱཡདྭཱརཾ. ཀཱཡདྭཱརེ པཝཏྟརཱུཔཾ མནོདྭཱརཾ ཨཔྤཏྭཱ ཨེཏྠེཝ ནིརུཛ྄ཛྷཏི, ཏསྨཱ ཏཾ ཨནིཙྩཾ དུཀྑམནཏྟཱ’’ཏི ཨེཝཾ ཏཏྠ ཏིལཀྑཎཾ ཨཱརོཔེཏི.

༧༡༥. ཙིཏྟསམུཊྛཱནཾ སོམནསྶིཏདོམནསྶིཏཝསེན པཱཀཊཾ ཧོཏི, སོམནསྶིཏཀཱལེ ཨུཔྤནྣཾ ཧི རཱུཔཾ སིནིདྡྷཾ མུདུ པཱིཎིཏཾ ཕསྶཝནྟཾ ཧོཏི. དོམནསྶིཏཀཱལེ ཨུཔྤནྣཾ ཛྷཏྟཾ ཀིལནྟཾ དུབྦཎྞཾ ཧོཏི. སོ ཏཾ པརིགྒཧེཏྭཱ ‘‘སོམནསྶིཏཀཱལེ པཝཏྟརཱུཔཾ དོམནསྶིཏཀཱལཾ ཨཔྤཏྭཱ ཨེཏྠེཝ ནིརུཛ྄ཛྷཏི. དོམནསྶིཏཀཱལེ པཝཏྟརཱུཔཾ སོམནསྶིཏཀཱལཾ ཨཔྤཏྭཱ ཨེཏྠེཝ ནིརུཛ྄ཛྷཏི, ཏསྨཱ ཏཾ ཨནིཙྩཾ དུཀྑམནཏྟཱ’’ཏི ཨེཝཾ ཏཏྠ ཏིལཀྑཎཾ ཨཱརོཔེཏི.

ཏསྶེཝཾ ¶ ཙིཏྟསམུཊྛཱནརཱུཔཾ པརིགྒཧེཏྭཱ ཏཏྠ ཏིལཀྑཎཾ ཨཱརོཔཡཏོ ཨཡམཏྠོ པཱཀཊོ ཧོཏི –

ཛཱིཝིཏཾ ཨཏྟབྷཱཝོ ཙ, སུཁདུཀྑཱ ཙ ཀེཝལཱ;

ཨེཀཙིཏྟསམཱཡུཏྟཱ, ལཧུསོ ཝཏྟཏེ ཁཎོ.

ཙུལླཱསཱིཏི སཧསྶཱནི, ཀཔྤཾ ཏིཊྛནྟི ཡེ མརཱུ;

ན ཏྭེཝ ཏེཔི ཏིཊྛནྟི, དྭཱིཧི ཙིཏྟེཧི སམོཧིཏཱ.

ཡེ ནིརུདྡྷཱ མརནྟསྶ, ཏིཊྛམཱནསྶ ཝཱ ཨིདྷ;

སབྦེཝ སདིསཱ ཁནྡྷཱ, གཏཱ ཨཔྤཊིསནྡྷིཀཱ.

ཨནནྟརཱ ¶ ཙ ཡེ བྷགྒཱ, ཡེ ཙ བྷགྒཱ ཨནཱགཏེ;

ཏདནྟརཱ ནིརུདྡྷཱནཾ, ཝེསམཾ ནཏྠི ལཀྑཎེ.

ཨནིབྦཏྟེན ན ཛཱཏོ, པཙྩུཔྤནྣེན ཛཱིཝཏི;

ཙིཏྟབྷངྒཱ མཏོ ལོཀོ, པཉྙཏྟི པརམཏྠིཡཱ.

ཨནིདྷཱནགཏཱ བྷགྒཱ, པུཉྫོ ནཏྠི ཨནཱགཏེ;

ནིབྦཏྟཱ ཡེཔི ཏིཊྛནྟི, ཨཱརགྒེ སཱསཔཱུཔམཱ.

ནིབྦཏྟཱནཉྩ དྷམྨཱནཾ, བྷངྒོ ནེསཾ པུརཀྑཏོ;

པལོཀདྷམྨཱ ཏིཊྛནྟི, པུརཱཎེཧི ཨམིསྶིཏཱ.

ཨདསྶནཏོ ཨཱཡནྟི, བྷགྒཱ གཙྪནྟུདསྶནཾ;

ཝིཛྫུཔྤཱདོཝ ཨཱཀཱསེ, ཨུཔྤཛྫནྟི ཝཡནྟི ཙཱཏི. (མཧཱནི. ༡༠);

༧༡༦. ཨེཝཾ ཨཱཧཱརམཡཱདཱིསུ ཏིལཀྑཎཾ ཨཱརོཔེཏྭཱ པུན དྷམྨཏཱརཱུཔེ ཏིལཀྑཎཾ ཨཱརོཔེཏི. དྷམྨཏཱརཱུཔཾ ནཱམ བཧིདྡྷཱ ཨནིནྡྲིཡབདྡྷཾ ཨཡལོཧཏིཔུསཱིསསུཝཎྞརཛཏམུཏྟཱམཎིཝེལུ༹རིཡསངྑསིལཱཔཝཱལ༹ལོཧིཏངྒམསཱརགལླབྷཱུམིཔཱསཱཎཔབྦཏཏིཎརུཀྑལཏཱདིབྷེདཾ ཝིཝཊྚཀཔྤཏོ པཊྛཱཡ ཨུཔྤཛྫནཀརཱུཔཾ. ཏདསྶ ཨསོཀངྐུརཱདིཝསེན པཱཀཊཾ ཧོཏི.

ཨསོཀངྐུརཾ ཧི ཨཱདིཏོཝ ཏནུརཏྟཾ ཧོཏི, ཏཏོ དྭཱིཧཏཱིཧཙྩཡེན གྷནརཏྟཾ, པུན དྭཱིཧཏཱིཧཙྩཡེན མནྡརཏྟཾ, ཏཏོ ཏརུཎཔལླཝཝཎྞཾ, ཏཏོ ¶ པརིཎཏཔལླཝཝཎྞཾ, ཏཏོ ཧརིཏཔཎྞཝཎྞཾ. ཏཏོ ནཱིལཔཎྞཝཎྞཾ. ཏཏོ ནཱིལཔཎྞཝཎྞཀཱལཏོ པཊྛཱཡ སབྷཱགརཱུཔསནྟཏིམནུཔྤབནྡྷཱཔཡམཱནཾ སཾཝཙྪརམཏྟེན པཎྜུཔལཱསཾ ཧུཏྭཱ ཝཎྚཏོ ཚིཛྫིཏྭཱ པཏཏི.

སོ ཏཾ པརིགྒཧེཏྭཱ ‘‘ཏནུརཏྟཀཱལེ པཝཏྟརཱུཔཾ གྷནརཏྟཀཱལཾ ཨཔྤཏྭཱ ནིརུཛ྄ཛྷཏི. གྷནརཏྟཀཱལེ པཝཏྟརཱུཔཾ མནྡརཏྟཀཱལཾ. མནྡརཏྟཀཱལེ པཝཏྟརཱུཔཾ ཏརུཎཔལླཝཝཎྞཀཱལཾ. ཏརུཎཔལླཝཝཎྞཀཱལེ པཝཏྟཾ པརིཎཏཔལླཝཝཎྞཀཱལཾ. པརིཎཏཔལླཝཝཎྞཀཱལེ པཝཏྟཾ ཧརིཏཔཎྞཝཎྞཀཱལཾ ¶ . ཧརིཏཔཎྞཀཱལེ པཝཏྟཾ ནཱིལཔཎྞཝཎྞཀཱལཾ. ནཱིལཔཎྞཝཎྞཀཱལེ པཝཏྟཾ པཎྜུཔལཱསཀཱལཾ. པཎྜུཔལཱསཀཱལེ པཝཏྟཾ ཝཎྚཏོ ཚིཛྫིཏྭཱ པཏནཀཱལཾ ཨཔྤཏྭཱཝ ནིརུཛ྄ཛྷཏི, ཏསྨཱ ཏཾ ཨནིཙྩཾ དུཀྑམནཏྟཱ’’ཏི ཏིལཀྑཎཾ ཨཱརོཔེཏི, ཨེཝཾ ཏཏྠ ཏིལཀྑཎཾ ཨཱརོཔེཏྭཱ ཨིམིནཱ ནཡེན སབྦམྤི དྷམྨཏཱརཱུཔཾ སམྨསཏི.

ཨེཝཾ ཏཱཝ རཱུཔསཏྟཀཝསེན ཏིལཀྑཎཾ ཨཱརོཔེཏྭཱ སངྑཱརེ སམྨསཏི.

ཨརཱུཔསཏྟཀསམྨསནཀཐཱ

༧༡༧. ཡཾ པན ཝུཏྟཾ ‘‘ཨརཱུཔསཏྟཀཝསེནཱ’’ཏི, ཏཏྠ ཨཡཾ མཱཏིཀཱ – ཀལཱཔཏོ, ཡམཀཏོ, ཁཎིཀཏོ, པཊིཔཱཊིཏོ, དིཊྛིཨུགྒྷཱཊནཏོ, མཱནསམུགྒྷཱཊནཏོ, ནིཀནྟིཔརིཡཱདཱནཏོཏི.

ཏཏྠ ཀལཱཔཏོཏི ཕསྶཔཉྩམཀཱ དྷམྨཱ. ཀཐཾ ཀལཱཔཏོ སམྨསཏཱིཏི? ཨིདྷ བྷིཀྑུ ཨིཏི པཊིསཉྩིཀྑཏི – ‘‘ཡེ ཨིམེ ‘ཀེསཱ ཨནིཙྩཱ དུཀྑཱ ཨནཏྟཱ’ཏི སམྨསནེ ཨུཔྤནྣཱ ཕསྶཔཉྩམཀཱ དྷམྨཱ, ཡེ ཙ ‘ལོམཱ…པེ… མཏྠལུངྒཾ ཨནིཙྩཾ དུཀྑམནཏྟཱ’ཏི སམྨསནེ ཨུཔྤནྣཱ ཕསྶཔཉྩམཀཱ དྷམྨཱ, སབྦེ ཏེ ཨིཏརཱིཏརཾ ཨཔྤཏྭཱ པབྦཾཔབྦཾ ཨོདྷིཨོདྷི ཧུཏྭཱ ཏཏྟཀཔཱལེ པཀྑིཏྟཏིལཱ ཝིཡ ཏཊཏཊཱཡནྟཱ ཝིནཊྛཱ, ཏསྨཱ ཨནིཙྩཱ དུཀྑཱ ཨནཏྟཱ’’ཏི. ཨཡཾ ཏཱཝ ཝིསུདྡྷིཀཐཱཡཾ ནཡོ.

ཨརིཡཝཾསཀཐཱཡཾ པན ‘‘ཧེཊྛཱ རཱུཔསཏྟཀེ སཏྟསུ ཋཱནེསུ ‘རཱུཔཾ ཨནིཙྩཾ དུཀྑམནཏྟཱ’ཏི པཝཏྟཾ ཙིཏྟཾ ཨཔརེན ཙིཏྟེན ‘ཨནིཙྩཾ དུཀྑམནཏྟཱ’ཏི སམྨསནྟོ ‘ཀལཱཔཏོ ¶ སམྨསཏཱི’ཏི’’ ཝུཏྟཾ, ཏཾ ཡུཏྟཏརཾ. ཏསྨཱ སེསཱནིཔི ཏེནེཝ ནཡེན ཝིབྷཛིསྶཱམ.

༧༡༨. ཡམཀཏོཏི ཨིདྷ བྷིཀྑུ ཨཱདཱནནིཀྑེཔརཱུཔཾ ‘‘ཨནིཙྩཾ དུཀྑམནཏྟཱ’’ཏི སམྨསིཏྭཱ ཏམྤི ཙིཏྟཾ ཨཔརེན ཙིཏྟེན ‘‘ཨནིཙྩཾ དུཀྑམནཏྟཱ’’ཏི སམྨསཏི. ཝཡོཝུཌྜྷཏྠངྒམརཱུཔཾ, ཨཱཧཱརམཡཾ, ཨུཏུམཡཾ, ཀམྨཛཾ, ཙིཏྟསམུཊྛཱནཾ, དྷམྨཏཱརཱུཔཾ ‘‘ཨནིཙྩཾ དུཀྑམནཏྟཱ’’ཏི ¶ སམྨསིཏྭཱ ཏམྤི ཙིཏྟཾ ཨཔརེན ཙིཏྟེན ‘‘ཨནིཙྩཾ དུཀྑམནཏྟཱ’’ཏི སམྨསཏི. ཨེཝཾ ཡམཀཏོ སམྨསཏི ནཱམ.

༧༡༩. ཁཎིཀཏོཏི ཨིདྷ བྷིཀྑུ ཨཱདཱནནིཀྑེཔརཱུཔཾ ‘‘ཨནིཙྩཾ དུཀྑམནཏྟཱ’’ཏི སམྨསིཏྭཱ ཏཾ པཋམཙིཏྟཾ དུཏིཡཙིཏྟེན, དུཏིཡཾ ཏཏིཡེན, ཏཏིཡཾ ཙཏུཏྠེན, ཙཏུཏྠཾ པཉྩམེན ‘‘ཨེཏམྤི ཨནིཙྩཾ དུཀྑམནཏྟཱ’’ཏི སམྨསཏི. ཝཡོཝུཌྜྷཏྠངྒམརཱུཔཾ, ཨཱཧཱརམཡཾ, ཨུཏུམཡཾ, ཀམྨཛཾ, ཙིཏྟསམུཊྛཱནཾ, དྷམྨཏཱརཱུཔཾ ‘‘ཨནིཙྩཾ དུཀྑམནཏྟཱ’’ཏི སམྨསིཏྭཱ ཏཾ པཋམཙིཏྟཾ དུཏིཡཙིཏྟེན, དུཏིཡཾ ཏཏིཡེན, ཏཏིཡཾ ཙཏུཏྠེན, ཙཏུཏྠཾ པཉྩམེན ‘‘ཨེཏམྤི ཨནིཙྩཾ དུཀྑམནཏྟཱ’’ཏི སམྨསཏི. ཨེཝཾ རཱུཔཔརིགྒཱཧཀཙིཏྟཏོ པཊྛཱཡ ཙཏྟཱརི ཙཏྟཱརི ཙིཏྟཱནི སམྨསནྟོ ཁཎིཀཏོ སམྨསཏི ནཱམ.

༧༢༠. པཊིཔཱཊིཏོཏི ཨཱདཱནནིཀྑེཔརཱུཔཾ ‘‘ཨནིཙྩཾ དུཀྑམནཏྟཱ’’ཏི སམྨསིཏྭཱ ཏཾ པཋམཙིཏྟཾ དུཏིཡཙིཏྟེན, དུཏིཡཾ ཏཏིཡེན, ཏཏིཡཾ ཙཏུཏྠེན…པེ… དསམཾ ཨེཀཱདསམེན ‘‘ཨེཏམྤི ཨནིཙྩཾ དུཀྑམནཏྟཱ’’ཏི སམྨསཏི. ཝཡོཝུཌྜྷཏྠངྒམརཱུཔཾ, ཨཱཧཱརམཡཾ, ཨུཏུམཡཾ, ཀམྨཛཾ, ཙིཏྟསམུཊྛཱནཾ, དྷམྨཏཱརཱུཔཾ ‘‘ཨནིཙྩཾ དུཀྑམནཏྟཱ’’ཏི སམྨསིཏྭཱ ཏཾ པཋམཙིཏྟཾ དུཏིཡཙིཏྟེན, དུཏིཡཾ ཏཏིཡེན, ཏཏིཡཾ ཙཏུཏྠེན…པེ… དསམཾ ཨེཀཱདསམེན ‘‘ཨེཏམྤི ཨནིཙྩཾ དུཀྑམནཏྟཱ’’ཏི ཨེཝཾ ཝིཔསྶནཱ པཊིཔཱཊིཡཱ སཀལམྤི དིཝསབྷཱགཾ སམྨསིཏུཾ ཝཊྚེཡྻ. ཡཱཝ དསམཙིཏྟསམྨསནཱ པན རཱུཔཀམྨཊྛཱནམྤི ཨརཱུཔཀམྨཊྛཱནམྤི པགུཎཾ ཧོཏི. ཏསྨཱ དསམེཡེཝ ཋཔེཏབྦནྟི ཝུཏྟཾ. ཨེཝཾ སམྨསནྟོ པཊིཔཱཊིཏོ སམྨསཏི ནཱམ.

༧༢༡. དིཊྛིཨུགྒྷཱཊནཏོ མཱནཨུགྒྷཱཊནཏོ ནིཀནྟིཔརིཡཱདཱནཏོཏི ཨིམེསུ ཏཱིསུ ཝིསུཾ སམྨསནནཡོ ནཱམ ནཏྠི. ཡཾ པནེཏཾ ཧེཊྛཱ ¶ རཱུཔཾ, ཨིདྷ ཙ ཨརཱུཔཾ པརིགྒཧིཏཾ, ཏཾ པསྶནྟོ རཱུཔཱརཱུཔཏོ ཨུདྡྷཾ ཨཉྙཾ སཏྟཾ ནཱམ ན པསྶཏི. སཏྟསྶ ཨདསྶནཏོ པཊྛཱཡ སཏྟསཉྙཱ ཨུགྒྷཱཊིཏཱ ཧོཏི. སཏྟསཉྙཾ ཨུགྒྷཱཊིཏཙིཏྟེན སངྑཱརེ པརིགྒཎྷཏོ དིཊྛི ནུཔྤཛྫཏི. དིཊྛིཡཱ ཨནུཔྤཛྫམཱནཱཡ དིཊྛི ཨུགྒྷཱཊིཏཱ ནཱམ ཧོཏི. དིཊྛིཨུགྒྷཱཊིཏཙིཏྟེན སངྑཱརེ པརིགྒཎྷཏོ མཱནོ ནུཔྤཛྫཏི. མཱནེ ཨནུཔྤཛྫནྟེ མཱནོ སམུགྒྷཱཊིཏོ ནཱམ ཧོཏི. མཱནསམུགྒྷཱཊིཏཙིཏྟེན སངྑཱརེ པརིགྒཎྷཏོ ཏཎྷཱ ནུཔྤཛྫཏི. ཏཎྷཱཡ ཨནུཔྤཛྫནྟིཡཱ ནིཀནྟི པརིཡཱདིཎྞཱ ནཱམ ཧོཏཱིཏི ཨིདཾ ཏཱཝ ཝིསུདྡྷིཀཐཱཡཾ ཝུཏྟཾ.

ཨརིཡཝཾསཀཐཱཡཾ ¶ པན ‘‘དིཊྛིཨུགྒྷཱཊནཏོ མཱནསམུགྒྷཱཊནཏོ ནིཀནྟིཔརིཡཱདཱནཏོ’’ཏི མཱཏིཀཾ ཋཔེཏྭཱ ཨཡཾ ནཡོ དསྶིཏོ.

‘‘ཨཧཾ ཝིཔསྶཱམི, མམ ཝིཔསྶནཱ’’ཏི གཎྷཏོ ཧི དིཊྛིསམུགྒྷཱཊནཾ ནཱམ ན ཧོཏི. ‘‘སངྑཱརཱཝ སངྑཱརེ ཝིཔསྶནྟི སམྨསནྟི ཝཝཏྠཔེནྟི པརིགྒཎྷནྟི པརིཙྪིནྡནྟཱི’’ཏི གཎྷཏོ པན དིཊྛིཨུགྒྷཱཊནཾ ནཱམ ཧོཏི.

‘‘སུཊྛུ ཝིཔསྶཱམི, མནཱཔཾ ཝིཔསྶཱམཱི’’ཏི གཎྷཏོ མཱནསམུགྒྷཱཊོ ནཱམ ན ཧོཏི. ‘‘སངྑཱརཱཝ སངྑཱརེ ཝིཔསྶནྟི སམྨསནྟི ཝཝཏྠཔེནྟི པརིགྒཎྷནྟི པརིཙྪིནྡནྟཱི’’ཏི གཎྷཏོ པན མཱནསམུགྒྷཱཊོ ནཱམ ཧོཏི.

‘‘ཝིཔསྶིཏུཾ སཀྐོམཱི’’ཏི ཝིཔསྶནཾ ཨསྶཱདེནྟསྶ ནིཀནྟིཔརིཡཱདཱནཾ ནཱམ ན ཧོཏི. ‘‘སངྑཱརཱཝ སངྑཱརེ ཝིཔསྶནྟི སམྨསནྟི ཝཝཏྠཔེནྟི པརིགྒཎྷནྟི པརིཙྪིནྡནྟཱི’’ཏི གཎྷཏོ པན ནིཀནྟིཔརིཡཱདཱནཾ ནཱམ ཧོཏི.

སཙེ སངྑཱརཱ ཨཏྟཱ བྷཝེཡྻུཾ, ཨཏྟཱཏི གཧེཏུཾ ཝཊྚེཡྻུཾ, ཨནཏྟཱ ཙ པན ཨཏྟཱཏི གཧིཏཱ, ཏསྨཱ ཏེ ཨཝསཝཏྟནཊྛེན ཨནཏྟཱ, ཧུཏྭཱ ཨབྷཱཝཊྛེན ཨནིཙྩཱ, ཨུཔྤཱདཝཡཔཊིཔཱིལ༹ནཊྛེན དུཀྑཱཏི པསྶཏོ དིཊྛིཨུགྒྷཱཊནཾ ནཱམ ཧོཏི.

སཙེ སངྑཱརཱ ནིཙྩཱ བྷཝེཡྻུཾ, ནིཙྩཱཏི གཧེཏུཾ ཝཊྚེཡྻུཾ, ཨནིཙྩཱ ཙ པན ནིཙྩཱཏི གཧིཏཱ, ཏསྨཱ ཏེ ཧུཏྭཱ ཨབྷཱཝཊྛེན ཨནིཙྩཱ, ཨུཔྤཱདཝཡཔཊིཔཱིལ༹ནཊྛེན དུཀྑཱ, ཨཝསཝཏྟནཊྛེན ཨནཏྟཱཏི པསྶཏོ མཱནསམུགྒྷཱཊོ ནཱམ ཧོཏི.

སཙེ ¶ སངྑཱརཱ སུཁཱ བྷཝེཡྻུཾ, སུཁཱཏི གཧེཏུཾ ཝཊྚེཡྻུཾ, དུཀྑཱ ཙ པན སུཁཱཏི གཧིཏཱ, ཏསྨཱ ཏེ ཨུཔྤཱདཝཡཔཊིཔཱིལ༹ནཊྛེན དུཀྑཱ, ཧུཏྭཱ ཨབྷཱཝཊྛེན ཨནིཙྩཱ, ཨཝསཝཏྟནཊྛེན ཨནཏྟཱཏི པསྶཏོ ནིཀནྟིཔརིཡཱདཱནཾ ནཱམ ཧོཏི.

ཨེཝཾ སངྑཱརེ ཨནཏྟཏོ པསྶནྟསྶ དིཊྛིསམུགྒྷཱཊནཾ ནཱམ ཧོཏི. ཨནིཙྩཏོ པསྶནྟསྶ མཱནསམུགྒྷཱཊནཾ ¶ ནཱམ ཧོཏི. དུཀྑཏོ པསྶནྟསྶ ནིཀནྟིཔརིཡཱདཱནཾ ནཱམ ཧོཏི. ཨིཏི ཨཡཾ ཝིཔསྶནཱ ཨཏྟནོ ཨཏྟནོ ཋཱནེཡེཝ ཏིཊྛཏཱིཏི.

ཨེཝཾ ཨརཱུཔསཏྟཀཝསེནཱཔི ཏིལཀྑཎཾ ཨཱརོཔེཏྭཱ སངྑཱརེ སམྨསཏི. ཨེཏྟཱཝཏཱ པནསྶ རཱུཔཀམྨཊྛཱནམྤི ཨརཱུཔཀམྨཊྛཱནམྤི པགུཎཾ ཧོཏི.

༧༢༢. སོ ཨེཝཾ པགུཎརཱུཔཱརཱུཔཀམྨཊྛཱནོ ཡཱ ཨུཔརི བྷངྒཱནུཔསྶནཏོ པཊྛཱཡ པཧཱནཔརིཉྙཱཝསེན སབྦཱཀཱརཏོ པཏྟབྦཱ ཨཊྛཱརས མཧཱཝིཔསྶནཱ, ཏཱསཾ ཨིདྷེཝ ཏཱཝ ཨེཀདེསཾ པཊིཝིཛ྄ཛྷནྟོ ཏཔྤཊིཔཀྑེ དྷམྨེ པཛཧཏི.

ཨཊྛཱརས མཧཱཝིཔསྶནཱ ནཱམ ཨནིཙྩཱནུཔསྶནཱདིཀཱ པཉྙཱ. ཡཱསུ ཨནིཙྩཱནུཔསྶནཾ བྷཱཝེནྟོ ནིཙྩསཉྙཾ པཛཧཏི, དུཀྑཱནུཔསྶནཾ བྷཱཝེནྟོ སུཁསཉྙཾ པཛཧཏི, ཨནཏྟཱནུཔསྶནཾ བྷཱཝེནྟོ ཨཏྟསཉྙཾ པཛཧཏི, ནིབྦིདཱནུཔསྶནཾ བྷཱཝེནྟོ ནནྡིཾ པཛཧཏི, ཝིརཱགཱནུཔསྶནཾ བྷཱཝེནྟོ རཱགཾ པཛཧཏི, ནིརོདྷཱནུཔསྶནཾ བྷཱཝེནྟོ སམུདཡཾ པཛཧཏི, པཊིནིསྶགྒཱནུཔསྶནཾ བྷཱཝེནྟོ ཨཱདཱནཾ པཛཧཏི, ཁཡཱནུཔསྶནཾ བྷཱཝེནྟོ གྷནསཉྙཾ པཛཧཏི, ཝཡཱནུཔསྶནཾ བྷཱཝེནྟོ ཨཱཡཱུཧནཾ པཛཧཏི, ཝིཔརིཎཱམཱནུཔསྶནཾ བྷཱཝེནྟོ དྷུཝསཉྙཾ པཛཧཏི, ཨནིམིཏྟཱནུཔསྶནཾ བྷཱཝེནྟོ ནིམིཏྟཾ པཛཧཏི, ཨཔྤཎིཧིཏཱནུཔསྶནཾ བྷཱཝེནྟོ པཎིདྷིཾ པཛཧཏི, སུཉྙཏཱནུཔསྶནཾ བྷཱཝེནྟོ ཨབྷིནིཝེསཾ པཛཧཏི, ཨདྷིཔཉྙཱདྷམྨཝིཔསྶནཾ བྷཱཝེནྟོ སཱརཱདཱནཱབྷིནིཝེསཾ པཛཧཏི, ཡཐཱབྷཱུཏཉཱཎདསྶནཾ བྷཱཝེནྟོ སམྨོཧཱབྷིནིཝེསཾ པཛཧཏི, ཨཱདཱིནཝཱནུཔསྶནཾ བྷཱཝེནྟོ ཨཱལཡཱབྷིནིཝེསཾ པཛཧཏི, པཊིསངྑཱནུཔསྶནཾ བྷཱཝེནྟོ ཨཔྤཊིསངྑཾ པཛཧཏི, ཝིཝཊྚཱནུཔསྶནཾ བྷཱཝེནྟོ སཾཡོགཱབྷིནིཝེསཾ པཛཧཏི.

ཏཱསུ ¶ ཡསྨཱ ཨིམིནཱ ཨནིཙྩཱདིལཀྑཎཏྟཡཝསེན སངྑཱརཱ དིཊྛཱ, ཏསྨཱ ཨནིཙྩ-དུཀྑ-ཨནཏྟཱནུཔསྶནཱ པཊིཝིདྡྷཱ ཧོནྟི. ཡསྨཱ ཙ ‘‘ཡཱ ཙ ཨནིཙྩཱནུཔསྶནཱ ཡཱ ཙ ཨནིམིཏྟཱནུཔསྶནཱ, ཨིམེ དྷམྨཱ ཨེཀཏྠཱ, བྱཉྫནམེཝ ནཱནཾ’’. ཏཐཱ ‘‘ཡཱ ཙ དུཀྑཱནུཔསྶནཱ ཡཱ ཙ ཨཔྤཎིཧིཏཱནུཔསྶནཱ, ཨིམེ དྷམྨཱ ཨེཀཏྠཱ, བྱཉྫནམེཝ ནཱནཾ’’. ‘‘ཡཱ ཙ ཨནཏྟཱནུཔསྶནཱ ཡཱ ཙ སུཉྙཏཱནུཔསྶནཱ, ཨིམེ དྷམྨཱ ཨེཀཏྠཱ, བྱཉྫནམེཝ ནཱན’’ནྟི (པཊི. མ. ༡.༢༢༧) ཝུཏྟཾ. ཏསྨཱ ཏཱཔི པཊིཝིདྡྷཱ ཧོནྟི.

ཨདྷིཔཉྙཱདྷམྨཝིཔསྶནཱ ¶ པན སབྦཱཔི ཝིཔསྶནཱ. ཡཐཱབྷཱུཏཉཱཎདསྶནཾ ཀངྑཱཝིཏརཎཝིསུདྡྷིཡཱ ཨེཝ སངྒཧིཏཾ. ཨིཏི ཨིདམྤི དྭཡཾ པཊིཝིདྡྷམེཝ ཧོཏི. སེསེསུ ཝིཔསྶནཱཉཱཎེསུ ཀིཉྩི པཊིཝིདྡྷཾ, ཀིཉྩི ཨཔྤཊིཝིདྡྷཾ, ཏེསཾ ཝིབྷཱགཾ པརཏོ ཨཱཝིཀརིསྶཱམ.

ཡདེཝ ཧི པཊིཝིདྡྷཾ, ཏཾ སནྡྷཱཡ ཨིདཾ ཝུཏྟཾ ‘‘ཨེཝཾ པགུཎརཱུཔཱརཱུཔཀམྨཊྛཱནོ ཡཱ ཨུཔརི བྷངྒཱནུཔསྶནཏོ པཊྛཱཡ པཧཱནཔརིཉྙཱཝསེན སབྦཱཀཱརཏོ པཏྟབྦཱ ཨཊྛཱརས མཧཱཝིཔསྶནཱ. ཏཱསཾ ཨིདྷེཝ ཏཱཝ ཨེཀདེསཾ པཊིཝིཛ྄ཛྷནྟོ ཏཔྤཊིཔཀྑེ དྷམྨེ པཛཧཏཱི’’ཏི.

ཨུདཡབྦཡཉཱཎཀཐཱ

༧༢༣. སོ ཨེཝཾ ཨནིཙྩཱནུཔསྶནཱདིཔཊིཔཀྑཱནཾ ནིཙྩསཉྙཱདཱིནཾ པཧཱནེན ཝིསུདྡྷཉཱཎོ སམྨསནཉཱཎསྶ པཱརཾ གནྟྭཱ, ཡཾ ཏཾ སམྨསནཉཱཎཱནནྟརཾ ‘‘པཙྩུཔྤནྣཱནཾ དྷམྨཱནཾ ཝིཔརིཎཱམཱནུཔསྶནེ པཉྙཱ ཨུདཡབྦཡཱནུཔསྶནེ ཉཱཎ’’ནྟི (པཊི. མ. མཱཏིཀཱ ༡.༦) ཨུདཡབྦཡཱནུཔསྶནཾ ཝུཏྟཾ, ཏསྶ ཨདྷིགམཱཡ ཡོགཾ ཨཱརབྷཏི. ཨཱརབྷམཱནོ ཙ སངྑེཔཏོ ཏཱཝ ཨཱརབྷཏི. ཏཏྲཱཡཾ པཱལི༹ –

‘‘ཀཐཾ པཙྩུཔྤནྣཱནཾ དྷམྨཱནཾ ཝིཔརིཎཱམཱནུཔསྶནེ པཉྙཱ ཨུདཡབྦཡཱནུཔསྶནེ ཉཱཎཾ? ཛཱཏཾ རཱུཔཾ པཙྩུཔྤནྣཾ, ཏསྶ ནིབྦཏྟིལཀྑཎཾ ཨུདཡོ, ཝིཔརིཎཱམལཀྑཎཾ ཝཡོ, ཨནུཔསྶནཱ ཉཱཎཾ. ཛཱཏཱ ཝེདནཱ… སཉྙཱ… སངྑཱརཱ… ཝིཉྙཱཎཾ… ཛཱཏཾ ཙཀྑུ…པེ… ཛཱཏོ བྷཝོ པཙྩུཔྤནྣོ, ཏསྶ ནིབྦཏྟིལཀྑཎཾ ཨུདཡོ, ཝིཔརིཎཱམལཀྑཎཾ ཝཡོ, ཨནུཔསྶནཱ ཉཱཎ’’ནྟི (པཊི. མ. ༡.༤༩).

སོ ¶ ཨིམིནཱ པཱལི༹ནཡེན ཛཱཏསྶ ནཱམརཱུཔསྶ ནིབྦཏྟིལཀྑཎཾ ཛཱཏིཾ ཨུཔྤཱདཾ ཨབྷིནཝཱཀཱརཾ ‘‘ཨུདཡོ’’ཏི, ཝིཔརིཎཱམལཀྑཎཾ ཁཡཾ བྷངྒཾ ‘‘ཝཡོ’’ཏི སམནུཔསྶཏི. སོ ཨེཝཾ པཛཱནཱཏི ‘‘ཨིམསྶ ནཱམརཱུཔསྶ ཨུཔྤཏྟིཏོ པུབྦེ ཨནུཔྤནྣསྶ རཱསི ཝཱ ནིཙཡོ ཝཱ ནཏྠི, ཨུཔྤཛྫམཱནསྶཱཔི རཱསིཏོ ཝཱ ནིཙཡཏོ ཝཱ ཨཱགམནཾ ནཱམ ནཏྠི, ནིརུཛ྄ཛྷམཱནསྶཱཔི དིསཱཝིདིསཱགམནཾ ནཱམ ནཏྠི, ནིརུདྡྷསྶཱཔི ཨེཀསྨིཾ ཋཱནེ རཱསིཏོ ནིཙཡཏོ ནིདྷཱནཏོ ཨཝཊྛཱནཾ ¶ ནཱམ ནཏྠི. ཡཐཱ པན ཝཱིཎཱཡ ཝཱདིཡམཱནཱཡ ཨུཔྤནྣསདྡསྶ ནེཝ ཨུཔྤཏྟིཏོ པུབྦེ སནྣིཙཡོ ཨཏྠི, ན ཨུཔྤཛྫམཱནོ སནྣིཙཡཏོ ཨཱགཏོ, ན ནིརུཛ྄ཛྷམཱནསྶ དིསཱཝིདིསཱགམནཾ ཨཏྠི, ན ནིརུདྡྷོ ཀཏྠཙི སནྣིཙིཏོ ཏིཊྛཏི, ཨཐ ཁོ ཝཱིཎཉྩ ཨུཔཝཱིཎཉྩ པུརིསསྶ ཙ ཏཛྫཾ ཝཱཡཱམཾ པཊིཙྩ ཨཧུཏྭཱ སམྦྷོཏི, ཧུཏྭཱ པཊིཝེཏི. ཨེཝཾ སབྦེཔི རཱུཔཱརཱུཔིནོ དྷམྨཱ ཨཧུཏྭཱ སམྦྷོནྟི, ཧུཏྭཱ པཊིཝེནྟཱི’’ཏི.

༧༢༤. ཨེཝཾ སངྑེཔཏོ ཨུདཡབྦཡམནསིཀཱརཾ ཀཏྭཱ པུན ཡཱནི ཨེཏསྶེཝ ཨུདཡབྦཡཉཱཎསྶ ཝིབྷངྒེ –

‘‘ཨཝིཛྫཱསམུདཡཱ རཱུཔསམུདཡོཏི པཙྩཡསམུདཡཊྛེན རཱུཔཀྑནྡྷསྶ ཨུདཡཾ པསྶཏི. ཏཎྷཱསམུདཡཱ… ཀམྨསམུདཡཱ… ཨཱཧཱརསམུདཡཱ རཱུཔསམུདཡོཏི པཙྩཡསམུདཡཊྛེན རཱུཔཀྑནྡྷསྶ ཨུདཡཾ པསྶཏི. ནིབྦཏྟིལཀྑཎཾ པསྶནྟོཔི རཱུཔཀྑནྡྷསྶ ཨུདཡཾ པསྶཏི. རཱུཔཀྑནྡྷསྶ ཨུདཡཾ པསྶནྟོ ཨིམཱནི པཉྩ ལཀྑཎཱནི པསྶཏི.

‘‘ཨཝིཛྫཱནིརོདྷཱ རཱུཔནིརོདྷོཏི པཙྩཡནིརོདྷཊྛེན རཱུཔཀྑནྡྷསྶ ཝཡཾ པསྶཏི. ཏཎྷཱནིརོདྷཱ… ཀམྨནིརོདྷཱ… ཨཱཧཱརནིརོདྷཱ རཱུཔནིརོདྷོཏི པཙྩཡནིརོདྷཊྛེན རཱུཔཀྑནྡྷསྶ ཝཡཾ པསྶཏི. ཝིཔརིཎཱམལཀྑཎཾ པསྶནྟོཔི རཱུཔཀྑནྡྷསྶ ཝཡཾ པསྶཏི. རཱུཔཀྑནྡྷསྶ ཝཡཾ པསྶནྟོཔི ཨིམཱནི པཉྩ ལཀྑཎཱནི པསྶཏི’’ (པཊི. མ. ༡.༥༠).

ཏཐཱ ‘‘ཨཝིཛྫཱསམུདཡཱ ཝེདནཱསམུདཡོཏི པཙྩཡསམུདཡཊྛེན ཝེདནཱཀྑནྡྷསྶ ཨུདཡཾ པསྶཏི. ཏཎྷཱསམུདཡཱ… ཀམྨསམུདཡཱ… ཕསྶསམུདཡཱ ཝེདནཱསམུདཡོཏི པཙྩཡསམུདཡཊྛེན ཝེདནཱཀྑནྡྷསྶ ཨུདཡཾ པསྶཏི. ནིབྦཏྟིལཀྑཎཾ པསྶནྟོཔི ཝེདནཱཀྑནྡྷསྶ ¶ ཨུདཡཾ པསྶཏི. ཝེདནཱཀྑནྡྷསྶ ཨུདཡཾ པསྶནྟོ ཨིམཱནི པཉྩ ལཀྑཎཱནི པསྶཏི. ཨཝིཛྫཱནིརོདྷཱ… ཏཎྷཱནིརོདྷཱ… ཀམྨནིརོདྷཱ… ཕསྶནིརོདྷཱ ཝེདནཱནིརོདྷོཏི པཙྩཡནིརོདྷཊྛེན ཝེདནཱཀྑནྡྷསྶ ཝཡཾ པསྶཏི. ཝིཔརིཎཱམལཀྑཎཾ པསྶནྟོཔི ཝེདནཱཀྑནྡྷསྶ ཝཡཾ པསྶཏི. ཝེདནཱཀྑནྡྷསྶ ཝཡཾ པསྶནྟོ ཨིམཱནི པཉྩ ལཀྑཎཱནི པསྶཏི’’ (པཊི. མ. ༡.༥༠).

ཝེདནཱཀྑནྡྷསྶ ¶ ཝིཡ ཙ སཉྙཱསངྑཱརཝིཉྙཱཎཀྑནྡྷཱནཾ. ཨཡཾ པན ཝིསེསོ, ཝིཉྙཱཎཀྑནྡྷསྶ ཕསྶཊྛཱནེ ‘‘ནཱམརཱུཔསམུདཡཱ, ནཱམརཱུཔནིརོདྷཱ’’ཏི –

ཨེཝཾ ཨེཀེཀསྶ ཁནྡྷསྶ ཨུདཡབྦཡདསྶནེ དས དས ཀཏྭཱ པཉྙཱས ལཀྑཎཱནི ཝུཏྟཱནི. ཏེསཾ ཝསེན ཨེཝམྤི རཱུཔསྶ ཨུདཡོ ཨེཝམྤི རཱུཔསྶ ཝཡོ, ཨེཝམྤི རཱུཔཾ ཨུདེཏི, ཨེཝམྤི རཱུཔཾ ཝེཏཱིཏི པཙྩཡཏོ ཙེཝ ཁཎཏོ ཙ ཝིཏྠཱརེན མནསིཀཱརཾ ཀརོཏི.

༧༢༥. ཏསྶེཝཾ མནསིཀརོཏོ ‘‘ཨིཏི ཀིརིམེ དྷམྨཱ ཨཧུཏྭཱ སམྦྷོནྟི, ཧུཏྭཱ པཊིཝེནྟཱི’’ཏི ཉཱཎཾ ཝིསདཏརཾ ཧོཏི. ཏསྶེཝཾ པཙྩཡཏོ ཙེཝ ཁཎཏོ ཙ དྭེདྷཱ ཨུདཡབྦཡཾ པསྶཏོ སཙྩཔཊིཙྩསམུཔྤཱདནཡལཀྑཎབྷེདཱ པཱཀཊཱ ཧོནྟི.

༧༢༦. ཡཉྷི སོ ཨཝིཛྫཱདིསམུདཡཱ ཁནྡྷཱནཾ སམུདཡཾ, ཨཝིཛྫཱདིནིརོདྷཱ ཙ ཁནྡྷཱནཾ ནིརོདྷཾ པསྶཏི, ཨིདམསྶ པཙྩཡཏོ ཨུདཡབྦཡདསྶནཾ. ཡཾ པན ནིབྦཏྟིལཀྑཎཝིཔརིཎཱམལཀྑཎཱནི པསྶནྟོ ཁནྡྷཱནཾ ཨུདཡབྦཡཾ པསྶཏི, ཨིདམསྶ ཁཎཏོ ཨུདཡབྦཡདསྶནཾ, ཨུཔྤཏྟིཀྑཎེཡེཝ ཧི ནིབྦཏྟིལཀྑཎཾ. བྷངྒཀྑཎེ ཙ ཝིཔརིཎཱམལཀྑཎཾ.

༧༢༧. ཨིཙྩསྶེཝཾ པཙྩཡཏོ ཙེཝ ཁཎཏོ ཙ དྭེདྷཱ ཨུདཡབྦཡཾ པསྶཏོ པཙྩཡཏོ ཨུདཡདསྶནེན སམུདཡསཙྩཾ པཱཀཊཾ ཧོཏི ཛནཀཱཝབོདྷཏོ. ཁཎཏོ ཨུདཡདསྶནེན དུཀྑསཙྩཾ པཱཀཊཾ ཧོཏི ཛཱཏིདུཀྑཱཝབོདྷཏོ. པཙྩཡཏོ ཝཡདསྶནེན ནིརོདྷསཙྩཾ པཱཀཊཾ ཧོཏི པཙྩཡཱནུཔྤཱདེན པཙྩཡཝཏཾ ཨནུཔྤཱདཱཝབོདྷཏོ. ཁཎཏོ ཝཡདསྶནེན དུཀྑསཙྩམེཝ པཱཀཊཾ ཧོཏི མརཎདུཀྑཱཝབོདྷཏོ. ཡཉྩསྶ ¶ ཨུདཡབྦཡདསྶནཾ, མགྒོཝཱཡཾ ལོཀིཀོཏི མགྒསཙྩཾ པཱཀཊཾ ཧོཏི ཏཏྲ སམྨོཧཝིགྷཱཏཏོ.

༧༢༨. པཙྩཡཏོ ཙསྶ ཨུདཡདསྶནེན ཨནུལོམོ པཊིཙྩསམུཔྤཱདོ པཱཀཊོ ཧོཏི, ‘‘ཨིམསྨིཾ སཏི ཨིདཾ ཧོཏཱི’’ཏི (མ. ནི. ༡.༤༠༤; སཾ. ནི. ༢.༢༡; ཨུདཱ. ༡) ཨཝབོདྷཏོ. པཙྩཡཏོ ཝཡདསྶནེན པཊིལོམོ པཊིཙྩསམུཔྤཱདོ པཱཀཊོ ཧོཏི, ‘‘ཨིམསྶ ནིརོདྷཱ ཨིདཾ ནིརུཛ྄ཛྷཏཱི’’ཏི (མ. ནི. ༡.༤༠༦; སཾ. ནི. ༢.༢༡; ཨུདཱ. ༢) ཨཝབོདྷཏོ ¶ . ཁཎཏོ པན ཨུདཡབྦཡདསྶནེན པཊིཙྩསམུཔྤནྣཱ དྷམྨཱ པཱཀཊཱ ཧོནྟི སངྑཏལཀྑཎཱཝབོདྷཏོ. ཨུདཡབྦཡཝནྟོ ཧི སངྑཏཱ, ཏེ ཙ པཊིཙྩསམུཔྤནྣཱཏི.

༧༢༩. པཙྩཡཏོ ཙསྶ ཨུདཡདསྶནེན ཨེཀཏྟནཡོ པཱཀཊོ ཧོཏི ཧེཏུཕལསམྦནྡྷེན སནྟཱནསྶ ཨནུཔཙྪེདཱཝབོདྷཏོ. ཨཐ སུཊྛུཏརཾ ཨུཙྪེདདིཊྛིཾ པཛཧཏི. ཁཎཏོ ཨུདཡདསྶནེན ནཱནཏྟནཡོ པཱཀཊོ ཧོཏི ནཝནཝཱནཾ ཨུཔྤཱདཱཝབོདྷཏོ. ཨཐ སུཊྛུཏརཾ སསྶཏདིཊྛིཾ པཛཧཏི. པཙྩཡཏོ ཙསྶ ཨུདཡབྦཡདསྶནེན ཨབྱཱཔཱརནཡོ པཱཀཊོ ཧོཏི དྷམྨཱནཾ ཨཝསཝཏྟིབྷཱཝཱཝབོདྷཏོ. ཨཐ སུཊྛུཏརཾ ཨཏྟདིཊྛིཾ པཛཧཏི. པཙྩཡཏོ པན ཨུདཡདསྶནེན ཨེཝཾདྷམྨཏཱནཡོ པཱཀཊོ ཧོཏི པཙྩཡཱནུརཱུཔེན ཕལསྶ ཨུཔྤཱདཱཝབོདྷཏོ. ཨཐ སུཊྛུཏརཾ ཨཀིརིཡདིཊྛིཾ པཛཧཏི.

༧༣༠. པཙྩཡཏོ ཙསྶ ཨུདཡདསྶནེན ཨནཏྟལཀྑཎཾ པཱཀཊཾ ཧོཏི དྷམྨཱནཾ ནིརཱིཧཀཏྟཔཙྩཡཔཊིབདྡྷཝུཏྟིཏཱཝབོདྷཏོ. ཁཎཏོ ཨུདཡབྦཡདསྶནེན ཨནིཙྩལཀྑཎཾ པཱཀཊཾ ཧོཏི ཧུཏྭཱ ཨབྷཱཝཱཝབོདྷཏོ, པུབྦནྟཱཔརནྟཝིཝེཀཱཝབོདྷཏོ ཙ. དུཀྑལཀྑཎམྤི པཱཀཊཾ ཧོཏི ཨུདཡབྦཡེཧི པཊིཔཱིལ༹ནཱཝབོདྷཏོ. སབྷཱཝལཀྑཎམྤི པཱཀཊཾ ཧོཏི ཨུདཡབྦཡཔརིཙྪིནྣཱཝབོདྷཏོ. སབྷཱཝལཀྑཎེ སངྑཏལཀྑཎསྶ ཏཱཝཀཱལིཀཏྟམྤི པཱཀཊཾ ཧོཏི ཨུདཡཀྑཎེ ཝཡསྶ, ཝཡཀྑཎེ ཙ ཨུདཡསྶ ཨབྷཱཝཱཝབོདྷཏོཏི.

༧༣༡. ཏསྶེཝཾ པཱཀཊཱིབྷཱུཏསཙྩཔཊིཙྩསམུཔྤཱདནཡལཀྑཎབྷེདསྶ ‘‘ཨེཝཾ ཀིར ནཱམིམེ དྷམྨཱ ཨནུཔྤནྣཔུབྦཱ ཨུཔྤཛྫནྟི, ཨུཔྤནྣཱ ནིརུཛ྄ཛྷནྟཱི’’ཏི ནིཙྩནཝཱཝ ཧུཏྭཱ སངྑཱརཱ ¶ ཨུཔཊྛཧནྟི. ན ཀེཝལཉྩ ནིཙྩནཝཱ, སཱུརིཡུགྒམནེ ཨུསྶཱཝབིནྡུ ཝིཡ ཨུདཀབུབྦུལོ༹ ཝིཡ ཨུདཀེ དཎྜརཱཛི ཝིཡ ཨཱརགྒེ སཱསཔོ ཝིཡ ཝིཛྫུཔྤཱདོ ཝིཡ ཙ པརིཏྟཊྛཱཡིནོ. མཱཡཱམརཱིཙིསུཔིནནྟཨལཱཏཙཀྐགནྡྷབྦནགརཕེཎཀདལིཨཱདཡོ ཝིཡ ཨསྶཱརཱ ནིསྶཱརཱཏི ཙཱཔི ཨུཔཊྛཧནྟི.

ཨེཏྟཱཝཏཱནེན ‘‘ཝཡདྷམྨམེཝ ཨུཔྤཛྫཏི, ཨུཔྤནྣཉྩ ཝཡཾ ཨུཔེཏཱི’’ཏི ཨིམིནཱ ཨཱཀཱརེན སམཔཉྙཱས ལཀྑཎཱནི པཊིཝིཛ྄ཛྷིཏྭཱ ཋིཏཾ ཨུདཡབྦཡཱནུཔསྶནཾ ནཱམ ཏརུཎཝིཔསྶནཱཉཱཎཾ ཨདྷིགཏཾ ཧོཏི, ཡསྶཱདྷིགམཱ ཨཱརདྡྷཝིཔསྶཀོཏི སངྑཾ གཙྪཏི.

ཝིཔསྶནུཔཀྐིལེསཀཐཱ

༧༣༢. ཨཐསྶ ¶ ཨིམཱཡ ཏརུཎཝིཔསྶནཱཡ ཨཱརདྡྷཝིཔསྶཀསྶ དས ཝིཔསྶནུཔཀྐིལེསཱ ཨུཔྤཛྫནྟི. ཝིཔསྶནུཔཀྐིལེསཱ ཧི པཊིཝེདྷཔྤཏྟསྶ ཨརིཡསཱཝཀསྶ ཙེཝ ཝིཔྤཊིཔནྣཀསྶ ཙ ནིཀྑིཏྟཀམྨཊྛཱནསྶ ཀུསཱིཏཔུགྒལསྶ ནུཔྤཛྫནྟི. སམྨཱཔཊིཔནྣཀསྶ པན ཡུཏྟཔཡུཏྟསྶ ཨཱརདྡྷཝིཔསྶཀསྶ ཀུལཔུཏྟསྶ ཨུཔྤཛྫནྟིཡེཝ.

ཀཏམེ པན ཏེ དས ཨུཔཀྐིལེསཱཏི? ཨོབྷཱསོ, ཉཱཎཾ, པཱིཏི, པསྶདྡྷི, སུཁཾ, ཨདྷིམོཀྑོ, པགྒཧོ, ཨུཔཊྛཱནཾ, ཨུཔེཀྑཱ, ནིཀནྟཱིཏི. ཝུཏྟཉྷེཏཾ –

‘‘ཀཐཾ དྷམྨུདྡྷཙྩཝིགྒཧིཏམཱནསཾ ཧོཏི? ཨནིཙྩཏོ མནསིཀརོཏོ ཨོབྷཱསོ ཨུཔྤཛྫཏི, ‘ཨོབྷཱསོ དྷམྨོ’ཏི ཨོབྷཱསཾ ཨཱཝཛྫཏི, ཏཏོ ཝིཀྑེཔོ ཨུདྡྷཙྩཾ. ཏེན ཨུདྡྷཙྩེན ཝིགྒཧིཏམཱནསོ ཨནིཙྩཏོ ཨུཔཊྛཱནཾ ཡཐཱབྷཱུཏཾ ནཔྤཛཱནཱཏི. དུཀྑཏོ… ཨནཏྟཏོ ཨུཔཊྛཱནཾ ཡཐཱབྷཱུཏཾ ནཔྤཛཱནཱཏི’’.

ཏཐཱ ‘‘ཨནིཙྩཏོ མནསིཀརོཏོ ཉཱཎཾ ཨུཔྤཛྫཏི…པེ… པཱིཏི… པསྶདྡྷི… སུཁཾ… ཨདྷིམོཀྑོ… པགྒཧོ… ཨུཔཊྛཱནཾ… ཨུཔེཀྑཱ… ནིཀནྟི ཨུཔྤཛྫཏི, ‘ནིཀནྟི དྷམྨོ’ཏི ནིཀནྟིཾ ཨཱཝཛྫཏི, ཏཏོ ཝིཀྑེཔོ ཨུདྡྷཙྩཾ. ཏེན ཨུདྡྷཙྩེན ཝིགྒཧིཏམཱནསོ ཨནིཙྩཏོ ཨུཔཊྛཱནཾ ཡཐཱབྷཱུཏཾ ནཔྤཛཱནཱཏི. དུཀྑཏོ… ཨནཏྟཏོ ཨུཔཊྛཱནཾ ཡཐཱབྷཱུཏཾ ནཔྤཛཱནཱཏཱི’’ཏི (པཊི. མ. ༢.༦).

༧༣༣. ཏཏྠ ¶ ཨོབྷཱསོཏི ཝིཔསྶནོབྷཱསོ. ཏསྨིཾ ཨུཔྤནྣེ ཡོགཱཝཙརོ ‘‘ན ཝཏ མེ ཨིཏོ པུབྦེ ཨེཝརཱུཔོ ཨོབྷཱསོ ཨུཔྤནྣཔུབྦོ, ཨདྡྷཱ མགྒཔྤཏྟོསྨི ཕལཔཏྟོསྨཱི’’ཏི ཨམགྒམེཝ ‘‘མགྒོ’’ཏི, ཨཕལམེཝ ཙ ‘‘ཕལ’’ནྟི གཎྷཱཏི. ཏསྶ ཨམགྒཾ ‘‘མགྒོ’’ཏི ཨཕལཾ ‘‘ཕལ’’ནྟི གཎྷཏོ ཝིཔསྶནཱཝཱིཐི ཨུཀྐནྟཱ ནཱམ ཧོཏི. སོ ཨཏྟནོ མཱུལཀམྨཊྛཱནཾ ཝིསྶཛྫེཏྭཱ ཨོབྷཱསམེཝ ཨསྶཱདེནྟོ ནིསཱིདཏི.

སོ ཁོ པནཱཡཾ ཨོབྷཱསོ ཀསྶཙི བྷིཀྑུནོ པལླངྐཊྛཱནམཏྟམེཝ ཨོབྷཱསེནྟོ ཨུཔྤཛྫཏི. ཀསྶཙི ¶ ཨནྟོགབྦྷཾ. ཀསྶཙི བཧིགབྦྷམྤི. ཀསྶཙི སཀལཝིཧཱརཾ, གཱཝུཏཾ, ཨཌྜྷཡོཛནཾ, ཡོཛནཾ, དྭིཡོཛནཾ, ཏིཡོཛནཾ…པེ… ཀསྶཙི པཐཝཱིཏལཏོ ཡཱཝ ཨཀནིཊྛབྲཧྨལོཀཱ ཨེཀཱལོཀཾ ཀུརུམཱནོ. བྷགཝཏོ པན དསསཧསྶིལོཀདྷཱཏུཾ ཨོབྷཱསེནྟོ ཨུདཔཱདི.

ཨེཝཾ ཝེམཏྟཏཱཡ ཙསྶ ཨིདཾ ཝཏྠུ – ཙིཏྟལཔབྦཏེ ཀིར དྭིཀུཊྚགེཧསྶ ཨནྟོ དྭེ ཐེརཱ ནིསཱིདིཾསུ. ཏཾདིཝསཉྩ ཀཱལ༹པཀྑུཔོསཐོ ཧོཏི, མེགྷཔཊལཙྪནྣཱ དིསཱ, རཏྟིབྷཱགེ ཙཏུརངྒསམནྣཱགཏཾ ཏམཾ པཝཏྟཏི. ཨཐེཀོ ཐེརོ ཨཱཧ – ‘‘བྷནྟེ, མཡ྄ཧཾ ཨིདཱནི ཙེཏིཡངྒཎམྷི སཱིཧཱསནེ པཉྩཝཎྞཱནི ཀུསུམཱནི པཉྙཱཡནྟཱི’’ཏི. ཏཾ ཨིཏརོ ཨཱཧ – ‘‘ཨནཙྪརིཡཾ, ཨཱཝུསོ, ཀཐེསི, མཡ྄ཧཾ པནེཏརཧི མཧཱསམུདྡམྷི ཡོཛནཊྛཱནེ མཙྪཀཙྪཔཱ པཉྙཱཡནྟཱི’’ཏི.

ཨཡཾ པན ཝིཔསྶནུཔཀྐིལེསོ ཡེབྷུཡྻེན སམཐཝིཔསྶནཱལཱབྷིནོ ཨུཔྤཛྫཏི. སོ སམཱཔཏྟིཝིཀྑམྦྷིཏཱནཾ ཀིལེསཱནཾ ཨསམུདཱཙཱརཏོ ‘‘ཨརཧཱ ཨཧ’’ནྟི ཙིཏྟཾ ཨུཔྤཱདེཏི ཨུཙྩཝཱལིཀཝཱསཱི མཧཱནཱགཏྠེརོ ཝིཡ ཧཾཀནཀཝཱསཱི མཧཱདཏྟཏྠེརོ ཝིཡ ཙིཏྟལཔབྦཏེ ནིངྐཔེཎྞཀཔདྷཱནགྷརཝཱསཱི ཙཱུལ༹སུམནཏྠེརོ ཝིཡ ཙ.

ཏཏྲིདཾ ཨེཀཝཏྠུཔརིདཱིཔནཾ – ཏལངྒརཝཱསཱི དྷམྨདིནྣཏྠེརོ ཀིར ནཱམ ཨེཀོ པབྷིནྣཔཊིསམྦྷིདོ མཧཱཁཱིཎཱསཝོ མཧཏོ བྷིཀྑུསངྒྷསྶ ཨོཝཱདདཱཡཀོ ¶ ཨཧོསི. སོ ཨེཀདིཝསཾ ཨཏྟནོ དིཝཱཊྛཱནེ ནིསཱིདིཏྭཱ ‘‘ཀིནྣུ ཁོ ཨམྷཱཀཾ ཨཱཙརིཡསྶ ཨུཙྩཝཱལིཀཝཱསཱིམཧཱནཱགཏྠེརསྶ སམཎབྷཱཝཀིཙྩཾ མཏྠཀཾ པཏྟཾ, ནོ’’ཏི ཨཱཝཛྫནྟོ པུཐུཛྫནབྷཱཝམེཝསྶ དིསྭཱ ‘‘མཡི ཨགཙྪནྟེ པུཐུཛྫནཀཱལཀིརིཡམེཝ ཀརིསྶཏཱི’’ཏི ཙ ཉཏྭཱ ཨིདྡྷིཡཱ ཝེཧཱསཾ ཨུཔྤཏིཏྭཱ དིཝཱཊྛཱནེ ནིསིནྣསྶ ཐེརསྶ སམཱིཔེ ཨོརོཧིཏྭཱ ཝནྡིཏྭཱ ཝཏྟཾ དསྶེཏྭཱ ཨེཀམནྟཾ ནིསཱིདི. ‘‘ཀིཾ, ཨཱཝུསོ དྷམྨདིནྣ, ཨཀཱལེ ཨཱགཏོསཱི’’ཏི ཙ ཝུཏྟེ ‘‘པཉྷཾ, བྷནྟེ, པུཙྪིཏུཾ ཨཱགཏོམྷཱི’’ཏི ཨཱཧ. ཏཏོ ‘‘པུཙྪཱཝུསོ, ཛཱནམཱནཱ ཀཐཡིསྶཱམཱ’’ཏི ཝུཏྟེ པཉྷསཧསྶཾ པུཙྪི.

ཐེརོ པུཙྪིཏཔུཙྪིཏཾ ཨསཛྫམཱནོཝ ཀཐེསི. ཏཏོ ‘‘ཨཏིཏིཀྑཾ ཝོ, བྷནྟེ, ཉཱཎཾ, ཀདཱ ཏུམྷེཧི ཨཡཾ དྷམྨོ ཨདྷིགཏོ’’ཏི ཝུཏྟེ ‘‘ཨིཏོ སཊྛིཝསྶཀཱལེ, ཨཱཝུསོ’’ཏི ཨཱཧ. སམཱདྷིམྤི, བྷནྟེ, ཝལ༹ཉྫེཐཱཏི, ན ཡིདཾ, ཨཱཝུསོ, བྷཱརིཡནྟི. ཏེན ཧི, བྷནྟེ, ཨེཀཾ ཧཏྠིཾ མཱཔེཐཱཏི ¶ . ཐེརོ སབྦསེཏཾ ཧཏྠིཾ མཱཔེསི. ཨིདཱནི, བྷནྟེ, ཡཐཱ ཨཡཾ ཧཏྠཱི ཨཉྩིཏཀཎྞོ པསཱརིཏནངྒུཊྛོ སོཎྜཾ མུཁེ པཀྑིཔིཏྭཱ བྷེརཝཾ ཀོཉྩནཱདཾ ཀརོནྟོ ཏུམྷཱཀཾ ཨབྷིམུཁོ ཨཱགཙྪཏི, ཏཐཱ ནཾ ཀརོཐཱཏི. ཐེརོ ཏཐཱ ཀཏྭཱ ཝེགེན ཨཱགཙྪཏོ ཧཏྠིསྶ བྷེརཝཾ ཨཱཀཱརཾ དིསྭཱ ཨུཊྛཱཡ པལཱཡིཏུཾ ཨཱརདྡྷོ. ཏམེནཾ ཁཱིཎཱསཝཏྠེརོ ཧཏྠཾ པསཱརེཏྭཱ ཙཱིཝརཀཎྞེ གཧེཏྭཱ ‘‘བྷནྟེ, ཁཱིཎཱསཝསྶ སཱརཛྫཾ ནཱམ ཧོཏཱི’’ཏི ཨཱཧ.

སོ ཏམྷི ཀཱལེ ཨཏྟནོ པུཐུཛྫནབྷཱཝཾ ཉཏྭཱ ‘‘ཨཝསྶཡོ མེ, ཨཱཝུསོ, དྷམྨདིནྣ ཧོཧཱི’’ཏི ཝཏྭཱ པཱདམཱུལེ ཨུཀྐུཊིཀཾ ནིསཱིདི. ‘‘བྷནྟེ, ཏུམྷཱཀཾ ཨཝསྶཡོ བྷཝིསྶཱམིཙྩེཝཱཧཾ ཨཱགཏོ, མཱ ཙིནྟཡིཏྠཱ’’ཏི ཀམྨཊྛཱནཾ ཀཐེསི. ཐེརོ ཀམྨཊྛཱནཾ གཧེཏྭཱ ཙངྐམཾ ཨཱརུཡ྄ཧ ཏཏིཡེ པདཝཱརེ ཨགྒཕལཾ ཨརཧཏྟཾ པཱཔུཎི. ཐེརོ ཀིར དོསཙརིཏོ ཨཧོསི. ཨེཝརཱུཔཱ བྷིཀྑཱུ ཨོབྷཱསེ ཀམྤནྟི.

༧༣༤. ཉཱཎནྟི ཝིཔསྶནཱཉཱཎཾ. ཏསྶ ཀིར རཱུཔཱརཱུཔདྷམྨེ ཏུལཡནྟསྶ ཏཱིརེནྟསྶ ཝིསྶཊྛཨིནྡཝཛིརམིཝ ཨཝིཧཏཝེགཾ ཏིཁིཎཾ སཱུརཾ ཨཏིཝིསདཾ ཉཱཎཾ ཨུཔྤཛྫཏི.

པཱིཏཱིཏི ¶ ཝིཔསྶནཱཔཱིཏི. ཏསྶ ཀིར ཏསྨིཾ སམཡེ ཁུདྡཀཱཔཱིཏི, ཁཎིཀཱཔཱིཏི, ཨོཀྐནྟིཀཱཔཱིཏི, ཨུབྦེགཱཔཱིཏི, ཕརཎཱཔཱིཏཱིཏི ཨཡཾ པཉྩཝིདྷཱ པཱིཏི སཀལསརཱིརཾ པཱུརཡམཱནཱ ཨུཔྤཛྫཏི.

པསྶདྡྷཱིཏི ཝིཔསྶནཱཔསྶདྡྷི. ཏསྶ ཀིར ཏསྨིཾ སམཡེ རཏྟིཊྛཱནེ ཝཱ དིཝཱཊྛཱནེ ཝཱ ནིསིནྣསྶ ཀཱཡཙིཏྟཱནཾ ནེཝ དརཐོ, ན གཱརཝཾ, ན ཀཀྑལ༹ཏཱ, ན ཨཀམྨཉྙཏཱ, ན གེལཉྙཾ, ན ཝངྐཏཱ ཧོཏི, ཨཐ ཁོ པནསྶ ཀཱཡཙིཏྟཱནི པསྶདྡྷཱནི ལཧཱུནི མུདཱུནི ཀམྨཉྙཱནི སུཝིསདཱནི ཨུཛུཀཱནིཡེཝ ཧོནྟི. སོ ཨིམེཧི པསྶདྡྷཱདཱིཧི ཨནུགྒཧིཏཀཱཡཙིཏྟོ ཏསྨིཾ སམཡེ ཨམཱནུསིཾ ནཱམ རཏིཾ ཨནུབྷཝཏི. ཡཾ སནྡྷཱཡ ཝུཏྟཾ –

‘‘སུཉྙཱགཱརཾ པཝིཊྛསྶ, སནྟཙིཏྟསྶ བྷིཀྑུནོ;

ཨམཱནུསཱི རཏི ཧོཏི, སམྨཱ དྷམྨཾ ཝིཔསྶཏོ.

‘‘ཡཏོ ¶ ཡཏོ སམྨསཏི, ཁནྡྷཱནཾ ཨུདཡབྦཡཾ;

ལབྷཏཱི པཱིཏིཔཱམོཛྫཾ, ཨམཏཾ ཏཾ ཝིཛཱནཏ’’ནྟི. (དྷ. པ. ༣༧༣-༣༧༤);

ཨེཝམསྶ ཨིམཾ ཨམཱནུསིཾ རཏིཾ སཱདྷཡམཱནཱ ལཧུཏཱདིསམྤཡུཏྟཱ པསྶདྡྷི ཨུཔྤཛྫཏི.

སུཁནྟི ཝིཔསྶནཱསུཁཾ. ཏསྶ ཀིར ཏསྨིཾ སམཡེ སཀལསརཱིརཾ ཨབྷིསནྡཡམཱནཾ ཨཏིཔཎཱིཏཾ སུཁཾ ཨུཔྤཛྫཏི.

ཨདྷིམོཀྑོཏི སདྡྷཱ. ཝིཔསྶནཱསམྤཡུཏྟཱཡེཝ ཧིསྶ ཙིཏྟཙེཏསིཀཱནཾ ཨཏིསཡཔསཱདབྷཱུཏཱ བལཝཏཱི སདྡྷཱ ཨུཔྤཛྫཏི.

པགྒཧོཏི ཝཱིརིཡཾ. ཝིཔསྶནཱསམྤཡུཏྟམེཝ ཧིསྶ ཨསིཐིལཾ ཨནཙྩཱརདྡྷཾ སུཔགྒཧིཏཾ ཝཱིརིཡཾ ཨུཔྤཛྫཏི.

ཨུཔཊྛཱནནྟི སཏི. ཝིཔསྶནཱསམྤཡུཏྟཱཡེཝ ཧིསྶ སུཔཊྛིཏཱ སུཔཏིཊྛིཏཱ ནིཁཱཏཱ ཨཙལཱ པབྦཏརཱཛསདིསཱ སཏི ཨུཔྤཛྫཏི. སོ ཡཾ ཡཾ ཋཱནཾ ཨཱཝཛྫཏི སམནྣཱཧརཏི མནསིཀརོཏི པཙྩཝེཀྑཏི, ཏཾ ཏཾ ཋཱནམསྶ ཨོཀྑནྡིཏྭཱ པཀྑནྡིཏྭཱ དིབྦཙཀྑུནོ པརལོཀོ ཝིཡ སཏིཡཱ ཨུཔཊྛཱཏི.

ཨུཔེཀྑཱཏི ¶ ཝིཔསྶནུཔེཀྑཱ ཙེཝ ཨཱཝཛྫནུཔེཀྑཱ ཙ. ཏསྨིཾ ཧིསྶ སམཡེ སབྦསངྑཱརེསུ མཛ྄ཛྷཏྟབྷཱུཏཱ ཝིཔསྶནུཔེཀྑཱཔི བལཝཏཱི ཨུཔྤཛྫཏི. མནོདྭཱརེ ཨཱཝཛྫནུཔེཀྑཱཔི. སཱ ཧིསྶ ཏཾ ཏཾ ཋཱནཾ ཨཱཝཛྫནྟསྶ ཝིསྶཊྛཨིནྡཝཛིརམིཝ པཏྟཔུཊེ པཀྑིཏྟ ཏཏྟནཱརཱཙོ ཝིཡ ཙ སཱུརཱ ཏིཁིཎཱ ཧུཏྭཱ ཝཧཏི.

ནིཀནྟཱིཏི ཝིཔསྶནཱནིཀནྟི. ཨེཝཾ ཨོབྷཱསཱདིཔཊིམཎྜིཏཱཡ ཧིསྶ ཝིཔསྶནཱཡ ཨཱལཡཾ ཀུརུམཱནཱ སུཁུམཱ སནྟཱཀཱརཱ ནིཀནྟི ཨུཔྤཛྫཏི. ཡཱ ནིཀནྟི ཀིལེསོཏི པརིགྒཧེཏུམྤི ན སཀྐཱ ཧོཏི.

ཡཐཱ ¶ ཙ ཨོབྷཱསེ, ཨེཝཾ ཨེཏེསུཔི ཨཉྙཏརསྨིཾ ཨུཔྤནྣེ ཡོགཱཝཙརོ ‘‘ན ཝཏ མེ ཨིཏོ པུབྦེ ཨེཝརཱུཔཾ ཉཱཎཾ ཨུཔྤནྣཔུབྦཾ, ཨེཝརཱུཔཱ པཱིཏི, པསྶདྡྷི, སུཁཾ, ཨདྷིམོཀྑོ, པགྒཧོ, ཨུཔཊྛཱནཾ, ཨུཔེཀྑཱ, ནིཀནྟི ཨུཔྤནྣཔུབྦཱ, ཨདྡྷཱ མགྒཔྤཏྟོསྨི ཕལཔྤཏྟོསྨཱི’’ཏི ཨམགྒམེཝ ‘‘མགྒོ’’ཏི ཨཕལམེཝ ཙ ‘‘ཕལ’’ནྟི གཎྷཱཏི. ཏསྶ ཨམགྒཾ ‘‘མགྒོ’’ཏི ཨཕལཾ ‘‘ཕལ’’ནྟི གཎྷཏོ ཝིཔསྶནཱཝཱིཐི ཨུཀྐནྟཱ ནཱམ ཧོཏི. སོ ཨཏྟནོ མཱུལཀམྨཊྛཱནཾ ཝིསྶཛྫེཏྭཱ ནིཀནྟིམེཝ ཨསྶཱདེནྟོ ནིསཱིདཏཱིཏི.

༧༣༥. ཨེཏྠ ཙ ཨོབྷཱསཱདཡོ ཨུཔཀྐིལེསཝཏྠུཏཱཡ ཨུཔཀྐིལེསཱཏི ཝུཏྟཱ, ན ཨཀུསལཏྟཱ. ནིཀནྟི པན ཨུཔཀྐིལེསོ ཙེཝ ཨུཔཀྐིལེསཝཏྠུ ཙ. ཝཏྠུཝསེནེཝ ཙེཏེ དས. གཱཧཝསེན པན སམཏིཾས ཧོནྟི. ཀཐཾ? ‘‘མམ ཨོབྷཱསོ ཨུཔྤནྣོ’’ཏི གཎྷཏོ ཧི དིཊྛིགཱཧོ ཧོཏི, ‘‘མནཱཔོ ཝཏ ཨོབྷཱསོ ཨུཔྤནྣོ’’ཏི གཎྷཏོ མཱནགཱཧོ, ཨོབྷཱསཾ ཨསྶཱདཡཏོ ཏཎྷཱགཱཧོ, ཨིཏི ཨོབྷཱསེ དིཊྛིམཱནཏཎྷཱཝསེན ཏཡོ གཱཧཱ. ཏཐཱ སེསེསུཔཱིཏི ཨེཝཾ གཱཧཝསེན སམཏིཾས ཨུཔཀྐིལེསཱ ཧོནྟི. ཏེསཾ ཝསེན ཨཀུསལོ ཨབྱཏྟོ ཡོགཱཝཙརོ ཨོབྷཱསཱདཱིསུ ཀམྤཏི ཝིཀྑིཔཏི. ཨོབྷཱསཱདཱིསུ ཨེཀེཀཾ ‘‘ཨེཏཾ མམ, ཨེསོཧམསྨི, ཨེསོ མེ ཨཏྟཱ’’ཏི (མ. ནི. ༡.༢༤༡) སམནུཔསྶཏི. ཏེནཱཧུ པོརཱཎཱ –

‘‘ཨོབྷཱསེ ཙེཝ ཉཱཎེ ཙ, པཱིཏིཡཱ ཙ ཝིཀམྤཏི;

པསྶདྡྷིཡཱ སུཁེ ཙེཝ, ཡེཧི ཙིཏྟཾ པཝེདྷཏི.

‘‘ཨདྷིམོཀྑེ ¶ ཙ པགྒཱཧེ, ཨུཔཊྛཱནེ ཙ ཀམྤཏི;

ཨུཔེཀྑཱཝཛྫནཱཡཉྩ, ཨུཔེཀྑཱཡ ནིཀནྟིཡཱ’’ཏི. (པཊི. མ. ༢.༧);

མགྒཱམགྒཝཝཏྠཱནཀཐཱ

༧༣༦. ཀུསལོ པན པཎྜིཏོ བྱཏྟོ བུདྡྷིསམྤནྣོ ཡོགཱཝཙརོ ཨོབྷཱསཱདཱིསུ ཨུཔྤནྣེསུ ‘‘ཨཡཾ ཁོ མེ ཨོབྷཱསོ ཨུཔྤནྣོ, སོ ཁོ པནཱཡཾ ཨནིཙྩོ སངྑཏོ པཊིཙྩསམུཔྤནྣོ ཁཡདྷམྨོ ཝཡདྷམྨོ ཝིརཱགདྷམྨོ ནིརོདྷདྷམྨོ’’ཏི ཨིཏི ཝཱ ཏཾ པཉྙཱཡ པརིཙྪིནྡཏི ཨུཔཔརིཀྑཏི. ཨཐ ཝཱ པནསྶ ཨེཝཾ ཧོཏི, ‘‘སཙེ ཨོབྷཱསོ ཨཏྟཱ བྷཝེཡྻ, ‘ཨཏྟཱ’ཏི གཧེཏུཾ ¶ ཝཊྚེཡྻ. ཨནཏྟཱ ཙ པནཱཡཾ ‘ཨཏྟཱ’ཏི གཧིཏོ. ཏསྨཱ སོ ཨཝསཝཏྟནཊྛེན ཨནཏྟཱ, ཧུཏྭཱ ཨབྷཱཝཊྛེན ཨནིཙྩོ, ཨུཔྤཱདཝཡཔཊིཔཱིལ༹ནཊྛེན དུཀྑོ’’ཏི སབྦཾ ཨརཱུཔསཏྟཀེ ཝུཏྟནཡེན ཝིཏྠཱརེཏབྦཾ. ཡཐཱ ཙ ཨོབྷཱསེ, ཨེཝཾ སེསེསུཔི.

སོ ཨེཝཾ ཨུཔཔརིཀྑིཏྭཱ ཨོབྷཱསཾ ‘‘ནེཏཾ མམ, ནེསོཧམསྨི, ན མེསོ ཨཏྟཱ’’ཏི (མ. ནི. ༡.༢༤༡) སམནུཔསྶཏི. ཉཱཎཾ…པེ… ནིཀནྟིཾ ‘‘ནེཏཾ མམ, ནེསོཧམསྨི, ན མེསོ ཨཏྟཱ’’ཏི (མ. ནི. ༡.༢༤༡) སམནུཔསྶཏི. ཨེཝཾ སམནུཔསྶནྟོ ཨོབྷཱསཱདཱིསུ ན ཀམྤཏི ན ཝེདྷཏི. ཏེནཱཧུ པོརཱཎཱ –

‘‘ཨིམཱནི དས ཋཱནཱནི, པཉྙཱཡསྶ པརིཙྩིཏཱ;

དྷམྨུདྡྷཙྩཀུསལོ ཧོཏི, ན ཙ ཝིཀྑེཔཾ གཙྪཏཱི’’ཏི. (པཊི. མ. ༢.༧);

སོ ཨེཝཾ ཝིཀྑེཔཾ ཨགཙྪནྟོ ཏཾ སམཏིཾསཝིདྷཾ ཨུཔཀྐིལེསཛཊཾ ཝིཛཊེཏྭཱ ཨོབྷཱསཱདཡོ དྷམྨཱ ན མགྒོ. ཨུཔཀྐིལེསཝིམུཏྟཾ པན ཝཱིཐིཔཊིཔནྣཾ ཝིཔསྶནཱཉཱཎཾ མགྒོཏི མགྒཉྩ ཨམགྒཉྩ ཝཝཏྠཔེཏི. ཏསྶེཝཾ ‘‘ཨཡཾ མགྒོ, ཨཡཾ ན མགྒོ’’ཏི མགྒཉྩ ཨམགྒཉྩ ཉཏྭཱ ཋིཏཾ ཉཱཎཾ མགྒཱམགྒཉཱཎདསྶནཝིསུདྡྷཱིཏི ཝེདིཏབྦཾ.

ཨེཏྟཱཝཏཱ ཙ པན ཏེན ཏིཎྞཾ སཙྩཱནཾ ཝཝཏྠཱནཾ ཀཏཾ ཧོཏི. ཀཐཾ? དིཊྛིཝིསུདྡྷིཡཾ ཏཱཝ ནཱམརཱུཔསྶ ཝཝཏྠཱཔནེན དུཀྑསཙྩསྶ ཝཝཏྠཱནཾ ཀཏཾ. ཀངྑཱཝིཏརཎཝིསུདྡྷིཡཾ པཙྩཡཔརིགྒཧཎེན སམུདཡསཙྩསྶ ཝཝཏྠཱནཾ. ཨིམིསྶཾ མགྒཱམགྒཉཱཎདསྶནཝིསུདྡྷིཡཾ སམྨཱམགྒསྶ ཨཝདྷཱརཎེན མགྒསཙྩསྶ ཝཝཏྠཱནཾ ¶ ཀཏནྟི, ཨེཝཾ ལོཀིཡེནེཝ ཏཱཝ ཉཱཎེན ཏིཎྞཾ སཙྩཱནཾ ཝཝཏྠཱནཾ ཀཏཾ ཧོཏི.

ཨིཏི སཱདྷུཛནཔཱམོཛྫཏྠཱཡ ཀཏེ ཝིསུདྡྷིམགྒེ

པཉྙཱབྷཱཝནཱདྷིཀཱརེ

མགྒཱམགྒཉཱཎདསྶནཝིསུདྡྷིནིདྡེསོ ནཱམ

ཝཱིསཏིམོ པརིཙྪེདོ.

༢༡. པཊིཔདཱཉཱཎདསྶནཝིསུདྡྷིནིདྡེསོ

ཨུཔཀྐིལེསཝིམུཏྟཨུདཡབྦཡཉཱཎཀཐཱ

༧༣༧. ཨཊྛནྣཾ ¶ ¶ པན ཉཱཎཱནཾ ཝསེན སིཁཱཔྤཏྟཱ ཝིཔསྶནཱ, ནཝམཉྩ སཙྩཱནུལོམིཀཉཱཎནྟི ཨཡཾ པཊིཔདཱཉཱཎདསྶནཝིསུདྡྷི ནཱམ. ཨཊྛནྣནྟི ཙེཏྠ ཨུཔཀྐིལེསཝིམུཏྟཾ ཝཱིཐིཔཊིཔནྣཝིཔསྶནཱསངྑཱཏཾ ཨུདཡབྦཡཱནུཔསྶནཱཉཱཎཾ, བྷངྒཱནུཔསྶནཱཉཱཎཾ, བྷཡཏུཔཊྛཱནཉཱཎཾ, ཨཱདཱིནཝཱནུཔསྶནཱཉཱཎཾ, ནིབྦིདཱནུཔསྶནཱཉཱཎཾ, མུཉྩིཏུཀམྱཏཱཉཱཎཾ, པཊིསངྑཱནུཔསྶནཱཉཱཎཾ, སངྑཱརུཔེཀྑཱཉཱཎནྟི ཨིམཱནི ཨཊྛ ཉཱཎཱནི ཝེདིཏབྦཱནི. ནཝམཾ སཙྩཱནུལོམིཀཉཱཎནྟི ཨནུལོམསྶེཏཾ ཨདྷིཝཙནཾ. ཏསྨཱ ཏཾ སམྤཱདེཏུཀཱམེན ཨུཔཀྐིལེསཝིམུཏྟཾ ཨུདཡབྦཡཉཱཎཾ ཨཱདིཾ ཀཏྭཱ ཨེཏེསུ ཉཱཎེསུ ཡོགོ ཀརཎཱིཡོ.

༧༣༨. པུན ཨུདཡབྦཡཉཱཎེ ཡོགོ ཀིམཏྠིཡོཏི ཙེ? ལཀྑཎསལླཀྑཎཏྠོ. ཨུདཡབྦཡཉཱཎཾ ཧི ཧེཊྛཱ དསཧི ཨུཔཀྐིལེསེཧི ཨུཔཀྐིལིཊྛཾ ཧུཏྭཱ ཡཱཐཱཝསརསཏོ ཏིལཀྑཎཾ སལླཀྑེཏུཾ ནཱསཀྑི. ཨུཔཀྐིལེསཝིམུཏྟཾ པན སཀྐོཏི. ཏསྨཱ ལཀྑཎསལླཀྑཎཏྠམེཏྠ པུན ཡོགོ ཀརཎཱིཡོ.

༧༣༩. ལཀྑཎཱནི པན ཀིསྶ ཨམནསིཀཱརཱ ཀེན པཊིཙྪནྣཏྟཱ ན ཨུཔཊྛཧནྟི? ཨནིཙྩལཀྑཎཾ ཏཱཝ ཨུདཡབྦཡཱནཾ ཨམནསིཀཱརཱ སནྟཏིཡཱ པཊིཙྪནྣཏྟཱ ན ཨུཔཊྛཱཏི. དུཀྑལཀྑཎཾ ཨབྷིཎྷསམྤཊིཔཱིལ༹ནསྶ ཨམནསིཀཱརཱ ཨིརིཡཱཔཐེཧི པཊིཙྪནྣཏྟཱ ན ཨུཔཊྛཱཏི. ཨནཏྟལཀྑཎཾ ནཱནཱདྷཱཏུཝིནིབྦྷོགསྶ ཨམནསིཀཱརཱ གྷནེན པཊིཙྪནྣཏྟཱ ན ཨུཔཊྛཱཏི. ཨུདཡབྦཡམྤན པརིགྒཧེཏྭཱ སནྟཏིཡཱ ཝིཀོཔིཏཱཡ ཨནིཙྩལཀྑཎཾ ཡཱཐཱཝསརསཏོ ཨུཔཊྛཱཏི. ཨབྷིཎྷསམྤཊིཔཱིལ༹ནཾ མནསིཀཏྭཱ ཨིརིཡཱཔཐེ ཨུགྒྷཱཊིཏེ དུཀྑལཀྑཎཾ ཡཱཐཱཝསརསཏོ ཨུཔཊྛཱཏི. ནཱནཱདྷཱཏུཡོ ཝིནིབྦྷུཛིཏྭཱ གྷནཝིནིབྦྷོགེ ཀཏེ ཨནཏྟལཀྑཎཾ ཡཱཐཱཝསརསཏོ ཨུཔཊྛཱཏི.

༧༤༠. ཨེཏྠ ¶ ཙ ཨནིཙྩཾ, ཨནིཙྩལཀྑཎཾ, དུཀྑཾ, དུཀྑལཀྑཎཾ, ཨནཏྟཱ, ཨནཏྟལཀྑཎནྟི ཨཡཾ ཝིབྷཱགོ ཝེདིཏབྦོ. ཏཏྠ ཨནིཙྩནྟི ཁནྡྷཔཉྩཀཾ. ཀསྨཱ? ཨུཔྤཱདཝཡཉྙཐཏྟབྷཱཝཱ ¶ , ཧུཏྭཱ ཨབྷཱཝཏོ ཝཱ. ཨུཔྤཱདཝཡཉྙཐཏྟཾ ཨནིཙྩལཀྑཎཾ ཧུཏྭཱ ཨབྷཱཝསངྑཱཏོ ཝཱ ཨཱཀཱརཝིཀཱརོ.

‘‘ཡདནིཙྩཾ ཏཾ དུཀྑ’’ནྟི (སཾ. ནི. ༣.༡༥) ཝཙནཏོ པན ཏདེཝ ཁནྡྷཔཉྩཀཾ དུཀྑཾ. ཀསྨཱ? ཨབྷིཎྷཔཊིཔཱིལ༹ནཱ, ཨབྷིཎྷཔཊིཔཱིལ༹ནཱཀཱརོ དུཀྑལཀྑཎཾ.

‘‘ཡཾ དུཀྑཾ ཏདནཏྟཱ’’ཏི (སཾ. ནི. ༣.༡༥) པན ཝཙནཏོ ཏདེཝ ཁནྡྷཔཉྩཀཾ ཨནཏྟཱ. ཀསྨཱ? ཨཝསཝཏྟནཏོ, ཨཝསཝཏྟནཱཀཱརོ ཨནཏྟལཀྑཎཾ.

ཏཡིདཾ སབྦམྤི ཨཡཾ ཡོགཱཝཙརོ ཨུཔཀྐིལེསཝིམུཏྟེན ཝཱིཐིཔཊིཔནྣཝིཔསྶནཱསངྑཱཏེན ཨུདཡབྦཡཱནུཔསྶནཱཉཱཎེན ཡཱཐཱཝསརསཏོ སལླཀྑེཏི.

ཨུཔཀྐིལེསཝིམུཏྟཨུདཡབྦཡཉཱཎཾ ནིཊྛིཏཾ.

བྷངྒཱནུཔསྶནཱཉཱཎཀཐཱ

༧༤༡. ཏསྶེཝཾ སལླཀྑེཏྭཱ པུནཔྤུནཾ ‘‘ཨནིཙྩཾ དུཀྑམནཏྟཱ’’ཏི རཱུཔཱརཱུཔདྷམྨེ ཏུལཡཏོ ཏཱིརཡཏོ ཏཾ ཉཱཎཾ ཏིཀྑཾ ཧུཏྭཱ ཝཧཏི, སངྑཱརཱ ལཧུཾ ཨུཔཊྛཧནྟི, ཉཱཎེ ཏིཀྑེ ཝཧནྟེ སངྑཱརེསུ ལཧུཾ ཨུཔཊྛཧནྟེསུ ཨུཔྤཱདཾ ཝཱ ཋིཏིཾ ཝཱ པཝཏྟཾ ཝཱ ནིམིཏྟཾ ཝཱ ན སམྤཱཔུཎཱཏི. ཁཡཝཡབྷེདནིརོདྷེཡེཝ སཏི སནྟིཊྛཏི. ཏསྶ ‘‘ཨེཝཾ ཨུཔྤཛྫིཏྭཱ ཨེཝཾ ནཱམ སངྑཱརགཏཾ ནིརུཛ྄ཛྷཏཱི’’ཏི པསྶཏོ ཨེཏསྨིཾ ཋཱནེ བྷངྒཱནུཔསྶནཾ ནཱམ ཝིཔསྶནཱཉཱཎཾ ཨུཔྤཛྫཏི. ཡཾ སནྡྷཱཡ ཝུཏྟཾ –

‘‘ཀཐཾ ཨཱརམྨཎཔཊིསངྑཱ བྷངྒཱནུཔསྶནེ པཉྙཱ ཝིཔསྶནེ ཉཱཎཾ? རཱུཔཱརམྨཎཏཱ ཙིཏྟཾ ཨུཔྤཛྫིཏྭཱ བྷིཛྫཏི, ཏཾ ཨཱརམྨཎཾ པཊིསངྑཱ ཏསྶ ཙིཏྟསྶ བྷངྒཾ ཨནུཔསྶཏི ¶ . ཨནུཔསྶཏཱིཏི ཀཐཾ ཨནུཔསྶཏི? ཨནིཙྩཏོ ཨནུཔསྶཏི ནོ ནིཙྩཏོ, དུཀྑཏོ ཨནུཔསྶཏི ནོ སུཁཏོ, ཨནཏྟཏོ ཨནུཔསྶཏི ནོ ཨཏྟཏོ, ནིབྦིནྡཏི ནོ ནནྡཏི, ཝིརཛྫཏི ནོ རཛྫཏི, ནིརོདྷེཏི ནོ སམུདེཏི, པཊིནིསྶཛྫཏི ནོ ཨཱདིཡཏི.

‘‘ཨནིཙྩཏོ ཨནུཔསྶནྟོ ནིཙྩསཉྙཾ པཛཧཏི. དུཀྑཏོ ཨནུཔསྶནྟོ སུཁསཉྙཾ, ཨནཏྟཏོ ཨནུཔསྶནྟོ ཨཏྟསཉྙཾ, ནིབྦིནྡནྟོ ¶ ནནྡིཾ, ཝིརཛྫནྟོ རཱགཾ, ནིརོདྷེནྟོ སམུདཡཾ པཊིནིསྶཛྫནྟོ ཨཱདཱནཾ པཛཧཏི.

‘‘ཝེདནཱརམྨཎཏཱ…པེ… སཉྙཱརམྨཎཏཱ… སངྑཱརཱརམྨཎཏཱ… ཝིཉྙཱཎཱརམྨཎཏཱ… ཙཀྑཱརམྨཎཏཱ…པེ… ཛརཱམརཎཱརམྨཎཏཱ ཙིཏྟཾ ཨུཔྤཛྫིཏྭཱ བྷིཛྫཏི…པེ… པཊིནིསྶཛྫནྟོ ཨཱདཱནཾ པཛཧཏི.

‘‘ཝཏྠུསངྐམནཱ ཙེཝ, པཉྙཱཡ ཙ ཝིཝཊྚནཱ;

ཨཱཝཛྫནཱབལཉྩེཝ, པཊིསངྑཱཝིཔསྶནཱ.

‘‘ཨཱརམྨཎཨནྭཡེན, ཨུབྷོ ཨེཀཝཝཏྠནཱ;

ནིརོདྷེ ཨདྷིམུཏྟཏཱ, ཝཡལཀྑཎཝིཔསྶནཱ.

‘‘ཨཱརམྨཎཉྩ པཊིསངྑཱ, བྷངྒཉྩ ཨནུཔསྶཏི;

སུཉྙཏོ ཙ ཨུཔཊྛཱནཾ, ཨདྷིཔཉྙཱཝིཔསྶནཱ.

‘‘ཀུསལོ ཏཱིསུ ཨནུཔསྶནཱསུ, ཙཏསྶོ ཙ ཝིཔསྶནཱསུ;

ཏཡོ ཨུཔཊྛཱནེ ཀུསལཏཱ, ནཱནཱདིཊྛཱིསུ ན ཀམྤཏཱི’’ཏི.

‘‘ཏཾ ཉཱཏཊྛེན ཉཱཎཾ, པཛཱནནཊྛེན པཉྙཱ, ཏེན ཝུཙྩཏི ‘ཨཱརམྨཎཔཊིསངྑཱ བྷངྒཱནུཔསྶནེ པཉྙཱ ཝིཔསྶནེ ཉཱཎ’’’ནྟི (པཊི. མ. ༡.༥༡-༥༢).

༧༤༢. ཏཏྠ ¶ ཨཱརམྨཎཔཊིསངྑཱཏི ཡཾཀིཉྩི ཨཱརམྨཎཾ པཊིསངྑཱཡ ཛཱནིཏྭཱ, ཁཡཏོ ཝཡཏོ དིསྭཱཏི ཨཏྠོ. བྷངྒཱནུཔསྶནེ པཉྙཱཏི ཏསྶ, ཨཱརམྨཎཾ ཁཡཏོ ཝཡཏོ པཊིསངྑཱཡ ཨུཔྤནྣསྶ ཉཱཎསྶ བྷངྒཾ ཨནུཔསྶནེ ཡཱ པཉྙཱ, ཨིདཾ ཝིཔསྶནེ ཉཱཎནྟི ཝུཏྟཾ. ཏཾ ཀཐཾ ཧོཏཱིཏི ཨཡཾ ཏཱཝ ཀཐེཏུཀམྱཏཱཔུཙྪཱཡ ཨཏྠོ. ཏཏོ ཡཐཱ ཏཾ ཧོཏི, ཏཾ དསྶེཏུཾ ‘‘རཱུཔཱརམྨཎཏཱ’’ཏིཨཱདི ཝུཏྟཾ.

ཏཏྠ རཱུཔཱརམྨཎཏཱ ཙིཏྟཾ ཨུཔྤཛྫིཏྭཱ བྷིཛྫཏཱིཏི རཱུཔཱརམྨཎཾ ཙིཏྟཾ ཨུཔྤཛྫིཏྭཱ བྷིཛྫཏི. ཨཐ ཝཱ རཱུཔཱརམྨཎབྷཱཝེ ཙིཏྟཾ ཨུཔྤཛྫིཏྭཱ བྷིཛྫཏཱིཏི ཨཏྠོ. ཏཾ ཨཱརམྨཎཾ པཊིསངྑཱཏི ཏཾ རཱུཔཱརམྨཎཾ པཊིསངྑཱཡ ཛཱནིཏྭཱ, ཁཡཏོ ཝཡཏོ དིསྭཱཏི ཨཏྠོ. ཏསྶ ཙིཏྟསྶ བྷངྒཾ ཨནུཔསྶཏཱིཏི ཡེན ཙིཏྟེན ཏཾ རཱུཔཱརམྨཎཾ ཁཡཏོ ཝཡཏོ དིཊྛཾ, ཏསྶ ཙིཏྟསྶ ཨཔརེན ཙིཏྟེན བྷངྒཾ ཨནུཔསྶཏཱིཏི ཨཏྠོ. ཏེནཱཧུ པོརཱཎཱ ‘‘ཉཱཏཉྩ ཉཱཎཉྩ ཨུབྷོཔི ཝིཔསྶཏཱི’’ཏི.

ཨེཏྠ ¶ ཙ ཨནུཔསྶཏཱིཏི ཨནུ ཨནུ པསྶཏི, ཨནེཀེཧི ཨཱཀཱརེཧི པུནཔྤུནཾ པསྶཏཱིཏི ཨཏྠོ. ཏེནཱཧ – ‘‘ཨནུཔསྶཏཱིཏི ཀཐཾ ཨནུཔསྶཏི. ཨནིཙྩཏོ ཨནུཔསྶཏཱི’’ཏིཨཱདི.

ཏཏྠ ཡསྨཱ བྷངྒོ ནཱམ ཨནིཙྩཏཱཡ པརམཱ ཀོཊི, ཏསྨཱ སོ བྷངྒཱནུཔསྶཀོ ཡོགཱཝཙརོ སབྦཾ སངྑཱརགཏཾ ཨནིཙྩཏོ ཨནུཔསྶཏི, ནོ ནིཙྩཏོ. ཏཏོ ཨནིཙྩསྶ དུཀྑཏྟཱ, དུཀྑསྶ ཙ ཨནཏྟཏྟཱ ཏདེཝ དུཀྑཏོ ཨནུཔསྶཏི, ནོ སུཁཏོ. ཨནཏྟཏོ ཨནུཔསྶཏི ནོ ཨཏྟཏོ.

ཡསྨཱ པན ཡཾ ཨནིཙྩཾ དུཀྑམནཏྟཱ, ན ཏཾ ཨབྷིནནྡིཏབྦཾ. ཡཉྩ ཨནབྷིནནྡིཏབྦཾ, ན ཏཏྠ རཛྫིཏབྦཾ. ཏསྨཱ ཨེཏསྨིཾ བྷངྒཱནུཔསྶནཱནུསཱརེན ‘‘ཨནིཙྩཾ དུཀྑམནཏྟཱ’’ཏི དིཊྛེ སངྑཱརགཏེ ནིབྦིནྡཏི, ནོ ནནྡཏི. ཝིརཛྫཏི, ནོ རཛྫཏི. སོ ཨེཝཾ ཨརཛྫནྟོ ལོཀིཀེནེཝ ཏཱཝ ཉཱཎེན རཱགཾ ནིརོདྷེཏི, ནོ སམུདེཏི. སམུདཡཾ ན ཀརོཏཱིཏི ཨཏྠོ.

ཨཐ ཝཱ སོ ཨེཝཾ ཝིརཏྟོ ཡཐཱ དིཊྛཾ སངྑཱརགཏཾ, ཏཐཱ ཨདིཊྛམྤི ཨནྭཡཉཱཎཝསེན ནིརོདྷེཏི ¶ , ནོ སམུདེཏི. ནིརོདྷཏོཝ མནསིཀརོཏི. ནིརོདྷམེཝསྶ པསྶཏི, ནོ སམུདཡནྟི ཨཏྠོ.

སོ ཨེཝཾ པཊིཔནྣོ པཊིནིསྶཛྫཏི, ནོ ཨཱདིཡཏི. ཀིཾ ཝུཏྟཾ ཧོཏི? ཨཡམྤི ཨནིཙྩཱདིཨནུཔསྶནཱ ཏདངྒཝསེན སདྡྷིཾ ཁནྡྷཱབྷིསངྑཱརེཧི ཀིལེསཱནཾ པརིཙྩཛནཏོ, སངྑཏདོསདསྶནེན ཙ ཏབྦིཔརཱིཏེ ནིབྦཱནེ ཏནྣིནྣཏཱཡ པཀྑནྡནཏོ པརིཙྩཱགཔཊིནིསྶགྒོ ཙེཝ པཀྑནྡནཔཊིནིསྶགྒོ ཙཱཏི ཝུཙྩཏི. ཏསྨཱ ཏཱཡ སམནྣཱགཏོ བྷིཀྑུ ཡཐཱཝུཏྟེན ནཡེན ཀིལེསེ པརིཙྩཛཏི, ནིབྦཱནེ ཙ པཀྑནྡཏི. ནཱཔི ནིབྦཏྟནཝསེན ཀིལེསེ ཨཱདིཡཏི, ན ཨདོསདསྶིཏཱཝསེན སངྑཏཱརམྨཎཾ. ཏེན ཝུཙྩཏི ‘‘པཊིནིསྶཛྫཏི ནོ ཨཱདིཡཏཱི’’ཏི.

༧༤༣. ཨིདཱནིསྶ ཏེཧི ཉཱཎེཧི ཡེསཾ དྷམྨཱནཾ པཧཱནཾ ཧོཏི, ཏཾ དསྶེཏུཾ ‘‘ཨནིཙྩཏོ ཨནུཔསྶནྟོ ནིཙྩསཉྙཾ པཛཧཏཱི’’ཏིཨཱདི ཝུཏྟཾ. ཏཏྠ ནནྡིནྟི སཔྤཱིཏིཀཾ ཏཎྷཾ. སེསཾ ཝུཏྟནཡམེཝ.

༧༤༤. གཱཐཱསུ ¶ པན ཝཏྠུསངྐམནཱཏི རཱུཔསྶ བྷངྒཾ དིསྭཱ པུན ཡེན ཙིཏྟེན བྷངྒོ དིཊྛོ, ཏསྶཱཔི བྷངྒདསྶནཝསེན པུརིམཝཏྠུཏོ ཨཉྙཝཏྠུསངྐམནཱ. པཉྙཱཡ ཙ ཝིཝཊྚནཱཏི ཨུདཡཾ པཧཱཡ ཝཡེ སནྟིཊྛནཱ. ཨཱཝཛྫནཱབལཉྩེཝཱཏི རཱུཔསྶ བྷངྒཾ དིསྭཱ པུན བྷངྒཱརམྨཎསྶ ཙིཏྟསྶ བྷངྒདསྶནཏྠཾ ཨནནྟརམེཝ ཨཱཝཛྫནསམཏྠཏཱ. པཊིསངྑཱཝིཔསྶནཱཏི ཨེསཱ ཨཱརམྨཎཔཊིསངྑཱབྷངྒཱནུཔསྶནཱ ནཱམ.

༧༤༥. ཨཱརམྨཎཨནྭཡེན ཨུབྷོ ཨེཀཝཝཏྠནཱཏི པཙྩཀྑཏོ དིཊྛསྶ ཨཱརམྨཎསྶ ཨནྭཡེན ཨནུགམནེན ཡཐཱ ཨིདཾ, ཏཐཱ ཨཏཱིཏེཔི སངྑཱརགཏཾ བྷིཛྫིཏྠ, ཨནཱགཏེཔི བྷིཛྫིསྶཏཱིཏི ཨེཝཾ ཨུབྷིནྣཾ ཨེཀསབྷཱཝེནེཝ ཝཝཏྠཱཔནནྟི ཨཏྠོ.

ཝུཏྟམྤི ཙེཏཾ པོརཱཎེཧི –

‘‘སཾཝིཛྫམཱནམྷི ཝིསུདྡྷདསྶནོ,

ཏདནྭཡཾ ནེཏི ཨཏཱིཏནཱགཏེ;

སབྦེཔི ¶ སངྑཱརགཏཱ པལོཀིནོ,

ཨུསྶཱཝབིནྡཱུ སཱུརིཡེཝ ཨུགྒཏེ’’ཏི.

ནིརོདྷེ ཨདྷིམུཏྟཏཱཏི ཨེཝཾ ཨུབྷིནྣཾ བྷངྒཝསེན ཨེཀཝཝཏྠཱནཾ ཀཏྭཱ ཏསྨིཉྙེཝ བྷངྒསངྑཱཏེ ནིརོདྷེ ཨདྷིམུཏྟཏཱ ཏགྒརུཏཱ ཏནྣིནྣཏཱ ཏཔྤོཎཏཱ ཏཔྤབྦྷཱརཏཱཏི ཨཏྠོ. ཝཡལཀྑཎཝིཔསྶནཱཏི ཨེསཱ ཝཡལཀྑཎཝིཔསྶནཱ ནཱམཱཏི ཝུཏྟཾ ཧོཏི.

༧༤༦. ཨཱརམྨཎཉྩ པཊིསངྑཱཏི པུརིམཉྩ རཱུཔཱདིཨཱརམྨཎཾ ཛཱནིཏྭཱ. བྷངྒཉྩ ཨནུཔསྶཏཱིཏི ཏསྶཱརམྨཎསྶ བྷངྒཾ དིསྭཱ ཏདཱརམྨཎསྶ ཙིཏྟསྶ བྷངྒཾ ཨནུཔསྶཏི. སུཉྙཏོ ཙ ཨུཔཊྛཱནནྟི ཏསྶེཝཾ བྷངྒཾ ཨནུཔསྶཏོ ‘‘སངྑཱརཱཝ བྷིཛྫནྟི, ཏེསཾ བྷེདོ མརཎཾ, ན ཨཉྙོ ཀོཙི ཨཏྠཱི’’ཏི སུཉྙཏོ ཨུཔཊྛཱནཾ ཨིཛ྄ཛྷཏི.

ཏེནཱཧུ ¶ པོརཱཎཱ –

‘‘ཁནྡྷཱ ནིརུཛ྄ཛྷནྟི ན ཙཏྠི ཨཉྙོ,

ཁནྡྷཱན བྷེདོ མརཎནྟི ཝུཙྩཏི;

ཏེསཾ ཁཡཾ པསྶཏི ཨཔྤམཏྟོ,

མཎིཾཝ ཝིཛ྄ཛྷཾ ཝཛིརེན ཡོནིསོ’’ཏི.

ཨདྷིཔཉྙཱཝིཔསྶནཱཏི ཡཱ ཙ ཨཱརམྨཎཔཊིསངྑཱ ཡཱ ཙ བྷངྒཱནུཔསྶནཱ ཡཉྩ སུཉྙཏོ ཨུཔཊྛཱནཾ, ཨཡཾ ཨདྷིཔཉྙཱཝིཔསྶནཱ ནཱམཱཏི ཝུཏྟཾ ཧོཏི.

༧༤༧. ཀུསལོ ཏཱིསུ ཨནུཔསྶནཱསཱུཏི ཨནིཙྩཱནུཔསྶནཱདཱིསུ ཏཱིསུ ཚེཀོ བྷིཀྑུ. ཙཏསྶོ ཙ ཝིཔསྶནཱསཱུཏི ནིབྦིདཱདཱིསུ ཙ ཙཏཱུསུ ཝིཔསྶནཱསུ. ཏཡོ ཨུཔཊྛཱནེ ཀུསལཏཱཏི ཁཡཏོ ཝཡཏོ སུཉྙཏོཏི ཨིམསྨིཉྩ ཏིཝིདྷེ ཨུཔཊྛཱནེ ཀུསལཏཱཡ. ནཱནཱདིཊྛཱིསུ ན ཀམྤཏཱིཏི སསྶཏདིཊྛིཨཱདཱིསུ ནཱནཔྤཀཱརཱསུ དིཊྛཱིསུ ན ཝེདྷཏི.

༧༤༨. སོ ཨེཝཾ ཨཝེདྷམཱནོ ‘‘ཨནིརུདྡྷམེཝ ནིརུཛ྄ཛྷཏི, ཨབྷིནྣམེཝ བྷིཛྫཏཱི’’ཏི པཝཏྟམནསིཀཱརོ ¶ དུབྦལབྷཱཛནསྶ ཝིཡ བྷིཛྫམཱནསྶ, སུཁུམརཛསྶེཝ ཝིཔྤཀིརིཡམཱནསྶ, ཏིལཱནཾ ཝིཡ བྷཛྫིཡམཱནཱནཾ སབྦསངྑཱརཱནཾ ཨུཔྤཱདཊྛིཏིཔཝཏྟནིམིཏྟཾ ཝིསྶཛྫེཏྭཱ བྷེདམེཝ པསྶཏི. སོ ཡཐཱ ནཱམ ཙཀྑུམཱ པུརིསོ པོཀྑརཎཱིཏཱིརེ ཝཱ ནདཱིཏཱིརེ ཝཱ ཋིཏོ ཐཱུལཕུསིཏཀེ དེཝེ ཝསྶནྟེ ཨུདཀཔིཊྛེ མཧནྟམཧནྟཱནི ཨུདཀབུབྦུལ༹ཀཱནི ཨུཔྤཛྫིཏྭཱ ཨུཔྤཛྫིཏྭཱ སཱིགྷཾ སཱིགྷཾ བྷིཛྫམཱནཱནི པསྶེཡྻ, ཨེཝམེཝ སབྦེ སངྑཱརཱ བྷིཛྫནྟི བྷིཛྫནྟཱིཏི པསྶཏི. ཨེཝརཱུཔཾ ཧི ཡོགཱཝཙརཾ སནྡྷཱཡ ཝུཏྟཾ བྷགཝཏཱ –

‘‘ཡཐཱ བུབྦུལ༹ཀཾ པསྶེ, ཡཐཱ པསྶེ མརཱིཙིཀཾ;

ཨེཝཾ ལོཀཾ ཨཝེཀྑནྟཾ, མཙྩུརཱཛཱ ན པསྶཏཱི’’ཏི. (དྷ. པ. ༡༧༠);

༧༤༩. ཏསྶེཝཾ ‘‘སབྦེ སངྑཱརཱ བྷིཛྫནྟི བྷིཛྫནྟཱི’’ཏི ཨབྷིཎྷཾ པསྶཏོ ཨཊྛཱནིསཾསཔརིཝཱརཾ བྷངྒཱནུཔསྶནཱཉཱཎཾ བལཔྤཏྟཾ ཧོཏི. ཏཏྲིམེ ཨཊྛཱནིསཾསཱ – བྷཝདིཊྛིཔྤཧཱནཾ, ཛཱིཝིཏནིཀནྟིཔརིཙྩཱགོ, སདཱཡུཏྟཔཡུཏྟཏཱ, ཝིསུདྡྷཱཛཱིཝིཏཱ, ཨུསྶུཀྐཔྤཧཱནཾ, ཝིགཏབྷཡཏཱ, ཁནྟིསོརཙྩཔཊིལཱབྷོ, ཨརཏིརཏིསཧནཏཱཏི.

ཏེནཱཧུ ¶ པོརཱཎཱ –

‘‘ཨིམཱནི ཨཊྛགྒུཎམུཏྟམཱནི,

དིསྭཱ ཏཧིཾ སམྨསཏེ པུནཔྤུནཾ;

ཨཱདིཏྟཙེལསྶིརསཱུཔམོ མུནི,

བྷངྒཱནུཔསྶཱི ཨམཏསྶ པཏྟིཡཱ’’ཏི.

བྷངྒཱནུཔསྶནཱཉཱཎཾ ནིཊྛིཏཾ.

བྷཡཏུཔཊྛཱནཉཱཎཀཐཱ

༧༥༠. ཏསྶེཝཾ སབྦསངྑཱརཱནཾ ཁཡཝཡབྷེདནིརོདྷཱརམྨཎཾ བྷངྒཱནུཔསྶནཾ ཨཱསེཝནྟསྶ བྷཱཝེནྟསྶ ¶ བཧུལཱིཀརོནྟསྶ སབྦབྷཝཡོནིགཏིཋིཏིསཏྟཱཝཱསེསུ པབྷེདཀཱ སངྑཱརཱ སུཁེན ཛཱིཝིཏུཀཱམསྶ བྷཱིརུཀཔུརིསསྶ སཱིཧབྱགྒྷདཱིཔིཨཙྪཏརཙྪཡཀྑརཀྑསཙཎྜགོཎཙཎྜཀུཀྐུརཔབྷིནྣམདཙཎྜཧཏྠིགྷོརཨཱསཱིཝིསཨསནིཝིཙཀྐསུསཱནརཎབྷཱུམིཛལིཏཨངྒཱརཀཱསུཨཱདཡོ ཝིཡ མཧཱབྷཡཾ ཧུཏྭཱ ཨུཔཊྛཧནྟི. ཏསྶ ‘‘ཨཏཱིཏཱ སངྑཱརཱ ནིརུདྡྷཱ, པཙྩུཔྤནྣཱ ནིརུཛ྄ཛྷནྟི, ཨནཱགཏེ ནིབྦཏྟནཀསངྑཱརཱཔི ཨེཝམེཝ ནིརུཛ྄ཛྷིསྶནྟཱི’’ཏི པསྶཏོ ཨེཏསྨིཾ ཋཱནེ བྷཡཏུཔཊྛཱནཉཱཎཾ ནཱམ ཨུཔྤཛྫཏི.

ཏཏྲཱཡཾ ཨུཔམཱ – ཨེཀིསྶཱ ཀིར ཨིཏྠིཡཱ ཏཡོ པུཏྟཱ རཱཛཔརཱདྷིཀཱ, ཏེསཾ རཱཛཱ སཱིསཙྪེདཾ ཨཱཎཱཔེསི. སཱ པུཏྟེཧི སདྡྷིཾ ཨཱགྷཱཏནཾ ཨགམཱསི. ཨཐསྶཱ ཛེཊྛཔུཏྟསྶ སཱིསཾ ཚིནྡིཏྭཱ མཛ྄ཛྷིམསྶ ཚིནྡིཏུཾ ཨཱརབྷིཾསུ. སཱ ཛེཊྛསྶ སཱིསཾ ཚིནྣཾ མཛ྄ཛྷིམསྶ ཙ ཚིཛྫམཱནཾ དིསྭཱ ཀནིཊྛམྷི ཨཱལཡཾ ཝིསྶཛྫི ‘‘ཨཡམྤི ཨེཏེསཉྙེཝ སདིསོ བྷཝིསྶཏཱི’’ཏི. ཏཏྠ ཏསྶཱ ཨིཏྠིཡཱ ཛེཊྛཔུཏྟསྶ ཚིནྣསཱིསདསྶནཾ ཝིཡ ཡོགིནོ ཨཏཱིཏསངྑཱརཱནཾ ནིརོདྷདསྶནཾ, མཛ྄ཛྷིམསྶ ཚིཛྫམཱནསཱིསདསྶནཾ ཝིཡ པཙྩུཔྤནྣཱནཾ ནིརོདྷདསྶནཾ, ‘‘ཨཡམྤི ཨེཏེསཉྙེཝ སདིསོ བྷཝིསྶཏཱི’’ཏི ཀནིཊྛཔུཏྟམྷི ཨཱལཡཝིསྶཛྫནཾ ཝིཡ ‘‘ཨནཱགཏེཔི ནིབྦཏྟནཀསངྑཱརཱ བྷིཛྫིསྶནྟཱི’’ཏི ཨནཱགཏཱནཾ ནིརོདྷདསྶནཾ. ཏསྶེཝཾ པསྶཏོ ཨེཏསྨིཾ ཋཱནེ ཨུཔྤཛྫཏི བྷཡཏུཔཊྛཱནཉཱཎཾ.

ཨཔརཱཔི ཨུཔམཱ – ཨེཀཱ ཀིར པཱུཏིཔཛཱ ཨིཏྠཱི དས དཱརཀེ ཝིཛཱཡི. ཏེསུ ནཝ མཏཱ, ཨེཀོ ཧཏྠགཏོ མརཏི, ཨཔརོ ཀུཙྪིཡཾ. སཱ ནཝ དཱརཀེ ¶ མཏེ དསམཉྩ མཱིཡམཱནཾ དིསྭཱ ཀུཙྪིགཏེ ཨཱལཡཾ ཝིསྶཛྫི ‘‘ཨཡམྤི ཨེཏེསཉྙེཝ སདིསོ བྷཝིསྶཏཱི’’ཏི. ཏཏྠ ཏསྶཱ ཨིཏྠིཡཱ ནཝནྣཾ དཱརཀཱནཾ མརཎཱནུསྶརཎཾ ཝིཡ ཡོགིནོ ཨཏཱིཏསངྑཱརཱནཾ ནིརོདྷདསྶནཾ, ཧཏྠགཏསྶ མཱིཡམཱནབྷཱཝདསྶནཾ ཝིཡ ཡོགིནོ པཙྩུཔྤནྣཱནཾ ནིརོདྷདསྶནཾ, ཀུཙྪིགཏེ ཨཱལཡཝིསྶཛྫནཾ ཝིཡ ཨནཱགཏཱནཾ ནིརོདྷདསྶནཾ. ཏསྶེཝཾ པསྶཏོ ཨེཏསྨིཾ ཁཎེ ཨུཔྤཛྫཏི བྷཡཏུཔཊྛཱནཉཱཎཾ.

༧༥༡. བྷཡཏུཔཊྛཱནཉཱཎཾ པན བྷཱཡཏི ན བྷཱཡཏཱིཏི? ན བྷཱཡཏི. ཏཉྷི ཨཏཱིཏཱ སངྑཱརཱ ནིརུདྡྷཱ, པཙྩུཔྤནྣཱ ནིརུཛ྄ཛྷནྟི, ཨནཱགཏཱ ནིརུཛ྄ཛྷིསྶནྟཱིཏི ཏཱིརཎམཏྟམེཝ ཧོཏི. ཏསྨཱ ཡཐཱ ནཱམ ཙཀྑུམཱ པུརིསོ ནགརདྭཱརེ ཏིསྶོ ཨངྒཱརཀཱསུཡོ ཨོལོཀཡམཱནོ སཡཾ ན བྷཱཡཏི, ཀེཝལཾ ཧིསྶ ‘‘ཡེ ཡེ ཨེཏྠ ནིཔཏིསྶནྟི, སབྦེ ཨནཔྤཀཾ དུཀྑམནུབྷཝིསྶནྟཱི’’ཏི ཏཱིརཎམཏྟམེཝ ཧོཏི. ཡཐཱ ཝཱ པན ཙཀྑུམཱ པུརིསོ ཁདིརསཱུལཾ ཨཡོསཱུལཾ སུཝཎྞསཱུལནྟི པཊིཔཱཊིཡཱ ¶ ཋཔིཏཾ སཱུལཏྟཡཾ ཨོལོཀཡམཱནོ སཡཾ ན བྷཱཡཏི, ཀེཝལཾ ཧིསྶ ‘‘ཡེ ཡེ ཨིམེསུ སཱུལེསུ ནིཔཏིསྶནྟི, སབྦེ ཨནཔྤཀཾ དུཀྑམནུབྷཝིསྶནྟཱི’’ཏི ཏཱིརཎམཏྟམེཝ ཧོཏི, ཨེཝམེཝ བྷཡཏུཔཊྛཱནཉཱཎཾ སཡཾ ན བྷཱཡཏི, ཀེཝལཾ ཧིསྶ ཨངྒཱརཀཱསུཏྟཡསདིསེསུ, སཱུལཏྟཡསདིསེསུ ཙ ཏཱིསུ བྷཝེསུ ‘‘ཨཏཱིཏཱ སངྑཱརཱ ནིརུདྡྷཱ, པཙྩུཔྤནྣཱ ནིརུཛ྄ཛྷནྟི, ཨནཱགཏཱ ནིརུཛ྄ཛྷིསྶནྟཱི’’ཏི ཏཱིརཎམཏྟམེཝ ཧོཏི. ཡསྨཱ པནསྶ ཀེཝལཾ སབྦབྷཝཡོནིགཏིཋིཏིནིཝཱསགཏཱ སངྑཱརཱ བྱསནཱཔནྣཱ སཔྤཊིབྷཡཱ ཧུཏྭཱ བྷཡཏོ ཨུཔཊྛཧནྟི, ཏསྨཱ བྷཡཏུཔཊྛཱནནྟི ཝུཙྩཏི.

ཨེཝཾ བྷཡཏོ ཨུཔཊྛཱནེ པནསྶ ཨཡཾ པཱལི༹ –

‘‘ཨནིཙྩཏོ མནསིཀརོཏོ ཀིཾ བྷཡཏོ ཨུཔཊྛཱཏི? དུཀྑཏོ. ཨནཏྟཏོ མནསིཀརོཏོ ཀིཾ བྷཡཏོ ཨུཔཊྛཱཏཱིཏི? ཨནིཙྩཏོ མནསིཀརོཏོ ནིམིཏྟཾ བྷཡཏོ ཨུཔཊྛཱཏི. དུཀྑཏོ མནསིཀརོཏོ པཝཏྟཾ བྷཡཏོ ཨུཔཊྛཱཏི. ཨནཏྟཏོ མནསིཀརོཏོ ནིམིཏྟཉྩ པཝཏྟཉྩ བྷཡཏོ ཨུཔཊྛཱཏཱི’’ཏི (པཊི. མ. ༡.༢༢༧).

ཏཏྠ ¶ ནིམིཏྟནྟི སངྑཱརནིམིཏྟཾ. ཨཏཱིཏཱནཱགཏཔཙྩུཔྤནྣཱནཾ སངྑཱརཱནམེཝེཏཾ ཨདྷིཝཙནཾ. ཨནིཙྩཏོ མནསིཀརོནྟོ ཧི སངྑཱརཱནཾ མརཎམེཝ པསྶཏི, ཏེནསྶ ནིམིཏྟཾ བྷཡཏོ ཨུཔཊྛཱཏི. པཝཏྟནྟི རཱུཔཱརཱུཔབྷཝཔཝཏྟི. དུཀྑཏོ མནསིཀརོནྟོ ཧི སུཁསམྨཏཱཡཔི པཝཏྟིཡཱ ཨབྷིཎྷཔཊིཔཱིལ༹ནབྷཱཝམེཝ པསྶཏི, ཏེནསྶ པཝཏྟཾ བྷཡཏོ ཨུཔཊྛཱཏི. ཨནཏྟཏོ མནསིཀརོནྟོ པན ཨུབྷཡམྤེཏཾ སུཉྙགཱམཾ ཝིཡ མརཱིཙིགནྡྷབྦནགརཱདཱིནི ཝིཡ ཙ རིཏྟཾ ཏུཙྪཾ སུཉྙཾ ཨསྶཱམིཀཾ ཨཔརིཎཱཡཀཾ པསྶཏི. ཏེནསྶ ནིམིཏྟཉྩ པཝཏྟཉྩ ཨུབྷཡཾ བྷཡཏོ ཨུཔཊྛཱཏཱིཏི.

བྷཡཏུཔཊྛཱནཉཱཎཾ ནིཊྛིཏཾ.

ཨཱདཱིནཝཱནུཔསྶནཱཉཱཎཀཐཱ

༧༥༢. ཏསྶ ཏཾ བྷཡཏུཔཊྛཱནཉཱཎཾ ཨཱསེཝནྟསྶ བྷཱཝེནྟསྶ བཧུལཱིཀརོནྟསྶ སབྦབྷཝཡོནིགཏིཋིཏིསཏྟཱཝཱསེསུ ¶ ནེཝ ཏཱཎཾ, ན ལེཎཾ, ན གཏི, ནཔྤཊིསརཎཾ པཉྙཱཡཏི. སབྦབྷཝཡོནིགཏིཋིཏིནིཝཱསགཏེསུ སངྑཱརེསུ ཨེཀསངྑཱརེཔི པཏྠནཱ ཝཱ པརཱམཱསོ ཝཱ ན ཧོཏི. ཏཡོ བྷཝཱ ཝཱིཏཙྩིཀངྒཱརཔུཎྞཨངྒཱརཀཱསུཡོ ཝིཡ, ཙཏྟཱརོ མཧཱབྷཱུཏཱ གྷོརཝིསཨཱསཱིཝིསཱ ཝིཡ, པཉྩཀྑནྡྷཱ ཨུཀྑིཏྟཱསིཀཝདྷཀཱ ཝིཡ, ཚ ཨཛ྄ཛྷཏྟིཀཱཡཏནཱནི སུཉྙགཱམོ ཝིཡ, ཚ བཱཧིརཱཡཏནཱནི གཱམགྷཱཏཀཙོརཱ ཝིཡ, སཏྟ ཝིཉྙཱཎཊྛིཏིཡོ, ནཝ ཙ སཏྟཱཝཱསཱ ཨེཀཱདསཧི ཨགྒཱིཧི ཨཱདིཏྟཱ སམྤཛྫལིཏཱ སཛོཏིབྷཱུཏཱ ཝིཡ ཙ, སབྦེ སངྑཱརཱ གཎྜབྷཱུཏཱ རོགབྷཱུཏཱ སལླབྷཱུཏཱ ཨགྷབྷཱུཏཱ ཨཱབཱདྷབྷཱུཏཱ ཝིཡ ཙ ནིརསྶཱདཱ ནིརསཱ མཧཱཨཱདཱིནཝརཱསིབྷཱུཏཱ ཧུཏྭཱ ཨུཔཊྛཧནྟི.

ཀཐཾ? སུཁེན ཛཱིཝིཏུཀཱམསྶ བྷཱིརུཀཔུརིསསྶ རམཎཱིཡཱཀཱརསཎྛིཏམྤི སཝཱལ༹ཀམིཝ ཝནགཧནཾ, སསདྡཱུལཱ ཝིཡ གུཧཱ, སགཱཧརཀྑསཾ ཝིཡ ཨུདཀཾ, སམུསྶིཏཁགྒཱ ཝིཡ པཙྩཏྠིཀཱ, སཝིསཾ ཝིཡ བྷོཛནཾ, སཙོརོ ཝིཡ མགྒོ, ཨཱདིཏྟམིཝ ཨགཱརཾ, ཨུཡྻུཏྟསེནཱ ཝིཡ རཎབྷཱུམི. ཡཐཱ ཧི སོ པུརིསོ ཨེཏཱནི སཝཱལ༹ཀཝནགཧནཱདཱིནི ཨཱགམྨ བྷཱིཏོ སཾཝིགྒོ ལོམཧཊྛཛཱཏོ སམནྟཏོ ཨཱདཱིནཝམེཝ པསྶཏི, ཨེཝམེཝཱཡཾ ཡོགཱཝཙརོ ¶ བྷངྒཱནུཔསྶནཱཝསེན སབྦསངྑཱརེསུ བྷཡཏོ ཨུཔཊྛིཏེསུ སམནྟཏོ ནིརསཾ ནིརསྶཱདཾ ཨཱདཱིནཝམེཝ པསྶཏི. ཏསྶེཝཾ པསྶཏོ ཨཱདཱིནཝཉཱཎཾ ནཱམ ཨུཔྤནྣཾ ཧོཏི. ཡཾ སནྡྷཱཡ ཨིདཾ ཝུཏྟཾ –

‘‘ཀཐཾ བྷཡཏུཔཊྛཱནེ པཉྙཱ ཨཱདཱིནཝེ ཉཱཎཾ? ཨུཔྤཱདོ བྷཡནྟི བྷཡཏུཔཊྛཱནེ པཉྙཱ ཨཱདཱིནཝེ ཉཱཎཾ. པཝཏྟཾ བྷཡནྟི… ནིམིཏྟཾ བྷཡནྟི… ཨཱཡཱུཧནཱ བྷཡནྟི… པཊིསནྡྷི བྷཡནྟི… གཏི བྷཡནྟི… ནིབྦཏྟི བྷཡནྟི… ཨུཔཔཏྟི བྷཡནྟི… ཛཱཏི བྷཡནྟི… ཛརཱ བྷཡནྟི… བྱཱདྷི བྷཡནྟི… མརཎཾ བྷཡནྟི… སོཀོ བྷཡནྟི… པརིདེཝོ བྷཡནྟི… ཨུཔཱཡཱསོ བྷཡནྟི བྷཡཏུཔཊྛཱནེ པཉྙཱ ཨཱདཱིནཝེ ཉཱཎཾ. ཨནུཔྤཱདོ ཁེམནྟི སནྟིཔདེ ཉཱཎཾ. ཨཔྤཝཏྟཾ…པེ… ཨནུཔཱཡཱསོ ཁེམནྟི སནྟིཔདེ ཉཱཎཾ. ཨུཔྤཱདོ བྷཡཾ, ཨནུཔྤཱདོ ཁེམནྟི སནྟིཔདེ ཉཱཎཾ. པཝཏྟཾ…པེ… ཨུཔཱཡཱསོ བྷཡཾ, ཨནུཔཱཡཱསོ ཁེམནྟི སནྟིཔདེ ཉཱཎཾ.

‘‘ཨུཔྤཱདོ དུཀྑནྟི བྷཡཏུཔཊྛཱནེ པཉྙཱ ཨཱདཱིནཝེ ཉཱཎཾ. པཝཏྟཾ…པེ… ཨུཔཱཡཱསོ དུཀྑནྟི བྷཡཏུཔཊྛཱནེ པཉྙཱ ཨཱདཱིནཝེ ཉཱཎཾ. ཨནུཔྤཱདོ སུཁནྟི སནྟིཔདེ ¶ ཉཱཎཾ. ཨཔྤཝཏྟཾ…པེ… ཨནུཔཱཡཱསོ སུཁནྟི སནྟིཔདེ ཉཱཎཾ. ཨུཔྤཱདོ དུཀྑཾ, ཨནུཔྤཱདོ སུཁནྟི སནྟིཔདེ ཉཱཎཾ. པཝཏྟཾ…པེ… ཨུཔཱཡཱསོ དུཀྑཾ, ཨནུཔཱཡཱསོ སུཁནྟི སནྟིཔདེ ཉཱཎཾ.

‘‘ཨུཔྤཱདོ སཱམིསནྟི བྷཡཏུཔཊྛཱནེ པཉྙཱ ཨཱདཱིནཝེ ཉཱཎཾ. པཝཏྟཾ…པེ… ཨུཔཱཡཱསོ སཱམིསནྟི བྷཡཏུཔཊྛཱནེ པཉྙཱ ཨཱདཱིནཝེ ཉཱཎཾ. ཨནུཔྤཱདོ ནིརཱམིསནྟི སནྟིཔདེ ཉཱཎཾ. ཨཔྤཝཏྟཾ…པེ… ཨནུཔཱཡཱསོ ནིརཱམིསནྟི སནྟིཔདེ ཉཱཎཾ. ཨུཔྤཱདོ སཱམིསཾ, ཨནུཔྤཱདོ ནིརཱམིསནྟི སནྟིཔདེ ཉཱཎཾ. པཝཏྟཾ…པེ… ཨུཔཱཡཱསོ སཱམིསཾ, ཨནུཔཱཡཱསོ ནིརཱམིསནྟི སནྟིཔདེ ཉཱཎཾ.

ཨུཔྤཱདོ ¶ ‘‘སངྑཱརཱཏི བྷཡཏུཔཊྛཱནེ པཉྙཱ ཨཱདཱིནཝེ ཉཱཎཾ. པཝཏྟཾ…པེ… ཨུཔཱཡཱསོ སངྑཱརཱཏི བྷཡཏུཔཊྛཱནེ པཉྙཱ ཨཱདཱིནཝེ ཉཱཎཾ. ཨནུཔྤཱདོ ནིབྦཱནནྟི སནྟིཔདེ ཉཱཎཾ. ཨཔྤཝཏྟཾ…པེ… ཨནུཔཱཡཱསོ ནིབྦཱནནྟི སནྟིཔདེ ཉཱཎཾ. ཨུཔྤཱདོ སངྑཱརཱ, ཨནུཔྤཱདོ ནིབྦཱནནྟི སནྟིཔདེ ཉཱཎཾ. པཝཏྟཾ…པེ… ཨུཔཱཡཱསོ སངྑཱརཱ, ཨནུཔཱཡཱསོ ནིབྦཱནནྟི སནྟིཔདེ ཉཱཎཾ.

‘‘ཨུཔྤཱདཉྩ པཝཏྟཉྩ, ནིམིཏྟཾ དུཀྑནྟི པསྶཏི;

ཨཱཡཱུཧནཾ པཊིསནྡྷིཾ, ཉཱཎཾ ཨཱདཱིནཝེ ཨིདཾ.

‘‘ཨནུཔྤཱདཾ ཨཔྤཝཏྟཾ, ཨནིམིཏྟཾ སུཁནྟི ཙ;

ཨནཱཡཱུཧནཱ ཨཔྤཊིསནྡྷི, ཉཱཎཾ སནྟིཔདེ ཨིདཾ.

‘‘ཨིདཾ ཨཱདཱིནཝེ ཉཱཎཾ, པཉྩཋཱནེསུ ཛཱཡཏི;

པཉྩཋཱནེ སནྟིཔདེ, དས ཉཱཎེ པཛཱནཱཏི;

དྭིནྣཾ ཉཱཎཱནཾ ཀུསལཏཱ, ནཱནཱདིཊྛཱིསུ ན ཀམྤཏཱི’’ཏི.

‘‘ཏཾ ཉཱཏཊྛེན ཉཱཎཾ. པཛཱནནཊྛེན པཉྙཱ. ཏེན ཝུཙྩཏི ‘‘བྷཡཏུཔཊྛཱནེ པཉྙཱ ཨཱདཱིནཝེ ཉཱཎ’’ནྟི (པཊི. མ. ༡.༥༣).

༧༥༣. ཏཏྠ ¶ ཨུཔྤཱདོཏི པུརིམཀམྨཔཙྩཡཱ ཨིདྷ ཨུཔྤཏྟི. པཝཏྟནྟི ཏཐཱ ཨུཔྤནྣསྶ པཝཏྟི. ནིམིཏྟནྟི སབྦམྤི སངྑཱརནིམིཏྟཾ. ཨཱཡཱུཧནཱཏི ཨཱཡཏིཾ པཊིསནྡྷིཧེཏུབྷཱུཏཾ ཀམྨཾ. པཊིསནྡྷཱིཏི ཨཱཡཏིཾ ཨུཔྤཏྟི. གཏཱིཏི ཡཱཡ གཏིཡཱ སཱ པཊིསནྡྷི ཧོཏི. ནིབྦཏྟཱིཏི ཁནྡྷཱནཾ ནིབྦཏྟནཾ. ཨུཔཔཏྟཱིཏི ‘‘སམཱཔནྣསྶ ཝཱ ཨུཔཔནྣསྶ ཝཱ’’ཏི (དྷ. ས. ༡༢༨༩, ༡༢༩༡) ཨེཝཾ ཝུཏྟཱ ཝིཔཱཀཔྤཝཏྟི. ཛཱཏཱིཏི ཛརཱདཱིནཾ པཙྩཡབྷཱུཏཱ བྷཝཔཙྩཡཱ ཛཱཏི. ཛརཱམརཎཱདཡོ པཱཀཊཱ ཨེཝ. ཨེཏྠ ཙ ཨུཔྤཱདཱདཡོ པཉྩེཝ ཨཱདཱིནཝཉཱཎསྶ ཝཏྠུཝསེན ཝུཏྟཱ. སེསཱ ཏེསཾ ཝེཝཙནཝསེན. ནིབྦཏྟི ཛཱཏཱིཏི ཨིདཉྷི དྭཡཾ ཨུཔྤཱདསྶ ཙེཝ པཊིསནྡྷིཡཱ ཙ ཝེཝཙནཾ. གཏི ཨུཔཔཏྟཱིཏི ཨིདཾ དྭཡཾ པཝཏྟསྶ. ཛརཱདཡོ ནིམིཏྟསྶཱཏི. ཏེནཱཧ –

‘‘ཨུཔྤཱདཉྩ པཝཏྟཉྩ, ནིམིཏྟཾ དུཀྑནྟི པསྶཏི;

ཨཱཡཱུཧནཾ པཊིསནྡྷིཾ, ཉཱཎཾ ཨཱདཱིནཝེ ཨིད’’ནྟི ཙ.

‘‘ཨིདཾ ཨཱདཱིནཝེ ཉཱཎཾ, པཉྩཋཱནེསུ ཛཱཡཏཱི’’ཏི ཙ.

ཨནུཔྤཱདོ ¶ ཁེམནྟི སནྟིཔདེ ཉཱཎནྟིཨཱདི པན ཨཱདཱིནཝཉཱཎསྶ པཊིཔཀྑཉཱཎདསྶནཏྠཾ ཝུཏྟཾ. བྷཡཏུཔཊྛཱནེན ཝཱ ཨཱདཱིནཝཾ དིསྭཱ ཨུབྦིགྒཧདཡཱནཾ ཨབྷཡམྤི ཨཏྠི ཁེམཾ ནིརཱདཱིནཝནྟི ཨསྶཱསཛནནཏྠམྤི ཨེཏཾ ཝུཏྟཾ. ཡསྨཱ ཝཱ པནསྶ ཨུཔྤཱདཱདཡོ བྷཡཏོ སཱུཔཊྛིཏཱ ཧོནྟི, ཏསྶ ཏཔྤཊིཔཀྑནིནྣཾ ཙིཏྟཾ ཧོཏི, ཏསྨཱ བྷཡཏུཔཊྛཱནཝསེན སིདྡྷསྶ ཨཱདཱིནཝཉཱཎསྶ ཨཱནིསཾསདསྶནཏྠམྤེཏཾ ཝུཏྟནྟི ཝེདིཏབྦཾ.

ཨེཏྠ ཙ ཡཾ བྷཡཾ, ཏཾ ཡསྨཱ ནིཡམཏོ དུཀྑཾ. ཏཾ ཝཊྚཱམིསལོཀཱམིསཀིལེསཱམིསེཧི ཨཝིཔྤམུཏྟཏྟཱ སཱམིསམེཝ. ཡཉྩ སཱམིསཾ, ཏཾ སངྑཱརམཏྟམེཝ. ཏསྨཱ ‘‘ཨུཔྤཱདོ དུཀྑནྟི བྷཡཏུཔཊྛཱནེ པཉྙཱ ཨཱདཱིནཝེ ཉཱཎ’’ནྟིཨཱདི ཝུཏྟཾ. ཨེཝཾ སནྟེཔི བྷཡཱཀཱརེན དུཀྑཱཀཱརེན སཱམིསཱཀཱརེནཱཏི ཨེཝཾ ཨཱཀཱརནཱནཏྟཏོ པཝཏྟིཝསེནེཝེཏྠ ནཱནཏྟཾ ཝེདིཏབྦཾ.

དསཉཱཎེ པཛཱནཱཏཱིཏི ཨཱདཱིནཝཉཱཎཾ པཛཱནནྟོ ཨུཔྤཱདཱདིཝཏྠུཀཱནི པཉྩ, ཨནུཔྤཱདཱདིཝཏྠུཀཱནི པཉྩཱཏི དས ཉཱཎཱནི པཛཱནཱཏི པཊིཝིཛ྄ཛྷཏི སཙྪིཀརོཏི. དྭིནྣཾ ཉཱཎཱནཾ ཀུསལཏཱཏི ཨཱདཱིནཝཉཱཎསྶ ཙེཝ སནྟིཔདཉཱཎསྶ ཙཱཏི ཨིམེསཾ དྭིནྣཾ ཀུསལཏཱཡ. ནཱནཱདིཊྛཱིསུ ¶ ན ཀམྤཏཱིཏི པརམདིཊྛདྷམྨནིབྦཱནཱདིཝསེན པཝཏྟཱསུ དིཊྛཱིསུ ན ཝེདྷཏི. སེསམེཏྠ ཨུཏྟཱནམེཝཱཏི.

ཨཱདཱིནཝཱནུཔསྶནཱཉཱཎཾ ནིཊྛིཏཾ.

ནིབྦིདཱནུཔསྶནཱཉཱཎཀཐཱ

༧༥༤. སོ ཨེཝཾ སབྦསངྑཱརེ ཨཱདཱིནཝཏོ པསྶནྟོ སབྦབྷཝཡོནིགཏིཝིཉྙཱཎཊྛིཏིསཏྟཱཝཱསགཏེ སབྷེདཀེ སངྑཱརགཏེ ནིབྦིནྡཏི ཨུཀྐཎྛཏི ནཱབྷིརམཏི.

སེཡྻཐཱཔི ནཱམ, ཙིཏྟཀཱུཊཔབྦཏཔཱདཱབྷིརཏོ སུཝཎྞརཱཛཧཾསོ ཨསུཙིམྷི ཙཎྜཱལགཱམདྭཱརཨཱཝཱཊེ ནཱབྷིརམཏི, སཏྟསུ མཧཱསརེསུཡེཝ ཨབྷིརམཏི, ཨེཝམེཝ ཨཡམྤི ཡོགཱིརཱཛཧཾསོ སུཔརིདིཊྛཱདཱིནཝེ སབྷེདཀེ སངྑཱརགཏེ ནཱབྷིརམཏི. བྷཱཝནཱརཱམཏཱཡ པན བྷཱཝནཱརཏིཡཱ སམནྣཱགཏཏྟཱ སཏྟསུ ཨནུཔསྶནཱསུཡེཝ རམཏི.

ཡཐཱ ¶ ཙ སུཝཎྞཔཉྫརེ པཀྑིཏྟོ སཱིཧོ མིགརཱཛཱ ནཱབྷིརམཏི, ཏིཡོཛནསཧསྶཝིཏྠཏེ པན ཧིམཝནྟེཡེཝ རམཏི, ཨེཝམཡཾ ཡོགཱིསཱིཧོ ཏིཝིདྷེ སུགཏིབྷཝེཔི ནཱབྷིརམཏི, ཏཱིསུ པན ཨནུཔསྶནཱསུཡེཝ རམཏི.

ཡཐཱ ཙ སབྦསེཏོ སཏྟཔཏིཊྛོ ཨིདྡྷིམཱ ཝེཧཱསངྒམོ ཚདྡནྟོ ནཱགརཱཛཱ ནགརམཛ྄ཛྷེ ནཱབྷིརམཏི, ཧིམཝཏི ཚདྡནྟདཧགཧནེཡེཝ ཨབྷིརམཏི, ཨེཝམཡཾ ཡོགཱིཝརཝཱརཎོ སབྦསྨིམྤི སངྑཱརགཏེ ནཱབྷིརམཏི, ཨནུཔྤཱདོ ཁེམནྟིཨཱདིནཱ ནཡེན དིཊྛེ སནྟིཔདེཡེཝ ཨབྷིརམཏི, ཏནྣིནྣཏཔྤོཎཏཔྤབྦྷཱརམཱནསོ ཧོཏཱིཏི.

ནིབྦིདཱནུཔསྶནཱཉཱཎཾ ནིཊྛིཏཾ.

༧༥༥. ཏཾ པནེཏཾ པུརིམེན ཉཱཎདྭཡེན ཨཏྠཏོ ཨེཀཾ. ཏེནཱཧུ པོརཱཎཱ –

‘‘བྷཡཏུཔཊྛཱནཾ ¶ ཨེཀམེཝ ཏཱིཎི ནཱམཱནི ལབྷཏི, སབྦསངྑཱརེ བྷཡཏོ ཨདྡསཱཏི བྷཡཏུཔཊྛཱནཾ ནཱམ ཛཱཏཾ. ཏེསུཡེཝ སངྑཱརེསུ ཨཱདཱིནཝཾ ཨུཔྤཱདེཏཱིཏི ཨཱདཱིནཝཱནུཔསྶནཱ ནཱམ ཛཱཏཾ. ཏེསུཡེཝ སངྑཱརེསུ ནིབྦིནྡམཱནཾ ཨུཔྤནྣནྟི ནིབྦིདཱནུཔསྶནཱ ནཱམ ཛཱཏ’’ནྟི.

པཱལི༹ཡམྤི ཝུཏྟཾ – ‘‘ཡཱ ཙ བྷཡཏུཔཊྛཱནེ པཉྙཱ, ཡཉྩ ཨཱདཱིནཝེ ཉཱཎཾ, ཡཱ ཙ ནིབྦིདཱ, ཨིམེ དྷམྨཱ ཨེཀཏྠཱ, བྱཉྫནམེཝ ནཱན’’ནྟི (པཊི. མ. ༡.༢༢༧).

མུཉྩིཏུཀམྱཏཱཉཱཎཀཐཱ

༧༥༦. ཨིམིནཱ པན ནིབྦིདཱཉཱཎེན ཨིམསྶ ཀུལཔུཏྟསྶ ནིབྦིནྡནྟསྶ ཨུཀྐཎྛནྟསྶ ཨནབྷིརམནྟསྶ སབྦབྷཝཡོནིགཏིཝིཉྙཱཎཊྛིཏིསཏྟཱཝཱསགཏེསུ སབྷེདཀེསུ སངྑཱརེསུ ཨེཀསངྑཱརེཔི ཙིཏྟཾ ན སཛྫཏི, ན ལགྒཏི, ན བཛ྄ཛྷཏི, སབྦསྨཱ སངྑཱརགཏཱ མུཙྩིཏུཀཱམཾ ནིསྶརིཏུཀཱམཾ ཧོཏི. ཡཐཱ ཀིཾ? ཡཐཱ ནཱམ ཛཱལབྦྷནྟརགཏོ མཙྪོ, སཔྤམུཁགཏོ མཎྜཱུཀོ, པཉྫརཔཀྑིཏྟོ ཝནཀུཀྐུཊོ, དལ༹ྷཔཱསཝསགཏོ མིགོ, ཨཧིཏུཎྜིཀཧཏྠགཏོ སཔྤོ, མཧཱཔངྐཔཀྑནྡོ ཀུཉྫརོ, སུཔཎྞམུཁགཏོ ¶ ནཱགརཱཛཱ, རཱཧུམུཁཔྤཝིཊྛོ ཙནྡོ, སཔཏྟཔརིཝཱརིཏོ པུརིསོཏི ཨེཝམཱདཡོ ཏཏོ ཏཏོ མུཙྩིཏུཀཱམཱ ནིསྶརིཏུཀཱམཱཝ ཧོནྟི, ཨེཝཾ ཏསྶ ཡོགིནོ ཙིཏྟཾ སབྦསྨཱ སངྑཱརགཏཱ མུཙྩིཏུཀཱམཾ ནིསྶརིཏུཀཱམཾ ཧོཏི. ཨཐསྶ ཨེཝཾ སབྦསངྑཱརེསུ ཝིགཏཱལཡསྶ སབྦསྨཱ སངྑཱརགཏཱ མུཙྩིཏུཀཱམསྶ ཨུཔྤཛྫཏི མུཉྩིཏུཀམྱཏཱ ཉཱཎནྟི.

མུཉྩིཏུཀམྱཏཱཉཱཎཾ ནིཊྛིཏཾ.

པཊིསངྑཱནུཔསྶནཱཉཱཎཀཐཱ

༧༥༧. སོ ཨེཝཾ སབྦབྷཝཡོནིགཏིཊྛིཏིནིཝཱསགཏེཧི སབྷེདཀེཧི སངྑཱརེཧི མུཙྩིཏུཀཱམོ སབྦསྨཱ སངྑཱརགཏཱ མུཙྩིཏུཾ པུན ཏེ ཨེཝཾ སངྑཱརེ པཊིསངྑཱནུཔསྶནཱཉཱཎེན ཏིལཀྑཎཾ ཨཱརོཔེཏྭཱ པརིགྒཎྷཱཏི.

སོ ¶ སབྦསངྑཱརེ ཨནཙྩནྟིཀཏོ, ཏཱཝཀཱལིཀཏོ, ཨུཔྤཱདཝཡཔརིཙྪིནྣཏོ, པལོཀཏོ, ཙལཏོ, པབྷངྒུཏོ, ཨདྡྷུཝཏོ, ཝིཔརིཎཱམདྷམྨཏོ, ཨསྶཱརཀཏོ, ཝིབྷཝཏོ, སངྑཏཏོ, མརཎདྷམྨཏོཏིཨཱདཱིཧི ཀཱརཎེཧི ཨནིཙྩཱཏི པསྶཏི.

ཨབྷིཎྷཔཊིཔཱིལ༹ནཏོ, དུཀྑམཏོ, དུཀྑཝཏྠུཏོ, རོགཏོ, གཎྜཏོ, སལླཏོ, ཨགྷཏོ, ཨཱབཱདྷཏོ, ཨཱིཏིཏོ, ཨུཔདྡཝཏོ, བྷཡཏོ, ཨུཔསགྒཏོ, ཨཏཱཎཏོ, ཨལེཎཏོ, ཨསརཎཏོ, ཨཱདཱིནཝཏོ, ཨགྷམཱུལཏོ, ཝདྷཀཏོ, སཱསཝཏོ, མཱརཱམིསཏོ, ཛཱཏིདྷམྨཏོ, ཛརཱདྷམྨཏོ, བྱཱདྷིདྷམྨཏོ, སོཀདྷམྨཏོ, པརིདེཝདྷམྨཏོ, ཨུཔཱཡཱསདྷམྨཏོ, སཾཀིལེསིཀདྷམྨཏོཏིཨཱདཱིཧི ཀཱརཎེཧི དུཀྑཱཏི པསྶཏི.

ཨཛཉྙཏོ, དུགྒནྡྷཏོ, ཛེགུཙྪཏོ, པཊིཀྐཱུལཏོ, ཨམཎྜནཱརཧཏོ, ཝིརཱུཔཏོ, བཱིབྷཙྪཏོཏིཨཱདཱིཧི ཀཱརཎེཧི དུཀྑལཀྑཎསྶ པརིཝཱརབྷཱུཏཏོ ཨསུབྷཏོ པསྶཏི.

པརཏོ, རིཏྟཏོ, ཏུཙྪཏོ, སུཉྙཏོ, ཨསྶཱམིཀཏོ, ཨནིསྶརཏོ, ཨཝསཝཏྟིཏོཏིཨཱདཱིཧི ཀཱརཎེཧི ཨནཏྟཏོ པསྶཏི.

༧༥༨. ཨེཝཉྷི ¶ པསྶཏཱནེན ཏིལཀྑཎཾ ཨཱརོཔེཏྭཱ སངྑཱརཱ པརིགྒཧིཏཱ ནཱམ ཧོནྟི. ཀསྨཱ པནཱཡམེཏེ ཨེཝཾ པརིགྒཎྷཱཏཱིཏི? མུཉྩནསྶ ཨུཔཱཡསམྤཱདནཏྠཾ.

ཏཏྲཱཡཾ ཨུཔམཱ – ཨེཀོ ཀིར པུརིསོ ‘‘མཙྪེ གཧེསྶཱམཱི’’ཏི མཙྪཁིཔྤཾ གཧེཏྭཱ ཨུདཀེ ཨོཌྜཱཔེསི སོ ཁིཔྤམུཁེན ཧཏྠཾ ཨོཏཱརེཏྭཱ ཨནྟོཨུདཀེ སཔྤཾ གཱིཝཱཡ གཧེཏྭཱ ‘‘མཙྪོ མེ གཧིཏོ’’ཏི ཨཏྟམནོ ཨཧོསི. སོ ‘‘མཧཱ ཝཏ མཡཱ མཙྪོ ལདྡྷོ’’ཏི ཨུཀྑིཔིཏྭཱ པསྶནྟོ སོཝཏྠིཀཏྟཡདསྶནེན སཔྤོཏི སཉྫཱནིཏྭཱ བྷཱིཏོ ཨཱདཱིནཝཾ དིསྭཱ གཧཎེ ནིབྦིནྣོ མུཉྩིཏུཀཱམོ ཧུཏྭཱ མུཉྩནསྶ ཨུཔཱཡཾ ཀརོནྟོ ཨགྒནངྒུཊྛཏོ པཊྛཱཡ ཧཏྠཾ ནིབྦེཋེཏྭཱ བཱཧུཾ ཨུཀྑིཔིཏྭཱ ཨུཔརིསཱིསེ དྭེ ཏཡོ ཝཱརེ ཨཱཝིཛ྄ཛྷིཏྭཱ སཔྤཾ དུབྦལཾ ཀཏྭཱ ‘‘གཙྪ དུཊྛ སཔྤཱ’’ཏི ནིསྶཛྫིཏྭཱ ཝེགེན ཏལཱ༹ཀཔཱལི༹ཾ ཨཱརུཡ྄ཧ ‘‘མཧནྟསྶ ཝཏ བྷོ སཔྤསྶ མུཁཏོ མུཏྟོམྷཱི’’ཏི ཨཱགཏམགྒཾ ཨོལོཀཡམཱནོ ཨཊྛཱསི.

ཏཏྠ ¶ ཏསྶ པུརིསསྶ ‘‘མཙྪོ’’ཏི སཔྤཾ གཱིཝཱཡ གཧེཏྭཱ ཏུཊྛཀཱལོ ཝིཡ ཨིམསྶཱཔི ཡོགིནོ ཨཱདིཏོཝ ཨཏྟབྷཱཝཾ པཊིལབྷིཏྭཱ ཏུཊྛཀཱལོ, ཏསྶ ཁིཔྤམུཁཏོ སཱིསཾ ནཱིཧརིཏྭཱ སོཝཏྠིཀཏྟཡདསྶནཾ ཝིཡ ཨིམསྶ གྷནཝིནིབྦྷོགཾ ཀཏྭཱ སངྑཱརེསུ ཏིལཀྑཎདསྶནཾ, ཏསྶ བྷཱིཏཀཱལོ ཝིཡ ཨིམསྶ བྷཡཏུཔཊྛཱནཉཱཎཾ. ཏཏོ ཨཱདཱིནཝདསྶནཾ ཝིཡ ཨཱདཱིནཝཱནུཔསྶནཱཉཱཎཾ, གཧཎེ ནིབྦིནྡནཾ ཝིཡ ནིབྦིདཱནུཔསྶནཱཉཱཎཾ. སཔྤཾ མུཉྩིཏུཀཱམཏཱ ཝིཡ མུཉྩིཏུཀམྱཏཱཉཱཎཾ, མུཉྩནསྶ ཨུཔཱཡཀརཎཾ ཝིཡ པཊིསངྑཱནུཔསྶནཱཉཱཎེན སངྑཱརེསུ ཏིལཀྑཎཱརོཔནཾ. ཡཐཱ ཧི སོ པུརིསོ སཔྤཾ ཨཱཝིཛ྄ཛྷིཏྭཱ དུབྦལཾ ཀཏྭཱ ནིཝཏྟེཏྭཱ ཌཾསིཏུཾ ཨསམཏྠབྷཱཝཾ པཱཔེཏྭཱ སུམུཏྟཾ མུཉྩཏི, ཨེཝམཡཾ ཡོགཱཝཙརོ ཏིལཀྑཎཱརོཔནེན སངྑཱརེ ཨཱཝིཛ྄ཛྷིཏྭཱ དུབྦལེ ཀཏྭཱ པུན ནིཙྩསུཁསུབྷཨཏྟཱཀཱརེན ཨུཔཊྛཱཏུཾ ཨསམཏྠཏཾ པཱཔེཏྭཱ སུམུཏྟཾ མུཉྩཏི. ཏེན ཝུཏྟཾ ‘‘མུཉྩནསྶ ཨུཔཱཡསམྤཱདནཏྠཾ ཨེཝཾ པརིགྒཎྷཱཏཱི’’ཏི.

༧༥༩. ཨེཏྟཱཝཏཱ ཏསྶ ཨུཔྤནྣཾ ཧོཏི པཊིསངྑཱཉཱཎཾ. ཡཾ སནྡྷཱཡ ཝུཏྟཾ –

‘‘ཨནིཙྩཏོ ¶ མནསིཀརོཏོ ཀིཾ པཊིསངྑཱ ཉཱཎཾ ཨུཔྤཛྫཏི? དུཀྑཏོ. ཨནཏྟཏོ མནསིཀརོཏོ ཀིཾ པཊིསངྑཱ ཉཱཎཾ ཨུཔྤཛྫཏི? ཨནིཙྩཏོ མནསིཀརོཏོ ནིམིཏྟཾ པཊིསངྑཱ ཉཱཎཾ ཨུཔྤཛྫཏི. དུཀྑཏོ མནསིཀརོཏོ པཝཏྟཾ པཊིསངྑཱ ཉཱཎཾ ཨུཔྤཛྫཏི. ཨནཏྟཏོ མནསིཀརོཏོ ནིམིཏྟཉྩ པཝཏྟཉྩ པཊིསངྑཱ ཉཱཎཾ ཨུཔྤཛྫཏཱི’’ཏི (པཊི. མ. ༡.༢༢༧).

ཨེཏྠ ཙ ནིམིཏྟཾ པཊིསངྑཱཏི སངྑཱརནིམིཏྟཾ ‘‘ཨདྡྷུཝཾ ཏཱཝཀཱལིཀ’’ནྟི ཨནིཙྩལཀྑཎཝསེན ཛཱནིཏྭཱ. ཀཱམཉྩ ན པཋམཾ ཛཱནིཏྭཱ པཙྪཱ ཉཱཎཾ ཨུཔྤཛྫཏི, ཝོཧཱརཝསེན པན ‘‘མནཉྩ པཊིཙྩ དྷམྨེ ཙ ཨུཔྤཛྫཏི མནོཝིཉྙཱཎ’’ནྟིཨཱདཱིནི (མ. ནི. ༣.༤༢༡) ཝིཡ ཨེཝཾ ཝུཙྩཏི. ཨེཀཏྟནཡེན ཝཱ པུརིམཉྩ པཙྪིམཉྩ ཨེཀཾ ཀཏྭཱ ཨེཝཾ ཝུཏྟནྟི ཝེདིཏབྦཾ. ཨིམིནཱ ནཡེན ཨིཏརསྨིམྤི པདདྭཡེ ཨཏྠོ ཝེདིཏབྦོཏི.

པཊིསངྑཱནུཔསྶནཱཉཱཎཾ ནིཊྛིཏཾ.

སངྑཱརུཔེཀྑཱཉཱཎཀཐཱ

༧༦༠. སོ ¶ ཨེཝཾ པཊིསངྑཱནུཔསྶནཱཉཱཎེན ‘‘སབྦེ སངྑཱརཱ སུཉྙཱ’’ཏི པརིགྒཧེཏྭཱ པུན ‘‘སུཉྙམིདཾ ཨཏྟེན ཝཱ ཨཏྟནིཡེན ཝཱ’’ཏི (མ. ནི. ༣.༦༩) དྭིཀོཊིཀཾ སུཉྙཏཾ པརིགྒཎྷཱཏི. སོ ཨེཝཾ ནེཝ ཨཏྟཱནཾ, ན པརཾ ཀིཉྩི ཨཏྟནོ པརིཀྑཱརབྷཱཝེ ཋིཏཾ དིསྭཱ པུན ‘‘ནཱཧཾ ཀྭཙནི, ཀསྶཙི ཀིཉྩནཏསྨིཾ, ན ཙ མམ ཀྭཙནི, ཀིསྨིཉྩི ཀིཉྩནཏཏྠཱི’’ཏི ཡཱ ཨེཏྠ ཙཏུཀོཊིཀཱ སུཉྙཏཱ ཀཐིཏཱ, ཏཾ པརིགྒཎྷཱཏི.

ཀཐཾ? ཨཡཉྷི ནཱཧཾ ཀྭཙནཱིཏི ཀྭཙི ཨཏྟཱནཾ ན པསྶཏི. ཀསྶཙི ཀིཉྩནཏསྨིནྟི ཨཏྟནོ ཨཏྟཱནཾ ཀསྶཙི པརསྶ ཀིཉྩནབྷཱཝེ ཨུཔནེཏབྦཾ ན པསྶཏི. བྷཱཏིཊྛཱནེཝཱ བྷཱཏརཾ, སཧཱཡཊྛཱནེ ཝཱ སཧཱཡཾ, པརིཀྑཱརཊྛཱནེ ཝཱ པརིཀྑཱརཾ མཉྙིཏྭཱ ཨུཔནེཏབྦཾ ན པསྶཏཱིཏི ཨཏྠོ. ན ཙ མམ ཀྭཙནཱིཏི ཨེཏྠ མམ-སདྡཾ ཏཱཝ ཋཔེཏྭཱ ན ཙ ཀྭཙནཱིཏི པརསྶ ཙ ཨཏྟཱནཾ ཀྭཙི ནཔསྶཏཱིཏི ¶ ཨཡམཏྠོ. ཨིདཱནི མམ-སདྡཾ ཨཱཧརིཏྭཱ མམ ཀིསྨིཉྩི ཀིཉྩནཏཏྠཱིཏི སོ པརསྶ ཨཏྟཱ མམ ཀིསྨིཉྩི ཀིཉྩནབྷཱཝེ ཨཏྠཱིཏི ན པསྶཏཱིཏི. ཨཏྟནོ བྷཱཏིཊྛཱནེ ཝཱ བྷཱཏརཾ, སཧཱཡཊྛཱནེ ཝཱ སཧཱཡཾ པརིཀྑཱརཊྛཱནེ ཝཱ པརིཀྑཱརནྟི ཀིསྨིཉྩི ཋཱནེ པརསྶ ཨཏྟཱནཾ ཨིམིནཱ ཀིཉྩནབྷཱཝེན ཨུཔནེཏབྦཾ ན པསྶཏཱིཏི ཨཏྠོ. ཨེཝམཡཾ ཡསྨཱ ནེཝ ཀཏྠཙི ཨཏྟཱནཾ པསྶཏི, ན ཏཾ པརསྶ ཀིཉྩནབྷཱཝེ ཨུཔནེཏབྦཾ པསྶཏི, ན པརསྶ ཨཏྟཱནཾ པསྶཏི, ན པརསྶ ཨཏྟཱནཾ ཨཏྟནོ ཀིཉྩནབྷཱཝེ ཨུཔནེཏབྦཾ པསྶཏི. ཏསྨཱནེན ཙཏུཀོཊིཀཱ སུཉྙཏཱ པརིགྒཧིཏཱ ཧོཏཱིཏི.

༧༦༡. ཨེཝཾ ཙཏུཀོཊིཀཾ སུཉྙཏཾ པརིགྒཧེཏྭཱ པུན ཚཧཱཀཱརེཧི སུཉྙཏཾ པརིགྒཎྷཱཏི. ཀཐཾ? ཙཀྑུ སུཉྙཾ ཨཏྟེན ཝཱ ཨཏྟནིཡེན ཝཱ ནིཙྩེན ཝཱ དྷུཝེན ཝཱ སསྶཏེན ཝཱ ཨཝིཔརིཎཱམདྷམྨེན ཝཱ…པེ… མནོ སུཉྙོ. རཱུཔཱ སུཉྙཱ…པེ… དྷམྨཱ སུཉྙཱ. ཙཀྑུཝིཉྙཱཎཾ…པེ… མནོཝིཉྙཱཎཾ. ཙཀྑུསམྥསྶོཏི ཨེཝཾ ཡཱཝ ཛརཱམརཎཱ ནཡོ ནེཏབྦོ.

༧༦༢. ཨེཝཾ ཚཧཱཀཱརེཧི སུཉྙཏཾ པརིགྒཧེཏྭཱ པུན ཨཊྛཧཱཀཱརེཧི པརིགྒཎྷཱཏི. སེཡྻཐིདཾ – རཱུཔཾ ཨསཱརཾ ནིསྶཱརཾ སཱརཱཔགཏཾ ནིཙྩསཱརསཱརེན ཝཱ དྷུཝསཱརསཱརེན ཝཱ སུཁསཱརསཱརེན ¶ ཝཱ ཨཏྟསཱརསཱརེན ཝཱ ནིཙྩེན ཝཱ དྷུཝེན ཝཱ སསྶཏེན ཝཱ ཨཝིཔརིཎཱམདྷམྨེན ཝཱ. ཝེདནཱ… སཉྙཱ… སངྑཱརཱ… ཝིཉྙཱཎཾ… ཙཀྑུ…པེ… ཛརཱམརཎཾ ཨསཱརཾ ནིསྶཱརཾ སཱརཱཔགཏཾ ནིཙྩསཱརསཱརེན ཝཱ དྷུཝསཱརསཱརེན ཝཱ སུཁསཱརསཱརེན ཝཱ ཨཏྟསཱརསཱརེན ཝཱ ནིཙྩེན ཝཱ དྷུཝེན ཝཱ སསྶཏེན ཝཱ ཨཝིཔརིཎཱམདྷམྨེན ཝཱ. ཡཐཱ ནལོ༹ ཨསཱརོ ནིསྶཱརོ སཱརཱཔགཏོ. ཡཐཱ ཨེརཎྜོ… ཡཐཱ ཨུདུམྦརོ… ཡཐཱ སེཏཝཙྪོ… ཡཐཱ པཱལི༹བྷདྡཀོ… ཡཐཱ ཕེཎཔིཎྜོ… ཡཐཱ ཨུདཀབུབྦུལ༹ཾ… ཡཐཱ མརཱིཙི… ཡཐཱ ཀདལིཀྑནྡྷོ… ཡཐཱ མཱཡཱ ཨསཱརཱ ནིསྶཱརཱ སཱརཱཔགཏཱ, ཨེཝམེཝ རཱུཔཾ…པེ… ཛརཱམརཎཾ ཨསཱརཾ ནིསྶཱརཾ སཱརཱཔགཏཾ ནིཙྩསཱརསཱརེན ཝཱ…པེ… ཨཝིཔརིཎཱམདྷམྨེན ཝཱཏི (ཙཱུལ༹ནི. མོགྷརཱཛམཱཎཝཔུཙྪཱནིདྡེས ༨༨).

༧༦༣. སོ ¶ ཨེཝཾ ཨཊྛཧཱཀཱརེཧི སུཉྙཏཾ པརིགྒཧེཏྭཱ པུན དསཧཱཀཱརེཧི པརིགྒཎྷཱཏི, རཱུཔཾ རིཏྟཏོ པསྶཏི. ཏུཙྪཏོ… སུཉྙཏོ… ཨནཏྟཏོ… ཨནིསྶརིཡཏོ… ཨཀཱམཀཱརིཡཏོ… ཨལབྦྷནཱིཡཏོ… ཨཝསཝཏྟཀཏོ… པརཏོ… ཝིཝིཏྟཏོ པསྶཏི. ཝེདནཾ…པེ… ཝིཉྙཱཎཾ རིཏྟཏོ…པེ… ཝིཝིཏྟཏོ པསྶཏཱིཏི.

༧༦༤. ཨེཝཾ དསཧཱཀཱརེཧི སུཉྙཏཾ པརིགྒཧེཏྭཱ པུན དྭཱདསཧཱཀཱརེཧི པརིགྒཎྷཱཏི. སེཡྻཐིདཾ – རཱུཔཾ ན སཏྟོ, ན ཛཱིཝོ, ན ནརོ, ན མཱཎཝོ, ན ཨིཏྠཱི, ན པུརིསོ, ན ཨཏྟཱ, ན ཨཏྟནིཡཾ. ནཱཧཾ, ན མམ, ན ཨཉྙསྶ, ན ཀསྶཙི. ཝེདནཱ…པེ… ཝིཉྙཱཎཾ ན ཀསྶཙཱིཏི (ཙཱུལ༹ནི. མོགྷརཱཛམཱཎཝཔུཙྪཱནིདྡེས ༨༨).

༧༦༥. ཨེཝཾ དྭཱདསཧཱཀཱརེཧི སུཉྙཏཾ པརིགྒཎྷིཏྭཱ པུན ཏཱིརཎཔརིཉྙཱཝསེན དྭཱཙཏྟཱལཱིསཱཡ ཨཱཀཱརེཧི སུཉྙཏཾ པརིགྒཎྷཱཏི, རཱུཔཾ ཨནིཙྩཏོ… དུཀྑཏོ… རོགཏོ… གཎྜཏོ… སལླཏོ… ཨགྷཏོ… ཨཱབཱདྷཏོ… པརཏོ… པལོཀཏོ… ཨཱིཏིཏོ… ཨུཔདྡཝཏོ… བྷཡཏོ… ཨུཔསགྒཏོ… ཙལཏོ… པབྷངྒུཏོ… ཨདྡྷུཝཏོ… ཨཏཱཎཏོ… ཨལེཎཏོ… ཨསརཎཏོ… ཨསརཎཱིབྷཱུཏཏོ… རིཏྟཏོ… ཏུཙྪཏོ… སུཉྙཏོ… ཨནཏྟཏོ… ཨནསྶཱདཏོ… ཨཱདཱིནཝཏོ… ཝིཔརིཎཱམདྷམྨཏོ… ཨསྶཱརཀཏོ… ཨགྷམཱུལཏོ… ཝདྷཀཏོ… ཝིབྷཝཏོ… སཱསཝཏོ… སངྑཏཏོ… མཱརཱམིསཏོ… ཛཱཏིདྷམྨཏོ… ཛརཱདྷམྨཏོ… བྱཱདྷིདྷམྨཏོ… མརཎདྷམྨཏོ… སོཀཔརིདེཝདུཀྑདོམནསྶཨུཔཱཡཱསདྷམྨཏོ… སམུདཡཏོ… ཨཏྠངྒམཏོ… ཨནསྶཱདཏོ ¶ … ཨཱདཱིནཝཏོ… ནིསྶརཎཏོ པསྶཏི. ཝེདནཾ…པེ… ཝིཉྙཱཎཾ ཨནིཙྩཏོ…པེ… ནིསྶརཎཏོ པསྶཏི.

ཝུཏྟམྤི ཙེཏཾ – ‘‘རཱུཔཾ ཨནིཙྩཏོ…པེ… ནིསྶརཎཏོ པསྶནྟོ སུཉྙཏོ ལོཀཾ ཨཝེཀྑཏི. ཝེདནཾ…པེ… ཝིཉྙཱཎཾ ཨནིཙྩཏོ…པེ… ནིསྶརཎཏོ པསྶནྟོ སུཉྙཏོ ལོཀཾ ཨཝེཀྑཏི’’.

‘‘སུཉྙཏོ ལོཀཾ ཨཝེཀྑསྶུ, མོགྷརཱཛ སདཱ སཏོ;

ཨཏྟཱནུདིཊྛིཾ ཨཱུཧཙྩ, ཨེཝཾ མཙྩུཏརོ སིཡཱ;

ཨེཝཾ ལོཀཾ ཨཝེཀྑནྟཾ, མཙྩུརཱཛཱ ན པསྶཏཱི’’ཏི. (སུ. ནི. ༡༡༢༥; ཙཱུལ༹ནི. མོགྷརཱཛམཱཎཝཔུཙྪཱནིདྡེས ༨༨);

༧༦༦. ཨེཝཾ ¶ སུཉྙཏོ དིསྭཱ ཏིལཀྑཎཾ ཨཱརོཔེཏྭཱ སངྑཱརེ པརིགྒཎྷནྟོ བྷཡཉྩ ནནྡིཉྩ ཝིཔྤཧཱཡ སངྑཱརེསུ ཨུདཱསཱིནོ ཨཧོསི མཛ྄ཛྷཏྟོ, ཨཧནྟི ཝཱ མམནྟི ཝཱ ན གཎྷཱཏི ཝིསྶཊྛབྷརིཡོ ཝིཡ པུརིསོ.

ཡཐཱ ནཱམ པུརིསསྶ བྷརིཡཱ བྷཝེཡྻ ཨིཊྛཱ ཀནྟཱ མནཱཔཱ, སོ ཏཱཡ ཝིནཱ མུཧུཏྟམྤི ཨདྷིཝཱསེཏུཾ ན སཀྐུཎེཡྻ, ཨཏིཝིཡ ནཾ མམཱཡེཡྻ, སོ ཏཾ ཨིཏྠིཾ ཨཉྙེན པུརིསེན སདྡྷིཾ ཋིཏཾ ཝཱ ནིསིནྣཾ ཝཱ ཀཐེནྟིཾ ཝཱ ཧསནྟིཾ ཝཱ དིསྭཱ ཀུཔིཏོ ཨསྶ ཨནཏྟམནོ, ཨདྷིམཏྟཾ དོམནསྶཾ པཊིསཾཝེདེཡྻ. སོ ཨཔརེན སམཡེན ཏསྶཱ ཨིཏྠིཡཱ དོསཾ དིསྭཱ མུཉྩིཏུཀཱམོ ཧུཏྭཱ ཏཾ ཝིསྶཛྫེཡྻ, ན ནཾ མམཱཏི གཎྷེཡྻ. ཏཏོ པཊྛཱཡ ཏཾ ཡེནཀེནཙི སདྡྷིཾ ཡཾཀིཉྩི ཀུརུམཱནཾ དིསྭཱཔི ནེཝ ཀུཔྤེཡྻ, ན དོམནསྶཾ ཨཱཔཛྫེཡྻ, ཨཉྙདཏྠུ ཨུདཱསཱིནོཝ བྷཝེཡྻ མཛ྄ཛྷཏྟོ. ཨེཝམེཝཱཡཾ སབྦསངྑཱརེཧི མུཉྩིཏུཀཱམོ ཧུཏྭཱ པཊིསངྑཱནུཔསྶནཱཡ སངྑཱརེ པརིགྒཎྷནྟོ ཨཧཾ མམཱཏི གཧེཏབྦཾ ཨདིསྭཱ བྷཡཉྩ ནནྡིཉྩ ཝིཔྤཧཱཡ སབྦསངྑཱརེསུ ཨུདཱསཱིནོ ཧོཏི མཛ྄ཛྷཏྟོ.

ཏསྶ ཨེཝཾ ཛཱནཏོ ཨེཝཾ པསྶཏོ ཏཱིསུ བྷཝེསུ ཙཏཱུསུ ཡོནཱིསུ པཉྩསུ གཏཱིསུ སཏྟསུ ཝིཉྙཱཎཊྛིཏཱིསུ ¶ ནཝསུ སཏྟཱཝཱསེསུ ཙིཏྟཾ པཏིལཱིཡཏི པཏིཀུཊཏི པཏིཝཏྟཏི ན སམྤསཱརིཡཏི, ཨུཔེཀྑཱ ཝཱ པཱཊིཀུལྱཏཱ ཝཱ སཎྛཱཏི.

སེཡྻཐཱཔི ནཱམ པདུམཔལཱསེ ཨཱིསཀཔོཎེ ཨུདཀཕུསིཏཱནི པཏིལཱིཡནྟི པཏིཀུཊནྟི པཏིཝཏྟནྟི ན སམྤསཱརིཡནྟི, ཨེཝམེཝ…པེ… སེཡྻཐཱཔི ནཱམ ཀུཀྐུཊཔཏྟཾ ཝཱ ནཧཱརུདདྡུལཾ ཝཱ ཨགྒིམྷི པཀྑིཏྟཾ པཏིལཱིཡཏི པཏིཀུཊཏི པཏིཝཏྟཏི ན སམྤསཱརིཡཏི (ཨ. ནི. ༧.༤༩), ཨེཝམེཝ ཏསྶ ཏཱིསུ བྷཝེསུ ཙིཏྟཾ…པེ… ཨུཔེཀྑཱ ཝཱ པཱཊིཀུལྱཏཱ ཝཱ སཎྛཱཏི. ཨིཙྩསྶ སངྑཱརུཔེཀྑཱཉཱཎཾ ནཱམ ཨུཔྤནྣཾ ཧོཏི.

༧༦༧. ཏཾ པནེཏཾ སཙེ སནྟིཔདཾ ནིབྦཱནཾ སནྟཏོ པསྶཏི, སབྦཾ སངྑཱརཔྤཝཏྟཾ ཝིསྶཛྫེཏྭཱ ནིབྦཱནམེཝ པཀྑནྡཏི. ནོ ཙེ ནིབྦཱནཾ སནྟཏོ ¶ པསྶཏི, པུནཔྤུནཾ སངྑཱརཱརམྨཎམེཝ ཧུཏྭཱ པཝཏྟཏི སཱམུདྡིཀཱནཾ དིསཱཀཱཀོ ཝིཡ. སཱམུདྡིཀཱ ཀིར ཝཱཎིཛཀཱ ནཱཝཾ ཨཱརོཧནྟཱ དིསཱཀཱཀཾ ནཱམ གཎྷནྟི, ཏེ ཡདཱ ནཱཝཱ ཝཱཏཀྑིཏྟཱ ཝིདེསཾ པཀྑནྡཏི, ཏཱིརཾ ན པཉྙཱཡཏི, ཏདཱ དིསཱཀཱཀཾ ཝིསྶཛྫེནྟི. སོ ཀཱུཔཀཡཊྛིཏོ ཨཱཀཱསཾ ལངྒྷིཏྭཱ སབྦཱ དིསཱ ཙ ཝིདིསཱ ཙ ཨནུགནྟྭཱ སཙེ ཏཱིརཾ པསྶཏི, ཏདབྷིམུཁོཝ གཙྪཏི. ནོ ཙེ པསྶཏི, པུནཔྤུནཾ ཨཱགནྟྭཱ ཀཱུཔཀཡཊྛིཾཡེཝ ཨལླཱིཡཏི. ཨེཝམེཝ སཙེ སངྑཱརུཔེཀྑཱཉཱཎཾ སནྟིཔདཾ ནིབྦཱནཾ སནྟཏོ པསྶཏི, སབྦཾ སངྑཱརཔྤཝཏྟཾ ཝིསྶཛྫེཏྭཱ ནིབྦཱནམེཝ པཀྑནྡཏི. ནོ ཙེ པསྶཏི, པུནཔྤུནཾ སངྑཱརཱརམྨཎམེཝ ཧུཏྭཱ པཝཏྟཏི.

ཏདིདཾ སུཔྤགྒེ པིཊྛཾ ཝཊྚཡམཱནཾ ཝིཡ. ནིབྦཊྚིཏཀཔྤཱསཾ ཝིཧནམཱནཾ ཝིཡ ནཱནཔྤཀཱརཏོ སངྑཱརེ པརིགྒཧེཏྭཱ བྷཡཉྩ ནནྡིཉྩ པཧཱཡ སངྑཱརཝིཙིནནེ མཛ྄ཛྷཏྟཾ ཧུཏྭཱ ཏིཝིདྷཱནུཔསྶནཱཝསེན ཏིཊྛཏི. ཨེཝཾ ཏིཊྛམཱནཾ ཏིཝིདྷཝིམོཀྑམུཁབྷཱཝཾ ཨཱཔཛྫིཏྭཱ སཏྟཨརིཡཔུགྒལཝིབྷཱགཱཡ པཙྩཡོ ཧོཏི.

༧༦༨. ཏཏྲིདཾ ཏིཝིདྷཱནུཔསྶནཱཝསེན པཝཏྟནཏོ ཏིཎྞཾ ཨིནྡྲིཡཱནཾ ཨཱདྷིཔཏེཡྻཝསེན ཏིཝིདྷཝིམོཀྑམུཁབྷཱཝཾ ཨཱཔཛྫཏི ནཱམ. ཏིསྶོ ཧི ཨནུཔསྶནཱ ཏཱིཎི ཝིམོཀྑམུཁཱནཱིཏི ཝུཙྩནྟི. ཡཐཱཧ –

‘‘ཏཱིཎི ¶ ཁོ པནིམཱནི ཝིམོཀྑམུཁཱནི ལོཀནིཡྻཱནཱཡ སཾཝཏྟནྟི, སབྦསངྑཱརེ པརིཙྪེདཔརིཝཊུམཏོ སམནུཔསྶནཏཱཡ, ཨནིམིཏྟཱཡ ཙ དྷཱཏུཡཱ ཙིཏྟསམྤཀྑནྡནཏཱཡ, སབྦསངྑཱརེསུ མནོསམུཏྟེཛནཏཱཡ, ཨཔྤཎིཧིཏཱཡ ཙ དྷཱཏུཡཱ ཙིཏྟསམྤཀྑནྡནཏཱཡ, སབྦདྷམྨེ པརཏོ སམནུཔསྶནཏཱཡ, སུཉྙཏཱཡ ཙ དྷཱཏུཡཱ ཙིཏྟསམྤཀྑནྡནཏཱཡ, ཨིམཱནི ཏཱིཎི ཝིམོཀྑམུཁཱནི ལོཀནིཡྻཱནཱཡ སཾཝཏྟནྟཱི’’ཏི (པཊི. མ. ༡.༢༡༩).

ཏཏྠ པརིཙྪེདཔརིཝཊུམཏོཏི ཨུདཡབྦཡཝསེན པརིཙྪེདཏོ ཙེཝ པརིཝཊུམཏོ ཙ. ཨནིཙྩཱནུཔསྶནཾ ཧི ‘‘ཨུདཡཏོ པུབྦེ སངྑཱརཱ ནཏྠཱི’’ཏི པརིཙྪིནྡིཏྭཱ ཏེསཾ གཏིཾ སམནྣེསམཱནཾ ‘‘ཝཡཏོ པརཾ ན གཙྪནྟི, ཨེཏྠེཝ ཨནྟརདྷཱཡནྟཱི’’ཏི པརིཝཊུམཏོ སམནུཔསྶཏི. མནོསམུཏྟེཛནཏཱཡཱཏི ཙིཏྟསཾཝེཛནཏཱཡ ¶ . དུཀྑཱནུཔསྶནེན ཧི སངྑཱརེསུ ཙིཏྟཾ སཾཝེཛེཏི. པརཏོ སམནུཔསྶནཏཱཡཱཏི ‘‘ནཱཧཾ, ན མམཱ’’ཏི ཨེཝཾ ཨནཏྟཏོ སམནུཔསྶནཏཱཡ. ཨིཏི ཨིམཱནི ཏཱིཎི པདཱནི ཨནིཙྩཱནུཔསྶནཱདཱིནཾ ཝསེན ཝུཏྟཱནཱིཏི ཝེདིཏབྦཱནི. ཏེནེཝ ཏདནནྟརེ པཉྷཝིསྶཛྫནེ ཝུཏྟཾ – ‘‘ཨནིཙྩཏོ མནསིཀརོཏོ ཁཡཏོ སངྑཱརཱ ཨུཔཊྛཧནྟི. དུཀྑཏོ མནསིཀརོཏོ བྷཡཏོ སངྑཱརཱ ཨུཔཊྛཧནྟི. ཨནཏྟཏོ མནསིཀརོཏོ སུཉྙཏོ སངྑཱརཱ ཨུཔཊྛཧནྟཱི’’ཏི (པཊི. མ. ༡.༢༡༩).

༧༦༩. ཀཏམེ པན ཏེ ཝིམོཀྑཱ, ཡེསཾ ཨིམཱནི ཨནུཔསྶནཱནི མུཁཱནཱིཏི? ཨནིམིཏྟོ, ཨཔྤཎིཧིཏོ, སུཉྙཏོཏི ཨེཏེ ཏཡོ. ཝུཏྟཾ ཧེཏཾ ‘‘ཨནིཙྩཏོ མནསིཀརོནྟོ ཨདྷིམོཀྑབཧུལོ ཨནིམིཏྟཾ ཝིམོཀྑཾ པཊིལབྷཏི. དུཀྑཏོ མནསིཀརོནྟོ པསྶདྡྷིབཧུལོ ཨཔྤཎིཧིཏཾ ཝིམོཀྑཾ པཊིལབྷཏི. ཨནཏྟཏོ མནསིཀརོནྟོ ཝེདབཧུལོ སུཉྙཏཝིམོཀྑཾ པཊིལབྷཏཱི’’ཏི (པཊི. མ. ༡.༢༢༣).

ཨེཏྠ ཙ ཨནིམིཏྟོ ཝིམོཀྑོཏི ཨནིམིཏྟཱཀཱརེན ནིབྦཱནཾ ཨཱརམྨཎཾ ཀཏྭཱ པཝཏྟོ ཨརིཡམགྒོ. སོ ཧི ཨནིམིཏྟཱཡ དྷཱཏུཡཱ ཨུཔྤནྣཏྟཱ ཨནིམིཏྟོ. ཀིལེསེཧི ཙ ཝིམུཏྟཏྟཱ ཝིམོཀྑོ. ཨེཏེནེཝ ནཡེན ཨཔྤཎིཧིཏཱཀཱརེན ནིབྦཱནཾ ཨཱརམྨཎཾ ཀཏྭཱ པཝཏྟོ ཨཔྤཎིཧིཏོ. སུཉྙཏཱཀཱརེན ནིབྦཱནཾ ཨཱརམྨཎཾ ཀཏྭཱ པཝཏྟོ སུཉྙཏོཏི ཝེདིཏབྦོ.

༧༧༠. ཡཾ པན ཨབྷིདྷམྨེ ‘‘ཡསྨིཾ སམཡེ ལོཀུཏྟརཾ ཛྷཱནཾ བྷཱཝེཏི ནིཡྻཱནིཀཾ ཨཔཙཡགཱམིཾ ¶ དིཊྛིགཏཱནཾ པཧཱནཱཡ པཋམཱཡ བྷཱུམིཡཱ པཏྟིཡཱ ཝིཝིཙྩེཝ ཀཱམེཧི པཋམཾ ཛྷཱནཾ ཨུཔསམྤཛྫ ཝིཧརཏི ཨཔྤཎིཧིཏཾ སུཉྙཏ’’ནྟི (དྷ. ས. ༣༤༣ ཨཱདཡོ) ཨེཝཾ ཝིམོཀྑདྭཡམེཝ ཝུཏྟཾ, ཏཾ ནིཔྤརིཡཱཡཏོ ཝིཔསྶནཱགམནཾ སནྡྷཱཡ. ཝིཔསྶནཱཉཱཎཾ ཧི ཀིཉྩཱཔི པཊིསམྦྷིདཱམགྒེ –

‘‘ཨནིཙྩཱནུཔསྶནཱཉཱཎཾ ནིཙྩཏོ ཨབྷིནིཝེསཾ མུཉྩཏཱིཏི སུཉྙཏོ ཝིམོཀྑོ. དུཀྑཱནུཔསྶནཱཉཱཎཾ སུཁཏོ ཨབྷིནིཝེསཾ. ཨནཏྟཱནུཔསྶནཱཉཱཎཾ ཨཏྟཏོ ཨབྷིནིཝེསཾ མུཉྩཏཱིཏི ¶ སུཉྙཏོ ཝིམོཀྑོ’’ཏི (པཊི. མ. ༡.༢༢༩) ཨེཝཾ ཨབྷིནིཝེསཾ མུཉྩནཝསེན སུཉྙཏོ ཝིམོཀྑོཏི ཙ,

‘‘ཨནིཙྩཱནུཔསྶནཱཉཱཎཾ ནིཙྩཏོ ནིམིཏྟཾ མུཉྩཏཱིཏི ཨནིམིཏྟོ ཝིམོཀྑོ. དུཀྑཱནུཔསྶནཱཉཱཎཾ སུཁཏོ ནིམིཏྟཾ, ཨནཏྟཱནུཔསྶནཱཉཱཎཾ ཨཏྟཏོ ནིམིཏྟཾ མུཉྩཏཱིཏི ཨནིམིཏྟོ ཝིམོཀྑོ’’ཏི (པཊི. མ. ༡.༢༢༩) ཨེཝཾ ནིམིཏྟཾ མུཉྩནཝསེན ཨནིམིཏྟོ ཝིམོཀྑོཏི ཙ,

‘‘ཨནིཙྩཱནུཔསྶནཱཉཱཎཾ ནིཙྩཏོ པཎིདྷིཾ མུཉྩཏཱིཏི ཨཔྤཎིཧིཏོ ཝིམོཀྑོ. དུཀྑཱནུཔསྶནཱཉཱཎཾ སུཁཏོ པཎིདྷིཾ. ཨནཏྟཱནུཔསྶནཱཉཱཎཾ ཨཏྟཏོ པཎིདྷིཾ མུཉྩཏཱིཏི ཨཔྤཎིཧིཏོ ཝིམོཀྑོ’’ཏི (པཊི. མ. ༡.༢༢༩) ཨེཝཾ པཎིདྷིཾ མུཉྩནཝསེན ཨཔྤཎིཧིཏོ ཝིམོཀྑོཏི ཙ –

ཝུཏྟཾ. ཏཐཱཔི ཏཾ སངྑཱརནིམིཏྟསྶ ཨཝིཛཧནཏོ ན ནིཔྤརིཡཱཡེན ཨནིམིཏྟཾ. ནིཔྤརིཡཱཡེན པན སུཉྙཏཉྩེཝ ཨཔྤཎིཧིཏཉྩ. ཏསྶ ཙ ཨཱགམནཝསེན ཨརིཡམགྒཀྑཎེ ཝིམོཀྑོ ཨུདྡྷཊོ. ཏསྨཱ ཨཔྤཎིཧིཏཾ སུཉྙཏནྟི ཝིམོཀྑདྭཡམེཝ ཝུཏྟནྟི ཝེདིཏབྦཾ. ཨཡཾ ཏཱཝེཏྠ ཝིམོཀྑཀཐཱ.

༧༧༡. ཡཾ པན ཝུཏྟཾ ‘‘སཏྟཨརིཡཔུགྒལཝིབྷཱགཱཡ པཙྩཡོ ཧོཏཱི’’ཏི, ཏཏྠ སདྡྷཱནུསཱརཱི, སདྡྷཱཝིམུཏྟོ, ཀཱཡསཀྑི, ཨུབྷཏོབྷཱགཝིམུཏྟོ, དྷམྨཱནུསཱརཱི, དིཊྛིཔྤཏྟོ, པཉྙཱཝིམུཏྟོཏི ¶ ཨིམེ ཏཱཝ སཏྟ ཨརིཡཔུགྒལཱ, ཏེསཾ ཝིབྷཱགཱཡ ཨིདཾ སངྑཱརུཔེཀྑཱཉཱཎཾ པཙྩཡོ ཧོཏི.

༧༧༢. ཡོ ཧི ཨནིཙྩཏོ མནསིཀརོནྟོ ཨདྷིམོཀྑབཧུལོ སདྡྷིནྡྲིཡཾ པཊིལབྷཏི, སོ སོཏཱཔཏྟིམགྒཀྑཎེ སདྡྷཱནུསཱརཱི ཧོཏི. སེསེསུ སཏྟསུ ཋཱནེསུ སདྡྷཱཝིམུཏྟོ.

༧༧༣. ཡོ པན དུཀྑཏོ མནསིཀརོནྟོ པསྶདྡྷིབཧུལོ སམཱདྷིནྡྲིཡཾ པཊིལབྷཏི, སོ སབྦཏྠ ཀཱཡསཀྑི ནཱམ ཧོཏི. ཨརཱུཔཛ྄ཛྷཱནཾ པན པཏྭཱ ཨགྒཕལཔྤཏྟོ ཨུབྷཏོབྷཱགཝིམུཏྟོ ནཱམ ཧོཏི.

༧༧༤. ཡོ ¶ པན ཨནཏྟཏོ མནསིཀརོནྟོ ཝེདབཧུལོ པཉྙིནྡྲིཡཾ པཊིལབྷཏི, སོ སོཏཱཔཏྟིམགྒཀྑཎེ དྷམྨཱནུསཱརཱི ཧོཏི. ཚསུ ཋཱནེསུ དིཊྛིཔྤཏྟོ ཨགྒཕལེ པཉྙཱཝིམུཏྟོཏི.

༧༧༥. ཝུཏྟཾ ཧེཏཾ –

‘‘ཨནིཙྩཏོ མནསིཀརོཏོ སདྡྷིནྡྲིཡཾ ཨདྷིམཏྟཾ ཧོཏི. སདྡྷིནྡྲིཡསྶ ཨདྷིམཏྟཏྟཱ སོཏཱཔཏྟིམགྒཾ པཊིལབྷཏི, ཏེན ཝུཙྩཏི སདྡྷཱནུསཱརཱི’’ཏི.

ཏཐཱ ‘‘ཨནིཙྩཏོ མནསིཀརོཏོ སདྡྷིནྡྲིཡཾ ཨདྷིམཏྟཾ ཧོཏི, སདྡྷིནྡྲིཡསྶ ཨདྷིམཏྟཏྟཱ སོཏཱཔཏྟིཕལཾ སཙྪིཀཏཾ ཧོཏི, ཏེན ཝུཙྩཏི སདྡྷཱཝིམུཏྟོ’’ཏིཨཱདི (པཊི. མ. ༡.༢༢༡).

༧༧༦. ཨཔརམྤི ཝུཏྟཾ –

‘‘སདྡཧནྟོ ཝིམུཏྟོཏི སདྡྷཱཝིམུཏྟོ. ཕུཊྛནྟཾ སཙྪིཀཏོཏི ཀཱཡསཀྑི. དིཊྛནྟཾ པཏྟོཏི དིཊྛིཔྤཏྟོ. སདྡཧནྟོ ཝིམུཙྩཏཱིཏི སདྡྷཱཝིམུཏྟོ. ཛྷཱནཕསྶཾ པཋམཾ ཕུསཏི པཙྪཱ ནིརོདྷཾ ནིབྦཱནཾ སཙྪིཀརོཏཱིཏི ཀཱཡསཀྑི. ‘དུཀྑཱ སངྑཱརཱ, སུཁོ ནིརོདྷོ’ཏི ཉཱཏཾ ཧོཏི དིཊྛཾ ཝིདིཏཾ སཙྪིཀཏཾ ཕུསིཏཾ པཉྙཱཡཱཏི དིཊྛིཔྤཏྟོ’’ཏི (པཊི. མ. ༡.༢༢༡).

༧༧༧. ཨིཏརེསུ ¶ པན ཙཏཱུསུ སདྡྷཾ ཨནུསརཏི, སདྡྷཱཡ ཝཱ ཨནུསརཏི གཙྪཏཱིཏི སདྡྷཱནུསཱརཱི. ཏཐཱ པཉྙཱསངྑཱཏཾ དྷམྨཾ ཨནུསརཏི, དྷམྨེན ཝཱ ཨནུསརཏཱིཏི དྷམྨཱནུསཱརཱི. ཨརཱུཔཛ྄ཛྷཱནེན ཙེཝ ཨརིཡམགྒེན ཙཱཏི ཨུབྷཏོབྷཱགེན ཝིམུཏྟོཏི ཨུབྷཏོབྷཱགཝིམུཏྟོ. པཛཱནནྟོ ཝིམུཏྟོཏི པཉྙཱཝིམུཏྟོཏི ཨེཝཾ ཝཙནཏྠོ ཝེདིཏབྦོཏི.

སངྑཱརུཔེཀྑཱཉཱཎཾ.

༧༧༨. ཏཾ པནེཏཾ པུརིམེན ཉཱཎདྭཡེན ཨཏྠཏོ ཨེཀཾ. ཏེནཱཧུ པོརཱཎཱ – ‘‘ཨིདཾ སངྑཱརུཔེཀྑཱཉཱཎཾ ཨེཀམེཝ ཏཱིཎི ནཱམཱནི ལབྷཏི, ཧེཊྛཱ ¶ མུཉྩིཏུཀམྱཏཱཉཱཎཾ ནཱམ ཛཱཏཾ, མཛ྄ཛྷེ པཊིསངྑཱནུཔསྶནཱཉཱཎཾ ནཱམ, ཨནྟེ ཙ སིཁཱཔྤཏྟཾ སངྑཱརུཔེཀྑཱཉཱཎཾ ནཱམ’’.

༧༧༩. པཱལི༹ཡམྤི ཝུཏྟཾ –

‘‘ཀཐཾ མུཉྩིཏུཀམྱཏཱ-པཊིསངྑཱ-སནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ? ཨུཔྤཱདཾ མུཉྩིཏུཀམྱཏཱ-པཊིསངྑཱ-སནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ. པཝཏྟཾ…པེ… ནིམིཏྟཾ…པེ… ཨུཔཱཡཱསཾ མུཉྩིཏུཀམྱཏཱཔཊིསངྑཱ-སནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ. ཨུཔྤཱདོ དུཀྑནྟི…པེ… བྷཡནྟི…པེ… སཱམིསནྟི…པེ… ཨུཔྤཱདོ སངྑཱརཱཏི…པེ… ཨུཔཱཡཱསོ སངྑཱརཱཏི མུཉྩིཏུཀམྱཏཱ-པཊིསངྑཱ-སནྟིཊྛནཱ པཉྙཱ སངྑཱརུཔེཀྑཱསུ ཉཱཎ’’ནྟི (པཊི. མ. ༡.༥༤).

༧༨༠. ཏཏྠ མུཉྩིཏུཀམྱཏཱ ཙ སཱ པཊིསངྑཱ ཙ སནྟིཊྛནཱ ཙཱཏི མུཉྩིཏུཀམྱཏཱ-པཊིསངྑཱ-སནྟིཊྛནཱ. ཨིཏི པུབྦབྷཱགེ ནིབྦིདཱཉཱཎེན ནིབྦིནྣསྶ ཨུཔྤཱདཱདཱིནི པརིཙྩཛིཏུཀཱམཏཱ མུཉྩིཏུཀཱམཏཱ. མུཉྩནསྶ ཨུཔཱཡཀརཎཏྠཾ མཛ྄ཛྷེ པཊིསངྑཱནཾ པཊིསངྑཱ. མུཉྩིཏྭཱ ཨཝསཱནེ ཨཛ྄ཛྷུཔེཀྑནཾ སནྟིཊྛནཱ. ཡཾ སནྡྷཱཡ ‘‘ཨུཔྤཱདོ སངྑཱརཱ, ཏེ སངྑཱརེ ཨཛ྄ཛྷུཔེཀྑཏཱིཏི སངྑཱརུཔེཀྑཱ’’ཏིཨཱདི (པཊི. མ. ༡.༥༤) ཝུཏྟཾ. ཨེཝཾ ཨེཀམེཝིདཾ ཉཱཎཾ.

༧༨༡. ཨཔིཙ ཨིམཱཡཔི པཱལི༹ཡཱ ཨིདཾ ཨེཀམེཝཱཏི ཝེདིཏབྦཾ. ཝུཏྟཾ ཧེཏཾ – ‘‘ཡཱ ཙ མུཉྩིཏུཀམྱཏཱ, ཡཱ ཙ པཊིསངྑཱནུཔསྶནཱ, ཡཱ ཙ སངྑཱརུཔེཀྑཱ, ཨིམེ དྷམྨཱ ཨེཀཏྠཱ, བྱཉྫནམེཝ ནཱན’’ནྟི (པཊི. མ. ༡.༢༢༧).

༧༨༢. ཨེཝཾ ¶ ཨདྷིགཏསངྑཱརུཔེཀྑསྶ པན ཨིམསྶ ཀུལཔུཏྟསྶ ཝིཔསྶནཱ སིཁཱཔྤཏྟཱ ཝུཊྛཱནགཱམིནཱི ཧོཏི. སིཁཱཔྤཏྟཱ ཝིཔསྶནཱཏི ཝཱ ཝུཊྛཱནགཱམིནཱིཏི ཝཱ སངྑཱརུཔེཀྑཱདིཉཱཎཏྟཡསྶེཝ ཨེཏཾ ནཱམཾ. སཱ ཧི སིཁཾ ཨུཏྟམབྷཱཝཾ པཏྟཏྟཱ སིཁཱཔྤཏྟཱ. ཝུཊྛཱནཾ གཙྪཏཱིཏི ཝུཊྛཱནགཱམིནཱི. ཝུཊྛཱནཾ ཝུཙྩཏི བཧིདྡྷཱནིམིཏྟབྷཱུཏཏོ ཨབྷིནིཝིཊྛཝཏྠུཏོ ཙེཝ ཨཛ྄ཛྷཏྟཔཝཏྟཏོ ཙ ཝུཊྛཧནཏོ མགྒོ, ཏཾ གཙྪཏཱིཏི ཝུཊྛཱནགཱམིནཱི, མགྒེན སདྡྷིཾ གྷཊིཡཏཱིཏི ཨཏྠོ.

༧༨༣. ཏཏྲཱཡཾ ཨབྷིནིཝེསཝུཊྛཱནཱནཾ ཨཱཝིབྷཱཝཏྠཱཡ མཱཏིཀཱ – ཨཛ྄ཛྷཏྟཾ ཨབྷིནིཝིསིཏྭཱ ཨཛ྄ཛྷཏྟཱ ཝུཊྛཱཏི, ཨཛ྄ཛྷཏྟཾ ཨབྷིནིཝིསིཏྭཱ བཧིདྡྷཱ ཝུཊྛཱཏི ¶ , བཧིདྡྷཱ ཨབྷིནིཝིསིཏྭཱ བཧིདྡྷཱ ཝུཊྛཱཏི, བཧིདྡྷཱ ཨབྷིནིཝིསིཏྭཱ ཨཛ྄ཛྷཏྟཱ ཝུཊྛཱཏི, རཱུཔེ ཨབྷིནིཝིསིཏྭཱ རཱུཔཱ ཝུཊྛཱཏི, རཱུཔེ ཨབྷིནིཝིསིཏྭཱ ཨརཱུཔཱ ཝུཊྛཱཏི, ཨརཱུཔེ ཨབྷིནིཝིསིཏྭཱ ཨརཱུཔཱ ཝུཊྛཱཏི, ཨརཱུཔེ ཨབྷིནིཝིསིཏྭཱ རཱུཔཱ ཝུཊྛཱཏི, ཨེཀཔྤཧཱརེན པཉྩཧི ཁནྡྷེཧི ཝུཊྛཱཏི, ཨནིཙྩཏོ ཨབྷིནིཝིསིཏྭཱ ཨནིཙྩཏོ ཝུཊྛཱཏི, ཨནིཙྩཏོ ཨབྷིནིཝིསིཏྭཱ དུཀྑཏོ, ཨནཏྟཏོ ཝུཊྛཱཏི, དུཀྑཏོ ཨབྷིནིཝིསིཏྭཱ དུཀྑཏོ, ཨནིཙྩཏོ, ཨནཏྟཏོ ཝུཊྛཱཏི, ཨནཏྟཏོ ཨབྷིནིཝིསིཏྭཱ ཨནཏྟཏོ, ཨནིཙྩཏོ, དུཀྑཏོ ཝུཊྛཱཏི.

༧༨༤. ཀཐཾ? ཨིདྷེཀཙྩོ ཨཱདིཏོཝ ཨཛ྄ཛྷཏྟསངྑཱརེསུ ཨབྷིནིཝིསཏི, ཨབྷིནིཝིསིཏྭཱ ཏེ པསྶཏི. ཡསྨཱ པན ན སུདྡྷཨཛ྄ཛྷཏྟདསྶནམཏྟེནེཝ མགྒཝུཊྛཱནཾ ཧོཏི, བཧིདྡྷཱཔི དཊྛབྦམེཝ, ཏསྨཱ པརསྶ ཁནྡྷེཔི ཨནུཔཱདིཎྞསངྑཱརེཔི ཨནིཙྩཾ དུཀྑམནཏྟཱཏི པསྶཏི. སོ ཀཱལེན ཨཛ྄ཛྷཏྟཾ སམྨསཏི, ཀཱལེན བཧིདྡྷཱ. ཏསྶེཝཾ སམྨསཏོ ཨཛ྄ཛྷཏྟཾ སམྨསནཀཱལེ ཝིཔསྶནཱ མགྒེན སདྡྷིཾ གྷཊིཡཏི. ཨཡཾ ཨཛ྄ཛྷཏྟཾ ཨབྷིནིཝིསིཏྭཱ ཨཛ྄ཛྷཏྟཱ ཝུཊྛཱཏི ནཱམ.

སཙེ པནསྶ བཧིདྡྷཱ སམྨསནཀཱལེ ཝིཔསྶནཱ མགྒེན སདྡྷིཾ གྷཊིཡཏི, ཨཡཾ ཨཛ྄ཛྷཏྟཾ ཨབྷིནིཝིསིཏྭཱ བཧིདྡྷཱ ཝུཊྛཱཏི ནཱམ. ཨེས ནཡོ བཧིདྡྷཱ ཨབྷིནིཝིསིཏྭཱ བཧིདྡྷཱ ཙ ཨཛ྄ཛྷཏྟཱ ཙ ཝུཊྛཱནེཔི.

༧༨༥. ཨཔརོ ཨཱདིཏོཝ རཱུཔེ ཨབྷིནིཝིསཏི, ཨབྷིནིཝིསིཏྭཱ བྷཱུཏརཱུཔཉྩ ཨུཔཱདཱརཱུཔཉྩ རཱསིཾ ཀཏྭཱ པསྶཏི. ཡསྨཱ པན ན སུདྡྷརཱུཔདསྶནམཏྟེནེཝ ཝུཊྛཱནཾ ཧོཏི, ཨརཱུཔམྤི དཊྛབྦམེཝ. ཏསྨཱ ཏཾ རཱུཔཾ ཨཱརམྨཎཾ ཀཏྭཱ ཨུཔྤནྣཾ ཝེདནཾ སཉྙཾ སངྑཱརེ ཝིཉྙཱཎཉྩ ‘‘ཨིདཾ ཨརཱུཔ’’ནྟི ཨརཱུཔཾ པསྶཏི. སོ ཀཱལེན རཱུཔཾ སམྨསཏི, ཀཱལེན ཨརཱུཔཾ ¶ . ཏསྶེཝཾ སམྨསཏོ རཱུཔསམྨསནཀཱལེ ཝིཔསྶནཱ མགྒེན སདྡྷིཾ གྷཊིཡཏི, ཨཡཾ རཱུཔེ ཨབྷིནིཝིསིཏྭཱ རཱུཔཱ ཝུཊྛཱཏི ནཱམ.

སཙེ པནསྶ ཨརཱུཔསམྨསནཀཱལེ ཝིཔསྶནཱ མགྒེན སདྡྷིཾ གྷཊིཡཏི, ཨཡཾ ཨརཱུཔེ ཨབྷིནིཝིསིཏྭཱ ཨརཱུཔཱ ཝུཊྛཱཏི ནཱམ. ཨེས ནཡོ ཨརཱུཔེ ཨབྷིནིཝིསིཏྭཱ ཨརཱུཔཱ ཙ རཱུཔཱ ཙ ཝུཊྛཱནེཔི.

༧༨༦. ‘‘ཡཾཀིཉྩི སམུདཡདྷམྨཾ, སབྦཾ ཏཾ ནིརོདྷདྷམྨ’’ནྟི (དཱི. ནི. ༡.༢༩༨) ཨེཝཾ ཨབྷིནིཝིསིཏྭཱ ཨེཝམེཝ ཝུཊྛཱནཀཱལེ པན ཨེཀཔྤཧཱརེན པཉྩཧི ཁནྡྷེཧི ཝུཊྛཱཏི ནཱམ.

༧༨༧. ཨེཀོ ¶ ཨཱདིཏོཝ ཨནིཙྩཏོ སངྑཱརེ སམྨསཏི. ཡསྨཱ པན ན ཨནིཙྩཏོ སམྨསནམཏྟེནེཝ ཝུཊྛཱནཾ ཧོཏི, དུཀྑཏོཔི ཨནཏྟཏོཔི སམྨསིཏབྦམེཝ, ཏསྨཱ དུཀྑཏོཔི ཨནཏྟཏོཔི སམྨསཏི. ཏསྶེཝཾ པཊིཔནྣསྶ ཨནིཙྩཏོ སམྨསནཀཱལེ ཝུཊྛཱནཾ ཧོཏི, ཨཡཾ ཨནིཙྩཏོ ཨབྷིནིཝིསིཏྭཱ ཨནིཙྩཏོ ཝུཊྛཱཏི ནཱམ.

སཙེ པནསྶ དུཀྑཏོ ཨནཏྟཏོ སམྨསནཀཱལེ ཝུཊྛཱནཾ ཧོཏི, ཨཡཾ ཨནིཙྩཏོ ཨབྷིནིཝིསིཏྭཱ དུཀྑཏོ, ཨནཏྟཏོ ཝུཊྛཱཏི ནཱམ. ཨེས ནཡོ དུཀྑཏོ ཨནཏྟཏོ ཨབྷིནིཝིསིཏྭཱ སེསཝུཊྛཱནེསུཔི.

༧༨༨. ཨེཏྠ ཙ ཡོཔི ཨནིཙྩཏོ ཨབྷིནིཝིཊྛོ, ཡོཔི དུཀྑཏོ, ཡོཔི ཨནཏྟཏོ, ཝུཊྛཱནཀཱལེ ཙ ཨནིཙྩཏོ ཝུཊྛཱནཾ ཧོཏི. ཏཡོཔི ཛནཱ ཨདྷིམོཀྑབཧུལཱ ཧོནྟི, སདྡྷིནྡྲིཡཾ པཊིལབྷནྟི, ཨནིམིཏྟཝིམོཀྑེན ཝིམུཙྩནྟི, པཋམམགྒཀྑཎེ སདྡྷཱནུསཱརིནོ ཧོནྟི, སཏྟསུ ཋཱནེསུ སདྡྷཱཝིམུཏྟཱ. སཙེ པན དུཀྑཏོ ཝུཊྛཱནཾ ཧོཏི, ཏཡོཔི ཛནཱ པསྶདྡྷིབཧུལཱ ཧོནྟི, སམཱདྷིནྡྲིཡཾ པཊིལབྷནྟི, ཨཔྤཎིཧིཏཝིམོཀྑེན ཝིམུཙྩནྟི, སབྦཏྠ ཀཱཡསཀྑིནོ ཧོནྟི. ཡསྶ པནེཏྠ ཨརཱུཔཛ྄ཛྷཱནཾ པཱདཀཾ, སོ ཨགྒཕལེ ཨུབྷཏོབྷཱགཝིམུཏྟོ ཧོཏི. ཨཐ ནེསཾ ཨནཏྟཏོ ཝུཊྛཱནཾ ཧོཏི, ཏཡོཔི ཛནཱ ཝེདབཧུལཱ ཧོནྟི, པཉྙིནྡྲིཡཾ པཊིལབྷནྟི, སུཉྙཏཝིམོཀྑེན ཝིམུཙྩནྟི, པཋམམགྒཀྑཎེ དྷམྨཱནུསཱརིནོ ཧོནྟི, ཚསུ ཋཱནེསུ དིཊྛིཔྤཏྟཱ ཨགྒཕལེ པཉྙཱཝིམུཏྟཱཏི.

༧༨༩. ཨིདཱནི ¶ སདྡྷིཾ པུརིམཔཙྪིམཉཱཎེཧི ཨིམིསྶཱ ཝུཊྛཱནགཱམིནིཡཱ ཝིཔསྶནཱཡ ཨཱཝིབྷཱཝཏྠཾ དྭཱདས ཨུཔམཱ ཝེདིཏབྦཱ. ཏཱསཾ ཨིདཾ ཨུདྡཱནཾ –

‘‘ཝགྒུལཱི ཀཎྷསཔྤོ ཙ, གྷརཾ གོ ཡཀྑི དཱརཀོ;

ཁུདྡཾ པིཔཱསཾ སཱིཏུཎྷཾ, ཨནྡྷཀཱརཾ ཝིསེན ཙཱ’’ཏི.

ཨིམཱ ཙ ཨུཔམཱ བྷཡཏུཔཊྛཱནཏོ པབྷུཏི ཡཏྠ ཀཏྠཙི ཉཱཎེ ཋཏྭཱ ཨཱཧརིཏུཾ ཝཊྚེཡྻུཾ. ཨིམསྨིཾ པན ཋཱནེ ཨཱཧརིཡམཱནཱསུ བྷཡཏུཔཊྛཱནཏོ ཡཱཝ ཕལཉཱཎཾ སབྦཾ པཱཀཊཾ ཧོཏི, ཏསྨཱ ཨིདྷེཝ ཨཱཧརིཏབྦཱཏི ཝུཏྟཱ.

༧༩༠. ཝགྒུལཱིཏི ¶ ཨེཀཱ ཀིར ཝགྒུལཱི ‘‘ཨེཏྠ པུཔྥཾ ཝཱ ཕལཾ ཝཱ ལབྷིསྶཱམཱི’’ཏི པཉྩསཱཁེ མདྷུཀརུཀྑེ ནིལཱིཡིཏྭཱ ཨེཀཾ སཱཁཾ པརཱམསིཏྭཱ ན ཏཏྠ ཀིཉྩི པུཔྥཾ ཕལཾ ཝཱ གཡ྄ཧུཔགཾ ཨདྡས. ཡཐཱ ཙ ཨེཀཾ, ཨེཝཾ དུཏིཡཾ, ཏཏིཡཾ, ཙཏུཏྠཾ. པཉྩམམྤི སཱཁཾ པརཱམསིཏྭཱ ནཱདྡས. སཱ ‘‘ཨཕལོ ཝཏཱཡཾ རུཀྑོ, ནཏྠེཏྠ ཀིཉྩི གཡ྄ཧུཔག’’ནྟི ཏསྨིཾ རུཀྑེ ཨཱལཡཾ ཝིསྶཛྫེཏྭཱ ཨུཛུཀཱཡ སཱཁཱཡ ཨཱརུཡ྄ཧ ཝིཊཔནྟརེན སཱིསཾ ནཱིཧརིཏྭཱ ཨུདྡྷཾ ཨུལློཀེཏྭཱ ཨཱཀཱསེ ཨུཔྤཏིཏྭཱ ཨཉྙསྨིཾ ཕལརུཀྑེ ནིལཱིཡཏི.

ཏཏྠ ཝགྒུལི ཝིཡ ཡོགཱཝཙརོ དཊྛབྦོ, པཉྩསཱཁོ མདྷུཀརུཀྑོ ཝིཡ པཉྩུཔཱདཱནཀྑནྡྷཱ, ཏཏྠ ཝགྒུལིཡཱ ནིལཱིཡནཾ ཝིཡ ཡོགིནོ ཁནྡྷཔཉྩཀེ ཨབྷིནིཝེསོ, ཏསྶཱ ཨེཀེཀཾ སཱཁཾ པརཱམསིཏྭཱ ཀིཉྩི གཡ྄ཧུཔགཾ ཨདིསྭཱ ཨཝསེསསཱཁཱཔརཱམསནཾ ཝིཡ ཡོགིནོ རཱུཔཀྑནྡྷཾ སམྨསིཏྭཱ ཏཏྠ ཀིཉྩི གཡ྄ཧུཔགཾ ཨདིསྭཱ ཨཝསེསཀྑནྡྷསམྨསནཾ, ཏསྶཱ ‘‘ཨཕལོ ཝཏཱཡཾ རུཀྑོ’’ཏི རུཀྑེ ཨཱལཡཝིསྶཛྫནཾ ཝིཡ ཡོགིནོ པཉྩསུཔི ཁནྡྷེསུ ཨནིཙྩལཀྑཎཱདིདསྶནཝསེན ནིབྦིནྣསྶ མུཉྩིཏུཀམྱཏཱདིཉཱཎཏྟཡཾ, ཏསྶཱ ཨུཛུཀཱཡ སཱཁཱཡ ཨུཔརི ཨཱརོཧནཾ ཝིཡ ཡོགིནོ ཨནུལོམཾ, སཱིསཾ ནཱིཧརིཏྭཱ ཨུདྡྷཾ ཨུལློཀནཾ ཝིཡ གོཏྲབྷུཉཱཎཾ, ཨཱཀཱསེ ཨུཔྤཏནཾ ཝིཡ མགྒཉཱཎཾ, ཨཉྙསྨིཾ ཕལརུཀྑེ ནིལཱིཡནཾ ཝིཡ ཕལཉཱཎཾ.

༧༩༡. ཀཎྷསཔྤུཔམཱ པཊིསངྑཱཉཱཎེ ཝུཏྟཱཝ. ཨུཔམཱསཾསནྡནེ པནེཏྠ སཔྤཝིསྶཛྫནཾ ཝིཡ ¶ གོཏྲབྷུཉཱཎཾ, མུཉྩིཏྭཱ ཨཱགཏམགྒཾ ཨོལོཀེནྟསྶ ཋཱནཾ ཝིཡ མགྒཉཱཎཾ, གནྟྭཱ ཨབྷཡཊྛཱནེ ཋཱནཾ ཝིཡ ཕལཉཱཎནྟི ཨཡཾ ཝིསེསོ.

༧༩༢. གྷརནྟི གྷརསཱམིཀེ ཀིར སཱཡཾ བྷུཉྫིཏྭཱ སཡནཾ ཨཱརུཡ྄ཧ ནིདྡཾ ཨོཀྐནྟེ གྷརཾ ཨཱདིཏྟཾ, སོ པབུཛ྄ཛྷིཏྭཱ ཨགྒིཾ དིསྭཱ ‘‘བྷཱིཏོ སཱདྷུ ཝཏསྶ སཙེ ཨཌཡ྄ཧམཱནོ ནིཀྑམེཡྻ’’ནྟི ཨོལོཀཡམཱནོ མགྒཾ དིསྭཱ ནིཀྑམིཏྭཱ ཝེགེན ཁེམཊྛཱནཾ གནྟྭཱ ཋིཏོ. ཏཏྠ གྷརསཱམིཀསྶ བྷུཉྫིཏྭཱ སཡནཾ ཨཱརུཡ྄ཧ ནིདྡོཀྐམནཾ ཝིཡ བཱལཔུཐུཛྫནསྶ ཁནྡྷཔཉྩཀེ ‘‘ཨཧཾ མམཱ’’ཏི གཧཎཾ. པབུཛ྄ཛྷིཏྭཱ ཨགྒིཾ དིསྭཱ བྷཱིཏཀཱལོ ཝིཡ སམྨཱཔཊིཔདཾ པཊིཔཛྫིཏྭཱ ལཀྑཎཾ དིསྭཱ བྷཡཏུཔཊྛཱནཉཱཎཾ, ནིཀྑམནམགྒཾ ཨོལོཀནཾ ཝིཡ མུཉྩིཏུཀམྱཏཱཉཱཎཾ ¶ , མགྒདསྶནཾ ཝིཡ ཨནུལོམཾ, ནིཀྑམནཾ ཝིཡ གོཏྲབྷུཉཱཎཾ, ཝེགེན གམནཾ ཝིཡ མགྒཉཱཎཾ, ཁེམཊྛཱནེ ཋཱནཾ ཝིཡ ཕལཉཱཎཾ.

༧༩༣. གོཏི ཨེཀསྶ ཀིར ཀསྶཀསྶ རཏྟིབྷཱགེ ནིདྡཾ ཨོཀྐནྟསྶ ཝཛཾ བྷིནྡིཏྭཱ གོཎཱ པལཱཏཱ, སོ པཙྩཱུསསམཡེ ཏཏྠ གནྟྭཱ ཨོལོཀེནྟོ ཏེསཾ པལཱཏབྷཱཝཾ ཉཏྭཱ ཨནུཔདཾ གནྟྭཱ རཉྙོ གོཎེ ཨདྡས. ཏེ ‘‘མཡ྄ཧཾ གོཎཱ’’ཏི སལླཀྑེཏྭཱ ཨཱཧརནྟོ པབྷཱཏཀཱལེ ‘‘ན ཨིམེ མཡ྄ཧཾ གོཎཱ, རཉྙོ གོཎཱ’’ཏི སཉྫཱནིཏྭཱ ‘‘ཡཱཝ མཾ ‘ཙོརོ ཨཡ’ནྟི གཧེཏྭཱ རཱཛཔུརིསཱ ན ཨནཡབྱསནཾ པཱཔེནྟི, ཏཱཝདེཝ པལཱཡིསྶཱམཱི’’ཏི བྷཱིཏོ གོཎེ པཧཱཡ ཝེགེན པལཱཡིཏྭཱ ནིབྦྷཡཊྛཱནེ ཨཊྛཱསི. ཏཏྠ ‘‘མཡ྄ཧཾ གོཎཱ’’ཏི རཱཛགོཎཱནཾ གཧཎཾ ཝིཡ བཱལཔུཐུཛྫནསྶ ‘‘ཨཧཾ མམཱ’’ཏི ཁནྡྷཱནཾ གཧཎཾ, པབྷཱཏེ ‘‘རཱཛགོཎཱ’’ཏི སཉྫཱནནཾ ཝིཡ ཡོགིནོ ཏིལཀྑཎཝསེན ཁནྡྷཱནཾ ‘‘ཨནིཙྩཱ དུཀྑཱ ཨནཏྟཱ’’ཏི སཉྫཱནནཾ, བྷཱིཏཀཱལོ ཝིཡ བྷཡཏུཔཊྛཱནཉཱཎཾ, ཝིསྶཛྫིཏྭཱ གནྟུཀཱམཏཱ ཝིཡ མུཉྩིཏུཀམྱཏཱ, ཝིསྶཛྫནཾ ཝིཡ གོཏྲབྷུ, པལཱཡནཾ ཝིཡ མགྒོ, པལཱཡིཏྭཱ ཨབྷཡདེསེ ཋཱནཾ ཝིཡ ཕལཾ.

༧༩༤. ཡཀྑཱིཏི ཨེཀོ ཀིར པུརིསོ ཡཀྑིནིཡཱ སདྡྷིཾ སཾཝཱསཾ ཀཔྤེསི, སཱ རཏྟིབྷཱགེ ‘‘སུཏྟོ ཨཡ’’ནྟི མནྟྭཱ ཨཱམཀསུསཱནཾ གནྟྭཱ མནུསྶམཾསཾ ཁཱདཏི. སོ ‘‘ཀུཧིཾ ཨེསཱ གཙྪཏཱི’’ཏི ཨནུབནྡྷིཏྭཱ མནུསྶམཾསཾ ཁཱདམཱནཾ དིསྭཱ ཏསྶཱ ཨམནུསྶིབྷཱཝཾ ཉཏྭཱ ‘‘ཡཱཝ མཾ ན ཁཱདཏི, ཏཱཝ པལཱཡིསྶཱམཱི’’ཏི བྷཱིཏོ ཝེགེན པལཱཡིཏྭཱ ཁེམཊྛཱནེ ཨཊྛཱསི. ཏཏྠ ཡཀྑིནིཡཱ སདྡྷིཾ སཾཝཱསོ ཝིཡ ཁནྡྷཱནཾ ‘‘ཨཧཾ མམཱ’’ཏི གཧཎཾ, སུསཱནེ མནུསྶམཾསཾ ཁཱདམཱནཾ ¶ དིསྭཱ ‘‘ཡཀྑིནཱི ཨཡ’’ནྟི ཛཱནནཾ ཝིཡ ཁནྡྷཱནཾ ཏིལཀྑཎཾ དིསྭཱ ཨནིཙྩཱདིབྷཱཝཛཱནནཾ, བྷཱིཏཀཱལོ ཝིཡ བྷཡཏུཔཊྛཱནཾ, པལཱཡིཏུཀཱམཏཱ ཝིཡ མུཉྩིཏུཀམྱཏཱ, སུསཱནཝིཛཧནཾ ཝིཡ གོཏྲབྷུ, ཝེགེན པལཱཡནཾ ཝིཡ མགྒོ, ཨབྷཡདེསེ ཋཱནཾ ཝིཡ ཕལཾ.

༧༩༥. དཱརཀོཏི ཨེཀཱ ཀིར པུཏྟགིདྡྷིནཱི ཨིཏྠཱི, སཱ ཨུཔརིཔཱསཱདེ ནིསིནྣཱཝ ཨནྟརཝཱིཐིཡཾ དཱརཀསདྡཾ སུཏྭཱ ‘‘པུཏྟོ ནུ ཁོ མེ ཀེནཙི ཝིཧེཋིཡཏཱི’’ཏི ཝེགསཱ གནྟྭཱ ‘‘ཨཏྟནོ པུཏྟོ’’ཏི སཉྙཱཡ པརཔུཏྟཾ ཨགྒཧེསི. སཱ ‘‘པརཔུཏྟོ ཨཡ’’ནྟི སཉྫཱནིཏྭཱ ཨོཏྟཔྤམཱནཱ ཨིཏོ ཙིཏོ ¶ ཙ ཨོལོཀེཏྭཱ ‘‘མཱ ཧེཝ མཾ ཀོཙི ‘དཱརཀཙོརཱི ཨཡ’ནྟི ཝདེཡྻཱ’’ཏི དཱརཀཾ ཏཏྠེཝ ཨོརོཔེཏྭཱ པུན ཝེགསཱ པཱསཱདཾ ཨཱརུཡ྄ཧ ནིསཱིདི. ཏཏྠ ཨཏྟནོ པུཏྟསཉྙཱཡ པརཔུཏྟསྶ གཧཎཾ ཝིཡ ‘‘ཨཧཾ མམཱ’’ཏི པཉྩཀྑནྡྷགཧཎཾ, ‘‘པརཔུཏྟོ ཨཡ’’ནྟི སཉྫཱནནཾ ཝིཡ ཏིལཀྑཎཝསེན ‘‘ནཱཧཾ, ན མམཱ’’ཏི སཉྫཱནནཾ, ཨོཏྟཔྤནཾ ཝིཡ བྷཡཏུཔཊྛཱནཾ, ཨིཏོ ཙིཏོ ཙ ཨོལོཀནཾ ཝིཡ མུཉྩིཏུཀམྱཏཱཉཱཎཾ, ཏཏྠེཝ དཱརཀསྶ ཨོརོཔནཾ ཝིཡ ཨནུལོམཾ, ཨོརོཔེཏྭཱ ཨནྟརཝཱིཐིཡཾ ཋིཏཀཱལོ ཝིཡ གོཏྲབྷུ, པཱསཱདཱརཱུཧནཾ ཝིཡ མགྒོ, ཨཱརུཡ྄ཧ ནིསཱིདནཾ ཝིཡ ཕལཾ.

༧༩༦. ཁུདྡཾ པིཔཱསཾ སཱིཏུཎྷཾ, ཨནྡྷཀཱརཾ ཝིསེན ཙཱཏི ཨིམཱ པན ཚ ཨུཔམཱ ཝུཊྛཱནགཱམིནིཡཱ ཝིཔསྶནཱཡ ཋིཏསྶ ལོཀུཏྟརདྷམྨཱབྷིམུཁནིནྣཔོཎཔབྦྷཱརབྷཱཝདསྶནཏྠཾ ཝུཏྟཱ. ཡཐཱ ཧི ཁུདྡཱཡ ཨབྷིབྷཱུཏོ སུཛིགྷཙྪིཏོ པུརིསོ སཱདུརསཾ བྷོཛནཾ པཏྠེཏི, ཨེཝམེཝཱཡཾ སཾསཱརཝཊྚཛིགྷཙྪཱཡ ཕུཊྛོ ཡོགཱཝཙརོ ཨམཏརསཾ ཀཱཡགཏཱསཏིབྷོཛནཾ པཏྠེཏི.

ཡཐཱ ཙ པིཔཱསིཏོ པུརིསོ པརིསུསྶམཱནཀཎྛམུཁོ ཨནེཀངྒསམྦྷཱརཾ པཱནཀཾ པཏྠེཏི, ཨེཝམེཝཱཡཾ སཾསཱརཝཊྚཔིཔཱསཱཡ ཕུཊྛོ ཡོགཱཝཙརོ ཨརིཡཾ ཨཊྛངྒིཀམགྒཔཱནཀཾ པཏྠེཏི.

ཡཐཱ པན སཱིཏསམྥུཊྛོ པུརིསོ ཨུཎྷཾ པཏྠེཏི, ཨེཝམེཝཱཡཾ སཾསཱརཝཊྚེ ཏཎྷཱསིནེཧསཱིཏེན ཕུཊྛོ ཡོགཱཝཙརོ ཀིལེསསནྟཱཔཀཾ མགྒཏེཛཾ པཏྠེཏི.

ཡཐཱ ཙ ཨུཎྷསམྥུཊྛོ པུརིསོ སཱིཏཾ པཏྠེཏི, ཨེཝམེཝཱཡཾ སཾསཱརཝཊྚེ ཨེཀཱདསགྒིསནྟཱཔསནྟཏྟོ ཡོགཱཝཙརོ ཨེཀཱདསགྒིཝཱུཔསམཾ ནིབྦཱནཾ པཏྠེཏི.

ཡཐཱ ¶ པན ཨནྡྷཀཱརཔརེཏོ པུརིསོ ཨཱལོཀཾ པཏྠེཏི, ཨེཝམེཝཱཡཾ ཨཝིཛྫནྡྷཀཱརེན ཨོནདྡྷཔརིཡོནདྡྷོ ཡོགཱཝཙརོ ཉཱཎཱལོཀཾ མགྒབྷཱཝནཾ པཏྠེཏི.

ཡཐཱ ཙ ཝིསསམྥུཊྛོ པུརིསོ ཝིསགྷཱཏནཾ བྷེསཛྫཾ པཏྠེཏི, ཨེཝམེཝཱཡཾ ཀིལེསཝིསསམྥུཊྛོ ཡོགཱཝཙརོ ཀིལེསཝིསནིམྨཐནཾ ཨམཏོསདྷཾ ནིབྦཱནཾ པཏྠེཏི. ཏེན ཝུཏྟཾ – ‘‘ཏསྶེཝཾ ཛཱནཏོ ཨེཝཾ པསྶཏོ ¶ ཏཱིསུ བྷཝེསུ…པེ… ནཝསུ སཏྟཱཝཱསེསུ ཙིཏྟཾ པཏིལཱིཡཏི པཏིཀུཊཏི པཏིཝཏྟཏི ན སམྤསཱརིཡཏི. ཨུཔེཀྑཱ ཝཱ པཱཊིཀུལྱཏཱ ཝཱ སཎྛཱཏི. སེཡྻཐཱཔི ནཱམ པདུམཔལཱསེ ཨཱིསཀཔོཎེ’’ཏི སབྦཾ པུབྦེ ཝུཏྟནཡེནེཝ ཝེདིཏབྦཾ.

༧༩༧. ཨེཏྟཱཝཏཱ ཙ པནེས པཏིལཱིནཙརོ ནཱམ ཧོཏི, ཡཾ སནྡྷཱཡ ཝུཏྟཾ –

‘‘པཏིལཱིནཙརསྶ བྷིཀྑུནོ,

བྷཛམཱནསྶ ཝིཝིཏྟམཱསནཾ;

སཱམགྒིཡམཱཧུ ཏསྶ ཏཾ,

ཡོ ཨཏྟཱནཾ བྷཝནེ ན དསྶཡེ’’ཏི. (སུ. ནི. ༨༡༦; མཧཱནི. ༤༥);

ཨེཝམིདཾ སངྑཱརུཔེཀྑཱཉཱཎཾ ཡོགིནོ པཏིལཱིནཙརབྷཱཝཾ ནིཡམེཏྭཱ ཨུཏྟརི ཨརིཡམགྒསྶཱཔི བོཛ྄ཛྷངྒམགྒངྒཛྷཱནངྒཔཊིཔདཱཝིམོཀྑཝིསེསཾ ནིཡམེཏི. ཀེཙི ཧི ཐེརཱ བོཛ྄ཛྷངྒམགྒངྒཛྷཱནངྒཱནཾ ཝིསེསཾ པཱདཀཛ྄ཛྷཱནཾ ནིཡམེཏཱིཏི ཝདནྟི. ཀེཙི ཝིཔསྶནཱཡ ཨཱརམྨཎབྷཱུཏཱ ཁནྡྷཱ ནིཡམེནྟཱིཏི ཝདནྟི. ཀེཙི པུགྒལཛ྄ཛྷཱསཡོ ནིཡམེཏཱིཏི ཝདནྟི. ཏེསམྤི ཝཱདེསུ ཨཡཾ པུབྦབྷཱགཝུཊྛཱནགཱམིནིཝིཔསྶནཱཝ ནིཡམེཏཱིཏི ཝེདིཏབྦཱ.

༧༩༨. ཏཏྲཱཡཾ ཨནུཔུབྦིཀཐཱ – ཝིཔསྶནཱནིཡམེན ཧི སུཀྑཝིཔསྶཀསྶ ཨུཔྤནྣམགྒོཔི, སམཱཔཏྟིལཱབྷིནོ ཛྷཱནཾ པཱདཀཾ ཨཀཏྭཱ ཨུཔྤནྣམགྒོཔི, པཋམཛ྄ཛྷཱནཾ པཱདཀཾ ཀཏྭཱ པཀིཎྞཀསངྑཱརེ སམྨསིཏྭཱ ཨུཔྤཱདིཏམགྒོཔི པཋམཛ྄ཛྷཱནིཀཱཝ ཧོནྟི. སབྦེསུ སཏྟ བོཛ྄ཛྷངྒཱནི ཨཊྛ མགྒངྒཱནི པཉྩ ཛྷཱནངྒཱནི ཧོནྟི. ཏེསཾ ཧི པུབྦབྷཱགཝིཔསྶནཱ སོམནསྶསཧགཏཱཔི ཨུཔེཀྑཱསཧགཏཱཔི ཧུཏྭཱ ཝུཊྛཱནཀཱལེ སངྑཱརུཔེཀྑཱབྷཱཝཾ པཏྭཱ སོམནསྶསཧགཏཱ ¶ ཧོཏི. པཉྩཀནཡེ དུཏིཡཏཏིཡཙཏུཏྠཛ྄ཛྷཱནཱནི པཱདཀཱནི ཀཏྭཱ ཨུཔྤཱདིཏམགྒེསུ ཡཐཱཀྐམེནེཝ ཛྷཱནཾ ཙཏུརངྒིཀཾ ཏིཝངྒིཀཾ དུཝངྒིཀཉྩ ཧོཏི. སབྦེསུ པན སཏྟ མགྒངྒཱནི ཧོནྟི. ཙཏུཏྠེ ཚ བོཛ྄ཛྷངྒཱནི. ཨཡཾ ཝིསེསོ པཱདཀཛ྄ཛྷཱནནིཡམེན ཙེཝ ཝིཔསྶནཱནིཡམེན ཙ ཧོཏི. ཏེསམྤི ཧི པུབྦབྷཱགཝིཔསྶནཱ སོམནསྶསཧགཏཱཔི ཨུཔེཀྑཱསཧགཏཱཔི ཧོཏི. ཝུཊྛཱནགཱམིནཱི སོམནསྶསཧགཏཱཝ. པཉྩམཛ྄ཛྷཱནཾ ¶ པཱདཀཾ ཀཏྭཱ ནིབྦཏྟིཏམགྒེ པན ཨུཔེཀྑཱཙིཏྟེཀགྒཏཱཝསེན དྭེ ཛྷཱནངྒཱནི བོཛ྄ཛྷངྒམགྒངྒཱནི ཚ སཏྟ ཙེཝ. ཨཡམྤི ཝིསེསོ ཨུབྷཡནིཡམཝསེན ཧོཏི. ཨིམསྨིཾ ཧི ནཡེ པུབྦབྷཱགཝིཔསྶནཱ སོམནསྶསཧགཏཱ ཝཱ ཨུཔེཀྑཱསཧགཏཱ ཝཱ ཧོཏི. ཝུཊྛཱནགཱམིནཱི ཨུཔེཀྑཱསཧགཏཱཝ. ཨརཱུཔཛ྄ཛྷཱནཱནི པཱདཀཾ ཀཏྭཱ ཨུཔྤཱདིཏམགྒེཔི ཨེསེཝ ནཡོ. ཨེཝཾ པཱདཀཛ྄ཛྷཱནཏོ ཝུཊྛཱཡ ཡེཀེཙི སངྑཱརེ སམྨསིཏྭཱ ནིབྦཏྟིཏམགྒསྶ ཨཱསནྣཔདེསེ ཝུཊྛིཏསམཱཔཏྟི ཨཏྟནོ སདིསབྷཱཝཾ ཀརོཏི བྷཱུམིཝཎྞོ ཝིཡ གོདྷཱཝཎྞསྶ.

༧༩༩. དུཏིཡཏྠེརཝཱདེ པན ཡཏོ ཡཏོ སམཱཔཏྟིཏོ ཝུཊྛཱཡ ཡེ ཡེ སམཱཔཏྟིདྷམྨེ སམྨསིཏྭཱ མགྒོ ནིབྦཏྟིཏོ ཧོཏི, ཏཾཏཾསམཱཔཏྟིསདིསོཝ ཧོཏི. ཏཏྲཱཔི ཙ ཝིཔསྶནཱནིཡམོ ཝུཏྟནཡེནེཝ ཝེདིཏབྦོ.

༨༠༠. ཏཏིཡཏྠེརཝཱདེ ཨཏྟནོ ཨཏྟནོ ཨཛ྄ཛྷཱསཡཱནུརཱུཔེན ཡཾ ཡཾ ཛྷཱནཾ པཱདཀཾ ཀཏྭཱ ཡེ ཡེ ཛྷཱནདྷམྨེ སམྨསིཏྭཱ མགྒོ ནིབྦཏྟིཏོ, ཏཾཏཾཛྷཱནསདིསོཝ ཧོཏི. པཱདཀཛ྄ཛྷཱནཾ པན སམྨསིཏཛ྄ཛྷཱནཾ ཝཱ ཝིནཱ ཨཛ྄ཛྷཱསཡམཏྟེནེཝ ཏཾ ན ཨིཛ྄ཛྷཏི. སྭཱཡམཏྠོ ནནྡཀོཝཱདསུཏྟེན (མ. ནི. ༣.༣༩༨ ཨཱདཡོ) དཱིཔེཏབྦོ. ཨེཏྠཱཔི ཙ ཝིཔསྶནཱནིཡམོ ཝུཏྟནཡེནེཝ ཝེདིཏབྦོ. ཨེཝཾ ཏཱཝ སངྑཱརུཔེཀྑཱ བོཛ྄ཛྷངྒམགྒངྒཛྷཱནངྒཱནི ནིཡམེཏཱིཏི ཝེདིཏབྦཱ.

༨༠༡. སཙེ པནཱཡཾ ཨཱདིཏོ ཀིལེསེ ཝིཀྑམྦྷཡམཱནཱ དུཀྑེན སཔྤཡོགེན སསངྑཱརེན ཝིཀྑམྦྷེཏུཾ ཨསཀྑི, དུཀྑཱཔཊིཔདཱ ནཱམ ཧོཏི. ཝིཔརིཡཱཡེན སུཁཱཔཊིཔདཱ. ཀིལེསེ པན ཝིཀྑམྦྷེཏྭཱ ཝིཔསྶནཱཔརིཝཱསཾ མགྒཔཱཏུབྷཱཝཾ སཎིཀཾ ཀུརུམཱནཱ དནྡྷཱབྷིཉྙཱ ནཱམ ཧོཏི. ཝིཔརིཡཱཡེན ཁིཔྤཱབྷིཉྙཱ. ཨིཏི ཨཡཾ སངྑཱརུཔེཀྑཱ ཨཱགམནཱིཡཊྛཱནེ ཋཏྭཱ ཨཏྟནོ ཨཏྟནོ མགྒསྶ ནཱམཾ དེཏི. ཏེན མགྒོ ཙཏྟཱརི ནཱམཱནི ལབྷཏི.

སཱ ¶ ¶ པནཱཡཾ པཊིཔདཱ ཀསྶཙི བྷིཀྑུནོ ནཱནཱ ཧོཏི, ཀསྶཙི ཙཏཱུསུཔི མགྒེསུ ཨེཀཱཝ. བུདྡྷཱནཾ པན ཙཏྟཱརོཔི མགྒཱ སུཁཱཔཊིཔདཱ ཁིཔྤཱབྷིཉྙཱཝ ཨཧེསུཾ. ཏཐཱ དྷམྨསེནཱཔཏིསྶ. མཧཱམོགྒལླཱནཏྠེརསྶ པན པཋམམགྒོ སུཁཱཔཊིཔདོ ཁིཔྤཱབྷིཉྙོ ཨཧོསི. ཨུཔརི ཏཡོ དུཀྑཱཔཊིཔདཱ དནྡྷཱབྷིཉྙཱ. ཡཐཱ ཙ པཊིཔདཱ, ཨེཝཾ ཨདྷིཔཏཡོཔི ཀསྶཙི བྷིཀྑུནོ ཙཏཱུསུ མགྒེསུ ནཱནཱ ཧོནྟི. ཀསྶཙི ཙཏཱུསུཔི ཨེཀཱཝ. ཨེཝཾ སངྑཱརུཔེཀྑཱ པཊིཔདཱཝིསེསཾ ནིཡམེཏི. ཡཐཱ པན ཝིམོཀྑཝིསེསཾ ནིཡམེཏི, ཏཾ པུབྦེ ཝུཏྟམེཝ.

༨༠༢. ཨཔིཙ མགྒོ ནཱམ པཉྩཧི ཀཱརཎེཧི ནཱམཾ ལབྷཏི སརསེན ཝཱ པཙྩནཱིཀེན ཝཱ སགུཎེན ཝཱ ཨཱརམྨཎེན ཝཱ ཨཱགམནེན ཝཱ. སཙེ ཧི སངྑཱརུཔེཀྑཱ ཨནིཙྩཏོ སངྑཱརེ སམྨསིཏྭཱ ཝུཊྛཱཏི, ཨནིམིཏྟཝིམོཀྑེན ཝིམུཙྩཏི. སཙེ དུཀྑཏོ སམྨསིཏྭཱ ཝུཊྛཱཏི, ཨཔྤཎིཧིཏཝིམོཀྑེན ཝིམུཙྩཏི. སཙེ ཨནཏྟཏོ སམྨསིཏྭཱ ཝུཊྛཱཏི, སུཉྙཏཝིམོཀྑེན ཝིམུཙྩཏི. ཨིདཾ སརསཏོ ནཱམཾ ནཱམ.

ཡསྨཱ པནེས ཨནིཙྩཱནུཔསྶནཱཡ སངྑཱརཱནཾ གྷནཝིནིབྦྷོགཾ ཀཏྭཱ ནིཙྩནིམིཏྟདྷུཝནིམིཏྟསསྶཏནིམིཏྟཱནི པཛཧནྟོ ཨཱགཏོ, ཏསྨཱ ཨནིམིཏྟོ. དུཀྑཱནུཔསྶནཱཡ པན སུཁསཉྙཾ པཧཱཡ པཎིདྷིཾ པཏྠནཾ སུཀྑཱཔེཏྭཱ ཨཱགཏཏྟཱ ཨཔྤཎིཧིཏོ. ཨནཏྟཱནུཔསྶནཱཡ ཨཏྟསཏྟཔུགྒལསཉྙཾ པཧཱཡ སངྑཱརཱནཾ སུཉྙཏོ དིཊྛཏྟཱ སུཉྙཏོཏི ཨིདཾ པཙྩནཱིཀཏོ ནཱམཾ ནཱམ.

རཱགཱདཱིཧི པནེས སུཉྙཏྟཱ སུཉྙཏོ, རཱུཔནིམིཏྟཱདཱིནཾ རཱགནིམིཏྟཱདཱིནཉྙེཝ ཝཱ ཨབྷཱཝེན ཨནིམིཏྟོ, རཱགཔཎིདྷིཨཱདཱིནཾ ཨབྷཱཝཏོ ཨཔྤཎིཧིཏོཏི ཨིདམསྶ སགུཎཏོ ནཱམཾ.

སྭཱཡཾ སུཉྙཾ ཨནིམིཏྟཾ ཨཔྤཎིཧིཏཉྩ ནིབྦཱནཾ ཨཱརམྨཎཾ ཀརོཏཱིཏིཔི སུཉྙཏོ ཨནིམིཏྟོ ཨཔྤཎིཧིཏོཏི ཝུཙྩཏི. ཨིདམསྶ ཨཱརམྨཎཏོ ནཱམཾ.

༨༠༣. ཨཱགམནཾ པན དུཝིདྷཾ ཝིཔསྶནཱགམནཾ མགྒཱགམནཉྩ. ཏཏྠ མགྒེ ཝིཔསྶནཱགམནཾ ལབྷཏི, ཕལེ མགྒཱགམནཾ. ཨནཏྟཱནུཔསྶནཱ ཧི སུཉྙཏཱ ནཱམ, སུཉྙཏཝིཔསྶནཱཡ མགྒོ སུཉྙཏོ, ཨནིཙྩཱནུཔསྶནཱ ཨནིམིཏྟཱ ནཱམ ¶ , ཨནིམིཏྟཝིཔསྶནཱཡ ¶ མགྒོ ཨནིམིཏྟོ. ཨིདཾ པན ནཱམཾ ན ཨབྷིདྷམྨཔརིཡཱཡེན ལབྦྷཏི, སུཏྟནྟཔརིཡཱཡེན ལབྦྷཏི. ཏཏྲ ཧི གོཏྲབྷུཉཱཎཾ ཨནིམིཏྟཾ ནིབྦཱནཾ ཨཱརམྨཎཾ ཀཏྭཱ ཨནིམིཏྟནཱམཀཾ ཧུཏྭཱ སཡཾ ཨཱགམནཱིཡཊྛཱནེ ཋཏྭཱ མགྒསྶ ནཱམཾ དེཏཱིཏི ཝདནྟི. ཏེན མགྒོ ཨནིམིཏྟོཏི ཝུཏྟོ. མགྒཱགམནེན པན ཕལཾ ཨནིམིཏྟནྟི ཡུཛྫཏིཡེཝ. དུཀྑཱནུཔསྶནཱ སངྑཱརེསུ པཎིདྷིཾ སུཀྑཱཔེཏྭཱ ཨཱགཏཏྟཱ ཨཔྤཎིཧིཏཱ ནཱམ, ཨཔྤཎིཧིཏཝིཔསྶནཱཡ མགྒོ ཨཔྤཎིཧིཏོ, ཨཔྤཎིཧིཏམགྒསྶ ཕལཾ ཨཔྤཎིཧིཏཾ. ཨེཝཾ ཝིཔསྶནཱ ཨཏྟནོ ནཱམཾ མགྒསྶ དེཏི, མགྒོ ཕལསྶཱཏི ཨིདཾ ཨཱགམནཏོ ནཱམཾ. ཨེཝམཡཾ སངྑཱརུཔེཀྑཱ ཝིམོཀྑཝིསེསཾ ནིཡམེཏཱིཏི.

སངྑཱརུཔེཀྑཱཉཱཎཾ ནིཊྛིཏཾ.

ཨནུལོམཉཱཎཀཐཱ

༨༠༤. ཏསྶ ཏཾ སངྑཱརུཔེཀྑཱཉཱཎཾ ཨཱསེཝནྟསྶ བྷཱཝེནྟསྶ བཧུལཱིཀརོནྟསྶ ཨདྷིམོཀྑསདྡྷཱ བལཝཏརཱ ནིབྦཏྟཏི, ཝཱིརིཡཾ སུཔགྒཧིཏཾ ཧོཏི, སཏི སཱུཔཊྛིཏཱ, ཙིཏྟཾ སུསམཱཧིཏཾ, ཏིཀྑཏརཱ སངྑཱརུཔེཀྑཱ ཨུཔྤཛྫཏི. ཏསྶ ‘‘དཱནི མགྒོ ཨུཔྤཛྫིསྶཏཱི’’ཏི སངྑཱརུཔེཀྑཱ སངྑཱརེ ཨནིཙྩཱཏི ཝཱ དུཀྑཱཏི ཝཱ ཨནཏྟཱཏི ཝཱ སམྨསིཏྭཱ བྷཝངྒཾ ཨོཏརཏི. བྷཝངྒཱནནྟརཾ སངྑཱརུཔེཀྑཱཡ ཀཏནཡེནེཝ སངྑཱརེ ཨནིཙྩཱཏི ཝཱ དུཀྑཱཏི ཝཱ ཨནཏྟཱཏི ཝཱ ཨཱརམྨཎཾ ཀུརུམཱནཾ ཨུཔྤཛྫཏི མནོདྭཱརཱཝཛྫནཾ. ཏཏོ བྷཝངྒཾ ཨཱཝཊྚེཏྭཱ ཨུཔྤནྣསྶ ཏསྶ ཀིརིཡཙིཏྟསྶཱནནྟརཾ ཨཝཱིཙིཀཾ ཙིཏྟསནྟཏིཾ ཨནུཔྤབནྡྷམཱནཾ ཏཐེཝ སངྑཱརེ ཨཱརམྨཎཾ ཀཏྭཱ ཨུཔྤཛྫཏི པཋམཾ ཛཝནཙིཏྟཾ, ཡཾ པརིཀམྨནྟི ཝུཙྩཏི. ཏདནནྟརཾ ཏཐེཝ སངྑཱརེ ཨཱརམྨཎཾ ཀཏྭཱ ཨུཔྤཛྫཏི དུཏིཡཾ ཛཝནཙིཏྟཾ, ཡཾ ཨུཔཙཱརནྟི ཝུཙྩཏི. ཏདནནྟརམྤི ཏཐེཝ སངྑཱརེ ཨཱརམྨཎཾ ཀཏྭཱ ཨུཔྤཛྫཏི ཏཏིཡཾ ཛཝནཙིཏྟཾ, ཡཾ ཨནུལོམནྟི ཝུཙྩཏི. ཨིདཾ ནེསཾ པཱཊིཡེཀྐཾ ནཱམཾ.

ཨཝིསེསེན པན ཏིཝིདྷམྤེཏཾ ཨཱསེཝནནྟིཔི པརིཀམྨནྟིཔི ཨུཔཙཱརནྟིཔི ཨནུལོམནྟིཔི ཝཏྟུཾ ཝཊྚཏི. ཀིསྶཱནུལོམཾ? པུརིམབྷཱགཔཙྪིམབྷཱགཱནཾ. ཏཉྷི པུརིམཱནཾ ཨཊྛནྣཾ ¶ ཝིཔསྶནཱཉཱཎཱནཾ ཏཐཀིཙྩཏཱཡ ཙ ཨནུལོམེཏི, ཨུཔརི ཙ སཏྟཏིཾསཱཡ བོདྷིཔཀྑིཡདྷམྨཱནཾ. ཏཉྷི ཨནིཙྩལཀྑཎཱདིཝསེན སངྑཱརེ ཨཱརབྦྷ ¶ པཝཏྟཏྟཱ, ‘‘ཨུདཡབྦཡཝནྟཱནཾཡེཝ ཝཏ དྷམྨཱནཾ ཨུདཡབྦཡཉཱཎཾ ཨུཔྤཱདཝཡེ ཨདྡསཱ’’ཏི ཙ, ‘‘བྷངྒཝནྟཱནཾཡེཝ ཝཏ བྷངྒཱནུཔསྶནཾ བྷངྒཾ ཨདྡསཱ’’ཏི ཙ, ‘‘སབྷཡཾཡེཝ ཝཏ བྷཡཏུཔཊྛཱནསྶ བྷཡཏོ ཨུཔཊྛིཏ’’ནྟི ཙ, ‘‘སཱདཱིནཝེཡེཝ ཝཏ ཨཱདཱིནཝཱནུཔསྶནཾ ཨཱདཱིནཝཾ ཨདྡསཱ’’ཏི ཙ, ‘‘ནིབྦིནྡིཏབྦེཡེཝ ཝཏ ནིབྦིདཱཉཱཎཾ ནིབྦིནྣ’’ནྟི ཙ, ‘‘མུཉྩིཏབྦམྷིཡེཝ ཝཏ མུཉྩིཏུཀམྱཏཱཉཱཎཾ མུཉྩིཏུཀཱམཾ ཛཱཏ’’ནྟི ཙ, ‘‘པཊིསངྑཱཏབྦཾཡེཝ ཝཏ པཊིསངྑཱཉཱཎེན པཊིསངྑཱཏ’’ནྟི ཙ, ‘‘ཨུཔེཀྑིཏབྦཾཡེཝ ཝཏ སངྑཱརུཔེཀྑཱཡ ཨུཔེཀྑིཏ’’ནྟི ཙ ཨཏྠཏོ ཝདམཱནཾ ཝིཡ ཨིམེསཉྩ ཨཊྛནྣཾ ཉཱཎཱནཾ ཏཐཀིཙྩཏཱཡ ཨནུལོམེཏི, ཨུཔརི ཙ སཏྟཏིཾསཱཡ བོདྷིཔཀྑིཡདྷམྨཱནཾ ཏཱཡ པཊིཔཏྟིཡཱ པཏྟབྦཏྟཱ.

ཡཐཱ ཧི དྷམྨིཀོ རཱཛཱ ཝིནིཙྪཡཊྛཱནེ ནིསིནྣོ ཝོཧཱརིཀམཧཱམཏྟཱནཾ ཝིནིཙྪཡཾ སུཏྭཱ ཨགཏིགམནཾ པཧཱཡ མཛ྄ཛྷཏྟོ ཧུཏྭཱ ‘‘ཨེཝཾ ཧོཏཱུ’’ཏི ཨནུམོདམཱནོ ཏེསཉྩ ཝིནིཙྪཡསྶ ཨནུལོམེཏི, པོརཱཎསྶ ཙ རཱཛདྷམྨསྶ, ཨེཝཾསམྤདམིདཾ ཝེདིཏབྦཾ. རཱཛཱ ཝིཡ ཧི ཨནུལོམཉཱཎཾ, ཨཊྛ ཝོཧཱརིཀམཧཱམཏྟཱ ཝིཡ ཨཊྛ ཉཱཎཱནི, པོརཱཎོ རཱཛདྷམྨོ ཝིཡ སཏྟཏིཾས བོདྷིཔཀྑིཡཱ. ཏཏྠ ཡཐཱ རཱཛཱ ‘‘ཨེཝཾ ཧོཏཱུ’’ཏི ཝདམཱནོ ཝོཧཱརིཀཱནཉྩ ཝིནིཙྪཡསྶ, རཱཛདྷམྨསྶ ཙ ཨནུལོམེཏི, ཨེཝམིདཾ ཨནིཙྩཱདིཝསེན སངྑཱརེ ཨཱརབྦྷ ཨུཔྤཛྫམཱནཾ ཨཊྛནྣཉྩ ཉཱཎཱནཾ ཏཐཀིཙྩཏཱཡ ཨནུལོམེཏི, ཨུཔརི ཙ སཏྟཏིཾསཱཡ བོདྷིཔཀྑིཡདྷམྨཱནཾ. ཏེནེཝ སཙྩཱནུལོམིཀཉཱཎནྟི ཝུཙྩཏཱིཏི.

ཨནུལོམཉཱཎཾ ནིཊྛིཏཾ.

ཝུཊྛཱནགཱམིནཱིཝིཔསྶནཱཀཐཱ

༨༠༥. ཨིདཉྩ པན ཨནུལོམཉཱཎཾ སངྑཱརཱརམྨཎཱཡ ཝུཊྛཱནགཱམིནིཡཱ ཝིཔསྶནཱཡ པརིཡོསཱནཾ ཧོཏི. སབྦེན སབྦཾ པན གོཏྲབྷུཉཱཎཾ ཝུཊྛཱནགཱམིནིཡཱ ཝིཔསྶནཱཡ པརིཡོསཱནཾ. ཨིདཱནི ཏསྶཱཡེཝ ཝུཊྛཱནགཱམིནིཡཱ ཝིཔསྶནཱཡ ཨསམྨོཧཏྠཾ ཨཡཾ སུཏྟསཾསནྡནཱ ཝེདིཏབྦཱ.

སེཡྻཐིདཾ ¶ ¶ –

ཨཡཉྷི ཝུཊྛཱནགཱམིནཱི ཝིཔསྶནཱ སལཱ༹ཡཏནཝིབྷངྒསུཏྟེ ‘‘ཨཏམྨཡཏཾ, བྷིཀྑཝེ, ནིསྶཱཡ ཨཏམྨཡཏཾ ཨཱགམྨ ཡཱཡཾ ཨུཔེཀྑཱ ཨེཀཏྟཱ ཨེཀཏྟསིཏཱ, ཏཾ པཛཧཐ ཏཾ སམཏིཀྐམཐཱ’’ཏི (མ. ནི. ༣.༣༡༠) ཨེཝཾ ཨཏམྨཡཏཱཏི ཝུཏྟཱ.

ཨལགདྡསུཏྟནྟེ ‘‘ནིབྦིནྡཾ ཝིརཛྫཏི, ཝིརཱགཱ ཝིམུཙྩཏཱི’’ཏི (མ. ནི. ༡.༢༤༥) ཨེཝཾ ནིབྦིདཱཏི ཝུཏྟཱ.

སུསིམསུཏྟནྟེ ‘‘པུབྦེ ཁོ, སུསིམ, དྷམྨཊྛིཏིཉཱཎཾ, པཙྪཱ ནིབྦཱནེ ཉཱཎ’’ནྟི (སཾ. ནི. ༢.༧༠) ཨེཝཾ དྷམྨཊྛིཏིཉཱཎནྟི ཝུཏྟཱ.

པོཊྛཔཱདསུཏྟནྟེ ‘‘སཉྙཱ ཁོ, པོཊྛཔཱད, པཋམཾ ཨུཔྤཛྫཏི, པཙྪཱ ཉཱཎ’’ནྟི (དཱི. ནི. ༡.༤༡༦) ཨེཝཾ སཉྙགྒནྟི ཝུཏྟཱ.

དསུཏྟརསུཏྟནྟེ ‘‘པཊིཔདཱཉཱཎདསྶནཝིསུདྡྷི པཱརིསུདྡྷིཔདྷཱནིཡངྒ’’ནྟི (དཱི. ནི. ༣.༣༥༩) ཨེཝཾ པཱརིསུདྡྷིཔདྷཱནིཡངྒནྟི ཝུཏྟཱ.

པཊིསམྦྷིདཱམགྒེ ‘‘ཡཱ ཙ མུཉྩིཏུཀམྱཏཱ ཡཱ ཙ པཊིསངྑཱནུཔསྶནཱ ཡཱ ཙ སངྑཱརུཔེཀྑཱ, ཨིམེ དྷམྨཱ ཨེཀཏྠཱ བྱཉྫནམེཝ ནཱན’’ནྟི (པཊི. མ. ༡.༢༢༧) ཨེཝཾ ཏཱིཧི ནཱམེཧི ཝུཏྟཱ.

པཊྛཱནེ ‘‘ཨནུལོམཾ གོཏྲབྷུསྶ, ཨནུལོམཾ ཝོདཱནསྶཱ’’ཏི (པཊྛཱ. ༡.༡.༤༡༧) ཨེཝཾ ཏཱིཧི ནཱམེཧི ཝུཏྟཱ.

རཐཝིནཱིཏསུཏྟནྟེ ‘‘ཀིཾ པནཱཝུསོ, པཊིཔདཱཉཱཎདསྶནཝིསུདྡྷཏྠཾ བྷགཝཏི བྲཧྨཙརིཡཾ ཝུསྶཏཱི’’ཏི (མ. ནི. ༡.༢༥༧) ཨེཝཾ པཊིཔདཱཉཱཎདསྶནཝིསུདྡྷཱིཏི ཝུཏྟཱ.

ཨིཏིནེཀེཧི ¶ ¶ ནཱམེཧི, ཀིཏྟིཏཱ ཡཱ མཧེསིནཱ;

ཝུཊྛཱནགཱམིནཱི སནྟཱ, པརིསུདྡྷཱ ཝིཔསྶནཱ.

ཝུཊྛཱཏུཀཱམོ སཾསཱར-དུཀྑཔངྐཱ མཧབྦྷཡཱ;

ཀརེཡྻ སཏཏཾ ཏཏྠ, ཡོགཾ པཎྜིཏཛཱཏིཀོཏི.

ཨིཏི སཱདྷུཛནཔཱམོཛྫཏྠཱཡ ཀཏེ ཝིསུདྡྷིམགྒེ

པཉྙཱབྷཱཝནཱདྷིཀཱརེ

པཊིཔདཱཉཱཎདསྶནཝིསུདྡྷིནིདྡེསོ ནཱམ

ཨེཀཝཱིསཏིམོ པརིཙྪེདོ.

༢༢. ཉཱཎདསྶནཝིསུདྡྷིནིདྡེསོ

པཋམམགྒཉཱཎཀཐཱ

༨༠༦. ཨིཏོ ¶ ¶ པརཾ གོཏྲབྷུཉཱཎཾ ཧོཏི, ཏཾ མགྒསྶ ཨཱཝཛྫནཊྛཱནིཡཏྟཱ ནེཝ པཊིཔདཱཉཱཎདསྶནཝིསུདྡྷིཾ ན ཉཱཎདསྶནཝིསུདྡྷིཾ བྷཛཏི, ཨནྟརཱ ཨབྦོཧཱརིཀམེཝ ཧོཏི. ཝིཔསྶནཱསོཏེ པཏིཏཏྟཱ པན ཝིཔསྶནཱཏི སངྑཾ གཙྪཏི. སོཏཱཔཏྟིམགྒོ སཀདཱགཱམིམགྒོ ཨནཱགཱམིམགྒོ ཨརཧཏྟམགྒོཏི ཨིམེསུ པན ཙཏཱུསུ མགྒེསུ ཉཱཎཾ ཉཱཎདསྶནཝིསུདྡྷི ནཱམ.

ཏཏྠ པཋམམགྒཉཱཎཾ ཏཱཝ སམྤཱདེཏུཀཱམེན ཨཉྙཾ ཀིཉྩི ཀཱཏབྦཾ ནཱམ ནཏྠི. ཡཉྷི ཨནེན ཀཱཏབྦཾ སིཡཱ, ཏཾ ཨནུལོམཱཝསཱནཾ ཝིཔསྶནཾ ཨུཔྤཱདེནྟེན ཀཏམེཝ. ཨེཝཾ ཨུཔྤནྣཨནུལོམཉཱཎསྶ པནསྶ ཏེཧི ཏཱིཧིཔི ཨནུལོམཉཱཎེཧི ཨཏྟནོ བལཱནུརཱུཔེན ཐཱུལཐཱུལེ སཙྩཔཊིཙྪཱདཀེ ཏམམྷི ཨནྟརདྷཱཔིཏེ སབྦསངྑཱརགཏེསུ ཙིཏྟཾ ན པཀྑནྡཏི, ན སནྟིཊྛཏི, ནཱདྷིམུཙྩཏི, ན སཛྫཏི, ན ལགྒཏི, ན བཛ྄ཛྷཏི. པདུམཔལཱསཏོ ཨུདཀཾ ཝིཡ པཏིལཱིཡཏི པཏིཀུཊཏི པཏིཝཏྟཏི. སབྦཾ ནིམིཏྟཱརམྨཎམྤི སབྦཾ པཝཏྟཱརམྨཎམྤི པལིབོདྷཏོ ཨུཔཊྛཱཏི. ཨཐསྶ སབྦསྨིཾ ནིམིཏྟཔཝཏྟཱརམྨཎེ པལིབོདྷཏོ ཨུཔཊྛིཏེ ཨནུལོམཉཱཎསྶ ཨཱསེཝནནྟེ ཨནིམིཏྟཾ ཨཔྤཝཏྟཾ ཝིསངྑཱརཾ ནིརོདྷཾ ནིབྦཱནཾ ཨཱརམྨཎཾ ཀུརུམཱནཾ པུཐུཛྫནགོཏྟཾ པུཐུཛྫནསངྑཾ པུཐུཛྫནབྷཱུམིཾ ཨཏིཀྐམམཱནཾ ཨརིཡགོཏྟཾ ཨརིཡསངྑཾ ཨརིཡབྷཱུམིཾ ཨོཀྐམམཱནཾ ནིབྦཱནཱརམྨཎེ པཋམཱཝཊྚནཔཋམཱབྷོགཔཋམསམནྣཱཧཱརབྷཱུཏཾ མགྒསྶ ཨནནྟརསམནནྟརཱསེཝནཨུཔནིསྶཡནཏྠིཝིགཏཝསེན ཚཧི ཨཱཀཱརེཧི པཙྩཡབྷཱཝཾ སཱདྷཡམཱནཾ སིཁཱཔྤཏྟཾ ཝིཔསྶནཱཡ མུདྡྷབྷཱུཏཾ ཨཔུནརཱཝཊྚཀཾ ཨུཔྤཛྫཏི གོཏྲབྷུཉཱཎཾ.

ཡཾ སནྡྷཱཡ ཝུཏྟཾ –

‘‘ཀཐཾ ¶ བཧིདྡྷཱ ཝུཊྛཱནཝིཝཊྚནེ པཉྙཱ གོཏྲབྷུཉཱཎཾ? ཨུཔྤཱདཾ ཨབྷིབྷུཡྻཏཱིཏི གོཏྲབྷུ. པཝཏྟཾ…པེ… ཨུཔཱཡཱསཾ ཨབྷིབྷུཡྻཏཱིཏི གོཏྲབྷུ. བཧིདྡྷཱ སངྑཱརནིམིཏྟཾ ཨབྷིབྷུཡྻཏཱིཏི གོཏྲབྷུ. ཨནུཔྤཱདཾ པཀྑནྡཏཱིཏི གོཏྲབྷུ. ཨཔྤཝཏྟཾ…པེ… ཨནུཔཱཡཱསཾ ནིརོདྷཾ ནིབྦཱནཾ པཀྑནྡཏཱིཏི ¶ གོཏྲབྷུ. ཨུཔྤཱདཾ ཨབྷིབྷུཡྻིཏྭཱ ཨནུཔྤཱདཾ པཀྑནྡཏཱིཏི གོཏྲབྷཱུ’’ཏི (པཊི. མ. ༡.༥༩) སབྦཾ ཝིཏྠཱརེཏབྦཾ.

༨༠༧. ཏཏྲཱཡཾ ཨེཀཱཝཛྫནེན ཨེཀཝཱིཐིཡཾ པཝཏྟམཱནཱནམྤི ཨནུལོམགོཏྲབྷཱུནཾ ནཱནཱརམྨཎེ པཝཏྟནཱཀཱརདཱིཔིཀཱ ཨུཔམཱ – ཡཐཱ ཧི མཧཱམཱཏིཀཾ ལངྒྷིཏྭཱ པརཏཱིརེ པཏིཊྛཱཏུཀཱམོ པུརིསོ ཝེགེན དྷཱཝིཏྭཱ མཱཏིཀཱཡ ཨོརིམཏཱིརེ རུཀྑསཱཁཱཡ བནྡྷིཏྭཱ ཨོལམྦིཏཾ རཛྫུཾ ཝཱ ཡཊྛིཾ ཝཱ གཧེཏྭཱ ཨུལླངྒྷིཏྭཱ པརཏཱིརནིནྣཔོཎཔབྦྷཱརཀཱཡོ ཧུཏྭཱ པརཏཱིརསྶ ཨུཔརིབྷཱགཾ པཏྟོ ཏཾ མུཉྩིཏྭཱ ཝེདྷམཱནོ པརཏཱིརེ པཏིཏྭཱ སཎིཀཾ པཏིཊྛཱཏི, ཨེཝམེཝཱཡཾ ཡོགཱཝཙརོཔི བྷཝཡོནིགཏིཊྛིཏིནིཝཱསཱནཾ པརཏཱིརབྷཱུཏེ ནིབྦཱནེ པཏིཊྛཱཏུཀཱམོ ཨུདཡབྦཡཱནུཔསྶནཱདིནཱ ཝེགེན དྷཱཝིཏྭཱ ཨཏྟབྷཱཝརུཀྑསཱཁཱཡ བནྡྷིཏྭཱ ཨོལམྦིཏཾ རཱུཔརཛྫུཾ ཝཱ ཝེདནཱདཱིསུ ཨཉྙཏརདཎྜཾ ཝཱ ཨནིཙྩནྟི ཝཱ དུཀྑནྟི ཝཱ ཨནཏྟཱཏི ཝཱཏི ཨནུལོམཱཝཛྫནེན གཧེཏྭཱ ཏཾ ཨམུཉྩམཱནོཝ པཋམེན ཨནུལོམཙིཏྟེན ཨུལླངྒྷིཏྭཱ དུཏིཡེན པརཏཱིརནིནྣཔོཎཔབྦྷཱརཀཱཡོ ཝིཡ ནིབྦཱནནིནྣཔོཎཔབྦྷཱརམཱནསོ ཧུཏྭཱ ཏཏིཡེན པརཏཱིརསྶ ཨུཔརིབྷཱགཾ པཏྟོ ཝིཡ ཨིདཱནི པཏྟབྦསྶ ནིབྦཱནསྶ ཨཱསནྣོ ཧུཏྭཱ ཏསྶ ཙིཏྟསྶ ནིརོདྷེན ཏཾ སངྑཱརཱརམྨཎཾ མུཉྩིཏྭཱ གོཏྲབྷུཙིཏྟེན ཝིསངྑཱརེ པརཏཱིརབྷཱུཏེ ནིབྦཱནེ པཏཏི. ཨེཀཱརམྨཎེ པན ཨལདྡྷཱསེཝནཏཱཡ ཝེདྷམཱནོ སོ པུརིསོ ཝིཡ ན ཏཱཝ སུཔྤཏིཊྛིཏོ ཧོཏི, ཏཏོ མགྒཉཱཎེན པཏིཊྛཱཏཱིཏི.

༨༠༨. ཏཏྠ ཨནུལོམཾ སཙྩཔཊིཙྪཱདཀཾ ཀིལེསཏམཾ ཝིནོདེཏུཾ སཀྐོཏི, ན ནིབྦཱནམཱརམྨཎཾ ཀཱཏུཾ. གོཏྲབྷུ ནིབྦཱནམེཝ ཨཱརམྨཎཾ ཀཱཏུཾ སཀྐོཏི, ན སཙྩཔཊིཙྪཱདཀཾ ཏམཾ ཝིནོདེཏུཾ. ཏཏྲཱཡཾ ཨུཔམཱ – ཨེཀོ ཀིར ཙཀྑུམཱ པུརིསོ ‘‘ནཀྑཏྟཡོགཾ ཛཱནིསྶཱམཱི’’ཏི རཏྟིབྷཱགེ ནིཀྑམིཏྭཱ ཙནྡཾ པསྶིཏུཾ ཨུདྡྷཾ ཨུལློཀེསི, ཏསྶ ཝལཱཧཀེཧི པཊིཙྪནྣཏྟཱ ཙནྡོ ན པཉྙཱཡིཏྠ. ཨཐེཀོ ཝཱཏོ ཨུཊྛཧིཏྭཱ ཐཱུལཐཱུལེ ཝལཱཧཀེ ཝིདྡྷཾསེཏི. ཨཔརོ མཛ྄ཛྷིམེ, ཨཔརོ སུཁུམེཏི. ཏཏོ སོ པུརིསོ ཝིགཏཝལཱཧཀེ ནབྷེ ཙནྡཾ དིསྭཱ ནཀྑཏྟཡོགཾ ཨཉྙཱསི.

ཏཏྠ ¶ ¶ ཏཡོ ཝལཱཧཀཱ ཝིཡ སཙྩཔཊིཙྪཱདཀཐཱུལམཛ྄ཛྷིམསུཁུམཾ ཀིལེསནྡྷཀཱརཾ, ཏཡོ ཝཱཏཱ ཝིཡ ཏཱིཎི ཨནུལོམཙིཏྟཱནི, ཙཀྑུམཱ པུརིསོ ཝིཡ གོཏྲབྷུཉཱཎཾ, ཙནྡོ ཝིཡ ནིབྦཱནཾ, ཨེཀེཀསྶ ཝཱཏསྶ ཡཐཱཀྐམེན ཝལཱཧཀཝིདྡྷཾསནཾ ཝིཡ ཨེཀེཀསྶ ཨནུལོམཙིཏྟསྶ སཙྩཔཊིཙྪཱདཀཏམཝིནོདནཾ, ཝིགཏཝལཱཧཀེ ནབྷེ ཏསྶ པུརིསསྶ ཝིསུདྡྷཙནྡདསྶནཾ ཝིཡ ཝིགཏེ སཙྩཔཊིཙྪཱདཀེ ཏམེ གོཏྲབྷུཉཱཎསྶ ཝིསུདྡྷནིབྦཱནདསྶནཾ.

ཡཐེཝ ཧི ཏཡོ ཝཱཏཱ ཙནྡཔཊིཙྪཱདཀེ ཝལཱཧཀེཡེཝ ཝིདྡྷཾསེཏུཾ སཀྐོནྟི, ན ཙནྡཾ དཊྛུཾ, ཨེཝཾ ཨནུལོམཱནི སཙྩཔཊིཙྪཱདཀཾ ཏམཉྙེཝ ཝིནོདེཏུཾ སཀྐོནྟི, ན ནིབྦཱནཾ དཊྛུཾ. ཡཐཱ སོ པུརིསོ ཙནྡམེཝ དཊྛུཾ སཀྐོཏི, ན ཝལཱཧཀེ ཝིདྡྷཾསེཏུཾ, ཨེཝཾ གོཏྲབྷུཉཱཎཾ ནིབྦཱནམེཝ དཊྛུཾ སཀྐོཏི, ན ཀིལེསཏམཾ ཝིནོདེཏུཾ. ཏེནེཝ ཙེཏཾ མགྒསྶ ཨཱཝཛྫནནྟི ཝུཙྩཏི. ཏཉྷི ཨནཱཝཛྫནམྤི སམཱནཾ ཨཱཝཛྫནཊྛཱནེ ཋཏྭཱ ‘‘ཨེཝཾ ནིབྦཏྟཱཧཱི’’ཏི མགྒསྶ སཉྙཾ དཏྭཱ ཝིཡ ནིརུཛ྄ཛྷཏི. མགྒོཔི ཏེན དིནྣསཉྙཾ ཨམུཉྩིཏྭཱཝ ཨཝཱིཙིསནྟཏིཝསེན ཏཾ ཉཱཎཾ ཨནུཔྤབནྡྷམཱནོ ཨནིབྦིདྡྷཔུབྦཾ ཨཔདཱལིཏཔུབྦཾ ལོབྷཀྑནྡྷཾ དོསཀྑནྡྷཾ མོཧཀྑནྡྷཾ ནིབྦིཛ྄ཛྷམཱནོཝ པདཱལཡམཱནོཝ ནིབྦཏྟཏི.

༨༠༩. ཏཏྲཱཡཾ ཨུཔམཱ – ཨེཀོ ཀིར ཨིསྶཱསོ ཨཊྛཨུསབྷམཏྟེ པདེསེ ཕལཀསཏཾ ཋཔཱཔེཏྭཱ ཝཏྠེན མུཁཾ ཝེཋེཏྭཱ སརཾ སནྣཧིཏྭཱ ཙཀྐཡནྟེ ཨཊྛཱསི. ཨཉྙོ པུརིསོ ཙཀྐཡནྟཾ ཨཱཝིཛ྄ཛྷིཏྭཱ ཡདཱ ཨིསྶཱསསྶ ཕལཀཾ ཨབྷིམུཁཾ ཧོཏི, ཏདཱ ཏཏྠ དཎྜཀེན སཉྙཾ དེཏི. ཨིསྶཱསོ དཎྜཀསཉྙཾ ཨམུཉྩིཏྭཱཝ སརཾ ཁིཔིཏྭཱ ཕལཀསཏཾ ནིབྦིཛ྄ཛྷཏི. ཏཏྠ དཎྜཀསཉྙཾ ཝིཡ གོཏྲབྷུཉཱཎཾ, ཨིསྶཱསོ ཝིཡ མགྒཉཱཎཾ. ཨིསྶཱསསྶ དཎྜཀསཉྙཾ ཨམུཉྩིཏྭཱཝ ཕལཀསཏནིབྦིཛ྄ཛྷནཾ ཝིཡ མགྒཉཱཎསྶ གོཏྲབྷུཉཱཎེན དིནྣསཉྙཾ ཨམུཉྩིཏྭཱཝ ནིབྦཱནཾ ཨཱརམྨཎཾ ཀཏྭཱ ཨནིབྦིདྡྷཔུབྦཱནཾ ཨཔདཱལིཏཔུབྦཱནཾ ལོབྷདོསམོཧཀྑནྡྷཱནཾ ནིབྦིཛ྄ཛྷནཔདཱལནཾ.

༨༡༠. ན ཀེཝལཉྩེས མགྒོ ལོབྷཀྑནྡྷཱདཱིནཾ ནིབྦིཛ྄ཛྷནམེཝ ཀརོཏི, ཨཔིཙ ཁོ ཨནམཏགྒསཾསཱརཝཊྚདུཀྑསམུདྡཾ སོསེཏི, སབྦཨཔཱཡདྭཱརཱནི པིདཧཏི, སཏྟནྣཾ ཨརིཡདྷནཱནཾ སམྨུཁཱིབྷཱཝཾ ཀརོཏི, ཨཊྛངྒིཀཾ མིཙྪཱམགྒཾ པཛཧཏི, སབྦཝེརབྷཡཱནི ཝཱུཔསམེཏི, སམྨཱསམྦུདྡྷསྶ ཨོརསཔུཏྟབྷཱཝཾ ཨུཔནེཏི ¶ ¶ , ཨཉྙེསཉྩ ཨནེཀསཏཱནཾ ཨཱནིསཾསཱནཾ པཊིལཱབྷཱཡ སཾཝཏྟཏཱིཏི ཨེཝཾ ཨནེཀཱནིསཾསདཱཡཀེན སོཏཱཔཏྟིམགྒེན སམྤཡུཏྟཾ ཉཱཎཾ སོཏཱཔཏྟིམགྒེ ཉཱཎནྟི.

པཋམམགྒཉཱཎཾ ནིཊྛིཏཾ.

སོཏཱཔནྣཔུགྒལཀཐཱ

༨༡༡. ཨིམསྶ པན ཉཱཎསྶ ཨནནྟརཾ ཏསྶེཝ ཝིཔཱཀབྷཱུཏཱནི དྭེ ཏཱིཎི ཝཱ ཕལཙིཏྟཱནི ཨུཔྤཛྫནྟི. ཨནནྟརཝིཔཱཀཏྟཱཡེཝ ཧི ལོཀུཏྟརཀུསལཱནཾ ‘‘སམཱདྷིམཱནནྟརིཀཉྙམཱཧཱུ’’ཏི (ཁུ. པཱ. ༦.༥) ཙ ‘‘དནྡྷཾ ཨཱནནྟརིཀཾ པཱཔུཎཱཏི ཨཱསཝཱནཾ ཁཡཱཡཱ’’ཏི (ཨ. ནི. ༤.༡༦༢) ཙ ཨཱདི ཝུཏྟཾ. ཀེཙི པན ཨེཀཾ དྭེ ཏཱིཎི ཙཏྟཱརི ཝཱ ཕལཙིཏྟཱནཱིཏི ཝདནྟི, ཏཾ ན གཧེཏབྦཾ.

ཨནུལོམསྶ ཧི ཨཱསེཝནནྟེ གོཏྲབྷུཉཱཎཾ ཨུཔྤཛྫཏི. ཏསྨཱ སབྦནྟིམེན པརིཙྪེདེན དྭཱིཧི ཨནུལོམཙིཏྟེཧི བྷཝིཏབྦཾ. ན ཧི ཨེཀཾ ཨཱསེཝནཔཙྩཡཾ ལབྷཏི, སཏྟཙིཏྟཔརམཱ ཙ ཨེཀཱཝཛྫནཝཱིཐི. ཏསྨཱ ཡསྶ དྭེ ཨནུལོམཱནི, ཏསྶ ཏཏིཡཾ གོཏྲབྷུ ཙཏུཏྠཾ མགྒཙིཏྟཾ ཏཱིཎི ཕལཙིཏྟཱནི ཧོནྟི. ཡསྶ ཏཱིཎི ཨནུལོམཱནི, ཏསྶ ཙཏུཏྠཾ གོཏྲབྷུ པཉྩམཾ མགྒཙིཏྟཾ དྭེ ཕལཙིཏྟཱནི ཧོནྟི. ཏེན ཝུཏྟཾ ‘‘དྭེ ཏཱིཎི ཝཱ ཕལཙིཏྟཱནི ཨུཔྤཛྫནྟཱི’’ཏི.

ཀེཙི པན ཡསྶ ཙཏྟཱརི ཨནུལོམཱནི, ཏསྶ པཉྩམཾ གོཏྲབྷུ ཚཊྛཾ མགྒཙིཏྟཾ ཨེཀཾ ཕལཙིཏྟནྟི ཝདནྟི, ཏཾ པན ཡསྨཱ ཙཏུཏྠཾ པཉྩམཾ ཝཱ ཨཔྤེཏི, ན ཏཏོ པརཾ ཨཱསནྣབྷཝངྒཏྟཱཏི པཊིཀྑིཏྟཾ. ཏསྨཱ ན སཱརཏོ པཙྩེཏབྦཾ.

༨༡༢. ཨེཏྟཱཝཏཱ ཙ པནེས སོཏཱཔནྣོ ནཱམ དུཏིཡོ ཨརིཡཔུགྒལོ ཧོཏི. བྷུསཾ པམཏྟོཔི ཧུཏྭཱ སཏྟཀྑཏྟུཾ དེཝེསུ ཙ མནུསྶེསུ ཙ སནྡྷཱཝིཏྭཱ སཾསརིཏྭཱ དུཀྑསྶནྟསྶ ཀརཎསམཏྠོ ཧོཏི. ཕལཔརིཡོསཱནེ པནསྶ ཙིཏྟཾ བྷཝངྒཾ ཨོཏརཏི, ཏཏོ བྷཝངྒཾ ཨུཔཙྪིནྡིཏྭཱ མགྒཔཙྩཝེཀྑཎཏྠཱཡ ཨུཔྤཛྫཏི མནོདྭཱརཱཝཛྫནཾ, ཏསྨིཾ ནིརུདྡྷེ པཊིཔཱཊིཡཱ སཏྟ མགྒཔཙྩཝེཀྑཎཛཝནཱནཱིཏི. པུན བྷཝངྒཾ ཨོཏརིཏྭཱ ཏེནེཝ ནཡེན ¶ ཕལཱདཱིནཾ པཙྩཝེཀྑཎཏྠཱཡ ཨཱཝཛྫནཱདཱིནི ¶ ཨུཔྤཛྫནྟི. ཡེསཾ ཨུཔྤཏྟིཡཱ ཨེས མགྒཾ པཙྩཝེཀྑཏི, ཕལཾ པཙྩཝེཀྑཏི, པཧཱིནཀིལེསེ པཙྩཝེཀྑཏི, ཨཝསིཊྛཀིལེསེ པཙྩཝེཀྑཏི, ནིབྦཱནཾ པཙྩཝེཀྑཏི.

སོ ཧི ‘‘ཨིམིནཱ ཝཏཱཧཾ མགྒེན ཨཱགཏོ’’ཏི མགྒཾ པཙྩཝེཀྑཏི, ཏཏོ ‘‘ཨཡཾ མེ ཨཱནིསཾསོ ལདྡྷོ’’ཏི ཕལཾ པཙྩཝེཀྑཏི. ཏཏོ ‘‘ཨིམེ ནཱམ མེ ཀིལེསཱ པཧཱིནཱ’’ཏི པཧཱིནཀིལེསེ པཙྩཝེཀྑཏི. ཏཏོ ‘‘ཨིམེ ནཱམ མེ ཀིལེསཱ ཨཝསིཊྛཱ’’ཏི ཨུཔརིམགྒཏྟཡཝཛ྄ཛྷེ ཀིལེསེ པཙྩཝེཀྑཏི. ཨཝསཱནེ ཙ ‘‘ཨཡཾ མེ དྷམྨོ ཨཱརམྨཎཏོ པཊིཝིདྡྷོ’’ཏི ཨམཏཾ ནིབྦཱནཾ པཙྩཝེཀྑཏི. ཨིཏི སོཏཱཔནྣསྶ ཨརིཡསཱཝཀསྶ པཉྩ པཙྩཝེཀྑཎཱནི ཧོནྟི. ཡཐཱ ཙ སོཏཱཔནྣསྶ, ཨེཝཾ སཀདཱགཱམིཨནཱགཱམཱིནམྤི. ཨརཧཏོ པན ཨཝསིཊྛཀིལེསཔཙྩཝེཀྑཎཾ ནཱམ ནཏྠཱིཏི. ཨེཝཾ སབྦཱནིཔི ཨེཀཱུནཝཱིསཏི པཙྩཝེཀྑཎཱནི ནཱམ.

ཨུཀྐཊྛཔརིཙྪེདོཡེཝ ཙེསོ. པཧཱིནཱཝསིཊྛཀིལེསཔཙྩཝེཀྑཎཉྷི སེཀྑཱནམྤི ཧོཏི ཝཱ ན ཝཱ. ཏསྶ ཧི པཙྩཝེཀྑཎསྶ ཨབྷཱཝེནེཝ མཧཱནཱམོ བྷགཝནྟཾ པུཙྪི ‘‘ཀོསུ ནཱམ མེ དྷམྨོ ཨཛ྄ཛྷཏྟཾ ཨཔྤཧཱིནོ, ཡེན མེ ཨེཀདཱ ལོབྷདྷམྨཱཔི ཙིཏྟཾ པརིཡཱདཱཡ ཏིཊྛནྟཱི’’ཏི (མ. ནི. ༡.༡༧༥) སབྦཾ ཝིཏྠཱརཏོ ཝེདིཏབྦཾ.

དུཏིཡམགྒཉཱཎཀཐཱ

༨༡༣. ཨེཝཾ པཙྩཝེཀྑིཏྭཱ པན སོ སོཏཱཔནྣོ ཨརིཡསཱཝཀོ ཏསྨིཉྙེཝ ཝཱ ཨཱསནེ ནིསིནྣོ, ཨཔརེན ཝཱ སམཡེན ཀཱམརཱགབྱཱཔཱདཱནཾ ཏནུབྷཱཝཱཡ དུཏིཡཱཡ བྷཱུམིཡཱ པཏྟིཡཱ ཡོགཾ ཀརོཏི. སོ ཨིནྡྲིཡབལབོཛ྄ཛྷངྒཱནི སམོདྷཱནེཏྭཱ ཏདེཝ རཱུཔཝེདནཱསཉྙཱསངྑཱརཝིཉྙཱཎབྷེདཾ སངྑཱརགཏཾ ཨནིཙྩཾ དུཀྑམནཏྟཱཏི ཉཱཎེན པརིམདྡཏི, པརིཝཏྟེཏི, ཝིཔསྶནཱཝཱིཐིཾ ཨོགཱཧཏི. ཏསྶེཝཾ པཊིཔནྣསྶ ཝུཏྟནཡེནེཝ སངྑཱརུཔེཀྑཱཝསཱནེ ཨེཀཱཝཛྫནེན ཨནུལོམགོཏྲབྷུཉཱཎེསུ ཨུཔྤནྣེསུ གོཏྲབྷུཨནནྟརཾ སཀདཱགཱམིམགྒོ ཨུཔྤཛྫཏི. ཏེན སམྤཡུཏྟཾ ཉཱཎཾ སཀདཱགཱམིམགྒེ ཉཱཎནྟི.

དུཏིཡཉཱཎཾ ནིཊྛིཏཾ.

ཏཏིཡམགྒཉཱཎཀཐཱ

༨༡༤. ཨིམསྶཱཔི ¶ ¶ ཉཱཎསྶ ཨནནྟརཾ ཝུཏྟནཡེནེཝ ཕལཙིཏྟཱནི ཝེདིཏབྦཱནི. ཨེཏྟཱཝཏཱ ཙེས སཀདཱགཱམཱི ནཱམ ཙཏུཏྠོ ཨརིཡཔུགྒལོ ཧོཏི སཀིཾདེཝ ཨིམཾ ལོཀཾ ཨཱགནྟྭཱ དུཀྑསྶནྟཀརཎསམཏྠོ. ཏཏོ པརཾ པཙྩཝེཀྑཎཾ ཝུཏྟནཡམེཝ.

ཨེཝཾ པཙྩཝེཀྑིཏྭཱ ཙ སོ སཀདཱགཱམཱི ཨརིཡསཱཝཀོ ཏསྨིཉྙེཝ ཝཱ ཨཱསནེ ནིསིནྣོ ཨཔརེན ཝཱ སམཡེན ཀཱམརཱགབྱཱཔཱདཱནཾ ཨནཝསེསཔྤཧཱནཱཡ ཏཏིཡཱཡ བྷཱུམིཡཱ པཏྟིཡཱ ཡོགཾ ཀརོཏི, སོ ཨིནྡྲིཡབལབོཛ྄ཛྷངྒཱནི སམོདྷཱནེཏྭཱ ཏདེཝ སངྑཱརགཏཾ ཨནིཙྩཾ དུཀྑམནཏྟཱཏི ཉཱཎེན པརིམདྡཏི, པརིཝཏྟེཏི, ཝིཔསྶནཱཝཱིཐིཾ ཨོགཱཧཏི. ཏསྶེཝཾ པཊིཔནྣསྶ ཝུཏྟནཡེནེཝ སངྑཱརུཔེཀྑཱཝསཱནེ ཨེཀཱཝཛྫནེན ཨནུལོམགོཏྲབྷུཉཱཎེསུ ཨུཔྤནྣེསུ གོཏྲབྷུཨནནྟརཾ ཨནཱགཱམིམགྒོ ཨུཔྤཛྫཏི, ཏེན སམྤཡུཏྟཾ ཉཱཎཾ ཨནཱགཱམིམགྒེ ཉཱཎནྟི.

ཏཏིཡཉཱཎཾ ནིཊྛིཏཾ.

ཙཏུཏྠམགྒཉཱཎཀཐཱ

༨༡༥. ཨིམསྶཔི ཉཱཎསྶ ཨནནྟརཾ ཝུཏྟནཡེནེཝ ཕལཙིཏྟཱནི ཝེདིཏབྦཱནི. ཨེཏྟཱཝཏཱ ཙེས ཨནཱགཱམཱི ནཱམ ཚཊྛོ ཨརིཡཔུགྒལོ ཧོཏི ཨོཔཔཱཏིཀོ ཏཏྠཔརིནིབྦཱཡཱི ཨནཱཝཏྟིདྷམྨོ པཊིསནྡྷིཝསེན ཨིམཾ ལོཀཾ པུན ཨནཱགནྟཱ. ཏཏོ པརཾ པཙྩཝེཀྑཎཾ ཝུཏྟནཡམེཝ.

ཨེཝཾ པཙྩཝེཀྑིཏྭཱ ཙ སོ ཨནཱགཱམཱི ཨརིཡསཱཝཀོ ཏསྨིཉྙེཝ ཝཱ ཨཱསནེ ནིསིནྣོ, ཨཔརེན ཝཱ སམཡེན རཱུཔཱརཱུཔརཱགམཱནཨུདྡྷཙྩཨཝིཛྫཱནཾ ཨནཝསེསཔྤཧཱནཱཡ ཙཏུཏྠཱཡ བྷཱུམིཡཱ པཏྟིཡཱ ཡོགཾ ཀརོཏི, སོ ཨིནྡྲིཡབལབོཛ྄ཛྷངྒཱནི སམོདྷཱནེཏྭཱ ཏདེཝ སངྑཱརགཏཾ ཨནིཙྩཾ དུཀྑམནཏྟཱཏི ཉཱཎེན པརིམདྡཏི, པརིཝཏྟེཏི, ཝིཔསྶནཱཝཱིཐིཾ ཨོགཱཧཏི. ཏསྶེཝཾ པཊིཔནྣསྶ ཝུཏྟནཡེནེཝ སངྑཱརུཔེཀྑཱཝསཱནེ ཨེཀཱཝཛྫནེན ཨནུལོམགོཏྲབྷུཉཱཎེསུ ¶ ཨུཔྤནྣེསུ གོཏྲབྷུཨནནྟརཾ ཨརཧཏྟམགྒོ ཨུཔྤཛྫཏི, ཏེན སམྤཡུཏྟཾ ཉཱཎཾ ཨརཧཏྟམགྒེ ཉཱཎནྟི.

ཙཏུཏྠཉཱཎཾ ནིཊྛིཏཾ.

ཨརཧནྟཔུགྒལཀཐཱ

༨༡༦. ཨིམསྶཔི ¶ ཉཱཎསྶ ཨནནྟརཾ ཝུཏྟནཡེནེཝ ཕལཙིཏྟཱནི ཝེདིཏབྦཱནི. ཨེཏྟཱཝཏཱ ཙེས ཨརཧཱ ནཱམ ཨཊྛམོ ཨརིཡཔུགྒལོ ཧོཏི མཧཱཁཱིཎཱསཝོ ཨནྟིམདེཧདྷཱརཱི ཨོཧིཏབྷཱརོ ཨནུཔྤཏྟསདཏྠོ པརིཀྑཱིཎབྷཝསཾཡོཛནོ སམྨཱདཉྙཱ ཝིམུཏྟོ སདེཝཀསྶ ལོཀསྶ ཨགྒདཀྑིཎེཡྻོཏི.

ཨིཏི ཡཾ ཏཾ ཝུཏྟཾ ‘‘སོཏཱཔཏྟིམགྒོ སཀདཱགཱམིམགྒོ ཨནཱགཱམིམགྒོ ཨརཧཏྟམགྒོཏི ཨིམེསུ པན ཙཏཱུསུ མགྒེསུ ཉཱཎཾ ཉཱཎདསྶནཝིསུདྡྷི ནཱམཱ’’ཏི, ཏཾ ཨིམཱནི ཨིམིནཱ ཨནུཀྐམེན པཏྟབྦཱནི ཙཏྟཱརི ཉཱཎཱནི སནྡྷཱཡ ཝུཏྟཾ.

བོདྷིཔཀྑིཡཀཐཱ

༨༡༧. ཨིདཱནི ཨིམིསྶཱཡེཝ ཙཏུཉཱཎཱཡ ཉཱཎདསྶནཝིསུདྡྷིཡཱ ཨཱནུབྷཱཝཝིཛཱནནཏྠཾ –

པརིཔུཎྞབོདྷིཔཀྑིཡ, བྷཱཝོ ཝུཊྛཱནབལསམཱཡོགོ;

ཡེ ཡེན པཧཱཏབྦཱ, དྷམྨཱ ཏེསཾ པཧཱནཉྩ.

ཀིཙྩཱནི པརིཉྙཱདཱིནི, ཡཱནི ཝུཏྟཱནི ཨབྷིསམཡཀཱལེ;

ཏཱནི ཙ ཡཐཱསབྷཱཝེན, ཛཱནིཏབྦཱནི སབྦཱནཱིཏི.

༨༡༨. ཏཏྠ པརིཔུཎྞབོདྷིཔཀྑིཡ, བྷཱཝོཏི བོདྷིཔཀྑིཡཱནཾ པརིཔུཎྞབྷཱཝོ. ཙཏྟཱརོ སཏིཔཊྛཱནཱ, ཙཏྟཱརོ སམྨཔྤདྷཱནཱ, ཙཏྟཱརོ ཨིདྡྷིཔཱདཱ, པཉྩིནྡྲིཡཱནི, པཉྩ བལཱནི, སཏྟ བོཛ྄ཛྷངྒཱ, ཨརིཡོ ཨཊྛངྒིཀོ མགྒོཏི ཧི ཨིམེ སཏྟཏིཾས དྷམྨཱ བུཛ྄ཛྷནཊྛེན བོདྷོཏི ལདྡྷནཱམསྶ ཨརིཡམགྒསྶ པཀྑེ བྷཝཏྟཱ བོདྷིཔཀྑིཡཱ ནཱམ. པཀྑེ བྷཝཏྟཱཏི ཨུཔཀཱརབྷཱཝེ ཋིཏཏྟཱ.

༨༡༩. ཏེསུ ¶ ཏེསུ ཨཱརམྨཎེསུ ཨོཀྑནྡིཏྭཱ པཀྑནྡིཏྭཱ ཨུཔཊྛཱནཏོ པཊྛཱནཾ. སཏིཡེཝ པཊྛཱནཾ སཏིཔཊྛཱནཾ. ཀཱཡཝེདནཱཙིཏྟདྷམྨེསུ པནསྶཱ ཨསུབྷ-དུཀྑ-ཨནིཙྩ-ཨནཏྟཱཀཱརགཧཎཝསེན ¶ སུབྷ-སུཁ-ནིཙྩ-ཨཏྟ-སཉྙཱཔཧཱནཀིཙྩསཱདྷནཝསེན ཙ པཝཏྟིཏོ ཙཏུདྷཱ བྷེདོ ཧོཏི. ཏསྨཱ ཙཏྟཱརོ སཏིཔཊྛཱནཱཏི ཝུཙྩནྟི.

༨༢༠. པདཧནྟི ཨེཏེནཱཏི པདྷཱནཾ. སོབྷནཾ པདྷཱནཾ སམྨཔྤདྷཱནཾ. སམྨཱ ཝཱ པདཧནྟི ཨེཏེནཱཏི སམྨཔྤདྷཱནཾ. སོབྷནཾ ཝཱ ཏཾ ཀིལེསཝིརཱུཔཏྟཝིརཧཏོ པདྷཱནཉྩ ཧིཏསུཁནིཔྥཱདཀཏྟེན སེཊྛབྷཱཝཱཝཧནཏོ པདྷཱནབྷཱཝཀཱརཎཏོ ཙཱཏི སམྨཔྤདྷཱནཾ. ཝཱིརིཡསྶེཏཾ ཨདྷིཝཙནཾ. ཏཡིདཾ ཨུཔྤནྣཱནུཔྤནྣཱནཾ ཨཀུསལཱནཾ པཧཱནཱནུཔྤཏྟིཀིཙྩཾ ཨནུཔྤནྣུཔྤནྣཱནཉྩ ཀུསལཱནཾ ཨུཔྤཏྟིཊྛིཏིཀིཙྩཾ སཱདྷཡཏཱིཏི ཙཏུབྦིདྷཾ ཧོཏི, ཏསྨཱ ཙཏྟཱརོ སམྨཔྤདྷཱནཱཏི ཝུཙྩནྟི.

༨༢༡. པུབྦེ ཝུཏྟེན ཨིཛ྄ཛྷནཊྛེན ཨིདྡྷི. ཏསྶཱ སམྤཡུཏྟཱཡ པུབྦངྒམཊྛེན ཕལབྷཱུཏཱཡ པུབྦབྷཱགཀཱརཎཊྛེན ཙ ཨིདྡྷིཡཱ པཱདོཏི ཨིདྡྷིཔཱདོ. སོ ཚནྡཱདིཝསེན ཙཏུབྦིདྷོ ཧོཏི, ཏསྨཱ ཙཏྟཱརོ ཨིདྡྷིཔཱདཱཏི ཝུཙྩནྟི. ཡཐཱཧ – ‘‘ཙཏྟཱརོ ཨིདྡྷིཔཱདཱ ཚནྡིདྡྷིཔཱདོ ཙིཏྟིདྡྷིཔཱདོ ཝཱིརིཡིདྡྷིཔཱདོ ཝཱིམཾསིདྡྷིཔཱདོ’’ཏི (ཝིབྷ. ༤༥༧). ཨིམེ ལོཀུཏྟརཱཝ. ལོཀིཡཱ པན ‘‘ཚནྡཉྩེ བྷིཀྑུ ཨདྷིཔཏིཾ ཀརིཏྭཱ ལབྷཏི སམཱདྷིཾ, ལབྷཏི ཙིཏྟསྶ ཨེཀགྒཏཾ. ཨཡཾ ཝུཙྩཏི ཚནྡསམཱདྷཱི’’ཏིཨཱདིཝཙནཏོ (ཝིབྷ. ༤༣༢) ཚནྡཱདིཨདྷིཔཏིཝསེན པཊིལདྡྷདྷམྨཱཔི ཧོནྟི.

༨༢༢. ཨསྶདྡྷིཡཀོསཛྫཔམཱདཝིཀྑེཔསམྨོཧཱནཾ ཨབྷིབྷཝནཏོ ཨབྷིབྷཝནསངྑཱཏེན ཨདྷིཔཏིཡཊྛེན ཨིནྡྲིཡཾ. ཨསྶདྡྷིཡཱདཱིཧི ཙ ཨནབྷིབྷཝནཱིཡཏོ ཨཀམྤིཡཊྛེན བལཾ. ཏདུབྷཡམྤི སདྡྷཱདིཝསེན པཉྩཝིདྷཾ ཧོཏི, ཏསྨཱ པཉྩིནྡྲིཡཱནི པཉྩ བལཱནཱིཏི ཝུཙྩནྟི.

༨༢༣. བུཛ྄ཛྷནཀསཏྟསྶ པན ཨངྒབྷཱཝེན སཏིཨཱདཡོ སཏྟ བོཛ྄ཛྷངྒཱ. ནིཡྻཱནིཀཊྛེན ཙ སམྨཱདིཊྛིཨཱདཡོ ཨཊྛ མགྒངྒཱ ཧོནྟི. ཏེན ཝུཏྟཾ ‘‘སཏྟ བོཛ྄ཛྷངྒཱ ཨརིཡོ ཨཊྛངྒིཀོ མགྒོ’’ཏི.

༨༢༤. ཨིཏི ¶ ཨིམེ སཏྟཏིཾས བོདྷིཔཀྑིཡདྷམྨཱ པུབྦབྷཱགེ ལོཀིཡཝིཔསྶནཱཡ ཝཏྟམཱནཱཡ ཙུདྡསཝིདྷེན ཀཱཡཾ པརིགྒཎྷཏོ ཙ ཀཱཡཱནུཔསྶནཱསཏིཔཊྛཱནཾ, ནཝཝིདྷེན ཝེདནཾ པརིགྒཎྷཏོ ཙ ཝེདནཱནུཔསྶནཱསཏིཔཊྛཱནཾ, སོལ༹སཝིདྷེན ཙིཏྟཾ པརིགྒཎྷཏོ ཙ ཙིཏྟཱནུཔསྶནཱསཏིཔཊྛཱནཾ, པཉྩཝིདྷེན དྷམྨེ པརིགྒཎྷཏོ ཙ དྷམྨཱནུཔསྶནཱསཏིཔཊྛཱནཾ. ཨིམསྨིཾ ཨཏྟབྷཱཝེ ¶ ཨནུཔྤནྣཔུབྦཾ པརསྶ ཨུཔྤནྣཾ ཨཀུསལཾ དིསྭཱ ‘‘ཡཐཱ པཊིཔནྣསྶེཏཾ ཨུཔྤནྣཾ, ན ཏཐཱ པཊིཔཛྫིསྶཱམི ཨེཝཾ མེ ཨེཏཾ ནུཔྤཛྫིསྶཏཱི’’ཏི, ཏསྶ ཨནུཔྤཱདཱཡ ཝཱཡམནཀཱལེ པཋམཾ སམྨཔྤདྷཱནཾ. ཨཏྟནོ སམུདཱཙཱརཔྤཏྟཾ ཨཀུསལཾ དིསྭཱ ཏསྶ པཧཱནཱཡ ཝཱཡམནཀཱལེ དུཏིཡཾ. ཨིམསྨིཾ ཨཏྟབྷཱཝེ ཨནུཔྤནྣཔུབྦཾ ཛྷཱནཾ ཝཱ ཝིཔསྶནཾ ཝཱ ཨུཔྤཱདེཏུཾ ཝཱཡམནྟསྶ ཏཏིཡཾ. ཨུཔྤནྣཾ ཡཐཱ ན པརིཧཱཡཏི, ཨེཝཾ པུནཔྤུནཾ ཨུཔྤཱདེནྟསྶ ཙཏུཏྠཾ སམྨཔྤདྷཱནཾ. ཚནྡཾ དྷུརཾ ཀཏྭཱ ཀུསལུཔྤཱདནཀཱལེ ཚནྡིདྡྷིཔཱདོ. མིཙྪཱཝཱཙཱཡ ཝིརམཎཀཱལེ སམྨཱཝཱཙཱཏི ཨེཝཾ ནཱནཱཙིཏྟེསུ ལབྦྷནྟི. ཨིམེསཾ པན ཙཏུནྣཾ ཉཱཎཱནཾ ཨུཔྤཏྟིཀཱལེ ཨེཀཙིཏྟེ ལབྦྷནྟི. ཕལཀྑཎེ ཋཔེཏྭཱ ཙཏྟཱརོ སམྨཔྤདྷཱནེ ཨཝསེསཱ ཏེཏྟིཾས ལབྦྷནྟི.

༨༢༥. ཨེཝཾ ཨེཀཙིཏྟེ ལབྦྷམཱནེསུ ཙེཏེསུ ཨེཀཱཝ ནིབྦཱནཱརམྨཎཱ སཏི ཀཱཡཱདཱིསུ སུབྷསཉྙཱདིཔྤཧཱནཀིཙྩསཱདྷནཝསེན ཙཏྟཱརོ སཏིཔཊྛཱནཱཏི ཝུཙྩཏི. ཨེཀམེཝ ཙ ཝཱིརིཡཾ ཨནུཔྤནྣཱནཾ ཨནུཔྤཱདཱདིཀིཙྩསཱདྷནཝསེན ཙཏྟཱརོ སམྨཔྤདྷཱནཱཏི ཝུཙྩཏི. སེསེསུ པན ཧཱཔནཝཌྜྷནཾ ནཏྠི.

༨༢༦. ཨཔིཙ ཏེསུ –

ནཝ ཨེཀཝིདྷཱ ཨེཀོ, དྭེདྷཱཐ ཙཏུ པཉྩདྷཱ;

ཨཊྛདྷཱ ནཝདྷཱ ཙེཝ, ཨིཏི ཚདྡྷཱ བྷཝནྟི ཏེ.

ནཝ ཨེཀཝིདྷཱཏི ཚནྡོ, ཙིཏྟཾ, པཱིཏི, པསྶདྡྷི, ཨུཔེཀྑཱ, སངྐཔྤོ, ཝཱཙཱ, ཀམྨནྟོ, ཨཱཛཱིཝོཏི ཨིམེ ནཝ ཚནྡིདྡྷིཔཱདཱདིཝསེན ཨེཀཝིདྷཱཝ ཧོནྟི, ན ཨཉྙཾ ཀོཊྛཱསཾ བྷཛནྟི. ཨེཀོ དྭེདྷཱཏི སདྡྷཱ ཨིནྡྲིཡ, བལཝསེན དྭེདྷཱ ཋིཏཱ. ཨཐ ཙཏུ པཉྩདྷཱཏི ཨཐཉྙོ ཨེཀོ ཙཏུདྷཱ, ཨཉྙོ པཉྩདྷཱ ཋིཏོཏི ཨཏྠོ. ཏཏྠ སམཱདྷི ཨེཀོ ཨིནྡྲིཡ, བལ, བོཛ྄ཛྷངྒ, མགྒངྒཝསེན ཙཏུདྷཱ ཋིཏོ. པཉྙཱ ཏེསཉྩ ཙཏུནྣཾ ཨིདྡྷིཔཱདཀོཊྛཱསསྶ ཙ ¶ ཝསེན པཉྩདྷཱ. ཨཊྛདྷཱ ནཝདྷཱ ཙེཝཱཏི ཨཔརོ ཨེཀོ ཨཊྛདྷཱ, ཨེཀོ ནཝདྷཱ ཋིཏོཏི ཨཏྠོ. ཙཏུསཏིཔཊྛཱན, ཨིནྡྲིཡ, བལ, བོཛ྄ཛྷངྒ, མགྒངྒཝསེན སཏི ཨཊྛདྷཱ ཋིཏཱ. ཙཏུསམྨཔྤདྷཱན, ཨིདྡྷིཔཱད, ཨིནྡྲིཡ, བལ, བོཛ྄ཛྷངྒ, མགྒངྒཝསེན ཝཱིརིཡཾ ནཝདྷཱཏི. ཨེཝཾ –

ཙུདྡསེཝ ¶ ཨསམྦྷིནྣཱ, ཧོནྟེཏེ བོདྷིཔཀྑིཡཱ;

ཀོཊྛཱསཏོ སཏྟཝིདྷཱ, སཏྟཏིཾསཔྤབྷེདཏོ.

སཀིཙྩནིཔྥཱདནཏོ, སརཱུཔེན ཙ ཝུཏྟིཏོ;

སབྦེཝ ཨརིཡམགྒསྶ, སམྦྷཝེ སམྦྷཝནྟི ཏེཏི.

ཨེཝཾ ཏཱཝེཏྠ པརིཔུཎྞབོདྷིཔཀྑིཡབྷཱཝོ ཛཱནིཏབྦོ.

ཝུཊྛཱནབལསམཱཡོགཀཐཱ

༨༢༧. ཝུཊྛཱནབལསམཱཡོགོཏི ཝུཊྛཱནཉྩེཝ བལསམཱཡོགོ ཙ. ལོཀིཡཝིཔསྶནཱ ཧི ནིམིཏྟཱརམྨཎཏྟཱ ཙེཝ པཝཏྟིཀཱརཎསྶ ཙ སམུདཡསྶ ཨསམུཙྪིནྡནཏོ ནེཝ ནིམིཏྟཱ ན པཝཏྟཱ ཝུཊྛཱཏི. གོཏྲབྷུཉཱཎཾ སམུདཡསྶ ཨསམུཙྪིནྡནཏོ པཝཏྟཱ ན ཝུཊྛཱཏི. ནིབྦཱནཱརམྨཎཏོ པན ནིམིཏྟཱ ཝུཊྛཱཏཱིཏི ཨེཀཏོ ཝུཊྛཱནཾ ཧོཏི. ཏེནཱཧ ‘‘བཧིདྡྷཱཝུཊྛཱནཝིཝཊྚནེ པཉྙཱ གོཏྲབྷུཉཱཎ’’ནྟི (པཊི. མ. མཱཏིཀཱ ༡.༡༠). ཏཐཱ ‘‘ཨུཔྤཱདཱ ཝིཝཊྚིཏྭཱ ཨནུཔྤཱདཾ པཀྑནྡཏཱིཏི གོཏྲབྷུ, པཝཏྟཱ ཝིཝཊྚིཏྭཱ’’ཏི (པཊི. མ. ༡.༥༩) སབྦཾ ཝེདིཏབྦཾ. ཨིམཱནི པན ཙཏྟཱརིཔི ཉཱཎཱནི ཨནིམིཏྟཱརམྨཎཏྟཱ ནིམིཏྟཏོ ཝུཊྛཧནྟི, སམུདཡསྶ སམུཙྪིནྡནཏོ པཝཏྟཱ ཝུཊྛཧནྟཱིཏི དུབྷཏོ ཝུཊྛཱནཱནི ཧོནྟི.

ཏེན ཝུཏྟཾ –

‘‘ཀཐཾ དུབྷཏོ ཝུཊྛཱནཝིཝཊྚནེ པཉྙཱ མགྒེ ཉཱཎཾ?

‘‘སོཏཱཔཏྟིམགྒཀྑཎེ དསྶནཊྛེན སམྨཱདིཊྛི མིཙྪཱདིཊྛིཡཱ ཝུཊྛཱཏི, ཏདནུཝཏྟཀཀིལེསེཧི ཙ ཁནྡྷེཧི ཙ ཝུཊྛཱཏི, བཧིདྡྷཱ ཙ སབྦནིམིཏྟེཧི ཝུཊྛཱཏི. ཏེན ཝུཙྩཏི དུབྷཏོ ཝུཊྛཱནཝིཝཊྚནེ པཉྙཱ མགྒེ ཉཱཎཾ. ཨབྷིནིརོཔནཊྛེན སམྨཱསངྐཔྤོ མིཙྪཱསངྐཔྤཱ…པེ… པརིགྒཧཊྛེན སམྨཱཝཱཙཱ མིཙྪཱཝཱཙཱཡ. སམུཊྛཱནཊྛེན སམྨཱཀམྨནྟོ. ཝོདཱནཊྛེན སམྨཱཨཱཛཱིཝོ. པགྒཧཊྛེན སམྨཱཝཱཡཱམོ ¶ . ཨུཔཊྛཱནཊྛེན སམྨཱསཏི. ཨཝིཀྑེཔཊྛེན སམྨཱསམཱདྷི མིཙྪཱསམཱདྷིཏོ ཝུཊྛཱཏི, ཏདནུཝཏྟཀཀིལེསེཧི ཙ ¶ ཁནྡྷེཧི ཙ ཝུཊྛཱཏི, བཧིདྡྷཱ ཙ སབྦནིམིཏྟེཧི ཝུཊྛཱཏི. ཏེན ཝུཙྩཏི ‘དུབྷཏོ ཝུཊྛཱནཝིཝཊྚནེ པཉྙཱ མགྒེ ཉཱཎ’ནྟི.

‘‘སཀདཱགཱམིམགྒཀྑཎེ དསྶནཊྛེན སམྨཱདིཊྛི…པེ… ཨཝིཀྑེཔཊྛེན སམྨཱསམཱདྷི ཨོལཱ༹རིཀཱ ཀཱམརཱགསཾཡོཛནཱ པཊིགྷསཾཡོཛནཱ ཨོལཱ༹རིཀཱ ཀཱམརཱགཱནུསཡཱ པཊིགྷཱནུསཡཱ ཝུཊྛཱཏི…པེ….

‘‘ཨནཱགཱམིམགྒཀྑཎེ དསྶནཊྛེན སམྨཱདིཊྛི…པེ… ཨཝིཀྑེཔཊྛེན སམྨཱསམཱདྷི ཨནུསཧགཏཱ ཀཱམརཱགསཾཡོཛནཱ པཊིགྷསཾཡོཛནཱ ཨནུསཧགཏཱ ཀཱམརཱགཱནུསཡཱ པཊིགྷཱནུསཡཱ ཝུཊྛཱཏི…པེ….

‘‘ཨརཧཏྟམགྒཀྑཎེ དསྶནཊྛེན སམྨཱདིཊྛི…པེ… ཨཝིཀྑེཔཊྛེན སམྨཱསམཱདྷི རཱུཔརཱགཱ ཨརཱུཔརཱགཱ མཱནཱ ཨུདྡྷཙྩཱ ཨཝིཛྫཱཡ མཱནཱནུསཡཱ བྷཝརཱགཱནུསཡཱ ཨཝིཛྫཱནུསཡཱ ཝུཊྛཱཏི, ཏདནུཝཏྟཀཀིལེསེཧི ཙ ཁནྡྷེཧི ཙ ཝུཊྛཱཏི, བཧིདྡྷཱ ཙ སབྦནིམིཏྟེཧི ཝུཊྛཱཏི. ཏེན ཝུཙྩཏི ‘དུབྷཏོ ཝུཊྛཱནཝིཝཊྚནེ པཉྙཱ མགྒེ ཉཱཎ’’’ནྟི (པཊི. མ. ༡.༦༡).

༨༢༨. ལོཀིཡཱནཉྩ ཨཊྛནྣཾ སམཱཔཏྟཱིནཾ བྷཱཝནཱཀཱལེ སམཐབལཾ ཨདྷིཀཾ ཧོཏི. ཨནིཙྩཱནུཔསྶནཱདཱིནཾ བྷཱཝནཱཀཱལེ ཝིཔསྶནཱབལཾ. ཨརིཡམགྒཀྑཎེ པན ཡུགནདྡྷཱ ཏེ དྷམྨཱ པཝཏྟནྟི ཨཉྙམཉྙཾ ཨནཏིཝཏྟནཊྛེན. ཏསྨཱ ཨིམེསུ ཙཏཱུསུཔི ཉཱཎེསུ ཨུབྷཡབལསམཱཡོགོ ཧོཏི. ཡཐཱཧ –

‘‘ཨུདྡྷཙྩསཧགཏཀིལེསེཧི ཙ ཁནྡྷེཧི ཙ ཝུཊྛཧཏོ ཙིཏྟསྶ ཨེཀགྒཏཱ ཨཝིཀྑེཔོ སམཱདྷི ནིརོདྷགོཙརོ, ཨཝིཛྫཱསཧགཏཀིལེསེཧི ཙ ཁནྡྷེཧི ཙ ཝུཊྛཧཏོ ཨནུཔསྶནཊྛེན ཝིཔསྶནཱ ནིརོདྷགོཙརཱ. ཨིཏི ཝུཊྛཱནཊྛེན སམཐཝིཔསྶནཱ ཨེཀརསཱ ¶ ཧོནྟི, ཡུགནདྡྷཱ ཧོནྟི, ཨཉྙམཉྙཾ ནཱཏིཝཏྟནྟཱིཏི. ཏེན ཝུཙྩཏི ཝུཊྛཱནཊྛེན སམཐཝིཔསྶནཾ ཡུགནདྡྷཾ བྷཱཝེཏཱི’’ཏི (པཊི. མ. ༢.༥).

ཨེཝམེཏྠ ཝུཊྛཱནབལསམཱཡོགོ ཝེདིཏབྦོ.

པཧཱཏབྦདྷམྨཔཧཱནཀཐཱ

༨༢༩. ཡེ ¶ ཡེན པཧཱཏབྦཱ དྷམྨཱ, ཏེསཾ པཧཱནཉྩཱཏི ཨིམེསུ པན ཙཏཱུསུ ཉཱཎེསུ ཡེ དྷམྨཱ ཡེན ཉཱཎེན པཧཱཏབྦཱ, ཏེསཾ པཧཱནཉྩ ཛཱནིཏབྦཾ. ཨེཏཱནི ཧི ཡཐཱཡོགཾ སཾཡོཛནཀིལེསམིཙྪཏྟལོཀདྷམྨམཙྪརིཡཝིཔལླཱསགནྠཨགཏིཨཱསཝཨོགྷཡོགནཱིཝརཎཔརཱམཱསཨུཔཱདཱནཨནུསཡམལཨཀུསལཀམྨཔཐཙིཏྟུཔྤཱདསངྑཱཏཱནཾ དྷམྨཱནཾ པཧཱནཀརཱནི.

ཏཏྠ སཾཡོཛནཱནཱིཏི ཁནྡྷེཧི ཁནྡྷཱནཾ ཕལེན ཀམྨསྶ དུཀྑེན ཝཱ སཏྟཱནཾ སཾཡོཛཀཏྟཱ རཱུཔརཱགཱདཡོ དས དྷམྨཱ ཝུཙྩནྟི. ཡཱཝཉྷི ཏེ, ཏཱཝ ཨེཏེསཾ ཨནུཔརམོཏི. ཏཏྲཱཔི རཱུཔརཱགོ ཨརཱུཔརཱགོ མཱནོ ཨུདྡྷཙྩཾ ཨཝིཛྫཱཏི ཨིམེ པཉྩ ཨུདྡྷཾནིབྦཏྟནཀཁནྡྷཱདིསཾཡོཛཀཏྟཱ ཨུདྡྷཾབྷཱགིཡསཾཡོཛནཱནི ནཱམ. སཀྐཱཡདིཊྛི ཝིཙིཀིཙྪཱ སཱིལབྦཏཔརཱམཱསོ ཀཱམརཱགོ པཊིགྷོཏི ཨིམེ པཉྩ ཨདྷོནིབྦཏྟནཀཁནྡྷཱདིསཾཡོཛཀཏྟཱ ཨདྷོབྷཱགིཡསཾཡོཛནཱནི ནཱམ.

ཀིལེསཱཏི སཡཾ སཾཀིལིཊྛཏྟཱ སམྤཡུཏྟདྷམྨཱནཉྩ སཾཀིལེསིཀཏྟཱ ལོབྷོ དོསོ མོཧོ མཱནོ དིཊྛི ཝིཙིཀིཙྪཱ ཐིནཾ ཨུདྡྷཙྩཾ ཨཧིརིཀཾ ཨནོཏྟཔྤནྟི ཨིམེ དས དྷམྨཱ.

མིཙྪཏྟཱཏི མིཙྪཱཔཝཏྟནཏོ མིཙྪཱདིཊྛི མིཙྪཱསངྐཔྤོ མིཙྪཱཝཱཙཱ མིཙྪཱཀམྨནྟོ མིཙྪཱཨཱཛཱིཝོ མིཙྪཱཝཱཡཱམོ མིཙྪཱསཏི མིཙྪཱསམཱདྷཱིཏི ཨིམེ ཨཊྛ དྷམྨཱ. མིཙྪཱཝིམུཏྟིམིཙྪཱཉཱཎེཧི ཝཱ སདྡྷིཾ དས.

ལོཀདྷམྨཱཏི ལོཀཔྤཝཏྟིཡཱ སཏི ཨནུཔརམདྷམྨཀཏྟཱ ལཱབྷོ ཨལཱབྷོ ཡསོ ཨཡསོ སུཁཾ དུཀྑཾ ནིནྡཱ པསཾསཱཏི ཨིམེ ཨཊྛ. ཨིདྷ པན ཀཱརཎོཔཙཱརེན ལཱབྷཱདིཝཏྠུཀསྶ ཨནུནཡསྶ ཨལཱབྷཱདིཝཏྠུཀསྶ པཊིགྷསྶ ཙེཏཾ ལོཀདྷམྨགྒཧཎེན གཧཎཾ ཀཏནྟི ཝེདིཏབྦཾ.

མཙྪརིཡཱནཱིཏི ¶ ཨཱཝཱསམཙྪརིཡཾ ཀུལམཙྪརིཡཾ ལཱབྷམཙྪརིཡཾ དྷམྨམཙྪརིཡཾ ཝཎྞམཙྪརིཡནྟི ཨིམཱསུ ཨཱཝཱསཱདཱིསུ ཨཉྙེསཾ སཱདྷཱརཎབྷཱཝཾ ཨསཧནཱཀཱརེན པཝཏྟཱནི པཉྩ མཙྪརིཡཱནི.

ཝིཔལླཱསཱཏི ¶ ཨནིཙྩདུཀྑཨནཏྟཨསུབྷེསུཡེཝ ཝཏྠཱུསུ ‘‘ནིཙྩཾ སུཁཾ ཨཏྟཱ སུབྷ’’ནྟི ཨེཝཾ པཝཏྟོ སཉྙཱཝིཔལླཱསོ ཙིཏྟཝིཔལླཱསོ དིཊྛིཝིཔལླཱསོཏི ཨིམེ ཏཡོ.

གནྠཱཏི ནཱམཀཱཡསྶ ཙེཝ རཱུཔཀཱཡསྶ ཙ གནྠནཏོ ཨབྷིཛ྄ཛྷཱདཡོ ཙཏྟཱརོ. ཏཐཱ ཧི ཏེ ཨབྷིཛ྄ཛྷཱ ཀཱཡགནྠོ, བྱཱཔཱདོ ཀཱཡགནྠོ, སཱིལབྦཏཔརཱམཱསོ ཀཱཡགནྠོ, ཨིདཾསཙྩཱབྷིནིཝེསོ ཀཱཡགནྠོ ཨིཙྩེཝ ཝུཏྟཱ.

ཨགཏཱིཏི ཚནྡདོསམོཧབྷཡེཧི ཨཀཏྟབྦཀརཎསྶ, ཀཏྟབྦཱཀརཎསྶ ཙ ཨདྷིཝཙནཾ. ཏཉྷི ཨརིཡེཧི ཨགནྟབྦཏྟཱ ཨགཏཱིཏི ཝུཙྩཏི.

ཨཱསཝཱཏི ཨཱརམྨཎཝསེན ཨཱགོཏྲབྷུཏོ, ཨཱབྷཝགྒཏོ ཙ སཝནཱ, ཨསཾཝུཏེཧི ཝཱ དྭཱརེཧི གྷཊཚིདྡེཧི ཨུདཀཾ ཝིཡ སཝནཏོ ནིཙྩཔགྒྷརཎཊྛེན སཾསཱརདུཀྑསྶ ཝཱ སཝནཏོ ཀཱམརཱགབྷཝརཱགམིཙྪཱདིཊྛིཨཝིཛྫཱནམེཏཾ ཨདྷིཝཙནཾ.

བྷཝསཱགརེ ཨཱཀཌྜྷནཊྛེན དུརུཏྟརཎཊྛེན ཙ ཨོགྷཱཏིཔི, ཨཱརམྨཎཝིཡོགསྶ ཙེཝ དུཀྑཝིཡོགསྶ ཙ ཨཔྤདཱནཏོ ཡོགཱཏིཔི ཏེསཉྙེཝ ཨདྷིཝཙནཾ.

ནཱིཝརཎཱནཱིཏི ཙིཏྟསྶ ཨཱཝརཎནཱིཝརཎཔཊིཙྪཱདནཊྛེན ཀཱམཙྪནྡཱདཡོ པཉྩ.

པརཱམཱསོཏི ཏསྶ ཏསྶ དྷམྨསྶ སབྷཱཝཾ ཨཏིཀྐམྨ པརཏོ ཨབྷཱུཏཾ སབྷཱཝཾ ཨཱམསནཱཀཱརེན པཝཏྟནཏོ མིཙྪཱདིཊྛིཡཱ ཨེཏཾ ཨདྷིཝཙནཾ.

ཨུཔཱདཱནཱནཱིཏི སབྦཱཀཱརེན པཊིཙྩསམུཔྤཱདནིདྡེསེ ཝུཏྟཱནི ཀཱམུཔཱདཱནཱདཱིནི ཙཏྟཱརི.

ཨནུསཡཱཏི ཐཱམགཏཊྛེན ཀཱམརཱགཱནུསཡོ, པཊིགྷ, མཱན, དིཊྛི, ཝིཙིཀིཙྪཱ, བྷཝརཱག, ཨཝིཛྫཱནུསཡོཏི ཨེཝཾ ཝུཏྟཱ ཀཱམརཱགཱདཡོ སཏྟ ¶ . ཏེ ཧི ཐཱམགཏཏྟཱ པུནཔྤུནཾ ཀཱམརཱགཱདཱིནཾ ཨུཔྤཏྟིཧེཏུབྷཱཝེན ཨནུསེནྟིཡེཝཱཏི ཨནུསཡཱ.

མལཱཏི ¶ ཏེལཉྫནཀལལཾ ཝིཡ སཡཉྩ ཨསུདྡྷཏྟཱ, ཨཉྙེསཉྩ ཨསུདྡྷབྷཱཝཀརཎཏོ ལོབྷདོསམོཧཱ ཏཡོ.

ཨཀུསལཀམྨཔཐཱཏི ཨཀུསལཀམྨབྷཱཝེན ཙེཝ དུགྒཏཱིནཉྩ པཐབྷཱཝེན པཱཎཱཏིཔཱཏོ ཨདིནྣཱདཱནཾ ཀཱམེསུམིཙྪཱཙཱརོ མུསཱཝཱདོ པིསུཎཝཱཙཱ ཕརུསཝཱཙཱ སམྥཔྤལཱཔོ ཨབྷིཛ྄ཛྷཱ བྱཱཔཱདོ མིཙྪཱདིཊྛཱིཏི ཨིམེ དས.

ཨཀུསལཙིཏྟུཔྤཱདཱཏི ལོབྷམཱུལཱ ཨཊྛ དོསམཱུལཱ དྭེ མོཧམཱུལཱ དྭེཏི ཨིམེ དྭཱདས.

༨༣༠. ཨིཏི ཨེཏེསཾ སཾཡོཛནཱདཱིནཾ དྷམྨཱནཾ ཨེཏཱནི ཡཐཱཡོགཾ པཧཱནཀརཱནི. ཀཐཾ? སཾཡོཛནེསུ ཏཱཝ སཀྐཱཡདིཊྛི ཝིཙིཀིཙྪཱ སཱིལབྦཏཔརཱམཱསོ ཨཔཱཡགམནཱིཡཱ ཙ ཀཱམརཱགཔཊིགྷཱཏི ཨེཏེ པཉྩ དྷམྨཱ པཋམཉཱཎཝཛ྄ཛྷཱ, སེསཱ ཀཱམརཱགཔཊིགྷཱ ཨོལཱ༹རིཀཱ དུཏིཡཉཱཎཝཛ྄ཛྷཱ, སུཁུམཱ ཏཏིཡཉཱཎཝཛ྄ཛྷཱ, རཱུཔརཱགཱདཡོ པཉྩཔི ཙཏུཏྠཉཱཎཝཛ྄ཛྷཱ ཨེཝ. པརཏོཔི ཙ ཡཏྠ ཡཏྠ ཨེཝསདྡེན ནིཡམཾ ན ཀརིསྶཱམ. ཏཏྠ ཏཏྠ ཡཾ ཡཾ ‘‘ཨུཔརིཉཱཎཝཛ྄ཛྷོ’’ཏི ཝཀྑཱམ, སོ སོ པུརིམཉཱཎེཧི ཧཏཱཔཱཡགམནཱིཡཱདིབྷཱཝོཝ ཧུཏྭཱ ཨུཔརིཉཱཎཝཛ྄ཛྷོ ཧོཏཱིཏི ཝེདིཏབྦོ.

ཀིལེསེསུ དིཊྛིཝིཙིཀིཙྪཱ པཋམཉཱཎཝཛ྄ཛྷཱ, དོསོ ཏཏིཡཉཱཎཝཛ྄ཛྷོ, ལོབྷམོཧམཱནཐིནཨུདྡྷཙྩཨཧིརིཀཨནོཏྟཔྤཱནི ཙཏུཏྠཉཱཎཝཛ྄ཛྷཱནི.

མིཙྪཏྟེསུ མིཙྪཱདིཊྛི མུསཱཝཱདོ མིཙྪཱཀམྨནྟོ མིཙྪཱཨཱཛཱིཝོཏི ཨིམེ པཋམཉཱཎཝཛ྄ཛྷཱ, མིཙྪཱསངྐཔྤོ པིསུཎཝཱཙཱ ཕརུསཝཱཙཱཏི ཨིམེ ཏཏིཡཉཱཎཝཛ྄ཛྷཱ, ཙེཏནཱཡེཝ ཙེཏྠ ཝཱཙཱཏི ཝེདིཏབྦཱ. སམྥཔྤལཱཔམིཙྪཱཝཱཡཱམསཏིསམཱདྷིཝིམུཏྟིཉཱཎཱནི ཙཏུཏྠཉཱཎཝཛ྄ཛྷཱནི.

ལོཀདྷམྨེསུ པཊིགྷོ ཏཏིཡཉཱཎཝཛ྄ཛྷོ, ཨནུནཡོ ཙཏུཏྠཉཱཎཝཛ྄ཛྷོ, ཡསེ ཙ པསཾསཱཡ ཙ ཨནུནཡོ ཙཏུཏྠཉཱཎཝཛ྄ཛྷོཏི ཨེཀེ. མཙྪརིཡཱནི པཋམཉཱཎཝཛ྄ཛྷཱནེཝ.

ཝིཔལླཱསེསུ ¶ ¶ ཨནིཙྩེ ནིཙྩཾ, ཨནཏྟནི ཨཏྟཱཏི ཙ སཉྙཱཙིཏྟདིཊྛིཝིཔལླཱསཱ, དུཀྑེ སུཁཾ, ཨསུབྷེ སུབྷནྟི དིཊྛིཝིཔལླཱསོ ཙཱཏི ཨིམེ པཋམཉཱཎཝཛ྄ཛྷཱ, ཨསུབྷེ སུབྷནྟི སཉྙཱཙིཏྟཝིཔལླཱསཱ ཏཏིཡཉཱཎཝཛ྄ཛྷཱ, དུཀྑེ སུཁནྟི སཉྙཱཙིཏྟཝིཔལླཱསཱ ཙཏུཏྠཉཱཎཝཛ྄ཛྷཱ.

གནྠེསུ སཱིལབྦཏཔརཱམསཨིདཾསཙྩཱབྷིནིཝེསཀཱཡགནྠཱ པཋམཉཱཎཝཛ྄ཛྷཱ, བྱཱཔཱདཀཱཡགནྠོ ཏཏིཡཉཱཎཝཛ྄ཛྷོ, ཨིཏརོ ཙཏུཏྠཉཱཎཝཛ྄ཛྷོ.

ཨགཏི པཋམཉཱཎཝཛ྄ཛྷཱཝ.

ཨཱསཝེསུ དིཊྛཱསཝོ པཋམཉཱཎཝཛ྄ཛྷོ, ཀཱམཱསཝོ ཏཏིཡཉཱཎཝཛ྄ཛྷོ, ཨིཏརེ དྭེ ཙཏུཏྠཉཱཎཝཛ྄ཛྷཱ. ཨོགྷཡོགེསུཔི ཨེསེཝ ནཡོ.

ནཱིཝརཎེསུ ཝིཙིཀིཙྪཱནཱིཝརཎཾ པཋམཉཱཎཝཛ྄ཛྷཾ, ཀཱམཙྪནྡོ བྱཱཔཱདོ ཀུཀྐུཙྩནྟི ཏཱིཎི ཏཏིཡཉཱཎཝཛ྄ཛྷཱནི, ཐིནམིདྡྷཨུདྡྷཙྩཱནི ཙཏུཏྠཉཱཎཝཛ྄ཛྷཱནི.

པརཱམཱསོ པཋམཉཱཎཝཛ྄ཛྷོཝ.

ཨུཔཱདཱནེསུ སབྦེསམྤི ལོཀིཡདྷམྨཱནཾ ཝཏྠུཀཱམཝསེན ཀཱམཱཏི ཨཱགཏཏྟཱ རཱུཔཱརཱུཔརཱགོཔི ཀཱམུཔཱདཱནེ པཏཏི, ཏསྨཱ ཏཾ ཙཏུཏྠཉཱཎཝཛ྄ཛྷཾ, སེསཱནི པཋམཉཱཎཝཛ྄ཛྷཱནི.

ཨནུསཡེསུ དིཊྛིཝིཙིཀིཙྪཱནུསཡཱ པཋམཉཱཎཝཛ྄ཛྷཱཝ, ཀཱམརཱགཔཊིགྷཱནུསཡཱ ཏཏིཡཉཱཎཝཛ྄ཛྷཱ, མཱནབྷཝརཱགཱཝིཛྫཱནུསཡཱ ཙཏུཏྠཉཱཎཝཛ྄ཛྷཱ.

མལེསུ དོསམལཾ ཏཏིཡཉཱཎཝཛ྄ཛྷཾ, ཨིཏརཱནི ཙཏུཏྠཉཱཎཝཛ྄ཛྷཱནི.

ཨཀུསལཀམྨཔཐེསུ པཱཎཱཏིཔཱཏོ ཨདིནྣཱདཱནཾ མིཙྪཱཙཱརོ མུསཱཝཱདོ མིཙྪཱདིཊྛཱིཏི ཨིམེ པཋམཉཱཎཝཛ྄ཛྷཱ ¶ , པིསུཎཝཱཙཱ ཕརུསཝཱཙཱ བྱཱཔཱདོཏི ཏཡོ ཏཏིཡཉཱཎཝཛ྄ཛྷཱ, སམྥཔྤལཱཔཱབྷིཛ྄ཛྷཱ ཙཏུཏྠཉཱཎཝཛ྄ཛྷཱ.

ཨཀུསལཙིཏྟུཔྤཱདེསུ ཙཏྟཱརོ དིཊྛིགཏསམྤཡུཏྟཱ ཝིཙིཀིཙྪཱསམྤཡུཏྟོ ཙཱཏི པཉྩ པཋམཉཱཎཝཛ྄ཛྷཱཝ, དྭེ པཊིགྷསམྤཡུཏྟཱ ཏཏིཡཉཱཎཝཛ྄ཛྷཱ, སེསཱ ཙཏུཏྠཉཱཎཝཛ྄ཛྷཱཏི.

ཡཉྩ ཡེན ཝཛ྄ཛྷཾ, ཏཾ ཏེན པཧཱཏབྦཾ ནཱམ. ཏེན ཝུཏྟཾ ‘‘ཨིཏི ཨེཏེསཾ སཾཡོཛནཱདཱིནཾ དྷམྨཱནཾ ཨེཏཱནི ཡཐཱཡོགཾ པཧཱནཀརཱནཱི’’ཏི.

༨༣༡. ཀིཾ ¶ པནེཏཱནི ཨེཏེ དྷམྨེ ཨཏཱིཏཱནཱགཏེ པཛཧནྟི ཨུདཱཧུ པཙྩུཔྤནྣེཏི. ཀིཾ པནེཏྠ ཡདི ཏཱཝ ཨཏཱིཏཱནཱགཏེ, ཨཕལོ ཝཱཡཱམོ ཨཱཔཛྫཏི. ཀསྨཱ? པཧཱཏབྦཱནཾ ནཏྠིཏཱཡ. ཨཐ པཙྩུཔྤནྣེ, ཏཐཱཔི ཨཕལོ, ཝཱཡཱམེན སདྡྷིཾ པཧཱཏབྦཱནཾ ཨཏྠིཏཱཡ, སཾཀིལེསིཀཱ ཙ མགྒབྷཱཝནཱ ཨཱཔཛྫཏི, ཝིཔྤཡུཏྟཏཱ ཝཱ ཀིལེསཱནཾ, ན ཙ པཙྩུཔྤནྣཀིལེསོ ཙིཏྟཝིཔྤཡུཏྟོ ནཱམ ཨཏྠཱིཏི. ནཱཡཾ ཨཱཝེཎིཀཱ ཙོདནཱ. པཱལི༹ཡཾཡེཝ ཧི ‘‘སྭཱཡཾ ཀིལེསེ པཛཧཏི, ཨཏཱིཏེ ཀིལེསེ པཛཧཏི, ཨནཱགཏེ ཀིལེསེ པཛཧཏི, པཙྩུཔྤནྣེ ཀིལེསེ པཛཧཏཱི’’ཏི ཝཏྭཱ, པུན ‘‘ཧཉྩི ཨཏཱིཏེ ཀིལེསེ པཛཧཏི, ཏེནཧི ཁཱིཎཾ ཁེཔེཏི, ནིརུདྡྷཾ ནིརོདྷེཏི, ཝིགཏཾ ཝིགམེཏི, ཨཏྠངྒཏཾ ཨཏྠངྒམེཏི. ཨཏཱིཏཾ ཡཾ ནཏྠི, ཏཾ པཛཧཏཱི’’ཏི (པཊི. མ. ༣.༢༡) ཙ ཝཏྭཱ, ‘‘ན ཨཏཱིཏེ ཀིལེསེ པཛཧཏཱི’’ཏི པཊིཀྑིཏྟཾ.

ཏཐཱ ‘‘ཧཉྩི ཨནཱགཏེ ཀིལེསེ པཛཧཏི, ཏེནཧི ཨཛཱཏཾ པཛཧཏི, ཨནིབྦཏྟཾ པཛཧཏི, ཨནུཔྤནྣཾ པཛཧཏི, ཨཔཱཏུབྷཱུཏཾ པཛཧཏི. ཨནཱགཏཾ ཡཾ ནཏྠི, ཏཾ པཛཧཏཱི’’ཏི ཙ ཝཏྭཱ, ‘‘ན ཨནཱགཏེ ཀིལེསེ པཛཧཏཱི’’ཏི པཊིཀྑིཏྟཾ.

ཏཐཱ ‘‘ཧཉྩི པཙྩུཔྤནྣེ ཀིལེསེ པཛཧཏི, ཏེནཧི རཏྟོ རཱགཾ པཛཧཏི. དུཊྛོ དོསཾ, མཱུལ༹ྷོ མོཧཾ, ཝིནིབདྡྷོ མཱནཾ, པརཱམཊྛོ དིཊྛིཾ, ཝིཀྑེཔགཏོ ཨུདྡྷཙྩཾ, ཨནིཊྛངྒཏོ ཝིཙིཀིཙྪཾ, ཐཱམགཏོ ཨནུསཡཾ པཛཧཏི. ཀཎྷསུཀྐཱ དྷམྨཱ ཡུགནདྡྷཱཝ ཝཏྟནྟི. སཾཀིལེསིཀཱ མགྒབྷཱཝནཱ ཧོཏཱི’’ཏི ཙ ཝཏྭཱ, ‘‘ན ཨཏཱིཏེ ཀིལེསེ པཛཧཏི, ན ཨནཱགཏེ, ན པཙྩུཔྤནྣེ ཀིལེསེ པཛཧཏཱི’’ཏི སབྦཾ པཊིཀྑིཔིཏྭཱ, ‘‘ཏེནཧི ནཏྠི མགྒབྷཱཝནཱ, ནཏྠི ཕལསཙྪིཀིརིཡཱ ¶ , ནཏྠི ཀིལེསཔྤཧཱནཾ, ནཏྠི དྷམྨཱབྷིསམཡོ’’ཏི པཉྷཱཔརིཡོསཱནེ ‘‘ན ཧི ནཏྠི མགྒབྷཱཝནཱ…པེ… ནཏྠི དྷམྨཱབྷིསམཡོ’’ཏི པཊིཛཱནིཏྭཱ ‘‘ཡཐཱ ཀཐཾ ཝིཡཱ’’ཏི ཝུཏྟེ ཨིདཾ ཝུཏྟཾ –

‘‘སེཡྻཐཱཔི ཏརུཎོ རུཀྑོ ཨཛཱཏཕལོ, ཏམེནཾ པུརིསོ མཱུལེ ཚིནྡེཡྻ, ཡེ ཏསྶ རུཀྑསྶ ཨཛཱཏཕལཱ, ཏེ ཨཛཱཏཱཡེཝ ན ཛཱཡནྟི, ཨནིབྦཏྟཱཡེཝ ན ནིབྦཏྟནྟི, ཨནུཔྤནྣཱཡེཝ ན ཨུཔྤཛྫནྟི, ཨཔཱཏུབྷཱུཏཱཡེཝ ན པཱཏུབྷཝནྟི, ཨེཝམེཝ ¶ ཨུཔྤཱདོ ཧེཏུ ཨུཔྤཱདོ པཙྩཡོ ཀིལེསཱནཾ ནིབྦཏྟིཡཱཏི ཨུཔྤཱདེ ཨཱདཱིནཝཾ དིསྭཱ ཨནུཔྤཱདེ ཙིཏྟཾ པཀྑནྡཏི, ཨནུཔྤཱདེ ཙིཏྟསྶ པཀྑནྡཏྟཱ ཡེ ཨཱཡཱུཧནཔཙྩཡཱ ཀིལེསཱ ནིབྦཏྟེཡྻུཾ, ཏེ ཨཛཱཏཱཡེཝ ན ཛཱཡནྟི…པེ… ཨཔཱཏུབྷཱུཏཱཡེཝ ན པཱཏུབྷཝནྟི, ཨེཝཾ ཧེཏུནིརོདྷཱ དུཀྑནིརོདྷོ. པཝཏྟཾ ཧེཏུ…པེ… ནིམིཏྟཾ ཧེཏུ…པེ… ཨཱཡཱུཧནཱ ཧེཏུ…པེ… ཨནཱཡཱུཧནེ ཙིཏྟསྶ པཀྑནྡཏྟཱ ཡེ ཨཱཡཱུཧནཔཙྩཡཱ ཀིལེསཱ ནིབྦཏྟེཡྻུཾ, ཏེ ཨཛཱཏཱཡེཝ…པེ… ཨཔཱཏུབྷཱུཏཱཡེཝ ན པཱཏུབྷཝནྟི, ཨེཝཾ ཧེཏུནིརོདྷཱ དུཀྑནིརོདྷོ. ཨེཝཾ ཨཏྠི མགྒབྷཱཝནཱ, ཨཏྠི ཕལསཙྪིཀིརིཡཱ, ཨཏྠི ཀིལེསཔྤཧཱནཾ, ཨཏྠི དྷམྨཱབྷིསམཡོ’’ཏི (པཊི. མ. ༣.༢༡).

༨༣༢. ཨེཏེན ཀིཾ དཱིཔིཏཾ ཧོཏི? བྷཱུམིལདྡྷཱནཾ ཀིལེསཱནཾ པཧཱནཾ དཱིཔིཏཾ ཧོཏི. བྷཱུམིལདྡྷཱ པན ཀིཾ ཨཏཱིཏཱནཱགཏཱ ཨུདཱཧུ པཙྩུཔྤནྣཱཏི. བྷཱུམིལདྡྷུཔྤནྣཱ ཨེཝ ནཱམ ཏེ.

༨༣༣. ཨུཔྤནྣཾ ཧི ཝཏྟམཱནབྷཱུཏཱཔགཏོཀཱསཀཏབྷཱུམིལདྡྷཝསེན ཨནེཀཔྤབྷེདཾ. ཏཏྠ སབྦམྤི ཨུཔྤཱདཛརཱབྷངྒསམངྒིསངྑཱཏཾ ཝཏྟམཱནུཔྤནྣཾ ནཱམ. ཨཱརམྨཎརསཾ ཨནུབྷཝིཏྭཱ ནིརུདྡྷཾ ཨནུབྷཱུཏཱཔགཏསངྑཱཏཾ ཀུསལཱཀུསལཾ ཨུཔྤཱདཱདིཏྟཡཾ ཨནུཔྤཏྭཱ ནིརུདྡྷཾ བྷཱུཏཱཔགཏསངྑཱཏཾ སེསསངྑཏཉྩ བྷཱུཏཱཔགཏུཔྤནྣཾ ནཱམ. ‘‘ཡཱནིསྶ ཏཱནི པུབྦེཀཏཱནི ཀམྨཱནཱི’’ཏི (མ. ནི. ༣.༢༤༨) ཨེཝམཱདིནཱ ནཡེན ཝུཏྟཾ ཀམྨཾ ཨཏཱིཏམྤི སམཱནཾ ཨཉྙཾ ཝིཔཱཀཾ པཊིབཱཧིཏྭཱ ཨཏྟནོ ཝིཔཱཀསྶོཀཱསཾ ཀཏྭཱ ཋིཏཏྟཱ ཏཐཱ ཀཏོཀཱསཉྩ ཝིཔཱཀཾ ཨནུཔྤནྣམྤི སམཱནཾ ཨེཝཾ ཀཏེ ཨོཀཱསེ ཨེཀནྟེན ཨུཔྤཛྫནཏོ ཨོཀཱསཀཏུཔྤནྣཾ ནཱམ. ཏཱསུ ཏཱསུ བྷཱུམཱིསུ ཨསམཱུཧཏཾ ཨཀུསལཾ བྷཱུམིལདྡྷུཔྤནྣཾ ནཱམ.

༨༣༤. ཨེཏྠ ¶ ཙ བྷཱུམིཡཱ བྷཱུམིལདྡྷསྶ ཙ ནཱནཏྟཾ ཝེདིཏབྦཾ. བྷཱུམཱིཏི ཧི ཝིཔསྶནཱཡ ཨཱརམྨཎབྷཱུཏཱ ཏེབྷཱུམཀཱ པཉྩཀྑནྡྷཱ. བྷཱུམིལདྡྷཾ ནཱམ ཏེསུ ཁནྡྷེསུ ཨུཔྤཏྟིརཧཾ ཀིལེསཛཱཏཾ. ཏེནཧི སཱ བྷཱུམི ལདྡྷཱ ནཱམ ཧོཏཱིཏི ཏསྨཱ བྷཱུམིལདྡྷནྟི ཝུཙྩཏི, སཱ ཙ ཁོ ན ཨཱརམྨཎཝསེན. ཨཱརམྨཎཝསེན ¶ ཧི སབྦེཔི ཨཏཱིཏཱནཱགཏེ པརིཉྙཱཏེཔི ཙ ཁཱིཎཱསཝཱནཾ ཁནྡྷེ ཨཱརབྦྷ ཀིལེསཱ ཨུཔྤཛྫནྟི མཧཱཀཙྩཱནཨུཔྤལཝཎྞཱདཱིནཾ ཁནྡྷེ ཨཱརབྦྷ སོརེཡྻསེཊྛི ནནྡམཱཎཝཀཱདཱིནཾ ཝིཡ. ཡདི ཙ ཏཾ བྷཱུམིལདྡྷཾ ནཱམ སིཡཱ, ཏསྶ ཨཔྤཧེཡྻཏོ ན ཀོཙི བྷཝམཱུལཾ པཛཧེཡྻ. ཝཏྠུཝསེན པན བྷཱུམིལདྡྷཾ ཝེདིཏབྦཾ. ཡཏྠ ཡཏྠ ཧི ཝིཔསྶནཱཡ ཨཔརིཉྙཱཏཱ ཁནྡྷཱ ཨུཔྤཛྫནྟི, ཏཏྠ ཏཏྠ ཨུཔྤཱདཏོ པབྷུཏི ཏེསུ ཝཊྚམཱུལཾ ཀིལེསཛཱཏཾ ཨནུསེཏི. ཏཾ ཨཔྤཧཱིནཊྛེན བྷཱུམིལདྡྷནྟི ཝེདིཏབྦཾ.

༨༣༥. ཏཏྠ ཙ ཡསྶ ཡེསུ ཁནྡྷེསུ ཨཔྤཧཱིནཊྛེན ཨནུསཡིཏཱ ཀིལེསཱ, ཏསྶ ཏེ ཨེཝ ཁནྡྷཱ ཏེསཾ ཀིལེསཱནཾ ཝཏྠུ, ན ཨཉྙེསཾ སནྟཀཱ ཁནྡྷཱ. ཨཏཱིཏཀྑནྡྷེསུ ཙ ཨཔྤཧཱིནཱནུསཡིཏཱནཾ ཀིལེསཱནཾ ཨཏཱིཏཀྑནྡྷཱཝ ཝཏྠུ, ན ཨིཏརེ. ཨེས ནཡོ ཨནཱགཏཱདཱིསུ. ཏཐཱ ཀཱམཱཝཙརཀྑནྡྷེསུ ཨཔྤཧཱིནཱནུསཡིཏཱནཾ ཀིལེསཱནཾ ཀཱམཱཝཙརཀྑནྡྷཱཝ ཝཏྠུ, ན ཨིཏརེ. ཨེས ནཡོ རཱུཔཱརཱུཔཱཝཙརེསུ. སོཏཱཔནྣཱདཱིསུ པན ཡསྶ ཡསྶ ཨརིཡཔུགྒལསྶ ཁནྡྷེསུ ཏཾ ཏཾ ཝཊྚམཱུལཾ ཀིལེསཛཱཏཾ ཏེན ཏེན མགྒེན པཧཱིནཾ, ཏསྶ ཏསྶ ཏེ ཏེ ཁནྡྷཱ པཧཱིནཱནཾ ཏེསཾ ཏེསཾ ཝཊྚམཱུལཀིལེསཱནཾ ཨཝཏྠུཏོ བྷཱུམཱིཏི སངྑཾ ན ལབྷནྟི. པུཐུཛྫནསྶ སབྦསོཝ ཝཊྚམཱུལཀིལེསཱནཾ ཨཔྤཧཱིནཏྟཱ ཡཾཀིཉྩི ཀརིཡམཱནཾ ཀམྨཾ ཀུསལཾ ཨཀུསལཾ ཝཱ ཧོཏི. ཨིཙྩསྶ ཀམྨཀིལེསཔཙྩཡཱ ཝཊྚཾ ཝཊྚཏི. ཏསྶེཏཾ ཝཊྚམཱུལཾ རཱུཔཀྑནྡྷེཡེཝ, ན ཝེདནཱཀྑནྡྷཱདཱིསུ. ཝིཉྙཱཎཀྑནྡྷེཡེཝ ཝཱ, ན རཱུཔཀྑནྡྷཱདཱིསཱུཏི ན ཝཏྟབྦཾ. ཀསྨཱ? ཨཝིསེསེན པཉྩསུཔི ཁནྡྷེསུ ཨནུསཡིཏཏྟཱ.

༨༣༦. ཀཐཾ? པཐཝཱིརསཱདི ཝིཡ རུཀྑེ. ཡཐཱ ཧི མཧཱརུཀྑེ པཐཝཱིཏལཾ ཨདྷིཊྛཱཡ པཐཝཱིརསཉྩ ཨཱཔོརསཉྩ ནིསྶཱཡ ཏཔྤཙྩཡཱ མཱུལཁནྡྷསཱཁཔསཱཁཔལླཝཔལཱསཔུཔྥཕལེཧི ཝཌྜྷིཏྭཱ ནབྷཾ པཱུརེཏྭཱ ཡཱཝ ཀཔྤཱཝསཱནཱ བཱིཛཔརམྤརཱཡ རུཀྑཔཝེཎིཾ སནྟཱནཡམཱནེ ཋིཏེ ཏཾ པཐཝཱིརསཱདི མཱུལེཡེཝ, ན ཁནྡྷཱདཱིསུ…པེ… ཕལེཡེཝ ཝཱ, ན མཱུལཱདཱིསཱུཏི ན ཝཏྟབྦཾ. ཀསྨཱ? ཨཝིསེསེན སབྦེསུ མཱུལཱདཱིསུ ཨནུགཏཏྟཱཏི.

ཡཐཱ ¶ པན ཏསྶེཝ རུཀྑསྶ པུཔྥཕལཱདཱིསུ ནིབྦིནྣོ ཀོཙི པུརིསོ ཙཏཱུསུ དིསཱསུ མཎྜཱུཀཀཎྚཀཾ ནཱམ ཝིསཀཎྚཀཾ ཨཱཀོཊེཡྻ, ཨཐ སོ ¶ རུཀྑོ ཏེན ཝིསསམྥསྶེན ཕུཊྛོ པཐཝཱིརསཨཱཔོརསཱནཾ པརིཡཱདིཎྞཏྟཱ ཨཔྤསཝནདྷམྨཏཾ ཨཱགམྨ པུན སནྟཱནཾ ནིབྦཏྟེཏུཾ ན སཀྐུཎེཡྻ, ཨེཝམེཝ ཁནྡྷཔཝཏྟིཡཾ ནིབྦིནྣོ ཀུལཔུཏྟོ ཏསྶ པུརིསསྶ ཙཏཱུསུ དིསཱསུ རུཀྑེ ཝིསཡོཛནཾ ཝིཡ ཨཏྟནོ སནྟཱནེ ཙཏུམགྒབྷཱཝནཾ ཨཱརབྷཏི. ཨཐསྶ སོ ཁནྡྷསནྟཱནོ ཏེན ཙཏུམགྒཝིསསམྥསྶེན སབྦསོ ཝཊྚམཱུལཀཀིལེསཱནཾ པརིཡཱདིཎྞཏྟཱ ཀིརིཡབྷཱཝམཏྟཨུཔགཏཀཱཡཀམྨཱདིསབྦཀམྨཔྤབྷེདོ ཧུཏྭཱ ཨཱཡཏིཾ པུནབྦྷཝཱནབྷིནིབྦཏྟནདྷམྨཏཾ ཨཱགམྨ བྷཝནྟརསནྟཱནཾ ནིབྦཏྟེཏུཾ ན སཀྐོཏི. ཀེཝལཾ ཙརིམཝིཉྙཱཎནིརོདྷེན ནིརིནྡྷནོ ཝིཡ ཛཱཏཝེདོ ཨནུཔཱདཱནོ པརིནིབྦཱཡཏི, ཨེཝཾ བྷཱུམིཡཱ བྷཱུམིལདྡྷསྶ ཙ ནཱནཏྟཾ ཝེདིཏབྦཾ.

༨༣༧. ཨཔིཙ ཨཔརམྤི སམུདཱཙཱརཨཱརམྨཎཱདྷིགྒཧིཏཨཝིཀྑམྦྷིཏཨསམཱུཧཏཝསེན ཙཏུབྦིདྷཾ ཨུཔྤནྣཾ. ཏཏྠ ཝཏྟམཱནུཔྤནྣམེཝ སམུདཱཙཱརུཔྤནྣཾ. ཙཀྑཱདཱིནཾ པན ཨཱཔཱཐགཏེ ཨཱརམྨཎེ པུབྦབྷཱགེ ཨནུཔྤཛྫམཱནམྤི ཀིལེསཛཱཏཾ ཨཱརམྨཎསྶ ཨདྷིགྒཧིཏཏྟཱ ཨེཝ ཨཔརབྷཱགེ ཨེཀནྟེན ཨུཔྤཏྟིཏོ ཨཱརམྨཎཱདྷིགྒཧིཏུཔྤནྣནྟི ཝུཙྩཏི, ཀལྱཱཎིགཱམེ པིཎྜཱཡ ཙརཏོ མཧཱཏིསྶཏྠེརསྶ ཝིསབྷཱགརཱུཔདསྶནེན ཨུཔྤནྣཀིལེསཛཱཏཾ ཝིཡ. སམཐཝིཔསྶནཱནཾ ཨཉྙཏརཝསེན ཨཝིཀྑམྦྷིཏཾ ཀིལེསཛཱཏཾ ཙིཏྟསནྟཏིམནཱརཱུལ༹ྷམྤི ཨུཔྤཏྟིནིཝཱརཀསྶ ཧེཏུནོ ཨབྷཱཝཱ ཨཝིཀྑམྦྷིཏུཔྤནྣཾ ནཱམ. སམཐཝིཔསྶནཱཝསེན པན ཝིཀྑམྦྷིཏམྤི ཨརིཡམགྒེན ཨསམཱུཧཏཏྟཱ ཨུཔྤཏྟིདྷམྨཏཾ ཨནཏཱིཏཏཱཡ ཨསམཱུཧཏུཔྤནྣནྟི ཝུཙྩཏི, ཨཱཀཱསེན གཙྪནྟསྶ ཨཊྛསམཱཔཏྟིལཱབྷིནོ ཐེརསྶ ཀུསུམིཏརུཀྑེ ཨུཔཝནེ པུཔྥཱནི ཨུཙྩིནནྟསྶ མདྷུརེན སརེན གཱཡཏོ མཱཏུགཱམསྶ གཱིཏསཝནེན ཨུཔྤནྣཀིལེསཛཱཏཾ ཝིཡ. ཏིཝིདྷམྤི ཙེཏཾ ཨཱརམྨཎཱདྷིགྒཧིཏཱཝིཀྑམྦྷིཏཨསམཱུཧཏུཔྤནྣཾ བྷཱུམིལདྡྷེནེཝ སངྒཧཾ གཙྪཏཱིཏི ཝེདིཏབྦཾ.

༨༣༨. ཨིཙྩེཏསྨིཾ ཝུཏྟཔྤབྷེདེ ཨུཔྤནྣེ ཡདེཏཾ ཝཏྟམཱནབྷཱུཏཱཔགཏོཀཱསཀཏསམུདཱཙཱརསངྑཱཏཾ ཙཏུབྦིདྷཾ ཨུཔྤནྣཾ, ཏཾ ཨམགྒཝཛ྄ཛྷཏྟཱ ཀེནཙིཔི ཉཱཎེན པཧཱཏབྦཾ ན ཧོཏི. ཡཾ པནེཏཾ བྷཱུམིལདྡྷཱརམྨཎཱདྷིགྒཧིཏཨཝིཀྑམྦྷིཏཨསམཱུཧཏསངྑཱཏཾ ཨུཔྤནྣཾ, ཏསྶ ཏཾ ཨུཔྤནྣབྷཱཝཾ ཝིནཱསཡམཱནཾ ཡསྨཱ ཏཾ ཏཾ ལོཀིཡལོཀུཏྟརཉཱཎཾ ཨུཔྤཛྫཏི, ཏསྨཱ ཏཾ སབྦམྤི པཧཱཏབྦཾ ཧོཏཱིཏི. ཨེཝམེཏྠ ཡེ ཡེན པཧཱཏབྦཱ དྷམྨཱ, ཏེསཾ པཧཱནཉྩ ཛཱནིཏབྦཾ.

པརིཉྙཱདིཀིཙྩཀཐཱ

༨༣༩.

ཀིཙྩཱནི ¶ ¶ པརིཉྙཱདཱིནི, ཡཱནི ཝུཏྟཱནི ཨབྷིསམཡཀཱལེ;

ཏཱནི ཙ ཡཐཱསབྷཱཝེན, ཛཱནིཏབྦཱནི སབྦཱནཱིཏི.

སཙྩཱབྷིསམཡཀཱལཾ ཧི ཨེཏེསུ ཙཏཱུསུ ཉཱཎེསུ ཨེཀེཀསྶ ཨེཀཀྑཎེ པརིཉྙཱ པཧཱནཾ སཙྪིཀིརིཡཱ བྷཱཝནཱཏི ཨེཏཱནི པརིཉྙཱདཱིནི ཙཏྟཱརི ཀིཙྩཱནི ཝུཏྟཱནི, ཏཱནི ཡཐཱསབྷཱཝེན ཛཱནིཏབྦཱནི. ཝུཏྟཾ ཧེཏཾ པོརཱཎེཧི –

‘‘ཡཐཱ པདཱིཔོ ཨཔུབྦཾ ཨཙརིམཾ ཨེཀཀྑཎེ ཙཏྟཱརི ཀིཙྩཱནི ཀརོཏི, ཝཊྚིཾ ཛྷཱཔེཏི, ཨནྡྷཀཱརཾ ཝིདྷམཏི, ཨཱལོཀཾ པརིཝིདཾསེཏི, སིནེཧཾ པརིཡཱདིཡཏི, ཨེཝམེཝ མགྒཉཱཎཾ ཨཔུབྦཾ ཨཙརིམཾ ཨེཀཀྑཎེ ཙཏྟཱརི སཙྩཱནི ཨབྷིསམེཏི, དུཀྑཾ པརིཉྙཱབྷིསམཡེན ཨབྷིསམེཏི, སམུདཡཾ པཧཱནཱབྷིསམཡེན ཨབྷིསམེཏི, མགྒཾ བྷཱཝནཱབྷིསམཡེན ཨབྷིསམེཏི, ནིརོདྷཾ སཙྪིཀིརིཡཱབྷིསམཡེན ཨབྷིསམེཏི. ཀིཾ ཝུཏྟཾ ཧོཏི? ནིརོདྷཾ ཨཱརམྨཎཾ ཀརིཏྭཱ ཙཏྟཱརིཔི སཙྩཱནི པཱཔུཎཱཏི པསྶཏི པཊིཝིཛ྄ཛྷཏཱི’’ཏི.

ཝུཏྟམྤི ཙེཏཾ ‘‘ཡོ, བྷིཀྑཝེ, དུཀྑཾ པསྶཏི, དུཀྑསམུདཡམྤི སོ པསྶཏི, དུཀྑནིརོདྷམྤི པསྶཏི, དུཀྑནིརོདྷགཱམིནིཾ པཊིཔདམྤི པསྶཏཱི’’ཏི (སཾ. ནི. ༥.༡༡༠༠) སབྦཾ ཝེདིཏབྦཾ.

ཨཔརམྤི ཝུཏྟཾ ‘‘མགྒསམངྒིསྶ ཉཱཎཾ, དུཀྑེཔེཏཾ ཉཱཎཾ, དུཀྑསམུདཡེཔེཏཾ ཉཱཎཾ, དུཀྑནིརོདྷེཔེཏཾ ཉཱཎཾ, དུཀྑནིརོདྷགཱམིནིཡཱ པཊིཔདཱཡཔེཏཾ ཉཱཎ’’ནྟི (ཝིབྷ. ༧༩༤; པཊི. མ. ༡.༡༠༩).

ཏཏྠ ཡཐཱ པདཱིཔོ ཝཊྚིཾ ཛྷཱཔེཏི, ཨེཝཾ མགྒཉཱཎཾ དུཀྑཾ པརིཛཱནཱཏི. ཡཐཱ ཨནྡྷཀཱརཾ ཝིདྷམཏི, ཨེཝཾ སམུདཡཾ པཛཧཏི. ཡཐཱ ཨཱལོཀཾ པརིཝིདཾསེཏི, ཨེཝཾ སཧཛཱཏཱདིཔཙྩཡཏཱཡ སམྨཱསངྐཔྤཱདིདྷམྨསངྑཱཏཾ མགྒཾ བྷཱཝེཏི. ཡཐཱ སིནེཧཾ པརིཡཱདིཡཏི, ཨེཝཾ ཀིལེསཔརིཡཱདཱནཾ ནིརོདྷཾ སཙྪིཀརོཏཱིཏི ཨེཝཾ ཨུཔམཱསཾསནྡནཾ ཝེདིཏབྦཾ.

༨༤༠. ཨཔརོ ¶ ནཡོ – ཡཐཱ སཱུརིཡོ ཨུདཡནྟོ ཨཔུབྦཾ ཨཙརིམཾ སཧ པཱཏུབྷཱཝཱ ཙཏྟཱརི ཀིཙྩཱནི ཀརོཏི, རཱུཔགཏཱནི ཨོབྷཱསེཏི, ཨནྡྷཀཱརཾ ¶ ཝིདྷམཏི, ཨཱལོཀཾ དསྶེཏི, སཱིཏཾ པཊིཔྤསྶམྦྷེཏི, ཨེཝམེཝ མགྒཉཱཎཾ…པེ… ནིརོདྷཾ སཙྪིཀིརིཡཱབྷིསམཡེན ཨབྷིསམེཏི. ཨིདྷཱཔི ཡཐཱ སཱུརིཡོ རཱུཔགཏཱནི ཨོབྷཱསེཏི, ཨེཝཾ མགྒཉཱཎཾ དུཀྑཾ པརིཛཱནཱཏི. ཡཐཱ ཨནྡྷཀཱརཾ ཝིདྷམཏི, ཨེཝཾ སམུདཡཾ པཛཧཏི. ཡཐཱ ཨཱལོཀཾ དསྶེཏི, ཨེཝཾ སཧཛཱཏཱདིཔཙྩཡཏཱཡ མགྒཾ བྷཱཝེཏི. ཡཐཱ སཱིཏཾ པཊིཔྤསྶམྦྷེཏི, ཨེཝཾ ཀིལེསཔཊིཔྤསྶདྡྷིཾ ནིརོདྷཾ སཙྪིཀརོཏཱིཏི ཨེཝཾ ཨུཔམཱསཾསནྡནཾ ཝེདིཏབྦཾ.

༨༤༡. ཨཔརོ ནཡོ – ཡཐཱ ནཱཝཱ ཨཔུབྦཾ ཨཙརིམཾ ཨེཀཀྑཎེ ཙཏྟཱརི ཀིཙྩཱནི ཀརོཏི, ཨོརིམཏཱིརཾ པཛཧཏི, སོཏཾ ཚིནྡཏི, བྷཎྜཾ ཝཧཏི, པཱརིམཏཱིརཾ ཨཔྤེཏི, ཨེཝམེཝ མགྒཉཱཎཾ…པེ… ནིརོདྷཾ སཙྪིཀིརིཡཱབྷིསམཡེན ཨབྷིསམེཏི. ཨེཏྠཱཔི ཡཐཱ ནཱཝཱ ཨོརིམཏཱིརཾ པཛཧཏི, ཨེཝཾ མགྒཉཱཎཾ དུཀྑཾ པརིཛཱནཱཏི. ཡཐཱ སོཏཾ ཚིནྡཏི, ཨེཝཾ སམུདཡཾ པཛཧཏི. ཡཐཱ བྷཎྜཾ ཝཧཏི, ཨེཝཾ སཧཛཱཏཱདིཔཙྩཡཏཱཡ མགྒཾ བྷཱཝེཏི. ཡཐཱ པཱརིམཏཱིརཾ ཨཔྤེཏི, ཨེཝཾ པཱརིམཏཱིརབྷཱུཏཾ ནིརོདྷཾ སཙྪིཀརོཏཱིཏི ཨེཝཾ ཨུཔམཱསཾསནྡནཾ ཝེདིཏབྦཾ.

༨༤༢. ཨེཝཾ སཙྩཱབྷིསམཡཀཱལསྨིཾ ཨེཀཀྑཎེ ཙཏུནྣཾ ཀིཙྩཱནཾ ཝསེན པཝཏྟཉཱཎསྶ པནསྶ སོལ༹སཧཱཀཱརེཧི ཏཐཊྛེན ཙཏྟཱརི ཀིཙྩཱནི ཨེཀཔཊིཝེདྷཱནི ཧོནྟི. ཡཐཱཧ –

‘‘ཀཐཾ ཏཐཊྛེན ཙཏྟཱརི ཀིཙྩཱནི ཨེཀཔཊིཝེདྷཱནི? སོལ༹སཧི ཨཱཀཱརེཧི ཏཐཊྛེན ཙཏྟཱརི ཀིཙྩཱནི ཨེཀཔཊིཝེདྷཱནི. དུཀྑསྶ པཱིལ༹ནཊྛོ, སངྑཏཊྛོ, སནྟཱཔཊྛོ, ཝིཔརིཎཱམཊྛོ, ཏཐཊྛོ. སམུདཡསྶ ཨཱཡཱུཧནཊྛོ, ནིདཱནཊྛོ, སཾཡོགཊྛོ, པལིབོདྷཊྛོ, ཏཐཊྛོ. ནིརོདྷསྶ ནིསྶརཎཊྛོ, ཝིཝེཀཊྛོ, ཨསངྑཏཊྛོ, ཨམཏཊྛོ, ཏཐཊྛོ. མགྒསྶ ནིཡྻཱནཊྛོ, ཧེཏུཊྛོ, དསྶནཊྛོ, ཨདྷིཔཏེཡྻཊྛོ, ཏཐཊྛོ. ཨིམེཧི སོལ༹སཧི ཨཱཀཱརེཧི ཏཐཊྛེན ཙཏྟཱརི སཙྩཱནི ཨེཀསངྒཧིཏཱནི. ཡཾ ཨེཀསངྒཧིཏཾ, ཏཾ ཨེཀཏྟཾ. ཡཾ ཨེཀཏྟཾ, ཏཾ ཨེཀེན ཉཱཎེན པཊིཝིཛ྄ཛྷཏཱིཏི ཙཏྟཱརི སཙྩཱནི ཨེཀཔཊིཝེདྷཱནཱི’’ཏི (པཊི. མ. ༢.༡༡).

༨༤༣. ཏཏྠ ¶ སིཡཱ ཡདཱ དུཀྑཱདཱིནཾ ཨཉྙེཔི རོགགཎྜཱདཡོ ཨཏྠཱ ཨཏྠི, ཨཐ ཀསྨཱ ཙཏྟཱརོཡེཝ ཝུཏྟཱཏི. ཨེཏྠ ཝདཱམ, ཨཉྙསཙྩདསྶནཝསེན ཨཱཝིབྷཱཝཏོ. ‘‘ཏཏྠ ཀཏམཾ ¶ དུཀྑེ ཉཱཎཾ? དུཀྑཾ ཨཱརབྦྷ ཡཱ ཨུཔྤཛྫཏི པཉྙཱ པཛཱནནཱ’’ཏིཨཱདིནཱ (ཝིབྷ. ༧༩༤; པཊི. མ. ༡.༡༠༩) ཧི ནཡེན ཨེཀེཀསཙྩཱརམྨཎཝསེནཱཔི སཙྩཉཱཎཾ ཝུཏྟཾ. ‘‘ཡོ, བྷིཀྑཝེ, དུཀྑཾ པསྶཏི, སམུདཡམྤི སོ པསྶཏཱི’’ཏིཨཱདིནཱ (སཾ. ནི. ༥.༡༡༠༠) ནཡེན ཨེཀཾ སཙྩཾ ཨཱརམྨཎཾ ཀཏྭཱ སེསེསུཔི ཀིཙྩནིཔྥཏྟིཝསེནཱཔི ཝུཏྟཾ.

ཏཏྠ ཡདཱ ཨེཀེཀཾ སཙྩཾ ཨཱརམྨཎཾ ཀརོཏི, ཏདཱ སམུདཡདསྶནེན ཏཱཝ སབྷཱཝཏོ པཱིལ༹ནལཀྑཎསྶཱཔི དུཀྑསྶ, ཡསྨཱ ཏཾ ཨཱཡཱུཧནལཀྑཎེན སམུདཡེན ཨཱཡཱུཧིཏཾ སངྑཏཾ རཱསིཀཏཾ, ཏསྨཱསྶ སོ སངྑཏཊྛོ ཨཱཝིབྷཝཏི. ཡསྨཱ པན མགྒོ ཀིལེསསནྟཱཔཧརོ སུསཱིཏལོ, ཏསྨཱསྶ མགྒསྶ དསྶནེན སནྟཱཔཊྛོ ཨཱཝིབྷཝཏི ཨཱཡསྨཏོ ནནྡསྶ ཨཙྪརཱདསྶནེན སུནྡརིཡཱ ཨནབྷིརཱུཔབྷཱཝོ ཝིཡ. ཨཝིཔརིཎཱམདྷམྨསྶ པན ནིརོདྷསྶ དསྶནེནསྶ ཝིཔརིཎཱམཊྛོ ཨཱཝིབྷཝཏཱིཏི ཝཏྟབྦམེཝེཏྠ ནཏྠི.

ཏཐཱ སབྷཱཝཏོ ཨཱཡཱུཧནལཀྑཎསྶཱཔི སམུདཡསྶ, དུཀྑདསྶནེན ནིདཱནཊྛོ ཨཱཝིབྷཝཏི ཨསཔྤཱཡབྷོཛནཏོ ཨུཔྤནྣབྱཱདྷིདསྶནེན བྷོཛནསྶ བྱཱདྷིནིདཱནབྷཱཝོ ཝིཡ. ཝིསཾཡོགབྷཱུཏསྶ ནིརོདྷསྶ དསྶནེན སཾཡོགཊྛོ. ནིཡྻཱནབྷཱུཏསྶ ཙ མགྒསྶ དསྶནེན པལིབོདྷཊྛོཏི.

ཏཐཱ ནིསྶརཎལཀྑཎསྶཱཔི ནིརོདྷསྶ, ཨཝིཝེཀབྷཱུཏསྶ སམུདཡསྶ དསྶནེན ཝིཝེཀཊྛོ ཨཱཝིབྷཝཏི. མགྒདསྶནེན ཨསངྑཏཊྛོ, ཨིམིནཱ ཧི ཨནམཏགྒསཾསཱརེ མགྒོ ནདིཊྛཔུབྦོ, སོཔི ཙ སཔྤཙྩཡཏྟཱ སངྑཏོཡེཝཱཏི ཨཔྤཙྩཡདྷམྨསྶ ཨསངྑཏབྷཱཝོ ཨཏིཝིཡ པཱཀཊོ ཧོཏི. དུཀྑདསྶནེན པནསྶ ཨམཏཊྛོ ཨཱཝིབྷཝཏི, དུཀྑཾ ཧི ཝིསཾ, ཨམཏཾ ནིབྦཱནནྟི.

ཏཐཱ ནིཡྻཱནལཀྑཎསྶཱཔི མགྒསྶ, སམུདཡདསྶནེན ‘‘ནཱཡཾ ཧེཏུ ནིབྦཱནསྶ པཏྟིཡཱ, ཨཡཾ ཧེཏཱུ’’ཏི ཧེཏུཊྛོ ཨཱཝིབྷཝཏི. ནིརོདྷདསྶནེན དསྶནཊྛོ, པརམསུཁུམཱནི རཱུཔཱནི པསྶཏོ ‘‘ཝིཔྤསནྣཾ ཝཏ མེ ¶ ཙཀྑཱུ’’ནྟི ཙཀྑུསྶ ཝིཔྤསནྣབྷཱཝོ ཝིཡ. དུཀྑདསྶནེན ཨདྷིཔཏེཡྻཊྛོ, ཨནེཀརོགཱཏུརཀཔཎཛནདསྶནེན ཨིསྶརཛནསྶ ཨུལཱ༹རབྷཱཝོ ཝིཡཱཏི ཨེཝམེཏྠ སལཀྑཎཝསེན ཨེཀེཀསྶ, ཨཉྙསཙྩདསྶནཝསེན ཙ ཨིཏརེསཾ ཏིཎྞཾ ཏིཎྞཾ ཨཱཝིབྷཱཝཏོ ཨེཀེཀསྶ ཙཏྟཱརོ ཙཏྟཱརོ ཨཏྠཱ ཝུཏྟཱ. མགྒཀྑཎེ པན སབྦེ ཙེཏེ ཨཏྠཱ ཨེཀེནེཝ དུཀྑཱདཱིསུ ¶ ཙཏུཀིཙྩེན ཉཱཎེན པཊིཝེདྷཾ གཙྪནྟཱིཏི. ཡེ པན ནཱནཱབྷིསམཡཾ ཨིཙྪནྟི, ཏེསཾ ཨུཏྟརཾ ཨབྷིདྷམྨེ ཀཐཱཝཏྠུསྨིཾ ཝུཏྟམེཝ.

པརིཉྙཱདིཔྤབྷེདཀཐཱ

༨༤༤. ཨིདཱནི ཡཱནི ཏཱནི པརིཉྙཱདཱིནི ཙཏྟཱརི ཀིཙྩཱནི ཝུཏྟཱནི, ཏེསུ –

ཏིཝིདྷཱ ཧོཏི པརིཉྙཱ, ཏཐཱ པཧཱནམྤི སཙྪིཀིརིཡཱཔི;

དྭེ བྷཱཝནཱ ཨབྷིམཏཱ, ཝིནིཙྪཡོ ཏཏྠ ཉཱཏབྦོ.

༨༤༥. ཏིཝིདྷཱ ཧོཏི པརིཉྙཱཏི ཉཱཏཔརིཉྙཱ ཏཱིརཎཔརིཉྙཱ པཧཱནཔརིཉྙཱཏི ཨེཝཾ པརིཉྙཱ ཏིཝིདྷཱ ཧོཏི. ཏཏྠ ‘‘ཨབྷིཉྙཱཔཉྙཱ ཉཱཏཊྛེན ཉཱཎ’’ནྟི (པཊི. མ. མཱཏིཀཱ ༡.༢༠) ཨེཝཾ ཨུདྡིསིཏྭཱ ‘‘ཡེ ཡེ དྷམྨཱ ཨབྷིཉྙཱཏཱ ཧོནྟི, ཏེ ཏེ དྷམྨཱ ཉཱཏཱ ཧོནྟཱི’’ཏི (པཊི. མ. ༡.༧༥) ཨེཝཾ སངྑེཔཏོ, ‘‘སབྦཾ, བྷིཀྑཝེ, ཨབྷིཉྙེཡྻཾ. ཀིཉྩ, བྷིཀྑཝེ, སབྦཾ ཨབྷིཉྙེཡྻཾ? ཙཀྑུཾ, བྷིཀྑཝེ, ཨབྷིཉྙེཡྻ’’ནྟིཨཱདིནཱ (པཊི. མ. ༡.༢) ནཡེན ཝིཏྠཱརཏོ ཝུཏྟཱ ཉཱཏཔརིཉྙཱ ནཱམ. ཏསྶཱ སཔྤཙྩཡནཱམརཱུཔཱབྷིཛཱནནཱ ཨཱཝེཎིཀཱ བྷཱུམི.

༨༤༦. ‘‘པརིཉྙཱཔཉྙཱ ཏཱིརཎཊྛེན ཉཱཎ’’ནྟི (པཊི. མ. མཱཏིཀཱ ༡.༢༡) ཨེཝཾ ཨུདྡིསིཏྭཱ པན ‘‘ཡེ ཡེ དྷམྨཱ པརིཉྙཱཏཱ ཧོནྟི, ཏེ ཏེ དྷམྨཱ ཏཱིརིཏཱ ཧོནྟཱི’’ཏི (པཊི. མ. ༡.༧༥) ཨེཝཾ སངྑེཔཏོ, ‘‘སབྦཾ, བྷིཀྑཝེ, པརིཉྙེཡྻཾ. ཀིཉྩ, བྷིཀྑཝེ, སབྦཾ པརིཉྙེཡྻཾ? ཙཀྑུཾ, བྷིཀྑཝེ, པརིཉྙེཡྻ’’ནྟིཨཱདིནཱ (པཊི. མ. ༡.༢༡) ནཡེན ཝིཏྠཱརཏོ ཝུཏྟཱ ཏཱིརཎཔརིཉྙཱ ནཱམ. ཏསྶཱ ཀལཱཔསམྨསནཏོ པཊྛཱཡ ཨནིཙྩཾ དུཀྑམནཏྟཱཏི ཏཱིརཎཝསེན པཝཏྟམཱནཱཡ ཡཱཝ ཨནུལོམཱ ཨཱཝེཎིཀཱ བྷཱུམི.

༨༤༧. ‘‘པཧཱནཔཉྙཱ པརིཙྩཱགཊྛེན ཉཱཎ’’ནྟི (པཊི. མ. མཱཏིཀཱ ༡.༢༢) ཨེཝཾ པན ཨུདྡིསིཏྭཱ ‘‘ཡེ ཡེ དྷམྨཱ པཧཱིནཱ ཧོནྟི, ཏེ ཏེ དྷམྨཱ པརིཙྩཏྟཱ ཧོནྟཱི’’ཏི (པཊི. མ. ༡.༧༥) ཨེཝཾ ཝིཏྠཱརཏོ ¶ ཝུཏྟཱ ‘‘ཨནིཙྩཱནུཔསྶནཱཡ ནིཙྩསཉྙཾ པཛཧཏཱི’’ཏིཨཱདིནཡཔྤཝཏྟཱ ¶ པཧཱནཔརིཉྙཱ. ཏསྶཱ བྷངྒཱནུཔསྶནཏོ པཊྛཱཡ ཡཱཝ མགྒཉཱཎཱ བྷཱུམི, ཨཡཾ ཨིདྷ ཨདྷིཔྤེཏཱ.

ཡསྨཱ ཝཱ ཉཱཏཏཱིརཎཔརིཉྙཱཡོཔི ཏདཏྠཱཡེཝ, ཡསྨཱ ཙ ཡེ དྷམྨེ པཛཧཏི, ཏེ ནིཡམཏོ ཉཱཏཱ ཙེཝ ཏཱིརིཏཱ ཙ ཧོནྟི, ཏསྨཱ པརིཉྙཱཏྟཡམྤི ཨིམིནཱ པརིཡཱཡེན མགྒཉཱཎསྶ ཀིཙྩནྟི ཝེདིཏབྦཾ.

༨༤༨. ཏཐཱ པཧཱནམྤཱིཏི པཧཱནམྤི ཧི ཝིཀྑམྦྷནཔྤཧཱནཾ ཏདངྒཔྤཧཱནཾ སམུཙྪེདཔྤཧཱནནྟི པརིཉྙཱ ཝིཡ ཏིཝིདྷམེཝ ཧོཏི. ཏཏྠ ཡཾ སསེཝཱལེ ཨུདཀེ པཀྑིཏྟེན གྷཊེན སེཝཱལསྶ ཝིཡ ཏེན ཏེན ལོཀིཡསམཱདྷིནཱ ནཱིཝརཎཱདཱིནཾ པཙྩནཱིཀདྷམྨཱནཾ ཝིཀྑམྦྷནཾ, ཨིདཾ ཝིཀྑམྦྷནཔྤཧཱནཾ ནཱམ. པཱལི༹ཡཾ པན ‘‘ཝིཀྑམྦྷནཔྤཧཱནཉྩ ནཱིཝརཎཱནཾ པཋམཾ ཛྷཱནཾ བྷཱཝཡཏོ’’ཏི (པཊི. མ. ༡.༢༤) ནཱིཝརཎཱནཉྙེཝ ཝིཀྑམྦྷནཾ ཝུཏྟཾ, ཏཾ པཱཀཊཏྟཱ ཝུཏྟནྟི ཝེདིཏབྦཾ. ནཱིཝརཎཱནི ཧི ཛྷཱནསྶ པུབྦབྷཱགེཔི པཙྪཱབྷཱགེཔི ན སཧསཱ ཙིཏྟཾ ཨཛ྄ཛྷོཏྠརནྟི, ཝིཏཀྐཱདཡོ ཨཔྤིཏཀྑཎེཡེཝ. ཏསྨཱ ནཱིཝརཎཱནཾ ཝིཀྑམྦྷནཾ པཱཀཊཾ.

༨༤༩. ཡཾ པན རཏྟིབྷཱགེ སམུཛྫལིཏེན པདཱིཔེན ཨནྡྷཀཱརསྶ ཝིཡ ཏེན ཏེན ཝིཔསྶནཱཡ ཨཝཡཝབྷཱུཏེན ཉཱཎངྒེན པཊིཔཀྑཝསེནེཝ ཏསྶ ཏསྶ པཧཱཏབྦདྷམྨསྶ པཧཱནཾ, ཨིདཾ ཏདངྒཔྤཧཱནཾ ནཱམ. སེཡྻཐིདཾ – ནཱམརཱུཔཔརིཙྪེདེན ཏཱཝ སཀྐཱཡདིཊྛིཡཱ. པཙྩཡཔརིགྒཧེན ཨཧེཏུཝིསམཧེཏུདིཊྛིཡཱ ཙེཝ ཀངྑཱམལསྶ ཙ. ཀལཱཔསམྨསནེན ‘‘ཨཧཾ མམཱ’’ཏི སམཱུཧགཱཧསྶ. མགྒཱམགྒཝཝཏྠཱནེན ཨམགྒེ མགྒསཉྙཱཡ. ཨུདཡདསྶནེན ཨུཙྪེདདིཊྛིཡཱ. ཝཡདསྶནེན སསྶཏདིཊྛིཡཱ. བྷཡཏུཔཊྛཱནེན སབྷཡེ ཨབྷཡསཉྙཱཡ. ཨཱདཱིནཝདསྶནེན ཨསྶཱདསཉྙཱཡ. ནིབྦིདཱནུཔསྶནེན ཨབྷིརཏིསཉྙཱཡ. མུཉྩིཏུཀམྱཏཱཡ ཨམུཉྩིཏུཀཱམབྷཱཝསྶ. པཊིསངྑཱནེན ཨཔྤཊིསངྑཱནསྶ. ཨུཔེཀྑཱཡ ཨནུཔེཀྑནསྶ. ཨནུལོམེན སཙྩཔཊིལོམགཱཧསྶ པཧཱནཾ.

ཡཾ ཝཱ པན ཨཊྛཱརསསུ མཧཱཝིཔསྶནཱསུ ཨནིཙྩཱནུཔསྶནཱཡ ནིཙྩསཉྙཱཡ. དུཀྑཱནུཔསྶནཱཡ སུཁསཉྙཱཡ. ཨནཏྟཱནུཔསྶནཱཡ ཨཏྟསཉྙཱཡ. ནིབྦིདཱནུཔསྶནཱཡ ནནྡིཡཱ. ཝིརཱགཱནུཔསྶནཱཡ རཱགསྶ. ནིརོདྷཱནུཔསྶནཱཡ ¶ སམུདཡསྶ. པཊིནིསྶགྒཱནུཔསྶནཱཡ ¶ ཨཱདཱནསྶ. ཁཡཱནུཔསྶནཱཡ གྷནསཉྙཱཡ. ཝཡཱནུཔསྶནཱཡ ཨཱཡཱུཧནསྶ. ཝིཔརིཎཱམཱནུཔསྶནཱཡ དྷུཝསཉྙཱཡ. ཨནིམིཏྟཱནུཔསྶནཱཡ ནིམིཏྟསྶ. ཨཔྤཎིཧིཏཱནུཔསྶནཱཡ པཎིདྷིཡཱ. སུཉྙཏཱནུཔསྶནཱཡ ཨབྷིནིཝེསསྶ. ཨདྷིཔཉྙཱདྷམྨཝིཔསྶནཱཡ སཱརཱདཱནཱབྷིནིཝེསསྶ. ཡཐཱབྷཱུཏཉཱཎདསྶནེན སམྨོཧཱབྷིནིཝེསསྶ. ཨཱདཱིནཝཱནུཔསྶནཱཡ ཨཱལཡཱབྷིནིཝེསསྶ. པཊིསངྑཱནུཔསྶནཱཡ ཨཔྤཊིསངྑཱཡ. ཝིཝཊྚཱནུཔསྶནཱཡ སཾཡོགཱབྷིནིཝེསསྶ པཧཱནཾ. ཨིདམྤི ཏདངྒཔྤཧཱནམེཝ.

༨༥༠. ཏཏྠ ཡཐཱ ཨནིཙྩཱནུཔསྶནཱདཱིཧི སཏྟཧི ནིཙྩསཉྙཱདཱིནཾ པཧཱནཾ ཧོཏི, ཏཾ བྷངྒཱནུཔསྶནེ ཝུཏྟམེཝ.

ཁཡཱནུཔསྶནཱཏི པན གྷནཝིནིབྦྷོགཾ ཀཏྭཱ ཨནིཙྩཾ ཁཡཊྛེནཱཏི ཨེཝཾ ཁཡཾ པསྶཏོ ཉཱཎཾ. ཏེན གྷནསཉྙཱཡ པཧཱནཾ ཧོཏི.

ཝཡཱནུཔསྶནཱཏི –

ཨཱརམྨཎཱནྭཡེན, ཨུབྷོ ཨེཀཝཝཏྠཱནཱ;

ནིརོདྷེ ཨདྷིམུཏྟཏཱ, ཝཡལཀྑཎཝིཔསྶནཱཏི. –

ཨེཝཾ ཝུཏྟཱ པཙྩཀྑཏོ ཙེཝ ཨནྭཡཏོ ཙ སངྑཱརཱནཾ བྷངྒཾ དིསྭཱ ཏསྨིཉྙེཝ བྷངྒསངྑཱཏེ ནིརོདྷེ ཨདྷིམུཏྟཏཱ, ཏཱཡ ཨཱཡཱུཧནསྶ པཧཱནཾ ཧོཏི. ཡེསཾ ཧི ཨཏྠཱཡ ཨཱཡཱུཧེཡྻ, ‘‘ཏེ ཨེཝཾ ཝཡདྷམྨཱ’’ཏི ཝིཔསྶཏོ ཨཱཡཱུཧནེ ཙིཏྟཾ ན ནམཏི.

ཝིཔརིཎཱམཱནུཔསྶནཱཏི རཱུཔསཏྟཀཱདིཝསེན ཏཾ ཏཾ པརིཙྪེདཾ ཨཏིཀྐམྨ ཨཉྙཐཱཔཝཏྟིདསྶནཾ. ཨུཔྤནྣསྶ ཝཱ ཛརཱཡ ཙེཝ མརཎེན ཙ དྭཱིཧཱཀཱརེཧི ཝིཔརིཎཱམདསྶནཾ, ཏཱཡ དྷུཝསཉྙཱཡ པཧཱནཾ ཧོཏི.

ཨནིམིཏྟཱནུཔསྶནཱཏི ཨནིཙྩཱནུཔསྶནཱཝ, ཏཱཡ ནིཙྩནིམིཏྟསྶ པཧཱནཾ ཧོཏི.

ཨཔྤཎིཧིཏཱནུཔསྶནཱཏི དུཀྑཱནུཔསྶནཱཝ, ཏཱཡ སུཁཔཎིདྷིསུཁཔཏྠནཱཔཧཱནཾ ཧོཏི.

སུཉྙཏཱནུཔསྶནཱཏི ཨནཏྟཱནུཔསྶནཱཝ, ཏཱཡ ‘‘ཨཏྠི ཨཏྟཱ’’ཏི ཨབྷིནིཝེསསྶ པཧཱནཾ ཧོཏི.

ཨདྷིཔཉྙཱདྷམྨཝིཔསྶནཱཏི ¶ ¶ –

‘‘ཨཱརམྨཎཉྩ པཊིསངྑཱ, བྷངྒཉྩ ཨནུཔསྶཏི;

སུཉྙཏོ ཙ ཨུཔཊྛཱནཾ, ཨདྷིཔཉྙཱ ཝིཔསྶནཱ’’ཏི. –

ཨེཝཾ ཝུཏྟཱ རཱུཔཱདིཨཱརམྨཎཾ ཛཱནིཏྭཱ ཏསྶ ཙ ཨཱརམྨཎསྶ ཏདཱརམྨཎསྶ ཙ ཙིཏྟསྶ བྷངྒཾ དིསྭཱ ‘‘སངྑཱརཱཝ བྷིཛྫནྟི, སངྑཱརཱནཾ མརཎཾ, ན ཨཉྙོ ཀོཙི ཨཏྠཱི’’ཏི བྷངྒཝསེན སུཉྙཏཾ གཧེཏྭཱ པཝཏྟཱ ཝིཔསྶནཱ. སཱ ཨདྷིཔཉྙཱ ཙ དྷམྨེསུ ཙ ཝིཔསྶནཱཏི ཀཏྭཱ ཨདྷིཔཉྙཱདྷམྨཝིཔསྶནཱཏི ཝུཙྩཏི, ཏཱཡ ནིཙྩསཱརཱབྷཱཝསྶ ཙ ཨཏྟསཱརཱབྷཱཝསྶ ཙ སུཊྛུ དིཊྛཏྟཱ སཱརཱདཱནཱབྷིནིཝེསསྶ པཧཱནཾ ཧོཏི.

ཡཐཱབྷཱུཏཉཱཎདསྶནནྟི སཔྤཙྩཡནཱམརཱུཔཔརིགྒཧོ, ཏེན ‘‘ཨཧོསིཾ ནུ ཁོ ཨཧཾ ཨཏཱིཏམདྡྷཱན’’ནྟིཨཱདིཝསེན ཙེཝ, ‘‘ཨིསྶརཏོ ལོཀོ སམྦྷོཏཱི’’ཏིཨཱདིཝསེན ཙ པཝཏྟསྶ སམྨོཧཱབྷིནིཝེསསྶ པཧཱནཾ ཧོཏི.

ཨཱདཱིནཝཱནུཔསྶནཱཏི བྷཡཏུཔཊྛཱནཝསེན ཨུཔྤནྣཾ སབྦབྷཝཱདཱིསུ ཨཱདཱིནཝདསྶནཉཱཎཾ, ཏེན ‘‘ཀིཉྩི ཨལླཱིཡིཏབྦཾ ན དིསྶཏཱི’’ཏི ཨཱལཡཱབྷིནིཝེསསྶ པཧཱནཾ ཧོཏི.

པཊིསངྑཱནུཔསྶནཱཏི མུཉྩནསྶ ཨུཔཱཡཀརཎཾ པཊིསངྑཱཉཱཎཾ, ཏེན ཨཔྤཊིསངྑཱཡ པཧཱནཾ ཧོཏི.

ཝིཝཊྚཱནུཔསྶནཱཏི སངྑཱརུཔེཀྑཱ ཙེཝ ཨནུལོམཉྩ. ཏདཱ ཧིསྶ ཙིཏྟཾ ཨཱིསཀཔོཎེ པདུམཔལཱསེ ཨུདཀབིནྡུ ཝིཡ སབྦསྨཱ སངྑཱརགཏཱ པཏིལཱིཡཏི, པཏིཀུཊཏི, པཏིཝཏྟཏཱིཏི ཝུཏྟཾ. ཏསྨཱ ཏཱཡ སཾཡོགཱབྷིནིཝེསསྶ པཧཱནཾ ཧོཏི, ཀཱམསཾཡོགཱདིཀསྶ ཀིལེསཱབྷིནིཝེསསྶ ཀིལེསཔྤཝཏྟིཡཱ པཧཱནཾ ཧོཏཱིཏི ཨཏྠོ. ཨེཝཾ ཝིཏྠཱརཏོ ཏདངྒཔྤཧཱནཾ ཝེདིཏབྦཾ. པཱལི༹ཡཾ པན ‘‘ཏདངྒཔྤཧཱནཉྩ དིཊྛིགཏཱནཾ ནིབྦེདྷབྷཱགིཡཾ སམཱདྷིཾ བྷཱཝཡཏོ’’ཏི (པཊི. མ. ༡.༢༤) སངྑེཔེནེཝ ཝུཏྟཾ.

༨༥༡. ཡཾ ¶ པན ཨསནིཝིཙཀྐཱབྷིཧཏསྶ རུཀྑསྶ ཝིཡ ཨརིཡམགྒཉཱཎེན སཾཡོཛནཱདཱིནཾ དྷམྨཱནཾ ཡཐཱ ན པུན པཝཏྟི, ཨེཝཾ པཧཱནཾ, ཨིདཾ སམུཙྪེདཔྤཧཱནཾ ནཱམ. ཡཾ སནྡྷཱཡ ཝུཏྟཾ ‘‘སམུཙྪེདཔྤཧཱནཉྩ ལོཀུཏྟརཾ ཁཡགཱམིམགྒཾ བྷཱཝཡཏོ’’ཏི (པཊི. མ. ༡.༢༤) ¶ . ཨིཏི ཨིམེསུ ཏཱིསུ པཧཱནེསུ སམུཙྪེདཔྤཧཱནམེཝ ཨིདྷ ཨདྷིཔྤེཏཾ. ཡསྨཱ པན ཏསྶ ཡོགིནོ པུབྦབྷཱགེ ཝིཀྑམྦྷནཏདངྒཔྤཧཱནཱནིཔི ཏདཏྠཱནེཝ, ཏསྨཱ པཧཱནཏྟཡམྤི ཨིམིནཱ པརིཡཱཡེན མགྒཉཱཎསྶ ཀིཙྩནྟི ཝེདིཏབྦཾ. པཊིརཱཛཱནཾ ཝདྷིཏྭཱ རཛྫཾ པཏྟེན ཧི ཡམྤི ཏཏོ པུབྦེ ཀཏཾ, སབྦཾ ‘‘ཨིདཉྩིདཉྩ རཉྙཱ ཀཏ’’ནྟིཡེཝ ཝུཙྩཏི.

༨༥༢. སཙྪིཀིརིཡཱཔཱིཏི ལོཀིཡསཙྪིཀིརིཡཱ ལོཀུཏྟརསཙྪིཀིརིཡཱཏི དྭེདྷཱ བྷིནྣཱཔི ལོཀུཏྟརཱཡ དསྶནབྷཱཝནཱཝསེན བྷེདཏོ ཏིཝིདྷཱ ཧོཏི. ཏཏྠ ‘‘པཋམསྶ ཛྷཱནསྶ ལཱབྷཱིམྷི, ཝསཱིམྷི, པཋམཛ྄ཛྷཱནཾ སཙྪིཀཏཾ མཡཱ’’ཏིཨཱདིནཱ (པཱརཱ. ༢༠༣-༢༠༤) ནཡེན ཨཱགཏཱ པཋམཛ྄ཛྷཱནཱདཱིནཾ ཕསྶནཱ ལོཀིཡསཙྪིཀིརིཡཱ ནཱམ. ཕསྶནཱཏི ཨདྷིགནྟྭཱ ‘‘ཨིདཾ མཡཱ ཨདྷིགཏ’’ནྟི པཙྩཀྑཏོ ཉཱཎཕསྶེན ཕུསནཱ. ཨིམམེཝ ཧི ཨཏྠཾ སནྡྷཱཡ ‘‘སཙྪིཀིརིཡཱ པཉྙཱ ཕསྶནཊྛེ ཉཱཎ’’ནྟི (པཊི. མ. མཱཏིཀཱ ༡.༢༤) ཨུདྡིསིཏྭཱ ‘‘ཡེ ཡེ དྷམྨཱ སཙྪིཀཏཱ ཧོནྟི, ཏེ ཏེ དྷམྨཱ ཕསྶིཏཱ ཧོནྟཱི’’ཏི (པཊི. མ. ༡.༧༥) སཙྪིཀིརིཡནིདྡེསོ ཝུཏྟོ.

ཨཔིཙ ཨཏྟནོ སནྟཱནེ ཨནུཔྤཱདེཏྭཱཔི ཡེ དྷམྨཱ ཀེཝལཾ ཨཔརཔྤཙྩཡེན ཉཱཎེན ཉཱཏཱ, ཏེ སཙྪིཀཏཱ ཧོནྟི. ཏེནེཝ ཧི ‘‘སབྦཾ, བྷིཀྑཝེ, སཙྪིཀཱཏབྦཾ. ཀིཉྩ, བྷིཀྑཝེ, སབྦཾ སཙྪིཀཱཏབྦཾ? ཙཀྑུ, བྷིཀྑཝེ, སཙྪིཀཱཏབྦ’’ནྟིཨཱདི (པཊི. མ. ༡.༢༩) ཝུཏྟཾ.

ཨཔརམྤི ཝུཏྟཾ ‘‘རཱུཔཾ པསྶནྟོ སཙྪིཀརོཏི. ཝེདནཾ…པེ… ཝིཉྙཱཎཾ པསྶནྟོ སཙྪིཀརོཏི. ཙཀྑུཾ…པེ… ཛརཱམརཎཾ…པེ… ཨམཏོགདྷཾ ནིབྦཱནཾ པསྶནྟོ སཙྪིཀརོཏཱིཏི. ཡེ ཡེ དྷམྨཱ སཙྪིཀཏཱ ཧོནྟི, ཏེ ཏེ དྷམྨཱ ཕསྶིཏཱ ཧོནྟཱི’’ཏི (པཊི. མ. ༡.༢༩).

པཋམམགྒཀྑཎེ པན ནིབྦཱནདསྶནཾ དསྶནསཙྪིཀིརིཡཱ. སེསམགྒཀྑཎེསུ བྷཱཝནཱསཙྪིཀིརིཡཱཏི. སཱ དུཝིདྷཱཔི ཨིདྷ ཨདྷིཔྤེཏཱ. ཏསྨཱ དསྶནབྷཱཝནཱཝསེན ནིབྦཱནསྶ སཙྪིཀིརིཡཱ ཨིམསྶ ཉཱཎསྶ ཀིཙྩནྟི ཝེདིཏབྦཾ.

༨༥༣. དྭེ ¶ ¶ བྷཱཝནཱ ཨབྷིམཏཱཏི བྷཱཝནཱ པན ལོཀིཡབྷཱཝནཱ ལོཀུཏྟརབྷཱཝནཱཏི དྭེཡེཝ ཨབྷིམཏཱ. ཏཏྠ ལོཀིཡཱནཾ སཱིལསམཱདྷིཔཉྙཱནཾ ཨུཔྤཱདནཾ, ཏཱཧི ཙ སནྟཱནཝཱསནཾ ལོཀིཡབྷཱཝནཱ. ལོཀུཏྟརཱནཾ ཨུཔྤཱདནཾ, ཏཱཧི ཙ སནྟཱནཝཱསནཾ ལོཀུཏྟརབྷཱཝནཱ. ཏཱསུ ཨིདྷ ལོཀུཏྟརཱ ཨདྷིཔྤེཏཱ. ལོཀུཏྟརཱནི ཧི སཱིལཱདཱིནི ཙཏུབྦིདྷམྤེཏཾ ཉཱཎཾ ཨུཔྤཱདེཏི. ཏེསཾ སཧཛཱཏཔཙྩཡཱདིཏཱཡ ཏེཧི ཙ སནྟཱནཾ ཝཱསེཏཱིཏི ལོཀུཏྟརབྷཱཝནཱཝསྶ ཀིཙྩནྟི.

ཨེཝཾ –

ཀིཙྩཱནི པརིཉྙཱདཱིནི, ཡཱནི ཝུཏྟཱནི ཨབྷིསམཡཀཱལེ;

ཏཱནི ཙ ཡཐཱསབྷཱཝེན, ཛཱནིཏབྦཱནི སབྦཱནཱིཏི.

ཨེཏྟཱཝཏཱ ཙ –

‘‘སཱིལེ པཏིཊྛཱཡ ནརོ སཔཉྙོ, ཙིཏྟཾ པཉྙཉྩ བྷཱཝཡ’’ནྟི. –

ཨེཝཾ སརཱུཔེནེཝ ཨཱབྷཏཱཡ པཉྙཱབྷཱཝནཱཡ ཝིདྷཱནདསྶནཏྠཾ ཡཾ ཝུཏྟཾ ‘‘མཱུལབྷཱུཏཱ དྭེ ཝིསུདྡྷིཡོ སམྤཱདེཏྭཱ སརཱིརབྷཱུཏཱ པཉྩ ཝིསུདྡྷིཡོ སམྤཱདེནྟེན བྷཱཝེཏབྦཱ’’ཏི, ཏཾ ཝིཏྠཱརིཏཾ ཧོཏི. ཀཐཾ བྷཱཝེཏབྦཱཏི ཨཡཉྩ པཉྷོ ཝིསྶཛྫིཏོཏི.

ཨིཏི སཱདྷུཛནཔཱམོཛྫཏྠཱཡ ཀཏེ ཝིསུདྡྷིམགྒེ

པཉྙཱབྷཱཝནཱདྷིཀཱརེ

ཉཱཎདསྶནཝིསུདྡྷིནིདྡེསོ ནཱམ

བཱཝཱིསཏིམོ པརིཙྪེདོ.

༢༣. པཉྙཱབྷཱཝནཱནིསཾསནིདྡེསོ

ཨཱནིསཾསཔཀཱསནཱ

༨༥༤. ཡཾ ¶ ¶ པན ཝུཏྟཾ ‘‘པཉྙཱབྷཱཝནཱཡ ཀོ ཨཱནིསཾསོ’’ཏི, ཏཏྠ ཝདཱམ. ཨཡཉྷི པཉྙཱབྷཱཝནཱ ནཱམ ཨནེཀསཏཱནིསཾསཱ. ཏསྶཱ དཱིགྷེནཱཔི ཨདྡྷུནཱ ན སུཀརཾ ཝིཏྠཱརཏོ ཨཱནིསཾསཾ པཀཱསེཏུཾ. སངྑེཔཏོ པནསྶཱ ནཱནཱཀིལེསཝིདྡྷཾསནཾ, ཨརིཡཕལརསཱནུབྷཝནཾ, ནིརོདྷསམཱཔཏྟིསམཱཔཛྫནསམཏྠཏཱ, ཨཱཧུནེཡྻབྷཱཝཱདིསིདྡྷཱིཏི ཨཡམཱནིསཾསོ ཝེདིཏབྦོ.

ནཱནཱཀིལེསཝིདྡྷཾསནཀཐཱ

༨༥༥. ཏཏྠ ཡཾ ནཱམརཱུཔཔརིཙྪེདཏོ པཊྛཱཡ སཀྐཱཡདིཊྛཱདཱིནཾ ཝསེན ནཱནཱཀིལེསཝིདྡྷཾསནཾ ཝུཏྟཾ, ཨཡཾ ལོཀིཀཱཡ པཉྙཱབྷཱཝནཱཡ ཨཱནིསཾསོ. ཡཾ ཨརིཡམགྒཀྑཎེ སཾཡོཛནཱདཱིནཾ ཝསེན ནཱནཱཀིལེསཝིདྡྷཾསནཾ ཝུཏྟཾ, ཨཡཾ ལོཀུཏྟརཱཡ པཉྙཱབྷཱཝནཱཡ ཨཱནིསཾསོཏི ཝེདིཏབྦོ.

བྷཱིམཝེགཱནུཔཏིཏཱ, ཨསནཱིཝ སིལུཙྩཡེ;

ཝཱཡུཝེགསམུཊྛིཏོ, ཨརཉྙམིཝ པཱཝཀོ.

ཨནྡྷཀཱརཾ ཝིཡ རཝི, སཏེཛུཛྫལམཎྜལོ;

དཱིགྷརཏྟཱནུཔཏིཏཾ, སབྦཱནཏྠཝིདྷཱཡཀཾ.

ཀིལེསཛཱལཾ པཉྙཱ ཧི, ཝིདྡྷཾསཡཏི བྷཱཝིཏཱ;

སནྡིཊྛིཀམཏོ ཛཉྙཱ, ཨཱནིསཾསམིམཾ ཨིདྷ.

ཕལསམཱཔཏྟིཀཐཱ

༨༥༦. ཨརིཡཕལརསཱནུབྷཝནནྟི ¶ ན ཀེཝལཉྩ ཀིལེསཝིདྡྷཾསནཉྙེཝ, ཨརིཡཕལརསཱནུབྷཝནམྤི པཉྙཱབྷཱཝནཱཡ ཨཱནིསཾསོ. ཨརིཡཕལནྟི ཧི སོཏཱཔཏྟིཕལཱདི སཱམཉྙཕལཾ ཝུཙྩཏི. ཏསྶ དྭཱིཧཱཀཱརེཧི རསཱནུབྷཝནཾ ཧོཏི. མགྒཝཱིཐིཡཉྩ ཕལསམཱཔཏྟིཝསེན ཙ པཝཏྟིཡཾ. ཏཏྲཱསྶ མགྒཝཱིཐིཡཾ པཝཏྟི དསྶིཏཱཡེཝ.

༨༥༧. ཨཔིཙ ¶ ཡེ ‘‘སཾཡོཛནཔྤཧཱནམཏྟམེཝ ཕལཾ ནཱམ, ན ཀོཙི ཨཉྙོ དྷམྨོ ཨཏྠཱི’’ཏི ཝདནྟི, ཏེསཾ ཨནུནཡཏྠཾ ཨིདཾ སུཏྟམྤི དསྶེཏབྦཾ – ‘‘ཀཐཾ པཡོགཔཊིཔྤསྶདྡྷིཔཉྙཱ ཕལེ ཉཱཎཾ? སོཏཱཔཏྟིམགྒཀྑཎེ དསྶནཊྛེན སམྨཱདིཊྛི མིཙྪཱདིཊྛིཡཱ ཝུཊྛཱཏི, ཏདནུཝཏྟཀཀིལེསེཧི ཙ ཁནྡྷེཧི ཙ ཝུཊྛཱཏི, བཧིདྡྷཱ ཙ སབྦནིམིཏྟེཧི ཝུཊྛཱཏི. ཏམྤཡོགཔཊིཔྤསྶདྡྷཏྟཱ ཨུཔྤཛྫཏི སམྨཱདིཊྛི, མགྒསྶེཏཾ ཕལ’’ནྟི (པཊི. མ. ༡.༦༣) ཝིཏྠཱརེཏབྦཾ.

‘‘ཙཏྟཱརོ མགྒཱ ཨཔརིཡཱཔནྣཱ, ཙཏྟཱརི ཙ སཱམཉྙཕལཱནི, ཨིམེ དྷམྨཱ ཨཔྤམཱཎཱརམྨཎཱ’’ (དྷ. ས. ༡༤༢༢). ‘‘མཧགྒཏོ དྷམྨོ ཨཔྤམཱཎསྶ དྷམྨསྶ ཨནནྟརཔཙྩཡེན པཙྩཡོ’’ཏི (པཊྛཱ. ༢.༡༢.༦༢) ཨེཝམཱདཱིནིཔི ཙེཏྠ སཱདྷཀཱནི.

༨༥༨. ཕལསམཱཔཏྟིཡཾ པཝཏྟིདསྶནཏྠཾ པནསྶ ཨིདཾ པཉྷཱཀམྨཾ – ཀཱ ཕལསམཱཔཏྟི, ཀེ ཏཾ སམཱཔཛྫནྟི, ཀེ ན སམཱཔཛྫནྟི, ཀསྨཱ སམཱཔཛྫནྟི, ཀཐཉྩསྶཱ སམཱཔཛྫནཾ ཧོཏི, ཀཐཾ ཋཱནཾ, ཀཐཾ ཝུཊྛཱནཾ, ཀིཾ ཕལསྶ ཨནནྟརཾ, ཀསྶ ཙ ཕལཾ ཨནནྟརནྟི?

༨༥༩. ཏཏྠ ཀཱ ཕལསམཱཔཏྟཱིཏི ཡཱ ཨརིཡཕལསྶ ནིརོདྷེ ཨཔྤནཱ.

༨༦༠. ཀེ ཏཾ སམཱཔཛྫནྟི, ཀེ ན སམཱཔཛྫནྟཱིཏི སབྦེཔི པུཐུཛྫནཱ ན སམཱཔཛྫནྟི. ཀསྨཱ? ཨནདྷིགཏཏྟཱ. ཨརིཡཱ པན སབྦེཔི སམཱཔཛྫནྟི. ཀསྨཱ? ཨདྷིགཏཏྟཱ. ཨུཔརིམཱ པན ཧེཊྛིམཾ ན སམཱཔཛྫནྟི, པུགྒལནྟརབྷཱཝུཔགམནེན པཊིཔྤསྶདྡྷཏྟཱ. ཧེཊྛིམཱ ཙ ཨུཔརིམཾ, ཨནདྷིགཏཏྟཱ. ཨཏྟནོ ཨཏྟནོཡེཝ པན ཕལཾ སམཱཔཛྫནྟཱིཏི ཨིདམེཏྠ སནྣིཊྛཱནཾ.

ཀེཙི པན ‘‘སོཏཱཔནྣསཀདཱགཱམིནོཔི ན སམཱཔཛྫནྟི. ཨུཔརིམཱ དྭེཡེཝ སམཱཔཛྫནྟཱི’’ཏི ¶ ཝདནྟི. ཨིདཉྩ ཏེསཾ ཀཱརཎཾ, ཨེཏེ ཧི སམཱདྷིསྨིཾ པརིཔཱུརཀཱརིནོཏི. ཏཾ པུཐུཛྫནསྶཱཔི ཨཏྟནཱ པཊིལདྡྷལོཀིཡསམཱདྷིསམཱཔཛྫནཏོ ཨཀཱརཎམེཝ. ཀིཉྩེཏྠ ཀཱརཎཱཀཱརཎཙིནྟཱཡ. ནནུ པཱལི༹ཡཾཡེཝ ཝུཏྟཾ – ‘‘ཀཏམེ དས གོཏྲབྷུདྷམྨཱ ཝིཔསྶནཱཝསེན ཨུཔྤཛྫནྟི? སོཏཱཔཏྟིམགྒཔཊིལཱབྷཏྠཱཡ ཨུཔྤཱདཾ པཝཏྟཾ…པེ… ཨུཔཱཡཱསཾ བཧིདྡྷཱ སངྑཱརནིམིཏྟཾ ཨབྷིབྷུཡྻཏཱིཏི གོཏྲབྷུ. སོཏཱཔཏྟིཕལསམཱཔཏྟཏྠཱཡ སཀདཱགཱམིམགྒཾ ¶ …པེ… ཨརཧཏྟཕལསམཱཔཏྟཏྠཱཡ… སུཉྙཏཝིཧཱརསམཱཔཏྟཏྠཱཡ… ཨནིམིཏྟཝིཧཱརསམཱཔཏྟཏྠཱཡ ཨུཔྤཱདཾ…པེ… བཧིདྡྷཱ སངྑཱརནིམིཏྟཾ ཨབྷིབྷུཡྻཏཱིཏི གོཏྲབྷཱུ’’ཏི (པཊི. མ. ༡.༦༠). ཏསྨཱ སབྦེཔི ཨརིཡཱ ཨཏྟནོ ཨཏྟནོ ཕལཾ སམཱཔཛྫནྟཱིཏི ནིཊྛམེཏྠ གནྟབྦཾ.

༨༦༡. ཀསྨཱ སམཱཔཛྫནྟཱིཏི དིཊྛདྷམྨསུཁཝིཧཱརཏྠཾ. ཡཐཱ ཧི རཱཛཱ རཛྫསུཁཾ, དེཝཏཱ དིབྦསུཁཾ ཨནུབྷཝནྟི, ཨེཝཾ ཨརིཡཱ ‘‘ཨརིཡཾ ལོཀུཏྟརསུཁཾ ཨནུབྷཝིསྶཱམཱ’’ཏི ཨདྡྷཱནཔྤརིཙྪེདཾ ཀཏྭཱ ཨིཙྪིཏིཙྪིཏཀྑཎེ ཕལསམཱཔཏྟིཾ སམཱཔཛྫནྟི.

༨༦༢. ཀཐཉྩསྶཱ སམཱཔཛྫནཾ ཧོཏི, ཀཐཾ ཋཱནཾ, ཀཐཾ ཝུཊྛཱནནྟི དྭཱིཧི ཏཱཝ ཨཱཀཱརེཧི ཨསྶཱ སམཱཔཛྫནཾ ཧོཏི – ནིབྦཱནཏོ ཨཉྙསྶ ཨཱརམྨཎསྶ ཨམནསིཀཱརཱ ནིབྦཱནསྶ ཙ མནསིཀཱརཱ. ཡཐཱཧ – ‘‘དྭེ ཁོ, ཨཱཝུསོ, པཙྩཡཱ ཨནིམིཏྟཱཡ ཙེཏོཝིམུཏྟིཡཱ སམཱཔཏྟིཡཱ སབྦནིམིཏྟཱནཉྩ ཨམནསིཀཱརོ, ཨནིམིཏྟཱཡ ཙ དྷཱཏུཡཱ མནསིཀཱརོ’’ཏི (མ. ནི. ༡.༤༥༨).

༨༦༣. ཨཡམྤནེཏྠ སམཱཔཛྫནཀྐམོ. ཕལསམཱཔཏྟཏྠིཀེན ཧི ཨརིཡསཱཝཀེན རཧོགཏེན པཊིསལླཱིནེན ཨུདཡབྦཡཱདིཝསེན སངྑཱརཱ ཝིཔསྶིཏབྦཱ. ཏསྶ པཝཏྟཱནུཔུབྦཝིཔསྶནསྶ སངྑཱརཱརམྨཎགོཏྲབྷུཉཱཎཱནནྟརཱ ཕལསམཱཔཏྟིཝསེན ནིརོདྷེ ཙིཏྟཾ ཨཔྤེཏི. ཕལསམཱཔཏྟིནིནྣཏཱཡ ཙེཏྠ སེཀྑསྶཱཔི ཕལམེཝ ཨུཔྤཛྫཏི, ན མགྒོ.

ཡེ པན ཝདནྟི ‘‘སོཏཱཔནྣོ ‘ཕལསམཱཔཏྟིཾ སམཱཔཛྫིསྶཱམཱི’ཏི ཝིཔསྶནཾ པཊྛཔེཏྭཱ སཀདཱགཱམཱི ཧོཏི. སཀདཱགཱམཱི ཙ ཨནཱགཱམཱི’’ཏི, ཏེ ཝཏྟབྦཱ ‘‘ཨེཝཾ སཏི ཨནཱགཱམཱི ཨརཧཱ བྷཝིསྶཏི, ཨརཧཱ པཙྩེཀབུདྡྷོ, པཙྩེཀབུདྡྷོ ཙ བུདྡྷོ. ཏསྨཱ ན ཀིཉྩི ཨེཏཾ, པཱལི༹ཝསེནེཝ ཙ པཊིཀྑིཏྟ’’ནྟིཔི ན གཧེཏབྦཾ. ཨིདམེཝ པན གཧེཏབྦཾ – སེཀྑསྶཱཔི ཕལམེཝ ¶ ཨུཔྤཛྫཏི, ན མགྒོ. ཕལཉྩསྶ སཙེ ཨནེན པཋམཛ྄ཛྷཱནིཀོ མགྒོ ཨདྷིགཏོ ཧོཏི. པཋམཛ྄ཛྷཱནིཀམེཝ ཨུཔྤཛྫཏི. སཙེ དུཏིཡཱདཱིསུ ཨཉྙཏརཛ྄ཛྷཱནིཀོ, དུཏིཡཱདཱིསུ ཨཉྙཏརཛ྄ཛྷཱནིཀམེཝཱཏི. ཨེཝཾ ཏཱཝསྶཱ སམཱཔཛྫནཾ ཧོཏི.

༨༦༤. ‘‘ཏཡོ ¶ ཁོ, ཨཱཝུསོ, པཙྩཡཱ ཨནིམིཏྟཱཡ ཙེཏོཝིམུཏྟིཡཱ ཋིཏིཡཱ སབྦནིམིཏྟཱནཉྩ ཨམནསིཀཱརོ, ཨནིམིཏྟཱཡ ཙ དྷཱཏུཡཱ མནསིཀཱརོ, པུབྦེ ཙ ཨབྷིསངྑཱརོ’’ཏི (མ. ནི. ༡.༤༥༨) ཝཙནཏོ པནསྶཱ ཏཱིཧཱཀཱརེཧི ཋཱནཾ ཧོཏི. ཏཏྠ པུབྦེ ཙ ཨབྷིསངྑཱརོཏི སམཱཔཏྟིཏོ པུབྦེ ཀཱལཔརིཙྪེདོ. ‘‘ཨསུཀསྨིཾ ནཱམ ཀཱལེ ཝུཊྛཧིསྶཱམཱི’’ཏི པརིཙྪིནྣཏྟཱ ཧིསྶཱ ཡཱཝ སོ ཀཱལོ ནཱགཙྪཏི, ཏཱཝ ཋཱནཾ ཧོཏི. ཨེཝམསྶཱ ཋཱནཾ ཧོཏཱིཏི.

༨༦༥. ‘‘དྭེ ཁོ, ཨཱཝུསོ, པཙྩཡཱ ཨནིམིཏྟཱཡ ཙེཏོཝིམུཏྟིཡཱ ཝུཊྛཱནཱཡ སབྦནིམིཏྟཱནཉྩ མནསིཀཱརོ, ཨནིམིཏྟཱཡ ཙ དྷཱཏུཡཱ ཨམནསིཀཱརོ’’ཏི (མ. ནི. ༡.༤༥༨) ཝཙནཏོ པནསྶཱ དྭཱིཧཱཀཱརེཧི ཝུཊྛཱནཾ ཧོཏི. ཏཏྠ སབྦནིམིཏྟཱནནྟི རཱུཔནིམིཏྟཝེདནཱསཉྙཱསངྑཱརཝིཉྙཱཎནིམིཏྟཱནཾ. ཀཱམཉྩ ན སབྦཱནེཝེཏཱནི ཨེཀཏོ མནསིཀརོཏི སབྦསངྒཱཧིཀཝསེན པནེཏཾ ཝུཏྟཾ. ཏསྨཱ ཡཾ བྷཝངྒསྶ ཨཱརམྨཎཾ ཧོཏི, ཏཾ མནསིཀརོཏོ ཕལསམཱཔཏྟིཝུཊྛཱནཾ ཧོཏཱིཏི ཨེཝམསྶཱ ཝུཊྛཱནཾ ཝེདིཏབྦཾ.

༨༦༦. ཀིཾ ཕལསྶ ཨནནྟརཾ, ཀསྶ ཙ ཕལཾ ཨནནྟརནྟི ཕལསྶ ཏཱཝ ཕལམེཝ ཝཱ ཨནནྟརཾ ཧོཏི, བྷཝངྒཾ ཝཱ. ཕལཾ པན ཨཏྠི མགྒཱནནྟརཾ, ཨཏྠི ཕལཱནནྟརཾ, ཨཏྠི གོཏྲབྷུཨནནྟརཾ, ཨཏྠི ནེཝསཉྙཱནཱསཉྙཱཡཏནཱནནྟརཾ. ཏཏྠ མགྒཝཱིཐིཡཾ མགྒཱནནྟརཾ, པུརིམསྶ པུརིམསྶ པཙྪིམཾ པཙྪིམཾ ཕལཱནནྟརཾ. ཕལསམཱཔཏྟཱིསུ པུརིམཾ པུརིམཾ གོཏྲབྷུཨནནྟརཾ. གོཏྲབྷཱུཏི ཙེཏྠ ཨནུལོམཾ ཝེདིཏབྦཾ. ཝུཏྟཉྷེཏཾ པཊྛཱནེ – ‘‘ཨརཧཏོ ཨནུལོམཾ ཕལསམཱཔཏྟིཡཱ ཨནནྟརཔཙྩཡེན པཙྩཡོ. སེཀྑཱནཾ ཨནུལོམཾ ཕལསམཱཔཏྟིཡཱ ཨནནྟརཔཙྩཡེན པཙྩཡོ’’ཏི (པཊྛཱ. ༡.༡.༤༡༧). ཡེན ཕལེན ནིརོདྷཱ ཝུཊྛཱནཾ ཧོཏི, ཏཾ ནེཝསཉྙཱནཱསཉྙཱཡཏནཱནནྟརནྟི. ཏཏྠ ཋཔེཏྭཱ མགྒཝཱིཐིཡཾ ཨུཔྤནྣཾ ཕལཾ ཨཝསེསཾ སབྦཾ ཕལསམཱཔཏྟིཝསེན པཝཏྟཾ ནཱམ. ཨེཝམེཏཾ མགྒཝཱིཐིཡཾ ཕལསམཱཔཏྟིཡཾ ཝཱ ཨུཔྤཛྫནཝསེན,

པཊིཔྤསྶདྡྷདརཐཾ ¶ , ཨམཏཱརམྨཎཾ སུབྷཾ;

ཝནྟལོཀཱམིསཾ སནྟཾ, སཱམཉྙཕལམུཏྟམཾ.

ཨོཛཝནྟེན སུཙིནཱ, སུཁེན ཨབྷིསནྡིཏཾ;

ཡེན སཱཏཱཏིསཱཏེན, ཨམཏེན མདྷུཾ ཝིཡ.

ཏཾ ¶ སུཁཾ ཏསྶ ཨརིཡསྶ, རསབྷཱུཏམནུཏྟརཾ;

ཕལསྶ པཉྙཾ བྷཱཝེཏྭཱ, ཡསྨཱ ཝིནྡཏི པཎྜིཏོ.

ཏསྨཱ ཨརིཡཕལསྶེཏཾ, རསཱནུབྷཝནཾ ཨིདྷ;

ཝིཔསྶནཱབྷཱཝནཱཡ, ཨཱནིསཾསོཏི ཝུཙྩཏི.

ནིརོདྷསམཱཔཏྟིཀཐཱ

༨༦༧. ནིརོདྷསམཱཔཏྟིསམཱཔཛྫནསམཏྠཏཱཏི ན ཀེཝལཉྩ ཨརིཡཕལརསཱནུབྷཝནཾཡེཝ, ཨཡཾ པན ནིརོདྷསམཱཔཏྟིཡཱ སམཱཔཛྫནསམཏྠཏཱཔི ཨིམིསྶཱ པཉྙཱབྷཱཝནཱཡ ཨཱནིསཾསོཏི ཝེདིཏབྦོ.

ཏཏྲིདཾ ནིརོདྷསམཱཔཏྟིཡཱ ཝིབྷཱཝནཏྠཾ པཉྷཱཀམྨཾ – ཀཱ ནིརོདྷསམཱཔཏྟི, ཀེ ཏཾ སམཱཔཛྫནྟི, ཀེ ན སམཱཔཛྫནྟི, ཀཏྠ སམཱཔཛྫནྟི, ཀསྨཱ སམཱཔཛྫནྟི, ཀཐཉྩསྶཱ སམཱཔཛྫནཾ ཧོཏི, ཀཐཾ ཋཱནཾ, ཀཐཾ ཝུཊྛཱནཾ, ཝུཊྛིཏསྶ ཀིཾནིནྣཾ ཙིཏྟཾ ཧོཏི, མཏསྶ ཙ སམཱཔནྣསྶ ཙ ཀོ ཝིསེསོ, ནིརོདྷསམཱཔཏྟི ཀིཾ སངྑཏཱ ཨསངྑཏཱ ལོཀིཡཱ ལོཀུཏྟརཱ ནིཔྥནྣཱ ཨནིཔྥནྣཱཏི?

༨༦༨. ཏཏྠ ཀཱ ནིརོདྷསམཱཔཏྟཱིཏི ཡཱ ཨནུཔུབྦནིརོདྷཝསེན ཙིཏྟཙེཏསིཀཱནཾ དྷམྨཱནཾ ཨཔྤཝཏྟི. ཀེ ཏཾ སམཱཔཛྫནྟི, ཀེ ན སམཱཔཛྫནྟཱིཏི སབྦེཔི པུཐུཛྫནཱ, སོཏཱཔནྣཱ, སཀདཱགཱམིནོ, སུཀྑཝིཔསྶཀཱ ཙ ཨནཱགཱམིནོ, ཨརཧནྟོ ན སམཱཔཛྫནྟི. ཨཊྛསམཱཔཏྟིལཱབྷིནོ པན ཨནཱགཱམིནོ, ཁཱིཎཱསཝཱ ཙ སམཱཔཛྫནྟི. ‘‘དྭཱིཧི བལེཧི སམནྣཱགཏཏྟཱ ¶ , ཏཡོ ཙ སངྑཱརཱནཾ པཊིཔྤསྶདྡྷིཡཱ, སོལ༹སཧི ཉཱཎཙརིཡཱཧི, ནཝཧི སམཱདྷིཙརིཡཱཧི ཝསཱིབྷཱཝཏཱ པཉྙཱ ནིརོདྷསམཱཔཏྟིཡཱ ཉཱཎ’’ནྟི (པཊི. མ. མཱཏིཀཱ ༡.༣༤) ཧི ཝུཏྟཾ. ཨཡཉྩ སམྤདཱ ཋཔེཏྭཱ ཨཊྛསམཱཔཏྟིལཱབྷིནོ ཨནཱགཱམིཁཱིཎཱསཝེ ཨཉྙེསཾ ནཏྠི. ཏསྨཱ ཏེཡེཝ སམཱཔཛྫནྟི, ན ཨཉྙེ.

༨༦༩. ཀཏམཱནི པནེཏྠ དྭེ བལཱནི…པེ… ཀཏམཱ ཝསཱིབྷཱཝཏཱཏི? ན ཨེཏྠ ཀིཉྩི ཨམྷེཧི ཝཏྟབྦཾ ཨཏྠི. སབྦམིདཾ ཨེཏསྶ ཨུདྡེསསྶ ནིདྡེསེ ཝུཏྟམེཝ. ཡཐཱཧ –

‘‘དྭཱིཧི ¶ བལེཧཱིཏི དྭེ བལཱནི སམཐབལཾ ཝིཔསྶནཱབལཾ. ཀཏམཾ སམཐབལཾ? ནེཀྑམྨཝསེན ཙིཏྟསྶ ཨེཀགྒཏཱ ཨཝིཀྑེཔོ སམཐབལཾ. ཨབྱཱཔཱདཝསེན… ཨཱལོཀསཉྙཱཝསེན… ཨཝིཀྑེཔཝསེན…པེ… པཊིནིསྶགྒཱནུཔསྶིཨསྶཱསཝསེན… པཊིནིསྶགྒཱནུཔསྶིཔསྶཱསཝསེན ཙིཏྟསྶ ཨེཀགྒཏཱ ཨཝིཀྑེཔོ སམཐབལནྟི. ཀེནཊྛེན སམཐབལཾ? པཋམཛ྄ཛྷཱནེན ནཱིཝརཎེ ན ཀམྤཏཱིཏི སམཐབལཾ. དུཏིཡཛ྄ཛྷཱནེན ཝིཏཀྐཝིཙཱརེ…པེ… ནེཝསཉྙཱནཱསཉྙཱཡཏནསམཱཔཏྟིཡཱ ཨཱཀིཉྩཉྙཱཡཏནསཉྙཱཡ ན ཀམྤཏཱིཏི སམཐབལཾ. ཨུདྡྷཙྩེ ཙ ཨུདྡྷཙྩསཧགཏཀིལེསེ ཙ ཁནྡྷེ ཙ ན ཀམྤཏི ན ཙལཏི ན ཝེདྷཏཱིཏི སམཐབལཾ. ཨིདཾ སམཐབལཾ.

‘‘ཀཏམཾ ཝིཔསྶནཱབལཾ? ཨནིཙྩཱནུཔསྶནཱ ཝིཔསྶནཱབལཾ. དུཀྑཱནུཔསྶནཱ… ཨནཏྟཱནུཔསྶནཱ… ནིབྦིདཱནུཔསྶནཱ… ཝིརཱགཱནུཔསྶནཱ… ནིརོདྷཱནུཔསྶནཱ… པཊིནིསྶགྒཱནུཔསྶནཱ ཝིཔསྶནཱབལཾ. རཱུཔེ ཨནིཙྩཱནུཔསྶནཱ…པེ… རཱུཔེ པཊིནིསྶགྒཱནུཔསྶནཱ ཝིཔསྶནཱབལཾ. ཝེདནཱཡ… སཉྙཱཡ… སངྑཱརེསུ… ཝིཉྙཱཎེ… ཙཀྑུསྨིཾ…པེ… ཛརཱམརཎེ ཨནིཙྩཱནུཔསྶནཱ. ཛརཱམརཎེ པཊིནིསྶགྒཱནུཔསྶནཱ ཝིཔསྶནཱབལནྟི. ཀེནཊྛེན ཝིཔསྶནཱབལཾ? ཨནིཙྩཱནུཔསྶནཱཡ ནིཙྩསཉྙཱཡ ན ཀམྤཏཱིཏི ཝིཔསྶནཱབལཾ. དུཀྑཱནུཔསྶནཱཡ སུཁསཉྙཱཡ ན ཀམྤཏཱིཏི… ཨནཏྟཱནུཔསྶནཱཡ ཨཏྟསཉྙཱཡ ན ཀམྤཏཱིཏི… ནིབྦིདཱནུཔསྶནཱཡ ནནྡིཡཱ ན ཀམྤཏཱིཏི… ཝིརཱགཱནུཔསྶནཱཡ རཱགེ ན ཀམྤཏཱིཏི… ནིརོདྷཱནུཔསྶནཱཡ སམུདཡེ ན ཀམྤཏཱིཏི… པཊིནིསྶགྒཱནུཔསྶནཱཡ ཨཱདཱནེ ན ཀམྤཏཱིཏི ཝིཔསྶནཱབལཾ. ཨཝིཛྫཱཡ ¶ ཙ ཨཝིཛྫཱསཧགཏཀིལེསེ ཙ ཁནྡྷེ ཙ ན ཀམྤཏི ན ཙལཏི ན ཝེདྷཏཱིཏི ཝིཔསྶནཱབལཾ. ཨིདཾ ཝིཔསྶནཱབལཾ.

‘‘ཏཡོ ཙ སངྑཱརཱནཾ པཊིཔྤསྶདྡྷིཡཱཏི ཀཏམེསཾ ཏིཎྞནྣཾ སངྑཱརཱནཾ པཊིཔྤསྶདྡྷིཡཱ? དུཏིཡཛ྄ཛྷཱནཾ སམཱཔནྣསྶ ཝིཏཀྐཝིཙཱརཱ ཝཙཱིསངྑཱརཱ པཊིཔྤསྶདྡྷཱ ཧོནྟི. ཙཏུཏྠཾ ཛྷཱནཾ སམཱཔནྣསྶ ཨསྶཱསཔསྶཱསཱ ཀཱཡསངྑཱརཱ པཊིཔྤསྶདྡྷཱ ཧོནྟི. སཉྙཱཝེདཡིཏནིརོདྷཾ སམཱཔནྣསྶ སཉྙཱ ཙ ཝེདནཱ ཙ ཙིཏྟསངྑཱརཱ པཊིཔྤསྶདྡྷཱ ཧོནྟི. ཨིམེསཾ ཏིཎྞནྣཾ སངྑཱརཱནཾ པཊིཔྤསྶདྡྷིཡཱ.

‘‘སོལ༹སཧི ¶ ཉཱཎཙརིཡཱཧཱིཏི ཀཏམཱཧི སོལ༹སཧི ཉཱཎཙརིཡཱཧི? ཨནིཙྩཱནུཔསྶནཱ ཉཱཎཙརིཡཱ. དུཀྑཱ… ཨནཏྟཱ… ནིབྦིདཱ… ཝིརཱགཱ… ནིརོདྷཱ… པཊིནིསྶགྒཱ… ཝིཝཊྚཱནུཔསྶནཱ ཉཱཎཙརིཡཱ. སོཏཱཔཏྟིམགྒོ ཉཱཎཙརིཡཱ. སོཏཱཔཏྟིཕལསམཱཔཏྟི ཉཱཎཙརིཡཱ. སཀདཱགཱམིམགྒོ…པེ… ཨརཧཏྟཕལསམཱཔཏྟི ཉཱཎཙརིཡཱ. ཨིམཱཧི སོལ༹སཧི ཉཱཎཙརིཡཱཧི.

‘‘ནཝཧི སམཱདྷིཙརིཡཱཧཱིཏི ཀཏམཱཧི ནཝཧི སམཱདྷིཙརིཡཱཧི? པཋམཛ྄ཛྷཱནཾ སམཱདྷིཙརིཡཱ. དུཏིཡཛ྄ཛྷཱནཾ…པེ… ནེཝསཉྙཱནཱསཉྙཱཡཏནསམཱཔཏྟི སམཱདྷིཙརིཡཱ. པཋམཛ྄ཛྷཱནཔཊིལཱབྷཏྠཱཡ ཝིཏཀྐོ ཙ ཝིཙཱརོ ཙ པཱིཏི ཙ སུཁཉྩ ཙིཏྟེཀགྒཏཱ ཙ…པེ… ནེཝསཉྙཱནཱསཉྙཱཡཏནསམཱཔཏྟིཾ པཊིལཱབྷཏྠཱཡ ཝིཏཀྐོ ཙ ཝིཙཱརོ ཙ པཱིཏི ཙ སུཁཉྩ ཙིཏྟེཀགྒཏཱ ཙ. ཨིམཱཧི ནཝཧི སམཱདྷིཙརིཡཱཧི.

‘‘ཝསཱིཏི པཉྩ ཝསིཡོ – ཨཱཝཛྫནཝསཱི, སམཱཔཛྫནཝསཱི, ཨདྷིཊྛཱནཝསཱི, ཝུཊྛཱནཝསཱི, པཙྩཝེཀྑཎཝསཱི. པཋམཛ྄ཛྷཱནཾ ཡཏྠིཙྪཀཾ ཡདིཙྪཀཾ ཡཱཝཏིཙྪཀཾ ཨཱཝཛྫཏི, ཨཱཝཛྫནཱཡ དནྡྷཱཡིཏཏྟཾ ནཏྠཱིཏི ཨཱཝཛྫནཝསཱི. པཋམཛ྄ཛྷཱནཾ ཡཏྠིཙྪཀཾ ཡདིཙྪཀཾ ཡཱཝཏིཙྪཀཾ སམཱཔཛྫཏི, སམཱཔཛྫནཱཡ དནྡྷཱཡིཏཏྟཾ ནཏྠཱིཏི སམཱཔཛྫནཝསཱི…པེ… ཨདྷིཊྛཱཏི ཨདྷིཊྛཱནེ…པེ… ཝུཊྛཱཏི ཝུཊྛཱནེ…པེ… པཙྩཝེཀྑཏི པཙྩཝེཀྑཎཱཡ དནྡྷཱཡིཏཏྟཾ ནཏྠཱིཏི པཙྩཝེཀྑཎཝསཱི. དུཏིཡཾ…པེ… ནེཝསཉྙཱནཱསཉྙཱཡཏནསམཱཔཏྟིཾ ཡཏྠིཙྪཀཾ ཡདིཙྪཀཾ ཡཱཝཏིཙྪཀཾ ཨཱཝཛྫཏི ¶ …པེ… པཙྩཝེཀྑཏི. པཙྩཝེཀྑཎཱཡ དནྡྷཱཡིཏཏྟཾ ནཏྠཱིཏི པཙྩཝེཀྑཎཝསཱི. ཨིམཱ པཉྩ ཝསིཡོ’’ཏི (པཊི. མ. ༡.༨༣).

༨༧༠. ཨེཏྠ ཙ ‘‘སོལ༹སཧི ཉཱཎཙརིཡཱཧཱི’’ཏི ཨུཀྐཊྛནིདྡེསོ ཨེས. ཨནཱགཱམིནོ པན ཙུདྡསཧི ཉཱཎཙརིཡཱཧི ཧོཏི. ཡདི ཨེཝཾ སཀདཱགཱམིནོ དྭཱདསཧི སོཏཱཔནྣསྶ ཙ དསཧི ཀིཾ ན ཧོཏཱིཏི? ན ཧོཏི, སམཱདྷིཔཱརིབནྡྷིཀསྶ པཉྩ ཀཱམགུཎིཀརཱགསྶ ཨཔྤཧཱིནཏྟཱ. ཏེསཾ ཧི སོ ཨཔྤཧཱིནོ. ཏསྨཱ སམཐབལཾ ན པརིཔུཎྞཾ ཧོཏི, ཏསྨིཾ ཨཔརིཔཱུརེ དྭཱིཧི བལེཧི སམཱཔཛྫིཏབྦཾ ནིརོདྷསམཱཔཏྟིཾ བལཝེཀལླེན སམཱཔཛྫིཏུཾ ན སཀྐོནྟི. ཨནཱགཱམིསྶ པན སོ པཧཱིནོ, ཏསྨཱ ཨེས པརིཔུཎྞབལོ ¶ ཧོཏི. པརིཔུཎྞབལཏྟཱ སཀྐོཏི. ཏེནཱཧ བྷགཝཱ – ‘‘ནིརོདྷཱ ཝུཊྛཧནྟསྶ ནེཝསཉྙཱནཱསཉྙཱཡཏནཀུསལཾ ཕལསམཱཔཏྟིཡཱ ཨནནྟརཔཙྩཡེན པཙྩཡོ’’ཏི (པཊྛཱ. ༡.༡.༤༡༧). ཨིདཉྷི པཊྛཱནེ མཧཱཔཀརཎེ ཨནཱགཱམིནོཝ ནིརོདྷཱ ཝུཊྛཱནཾ སནྡྷཱཡ ཝུཏྟནྟི.

༨༧༡. ཀཏྠ སམཱཔཛྫནྟཱིཏི པཉྩཝོཀཱརབྷཝེ. ཀསྨཱ? ཨནུཔུབྦསམཱཔཏྟིསབྦྷཱཝཏོ. ཙཏུཝོཀཱརབྷཝེ པན པཋམཛ྄ཛྷཱནཱདཱིནཾ ཨུཔྤཏྟི ནཏྠི. ཏསྨཱ ན སཀྐཱ ཏཏྠ སམཱཔཛྫིཏུནྟི. ཀེཙི པན ‘‘ཝཏྠུསྶ ཨབྷཱཝཱ’’ཏི ཝདནྟི.

༨༧༢. ཀསྨཱ སམཱཔཛྫནྟཱིཏི སངྑཱརཱནཾ པཝཏྟིབྷེདེ ཨུཀྐཎྛིཏྭཱ དིཊྛེཝ དྷམྨེ ཨཙིཏྟཀཱ ཧུཏྭཱ ‘‘ནིརོདྷཾ ནིབྦཱནཾ པཏྭཱ སུཁཾ ཝིཧརིསྶཱམཱ’’ཏི སམཱཔཛྫནྟི.

༨༧༣. ཀཐཉྩསྶཱ སམཱཔཛྫནཾ ཧོཏཱིཏི སམཐཝིཔསྶནཱཝསེན ཨུསྶཀྐིཏྭཱ ཀཏཔུབྦཀིཙྩསྶ ནེཝསཉྙཱནཱསཉྙཱཡཏནཾ ནིརོདྷཡཏོ, ཨེཝམསྶ སམཱཔཛྫནཾ ཧོཏི. ཡོ ཧི སམཐཝསེནེཝ ཨུསྶཀྐཏི, སོ ནེཝསཉྙཱནཱསཉྙཱཡཏནསམཱཔཏྟིཾ པཏྭཱ ཏིཊྛཏི. ཡོ པན ཝིཔསྶནཱཝསེནེཝ ཨུསྶཀྐཏི, སོ ཕལསམཱཔཏྟིཾ པཏྭཱ ཏིཊྛཏི. ཡོ པན ཨུབྷཡཝསེནེཝ ཨུསྶཀྐིཏྭཱ པུབྦཀིཙྩཾ ཀཏྭཱ ནེཝསཉྙཱནཱསཉྙཱཡཏནཾ ནིརོདྷེཏི, སོ ཏཾ སམཱཔཛྫཏཱིཏི ཨཡམེཏྠ སངྑེཔོ.

༨༧༤. ཨཡཾ པན ཝིཏྠཱརོ – ཨིདྷ བྷིཀྑུ ནིརོདྷཾ སམཱཔཛྫིཏུཀཱམོ ཀཏབྷཏྟཀིཙྩོ སུདྷོཏཧཏྠཔཱདོ ¶ ཝིཝིཏྟེ ཨོཀཱསེ སུཔཉྙཏྟམྷི ཨཱསནེ ནིསཱིདཏི པལླངྐཾ ཨཱབྷུཛིཏྭཱ ཨུཛུཾ ཀཱཡཾ པཎིདྷཱཡ པརིམུཁཾ སཏིཾ ཨུཔཊྛཔེཏྭཱ, སོ པཋམཾ ཛྷཱནཾ སམཱཔཛྫིཏྭཱ ཝུཊྛཱཡ ཏཏྠ སངྑཱརེ ཨནིཙྩཏོ དུཀྑཏོ ཨནཏྟཏོ ཝིཔསྶཏི.

ཝིཔསྶནཱ པནེསཱ ཏིཝིདྷཱ ཧོཏི – སངྑཱརཔརིགཎྷནཀཝིཔསྶནཱ, ཕལསམཱཔཏྟིཝིཔསྶནཱ, ནིརོདྷསམཱཔཏྟིཝིཔསྶནཱཏི. ཏཏྠ སངྑཱརཔརིགཎྷནཀཝིཔསྶནཱ མནྡཱ ཝཱ ཧོཏུ ཏིཀྑཱ ཝཱ, མགྒསྶ པདཊྛཱནཾ ཧོཏིཡེཝ. ཕལསམཱཔཏྟིཝིཔསྶནཱ ¶ ཏིཀྑཱཝ ཝཊྚཏི མགྒབྷཱཝནཱསདིསཱ. ནིརོདྷསམཱཔཏྟིཝིཔསྶནཱ པན ནཱཏིམནྡནཱཏིཏིཀྑཱ ཝཊྚཏི. ཏསྨཱ ཨེས ནཱཏིམནྡཱཡ ནཱཏིཏིཀྑཱཡ ཝིཔསྶནཱཡ ཏེ སངྑཱརེ ཝིཔསྶཏི.

ཏཏོ དུཏིཡཾ ཛྷཱནཾ སམཱཔཛྫིཏྭཱ ཝུཊྛཱཡ ཏཏྠ སངྑཱརེ ཏཐེཝ ཝིཔསྶཏི. ཏཏོ ཏཏིཡཾ ཛྷཱནཾ…པེ… ཏཏོ ཝིཉྙཱཎཉྩཱཡཏནཾ སམཱཔཛྫིཏྭཱ ཝུཊྛཱཡ ཏཏྠ སངྑཱརེ ཏཐེཝ ཝིཔསྶཏི. ཏཐཱ ཨཱཀིཉྩཉྙཱཡཏནཾ སམཱཔཛྫིཏྭཱ ཝུཊྛཱཡ ཙཏུབྦིདྷཾ པུབྦཀིཙྩཾ ཀརོཏི – ནཱནཱབདྡྷཨཝིཀོཔནཾ, སངྒྷཔཊིམཱནནཾ, སཏྠུཔཀྐོསནཾ, ཨདྡྷཱནཔརིཙྪེདནྟི.

༨༧༥. ཏཏྠ ནཱནཱབདྡྷཨཝིཀོཔནནྟི ཡཾ ཨིམིནཱ བྷིཀྑུནཱ སདྡྷིཾ ཨེཀཱབདྡྷཾ ན ཧོཏི, ནཱནཱབདྡྷཾ ཧུཏྭཱ ཋིཏཾ པཏྟཙཱིཝརཾ ཝཱ མཉྩཔཱིཋཾ ཝཱ ནིཝཱསགེཧཾ ཝཱ ཨཉྙཾ ཝཱ པན ཀིཉྩི པརིཀྑཱརཛཱཏཾ, ཏཾ ཡཐཱ ན ཝིཀུཔྤཏི, ཨགྒིཨུདཀཝཱཏཙོརཨུནྡཱུརཱདཱིནཾ ཝསེན ན ཝིནསྶཏི, ཨེཝཾ ཨདྷིཊྛཱཏབྦཾ.

ཏཏྲིདཾ ཨདྷིཊྛཱནཝིདྷཱནཾ ‘‘ཨིདཉྩ ཨིདཉྩ ཨིམསྨིཾ སཏྟཱཧབྦྷནྟརེ མཱ ཨགྒིནཱ ཛྷཱཡཏུ, མཱ ཨུདཀེན ཝུཡ྄ཧཏུ, མཱ ཝཱཏེན ཝིདྡྷཾསཏུ, མཱ ཙོརེཧི ཧརིཡཏུ, མཱ ཨུནྡཱུརཱདཱིཧི ཁཛྫཏཱུ’’ཏི. ཨེཝཾ ཨདྷིཊྛིཏེ ཏཾ སཏྟཱཧཾ ཏསྶ ན ཀོཙི པརིསྶཡོ ཧོཏི.

ཨནདྷིཊྛཧཏོ པན ཨགྒིཨཱདཱིཧི ཝིནསྶཏི མཧཱནཱགཏྠེརསྶ ཝིཡ. ཐེརོ ཀིར མཱཏུཨུཔཱསིཀཱཡ གཱམཾ པིཎྜཱཡ པཱཝིསི. ཨུཔཱསིཀཱ ཡཱགུཾ དཏྭཱ ཨཱསནསཱལཱཡ ནིསཱིདཱཔེསི. ཐེརོ ནིརོདྷཾ སམཱཔཛྫིཏྭཱ ནིསཱིདི. ཏསྨིཾ ནིསིནྣེ ཨཱསནསཱལཱཡ ཨགྒིནཱ གཧིཏཱཡ སེསབྷིཀྑཱུ ཨཏྟནོ ཨཏྟནོ ནིསིནྣཱསནཾ གཧེཏྭཱ པལཱཡིཾསུ. གཱམཝཱསིཀཱ སནྣིཔཏིཏྭཱ ¶ ཐེརཾ དིསྭཱ ‘‘ཨལསསམཎོ’’ཏི ཨཱཧཾསུ. ཨགྒི ཏིཎཝེཎུཀཊྛཱནི ཛྷཱཔེཏྭཱ ཐེརཾ པརིཀྑིཔིཏྭཱ ཨཊྛཱསི. མནུསྶཱ གྷཊེཧི ཨུདཀཾ ཨཱཧརིཏྭཱ ནིབྦཱཔེཏྭཱ ཚཱརིཀཾ ཨཔནེཏྭཱ པརིབྷཎྜཾ ཀཏྭཱ པུཔྥཱནི ཝིཀིརིཏྭཱ ནམསྶམཱནཱ ཨཊྛཾསུ. ཐེརོ པརིཙྪིནྣཀཱལཝསེན ཝུཊྛཱཡ ཏེ དིསྭཱ ‘‘པཱཀཊོམྷི ཛཱཏོ’’ཏི ཝེཧཱསཾ ཨུཔྤཏིཏྭཱ པིཡངྒུདཱིཔཾ ཨགམཱསི. ཨིདཾ ནཱནཱབདྡྷཨཝིཀོཔནཾ ནཱམ.

ཡཾ ཨེཀཱབདྡྷཾ ཧོཏི ནིཝཱསནཔཱཝུརཎཾ ཝཱ ནིསིནྣཱསནཾ ཝཱ, ཏཏྠ ཝིསུཾ ཨདྷིཊྛཱནཀིཙྩཾ ནཏྠི. སམཱཔཏྟིཝསེནེཝ ནཾ རཀྑཏི ཨཱཡསྨཏོ སཉྫཱིཝསྶ ཝིཡ ¶ . ཝུཏྟམྤི ཙེཏཾ ‘‘ཨཱཡསྨཏོ སཉྫཱིཝསྶ སམཱདྷིཝིཔྥཱརཱ ཨིདྡྷི, ཨཱཡསྨཏོ སཱརིཔུཏྟསྶ སམཱདྷིཝིཔྥཱརཱ ཨིདྡྷཱི’’ཏི.

༨༧༦. སངྒྷཔཊིམཱནནནྟི སངྒྷསྶ པཊིམཱནནཾ ཨུདིཀྑནཾ. ཡཱཝ ཨེསོ བྷིཀྑུ ཨཱགཙྪཏི, ཏཱཝ སངྒྷཀམྨསྶ ཨཀརཎནྟི ཨཏྠོ. ཨེཏྠ ཙ ན པཊིམཱནནཾ ཨེཏསྶ པུབྦཀིཙྩཾ, པཊིམཱནནཱཝཛྫནཾ པན པུབྦཀིཙྩཾ. ཏསྨཱ ཨེཝཾ ཨཱཝཛྫིཏབྦཾ ‘‘སཙེ མཡི སཏྟཱཧཾ ནིརོདྷཾ སམཱཔཛྫིཏྭཱ ནིསིནྣེ སངྒྷོ ཨུཏྟིཀམྨཱདཱིསུ ཀིཉྩིདེཝ ཀམྨཾ ཀཏྟུཀཱམོ ཧོཏི, ཡཱཝ མཾ ཀོཙི བྷིཀྑུ ཨཱགནྟྭཱ ན པཀྐོསཏི, ཏཱཝདེཝ ཝུཊྛཧིསྶཱམཱི’’ཏི. ཨེཝཾ ཀཏྭཱ སམཱཔནྣོ ཧི ཏསྨིཾ སམཡེ ཝུཊྛཱཏིཡེཝ.

ཡོ པན ཨེཝཾ ན ཀརོཏི, སངྒྷོ ཙ སནྣིཔཏིཏྭཱ ཏཾ ཨཔསྶནྟོ ‘‘ཨསུཀོ བྷིཀྑུ ཀུཧི’’ནྟི ‘‘ནིརོདྷསམཱཔནྣོ’’ཏི ཝུཏྟེ སངྒྷོ ཀཉྩི བྷིཀྑུཾ པེསེཏི ‘‘གཙྪ ནཾ སངྒྷསྶ ཝཙནེན པཀྐོསཱཧཱི’’ཏི. ཨཐསྶ ཏེན བྷིཀྑུནཱ སཝནཱུཔཙཱརེ ཋཏྭཱ ‘‘སངྒྷོ ཏཾ ཨཱཝུསོ པཊིམཱནེཏཱི’’ཏི ཝུཏྟམཏྟེཝ ཝུཊྛཱནཾ ཧོཏི. ཨེཝཾ གརུཀཱ ཧི སངྒྷསྶ ཨཱཎཱ ནཱམ. ཏསྨཱ ཏཾ ཨཱཝཛྫིཏྭཱ ཡཐཱ སཡམེཝ ཝུཊྛཱཏི, ཨེཝཾ སམཱཔཛྫིཏབྦཾ.

༨༧༧. སཏྠུཔཀྐོསནནྟི ཨིདྷཱཔི སཏྠུཔཀྐོསནཱཝཛྫནམེཝ ཨིམསྶ ཀིཙྩཾ. ཏསྨཱ ཏམྤི ཨེཝཾ ཨཱཝཛྫིཏབྦཾ ‘‘སཙེ མཡི སཏྟཱཧཾ ནིརོདྷཾ སམཱཔཛྫིཏྭཱ ནིསིནྣེ སཏྠཱ ཨོཏིཎྞཝཏྠུསྨིཾ སིཀྑཱཔདཾ ཝཱ པཉྙཔེཏི, ཏཐཱརཱུཔཱཡ ཝཱ ཨཏྠུཔྤཏྟིཡཱ དྷམྨཾ དེསེཏི, ཡཱཝ མཾ ¶ ཀོཙི ཨཱགནྟྭཱ ན པཀྐོསཏི, ཏཱཝདེཝ ཝུཊྛཧིསྶཱམཱི’’ཏི. ཨེཝཾ ཀཏྭཱ ནིསིནྣོ ཧི ཏསྨིཾ སམཡེ ཝུཊྛཱཏིཡེཝ.

ཡོ པན ཨེཝཾ ན ཀརོཏི, སཏྠཱ ཙ སངྒྷེ སནྣིཔཏིཏེ ཏཾ ཨཔསྶནྟོ ‘‘ཨསུཀོ བྷིཀྑུ ཀུཧི’’ནྟི ‘‘ནིརོདྷསམཱཔནྣོ’’ཏི ཝུཏྟེ ཀཉྩི བྷིཀྑུཾ པེསེཏི ‘‘གཙྪ ནཾ མམ ཝཙནེན པཀྐོསཱ’’ཏི. ཨཐསྶ ཏེན བྷིཀྑུནཱ སཝནཱུཔཙཱརེ ཋཏྭཱ ‘‘སཏྠཱ ཨཱཡསྨནྟཾ ཨཱམནྟེཏཱི’’ཏི ཝུཏྟམཏྟེཝ ཝུཊྛཱནཾ ཧོཏི. ཨེཝཾ གརུཀཾ ཧི སཏྠུཔཀྐོསནཾ, ཏསྨཱ ཏཾ ཨཱཝཛྫིཏྭཱ ཡཐཱ སཡམེཝ ཝུཊྛཱཏི, ཨེཝཾ སམཱཔཛྫིཏབྦཾ.

༨༧༨. ཨདྡྷཱནཔརིཙྪེདོཏི ཛཱིཝིཏདྡྷཱནསྶ པརིཙྪེདོ. ཨིམིནཱ བྷིཀྑུནཱ ཨདྡྷཱནཔརིཙྪེདེ སུཀུསལེན བྷཝིཏབྦཾ. ཨཏྟནོ ‘‘ཨཱཡུསངྑཱརཱ སཏྟཱཧཾ ¶ པཝཏྟིསྶནྟི ན པཝཏྟིསྶནྟཱི’’ཏི ཨཱཝཛྫིཏྭཱཝ སམཱཔཛྫིཏབྦཾ. སཙེ ཧི སཏྟཱཧབྦྷནྟརེ ནིརུཛ྄ཛྷནཀེ ཨཱཡུསངྑཱརེ ཨནཱཝཛྫིཏྭཱཝ སམཱཔཛྫཏི, ནཱསྶ ནིརོདྷསམཱཔཏྟི མརཎཾ པཊིབཱཧིཏུཾ སཀྐོཏི. ཨནྟོནིརོདྷེ མརཎསྶ ནཏྠིཏཱཡ ཨནྟརཱཝ སམཱཔཏྟིཏོ ཝུཊྛཱཏི. ཏསྨཱ ཨེཏཾ ཨཱཝཛྫིཏྭཱཝ སམཱཔཛྫིཏབྦཾ. ཨཝསེསཾ ཧི ཨནཱཝཛྫིཏུམྤི ཝཊྚཏི. ཨིདཾ པན ཨཱཝཛྫིཏབྦམེཝཱཏི ཝུཏྟཾ.

༨༧༩. སོ ཨེཝཾ ཨཱཀིཉྩཉྙཱཡཏནཾ སམཱཔཛྫིཏྭཱ ཝུཊྛཱཡ ཨིམཾ པུབྦཀིཙྩཾ ཀཏྭཱ ནེཝསཉྙཱནཱསཉྙཱཡཏནཾ སམཱཔཛྫཏི. ཨཐེཀཾ ཝཱ དྭེ ཝཱ ཙིཏྟཝཱརེ ཨཏིཀྐམིཏྭཱ ཨཙིཏྟཀོ ཧོཏི, ནིརོདྷཾ ཕུསཏི. ཀསྨཱ པནསྶ དྭིནྣཾ ཙིཏྟཱནཾ ཨུཔརིཙིཏྟཱནི ན པཝཏྟནྟཱིཏི? ནིརོདྷསྶ པཡོགཏྟཱ. ཨིདཉྷི ཨིམསྶ བྷིཀྑུནོ དྭེ སམཐཝིཔསྶནཱདྷམྨེ ཡུགནདྡྷེ ཀཏྭཱ ཨཊྛ སམཱཔཏྟིཨཱརོཧནཾ ཨནུཔུབྦནིརོདྷསྶ པཡོགོ, ན ནེཝསཉྙཱནཱསཉྙཱཡཏནསམཱཔཏྟིཡཱཏི ནིརོདྷསྶ པཡོགཏྟཱ དྭིནྣཾ ཙིཏྟཱནཾ ཨུཔརི ན པཝཏྟནྟི.

ཡོ པན བྷིཀྑུ ཨཱཀིཉྩཉྙཱཡཏནཏོ ཝུཊྛཱཡ ཨིདཾ པུབྦཀིཙྩཾ ཨཀཏྭཱ ནེཝསཉྙཱནཱསཉྙཱཡཏནཾ སམཱཔཛྫཏི, སོ པརཏོ ཨཙིཏྟཀོ བྷཝིཏུཾ ན སཀྐོཏི, པཊིནིཝཏྟིཏྭཱ པུན ཨཱཀིཉྩཉྙཱཡཏནེཡེཝ པཏིཊྛཱཏི. མགྒཾ ཨགཏཔུབྦཔུརིསཱུཔམཱ ཙེཏྠ ཝཏྟབྦཱ –

ཨེཀོ ¶ ཀིར པུརིསོ ཨེཀཾ མགྒཾ ཨགཏཔུབྦོ ཨནྟརཱ ཨུདཀཀནྡརཾ ཝཱ གམྦྷཱིརཾ ཨུདཀཙིཀྑལླཾ ཨཏིཀྐམིཏྭཱ ཋཔིཏཾ ཙཎྜཱཏཔསནྟཏྟཔཱསཱཎཾ ཝཱ ཨཱགམྨ ཏཾ ནིཝཱསནཔཱཝུརཎཾ ཨསཎྛཔེཏྭཱཝ ཀནྡརཾ ཨོརཱུལ༹ྷོ པརིཀྑཱརཏེམནབྷཡེན པུནདེཝ ཏཱིརེ པཏིཊྛཱཏི. པཱསཱཎཾ ཨཀྐམིཏྭཱཔི སནྟཏྟཔཱདོ པུནདེཝ ཨོརབྷཱགེ པཏིཊྛཱཏི. ཏཏྠ ཡཐཱ སོ པུརིསོ ཨསཎྛཔིཏནིཝཱསནཔཱཝུརཎཏྟཱ ཀནྡརཾ ཨོཏིཎྞམཏྟོཝ, ཏཏྟཔཱསཱཎཾ ཨཀྐནྟམཏྟོ ཨེཝ ཙ པཊིནིཝཏྟིཏྭཱ ཨོརཏོཝ པཏིཊྛཱཏི, ཨེཝཾ ཡོགཱཝཙརོཔི པུབྦཀིཙྩསྶ ཨཀཏཏྟཱ ནེཝསཉྙཱནཱསཉྙཱཡཏནཾ སམཱཔནྣམཏྟོཝ པཊིནིཝཏྟིཏྭཱ ཨཱཀིཉྩཉྙཱཡཏནེ པཏིཊྛཱཏི.

ཡཐཱ པན པུབྦེཔི ཏཾ མགྒཾ གཏཔུབྦཔུརིསོ ཏཾ ཋཱནཾ ཨཱགམྨ ཨེཀཾ སཱཊཀཾ དལ༹ྷཾ ནིཝཱསེཏྭཱ ཨཔརཾ ཧཏྠེན གཧེཏྭཱ ཀནྡརཾ ཨུཏྟརིཏྭཱ ཏཏྟཔཱསཱཎཾ ¶ ཝཱ ཨཀྐནྟམཏྟཀམེཝ ཀརིཏྭཱ པརཏོ གཙྪཏི, ཨེཝམེཝཾ ཀཏཔུབྦཀིཙྩོ བྷིཀྑུ ནེཝསཉྙཱནཱསཉྙཱཡཏནཾ སམཱཔཛྫིཏྭཱཝ པརཏོ ཨཙིཏྟཀོ ཧུཏྭཱ ནིརོདྷཾ ཕུསིཏྭཱ ཝིཧརཏི.

༨༨༠. ཀཐཾ ཋཱནནྟི ཨེཝཾ སམཱཔནྣཱཡ པནསྶཱ ཀཱལཔརིཙྪེདཝསེན ཙེཝ ཨནྟརཱཨཱཡུཀྑཡསངྒྷཔཊིམཱནནསཏྠུཔཀྐོསནཱབྷཱཝེན ཙ ཋཱནཾ ཧོཏི.

༨༨༡. ཀཐཾ ཝུཊྛཱནནྟི ཨནཱགཱམིསྶ ཨནཱགཱམིཕལུཔྤཏྟིཡཱ, ཨརཧཏོ ཨརཧཏྟཕལུཔྤཏྟིཡཱཏི ཨེཝཾ དྭེདྷཱ ཝུཊྛཱནཾ ཧོཏི.

༨༨༢. ཝུཊྛིཏསྶ ཀིཾནིནྣཾ ཙིཏྟཾ ཧོཏཱིཏི ནིབྦཱནནིནྣཾ. ཝུཏྟཾ ཧེཏཾ ‘‘སཉྙཱཝེདཡིཏནིརོདྷསམཱཔཏྟིཡཱ ཝུཊྛིཏསྶ ཁོ, ཨཱཝུསོ ཝིསཱཁ, བྷིཀྑུནོ ཝིཝེཀནིནྣཾ ཙིཏྟཾ ཧོཏི ཝིཝེཀཔོཎཾ ཝིཝེཀཔབྦྷཱར’’ནྟི (མ. ནི. ༡.༤༦༤).

༨༨༣. མཏསྶ ཙ སམཱཔནྣསྶ ཙ ཀོ ཝིསེསོཏི ཨཡམྤི ཨཏྠོ སུཏྟེ ཝུཏྟོཡེཝ. ཡཐཱཧ – ‘‘ཡྭཱཡཾ, ཨཱཝུསོ, མཏོ ཀཱལངྐཏོ, ཏསྶ ཀཱཡསངྑཱརཱ ནིརུདྡྷཱ པཊིཔྤསྶདྡྷཱ, ཝཙཱིསངྑཱརཱ… ཙིཏྟསངྑཱརཱ ནིརུདྡྷཱ པཊིཔྤསྶདྡྷཱ, ཨཱཡུ པརིཀྑཱིཎོ, ཨུསྨཱ ཝཱུཔསནྟཱ, ཨིནྡྲིཡཱནི པརིབྷིནྣཱནི. ཡོ ཙཱཡཾ བྷིཀྑུ སཉྙཱཝེདཡིཏནིརོདྷཾ སམཱཔནྣོ, ཏསྶཔི ཀཱཡསངྑཱརཱ ¶ ནིརུདྡྷཱ པཊིཔྤསྶདྡྷཱ, ཝཙཱིསངྑཱརཱ… ཙིཏྟསངྑཱརཱ ནིརུདྡྷཱ པཊིཔྤསྶདྡྷཱ, ཨཱཡུ ཨཔརིཀྑཱིཎོ, ཨུསྨཱ ཨཝཱུཔསནྟཱ, ཨིནྡྲིཡཱནི ཨཔརིབྷིནྣཱནཱི’’ཏི (མ. ནི. ༡.༤༥༧).

༨༨༤. ནིརོདྷསམཱཔཏྟི སངྑཏཱཏིཨཱདིཔུཙྪཱཡཾ པན སངྑཏཱཏིཔི ཨསངྑཏཱཏིཔི ལོཀིཡཱཏིཔི ལོཀུཏྟརཱཏིཔི ན ཝཏྟབྦཱ. ཀསྨཱ? སབྷཱཝཏོ ནཏྠིཏཱཡ. ཡསྨཱ པནསྶཱ སམཱཔཛྫནྟསྶ ཝསེན སམཱཔནྣཱ ནཱམ ཧོཏི, ཏསྨཱ ནིཔྥནྣཱཏི ཝཏྟུཾ ཝཊྚཏི, ནོ ཨནིཔྥནྣཱ.

ཨིཏི སནྟཾ སམཱཔཏྟིཾ, ཨིམཾ ཨརིཡནིསེཝིཏཾ;

དིཊྛེཝ དྷམྨེ ནིབྦཱནམིཏིསངྑཾ ཨུཔཱགཏཾ;

བྷཱཝེཏྭཱ ཨརིཡཾ པཉྙཾ, སམཱཔཛྫནྟི པཎྜིཏཱ.

ཡསྨཱ ཏསྨཱ ཨིམིསྶཱཔི, སམཱཔཏྟིསམཏྠཏཱ;

ཨརིཡམགྒེསུ པཉྙཱཡ, ཨཱནིསཾསོཏི ཝུཙྩཏཱིཏི.

ཨཱཧུནེཡྻབྷཱཝཱདིསིདྡྷིཀཐཱ

༨༨༥. ཨཱཧུནེཡྻབྷཱཝཱདིསིདྡྷཱིཏི ¶ ན ཀེཝལཉྩ ནིརོདྷསམཱཔཏྟིཡཱ སམཱཔཛྫནསམཏྠཏཱཝ, ཨཡཾ པན ཨཱཧུནེཡྻབྷཱཝཱདིསིདྡྷིཔི ཨིམིསྶཱ ལོཀུཏྟརཔཉྙཱབྷཱཝནཱཡ ཨཱནིསཾསོཏི ཝེདིཏབྦོ. ཨཝིསེསེན ཧི ཙཏུབྦིདྷཱཡཔི ཨེཏིསྶཱ བྷཱཝིཏཏྟཱ བྷཱཝིཏཔཉྙོ པུགྒལོ སདེཝཀསྶ ལོཀསྶ ཨཱཧུནེཡྻོ ཧོཏི པཱཧུནེཡྻོ དཀྑིཎེཡྻོ ཨཉྫལཱིཀརཎཱིཡོ ཨནུཏྟརཾ པུཉྙཀྑེཏྟཾ ལོཀསྶ.

༨༨༦. ཝིསེསཏོ པནེཏྠ པཋམམགྒཔཉྙཾ ཏཱཝ བྷཱཝེཏྭཱ མནྡཱཡ ཝིཔསྶནཱཡ ཨཱགཏོ མུདིནྡྲིཡོཔི སཏྟཀྑཏྟུཔརམོ ནཱམ ཧོཏི, སཏྟསུགཏིབྷཝེ སཾསརིཏྭཱ དུཀྑསྶནྟཾ ཀརོཏི. མཛ྄ཛྷིམཱཡ ཝིཔསྶནཱཡ ཨཱགཏོ མཛ྄ཛྷིམིནྡྲིཡོ ཀོལཾཀོལོ ནཱམ ཧོཏི, དྭེ ཝཱ ཏཱིཎི ཝཱ ཀུལཱནི ¶ སནྡྷཱཝིཏྭཱ སཾསརིཏྭཱ དུཀྑསྶནྟཾ ཀརོཏི. ཏིཀྑཱཡ ཝིཔསྶནཱཡ ཨཱགཏོ ཏིཀྑིནྡྲིཡོ ཨེཀབཱིཛཱི ནཱམ ཧོཏི, ཨེཀཉྙེཝ མཱནུསཀཾ བྷཝཾ ནིབྦཏྟེཏྭཱ དུཀྑསྶནྟཾ ཀརོཏི.

༨༨༧. དུཏིཡམགྒཔཉྙཾ བྷཱཝེཏྭཱ སཀདཱགཱམཱི ནཱམ ཧོཏི, སཀིདེཝ ཨིམཾ ལོཀཾ ཨཱགནྟྭཱ དུཀྑསྶནྟཾ ཀརོཏི.

༨༨༨. ཏཏིཡམགྒཔཉྙཾ བྷཱཝེཏྭཱ ཨནཱགཱམཱི ནཱམ ཧོཏི. སོ ཨིནྡྲིཡཝེམཏྟཏཱཝསེན ཨནྟརཱཔརིནིབྦཱཡཱི, ཨུཔཧཙྩཔརིནིབྦཱཡཱི, ཨསངྑཱརཔརིནིབྦཱཡཱི, སསངྑཱརཔརིནིབྦཱཡཱི, ཨུདྡྷཾསོཏོ ཨཀནིཊྛགཱམཱིཏི པཉྩདྷཱ. ཨིདྷ ཝིཧཱཡནིཊྛོ ཧོཏི. ཏཏྠ ཨནྟརཱཔརིནིབྦཱཡཱིཏི ཡཏྠ ཀཏྠཙི སུདྡྷཱཝཱསབྷཝེ ཨུཔཔཛྫིཏྭཱ ཨཱཡུཝེམཛ྄ཛྷཾ ཨཔྤཏྭཱཝ པརིནིབྦཱཡཏི. ཨུཔཧཙྩཔརིནིབྦཱཡཱིཏི ཨཱཡུཝེམཛ྄ཛྷཾ ཨཏིཀྐམིཏྭཱ པརིནིབྦཱཡཏི. ཨསངྑཱརཔརིནིབྦཱཡཱིཏི ཨསངྑཱརེན ཨཔྤཡོགེན ཨུཔརིམགྒཾ ནིབྦཏྟེཏི. སསངྑཱརཔརིནིབྦཱཡཱིཏི སསངྑཱརེན སཔྤཡོགེན ཨུཔརིམགྒཾ ནིབྦཏྟེཏི. ཨུདྡྷཾསོཏོ ཨཀནིཊྛགཱམཱིཏི ཡཏྠུཔཔནྣོ, ཏཏོ ཨུདྡྷཾ ཡཱཝ ཨཀནིཊྛབྷཝཱ ཨཱརུཡ྄ཧ ཏཏྠ པརིནིབྦཱཡཏི.

༨༨༩. ཙཏུཏྠམགྒཔཉྙཾ བྷཱཝེཏྭཱ ཀོཙི སདྡྷཱཝིམུཏྟོ ཧོཏི, ཀོཙི པཉྙཱཝིམུཏྟོ ཧོཏི, ཀོཙི ཨུབྷཏོབྷཱགཝིམུཏྟོ ཧོཏི, ཀོཙི ཏེཝིཛྫོ, ཀོཙི ཚལ༹བྷིཉྙོ, ཀོཙི པཊིསམྦྷིདཔྤབྷེདཔྤཏྟོ མཧཱཁཱིཎཱསཝོ. ཡཾ སནྡྷཱཡ ཝུཏྟཾ ‘‘མགྒཀྑཎེ པནེས ཏཾ ཛཊཾ ཝིཛཊེཏི ནཱམ ¶ . ཕལཀྑཎེ ཝིཛཊིཏཛཊོ སདེཝཀསྶ ལོཀསྶ ཨགྒདཀྑིཎེཡྻོ ཧོཏཱི’’ཏི.

ཨེཝཾ ཨནེཀཱནིསཾསཱ, ཨརིཡཔཉྙཱཡ བྷཱཝནཱ;

ཡསྨཱ ཏསྨཱ ཀརེཡྻཱཐ, རཏིཾ ཏཏྠ ཝིཙཀྑཎོ.

༨༩༠. ཨེཏྟཱཝཏཱ ཙ –

སཱིལེ པཏིཊྛཱཡ ནརོ སཔཉྙོ, ཙིཏྟཾ པཉྙཉྩ བྷཱཝཡཾ;

ཨཱཏཱཔཱི ནིཔཀོ བྷིཀྑུ, སོ ཨིམཾ ཝིཛཊཡེ ཛཊནྟི. –

ཨིམིསྶཱ ¶ གཱཐཱཡ སཱིལསམཱདྷིཔཉྙཱམུཁེན དེསིཏེ ཝིསུདྡྷིམགྒེ སཱནིསཾསཱ པཉྙཱབྷཱཝནཱ པརིདཱིཔིཏཱ ཧོཏཱིཏི.

ཨིཏི སཱདྷུཛནཔཱམོཛྫཏྠཱཡ ཀཏེ ཝིསུདྡྷིམགྒེ

པཉྙཱབྷཱཝནཱདྷིཀཱརེ

པཉྙཱབྷཱཝནཱནིསཾསནིདྡེསོ ནཱམ

ཏེཝཱིསཏིམོ པརིཙྪེདོ.

ནིགམནཀཐཱ

༨༩༡. ཨེཏྟཱཝཏཱ ¶ ཙ –

‘‘སཱིལེ པཏིཊྛཱཡ ནརོ སཔཉྙོ, ཙིཏྟཾ པཉྙཉྩ བྷཱཝཡཾ;

ཨཱཏཱཔཱི ནིཔཀོ བྷིཀྑུ, སོ ཨིམཾ ཝིཛཊཡེ ཛཊ’’ནྟི. –

ཨིམཾ གཱཐཾ ནིཀྑིཔིཏྭཱ ཡདཝོཙུམྷ –

‘‘ཨིམིསྶཱ དཱནི གཱཐཱཡ, ཀཐིཏཱཡ མཧེསིནཱ;

ཝཎྞཡནྟོ ཡཐཱབྷཱུཏཾ, ཨཏྠཾ སཱིལཱདིབྷེདནཾ.

‘‘སུདུལླབྷཾ ལབྷིཏྭཱན, པབྦཛྫཾ ཛིནསཱསནེ;

སཱིལཱདིསངྒཧཾ ཁེམཾ, ཨུཛུཾ མགྒཾ ཝིསུདྡྷིཡཱ.

‘‘ཡཐཱབྷཱུཏཾ ཨཛཱནནྟཱ, སུདྡྷིཀཱམཱཔི ཡེ ཨིདྷ;

ཝིསུདྡྷིཾ ནཱདྷིགཙྪནྟི, ཝཱཡམནྟཱཔི ཡོགིནོ.

‘‘ཏེསཾ ¶ པཱམོཛྫཀརཎཾ, སུཝིསུདྡྷཝིནིཙྪཡཾ;

མཧཱཝིཧཱརཝཱསཱིནཾ, དེསནཱནཡནིསྶིཏཾ.

‘‘ཝིསུདྡྷིམགྒཾ བྷཱསིསྶཾ, ཏཾ མེ སཀྐཙྩ བྷཱསཏོ;

ཝིསུདྡྷིཀཱམཱ སབྦེཔི, ནིསཱམཡཐ སཱདྷཝོ’’ཏི.

སྭཱཡཾ བྷཱསིཏོ ཧོཏི.

༨༩༢. ཏཏྠ ཙ –

ཏེསཾ སཱིལཱདིབྷེདཱནཾ, ཨཏྠཱནཾ ཡོ ཝིནིཙྪཡོ;

པཉྩནྣམྤི ནིཀཱཡཱནཾ, ཝུཏྟོ ཨཊྛཀཐཱནཡེ.

སམཱཧརིཏྭཱ ཏཾ སབྦཾ, ཡེབྷུཡྻེན སནིཙྪཡོ;

སབྦསངྐརདོསེཧི, མུཏྟོ ཡསྨཱ པཀཱསིཏོ.

ཏསྨཱ ཝིསུདྡྷིཀཱམེཧི, སུདྡྷཔཉྙེཧི ཡོགིཧི;

ཝིསུདྡྷིམགྒེ ཨེཏསྨིཾ, ཀརཎཱིཡོཝ ཨཱདརོཏི.

༨༩༣.

ཝིབྷཛྫཝཱདིསེཊྛཱནཾ ¶ , ཐེརིཡཱནཾ ཡསསྶིནཾ;

མཧཱཝིཧཱརཝཱསཱིནཾ, ཝཾསཛསྶ ཝིབྷཱཝིནོ.

བྷདནྟསངྒྷཔཱལསྶ, སུཙིསལླེཁཝུཏྟིནོ;

ཝིནཡཱཙཱརཡུཏྟསྶ, ཡུཏྟསྶ པཊིཔཏྟིཡཾ.

ཁནྟིསོརཙྩམེཏྟཱདི-གུཎབྷཱུསིཏཙེཏསོ;

ཨཛ྄ཛྷེསནཾ གཧེཏྭཱན, ཀརོནྟེན ཨིམཾ མཡཱ.

སདྡྷམྨཊྛིཏིཀཱམེན ¶ , ཡོ པཏྟོ པུཉྙསཉྩཡོ;

ཏསྶ ཏེཛེན སབྦེཔི, སུཁམེདྷནྟུ པཱཎིནོ.

༨༩༤.

ཝིསུདྡྷིམགྒོ ཨེསོ ཙ, ཨནྟརཱཡཾ ཝིནཱ ཨིདྷ;

ནིཊྛིཏོ ཨཊྛཔཉྙཱས-བྷཱཎཝཱརཱཡ པཱལི༹ཡཱ.

ཡཐཱ ཏཐེཝ ལོཀསྶ, སབྦེ ཀལྱཱཎནིསྶིཏཱ;

ཨནནྟརཱཡཱ ཨིཛ྄ཛྷནྟུ, སཱིགྷཾ སཱིགྷཾ མནོརཐཱཏི.

༨༩༥. པརམ ཝིསུདྡྷ སདྡྷཱ བུདྡྷི ཝཱིརིཡ པཊིམཎྜིཏེན སཱིལཱཙཱརཛྫཝ མདྡཝཱདིགུཎསམུདཡསམུདིཏེན སཀསམཡ སམཡནྟརགཧནཛ྄ཛྷོགཱཧཎསམཏྠེན པཉྙཱཝེཡྻཏྟིཡསམནྣཱགཏེན ཏིཔིཊཀཔརིཡཏྟིབྷེདེ སཱཊྛཀཐེ སཏྠུསཱསནེ ཨཔྤཊིཧཏཉཱཎཔྤབྷཱཝེན མཧཱཝེཡྻཱཀརཎེན ཀརཎསམྤཏྟིཛནིཏསུཁཝིནིགྒཏམདྷུརོདཱརཝཙནལཱཝཎྞཡུཏྟེན ཡུཏྟམུཏྟཝཱདིནཱ ཝཱདཱིཝརེན མཧཱཀཝིནཱ ཚལ༹བྷིཉྙཱཔཊིསམྦྷིདཱདི བྷེདགུཎཔཊིམཎྜིཏེ ཨུཏྟརིམནུསྶདྷམྨེ ཨཔྤཊིཧཏབུདྡྷཱིནཾ ཐེརཝཾསཔྤདཱིཔཱནཾ ཐེརཱནཾ མཧཱཝིཧཱརཝཱསཱིནཾ ཝཾསཱལངྐཱརབྷཱུཏེན ཝིཔུལཝིསུདྡྷབུདྡྷིནཱ བུདྡྷགྷོསོཏི གརཱུཧི གཧིཏནཱམདྷེཡྻེན ཐེརེན མུདནྟཁེདཀཝཏྟབྦེན ཀཏོ ཝིསུདྡྷིམགྒོ ནཱམ.

༨༩༦.

ཏཱཝ ཏིཊྛཏུ ལོཀསྨིཾ, ལོཀནིཏྠརཎེསིནཾ;

དསྶེནྟོ ཀུལཔུཏྟཱནཾ, ནཡཾ སཱིལཱདིསུདྡྷིཡཱ.

ཡཱཝ ¶ བུདྡྷོཏི ནཱམམྤི, སུདྡྷཙིཏྟསྶ ཏཱདིནོ;

ལོཀམྷི ལོཀཛེཊྛསྶ, པཝཏྟཏི མཧེསིནོཏི.

ཨིཏི སཱདྷུཛནཔཱམོཛྫཏྠཱཡ ཀཏཱ ཝིསུདྡྷིམགྒཀཐཱ,

པཱལི༹གཎནཱཡ པན སཱ ཨཊྛཔཉྙཱསབྷཱཎཝཱརཱ ཧོཏཱིཏི.

ཝིསུདྡྷིམགྒཔཀརཎཾ ནིཊྛིཏཾ.