📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཝིསུདྡྷིམགྒ-མཧཱཊཱིཀཱ

(པཋམོ བྷཱགོ)

གནྠཱརམྦྷཀཐཱ

སདྡྷམྨརཾསིམཱལཱི ¶ ¶ ཡོ, ཝིནེཡྻཀམལཱཀརེ;

ཝིབོདྷེསི མཧཱམོཧ-ཏམཾ ཧནྟྭཱན སབྦསོ.

ཉཱཎཱཏིསཡབིམྦཾ ཏཾ, ཝིསུདྡྷཀརུཎཱརུཎཾ;

ཝནྡིཏྭཱ ནིརུཔཀླེསཾ, བུདྡྷཱདིཙྩཾ མཧོདཡཾ.

ལོཀཱལོཀཀརཾ དྷམྨཾ, གུཎརསྨིསམུཛྫལཾ;

ཨརིཡསངྒྷཉྩ སམྥུལླཾ, ཝིསུདྡྷཀམལཱཀརཾ.

ཝནྡནཱཛནིཏཾ ¶ པུཉྙཾ, ཨིཏི ཡཾ རཏནཏྟཡེ;

ཧཏནྟརཱཡོ སབྦཏྠ, ཧུཏྭཱཧཾ ཏསྶ ཏེཛསཱ.

སམྤནྣསཱིལཱཙཱརེན, དྷཱིམཏཱ སུཙིཝུཏྟིནཱ;

ཨཛ྄ཛྷེསིཏོ དཱཋཱནཱགཏྠེརེན ཐིརཙེཏསཱ.

ཝིསུདྡྷཙརིཏོ ནཱཐོ, ཡཾ ཝིསུདྡྷིམནུཏྟརཾ;

པཏྭཱ དེསེསི ཀརུཎཱསམུསྶཱཧིཏམཱནསོ.

ཏསྶཱ ཨདྷིགམཱུཔཱཡོ, ཝིསུདྡྷནཡམཎྜིཏོ;

ཝིསུདྡྷིམགྒོ ཡོ ཝུཏྟོ, སུཝིསུདྡྷཔདཀྐམོ.

སུཝིསུདྡྷཾ ཨསཾཀིཎྞཾ, ནིཔུཎཏྠཝིནིཙྪཡཾ;

མཧཱཝིཧཱརཝཱསཱིནཾ, སམཡཾ ཨཝིལོམཡཾ.

ཏསྶ ¶ ནིསྶཱཡ པོརཱཎཾ, ཀཐཱམགྒཾ ཨནཱཀུལཾ;

ཏནྟིནཡཱནུགཾ སུདྡྷཾ, ཀརིསྶཱམཏྠཝཎྞནཾ.

ཨིཏི ཨཱཀངྑམཱནསྶ, སདྡྷམྨསྶ ཙིརཊྛིཏིཾ;

ཝིབྷཛནྟསྶ ཏསྶཏྠཾ, ནིསཱམཡཐ སཱདྷཝོཏི.

ནིདཱནཱདིཀཐཱཝཎྞནཱ

༡. སྭཱཡཾ ཝིསུདྡྷིམགྒོ ཡཾ སུཏྟཔདཾ ནིསྶཱཡ པཊྛཔཱིཡཏི, ཏཾ ཏཱཝ ནིཀྑིཔིཏྭཱ ཏསྶ ནིདཱནཱདིནིདྡྷཱརཎམུཁེན ནཱནཔྤཀཱརཏོ ཨཏྠཾ སཾཝཎྞེཏུཾ ‘‘སཱིལེ པཏིཊྛཱཡཱ’’ཏིཨཱདི ཨཱརདྡྷཾ. དྷམྨཾ སཾཝཎྞེནྟེན ཧི ཨཱདིཏོ ཏསྶ ནིདཱནཾ ཝཏྟབྦཾ, ཏཏོ པཡོཛནཾ པིཎྜཏྠོ པདཏྠོ སམྦནྡྷོ ཨདྷིཔྤཱཡོ ཙོདནཱ སོདྷནཾ ཝཏྟབྦཾ. ཏཐཱ ཙེཝ ཨཱཙརིཡེན པཊིཔནྣཾ. ཨེཏྠ ཧི བྷགཝནྟཾ ཀིརཱཏིཨཱདི དེསནཱཡ ནིདཱནཔཡོཛནནིདྡྷཱརཎཾ, ཝིསུདྡྷིམགྒཾ བྷཱསིསྶནྟིཨཱདི པིཎྜཏྠནིདྡྷཱརཎཾ ¶ , སཱིལེ ཋཏྭཱཏིཨཱདི པདཏྠསམྦནྡྷཱདྷིཔྤཱཡཝིབྷཱཝནཱ, ཀིཾ སཱིལནྟིཨཱདི ཙོདནཱ, ཏཏོ པརཾ སོདྷནཾ, སམཱདྷིཔཉྙཱཀཐཱསུཔི ཨེསེཝ ནཡོ. ཀསྨཱ པནེཏྠ ཝིསྶཛྫནགཱཐཱ ཨཱདིམྷི ནིཀྑིཏྟཱ, ན པུཙྪཱགཱཐཱ. པུཙྪཱཔུབྦིཀཱ ཧི ཝིསྶཛྫནཱཏི? ཝུཙྩཏེ – ཏདཏྠསྶ མངྒལབྷཱཝཏོ, སཱསནསྶ ཨཱདིཀལྱཱཎཱདིབྷཱཝཝིབྷཱཝནཏོ, བྷཡཱདིཨུཔདྡཝནིཝཱརཎེན ཨནྟརཱཡཝིདྷམནཏོ, ཨུཔརི སཾཝཎྞེཏབྦདྷམྨསངྒཧཏོ ཙཱཏི ཝེདིཏབྦཾ.

ཨེཏྠཱཧ – ཀསྨཱ པནཱཡཾ ཝིསུདྡྷིམགྒཀཐཱ ཝཏྠུཔུབྦིཀཱ ཨཱརདྡྷཱ, ན སཏྠུཐོམནཱཔུབྦིཀཱཏི? ཝུཙྩཏེ – ཝིསུཾ ཨསཾཝཎྞནཱདིབྷཱཝཏོ. སུམངྒལཝིལཱསིནཱིཨཱདཡོ ཝིཡ ཧི དཱིགྷནིཀཱཡཱདཱིནཾ ནཱཡཾ ཝིསུཾ སཾཝཎྞནཱ, ན པཀརཎནྟརཾ ཝཱ ཨབྷིདྷམྨཱཝཏཱརསུམཏཱཝཏཱརཱདི ཝིཡ. ཏཱསཾཡེཝ པན སུམངྒལཝིལཱསིནཱིཨཱདཱིནཾ ཝིསེསབྷཱུཏཱ. ཏེནེཝཱཧ ‘‘མཛ྄ཛྷེ ཝིསུདྡྷིམགྒོ’’ཏིཨཱདི (དཱི. ནི. ཨཊྛ. ༡.གནྠཱརམྦྷཀཐཱ; མ. ནི. ཨཊྛ. ༡.གནྠཱརམྦྷཀཐཱ; སཾ. ནི. ཨཊྛ. ༡.༡.གནྠཱརམྦྷཀཐཱ; ཨ. ནི. ཨཊྛ. ༡.༡.གནྠཱརམྦྷཀཐཱ). ཨཐ ཝཱ ཐོམནཱཔུབྦིཀཱཔི ཙཱཡཾ ཀཐཱ ན ཝཏྠུཔུབྦིཀཱཝཱཏི དཊྛབྦཾ. སཱསནེ ཧི ཝཏྠུཀིཏྟནཾ ན ལོཀེ ཝིཡ ཀེཝལཾ ཧོཏི, སཱསནསམྤཏྟིཀིཏྟནཏྟཱ པན སཏྠུ ཨཝིཔརཱིཏདྷམྨདེསནཱབྷཱཝཝིབྷཱཝནེན སཏྠུགུཎསཾཀིཏྟནཾ ཨུལླིངྒནྟམེཝ པཝཏྟཏི. ཏཐཱ ཧི ཝཀྑཏི ‘‘ཨེཏྟཱཝཏཱ ཏིསྶོ སིཀྑཱ’’ཏིཨཱདི. སོཏཱཔནྣཱདིབྷཱཝསྶ ཙ ཀཱརཎནྟི ཨེཏྠ ཧི ཨཱདི-སདྡེན སབྦསཀདཱགཱམིཨནཱགཱམིནོ ¶ ཝིཡ སབྦེཔི ཨརཧནྟོ སངྒཡ྄ཧནྟི ཝིབྷཱགསྶ ཨནུདྡྷཊཏྟཱ. ཏེན ཏིཎྞམྤི བོདྷིསཏྟཱནཾ ནིབྦེདྷབྷཱགིཡཱ སཱིལཱདཡོ ཨིདྷ ‘‘སཱིལེ པཏིཊྛཱཡཱ’’ཏིཨཱདིཝཙནེན སངྒཧིཏཱཏི དཊྛབྦཾ. ཏིཎྞམྤི ཧི ནེསཾ ཙརིམབྷཝེ ཝིསེསཏོ སཾསཱརབྷཡིཀྑཎཾ, ཡཐཱསཀཾ སཱིལེ པཏིཊྛཱཡ སམཐཝིཔསྶནཾ ཨུསྶུཀྐཱཔེཏྭཱ ཏཎྷཱཛཊཱཝིཛཊནཔཊིཔཏྟི ཙ སམཱནཱཏི. ཨཐ ཝཱ ‘‘སོ ཨིམཾ ཝིཛཊཡེ ཛཊ’’ནྟི སཱདྷཱརཎཝཙནེན སཱཏིསཡཾ, ནིརཏིསཡཉྩ ཏཎྷཱཛཊཱཝིཛཊནཾ གཧིཏཾ. ཏཏྠ ཡཾ ནིརཏིསཡཾ སཝཱསནཔྤཧཱནཏཱཡ. ཏེན སཏྠུ པཧཱནསམྤདཱ ཀིཏྟིཏཱ ཧོཏི, ཏནྣིམིཏྟཱ ཉཱཎསམྤདཱ ཙ. ཏདུབྷཡེན ནཱནནྟརིཀཏཱཡ ཨཱནུབྷཱཝསམྤདཱདཡོཔཱིཏི. ཨེཝམྤི ཐོམནཱཔུབྦིཀཱཡཾ ཀཐཱཏི ཝེདིཏབྦཾ. ཨཐ ཝཱ ཐོམནཱཔུབྦིཀཱ ཨེཝཱཡཾ ཀཐཱཏི དཊྛབྦཾ, ‘‘སབྦདྷམྨེསུ ཨཔྤཊིཧཏཉཱཎཙཱརོ’’ཏིཨཱདིནཱ སཏྠུ ཐོམནཾ པུརཀྑཏྭཱ སཾཝཎྞནཱཡ ཨཱརདྡྷཏྟཱ. སཱ པནཱཡཾ ཡསྨཱ པུཙྪནྟསྶ ཨཛ྄ཛྷཱསཡཱནུརཱུཔཾ བྱཱཀརཎསམཏྠཏཱཡ ཝིབྷཱཝནཝསེན པཝཏྟིཏཱ, ཨཱཙིཎྞཉྩེཏཾ ཨཱཙརིཡསྶ ཡདིདཾ སཾཝཎྞེཏབྦདྷམྨཱནུཀཱུལཾ སཾཝཎྞནཱརམྦྷེ སཏྠུ ཨབྷིཏྠཝནཾ. ཏསྨཱ ¶ ཨིམིནཱ ཀཱརཎེན ཨེཝམེཏྠ ཐོམནཱ པཝཏྟིཏཱཏི. ཐོམནཱཀཱརསྶ ཝུཙྩམཱནསྶ ཀཱརཎཾ ཨུདྡྷརནྟེན པཋམཾ ཝིསྶཛྫནགཱཐཾ ནིཀྑིཔིཏྭཱ ཏསྶཱ ནིདཱནཙོདནཱམུཁེན པུཙྪཱགཱཐཾ སརཱུཔཏོ ཙ ཨཏྠཏོ ཙ དསྶེཏྭཱ ཏསྶཱ པུཙྪཱཡ ཨཝིཔརཱིཏབྱཱཀརཎསམཏྠབྷཱཝཱཝཛོཏནཾ བྷགཝཏོ ཐོམནཾ པུརཀྑཏྭཱ ཡཐཱདྷིཔྤེཏདྷམྨསཾཝཎྞནཱ ཀཏཱ. ཏེནཱཧ ‘‘སཱིལེ པཏིཊྛཱཡཱ’’ཏིཨཱདི. ཏཏྠ གཱཐཱཡ ཨཏྠོ པརཏོ ཨཱཝི བྷཝིསྶཏི.

ཨིཏཱིཏིཨཱདཱིསུ ཨིཏཱིཏི ཨཡཾ ཨིཏི-སདྡོ ཧེཏུ པརིསམཱཔནཱདིཔདཏྠཝིཔརིཡཱཡཔཀཱརཱཝདྷཱརཎནིདསྶནཱདིཨནེཀཏྠཔྤབྷེདོ. ཏཐཱ ཧེས ‘‘རུཔྤཏཱིཏི ཁོ, བྷིཀྑཝེ, ཏསྨཱ ‘རཱུཔ’ནྟི ཝུཙྩཏཱི’’ཏིཨཱདཱིསུ (སཾ. ནི. ༣.༧༩) ཧེཏུམྷི ཨཱགཏོ. ‘‘ཏསྨཱཏིཧ མེ, བྷིཀྑཝེ, དྷམྨདཱཡཱདཱ བྷཝཐ, མཱ ཨཱམིསདཱཡཱདཱ. ཨཏྠི མེ ཏུམྷེསུ ཨནུཀམྤཱ ‘ཀིནྟི མེ སཱཝཀཱ དྷམྨདཱཡཱདཱ བྷཝེཡྻུཾ, ནོ ཨཱམིསདཱཡཱདཱ’’ཏིཨཱདཱིསུ (མ. ནི. ༡.༢༩) པརིསམཱཔནེ. ‘‘ཨིཏི ཝཱ ཨིཏི ཨེཝརཱུཔཱ ནཙྩགཱིཏཝཱདིཏཝིསཱུཀདསྶནཱ པཊིཝིརཏོ’’ཏིཨཱདཱིསུ (དཱི. ནི. ༡.༡༩༧) ཨཱདིཨཏྠེ. ‘‘མཱགཎྜིཡོཏི ཏསྶ བྲཱཧྨཎསྶ སངྑཱ སམཉྙཱ པཉྙཏྟི ཝོཧཱརོ ནཱམཾ ¶ ནཱམཀམྨཾ ནཱམདྷེཡྻཾ ནིརུཏྟི བྱཉྫནཾ ཨབྷིལཱཔོ’’ཏིཨཱདཱིསུ (མཧཱནི. ༧༣, ༧༥) པདཏྠཝིཔརིཡཱཡེ. ‘‘ཨིཏི ཁོ, བྷིཀྑཝེ, སཔྤཊིབྷཡོ བཱལོ, ཨཔྤཊིབྷཡོ པཎྜིཏོ. སཨུཔདྡཝོ བཱལོ, ཨནུཔདྡཝོ པཎྜིཏོ. སཨུཔསགྒོ བཱལོ, ཨནུཔསགྒོ པཎྜིཏོ’’ཏིཨཱདཱིསུ (མ. ནི. ༣.༡༢༤) པཀཱརེ. ‘‘ཨཏྠི ཨིདཔྤཙྩཡཱ ཛརཱམརཎནྟི ཨིཏི པུཊྛེན སཏཱ, ཨཱནནྡ, ཨཏྠཱིཏིསྶ ཝཙནཱིཡཾ, ཀིཾཔཙྩཡཱ ཛརཱམརཎནྟི ཨིཏི ཙེ ཝདེཡྻ, ཛཱཏིཔཙྩཡཱ ཛརཱམརཎནྟི ཨིཙྩསྶ ཝཙནཱིཡ’’ནྟིཨཱདཱིསུ (དཱི. ནི. ༢.༩༦) ཨཝདྷཱརཎེ, སནྣིཊྛཱནེཏི ཨཏྠོ. ‘‘ཨཏྠཱིཏི ཁོ, ཀཙྩཱན, ཨཡམེཀོ ཨནྟོ, ནཏྠཱིཏི ཁོ, ཀཙྩཱན, ཨཡཾ དུཏིཡོ ཨནྟོ’’ཏིཨཱདཱིསུ (སཾ. ནི. ༢.༡༥; ༣.༩༠) ནིདསྶནེ. ཨིདྷཱཔི ནིདསྶནེ དཊྛབྦོ, པཀཱརེཏིཔི ཝཏྟུཾ ཝཊྚཏེཝ. པཋམོ པན ཨིཏི-སདྡོ པརིསམཱཔནེ དཊྛབྦོ. ཧཱིཏི ཨཝདྷཱརཎེ. ཨིདནྟི ཨཱསནྣཔཙྩཀྑཝཙནཾ ཡཐཱདྷིགཏསྶ སུཏྟཔདསྶ ཨབྷིམུཁཱིཀརཎཏོ.

ཝུཏྟནྟི ཨཡཾ ཝུཏྟ-སདྡོ སཨུཔསགྒོ, ཨནུཔསགྒོ ཙ ཝཔྤནཝཱཔསམཱིཀརཎཀེསོཧཱརཎཛཱིཝིཏཝུཏྟིཔམུཏྟབྷཱཝཔཱཝཙནཔཝཏྟིཏཨཛ྄ཛྷེསནཀཐནཱདཱིསུ དིསྶཏི. ཏཐཱ ཧི ཨཡཾ –

‘‘གཱཝོ ¶ ཏསྶ པཛཱཡནྟི, ཁེཏྟེ ཝུཏྟཾ ཝིརཱུཧཏི;

ཝུཏྟཱནཾ ཕལམསྣཱཏི, ཡོ མིཏྟཱནཾ ན དུབྦྷཏཱི’’ཏི. –

ཨཱདཱིསུ (ཛཱ. ༢.༢༢.༡༩) ཝཔྤནེ ཨཱགཏོ. ‘‘ནོ ཙ ཁོ པཊིཝུཏྟ’’ནྟིཨཱདཱིསུ (པཱརཱ. ༢༨༩) ཨཊྛདནྟཀཱདཱིཧི ཝཱཔསམཱིཀརཎེ. ‘‘ཀཱཔཊིཀོ མཱཎཝོ དཧརོ ཝུཏྟསིརོ’’ཏིཨཱདཱིསུ (མ. ནི. ༢.༤༢༦) ཀེསོཧཱརཎེ. ‘‘པནྣལོམོ པརདཏྟཝུཏྟོ མིགབྷཱུཏེན ཙེཏསཱ ཝིཧརཏཱི’’ཏིཨཱདཱིསུ (ཙཱུལ༹ཝ. ༣༣༢) ཛཱིཝིཏཝུཏྟིཡཾ. ‘‘སེཡྻཐཱཔི ནཱམ པཎྜུཔལཱསོ བནྡྷནཱ པཝུཏྟོ ཨབྷབྦོ ཧརིཏཏྠཱཡཱ’’ཏིཨཱདཱིསུ (མ. ནི. ༣.༥༩; པཱརཱ. ༩༢; པཱཙི. ༦༦༦; མཧཱཝ. ༡༢༩) བནྡྷནཏོ པམུཏྟབྷཱཝེ. ‘‘ཡེསམིདཾ ཨེཏརཧི པོརཱཎཾ མནྟཔདཾ གཱིཏཾ པཝུཏྟཾ སམིཧིཏ’’ནྟིཨཱདཱིསུ (དཱི. ནི. ༡.༢༨༥; མ. ནི. ༢.༤༢༧; མཧཱཝ. ༣༠༠) པཱཝཙནབྷཱཝེན པཝཏྟིཏེ. ལོཀེ པན ‘‘ཝུཏྟོ གུཎོ ཝུཏྟོ པཱརཱཡནོ’’ཏིཨཱདཱིསུ ཨཛ྄ཛྷེསནེ. ‘‘ཝུཏྟཾ ཁོ ¶ པནེཏཾ བྷགཝཏཱ ‘དྷམྨདཱཡཱདཱ མེ, བྷིཀྑཝེ, བྷཝཐ, མཱ ཨཱམིསདཱཡཱདཱ’ཏི’’ཨཱདཱིསུ (མ. ནི. ༡.༣༠) ཀཐནེ. ཨིདྷཱཔི ཀཐནེ ཨེཝ དཊྛབྦོ. ཏསྨཱ ‘‘ཨིཏི ཧི ཨེཝམེཝ ཨིདཾ སུཏྟཾ དེསིཏ’’ནྟི ཡཐཱནིཀྑིཏྟཾ གཱཐཾ དེསིཏབྷཱཝེན ནིདསྶེཏི. ཏསྶཱ ཝཱ དེསིཏཱཀཱརཾ ཨཝདྷཱརེཏི.

ཀསྨཱཏི ཧེཏུམྷི ནིསྶཀྐཾ. པནཱཏི ཝཙནཱལངྐཱརམཏྟཾ. ཨུབྷཡེནཱཔི ཀཱརཎཾ པུཙྪཏི. ཨེཏནྟི ཡཐཱཝུཏྟཾ སུཏྟཔདཾ པཙྩཱམསཏི. ཝུཏྟནྟི པུཙྪཱནིམིཏྟཾ. ཏདཏྠསྶ ཨཏྟནོ བུདྡྷིཡཾ ཝིཔརིཝཏྟམཱནཏཾ ཨུཔཱདཱཡ ‘‘ཨིད’’ནྟི ཝཏྭཱ པུན བྷགཝཏཱ བྷཱསིཏཱཀཱརཾ སནྡྷཱཡ ‘‘ཨེཏ’’ནྟི ཝུཏྟཾ. སཀལེན པནཱནེན ཝཙནེན དེསནཱཡ ནིདཱནཾ ཛོཏིཏཾ ཧོཏི. པརཏོ ཏསྶཱ དེསཀདེསཀཱལཔཊིགྒཱཧཀེ ཝིབྷཱཝེཏུཾ ‘‘བྷགཝནྟཾ ཀིརཱ’’ཏིཨཱདི ཝུཏྟཾ. ཏཏྠ ཀིརཱཏི ཨནུསྶཝནཏྠེ ནིཔཱཏོ. ཏེན ཝུཙྩམཱནསྶཏྠསྶ ཨནུ ཨནུ སུཡྻམཱནཏཾ དཱིཔེཏི. རཏྟིབྷཱགེཏི རཏྟིཡཱ ཨེཀསྨིཾ ཀོཊྛཱསེ, མཛ྄ཛྷིམཡཱམེཏི ཨདྷིཔྤཱཡོ. ཝེསྶཝཎཱདཡོ ཝིཡ ཨཔཱཀཊནཱམདྷེཡྻཏྟཱ ཨཉྙཏརོ. དེཝོ ཨེཝ དེཝཔུཏྟོ. སཾསཡསམུགྒྷཱཊཏྠནྟི ཝིཙིཀིཙྪཱསལླསམུདྡྷརཎཏྠཾ པུཙྪཱིཏི ཡོཛནཱ. ‘‘སཾསཡསམུགྒྷཱཊཏྠ’’ནྟི ཙ ཨིམིནཱ པཉྩསུ པུཙྪཱསུ ཨཡཾ ཝིམཏིཙྪེདནཱཔུཙྪཱཏི དསྶེཏི. ཡེན ཨཏྠེན ཏཎྷཱ ‘‘ཛཊཱ’’ཏི ཝུཏྟཱ, ཏམེཝ ཨཏྠཾ དསྶེཏུཾ ‘‘ཛཱལིནིཡཱ’’ཏིཨཱདི ཝུཏྟཾ. སཱ ཧི ཨཊྛསཏཏཎྷཱཝིཙརིཏཔྤབྷེདོ ཨཏྟནོ ཨཝཡཝབྷཱུཏོ ཨེཝ ཛཱལོ ཨེཏིསྶཱ ཨཏྠཱིཏི ‘‘ཛཱལིནཱི’’ཏི ཝུཙྩཏི.

ཨིདཱནིསྶཱ ¶ ཛཊཱཀཱརེན པཝཏྟིཾ དསྶེཏུཾ ‘‘སཱ ཧཱི’’ཏིཨཱདི ཝུཏྟཾ. ཏཏྠ རཱུཔཱདཱིསུ ཨཱརམྨཎེསཱུཏི ཏསྶཱ པཝཏྟིཊྛཱནམཱཧ, རཱུཔཱདིཚལཱ༹རམྨཎཝིནིམུཏྟསྶ ཏཎྷཱཝིསཡསྶ ཨབྷཱཝཏོ. ཧེཊྛུཔརིཡཝསེནཱཏི ཀདཱཙི རཱུཔཱརམྨཎེ ཀདཱཙི ཡཱཝ དྷམྨཱརམྨཎེ ཀདཱཙི དྷམྨཱརམྨཎེ ཀདཱཙི ཡཱཝ རཱུཔཱརམྨཎེཏི ཨེཝཾ ཧེཊྛཱ, ཨུཔརི ཙ པཝཏྟིཝསེན. དེསནཱཀྐམེན ཙེཏྠ ཧེཊྛུཔརིཡཏཱ དཊྛབྦཱ. ཀདཱཙི ཀཱམབྷཝེ ཀདཱཙི རཱུཔབྷཝེ ཀདཱཙི ཨརཱུཔབྷཝེ ཀདཱཙི ཝཱ ཨརཱུཔབྷཝེ…པེ… ཀདཱཙི ཀཱམབྷཝེཏི ཨེཝམེཏྠ ཧེཊྛུཔརིཡཝསེན པཝཏྟི ཝེདིཏབྦཱ. སབྦསངྑཱརཱནཾ ཁཎེ ཁཎེ བྷིཛྫནསབྷཱཝཏྟཱ ཨཔརཱཔརུཔྤཏྟི ཨེཏྠ སཾསིབྦནནྟི ཨཱཧ ‘‘པུནཔྤུནཾ ཨུཔྤཛྫནཏོ’’ཏི. ‘‘སཾསིབྦནཊྛེནཱ’’ཏི ཨིདཾ ཡེན སམྦནྡྷེན ཛཊཱ ཝིཡཱཏི ཛཊཱཏི ¶ ཛཊཱཏཎྷཱནཾ ཨུཔམཱུཔམེཡྻཏཱ, ཏཾདསྶནཾ. ཨཡཾ ཧེཏྠ ཨཏྠོ – ཡཐཱ ཛཱལིནོ ཝེལུ༹གུམྦསྶ སཱཁཱ, ཀོསསཉྩཡཱདཡོ ཙ ཨཏྟནཱ ཨཏྟནོ ཨཝཡཝེཧི སཾསིབྦིཏཱ ཝིནདྡྷཱ ‘‘ཛཊཱ’’ཏི ཝུཙྩནྟི, ཨེཝཾ ཏཎྷཱཔི སཾསིབྦནསབྷཱཝེནཱཏི, ‘‘སཾསིབྦིཏཊྛེནཱ’’ཏི ཝཱ པཱཋོ, ཨཏྟནཱཝ ཨཏྟནོ སཾསིབྦིཏབྷཱཝེནཱཏི ཨཏྠོ. ཨཡཾ ཧི ཏཎྷཱ ཀོསཀཱརཀིམི ཝིཡ ཨཏྟནཱཝ ཨཏྟཱནམྤི སཾསིབྦནྟཱི པཝཏྟཏི. ཏེནཱཧ བྷགཝཱ ‘‘རཱུཔཏཎྷཱ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏཱི’’ཏིཨཱདི (དཱི. ནི. ༢.༤༠༠; མ. ནི. ༡.༨༦; ཝིབྷ. ༢༠༣). ཨིམེ སཏྟཱ ‘‘མམ ཨིད’’ནྟི པརིགྒཧིཏཾ ཝཏྠུཾ ཨཏྟནིབྦིསེསཾ མཉྙམཱནཱ ཨབྦྷནྟརིམཾ ཀརོནྟི. ཨབྦྷནྟརཏྠོ ཙ ཨནྟོསདྡོཏི སཀཔརིཀྑཱརེ ཨུཔྤཛྫམཱནཱཔི ཏཎྷཱ ‘‘ཨནྟོཛཊཱ’’ཏི ཝུཏྟཱ. པབྦཛིཏསྶ པཏྟཱདི, གཧཊྛསྶ ཧཏྠིཨཱདི སཀཔརིཀྑཱརོ.

‘‘ཨཏྟཱ’’ཏི བྷཝཏི ཨེཏྠ ཨབྷིམཱནོཏི ཨཏྟབྷཱཝོ, ཨུཔཱདཱནཀྑནྡྷཔཉྩཀཾ. སརཱིརནྟི ཀེཙི. མམ ཨཏྟབྷཱཝོ སུནྡརོ, ཨསུཀསྶ ཝིཡ མམ ཨཏྟབྷཱཝོ བྷཝེཡྻཱཏི ཝཱ ཨཱདིནཱ སཀཨཏྟབྷཱཝཱདཱིསུ ཏཎྷཱཡ ཨུཔྤཛྫམཱནཱཀཱརོ ཝེདིཏབྦོ. ཨཏྟནོ ཙཀྑཱདཱིནི ཨཛ྄ཛྷཏྟིཀཱཡཏནཱནི. ཨཏྟནོ, པརེསཉྩ རཱུཔཱདཱིནི བཱཧིརཱཡཏནཱནི. པརེསཾ སབྦཱནི ཝཱ, སཔརསནྟཏིཔརིཡཱཔནྣཱནི ཝཱ ཙཀྑཱདཱིནི ཨཛ྄ཛྷཏྟིཀཱཡཏནཱནི. ཏཐཱ རཱུཔཱདཱིནི བཱཧིརཱཡཏནཱནི. པརིཏྟམཧགྒཏབྷཝེསུ པཝཏྟིཡཱཔི ཏཎྷཱཡ ཨནྟོཛཊཱབཧིཛཊཱབྷཱཝོ ཝེདིཏབྦོ. ཀཱམབྷཝོ ཧི ཀསྶཙིཔི ཀིལེསསྶ ཨཝིཀྑམྦྷིཏཏྟཱ ཀཐཉྩིཔི ཨཝིམུཏྟོ ཨཛ྄ཛྷཏྟགྒཧཎསྶ ཝིསེསཔཙྩཡོཏི ‘‘ཨཛ྄ཛྷཏྟཾ, ཨནྟོ’’ཏི ཙ ཝུཙྩཏི. ཏབྦིཔརིཡཱཡཏོ རཱུཔཱརཱུཔབྷཝོ ‘‘བཧིདྡྷཱ, བཧཱི’’ཏི ཙ. ཏེནཱཧ བྷགཝཱ ‘‘ཨཛ྄ཛྷཏྟསཾཡོཛནོ པུགྒལོ, བཧིདྡྷཱསཾཡོཛནོ པུགྒལོ’’ཏི (ཨ. ནི. ༢.༣༧). ཝིསཡབྷེདེན, པཝཏྟིཨཱཀཱརབྷེདེན ཙ ཨནེཀབྷེདབྷིནྣམྤི ཏཎྷཾ ¶ ཛཊཱབྷཱཝསཱམཉྙེན ཨེཀནྟི གཧེཏྭཱ ‘‘ཏཱཡ ཨེཝཾ ཨུཔྤཛྫམཱནཱཡ ཛཊཱཡཱ’’ཏི ཝུཏྟཾ. སཱ པན ‘‘པཛཱ’’ཏི ཝུཏྟསཏྟསནྟཱནཔརིཡཱཔནྣཱ ཨེཝ ཧུཏྭཱ པུནཔྤུནཾ ཏཾ ཛཊེནྟཱི ཝིནནྡྷནྟཱི པཝཏྟཏཱིཏི ཨཱཧ ‘‘ཛཊཱཡ ཛཊིཏཱ པཛཱ’’ཏི. ཏཐཱ ཧི པརམཏྠཏོ ཡདིཔི ཨཝཡཝབྱཏིརེཀེན སམུདཱཡོ ནཏྠི, ཨེཀདེསོ པན སམུདཱཡོ ནཱམ ན ཧོཏཱིཏི ཨཝཡཝཏོ སམུདཱཡཾ བྷིནྣཾ ཀཏྭཱ ཨུཔམཱུཔམེཡྻཾ དསྶེནྟོ ‘‘ཡཐཱ ནཱམ ¶ ཝེལུ༹ཛཊཱདཱིཧི…པེ… སཾསིབྦིཏཱ’’ཏི ཨཱཧ. ཨིམཾ ཛཊནྟི སམྦནྡྷོ. ཏཱིསུ དྷཱཏཱུསུ ཨེཀམྤི ཨསེསེཏྭཱ སཾསིབྦནེན ཏེདྷཱཏུཀཾ ཛཊེཏྭཱ ཋིཏཾ. ཏེནསྶཱ མཧཱཝིསཡཏཾ, ཝིཛཊནསྶ ཙ སུདུཀྐརབྷཱཝམཱཧ. ‘‘ཝིཛཊེཏུཾ ཀོ སམཏྠོ’’ཏི ཨིམིནཱ ‘‘ཝིཛཊཡེ’’ཏི པདཾ སཏྟིཨཏྠཾ, ན ཝིདྷིཨཱདིཨཏྠནྟི དསྶེཏི.

ཨེཝཾ ‘‘ཨནྟོཛཊཱ’’ཏིཨཱདིནཱ པུཊྛོ པན ཨསྶ དེཝཔུཏྟསྶ ཨིམཾ གཱཐམཱཧཱཏི སམྦནྡྷོ. ‘‘ཨེདིསོཝ ཨིམཾ པཉྷཾ ཝིསྶཛྫེཡྻཱ’’ཏི སཏྠཱརཾ གུཎཏོ དསྶེནྟོ ‘‘སབྦདྷམྨེསུ ཨཔྤཊིཧཏཉཱཎཙཱརོ’’ཏིཨཱདིམཱཧ. ཏཏྠ སབྦདྷམྨེསཱུཏི ཨཏཱིཏཱདིབྷེདབྷིནྣེསུ སབྦེསུ ཉེཡྻདྷམྨེསུ. ཨཔྤཊིཧཏཉཱཎཙཱརོཏི ཨནཝསེསཉེཡྻཱཝརཎཔྤཧཱནེན ནིསྶངྒཙཱརཏྟཱ ནཝིཧཏཉཱཎཔཝཏྟིཀོ. ཨེཏེན ཏཱིསུ ཀཱལེསུ ཨཔྤཊིཧཏཉཱཎཏཱཝིབྷཱཝནེན ཨཱདིཏོ ཏིཎྞཾ ཨཱཝེཎིཀདྷམྨཱནཾ གཧཎེནེཝ ཏདེཀལཀྑཎཏཱཡ ཏདཝིནཱབྷཱཝཏོ ཙ བྷགཝཏོ སེསཱཝེཎིཀདྷམྨཱནམྤི གཧིཏབྷཱཝོ ཝེདིཏབྦོ. དིབྦནྟི ཀཱམགུཎཱདཱིཧི ཀཱིལ༹ནྟི ལལ༹ནྟི, ཏེསུ ཝཱ ཝིཧརནྟི, ཝིཛཡསམཏྠཏཱཡོགེན པཙྩཏྠིཀེ ཝིཛེཏུཾ ཨིཙྪནྟི, ཨིསྶརིཡདྷནཱདིསཀྐཱརདཱནགྒཧཎཾ, ཏཾཏཾཨཏྠཱནུསཱསནཉྩ ཀརོནྟཱ ཝོཧརནྟི, པུཉྙཱཏིསཡཡོགཱནུབྷཱཝཔྤཏྟཱཡ ཛུཏིཡཱ ཛོཏནྟི, ཡཐཱདྷིཔྤེཏཉྩ ཝིསཡཾ ཨཔྤཊིགྷཱཏེན གཙྪནྟི, ཡཐིཙྪིཏནིཔྥཱདནེ ཙ སཀྐོནྟཱིཏི དེཝཱ. ཨཐ ཝཱ དེཝནཱིཡཱ ཏཾཏཾབྱསནནིཏྠརཎཏྠིཀེཧི སརཎཾ པརཱཡཎནྟི གམནཱིཡཱ, ཨབྷིཏྠཝནཱིཡཱ ཝཱ, སོབྷཱཝིསེསཡོགེན ཀམནཱིཡཱཏི ཝཱ དེཝཱ. ཏེ ཏིཝིདྷཱ – སམྨུཏིདེཝཱ ཨུཔཔཏྟིདེཝཱ ཝིསུདྡྷིདེཝཱཏི. བྷགཝཱ པན ནིརཏིསཡཱཡ ཨབྷིཉྙཱཀཱིལཱ༹ཡ ཨུཏྟམེཧི དིབྦབྲཧྨཨརིཡཝིཧཱརེཧི སཔརསནྟཱནགཏཔཉྩཝིདྷམཱརཝིཛཡིཙྪཱནིཔྥཏྟིཡཱ ཙིཏྟིསྶརིཡསཏྟདྷནཱདིསམྨཱཔཊིཔཏྟི ཨཝེཙྩཔསཱདསཀྐཱརདཱནགྒཧཎསངྑཱཏེན, དྷམྨསབྷཱཝཔུགྒལཛ྄ཛྷཱསཡཱནུརཱུཔཱནུསཱསནཱིསངྑཱཏེན ཙ ཝོཧཱརཱཏིསཡེན པརམཱཡ པཉྙཱསརཱིརཔྤབྷཱསངྑཱཏཱཡ ཛུཏིཡཱ, ཨནཉྙསཱདྷཱརཎཱཡ ཉཱཎསརཱིརགཏིཡཱ, མཱརཝིཛཡསབྦསབྦཉྙུགུཎཔརཧིཏནིཔྥཱདནེསུ ཨཔྤཊིཧཏཱཡ སཏྟིཡཱ ཙ སམནྣཱགཏཏྟཱ སདེཝཀེན ལོཀེན ‘‘སརཎ’’ནྟི གམནཱིཡཏོ, ཨབྷིཏྠཝནཱིཡཏོ, བྷཏྟིཝསེན ཀམནཱིཡཏོ ཙ སབྦེ ¶ ཏེ དེཝེ ཏེཧི གུཎེཧི ཨབྷིབྷུཡྻ ཋིཏཏྟཱ ཏེསཾ དེཝཱནཾ སེཊྛོ ཨུཏྟམོ དེཝོཏི དེཝདེཝོ. སབྦདེཝེཧི ¶ པཱུཛནཱིཡཏརོ དེཝོཏི ཝཱ, ཝིསུདྡྷིདེཝབྷཱཝསྶ ཝཱ སབྦཉྙུགུཎཱལངྐཱརསྶ ཝཱ ཨདྷིགཏཏྟཱ ཨཉྙེསཾ དེཝཱནཾ ཨཏིསཡེན དེཝོཏི དེཝདེཝོ.

ཨཔརིམཱཎཱསུ ལོཀདྷཱཏཱུསུ ཨཔརིམཱཎཱནཾ སཀྐཱནཾ, མཧཱབྲཧྨཱནཉྩ གུཎཱབྷིབྷཝནཏོ ཨདྷིཀོ ཨཏིསཡོ ཨཏིརེཀཏརོ ཝཱ སཀྐོ བྲཧྨཱ ཙཱཏི སཀྐཱནཾ ཨཏིསཀྐོ བྲཧྨཱནཾ ཨཏིབྲཧྨཱ. ཉཱཎཔྤཧཱནདེསནཱཝིསེསེསུ སདེཝཀེ ལོཀེ ཀེནཙི ཨཝིཀྑམྦྷནཱིཡཊྛཱནཏཱཡ ཀུཏོཙིཔི ཨུཏྲསྟཱབྷཱཝཏོ ཙཏཱུཧི ཝེསཱརཛྫེཧི ཝིསཱརདོཏི ཙཏུཝེསཱརཛྫཝིསཱརདོ. ཡཾ སནྡྷཱཡ ཝུཏྟཾ ‘‘སམྨཱསམྦུདྡྷསྶ ཏེ པཊིཛཱནཏོ ཨིམེ དྷམྨཱ ཨནབྷིསམྦུདྡྷཱཏི ཏཏྲ ཝཏ མཾ སམཎོ ཝཱ…པེ… ཝེསཱརཛྫཔྤཏྟོ ཝིཧརཱམཱི’’ཏི (མ. ནི. ༡.༡༥༠; ཨ. ནི. ༤.༨). ཋཱནཱཋཱནཉཱཎཱདཱིཧི དསཧི ཉཱཎབལེཧི སམནྣཱགཏཏྟཱ དསབལདྷརོ. ཡཾ སནྡྷཱཡ ཝུཏྟཾ ‘‘ཨིདྷ ཏཐཱགཏོ ཋཱནཉྩ ཋཱནཏོ, ཨཊྛཱནཉྩ ཨཊྛཱནཏོ ཡཐཱབྷཱུཏཾ པཛཱནཱཏཱི’’ཏིཨཱདི (ཨ. ནི. ༡༠.༢༡; ཝིབྷ. ༨༠༩). ཡཾ ཀིཉྩི ཉེཡྻཾ ནཱམ, ཏཏྠ སབྦཏྠེཝ ཨནཱཝཊཉཱཎཏཱཡ ཨནཱཝརཎཉཱཎོ. ཏཉྩ སབྦཾ སམནྟཏོ སབྦཱཀཱརཏོ ཧཏྠཏལེ ཨཱམལཀཾ ཝིཡ པཙྩཀྑཏོ དསྶནསམཏྠེན ཉཱཎཙཀྑུནཱ སམནྣཱགཏཏྟཱ སམནྟཙཀྑུ, སབྦཉྙཱུཏི ཨཏྠོ. ཨིམེཧི པན དྭཱིཧི པདེཧི པཙྪིམཱནི དྭེ ཨསཱདྷཱརཎཉཱཎཱནི གཧིཏཱནི. བྷཱགྱཝནྟཏཱདཱིཧི ཀཱརཎེཧི བྷགཝཱ. ཡཾ པནེཏྠ ཝཏྟབྦཾ, ཏཾ པརཏོ བུདྡྷཱནུསྶཏིནིདྡེསེ (ཝིསུདྡྷི. ༡.༡༢༣ ཨཱདཡོ) ཝིཏྠཱརཏོ ཨཱགམིསྶཏི.

ཨེཏྠ ཙ ‘‘སབྦདྷམྨེསུ ཨཔྤཊིཧཏཉཱཎཙཱརོ’’ཏི ཨིམིནཱ ཏིཡདྡྷཱརུལ༹ྷཱནཾ པུཙྪཱནཾ བྷགཝཏོ བྱཱཀརཎསམཏྠཏཱཡ དསྶིཏཱཡ ཀིཾ དེཝཏཱནམྤི པུཙྪཾ བྱཱཀཱཏུཾ སམཏྠོ བྷགཝཱཏི ཨཱསངྐཱཡ ཏནྣིཝཏྟནཏྠཾ ‘‘དེཝདེཝོ’’ཏི ཝུཏྟཾ. དེཝཱནཾ ཨཏིདེཝོ སཀྐོ དེཝཱནམིནྡོ དེཝཏཱནཾ པཉྷཾ ཝིསྶཛྫེཏི, ‘‘ཏཏོ ཨིམསྶ ཀོ ཝིསེསོ’’ཏི ཙིནྟེནྟཱནཾ ཏནྣིཝཏྟནཏྠཾ ‘‘སཀྐཱནཾ ཨཏིསཀྐོ’’ཏི ཝུཏྟཾ. སཀྐེནཔི པུཙྪིཏམཏྠཾ སནངྐུམཱརཱདཡོ བྲཧྨཱནོ ཝིསྶཛྫེནྟི, ‘‘ཏཏོ ཨིམསྶ ཀོ ཨཏིསཡོ’’ཏི ཙིནྟེནྟཱནཾ ཏནྣིཝཏྟནཏྠཾ ‘‘བྲཧྨཱནཾ ཨཏིབྲཧྨཱ’’ཏི ཝུཏྟཾ. ཨཡཾ ཙསྶ ཝིསེསོ ཙཏུཝེསཱརཛྫདསབལཉཱཎེཧི པཱཀཊོ ཛཱཏོཏི དསྶནཏྠཾ ‘‘ཙཏུ…པེ… ¶ དྷརོ’’ཏི ཝུཏྟཾ. ཨིམཱནི ཙ ཉཱཎཱནི ཨིམསྶ ཉཱཎདྭཡསྶ ཨདྷིགམེན སཧེཝ སིདྡྷཱནཱིཏི དསྶནཏྠཾ ‘‘ཨནཱཝརཎཉཱཎོ སམནྟཙཀྑཱུ’’ཏི ཝུཏྟཾ. ཏཡིདཾ ཉཱཎདྭཡཾ པུཉྙཉཱཎསམྦྷཱརཱུཔཙཡསིདྡྷཱཡ བྷགྒདོསཏཱཡ སིདྡྷནྟི དསྶེནྟོ ‘‘བྷགཝཱ’’ཏི ཨཝོཙཱཏི. ཨེཝམེཏེསཾ ¶ པདཱནཾ གཧཎེ པཡོཛནཾ, ཨནུཔུབྦི ཙ ཝེདིཏབྦཱ. ཡཾ པནེཏཾ པཙྪིམཾ ཨནཱཝརཎཉཱཎཾ སབྦཉྙུཏཉྙཱཎནྟི ཉཱཎདྭཡཾ, ཏཾ ཨཏྠཏོ ཨབྷིནྣཾ. ཨེཀམེཝ ཧི ཏཾ ཉཱཎཾ ཝིསཡཔཝཏྟིམུཁེན ཨཉྙེཧི ཨསཱདྷཱརཎབྷཱཝདསྶནཏྠཾ དྭིདྷཱ ཀཏྭཱ ཝུཏྟཾ. ཨནཝསེསསངྑཏཱསངྑཏསམྨུཏིདྷམྨཱརམྨཎཏཱཡ སབྦཉྙུཏཉྙཱཎཾ, ཏཏྠཱཝརཎཱབྷཱཝཏོ ནིསྶངྒཙཱརམུཔཱདཱཡ ‘‘ཨནཱཝརཎཉཱཎ’’ནྟིཔི ཝུཏྟཾ. ཡཾ པནེཏྠ ཝཏྟབྦཾ, ཏཾ པརཏོ བུདྡྷཱནུསྶཏིནིདྡེསེ (ཝིསུདྡྷི. ༡.༡༢༣ ཨཱདཡོ) ཝཀྑཱམ.

༢. མཧནྟེ སཱིལཀྑནྡྷཱདིཀེ ཨེསཱི གཝེསཱིཏི མཧེསི, བྷགཝཱ. ཏེན མཧེསིནཱ. ཝཎྞཡནྟོཏི ཝིཝརནྟོ ཝིཏྠཱརེནྟོ. ཡཐཱབྷཱུཏནྟི ཨཝིཔརཱིཏཾ. སཱིལཱདིབྷེདནནྟི སཱིལསམཱདྷིཔཉྙཱདིཝིབྷཱགཾ. སུདུལླབྷནྟི ཨཊྛཀྑཎཝཛྫིཏེན ནཝམེན ཁཎེན ལདྡྷབྦཏྟཱ སུཊྛུ དུལླབྷཾ. སཱིལཱདིསངྒཧནྟི སཱིལཱདིཀྑནྡྷཏྟཡསངྒཧཾ. ཨརིཡམགྒོ ཧི ཏཱིཧི ཁནྡྷེཧི སངྒཧིཏོ སཔྤདེསཏྟཱ ནགརཾ ཝིཡ རཛྫེན, ན ཏཡོ ཁནྡྷཱ ཨརིཡམགྒེན ནིཔྤདེསཏྟཱ. ཝུཏྟཉྷེཏཾ ‘‘ན ཁོ, ཨཱཝུསོ ཝིསཱཁ, ཨརིཡེན ཨཊྛངྒིཀེན མགྒེན ཏཡོ ཁནྡྷཱ སངྒཧིཏཱ; ཏཱིཧི ཙ ཁོ, ཨཱཝུསོ ཝིསཱཁ, ཁནྡྷེཧི ཨརིཡོ ཨཊྛངྒིཀོ མགྒོ སངྒཧིཏོ’’ཏི (མ. ནི. ༡.༤༦༢). ཀིལེསཙོརེཧི ཨཔརིཔནྠནཱིཡཏཱཡ ཁེམཾ. ཨནྟདྭཡཔརིཝཛྫནཏོ, མཱཡཱདིཀཱཡཝངྐཱདིཔྤཧཱནཏོ ཙ ཨུཛུཾ. སབྦེསཾ སཾཀིལེསདྷམྨཱནཾ མཱརཎཝསེན གམནཏོ པཝཏྟནཏོ, ནིབྦཱནསྶ མགྒནཏོ, ནིབྦཱནཏྠིཀེཧི མགྒིཏབྦཏོ ཙ མགྒཾ. ཝིསུདྡྷིཡཱཏི ནིབྦཱནཱཡ, ཝིསུདྡྷིབྷཱཝཱཡ ཝཱ, ཨརཧཏྟཱཡཱཏི ཨཏྠོ.

ཡཐཱབྷཱུཏཾ ཨཛཱནནྟཱཏི ཨེཝཾ སཱིལཝིསུདྡྷིཨཱདིཝིསུདྡྷིཔརམྤརཱཡ ཨདྷིགནྟབྦོ ཨེཝརཱུཔོ ཨེཝཾཀིཙྩཀོ ཨེཝམཏྠོཏི ཡཱཐཱཝཏོ ཨནཝབུཛ྄ཛྷནྟཱ. སཀལསཾཀིལེསཏོ, སཾསཱརཏོ ཙ སུདྡྷིཾ ཝིམུཏྟིཾ ཀཱམེནྟི པཏྠེནྟཱིཏི སུདྡྷིཀཱམཱ. ཨཔི-སདྡོ སམྦྷཱཝནེ. ཏེན ན ཀེཝལཾ སཱིལམཏྟེན པརིཏུཊྛཱ, ཨཐ ཁོ ཝིསུདྡྷིཀཱམཱཔི སམཱནཱཏི དསྶེཏི. ཨིདྷཱཏི ཨིམསྨིཾ སཱསནེ. བྷཱཝནཱཡ ཡུཏྟཔཡུཏྟཏཱཡ ཡོགིནོ ཝཱཡམནྟཱཔི ཝིསུདྡྷིཾ ¶ ཨུདྡིསྶ པཡོགཾ པརཀྐམཾ ཀརོནྟཱཔི ཨུཔཱཡསྶ ཨནདྷིགཏཏྟཱ ཝིསུདྡྷིཾ ནཱདྷིགཙྪནྟཱིཏི ཡོཛནཱ. ཏེསནྟི ཡོགཱིནཾ. ཀཱམཉྩཱཡཾ ཝིསུདྡྷིམགྒོ སམནྟབྷདྡཀཏྟཱ སཝནདྷཱརཎཔརིཙཡཱདིཔསུཏཱནཾ སབྦེསམྤི པཱམོཛྫཀརོ, ཡོགཱིནཾ པན སཱཏིསཡཾ པམོདཧེཏཱུཏི ཨཱཧ ‘‘ཏེསཾ པཱམོཛྫཀརཎ’’ནྟི. བཱཧིརཀནིཀཱཡནྟརལདྡྷཱིཧི ཨསམྨིསྶཏཱཡ སུཊྛུ ཝིསུདྡྷཝིནིཙྪཡཏྟཱ སུཝིསུདྡྷཝིནིཙྪཡཾ. མཧཱཝིཧཱརཝཱསཱིནནྟི ཨཏྟནོ ཨཔསྶཡབྷཱུཏཾ ནིཀཱཡཾ དསྶེཏི ¶ . དེསནཱནཡནིསྶིཏནྟི དྷམྨསཾཝཎྞནཱནཡསནྣིསྶིཏཾ. ཨེཏྠ ཙ ‘‘ཏེསཾ པཱམོཛྫཀརཎ’’ནྟིཨཱདིནཱ སབྦསཾཀིལེསམལཝིསུདྡྷཏཱཡ ཝིསུདྡྷིཾ ནིབྦཱནཾ པཏྠེནྟཱནཾ ཡོགཱིནཾ ཨེཀཾསེན ཏདཱཝཧཏྟཱ པཱམོཛྫཀརོ ཉཱཎུཏྟརེཧི སམྨཱཔཊིཔནྣེཧི ཨདྷིཊྛིཏཏྟཱ སུཊྛུ སམྨཱ ཝིསུདྡྷཝིནིཙྪཡོ མཧཱཝིཧཱརཝཱསཱིནཾ ཀཐཱམགྒོཏི དསྶེཏི. སཀྐཙྩཾ མེ བྷཱསཏོ སཀྐཙྩཾ ནིསཱམཡཐཱཏི ཡོཛེཏབྦཾ.

ཨེཏྠ ཙ ‘‘ཨིམིསྶཱ དཱནི གཱཐཱཡཱ’’ཏི ཨིམིནཱ ཝིསུདྡྷིམགྒབྷཱསནསྶ ནིསྶཡཾ, ‘‘ཀཐིཏཱཡ མཧེསིནཱ’’ཏི ཨིམིནཱ ཏསྶ པམཱཎབྷཱཝཾ, ‘‘ཡཐཱབྷཱུཏཾ ཨཏྠཾ སཱིལཱདིབྷེདན’’ནྟི ཨིམིནཱ ཨཝིཔརཱིཏཔིཎྜཏྠཾ, ‘‘སུདུལླབྷཾ…པེ… ཡོགིནོ’’ཏི ཨིམིནཱ ནིམིཏྟཾ, ‘‘ཏེསཾ པཱམོཛྫཀརཎ’’ནྟི ཨིམིནཱ པཡོཛནཾ, ‘‘ཝཎྞཡནྟོ ཨཏྠཾ, སུཝིསུདྡྷཝིནིཙྪཡཾ མཧཱཝིཧཱརཝཱསཱིནཾ དེསནཱནཡནིསྶིཏཾ, སཀྐཙྩ’’ནྟི ཙ ཨིམིནཱ ཀརཎཔྤཀཱརཾ དསྶེཏྭཱ ‘‘ཝིསུདྡྷིཀཱམཱ སབྦེཔི, ནིསཱམཡཐ སཱདྷཝོ’’ཏི ཨིམིནཱ ཏཏྠ སཀྐཙྩསཝནེ སཱདྷུཛནེ ནིཡོཛེཏི. སཱདྷུཀཾ སཝནཔཊིབདྡྷཱ ཧི སཱསནསམྤཏྟི.

༣. ཝཙནཏྠཝིབྷཱཝནེན པཝེདིཏཝིསུདྡྷིམགྒསཱམཉྙཏྠསྶ ཝིསུདྡྷིམགྒཀཐཱ ཝུཙྩམཱནཱ ཨབྷིརུཙིཾ ཨུཔྤཱདེཏཱིཏི པདཏྠཏོ ཝིསུདྡྷིམགྒཾ ཝིབྷཱཝེཏུཾ ‘‘ཏཏྠ ཝིསུདྡྷཱི’’ཏིཨཱདི ཨཱརདྡྷཾ. ཏཏྠ ཏཏྠཱཏི ཡདིདཾ ‘‘ཝིསུདྡྷིམགྒཾ བྷཱསིསྶ’’ནྟི ཨེཏྠ ཝིསུདྡྷིམགྒཔདཾ ཝུཏྟཾ, ཏཏྠ. སབྦམལཝིརཧིཏནྟི སབྦེཧི རཱགཱདིམལེཧི, སབྦེཧི སཾཀིལེསམལེཧི ཙ ཝིརཧིཏཾ ཝིཝིཏྟཾ. ཏཏོ ཨེཝ ཨཙྩནྟཔརིསུདྡྷཾ, སབྦདཱ སབྦཐཱ ཙ ཝིསུདྡྷནྟི ཨཏྠོ. ཡཐཱཝུཏྟཾ ཝིསུདྡྷིཾ མགྒཏི གཝེསཏི ཨདྷིགཙྪཏི ཨེཏེནཱཏི ཝིསུདྡྷིམགྒོ. ཏེནཱཧ ‘‘མགྒོཏི ཨདྷིགམཱུཔཱཡོ ཝུཙྩཏཱི’’ཏི. ཝིསུདྡྷིམགྒོཏི ཙ ནིཔྤརིཡཱཡེན ལོཀུཏྟརམགྒོ ཝེདིཏབྦོ, ཏདུཔཱཡཏྟཱ པན པུབྦབྷཱགམགྒོ, ཏནྣིསྶཡོ ཀཐཱཔབནྡྷོ ཙ ཏཐཱ ཝུཙྩཏི.

སྭཱཡཾ ¶ ཝིསུདྡྷིམགྒོ སཏྠཱརཱ དེསནཱཝིལཱསཏོ, ཝེནེཡྻཛ྄ཛྷཱསཡཏོ ཙ ནཱནཱནཡེཧི དེསིཏོ, ཏེསུ ཨཡམེཀོ ནཡོ གཧིཏོཏི དསྶེཏུཾ ‘‘སོ པནཱཡ’’ནྟིཨཱདི ཨཱརདྡྷཾ. ཏཏྠ ཀཏྠཙཱིཏི ཀིསྨིཉྩི སུཏྟེ. ཝིཔསྶནཱམཏྟཝསེནེཝཱཏི ཨཝདྷཱརཎེན སམཐཾ ནིཝཏྟེཏི. སོ ཧི ཏསྶཱ པཊིཡོགཱི, ན སཱིལཱདི. མཏྟ-སདྡེན ཙ ཝིསེསནིཝཏྟིཨཏྠེན སཝིསེསཾ སམཱདྷིཾ ནིཝཏྟེཏི. སོ ཨུཔཙཱརཔྤནཱབྷེདོ ཝིཔསྶནཱཡཱནིཀསྶ དེསནཱཏི ཀཏྭཱ ན སམཱདྷིམཏྟཾ. ན ཧི ¶ ཁཎིཀསམཱདྷིཾ ཝིནཱ ཝིཔསྶནཱ སམྦྷཝཏི. ཝིཔསྶནཱཏི ཙ ཏིཝིདྷཱཔི ཨནུཔསྶནཱ ཝེདིཏབྦཱ, ན ཨནིཙྩཱནུཔསྶནཱཝ. ན ཧི ཨནིཙྩདསྶནམཏྟེན སཙྩཱབྷིསམཡོ སམྦྷཝཏི. ཡཾ པན གཱཐཱཡཾ ཨནིཙྩལཀྑཎསྶེཝ གཧཎཾ ཀཏཾ, ཏཾ ཡསྶ ཏདེཝ སུཊྛུཏརཾ པཱཀཊཾ ཧུཏྭཱ ཨུཔཊྛཱཏི, ཏཱདིསསྶ ཝསེན. སོཔི ཧི ཨིཏརཾ ལཀྑཎདྭཡཾ ཝིབྷཱུཏཏརཾ ཀཏྭཱ སམྨསིཏྭཱ ཝིསེསཾ ཨདྷིགཙྪཏི, ན ཨནིཙྩལཀྑཎམེཝ.

སབྦེ སངྑཱརཱཏི སབྦེ ཏེབྷཱུམཀསངྑཱརཱ, ཏེ ཧི སམྨསནཱིཡཱ. ཨནིཙྩཱཏི ན ནིཙྩཱ ཨདྡྷུཝཱ ཨིཏྟརཱ ཁཎབྷངྒུརཱཏི. པཉྙཱཡཱཏི ཝིཔསྶནཱཔཉྙཱཡ. པསྶཏི སམྨསཏི. ཨཐ པཙྪཱ ཨུདཡབྦཡཉཱཎཱདཱིནཾ ཨུཔྤཏྟིཡཱ ཨུཏྟརཀཱལཾ. ནིབྦིནྡཏི དུཀྑེཏི ཏསྨིཾཡེཝ ཨནིཙྩཱཀཱརཏོ དིཊྛེ ‘‘སབྦེ སངྑཱརཱ’’ཏི ཝུཏྟེ ཏེབྷཱུམཀེ ཁནྡྷཔཉྩཀསངྑཱཏེ དུཀྑེ ནིབྦིནྡཏི ནིབྦིདཱཉཱཎཾ པཊིལབྷཏི. ཨེས མགྒོ ཝིསུདྡྷིཡཱཏི ཨེས ནིབྦིདཱནུཔསྶནཱསངྑཱཏོ ཝིརཱགཱདཱིནཾ ཀཱརཎབྷཱུཏོ ནིབྦཱནསྶ ཨདྷིགམཱུཔཱཡོ.

ཛྷཱནཔཉྙཱཝསེནཱཏི སམཐཝིཔསྶནཱཝསེན. ཛྷཱནནྟི ཙེཏྠ ཝིཔསྶནཱཡ པཱདཀབྷཱུཏཾ ཛྷཱནཾ ཨདྷིཔྤེཏཾ. ཡམྷཱིཏི ཡསྨིཾ པུགྒལེ. ཛྷཱནཉྩ པཉྙཱ ཙཱཏི ཨེཏྠཱཡམཏྠོ – ཡོ པུགྒལོ ཛྷཱནཾ པཱདཀཾ ཀཏྭཱ ཝིཔསྶནཾ པཊྛཔེཏྭཱ ཏཾ ཨུསྶུཀྐཱཔེཏི. ས ཝེ ནིབྦཱནསནྟིཀེཏི སོ བྱཏྟཾ ནིབྦཱནསྶ སམཱིཔེ ཨེཀནྟཏོ ནིབྦཱནཾ ཨདྷིགཙྪཏཱིཏི.

ཀམྨནྟི མགྒཙེཏནཱ. སཱ ཧི ཨཔཙཡགཱམིཏཱཡ སཏྟཱནཾ སུདྡྷིཾ ཨཱཝཧཏི. ཝིཛྫཱཏི སམྨཱདིཊྛི. སཱིལནྟི སམྨཱཝཱཙཱཀམྨནྟཱ. ཛཱིཝིཏམུཏྟམནྟི སམྨཱཨཱཛཱིཝོ. དྷམྨོཏི ཨཝསེསཱ ཙཏྟཱརོ ཨརིཡམགྒདྷམྨཱ. ཨཐ ཝཱ ཀམྨནྟི སམྨཱཀམྨནྟསྶ གཧཎཾ. ‘‘ཡཱ ཙཱཝུསོ ཝིསཱཁ, སམྨཱདིཊྛི, ཡོ ཙ ¶ སམྨཱསངྐཔྤོ, ཨིམེ དྷམྨཱ པཉྙཱཀྑནྡྷེ སངྒཧིཏཱ’’ཏི (མ. ནི. ༡.༤༦༢) ཝཙནཏོ. ཝིཛྫཱཏི སམྨཱདིཊྛིསམྨཱསངྐཔྤཱནཾ གཧཎཾ. དྷམྨོཏི སམཱདྷི ‘‘ཨེཝཾདྷམྨཱ ཏེ བྷགཝནྟོ ཨཧེསུ’’ནྟིཨཱདཱིསུ (སཾ. ནི. ༥.༣༧༨) ཝིཡ. ཏགྒཧཎེནེཝ ‘‘ཡོ ཙཱཝུསོ ཝིསཱཁ, སམྨཱཝཱཡཱམོ, ཡཱ ཙ སམྨཱསཏི, ཡོ ཙ སམྨཱསམཱདྷི, ཨིམེ དྷམྨཱ སམཱདྷིཀྑནྡྷེ སངྒཧིཏཱ’’ཏི ཝཙནཏོ སམྨཱཝཱཡཱམསཏཱིནམྤི གཧཎཾ དཊྛབྦཾ. སཱིལནྟི སམྨཱཝཱཙཱཛཱིཝཱནཾ. ཛཱིཝིཏམུཏྟམནྟི ཨེཝརཱུཔསྶ ཨརིཡཔུགྒལསྶ ཛཱིཝིཏཾ ཨུཏྟམཾ ཛཱིཝིཏནྟི ཨེཝམེཏྠ ཨཊྛངྒིཀོ ཨརིཡམགྒོ ཝུཏྟོཏི ཝེདིཏབྦོ.

སཱིལཱདིཝསེནཱཏི ¶ སཱིལསམཱདྷིཔཉྙཱཝཱིརིཡཝསེན. སབྦདཱཏི སམཱདཱནཏོ པབྷུཏི སབྦཀཱལཾ. སཱིལསམྤནྣོཏི ཙཏུཔཱརིསུདྡྷིསཱིལསམྤདཱཡ སམྤནྣོ སམནྣཱགཏོ. པཉྙཝཱཏི ལོཀིཡལོཀུཏྟརཱཡ པཉྙཱཡ སམནྣཱགཏོ. སུསམཱཧིཏོཏི ཏཾསམྤཡུཏྟེན སམཱདྷིནཱ སུཊྛུ སམཱཧིཏོ. ཨཱརདྡྷཝཱིརིཡོཏི ཨཀུསལཱནཾ དྷམྨཱནཾ པཧཱནཱཡ, ཀུསལཱནཾ དྷམྨཱནཾ ཨུཔསམྤདཱཡ པགྒཧིཏཝཱིརིཡོ. པཧིཏཏྟོཏི ནིབྦཱནཾ པཏིཔེསིཏཏྟཏཱཡ ཀཱཡེ ཙ ཛཱིཝིཏེ ཙ ནིརཔེཀྑཙིཏྟོ. ཨོགྷནྟི ཀཱམོགྷཱདིཙཏུབྦིདྷམྤི ཨོགྷཾ, སཾསཱརམཧོགྷམེཝ ཝཱ.

ཨེཀཱཡནོཏི ཨེཀམགྒོ. མགྒཔརིཡཱཡོ ཧི ཨིདྷ ཨཡན-སདྡོ, ཏསྨཱ ཨེཀཔཐབྷཱུཏོ ཨཡཾ, བྷིཀྑཝེ, མགྒོ, ན དྭེདྷཱཔཐབྷཱུཏོཏི ཨཏྠོ. ཨེཀཾ ཝཱ ནིབྦཱནཾ ཨཡཏི གཙྪཏཱིཏི ཨེཀཱཡནོ, ཨེཀེན ཝཱ གཎསངྒཎིཀཾ པཧཱཡ ཝིཝེཀཊྛེན ཨཡིཏབྦོ པཊིཔཛྫིཏབྦོཏི ཨེཀཱཡནོ, ཨཡནྟི ཏེནཱཏི ཝཱ ཨཡནོ, ཨེཀསྶ སེཊྛསྶ བྷགཝཏོ ཨཡནོཏི ཨེཀཱཡནོ, ཏེན ཨུཔྤཱདིཏཏྟཱ, ཨེཀསྨིཾ ཝཱ ཨིམསྨིཾཡེཝ དྷམྨཝིནཡེ ཨཡནོཏི ཨེཀཱཡནོ. སཏྟཱནཾ ཝིསུདྡྷིཡཱཏི རཱགཱདིམལེཧི, ཨབྷིཛ྄ཛྷཱཝིསམལོབྷཱདིཨུཔཀྐིལེསེཧི ཙ སཏྟཱནཾ ཝིསུདྡྷཏྠཱཡ ཝིསུཛ྄ཛྷནཏྠཱཡ. ཡདིདནྟི ནིཔཱཏོ, ཡེ ཨིམེཏི ཨཏྠོ. པུབྦེ སརཎལཀྑཎེན མགྒཊྛེན ཙ མགྒོཏི ཝུཏྟསྶེཝ ཀཱཡཱདིཝིསཡབྷེདེན ཙཏུབྦིདྷཏྟཱ ‘‘ཙཏྟཱརོ སཏིཔཊྛཱནཱ’’ཏི ཝུཏྟཾ. སམྨཔྤདྷཱནཱདཱིསཱུཏི ཨེཏྠ ཨཱདི-སདྡེན ཨཔྤམཱདཱབྷིརཏིཨཱདཱིནཾ སངྒཧོ ཝེདིཏབྦོ ¶ . ཨཔྤམཱདཱབྷིརཏིཨཱདིཝསེནཱཔི ཧི ཀཏྠཙི ཝིསུདྡྷིམགྒོ དེསིཏོ. ཡཐཱཧ –

‘‘ཨཔྤམཱདརཏོ བྷིཀྑུ, པམཱདེ བྷཡདསྶི ཝཱ;

ཨབྷབྦོ པརིཧཱནཱཡ, ནིབྦཱནསྶེཝ སནྟིཀེ’’ཏི. (དྷ. པ. ༣༢);

༤. ཏཏྲཱཏི ཏསྶཾ གཱཐཱཡཾ. ཨུཔརི ཝུཙྩམཱནཱ གཱཐཱཡ ཝིཏྠཱརསཾཝཎྞནཱ ནིདྡེསཔཊིནིདྡེསཊྛཱནིཡཱ, ཏཏོ སཾཁིཏྟཏརཱ ཨཏྠཝཎྞནཱ ཨུདྡེསཊྛཱནིཡཱཏི ཨཱཧ ‘‘ཨཡཾ སངྑེཔཝཎྞནཱ’’ཏི. ཡཐཱཨུདྡིཊྛསྶ ཧི ཨཏྠསྶ ནིདྡེསཔཊིནིདྡེསཱ སུཀརཱ, སུབོདྷཱ ཙ ཧོནྟཱིཏི. སཱིལེ པཏིཊྛཱཡཱཏི ཨེཏྠ སཱིལེཏི ཀུསལསཱིལེ. ཡདིཔི ‘‘ཀཏམེ ཙ, ཐཔཏི, ཨཀུསལཱ སཱིལཱ’’ཏིཨཱདཱིསུ ཨཀུསལཱ དྷམྨཱཔི སཱིལནྟི ཨཱགཏཱ. ཝུཙྩམཱནཱཡ པན ཙིཏྟཔཉྙཱབྷཱཝནཱཡ ཨདྷིཊྛཱནཱཡོགྱཏཱཡ ཀིརིཡསཱིལཱནམྤི ཨསམྦྷཝོ, ཀུཏོ ཨིཏརེསནྟི ཀུསལསཱིལམེཝེཏྠ ཨདྷིཔྤེཏཾ. སཱིལཾ པརིཔཱུརཡམཱནོཏིཨཱདཱིསུ པརིཔཱུརཡམཱནོཏི པརིཔཱལེནྟོ, པརིཝཌྜྷེནྟོ ཝཱ, སབྦབྷཱགེཧི སཾཝརནྟོ ¶ , ཨཝཱིཏིཀྐམནྟོ ཙཱཏི ཨཏྠོ. ཏཐཱབྷཱུཏོ ཧི ཏཾ ཨཝིཛཧནྟོ ཏཏྠ པཏིཊྛིཏོ ནཱམ ཧོཏི. ‘‘སཱིལེ’’ཏི ཧི ཨིདཾ ཨཱདྷཱརེ བྷུམྨཾ. པཏིཊྛཱཡཱཏི དུཝིདྷཱ པཏིཊྛཱ ནིསྶཡཱུཔནིསྶཡབྷེདཏོ. ཏཏྠ ཨུཔནིསྶཡཔཏིཊྛཱ ལོཀིཡཱ, ཨིཏརཱ ལོཀུཏྟརཱ ཨབྷིནྡིཏྭཱ གཧཎེ. བྷིནྡིཏྭཱ པན གཧཎེ ཡཐཱ ལོཀིཡཙིཏྟུཔྤཱདེསུ སཧཛཱཏཱནཾ, པུརིམཔཙྪིམཱནཉྩ ཝསེན ནིསྶཡཱུཔནིསྶཡཔཏིཊྛཱ སམྦྷཝཏི, ཨེཝཾ ལོཀུཏྟརེསུ ཧེཊྛིམམགྒཕལསཱིལཝསེན ཨུཔནིསྶཡཔཏིཊྛཱཔི སམྦྷཝཏི. ‘‘པཏིཊྛཱཡཱ’’ཏི ཙ པདསྶ ཡདཱ ཨུཔནིསྶཡཔཏིཊྛཱ ཨདྷིཔྤེཏཱ, ཏདཱ ‘‘སདྡྷཾ ཨུཔནིསྶཱཡཱ’’ཏིཨཱདཱིསུ (པཊྛཱ. ༡.༡.༤༢༣) ཝིཡ པུརིམཀཱལཀིརིཡཱཝསེན ཨཏྠོ ཝེདིཏབྦོ. ཏེནཱཧ ‘‘པུབྦེཝ ཁོ པནསྶ ཀཱཡཀམྨཾ ཝཙཱིཀམྨཾ ཨཱཛཱིཝོ སུཔརིསུདྡྷོ ཧོཏཱི’’ཏི (མ. ནི. ༣.༤༣༡). ཡདཱ པན ནིསྶཡཔཏིཊྛཱ ཨདྷིཔྤེཏཱ, ཏདཱ ‘‘ཙཀྑུཉྩ པཊིཙྩཱ’’ཏིཨཱདཱིསུ (མ. ནི. ༡.༢༠༤; ༣.༤༢༡; སཾ. ནི. ༤.༦༠) ཝིཡ སམཱནཀཱལཀིརིཡཱཝསེན ཨཏྠོ ཝེདིཏབྦོ. སམྨཱཝཱཙཱདཡོ ཧི ཨཏྟནཱ སམྤཡུཏྟཱནཾ སམྨཱདིཊྛིཨཱདཱིནཾ སཧཛཱཏཝསེནེཝ ནིསྶཡཔཙྩཡཱ ཧོནྟཱིཏི.

ནརཏི ¶ ནེཏཱིཏི ནརོ, པུརིསོ. ཡཐཱ ཧི པཋམཔཀཏིབྷཱུཏོ སཏྟོ, ཨིཏརཱཡ པཀཏིཡཱ སེཊྛཊྛེན པུརི ཨུཙྩེ ཋཱནེ སེཏི པཝཏྟཏཱིཏི ‘‘པུརིསོ’’ཏི ཝུཙྩཏི, ཨེཝཾ ནཡནཊྛེན ‘‘ནརོ’’ཏི ཝུཙྩཏི. པུཏྟབྷཱཏུབྷཱུཏོཔི ཧི པུགྒལོ མཱཏུཛེཊྛབྷགིནཱིནཾ ནེཏུཊྛཱནེ ཏིཊྛཏི, པགེཝ ཨིཏརོ ཨིཏརཱསཾ. ནརེན ཡོགཏོ, ནརསྶ ཨཡནྟི ཝཱ ནཱརཱི, ཨིཏྠཱི. སཱཔི ཙེཏྠ ཀཱམཾ ཏཎྷཱཛཊཱཝིཛཊནསམཏྠཏཱ ཨཏྠི, པདྷཱནམེཝ པན སཏྟཾ དསྶེནྟོ ‘‘ནརོ’’ཏི ཨཱཧ ཡཐཱ ‘‘སཏྠཱ དེཝམནུསྶཱན’’ནྟི (དཱི. ནི. ༡.༡༥༧, ༢༥༥). ཨཊྛཀཐཱཡཾ པན ཨཝིབྷཱགེན པུགྒལཔརིཡཱཡོ ཨཡནྟི དསྶེཏུཾ ‘‘ནརོཏི སཏྟོ’’ཏི ཝུཏྟཾ. སཔཉྙོཏི ཝིཔཱཀབྷཱུཏཱཡ སཧ པཉྙཱཡ པཝཏྟཏཱིཏི སཔཉྙོ. ཏཱཡ ཧི ཨཱདིཏོ པཊྛཱཡ སནྟཱནཝསེན བཧུལཾ པཝཏྟམཱནཱཡ ཨཡཾ སཏྟོ སཝིསེསཾ ‘‘སཔཉྙོ’’ཏི ཝཏྟབྦཏཾ ཨརཧཏི. ཝིཔཱཀཔཉྙཱཔི ཧི སནྟཱནཝིསེསནེན བྷཱཝནཱཔཉྙུཔྤཏྟིཡཱ ཨུཔནིསྶཡོ ཧོཏི ཨཧེཏུཀདྭིཧེཏུཀཱནཾ ཏདབྷཱཝཏོ. སམྤཛཉྙསངྑཱཏཱཡ ཙ ཏཾཏཾཀིཙྩཀཱརིཀཱཡ པཉྙཱཡ ཝསེན ‘‘སཔཉྙོ’’ཏི ཝཏྟུཾ ཝཊྚཏི. ཨཊྛཀཐཱཡཾ པན ནིཔཀ-སདྡེན པཱརིཧཱརིཀཔཉྙཱ གཡ྄ཧཏཱིཏི ཝིཔཱཀཔཉྙཱཝསེནེཝེཏྠ ཨཏྠོ ཝུཏྟོ. ཀམྨཛཏིཧེཏུཀཔཊིསནྡྷིཔཉྙཱཡཱཏི ཀམྨཛཱཡ ཏིཧེཏུཀཔཊིསནྡྷིཡཾ པཉྙཱཡཱཏི ཨེཝཾ ཏིཧེཏུཀ-སདྡོ པཊིསནྡྷི-སདྡེན སམྦནྡྷིཏབྦོ, ན པཉྙཱ-སདྡེན. ན ཧི པཉྙཱ ཏིཧེཏུཀཱ ཨཏྠི. པཊིསནྡྷིཏོ པབྷུཏི པཝཏྟམཱནཱ པཉྙཱ ‘‘པཊིསནྡྷིཡཾ པཉྙཱ’’ཏི ཝུཏྟཱ ཏཾམཱུལཀཏྟཱ, ན པཊིསནྡྷིཀྑཎེ པཝཏྟཱ ཨེཝ.

ཙིནྟེཏི ¶ ཨཱརམྨཎཾ ཨུཔནིཛ྄ཛྷཱཡཏཱིཏི ཙིཏྟཾ, སམཱདྷི. སོ ཧི སཱཏིསཡཾ ཨུཔནིཛ྄ཛྷཱནཀིཙྩོ. ན ཧི ཝིཏཀྐཱདཡོ ཝིནཱ སམཱདྷིནཱ ཏམཏྠཾ སཱདྷེནྟི, སམཱདྷི པན ཏེཧི ཝིནཱཔི སཱདྷེཏཱིཏི. པགུཎབལཝབྷཱཝཱཔཱདནེན པཙྩཡེཧི ཙིཏཾ, ཏཐཱ སནྟཱནཾ ཙིནོཏཱིཏིཔི ཙིཏྟཾ, སམཱདྷི. པཋམཛ྄ཛྷཱནཱདིཝསེན ཙིཏྟཝིཙིཏྟཏཱཡ, ཨིདྡྷིཝིདྷཱདིཙིཏྟཀརཎེན ཙ སམཱདྷི ཙིཏྟནྟི ཝིནཱཔི པརོཔདེསེནསྶ ཙིཏྟཔརིཡཱཡོ ལབྦྷཏེཝ. ཨཊྛཀཐཱཡཾ པན ཙིཏྟ-སདྡོ ཝིཉྙཱཎེ ནིརུལ༹ྷོཏི ཀཏྭཱ ཝུཏྟཾ ‘‘ཙིཏྟསཱིསེན ཧེཏྠ སམཱདྷི ནིདྡིཊྛོ’’ཏི. ཡཐཱསབྷཱཝཾ པཀཱརེཧི ཛཱནཱཏཱིཏི པཉྙཱ. སཱ ཡདིཔི ཀུསལཱདིབྷེདཏོ བཧུཝིདྷཱ. ‘‘བྷཱཝཡ’’ནྟི པན ཝཙནཏོ བྷཱཝེཏབྦཱ ཨིདྷཱདྷིཔྤེཏཱཏི ཏཾ དསྶེཏུཾ ‘‘ཝིཔསྶན’’ནྟི ཝུཏྟཾ. ‘‘བྷཱཝཡ’’ནྟི ཙ ཨིདཾ པཙྩེཀཾ ¶ ཡོཛེཏབྦཾ ‘‘ཙིཏྟཉྩ བྷཱཝཡཾ, པཉྙཉྩ བྷཱཝཡ’’ནྟི. ཏཡིདཾ དྭཡཾ ཀིཾ ལོཀིཡཾ, ཨུདཱཧུ ལོཀུཏྟརནྟི? ལོཀུཏྟརནྟི དཊྛབྦཾ ཨུཀྐཊྛནིདྡེསཏོ. ཏཾ ཧི བྷཱཝཡམཱནོ ཨརིཡམགྒཀྑཎེ ཏཎྷཱཛཊཾ སམུཙྪེདཝསེན ཝིཛཊེཏཱིཏི ཝུཙྩཏི, ན ལོཀིཡཾ. ནཱནནྟརིཡབྷཱཝེན པནེཏྠ ལོཀིཡཱཔི གཧིཏཱཝ ཧོནྟི ལོཀིཡསམཐཝིཔསྶནཱཡ ཝིནཱ ཏདབྷཱཝཏོ. སམཐཡཱནིཀསྶ ཧི ཨུཔཙཱརཔྤནཱཔྤབྷེདཾ སམཱདྷིཾ ཨིཏརསྶ ཁཎིཀསམཱདྷིཾ, ཨུབྷཡེསམྤི ཝིམོཀྑམུཁཏྟཡཾ ཝིནཱ ན ཀདཱཙིཔི ལོཀུཏྟརཱདྷིགམོ སམྦྷཝཏི. ཏེནཱཧ ‘‘སམཱདྷིཉྩེཝ ཝིཔསྶནཉྩ བྷཱཝཡམཱནོ’’ཏི. ཏཏྠ ཡདཱ ལོཀིཡཱ སམཐཝིཔསྶནཱ ཨདྷིཔྤེཏཱ, ཏདཱ ‘‘བྷཱཝཡ’’ནྟི ཨིདཾ བྷཱཝནཱཀིརིཡཱཡ ཧེཏུབྷཱཝཀཐནཾ, བྷཱཝནཱཧེཏཱུཏི ཨཏྠོ. ཏཾབྷཱཝནཱཧེཏུཀཱ ཧི ཝིཛཊནཀིརིཡཱཏི. ཡདཱ པན ལོཀུཏྟརཱ ཨདྷིཔྤེཏཱ, ཏདཱ ཀེཝལཾ ཝཏྟམཱནབྷཱཝནིདྡེསོ. ཏདུབྷཡབྷཱཝནཱསམཀཱལམེཝ ཧི ཏཎྷཱཛཊཱཝིཛཊནཾ.

‘‘ཨཱཏཱཔཱི ནིཔཀོ’’ཏི ཨིདཾ ཡཐཱཝུཏྟབྷཱཝནཱཡ ཨུཔཀཱརཀདྷམྨཀིཏྟནཾ. ཀམྨཊྛཱནཾ ཨནུཡུཉྫནྟསྶ ཧི ཝཱིརིཡཾ སཏི སམྤཛཉྙནྟི ཨིམེ ཏཡོ དྷམྨཱ བཧཱུཔཀཱརཱ. ཝཱིརིཡཱུཔཏྠདྡྷཉྷི ཀམྨཊྛཱནཾ སཏིསམྤཛཉྙཱནུཔཱལིཏཾ ན པརིཔཏཏི, ཨུཔརི ཙ ཝིསེསཾ ཨཱཝཧཏི. པཏིཊྛཱསིདྡྷིཡཱ ཙེཏྠ སདྡྷཱསིདྡྷི, སདྡྷཱུཔནིསྶཡཏྟཱ སཱིལསྶ, ཝཱིརིཡཱདིསིདྡྷིཡཱ ཙ. ན ཧི སདྡྷེཡྻཝཏྠུཾ ཨསདྡཧནྟསྶ ཡཐཱཝུཏྟཝཱིརིཡཱདཡོ སམྦྷཝནྟི, ཏཐཱ སམཱདྷིཔི. ཡཐཱ ཧི ཧེཏུབྷཱཝཏོ ཝཱིརིཡཱདཱིཧི སདྡྷཱསིདྡྷི, ཨེཝཾ ཕལབྷཱཝཏོ ཏེཧི སམཱདྷིསིདྡྷི. ཝཱིརིཡཱདཱིསུ ཧི སམྤཛྫམཱནེསུ སམཱདྷི སམྤནྣོཝ ཧོཏི ཨསམཱཧིཏསྶ ཏདབྷཱཝཏོ. ཀཐཾ པནེཏྠ སཏིསིདྡྷི? ནིཔཀགྒཧཎཏོ. ཏིཀྑཝིསདབྷཱཝཔྤཏྟཱ ཧི སཏི ‘‘ནེཔཀྐ’’ནྟི ཝུཙྩཏི. ཡཐཱཧ ‘‘པརམེན སཏིནེཔཀྐེན སམནྣཱགཏོ’’ཏི. ཨཊྛཀཐཱཡཾ པན ‘‘ནེཔཀྐཾ པཉྙཱ’’ཏི ཨཡམཏྠོ དསྶིཏོ. ཏགྒཧཎེནེཝ ¶ སཏིཔི གཧིཏཱཝ ཧོཏི. ན ཧི སཏིཝིརཧིཏཱ པཉྙཱ ཨཏྠཱིཏི. ཨཔརེ པན ‘‘སཔཉྙོ’’ཏི ཨིམིནཱཝ པཱརིཧཱརིཀཔཉྙཱཔི གཡ྄ཧཏཱིཏི ‘‘ནིཔཀོ’’ཏི པདསྶ ‘‘སཏོ’’ཏི ཨཏྠཾ ཝདནྟི. ཡདིཔི ཀིལེསཱནཾ པཧཱནཾ ཨཱཏཱཔནཾ, ཏཾ སམྨཱདིཊྛིཨཱདཱིནམྤི ཨཏྠེཝ. ཨཱཏཔྤསདྡོ ཝིཡ པན ཨཱཏཱཔསདྡོ ཝཱིརིཡེཡེཝ ¶ ནིརུལ༹ྷོཏི ཨཱཧ ‘‘ཨཱཏཱཔཱིཏི ཝཱིརིཡཝཱ’’ཏི. ཨཐ ཝཱ པཊིཔཀྑཔྤཧཱནེ སམྤཡུཏྟདྷམྨཱནཾ ཨབྦྷུསྶཧནཝསེན པཝཏྟམཱནསྶ ཝཱིརིཡསྶ སཱཏིསཡཾ ཏདཱཏཱཔནནྟི ཝཱིརིཡམེཝ ཏཐཱ ཝུཙྩཏི, ན ཨཉྙེ དྷམྨཱ. ཨཱཏཱཔཱིཏི ཙཱཡམཱིཀཱརོ པསཾསཱཡ, ཨཏིསཡསྶ ཝཱ དཱིཔཀོ. ཝཱིརིཡཝཱཏི ཝཱ-སདྡོཔི ཏདཏྠོ ཨེཝ དཊྛབྦོ. ཏེན སམྨཔྤདྷཱནསམངྒིཏཱ ཝུཏྟཱ ཧོཏི. ཏེནཱཧ ‘‘ཀིལེསཱནཾ ཨཱཏཱཔནཔརིཏཱཔནཊྛེནཱ’’ཏི. ཨཱཏཱཔནགྒཧཎེན ཙེཏྠ ཨཱརམྦྷ དྷཱཏུམཱཧ ཨཱདིཏོ ཝཱིརིཡཱརམྦྷོཏི ཀཏྭཱ, པརིཏཱཔནགྒཧཎེན ནིཀྐམཔརཀྐམདྷཱཏུཡོ སབྦསོ པཊིཔཀྑཏོ ནིཀྑནྟཏཾ, ཨུཔརཱུཔརི ཝིསེསཔྤཏྟིཉྩ ཨུཔཱདཱཡ. ནིཔཡཏི ཝིསོསེཏི པཊིཔཀྑཾ, ཏཏོ ཝཱ ཨཏྟཱནཾ ནིཔཱཏི རཀྑཏཱིཏི ནིཔཀོ, སམྤཛཱནོ. ཀམྨཊྛཱནསྶ པརིཧརཎེ ནིཡུཏྟཱཏི པཱརིཧཱརིཀཱ.

ཨབྷིཀྐམཱདཱིནི སབྦཀིཙྩཱནི སཱཏྠཀསམྤཛཉྙཱདིཝསེན པརིཙྪིཛྫ ནེཏཱིཏི སབྦཀིཙྩཔརིཎཱཡིཀཱ. ཀམྨཊྛཱནསྶ ཝཱ ཨུགྒཧོ པརིཔུཙྪཱ བྷཱཝནཱརམྦྷོ མནསིཀཱརཝིདྷི, ཏཏྠ ཙ སཀྐཙྩཀཱརིཏཱ སཱཏཙྩཀཱརིཏཱ སཔྤཱཡཀཱརིཏཱ ནིམིཏྟཀུསལཏཱ པཧིཏཏྟཏཱ ཨནྟརཱཨསངྐོཙོ ཨིནྡྲིཡསམཏྟཔཊིཔཱདནཱ ཝཱིརིཡསམཏཱཔཱདནཾ ཝཱིརིཡསམཏཱཡོཛནནྟི ཨེཝམཱདཱིནཾ སབྦེསཾ ཀིཙྩཱནཾ པརིཎཱཡིཀཱ སབྦཀིཙྩཔརིཎཱཡིཀཱ. བྷཡཾ ཨིཀྑཏཱིཏི བྷིཀྑཱུཏི སཱདྷཱརཎཏོ བྷིཀྑུལཀྑཎཀཐནེན པཊིཔཏྟིཡཱཝ བྷིཀྑུབྷཱཝོ, ན བྷིཀྑཀབྷིནྣཔཊདྷརཱདིབྷཱཝེནཱཏི དསྶེཏི. ཨེཝཾ ཧི ཀཏཀིཙྩཱནཾ སཱམཎེརཱདཱིནཾ, པཊིཔནྣཱནཉྩ ཨཔབྦཛིཏཱནམྤི སངྒཧོ ཀཏོ ཧོཏི. ཨིདྷ པན པཊིཔཛྫནཀཝསེན ཨཏྠོ ཝེདིཏབྦོ. བྷིནྡཏི པཱཔཀེ ཨཀུསལེ དྷམྨེཏི ཝཱ བྷིཀྑུ. སོ ཨིམཾ ཝིཛཊཡེཏི ཡོ ནརོ སཔྤཉྙོ སཱིལེ པཏིཊྛཱཡ ཨཱཏཱཔཱི ནིཔཀོ ཙིཏྟཾ པཉྙཉྩ བྷཱཝཡནྟི ཝུཏྟོ, སོ བྷིཀྑུ ཨིམཾ ཏཎྷཱཛཊཾ ཝིཛཊཡེཏི སམྦནྡྷོ. ཨིདཱནི ཏམྤི ཝིཛཊནཾ ཝེལུ༹གུམྦཝིཛཊནེན ཨུཔམེཏྭཱ དསྶེཏུཾ གཱཐཱཡ ཡཐཱཝུཏྟེ སཱིལཱདིདྷམྨེ ‘‘ཨིམིནཱ ཙ སཱིལེནཱ’’ཏིཨཱདིནཱ པཙྩཱམསཏི. ཏཏྠ ཡསྨཱ ཡོགཱཝཙརསནྟཱནགཏཱ ནཱནཱཀྑཎིཀཱ མིསྶཀཱ སཱིལཱདིདྷམྨཱ གཱཐཱཡ གཧིཏཱ, ཏསྨཱ ཏེ ཨེཀཙྩཾ གཎྷནྟོ ‘‘ཚཧི དྷམྨེཧི སམནྣཱགཏོ’’ཏི ཨཱཧ. ན ཧི ཏེ ཚ དྷམྨཱ ཨེཀསྨིཾ སནྟཱནེ ཨེཀསྨིཾ ཁཎེ ¶ ལབྦྷནྟི. ཡསྨཱ ཙ པུགྒལཱདྷིཊྛཱནེན གཱཐཱ བྷཱསིཏཱ, ཏསྨཱ པུགྒལཱདྷིཊྛཱནམེཝ ཨུཔམཾ དསྶེནྟོ ‘‘སེཡྻཐཱཔི ནཱམ པུརིསོ’’ཏིཨཱདིམཱཧ ¶ . ཏཏྠ སུནིསིཏནྟི སུཊྛུ ནིསིཏཾ, ཨཏིཝིཡ ཏིཁིཎནྟི ཨཏྠོ. སཏྠསྶ ནིསཱནསིལཱཡཾ ནིསིཏཏརབྷཱཝཀརཎཾ, བཱཧུབལེན ཙསྶ ཨུཀྑིཔནནྟི ཨུབྷཡམྤེཏཾ ཨཏྠཱཔནྣཾ ཀཏྭཱ ཨུཔམཱ ཝུཏྟཱཏི ཏདུབྷཡཾ ཨུཔམེཡྻེ དསྶེནྟོ ‘‘སམཱདྷིསིལཱཡཾ སུནིསིཏཾ…པེ… པཉྙཱཧཏྠེན ཨུཀྑིཔིཏྭཱ’’ཏི ཨཱཧ. སམཱདྷིགུཎེན ཧི པཉྙཱཡ ཏིཀྑབྷཱཝོ. ཏེནཱཧ བྷགཝཱ ‘‘སམཱཧིཏོ ཡཐཱབྷཱུཏཾ པཛཱནཱཏཱི’’ཏི (སཾ. ནི. ༣.༥; ༤.༩༩; ༥.༡༠༧༡; ནེཏྟི. ༤༠; མི. པ. ༢.༡.༡༤). ཝཱིརིཡཉྩསྶཱ ཨུཔཏྠམྦྷཀཾ པགྒཎྷནཏོ. ཝིཛཊེཡྻཱཏི ཝིཛཊེཏུཾ སཀྐུཎེཡྻ. ཝུཊྛཱནགཱམིནིཝིཔསྶནཱཡ ཧི ཝཏྟམཱནཱཡ ཡོགཱཝཙརོ ཏཎྷཱཛཊཾ ཝིཛཊེཏུཾ སམཏྠོ ནཱམ. ཝིཛཊནཾ ཙེཏྠ སམུཙྪེདཝསེན པཧཱནནྟི ཨཱཧ ‘‘སཉྪིནྡེཡྻ སམྤདཱལེཡྻཱ’’ཏི. དཀྑིཎཾ ཨརཧཏཱིཏི དཀྑིཎེཡྻོ, ཨགྒོ ཙ སོ དཀྑིཎེཡྻོ ཙཱཏི ཨགྒདཀྑིཎེཡྻོ, ཨགྒཱ ཝཱ དཀྑིཎཱ ཨགྒདཀྑིཎཱ, ཏཾ ཨརཧཏཱིཏི ཨགྒདཀྑིཎེཡྻོ.

༥. ཏཏྲཱཏི ཏསྶཾ གཱཐཱཡཾ. ཨཡནྟི ‘‘ནརོ’’ཏི ཙ ‘‘བྷིཀྑཱུ’’ཏི ཙ ཝུཏྟོ ཡོགཱཝཙརོ. པུན ཏཏྲཱཏི ཏསྶཾ པཉྙཱཡཾ. ཨསྶཱཏི བྷིཀྑུནོ. ཀཏྟརི ཙེཏཾ སཱམིཝཙནཾ, ཨནེནཱཏི ཨཏྠོ. ཀརཎཱིཡཾ ནཏྠི ཝིསེསཱདྷཱནསྶ ཏིཧེཏུཀཔཊིསནྡྷིཔཉྙཱཡ ཨབྷཱཝཏོ. ཏེནཱཧ ‘‘པུརིམཀམྨཱནུབྷཱཝེནེཝ ཧིསྶ སཱ སིདྡྷཱ’’ཏི. ཏེནཱཏི ཡོགིནཱ. བྷཱཝནཱཡཾ སཏཏཔཝཏྟིཏཝཱིརིཡཏཱཡ སཱཏཙྩཀཱརིནཱ. པཉྙཱཝསེནཱཏི ཡཐཱཝུཏྟནེཔཀྐསངྑཱཏཔཉྙཱཝསེན. ཡཾ ཀིཉྩི ཀཏྟབྦཾ, ཏསྶ སབྦསྶ སམྤཛཱནཝསེནེཝ ཀརཎསཱིལོ, ཏཏྠ ཝཱ སམྤཛཱནཀཱརོ ཨེཏསྶ ཨཏྠི, སམྤཛཱནསྶ ཝཱ ཨསམྨོཧསྶ ཀཱརཀོ ཨུཔྤཱདཀོཏི སམྤཛཱནཀཱརཱི, ཏེན སམྤཛཱནཀཱརིནཱ. ཨཏྲཱཏི ཨསྶཾ གཱཐཱཡཾ. སཱིལཱདིསམྤཱདནེ ཝཱིརིཡསྶ ཏེསཾ ཨངྒབྷཱཝཏོ ཏཾ ཝིསུཾ ཨགྒཧེཏྭཱ ‘‘སཱིལསམཱདྷིཔཉྙཱམུཁེནཱ’’ཏི ཝུཏྟཾ.

‘‘ཝིསུདྡྷིམགྒཾ དསྶེཏཱི’’ཏི ཨཝིབྷཱགཏོ དེསནཱཡ པིཎྜཏྠཾ ཝཏྭཱ པུན ཏཾ ཝིབྷཱགཏོ དསྶེཏུཾ ‘‘ཨེཏྟཱཝཏཱ’’ཏིཨཱདི ཝུཏྟཾ. ཏཏྠ ཨེཏྟཱཝཏཱཏི ཨེཏྟཀཱཡ དེསནཱཡ. སིཀྑཱཏི སིཀྑིཏབྦཊྛེན སིཀྑཱ. སིཀྑནཾ ཙེཏྠ ཨཱསེཝནཾ དཊྛབྦཾ. སཱིལཱདིདྷམྨེཧི སཾཝརཎཱདིཝསེན ཨཱསེཝནྟོ ཏེ སིཀྑཏཱིཏི ¶ ཝུཙྩཏི. སཱསནནྟི པཊིཔཏྟིསཱསནཾ. ཨུཔནིསྶཡོ བལཝཀཱརཎཾ. ཝཛྫནཾ ཨནུཔགམནཾ. སེཝནཱ བྷཱཝནཱ. པཊིཔཀྑོཏི པཧཱཡཀཔཊིཔཀྑོ. ཡདིཔི གཱཐཱཡཾ ‘‘སཱིལེ’’ཏི སཱམཉྙཏོ ཝུཏྟཾ, ན ‘‘ཨདྷིསཱིལེ’’ཏི. ཏཾ པན ཏཎྷཱཛཊཱཝིཛཊནསྶ པཏིཊྛཱབྷཱུཏཾ ཨདྷིཔྤེཏནྟི ཨཱཧ ‘‘སཱིལེན ཨདྷིསཱིལསིཀྑཱ པཀཱསིཏཱ’’ཏི. བྷཝགཱམི ཧི སཱིལཾ སཱིལམེཝ, ཝིབྷཝགཱམི ¶ སཱིལཾ ཨདྷིསཱིལསིཀྑཱ. སཱམཉྙཛོཏནཱ ཧི ཝིསེསེ ཨཝཏིཊྛཏཱིཏི. ཨེས ནཡོ སེསསིཀྑཱསུཔི.

སཱིལེནཱཏི ཨདྷིསཱིལསིཀྑཱབྷཱུཏེན སཱིལེན. ཏཾ ཧི ཨནཉྙསཱདྷཱརཎཏཱཡ སཱསནསྶ ཨཱདིཀལྱཱཎཏཾ པཀཱསེཏི, ན ཡམནིཡམཱདིམཏྟཾ. ཏེན ཝུཏྟཾ ‘‘སཱིལཉྩ སུཝིསུདྡྷཾ, སབྦཔཱཔསྶ ཨཀརཎ’’ནྟི ཙ. ཀུསལཱནནྟི མགྒཀུསལཱནཾ. ཀུསལཱནནྟི ཝཱ ཨནཝཛྫཱནཾ. ཏེན ཨརིཡཕལདྷམྨཱནམྤི སངྒཧོ སིདྡྷོ ཧོཏི. སབྦཔཱཔསྶ ཨཀརཎནྟི སབྦསྶཱཔི སཱཝཛྫསྶ ཨཀིརིཡཱ ཨནཛ྄ཛྷཱཔཛྫནཾ. ཨེཏེན ཙཱརིཏྟཝཱརིཏྟབྷེདསྶ སབྦསྶ སཱིལསྶ གཧཎཾ ཀཏཾ ཧོཏི. ཀཏྟབྦཱཀརཎམྤི ཧི སཱཝཛྫམེཝཱཏི. ཨཱདིཝཙནཏོཏི གཱཐཱཡཾ ཝུཏྟསམཱདྷིཔཉྙཱནཾ ཨཱདིམྷི ཝཙནཏོ. ཨཱདིབྷཱཝོ ཙསྶ ཏམྨཱུལཀཏྟཱ ཨུཏྟརིམནུསྶདྷམྨཱནཾ. ཨཱདཱིནཾ ཝཱ ཝཙནཾ ཨཱདིཝཙནཾ. ཨཱདིསདྡེན ཙེཏྠ ‘‘སཱིལཾ སམཱདྷི པཉྙཱ ཙ, ཝིམུཏྟི ཙ ཨནུཏྟརཱ’’ཏི (དཱི. ནི. ༢.༡༨༦) ཨེཝམཱདཱིནཾ སངྒཧོ དཊྛབྦོ. སཱིལསྶ ཝིསུདྡྷཏྟཱ ཝིཔྤཊིསཱརཱདིཧེཏཱུནཾ དཱུརཱིཀརཎཏོ ཨཝིཔྤཊིསཱརཱདིགུཎཱཝཧཾ. ‘‘ཨཝིཔྤཊིསཱརཱདིགུཎཱཝཧཏྟཱ’’ཏི ཨེཏེན ན ཀེཝལཾ སཱིལསྶ ཀལྱཱཎཏཱཝ ཝིབྷཱཝིཏཱ, ཨཐ ཁོ ཨཱདིབྷཱཝོཔཱིཏི དཊྛབྦཾ. ཏཐཱ ཧིསྶ སུཏྟེ (པརི. ༣༦༦) ཨཝིཔྤཊིསཱརཱདཱིནཾ ཝིམུཏྟིཉཱཎཔརིཡོསཱནཱནཾ པརམྤརཔཙྩཡཏཱ ཝུཏྟཱ. སམཱདྷིནཱཏི ཨདྷིཙིཏྟསིཀྑཱབྷཱུཏེན སམཱདྷིནཱ. སཀལཾ སཱསནཾ སངྒཧེཏྭཱ པཝཏྟཱཡ གཱཐཱཡ ཨཱདིཔདེན ཨཱདིམྷི པཊིཔཛྫིཏབྦསྶ སཱིལསྶ, ཏཏིཡཔདེན པརིཡོསཱནེ པཊིཔཛྫིཏབྦཱཡ པཉྙཱཡ གཧིཏཏྟཱ མཛ྄ཛྷེ པཊིཔཛྫིཏབྦོ སམཱདྷི པཱརིསེསཏོ དུཏིཡཔདེན གཡ྄ཧཏཱིཏི ‘‘ཀུསལསྶ ཨུཔསམྤདཱཏིཨཱདིཝཙནཏོ ཧི སམཱདྷི སཱསནསྶ མཛ྄ཛྷེ’’ཏི ཝུཏྟཾ, ན ཀུསལསདྡསྶ སམཱདྷིཔརིཡཱཡཏྟཱ. པུབྦཱུཔནིསྶཡཝཏོ ཧི སམཱཧིཏཏཱདིཨཊྛངྒསམནྣཱགམེན ཨབྷིནཱིཧཱརཀྑམཏཱ སམཱདྷིསྶ ཨིདྡྷིཝིདྷཱདིགུཎཱཝཧཏྟཾ, ཨགྒམགྒཔཉྙཱཡ ཨདྷིགཏཱཡ ཡདཏྠཾ པབྦཛཏི, ཏཾ པརིཡོསིཏནྟི པཉྙཱ སཱསནསྶ ¶ པརིཡོསཱནཾ. ཏེནཱཧ བྷགཝཱ ‘‘སིཀྑཱནིསཾསམིདཾ, བྷིཀྑཝེ, བྲཧྨཙརིཡཾ ཝུསྶཏི སདྡྷཱདྷིཔཏེཡྻཾ པཉྙུཏྟརཾ ཝིམུཏྟིསཱར’’ནྟི (ཨ. ནི. ༤.༢༤༥). སཀཾ ཙིཏྟཾ སཙིཏྟཾ, སཙིཏྟསྶ སབྦསོ ཀིལེསཱནཾ སམུཙྪིནྡནེན ཝིསོདྷནཾ སཙིཏྟཔརིཡོདཱཔནཾ. ཨེཝཾ པན པཉྙཱཀིཙྩེ མཏྠཀཔྤཏྟེ ཨུཏྟརི ཀརཎཱིཡཱབྷཱཝཏོ སཱསནསྶ པཉྙུཏྟརཏཱ ཝེདིཏབྦཱ. ཏཱདིབྷཱཝཱཝཧནཏོཏི ཡཱདིསོ ཨིཊྛེསུ, ལཱབྷཱདཱིསུ ཙ ཨནུནཡཱབྷཱཝཏོ, ཏཱདིསོ ཨནིཊྛེསུ, ཨལཱབྷཱདཱིསུ ཙ པཊིགྷཱབྷཱཝཏོ. ཏཏོ ཨེཝ ཝཱ ཡཱདིསོ ཨནཱཔཱཐགཏེསུ ཨིཊྛཱནིཊྛེསུ, ཏཱདིསོ ཨཱཔཱཐགཏེསུཔཱིཏི ཏཱདཱི. ཏསྶ བྷཱཝོ ཏཱདིབྷཱཝོ, ཏསྶ ཨཱཝཧནཏོ. ཝཱཏེནཱཏི ¶ ཝཱཏཧེཏུ. ན སམཱིརཏཱིཏི ན ཙལཏི. ན སམིཉྫནྟཱིཏི ན ཕནྡནྟི, ཀུཏོ ཙལནནྟི ཨདྷིཔྤཱཡོ.

ཏཐཱཏི ཡཐཱ སཱིལཱདཡོ ཨདྷིསཱིལསིཀྑཱདཱིནཾ པཀཱསཀཱ, ཏཐཱ ཏེཝིཛྫཏཱདཱིནཾ ཨུཔནིསྶཡསྶཱཏི ཏེསཾ པཀཱསནཱཀཱརཱུཔསཾཧཱརཏྠོ ཏཐཱ-སདྡོ. ཡསྨཱ སཱིལཾ ཝིསུཛ྄ཛྷམཱནཾ སཏིསམྤཛཉྙབལེན, ཀམྨསྶཀཏཉཱཎབལེན ཙ སཾཀིལེསམལཏོ ཝིསུཛ྄ཛྷཏི པཱརིཔཱུརིཉྩ གཙྪཏི, ཏསྨཱ སཱིལསམྤདཱ སིཛ྄ཛྷམཱནཱ ཨུཔནིསྶཡསམྤཏྟིབྷཱཝེན སཏིབལཾ, ཉཱཎབལཉྩ པཙྩུཔཊྛཔེཏཱིཏི ཏསྶཱ ཝིཛྫཏྟཡཱུཔནིསྶཡཏཱ ཝེདིཏབྦཱ སབྷཱགཧེཏུསམྤཱདནཏོ. སཏིནེཔཀྐེན ཧི པུབྦེནིཝཱསཝིཛྫཱསིདྡྷི, སམྤཛཉྙེན སབྦཀིཙྩེསུ སུདིཊྛཀཱརིཏཱཔརིཙཡེན ཙུཏཱུཔཔཱཏཉཱཎཱནུབནྡྷཱཡ དུཏིཡཝིཛྫཱསིདྡྷི, ཝཱིཏིཀྐམཱབྷཱཝེན སཾཀིལེསཔྤཧཱནསབྦྷཱཝཏོ ཝིཝཊྚཱུཔནིསྶཡཏཱཝསེན ཨཛ྄ཛྷཱསཡསུདྡྷིཡཱ ཏཏིཡཝིཛྫཱསིདྡྷི. པུརེཏརཾ སིདྡྷཱནཾ སམཱདྷིཔཉྙཱནཾ པཱརིཔཱུརིཾ ཝིནཱ སཱིལསྶ ཨཱསཝཀྑཡཉཱཎཱུཔནིསྶཡཏཱ སུཀྑཝིཔསྶཀཁཱིཎཱསཝེཧི དཱིཔེཏབྦཱ. སམཱདྷིཔཉྙཱ ཝིཡ ཨབྷིཉྙཱཔཊིསམྦྷིདཱནཾ སཱིལཾ ན སབྷཱགཧེཏཱུཏི ཀཏྭཱ ཝུཏྟཾ ‘‘ན ཏཏོ པར’’ནྟི. ‘‘སམཱཧིཏོ ཡཐཱབྷཱུཏཾ པཛཱནཱཏཱི’’ཏི (སཾ. ནི. ༣.༥; ༤.༩༩; ནེཏྟི. ༤༠; མི. པ. ༢.༡.༡༤) ཝཙནཏོ སམཱདྷིསམྤདཱ ཚལ༹བྷིཉྙཏཱཡ ཨུཔནིསྶཡོ. པཉྙཱ ཝིཡ པཊིསམྦྷིདཱནཾ སམཱདྷི ན སབྷཱགཧེཏཱུཏི ཝུཏྟཾ ‘‘ན ཏཏོ པར’’ནྟི. ‘‘ཡོགཱ ཝེ ཛཱཡཏེ བྷཱུརཱི’’ཏི (དྷ. པ. ༢༨༢) ཝཙནཏོ པུབྦཡོགེན, གརུཝཱསདེསབྷཱསཱཀཨོསལླཨུགྒཧཔརིཔུཙྪཱདཱིཧི ཙ པརིབྷཱཝིཏཱ པཉྙཱསམྤཏྟི པཊིསམྦྷིདཱཔབྷེདསྶ ཨུཔནིསྶཡོ ¶ པཙྩེཀབོདྷིསམྨཱསམྦོདྷིཡོཔི པཉྙཱསམྤཏྟིསནྣིསྶཡཱཏི པཉྙཱཡ ཨནདྷིགནྟབྦསྶ ཝིསེསསྶ ཨབྷཱཝཏོ, ཏསྶཱ ཙ པཊིསམྦྷིདཱཔབྷེདསྶ ཨེཀནྟིཀཀཱརཎཏོ ཧེཊྛཱ ཝིཡ ‘‘ན ཏཏོ པར’’ནྟི ཨཝཏྭཱ ‘‘ན ཨཉྙེན ཀཱརཎེནཱ’’ཏི ཝུཏྟཾ.

ཨེཏྠ ཙ ‘‘སཱིལསམྤཏྟིཉྷི ནིསྶཱཡཱ’’ཏི ཝུཏྟཏྟཱ ཡསྶ སམཱདྷིཝིཛམྦྷནབྷཱུཏཱ ཨནཝསེསཱ ཚ ཨབྷིཉྙཱ ན ཨིཛ྄ཛྷནྟི, ཏསྶ ཨུཀྐཊྛཔརིཙྪེདཝསེན ན སམཱདྷིསམྤདཱ ཨཏྠཱིཏི. སཏིཔི ཝིཛྫཱནཾ ཨབྷིཉྙེཀདེསབྷཱཝེ སཱིལསམྤཏྟིསམུདཱགཏཱ ཨེཝ ཏིསྶོ ཝིཛྫཱ གཧིཏཱ. ཡཐཱ ཧི པཉྙཱསམྤཏྟིསམུདཱགཏཱ ཙཏསྶོ པཊིསམྦྷིདཱ ཨུཔནིསྶཡསམྤནྣསྶ མགྒེནེཝ ཨིཛ྄ཛྷནྟི, མགྒཀྑཎེ ཨེཝ ཏཱསཾ པཊིལབྷིཏབྦཏོ, ཨེཝཾ སཱིལསམྤཏྟིསམུདཱགཏཱ ཏིསྶོ ཝིཛྫཱ སམཱདྷིསམྤཏྟིསམུདཱགཏཱ ཙ ཚ ཨབྷིཉྙཱ ཨུཔནིསྶཡསམྤནྣསྶ མགྒེནེཝ ཨིཛ྄ཛྷནྟཱིཏི མགྒཱདྷིགམེནེཝ ¶ ཏཱསཾ ཨདྷིགམོ ཝེདིཏབྦོ. པཙྩེཀབུདྡྷཱནཾ, སམྨཱསམྦུདྡྷཱནཉྩ པཙྩེཀབོདྷིསམྨཱསམྦོདྷིསམདྷིགམསདིསཱ ཧི ཨིམེསཾ ཨརིཡཱནཾ ཨིམེ ཝིསེསཱདྷིགམཱཏི. ཝིནཡསུཏྟཱབྷིདྷམྨེསུ སམྨཱཔཊིཔཏྟིཡཱ ཏེཝིཛྫཏཱདཱིནཾ ཨུཔནིསྶཡཏཱཔི ཡཐཱཝུཏྟཝིདྷིནཱ ཝེདིཏབྦཱ.

སམྤནྣསཱིལསྶ ཀཱམསེཝནཱབྷཱཝཏོ སཱིལེན པཋམནྟཝིཝཛྫནཾ ཝུཏྟཾ. ཡེབྷུཡྻེན ཧི སཏྟཱ ཀཱམཧེཏུ པཱཎཱཏིཔཱཏཱདིཝསེནཱཔི ཨསུདྡྷཔཡོགཱ ཧོནྟི. ཛྷཱནསུཁལཱབྷིནོ ཀཱཡཀིལམཐསྶ སམྦྷཝོ ཨེཝ ནཏྠཱིཏི སམཱདྷིནཱ དུཏིཡནྟཝིཝཛྫནཾ ཝུཏྟཾ ཛྷཱནསམུཊྛཱནཔཎཱིཏརཱུཔཕུཊཀཱཡཏྟཱ. པཉྙཱཡཱཏི མགྒཔཉྙཱཡ. ཨུཀྐཊྛནིདྡེསེན ཧི ཨེཀཾསཏོ ཨརིཡམགྒོཝ མཛ྄ཛྷིམཱ པཊིཔཏྟི ནཱམ. ཨེཝཾ སནྟེཔི ལོཀིཡཔཉྙཱཝསེནཔི ཨནྟདྭཡཝིཝཛྫནཾ ཝིབྷཱཝེཏབྦཾ.

སཱིལཾ ཏཾསམངྒིནོ ཀཱམསུགཏཱིསུཡེཝ ནིབྦཏྟཱཔནཏོ ཙཏཱུཧི ཨཔཱཡེཧི ཝིམུཏྟིཡཱ ཀཱརཎནྟི ཨཱཧ ‘‘སཱིལེན ཨཔཱཡསམཏིཀྐམནུཔཱཡོ པཀཱསིཏོ ཧོཏཱི’’ཏི. ན ཧི པཱཎཱཏིཔཱཏཱདིཔཊིཝིརཏི དུགྒཏིཔརིཀིལེསཾ ཨཱཝཧཏི. སམཱདྷི ཏཾསམངྒིནོ མཧགྒཏབྷཱུམིཡཾཡེཝ ནིབྦཏྟཱཔནེན སཀལཀཱམབྷཝཏོ ཝིམོཙེཏཱིཏི ཝུཏྟཾ ‘‘སམཱདྷིནཱ ཀཱམདྷཱཏུསམཏིཀྐམནུཔཱཡོ པཀཱསིཏོ ཧོཏཱི’’ཏི. ན ཧི ཀཱམཱཝཙརཀམྨསྶ ཨནུབལཔྤདཱཡཱིནཾ ཀཱམཙྪནྡཱདཱིནཾ ཝིཀྑམྦྷཀཾ ཛྷཱནཾ ཀཱམདྷཱཏུཔརིཀིལེསཱཝཧཾ ཧོཏི. ན ཙེཏྠ ཨུཔཙཱརཛ྄ཛྷཱནཾ ནིདསྶེཏབྦཾ, ཨཔྤནཱསམཱདྷིསྶ ¶ ཨདྷིཔྤེཏཏྟཱ. ནཱཔི ‘‘སཱིལེནེཝ ཨཏིཀྐམིཏབྦསྶ ཨཔཱཡབྷཝསྶ སམཱདྷིནཱ ཨཏིཀྐམིཏབྦཏཱ’’ཏི ཝཙནོཀཱསོ. སུགཏིབྷཝམྤི ཨཏིཀྐམནྟསྶ དུགྒཏིསམཏིཀྐམནེ ཀཱ ཀཐཱཏི. སབྦབྷཝསམཏིཀྐམནུཔཱཡོཏི ཀཱམབྷཝཱདཱིནཾ ནཝནྣམྤི བྷཝཱནཾ སམཏིཀྐམནུཔཱཡོ སཱིལསམཱདྷཱིཧི ཨཏིཀྐནྟཱཔི བྷཝཱ ཨནཏིཀྐནྟཱ ཨེཝ, ཀཱརཎསྶ ཨཔཧཱིནཏྟཱ. པཉྙཱཡ པནསྶ སུཔྤཧཱིནཏྟཱ ཏེ སམཏིཀྐནྟཱ ཨེཝ.

ཏདངྒཔྤཧཱནཝསེནཱཏི དཱིཔཱལོཀེནེཝ ཏམསྶ པུཉྙཀིརིཡཝཏྠུགཏེན ཏེན ཏེན ཀུསལངྒེན ཏསྶ ཏསྶ ཨཀུསལངྒསྶ པཧཱནཝསེན. སམཱདྷིནཱ ཝིཀྑམྦྷནཔྤཧཱནཝསེནཱཏི ཨུཔཙཱརཔྤནཱབྷེདེན སམཱདྷིནཱ པཝཏྟིནིཝཱརཎེན གྷཊཔྤཧཱརེནེཝ ཛལཏལེ སེཝཱལསྶ ཏེསཾ ཏེསཾ ནཱིཝརཎཱདིདྷམྨཱནཾ པཧཱནཝསེན. པཉྙཱཡཱཏི ཨརིཡམགྒཔཉྙཱཡ. སམུཙྪེདཔྤཧཱནཝསེནཱཏི ཙཏུནྣཾ ཨརིཡམགྒཱནཾ བྷཱཝིཏཏྟཱ ཏཾཏཾམགྒཝཏོ ཨཏྟནོ སནྟཱནེ ‘‘དིཊྛིགཏཱནཾ པཧཱནཱཡཱ’’ཏིཨཱདིནཱ (དྷ. ས. ༢༧༧) ཝུཏྟསྶ ¶ སམུདཡཔཀྑིཡསྶ ཀིལེསགཎསྶ ཨཙྩནྟཾ ཨཔྤཝཏྟིསངྑཱཏསམུཙྪིནྡནཔྤཧཱནཝསེན.

ཀིལེསཱནཾ ཝཱིཏིཀྐམཔཊིཔཀྑོཏི སཾཀིལེསདྷམྨཱནཾ, ཀམྨཀིལེསཱནཾ ཝཱ ཡོ ཀཱཡཝཙཱིདྭཱརེསུ ཝཱིཏིཀྐམོ ཨཛ྄ཛྷཱཙཱརོ, ཏསྶ པཊིཔཀྑོ སཱིལེན པཀཱསིཏོ ཧོཏི, ཨཝཱིཏིཀྐམསབྷཱཝཏྟཱ སཱིལསྶ. ཨོཀཱསཱདཱནཝསེན ཀིལེསཱནཾ ཙིཏྟེ ཀུསལཔྤཝཏྟིཾ པརིཡཱདིཡིཏྭཱ ཨུཊྛཱནཾ པརིཡུཊྛཱནཾ. ཏཾ སམཱདྷི ཝིཀྑམྦྷེཏཱིཏི ཨཱཧ ‘‘སམཱདྷིནཱ པརིཡུཊྛཱནཔཊིཔཀྑོ པཀཱསིཏོ ཧོཏཱི’’ཏི, སམཱདྷིསྶ པརིཡུཊྛཱནཔྤཧཱཡཀཏྟཱ. ཨཔྤཧཱིནབྷཱཝེན སནྟཱནེ ཨནུ ཨནུ སཡནཏོ ཀཱརཎལཱབྷེ ཨུཔྤཏྟིརཧཱ ཨནུསཡཱ, ཏེ པན ཨནུརཱུཔཾ ཀཱརཎཾ ལདྡྷཱ ཨུཔྤཛྫནཱརཧཱ ཐཱམགཏཱ ཀཱམརཱགཱདཡོ སཏྟ ཀིལེསཱ ཝེདིཏབྦཱ. ཏེ ཨརིཡམགྒཔཉྙཱཡ སབྦསོ པཧཱིཡནྟཱིཏི ཨཱཧ ‘‘པཉྙཱཡ ཨནུསཡཔཊིཔཀྑོ པཀཱསིཏོ ཧོཏཱི’’ཏི.

ཀཱཡདུཙྩརིཏཱདི དུཊྛུ ཙརིཏཾ, ཀིལེསེཧི ཝཱ དཱུསིཏཾ ཙརིཏནྟི དུཙྩརིཏཾ, ཏམེཝ ཡཏྠ ཨུཔྤནྣཾ, ཏཾ སནྟཱནཾ སཾཀིལེསེཏི ཝིབཱདྷཏི, ཨུཔཏཱཔེཏི ཙཱཏི སཾཀིལེསོ, ཏསྶ ཝིསོདྷནཾ སཱིལེན ཏདངྒཝསེན པཧཱནཾ ཝཱིཏིཀྐམཔཊིཔཀྑཏྟཱ སཱིལསྶ. ཏཎྷཱསཾཀིལེསསྶ ཝིསོདྷནཾ ཝིཀྑམྦྷནཝསེན ¶ པཧཱནཾ པརིཡུཊྛཱནཔཊིཔཀྑཏྟཱ སམཱདྷིསྶ, ཏཎྷཱཡ ཙསྶ ཨུཛུཝིཔཙྩནིཀབྷཱཝཏོ. དིཊྛིསཾཀིལེསསྶ ཝིསོདྷནཾ སམུཙྪེདཝསེན པཧཱནཾ ཨནུསཡཔཊིཔཀྑཏྟཱ པཉྙཱཡ, དིཊྛིགཏཱནཉྩ ཨཡཱཐཱཝགཱཧཱིནཾ ཡཱཐཱཝགཱཧིནིཡཱ པཉྙཱཡ ཨུཛུཝིཔཙྩནིཀབྷཱཝཏོ.

ཀཱརཎནྟི ཨུཔནིསྶཡཔཙྩཡོ. སཱིལེསུ པརིཔཱུརཀཱརཱིཏི མགྒབྲཧྨཙརིཡསྶ ཨཱདིབྷཱུཏཏྟཱ ཨཱདིབྲཧྨཙརིཡཀཱནཾ པཱརཱཛིཀསངྒྷཱདིསེསསངྑཱཏཱནཾ མཧཱསཱིལསིཀྑཱཔདཱནཾ ཨཝཱིཏིཀྐམནཏོ ཁུདྡཱནུཁུདྡཀཱནཾ ཨཱཔཛྫནེ སཧསཱཝ ཏེཧི ཝུཊྛཱནེན སཱིལེསུ ཡཾ ཀཏྟབྦཾ, ཏཾ པརིཔཱུརཾ སམཏྠཾ ཀརོཏཱིཏི སཱིལེསུ པརིཔཱུརཀཱརཱི. ཏཐཱ སཀདཱགཱམཱིཏི ‘‘སཱིལེསུ པརིཔཱུརཀཱརཱི’’ཏི ཨེཏཾ ཨུཔསཾཧརཏི ཏཐཱ-སདྡེན. ཨེཏེ ཧི དྭེ ཨརིཡཱ སམཱདྷིཔཱརིཔནྠིཀཱནཾ ཀཱམརཱགབྱཱཔཱདཱནཾ པཉྙཱཔཱརིཔནྠིཀསྶ སཙྩཔཊིཙྪཱདཀམོཧསྶ སབྦསོ ཨསམཱུཧཏཏྟཱ སམཱདྷིཾ, པཉྙཉྩ བྷཱཝེནྟཱཔི སམཱདྷིཔཉྙཱསུ ཡཾ ཀཏྟབྦཾ, ཏཾ མཏྟསོ པམཱཎེན པདེསམཏྟམེཝ ཀརོནྟཱིཏི སམཱདྷིསྨིཾ, པཉྙཱཡ ཙ མཏྟསོ ཀཱརིནོ ‘‘སཱིལེསུ པརིཔཱུརཀཱརིནོ’’ཨིཙྩེཝ ཝུཙྩནྟི. ཨནཱགཱམཱི ¶ པན ཀཱམརཱགབྱཱཔཱདཱནཾ སམུཙྪིནྣཏྟཱ སམཱདྷིསྨིཾ པརིཔཱུརཀཱརཱི. ཨརཧཱ སབྦསོ སམྨོཧསྶ སུསམཱུཧཏཏྟཱ པཉྙཱཡ པརིཔཱུརཀཱརཱི.

ཝུཏྟཾ ཧེཏཾ བྷགཝཏཱ (ཨ. ནི. ༣.༨༧) –

‘‘ཨིདྷ, བྷིཀྑཝེ, བྷིཀྑུ སཱིལེསུ པརིཔཱུརཀཱརཱི ཧོཏི, སམཱདྷིསྨིཾ མཏྟསོ ཀཱརཱི, པཉྙཱཡ མཏྟསོ ཀཱརཱི. སོ ཡཱནི ཏཱནི ཁུདྡཱནུཁུདྡཀཱནི སིཀྑཱཔདཱནི, ཏཱནི ཨཱཔཛྫཏིཔི ཝུཊྛཱཏིཔི. ཏཾ ཀིསྶ ཧེཏུ? ན ཧི མེཏྠ, བྷིཀྑཝེ, ཨབྷབྦཏཱ ཝུཏྟཱ. ཡཱནི ཙ ཁོ ཏཱནི སིཀྑཱཔདཱནི ཨཱདིབྲཧྨཙརིཡཀཱནི བྲཧྨཙརིཡསཱརུཔྤཱནི, ཏཏྠ དྷུཝསཱིལོ ཙ ཧོཏི ཋིཏསཱིལོ ཙ, སམཱདཱཡ སིཀྑཏི སིཀྑཱཔདེསུ. སོ ཏིཎྞཾ སཾཡོཛནཱནཾ པརིཀྑཡཱ སོཏཱཔནྣོ ཧོཏི ཨཝིནིཔཱཏདྷམྨོ ནིཡཏོ སམྦོདྷིཔརཱཡཎོ. ཨིདྷ པན, བྷིཀྑཝེ, བྷིཀྑུ སཱིལེསུ…པེ… སོ ཏིཎྞཾ སཾཡོཛནཱནཾ པརིཀྑཡཱ རཱགདོསམོཧཱནཾ ཏནུཏྟཱ སཀདཱགཱམཱི ཧོཏི. སཀིདེཝ ཨིམཾ ལོཀཾ ཨཱགནྟྭཱ དུཀྑསྶནྟཾ ཀརོཏི. ཨིདྷ པན, བྷིཀྑཝེ, བྷིཀྑུ སཱིལེསུ པརིཔཱུརཀཱརཱི ¶ ཧོཏི, སམཱདྷིསྨིཾ པརིཔཱུརཀཱརཱི, པཉྙཱཡ མཏྟསོ ཀཱརཱི. སོ ཡཱནི ཏཱནི…པེ… སིཀྑཏི སིཀྑཱཔདེསུ. སོ པཉྩནྣཾ ཨོརམྦྷཱགིཡཱནཾ…པེ… ཨནཱཝཏྟིདྷམྨོ ཏསྨཱ ལོཀཱ. ཨིདྷ པན, བྷིཀྑཝེ, བྷིཀྑུ སཱིལེསུ པརིཔཱུརཀཱརཱི ཧོཏི, སམཱདྷིསྨིཾ པརིཔཱུརཀཱརཱི, པཉྙཱཡ པརིཔཱུརཀཱརཱི. སོ ཡཱནི ཏཱནི ཁུདྡཱནུཁུདྡཀཱནི…པེ… སིཀྑཏི སིཀྑཱཔདེསུ. སོ ཨཱསཝཱནཾ ཁཡཱ…པེ… ཨུཔསམྤཛྫ ཝིཧརཏཱི’’ཏི.

‘‘ཀཐ’’ནྟི པུཙྪིཏྭཱ སིཀྑཱདིཀེ ཝིབྷཛིཏྭཱ ཝུཏྟམེཝཏྠཾ ནིགམེཏུཾ ‘‘ཨེཝ’’ནྟིཨཱདི ཝུཏྟཾ. ཏཏྠ ཨཉྙེ ཙཱཏི ཏཡོ ཝིཝེཀཱ, ཏཱིཎི ཀུསལམཱུལཱནི, ཏཱིཎི ཝིམོཀྑམུཁཱནི, ཏཱིཎི ཨིནྡྲིཡཱནཱིཏི ཨེཝམཱདཡོ, སིཀྑཏྟིཀཱདཱིཧི ཨཉྙེ ཙ གུཎཏྟིཀཱ. ཨེཝརཱུཔཱཏི ཡཱདིསཀཱ སིཀྑཏྟིཀཱདཡོ ཨིདྷ སཱིལཱདཱིཧི པཀཱསིཏཱ ཧོནྟི, ཨེདིསཱ.

ཨེཏྠ ཧི ཝིཝཊྚསནྣིསྶིཏསྶ སཱིལསྶ ཨིདྷཱདྷིཔྤེཏཏྟཱ སཱིལེན ཀཱཡཝིཝེཀོ པཀཱསིཏོ ཧོཏི, སམཱདྷིནཱ ཙིཏྟཝིཝེཀོ, པཉྙཱཡ ཨུཔདྷིཝིཝེཀོ. ཏཐཱ སཱིལེན ཨདོསོ ཀུསལམཱུལཾ པཀཱསིཏཾ ཧོཏི, ཏིཏིཀྑཔྤདྷཱནཏཱཡ, ཨཔརཱུཔགྷཱཏསབྷཱཝཏཱཡ ཙ སཱིལསྶ. སམཱདྷིནཱ ཨལོབྷོ ¶ ཀུསལམཱུལཾ, ལོབྷཔཊིཔཀྑཏོ, ཨལོབྷཔདྷཱནཏཱཡ ཙ སམཱདྷིསྶ. པཉྙཱཡ པན ཨམོཧོཡེཝ. སཱིལེན ཙ ཨནིམིཏྟཝིམོཀྑམུཁཾ པཀཱསིཏཾ ཧོཏི. ཨདོསཔྤདྷཱནཾ ཧི སཱིལསམྤདཾ ནིསྶཱཡ དོསེ ཨཱདཱིནཝདསྶིནོ ཨནིཙྩཱནུཔསྶནཱ སུཁེནེཝ ཨིཛ྄ཛྷཏི, ཨནིཙྩཱནུཔསྶནཱ ཙ ཨནིམིཏྟཝིམོཀྑམུཁཾ. སམཱདྷིནཱ ཨཔྤཎིཧིཏཝིམོཀྑམུཁཾ. པཉྙཱཡ སུཉྙཏཝིམོཀྑམུཁཾ. ཨལོབྷཔྤདྷཱནཾ ཧི ཀཱམནིསྶརཎཾ སམཱདྷིསམྤདཾ ནིསྶཱཡ ཀཱམེསུ ཨཱདཱིནཝདསྶིནོ དུཀྑཱནུཔསྶནཱ སུཁེནེཝ ཨིཛ྄ཛྷཏི, དུཀྑཱནུཔསྶནཱ ཙ ཨཔྤཎིཧིཏཝིམོཀྑམུཁཾ. པཉྙཱསམྤདཾ ནིསྶཱཡ ཨནཏྟཱནུཔསྶནཱ སུཁེནེཝ ཨིཛ྄ཛྷཏི, ཨནཏྟཱནུཔསྶནཱ ཙ སུཉྙཏཝིམོཀྑམུཁཾ. ཏཐཱ སཱིལེན ཨནཉྙཱཏཉྙསྶཱམཱིཏིནྡྲིཡཾ པཀཱསིཏཾ ཧོཏི. ཏཾ ཧི སཱིལེསུ པརིཔཱུརཀཱརིནོ ཨཊྛམཀསྶ ཨིནྡྲིཡཾ. སམཱདྷིནཱ ཨཉྙིནྡྲིཡཾ. ཏཾ ཧི ཨུཀྐཾསགཏཾ སམཱདྷིསྨིཾ པརིཔཱུརཀཱརིནོ ཨནཱགཱམིནོ, ཨགྒམགྒཊྛསྶ ཙ ཨིནྡྲིཡཾ. པཉྙཱཡ ཨཉྙཱཏཱཝིནྡྲིཡཾ པཀཱསིཏཾ ཧོཏི. ཏདུཔྤཏྟིཡཱ ཧི ཨརཧཱ པཉྙཱཡ པརིཔཱུརཀཱརཱིཏི. ཨིམིནཱ ནཡེན ཨཉྙེ ཙ ཨེཝརཱུཔཱ གུཎཏྟིཀཱ སཱིལཱདཱིཧི པཀཱསེཏབྦཱ.

༡. སཱིལནིདྡེསཝཎྞནཱ

སཱིལསརཱུཔཱདིཀཐཱཝཎྞནཱ

༦. ཨེཝནྟི ¶ ཝུཏྟཔྤཀཱརེན. ཨནེཀགུཎསངྒཱཧཀེནཱཏི ཨདྷིསཱིལསིཀྑཱདཱིནཾ, ཨཉྙེསཉྩ ཨནེཀེསཾ གུཎཱནཾ སངྒཱཧཀེན. སཱིལསམཱདྷིཔཉྙཱམུཁེནཱཏི ‘‘སབྦེ སངྑཱརཱ ཨནིཙྩཱ’’ཏིཨཱདཱིསུ (དྷ. པ. ༢༧༧; ཐེརགཱ. ༦༧༦; ནེཏྟི. ༥) ཝིཡ ཝིཔསྶནཱམཏྟཱདིམུཁེན སངྑེཔཏོ ཨདེསེཏྭཱ སཱིལསམཱདྷིཔཉྙཱམུཁེན དེསིཏོཔི, སཏྟཏིཾསཱཡཔི ཝཱ བོདྷིཔཀྑིཡདྷམྨཱནཾ ཝིསུདྡྷིམགྒནྟོགདྷཏྟཱ ཏཏྠ སཱིལསམཱདྷིཔཉྙཱ མུཁཾ པམུཁཾ ཀཏྭཱ དེསིཏོཔི. ཨེཏེན སཱིལསམཱདྷིཔཉྙཱསུ ཨཝསེསབོདྷིཔཀྑིཡདྷམྨཱནཾ སབྷཱཝཏོ, ཨུཔཀཱརཏོ ཙ ཨནྟོགདྷབྷཱཝོ དཱིཔིཏོཏི ཝེདིཏབྦཾ. ཨཏིསངྑེཔདེསིཏོཡེཝ ཧོཏི སབྷཱཝཝིབྷཱགཱདིཏོ ཨཝིབྷཱཝིཏཏྟཱ. ནཱལནྟི ན པརིཡཏྟཾ ན སམཏྠཾ. སབྦེསནྟི ནཱཏིསངྑེཔནཱཏིཝིཏྠཱརརུཙཱིནམྤི, ཝིཔཉྩིཏཉྙུནེཡྻཱནམྤི ཝཱ. སངྑེཔདེསནཱ ཧི སཾཁིཏྟརུཙཱིནཾ, ཨུགྒྷཊིཏཉྙཱུནཾཡེཝ ཙ ཨུཔཀཱརཱཡ ཧོཏི, ན པནིཏརེསཾ. ཨསྶ ཝིསུདྡྷིམགྒསྶ. པུཙྪནཊྛེན པཉྷཱ, ཀིརིཡཱ ཀརཎཾ ཀམྨཾ, པཉྷཱཝ ཀམྨཾ པཉྷཱཀམྨཾ, པུཙྪནཔཡོགོ.

ཀིཾ སཱིལནྟི སརཱུཔཔུཙྪཱ. ཀེནཊྛེན སཱིལནྟི ཀེན ཨཏྠེན སཱིལནྟི ཝུཙྩཏི, ‘‘སཱིལ’’ནྟི པདཾ ཀཾ ཨབྷིདྷེཡྻཾ ནིསྶཱཡ པཝཏྟནྟི ཨཏྠོ. ཏཡིདཾ སཱིལཾ སབྷཱཝཏོ, ཀིཙྩཏོ, ཨུཔཊྛཱནཱཀཱརཏོ, ཨཱསནྣཀཱརཎཏོ ཙ ཀཐཾ ཛཱནིཏབྦནྟི ཨཱཧ ‘‘ཀཱནསྶ ལཀྑཎརསཔཙྩུཔཊྛཱནཔདཊྛཱནཱནཱི’’ཏི. པཊིཔཏྟི ནཱམ དིཊྛཱནིསཾསེ ཨེཝ ཧོཏཱིཏི ཨཱཧ ‘‘ཀིམཱནིསཾས’’ནྟི. ཀཏིཝིདྷནྟི པབྷེདཔུཙྪཱ. ཝིབྷཱགཝནྟཱནཾ ཧི སབྷཱཝཝིབྷཱཝནཾ ཝིབྷཱགདསྶནམུཁེནེཝ ཧོཏཱིཏི. ཝོདཱནཾ ཝིསུདྡྷི. སཱ ཙ སཾཀིལེསམལཝིམུཏྟི. ཏཾ ཨིཙྪནྟེན ཡསྨཱ ཨུཔཱཡཀོསལླཏྠིནཱ ཨནུཔཱཡཀོསལླཾ ཝིཡ སཾཀིལེསོ ཛཱནིཏབྦོཏི ཨཱཧ ‘‘ཀོ ཙསྶ སཾཀིལེསོ’’ཏི.

ཏཏྲཱཏི ¶ ཏསྨིཾ, ཏསྶ ཝཱ པཉྷཱཀམྨསྶ. ཝིསྶཛྫནནྟི ཝིཝརཎཾ. པུཙྪིཏོ ཧི ཨཏྠོ ཨཝིབྷཱཝིཏཏྟཱ ནིགཱུལ༹ྷོ མུཊྛིཡཾ ཀཏོ ཝིཡ ཏིཊྛཏི. ཏསྶ ཝིཝརཎཾ ཝིསྶཛྫནཾ ཝིབྷཱུཏབྷཱཝཀཱརཎཏོ. པཱཎཱཏིཔཱཏཱདཱིཧཱིཏི ཨེཏྠ ¶ པཱཎོཏི ཝོཧཱརཏོ སཏྟོ, པརམཏྠཏོ ཛཱིཝིཏིནྡྲིཡཾ. ཏསྶ སརསེནེཝ པཏནསབྷཱཝསྶ ཨནྟརེ ཨེཝ ཨཏིཝ པཱཏནཾ ཨཏིཔཱཏོ, སཎིཀཾ པཏིཏུཾ ཨདཏྭཱ སཱིགྷཾ པཱཏནནྟི ཨཏྠོ, ཨཏིཀྐམྨ ཝཱ སཏྠཱདཱིཧི ཨབྷིབྷཝིཏྭཱ པཱཏནཾ ཨཏིཔཱཏོ, པཱཎགྷཱཏོ. ཨཱདིསདྡེན ཨདིནྣཱདཱནཱདིཾ སངྒཎྷཱཏི. ཏེཧི པཱཎཱཏིཔཱཏཱདཱིཧི དུསྶཱིལྱཀམྨེཧི. ཝིརམནྟསྶཱཏི སམཱདཱནཝིརཏིཝསེན, སམྤཏྟཝིརཏིཝསེན ཙ ཨོརམནྟསྶ. ཝཏྟཔཊིཔཏྟིནྟི ཨུཔཛ྄ཛྷཱཡཝཏྟཱདིཝཏྟཀརཎཾ. ཙེཏནཱདཡོ དྷམྨཱཏི སངྑེཔཏོ ཝུཏྟམཏྠཾ པཱལི༹ཝསེན ཝིབྷཛིཏྭཱ དསྶེཏུཾ ‘‘ཝུཏྟཉྷེཏ’’ནྟིཨཱདི ཝུཏྟཾ. ཏཏྠ ཙེཏཡཏཱིཏི ཙེཏནཱ, ཨཏྟནཱ སམྤཡུཏྟདྷམྨེཧི སདྡྷིཾ ཨཱརམྨཎེ ཨབྷིསནྡཧཏཱིཏི ཨཏྠོ. ཙེཏནཱཡ ཨནུཀཱུལཝསེནེཝ ཧི ཏཾསམྤཡུཏྟཱ དྷམྨཱ ཨཱརམྨཎེ པཝཏྟནྟི. ཙེཏནཱ ཀཱམཾ ཀུསལཏྟིཀསཱདྷཱརཎཱ, ཨིདྷ པན སཱིལཙེཏནཱ ཨདྷིཔྤེཏཱཏི ཀཏྭཱ ‘‘ཀུསལཱ’’ཏི ཝེདིཏབྦཱ. ཙེཏསི ནིཡུཏྟཾ ཙེཏསིཀཾ, ཙིཏྟསམྤཡུཏྟནྟི ཨཏྠོ. ཙེཏནཱཡ སཏིཔི ཙེཏསིཀཏྟེ ‘‘ཙེཏནཱ སཱིལ’’ནྟི ཝིསུཾ གཧིཏཏྟཱ ཏདཉྙམེཝ ཝིརཏིཨནབྷིཛ྄ཛྷཱདིཀཾ ཙེཏསིཀཾ སཱིལཾ དཊྛབྦཾ གོབལཱིབདྡཉཱཡེན. སཾཝརཎཾ སཾཝརོ. ཡཐཱ ཨཀུསལཱ དྷམྨཱ ཙིཏྟེ ན ཨོཏརནྟི, ཏཐཱ པིདཧནཾ. ཨཝཱིཏིཀྐམོ ཝཱིཏིཀྐམསྶ པཊིཔཀྑབྷཱུཏཱ ཨཝཱིཏིཀྐམཝསེན པཝཏྟཙིཏྟཙེཏསིཀཱ. ཏཏྠ ཙེཏནཱ སཱིལཾ ནཱམཱཏིཨཱདི ཡཐཱཝུཏྟསྶ སུཏྟཔདསྶ ཝིཝརཎཾ. ཝིརམནྟསྶ ཙེཏནཱཏི ཝིརཏིསམྤཡུཏྟཾ པདྷཱནབྷཱུཏཾ ཙེཏནམཱཧ. པཱུརེནྟསྶ ཙེཏནཱཏི ཝཏྟཔཊིཔཏྟིཨཱཡཱུཧིནཱི. ཝིརམནྟསྶ ཝིརཏཱིཏི ཝིརཏིཡཱ པདྷཱནབྷཱཝཾ གཧེཏྭཱ ཝུཏྟཾ.

ཨེཏྠ ཧི ཡདཱ ‘‘ཏིཝིདྷཱ, བྷིཀྑཝེ, ཀཱཡསཉྩེཏནཱ ཀུསལཾ ཀཱཡཀམྨ’’ནྟིཨཱདི (ཀཐཱ. ༥༣༩) ཝཙནཏོ པཱཎཱཏིཔཱཏཱདཱིནཾ པཊིཔཀྑབྷཱུཏཱ ཏབྦིརཏིཝིསིཊྛཱ ཙེཏནཱ ཏཐཱཔཝཏྟཱ པདྷཱནབྷཱཝེན པཱཎཱཏིཔཱཏཱདིཔཊིཝིརཏིསཱདྷིཀཱ ཧོཏི, ཏདཱ ཏཾསམྤཡུཏྟཱ ཝིརཏིཨནབྷིཛ྄ཛྷཱདཡོ ཙ ཙེཏནཱཔཀྑིཀཱ ཝཱ, ཨབྦོཧཱརིཀཱ ཝཱཏི ཨིམམཏྠཾ སནྡྷཱཡ ཙེཏནཱསཱིལཾ ཝུཏྟཾ. ཡདཱ པན པཱཎཱཏིཔཱཏཱདཱིཧི སངྐོཙཾ ཨཱཔཛྫནྟསྶ ཏཏོ ཝིརམཎཱཀཱརེན པཝཏྟམཱནཱ ཙེཏནཱཝིསིཊྛཱ ཝིརཏི, ཨནབྷིཛ྄ཛྷཱདཡོ ཙ ཏཏྠ ཏཏྠ པདྷཱནབྷཱཝེན ཀིཙྩསཱདྷིཀཱ ཧོནྟི, ཏདཱ ཏཾསམྤཡུཏྟཱ ཙེཏནཱ ཝིརཏིཨཱདིཔཀྑིཀཱ ¶ ཝཱ ཧོཏི, ཨབྦོཧཱརིཀཱ ཝཱཏི ཨིམམཏྠཾ སནྡྷཱཡ ཙེཏསིཀསཱིལཾ ཝུཏྟཾ.

ཨིདཱནི ¶ སུཏྟེ ཨཱགཏནཡེན ཀུསལཀམྨཔཐཝསེན ཙེཏནཱཙེཏསིཀསཱིལཱནི ཝིབྷཛིཏྭཱ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. པཛཧནྟསྶཱཏི སམཱདཱནཝསེན ‘‘ཨིཏོ པཊྛཱཡ ན ཀརིསྶཱམཱི’’ཏི སམྤཏྟཝཏྠུཀཱནིཔི ཨནཛ྄ཛྷཱཙརཎེན པཛཧནྟསྶ. སཏྟ ཀམྨཔཐཙེཏནཱཏི པཱཎཱཏིཔཱཏཱདིཔཧཱནསཱདྷིཀཱ པཊིཔཱཊིཡཱ སཏྟ ཀུསལཀམྨཔཐཙེཏནཱ. ཨབྷིཛ྄ཛྷཱདིཝསེན ཡཾ པརདཱརགམནཱདི ཀརཱིཡཏི, ཏསྶ པཧཱཡཀཱ ཨནབྷིཛ྄ཛྷཱདཡོ སཱིལནྟི ཨཱཧ ‘‘ཙེཏསིཀཾ སཱིལཾ ནཱམ ཨནབྷིཛ྄ཛྷཱ…པེ… སམྨཱདིཊྛིདྷམྨཱ’’ཏི. ཡཐཱ ཧི ཨབྷིཛ྄ཛྷཱབྱཱཔཱདཝསེན མིཙྪཱཙཱརཔཱཎཱཏིཔཱཏཱདཡོ ཀརཱིཡནྟི, ཨེཝཾ མིཙྪཱདིཊྛིཝསེནཱཔི ཏེ པུཏྟམུཁདསྶནཱདིཨཏྠཾ ཀརཱིཡནྟི. ཏེསཉྩ པཛཧནཀཱ ཨནབྷིཛ྄ཛྷཱདཡོཏི. པཱཏིམོཀྑསཾཝརོ ཙཱརིཏྟཝཱརིཏྟཝིབྷཱགཾ ཝིནཡཔརིཡཱཔནྣཾ སིཀྑཱཔདསཱིལཾ. སཏིསཾཝརོ མནཙྪཊྛཱནཾ ཨིནྡྲིཡཱནཾ ཨཱརཀྑཱ, སཱ ཙ ཏཐཱཔཝཏྟཱ སཏིཡེཝ. ཉཱཎསཾཝརོ པཉྙཱ. ཁནྟིསཾཝརོ ཨདྷིཝཱསནཱ, སཱ ཙ ཏཐཱཔཝཏྟཱ ཨདོསཔདྷཱནཱ ཁནྡྷཱ, ཨདོསོ ཨེཝ ཝཱ. ཝཱིརིཡསཾཝརོ ཀཱམཝིཏཀྐཱདཱིནཾ ཝིནོདནཝསེན པཝཏྟཾ ཝཱིརིཡཾ. པཱཏིམོཀྑསཾཝརསཏིསཾཝརཱདཱིསུ ཡཾ ཝཏྟབྦཾ, ཏཾ པརཏོ ཨཱཝི བྷཝིསྶཏི.

སོཏཱནཱིཏི ཏཎྷཱདིཊྛིཨཝིཛྫཱདུཙྩརིཏཨཝསིཊྛཀིལེསསོཏཱནི. ‘‘སོཏཱནཾ སཾཝརཾ བྲཱུམཱི’’ཏི ཝཏྭཱ ‘‘པཉྙཱཡེཏེ པིདྷིཡྻརེ’’ཏི ཝཙནེན སོཏཱནཾ སཾཝརོ པིདཧནཾ སམུཙྪེདནཾ ཉཱཎནྟི ཝིཉྙཱཡཏི.

ཨིདམཏྠིཀཏཾ མནསི ཀཏྭཱ ཡེན ཉཱཎེན ཡོནིསོ པཙྩཝེཀྑིཏྭཱ པཙྩཡཱ པཊིསེཝཱིཡནྟི. ཏཾ པཙྩཡཔཊིསེཝནམྤི ཉཱཎསབྷཱཝཏྟཱ ཨེཏྠེཝ ཉཱཎསཾཝརེ ཨེཝ སམོདྷཱནཾ སངྒཧཾ གཙྪཏི. ཁམཏི ཨདྷིཝཱསེཏཱིཏི ཁམོ. ཨུཔྤནྣནྟི ཏསྨིཾ ཏསྨིཾ ཨཱརམྨཎེ ཛཱཏཾ ནིབྦཏྟཾ. ཀཱམཝིཏཀྐནྟི ཀཱམཱུཔསཾཧིཏཾ ཝིཏཀྐཾ. ནཱདྷིཝཱསེཏཱིཏི ཙིཏྟཾ ཨཱརོཔེཏྭཱ ཨབྦྷནྟརེ ན ཝཱསེཏི. ཨཱཛཱིཝཔཱརིསུདྡྷིཔཱིཏི བུདྡྷཔཊིཀུཊྛཾ མིཙྪཱཛཱིཝཾ པཧཱཡ ཨནཝཛྫེན པཙྩཡཔརིཡེསནེན སིཛ྄ཛྷནཀཾ ཨཱཛཱིཝཔཱརིསུདྡྷིསཱིལམྤི ཨེཏྠེཝ ཝཱིརིཡསཾཝརེ ཨེཝ སམོདྷཱནཾ གཙྪཏི ཝཱིརིཡསཱདྷནཏྟཱ. ཨེཏྠ ཙ ཡཐཱ ཉཱཎཾ ཏཎྷཱདིསོཏཱནཾ པཝཏྟིནིཝཱརཎཏོ པིདཧནཊྛེན སཾཝརཎཏོ སཾཝརོ ཙ, པརཏོ པཝཏྟནཀགུཎཱནཾ ཨཱདྷཱརཱདིབྷཱཝཏོ སཱིལནཊྛེན སཱིལཾ ¶ , ཨེཝཾ ཁནྟི ཨནདྷིཝཱསནེན ཨུཔྤཛྫནཀཀིལེསཱནཾ ཨདྷིཝཱསནེན སཾཝརཎཏོ སཾཝརོ ཙ, ཁམནཧེཏུ ཨུཔྤཛྫནཀགུཎཱནཾ ཨཱདྷཱརཱདིབྷཱཝཏོ སཱིལནཊྛེན སཱིལཾ, ཝཱིརིཡཾ ཝིནོདེཏབྦཱནཾ པཱཔདྷམྨཱནཾ ཝིནོདནེན སཾཝརཎཏོ སཾཝརོ ཙ, ཝིནོདནཧེཏུ ཨུཔྤཛྫནཀགུཎཱནཾ ཨཱདྷཱརཱདིབྷཱཝཏོ སཱིལནཊྛེན སཱིལནྟི ¶ ཝེདིཏབྦཾ. ཡཐཱ པན པཱཏིམོཀྑསཱིལཱདི ཏསྶ ཏསྶ པཱཔདྷམྨསྶ པཝཏྟིཏུཾ ཨཔྤདཱནཝསེན སཾཝརཎཾ པིདཧནཾ, ཏཾ ཨུཔཱདཱཡ སཾཝརོ, ཨེཝཾ ཨསམཱདིནྣསཱིལསྶ ཨཱགཏཝཏྠུཏོ ཝིརམཎམྤཱིཏི ཨཱཧ ‘‘ཡཱ ཙ པཱཔབྷཱིརུཀཱནཾ…པེ… སཾཝརསཱིལནྟི ཝེདིཏབྦ’’ནྟི. ན ཝཱིཏིཀྐམཏི ཨེཏེནཱཏི ཨཝཱིཏིཀྐམོ. ཏཐཱཔཝཏྟོ ཀུསལཙིཏྟུཔྤཱདོ.

༧. ཨཝསེསེསུ པན པཉྷེསུ. སམཱདྷཱནཾ སཎྛཔནཾ. དུསྶཱིལྱཝསེན ཧི པཝཏྟཱ ཀཱཡཀམྨཱདཡོ སམྤཏི, ཨཱཡཏིཉྩ ཨཧིཏདུཀྑཱཝཧཱ, ན སམྨཱ ཋཔིཏཱཏི ཨསཎྛཔིཏཱ ཝིཔྤཀིཎྞཱ ཝིསཊཱ ཙ ནཱམ ཧོནྟི, སུསཱིལྱཝསེན པན པཝཏྟཱ ཏབྦིཔརིཡཱཡཏོ སཎྛཔིཏཱ ཨཝིཔྤཀིཎྞཱ ཨཝིསཊཱ ཙ ནཱམ ཧོནྟི ཡཐཱ ཏཾ ཨོཀྑིཏྟཙཀྑུཏཱ ཨབཱཧུཔྤཙཱལནཱདི. ཏེནཱཧ ‘‘ཀཱཡཀམྨཱདཱིནཾ སུསཱིལྱཝསེན ཨཝིཔྤཀིཎྞཏཱཏི ཨཏྠོ’’ཏི. ཨེཏེན སམཱདྷིཀིཙྩཏོ སཱིལནཾ ཝིསེསེཏི. ཏསྶ ཧི སམཱདྷཱནཾ སམྤཡུཏྟདྷམྨཱནཾ ཨཝིཀྑེཔཧེཏུཏཱ. ཨིདཾ ཀཱཡཀམྨཱདཱིནཾ སཎྛཔནཾ སཾཡམནཾ. ཨུཔདྷཱརཎཾ ཨདྷིཊྛཱནཾ མཱུལབྷཱཝོ. ཏཐཱ ཧིསྶ ཨཱདིཙརཎཱདིབྷཱཝོ ཝུཏྟོ. ཏེན པཐཝཱིདྷཱཏུཀིཙྩཏོ སཱིལནཾ ཝིསེསིཏཾ ཧོཏི. སཱ ཧི སཧཛཱཏརཱུཔདྷམྨཱནཾ སནྡྷཱརཎཝསེན པཝཏྟཏི. ཨིདཾ པན ཨནཝཛྫདྷམྨཱནཾ མཱུལཱདྷིཊྛཱནབྷཱཝེན. ཏེནཱཧ ‘‘ཀུསལཱནཾ དྷམྨཱན’’ནྟིཨཱདི. ཏཏྠ ཀུསལདྷམྨཱ ནཱམ སཔུབྦབྷཱགཱ མཧགྒཏཱནུཏྟརཱ དྷམྨཱ. ཨཉྙེ པན ཨཱཙརིཡཱ. སིརཊྛོཏི ཡཐཱ སིརསི ཚིནྣེ སབྦོ ཨཏྟབྷཱཝོ ཝིནསྶཏི, ཨེཝཾ སཱིལེ བྷིནྣེ སབྦཾ གུཎསརཱིརཾ ཝིནསྶཏི. ཏསྨཱ ཏསྶ ཨུཏྟམངྒཊྛོ སཱིལཊྛོ. ‘‘སིརོ སཱིས’’ནྟི ཝཱ ཝཏྟབྦེ ནིརུཏྟིནཡེན ‘‘སཱིལ’’ནྟི ཝུཏྟནྟི ཨདྷིཔྤཱཡོ. སཱིཏལཊྛོ པརིལཱ༹ཧཝཱུཔསམནཊྛོ. ཏེན ཏ-ཀཱརསྶ ལོཔཾ ཀཏྭཱ ནིརུཏྟིནཡེནེཝ ‘‘སཱིལ’’ནྟི ཝུཏྟནྟི དསྶེཏི. ཏཐཱ ཧིདཾ པཡོགསམྤཱདིཏཾ སབྦཀིལེསཔརིལཱ༹ཧཝཱུཔསམཀརཾ ཧོཏི. ཨེཝམཱདིནཱཏི ¶ ཨཱདི-སདྡེན སཡནྟི ཨཀུསལཱ ཨེཏསྨིཾ སཏི ཨཔཝིཊྛཱ ཧོནྟཱིཏི སཱིལཾ, སུཔནྟི ཝཱ ཏེན ཝིཧཏུསྶཱཧཱནི སབྦདུཙྩརིཏཱནཱིཏི སཱིལཾ, སབྦེསཾ ཝཱ ཀུསལདྷམྨཱནཾ པཝེསཱརཧསཱལཱཏི སཱིལནྟི ཨེཝམཱདཱིནཾ སངྒཧོ དཊྛབྦོ.

༨. ‘‘སཱིལནཊྛེན སཱིལ’’ནྟི པུབྦེ སདྡཏྠུདྡྷཱརེན པཀཱསིཏོཔི བྷཱཝཏྠོ ཨེཝཱཏི ཨཱཧ ‘‘སཱིལནཾ ལཀྑཎཾ ཏསྶཱ’’ཏི. ན ཧི ཏསྶ ཙེཏནཱདིབྷེདབྷིནྣསྶ ཨནཝསེསཏོ སངྒཱཧཀོ ཏཏོ ཨཉྙོ ཨཏྠོ ཨཏྠི, ཡོ ལཀྑཎབྷཱཝེན ཝུཙྩེཡྻ. ནནུ ཙ ཨནེཀབྷེདསངྒཱཧཀཾ སཱམཉྙལཀྑཎཾ ནཱམ སིཡཱ, ན ཝིསེསལཀྑཎནྟི ཨནུཡོགཾ མནསི ཀཏྭཱ ཨཱཧ ‘‘སནིདསྶནཏྟཾ རཱུཔསྶ, ཡཐཱ བྷིནྣསྶནེཀདྷཱ’’ཏི.

ཡཐཱ ¶ ཧི ནཱིལཱདིཝསེན ཨནེཀབྷེདབྷིནྣསྶཱཔི རཱུཔཱཡཏནསྶ སནིདསྶནཏྟཾ ཝིསེསལཀྑཎཾ ཏདཉྙདྷམྨཱསཱདྷཱརཎཏོ. ན ཨནིཙྩཏཱདི ཝིཡ, རུཔྤནཾ ཝིཡ ཝཱ སཱམཉྙལཀྑཎཾ, ཨེཝམིདྷཱཔི དཊྛབྦཾ. ཀིཾ པནེཏཾ སནིདསྶནཏྟཾ ནཱམ? དཊྛབྦཏཱ ཙཀྑུཝིཉྙཱཎསྶ གོཙརབྷཱཝོ. ཏསྶ པན རཱུཔཱཡཏནཏོ ཨནཉྙཏྟེཔི ཨཉྙེཧི དྷམྨེཧི རཱུཔཱཡཏནཾ ཝིསེསེཏུཾ ཨཉྙཾ ཝིཡ ཀཏྭཱ སཧ ནིདསྶནེན སནིདསྶནནྟི ཝུཙྩཏི. དྷམྨསབྷཱཝསཱམཉྙེན ཧི ཨེཀཱིབྷཱུཏེསུ དྷམྨེསུ ཡོ ནཱནཏྟཀརོ སབྷཱཝོ, སོ ཨཉྙཾ ཝིཡ ཀཏྭཱ ཨུཔཙརིཏུཾ ཡུཏྟོ. ཨེཝཾ ཧི ཨཏྠཝིསེསཱཝབོདྷོ ཧོཏཱིཏི. ཨཐ ཝཱ ‘‘སཧ ནིདསྶནེནཱ’’ཏི ཨེཏྠ ཏབྦྷཱཝཏྠོ སཧ-སདྡོ ཡཐཱ ནནྡིརཱགསཧགཏཱཏི (སཾ. ནི. ༥.༡༠༨༡; མཧཱཝ. ༡༤; པཊི. མ. ༢.༣༠).

དུསྶཱིལྱཝིདྡྷཾསནརསནྟི ཀཱཡིཀཨསཾཝརཱདིབྷེདསྶ དུསྶཱིལྱསྶ ཝིདྷམནཀིཙྩཾ. ཨནཝཛྫརསནྟི ཨགཱརཡ྄ཧསམྤཏྟིཀཾ ཨགརཧིཏབྦབྷཱཝེན སམྤཛྫནཀཾ, ཨཝཛྫཔཊིཔཀྑབྷཱཝེན ཝཱ སམྤཛྫནཀཾ. ལཀྑཎཱདཱིསཱུཏི ལཀྑཎརསཱདཱིསུ ཝུཙྩམཱནེསུ ཀིཙྩམེཝ, སམྤཏྟི ཝཱ རསོཏི ཝུཙྩཏི, ན རསཱཡཏནརསཱདཱིཏི ཨདྷིཔྤཱཡོ. ཀེཙི པན ‘‘ཀིཙྩམེཝཱ’’ཏི ཨཝདྷཱརཎཾ ཏསྶ ཨིཏརརསཏོ བལཝབྷཱཝདསྶནཏྠནྟི ཝདནྟི, ཏཾ ཏེསཾ མཏིམཏྟཾ, ཀིཙྩམེཝ, སམྤཏྟི ཨེཝ ཝཱ རསོཏི ཨིམསྶ ཨཏྠསྶ ཨདྷིཔྤེཏཏྟཱ.

སོཙེཡྻཔཙྩུཔཊྛཱནནྟི ¶ ཀཱཡཱདཱིཧི སུཙིབྷཱཝེན པཙྩུཔཊྛཱཏི. གཧཎབྷཱཝནྟི གཧེཏབྦབྷཱཝཾ. ཏེན ཨུཔཊྛཱནཱཀཱརཊྛེན པཙྩུཔཊྛཱནཾ ཝུཏྟཾ, ཕལཊྛེན པན ཨཝིཔྤཊིསཱརཔཙྩུཔཊྛཱནཾ, སམཱདྷིཔཙྩུཔཊྛཱནཾ ཝཱ. སཱིལཾ ཧི སམྤཏིཡེཝ ཨཝིཔྤཊིསཱརཾ པཙྩུཔཊྛཱཔེཏི, པརམྤརཱཡ སམཱདྷིཾ. ཨིམསྶ པན ཨཱནིསཾསཕལསྶ ཨཱནིསཾསཀཐཱཡཾ ཝཀྑམཱནཏྟཱ ཨིདྷ ཨགྒཧཎཾ དཊྛབྦཾ. ཀེཙི པན ཕལསྶ ཨནིཙྪིཏཏྟཱ ཨིདྷ ཨགྒཧཎནྟི ཝདནྟི, ཏདཡུཏྟཾ ཕལསྶ ཨནེཀཝིདྷཏྟཱ, ལོཀིཡཱདིསཱིལསྶཱཔི ཝིབྷཛིཡམཱནཏྟཱ. ཏཐཱ ཧི ཝཀྑཏི ‘‘ནིསྶིཏཱནིསྶིཏཝསེནཱ’’ཏིཨཱདི (ཝིསུདྡྷི. ༡.༡༠). ཡཐཱ པཐཝཱིདྷཱཏུཡཱ ཀམྨཱདི དཱུརཀཱརཎཾ, སེསབྷཱུཏཏྟཡཾ ཨཱསནྣཀཱརཎཾ, ཡཐཱ ཙ ཝཏྠསྶ ཏནྟཝཱཡཏུརིཝེམསལཱཀཱདི དཱུརཀཱརཎཾ, ཏནྟཝོ ཨཱསནྣཀཱརཎཾ, ཨེཝཾ སཱིལསྶ སདྡྷམྨསྶཝནཱདི དཱུརཀཱརཎཾ, ཧིརིཨོཏྟཔྤམསྶ ཨཱསནྣཀཱརཎནྟི དསྶེནྟོ ཨཱཧ ‘‘ཧིརོཏྟཔྤཉྩ པནཱ’’ཏིཨཱདི. ཧིརོཏྟཔྤེ ཧཱིཏིཨཱདི ཏསྶ ཨཱསནྣཀཱརཎབྷཱཝསཱདྷནཾ. ཏཏྠ ཨུཔྤཛྫཏི སམཱདཱནཝསེན, ཏིཊྛཏི ཨཝཱིཏིཀྐམཝསེནཱཏི ཝེདིཏབྦཾ.

སཱིལཱནིསཾསཀཐཱཝཎྞནཱ

༩. ཨཝིཔྤཊིསཱརཱདཱིཏི ¶ ཨེཏྠ ཝིཔྤཊིསཱརཔཊིཔཀྑོ ཀུསལཙིཏྟུཔྤཱདོ ཨཝིཔྤཊིསཱརོ. སོ པན ཝིསེསཏོ ‘‘ལཱབྷཱ ཝཏ མེ, སུལདྡྷཾ ཝཏ མེ, ཡསྶ མེ སུཔརིསུདྡྷཾ སཱིལ’’ནྟི ཨཏྟནོ སཱིལསྶ པཙྩཝེཀྑཎཝསེན པཝཏྟོཏི ཝེདིཏབྦོ. ཨཱདི-སདྡེན པཱམོཛྫབྷོགསམྤཏྟིཀིཏྟིསདྡཱདིཾ སངྒཎྷཱཏི. ཨཝིཔྤཊིསཱརཏྠཱནཱིཏི ཨཝིཔྤཊིསཱརཔྤཡོཛནཱནི. ཀུསལཱནཱིཏི ཨནཝཛྫཱནི. ཨཝིཔྤཊིསཱརཱནིསཾསཱནཱིཏི ཨཝིཔྤཊིསཱརུདྡཡཱནི. ཨེཏེན ཨཝིཔྤཊིསཱརོ ནཱམ སཱིལསྶ ཨུདྡཡམཏྟཾ, སཾཝཌྜྷིཏསྶ རུཀྑསྶ ཚཱཡཱཔུཔྥསདིསཾ. ཨཉྙོ ཨེཝ པནཱནེན ནིཔྥཱདེཏབྦོ སམཱདྷིཨཱདིགུཎོཏི དསྶེཏི.

སཱིལཝཏོ སཱིལསམྤདཱཡཱཏི པརིསུདྡྷཾ པརིཔུཎྞཾ ཀཏྭཱ སཱིལསྶ སམྤཱདནེན སཱིལཝཏོ, ཏཱཡ ཨེཝ སཱིལསམྤདཱཡ. ཨཔྤམཱདཱདྷིཀརཎནྟི ཨཔྤམཱདཀཱརཎཱ. བྷོགཀྑནྡྷནྟི བྷོགརཱསིཾ. ཀལྱཱཎོ ཀིཏྟིསདྡོ ཨབྦྷུགྒཙྪཏཱིཏི ‘‘ཨིཏིཔི སཱིལཝཱ, ཨིཏིཔི ཀལྱཱཎདྷམྨོ’’ཏི སུནྡརོ ཐུཏིགྷོསོ ཨུཊྛཧཏི, ལོཀཾ པཏྠརཏི. ཝིསཱརདོཏི ཨཏྟནི ཀིཉྩི གརཧིཏབྦཾ ¶ ཨུཔཝདིཏབྦཾ ཨཔསྶནྟོ ཝིགཏསཱརཛྫོ ནིབྦྷཡོ. ཨམངྐུབྷཱུཏོཏི ཨཝིལཀྑོ. ཨསམྨཱུལ༹ྷོཏི ‘‘ཨཀཏཾ ཝཏ མེ ཀལྱཱཎ’’ནྟིཨཱདིནཱ (མ. ནི. ༣.༢༤༨) ཝིཔྤཊིསཱརཱབྷཱཝཏོ, ཀུསལཀམྨཱདཱིནཾཡེཝ ཙ ཏདཱ ཨུཔཊྛཱནཏོ ཨམཱུལ༹ྷོ པསནྣམཱནསོ ཨེཝ ཀཱལཾཀརོཏི. ཀཱཡསྶ བྷེདཱཏི ཨུཔཱདིནྣཀྑནྡྷཔརིཙྩཱགཱ, ཛཱིཝིཏིནྡྲིཡསྶ ཨུཔཙྪེདཱ. པརཾ མརཎཱཏི ཙུཏིཏོ ཨུདྡྷཾ. སུགཏིནྟི སུནྡརཾ གཏིཾ. ཏེན མནུསྶགཏིཔི སངྒཡ྄ཧཏི. སགྒནྟི དེཝགཏིཾ. སཱ ཧི རཱུཔཱདཱིཧི ཝིསཡེཧི སུཊྛུ ཨགྒོཏི སགྒོ, ལོཀིཡཏི ཨེཏྠ ཨུལཱ༹རཾ པུཉྙཕལནྟི ལོཀོཏི ཙ ཝུཙྩཏི.

ཨཱཀངྑེཡྻ ཙེཏི ཡདི ཨིཙྪེཡྻ. པིཡོ ཙ ཨསྶནྟི པིཡཱཡིཏབྦོ པིཡཙཀྑཱུཧི པསྶིཏབྦོ པེམནིཡོ བྷཝེཡྻནྟི ཨཏྠོ. མནཱཔོཏི སབྲཧྨཙཱརཱིནཾ མནཝཌྜྷནཀོ, ཏེསཾ ཝཱ མནེན པཏྟབྦོ, མེཏྟཙིཏྟེན ཕརིཏབྦོཏི ཝུཏྟཾ ཧོཏི. གརཱུཏི གརུཊྛཱནིཡོ པཱསཱཎཚཏྟསདིསོ. བྷཱཝནཱིཡོཏི ‘‘ཨདྡྷཱ ཨཡམཱཡསྨཱ ཛཱནཾ ཛཱནཱཏི, པསྶཾ པསྶཏཱི’’ཏི སམྦྷཱཝནཱིཡོ. སཱིལེསྭེཝསྶ པརིཔཱུརཀཱརཱིཏི ཙཏུཔཱརིསུདྡྷིསཱིལེསུ ཨེཝ པརིཔཱུརཀཱརཱི ཨསྶ, ཨནཱུནཀཱརཱི པརིཔཱུརཎཱཀཱརེན སམནྣཱགཏོ བྷཝེཡྻ. ‘‘ཨཱདིནཱ ནཡེནཱ’’ཏི ཨེཏེན ‘‘ཨཛ྄ཛྷཏྟཾ ཙེཏོསམཐམནུཡུཏྟོ ¶ ཨནིརཱཀཏཛ྄ཛྷཱནོ ཝིཔསྶནཱཡ སམནྣཱགཏོ བྲཱུཧེཏཱ སུཉྙཱགཱརཱན’’ནྟི (མ. ནི. ༡.༦༥) ཨེཝམཱདིཀེ སཱིལཐོམནསུཏྟཱགཏེ སཏྟརས སཱིལཱནིསཾསེ སངྒཎྷཱཏི.

ཨིདཱནི ན ཀེཝལམིམེ ཨེཝ ཨཝིཔྤཊིསཱརཱདཡོ, ཨཐ ཁོ ཨཉྙེཔི བཧཱུ སཱིལཱནིསཾསཱ ཝིཛྫནྟཱིཏི ཏེ དསྶེཏུཾ ‘‘ཨཔིཙཱ’’ཏིཨཱདི ཨཱརདྡྷཾ. ཏཏྠ སཱསནེཏི ཨིམསྨིཾ སཀལལོཀིཡལོཀུཏྟརགུཎཱཝཧེ སཏྠུསཱསནེ. ཨཱཙཱརཀུལཔུཏྟཱནཾ ཡཾ སཱིལཾ ཝིནཱ པཏིཊྛཱ ཨཝཊྛཱནཾ ནཏྠི, ཏསྶ ཨེཝཾ མཧཱནུབྷཱཝསྶ སཱིལསྶ ཨཱནིསཾསཱནཾ པརིཙྪེདཾ པརིམཱཎཾ ཀོ ཝདེ ཀོ ཝཏྟུཾ སཀྐུཎེཡྻཱཏི ཨཏྠོ. ཨེཏེན སབྦེསཾཡེཝ ལོཀིཡལོཀུཏྟརཱནཾ གུཎཱནཾ སཱིལམེཝ མཱུལབྷཱུཏནྟི དསྶེཏྭཱ ཏཏོ པརམྤི མལཝིསོདྷནེན, པརིལཱ༹ཧཝཱུཔསམནེན, སུཙིགནྡྷཝཱཡནེན, སགྒནིབྦཱནཱདྷིགམཱུཔཱཡབྷཱཝེན, སོབྷཱལངྐཱརསཱདྷནཏཱཡ བྷཡཝིདྷམནེན, ཀིཏྟིཔཱམོཛྫཛནེན ཙ སཱིལསདིསཾ ཨཉྙཾ སཏྟཱནཾ ཧིཏསུཁཱཝཧཾ ནཏྠཱིཏི དསྶེནྟོ ‘‘ན གངྒཱ’’ཏིཨཱདིཀཱ གཱཐཱ ཨབྷཱསི.

ཏཏྠ ¶ སརབྷཱུཏི ཨེཀཱ ནདཱི, ‘‘ཡཾ ལོཀེ སརབྷཱུ’’ཏི ཝདནྟི. ནིནྣགཱ ཝཱཙིརཝཏཱིཏི ‘‘ཨཙིརཝཏཱི’’ཏི ཨེཝཾནཱམིཀཱ ནདཱི, ཝཱཏི སབྦཏྠ ཝཱ-སདྡོ ཨནིཡམཏྠོ. ཏེན ཨཝུཏྟཱ གོདྷཱཝརཱིཙནྡབྷཱགཱདིཀཱ སངྒཎྷཱཏི. པཱཎནཊྛེན པཱཎཱིནཾ སཏྟཱནཾ ཡཾ མལཾ སཱིལཛལཾ ཝིསོདྷཡཏི, ཏཾ མལཾ ཝིསོདྷེཏུཾ ན སཀྐུཎནྟི གངྒཱདཡོ ནདིཡོཏི པཋམགཱཐཱཡ ན-ཀཱརཾ ཨཱནེཏྭཱ སམྦནྡྷིཏབྦཾ. ཧཱརཱཏི མུཏྟཱཧཱརཱ. མཎཡོཏི ཝེལུ༹རིཡཱདིམཎཡོ. ཨརིཡནྟི ཝིསུདྡྷཾ. སཱིལསམུཊྛཱནོ ཀིཏྟིསདྡོ གནྡྷོ མནོཧརབྷཱཝཏོ, དིསཱསུ ཨབྷིབྱཱཔནཏོ ཙ ‘‘སཱིལགནྡྷོ’’ཏི ཝུཏྟོ. སོ ཧི པཊིཝཱཏེཔི པཝཏྟཏི. ཏེནཱཧ བྷགཝཱ ‘‘སཏཉྩ གནྡྷོ པཊིཝཱཏམེཏཱི’’ཏི (དྷ. པ. ༥༤; ཨ. ནི. ༣.༨༠; མི. པ. ༥.༤.༡). དོསཱནཾ བལཾ ནཱམ ཝཏྠུཛ྄ཛྷཱཙཱརོ, ཏཾ ཏེསཾ ཀཱཏུཾ ཨདེནྟཾ སཱིལཾ དོསཱནཾ བལཾ གྷཱཏེཏཱིཏི ཝེདིཏབྦཾ.

སཱིལཔྤབྷེདཀཐཱཝཎྞནཱ

༡༠. ‘‘ཀཏིཝིདྷ’’ནྟི ཨེཏྠ ཝིདྷ-སདྡོ ཀོཊྛཱསཔརིཡཱཡོ ‘‘ཨེཀཝིདྷེན རཱུཔསངྒཧོ’’ཏིཨཱདཱིསུ ཝིཡ, པཀཱརཏྠོ ཝཱ, ཀཏིཔྤཀཱརཾ ཀིཏྟཀཱ སཱིལསྶ པཀཱརབྷེདཱཏི ཨཏྠོ. སཱིལནལཀྑཎེནཱཏི སཱིལནསངྑཱཏེན སབྷཱཝེན.

ཙརནྟི ¶ ཏེན སཱིལེསུ པརིཔཱུརཀཱརིཏཾ ཨུཔགཙྪནྟཱིཏི ཙརིཏྟཾ, ཙརིཏྟམེཝ ཙཱརིཏྟཾ. ཝཱརིཏཏོ ཏེན ཨཏྟཱནཾ ཏཱཡནྟི རཀྑནྟཱིཏི ཝཱརིཏྟཾ. ཨདྷིཀོ སམཱཙཱརོ ཨབྷིསམཱཙཱརོ, ཏཏྠ ནིཡུཏྟཾ, སོ ཝཱ པཡོཛནཾ ཨེཏསྶཱཏི ཨཱབྷིསམཱཙཱརིཀཾ. ཨཱདི བྲཧྨཙརིཡསྶཱཏི ཨཱདིབྲཧྨཙརིཡཾ, ཏདེཝ ཨཱདིབྲཧྨཙརིཡཀཾ. ཝིརམཏི ཨེཏཱཡ, སཡཾ ཝཱ ཝིརམཏི, ཝིརམཎཾ ཝཱ ཝིརཏི, ན ཝིརཏཱིཏི ཨཝིརཏི. ནིསྶཡཏཱིཏི ནིསྶིཏཾ, ན ནིསྶིཏནྟི ཨནིསྶིཏཾ. པརིཡནྟོ ཨེཏསྶ ཨཏྠཱིཏི པརིཡནྟཾ, ཀཱལེན པརིཡནྟཾ ཀཱལཔརིཡནྟཾ, ཡཐཱཔརིཙྪིནྣོ ཝཱ ཀཱལོ པརིཡནྟོ ཨེཏསྶཱཏི ཀཱལཔརིཡནྟཾ. ཡཱཝ པཱཎནཾ ཛཱིཝནཾ ཀོཊི ཨེཏསྶཱཏི ཨཱཔཱཎཀོཊིཀཾ. ཨཏྟནོ པཙྩཡེཧི ལོཀེ ནིཡུཏྟཾ, ཏཏྠ ཝཱ ཝིདིཏནྟི ལོཀིཡཾ. ལོཀཾ ཨུཏྟརཏཱིཏི ལོཀུཏྟརཾ.

པཙྩཡཏོ, ཕལཏོ ཙ མཛ྄ཛྷིམཔཎཱིཏེཧི ནིཧཱིནཾ, ཏེསཾ ཝཱ གུཎེཧི པརིཧཱིནནྟི ཧཱིནཾ. ཨཏྟནོ པཙྩཡེཧི པདྷཱནབྷཱཝཾ ནཱིཏནྟི པཎཱིཏཾ. ཨུབྷིནྣམེཝ ཝེམཛ྄ཛྷེ ¶ བྷཝཾ མཛ྄ཛྷིམཾ. ཨཏྟཱདྷིཔཏིཏོ ཨཱགཏཾ ཨཏྟཱདྷིཔཏེཡྻཾ. སེསཔདདྭཡེཔི ཨེསེཝ ནཡོ. ཏཎྷཱཡ, དིཊྛིཡཱ ཝཱ པརཱམཊྛཾ པདྷཾསིཏནྟི པརཱམཊྛཾ. ཏཔྤཊིཀྑེཔཏོ ཨཔརཱམཊྛཾ. པཊིཔྤསྶདྡྷཀིལེསཾ པཊིཔྤསྶདྡྷཾ. སིཀྑཱསུ ཛཱཏཾ, སེཀྑསྶ ཨིདནྟི ཝཱ སེཀྑཾ. པརིནིཊྛིཏསིཀྑཱཀིཙྩཏཱཡ ཨསེཀྑདྷམྨཔརིཡཱཔནྣཾ ཨསེཀྑཾ. ཏདུབྷཡཔཊིཀྑེཔེན ནེཝསེཀྑནཱསེཀྑཾ. ཧཱནཾ བྷཛཏི, ཧཱནབྷཱགོ ཝཱ ཨེཏསྶ ཨཏྠཱིཏི ཧཱནབྷཱགིཡཾ. སེསེསུཔི ཨེསེཝ ནཡོ. ཨཔྤཔརིམཱཎཏྟཱ པརིཡནྟཝནྟཾ, པཱརིསུདྡྷིཝནྟཉྩ སཱིལཾ པརིཡནྟཔཱརིསུདྡྷིསཱིལཾ. ཨནཔྤཔརིམཱཎཏྟཱ ཨཔརིཡནྟཾ, པཱརིསུདྡྷིཝནྟཉྩ སཱིལཾ ཨཔརིཡནྟཔཱརིསུདྡྷིསཱིལཾ. སབྦསོ པུཎྞཾ, པཱརིསུདྡྷིཝནྟཉྩ སཱིལཾ པརིཔུཎྞཔཱརིསུདྡྷིསཱིལཾ.

༡༡. ཝུཏྟནཡེནཱཏི ‘‘སཱིལནཊྛེན སཱིལ’’ནྟིཨཱདིནཱ (ཝིསུདྡྷི. ༡.༧) ཧེཊྛཱ ཝུཏྟེན ནཡེན. ཨིདཾ ཀཏྟབྦནྟི པཉྙཏྟསིཀྑཱཔདཔཱུརཎནྟི ཨིདཾ ཨཱབྷིསམཱཙཱརིཀཾ ཀཏྟབྦཾ པཊིཔཛྫིཏབྦནྟི ཨེཝཾ པཉྙཏྟསྶ སིཀྑཱཔདསཱིལསྶ པཱུརཎཾ. སིཀྑཱཔདསཱིལཾ ཧི པཱུརེནྟོ སིཀྑཱཔདམྤི པཱུརེཏི པཱལེཏི ནཱམ. སིཀྑཱ ཨེཝ ཝཱ སིཀྑིཏབྦཏོ, པཊིཔཛྫིཏབྦཏོ ཙ སིཀྑཱཔདཾ. ཏསྶ པཱུརཎནྟིཔི ཡོཛེཏབྦཾ. ཨིདཾ ན ཀཏྟབྦནྟི པཊིཀྑིཏྟསྶ ཨཀརཎནྟི ཨིདཾ དུཙྩརིཏཾ ན ཀཏྟབྦནྟི བྷགཝཏཱ པཊིཀྑིཏྟསྶ ཨཀརཎཾ ཝིརམཎཾ. ཙརནྟི ཏསྨིནྟི ཏསྨིཾ སཱིལེ ཏཾསམངྒིནོ ཙརནྟཱིཏི སཱིལསྶ ཨདྷིཀརཎཏཾ ཝིབྷཱཝེནྟོ ཏེསཾ པཝཏྟིཊྛཱནབྷཱཝཾ དསྶེཏི. ཏེནཱཧ ‘‘སཱིལེསུ པརིཔཱུརཀཱརིཏཱཡ པཝཏྟནྟཱི’’ཏི. ཝཱརིཏནྟི ཨིདཾ ན ཀཏྟབྦནྟི པཊིཀྑིཏྟཾ ཨཀཔྤིཡཾ ¶ . ཏཱཡནྟཱིཏི ཨཀརཎེནེཝ ཏཱཡནྟི. ཏེནཱཏི ཝཱརིཏྟསཱིལམཱཧ. ཝཱརེཏི ཝཱ སཏྠཱ ཨེཏྠ, ཨེཏེན ཝཱཏི ཝཱརིཏཾ, སིཀྑཱཔདཾ. ཏཾ ཨཝིཀོཔེནྟོ ཏཱཡནྟི ཏེནཱཏི ཝཱརིཏྟཾ. སདྡྷཱཝཱིརིཡསཱདྷནནྟི སདྡྷཱཡ, ཨུཊྛཱནཝཱིརིཡེན ཙ སཱདྷེཏབྦཾ. ན ཧི ཨསདྡྷོ, ཀུསཱིཏོ ཙ ཝཏྟཔཊིཔཏྟིཾ པརིཔཱུརེཏི, སདྡྷོ ཨེཝ སཏྠཱརཱ པཊིཀྑིཏྟེ ཨཎུམཏྟེཔི ཝཛྫེ བྷཡདསྶཱཝཱི སམཱདཱཡ སིཀྑཏི སིཀྑཱཔདེསཱུཏི ཨཱཧ ‘‘སདྡྷཱསཱདྷནཾ ཝཱརིཏྟ’’ནྟི.

ཨདྷིསཱིལསིཀྑཱཔརིཡཱཔནྣཏྟཱ ཨབྷིཝིསིཊྛོ སམཱཙཱརོཏི ཨབྷིསམཱཙཱརོཏི ཨཱཧ ‘‘ཨུཏྟམསམཱཙཱརོ’’ཏི. ཨབྷིསམཱཙཱརོཝ ཨཱབྷིསམཱཙཱརིཀཾ, ཡཐཱ ཝེནཡིཀོཏི (ཨ. ནི. ༨.༡༡; པཱརཱ. ༨) ཨདྷིཔྤཱཡོ. ཨབྷིསམཱཙཱརོ ཨུཀྐཊྛནིདྡེསཏོ ¶ མགྒསཱིལཾ, ཕལསཱིལཉྩ, ཏཾ ཨཱརབྦྷ ཨུདྡིསྶ ཏདཏྠཾ ཏཔྤཡོཛནཾ པཉྙཏྟཾ ཨཱབྷིསམཱཙཱརིཀཾ. སུཔརིསུདྡྷཱནི ཏཱིཎི ཀཱཡཀམྨཱནི, ཙཏྟཱརི ཝཙཱིཀམྨཱནི, སུཔརིསུདྡྷོ ཨཱཛཱིཝོཏི ཨིདཾ ཨཱཛཱིཝཊྛམཀཾ. ཏཏྠ ཀཱམཾ ཨཱཛཱིཝཧེཏུཀཏོ སཏྟཝིདྷདུཙྩརིཏཏོ ཝིརཏི སམྨཱཨཱཛཱིཝོཏི སོཔི སཏྟཝིདྷོ ཧོཏི, སམྨཱཛཱིཝཏཱསཱམཉྙེན པན ཏཾ ཨེཀཾ ཀཏྭཱ ཝུཏྟཾ. ཨཐ ཝཱ ཏིཝིདྷཀུཧནཝཏྠུསནྣིསྶཡཏོ མིཙྪཱཛཱིཝཏོ ཝིརཏིཾ ཨེཀཛ྄ཛྷཾ ཀཏྭཱ ཝུཏྟོ ‘‘ཨཱཛཱིཝོ སུཔརིསུདྡྷོ’’ཏི. སེཊྛཙརིཡབྷཱཝཏོ མགྒོ ཨེཝ བྲཧྨཙརིཡནྟི མགྒབྲཧྨཙརིཡཾ, ཏསྶ. ཨཱདིབྷཱཝབྷཱུཏནྟི ཨཱདིམྷི བྷཱཝེཏབྦཏཾ ནིཔྥཱདེཏབྦཏཾ བྷཱུཏཾ པཏྟཾ ཨཱདིབྷཱཝབྷཱུཏཾ. ཀིཉྩཱཔི དེསནཱནུཀྐམེན སམྨཱདིཊྛི ཨཱདི, པཊིཔཏྟིཀྐམེན པན ཨཱཛཱིཝཊྛམཀསཱིལཾ ཨཱདཱིཏི. ཏསྶ སམྤཏྟིཡཱཏི ཨཱབྷིསམཱཙཱརིཀསྶ སམྤཛྫནེན པརིཔཱུརཎེན ཨཱདིབྲཧྨཙརིཡཀཾ སམྤཛྫཏི. ཡོ ཧི ལཧུཀཱནིཔི ཨཔྤསཱཝཛྫཱནི པརིཝཛྫེཏི, སོ གརུཀཱནི མཧཱསཱཝཛྫཱནི བཧྭཱདཱིནཝཱནི པརིཝཛྫེསྶཏཱིཏི ཝཏྟབྦམེཝ ནཏྠཱིཏི. སུཏྟཾ པན ཨེཏམཏྠཾ བྱཏིརེཀཝསེན ཝིབྷཱཝེཏི. ཏཏྠ དྷམྨནྟི སཱིལཾ. ཏཾ ཧི ཨུཔརིགུཎཝིསེསཱནཾ དྷཱརཎཊྛེན དྷམྨོཏི ཝུཙྩཏི.

ཝིརཏིསཱིལསྶ ཨིཏརསཱིལེན སཏིཔི སམྤཡོགཱདིཀེ ཨསམྨིསྶཀཏཱདསྶནཏྠཾ ‘‘ཝེརམཎིམཏྟ’’ནྟི ཝུཏྟཾ.

‘‘ནིསྶིཏཱནིསྶིཏཝསེནཱ’’ཏི ཨེཏྠ ལབྦྷམཱནནིསྶཡཾ ཏཱཝ དསྶེཏུཾ ‘‘ནིསྶཡོ’’ཏིཨཱདི ཝུཏྟཾ. ཏཏྠ ཏཎྷཱཙརིཏེན ནིསྶཡིཏབྦཏོ ཏཎྷཱཝ ཏཎྷཱནིསྶཡོ. ཏཐཱ དིཊྛིནིསྶཡོ. དིཊྛིཙརིཏོ ཧི ཨསཏིཔི དིཊྛིཡཱ ཏཎྷཱཝིརཧེ དིཊྛིནིསྶིཏོཝ པཝཏྟཏི. དེཝོཏི ཙཏུམཧཱརཱཛསཀྐསུཡཱམཱདིཔཱཀཊདེཝམཱཧ ¶ . དེཝཉྙཏརོཏི ཨཔཱཀཊཾ. ཏཎྷཾ ཨེཝ ནིསྶིཏནྟི ཏཎྷཱནིསྶིཏཾ. ཏཎྷཱཡ ནིསྶིཏནྟི ཙ ཀེཙི ཝདནྟི. ཏེསཾ ‘‘དྭེ ནིསྶཡཱ’’ཏིཨཱདིནཱ ཝིརུཛ྄ཛྷཏི. སུདྡྷིདིཊྛིཡཱཏི ‘‘ཨིཏི སཾསཱརསུདྡྷི བྷཝིསྶཏཱི’’ཏི ཨེཝཾ པཝཏྟདིཊྛིཡཱ, ལོཀུཏྟརཾ སཱིལནྟི ཨདྷིཔྤཱཡོ. ཏསྶེཝཱཏི ལོཀུཏྟརསྶེཝ སམྦྷཱརབྷཱུཏཾ ཀཱརཎབྷཱུཏཾ, ཝིཝཊྚཱུཔནིསྶཡནྟི ཨཏྠོ.

ཀཱལཔརིཙྪེདཾ ཀཏྭཱཏི ‘‘ཨིམཉྩ རཏྟིཾ, ཨིམཉྩ དིཝ’’ནྟིཨཱདིནཱ (ཨ. ནི. ༨.༤༡) ཝིཡ ཀཱལཝསེན པརིཙྪེདཾ ཀཏྭཱ. ཀཱལཔརིཙྪེདཾ ཨཀཏྭཱ སམཱདིནྣམྤི ཨནྟརཱཝིཙྪིནྣཾ ¶ སམྤཏྟཝིརཏིཝསེན ཡཱཝཛཱིཝཾ པཝཏྟིཏམྤི ཨཱཔཱཎཀོཊིཀཾ ན ཧོཏཱིཏི དསྶེཏུཾ ‘‘ཡཱཝཛཱིཝཾ སམཱདིཡིཏྭཱ ཏཐེཝ པཝཏྟིཏ’’ནྟི ཝུཏྟཾ.

ལཱབྷཡསཉཱཏིཨངྒཛཱིཝིཏཝསེནཱཏི ལཱབྷཡསཱནཾ ཨནུཔྤནྣཱནཾ ཨུཔྤཱདནཝསེན, ཨུཔྤནྣཱནཾ རཀྑཎཝསེན ཙེཝ ཝཌྜྷནཝསེན ཙ ཉཱཏིཨངྒཛཱིཝིཏཱནཾ ཨཝིནཱསནཝསེན. ཀིཾ སོ ཝཱིཏིཀྐམིསྶཏཱིཏི ཡོ ཝཱིཏིཀྐམཱཡ ཙིཏྟམྤི ན ཨུཔྤཱདེཏི, སོ ཀཱཡཝཱཙཱཧི ཝཱིཏིཀྐམིསྶཏཱིཏི ཀིཾ ཨིདཾ, ནཏྠེཏནྟི ཨཏྠོ. པཊིཀྑེཔེ ཧི ཨཡཾ ཀིཾ-སདྡོ.

ཨཱརམྨཎབྷཱཝེན ཝཎོ ཝིཡ ཨཱསཝེ ཀཱམཱསཝཱདིཀེ པགྒྷརཏཱིཏི སམྤཡོགབྷཱཝཱབྷཱཝེཔི སཧཱསཝེཧཱིཏི སཱསཝཾ. ཏེབྷཱུམཀདྷམྨཛཱཏནྟི སཱིལཾ ཏཔྤརིཡཱཔནྣནྟི ཨཱཧ ‘‘སཱསཝཾ སཱིལཾ ལོཀིཡ’’ནྟི. བྷཝཝིསེསཱ སམྤཏྟིབྷཝཱ. ཝིནཡོཏི ཝིནཡཔརིཡཏྟི, ཏཏྠ ཝཱ ཨཱགཏསིཀྑཱཔདཱནི. པཱམོཛྫཾ ཏརུཎཔཱིཏི. ཡཐཱབྷཱུཏཉཱཎདསྶནཾ སཔཙྩཡནཱམརཱུཔདསྶནཾ, ཏདདྷིཊྛཱནཱ ཝཱ ཏརུཎཝིཔསྶནཱ. ནིབྦིདཱཏི ནིབྦིདཱཉཱཎཾ. ཏེན བལཝཝིཔསྶནམཱཧ. ཝིརཱགོ མགྒོ. ཝིམུཏྟི ཨརཧཏྟཕལཾ. ཝིམུཏྟིཉཱཎདསྶནཾ པཙྩཝེཀྑཎཱ. ཀཐཱཏི ཝིནཡཀཐཱ. མནྟནཱཏི ཝིནཡཝིཙཱརཎཱ. ཨུཔནིསཱཏི ཡཐཱཝུཏྟཀཱརཎཔརམྤརཱསངྑཱཏོ ཨུཔནིསྶཡོ. ལོཀུཏྟརཾ མགྒཕལཙིཏྟསམྤཡུཏྟཾ ཨཱཛཱིཝཊྛམཀསཱིལཾ. ཏཏྠ མགྒསཱིལཾ བྷཝནིསྶརཎཱཝཧཾ ཧོཏི, པཙྩཝེཀྑཎཉཱཎསྶ ཙ བྷཱུམི, ཕལསཱིལཾ པན པཙྩཝེཀྑཎཱཉཱཎསྶེཝ བྷཱུམི.

༡༢. ཧཱིནཱདྷིམུཏྟིཝསེན ཚནྡཱདཱིནམྤི ཧཱིནཏཱ. པཎཱིཏཱདྷིམུཏྟིཝསེན པཎཱིཏཏཱ. ཏདུབྷཡཝེམཛ྄ཛྷཏཱཝསེན མཛ྄ཛྷིམཏཱ. ཡཐེཝ ཧི ཀམྨཾ ཨཱཡཱུཧནཝསེན ཧཱིནཱདིབྷེདབྷིནྣཾ ཧོཏི, ཨེཝཾ ¶ ཚནྡཱདཡོཔི པཝཏྟིཨཱཀཱརཝསེན. སོ ཙ ནེསཾ པཝཏྟིཨཱཀཱརོ ཨདྷིམུཏྟིབྷེདེནཱཏི དཊྛབྦཾ. ཡསཀཱམཏཱཡཱཏི ཀིཏྟིསིལོཀཱབྷིརཏིཡཱ, པརིཝཱརིཙྪཱཡ ཝཱ. ‘‘ཀཐཾ ནཱམ མཱདིསོ ཨཱིདིསཾ ཀརེཡྻཱ’’ཏི པཱཔཛིགུཙྪཱཡ ཨརིཡབྷཱཝཾ ནིསྶཱཡ. ཨནུཔཀྐིལིཊྛནྟི ཨཏྟུཀྐཾསནཔརཝམྦྷནཱཧི, ཨཉྙེཧི ཙ ཨུཔཀྐིལེསེཧི ཨནུཔཀྐིལིཊྛཾ. བྷཝབྷོགཏྠཱཡཱཏི བྷཝསམྤཏྟིཨཏྠཉྩེཝ བྷོགསམྤཏྟིཨཏྠཉྩ. ཨཏྟནོ ཝིམོཀྑཏྠཱཡ པཝཏྟིཏནྟི སཱཝཀཔཙྩེཀབོདྷིསཏྟསཱིལམཱཧ. སབྦསཏྟཱནཾ ཝིམོཀྑཏྠཱཡཱཏི སབྦསཏྟཱནཾ སཾསཱརབནྡྷནཏོ ¶ ཝིམོཙནཏྠཱཡ. པཱརམིཏཱསཱིལཾ མཧཱབོདྷིསཏྟསཱིལཾ. ཡཱ ཀརུཎཱུཔཱཡཀོསལླཔརིགྒཧིཏཱ མཧཱབོདྷིཾ ཨཱརབྦྷ པཝཏྟཱ པརམུཀྐཾསགཏསོཙེཡྻསལླེཁཱ དེསཀཱལསཏྟཱདིཝིཀཔྤརཧིཏཱ སཱིལཔཱརམིཏཱ.

ཨནནུརཱུཔནྟི ཨསཱརུཔྤཾ. ཨཏྟཱ ཨེཝ གརུ ཨདྷིཔཏི ཨེཏསྶཱཏི ཨཏྟགརུ, ལཛྫཱདྷིཀོ. ཨཏྟཱདྷིཔཏིཏོ ཨཱགཏཾ ཨཏྟཱདྷིཔཏེཡྻཾ. ལོཀོ ཨདྷིཔཏི གརུ ཨེཏསྶཱཏི ལོཀཱདྷིཔཏི, ཨོཏྟཔྤཱདྷིཀོ. དྷམྨོ ནཱམཱཡཾ མཧཱནུབྷཱཝོ ཨེཀནྟནིཡྻཱནིཀོ, སོ ཙ པཊིཔཏྟིཡཱཝ པཱུཛེཏབྦོ. ཏསྨཱ ‘‘ནཾ སཱིལསམྤདཱཡ པཱུཛེསྶཱམཱི’’ཏི ཨེཝཾ དྷམྨམཧཏྟཾ པཱུཛེཏུཀཱམེན.

པརཱམཊྛཏྟཱཏི པརཱབྷཝཝསེན ཨཱམཊྛཏྟཱ. ཏཎྷཱདིཊྛིཡོ ཧི ‘‘ཨིམིནཱཧཾ སཱིལེན དེཝོ ཝཱ བྷཝིསྶཱམི དེཝཉྙཏརོ ཝཱ, ཨིམིནཱ མེ སཱིལེན སཾསཱརསུདྡྷི བྷཝིསྶཏཱི’’ཏི པཝཏྟསྶ སཱིལཾ པརཱམསནྟིཡོ ཏཾ པརཱབྷཝཾ པཱཔེནྟི མགྒསྶ ཨནུཔནིསྶཡབྷཱཝཀརཎཏོ. པུཐུཛྫནཀལྱཱཎཀསྶཱཏི པུཐུཛྫནེསུ ཀལྱཱཎཀསྶ. སོ ཧི པུཐུཛྫནོཝ ཧུཏྭཱ ཀལྱཱཎེཧི སཱིལཱདཱིཧི སམནྣཱགཏོ. པརཱམསནཀིལེསཱནཾ ཝིཀྑམྦྷནཏོ, སམུཙྪིནྡནཏོ ཙ ཏེཧི ན པརཱམཊྛནྟི ཨཔརཱམཊྛཾ. ཏསྶ ཏསྶ ཀིལེསདརཐསྶ པཊིཔྤསྶམྦྷནཏོ ཝཱུཔསམནཏོ པཊིཔྤསྶདྡྷཾ.

ཀཏཔཊིཀམྨནྟི ཝུཊྛཱནདེསནཱཧི ཡཐཱདྷམྨཾ ཀཏཔཊིཀཱརཾ. ཨེཝཾ ཧི ཏཾ སཱིལཾ པཊིཔཱཀཏིཀམེཝ ཧོཏི. ཏེནཱཧ ‘‘ཏཾ ཝིསུདྡྷ’’ནྟི. ‘‘ཀཏཔཊིཀམྨ’’ནྟི ཨིམིནཱ ཙ ‘‘ན པུནེཝཾ ཀརིསྶ’’ནྟི ཨདྷིཊྛཱནམྤི སངྒཧིཏནྟི དཊྛབྦཾ. ‘‘ཨཙྪམཾསཾ ནུ ཁོ, སཱུཀརམཾསཾ ནུ ཁོ’’ཏིཨཱདིནཱ ཝཏྠུམྷི ཝཱ, ‘‘པཱཙིཏྟིཡཾ ནུ ཁོ, དུཀྐཊཾ ནུ ཁོ’’ཏིཨཱདིནཱ ཨཱཔཏྟིཡཱ ཝཱ, ‘‘མཡཱ ཏཾ ཝཏྠུ ཝཱིཏིཀྐནྟཾ ནུ ཁོ, ན ནུ ཁོ ཝཱིཏིཀྐནྟ’’ནྟིཨཱདིནཱ ཨཛ྄ཛྷཱཙཱརེ ཝཱ ཝེམཏིཀསྶ སཾསཡཱཔནྣསྶ. ཝིསོདྷེཏབྦཾ ཡཐཱདྷམྨཾ པཊིཀམྨེན. ཝིམཏི ཨེཝ ཝེམཏིཀཾ, ཏསྨིཾ ཝེམཏིཀེ སཏི, ཝིམཏིཡཱ ཨུཔྤནྣཱཡཱཏི ཨཏྠོ. ཝིམཏི པཊིཝིནེཏབྦཱཏི སཡཾ ཝཱ ཏཾ ཝཏྠུཾ ¶ ཝིཙཱརེཏྭཱ, ཝིནཡདྷརེ ཝཱ པུཙྪིཏྭཱ ཀངྑཱ ཝིནོདེཏབྦཱ. ནིཀྐངྑེན པན ཀཔྤིཡཾ ཙེ ཀཱཏབྦཾ, ཨཀཔྤིཡཾ ཙེ ཚཌྜེཏབྦཾ. ཏེནཱཧ ‘‘ཨིཙྩསྶ ཕཱསུ བྷཝིསྶཏཱི’’ཏི.

‘‘ཙཏཱུཧི ¶ ཨརིཡམགྒེཧཱི’’ཏིཨཱདིནཱ མགྒཕལཔརིཡཱཔནྣཾ སཱིལཾ མགྒཕལསམྤཡུཏྟཾ ཝུཏྟཾ. སམུདཱཡེསུ པཝཏྟཝོཧཱརཱ ཨཝཡཝེསུཔི པཝཏྟནྟཱིཏི. སེསནྟི སབྦཾ ལོཀིཡསཱིལཾ.

པཀཏིཔཱིཏི སབྷཱཝོཔི. སུཁསཱིལོ སཁིལོ སུཁསཾཝཱསོ. ཏེན པརིཡཱཡེནཱཏི པཀཏིཨཏྠཝཱཙཀཏྠེན. ཨེཀཙྩཾ ཨབྱཱཀཏཾ སཱིལཾ ཨིདྷཱདྷིཔྤེཏསཱིལེན ཨེཀསངྒཧནྟི ཨཀུསལསྶེཝཱཡུཛྫམཱནཏཾ དསྶེཏུཾ ‘‘ཏཏྠ ཨཀུསལ’’ནྟིཨཱདི ཝུཏྟཾ. ཏཐཱ ཧི སེཀྑཏྟིཀཾ ཨིདྷ གཧིཏཾ, ཨིདྷ ན ཨུཔནཱིཏཾ ཀུསལཏྟིཀནྟི ཨདྷིཔྤཱཡོ. ཝུཏྟནཡེནེཝཱཏི ཝུཏྟེནེཝ ནཡེན ཀུསལཏྟིཀཾ ཨགྒཧེཏྭཱ ཧཱིནཏྟིཀཱདཱིནཾ པཉྩནྣཾ ཏིཀཱནཾ ཝསེན ཨསྶ སཱིལསྶ ཏིཝིདྷཏཱ ཝེདིཏབྦཱ.

༡༣. ཡོདྷཱཏི ཡོ ཨིདྷ. ཝཏྠུཝཱིཏིཀྐམེཏི ཨཱཔཏྟིཡཱ ཝཏྠུནོ ཝཱིཏིཀྐམནེ ཨཛ྄ཛྷཱཙཱརེ. ཀཱམསངྐཔྤཱདཡོ ནཝ མཧཱཝིཏཀྐཱ མིཙྪཱསངྐཔྤཱ. ཨེཝརཱུཔསྶཱཏི ཨེདིསསྶ. ཏསྶ ཧི སཱིལཝནྟེ ཨནུཔསངྐམིཏྭཱ དུསྶཱིལེ སེཝནྟསྶ ཏཏོ ཨེཝ ཏེསཾ དིཊྛཱནུགཏིཾ ཨཱཔཛྫནེན པཎྞཏྟིཝཱིཏིཀྐམེ ཨདོསདསྶཱཝིནོ མིཙྪཱསངྐཔྤབཧུལཏཱཡ མནཙྪཊྛཱནི ཨིནྡྲིཡཱནི ཨརཀྑཏོ སཱིལཾ ཨེཀཾསེནེཝ ཧཱནབྷཱགིཡཾ ཧོཏི, ན ཋིཏིབྷཱགིཡཾ, ཀུཏོ ཝིསེསཱདིབྷཱགིཡཏཱ. སཱིལསམྤཏྟིཡཱཏི སཱིལཔཱརིཔཱུརིཡཱ ཙཏུཔཱརིསུདྡྷིསཱིལེན. ཨགྷཊནྟསྶ ཨུཏྟརཱིཏི ཨུཏྟརི ཝིསེསཱདྷིགམཱཡ ཨཝཱཡམནྟསྶ. ཋིཏིབྷཱགིཡཾ སཱིལཾ བྷཝཏི ཨསམཱདྷིསཾཝཏྟནིཡཏྟཱ. སམྤཱདིཏེ ཧི སམཱདྷིསྨིཾ སཱིལསྶ སམཱདྷིསཾཝཏྟནིཡཏཱ ནིཙྪིཡཏི. སམཱདྷཏྠཱཡཱཏི སམཐཝསེན སམཱདྷཱནཏྠཱཡ. ནིབྦིདནྟི ཝིཔསྶནཾ. བལཝཝིཔསྶནཱདསྶནཏྠཾ ནིབྦིདཱགཧཎཾ ཏཱཝཏཱཔི སཱིལསྶ ནིབྦེདྷབྷཱགིཡབྷཱཝསིདྡྷིཏོ.

ཡཱནི ཙ སིཀྑཱཔདཱནི ནེསཾ རཀྑིཏབྦཱནཱིཏི སམྦནྡྷོ, ཏཱནི པན ཨསཱདྷཱརཎཔཉྙཏྟིཏོ ཨཉྙཱནི. ནེསནྟི ‘‘རཀྑིཏབྦཱནཱི’’ཏི པདཾ ཨཔེཀྑིཏྭཱ ཀཏྟརི སཱམིཝཙནཾ, ཏེཧི བྷིཀྑཱུཧཱིཏི ཨཏྠོ. སཏི ཝཱ ཨུསྶཱཧེཏི ཨུསྶཀྐིཏྭཱ སཱིལཱནི རཀྑིཏུཾ ཨུསྶཱཧེ སཏི. དསཱཏི སཱམཎེརེཧི རཀྑིཏབྦསཱིལམཱཧ གྷཊིཀཱརཱདཱིནཾ ཝིཡ. ཨཊྛཱཏི ནཙྩཱདིམཱལཱདིཝེརམཎིཾ ཨེཀཾ ཀཏྭཱ སབྦཔཙྪིམཝཛྫཱནི ཨཊྛ.

ཨཝཱིཏིཀྐམོཏི ¶ ¶ པཉྩནྣཾ སཱིལཱནཾ ཨཝཱིཏིཀྐམོ. པཀཏིསཱིལནྟི སབྷཱཝསཱིལཾ. ཏཏྲཱུཔཔཏྟིནིཡཏཾ ཧི སཱིལཾ ཨུཏྟརཀུརུཀཱནཾ. མརིཡཱདཱཙཱརིཏྟནྟི ཏསྶ ཏསྶ སཱཝཛྫསྶ ཨཀརཎེ མརིཡཱདབྷཱུཏཾ, ཏཏྠ ཏཏྠ ཀུལཱདཱིསུ པུབྦཔུརིསེཧི ཋཔིཏཾ ཙཱརིཏྟཾ. ཀུལདེསཔཱསཎྜདྷམྨོ ཧི ‘‘ཨཱཙཱརསཱིལ’’ནྟི ཨདྷིཔྤེཏཾ. ཏཏྠ ཀུལདྷམྨོ ཏཱཝ བྲཱཧྨཎཱདཱིནཾ ཨམཛྫཔཱནཱདི, དེསདྷམྨོ ཨེཀཙྩཛནཔདཝཱསཱིནཾ ཨཧིཾསནཱདི, པཱསཎྜདྷམྨོ ཏིཏྠིཡཱནཾ ཡམནིཡམཱདི. ཏིཏྠིཡམཏཾ ཧི དིཊྛིཔཱསེན, ཏཎྷཱཔཱསེན ཙ ཌེཏི པཝཏྟཏི, པཱསཾ ཝཱ བཱདྷཾ ཨརིཡཝིནཡསྶ ཌེཏཱིཏི ‘‘པཱསཎྜ’’ནྟི ཝུཙྩཏི. ‘‘པཀཏིཡཱ སཱིལཝཏཱི ཧོཏཱི’’ཏི (དཱི. ནི. ༢.༢༠) ཝཙནཏོ བོདྷིསཏྟམཱཏུ པཉྩསིཀྑཱཔདསཱིལཾ པརིཔུཎྞམེཝ. ཨིདཾ པན ཨུཀྐཾསགཏཾ བོདྷིསཏྟཔིཏརིཔི ཙིཏྟུཔྤཱདམཏྟེནཔི ཨསཾཀིལིཊྛཾ ‘‘དྷམྨཏཱསཱིལ’’ནྟི ཝུཏྟཾ. ཀཱམགུཎཱུཔསཾཧིཏནྟི ཀཱམཀོཊྛཱསེསུ ཨསྶཱདཱུཔསཾཧིཏཾ ཀཱམསྶཱདགདྷིཏཾ. དྷམྨཏཱསཱིལནྟི དྷམྨཏཱཡ ཀཱརཎནིཡཱམེན ཨཱགཏཾ སཱིལཾ. སཱིལཔཱརམིཾ ཧི པརམུཀྐཾསཾ པཱཔེཏྭཱ ཀུཙྪིགཏསྶ མཧཱབོདྷིསཏྟསྶ སཱིལཏེཛེན གུཎཱནུབྷཱཝེན བོདྷིསཏྟམཱཏུ སརསེནེཝ པརམསལླེཁཔྤཏྟཾ སཱིལཾ ཧོཏི. མཧཱཀསྶཔཱདཱིནནྟི ཨཱདི-སདྡེན བྷདྡཱདིཀེ སངྒཎྷཱཏི. ཏེ ཀིར སུཙིརཾ ཀཱལཾ སུཔརིསུདྡྷསཱིལཱ ཨེཝ ཧུཏྭཱ ཨཱགཏཱ. ཏེནཱཧ ‘‘སུདྡྷསཏྟཱན’’ནྟི. ཏཱསུ ཏཱསུ ཛཱཏཱིསཱུཏི སཱིལཝརཱཛམཧིཾསརཱཛཱདིཛཱཏཱིསུ. པུབྦེ པུརིམཛཱཏིཡཾ སིདྡྷོ ཧེཏུ ཨེཏསྶཱཏི པུབྦཧེཏུཀསཱིལཾ. ཨིདཾ པན པཀཏིསཱིལཱདིསམཱདཱནེན ཝིནཱ ཨཝཱིཏིཀྐམལཀྑཎཾ སམྤཏྟཝིརཏིསངྒཧཾ དཊྛབྦཾ.

ཡཾ བྷགཝཏཱ ཨེཝཾ ཝུཏྟཾ སཱིལནྟི སམྦནྡྷོ. ཨིདྷཱཏི ཝཀྑམཱནསཱིལཔརིཔཱུརཀསྶ པུགྒལསྶ སནྣིསྶཡབྷཱུཏསཱསནཔརིདཱིཔནཾ, ཨཉྙསཱསནསྶ ཙ ཏཐཱབྷཱཝཔཊིསེདྷནཾ. ཝུཏྟཾ ཧེཏཾ ‘‘ཨིདྷེཝ, བྷིཀྑཝེ, སམཎོ…པེ… སུཉྙཱ པརཔྤཝཱདཱ སམཎེབྷི ཨཉྙེཧཱི’’ཏི (དཱི. ནི. ༢.༢༡༤; མ. ནི. ༡.༡༣༩; ཨ. ནི. ༤.༢༤༡). བྷིཀྑཱུཏི ཏསྶ སཱིལསྶ པརིཔཱུརཀཔུགྒལཔརིདཱིཔནཾ. པཱཏིམོཀྑསཾཝརསཾཝུཏོཏི ཨིདམསྶ པཱཏིམོཀྑསཱིལེ པཏིཊྛིཏབྷཱཝཔརིདཱིཔནཾ. ཝིཧརཏཱིཏི ཨིདམསྶ ཏདནུརཱུཔཝིཧཱརསམངྒིབྷཱཝཔརིདཱིཔནཾ. ཨཱཙཱརགོཙརསམྤནྣོཏི ཨིདཾ པཱཏིམོཀྑསཾཝརསྶ, ཨུཔརིཨདྷིགནྟབྦགུཎཱནཉྩ ཨུཔཀཱརཀདྷམྨཔརིདཱིཔནཾ. ཨཎུམཏྟེསུ ཝཛྫེསུ བྷཡདསྶཱཝཱིཏི ཨིདཾ པཱཏིམོཀྑཏོ ཨཙཝནབྷཱཝཔརིདཱིཔནཾ. སམཱདཱཡཱཏི སིཀྑཱཔདཱནཾ ཨནཝསེསཏོ ཨཱདཱནཔརིདཱིཔནཾ. སིཀྑཏཱིཏི སིཀྑཱཡ སམངྒིབྷཱཝཔརིདཱིཔནཾ ¶ . སིཀྑཱཔདེསཱུཏི སིཀྑིཏབྦདྷམྨཔརིདཱིཔནཾ. ཡཾ པནེཏྠ ཝཏྟབྦཾ, ཏཾ པརཏོ ཨཱཝི བྷཝིསྶཏི.

སོཏི ¶ པཱཏིམོཀྑསཾཝརསཱིལེ པཏིཊྛིཏབྷིཀྑུ. ཏེན ཡཱདིསསྶ ཨིནྡྲིཡསཾཝརསཱིལཾ ཨིཙྪིཏབྦཾ, ཏཾ དསྶེཏི. ཙཀྑུནཱཏི ཡཏོ སོ སཾཝརོ, ཏཾ དསྶེཏི. རཱུཔནྟི ཡཏྠ སོ སཾཝརོ, ཏཾ དསྶེཏི. དིསྭཱ ན ནིམིཏྟགྒཱཧཱི ཧོཏི ནཱནུབྱཉྫནགྒཱཧཱིཏི སཾཝརསྶ ཨུཔཱཡཾ དསྶེཏི. ཡཏྭཱདྷིཀརཎ…པེ… ཨནྭཱསྶཝེཡྻུནྟི སཾཝརསྶ པཊིཔཀྑཾ ཏཏྠ ཨཱདཱིནཝཾ དསྶེཏི. སཾཝརཱཡ པཊིཔཛྫཏཱིཏི པགེཝ སཏིཡཱ ཨུཔཊྛཔེཏབྦཏཾ དསྶེཏི. རཀྑཏི ཙཀྑུནྡྲིཡནྟི སཏིཡཱ ཨུཔཊྛཱཔནམེཝ ཙཀྑུནྡྲིཡསྶ ཨཱརཀྑཱཏི དསྶེཏི. ཙཀྑུནྡྲིཡེ སཾཝརཾ ཨཱཔཛྫཏཱིཏི ཏཐཱབྷཱུཏཱ སཏིཡེཝེཏྠ སཾཝརོཏི དསྶེཏི. ཝཱིཏིཀྐམསྶ ཝསེནཱཏི སམྦནྡྷོ. ཚནྣཾ སིཀྑཱཔདཱནནྟི ‘‘ཨཱཛཱིཝཧེཏུ ཨཱཛཱིཝཀཱརཎཱ ཨསནྟཾ ཨབྷཱུཏཾ ཨུཏྟརིམནུསྶདྷམྨཾ ཨུལླཔཏཱི’’ཏིཨཱདིནཱ ཨཱགཏཱནཾ ཚནྣཾ པཱརཱཛིཀཱདིཔཊིསཾཡུཏྟཱནཾ སིཀྑཱཔདཱནཾ. སཱམནྟཛཔྤནཱདིནཱ ཏིཝིདྷེན ཀུཧནཝཏྠུནཱ ཝིམྷཱཔནཾ ཀུཧནཱ. ཨཏྟཱནཾ, དཱཡཀཾ ཝཱ ཨུཀྑིཔིཏྭཱ ཡཐཱ སོ ཀིཉྩི དདཱཏི, ཨེཝཾ ཀཐནཾ ལཔནཱ. ནིམིཏྟཾ ཝུཙྩཏི པཙྩཡདཱནསཉྙུཔྤཱདཀཾ ཀཱཡཝཙཱིཀམྨཾ, ཏེན ནིམིཏྟེན ཙརཏི, ནིམིཏྟཾ ཝཱ ཀརོཏཱིཏི ནེམིཏྟིཀོ, ཏསྶ བྷཱཝོ ནེམིཏྟིཀཏཱ. གནྡྷཱདཡོ ཝིཡ ལཱབྷཱཡ པརེསཾ ཨཀྐོསནཱདིནཱ ནིཔིསཏཱིཏི ནིཔྤེསོ, ནིཔྤེསོཝ ནིཔྤེསིཀོ, ཏསྶ བྷཱཝོ ནིཔྤེསིཀཏཱ. མཧིཙྪཏཱཡ ཨཏྟནཱ ལདྡྷལཱབྷེན པརཏོ ལཱབྷཔརིཡེསནཱ ལཱབྷེན ལཱབྷཾ ནིཛིགཱིསནཏཱ. ཨེཝམཱདཱིནནྟི ཨཱདི-སདྡེན ཨནུཔྤིཡབྷཱཎིཏཱཙཱཊུཀམྱཏཱདིཾ སངྒཎྷཱཏི. པཊིསངྑཱནེན པཙྩཝེཀྑཎཱཡ པརིསུདྡྷོ ཨསཾཀིལིཊྛོ པཊིསངྑཱནཔརིསུདྡྷོ. ཙཏྟཱརོ པཙྩཡཱ པརིབྷུཉྫཱིཡནྟི ཨེཏེནཱཏི ཙཏུཔཙྩཡཔརིབྷོགོ, ཏཐཱཔཝཏྟཱ ཨནཝཛྫཙེཏནཱ.

པཱཏིམོཀྑསཾཝརསཱིལཝཎྞནཱ

༡༤. ཏཏྲཱཏི ཏེསུ པཱཏིམོཀྑསཾཝརཱདཱིསུ. ཨཱདིཏོ པཊྛཱཡཱཏི ‘‘ཨིདྷ བྷིཀྑཱུ’’ཏིཨཱདིནཱ (ཝིབྷ. ༥༠༨; དཱི. ནི. ༡.༡༩༤) ཨཱགཏདེསནཱཡ ཨཱདིཏོ པབྷུཏི. ཝིནིཙྪཡཀཐཱཏི ཏཏྠ སཾསཡཝིདྷམནེན ཝིནིཙྪཡཱཝཧཱ ཀཐཱ. པཋམསྶ ཨཏྠསྶ ¶ སབྦསཱདྷཱརཎཏྟཱ ཨསཱདྷཱརཎཾ པབྦཛིཏཱཝེཎིཀཾ པརིཡཱཡཾ དསྶེནྟོ ‘‘ཚིནྣབྷིནྣཔཊདྷརཱདིཏཱཡ ཝཱ’’ཏི ཨཱཧ. ཨེཝཾ ཧིསྶ པརིཔུཎྞཔཱཏིམོཀྑསཾཝརཡོགྱཏཱ དསྶིཏཱ ཧོཏི. བྷིནྣཔཊདྷརཱདིབྷཱཝོ ཙ ནཱམ དལིདྡསྶཱཔི ནིགྒཧིཏསྶ ཧོཏཱིཏི ཏཏོ ཝིསེསེཏུཾ ‘‘སདྡྷཱཔབྦཛིཏོ’’ཏི ཝཏྭཱ པཊིཔཏྟིཡཱ ཡོགྱབྷཱཝདསྶནཏྠཾ ‘‘ཀུལཔུཏྟོ’’ཏི ཝུཏྟཾ. ཨཱཙཱརཀུལཔུཏྟོ ཝཱ ཧི པཊིཔཛྫིཏུཾ སཀྐོཏི ཛཱཏིཀུལཔུཏྟོ ཝཱ. སིཀྑཱཔདསཱིལནྟི ཙཱརིཏྟཝཱརིཏྟཔྤབྷེདཾ སིཀྑཱཔདཝསེན པཉྙཏྟཾ སཱིལཾ. ཡོཏི ¶ ཨནིཡམནིདྡེསོ ཡོ ཀོཙི པུགྒལོ. ནནྟི ཝིནཡཔརིཡཱཔནྣཾ སཱིལཾ. ཏནྟི པུགྒལཾ. མོཀྑེཏི སཧཀཱརིཀཱརཎབྷཱཝཏོ. ཨཔཱཡེ བྷཝཱནི ཨཱཔཱཡིཀཱནི. ཨཱདི-སདྡེན ཏདཉྙཾ སབྦསཾསཱརདུཀྑཾ སངྒཎྷཱཏི. སཾཝརཎཾ ཀཱཡཝཙཱིདྭཱརཱནཾ པིདཧནཾ. ཡེན ཏེ སཾཝུཏཱ པིཧིཏཱ ཧོནྟི, སོ སཾཝརོ. ཡསྨཱ པན སོ སཏྟནྣཾ ཨཱཔཏྟིཀྑནྡྷཱནཾ ཨཝཱིཏིཀྐམོ ཝཱིཏིཀྐམཔཊིཔཀྑོཏི ཀཏྭཱ, ཏསྨཱ ཝུཏྟཾ ‘‘ཀཱཡིཀཝཱཙསིཀསྶ ཨཝཱིཏིཀྐམསྶེཏཾ ནཱམ’’ནྟི. པཱཏིམོཀྑསཾཝརེན སཾཝུཏོཏི པཱཏིམོཀྑསཾཝརེན པིཧིཏཀཱཡཝཙཱིདྭཱརོ. ཏཐཱབྷཱུཏོ ཙ ཡསྨཱ ཏཾ ཨུཔེཏོ ཏེན ཙ སམངྒཱི ནཱམ ཧོཏི, ཏསྨཱ ཝུཏྟཾ ‘‘ཨུཔགཏོ སམནྣཱགཏོཏི ཨཏྠོ’’ཏི.

ཨཔརོ ནཡོ – ཀིལེསཱནཾ བལཝབྷཱཝཏོ, པཱཔཀིརིཡཱཡ སུཀརབྷཱཝཏོ, པུཉྙཀིརིཡཱཡ ཙ དུཀྐརབྷཱཝཏོ བཧུཀྑཏྟུཾ ཨཔཱཡེསུ པཏནསཱིལོཏི པཱཏཱི, པུཐུཛྫནོ. ཨནིཙྩཏཱཡ ཝཱ བྷཝཱདཱིསུ ཀམྨཝེགཀྑིཏྟོ གྷཊིཡནྟཾ ཝིཡ ཨནཝཊྛཱནེན པརིབྦྷམནཏོ གམནསཱིལོཏི པཱཏཱི, མརཎཝསེན ཝཱ ཏམྷི ཏམྷི སཏྟནིཀཱཡེ ཨཏྟབྷཱཝསྶ པཱཏནསཱིལོཏི པཱཏཱི, སཏྟསནྟཱནོ, ཙིཏྟམེཝ ཝཱ. ཏཾ པཱཏིནཾ སཾསཱརདུཀྑཏོ མོཀྑེཏཱིཏི པཱཏིམོཀྑཾ. ཙིཏྟསྶ ཧི ཝིམོཀྑེན སཏྟོ ‘‘ཝིམུཏྟོ’’ཏི ཝུཙྩཏི. ཝུཏྟཾ ཧི ‘‘ཙིཏྟཝོདཱནཱ ཝིསུཛ྄ཛྷནྟཱི’’ཏི, ‘‘ཨནུཔཱདཱཡ ཨཱསཝེཧི ཙིཏྟཾ ཝིམུཏྟ’’ནྟི (མཧཱཝ. ༢༨) ཙ. ཨཐ ཝཱ ཨཝིཛྫཱདིནཱ ཧེཏུནཱ སཾསཱརེ པཏཏི གཙྪཏི པཝཏྟཏཱིཏི པཱཏཱི, ‘‘ཨཝིཛྫཱནཱིཝརཎཱནཾ སཏྟཱནཾ ཏཎྷཱསཾཡོཛནཱནཾ སནྡྷཱཝཏཾ སཾསརཏ’’ནྟི (སཾ. ནི. ༢.༡༢༤) ཧི ཝུཏྟཾ. ཏསྶ པཱཏིནོ སཏྟསྶ ཏཎྷཱདིསཾཀིལེསཏྟཡཏོ མོཀྑོ ཨེཏེནཱཏི པཱཏིམོཀྑཾ ¶ . ‘‘ཀཎྛེཀཱལོ༹’’ཏིཨཱདཱིནཾ ཝིཡསྶ སམཱསསིདྡྷི ཝེདིཏབྦཱ. ཨཐ ཝཱ པཱཏེཏི ཝིནིཔཱཏེཏི དུཀྑེཏི པཱཏི, ཙིཏྟཾ. ཝུཏྟཾ ཧི ‘‘ཙིཏྟེན ནཱིཡཏི ལོཀོ, ཙིཏྟེན པརིཀསྶཏཱི’’ཏི (སཾ. ནི. ༡.༦༢). ཏསྶ པཱཏིནོ མོཀྑོ ཨེཏེནཱཏི པཱཏིམོཀྑཾ, པཏཏི ཝཱ ཨེཏེན ཨཔཱཡདུཀྑེ, སཾསཱརདུཀྑེ ཙཱཏི པཱཏཱི, ཏཎྷཱདིསཾཀིལེསོ. ཝུཏྟཾ ཧི ‘‘ཏཎྷཱ ཛནེཏི པུརིསཾ (སཾ. ནི. ༡.༥༥-༥༧), ཏཎྷཱདུཏིཡོ པུརིསོ’’ཏི (ཨིཏིཝུ. ༡༥, ༡༠༥; ཨ. ནི. ༤.༩; མཧཱནི. ༡༩༡; ཙཱུལ༹ནི. པཱརཱཡནཱནུགཱིཏིགཱཐཱནིདྡེས) ཙ ཨཱདི. ཏཏོ པཱཏིཏོ མོཀྑོཏི པཱཏིམོཀྑཾ. ཨཐ ཝཱ པཏཏི ཨེཏྠཱཏི པཱཏཱིནི, ཚ ཨཛ྄ཛྷཏྟིཀབཱཧིརཱནི ཨཱཡཏནཱནི. ཝུཏྟཾ ཧི ‘‘ཚསུ ལོཀོ སམུཔྤནྣོ, ཚསུ ཀུབྦཏི སནྠཝ’’ནྟི (སཾ. ནི. ༡.༧༠; སུ. ནི. ༡༧༡). ཏཏོ ཚཨཛ྄ཛྷཏྟིཀབཱཧིརཱཡཏནསངྑཱཏཏོ པཱཏིཏོ མོཀྑོཏི པཱཏིམོཀྑཾ. ཨཐ ཝཱ པཱཏོ ཝིནིཔཱཏོ ཨསྶ ¶ ཨཏྠཱིཏི པཱཏཱི, སཾསཱརོ. ཏཏོ མོཀྑོཏི པཱཏིམོཀྑཾ, ཨཐ ཝཱ སབྦལོཀཱདྷིཔཏིབྷཱཝཏོ དྷམྨིསྶརོ བྷགཝཱ ‘‘པཏཱི’’ཏི ཝུཙྩཏི. མུཙྩཏི ཨེཏེནཱཏི མོཀྑོ, པཏིནོ མོཀྑོ ཏེན པཉྙཏྟཏྟཱཏི པཏིམོཀྑོ, པཏིམོཀྑོ ཨེཝ པཱཏིམོཀྑཾ. སབྦགུཎཱནཾ ཝཱ མཱུལབྷཱཝཏོ ཨུཏྟམཊྛེན པཏི ཙ སོ ཡཐཱཝུཏྟེནཏྠེན མོཀྑོ ཙཱཏི པཏིམོཀྑོ, པཏིམོཀྑོ ཨེཝ པཱཏིམོཀྑཾ. ཏཐཱ ཧི ཝུཏྟཾ ‘‘པཱཏིམོཀྑནྟི མུཁམེཏཾ པམུཁམེཏ’’ནྟི (མཧཱཝ. ༡༣༥) ཝིཏྠཱརོ.

ཨཐ ཝཱ པ-ཨིཏི པཀཱརེ, ཨཏཱི-ཏི ཨཙྩནྟཏྠེ ནིཔཱཏོ, ཏསྨཱ པཀཱརེཧི ཨཙྩནྟཾ མོཀྑེཏཱིཏི པཱཏིམོཀྑཾ. ཨིདཾ ཧི སཱིལཾ སཡཾ ཏདངྒཝསེན, སམཱདྷིསཧིཏཾ པཉྙཱསཧིཏཉྩ ཝིཀྑམྦྷནཝསེན, སམུཙྪེདཝསེན ཙ ཨཙྩནྟཾ མོཀྑེཏི མོཙེཏཱིཏི པཱཏིམོཀྑཾ, པཏི པཏི མོཀྑོཏི ཝཱ པཏིམོཀྑོ, ཏམྷཱ ཏམྷཱ ཝཱིཏིཀྐམདོསཏོ པཙྩེཀཾ མོཀྑོཏི ཨཏྠོ, པཏིམོཀྑོ ཨེཝ པཱཏིམོཀྑཾ. མོཀྑོཏི ཝཱ ནིབྦཱནཾ, ཏསྶ མོཀྑསྶ པཊིབིམྦབྷཱུཏོཏི པཏིམོཀྑོ. སཱིལསཾཝརོ ཧི སཱུརིཡསྶ ཨརུཎུགྒམནཾ ཝིཡ ནིབྦཱནསྶ ཨུདཡབྷཱུཏོ ཏཔྤཊིབྷཱགོ ཝིཡ ཡཐཱརཧཾ ཀིལེསནིབྦཱཔནཏོ, པཏིམོཀྑོཡེཝ པཱཏིམོཀྑཾ. ཨཐ ཝཱ མོཀྑཾ པཏི ཝཏྟཏི, མོཀྑཱབྷིམུཁནྟི ཝཱ པཏིམོཀྑཾ, པཏིམོཀྑམེཝ པཱཏིམོཀྑནྟི ཨེཝམེཏྠ པཱཏིམོཀྑ-སདྡསྶ ཨཏྠོ ཝེདིཏབྦོ. ཨིརིཡཏཱིཏི ཨཏྟབྷཱཝཾ པཝཏྟེཏི. ‘‘ཝིཧརཏཱི’’ཏི ཨིམིནཱ པཱཏིམོཀྑསཾཝརསཱིལེ ཋིཏསྶ ¶ བྷིཀྑུནོ ཨིརིཡཱཔཐཝིཧཱརོ དསྶིཏོ. པཱལི༹ཡནྟི ཛྷཱནཝིབྷངྒཔཱལི༹ཡཾ (ཝིབྷ. ༥༠༨ ཨཱདཡོ).

ཏཏྠ ཀཱམཾ སམཎཙཱརཾ, སམཎགོཙརཉྩ དསྶེཏུཾ ‘‘ཨཱཙཱརགོཙརསམྤནྣོ’’ཏི ཝུཏྟཾ, ཡཐཱ པན མགྒཾ ཨཱཙིཀྑནྟོ ‘‘ཝཱམཾ མུཉྩ, དཀྑིཎཾ གཎྷཱ’’ཏི ཝཛྫེཏབྦཔུབྦཀཾ གཧེཏབྦཾ ཝདེཡྻ, ཡཐཱ ཝཱ སསཱིསནྷཱནེན པཧཱིནསེདམལཛལླིཀསྶ མཱལཱགནྡྷཝིལེཔནཱདིཝིབྷཱུསནསཾཝིདྷཱནཾ ཡུཏྟརཱུཔཾ, ཨེཝཾ པཧཱིནཔཱཔདྷམྨསྶ ཀལྱཱཎདྷམྨསམཱཡོགོ ཡུཏྟརཱུཔོཏི ‘‘ཨཏྠི ཨཱཙཱརོ, ཨཏྠི ཨནཱཙཱརོ’’ཏི དྭཡཾ ཨུདྡིསིཏྭཱ ཨནཱཙཱརཾ ཏཱཝ ཝིབྷཛིཏུཾ ‘‘ཏཏྠ ཀཏམོ ཨནཱཙཱརོ’’ཏིཨཱདི ཝུཏྟཾ. ཏཏྠ ཀཱཡིཀོ ཝཱིཏིཀྐམོཏི ཏིཝིདྷཾ ཀཱཡདུཙྩརིཏཾ. ཝཱཙསིཀོ ཝཱིཏིཀྐམོཏི ཙཏུབྦིདྷཾ ཝཙཱིདུཙྩརིཏཾ. ཀཱཡིཀཝཱཙསིཀོཏི ཏདུབྷཡཾ.

ཨེཝཾ ཨཱཛཱིཝཊྛམཀསཱིལསྶ ཝཱིཏིཀྐམོ དསྶིཏོ. ཨིདཱནི མཱནསཾ ཨནཱཙཱརཾ དསྶེཏུཾ ‘‘སབྦམྤི ¶ དུསྶཱིལྱཾ ཨནཱཙཱརོ’’ཏི ཝཏྭཱ ཏཏྠ ཨེཀཙྩིཡཾ དསྶེནྟོ ‘‘ཨིདྷེཀཙྩོ ཝེལུ༹དཱནེན ཝཱ’’ཏིཨཱདིམཱཧ. ཏཏྠ ཝེལུ༹དཱནེནཱཏི པཙྩཡུཔྤཱདནཏྠེན ཝེལུ༹དཱནེན. པཏྟདཱནཱདཱིསུཔི ཨེསེཝ ནཡོ. ཝེལཱུ༹ཏི མནུསྶཱནཾ པཡོཛནཱཝཧོ ཡོ ཀོཙི ཝེལུ༹དཎྜོ. པཏྟཾ གནྡྷིཀཱདཱིནཾ གནྡྷཔལིཝེཋནཱདིཨཏྠཾ ཝཱ, ཏཱལནཱལི༹ཀེརཱདིཔཏྟཾ ཝཱ. པུཔྥཾ ཡཾ ཀིཉྩི མནུསྶཱནཾ པཡོཛནཱཝཧཾ. ཏཐཱ ཕལཾ. སིནཱནཾ སིརཱིསཙུཎྞཱདིནྷཱནིཡཙུཎྞཾ. མཏྟིཀཱཔི ཨེཏྠེཝ སངྒཧཾ གཙྪཏི. དནྟཀཊྛཾ ཡཾ ཀིཉྩི མུཁསོདྷནཏྠཾ དནྟཔོནཾ. ཙཱཊུཀམྱཏཱ ཨཏྟཱནཾ དཱསཾ ཝིཡ ནཱིཙཊྛཱནེ ཋཔེཏྭཱ པརསྶ ཁལིཏཝཙནཾ སཎྛཔེཏྭཱ པིཡཀཱམཏཱཡ པགྒཡ྄ཧཝཙནཾ. མུགྒསཱུཔྱཏཱཏི མུགྒསཱུཔསམཏཱ སཙྩཱལིཀེན ཛཱིཝིཏཀཔྤནཾ. ཡཐཱ ཧི མུགྒསཱུཔེ པཙྩནྟེ བཧཱུ མུགྒཱ པཙྩནྟི, ཀཏིཔཡཱ ན པཙྩནྟི, ཨེཝཾ སཙྩཱལིཀེན ཛཱིཝིཏཀཔྤནེ བཧུ ཨལིཀཾ ཧོཏི, ཨཔྤཀཾ སཙྩནྟི. པརིབྷཊཏཱིཏི པརིབྷཊོ, པརེསཾ དཱརཀེ པརིཧརནྟོ. པརིབྷཊསྶ ཀམྨཾ པཱརིབྷཊྱཾ, སཱ ཨེཝ པཱརིབྷཊྱཏཱ, ཨལངྐརཎཱདིནཱ ཀུལདཱརཀཔརིཧརཎསྶེཏཾ ནཱམཾ. ཏེསཾ ཏེསཾ གིཧཱིནཾ གཱམནྟརདེསནྟརཱདཱིསུ སཱསནཔཊིསཱསནཧརཎཾ ཛངྒྷཔེསནིཀཾ. ཨཉྙཏརཉྙཏརེནཱཏི ཨེཏེསཾ ཝཱ ཝེལུ༹དཱནཱདཱིནཾ ཝེཛྫཀམྨབྷཎྜཱགཱརིཀཀམྨཔིཎྜཔཊིཔིཎྜཀམྨསངྒྷུཔྤཱདཙེཏིཡུཔྤཱདཔཊྛཔནཱདཱིནཾ ཝཱ མིཙྪཱཛཱིཝེན ཛཱིཝིཏཀཔྤནཀཀམྨཱནཾ ཡེན ཀེནཙི ¶ . བུདྡྷཔཊིཀུཊྛེནཱཏི བུདྡྷེཧི གརཧིཏེན པཊིསིདྡྷེན. མིཙྪཱཛཱིཝེནཱཏི ན སམྨཱཨཱཛཱིཝེན. ཨཡཾ ཝུཙྩཏི ཨནཱཙཱརོཏི ཨཡཾ སབྦོཔི ‘‘ཨནཱཙཱརོ’’ཏི ཀཐཱིཡཏི. ཨཱཙཱརནིདྡེསོ ཝུཏྟཔཊིཔཀྑནཡེནེཝ ཝེདིཏབྦོ.

གོཙརནིདྡེསེཔི པཋམཾ ཨགོཙརསྶ ཝཙནེ ཀཱརཎཾ ཧེཊྛཱ ཝུཏྟནཡེནེཝ ཝེདིཏབྦཾ. གོཙརོཏི པིཎྜཔཱཏཱདཱིནཾ ཨཏྠཱཡ ཨུཔསངྐམིཏུཾ ཡུཏྟཊྛཱནཾ. ཨཡུཏྟཊྛཱནཾ ཨགོཙརོ. ཝེསིཡཱ གོཙརོ ཨསྶཱཏི ཝེསིཡཱགོཙརོ, མིཏྟསནྠཝཝསེན ཨུཔསངྐམིཏབྦཊྛཱནནྟི ཨཏྠོ. ཝེསིཡཱ ནཱམ རཱུཔཱུཔཛཱིཝིནིཡོ, ཏཱ མིཏྟསནྠཝཝསེན ན ཨུཔསངྐམིཏབྦཱ, སམཎབྷཱཝསྶ ཨནྟརཱཡཀརཏྟཱ, པརིསུདྡྷཱསཡསྶཱཔི གརཧཧེཏུཏོ, ཏསྨཱ དཀྑིཎཱདཱནཝསེན སཏིཾ ཨུཔཊྛཔེཏྭཱཝ ཨུཔསངྐམིཏབྦཱ. ཝིདྷཝཱ ཝུཙྩནྟི མཏཔཏིཀཱ, པཝུཏྠཔཏིཀཱ ཝཱ. ཐུལླཀུམཱརིཀཱཏི མཧལླིཀཱ ཨནིཝིཊྛཀུམཱརིཡོ, པཎྜཀཱཏི ནཔུཾསཀཱ. ཏེ ཧི ཨུསྶནྣཀིལེསཱ ཨཝཱུཔསནྟཔརིལཱ༹ཧཱ ལོཀཱམིསསནྣིསྶིཏཀཐཱབཧུལཱ, ཏསྨཱ ན ཨུཔསངྐམིཏབྦཱ. བྷིཀྑུནིཡོ ནཱམ ཨུསྶནྣབྲཧྨཙརིཡཱ. ཏཐཱ བྷིཀྑཱུཔི. ཏེསཾ ཨཉྙམཉྙཾ ཝིསབྷཱགཝཏྠུབྷཱཝཏོ སནྠཝཝསེན ཨུཔསངྐམནེ ཀཏིཔཱཧེནེཝ བྲཧྨཙརིཡནྟརཱཡོ སིཡཱ, ཏསྨཱ ན ཨུཔསངྐམིཏབྦཱ. གིལཱནཔུཙྪནཱདིཝསེན ཨུཔསངྐམནེ སཏོཀཱརིནཱ བྷཝིཏབྦཾ. པཱནཱགཱརནྟི སུརཱཔཱནགྷརཾ. ཏཾ སོཎྜཛནེཧི ¶ ཨཝིཝིཏྟཾ ཧོཏི. ཏཏྠ ཏེཧི སོཎྜཏཱདིཝསེན ན ཨུཔསངྐམིཏབྦཾ བྲཧྨཙརིཡནྟརཱཡཀརཏྟཱ. སཾསཊྛོ ཝིཧརཏི རཱཛཱུཧཱིཏིཨཱདཱིསུ རཱཛཱནོ ནཱམ ཡེ རཛྫམནུསཱསནྟི. རཱཛམཧཱམཏྟཱ རཱཛིསྶརིཡསདིསཱཡ ཨིསྶརིཡམཏྟཱཡ སམནྣཱགཏཱ. ཏིཏྠིཡཱཏི ཝིཔརཱིཏདསྶནཱ བཱཧིརཀཔརིབྦཱཛཀཱ. ཏིཏྠིཡསཱཝཀཱཏི ཏེསུ དལ༹ྷབྷཏྟཱ པཙྩཡདཱཡཀཱ. ཨནནུལོམིཀེན སཾསགྒེནཱཏི ཏིསྶནྣཾ སིཀྑཱནཾ ཨནནུལོམིཀེན པཙྩནཱིཀབྷཱུཏེན སཾསགྒེན སཾསཊྛོ ཝིཧརཏི, ཡེན བྲཧྨཙརིཡནྟརཱཡཾ ཝཱ སལླེཁཔརིཧཱནིཾ ཝཱ པཱཔུཎཱཏི.

ཨིདཱནི ཨཔརེནཔི པརིཡཱཡེན ཨགོཙརཾ དསྶེཏུཾ ‘‘ཡཱནི ཝཱ པན ཏཱནཱི’’ཏིཨཱདི ཝུཏྟཾ. ཏཏྠ ཨསྶདྡྷཱནཱིཏི བུདྡྷཱདཱིསུ སདྡྷཱཝིརཧིཏཱནི. ཏཏོ ཨེཝ ཨཔྤསནྣཱནི, ཀམྨཀམྨཕལསདྡྷཱཡ ཝཱ ཨབྷཱཝེན ཨསྶདྡྷཱནི. རཏནཏྟཡཔྤསཱདཱབྷཱཝེན ཨཔྤསནྣཱནི. ཨཀྐོསཀཔརིབྷཱསཀཱནཱིཏི ཨཀྐོསཝཏྠཱུཧི ¶ ཨཀྐོསཀཱནི ཙེཝ བྷཡདསྶནེན སནྟཛྫནཀཱནི ཙ. ཨཏྠཾ ན ཨིཙྪནྟི ཨནཏྠམེཝ ཨིཙྪནྟཱིཏི ཨནཏྠཀཱམཱནི. ཧིཏཾ ན ཨིཙྪནྟི ཨཧིཏམེཝ ཨིཙྪནྟཱིཏི ཨཧིཏཀཱམཱནི. ཕཱསུ ན ཨིཙྪནྟི ཨཕཱསུཾཡེཝ ཨིཙྪནྟཱིཏི ཨཕཱསུཀཀཱམཱནི. ཡོགཀྑེམཾ ནིབྦྷཡཾ ན ཨིཙྪནྟི, ཨཡོགཀྑེམམེཝ ཨིཙྪནྟཱིཏི ཨཡོགཀྑེམཀཱམཱནི. བྷིཀྑཱུནནྟི ཨེཏྠ སཱམཎེརཱནམྤི སངྒཧོ. བྷིཀྑུནཱིནནྟི ཨེཏྠ སིཀྑམཱནསཱམཎེརཱིནཾ. སབྦེསཾ ཧི སཱསནིཀཱནཾ ཨནཏྠཀཱམཏཱདཱིཔནཔདམིདཾ ཝཙནཾ. ཏཐཱརཱུཔཱནི ཀུལཱནཱིཏི ཏཱདིསཱནི ཁཏྟིཡཀུལཱདཱིནི. སེཝཏཱིཏི ནིསྶཱཡ ཛཱིཝཏི. བྷཛཏཱིཏི ཨུཔསངྐམཏི. པཡིརུཔཱསཏཱིཏི པུནཔྤུནཾ ཨུཔགཙྪཏི. ཨཡཾ ཝུཙྩཏཱིཏི ཨཡཾ ཝེསིཡཱདིཀོ, རཱཛཱདིཀོ, ཨསྶདྡྷཀུལཱདིཀོ ཙ ཏཾ ཏཾ སེཝནྟསྶ ཏིཔྤཀཱརོཔི ཨཡུཏྟོ གོཙརོཏི ཨགོཙརོ. ཨེཏྠ ཧི ཝེསིཡཱདིཀོ པཉྩཀཱམགུཎནིསྶཡཏོ ཨགོཙརོ. ཡཐཱཧ ‘‘ཀོ ཙ, བྷིཀྑཝེ, བྷིཀྑུནོ ཨགོཙརོ པརཝིསཡོ? ཡདིདཾ པཉྩ ཀཱམགུཎཱ’’ཏི (སཾ. ནི. ༥.༣༧༢). རཱཛཱདིཀོ སམཎདྷམྨསྶ ཨནུཔནིསྶཡཏོ, ལཱབྷསཀྐཱརཱསནིཝིཙཀྐནིཔྤོཐནདིཊྛིཝིཔཏྟིཧེཏུཏོ ཙ. ཨསྶདྡྷཀུལཱདིཀོ སདྡྷཱཧཱནིཙིཏྟསནྟཱསཱཝཧཏོ ཨགོཙརོ.

གོཙརནིདྡེསེ ‘‘ན ཝེསིཡཱགོཙརོ’’ཏིཨཱདཱིནི ཝུཏྟཔཊིཔཀྑཝསེན ཝེདིཏབྦཱནི. ཨོཔཱནབྷཱུཏཱནཱིཏི ཨུདཔཱནབྷཱུཏཱནི བྷིཀྑུསངྒྷསྶ, བྷིཀྑུནཱིསངྒྷསྶ ཙ ཙཏུམཧཱཔཐེ ཁཏཔོཀྑརཎཱི ཝིཡ ཡཐཱསུཁཾ ཨོགཱཧནཀྑམཱནི. ཀཱསཱཝཔཛྫོཏཱནཱིཏི བྷིཀྑཱུནཾ, བྷིཀྑུནཱིནཉྩ ནིཝཏྠཔཱརུཏཀཱསཱཝཱནཾཡེཝ པབྷཱཧི ཨེཀོབྷཱསཱནི. ཨིསིཝཱཏཔཊིཝཱཏཱནཱིཏི གེཧཾ པཝིསནྟཱནཾ ¶ , ནིཀྑམནྟཱནཉྩ བྷིཀྑུབྷིཀྑུནཱིསངྑཱཏཱནཾ ཨིསཱིནཾ ཙཱིཝརཝཱཏེན ཙེཝ སམིཉྫནཔསཱརཎཱདིཛནིཏསརཱིརཝཱཏེན ཙ པཊིཝཱཏཱནི པཝཱཡིཏཱནི ཝིནིདྡྷུཏཀིབྦིསཱནི ཝཱ.

ཨིདཱནི ནིདྡེསེ ཨཱགཏནཡེནཱཔི ཨཱཙཱརགོཙརེ དསྶེཏུཾ ‘‘ཨཔིཙཱ’’ཏིཨཱདི ཨཱརདྡྷཾ. ཨེཏྠཱཏི ཨེཏསྨིཾ པཱཏིམོཀྑསཱིལནིདྡེསེ. ཨིམིནཱཔི ནཡེནཱཏི ཨིདཱནི ཝུཙྩམཱནཝིདྷིནཱཔི. སངྒྷགཏོཏི སངྒྷསནྣིཔཱཏཾ གཏོ. ཨཙིཏྟཱིཀཱརཀཏོཏི ཨཀཏཙིཏྟཱིཀཱརོ, ཨཀཏགཱརཝོཏི ཨཏྠོ. གྷཊྚཡནྟོཏི སརཱིརེན, ཙཱིཝརེན ཝཱ གྷཾསནྟོ. པུརཏོཔི ཏིཊྛཏི ཨཙིཏྟཱིཀཱརཀཏོཏི ¶ སམྦནྡྷིཏབྦཾ. ཋིཏཀོཔཱིཏི ཨུཔརི ཏིཊྛནྟོ ཝིཡ ཨཱསནྣཏརཊྛཱནེ ཋིཏཀོཔི བྷཎཏི. བཱཧཱཝིཀྑེཔཀོཏི བཱཧུཾ ཝིཀྑིཔནྟོ. ཨནུཔཱཧནཱནནྟི ཨནཱདརེ སཱམིཝཙནཾ. སཨུཔཱཧནོཏི ཨུཔཱཧནཱརུལ༹ྷོ. ཐེརེ བྷིཀྑཱུ ཨནུཔཁཛྫཱཏི ཐེརཱནཾ བྷིཀྑཱུནཾ ཋིཏཊྛཱནཾ ཨནུཔཝིསིཏྭཱ ཏེསཾ ཨཱསནྣཏརཊྛཱནཾ ཨུཔགནྟྭཱ. ཀཊྛཾ པཀྑིཔཏི ཨགྒིཀུཎྜེ. ཝོཀྐམྨཱཏི པསྶཏོ ཨཏིཀྐམིཏྭཱ. གཱུལ༹ྷཱནི སབྷཱཝཏོ པཊིཙྪནྣཱནི སཱཎིཔཱཀཱརཱདིནཱ པཊིཙྪཱདིཏཱནི. ཨནཱཔུཙྪཱཏི ཨནཱཔུཙྪིཏྭཱ. ཨསྶཱཏི ཨནཱཙཱརསྶ.

ཨཔིཙ བྷིཀྑཱུཏིཨཱདི སབྦསྶེཝ བྷིཀྑུནོ ཨཱཙཱརདསྶནཝསེན པཝཏྟཾ ཨཊྛཀཐཱཝཙནཾ, ན ནིདྡེསཔཱལི༹. སདྡྷཱསཱིལསུཏཙཱགཱདིགུཎཧེཏུཀོ གརུབྷཱཝོ གརུཀརཎཾ ཝཱ གཱརཝོ, སཧ གཱརཝེནཱཏི སགཱརཝོ. གརུཊྛཱནིཡེསུ གཱརཝསཱརཛྫཱདིཝསེན པཊིསྶཱཡནཱ པཏིསྶཱ, སཔྤཏིསྶཝཔཊིཔཏྟི. སཧ པཏིསྶཱཡཱཏི སཔྤཏིསྶོ. སཝིསེསཾ ཧིརིམནཏཱཡ, ཨོཏྟཔྤིབྷཱཝེན ཙ ཧིརོཏྟཔྤསམྤནྣོ. སེཁིཡདྷམྨཔཱརིཔཱུརིཝསེན སུནིཝཏྠོ སུཔཱརུཏོ. པཱསཱདིཀེནཱཏི པསཱདཱཝཧེན, ཨིཏྠམྦྷཱུཏལཀྑཎེ ཙེཏཾ ཀརཎཝཙནཾ. ཨེསེཝ ནཡོ ཨིཏོ པརེསུཔི ཚསུ པདེསུ. ཨབྷིཀྐནྟེནཱཏི ཨབྷིཀྐམེན. ཨིརིཡཱཔཐསམྤནྣོཏི སམྤནྣཨིརིཡཱཔཐོ. ཏེན སེསཨིརིཡཱཔཐཱནམྤི པཱསཱདིཀཏམཱཧ. ཨིནྡྲིཡེསུ གུཏྟདྭཱརོཏི ཙཀྑུནྡྲིཡཱདཱིསུ ཚསུ དྭཱརེསུ སུསཾཝིཧིཏཱརཀྑོ. བྷོཛནེ མཏྟཉྙཱུཏི པརིབྷུཉྫིཏབྦཏོ བྷོཛནསཉྙིཏེ ཙཏུབྦིདྷེཔི པཙྩཡེ པརིཡེསནཔཊིགྒཧཎཔརིབྷོགཱདིཝསེན སབྦསོ པམཱཎཉྙཱུ. ཛཱགརིཡམནུཡུཏྟོཏི པུབྦརཏྟཱཔརརཏྟཾ བྷཱཝནཱམནསིཀཱརསངྑཱཏཾ ཛཱགརིཡཾ སཱཏཙྩཀཱརིཏཱཝསེན ཨནུ ཨནུ ཡུཏྟོ ཏཏྠ ཡུཏྟཔཡུཏྟོ. སཏིསམྤཛཉྙེན སམནྣཱགཏོཏིཨཱདི ཡཐཱཝུཏྟསྶ ཨཱཙཱརསྶ སམྦྷཱརདསྶནཾ. ཏཏྠ ཨཔྤིཙྪོཏི ནིཨིཙྪོ. སནྟུཊྛོཏི ཡཐཱལཱབྷཱདིཝསེན སནྟོསེན ཏུཊྛོ. སཀྐཙྩཀཱརཱིཏི ཨཱདརཀཱརཱི. གརུཙིཏྟཱིཀཱརབཧུལོཏི ¶ གརུཊྛཱནིཡེསུ གརུཀརཎབཧུལོ. ཨཡཾ ཝུཙྩཏི ཨཱཙཱརོཏི ཨཡཾ སགཱརཝཏཱདི ཨཏྠཀཱམེཧི ཨཱཙརིཏབྦཏོ ཨཱཙཱརོ.

སཱིལཱདཱིནཾ གུཎཱནཾ ཨུཔནིསྶཡབྷཱུཏོ ཨུཔནིསྶཡགོཙརོ. སཏིསངྑཱཏོ ཙིཏྟསྶ ཨཱརཀྑབྷཱུཏོ ཨེཝ གོཙརོ ཨཱརཀྑགོཙརོ. ཀམྨཊྛཱནསངྑཱཏོ ཙིཏྟསྶ ཨུཔནིབནྡྷནཊྛཱནབྷཱུཏོ གོཙརོ ཨུཔནིབནྡྷགོཙརོ. ཨཔྤིཙྪཏཱདཱིཧི ¶ དསཧི ཝིཝཊྚནིསྶིཏཱཡ ཀཐཱཡ ཝཏྠུབྷཱུཏེཧི གུཎེཧི སམནྣཱགཏོ དསཀཐཱཝཏྠུགུཎསམནྣཱགཏོ. ཏཏོ ཨེཝ ཀལྱཱཎོ སུནྡརོ མིཏྟོཏི ཀལྱཱཎམིཏྟོ. ཏསྶ ལཀྑཎཾ པརཏོ ཨཱགམིསྶཏི. ཨསྶུཏཾ སུཏྟགེཡྻཱདིཾ. སུཎཱཏཱིཏི སུཏམཡཾ ཉཱཎཾ ཨུཔྤཱདེཏི. སུཏཾ པརིཡོདཱཔེཏཱིཏི ཏམེཝ ཡཐཱསུཏཾ ཨཝིསདཏཱཡ ཨཔརིཡོདཱཏཾ པུནཔྤུནཾ པརིཔུཙྪནཱདིནཱ ཝིསོདྷེཏི ནིཛྫཊཾ ནིགུམྦཾ ཀརོཏི. ཏཏྠ ཙ ཡེ ཀངྑཊྛཱནིཡཱ དྷམྨཱ, ཏེསུ སཾསཡཾ ཚིནྡནྟོ ཀངྑཾ ཝིཏརཏི. ཀམྨཀམྨཕལེསུ, རཏནཏྟཡེ ཙ སམྨཱདིཊྛིཡཱ ཨུཛུཀརཎེན དིཊྛིཾ ཨུཛུཾ ཀརོཏི. ཏཏོ ཨེཝ ཙ དུཝིདྷཱཡཔི སདྡྷཱསམྤདཱཡ ཙིཏྟཾ པསཱདེཏི. ཨཐ ཝཱ ཡཐཱསུཏཾ དྷམྨཾ པརིཡོདཔེཏྭཱ ཏཏྠཱགཏེ རཱུཔཱརཱུཔདྷམྨེ པརིགྒཧེཏྭཱ སཔཙྩཡཾ ནཱམརཱུཔཾ པརིགྒཎྷནྟོ སཏྟདིཊྛིཝངྐཝིདྷམནེན དིཊྛིཾ ཨུཛུཾ ཀརོཏི. དྷམྨཱནཾ པཙྩཡཔཙྩཡུཔྤནྣཏཱམཏྟདསྶནེན ཏཱིསུཔི ཨདྡྷཱསུ ཀངྑཾ ཝིཏརཏི. ཏཏོ པརཾ ཙ ཨུདཡབྦཡཉཱཎཱདིཝསེན ཝིཔསྶནཾ ཝཌྜྷེཏྭཱ ཨརིཡབྷཱུམིཾ ཨོཀྐམནྟོ ཨཝེཙྩཔསཱདེན རཏནཏྟཡེ ཙིཏྟཾ པསཱདེཏི. ཏཐཱབྷཱུཏོཝ ཏསྶ ཀལྱཱཎམིཏྟསྶ ཨནུསིཀྑནེན སདྡྷཱདཱིཧི གུཎེཧི ན ཧཱཡཏི, ཨཉྙདཏྠུ ཝཌྜྷཏེཝ. ཏེནཱཧ ‘‘ཡསྶ ཝཱ’’ཏིཨཱདི.

ཨནྟརགྷརནྟི ཨནྟརེ ཨནྟརེ གྷརཱནི ཨེཏྠ, ཏཾ ཨེཏསྶཱཏི ཝཱ ‘‘ཨནྟརགྷར’’ནྟི ལདྡྷནཱམཾ གོཙརགཱམཾ པཝིཊྛོ. ཏཏྠ གྷརེ གྷརེ བྷིཀྑཱཔརིཡེསནཱཡ ཝཱིཐིཾ པཊིཔནྣོ. ཨོཀྑིཏྟཙཀྑཱུཏི ཧེཊྛཱཁིཏྟཙཀྑུ. ཀིཏྟཀེན པན ཨོཀྑིཏྟཙཀྑུ ཧོཏཱིཏི ཨཱཧ ‘‘ཡུགམཏྟདསྶཱཝཱི’’ཏི. སུསཾཝུཏོཏི སཾཡཏོ. ཡཐཱ པནེཏྠ སུསཾཝུཏོ ནཱམ ཧོཏི, ཏཾ དསྶེཏུཾ ‘‘ན ཧཏྠིཾ ཨོལོཀེནྟོ’’ཏིཨཱདི ཝུཏྟཾ.

ཡཏྠཱཏི ཡེསུ སཏིཔཊྛཱནེསུ. ཙིཏྟཾ བྷཱཝནཱཙིཏྟཾ. ཨུཔནིབནྡྷཏཱིཏི ཨུཔནེཏྭཱ ནིབནྡྷཏི. ཝུཏྟཉྷེཏཾ –

‘‘ཡཐཱ ¶ ཐམྦྷེ ནིབནྡྷེཡྻ, ཝཙྪཾ དམཾ ནརོ ཨིདྷ;

བནྡྷེཡྻེཝཾ སཀཾ ཙིཏྟཾ, སཏིཡཱརམྨཎེ དལ༹ྷ’’ནྟི. (ཝིསུདྡྷི. ༡.༢༡༧; དཱི. ནི. ཨཊྛ. ༢.༣༧༤; མ. ནི. ཨཊྛ. ༡.༡༠༧; པཱརཱ. ཨཊྛ. ༢.༡༦༥; པཊི. མ. ཨཊྛ. ༢.༡.༡༦༣);

སཏིཔཊྛཱནཱནཾ ཨུཔནིབནྡྷགོཙརབྷཱཝཾ དསྶེཏུཾ ‘‘ཝུཏྟཉྷེཏ’’ནྟིཨཱདི ཝུཏྟཾ. ཏཏྠ སཀོ པེཏྟིཀོ ཝིསཡོཏི ཨཏྟནོ པིཏུ སམྨཱསམྦུདྡྷསྶ སནྟཀོ, ཏེན དིཊྛོ དསྶིཏོ ཙ ཝིསཡོ.

ཨཎུཔྤམཱཎེསཱུཏི ¶ པརམཱཎུཔྤམཱཎེསུ. ཨསཉྩིཙྩཨཱཔནྣསེཁིཡཨཀུསལཙིཏྟུཔྤཱདཱདིབྷེདེསཱུཏི ཨསཉྩིཙྩ ཨཱཔནྣསེཁིཡེསུ ཨཀུསལཙིཏྟུཔྤཱདཱདིབྷེདེསཱུཏི ཨེཝཾ ཨསཉྩིཙྩགྒཧཎཾ སེཁིཡཝིསེསནཾ དཊྛབྦཾ. སེཁིཡགྒཧཎེན ཙེཏྠ ཝཏྟཀྑནྡྷཀཱདཱིསུ (ཙཱུལ༹ཝ. ༣༥༦ ཨཱདཡོ) ཨཱགཏཝཏྟཱདཱིནམྤི གཧཎཾ. ཏེཔི ཧི སིཀྑིཏབྦཊྛེན ‘‘སེཁིཡཱ’’ཏི ཨིཙྪིཏཱ. ཏཐཱ ཧི མཱཏིཀཱཡཾ པཱརཱཛིཀཱདཱིནཾ ཝིཡ སེཁིཡཱནཾ པརིཙྪེདོ ན ཀཏོ. ཨེཝཉྩ ཀཏྭཱ ‘‘ཨསཉྩིཙྩ ཨཱཔནྣསེཁིཡཱ’’ཏི ཨསཉྩིཙྩགྒཧཎཾ སམཏྠིཏཾ ཧོཏི. ན ཧི མཱཏིཀཱཡཾ ཨཱགཏེསུ པཉྩསཏྟཏིཡཱ སེཁིཡེསུ ནོསཉྙཱཝིམོཀྑོ ནཱམ ཨཏྠི, ཨསཉྩིཙྩགྒཧཎེནེཝ ཙེཏྠ ཨསཏིཨཛཱནནཱནམྤི སངྒཧོ ཀཏོ. ཀེཙི པནེཏྠ ཨསིཉྩིཙྩ ཨཱཔནྣགྒཧཎེན ཨཙིཏྟཀཱཔཏྟིཡོ གཧིཏཱཏི ཝདནྟི, ཏཾ ཏེསཾ མཏིམཏྟཾ, གརུཀཱཔཏྟཱིསུཔི ཀཱསཉྩི ཨཙིཏྟཀབྷཱཝསབྦྷཱཝཏོ, ཨདྷིཊྛཱནཱཝིཀམྨསྶ, དེསནཱཝིཀམྨསྶེཝ ཝཱ སབྦལཧུཀསྶ ཝཛྫསྶ ཨིདྷཱདྷིཔྤེཏཏྟཱ. ཏེནཱཧ ‘‘ཡཱནི ཏཱནི ཝཛྫཱནི ཨཔྤམཏྟཀཱནི ཨོརམཏྟཀཱནི ལཧུཀཱནི ལཧུསམྨཏཱནཱི’’ཏིཨཱདི. ཨཱདིསདྡེན པཱཏིམོཀྑསཾཝརཝིསུདྡྷཏྠཾ ཨནཏིཀྐམནཱིཡཱནཾ ཨནཱཔཏྟིགམནཱིཡཱནཾ སངྒཧོ དཊྛབྦོ. བྷཡདསྶནསཱིལོཏི པརམཱཎུམཏྟཾ ཝཛྫཾ ཨཊྛསཊྛིཡོཛནསཏསཧསྶུབྦེདྷསིནེརུཔབྦཏསདིསཾ ཀཏྭཱ དསྶནསབྷཱཝོ, སབྦལཧུཀཾ ཝཱ དུབྦྷཱསིཏམཏྟཾ པཱརཱཛིཀསདིསཾ ཀཏྭཱ དསྶནསབྷཱཝོ. ཡཾ ཀིཉྩཱིཏི མཱུལཔཉྙཏྟིཨནུཔཉྙཏྟིསབྦཏྠཔཉྙཏྟིཔདེསཔཉྙཏྟིཨཱདིབྷེདཾ ཡཾ ཀིཉྩི སིཀྑིཏབྦཾ པཊིཔཛྫིཏབྦཾ པཱུརེཏབྦཾ སཱིལཾ. སམྨཱ ཨཱདཱཡཱཏི སམྨདེཝ སཀྐཙྩཾ, སབྦསོ ཙ ཨཱདིཡིཏྭཱ. ཨཡཾ པན ཨཱཙཱརགོཙརསམྤདཱ ཀིཾ པཱཏིམོཀྑསཱིལེ པརིཡཱཔནྣཱ, ཨུདཱཧུ ཨཔརིཡཱཔནྣཱཏི? པརིཡཱཔནྣཱ. ཡདི ཨེཝཾ ཀསྨཱ པུན ཝུཏྟཱཏི ཙོདནཾ སནྡྷཱཡཱཧ ‘‘ཨེཏྠ ཙཱ’’ཏིཨཱདི.

ཨིནྡྲིཡསཾཝརསཱིལཝཎྞནཱ

༡༥. ཨིནྡྲིཡསཾཝརསཱིལཾ ¶ པཱཏིམོཀྑསཾཝརསཱིལསྶ སམྦྷཱརབྷཱུཏཾ, ཏསྨིཾ སཏིཡེཝ ཨིཙྪིཏབྦནྟི ཝུཏྟཾ ‘‘སོཏི པཱཏིམོཀྑསཾཝརསཱིལེ ཋིཏོ བྷིཀྑཱུ’’ཏི. སམྤཱདིཏེ ཧི ཨེཏསྨིཾ པཱཏིམོཀྑསཾཝརསཱིལཾ སུགུཏྟཾ སུརཀྑིཏམེཝ ཧོཏི, སུསཾཝིཧིཏཀཎྚཀཝཏི ཝིཡ སསྶནྟི. ཀཱརཎཝསེནཱཏི ཨསཱདྷཱརཎཀཱརཎསྶ ཝསེན. ཨསཱདྷཱརཎཀཱརཎཝསེན ¶ ཧི ཕལཾ ཨཔདིསཱིཡཏི, ཡཐཱ ཡཝངྐུརོ བྷེརིསདྡོཏི. ནིསྶཡཝོཧཱརེན ཝཱ ཨེཏཾ ནིསྶིཏཝཙནཾ, ཡཐཱ མཉྩཱ ཨུཀྐུཊྛིཾ ཀརོནྟཱིཏི. རཱུཔནྟི རཱུཔཱཡཏནཾ. ཙཀྑུནཱ རཱུཔཾ དིསྭཱཏི ཨེཏྠ ཡདི ཙཀྑུ རཱུཔཾ པསྶེཡྻ, ཨཉྙཝིཉྙཱཎསམངྒིནོཔི པསྶེཡྻུཾ, ན ཙེཏཾ ཨཏྠི, ཀསྨཱ? ཨཙེཏནཏྟཱ ཙཀྑུསྶ. ཏེནཱཧ ‘‘ཙཀྑུ རཱུཔཾ ན པསྶཏི ཨཙིཏྟཀཏྟཱ’’ཏི. ཨཐ ཝིཉྙཱཎཾ རཱུཔཾ པསྶེཡྻ, ཏིརོཀུཊྚཱདིགཏམྤི ནཾ པསྶེཡྻ ཨཔྤཊིགྷབྷཱཝཏོ, ཨིདམྤི ནཏྠི སབྦསྶ ཝིཉྙཱཎསྶ དསྶནཱབྷཱཝཏོ. ཏེནཱཧ ‘‘ཙིཏྟཾ ན པསྶཏི ཨཙཀྑུཀཏྟཱ’’ཏི. ཏཏྠ ཡཐཱ ཙཀྑུསནྣིསྶིཏཾ ཝིཉྙཱཎཾ པསྶཏི, ན ཡཾ ཀིཉྩི. ཏཉྩ ཀེནཙི ཀུཊྚཱདིནཱ ཨནྟརིཏེ ན ཨུཔྤཛྫཏི, ཡཏྠ ཨཱལོཀསྶ ཝིབནྡྷོ. ཡཏྠ པན ན ཝིབནྡྷོ ཕལིཀགབྦྷཔཊལཱདིཀེ, ཏཏྠ ཨནྟརིཏེཔི ཨུཔྤཛྫཏེཝ. ཨེཝཾ ཝིཉྙཱཎཱདྷིཊྛིཏཾ ཙཀྑུ པསྶཏི, ན ཡཾ ཀིཉྩཱིཏི ཝིཉྙཱཎཱདྷིཊྛིཏཾ ཙཀྑུཾ སནྡྷཱཡེཏཾ ཝུཏྟཾ ‘‘ཙཀྑུནཱ རཱུཔཾ དིསྭཱ’’ཏི.

དྭཱརཱརམྨཎསངྒྷཊྚེཏི དྭཱརསྶ ཨཱརམྨཎེན སངྒྷཊྚེ སཏི, ཙཀྑུསྶ རཱུཔཱརམྨཎེ ཨཱཔཱཐགཏེཏི ཨདྷིཔྤཱཡོ. པསཱདཝཏྠུཀེན ཙིཏྟེནཱཏི ཙཀྑུཔསཱདཝཏྠུཀེན ཏནྣིསྶཱཡ པཝཏྟེན ཝིཉྙཱཎེན, ཡཾ ‘‘ཙཀྑུཝིཉྙཱཎ’’ནྟི ཝུཙྩཏི. པསྶཏཱིཏི ཨོལོཀེཏི. ཙཀྑུཔསཱདསནྣིསྶཡེ ཧི ཝིཉྙཱཎེ ཨཱལོཀཱནུགྒཧིཏཾ རཱུཔཱརམྨཎཾ སནྣིསྶཡགུཎེན ཨོབྷཱསེནྟེ ཏཾསམངྒིཔུགྒལོ ‘‘རཱུཔཾ པསྶཏཱི’’ཏི ཝུཙྩཏི. ཨོབྷཱསནཉྩེཏྠ ཨཱརམྨཎསྶ ཡཐཱསབྷཱཝཏོ ཝིབྷཱཝནཾ, ཡཾ ‘‘པཙྩཀྑཏོ གཧཎ’’ནྟི ཝུཙྩཏི. ཨུསུནཱ ལཀྑསྶ ཝེདྷེ སིཛ྄ཛྷནྟེ ཏསྶ སམྦྷཱརབྷཱུཏེན དྷནུནཱ ཝིཛ྄ཛྷཏཱིཏི ཝཙནཾ ཝིཡ ཝིཉྙཱཎེན རཱུཔདསྶནེ སིཛ྄ཛྷནྟེ ཙཀྑུནཱ རཱུཔཾ པསྶཏཱིཏི ཨཱིདིསཱི སསམྦྷཱརཀཐཱ ནཱམེསཱ ཧོཏི. སསམྦྷཱརཱ ཀཐཱ སསམྦྷཱརཀཐཱ, དསྶནསྶ ཀཱརཎསཧིཏཱཏི ཨཏྠོ. སསམྦྷཱརསྶ ཝཱ དསྶནསྶ ཀཐཱ སསམྦྷཱརཀཐཱ. ཏསྨཱཏི ཡསྨཱ ཀེཝལེན ཙཀྑུནཱ, ཀེཝལེན ཝཱ ཝིཉྙཱཎེན རཱུཔདསྶནཾ ནཏྠི, ཏསྨཱ.

ཨིཏྠིཔུརིསནིམིཏྟཾ ཝཱཏི ཨེཏྠ ཨིཏྠིསནྟཱནནིསྶིཏརཱུཔམུཁེན གཡ྄ཧམཱནཾ སཎྛཱནཾ ཐནམཾསཱཝིསདཏཱ ¶ ནིམྨསྶུམུཁཏཱ ཀེསབནྡྷནཝཏྠགྒཧཎཾ ཨཝིསདཊྛཱནགམནཱདི ཙ སབྦཾ ‘‘ཨིཏྠཱི’’ཏི སཉྫཱནནསྶ ཀཱརཎབྷཱཝཏོ ཨིཏྠིནིམིཏྟཾ. ཝུཏྟཝིཔརིཡཱཡཏོ པུརིསནིམིཏྟཾ ཝེདིཏབྦཾ. སུབྷནིམིཏྟཱདིཀཾ ཝཱཏི ཨེཏྠ རཱགུཔྤཏྟིཧེཏུབྷཱུཏོ ཨིཊྛཱཀཱརོ སུབྷནིམིཏྟཾ. ཨཱདི-སདྡེན པཊིགྷནིམིཏྟཱདཱིནཾ ¶ སངྒཧོ. སོ པན དོསུཔྤཏྟིཨཱདིཧེཏུབྷཱུཏོ ཨནིཊྛཱདིཨཱཀཱརོ ཝེདིཏབྦོ. ཀཱམཉྩེཏྠ པཱལི༹ཡཾ ཨབྷིཛ྄ཛྷཱདོམནསྶཱཝ སརཱུཔཏོ ཨཱགཏཱ, ཨུཔེཀྑཱནིམིཏྟསྶཱཔི པན སངྒཧོ ཨིཙྪིཏབྦོ, ཨསམཔེཀྑནེན ཨུཔྤཛྫནཀམོཧསྶཱཔི ཨསཾཝརབྷཱཝཏོ. ཏཐཱ ཧི ཝཀྑཏི ‘‘མུཊྛསཙྩཾ ཝཱ ཨཉྙཱཎཾ ཝཱ’’ཏི. ཨུཔེཀྑཱནིམིཏྟནྟི ཙེཏྠ ཨཉྙཱཎུཔེཀྑཱཡ ཝཏྠུབྷཱུཏཾ ཨཱརམྨཎཾ, ཏཉྩསྶ ཨསམཔེཀྑནཝསེན ཝེདིཏབྦཾ. ཨེཝཾ སངྑེཔཏོ རཱགདོསམོཧཱནཾ ཀཱརཎཾ ‘‘སུབྷནིམིཏྟཱདིཀ’’ནྟི ཝུཏྟཾ. ཏེནཱཧ ‘‘ཀིལེསཝཏྠུབྷཱུཏཾ ནིམིཏྟ’’ནྟི. དིཊྛམཏྟེཡེཝ སཎྛཱཏཱིཏི ‘‘དིཊྛེ དིཊྛམཏྟཾ བྷཝིསྶཏཱི’’ཏི (ཨུདཱ. ༡༠) སུཏྟེ ཝུཏྟནཡེན ཝཎྞཱཡཏནེ ཙཀྑུཝིཉྙཱཎེན, ཝཱིཐིཙིཏྟེཧི ཙ གཧིཏམཏྟེཡེཝ ཏིཊྛཏི, ན ཏཏོ པརཾ ཀིཉྩི སུབྷཱདིཨཱཀཱརཾ པརིཀཔྤེཏི. པཱཀཊབྷཱཝཀརཎཏོཏི པརིབྱཏྟབྷཱཝཀརཎཏོ ཝིབྷཱུཏབྷཱཝཀརཎཏོ. ཝིསབྷཱགཝཏྠུནོ ཧི ཧཏྠཱདིཨཝཡཝེསུ སུབྷཱདིཏོ པརིཀཔྤེནྟསྶ ཨཔརཱཔརཾ ཏཏྠ ཨུཔྤཛྫམཱནཱ ཀིལེསཱ པརིབྱཏྟཱ ཧོནྟཱིཏི ཏེ ཏེསཾ ཨནུབྱཉྫནཱ ནཱམ. ཏེ པན ཡསྨཱ ཏཐཱ ཏཐཱ སནྣིཝིཊྛཱནཾ བྷཱུཏུཔཱདཱཡརཱུཔཱནཾ སནྣིཝེསཱཀཱརོ. ན ཧི ཏཾ མུཉྩིཏྭཱ པརམཏྠཏོ ཧཏྠཱདི ནཱམ ཀོཙི ཨཏྠི. ཏསྨཱ ཝུཏྟཾ ‘‘ཧཏྠཔཱད…པེ… ཨཱཀཱརཾ ན གཎྷཱཏཱི’’ཏི. ཀིཾ པན གཎྷཱཏཱིཏི ཨཱཧ ‘‘ཡཾ ཏཏྠ བྷཱུཏཾ, ཏདེཝ གཎྷཱཏཱི’’ཏི. ཡཾ ཏསྨིཾ སརཱིརེ ཝིཛྫམཱནཾ ཀེསལོམཱདི བྷཱུཏུཔཱདཱཡམཏྟཾ ཝཱ, ཏདེཝ ཡཱཐཱཝཏོ གཎྷཱཏི. ཏཏྠ ཨསུབྷཱཀཱརགཧཎསྶ ནིདསྶནཾ དསྶེནྟོ ‘‘ཙེཏིཡཔབྦཏཝཱསཱི’’ཏིཨཱདིནཱ མཧཱཏིསྶཏྠེརཝཏྠུཾ ཨཱཧརི.

ཏཏྠ སུམཎྜིཏཔསཱདྷིཏཱཏི སུཊྛུ མཎྜིཏཱ པསཱདྷིཏཱ ཙ. ཨཱབྷརཎཱདཱིཧི ཨཱཧཱརིམེཧི མཎྜནཾ. སརཱིརསྶ ཨུཙྪཱདནཱདིཝསེན པཊིསངྑརཎཾ པསཱདྷནནྟི ཝདནྟི, ཨཱབྷརཎེཧི, པན ཝཏྠཱལངྐཱརཱདཱིཧི ཙ ཨལངྐརཎཾ པསཱདྷནཾ. ཨཱུནཊྛཱནཔཱུརཎཾ མཎྜནཾ. ཝིཔལླཏྠཙིཏྟཱཏི རཱགཝསེན ཝིཔརཱིཏཙིཏྟཱ. ཨོལོཀེནྟོཏི ཐེརོ ཀམྨཊྛཱནམནསིཀཱརེནེཝ གཙྪནྟོ སདྡཀཎྚཀཏྟཱ པུབྦབྷཱགམནསིཀཱརསྶ ཧསིཏསདྡཱནུསཱརེན ‘‘ཀིམེཏ’’ནྟི ཨོལོཀེནྟོ. ཨསུབྷསཉྙནྟི ཨཊྛིཀསཉྙཾ. ཨཊྛིཀཀམྨཊྛཱནཾ ཧི ཐེརོ ཏདཱ པརིཧརཏི. ཨརཧཏྟཾ པཱཔུཎཱིཏི ཐེརོ ¶ ཀིར ཏསྶཱ ཧསནྟིཡཱ དནྟཊྛིདསྶནེནེཝ པུབྦབྷཱགབྷཱཝནཱཡ སུབྷཱཝིཏཏྟཱ པཊིབྷཱགནིམིཏྟཾ, སཱཏིསཡཉྩ ཨུཔཙཱརཛ྄ཛྷཱནཾ ལབྷིཏྭཱ ཡཐཱཋིཏོཝ ཏཏྠ པཋམཛ྄ཛྷཱནཾ ཨདྷིགནྟྭཱ ཏཾ པཱདཀཾ ཀཏྭཱ ¶ ཝིཔསྶནཾ ཝཌྜྷེཏྭཱ མགྒཔརམྤརཱཡ ཨཱསཝཀྑཡཾ པཱཔུཎི. པུབྦསཉྙཾ ཨནུསྶརཱིཏི པུབྦཀཾ ཡཐཱརདྡྷཾ ཀཱལེན ཀཱལཾ ཨནུཡུཉྫིཡམཱནཾ ཨཊྛིཀཀམྨཊྛཱནཾ ཨནུསྶརི སམནྣཱཧརི. ཨནུམགྒནྟི ཨནུཔཐཾ ཏསྶཱ པདཱནུཔདཾ. ཐེརསྶ ཀིར བྷཱཝནཱཡ པགུཎབྷཱཝཏོ དནྟཊྛིདསྶནེནེཝ ཏསྶཱ སཀལསརཱིརཾ ཨཊྛིཀསངྒྷཱཏབྷཱཝེན ཨུཔཊྛཱསི. ན ཏཾ ‘‘ཨིཏྠཱི’’ཏི ཝཱ ‘‘པུརིསོ’’ཏི ཝཱ སཉྫཱནི. ཏེནཱཧ ‘‘ནཱབྷིཛཱནཱམི…པེ… མཧཱཔཐེ’’ཏི.

‘‘ཡསྶ ཙཀྑུནྡྲིཡཱསཾཝརསྶ ཧེཏཱུ’’ཏི ཝཏྭཱ པུན ‘‘ཏསྶ ཙཀྑུནྡྲིཡསྶ སཏིཀཝཱཊེན པིདཧནཏྠཱཡཱ’’ཏི ཝུཏྟཾ, ན ཨསཾཝརསྶཱཏི. ཡདིདཾ ཡཾ ཙཀྑུནྡྲིཡཱསཾཝརསྶ ཧེཏུ ཨབྷིཛ྄ཛྷཱདིཨནྭཱསྶཝནཾ དསྶིཏཾ, ཏཾ ཨསཾཝུཏཙཀྑུནྡྲིཡསྶེཝ ཧེཏུ པཝཏྟཾ དསྶིཏནྟི ཀཏྭཱ ཝུཏྟཾ. ཙཀྑུདྭཱརིཀསྶ ཧི ཨབྷིཛ྄ཛྷཱདིཨནྭཱསྶཝནསྶ ཏཾདྭཱརིཀཝིཉྙཱཎསྶ ཝིཡ ཙཀྑུནྡྲིཡཾ པདྷཱནཀཱརཎཾ. ཙཀྑུནྡྲིཡསྶ ཨསཾཝུཏཏྟེ སཏི ཏེ ཨནྭཱསྶཝནྟཱིཏི ཨསཾཝརིཡམཱནཙཀྑུནྡྲིཡཧེཏུཀོ སོ ཨསཾཝརོ ཏཐཱ ཝུཏྟོཏི. ཡཏྭཱདྷིཀརཎནྟི ཧི ཡསྶ ཙཀྑུནྡྲིཡསྶ ཀཱརཎཱཏི ཨཏྠོ. ཀཱིདིསསྶ ཙ ཀཱརཎཱཏི? ཨསཾཝུཏསྶ, ཀིཉྩ ཨསཾཝུཏཾ? ཡསྶ ཙཀྑུནྡྲིཡཱསཾཝརསྶ ཧེཏུ ཨབྷིཛ྄ཛྷཱདཡོ ཨནྭཱསྶཝནྟི, ཏསྶ སཾཝརཱཡཱཏི ཨཡམེཏྠ ཡོཛནཱ.

ཛཝནཀྑཎེ པན སཙེ དུསྶཱིལྱཾ ཝཱཏིཨཱདི པུན ཨཝཙནཏྠཾ ཨིདྷེཝ སབྦཾ ཝུཏྟནྟི ཚསུ དྭཱརེསུ ཡཐཱསམྦྷཝཾ ཝེདིཏབྦཾ. ན ཧི པཉྩདྭཱརེ ཀཱཡཝཙཱིདུཙྩརིཏསངྑཱཏཾ དུསྶཱིལྱཾ ཨཏྠི, ཏསྨཱ དུསྶཱིལྱཱསཾཝརོ མནོདྭཱརཝསེན, སེསཱསཾཝརོ ཚདྭཱརཝསེན ཡོཛེཏབྦོ. མུཊྛསཙྩཱདཱིནཾ ཧི སཏིཔཊིཔཀྑཱཀུསལདྷམྨཱདིབྷཱཝཏོ སིཡཱ པཉྩདྭཱརེ ཨུཔྤཏྟི, ན ཏྭེཝ ཀཱཡིཀཝཱཙསིཀཝཱིཏིཀྐམབྷཱུཏསྶ དུསྶཱིལྱསྶ ཏཏྠ ཨུཔྤཏྟི, པཉྩདྭཱརིཀཛཝནཱནཾ ཨཝིཉྙཏྟིཛནཀཏྟཱ. དུསྶཱིལྱཱདཡོ ཙེཏྠ པཉྩ ཨསཾཝརཱ སཱིལསཾཝརཱདཱིནཾ པཉྩནྣཾ སཾཝརཱནཾ པཊིཔཀྑབྷཱཝེན ཝུཏྟཱ. ཏསྨིཾ སཏཱིཏི ཏསྨིཾ ཨསཾཝརེ སཏི.

ཡཐཱ ¶ ཀིནྟི ཡེན པཀཱརེན ཛཝནེ ཨུཔྤཛྫམཱནོ ཨསཾཝརོ ‘‘ཙཀྑུནྡྲིཡེ ཨསཾཝརོ’’ཏི ཝུཙྩཏི, ཏཾ ནིདསྶནཾ ཀིནྟི ཨཏྠོ. ཡཐཱཏིཨཱདིནཱ ནགརདྭཱརེ ཨསཾཝརེ སཏི ཏཾསམྦནྡྷཱནཾ གྷརཱདཱིནཾ ཨསཾཝུཏཏཱ ཝིཡ ཛཝནེ ཨསཾཝརེ སཏི ཏཾསམྦནྡྷཱནཾ དྭཱརཱདཱིནཾ ཨསཾཝུཏཏཱཏི ཨེཝཾ ཨཉྙཱསཾཝརེ ཨཉྙཱསཾཝུཏཏཱ སཱམཉྙམེཝ ནིདསྶེཏི, ན པུབྦཱཔརསཱམཉྙཾ, ཨནྟོབཧིསཱམཉྙཾ ཝཱ. སཏི ཝཱ དྭཱརབྷཝངྒཱདིཀེ པུན ཨུཔྤཛྫམཱནཾ ཛཝནཾ བཱཧིརཾ ཝིཡ ཀཏྭཱ ནགརདྭཱརསམཱནཾ ཝུཏྟཾ ¶ , ཨིཏརཉྩ ཨནྟོནགརེ གྷརཱདིསམཱནཾ. པཙྩཡབྷཱཝེན ཧི པུརིམནིཔྥནྣཾ ཛཝནཀཱལེ ཨསནྟམྤི བྷཝངྒཱདི ཙཀྑཱདི ཝིཡ ཕལནིཔྥཏྟིཡཱ སནྟཾཡེཝ ནཱམ ཧོཏི. ན ཧི དྷརམཱནཾཡེཝ ‘‘སནྟ’’ནྟི ཝུཙྩཏི. ‘‘བཱཧིརཾ ཝིཡ ཀཏྭཱ’’ཏི ཙ པརམཏྠཏོ ཛཝནསྶ བཱཧིརབྷཱཝེ, ཨིཏརསྶ ཙ ཨབྦྷནྟརབྷཱཝེ ཨསཏིཔི ‘‘པབྷསྶརམིདཾ, བྷིཀྑཝེ, ཙིཏྟཾ, ཏཉྩ ཁོ ཨཱགནྟུཀེཧི ཨུཔཀྐིལིཊྛ’’ནྟིཨཱདི (ཨ. ནི. ༡.༤༩) ཝཙནཏོ ཨཱགནྟུཀབྷཱུཏསྶ ཀདཱཙི ཀདཱཙི ཨུཔྤཛྫམཱནསྶ ཛཝནསྶ བཱཧིརབྷཱཝོ, ཏབྦིདྷུརསབྷཱཝསྶ ཨིཏརསྶ ཨབྦྷནྟརབྷཱཝོ ཨེཀེན པརིཡཱཡེན ཧོཏཱིཏི ཀཏྭཱ ཝུཏྟཾ. ཛཝནེ ཝཱ ཨསཾཝརེ ཨུཔྤནྣེ ཏཏོ པརཾ དྭཱརབྷཝངྒཱདཱིནཾ ཨསཾཝརཧེཏུབྷཱཝཱཔཏྟིཏོ. ཨསཾཝརསྶ ཧི ཨུཔྤཏྟིཡཱ དྭཱརབྷཝངྒཱདཱིནཾ ཏསྶ ཧེཏུབྷཱཝོ པཉྙཱཡཏཱིཏི. ནགརདྭཱརསདིསེན ཛཝནེན པཝིསིཏྭཱ དུསྶཱིལྱཱདིཙོརཱནཾ དྭཱརབྷཝངྒཱདཱིསུ མུསནཾ ཀུསལབྷཎྜཝིནཱསནཾ ཀཐིཏཾ. ཡསྨིཾ ཧི དྭཱརེ ཨསཾཝརོ ཨུཔྤཛྫཏི, སོ ཏཏྠ དྭཱརཱདཱིནཾ སཾཝརཱུཔནིསྶཡབྷཱཝཾ ཨུཔཙྪིནྡནྟོཡེཝ པཝཏྟཏཱིཏི. དྭཱརབྷཝངྒཱདཱིནཾ ཛཝནེན སཧ སམྦནྡྷོ ཨེཀསནྟཏིཔརིཡཱཔནྣཏོ དཊྛབྦོ.

ཨེཏྠ ཙ ཙཀྑུདྭཱརེ རཱུཔཱརམྨཎེ ཨཱཔཱཐགཏེ ནིཡམིཏཱདིཝསེན ཀུསལཱཀུསལཛཝནེ སཏྟཀྑཏྟུཾ ཨུཔྤཛྫིཏྭཱ བྷཝངྒཾ ཨོཏིཎྞེ ཏདནུརཱུཔམེཝ མནོདྭཱརིཀཛཝནེ ཏསྨིཾཡེཝཱརམྨཎེ སཏྟཀྑཏྟུཾཡེཝ ཨུཔྤཛྫིཏྭཱ བྷཝངྒཾ ཨོཏིཎྞེ པུན ཏསྨིཾཡེཝ དྭཱརེ ཏདེཝཱརམྨཎཾ ནིསྶཱཡ ‘‘ཨིཏྠཱི པུརིསོ’’ཏིཨཱདིནཱ ཝཝཏྠཔེནྟཾ པསཱདརཛྫནཱདིཝསེན སཏྟཀྑཏྟུཾ ཛཝནཾ ཛཝཏི. ཨེཝཾ པཝཏྟམཱནཾ ཛཝནཾ སནྡྷཱཡ ‘‘ཛཝནེ དུསྶཱིལྱཱདཱིསུ ཨུཔྤནྣེསུ ཏསྨིཾ ཨསཾཝརེ སཏི དྭཱརམྤི ཨགུཏྟ’’ནྟིཨཱདི ཝུཏྟཾ.

ཏསྨིཾ པན ཛཝནེ. སཱིལཱདཱིསཱུཏི སཱིལསཾཝརསཏིསཾཝརཉཱཎསཾཝརཁནྟིསཾཝརཝཱིརིཡསཾཝརེསུ ཨུཔྤནྣེསུ. ཡཐཱ ཧི པགེཝ སཏིཨཱརཀྑཾ ཨནུཔཊྛཔེནྟསྶ ¶ དུསྶཱིལྱཱདཱིནཾ ཨུཔྤཏྟི, ཨེཝཾ པགེཝ སཏིཨཱརཀྑཾ ཨུཔཊྛཔེནྟསྶ སཱིལཱདཱིནཾ ཨུཔྤཏྟི ཝེདིཏབྦཱ. སདྡཱདཱིསུཔི ཡཐཱརཧཾ ནིམིཏྟཱནུབྱཉྫནཱནི ཝེདིཏབྦཱནི. སོཏཝིཉྙཱཎེན ཧི སདྡཾ སུཏྭཱ ‘‘ཨིཏྠིསདྡོ’’ཏི ཝཱ ‘‘པུརིསསདྡོ’’ཏི ཝཱ ཨིཊྛཱནིཊྛཱདིཀཾ ཝཱ ཀིལེསཝཏྠུབྷཱུཏཾ ནིམིཏྟཾ ན གཎྷཱཏི, སུཏམཏྟེ ཨེཝ སཎྛཱཏི. ཡོ ཙ གཱིཏསདྡཱདིཀསྶ ཀིལེསཱནཾ ཨནུ ཨནུ བྱཉྫནཏོ ‘‘ཨནུབྱཉྫན’’ནྟི ལདྡྷཝོཧཱརོ མནྡཏཱརཱདིཝསེན ཝཝཏྠིཏོ ཚཛྫཱདིབྷེདབྷིནྣོ ཨཱཀཱརོ, ཏམྤི ན གཎྷཱཏཱིཏི. ཨེཝཾ གནྡྷཱདཱིསུཔི ཡཐཱརཧཾ ཝཏྟབྦཾ. མནོདྭཱརེ པན སཱཝཛྫནབྷཝངྒཾ མནོདྭཱརཾ ཏསྨིཾ དྭཱརེ དྷམྨཱརམྨཎེ ¶ ཨཱཔཱཐགཏེ ཏཾ ཛཝནམནསཱཝ ཝིཉྙཱཡ ཝིཛཱནིཏྭཱཏིཨཱདིནཱ ཡོཛེཏབྦཾ. ཀིལེསོ ཨནུབནྡྷོ ཨེཏསྶཱཏི ཀིལེསཱནུབནྡྷོ, སོ ཨེཝ ནིམིཏྟཱདིགཱཧོ, ཏཏོ པརིཝཛྫནལཀྑཎཾ ཀིལེསཱནུབནྡྷནིམིཏྟཱདིགྒཱཧཔརིཝཛྫནལཀྑཎཾ. ཨཱདི-སདྡེན ཨནུབྱཉྫནཾ སངྒཎྷཱཏི.

ཨཱཛཱིཝཔཱརིསུདྡྷིསཱིལཝཎྞནཱ

༡༦. ཝུཏྟེཏི ཨིདྷེཝ ཨུདྡེསཝསེན པུབྦེ ཝུཏྟེ. ཏཐཱ ཧི ‘‘ཨཱཛཱིཝཧེཏུ པཉྙཏྟཱནཾ ཚནྣཾ སིཀྑཱཔདཱན’’ནྟི པདུདྡྷཱརཾ ཀཏྭཱ ཏཱནི པཱལི༹ཝསེནེཝ དསྶེཏུཾ ‘‘ཡཱནི ཏཱནཱི’’ཏིཨཱདི ཨཱརདྡྷཾ. ཏཏྠ ཡཱནི ཏཱནི ཨེཝཾ པཉྙཏྟཱནི ཚ སིཀྑཱཔདཱནཱིཏི སམྦནྡྷོ. ཨཱཛཱིཝཧེཏཱུཏི ཛཱིཝིཀནིམིཏྟཾ, ‘‘ཨེཝཱཧཾ པཙྩཡེཧི ཨཀིལམནྟོ ཛཱིཝིསྶཱམཱི’’ཏི ཨདྷིཔྤཱཡེན. ཨཱཛཱིཝཀཱརཎཱཏི ཏསྶེཝ ཝེཝཙནཾ. པཱཔིཙྪོཏི པཱཔིཀཱཡ ཨསནྟགུཎསམྦྷཱཝནིཙྪཱཡ སམནྣཱགཏོ. ཨིཙྪཱཔཀཏོཏི ཨིཙྪཱཡ ཨཔཀཏོ ཨུཔདྡུཏོ, ཨབྷིབྷཱུཏོ ཝཱ. ཨསནྟནྟི ཨཝིཛྫམཱནཾ. ཨབྷཱུཏནྟི ཨནུཔྤནྣཾ. ཨནུཔྤནྣཏྟཱ ཧི ཏསྶ ཏཾ ཨསནྟནྟི པུརིམསྶ པཙྪིམཾ ཀཱརཎཝཙནཾ. ཨུཏྟརིམནུསྶདྷམྨནྟི ཨུཏྟརིམནུསྶཱནཾ ཨུཀྐཊྛཔུརིསཱནཾ དྷམྨཾ, མནུསྶདྷམྨཏོ ཝཱ ཨུཏྟརི ཨུཀྐཊྛཾ. ཨུལླཔཏཱིཏི ཨུགྒཏཱཡུཀོ ལཔཏི. སཱིལཾ ཧི བྷིཀྑུནོ ཨཱཡུ, ཏཾ ཏསྶ ཏཐཱལཔནསམཀཱལམེཝ ཝིགཙྪཏི. ཏེནཱཧ ‘‘ཨཱཔཏྟི པཱརཱཛིཀསྶཱ’’ཏི པཱརཱཛིཀསངྑཱཏཱ ཨཱཔཏྟི ཨསྶ, པཱརཱཛིཀསཉྙིཏསྶ ཝཱ ཝཱིཏིཀྐམསྶ ཨཱཔཛྫནཾ ཨུལླཔནནྟི ཨཏྠོ. སཉྩརིཏྟཾ སམཱཔཛྫཏཱིཏི སཉྩརཎབྷཱཝཾ ཨཱཔཛྫཏི, ཨིཏྠིཡཱ ཝཱ པུརིསམཏིཾ, པུརིསསྶ ཝཱ ཨིཏྠིམཏིཾ ཨཱརོཙེཏཱིཏི ཨདྷིཔྤཱཡོ. ‘‘ཨིམེསཾ ཚནྣཾ སིཀྑཱཔདཱནཾ ཝཱིཏིཀྐམསྶ ཝསེནཱ’’ཏི སམྦནྡྷོ ཧེཊྛཱ དསྶིཏོ ཨེཝ.

ཀུཧནཱཏིཨཱདཱིསཱུཏི ¶ ཧེཊྛཱ ཨུདྡིཊྛཔཱལི༹ཡཱཝ པདུདྡྷཱརོ. ཨཡཾ པཱལཱི༹ཏི ཨཡཾ ཝིབྷངྒེ (ཝིབྷ. ༨༦༡) ཨཱགཏཱ ནིདྡེསཔཱལི༹.

༡༧. ཙཱིཝརཱདིཔཙྩཡཱ ལབྦྷནྟཱིཏི ལཱབྷཱ. ཏེ ཨེཝ སཀྐཙྩཾ ཨཱདརཝསེན དིཡྻམཱནཱ སཀྐཱརཱ. པཏྠཊཡསཏཱ ཀིཏྟིསདྡོ. ཏཾ ལཱབྷཉྩ སཀྐཱརཉྩ ཀིཏྟིསདྡཉྩ. སནྣིསྶིཏསྶཱཏི ཨེཏྠ ཏཎྷཱནིསྶཡོ ཨདྷིཔྤེཏོཏི ཨཱཧ ‘‘པཏྠཡནྟསྶཱ’’ཏི. ཨསནྟགུཎདཱིཔནཀཱམསྶཱཏི ཨསནྟེ ཨཏྟནི ཨཝིཛྫམཱནེ སདྡྷཱདིགུཎེ སམྦྷཱཝེཏུཀཱམསྶ. ཨསནྟགུཎསམྦྷཱཝནཏཱལཀྑཎཱ, པཊིགྒཧཎེ ¶ ཙ ཨམཏྟཉྙུཏཱལཀྑཎཱ ཧི པཱཔིཙྪཏཱ. ཨིཙྪཱཡ ཨཔཀཏསྶཱཏི པཱཔིཀཱཡ ཨིཙྪཱཡ སམྨཱཨཱཛཱིཝཏོ ཨཔེཏོ ཀཏོཏི ཨཔཀཏོ. ཏཐཱབྷཱུཏོ ཙ ཨཱཛཱིཝཱུཔདྡཝེན ཨུཔདྡུཏོཏི ཀཏྭཱ ཨཱཧ ‘‘ཨུཔདྡུཏསྶཱཏི ཨཏྠོ’’ཏི.

ཀུཧནམེཝ པཙྩཡུཔྤཱདནསྶ ཝཏྠཱུཏི ཀུཧནཝཏྠུ. ཏིཝིདྷམྤེཏཾ ཏཏྠ ཨཱགཏཾ ཏསྶ ནིསྶཡབྷཱུཏཱཡ ཨིམཱཡ པཱལི༹ཡཱ དསྶེཏུནྟི ཨེཝམཏྠོ དཊྛབྦོ. ཏདཏྠིཀསྶེཝཱཏི ཏེཧི ཙཱིཝརཱདཱིཧི ཨཏྠིཀསྶེཝ. པཊིཀྑིཔནེནཱཏི ཙཱིཝརཱདཱིནཾ པཊིཀྑིཔནཧེཏུ. ཨསྶཱཏི བྷཝེཡྻ. པཊིགྒཧཎེན ཙཱཏི ཙ-སདྡེན པུབྦེ ཝུཏྟཾ པཊིཀྑིཔནཾ སམུཙྩིནོཏི.

བྷིཡྻོཀམྱཏནྟི བཧུཀཱམཏཾ. ཡནྟི ཀིརིཡཱཔརཱམསནཾ, ཏསྨཱ ‘‘དྷཱརེཡྻཱ’’ཏི ཨེཏྠ ཡདེཏཾ སངྒྷཱཊིཾ ཀཏྭཱ དྷཱརཎཾ, ཨེཏཾ སམཎསྶ སཱརུཔྤནྟི ཡོཛནཱ. པཱཔཎིཀཱནཱིཏི ཨཱཔཎཏོ ཚཌྜིཏཱནི. ནནྟཀཱནཱིཏི ཨནྟརཧིཏཱནི ཙོལ༹ཁཎྜཱནི. ཨུཙྩིནིཏྭཱཏི ཨུཉྪནེན ཙིནིཏྭཱ སངྒཧེཏྭཱ. ཨུཉྪཱཙརིཡཱཡཱཏི ཨུཉྪཱཙརིཡཱཡ ལདྡྷེན. གིལཱནསྶ པཙྩཡབྷཱུཏཱ བྷེསཛྫསངྑཱཏཱ ཛཱིཝིཏཔརིཀྑཱརཱ གིལཱནཔཙྩཡབྷེསཛྫཔརིཀྑཱརཱ. པཱུཏིམུཏྟནྟི པུརཱཎསྶ, ཨཔུརཱཎསྶ ཙ སབྦསྶ གོམུཏྟསྶེཏཾ ནཱམཾ. པཱུཏིམུཏྟེནཱཏི པཱུཏིབྷཱཝེན མུཏྟེན པརེཧི ཚཌྜིཏེན, པཱུཏིབྷཱུཏེན ཝཱ གོམུཏྟེན. དྷུཏཝཱདོཏི པརེསམྤི དྷུཏགུཎཝཱདཱི. སམྨུཁཱིབྷཱཝཱཏི སམྨུཁཏོ ཝིཛྫམཱནཏྟཱ, ལབྦྷམཱནཏཱཡཱཏི ཨཏྠོ.

ཨཏྟཱནཾ ཨུཏྟརིམནུསྶདྷམྨཱདྷིགམསྶ སཱམནྟེ ཀཏྭཱ ཛཔྤནཾ སཱམནྟཛཔྤནཾ. མཧེསཀྑོཏི མཧཱནུབྷཱཝོ, ཨུཏྟརིམནུསྶདྷམྨཱདྷིགམེནཱཏི ཨདྷིཔྤཱཡོ. ‘‘མིཏྟོ’’ཏི སཱམཉྙཏོ ཝཏྭཱ པུན ཏཾ ཝིསེསེཏི ‘‘སནྡིཊྛོ སམྦྷཏྟོ’’ཏི ¶ . དིཊྛམཏྟོ ཧི མིཏྟོ སནྡིཊྛོ. དལ༹ྷབྷཏྟིཀོ སམྦྷཏྟོ. སཧཱཡོཏི སཧ ཨཱཡནཀོ, སཁཱཏི ཨཏྠོ. སཏྟཔདིནོ ཧི ‘‘སཁཱ’’ཏི ཝུཙྩནྟི. ཝིཧཱརོ པཱཀཱརཔརིཙྪིནྣོ སཀལོ ཨཱཝཱསོ. ཨཌྜྷཡོགོ དཱིགྷཔཱསཱདོ, གརུལ༹སཎྛཱནཔཱསཱདོཏིཔི ཝདནྟི. པཱསཱདོ ཙཏུརསྶཔཱསཱདོ. ཧམྨིཡཾ མུཎྜཙྪདནཔཱསཱདོ. ཀཱུཊཱགཱརཾ དྭཱིཧི ཀཎྞིཀཱཧི ཀཏྟབྦཔཱསཱདོ. ཨཊྚོ པཊིརཱཛཱུནམྤི པཊིབཱཧནཡོགྱོ ཙཏུཔཉྩབྷཱུམཀོ པཊིསྶཡཝིསེསོ. མཱལོ༹ ཨེཀཀཱུཊསངྒཧིཏོ ཨནེཀཀོཎཝནྟོ པཊིསྶཡཝིསེསོ. ཨུདྡཎྜོ ཨགབྦྷིཀཱ ཨེཀདྭཱརཱ དཱིགྷསཱལཱཏི ཝདནྟི. ཨཔརེ པན བྷཎནྟི – ཝིཧཱརོ ནཱམ དཱིགྷམུཁཔཱསཱདོ. ཨཌྜྷཡོགོ ཨེཀཔསྶེན ཚདནཀསེནཱསནཾ. ཏསྶ ཀིར ཨེཀཔསྶེ བྷིཏྟི ཨུཙྩཏརཱ ཧོཏི, ཨིཏརཔསྶེ ནཱིཙཱ, ཏེན ཏཾ ཨེཀཔསྶཚདནཀཾ ¶ ཧོཏི. པཱསཱདོ ཨཱཡཏཙཏུརསྶཔཱསཱདོ. ཧམྨིཡཾ མུཎྜཙྪདནཾ ཙནྡིཀངྒཎཡུཏྟཾ. གུཧཱ ཀེཝལཱ པབྦཏགུཧཱ. ལེཎཾ དྭཱརབདྡྷཾ. ཀཱུཊཱགཱརཾ ཡོ ཀོཙི ཀཎྞིཀཱབདྡྷཔཱསཱདོ. ཨཊྚོ བཧལབྷིཏྟིགེཧཾ. ཡསྶ གོཔཱནསིཡོ ཨགྒཧེཏྭཱ ཨིཊྛཀཱཧི ཨེཝ ཚདནཾ ཧོཏི. ཨཊྚཱལཀཱཀཱརེན ཀརཱིཡཏཱིཏིཔི ཝདནྟི. མཱལོ༹ ཝཊྚཱཀཱརེན ཀཏསེནཱསནཾ. ཨུདྡཎྜོ ཨེཀོ པཊིསྶཡཝིསེསོ. ཡོ ‘‘བྷཎྜསཱལཱ, ཨུདོསིཏ’’ནྟིཔི ཝུཙྩཏི. ཨུཔཊྛཱནསཱལཱ སནྣིཔཏནཊྛཱནཾ.

ཀུཙྪིཏརཛབྷཱུཏཱཡ པཱཔིཙྪཏཱཡ ནིརཏྠཀཾ ཀཱཡཝཙཱིཝིཔྥནྡནིགྒཎྷནཾ ཀོརཛཾ, ཏཾ ཨེཏསྶ ཨཏྠཱིཏི ཀོརཛིཀོ, ཀོཧཉྙེན སཾཡཏཀཱཡོ, ཨཏིཝིཡ, ཨབྷིཎྷཾ ཝཱ ཀོརཛིཀོ ཀོརཛིཀཀོརཛིཀོ. ཨཏིཔརིསངྐིཏོཏི ཀེཙི. ཨཏིཝིཡ ཀུཧོ ཀུཧཀཀུཧཀོ, སཱཏིསཡཝིམྷཱཔཀོཏི ཨཏྠོ. ཨཏིཝིཡ ལཔོ ལཔནཀོ ལཔཀལཔཀོ. མུཁསམྦྷཱཝིཀོཏི ཀོརཛིཀཀོརཛིཀཱདིབྷཱཝེན པཝཏྟཝཙནེཧི ཨཏྟནོ མུཁམཏྟེན ཨཉྙེཧི སམྦྷཱཝིཀོ. སོ ཨེཝརཱུཔོ ཨེཝརཱུཔཏཱཡ ཨེཝ ཨཏྟཱནཾ པརཾ ཝིཡ ཀཏྭཱ ‘‘ཨཡཾ སམཎོ’’ཏིཨཱདཱིནི ཀཐེཏི. གམྦྷཱིརནྟིཨཱདི ཏསྶཱ ཀཐཱཡ ཨུཏྟརིམནུསྶདྷམྨཔཊིབདྡྷཏཱཡ ཝུཏྟཾ.

སམྦྷཱཝནཱདྷིཔྤཱཡཀཏེནཱཏི ‘‘ཀཐཾ ནུ ཁོ མཾ ཛནོ ‘ཨརིཡོ’ཏི ཝཱ ‘ཝིསེསལཱབྷཱི’ཏི ཝཱ སམྦྷཱཝེཡྻཱ’’ཏི ཨིམིནཱ ཨདྷིཔྤཱཡེན ཀཏེན. གམནཾ སཎྛཔེཏཱིཏི ཝིསེསལཱབྷཱིནཾ གམནཾ ཝིཡ ཨཏྟནོ གམནཾ སཀྐཙྩཾ ཋཔེཏི ¶ , སཏོ སམྤཛཱནོཝ གཙྪནྟོ ཝིཡ ཧོཏི. པཎིདྷཱཡཱཏི ‘‘ཨརཧཱཏི མཾ ཛཱནནྟཱུ’’ཏི ཙིཏྟཾ སཎྛཔེཏྭཱ, པཏྠེཏྭཱ ཝཱ. སམཱཧིཏོ ཝིཡཱཏི ཛྷཱནསམཱདྷིནཱ སམཱཧིཏོ ཝིཡ. ཨཱཔཱཐཀཛ྄ཛྷཱཡཱིཏི མནུསྶཱནཾ ཨཱཔཱཐཊྛཱནེ སམཱདྷིསམཱཔནྣོ ཝིཡ ནིསཱིདནྟོ ཨཱཔཱཐཀེ ཛནསྶ པཱཀཊཊྛཱནེ ཛྷཱཡཱི. ཨིརིཡཱཔཐསངྑཱཏནྟི ཨིརིཡཱཔཐསཎྛཔནསངྑཱཏཾ.

པཙྩཡཔཊིསེཝནསངྑཱཏེནཱཏི ཨཡོནིསོ ཨུཔྤཱདིཏཱནཾ པཙྩཡཱནཾ པཊིསེཝནནྟི ཨེཝཾ ཀཐིཏེན, ཏེན ཝཱ པཙྩཡཔཊིསེཝནེན སངྑཱཏབྦེན ཀཐིཏབྦེན. ཨཉྙཾ ཝིཡ ཀཏྭཱ ཨཏྟནོ སམཱིཔེ བྷཎནཾ སཱམནྟཛཔྤིཏཾ. ཨཱ-ཀཱརསྶ རསྶཏྟཾ ཀཏྭཱ ‘‘ཨཊྛཔནཱ’’ཏི ཝུཏྟཾ. ཀུཧནཾ ཀུཧོ, ཏསྶ ཨཡནཱ པཝཏྟི ཀུཧཱཡནཱ, ཀུཧསྶ ཝཱ པུགྒལསྶ ཨཡནཱ གཏི ཀིརིཡཱ ཀུཧཱཡནཱ. ཀུཧེཏི, ཀུཧེན ཝཱ ཨིཏོཏི ཀུཧིཏོ, ཀུཧཀོ.

པུཊྛསྶཱཏི ¶ ‘‘ཀོ ཏིསྶོ, ཀོ རཱཛཔཱུཛིཏོ’’ཏི པུཊྛསྶ. ཨུདྡྷཾ ཀཏྭཱཏི ཨུཀྑིཔིཏྭཱ ཝིབྷཝསམྤཏྟིཨཱདིནཱ པགྒཧེཏྭཱ.

ཨུནྣཧནཱཏི ཨུདྡྷཾ ཨུདྡྷཾ བནྡྷནཱ པལིཝེཋནཱ. དྭེ ཀིར བྷིཀྑཱུ ཨེཀཾ གཱམཾ པཝིསིཏྭཱ ཨཱསནསཱལཱཡ ནིསཱིདིཏྭཱ ཨེཀཾ ཀུམཱརིཀཾ པཀྐོསིཾསུ. ཏཱཡ ཨཱགཏཱཡ ཏཏྲེཀོ ཨེཀཾ པུཙྪི ‘‘ཨཡཾ, བྷནྟེ, ཀསྶ ཀུམཱརིཀཱ’’ཏི? ‘‘ཨམྷཱཀཾ ཨུཔཊྛཱཡིཀཱཡ ཏེལཀནྡརིཀཱཡ དྷཱིཏཱ, ཨིམིསྶཱ མཱཏཱ མཡི གེཧཾ གཏེ སཔྤིཾ དདམཱནཱ གྷཊེནེཝ དེཏི, ཨཡམྤི མཱཏཱ ཝིཡ གྷཊེན དེཏཱི’’ཏི (ཝིབྷ. ཨཊྛ. ༨༦༢) ཨུཀྐཱཙེསི. ཨིམཾ སནྡྷཱཡ ཝུཏྟཾ ‘‘ཏེལཀནྡརིཀཝཏྠུ ཙེཏྠ ཝཏྟབྦ’’ནྟི.

དྷམྨཱནུརཱུཔཱ ཝཱཏི མཏྟཱཝཙནཱནུརཱུཔཾ ཝཱ. མཏྟཱཝཙནཾ ཧི ‘‘དྷམྨོ’’ཏི ཝུཙྩཏི. ཡཐཱཧ ‘‘སུབྷཱསིཏཾ ཨུཏྟམམཱཧུ སནྟོ, དྷམྨཾ བྷཎེ ནཱདྷམྨཾ ཏཾ དུཏིཡ’’ནྟི (སཾ. ནི. ༡.༢༡༣; སུ. ནི. ༤༥༢). ཏེན བཧུཾ ཝིཔྤལཔནམཱཧ, སཙྩཏོ ཝཱ ཨཉྙཱ སུབྷཱསིཏཱ ཝཱཙཱ ‘‘དྷམྨོ’’ཏི ཝེདིཏབྦོ. མུགྒསཱུཔསདིསཀམྨོ པུགྒལོ མུགྒསཱུཔྱོ. ཏེནཱཧ ‘‘ཨཡཾ པུགྒལོ མུགྒསཱུཔྱོཏི ཝུཙྩཏཱི’’ཏི. པརིབྷཊསྶ ཀམྨཾ པཱརིབྷཊྱཾ, ཏདེཝ པཱརིབྷཊྱཏཱ.

ནིམིཏྟེན ཙརནྟོ, ཛཱིཝནྟོ ཝཱ ནིམིཏྟཀོ, ཏསྶ བྷཱཝོ ནེམིཏྟིཀཏཱ. ཨཏྟནོ ཨིཙྪཱཡ པཀཱསནཾ ཨོབྷཱསོ. ཀོ པན སོཏི ¶ ? ‘‘ཨཛྫ བྷིཀྑཱུནཾ པཙྩཡཱ དུལླབྷཱ ཛཱཏཱ’’ཏིཨཱདིཀཱ པཙྩཡཔཊིསཾཡུཏྟཀཐཱ. ཨིཙྪིཏཝཏྠུསྶ སམཱིཔེ ཀཐནཾ སཱམནྟཛཔྤཱ.

ཨཀྐོསནབྷཡེནཱཔི དདེཡྻཱཏི དསཧི ཨཀྐོསཝཏྠཱུཧི ཨཀྐོསནཾ. ཏཐཱ ཝམྦྷནཱདཡོ. ཨུཔེཀྑནཱ ཨུཔཱསཀཱནཾ དཱཡཀཱདིབྷཱཝཏོ བཧི ཚཌྜནཱ. ཁིཔནཱཏི ཁེཔཝཙནཾ. ཏཾ པན ཨཝཧསིཏྭཱ ཝཙནཾ ཧོཏཱིཏི ཨཱཧ ‘‘ཨུཔྤཎྜནཱ’’ཏི. པཱཔནཱཏི ཨདཱཡཀཏྟསྶ, ཨཝཎྞསྶ ཝཱ པཏིཊྛཱཔནཾ. པརེསཾ པིཊྛིམཾསཁཱདནསཱིལོ པརཔིཊྛིམཾསིཀོ, ཏསྶ བྷཱཝོ པརཔིཊྛིམཾསིཀཏཱ. ཨབྦྷངྒནྟི ཨབྦྷཉྫནཾ. ནིཔིསིཏྭཱ གནྡྷམགྒནཱ ཝིཡཱཏི ཨནིཔྤིསིཏེ ཨལབྦྷམཱནསྶ གནྡྷསྶ ནིཔིསནེ ལཱབྷོ ཝིཡ པརགུཎེ ཨནིཔྤིསིཏེ ཨལབྦྷམཱནཱནཾ པཙྩཡཱནཾ ནིཔིསནེན ལཱབྷོ དཊྛབྦོཏི.

ནིཀཏྟུཾ ¶ ཨཔྤེན ལཱབྷེན བཧུཀཾ ཝཉྩེཏྭཱ གཧེཏུཾ ཨིཙྪནཾ ནིཛིགཱིསནཾ, ཏསྶ བྷཱཝོ ནིཛིགཱིསནཏཱ. ཏསྶེཝ ཨིཙྪནསྶ པཝཏྟིཨཱཀཱརོ, ཏཾསཧཛཱཏཾ ཝཱ གཝེསནཀམྨཾ.

ཨངྒནྟི ཧཏྠཔཱདཱདིཨངྒཱནི ཨུདྡིསྶ པཝཏྟཾ ཝིཛྫཾ. ནིམིཏྟནྟི ནིམིཏྟསཏྠཾ. ཨུཔྤཱཏནྟི ཨུཀྐཱཔཱཏདིསཱཌཱཧ-བྷཱུམིཙཱལཱདིཨུཔྤཱཏཔཊིབདྡྷཝིཛྫཾ. སུཔིནནྟི སུཔིནསཏྠཾ. ལཀྑཎནྟི ཨིཏྠིཔུརིསཱནཾ ལཀྑཎཛཱནནསཏྠཾ. མཱུསིཀཙྪིནྣནྟི ཝཏྠཱདཱིནཾ ཨསུཀབྷཱགེ མཱུསིཀཙྪེདེ སཏི ཨིདཾ ནཱམ ཕལཾ ཧོཏཱིཏི ཛཱནནཀསཏྠཾ. པལཱསགྒིཨཱདཱིསུ ཨིམིནཱ ནཱམ ཨགྒིནཱ ཧུཏེ ཨིདཾ ནཱམ ཧོཏཱིཏི ཨགྒིཝསེན ཧོམཝིདྷཱནཾ ཨགྒིཧོམཾ. ཨིམིནཱ ནཡེན དབྦིཧོམཾ ཝེདིཏབྦཾ. ཨཱདི-སདྡེན ཐུསཧོམཱདཱིནཾ, ཨཉྙེསཉྩ སུཏྟེ ཨཱགཏཱནཾ མིཙྪཱཛཱིཝཱནཾ སངྒཧོ དཊྛབྦོ. ཝཱིརིཡསཱདྷནཏྟཱ ཨཱཛཱིཝཔཱརིསུདྡྷིསཱིལསྶ ‘‘པཙྩཡཔརིཡེསནཝཱཡཱམོ’’ཏི ཝུཏྟཾ. ཏསྶ པཱརིསུདྡྷི ཨནཝཛྫབྷཱཝོ, ཡེན དྷམྨེན སམེན པཙྩཡལཱབྷོ ཧོཏི. ན ཧི ཨལསོ ཉཱཡེན པཙྩཡེ པརིཡེསིཏུཾ སཀྐོཏཱིཏི.

པཙྩཡསནྣིསྶིཏསཱིལཝཎྞནཱ

༡༨. པཊིསངྑཱཏི ཨཡཾ ‘‘སཡཾ ཨབྷིཉྙཱ’’ཏིཨཱདཱིསུ (མཧཱཝ. ༡༡) ཝིཡ ཡ-ཀཱརལོཔེན ནིདྡེསོ. ཡོནིསོཏི ཙེཏྠ ཨུཔཱཡཏྠོ ཡོནིསོ-སདྡོཏི དསྶེནྟོ ཨཱཧ ‘‘ཨུཔཱཡེན པཐེནཱ’’ཏི. ‘‘པཊིསངྑཱཡ ཉཏྭཱ’’ཏི ¶ ཝཏྭཱ ཏཡིདཾ པཊིསངྑཱནཾ པཙྩཝེཀྑཎནྟི དསྶེཏུཾ ‘‘པཙྩཝེཀྑིཏྭཱཏི ཨཏྠོ’’ཏིཨཱདི ཝུཏྟཾ. ཡཐཱ ཧི པཙྩཝེཀྑིཏྭཱཏི སཱིཏཔཊིགྷཱཏཱདིཀཾ ཏཾ ཏཾ པཡོཛནཾ པཏི པཏི ཨཝེཀྑིཏྭཱ, ཉཱཎེན པསྶིཏྭཱཏི ཨཏྠོ, ཨེཝཾ པཊིསངྑཱཡཱཏི ཏདེཝ པཡོཛནཾ པཏི པཏི སངྑཱཡ, ཛཱནིཏྭཱཏི ཨཏྠོ. ཉཱཎཔརིཡཱཡོ ཧི ཨིདྷ སངྑཱ-སདྡོཏི. ཨེཏྠ ཙ ‘‘པཊིསངྑཱ ཡོནིསོ’’ཏིཨཱདི ཀཱམཾ པཙྩཡཔརིབྷོགཀཱལེན ཝུཙྩཏི, དྷཱཏུཝསེན པན པཊིཀཱུལཝསེན ཝཱ པཙྩཝེཀྑཎཱཡ པཙྩཡསནྣིསྶིཏསཱིལཾ སུཛ྄ཛྷཏཱིཏི ཨཔརེ. བྷིཛྫཏཱིཏི ཀེཙི. ཨེཀེ པན པཋམཾ ཨེཝ པརིཡཏྟནྟི ཝདནྟི, ཝཱིམཾསིཏབྦཾ. ‘‘ཙཱིཝར’’ནྟི ཨེཀཝཙནཾ ཨེཀཏྟམཏྟཾ ཝཱཙཀནྟི ཨདྷིཔྤཱཡེན ‘‘ཨནྟརཝཱསཀཱདཱིསུ ཡཾ ཀིཉྩཱི’’ཏི ཝུཏྟཾ, ཛཱཏིསདྡཏཱཡ པན ཏསྶ པཱལི༹ཡཾ ཨེཀཝཙནནྟི ཡཏྟཀཱནི ཙཱིཝརཱནི ཡོགིནཱ པརིཧརིཏབྦཱནི, ཏེསཾ སབྦེསཾ ཨེཀཛ྄ཛྷཾ གཧཎནྟི སཀྐཱ ཝིཉྙཱཏུཾ, ཡཾ ཀིཉྩཱིཏི ཝཱ ཨནཝསེསཔརིཡཱདཱནམེཏཾ, ན ཨནིཡམཝཙནཾ. ‘‘ནིཝཱསེཏི ཝཱ པཱརུཔཏི ཝཱ’’ཏི ཝིཀཔྤནཾ པན པཊིསེཝནཔརིཡཱཡསྶ པརིབྷོགསྶ ¶ ཝིབྷཱགདསྶནནྟི ཏཾ པཉྙཔེཏྭཱ སཡནནིསཱིདན-ཙཱིཝརཀུཊིཀརཎཱདིཝསེནཱཔི པརིབྷོགསྶ སངྒཧོ དཊྛབྦོ.

པཡོཛནཱནཾ མརིཡཱདཱ པཡོཛནཱཝདྷི, ཏསྶ པརིཙྪིནྡནཝསེན ཡོ ནིཡམོ, ཏསྶ ཝཙནཾ པཡོཛནཱ…པེ… ཝཙནཾ. ཨིདཱནི ཏཾ ནིཡམཾ ཝིཝརིཏྭཱ དསྶེཏུཾ ‘‘ཨེཏྟཀམེཝ ཧཱི’’ཏིཨཱདི ཝུཏྟཾ. ཏཏྠ ཨཝདྷཱརཎེན ལཱིལཱ༹ཝིབྷཱུསཱཝིལམྦནཱནཊམྦརཱདིཝསེན ཝཏྠཔརིབྷོགཾ ནིསེདྷེཏི. ཏེནཱཧ ‘‘ན ཨིཏོ བྷིཡྻོ’’ཏི. ལཱིལཱ༹ཝསེན ཧི ཨེཀཙྩེ སཏྟཱ ཝཏྠཱནི པརིདཧནྟི ཙེཝ ཨུཔསཾཝིཡནྟི ཙ. ཡཐཱ ཏཾ ཡོབྦནེ ཋིཏཱ ནཱགརིཀམནུསྶཱ. ཨེཀཙྩེ ཝིབྷཱུསནཝསེན, ཡཐཱ ཏཾ རཱུཔཱུཔཛཱིཝིནིཨཱདཡོ. ཝིལམྦནཝསེན ཝིལམྦཀཱ. ནཊམྦརཝསེན བྷོཛཱདཡོ. ཨཛ྄ཛྷཏྟདྷཱཏུཀྑོབྷོ སཱིཏརོགཱདིཨུཔྤཱདཀོ. ཨུཏུཔརིཎཱམནཝསེནཱཏི ཨུཏུནོ པརིཝཏྟནཝསེན ཝིསབྷཱགསཱིཏཨུཏུསམུཊྛཱནེན. ཝཱ-སདྡེན ཧེམནྟཱདཱིསུ ཧིམཔཱཏཱདིཝསེན པཝཏྟསྶ སངྒཧོ དཊྛབྦོ, ན ཨུཔྤཱདེཏི སཱིཏནྟི ཨདྷིཔྤཱཡོ. ཡདཏྠཾ པན ཏཾ ཝིནོདནཾ, ཏཾ མཏྠཀཔྤཏྟཾ དསྶེཏུཾ ‘‘སཱིཏབྦྷཱཧཏེ’’ཏིཨཱདི ཝུཏྟཾ. སབྦཏྠཱཏི ‘‘ཨུཎྷསྶ པཊིགྷཱཏཱཡཱ’’ཏིཨཱདཱིསུ སབྦེསུ སེསཔཡོཛནེསུ. ཡདིཔི སཱུརིཡསནྟཱཔོཔི ཨུཎྷོཝ, ཏསྶ པན ཨཱཏཔགྒཧཎེན གཧིཏཏྟཱ ‘‘ཨགྒིསནྟཱཔསྶཱ’’ཏི ¶ ཝུཏྟཾ. ཨེཀཙྩོ དཱཝགྒིསནྟཱཔོ ཀཱཡཾ ཙཱིཝརེན པཊིཙྪཱདེཏྭཱ སཀྐཱ ཝིནོདེཏུནྟི ཨཱཧ ‘‘ཏསྶ ཝནདཱཧཱདཱིསུ སམྦྷཝོ ཝེདིཏབྦོ’’ཏི. ཌཾསཱཏི པིངྒལམཀྑིཀཱ. ཏེ པན ཡསྨཱ ཌཾསནསཱིལཱ, ཏསྨཱ ཝུཏྟཾ ‘‘ཌཾསནམཀྑིཀཱ’’ཏི. སཔྤཱདཡོཏི སཔྤསཏཔདིཨུཎྞནཱབྷིསརབཱུཝིཙྪིཀཱདཡོ. ཕུཊྛསམྥསྶོཏི ཕུཊྛཝིསམཱཧ. ཏིཝིདྷཱ ཧི སཔྤཱ – དཊྛཝིསཱ ཕུཊྛཝིསཱ དིཊྛཝིསཱ. ཏེསུ པུརིམཀཱ དྭེ ཨེཝ གཧིཏཱ. སཏཔདིཨཱདཱིནམྤི ཏཱདིསཱནཾ སངྒཎྷནཏྠཾ. ནིཡཏཔཡོཛནཾ ཨེཀནྟིཀཾ, སབྦཀཱལིཀཉྩ པཡོཛནཾ. ཧིརཱི ཀུཔྤཏི ནིལླཛྫཏཱ སཎྛཱཏི. ཏེནཱཧ ‘‘ཝིནསྶཏཱི’’ཏི. ཀཱུཔཱཝཏརཎཾ ཝཱ པཊིཙྪཱདནཾ ཨརཧཏཱིཏི ཀོཔིནཾ. ཧིརིཡིཏབྦཊྛེན ཧིརཱི ཙ ཏཾ ཀོཔིནཉྩཱཏི ཧིརིཀོཔིནནྟི ཨེཝམེཏྠ ཨཏྠོ དཊྛབྦོ. ཏསྶ ཙཱཏི ཙ-སདྡོ པུབྦེ ཝུཏྟཔཡོཛནཱནཾ སམྤིཎྜནཏྠོ.

ཡཾ ཀིཉྩི ཨཱཧཱརནྟི ཁཱདནཱིཡབྷོཛནཱིཡཱདིབྷེདཾ ཡཾ ཀིཉྩི ཨཱཧརིཏབྦཝཏྠུཾ. པིཎྜཱཡ བྷིཀྑཱཡ ཨུལཏཱིཏི པིཎྜོལོ, ཏསྶ ཀམྨཾ པིཎྜོལྱཾ. ཏེན པིཎྜོལྱེན བྷིཀྑཱཙརིཡཱཡ. པཏིཏཏྟཱཏི པཀྑིཔིཏཏྟཱ. པིཎྜཔཱཏོ པཏྟེ པཀྑིཏྟབྷིཀྑཱཧཱརོ. པིཎྜཱནཾ ཝཱ པཱཏོཏི གྷརེ གྷརེ ལདྡྷབྷིཀྑཱནཾ སནྣིཔཱཏོ. ‘‘ནཏྠི དཝཱ’’ཏིཨཱདཱིསུ (དཱི. ནི. ཨཊྛ. ༣.༣༠༥) སཧསཱ ཀིརིཡཱཔི ¶ ‘‘དཝཱ’’ཏི ཝུཙྩཏི, ཏཏོ ཝིསེསནཏྠཾ ‘‘དཝཏྠཾ, ཀཱིལཱ༹ནིམིཏྟནྟི ཝུཏྟཾ ཧོཏཱི’’ཏི ཨཱཧ. མུཊྛིཀམལླཱ མུཊྛིཡུདྡྷཡུཛ྄ཛྷནཀཱ. ཨཱདི-སདྡེན ནིབུདྡྷཡུཛ྄ཛྷནཀཱདཱིནཾ གཧཎཾ. བལམདནིམིཏྟནྟི བལཾ ནིསྶཱཡ ཨུཔྤཛྫནཀམདོ བལམདོ. ཏཾ ནིམིཏྟཾ, བལསྶ ཨུཔྤཱདནཏྠནྟི ཨཏྠོ. པོརིསམདནིམིཏྟནྟི པོརིསམདོ ཝུཙྩཏི པུརིསམཱནོ ‘‘ཨཧཾ པུརིསོ’’ཏི ཨུཔྤཛྫནཀམཱནོ. ཨསདྡྷམྨསེཝནཱསམཏྠཏཾ ནིསྶཱཡ པཝཏྟོ མཱནོ, རཱགོ ཨེཝ ཝཱ པོརིསམདོཏི ཀེཙི. ཏཾ ནིམིཏྟཾ. ཨནྟེཔུརིཀཱ རཱཛོརོདྷཱ. སབྦེསཾ སནྣིཝེསཡོགྱཏཱཡ ཝེསིཡོ རཱུཔཱུཔཛཱིཝིནིཡོ. མཎྜནཾ ནཱམ ཨིདྷཱཝཡཝཔཱརིཔཱུརཱིཏི ཨཱཧ ‘‘ཨངྒཔཙྩངྒཱནཾ པཱིཎབྷཱཝནིམིཏྟ’’ནྟི, པརིབྲཱུཧནཧེཏཱུཏི ཨཏྠོ. ནཊཱ ནཱམ རངྒནཊཱ. ནཙྩཀཱ ལངྒྷཀཱདཡོ. ཝིབྷཱུསནཾ སོབྷཱསམུཔྤཱདནནྟི ཨཱཧ ‘‘པསནྣཙྪཝིཝཎྞཏཱནིམིཏྟ’’ནྟི.

ཨེཏཾ པདཾ. མོཧཱུཔནིསྶཡཔྤཧཱནཏྠནྟི མོཧསྶ ཨུཔནིསྶཡཏཱཔཧཱནཱཡ. དཝཱ ཧི མོཧེན ཧོཏི, མོཧཉྩ ཝཌྜྷེཏཱིཏི ཏསྶཱ ཝཛྫནེན མོཧསྶ ཨནུཔནིསྶཡཏཱ. དོསཱུཔནིསྶཡཔྤཧཱནཏྠནྟི ཨིདཾ བལམདསྶ, པུརིསམདསྶ ¶ ཙ དོསཧེཏུནོ ཝསེན ཝུཏྟཾ, ཨིཏརསྶ པན ཝསེན ‘‘རཱགཱུཔནིསྶཡཔྤཧཱནཏྠ’’ནྟི ཝཏྟབྦཾ. མཎྜནཝིབྷཱུསནཔཊིཀྑེཔོ སིཡཱ མོཧཱུཔནིསྶཡཔྤཧཱནཱཡཔི, རཱགཱུཔནིསྶཡཏཱཡ པན ཨུཛུཔཊིཔཀྑོཏི ཝུཏྟཾ ‘‘རཱགཱུཔནིསྶཡཔྤཧཱནཏྠ’’ནྟི. ཡདིཔི ཨེཀཙྩསྶ དཝམདེ ཨཱརབྦྷ པརསྶ པཊིགྷསཾཡོཛནཱདཱིནཾ ཨུཔྤཏྟི ཧོཏིཡེཝ མནོཔདོསིཀདེཝཱདཱིནཾ ཝིཡ, ཨཏྟནོ པན དཝམདེ ཨཱརབྦྷ ཡེསཾ སཝིསེསཾ རཱགམོཧམཱནཱདཡོ པཱཔདྷམྨཱ ཨུཔྤཛྫནྟི. ཏེ སནྡྷཱཡ ‘‘ཨཏྟནོ སཾཡོཛནུཔྤཏྟིཔཊིསེདྷནཏྠ’’ནྟི ཝཏྭཱ མཎྜནཝིབྷཱུསནཱནི པཊིཙྩ སཝིསེསཾ པརསྶཔི རཱགམོཧཱདཡོ པཝཏྟནྟཱིཏི ‘‘པརསྶཔི སཾཡོཛནུཔྤཏྟིཔཊིསེདྷནཏྠ’’ནྟི ཝུཏྟཾ. ཨཡོནིསོ པཊིཔཏྟིཡཱཏི ཨེཏྠ ཀཱམསུཁལླིཀཱནུཡོགཾ མུཉྩིཏྭཱ སབྦཱཔི མིཙྪཱཔཊིཔཏྟི ཨཡོནིསོ པཊིཔཏྟི. པུརིམེཧི དྭཱིཧི པདེཧི ཨཡོནིསོ པཊིཔཏྟིཡཱ, པཙྪིམེཧི དྭཱིཧི ཀཱམསུཁལླིཀཱནུཡོགསྶ པཧཱནཾ ཝུཏྟནྟི ཝདནྟི. ‘‘ཙཏཱུཧིཔི ཙེཏེཧཱི’’ཏི པན ཝཙནཏོ སབྦེཧི ཨུབྷིནྣམྤི པཧཱནཾ ཝུཏྟནྟི ཝེདིཏབྦཾ. ཀཱམཀཱིལཱ༹པི དཝནྟོགདྷཱ ཧོཏིཡེཝ, པུརིསམདོཔི ཀཱམསུཁལླིཀཱནུཡོགསྶ ཧེཏུཡེཝཱཏི.

ཙཱཏུམཧཱབྷཱུཏིཀསྶཱཏི ཙཏུམཧཱབྷཱུཏེ སནྣིསྶིཏསྶ. རཱུཔཀཱཡསྶཱཏི ཙཏུསནྟཏིརཱུཔསམཱུཧསྶ. ཋིཏིཡཱཏི ཋིཏཏྠཾ. སཱ པནསྶ ཋིཏི པབནྡྷཝསེན ཨིཙྪིཏཱཏི ཨཱཧ ‘‘པབནྡྷཊྛིཏཏྠ’’ནྟི. པཝཏྟིཡཱཏི ཛཱིཝིཏིནྡྲིཡཔྤཝཏྟིཡཱ. ཏཐཱ ཧི ཛཱིཝིཏིནྡྲིཡཾ ‘‘ཡཱཔནཱ ཝཏྟནཱ’’ཏི ¶ (དྷ. ས. ༡༩, ༦༣༤) ཙ ནིདྡིཊྛཾ. ཏསྶཱ ཙ ཨཝིཙྪེདོ ཨཱཧཱརཱུཔཡོགེན ཧོཏི. ཀཱཡསྶ ཙིརཏརཾ ཡཱཝ ཨཱཡུཀཔྤོ, ཏཱཝ ཨཝཏྠཱནཾ ཡཱཔནཱཏི དསྶེནྟོ ‘‘ཙིརཀཱལཊྛིཏཏྠཾ ཝཱ’’ཏི ཨཱཧ. ཨིདཱནི ཝུཏྟམེཝཏྠཾ པཱཀཊཏརཾ ཀཱཏུཾ ‘‘གྷརཱུཔཏྠམྦྷམིཝཱ’’ཏིཨཱདི ཝུཏྟཾ. ཏཏྠཱཡཾ ཡོཛནཱ – ཡཐཱ ཛིཎྞགྷརསཱམིཀོ གྷརསྶ ཨུཔཏྠམྦྷནཾ ཀརོཏི ཏསྶ ཨཔཏནཏྠཾ, ཡཐཱ ཙ སཱཀཊིཀོ ཨཀྑབྦྷཉྫནཾ ཀརོཏི ཏསྶ སམྤཝཏྟནཏྠཾ, ཨེཝམེས ཡོགཱི ཀཱཡསྶ ཋིཏཏྠཾ, ཡཱཔནཏྠཉྩ པིཎྜཔཱཏཾ པཊིསེཝཏི པརིབྷུཉྫཏཱིཏི. ཨེཏེན ཋིཏི ནཱམ ཨཔཏནཾ ཡཱཔནཱ པཝཏྟཱིཏི དསྶེཏི. ན དཝམདམཎྜནཝིབྷཱུསནཏྠནྟི ཨིདཾ ‘‘ཡཱཝདེཝཱ’’ཏི ཨཝདྷཱརཎེན ནིཝཏྟིཏཏྠདསྶནཾ. ཏིཊྛནྟི ཨུཔཱདིནྣདྷམྨཱ ཨེཏཱཡཱཏི ཋིཏི, ཨཱཡཱུཏི ཨཱཧ ‘‘ཋིཏཱིཏི ཛཱིཝིཏིནྡྲིཡསྶེཏཾ ཨདྷིཝཙན’’ནྟི. ཏཐཱ ཧི ཏཾ ཨཱཡུ ‘‘ཋིཏཱི’’ཏི ནིདྡིཊྛཾ, ཋིཏིཡཱ ཡཱཔནཱཡཱཏི ཀཱཡསྶ ¶ ཋིཏིཧེཏུཏཱཡ ‘‘ཋིཏཱི’’ཏི ལདྡྷཝོཧཱརསྶ ཛཱིཝིཏིནྡྲིཡསྶ པཝཏྟནཏྠནྟི ཨཏྠོ. ཏེནཱཧ ‘‘ཛཱིཝིཏིནྡྲིཡཔཝཏྟཱཔནཏྠ’’ནྟི. ཨཱབཱདྷཊྛེནཱཏི ཝིབཱདྷནཊྛེན, རོགཊྛེན ཝཱ. ཛིགྷཙྪཱཔརམཱ ཧི རོགཱ. ཨུཔརམཏྠནྟི ཝཱུཔསམཏྠཾ. ཝཎཱལེཔནམིཝ ཝཎིཀོ. ཨུཎྷསཱིཏཱདཱིསུ ཨབྷིབྷཝནྟེསུ ཏཔྤཊིཀཱརཾ སཱིཏུཎྷཾ ཝིཡ པཊིསེཝཏཱིཏི སམྦནྡྷོ. མགྒབྲཧྨཙརིཡཾ ཋཔེཏྭཱ སིཀྑཏྟཡསངྒཧཱ སཱསནཱཝཙརིཏབྦཱ ཨནུསཱསནཱི སཱསནབྲཧྨཙརིཡནྟི ཨཱཧ ‘‘སཀལསཱསནབྲཧྨཙརིཡསྶ ཙ མགྒབྲཧྨཙརིཡསྶ ཙཱ’’ཏི. ཨནུགྒཧཎཏྠནྟི ཨནུ ཨནུ གཎྷནཏྠཾ སམྤཱདནཏྠཾ. ཀཱཡབལཾ ནིསྶཱཡཱཏི ཡཐཱསམཱརདྡྷཾ གུཎཝིསེསཔཱརིཔཱུརིཧེཏུབྷཱུཏཾ ཀཱཡབལམཏྟཾ ནིསྶཱཡ. ཏེནཱཧ ‘‘སིཀྑཏྟཡཱནུཡོགཝསེནཱ’’ཏིཨཱདི. ཀནྟཱརནིཏྠརཎཏྠིཀཱ ཛཱཡམྤཏིཀཱ, ནདཱིསམུདྡནིཏྠརཎཏྠིཀཱ ཙ པུཏྟམཾསཱདཱིནི ཡཐཱ ཨགིདྡྷཱ ཨམུཙྪིཏཱ ཀེཝལཾ ཏཾ ཏཾ ཨཏྠསིདྡྷིམེཝ ཨཝེཀྑནྟཱ པཊིསེཝནྟི ཏེཧི ཝིནཱ ཨསིཛ྄ཛྷནཏོ, ཨེཝམཡམྤི ཀེཝལཾ བྷཝཀནྟཱརནིཏྠརཎཏྠིཀོ ཨགིདྡྷོ ཨམུཙྪིཏོ ཏེན ཝིནཱ ཨསིཛ྄ཛྷནཏོ པིཎྜཔཱཏཾ པཊིསེཝཏཱིཏི ཨུཔམཱསཾསནྡནཾ.

ཨིཏཱིཏི པཀཱརཏྠེ ནིཔཱཏཔདཾ. ཏེན པཊིསེཝིཡམཱནསྶ པིཎྜཔཱཏསྶ པཊིསེཝནཱཀཱརོ གཡ྄ཧཏཱིཏི ཨཱཧ ‘‘ཨེཝཾ ཨིམིནཱ པིཎྜཔཱཏཔཊིསེཝནེནཱ’’ཏི. པུརཱཎནྟི བྷོཛནཏོ པུརིམཀཱལིཀཏྟཱ པུརཱཏནཾ. པཊིཧངྑཱམཱིཏི པཊིཧནིསྶཱམི. ནཝཉྩ ཝེདནཾ ན ཨུཔྤཱདེསྶཱམཱིཏི པཊིསེཝཏཱིཏི ཡོཛནཱ. ཀཱིདིསཾ, ཀཐཉྩཱཏི ཨཱཧ ‘‘ཨཔརིམིཏ…པེ… ཨཉྙཏརོ ཝིཡཱ’’ཏི. ཨཔརིམིཏཾ ཨཔརིམཱཎཾ བྷོཛནཾ པཙྩཡོ ཨེཏིསྶཱཏི ཨཔརིམིཏབྷོཛནཔཙྩཡཱ, ཏཾ ཨཔརིམིཏབྷོཛནཔཙྩཡཾ ཨཏྟནོ གཧཎཱིཏེཛཔམཱཎཏོ ཨཏིཀྐནྟཔམཱཎབྷོཛནཧེཏུཀནྟི ཨཏྠོ. ཡོ བཧུཾ བྷུཉྫིཏྭཱ ཨཏྟནོ ¶ དྷམྨཏཱཡ ཨུཊྛཱཏུཾ ཨསཀྐོནྟོ ‘‘ཨཱཧར ཧཏྠ’’ནྟི ཝདཏི, ཨཡཾ ཨཱཧརཧཏྠཀོ. ཡོ བྷུཉྫིཏྭཱ ཨཙྩུདྡྷུམཱཏཀུཙྪིཏཱཡ ཨུཊྛིཏོཔི སཱཊཀཾ ནིཝཱསེཏུཾ ན སཀྐོཏི, ཨཡཾ ཨལཾསཱཊཀོ. ཡོ བྷུཉྫིཏྭཱ ཨུཊྛཱཏུཾ ཨསཀྐོནྟོ ཏཏྠེཝ པརིཝཏྟཏི, ཨཡཾ ཏཏྲཝཊྚཀོ. ཡོ ཡཐཱ ཀཱཀེཧི ཨཱམསིཏུཾ སཀྐཱ, ཨེཝཾ ཡཱཝ མུཁདྭཱརཾ ཨཱཧཱརེཏི, ཨཡཾ ཀཱཀམཱསཀོ. ཡོ བྷུཉྫིཏྭཱ མུཁེ སནྡྷཱརེཏུཾ ཨསཀྐོནྟོ ཏཏྠེཝ ཝམཏི, ཨཡཾ བྷུཏྟཝམིཏཀོ. ཨེཏེསཾ ཨཉྙཏརོ ཝིཡ. ཨཐ ཝཱ པུརཱཎཝེདནཱ ནཱམ ཨབྷུཏྟཔཙྩཡཱ ཨུཔྤཛྫནཀཝེདནཱ. ཏཾ ‘‘པཊིཧནིསྶཱམཱི’’ཏི ¶ པཊིསེཝཏི. ནཝཝེདནཱ ནཱམ ཨཏིབྷུཏྟཔཙྩཡེན ཨུཔྤཛྫནཀཝེདནཱ. ཏཾ ‘‘ན ཨུཔྤཱདེསྶཱམཱི’’ཏི པཊིསེཝཏི. ཨཐ ཝཱ ནཝཝེདནཱ ནཱམ ཨབྷུཏྟཔཙྩཡེན ཨུཔྤཛྫནཀཝེདནཱ, ཏསྶཱ ཨནུཔྤནྣཱཡ ཨནུཔྤཛྫནཏྠམེཝ པཊིསེཝཏི. ཨབྷུཏྟཔཙྩཡཱ ཨུཔྤཛྫནཀཱཏི ཙེཏཾ ཁུདྡཱཡ ཝིསེསནཾ. ཡསྶཱ ཨཔྤཝཏྟི བྷོཛནེན ཀཱཏབྦཱ, ཏསྶཱ དསྶནཏྠཾ. ཨབྷུཏྟཔཙྩཡེན, བྷུཏྟཔཙྩཡེན ཙ ཨུཔྤཛྫནཀཱནུཔྤཛྫནཀཝེདནཱསུ པུརིམཱ ཡཐཱཔཝཏྟཱ ཛིགྷཙྪཱནིམིཏྟཱ ཝེདནཱ. སཱ ཧི ཨབྷུཉྫནྟསྶ བྷིཡྻོཔཝཌྜྷནཝསེན ཨུཔྤཛྫཏི. པཙྪིམཱཔི ཁུདྡཱནིམིཏྟཱཝ ཨངྒདཱཧསཱུལཱདིཝེདནཱ པཝཏྟཱ. སཱ ཧི བྷུཏྟཔཙྩཡཱ པུབྦེ ཨནུཔྤནྣཱཝ ནུཔྤཛྫིསྶཏཱིཏི ཨཡམེཏཱསཾ ཝིསེསོ. ཝིཧིཾསཱནིམིཏྟཏཱ ཙེཏཱསཾ ཝིཧིཾསཱཡ ཝིསེསོ.

ཡཱ ཝེདནཱ. ཨདྷུནཱཏི ཨེཏརཧི. ཨསཔྤཱཡཱཔརིམིཏབྷོཛནཾ ནིསྶཱཡཱཏི ཨསཔྤཱཡཱཔརིམིཏསྶ ཨཱཧཱརསྶ བྷུཉྫནཔཡོགཾ ཨཱགམྨ ཨུཔྤཛྫཏཱིཏི ཨཏྠོ. པུརཱཎཀམྨཔཙྩཡཝསེནཱཏི པུབྦེ པུརིམཛཱཏིཡཾ ཀཏཏྟཱ པུརཱཎསྶ ཀམྨསྶ པཙྩཡཏཱཝསེན པཡོགཝིཔཏྟིཾ ཨཱགམྨ ཨུཔྤཛྫནཱརཧཏཱཡ ཏཾ ཝཛྫེཏྭཱ པཡོགསམྤཏྟིཡཱ ཨུཔཊྛཱཔནཾ དུཀྑཝེདནཱཔཙྩཡགྷཱཏོ, པཊིཧནནཉྩ ཧོཏཱིཏི ཨཱཧ ‘‘ཏསྶཱ པཙྩཡཾ ཝིནཱསེནྟོ ཏཾ པུརཱཎཉྩ ཝེདནཾ པཊིཧངྑཱམཱི’’ཏི. ཨཡུཏྟཔརིབྷོགོ པཙྩཡེ ཨཔཙྩཝེཀྑིཏྭཱ པརིབྷོགོ. སོ ཨེཝ ཀཏཱུཔཙིཏཀམྨཏཱཡ ཀམྨཱུཔཙཡོ. ཏཾ ནིསྶཱཡ པཊིཙྩ ཨཱཡཏིཾ ཨནཱགཏེ ཀཱལེ ཨུཔྤཛྫནཏོ ཡཱ ཙཱཡཾ ‘‘ནཝཝེདནཱ’’ཏི ཝུཙྩཏཱིཏི ཡོཛནཱ. ཡུཏྟཔརིབྷོགཝསེནཱཏི པཙྩཝེཀྑིཏྭཱ པཙྩཡཱནཾ པརིབྷོགཝསེན, ཏསྶཱ ནཝཝེདནཱཡ མཱུལཾ ཨཡུཏྟཔརིབྷོགཀམྨཾ ཨནིབྦཏྟེནྟོ སབྦེན སབྦཾ ཨནུཔྤཱདེནྟོ. ཨེཏྟཱཝཏཱཏི ‘‘ཨིཏི པུརཱཎ’’ནྟིཨཱདིནཱ ཝུཏྟེན པདདྭཡེན. ‘‘ཝིཧིཾསཱུཔརཏིཡཱ’’ཏིཨཱདིནཱ ཝཱ པདཙཏུཀྐེན ཡུཏྟཔརིབྷོགསངྒཧོ པབྦཛིཏཱནུཙྪཝིཀསྶ པཙྩཡཔརིབྷོགསྶ ཝུཏྟཏྟཱ. ཨཏྟཀིལམཐཱནུཡོགཔྤཧཱནཾ ཛིགྷཙྪཱདིདུཀྑཔཊིགྷཱཏསྶ བྷཱསིཏཏྟཱ. ཛྷཱནསུཁཱདཱིནཾ ¶ པཙྩཡབྷཱུཏསྶ ཀཱཡསུཁསྶ ཨཝིསྶཛྫནཏོ དྷམྨིཀསུཁཱཔརིཙྩཱགོ ཙ དཱིཔིཏོ ཧོཏི.

ཨསཔྤཱཡཱཔརིམིཏཱུཔཡོགེན ཛཱིཝིཏིནྡྲིཡུཔཙྪེདཀོ, ཨིརིཡཱཔཐབྷཉྫནཀོ ཝཱ སིཡཱ པརིསྶཡོ, སཔྤཱཡཔརིམིཏཱུཔཡོགེན པན སོ ན ཧོཏི. ཏཐཱ སཏི ཙིརཀཱལཔྤཝཏྟིསངྑཱཏཱ སརཱིརསྶ ཡཱཏྲཱ ¶ ཡཱཔནཱ བྷཝིསྶཏཱིཏི ཨིམམཏྠཾ དསྶེནྟོ ‘‘པརིམིཏཔརིབྷོགེན…པེ… བྷཝིསྶཏཱི’’ཏི ཨཱཧ. ཡོ རོགོ སཱདྡྷོ ཨསཱདྡྷོ ཙ ན ཧོཏི, སོ ཡཱཔྱརོགོ, སོ ཨེཏསྶ ཨཏྠཱིཏི ཡཱཔྱརོགཱི. སོ ཧི ནིཙྩཀཱལཾ བྷེསཛྫཾ ཨུཔསེཝཏི, ཏཐཱ ཨཡམྤཱིཏི. ཡདི ཡཱཏྲཱཔི ཡཱཔནཱ, པུབྦེཔི ‘‘ཡཱཔནཱཡཱ’’ཏི ཝུཏྟཾ, ཀོ ཨེཏྠ ཝིསེསོཏི? པུབྦེ ‘‘ཡཱཔནཱཡཱ’’ཏི ཛཱིཝིཏིནྡྲིཡཡཱཔནཱ ཨདྷིཔྤེཏཱ, ཨིདྷ པན ཙཏུནྣམྤི ཨིརིཡཱཔཐཱནཾ ཨཝིཙྪེདསངྑཱཏཱ ཡཱཔནཱ ཡཱཏྲཱཏི ཨཡམེཏྠ ཝིསེསོ. བུདྡྷཔཊིཀུཊྛེན མིཙྪཱཛཱིཝེན པཙྩཡཔརིཡེསནཱ ཨཡུཏྟཔརིཡེསནཱ. དཱཡཀདེཡྻདྷམྨཱནཾ, ཨཏྟནོ ཙ པམཱཎཾ ཨཛཱནིཏྭཱ པཊིགྒཧཎཾ, སདྡྷཱདེཡྻཝིནིཔཱཏནཏྠཾ ཝཱ པཊིགྒཧཎཾ ཨཡུཏྟཔཊིགྒཧཎཾ, ཡེན ཝཱ ཨཱཔཏྟིཾ ཨཱཔཛྫཏི. ཨཔཙྩཝེཀྑིཏྭཱ པརིབྷོགོ ཨཡུཏྟཔརིབྷོགོ. ཏེསཾ པརིཝཛྫནཾ དྷམྨེན སམེན པཙྩཡུཔྤཱདནཱདིཝསེན ཝེདིཏབྦཾ. དྷམྨེན ཧི པཙྩཡེ པརིཡེསིཏྭཱ དྷམྨེན པཊིགྒཧེཏྭཱ པཙྩཝེཀྑིཏྭཱ པརིབྷུཉྫནཾ ཨནཝཛྫཏཱ ནཱམ.

ཨརཏཱིཏི ཨུཀྐཎྛཱ. པནྟསེནཱསནེསུ, ཨདྷིཀུསལདྷམྨེསུ ཙ ཨནབྷིརཏི. ཏནྡཱིཏི པཙལཱཡིཀཱ ནིདྡཱ. ཝིཛམྦྷིཏཱཏི ཐིནམིདྡྷཱབྷིབྷཝེན ཀཱཡསྶ ཝིཛམྦྷནཱ. ཝིཉྙཱུཧི གརཧཱ ཝིཉྙཱུགརཧཱ. ཨེཀཙྩོ ཧི ཨནཝཛྫཾཡེཝ སཱཝཛྫཾ ཀརོཏི, ‘‘ལདྡྷཾ མེ’’ཏི པམཱཎཱདྷིཀཾ བྷུཉྫིཏྭཱ ཏཾ ཛཱིརཱཔེཏུཾ ཨསཀྐོནྟོ ཨུདྡྷཾཝིརེཙནཨདྷོཝིརེཙནཱདཱིཧི ཀིལམཏི, སཀལཝིཧཱརེ བྷིཀྑཱུ ཏསྶ སརཱིརཔཊིཛགྒནབྷེསཛྫཔརིཡེསནཱཔསུཏཱ ཧོནྟི. ཨཉྙེ ཏེ ‘‘ཀིཾ ཨིད’’ནྟི པུཙྪིཏྭཱ ‘‘ཨསུཀསྶ ཨུདརཾ ཨུདྡྷུམཱཏ’’ནྟིཨཱདཱིནི སུཏྭཱ ‘‘ནིཙྩཀཱལམེས ཨེཝཾཔཀཏིཀོ ཨཏྟནོ ཀུཙྪིཔམཱཎཾ ནཱམ ན ཛཱནཱཏཱི’’ཏི ནིནྡནྟི, ཨེཝཾ ཨནཝཛྫཾཡེཝ སཱཝཛྫཾ ཀརོཏི. ཨེཝཾ ཨཀཏྭཱ ‘‘ཨནཝཛྫཏཱ ཙ བྷཝིསྶཏཱི’’ཏི པཊིསེཝཏི. ཨཏྟནོ ཧི པཀཏིཨགྒིབལཱདིཾ ཛཱནིཏྭཱ ‘‘ཨེཝཾ མེ ཨརཏིཨཱདཱིནཾ ཨབྷཱཝེན ཀཱཡསུཁཏཱ, ཨགརཧིཏབྦཏཱ ཙ བྷཝིསྶཏཱི’’ཏི པམཱཎཡུཏྟམེཝ པཊིསེཝཏི. ཡཱཝཏཀོ བྷོཛནེན ཨཏྠོ, ཏསྶ སཱདྷནེན ཡཱཝདཏྠཾ ཨུདརསྶ པརིཔཱུརཎེན ཨུདརཱཝདེཧཀཾ བྷོཛནཾ ཡཱཝདཏྠཨུདརཱཝདེཧཀབྷོཛནཾ, ཏསྶ པརིཝཛྫནེན. སེཡྻཱཡ སཡནེན ལདྡྷབྦསུཁཾ སེཡྻསུཁཾ, ཨུབྷོཧི པསྶེཧི ¶ སམྤརིཝཏྟནཀཾ སཡནྟསྶ ཨུཔྤཛྫནསུཁཾ པསྶསུཁཾ ¶ , མིདྡྷེན ནིདྡཱཡནེན ཨུཔྤཛྫནསུཁཾ མིདྡྷསུཁཾ, ཏེསཾ སེཡྻ…པེ… སུཁཱནཾ པཧཱནཏོ ཙཏུནྣཾ ཨིརིཡཱཔཐཱནཾ ཡོགྱབྷཱཝསྶ པཊིཔཱདནཾ ཀཱཡསྶ ཙཏུཨིརིཡཱཔཐཡོགྱབྷཱཝཔཊིཔཱདནཾ, ཏཏོ. སུཁོ ཨིརིཡཱཔཐཝིཧཱརོ ཕཱསུཝིཧཱརོ. པཙྪིམེ ཝིཀཔྤེ, སབྦཝིཀཔྤེསུ ཝཱ ཝུཏྟཾ ཕཱསུཝིཧཱརལཀྑཎཾ ཨཱགམེན སམཏྠེཏུཾ ‘‘ཝུཏྟམྤི ཧེཏ’’ནྟིཨཱདི ཝུཏྟཾ. ཏཱིསུཔི ཝིཀཔྤེསུ ཨཱཧཱརསྶ ཨཱུནཔརིབྷོགཝསེནེཝ ཧི ཕཱསུཝིཧཱརོ ཝུཏྟོཏི.

ཨེཏྟཱཝཏཱཏི ‘‘ཡཱཏྲཱ’’ཏིཨཱདིནཱ ཝུཏྟེན པདཏྟཡེན. ‘‘ཡཱཏྲཱ ཙ མེ བྷཝིསྶཏཱི’’ཏི པཡོཛནཔརིགྒཧདཱིཔནཱ. ཡཱཏྲཱ ཧི ནཾ ཨཱཧཱརཱུཔཡོགཾ པཡོཛེཏཱིཏི. དྷམྨིཀསུཁཱཔརིཙྩཱགཧེཏུཀོ ཕཱསུཝིཧཱརོ མཛ྄ཛྷིམཱ པཊིཔདཱ ཨནྟདྭཡཔརིཝཛྫནཏོ. ཨིམསྨིཾ པན ཋཱནེ ཨཊྛ ཨངྒཱནི སམོདྷཱནེཏབྦཱནི – ‘‘ནེཝ དཝཱཡཱ’’ཏི ཨེཀཾ ཨངྒཾ, ‘‘ན མདཱཡཱ’’ཏི ཨེཀཾ, ‘‘ན མཎྜནཱཡཱ’’ཏི ཨེཀཾ, ‘‘ན ཝིབྷཱུསནཱཡཱ’’ཏི ཨེཀཾ, ‘‘ཡཱཝདེཝ ཨིམསྶ ཀཱཡསྶ ཋིཏིཡཱ ཡཱཔནཱཡཱ’’ཏི ཨེཀཾ, ‘‘ཝིཧིཾསཱུཔརཏིཡཱ བྲཧྨཙརིཡཱནུགྒཧཱཡཱ’’ཏི ཨེཀཾ, ‘‘ཨིཏི པུརཱཎཉྩ ཝེདནཾ པཊིཧངྑཱམི, ནཝཉྩ ཝེདནཾ ན ཨུཔྤཱདེསྶཱམཱི’’ཏི ཨེཀཾ, ‘‘ཡཱཏྲཱ ཙ མེ བྷཝིསྶཏཱི’’ཏི ཨེཀཾ. ‘‘ཨནཝཛྫཏཱ ཙ ཕཱསུཝིཧཱརོ ཙཱ’’ཏི ཨཡམེཏྠ བྷོཛནཱནིསཾསོ. མཧཱསིཝཏྠེརོ པནཱཧ ‘‘ཧེཊྛཱ ཙཏྟཱརི ཨངྒཱནི པཊིཀྑེཔོ ནཱམ, ཨུཔརི པན ཨཊྛངྒཱནི སམོདྷཱནེཏབྦཱནཱི’’ཏི. ཏཏྠ ‘‘ཡཱཝདེཝ ཨིམསྶ ཀཱཡསྶ ཋིཏིཡཱ’’ཏི ཨེཀཾ ཨངྒཾ, ‘‘ཡཱཔནཱཡཱ’’ཏི ཨེཀཾ, ‘‘ཝིཧིཾསཱུཔརཏིཡཱ’’ཏི ཨེཀཾ, ‘‘བྲཧྨཙརིཡཱནུགྒཧཱཡཱ’’ཏི ཨེཀཾ, ‘‘ཨིཏི པུརཱཎཉྩ ཝེདནཾ པཊིཧངྑཱམཱི’’ཏི ཨེཀཾ, ‘‘ནཝཉྩ ཝེདནཾ ན ཨུཔྤཱདེསྶཱམཱི’’ཏི ཨེཀཾ, ‘‘ཡཱཏྲཱ ཙ མེ བྷཝིསྶཏཱི’’ཏི ཨེཀཾ, ‘‘ཨནཝཛྫཏཱ ཙཱ’’ཏི ཨེཀཾ. ཕཱསུཝིཧཱརོ པན བྷོཛནཱནིསཾསོཏི. ཨེཝཾ ཨཊྛངྒསམནྣཱགཏཾ ཨཱཧཱརཾ ཨཱཧཱརེནྟོ པཊིསངྑཱ ཡོནིསོ པིཎྜཔཱཏཾ པཊིསེཝཏི ནཱམ.

ཡཏྠ ཡཏྠཱཏི བྷུམྨནིདྡེསེན སེན-སདྡསྶ ཨདྷིཀརཎཏྠཝུཏྟིམཱཧ. ཏཐཱ ཨཱསན-སདྡསྶཱཏི. ཨཌྜྷཡོགཱདིམྷཱིཏི ཨཱདི-སདྡེན པཱསཱདཱདིཾ, མཉྩཱདིཉྩ སངྒཎྷཱཏི. ཡཏྠ ཡཏྠ ཝིཧཱརེ ཝཱ ཨཌྜྷཡོགཱདིམྷི ཝཱ ཨཱསཏཱིཏི ཝིཧཱརཨཌྜྷཡོགཱདིཀེ ཨཱནེཏྭཱ སམྦནྡྷིཏབྦཾ. ཨིདྷ ཨཱདི-སདྡེན པཱིཋསནྠཏཱདཱིནམྤི སངྒཧོ ཝེདིཏབྦོ. པརིསཧནཊྛེནཱཏི ཨབྷིབྷཝནཊྛེན, ཝིབཱདྷནཊྛེནཱཏི ཨཏྠོ. ཨུཏུཡེཝ ཨུཏུཔརིསྶཡོཏི སཱིཏུཎྷཱདིཨུཏུཡེཝ ¶ ཨསཔྤཱཡོ ཝུཏྟནཡེན ཨུཏུཔརིསྶཡོ. ཏསྶ ཨུཏུཔརིསྶཡསྶ ཝིནོདནཏྠཾ, ཨནུཔྤནྣསྶ ཨནུཔྤཱདནཏྠཾ, ཨུཔྤནྣསྶ ཝཱུཔསམནཏྠཉྩཱཏི ཨཏྠོ. ནཱནཱརམྨཎཏོ ¶ པཊིསཾཧརིཏྭཱ ཀམྨཊྛཱནབྷཱུཏེ ཨེཀསྨིཾཡེཝ ཨཱརམྨཎེ ཙིཏྟསྶ སམྨདེཝ ལཡནཾ པཊིསལླཱནཾ, ཏཏྠ ཨཱརཱམོ ཨབྷིརཏི པཊིསལླཱནཱརཱམོ, ཏདཏྠཾ. སེནཱསནཾ ཧི ཝིཝིཏྟཾ ཡོགིནོ བྷཱཝནཱནུཀཱུལཾ སུཉྙཱགཱརབྷཱཝཏོ. ཏཾ པནེཏཾ ཨཏྠདྭཡཾ ཝིབྷཱཝེཏུཾ ‘‘ཡོ སརཱིརཱབཱདྷཙིཏྟཝིཀྑེཔཀརོ’’ཏིཨཱདི ཝུཏྟཾ. ཏཏྠ ཨེཀཱིབྷཱཝསུཁཏྠནྟི ཨེཀཱིབྷཱཝཧེཏུཀཾ སུཁཾ ཨེཀཱིབྷཱཝསུཁཾ, ཏདཏྠཾ. གཎསངྒཎིཀཀིལེསསངྒཎིཀཱབྷཱཝེན ཨུཔྤཛྫནཀསུཁཾ.

ཡདི ཨུཏུཡེཝ ཨུཏུཔརིསྶཡོ, ‘‘ཨུཏུ ཙ སཱིཏུཎྷ’’ནྟི སཱིཏུཎྷཔཊིགྷཱཏཾ ཝཏྭཱ ཨུཏུཔརིསྶཡཝིནོདནཾ ཀསྨཱ ཝུཏྟནྟི ཙོདནཾ སནྡྷཱཡཱཧ ‘‘ཀཱམཉྩཱ’’ཏིཨཱདི. ཏཏྠ ‘‘ནིཡཏཾ ཨུཏུཔརིསྶཡཝིནོདན’’ནྟི ཨེཏེན ‘‘སཱིཏསྶ པཊིགྷཱཏཱཡ ཨུཎྷསྶ པཊིགྷཱཏཱཡཱ’’ཏི ཨེཏྠ ཝུཏྟཾ སཱིཏུཎྷཾ ཨནིཡཏཾ ཀདཱཙི ཀདཱཙི ཨུཔྤཛྫནཀཾ, ཨུཏུཔརིསྶཡོ པན སབྦདཱབྷཱཝཱི ཨདྷིཔྤེཏོཏི དསྶེཏི. ཝུཏྟཔྤཀཱརོཏི ‘‘སཱིཏཱདིཀོ, ཨསཔྤཱཡོ’’ཏི ཙ ཨེཝཾ ཝུཏྟཔྤཀཱརོ ཝིཝཊངྒཎརུཀྑམཱུལཱདཱིསུ ནིསིནྣསྶ ཨཔརིགུཏྟིཡཱ ཨསཾཝུཏདྭཱརཱདིཏཱཡ པཱཀཊཔརིསྶཡཱ, ཨསཔྤཱཡརཱུཔདསྶནཱདིནཱ ཨཔཱཀཊཔརིསྶཡཱ ཙ བྷིཀྑུསྶ ཀཱཡཙིཏྟཱནཾ ཨཱབཱདྷཾ ཀརེཡྻུཾ. ཡཏྠ གུཏྟེ སེནཱསནེ ཨཱབཱདྷཾ ན ཀརོནྟི. ཨེཝཾ ཛཱནིཏྭཱཏི ཨུབྷཡཔརིསྶཡརཧིཏནྟི ཨེཝཾ ཉཏྭཱ པཊིསེཝནྟོ བྷིཀྑུ ཝེདིཏབྦོཏི སམྦནྡྷོ.

དྷཱཏུཀྑོབྷལཀྑཎསྶ, ཏཾཧེཏུཀདུཀྑཝེདནཱལཀྑཎསྶ ཝཱ རོགསྶ པཊིཔཀྑབྷཱཝོ པཊིཨཡནཊྛོ. ཏེནཱཧ ‘‘པཙྩནཱིཀགམནཊྛེནཱཏི ཨཏྠོ’’ཏི, ཝཱུཔསམནཊྛེནཱཏི ཝུཏྟཾ ཧོཏི. ཡསྶ ཀསྶཙཱིཏི སཔྤིཨཱདཱིསུ ཡསྶ ཀསྶཙི. སཔྤཱཡསྶཱཏི ཧི ཏསྶ ཝིཀཱརཝཱུཔསམེནཱཏི ཨདྷིཔྤཱཡོ. བྷིསཀྐསྶ ཀམྨཾ ཏེན ཝིདྷཱཏབྦཏོ. ཏེནཱཧ ‘‘ཏེན ཨནུཉྙཱཏཏྟཱ’’ཏི. ནགརཔརིཀྑཱརེཧཱིཏི ནགརཾ པརིཝཱརེཏྭཱ རཀྑཎཀེཧི. ཝིཝཊཔརིཀྑེཔོ པརིཀྑཱ ཨུཌྜཱཔོ པཱཀཱརོ ཨེསིཀཱ པལིགྷོ པཱཀཱརཔཏྠཎྜིལནྟི སཏྟ ‘‘ནགརཔརིཀྑཱརཱ’’ཏི ཝདནྟི. སཱིལཔརིཀྑཱརོཏི སུཝིསུདྡྷསཱིལཱལངྐཱརོ ¶ . ཨརིཡམགྒོ ཧི ཨིདྷ ‘‘རཐོ’’ཏི ཨདྷིཔྤེཏོ. ཏསྶ ཙ སམྨཱཝཱཙཱདཡོ ཨལངྐཱརཊྛེན ‘‘པརིཀྑཱརོ’’ཏི ཝུཏྟཱ. ཛཱིཝིཏཔརིཀྑཱརཱཏི ཛཱིཝིཏསྶ པཝཏྟིཀཱརཎཱནི. སམུདཱནེཏབྦཱཏི སམྨཱ ཨུདྡྷཾ ཨུདྡྷཾ ཨཱནེཏབྦཱ པརིཡེསིཏབྦཱ. པརིཝཱརོཔི ཧོཏི ཨནྟརཱཡཱནཾ པརིཏོ ཝཱརཎཏོ. ཏེནཱཧ ‘‘ཛཱིཝིཏ…པེ… རཀྑཎཏོ’’ཏི.

ཏཏྠ ཨནྟརནྟི ཝིཝརཾ, ཨོཀཱསོཏི ཨཏྠོ. ཝེརིཀཱནཾ ཨནྟརཾ ཨདཏྭཱ ཨཏྟནོ སཱམིཀཱནཾ ¶ པརིཝཱརེཏྭཱ ཋིཏསེཝཀཱ ཝིཡ རཀྑཎཏོ. ཨསྶཱཏི ཛཱིཝིཏསྶ. ཀཱརཎབྷཱཝཏོཏི ཙིརཔྤཝཏྟིཡཱ ཀཱརཎབྷཱཝཏོ. རསཱཡནབྷཱུཏཾ ཧི བྷེསཛྫཾ སུཙིརམྤི ཀཱལཾ ཛཱིཝིཏཾ པཝཏྟེཏིཡེཝ. ཡདིཔི ཨནུཔྤནྣཱ ཨེཝ དུཀྑཝེདནཱ བྷེསཛྫཔརིབྷོགེན པཊིཧཉྙནྟི, ན ཨུཔྤནྣཱ ཏཱསཾ སརསེནེཝ བྷིཛྫནཏོ, ཨུཔྤནྣསདིསཱ པན ‘‘ཨུཔྤནྣཱ’’ཏི ཝུཙྩནྟི. བྷཝཏི ཧི ཏཾསདིསེསུ ཏབྦོཧཱརོ, ཡཐཱ སཱ ཨེཝ ཏིཏྟིརི, ཏཱནིཡེཝ ཨོསདྷཱནཱིཏི. ཏསྨཱ ཝུཏྟཾ ‘‘ཨུཔྤནྣཱནནྟི ཛཱཏཱནཾ བྷཱུཏཱནཾ ནིབྦཏྟཱན’’ནྟི. སཉྩཡཏོ པཊྛཱཡ སོ དྷཱཏུཀྑོབྷོ སམུཊྛཱནཾ ཨེཏེསནྟི ཏཾསམུཊྛཱནཱ. ‘‘དུཀྑཝེདནཱ’’ཏི ཝཏྭཱ སཱ ཨཀུསལསབྷཱཝཱཔི ཨཏྠཱིཏི ཏཏོ ཝིསེསེཏུཾ ‘‘ཨཀུསལཝིཔཱཀཝེདནཱ’’ཏི ཝུཏྟཾ. བྱཱབཱདྷནཊྛེན བྱཱབཱདྷོ, བྱཱབཱདྷོཝ བྱཱབཛ྄ཛྷཾ, དུཀྑནྟི ཨཏྠོ. ནཏྠི ཨེཏྠ བྱཱབཛ྄ཛྷནྟི ཨབྱཱབཛ྄ཛྷཾ, ནིདྡུཀྑཏཱ. ཏེནཱཧ ‘‘ཨབྱཱབཛ྄ཛྷཔརམཏཱཡཱ’’ཏི ནིདྡུཀྑཔརམཏཱཡཱཏི. ཏཾ དུཀྑནྟི རོགནིམིཏྟཀཾ དུཀྑཾ.

ཙཱིཝརཱདཱིནཾ པཙྩཡཱནཾ ནིསྶཡནཾ པརིབྷོགོ ཨེཝཱཏི དསྶེཏུཾ ‘‘ཏེ པཊིཙྩ ནིསྶཱཡཱ’’ཏི ཝཏྭཱ ‘‘པརིབྷུཉྫམཱནཱ’’ཏི ཝུཏྟཾ. པཝཏྟནྟཱིཏི ཛཱིཝནྟི. ཛཱིཝནམྤི ཧི པཝཏྟནཾ, ཡཏོ ཛཱིཝིཏིནྡྲིཡཾ ‘‘པཝཏྟནརས’’ནྟི ཝུཙྩཏི.

ཙཏུཔཱརིསུདྡྷིསམྤཱདནཝིདྷིཝཎྞནཱ

༡༩. ཨེཝཾ པཱཏིམོཀྑསཾཝརཱདིབྷེདེན ནིདྡིཊྛཾ སཱིལཾ པུན སཱདྷནཝིབྷཱགེན དསྶེཏུཾ ‘‘ཨེཝམེཏསྨི’’ནྟིཨཱདིམཱརདྡྷཾ. ཏཏྠ སཱདྷཱིཡཏི སམྤཱདིཡཏི ཨེཏེནཱཏི སཱདྷནཾ, སདྡྷཱ སཱདྷནཾ ཨེཏསྶཱཏི སདྡྷཱསཱདྷནོ. ནནུ ཙ ཝཱིརིཡསཏིཔཉྙཱཧིཔི ཝིནཱ པཱཏིམོཀྑསཾཝརོ ན སིཛ྄ཛྷཏཱིཏི? སཙྩཾ ན སིཛ྄ཛྷཏི, སདྡྷཱཡ པན ཝིསེསཧེཏུབྷཱཝཾ སནྡྷཱཡ ཨེཝཾ ཝུཏྟནྟི དསྶེནྟོ ཨཱཧ

‘‘སཱཝཀཝིསཡཱཏཱིཏཏྟཱ ¶ སིཀྑཱཔདཔཉྙཏྟིཡཱ’’ཏི. གརུཀལཧུཀཱདིབྷེདེ ཨོཏིཎྞེ ཝཏྠུསྨིཾ ཏསྶ ཏསྶ ཨཔརཱདྷསྶ ཨནུརཱུཔཾ སིཀྑཱཔདཔཉྙཱཔནཾ ནཱམ སཱཝཀཱནཾ ཨཝིསཡོ, བུདྡྷཱནཾ ཨེཝ ཝིསཡོ. སིཀྑཱཔདཔཉྙཱཔནཾ ཏཱཝ ཏིཊྛཏུ, ཏསྶ ཀཱལོཔི ནཱམ སཱཝཀཱནཾ ཨཝིསཡོ, བུདྡྷཱནཾ ཨེཝ ཝིསཡོཏི དསྶེནྟོ ‘‘སིཀྑཱཔདཔཉྙཏྟིཡཱཙནཔཊིཀྑེཔོ ཙེཏྠ ནིདསྶན’’ནྟི ཨཱཧ. ཏཐཱ ཧི ཝུཏྟཾ ‘‘ཨཱགམེཧི ཏྭཾ སཱརིཔུཏྟ, ཨཱགམེཧི ཏྭཾ སཱརིཔུཏྟ, ཏཐཱགཏོཝ ཏཏྠ ཀཱལཾ ¶ ཛཱནིསྶཏཱི’’ཏི (པཱརཱ. ༢༡). ཏཏྠ ཙ-སདྡོ སམུཙྩཡཏྠོ. ཏེན ‘‘ཨཔཉྙཏྟཾ ན པཉྙཔེམ, པཉྙཏྟཾ ན སམུཙྪིནྡཱམ, ཡཐཱཔཉྙཏྟེསུ སིཀྑཱཔདེསུ སམཱདཱཡ ཝཏྟཱམཱ’’ཏི (པཱརཱ. ༥༦༥) ཨེཝམཱདཱིནཾ སངྒཧོ དཊྛབྦོ. སདྡྷཱཡཱཏི སདྡཧནེན སཏྠརི, དྷམྨེ ཙ སདྡྷཱཡ པཙྩུཔཊྛཱཔནེན. ཛཱིཝིཏེཔི པགེཝ ཛཱིཝིཏཔརིཀྑཱརེཏི ཨདྷིཔྤཱཡོ.

ཀིཀཱིཝ ཨཎྜནྟི ཀིཀཱིསཀུཎིཀཱ ཝིཡ ཨཏྟནོ ཨཎྜཾ. སཱ ཀིར ཛཱིཝིཏམྤི པརིཙྩཛིཏྭཱ ཨཎྜམེཝ རཀྑཏི. ཙམརཱིཝ ཝཱལདྷིནྟི ཙམརཱིམིགོ ཝིཡ ཨཏྟནོ ཝཱལདྷིཾ. ཙམརཱིམིགཱ ཀིར བྱཱདྷེན པརིཔཱཏིཡམཱནཱ ཛཱིཝིཏམྤི པརིཙྩཛིཏྭཱ ཀཎྜཀགུམྦཱདཱིསུ ལགྒཾ ཨཏྟནོ ཝཱལམེཝ རཀྑནྟི. པིཡཾཝ པུཏྟཾ ཨེཀཀནྟི ཨཱནེཏྭཱ སམྦནྡྷིཏབྦཾ. ཡཐཱ ཧི ཨེཀཔུཏྟཀོ ཀུཊུམྦིཀོ ཏཾ ཨེཀཔུཏྟཾ, ཨེཀནཡནོ ཙ ཏཾ ཨེཀནཡནཾ སུཊྛུཏརཾ རཀྑཏི. ཏཐེཝ སཱིལཾ ཨནུརཀྑམཱནཀཱཏི ཨནུཀམྤནཝསེན ཝུཏྟཾ. སུཔེསལཱཏི སུཊྛུ པིཡསཱིལཱ. སདཱ སབྦཀཱལཾ དཧརམཛ྄ཛྷིམཐེརཀཱལེསུ. ཚནྣམྤི གཱརཝཱནཾ ཝསེན སགཱརཝཱ, གརུཀཱརཝནྟོཏི ཨཏྠོ.

ཨེཝམེཝ ཁོཏི ཡཐཱ མཧཱསམུདྡོ ཋིཏདྷམྨོ ཝེལཾ ནཱཏིཀྐམཏི, ཨེཝམེཝ. མམ སཱཝཀཱཏི ཨརིཡསཱཝཀེ སནྡྷཱཡཱཧ. ཏེ ཧི དྷུཝསཱིལཱ. ཨིམསྨིཾ ཨཏྠེཏི ཛཱིཝིཏཧེཏུཔི སཱིལསྶ ཨཝཱིཏིཀྐམནེ.

མཧཱཝཏྟནིཨཊཝཱི ནཱམ ཝིཉྫྷཱཊཝཱི. ཧིམཝནྟཔསྶེ ཨཊཝཱིཏི ཀེཙི. ཐེརནྟི ནཱམགོཏྟཝསེན ཨཔཉྙཱཏཾ ཨེཀཾ ཐེརཾ. ནིཔཛྫཱཔེསུཾ གནྟྭཱ ཀསྶཙི མཱ ཨཱརོཙེཡྻཱཏི.

པཱུཏིལཏཱཡཱཏི ¶ གལོ༹ཙིལཏཱཡ. སམསཱིསཱིཏི ཛཱིཝིཏསམསཱིསཱི. ཡསྶ ཧི ཀིལེསསཱིསཾ ཨཝིཛྫཾ མགྒཔཊིཔཱཊིཡཱ ཨརཧཏྟམགྒོ པརིཡཱདིཡཏི, ཏཏོ ཨེཀཱུནཝཱིསཏིམེ པཙྩཝེཀྑཎཉཱཎེ པཏིཊྛཱཡ བྷཝངྒོཏྟརཎེ ཝཊྚསཱིསཾ ཛཱིཝིཏིནྡྲིཡཾ ཙུཏིཙིཏྟཾ པརིཡཱདིཡཏི, སོ ཨིམཱཡ ཝཱརསམཏཱཡ ‘‘ཛཱིཝིཏསམསཱིསཱི’’ཏི ཝུཙྩཏི. སོ ཙ ཐེརོ ཏཐཱ པརིནིབྦཱཡི. ཏེན ཝུཏྟཾ ‘‘སམསཱིསཱི ཧུཏྭཱ པརིནིབྦཱཡཱི’’ཏི. ཨབྷཡཏྠེརོ ཀིར མཧཱབྷིཉྙོ. ཏསྨཱ ཙེཏིཡཾ ཀཱརཱཔེསཱིཏི ཝདནྟི. ཨཔྤེཝཱཏི ཨཔྤེཝ ནཱམ ཨཏྟནོ ཛཱིཝིཏམྤི ཛཧེཡྻ, ན བྷིནྡེཏི ན བྷིནྡེཡྻ, ན ཝཱིཏིཀྐམེཡྻ.

སཏིཡཱ ¶ ཨདྷིཊྛིཏཱནནྟི པགེཝ ཨུཔཊྛིཏཱཡ སཏིཡཱ ཨཱརཀྑཝསེན ཨདྷིཊྛིཏཱནཾ ཨིནྡྲིཡཱནཾ. ཨནནྭཱསྶཝནཱིཡཏོཏི དྭཱརབྷཱཝེན ཨབྷིཛ྄ཛྷཱདཱིཧི ཨནནུབནྡྷིཏབྦཏོ. ཝརནྟི སེཊྛཾ. ཏཏྟཱཡཱཏི ཨུཎྷཱཡ. ཨཱདིཏྟཱཡཱཏི ཨཱདིཏོ པཊྛཱཡ དིཏྟཱཡ. སམྤཛྫལིཏཱཡཱཏི སམནྟཏོ ཛལནྟིཡཱ. སཛོཏིབྷཱུཏཱཡཱཏི ཨེཀཛཱལཱིབྷཱུཏཱཡ. སམྤལིམཊྛནྟི སབྦསོ ཨཱམཊྛཾ, ཨཉྩིཏནྟི ཨཏྠོ. ན ཏྭེཝ ཝརནྟི ཨཱནེཏྭཱ སམྦནྡྷིཏབྦཾ. རཱུཔེསཱུཏི རཱུཔཱརམྨཎེསུ. ཨནུབྱཉྫནསོ ནིམིཏྟགྒཱཧོཏི ཀིལེསཱནཾ ཨནུ ཨནུ བྱཉྫནཝསེན ཨུཔྤཱདནེན པཱཀཊཱིཀརཎཝསེན སུབྷཱདིནིམིཏྟགྒཱཧོ, ཨཐ ཝཱ ཨནུབྱཉྫནསོཏི ཧཏྠཔཱདཱདིཨནུབྱཉྫནཏོ, ནིམིཏྟགྒཱཧོཏི ཨིཏྠིཔུརིསཱདིསུབྷཱདིནིམིཏྟགྒཧཎཾ. ཙཀྑུདྭཱརཱདིཔཝཏྟསྶཱཏི ཙཀྑུདྭཱརཱདཱིཧི པཝཏྟསྶ. ཝིཉྙཱཎསྶཱཏི ཛཝནཝིཉྙཱཎསྶ. ནིམིཏྟཱདིགྒཱཧཾ ནིསེདྷེནྟེན སམྤཱདེཏབྦོཏི སམྦནྡྷོ. ཨསཾཝིཧིཏསཱཁཱཔརིཝཱརནྟི སམྨཱ ཨཝིཧིཏཝཏིཔརིཀྑེཔཾ. པརསྶཧཱརཱིཧཱིཏི པརསནྟཀཱཝཧཱརཀེཧི ཙོརེཧི. སམཏིཝིཛ྄ཛྷཏཱིཏི སབྦསོ ཨཏིཝིཛ྄ཛྷཏི ཨནུཔཝིསཏི.

རཱུཔེསཱུཏི རཱུཔཧེཏུ རཱུཔནིམིཏྟཾ. ཨུཔྤཛྫནཀཨནཏྠཏོ རཀྑ ཨིནྡྲིཡནྟི སམྦནྡྷོ. ཨེཝཾ སེསེསུ. ཨེཏེ ཧི དྭཱརཱཏི ཨེཏེ ཙཀྑཱདིདྭཱརཱ. སཏིཀཝཱཊེན ཨསཾཝུཏཏྟཱ ཝིཝཊཱ. ཏཏོ ཨེཝ ཨརཀྑིཏཱ. ཀིལེསུཔྤཏྟིཡཱ ཧེཏུབྷཱཝེན ཏཾསམངྒིནཾ ཧནནྟཱིཏི ཀཱརཎཱུཔཙཱརེནེཝ ཝུཏྟཾ. ཨེཏེ ཝཱ རཱུཔཱདཡོ. ཀིལེསཱནཾ ཨཱརམྨཎབྷཱུཏཱ དྭཱརཱ ཙཀྑཱདིདྭཱརཱ. ཏེ ཀཱིདིསཱ ཝིཝཊཱ ཨརཀྑིཏཱ ཨསཾཝུཏཙཀྑཱདིཧེཏུཾ ཏཾསམངྒིནཾ ཧནནྟཱིཏི ཀཱརཎཱུཔཙཱརེནེཝ ཝུཏྟཾ. ཨགཱརནྟི གེཧཾ. དུཙྪནྣནྟི ན སམྨཱ ཚཱདིཏཾ. ཨབྷཱཝིཏནྟི ལོཀུཏྟརབྷཱཝནཱརཧིཏཾ.

སམྤཱདིཏེཏིཨཱདིསྶ ¶ ཝོདཱནཔཀྑསྶ ཨཏྠོ ཝུཏྟཝིཔརིཡཱཡེན ཝེདིཏབྦོ. ཨཡཾ པན སབྦསོ ཀིལེསཱནཾ ཨནུཔྤཱདོ ཨཏིཨུཀྐཊྛདེསནཱ མགྒེནཱགཏསདིསཏྟཱ. སམྤཱདེཏབྦོཏི ‘‘ན པུནེཝཾ ཀརིསྶ’’ནྟི ཨདྷིཊྛཱནསུདྡྷིཡཱ སམྤཱདེཏབྦོ.

ཨདྷུནཱཔབྦཛིཏེནཱཏི ན ཙིརཔབྦཛིཏེན, ནཝཔབྦཛིཏེནཱཏི ཨཏྠོ. ཀཱམརཱགེན ཌཡ྄ཧཱམཱིཏི ཀཱམརཱགགྒིནཱ པརིཌཡ྄ཧཱམི. སོ ཙ པན དཱཧོ ཨིདཱནི ཙིཏྟགཏོཏི དསྶེནྟོ ཨཱཧ ‘‘ཙིཏྟཾ མེ པརིཌཡ྄ཧཏཱི’’ཏི. སཱདྷཱུཏི ཨཱཡཱཙནཱ. ནིབྦཱཔནནྟི ཏསྶ ནིབྦཱཔནུཔཱཡཾ. གོཏམཱཏི ཐེརཾ གོཏྟེན ཨཱལཔཏི.

སཉྙཱཡ ¶ ཝིཔརིཡེསཱཏི ‘‘ཨསུབྷེ སུབྷ’’ནྟི པཝཏྟསཉྙཱཝིཔརིཡེསཧེཏུ ཝིཔརཱིཏསཉྙཱནིམིཏྟཾ. ནིམིཏྟཾ པརིཝཛྫེཧི ཀཱིདིསཾ? རཱགཱུཔསཉྷིཏཾ རཱགུཔྤཏྟིཧེཏུབྷཱུཏཾ སུབྷནིམིཏྟཾ པརིཝཛྫེཧི ན མནསི ཀརོཧི. ན ཀེཝལཾ སུབྷནིམིཏྟསྶཱམནསིཀཱརོ ཨེཝ, ཨཐ ཁོ ཨསུབྷབྷཱཝནཱཡ ཨཏྟནོ ཙིཏྟཾ བྷཱཝེཧི. ཀཐཾ? ཨེཀགྒཾ སུསམཱཧིཏཾ ཡཐཱ ཏཾ ཨསུབྷཱརམྨཎེ ཝིཀྑེཔཱབྷཱཝེན ཨེཀགྒཾ, སུཊྛུ ཨཔྤིཏབྷཱཝེན སུསམཱཧིཏཉྩ ཧོཏི, ཨེཝཾ བྷཱཝེཧཱིཏི. ཨེཝཾ སམཐབྷཱཝནཱཡ ཀཱམརཱགསྶ ཝིཀྑམྦྷནཾ དསྶེཏྭཱ ཨིདཱནི སམུཙྪེདནཝིདྷིཾ དསྶེཏུཾ ‘‘སངྑཱརེ’’ཏིཨཱདི ཝུཏྟཾ. ཏཏྠ སངྑཱརེ པརཏོ པསྶཱཏི སབྦེཔི སངྑཱརེ ཨཝིདྷེཡྻཀཏཱཡ ‘‘པརེ’’ཏི པསྶ. ཨནིཙྩཏཱཡ པན ཨུདཡབྦཡཔཊིཔཱིལི༹ཏཏྟཱ དུཀྑཏོ, ཨནཏྟསབྷཱཝཏྟཱ, ཨཏྟཝིརཧཏོ ཙ ནོ ཨཏྟཏོ པསྶ. ཨེཝཾ ལཀྑཎཏྟཡཾ ཨཱརོཔེཏྭཱ ཝིཔསྶནཾ ཝཌྜྷེནྟོ མགྒཔཊིཔཱཊིཡཱ ཙཏུཏྠམགྒེན སབྦསོ ནིབྦཱཔེཧི མཧཱརཱགཾ ཏེབྷཱུམཀསྶ ཨབྷིབྷཝནཏོ མཧཱཝིསཡཏཱཡ མཧཱརཱགཾ ཝཱུཔསམེཧི. ཡཐཱ ཨེཏརཧི, ཨེཝཾ མཱ ཌཡ྄ཧིཏྠོ པུནཔྤུནནྟི དལ༹ྷཏརཾ རཱགཝིནོདནེ ནིཡོཛེསི.

ཨེཝཾ ཨིནྡྲིཡསཾཝརསཱིལསྶ སམྤཱདནེ ཝིདྷིཾ དསྶེཏྭཱ ཨེཝཾ ཏཾ སུསམྤཱདིཏཾ ཧོཏཱིཏི ནཡཾ དསྶེཏུཾ ‘‘ཨཔིཙཱ’’ཏིཨཱདིནཱ ཏཏྠ པརིཔཱུརཀཱརིནོ ཐེརེ ནིདསྶེཏི. ཏཏྠ ‘‘ལེཎཾ ན ཨུལློཀིཏཔུབྦ’’ནྟི ཨིདཾ སབྦཏྠེཝ ཐེརསྶ ཡུགམཏྟདསྶིཏཱཡ ཝུཏྟཾ. ཀིཾ པན ཐེརོ སེནཱསནཾ ན སོདྷེཏི ¶ ? ‘‘ཨུལློཀཱ པཋམཾ ཨོཧཱརེཏབྦ’’ནྟི ཧི ཝུཏྟཾ, ཨནྟེཝཱསིཀཱདཡོ ཨེཝ ཀིརསྶ སེནཱསནཾ སོདྷེནྟི. ཨསྶ ནཱགརུཀྑསྶ.

ཏསྨིཾ གཱམེཏི མཧཱགཱམེ. ཏརུཎཱ ཐཉྙཔིཝནཀཱ པུཏྟདྷཱིཏརོ ཡཱསཾ ཏཱ ཏརུཎཔུཏྟཱ, ཏཱསཾ. ལཉྫཱཔེསཱིཏི ཐནཔཊྚིཀཱཡ ཐནེ བནྡྷཱཔེཏྭཱ རཱཛམུདྡིཀཱཡ ལཉྫཱཔེསི. རཱཛཱ ཐེརཾ ཙིརཏརཾ དཊྛུཾ ཀཱལཝིཀྑེཔཾ ཀརོནྟོ ‘‘སྭེ སཱིལཱནི གཎྷིསྶཱམཱི’’ཏི ཨཱཧ. ཐེརོ རཉྙོ ཙ དེཝིཡཱ ཙ ཝནྡནཀཱལེ སཏྟཱཀཱརམཏྟཾ གཎྷཱཏི. ཨིཏྠཱི པུརིསོཏི པན ཝིཝེཀཾ ན ཀརོཏི. ཏེནཱཧ ‘‘ཝཝཏྠཱནཾ ན ཀརོམཱི’’ཏི. ‘‘ཨཧོ སུཔརིསུདྡྷསཱིལོ ཝཏཱཡཾ ཨཡྻོ’’ཏི དཎྜདཱིཔིཀཾ གཧེཏྭཱ ཨཊྛཱསི. ཨཏིཔརིསུདྡྷཾ པཱཀཊནྟི སཔྤཱཡལཱབྷེན ཀམྨཊྛཱནཾ ཨཏིཝིཡ པརིསུདྡྷཾ ཝིབྷཱུཏཾ ཨཧོསི. སཀལཾ པབྦཏཾ ཨུནྣཱདཡནྟོཏི པཐཝིཀམྤནེན སཀལཾ པབྦཏཾ ཨེཀཾ ནིནྣཱདཾ ཀརོནྟོ. ཏནྣིཝཱསིདེཝཏཱནཾ སཱདྷུཀཱརདཱནེནཱཏི ཀེཙི. བྷནྟོཏི ཨནཝཊྛིཏོ. བཱལོཏི ཏརུཎདཱརཀོ. ཨུཏྲསྟོཏི ཉཱཏཀེཧི ཝིནཱབྷཱཝེན སནྟྲསྟོ.

ཝིསགཎྜཀརོགོཏི ¶ ཐནཀནྡལ༹རོགམཱཧ. མཱསརོགཱདིཀོཔི ཝིསགཎྜཀརོགོཏི ཝདནྟི. ཡཏོ པབྦཛིཏོ, ཏཏོ པཊྛཱཡ པབྦཛིཏཀཱལཏོ པབྷུཏཱིཏི ཨཏྠོ. ཨིནྡྲིཡཱནཱིཏི ཨིནྡྲིཡསཾཝརསཱིལཱནི. ཏེསུ ཧི བྷིནྣེསུ ཨིནྡྲིཡཱནིཔི བྷིནྣཱནཱིཏི ཝུཙྩནྟི ཨཱརཀྑཱབྷཱཝཏོ, ཨིནྡྲིཡཱནེཝ ཝཱ ནིམིཏྟཱནུབྱཉྫནགྒཱཧསྶ དྭཱརབྷཱུཏཱནི བྷིནྣཱནི ནཱམ ཏཾསམངྒིནོ ཨནཏྠུཔྤཏྟིཏོ, ཝིཔརིཡཱཡཏོ ཨབྷིནྣཱནཱིཏི ཝེདིཏབྦཱནི. ཨིནྡྲིཡཱནཾ ཝཱ ཨཡོནིསོ ཨུཔསཾཧཱརོ བྷེདནཾ, ཡོནིསོ ཨུཔསཾཧཱརོ ཨབྷེདནནྟི ཨཔརེ. མིཏྟཏྠེརོཝཱཏི མཧཱམིཏྟཏྠེརོ ཝིཡ. ཝརེཏི སེཊྛེ.

ཏཐཱ ཝཱིརིཡེནཱཏི ཏཐཱ-སདྡེན ཝཱིརིཡཾ ཝིསེསེཏི. ཡཐཱ སཏི ཨནཝཛྫལཀྑཎཱཝ ཨིནྡྲིཡསཾཝརསཱདྷནཾ, ཏཐཱ ཝཱིརིཡཾ ཨནཝཛྫལཀྑཎཾ ཨཱཛཱིཝཔཱརིསུདྡྷིསཱདྷནནྟི. ཝཱིརིཡཱཔེཀྑམེཝ ཝིསེསནཾ དཊྛབྦཾ. ཏེནེཝཱཧ ‘‘སམྨཱཨཱརདྡྷཝཱིརིཡསྶཱ’’ཏི. ཨཡུཏྟཱ ཨེསནཱ ཨནེསནཱ, ཡཐཱཝུཏྟམིཙྪཱཛཱིཝསངྒཧཱ. སཱ ཨེཝ སཏྠུསཱསནསྶ ན པཏིརཱུཔཱཏི ཨཔྤཏིརཱུཔཾ, ཏཾ ཨནེསནཾ ཨཔྤཏིརཱུཔཾ. ཨཐ ཝཱ པཏིརཱུཔཝིརོདྷིནཱི ཨཔྤཏིརཱུཔཱ, པརིགྒཧིཏདྷུཏངྒསྶ ¶ དྷུཏངྒནིཡམཝིརོདྷིནཱི ཡསྶ ཀསྶཙི སལླེཁཝིཀོཔིནཱི པཊིཔཏྟི. ཨིམསྨིཾ པཀྑེ ཙ-སདྡོ ལུཏྟནིདྡིཊྛོ, ཨནེསནཾ, ཨཔྤཏིརཱུཔཉྩ པཧཱཡཱཏི. པཊིསེཝམཱནེན པརིཝཛྫཡཏཱ སམྤཱདེཏབྦཱཏི སམྦནྡྷོ. ‘‘པརིསུདྡྷུཔྤཱདེ’’ཏི ཨིམིནཱཝ དྷམྨདེསནཱདཱིནཾ པརིསུདྡྷཱཡ སམུཊྛཱནཏཱ དཱིཔིཏཱ ཧོཏཱིཏི ‘‘དྷམྨདེསནཱདཱིཧི ཙསྶ གུཎེཧི པསནྣཱན’’ནྟི ཝུཏྟཾ. ཨཱདི-སདྡེན བཱཧུསཙྩཝཏྟཔརིཔཱུརཎཨིརིཡཱཔཐསམྤཏྟིཨཱདཱིནཾ གཧཎཾ ཝེདིཏབྦཾ. དྷུཏགུཎེ ཙསྶ པསནྣཱནནྟི ཨེཏྠཱཔི ཨེསེཝ ནཡོ. པིཎྜཔཱཏཙརིཡཱདཱིཧཱིཏི ཨཱདི-སདྡེན མིཏྟསུཧཛྫཔཾསུཀཱུལཙརིཡཱདཱིནཾ སངྒཧོ དཊྛབྦོ. དྷུཏངྒནིཡམཱནུལོམེནཱཏི ཏཾཏཾདྷུཏངྒནིཡཏཱཡ པཊིཔཏྟིཡཱ ཨནུལོམཝསེན, ཨཝིཀོཔནཝསེནཱཏི ཨཏྠོ. མཧིཙྪསྶེཝ མིཙྪཱཛཱིཝེན ཛཱིཝིཀཱ, ན ཨཔྤིཙྪསྶ. ཨཔྤིཙྪཏཱཡ ཨུཀྐཾསགཏཱཡ མིཙྪཱཛཱིཝསྶ ཨསམྦྷཝོ ཨེཝཱཏི དསྶེཏུཾ ‘‘ཨེཀབྱཱདྷིཝཱུཔསམཏྠ’’ནྟིཨཱདི ཝུཏྟཾ. ཏཏྠ པཱུཏིཧརིཏཀཱིཏི པཱུཏིམུཏྟཔརིབྷཱཝིཏཾ, པཱུཏིབྷཱཝེན ཝཱ ཚཌྜིཏཾ ཧརིཏཀཾ. ཨརིཡཝཾསོ ཨེཏསྶ ཨཏྠཱིཏི, ཨརིཡཝཾསེ ཝཱ ནིཡུཏྟོཏི ཨརིཡཝཾསིཀོ, པཙྩཡགེདྷསྶ དཱུརསམུསྶཱརིཏཏྟཱ ཨུཏྟམོ ཙ སོ ཨརིཡཝཾསིཀོ ཙཱཏི ཨུཏྟམཨརིཡཝཾསིཀོ. ཡསྶ ཀསྶཙཱིཏི པརིགྒཧིཏཱཔརིགྒཧིཏདྷུཏངྒེསུ ཡསྶ ཀསྶཙི.

ནིམིཏྟཾ ནཱམ པཙྩཡེ ཨུདྡིསྶ ཡཐཱ ཨདྷིཔྤཱཡོ ཉཱཡཏི ཨེཝཾ ནིམིཏྟཀམྨཾ. ཨོབྷཱསོ ནཱམ ¶ ཨུཛུཀམེཝ ཨཀཐེཏྭཱ ཡཐཱ ཨདྷིཔྤཱཡོ ཝིབྷཱུཏོ ཧོཏི, ཨེཝཾ ཨོབྷཱསནཾ. པརིཀཐཱ ནཱམ པརིཡཱཡེན ཀཐནཾ. ཏཐཱ ཨུཔྤནྣནྟི ནིམིཏྟཱདིཝསེན ཨུཔྤནྣཾ.

དྭཱརཾ དིནྣནྟི རོགསཱིསེན པརིབྷོགསྶ དྭཱརཾ དིནྣཾ. ཏསྨཱ ཨརོགཀཱལེཔི པརིབྷུཉྫིཏུཾ ཝཊྚཏི, ཨཱཔཏྟི ན ཧོཏཱིཏི ཨཏྠོ. ཏེནཱཧ ‘‘ཀིཉྩཱཔི ཨཱཔཏྟི ན ཧོཏཱི’’ཏིཨཱདི. ན ཝཊྚཏཱིཏི སལླེཁཔཊིཔཏྟིཡཾ ཋིཏསྶ ན ཝཊྚཏི, སལླེཁཾ ཀོཔེཏཱིཏི ཨདྷིཔྤཱཡོ. ‘‘ཨཱཛཱིཝཾ པན ཀོཔེཏཱི’’ཏི ཨིམིནཱཝ སེནཱསནཔཊིསཾཡུཏྟདྷུཏངྒདྷརསྶ ནིམིཏྟཱདཡོ ན ཝཊྚནྟཱིཏི ཝདནྟི. ཏདཉྙདྷུཏངྒདྷརསྶཱཔི ན ཝཊྚནྟིཡེཝཱཏི ཨཔརེ. ཨཀརོནྟོཏི ཡཐཱསཀཾ ཨནུཉྙཱཏཝིསཡེཔི ཨཀརོནྟོ. ཨཉྙཏྲེཝཱཏི ཋཔེཏྭཱ ཨེཝ.

གཎཝཱསཾ ¶ པཧཱཡ ཨརཉྙཱཡཏནེ པཊིཔྤསྶདྡྷིཝིཝེཀསྶ མུདྡྷབྷཱུཏཱཡ ཨགྒཕལསམཱཔཏྟིཡཱ ཝིཧརནྟོ མཧཱཐེརོ ‘‘པཝིཝེཀཾ བྲཱུཧཡམཱནོ’’ཏི ཝུཏྟོ. ཨུདརསནྣིསྶིཏོ ཝཱཏཱབཱདྷོ ཨུདརཝཱཏཱབཱདྷོ. ཨསམྦྷིནྣཾ ཁཱིརཾ ཨེཏསྶཱཏི ཨསམྦྷིནྣཁཱིརཾ, ཏདེཝ པཱཡཱསནྟི ཨསམྦྷིནྣཁཱིརཔཱཡཱསཾ, ཨུདཀེན ཨསམྨིསྶཁཱིརེན པཀྐཔཱཡཱསནྟི ཨཏྠོ. ཏསྶཱཏི པཱཡཱསསྶ. ཨུཔྤཏྟིམཱུལནྟི ‘‘གིཧིཀཱལེ མེ, ཨཱཝུསོ, མཱཏཱ སཔྤིམདྷུསཀྐརཱདཱིཧི ཡོཛེཏྭཱ ཨསམྦྷིནྣཁཱིརཔཱཡཱསཾ ཨདཱསི, ཏེན མེ ཕཱསུ ཨཧོསཱི’’ཏི ཨཏྟནོ ཝཙཱིནིཙྪཱརཎསངྑཱཏཾ ཨུཔྤཏྟིཧེཏུཾ. ‘‘ཨཔརིབྷོགཱརཧོ པིཎྜཔཱཏོ’’ཏི ཀསྨཱ ཝུཏྟཾ, ནནུ ཐེརསྶ ཨོབྷཱསནཱདིཙིཏྟུཔྤཏྟིཡེཝ ནཏྠཱིཏི? སཙྩཾ ནཏྠི, ཨཛ྄ཛྷཱསཡཾ པན ཨཛཱནནྟཱ ཨེཀཙྩེ པུཐུཛྫནཱ ཏཐཱ མཉྙེཡྻུཾ, ཨནཱགཏེ ཙ སབྲཧྨཙཱརིནོ ཨེཝཾ མམ དིཊྛཱནུགཏིཾ ཨཱཔཛྫེཡྻུནྟི པཊིཀྑིཔི. ཨཔིཙ མཧཱཐེརསྶ པརམུཀྐཾསགཏཱ སལླེཁཔཊིཔཏྟི. ཏཐཱ ཧི དཧརབྷིཀྑུནོ ‘‘ཀསྶ སམྤནྣཾ ན མནཱཔ’’ནྟི (པཱཙི. ༢༠༩, ༢༥༧, ༦༡༢, ༡༢༢༨, ༡༢༣༤; ཙཱུལ༹ཝ. ༣༤༣) ཝཙནཾ ནིསྶཱཡ ཡཱཝ པརིནིབྦཱནཱ པིཊྛཁཱདནཱིཡཾ ན ཁཱདཏི.

ཝཙཱིཝིཉྙཏྟིཝིཔྥཱརཱཏི ཝཙཱིནིཙྪཱརཎཧེཏུ. ཨཏྠཝིཉྙཱཔནཝསེན པཝཏྟམཱནོ ཧི སདྡོ ཨསཏིཔི ཝིཉྙཏྟིཡཱ ཏསྶ ཀེནཙི པཙྩཡེན པཙྩཡབྷཱཝེ ཝཙཱིཝིཉྙཏྟིཝསེནེཝ པཝཏྟཏཱིཏི ‘‘ཝཙཱིཝིཉྙཏྟིཝིཔྥཱརོ’’ཏི ཝུཙྩཏི. བྷུཏྟོཏི བྷུཏྟཝཱ སཙེ བྷཝེཡྻཾ ཨཧཾ. སཱཏི ཨསྶ. ཨཀཱརལོཔེན ཧི ནིདྡེསོ ‘‘ཨེཝཾས ཏེ’’ཏིཨཱདཱིསུ (མ. ནི. ༡.༢༣; ཨ. ནི. ༦.༥༨; ༨.༧) ཝིཡ. ཨནྟགུཎནྟི ཨནྟབྷོགོ. བཧི ཙརེཏི ཨཱསཡཏོ ནིཀྑམིཏྭཱ གོཙརགྒཧཎཝསེན ¶ བཧི ཡདི ཝིཙརེཡྻ. པརམཔྤིཙྪཾ དསྶེཏུཾ ལོཀཝོཧཱརེནེཝམཱཧ. ལོཀེ ཧི ཨཡུཏྟབྷོཛནཾ ཨོདརིཡཾ གརཧནྟཱ ཨེཝཾ ཝདནྟི ‘‘ཀིཾསུ ནཱམ ཏསྶ ཨནྟཱནི བཧི ཙརནྟཱི’’ཏི. ཨཱརཱདྷེམཱིཏི ཨཱདིཏོ པཊྛཱཡ རཱདྷེམི, ཝསེ ཝཏྟེམཱིཏི ཨཏྠོ.

མཧཱཏིསྶཏྠེརོ ཀིར དུབྦྷིཀྑཀཱལེ མགྒཾ གཙྪནྟོ བྷཏྟཙྪེདེན, མགྒཀིལམཐེན ཙ ཀིལནྟཀཱཡོ དུབྦལོ ཨཉྙཏརསྶ ཕལིཏསྶ ཨམྦསྶ མཱུལེ ནིཔཛྫི, བཧཱུནི ཨམྦཕལཱནི ཏཧཾ ཏཧཾ པཏིཏཱནི ཧོནྟི. ཏཏྠེཀོ ཝུཌྜྷཏརོ ཨུཔཱསཀོ ཐེརསྶ སནྟིཀཾ ཨུཔགནྟྭཱ པརིསྶམཾ ཉཏྭཱ ¶ ཨམྦཔཱནཾ པཱཡེཏྭཱ ཨཏྟནོ པིཊྛིཾ ཨཱརོཔེཏྭཱ ཝསནཊྛཱནཾ ནེཏི. ཐེརོ –

‘‘ན པིཏཱ ནཔི ཏེ མཱཏཱ, ན ཉཱཏི ནཔི བནྡྷཝོ;

ཀརོཏེཏཱདིསཾ ཀིཙྩཾ, སཱིལཝནྟསྶ ཀཱརཎཱ’’ཏི. (ཝིསུདྡྷི. ༡.༢༠) –

ཨཏྟཱནཾ ཨོཝདིཏྭཱ སམྨསནཾ ཨཱརབྷིཏྭཱ ཝིཔསྶནཾ ཝཌྜྷེཏྭཱ ཏསྶ པིཊྛིགཏོ ཨེཝ མགྒཔཊིཔཱཊིཡཱ ཨརཧཏྟཾ སཙྪཱཀཱསི. ཨིམཾ སནྡྷཱཡ ཝུཏྟཾ ‘‘ཨམྦཁཱདཀམཧཱཏིསྶཏྠེརཝཏྠུཔི ཙེཏྠ ཀཐེཏབྦ’’ནྟི. སབྦཐཱཔཱིཏི སབྦཔྤཀཱརེནཔི ཨནེསནཝསེན, ཙིཏྟུཔྤཏྟིཝསེནཔི, པགེཝ ཀཱཡཝཙཱིཝིཔྥནྡིཏཝསེནཱཏི ཨདྷིཔྤཱཡོ. ཏེནཱཧ ‘‘ཨནེསནཱཡཱ’’ཏིཨཱདི.

ཨཔཙྩཝེཀྑིཏཔརིབྷོགེ ཨིཎཔརིབྷོགཨཱཔཏྟིཨཱདཱིནཝསྶ, ཏབྦིཔརིཡཱཡཏོ པཙྩཝེཀྑིཏཔརིབྷོགེ ཨཱནིསཾསསྶ ཙ དསྶནཾ ཨཱདཱིནཝཱནིསཾསདསྶནཾ. ཏསྶ པན པཙྩཡཱདྷིཀཱརཏྟཱ ཝུཏྟཾ ‘‘པཙྩཡེསཱུ’’ཏི. ཀཱརཎཀཱརཎམྤི ཧི ཀཱརཎབྷཱཝེན ཝུཙྩཏི ཡཐཱ ཏིཎེཧི བྷཏྟཾ སིདྡྷནྟི. ཡེན ཀཱརཎེན བྷིཀྑུནོ ཨཔཙྩཝེཀྑིཏཔརིབྷོགོ ནཱམ སིཡཱ, ཏསྨིཾ ཝཛྫིཏེ པཙྩཡསནྣིསྶིཏསཱིལཾ སིཛ྄ཛྷཏི, ཝིསུཛ྄ཛྷཏི ཙཱཏི དསྶེཏུཾ ‘‘ཏསྨཱ’’ཏིཨཱདི ཝུཏྟཾ. ཏཏྠ པཙྩཡགེདྷནྟི གེདྷགྒཧཎེནེཝ སམྨོཧོཔི གཧིཏོཏི དཊྛབྦོ ཏེན སཧ པཝཏྟནཏོ, ཏདུཔནིསྶཡཏོ ཙ. དྷམྨེན སམེན ཨུཔྤནྣེཏི ཨིདཾ པཙྩཡཱནཾ ཨཱགམནསུདྡྷིདསྶནཾ, ན པཙྩཡསནྣིསྶིཏསཱིལཝིསུདྡྷིདསྶནཾ. པཙྩཡཱནཾ ཧི ཨིདམཏྠིཏཾ ཨུཔདྷཱརེཏྭཱ པརིབྷུཉྫནཾ པཙྩཡསནྣིསྶིཏསཱིལཾ. ཡསྨཱ པན ཏེ པཙྩཡཱ ཉཱཡཱདྷིགཏཱ ཨེཝ བྷིཀྑུནཱ པརིབྷུཉྫིཏབྦཱ, ཏསྨཱ ཝུཏྟཾ ‘‘དྷམྨེན སམེན ཨུཔྤནྣེ པཙྩཡེ’’ཏི. ཡཐཱཝུཏྟེན ཝིདྷིནཱཏི ‘‘སཱིཏསྶ པཊིགྷཱཏཱཡཱ’’ཏིཨཱདིནཱ (མ. ནི. ༡.༢༣; ཨ. ནི. ༦.༥༨; མཧཱནི. ༢༠༦) ཝུཏྟཝིདྷིནཱ.

དྷཱཏུཝསེན ¶ ཝཱཏི ‘‘ཡཐཱཔཙྩཡཾ ཝཏྟམཱནཾ དྷཱཏུམཏྟམེཝེཏཾ, ཡདིདཾ ཙཱིཝརཱདི, ཏདུཔབྷུཉྫཀོ ཙ པུགྒལོ’’ཏི ཨེཝཾ དྷཱཏུམནསིཀཱརཝསེན ཝཱ. པཊིཀཱུལཝསེན ཝཱཏི པིཎྜཔཱཏེ ཏཱཝ ཨཱཧཱརེ པཊིཀཱུལསཉྙཱཝསེན, ‘‘སབྦཱནི པན ཨིམཱནི ཙཱིཝརཱདཱིནི ཨཛིགུཙྪནཱིཡཱནི, ཨིམཾ པཱུཏིཀཱཡཾ པཏྭཱ ཨཏིཝིཡ ཛིགུཙྪནཱིཡཱནི ཛཱཡནྟཱི’’ཏི ཨེཝཾ པཊིཀཱུལམནསིཀཱརཝསེན ཝཱ. ཏཏོ ཨུཏྟརཱིཏི པཊིལཱབྷཀཱལཏོ ཨུཔརི. ཨནཝཛྫོཝ པརིབྷོགོ ¶ ཨཱདིཏོཝ པཉྙཱཡ པརིསོདྷིཏཏྟཱ ཨདྷིཊྛཧིཏྭཱ ཋཔིཏཔཏྟཙཱིཝརཱནཾ ཝིཡཱཏི. པཙྩཝེཀྑཎཱཡ ཨཱདིསུདྡྷིདསྶནཔརམེཏཾ, ན པརིབྷོགཀཱལེ པཙྩཝེཀྑཎཔཊིཀྑེཔཔརཾ. ཏེནཱཧ ‘‘པརིབྷོགཀཱལེཔཱི’’ཏིཨཱདི. ཏཏྲཱཏི ཏསྨིཾ པརིབྷོགཀཱལེ པཙྩཝེཀྑཎེ. སནྣིཊྛཱནཀརོཏི ཨསནྡེཧཀརོ ཨེཀནྟིཀོ.

ཐེཡྻཔརིབྷོགོ ནཱམ ཨནརཧསྶ པརིབྷོགོ. བྷགཝཏཱཔི ཨཏྟནོ སཱསནེ སཱིལཝཏོ པཙྩཡཱ ཨནུཉྙཱཏཱ, ན དུསྶཱིལསྶ. དཱཡཀཱནམྤི སཱིལཝཏོ ཨེཝ པརིཙྩཱགོ, ན དུསྶཱིལསྶ. ཨཏྟནོ ཀཱརཱནཾ མཧཔྥལབྷཱཝསྶ པཙྩཱསཱིསནཏོ. ཨིཏི སཏྠཱརཱ ཨནནུཉྙཱཏཏྟཱ, དཱཡཀེཧི ཙ ཨཔརིཙྩཏྟཏྟཱ དུསྶཱིལསྶ པརིབྷོགོ ཐེཡྻཱཡ པརིབྷོགོ ཐེཡྻཔརིབྷོགོ. ཨིཎཝསེན པརིབྷོགོ ཨིཎཔརིབྷོགོ, པཊིགྒཱཧཀཏོ དཀྑིཎཱཝིསུདྡྷིཡཱ ཨབྷཱཝཏོ ཨིཎཾ གཧེཏྭཱ པརིབྷོགོ ཝིཡཱཏི ཨཏྠོ. ཏསྨཱཏི ‘‘སཱིལཝཏོ’’ཏིཨཱདིནཱ ཝུཏྟམེཝཏྠཾ ཀཱརཎབྷཱཝེན པཙྩཱམསཏི. ཙཱིཝརཾ ཀཱཡཏོ མོཙེཏྭཱ པརིབྷོགེ པརིབྷོགེ པུརེབྷཏྟ…པེ… པཙྪིམཡཱམེསུ པཙྩཝེཀྑིཏབྦནྟི སམྦནྡྷོ. ཏཐཱ ཨསཀྐོནྟེན ཡཐཱཝུཏྟཀཱལཝིསེསཝསེན ཨེཀདིཝསེ ཙཏུཀྑཏྟུཾ ཏིཀྑཏྟུཾ དྭིཀྑཏྟུཾ སཀིཾཡེཝ ཝཱ པཙྩཝེཀྑིཏབྦཾ. སཙེ ཨརུཎཾ ཨུགྒཙྪཏི, ཨིཎཔརིབྷོགཊྛཱནེ ཏིཊྛཏི. ཧིཡྻོ ཡཾ མཡཱ ཙཱིཝརཾ པརིབྷུཏྟཾ, ཏཾ ཡཱཝདེཝ སཱིཏསྶ པཊིགྷཱཏཱཡ…པེ… ཧིརིཀོཔཱིནཔཊིཙྪཱདནཏྠཾ. ཧིཡྻོ ཡོ མཡཱ པིཎྜཔཱཏོ པརིབྷུཏྟོ, སོ ‘‘ནེཝ དཝཱཡཱ’’ཏིཨཱདིནཱ སཙེ ཨཏཱིཏཔརིབྷོགཔཙྩཝེཀྑཎཾ ན ཀརེཡྻཱཏི ཝདནྟི, ཏཾ ཝཱིམཾསིཏབྦཾ. སེནཱསནམྤི པརིབྷོགེ པརིབྷོགེཏི པཝེསེ པཝེསེ. སཏིཔཙྩཡཏཱཏི སཏིཡཱ པཙྩཡབྷཱཝོ པཊིགྒཧཎསྶ, པརིབྷོགསྶ ཙ པཙྩཝེཀྑཎསཏིཡཱ པཙྩཡབྷཱཝོ ཡུཛྫཏི, པཙྩཝེཀྑིཏྭཱཝ པཊིགྒཧེཏབྦཾ, པརིབྷུཉྫིཏབྦཉྩཱཏི ཨཏྠོ. ཏེནེཝཱཧ ‘‘སཏིཾ ཀཏྭཱ’’ཏིཨཱདི. ཨེཝཾ སནྟེཔཱིཏི ཡདིཔི དྭཱིསུཔི ཋཱནེསུ པཙྩཝེཀྑཎཱ ཡུཏྟཱ, ཨེཝཾ སནྟེཔི. ཨཔརེ པནཱཧུ – སཏི པཙྩཡཏཱཏི སཏི བྷེསཛྫཔརིབྷོགསྶ པཙྩཡབྷཱཝེ, སཏི པཙྩཡེཏི ཨཏྠོ. ཨེཝཾ སནྟེཔཱིཏི པཙྩཡེ སཏིཔཱིཏི. ཏཾ ཏེསཾ མཏིམཏྟཾ. ཏཐཱ ཧི པཙྩཡསནྣིསྶིཏསཱིལཾ པཙྩཝེཀྑཎཱཡ ཝིསུཛ྄ཛྷཏི, ན པཙྩཡསྶ བྷཱཝམཏྟེན.

ཨེཝཾ ¶ པཙྩཡསནྣིསྶིཏསཱིལསྶ ཝིསུདྡྷིཾ དསྶེཏྭཱ ཏེནེཝ པསངྒེན སབྦཱཔི ཝིསུདྡྷིཡོ དསྶེཏུཾ ‘‘ཙཏུབྦིདྷཱ ཧི སུདྡྷཱི’’ཏིཨཱདིམཱཧ. ཏཏྠ སུཛ྄ཛྷཏི ¶ ཨེཏཱཡཱཏི སུདྡྷི, ཡཐཱདྷམྨཾ དེསནཱཝ སུདྡྷི དེསནཱསུདྡྷི. ཝུཊྛཱནསྶཱཔི ཙེཏྠ དེསནཱཡ ཨེཝ སངྒཧོ དཊྛབྦོ. ཚིནྣམཱུལཱཔཏྟཱིནཾ པན ཨབྷིཀྑུཏཱཔཊིཉྙཱཝ དེསནཱ. ཨདྷིཊྛཱནཝིསིཊྛོ སཾཝརོཝ སུདྡྷི སཾཝརསུདྡྷི. དྷམྨེན སམེན པཙྩཡཱནཾ པརིཡེཊྛི ཨེཝ སུདྡྷི པརིཡེཊྛིསུདྡྷི. ཙཏཱུསུཔི པཙྩཡེསུ ཝུཏྟཝིདྷིནཱ པཙྩཝེཀྑཎཱཝ སུདྡྷི པཙྩཝེཀྑཎསུདྡྷི. ཨེས ཏཱཝ སུདྡྷཱིསུ སམཱསནཡོ. སུདྡྷིམནྟེསུ པན དེསནཱ སུདྡྷི ཨེཏསྶཱཏི དེསནཱསུདྡྷི. སེསེསུཔི ཨེསེཝ ནཡོ. སུདྡྷི-སདྡོ པན ཝུཏྟནཡོཝ. ཨེཝནྟི སཾཝརབྷེདཾ སནྡྷཱཡཱཧ. པཧཱཡཱཏི ཝཛྫེཏྭཱ, ཨཀཏྭཱཏི ཨཏྠོ.

དཱཏབྦཊྛེན དཱཡཾ, ཏཾ ཨཱདིཡནྟཱིཏི དཱཡཱདཱ. ཨནནུཉྙཱཏེསུ སབྦེན སབྦཾ པརིབྷོགཱབྷཱཝཏོ, ཨནུཉྙཱཏེསུ ཨེཝ ཙ པརིབྷོགསམྦྷཝཏོ བྷིཀྑཱུཧི པརིབྷུཉྫིཏབྦཔཙྩཡཱ བྷགཝཏོ སནྟཀཱ. ‘‘དྷམྨདཱཡཱདཱ མེ, བྷིཀྑཝེ, བྷཝཐ མཱ ཨཱམིསདཱཡཱདཱ. ཨཏྠི མེ ཏུམྷེསུ ཨནུཀམྤཱ ‘ཀིནྟི མེ སཱཝཀཱ དྷམྨདཱཡཱདཱ བྷཝེཡྻུཾ ནོ ཨཱམིསདཱཡཱདཱ’’’ཏི (མ. ནི. ༡.༢༩) ཨེཝཾ པཝཏྟཾ དྷམྨདཱཡཱདསུཏྟཉྩ ཨེཏྠ ཨེཏསྨིཾ ཨཏྠེ སཱདྷཀཾ.

ཨཝཱིཏརཱགཱནཾ ཏཎྷཱཔརཝསཏཱཡ པཙྩཡཔརིབྷོགེ སཱམིབྷཱཝོ ནཏྠི, ཏདབྷཱཝེན ཝཱིཏརཱགཱནཾ ཏཏྠ སཱམིབྷཱཝོ ཡཐཱརུཙིཔརིབྷོགསམྦྷཝཏོ. ཏཐཱ ཧི ཏེ པཊིཀཱུལམྤི ཨཔྤཊིཀཱུལཱཀཱརེན, ཨཔྤཊིཀཱུལམྤི པཊིཀཱུལཱཀཱརེན, ཏདུབྷཡམྤི ཝཛྫེཏྭཱ ཨཛ྄ཛྷུཔེཀྑནཱཀཱརེན པཙྩཡེ པརིབྷུཉྫནྟི, དཱཡཀཱནཉྩ མནོརཐཾ པརིཔཱུརེནྟི. ཏེནཱཧ ‘‘ཏེ ཧི ཏཎྷཱཡ དཱསབྱཾ ཨཏཱིཏཏྟཱ སཱམིནོ ཧུཏྭཱ པརིབྷུཉྫནྟཱི’’ཏི.

སབྦེསནྟི ཨརིཡཱནཾ, པུཐུཛྫནཱནཉྩ. ཀཐཾ པུཐུཛྫནཱནཾ ཨིམེ པརིབྷོགཱ སམྦྷཝནྟི? ཨུཔཙཱརཝསེན. ཡོ ཧི པུཐུཛྫནསྶཱཔི སལླེཁཔཊིཔཏྟིཡཾ ཋིཏསྶ པཙྩཡགེདྷཾ པཧཱཡ ཏཏྠ ཏཏྠ ཨནུཔལིཏྟེན ཙིཏྟེན པརིབྷོགོ, སོ སཱམིཔརིབྷོགོ ཝིཡ ཧོཏི. སཱིལཝཏོ པན པཙྩཝེཀྑིཏཔརིབྷོགོ དཱཡཛྫཔརིབྷོགོ ཝིཡ ཧོཏི, དཱཡཀཱནཾ མནོརཐསྶ ཨཝིརཱདྷནཏོ. ཏཐཱ ཧི ཝུཏྟཾ ‘‘དཱཡཛྫཔརིབྷོགེཡེཝ ཝཱ སངྒཧཾ གཙྪཏཱི’’ཏི. ཀལྱཱཎཔུཐུཛྫནསྶ པརིབྷོགེ ཝཏྟབྦམེཝ ནཏྠི, ཏསྶ སེཀྑསངྒཧཏོ. སེཀྑསུཏྟཾ (སཾ. ནི. ༥.༡༣) ཧེཏསྶཏྠསྶ སཱདྷཀཾ. ཏེནཱཧ ‘‘སཱིལཝཱཔི ¶ ཧཱི’’ཏིཨཱདི. པཙྩནཱིཀཏྟཱཏི ཡཐཱ ཨིཎཱཡིཀོ ཨཏྟནོ རུཙིཡཱ ཨིཙྪིཏདེསཾ གནྟུཾ ན ¶ ལབྷཏི, ཨེཝཾ ཨིཎཔརིབྷོགཡུཏྟོ ལོཀཏོ ནིསྶརིཏུཾ ན ལབྷཏཱིཏི ཏཔྤཊིཔཀྑཏྟཱ སཱིལཝཏོ པཙྩཝེཀྑིཏཔརིབྷོགོ ཨཱཎཎྱཔརིབྷོགོཏི ཨཱཧ ‘‘ཨཱཎཎྱཔརིབྷོགོ ཝཱ’’ཏི. ཨེཏེན ནིཔྤརིཡཱཡཏོ ཙཏུཔརིབྷོགཝིནིམུཏྟོ ཝིསུཾཡེཝཱཡཾ པརིབྷོགོཏི དསྶེཏི. ཨིམཱཡ སིཀྑཱཡཱཏི སཱིལསངྑཱཏཱཡ སིཀྑཱཡ. ཀིཙྩཀཱརཱིཏི པཊིཉྙཱནུརཱུཔཾ པཊིཔཛྫནཏོ ཡུཏྟཔཏྟཀཱརཱི.

ཨིདཱནི ཏམེཝ ཀིཙྩཀཱརིཏཾ སུཏྟཔདེན ཝིབྷཱཝེཏུཾ ‘‘ཝུཏྟམྤི ཙེཏ’’ནྟིཨཱདི ཝུཏྟཾ. ཏཏྠ ཝིཧཱརནྟི པཏིསྶཡཾ. སཡནཱསནནྟི མཉྩཱདིཾ. ཨུབྷཡེནཔི སེནཱསནམེཝ ཝུཏྟཾ. ཨཱཔནྟི ཨུདཀཾ. སངྒྷཱཊིརཛཱུཔཝཱཧནནྟི པཾསུམལཱདིནོ སངྒྷཱཊིགཏརཛསྶ དྷོཝནཾ. སུཏྭཱན དྷམྨཾ སུགཏེན དེསིཏནྟི ཙཱིཝརཱདཱིསུ ‘‘པཊིསངྑཱ ཡོནིསོ ཙཱིཝརཾ པཊིསེཝཏི སཱིཏསྶ པཊིགྷཱཏཱཡཱ’’ཏིཨཱདིནཱ (མ. ནི. ༡.༢༣; ཨ. ནི. ༦.༥༨; མཧཱནི. ༢༠༦) ནཡེན བྷགཝཏཱ དེསིཏཾ དྷམྨཾ སུཏྭཱ. སངྑཱཡ སེཝེ ཝརཔཉྙསཱཝཀོཏི ‘‘པིཎྜ’’ནྟི ཝུཏྟཾ པིཎྜཔཱཏཾ, ཝིཧཱརཱདིཔདེཧི ཝུཏྟཾ སེནཱསནཾ, ‘‘པིཔཱསཱགེལཉྙསྶ ཝཱུཔསམནཏོ པཱནཱིཡམྤི གིལཱནཔཙྩཡོ’’ཏི ཨཱཔམུཁེན དསྶིཏཾ གིལཱནཔཙྩཡཾ, སངྒྷཱཊིཡཱདིཙཱིཝརནྟི ཙཏུབྦིདྷཾ པཙྩཡཾ སངྑཱཡ ‘‘ཡཱཝདེཝ ཨིམསྶ ཀཱཡསྶ ཋིཏིཡཱ’’ཏིཨཱདིནཱ (མ. ནི. ༡.༢༣; ༢.༢༤; ༣.༧༥; སཾ. ནི. ༤.༡༢༠; ཨ. ནི. ༦.༥༨; ༨.༩; དྷ. ས. ༡༣༥༥) ནཡེན པཙྩཝེཀྑིཏྭཱ. སེཝེ སེཝིཏུཾ སཀྐུཎེཡྻ ཨུཏྟམཔཉྙསྶ བྷགཝཏོ སཱཝཀོ སེཁོ ཝཱ པུཐུཛྫནོ ཝཱ.

ཡསྨཱ ཙ སངྑཱཡ སེཝཱི ཝརཔཉྙསཱཝཀོ, ཏསྨཱ ཧི པིཎྜེ…པེ… པོཀྑརེ ཝཱརིབིནྡུ, ཏཐཱ ཧོཏི. ཀཱལེནཱཏི ཨརིཡཱནཾ བྷོཛནཀཱལེ. ལདྡྷཱཏི ལབྷིཏྭཱ. པརཏོཏི ཨཉྙཏོ དཱཡཀཏོ. ཨནུགྒཧཱཏི ཨནུཀམྤཱཡ བཧུམྷི ཨུཔནཱིཏེ མཏྟཾ སོ ཛཉྙཱ ཛཱནེཡྻ སཏཏཾ སབྦཀཱལཾ ཨུཔཊྛིཏོ ཨུཔཊྛིཏསྶཏི. ཨཱལེཔནརཱུཧནེ ཡཐཱཏི བྷེསཛྫལེཔནེན ཝཎསྶ རུཧནེ ཝིཡ, མཏྟཾ ཛཱནེཡྻཱཏི ཡོཛནཱ. ཨཱཧརེཏི ཨཱཧརེཡྻ. ‘‘ཨཱཧརེཡྻཱཧཱར’’ནྟི ཝཱ པཱཋོ. ཡཱཔནཏྠནྟི སརཱིརསྶ ཡཱཔནཱཡ. ཨམུཙྪིཏོཏི ཏཎྷཱམུཙྪཱཡ ཨམུཙྪིཏོ གེདྷཾ ཏཎྷཾ ཨནཱཔནྣོ.

ཨཏྟནོ ¶ མཱཏུལསྶ སངྒྷརཀྑིཏཏྠེརསྶེཝ ནཱམསྶ གཧིཏཏྟཱ བྷཱགིནེཡྻསངྒྷརཀྑིཏསཱམཎེརོ. སཱལིཀཱུརནྟི སཱལིབྷཏྟཾ. སུནིབྦུཏནྟི སུསཱིཏལཾ. ཨསཉྙཏོཏི ཨཔཙྩཝེཀྑཎཾ སནྡྷཱཡཱཧ. སབྦཱསཝཔརིཀྑཱིཎོཏི པརིཀྑཱིཎསབྦཱསཝོ.

པཋམསཱིལཔཉྩཀཝཎྞནཱ

༢༠. པརིཡནྟོ ¶ ཨེཏེསཾ ཨཏྠཱིཏི པརིཡནྟཱནི, པརིཡནྟཱནི སིཀྑཱཔདཱནི ཡེསཾ ཏེ པརིཡནྟསིཀྑཱཔདཱ, ཏེསཾ པརིཡནྟསིཀྑཱཔདཱནཾ. ཨུཔསམྤནྣཱནནྟི ཋཔེཏྭཱ ཀལྱཱཎཔུཐུཛྫནསེཀྑཱསེཀྑེ ཏདཉྙེསཾ ཨུཔསམྤནྣཱནཾ. སཱམཉྙཛོཏནཱཔི ཧི ཝིསེསེ ཏིཊྛཏི. ཀུསལདྷམྨེ ཡུཏྟཱནནྟི ཝིཔསྶནཱཙཱརེ ཡུཏྟཔཡུཏྟཱནཾ. སེཀྑདྷམྨཱ པརིཡནྟཱ པརམཱ མརིཡཱདཱ ཨེཏསྶཱཏི སེཀྑཔརིཡནྟོ. ནཱམརཱུཔཔརིཙྪེདཏོ, ཀུསལདྷམྨསམཱདཱནཏོ ཝཱ པན པཊྛཱཡ ཡཱཝ གོཏྲབྷཱུ, ཏཱཝ པཝཏྟཀུསལདྷམྨཔྤབནྡྷོ སེཀྑདྷམྨེ ཨཱཧཙྩ ཋིཏོ སེཀྑཔརིཡནྟོ. སེཀྑདྷམྨཱནཾ ཝཱ ཧེཊྛིམནྟབྷཱུཏཱ སིཀྑིཏབྦཱ ལོཀིཡཱ ཏིསྶོ སིཀྑཱ སེཀྑཔརིཡནྟོ, ཏསྨིཾ སེཀྑཔརིཡནྟེ. པརིཔཱུརཀཱརཱིནནྟི ཀིཉྩིཔི སིཀྑཾ ཨཧཱཔེཏྭཱ པཱུརེནྟཱནཾ. ཨུཔརིཝིསེསཱདྷིགམཏྠཾ ཀཱཡེ ཙ ཛཱིཝིཏེ ཙ ཨནཔེཀྑཱནཾ. ཏཏོ ཨེཝ སཱིལཔཱརིཔཱུརིཨཏྠཾ པརིཙྩཏྟཛཱིཝིཏཱནཾ. དིཊྛིསཾཀིལེསེན ཨཔརཱམསནཱིཡཏོ པཱརིསུདྡྷིཝནྟཾ སཱིལཾ ཨཔརཱམཊྛཔཱརིསུདྡྷིསཱིལཾ. ཀིལེསཱནཾ སབྦསོ པཊིཔྤསྶདྡྷིཡཱ པཱརིསུདྡྷིཝནྟཾ སཱིལཾ པཊིཔྤསྶདྡྷིཔཱརིསུདྡྷིསཱིལཾ.

ཨནུཔསམྤནྣཱནཾ ཨསེཀྑཱནཾ, སེཀྑཱནཾ, ཀལྱཱཎཔུཐུཛྫནཱནཉྩ སཱིལཾ མཧཱནུབྷཱཝཏཱཡ ཨཱནུབྷཱཝཏོ ཨཔརིཡནྟམེཝཱཏི ཨཱཧ ‘‘གཎནཝསེན སཔརིཡནྟཏྟཱ’’ཏི. ཀཱཡཝཱཙཱནཾ སཾཝརཎཏོ, ཝིནཡནཏོ ཙ སཾཝརཝིནཡཱ. པེཡྻཱལམུཁེན ནིདྡིཊྛཱཏི ཏཏྠ ཏཏྠ སཏྠཱརཱ དེསིཏཝིཏྠཱརནཡེན ཡཐཱཝུཏྟགཎནཏོ ནིདྡིཊྛཱ. སིཀྑཱཏི སཱིལསངྑཱཏཱ སིཀྑཱ. ཝིནཡསཾཝརེཏི ཝིནཡཔིཊཀེ. གཎནཝསེན སཔརིཡནྟམྤི ཨུཔསམྤནྣཱནཾ སཱིལནྟི ཧེཊྛཱ ཝུཏྟཾ ཨཱནེཏྭཱ སམྦནྡྷིཏབྦཾ. ཡཾ ཀིཉྩི ཧི ཨུཔསམྤནྣེན སིཀྑིཏབྦཾ སཱིལཾ ནཱམ, ཏཏྠ ཀསྶཙིཔི ཨནཝསེསཏོ ཨནཝསེསཝསེན ¶ . སམཱདཱནབྷཱཝནྟི སམཱདཱནསབྦྷཱཝཾ. ལཱབྷ…པེ… ཝསེན ཨདིཊྛཔརིཡནྟབྷཱཝོ ལཱབྷཱདིཧེཏུ སཱིལསྶ ཨཝཱིཏིཀྐམོ.

དྷནཾ ཙཛེ ཨངྒཝརསྶ ཧེཏུ པཱརིཔནྠིཀཙོརཱདཱིཧི ཨུཔདྡུཏོ. ཨངྒཾ ཙཛེ ཛཱིཝིཏཾ རཀྑམཱནོ སཔྤདཊྛཱདིཀཱལེ. ཨངྒཾ དྷནཾ ཛཱིཝིཏཉྩཱཔི སབྦཾ, ཙཛེ ནརོ དྷམྨམནུསྶརནྟོ སུཏསོམམཧཱབོདྷིསཏྟཱདཡོ ཝིཡ. ཏེནཱཧ ‘‘ཨིམཾ སཔྤུརིསཱནུསྶཏིཾ ཨཝིཛཧནྟོ’’ཏི. ཛིགྷཙྪཱཔརིསྶམེན ཛཱིཝིཏསཾསཡེ སཏིཔི. སིཀྑཱཔདཾ ཨཝཱིཏིཀྐམྨཱཏི ཨསྶཱམིཀེསུ ཨམྦཕལེསུ ¶ བྷཱུམིཡཾ པཏིཏེསུ སམཱིཔེཡེཝ སནྟེསུཔི པཊིགྒཱཧཀཱབྷཱཝེན ཨཔརིབྷུཉྫནྟོ པཊིགྒཧཎསིཀྑཱཔདཾ ཨཝཱིཏིཀྐམིཏྭཱ.

སཱིལཝནྟསྶཱཏི སཱིལཝནྟབྷཱཝསྶ ཀཱརཎཱ, སཱིལཝནྟསྶ ཝཱ ཏུཡ྄ཧཾ ཨེཏཱདིསཾ ཨཾསེན ཝཱཧཎཱདིཀཾ ཀིཙྩཾ ཀརོཏི, ཀཱརཎཱ སཱིལསྶཱཏི ཨདྷིཔྤཱཡོ. སུདྷོཏཛཱཏིམཎི ཝིཡཱཏི ཙཏཱུསུ པཱསཱཎེསུ སམྨདེཝ དྷོཏཛཱཏིམཎི ཝིཡ. མཧཱསངྒྷརཀྑིཏབྷཱགིནེཡྻསངྒྷརཀྑིཏཏྠེརཱནཾ ཝིཡཱཏི མཧཱསངྒྷརཀྑིཏཏྠེརསྶ, ཏསྶེཝ བྷཱགིནེཡྻསངྒྷརཀྑིཏཏྠེརསྶ ཝིཡ ཙ. ‘‘ཀིམཏྠཾ མཡཾ ཨིདྷཱགཏཱ’’ཏི མཧཱཛནསྶ ཝིཔྤཊིསཱརོ བྷཝིསྶཏཱིཏི ཨདྷིཔྤཱཡོ. ཨཙྪརིཀཱཡཱཏི ཨངྒུལིཕོཊནེན. ཨསཏིཡཱཏི སཏིསམྨོསེན. ཨཉྙཱཎཔཀཏནྟི ཨཉྙཱཎེན ཨཔརཛ྄ཛྷིཏྭཱ ཀཏཾ, ཨཛཱནིཏྭཱ ཀཏནྟི ཨཏྠོ.

ཨཔྤསྶུཏོཔི ཙེ ཧོཏཱིཏི སུཏྟགེཡྻཱདིསུཏརཧིཏོ ཧོཏི ཙེ. སཱིལེསུ ཨསམཱཧིཏོཏི པཱཏིམོཀྑསཾཝརཱདིསཱིལེསུཔི ན སམྨཱ པཏིཊྛིཏོ ཧོཏི ཙེ. ནཱསྶ སམྤཛྫཏེ སུཏནྟི ཨསྶ སཱིལརཧིཏསྶ པུགྒལསྶ སུཏཾ ཨཏྟནོ, པརེསཉྩ ཀཏྠཙི བྷཝསམྤཏྟིཨཱཝཧཾ ན ཧོཏི. ‘‘དུསྶཱིལོཡཾ པུརིསཔུགྒལོ’’ཏི ཧི སིཀྑཱཀཱམཱ ན ཏསྶ སནྟིཀཾ ཨུཔསངྐམནྟི. བཧུསྶུཏོཔི ཙེཏི ཨེཏྠ ཙེ-ཏི ནིཔཱཏམཏྟཾ. པསཾསིཏོཏི པསཾསིཏོ ཨེཝ ནཱམ.

རཱགཝསེན ཨཔརཱམཊྛགཧཎེན ཏཎྷཱཔརཱམཱསཱབྷཱཝམཱཧ. ཏཐཱརཱུཔནྟི རཱགཝསེན ཨཔརཱམཊྛཾ. བྷིནྡིཏྭཱཏི ཧནིཏྭཱ. སཉྙཔེསྶཱམཱིཏི སཉྙཏྟིཾ ¶ ཀརིསྶཱམི, ཨཔྤཀཾ ཝེལཾ མཾ ཝིསྶེཛྫེཏུནྟི ཨདྷིཔྤཱཡོ. ཨཊྚིཡཱམཱིཏི ཛིགུཙྪཱམི. ཧརཱཡཱམཱིཏི ལཛྫཱམི.

པལིཔནྣོཏི སཱིདནྟོ, སམྨཀྑིཏོ ཝཱ. སཱིལེནེཝ སདྡྷིཾ མརིསྶཱམཱིཏི སཱིལཾ ཨཝིནཱསེནྟོ ཏེན སཧེཝ མརིསྶཱམི, ན ཨིདཱནི ཀདཱཙིཔི ཏཾ པརིཙྩཛིསྶཱམི. སཏི ཧི བྷཝཱདཱནེ སཱིལེན ཝིཡོགོ སིཡཱ, བྷཝམེཝ ནཱདིཡིསྶཱམཱིཏི ཨདྷིཔྤཱཡོ. རོགཾ སམྨསནྟོཏི རོགབྷཱུཏཾ ཝེདནཾ ཝེདནཱམུཁེན སེསཱརཱུཔདྷམྨེ, རཱུཔདྷམྨེ ཙ པརིགྒཧེཏྭཱ ཝིཔསྶནྟོ.

རུཔྤཏོཏི ཝིཀཱརཾ ཨཱཔཱདིཡམཱནསརཱིརསྶ. པརིསུསྶཏཱིཏི སམནྟཏོ སུསྶཏི. ཡཐཱ ཀིཾ? པུཔྥཾ ཡཐཱ པཾསུནི ཨཱཏཔེ ཀཏཾ སཱུརིཡཱཏཔསནྟཏྟེ པཾསུནི ཋཔིཏཾ སིརཱིསཱདིཔུཔྥཾ ཝིཡཱཏི ¶ ཨཏྠོ. ཨཛཉྙནྟི ཨམནུཉྙཾ ཛིགུཙྪནཱིཡཾ. ཛཉྙསངྑཱཏནྟི བཱལེཧི ‘‘ཛཉྙ’’ནྟི ཨེཝཾ ཀིཏྟིཏཾ. ཛཉྙརཱུཔཾ ཨཔསྶཏོཏི ཡཐཱབྷཱུཏཾ ཨཔྤསྶཏོ ཨཝིདྡསུནོ ‘‘ཛཉྙ’’ནྟི པསཾསིཏཾ. དྷིརཏྠུམནྟི དྷི ཨཏྠུ ཨིམཾ, དྷི-སདྡཡོགེན སབྦཏྠ ཨུཔཡོགཝཙནཾ, ཨིམསྶ པཱུཏིཀཱཡསྶ དྷིཀཱརོ ཧོཏཱུཏི ཨཏྠོ. དུགྒནྡྷིཡནྟི དུགྒནྡྷིཀཾ དུགྒནྡྷཝནྟཾ. ཡཏྠ ཡཐཱཝུཏྟེ པཱུཏིཀཱཡེ རཱགཧེཏུ པམཏྟཱ པམཱདཾ ཨཱཔནྣཱ. པཛཱཏི སཏྟཱ. ཧཱཔེནྟི མགྒཾ སུགཏཱུཔཔཏྟིཡཱཏི སུགཏཱུཔཔཏྟིཡཱ མགྒཾ, སཱིལམྤི ཧཱཔེནྟི, པགེཝ ཛྷཱནཱདིནྟི ཨདྷིཔྤཱཡོ. ཀེཝལཾ ‘‘ཨརཧནྟོ’’ཏི ཝཏྟབྦཱ སཱཝཀཁཱིཎཱསཝཱ, ཨིཏརེ པན པཙྩེཀབུདྡྷཱ སམྨཱསམྦུདྡྷཱཏི སཧ ཝིསེསནེནཱཏི ཨཱཧ ‘‘ཨརཧནྟཱདཱིན’’ནྟི. སབྦདརཐཔྤཊིཔྤསྶདྡྷིཡཱཏི སབྦཀིལེསདརཐཔྤཊིཔྤསྶདྡྷིཡཱ.

དུཏིཡསཱིལཔཉྩཀཝཎྞནཱ

པཱཎཱཏིཔཱཏཱདཱིནནྟི ཨཱདི-སདྡེན ཨདིནྣཱདཱནཱདཱིནཾ ཨགྒམགྒཝཛ྄ཛྷཀིལེསཔརིཡོསཱནཱནཾ སངྒཧོ དཊྛབྦོ. པཧཱནཱདཱིཏི ཨཱདི-སདྡེན ཝེརམཎིཨཱདཱིནཾ ཙཏུནྣཾ. ཀེསུཙི པོཏྠཀེསུ ‘‘པཧཱནཝསེནཱ’’ཏི ལིཁནྟི, སཱ པམཱདལེཁཱ. པཱཎཱཏིཔཱཏསྶ པཧཱནཾ སཱིལནྟི ཧིརོཏྟཔྤཀརུཎཱལོབྷཱདིཔམུཁེན ཡེན ཀུསལཙིཏྟུཔྤཱདེན པཱཎཱཏིཔཱཏོ པཧཱིཡཏི, ཏཾ པཱཎཱཏིཔཱཏསྶ པཧཱནཾ སཱིལནཊྛེན སཱིལཾ. ཏཐཱ པཱཎཱཏིཔཱཏཱ ¶ ཝིརཏི ཝེརམཎཱི སཱིལཾ. པཱཎཱཏིཔཱཏསྶ པཊིཔཀྑཙེཏནཱ ཙེཏནཱ སཱིལཾ. པཱཎཱཏིཔཱཏསྶ སཾཝརཎཾ པཝེསདྭཱརཔིདྷཱནཾ སཾཝརོ སཱིལཾ. པཱཎཱཏིཔཱཏསྶ ཨཝཱིཏིཀྐམནཾ ཨཝཱིཏིཀྐམོ སཱིལཾ. ཨདིནྣཱདཱནསྶཱཏིཨཱདཱིསུཔི ཨེསེཝ ནཡོ. ཨབྷིཛ྄ཛྷཱདཱིནཾ པན ཨནབྷིཛ྄ཛྷཱདིཝསེན པཧཱནཾ ཝེདིཏབྦཾ. ཝེརམཎཱི ཙེཏནཱ ཏཾསམྤཡུཏྟཱ སཾཝརཱཝཱིཏིཀྐམཱ ཏཔྤམུཁཱ དྷམྨཱ.

ཨེཝཾ དསཀུསལཀམྨཔཐཝསེན པཧཱནསཱིལཱདཱིནི དསྶེཏྭཱ ཨིདཱནི སཨུཔཱཡཱནཾ ཨཊྛནྣཾ སམཱཔཏྟཱིནཾ, ཨཊྛཱརསནྣཾ མཧཱཝིཔསྶནཱནཾ, ཨརིཡམགྒཱནཉྩ ཝསེན ཏཱནི དསྶེཏུཾ ‘‘ནེཀྑམྨེནཱ’’ཏིཨཱདི ཨཱརདྡྷཾ. ཏཏྠ ནེཀྑམྨེནཱཏི ཨལོབྷཔྤདྷཱནེན ཀུསལཙིཏྟུཔྤཱདེན. ཀུསལཱ ཧི དྷམྨཱ ཀཱམཔཊིཔཀྑཱ ཨིདྷ ‘‘ནེཀྑམྨ’’ནྟི ཨདྷིཔྤེཏཱ. ཏེནཱཧ ‘‘ཀཱམཙྪནྡསྶ པཧཱནཾ སཱིལ’’ནྟིཨཱདི. ཏཏྠ པཧཱནསཱིལཱདཱིནི ཧེཊྛཱ ཝུཏྟནཡེནེཝ ཝེདིཏབྦཱནི. ཝིསེསམེཝ ཝཀྑཱམ. ཨབྱཱཔཱདེནཱཏི མེཏྟཱཡ. ཨཱལོཀསཉྙཱཡཱཏི ཝིབྷཱུཏཾ ཀཏྭཱ མནསིཀརཎེན ཨུཔཊྛིཏཨཱལོཀསཉྫཱནནེན ¶ . ཨཝིཀྑེཔེནཱཏི སམཱདྷིནཱ. དྷམྨཝཝཏྠཱནེནཱཏི ཀུསལཱདིདྷམྨཱནཾ ཡཱཐཱཝནིཙྪཡེན. སཔཙྩཡནཱམརཱུཔཝཝཏྠཱནེནཱཏིཔི ཝདནྟི.

ཨེཝཾ ཀཱམཙྪནྡཱདིནཱིཝརཎཔྤཧཱནེན ‘‘ཨབྷིཛ྄ཛྷཾ ལོཀེ པཧཱཡཱ’’ཏིཨཱདིནཱ (ཝིབྷ. ༥༣༨) ཝུཏྟཱཡ པཋམཛ྄ཛྷཱནཱདྷིགམསྶ ཨུཔཱཡབྷཱུཏཱཡ པུབྦབྷཱགཔཊིཔདཱཡ ཝསེན པཧཱནསཱིལཱདཱིནི དསྶེཏྭཱ ཨིདཱནི སཨུཔཱཡཱནཾ ཨཊྛསམཱཔཏྟིཨཱདཱིནཾ ཝསེན དསྶེཏུཾ ‘‘ཉཱཎེནཱ’’ཏིཨཱདི ཝུཏྟཾ. ནཱམརཱུཔཔརིགྒཧཀངྑཱཝིཏརཎཱནཾ ཧི ཝིབནྡྷབྷཱུཏསྶ མོཧསྶ དཱུརཱིཀརཎེན ཉཱཏཔརིཉྙཱཡ ཋིཏསྶ ཨནིཙྩསཉྙཱདཡོ སིཛ྄ཛྷནྟི. ཏཐཱ ཛྷཱནསམཱཔཏྟཱིསུ ཨབྷིརཏིནིམིཏྟེན པཱམོཛྫེན. ཏཏྠ ཨནབྷིརཏིཡཱ ཝིནོདིཏཱཡ ཛྷཱནཱདཱིནཾ སམདྷིགམོཏི སམཱཔཏྟིཝིཔསྶནཱནཾ ཨརཏིཝིནོདནཨཝིཛྫཱཔདཱལནཱདིནཱ ཨུཔཱཡོཏི ཝུཏྟཾ ‘‘ཉཱཎེན ཨཝིཛྫཱཡ, པཱམོཛྫེན ཨརཏིཡཱ’’ཏི. ཨུཔྤཊིཔཱཊིནིདྡེསོ པན ནཱིཝརཎསབྷཱཝཱཡ ཨཝིཛྫཱཡ ཧེཊྛཱནཱིཝརཎེསུཔི སངྒཧདསྶནཏྠནྟི དཊྛབྦཾ.

‘‘པཋམེན ¶ ཛྷཱནེན ནཱིཝརཎཱན’’ནྟིཨཱདཱིསུ ཀཐཾ ཛྷཱནཱནཾ སཱིལབྷཱཝོ, ཀཐཾ ཝཱ ཏཏྠ ཝིརཏིཡཱ སམྦྷཝོ. སུཝིསུདྡྷཀཱཡཀམྨཱདིཀསྶ ཧི ཙིཏྟསམཱདཱནཝསེན ཨིམཱནི ཛྷཱནཱནི པཝཏྟནྟི, ན པརིཏྟཀུསལཱནི ཝིཡ ཀཱཡཀམྨཱདིཝིསོདྷནཝསེན, ནཱཔི མགྒཕལདྷམྨཱ ཝིཡ དུཙྩརིཏདུརཱཛཱིཝསམུཙྪེདཔཊིཔྤསྶམྦྷནཝསེནཱཏི? སཙྩམེཏཾ. མཧགྒཏདྷམྨེསུ ནིཔྤརིཡཱཡེན ནཏྠི སཱིལནཊྛོ, ཀུཏོ ཝིརམཎཊྛོ. པརིཡཱཡེན པནེཏཾ ཝུཏྟནྟི དཊྛབྦཾ. ཀོ པན སོ པརིཡཱཡོ? ཡདགྒེན མཧགྒཏཱ ཀུསལདྷམྨཱ པཊིཔཀྑེ པཛཧནྟི, ཏདགྒེན ཏཏོ ཨོརཏཱ. ཏེ ཙ ཡཐཱ ཙིཏྟཾ ནཱརོཧནྟི, ཨེཝཾ སཾཝུཏཱ ནཱམ ཧོནྟི. པརིཡུཊྛཱནསངྑཱཏོ མནོདྭཱརེ ཝཱིཏིཀྐམོ ནཏྠི ཨེཏེསཱུཏི ཨཝཱིཏིཀྐམཱཏི ཙ ཝུཙྩནྟི, ཙེཏནཱ པན ཏཾསམྤཡུཏྟཱཏི. སོཡམཏྠོ པརཏོ ཨཱགམིསྶཏི. ཨེཝཉྩ ཀཏྭཱ ཝིཏཀྐཱདིཔཧཱནཝཙནམྤི སམཏྠིཏཾ ཧོཏི. ན ཧི ནིཔྤརིཡཱཡཏོ སཱིལཾ ཀུསལདྷམྨཱནཾ པཧཱཡཀཾ ཡུཛྫཏི, ན ཙེཏྠ ཨཀུསལཝིཏཀྐཱདཡོ ཨདྷིཔྤེཏཱ. ཀིཉྩཱཔི པཋམཛ྄ཛྷཱནཱུཔཙཱརེཡེཝ དུཀྑསྶ, ཙཏུཏྠཛ྄ཛྷཱནཱུཔཙཱརེ ཙ སུཁསྶ པཧཱནཾ ཧོཏི, ཨཏིསཡཔཧཱནཾ པན སནྡྷཱཡ ཝུཏྟཾ ‘‘ཙཏུཏྠེན ཛྷཱནེན སུཁདུཀྑཱནཾ པཧཱན’’ནྟི. ‘‘ཨཱཀཱསཱནཉྩཱཡཏནསམཱཔཏྟིཡཱ’’ཏིཨཱདཱིསུ ཡཾ ཝཏྟབྦཾ, ཏཾ ཨཱརུཔྤཀཐཱཡཾ (ཝིསུདྡྷི. ༡.༢༧༥ ཨཱདཡོ) ཨཱགམིསྶཏི.

ཨནིཙྩསྶ, ཨནིཙྩནྟི ཝཱ ཨནུཔསྶནཱ ཨནིཙྩཱནུཔསྶནཱ. ཏེབྷཱུམིཀདྷམྨཱནཾ ཨནིཙྩཏཾ གཧེཏྭཱ ¶ པཝཏྟཱཡ ཝིཔསྶནཱཡེཏཾ ནཱམཾ. ནིཙྩསཉྙཱཡཱཏི ‘‘སངྑཏདྷམྨཱ ནིཙྩཱ སསྶཏཱ’’ཏི ཨེཝཾ པཝཏྟཱཡ མིཙྪཱསཉྙཱཡ, སཉྙཱགྒཧཎེནེཝ དིཊྛིཙིཏྟཱནམྤི གཧཎཾ དཊྛབྦཾ. ཨེས ནཡོ ཨིཏོ པརཱསུཔི. ནིབྦིདཱནུཔསྶནཱཡཱཏི སངྑཱརེསུ ནིབྦིནྡནཱཀཱརེན པཝཏྟཱཡ ཨནུཔསྶནཱཡ. ནནྡིཡཱཏི སཔྤཱིཏིཀཏཎྷཱཡ. ཝིརཱགཱནུཔསྶནཱཡཱཏི ཝིརཛྫནཱཀཱརེན པཝཏྟཱཡ ཨནུཔསྶནཱཡ. རཱགསྶཱཏི སངྑཱརེསུ རཱགསྶ. ནིརོདྷཱནུཔསྶནཱཡཱཏི སངྑཱརཱནཾ ནིརོདྷསྶ ཨནུཔསྶནཱཡ. ཡཐཱ ཝཱ སངྑཱརཱ ནིརུཛ྄ཛྷནྟིཡེཝ, ཨཱཡཏིཾ པུནབྦྷཝཝསེན ན ཨུཔྤཛྫནྟི, ཨེཝཾ ཨནུཔསྶནཱ ནིརོདྷཱནུཔསྶནཱ. ཏེནེཝཱཧ ‘‘ནིརོདྷཱནུཔསྶནཱཡ ནིརོདྷེཏི ནོ སམུདེཏཱི’’ཏི (པཊི. མ. ༡.༨༣). མུཉྩིཏུཀཱམཏཱཡ ཧི ཨཡཾ བལཔྤཏྟཱ. སངྑཱརཱནཾ པཊིནིསྶཛྫནཱཀཱརེན པཝཏྟཱ ཨནུཔསྶནཱ པཊིནིསྶགྒཱནུཔསྶནཱ. པཊིསངྑཱ སནྟིཊྛནཱ ཧི ཨཡཾ ¶ . ཨཱདཱནསྶཱཏི ནིཙྩཱདིཝསེན གཧཎསྶ. སནྟཏིསམཱུཧཀིཙྩཱརམྨཎཝསེན ཨེཀཏྟགཧཎཾ གྷནསཉྙཱ, ཏསྶཱ གྷནསཉྙཱཡ. ཨཱཡཱུཧནསྶཱཏི ཨབྷིསངྑརཎསྶ. སངྑཱརཱནཾ ཨཝཏྠཱདིཝིསེསཱཔཏྟི ཝིཔརིཎཱམོ. དྷུཝསཉྙཱཡཱཏི ཐིརབྷཱཝགཧཎསྶ. ནིམིཏྟསྶཱཏི སམཱུཧཱདིགྷནཝསེན སཀིཙྩཔརིཙྪེདཏཱཡ ཙ སངྑཱརཱནཾ སཝིགྒཧཏཱཡ. པཎིདྷིཡཱཏི རཱགཱདིཔཎིདྷིཡཱ, ཏཎྷཱཝསེན སངྑཱརེསུ ནིནྣཏཱཡཱཏི ཨཏྠོ. ཨབྷིནིཝེསསྶཱཏི ཨཏྟཱནུདིཊྛིཡཱ. ཨནིཙྩདུཀྑཱདིཝསེན སབྦཏེབྷཱུམཀདྷམྨཏིརཎཱ ཨདྷིཔཉྙཱདྷམྨཝིཔསྶནཱ. སཱརཱདཱནཱབྷིནིཝེསསྶཱཏི ཨསཱརེསུ སཱརགཧཎཝིཔལླཱསསྶ. ཡཐཱབྷཱུཏཉཱཎདསྶནཾ ཐིརབྷཱཝཔཏྟཱ ཨནིཙྩཱདིཨནུཔསྶནཱཝ. ཨུདཡབྦཡཉཱཎནྟི ཀེཙི. སཔྤཙྩཡནཱམརཱུཔདསྶནནྟི ཨཔརེ. ‘‘ཨིསྶརཀུཏྟཱདིཝསེན ལོཀོ སམུཔྤནྣོ’’ཏི ཨབྷིནིཝེསོ སམྨོཧཱབྷིནིཝེསོ. ཨུཙྪེདསསྶཏཱབྷིནིཝེསོཏི ཀེཙི. ‘‘ཨཧོསིཾ ནུ ཁོ ཨཧམཏཱིཏམདྡྷཱན’’ནྟིཨཱདིནཡཔྤཝཏྟཱ (མ. ནི. ༡.༡༨; སཾ. ནི. ༢.༢༠; མཧཱནི. ༡༧༤) སཾསཡཱཔཏྟི སམྨོཧཱབྷིནིཝེསོཏི ཨཔརེ. སངྑཱརེསུ ཏཱཎལེཎབྷཱཝགཧཎཾ ཨཱལཡཱབྷིནིཝེསོ. ‘‘ཨཱལཡརཏཱ ཨཱལཡསམྨུདིཏཱ’’ཏི (དཱི. ནི. ༢.༦༧; མ. ནི. ༡.༢༨༡; ༢.༣༣༧; སཾ. ནི. ༡.༡༧༢; མཧཱཝ. ༧-༨) ཝཙནཏོ ཨཱལཡོ ཏཎྷཱ. སཱ ཨེཝ ཙཀྑཱདཱིསུ, རཱུཔཱདཱིསུ ཙ ཨབྷིནིཝིསནཝསེན པཝཏྟིཡཱ ཨཱལཡཱབྷིནིཝེསོཏི ཨཔརེ. ‘‘ཨེཝཾ ཋིཏཱ ཏེ སངྑཱརཱ པཊིནིསྶཛྫཱིཡནྟཱི’’ཏི པཝཏྟཾ ཉཱཎཾ པཊིསངྑཱནུཔསྶནཱ. ཨཔྤཊིསངྑཱ པཊིསངྑཱཡ པཊིཔཀྑབྷཱུཏཱ མོཧཔྤདྷཱནཱ ཨཀུསལདྷམྨཱ. ཝཊྚཏོ ཝིགཏཏྟཱ ཝིཝཊྚཾ ནིབྦཱནཾ, ཏཏྠ ནིནྣབྷཱཝསངྑཱཏེན ཨནུཔསྶནེན པཝཏྟི ཝིཝཊྚཱནུཔསྶནཱ, སངྑཱརུཔེཀྑཱ ཙེཝ ཨནུལོམཉཱཎཉྩ. སཉྙོགཱབྷིནིཝེསོ སཾཡུཛྫནཝསེན སངྑཱརེསུ ཨབྷིནིཝིསནཾ.

དིཊྛེཀཊྛཱནནྟི ¶ དིཊྛིཡཱ སཧཛེཀཊྛཱནཉྩ པཧཱནེཀཊྛཱནཉྩ. ཨོལཱ༹རིཀཱནནྟི ཨུཔརིམགྒཝཛ྄ཛྷེ ཀིལེསེ ཨུཔཱདཱཡ ཝུཏྟཾ. ཨཉྙཐཱ དསྶནེན པཧཱཏབྦཱཔི དུཏིཡམགྒཝཛ྄ཛྷེཧི ཨོལཱ༹རིཀཱ. ཨཎུསཧགཏཱནནྟི ཨཎུབྷཱུཏཱནཾ, ཨིདཾ ཧེཊྛིམམགྒཝཛ྄ཛྷེ ཨུཔཱདཱཡ ཝུཏྟཾ. སབྦཀིལེསཱནནྟི ཨཝསིཊྛསབྦཀིལེསཱནཾ. ན ཧི པཋམམགྒཱདཱིཧི པཧཱིནཱ ཀིལེསཱ པུན པཧཱིཡནྟི.

‘‘ཙིཏྟསྶ ¶ ཨཝིཔྤཊིསཱརཱཡ སཾཝཏྟནྟཱི’’ཏིཨཱདཱིསུ སཾཝརོ ཨཝིཔྤཊིསཱརཏྠཱཡ. ‘‘ཨཝིཔྤཊིསཱརཏྠཱནི ཁོ, ཨཱནནྡ, ཀུསལཱནི སཱིལཱནཱི’’ཏི (ཨ. ནི. ༡༠.༡) ཝཙནཏོ ཙེཏསོ ཨཝིཔྤཊིསཱརཏྠཱཡ བྷཝནྟི. ཨཝིཔྤཊིསཱརོ པཱམོཛྫཏྠཱཡ. ‘‘ཡོནིསོ མནསི ཀརོཏོ པཱམོཛྫཾ ཛཱཡཏཱི’’ཏི (དཱི. ནི. ༣.༣༥༩) ཝཙནཏོ པཱམོཛྫཱཡ སཾཝཏྟནྟི. པཱམོཛྫཾ པཱིཏིཡཱ. ‘‘པམུདིཏསྶ པཱིཏི ཛཱཡཏཱི’’ཏི (དཱི. ནི. ༡.༤༦༦; ༣.༣༥༩; ཨ. ནི. ༣.༩༦; ༦.༡༠; ༡༡.༡༢) ཝཙནཏོ པཱིཏིཡཱ སཾཝཏྟནྟི. པཱིཏི པསྶདྡྷཏྠཱཡ. ‘‘པཱིཏིམནསྶ ཀཱཡོ པསྶམྦྷཏཱི’’ཏི (དཱི. ནི. ༡.༤༦༦; ༣.༣༥༩; ཨ. ནི. ༣.༩༦; ༦.༡༠; ༡༡.༡༢) ཝཙནཏོ པསྶདྡྷིཡཱ སཾཝཏྟནྟི. པསྶདྡྷི སུཁཏྠཱཡ. ‘‘པསྶདྡྷཀཱཡོ སུཁཾ ཝེདེཏཱི’’ཏི (དཱི. ནི. ༡.༤༦༦; ༣.༣༥༩; ཨ. ནི. ༣.༩༦; ༦.༡༠; ༡༡.༡༢) ཝཙནཏོ སོམནསྶཱཡ སཾཝཏྟནྟཱིཏི. ‘‘སུཁཏྠཱཡ སུཁཾ ཝེདེཏཱི’’ཏི ཙེཏྠ སོམནསྶཾ ‘‘སུཁ’’ནྟི ཝུཏྟཾ. ཨཱསེཝནཱཡཱཏི སམཱདྷིསྶ ཨཱསེཝནཱཡ. ནིརཱམིསེ ཧི སུཁེ སིདྡྷེ ‘‘སུཁིནོ ཙིཏྟཾ སམཱདྷིཡཏཱི’’ཏི (དཱི. ནི. ༡.༤༦༦; ༣.༣༥༩; ཨ. ནི. ༣.༩༦; ༦.༡༠; ༡༡.༡༢) ཝཙནཏོ སམཱདྷི སིདྡྷོཡེཝ ཧོཏི, ཏསྨཱ སམཱདྷིསྶ ཨཱསེཝནཱཡ པགུཎབལཝབྷཱཝཱཡ སཾཝཏྟནྟཱིཏི ཨཏྠོ. བྷཱཝནཱཡཱཏི ཏསྶེཝ སམཱདྷིསྶ ཝཌྜྷིཡཱ. བཧུལཱིཀམྨཱཡཱཏི པུནཔྤུནཾ ཀིརིཡཱཡ. ཨལངྐཱརཱཡཱཏི ཏསྶེཝ སམཱདྷིསྶ པསཱདྷནབྷཱུཏསདྡྷིནྡྲིཡཱདིནིཔྥཏྟིཡཱ ཨལངྐཱརཱཡ སཾཝཏྟནྟི. པརིཀྑཱརཱཡཱཏི ཨཝིཔྤཊིསཱརཱདིཀསྶ སམཱདྷིསམྦྷཱརསྶ སིདྡྷིཡཱ ཏསྶེཝ སམཱདྷིསྶ པརིཀྑཱརཱཡ སཾཝཏྟནྟི. སམྦྷཱརཏྠོ ཧི ཨིདྷ པརིཀྑཱར-སདྡོ. ‘‘ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ’’ཏིཨཱདཱིསུ (མ. ནི. ༡.༡༩༡) ཝིཡ སམྦྷཱརོཏི ཙ པཙྩཡོ ཝེདིཏབྦོ. ཀཱམཉྩཱཡཾ པརིཀྑཱར-སདྡོ ‘‘རཐོ སཱིལཔརིཀྑཱརོ’’ཏིཨཱདཱིསུ (སཾ. ནི. ༥.༤) ཨལངྐཱརཏྠོ. ‘‘སཏྟཧི ནགརཔརིཀྑཱརེཧི སུཔརིཀྑཏྟཾ ཧོཏཱི’’ཏིཨཱདཱིསུ (ཨ. ནི. ༧.༦༧) པརིཝཱརཏྠོ ཝུཏྟོ. ཨིདྷ པན ཨལངྐཱརཔརིཝཱརཱནཾ ཝིསུཾ གཧིཏཏྟཱ ‘‘སམྦྷཱརཏྠོ’’ཏི ཝུཏྟཾ ¶ . པརིཝཱརཱཡཱཏི མཱུལཀཱརཎབྷཱཝེནེཝ སམཱདྷིསྶ པརིཝཱརབྷཱུཏསཏིཝཱིརིཡཱདིདྷམྨཝིསེསསཱདྷནེན པརིཝཱརསམྤཏྟིཡཱ སཾཝཏྟནྟི. པཱརིཔཱུརིཡཱཏི ཝསཱིབྷཱཝསམྤཱཔནེན, ཝིཔསྶནཱཡ པདཊྛཱནབྷཱཝཱཔཱདནེན ཙ པརིཔུཎྞབྷཱཝསཱདྷནཏོ སམཱདྷིསྶ པཱརིཔཱུརིཡཱ སཾཝཏྟནྟི.

ཨེཝཾ སུཔརིསུདྡྷསཱིལམཱུལཀཾ སབྦཱཀཱརཔརིཔཱུརཾ སམཱདྷིཾ དསྶེཏྭཱ ཨིདཱནི ‘‘སམཱཧིཏོ པཛཱནཱཏི པསྶཏི, ཡཐཱབྷཱུཏཾ ཛཱནཾ པསྶཾ ནིབྦིནྡཏི, ནིབྦིནྡཾ ཝིརཛྫཏི ¶ , ཝིརཱགཱ ཝིམུཙྩཏཱི’’ཏི (ཨ. ནི. ༡༠.༢; ས. ནི. ༣.༡༤) ཝཙནཏོ སཱིལམཱུལཀཱནི སམཱདྷིཔདཊྛཱནཱནི པཡོཛནཱནི དསྶེཏུཾ ‘‘ཨེཀནྟནིབྦིདཱཡཱ’’ཏིཨཱདི ཝུཏྟཾ. ནིབྦིདཱཡ ཧི དསྶིཏཱཡ ཏསྶཱ པདཊྛཱནབྷཱུཏཾ ཡཐཱབྷཱུཏཉཱཎདསྶནཾ དསྶིཏམེཝ ཧོཏི, ཏསྨིཾ ཨསཏི ནིབྦིདཱཡ ཨསིཛ྄ཛྷནཏོ. ནིབྦིདཱདཡོ ཨཏྠཏོ ཝིབྷཏྟཱ ཨེཝ. ཡཐཱབྷཱུཏཉཱཎདསྶནནྟི པནེཏྠ སཔྤཙྩཡནཱམརཱུཔདསྶནཾ ཨདྷིཔྤེཏཾ. ཨེཝམེཏྠ ཨམཏམཧཱནིབྦཱནཔརིཡོསཱནཾ སཱིལསྶ པཡོཛནཾ དསྶིཏནྟི ཝེདིཏབྦཾ.

ཨིདཱནི པཧཱནཱདཱིསུ སཱིལཏྠཾ དསྶེཏུཾ ‘‘ཨེཏྠ ཙཱ’’ཏིཨཱདི ཨཱརདྡྷཾ. ཏཏྠ པཛཧནཾ ཨནུཔྤཱདནིརོདྷོ པཧཱནནྟི ཏསྶ བྷཱཝསཱདྷནཏཾ སནྡྷཱཡ ‘‘པཧཱནནྟི ཀོཙི དྷམྨོ ནཱམ ནཏྠཱི’’ཏི ཝུཏྟཾ. ཡཐཱ པནསྶ དྷམྨབྷཱཝོ སམྦྷཝཏི, ཏཐཱ ཧེཊྛཱ སཾཝཎྞིཏམེཝ. ཨེཝཾ ཧིསྶ སཱིལབྷཱཝོ སུཊྛུ ཡུཛྫཏི. ཏཾ ཏཾ པཧཱནནྟི ‘‘པཱཎཱཏིཔཱཏསྶ པཧཱནཾ, ཨདིནྣཱདཱནསྶ པཧཱན’’ནྟི ཨེཝཾ ཝུཏྟཾ ཏཾ ཏཾ པཧཱནཾ. ཏསྶ ཏསྶ ཀུསལདྷམྨསྶཱཏི པཱཎཱཏིཔཱཏསྶ པཧཱནཾ མེཏྟཱདིཀུསལདྷམྨསྶ, ཨདིནྣཱདཱནསྶ པཧཱནཾ ཙཱགཱདིཀུསལདྷམྨསྶཱཏི ཨེཝཾ ཏསྶ ཏསྶ ཀུསལདྷམྨསྶ. པཏིཊྛཱནཊྛེནཱཏི པཏིཊྛཱནབྷཱཝེན. པཧཱནཾ ཧི ཏསྨིཾ སཏི ཧོཏི, ཨསཏི ན ཧོཏི, ཏསྶ ‘‘པཏིཊྛཱན’’ནྟི ཝཏྟབྦཏཾ ལབྷཏཱིཏི ཀཏྭཱ ཡསྨིཾ སནྟཱནེ པཱཎཱཏིཔཱཏཱདཡོ ཏསྶ པཀམྤཧེཏཝོཏི ཏཔྤཧཱནཾ ཝིཀམྤཱབྷཱཝཀརཎེན ཙ སམཱདྷཱནཾ ཝུཏྟཾ. ཨེཝཾ སེསཔཧཱནེསུཔི ཝཏྟབྦཾ. སམཱདྷཱནཾ སཎྛཔནཾ, སཾཡམནཾ ཝཱ. ཨིཏརེ ཙཏྟཱརོཏི ཝེརམཎིཨཱདཡོ ཙཏྟཱརོ དྷམྨཱ ན པཧཱནཾ ཝིཡ ཝོཧཱརམཏྟནྟི ཨདྷིཔྤཱཡོ. ཏཏོ ཏཏོཏི ཏམྷཱ ཏམྷཱ པཱཎཱཏིཔཱཏཱདིཏོ. ཏསྶ ཏསྶཱཏི པཱཎཱཏིཔཱཏཱདིཀསྶ སཾཝརཎཝསེན, ཏསྶ ཏསྶ ཝཱ སཾཝརསྶ ཝསེན. ཏདུབྷཡསམྤཡུཏྟཙེཏནཱཝསེནཱཏི ཝེརམཎཱིཧི, སཾཝརདྷམྨེཧི ཙ སམྤཡུཏྟཱཡ ཙེཏནཱཡ ཝསེན. ཏཾ ཏཾ ཨཝཱིཏིཀྐམནྟསྶཱཏི ཏཾ ཏཾ པཱཎཱཏིཔཱཏཱདིཾ ཨཝཱིཏིཀྐམནྟསྶ པུགྒལསྶ, དྷམྨསམཱུཧསྶ ཝཱ ཝསེན ཙེཏསོ པཝཏྟིསབྦྷཱཝཾ སནྡྷཱཡ ཝུཏྟཱ. ཏསྨཱ ཨེཀཀྑཎེཔི ལབྦྷནྟཱིཏི ཨདྷིཔྤཱཡོ.

སཱིལསཾཀིལེསཝོདཱནཝཎྞནཱ

༢༡. སཾཀིལིསྶཏི ¶ ¶ ཏེནཱཏི སཾཀིལེསོ. ཀོ པན སོཏི ཨཱཧ ‘‘ཁཎྜཱདིབྷཱཝོ སཱིལསྶ སཾཀིལེསོ’’ཏི. ཝོདཱཡཏི ཝིསུཛ྄ཛྷཏི ཨེཏེནཱཏི ཝོདཱནཾ, ཨཁཎྜཱདིབྷཱཝོ. ལཱབྷཡསཱདཱིཏི ཨཱདི-སདྡེན ཉཱཏིཨངྒཛཱིཝིཏཱདཱིནཾ སངྒཧོ. སཏྟསུ ཨཱཔཏྟིཀྑནྡྷེསུ ཨཱདིམྷི ཝཱ ཨནྟེ ཝཱ ཝེམཛ྄ཛྷེཏི ཙ ཨིདཾ ཏེསཾ ཨུདྡེསཱདིཔཱལི༹ཝསེན ཝུཏྟཾ. ན ཧི ཨཉྙོ ཀོཙི ཨཱཔཏྟིཀྑནྡྷཱནཾ ཨནུཀྐམོ ཨཏྠི. ཁཎྜནྟི ཁཎྜཝནྟཾ, ཁཎྜིཏཾ ཝཱ. ཚིདྡནྟི ཨེཏྠཱཔི ཨེསེཝ ནཡོ. པརིཡནྟེ ཚིནྣསཱཊཀོ ཝིཡཱཏི ཝཏྠནྟེ, དསནྟེ ཝཱ ཚིནྣཝཏྠཾ ཝིཡ.

ཨེཝནྟི ཨིདཱནི ཝུཙྩམཱནཱཀཱརེན. མེཐུནསཾཡོགཝསེནཱཏི རཱགཔརིཡུཊྛཱནེན སདིསབྷཱཝཱཔཏྟིཡཱ མིཐུནཱནཾ ཨིདནྟི མེཐུནཾ, ནིབནྡྷནཾ. མེཐུནཝསེན སམཱཡོགོ མེཐུནསཾཡོགོ. ཨིདྷ པན མེཐུནསཾཡོགོ ཝིཡཱཏི མེཐུནསཾཡོགོ, ཏསྶ ཝསེན. ཨིདྷཱཏི ཨིམསྨིཾ ལོཀེ. ཨེཀཙྩོཏི ཨེཀོ. སམཎོ ཝཱ བྲཱཧྨཎོ ཝཱཏི པབྦཛྫཱམཏྟེན སམཎོ ཝཱ ཛཱཏིམཏྟེན བྲཱཧྨཎོ ཝཱ. དྭཡཾདྭཡསམཱཔཏྟིནྟི དྭཱིཧི དྭཱིཧི སམཱཔཛྫིཏབྦཾ, མེཐུནནྟི ཨཏྠོ. ན ཧེཝ ཁོ སམཱཔཛྫཏཱིཏི སམྦནྡྷོ. ཨུཙྪཱདནཾ ཨུབྦཏྟནཾ. སམྦཱཧནཾ པརིམདྡནཾ. སཱདིཡཏཱིཏི ཨདྷིཝཱསེཏི. ཏདསྶཱདེཏཱིཏི ཏཾ ཨུཙྪཱདནཱདིཾ ཨབྷིརམཏི. ནིཀཱམེཏཱིཏི ཨིཙྪཏི. ཝིཏྟིནྟི ཏུཊྛིཾ. ཨིདམྤི ཁོཏི ཨེཏྠ ཨིདནྟི ཡཐཱཝུཏྟཾ སཱདིཡནཱདིཾ ཁཎྜབྷཱཝཱདིཝསེན ཨེཀཾ ཀཏྭཱ ཝུཏྟཾ. པི-སདྡོ ཝཀྑམཱནཾ ཨུཔཱདཱཡ སམུཙྩཡཏྠོ. ཁོ-སདྡོ ཨཝདྷཱརཎཏྠོ. ཨིདཾ ཝུཏྟཾ ཧོཏི – ཡདེཏཾ བྲཧྨཙཱརཱིཔཊིཉྙསྶ ཨསཏིཔི དྭཡཾདྭཡསམཱཔཏྟིཡཾ མཱཏུགཱམསྶ ཨུཙྪཱདནནྷཱཔནསམྦཱཧནསཱདིཡནཱདི, ཨིདམྤི ཨེཀཾསེན ཏསྶ བྲཧྨཙརིཡསྶ ཁཎྜཱདིབྷཱཝཱཔཱདནཏོ ཁཎྜམྤི ཚིདྡམྤི སབལམྤི ཀམྨཱསམྤཱིཏི. ཨེཝཾ པན ཁཎྜཱདིབྷཱཝཱཔཏྟིཡཱ སོ ཨཔརིསུདྡྷཾ བྲཧྨཙརིཡཾ ཙརཏི, ན པརིསུདྡྷཾ, སཾཡུཏྟོ མེཐུནསཾཡོགེན, ན ཝིསཾཡུཏྟོ. ཏཏོ ཙསྶ ན ཛཱཏིཨཱདཱིཧི པརིམུཏྟཱིཏི དསྶེནྟོ ‘‘ཨཡཾ ཝུཙྩཏཱི’’ཏིཨཱདིམཱཧ.

སཉྫགྒྷཏཱིཏི ཀིལེསཝསེན མཧཱཧསིཏཾ ཧསཏི. སཾཀཱིལ༹ཏཱིཏི ཀཱཡསཾསགྒཝསེན ཀཱིལ༹ཏི. སཾཀེལཱཡཏཱིཏི སབྦསོ མཱཏུགཱམཾ ཀེལཱཡནྟོ ¶ ཝིཧརཏི. ཙཀྑུནཱཏི ཨཏྟནོ ཙཀྑུནཱ. ཙཀྑུནྟི མཱཏུགཱམསྶ ཙཀྑུཾ. ཨུཔནིཛ྄ཛྷཱཡཏཱིཏི ཨུཔེཙྩ ནིཛ྄ཛྷཱཡཏི ཨོལོཀེཏི. ཏིརོཀུཊྚཱཏི ཀུཊྚསྶ ¶ པརཏོ. ཏཐཱ ཏིརོཔཱཀཱརཱ. མཏྟིཀཱམཡཱ བྷིཏྟི ཀུཊྚཾ, ཨིཊྛཀཱམཡཱ པཱཀཱརོཏི ཝདནྟི. ཡཱ ཀཱཙི ཝཱ བྷིཏྟི པོརིསཏོ དིཡཌྜྷརཏནུཙྩཔྤམཱཎཱ ཀུཊྚཾ, ཀུཊྚཏོ ཨདྷིཀོ པཱཀཱརོ.

ཨསྶཱཏི བྲཧྨཙཱརཱིཔཊིཉྙསྶ. པུབྦེཏི ཝཏསམཱདཱནཏོ པུབྦེ. ཀཱམགུཎེཧཱིཏི ཀཱམཀོཊྛཱསེཧི. སམཔྤིཏནྟི སུཊྛུ ཨཔྤིཏཾ སཧིཏཾ. སམངྒཱིབྷཱུཏནྟི སམནྣཱགཏཾ. པརིཙཱརཡམཱནནྟི ཀཱིལ༹ནྟཾ, ཨུཔཊྛཧིཡམཱནཾ ཝཱ. པཎིདྷཱཡཱཏི པཏྠེཏྭཱ. སཱིལེནཱཏིཨཱདཱིསུ ཡམནིཡམཱདིསམཱདཱནཝསེན སཱིལཾ. ཨཝཱིཏིཀྐམཝསེན ཝཏཾ. ཨུབྷཡམྤི སཱིལཾ. དུཀྐརཙརིཡཝསེན པཝཏྟིཏཾ ཝཏཾ. ཏཾཏཾཨཀིཙྩསམྨཏཏོ ཝཱ ནིཝཏྟིལཀྑཎཾ སཱིལཾ. ཏཾཏཾསམཱདཱནཝཏོ ཝེསབྷོཛནཀིཙྩཀརཎཱདིཝིསེསཔཊིཔཏྟི ཝཏཾ. སབྦཐཱཔི དུཀྐརཙརིཡཱ ཏཔོ. མེཐུནཝིརཏི བྲཧྨཙརིཡཾ.

སབྦསོཏི ཨནཝསེསཏོ, སབྦེསཾ ཝཱ. ཨབྷེདེནཱཏི ཨཝཱིཏིཀྐམེན. ཨཔརཱཡ ཙ པཱཔདྷམྨཱནཾ ཨནུཔྤཏྟིཡཱ, གུཎཱནཾ ཨུཔྤཏྟིཡཱ སངྒཧིཏོཏི ཡོཛནཱ. ཏཏྠ ཀུཛ྄ཛྷནལཀྑཎོ ཀོདྷོ. ཨུཔནནྡྷནལཀྑཎོ ཨུཔནཱཧོ. པརེསཾ གུཎམཀྑནལཀྑཎོ མཀྑོ. ཡུགགྒཱཧལཀྑཎོ པལཱ༹སོ. པརསམྤཏྟིཨུསཱུཡནལཀྑཎཱ ཨིསྶཱ. ཨཏྟསམྤཏྟིནིགཱུཧནལཀྑཎཾ མཙྪརིཡཾ. སནྟདོསཔཊིཙྪཱདནལཀྑཎཱ མཱཡཱ. ཨསནྟགུཎསམྦྷཱཝནལཀྑཎཾ སཱཋེཡྻཾ. ཙིཏྟསྶ ཐདྡྷབྷཱཝལཀྑཎོ ཐམྦྷོ. ཀརཎུཏྟརིཡལཀྑཎོ སཱརམྦྷོ. ཨུནྣཏིལཀྑཎོ མཱནོ. ཨབྦྷུནྣཏིལཀྑཎོ ཨཏིམཱནོ. མཛྫནལཀྑཎོ མདོ. ཙིཏྟཝོསགྒལཀྑཎོ པམཱདོ. ཨཱདི-སདྡེན ལོབྷམོཧཝིཔརཱིཏམནསིཀཱརཱདཱིནཾ སངྒཧོ.

ཨིདཱནི ‘‘ཨཁཎྜཱདིབྷཱཝོ པནཱ’’ཏིཨཱདིནཱ ཝུཏྟམེཝཏྠཾ པཱཀཊཏརཾ ཀཱཏུཾ ‘‘ཡཱནི ཧཱི’’ཏིཨཱདིམཱཧ. ཏཏྠ ཨནུཔཧཏཱནཱིཏི ཨནུཔདྡུཏཱནི. ཝིཝཊྚཱུཔནིསྶཡཏཱཡ ཏཎྷཱདཱསབྱཏོ མོཙནེན བྷུཛིསྶབྷཱཝཀརཎཾ. ཨཝིཉྙཱུནཾ ཨཔྤམཱཎཏྟཱ ཝུཏྟཾ ‘‘ཝིཉྙཱུཧི པསཏྠཏྟཱ’’ཏི. སམཱདྷིསཾཝཏྟནཾ ཝཱ ཨེཏེསཾ པཡོཛནཾ, སམཱདྷིསཾཝཏྟནེ ཝཱ ནིཡུཏྟཱནཱིཏི སམཱདྷིསཾཝཏྟནིཀཱནི. ནིདྡཱནེན སསྶསམྤཏྟི ཝིཡ པཊིཔཀྑཝིགམེན སཱིལསམྤདཱ, སཱ ཙ ཏཏྠ ¶ སཏི དོསདསྶནེཏི ཨཱཧ ‘‘སཱིལཝིཔཏྟིཡཱ ཙ ཨཱདཱིནཝདསྶནེནཱ’’ཏི. ནིསམྨཀཱརཱིནཾ པཡོཛནགརུཀཏཱཡ དིཊྛགུཎེཡེཝ སམྨཱཔཊིཔཏྟཱིཏི ཝུཏྟཾ ‘‘སཱིལསམྤཏྟིཡཱ ཙ ཨཱནིསཾསདསྶནེནཱ’’ཏི.

ཏཏྠ ¶ སཱིལཝིཔཏྟིཡཱ ཨཱདཱིནཝོ སཱིལསམྤདཱཡ ཧེཊྛཱ དསྶིཏཨཱནིསཾསཔཊིཔཀྑཏོ ཝེདིཏབྦོ, ཏཾ སུཝིཉྙེཡྻནྟི ཨཝིཏྠཱརེཏྭཱ པཀཱརནྟརེཧི དསྶེཏུཾ ‘‘ཨཔིཙཱ’’ཏི ཨཱརདྡྷཾ. ཏཏྠ ཡཐཱ སཱིལསམྤདཱ སཏྟཱནཾ མནུཉྙབྷཱཝཀཱརཎཾ, ཨེཝཾ སཱིལཝིཔཏྟི ཨམནུཉྙབྷཱཝཀཱརཎནྟི ཨཱཧ ‘‘དུསྶཱིལོ…པེ… དེཝམནུསྶཱན’’ནྟི. ཨནནུསཱསནཱིཡོ ཛིགུཙྪིཏབྦཏོ. དུཀྑིཏོཏི སཉྫཱཏདུཀྑོ. ཝིཔྤཊིསཱརཱིཏི ‘‘ཨཀཏཾ ཝཏ མེ ཀལྱཱཎ’’ནྟིཨཱདིནཱ པཙྩཱནུཏཱཔཱི. དུབྦཎྞོཏི གུཎཝཎྞེན, ཀཱཡཝཎྞེན ཙ ཝིརཧིཏོ. ཨསྶཱཏི དུསྶཱིལསྶ. སམྥསྶིཏཱནཾ དུཀྑོ དུཀྑཱཝཧོ སམྥསྶོ ཨེཏསྶཱཏི དུཀྑསམྥསྶོ. གུཎཱནུབྷཱཝཱབྷཱཝཏོ ཨཔྤཾ ཨགྒྷཏཱིཏི ཨཔྤགྒྷོ. ཨནེཀཝསྶགཎིཀགཱུཐཀཱུཔོ ཝིཡཱཏི ཨནེཀཝསྶསམཱུཧེ སཉྩིཏུཀྐཱརཱཝཱཊོ ཝིཡ. དུབྦིསོདྷནོ སོདྷེཏུཾ ཨསཀྐུཎེཡྻོ. ཚཝཱལཱཏཾ ཚཝཌཱཧེ སནྟཛྫནུམྨུཀྐཾ. ཨུབྷཏོ པརིབཱཧིརོཏི སཱམཉྙཏོ, གིཧིབྷོགཏོ ཙ པརིཧཱིནོ. སབྦེསཾ ཝེརཱི, སབྦེ ཝཱ ཝེརཱི ཨེཏསྶཱཏི སབྦཝེརཱི, སོ ཨེཝ སབྦཝེརིཀོ, པུརིསོ. སཾཝཱསཾ ནཱརཧཏཱིཏི ཨསཾཝཱསཱརཧོ. སདྡྷམྨེཏི པཊིཔཏྟིསདྡྷམྨེ, པཊིཝེདྷསདྡྷམྨེ ཙ.

‘‘ཨགྒིཀྑནྡྷཔརིཡཱཡེ ཝུཏྟདུཀྑབྷཱགིཏཱཡཱ’’ཏི སངྑེཔེན ཝུཏྟམཏྠཾ ཝིཏྠཱརཏོ དསྶེཏུཾ ‘‘དུསྶཱིལཱནཉྷཱི’’ཏིཨཱདི ཨཱརདྡྷཾ. པཉྩཀཱམགུཎཔརིབྷོགསུཁེ, པརེཧི ཀཡིརམཱནཝནྡནམཱནནཱདིསུཁེ ཙ ཨསྶཱདེན གདྷིཏཙིཏྟཱ པཉྩཀཱམ…པེ… གདྷིཏཙིཏྟཱ, ཏེསཾ. ཏེ ཡཐཱཝུཏྟསུཁསྶཱདཱ པཙྩཡཱ ཨེཏསྶཱཏི ཏཔྤཙྩཡཾ. དུཀྑནྟི སམྦནྡྷོ.

པསྶཐ ནོཏི པསྶཐ ནུ, ཨཔི པསྶཐ. མཧནྟནྟི ཝིཔུལཾ. ཨགྒིཀྑནྡྷནྟི ཨགྒིསམཱུཧཾ. ཨཱདིཏྟནྟི པདིཏྟཾ. སམྤཛྫལིཏནྟི སམནྟཏོ པཛྫལིཏཾ ཨཙྪིཝིཔྥུལིངྒཱནི མུཙྩནྟཾ. སཛོཏིབྷཱུཏནྟི སཔབྷཾ སམནྟཏོ ཨུཊྛིཏཱཧི ཛཱལཱཧི ཨེཀཔྤབྷཱསམུདཡབྷཱུཏཾ. ཏཾ ཀིཾ མཉྙཐཱཏི ཏཾ ཨིདཱནི མཡཱ ཝུཙྩམཱནམཏྠཾ ཀིཾ མཉྙཐཱཏི ཨནུམཏིགཧཎཏྠཾ པུཙྪཏི. ཨཱལིངྒེཏྭཱཏི ཨུཔགཱུཧིཏྭཱ. ཨུཔནིསཱིདེཡྻཱཏི ཏེནེཝ ཨཱལིངྒནེན ཨུཔེཙྩ ནིསཱིདེཡྻ. ཡདཏྠམེཏྠ སཏྠཱ ཨགྒིཀྑནྡྷཱལིངྒནཾ, ཀཉྙཱལིངྒནཉྩ ཨཱནེསི, ཏམཏྠཾ ཝིབྷཱཝེཏུཾ ‘‘ཨཱརོཙཡཱམཱི’’ཏིཨཱདིམཱཧ ¶ . ཏཏྠ ཨཱརོཙཡཱམཱིཏི ཨཱམནྟེམི. ཝོཏི ཏུམྷེ. པཊིཝེདཡཱམཱིཏི པབོདྷེམི. དུསྶཱིལསྶཱཏི ནིསྶཱིལསྶ སཱིལཝིརཧིཏསྶ. པཱཔདྷམྨསྶཱཏི དུསྶཱིལཏྟཱ ཨེཝ ཧཱིནཛ྄ཛྷཱསཡཏཱཡ ལཱམཀསབྷཱཝསྶ. ཨསུཙིསངྐསྶརསམཱཙཱརསྶཱཏི ཨཔརིསུདྡྷཀཱཡསམཱཙཱརཱདིཏཱཡ ཨསུཙིསྶ ཧུཏྭཱ སངྐཱཡ སརིཏབྦསམཱཙཱརསྶ. དུསྶཱིལོ ཧི ཀིཉྩིདེཝ ཨསཱརུཔྤཾ དིསྭཱ ‘‘ཨིདཾ ¶ ཨསུཀེན ཀཏཾ བྷཝིསྶཏཱི’’ཏི པརེསཾ ཨཱསངྐནཱིཡོཝ ཧོཏི, ཀེནཙིདེཝ ཝཱ ཀརཎཱིཡེན མནྟཡནྟེ བྷིཀྑཱུ དིསྭཱ ‘‘ཀཙྩི ནུ ཁོ ཨིམེ མཡཱ ཀཏཾ ཀམྨཾ ཛཱནིཏྭཱ མནྟེནྟཱི’’ཏི ཨཏྟནོཡེཝ སངྐཱཡ སརིཏབྦསམཱཙཱརོཏི. པཊིཙྪནྣཀམྨནྟསྶཱཏི ལཛྫིཏབྦཏཱཡ པཊིཙྪཱདེཏབྦཀམྨནྟསྶ. ཨསྶམཎསྶཱཏི ན སམཎསྶ. སལཱཀགྒཧཎཱདཱིསུ ‘‘ཨཧམྤི སམཎོ’’ཏི མིཙྪཱཔཊིཉྙཱཡ སམཎཔཊིཉྙསྶ. ཨསེཊྛཙཱརིཏཱཡ ཨབྲཧྨཙཱརིསྶ. ཨུཔོསཐཱདཱིསུ ‘‘ཨཧམྤི བྲཧྨཙཱརཱི’’ཏི མིཙྪཱཔཊིཉྙཱཡ བྲཧྨཙཱརིཔཊིཉྙསྶ. པཱུཏིནཱ ཀམྨེན སཱིལཝིཔཏྟིཡཱ ཨནྟོ ཨནུཔཝིཊྛཏྟཱ ཨནྟོཔཱུཏིཀསྶ. ཚཧི དྭཱརེཧི རཱགཱདིཀིལེསཱནུཝསྶནེན ཏིནྟཏྟཱ ཨཝསྶུཏསྶ. སཉྫཱཏརཱགཱདིཀཙཝརཏྟཱ, སཱིལཝནྟེཧི ཚཌྜེཏབྦཏྟཱ ཙ ཀསམྦུཛཱཏསྶ. ཨགྒིཀྑནྡྷཱུཔམཱཡ ཧཱིནཱུཔམབྷཱུཏཱཡཱཏི ཨཏྠོ. ཏེནཱཧ བྷགཝཱ – ‘‘ཨེཏདེཝ ཏསྶ ཝར’’ནྟི. བྷགཝཱ དུཀྑཾ དསྶེཏྭཱ དུཀྑཾ དསྶེཏཱིཏི སམྦནྡྷོ.

ཝཱལ༹རཛྫུཡཱཏི ཝཱལེ༹ཧི ཀཏརཛྫུཡཱ. སཱ ཧི ཁརཏརཱ ཧོཏི. གྷཾསེཡྻཱཏི པདྷཾསནཝསེན གྷཾསེཡྻ. ཏེལདྷོཏཱཡཱཏི ཏེལེན ནིསིཏཱཡ. པཙྩོརསྨིནྟི པཏིཨུརསྨིཾ ཨུརཱབྷིམུཁཾ, ཨུརམཛ྄ཛྷེཏི ཨདྷིཔྤཱཡོ. ཨཡོསངྐུནཱཏི སཎྜཱསེན. ཕེཎུདྡེཧཀནྟི ཕེཎཾ ཨུདྡེཧེཏྭཱ, ཨནེཀཝཱརཾ ཕེཎཾ ཨུཊྛཔེཏྭཱཏི ཨཏྠོ.

ཨགྒིཀྑནྡྷཱལིངྒནདུཀྑཏོཔི ཨདྷིམཏྟདུཀྑཏཱཡ ཀཊུཀབྷཱུཏཾ དུཀྑཾ ཕལཾ ཨེཏསྶཱཏི ཨགྒིཀྑནྡྷཱལིངྒནདུཀྑཱདྷིཀདུཀྑཀཊུཀཕལཾ. ཀཱམསུཁཾ ཨཝིཛཧཏོ བྷིནྣསཱིལསྶ དུསྶཱིལསྶ ཀུཏོ ཏསྶ སུཁཾ ནཏྠེཝཱཏི ཨདྷིཔྤཱཡོ. སཱདནེཏི སཱདིཡནེ. ཡནྟི ཨཉྫལིཀམྨསཱདནཾ. ཨསཱིལིནོཏི དུསྶཱིལསྶ. ཨུཔཧཏནྟི སཱིལབྱསནེན ཨུཔདྡུཏཾ. ཁཏནྟི ཀུསལམཱུལཱནཾ ཁཎནེན ཁཏཾ, ཁཎིཏཾ ཝཱ གུཎཾ སརཱིརེཏི ཨདྷིཔྤཱཡོ. སབྦབྷཡེཧཱིཏི ཨཏྟཱནུཝཱདཱདིསབྦབྷཡེཧི. ཨུཔཙཱརཛ྄ཛྷཱནཾ ཨུཔཱདཱཡ སབྦེཧི ཨདྷིགམསུཁེཧི.

ཝུཏྟཔྤཀཱརཝིཔརཱིཏཏོཏི ¶ སཱིལཝིཔཏྟིཡཾ ཝུཏྟཱཀཱརཔཊིཔཀྑཏོ ‘‘མནཱཔོ ཧོཏི དེཝམནུསྶཱན’’ནྟིཨཱདིནཱ. ཀཱཡགནྡྷོཔི པཱམོཛྫཾ, སཱིལཝནྟསྶ བྷིཀྑུནོ. ཀརོཏི ཨཔི དེཝཱནནྟི ཨེཏྠ ‘‘གནྡྷོ ཨིསཱིནཾ ཙིརདིཀྑིཏཱན’’ནྟིཨཱདིཀཱ (ཛཱ. ༢.༡༧.༥༥) གཱཐཱ ཝིཏྠཱརེཏབྦཱ. ཨཝིགྷཱཏཱིཏི ཨཔྤཊིགྷཱཏཱི. ཝདྷབནྡྷཱདིཔརིཀིལེསཱ དིཊྛདྷམྨིཀཱ ཨཱསཝཱ ཨུཔདྡཝཱ. སམྤརཱཡིཀདུཀྑཱནཾ མཱུལཾ ནཱམ དུསྶཱིལྱཾ. ཨནྟམཏིཀྐནྟཾ ཨཙྩནྟཾ, ཨཙྩནྟཾ སནྟཱ ཨཙྩནྟསནྟཱ ¶ ཀིལེསཔརིལཱ༹ཧསངྑཱཏདརཐཱནཾ ཨབྷཱཝེན སབྦདཱ སནྟཱ. ཨུབྦིཛྫིཏྭཱཏི ཉཱཎུཏྲཱསེན ཨུཏྟསིཏྭཱ. ཝོདཱཔེཏབྦནྟི ཝིསོདྷེཏབྦཾ.

སཱིལནིདྡེསཝཎྞནཱ ནིཊྛིཏཱ.

ཨིཏི པཋམཔརིཙྪེདཝཎྞནཱ.

༢. དྷུཏངྒནིདྡེསཝཎྞནཱ

༢༢. ཨཔྤཱ ¶ ¶ ཨིཙྪཱ ཨེཏསྶཱཏི ཨཔྤིཙྪོ, པཙྩཡགེདྷརཧིཏོ. ཏསྶ བྷཱཝོ ཨཔྤིཙྪཏཱ, ཨལོབྷཛ྄ཛྷཱསཡཏཱཏི ཨཏྠོ. སམཾ ཏུཊྛི, སནྟེན, སཀེན ཝཱ ཏུཊྛི སནྟུཊྛི, སནྟུཊྛི ཨེཝ སནྟུཊྛིཏཱ, ཨཉྙཾ ཨཔཏྠེཏྭཱ ཡཐཱལདྡྷེཧི ཨིཏརཱིཏརེཧི པཙྩཡེཧི པརིཏུསྶནཱ. སནྟུཊྛིཏཱདཱིཧཱིཏི ཏ-ཀཱརོ ཝཱ པདསནྡྷིཀརོ. ‘‘སནྟུཊྛིཨཱདཱིཧཱི’’ཏི ཝཱ པཱཋོ. ཏེ གུཎེཏི ཏེ སཱིལཝོདཱནསྶ ཧེཏུབྷཱུཏེ ཨཔྤིཙྪཏཱདིགུཎེ. སམྤཱདེཏུནྟི སམྤནྣེ ཀཱཏུཾ. ཏེ ཧི སཱིལཝིསུདྡྷིཡཱ པཊིལདྡྷམཏྟཱ ཧུཏྭཱ དྷུཏདྷམྨེཧི སམྤནྣཏརཱ ཧོནྟི. དྷུཏངྒསམཱདཱནནྟི ཀིལེསཱནཾ དྷུནནཀཨངྒཱནཾ ཝིདྡྷཾསནཀཱརཎཱནཾ སམྨདེཝ ཨཱདཱནཾ. ཨེཝནྟི ཨེཝཾ སནྟེ, དྷུཏངྒསམཱདཱནེ ཀཏེཏི ཨཏྠོ. ཨསྶ ཡོགིནོ. སལླེཁོ ཀིལེསཱནཾ སམྨདེཝ ལིཁནཱ ཚེདནཱ ཏནུཀརཎཾ. པཝིཝེཀོ ཙིཏྟཝིཝེཀསྶ ཨུཔཱཡབྷཱུཏཱ ཝིཝེཀཊྛཀཱཡཏཱ. ཨཔཙཡོ ཡཐཱ པཊིཔཛྫནཏོ ཀིལེསཱ ནཾ ཨཔཙིནནྟི ན ཨཱཙིནནྟི, ཏཐཱ པཊིཔཛྫནཱ. ཝཱིརིཡཱརམྦྷོ ཨནུཔྤནྣཱནཾ པཱཔདྷམྨཱནཾ ཨནུཔྤཱདནཱདིཝསེན ཨཱརདྡྷཝཱིརིཡཏཱ. སུབྷརཏཱ ཡཐཱཝུཏྟཨཔྤིཙྪབྷཱཝཱདིསིདྡྷཱ ཨུཔཊྛཀཱནཾ སུཁབྷརཎཱིཡཏཱ སུཔོསཏཱ. ཨཱདི-སདྡེན ཨཔྤཀིཙྩཏཱསལླཧུཀཝུཏྟིཨཱདིཀེ སངྒཎྷཱཏི. སཱིལཉྩེཝ ཡཐཱསམཱདིནྣཾ པཊིཔཀྑདྷམྨཱནཾ དཱུརཱིབྷཱཝེན སུཔརིསུདྡྷཾ བྷཝིསྶཏི. ཝཏཱནི ཙ དྷུཏདྷམྨཱ ཙ སམྤཛྫིསྶནྟི སམྤནྣཱ བྷཝིསྶནྟི, ནིཔྥཛྫིསྶནྟི ཝཱ. ཡཱ ཐིརབྷཱུཏཱ ཨིཏརཱིཏརཙཱིཝརཔིཎྜཔཱཏསེནཱསནསནྟུཊྛི པོརཱཎཱནཾ བུདྡྷཱདཱིནཾ ཨརིཡཱནཾ པཝེཎིབྷཱཝེན ཋིཏཱ, ཏཏྠ པཏིཊྛིཏབྷཱཝཾ སནྡྷཱཡཱཧ ‘‘པོརཱཎེ ཨརིཡཝཾསཏྟཡེ པཏིཊྛཱཡཱ’’ཏི. བྷཱཝནཱ ཨཱརམིཏབྦཊྛེན ཨཱརཱམོ ཨེཏསྶཱཏི བྷཱཝནཱརཱམོ, ཏབྦྷཱཝོ བྷཱཝནཱརཱམཏཱ, སམཐཝིཔསྶནཱབྷཱཝནཱསུ ཡུཏྟཔྤཡུཏྟཏཱ. ཡསྨཱ ཨདྷིགམཱརཧོ བྷཝིསྶཏི, ཏསྨཱཏི སམྦནྡྷོ.

ལཱབྷསཀྐཱརཱདི ཏཎྷཱཡ ཨཱམསིཏབྦཏོ, ལོཀཔརིཡཱཔནྣཏཱཡ ཙ ལོཀཱམིསཾ. ནིབྦཱནཱདྷིགམསྶ ཨནུལོམཏོ ཨནུལོམཔཊིཔདཱ ཝིཔསྶནཱབྷཱཝནཱ. ཨཏྠཏོཏི ཝཙནཏྠཏོ. པབྷེདཏོཏི ¶ ཝིབྷཱགཏོ. བྷེདཏོཏི ཝིནཱསཏོ. དྷུཏཱདཱིནནྟི དྷུཏདྷུཏཝཱདདྷུཏདྷམྨདྷུཏངྒཱནཾ. སམཱསབྱཱསཏོཏི སངྑེཔཝིཏྠཱརཏོ.

༢༣. རཐིཀཱཏི ¶ རཙྪཱ. སངྐཱརཀཱུཊཱདཱིནནྟི ནིདྡྷཱརཎེ སཱམིཝཙནཾ. ཨབྦྷུགྒཏཊྛེནཱཏི ཨུསྶིཏཊྛེན. ‘‘ནདིཡཱ ཀཱུལ’’ནྟིཨཱདཱིསུ ཝིཡ སམུསྶཡཏྠོ ཀཱུལ-སདྡོཏི ཨཱཧ ‘‘པཾསུཀཱུལམིཝ པཾསུཀཱུལ’’ནྟི. ཀུ-སདྡོ ཀུཙྪཱཡཾ ཨུལ-སདྡོ གཏིཨཏྠོཏི ཨཱཧ ‘‘ཀུཙྪིཏབྷཱཝཾ གཙྪཏཱིཏི ཝུཏྟཾ ཧོཏཱི’’ཏི, པཾསུ ཝིཡ ཀུཙྪིཏཾ ཨུལཏི པཝཏྟཏཱིཏི ཝཱ པཾསུཀཱུལཾ. པཾསུཀཱུལསྶ དྷཱརཎཾ པཾསུཀཱུལཾ ཨུཏྟརཔདལོཔེན, ཏཾ སཱིལམསྶཱཏི པཾསུཀཱུལིཀོ, ཡཐཱ ‘‘ཨཱཔཱུཔིཀོ’’ཏི. ཨངྒཏི ཨཏྟནོ ཕལཾ པཊིཙྩ ཧེཏུབྷཱཝཾ གཙྪཏཱིཏི ཨངྒཾ, ཀཱརཎཾ. ཡེན པུགྒལོ ‘‘པཾསུཀཱུལིཀོ’’ཏི ཝུཙྩཏི, སོ སམཱདཱནཙེཏནཱསངྑཱཏོ དྷམྨོ པཾསུཀཱུལིཀསྶ ཨངྒནྟི པཾསུཀཱུལིཀངྒཾ. ཏེནཱཧ ‘‘པཾསུཀཱུལིཀསྶཱ’’ཏིཨཱདི. ཏསྶཱཏི སམཱདཱནསྶ. སམཱདིཡཏི ཨེཏེནཱཏི སམཱདཱནཾ, ཙེཏནཱ.

ཨེཏེནེཝ ནཡེནཱཏི ཡཐཱ པཾསུཀཱུལདྷཱརཎཾ པཾསུཀཱུལཾ, ཏཾསཱིལོ པཾསུཀཱུལིཀོ, ཏསྶ ཨངྒཾ སམཱདཱནཙེཏནཱ ‘‘པཾསུཀཱུལིཀངྒ’’ནྟི ཝུཏྟཾ, ཨེཝཾ ཨེཏེནེཝ ཝཙནཏྠནཡེན ཏིཙཱིཝརདྷཱརཎཾ ཏིཙཱིཝརཾ, ཏཾསཱིལོ ཏེཙཱིཝརིཀོ, ཏསྶ ཨངྒཾ སམཱདཱནཙེཏནཱ ‘‘ཏེཙཱིཝརིཀངྒ’’ནྟི ཝེདིཏབྦཾ. སངྒྷཱཊིཨཱདཱིསུ ཨེཝ ཏཱིསུ ཙཱིཝརེསུ ཏིཙཱིཝརསམཉྙཱ, ན ཀཎྜུཔཊིཙྪཱདིཝསྶིཀསཱཊིཀཱདཱིསཱུཏི ཏཱནི སརཱུཔཏོ དསྶེནྟོ ‘‘སངྒྷཱཊིཨུཏྟརཱསངྒཨནྟརཝཱསཀསངྑཱཏ’’ནྟི ཨཱཧ.

ཏཾ པིཎྜཔཱཏནྟི པརེཧི དིཡྻམཱནཱནཾ པིཎྜཱནཾ པཏྟེ པཏནསངྑཱཏཾ པིཎྜཔཱཏཾ, ཏཾ ཨུཉྪཏཱིཏི པིཎྜཔཱཏིཀོ, ཡཐཱ བཱདརིཀོ སཱམཱཀིཀོ. པིཎྜཔཱཏི ཨེཝ པིཎྜཔཱཏིཀོ, ཡཐཱ བྷདྡོ ཨེཝ བྷདྡཀོ. ཨཝཁཎྜནཾ ཝིཙྪིནྡནཾ ནིརནྟརམཔྤཝཏྟི. ཏཔྤཊིཀྑེཔཏོ ཨནཝཁཎྜནཾ ཨཝིཙྪིནྡནཾ ནིརནྟརཔྤཝཏྟི. སཧ ཨཔདཱནེནཱཏི སཧ ཨནཝཁཎྜནེན. སཔདཱནནྟི པདསྶ ཀིརིཡཱཝིསེསནབྷཱཝཾ, ཡཏྠ ཙ ཏཾ ཨནཝཁཎྜནཾ, ཏཉྩ དསྶེཏུཾ ‘‘ཨཝཁཎྜནརཧིཏཾ ཨནུགྷརནྟི ཝུཏྟཾ ཧོཏཱི’’ཏི ཝུཏྟཾ. ཨེཀཱསནེཏི ཨིརིཡཱཔཐནྟརེན ཨནནྟརིཏཱཡ ཨེཀཱཡཡེཝ ནིསཛྫཱཡ. པཏྟེ པིཎྜོཏི ཨེཏྠ ཝཏྠུབྷེདོ ཨིདྷཱདྷིཔྤེཏོ, ན སཱམཉྙཾ. ཨེཝ-ཀཱརོ ཙ ལུཏྟནིདྡིཊྛོཏི དསྶེནྟོ ‘‘ཀེཝལཾ ཨེཀསྨིཾཡེཝ པཏྟེ’’ཏི ཨཱཧ. ཨུཏྟརཔདལོཔཾ ཀཏྭཱ ཨཡཾ ནིདྡེསོཏི དསྶེནྟོ ‘‘པཏྟཔིཎྜགཧཎེ པཏྟཔིཎྜསཉྙཾ ཀཏྭཱ’’ཏི ཨཱཧ. ཨེས ནཡོ ཨིཏོ པརེསུཔི.

པཙྪཱབྷཏྟཾ ¶ ¶ ནཱམ པཝཱརཎཏོ པཙྪཱ ལདྡྷབྷཏྟཾ ཨེཝ. ཁལུ-སདྡསྶ པཊིསེདྷཏྠཝཱཙཀཏྟཱ ཏེན སམཱནཏྠཾ ན-ཀཱརཾ གཧེཏྭཱ ཨཱཧ ‘‘ན པཙྪཱབྷཏྟིཀོ’’ཏི. སིཀྑཱཔདསྶ ཝིསཡོ སིཀྑཱཔདེནེཝ པཊིཀྑིཏྟོ. ཡོ ཏསྶ ཨཝིསཡོ, སོ ཨེཝ སམཱདཱནསྶ ཝིསཡོཏི ཨཱཧ ‘‘སམཱདཱནཝསེན པཊིཀྑིཏྟཱཏིརིཏྟབྷོཛནསྶཱ’’ཏི. ཨབྦྷོཀཱསེ ནིཝཱསོ ཨབྦྷོཀཱསོ. སུསཱནེ ནིཝཱསོ སུསཱནཾ, ཏཾ སཱིལཾ ཨསྶཱཏིཨཱདིནཱ སབྦཾ ཝཏྟབྦནྟི ཨཱཧ ‘‘ཨེསེཝ ནཡོ’’ཏི. ཡཐཱསནྠཏཾ ཝིཡ ཡཐཱསནྠཏཾ, ཨཱདིཏོ ཡཐཱཨུདྡིཊྛཾ. ཏཾ ཧེས ‘‘ཨིདཾ བཧུམངྐུཎཾ དུགྒནྡྷཔཝཱཏ’’ནྟིཨཱདིཝསེན ཨཔྤཊིཀྑིཔིཏྭཱཝ སམྤཊིཙྪཏི. ཏེནེཝཱཧ ‘‘ཨིདཾ ཏུཡ྄ཧ’’ནྟིཨཱདི. སཡནནྟི ནིཔཛྫནམཱཧ. ཏེན ཏེན སམཱདཱནེནཱཏི ཏེན ཏེན པཾསུཀཱུལིཀངྒཱདིཀསྶ སམཱདཱནེན དྷུཏཀིལེསཏྟཱཏི ཝིདྡྷཾསིཏཀིལེསཏྟཱ, ཏདངྒཝསེན པཧཱིནཏཎྷུཔཱདཱནཱདིཔཱཔདྷམྨཏྟཱཏི ཨཏྠོ. ཡེཧི ཏཾ ཀིལེསདྷུནནཾ, ཏཱནིཡེཝ ཨིདྷ དྷུཏསྶ བྷིཀྑུནོ ཨངྒཱནཱིཏི ཨདྷིཔྤེཏཱནི, ན ཨཉྙཱནི ཡཱནི ཀཱནིཙི, ཨཉྙེན ཝཱ དྷུཏསྶཱཏི ཨཡམཏྠོ ཨཏྠཏོ ཨཱཔནྣོ. ‘‘ཉཱཎཾ ཨངྒཾ ཨེཏེས’’ནྟི ཨིམིནཱ ཉཱཎཔུབྦཀཏཾ ཏེསཾ སམཱདཱནསྶ ཝིབྷཱཝེཏི. པཊིཔཏྟིཡཱཏི སཱིལཱདིསམྨཱཔཊིཔཏྟིཡཱ. སམཱདིཡཏི ཨེཏེནཱཏི སམཱདཱནཾ, སམཱདཱནཝསེན པཝཏྟཱ ཙེཏནཱ, ཏཾ ལཀྑཎཾ ཨེཏེསནྟི སམཱདཱནཙེཏནཱལཀྑཎཱནི. ཝུཏྟམྤི ཙེཏཾ ཨཊྛཀཐཱཡཾ –

‘‘སམཱདཱནཀིརིཡཱཡ, སཱདྷཀཏམབྷཱཝཏོ;

སམྤཡུཏྟདྷམྨཱ ཡེནཱཏི, ཀརཎབྷཱཝེན དསྶིཏཱ’’ཏི.

སམཱདཱནཙེཏནཱཡ གཧཎཾ ཏཾམཱུལཀཏྟཱ པརིཧརཎཙེཏནཱཔི དྷུཏངྒམེཝ. ཨཏྟནཱ, པརམྨུཁེན ཙ ཀུསལབྷཎྜསྶ བྷུསཾ ཝིལུཔྤནཊྛེན ལོལུཔྤཾ ཏཎྷཱཙཱརོ, ཏསྶ ཝིདྡྷཾསནཀིཙྩཏྟཱ ལོལུཔྤཝིདྡྷཾསནརསཱནི. ཏཏོ ཨེཝ ནིལློལུཔྤབྷཱཝེན པཙྩུཔཏིཊྛནྟི, ཏཾ ཝཱ པཙྩུཔཊྛཱཔེནྟཱིཏི ནིལློལུཔྤབྷཱཝཔཙྩུཔཊྛཱནཱནི. ཨརིཡདྷམྨཔདཊྛཱནཱནཱིཏི པརིསུདྡྷསཱིལཱདིསདྡྷམྨཔདཊྛཱནཱནི.

བྷགཝཏོཝ སནྟིཀེ སམཱདཱཏབྦཱནཱིཏི ཨིདཾ ཨནྟརཱ ཨཝིཙྪེདནཏྠཾ ཝུཏྟཾ, རཉྙོ སནྟིཀེ པཊིཉྙཱཏཱརཧསྶ ཨཏྠསྶ ཏདུཔཛཱིཝིནོ ཨེཀཾསཏོ ཨཝིསཾཝཱདནཾ ཝིཡ. སེསཱནཾ སནྟིཀེ སམཱདཱནེཔི ཨེསེཝ ནཡོ. ཨེཀསངྒཱིཏིཀསྶཱཏི ¶ པཉྩསུ དཱིགྷནིཀཱཡཱདཱིསུ ནིཀཱཡེསུ ཨེཀནིཀཱཡིཀསྶ. ཨཊྛཀཐཱཙརིཡསྶཱཏི ཡསྶ ཨཊྛཀཐཱཏནྟིཡེཝ ཝིསེསཏོ པགུཎཱ, ཏསྶ. ཨེཏྠཱཏི ཨཏྟནཱཔི སམཱདཱནསྶ རུཧནེ. ཛེཊྛཀབྷཱཏུ དྷུཏངྒཔྤིཙྪཏཱཡ ཝཏྠཱུཏི སོ ཀིར ཐེརོ ནེསཛྫིཀོ ¶ , ཏསྶ ཏཾ ན ཀོཙི ཛཱནཱཏི. ཨཐེཀདིཝསཾ རཏྟིཡཱ སཡནཔིཊྛེ ནིསིནྣཾ ཝིཛྫུལཏོབྷཱསེན དིསྭཱ ཨིཏརོ པུཙྪི ‘‘ཀིཾ, བྷནྟེ, ཏུམྷེ ནེསཛྫིཀཱ’’ཏི. ཐེརོ དྷུཏངྒཔྤིཙྪཏཱཡ ཏཱཝདེཝ ནིཔཛྫིཏྭཱ པཙྪཱ སམཱདིཡཱིཏི ཨེཝམཱགཏཾ ཝཏྠུ.

༡. པཾསུཀཱུལིཀངྒཀཐཱཝཎྞནཱ

༢༤. གཧཔཏིདཱནཙཱིཝརནྟི ཨེཏྠ དཱཡཀབྷཱཝེན སམཎཱཔི ཨུཀྐཊྛསྶ གཧཔཏིཔཀྑཾཡེཝ པཝིཊྛཱཏི དཊྛབྦཾ. ‘‘པབྦཛིཏོ གཎྷིསྶཏཱི’’ཏི ཋཔིཏཀཾ སིཡཱ གཧཔཏིཙཱིཝརཾ, ན པན གཧཔཏིདཱནཙཱིཝརནྟི ཏཱདིསཾ ནིཝཏྟེཏུཾ དཱནགྒཧཎཾ. ཨཉྙཏརེནཱཏི ཨེཏྠ སམཱདཱནཝཙནེན ཏཱཝ སམཱདིནྣཾ ཧོཏུ, པཊིཀྑེཔཝཙནེན པན ཀཐནྟི? ཨཏྠཏོ ཨཱཔནྣཏྟཱ. ཡཐཱ ‘‘དེཝདཏྟོ དིཝཱ ན བྷུཉྫཏཱི’’ཏི ཝུཏྟེ ‘‘རཏྟིཡཾ བྷུཉྫཏཱི’’ཏི ཨཏྠཏོ ཨཱཔནྣམེཝ ཧོཏི, ཏསྶ ཨཱཧཱརེན ཝིནཱ སརཱིརཊྛིཏི ནཏྠཱིཏི, ཨེཝམིདྷཱཔི བྷིཀྑུནོ གཧཔཏིདཱནཙཱིཝརེ པཊིཀྑིཏྟེ ཏདཉྙཙཱིཝརཔྤཊིགྒཧོ ཨཏྠཏོ ཨཱཔནྣོ ཨེཝ ཧོཏི, ཙཱིཝརེན ཝིནཱ སཱསནེ ཋིཏི ནཏྠཱིཏི.

ཨེཝཾ སམཱདིནྣདྷུཏངྒེནཱཏིཨཱདིཝིདྷཱནཾ པཾསུཀཱུལིཀངྒེ པཊིཔཛྫནཝིདྷི. སུསཱནེ ལདྡྷཾ སོསཱནིཀཾ. ཏཾ པན ཡསྨཱ ཏཏྠ ཀེནཙི ཚཌྜིཏཏྟཱ པཏིཏཾ ཧོཏི, ཏསྨཱ ཝུཏྟཾ ‘‘སུསཱནེ པཏིཏཀ’’ནྟི. ཨེཝཾ པཱཔཎིཀམྤི དཊྛབྦཾ. ཏཱལཝེལི༹མགྒོ ནཱམ མཧཱགཱམེ ཨེཀཱ ཝཱིཐི. ཨནུརཱདྷཔུརེཏི ཙ ཝདནྟི. ཌཌྜྷོ པདེསོ ཨེཏསྶཱཏི ཌཌྜྷཔྤདེསཾ, ཝཏྠཾ. མགྒེ པཏིཏཀཾ བཧུདིཝསཱཏིཀྐནྟཾ གཧེཏབྦནྟི ཝདནྟི. ‘‘དྭཏྟིདིཝསཱཏིཀྐནྟ’’ནྟི ཨཔརེ. ཐོཀཾ རཀྑིཏྭཱཏི ཀཏིཔཡཾ ཀཱལཾ ཨཱགམེཏྭཱ. ཝཱཏཱཧཏམྤི སཱམིཀཱནཾ སཏིསམྨོསེན པཏིཏསདིསནྟི ‘‘སཱམིཀེ ཨཔསྶནྟེན གཧེཏུཾ ཝཊྚཏཱི’’ཏི ཝུཏྟཾ. ཏསྨཱ ཐོཀཾ ཨཱགམེཏྭཱ གཧེཏབྦཾ.

‘‘སངྒྷསྶ དེམཱ’’ཏི དིནྣཾ, ཙོལ༹ཀབྷིཀྑཱཝསེན ལདྡྷཉྩ ལདྡྷཀཱལཏོ པཊྛཱཡ ‘‘སམཎཙཱིཝརཾ སིཡཱ ནུ ཁོ, ནོ’’ཏི ཨཱསངྐཾ ནིཝཏྟེཏུཾ ‘‘ན ཏཾ པཾསུཀཱུལ’’ནྟི ཝུཏྟཾ. ན ཧི ཏཾ ཏེཝཱིསཏིཡཱ ཨུཔྤཏྟིཊྛཱནེསུ ཀཏྠཙི པརིཡཱཔནྣཾ. ཨིདཱནི ཨིམིནཱཝ པསངྒེན ཡཾ བྷིཀྑུདཏྟིཡེ ལཀྑཎཔཏྟཾ ¶ པཾསུཀཱུལཾ, ཏསྶ ཙ ཨུཀྐཊྛཱནུཀྐཊྛཝིབྷཱགཾ དསྶེཏུཾ ‘‘བྷིཀྑུདཏྟིཡེཔཱི’’ཏིཨཱདི ཝུཏྟཾ. ཏཏྠ གཱཧེཏྭཱ ཝཱ དཱིཡཏཱིཏི སངྒྷསྶ ཝཱ གཎསྶ ཝཱ དེནྟེཧི ཡཾ ཙཱིཝརཾ ཝསྶགྒེན པཱཔེཏྭཱ བྷིཀྑཱུནཾ དཱིཡཏི. སེནཱསནཙཱིཝརནྟི སེནཱསནཾ ཀཱརེཏྭཱ ‘‘ཨེཏསྨིཾ སེནཱསནེ ཝསནྟཱ པརིབྷུཉྫནྟཱུ’’ཏི ¶ དིནྣཙཱིཝརཾ. ན ཏཾ པཾསུཀཱུལནྟི ཨཔཾསུཀཱུལབྷཱཝོ པུབྦེ ཝུཏྟཀཱརཎཏོ, གཱཧེཏྭཱ དིནྣཏྟཱ ཙ. ཏེནཱཧ ‘‘ནོ གཱཧཱཔེཏྭཱ དིནྣམེཝ པཾསུཀཱུལ’’ནྟི. ཏཏྲཔཱིཏི ཡཾ གཱཧེཏྭཱ ན དིནྣཾ བྷིཀྑུདཏྟིཡཾ, ཏཏྲཔི ཡེན བྷིཀྑུནཱ ཙཱིཝརཾ དཱིཡཏི, ཏསྶ ལཱབྷེ, དཱནེ ཙ ཝིསུཾ ཝིསུཾ ཨུབྷཡཏྠ ཨཱདརགཱརཝཱནཾ སབྦྷཱཝཏོ, ཏདབྷཱཝཏོ ཙ བྷིཀྑུདཏྟིཡསྶ ཨེཀཏོསུདྡྷི ཨུབྷཏོསུདྡྷི ཨནུཀྐཊྛཏཱ ཧོནྟཱིཏི ཨིམམཏྠཾ དསྶེཏུཾ ‘‘ཡཾ དཱཡཀེཧཱི’’ཏིཨཱདི ཝུཏྟཾ, པཱདམཱུལེ ཋཔེཏྭཱ དིནྣཀཾ སམཎེནཱཏི ཨདྷིཔྤཱཡོ. ཡསྶ ཀསྶཙཱིཏི ཨུཀྐཊྛཱདཱིསུ ཡསྶ ཀསྶཙི. རུཙིཡཱཏི ཚནྡེན. ཁནྟིཡཱཏི ནིཛ྄ཛྷཱནཀྑནྟིཡཱ.

ནིསྶཡཱནུརཱུཔཔཊིཔཏྟིསབྦྷཱཝོཏི ཨུཔསམྤནྣསམནནྟརཾ ཨཱཙརིཡེན ཝུཏྟེསུ ཙཏཱུསུ ནིསྶཡེསུ ཨཏྟནཱ ཡཐཱཔཊིཉྙཱཏདུཏིཡནིསྶཡཱནུརཱུཔཱཡ པཊིཔཏྟིཡཱ ཝིཛྫམཱནཏཱ. ཨཱརཀྑདུཀྑཱབྷཱཝོཏི ཙཱིཝརཱརཀྑནདུཀྑསྶ ཨབྷཱཝོ པཾསུཀཱུལཙཱིཝརསྶ ཨལོབྷནཱིཡཏྟཱ. པརིབྷོགཏཎྷཱཡ ཨབྷཱཝོ སཝིསེསལཱུཁསབྷཱཝཏྟཱ. པཱསཱདིཀཏཱཏི པརེསཾ པསཱདཱཝཧཏཱ. ཨཔྤིཙྪཏཱདཱིནཾ ཕལནིཔྥཏྟི དྷུཏངྒཔརིཧརཎསྶ ཨཔྤིཙྪཏཱདཱིཧིཡེཝ ནིཔྥཱདེཏབྦཏོ. དྷུཏདྷམྨེ སམཱདཱཡ ཝཏྟནཾ ཡཱཝདེཝ ཨུཔརི སམྨཱཔཊིཔཏྟིསམྤཱདནཱཡཱཏི ཝུཏྟཾ ‘‘སམྨཱཔཊིཔཏྟིཡཱ ཨནུབྲཱུཧན’’ནྟི. མཱརསེནཝིགྷཱཏཱཡཱཏི མཱརསྶ, མཱརསེནཱཡ ཙ ཝིཧནནཱཡ ཝིདྡྷཾསནཱཡ. ཀཱཡཝཱཙཱཙིཏྟེཧི ཡཏོ སཾཡཏོཏི ཡཏི, བྷིཀྑུ. དྷཱརིཏཾ ཡཾ ལོཀགརུནཱ པཾསུཀཱུལཾ, ཏཾ ཀོ ན དྷཱརཡེ, ཡསྨཱ ཝཱ ལོཀགརུནཱ པཾསུཀཱུལཾ དྷཱརིཏཾ, ཏསྨཱ ཀོ ཏཾ ན དྷཱརཡེཏི ཡོཛནཱ ཡཾཏཾསདྡཱནཾ ཨེཀནྟསམྦནྡྷིབྷཱཝཏོ. པཊིཉྙཾ སམནུསྶརནྟི ཨུཔསམྤདམཱལེ༹ ‘‘ཨཱམ བྷནྟེ’’ཏི ཨཱཙརིཡཔམུཁསྶ སངྒྷསྶ སམྨུཁཱ དིནྣཾ པཊིཉྙཾ སམནུསྶརནྟོ.

ཨིཏི པཾསུཀཱུལིཀངྒཀཐཱཝཎྞནཱ.

༢. ཏེཙཱིཝརིཀངྒཀཐཱཝཎྞནཱ

༢༥. ཙཏུཏྠཀཙཱིཝརནྟི ¶ ནིཝཱསནཔཱརུཔནཡོགྱཾ ཙཏུཏྠཀཙཱིཝརནྟི ཨདྷིཔྤཱཡོ, ཨཾསཀཱསཱཝསྶ ཨཔྤཊིཀྑིཔིཏབྦཏོ. ཨཉྙཏརཝཙནེནཱཏི ཨེཏྠ ཡཾ ཝཏྟབྦཾ, ཏཾ ཧེཊྛཱ ཝུཏྟནཡམེཝ. ཡཱཝ ན སཀྐོཏི, ཡཱཝ ན ལབྷཏི, ཡཱཝ ན སམྤཛྫཏཱིཏི པཙྩེཀཾ ཡཱཝ-སདྡོ སམྦནྡྷིཏབྦོ. ན སམྤཛྫཏཱིཏི ན སིཛ྄ཛྷཏི. ནིཀྑིཏྟཔཙྩཡཱ དོསོ ནཏྠཱིཏི ནིཙཡསནྣིདྷིདྷུཏངྒསཾཀིལེསདོསོ ¶ ནཏྠི. ཨཱསནྣེཏི ཙཱིཝརསྶ ཨཱསནྣེ ཋཱནེ. རཛནཀྑཎེ པརིབྷུཉྫནཀཱསཱཝཾ རཛནཀཱསཱཝཾ. ཏཏྲཊྛཀཔཙྩཏྠརཎཾ ནཱམ ཨཏྟནོ, པརསྶ ཝཱ སནྟཀཾ སེནཱསནེ པཙྩཏྠརཎཝསེན ཨདྷིཊྛིཏཾ. ‘‘ཨཾསཀཱསཱཝཾ པརིཀྑཱརཙོལ༹ཾ ཧོཏི, ཨིཏི པཙྩཏྠརཎཾ, ཨཾསཀཱསཱཝནྟི ཨིམཱནི དྭེཔི ཨཏིརེཀཙཱིཝརཊྛཱནེ ཋིཏཱནིཔི དྷུཏངྒབྷེདཾ ན ཀརོནྟཱི’’ཏི ཨཊྛཀཐཱཡཾ ཝུཏྟནྟི ཝདནྟི. པརིཧརིཏུཾ པན ན ཝཊྚཏཱིཏི རཛནཀཱལེ ཨེཝ ཨནུཉྙཱཏཏྟཱ ནིཙྩཔརིབྷོགཝསེན ན ཝཊྚཏི ཏེཙཱིཝརིཀསྶ. ཨཾསཀཱསཱཝནྟི ཁནྡྷེ ཋཔེཏབྦཀཱསཱཝཾ. ཀཱཡཔརིཧཱརིཀེནཱཏི ཝཱཏཱཏཔཱདིཔརིསྶཡཏོ ཀཱཡསྶ པརིཧརཎམཏྟེན. སམཱདཱཡེཝཱཏི གཧེཏྭཱ ཨེཝ. ཨཔྤསམཱརམྦྷཏཱཏི ཨཔྤཀིཙྩཏཱ. ཀཔྤིཡེ མཏྟཀཱརིཏཱཡཱཏི ནིསཱིདནཱདིཝསེན, པརིཀྑཱརཙོལ༹ཝསེན ཙ བཧཱུསུ ཙཱིཝརེསུ ཨནུཉྙཱཏེསུཔི ཏིཙཱིཝརམཏྟེ ཋིཏཏྟཱ. སཧ པཏྟཙརཎཱཡཱཏི སཔཏྟཙརཎོ. པཀྑཱི སཔཀྑཀོ.

ཨིཏི ཏེཙཱིཝརིཀངྒཀཐཱཝཎྞནཱ.

༣. པིཎྜཔཱཏིཀངྒཀཐཱཝཎྞནཱ

༢༦. ཨཏིརེཀལཱབྷནྟི ‘‘པིཎྜིཡཱལོཔབྷོཛནཾ ནིསྶཱཡཱ’’ཏི (མཧཱཝ. ༧༣, ༡༢༨) ཨེཝཾ ཝུཏྟབྷིཀྑཱཧཱརལཱབྷཏོ ཨཏིརེཀལཱབྷཾ, སངྒྷབྷཏྟཱདིནྟི ཨཏྠོ. སཀལསྶ སངྒྷསྶ དཱཏབྦབྷཏྟཾ སངྒྷབྷཏྟཾ. ཀཏིཔཡེ བྷིཀྑཱུ ཨུདྡིསིཏྭཱ དཱཏབྦབྷཏྟཾ ཨུདྡེསབྷཏྟཾ. ཨེཀསྨིཾ པཀྑེ ཨེཀདིཝསཾ དཱཏབྦབྷཏྟཾ པཀྑིཀཾ. ཨུཔོསཐེ ཨུཔོསཐེ དཱཏབྦབྷཏྟཾ ཨུཔོསཐིཀཾ. པཊིཔདདིཝསེ དཱཏབྦབྷཏྟཾ པཱཊིཔདིཀཾ. ཝིཧཱརཾ ཨུདྡིསྶ དཱཏབྦབྷཏྟཾ ཝིཧཱརབྷཏྟཾ. དྷུརགེཧེ ཨེཝ ཋཔེཏྭཱ དཱཏབྦབྷཏྟཾ དྷུརབྷཏྟཾ. གཱམཝཱསཱིཨཱདཱིཧི ཝཱརེན དཱཏབྦབྷཏྟཾ ¶ ཝཱརཀབྷཏྟཾ. ‘‘སངྒྷབྷཏྟཾ གཎྷཐཱཏིཨཱདིནཱ’’ཏི ཨཱདི-སདྡེན ཨུདྡེསབྷཏྟཱདིཾ སངྒཎྷཱཏི. སཱདིཏུཾ ཝཊྚནྟཱིཏི བྷིཀྑཱཔརིཡཱཡེན ཝུཏྟཏྟཱ. བྷེསཛྫཱདིཔཊིསཾཡུཏྟཱ ནིརཱམིསསལཱཀཱ. ཡཱཝཀཱལིཀཝཛྫཱཏི ཙ ཝདནྟི. ཝིཧཱརེ པཀྐབྷཏྟམྤཱིཏི ཨུཔཱསཀཱ ཨིདྷེཝ བྷཏྟཾ པཙིཏྭཱ ‘‘སབྦེསཾ ཨཡྻཱནཾ དསྶཱམཱ’’ཏི ཝིཧཱརེཡེཝ བྷཏྟཾ སམྤཱདེནྟི, ཏཾ པིཎྜཔཱཏིཀཱནམྤི ཝཊྚཏི. ཨཱཧརིཏྭཱཏི པཏྟཾ གཧེཏྭཱ གེཧཏོ ཨཱནེཏྭཱ. ཏཾ དིཝསཾ ནིསཱིདིཏྭཱཏི ‘‘མཱ, བྷནྟེ, པིཎྜཱཡ ཙརིཏྠ, ཝིཧཱརེཡེཝ བྷིཀྑཱ ཨཱནཱིཡཏཱི’’ཏི ཝདནྟཱནཾ སམྤཊིཙྪནེན ཏཾ དིཝསཾ ནིསཱིདིཏྭཱ. སེརིཝིཧཱརསུཁནྟི ཨཔརཱཡཏྟཝིཧཱརིཏཱསུཁཾ ¶ . ཨརིཡཝཾསོཏི ཨརིཡཝཾསསུཏྟཔཊིསཾཡུཏྟཱ (དཱི. ནི. ༣.༣༠༩; ཨ. ནི. ༤.༢༨) དྷམྨཀཐཱ. དྷམྨརསནྟི དྷམྨཱུཔསཉྷིཏཾ པཱམོཛྫཱདིརསཾ.

ཛངྒྷབལཾ ནིསྶཱཡ པིཎྜཔརིཡེསནཏོ ཀོསཛྫནིམྨདྡནཏཱ. ‘‘ཡཐཱཔི བྷམརོ པུཔྥ’’ནྟིཨཱདིནཱ (དྷ. པ. ༤༩; ནེཏྟི. ༡༢༣) ཝུཏྟཝིདྷིནཱ ཨཱཧཱརཔརིཡེསནཏོ པརིསུདྡྷཱཛཱིཝཏཱ. ནིཙྩཾ ཨནྟརགྷརཾ པཝིསནྟསྶེཝ སུཔྤཊིཙྪནྣགམནཱདཡོ སེཁིཡདྷམྨཱ སམྤཛྫནྟཱིཏི སེཁིཡཔཊིཔཏྟིཔཱུརཎཾ. པཊིགྒཧཎེ མཏྟཉྙུཏཱཡ, སཾསཊྛཝིཧཱརཱབྷཱཝཏོ ཙ ཨཔརཔོསིཏཱ. ཀུལེ ཀུལེ ཨཔྤཀཨཔྤཀཔིཎྜགཧཎེན པརཱནུགྒཧཀིརིཡཱ. ཨནྟིམཱཡ ཛཱིཝིཀཱཡ ཨཝཊྛཱནེན མཱནཔྤཧཱནཾ. ཝུཏྟཉྷེཏཾ ‘‘ཨནྟམིདཾ, བྷིཀྑཝེ, ཛཱིཝིཀཱནཾ, ཡདིདཾ པིཎྜོལྱ’’ནྟིཨཱདི (ཨིཏིཝུ. ༩༡; སཾ. ནི. ༣.༨༠). མིསྶཀབྷཏྟེན ཡཱཔནཏོ རསཏཎྷཱནིཝཱརཎཾ. ནིམནྟནཱསམྤཊིཙྪནཏོ གཎབྷོཛནཱདིསིཀྑཱཔདེཧི ཨནཱཔཏྟིཏཱ.

ཨཔྤཊིཧཏཝུཏྟིཏཱཡ ཙཏཱུསུཔི དིསཱསུ ཝཏྟནཊྛེན ཙཱཏུདྡིསོ. ཨཱཛཱིཝསྶ ཝིསུཛ྄ཛྷཏཱིཏི ཨཱཛཱིཝོ ཨསྶ ཝིསུཛ྄ཛྷཏི. ཨཏྟབྷརསྶཱཏི ཨཔྤཱནཝཛྫསུལབྷརཱུཔེཧི པཙྩཡེཧི ཨཏྟནོ བྷརཎཏོ ཨཏྟབྷརསྶ. ཏཏོ ཨེཝ ཨེཀཝིཧཱརིཏཱཡ སདྡྷིཝིཧཱརིཀཱདཱིནམྤི ཨཉྙེསཾ ཨཔོསནཏོ ཨནཉྙཔོསིནོ. པདདྭཡེནཱཔི ཀཱཡཔརིཧཱརིཀེན ཙཱིཝརེན ཀུཙྪིཔརིཧཱརིཀེན པིཎྜཔཱཏེན ཝིཙརཎཏོ སལླཧུཀཝུཏྟིཏཾ, སུབྷརཏཾ, པརམཨཔྤིཙྪཏཾ, སནྟུཊྛིཉྩ དསྶེཏི. དེཝཱཔི པིཧཡནྟི ཏཱདིནོཏི ཏཱདིསསྶ བྷུསཾ ཨཏིཝིཡ སནྟཀཱཡཝཙཱིམནོཀམྨཏཱཡ ཨུཔསནྟསྶ པརམེན སཏིནེཔཀྐེན སམནྣཱགམཏོ སབྦཀཱལཾ སཏིམཏོ པིཎྜཔཱཏིཀསྶ བྷིཀྑུསྶ སཀྐཱདཡོ ¶ དེཝཱཔི པིཧཡནྟི པཏྠེནྟི. ཏསྶ སཱིལཱདིགུཎེསུ བཧུམཱནཾ ཨུཔྤཱདེནྟཱ ཨཱདརཾ ཛནེནྟི, པགེཝ མནུསྶཱ. སཙེ སོ ལཱབྷསཀྐཱརསིལོཀསནྣིསྶིཏོ ན ཧོཏི, ཏདབྷིཀངྑཱི ན ཧོཏཱིཏི ཨཏྠོ.

ཨིཏི པིཎྜཔཱཏིཀངྒཀཐཱཝཎྞནཱ.

༤. སཔདཱནཙཱརིཀངྒཀཐཱཝཎྞནཱ

༢༧. ཨིམིནཱཏི སཔདཱནཙཱརིཀེན. ཀཱལཏརནྟི ཀཱལསྶེཝ. ཨཕཱསུཀཊྛཱནནྟི སཔརིསྶཡཱདིཝསེན ¶ དུཔྤཝེསནཊྛཱནཾ. པུརཏོཏི ཝཱིཐིཡཾ གཙྪནྟསྶ པུརཏོ གྷརཾ ཨཔཝིཊྛསྶེཝ. པཏྟཝིསྶཊྛཊྛཱནནྟི པེསཀཱརཝཱིཐིཡཾ པེསཀཱརབྷཱཝཾ ནིམྨིནིཏྭཱ ཋིཏསྶ སཀྐསྶ གྷརདྭཱརེ པཏྟཝིསྶཊྛཊྛཱནཾ. ཨུཀྐཊྛཔིཎྜཔཱཏིཀོ ཏཾ དིཝསཾ ན བྷིཀྑཾ ཨཱགམཡམཱནོ ནིསཱིདཏི, ཏསྨཱ ཏཾ ཨནུལོམེཏི. ཀཏྠཙིཔི ཀུལེ ནིབདྡྷཾ ཨུཔསངྐམནཱབྷཱཝཏོ པརིཙཡཱབྷཱཝེན ཀུལེསུ ནིཙྩནཝཀཏཱ. སབྦཏྠ ཨལགྒམཱནསཏཱཡ ཙ སོམྨབྷཱཝེན ཙ ཙནྡཱུཔམཏཱ. ཀུལེསུ པརིགྒཧཙིཏྟཱབྷཱཝེན ཏཏྠ མཙྪེརཔྤཧཱནཾ. ཧིཏེསིཏཱཡ ཝིབྷཱགཱབྷཱཝཏོ སམཱནུཀམྤིཏཱ. ཀུལཱནཾ སངྒཎྷནསཾསཊྛཏཱདཡོ ཀུལཱུཔཀཱདཱིནཝཱ. ཨཝ྄ཧཱནཱནབྷིནནྡནཱཏི ནིམནྟནཝསེན ཨཝ྄ཧཱནསྶ ཨསམྤཊིཙྪནཱ. ཨབྷིཧཱརེནཱཏི བྷིཀྑཱབྷིཧཱརེན. སེརིཙཱརནྟི ཡཐཱརུཙི ཝིཙརཎཾ.

ཨིཏི སཔདཱནཙཱརིཀངྒཀཐཱཝཎྞནཱ.

༥. ཨེཀཱསནིཀངྒཀཐཱཝཎྞནཱ

༢༨. ནཱནཱསནབྷོཛནནྟི ཨནེཀསྨིཾ ཨཱསནེ བྷོཛནཾ, ཨེཀནིསཛྫཱཡ ཨེཝ ཨབྷུཉྫིཏྭཱ ཝིསུཾ ཝིསུཾ ནིསཛྫཱསུ ཨཱཧཱརཔརིབྷོགནྟི ཨཏྠོ. པཏིརཱུཔནྟི ཡུཏྟརཱུཔཾ ཨནུཊྛཱཔནཱིཡཾ. ཝཏྟཾ ཀཱཏུཾ ཝཊྚཏཱིཏི ཝཏྟཾ ཀཱཏུཾ ཡུཛྫཏི. ཝཏྟཾ ནཱམ གརུཊྛཱནཱིཡེ ཀཏྟབྦམེཝ. ཏཏྠ པན པཊིཔཛྫནཝིདྷིཾ དསྶེཏུཾ ཡཾ ཐེརཝཱདཾ ཨཱཧ ‘‘ཨཱསནཾ ཝཱ རཀྑེཡྻ བྷོཛནཾ ཝཱ’’ཏིཨཱདི. ཏསྶཏྠོ – ཨེཀཱསནིཀཾ བྷིཀྑུཾ བྷུཉྫནྟཾ ཨཱསནཾ ཝཱ རཀྑེཡྻ, དྷུཏངྒབྷེདཏོ ཡཱཝ བྷོཛནཔརིཡོསཱནཱ ན ཝུཊྛཱཏབྦནྟི ཝུཏྟཾ ཧོཏི ¶ . བྷོཛནཾ ཝཱ རཀྑེཡྻ དྷུཏངྒབྷེདཏོ, ཨབྷུཉྫིཡམཱནཾ ཡཱཝ བྷུཉྫིཏུཾ ནཱརབྷཏི, ཏཱཝ ཝུཊྛཱཏབྦནྟི ཨཏྠོ. ཡསྨཱ ཏཡིདཾ དྭཡཾ ཨིདྷ ནཏྠི, ཏསྨཱ ཝཏྟཀརཎཾ དྷུཏངྒཾ ན རཀྑཏཱིཏི ཨདྷིཔྤཱཡོ. ཏེནཱཧ ‘‘ཨཡཉྩཱ’’ཏིཨཱདི. ‘‘བྷེསཛྫཏྠམེཝཱ’’ཏི ཨིམིནཱ བྷེསཛྫཔརིབྷོགཝསེནེཝ སཔྤིཨཱདཱིནིཔི ཝཊྚནྟཱིཏི དསྶེཏི. ཨཔྤཱབཱདྷཏཱཏི ཨརོགཏཱ. ཨཔྤཱཏངྐཏཱཏི ཨཀིཙྪཛཱིཝིཏཱ སརཱིརདུཀྑཱབྷཱཝོ. ལཧུཊྛཱནནྟི ཀཱཡསྶ ལཧུཔརིཝཏྟིཏཱ. བལནྟི སརཱིརབལཾ. ཕཱསུཝིཧཱརོཏི སུཁཝིཧཱརོ. སབྦམེཏཾ བཧུཀྑཏྟུཾ བྷུཉྫནཔཙྩཡཱ ཨུཔྤཛྫནཝིཀཱརཔཊིཀྑེཔཔདཾ. རུཛཱཏི རོགཱ. ན ཀམྨམཏྟནོཏི ཨཏྟནོ ཡོགཀམྨཾ པུརེབྷཏྟཾ, པཙྪཱབྷཏྟཉྩ ན པརིཧཱཔེཏི, བཧུསོ བྷོཛནེ ཨབྱཱཝཊབྷཱཝཏོ, ཨརོགབྷཱཝཏོ ཙཱཏི ཨདྷིཔྤཱཡོ.

ཨིཏི ཨེཀཱསནིཀངྒཀཐཱཝཎྞནཱ.

༦. པཏྟཔིཎྜིཀངྒཀཐཱཝཎྞནཱ

༢༩. ཨཔྤཊིཀཱུལཾ ¶ ཀཏྭཱ བྷུཉྫིཏུཾ ཝཊྚཏི པཊིཀཱུལསྶ བྷུཏྟསྶ ཨགཎྷནམྤི སིཡཱཏི ཨདྷིཔྤཱཡོ. པམཱཎཡུཏྟམེཝ གཎྷིཏབྦནྟི ‘‘ཨེཀབྷཱཛནམེཝ གཎྷཱམཱི’’ཏི བཧུཾ གཧེཏྭཱ ན ཚཌྜེཏབྦཾ. ནཱནཱརསཏཎྷཱཝིནོདནནྟི ནཱནཱརསབྷོཛནེ ཏཎྷཱཡ ཝིནོདནཾ. ཨཏྲ ཨཏྲ ནཱནཱབྷཱཛནེ ཋིཏེ ནཱནཱརསེ ཨིཙྪཱ ཨེཏསྶཱཏི ཨཏྲིཙྪོ, ཏསྶ བྷཱཝོ ཨཏྲིཙྪཏཱ, ཏསྶཱ ཨཏྲིཙྪཏཱཡ པཧཱནཾ. ཨཱཧཱརེ པཡོཛནམཏྟདསྶིཏཱཏི ཨསམྦྷིནྣནཱནཱརསེ གེདྷཾ ཨཀཏྭཱ ཨཱཧཱརེ སཏྠཱརཱ ཨནུཉྙཱཏཔཡོཛནམཏྟདསྶིཏཱ. ཝིསུཾ ཝིསུཾ བྷཱཛནེསུ ཋིཏཱནི བྱཉྫནཱནི གཎྷཏོ ཏཏྠ ཏཏྠ སཱབྷོགཏཱཡ སིཡཱ ཝིཀྑིཏྟབྷོཛིཏཱ, ན ཏཐཱ ཨིམསྶ ཨེཀཔཏྟགཏསཉྙིནོཏི ཝུཏྟཾ ‘‘ཨཝིཀྑིཏྟབྷོཛིཏཱ’’ཏི. ཨོཀྑིཏྟལོཙནོཏི པཏྟསཉྙིཏཱཡ ཧེཊྛཱཁིཏྟཙཀྑུ. པརིབྷུཉྫེཡྻཱཏི པརིབྷུཉྫིཏུཾ སཀྐུཎེཡྻ.

ཨིཏི པཏྟཔིཎྜིཀངྒཀཐཱཝཎྞནཱ.

༧. ཁལུཔཙྪཱབྷཏྟིཀངྒཀཐཱཝཎྞནཱ

༣༠. བྷུཉྫནྟསྶ ¶ ཡཾ ཨུཔནཱིཏཾ, ཏསྶ པཊིཀྑེཔེན ཏཾ ཨཏིརིཏྟཾ བྷོཛནནྟི ཨཏིརིཏྟབྷོཛནཾ. པུན བྷོཛནཾ ཀཔྤིཡཾ ཀཱརེཏྭཱ ན བྷུཉྫིཏབྦཾ, ཏབྦིསཡཏྟཱ ཨིམསྶ དྷུཏངྒསྶ. ཏེནཱཧ ‘‘ཨིདམསྶ ཝིདྷཱན’’ནྟི. ཡསྨིཾ བྷོཛནེཏི ཡསྨིཾ བྷུཉྫིཡམཱནེ བྷོཛནེ. ཏདེཝ བྷུཉྫཏི, ན ཨཉྙཾ. ཨནཏིརིཏྟབྷོཛནཔཙྩཡཱ ཨཱཔཏྟི ཨནཏིརིཏྟབྷོཛནཱཔཏྟི, ཏཏོ དཱུརཱིབྷཱཝོ ཨནཱཔཛྫནཾ. ཨོདརིཀཏྟཾ གྷསྨརབྷཱཝོ ཀུཙྪིཔཱུརཀཏཱ, ཏསྶ ཨབྷཱཝོ ཨེཀཔིཎྜེནཱཔི ཡཱཔནཏོ. ནིརཱམིསསནྣིདྷིཏཱ ནིཧིཏསྶ ཨབྷུཉྫནཏོ. པུན པརིཡེསནཝསེན པརིཡེསནཱཡ ཁེདཾ ན ཡཱཏི. ཨབྷིསལླེཁཀཱནཾ སནྟོསགུཎཱདཱིནཾ ཝུདྡྷིཡཱ སཉྫནནཾ སནྟོསགུཎཱདིཝུཌྜྷིསཉྫནནཾ. ཨིདནྟི ཁལུཔཙྪཱབྷཏྟིཀངྒཾ.

ཨིཏི ཁལུཔཙྪཱབྷཏྟིཀངྒཀཐཱཝཎྞནཱ.

༨. ཨཱརཉྙིཀངྒཀཐཱཝཎྞནཱ

༣༡. གཱམནྟསེནཱསནཾ ¶ པཧཱཡ ཨརཉྙེ ཨརུཎཾ ཨུཊྛཱཔེཏབྦནྟི ཨེཏྠ གཱམནྟཾ, ཨརཉྙཉྩ སརཱུཔཏོ དསྶེཏུཾ ‘‘ཏཏྠ སདྡྷིཾ ཨུཔཙཱརེནཱ’’ཏིཨཱདི ཨཱརདྡྷཾ. ཏཏྠ གཱམཔརིཡཱཔནྣཏྟཱ གཱམནྟསེནཱསནསྶ ‘‘གཱམོཡེཝ གཱམནྟསེནཱསན’’ནྟི ཝུཏྟཾ. ཡོ ཀོཙི སཏྠོཔི གཱམོ ནཱམཱཏི སམྦནྡྷོ. ཨིནྡཁཱིལཱཏི ཨུམྨཱརཱ. ཏསྶཱཏི ལེཌྜུཔཱཏསྶ. ཝིནཡཔརིཡཱཡེན ཨརཉྙལཀྑཎཾ ཨདིནྣཱདཱནཔཱརཱཛིཀེ (པཱརཱ. ༩༢) ཨཱགཏཾ. ཏཏྠ ཧི ‘‘གཱམཱ ཝཱ ཨརཉྙཱ ཝཱ’’ཏི ཨནཝསེསཏོ ཨཝཧཱརཊྛཱནཔརིགྒཧེ ཏདུབྷཡཾ ཨསངྐརཏོ དསྶེཏུཾ ‘‘ཋཔེཏྭཱ གཱམཉྩཱ’’ཏིཨཱདི ཝུཏྟཾ. གཱམཱུཔཙཱརོ ཧི ལོཀེ གཱམསངྑམེཝ གཙྪཏཱིཏི. ནིཔྤརིཡཱཡཏོ པན གཱམཝིནིམུཏྟཾ ཋཱནཾ ཨརཉྙམེཝ ཧོཏཱིཏི ཨབྷིདྷམྨེ (ཝིབྷ. ༥༢༩) གཱམཱ ‘‘ནིཀྑམིཏྭཱ བཧི ཨིནྡཁཱིལཱ, སབྦམེཏཾ ཨརཉྙ’’ནྟི ཝུཏྟཾ. སུཏྟནྟིཀཔརིཡཱཡེན ཨཱརཉྙཀསིཀྑཱཔདེ (པཱརཱ. ༦༥༤) ‘‘པཉྩདྷནུསཏིཀཾ པཙྪིམ’’ནྟི ཨཱགཏཾ ཨཱརཉྙིཀཾ བྷིཀྑུཾ སནྡྷཱཡ. ན ཧི སོ ཝིནཡཔརིཡཱཡིཀེ ‘‘ཨརཉྙེ ཝསནཏོ ཨཱརཉྙིཀོ པནྟསེནཱསནོ’’ཏི སུཏྟེ ཝུཏྟོ. ཨཡཉྩ སུཏྟསཾཝཎྞནཱཏི ཨིདྷ སབྦཏྠ སུཏྟནྟཀཐཱཝ ¶ པམཱཎཾ. ཏསྨཱ ཏཏྠ ཨཱགཏམེཝ ལཀྑཎཾ གཧེཏབྦནྟི དསྶེནྟོ ‘‘ཏཾ ཨཱརོཔིཏེན ཨཱཙརིཡདྷནུནཱ’’ཏིཨཱདིནཱ མིནནཝིདྷིཾ ཨཱཧ. ཏེནེཝ ཧི མཛ྄ཛྷིམཊྛཀཐཱནཡོཝ (མ. ནི. ཨཊྛ. ༡.༢༩༦) ཨིདམེཏྠ པམཱཎནྟི ཙ ཝུཏྟོ.

ཏཏོ ཏཏོ མགྒནྟི ཏཏྠ ཏཏྠ ཁུདྡཀམགྒཾ པིདཧཏི. དྷུཏངྒསུདྡྷིཀེན དྷུཏངྒསོདྷནཔསུཏེན. ཡཐཱཔརིཙྪིནྣེ ཀཱལེཏི ཨུཀྐཊྛསྶ ཏཡོཔི ཨུཏཱུ, མཛ྄ཛྷིམསྶ དྭེ, མུདུཀསྶ ཨེཀོ ཨུཏུ. ཏཏྠཔི དྷུཏངྒཾ ན བྷིཛྫཏི སཨུསྶཱཧཏྟཱ. ནིཔཛྫིཏྭཱ གམིསྶཱམཱཏི ཙིཏྟསྶ སིཐིལབྷཱཝེན དྷུཏངྒཾ བྷིཛྫཏཱིཏི ཝུཏྟཾ. ཨརཉྙསཉྙཾ མནསི ཀརོནྟོཏི ‘‘ཨཧཾ ཝིཝེཀཝཱསཾ ཝསིསྶཱམི, ཡཐཱལདྡྷོཝ ཀཱཡཝིཝེཀོ སཱཏྠཀོ ཀཱཏབྦོ’’ཏི མནསིཀཱརསབྦྷཱཝཏོ ‘‘བྷབྦོ…པེ… རཀྑིཏུ’’ནྟི ཝུཏྟཾ. ཨསྶ ཨཱརཉྙིཀསྶ ཙིཏྟཾ ན ཝིཀྑིཔནྟི ཨཱཔཱཐམནུཔགམནཏོ. ཝིགཏསནྟཱསོ ཧོཏི ཝིཝེཀཔརིཙཡཏོ. ཛཱིཝིཏནིཀནྟིཾ ཛཧཏི བཧུཔརིསྶཡེ ཨརཉྙེ ནིཝཱསེནེཝ མརཎབྷཡསྶ དཱུརཱིཀརཎཏོ. པཝིཝེཀསུཁརསཾ ཨསྶཱདེཏི ཨནུབྷཝཏི ཛནསཾསགྒཱབྷཱཝཏོ. ཨཱརཱདྷཡནྟོཏི ཨནུནཡནྟོ. ཡཐཱནུསིཊྛཾ པཊིཔཏྟིཡཱ ཝིཝེཀསྶ ཨདྷིཊྛཱནབྷཱཝཏོ ཨཱརཉྙིཀངྒཡོགིནོ ཝཱཧནསདིསནྟི ཀཏྭཱ ཝུཏྟཾ ‘‘ཨཝསེསདྷུཏཱཡུདྷོ’’ཏི, ཨཝསིཊྛདྷུཏདྷམྨཱཡུདྷོཏི ཨཏྠོ.

ཨིཏི ཨཱརཉྙིཀངྒཀཐཱཝཎྞནཱ.

༩. རུཀྑམཱུལིཀངྒཀཐཱཝཎྞནཱ

༣༢. ཚནྣནྟི ¶ ཨིཊྛཀཱཚདནཱདཱིཧི ཚཱདིཏཾ, ཨཱཝསཐནྟི ཨཏྠོ. སཱིམནྟརིཀརུཀྑོཏི དྭིནྣཾ རཱཛཱུནཾ རཛྫསཱིམཱཡ ཋིཏརུཀྑོ. ཏཏྠ ཧི ཏེསཾ རཱཛཱུནཾ བལཀཱཡོ ཨུཔགནྟྭཱ ཨནྟརནྟརཱ ཡུདྡྷཾ ཀརེཡྻ, ཙོརཱཔི པཱརིཔནྠིཀཱ སམོསརནྟཱ བྷིཀྑུསྶ སུཁེན ནིསཱིདིཏུཾ ན དེནྟི. ཙེཏིཡརུཀྑོ ‘‘དེཝཏཱདྷིཊྛིཏོ’’ཏི མནུསྶེཧི སམྨཏརུཀྑོ པཱུཛེཏུཾ ཨུཔགཏེཧི མནུསྶེཧི ཨཝིཝིཏྟོ ཧོཏི. ནིཡྻཱསརུཀྑོ སཛྫརུཀྑཱདི. ཝགྒུལིརུཀྑོ ཝགྒུལིནིསེཝིཏོ. སཱིམནྟརིཀརུཀྑཱདཡོ སཔརིསྶཡཱ, དུལླབྷཝིཝེཀཱ ཙཱཏི ཨཱཧ ‘‘ཨིམེ རུཀྑེ ཝིཝཛྫེཏྭཱ’’ཏི. པཎྞསཊནྟི ¶ རུཀྑཏོ པཏིཏཔཎྞཾ. པཊིཙྪནྣེ ཋཱནེ ནིསཱིདིཏབྦཾ རུཀྑམཱུལིཀབྷཱཝསྶ པཊིཙྪཱདནཏྠཾ. ཚནྣེ ཝཱསཀཔྤནཱ དྷམྨསྶཝནཱདཱིནམཏྠཱཡཔི ཧོཏི. ཏསྨཱ ‘‘ཛཱནིཏྭཱ ཨརུཎཾ ཨུཊྛཱཔིཏམཏྟེ’’ཏི ཝུཏྟཾ.

ཨབྷིཎྷཾ ཏརུཔཎྞཝིཀཱརདསྶནེནཱཏི ཨབྷིཀྑཎཾ ཏརཱུསུ, ཏརཱུནཾ ཝཱ པཎྞེསུ ཝིཀཱརསྶ ཁཎབྷངྒསྶ དསྶནེན. སེནཱསནམཙྪེརཀམྨཱརཱམཏཱནནྟི ཨཱཝཱསམཙྪརིཡནཝཀམྨརཏབྷཱཝཱནཾ. དེཝཏཱཧཱིཏི རུཀྑདེཝཏཱཧི. ཏཱཔི ཧི རུཀྑཊྛཝིམཱནེསུ ཝསནྟིཡོ རུཀྑེསུ ཝསནྟི. ཨཡམྤི རུཀྑེཏི སཧཝཱསིཏཱ. ཝཎྞིཏོཏི ‘‘ཨཔྤཱནི ཙེཝཱ’’ཏིཨཱདིནཱ པསཾསིཏོ. ‘‘རུཀྑམཱུལསེནཱསནཾ ནིསྶཱཡ པབྦཛྫཱ’’ཏི (མཧཱཝ. ༧༣, ༡༢༨) ཨེཝཾ ནིསྶཡོཏི ཙ བྷཱསིཏོ. ཨབྷིརཏྟཱནི ཏརུཎཀཱལེ, ནཱིལཱནི མཛ྄ཛྷིམཀཱལེ, པཎྜཱུནི ཛིཎྞཀཱལེ. པཏིཏཱནི མིལཱཡནཝསེན. ཨེཝཾ པསྶནྟོ ཏརུཔཎྞཱནི པཙྩཀྑཏོ ཨེཝ ནིཙྩསཉྙཾ པནཱུདཏི པཛཧཏི, ཨནིཙྩསཉྙཱ ཨེཝསྶ སཎྛཱཏི. ཡསྨཱ བྷགཝཏོ ཛཱཏིབོདྷིདྷམྨཙཀྐཔཝཏྟནཔརིནིབྦཱནཱནི རུཀྑམཱུལེཡེཝ ཛཱཏཱནི, ཏསྨཱ ཝུཏྟཾ ‘‘བུདྡྷདཱཡཛྫཾ རུཀྑམཱུལ’’ནྟི.

ཨིཏི རུཀྑམཱུལིཀངྒཀཐཱཝཎྞནཱ.

༡༠. ཨབྦྷོཀཱསིཀངྒཀཐཱཝཎྞནཱ

༣༣. ‘‘རུཀྑམཱུལཾ པཊིཀྑིཔཱམཱི’’ཏི ཨེཏྟཀེ ཝུཏྟེ ཚནྣཾ ཨཔྤཊིཀྑིཏྟམེཝ ཧོཏཱིཏི ‘‘ཚནྣཉྩ ¶ རུཀྑམཱུལཉྩ པཊིཀྑིཔཱམཱི’’ཏི ཝུཏྟཾ. དྷུཏངྒསྶ སབྦསོ པཊིཡོགིཔཊིཀྑེཔེན ཧི སམཱདཱནཾ ཨིཛ྄ཛྷཏི, ནོ ཨཉྙཐཱཏི. ‘‘དྷམྨསྶཝནཱཡཱ’’ཏི ཨིམིནཱཝ དྷམྨཾ ཀཐེནྟེནཱཔི ཨུཔོསཐདིཝསཱདཱིསུ སུཎནྟཱནཾ ཙིཏྟཱནུརཀྑཎཏྠཾ ཏེཧི ཡཱཙིཏེན ཚནྣཾ པཝིསིཏུཾ ཝཊྚཏི, དྷམྨཾ པན ཀཐེཏྭཱ ཨབྦྷོཀཱསོཝ གནྟབྦོ. རུཀྑམཱུལིཀསྶཱཔི ཨེསེཝ ནཡོ. ཨུཔོསཐཏྠཱཡཱཏི ཨུཔོསཐཀམྨཱཡ. ཨུདྡིསནྟེནཱཏི པརེསཾ ཨུདྡེསཾ དེནྟེན. ཨུདྡིསཱཔེནྟེནཱཏི སཡཾ ཨུདྡེསཾ གཎྷནྟེན. མགྒམཛ྄ཛྷེ ཋིཏཾ སཱལནྟི སཱིཧལ༹དཱིཔེ ཝིཡ མགྒཱ ཨནོཀྐམྨ ཨུཛུཀམེཝ པཝིསིཏབྦསཱལཾ. ཝེགེན གནྟུཾ ན ཝཊྚཏི ཨསཱརུཔྤཏྟཱ. ཡཱཝ ཝསྶཱུཔརམཱ ཋཏྭཱ གནྟབྦཾ, ན ཏཱཝ དྷུཏངྒབྷེདོ ཧོཏཱིཏི ཨདྷིཔྤཱཡོ.

རུཀྑསྶ ¶ ཨནྟོ ནཱམ རུཀྑམཱུལཾ. པབྦཏསྶ པན པབྦྷཱརསདིསོ པབྦཏཔདེསོ. ཨཙྪནྣམརིཡཱདནྟི ཡཐཱ ཝསྶོདཀཾ ཨནྟོ ན པཝིསཏི, ཨེཝཾ ཚདནསངྑེཔེན ཨུཔརི ཨཀཏམརིཡཱདཾ. ཨནྟོ པན པབྦྷཱརསྶ ཝསྶོདཀཾ པཝིསཏི ཙེ, ཨབྦྷོཀཱསསངྑེཔམེཝཱཏི ཏཏྠ པཝིསིཏུཾ ཝཊྚཏི. སཱཁཱམཎྜཔོཏི རུཀྑསཱཁཱཧི ཝིརལ༹ཙྪནྣམཎྜཔོ. པཱིཋཔཊོ ཁལིཏྠདྡྷསཱཊཀོ.

པཝིཊྛཀྑཎེ དྷུཏངྒཾ བྷིཛྫཏི ཡཐཱཝུཏྟཔབྦྷཱརཱདིཀེ ཋཔེཏྭཱཏི ཨདྷིཔྤཱཡོ. ཛཱནིཏྭཱཏི དྷམྨསྶཝནཱདིཨཏྠཾ ཚནྣཾ རུཀྑམཱུལཾ པཝིསིཏྭཱ ནིསིནྣོ ‘‘ཨིདཱནི ཨརུཎོ ཨུཊྛཧཏཱི’’ཏི ཛཱནིཏྭཱ. རུཀྑམཱུལེཔི ཀཏྠཙི ཨཏྠེཝ ནིཝཱསཕཱསུཀཏཱཏི སིཡཱ ཏཏྠ ཨཱསངྒཔུབྦཀོ ཨཱཝཱསཔལིབོདྷོ, ན པན ཨབྦྷོཀཱསེཏི ཨིདྷེཝ ཨཱཝཱསཔལིབོདྷུཔཙྪེདོ ཨཱནིསཾསོ ཝུཏྟོ. པསཾསཱཡཱནུརཱུཔཏཱཏི ཨནིཀེཏཱཏི ཝུཏྟཔསཾསཱཡ ཨནཱལཡབྷཱཝེན ཨནུཙྪཝིཀཏཱ. ནིསྶངྒཏཱཏི ཨཱཝཱསཔརིགྒཧཱབྷཱཝེནེཝ ཏཏྠ ནིསྶངྒཏཱ. ཨསུཀདིསཱཡ ཝསནཊྛཱནཾ ནཏྠི, ཏསྨཱ ཏཏྠ གནྟུཾ ནེཝ སཀྐཱཏི ཨེདིསསྶ པརིཝིཏཀྐསྶ ཨབྷཱཝཏོ ཙཱཏུདྡིསོ. མིགབྷཱུཏེནཱཏི པརིགྒཧཱབྷཱཝེན མིགསྶ ཝིཡ བྷཱུཏེན. སིཏོཏི ནིསྶིཏོ. ཝིནྡཏཱིཏི ལབྷཏི.

ཨིཏི ཨབྦྷོཀཱསིཀངྒཀཐཱཝཎྞནཱ.

༡༡. སོསཱནིཀངྒཀཐཱཝཎྞནཱ

༣༤. ན ¶ སུསཱནནྟི ཨསུསཱནཾ. ཨཉྙཏྠོ ན-ཀཱརོ, སུསཱནལཀྑཎརཧིཏཾ ཝསནཊྛཱནནྟི ཨདྷིཔྤཱཡོ. ན ཏཏྠཱཏི ‘‘སུསཱན’’ནྟི ཝཝཏྠཔིཏམཏྟེ ཋཱནེ ན ཝསིཏབྦཾ. ན ཧི ནཱམམཏྟེན སུསཱནལཀྑཎཾ སིཛ྄ཛྷཏི. ཏེནཱཧ ‘‘ན ཧཱི’’ཏིཨཱདི. ཛྷཱཔིཏཀཱལཏོ པན པཊྛཱཡ…པེ… སུསཱནམེཝ ཚཝེན སཡིཏམཏྟཱཡ སུསཱནལཀྑཎཔྤཏྟིཏོ. ཚཝསཡནཾ ཧི ‘‘སུསཱན’’ནྟི ཝུཙྩཏི.

སོསཱནིཀེན ནཱམ ཨཔྤཀིཙྩེན སལླཧུཀཝུཏྟིནཱ བྷཝིཏབྦནྟི དསྶེཏུཾ ‘‘ཏསྨིཾ པན ཝསནྟེནཱ’’ཏིཨཱདི ཝུཏྟཾ. གརུཀནྟི དུཔྤརིཧཱརཾ. ཏམེཝ ཧི དུཔྤརིཧཱརབྷཱཝཾ དསྶེཏུཾ ‘‘ཏསྨཱ’’ཏིཨཱདི ཝུཏྟཾ. ཏཏྠ ཨུཔྤནྣཔརིསྶཡཝིགྷཱཏཏྠཱཡཱཏི ¶ ‘‘སུསཱནཾ ནཱམ མནུསྶརཱཧསྶེཡྻཀ’’ནྟི ཙོརཱ ཀཏཀམྨཱཔི ཨཀཏཀམྨཱཔི ཨོསརནྟི, ཏཏྠ ཙོརེསུ བྷཎྜསཱམིཀེ དིསྭཱ བྷིཀྑུསམཱིཔེ བྷཎྜཾ ཚཌྜེཏྭཱ པལཱཏེསུ མནུསྶཱ བྷིཀྑུཾ ‘‘ཙོརོ’’ཏི གཧེཏྭཱ པོཐེཡྻུཾ, ཏསྨཱ ཝིཧཱརེ སངྒྷཏྠེརཾ ཝཱ གོཙརགཱམེ རཉྙཱ ནིཡུཏྟཾ རཱཛཡུཏྟཀཾ ཝཱ ཨཏྟནོ སོསཱནིཀབྷཱཝཾ ཛཱནཱཔེཏྭཱ ཡཐཱ ཏཱདིསོ, ཨཉྙོ ཝཱ པརིསྶཡོ ན ཧོཏི, ཏཐཱ ཨཔྤམཏྟེན ཝསིཏབྦཾ. ཙངྐམནྟསྶ ཡདཱ ཨཱལ༹ཧནཾ ཨབྷིམུཁཾ ན ཧོཏི, ཏདཱཔི སཾཝེགཛནནཏྠཾ ཏཏྠ དིཊྛི ཝིསྶཛྫེཏབྦཱཏི དསྶེཏུཾ ‘‘ཨདྡྷཀྑིཀེན ཨཱལ༹ཧནཾ ཨོལོཀེནྟེནཱ’’ཏི ཝུཏྟཾ.

ཨུཔྤཐམགྒེན གནྟབྦཾ ཨཏྟནོ སོསཱནིཀབྷཱཝསྶ ཨཔཱཀཊབྷཱཝཏྠཾ. ཨཱརམྨཎནྟི ཏསྨིཾ སུསཱནེ ‘‘ཨཡཾ ཝམྨིཀོ, ཨཡཾ རུཀྑོ, ཨཡཾ ཁཱཎུཀོ’’ཏིཨཱདིནཱ དིཝཱཡེཝ ཨཱརམྨཎཾ ཝཝཏྠཔེཏབྦཾ. བྷཡཱནཀནྟི བྷཡཛནཀཾ ཝམྨིཀཱདིཾ. ཀེནཙི ལེཌྜུཔཱསཱཎཱདིནཱ ཨཱསནྣེ ཝིཙརནྟཱིཏི ན པཧརིཏབྦཱ. ཏིལཔིཊྛཾ ཝུཙྩཏི པལལཾ. མཱསམིསྶཾ བྷཏྟཾ མཱསབྷཏྟཾ. གུལཱ༹དཱིཏི ཨཱདི-སདྡེན ཏིལསཾགུལི༹ཀཱདིགྷནཔཱུཝཉྩ སངྒཎྷཱཏི. ཀུལགེཧཾ ན པཝིསིཏབྦནྟི པེཏདྷཱུམེན ཝཱསིཏཏྟཱ, པིསཱཙཱནུབནྡྷཏྟཱ ཙ ཀུལགེཧསྶ ཨབྦྷནྟརཾ ན པཝིསིཏབྦཾ. དེཝསིཀཾ ཚཝཌཱཧོ དྷུཝཌཱཧོ. མཏཉཱཏཀཱནཾ ཏཏྠ གནྟྭཱ དེཝསིཀཾ རོདནཾ དྷུཝརོདནཾ. ཝུཏྟནཡེནཱཏི ‘‘ཛྷཱཔིཏཀཱལཏོ པན པཊྛཱཡཱ’’ཏི ཝུཏྟནཡེན. ‘‘པཙྪིམཡཱམེ པཊིཀྐམིཏུཾ ཝཊྚཏཱི’’ཏི ཨིཙྪིཏཏྟཱ ‘‘སུསཱནཾ ཨགཏདིཝསེ’’ཏི ཨངྒུཏྟརབྷཱཎཀཱ.

སུསཱནེ ནིཙྩཀཱལཾ སིཝཐིཀདསྶནེན མརཎསྶཏིཔཊིལཱབྷོ. ཏཏོ ཨེཝ ཨཔྤམཱདཝིཧཱརིཏཱ ¶ . ཏཏྠ ཚཌྜིཏསྶ མཏཀལེ༹ཝརསྶ དསྶནེན ཨསུབྷནིམིཏྟཱདྷིགམོ. ཏཏོ ཨེཝ ཀཱམརཱགཝིནོདནཾ. བཧུལཾ སརཱིརསྶ ཨསུཙིདུགྒནྡྷཛེགུཙྪབྷཱཝསལླཀྑཎཏོ ཨབྷིཎྷཾ ཀཱཡསབྷཱཝདསྶནཾ. ཏཏོ མརཎསྶཏིཔཊིལཱབྷཏོ ཙ སཾཝེགབཧུལཏཱ. བྱཱདྷིཀཱནཾ, ཛརཱཛིཎྞཱནཉྩ མཏཱནཾ ཏཏྠ དསྶནེན ཨཱརོགྱཡོབྦནཛཱིཝིཏམདཔྤཧཱནཾ. ཁུདྡཀསྶ, མཧཏོ ཙ བྷཡསྶ ཨབྷིབྷཝནཏོ བྷཡབྷེརཝསཧནཏཱ. སཾཝིགྒསྶ ཡོནིསོ པདཧནཾ སམྦྷཝཏཱིཏི ཨམནུསྶཱནཾ གརུབྷཱཝནཱིཡཏཱ. ནིདྡཱགཏམྤཱིཏི སུཏྟམྤི, སུཔིནནྟེཔཱིཏི ཨདྷིཔྤཱཡོ.

ཨིཏི སོསཱནིཀངྒཀཐཱཝཎྞནཱ.

༡༢. ཡཐཱསནྠཏིཀངྒཀཐཱཝཎྞནཱ

༣༥. སེནཱསནགཱཧཎེ ¶ པརེ ཨུཊྛཱཔེཏྭཱ གཧཎཾ, ‘‘ཨིདཾ སུནྡརཾ, ཨིདཾ ན སུནྡར’’ནྟི པརིཏུལཡིཏྭཱ པུཙྪནཱ, ཨོལོཀནཱ ཙ སེནཱསནལོལུཔྤཾ. ཏུཊྛབྦནྟི ཏུསྶིཏབྦཾ. ཝིཧཱརསྶ པརིཡནྟབྷཱཝེན དཱུརེཏི ཝཱ བཧཱུནཾ སནྣིཔཱཏཊྛཱནཱདཱིནཾ ཨཙྩཱསནྣེཏི ཝཱ པུཙྪིཏུཾ ན ལབྷཏི, པུཙྪནེནཔིསྶ དྷུཏངྒསྶ སཾཀིལིསྶནཏོ. ཨོལོཀེཏུནྟི ལོལུཔྤཝསེན པསྶིཏུཾ. སཙསྶ ཏཾ ན རུཙྩཏཱིཏི ཨསྶ ཡཐཱསནྠཏིཀསྶ ཏཾ ཡཐཱགཱཧིཏཾ སེནཱསནཾ ཨཕཱསུཀབྷཱཝེན སཙེ ན རུཙྩཏི, མུདུཀསྶ ཨསཏི རོགེ ཡཐཱགཱཧིཏཾ པཧཱཡ ཨཉྙསྶ སེནཱསནསྶ གཧཎཾ ལོལུཔྤཾ, མཛ྄ཛྷིམསྶ གནྟྭཱ ཨོལོཀནཱ, ཨུཀྐཊྛསྶ པུཙྪནཱ. སབྦེསམྤི ཨུཊྛཱཔེཏྭཱ གཧཎེ ཝཏྟབྦམེཝ ནཏྠི.

ཨུཔཊྛཱཔནཱིཡཱནམྤི ཨནུཊྛཱཔནེན སབྲཧྨཙཱརཱིནཾ ཧིཏེསིཏཱ. ཏཱཡ ཀརུཎཱཝིཧཱརཱནུགུཎཏཱ. སུནྡརཱསུནྡརཝིབྷཱགཱཀརཎཏོ ཧཱིནཔཎཱིཏཝིཀཔྤཔརིཙྩཱགོ. ཏེན ཏཱདིལཀྑཎཱནུགུཎཏཱ. ཏཏོ ཨེཝ ཨནུརོདྷཝིརོདྷཔྤཧཱནཾ. དྭཱརཔིདཧནཾ ཨོཀཱསཱདཱནཏོ. ཡཐཱསནྠཏརཱམཏནྟི ཡཐཱགཱཧིཏེ ཡཐཱནིདྡིཊྛེ སེནཱསནེ ཨབྷིརཏབྷཱཝཾ.

ཨིཏི ཡཐཱསནྠཏིཀངྒཀཐཱཝཎྞནཱ.

༡༣. ནེསཛྫིཀངྒཀཐཱཝཎྞནཱ

༣༦. སེཡྻནྟི ¶ ཨིརིཡཱཔཐལཀྑཎཾ སེཡྻཾ. ཏཔྤཊིཀྑེཔེནེཝ ཧི ཏདཏྠཱ ‘‘མཉྩོ བྷིསཱི’’ཏི ཨེཝམཱདིཀཱ (ཙཱུལ༹ཝ. ༣༢༡, ༣༢༢) སེཡྻཱ པཊིཀྑིཏྟཱ ཨེཝ ཧོནྟི. ‘‘ནེསཛྫིཀོ’’ཏི ཙ སཡནཾ པཊིཀྑིཔིཏྭཱ ནིསཛྫཱཡ ཨེཝ ཝིཧརིཏུཾ སཱིལམསྶཱཏི ཨིམསྶ ཨཏྠསྶ ཨིདྷ ཨདྷིཔྤེཏཏྟཱ སེཡྻཱ ཨེཝེཏྠ པཊིཡོགིནཱི, ན ཨིཏརེ ཏཐཱ ཨནིཊྛཏྟཱ, ཨསམྦྷཝཏོ ཙ. ཀོསཛྫཔཀྑིཡོ ཧི ཨིརིཡཱཔཐོ ཨིདྷ པཊིཡོགིབྷཱཝེན ཨིཙྪིཏོ, ན ཨིཏརེ. ན ཙ སཀྐཱ ཋཱནགམནེཧི ཝིནཱ ནིསཛྫཱཡ ཨེཝ ཡཱཔེཏུཾ ཏཐཱ པཝཏྟེཏུནྟི སེཡྻཱཝེཏྠ པཊིཡོགིནཱི. ཏེནཱཧ ‘‘ཏེན པནཱ’’ཏིཨཱདི. ཙངྐམིཏབྦཾ ན ‘‘ནེསཛྫིཀོ ཨཧ’’ནྟི སབྦརཏྟིཾ ནིསཱིདིཏབྦཾ. ཨིརིཡཱཔཐནྟརཱནུགྒཧིཏོ ཧི ཀཱཡོ མནསིཀཱརཀྑམོ ཧོཏི.

ཙཏྟཱརོ ¶ པཱདཱ, པིཊྛིཨཔསྶཡོ ཙཱཏི ཨིམེཧི པཉྩཧི ཨངྒེཧི པཉྩངྒོ. ཙཏཱུཧི ཨཊྚནཱིཧི, པིཊྛིཨཔསྶཡེན ཙ པཉྩངྒོཏི ཨཔརེ. ཨུབྷོསུ པསྶེསུ པིཊྛིཔསྶེ ཙ ཡཐཱསུཁཾ ཨཔསྶཱཡ ཝིཧརཏོ ནེསཛྫིཀསྶ ‘‘ཨནེསཛྫིཀཏོ ཀོ ཝིསེསོ’’ཏི གཱཧཾ ནིཝཱརེཏུཾ ཨབྷཡཏྠེརོ ནིདསྶིཏོ ‘‘ཐེརོ ཨནཱགཱམཱི ཧུཏྭཱ པརིནིབྦཱཡཱི’’ཏི.

ཨུཔཙྪེདཱིཡཏི ཨེཏེནཱཏི ཨུཔཙྪེདནནྟི ཝིནིབནྡྷུཔཙྪེདསྶ སཱདྷཀཏམབྷཱཝོ དཊྛབྦོ. སབྦཀམྨཊྛཱནཱནུཡོགསཔྤཱཡཏཱ ཨལཱིནཱནུདྡྷཙྩཔཀྑིཀཏྟཱ ནིསཛྫཱཡ. ཏཏོ ཨེཝ པཱསཱདིཀཨིརིཡཱཔཐཏཱ. ཝཱིརིཡཱརམྦྷཱནུཀཱུལཏཱ ཝཱིརིཡསམཏཱཡོཛནསྶ ཨནུཙྪཝིཀཏཱ. ཏཏོ ཨེཝ སམྨཱཔཊིཔཏྟིཡཱ ཨནུབྲཱུཧནཏཱ. པཎིདྷཱཡཱཏི ཋཔེཏྭཱ. ཏནུནྟི ཨུཔརིམཀཱཡཾ. ཝིཀམྤེཏཱིཏི ཙཱལེཏི, ཨིཙྪཱཝིགྷཱཏཾ ཀརོཏཱིཏི ཨདྷིཔྤཱཡོ. ཝཏནྟི དྷུཏངྒཾ.

ཨིཏི ནེསཛྫིཀངྒཀཐཱཝཎྞནཱ.

དྷུཏངྒཔཀིཎྞཀཀཐཱཝཎྞནཱ

༣༧. སེཀྑཔུཐུཛྫནཱནཾ ཝསེན སིཡཱ ཀུསལཱནི, ཁཱིཎཱསཝཱནཾ ཝསེན སིཡཱ ཨབྱཱཀཏཱནི ¶ . ཏཏྠ སེཀྑཔུཐུཛྫནཱ པཊིཔཏྟིཔཱུརཎཏྠཾ, ཁཱིཎཱསཝཱ ཕཱསུཝིཧཱརཏྠཾ དྷུཏངྒཱནི པརིཧརནྟི. ཨཀུསལམྤི དྷུཏངྒནྟི ཨཀུསལཙིཏྟེནཱཔི དྷུཏངྒསེཝནཱ ཨཏྠཱིཏི ཨདྷིཔྤཱཡོ. ཏཾ ན ཡུཏྟཾ, ཡེན ཨཀུསལཙིཏྟེན པབྦཛིཏསྶ ཨཱརཉྙིཀཏྟཾ, ཏཾ དྷུཏངྒཾ ནཱམ ན ཧོཏི. ཀསྨཱ? ལཀྑཎཱབྷཱཝཏོ. ཡཾ ཧིདཾ ཀིལེསཱནཾ དྷུནནཏོ དྷུཏསྶ པུགྒལསྶ, ཉཱཎསྶ, ཙེཏནཱཡ ཝཱ ཨངྒཏྟཾ, ན ཏཾ ཨཀུསལདྷམྨེསུ སམྦྷཝཏི. ཏསྨཱ ཨརཉྙཝཱསཱདིམཏྟེན ཨཱརཉྙིཀཱདཡོ ཏཱཝ ཧོནྟུ, ཨཱརཉྙིཀངྒཱདཱིནི པན ན ཧོནྟཱིཏི ཨིམམཏྠཾ དསྶེཏུཾ ‘‘ན མཡ’’ནྟིཨཱདི ཝུཏྟཾ. ཏཏྠ ཨིམཱནཱིཏི དྷུཏངྒཱནི. ཝུཏྟཾ ཧེཊྛཱ ཝཙནཏྠནིདྡེསེ. ན ཙ ཨཀུསལེན ཀོཙི དྷུཏོ ནཱམ ཧོཏི, ཀིལེསཱནཾ དྷུནནཊྛེནཱཏི ཨདྷིཔྤཱཡོ. ཡསྶ བྷིཀྑུནོ ཨེཏཱནི སམཱདཱནཱནི ཨངྒཱནི, ཨེཏེན པཋམེནཱཔི ཨཏྠཝིཀཔྤེན ‘‘ནཏྠི ཨཀུསལཾ དྷུཏངྒ’’ནྟི དསྶེཏི. ན ཙ ཨཀུསལཾ ཀིཉྩི དྷུནཱཏཱིཏི ཨཀུསལཾ ཀིཉྩི པཱཔཾ ན ཙ དྷུནཱཏི ཨེཝ ཨཔྤཊིཔཀྑཏོ. ཡེསཾ སམཱདཱནཱནཾ ཏཾ ཨཀུསལཾ ཉཱཎཾ ཝིཡ ¶ ཨངྒནྟི ཀཏྭཱ ཏཱནི དྷུཏངྒཱནཱིཏི ཝུཙྩེཡྻུཾ. ཨིམིནཱ དུཏིཡེནཱཔི ཨཏྠཝིཀཔྤེན ‘‘ནཏྠི ཨཀུསལཾ དྷུཏངྒ’’ནྟི དསྶེཏི. ནཱཔི ཨཀུསལནྟིཨཱདི ཏཏིཡཨཏྠཝིཀཔྤཝསེན ཡོཛནཱ. ཏསྨཱཏིཨཱདི ཝུཏྟསྶེཝཏྠསྶ ནིགམནཾ.

ཡེསནྟི ཨབྷཡགིརིཝཱསིཀེ སནྡྷཱཡཱཧ. ཏེ ཧི དྷུཏངྒཾ ནཱམ པཉྙཏྟཱིཏི ཝདནྟི. ཏཐཱ སཏི ཏསྶ པརམཏྠཏོ ཨཝིཛྫམཱནཏྟཱ ཀིལེསཱནཾ དྷུནནཊྛོཔི ན སིཡཱ, སམཱདཱཏབྦཏཱ ཙཱཏི ཏེསཾ ཝཙནཾ པཱལི༹ཡཱ ཝིརུཛ྄ཛྷཏཱིཏི དསྶེཏུཾ ‘‘ཀུསལཏྟིཀཝིནིམུཏྟ’’ནྟིཨཱདི ཝུཏྟཾ. ཏསྨཱཏི ཡསྨཱ པཉྙཏྟིཔཀྑེ ཨེཏེ དོསཱ དུནྣིཝཱརཱ, ཏསྨཱ ཏཾ ཏེསཾ ཝཙནཾ ན གཧེཏབྦཾ, ཝུཏྟནཡོ ཙེཏནཱཔཀྑོཡེཝ གཧེཏབྦོཏི ཨཏྠོ. ཡསྨཱ ཨེཏེ དྷུཏགུཎཱ ཀུསལཏྟིཀེ པཋམཏཏིཡཔདསངྒཧིཏཱ, ཏསྨཱ སིཡཱ སུཁཱཡ ཝེདནཱཡ སམྤཡུཏྟཱ, སིཡཱ ཨདུཀྑམསུཁཱཡ ཝེདནཱཡ སམྤཡུཏྟཱ, སིཡཱ ཝིཔཱཀདྷམྨདྷམྨཱ, སིཡཱ ནེཝཝིཔཱཀནཝིཔཱཀདྷམྨདྷམྨཱ, སིཡཱ ཨནུཔཱདིནྣུཔཱདཱནིཡཱ, སིཡཱ ཨསཾཀིལིཊྛསཾཀིལེསིཀཱཏི ཨེཝཾ སེསཏིཀདུཀཔདེཧིཔི ནེསཾ ཡཐཱརཧཾ སངྒཧོ ཝིབྷཱཝེཏབྦོ.

ཀཱམཾ སབྦོཔི ཨརཧཱ དྷུཏཀིལེསོ, ཨིདྷ པན དྷུཏངྒསེཝནཱམུཁེན ཀིལེསེ ཝིདྷུནིཏྭཱ ཋིཏོ ཁཱིཎཱསཝོ ‘‘དྷུཏཀིལེསོ པུགྒལོ’’ཏི ཨདྷིཔྤེཏོ. ཏཐཱ སབྦོཔི ཨརིཡམགྒོ ནིཔྤརིཡཱཡེན ཀིལེསདྷུནནོ དྷམྨོ, ཝིསེསཏོ ཨགྒམགྒོ. པརིཡཱཡེན པན ཝིཔསྶནཱཉཱཎཱདི. ཧེཊྛིམཔརིཙྪེདེན དྷུཏངྒཙེཏནཱསམྤཡུཏྟཉཱཎཾ དཊྛབྦཾ. ཨེཝཾ དྷུཏཾ དསྶེཏྭཱ དྷུཏཝཱདེ དསྶེཏབྦེ ཡསྨཱ དྷུཏཝཱདབྷེདེན ¶ དྷུཏོ ཝིཡ དྷུཏབྷེདེན དྷུཏཝཱདོཔི དུཝིདྷོ, ཏསྨཱ ཏེསཾ, ཏདུབྷཡཔཊིཀྑེཔསྶ ཙ ཝསེན ཙཏུཀྐམེཏྠ སམྦྷཝཏཱིཏི ཏཾ དསྶེཏུཾ ‘‘ཨཏྠི དྷུཏོ’’ཏིཨཱདི ཝུཏྟཾ.

ཏཡིདནྟི ནིཔཱཏོ, ཏསྶ ‘‘སོ ཨཡ’’ནྟི ཨཏྠོ. དྷུཏདྷམྨཱ ནཱམཱཏི དྷུཏངྒསེཝནཱཡ པཊིཔཀྑབྷཱུཏཱནཾ པཱཔདྷམྨཱནཾ དྷུནནཝསེན པཝཏྟིཡཱ ‘‘དྷུཏོ’’ཏི ལདྡྷནཱམཱཡ དྷུཏངྒཙེཏནཱཡ ཨུཔཀཱརཀཱ དྷམྨཱཏི ཀཏྭཱ དྷུཏདྷམྨཱ ནཱམ. ཨསམྤཏྟསམྤཏྟེསུ པཙྩཡེསུ ཨལུབྦྷནཱཀཱརེན པཝཏྟནཏོ ཨཔྤིཙྪཏཱ སནྟུཊྛིཏཱ ཙ ཨཏྠཏོ ཨལོབྷོ. པཙྩཡགེདྷཱདིཧེཏུཀཱནཾ ལོལཏཱདཱིནཾ སཾཀིལེསཱནཾ སམྨདེཝ ལིཁནཏོ ¶ ཚེདནཏོ གཎསངྒཎིཀཱདིབྷེདཏོ སཾསགྒཏོ ཙིཏྟསྶ ཝིཝེཙནཏོ སལླེཁཏཱ པཝིཝེཀཏཱ ཙ ཨལོབྷོ ཨམོཧོཏི ཨིམེསུ དྭཱིསུ དྷམྨེསུ ཨནུཔཏནྟི ཏདནྟོགདྷཱ ཏཔྤརིཡཱཔནྣཱ ཧོནྟི, ཏདུབྷཡསྶེཝ པཝཏྟིཝིསེསབྷཱཝཏོ. ཨིམེཧི ཀུསལདྷམྨེཧི ཨཏྠཱི ཨིདམཏྠཱི, ཡེན ཉཱཎེན པབྦཛིཏེན ནཱམ པཾསུཀཱུལིཀངྒཱདཱིསུ པཏིཊྛིཏེན བྷཝིཏབྦནྟི ཡཐཱནུསིཊྛཾ དྷུཏགུཎེ སམཱདིཡཏི ཙེཝ པརིཧརཏི ཙ, ཏཾ ཉཱཎཾ ཨིདམཏྠིཏཱ. ཏེནཱཧ ‘‘ཨིདམཏྠིཏཱ ཉཱཎམེཝཱ’’ཏི. པཊིཀྑེཔཝཏྠཱུསཱུཏི གཧཔཏིཙཱིཝརཱདཱིསུ ཏེཧི ཏེཧི དྷུཏངྒེཧི པཊིཀྑིཔིཏབྦཝཏྠཱུསུ. ལོབྷནྟི ཏཎྷཾ. ཏེསྭེཝ ཝཱཏི པཊིཀྑེཔཝཏྠཱུསུ ཨེཝ. ཨཱདཱིནཝཔཊིཙྪཱདཀནྟི ཨཱརཀྑདུཀྑཔརཱདྷཱིནཝུཏྟིཙོརབྷཡཱདིཨཱདཱིནཝཔཊིཙྪཱདཀཾ. ཨནུཉྙཱཏཱནནྟི སཏྠཱརཱ ནིཙྪནྡརཱགཔརིབྷོགཝསེན ཨནུཉྙཱཏཱནཾ སུཁསམྥསྶཨཏྠརཎཔཱཝུརཎཱདཱིནཾ. པཊིསེཝནམུཁེནཱཏི པཊིསེཝནདྭཱརེན, ཏེན ལེསེནཱཏི ཨཏྠོ. ཨཏིསལླེཁམུཁེནཱཏི ཨཏིཝིཡ སལླེཁཔཊིཔཏྟིམུཁེན, ཨུཀྐཊྛསྶ ཝཏྟནཀཱནམྤི པཊིཀྑིཔནཝསེནཱཏི ཨཏྠོ.

སུཁུམཀརཎསནྣིསྶཡོ རཱགོ དུཀྑཱཡ པཊིཔཏྟིཡཱ པཏིཊྛཾ ན ལབྷཏཱིཏི ཨཱཧ ‘‘དུཀྑཱཔཊིཔདཉྩ ནིསྶཱཡ རཱགོ ཝཱུཔསམྨཏཱི’’ཏི. སལླེཁོ ནཱམ སམྤཛཱནསྶ ཧོཏི, སཏིསམྤཛཉྙེ མོཧོ ཨཔཏིཊྛོཝ ཨཔྤམཱདསམྦྷཝཏོཏི ཝུཏྟཾ ‘‘སལླེཁཾ ནིསྶཱཡ ཨཔྤམཏྟསྶ མོཧོ པཧཱིཡཏཱི’’ཏི. ཨེཏྠཱཏི ཨེཏེསུ དྷུཏངྒེསུ. ཏཏྠཱཏི ཨརཉྙརུཀྑམཱུལེསུ.

སཱིསངྒཱནཱིཏི སཱིསབྷཱུཏཱནི ཨངྒཱནི, པརེསམྤི ཀེསཉྩི ནཱནནྟརིཀཏཱཡ, སུཀརཏཱཡ ཙ སངྒཎྷནཏོ ཨུཏྟམངྒཱནཱིཏི ཨཏྠོ. ཨསམྦྷིནྣངྒཱནཱིཏི ཀེཧིཙི སམྦྷེདརཧིཏཱནི, ཝིསུཾཡེཝ ཨངྒཱནཱིཏི ཝུཏྟཾ ཧོཏི. ཀམྨཊྛཱནཾ ཝཌྜྷཏི རཱགཙརིཏསྶ མོཧཙརིཏསྶ དོསཙརིཏསྶཱཔི, ཏཾ ཨེཀཙྩཾ ¶ དྷུཏངྒཾ སེཝནྟསྶཱཏི ཨདྷིཔྤཱཡོ. ཧཱཡཏི ཀམྨཊྛཱནཾ སུཀུམཱརབྷཱཝེནལཱུཁཔཊིཔཏྟིཾ ཨསཧནྟསྶ. ཝཌྜྷཏེཝ མཧཱཔུརིསཛཱཏིཀསྶཱཏི ཨདྷིཔྤཱཡོ. ན ཝཌྜྷཏི ཀམྨཊྛཱནཾ ཨུཔནིསྶཡརཧིཏསྶ. ཨེཀམེཝ ཧི དྷུཏངྒཾ ཡཐཱ ཀིལེསདྷུནནཊྛེན, ཨེཝཾ ཙེཏནཱསབྷཱཝཏྟཱ. ཏེནཱཧ ‘‘སམཱདཱནཙེཏནཱ’’ཏི.

ཏེརསཱཔི ¶ དྷུཏངྒཱནི སམཱདཱཡ པརིཧརནྟཱནཾ པུགྒལཱནཾ ཝསེན ‘‘དྭཱཙཏྟཱལཱིས ཧོནྟཱི’’ཏི ཝཏྭཱ བྷིཀྑཱུནཾ ཏེརསནྣམྤི པརིཧརཎསྶ ཨེཀཛ྄ཛྷཾཡེཝ སམྦྷཝཾ དསྶེཏུཾ ‘‘སཙེ ཧཱི’’ཏིཨཱདི ཝུཏྟཾ. ཏཏྠ ‘‘ཨེཀཔྤཧཱརེན སབྦདྷུཏངྒཱནི པརིབྷུཉྫིཏུཾ སཀྐོཏཱི’’ཏི ཝུཏྟཾ. ཀཐཾ ཨབྦྷོཀཱསེ ཝིཧརནྟསྶ རུཀྑམཱུལིཀངྒཾ? ‘‘ཚནྣཾ པཊིཀྑིཔཱམི, རུཀྑམཱུལིཀངྒཾ སམཱདིཡཱམཱི’’ཏི (ཝིསུདྡྷི. ༡.༣༢) ཝཙནཏོ ཚནྣེ ཨརུཎཾ ཨུཊྛཱཔིཏམཏྟེ དྷུཏངྒཾ བྷིཛྫཏི, ན ཨབྦྷོཀཱསེ, ཏསྨཱ བྷེདཧེཏུནོ ཨབྷཱཝེན ཏམྤི ཨརོགམེཝ. ཏཐཱ སེནཱསནལོལུཔྤསྶ ཨབྷཱཝེན ཡཐཱསནྠཏིཀངྒནྟི དཊྛབྦཾ. ཨཱརཉྙིཀངྒཾ གཎམྷཱ ཨོཧཱིཡནསིཀྑཱཔདེན (པཱཙི. ༦༩༡-༦༩༢) པཊིཀྑིཏྟཾ, ཁལུཔཙྪཱབྷཏྟིཀངྒཾ ཨནཏིརིཏྟབྷོཛནསིཀྑཱཔདེན (པཱཙི. ༢༣༨-༢༤༠). པཝཱརིཏཱཡ ཧི བྷིཀྑུནིཡཱ ཨཏིརིཏྟཾ ཀཏྭཱ བྷུཉྫིཏུཾ ན ལབྦྷཏི. ཀཔྤིཡེ ཙ ཝཏྠུསྨིཾ ལོལཏཱཔཧཱནཱཡ དྷུཏངྒསམཱདཱནཾ, ན ཨཀཔྤིཡེ, སིཀྑཱཔདེནེཝ པཊིཀྑིཏྟཏྟཱ. ཨཊྛེཝ ཧོནྟི བྷིཀྑུནིཡཱ སཾཀཙྩིཀཙཱིཝརཱདཱིཧི སདྡྷིཾ པཉྩཔི ཏིཙཱིཝརསངྑམེཝ གཙྪནྟཱིཏི ཀཏྭཱ. ཡཐཱཝུཏྟེསཱུཏི བྷིཀྑཱུནཾ ཝུཏྟེསུ ཏེརསསུ ཏིཙཱིཝརཱདྷིཊྛཱནཝིནཡཀམྨཱབྷཱཝཏོ ཋཔེཏྭཱ ཏེཙཱིཝརིཀངྒཾ དྭཱདས སཱམཎེརཱནཾ. སཏྟཱཏི བྷིཀྑུནཱིནཾ ཝུཏྟེསུ ཨཊྛསུ ཨེཀཾ པཧཱཡ སཏྟ ཏིཙཱིཝརཱདྷིཊྛཱནཝིནཡཀམྨཱབྷཱཝཏོ. ‘‘ཋཔེཏྭཱ ཏེཙཱིཝརིཀངྒ’’ནྟི ཧི ཨིམཾ ཨནུཝཏྟམཱནམེཝ ཀཏྭཱ ‘‘སཏྟ སིཀྑམཱནསཱམཎེརཱིན’’ནྟི ཝུཏྟཾ. པཏིརཱུཔཱནཱིཏི ཨུཔཱསཀབྷཱཝསྶ ཨནུཙྪཝིཀཱནི.

དྷུཏངྒནིདྡེསཝཎྞནཱ ནིཊྛིཏཱ.

ཨིཏི དུཏིཡཔརིཙྪེདཝཎྞནཱ.

༣. ཀམྨཊྛཱནགྒཧཎནིདྡེསཝཎྞནཱ

༣༨. ཨཔྤིཙྪཏཱདཱིཧཱིཏི ¶ ¶ ཨཔྤིཙྪཏཱསནྟུཊྛིསལླེཁཔཝིཝེཀཱཔཙཡཝཱིརིཡཱརམྦྷཱདཱིཧི. པརིཡོདཱཏེཏི སུཝིསུདྡྷེ ནིརུཔཀྐིལེསེ. ཨིམསྨིཾ སཱིལེཏི ཡཐཱཝུཏྟེ ཙཏུཔཱརིསུདྡྷིསཱིལེ. ‘‘ཙིཏྟཾ བྷཱཝཡ’’ནྟི ཨིམམེཝ དེསནཾ སནྡྷཱཡཱཧ ‘‘ཨཏིསངྑེཔདེསིཏཏྟཱ’’ཏི. ཀོ སམཱདྷཱིཏི སརཱུཔཔུཙྪཱ. ཀེནཊྛེན སམཱདྷཱིཏི ཀེན ཨཏྠེན སམཱདྷཱིཏི ཝུཙྩཏི, ‘‘སམཱདྷཱི’’ཏི པདཾ ཀཾ ཨབྷིདྷེཡྻཏྠཾ ནིསྶཱཡ པཝཏྟནྟི ཨཏྠོ. ཀཏིཝིདྷོཏི པབྷེདཔུཙྪཱ.

‘‘ཀོ སམཱདྷཱི’’ཏི ཀཱམཉྩཱཡཾ སརཱུཔཔུཙྪཱ, ཝིབྷཱགཝནྟཱནཾ པན སརཱུཔཝིབྷཱཝནཾ ཝིབྷཱགདསྶནམུཁེནེཝ ཧོཏཱིཏི ཝིབྷཱགོ ཏཱཝ ཨནཝསེསཏོ དསྶེཏབྦོ. ཏཾདསྶནེ ཙ ཨཡམཱདཱིནཝོཏི དསྶེཏུཾ ‘‘སམཱདྷི བཧུཝིདྷོ’’ཏིཨཱདི ཝུཏྟཾ. ཏཏྠ བཧུཝིདྷོཏི ཀུསལཱདིཝསེན ཨནེཀཝིདྷོ. ནཱནཔྤཀཱརཀོཏི ཨཱལམྦནམནསིཀཱརཚནྡཔཎིདྷིཨདྷིམོཀྑཨབྷིནཱིཧཱརསཉྙཱནཱནཏྟཱདིནཱནཔྤཀཱརོ. ན སཱདྷེཡྻཱཏི ལོཀིཡསམཱདྷིསྶ བྷཱཝནཱ ཨིདྷ ཨདྷིཔྤེཏཏྠོ, ཏཉྩ ན སཱདྷེཡྻ. ཛྷཱནཝིམོཀྑཱདཱིསུ ཧི སམཱདྷིཾ ཨུདྡྷརིཏྭཱ ཏསྶ ལབྦྷམཱནེཧི ཝིབྷཱགེཧི ཝིསྶཛྫནེ ཀརིཡམཱནེ ཛྷཱནཝིབྷངྒཱདཱིསུ (ཝིབྷ. ༥༠༨ ཨཱདཡོ) ཨཱགཏོ སབྦོ སམཱདྷིཔབྷེདོ ཝིསྶཛྫེཏབྦོ སིཡཱ. ཏཐཱ ཙ སཏི ཡྭཱཡཾ ལོཀིཡསམཱདྷིསྶ བྷཱཝནཱཝིདྷི ཨདྷིཔྤེཏོ, ཏསྶ ཝིསྶཛྫནཱཡ ཨོཀཱསོཝ ན བྷཝེཡྻ. ཀིཉྩ ཡེནསྶ ཏིཀཙཏུཀྐཛྷཱནིཀེན ཧཱིནཱདིབྷེདབྷིནྣེན པཝཏྟིཝིབྷཱགེན བྲཧྨཔཱརིསཛྫཱདིཝསེན ནཝཝིདྷོ, པཉྩམཛ྄ཛྷཱནིཀེན ཝེཧཔྥལཱདིཝསེན དསཝིདྷོ ཝཱ ཨེཀཱདསཝིདྷོ ཝཱ བྷཝཔྤབྷེདོ ནིཔྤཛྫཏི. སྭཱསྶ པཝཏྟིཝིབྷཱགོ ཨཡཾ སོཏི ནིདྡྷཱརེཏྭཱ ཝུཙྩམཱནོ ཝིཀྑེཔཱཡ སིཡཱ, ཡཐཱ ཏཾ ཨཝིསཡེ. ཏེནཱཧ ‘‘ཨུཏྟརི ཙ ཝིཀྑེཔཱཡ སཾཝཏྟེཡྻཱ’’ཏི. ཀུསལཙིཏྟེཀགྒཏཱཏི ཀུསལཱ ཨནཝཛྫསུཁཝིཔཱཀལཀྑཎཱ ཙིཏྟེཀགྒཏཱ.

ཙིཏྟཙེཏསིཀཱནཾ སམཾ ཨཝིསཱརཝསེན སམྤིཎྜེནྟསྶ ཝིཡ ཨཱདྷཱནཾ སམཱདྷཱནཾ. ཨཝིསཱརལཀྑཎོ ¶ ཧི སམཱདྷི, སམྤིཎྜནརསོ ཙ. སམྨཱ ཨཝིཀྑིཔནཝསེན ཨཱདྷཱནཾ སམཱདྷཱནཾ. ཨཝིཀྑེཔལཀྑཎོ ཝཱ ཧི ¶ སམཱདྷི, ཝིཀྑེཔཝིདྡྷཾསནརསོ ཙཱཏི. སྭཱཡཾ ཡསྨཱ ཨེཀཱརམྨཎེ ཙིཏྟསྶ ཋིཏིཧེཏུ, ཏསྨཱ ‘‘ཋཔནནྟི ཝུཏྟཾ ཧོཏཱི’’ཏི ཨཱཧ. ཏཐཱ ཧེས ‘‘ཙིཏྟསྶ ཋིཏི སཎྛིཏི ཨཝཊྛིཏཱི’’ཏི (དྷ. ས. ༡༥) ནིདྡིཊྛོ. ཨེཀཱརམྨཎགྒཧཎཉྩེཏྠ སམཱདྷིསྶ སནྟཱནཊྛིཏིབྷཱཝདསྶནཏྠཾ. ཏཐཱ ཧིསྶ ཨཊྛཀཐཱཡཾ དཱིཔཙྩིཊྛིཏི ནིདསྶིཏཱ. ཨཱནུབྷཱཝེནཱཏི བལེན, པཙྩཡབྷཱཝེནཱཏི ཨཏྠོ. ཨཝིཀྑིཔམཱནཱཏི ན ཝིཀྑིཔམཱནཱ ཝཱུཔསམམཱནཱ. ཨུཔསམཔཙྩུཔཊྛཱནོ ཧི སམཱདྷི. ཨེཏེནསྶ ཝིཀྑེཔཔཊིཔཀྑཏཾ དསྶེཏི. ཨཝིཔྤཀིཎྞཱཏི ཨཝིསཊཱ. ཨེཏེན ཨཝིསཱརལཀྑཎཏཾ.

སཡཾ ན ཝིཀྑིཔཏི, སམྤཡུཏྟཱ ཝཱ ན ཝིཀྑིཔནྟི ཨེཏེནཱཏི ཨཝིཀྑེཔོ, སོ ལཀྑཎཾ ཨེཏསྶཱཏི ཨཝིཀྑེཔལཀྑཎོ. ཝིཀྑེཔཾ ཝིདྡྷཾསེཏི, ཏཐཱ ཝཱ སམྤཛྫཏཱིཏི ཝིཀྑེཔཝིདྡྷཾསནརསོ. ཨུདྡྷཙྩེ ཨཝིཀམྤནཝསེན པཙྩུཔཏིཊྛཏི, སམྤཡུཏྟཱནཾ ཝཱ ཏཾ པཙྩུཔཊྛཔེཏཱིཏི ཨཝིཀམྤནཔཙྩུཔཊྛཱནོ. སུཁནྟི ནིརཱམིསཾ སུཁཾ དཊྛབྦཾ.

༣༩. ཨཝིཀྑེཔལཀྑཎཾ ནཱམ སམཱདྷིསྶ ཨཱཝེཎིཀོ སབྷཱཝོ, ན ཏེནསྶ ཀོཙི ཝིབྷཱགོ ལབྦྷཏཱིཏི ཨཱཧ ‘‘ཨཝིཀྑེཔལཀྑཎེན ཏཱཝ ཨེཀཝིདྷོ’’ཏི. སམྤཡུཏྟདྷམྨེ ཨཱརམྨཎེ ཨཔྤེནྟོ ཝིཡ པཝཏྟཏཱིཏི ཝིཏཀྐོ ཨཔྤནཱ. ཏཐཱ ཧི སོ ‘‘ཨཔྤནཱ བྱཔྤནཱ’’ཏི (དྷ. ས. ༧) ནིདྡིཊྛོ. ཏཔྤམུཁཏཱཝསེན པན སབྦསྨིཾ མཧགྒཏཱནུཏྟརེ ཛྷཱནདྷམྨེ ‘‘ཨཔྤནཱ’’ཏི ཨཊྛཀཐཱཝོཧཱརོ. ཏཐཱ ཏསྶ ཨནུཔྤཏྟིཊྛཱནབྷཱུཏེ པརིཏྟཛྷཱནེ ཨུཔཙཱརཝོཧཱརོ. གཱམཱདཱིནཾ སམཱིཔཊྛཱནེ གཱམཱུཔཙཱརཱདིསམཉྙཱ ཝིཡཱཏི ཨཱཧ ‘‘ཨུཔཙཱརཔྤནཱཝསེན དུཝིདྷོ’’ཏི. ཨིདྷ པན སམཱདྷིཝསེན ཝེདིཏབྦཾ. ལུཛྫནཔལུཛྫནཊྛེན ལོཀོཏི ཝུཙྩཏི ཝཊྚཾ, ཏཔྤརིཡཱཔནྣཏཱཡ ལོཀེ ནིཡུཏྟོ, ཏཏྠ ཝཱ ཝིདིཏོཏི ལོཀིཡོ. ཏཏྠ ཨཔརིཡཱཔནྣཏཱཡ ལོཀཏོ ཨུཏྟརོ ཨུཏྟིཎྞོཏི ལོཀུཏྟརོ. ཀཱམཉྩེཏྠ ལོཀིཡསམཱདྷི བྷཱཝེཏབྦབྷཱཝེན གཡ྄ཧཏི, ཨུབྷཡཾ པན ཨེཀཛ྄ཛྷཾ གཧེཏྭཱ ཏཏོ ཨིཏརཾ ནིདྡྷཱརེཏུཾ ‘‘ལོཀིཡལོཀུཏྟརཝསེན དུཝིདྷོ’’ཏི ཝུཏྟཾ. སཔྤཱིཏིཀནིཔྤཱིཏིཀཝསེནཱཏི སཧ པཱིཏིཡཱ ཝཏྟཏཱིཏི སཔྤཱིཏིཀོ, པཱིཏིསམྤཡུཏྟོ. ནཏྠི ཨེཏསྶ པཱིཏཱིཏི ནིཔྤཱིཏིཀོ, པཱིཏིཝིཔྤཡུཏྟོ. ཏེསཾ ཝསེན. སུཁེན སཧ ཨེཀུཔྤཱདཱདིབྷཱཝཾ གཏོཏི སུཁསཧགཏོ ¶ , སུཁསམྤཡུཏྟོཏི ཨཏྠོ. ཨུཔེཀྑཱསཧགཏེཔི ཨེསེཝ ནཡོ. ཨུཔེཀྑཱཏི ཙེཏྠ ཨདུཀྑམསུཁཝེདནཱ ཨདྷིཔྤེཏཱ. སཱ ཧི སུཁདུཀྑཱཀཱརཔཝཏྟིཾ ཨུཔེཀྑཏི མཛ྄ཛྷཏྟཱཀཱརསཎྛིཏཏྟཱ. སུཁསཧགཏ-པདེན ¶ ཙེཏྠ སཔྤཱིཏིཀོ, ནིཔྤཱིཏིཀེཀདེསོ ཙ སངྒཧིཏོ, ཨུཔེཀྑཱསཧགཏ-པདེན པན ནིཔྤཱིཏིཀེཀདེསོཝཱཏི ཨཡམེཏེསཾ པདཱནཾ ཝིསེསོ.

སབྷཱཝཏོ, པཙྩཡཏོ, ཕལཏོ ཙ མཛ྄ཛྷིམཔཎཱིཏེཧི ནིཧཱིནོ, ཏེསཾ ཝཱ གུཎེཧི པརིཧཱིནོཏི ཧཱིནོ, ཨཏྟནོ པཙྩཡེཧི པདྷཱནབྷཱཝཾ ནཱིཏོ པཎཱིཏོ, ཨུབྷིནྣཾ མཛ྄ཛྷེ བྷཝོ མཛ྄ཛྷིམོ. སམྤཡོགཝསེན པཝཏྟམཱནེན སཧ ཝིཏཀྐེན སཝིཏཀྐོ, སཧ ཝིཙཱརེན སཝིཙཱརོ, སཝིཏཀྐོ ཙ སོ སཝིཙཱརོ ཙཱཏི སཝིཏཀྐསཝིཙཱརོ. ཨཱདི-སདྡེན ཨཝིཏཀྐཝིཙཱརམཏྟོ, ཨཝིཏཀྐཱཝིཙཱརོ ཙ གཧིཏོ. ཏཏྠ ཝིཙཱརཏོ ཨུཏྟརི ཝིཏཀྐེན སམྤཡོགཱབྷཱཝཏོ ཨཝིཏཀྐོ ཙ སོ ཝིཙཱརམཏྟོ ཙཱཏི ཨཝིཏཀྐཝིཙཱརམཏྟོ. ཝིསེསནིཝཏྟིཨཏྠོ ཝཱ མཏྟ-སདྡོ. སཝིཏཀྐསཝིཙཱརོ ཧི སམཱདྷི ཝིཏཀྐཝིསིཊྛེན ཝིཙཱརེན སཝིཙཱརོ, ཨཡཾ པན ཝིཙཱརམཏྟེན ཝིཏཀྐསངྑཱཏཝིསེསརཧིཏེན, ཏསྨཱ ཨཝིཏཀྐཝིཙཱརམཏྟོ. ཨཐ ཝཱ བྷཱཝནཱཡ པཧཱིནཏྟཱ ཝིཏཀྐཱབྷཱཝེནཱཡཾ ཝིཙཱརམཏྟོ, ན ཝིཙཱརཏོ ཨཉྙསྶ ཨཏྟནོ སམྤཡུཏྟདྷམྨསྶ ཀསྶཙི ཨབྷཱཝཱཏི དསྶེཏུཾ ཨཝིཏཀྐ-ཝཙནེན ཝིཙཱརམཏྟ-པདཾ ཝིསེསེཏྭཱ ཝུཏྟཾ. ཨུབྷཡརཧིཏོ ཨཝིཏཀྐཱཝིཙཱརོ. པཱིཏིསཧགཏཱདིཝསེནཱཏི པཱིཏིསཧགཏསུཁསཧགཏཨུཔེཀྑཱསཧགཏཝསེན. ཡདེཏྠ ཝཏྟབྦཾ, ཏཾ སུཁསཧགཏདུཀེ ཝུཏྟནཡམེཝ. པཊིཔཀྑེཧི སམནྟཏོ ཁཎྜིཏཏྟཱ པརིཏྟོ. པརིཏྟནྟི ཝཱ ཨཔྤམཏྟཀཾ ཝུཙྩཏི, ཨཡམྤི ཨཔྤཱནུབྷཱཝཏཱཡ པརིཏྟོ ཝིཡཱཏི པརིཏྟོ. ཀིལེསཝིཀྑམྦྷནཏོ, ཝིཔུལཕལཏོ, དཱིགྷསནྟཱནཏོ ཙ མཧནྟབྷཱཝཾ གཏོ, མཧནྟེཧི ཝཱ ཨུལཱ༹རཙྪནྡཱདཱིཧི གཏོ པཊིཔནྣོཏི མཧགྒཏོ. ཨཱརམྨཎཀརཎཝསེནཱཔི ནཏྠི ཨེཏསྶ པམཱཎཀརདྷམྨཱ, ཏེསཾ ཝཱ པཊིཔཀྑོཏི ཨཔྤམཱཎོ.

པཊིཔཛྫཏི ཛྷཱནཾ ཨེཏཱཡཱཏི པཊིཔདཱ, པུབྦབྷཱགབྷཱཝནཱ. དུཀྑཱ ཀིཙྪཱ པཊིཔདཱ ཨེཏསྶཱཏི དུཀྑཱཔཊིཔདོ. པཀཏིཔཉྙཱཡ ཨབྷིཝིསིཊྛཏྟཱ ཨབྷིཉྙཱ ནཱམ ཨཔྤནཱཝཧཱ བྷཱཝནཱཔཉྙཱ, དནྡྷཱ མནྡཱ ཨབྷིཉྙཱ ཨེཏསྶཱཏི དནྡྷཱབྷིཉྙོ. དུཀྑཱཔཊིཔདོ ཙ སོ དནྡྷཱབྷིཉྙོ ཙཱཏི དུཀྑཱཔཊིཔདཱདནྡྷཱབྷིཉྙོ ¶ , སམཱདྷི. ཏདཱདིཝསེན. ཙཏུཛྷཱནངྒཝསེནཱཏི ཙཏུནྣཾ ཛྷཱནཱནཾ ཨངྒབྷཱཝཝསེན, ཙཏུཀྐནཡཝསེན ཙེཏཾ ཝུཏྟཾ. ཧཱནབྷཱགིཡཱདིཝསེནཱཏི ཧཱནཀོཊྛཱསིཀཱདིཝསེན.

སམཱདྷིཨེཀཀདུཀཝཎྞནཱ

ཚནྣཾ ¶ ཨནུསྶཏིཊྛཱནཱནནྟི བུདྡྷཱནུསྶཏིཨཱདཱིནཾ ཚནྣཾ ཨནུསྶཏིཀམྨཊྛཱནཱནཾ. ཨིམེསཾ ཝསེནཱཏི ཨིམེསཾ དསནྣཾ ཀམྨཊྛཱནཱནཾ ཝསེན. ‘‘པུབྦབྷཱགེ ཨེཀགྒཏཱ’’ཏི ཨིམིནཱ ཨཔྤནཱཡ ཨུཔཀཱརཀནཱནཱཝཛྫནུཔཙཱརསྶཔི སངྒཧོ དཊྛབྦོ, ན ཨེཀཱཝཛྫནསྶེཝ. ཨཔྤནཱསམཱདྷཱིནནྟི ཨུཔཀཏྟབྦཨུཔཀཱརཀསམྦནྡྷེ སཱམིཝཙནཾ ‘‘པུརིསསྶ ཨཏྠོ’’ཏིཨཱདཱིསུ ཝིཡ. པརིཀམྨནྟི གོཏྲབྷུ. ཨཔརིཏྟོ སམཱདྷཱིཏི དསྶེཏུཾ ‘‘པཋམསྶ ཛྷཱནསྶཱ’’ཏིཨཱདི ཝུཏྟཾ.

ཏཱིསུ བྷཱུམཱིསཱུཏི ཀཱམརཱུཔཱརཱུཔབྷཱུམཱིསུ. ཀུསལཙིཏྟེཀགྒཏཱཡ ཨདྷིཔྤེཏཏྟཱ ‘‘ཨརིཡམགྒསམྤཡུཏྟཱ’’ཏི ཝུཏྟཾ. སིཡཱ སཔྤཱིཏིཀོ, སིཡཱ ནིཔྤཱིཏིཀོཏི ཨནིཡམཝཙནཾ ཨུཔཙཱརསམཱདྷིསཱམཉྙེན སབྦེསམྤི ཝཱ ཛྷཱནཱནཾ ནཱནཱཝཛྫནཝཱིཐིཡཾ ཨུཔཙཱརསམཱདྷི སིཡཱ སཔྤཱིཏིཀོ, སིཡཱ ནིཔྤཱིཏིཀོ. ཨེཀཱཝཛྫནཝཱིཐིཡཾ པན ཨཱདིཏོ དུཀཏིཀཛ྄ཛྷཱནཱནཾ ཨུཔཙཱརསམཱདྷི སཔྤཱིཏིཀོཝ, ཨིཏརེསཾ ནིཔྤཱིཏིཀོཝ, ཝིསབྷཱགཝེདནསྶ ཙིཏྟསྶ ཨཱསེཝནཔཙྩཡཏཱབྷཱཝཏོ, ཨེཀཝཱིཐིཡཾ ཝེདནཱཔརིཝཏྟནཱབྷཱཝཏོ ཙ. སིཡཱ སུཁསཧགཏོ, སིཡཱ ཨུཔེཀྑཱསཧགཏོཏི ཨེཏྠཱཔི ཝུཏྟནཡེནེཝ ཨཏྠོ ཝེདིཏབྦོ. ཏཏྠ པན ‘‘དུཀཏིཀཛ྄ཛྷཱནཱན’’ནྟི ཝུཏྟཾ, ཨིདྷ ‘‘ཏིཀཙཏུཀྐཛ྄ཛྷཱནཱན’’ནྟི ཝཏྟབྦཾ.

སམཱདྷིཏིཀཝཎྞནཱ

པཊིལདྡྷམཏྟོཏི ཨདྷིགཏམཏྟོ ཨནཱསེཝིཏོ ཨབཧུལཱིཀཏོ. སོ ཧི པརིདུབྦལབྷཱཝེན ཧཱིནོ ཧོཏི. ནཱཏིསུབྷཱཝིཏོཏི ཨཏིཝིཡ པགུཎབྷཱཝཾ ཨཔཱཔིཏོ. སུབྷཱཝིཏོཏི སུཊྛུ བྷཱཝིཏོ སམྨདེཝ པགུཎཏཾ ཨུཔནཱིཏོ. ཏེནཱཧ ‘‘ཝསིཔྤཏྟོ’’ཏི. ཚནྡཱདཱིནཾ ཧཱིནཏཱདིཝསེནཱཔི ཨིམེསཾ ཧཱིནཱདིཏཱ ཝེདིཏབྦཱ. ཏཐཱ ཧི ཨུལཱ༹རཔུཉྙཕལཀཱམཏཱཝསེན པཝཏྟིཏོ ཧཱིནོ, ལོཀིཡཱབྷིཉྙཱསམྤཱདནཱཡ པཝཏྟིཏོ མཛ྄ཛྷིམོ, ཝིཝེཀཀཱམཏཱཡ ཨརིཡབྷཱཝེ ཋིཏེན པཝཏྟིཏོ པཎཱིཏོ ¶ . ཨཏྟཧིཏཱཡ བྷཝསམྤཏྟིཨཏྠཾ པཝཏྟིཏོ ཝཱ ཧཱིནོ, ཀེཝལཾ ཨལོབྷཛ྄ཛྷཱསཡེན པཝཏྟིཏོ མཛ྄ཛྷིམོ, པརཧིཏཱཡ པཝཏྟིཏོ པཎཱིཏོ. ཝཊྚཛ྄ཛྷཱསཡེན ཝཱ པཝཏྟིཏོ ཧཱིནོ, ཝིཝེཀཛ྄ཛྷཱསཡེན པཝཏྟིཏོ མཛ྄ཛྷིམོ, ཝིཝཊྚཛ྄ཛྷཱསཡེན ལོཀུཏྟརཔཱདཀཏྠཾ པཝཏྟིཏོ པཎཱིཏོ.

སདྡྷིཾ ཨུཔཙཱརསམཱདྷིནཱཏི སབྦེསམྤི ཛྷཱནཱནཾ ཨུཔཙཱརསམཱདྷིནཱ སཧ. ཝིཏཀྐམཏྟེཡེཝ ཨཱདཱིནཝཾ ¶ དིསྭཱཏི ཝིཏཀྐེཡེཝ ཨོལཱ༹རིཀཏོ ཨུཔཊྛཧནྟེ ‘‘ཙིཏྟསྶ ཁོབྷཀརདྷམྨོ ཨཡ’’ནྟི ཨཱདཱིནཝཾ དིསྭཱ ཝིཙཱརཉྩ སནྟཏོ མནསི ཀརིཏྭཱ. ཏེནཱཧ ‘‘ཝིཙཱརེ ཨདིསྭཱ’’ཏི. ཏཾ སནྡྷཱཡཱཏི ཏཾ ཨེཝཾ པཊིལདྡྷཾ སམཱདྷིཾ སནྡྷཱཡ. ཨེཏཾ ‘‘ཨཝིཏཀྐཝིཙཱརམཏྟོ སམཱདྷཱི’’ཏི དུཏིཡཔདཾ ཝུཏྟཾ. ཏཱིསཱུཏི ཨཱདིཏོ ཏཱིསུ.

ཏེསྭེཝཱཏི ཏེསུ ཨེཝ ཙཏུཀྐཔཉྩཀནཡེསུ. ཏཏིཡེ ཙཏུཏྠེཏི ཙཏུཀྐནཡེ ཏཏིཡེ, པཉྩཀནཡེ ཙཏུཏྠེཏི ཡོཛེཏབྦཾ. ཨཝསཱནེཏི དྭཱིསུཔི ནཡེསུ པརིཡོསཱནཛ྄ཛྷཱནེ. ཡཐཱཀྐམཾ ཙཏུཏྠེ, པཉྩམེ ཝཱ. པཱིཏིསུཁསཧགཏོ ཝཱཏི ཨེཏྠཱཔི ཧེཊྛཱ ཝུཏྟནཡེནེཝ ཨཏྠོ ཝེདིཏབྦོ. ཨེཏྠ ཙ སཏིཔི པཱིཏིསཧགཏསྶཱཔི སམཱདྷིསྶ སུཁསཧགཏཏྟེ ཏཱིཎིཔི པདཱནི ཨསངྐརཏོ དསྶེཏུཾ ནིཔྤཱིཏིཀསུཁཏོ སཔྤཱིཏིཀསུཁསྶ ཝིསེསདསྶནཏྠཾ སཏྠུ པཱིཏིཏིཀདེསནཱཏི ནིཔྤཱིཏིཀསྶེཝ སུཁསྶ ཝསེན སུཁསཧགཏོ སམཱདྷི གཧིཏོཏི དཊྛབྦོ.

ཨུཔཙཱརབྷཱུམིཡནྟི ཨུཔཙཱརཛ྄ཛྷཱནསམྤཡུཏྟཙིཏྟུཔྤཱདེ. ཙིཏྟུཔྤཱདོ ཧི སཧཛཱཏདྷམྨཱནཾ ཨུཔྤཏྟིཊྛཱནཏཱཡ ‘‘བྷཱུམཱི’’ཏི ཝུཙྩཏི ‘‘སུཁབྷཱུམིཡཾ ཀཱམཱཝཙརེ’’ཏིཨཱདཱིསུ (དྷ. ས. ༩༨༨) ཝིཡ. པརིཏྟོ སམཱདྷི ཀཱམཱཝཙརབྷཱཝཏོ.

སམཱདྷིཙཏུཀྐཝཎྞནཱ

པཋམསམནྣཱཧཱརོ བྷཱཝནཾ ཨཱརབྷནྟསྶ ‘‘པཐཝཱི པཐཝཱི’’ཏིཨཱདིནཱ ཀམྨཊྛཱནེ པཋམཱབྷིནིཝེསོ. ཏསྶ ཏསྶ ཛྷཱནསྶ ཨུཔཙཱརནྟི ནཱིཝརཎཝིཏཀྐཝིཙཱརནིཀནྟིཨཱདཱིནཾ ཝཱུཔསམེ ཐིརབྷཱུཏཾ ཀཱམཱཝཙརཛ྄ཛྷཱནཾ. ‘‘ཡཱཝ ཨཔྤནཱ’’ཏི ཨིམིནཱ པུབྦབྷཱགཔཉྙཱཡ ཨེཝ ཨབྷིཉྙཱབྷཱཝོ ཝུཏྟོ ཝིཡ དིསྶཏཱིཏི ཝདནྟི ¶ . ཨཔྤནཱཔཉྙཱ པན ཨབྷིཉྙཱཝ. ཡདགྒེན ཧི པུབྦབྷཱགཔཉྙཱཡ དནྡྷསཱིགྷཏཱ, ཏདགྒེན ཨཔྤནཱཔཉྙཱཡཔཱིཏི. སམུདཱཙཱརགཧཎཏཱཡཱཏི སམུདཱཙཱརསྶ གཧཎབྷཱཝེན, པཝཏྟིབཱཧུལླཏོཏི ཨཏྠོ. ཨསུཁཱསེཝནཱཏི ཀསིརབྷཱཝནཱ.

པལིབོདྷུཔཙྪེདཱདཱིནཱིཏི ཨཱདི-སདྡེན བྷཱཝནཱཝིདྷཱནཱཔརིཧཱཔནཱདིཾ སངྒཎྷཱཏི. ཨསཔྤཱཡསེཝཱིཏི ཨུཔཙཱརཱདྷིགམཏོ པུབྦེ ཨསཔྤཱཡསེཝིཏཱཡ དུཀྑཱ པཊིཔདཱ. པཙྪཱ ཨསཔྤཱཡསེཝིཏཱཡ དནྡྷཱ ཨབྷིཉྙཱ ཧོཏི. སཔྤཱཡསེཝིནོཏི ཨེཏྠཱཔི ཨེསེཝ ནཡོ. པུབྦབྷཱགེཏི ཨུཔཙཱརཛ྄ཛྷཱནཱདྷིགམཏོ ¶ ཨོརབྷཱགེ. ཨཔརབྷཱགེཏི ཏཏོ ཨུདྡྷཾ. ཏསྶ ཝོམིསྶཀཏཱཏི ཡོ པུབྦབྷཱགེ ཨསཔྤཱཡཾ སེཝིཏྭཱ ཨཔརབྷཱགེ སཔྤཱཡསེཝཱི, ཏསྶ དུཀྑཱ པཊིཔདཱ ཁིཔྤཱབྷིཉྙཱ. ཨིཏརསྶ སུཁཱ པཊིཔདཱ དནྡྷཱབྷིཉྙཱ ཧོཏི. ཨེཝཾ པཋམཙཏུཏྠཱནཾ ཝོམིསྶཀཏཱཡ དུཏིཡཏཏིཡཱཏི ཨཏྠོ. ཨཀཏཔལིབོདྷུཔཙྪེདསྶ སཔརིཔནྠཏཱཡ པཊིཔདཱ དུཀྑཱ ཧོཏི, ཨིཏརསྶ སུཁཱ. ཨསམྤཱདིཏཨཔྤནཱཀོསལླསྶ ཉཱཎསྶ ཨཝིསདཏཱཡ དནྡྷཱ ཨབྷིཉྙཱ ཧོཏི, ཝིསདཏཱཡ ཁིཔྤཱ ཨབྷིཉྙཱ.

ཏཎྷཱཨཝིཛྫཱཝསེནཱཏི ཏཎྷཱཨཝིཛྫཱནཾ ཨབྷིབྷཝཱནབྷིབྷཝཝསེན. སམཐཝིཔསྶནཱདྷིཀཱརཝསེནཱཏི སམཐཝིཔསྶནཱསུ ཨསཏོ, སཏོ ཙ ཨདྷིཀཱརསྶ ཝསེན. ཏཎྷཱཡ སམཱདྷིསྶ ཨུཛུཔཊིཔཀྑཏྟཱ སཱ སམཐཔཊིཔདཱཡ པརིཔནྠིནཱིཏི ཨཱཧ ‘‘ཏཎྷཱབྷིབྷཱུཏསྶ ཧི དུཀྑཱ པཊིཔདཱ ཧོཏཱི’’ཏི. ཨབྷིབྷཝོ ཙསྶཱ ཨིཏརཀིལེསེཧི ཨདྷིཀཏཱཡ ཨནབྷིབྷཱུཏསྶ ཏཎྷཱཡཱཏི ཨདྷིཀཱརཏོ ཝེདིཏབྦཾ. ཏཐཱ ཨཝིཛྫཱ པཉྙཱཡ ཨུཛུཔཊིཔཀྑཱཏི ཏདབྷིབྷཱུཏསྶ དནྡྷཱབྷིཉྙཏཱ ཝུཏྟཱ. ཨཀཏཱདྷིཀཱརོཏི བྷཝནྟརེ ཨཀཏཔརིཙཡོ ཡཐཱ པགུཎཾ ཀཏྭཱ ཝིསྶཊྛགནྠོ ཨཔྤམཏྟཀེན པཡོགེན སུཔྤཝཏྟི ཝཱཙུགྒཏོཝ ཧོཏི, ཨེཝཾ པུབྦེ ཀཏཔརིཙཡསྶ བྷཱཝནཱ ཨཔྤཀསིརེནེཝ ཨིཛ྄ཛྷཏཱིཏི ཨཱཧ ‘‘ཀཏཱདྷིཀཱརསྶ སུཁཱ’’ཏི. སྭཱཡཾ ཨཀཏོ, ཀཏོ ཙ ཨདྷིཀཱརོ སམཐནིསྶིཏོ པཊིཔདཱཡཾ ཝུཏྟོ སམཱདྷིཔྤདྷཱནཏྟཱ པཊིཔདཱཡ. ཝིཔསྶནཱནིསྶིཏོ ཨབྷིཉྙཱཡཾ ཉཱཎཔྤདྷཱནཏྟཱ ཨཔྤནཱཡ. ཀིལེསིནྡྲིཡཝསེནཱཏི ཏིཀྑཱཏིཀྑཱནཾ ཀིལེསིནྡྲིཡཱནཾ ཝསེན. ཏེནཱཧ ‘‘ཏིབྦཀིལེསསྶཱ’’ཏིཨཱདི ¶ . ཏཏྠ ཀིལེསཱ ཀཱམཙྪནྡཱདཡོ, ཨིནྡྲིཡཱནི སདྡྷཱདཱིནི.

ཡཐཱཝུཏྟཱ པཊིཔདཱབྷིཉྙཱ པུགྒལཱདྷིཊྛཱནཱཏི དྷམྨནིདྡེསམྤི པུགྒལཱདྷིཊྛཱནམུཁེན དསྶེཏུཾ ‘‘ཡོ པུགྒལོ’’ཏིཨཱདི ཝུཏྟཾ. ཨཔྤགུཎོཏི ན སུབྷཱཝིཏོ ཝསཱིབྷཱཝཾ ཨཔཱཔིཏོ. ཏེནཱཧ ‘‘ཨུཔརིཛྷཱནསྶ པཙྩཡོ བྷཝིཏུཾ ན སཀྐོཏཱི’’ཏི. ཨཡཾ པརིཏྟོཏི ཨཡཾ སམཱདྷི ཨཔྤཱནུབྷཱཝཏཱཡ པརིཏྟོ. ཨཝཌྜྷིཏེཏི ཨེཀངྒུལདྭངྒུལམཏྟམྤི ན ཝཌྜྷིཏེ ཡཐཱཨུཔཊྛིཏེ ཨཱརམྨཎེ. ཨེཀངྒུལམཏྟམྤི ཧི ཝཌྜྷིཏཾ ཨཔྤམཱཎམེཝཱཏི ཝདནྟི. ‘‘པགུཎོ སུབྷཱཝིཏོ’’ཏི ཝཏྭཱ ‘‘ཨུཔརིཛྷཱནསྶ པཙྩཡོ བྷཝིཏུཾ སཀྐོཏཱི’’ཏི ཨིམིནཱ ཡཐཱ པགུཎོཔི ཨུཔརིཛྷཱནསྶ པཙྩཡོ བྷཝིཏུཾ ཨསཀྐོནྟོ སམཱདྷི པརིཏྟོཡེཝ ཧོཏི, ན ཨཔྤམཱཎོ, ཨེཝཾ ཉཱཎུཏྟརསྶ ཨེཀཱསནེནེཝ ཨུཔརིཛྷཱནནིབྦཏྟནེནཱཏི སུབྷཱཝིཏོཔི ཨུཔརིཛྷཱནསྶ པཙྩཡབྷཱཝསངྑཱཏཱཡ སུབྷཱཝིཏཀིཙྩསིདྡྷིཡཱ ‘‘ཨཔྤམཱཎོ’’ཏྭེཝ ཝུཙྩཏི. ཨཔརེ པན སཙེ སུབྷཱཝིཏོ པགུཎོ ཝསཱིབྷཱཝཾ པཏྟོ ¶ ཨུཔརིཛྷཱནསྶ པཙྩཡོ ཨཧོནྟོཔི ཨཔྤམཱཎོ ཨེཝ, པམཱཎཀརཱནཾ རཱགཱདིཔཊིཔཀྑཱནཾ སུཝིདཱུརབྷཱཝཏོཏི ཝདནྟི. ཝུཏྟལཀྑཎཝོམིསྶཏཱཡཱཏི ཡོ ཨཔྤགུཎོ ཨུཔརིཛྷཱནསྶ པཙྩཡོ བྷཝིཏུཾ ན སཀྐོཏི, ཝཌྜྷིཏེ ཨཱརམྨཎེ པཝཏྟོ, ཨཡཾ པརིཏྟོ ཨཔྤམཱཎཱརམྨཎོ. ཡོ པན པགུཎོ ཨུཔརིཛྷཱནསྶ པཙྩཡོ བྷཝིཏུཾ སཀྐོཏི, ཨཝཌྜྷིཏེ ཨཱརམྨཎེ པཝཏྟོ, ཨཡཾ ཨཔྤམཱཎོ པརིཏྟཱརམྨཎོཏི ཨེཝཾ པཋམཙཏུཏྠསམཱདྷཱིནཾ ཝུཏྟལཀྑཎསྶ ཝོམིསྶཀབྷཱཝེན དུཏིཡཏཏིཡསམཱདྷིསངྒཱཧཀོ ཝོམིསྶཀནཡོ ཝེདིཏབྦོ.

ཏཏོཏི ཏཏོ པཋམཛ྄ཛྷཱནཏོ ཨུདྡྷཾ. ཝིརཏྟཔཱིཏིཀནྟི ཨཏིཀྐནྟཔཱིཏིཀཾ ཝཱ ཛིགུཙྪིཏཔཱིཏིཀཾ ཝཱ. ཨཝཡཝོ སམུདཱཡསྶ ཨངྒནྟི ཝུཙྩཏི, ‘‘སེནངྒཾ རཐངྒ’’ནྟིཨཱདཱིསུ ཝིཡཱཏི ཨཱཧ ‘‘ཙཏུནྣཾ ཛྷཱནཱནཾ ཨངྒབྷཱུཏཱ ཙཏྟཱརོ སམཱདྷཱི’’ཏི.

ཧཱནཾ བྷཛཏཱིཏི ཧཱནབྷཱགིཡོ, ཧཱནབྷཱགོ ཝཱ ཨེཏསྶ ཨཏྠཱིཏི ཧཱནབྷཱགིཡོ, པརིཧཱནཀོཊྛཱསིཀོཏི ཨཏྠོ. ཨཱལཡསྶ ཨཔེཀྑཱཡ ཨཔརིཙྩཛནཏོ ཋིཏིཾ བྷཛཏཱིཏི ཋིཏིབྷཱགིཡོ. ཝིསེསཾ བྷཛཏཱིཏི ཝིསེསབྷཱགིཡོ. པཙྩནཱིཀསམུདཱཙཱརཝསེནཱཏི ཏསྶ ཏསྶ ¶ ཛྷཱནསྶ པཙྩནཱིཀཱནཾ ནཱིཝརཎཝིཏཀྐཝིཙཱརཱདཱིནཾ པཝཏྟིཝསེན. ཏདནུདྷམྨཏཱཡཱཏི ཏདནུརཱུཔབྷཱུཏཱཡ སཏིཡཱ. སཎྛཱནཝསེནཱཏི སཎྛཧནཝསེན པཏིཊྛཱནཝསེན. ‘‘སཱ པན ཏདསྶཱདསངྑཱཏཱ, ཏདསྶཱདསམྤཡུཏྟཀྑནྡྷསངྑཱཏཱ ཝཱ མིཙྪཱསཏཱི’’ཏི སམྨོཧཝིནོདནིཡཾ (ཝིབྷ. ཨཊྛ. ༧༩༩) ཝུཏྟཾ. ཏཏྠ སཱཔེཀྑསྶ ཨུཔརི ཝིསེསཾ ནིབྦཏྟེཏུཾ ཨསཀྐུཎེཡྻཏྟཱ ཨཝིགཏནིཀནྟིཀཱ ཏཾཏཾཔརིཧརཎསཏཱིཏིཔི ཝཏྟུཾ ཝཊྚཏི. ཨེཝཉྩ ཀཏྭཱ ‘‘སཏིཡཱ ཝཱ ནིཀནྟིཡཱ ཝཱ’’ཏི ཝིཀཔྤཝཙནཉྩ ཡུཏྟཾ ཧོཏི. ཝིསེསཱདྷིགམཝསེནཱཏི ཝིསེསཱདྷིགམསྶ པཙྩཡབྷཱཝཝསེན, ཝིསེསཾ ཝཱ ཨདྷིགཙྪཏི ཨེཏེནཱཏི ཝིསེསཱདྷིགམོ, ཏསྶ ཝསེན. ནིབྦིདཱསཧགཏསཉྙཱམནསིཀཱརསམུདཱཙཱརཝསེནཱཏི ཨཱདཱིནཝདསྶནཔུབྦངྒམནིབྦིནྡནཉཱཎསམྤཡུཏྟསཉྙཱཡ ཙ ཨཱབྷོགསྶ ཙ པཝཏྟིཝསེན. ནིབྦེདྷབྷཱགིཡཏཱཏི སཙྩཱནཾ ནིབྦིཛ྄ཛྷནཔཀྑིཀཏཱ ཝིཔསྶནཱཡ སཾཝཏྟཏཱིཏི ཨཏྠོ.

ཀཱམསཧགཏཱཏི ཀཱམཱརམྨཎཱ, ཀཱམསཉྙཱཧི ཝཱ ཝོཀིཎྞཱ. ཨཝིཏཀྐསཧགཏཱཏི ‘‘ཀཐཾ ནུ ཁོ མེ ཨཝིཏཀྐཾ ཛྷཱནཾ བྷཝེཡྻཱ’’ཏི ཨེཝཾ ཨཝིཏཀྐཱརམྨཎཱ ཨཝིཏཀྐཝིསཡཱ. ཀཱམཉྩཱཡཾ ‘‘པཋམསྶ ཛྷཱནསྶཱ’’ཏིཨཱདིཀོ པཱཋོ པཉྙཱཝསེན ཨཱགཏོ, སམཱདྷིསྶཱཔི པནེཏྠ སངྒཧོ ¶ ཨཏྠེཝཱཏི ཨུདཱཧརཎསྶ སཱཏྠཀཏཾ དསྶེཏུཾ ‘‘ཏཱཡ པན པཉྙཱཡ སམྤཡུཏྟཱ སམཱདྷཱིཔི ཙཏྟཱརོ ཧོནྟཱི’’ཏི ཏེསཾ ཝསེན ཨེཝཾ ཝུཏྟནྟི ཨཏྠོ.

བྷཱཝནཱམཡསྶ སམཱདྷིསྶ ཨིདྷཱདྷིཔྤེཏཏྟཱ ཨུཔཙཱརེཀགྒཏཱ ‘‘ཀཱམཱཝཙརོ སམཱདྷཱི’’ཏི ཝུཏྟཾ. ཨདྷིཔཏིཾ ཀརིཏྭཱཏི ‘‘ཚནྡཝཏོ ཙེ སམཱདྷི ཧོཏི, མཡ྄ཧམྤི ཨེཝཾ ཧོཏཱི’’ཏི ཚནྡཾ ཨདྷིཔཏིཾ, ཚནྡཾ དྷུརཾ ཛེཊྛཀཾ པུབྦངྒམཾ ཀཏྭཱ. ལབྷཏི སམཱདྷིནྟི ཨེཝཾ ཡཾ སམཱདྷིཾ ལབྷཏི, ཨཡཾ ཝུཙྩཏི ཚནྡསམཱདྷི, ཚནྡཱདྷིཔཏིསམཱདྷཱིཏི ཨཏྠོ. ཨེཝཾ ཝཱིརིཡསམཱདྷིཨཱདཡོཔི ཝེདིཏབྦཱ.

ཙཏུཀྐབྷེདེཏི ཙཏུཀྐཝསེན སམཱདྷིཔྤབྷེདནིདྡེསེ. ཨཉྙཏྠ སམྤཡོགཝསེན ཝིཙཱརེན སཧ ཝཏྟམཱནོ ཝིཏཀྐོ པཉྩཀནཡེ དུཏིཡཛ྄ཛྷཱནེ ཝིཡོཛིཏོཔི ན སུཊྛུ ཝིཡོཛིཏོཏི, ཏེན སདྡྷིཾཡེཝ ཝིཙཱརསམཏིཀྐམཾ དསྶེཏུཾ ཝུཏྟཾ ‘‘ཝིཏཀྐཝིཙཱརཱཏིཀྐམེན ཏཏིཡ’’ནྟི. དྭིདྷཱ ¶ བྷིནྡིཏྭཱ ཙཏུཀྐབྷེདེ ཝུཏྟཾ དུཏིཡཾ ཛྷཱནནྟི ཡོཛནཱ. པཉྩཛྷཱནངྒཝསེནཱཏི པཉྩནྣཾ ཛྷཱནཱནཾ ཨངྒབྷཱཝཝསེན སམཱདྷིསྶ པཉྩཝིདྷཏཱ ཝེདིཏབྦཱ.

༤༠. ཝིབྷངྒེཏི ཉཱཎཝིབྷངྒེ. ཏཏྠ ཧི ‘‘ཛྷཱནཝིམོཀྑསམཱདྷིསམཱཔཏྟཱིནཾ སཾཀིལེསཝོདཱན’’ནྟི, ཨེཏྠ ‘‘སཾཀིལེས’’ནྟིཨཱདི ཝུཏྟཾ. ཏཏྠ ཧཱནབྷཱགིཡོ དྷམྨོཏི ཨཔགུཎེཧི པཋམཛ྄ཛྷཱནཱདཱིཧི ཝུཊྛིཏསྶ སཉྙཱམནསིཀཱརཱནཾ ཀཱམཱདིཨནུཔཀྑནྡནཾ. ཝིསེསབྷཱགིཡོ དྷམྨོཏི པགུཎེཧི པཋམཛ྄ཛྷཱནཱདཱིཧི ཝུཊྛིཏསྶ སཉྙཱམནསིཀཱརཱནཾ དུཏིཡཛ྄ཛྷཱནཱདིཨནུཔཀྑནྡནཾ. ཏེནཱཧ ‘‘པཋམསྶ ཛྷཱནསྶ ལཱབྷི’’ནྟིཨཱདི. ཏསྶཏྠོ (ཝིབྷ. ཨཊྛ. ༨༢༨) – ཨཔགུཎསྶ པཋམསྶ ཛྷཱནསྶ ལཱབྷཱིནཾ ཏཏོ ཝུཊྛིཏཾ ཨཱརམྨཎཝསེན ཀཱམསཧགཏཱ ཧུཏྭཱ སཉྙཱམནསིཀཱརཱ སམུདཱཙརནྟི ཙོདེནྟི ཏུདནྟི, ཏསྶ ཀཱམཱནུཔཀྑནྡཱནཾ སཉྙཱམནསིཀཱརཱནཾ ཝསེན སཱ པཋམཛ྄ཛྷཱནཔཉྙཱ ཧཱཡཏི, ཏསྨཱ ཧཱནབྷཱགིནཱི པཉྙཱ. ཨཝིཏཀྐསཧགཏཱཏི ཨཝིཏཀྐཾ དུཏིཡཾ ཛྷཱནཾ སནྟཏོ པཎཱིཏཏོ མནསི ཀརོཏོ ཨཱརམྨཎཝསེན ཨཝིཏཀྐསཧགཏཱ སམུདཱཙརནྟི པགུཎཔཋམཛ྄ཛྷཱནཏོ ཝུཊྛིཏཾ དུཏིཡཛ྄ཛྷཱནཱདྷིགམཏྠཱཡ ཙོདེནྟི ཏུདནྟི, ཏསྶ དུཏིཡཛ྄ཛྷཱནཱནུཔཀྑནྡཱནཾ སཉྙཱམནསིཀཱརཱནཾ ཝསེན པཋམཛ྄ཛྷཱནཔཉྙཱ ཝིསེསབྷཱུཏསྶ དུཏིཡཛ྄ཛྷཱནསྶ ཨུཔྤཏྟིཡཱ པདཊྛཱནཏཱཡ ཝིསེསབྷཱགིནཱི པཉྙཱ. ཏཾསམྤཡུཏྟོ སམཱདྷི ཨིདྷཱདྷིཔྤེཏོ. ཨིམིནཱ ནཡེནཱཏི ཨིམིནཱ པཋམཛ྄ཛྷཱནེ ཝུཏྟེན ཝིདྷིནཱ དུཏིཡཛ྄ཛྷཱནཱདཱིསུཔི ཧཱནབྷཱགིཡདྷམྨོ, ཝིསེསབྷཱགིཡདྷམྨོ ཙ ཝེདིཏབྦོ.

དསཔལིབོདྷཝཎྞནཱ

༤༡. ཨརིཡམགྒསམྤཡུཏྟོཏི ¶ ལོཀུཏྟརཨཔྤམཱཎཨཔརིཡཱཔནྣགྒཧཎེན ལོཀིཡེཧི ཨསཱདྷཱརཎཏོ, སཔྤཱིཏིཀཱདིགྒཧཎེན སཱདྷཱརཎཏོ ཙ ཨརིཡམགྒསམྤཡུཏྟོ སམཱདྷི ཝུཏྟོ. བྷཱཝིཏོ ཧོཏི སཉྙཱཡ སམྤཡུཏྟཏྟཱ. ཏནྟི ཨརིཡམགྒསམཱདྷིཾ. ཝིསུནྟི པཉྙཱབྷཱཝནཱཡ ཝིསུཾ ཀཏྭཱ ན ཝདཱམ.

ཀམྨཊྛཱནབྷཱཝནཾ ¶ པརིབུནྡྷེཏི ཨུཔརོདྷེཏི པཝཏྟིཏུཾ ན དེཏཱིཏི པལིབོདྷོ ར-ཀཱརསྶ ལ-ཀཱརཾ ཀཏྭཱ, པརིཔནྠོཏི ཨཏྠོ. ཨུཔཙྪིནྡིཏྭཱཏི སམཱཔནེན, སངྒཧཎེན ཝཱ ཨུཔརུནྡྷིཏྭཱ, ཨཔལིབོདྷཾ ཀཏྭཱཏི ཨཏྠོ.

ཨཱཝསནྟི ཨེཏྠཱཏི ཨཱཝཱསོ. པརིཙྪེདཝསེན ཝེཎིཡཏི དིསྶཏཱིཏི པརིཝེཎཾ. ཝིཧཱརེ བྷིཀྑཱུནཾ ཏཾ ཏཾ ཝསནཊྛཱནཾ. སྭཱཡཾ ཨཱཝཱསོ. ནཝཀམྨཱདཱིསཱུཏི ཨཱདི-སདྡེན ཨཱཝཱསསྶ ཏདཉྙཾ ཨབྷིཝུདྡྷིཀཱརཎཾ སངྒཎྷཱཏི. ཀཱརཎེནཱཏི ‘‘ཚཱཡཱུདཀསམྤནྣཾ སུལབྷབྷིཀྑ’’ནྟིཨཱདིནཱ ཀཱརཎེན. ཨཔེཀྑཝཱཏི སཱལཡོ.

ཏཏྲཱཏི ཏསྨིཾ པལིབོདྷཱབྷཱཝེ. པཱཙཱིནཁཎྜརཱཛིནྟི པུརཏྠིམདིསཱཡཾ པབྦཏཁཎྜཱནཾ ཨནྟརེ ཝནརཱཛིཊྛཱནཾ. ‘‘ནཱམཱ’’ཏི ཨིམིནཱ ཏསྶ པདེསསྶ ཨཡཾ སམཉྙཱཏི དསྶེཏི. པཊིསཱམིཏམེཝཱཏི ནིཙྩཀཱལཾ པཊིསཱམེཏྭཱཝ ཝིཧཱརཏོ ནིཀྑམཱམཱིཏི དསྶེཏི. དྷཱཏུནིདྷཱནཊྛཱནནྟི ཀཱཡབནྡྷནདྷམྨཀརཎནྷཱནསཱཊིཀཨཀྑཀདྷཱཏུསངྑཱཏཱནཾ པརིབྷོགསརཱིརདྷཱཏཱུནཾ ནིདཧིཏཊྛཱནཾ. ཨཱིདིསསྶ ཨཡཾ ཐེརོ ཝིཡ ཨལགྒཙིཏྟསྶ. ཨེཏེན ‘‘བྷིཀྑུནཱ ནཱམ ཨཱཝཱསེ ཨེཝརཱུཔེན བྷཝིཏབྦ’’ནྟི ཨོཝཱདོ དིནྣོ ཧོཏི. ཨིཏོ པརེསུཔི ཝཏྠཱུསུ ཨེསེཝ ནཡོ.

ཀུལནྟི ཀུལགྒཧཎེན ཀུལམནུསྶཱནཾ གཧཎཾ གཱམགྒཧཎེན གཱམཝཱསཱིནཾ ཝིཡ. ཨུཔཊྛཱཀཀུལམྤཱིཏི པི-སདྡེན པགེཝ ཉཱཏིཀུལནྟི དསྶེཏི. ཨུདྡེསཏྠནྟི ཨུདྡིསཱཔནཏྠཾ, པཱཋཾ ཨུདྡིསཱཔེཏྭཱ སཛ྄ཛྷཱཡིཏུནྟི ཨཏྠོ. ཨིདྷེཝཱཏི ཨིམསྨིཾཡེཝ པདེསེ, ཡཏྠ ཀཏྠཙི ཝིཧཱརེཏི ཨཏྠོ. ཏཾ ཝིཧཱརནྟི ཏཾ ཀོརཎྜཀཝིཧཱརཾ.

ཨུཔགཏོཏི ¶ ཝསྶཾ ཨུཔགཏོ. སདཱཏི གཏཀཱལཏོ པབྷུཏི ཝིསེསཏོ པཝཱརིཏདིཝསཏོ པཊྛཱཡ སབྦདཱ དིཝསེ དིཝསེ. པརིདེཝམཱནཱཏི ཏཾཏཾཝིལཔནཝསེན ཝིཝིདྷཾ པརིདེཝནྟཱི. སབྦཾ པཝཏྟིནྟི ཨཏྟནཱ ཏཏྠ དིཊྛཀཱལཏོ པཊྛཱཡ པཙྪཱ སམཱགམཔརིཡོསཱནཾ དཧརསྶ སབྦཾ པཝཏྟིཾ.

ཀཱཡསཀྑིནྟི ¶ ‘‘པསྶ ཨིམ’’ནྟི མུཁཔཊིགྒཱཧཀཾ ཀཏྭཱ. རཐཝིནཱིཏཔཊིཔདནྟི དསཀཐཱཝཏྠུཀིཏྟནཔུབྦིཀཾ རཐཝིནཱིཏཱུཔམཱཧི ཝིབྷཱཝིཏཾ རཐཝིནཱིཏསུཏྟེ (མ. ནི. ༡.༢༥༢) ཨཱགཏཾ སཏྟཝིསུདྡྷིཔཊིཔདཾ. ནཱལཀཔཊིཔདནྟི ‘‘མོནེཡྻཾ ཏེ ཨུཔཉྙིསྶ’’ནྟིཨཱདིནཱ (སུ. ནི. ༧༠༦) སཏྠཱརཱ ནཱལཀཏྠེརསྶ དེསིཏཔཊིཔདཾ. ཏུཝཊཀཔཊིཔདནྟི ‘‘མཱུལཾ པཔཉྩསངྑཱཡཱ’’ཏིཨཱདིནཱ (སུ. ནི. ༩༢༢) བྷགཝཏཱ དེསིཏཔཊིཔདཾ. ཏཏྠ ཧི ཡཐཱཀྐམཾ –

‘‘ན མུནཱི གཱམམཱགམྨ, ཀུལེསུ སཧསཱ ཙརེ;

གྷཱསེསནཾ ཚིནྣཀཐོ, ན ཝཱཙཾ པཡུཏཾ བྷཎེ’’. (སུ. ནི. ༧༡༦);

‘‘གཱམེ ཙ ནཱབྷིསཛྫེཡྻ, ལཱབྷཀམྱཱ ཛནཾ ན ལཔཡེཡྻཱ’’ཏི. (སུ. ནི. ༩༣༥) –

ཨེཝམཱདིཀཱ པརམཔྤིཙྪཀཐཱ ཨཱགཏཱ. ཙཏུཔཙྩཡསནྟོསབྷཱཝནཱརཱམཏཱདཱིཔཀནྟི ཙཱིཝརཱདཱིསུ ཙཏཱུསུ པཙྩཡེསུ སནྟོསསྶ, བྷཱཝནཱརཱམཏཱཡ ཙ པཀཱསཀཾ.

ལབྦྷཏཱིཏི ལཱབྷོ. ཏེནཱཧ ‘‘ཙཏྟཱརོ པཙྩཡཱ’’ཏི. མཧཱཔརིཝཱརེཏི ཝིཔུལཔརིཝཱརེ. པིཎྜཔཱཏཾ ཏཱཝ དེནྟཱ བུདྡྷཔཱུཛཱཔཏྟཙཱིཝརཱདཱིནི ཏསྶ པརིཝཱརཱནི ཀཏྭཱ དེནྟི, ཏཐཱ ཙཱིཝརཱདིདཱནེཔི. བཱཧུལླིཀཔིཎྜཔཱཏིཀཱཏི པིཎྜཔཱཏིཀཱ ཧུཏྭཱ པཙྩཡབཱཧུལླིཀཱ. ཝདནྟཱིཏི པུརིམདིཝསེ བྷིཀྑཱཡ ཨཱཧིཎྜནཀཱལེ ཡཐཱསུཏཾ ཝདནྟི. ནིཙྩབྱཱཝཊོ ཨུཔཱསཀཱདཱིནཾ སངྒཎྷནེ.

ཏསྶཱཏི གཎསྶ. སོཏི གཎཔལིབོདྷོ. ཨེཝནྟི ཨིདཱནི ཝུཙྩམཱནཱཀཱརེན གཎཝཱཙཀསྶ པརིཡེསནམྤི ལཧུཀམེཝ ཨིཙྪིཏབྦནྟི ཨཱཧ ‘‘ཡོཛནཏོ པརཾ ཨགནྟྭཱ’’ཏི. ཨཏྟནོ ཀམྨནྟི སམཎདྷམྨམཱཧ.

ཀཏཱཀཏེཏི ¶ ཀཏེ ཙ ཨཀཏེ ཙ ཀམྨེ ཛཱནནཝསེན ཨུསྶུཀྐཾ ཨཱཔཛྫིཏབྦཾ, ཀཏཱཀཏེཏི ཝཱ ཨཔྤཀེ ཙ མཧནྟེ ཙ ཀཏེ, ཡཐཱ ‘‘ཕལཱཕལེ’’ཏི. སཙེ བཧུཾ ཨཝསིཊྛནྟི སམྦནྡྷོ. བྷཱརཧཱརཱ སངྒྷཀིཙྩཔརིཎཱཡཀཱ.

པབྦཛྫཱཔེཀྑོཏི ¶ སཱིཧལ༹དཱིཔེ ཀིར ཀུལདཱརཀཱནཾ པབྦཛྫཱ ཨཱཝཱཧཝིཝཱཧསདིསཱ, ཏསྨཱ ཏཾ པརིཙྪིནྣདིཝསཾ ཨཏིཀྐམེཏུཾ ན སཀྐཱ. ‘‘སཙེ ཏཾ ཨལབྷནྟོ ན སཀྐོཏི ཨདྷིཝཱསེཏུ’’ནྟིཨཱདིནཱ སམཱཔནེན པལིབོདྷུཔཙྪེདོ ཝུཏྟོ, བྱཏིརེཀཏོ པན ‘‘སཙེ ཏཾ ཨལབྷནྟོ སཀྐོཏི ཨདྷིཝཱསེཏུཾ, ཨརཉྙཾ པཝིསིཏྭཱ སམཎདྷམྨོཝ ཀཱཏབྦོ’’ཏི ཨཡམཏྠོ དསྶིཏོཏི སངྒཧཎེན པལིབོདྷུཔཙྪེདོ ཝེདིཏབྦོ. ཨེས ནཡོ སེསེསུཔི.

ཏཐཱཏི ཡཐཱ ཨུཔཛ྄ཛྷཱཡོ གིལཱནོ ཡཱཝཛཱིཝཾ ཨུཔཊྛཱཏབྦོ, ཏཐཱ ཨུཔསམྤཱདིཏཨནྟེཝཱསིཀོ ཨཏྟནོ ཀམྨཝཱཙཾ ཝཏྭཱ ཨུཔསམྤཱདིཏོ.

ཡོ ཀོཙི རོགོཏི མཱུལབྷཱུཏོ, ཨནུབནྡྷོ ཝཱ ཨཏྟནོ ཨུཔྤནྣོ. ཨནམཏགྒེཏི ཨནུ ཨནུ ཨམཏགྒེ ཨནཱདིམཏི.

‘‘གནྠོ’’ཏི ཨིམིནཱ གནྠཔལིབོདྷོ ཨིདྷ ཝུཏྟོཏི ཨཱཧ ‘‘པརིཡཏྟིཧརཎ’’ནྟི. སཛ྄ཛྷཱཡཱདཱིཧཱིཏི སཛ྄ཛྷཱཡདྷཱརཎཔརིཙཡཔུཙྪཱདཱིཧི. ཨིཏརསྶཱཏི ཨབྱཱཝཊསྶ. ཡསྶ གནྠདྷུརཾ ཝིསྶཛྫེཏྭཱ ཋིཏསྶཱཔི གནྠོ ཝཏྟཏེཝ, ན ཏསྶ གནྠོ པལིབོདྷོ. ཡཐཱ ཏམྷི ཏམྷི ཝཏྠུམྷི ཨཱགཏཏྠེརཱནཾ, ནཱཔི སབྦེན སབྦཾ ཨགནྠཔསུཏསྶ. མཛ྄ཛྷིམཔཎྞཱསཀོ ཨཱགཙྪཏི, སུཏྟཔདེསཱནཾ ཝཱརཱནཉྩ སདིསཏཱཡ བྱཱམུཡ྄ཧནཏོ. པུན ན ཨོལོཀེསྶཱམཱིཏི ཀམྨཊྛཱནཾ གཧེཏྭཱ གནྠདྷུརཾ ཝིསྶཛྫེམཱིཏི ཨཏྠོ.

གཱམཝཱསིཀཏྠེརེཧཱིཏི ཨནུརཱདྷཔུརཝཱསཱིཧི. ཨནུགྒཧེཏྭཱཏི ཨགྒཧེཏྭཱ ཏཏྠ པརིཙཡཾ ཨཀཏྭཱ. པཉྩནིཀཱཡམཎྜལེཏི དཱིགྷཱགམཱདིཀེ པཉྩཔི ནིཀཱཡེ སིཀྑིཏཔརིསཱཡ. པརིཝཏྟེསྶཱམཱིཏི ཝཎྞཡིསྶཱམི. སུཝཎྞབྷེརིནྟི སེཊྛབྷེརིཾ. ཀཏམཱཙརིཡཱནཾ ཨུགྒཧོཏི ཀཏམེསཾ ཨཱཙརིཡཱནཾ ཨུགྒཧོ, ཀེན པརིཝཏྟཱིཡཏཱིཏི ཨདྷིཔྤཱཡོ. ཨཱཙརིཡམགྒོཏི ཨཱཙརིཡཱནཾ ཀཐཱམགྒོ. ཨཏྟནོ ཨཱཙརིཡཱནནྟི ཨཏྟནོ ཀཐེཏུཾ ཡུཏྟཱནཾ ཨཱཙརིཡཱནཾ. སུཝིནིཙྪིཏཱ སབྦཱ ཏིཔིཊཀཔརིཡཏྟི ¶ ཨེཏསྨིཾ ཨཏྠཱིཏི སབྦཔརིཡཏྟིཀོ, ཏེཔིཊཀོཏི ཨཏྠོ. པཱིཋེ ནིསིནྣོ ཏཏོ ཨོཏརིཏྭཱ བྷཱུམིཡཾ ཏཊྚིཀཱཡ ནིསཱིདིཏྭཱ. གཏཀསྶཱཏི པཊིཔཏྟིགམནེན གཏསྶ དིཊྛསཙྩསྶ. ཙཱིཝརཾ པཱརུཔིཏྭཱཏི ཨཱཙརིཡསྶ ཨཔཙིཏིདསྶནཏྠཾ ¶ པརིམཎྜལཾ ཙཱིཝརཾ པཱརུཔིཏྭཱ. སཱཋེཡྻཱབྷཱཝཏོ ཨུཛུ. ཀཱརཎཱཀཱརཎསྶ ཨཱཛཱནནཏོ ཨཱཛཱནཱིཡོ.

པོཐུཛྫནིཀཱཏི པུཐུཛྫནེ བྷཝཱ. དུཔྤརིཧཱརཱ བཧུཔརིསྶཡཏཱཡ. ཏཐཱ ཧིསྶཱ ཨུཏྟཱནསེཡྻཀདཱརཀོ, ཏརུཎསསྶཉྩ ནིདསྶིཏཾ. ཝིཔསྶནཱཡ པལིབོདྷོ སམཐཡཱནིཀསྶ, ན ཝིཔསྶནཱཡཱནིཀསྶ. ཡེབྷུཡྻེན ཧི ཛྷཱནལཱབྷཱི སམཐཡཱནིཀོཝ ཧོཏི ཝིཔསྶནཱསུཁཏོ. ཨིཏརེནཱཏི སམཐཏྠིཀེན. ཨཝསེསཱ ནཝ པལིབོདྷཱ.

ཀམྨཊྛཱནདཱཡཀཝཎྞནཱ

༤༢. ཀམྨཊྛཱནེ ནིཡུཏྟོ ཀམྨཊྛཱནིཀོ, བྷཱཝནམནུཡུཉྫནྟོ. ཏེན ཀམྨཊྛཱནིཀེན. པརིཙྪིནྡིཏྭཱཏི ‘‘ཨིམསྨིཾ ཝིཧཱརེ སབྦེ བྷིཀྑཱུ’’ཏི ཨེཝཾ པརིཙྪིནྡིཏྭཱ. སཧཝཱསཱིནཾ བྷིཀྑཱུནཾ. མུདུཙིཏྟཏནྟི ཨཏྟནི མུདུཙིཏྟཏཾ ཛནེཏི, ཨཡཉྩ སཧཝཱསཱིནཾ ཙིཏྟམདྡཝཛནནཱདིཨཏྠོ ‘‘མནུསྶཱནཾ པིཡོ ཧོཏཱི’’ཏིཨཱདིནཡཔྤཝཏྟེན མེཏྟཱནིསཾསསུཏྟེན (ཨ. ནི. ༡༡.༡༥; པཊི. མ. ༢.༢༢; མི. པ. ༤.༤.༦) དཱིཔེཏབྦོ. ཨནོལཱིནཝུཏྟིཀོ ཧོཏི སམྨཱཔཊིཔཏྟིཡཾ. དིབྦཱནིཔི ཨཱརམྨཎཱནི པགེཝ ཨིཏརཱནི. སབྦཏྠ སབྦསྨིཾ སམཎཀརཎཱིཡེ, སབྦསྨིཾ ཝཱ ཀམྨཊྛཱནཱནུཡོགེ. པུབྦཱསེཝནཝསེན ཨཏྠཡིཏབྦཾ. ཡོགསྶ བྷཱཝནཱཡ ཨནུཡུཉྫནཾ ཡོགཱནུཡོགོ, ཏདེཝ ཀརཎཱིཡཊྛེན ཀམྨཾ, ཏསྶ ཡོགཱནུཡོགཀམྨསྶ ཋཱནཾ ནིཔྥཏྟིཧེཏུ.

ནིཙྩཾ པརིཧརིཏབྦཏྟཱཏི སབྦཏྠཀཀམྨཊྛཱནཾ ཝིཡ ཨེཀདཱཝ ཨནནུཡུཉྫིཏྭཱ སབྦཀཱལཾ པརིཧརཎཱིཡཏྟཱ ཨནུཡུཉྫིཏབྦཏྟཱ. ཨེཝམཱདིགུཎསམནྣཱགཏནྟི པིཡབྷཱཝཱདཱིཧི གུཎེཧི སམྤནྣཾ. ཀལྱཱཎམིཏྟོ ཧི སདྡྷཱསམྤནྣོ ཧོཏི སཱིལསམྤནྣོ སུཏསམྤནྣོ ཙཱགསམྤནྣོ ཝཱིརིཡསམྤནྣོ སཏིསམྤནྣོ སམཱདྷིསམྤནྣོ པཉྙཱསམྤནྣོ. ཏཏྠ སདྡྷཱསམྤཏྟིཡཱ སདྡཧཏི ཏཐཱགཏསྶ བོདྷིཾ, ཀམྨཕལཉྩ, ཏེན སམྨཱསམྦོདྷིཡཱ ཧེཏུབྷཱུཏཾ སཏྟེསུ ཧིཏེསིཏཾ ན པརིཙྩཛཏི. སཱིལསམྤཏྟིཡཱ སཏྟཱནཾ པིཡོ ཧོཏི གརུ བྷཱཝནཱིཡོ ཙོདཀོ པཱཔགརཧཱི ཝཏྟཱ ཝཙནཀྑམོ, སུཏསམྤཏྟིཡཱ སཙྩཔཊིཙྩསམུཔྤཱདཱདིཔཊིསཾཡུཏྟཱནཾ གམྦྷཱིརཱནཾ ཀཐཱནཾ ཀཏྟཱ ཧོཏི, ཙཱགསམྤཏྟིཡཱ ཨཔྤིཙྪོ ཧོཏི ¶ སནྟུཊྛོ པཝིཝིཏྟོ ཨསཾསཊྛོ, ཝཱིརིཡསམྤཏྟིཡཱ ཨཱརདྡྷཝཱིརིཡོ ཧོཏི ཨཏྟཧིཏཔརཧིཏཔཊིཔཏྟིཡཾ, སཏིསམྤཏྟིཡཱ ¶ ཨུཔཊྛིཏསྶཏི ཧོཏི, སམཱདྷིསམྤཏྟིཡཱ ཨཝིཀྑིཏྟོ སམཱཧིཏཙིཏྟོ, པཉྙཱསམྤཏྟིཡཱ ཨཝིཔརཱིཏཾ པཛཱནཱཏི. སོ སཏིཡཱ ཀུསལཱཀུསལཱནཾ དྷམྨཱནཾ གཏིཡོ སམནྣེསམཱནོ པཉྙཱཡ སཏྟཱནཾ ཧིཏཱཧིཏཾ ཡཐཱབྷཱུཏཾ ཛཱནིཏྭཱ སམཱདྷིནཱ ཏཏྠ ཨེཀགྒཙིཏྟོ ཧུཏྭཱ ཝཱིརིཡེན སཏྟེ ཨཧིཏཾ ནིསེདྷེཏྭཱ ཧིཏེ ནིཡོཛེཏི. ཏེན ཝུཏྟཾ ‘‘པིཡོ…པེ… ནིཡོཛཀོཏི ཨེཝམཱདིགུཎསམནྣཱགཏ’’ནྟི.

ཏཾ པན ཀལྱཱཎམིཏྟཾ པརམུཀྐཾསགཏཾ དསྶེཏུཾ ‘‘མམཾ ཧཱི’’ཏིཨཱདི ཝུཏྟཾ. ཀཱརཀབྷཱཝཾ ཡོགཀམྨསྶ. པཀཱསེཏི ཨཏྟཱནཾ པཊིཔཏྟིཡཱ ཨམོགྷབྷཱཝདསྶནེན སམུཏྟེཛནཱཡ, སམྤཧཾསནཱཡ ཙ, ནནུ ཀཐེསི པཝེཎིཔཱལནཏྠནྟི ཨདྷིཔྤཱཡོ. ཨེཝརཱུཔོཏི པེསལོ ཧུཏྭཱ བཧུསྶུཏོ. ཏནྟིདྷརོཏི སུཏྟདྷརོ ཏཏྠ ཀེཧིཙིཔི ཨསཾཧཱིརོ. ཝཾསཱནུརཀྑཀོཏི བུདྡྷཱནུབུདྡྷཝཾསསྶ ཨནུརཀྑཀོ. པཝེཎིཔཱལཀོཏི པཝེཎིཡཱ ཨཱཙརིཡུགྒཧཎསྶ ཨནུཔཱལཀོ. ཨཱཙརིཡམཏིཀོཏི ཨཱཙརིཡམཏིཡཾ ནིཡུཏྟོ ཏསྶཱ ཨནཏིཝཏྟནཏོ. ན ཨཏྟནོམཏིཾ པཀཱསེཏི ཀཐེཏཱིཏི ན ཨཏྟནོམཏིཀོ, ཨཏྟནོ མཏིཾ པགྒཡ྄ཧ ཝཏྟཱ ན ཧོཏཱིཏི ཨཏྠོ.

‘‘པུབྦེ ཝུཏྟཁཱིཎཱསཝཱདཡོ’’ཏིཨཱདི ཨེཀཙྩཁཱིཎཱསཝཏོ བཧུསྶུཏོཝ ཀམྨཊྛཱནདཱནེ སེཡྻོཏི དསྶནཏྠཾ ཨཱརདྡྷཾ. ཏཏྠ པུབྦེ ཝུཏྟཁཱིཎཱསཝཱདཡོཏི ‘‘ཡཾ ཀམྨཊྛཱནཾ གཧེཏུཀཱམོ’’ཏིཨཱདིནཱ ཝུཏྟཁཱིཎཱསཝཱདིཀཱ. ཨུགྒཧཔརིཔུཙྪཱནཾ ཝིསོདྷིཏཏྟཱཏི ཨུགྒཧེཏབྦཏོ ‘‘ཨུགྒཧོ’’ཏི ལདྡྷནཱམཱཡ ཀམྨཊྛཱནུཔཀཱརཱཡ པཱལི༹ཡཱ, ཏདཏྠཾ པརིཔུཙྪནཏོ ‘‘པརིཔུཙྪཱ’’ཏི ལདྡྷསམཉྙཱཡ ཨཏྠསཾཝཎྞནཱཡ ཙ ཝིསེསཏོ སོདྷིཏཏྟཱ ནིགྒུམྦཾ ནིཛྫཊཾ ཀཏྭཱ གཧིཏཏྟཱ. ཨིཏོ ཙིཏོ ཙ སུཏྟཉྩ ཀཱརཎཉྩ སལླཀྑེཏྭཱཏི པཉྩསུཔི ནིཀཱཡེསུ ཨིཏོ ཙིཏོ ཙ ཏསྶ ཏསྶ ཀམྨཊྛཱནསྶ ཨནུརཱུཔཾ སུཏྟཔདཉྩེཝ སུཏྟཱནུགཏཾ ཡུཏྟིཉྩ སུཊྛུ ཨུཔལཀྑེཏྭཱ. སཔྤཱཡཱསཔྤཱཡཾ ཡོཛེཏྭཱཏི ཡསྶ ཀམྨཊྛཱནཾ ཨཱཙིཀྑཏི, ཏསྶ ཨུཔཀཱརཱནུཔཀཱརཾ ཡུཏྟིཾ མགྒནེན ཡོཛེཏྭཱ, སམཱདཱཡ ཝཱ སམྨདེཝ ཧདཡེ ཋཔེཏྭཱཏི ཨཏྠོ. མཧཱམགྒཾ དསྶེནྟོཏི ཀམྨཊྛཱནཝིདྷིཾ མཧཱམགྒཾ ཀཏྭཱ དསྶེནྟོ.

སབྦཏྠཱཏི ¶ ཏཏྠ ཏཏྠ ཝིཧཱརེ. ཝཏྟཔཊིཔཏྟིཾ ཀུརུམཱནེནཱཏི པཝིཊྛཀཱལེ ཨཱགནྟུཀཝཏྟཾ, ནིཀྑམནཀཱལེ གམིཀཝཏྟནྟི ཡཐཱརཧཾ ཏཾ ཏཾ ཝཏྟཾ པཱུརེནྟེན. སབྦཔཱརིཧཱརིཡཏེལནྟི སབྦེསཾ ཨངྒཱནཾ ¶ , སབྦེསཾ ཝཱ བྷིཀྑཱུནཾ ཨཏྠཱཡ པརིཧརིཏབྦཏེལཾ. ཋཔེམཱིཏི ཨནུཛཱནཱཔནཾ. ཡཾ ཏཾ སམྨཱཝཏྟཾ པཉྙཏྟནྟི སམྦནྡྷོ. ཨེཀདིཝསཾ སཱཡཾ ཝིསྶཛྫིཏེནཱཔཱིཏི ཡོཛནཱ. ཨཱརོཙེཏབྦཾ ཨཱགམནཀཱརཎཾ. སཔྤཱཡཝེལཱ སརཱིརཙིཏྟཱནཾ ཀལླསམཡོ.

ཙརིཡཱཝཎྞནཱ

༤༣. སནྟཱནེ རཱགསྶ ཨུསྶནྣབྷཱཝེན ཙརཎཾ པཝཏྟི རཱགཙརིཡཱ, སཱ སསྶཏཱསཡཱདཡོ ཝིཡ དཊྛབྦཱ. ཏཐཱ དོསཙརིཡཱདཡོ. སཾསགྒོ སམྤཡོགཱརཧཝསེན ཝེདིཏབྦོ, ཡཐཱ ‘‘རཱགམོཧཙརིཡཱ དོསམོཧཙརིཡཱ’’ཏིཨཱདི. སནྣིཔཱཏོ ཨེཀསནྟཏིཔརིཡཱཔནྣཏཱཝསེན, ཡཐཱ ‘‘རཱགདོསཙརིཡཱ རཱགདོསམོཧཙརིཡཱ’’ཏིཨཱདི. ཨིམཱ ཨེཝ ཧི སནྡྷཱཡ ‘‘ཨཔརཱཔི ཙཏསྶོ’’ཏི ཝུཏྟཾ. ཏཐཱཏི ཡཐཱ རཱགཱདཱིནཾ, ཏཐཱ སདྡྷཱདཱིནཾ སཾསགྒསནྣིཔཱཏཝསེན སདྡྷཱབུདྡྷིཙརིཡཱ སདྡྷཱཝིཏཀྐཙརིཡཱ བུདྡྷིཝིཏཀྐཙརིཡཱ སདྡྷཱབུདྡྷིཝིཏཀྐཙརིཡཱཏི. ཨིམཱ ཨཔརཱཔི ཙཏསྶོ. ཨེཝནྟི སཾསགྒསནྣིཔཱཏཝསེན. སཾསགྒནྟི སཾསཛྫནཾ མིསྶཱིཀརཎཾ ‘‘རཱགསདྡྷཱཙརིཡཱ དོསསདྡྷཱཙརིཡཱ’’ཏིཨཱདིནཱ. ཨནེཀཱཏི ཏེསཊྛི, ཏཏོ ཨཏིརེཀཱཔི ཝཱ, ཏཱ པན ཨསམྨོཧནྟེན སཾཡུཏྟསུཏྟཊཱིཀཱཡཾ ཝིཏྠཱརཏོ དསྶིཏཱཏི ཏཏྠ ཝུཏྟནཡེན ཝེདིཏབྦཱ. ‘‘པཀཏཱི’’ཏི ཨིམིནཱ ཨསཏི པཊིཔཀྑབྷཱཝནཱཡཾ ཏཏྠ ཏཏྠ སནྟཱནེ ཙརིཡཱཡ སབྷཱཝབྷཱུཏཏཾ དསྶེཏི. ཨུསྶནྣཏཱ ཨཉྙདྷམྨེཧི རཱགཱདཱིནཾ ཨདྷིཀཏཱ, ཡཏོ རཱགཙརིཡཱདཱིནཾ པཙྩཡསམཝཱཡེ རཱགཱདཡོ བལཝནྟོ ཧོནྟི, ཨབྷིཎྷཉྩ པཝཏྟནྟི. ཏཱསཾ ཝསེནཱཏི ཚནྣཾ མཱུལཙརིཡཱནཾ ཝསེན ཚལེ༹ཝ པུགྒལཱ ཧོནྟི. ཨཉྙཐཱ ཨནེཀཔུགྒལཱ སིཡུཾ, ཏཐཱ ཙ སཏི ཨདྷིཔྤེཏཏྠསིདྡྷི ཙ ན སིཡཱཏི ཨདྷིཔྤཱཡོ.

སདྡྷཱ བལཝཏཱི ཧོཏི རཱགུསྶནྣེ སནྟཱནེ ཏདནུགུཎསྶ དྷམྨསྶ ནིཡོགཏོ ཨདྷིཀབྷཱཝསམྦྷཝཏོ. ཏེནཱཧ ‘‘རཱགསྶ ཨཱསནྣགུཎཏྟཱ’’ཏི, སིནེཧཔརིཡེསནཱཔརིཙྩཛནེཧི སབྷཱགདྷམྨཏྟཱཏི ཨཏྠོ. སབྷཱགོ ཧི དཱུརེཔི ཨཱསནྣེཡེཝཱཏི སབྷཱགཏཱལཀྑཎམིདྷ ཨཱསནྣགྒཧཎཾ. ཏཏྠ སདྡྷཱཡ སིནིཡ྄ཧནཾ པསཱདཝསེན ཨཀཱལུསྶིཡཾ ཨལཱུཁཏཱ ¶ , རཱགསྶ པན རཉྫནཝསེན. སདྡྷཱཡ པརིཡེསནཾ ཨདྷིམུཙྩནཝསེན ཏནྣིནྣཏཱ, རཱགསྶ ཏཎྷཱཡནཝསེན. སདྡྷཱཡ ཨཔརིཙྩཛནཾ ཨོཀཔྤནཝསེན ཨནུཔཀྑནྡནཾ, རཱགསྶ ཨབྷིསངྒཝསེནཱཏི ཨེཝཾ བྷིནྣསབྷཱཝཱནམྤི ¶ ཏེསཾ ཡཐཱ ཨལཱུཁཏཱདིསཱམཉྙེན སབྷཱགཏཱ, ཨེཝཾ ཏཾསམངྒཱིནམྤི པུགྒལཱནནྟི ཨཱཧ ‘‘རཱགཙརིཏསྶ སདྡྷཱཙརིཏོ སབྷཱགོ’’ཏི.

པཉྙཱ བལཝཏཱི ཧོཏི དོསུསྶནྣེ སནྟཱནེ ཏདནུགུཎསྶ དྷམྨསྶ ནིཡོགཏོ ཨདྷིཀབྷཱཝསམྦྷཝཏོ. ཏེནཱཧ ‘‘དོསསྶ ཨཱསནྣགུཎཏྟཱ’’ཏི, ཨནལླཱིཡནཔརིཡེསནཔརིཝཛྫནེཧི སབྷཱགདྷམྨཏྟཱཏི ཨཏྠོ. ཏཏྠ པཉྙཱཡ ཨཱརམྨཎསྶ ཨནལླཱིཡནཾ ཏསྶ ཡཐཱསབྷཱཝཱཝབོདྷཝསེན ཝིསཾསཊྛཏཱ, དོསསྶ པན བྱཱཔཛྫནཝསེན. པཉྙཱཡ པརིཡེསནཾ ཡཐཱབྷཱུཏདོསཔཝིཙཡོ, དོསསྶ ཨབྷཱུཏདོསནིཛིགཱིསཱ. པཉྙཱཡ པརིཝཛྫནཾ ནིབྦིནྡནཱདིཝསེན ཉཱཎུཏྲཱསོ, དོསསྶ ཨཧིཏཱདྷཱནཝསེན ཚཌྜནནྟི ཨེཝཾ བྷིནྣསབྷཱཝཱནམྤི ཏེསཾ ཡཐཱ ཨནལླཱིཡནཱདིསཱམཉྙེན སབྷཱགཏཱ, ཨེཝཾ ཏཾསམངྒཱིནམྤི པུགྒལཱནནྟི ཨཱཧ ‘‘དོསཙརིཏསྶ བུདྡྷིཙརིཏོ སབྷཱགོ’’ཏི.

ཨནྟརཱཡཀརཱ ཝིཏཀྐཱཏི མིཙྪཱཝིཏཀྐཱ མིཙྪཱསངྐཔྤཱ ཨུཔྤཛྫནྟི མོཧུསྶནྣེ སནྟཱནེ ཏདནུགུཎསྶ དྷམྨསྶ ཡེབྷུཡྻེན པཝཏྟིསབྦྷཱཝཏོ. ཏེནཱཧ ‘‘མོཧསྶ ཨཱསནྣལཀྑཎཏྟཱ’’ཏི, ཨནཝཊྛཱནཙཉྩལབྷཱཝེཧི སབྷཱགདྷམྨཏྟཱཏི ཨཏྠོ. ཏཏྠ ཝིཏཀྐསྶ ཨནཝཊྛཱནཾ པརིཀཔྤཝསེན སཝིཔྥཱརཏཱཡ, མོཧསྶ སམྨཱུལ༹ྷཏཱཝསེན བྱཱཀུལཏཱཡ. ཏཐཱ ཝིཏཀྐསྶ ལཧུཔརིཝིཏཀྐནེན ཏདངྒཙལཏཱཡ ཙཉྩལཏཱ, མོཧསྶ ཨནོགཱལ༹ྷཏཱཡཱཏི ཨེཝཾ བྷིནྣསབྷཱཝཱནམྤི ཏེསཾ ཡཐཱ ཨནཝཊྛཱནཱདིསཱམཉྙེན སབྷཱགཏཱ, ཨེཝཾ ཏཾསམངྒཱིནམྤི པུགྒལཱནནྟི ཨཱཧ ‘‘མོཧཙརིཏསྶ ཝིཏཀྐཙརིཏོ སབྷཱགོ’’ཏི.

ཏཎྷཱ རཱགོཡེཝ སབྷཱཝཏོ, ཏསྨཱ རཱགཙརིཡཱཝིནིམུཏྟཱ ཏཎྷཱཙརིཡཱ ནཏྠཱིཏི ཨཏྠོ. ཏཾསམྤཡུཏྟོཏི ཏེན རཱགེན སམྤཡུཏྟོ, དོསཱདཡོ ཝིཡ ཏེན ཝིཔྤཡུཏྟོ ནཏྠཱིཏི ཨདྷིཔྤཱཡོ. ཏདུབྷཡནྟི ཏཎྷཱམཱནདྭཡཾ. ནཱཏིཝཏྟཏཱིཏི སབྷཱཝཏོ, སམྤཡོགཝསེན ཙ ན ཨཏིཀྐམིཏྭཱ ཝཊྚཏི. ཀཱམཉྩེཏྠ ཡཐཱ རཱགདོསེཧི སམྤཡོགཝསེན སཧ ¶ ཝཏྟམཱནསྶཔི མོཧསྶ ཨུསྶནྣཏཱཝསེན ཝིསུཾ ཙརིཡཱབྷཱཝོ, ན ཀེཝལཾ མོཧསྶེཝ, ཏཐཱ སདྡྷཱབུདྡྷིཝིཏཀྐཱནཾ. ཨེཝཾ རཱགེན སཏིཔི སམྤཡོགེ མཱནསྶཱཔི ཝིསུཾ ཙརིཡཱབྷཱཝོ ཡུཏྟོ སིཡཱ, ཨེཝཾ སནྟེཔི རཱགཔཊིགྷམཱནདིཊྛིཝིཙིཀིཙྪཱཝིཛྫཱནཾ ཝིཡ ཨནུསཡཊྛོ ཨིམེསཾ རཱགཱདཱིནཾཡེཝ ཨཱཝེཎིཀོ ཙརིཡཊྛོཏི, ནཏྠེཝ མཱནཙརིཡཱ. ཡཏོ ཙརིཡཱ ‘‘པཀཏཱི’’ཏི ཝུཏྟཱ. པཀཏི ཙ སབྷཱཝོཏི. ཨེཏེནེཝ དིཊྛིཡཱཔི ཝིསུཾ ཙརིཡཱབྷཱཝཱབྷཱཝོ སཾཝཎྞིཏོཏི དཊྛབྦོ. ཨཊྛཀཐཱཡཾ པན མོཧཙརིཡནྟོགདྷཱཝ ¶ དིཊྛིཙརིཡཱཏི དསྶེཏུཾ ‘‘མོཧནིདཱནཏྟཱ ཙཱ’’ཏིཨཱདི ཝུཏྟཾ. ཏཏྠ ཙ-སདྡེན སམྤཡོགཾ སམུཙྩིནོཏི མོཧནིདཱནཏྟཱ, མོཧསམྤཡུཏྟཏྟཱ ཙཱཏི.

༤༤. ཀིཾ སཔྤཱཡནྟི ཀཱིདིསཾ སེནཱསནཱདིསཔྤཱཡཾ. པུབྦཱཙིཎྞཾ པུརིམཛཱཏཱིསུ ཨཱཙརིཏཾ. ཨེཀཙྩེཏི ཨུཔཏིསྶཏྠེརཾ སནྡྷཱཡཱཧ. ཏེན ཧི ཝིམུཏྟིམགྒེ ཏཐཱ ཝུཏྟཾ. པུབྦེ ཀིརཱཏི ཀིར-སདྡོ ཨརུཙིསཱུཙནཏྠོ. ཨིཊྛཔྤཡོགོ མནཱཔཀིརིཡཱ. སུབྷཀམྨབཧུལོ ཡེབྷུཡྻེན སོབྷནཀམྨཀཱརཱི. ན སབྦེ རཱགཙརིཏཱ ཨེཝ ཧོནྟི, ཨལུདྡྷཱནམྤི པུབྦེ ཨིཊྛཔྤཡོགསུབྷཀམྨབཧུལཏཱསམྦྷཝཏོ, སགྒཱ ཙཝིཏྭཱ ཨིདྷཱུཔཔཏྟིསམྦྷཝཏོ ཙ. ཨེཏེན ཨསཏི པུབྦཧེཏུནིཡཱམེ ཡཐཱཝུཏྟཀཱརཎམཏྟེན ན ཏེསཾ ལུདྡྷཏཱ, ལུདྡྷབྷཱཝཧེཏུཀཱ ཙ རཱགཙརིཡཱཏི ཨིམམཏྠཾ དསྶེཏི.

ཨིཏརེཏི ཚེདནཱདིཀམྨབཧུལཱ ནིརཡཱདིཏོ ཨིདྷཱུཔཔནྣཱ ཙ ན སབྦེ དོསམོཧཙརིཏཱ ཨེཝ ཧོནྟཱིཏི ཡོཛནཱ. ཨིདྷཱཔི ཡཐཱཝུཏྟཀཱརཎསྶ ཀོདྷནབྷཱཝེ, མཱུལ༹ྷབྷཱཝེ ཙ ཨནེཀནྟིཀཏྟཱ དོསམོཧཙརིཏཏཱཡཔི ཨནེཀཾསིཀཏཱ ཝེདིཏབྦཱ. དྷཱཏཱུནཾ ཨུསྶདནིཡམོ ཡདི པམཱཎཏོ, སོ ནཏྠི, ཨཐ སཱམཏྠིཡཏོ, སོཔི ཨེཀཾསིཀོ ན ཨུཔལབྦྷཏཱིཏི དསྶེནྟོ ཨཱཧ ‘‘ཡཐཱཝུཏྟེནེཝ ནཡེན ཨུསྶདནིཡམོ ནཱམ ནཏྠཱི’’ཏི. ཏཏྠ ཡཐཱཝུཏྟེནེཝཱཏི ‘‘དྭིནྣཾ པན དྷཱཏཱུན’’ནྟིཨཱདིནཱ ཝུཏྟཔྤཀཱརེནེཝ. དོསནིཡམེཏི སེམྷཱདིདོསཱདྷིཀཏཱཡ རཱགཱདིཙརིཏོ ཧོཏཱིཏི དོསཝསེན ཙརིཡཱནིཡམེ ‘‘སེམྷཱདྷིཀོ རཱགཙརིཏོ’’ཏི ཝཏྭཱ པུན ‘‘སེམྷཱདྷིཀོ མོཧཙརིཏོ’’ཏི, ‘‘ཝཱཏཱདྷིཀོ མོཧཙརིཏོ’’ཏི ཝཏྭཱ པུན ‘‘ཝཱཏཱདྷིཀོ རཱགཙརིཏོ’’ཏི ཙ ཝུཏྟཏྟཱ ཏམྤི དོསཝསེན ནིཡམཝཙནཾ པུབྦཱཔརཝིརུདྡྷམེཝ. ཨཔརིཙྪིནྣཝཙནནྟི ¶ པརིཙྪེདཀཱརིཀཱཡ པཉྙཱཡ ན པརིཙྪིནྡིཏྭཱ ཝུཏྟཝཙནཾ, ཨནུཔཔརིཀྑིཏཝཙནནྟི ཨཏྠོ.

ཨུསྶདཀིཏྟནེཏི ཝིཔཱཀཀཐཱཡཾ གཧིཏཨུསྶདཀིཏྟནེ. པུབྦཧེཏུནིཡཱམེནཱཏི པུརིམབྷཝེ པཝཏྟལོབྷཱདིཧེཏུནིཡཱམེན. ནིཡཱམོཏི ཙ ཏེསཾཡེཝ ལོབྷཱདཱིནཾ པཊིནིཡཏོ ལུབྦྷནཱདིསབྷཱཝོ དཊྛབྦོ. ལོབྷོ ཨུསྶདོ ཨེཏེསནྟི ལོབྷུསྶདཱ, ཨུསྶནྣལོབྷཱ, ལོབྷཱདྷིཀཱཏི ཨཏྠོ. ཨམོཧུསྶདཱ ཙཱཏི ཨེཏྠ ཙ-སདྡོ སམྤིཎྜནཏྠོ. ཏེན ཡེ ཨིམེ ལོབྷུསྶདཏཱདཱིནཾ པཙྩེཀཾ ཝོམིསྶཏོ ཙ ཙུདྡས པབྷེདཱ ཨིཙྪིཏཱ, ཏེ ཨནཝསེསཏོ སམྤིཎྜེཏི ཡཐཱཝུཏྟེསུ ཚསྭེཝ ཏེསཾ ཨནྟོགདྷཏྟཱ. ཕལབྷཱུཏཱ ཙེཏྠ ལོབྷུསྶདཏཱདཡོ དཊྛབྦཱ.

ཨིདཱནི ¶ ཏཾ ནེསཾ ལོབྷུསྶདཏཱདཱིནཾ པཙྩེཀཾ ཝོམིསྶཀཏཱདིཾ ཝིབྷཱགེན དསྶེཏུཾ ‘‘ཡསྶ ཧཱི’’ཏིཨཱདི ཨཱརདྡྷཾ. ཀམྨཱཡཱུཧནཀྑཎེཏི ཀམྨཀརཎཝེལཱཡཾ. ལོབྷོ བལཝཱཏི ལོབྷོ ཏཛྫཱཡ པཙྩཡསཱམགྒིཡཱ སཱམཏྠིཡཏོ ཨདྷིཀོ ཧོཏི. ཨལོབྷོ མནྡོཏི ཏཔྤཊིཔཀྑོ ཨལོབྷོ དུབྦལོ. ཀཐཾ པནེཏེ ལོབྷཱལོབྷཱ ཨཉྙམཉྙཾ ཨུཛུཝིཔཙྩནཱིཀབྷཱུཏཱ ཨེཀཀྑཎེ པཝཏྟནྟཱིཏི? ན ཁོ པནེཏཾ ཨེཝཾ དཊྛབྦཾ ‘‘ཨེཀཀྑཎེ པཝཏྟནྟཱི’’ཏི. ནིཀནྟིཀྑཎཾ པན ཨཱཡཱུཧནཔཀྑིཡམེཝ ཀཏྭཱ ཨེཝཾ ཝུཏྟཾ. ཨེསེཝ ནཡོ སེསེསུཔི. པརིཡཱདཱཏུནྟི ཨབྷིབྷཝིཏུཾ ན སཀྐོཏི. ཡོ ཧི ‘‘ཨེཝཾསུནྡརཾ ཨེཝཾཝིཔུལཾ ཨེཝཾམཧགྒྷཉྩ ན སཀྐཱ དཱཏུ’’ནྟིཨཱདིནཱ ཨམུཏྟཙཱགཏཱདིཝསེན པཝཏྟཱཡ ཙེཏནཱཡ སམྤཡུཏྟོ ཨལོབྷོ, སོ སམྨདེཝ ལོབྷཾ པརིཡཱདཱཏུཾ ན སཀྐོཏི. དོསམོཧཱནཾ ཨནུཔྤཏྟིཡཱ, ཏཱདིསཔཙྩཡལཱབྷེན ཙ ཨདོསཱམོཧཱ བལཝནྟོ. ཏསྨཱཏི ལོབྷཱདོསཱམོཧཱནཾ བལཝབྷཱཝཏོ, ཨལོབྷདོསམོཧཱནཉྩ དུབྦལབྷཱཝཏོཏི ཝུཏྟམེཝ ཀཱརཎཾ པཙྩཱམསཏི. སོཏི ཏཾསམངྒཱིཔུགྒལོ. ཏེན ཀམྨེནཱཏི ཏེན ལོབྷཱདིཨུཔནིསྶཡཝཏཱ ཀུསལཀམྨུནཱ. སུཁསཱིལོཏི སཁིལོ. ཏམེཝཏྠཾ ‘‘ཨཀྐོདྷནོ’’ཏི པརིཡཱཡེན ཝདཏི.

པུརིམནཡེནེཝཱཏི པུབྦེ ཝུཏྟནཡཱནུསཱརེན མནྡཱ ཨལོབྷཱདོསཱ ལོབྷདོསེ པརིཡཱདཱཏུཾ ན སཀྐོནྟི, ཨམོཧོ པན བལཝཱ མོཧཾ པརིཡཱདཱཏུཾ སཀྐོཏཱིཏི ཨེཝཾ ཏཏྠ ཏཏྠ ཝཱརེ ཡཐཱརཧཾ ཨཏིདེསཏྠོ ¶ ཝེདིཏབྦོ. དུཊྛོཏི ཀོདྷནོ. དནྡྷོཏི མནྡཔཉྙོ. སཱིལཀོཏི སུཁསཱིལོ.

ཨེཏྠ ཙ ལོབྷཝསེན, དོསམོཧལོབྷདོསལོབྷམོཧདོསམོཧལོབྷདོསམོཧཝསེནཱཏི ཏཡོ ཨེཀཀཱ, ཏཡོ དུཀཱ, ཨེཀོ ཏིཀོཏི ལོབྷཱདིཨུསྶདཝསེན ཨཀུསལཔཀྑེཡེཝ སཏྟ ཝཱརཱ, ཏཐཱ ཀུསལཔཀྑེ ཨལོབྷཱདིཨུསྶདཝསེནཱཏི ཙུདྡས ཝཱརཱ ལབྦྷནྟི. ཏཏྠ ཨལོབྷདོསཱམོཧཱ, ཨལོབྷཱདོསམོཧཱ, ཨལོབྷདོསམོཧཱ བལཝནྟོཏི ཨཱགཏེཧི ཀུསལཔཀྑེ ཏཏིཡདུཏིཡཔཋམཝཱརེཧི དོསུསྶདམོཧུསྶདདོསམོཧུསྶདཝཱརཱ གཧིཏཱ ཨེཝ ཧོནྟི, ཏཐཱ ཨཀུསལཔཀྑེ ལོབྷཱདོསམོཧཱ, ལོབྷདོསཱམོཧཱ, ལོབྷཱདོསཱམོཧཱ བལཝནྟོཏི ཨཱགཏེཧི ཏཏིཡདུཏིཡཔཋམཝཱརེཧི ཨདོསུསྶདཨམོཧུསྶདཨདོསཱམོཧུསྶདཝཱརཱ གཧིཏཱ ཨེཝཱཏི ཨཀུསལཀུསལཔཀྑེསུ ཏཡོ ཏཡོ ཝཱརེ ཨནྟོགདྷེ ཀཏྭཱ ཨཊྛེཝ ཝཱརཱ དསྶིཏཱ. ཡེ པན ཨུབྷཡེསཾ མིསྶཏཱཝསེན ལོབྷཱལོབྷུསྶདཝཱརཱདཡོ ཨཔརེ ཨེཀཱུནཔཉྙཱས ཝཱརཱ དསྶེཏབྦཱ, ཏེ ཨལབྦྷནཏོ ཨེཝ ན དསྶིཏཱ. ན ཧི ཨེཀསྨིཾ སནྟཱནེ ཨནྟརེན ཨཝཏྠནྟརཾ ‘‘ལོབྷོ ཙ བལཝཱ, ཨལོབྷོ ཙཱ’’ཏིཨཱདི ཡུཛྫཏཱིཏི, པཊིཔཀྑཝསེན ཝཱ ཧི ཨེཏེསཾ བལཝདུབྦལབྷཱཝོ, སཧཛཱཏདྷམྨཝསེན ¶ ཝཱ. ཏཏྠ ལོབྷསྶ ཏཱཝ པཊིཔཀྑཝསེན ཨལོབྷེན ཨནདྷིབྷཱུཏཏཱཡ བལཝབྷཱཝོ, ཏཐཱ དོསམོཧཱནཾ ཨདོསཱམོཧེཧི. ཨལོབྷཱདཱིནཾ པན ལོབྷཱདིཨབྷིབྷཝནཏོ, སབྦེསཉྩ སམཱནཛཱཏིཡམབྷིབྷུཡྻ པཝཏྟིཝསེན སཧཛཱཏདྷམྨཏོ བལཝབྷཱཝོ. ཏེན ཝུཏྟཾ ཨཊྛཀཐཱཡཾ ‘‘ལོབྷོ བལཝཱ ཨལོབྷོ མནྡོ, ཨདོསཱམོཧཱ བལཝནྟོ དོསམོཧཱ མནྡཱ’’ཏི. སོ ཙ ནེསཾ མནྡབལཝབྷཱཝོ པུརིམཱུཔནིསྶཡཏོ ཏཐཱ ཨཱསཡསྶ པརིབྷཱཝིཏཏཱཡ ཝེདིཏབྦོ.

ཡོ ལུདྡྷོཏི ཝུཏྟོཏི ཡོ ཨུསྶདཀིཏྟནེ ‘‘ལུདྡྷོ’’ཏི ཝུཏྟོ, ཨཡཾ ཨིདྷ ཙརིཡཱཝིཙཱརེ ‘‘རཱགཙརིཏོ’’ཏི ཝེདིཏབྦོ. དུཊྛདནྡྷཱཏི ‘‘དུཊྛོ, དནྡྷོ’’ཏི ཙ ཝུཏྟཱ ཡཐཱཀྐམཾ དོསམོཧཙརིཏཱ. པཉྙཝཱཏི སཱཏིསཡཾ སཔྤཉྙོ. ཡཏོ སདྡྷཱཝིཏཀྐེསུ ཝིཛྫམཱནེསུཔི བུདྡྷིཙརིཏོཏི ཝུཙྩཏི. ཨལོབྷཱདོསཱནཾ ¶ བལཝབྷཱཝོ སདྡྷཱུཔནིསྶཡཏཱཡ ཝིནཱ ན ཧོཏཱིཏི ཨཱཧ ‘‘ཨལུདྡྷཨདུཊྛཱ པསནྣཔཀཏིཏཱཡ སདྡྷཱཙརིཏཱ’’ཏི.

ཨཡཉྩ ནཡོ སཱདྷཱརཎཏོ ཝུཏྟོཏི ནིབྦཏྟིཏཔུབྦཧེཏུནིཡཱམཝསེནེཝ བུདྡྷིཙརིཏཱདིཀེཔི དསྶེཏུཾ ‘‘ཡཐཱ ཝཱ’’ཏིཨཱདི ཝུཏྟཾ. ཏཏྠ ཨམོཧཔརིཝཱརེནཱཏི ཨམོཧཔརིཀྑིཏྟེན, ཨུཔནིསྶཡཏོ སམྤཡོགཏོ ཙ པཉྙཱཡ ཨབྷིསངྑཏེནཱཏི ཨཏྠོ. སེསཔདཏྟཡེཔི ཨེསེཝ ནཡོ. ལོབྷཱདིནཱ ཝོམིསྶཔརིཝཱརེནཱཏི ཨེཏྠ ལོབྷམོཧཱདིནཱ ཨཉྙམཉྙཨཝིརུདྡྷཝོམིསྶཔརིཝཱརེནཱཏི ཨཏྠོ. ཨཝིརོདྷོ ཙ ཡུགགྒཱཧཝསེན ཨཔྤཝཏྟིཡཱ ཝེདིཏབྦོ. ཏཐཱ ཧི སདྡྷཱནུསཱརིདྷམྨཱནུསཱརིགོཏྟཱནི ཨཉྙམཉྙམྤི བྷིནྣསབྷཱཝཱནེཝ. ཨེཀཾསེན ཙ མིསྶཀཙརིཡཱཔི སམྤཊིཙྪིཏབྦཱ པུབྦཧེཏུནིཡཱམེན ཙརིཡཱསིདྡྷིཏོ. ཏཐཱ ཙེཝ ཨུསྶདཀིཏྟནཾ པཝཏྟཾ ཡཐཱརཧཾ ལོབྷཱལོབྷཱདཱིནཾ ཝིཔཱཀསྶ པཙྩཡབྷཱཝཏོ. ཏེནཱཧ པཊིསམྦྷིདཱམགྒེ (པཊི. མ. ༡.༢༣༢) –

‘‘གཏིསམྤཏྟིཡཱ ཉཱཎསམྤཡུཏྟེ ཀཏམེསཾ ཨཊྛནྣཾ ཧེཏཱུནཾ པཙྩཡཱ ཨུཔཔཏྟི ཧོཏི? ཀུསལཀམྨསྶ ཛཝནཀྑཎེ ཏཡོ ཧེཏཱུ ཀུསལཱ ཏསྨིཾ ཁཎེ ཛཱཏཙེཏནཱཡ སཧཛཱཏཔཙྩཡཱ ཧོནྟི, ཏེན ཝུཙྩཏི ཀུསལམཱུལཔཙྩཡཱཔི སངྑཱརཱ. ནིཀནྟིཀྑཎེ དྭེ ཧེཏཱུ ཨཀུསལཱ ཏསྨིཾ ཁཎེ ཛཱཏཙེཏནཱཡ སཧཛཱཏཔཙྩཡཱ ཧོནྟི, ཏེན ཝུཙྩཏི ཨཀུསལམཱུལཔཙྩཡཱཔི སངྑཱརཱ. པཊིསནྡྷིཀྑཎེ ཏཡོ ཧེཏཱུ ཨབྱཱཀཏཱ ཏསྨིཾ ཁཎེ ཛཱཏཙེཏནཱཡ སཧཛཱཏཔཙྩཡཱ ཧོནྟི, ཏེན ཝུཙྩཏི ནཱམརཱུཔཔཙྩཡཱཔི ཝིཉྙཱཎཾ, ཝིཉྙཱཎཔཙྩཡཱཔི ནཱམརཱུཔ’’ནྟི –

ཨཱདི ¶ . པུབྦཧེཏུནིཡཱམེན ཙ ཡཐཱ ཏིཧེཏུཀསྶ པཉྙཱཝེཡྻཏྟིཡཾ, ན ཏཐཱ དུཧེཏུཀསྶ. ཡཐཱ ཙ དུཧེཏུཀསྶ ཨིཏིཀཏྟབྦཏཱ ནེཔཀྐཾ, ན ཏཐཱ ཨཧེཏུཀསྶ. ཨེཝཾ ལོབྷུསྶདཱདཡོ པུགྒལཱ རཱགཙརིཏཱདཡོ ཧོནྟཱིཏི ནིཊྛམེཏྠ གནྟབྦནྟི. ཡཐཱཝུཏྟམཏྠཾ ནིགམཝསེན དསྶེཏུཾ ‘‘ཨེཝཾ ལོབྷཱདཱིསཱུ’’ཏིཨཱདི ཝུཏྟཾ.

༤༥. ཏཏྲཱཏི ¶ ཏསྨིཾ པུཙྪཱཝཙནེ. ནཡོཏི ཛཱནནནཡོ. པུགྒལཱདྷིཊྛཱནེན ཝུཏྟོཔི ཨཏྠོ དྷམྨམུཁེནེཝ པཉྙཱཡཏཱིཏི དྷམྨཱདྷིཊྛཱནེནཱཧ ‘‘ཙརིཡཱཡོ ཝིབྷཱཝཡེ’’ཏི. པཀཏིགམནེནཱཏི ཨཀིཏྟིམེན སབྷཱཝགམནེན. ཙཱཏུརིཡེནཱཏི ཙཱཏུརབྷཱཝེན སིངྒཱརེན. ཨུཀྐུཊིཀནྟི ཨསམྥུཊྛམཛ྄ཛྷཾ. ཁཎནྟོ ཝིཡཱཏི བྷཱུམིཾ ཁཎནྟོ ཝིཡ. ཨནུཀཌྜྷིཏནྟི པཱདནིཀྑེཔསམཡེ ཀཌྜྷནྟོ ཝིཡ པཱདཾ ནིཀྑིཔཏི. ཏེནསྶ པདཾ ཨནུཀཌྜྷིཏཾ པཙྪཏོ ཨཉྪིཏཾ ཧོཏི. པརིབྱཱཀུལཱཡཱཏི པརིཏོ ཨཱལུལི༹ཏཱཡ. ཚམྦྷིཏོ ཝིཡཱཏི ཝིཏྠཱཡནྟོ ཝིཡ. བྷཱིཏོ ཝིཡཱཏི ཀེཙི. སཧསཱནུཔཱིལི༹ཏནྟི ཨགྒཔཱདེན, པཎྷིཡཱ ཙ སཧསཱཝ སནྣིརུཛ྄ཛྷིཏཾ. ཝིཝཊྚཙྪདསྶཱཏི ཝིནིཝཊྚཙྪདནསྶ པཧཱིནཀིལེསསྶ. ཨིདམཱིདིསཾ པདནྟི བྷགཝཏོ པདཾ དིསྭཱ ཝདཏི.

པཱསཱདིཀནྟི པསཱདཱཝཧཾ. མདྷུརཱཀཱརནྟི ཨིཊྛཱཀཱརཾ. ཐདྡྷཱཀཱརནྟི ཐམྦྷིཏཱཀཱརཾ. ཨཏརམཱནོཏི ནཏརམཱནོ, སཎིཀནྟི ཨཏྠོ. སམོདྷཱཡཱཏི སམྨདེཝ ཨོདྷཱཡ ཨཝིཀྑིཔིཏྭཱ. ནིཔཛྫིཏྭཱཏི ཀཱཡཔསཱརཎལཀྑཎཱཡ ནིཔཛྫཱཡ སེཡྻཱཡ ནིཔཛྫིཏྭཱ སཡཏི ནིདྡཱཡཏི. པཀྑིཏྟཀཱཡོཏི ཨཝཀྑིཏྟཀཱཡོ ཨཝསོ ཝིཡ སཧསཱ པཏིཏཀཱཡོ. དུསྶཎྛཱནནྟི ཝིརཱུཔསནྣིཝེསཾ. ཝིཀྑིཏྟཀཱཡོཏི ཨིཏོ ཙིཏོ ཙ ཁིཏྟཨངྒཔཙྩངྒོ.

སམྤརིཝཏྟཀནྟི སམྤརིཝཏྟིཏྭཱ. ཨཱལོལ༹ཡམཱནོ ཝཱལིཀཱཀཙཝརཱནི ཨཱཀུལཡནྟོ.

ནིཔུཎམདྷུརསམསཀྐཙྩཀཱརཱིཏི སུཀོསལླཾ སུནྡརཾ ཨཝིསམཾ སཱབྷིསངྑཱརཉྩ ཀརཎསཱིལོ. གཱལ༹ྷཐདྡྷཝིསམཀཱརཱིཏི ཐིརཾ ཨསིཐིལཾ ཝིསམཉྩ ཀརཎསཱིལོ. ཨཔརིཙྪིནྣཾ ཨཔརིནིཊྛིཏཾ.

མུཁཔཱུརཀནྟི མུཁསྶ པཱུརཎཾ མཧནྟཾ. ཨརསཔཊིསཾཝེདཱིཏི ནརསཔཊིསཾཝེདཱི. བྷཱཛནེ ཚཌྜེནྟོཏི བྷོཛནབྷཱཛནེ སིཏྠཱནི ཚཌྜེནྟོ. མུཁཾ མཀྑེནྟོཏི བཧིམུཁཾ མཀྑེནྟོ.

ཀིལནྟརཱུཔོ ¶ ཝིཡཱཏི ཏསྶ ཨསཧནེན ཁེདཔྤཏྟོ ཝིཡ. ཨཉྙཱཎུཔེཀྑཱཡཱཏི ཨཉྙཱཎབྷཱུཏཱཡ ཨུཔེཀྑཱཡ. ཨཉྙཱཎསངྑཱཏཱཡ ཨུཔེཀྑཱཡཱཏི ཀེཙི.

མཱཡཱདཱིསུ ¶ སནྟདོསཔཊིཙྪདནལཀྑཎཱ མཱཡཱ. ཨསནྟགུཎཔཀཱསནལཀྑཎཾ སཱཋེཡྻཾ. ཨུནྣཏིལཀྑཎོ མཱནོ. ཨསནྟགུཎསམྦྷཱཝནཱམུཁེན པཊིགྒཧཎེ ཨམཏྟཉྙུཏཱལཀྑཎཱ པཱཔིཙྪཏཱ. སནྟགུཎསམྦྷཱཝནཱམུཁེན པཊིགྒཧཎེ ཨམཏྟཉྙུཏཱལཀྑཎཱ མཧིཙྪཏཱ. སཀལཱབྷེན ཨསནྟུསྶནལཀྑཎཱ ཨསནྟུཊྛིཏཱ. ཝིཛ྄ཛྷནཊྛེན སིངྒཾ, སིངྒཱརཏཱནཱགརིཀབྷཱཝསངྑཱཏཾ ཀིལེསསིངྒཾ. ཨཏྟནོ སརཱིརསྶ, ཙཱིཝརཱདིཔརིཀྑཱརསྶ ཙ མཎྜནཝསེན པཝཏྟཾ ལོལུཔྤཾ ཙཱཔལྱཾ. ཨེཝམཱདཡོཏི ཨེཏྠ ཨཱདི-སདྡེན ཨཧིརིཀཱནོཏྟཔྤམདཔྤམཱདཱདཡོ སངྒཡ྄ཧནྟི.

པརཱཔརཱདྷསྶ ཨུཔནཡ྄ཧནལཀྑཎོ ཨུཔནཱཧོ. པརེསཾ གུཎམཀྑཎལཀྑཎོ མཀྑོ. པརསྶ གུཎེ ཌཾསིཏྭཱ ཨཔནེནྟོ ཝིཡ ཡུགགྒཱཧལཀྑཎོ པལཱ༹སོ. པརསམྤཏྟིཨུསཱུཡནལཀྑཎཱ ཨིསྶཱ. ཨཏྟསམྤཏྟིནིགཱུཧནལཀྑཎཾ མཙྪརིཡཾ. ཨིདྷ ཨཱདི-སདྡེན དོཝཙསྶཏཱཔཱཔམིཏྟཏཱདཱིནཾ སངྒཧོ དཊྛབྦོ.

ཨནུསྶཱཧནཾ ཐིནཾ. ཨསཏྟིཝིགྷཱཏོ མིདྡྷཾ. ཙེཏསོ ཨཝཱུཔསམོ ཨུདྡྷཙྩཾ. ཝིཔྤཊིསཱརོ ཀུཀྐུཙྩཾ. སཾསཡོ ཝིཙིཀིཙྪཱ. ཨཡོནིསོ དལ༹ྷགྒཱཧོ ཨཱདྷཱནགྒཱཧིཏཱ. ཡཐཱགཧིཏསྶ མིཙྪཱགཱཧསྶ དུབྦིཝེཋིཡཏཱ དུཔྤཊིནིསྶགྒིཡཏཱ. ཨིདྷ ཨཱདི-སདྡེན མུཊྛསཙྩཨསམྤཛཉྙཱདཱིནཾ སངྒཧོ དཊྛབྦོ.

མུཏྟཙཱགཏཱཏི ཝིསྶཊྛཙཱགཏཱ ནིསྶངྒཔརིཙྩཱགོ. ཡཐཱ མཱཡཱདཡོ, ཏཐཱ པཝཏྟཱ ཨཀུསལཀྑནྡྷཱ, ཡཐཱ ཨརིཡཱནཾ དསྶནཀཱམཏཱདཡོ, ཏཐཱ པཝཏྟཱ ཀུསལཀྑནྡྷཱ ཝེདིཏབྦཱ.

པསཱདནཱིཡཊྛཱནཾ ནཱམ ཝཏྠུཏྟཡཾ. སཾཝེཛནཱིཡཊྛཱནཱནི ཛཱཏིཨཱདཱིནི. ཀུསལཱནུཡོགེཏི ཀུསལདྷམྨབྷཱཝནཱཡཾ. ‘‘ཨེཝཉྩ ཨེཝཉྩ ཀརིསྶཱམཱི’’ཏི ཀིཙྩཱནཾ རཏྟིབྷཱགེ པརིཝིཏཀྐནཾ རཏྟིཾ དྷཱུམཱཡནཱ. ཏཐཱཝིཏཀྐིཏཱནཾ ཏེསཾ དིཝསབྷཱགེ ཨནུཊྛཱནཾ དིཝཱ པཛྫལནཱ. ཧུརཱཧུརཾ དྷཱཝནཱཏི ཨིཏོ ཙིཏོ ཙ ཏཏྠ ཏཏྠ ཨཱརམྨཎེ ཙིཏྟཝོསགྒོ. ཏེནེཝཱཧ ‘‘ཨིདཾ པུརེ ཙིཏྟམཙཱརི ཙཱརིཀཾ, ཡེནིཙྪཀཾ ¶ ཡཏྠཀཱམཾ ཡཐཱསུཁ’’ནྟི (དྷ. པ. ༣༢༦), ‘‘ཙིཏྟམསྶ ཝིདྷཱཝཏཱི’’ཏི (སཾ. ནི. ༡.༥༥) ཙ.

དྷམྨཔྤཝཏྟིདསྶནཱདི ¶ ཙ པཱལི༹ཡཾ, ཨཊྛཀཐཱཡཉྩ ཨནཱགཏམེཝཱཏི ན སཀྐཱ ཝཏྟུནྟི ‘‘སབྦཱཀཱརེནཱ’’ཏི ཝུཏྟཾ. ཀིཉྩི ཀིཉྩི ཨཱགཏམྤི ཨཏྠེཝཱཏི ཧི ཨདྷིཔྤཱཡོ. ‘‘ན སཱརཏོ པཙྩེཏབྦ’’ནྟི ཝཏྭཱ ཏཏྠ ཀཱརཎཾ དསྶེནྟོ ‘‘རཱགཙརིཏསྶ ཧཱི’’ཏིཨཱདིམཱཧ. ཨཔྤམཱདཝིཧཱརིནོཏི ཏཏྠ ཝིནིདྷཱཡ བྷཱཝཾ པཊིཔཛྫནེན ཨཔྤམཱདཀཱརིནོ. བྷིནྣལཀྑཎཱ ཨིརིཡཱཔཐཱདཡོཏི ཙཱཏུརིཡེན ཨཙཱཏུརིཡེན སཎིཀཾ, སཧསཱ ཙ གམནཱདཡོ. ན ཨུཔཔཛྫནྟཱིཏི ན ཡུཛྫནྟི. པུཙྪིཏྭཱ ཛཱནིཏབྦནྟི དྷམྨཔྤཝཏྟིཨཱདིཾ པུཙྪིཏྭཱ ཛཱནིཏབྦཾ.

༤༦. སཔྤཱཡཾ ཧིཏཾ, ཀིལེསཝིགྷཱཏཱིཏི ཨཏྠོ. ཨདྷོཏཝེདིཀནྟི ཨཔརིསུདྡྷཔརིཀྑེཔཝེདིཀཾ. བྷཱུམཊྛཀནྟི བྷཱུམིཏལེཡེཝ ཨུཊྛཱཔིཏཾ ཨུཔརིམཏལརཧིཏཾ. ཨེཀཏོ ཨོནཏསྶ པབྦཏཔཱདསྶ ཧེཊྛཱབྷཱགོ ཨཀཏབྷིཏྟིབྷཱུམིཔརིཀམྨོ ཨཀཏཔབྦྷཱརོ. ཛཏུཀཱབྷརིཏནྟི ཨདྷོམུཁཱཧི ཨོལམྦམཱནམུཁཱཧི ཁུདྡཀཝགྒུལཱིཧི པརིཔུཎྞཾ. ཨོལུགྒཝིལུགྒནྟི ཚིནྣབྷིནྣཾ. ཨུཛྫངྒལཾ ལཱུཁདྷཱུསརཾ ཚཱཡཱུདཀརཧིཏཾ. སཱིཧབྱགྒྷཱདིབྷཡེན སཱསངྐཾ. དུརཱུཔནྟི ཝིརཱུཔཾ. དུབྦཎྞནྟི ཨསུནྡརཝཎྞཾ, དུསྶཎྛཱནཾ ཝཱ. ཛཱལཱཀཱརེན ཀཏཔཱུཝཾ ཛཱལཔཱུཝཾ. སཱཎི ཝིཡ ཁརསམྥསྶནྟི སཱཎིཕལཀོ ཝིཡ དུཀྑསམྥསྶཾ. བྷཱརིཀབྷཱཝེན, ཨནྟརནྟརཱ ཏུནྣཀརཎེན ཙ ཀིཙྪཔརིཧརཎཾ. ཨཱཎིགཎྛིཀཱཧཏོཏི ཨཱཎིནཱ, གཎྛིཡཱ ཙ ཧཏསོབྷོ. ཨིདཾ རཱགཙརིཏསྶ སཔྤཱཡཾ, ཨེཝམསྶ ཀིལེསསམུདཱཙཱརོ ན ཧོཏཱིཏི ཨདྷིཔྤཱཡོ. ཨེསེཝ ནཡོ སེསེསུཔི.

དིསཱམུཁནྟི དིསཱབྷིམུཁཾ, ཨབྦྷོཀཱསཱབྷིམུཁནྟི ཨདྷིཔྤཱཡོ. མཧཱཀསིཎནྟི མཧནྟཾ ཀསིཎམཎྜལཾ. སེསཾ སེནཱསནཱདཱིསུ ཡཾ ཝཏྟབྦཾ མོཧཙརིཏསྶ, ཏཾ དོསཙརིཏསྶ ཝུཏྟསདིསམེཝ.

ཝིཏཀྐཝིདྷཱཝནསྶེཝ པཙྩཡོ ཧོཏི ཡཐཱ ཏཾ ཨཱཡསྨཏོ མེགྷིཡཏྠེརསྶ. དརཱིམུཁེཏི པབྦཏཝིཝརེ. པརིཏྟནྟི སུཔྤསརཱཝམཏྟཾ.

པབྷེདཔརིཙྪེདཏོ ནིདཱནཔརིཙྪེདཏོ ཝིབྷཱཝནཔརིཙྪེདཏོ སཔྤཱཡཔརིཙྪེདཏོཏི པཙྩེཀཾ པརིཙྪེད-སདྡོ ཡོཛེཏབྦོ. ཝིབྷཱཝནཱཏི ‘‘ཨཡཾ རཱགཙརིཏོ’’ཏིཨཱདིནཱ ཛཱནནཝིབྷཱཝནཱ. ཨེཀཙྩཀསིཎཱནུསྶཏིཊྛཱནམཏྟསྶ ¶ པསངྒེན ཀཐིཏཏྟཱ ཝུཏྟཾ ‘‘ན ཙ ཏཱཝ ཙརིཡཱནུཀཱུལཾ ཀམྨཊྛཱནཾ སབྦཱཀཱརེན ཨཱཝིཀཏ’’ནྟི.

ཙཏྟཱལཱིསཀམྨཊྛཱནཝཎྞནཱ

༤༧. སངྑཱཏནིདྡེསཏོཏི ¶ སངྑཱཏཱནཾ ‘‘ཙཏྟཱལཱིསཱཡཱ’’ཏི སངྑྱཱཝསེན གཧིཏཱནཾ ཨུདྡིཊྛཱནཾ ནིདྡེསཏོ. ‘‘ཨེཏྠ ཨེཏྟཀཱནི ཨུཔཙཱརཛ྄ཛྷཱནཱཝཧཱནི, ཨེཏྟཀཱནི ཨཔྤནཱཛ྄ཛྷཱནཱཝཧཱནཱི’’ཏི ཨུཔཙཱརཔྤནཱཝཧཏོ. ‘‘ཨེཏྟཀཱནི ཨེཀཛ྄ཛྷཱནིཀཱནི, ཨེཏྟཀཱནི དུཀཏིཀཛ྄ཛྷཱནིཀཱནི, ཨེཏྟཀཱནི སཀལཛ྄ཛྷཱནིཀཱནཱི’’ཏི ཛྷཱནཔྤབྷེདཏོ. ‘‘ཨེཏེསུ ཨངྒསམཏིཀྐམོ, ཨེཏེསུ ཨཱརམྨཎསམཏིཀྐམོ’’ཏི ཨེཝཾ སམཏིཀྐམཏོ. ‘‘ཨེཏྟཀཱནེཏྠ ཝཌྜྷེཏབྦཱནི, ཨེཏྟཀཱནི ན ཝཌྜྷེཏབྦཱནཱི’’ཏི ཝཌྜྷནཱཝཌྜྷནཏོ. ཨཱརམྨཎཏོཏི སབྷཱཝདྷམྨནིམིཏྟནཝཏྟབྦཝསེན, ཙལིཏཱཙལིཏཝསེན ཙ ཨཱརམྨཎཝིབྷཱགཏོ. བྷཱུམིཏོཏི ཀཱམཱཝཙརཱདིབྷཱུམིཝིབྷཱགཏོ. གཧཎཏོཏི དིཊྛཱདིཝསེན གཧཎཝིབྷཱགཏོ. པཙྩཡཏོཏི ཨཱརུཔྤཱདཱིནཾ ཡཐཱརཧཾ པཙྩཡབྷཱཝཏོ. ཙརིཡཱནུཀཱུལཏོཏི རཱགཙརིཡཱདཱིནཾ ཨནུཀཱུལབྷཱཝཏོ.

ཀམྨཊྛཱནཱནཱིཏི ཨཱརམྨཎབྷཱཝེན ཡོགཀམྨསྶ པཝཏྟིཊྛཱནཱནི. ཙཏུཀྐཛ྄ཛྷཱནིཀཱཏི ཙཏུབྦིདྷརཱུཔཱཝཙརཛ྄ཛྷཱནཝནྟོ, ཏེསཾ ཨཱརམྨཎབྷཱུཏཱཏི ཨཏྠོ. ཙཏུཀྐནཡཝསེན ཙེཏཾ ཝུཏྟཾ. ཏིཀཙཏུཀྐཛ྄ཛྷཱནིཀེསཱུཏི ཏིཀཛ྄ཛྷཱནིཀེསུ པུརིམེསུ བྲཧྨཝིཧཱརེསུ, ཙཏུཀྐཛ྄ཛྷཱནིཀེསུ ཨཱནཱཔཱནཀསིཎེསུ. སེསེསཱུཏི ཝུཏྟཱཝསེསེསུ ཨེཀཝཱིསཏིཡཱ ཀམྨཊྛཱནེསུ.

དིབྦཙཀྑུནཱ དིཊྛཧདཡརཱུཔསྶ སཏྟསྶ ཙིཏྟཾ ཨཱདིཀམྨིཀོ ཙེཏོཔརིཡཉཱཎེན པརིཙྪིནྡིཏུཾ སཀྐོཏི, ན ཨིཏརསྶཱཏི ཀསིཎཕརཎཾ ཙེཏོཔརིཡཉཱཎསྶ པཙྩཡོ ཧོཏི. ཏེན ཝུཏྟཾ ‘‘པརསཏྟཱནཉྩ ཙེཏསཱ ཙིཏྟམཉྙཱཏུཾ སམཏྠོ ཧོཏཱི’’ཏི. ཨོཀཱསེན པརིཙྪིནྣཏྟཱཏི ཨཏྟནོ ཋིཏོཀཱསེན པརིཙྪིནྣཏྟཱ. ཏཐཱ ཨུགྒཧཀོསལླསྶ སམྤཱདིཏཏྟཱ པརིཙྪིནྣཱཀཱརེནེཝ ཏཱནི ཨུཔཏིཊྛནྟི, ཏསྨཱ ན ཏཏྠ ཝཌྜྷནཱཏི ཨདྷིཔྤཱཡོ. སཙེ པན ཀོཙི ཝཌྜྷེཡྻ, ན ཏེན ཀོཙི གུཎོཏི དསྶེནྟོ ཨཱཧ ‘‘ཨཱནིསཾསཱབྷཱཝཱ ཙཱ’’ཏི. ‘‘ཏེསུ པནཱ’’ཏིཨཱདིནཱ ཏམེཝ ཨཱནིསཾསཱབྷཱཝཾ ཝིཝརཏི. ཡསྨཱ ཝཌྜྷིཏེསུ ཀུཎཔརཱསིཡེཝ ཝཌྜྷཏི, ཨཝཌྜྷིཏེཔི ཀཱམརཱགཝིཀྑམྦྷནཱ ¶ ཧོཏིཡེཝ, ཏསྨཱ ཨཱནིསཾསཱབྷཱཝོ. ཝིབྷཱུཏཱཏི ཝིཔུལཱརམྨཎཏཱཡ སུཔཱཀཊཱ, ཝཌྜྷིཏནིམིཏྟཏཱཡ ཨཔྤམཱཎཱརམྨཎབྷཱཝེན པརིབྱཏྟཱཏི ཨཏྠོ.

ཀེཝལནྟི ¶ སཀལཾ ཨནཝསེསཾ. ‘‘པཐཝིཾ ཨིམ’’ནྟི ཝཙནཾ ཨུཔཊྛཱནཱཀཱརེན ཝུཏྟཾ, ན ནིམིཏྟསྶ ཝཌྜྷནེནཱཏི ཨདྷིཔྤཱཡོ. ལཱབྷིཏྟཱཏི སཱཏིསཡཾ ལཱབྷིཏཱཡ, ཨུཀྐཾསགཏཝསིབྷཱཝཏོཏི ཨཏྠོ. ཐེརོ ཧི པརམཱཡ ཝསིཔཏྟིཡཱ ཨསྶམཎྜལེ ཨསྶཾ སཱརེནྟོ ཝིཡ ཡཏྠ ཏཏྠ ནིསིནྣོཔི ཋིཏོཔི ཏཾ ཛྷཱནཾ སམཱཔཛྫཏེཝ. ཏེནསྶ སམནྟཏོ ནིམིཏྟཾ ཝཌྜྷིཏཾ ཝིཡ ཨུཔཊྛཱསི. ཏེན ཝུཏྟཾ ‘‘སབྦདིསཱསཱུ’’ཏིཨཱདི.

ཝུཏྟཱཏི དྷམྨསངྒཧེ ཝུཏྟཱ. མཧནྟེཏི ཝིཔུལེ. ནིནྣཐལཱདིཝསེན ཧི ཨེཀདེསེ ཨཊྛཏྭཱ སམནྟཏོ གཧཎཝསེན སཀལསརཱིརེ ནིམིཏྟཾ གཎྷནྟསྶ ཏཾ མཧནྟཾ ཧོཏི. མཧནྟེ ཝཱ སརཱིརེ. ཨཔྤཀེཏི སརཱིརསྶ ཨེཀདེསེ ནིམིཏྟཾ གཎྷཱཏཱིཏི ཡོཛནཱ. ཨཔྤཀེ ཝཱ ཁུདྡཀེ དཱརཀསརཱིརེ. ཨེཏནྟི ཨསུབྷནིམིཏྟཾ. ཨཱདཱིནཝནྟི ‘‘ཨསུབྷརཱསི ཨེཝ ཝཌྜྷཏི, ན ཙ ཀོཙི ཨཱནིསཾསོ’’ཏི ཝུཏྟཾ ཨཱདཱིནཝཾ.

སེསཱནིཔི ན ཝཌྜྷེཏབྦཱནཱིཏི སངྑེཔཏོ ཝུཏྟམཏྠཾ ཨུཔཔཏྟིཏོ ཝིཝརིཏུཾ ‘‘ཀསྨཱ’’ཏིཨཱདི ཝུཏྟཾ. པིཙུཔིཎྜཱདིཝསེན ཨུཔཊྛཧནྟམྤི ནིམིཏྟཾ ཝཱཏསངྒྷཱཏསནྣིསྶཡནྟི ཀཏྭཱ ཝུཏྟཾ ‘‘ཝཱཏརཱསིཡེཝ ཝཌྜྷཏཱི’’ཏི. ཨོཀཱསེན པརིཙྪིནྣནྟི ནཱསིཀགྒམུཁནིམིཏྟཱདིཨོཀཱསེན སཔརིཙྪེདཾ. ཝཱཡོཀསིཎཝཌྜྷནེ ཝིཡ ན ཨེཏྠ ཀོཙི གུཎོ, ཀེཝལཾ ཝཱཏཝཌྜྷནམེཝཱཏི ཨཱཧ ‘‘སཱདཱིནཝཏྟཱ’’ཏི. ཏེསནྟི བྲཧྨཝིཧཱརཱནཾ. ནིམིཏྟནྟི ཨཱརམྨཎཾ. ན ཙ ཏེན ཨཏྠོ ཨཏྠཱིཏི ཏེན སཏྟརཱསིཝཌྜྷནེན པཐཝཱིཀསིཎཱདིཝཌྜྷནེ ཝིཡ ཀིཉྩི པཡོཛནཾ ནཏྠི. པརིགྒཧཝསེནཱཏི ཨཔརིགྒཧིཏསྶ བྷཱཝནཱཝིསཡསྶ པརིགྒཧཝསེན, ན ནིམིཏྟཝཌྜྷནཝསེན. ཏེནཱཧ ‘‘ཨེཀཱཝཱསདྭིཨཱཝཱསཱདིནཱ’’ཏིཨཱདི. ཨེཏྠཱཏི བྲཧྨཝིཧཱརབྷཱཝནཱཡཾ. ཡདཡནྟི ཡཾ པཊིབྷཱགནིམིཏྟཾ ཨཡཾ ཡོགཱི. སཱིམཱསམྦྷེདེནེཝ ཧེཏྠ ཨུཔཙཱརཛ྄ཛྷཱནུཔྤཏྟི, ན ནིམིཏྟུཔྤཏྟིཡཱ. ཡདི ཨེཝཾ ཀཐཾ པརིཏྟཱདིཨཱརམྨཎཏཱ ཛྷཱནསྶཱཏི ཨཱཧ ‘‘པརིཏྟཨཔྤམཱཎཱརམྨཎཏཱཔེཏྠ པརིགྒཧཝསེནཱ’’ཏི, ཀཏིཔཡེ སཏྟེ པརིགྒཧེཏྭཱ པཝཏྟཱ མེཏྟཱདཡོ པརིཏྟཱརམྨཎཱ, བཧུཀེ ཨཔྤམཱཎཱརམྨཎཱཏི ཨཏྠོ. ཨཱཀཱསཾ ཀསིཎུགྒྷཱཊིམཏྟཱ ན ཝཌྜྷེཏབྦནྟི ཡོཛནཱ. ཝཀྑཏི ཝཱ ཡཾ ཏེན སམྦནྡྷིཏབྦཾ. པརིཀཔྤཛམེཝ ཨཱརམྨཎཾ ཝཌྜྷེཏུཾ སཀྐཱ, ན ཨིཏརནྟི ཨཱཧ ‘‘ན ཧི སཀྐཱ སབྷཱཝདྷམྨཾ ¶ ཝཌྜྷེཏུ’’ནྟི ¶ . ཨཱརུཔྤཱནཾ པརིཏྟཨཔྤམཱཎཱརམྨཎཏཱ པརིཏྟཀསིཎུགྒྷཱཊིམཱཀཱསེ, ཝིཔུལཀསིཎུགྒྷཱཊིམཱཀཱསེ ཙ པཝཏྟིཡཱ ཝེདིཏབྦཱ. སེསཱནི བུདྡྷཱནུསྶཏིཨཱདཱིནི དས ཀམྨཊྛཱནཱནི. ཨནིམིཏྟཏྟཱཏི པཊིབྷཱགནིམིཏྟཱབྷཱཝཱ.

པཊིབྷཱགནིམིཏྟཱརམྨཎཱནཱིཏི པཊིབྷཱགནིམིཏྟབྷཱུཏཱནི ཨཱརམྨཎཱནི. སེསཱནི ཨཊྛཱརས. སེསཱནི ཚཱཏི ཙཏྟཱརོ བྲཧྨཝིཧཱརཱ, ཨཱཀཱསཱནཉྩཱཡཏནཾ, ཨཱཀིཉྩཉྙཱཡཏནནྟི ཨིམཱནི སེསཱནི ཚ. ཝིསྶནྡམཱནཔུབྦཏཱཡ ཝིཔུབྦཀཾ. པགྒྷརམཱནལོཧིཏཏཱཡ ལོཧིཏཀཾ. ཀིམཱིནཾ པཙལནེན པུལུ༹ཝཀཾ, ཙལིཏཱརམྨཎཾ ཝུཏྟཾ. ཝཱཏཔཱནཝིཝརཱདཱིཧི ཨནྟོཔཝིཊྛསྶ སཱུརིཡཱལོཀཱདིཀསྶ ཙལནཱཀཱརོ པཉྙཱཡཏཱིཏི ཨོབྷཱསམཎྜལཱརམྨཎམྤི ཙལིཏཱརམྨཎཾ ཝུཏྟཾ. པུབྦབྷཱགེཏི པཊིབྷཱགནིམིཏྟཔྤཝཏྟིཡཱ པུབྦབྷཱགེ. སནྣིསིནྣམེཝཱཏི སནྟཾ ནིཙྩལམེཝ.

དེཝེསཱུཏི ཀཱམཱཝཙརདེཝེསུ, ཏཏྠ ཨསུབྷཱནཾ པཊིཀཱུལསྶ ཙ ཨཱཧཱརསྶ ཨབྷཱཝཏོ. ཨསྶཱསཔསྶཱསཱནཾ བྲཧྨལོཀེ ཨབྷཱཝཏོ ‘‘ཨཱནཱཔཱནསྶཏི ཙཱ’’ཏི ཝུཏྟཾ.

དིཊྛེནཱཏི དིཊྛེན ཝཏྠུནཱ ཀཱརཎབྷཱུཏེན. གཧེཏབྦཱནཱིཏི ཨུགྒཧེཏབྦཱནི, ཨུཔྤཱདེཏབྦཨུགྒཧནིམིཏྟཱནཱིཏི ཨཏྠོ. ཏེནཱཧ ‘‘པུབྦབྷཱགེ’’ཏིཨཱདི. ཏསྶཱཏི ཀཱཡགཏཱསཏིཡཱ. ཨུཙྪུསསྶཱདཱིནཾ པཏྟེསུ པཙལམཱནཝཎྞགྒཧཎམུཁེན ཝཱ ཏསྶ གཧེཏབྦཏྟཱ ཝུཏྟཾ ‘‘ཝཱཡོཀསིཎཾ དིཊྛཕུཊྛེནཱ’’ཏི. ན ཨཱདིཀམྨིཀེན གཧེཏབྦཱནཱིཏི ཨཱདིཀམྨིཀེན ན གཧེཏབྦཱནི, བྷཱཝནཱརམྦྷཝསེན ན པཊྛཔེཏབྦཱནི, ཧེཊྛིམེ ཏཡོ བྲཧྨཝིཧཱརེ, ཀསིཎེསུ རཱུཔཱཝཙརཙཏུཏྠཛ྄ཛྷཱནཉྩ ཨནདྷིགནྟྭཱ སམྤཱདེཏུཾ ཨསཀྐུཎེཡྻཏྟཱ.

ཨིམེསུ པན ཀམྨཊྛཱནེསཱུཏི ཨེཏྠ ཀམྨཊྛཱནགྒཧཎེན ཡཐཱརཧཾ ཨཱརམྨཎཱནཾ, ཛྷཱནཱནཉྩ གཧཎཾ ཝེདིཏབྦཾ. སུཁཝིཧཱརསྶཱཏི དིཊྛདྷམྨསུཁཝིཧཱརསྶ.

‘‘ཨེཀཱདས ཀམྨཊྛཱནཱནི ཨནུཀཱུལཱནཱི’’ཏི ཨུཛུཝིཔཙྩནཱིཀཝསེན ཙེཏཾ ཝུཏྟཾ. ཨེཝཾ སེསེསུཔི. ཝཀྑཏི ཧི ‘‘སབྦཉྩེཏ’’ནྟིཨཱདི. ཨནུཀཱུལཱནི རཱགཝིཀྑམྦྷནསྶ ཨུཔཱཡབྷཱཝཏོ. ཨཊྛ ཨནུཀཱུལཱནཱིཏི ཡོཛནཱ. ཨེཝཾ སེསེསུ. ཨེཀནྟི ཨིདཾ ཨནུསྶཏིཨཔེཀྑཾ ཨནུསྶཏཱིསུ ཨེཀནྟི, ན མོཧཙརིཏཝིཏཀྐཙརིཏཱཔེཀྑཾ ཏེསཾ ཨཉྙསྶཱཔི ཨནུཀཱུལསྶ ཨལབྦྷནཏོ ¶ . ‘‘སདྡྷཱཙརིཏསྶ ¶ པུརིམཱ ཚ ཨནུསྶཏིཡོ’’ཏི ཨིདཾ ཨཏིསཔྤཱཡཝསེན ཝུཏྟཾ. ཨིམསྶེཝ ཨུཛུཝིཔཙྩནཱིཀཾ ཨིམསྶ ཨཏིསཔྤཱཡནྟི གཧེཏབྦསྶ ཝིསེསསྶ ཨབྷཱཝཏོ སབྦཙརིཏཱནཾ ཨནུཀཱུལཱནི. པརིཏྟནྟི སརཱཝམཏྟཾ, ཨཔྤམཱཎནྟི ཏཏོ ཨདྷིཀཔམཱཎཾ. པརིཏྟཾ ཝཱ སུཔྤསརཱཝམཏྟཾ, ཨཔྤམཱཎཾ ཨདྷིཀཔམཱཎཾ ཁལམཎྜལཱདིཀསིཎབྷཱཝེན པརིགྒཧིཏཾ.

ཙཏྟཱརོ དྷམྨཱཏི ཙཏྟཱརོ མནསིཀརཎཱིཡཱ དྷམྨཱ. ཨུཏྟརཱིཏི སཱིལསམྤདཱ, ཀལྱཱཎམིཏྟཏཱ, སཔྤཱཡདྷམྨསྶཝནཾ, ཝཱིརིཡཾ; པཉྙཱཏི ཨིམེསུ པཉྩསུ དྷམྨེསུ པཏིཊྛཱནཏོ ཨུཔརི. ཨསུབྷཱཏི ཨསུབྷབྷཱཝནཱ ཨེཀཱདསསུ ཨསུབྷཀམྨཊྛཱནེསུ བྷཱཝནཱནུཡོགཱ. མེཏྟཱཏི ཨནོདྷིསོ, ཨོདྷིསོ ཝཱ པཝཏྟཱ མེཏྟཱབྷཱཝནཱ. ཨཱནཱཔཱནསྶཏཱིཏི སོལ༹སཝཏྠུཀཱ ཨཱནཱཔཱནསྶཏིསམཱདྷིབྷཱཝནཱ. ཝིཏཀྐུཔཙྪེདཱཡཱཏི མིཙྪཱཝིཏཀྐཱནཾ ཨུཔཙྪིནྡནཏྠཱཡ. ཨནིཙྩསཉྙཱཏི ‘‘སབྦེ སངྑཱརཱ ཨནིཙྩཱ’’ཏི (ཨ. ནི. ༣.༡༣༧; དྷ. པ. ༢༧༧; མཧཱནི. ༢༧) ཨེཝཾ པཝཏྟཱ ཨནིཙྩཱནུཔསྶནཱ. ཨསྨིམཱནསམུགྒྷཱཏཱཡཱཏི ‘‘ཨསྨཱི’’ཏི ཨུཔྤཛྫནཀསྶ ནཝཝིདྷསྶཱཔི མཱནསྶ སམུཙྪིནྡནཱཡ. ཨེཏྠ ཧི ཨེཀསྶེཝ ཙཏྟཱརོ དྷམྨཱ བྷཱཝེཏབྦཱ ཝུཏྟཱ, ན ཨེཀསྶ ཙཏུཙརིཡཏཱཡ. ཏེན ཝིཉྙཱཡཏི ‘‘སབྦཱནིཔི ཀམྨཊྛཱནཱནི སབྦཱཀུསལཝིཀྑམྦྷནཱནི སབྦཀུསལཔརིབྲཱུཧནཱནཱི’’ཏི.

ཨེཀསྶེཝ སཏྟ ཀམྨཊྛཱནཱནི ཝུཏྟཱནི, ན ཙཱཡསྨཱ རཱཧུལོ སབྦཙརིཏོཏི ཨདྷིཔྤཱཡོ. ཝཙནམཏྟེཏི ‘‘ཨསུཀཀམྨཊྛཱནཾ ཨསུཀཙརིཏསྶ ཨནུཀཱུལ’’ནྟི ཨེཝཾ ཝུཏྟཝཙནམཏྟེ. ཨདྷིཔྤཱཡོཏི ཏཐཱཝཙནསྶ ཨདྷིཔྤཱཡོ. སོ པན ‘‘སབྦཉྩེཏ’’ནྟིཨཱདིནཱ ཝིབྷཱཝིཏོ ཨེཝ.

༤༨. ‘‘པིཡོ གརཱུ’’ཏིཨཱདིནཱ (ཨ. ནི. ༧.༣༧) ཝུཏྟཔྤཀཱརཾ ཀལྱཱཎམིཏྟཾ. ‘‘ཨཏྟནོ པཏྟཙཱིཝརཾ སཡམེཝ གཧེཏྭཱ’’ཏིཨཱདིནཱ ཝུཏྟནཡེན ཨུཔསངྐམིཏྭཱ. སོམནསྶམེཝ ཨུཔྤཛྫཏི ‘‘ཨེཝཾ བཧུཔརིསྶཡོཡཾ ཨཏྟབྷཱཝོ ཋཱནེཡེཝ མཡཱ ནིཡྻཱཏིཏོ’’ཏི. ཏེནཱཧ ‘‘ཡཐཱ ཧཱི’’ཏིཨཱདི.

ཨཏཛྫནཱིཡོཏི ན ཏཛྫེཏབྦོ ན ནིགྒཧེཏབྦོ. སྭཱཡཾ ཨཏཛྫནཱིཡབྷཱཝོ དོཝཙསྶཏཱཡ ཝཱ སིཡཱ, ཨཱཙརིཡེ ཨནིཝིཊྛཔེམཏཱཡ ཝཱཏི ཏདུབྷཡཾ དསྶེཏུཾ ‘‘དུབྦཙོ ཝཱ’’ཏིཨཱདི ཝུཏྟཾ. ཡོ ཧི ཨཱཙརིཡེན ཏཛྫིཡམཱནོ ཀོཔཉྩ དོསཉྩ ཨཔཙྩཡཉྩ པཱཏུཀརོཏི, ཡོ ཝཱ ‘‘ཀིམསྶ ¶ ¶ སནྟིཀེ ཝཱསེནཱ’’ཏི པཀྐམཏི, ཨཡཾ དུཝིདྷོཔི ཨཏཛྫནཱིཡོ. དྷམྨེནཱཏི ཨོཝཱདཱནུསཱསནིདྷམྨེན. གཱུལ༹ྷཾ གནྠནྟི ཀམྨཊྛཱནགནྠཾ, སཙྩཔཊིཙྩསམུཔྤཱདཱདིསཧིཏཾ གམྦྷཱིརཾ སུཉྙཏཱཔཊིསཾཡུཏྟཉྩ.

ཏུམྷཱཀམཏྠཱཡཱཏི ཝུཏྟེཏི ‘‘སཏཔོརིསེ པཔཱཏེ པཏནེན ཏུམྷཱཀཾ ཀོཙི ཨཏྠོ ཧོཏཱི’’ཏི ཀེནཙི ཝུཏྟེ. གྷཾསེནྟོཏི ‘‘མནུསྶཀཀྐེན ཏུམྷཱཀཾ ཀོཙི ཨཏྠོ’’ཏི ཝུཏྟེ གྷཾསེནྟོ ནིརཝསེསཾ ཨཏྟབྷཱཝཾ ཁེཔེཏུཾ ཨུསྶཧེཡྻཾ. ‘‘མམ ཨསྶཱསཔསྶཱསནིརུནྡྷནེན ཏུམྷཱཀཾ ཀོཙི རོགཝཱུཔསམཱདིཀོ ཨཏྠོ ཨཏྠཱི’’ཏི ཀེནཙི ཝུཏྟེ. ཏཱིཧིཔི བྷིཀྑཱུཧི ཨཱཙརིཡེ བྷཏྟིཔཝེདནམུཁེན ཝཱིརིཡཱརམྦྷོ ཨེཝ པཝེདིཏོ.

༤༩. ཨཉྙཏྠ པཝཏྟིཏྭཱཔི ཙིཏྟཾ ཨཱགམྨ ཡཏྠ སེཏི, སོ ཏསྶ ཨཱསཡོ ‘‘མིགཱསཡོ’’ ཝིཡ, ཨཱསཡོ ཨེཝ ཨཛ྄ཛྷཱསཡོ. སོ དུཝིདྷོ ཝིཔནྣོ, སམྤནྣོཏི. ཏཏྠ ཝིཔནྣོ སསྶཏཱདིམིཙྪཱབྷིནིཝེསནིསྶིཏོ. སམྤནྣོ དུཝིདྷོ ཝཊྚནིསྶིཏོ, ཝིཝཊྚནིསྶིཏོཏི. ཏེསུ ཝིཝཊྚནིསྶིཏོ ཨཛ྄ཛྷཱསཡོ ‘‘སམྤནྣཛ྄ཛྷཱསཡེནཱ’’ཏི ཨིདྷཱདྷིཔྤེཏོ. ཨིདཱནི ནཾ ཝིབྷཱགེན དསྶེཏུཾ ‘‘ཨལོབྷཱདཱིནཾ ཝསེནཱ’’ཏིཨཱདི ཝུཏྟཾ. ཏཏྠ ཚཧཱཀཱརེཧཱིཏི ཨལུབྦྷནཱདཱིཧི ཚཧི ཨཱཀཱརེཧི. སམྤནྣཛ྄ཛྷཱསཡེནཱཏི པུབྦབྷཱགིཡཱནཾ སཱིལསམྤདཱདཱིནཾ སཱདྷནཝསེན, ལོཀུཏྟརཱནཾ ཨུཔནིསྶཡབྷཱཝེན ཙ སམྤནྣོ ཨཛ྄ཛྷཱསཡོ ཨེཏསྶཱཏི སམྤནྣཛ྄ཛྷཱསཡོ, ཏེན. ཨལོབྷཱདཡོ ཧི ཨནེཀདོསཝིདྷམནཏོ, ཨནེཀགུཎཱཝཧཏོ ཙ སཏྟཱནཾ བཧུཀཱརཱ ཝིསེསཏོ ཡོགིནོ. ཏཐཱ ཧི ཨལོབྷཱདཡོ མཙྪེརམལཱདཱིནཾ པཊིཔཀྑབྷཱཝེན པཝཏྟནྟི. ཝུཏྟཾ ཧེཏཾ (དྷ. ས. ཨཊྛ. ༡ མཱུལརཱསཱིཝཎྞནཱ) –

‘‘ཨལོབྷོ མཙྪེརམལསྶ པཊིཔཀྑོ, ཨདོསོ དུསྶཱིལྱམལསྶ, ཨམོཧོ ཀུསལེསུ དྷམྨེསུ ཨབྷཱཝནཱཡ. ཨལོབྷོ ཙེཏྠ དཱནཧེཏུ, ཨདོསོ སཱིལཧེཏུ, ཨམོཧོ བྷཱཝནཱཧེཏུ. ཏེསུ ཙ ཨལོབྷེན ཨནདྷིཀཾ གཎྷཱཏི ལུདྡྷསྶ ཨདྷིཀགྒཧཎཏོ, ཨདོསེན ཨནཱུནཾ དུཊྛསྶ ཨཱུནགྒཧཎཏོ, ཨམོཧེན ཨཝིཔརཱིཏཾ མཱུལ༹ྷསྶ ཝིཔརཱིཏགྒཧཎཏོ.

‘‘ཨལོབྷེན ¶ ཙེཏྠ ཝིཛྫམཱནཾ དོསཾ དོསཏོ དྷཱརེནྟོ དོསེ པཝཏྟཏི, ལུདྡྷོ ཧི དོསཾ པཊིཙྪཱདེཏི. ཨདོསེན ཝིཛྫམཱནཾ གུཎཾ གུཎཏོ དྷཱརེནྟོ གུཎེ པཝཏྟཏི, དུཊྛོ ཧི གུཎཾ མཀྑེཏི. ཨམོཧེན ཡཱཐཱཝསབྷཱཝཾ ཡཱཐཱཝསབྷཱཝཏོ དྷཱརེནྟོ ཡཱཐཱཝསབྷཱཝེ པཝཏྟཏི ¶ , མཱུལ༹ྷོ ཧི ཏཙྪཾ ‘ཨཏཙྪ’ནྟི, ཨཏཙྪཉྩ ‘ཏཙྪ’ནྟི གཎྷཱཏི. ཨལོབྷེན ཙ པིཡཝིཔྤཡོགདུཀྑཾ ན ཧོཏི ལུདྡྷསྶ པིཡསབྦྷཱཝཏོ, པིཡཝིཔྤཡོགཱསཧནཏོ ཙ, ཨདོསེན ཨཔྤིཡསམྤཡོགདུཀྑཾ ན ཧོཏི དུཊྛསྶ ཨཔྤིཡསབྦྷཱཝཏོ, ཨཔྤིཡསམྤཡོགཱསཧནཏོ ཙ, ཨམོཧེན ཨིཙྪིཏཱལཱབྷདུཀྑཾ ན ཧོཏི, ཨམཱུལ༹ྷསྶ ཧི ‘ཏཾ ཀུཏེཏྠ ལབྦྷཱ’ཏི ཨེཝམཱདིཔཙྩཝེཀྑཎསབྦྷཱཝཏོ.

‘‘ཨལོབྷེན ཙེཏྠ ཛཱཏིདུཀྑཾ ན ཧོཏི ཨལོབྷསྶ ཏཎྷཱཔཊིཔཀྑཏོ, ཏཎྷཱམཱུལཀཏྟཱ ཙ ཛཱཏིདུཀྑསྶ, ཨདོསེན ཛརཱདུཀྑཾ ན ཧོཏི ཏིཀྑདོསསྶ ཁིཔྤཾ ཛརཱསམྦྷཝཏོ, ཨམོཧེན མརཎདུཀྑཾ ན ཧོཏི, སམྨོཧམརཎཉྷི དུཀྑཾ, ན ཙ ཏཾ ཨམཱུལ༹ྷསྶ ཧོཏི. ཨལོབྷེན ཙ གཧཊྛཱནཾ, ཨམོཧེན པབྦཛིཏཱནཾ, ཨདོསེན པན སབྦེསམྤི སུཁསཾཝཱསཏཱ ཧོཏི.

‘‘ཝིསེསཏོ ཙེཏྠ ཨལོབྷེན པེཏྟིཝིསཡེ ཨུཔཔཏྟི ན ཧོཏི, ཡེབྷུཡྻེན ཧི སཏྟཱ ཏཎྷཱཡ པེཏྟིཝིསཡཾ ཨུཔཔཛྫནྟི, ཏཎྷཱཡ ཙ པཊིཔཀྑོ ཨལོབྷོ. ཨདོསེན ནིརཡེ ཨུཔཔཏྟི ན ཧོཏི, དོསེན ཧི ཙཎྜཛཱཏིཏཱཡ དོསསདིསཾ ནིརཡཾ ཨུཔཔཛྫནྟི, དོསསྶ ཙ པཊིཔཀྑོ ཨདོསོ. ཨམོཧེན ཏིརཙྪཱནཡོནིཡཾ ནིབྦཏྟི ན ཧོཏི, མོཧེན ཧི ནིཙྩསམྨཱུལ༹ྷཾ ཏིརཙྪཱནཡོནིཾ ཨུཔཔཛྫནྟི, མོཧཔཊིཔཀྑོ ཙ ཨམོཧོ. ཨེཏེསུ ཙ ཨལོབྷོ རཱགཝསེན ཨུཔགམནསྶ ཨབྷཱཝཀརོ, ཨདོསོ དོསཝསེན ཨཔགམནསྶ, ཨམོཧོ མོཧཝསེན ཨམཛ྄ཛྷཏྟབྷཱཝསྶ.

‘‘ཏཱིཧིཔི ¶ ཙེཏེཧི ཡཐཱཔཊིཔཱཊིཡཱ ནེཀྑམྨསཉྙཱ ཨབྱཱཔཱདསཉྙཱ ཨཝིཧིཾསཱསཉྙཱཏི ཨིམཱ ཏིསྶོ, ཨསུབྷསཉྙཱ ཨཔྤམཱཎསཉྙཱ དྷཱཏུསཉྙཱཏི ཨིམཱ ཙ ཏིསྶོ སཉྙཱཡོ ཧོནྟི. ཨལོབྷེན པན ཀཱམསུཁལླིཀཱནུཡོགཨནྟསྶ, ཨདོསེན ཨཏྟཀིལམཐཱནུཡོགཨནྟསྶ པརིཝཛྫནཾ ཧོཏི, ཨམོཧེན མཛ྄ཛྷིམཱཡ པཊིཔཏྟིཡཱ པཊིཔཛྫནཾ. ཏཐཱ ཨལོབྷེན ཨབྷིཛ྄ཛྷཱཀཱཡགནྠསྶ པབྷེདནཾ ཧོཏི, ཨདོསེན བྱཱཔཱདཀཱཡགནྠསྶ, ཨམོཧེན སེསགནྠདྭཡསྶ. པུརིམཱནི ཙ དྭེ སཏིཔཊྛཱནཱནི པུརིམཱནཾ དྭིནྣཾ ཨཱནུབྷཱཝེན, པཙྪིམཱནི པཙྪིམསྶེཝ ཨཱནུབྷཱཝེན ཨིཛ྄ཛྷནྟི.

‘‘ཨལོབྷོ ¶ ཙེཏྠ ཨཱརོགྱསྶ པཙྩཡོ ཧོཏི, ཨལུདྡྷོ ཧི ལོབྷནཱིཡམྤི ཨསཔྤཱཡཾ ན སེཝཏི, ཏེན ཨརོགོ ཧོཏི. ཨདོསོ ཡོབྦནསྶ, ཨདུཊྛོ ཧི ཝལིཏཔལིཏཱཝཧེན དོསགྒིནཱ ཨཌཡ྄ཧམཱནོ དཱིགྷརཏྟཾ ཡུཝཱ ཧོཏི. ཨམོཧོ དཱིགྷཱཡུཀཏཱཡ, ཨམཱུལ༹ྷོ ཧི ཧིཏཱཧིཏཾ ཉཏྭཱ ཨཧིཏཾ པརིཝཛྫེནྟོ, ཧིཏཉྩ པཊིསེཝམཱནོ དཱིགྷཱཡུཀོ ཧོཏི.

‘‘ཨལོབྷོ ཙེཏྠ བྷོགསམྤཏྟིཡཱ པཙྩཡོ ཙཱགེན བྷོགཔཊིལཱབྷཏོ, ཨདོསོ མིཏྟསམྤཏྟིཡཱ མེཏྟཱཡ མིཏྟཱནཾ པཊིལཱབྷཏོ, ཨཔརིཧཱནཏོ ཙ, ཨམོཧོ ཨཏྟསམྤཏྟིཡཱ, ཨམཱུལ༹ྷོ ཧི ཨཏྟནོ ཧིཏམེཝ ཀརོནྟོ ཨཏྟཱནཾ སམྤཱདེཏི. ཨལོབྷོ ཙ དིབྦཝིཧཱརསྶ པཙྩཡོ ཧོཏི, ཨདོསོ བྲཧྨཝིཧཱརསྶ, ཨམོཧོ ཨརིཡཝིཧཱརསྶ.

‘‘ཨལོབྷེན ཙེཏྠ སཀཔཀྑེསུ སཏྟསངྑཱརེསུ ནིབྦུཏོ ཧོཏི ཏེསཾ ཝིནཱསེན ཨབྷིསངྒཧེཏུཀསྶ དུཀྑསྶ ཨབྷཱཝཱ, ཨདོསེན པརཔཀྑེསུ, ཨདུཊྛསྶ ཧི ཝེརཱིསུཔི ཝེརིསཉྙཱཡ ཨབྷཱཝཏོ, ཨམོཧེན ཨུདཱསཱིནཔཀྑེསུ ཨམཱུལ༹ྷསྶ སབྦཱབྷིསངྒཏཱཡ ཨབྷཱཝཏོ.

‘‘ཨལོབྷེན ¶ ཙ ཨནིཙྩདསྶནཾ ཧོཏི, ལུདྡྷོ ཧི ཨུཔབྷོགཱསཱཡ ཨནིཙྩེཔི སངྑཱརེ ཨནིཙྩཏོ ན པསྶཏི. ཨདོསེན དུཀྑདསྶནཾ, ཨདོསཛ྄ཛྷཱསཡོ ཧི པརིཙྩཏྟཨཱགྷཱཏཝཏྠུཔརིགྒཧོ སངྑཱརེཡེཝ དུཀྑཏོ པསྶཏི. ཨམོཧེན ཨནཏྟདསྶནཾ, ཨམཱུལ༹ྷོ ཧི ཡཱཐཱཝགཧཎཀུསལོ ཨཔརིཎཱཡཀཾ ཁནྡྷཔཉྩཀཾ ཨཔརིཎཱཡཀཏོ བུཛ྄ཛྷཏི. ཡཐཱ ཙ ཨེཏེཧི ཨནིཙྩདསྶནཱདཱིནི, ཨེཝཾ ཨེཏེཔི ཨནིཙྩདསྶནཱདཱིཧི ཧོནྟི. ཨནིཙྩདསྶནེན ཧི ཨལོབྷོ ཧོཏི, དུཀྑདསྶནེན ཨདོསོ, ཨནཏྟདསྶནེན ཨམོཧོ. ཀོ ཧི ནཱམ ‘ཨནིཙྩམིད’ནྟི སམྨཱ ཉཏྭཱ ཏསྶཏྠཱཡ པིཧཾ ཨུཔྤཱདེཡྻ, སངྑཱརེ ཝཱ ‘དུཀྑ’ནྟི ཛཱནནྟོ ཨཔརམྤི ཨཙྩནྟཏིཁིཎཾ ཀོདྷདུཀྑཾ ཨུཔྤཱདེཡྻ, ཨཏྟསུཉྙཏཉྩ བུཛ྄ཛྷིཏྭཱ པུན སམྨོཧཾ ཨཱཔཛྫེཡྻཱ’’ཏི.

ཏེན ཝུཏྟཾ ‘‘པུབྦབྷཱགིཡཱནཾ སཱིལསམྤདཱདཱིནཾ སཱདྷནཝསེན ལོཀུཏྟརཱནཾ, ཨུཔནིསྶཡབྷཱཝེན ཙ སམྤནྣོ ཨཛ྄ཛྷཱསཡོ ཨེཏསྶཱཏི སམྤནྣཛ྄ཛྷཱསཡོ’’ཏི. ཏེནཱཧ ‘‘ཨེཝཾ ཏིསྶནྣཾ བོདྷཱིནཾ ཨཉྙཏརཾ པཱཔུཎཱཏཱི’’ཏི.

ཨིདཱནི ¶ ཏེ ཨཛ྄ཛྷཱསཡེ པཱལི༹ཡཱཝ ཝིབྷཱཝེཏུཾ ‘‘ཡཐཱཧཱ’’ཏིཨཱདི ཝུཏྟཾ. ཏཏྠ ཚཱཏི གཎནཔརིཙྪེདོ. ཨཛ྄ཛྷཱསཡཱཏི པརིཙྪིནྣདྷམྨནིདསྶནཾ. ཨུབྷཡཾ པན ཨེཀཛ྄ཛྷཾ ཀཏྭཱ ཚབྦིདྷཱ ཨཛ྄ཛྷཱསཡཱཏི ཨཏྠོ. བོདྷིསཏྟཱཏི བུཛ྄ཛྷནཀསཏྟཱ, བོདྷིཡཱ ཝཱ ནིཡཏབྷཱཝེན སཏྟཱ ལགྒཱ, ཨདྷིམུཏྟཱ ཏནྣིནྣཱ ཏཔྤོཎཱཏི ཨཏྠོ. བོདྷིཔརིཔཱཀཱཡ སཾཝཏྟནྟཱིཏི ཡཐཱབྷིནཱིཧཱརཾ ཨཏྟནཱ པཏྟབྦབོདྷིཡཱ པརིཔཱཙནཱཡ བྷཝནྟི. ཨལོབྷཛ྄ཛྷཱསཡཱཏི ཨལུབྦྷནཱཀཱརེན པཝཏྟཨཛ྄ཛྷཱསཡཱ, ཨཱདིཏོ ‘‘ཀཐཾ ནུ ཁོ མཡཾ སབྦཏྠ, སབྦདཱ ཙ ཨལུདྡྷཱ ཨེཝ ཧེསྶཱམཱ’’ཏི, མཛ྄ཛྷེ ཙ ཨལུབྦྷནཝསེནེཝ, པཙྪཱ ཙ ཏསྶེཝ རོཙནཝསེན པཝཏྟཨཛ྄ཛྷཱསཡཱ. ལོབྷེ དོསདསྶཱཝིནོཏི ལུབྦྷནལཀྑཎེ ལོབྷེ སབྦཔྤཀཱརེན ཨཱདཱིནཝདསྶཱཝིནོ. ཨིདཾ ཏསྶ ཨཛ྄ཛྷཱསཡསྶ ཨེཀདེསཏོ བྲཱུཧནཱཀཱརདསྶནཾ. ལོབྷེ ཧི ཨཱདཱིནཝཾ, ཨལོབྷེ ཙ ཨཱནིསཾསཾ པསྶནྟསྶ ཨལོབྷཛ྄ཛྷཱསཡོ པརིཝཌྜྷཏི, སྭཱཡཾ ཏཏྠ ཨཱདཱིནཝཱནིསཾསདསྶནཝིདྷི ཝིབྷཱཝིཏོཡེཝ. སེསཔདེསུཔི ཨིམིནཱ ནཡེན ཨཏྠོ ཝེདིཏབྦོ. ཨཡཾ ¶ པན ཝིསེསོ – ནེཀྑམྨནྟི ཨིདྷ པབྦཛྫཱ. པཝིཝེཀོ ཏདངྒཝིཝེཀོ, ཝིཀྑམྦྷནཝིཝེཀོ, ཀཱཡཝིཝེཀོ, ཙིཏྟཝིཝེཀོ ཙ. ནིསྶརཎཾ ནིབྦཱནཾ. སབྦབྷཝགཏཱིསཱུཏི སབྦེསུ བྷཝེསུ, སབྦཱསུ ཙ གཏཱིསུ. ཏདདྷིམུཏྟཏཱཡཱཏི ཡདཏྠཾ བྷཱཝནཱནུཡོགོ, ཡདཏྠཱ ཙ པབྦཛྫཱ, ཏདདྷིམུཏྟེན. ཏེནེཝཱཧ ‘‘སམཱདྷཱདྷིམུཏྟེནཱ’’ཏིཨཱདི.

༥༠. ‘‘ཀིཾ ཙརིཏོསཱི’’ཏི པུཙྪིཏོ སཙེ ‘‘ན ཛཱནཱམཱི’’ཏི ཝདེཡྻ, ‘‘ཀེ ཝཱ ཏེ དྷམྨཱ བཧུལཾ སམུདཱཙརནྟཱི’’ཏི པུཙྪིཏབྦོ. ཀིཾ ཝཱཏི ཀིཾ ཨསུབྷཾ ཝཱ ཨནུསྶཏིཊྛཱནཾ ཝཱ ཨཉྙཾ ཝཱ. ཀིཾ ཏེ མནསི ཀརོཏོ ཕཱསུ ཧོཏཱིཏི ཙིཏྟསྶ ཨེཀགྒབྷཱཝེན སུཁཾ ཧོཏི. ཙིཏྟཾ ནམཏཱིཏི པཀཏིཡཱཝ ཨབྷིརཏིཝསེན ནམཏི. ཨེཝམཱདཱིཧཱིཏི ཨཱདི-སདྡེན ཨིརིཡཱཔཐཱདཱིནཾ སངྒཧོ དཊྛབྦོ. ཏེཔི ཧི ན སབྦསྶ ཨེཀཾསཏོ བྱབྷིཙཱརིནོ ཨེཝ. ཏཐཱ ཧི སམུདཱཙཱརོ པུཙྪིཏབྦོ ཝུཏྟོ. ‘‘ཨསུཀཉྩ ཨསུཀཉྩ མནསིཀཱརཝིདྷིཾ ཀཏིཔཡདིཝསཾ ཨནུཡུཉྫཱཧཱི’’ཏི ཙ ཝཏྟབྦོ.

‘‘པཀཏིཡཱ ཨུགྒཧིཏཀམྨཊྛཱནསྶཱ’’ཏི ཨིདཾ ཡཾ ཀམྨཊྛཱནཾ གཧེཏུཀཱམོ, ཏཏྠ སཛ྄ཛྷཱཡཝསེན ཝཱ མནསིཀཱརཝསེན ཝཱ ཀཏཔརིཙཡཾ སནྡྷཱཡ ཝུཏྟཾ. ཨེཀཾ དྭེ ནིསཛྫཱནཱིཏི ཨེཀཾ ཝཱ དྭེ ཝཱ ཨུཎྷཱསནཱནི. སཛ྄ཛྷཱཡཾ ཀཱརེཏྭཱ ཨཏྟནོ སམྨུཁཱཝ ཨདྷཱིཡཱཔེཏྭཱ དཱཏབྦཾ, སོ ཙེ ཨཉྙཏྠ གནྟུཀཱམོཏི ཨདྷིཔྤཱཡོ. ཏེནཱཧ ‘‘སནྟིཀེ ཝསནྟསྶཱ’’ཏི. ཨཱགཏཱགཏཀྑཎེ ཀཐེཏབྦཾ, པཝཏྟིཾ སུཏྭཱཏི ཨདྷིཔྤཱཡོ.

པཐཝཱིཀསིཎནྟི ¶ པཐཝཱིཀསིཎཀམྨཊྛཱནཾ. ཀཏསྶཱཏི ཀཏསྶ ཀསིཎསྶ. ཏཾ ཏཾ ཨཱཀཱརནྟི ཨཱཙརིཡེན ཀམྨཊྛཱནེ ཝུཙྩམཱནེ པདཔདཏྠཱདྷིཔྤཱཡཨོཔམྨཱདིཀཾ ཨཏྟནོ ཉཱཎསྶ པཙྩུཔཊྛིཏཾ ཏཾ ཏཾ ཨཱཀཱརཾ, ཡཾ ཡཾ ནིམིཏྟནྟི ཝུཏྟཾ. ཨུཔནིབནྡྷིཏྭཱཏི ཨུཔནེཏྭཱ ནིབདྡྷཾ ཝིཡ ཀཏྭཱ, ཧདཡེ ཋཔེཏྭཱ ཨཔམུསྶནྟཾ ཀཏྭཱཏི ཨཏྠོ. ཨེཝཾ སུཊྛུ ཨུཔཊྛིཏསྶཏིཏཱཡ ནིམིཏྟཾ གཧེཏྭཱ ཏཏྠ སམྤཛཱནཀཱརིཏཱཡ སཀྐཙྩཾ སུཎནྟེན. ཏནྟི ཏཾ ཡཐཱཝུཏྟཾ སུགྒཧིཏཾ ནིསྶཱཡ. ཨིཏརསྶཱཏི ཏཐཱ ཨགཎྷནྟསྶ. སབྦཱཀཱརེནཱཏི ཀསྶཙིཔི པཀཱརསྶ ཏཏྠ ཨསེསིཏཏྟཱ ཝུཏྟཾ.

ཀམྨཊྛཱནགྒཧཎནིདྡེསཝཎྞནཱ ནིཊྛིཏཱ.

ཨིཏི ཏཏིཡཔརིཙྪེདཝཎྞནཱ.

༤. པཐཝཱིཀསིཎནིདྡེསཝཎྞནཱ

༥༡. ཕཱསུ ¶ ¶ ཧོཏཱིཏི ཨཱཝཱསསཔྤཱཡཱདིལཱབྷེན མནསིཀཱརཕཱསུཏཱ བྷཱཝནཱནུཀཱུལཏཱ ཧོཏི. པརིསོདྷེནྟེནཱཏི ཏེསཾ ཏེསཾ གཎྛིཊྛཱནཱནཾ ཚིནྡནཝསེན ཝིསོདྷེནྟེན. ཨཀིལམནྟོཡེཝཱཏི ཨཀིལནྟཀཱཡོ ཨེཝ. སཏི ཧི ཀཱཡཀིལམཐེ སིཡཱ ཀམྨཊྛཱནམནསིཀཱརསྶ ཨནྟརཱཡོཏི ཨདྷིཔྤཱཡོ. གཎྛིཊྛཱནནྟི ཨཏྠཏོ, ཨདྷིཔྤཱཡཏོ ཙ དུབྦིནིཝེདྷཏཱཡ གཎྛིབྷཱུཏཾ ཋཱནཾ. ཚིནྡིཏྭཱཏི ཡཱཐཱཝཏོ ཨཏྠསྶ, ཨདྷིཔྤཱཡསྶ ཙ ཝིབྷཱཝནེན ཚིནྡིཏྭཱ, ཝིབྷཱུཏཾ སུཔཱཀཊཾ ཀཏྭཱཏི ཨདྷིཔྤཱཡོ. སུཝིསུདྡྷནྟི སུཊྛུ ཝིསུདྡྷཾ, ནིགུམྦཾ ནིཛྫཊནྟི ཨཏྠོ.

ཨནནུརཱུཔཝིཧཱརཝཎྞནཱ

༥༢. ཨཉྙཏརེནཱཏི ཨཉྙཏརེནཱཔི, པགེཝ ཨནེཀེཧཱིཏི ཨདྷིཔྤཱཡོ. མཧནྟབྷཱཝོ མཧཏྟཾ. ཏཐཱ སེསེསུ. སོཎྜཝཱ སོཎྜཱི. ཏཐཱ པཎྞནྟིཨཱདཱིསུ. བོདྷིཨངྒཎཱདཱིསུ ཀཱཏབྦཾ ཨིདྷ ‘‘ཝཏྟ’’ནྟི ཨདྷིཔྤེཏནྟི ཨཱཧ ‘‘པཱནཱིཡགྷཊཾ ཝཱ རིཏྟ’’ནྟི. ནིཊྛིཏཱཡཱཏི པཝིཊྛཔཝིཊྛཱནཾ དཱནེན པརིཀྑཱིཎཱཡ. ཛིཎྞཝིཧཱརེཔི ཡཏྲ བྷིཀྑཱུ ཨེཝཾ ཝདནྟི ‘‘ཨཱཡསྨཱ, ཡཐཱསུཁཾ སམཎདྷམྨཾ ཀརོཏུ, མཡཾ པཊིཛགྒིསྶཱམཱ’’ཏི. ཨེཝརཱུཔེ ཝིཧཱཏབྦནྟི ཨཡམྤི ནཡོ ལབྦྷཏི, ཝུཏྟནཡཏྟཱ པན ན ཝུཏྟོ.

མཧཱཔཐཝིཧཱརེཏི མཧཱཔཐསམཱིཔེ ཝིཧཱརེ. བྷཱཛནདཱརུདོཎིཀཱདཱིནཱིཏི རཛནབྷཱཛནཱནི, རཛནཏྠཱཡ དཱརུ, དཱརུམཡདོཎིཀཱ, རཛནཔཙནཊྛཱནཾ, དྷོཝནཕལཀནྟི ཨེཝམཱདཱིནི. སཱཀཧཱརིཀཱཏི སཱཀཧཱརིནིཡོ ཨིཏྠིཡོ. ཝིསབྷཱགསདྡོ ཀཱམགུཎཱུཔསཾཧིཏོ གཱིཏསདྡོཏི ཝདནྟི, ཀེཝལོཔི ཨིཏྠིསདྡོ ཝིསབྷཱགསདྡོ ཨེཝ. ཏཏྲཱཏི པུཔྥཝནྟེ ཝིཧཱརེ. ཏཱདིསོཡེཝཱཏི ‘‘ཏཏྠསྶ ཀམྨཊྛཱནཾ གཧེཏྭཱ’’ཏིཨཱདིནཱ ཡཱདིསོ པཎྞཝནྟེ ཝིཧཱརེ ཨུཔདྡཝོ ཝུཏྟོ, ཏཱདིསོཡེཝ. ‘‘པུཔྥཧཱརིཀཱཡོ པུཔྥཾ ཨོཙིནནྟིཡོ’’ཏི པན ཝཏྟབྦཾ. ཨཡམིདྷ ཝིསེསོ.

པཏྠནཱིཡེཏི ¶ ཏཏྠ ཝསནྟེསུ སམྦྷཱཝནཱཝསེན ཨུཔསངྐམནཱདིནཱ པཏྠེཏབྦེ. ཏེནཱཧ ‘‘ལེཎསམྨཏེ’’ཏི. དཀྑིཎཱགིརཱིཏི མགདྷཝིསཡེ དཀྑིཎཱགིརཱིཏི ཝདནྟི.

ཝིསབྷཱགཱརམྨཎཱནི ¶ ཨིཊྛཱནི, ཨནིཊྛཱནི ཙ. ཨནིཊྛཱནཾ ཧི དསྶནཏྠཾ ‘‘གྷཊེཧི ནིགྷཾསནྟིཡོ’’ཏིཨཱདི ཝུཏྟཾ. དབྦཱུཔཀརཎཡོགྒཱ རུཀྑཱ དབྦཱུཔཀརཎརུཀྑཱ.

ཡོ པན ཝིཧཱརོ. ཁལནྟི དྷཉྙཀརཎཊྛཱནཾ. གཱཝོ རུནྡྷནྟི ‘‘སསྶཾ ཁཱདིཾསཱུ’’ཏི. ཨུདཀཝཱརནྟི ཀེདཱརེསུ སསྶཱནཾ དཱཏབྦཨུདཀཝཱརཾ. ཨཡམྤཱིཏི མཧཱསངྒྷབྷོགོཔི ཝིཧཱརོ. ཝཱརིཡམཱནཱ ཀམྨཊྛཱནིཀེན བྷིཀྑུནཱ.

སམུདྡསཱམུདྡིཀནདཱིནིསྶིཏཾ ཨུདཀཔཊྚནཾ. མཧཱནགརཱནཾ ཨཱཡདྭཱརབྷཱུཏཾ ཨཊཝིམུཁཱདིནིསྶིཏཾ ཐལཔཊྚནཾ. ཨཔྤསནྣཱ ཧོནྟི. ཏེནསྶ ཏཏྠ ཕཱསུཝིཧཱརོ ན ཧོཏཱིཏི ཨདྷིཔྤཱཡོ. མཉྙམཱནཱ རཱཛམནུསྶཱ.

སམོསརཎེནཱཏི ཨིཏོ ཙིཏོ སཉྩརཎེན. པཔཱཏེཏི པཔཱཏསཱིསེ ཋཏྭཱ གཱཡི ‘‘གཱིཏསདྡེན ཨིདྷཱགཏཾ པཔཱཏེ པཱཏེཏྭཱ ཁཱདིསྶཱམཱི’’ཏི. ཝེགེན གཧེཏྭཱཏི ཝེགེནཱགནྟྭཱ ‘‘ཀུཧིཾ ཡཱསཱི’’ཏི ཁནྡྷེ གཧེཏྭཱ.

ཡཏྠཱཏི ཡསྨིཾ ཝིཧཱརེ, ཝིཧཱརསཱམནྟཱ ཝཱ ན སཀྐཱ ཧོཏི ཀལྱཱཎམིཏྟཾ ལདྡྷུཾ, ཏཏྠ ཝིཧཱརེ སོ ཨལཱབྷོ མཧཱདོསོཏི ཡོཛནཱ.

པནྠནིནྟི པནྠེ ནཱིཏོ པཝཏྟིཏོཏི པནྠནཱི, མགྒནིསྶིཏོ ཝིཧཱརོ. ཏཾ པནྠནིཾ. སོཎྜིནྟི སོཎྜིསཧིཏོ ཝིཧཱརོ སོཎྜཱི, ཏཾ སོཎྜིཾ. ཏཐཱ པཎྞནྟིཨཱདཱིསུ. ནགརནིསྶིཏཾ ནགརནྟི ཝུཏྟཾ ཨུཏྟརཔདལོཔེན ཡཐཱ ‘‘བྷཱིམསེནོ བྷཱིམོ’’ཏི. དཱརུནཱཏི དཱརུནིསྶིཏེན སཧ. ཝིསབྷཱགེནཱཏི ཡོ ཝིསབྷཱགེཧི ཝུསཱིཡཏི, ཝིསབྷཱགཱནཾ ཝཱ ནིཝཱསོ, སོ ཝིཧཱརོ ཝིསབྷཱགོ. ཏེན ཝིསབྷཱགེན སདྡྷིཾ. པཙྩནྟནིསྶིཏཉྩ སཱིམཱནིསྶིཏཉྩ ཨསཔྤཱཡཉྩ པཙྩནྟསཱིམཱསཔྤཱཡཾ. ཡཏྠ མིཏྟོ ན ལབྦྷཏི, ཏམྤཱིཏི སབྦཏྠ ཋཱན-སདྡཱཔེཀྑཱཡ ནཔུཾསཀནིདྡེསོ. ཨིཏི ཝིཉྙཱཡཱཏི ‘‘བྷཱཝནཱཡ ཨནནུརཱུཔཱནཱི’’ཏི ཨེཝཾ ཝིཛཱནིཏྭཱ.

ཨནུརཱུཔཝིཧཱརཝཎྞནཱ

༥༣. ཨཡཾ ¶ ཨནུརཱུཔོ ནཱམཱཏི ཨཡཾ ཝིཧཱརོ བྷཱཝནཱཡ ཨནུརཱུཔོ ནཱམ. ནཱཏིདཱུརནྟི གོཙརཊྛཱནཏོ ཨཌྜྷགཱཝུཏཏོ ཨོརབྷཱགཏཱཡ ན ¶ ཨཏིདཱུརཾ. ནཱཙྩཱསནྣནྟི པཙྪིམེན པམཱཎེན གོཙརཊྛཱནཏོ པཉྩདྷནུསཏིཀཏཱཡ ན ཨཏིཨཱསནྣཾ. ཏཱཡ ཙ པན ནཱཏིདཱུརནཱཙྩཱསནྣཏཱཡ, གོཙརཊྛཱནཾ པརིསྶཡཱདིརཧིཏམགྒཏཱཡ ཙ གམནསྶ ཙ ཨཱགམནསྶ ཙ ཡུཏྟརཱུཔཏྟཱ གམནཱགམནསམྤནྣཾ. དིཝསབྷཱགེ མཧཱཛནསཾཀིཎྞཏཱབྷཱཝེན དིཝཱ ཨཔྤཱཀིཎྞཾ. ཨབྷཱཝཏྠོ ཧི ཨཡཾ ཨཔྤ-སདྡོ ‘‘ཨཔྤིཙྪོ’’ཏིཨཱདཱིསུ (མ. ནི. ༡.༣༣༦) ཝིཡ. རཏྟིཡཾ ཛནཱལཱཔསདྡཱབྷཱཝེན རཏྟིཾ ཨཔྤསདྡཾ. སབྦདཱཔི ཛནསནྣིཔཱཏནིགྒྷོསཱབྷཱཝེན ཨཔྤནིགྒྷོསཾ. ཨཔྤཀསིརེནཱཏི ཨཀསིརེན སུཁེནེཝ. སཱིལཱདིགུཎཱནཾ ཐིརབྷཱཝཔྤཏྟིཡཱ ཐེརཱ. སུཏྟགེཡྻཱདི བཧུ སུཏཾ ཨེཏེསནྟི བཧུསྶུཏཱ. ཝཱཙུགྒཏཀརཎེན, སམྨདེཝ གརཱུནཾ སནྟིཀེ ཨཱགམིཏབྷཱཝེན ཙ ཨཱགཏོ པརིཡཏྟིདྷམྨསངྑཱཏོ ཨཱགམོ ཨེཏེསནྟི ཨཱགཏཱགམཱ. སུཏྟཱབྷིདྷམྨསངྑཱཏསྶ དྷམྨསྶ དྷཱརཎེན དྷམྨདྷརཱ. ཝིནཡསྶ དྷཱརཎེན ཝིནཡདྷརཱ. ཏེསཾཡེཝ དྷམྨཝིནཡཱནཾ མཱཏིཀཱཡ དྷཱརཎེན མཱཏིཀཱདྷརཱ. ཏཏྠ ཏཏྠ དྷམྨཔརིཔུཙྪཱཡ པརིཔུཙྪཏི. ཨཏྠཔརིཔུཙྪཱཡ པརིཔཉྷཏི ཝཱིམཾསཏི ཝིཙཱརེཏི. ཨིདཾ, བྷནྟེ, ཀཐཾ ཨིམསྶ ཀོ ཨཏྠོཏི པརིཔུཙྪནཔརིཔཉྷཱཀཱརདསྶནཾ. ཨཝིཝཊཉྩེཝ པཱལི༹ཡཱ ཨཏྠཾ པདེསནྟརཔཱལི༹དསྶནེན ཨཱགམཏོ ཝིཝརནྟི. ཨནུཏྟཱནཱིཀཏཉྩ ཡུཏྟིཝིབྷཱཝནེན ཨུཏྟཱནཱིཀརོནྟི. ཀངྑཊྛཱནིཡེསུ དྷམྨེསུ སཾསཡུཔྤཏྟིཡཱ ཧེཏུཏཱཡ གཎྛིཊྛཱནབྷཱུཏེསུ པཱལི༹པདེསེསུ ཡཱཐཱཝཏོ ཝིནིཙྪཡདཱནེན ཀངྑཾ པཊིཝིནོདེནྟི. ཨེཏྠ ཙ ‘‘ནཱཏིདཱུརཾ, ནཱཙྩཱསནྣཾ, གམནཱགམནསམྤནྣ’’ནྟི ཨེཀཾ ཨངྒཾ, ‘‘དིཝཱ ཨཔྤཱཀིཎྞཾ, རཏྟིཾ ཨཔྤསདྡཾ ཨཔྤནིགྒྷོས’’ནྟི ཨེཀཾ, ‘‘ཨཔྤཌཾསམཀསཝཱཏཱཏཔསརཱིསཔསམྥསྶ’’ནྟི ཨེཀཾ, ‘‘ཏསྨིཾ ཁོ པན སེནཱསནེ ཝིཧརནྟསྶ…པེ… པརིཀྑཱརཱ’’ཏི ཨེཀཾ, ‘‘ཏསྨིཾ ཁོ པན སེནཱསནེ ཐེརཱ…པེ… ཀངྑཾ པཊིཝིནོདེནྟཱི’’ཏི ཨེཀཾ. ཨེཝཾ པཉྩ ཨངྒཱནི ཝེདིཏབྦཱནི.

ཁུདྡཀཔལིབོདྷཝཎྞནཱ

༥༤. ཁུདྡཀཔལིབོདྷུཔཙྪེདེ པཡོཛནཾ པརཏོ ཨཱགམིསྶཏི. ཨགྒལ༹ཨནུཝཱཏཔརིབྷཎྜདཱནཱདིནཱ དལ༹ྷཱིཀམྨཾ ཝཱ. ཏནྟཙྪེདཱདཱིསུ ཏུནྣཀམྨཾ ཝཱ ཀཱཏབྦཾ.

བྷཱཝནཱཝིདྷཱནཝཎྞནཱ

༥༥. སབྦཀམྨཊྛཱནཝསེནཱཏི ¶ ¶ ཨནུཀྐམེན ནིདྡིསིཡམཱནསྶ ཙཏྟཱལཱིསཝིདྷསྶ སབྦསྶ ཀམྨཊྛཱནསྶ ཝསེན. པིཎྜཔཱཏཔཊིཀྐནྟེནཱཏི པིཎྜཔཱཏཔརིབྷོགཏོ པཊིནིཝཏྟེན, པིཎྜཔཱཏབྷུཏྟཱཝིནཱ ཨོནཱིཏཔཏྟཔཱཎིནཱཏི ཨཏྠོ. བྷཏྟསམྨདཾ པཊིཝིནོདེཏྭཱཏི བྷོཛནནིམིཏྟཾ པརིསྶམཾ ཝིནོདེཏྭཱ. ཨཱཧཱརེ ཧི ཨཱསཡཾ པཝིཊྛམཏྟེ ཏསྶ ཨཱགནྟུཀཏཱཡ ཡེབྷུཡྻེན སིཡཱ སརཱིརསྶ ཀོཙི པརིསྶམོ, ཏཾ ཝཱུཔསམེཏྭཱ. ཏསྨིཾ ཧི ཨཝཱུཔསནྟེ སརཱིརཁེདེན ཙིཏྟཾ ཨེཀགྒཏཾ ན ལབྷེཡྻཱཏི. པཝིཝིཏྟེཏི ཛནཝིཝིཏྟེ. སུཁནིསིནྣེནཱཏི པལླངྐཾ ཨཱབྷུཛིཏྭཱ ཨུཛུཾ ཀཱཡཾ པཎིདྷཱཡ ནིསཛྫཱཡ སུཁནིསིནྣེན. ཝུཏྟཉྷེཏནྟི ཡཾ ‘‘ཀཏཱཡ ཝཱ’’ཏིཨཱདིནཱ པཐཝིཡཱ ནིམིཏྟགྒཧཎཾ ཨིདྷ ཝུཙྩཏི, ཝུཏྟཾ ཧེཏཾ པོརཱཎཊྛཀཐཱཡཾ.

ཨིདཱནི ཏཾ ཨཊྛཀཐཱཔཱལི༹ཾ དསྶེནྟོ ‘‘པཐཝཱིཀསིཎཾ ཨུགྒཎྷནྟོ’’ཏིཨཱདིམཱཧ. ཏཏྠཱཡཾ སངྑེཔཏྠོ – པཐཝཱིཀསིཎཾ ཨུགྒཎྷནྟོཏི ཨུགྒཧནིམིཏྟབྷཱཝེན པཐཝཱིཀསིཎཾ གཎྷནྟོ ཨཱདིཡནྟོ, ཨུགྒཧནིམིཏྟབྷཱུཏཾ པཐཝཱིཀསིཎཾ ཨུཔྤཱདེནྟོཏི ཨཏྠོ. ཨུཔྤཱདནཉྩེཏྠ ཏཐཱནིམིཏྟསྶ ཨུཔཊྛཱཔནཾ དཊྛབྦཾ. པཐཝིཡནྟི ཝཀྑམཱནཝིསེསེ པཐཝཱིམཎྜལེ. ནིམིཏྟཾ གཎྷཱཏཱིཏི ཏཏྠ ཙཀྑུནཱ ཨཱདཱསཏལེ མུཁནིམིཏྟཾ ཝིཡ བྷཱཝནཱཉཱཎེན ཝཀྑམཱནཝིསེསཾ པཐཝཱིནིམིཏྟཾ གཎྷཱཏི. ‘‘པཐཝིཡ’’ནྟི ཝཏྭཱཔི མཎྜལཱཔེཀྑཱཡ ནཔུཾསཀནིདྡེསོ. ཀཏེཏི ཝཀྑམཱནཝིདྷིནཱ ཨབྷིསངྑཏེཏི ཨཏྠོ. ཝཱ-སདྡོ ཨནིཡམཏྠོ. ཨཀཏེཏི པཱཀཏིཀེ ཁལམཎྜལཱདིཀེ པཐཝཱིམཎྜལེ. སཱནྟཀེཏི སཨནྟཀེ ཨེཝ, སཔརིཙྪེདེ ཨེཝཱཏི ཨཏྠོ. སཱཝདྷཱརཎཉྷེཏཾ ཝཙནཾ. ཏཐཱ ཧི ཏེན ནིཝཏྟིཏཾ དསྶེཏུཾ ‘‘ནོ ཨནནྟཀེ’’ཏི ཝུཏྟཾ. སཀོཊིཡེཏིཨཱདཱིནིཔི ཏསྶེཝ ཝེཝཙནཱནི. སུཔྤམཏྟེ ཝཱཏིཨཱདཱིསུ སུཔྤསརཱཝཱནི སམཔྤམཱཎཱནི ཨིཙྪིཏཱནི. ཀེཙི པན ཝདནྟི ‘‘སརཱཝམཏྟཾ ཝིདཏྠིཙཏུརངྒུལཾ ཧོཏི, སུཔྤམཏྟཾ ཏཏོ ཨདྷིཀཔྤམཱཎནྟི. ཀིཏྟིམཾ ཀསིཎམཎྜལཾ ཧེཊྛིམཔརིཙྪེདེན སརཱཝམཏྟཾ, ཨུཔརིམཔརིཙྪེདེན སུཔྤམཏྟཾ, ན ཏཏོ ཨདྷོ, ཨུདྡྷཾ ཝཱཏི པརིཏྟཔྤམཱཎབྷེདསངྒཎྷནཏྠཾ ‘སུཔྤམཏྟེ ཝཱ སརཱཝམཏྟེ ཝཱ’ཏི ཝུཏྟ’’ནྟི. ཡཐཱཨུཔཊྛིཏེ ཨཱརམྨཎེ ཨེཀངྒུལམཏྟམྤི ཝཌྜྷིཏཾ ཨཔྤམཱཎམེཝཱཏི ཝུཏྟོཝཱཡམཏྠོ. ཀེཙི པན ‘‘ཚཏྟམཏྟམྤི ཀསིཎམཎྜལཾ ཀཱཏབྦ’’ནྟི ཝདནྟི.

སོ ¶ ཏཾ ནིམིཏྟཾ སུགྒཧིཏཾ ཀརོཏཱིཏི སོ ཡོགཱཝཙརོ ཏཾ པཐཝཱིམཎྜལཾ སུགྒཧིཏཾ ནིམིཏྟཾ ¶ ཀརོཏི. ཡདཱ ཙཀྑུཾ ཨུམྨཱིལེཏྭཱ ཨོལོཀེཏྭཱ ཏཏྠ ནིམིཏྟཾ གཧེཏྭཱ ནིམྨཱིལེཏྭཱ ཨཱཝཛྫེནྟསྶ ཨུམྨཱིལེཏྭཱ ཨོལོཀིཏཀྑཎེ ཝིཡ ཨུཔཊྛཱཏི, ཏདཱ སུགྒཧིཏཾ ཀརོཏི ནཱམ. ཨཐེཏྠ སཏིཾ སཱུཔཊྛིཏཾ ཀཏྭཱ ཨབཧིགཏེན མཱནསེན པུནཔྤུནཾ སལླཀྑེནྟོ སཱུཔདྷཱརིཏཾ ཨུཔདྷཱརེཏི ནཱམ. ཨེཝཾ ཨུཔདྷཱརིཏཾ པན ནཾ པུནཔྤུནཾ ཨཱཝཛྫེནྟོ མནསི ཀརོནྟོ ཏམེཝཱརབྦྷ ཨཱསེཝནཾ བྷཱཝནཾ བཧུལཾ པཝཏྟེནྟོ སུཝཝཏྠིཏཾ ཝཝཏྠཔེཏི ནཱམ. ཏསྨིཾ ཨཱརམྨཎེཏི ཨེཝཾ སུགྒཧིཏཀརཎཱདིནཱ སམྨདེཝ ཨུཔཊྛིཏེ ཏསྨིཾ པཐཝཱིཀསིཎསཉྙིཏེ ཨཱརམྨཎེ. ཙིཏྟཾ ཨུཔནིབནྡྷཏཱིཏི ཨཏྟནོ ཙིཏྟཾ ཨུཔཙཱརཛ྄ཛྷཱནཾ ཨུཔནེཏྭཱ ནིབནྡྷཏི ཨཉྙཱརམྨཎཏོ ཝིནིཝཏྟཾ ཀརོཏི. ཨདྡྷཱ ཨིམཱཡཱཏིཨཱདི ཨཱནིསཾསདསྶཱཝིཏཱདསྶནཾ.

ཨིདཱནི ཡཐཱདསྶིཏསྶ ཨཊྛཀཐཱཔཱཋསྶ ཨཏྠཔྤཀཱསནེན སདྡྷིཾ བྷཱཝནཱཝིདྷིཾ ཝིབྷཱཝེཏུཀཱམོ ཨཀཏེ ཏཱཝ ནིམིཏྟགྒཧཎཾ དསྶེནྟོ ‘‘ཏཏྠ ཡེན ཨཏཱིཏབྷཝེཔཱི’’ཏིཨཱདིམཱཧ. ཏཏྠ ཏཏྠཱཏི ཏསྨིཾ ཨཊྛཀཐཱཔཱཋེ. ཙཏུཀྐཔཉྩཀཛ྄ཛྷཱནཱནཱིཏི ཙཏུཀྐཔཉྩཀནཡཝསེན ཝདཏི. པུཉྙཝཏོཏི བྷཱཝནཱམཡཔུཉྙཝཏོ. ཨུཔནིསྶཡསམྤནྣསྶཱཏི ཏཱདིསེནེཝ ཨུཔནིསྶཡེན སམནྣཱགཏསྶ. ཁལམཎྜལེཏི མཎྜལཱཀཱརེ དྷཉྙཀརཎཊྛཱནེ. ཏཾཋཱནཔྤམཱཎམེཝཱཏི ཨོལོཀིཏཊྛཱནཔྤམཱཎམེཝ.

ཨཝིརཱདྷེཏྭཱཏི ཨཝིརཛ྄ཛྷིཏྭཱ ཝུཏྟཝིདྷིནཱ ཨེཝ. ནཱིལཔཱིཏལོཧིཏཨོདཱཏསམྦྷེདཝསེནཱཏི ནཱིལཱདིཝཎྞཱཧི མཏྟིཀཱཧི པཙྩེཀཾ, ཨེཀཛ྄ཛྷཉྩ སཾསགྒཝསེན. གངྒཱཝཧེཏི གངྒཱསོཏེ. སཱིཧལ༹དཱིཔེ ཀིར རཱཝཎགངྒཱ ནཱམ ནདཱི, ཏསྶཱ སོཏེན ཚིནྣཏཊཊྛཱནེ མཏྟིཀཱ ཨརུཎཝཎྞཱ. ཏཾ སནྡྷཱཡ ཝུཏྟཾ ‘‘གངྒཱཝཧེ མཏྟིཀཱསདིསཱཡ ཨརུཎཝཎྞཱཡཱ’’ཏི. ཨརུཎཝཎྞཱཡ ཨརུཎནིབྷཱཡ, ཨརུཎཔྤབྷཱཝཎྞཱཡཱཏི ཨཏྠོ.

ཨེཝཾ ཀསིཎདོསེ དསྶེཏྭཱ ཨིདཱནི ཀསིཎཀརཎཱདིཀེ སེསཱཀཱརེ དསྶེཏུཾ ‘‘ཏཉྩ ཁོ’’ཏིཨཱདི ཝུཏྟཾ. སཾཧཱརིམནྟི སཾཧརིཏབྦཾ གཧེཏྭཱ ཙརཎཡོགྒཾ. ཏཏྲཊྛཀནྟི ཡཏྲ ཀཏཾ, ཏཏྠེཝ ཏིཊྛནཀཾ. ཝུཏྟཔྤམཱཎནྟི ¶ ‘‘སུཔྤམཏྟེ ཝཱ སརཱཝམཏྟེ ཝཱ’’ཏི ཝུཏྟཔྤམཱཎཾ. ཝཊྚནྟི མཎྜལསཎྛཱནཾ. པརིཀམྨཀཱལེཏི ནིམིཏྟུགྒཧཎཱཡ བྷཱཝནཱཀཱལེ. ཨེཏདེཝཱཏི ཡཾ ཝིདཏྠིཙཏུརངྒུལཝིཏྠཱརཾ, ཨེཏདེཝ པམཱཎཾ སནྡྷཱཡ ‘‘སུཔྤམཏྟཾ ཝཱ སརཱཝམཏྟཾ ཝཱ’’ཏི ཝུཏྟཾ. སུཔྤཾ ཧི ནཱཏིམཧནྟཾ, སརཱཝཉྩ མཧནྟཾ ཙཱཊིཔིདྷཱནཔྤཧོནཀནྟི སམཔྤམཱཎཾ ཧོཏི.

༥༦. ཏསྨཱཏི ¶ པརིཙྪེདཏྠཱཡ ཝུཏྟཏྟཱ. ཨེཝཾ ཝུཏྟཔམཱཎཾ པརིཙྪེདནྟི ཡཐཱཝུཏྟཔྤམཱཎཾ ཝིདཏྠིཙཏུརངྒུལཝིཏྠཱརཾ པརིཙྪེདཾ ཀཏྭཱ, ཨེཝཾ ཝུཏྟཔྤམཱཎཾ ཝཱ ཀསིཎམཎྜལཾ ཝིསབྷཱགཝཎྞེན པརིཙྪེདཾ ཀཏྭཱ. རུཀྑཔཱཎིཀཱཏི ཀུཙནྡནཱདིརུཀྑཔཱཎིཀཱ ཨརུཎཝཎྞསྶ ཝིསབྷཱགཝཎྞཾ སམུཊྛཔེཏི. ཏསྨཱ ཏཾ ཨགྒཧེཏྭཱཏི ཝུཏྟཾ. པཀཏིརུཀྑཔཱཎིཀཱ པན པཱསཱཎཔཱཎིཀཱགཏིཀཱཝ. ནིནྣུནྣཏཊྛཱནཱབྷཱཝེན བྷེརཱིཏལསདིསཾ ཀཏྭཱ. ཏཏོ དཱུརཏརེཏིཨཱདི ཡཐཱཝུཏྟཏོ པདེསཏོ, པཱིཋཏོ ཙ ཨཉྙསྨིཾ ཨཱདཱིནཝདསྶནཾ. ཀསིཎདོསཱཏི ཧཏྠཔཱཎིཔདཱདཡོ ཨིདྷ ཀསིཎདོསཱ.

ཝུཏྟནཡེནེཝཱཏི ‘‘ཨཌྜྷཏེཡྻཧཏྠནྟརེ པདེསེ, ཝིདཏྠིཙཏུརངྒུལཔཱདཀེ པཱིཋེ’’ཏི ཙ ཝུཏྟཝིདྷིནཱཝ. ཀཱམེསུ ཨཱདཱིནཝནྟི ‘‘ཀཱམཱ ནཱམེཏེ ཨཊྛིཀངྐལཱུཔམཱ ནིརསྶཱདཊྛེན, ཏིཎུཀྐཱུཔམཱ ཨནུདཧནཊྛེན, ཨངྒཱརཀཱསཱུཔམཱ མཧཱབྷིཏཱཔཊྛེན, སུཔིནཀཱུཔམཱ ཨིཏྟརཔཙྩུཔཊྛཱནཊྛེན, ཡཱཙིཏཀཱུཔམཱ ཏཱཝཀཱལིཀཊྛེན, རུཀྑཕལཱུཔམཱ སབྦངྒཔཙྩངྒཔལིབྷཉྫནཊྛེན, ཨསིསཱུནཱུཔམཱ ཨདྷིཀུཊྚནཊྛེན, སཏྟིསཱུལཱུཔམཱ ཝིནིཝིཛ྄ཛྷནཊྛེན, སཔྤསིརཱུཔམཱ སཔཊིབྷཡཊྛེནཱ’’ཏིཨཱདིནཱ (པཱཙི. ཨཊྛ. ༤༡༧; མ. ནི. ཨཊྛ. ༡.༢༣༤) ‘‘ཨཔྤསྶཱདཱ ཀཱམཱ བཧུདུཀྑཱ བཧུཔཱཡཱསཱ’’ཏིཨཱདིནཱ (པཱཙི. ༤༡༧; མ. ནི. ༡.༢༣༤; ༢.༤༢) ‘‘ཀཱམསུཁཉྩ ནཱམེཏཾ བཧུཔརིསྶཡཾ, སཱསངྐཾ, སབྷཡཾ, སཾཀིལིཊྛཾ, མཱིལ༹ྷཔརིབྷོགསདིསཾ, ཧཱིནཾ, གམྨཾ, པོཐུཛྫནིཀཾ, ཨནརིཡཾ, ཨནཏྠསཾཧིཏ’’ནྟིཨཱདིནཱ ཙ ཨནེཀཱཀཱརཝོཀཱརཾ ཝཏྠུཀཱམཀིལེསཀཱམེསུ ཨཱདཱིནཝཾ དོསཾ པཙྩཝེཀྑིཏྭཱ. ཀཱམནིསྶརཎེཏི ཀཱམཱནཾ ནིསྶརཎབྷཱུཏེ, ཏེཧི ཝཱ ནིསྶཊེ. ཨགྒམགྒསྶ པཱདཀབྷཱཝེན སབྦདུཀྑསམཏིཀྐམསྶ ཨུཔཱཡབྷཱུཏེ. ནེཀྑམྨེཏི ཛྷཱནེ. ཛཱཏཱབྷིལཱསེན སཉྫཱཏཙྪནྡེན. ‘‘སམྨཱསམྦུདྡྷོ ཝཏ བྷགཝཱ ཨཝིཔརཱིཏདྷམྨདེསནཏྟཱ, སྭཱཀྑཱཏོ ¶ དྷམྨོ ཨེཀནྟནིཡྻཱནིཀཏྟཱ, སུཔྤཊིཔནྣོ སངྒྷོ ཡཐཱནུསིཊྛཾ པཊིཔཛྫནཏོ’’ཏི ཨེཝཾ བུདྡྷདྷམྨསངྒྷགུཎཱནུསྶརཎེན རཏནཏྟཡཝིསཡཾ པཱིཏིཔཱམོཛྫཾ ཛནཡིཏྭཱ. ནེཀྑམྨཾ པཊིཔཛྫཏི ཨེཏཱཡཱཏི ནེཀྑམྨཔཊིཔདཱ, སཨུཔཙཱརསྶ ཛྷཱནསྶ, ཝིཔསྶནཱཡ, མགྒསྶ, ནིབྦཱནསྶ ཙ ཨདྷིགམཀཱརཎནྟི ཨཏྠོ. པུབྦེ པན པཋམཛ྄ཛྷཱནམེཝ ནེཀྑམྨནྟི ཝུཏྟཏྟཱ ཝུཏྟཱཝསེསཱ སབྦེཔི ནེཀྑམྨདྷམྨཱ. ཡཐཱཧ –

‘‘པབྦཛྫཱ པཋམཾ ཛྷཱནཾ, ནིབྦཱནཾ ཙ ཝིཔསྶནཱ;

སབྦེཔི ཀུསལཱ དྷམྨཱ, ‘ནེཀྑམྨ’ནྟི པཝུཙྩརེ’’ཏི. (ཨིཏིཝུ. ཨཊྛ. ༡༠༩);

པཝིཝེཀསུཁརསསྶཱཏི ¶ ཙིཏྟཝིཝེཀཱདིཝིཝེཀཛསྶ སུཁརསསྶ. ཨེཝམེཏེཧི པཉྩཧི པདེཧི ‘‘ཨཱནིསཾསདསྶཱཝཱི’’ཏིཨཱདཱིནཾ པདཱནཾ ཨཏྠོ དསྶིཏོཏི དཊྛབྦཾ. སམེན ཨཱཀཱརེནཱཏི ཨཏིཨུམྨཱིལནཨཏིམནྡཱལོཙནཱནི ཝཛྫེཏྭཱ ནཱཏིཨུམྨཱིལནནཱཏིམནྡཱལོཙནསངྑཱཏེན སམེན ཨཱལོཙནཱཀཱརེན. ནིམིཏྟཾ གཎྷནྟེནཱཏི པཐཝཱིཀསིཎེ ཙཀྑུནཱ གཧིཏནིམིཏྟཾ མནསཱ གཎྷནྟེན. བྷཱཝེཏབྦནྟི ཏཐཱཔཝཏྟཾ ནིམིཏྟགྒཧཎཾ ཝཌྜྷེཏབྦཾ ཨཱསེཝིཏབྦཾ བཧུལཱིཀཱཏབྦཾ.

ཙཀྑུ ཀིལམཏི ཨཏིསུཁུམཾ, ཨཏིབྷཱསུརཉྩ རཱུཔགཏཾ ཨུཔནིཛ྄ཛྷཱཡཏོ ཝིཡ. ཨཏིཝིབྷཱུཏཾ ཧོཏི ཨཏྟནོ སབྷཱཝཱཝིབྷཱཝཏོ. ཏཐཱ ཙ ཝཎྞཏོ ཝཱ ལཀྑཎཏོ ཝཱ ཨུཔཏིཊྛེཡྻ. ཏེན ཝུཏྟཾ ‘‘ཏེནསྶ ནིམིཏྟཾ ནུཔྤཛྫཏཱི’’ཏི. ཨཝིབྷཱུཏཾ ཧོཏི གཛནིམྨཱིལནེན པེཀྑནྟསྶ རཱུཔགཏཾ ཝིཡ. ཙིཏྟཉྩ ལཱིནཾ ཧོཏི དསྶནེ མནྡབྱཱཔཱརཏཱཡ ཀོསཛྫཔཱཏཏོ. ཏེནཱཧ ‘‘ཨེཝམྤི ནིམིཏྟཾ ནུཔྤཛྫཏཱི’’ཏི. ཨཱདཱསཏལེ མུཁནིམིཏྟདསྶིནཱ ཝིཡཱཏི ཡཐཱ ཨཱདཱསཏལེ མུཁནིམིཏྟདསྶཱི པུརིསོ ན ཏཏྠ ཨཏིགཱལ༹ྷཾ ཨུམྨཱིལཏི, ནཱཔི ཨཏིམནྡཾ, ན ཨཱདཱསཏལསྶ ཝཎྞཾ པཙྩཝེཀྑཏི, ནཱཔི ལཀྑཎཾ མནསི ཀརོཏི. ཨཐ ཁོ སམེན ཨཱཀཱརེན ཨོལོཀེནྟོ ཨཏྟནོ མུཁནིམིཏྟམེཝ པསྶཏི, ཨེཝམེཝ ཨཡམྤི པཐཝཱིཀསིཎཾ སམེན ཨཱཀཱརེན ཨོལོཀེནྟོ ནིམིཏྟགྒཧཎཔྤསུཏོཡེཝ ཧོཏི, ཏེན ཝུཏྟཾ ‘‘སམེན ཨཱཀཱརེནཱ’’ཏིཨཱདི. ན ཝཎྞོ པཙྩཝེཀྑིཏབྦོཏི ཡོ ཏཏྠ པཐཝཱིཀསིཎེ ཨརུཎཝཎྞོ, སོ ན ཙིནྟེཏབྦོ. ཙཀྑུཝིཉྙཱཎེན པན གཧཎཾ ན སཀྐཱ ནིཝཱརེཏུཾ. ཏེནེཝེཏྠ ‘‘ན ཨོལོཀེཏབྦོ’’ཏི ¶ ཨཝཏྭཱ པཙྩཝེཀྑཎགྒཧཎཾ ཀཏཾ. ན ལཀྑཎཾ མནསི ཀཱཏབྦནྟི ཡཾ ཏཏྠ པཐཝཱིདྷཱཏུཡཱ ཐདྡྷལཀྑཎཾ, ཏཾ ན མནསི ཀཱཏབྦཾ.

དིསྭཱ གཧེཏབྦཏྟཱ ‘‘ཝཎྞཾ ཨམུཉྩིཏྭཱ’’ཏི ཝཏྭཱཔི ཝཎྞཝསེནེཏྠ ཨཱབྷོགོ ན ཀཱཏབྦོ, སོ པན ཝཎྞོ ནིསྶཡགཏིཀོ ཀཱཏབྦོཏི དསྶེནྟོ ཨཱཧ ‘‘ནིསྶཡསཝཎྞཾ ཀཏྭཱ’’ཏི. ནིསྶཡེན སམཱནཱཀཱརསནྣིསྶིཏོ སོ ཝཎྞོ ཏཱཡ པཐཝིཡཱ སམཱནགཏིཀཾ ཀཏྭཱ, ཝཎྞེན སཧེཝ ‘‘པཐཝཱི’’ཏི མནསི ཀཱཏབྦནྟི ཨཏྠོ. ཨུསྶདཝསེན པཎྞཏྟིདྷམྨེཏི པཐཝཱིདྷཱཏུཡཱ ཨུསྶནྣབྷཱཝེན སཏྟིཏོ ཨདྷིཀབྷཱཝེན སསམྦྷཱརཔཐཝིཡཾ ‘‘པཐཝཱི’’ཏི ཡོ ལོཀཝོཧཱརོ, ཏསྨིཾ པཎྞཏྟིདྷམྨེ ཙིཏྟཾ པཊྛཔེཏྭཱ ‘‘པཐཝཱི, པཐཝཱི’’ཏི མནསི ཀཱཏབྦཾ. ཡདི ལོཀཝོཧཱརེན པཎྞཏྟིམཏྟེ ཙིཏྟཾ ཋཔེཏབྦཾ, ནཱམནྟརཝསེནཔི པཐཝཱི མནསི ཀཱཏབྦཱ བྷཝེཡྻཱཏི, ཧོཏུ, ཀོ དོསོཏི དསྶེནྟོ ‘‘མཧཱི མེདིནཱི’’ཏིཨཱདིམཱཧ. ཏཏྠ ཡམིཙྪཏཱིཏི ཡཾ ནཱམཾ ཝཏྟུཾ ཨིཙྪཏི, ཏཾ ཝཏྟབྦཾ. ཏཉྩ ཁོ ཡདསྶ སཉྙཱནུཀཱུལཾ ¶ ཧོཏི ཡཾ ནཱམཾ ཨསྶ ཡོགིནོ པུབྦེ ཏཏྠ གཧིཏསཉྙཱཝསེན ཨནུཀཱུལཾ པཙུརཏཱཡ, པགུཎཏཱཡ ཝཱ ཨཱགཙྪཏི, ཏཾ ཝཏྟབྦཾ. ཝཏྟབྦནྟི ཙ པཋམསམནྣཱཧཱརེ ཀསྶཙི ཝཙཱིབྷེདོཔི ཧོཏཱིཏི ཀཏྭཱ ཝུཏྟཾ, ཨཱཙརིཡེན ཝཱ ཝཏྟབྦཏཾ སནྡྷཱཡ. ཀིཾ ཝཱ བཧུནཱ, པཱཀཊབྷཱཝོཡེཝེཏྠ པམཱཎནྟི དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ཀཱལེན ཨུམྨཱིལེཏྭཱ ཀཱལེན ནིམྨཱིལེཏྭཱཏི ཀིཉྩི ཀཱལཾ ཙཀྑུཾ ཨུམྨཱིལེཏྭཱ ནིམིཏྟགྒཧཎཝསེན པཐཝཱིམཎྜལཾ ཨོལོཀེཏྭཱ པུན ཀིཉྩི ཀཱལཾ ཙཀྑུཾ ནིམྨཱིལེཏྭཱ ཨཱཝཛྫིཏབྦཾ. ཡེནཱཀཱརེན ཨོལོཀེཏྭཱ གཧིཏཾ, ཏེནཱཀཱརེན པུན ཏཾ སམནྣཱཧརིཏབྦཾ.

༥༧. ཨཱཔཱཐམཱགཙྪཏཱིཏི མནོདྭཱརིཀཛཝནཱནཾ གོཙརབྷཱཝཾ ཨུཔགཙྪཏི. ཏསྶ ཨུགྒཧནིམིཏྟསྶ. ན ཏསྨིཾ ཋཱནེ ནིསཱིདིཏབྦཾ. ཀསྨཱ? ཡདི ཨུགྒཧནིམིཏྟེ ཛཱཏེཔི པཐཝཱིམཎྜལཾ ཨོལོཀེཏྭཱ བྷཱཝེཏི, པཊིབྷཱགནིམིཏྟུཔྤཏྟི ན སིཡཱ. སམཱིཔཊྛེན ཙ ན ཨོལོཀེཏུཾ ན སཀྐཱ. ཏེན ཝུཏྟཾ ‘‘ཨཏྟནོ ཝསནཊྛཱནཾ པཝིསིཏྭཱ’’ཏིཨཱདི. ནིསྶདྡབྷཱཝཱཡ ཨེཀཔཊལིཀཱུཔཱཧནཱགཧཎཾ, པརིསྶཡཝིནོདནཏྠཾ ཀཏྟརདཎྜགྒཧཎཾ. སཙེ ནསྶཏི, ཨཐཱནེན བྷཱཝེཏབྦནྟི སམྦནྡྷོ. ཝཀྑམཱནེསུ ཨསཔྤཱཡེསུ ཀེནཙིདེཝ ཨསཔྤཱཡེན ཀཱརཎབྷཱུཏེན. ནིམིཏྟཾ ཨཱདཱཡཱཏི ཡཐཱཛཱཏཾ ཨུགྒཧནིམིཏྟཾ གཧེཏྭཱ. སམནྣཱཧརིཏབྦནྟི ཨཱཝཛྫིཏབྦཾ ནིམིཏྟནྟི ཨདྷིཔྤཱཡོ, སམྨཱ ཝཱ ཨནུ ¶ ཨནུ ཨཱཧརིཏབྦཾ ཀམྨཊྛཱནནྟི ཨཏྠོ. ཏཀྐཱཧཏཾ ཝིཏཀྐཱཧཏནྟི ཏཀྐནཏོ, སཝིསེསཾ ཏཀྐནཏོ ཙ ‘‘ཏཀྐོ, ཝིཏཀྐོ’’ཏི ཙ ཨེཝཾ ལདྡྷནཱམེན བྷཱཝནཱཙིཏྟསམྤཡུཏྟེན སམྨཱསངྐཔྤེན ཨཱཧནནཔརིཡཱཧནནཀིཙྩེན ཨཔརཱཔརཾ ཝཏྟམཱནེན ཀམྨཊྛཱནཾ ཨཱཧཏཾ, པརིཡཱཧཏཉྩ ཀཱཏབྦཾ, བལཔྤཏྟཝིཏཀྐོ མནསིཀཱརོ བཧུལཾ པཝཏྟེཏབྦོཏི ཨཏྠོ. ཨེཝཾ ཀརོནྟསྶཱཏི ཨེཝཾ ཀམྨཊྛཱནཾ ཏཀྐཱཧཏཾ ཝིཏཀྐཱཧཏཾ ཀརོནྟསྶ. ཡཐཱ བྷཱཝནཱ པུབྦེནཱཔརཾ ཝིསེསཾ ཨཱཝཧཏི, ཨེཝཾ ཨནུཡུཉྫནྟསྶ. ཨནུཀྐམེནཱཏི བྷཱཝནཱནུཀྐམེན. ཡདཱ སདྡྷཱདཱིནི ཨིནྡྲིཡཱནི སུཝིསདཱནི ཏིཀྑཱནི པཝཏྟནྟི, ཏདཱ ཨསྶདྡྷིཡཱདཱིནཾ དཱུརཱིབྷཱཝེན སཱཏིསཡཐཱམཔྤཏྟེཧི སཏྟཧི བལེཧི ལདྡྷཱུཔཏྠམྦྷཱནི ཝིཏཀྐཱདཱིནི ཀཱམཱཝཙརཱནེཝ ཛྷཱནངྒཱནི བཧཱུནི ཧུཏྭཱ པཱཏུབྷཝནྟི. ཏཏོ ཨེཝ ཏེསཾ ཨུཛུཝིཔཙྩནཱིཀབྷཱུཏཱ ཀཱམཙྪནྡཱདཡོ སདྡྷིཾ ཏདེཀཊྛེཧི པཱཔདྷམྨེཧི ཝིདཱུརཱི བྷཝནྟི, པཊིབྷཱགནིམིཏྟུཔྤཏྟིཡཱ སདྡྷིཾ ཏཾ ཨཱརབྦྷ ཨུཔཙཱརཛ྄ཛྷཱནཾ ཨུཔྤཛྫཏི. ཏེན ཝུཏྟཾ ‘‘ནཱིཝརཎཱནི ཝིཀྑམྦྷནྟཱི’’ཏིཨཱདི. ཏཏྠ སནྣིསཱིདནྟཱིཏི སམྨདེཝ སཱིདནྟི, ཨུཔསམནྟཱིཏི ཨཏྠོ.

ཨིམསྶཱཏི པཊིབྷཱགནིམིཏྟསྶ. ཨངྒུལིཔདཔཱཎིཔདཱདིཀོ ཀསིཎདོསོ. ཨཱདཱསམཎྜལཱུཔམཱདཱིཧི ¶ ཨུགྒཧནིམིཏྟཏོ པཊིབྷཱགནིམིཏྟསྶ སུཔརིསུདྡྷཏཾ, སཎྷསུཁུམཏཉྩ དསྶེཏི. ཏཉྩ ཁོ པཊིབྷཱགནིམིཏྟཾ ནེཝ ཝཎྞཝནྟཾ ན སཎྛཱནཝནྟཾ ཨཔརམཏྠསབྷཱཝཏྟཱ. ཨཱིདིསནྟི ཝཎྞསཎྛཱནཝནྟཾ. ཏིལཀྑཎབྦྷཱཧཏནྟི ཨུཔྤཱདཱདིལཀྑཎཏྟཡཱནུཔཝིཊྛཾ, ཨནིཙྩཏཱདིལཀྑཎཏྟཡངྐིཏཾ ཝཱ. ཡདི ན པནེཏཾ ཏཱདིསཾ ཝཎྞཱདིཝནྟཾ, ཀཐཾ ཛྷཱནསྶ ཨཱརམྨཎབྷཱཝོཏི ཨཱཧ ‘‘ཀེཝལཉྷཱི’’ཏིཨཱདི. སཉྙཛནྟི བྷཱཝནཱསཉྙཱཛནིཏཾ, བྷཱཝནཱསཉྙཱཡ སཉྫཱཏམཏྟཾ. ན ཧི ཨསབྷཱཝསྶ ཀུཏོཙི སམུཊྛཱནཾ ཨཏྠི. ཏེནཱཧ ‘‘ཨུཔཊྛཱནཱཀཱརམཏྟ’’ནྟི.

༥༨. ཝིཀྑམྦྷིཏཱནེཝ སནྣིསིནྣཱཝ, ན པན ཏདཏྠཾ ཨུསྶཱཧོ ཀཱཏབྦོཏི ཨདྷིཔྤཱཡོ. ‘‘ཨུཔཙཱརསམཱདྷིནཱ’’ཏི ཝུཏྟེ ཨིཏརོཔི སམཱདྷི ཨཏྠཱིཏི ཨཏྠཏོ ཨཱཔནྣནྟི ཏམྤི དསྶེཏུཾ ‘‘དུཝིདྷོ ཧི སམཱདྷཱི’’ཏིཨཱདི ཨཱརདྡྷཾ. དྭཱིཧཱཀཱརེཧཱིཏི ཛྷཱནདྷམྨཱནཾ པཊིཔཀྑདཱུརཱིབྷཱཝོ, ཐིརབྷཱཝཔྤཏྟི ཙཱཏི ཨིམེཧི དྭཱིཧི ཀཱརཎེཧི. ཨིདཱནི ཏཱནི ཀཱརཎཱནི ཨཝཏྠཱམུཁེན དསྶེཏུཾ ‘‘ཨུཔཙཱརབྷཱུམིཡཾ ཝཱ’’ཏིཨཱདི ཝུཏྟཾ. ཨུཔཙཱརབྷཱུམིཡནྟི ཨུཔཙཱརཱཝཏྠཱཡཾ. ཡདིཔི ཏདཱ ཛྷཱནངྒཱནི པཊུཏརཱནི མཧགྒཏབྷཱཝཔྤཏྟཱནི ན ཨུཔྤཛྫནྟི, ཏེསཾ ¶ པན པཊིཔཀྑདྷམྨཱནཾ ཝིཀྑམྦྷནེན ཙིཏྟཾ སམཱདྷིཡཏི. ཏེནཱཧ ‘‘ནཱིཝརཎཔྤཧཱནེན ཙིཏྟཾ སམཱཧིཏཾ ཧོཏཱི’’ཏི. པཊིལཱབྷབྷཱུམིཡནྟི ཛྷཱནསྶ ཨདྷིགམཱཝཏྠཱཡཾ. ཏདཱ ཧི ཨཔྤནཱཔཏྟཱནཾ ཛྷཱནདྷམྨཱནཾ ཨུཔྤཏྟིཡཱ ཙིཏྟཾ སམཱདྷིཡཏི. ཏེནཱཧ ‘‘ཨངྒཔཱཏུབྷཱཝེནཱ’’ཏི. ཙིཏྟཾ སམཱཧིཏཾ ཧོཏཱིཏི སམྦནྡྷོ.

ན ཐཱམཛཱཏཱནཱིཏི ན ཛཱཏཐཱམཱནི, ན བྷཱཝནཱབལཾ པཏྟཱནཱིཏི ཨཏྠོ. ཙིཏྟནྟི ཛྷཱནཙིཏྟཾ. ཀེཝལམྤི རཏྟིཾ ཀེཝལམྤི དིཝསཾ ཏིཊྛཏཱིཏི སམཱཔཏྟིཝེལཾ སནྡྷཱཡཱཧ. ཨུཔཙཱརབྷཱུམིཡཾ ནིམིཏྟཝཌྜྷནཾ ཡུཏྟནྟི ཀཏྭཱ ཝུཏྟཾ ‘‘ནིམིཏྟཾ ཝཌྜྷེཏྭཱ’’ཏི. ལདྡྷཔརིཧཱནཱིཏི ལདྡྷཨུཔཙཱརཛ྄ཛྷཱནཔརིཧཱནི. ནིམིཏྟེ ཨཝིནསྶནྟེ ཏདཱརམྨཎཛྷཱནམྤི ཨཔརིཧཱིནམེཝ ཧོཏི, ནིམིཏྟེ པན ཨཱརཀྑཱབྷཱཝེན ཝིནཊྛེ ལདྡྷཾ ལདྡྷཾ ཛྷཱནམྤི ཝིནསྶཏི ཏདཱཡཏྟཝུཏྟིཏོ. ཏེནཱཧ ‘‘ཨཱརཀྑམྷཱི’’ཏིཨཱདི.

སཏྟསཔྤཱཡཝཎྞནཱ

༥༩. ‘‘ཐཱཝརཉྩ ཧོཏཱི’’ཏི ཝཏྭཱ ཡཐཱ ཐཱཝརཾ ཧོཏི, ཏཾ དསྶེཏུཾ ‘‘སཏི ཨུཔཊྛཱཏི, ཙིཏྟཾ སམཱདྷིཡཏཱི’’ཏི ཝུཏྟཾ. ཡཐཱལདྡྷཉྷི ནིམིཏྟཾ ཏཏྠ སཏིཾ སཱུཔཊྛིཏཾ ཀཏྭཱ ཨེཀགྒཏཾ ཝིནྡནྟསྶ ¶ ཐིརཾ ནཱམ ཧོཏི, སུརཀྑིཏཉྩ. སཏི-གྒཧཎེན ཙེཏྠ སམྤཛཉྙཾ, སམཱདྷིགྒཧཎེན ཝཱིརིཡཉྩ སངྒཧིཏཾ ཧོཏི ནཱནནྟརིཡབྷཱཝཏོ. ཏཏྠཱཏི ཏེསུ ཨཱཝཱསེསུ. ཏཱིཎི ཏཱིཎཱིཏི ཨེཀེཀསྨིཾ ཨཱཝཱསེ ཨཝུཏྠཨཝུཏྠཊྛཱནེ ཝསནནིཡཱམེན ཏཡོ ཏཡོ དིཝསེ ཝསིཏྭཱ.

ཨུཏྟརེན ཝཱ དཀྑིཎེན ཝཱཏི ཝུཏྟཾ གམནཱགམནེ སཱུརིཡཱབྷིམུཁབྷཱཝནིཝཱརཎཏྠནྟི. སཧསྶདྷནུཔྤམཱཎཾ དིཡཌྜྷཀོསཾ.

དྭཏྟིཾས ཏིརཙྪཱནཀཐཱཏི རཱཛཀཐཱདིཀེ (དཱི. ནི. ༡.༡༧; མ. ནི. ༢.༢༢༣; སཾ. ནི. ༥.༡༠༨༠; ཨ. ནི. ༡༠.༦༩; པཱཙི. ༥༠༨) སནྡྷཱཡཱཧ. ཏཱ ཧི པཱལི༹ཡཾ སརཱུཔཏོ ཨནཱགཏཱཔི ཨརཉྙཔབྦཏནདཱིདཱིཔཀཐཱ ཨིཏི-སདྡེན སངྒཧེཏྭཱ སགྒམོཀྑཱནཾ ཏིརཙྪཱནབྷཱཝཏོ ‘‘དྭཏྟིཾས ཏིརཙྪཱནཀཐཱ’’ཏི ཝུཏྟཱ. དསཀཐཱཝཏྠུནིསྶིཏནྟི ‘‘ཨཔྤིཙྪཏཱ, སནྟུཊྛི, པཝིཝེཀོ, ཨསཾསགྒོ, ཝཱིརིཡཱརམྦྷོ, སཱིལ, སམཱདྷི, པཉྙཱ, ཝིམུཏྟི, ཝིམུཏྟིཉཱཎདསྶན’’ནྟི ཨིམཱནི ཨཔྤིཙྪཀཐཱདཱིནཾ ཝཏྠཱུནི, ཏནྣིསྶིཏཾ བྷསྶཾ སཔྤཱཡཾ.

ཨཏིརཙྪཱནཀཐིཀོཏི ¶ ནཏིརཙྪཱནཀཐིཀོ, ཏིརཙྪཱནཀཐཱ ཝིདྷུརཾ དྷམྨིཀཾ ཀམྨཊྛཱནཔཊིསཾཡུཏྟམེཝ ཀཐཾ ཀཐེཏཱིཏི ཨདྷིཔྤཱཡོ. སཱིལཱདིགུཎསམྤནྣོཏི སཱིལསམཱདྷིཨཱདིགུཎསམྤནྣོ. ཡོ ཧི སམཱདྷིཀམྨཊྛཱནིཀོ, སམཱདྷིཀམྨཊྛཱནསྶ ཝཱ པཱརཾ པཏྟོ, སོ ཨིམསྶ ཡོགིནོ སཔྤཱཡོ. ཏེནཱཧ ‘‘ཡཾ ནིསྶཱཡཱ’’ཏིཨཱདི. ཀཱཡདལ༹ྷཱིབཧུལོཏི ཀཱཡསྶ སནྟཔྤནཔོསནཔྤསུཏོ. ཡཾ སནྡྷཱཡ ཝུཏྟཾ ‘‘ཡཱཝདཏྠཾ ཨུདརཱཝདེཧཀཾ བྷུཉྫིཏྭཱ སེཡྻསུཁཾ པསྶསུཁཾ མིདྡྷསུཁཾ ཨནུཡུཏྟོ ཝིཧརཏཱི’’ཏི (དཱི. ནི. ༣.༣༢༠; མ. ནི. ༡.༡༨༦; ཨ. ནི. ༥.༢༠༦).

བྷོཛནཾ ཡེབྷུཡྻེན མདྷུརམྦིལརསཝསེན སཏྟཱནཾ ཨུཔཡོགཾ གཙྪཏི དདྷིཨཱདཱིསུ ཏཐཱ དསྶནཏོ. ཀཊུཀཱདིརསཱ པན ཀེཝལཾ ཨབྷིསངྑཱརཀཱ ཨེཝཱཏི ཨཱཧ ‘‘ཀསྶཙི མདྷུརཾ, ཀསྶཙི ཨམྦིལཾ སཔྤཱཡཾ ཧོཏཱི’’ཏི.

ཡསྨིཾ ཨིརིཡཱཔཐེ ཨཱདྷཱརབྷཱུཏེ, ཝཏྟམཱནེ ཝཱ, ཡསྨིཾ ཝཱ ཨིརིཡཱཔཐེ པཝཏྟམཱནསྶ. ནིམིཏྟཱསེཝནབཧུལསྶཱཏི ནིམིཏྟེ ཨཱསེཝནཱབཧུལསྶ པཊིབྷཱགནིམིཏྟེ ཝིསཡབྷཱུཏེ བྷཱཝནཱམནསིཀཱརཾ ¶ བཧུལཾ ཨཱསེཝནྟསྶ, ནིམིཏྟསྶ ཝཱ གོཙརཱསེཝནཝསེན ཨཱསེཝནཱབཧུལསྶ. ཡེན ཧི བྷཱཝེནྟསྶ བྷཱཝནཱསེཝནཱ, ཏེན གོཙརཱསེཝནཱཔི ཨིཙྪིཏབྦཱཏི.

དསཝིདྷཨཔྤནཱཀོསལླཝཎྞནཱ

༦༠. ན ཧོཏི ཨཔྤནཱ. ཡེན ཝིདྷིནཱ ཨཔྤནཱཡཾ ཀུསལོ ཧོཏི, སོ དསཝིདྷོ ཝིདྷི ཨཔྤནཱཀོསལླཾ, ཏནྣིབྦཏྟཾ ཝཱ ཉཱཎཾ. ཝཏྠུཝིསདཀིརིཡཏོཏི ཝཏྠཱུནཾ ཝིསདབྷཱཝཀརཎཏོ ཨཔྤནཱཀོསལླཾ ཨིཙྪིཏབྦནྟི སམྦནྡྷོ. ཨེཝཾ སེསེསུཔི.

༦༡. ཙིཏྟཙེཏསིཀཱནཾ ཧི པཝཏྟིཊྛཱནབྷཱཝཏོ སརཱིརཾ, ཏཔྤཊིབདྡྷཱནི ཙཱིཝརཱདཱིནི ཙ ཨིདྷ ‘‘ཝཏྠཱུནཱི’’ཏི ཨདྷིཔྤེཏཱནི. ཏཱནི ཡཐཱ ཙིཏྟསྶ སུཁཱཝཧཱནི ཧོནྟི, ཏཐཱ ཀརཎཾ ཏེསཾ ཝིསདབྷཱཝཀརཎཾ. ཏེན ཝུཏྟཾ ‘‘ཨཛ྄ཛྷཏྟིཀབཱཧིརཱན’’ནྟིཨཱདི. སརཱིརཾ ཝཱཏི ཝཱ-སདྡོ ཨཊྛཱནཔྤཡུཏྟོ, སརཱིརཾ སེདམལགྒཧིཏཾ ཝཱ ཨཉྙེན ཝཱ ཨཝསྶུཏཀིཙྩེན ཝིབཱདྷིཏནྟི ཨདྷིཔྤཱཡོ. སེནཱསནཾ ཝཱཏི ཝཱ-སདྡེན པཏྟཱདཱིནམྤི སངྒཧོ དཊྛབྦོ. ནནུ ཙཱཡཾ ནཡོ ¶ ཁུདྡཀཔལིབོདྷུཔཙྪེདེན སངྒཧིཏོ, པུན ཀསྨཱ ཝུཏྟོཏི? སཙྩཾ སངྒཧིཏོ, སོ ཙ ཁོ བྷཱཝནཱཡ ཨཱརམྦྷཀཱལེ. ཨིདྷ པན ཨཱརདྡྷཀམྨཊྛཱནསྶ ཨུཔཙཱརཛ྄ཛྷཱནེ ཋཏྭཱ ཨཔྤནཱཔརིཝཱསཾ ཝསནྟསྶ ཀཱལནྟརེ ཛཱཏེ ཏཐཱཔཊིཔཏྟི ཨཔྤནཱཀོསལླཱཡ ཝུཏྟཱ. ཨཝིསདེ སཏི, ཝིསཡབྷཱུཏེ ཝཱ. ཀཐཾ བྷཱཝནམནུཡུཉྫནྟསྶ ཏཱནི ཝིསཡོ? ཨནྟརནྟརཱ པཝཏྟནཀཙིཏྟུཔྤཱདཝསེནེཝཾ ཝུཏྟཾ. ཏེ ཧི ཙིཏྟུཔྤཱདཱ ཙིཏྟེཀགྒཏཱཡ ཨཔརིསུདྡྷབྷཱཝཱཡ སཾཝཏྟནྟི. ཙིཏྟཙེཏསིཀེསུ ནིསྶཡཱདིཔཙྩཡབྷཱུཏེསུ. ཉཱཎམྤཱིཏི པི-སདྡོ སམྤིཎྜནེ. ཏེན ‘‘ན ཀེཝལཾ ཏཾ ཝཏྠུཡེཝ, ཨཐ ཁོ ཏསྨིཾ ཨཔརིསུདྡྷེ ཉཱཎམྤི ཨཔརིསུདྡྷཾ ཧོཏཱི’’ཏི དསྶིཏཾ. ཏཾསམྤཡུཏྟཱནཾ པན ཨཔརིསུདྡྷཏཱ ཨཝུཏྟསིདྡྷཱ, ཉཱཎསྶ ཙ ཝིསུཾ གཧཎཾ ཨཔྤནཱཡ བཧུཀཱརཏྟཱ. ཏཐཱ ཧི ཛྷཱནཾ ‘‘དནྡྷཱབྷིཉྙཾ, ཁིཔྤཱབྷིཉྙ’’ནྟི ཉཱཎམུཁེན ནིདྡིཊྛཾ. ནིསྶཡནིསྶཡོཔི ནིསྶཡོཏྭེཝ ཝུཙྩཏཱིཏི ཨཱཧ ‘‘དཱིཔཀཔལླིཀཝཊྚིཏེལཱནི ནིསྶཱཡཱ’’ཏི. ཉཱཎེ ཨཝིསདེ ཝིཔསྶནཱབྷཱཝནཱ ཝིཡ སམཱདྷིབྷཱཝནཱཔི པརིདུབྦལཱ ཧོཏཱིཏི དསྶེཏུཾ ‘‘ཨཔརིསུདྡྷེན ཉཱཎེནཱ’’ཏིཨཱདི ཝུཏྟཾ. ཏཏྠ ཀམྨཊྛཱནནྟི སམཐཀམྨཊྛཱནཾ ཨཱཧ. ཝུཌྜྷིཾ ཨངྒཔཱཏུབྷཱཝེན, ཝིརཱུལ༹ྷིཾ གུཎབྷཱཝེན, ཝེཔུལླཾ སབྦསོ ཝསིབྷཱཝཔྤཏྟིཡཱ ཝེདིཏབྦཾ. ཝིསདེ པནཱཏི སུཀྐཔཀྑོ, ཏསྶ ཝུཏྟཝིཔརིཡཱཡེན ཨཏྠོ ཝེདིཏབྦོ.

༦༢. སམབྷཱཝཀརཎནྟི ¶ ཀིཙྩཏོ ཨནཱུནཱདྷིཀབྷཱཝཀརཎཾ. ཡཐཱཔཙྩཡཾ སདྡྷེཡྻཝཏྠུསྨིཾ ཨདྷིམོཀྑཀིཙྩསྶ པཊུཏརབྷཱཝེན, པཉྙཱཡ ཨཝིསདཏཱཡ, ཝཱིརིཡཱདཱིནཾ ཙ སིཐིལཏཱདིནཱ སདྡྷིནྡྲིཡཾ བལཝཾ ཧོཏི. ཏེནཱཧ ‘‘ཨིཏརཱནི མནྡཱནཱི’’ཏི. ཏཏོཏི ཏསྨཱ སདྡྷིནྡྲིཡསྶ བལཝབྷཱཝཏོ, ཨིཏརེསཉྩ མནྡཏྟཱ. ཀོསཛྫཔཀྑེ པཏིཏུཾ ཨདཏྭཱ སམྤཡུཏྟདྷམྨཱནཾ པགྒཎྷནཾ ཨནུབལཔྤདཱནཾ པགྒཧོ, པགྒཧོཝ ཀིཙྩཾ, པགྒཧཀིཙྩཾ ཀཱཏུཾ ན སཀྐོཏཱིཏི སམྦནྡྷིཏབྦཾ. ཨཱརམྨཎཾ ཨུཔགནྟྭཱ ཋཱནཾ, ཨནིསྶཛྫནཾ ཝཱ ཨུཔཊྛཱནཾ, ཝིཀྑེཔཔཊིཔཀྑོ. ཡེན ཝཱ སམྤཡུཏྟཱ ཨཝིཀྑིཏྟཱ ཧོནྟི, སོ ཨཝིཀྑེཔོ. རཱུཔགཏཾ ཝིཡ ཙཀྑུནཱ ཡེན ཡཱཐཱཝཏོ ཝིསཡསབྷཱཝཾ པསྶཏི, ཏཾ དསྶནཀིཙྩཾ ཀཱཏུཾ ན སཀྐོཏི བལཝཏཱ སདྡྷིནྡྲིཡེན ཨབྷིབྷཱུཏཏྟཱ. སཧཛཱཏདྷམྨེསུ ཧི ཨིནྡཊྛཾ ཀཱརེནྟཱནཾ སཧཔཝཏྟམཱནཱནཾ དྷམྨཱནཾ ཨེཀརསཏཱཝསེནེཝ ཨཏྠསིདྡྷི, ན ཨཉྙཐཱ. ཏསྨཱཏི ཝུཏྟམེཝཏྠཾ ཀཱརཎབྷཱཝེན པཙྩཱམསཏི ¶ . ཏནྟི སདྡྷིནྡྲིཡཾ. དྷམྨསབྷཱཝཔཙྩཝེཀྑཎེནཱཏི ཡསྶ སདྡྷེཡྻཝཏྠུནོ ཨུལཱ༹རཏཱདིགུཎེ ཨདྷིམུཙྩནསྶ སཱཏིསཡཔྤཝཏྟིཡཱ སདྡྷིནྡྲིཡཾ བལཝཾ ཛཱཏཾ, ཏསྶ པཙྩཡཔཙྩཡུཔྤནྣཱདིཝིབྷཱགཏོ ཡཱཐཱཝཏོ ཝཱིམཾསནེན. ཨེཝཉྷི ཨེཝཾདྷམྨཏཱནཡེན སབྷཱཝརསཏོ པརིགྒཡ྄ཧམཱནེ སཝིཔྥཱརོ ཨདྷིམོཀྑོ ན ཧོཏི, ‘‘ཨཡཾ ཨིམེསཾ དྷམྨཱནཾ སབྷཱཝོ’’ཏི པརིཛཱནནཝསེན པཉྙཱབྱཱཔཱརསྶ སཱཏིསཡཏྟཱ. དྷུརིཡདྷམྨེསུ ཧི ཡཐཱ སདྡྷཱཡ བལཝབྷཱཝེ པཉྙཱཡ མནྡབྷཱཝོ ཧོཏི, ཨེཝཾ པཉྙཱཡ བལཝབྷཱཝེ སདྡྷཱཡ མནྡབྷཱཝོ ཧོཏཱིཏི. ཏེན ཝུཏྟཾ ‘‘ཏཾ དྷམྨསབྷཱཝཔཙྩཝེཀྑཎེན ཧཱཔེཏབྦ’’ནྟི.

ཏཐཱ ཨམནསིཀཱརེནཱཏི ཡེནཱཀཱརེན བྷཱཝནམནུཡུཉྫནྟསྶ སདྡྷིནྡྲིཡཾ བལཝཾ ཧོཏི, ཏེནཱཀཱརེན བྷཱཝནཱཡ ཨནནུཡུཉྫནཏོཏི ཝུཏྟཾ ཧོཏི. ཨིདྷ དུཝིདྷེན སདྡྷིནྡྲིཡསྶ བལཝབྷཱཝོ, ཨཏྟནོ ཝཱ པཙྩཡཝིསེསཏོ ཀིཙྩུཏྟརིཡེན, ཝཱིརིཡཱདཱིནཾ ཝཱ མནྡཀིཙྩཏཱཡ. ཏཏྠ པཋམཝིཀཔྤེ ཧཱཔནཝིདྷི དསྶིཏོ, དུཏིཡཝིཀཔྤེ པན ཡཐཱ མནསི ཀརོཏོ ཝཱིརིཡཱདཱིནཾ མནྡཀིཙྩཏཱཡ སདྡྷིནྡྲིཡཾ བལཝཾ ཛཱཏཾ, ཏཐཱ ཨམནསིཀཱརེན ཝཱིརིཡཱདཱིནཾ པཊུཀིཙྩབྷཱཝཱཝཧེན མནསིཀཱརེན སདྡྷིནྡྲིཡཾ ཏེཧི སམརསཾ ཀརོནྟེན ཧཱཔེཏབྦཾ. ཨིམིནཱ ནཡེན སེསིནྡྲིཡེསུཔི ཧཱཔནཝིདྷི ཝེདིཏབྦོ.

ཝཀྐལིཏྠེརཝཏྠཱུཏི སོ ཧི ཨཱཡསྨཱ སདྡྷཱདྷིམུཏྟཏཱཡ ཀཏཱདྷིཀཱརོ སཏྠུ རཱུཔཀཱཡདསྶནཔྤསུཏོ ཨེཝ ཧུཏྭཱ ཝིཧརནྟོ སཏྠཱརཱ ‘‘ཀིཾ ཏེ, ཝཀྐལི, ཨིམིནཱ པཱུཏིཀཱཡེན དིཊྛེན? ཡོ ཁོ, ཝཀྐལི, དྷམྨཾ པསྶཏི, སོ མཾ པསྶཏཱི’’ཏིཨཱདིནཱ (སཾ. ནི. ༣.༨༧) ཨོཝདིཏྭཱ ¶ ཀམྨཊྛཱནེ ནིཡོཛིཏོཔི ཏཾ ཨནནུཡུཉྫནྟོ པཎཱམིཏོ ཨཏྟཱནཾ ཝིནིཔཱཏེཏུཾ པཔཱཏཊྛཱནཾ ཨབྷིརུཧི. ཨཐ ནཾ སཏྠཱ ཡཐཱནིསིནྣོཝ ཨོབྷཱསཾ ཝིསཛྫེནྟོ ཨཏྟཱནཾ དསྶེཏྭཱ –

‘‘པཱམོཛྫབཧུལོ བྷིཀྑུ, པསནྣོ བུདྡྷསཱསནེ;

ཨདྷིགཙྪེ པདཾ སནྟཾ, སངྑཱརཱུཔསམཾ སུཁ’’ནྟི. (དྷ. པ. ༣༨༡) –

གཱཐཾ ཝཏྭཱ ‘‘ཨེཧི ཝཀྐལཱི’’ཏི ཨཱཧ. སོ ཏེན ཨམཏེནེཝ ཨབྷིསིཏྟོ ཧཊྛཏུཊྛོ ཧུཏྭཱ ཝིཔསྶནཾ པཊྛཔེསི. སདྡྷཱཡ པན བལཝབྷཱཝཏོ ¶ ཝིཔསྶནཱཝཱིཐིཾ ན ཨོཏརི. ཏཾ ཉཏྭཱ བྷགཝཱ ཨིནྡྲིཡསམཏཾ པཊིཔཱདེནྟོ ཀམྨཊྛཱནཾ སོདྷེཏྭཱ ཨདཱསི. སོ སཏྠཱརཱ དིནྣནཡེན ཝིཔསྶནཾ ཨུསྶུཀྐཱཔེཏྭཱ མགྒཔཊིཔཱཊིཡཱ ཨརཧཏྟཾ པཱཔུཎི. ཏེན ཝུཏྟཾ ‘‘ཝཀྐལིཏྠེརཝཏྠུ ཙེཏྠ ནིདསྶན’’ནྟི.

ཨིཏརཀིཙྩབྷེདནྟི ཨུཔཊྛཱནཱདིཀིཙྩཝིསེསཾ. པསྶདྡྷཱདཱིཏི ཨཱདི-སདྡེན སམཱདྷིཨུཔེཀྑཱསམྦོཛ྄ཛྷངྒཱནཾ སངྒཧོ དཊྛབྦོ. ཧཱཔེཏབྦནྟི ཡཐཱ སདྡྷིནྡྲིཡསྶ བལཝབྷཱཝོ དྷམྨསབྷཱཝཔཙྩཝེཀྑཎེན ཧཱཡཏི, ཨེཝཾ ཝཱིརིཡིནྡྲིཡསྶ ཨདྷིམཏྟཏཱ པསྶདྡྷིཨཱདིབྷཱཝནཱཡ ཧཱཡཏི, སམཱདྷིཔཀྑིཡཏྟཱ ཏསྶཱ. ཏཐཱ ཧི སཱ སམཱདྷིནྡྲིཡསྶ ཨདྷིམཏྟཏཾ ཀོསཛྫཔཱཏཏོ རཀྑནྟཱི ཝཱིརིཡཱདིབྷཱཝནཱ ཝིཡ ཝཱིརིཡིནྡྲིཡསྶ ཨདྷིམཏྟཏཾ ཨུདྡྷཙྩཔཱཏཏོ རཀྑནྟཱི ཨེཀཾསཏོ ཧཱཔེཏི. ཏེན ཝུཏྟཾ ‘‘པསྶདྡྷཱདིབྷཱཝནཱཡ ཧཱཔེཏབྦ’’ནྟི.

སོཎཏྠེརསྶ ཝཏྠཱུཏི (མཧཱཝ. ༢༤༣) སུཀུམཱརསྶ སོཎཏྠེརསྶ ཝཏྠུ. སོ ཧི ཨཱཡསྨཱ སཏྠུ སནྟིཀེ ཀམྨཊྛཱནཾ གཧེཏྭཱ སཱིཏཝནེ ཝིཧརནྟོ ‘‘མམ སརཱིརཾ སུཁུམཱལཾ, ན ཙ སཀྐཱ སུཁེནེཝ སུཁཾ ཨདྷིགནྟུཾ, ཀཱཡཾ ཀིལམེཏྭཱཔི སམཎདྷམྨོ ཀཱཏབྦོ’’ཏི ཋཱནཙངྐམམེཝ ཨདྷིཊྛཱཡ པདྷཱནམནུཡུཉྫནྟོ པཱདཏལེསུ ཕོཊེསུ ཨུཊྛིཏེསུཔི ཝེདནཾ ཨཛ྄ཛྷུཔེཀྑིཏྭཱ དལ༹ྷཾ ཝཱིརིཡཾ ཀརོནྟོ ཨཙྩཱརདྡྷཝཱིརིཡཏཱཡ ཝིསེསཾ ནིབྦཏྟེཏུཾ ནཱསཀྑི. སཏྠཱ ཏཏྠ གནྟྭཱ ཝཱིཎོཝཱདེན ཨོཝདིཏྭཱ ཝཱིརིཡསམཏཱཡོཛནཝིདྷིཾ དསྶེནྟོ ཀམྨཊྛཱནཾ སོདྷེཏྭཱ གིཛ྄ཛྷཀཱུཊཾ གཏོ. ཐེརོཔི སཏྠཱརཱ དིནྣནཡེན ཝཱིརིཡསམཏཾ ཡོཛེནྟོ ཝིཔསྶནཾ ཨུསྶུཀྐཱཔེཏྭཱ ཨརཧཏྟེ པཏིཊྛཱསི. ཏེན ཝུཏྟཾ ‘‘སོཎཏྠེརསྶ ཝཏྠུ དསྶེཏབྦ’’ནྟི.

སེསེསུཔཱིཏི ¶ སཏིསམཱདྷིཔཉྙིནྡྲིཡེསུཔི. ཨེཀསྶཱཏི ཨེཀེཀསྶ. སཱམཉྙནིདྡེསོཝཱཡཾ དཊྛབྦོ. ཨེཝཾ པཉྩནྣཾ ཨིནྡྲིཡཱནཾ པཙྩེཀཾ ཨདྷིམཏྟཏཱཡ པན ཧཱཔནཝསེན སམཏཾ དསྶེཏྭཱ ཨིདཱནི ཏཏྠ ཡེསཾ ཝིསེསཏོ ཨསཱདྷཱརཎཏོ, སཱདྷཱརཎཏོ ཙ སམཏཱ ཨིཙྪིཏབྦཱ, ཏཾ དསྶེཏུཾ ‘‘ཝིསེསཏོ པནཱ’’ཏིཨཱདི ཝུཏྟཾ. ཨེཏྠཱཏི ཨེཏེསུ པཉྩསུ ཨིནྡྲིཡེསུ. སམཏནྟི སདྡྷཱཔཉྙཱནཾ ཨཉྙམཉྙཾ ཨནཱུནཱནདྷིཀབྷཱཝཾ. ཏཐཱ སམཱདྷིཝཱིརིཡཱནཾ ¶ . ཡཐཱ ཧི སདྡྷཱཔཉྙཱནཾ ཝིསུཾ ཝིསུཾ དྷུརིཡདྷམྨབྷཱུཏཱནཾ ཀིཙྩཏོ ཨཉྙམཉྙཱནཏིཝཏྟནཾ ཝིསེསཏོ ཨིཙྪིཏབྦམེཝ, ཡཏོ ནེསཾ སམདྷུརཏཱཡ ཨཔྤནཱ སམྤཛྫཏཱིཏི, ཨེཝཾ སམཱདྷིཝཱིརིཡཱནཾ ཀོསཛྫཨུདྡྷཙྩཔཀྑིཀཱནཾ སམརསཏཱཡ སཏི ཨཉྙམཉྙཱུཔཏྠམྦྷནཏོ སམྤཡུཏྟདྷམྨཱནཾ ཨནྟདྭཡཔཱཏཱབྷཱཝེན སམྨདེཝ ཨཔྤནཱ ཨིཛ྄ཛྷཏི.

‘‘བལཝསདྡྷོ ཧཱི’’ཏིཨཱདི ནིདསྶནཝསེན ཝུཏྟཾ. ཏསྶཏྠོ – ཡོ བལཝཏིཡཱ སདྡྷཱཡ སམནྣཱགཏོ ཨཝིསདཉཱཎོ, སོ མུདྡྷཔྤསནྣོ ཧོཏི, ན ཨཝེཙྩཔྤསནྣོ. ཏཐཱ ཧི སོ ཨཝཏྠུསྨིཾ པསཱིདཏི སེཡྻཐཱཔི ཏིཏྠིཡསཱཝཀཱ. ཀེརཱཊིཀཔཀྑནྟི སཱཋེཡྻཔཀྑཾ བྷཛཏི. སདྡྷཱཧཱིནཱཡ པཉྙཱཡ ཨཏིདྷཱཝནྟོ ‘‘དེཡྻཝཏྠུཔརིཙྩཱགེན ཝིནཱ ཙིཏྟུཔྤཱདམཏྟེནཔི དཱནམཡཾ པུཉྙཾ ཧོཏཱི’’ཏིཨཱདཱིནི པརིཀཔྤེཏི ཧེཏུཔཊིརཱུཔཀེཧི ཝཉྩིཏོ. ཨེཝཾབྷཱུཏོ པན སུཀྑཏཀྐཝིལུཏྟཙིཏྟོ པཎྜིཏཱནཾ ཝཙནཾ ནཱདིཡཏི, སཉྙཏྟིཾ ན གཙྪཏི. ཏེནཱཧ ‘‘བྷེསཛྫསམུཊྛིཏོ ཝིཡ རོགོ ཨཏེཀིཙྪོ ཧོཏཱི’’ཏི. ཡཐཱ ཙེཏྠ སདྡྷཱཔཉྙཱནཾ ཨཉྙམཉྙཝིརཧོ ན ཨཏྠཱཝཧོ ཨནཏྠཱཝཧོ ཙ, ཨེཝམིདྷཱཔི སམཱདྷིཝཱིརིཡཱནཾ ཨཉྙམཉྙཝིརཧོ ན ཨཝིཀྑེཔཱཝཧོ ཝིཀྑེཔཱཝཧོ ཙཱཏི ཝེདིཏབྦཾ. ཀོསཛྫཾ ཨབྷིབྷཝཏི, ཏེན ཨཔྤནཾ ན པཱཔུཎཱཏཱིཏི ཨདྷིཔྤཱཡོ. ཨུདྡྷཙྩཾ ཨབྷིབྷཝཏཱིཏི ཨེཏྠཱཔི ཨེསེཝ ནཡོ. ཏདུབྷཡནྟི ཏཾ སདྡྷཱཔཉྙཱདྭཡཾ, སམཱདྷིཝཱིརིཡདྭཡཉྩ. སམཾ ཀཱཏབྦནྟི སམརསཾ ཀཱཏབྦཾ.

སམཱདྷིཀམྨིཀསྶཱཏི སམཐཀམྨཊྛཱནིཀསྶ. ཨེཝནྟི ཨེཝཾ སནྟེ, སདྡྷཱཡ ཏེསཾ བལཝབྷཱཝེ སཏཱིཏི ཨཏྠོ. སདྡཧནྟོཏི ‘‘པཐཝཱི པཐཝཱི’’ཏི མནསིཀརཎམཏྟེན ཀཐཾ ཛྷཱནུཔྤཏྟཱིཏི ཨཙིནྟེཏྭཱ ‘‘ཨདྡྷཱ སམྨཱསམྦུདྡྷེན ཝུཏྟཝིདྷི ཨིཛ྄ཛྷིསྶཏཱི’’ཏི སདྡཧནྟོ སདྡྷཾ ཛནེནྟོ. ཨོཀཔྤེནྟོཏི ཨཱརམྨཎཾ ཨནུཔཝིསིཏྭཱ ཝིཡ ཨདྷིམུཙྩནཝསེན ཨོཀཔྤེནྟོ པཀྑནྡནྟོ. ཨེཀགྒཏཱ བལཝཏཱི ཝཊྚཏི སམཱདྷིཔདྷཱནཏྟཱ ཛྷཱནསྶ. ཨུབྷིནྣནྟི སམཱདྷིཔཉྙཱནཾ, སམཱདྷིཀམྨིཀསྶ སམཱདྷིནོ ཨདྷིམཏྟཏཱཔི ཨིཙྪིཏབྦཱཏི ཨཱཧ ‘‘སམཏཱཡཔཱི’’ཏི, སམབྷཱཝེནཱཔཱིཏི ཨཏྠོ. ཨཔྤནཱཏི ཨིདྷཱདྷིཔྤེཏཨཔྤནཱ. ཏཐཱ ཧི ‘‘ཧོཏིཡེཝཱ’’ཏི སཱསངྐཾ ཝདཏི ¶ , ལོཀུཏྟརཔྤནཱ པན ཏེསཾ སམབྷཱཝེནེཝ ཨིཙྪིཏཱ. ཡཐཱཧ – ‘‘སམཐཝིཔསྶནཾ ཡུགནདྡྷཾ བྷཱཝེཏཱི’’ཏི (པཊི. མ. ༢.༡, ༥).

ཡདི ¶ ཝིསེསཏོ སདྡྷཱཔཉྙཱནཾ, སམཱདྷིཝཱིརིཡཱནཉྩ སམཏཱ ཨིཙྪིཏཱ, ཀཐཾ སཏཱིཏི ཨཱཧ ‘‘སཏི པན སབྦཏྠ བལཝཏཱི ཝཊྚཏཱི’’ཏི. སབྦཏྠཱཏི ལཱིནུདྡྷཙྩཔཀྑེསུ པཉྩསུ ཨིནྡྲིཡེསུ. ཨུདྡྷཙྩཔཀྑིཡེ གཎྷནྟོ ‘‘སདྡྷཱཝཱིརིཡཔཉྙཱན’’ནྟི ཨཱཧ. ཨཉྙཐཱཔཱིཏི ཙ གཧེཏབྦཱ སིཡཱ. ཏཐཱ ཧི ‘‘ཀོསཛྫཔཀྑེན སམཱདྷིནཱ’’ ཨིཙྩེཝ ཝུཏྟཾ, ན ‘‘པསྶདྡྷིསམཱདྷིཨུཔེཀྑཱཧཱི’’ཏི. སཱ སཏི. སབྦེསུ རཱཛཀམྨེསུ ནིཡུཏྟོ སབྦཀམྨིཀོ. ཏེན ཀཱརཎེན སབྦཏྠ ཨིཙྪིཏབྦཏྠེན. ཨཱཧ ཨཊྛཀཐཱཡཾ. སབྦཏྠ ནིཡུཏྟཱ སབྦཏྠིཀཱ, སབྦེན ཝཱ ལཱིནུདྡྷཙྩཔཀྑིཡེན བོཛ྄ཛྷངྒགྒཧཎེན ཨཏྠེཏབྦཱ སབྦཏྠིཡཱ, སབྦཏྠིཡཱཝ སབྦཏྠིཀཱ. ཙིཏྟནྟི ཀུསལཙིཏྟཾ. ཏསྶ ཧི སཏི པཊིསརཎཾ པརཱཡཎཾ ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ. ཏེནཱཧ ‘‘ཨཱརཀྑཔཙྩུཔཊྛཱནཱ’’ཏིཨཱདི.

༦༣. ཙིཏྟེཀགྒཏཱནིམིཏྟསྶཱཏི ཙིཏྟེཀགྒཏཱཡ ནིམིཏྟསྶ, ཙིཏྟེཀགྒཏཱསངྑཱཏསྶ ཙ ནིམིཏྟསྶ. ཙིཏྟསྶ ཧི སམཱཧིཏཱཀཱརཾ སལླཀྑེཏྭཱ སམཐནིམིཏྟཾ རཀྑནྟོཡེཝ ཀསིཎནིམིཏྟཾ རཀྑཏི. ཏསྨཱ པཐཝཱིཀསིཎཱདིཀསྶཱཏི ཨཱདི-སདྡེན ན ཀེཝལཾ པཊིབྷཱགནིམིཏྟསྶེཝ, ཨཐ ཁོ སམཐནིམིཏྟསྶཱཔི གཧཎཾ དཊྛབྦཾ. ཏནྟི རཀྑཎཀོསལླཾ. ཨིདྷ ཨཔྤནཱཀོསལླཀཐཱཡཾ ‘‘ནིམིཏྟཀོསལླ’’ནྟི ཨདྷིཔྤེཏཾ, ཀརཎབྷཱཝནཱཀོསལླཱནཾ པགེཝ སིདྡྷཏྟཱཏི ཨདྷིཔྤཱཡོ.

༦༤. ཨཏིསིཐིལཝཱིརིཡཏཱདཱིཧཱིཏི ཨཱདི-སདྡེན པམོདནསཾཝེཛནཝིཔརིཡཱཡེ སངྒཎྷཱཏི. ལཱིནནྟི སངྐུཙིཏཾ ཀོསཛྫཔཀྑཔཏིཏཾ. ཙིཏྟནྟི བྷཱཝནཱཙིཏྟཾ. དྷམྨཝིཙཡསམྦོཛ྄ཛྷངྒཱདཡོ བྷཱཝེཏཱིཏི ཨེཏྠ ‘‘ཏཡོ’’ཏི པདཾ ཨཱནེཏྭཱ སམྦནྡྷིཏབྦཾ. ཡཐཱ པན ཏེ བྷཱཝེཏབྦཱ, ཏཾ སཡམེཝ ཝཀྑཏི.

པརིཏྟནྟི ཨཔྤཀཾ. ཨུཛྫཱལེཏུཀཱམོཏི པདཱིཔེཏུཀཱམོ. ཨུདཀཝཱཏཾ དདེཡྻཱཏི ཨུདཀམིསྶཾ ཝཱཏཾ ཨུཔནེཡྻ. ཨཀཱལོཏི ནཀཱལོ, ཨཡུཏྟཀཱལོ ཝཱ. སཏིཨཱདིདྷམྨསཱམགྒིསངྑཱཏཱཡ བོདྷིཡཱ བུཛ྄ཛྷཏི ཨེཏཱཡཱཏི ཀཏྭཱ, ཏཾསམངྒིནོ ཝཱ བུཛ྄ཛྷཏཱིཏི བོདྷིནོ ཡོགིནོ ཨངྒནྟི བོཛ྄ཛྷངྒོ ¶ , པསཏྠོ, སུནྡརོ ཝཱ བོཛ྄ཛྷངྒོ སམྦོཛ྄ཛྷངྒོ ¶ . ཀཱཡཙིཏྟདརཐཝཱུཔསམལཀྑཎཱ པསྶདྡྷིཡེཝ སམྦོཛ྄ཛྷངྒོ པསྶདྡྷིསམྦོཛ྄ཛྷངྒོ, ཏསྶ པསྶདྡྷིསམྦོཛ྄ཛྷངྒསྶ. སམཱདྷིསམྦོཛ྄ཛྷངྒཱདཱིསུཔི ཨེསེཝ ནཡོ. ཨཡཾ པན ཝིསེསོ – སམཱདྷིསྶ ཏཱཝ པདཏྠལཀྑཎཱནི ཧེཊྛཱ ཨཱགཏཱནེཝ. ཨུཔཔཏྟིཏོ ཨིཀྑཏཱིཏི ཨུཔེཀྑཱ. སཱ པནཱཡཾ ཨཏྠཏོ ཏཏྲམཛ྄ཛྷཏྟུཔེཀྑཱཝ ཨིདྷ བོཛ྄ཛྷངྒུཔེཀྑཱ ཝེདིཏབྦཱ. དུསམུཊྛཱཔཡནྟི སམུཊྛཱཔེཏུཾ ཨུཔྤཱདེཏུཾ ཨསཀྐུཎེཡྻཾ. དྷམྨཱནཾ, དྷམྨེསུ ཝཱ ཝིཙཡོ དྷམྨཝིཙཡོ, པཉྙཱཏི ཨཏྠོ. ཝཱིརསྶ བྷཱཝོ, ཀམྨཾ ཝཱ, ཝིདྷིནཱ ཝཱ ཨཱིརེཏབྦཾ པཝཏྟེཏབྦནྟི ཝཱིརིཡཾ, ཨུསྶཱཧོ. པཱིཎེཏི ཀཱཡཾ, ཙིཏྟཾ ཙ སནྟཔྤེཏཱིཏི པཱིཏི.

ཡཾ ཡཾ སཀཾ ཡཐཱསཀཾ, ཨཏྟནོ ཨཏྟནོཏི ཨཏྠོ. ཨཱཧཱརཝསེནཱཏི པཙྩཡཝསེན. བྷཱཝནཱཏི ཨུཔྤཱདནཱ, ཝཌྜྷནཱ ཙ. ཀུསལཱཀུསལཱཏི ཀོསལླསམྦྷཱུཏཊྛེན ཀུསལཱ, ཏཔྤཊིཔཀྑཏོ ཨཀུསལཱ. ཡེ ཨཀུསལཱ, ཏེ སཱཝཛྫཱ. ཡེ ཀུསལཱ, ཏེ ཨནཝཛྫཱ. ཨཀུསལཱ ཧཱིནཱ, ཨིཏརེ པཎཱིཏཱ. ཀུསལཱཔི ཝཱ ཧཱིནེཧི ཚནྡཱདཱིཧི ཨཱརདྡྷཱ ཧཱིནཱ, ཨིཏརེ པཎཱིཏཱ. ཀཎྷཱཏི ཀཱལ༹ཀཱ ཙིཏྟསྶ ཨཔབྷསྶརབྷཱཝཀརཎཱ, སུཀྐཱཏི ཨོདཱཏཱ ཙིཏྟསྶ པབྷསྶརབྷཱཝཀརཎཱ. ཀཎྷཱབྷིཛཱཏིཧེཏུཏོ ཝཱ ཀཎྷཱ, སུཀྐཱབྷིཛཱཏིཧེཏུཏོ སུཀྐཱ. ཏེ ཨེཝ སཔྤཊིབྷཱགཱ. ཀཎྷཱ ཧི ཨུཛུཝིཔཙྩནཱིཀཏཱཡ སུཀྐེཧི སཔྤཊིབྷཱགཱ. ཏཐཱ སུཀྐཱཔི ཨིཏརེཧི. ཨཐ ཝཱ ཀཎྷཱ ཙ སུཀྐཱ ཙ སཔྤཊིབྷཱགཱ ཙ ཀཎྷསུཀྐསཔྤཊིབྷཱགཱ. སུཁཱ ཧི ཝེདནཱ དུཀྑཱཡ ཝེདནཱཡ སཔྤཊིབྷཱགཱ, དུཀྑཱ ཙ ཝེདནཱ སུཁཱཡ སཔྤཊིབྷཱགཱཏི. ཨནུཔྤནྣསྶཱཏི ཨནིབྦཏྟསྶ. ཨུཔྤཱདཱཡཱཏི ཨུཔྤཱདནཏྠཱཡ. ཨུཔྤནྣསྶཱཏི ནིབྦཏྟསྶ. བྷིཡྻོབྷཱཝཱཡཱཏི པུནཔྤུནབྷཱཝཱཡ. ཝེཔུལླཱཡཱཏི ཝིཔུལབྷཱཝཱཡ. བྷཱཝནཱཡཱཏི ཝཌྜྷིཡཱ. པཱརིཔཱུརིཡཱཏི པརིཔཱུརཎཏྠཱཡ.

ཏཏྠཱཏི ‘‘ཨཏྠི བྷིཀྑཝེ’’ཏིཨཱདིནཱ དསྶིཏཔཱཋེ. སབྷཱཝསཱམཉྙལཀྑཎཔཊིཝེདྷཝསེནཱཏི ཨེཀཛ྄ཛྷཾ ཀཏྭཱ གཧཎེ ཨནཝཛྫསུཁཝིཔཱཀཱདིཀསྶ ཝིསུཾ ཝིསུཾ པན ཕུསནཱདིཀསྶ སབྷཱཝལཀྑཎསྶ, ཨནིཙྩཱདིཀསྶ སཱམཉྙལཀྑཎསྶ ཙ པཊིཝིཛ྄ཛྷནཝསེན. པཝཏྟམནསིཀཱརོཏི ཀུསལཱདཱིནཾ ཏཾཏཾསབྷཱཝལཀྑཎཱདིཀསྶ ཡཱཐཱཝཏོ ཨཝབུཛ྄ཛྷནཝསེན ཨུཔྤནྣཛཝནཙིཏྟུཔྤཱདོ. སོ ཧི ཨཝིཔརཱིཏམནསིཀཱརཏཱཡ ‘‘ཡོནིསོམནསིཀཱརོ’’ཏི ཝུཏྟོ. ཏདཱབྷོགཏཱཡ ཨཱཝཛྫནཱཔི ཏགྒཏིཀཱཝ. རུཔྤནལཀྑཎཱདིཀམྤི ¶ ཨིདྷ སཱམཉྙལཀྑཎེནེཝ སངྒཧིཏནྟི དཊྛབྦཾ. ཀུསལཀིརིཡཱཡ ཨཱདིཨཱརམྦྷཝསེན པཝཏྟཝཱིརིཡཾ དྷིཏིསབྷཱཝཏཱཡ ‘‘དྷཱཏཱུ’’ཏི ཝུཏྟནྟི ཨཱཧ ‘‘ཨཱརམྦྷདྷཱཏཱུཏི པཋམཝཱིརིཡཾ ཝུཙྩཏཱི’’ཏི. ལདྡྷཱསེཝནཾ ཝཱིརིཡཾ བལཔྤཏྟཾ ¶ ཧུཏྭཱ པཊིཔཀྑཾ ཝིདྷམཏཱིཏི ཨཱཧ ‘‘ཀོསཛྫཏོ ནིཀྑནྟཏྟཱ ཏཏོ བལཝཏར’’ནྟི. ཨདྷིམཏྟཱདྷིམཏྟཏརཱནཾ པཊིཔཀྑདྷམྨཱནཾ ཝིདྷམནསམཏྠཾ པཊུཔཊུཏརཱདིབྷཱཝཔྤཏྟཾ ཧོཏཱིཏི ཝུཏྟཾ ‘‘པརཾ པརཾ ཋཱནཾ ཨཀྐམནཏོ ཏཏོཔི བལཝཏར’’ནྟི. ཏིཊྛཏི པཝཏྟཏི ཨེཏྠཱཏི ཋཱནིཡཱ, པཱིཏིསམྦོཛ྄ཛྷངྒསྶ ཋཱནིཡཱ པཱིཏིསམྦོཛ྄ཛྷངྒཊྛཱནིཡཱ. ཋཱཏབྦོ ཝཱ ཋཱནིཡོ, པཱིཏིསམྦོཛ྄ཛྷངྒོ ཋཱནིཡོ ཨེཏེསཱུཏི པཱིཏིསམྦོཛ྄ཛྷངྒཊྛཱནིཡཱ, ཨཔརཱཔརཾ ཝཏྟམཱནཱ པཱིཏིསམྦོཛ྄ཛྷངྒསམྤཡུཏྟཱ དྷམྨཱ. ཡསྨཱ པན ཏེསུ པཱིཏིཡེཝ པཱིཏིསམྦོཛ྄ཛྷངྒསྶ ཝིསེསཀཱརཎཾ, ཏསྨཱ ཝུཏྟཾ ‘‘པཱིཏིཡཱ ཨེཝ ཨེཏཾ ནཱམ’’ནྟི. ཨུཔྤཱདཀམནསིཀཱརོཏི ཡཐཱ མནསི ཀརོཏོ ཨནུཔྤནྣོ པཱིཏིསམྦོཛ྄ཛྷངྒོ ཨུཔྤཛྫཏི, ཨུཔྤནྣོ ཙ ཝཌྜྷཏི, ཏཐཱ པཝཏྟམནསིཀཱརོ.

པརིཔུཙྪཀཏཱཏི པརིཡོགཱཧེཏྭཱ པུཙྪཀབྷཱཝོ. པཉྩཔི ཧི ནིཀཱཡེ ཨུགྒཧེཏྭཱ ཨཱཙརིཡེ པརིཡུཔཱསིཏྭཱ ཏསྶ ཏསྶ ཨཏྠཾ པརིཔུཙྪནྟསྶ, ཏེ ཝཱ སཧ ཨཊྛཀཐཱཡ པརིཡོགཱཧེཏྭཱ ཡཾ ཡཾ ཏཏྠ གཎྛིཊྛཱནཾ, ཏཾ ཏཾ ‘‘ཨིདཾ, བྷནྟེ, ཀཐཾ, ཨིམསྶ ཀོ ཨཏྠོ’’ཏི པུཙྪནྟསྶ དྷམྨཝིཙཡསམྦོཛ྄ཛྷངྒོ ཨུཔྤཛྫཏཱིཏི. ཝཏྠུཝིསདཀིརིཡཱ ཨིནྡྲིཡསམཏྟཔཊིཔཱདནཱ སངྑེཔཏོ, ཝིཏྠཱརཏོ ཙ པཀཱསིཏཱ ཨེཝ. ཏཏྠ པན སམཱདྷིསཾཝཏྟནིཡབྷཱཝེན ཨཱགཏཱ, ཨིདྷ པཉྙཱསཾཝཏྟནིཡབྷཱཝེན. ཡདགྒེན ཧི སམཱདྷིསཾཝཏྟནིཀཱ, ཏདགྒེན པཉྙཱསཾཝཏྟནིཀཱ སམཱདྷིསྶ ཉཱཎཔཙྩུཔཊྛཱནཏོ. ‘‘སམཱཧིཏོ ཡཐཱབྷཱུཏཾ པཛཱནཱཏཱི’’ཏི (སཾ. ནི. ༤.༩༩; ༥.༡༠༧༡) ཝུཏྟཾ. དུཔྤཉྙཔུགྒལཔརིཝཛྫནཱ ནཱམ དུཔྤཉྙཱནཾ མནྡབུདྡྷཱིནཾ བྷཏྟནིཀྑིཏྟཀཱཀམཾསནིཀྑིཏྟསུནཁསདིསཱནཾ མོམཱུཧཔུགྒལཱནཾ དཱུརཏོ པརིཙྩཛནཱ. པཉྙཝནྟཔུགྒལསེཝནཱ ནཱམ པཉྙཱཡ ཀཏཱདྷིཀཱརཱནཾ སཙྩཔཊིཙྩསམུཔྤཱདཱདཱིསུ ཀུསལཱནཾ ཨརིཡཱནཾ, ཝིཔསྶནཱཀམྨིཀཱནཾ ཝཱ མཧཱཔཉྙཱནཾ ཀཱལེན ཀཱལཾ ཨུཔསངྐམནཾ. གམྦྷཱིརཉཱཎཙརིཡཔཙྩཝེཀྑཎཱཏི གམྦྷཱིརཉཱཎེཧི ཙརིཏབྦཱནཾ ཁནྡྷཱཡཏནདྷཱཏཱདཱིནཾ, སཙྩཔཙྩཡཱཀཱརཱདིདཱིཔནཱནཾ ཝཱ སུཉྙཏཱཔཊིསཾཡུཏྟཱནཾ སུཏྟནྟཱནཾ པཙྩཝེཀྑཎཱ. ཏདདྷིམུཏྟཏཱཏི པཉྙཱདྷིམུཏྟཏཱ, པཉྙཱཡ ནིནྣཔོཎཔབྦྷཱརཏཱཏི ཨཏྠོ.

ཨཔཱཡཱདཱིཏི ¶ ཨཱདི-སདྡེན ཛཱཏིཨཱདིཾ ཨཏཱིཏེ ཝཊྚམཱུལཀཾ དུཀྑཾ, ཨནཱགཏེ ཝཊྚམཱུལཀཾ དུཀྑཾ, པཙྩུཔྤནྣེ ཨཱཧཱརཔརིཡེཊྛིམཱུལཀཉྩ དུཀྑཾ སངྒཎྷཱཏི. ཝཱིརིཡཱཡཏྟསྶ ལོཀིཡལོཀུཏྟརཝིསེསསྶ ཨདྷིགམོ ཨེཝ ཨཱནིསཾསོ, ཏསྶ དསྶནསཱིལཏཱ ཝཱིརིཡཱཡཏྟ…པེ… དསྶིཏཱ. སཔུབྦབྷཱགོ ནིབྦཱནགཱམིམགྒོ གམནཝཱིཐི གནྟབྦཱ པཊིཔཛྫིཏབྦཱ པཊིཔདཱཏི ཀཏྭཱ ¶ . དཱཡཀཱནཾ མཧཔྥལབྷཱཝཀརཎེན པིཎྜཱཔཙཱཡནཏཱཏི པཙྩཡདཱཡཀཱནཾ ཨཏྟནི ཀཱརསྶ ཨཏྟནོ སམྨཱཔཊིཔཏྟིཡཱ མཧཔྥལཀཱརབྷཱཝསྶ ཀརཎེན པིཎྜསྶ བྷིཀྑཱཡ པཊིཔཱུཛནཱ. ཨིཏརཐཱཏི ཨཱམིསཔཱུཛཱཡ. ཀུསཱིཏཔུགྒལཔརིཝཛྫནཏཱཏི ཨལསཱནཾ བྷཱཝནཱཡ ནཱམམཏྟམྤི ཨཛཱནནྟཱནཾ ཀཱཡདལ༹ྷཱིབཧུལཱནཾ ཡཱཝདཏྠཾ བྷུཉྫིཏྭཱ སེཡྻསུཁཱདིཨནུཡུཉྫནཀཱནཾ ཏིརཙྪཱནཀཐིཀཱནཾ པུགྒལཱནཾ དཱུརཏོ པརིཙྩཛནཱ. ཨཱརདྡྷཝཱིརིཡཔུགྒལསེཝནཏཱཏི ‘‘དིཝསཾ ཙངྐམེན ནིསཛྫཱཡཱ’’ཏིཨཱདིནཱ (ཝིབྷ. ༥༡༩; ཨ. ནི. ༣.༡༦) བྷཱཝནཱརམྦྷཝསེན ཨཱརདྡྷཝཱིརིཡཱནཾ དལ༹ྷཔརཀྐམཱནཾ པུགྒལཱནཾ ཀཱལེན ཀཱལཾ ཨུཔསངྐམནཱ. སམྨཔྤདྷཱནཔཙྩཝེཀྑཎཏཱཏི ཙཏུབྦིདྷསམྨཔྤདྷཱནཱནུབྷཱཝསྶ པཙྩཝེཀྑཎཏཱ. ཏདདྷིམུཏྟཏཱཏི ཏསྨིཾ ཝཱིརིཡསམྦོཛ྄ཛྷངྒེ ཨདྷིམུཏྟི སབྦིརིཡཱཔཐེསུ ནིནྣཔོཎཔབྦྷཱརཏཱ. ཨེཏྠ ཙ ཐིནམིདྡྷཝིནོདནཀུསཱིཏཔུགྒལཔརིཝཛྫནཨཱརདྡྷཝཱིརིཡཔུགྒལསེཝནཏདདྷིམུཏྟཏཱ པཊིཔཀྑཝིདྷམནཔཙྩཡཱུཔསཾཧཱརཝསེན, ཨཔཱཡཱདིབྷཡཔཙྩཝེཀྑཎཱདཡོ སམུཏྟེཛནཝསེན ཝཱིརིཡསམྦོཛ྄ཛྷངྒསྶ ཨུཔྤཱདཀཱ དཊྛབྦཱ.

བུདྡྷཱདཱིསུ པསཱདསིནེཧཱབྷཱཝེན ཐུསཁརཧདཡཱ ལཱུཁཔུགྒལཱ, ཏབྦིཔརིཡཱཡེན སིནིདྡྷཔུགྒལཱ ཝེདིཏབྦཱ. བུདྡྷཱདཱིནཾ གུཎཔརིདཱིཔནཱ སམྤསཱདནཱིཡསུཏྟཱདཡོ (དཱི. ནི. ༣.༡༤༡ ཨཱདཡོ) པསཱདནཱིཡསུཏྟནྟཱ. ཨིམེཧི ཨཱཀཱརེཧཱིཏི ཡཐཱཝུཏྟེཧི ཀུསལཱདཱིནཾ སབྷཱཝསཱམཉྙལཀྑཎཔཊིཝིཛ྄ཛྷནཱདིཨཱཀཱརེཧི ཙེཝ པརིཔུཙྪཀཏཱདིཨཱཀཱརེཧི ཙ. ཨེཏེ དྷམྨེཏི ཨེཏེ ཀུསལཱདཱིསུ ཡོནིསོམནསིཀཱརཱདིཀེ ཙེཝ དྷམྨཏྠཉྙུཏཱདིཀེ ཙ.

༦༥. ཨཙྩཱརདྡྷཝཱིརིཡཏཱདཱིཧཱིཏི ཨཏིཝིཡ པགྒཧིཏཝཱིརིཡཏཱདཱིཧི. ཨཱདི-སདྡེན སཾཝེཛནཔམོདནཱདིཾ སངྒཎྷཱཏི. ཨུདྡྷཏནྟི སམཱདྷིཨཱདཱིནཾ མནྡཏཱཡ ཨཝཱུཔསནྟཾ. དུཝཱུཔསམཡནྟི ཝཱུཔསམེཏུཾ སམཱདྷཱཏུཾ ཨསཀྐུཎེཡྻཾ.

ཏཾ ¶ ཨཱཀཱརཾ སལླཀྑེཏྭཱཏི ཡེནཱཀཱརེན ཨསྶ ཡོགིནོ པསྶདྡྷི སམཱདྷི ཨུཔེཀྑཱཏི ཨིམེ པསྶདྡྷིཨཱདཡོ དྷམྨཱ པུབྦེ ཡཐཱརཧཾ ཏསྨིཾ ཏསྨིཾ ཀཱལེ ཨུཔྤནྣཔུབྦཱ, ཏཾ ཙིཏྟཏཾསམྤཡུཏྟདྷམྨཱནཾ པསྶདྡྷཱཀཱརཾ, སམཱཧིཏཱཀཱརཾ, ཨཛ྄ཛྷུཔེཀྑིཏཱཀཱརཉྩ ཨུཔལཀྑེཏྭཱ ཨུཔདྷཱརེཏྭཱ. ཏཱིསུཔི པདེསཱུཏི ‘‘ཨཏྠི, བྷིཀྑཝེ, ཀཱཡཔྤསྶདྡྷཱི’’ཏིཨཱདིནཱ ཨཱགཏེསུ ཏཱིསུཔི ཝཱཀྱེསུ, ཏེཧི ཝཱ པཀཱསིཏེསུ ཏཱིསུ དྷམྨཀོཊྛཱསེསུ. ཡཐཱསམཱཧིཏཱཀཱརཾ སལླཀྑེཏྭཱ གཡ྄ཧམཱནོ ¶ སམཐོ ཨེཝ སམཐནིམིཏྟནྟི ཨཱཧ ‘‘སམཐནིམིཏྟནྟི ཙ སམཐསྶེཝེཏམདྷིཝཙན’’ནྟི. ནཱནཱརམྨཎེ པརིབྦྷམནེན ཝིཝིདྷཾ ཨགྒཾ ཨེཏསྶཱཏི བྱགྒོ, ཝིཀྑེཔོ. ཏཐཱ ཧི སོ ཨནཝཊྛཱནརསོ, བྷནྟཏཱཔཙྩུཔཊྛཱནོ ཙ ཝུཏྟོ. ཨེཀགྒཏཱབྷཱཝཏོ བྱགྒཔཊིཔཀྑོཏི ཨབྱགྒོ, སམཱདྷི. སོ ཨེཝ ནིམིཏྟནྟི པུབྦེ ཝིཡ ཝཏྟབྦཾ. ཏེནཱཧ ‘‘ཨཝིཀྑེཔཊྛེན ཙ ཏསྶེཝ ཨབྱགྒནིམིཏྟནྟི ཨདྷིཝཙན’’ནྟི.

སརཱིརཱཝཏྠཾ ཉཏྭཱ མཏྟསོ པརིབྷུཏྟོ པཎཱིཏཱཧཱརོ ཀཱཡལཧུཏཱདཱིནཾ སམུཊྛཱཔནེན པསྶདྡྷིཡཱ པཙྩཡོ ཧོཏི, ཏཐཱ ཨུཏུསཔྤཱཡཾ, ཨིརིཡཱཔཐསཔྤཱཡཉྩ སེཝིཏཾ, པཡོགོ ཙ ཀཱཡིཀོ པཝཏྟིཏོཏི ཨཱཧ ‘‘པཎཱིཏབྷོཛནསེཝནཏཱ’’ཏིཨཱདི. པཡོགསམཏཱདཱིནཾ ཨབྷཱཝེན སདརཐཀཱཡཙིཏྟཱ པུགྒལཱ སཱརདྡྷཔུགྒལཱ. ཝུཏྟཝིཔརིཡཱཡེན པསྶདྡྷཀཱཡཱ པུགྒལཱ ཝེདིཏབྦཱ.

ནིརསྶཱདསྶཱཏི བྷཱཝནསྶཱདརཧིཏསྶ. བྷཱཝནཱ ཧི ཝཱིཐིཔཊིཔནྣཱ པུབྦེནཱཔརཾ ཝིསེསཝཏཱི པཝཏྟམཱནཱ ཙིཏྟསྶ ཨསྶཱདཾ ཨུཔསམསུཁཾ ཨཱཝཧཏི, ཏདབྷཱཝཏོ ནིརསྶཱདཾ ཙིཏྟཾ ཧོཏི. སདྡྷཱསཾཝེགཝསེནཱཏི སདྡྷཱཝསེན, སཾཝེགཝསེན ཙ. སམྤཧཾསནཏཱཏི སམྨདེཝ པཧཾསནཏཱ སཾཝེཛནཔུབྦཀཔསཱདུཔྤཱདནེན བྷཱཝནཱ ཙིཏྟསྶ ཏོསནཱ. སམྨཱཔཝཏྟསྶཱཏི ལཱིནུདྡྷཙྩཝིརཧེན, སམཐཝཱིཐིཔཊིཔཏྟིཡཱ ཙ སམཾ, སཝིསེསཉྩ པཝཏྟིཡཱ སམྨདེཝ པཝཏྟསྶ བྷཱཝནཱཙིཏྟསྶ. ཨཛ྄ཛྷུཔེཀྑནཏཱཏི པགྒཧནིགྒཧསམྤཧཾསནེསུ ཨབྱཱཝཊཏཱ. ཛྷཱནཝིམོཀྑཔཙྩཝེཀྑཎཏཱཏི པཋམཱདཱིནི ཛྷཱནཱནི པཙྩནཱིཀདྷམྨེཧི སུཊྛུ ཝིམུཏྟཏཱདིནཱ ཏེཡེཝ ཝིམོཀྑཱ ཏེསཾ ‘‘ཨེཝཾ བྷཱཝནཱ, ཨེཝཾ སམཱཔཛྫནཱ, ཨེཝཾ ཨདྷིཊྛཱནཾ, ཨེཝཾ ཝུཊྛཱནཾ, ཨེཝཾ སཾཀིལེསོ, ཨེཝཾ ཝོདཱན’’ནྟི པཏི པཏི ཨཝེཀྑཎཱ.

སཏྟམཛ྄ཛྷཏྟཏཱཏི ¶ སཏྟེསུ པིཡཊྛཱནིཡེསུཔི གཧཊྛཔབྦཛིཏེསུ མཛ྄ཛྷཏྟཱཀཱརོ ཨཛ྄ཛྷུཔེཀྑནཱ. སངྑཱརམཛ྄ཛྷཏྟཏཱཏི ཨཛ྄ཛྷཏྟིཀེསུ ཙཀྑཱདཱིསུ, བཱཧིརེསུ པཏྟཙཱིཝརཱདཱིསུ མཛ྄ཛྷཏྟཱཀཱརོ ཨཛ྄ཛྷུཔེཀྑནཱ. སཏྟསངྑཱརཱནཾ མམཱཡནཾ སཏྟསངྑཱརཀེལཱཡནཾ. ཨིམེཧཱཀཱརེཧཱིཏི ཨིམེཧི ཡཐཱཝུཏྟེཧི ཀཱཡཙིཏྟཱནཾ པསྶདྡྷཱཀཱརསལླཀྑཎཱདིཨཱཀཱརེཧི ཙེཝ སཔྤཱཡཱཧཱརསེཝནཱདིཨཱཀཱརེཧི ཙ. ཨེཏེ དྷམྨེཏི ཨེཏེ པསྶདྡྷིཨཱདིདྷམྨེ.

༦༦. པཉྙཱཔཡོགམནྡཏཱཡཱཏི པཉྙཱབྱཱཔཱརསྶ ཨཔྤབྷཱཝེན. ཡཐཱ ཧི དཱནསཱིལཱནི ཨལོབྷཱདོསཔྤདྷཱནཱནི ¶ , ཨེཝཾ བྷཱཝནཱ ཨམོཧཔྤདྷཱནཱ ཝིསེསཏོ ཨཔྤནཱཝཧཱ. ཏཏྠ ཡདཱ པཉྙཱ ན བལཝཏཱི ཧོཏི, ཏདཱ བྷཱཝནཱཙིཏྟསྶ ཨནབྷིསངྑཏོ ཝིཡ ཨཱཧཱརོ པུརིསསྶ ཨབྷིརུཙིཾ ན ཛནེཏི, ཏེན ཏཾ ནིརསྶཱདཾ ཧོཏི. ཡདཱ ཙ བྷཱཝནཱ པུབྦེནཱཔརཾ ཝིསེསཱཝཧཱ ན ཧོཏི སམྨདེཝ ཨཝཱིཐིཔཊིཔཏྟིཡཱ, ཏདཱ ཨུཔསམསུཁསྶ ཨལཱབྷེན ཙིཏྟཾ ནིརསྶཱདཾ ཧོཏི. ཏདུབྷཡཾ སནྡྷཱཡཱཧ ‘‘པཉྙཱཔཡོགམནྡཏཱཡཱ’’ཏིཨཱདི. ནནྟི ཙིཏྟཾ. ཛཱཏིཛརཱབྱཱདྷིམརཎཱནི ཡཐཱརཧཾ སུགཏིཡཾ, དུགྒཏིཡཉྩ ཧོནྟཱིཏི ཏདཉྙམེཝ པཉྩཝིདྷབནྡྷནཱདིཁུཔྤིཔཱསཱདིཨཉྙམཉྙཝིབཱདྷནཱདིཧེཏུཀཾ ཨཔཱཡདུཀྑཾ དཊྛབྦཾ. ཏཡིདཾ སབྦཾ ཏེསཾ ཏེསཾ སཏྟཱནཾ པཙྩུཔྤནྣབྷཝནིསྶིཏཾ གཧིཏནྟི ཨཏཱིཏེ, ཨནཱགཏེ ཙ ཀཱལེ ཝཊྚམཱུལཀདུཀྑཱནི ཝིསུཾ གཧིཏཱནི. ཡེ པན སཏྟཱ ཨཱཧཱརཱུཔཛཱིཝིནོ, ཏཏྠ ཙ ཨུཊྛཱནཕལཱུཔཛཱིཝིནོ, ཏེསཾ ཨཉྙེཧི ཨསཱདྷཱརཎཾ ཛཱིཝིཏདུཀྑཾ ཨཊྛམཾ སཾཝེགཝཏྠུ ཝུཏྟནྟི དཊྛབྦཾ.

ཨསྶཱཏི ཙིཏྟསྶ. ཨལཱིནནྟིཨཱདཱིསུ ཀོསཛྫཔཀྑིཡཱནཾ དྷམྨཱནཾ ཨནདྷིམཏྟཏཱཡ ཨལཱིནཾ. ཨུདྡྷཙྩཔཀྑིཀཱནཾ དྷམྨཱནཾ ཨནདྷིམཏྟཏཱཡ ཨནུདྡྷཏཾ. པཉྙཱཔཡོགསམྤཏྟིཡཱ, ཨུཔསམསུཁཱདྷིགམེན ཙ ཨནིརསྶཱདཾ. པུབྦེནཱཔརཾ སཝིསེསཾ ཏཏོ ཨེཝ ཨཱརམྨཎེ སམཔྤཝཏྟཾ, སམཐཝཱིཐིཔཊིཔནྣཉྩ. ཏཏྠ ཨལཱིནཏཱཡ པགྒཧེ, ཨནུདྡྷཏཏཱཡ ནིགྒཧེ, ཨནིརསྶཱདཏཱཡ སམྤཧཾསནེ ན བྱཱཔཱརཾ ཨཱཔཛྫཏི. ཨལཱིནཱནུདྡྷཏཏཱཡ ཧི ཨཱརམྨཎེ སམཔྤཝཏྟཾ ཨནིརསྶཱདཏཱཡ སམཐཝཱིཐིཔཊིཔནྣཾ. སམཔྤཝཏྟིཡཱ ཝཱ ཨལཱིནཾ ཨནུདྡྷཏཾ, སམཐཝཱིཐིཔཊིཔཏྟིཡཱ ཨནིརསྶཱདནྟི དཊྛབྦཾ.

ནེཀྑམྨཔཊིཔདནྟི ཛྷཱནཔཊིཔཏྟིཾ. སམཱདྷིཨདྷིམུཏྟཏཱཏི སམཱདྷིནིབྦཏྟནེ ཛྷཱནཱདྷིགམེ ཡུཏྟཔྤཡུཏྟཏཱ. སཱ པན ཡསྨཱ སམཱདྷིཾ གརུཾ ཀཏྭཱ ཏཏྠ ནིནྣཔོཎཔབྦྷཱརབྷཱཝེན ¶ པཝཏྟིཡཱ ཧོཏི, ཏསྨཱ ‘‘སམཱདྷིགརཱུ’’ཏིཨཱདི ཝུཏྟཾ.

༦༧. པཊིལདྡྷེ ནིམིཏྟསྨིཾ ཨེཝཾ ཧི སམྤཱདཡཏོ ཨཔྤནཱཀོསལླཾ ཨིམཾ ཨཔྤནཱ སམྤཝཏྟཏཱིཏི སམྦནྡྷོ. སཱཏི ཨཔྤནཱ. ཧིཏྭཱ ཧཱིཏི ཧི-སདྡོ ཧེཏུཨཏྠོ. ཡསྨཱ ཋཱནམེཏཾ ན ཝིཛྫཏི, ཏསྨཱ ཙིཏྟཔྤཝཏྟིཨཱཀཱརཾ བྷཱཝནཱཙིཏྟསྶ ལཱིནུདྡྷཏཱདིཝསེན པཝཏྟིཨཱཀཱརཾ སལླཀྑཡཾ ཨུཔདྷཱརེནྟོ. སམཏཾ ཝཱིརིཡསྶེཝ ཝཱིརིཡསྶ སམཱདྷིནཱ སམརསཏཾཡེཝ ཡོཛཡེཐ. ཀཐཾ པན ཡོཛཡེཐཱཏི ཨཱཧ ‘‘ཨཱིསཀམྤཱི’’ཏིཨཱདི. ཏཏྠ ལཡནྟི ལཱིནབྷཱཝཾ, སངྐོཙནྟི ཨཏྠོ. ཡནྟནྟི གཙྪནྟཾ ¶ , པགྒཎྷེཐེཝ སམབྷཱཝཱཡཱཏི ཨདྷིཔྤཱཡོ. ཏེནཱཧ ‘‘ཨཙྩཱརདྡྷཾ ནིསེདྷེཏྭཱ སམམེཝ པཝཏྟཡེ’’ཏི. ཀཐཾ པན སམམེཝ པཝཏྟཡེཏི ཨཱཧ ‘‘རེཎུམྷཱི’’ཏིཨཱདི. ཡཐཱཏི རེཎུཨཱདཱིསུ ཡཐཱ མདྷུཀརཱདཱིནཾ པཝཏྟི ཨུཔམཱབྷཱཝེན ཨཊྛཀཐཱཡཾ སམྨཝཎྞིཏཱ, ཨེཝཾ ལཱིནུདྡྷཏབྷཱཝེཧི མོཙཡིཏྭཱ ཝཱིརིཡསམཏཱཡོཛནེན ནིམིཏྟཱབྷིམུཁཾ མཱནསཾ པཊིཔཱདཡེ པཊིབྷཱགནིམིཏྟཱབྷིམུཁཾ བྷཱཝནཱཙིཏྟཾ སམྤཱདེཡྻཱཏི ཨཏྠོ.

ནིམིཏྟཱབྷིམུཁཔཊིཔཱདནཝཎྞནཱ

༦༨. ཏཏྲཱཏི ཏསྨིཾ ‘‘རེཎུམྷཱི’’ཏིཨཱདིནཱ ཝུཏྟགཱཐཱདྭཡེ. ཨཏྠདཱིཔནཱ ཨུཔམཱུཔམེཡྻཏྠཝིབྷཱཝནཱ. ཨཚེཀོཏི ཨཀུསལོ. པཀྑནྡོཏི དྷཱཝིཏུཾ ཨཱརདྡྷོ. ཝིཀསནཀྑཎེཡེཝ སརསཾ ཀུསུམཔརཱགཾ ཧོཏི, པཙྪཱ ཝཱཏཱདཱིཧི པརིཔཏཏི, ཝིརསཾ ཝཱ ཧོཏི. ཏསྨཱ ནིཝཏྟནེ རེཎུ ཁཱིཡཏཱིཏི ཨཱཧ ‘‘ཁཱིཎེ རེཎུམྷི སམྤཱཔུཎཱཏཱི’’ཏི. པུཔྥརཱསིནྟི རུཀྑསཱཁཱསུ ནིསྶིཏཾ པུཔྥསཉྩཡཾ.

སལླཀཏྟཨནྟེཝཱསིཀེསཱུཏི སལླཀཏྟཨཱཙརིཡསྶ ཨནྟེཝཱསིཀེསུ. ཨུདཀཐཱལགཏེཏི ཨུདཀཐཱལིཡཾ ཋཔིཏེ. སཏྠཀམྨནྟི སིརཱཝེདྷནཱདིསཏྠཀམྨཾ. ཕུསིཏུམྤི ཨུཔྤལཔཏྟནྟི སམྦནྡྷོ. སམེནཱཏི པུརིམཀཱ ཝིཡ གརུཾ, མནྡཉྩ པཡོགཾ ཨཀཏྭཱ སམཔྤམཱཎེན པཡོགེན. ཏཏྠཱཏི ཨུཔྤལཔཏྟེ. པརིཡོདཱཏསིཔྤོཏི སུཝིསུདྡྷསིཔྤོ ནིཔྥནྣསིཔྤོ.

མཀྐཊཀསུཏྟནྟི ¶ ལཱུཏསུཏྟཾ. ནིཡཱམཀོ ནཱཝཱསཱརཐཱི. ལངྐཱརནྟི ཀིལཉྫཱདིམཡཾ ནཱཝཱཀཊསཱརཀཾ. ཏེལེན ཨཚཌྜེནྟོ ནཱལི༹ཾ པཱུརེཏཱིཏི སརཱཝཱདིགཏེན ཏེལེན ཨཚཌྜེནྟོ སུཁུམཙྪིདྡཀཾ ཏེལནཱལི༹ཾ པཱུརེཏི. ཨེཝམེཝཱཏི ཡཐཱ ཏེ ཨཱདིཏོ ཝུཏྟམདྷུཀརསལླཀཏྟཨནྟེཝཱསིསུཏྟཱཀཌྜྷཀནིཡཱམཀཏེལཔཱུརཀཱ ཝེགེན པཡོགཾ ཀརོནྟི, ཨེཝམེཝ ཡོ བྷིཀྑུ ‘‘སཱིགྷཾ ཨཔྤནཾ པཱཔུཎིསྶཱམཱི’’ཏི གཱལ༹ྷཾ ཝཱིརིཡཾ ཀརོཏི, ཡོ མཛ྄ཛྷེ ཝུཏྟམདྷུཀརཱདཡོ ཝིཡ ཝཱིརིཡཾ ན ཀརོཏི, ཨིམེ དྭེཔི ཝཱིརིཡསམཏཱབྷཱཝེན ཨཔྤནཾ པཱཔུཎིཏུཾ ན སཀྐོནྟི. ཡོ པན ཨཝསཱནེ ཝུཏྟམདྷུཀརཱདཡོ ཝིཡ སམཔྤཡོགོ, ཨཡཾ ཨཔྤནཾ པཱཔུཎིཏུཾ སཀྐོཏི ཝཱིརིཡསམཏཱཡོགཏོཏི ཨུཔམཱསཾསནྡནཾ ཝེདིཏབྦཾ. ཏེན ཝུཏྟཾ ‘‘ཨེཀོ བྷིཀྑཱུ’’ཏིཨཱདི. ལཱིནཾ བྷཱཝནཱཙིཏྟནྟི ཨདྷིཔྤཱཡོ.

པཋམཛ྄ཛྷཱནཀཐཱཝཎྞནཱ

༦༩. ཨེཝནྟི ¶ ཝུཏྟཔྤཀཱརེན. ཝཱིརིཡསམཏཱཡོཛནཝསེན ཝཱིཐིཔཊིཔནྣཾ བྷཱཝནཱམཱནསཾ པཊིབྷཱགནིམིཏྟེཡེཝ ཋཔནཝསེན ནིམིཏྟཱབྷིམུཁཾ པཊིཔཱདཡཏོ ཨསྶ ཡོགིནོ. ཨིཛ྄ཛྷིསྶཏཱིཏི སམིཛ྄ཛྷིསྶཏི, ཨུཔྤཛྫིསྶཏཱིཏི ཨཏྠོ. ཨནུཡོགཝསེནཱཏི བྷཱཝནཱཝསེན. སེསཱནཱིཏི སེསཱནི ཏཱིཎི, ཙཏྟཱརི ཝཱ. པཀཏིཙིཏྟེཧཱིཏི པཱཀཏིཀེཧི ཀཱམཱཝཙརཙིཏྟེཧི. བལཝ…པེ… ཙིཏྟེཀགྒཏཱནི བྷཱཝནཱབལེན པཊུཏརསབྷཱཝཔྤཏྟིཡཱ. པརིཀམྨཏྟཱཏི པཊིསངྑཱརཀཏྟཱ. ཡདི ཨཱསནྣཏྟཱ ཨུཔཙཱརཏཱ, གོཏྲབྷུནོ ཨེཝ ཨུཔཙཱརསམཉྙཱ སིཡཱཏི ཨཱཧ ‘‘སམཱིཔཙཱརིཏྟཱ ཝཱ’’ཏི. ཨནཙྩཱསནྣོཔི ཧི ནཱཏིདཱུརཔཝཏྟཱི སམཱིཔཙཱརཱི ནཱམ ཧོཏི. ཨཔྤནཾ ཨུཔེཙྩ ཙརནྟཱིཏི ཨུཔཙཱརཱནི. ཨིཏོ པུབྦེ པརིཀམྨཱནནྟི ནཱནཱཝཛྫནཝཱིཐིཡཾ པརིཀམྨཱནཾ. ཨེཏྠཱཏི ཨེཏེསུ པརིཀམྨུཔཙཱརཱནུལོམསཉྙིཏེསུ. སབྦནྟིམནྟི ཏཏིཡཾ, ཙཏུཏྠཾ ཝཱ. པརིཏྟགོཏྟཱབྷིབྷཝནཏོཏི པརིཏྟསྶ གོཏྟསྶ ཨབྷིབྷཝནཏོ. གཾཏཱཡཏཱིཏི ཧི གོཏྟཾ, ‘‘པརིཏྟ’’ནྟི པཝཏྟམཱནཾ ཨབྷིདྷཱནཾ, བུདྡྷིཉྩ ཨེཀཾསིཀཝིསཡཏཱཡ རཀྑཏཱིཏི པརིཏྟགོཏྟཾ. ཡཐཱ ཧི བུདྡྷི ཨཱརམྨཎབྷཱུཏེན ཨཏྠེན ཝིནཱ ན པཝཏྟཏི, ཨེཝཾ ཨབྷིདྷཱནཾ ཨབྷིདྷེཡྻབྷཱུཏེན. ཏསྨཱ སོ ཏཱནི ཏཱཡཏི རཀྑཏཱིཏི ཝུཙྩཏི. ཏཾ པན མཧགྒཏཱནུཏྟརཝིདྷུརཾ ཀཱམཏཎྷཱཡ གོཙརབྷཱུཏཾ ཀཱམཱཝཙརདྷམྨཱནཾ ཨཱཝེཎིཀརཱུཔཾ དཊྛབྦཾ. མཧགྒཏགོཏྟེཔི ཨིམིནཱ ནཡེན ཨཏྠོ ཝེདིཏབྦོ. བྷཱཝནཏོཏི ཨུཔྤཱདནཏོ.

ཨཝིསེསེན ¶ སབྦེསཾ སབྦཱ སམཉྙཱཏི པཋམནཡོ གཧིཏགྒཧཎཾ ཧོཏཱིཏི ཨཱཧ ‘‘ཨགྒཧིཏགྒཧཎེནཱ’’ཏིཨཱདི. ནཱནཱཝཛྫནཔརིཀམྨམེཝ པརིཀམྨནྟི ཨདྷིཔྤཱཡེན ‘‘པཋམཾ ཝཱ ཨུཔཙཱར’’ནྟིཨཱདི ཝུཏྟཾ. ཙཏུཏྠཾ ཨཔྤནཱཙིཏྟཾ, པཉྩམཾ ཝཱ ཨཔྤནཱཙིཏྟཾ པུབྦེ ཝུཏྟནཡེན སཙེ ཙཏུཏྠཾ གོཏྲབྷུ ཧོཏཱིཏི ཨཏྠོ. པཉྩམཾ ཝཱཏི ཝཱ-སདྡོ ཨནིཡམེ. སྭཱཡཾ ཨནིཡམོ ཨིམིནཱ ཀཱརཎེནཱཏི དསྶེཏུཾ ‘‘ཏཉྩ ཁོ ཁིཔྤཱབྷིཉྙདནྡྷཱབྷིཉྙཝསེནཱ’’ཏི ཝུཏྟཾ. ཏཏྠ ཁིཔྤཱབྷིཉྙསྶ ཙཏུཏྠཾ ཨཔྤེཏི, དནྡྷཱབྷིཉྙསྶ པཉྩམཾ. ཀསྨཱ པན ཙཏུཏྠཾ, པཉྩམཾ ཝཱ ཨཔྤེཏི, ན ཏཏོ པརནྟི ཨཱཧ ‘‘ཏཏོ པརཾ ཛཝནཾ པཏཏཱི’’ཏི. ཏཏོ པཉྩམཏོ པརཾ ཚཊྛཾ, སཏྟམཉྩ ཛཝནཾ པཏནྟཾ ཝིཡ ཧོཏི པརིཀྑཱིཎཛཝཏྟཱཏི ཨདྷིཔྤཱཡོ.

ཡཐཱ ཨལདྡྷཱསེཝནཾ པཋམཛཝནཾ དུབྦལཏྟཱ གོཏྲབྷུཾ ན ཨུཔྤཱདེཏི, ལདྡྷཱསེཝནཾ པན བལཝབྷཱཝཏོ ¶ དུཏིཡཾ, ཏཏིཡཾ ཝཱ གོཏྲབྷུཾ ཨུཔྤཱདེཏི, ཨེཝཾ ལདྡྷཱསེཝནཏཱཡ བལཝབྷཱཝཏོ ཚཊྛཾ, སཏྟམམྤི ཨཔྤེཏཱིཏི ཐེརསྶ ཨདྷིཔྤཱཡོ. ཏེནཱཧ ‘‘ཏསྨཱ ཚཊྛེཔི སཏྟམེཔི ཨཔྤནཱ ཧོཏཱི’’ཏི. ཏནྟི ཐེརསྶ ཝཙནཾ. སུཏྟསུཏྟཱནུལོམཨཱཙརིཡཝཱདེཧི ཨནུཔཏྠམྦྷིཏཏྟཱ ཝུཏྟཾ ‘‘ཨཏྟནོམཏིམཏྟ’’ནྟི. ‘‘པུརིམཱ པུརིམཱ ཀུསལཱ དྷམྨཱ’’ཏི (པཊྛཱ. ༡.༡.༡༢) པན སུཏྟཔདམཀཱརཎཾ ཨཱསེཝནཔཙྩཡལཱབྷསྶ བལཝབྷཱཝེ ཨནེཀནྟིཀཏྟཱ. ཏཐཱ ཧི ཨལདྡྷཱསེཝནཱཔི པཋམཙེཏནཱ དིཊྛདྷམྨཝེདནཱིཡཱ ཧོཏི, ལདྡྷཱསེཝནཱ དུཏིཡཙེཏནཱ ཡཱཝ ཚཊྛཙེཏནཱ ཨཔརཱཔརིཡཝེདནཱིཡཱ. ཙཏུཏྠཔཉྩམེསུཡེཝཱཏིཨཱདི ཝུཏྟསྶེཝཏྠསྶ ཡུཏྟིདསྶནམུཁེན ནིགམནཏྠཾ ཝུཏྟཾ. ཏཏྠ ཡདི ཚཊྛསཏྟམཾ ཛཝནཾ པཏིཏཾ ནཱམ ཧོཏི པརིཀྑཱིཎཛཝཏྟཱ, ཀཐཾ སཏྟམཛཝནཙེཏནཱ ཨུཔཔཛྫཝེདནཱིཡཱ, ཨཱནནྟརིཡཱ ཙ ཧོཏཱིཏི? ནཱཡཾ ཝིསེསོ ཨཱསེཝནཔཙྩཡལཱབྷེན བལཔྤཏྟིཡཱ. ཀིཉྩརཧི ཀིརིཡཱཝཏྠཱཝིསེསཏོ. ཀིརིཡཱཝཏྠཱ ཧི ཨཱརམྦྷམཛ྄ཛྷཔརིཡོསཱནཝསེན ཏིཝིདྷཱ. ཏཏྠ ཙ པརིཡོསཱནཱཝཏྠཱཡ སནྣིཊྛཱཔཀཙེཏནཱབྷཱཝེན ཨུཔཔཛྫཝེདནཱིཡཱདིཏཱ ཧོཏི, ན བལཝབྷཱཝེནཱཏི དཊྛབྦཾ. པཊིསནྡྷིཡཱ ཨནནྟརཔཙྩཡབྷཱཝིནོ ཝིཔཱཀསནྟཱནསྶ ཨནནྟརཔཙྩཡབྷཱཝེན ཏཐཱ ཨབྷིསངྑཏཏྟཱཏི ཙ ཝདནྟི. ཏསྨཱ ཚཊྛསཏྟམཱནཾ པཔཱཏཱབྷིམུཁཏཱཡ པརིཀྑཱིཎཛཝཏཱ ན སཀྐཱ ནིཝཱརེཏུཾ. ཏཐཱ ཧི ‘‘ཡཐཱ ཧི པུརིསོ’’ཏིཨཱདི ཝུཏྟཾ.

སཱ ¶ ཙ པན ཨཔྤནཱ. ཨདྡྷཱནཔརིཙྪེདོཏི ཀཱལཔརིཙྪེདོ. སོ པནེཏྠ སཏྟསུ ཋཱནེསུ ཀཏྠཙི ཨཔརིམཱཎཙིཏྟཀྑཎཏཱཡ, ཀཏྠཙི ཨཏིཨིཏྟརཁཎཏཱཡ ནཏྠཱིཏི ཝུཏྟོ. ན ཧེཏྠ སམྤུཎྞཛཝནཝཱིཐི ཨདྡྷཱ ལབྦྷཏི. ཏེནེཝཱཧ ‘‘ཨེཏྠ མགྒཱནནྟརཕལ’’ནྟིཨཱདི. སེསཊྛཱནེསཱུཏི པཋམཔྤནཱ, ལོཀིཡཱབྷིཉྙཱ, མགྒཀྑཎོ, ནིརོདྷཱ ཝུཊྛཧནྟསྶ ཕལཀྑཎོཏི ཨེཏེསུ ཙཏཱུསུ ཋཱནེསུ.

ཨེཏྟཱཝཏཱཏི ཨེཏྟཀེན བྷཱཝནཱཀྐམེན ཨེས ཡོགཱཝཙརོ པཋམཾ ཛྷཱནཾ ཨུཔསམྤཛྫ ཝིཧརཏི. ཨེཝཾ ཝིཧརཏཱ ཙ ཨནེན ཏདེཝ པཋམཾ ཛྷཱནཾ ཨདྷིགཏཾ ཧོཏི པཐཝཱིཀསིཎནྟི སམྦནྡྷོ.

༧༠. ཏཏྠཱཏི ཏསྨིཾ ཛྷཱནཔཱཋེ. ཝིཝིཙྩིཏྭཱཏི ཝིསུཾ ཧུཏྭཱ. ཏེནཱཧ ‘‘ཝིནཱ ཧུཏྭཱ ཨཔཀྐམིཏྭཱ’’ཏི, པཛཧནཝསེན ཨཔསཀྐིཏྭཱཏི ཨཏྠོ. ཝིཝིཙྩེཝ ཀཱམེཧཱིཏི ཨེཏྠ ‘‘ཝིཝིཙྩཱ’’ཏི ཨིམིནཱ ཝིཝེཙནཾ ཛྷཱནཀྑཎེ ཀཱམཱནཾ ཨབྷཱཝམཏྟཾ ཝུཏྟཾ. ‘‘ཝིཝིཙྩེཝཱ’’ཏི པན ཨིམིནཱ ཨེཀཾསཏོ ཀཱམཱནཾ ཝིཝེཙེཏབྦཏཱདཱིཔནེན ཏཔྤཊིཔཀྑཏཱ ཛྷཱནསྶ, ཀཱམཝིཝེཀསྶ ཙ ཛྷཱནཱདྷིགམཱུཔཱཡཏཱ ¶ དསྶིཏཱ ཧོཏཱིཏི ཨིམམཏྠཾ དསྶེཏུཾ ‘‘པཋམཾ ཛྷཱན’’ནྟིཨཱདིཾ ཝཏྭཱ ཏམེཝཏྠཾ པཱཀཊཏརཾ ཀཱཏུཾ ‘‘ཀཐ’’ནྟིཨཱདི ཝུཏྟཾ. ‘‘ཨནྡྷཀཱརེ སཏི པདཱིཔོབྷཱསོ ཝིཡཱ’’ཏི ཨེཏེན ཡཐཱ པདཱིཔོབྷཱསཱབྷཱཝེན རཏྟིཡཾ ཨནྡྷཀཱརཱབྷིབྷཝོ, ཨེཝཾ ཛྷཱནཱབྷཱཝེན སཏྟསནྟཏིཡཾ ཀཱམཱབྷིབྷཝོཏི དསྶེཏི.

ཨེཏནྟི པུབྦཔདེཡེཝ ཨཝདྷཱརཎཝཙནཾ. ན ཁོ པན ཨེཝཾ དཊྛབྦཾ ‘‘ཀཱམེཧི ཨེཝཱ’’ཏི ཨཝདྷཱརཎསྶ ཨཀཏཏྟཱ. ནིསྶརནྟི ནིགྒཙྪནྟི ཨེཏེན, ཨེཏྠ ཝཱཏི ནིསྶརཎཾ. ཀེ ནིགྒཙྪནྟི? ཀཱམཱ, ཏེསཾ ཀཱམཱནཾ ནིསྶརཎཾ པཧཱནཾ ཏནྣིསྶརཎཾ, ཏཏོ. ཀཐཾ པན སམཱནེ ཝིཀྑམྦྷནེ ཀཱམཱནམེཝེཏཾ ནིསྶརཎཾ, ན བྱཱཔཱདཱདཱིནནྟི ཙོདནཾ ཡུཏྟིཏོ, ཨཱགམཏོ ཙ སོདྷེཏུཾ ‘‘ཀཱམདྷཱཏཱུ’’ཏིཨཱདི ཝུཏྟཾ. ཏཏྠ ཀཱམདྷཱཏུསམཏིཀྐམནཏོཏི སཀལསྶཔི ཀཱམབྷཝསྶ སམཏིཀྐམཔཊིཔདཱབྷཱཝཏོ. ཏེན ཨིམསྶ ཛྷཱནསྶ ཀཱམཔརིཉྙཱབྷཱཝམཱཧ. ཀཱམརཱགཔཊིཔཀྑཏོཏི ཝཀྑམཱནཝིབྷཱགསྶ ཀིལེསཀཱམསྶ པཙྩཏྠིཀབྷཱཝཏོ. ཏེན ཡཐཱ མེཏྟཱ བྱཱཔཱདསྶ, ཀརུཎཱ ཝིཧིཾསཱཡ, ཨེཝམིདཾ ཛྷཱནཾ ཀཱམརཱགསྶ ཨུཛུཝིཔཙྩནཱིཀབྷཱུཏནྟི དསྶེཏི. ཨེཝམཏྟནོ པཝཏྟིཡཱ, ཝིཔཱཀཔྤཝཏྟིཡཱ ཙ ཀཱམརཱགཏོ, ཀཱམདྷཱཏུཏོ ¶ ཙ ཝིནིཝཏྟསབྷཱཝཏྟཱ ཨིདཾ ཛྷཱནཾ ཝིསེསཏོ ཀཱམཱནམེཝ ནིསྶརཎཾ. སྭཱཡམཏྠོ པཱཋགཏོ ཨེཝཱཏི ཨཱཧ ‘‘ཡཐཱཧཱ’’ཏིཨཱདི. ཀཱམཉྩེཏམཏྠཾ དཱིཔེཏུཾ པུརིམཔདེཡེཝ ཨཝདྷཱརཎཾ གཧིཏཾ, ཨུཏྟརཔདེཔི པན ཏཾ གཧེཏབྦམེཝ ཏཐཱ ཨཏྠསམྦྷཝཏོཏི དསྶེཏུཾ ‘‘ཨུཏྟརཔདེཔཱི’’ཏིཨཱདི ཝུཏྟཾ. ཨིཏོཏི ཀཱམཙྪནྡཏོ. ཨེས ནིཡམོ. སཱདྷཱརཎཝཙནེནཱཏི ཨཝིསེསཝཙནེན. ཏདངྒཝིཀྑམྦྷནསམུཙྪེདཔྤཊིཔསྶདྡྷིནིསྶརཎཝིཝེཀཱ ཏདངྒཝིཝེཀཱདཡོ. ཙིཏྟཀཱཡཨུཔདྷིཝིཝེཀཱ ཙིཏྟཝིཝེཀཱདཡོ. ཏཡོ ཨེཝ ཨིདྷ ཛྷཱནཀཐཱཡཾ དཊྛབྦཱ སམུཙྪེདཝིཝེཀཱདཱིནཾ ཨསམྦྷཝཏོ.

ནིདྡེསེཏི མཧཱནིདྡེསེ (མཧཱནི. ༡, ༧). ཏཏྠ ཧི ‘‘ཨུདྡཱནཏོ དྭེ ཀཱམཱ – ཝཏྠུཀཱམཱ ཀིལེསཀཱམཱ ཙཱ’’ཏི ཨུདྡིསིཏྭཱ ‘‘ཏཏྠ ཀཏམེ ཝཏྠུཀཱམཱ? མནཱཔིཡཱ རཱུཔཱ…པེ… མནཱཔིཡཱ ཕོཊྛབྦཱ’’ཏིཨཱདིནཱ ཝཏྠུཀཱམཱ ནིདྡིཊྛཱ. ཏེ པན ཀཱམཱིཡནྟཱིཏི ཀཱམཱཏི ཝེདིཏབྦཱ. ཏཏྠེཝཱཏི ནིདྡེསེ ཨེཝ. ཝིབྷངྒེཏི ཛྷཱནཝིབྷངྒེ (ཝིབྷ. ༥༦༤). པཏྠནཱཀཱརེན པཝཏྟོ དུབྦལོ ལོབྷོ ཚནྡནཊྛེན ཚནྡོ, ཏཏོ བལཝཱ རཉྫནཊྛེན རཱགོ, ཏཏོཔི བལཝཏརོ བཧལརཱགོ ཚནྡརཱགོ. ནིམིཏྟཱནུབྱཉྫནཱནི སངྐཔྤེཏི ཨེཏེནཱཏི སངྐཔྤོ, ཏཐཱཔཝཏྟོ ལོབྷོ, ཏཏོ བལཝཱ རཉྫནཊྛེན རཱགོ, སངྐཔྤནཝསེནེཝ པཝཏྟོ ཏཏོཔི བལཝཏརོ སངྐཔྤརཱགོཏི. སྭཱཡཾ ¶ པབྷེདོ ཨེཀསྶེཝ ལོབྷསྶ པཝཏྟིཨཱཀཱརཝསེན, ཨཝཏྠཱབྷེདཝསེན ཙ ཝེདིཏབྦོ ཡཐཱ ‘‘ཝཙྪོ དམྨོ བལཱིབདྡོ’’ཏི. ཨིམེ ཀིལེསཀཱམཱ. ཀཱམེནྟཱིཏི ཀཱམཱ, ཀཱམེནྟི ཨེཏེཧཱིཏི ཝཱ.

ཨེཝཉྷི སཏཱིཏི ཨེཝཾ ཨུབྷཡེསམྤི ཀཱམཱནཾ སངྒཧེ སཏི. ཝཏྠུཀཱམེཧིཔཱིཏི ‘‘ཝཏྠུཀཱམེཧི ཝིཝིཙྩེཝཱ’’ཏིཔི ཨཏྠོ ཡུཛྫཏཱིཏི ཨེཝཾ ཡུཛྫམཱནཏྠནྟརསམུཙྩཡཏྠོ པི-སདྡོ, ན ཀིལེསཀཱམསམུཙྩཡཏྠོ. ཀསྨཱ? ཨིམསྨིཾ ཨཏྠེ ཀིལེསཀཱམེཧི ཝིཝེཀསྶ དུཏིཡཔདེན ཝུཏྟཏྟཱ. ཏེནཱཏི ཝཏྠུཀཱམཝིཝེཀེན. ཀཱཡཝིཝེཀོ ཝུཏྟོ ཧོཏི པུཏྟདཱརཱདིཔརིགྒཧཝིཝེཀདཱིཔནཏོ. པུརིམེནཱཏི ཀཱཡཝིཝེཀེན. ཨེཏྠཱཏི ‘‘ཝིཝིཙྩེཝ ཀཱམེཧི, ཝིཝིཙྩ ཨཀུསལེཧི དྷམྨེཧཱི’’ཏི ཨེཏསྨིཾ པདདྭཡེ, ཨིཏོ ཝཱ ནིདྡྷཱརིཏེ ཝིཝེཀདྭཡེ. ཨཀུསལ-སདྡེན ཡདིཔི ¶ ཀིལེསཀཱམཱ, སབྦཱཀུསལཱཔི ཝཱ གཧིཏཱ, སབྦཐཱ པན ཀིལེསཀཱམེཧི ཝིཝེཀོ ཝུཏྟོཏི ཨཱཧ ‘‘དུཏིཡེན ཀིལེསཀཱམེཧི ཝིཝེཀཝཙནཏོ’’ཏི. དུཏིཡེནཱཏི ཙ ཙིཏྟཝིཝེཀེནཱཏི ཨཏྠོ. ཨེཏེསནྟི ཡཐཱཝུཏྟཱནཾ དྭིནྣཾ པདཱནཾ, ནིདྡྷཱརཎེ ཙེཏཾ སཱམིཝཙནཾ. ཏཎྷཱདིསཾཀིལེསཱནཾ ཝཏྠུནོ པཧཱནཾ སཾཀིལེསཝཏྠུཔྤཧཱནཾ. ལོལབྷཱཝོ ནཱམ ཏཏྠ ཏཏྠ རཱུཔཱདཱིསུ ཏཎྷུཔྤཱདོ, ཏསྶ ཧེཏུ ཝཏྠུཀཱམཱ ཨེཝ ཝེདིཏབྦཱ. བཱལབྷཱཝོ ཨཝིཛྫཱ, དུཙྩིནྟིཏཙིནྟིཏཱདི ཝཱ, ཏསྶ ཨཡོནིསོམནསིཀཱརོ, སབྦེཔི ཝཱ ཨཀུསལཱ དྷམྨཱ ཧེཏུ. ཀཱམགུཎཱདྷིགམཧེཏུཔི པཱཎཱཏིཔཱཏཱདིཨསུདྡྷཔཡོགོ ཧོཏཱིཏི ཏབྦིཝེཀེན པཡོགསུདྡྷི ཝིབྷཱཝིཏཱ. ཏཎྷཱསཾཀིལེསསོདྷནེན, ཝིཝཊྚཱུཔནིསྶཡསཾཝཌྜྷནེན ཙ ཨཛ྄ཛྷཱསཡཝིསོདྷནཾ ཨཱསཡཔོསནཾ. ཀཱམེསཱུཏི ནིདྡྷཱརཎེ བྷུམྨཾ.

ཨནེཀབྷེདོཏི ཀཱམཱསཝཀཱམརཱགསཾཡོཛནཱདིཝསེན, རཱུཔཏཎྷཱདིཝསེན ཙ ཨནེཀཔྤབྷེདོ. ཀཱམཙྪནྡོཡེཝཱཏི ཀཱམསབྷཱཝོཡེཝ ཚནྡོ, ན ཀཏྟུཀམྱཏཱཚནྡོ, ནཱཔི ཀུསལཙྪནྡོཏི ཨདྷིཔྤཱཡོ. ཛྷཱནཔཊིཔཀྑཏོཏི ཛྷཱནསྶ པཊིཔཀྑབྷཱཝཏོ ཏཾཧེཏུ ཏནྣིམིཏྟཾ ཝིསུཾ ཝུཏྟོ. ཨཀུསལབྷཱཝསཱམཉྙེན ཨགྒཧེཏྭཱ ཝིསུཾ སརཱུཔེན གཧིཏོ. ཡདི ཀིལེསཀཱམོཝ པུརིམཔདེ ཝུཏྟོ, ཀཐཾ བཧུཝཙནནྟི ཨཱཧ ‘‘ཨནེཀབྷེདཏོ’’ཏིཨཱདི.

ཨཉྙེསམྤི དིཊྛིམཱནཨཧིརིཀཱནོཏྟཔྤཱདཱིནཾ, ཏཾསཧིཏཕསྶཱདཱིནཉྩ. ཨུཔརི ཝུཙྩམཱནཱནི ཛྷཱནངྒཱནི ཨུཔརིཛྷཱནངྒཱནི, ཏེསཾ ཨཏྟནོ པཙྩནཱིཀཱནཾ པཊིཔཀྑབྷཱཝདསྶནཏོ ཏཔྤཙྩནཱིཀནཱིཝརཎཝཙནཾ. ནཱིཝརཎཱནི ཧི ཛྷཱནངྒཔཙྩནཱིཀཱནི ཏེསཾ པཝཏྟིནིཝཱརཎཏོ. སམཱདྷི ཀཱམཙྪནྡསྶ ¶ པཊིཔཀྑོ རཱགཔྤཎིདྷིཡཱ ཨུཛུཝིཔཙྩནཱིཀབྷཱཝཏོ, ནཱནཱརམྨཎེཧི པལོབྷིཏསྶ པརིབྦྷམནྟསྶ ཙིཏྟསྶ སམཱདྷཱནཏོ ཙ. པཱིཏི བྱཱཔཱདསྶ པཊིཔཀྑཱ པཱམོཛྫེན སམཱནཡོགཀྑེམཏྟཱ. ཝིཏཀྐོ ཐིནམིདྡྷསྶ པཊིཔཀྑོ ཡོནིསོ སངྐཔྤནཝསེན སཝིཔྥཱརཔཝཏྟིཏོ. སུཁཾ ཨཝཱུཔསམཱནུཏཱཔསབྷཱཝསྶ ཨུདྡྷཙྩཀུཀྐུཙྩསྶ པཊིཔཀྑཾ ཝཱུཔསནྟསཱིཏལསབྷཱཝཏྟཱ. ཝིཙཱརོ ཝིཙིཀིཙྪཱཡ པཊིཔཀྑོ ཨཱརམྨཎེ ཨནུམཛྫནཝསེན པཉྙཱཔཊིརཱུཔསབྷཱཝཏྟཱ. མཧཱཀཙྩཱནཏྠེརེན དེསིཏཾ པིཊཀཱནཾ སཾཝཎྞནཱ པེཊཀཾ, ཏསྨིཾ པེཊཀེ.

པཉྩཀཱམགུཎབྷེདཝིསཡསྶཱཏི ¶ རཱུཔཱདིཔཉྩཀཱམགུཎཝིསེསཝིསཡསྶ. ཨཱགྷཱཏཝཏྠུབྷེདཱདིཝིསཡཱནནྟི བྱཱཔཱདཝིཝེཀཝཙནེན ‘‘ཨནཏྠཾ མེ ཨཙརཱི’’ཏི (དཱི. ནི. ༣.༣༤༠; ཨ. ནི. ༩.༢༩; ཝིབྷ. ༩༦༠) ཨཱདིཨཱགྷཱཏཝཏྠུབྷེདཝིསཡསྶ དོསསྶ, མོཧཱདྷིཀེཧི ཐིནམིདྡྷཱདཱིཧི ཝིཝེཀཝཙནེན པཊིཙྪཱདནཝསེན དུཀྑཱདིཔུབྦནྟཱདིབྷེདཝིསཡསྶ མོཧསྶ ཝིཀྑམྦྷནཝིཝེཀོ ཝུཏྟོ. ཀཱམརཱགབྱཱཔཱདཏདེཀཊྛཐིནམིདྡྷཱདིཝིཀྑམྦྷཀཉྩེཏཾ སབྦཱཀུསལཔཊིཔཀྑསབྷཱཝཏྟཱ. སབྦཀུསལཱནཾ ཏེན སབྷཱཝེན སབྦཱཀུསལཔྤཧཱཡཀཾ ཧོཏི, ཧོནྟམྤི ཀཱམརཱགཱདིཝིཀྑམྦྷནསབྷཱཝམེཝ ཧོཏི ཏཾསབྷཱཝཏྟཱཏི ཨཝིསེསེཏྭཱ ནཱིཝརཎཱཀུསལམཱུལཱདཱིནཾ ‘‘ཝིཀྑམྦྷནཝིཝེཀོ ཝུཏྟོ ཧོཏཱི’’ཏི ཨཱཧ.

༧༡. ཡཐཱཔཙྩཡཾ པཝཏྟམཱནཱནཾ སབྷཱཝདྷམྨཱནཾ ནཏྠི ཀཱཙི ཝསཝཏྟིཏཱཏི ཝསཝཏྟིབྷཱཝནིཝཱརཎཏྠཾ ‘‘ཝིཏཀྐནཾ ཝིཏཀྐོ’’ཏི ཝུཏྟཾ. ཏཡིདཾ ‘‘ཝིཏཀྐནཾ ཨཱིདིསམིད’’ནྟི ཨཱརམྨཎསྶ པརིཀཔྤནནྟི ཨཱཧ ‘‘ཨཱུཧནནྟི ཝུཏྟཾ ཧོཏཱི’’ཏི. ཡསྨཱ ཙིཏྟཾ ཝིཏཀྐབལེན ཨཱརམྨཎཾ ཨབྷིནིརུལ༹ྷཾ ཝིཡ ཧོཏི, ཏསྨཱ སོ ཨཱརམྨཎཱབྷིནིརོཔནལཀྑཎོ ཝུཏྟོ. ཡཐཱ ཧི ཀོཙི རཱཛཝལླབྷཾ, ཏཾསམྦནྡྷིནཾ མིཏྟཾ ཝཱ ནིསྶཱཡ རཱཛགེཧཾ ཨཱརོཧཏི ཨནུཔཝིསཏི, ཨེཝཾ ཝིཏཀྐཾ ནིསྶཱཡ ཙིཏྟཾ ཨཱརམྨཎཾ ཨཱརོཧཏི. ཡདི ཨེཝཾ, ཀཐཾ ཨཝིཏཀྐཾ ཙིཏྟཾ ཨཱརམྨཎཾ ཨཱརོཧཏཱིཏི? ཝིཏཀྐབལེནེཝ. ཡཐཱ ཧི སོ པུརིསོ པརིཙཡེན ཏེན ཝིནཱཔི ནིརཱསངྐོ རཱཛགེཧཾ པཝིསཏི, ཨེཝཾ པརིཙཡེན ཝིཏཀྐེན ཝིནཱཔི ཨཝིཏཀྐཾ ཙིཏྟཾ ཨཱརམྨཎཾ ཨཱརོཧཏི. པརིཙཡེནཱཏི ཙ སནྟཱནེ པཝཏྟཝིཏཀྐབྷཱཝནཱསངྑཱཏེན པརིཙཡེན. ཝིཏཀྐསྶ ཧི སནྟཱནེ ཨབྷིཎྷཾ པཝཏྟསྶ ཝསེན ཙིཏྟསྶ ཨཱརམྨཎཱབྷིརུཧཎཾ ཙིརཔརིཙིཏཾ. ཏེན ཏཾ ཀདཱཙི ཝིཏཀྐེན ཝིནཱཔི ཏཏྠ པཝཏྟཏེཝ. ཡཐཱ ཏཾ ཉཱཎསཧིཏཾ ཧུཏྭཱ སམྨསནཝསེན ཙིརཔརིཙིཏཾ ཀདཱཙི ཉཱཎཝིརཧིཏམྤི སམྨསནཝསེན པཝཏྟཏི, ཡཐཱ ཝཱ ཀིལེསསཧིཏཾ ཧུཏྭཱ པཝཏྟཾ སབྦསོ ¶ ཀིལེསརཧིཏམྤི པརིཙཡེན ཀིལེསཝཱསནཱཝསེན པཝཏྟཏི, ཨེཝཾསམྤདམིདཾ དཊྛབྦཾ. ཨཱདིཏོ, ཨབྷིམུཁཾ ཝཱ ཧནནཾ ཨཱཧནནཾ. པརིཏོ, པརིཝཏྟེཏྭཱ ཝཱ ཨཱཧནནཾ པརིཡཱཧནནཾ. ‘‘རཱུཔཾ རཱུཔཾ, པཐཝཱི པཐཝཱི’’ཏི ཨཱཀོཊེནྟསྶ ཝིཡ པཝཏྟི ‘‘ཨཱཧནནཾ, པརིཡཱཧནན’’ནྟི ཙ ཝེདིཏབྦཾ. ཨཱནཡནཾ ཙིཏྟསྶ ཨཱརམྨཎེ ཨུཔནཡནཾ, ཨཱཀཌྜྷནཾ ཝཱ.

ཨནུསཉྩརཎཾ ¶ ཨནུཔརིབྦྷམནཾ. སྭཱཡཾ ཝིསེསོ སནྟཱནམྷི ལབྦྷམཱནོ ཨེཝ སནྟཱནེ པཱཀཊོ ཧོཏཱིཏི དཊྛབྦོ. སེསེསུཔི ཨེསེཝ ནཡོ. ཨནུམཛྫནཾ ཨཱརམྨཎེ ཙིཏྟསྶ ཨནུམསནཾ, པརིམཛྫནནྟི ཨཏྠོ. ཏཐཱ ཧི ཝིཙཱརོ ‘‘པརིམཛྫནཧཏྠོ ཝིཡ, སཉྩརཎཧཏྠོ ཝིཡཱ’’ཏི ཙ ཝུཏྟོ. ཏཏྠཱཏི ཨཱརམྨཎེ. སཧཛཱཏཱནཾ ཨནུཡོཛནཾ ཨཱརམྨཎེ ཨནུཝིཙཱརཎསངྑཱཏཨནུམཛྫནཝསེནེཝ ཝེདིཏབྦཾ. ཨནུཔྤབནྡྷནཾ ཨཱརམྨཎེ ཙིཏྟསྶ ཨཝིཙྪིནྣསྶ ཝིཡ པཝཏྟི. ཏཐཱ ཧི སོ ‘‘ཨནུསནྡྷཱནཏཱ’’ཏི (དྷ. ས. ༨) ནིདྡིཊྛོ. ཏེནེཝ ཙ ‘‘གྷཎྜཱནུརཝོ ཝིཡ, པརིབྦྷམནཾ ཝིཡཱ’’ཏི ཙ ཝུཏྟོ.

ཀཏྠཙཱིཏི པཋམཛ྄ཛྷཱནེ, པརིཏྟཙིཏྟུཔྤཱདེསུ ཙ. ཝིཙཱརཏོ ཨོལཱ༹རིཀཊྛེན, ཝིཙཱརསྶེཝ ཙ པུབྦངྒམཊྛེན ཨནུརཝཏོ ཨོལཱ༹རིཀོ, ཏསྶ ཙ པུབྦངྒམོ གྷཎྜཱབྷིགྷཱཏོ ཝིཡ ཝིཏཀྐོ. ཡཐཱ ཧི གྷཎྜཱབྷིགྷཱཏོ པཋམཱབྷིནིཔཱཏོ ཧོཏི, ཨེཝཾ ཨཱརམྨཎཱབྷིམུཁནིརོཔནཊྛེན ཝིཏཀྐོ ཙེཏསོ པཋམཱབྷིནིཔཱཏོ ཧོཏི. ཨབྷིགྷཱཏ-གྒཧཎེན ཙེཏྠ ཨབྷིགྷཱཏཛོ སདྡོ གཧིཏོཏི ཝེདིཏབྦོ. ཝིཔྥཱརཝཱཏི ཝིཙལནཡུཏྟོ སཔརིཔྥནྡོ. པརིབྦྷམནཾ ཝིཡ པརིསྶཡཱབྷཱཝཝཱིམཾསནཏྠཾ. ཨནུཔྤབནྡྷེན པཝཏྟིཡནྟི ཨུཔཙཱརེ ཝཱ ཨཔྤནཱཡཾ ཝཱ སནྟཱནེན པཝཏྟིཡཾ. ཏཏྠ ཧི ཝིཏཀྐོ ནིཙྩལོ ཧུཏྭཱ ཨཱརམྨཎཾ ཨནུཔཝིསིཏྭཱ ཝིཡ པཝཏྟཏི, ན པཋམཱབྷིནིཔཱཏེ. པཱཀཊོ ཧོཏཱིཏི ཝིཏཀྐསྶ ཝིསེསོ ཨབྷིནིརོཔནཱཀཱརོ ཨོལཱ༹རིཀཏྟཱ པཋམཛ྄ཛྷཱནེ པཱཀཊོ ཧོཏི, ཏདབྷཱཝཏོ པཉྩཀནཡེ དུཏིཡཛ྄ཛྷཱནེ ཝིཙཱརསྶ ཝིསེསོ ཨནུམཛྫནཱཀཱརོ པཱཀཊོ ཧོཏི.

ཝཱལཎྜུཔཀཾ ཨེལ༹ཀལོམཱདཱིཧི ཀཏཙུམྦཊཀཾ. ཨུཔྤཱིལ༹ནཧཏྠོཏི པིཎྜསྶ ཨུཔྤཱིལ༹ནཧཏྠོ. ཏསྶེཝ ཨིཏོ ཙིཏོ ཙ སཉྩརཎཧཏྠོ. མཎྜལནྟི ཀཾསབྷཱཛནཱདཱིསུ ཀིཉྩི མཎྜལཾ ཝཊྚལེཁཾ ཀརོནྟསྶ. ཡཐཱ པུཔྥཕལསཱཁཱདིཨཝཡཝཝིནིམུཏྟོ ཨཝིཛྫམཱནོཔི རུཀྑོ ‘‘སཔུཔྥོ སཕལོ’’ཏི ཝོཧརཱིཡཏི, ཨེཝཾ ཝིཏཀྐཱདིཨངྒཝིནིམུཏྟཾ ཨཝིཛྫམཱནམྤི ཛྷཱནཾ ‘‘སཝིཏཀྐཾ སཝིཙཱར’’ནྟི ཝོཧརཱིཡཏཱིཏི དསྶེཏུཾ ‘‘རུཀྑོ ཝིཡཱ’’ཏིཨཱདི ཝུཏྟཾ. ཛྷཱནབྷཱཝནཱཡ པུགྒལཝསེན དེསེཏབྦཏྟཱ ¶ ‘‘ཨིདྷ བྷིཀྑུ ཝིཝིཙྩེཝ ཀཱམེཧཱི’’ཏིཨཱདིནཱ པུགྒལཱདྷིཊྛཱནེན ཛྷཱནཱནི ཨུདྡིཊྛཱནཱིཏི. ཡདིཔི ཝིབྷངྒེ པུགྒལཱདྷིཊྛཱནཱ དེསནཱ ཀཏཱ, ཨཏྠོ པན ཏཏྲཱཔི ཝིབྷངྒེཔི ཡཐཱ ཨིདྷ ‘‘ཨིམིནཱ ¶ ཙ ཝིཏཀྐེནཱ’’ཏིཨཱདིནཱ དྷམྨཝསེན ཝུཏྟོ, ཨེཝམེཝ དཊྛབྦོ, པརམཏྠཏོ པུགྒལསྶེཝ ཨབྷཱཝཏོཏི ཨདྷིཔྤཱཡོ. ཨཏྠོ…པེ… དཊྛབྦོ ཛྷཱནསམངྒིནོ ཝིཏཀྐཝིཙཱརསམངྒིཏཱདསྶནེན, ཛྷཱནསྶེཝ ཙ སཝིཏཀྐསཝིཙཱརཏཱཡ ཝུཏྟཏྟཱཏི ཨེཝཾ ཝཱ ཨེཏྠ ཨཏྠོ དཊྛབྦོ.

ཝིཝེཀཱཏི ཝིཝེཀཱ ཧེཏུབྷཱུཏཱཏི ཝིཝེཀ-སདྡསྶ བྷཱཝསཱདྷནཏཾ སནྡྷཱཡཱཧ. ཝིཝེཀེཏི ཀཏྟུསཱདྷནཏཾ, ཀམྨསཱདྷནཏཾ ཝཱ. ‘‘ཝིཝིཏྟོ’’ཏི ཧི ཨིམིནཱ ནཱིཝརཎེཧི ཝིནཱབྷཱུཏོ ཏེཧི ཝིཝེཙིཏོཏི ཙ སཱདྷནདྭཡམྤི སངྒཧིཏམེཝཱཏི.

༧༢. པཱིཎཡཏཱིཏི ཏཔྤེཏི, ཝཌྜྷེཏི ཝཱ. སམྤིཡཱཡནལཀྑཎཱཏི པརིཏུསྶནལཀྑཎཱ. པཱིཎནརསཱཏི པརིབྲཱུཧནརསཱ. ཕརཎརསཱཏི པཎཱིཏརཱུཔེཧི ཀཱཡསྶ བྱཱཔནརསཱ. ཨུདགྒབྷཱཝོ ཨོདགྱཾ. ཁུདྡིཀཱ ལཧུཾ ལོམཧཾསནམཏྟཾ ཀཏྭཱ བྷིནྣཱ ན པུན ཨུཔྤཛྫཏི. ཁཎིཀཱ བཧུལཾ ཨུཔྤཛྫཏི. ཨུབྦེགཏོ ཕརཎཱ ནིཙྩལཏྟཱ, ཙིརཊྛིཏིཀཏྟཱ ཙ པཎཱིཏཏརཱ. ཙེཏིཡངྒཎཾ གནྟྭཱཏི པུཎྞཝལླིཀཝིཧཱརེ ཙེཏིཡངྒཎཾ གནྟྭཱ. པཀཏིཡཱ དིཊྛཱརམྨཎཝསེནཱཏི པུབྦེ མཧཱཙེཏིཡཾ གཧིཏཱརམྨཎཝསེན. ཙིཏྲགེཎྜུཀོ ཝིཙིཏྲཱཀཱརེན ཀཏགེཎྜུཀོ. ཨུཔནིསྶཡེཏི སམཱིཔེ, ཏསྶ ཝཱ ཝིཧཱརསྶ ནིསྶཡབྷཱུཏེ, གོཙརཊྛཱནབྷཱུཏེཏི ཨཏྠོ.

གྷརཱཛིརེཏི གེཧངྒཎེ. པབྦཏསིཁརེ ཀཏཙེཏིཡཾ ‘‘ཨཱཀཱསཙེཏིཡ’’ནྟི ཝུཏྟཾ. གཧིཏནིམིཏྟེནེཝཱཏི ཙེཏིཡཝནྡནཾ, དྷམྨསྶཝནཉྩ ཨུདྡིསྶ ‘‘དྷཉྙཱ ཝཏིམེ’’ཏིཨཱདིནཱ གཧིཏཀུསལནིམིཏྟེནེཝ ཀཱརཎབྷཱུཏེན. གཧིཏཾ ཝཱ ནིམིཏྟཾ ཨེཏེནཱཏི གཧིཏནིམིཏྟཾ, ཝུཏྟཱཀཱརེན པཝཏྟཙིཏྟཾ, ཏེན གཧིཏནིམིཏྟེནེཝ ཙིཏྟེན སཧ. པཀྑནྡནྟི ཨནུཔཝིཊྛཾ. ཨནུཔརིཔྥུཊནྟི ཨནུ ཨནུ སམནྟཏོ ཕུཊཾ, སབྦསོ ཨནུཝིསཊནྟི ཨཏྠོ.

པསྶདྡྷིཡཱ ནིམིཏྟབྷཱཝེན གབྦྷཾ གཎྷནྟཱི. པརིཔཱཙནཝསེན པརིཔཱཀཾ གཙྪནྟཱི. ཨཔྤནཱསམྤཡུཏྟཱཝ པཱིཏི ཨཔྤནཱསམཱདྷིཔཱུརིཀཱ. ཁཎིཀསམཱདྷིཔཱུརིཀཱ ཙ ཨུཔཙཱརསམཱདྷིཔཱུརིཀཱ ཙ ཨཔྤནཱསམཱདྷིསྶ ཝིདཱུརཏརཱཏི ཏདུབྷཡཾ ཨནཱམསནྟོ ‘‘ཏཱསུ ཡཱ ཨཔྤནཱསམཱདྷིསྶཱ’’ཏིཨཱདིམཱཧ ¶ . སམཱདྷིསམྤཡོགཾ གཏཱཏི པུབྦེ ཨུཔཙཱརསམཱདྷིནཱ སམྤཡུཏྟཱ ཧུཏྭཱ ཨནུཀྐམེན ཝཌྜྷིཏྭཱ ཨཔྤནཱསམཱདྷིནཱ སམྤཡོགཾ གཏཱ.

༧༣. སུཁཡཏཱིཏི ¶ སུཁཾ, ཨཏྟནཱ སམྤཡུཏྟདྷམྨེ ལདྡྷསྶཱདེ ཀརོཏཱིཏི ཨཏྠོ. སྭཱཡཾ ཀཏྟུནིདྡེསོ པརིཡཱཡལདྡྷོ དྷམྨཏོ ཨཉྙསྶ ཀཏྟུ ནིཝཏྟནཏྠོ, ནིཔྤརིཡཱཡེན པན བྷཱཝསཱདྷནམེཝ ལབྦྷཏཱིཏི ‘‘སུཁནཾ སུཁ’’ནྟི ཝུཏྟཾ. ཨིཊྛསབྷཱཝཏྟཱ ཏཾསམངྒཱིཔུགྒལཾ, སམྤཡུཏྟདྷམྨེ ཝཱ ཨཏྟནི སཱདཡཏཱིཏི སཱཏཾ ད-ཀཱརསྶ ཏ-ཀཱརཾ ཀཏྭཱ. སཱཏཾ ‘‘མདྷུར’’ནྟི ཝདནྟི. སཱཏཾ ལཀྑཎཾ ཨེཏསྶཱཏི སཱཏལཀྑཎཾ. ཨུཔབྲཱུཧནཾ སམྤཡུཏྟདྷམྨཱནཾ སཾཝཌྜྷནཾ. དུཀྑཾ ཝིཡ ཨཝིསྶཛྫེཏྭཱ ཨདུཀྑམསུཁཱ ཝིཡ ཨནཛ྄ཛྷུཔེཀྑིཏྭཱ ཨནུ ཨནུ གཎྷནཾ, ཨུཔཀཱརིཏཱ ཝཱ ཨནུགྒཧོ. ཀཏྠཙི པཋམཛ྄ཛྷཱནཱདིཀེ. པཊིལཱབྷཏུཊྛཱིཏི པཊིལཱབྷཝསེན ཨུཔྤཛྫནཀཏུཊྛི. པཊིལདྡྷརསཱནུབྷཝནནྟི པཊིལདྡྷསྶ ཨཱརམྨཎརསསྶ ཨནུབྷཝནནྟི སབྷཱཝཏོ པཱིཏིསུཁཱནི ཝིབྷཛིཏྭཱ དསྶེཏི. ཡཏྠ པཱིཏི, ཏཏྠ སུཁནྟི ཝིཏཀྐསྶ ཝིཡ ཨིཏརེན པཱིཏིཡཱ སུཁེན ཨཙྩནྟསཾཡོགམཱཧ. ‘‘ཡཏྠ སུཁཾ, ཏཏྠ ན ནིཡམཏོ པཱིཏཱི’’ཏི ཝིཙཱརསྶ ཝིཡ ཝིཏཀྐེན སུཁསྶ པཱིཏིཡཱ ཨནཙྩནྟསཾཡོགཾ. ཏེན ཨཙྩནྟཱནཙྩནྟསཾཡོགིཏཱཡ པཱིཏིསུཁཱནཾ ཝིསེསཾ དསྶེཏི. ཀཾ ཏཱརེནྟི ཨེཏྠཱཏི ཀནྟཱརཾ, ནིརུདཀམརུཊྛཱནཾ. ཝནམེཝ ཝནནྟཾ. ཏསྨིཾ ཏསྨིཾ སམཡེཏི ཨིཊྛཱརམྨཎསྶ པཊིལཱབྷསམཡེ, པཊིལདྡྷསྶ རསཱནུབྷཝནསམཡེ, ཝནཙྪཱཡཱདཱིནཾ སཝནདསྶནསམཡེ, པཝེསཔརིབྷོགསམཡེ ཙ. པཱཀཊབྷཱཝཏོཏི ཡཐཱཀྐམཾ པཱིཏིསུཁཱནཾ ཝིབྷཱུཏབྷཱཝཏོ.

ཝིཝེཀཛཾ པཱིཏིསུཁནྟི ཨེཏྠ པུརིམསྨིཾ ཨཏྠེ ཝིཝེཀཛནྟི ཛྷཱནཾ ཝུཏྟཾ. པཱིཏིསུཁསདྡཏོ ཙ ཨཏྠིཨཏྠཝིསེསཏོ ‘‘ཨསྶ ཛྷཱནསྶ, ཨསྨིཾ ཝཱ ཛྷཱནེ’’ཏི ཨེཏྠ ཨ-ཀཱརོ དཊྛབྦོ. དུཏིཡེ པཱིཏིསུཁམེཝ ཝིཝེཀཛཾ. ‘‘ཝིཝེཀཛཾཔཱིཏིསུཁ’’ནྟི ཙ ཨཉྙཔདཏྠསམཱསོ, པཙྩཏྟནིདྡེསསྶ ཙ ཨལོཔོ ཀཏོ. ལོཔེ ཝཱ སཏི ‘‘ཝིཝེཀཛཔཱིཏིསུཁ’’ནྟི པཱཋོཏི ཨཡཾ ཝིསེསོ.

ཨུཔསམྤཛྫཱཏི ཨེཏྠ ཨུཔ-སཾ-སདྡཱ ‘‘ཨུཔལབྦྷཏི, སཾབྷུཉྫཏཱི’’ཏིཨཱདཱིསུ ཝིཡ ནིརཏྠཀཱཏི དསྶེཏུཾ ‘‘ཨུཔགནྟྭཱ’’ཏིཨཱདིཾ ཝཏྭཱ པུན ཏེསཾ སཱཏྠཀབྷཱཝཾ དསྶེཏུཾ ‘‘ཨུཔསམྤཱདཡིཏྭཱ’’ཏིཨཱདི ཝུཏྟཾ, ཏསྨཱ པཏྭཱ, སཱདྷེཏྭཱཏི ཝཱ ཨཏྠོ. ཨིརིཡནྟི ཀིརིཡཾ. ཝུཏྟིཨཱདཱིནི ཏསྶེཝ ཝེཝཙནཱནི. པཱལནཱཏི ཧི ཨེཀཾ ཨིརིཡཱཔཐབཱདྷནཾ ཨིརིཡཱཔཐནྟརེཧི རཀྑཎཱ.

པཉྩངྒཝིཔྤཧཱིནཱདིཝཎྞནཱ

༧༤. པཉྩ ¶ ¶ ཨངྒཱནི ཝིཀྑམྦྷནཝསེན པཧཱིནཱནི ཨེཏསྶཱཏི པཉྩངྒཝིཔྤཧཱིནཾ. ‘‘ཨགྱཱཧིཏོ’’ཏི ཨེཏྠ ཨཱཧིཏ-སདྡསྶ ཝིཡ ཝིཔྤཧཱིན-སདྡསྶེཏྠ པརཝཙནཾ དཊྛབྦཾ, པཉྩཧི ཨངྒེཧི ཝིཔྤཧཱིནནྟི ཝཱ པཉྩངྒཝིཔྤཧཱིནཾ. ནནུ ཨཉྙེཔི ཨཀུསལཱ དྷམྨཱ ཨིམིནཱ ཛྷཱནེན པཧཱིཡནྟི, ཨཐ ཀསྨཱ པཉྩངྒཝིཔྤཧཱིནཏཱཝ ཝུཙྩཏཱིཏི ཨཱཧ ‘‘ཀིཉྩཱཔཱི’’ཏིཨཱདི. ཛྷཱནལཱབྷིནོཔི ཨཛྷཱནསམངྒིཀཱལེ ཛྷཱནཔཊིཔཀྑལོབྷཙིཏྟཱདཱིནཾ པཝཏྟིསབྦྷཱཝཏོ ‘‘ཛྷཱནཀྑཎེ’’ཏི ཝུཏྟཾ. པཧཱིཡནྟཱིཏི ཝིགཙྪནྟི, ནཔྤཝཏྟནྟཱིཏི ཨཏྠོ. ཨེཀཏྟཱརམྨཎེཏི པཐཝཱིཀསིཎཱདིཝསེན ཨེཀསབྷཱཝེ, ཨེཀགྒཏཱསངྑཱཏེ ཨེཀཏྟཱཝཧེ ཝཱ ཨཱརམྨཎེ. ཏནྟི ཏཾ ནཱནཱཝིསཡཔལོབྷིཏཾ ཙིཏྟཾ. ཀཱམདྷཱཏུཔྤཧཱནཱཡཱཏི ནཱནཱཝིསཡསམཱུཔབྱཱུལ༹ྷཱཡ ཀཱམདྷཱཏུཡཱ པཧཱནཱཡ སམཏིཀྐམཱཡ པཊིཔདཾ ཛྷཱནཾ ནཔྤཊིཔཛྫཏི. ནིརནྟརནྟི ཝིཀྑེཔེན ཨནནྟརིཏཾ, སཧིཏནྟི ཨཏྠོ. ཨཀམྨཉྙནྟི ཨཀམྨནཱིཡཾ, བྷཱཝནཱཀམྨསྶ ཨཡོགྱནྟི ཨཏྠོ. ཨུདྡྷཙྩཀུཀྐུཙྩཔརེཏནྟི ཨུདྡྷཙྩཀུཀྐུཙྩེན ཨབྷིབྷཱུཏཾ. པརིབྦྷམཏི ཨནཝཊྛཱནཏོ, ཨཝཊྛཱནསྶ སམཱདྷཱནསྶ ཨབྷཱཝཏོཏི ཨཏྠོ. ཝིཙིཀིཙྪཱཡ ཨུཔཧཏནྟི སཱཏིསཡསྶ ཝིཙཱརསྶ ཨབྷཱཝཏོ ‘‘སམྨཱསམྦུདྡྷོ ནུ ཁོ བྷགཝཱ, ན ནུ ཁོ’’ཏི, ‘‘པཐཝཱི པཐཝཱི’’ཏིཨཱདིནཱ མནསིཀཱརེན, ‘‘ཛྷཱནཾ སིཡཱ ནུ ཁོ, ན ནུ ཁོ’’ཏིཨཱདིནཱ ཙ པཝཏྟཱཡ ཝིཙིཀིཙྪཱཡ ཨུཔཧཏཾ. ནཱརོཧཏི ཨཔྤཊིཔཏྟིནིམིཏྟཏྟཱ. ཝིསེསེན ཛྷཱནནྟརཱཡཀརཏྟཱཏི སམཱདྷིཨཱདཱིནཾ ཨུཛུཝིཔཙྩནཱིཀབྷཱཝེན ཛྷཱནཱདྷིགམསྶ ཨནྟརཱཡཀརཎཏོ.

ཏེཧཱིཏི ཛྷཱནཱདྷིགམསྶ པཙྩཡབྷཱུཏེཧི ཝིཏཀྐཝིཙཱརེཧི. ཨཝིཀྑེཔཱཡ སམྤཱདིཏཔྤཡོགསྶཱཏི ཏཏོ ཨེཝཾ སམཱདྷཱནཱཡ ནིཔྥཱདིཏབྷཱཝནཱཔཡོགསྶ. ཙེཏསོ པཡོགསམྤཏྟིསམྦྷཝཱཏི ཡཐཱཝུཏྟབྷཱཝནཱཔཡོགསམྤཏྟིསམུཊྛཱནཱ. པཱིཏི པཱིཎནཾ བྷཱཝནཱཝསེན ཏཔྤནཾ. ཨུཔབྲཱུཧནཾ བྷཱཝནཱཝསེན པརིཝུདྡྷིཾ ཙེཏསོ ཀརོཏཱིཏི སམྦནྡྷོ. ནནྟི ཙིཏྟཾ. སསེསསམྤཡུཏྟདྷམྨནྟི ཨཝསིཊྛཕསྶཱདིདྷམྨསཧིཏཾ, སམཾ སམྨཱ ཙ ཨཱདྷིཡཏཱིཏི སམྦནྡྷོ. ཨིནྡྲིཡསམཏཱཝསེན སམཾ, པཊིཔཀྑདྷམྨཱནཾ. དཱུརཱིབྷཱཝེ ལཱིནུདྡྷཙྩཱབྷཱཝེན སམྨཱ ཙ ཋཔེཏཱིཏི ཨཏྠོ. ཨེཀགྒཏཱ ཧི སམཱདྷཱནཀིཙྩེན ཙིཏྟཾ, སམྤཡུཏྟདྷམྨེ ཙ ཨཏྟཱནཾ ཨནུཝཏྟཱཔེནྟཱི ཛྷཱནཀྑཎེ སཱཏིསཡཾ སམཱཧིཏེ ཀརོཏཱིཏི. ཨུཔྤཏྟིཝསེནཱཏི ཡཐཱཔཙྩཡཾ ཨུཔྤཛྫནཝསེན ¶ . ཨེཏེསུ ¶ ཝིཏཀྐཱདཱིསུ ཛྷཱནཾ ཨུཔྤནྣཾ ནཱམ ཧོཏི ཏཏྠེཝ ཛྷཱནཝོཧཱརཏོ. ཏེནཱཧ ‘‘ཏསྨཱ’’ཏིཨཱདི. ‘‘ཡཐཱ པནཱ’’ཏིཨཱདིནཱཔི ཨུཔམཱཝསེན ཏམེཝཏྠཾ པཱཀཊཏརཾ ཀརོཏི.

པཀཏིཙིཏྟཏོཏི པཱཀཏིཀཀཱམཱཝཙརཙིཏྟཏོ. སུཝིསདེནཱཏི སུཊྛུ ཝིསདེན, པཊུཏརེནཱཏི ཨཏྠོ. སབྦཱཝནྟནྟི སབྦཱཝཡཝཝནྟཾ, ཨནཝསེསནྟི ཨཏྠོ. ཨཔྥུཊནྟི ཨསམྥུཊྛཾ. ཨཱརམྨཎེསུ ཕུསིཏཱཏི ཨཔྤནཱཝསེན པཝཏྟམཱནཱ ཙིཏྟེཀགྒཏཱ སམནྟཏོ ཨཱརམྨཎཾ ཕརནྟཱི ཝིཡ ཧོཏཱིཏི ཀཏྭཱ ཝུཏྟཾ. ཀསྨཱ པནེཏྠ ཛྷཱནཔཱཋེ ཨགྒཧིཏཱ ཙིཏྟེཀགྒཏཱ གཧིཏཱཏི ཨནུཡོགཾ སནྡྷཱཡ ‘‘ཏཏྠ ཙིཏྟེཀགྒཏཱ’’ཏིཨཱདི ཝུཏྟཾ. ཏཏྠཱཏི ཏེསུ ཛྷཱནངྒེསུ. ན ནིདྡིཊྛཱཏི སརཱུཔཏོ ན ནིདྡིཊྛཱ, སཱམཉྙཏོ པན ཛྷཱནགྒཧཎེན གཧིཏཱ. ཨེཝཾ ཝུཏྟཏྟཱཏི སརཱུཔེནེཝ ཝུཏྟཏྟཱ, ཨངྒམེཝ ཙིཏྟེཀགྒཏཱཏི སམྦནྡྷོ. ཡེན ཨདྷིཔྤཱཡེནཱཏི ཡེན ཝིཏཀྐཱདཱིཧི སཧ ཝཏྟནྟཾ དྷམྨཾ དཱིཔེཏུཾ ཏསྶ པཀཱསནཱདྷིཔྤཱཡེན ‘‘སཝིཏཀྐཾ སཝིཙཱར’’ནྟིཨཱདིནཱ ཨུདྡེསོ ཀཏོ. སོ ཨེཝ ཨདྷིཔྤཱཡོ ཏེན བྷགཝཏཱ ཝིབྷངྒེ ‘‘ཙིཏྟེཀགྒཏཱ’’ཏི ནིདྡིསནྟེན པཀཱསིཏོ. ཏསྨཱ སཱ ཛྷཱནཔཱཋེ ཨགྒཧིཏཱཏི ན ཙིནྟེཏབྦཾ.

ཏིཝིདྷཀལྱཱཎཝཎྞནཱ

༧༥. ཨཱདིམཛ྄ཛྷཔརིཡོསཱནཝསེནཱཏི ཛྷཱནསྶ ཨཱདིམཛ྄ཛྷཔརིཡོསཱནཝསེན. ལཀྑཎཝསེནཱཏི ཏེསཾཡེཝ ཨཔྤནཱཡཾ ལཀྑིཏབྦབྷཱཝཝསེན.

ཏཏྲཱཏི ཏསྨིཾ ཀལྱཱཎཏཱལཀྑཎཱནཾ ཝིབྷཱཝནེ. པཊིཔདཱཝིསུདྡྷཱིཏི པཊིཔཛྫཏི ཛྷཱནཾ ཨེཏཱཡཱཏི པཊིཔདཱ, གོཏྲབྷུཔརིཡོསཱནོ པུབྦབྷཱགིཡོ བྷཱཝནཱནཡོ. པརིཔནྠཏོ ཝིསུཛ྄ཛྷནཾ ཝིསུདྡྷི, པཊིཔདཱཡ ཝིསུདྡྷི པཊིཔདཱཝིསུདྡྷི. སཱ པནཱཡཾ ཡསྨཱ ཛྷཱནསྶ ཨུཔྤཱདཀྑཎེ ལབྦྷཏི, ཏསྨཱ ཝུཏྟཾ ‘‘པཊིཔདཱཝིསུདྡྷི ཨཱདཱི’’ཏི. ཨུཔེཀྑཱནུབྲཱུཧནཱཏི ཝིསོདྷེཏབྦཏཱདཱིནཾ ཨབྷཱཝཏོ ཛྷཱནཔརིཡཱཔནྣཱཡ ཏཏྲམཛ྄ཛྷཏྟུཔེཀྑཱཡ ཀིཙྩནིཔྥཏྟིཡཱ ཨནུབྲཱུཧནཱ. སཱ པནཱཡཾ ཝིསེསཏོ ཛྷཱནསྶ ཋིཏིཀྑཎེ ལབྦྷཏི. ཏེན ཝུཏྟཾ ‘‘ཨུཔེཀྑཱནུབྲཱུཧནཱ མཛ྄ཛྷེ’’ཏི. སམྤཧཾསནཱཏི ཏཏྠ དྷམྨཱནཾ ཨནཏིཝཏྟནཱདིསཱདྷཀསྶ ཉཱཎསྶ ཀིཙྩནིཔྥཏྟིཝསེན པརིཡོདཔནཱ. སཱ པན ཡསྨཱ ཛྷཱནསྶ ཨོསཱནཀྑཎེ པཱཀཊཱ ཧོཏི ¶ , ཏསྨཱ ཝུཏྟཾ ‘‘སམྤཧཾསནཱ པརིཡོསཱན’’ནྟི. ཨིམཱནི ཏཱིཎི ལཀྑཎཱནཱིཏི པརིཔནྠཏོ ཙིཏྟསྶ ཝིསུཛ྄ཛྷནཱཀཱརོ ¶ , མཛ྄ཛྷིམསྶ སམཐནིམིཏྟསྶ པཊིཔཛྫནཱཀཱརོ, ཏཏྠ པཀྑནྡནཱཀཱརོཏི ཨིམཱནི ཏཱིཎི ཛྷཱནསྶ ཨཱདིཏོ ཨུཔྤཱདཀྑཎེ ཨཔྤནཱཔཏྟིལཀྑཎཱནི ཏེཧི ཨཱཀཱརེཧི ཝིནཱ ཨཔྤནཱཔཏྟིཡཱ ཨབྷཱཝཏོ, ཨསཏི ཙ ཨཔྤནཱཡ ཏདབྷཱཝཏོ. ཨཱདིཀལྱཱཎཉྩེཝ ཝིསུདྡྷིཔཊིཔདཏྟཱ. ཡཐཱཝུཏྟེཧི ལཀྑཎེཧི སམནྣཱགཏཏྟཱ, སམྤནྣལཀྑཎཏྟཱ ཙ ཏིལཀྑཎསམྤནྣཉྩ. ཨིམིནཱ ནཡེན མཛ྄ཛྷཔརིཡོསཱནལཀྑཎཱནཉྩ ཡོཛནཱ ཝེདིཏབྦཱ.

སམྦྷརཱིཡཏི ཛྷཱནཾ ཨེཏེནཱཏི སམྦྷཱརོ, ནཱནཱཝཛྫནཔརིཀམྨཾ. སཧ སམྦྷཱརེནཱཏི སསམྦྷཱརོ, སོ ཨེཝ སསམྦྷཱརིཀོ. ཨུཔཙཱརོཏི ཨེཀཱཝཛྫནཱུཔཙཱརམཱཧ. པགྒཧཱདིཀིཙྩསྶ པུབྦབྷཱགེ བྷཱཝནཱཡ ཨེཝ སཱདྷིཏཏྟཱ ཡཱ ཏཏྠ ཨེཀཱཝཛྫནཱུཔཙཱརེ སིདྡྷཱ ཨཛ྄ཛྷུཔེཀྑནཱ, སཱ ཛྷཱནཀྑཎེ པརིབྲཱུཧིཏཱ ནཱམ ཧོཏཱིཏི ཝུཏྟཾ ‘‘ཨུཔེཀྑཱནུབྲཱུཧནཱ ནཱམ ཨཔྤནཱ’’ཏི. ཡཐཱདྷིགཏཾ ཛྷཱནཾ ནིསྶཱཡ ཡོ པཧཊྛཱཀཱརོ ཙིཏྟསྶ པརིཏོསོ, ཏཾ པཙྩཝེཀྑཎཱཝསེན པཝཏྟཾ སནྡྷཱཡཱཧ ‘‘སམྤཧཾསནཱ ནཱམ པཙྩཝེཀྑཎཱ’’ཏི. ཨེཀེཏི ཨབྷཡགིརིཝཱསིནོ. ཏེ ཧི ཨེཝཾ པཊིཔདཱཝིསུདྡྷིཨཱདིཀེ ཝཎྞཡནྟི, ཏདཡུཏྟཾ. ཏཐཱ ཧི སཏི ཨཛ྄ཛྷཱནདྷམྨེཧི ཛྷཱནསྶ གུཎསཾཀིཏྟནཾ ནཱམ ཀཏཾ ཧོཏི. ན ཧི བྷཱུམནྟརཾ བྷཱུམནྟརཔརིཡཱཔནྣཾ ཧོཏི. པཱལི༹ཡཱ ཙེཏཾ ཝིརུདྡྷནྟི དསྶེཏུཾ ‘‘ཡསྨཱ པནཱ’’ཏིཨཱདི ཝུཏྟཾ. ཏཏྠ ཨེཀཏྟགཏཾ ཙིཏྟནྟི ཨིནྡྲིཡཱནཾ ཨེཀརསབྷཱཝེན, ཨེཀགྒཏཱཡ ཙ སིཁཱཔྤཏྟིཡཱ ཏདནུགུཎཾ ཨེཀཏྟཾ གཏནྟི ཨེཀཏྟགཏཾ, སསམྤཡུཏྟཾ ཨཔྤནཱཔཏྟཙིཏྟཾ. ཏསྶེཝ པཊིཔདཱཝིསུདྡྷིཔཀྑནྡཏཱདི ཨནནྟརམེཝ ཝུཙྩཏི. ཏསྨཱཏི ཡསྨཱ ཨེཀསྨིཾཡེཝ ཨཔྤནཱཙིཏྟཀྑཎེ པཊིཔདཱཝིསུདྡྷིཨཱདི པཱལི༹ཡཾ ཝུཏྟཾ, ཏསྨཱ ཨཱགམནཝསེནཱཏི པརིཀམྨཱགམནཝསེན. ཨནཏིཝཏྟནཱདཱིཏི ཨཱདི-སདྡེན ཨིནྡྲིཡེཀརསཏཱཏདུཔགཝཱིརིཡཝཱཧནཱསེཝནཱནི སངྒཎྷཱཏི. པརིཡོདཱཔཀསྶཱཏི པརིསོདྷཀསྶ པབྷསྶརབྷཱཝཀརསྶ. ཨནཏིཝཏྟནཱདིབྷཱཝསཱདྷནམེཝ ཙེཏྠ ཉཱཎསྶ ཀིཙྩནིཔྥཏྟི ཝེདིཏབྦཱ.

ཏསྨིནྟི ཏསྨིཾ ཝཱརེ, ཙཏུཔཉྩཙིཏྟཔརིམཱཎཱཡ ཨཔྤནཱཝཱིཐིཡནྟི ཨཏྠོ. ཏཏོ པརིཔནྠཏོ. ཙིཏྟཾ ཝིསུཛ྄ཛྷཏཱིཏི ཡདིཔི ཨཱགམནཾ གཧེཏུཾ ཨཝིསེསེན ཝིཡ ཝུཏྟཾ, པརིཀམྨཝིསུདྡྷིཏོ པན ཨཔྤནཱཝིསུདྡྷི སཱཏིསཡཱཝ. ཏེནཱཧ ‘‘ཝིསུདྡྷཏྟཱ’’ཏིཨཱདི. ཨཱཝརཎཝིརཧིཏཾ ཧུཏྭཱཏི ཡེནཱཝརཎེན ¶ ཨཱཝཊཏྟཱ ཙིཏྟཾ ཏཏོ པུབྦེ མཛ྄ཛྷིམཾ སམཐནིམིཏྟཾ པཊིཔཛྫིཏུཾ ན སཀྐོཏི, ཏེན ཝིཝིཏྟཾ ཧུཏྭཱ, ཏཾ ཝིཀྑམྦྷེཏྭཱཏི ཨཏྠོ. ལཱིནུདྡྷཙྩསངྑཱཏཱནཾ ཨུབྷིནྣཾ ཨནྟཱནཾ ཨནུཔགམནེན མཛ྄ཛྷིམོ, སཝིསེསཾ པཙྩནཱིཀདྷམྨཱནཾ ཝཱུཔསམནཏོ ¶ སམཐོ, ཡོགིནོ སུཁཝིསེསཱནཾ ཀཱརཎབྷཱཝཏོ ནིམིཏྟཉྩཱཏི མཛ྄ཛྷིམཾ སམཐནིམིཏྟཾ. ཏེནཱཧ ‘‘སམཔྤཝཏྟོ ཨཔྤནཱསམཱདྷིཡེཝཱ’’ཏི. ཏདནནྟརཾ པན པུརིམཙིཏྟནྟི ཏསྶ ཨཔྤནཱཙིཏྟསྶ ཨནནྟརཔཙྩཡབྷཱུཏཾ པུརིམཾ ཙིཏྟཾ, གོཏྲབྷུཙིཏྟནྟི ཨཏྠོ. ཨེཀསནྟཏིཔརིཎཱམནཡེནཱཏི ཡཐཱ ‘‘ཏདེཝ ཁཱིརཾ དདྷིསམྤནྣ’’ནྟི, ཨེཝཾ སཏིཔི པརིཏྟམཧགྒཏབྷཱཝབྷེདེ, པཙྩཡཔཙྩཡུཔྤནྣབྷཱཝབྷེདེ ཙ ཨེཀིསྶཱ ཨེཝ སནྟཏིཡཱ པརིཎཱམཱུཔགམནནཡེན ཨེཀཏྟནཡཝསེན. ཏཐཏྟནྟི ཏཐབྷཱཝཾ ཨཔྤནཱསམཱདྷིཝསེན སམཱཧིཏབྷཱཝཾ. ཨེཝཾ པཊིཔནྣཏྟཱཏི ཝུཏྟཱཀཱརེན པཊིཔཛྫམཱནཏྟཱ. ཡསྨིཉྷི ཁཎེ ཏཐཏྟཾ མཛ྄ཛྷིམཾ སམཐནིམིཏྟཾ པཊིཔཛྫཏི, ཏསྨིཾཡེཝ ཁཎེ ཏཐཏྟུཔགམནེན ཨཔྤནཱསམཱདྷིནཱ སམཱཧིཏབྷཱཝཱུཔགམནེན ཏཏྠ པཀྑནྡཏི ནཱམ. པུརིམཙིཏྟེཏི ཨཔྤནཱཙིཏྟསྶ པུརིམསྨིཾ ཙིཏྟེ གོཏྲབྷུཙིཏྟེ. ཝིཛྫམཱནཱཀཱརནིཔྥཱདིཀཱཏི ཏསྨིཾ ཙིཏྟེ ཝིཛྫམཱནཱནཾ པརིཔནྠཝིསུདྡྷིམཛ྄ཛྷིམསམཐཔཊིཔཏྟིཔཀྑནྡནཱཀཱརཱནཾ ནིཔྥཱདིཀཱ, ཏེནཱཀཱརེན ནིཔྥཛྫམཱནཱཏི ཨཏྠོ. ཏེཡེཝ ཧི ཨཱཀཱརཱ པཙྩཡཝིསེསཏོ ཛྷཱནཀྑཎེ ནིཔྥཛྫམཱནཱ ‘‘པཊིཔདཱཝིསུདྡྷཱི’’ཏི ལདྡྷསམཉྙཱ ཛྷཱནསྶ ཏཾ ཝིསེསཾ ནིཔྥཱདེནྟཱ ཝིཡ ཝུཏྟཱ. ཨུཔྤཱདཀྑཎེཡེཝཱཏི ཨཏྟལཱབྷཝེལཱཡམེཝ. ཡདི ཨེཝཾ, ཀཐཾ ཏེ ཨཱཀཱརཱ ནིཔྥཛྫནྟཱིཏི ཨཱཧ ‘‘ཨཱགམནཝསེནཱ’’ཏི.

ཏསྶཱཏི ཙིཏྟསྶ. ‘‘ཝིསུདྡྷཾ ཙིཏྟཾ ཨཛ྄ཛྷུཔེཀྑཏཱི’’ཏི པཱལི༹ཡཾ (པཊི. མ. ༡.༡༥༨) པུགྒལཱདྷིཊྛཱནེན ཨཱགཏཱཏི ‘‘བྱཱཔཱརཾ ཨཀརོནྟོ’’ཏི ཨཱཧ. སམཐཔཊིཔཏྟིཏཐཏྟུཔགམནཉྩ ཨིདྷ སམཐབྷཱཝཱཔཏྟིཡེཝཱཏི ཨཱཧ ‘‘སམཐབྷཱཝཱུཔགམནེནཱ’’ཏི. ཀིལེསསཾསགྒཾ པཧཱཡ ཨེཀཏྟེན ཨུཔཊྛིཏསྶཱཏི པུབྦེ ‘‘ཀཐཾ ནུ ཁོ ཀིལེསསཾསགྒཾ པཛཧེཡྻ’’ནྟི པཊིཔནྣསྶ ཨིདཱནི སམཐཔཊིཔཏྟིཡཱ ཏསྶ པཧཱིནཏྟཱ ཀིལེསསངྒཎིཀཱབྷཱཝེན ཨེཀཏྟེན ཨུཔཊྛིཏསྶ ཛྷཱནཙིཏྟསྶ. པརིཔནྠཝིསུདྡྷིམཛ྄ཛྷིམསམཐཔཊིཔཏྟིཔཀྑནྡནེཧི ཝུདྡྷིཔྤཏྟིཡཱ ཨནུབྲཱུཧིཏེ ཛྷཱནཙིཏྟེ ལདྡྷོཀཱསཱ ཏཏྲམཛ྄ཛྷཏྟུཔེཀྑཱ སམྤཡུཏྟེསུ སམཝཱཧིཏབྷཱཝེན པཝཏྟམཱནཱ ཏེ ཨནུབྲཱུཧེནྟཱི ཝིཡ ཧོཏཱིཏི ཨཱཧ ‘‘ཏཏྲམཛ྄ཛྷཏྟུཔེཀྑཱཡ ཀིཙྩཝསེན ཨུཔེཀྑཱནུབྲཱུཧནཱ ཝེདིཏབྦཱ’’ཏི.

ཡེ ¶ པནེཏེ ཡུགནདྡྷདྷམྨཱཏི སམྦནྡྷོ. ཏཏྠཱཏི ཏསྨིཾ ཛྷཱནཙིཏྟེ. ཨཉྙམཉྙཱནཏིཝཏྟནཝསེན ཀིཙྩཀརཎཏོ ཡུགེ ནདྡྷཱ བདྡྷཱ ཝིཡ ཡུགནདྡྷཱ. ཝིམུཏྟིརསེནཱཏི ཝིམུཙྩནཀིཙྩེན, ཝིམུཙྩནསམྤཏྟིཡཱ ཝཱ. ཨེས ཡོགཱི. ཝཱཧཡཏཱིཏི པཝཏྟེཏི. ཨསྶཱཏི ཛྷཱནཙིཏྟསྶ. ཏསྨིཾ ཁཎེཏི བྷངྒཀྑཎེ. ཨུཔྤཱདཀྑཎེ ཨཏཱིཏེ ཧི ཋིཏིཀྑཎཏོ པཊྛཱཡ ཨཱསེཝནཱ ¶ པཝཏྟཏི ནཱམ. ཏེ ཨཱཀཱརཱཏི ཨཉྙམཉྙཱནཏིཝཏྟནཱདཡོ ཏཏྠ དྷམྨཱནཾ པཝཏྟིཨཱཀཱརཱ. ཨཱསེཝནཱཔི ཧི ཨཱསེཝནཔཙྩཡབྷཱཝཱིནཾ དྷམྨཱནཾ པཝཏྟིཨཱཀཱརོཡེཝ. སཾཀིལེསཝོདཱནེསཱུཏི སམཱདྷིཔཉྙཱནཾ སམརསཏཱཡ ཨཀརཎཾ བྷཱཝནཱཡ སཾཀིལེསོ, ཀརཎཾ ཝོདཱནཾ. ཏཐཱ སེསེསུཔི. ཨེཝམེཏེསུ སཾཀིལེསཝོདཱནེསུ ཏཾ ཏཾ ཨཱདཱིནཝཾ དོསཾ ཨཱནིསཾསཾ གུཎཾ པུརེཏརཾ པཱཊིཧཱརིཡཉཱཎེན དིསྭཱ ཡཐཱ ཨཉྙམཉྙཱནཏིཝཏྟནཱདཡོ ཧོནྟི, ཏཐཱ བྷཱཝནཱཡ སམྤཧཾསིཏཏྟཱ ཏེནེཝ ཉཱཎེན ཝིསོདྷིཏཏྟཱ. ཝིསོདྷནཾ ཧེཏྠ སམྤཧཾསནཾ. ཏེ ཨཱཀཱརཱ ཡསྨཱ ནིཔྥནྣཱ, ཏསྨཱ ‘‘དྷམྨཱནཾ…པེ… ཝེདིཏབྦཱཏི ཝུཏྟ’’ནྟི ལཀྑཎསཾཝཎྞནཱཡ ཨཱདིམྷི ཝུཏྟཾ ནིགམནཝསེན དསྶེཏི.

‘‘ཡསྨཱ ཨུཔེཀྑཱཝསེན ཉཱཎཾ པཱཀཊཾ ཧོཏཱི’’ཏི ཀོ སམྦནྡྷོ. ཀསྨཱ སམྤཧཾསནཱཝ པརིཡོསཱནནྟི ཝུཏྟཱ, ན ཨུཔེཀྑཱནུབྲཱུཧནཱཏི ཙོདནཾ སནྡྷཱཡ ‘‘ཏཏྠ ཡསྨཱ ཨུཔེཀྑཱཝསེན ཉཱཎཾ པཱཀཊཾ ཧོཏཱི’’ཏི ཝུཏྟཾ. ཏཏྠཱཏི ཏསྨིཾ བྷཱཝནཱཙིཏྟེ. ཨུཔེཀྑཱཝསེན ཉཱཎཾ པཱཀཊཾ ཧོཏཱིཏི ཨཔྤནཱཀཱལེ བྷཱཝནཱཡ སམཔྤཝཏྟིཡཱ, པཊིཔཀྑསྶ ཙ པཧཱནཏོ པགྒཧཱདཱིསུ བྱཱཔཱརསྶ ཨཀཱཏབྦཏོ ཨཛ྄ཛྷུཔེཀྑནཱཝ ཧོཏི. ཡཾ སནྡྷཱཡ ཝུཏྟཾ ‘‘སམཡེ ཙིཏྟསྶ ཨཛ྄ཛྷུཔེཀྑནཱ, ཝིསུདྡྷཾ ཙིཏྟཾ ཨཛ྄ཛྷུཔེཀྑཏཱི’’ཏི ཙ ཨཱདི. སཱ པནཱཡཾ ཨཛ྄ཛྷུཔེཀྑནཱ ཉཱཎསྶ ཀིཙྩསིདྡྷིཡཱ ཧོཏི, ཝིསེསཏོ ཉཱཎསཱདྷནཏྟཱ ཨཔྤནཱབྱཱཔཱརསྶཱཏི ཕལེན ཀཱརཎཱནུམཱནཉཱཡེན. ཡསྨཱ ཨུཔེཀྑཱཝསེན ཉཱཎཾ པཱཀཊཾ ཧོཏི, ཏསྨཱ ཉཱཎཀིཙྩབྷཱུཏཱ སམྤཧཾསནཱ པརིཡོསཱནནྟི ཝུཏྟཱཏི སམྦནྡྷོ.

ཨིདཱནི ཡཐཱཝུཏྟམཏྠཾ པཱལི༹ཡཱ སམཏྠེཏུཾ ‘‘ཡཐཱཧཱ’’ཏིཨཱདི ཝུཏྟཾ. ཏཐཱཔགྒཧིཏཾ ཙིཏྟནྟི ཡཐཱ བྷཱཝནཱཙིཏྟཾ ཀོསཛྫཔཀྑེ ན པཏཏི, ཏཐཱ ཝཱིརིཡསམྦོཛ྄ཛྷངྒཊྛཱནིཡཱནཾ དྷམྨཱནཾ བཧུལཱིཀཱརཝསེན པགྒཧིཏཾ. སཱདྷུཀཾ ཨཛ྄ཛྷུཔེཀྑཏཱིཏི པགྒཎྷནྟེནཱཔི སམཱདྷིསྶ ཝཱིརིཡསམཏཱཡོཛནཝསེན པགྒཧིཏཏྟཱ སཀྐཙྩཾ ཨཛ྄ཛྷུཔེཀྑཏི, ཏཏྲམཛ྄ཛྷཏྟུཔེཀྑཱ ཨོཀཱསཾ ¶ ལབྷཏི. ཏཾ པན ཨཛ྄ཛྷུཔེཀྑནཾ ཨུཔེཀྑཱཝསེན པུབྦེ པཝཏྟཔཱརིཧཱརིཡཔཉྙཱཝསེན ཨཔྤནཱཔཉྙཱཡ ཀིཙྩཱདྷིཀཏཱཏི ཨཱཧ ‘‘པཉྙཱཝསེན པཉྙིནྡྲིཡཾ ཨདྷིམཏྟཾ ཧོཏཱི’’ཏི. ཏསྶ ཨདྷིམཏྟཏྟཱ ཨེཝ ཨཛ྄ཛྷུཔེཀྑནྟསྶེཝ ནཱནཱསབྷཱཝེཧི ནཱིཝརཎཔམུཁེཧི ཀིལེསེཧི ཨཔྤནཱཙིཏྟཾ ཝིམུཙྩཏི. ཝིམོཀྑཝསེན ཝིམུཙྩནཝསེན. པཉྙཱཝསེནཱཏི པུབྦེ པཝཏྟཔཱརིཧཱརིཡཔཉྙཱཝསེན. ཝིམུཏྟཏྟཱཏི ནཱནཱཀིལེསེཧི ཝིམུཏྟཏྟཱ ཨེཝ. ཏེ དྷམྨཱ སདྡྷཱདཡོ, ཝིསེསཏོ སདྡྷཱཔཉྙཱཝཱིརིཡསམཱདྷཡོ ¶ ཙ ཨེཀརསཱ སམཱནཀིཙྩཱ ཧོནྟི. ཨེཝམཡཾ ཨིནྡྲིཡཱནཾ ཨེཀརསཊྛེན བྷཱཝནཱ ནིཔྥཛྫམཱནཱ ཉཱཎབྱཱཔཱརོཏི ཨཱཧ ‘‘ཉཱཎཀིཙྩབྷཱུཏཱ སམྤཧཾསནཱ པརིཡོསཱན’’ནྟི. ཨེཝཾ ཏིཝིདྷཱཡ པཊིཔདཱཝིསུདྡྷིཡཱ ལདྡྷཝིསེསཱཡ ཏིཝིདྷཱཡ ཨུཔེཀྑཱནུབྲཱུཧནཱཡ སཱཏིསཡཾ པཉྙིནྡྲིཡསྶ ཨདྷིམུཏྟབྷཱཝེན ཙཏུབྦིདྷཱཔི སམྤཧཾསནཱ སིཛ྄ཛྷཏཱིཏི ཨཱགམནུཔེཀྑཱ ཉཱཎཀིཙྩཝསེན དསཔི ཨཱཀཱརཱ ཛྷཱནེ ཨེཝ ཝེདིཏབྦཱ.

གཎནཱནུཔུབྦཏཱཏི གཎནཱནུཔུབྦཏཱཡ, གཎནཱནུཔུབྦཏཱམཏྟཾ ཝཱ པཋམནྟི ཨིདནྟི ཨཏྠོ. ཏེན དེསནཱཀྐམཾ ཨུལླིངྒེཏི. ‘‘པཋམཾ ཨུཔྤནྣནྟི པཋམ’’ནྟི ཨིམིནཱ པཊིཔཏྟིཀྐམཾ, ཨུཔྤནྣནྟི ཧི ཨདྷིགཏནྟི ཨཏྠོ. ‘‘པཋམཾ སམཱཔཛྫིཏབྦནྟི པཋམ’’ནྟི ཨིདཾ པན ན ཨེཀནྟལཀྑཎནྟི ཨཊྛཀཐཱཡཾ (དྷ. ས. ཨཊྛ. ༡༦༠) པཊིསིདྡྷཏྟཱ ཨིདྷ ན གཧིཏཾ. ཨཱརམྨཎཱུཔནིཛ྄ཛྷཱནཾ ལཀྑཎཱུཔནིཛ྄ཛྷཱནནྟི དུཝིདྷེ ཛྷཱནེ ཨིདྷཱདྷིཔྤེཏཛ྄ཛྷཱནམེཝ དསྶེཏུཾ ‘‘ཨཱརམྨཎཱུཔནིཛ྄ཛྷཱནཏོ’’ཏི ཝུཏྟཾ. པཐཝཱིཀསིཎསངྑཱཏསྶ ཨཏྟནོ ཨཏྟནོ ཨཱརམྨཎསྶ རཱུཔཾ ཝིཡ ཙཀྑུནཱ ཨུཔནིཛ྄ཛྷཱཡནཏོ. པཙྩནཱིཀཛྷཱཔནཏོཏི ནཱིཝརཎཱདཱིནཾ པཙྩནཱིཀདྷམྨཱནཾ དཧནཏོ ཝིཀྑམྦྷནཝསེན པཛཧནཏོ. སཀལཊྛེནཱཏི ཧེཊྛཱ ཝུཏྟནཡེན ཀཏེ ཝཱ ཨཀཏེ ཝཱ པརིཙྪིཛྫ གཧིཏེ པཐཝཱིབྷཱགེ པཐཝཱིམཎྜལེ སཀལཱརམྨཎཀརཎཊྛེན. ན ཧི ཏསྶ ཨེཀདེསམཱརམྨཎཾ ཀརཱིཡཏི. པཐཝཱིཀསིཎསནྣིསྶཡཏཱཡ ནིམིཏྟཾ པཐཝཱིཀསིཎཾ ཡཐཱ ‘‘མཉྩཱ ཨུཀྐུཊྛིཾ ཀརོནྟཱི’’ཏི. ཏཾསཧཙརཎཏོ ཛྷཱནཾ པཐཝཱིཀསིཎཾ ཡཐཱ ‘‘ཀུནྟཱ པཙརནྟཱི’’ཏི.

ཙིརཊྛིཏིསམྤཱདནཝཎྞནཱ

༧༦. ལཀྑཊྛཱནེ ཋིཏཾ སརེན ཝཱལཾ ཝིཛ྄ཛྷཏཱིཏི ཝཱལཝེདྷཱི. ཨིདྷ པན ཨནེཀདྷཱ བྷིནྣསྶ ཝཱལསྶ ཨཾསུཾ ཝིཛ྄ཛྷནྟོ ‘‘ཝཱལཝེདྷཱི’’ཏི ཨདྷིཔྤེཏོ. ཏེན ¶ ཝཱལཝེདྷིནཱ. སཱུདེནཱཏི བྷཏྟཀཱརེན. ‘‘ཨཱཀཱརཱ པརིགྒཧེཏབྦཱ’’ཏི སངྑེཔཏོ ཝུཏྟམཏྠཾ ཝིཝརིཏུཾ ‘‘ཡཐཱ ཧཱི’’ཏིཨཱདི ཝུཏྟཾ. ཏཏྠ སུཀུསལོཏི སུཊྛུ ཚེཀོ. དྷནུགྒཧོཏི ཨིསྶཱསོ. ཀམྨནྟི ཡོགྱཾ. ཨཀྐནྟཔདཱནནྟི ཝིཛ྄ཛྷནཀཱལེ ཨཀྐམནཝསེན པཝཏྟཔདཱནཾ. ཨཱཀཱརནྟི དྷནུཛིཡཱསརཱནཾ གཧིཏཱཀཱརཾ. པརིགྒཎྷེཡྻཱཏི ཨུཔདྷཱརེཡྻ. བྷོཛནསཔྤཱཡཱདཡོཏི ཨཱདི-སདྡོ ཨཝུཏྟཱཀཱརཱནམྤི སངྒཱཧཀོ དཊྛབྦོ. ཏེན ཨུཏུབྷཱཝནཱནིམིཏྟཱདཱིནམྤི པརིགྒཎྷནཾ ཝུཏྟཾ ཧོཏི. ཏསྨིནྟི ཏསྨིཾ ཏརུཎསམཱདྷིམྷི.

བྷཏྟཱརནྟི ¶ སཱམིནཾ, བྷཏྟཝེཏནཱདཱིཧི པོསཀནྟི ཨཏྠོ. པརིཝིསནྟོཏི བྷོཛེནྟོ. ཏསྶ རུཙྩིཏྭཱ བྷུཉྫནཱཀཱརཾ སལླཀྑེཏྭཱ ཏསྶ ཨུཔནཱམེནྟོཏི ཡོཛནཱ. ཨཡམྤི ཡོགཱི. ཨདྷིགཏཀྑཎེ བྷོཛནཱདཡོ ཨཱཀཱརེཏི པུབྦེ ཛྷཱནསྶ ཨདྷིགཏཀྑཎེ ཀིཙྩསཱདྷཀེ བྷོཛནཱདིགཏེ ཨཱཀཱརེ. གཧེཏྭཱཏི པརིགྒཧེཏྭཱ སལླཀྑེཏྭཱ. ནཊྛེ ནཊྛེ སམཱདྷིམྷི པུནཔྤུནཾ ཨཔྤནཱཡ.

མཧཱནསཝིཛྫཱཔརིཙཡེན པཎྜིཏོ. ཏཏྠ ཝིསདཉཱཎཏཱཡ བྱཏྟོ. ཋཱནུཔྤཏྟིཀཀཨོསལླཡོགེན ཀུསལོ. ནཱནཙྩཡེཧཱིཏི ནཱནཙྩཡེཧི ནཱནཱསབྷཱཝེཧི, ནཱནཱརསེཧཱིཏི ཨཏྠོ. ཏེནཱཧ ‘‘ཨམྦིལགྒེཧཱི’’ཏིཨཱདི. སཱུཔེཧཱིཏི བྱཉྫནེཧི. ཨམྦིལགྒེཧཱིཏི ཨམྦིལཀོཊྛཱསེཧི, ཡེ ཝཱ ཨམྦིལརསཱ ཧུཏྭཱ ཨགྒབྷཱུཏཱ, ཏེཧི ཙཏུརམྦིལཱདིམིསྶེཧི. ཨེས ནཡོ ཏིཏྟཀགྒཱདཱིསུཔི. ཁཱརིཀེཧཱིཏི ཝཱཏིངྒཎཀལཱི༹རཱདིམིསྶེཧི. ནིམིཏྟནྟི ཨཱཀཱརཾ རུཙྩནཝསེན བྷུཉྫནཱཀཱརཾ. ཨུགྒཎྷཱཏཱིཏི ཨུཔརཱུཔརི གཎྷཱཏི ཨུཔདྷཱརེཏི. ཨིམསྶ ཝཱ སཱུཔེཡྻསྶ ཨཏྠཱཡ ཧཏྠཾ ཨབྷིཧརཏི. ཨབྷིཧཱརཱནནྟི ཨབྷིམུཁེན ཧརིཏབྦཱནཾ པཎྞཱཀཱརཱནཾ, པཱུཛཱབྷིཧཱརཱནཾ ཝཱ. ནིམིཏྟཾ ཨུགྒཎྷཱཏཱིཏི ‘‘ཨེཝཾ མེ ཙིཏྟཾ སམཱཧིཏཾ ཨཧོསཱི’’ཏི ནིམིཏྟཾ གཎྷཱཏི སལླཀྑེཏི.

སམཱདྷིཔརིཔནྠཱནནྟི སམཱདྷིསྶ པརིཔནྠབྷཱུཏཱནཾ. དྷམྨཱནནྟི ཀཱམཙྪནྡཱདིནཱིཝརཎདྷམྨཱནཾ. སུཝིསོདྷིཏཏྟཱཏི སུཊྛུ ཝིསོདྷིཏཏྟཱ, ཝིཀྑམྦྷནཝསེནེཝ སམྨདེཝ པཧཱིནཏྟཱཏི ཨཏྠོ. ཀཱམཱདཱིནཝཔཙྩཝེཀྑཎཱདཱིཧཱིཏི ཨཱདི-སདྡེན ཨསུབྷམནསིཀཱརནེཀྑམྨཱནིསཾསཔཙྩཝེཀྑཎཱདཱིནི སངྒཎྷཱཏི. ནེཀྑམྨགུཎདསྶནེནཱཔི ¶ ཧི ཏསྶ ཝིབནྡྷབྷཱུཏེ ཀཱམཙྪནྡེ ཨཱདཱིནཝོ ཝིསེསཏོ པཱཀཊོ ཧོཏཱིཏི. ཀཱཡདུཊྛུལླནྟི ཀཱཡདརཐཾ སཱརདྡྷཀཱཡཏཾ. ཏེན ཀཱཡཙིཏྟཱནཾ སཱརམྦྷནིམིཏྟསྶ བྱཱཔཱདནཱིཝརཎསྶ ན ཝིསོདྷནམཱཧ. ཨཱརམྦྷདྷཱཏུམནསིཀཱརཱདཱིཏི ཨཱདི-སདྡེན ཝཱིརིཡསམྦོཛ྄ཛྷངྒནིམིཏྟཱནཾ, ཨཱལོཀསཉྙཱདཱིནཉྩ སངྒཧོ དཊྛབྦོ. སམཐནིམིཏྟམནསིཀཱརཱདཱིཏི ཨཱདི-སདྡེན སམཱདྷིསམྦོཛ྄ཛྷངྒཊྛཱནིཡཱནཾ དྷམྨཱནཾ སངྒཧོ དཊྛབྦོ. ཨཉྙེཔི སམཱདྷིཔརིཔནྠེཏི ཝིཙིཀིཙྪཱཊྛཱནིཡེ, མདམཱནཱདིཀེ ཙ སནྡྷཱཡཱཧ. ཨཱསཡནྟི ཝསནཀསུསིརཾ. སུཔརིསུདྡྷནྟི ཨཱསངྐནཱིཡཏྟཱབྷཱཝེན སུཊྛུ པརིསུདྡྷཾ. ཨེཏྠཱཧ – ནནུ ཙཱཡཾ པགེཝ ཀཱམཱདཱིནཝཾ པཙྩཝེཀྑིཏྭཱ སམཐཔཊིཔདཾ པཊིཔནྣོ ཨུཔཙཱརཀྑཎེཡེཝ ཛྷཱནེན ནཱིཝརཎཱནི ཝིཀྑམྦྷིཏཱནི, ཨཐ ཀསྨཱ པུན ཀཱམཱདཱིནཝཔཙྩཝེཀྑཎཱདི གཧིཏནྟི? སཙྩམེཏཾ. ཏཾ པན པཧཱནམཏྟནྟི ཛྷཱནསྶ ཙིརཊྛིཏིཡཱ ཨཏིསཡཔཧཱནཏྠཾ པུན གཧིཏཾ.

ཨུདྡྷཙྩ ¶ མིདྡྷནྟི ཀུཀྐུཙྩཾ, ཐིནཉྩ ཏདེཀཊྛཏཱཡ གཧིཏམེཝཱཏི ཀཏྭཱ ཝུཏྟཾ. སུདྡྷནྟགཏོཏི སུཔརིསུདྡྷཔརིཡནྟཾ སབྦསོ ཝིསོདྷིཏཀོཎཔརིཡནྟཾ ཨུཡྻཱནཾ གཏོ. ཏཧིཾ རམེཏི ཏསྨིཾ ཛྷཱནེ རམེཡྻ དིཝསབྷཱགམྤི ཛྷཱནསམངྒཱི ཨེཝ བྷཝེཡྻ.

ཙིཏྟབྷཱཝནཱཝེཔུལླཏྠནྟི སམཱདྷིབྷཱཝནཱཡ ཝིཔུལབྷཱཝཱཡ. ཡཐཱ ཧི བྷཱཝནཱཝསེན ནིམིཏྟསྶ ཨུཔྤཏྟི, ཨེཝམསྶ བྷཱཝནཱཝསེནེཝ ཝཌྜྷནམྤི. ཏསྨཱ ཨེཀངྒུལཱདིཝསེན ནིམིཏྟཾ ཝཌྜྷེནྟསྶ པུནཔྤུནཾ བཧུལཱིཀཱརེན ཛྷཱནཾ བྷཱཝནཱཔི ཝུདྡྷིཾ ཝིརུལ༹ྷིཾ ཝེཔུལླཾ ཨཱཔཛྫཏི. ཏེན ཝུཏྟཾ ‘‘ཙིཏྟབྷཱཝནཱཝེཔུལླཏྠཉྩ ཡཐཱལདྡྷཾ པཊིབྷཱགནིམིཏྟཾ ཝཌྜྷེཏབྦ’’ནྟི. ཏསྶཱཏི པཊིབྷཱགནིམིཏྟསྶ.

ནིམིཏྟཝཌྜྷནནཡཝཎྞནཱ

༧༧. ཏཏྲཱཏི སཱམིཨཏྠེ བྷུམྨཝཙནཾ, ཏསྶཱཏི ཨཏྠོ. ཨཝཌྜྷེཏྭཱཏི ཡཐཱ ཀུམྦྷཀཱརོ མཏྟིཀཱཡ པཏྟཾ ཀརོནྟོ པཋམཾ ཨཔརིཙྪིནྡིཏྭཱཝ པཏྟཾ ཝཌྜྷེཏི, ཨེཝཾ པཏྟཝཌྜྷནཡོགེན པཏྟཝཌྜྷནཡུཏྟིཡཱ ཨཝཌྜྷེཏྭཱ པཱུཝིཀསྶ པཱུཝཝཌྜྷནཾ. བྷཏྟསྶ ཨུཔརི བྷཏྟཔཀྑིཔནཾ བྷཏྟཝཌྜྷནཾ. ཝཏྠསྶ ཏིནྟསྶ ཨཉྪནཱདི དུསྶཝཌྜྷནཾ. པཙྩེཀཾ ཡོག-སདྡོ ཡོཛེཏབྦོ. ཨཔརིཙྪིནྡིཏྭཱ ¶ ན ཝཌྜྷེཏབྦཾ སཔརིཙྪེདེ ཨེཝ བྷཱཝནཱཔཝཏྟིཏོ. ཏཐཱ ཧི ཝུཏྟཾ ‘‘སཱནྟཀེ ནོ ཨནནྟཀེ’’ཏི (ཝིསུདྡྷི. ༡.༥༥).

ཧཾསཔོཏཀཱཏི ཛཝནཧཾསཔོཏཀཱ. ཨུཀྐཱུལཾ ཨུནྣཏཊྛཱནཾ. ཝིཀཱུལཾ ནིནྣཊྛཱནཾ. ནདཱིསོཏེན ཀཏཾ ཝིདུགྒཾ ནདཱིཝིདུགྒཾ. ཝིསམཱཀཱརེན ཋིཏོ པབྦཏཔདེསོ པབྦཏཝིསམོ.

ཐཱུལཱནི ཧུཏྭཱ ཨུཔཊྛཧནྟི པཙྩཝེཀྑཎཱབཱཧུལླེན ཝིབྷཱུཏབྷཱཝཏོ. དུབྦལཱནི ཧུཏྭཱ ཨུཔཊྛཧནྟི པགུཎབལཝབྷཱཝསྶ ཨནཱཔཱདིཀཏྟཱ. ཨུཔརི ཨུསྶུཀྐནཱཡཱཏི བྷཱཝནཱཡ ཨུཔརི ཨཱརོཧནཱཡ, དུཏིཡཛ྄ཛྷཱནཱདྷིགམཱཡཱཏི ཨཏྠོ.

པབྦཏེཡྻཱཏི པབྦཏེ བཧུལཙཱརིནཱི. ཨཁེཏྟཉྙཱུཏི ཨགོཙརཉྙཱུ. སམཱདྷིཔརིཔནྠཱནཾ ཝིསོདྷནཱནབྷིཉྙཱཏཱཡ བཱལོ. ཛྷཱནསྶ པགུཎབྷཱཝཱཔཱདནཝེཡྻཏྟིཡསྶ ཨབྷཱཝེན ཨབྱཏྟོ. ཨུཔརིཛྷཱནསྶ ¶ པདཊྛཱནབྷཱཝཱནཝབོདྷེན ཨཁེཏྟཉྙཱུ. སབྦཐཱཔི སམཱཔཏྟིཀོསལླཱབྷཱཝེན ཨཀུསལོ. སམཱདྷིནིམིཏྟསྶ ཝཱ ཨནཱསེཝནཱཡ བཱལོ. ཨབྷཱཝནཱཡ ཨབྱཏྟོ. ཨབཧུལཱིཀཱརེན ཨཁེཏྟཉྙཱུ. སམྨདེཝ ཨནདྷིཊྛཱནཏོ ཨཀུསལོཏི ཡོཛེཏབྦཾ. ཨུབྷཏོ བྷཊྛོཏི ཨུབྷཡཏོ ཛྷཱནཏོ བྷཊྛོ. སོ ཧི ཨཔྤགུཎཏཱཡ ན སུཔྤཏིཊྛིཏཏཱཡ སཨུསྶཱཧོཔི ཝིནཱསཏོ, ཨསཱམཏྠིཡཏོ ཙ ཛྷཱནདྭཡཏོ པརིཧཱིནོ. ཙིཎྞཝསིནཱཏི ཨཱསེཝིཏཝསིནཱ.

པཉྩཝསཱིཀཐཱཝཎྞནཱ

༧༨. ཝསནཾ ཝསཱིཏི དྷཱཏུནིདྡེསཏཱཡ ཀིརིཡཱནིདྡེསོཏི ཨདྷིཔྤཱཡེནཱཧ ‘‘ཝསིཡོ’’ཏི, ཡཐཱརུཙི པཝཏྟིཡོཏི ཨཏྠོ. ཨཱཝཛྫནཱཡ ཝསཱི, ཨཱཝཛྫནཱཝསེན ཝཱ ཝསཱི ཨཱཝཛྫནཝསཱི. ཛྷཱནཾ ཨཱཝཛྫིཏུཾ ཡཏྠ ཡཏྠ པདེསེ ཨིཙྪཱ ཡཏྠིཙྪཀཾ. ཡདཱ ཡདཱ, ཡསྨིཾ ཡསྨིཾ ཝཱ ཛྷཱནངྒེ ཨིཙྪཱ ཡདིཙྪཀཾ. ཡཱཝ ཡཱཝ ཨིཙྪཱ ཡཱཝདིཙྪཀཾ, ད-ཀཱརོ པདསནྡྷིཀརོ. ‘‘ཡཱཝཱ’’ཏི ཙ ཨིདཾ བཧཱུནཾ ཛཝནཝཱརཱནཾ ནིརནྟརཾ ཝིཡ ཏཐཱཔཝཏྟནཾ སནྡྷཱཡ ཝུཏྟཾ, ན ཨེཀམེཝ. སོ ཧི པརིཙྪིནྣཙིཏྟཀྑཎོཏི. ཨཱཝཛྫནཱཡ དནྡྷཱཡིཏཏྟཾ ནཏྠཱིཏི ཝུཏྟནཡེན ཡཏྠ ཀཏྠཙི ཋཱནེ ཡདཱ ཡདཱ ¶ ཡཾ ཀིཉྩི ཛྷཱནངྒཾ ཨཱཝཛྫེནྟསྶ ཡཐིཙྪིཏཾ ཀཱལཾ ཨཱཝཛྫནཱཡ ཨཱཝཛྫནཔྤཝཏྟིཡཱ དནྡྷཱཡིཏཏྟཾ ཝིཏྠཱཡིཏཏྟཾ, ཙིརཱཡིཏཏྟཾ ཝཱ ནཏྠི. ཨེཝཾ ཨཱཝཛྫནཝསཱི སིདྡྷཱ ནཱམ ཧོཏཱིཏི ཨཏྠོ. སེསཱཏི ཝུཊྛཱནཨདྷིཊྛཱནཔཙྩཝེཀྑཎཱཝསིཡོ.

ཨངྒསམུདཱཡབྷཱཝཏོ ཛྷཱནསྶ ཛྷཱནེ ཨཱཝཛྫནཝསིཾ ནིཔྥཱདེཏུཀཱམེན པཊིཔཱཊིཡཱ ཛྷཱནངྒཱནི ཨཱཝཛྫེཏབྦཱནཱིཏི ཨཱཧ ‘‘པཋམཾ ཝིཏཀྐཾ ཨཱཝཛྫཡཏོ’’ཏི. ཡདིཔི ཨཱཝཛྫནམེཝེཏྠ ཨིཙྪིཏཾ ཨཱཝཛྫནཝསིཡཱ ཨདྷིཔྤེཏཏྟཱ, ཨཱཝཛྫནཱཡ པན ཨུཔྤནྣཱཡ ཛཝནེཧི བྷཝིཏབྦཾ. ཏཱནི ཙ ཁོ ཨཱཝཛྫནཏཔྤརཏཱཡ ཙིཏྟཱབྷིནཱིཧཱརསྶ ཡཐཱཝཛྫིཏཛྷཱནངྒཱརམྨཎཱནི ཀཏིཔཡཱནེཝ ཧོནྟི, ན པརིཔུཎྞཱནཱིཏི ཝུཏྟཾ ‘‘ཝིཏཀྐཱརམྨཎཱནེཝ ཙཏྟཱརི པཉྩ ཝཱ ཛཝནཱནི ཛཝནྟཱི’’ཏི. ཙཏྟཱརི ཏིཀྑིནྡྲིཡསྶ. པཉྩ ནཱཏིཏིཀྑིནྡྲིཡསྶཱཏི དཊྛབྦཾ. ནིརནྟརནྟི ཝིསབྷཱགེཧི ནིརནྟརཾ. ཨཡཾ པནཱཏི བྷཝངྒདྭཡནྟརིཏཱ ཙཏུཛཝནཙིཏྟཱ ཡཐཱཝུཏྟཱ ཨཱཝཛྫནཝསཱི. ཨཉྙེསཾ ཝཱ དྷམྨསེནཱཔཏིཨཱདཱིནཾ. ཨེཝརཱུཔེ ཀཱལེཏི ཨུཊྛཱཡ སམུཊྛཱཡ ལཧུཏརཾ ཨཱཝཛྫནཝསཱིནིབྦཏྟནཀཱལེ. སཱ ཙ ཁོ ཨིཏྟརཱ པརིཏྟཀཱལཱ, ན སཏྠུ ཡམཀམཧཱཔཱཊིཧཱརིཡེ ཝིཡ ¶ ཙིརཏརཔྤབནྡྷཝཏཱི. ཏཐཱ ཧི ཏཾ སཱཝཀེཧི ཨསཱདྷཱརཎཾ ཝུཏྟཾ. ཨདྷིགམེན སམཾ སསམྤཡུཏྟསྶ ཛྷཱནསྶ སམྨཱ ཨཱཔཛྫནཾ པཊིཔཛྫནཾ སམཱཔཛྫནཾ, ཛྷཱནསམངྒིཏཱ.

སཱིགྷནྟི ཨེཏྠ སམཱཔཛྫིཏུཀཱམཏཱནནྟརཾ དྭཱིསུ བྷཝངྒེསུ ཨུཔྤནྣེསུ བྷཝངྒཾ ཨུཔཙྪིནྡིཏྭཱ ཨུཔྤནྣཱཝཛྫནཱནནྟརཾ སམཱཔཛྫནཾ སཱིགྷཾ སམཱཔཛྫནསམཏྠཏཱ. ཨཡཉྩ མཏྠཀཔྤཏྟཱ སམཱཔཛྫནཝསཱི སཏྠུ དྷམྨདེསནཱཡཾ ལབྦྷཏི. ཡཾ སནྡྷཱཡ ཝུཏྟཾ ‘‘སོ ཁོ ཨཧཾ, ཨགྒིཝེསྶན, ཏསྶཱ ཨེཝ ཀཐཱཡ པརིཡོསཱནེ ཏསྨིཾཡེཝ པུརིམསྨིཾ སམཱདྷིནིམིཏྟེ ཨཛ྄ཛྷཏྟམེཝ ཙིཏྟཾ སཎྛཔེམི སནྣིསཱདེམི ཨེཀོདིཾ ཀརོམི སམཱདཧཱམི ཡེནསྶུདཾ ནིཙྩཀཔྤཾ ཝིཧརཱམཱི’’ཏི (མ. ནི. ༡.༣༨༧). ཨིཏོ སཱིགྷཏརཱ ཧི སམཱཔཛྫནཝསཱི ནཱམ ནཏྠི. ཛུཎྷཱཡ རཏྟིཡཱ ནཝོརོཔིཏེཧི ཀེསེཧི ཀཔོཏཀནྡརཱཡཾ ཝིཧརནྟསྶ ཨཱཡསྨཏོ སཱརིཔུཏྟསྶ ཡཀྑེན མཧནྟམྤི པབྦཏཀཱུཊཾ པདཱལེཏུཾ སམཏྠེ པཧཱརེ སཱིསེ དིནྣེ སམཱཔཛྫནམྤེཏྠ ནིདསྶེཏབྦཾ. ཏཐཱ ཧི ཝཀྑཏི ‘‘ཏདཱ ཐེརོ ཏསྶ པཧརཎསམཡེ སམཱཔཏྟིཾ ཨཔྤེསཱི’’ཏི (ཝིསུདྡྷི. ༢.༣༧༤). པཱལི༹ཡཾ པན ‘‘ཨཉྙཏརཾ སམཱདྷིཾ སམཱཔཛྫིཏྭཱ ནིསིནྣོ’’ཏི (ཨུདཱ. ༣༤) ཝུཏྟཾ. ཨིམེ པན ཐེརཱ ¶ ‘‘སམཱཔཏྟིཏོ ཝུཊྛཱནསམཀཱལཾ ཏེན པཧཱརོ དིནྣོ’’ཏི ཝདནྟི.

ཨཙྪརཱམཏྟནྟི ཨངྒུལིཕོཊམཏྟཾ ཁཎཾ. ཋཔེཏུནྟི སེཏུ ཝིཡ སཱིགྷསོཏཱཡ ནདིཡཱ ཨོགྷཾ ཝེགེན པཝཏྟིཏུཾ ཨདཏྭཱ ཡཐཱཝུཏྟཀྑཎཾ ཛྷཱནཾ ཋཔེཏུཾ སམཏྠཏཱ. ཨབྷིབྷུཡྻ ཋཔནཾ, ཨདྷིཊྛཱནཾ ཝིཡཱཏི ཝཱ ཨདྷིཊྛཱནཾ. ཏཏྠ ཝསཱི ཨདྷིཊྛཱནཝསཱི. ཏཐེཝ ལཧུཾ ཝུཊྛཱཏུནྟི ཨཙྪརཱམཏྟཾ ཝཱ དསཙྪརཱམཏྟཾ ཝཱ ལཧུཾ ཁཎཾ ཛྷཱནསམངྒཱི ཧུཏྭཱ ཛྷཱནཏོ ཝུཊྛཱཏུཾ སམཏྠཏཱ. བྷཝངྒཙིཏྟུཔྤཏྟིཡེཝ ཧེཏྠ ཛྷཱནཏོ ཝུཊྛཱནཾ ནཱམ. ཨེཏྠ ཙ ཡཐཱ ‘‘ཨེཏྟཀམེཝ ཁཎཾ ཛྷཱནཾ ཋཔེསྶཱམཱི’’ཏི པུབྦཔརིཀམྨཝསེན ཨདྷིཊྛཱནསམཏྠཏཱ ཨདྷིཊྛཱནཝསཱི, ཨེཝཾ ‘‘ཨེཏྟཀམེཝ ཁཎཾ ཛྷཱནསམངྒཱི ཧུཏྭཱ ཛྷཱནཏོ ཝུཊྛཧིསྶཱམཱི’’ཏི པུབྦཔརིཀམྨཝསེན ཝུཊྛཱནསམཏྠཏཱ ཝུཊྛཱནཝསཱི ཝེདིཏབྦཱ, ཡཱ སམཱཔཏྟི ‘‘ཝུཊྛཱནཀུསལཏཱ’’ཏི ཝུཙྩཏི. ཏདུབྷཡདསྶནཏྠནྟི ཨདྷིཊྛཱནཝུཊྛཱནཝསཱིདསྶནཏྠཾ.

ཏཏྠཱཏི ཏསྨིཾ ནིམྨིཏཔབྦཏེ ཏསྶ ཝིཝརེ. ཀིཉྩཱཔི ཨེཀཾཡེཝ ཏཾ ཨབྷིཉྙཱཙིཏྟཾ ཡེན པབྦཏཾ ནིམྨིནེཡྻ, ཨབྷིཉྙཱཔཱདཀསྶ པན ཛྷཱནསྶ ལཧུཏརཾ ཋཔནཾ, ཝུཊྛཱནཉྩ ཨིདྷ ནིདསྶིཏནྟི དཊྛབྦཾ. ‘‘ཨེཏྟཀཱ ཨིདྡྷིམནྟཱ ཨེཀཾ ཨུཔཊྛཱཀཾ གརུལ༹ཏོ རཀྑིཏུཾ ན སཀྑིཾསཱུ’’ཏི གཱརཡ྄ཧཱ ཨསྶཱམ.

ཨཱཝཛྫནཱནནྟརཱནཱིཏི ¶ ཨཱཝཛྫནཝསཱིབྷཱཝཱཡ ཡཐཱཀྐམཾ ཝིཏཀྐཱདཱིནཾ ཛྷཱནངྒཱནཾ ཨཱཝཛྫནཱཡ པརཏོ ཡཱནི ཛཝནཱནི པཝཏྟཱནི, ཏཱནི ཏེསཾ པཙྩཝེཀྑཎཱནི. ཡདགྒེན ཨཱཝཛྫནཝསཱིསིདྡྷི, ཏདགྒེན པཙྩཝེཀྑཎཱཝསཱིསིདྡྷི ཝེདིཏབྦཱ.

དུཏིཡཛ྄ཛྷཱནཀཐཱཝཎྞནཱ

༧༩. ནཱིཝརཎཔྤཧཱནསྶ ཏཔྤཋམཏཱཡ ཨཱསནྣནཱིཝརཎཔཙྩཏྠིཀཱ. ཐཱུལཾ ནཱམ ཝིཔུལམྤི ཕེགྒུ ཝིཡ སུཁབྷཉྫནཱིཡནྟི ཨཱཧ ‘‘ཨོལཱ༹རིཀཏྟཱ ཨངྒདུབྦལཱ’’ཏི. སནྟཏོ མནསི ཀརིཏྭཱཏི པཋམཛ྄ཛྷཱནཾ ཝིཡ ཨནོལཱ༹རིཀངྒཏྟཱ, སནྟདྷམྨསམངྒིཏཱཡ ཙ ‘‘སནྟ’’ནྟི མནསི ཀཏྭཱ. ཡེ ཧི དྷམྨཱ དུཏིཡཛ྄ཛྷཱནེ པཱིཏིསུཁཱདཡོ, ཀཱམཾ ཏེ པཋམཛ྄ཛྷཱནེཔི སནྟི, ཏེཧི པན ཏེ སནྟཏརཱ ཙེཝ པཎཱིཏཏརཱ ཙ བྷཝནྟཱིཏི. ནིཀནྟིནྟི ནིཀཱམནཾ, ཨཔེཀྑནྟི ¶ ཨཏྠོ. པརིཡཱདཱཡཱཏི ཁེཔེཏྭཱ. ཙཏྟཱརི པཉྩཱཏི ཝཱ-སདྡོ ལུཏྟནིདྡིཊྛོ. དུཏིཡཛ྄ཛྷཱནཾ ཨེཏསྶ ཨཏྠཱིཏི དུཏིཡཛ྄ཛྷཱནིཀཾ. ཝུཏྟཔྤཀཱརཱནེཝཱཏི པཋམཛ྄ཛྷཱནེ ཝུཏྟཔྤཀཱརཱནིཡེཝ, པརིཀམྨཱདིནཱམཀཱནཱིཏི ཨཏྠོ.

༨༠. ཝཱུཔསམཱཏི ཝཱུཔསམཧེཏུ, ཝཱུཔསམོཏི ཙེཏྠ པཧཱནཾ ཨདྷིཔྤེཏཾ, ཏཉྩ ཝིཏཀྐཝིཙཱརཱནཾ. ཨཏིཀྐམོ ཨཏྠཏོ དུཏིཡཛ྄ཛྷཱནཀྑཎེ ཨནུཔྤཱདོཏི ཨཱཧ ‘‘སམཏིཀྐམཱ’’ཏིཨཱདི. ཀཏམེསཾ པནེཏྠ ཝིཏཀྐཝིཙཱརཱནཾ ཝཱུཔསམོ ཨདྷིཔྤེཏོ, ཀིཾ པཋམཛ྄ཛྷཱནིཀཱནཾ, ཨུདཱཧུ དུཏིཡཛ྄ཛྷཱནིཀཱནནྟི. ཀིཉྩེཏྠ ཡདི པཋམཛ྄ཛྷཱནིཀཱནཾ, ནཏྠི ཏེསཾ ཝཱུཔསམོ. ན ཧི ཀདཱཙི པཋམཛ྄ཛྷཱནཾ ཝིཏཀྐཝིཙཱརརཧིཏཾ ཨཏྠི. ཨཐ དུཏིཡཛ྄ཛྷཱནིཀཱནཾ, ཨེཝམྤི ནཏྠེཝ ཝཱུཔསམོ, སབྦེན སབྦཾ ཏེསཾ ཏཏྠ ཨབྷཱཝཏོཏི? ཝུཙྩཏེ – ཡེཧི ཝིཏཀྐཝིཙཱརེཧི པཋམཛ྄ཛྷཱནསྶ ཨོལཱ༹རིཀཏཱ, ཏེསཾ སམཏིཀྐམཱ དུཏིཡསྶ ཛྷཱནསྶ སམདྷིགམོ, ན སབྷཱཝཏོ ཨནོལཱ༹རིཀཱནཾ ཕསྶཱདཱིནཾ སམཏིཀྐམཱཏི ཨཡམཏྠོ ‘‘ཝིཏཀྐཝིཙཱརཱནཾ ཝཱུཔསམཱ’’ཏི ཨེཏེན དཱིཔིཏོ. ཏསྨཱ ‘‘ཀིཾ པཋམཛ྄ཛྷཱནིཀཱནཾ ཝིཏཀྐཝིཙཱརཱནཾ ཝཱུཔསམོ ཨིདྷཱདྷིཔྤེཏོ, ཨུདཱཧུ དུཏིཡཛ྄ཛྷཱནིཀཱན’’ནྟི ཨེདིསཱི ཙོདནཱ ཨནོཀཱསཱཝ. ཡསྨཱ དིཊྛཱདཱིནཝསྶ ཏཾཏཾཛྷཱནཀྑཎེ ཨནུཔྤཏྟིདྷམྨཏཱཔཱདནཾ ཝཱུཔསམནཾ ཨདྷིཔྤེཏཾ. ཝིཏཀྐཱདཡོ ཨེཝ ཛྷཱནངྒབྷཱུཏཱ ཏཐཱ ཀརཱིཡནྟི, ན ཏཾསམྤཡུཏྟཱ ཕསྶཱདཡོ, ཏསྨཱ ཝིཏཀྐཱདཱིནཾཡེཝ ཝཱུཔསམཱདིཝཙནཾ ཉཱཡཱགཏཾ. ཡསྨཱ པན ཝིཏཀྐཱདཱིནཾ ཝིཡ ཏཾསམྤཡུཏྟདྷམྨཱནམྤི ཨེཏེན ‘‘ཨེཏཾ ཨོལཱ༹རིཀ’’ནྟི ཨཱདཱིནཝདསྶནཾ སུཏྟེ ཨཱགཏཾ, ཏསྨཱ ཨཝིསེསེན ¶ ཝིཏཀྐཱདཱིནཾ, ཏཾསཧགཏཱནཉྩ ཝཱུཔསམཱདིཀེ ཝཏྟབྦེ ཝིཏཀྐཱདཱིནཾཡེཝ ཝཱུཔསམོ ཝུཙྩམཱནོ ཨདྷིཀཝཙནཾ ཨཉྙཾ ཨཏྠཾ བོདྷེཏཱིཏི ཀཏྭཱ ཀིཉྩི ཝིསེསཾ དཱིཔེཏཱིཏི དསྶེཏུཾ ཨཊྛཀཐཱཡཾ ‘‘ཨོལཱ༹རིཀསྶ པནཱ’’ཏིཨཱདི གཧིཏནྟི ཨིདྷ ‘‘ཡེཧི ཝིཏཀྐཝིཙཱརེཧཱི’’ཏིཨཱདི ཝུཏྟནྟི དཊྛབྦཾ. ‘‘པཱིཏིཡཱ ཙ ཝིརཱགཱ’’ཏིཨཱདཱིསུཔི ཨེསེཝ ནཡོ. ཏསྨཱ ཝིཏཀྐཝིཙཱརཔཱིཏིསུཁསམཏིཀྐམཝཙནཱནི ཨོལཱ༹རིཀོལཱ༹རིཀངྒསམཏིཀྐམཱ དུཏིཡཱདིཨདྷིགམདཱིཔཀཱནཱིཏི ཏེསཾ ཨེཀདེསབྷཱུཏཾ ཝིཏཀྐཝིཙཱརསམཏིཀྐམཝཙནཾ ཏཾདཱིཔཀཾ ཝུཏྟཾ. ཝིསུཾ ཝིསུཾ ཋིཏེཔི ཧི ཝིཏཀྐཝིཙཱརསམཏིཀྐམཝཙནཱདིཀེ པཧེཡྻངྒནིདྡེསཏཱསཱམཉྙེན ཙིཏྟེན སམཱུཧཏོ གཧིཏེ ཝིཏཀྐཝིཙཱརཝཱུཔསམཝཙནསྶ ཏདེཀདེསཏཱ དཊྛབྦཱ. ཨཡཉྩ ཨཏྠོ ¶ ཨཝཡཝེན སམུདཱཡོཔལཀྑཎནཡེན ཝུཏྟོ. ཨཐ ཝཱ ཝིཏཀྐཝིཙཱརཝཱུཔསམཝཙནེནེཝ ཏཾསམཏིཀྐམཱ དུཏིཡཱདྷིགམདཱིཔཀེན པཱིཏིཝིརཱགཱདིཝཙནཱནཾ པཱིཏིཨཱདིསམཏིཀྐམཱ ཏཏིཡཱདིཨདྷིགམདཱིཔཀཏཱ དཱིཔིཏཱ ཧོཏཱིཏི ཏསྶ ཏཾདཱིཔཀཏཱ ཝུཏྟཱ.

ནིཡཀཛ྄ཛྷཏྟམདྷིཔྤེཏཾ ན ཨཛ྄ཛྷཏྟཛ྄ཛྷཏྟཱདི. ཏཏྠ ཀཱརཎམཱཧ ‘‘ཝིབྷངྒེ པནཱ’’ཏིཨཱདི. ནཱིལཝཎྞཡོགཏོ ནཱིལཝཏྠཾ ཝིཡཱཏི ནཱིལཡོགཏོ ཝཏྠཾ ནཱིལཾ ཝིཡཱཏི ཨདྷིཔྤཱཡོ. ཡེན སམྤསཱདནེན ཡོགཱ ཛྷཱནཾ སམྤསཱདནཾ. ཏསྨིཾ དསྶིཏེ ‘‘སམྤསཱདནཾ ཛྷཱན’’ནྟི སམཱནཱདྷིཀརཎནིདྡེསེནེཝ ཏཾཡོགཱ ཛྷཱནེ ཏཾསདྡཔྤཝཏྟི དསྶིཏཱཏི ཨཝིརོདྷོ ཡུཏྟོ. ཨེཀོདིབྷཱཝེ ཀཐནྟི ཨེཀོདིམྷི དསྶིཏེ ཨེཀོདིབྷཱཝཾ ཛྷཱནནྟི སམཱནཱདྷིཀརཎནིདྡེསེནེཝ ཛྷཱནསྶ ཨེཀོདིཝཌྜྷནཏཱ ཝུཏྟཱ ཧོཏཱིཏི ཙེ? ‘‘ཨེཀོདིབྷཱཝ’’ནྟི པདཾ ཨུདྡྷརིཏྭཱ ཨེཀོདིསྶ ནིདྡེསོ ན ཀཱཏབྦོ སིཡཱཏི ཨེཀོདིབྷཱཝསདྡོ ཨེཝ སམཱདྷིམྷི པཝཏྟོ སམྤསཱདནསདྡོ ཝིཡ ཛྷཱནེ པཝཏྟཏཱིཏི ཡུཏྟཾ. ཨིམསྨིཉྩ ཨཏྠཝིཀཔྤེཏི ‘‘ཙེཏསོ སམྤསཱདཡཏཱི’’ཏི ཨེཏསྨིཾ པཀྑེ ‘‘ཙེཏསོ’’ཏི ཙ ཨུཔཡོགཏྠེ སཱམིཝཙནཾ. པུརིམསྨིནྟི ‘‘སམྤསཱདནཡོགཏོ ཛྷཱནཾ སམྤསཱདན’’ནྟི ཝུཏྟཔཀྑེ. ཙེཏསོཏི སམྦནྡྷེ སཱམིཝཙནཾ.

སེཊྛོཔི ལོཀེ ‘‘ཨེཀོ’’ཏི ཝུཙྩཏི ‘‘ཡཱཝ པརེ ཨེཀཱཧཾ ཏེ ཀརོམཱི’’ཏིཨཱདཱིསུ. ཨེཀོ ཨདུཏིཡོ ‘‘ཨེཀཱཀཱིབྷི ཁུདྡཀེཧི ཛིཏ’’ནྟིཨཱདཱིསུ ཨསཧཱཡཏྠོཔི ཨེཀ-སདྡོ དིཊྛོཏི ཨཱཧ ‘‘ཨེཀོ ཨསཧཱཡོ ཧུཏྭཱ’’ཏི. སདྡྷཱདཡོཔི ཀཱམཾ སམྤཡུཏྟདྷམྨཱནཾ སཱདྷཱརཎཏོ, ཨསཱདྷཱརཎཏོ ཙ པཙྩཡཱ ཧོནྟིཡེཝ, སམཱདྷི པན ཛྷཱནཀྑཎེ སམྤཡུཏྟདྷམྨཱནཾ ཨཝིཀྑེཔལཀྑཎེ ཨིནྡཊྛཀརཎེན སཱཏིསཡཾ པཙྩཡོ ཧོཏཱིཏི དསྶེནྟོ ‘‘སམྤཡུཏྟདྷམྨེ…པེ… ཨདྷིཝཙན’’ནྟི ཨཱཧ.

‘‘སམྤསཱདནཾ ¶ , ཙེཏསོ ཨེཀོདིབྷཱཝ’’ནྟི ཝིསེསནདྭཡཾ ཛྷཱནསྶ ཨཏིསཡཝཙནིཙྪཱཝསེན གཧིཏཾ. སྭཱཡམཏིསཡོ ཡཐཱ ཨིམསྨིཾ ཛྷཱནེ ལབྦྷཏི, ན ཏཐཱ པཋམཛ྄ཛྷཱནེཏི ཨིམཾ ཝིསེསཾ དསྶེཏུཾ ‘‘ནནུ ཙཱ’’ཏིཨཱདི ཝུཏྟཾ. ཨཱརམྨཎེ ཨཱཧནནཔརིཡཱཧནནཝསེན, ཨནུམཛྫནཨནུཡོཛནཝསེན ཙ པཝཏྟམཱནཱ དྷམྨཱ སཏིཔི ནཱིཝརཎཔྤཧཱནེན ཀིལེསཀཱལུསྶིཡཱཔགམེ ¶ སམྤཡུཏྟཱནཾ ཀཉྩི ཁོབྷཾ ཀརོནྟཱ ཝིཡ ཏེཧི ཙ ཏེ ན སནྣིསིནྣཱ ཧོནྟཱིཏི ཝུཏྟཾ ‘‘ཝིཏཀྐཝིཙཱརཀྑོབྷེན ན སུཔྤསནྣ’’ནྟི. ཁུདྡིཀཱ ཨཱུམིཡོ ཝཱིཙིཡོ. མཧཏིཡོ ཏརངྒཱ. སཏིཔི ཨིནྡྲིཡསམཏྟེ, ཝཱིརིཡསམཏཱཡ ཙ ཏེནེཝ ཁོབྷེན, སམྤསཱདཱབྷཱཝེན ཙ སམཱདྷིཔི ན སུཊྛུ པཱཀཊོ བཧལེ ཝིཡ ཛལེ མཙྪོ. ཡཐཱཝུཏྟཀྑོབྷོ ཨེཝ པལིབོདྷོ. ཨེཝཾ ཝུཏྟེནཱཏི ཡསྶཱ སདྡྷཱཡ ཝསེན སམྤསཱདནཾ, ཡསྶཱ ཙ ཙིཏྟེཀགྒཏཱཡ ཝསེན ཨེཀོདིབྷཱཝནྟི ཙ ཛྷཱནཾ ཝུཏྟཾ. ཏཱསཾ ཨེཝ ‘‘སདྡཧནཱ’’ཏིཨཱདིནཱ པཝཏྟིཨཱཀཱརསྶ ཝིསེསཝིབྷཱཝནཱཝསེན ཝུཏྟེན. ཏེན ཝིབྷངྒཔཱཋེན. ‘‘སམྤསཱདནཡོགཏོ, སམྤསཱདནཏོ ཝཱ སམྤསཱདནཾ, ཨེཀོདིཾ བྷཱཝེཏཱིཏི ཨེཀོདིབྷཱཝནྟི ཛྷཱནཾ ཝུཏྟ’’ནྟི ཨེཝཾ པཝཏྟཱ ཨཡཾ ཨཏྠཝཎྞནཱ ན ཝིརུཛ྄ཛྷཏི. ཡཐཱ པན ཨཝིརོདྷོ, སོ ཝུཏྟོ ཨེཝ.

༨༡. སནྟཱཏི སམཾ ནིརོདྷཾ གཏཱ. སམིཏཱཏི བྷཱཝནཱཡ སམཾ གམིཏཱ ནིརོདྷིཏཱ. ཝཱུཔསནྟཱཏི ཏཏོ ཨེཝ སུཊྛུ ཨུཔསནྟཱ. ཨཏྠངྒཏཱཏི ཨཏྠཾ ཝིནཱསཾ གཏཱ. ཨབྦྷཏྠངྒཏཱཏི ཨུཔསགྒེན པདཾ ཝཌྜྷེཏྭཱ ཝུཏྟཾ. ཨཔྤིཏཱཏི ཝིནཱསཾ གམིཏཱ. སོསིཏཱཏི པཝཏྟིསངྑཱཏསྶ སནྟཱནསྶ ཨབྷཱཝེན སོསཾ སུཀྑབྷཱཝཾ ཨིཏཱ. བྱནྟིཀཏཱཏི ཝིགཏནྟཀཏཱ.

ཨཡམཏྠོཏི བྷཱཝནཱཡ པཧཱིནཏྟཱ ཝིཏཀྐཝིཙཱརཱནཾ ཨབྷཱཝོ. ཙོདཀེན ཝུཏྟམཏྠཾ སམྤཊིཙྪིཏྭཱ པརིཧརིཏུཾ ‘‘ཨེཝམེཏཾ སིདྡྷོཝཱཡམཏྠོ’’ཏི ཝཏྭཱ ‘‘ན པནེཏ’’ནྟིཨཱདི ཝུཏྟཾ. ཏཏྠ ཨེཏནྟི ‘‘ཝིཏཀྐཝིཙཱརཱནཾ ཝཱུཔསམཱ’’ཏི ཨེཏཾ ཝཙནཾ. ཏདཏྠདཱིཔཀནྟི ཏསྶ ཝིཏཀྐཝིཙཱརཱབྷཱཝམཏྟསངྑཱཏསྶ ཨཏྠསྶ དཱིཔཀཾ. ཨཡཉྷེཏྠ ཨཏྠོ – དུཏིཡཛ྄ཛྷཱནཱདིཨདྷིགམཱུཔཱཡདཱིཔཀེན ཨཛ྄ཛྷཏྟསམྤསཱདནཏཱཡ, ཙེཏསོ ཨེཀོདིབྷཱཝཏཱཡ ཙ ཧེཏུདཱིཔཀེན, ཨཝིཏཀྐཨཝིཙཱརབྷཱཝཧེཏུདཱིཔཀེན ཙ ཝིཏཀྐཝིཙཱརཝཱུཔསམཝཙནེནེཝ ཝིཏཀྐཝིཙཱརཱབྷཱཝོ དཱིཔིཏོཏི ཀིཾ པུན ཨཝིཏཀྐཨཝིཙཱརཝཙནེན ཀཏེནཱཏི? ན, ཨདཱིཔིཏཏྟཱ. ན ཧི ཝིཏཀྐཝིཙཱརཝཱུཔསམཝཙནེན ཝིཏཀྐཝིཙཱརཱནཾ ཨཔྤཝཏྟི ཝུཏྟཱ ཧོཏི. ཝིཏཀྐཝིཙཱརེསུ ཧི ཏཎྷཱཔྤཧཱནཾ ཨེཏེསཾ ཝཱུཔསམནཾ, ཡེ ཙ སངྑཱརེསུ ཏཎྷཱཔྤཧཱནཾ ཀརོནྟི, ཏེསུ མགྒེསུ, པཧཱིནཏཎྷེསུ ¶ ཙ ཕལེསུ སངྑཱརཔཝཏྟི ཧོཏི ཨེཝ ¶ , ཨེཝམེཝིདྷཱཔི ཝིཀྑམྦྷིཏཝིཏཀྐཝིཙཱརཏཎྷསྶ དུཏིཡཛ྄ཛྷཱནསྶ ཝིཏཀྐཝིཙཱརསམྤཡོགོ པུརིམེན ན ནིཝཱརིཏོ སིཡཱཏི ཏཾནིཝཱརཎཏྠཾ, ཨཱཝཛྫིཏུཀཱམཏཱདིཨཏིཀྐམོཝ ཏེསཾ ཝཱུཔསམོཏི དསྶནཏྠཉྩ ‘‘ཨཝིཏཀྐཾ ཨཝིཙཱར’’ནྟི ཝུཏྟཾ. པཋམམྤཱིཏི པཋམཾ ཛྷཱནམྤི.

‘‘དུཏིཡཾ ཨུཔྤནྣནྟིཔི དུཏིཡ’’ནྟི ཝཏྟུཾ ཝཊྚཏིཡེཝ. ན ཏཐཱ ཨིམསྶ ཝིཏཀྐཝིཙཱརཱཏི ཡཐཱ པཋམཛ྄ཛྷཱནསྶ ཨུཔཙཱརཀྑཎེ ནཱིཝརཎཱནི པཧཱིཡནྟི, ཏཐཱ ཨིམསྶ དུཏིཡཛ྄ཛྷཱནསྶ ཨུཔཙཱརཀྑཎེ ཝིཏཀྐཝིཙཱརཱ ན པཧཱིཡནྟི ཨསཾཀིལིཊྛསབྷཱཝཏྟཱ, ཨུཔཙཱརབྷཱཝནཱཡ ཙ ཏེ པཧཱཏུཾ ཨསམཏྠབྷཱཝཏོ. ཡདིཔི ཏཱཡ ཏེསུ ཏཎྷཱ པཧཱིཡཏི, ན པན སཝིསེསཾ. སཝིསེསཉྷི ཏཏྠ ཏཎྷཱཔྤཧཱནཾ ཨཔྤནཱཡ ཨེཝ ཧོཏི. ཏེན ཝུཏྟཾ ‘‘ཨཔྤནཱཀྑཎེཡེཝཱ’’ཏིཨཱདི. པཧཱནངྒཏཱཔི ཨཏིསཡཔྤཧཱནཝསེནེཝ ཝེདིཏབྦཱ ཡཐཱ ནཱིཝརཎཱནཾ པཋམཛ྄ཛྷཱནསྶ. ཏསྨཱཏི ཡསྨཱ ཏིཝངྒམེཝེཏཾ ཛྷཱནཾ, ཏསྨཱ. ཏནྟི ཝིབྷངྒེ ཝཙནཾ. རཐསྶ པཎྜུཀམྦལཾ ཝིཡ སམྤསཱདོ ཛྷཱནསྶ པརིཀྑཱརོ, ན ཛྷཱནངྒནྟི ཨཱཧ ‘‘སཔརིཀྑཱརཾ ཛྷཱནཾ དསྶེཏུ’’ནྟི.

ཏཏིཡཛ྄ཛྷཱནཀཐཱཝཎྞནཱ

༨༢. ཨུཔྤིལཱཝིཏནྟི ཀཱམཉྩཱཡཾ པརིགྒཧེསུ ཨཔརིཙྩཏྟཔེམསྶ ཨནཱདཱིནཝདསྶིནོ ཏཎྷཱསཧགཏཱཡ པཱིཏིཡཱ པཝཏྟིཨཱཀཱརོ, ཨིདྷ པན དུཏིཡཛ྄ཛྷཱནཔཱིཏི ཨདྷིཔྤེཏཱ. ཏཐཱཔི སབྦསོ པཱིཏིཡཾ ཨཝིརཏྟཾ, སཱཔི ཨནུབནྡྷེཡྻཱཏི ཝུཏྟཾ. ཨུཔྤིལཱཝིཏཾ ཝིཡཱཏི ཝཱ ཨུཔྤིལཱཝིཏཾ. ཨཱདཱིནཝཾ ཧི ཏཏྠ པཱཀཊཏརཾ ཀཏྭཱ དསྶེཏུཾ ཨེཝཾ ཝུཏྟནྟི དཊྛབྦཾ.

༨༣. ཝིརཛྫནཾ ཝིརཱགོ. ཏཾ པན ཝིརཛྫནཾ ནིབྦིནྡནམུཁེན ཧཱིལ༹ནཾ ཝཱ ཏཔྤཊིབདྡྷརཱགཔྤཧཱནཾ ཝཱཏི ཏདུབྷཡཾ དསྶེཏུཾ ‘‘ཝུཏྟཔྤཀཱརཱཡ པཱིཏིཡཱ ཛིགུཙྪནཾ ཝཱ སམཏིཀྐམོ ཝཱ’’ཏི ཨཱཧ. ཝུཏྟཔྤཀཱརཱཡཱཏི ‘‘ཡདེཝ ཏཏྠ པཱིཏཱི’’ཏིཨཱདིནཱ ཝུཏྟཔྤཀཱརཱཡ. སམྤིཎྜནཾ སམུཙྩཡོ.

མགྒོཏི ཨུཔཱཡོ. ཏདདྷིགམཱཡཱཏི ཏཏིཡམགྒཱདྷིགམཱཡ.

༨༤. ཨུཔཔཏྟིཏོཏི ¶ སམཝཱཧིཏབྷཱཝེན པཏིརཱུཔཏོ. ཛྷཱནུཔེཀྑཱཔི སམཝཱཧིཏམེཝ ཨནྟོནཱིཏཾ ཀཏྭཱ པཝཏྟཏཱིཏི ཨཱཧ ‘‘སམཾ པསྶཏཱི’’ཏི. ཝིསདཱཡཱཏི ¶ པརིབྱཏྟཱཡ སཾཀིལེསཝིགམེན. ཝིཔུལཱཡཱཏི མཧཏིཡཱ སཱཏིསཡཾ མཧགྒཏབྷཱཝཔྤཏྟིཡཱ. ཐཱམགཏཱཡཱཏི པཱིཏིཝིགམེན ཐིརབྷཱཝཔྤཏྟཱཡ.

པརིསུདྡྷཔཀཏི ཁཱིཎཱསཝཔཀཏི ནིཀྐིལེསཏཱ. སཏྟེསུ ཀམྨསྶཀཏཱདསྶནཧེཏུཀོ སམབྷཱཝདསྶནཱཀཱརོ མཛ྄ཛྷཏྟཱཀཱརོ བྲཧྨཝིཧཱརུཔེཀྑཱ.

སཧཛཱཏདྷམྨཱནནྟི ནིདྡྷཱརཎེ སཱམིཝཙནཾ. སམཔྤཝཏྟིཡཱ བྷཱཝནཱཡ ཝཱིཐིཔཊིཔནྣཱཡ ཨལཱིནཱནུདྡྷཏཱ ནིརསྶཱདཏཱཡ པགྒཧནིགྒཧསམྤཧཾསནེསུ བྱཱཔཱརཱབྷཱཝཏོ སམྤཡུཏྟདྷམྨེསུ མཛ྄ཛྷཏྟཱཀཱརབྷཱུཏཱ བོཛ྄ཛྷངྒུཔེཀྑཱ.

ཨུཔེཀྑཱནིམིཏྟནྟི ཨེཏྠ ལཱིནུདྡྷཙྩཔཀྑཔཱཏརཧིཏཾ མཛ྄ཛྷཏྟཾ ཝཱིརིཡཾ ཨུཔེཀྑཱ. ཏདེཝ ཏཾ ཨཱཀཱརཾ གཧེཏྭཱ པཝཏྟེཏབྦསྶ ཏཱདིསསྶ ཝཱིརིཡསྶ ནིམིཏྟབྷཱཝཏོ ཨུཔེཀྑཱནིམིཏྟཾ བྷཱཝནཱཡ སམཔྤཝཏྟིཀཱལེ ཨུཔེཀྑཱིཡཏཱིཏི ཨུཔེཀྑཱ, ཝཱིརིཡམེཝ ཨུཔེཀྑཱ ཝཱིརིཡུཔེཀྑཱ.

‘‘པཋམཾ ཛྷཱནཾ པཊིལཱབྷཏྠཱཡ ནཱིཝརཎེ…པེ… ནེཝསཉྙཱནཱསཉྙཱཡཏནསམཱཔཏྟིཾ པཊིལཱབྷཏྠཱཡ ཨཱཀིཉྩཉྙཱཡཏནསཉྙཾ པཊིསངྑཱ སནྟིཊྛནཱ པཉྙཱ སངྑཱརུཔེཀྑཱསུ ཉཱཎ’’ནྟི (པཊི. མ. ༡.༥༧) ཨེཝམཱགཏཱ ཨིམཱ ཨཊྛ སམཱདྷིཝསེན ཨུཔྤཛྫནྟི. ‘‘སོཏཱཔཏྟིམགྒཾ པཊིལཱབྷཏྠཱཡ ཨུཔྤཱདཾ པཝཏྟཾ ནིམིཏྟཾ ཨཱཡཱུཧནཾ པཊིསནྡྷིཾ གཏིཾ ནིབྦཏྟིཾ ཨུཔཔཏྟིཾ ཛཱཏིཾ ཛརཾ བྱཱདྷིཾ མརཎཾ སོཀཾ པརིདེཝཾ ཨུཔཱཡཱསཾ. སོཏཱཔཏྟིཕལསམཱཔཏྟཏྠཱཡ ཨུཔྤཱདཾ པཝཏྟཾ…པེ… ཨརཧཏྟམགྒཾ པཊིལཱབྷཏྠཱཡ ཨུཔྤཱདཾ…པེ… ཨུཔཱཡཱསཾ…པེ… ཨརཧཏྟཕལསམཱཔཏྟཏྠཱཡ སུཉྙཏཱཝིཧཱརསམཱཔཏྟཏྠཱཡ ཨནིམིཏྟཝིཧཱརསམཱཔཏྟཏྠཱཡ ཨུཔྤཱདཾ པཝཏྟཾ ནིམིཏྟཾ ཨཱཡཱུཧནཾ པཊིསནྡྷིཾ གཏིཾ ནིབྦཏྟིཾ ཨུཔཔཏྟིཾ ཛཱཏིཾ ཛརཾ བྱཱདྷིཾ མརཎཾ སོཀཾ པརིདེཝཾ ཨུཔཱཡཱསཾ པཊིསངྑཱ སནྟིཊྛནཱ པཉྙཱ སངྑཱརུཔེཀྑཱསུ ཉཱཎ’’ནྟི ཨེཝམཱགཏཱ ཨིམཱ དས ཝིཔསྶནཱཝསེན ཨུཔྤཛྫནྟི. ཨེཏྠ ཙ པཋམཛ྄ཛྷཱནཱདཱིཧི ཝིཀྑམྦྷིཏཱནི ནཱིཝརཎཝིཏཀྐཝིཙཱརཱདཱིནི པཊིསངྑཱཡ སབྷཱཝཏོ ཨུཔཔརིཀྑིཏྭཱ སནྣིཊྛཱནཝསེན ཏིཊྛམཱནཱ ནཱིཝརཎཱདིཔཊིསངྑཱསནྟིཊྛནཱ དིཊྛཱདཱིནཝཏྟཱ ཏེསཾ གཧཎེ ཨུཔྤཱདནེ ཨཛ྄ཛྷུཔེཀྑནྟཱི ཝིཔསྶནཱཔཉྙཱ གཧཎེ མཛ྄ཛྷཏྟབྷཱུཏཱ ཨུཔེཀྑཱ.

ཏཏྠ ¶ ¶ ཨུཔྤཱདནྟི པུརིམཀམྨཔཙྩཡཱ ཁནྡྷཱནཾ ཨིདྷ ཨུཔྤཏྟིམཱཧ. པཝཏྟནྟི ཏཐཱཨུཔྤནྣསྶ པཝཏྟིཾ. ནིམིཏྟནྟི སབྦམྤི ཏེབྷཱུམཀསངྑཱརགཏཾ ནིམིཏྟབྷཱཝེན ཨུཔཊྛཱནཏོ. ཨཱཡཱུཧནནྟི ཨཱཡཏིཾ པཊིསནྡྷིཧེཏུབྷཱུཏཾ ཀམྨཾ. པཊིསནྡྷིནྟི ཨཱཡཏིཾ ཨུཔྤཏྟིཾ. གཏིནྟི ཡཱཡ གཏིཡཱ སཱ པཊིསནྡྷི ཧོཏི. ནིབྦཏྟིནྟི ཁནྡྷཱནཾ ནིབྦཏྟནཾ. ཨུཔཔཏྟིནྟི ‘‘སམཱཔནྣསྶ ཝཱ ཨུཔཔནྣསྶ ཝཱ’’ཏི (པཊི. མ. ༡.༧༢) ཨེཏྠ ‘‘ཨུཔཔནྣསྶཱ’’ཏི ཝུཏྟཝིཔཱཀཔྤཝཏྟིཾ. ཛཱཏིནྟི ཛརཱདཱིནཾ པཙྩཡབྷཱུཏཾ བྷཝཔཙྩཡཱ ཛཱཏིཾ. ཛརཱབྱཱདྷིམརཎཱདཡོ པཱཀཊཱ ཨེཝ. ཨེཏྠ ཙ ཨུཔྤཱདཱདཡོ པཉྩེཝ སངྑཱརུཔེཀྑཱཉཱཎསྶ ཝིསཡཝསེན ཝུཏྟཱ, སེསཱ ཏེསཾ ཝེཝཙནཝསེན. ‘‘ནིབྦཏྟི, ཛཱཏཱི’’ཏི ཨིདཉྷི དྭཡཾ ཨུཔྤཱདསྶ ཙེཝ པཊིསནྡྷིཡཱ ཙ ཝེཝཙནཾ, ‘‘གཏི, ཨུཔཔཏྟི ཙཱ’’ཏི ཨིདཾ དྭཡཾ པཝཏྟསྶ, ཛརཱདཡོ ནིམིཏྟསྶཱཏི ཝེདིཏབྦཾ. ཨཔྤཎིཧིཏཝིམོཀྑཝསེན མགྒུཔྤཏྟིཧེཏུབྷཱུཏཱ ཙཏསྶོ, ཏཐཱ ཕལསམཱཔཏྟིཡཱ ཙཏསྶོ, སུཉྙཏཝིཧཱརཨནིམིཏྟཝིཧཱརཝསེན དྭེཏི དས སངྑཱརུཔེཀྑཱ.

ཡཱཏི ཝིཔསྶནཱཔཉྙཱ. ཡདཏྠཱིཏི ཡཾ ཨནིཙྩཱདིལཀྑཎཏྟཡཾ ཨུཔལབྦྷཏི. ཡཾ བྷཱུཏནྟི ཡཾ པཙྩཡནིབྦཏྟཏྟཱ བྷཱུཏཾ ཁནྡྷཔཉྩཀཾ. ཏཾ པཛཧཏཱིཏི ཨནིཙྩཱནུཔསྶནཱདཱིཧི ནིཙྩསཉྙཱདཡོ པཛཧནྟོ སམྨདེཝ དིཊྛཱདཱིནཝཏྟཱ ཏཔྤཊིབདྡྷཙྪནྡརཱགཔྤཧཱནེན པཛཧཏི, ཡཐཱ ཨཱཡཏིཾ ཨཱདཱནཾ ན ཧོཏི, ཏཐཱ པཊིཔཏྟིཡཱ པཛཧཏི. ཏཐཱབྷཱུཏོ ཙ ཏཏྠ ཨུཔེཀྑཾ པཊིལབྷཏི. ཝིཙིནནེཏི ཨནིཙྩཱདིཝསེན སམྨསནེཔི.

སམྤཡུཏྟདྷམྨཱནཾ སམཔྤཝཏྟིཧེཏུཏཱཡ སམཝཱཧིཏབྷཱུཏཱ. ནཱིཝརཎཝིཏཀྐཝིཙཱརཱདིསབྦཔཙྩནཱིཀེཧི ཝིམུཏྟཏྟཱ སབྦཔཙྩནཱིཀཔརིསུདྡྷཱ. ཏེསཾ ཝཱུཔསནྟཏྟཱ པཙྩནཱིཀཝཱུཔསམནེཔི ཨབྱཱཔཱརབྷཱུཏཱ ཨབྱཱཔཱརབྷཱཝེན པཝཏྟཱ, ཨབྱཱཔཱརཏཾ ཝཱ པཏྟཱ.

ཡདི ཨཏྠཏོ ཨེཀཱ, ཀཐམཡཾ བྷེདོཏི ཨཱཧ ‘‘ཏེན ཏེནཱ’’ཏིཨཱདི. ཏསྨཱཏི ཡསྨཱ སཏིཔི སབྷཱཝཏོ ཨབྷེདེ ཡེཧི པན པཙྩཡཝིསེསེཧི སྭཱཡམིམཱསཾ ཨཝཏྠཱབྷེདོ, ཏེསཾ ཨེཀཛ྄ཛྷཾ ཨཔྤཝཏྟིཏོ ན ཏཱསཾ ཨབྷེདོ, ཨེཀཛ྄ཛྷཾ ཝཱ པཝཏྟི, ཏསྨཱ. ཏེནཱཧ ‘‘ཡཏྠ ཚལ༹ངྒུཔེཀྑཱ’’ཏིཨཱདི.

ཨེཀཱིབྷཱཝོཏི ¶ ཨེཀཏཱ. སཏིཔི མཛ྄ཛྷཏྟཱབྷཱཝསཱམཉྙེ ཝིསཡབྷེདེན པནསྶཱ བྷེདོ. ཡམཏྠཾ ¶ སནྡྷཱཡ ‘‘ཀིཙྩཝསེན དྭིདྷཱ བྷིནྣཱ’’ཏི ཝུཏྟཾ, ཏཾ ཝིཏྠཱརཏོ དསྶེནྟོ ‘‘ཡཐཱ ཧཱི’’ཏིཨཱདིམཱཧ. ཨཡཾ ཝིཔསྶནུཔེཀྑཱ. ཡཾ སནྡྷཱཡ ཝུཏྟཾ པཱལི༹ཡཾ ‘‘ཡདཏྠི ཡཾ བྷཱུཏཾ, ཏཾ པཛཧཏི, ཨུཔེཀྑཾ པཊིལབྷཏཱི’’ཏི (མ. ནི. ༣.༧༡; ཨ. ནི. ༧.༥༥). ཏཏྠ ཡདཏྠི ཡཾ བྷཱུཏནྟི ཁནྡྷཔཉྩཀཾ, ཏཾ མུཉྩིཏུཀམྱཏཱཉཱཎེན པཛཧཏི. དིཊྛསོཝཏྟིཀཏྟཡསྶ སབྦལཀྑཎཝིཙིནནེ ཝིཡ དིཊྛལཀྑཎཏྟཡསྶ བྷཱུཏསྶ སངྑཱརལཀྑཎཝིཙིནནེ ཨུཔེཀྑཾ པཊིལབྷཏི. སངྑཱརཱནཾ ཨནིཙྩཱདིལཀྑཎསྶ སུདིཊྛཏྟཱ ཏེསཾ ཝིཙིནནེ མཛ྄ཛྷཏྟབྷཱུཏཱཡ ཝིཔསྶནུཔེཀྑཱཡ སིདྡྷཱཡ ཏཐཱ དིཊྛཱདཱིནཝཱནཾ ཏེསཾ གཧཎེཔི ཨཛ྄ཛྷུཔེཀྑནཱ སིདྡྷཱཝ ཧོཏི, སབྦསོ ཝིསངྑཱརནིནྣཏྟཱ ཨཛ྄ཛྷཱསཡསྶ.

ཨནཱབྷོགརསཱཏི པཎཱིཏསུཁེཔི ཏསྨིཾ ཨཝནཏིཔཊིཔཀྑཀིཙྩཱཏི ཨཏྠོ. ཨབྱཱཔཱརཔཙྩུཔཊྛཱནཱཏི སཏིཔི སུཁཔཱརམིཔྤཏྟིཡཾ ཏསྨིཾ སུཁེ ཨབྱཱཝཊཱ ཧུཏྭཱ པཙྩུཔཏིཊྛཏི, སམྤཡུཏྟཱནཾ ཝཱ ཏཏྠ ཨབྱཱཔཱརཾ པཙྩུཔཊྛཔེཏཱིཏི ཨཏྠོ. སམྤཡུཏྟདྷམྨཱནཾ ཁོབྷཾ, ཨུཔྤིལཝཉྩ ཨཱཝཧནྟེཧི ཝིཏཀྐཱདཱིཧི ཨབྷིབྷཱུཏཏྟཱ ཨཔརིབྱཏྟཾ. ཏཏྠ ཏཏྲམཛ྄ཛྷཏྟཏཱཡ ཀིཙྩཾ. ཏདབྷཱཝཏོ ཨིདྷ པརིབྱཏྟཾ.

ནིཊྛིཏཱ ‘‘ཨུཔེཀྑཀོ ཙ ཝིཧརཏཱི’’ཏི ཨེཏསྶ

སབྦསོ ཨཏྠཝཎྞནཱ.

༨༥. ‘‘སརཏཱིཏི སཏོ’’ཏི པདསྶ ཀཏྟུསཱདྷནཏམཱཧ. སམྤཛཱནཱཏཱིཏི སམྨདེཝ པཛཱནཱཏི. སརཎཾ ཙིནྟནཾ ཨུཔཊྛཱནཾ ལཀྑཎམེཏིསྶཱཏི སརཎལཀྑཎཱ. སམྨུསྶནཔཊིཔཀྑོ ཨསམྨུསྶནཾ, ཏཾ ཀིཙྩཾ ཨེཏིསྶཱཏི ཨསམྨུསྶནརསཱ. ཀིལེསེཧི ཨཱརཀྑཱ ཧུཏྭཱ པཙྩུཔཏིཊྛཏི, ཏཏོ ཝཱ ཨཱརཀྑཾ པཙྩུཔཊྛཔེཏཱིཏི ཨཱརཀྑཔཙྩུཔཊྛཱནཱ. ཨསམྨུཡ྄ཧནཾ སམྨདེཝ པཛཱནནཾ, སམྨོཧཔཊིཔཀྑོ ཝཱ ཨསམྨོཧོ. ཏཱིརཎཾ ཀིཙྩསྶ པཱརགམནཾ. པཝིཙཡོ ཝཱིམཾསཱ.

ཀཱམཾ ཨུཔཙཱརཛ྄ཛྷཱནཱདཱིནི ཨུཔཱདཱཡ པཋམདུཏིཡཛ྄ཛྷཱནཱནིཔི སུཁུམཱནེཝ, ཨིམཾ པན ཨུཔརིཛྷཱནཾ ཨུཔཱདཱཡ ‘‘ཨོལཱ༹རིཀཏྟཱ’’ཏི ཝུཏྟཾ. སཱ ཙ ཨོལཱ༹རིཀཏཱ ཝིཏཀྐཱདིཐཱུལངྒཏཱཡ ཝེདིཏབྦཱ. ཀེཙི ‘‘བཧུཙེཏསིཀཏཱཡཱ’’ཏི ཙ ཝདནྟི ¶ . གཏི སུཁཱ ཧོཏི ཏཏྠ ཛྷཱནེསཱུཏི ཨདྷིཔྤཱཡོ. ཨབྱཏྟཾ ཏཏྠ སཏིསམྤཛཉྙཀིཙྩཾ ‘‘ཨིདཾ ནཱམ དུཀྐརཾ ཀརཱིཡཏཱི’’ཏི ཝཏྟབྦསྶ ཨབྷཱཝཏོ. ཨོལཱ༹རིཀངྒཔྤཧཱནེན སུཁུམཏྟཱཏི ཨཡམཏྠོ ཀཱམཾ དུཏིཡཛ྄ཛྷཱནེཔི སམྦྷཝཏི, ཏཐཱཔི ཡེབྷུཡྻེན ¶ ཨཝིཔྤཡོགཱིབྷཱཝེན ཝཏྟམཱནེསུ པཱིཏིསུཁེསུ པཱིཏིསངྑཱཏསྶ ཨོལཱ༹རིཀངྒསྶ པཧཱནེན སུཁུམཏཱཡ ཨིདྷ སཱཏིསཡོ སཏིསམྤཛཉྙབྱཱཔཱརོཏི ཝུཏྟཾ ‘‘པུརིསསྶཱ’’ཏིཨཱདི. པུནདེཝ པཱིཏིཾ ཨུཔགཙྪེཡྻཱཏི ཧཱནབྷཱགིཡཾ ཛྷཱནཾ སིཡཱ དུཏིཡཛ྄ཛྷཱནམེཝ སམྤཛྫེཡྻཱཏི ཨཏྠོ. ཏེནཱཧ ‘‘པཱིཏིསམྤཡུཏྟམེཝ སིཡཱ’’ཏི. ‘‘ཨིདཉྩ ཨཏིམདྷུརཾ སུཁ’’ནྟི ཏཏིཡཛ྄ཛྷཱནསུཁཾ སནྡྷཱཡཱཧ. ཨཏིམདྷུརཏཱ ཙསྶ པཧཱསོདགྱསབྷཱཝཱཡ པཱིཏིཡཱ ཨབྷཱཝེནེཝ ཝེདིཏབྦཱ. ཨིདནྟི ‘‘སཏོ, སམྤཛཱནོ’’ཏི པདདྭཡཾ.

ཏསྨཱ ཨེཏམཏྠཾ དསྶེནྟོཏི ཡསྨཱ ཏསྶ ཛྷཱནསམངྒིནོ ཡཾ ནཱམཀཱཡེན སམྤཡུཏྟཾ སུཁཾ, ཏཾ སོ པཊིསཾཝེདེཡྻ. ཡཾ ཝཱ ཏནྟི ཨཐ ཝཱ ཡཾ ཏཾ ཡཐཱཝུཏྟཾ ནཱམཀཱཡསམྤཡུཏྟཾ སུཁཾ. ཏཾསམུཊྛཱནེན ཏཏོ སམུཊྛིཏེན ཨཏིཔཎཱིཏེན རཱུཔེན ཨསྶ ཛྷཱནསམངྒིནོ རཱུཔཀཱཡོ ཡསྨཱ ཕུཊོ. ཡསྶ རཱུཔཀཱཡསྶ ཕུཊཏྟཱ ཛྷཱནཱ ཝུཊྛིཏོཔི ཛྷཱནསམངྒཱི ཀཱཡིཀཾ སུཁཾ པཊིསཾཝེདེཡྻ. ཏསྨཱ ཨེཏཾ ཙེཏསིཀཀཱཡིཀསུཁཔཊིསཾཝེདནསངྑཱཏཾ ཨཏྠཾ དསྶེནྟོ ‘‘སུཁཉྩ ཀཱཡེན པཊིསཾཝེདེཏཱིཏི ཨཱཧཱ’’ཏི ཡོཛནཱ. ཨཡཉྷེཏྠ སངྑེཔཏྠོ – ནཱམཀཱཡེན ཙེཏསིཀསུཁཾ, ཀཱཡིཀསུཁཧེཏུརཱུཔསམུཊྛཱཔནེན ཀཱཡིཀསུཁཉྩ ཛྷཱནསམངྒཱི པཊིསཾཝེདེཏཱིཏི ཝུཙྩཏི. ཕུཊཏྟཱཏི བྱཱཔིཏཏྟཱཏི ཨཏྠོ. ཡཐཱ ཧི ཨུདཀེན ཕུཊསརཱིརསྶ ཏཱདིསེ ནཱཏིཔཙྩནཱིཀེ ཝཱཏཱདིཕོཊྛབྦེ ཕུཊེ སུཁཾ ཨུཔྤཛྫཏི, ཨེཝམེཏེཧི ཕུཊསརཱིརསྶཱཏི. ཨཔརོ ནཡོ – སུཁཉྩ ཀཱཡེན པཊིསཾཝེདེཏཱིཏི ཨེཏྠ ཀཐམཱབྷོགེན ཝིནཱ སུཁཔཊིསཾཝེདནཱཏི ཙོདནཱཡཾ ‘‘ཀིཉྩཱཔི…པེ… ཨེཝཾ སནྟེཔཱི’’ཏི. ཡསྨཱ ཏསྶ ནཱམཀཱཡེན སམྤཡུཏྟཾ སུཁཾ, ཏསྨཱ སུཁཉྩ ཀཱཡེན པཊིསཾཝེདེཏཱིཏི ཡོཛནཱ. ཨིདཱནི སཧཱཔི ཨཱབྷོགེན སུཁཔཊིསཾཝེདནཾ དསྶེཏུཾ ‘‘ཡཾ ཝཱ ཏ’’ནྟིཨཱདི ཝུཏྟཾ.

༨༦. ཡནྟི ཧེཏུཨཏྠེ ནིཔཱཏོ, ཡསྨཱཏི ཨཏྠོ. ཏེནཱཧ ‘‘ཡཾཛྷཱནཧེཏཱུ’’ཏི. ‘‘ཨཱཙིཀྑནྟཱི’’ཏིཨཱདཱིནི པདཱནི ཀིཏྟནཏྠཱནཱིཏི ཨདྷིཔྤཱཡེནཱཧ ‘‘པསཾསནྟཱིཏི ཨདྷིཔྤཱཡོ’’ཏི. ཀིནྟཱིཏི པསཾསནཱཀཱརཔུཙྪཱ. ཨེདིསེསུ ¶ ཋཱནེསུ སཏིགྒཧཎེནེཝ སམྤཛཉྙམྤི གཧིཏཾ ཧོཏཱིཏི ཨིདྷ པཱལི༹ཡཾ སཏིཡཱ ཨེཝ གཧིཏཏྟཱ ཨེཝཾ ཨུཔཊྛིཏསཏིཏཱཡ ‘‘སཏིམཱ’’ ཨིཙྩེཝ ཝུཏྟཾ, ‘‘སམྤཛཱནོ’’ཏི ཧེཊྛཱ ཝུཏྟཏྟཱ ཝཱ.

ཛྷཱནཀྑཎེ ཙེཏསིཀསུཁམེཝ ལབྦྷཏཱིཏི ‘‘སུཁཾ ནཱམཀཱཡེན པཊིསཾཝེདེཏཱི’’ཏི ཙ ཝུཏྟཾ. ཏཏིཡནྟི ¶ གཎནཱནུཔུབྦཏཱཏི ཨིཏོ པཊྛཱཡ དུཏིཡཏཏིཡཛ྄ཛྷཱནཀཐཱཧི ཨཝིསེསོ, ཝིསེསོ ཙ ཝུཏྟོཏི.

ཙཏུཏྠཛ྄ཛྷཱནཀཐཱཝཎྞནཱ

༨༧. ཨིདཱནི ནིབྦཏྟིཏཝིསེསཾ དསྶེནྟོ ‘‘ཨཡཾ པན ཝིསེསོ’’ཏི ཝཏྭཱ ‘‘ཡསྨཱ’’ཏིཨཱདིམཱཧ. ཨཱསེཝནཔཙྩཡེན པཙྩཡོ ན ཧོཏི, ཨནིཊྛེ ཋཱནེ པདནྟརསངྒཧིཏསྶ ཨཱསེཝནཔཙྩཡཏྟཱབྷཱཝཏོ. ཨདུཀྑམསུཁཱཡ ཝེདནཱཡ ཨུཔྤཛྫིཏབྦཾ སཱཏིསཡཾ སུཁཝིརཱགབྷཱཝནཱབྷཱཝཏོ. ཏཱནཱིཏི ཨཔྤནཱཝཱིཐིཡཾ ཛཝནཱནི སནྡྷཱཡཱཧ.

༨༨. ‘‘པུབྦེཝཱ’’ཏི ཝུཏྟཏྟཱ ཀདཱ པན ཏེསཾ པཧཱནཾ ཧོཏཱིཏི ཙོདནཱཡཾ ཨཱཧ ‘‘ཙཏུནྣཾ ཛྷཱནཱནཾ ཨུཔཙཱརཀྑཎེ’’ཏི. ཨེཝཾ ཝེདིཏབྦནྟི སམྦནྡྷོ. པཧཱནཀྐམོ ནཱམ པཧཱཡཀདྷམྨཱནཾ ཨུཔྤཏྟིཔཊིཔཱཊི. ཏེན པན ཝུཙྩམཱནེ ‘‘དུཀྑཾ དོམནསྶཾ སུཁཾ སོམནསྶ’’ནྟི ཝཏྟབྦཾ སིཡཱ. ཀསྨཱ ཨིཏོ ཨཉྙཐཱ ཝཙནནྟི ཨཱཧ ‘‘ཨིནྡྲིཡཝིབྷངྒེ’’ཏིཨཱདི. ཨཐ ཀསྨཱ ཛྷཱནེསྭེཝ ནིརོདྷོ ཝུཏྟོཏི སམྦནྡྷོ.

ཀཏྠ ཙུཔྤནྣཾ དུཀྑིནྡྲིཡནྟི ཨཏྟནོ པཙྩཡེཧི ཨུཔྤནྣཾ དུཀྑིནྡྲིཡཾ. ཀཏྠ ཙ ཨཔརིསེསཾ ནིརུཛ྄ཛྷཏཱིཏི ནིརོདྷཊྛཱནཾ པུཙྪཏི. ཏེན ‘‘ཀཏྠཱ’’ཏི པུཙྪཱཡཾ, ‘‘ཨེཏྠཱ’’ཏི ཝིསྶཛྫནེཔི ཧེཏུམྷི བྷུམྨཝཙནཾ དཊྛབྦཾ. ཛྷཱནཱནུབྷཱཝནིམིཏྟཾ ཧི ཨནུཔྤཛྫནྟཾ ‘‘དུཀྑིནྡྲིཡཾ ཨཔརིསེསཾ ནིརུཛ྄ཛྷཏཱི’’ཏི ཝུཏྟཾ. ཨཏིསཡནིརོདྷོ སུཊྛུ པཧཱནཾ ཨུཛུཔཊིཔཀྑེན ཝཱུཔསམོ.

ནཱནཱཝཛྫནེཏི ཡེན ཨཱཝཛྫནེན ཨཔྤནཱཝཱིཐི, ཏཏོ བྷིནྣཱཝཛྫནེ, ཨནེཀཱཝཛྫནེ ཝཱ. ཨཔྤནཱཝཱིཐིཡཉྷི ཨུཔཙཱརོ ཨེཀཱཝཛྫནོ, ཨིཏརོ ཨནེཀཱཝཛྫནོ ཨནེཀཀྑཏྟུཾ པཝཏྟནཏོ. ཝིསམནིསཛྫཱཡ ཨུཔྤནྣཀིལམཐོ ཝིསམཱསནུཔཏཱཔོ. པཱིཏིཕརཎེནཱཏི པཱིཏིཡཱ ཕརཎརསཏྟཱ, པཱིཏིསམུཊྛཱནཱནཾ ཝཱ པཎཱིཏརཱུཔཱནཾ ཀཱཡསྶ བྱཱཔནཏོ ཝུཏྟཾ. ཏེནཱཧ ‘‘སབྦོ ཀཱཡོ སུཁོཀྐནྟོ ཧོཏཱི’’ཏི. ཝིཏཀྐཝིཙཱརཔཙྩཡེཔཱིཏི པི-སདྡོ ¶ ཨཊྛཱནཔྤཡུཏྟོ, སོ ‘‘པཧཱིནསྶཱ’’ཏི ཨེཏྠ ཨཱནེཏྭཱ སམྦནྡྷིཏབྦོ ‘‘པཧཱིནསྶཱཔི དོམནསྶིནྡྲིཡསྶཱ’’ཏི. ཨེཏཾ དོམནསྶིནྡྲིཡཾ ཨུཔྤཛྫཏཱིཏི སམྦནྡྷོ. ‘‘ཏསྶ མཡ྄ཧཾ ཨཏིཙིརཾ ཝིཏཀྐཡཏོ ཝིཙཱརཡཏོ ཀཱཡོཔི ཀིལམིཙིཏྟམྤི ཨུཧཉྙཱི’’ཏི ཝཙནཏོ ཀཱཡཙིཏྟཁེདཱནཾ ཝིཏཀྐཝིཙཱརཔྤཙྩཡཏཱ ཝེདིཏབྦཱ ¶ . ‘‘ཝིཏཀྐཝིཙཱརབྷཱཝེ ཨུཔྤཛྫཏི དོམནསྶིནྡྲིཡ’’ནྟི ཨཱནེཏྭཱ སམྦནྡྷིཏབྦཾ. ཏཏྠསྶ སིཡཱ ཨུཔྤཏྟཱིཏི ཏཏྠ དུཏིཡཛ྄ཛྷཱནཱུཔཙཱརེ ཨསྶ དོམནསྶསྶ ཨུཔྤཏྟི བྷཝེཡྻ.

ཨེཏྠ ཙ ཡདེཀེ ‘‘ཏཏྠསྶ སིཡཱ ཨུཔྤཏྟཱི’’ཏི ཝདནྟེན ཛྷཱནལཱབྷཱིནམྤི དོམནུསྶུཔྤཏྟི ཨཏྠཱིཏི དསྶིཏཾ ཧོཏི. ཏེན ཙ ཨནཱིཝརཎསབྷཱཝོ ལོབྷོ ཝིཡ དོསོཔི ཨཏྠཱིཏི དཱིཔེཏི. ན ཧི དོསེན ཝིནཱ དོམནསྶཾ པཝཏྟཏི. ན ཙེཏྠ པཊྛཱནཔཱལི༹ཡཱ ཝིརོདྷོ ཙིནྟེཏབྦོ. ཡསྨཱ ཏཏྠ པརིཧཱིནཾ ཛྷཱནཾ ཨཱརམྨཎཾ ཀཏྭཱ པཝཏྟམཱནཾ དོམནསྶཾ དསྶིཏཾ, ཨཔརིཧཱིནཛ྄ཛྷཱནམཱརམྨཎཾ ཀཏྭཱ ཨུཔྤཛྫམཱནསྶ དོམནསྶསྶ ཨསམྦྷཝཏོ. ཛྷཱནལཱབྷཱིནཾ སབྦསོ དོམནསྶཾ ནུཔྤཛྫཏཱིཏི ཙ ན སཀྐཱ ཝཏྟུཾ, ཨཊྛསམཱཔཏྟིལཱབྷིནོ ཨཔི ཏསྶ ཨུཔྤནྣཏྟཱ. ན ཧེཝ ཁོ སོ པཧཱིནཛ྄ཛྷཱནོ ཨཧོསཱིཏི ཝདནྟི, ཏཾ ཨཡུཏྟཾ ཨནཱིཝརཎསབྷཱཝསྶ དོསསྶ ཨབྷཱཝཏོ. ཡདི སིཡཱ, རཱུཔཱརཱུཔཱཝཙརསཏྟཱནམྤི ཨུཔྤཛྫེཡྻ, ན ཙ ཨུཔྤཛྫཏི. ཏཐཱ ཧི ‘‘ཨརཱུཔེ ཀཱམཙྪནྡནཱིཝརཎཾ པཊིཙྩ ཐིནམིདྡྷནཱིཝརཎཾ ཨུདྡྷཙྩནཱིཝརཎཾ ཨཝིཛྫཱནཱིཝརཎ’’ནྟིཨཱདཱིསུ བྱཱཔཱདཀུཀྐུཙྩནཱིཝརཎཱནི ཨནུདྡྷཊཱནི. ན ཙེཏྠ ནཱིཝརཎཏྟཱ པརིཧཱརོ, ཀཱམཙྪནྡཱདཱིནམྤི ཨནཱིཝརཎཱནཾཡེཝ ནཱིཝརཎསདིསཏཱཡ ནཱིཝརཎཔརིཡཱཡསྶ ཝུཏྟཏྟཱ. ཡཾ པན ཝུཏྟཾ ‘‘ཨཊྛསམཱཔཏྟིལཱབྷིནོ ཨཔི ཏསྶ ཨུཔྤནྣཏྟཱ’’ཏི, ཏམྤི ཨཀཱརཎཾ ཨུཔྤཛྫམཱནེན ཙ དོམནསྶེན ཛྷཱནཏོ པརིཧཱཡནཏོ. ལཧུཀེན པན པཙྩཡེན པརིཧཱིནཾ ཏཱདིསཱ ཨཔྤཀསིརེནེཝ པཊིཔཱཀཏིཀཾ ཀརོནྟཱིཏི དཊྛབྦཾ. ‘‘ཏཏྠསྶ སིཡཱ ཨུཔྤཏྟཱི’’ཏི ཨིདཾ པན པརིཀཔྤཝཙནཾ ཨུཔཙཱརཀྑཎེ དོམནསྶསྶ ཨཔྤཧཱིནབྷཱཝདསྶནཏྠཾ. ཏཐཱ ཧི ཝུཏྟཾ ‘‘ན ཏྭེཝ ཨནྟོཨཔྤནཱཡ’’ནྟི. ཡདི པན ཏདཱ དོམནསྶཾ ཨུཔྤཛྫེཡྻ, པཋམཛ྄ཛྷཱནམྤིསྶ པརིཧཱིནམེཝཱཏི དཊྛབྦཾ. པཧཱིནམྤི སོམནསྶིནྡྲིཡཾ པཱིཏི ཝིཡ ན དཱུརེཏི ཀཏྭཱ ¶ ‘‘ཨཱསནྣཏྟཱ’’ཏི ཝུཏྟཾ. ནཱནཱཝཛྫནཱུཔཙཱརེ པཧཱིནམྤི པཧཱནངྒཾ པཊིཔཀྑེན ཨཝིཧཏཏྟཱ ཨནྟརནྟརཱ ཨུཔྤཛྫེཡྻ ཝཱཏི ཨིམམཏྠཾ དསྶེནྟོ ‘‘ཨཔྤནཱཔྤཏྟཱཡཱ’’ཏིཨཱདིམཱཧ. ཏཱདིསཱཡ ཨཱསེཝནཱཡ ཨིཙྪིཏབྦཏྟཱ ཡཐཱ མགྒཝཱིཐིཏོ པུབྦེ དྭེ ཏཡོ ཛཝནཝཱརཱ སདིསཱནུཔསྶནཱཝ པཝཏྟནྟི, ཨེཝམིདྷཱཔི ཨཔྤནཱཝཱརཏོ པུབྦེ དྭེ ཏཡོ ཛཝནཝཱརཱ ཨུཔེཀྑཱསཧགཏཱཝ པཝཏྟནྟཱིཏི ཝདནྟི.

སམཱཧཊཱཏི སམཱནཱིཏཱ, སངྒཧེཏྭཱ ཝུཏྟཱཏི ཨཏྠོ. སུཁདུཀྑཱནི ཝིཡ ཨནོལཱ༹རིཀཏྟཱ ཨཝིབྷཱུཏཏཱཡ སུཁུམཱ. ཏཏོ ཨེཝ ཨནུམིནིཏབྦསབྷཱཝཏྟཱ དུཝིཉྙེཡྻཱ. དུཊྛསྶཱཏི དུཊྛཔཡོགསྶ, དུདྡམྨསྶཱཏི ཨཏྠོ. སཀྐཱ ཧོཏི ཨེསཱ གཱཧཡིཏུཾ ཨཉྙཱཔོཧནནཡེནཱཏི ཨདྷིཔྤཱཡོ.

ཨདུཀྑམསུཁཱཡ ¶ ཙེཏོཝིམུཏྟིཡཱཏི ཨིདམེཝ ཙཏུཏྠཛ྄ཛྷཱནཾ དཊྛབྦཾ. པཙྩཡདསྶནཏྠནྟི ཨདྷིགམསྶ ཨུཔཱཡབྷཱུཏཔཙྩཡདསྶནཏྠཾ. ཏེནཱཧ ‘‘དུཀྑཔྤཧཱནཱདཡོ ཧི ཏསྶཱ པཙྩཡཱ’’ཏི. དུཀྑཔྤཧཱནཱདཡོཏི ཙ སོཔཙཱརཱ པཋམཛ྄ཛྷཱནཱདཡོཝེཏྠ ཨདྷིཔྤེཏཱ.

པཧཱིནཱཏི ཝུཏྟཱ ‘‘པཉྩནྣཾ ཨོརམྦྷཱགིཡཱནཾ སཾཡོཛནཱནཾ པརིཀྑཡཱ’’ཏི. ཨེཏཱཏི སུཁཱདཡོ ཝེདནཱ.

སོམནསྶཾ རཱགསྶ པཙྩཡོ. ཝུཏྟཉྷི ‘‘སུཁཱཡ ཁོ, ཨཱཝུསོ ཝིསཱཁ, ཝེདནཱཡ རཱགཱནུསཡོ ཨནུསེཏཱི’’ཏི (མ. ནི. ༡.༤༦༥). དོམནསྶཾ དོསསྶ པཙྩཡོ. ཝུཏྟམྤི ཙེཏཾ ‘‘དུཀྑཱཡ ཁོ, ཨཱཝུསོ ཝིསཱཁ, ཝེདནཱཡ པཊིགྷཱནུསཡོ ཨནུསེཏཱི’’ཏི. སུཁཱདིགྷཱཏེནཱཏི སུཁཱདཱིནཾ པཧཱནེན. ཨསྶ ཛྷཱནསྶ.

ན དུཀྑནྟི ཨདུཀྑཾ, དུཀྑཝིདྷུརཾ. ཡསྨཱ ཏཏྠ དུཀྑཾ ནཏྠི, ཏསྨཱ ཝུཏྟཾ ‘‘དུཀྑཱབྷཱཝེནཱ’’ཏི. ཨསུཁནྟི ཨེཏྠཔི ཨེསེཝ ནཡོ. ཨེཏེནཱཏི དུཀྑསུཁཔཊིཀྑེཔཝཙནེན. ‘‘པཊིཔཀྑབྷཱུཏ’’ནྟི ཨིདཾ ཨིདྷ ཏཏིཡཝེདནཱཡ དུཀྑཱདཱིནཾ སམཏིཀྐམཝསེན པཏྟབྦཏྟཱ ཝུཏྟཾ, ན ཀུསལཱཀུསལཱནཾ ཝིཡ ཨུཛུཝིཔཙྩནཱིཀཏཱཡ. ཨིཊྛཱནིཊྛཝིཔརཱིཏསྶ མཛ྄ཛྷཏྟཱརམྨཎསྶ, ཨིཊྛཱནིཊྛཝིཔརཱིཏཾ ཝཱ མཛ྄ཛྷཏྟཱཀཱརེན ཨནུབྷཝནལཀྑཎཱ ཨིཊྛཱནིཊྛཝིཔརཱིཏཱནུབྷཝནལཀྑཎཱ. ཏཏོ ཨེཝ མཛ྄ཛྷཏྟརསཱ. ཨཝིབྷཱུཏཔཙྩུཔཊྛཱནཱཏི སུཁདུཀྑཱནི ཝིཡ ན ཝིབྷཱུཏཱཀཱརཱ ¶ , པིཊྛིཔཱསཱཎེ མིགགཏམགྒོ ཝིཡ ཏེཧི ཨནུམཱཏབྦཱ ཨཝིབྷཱུཏཱཀཱརོཔཊྛཱནཱ. སུཁནིརོདྷོ ནཱམ ཨིདྷ ཙཏུཏྠཛ྄ཛྷཱནཱུཔཙཱརོ, སོ པདཊྛཱནཾ ཨེཏིསྶཱཏི སུཁནིརོདྷཔདཊྛཱནཱ.

༨༩. ‘‘ཨུཔེཀྑཱསཏིཔཱརིསུདྡྷི’’ནྟི པུརིམཔདེ ཨུཏྟརཔདལོཔེནེཏཾ སམཱསཔདནྟི ཨཱཧ ‘‘ཨུཔེཀྑཱཡ ཛནིཏསཏིཔཱརིསུདྡྷི’’ནྟི. སབྦཔཙྩནཱིཀདྷམྨཔརིསུདྡྷཱཡ པཙྩནཱིཀསམནེཔི ཨབྱཱཝཊཱཡ པཱརིསུདྡྷིཨུཔེཀྑཱཡ ཝཏྟམཱནཱཡ ཙཏུཏྠཛ྄ཛྷཱནེ སཏི སམྤཧཾསནཔཉྙཱ ཝིཡ སུཔརིསུདྡྷཱ, སུཝིསདཱ ཙ ཧོཏཱིཏི ཨཱཧ ‘‘ཡཱ ཙ ཏསྶཱ སཏིཡཱ པཱརིསུདྡྷི, སཱ ཨུཔེཀྑཱཡ ཀཏཱ, ན ཨཉྙེནཱ’’ཏི. ཡདི ཏཏྲམཛ྄ཛྷཏྟཏཱ ཨིདྷ ‘‘ཨུཔེཀྑཱ’’ཏི ཨདྷིཔྤེཏཱ, ཀཐཾ སཏིཡེཝ ‘‘པརིསུདྡྷཱ’’ཏི ཝུཏྟཱཏི ཨཱཧ ‘‘ན ཀེཝལ’’ནྟིཨཱདི.

ཨེཝམྤི ¶ ཀསྨཱ ཨཡམེཝ སཏི ‘‘ཨུཔེཀྑཱསཏིཔཱརིསུདྡྷཱི’’ཏི ཝུཏྟཱཏི ཨནུཡོགཾ སནྡྷཱཡ ‘‘ཏཏྠ ཀིཉྩཱཔཱི’’ཏིཨཱདི ཝུཏྟཾ. ཏཏྠ ཧེཊྛཱ ཏཱིསུ ཛྷཱནེསུ ཝིཛྫམཱནཱཡཔི ཏཏྲམཛ྄ཛྷཏྟཏཱཡ པཙྩནཱིཀཱབྷིབྷཝཏོ, སཧཱཡཔཙྩཡཝེཀལླཏོ ཙ ཨཔཱརིསུདྡྷི, ཏཐཱ ཏཾསམྤཡུཏྟཱནཾ. ཏདབྷཱཝཏོ ཨིདྷ པཱརིསུདྡྷཱིཏི ཨིམམཏྠཾ རཱུཔཀཝསེན དསྶེཏུཾ ‘‘ཡཐཱ པནཱ’’ཏིཨཱདི ཝུཏྟཾ. སཱུརིཡཔྤབྷཱབྷིབྷཝཱཏི སཱུརིཡཔྤབྷཱཡ ཨབྷིབྷུཡྻམཱནཏྟཱ. ཨཏིཀྑཏཱཡ ཙནྡལེཁཱ ཝིཡ རཏྟིཔི སོམྨསབྷཱཝཱ སབྷཱགཱཡ རཏྟིཡམེཝ ཙ ཙནྡལེཁཱ སམུཛྫལཏཱིཏི སཱ ཏསྶཱ སབྷཱགཱཏི དསྶེནྟོ ‘‘སོམྨབྷཱཝེན ཙ ཨཏྟནོ ཨུཔཀཱརཀཏྟེན ཝཱ སབྷཱགཱཡ རཏྟིཡཱ’’ཏི ཨཱཧ.

‘‘ཨེཀཝཱིཐིཡ’’ནྟི ཨིདཾ ཏཏྠ སོམནསྶསྶ ཨེཀཾསེན ཨབྷཱཝཏོ ཝུཏྟཾ, ན ཏཏོ པུརིམཏརེསུ ཨེཀཾསེན བྷཱཝཏོ. ཡཐཱ པན ཝིཏཀྐཱདཡོ དུཏིཡཱདིཛ྄ཛྷཱནཀྑཎེཡེཝ པཧཱིཡནྟི, ན ཏེསཾ ཨེཀཝཱིཐིཡཾ པུརིམཛཝནེསུ, ན ཨེཝམེཏནྟི དསྶེཏུཾ ཝུཏྟཾ. ཙཏུཀྐཛ྄ཛྷཱནེཏི ཙཏུཀྐནཡཝསེན ནིབྦཏྟིཏཛ྄ཛྷཱནཙཏུཀྐེ.

པཉྩཀཛ྄ཛྷཱནཀཐཱཝཎྞནཱ

༩༠. ཏཏྠཱཏི པཋམཛ྄ཛྷཱནེ. ཙཏུཀྐནཡསྶ དུཏིཡཛ྄ཛྷཱནེ ཝིཡཱཏི ཙཏུཀྐནཡསམྦནྡྷིནི དུཏིཡཛ྄ཛྷཱནེ ཝིཡ. ཏཾ དྭིདྷཱ བྷིནྡིཏྭཱཏི ཙཏུཀྐནཡེ དུཏིཡཾ ¶ ‘‘ཨཝིཏཀྐཾ ཝིཙཱརམཏྟཾ, ཨཝིཏཀྐཾ ཨཝིཙཱར’’ནྟི ཙ ཨེཝཾ དྭིདྷཱ བྷིནྡིཏྭཱ པཉྩཀནཡེ དུཏིཡཉྩེཝ ཏཏིཡཉྩ ཧོཏི ཨབྷིདྷམྨེཏི (དྷ. ས. ༡༦༨) ཨདྷིཔྤཱཡོ. སུཏྟནྟེསུ པན སརཱུཔཏོ པཉྩཀནཡོ ན གཧིཏོ.

ཀསྨཱ པནེཏྠ ནཡདྭཡཝིབྷཱགོ གཧིཏོཏི? ཨབྷིདྷམྨེ ནཡདྭཡཝསེན ཛྷཱནཱནཾ དེསིཏཏྟཱ. ཀསྨཱ ཙ ཏཏྠ ཏཐཱ ཏཱནི དེསིཏཱནི? པུགྒལཛ྄ཛྷཱསཡཏོ, དེསནཱཝིལཱསཏོ ཙ. སནྣིཔཏིཏདེཝཔརིསཱཡ ཀིར ཡེསཾ ཡཐཱདེསིཏེ པཋམཛ྄ཛྷཱནེ ཝིཏཀྐོ ཨེཝ ཨོལཱ༹རིཀཏོ ཨུཔཊྛཱསི, ཨིཏརེ སནྟཏོ. ཏེསཾ ཨཛ྄ཛྷཱསཡཝསེན ཙ ཙཏུརངྒིཀཾ ཨཝིཏཀྐཾ ཝིཙཱརམཏྟཾ ཛྷཱནཾ དེསིཏཾ. ཡེསཾ ཝིཙཱརོ, ཡེསཾ པཱིཏི, ཡེསཾ སུཁཾ ཨོལཱ༹རིཀཏོ ཨུཔཊྛཱསི, ཨིཏརེ སནྟཏོ. ཏེསཾ ཏེསཾ ཨཛ྄ཛྷཱསཡཝསེན ཏཏིཡཱདཱིནི ཛྷཱནཱནི དེསིཏཱནི. ཨཡཾ ཏཱཝ པུགྒལཛ྄ཛྷཱསཡོ.

ཡསྶཱ པན དྷམྨདྷཱཏུཡཱ སུཔྤཊིཝིདྡྷཏྟཱ བྷགཝཱ ཡསྨཱ དེསནཱཝིལཱསཔྤཏྟོ, ཏསྨཱ ཉཱཎམཧནྟཏཱཡ ¶ དེསནཱཡ སུཀུསལོ ཡཾ ཡཾ ཨངྒཾ ལབྦྷཏི, ཏསྶ ཏསྶ ཝསེན ཡཐཱརུཙིཾ དེསནཾ ནིཡཱམེནྟོ ཙཏུཀྐནཡཝསེན, པཉྩཀནཡཝསེན ཙ. ཏཏྠ ཙ པཉྩངྒིཀཾ པཋམཾ, ཙཏུརངྒིཀཾ དུཏིཡཾ, ཏིཝངྒིཀཾ ཏཏིཡཾ, དུཝངྒིཀཾ ཙཏུཏྠཾ, དུཝངྒིཀམེཝ པཉྩམཾ ཛྷཱནཾ དེསེསཱིཏི ཨཡཾ དེསནཱཝིལཱསོ. ཨེཏྠ ཙ པཉྩཀནཡེ དུཏིཡཛ྄ཛྷཱནཾ ཙཏུཀྐནཡེ དུཏིཡཛ྄ཛྷཱནཔཀྑིཀཾ ཀཏྭཱ ཝིབྷཏྟཾ ‘‘ཡསྨིཾ སམཡེ རཱུཔཱུཔཔཏྟིཡཱ མགྒཾ བྷཱཝེཏི ཨཝིཏཀྐཾ ཝིཙཱརམཏྟཾ སམཱདྷིཛཾ པཱིཏིསུཁཾ དུཏིཡཾ ཛྷཱནཾ ཨུཔསམྤཛྫ ཝིཧརཏཱི’’ཏི (དྷ. ས. ༡༦༨). ཀསྨཱ? ཨེཀཏྟཀཱཡནཱནཏྟསཉྙཱིསཏྟཱཝཱསཕལཏཱཡ དུཏིཡཛ྄ཛྷཱནེན སམཱནཕལཏྟཱ, པཋམཛ྄ཛྷཱནསམཱདྷིཏོ ཛཱཏཏྟཱ ཙ. པཋམཛ྄ཛྷཱནམེཝ ཧི ‘‘ཀཱམེཧི ཨཀུསལེཧི ཙ ཝིཝིཏྟ’’ནྟི ཏདབྷཱཝཱ ན ཨིདྷ ‘‘ཝིཝིཙྩེཝ ཀཱམེཧི ཝིཝིཙྩ ཨཀུསལེཧཱི’’ཏི སཀྐཱ ཝཏྟུཾ, ནཱཔི ‘‘ཝིཝེཀཛ’’ནྟི. སུཏྟནྟདེསནཱསུ ཙ པཉྩཀནཡེ དུཏིཡཏཏིཡཛ྄ཛྷཱནཱནི དུཏིཡཛ྄ཛྷཱནམེཝ བྷཛནྟི ཝིཏཀྐཝཱུཔསམཱ ཝིཙཱརཝཱུཔསམཱ ཨཝིཏཀྐཏྟཱ, ཨཝིཙཱརཏྟཱ ཙ. ཨེཝཉྩ ཀཏྭཱ སུཏྟནྟདེསནཱཡཔི པཉྩཀནཡོ ལབྦྷཏེཝཱཏི སིདྡྷཾ ཧོཏི. ནནུ སུཏྟནྟེ ཙཏྟཱརིཡེཝ ཛྷཱནཱནི ཝིབྷཏྟཱནཱིཏི པཉྩཀནཡོ ན ལབྦྷཏཱིཏི? ན, ‘‘སཝིཏཀྐསཝིཙཱརོ སམཱདྷཱི’’ཏིཨཱདིནཱ (དཱི. ནི. ༣.༣༠༥) སམཱདྷིཏྟཡཱཔདེསེན པཉྩཀནཡསྶ ¶ ལབྦྷམཱནཏྟཱ. ཙཏུཀྐནཡནིསྶིཏོ པན ཀཏྭཱ པཉྩཀནཡོ ཝིབྷཏྟོཏི སུཏྟནྟདེསནཱཡཔི པཉྩཀནཡོ ནིདྡྷཱརེཏབྦོ. ‘‘ཝིཏཀྐཝིཙཱརཱནཾ ཝཱུཔསམཱ’’ཏི ཧི ཝིཏཀྐསྶ, ཝིཙཱརསྶ, ཝིཏཀྐཝིཙཱརཱནཉྩ ‘‘ཝིཏཀྐཝིཙཱརཱན’’ནྟི སཀྐཱ ཝཏྟུཾ. ཏཐཱ ‘‘ཨཝིཏཀྐཾ, ཨཝིཙཱར’’ནྟི ཙ ཝིནཱ, སཧ ཙ ཝིཙཱརེན ཝིཏཀྐཔྤཧཱནེན ཨཝིཏཀྐཾ, སཧ, ཝིནཱ ཙ ཝིཏཀྐེན ཝིཙཱརཔྤཧཱནེན ཨཝིཙཱརནྟི ཨཝིཏཀྐཾ, ཨཝིཙཱརཾ, ཨཝིཏཀྐཉྩ ཨཝིཙཱརཉྩཱཏི ཝཱ ཏིཝིདྷམྤི སཀྐཱ སངྒཧེཏུཾ.

དུཏིཡནྟི ཙ ཝིཏཀྐརཧིཏེ, ཝིཏཀྐཝིཙཱརདྭཡརཧིཏེ ཙ ཉཱཡཱགཏཱ དེསནཱ དུཏིཡཾ ཨདྷིགནྟབྦཏྟཱ, ཝིཙཱརམཏྟརཧིཏེཔི དྭཡཔྤཧཱནཱདྷིགཏསམཱནདྷམྨཏྟཱ. ཨེཝཉྩ ཀཏྭཱ པཉྩཀནཡནིདྡེསེ དུཏིཡེ ཝཱུཔསནྟོཔི ཝིཏཀྐོ སཧཱཡབྷཱུཏཝིཙཱརཱཝཱུཔསམེན ན སམྨཱ ཝཱུཔསནྟོཏི ཝིཏཀྐཝིཙཱརདྭཡརཧིཏེ ཝིཡ ཝིཙཱརཝཱུཔསམེནེཝ ཏདུཔསམཾ, སེསདྷམྨཱནཾ སམཱནཏཉྩ དསྶེནྟེན ‘‘ཝིཏཀྐཝིཙཱརཱནཾ ཝཱུཔསམཱ ཨཛ྄ཛྷཏྟཾ སམྤསཱདནཾ ཙེཏསོ ཨེཀོདིབྷཱཝཾ ཨཝིཏཀྐཾ ཨཝིཙཱརཾ སམཱདྷིཛཾ པཱིཏིསུཁཾ ཏཏིཡཾ ཛྷཱནཾ ཨུཔསམྤཛྫ ཝིཧརཏཱི’’ཏི ཏཏིཡཾ ཙཏུཀྐནཡེ དུཏིཡེན ནིབྦིསེསཾ ཝིབྷཏྟཾ. དུཝིདྷསྶཱཔི སཧཱཡཝིརཧེན, ཨཉྙཐཱ ཙ ཝིཏཀྐཔྤཧཱནེན ཨཝིཏཀྐཏྟཾ, སམཱདྷིཛཾ པཱིཏིསུཁཏྟཉྩ སམཱནནྟི སམཱནདྷམྨཏྟཱཔི དུཏིཡནྟི ནིདྡེསོ ¶ . ཝིཙཱརམཏྟམྤི ཧི ཝིཏཀྐཝིཙཱརདྭཡརཧིཏཾ ཝིཡ ‘‘ཡསྨིཾ སམཡེ རཱུཔཱུཔཔཏྟིཡཱ མགྒཾ བྷཱཝེཏི ཨཝིཏཀྐཾ ཝིཙཱརམཏྟཾ སམཱདྷིཛཾ པཱིཏིསུཁཾ དུཏིཡཾ ཛྷཱནཾ ཨུཔསམྤཛྫ ཝིཧརཏཱི’’ཏི (དྷ. ས. ༡༦༨) ཨཝིཏཀྐཾ སམཱདྷིཛཾ པཱིཏིསུཁནྟི ཝིབྷཏྟཾ. པཋམཛ྄ཛྷཱནེ ཝཱ སཧཙཱརཱིསུ ཝིཏཀྐཝིཙཱརེསུ ཨེཀཾ ཨཏིཀྐམིཏྭཱ དུཏིཡམྤི ཏཏྲཊྛམེཝ དོསཏོ དིསྭཱ ཨུབྷཡམྤི སཧཱཏིཀྐམནྟསྶ པཉྩཀནཡེ ཏཏིཡཾ ཝུཏྟཾ, ཏཏིཡཾ ཨདྷིགནྟབྦཏྟཱ. པཋམཏོ ཨནནྟརབྷཱཝེན པནསྶ དུཏིཡབྷཱཝོ ཙ ཨུཔྤཛྫཏཱིཏི. ཀསྨཱ པནེཝཾ སརཱུཔཏོ པཉྩཀནཡོ ན ཝིབྷཏྟོཏི? ཝིནེཡྻཛ྄ཛྷཱསཡཏོ. ཡཐཱནུལོམདེསནཱ ཧི སུཏྟནྟདེསནཱཏི.

པཐཝཱིཀསིཎནིདྡེསཝཎྞནཱ ནིཊྛིཏཱ.

ཨིཏི ཙཏུཏྠཔརིཙྪེདཝཎྞནཱ.

༥. སེསཀསིཎནིདྡེསཝཎྞནཱ

ཨཱཔོཀསིཎཀཐཱཝཎྞནཱ

༩༡. ཡཐཱཝིཏྠཱརིཏསྶ ¶ ¶ ཨཏྠསྶ ཨཏིདེསོཔི ཝིཏྠཱརཊྛཱནེཡེཝ ཏིཊྛཏཱིཏི ཨཱཧ ‘‘ཝིཏྠཱརཀཐཱ ཧོཏཱི’’ཏི. ཨཱཔོཀསིཎནྟི ཨཱཔོཀསིཎཛ྄ཛྷཱནཾ, ཨཱཔོཀསིཎཀམྨཊྛཱནཾ ཝཱ. སབྦཾ ཝིཏྠཱརེཏབྦནྟི པཐཝཱིཀསིཎཀམྨཊྛཱནེ ཝུཏྟནཡེན ཝིཏྠཱརེཏབྦཾ. ཨེཏྟཀམྤཱིཏི ‘‘ཀཏེ ཝཱ ཨཀཏེ ཝཱཏི སབྦཾ ཝིཏྠཱརེཏབྦ’’ནྟི ཨེཏྟཀམྤི ཨཝཏྭཱ. སཱམུདྡིཀེན ལོཎུདཀེན བྷརིཏོ ཛལཱསཡོ ལོཎཱི. ནཱིལཱདིཝཎྞསངྐརཔརིཧརཎཏྠཾ ‘‘སུདྡྷཝཏྠེན གཧིཏ’’ནྟི ཝུཏྟཾ. ཨཉྙནྟི བྷཱུམིཾ སམྤཏྟཾ. ཏཐཱརཱུཔནྟི ཡཱདིསཾ ཨཱཀཱསཛཾ ཨུདཀཾ, ཏཱདིསཾ. ཏེནཱཧ ‘‘ཝིཔྤསནྣཾ ཨནཱཝིལ’’ནྟི, ཡཾ པན ཨུདཀནྟི སམྦནྡྷོ. ‘‘ན ཝཎྞོ པཙྩཝེཀྑིཏབྦོ’’ཏིཨཱདཱིསུ ཡཾ ཝཏྟབྦཾ, ཏཾ པཐཝཱིཀསིཎཀཐཱཡཾ ཝུཏྟམེཝ. ལཀྑཎཾ པན ཨིདྷ པགྒྷརཎལཀྑཎཾ ཝེདིཏབྦཾ.

ཝུཏྟནཡེནེཝཱཏི པཐཝཱིཀསིཎབྷཱཝནཱཡཾ ཝུཏྟནཡེནེཝ. ཏརངྒུཊྛཱནཱདི, ཕེཎམིསྶཏཱདི ཙ ཨིདྷ ཀསིཎདོསོ. སོཏི ཡོགཱཝཙརོ. ཏསྶཱཏི པཊིབྷཱགནིམིཏྟསྶ.

ཏེཛོཀསིཎཀཐཱཝཎྞནཱ

༩༢. སིནིདྡྷཱནི སིནེཧཝནྟཱནི. སཱརདཱརཱུནི ན ཕེགྒུདཱརཱུནི. ཛཱལཱཡ ཙིརཊྛིཏཏྠཾ སིནིདྡྷསཱརདཱརུགྒཧཎཾ. གྷཊིཀཾ གྷཊིཀཾ ཀཏྭཱཏི ཁནྡྷསོ ཀརིཏྭཱ. ཨཱལིམྤེཏྭཱཏི ཛཱལེཏྭཱ. གྷནཛཱལཱཡཱཏི ཨཝིརལ༹ཝསེན པཝཏྟཨགྒིཛཱལཱཡཾ.

པཏནསདིསནྟི པཏམཱནསདིསཾ. ཨཀཏེ གཎྷནྟསྶཱཏི ཝུཏྟནཡེན ཡཐཱ ཀསིཎམཎྜལཾ པཉྙཱཡཏི, ཨེཝཾ ཨནབྷིསངྑཏེ ཀེཝལེ ཏེཛསྨིཾ ནིམིཏྟཾ གཎྷནྟསྶ.

ཝཱཡོཀསིཎཀཐཱཝཎྞནཱ

༩༣. ཝུཏྟཉྷེཏནྟི ¶ ཨེཏྠ ཧི-སདྡོ ཧེཏུཨཏྠོ, ཡསྨཱཏི ཨཏྠོ. ཏསྶ ‘‘ཏསྨཱ’’ཏི ཨིམིནཱ སམྦནྡྷོ. ཨུཙྪགྒནྟི ཨུཙྪུཁེཏྟེ ཡཐཱཋིཏཱནཾ ཨགྒཾ. ཨེརིཏནྟི ¶ ཝཱཏེན ཙལིཏཾ. སམེརིཏནྟི སབྦསོ ཙལིཏཾ. ཏསྨཱཏི ཡསྨཱ ‘‘ཝཱཡོཀསིཎཾ…པེ… ཨུཔལཀྑེཏཱི’’ཏི ཨེཝཾ ཝུཏྟཾ ཨཊྛཀཐཱཡཾ, ཏསྨཱ. སམསཱིསཊྛིཏནྟི ཨུཔརི པཏྟཱནཾ ཝསེན སམསཱིསཾ ཧུཏྭཱ ཋིཏཾ. ཝེལུ༹ཾ ཝཱ རུཀྑཾ ཝཱཏི ཨེཏྠཱཔི ‘‘སམསཱིསཾ ཋིཏཾ གྷནཔཏྟཝེལུ༹ཾ ཝཱ གྷནཔཏྟརུཀྑཾ ཝཱ’’ཏི ཨཱནེཏྭཱ ཡོཛེཏབྦཾ. ཨེཀངྒུལཱདིཔྤམཱཎེསུ ཀེསེསུ རསྶབྷཱཝཏོ, དཱིགྷཏརེསུ ཨོལམྦནཏོ, ཝིརལེ༹སུ ཨནུཔྤཝེསཏོ ཝཱཏཔྤཧཱརོ ན པཉྙཱཡཏཱིཏི ཙཏུརངྒུལཔྤམཱཎགྒཧཎཾ, གྷནགྒཧཎཉྩ ཀཏཾ. ཨེཏསྨིཾ ཋཱནེ པཧརཏཱིཏི སཏིཾ ཋཔེཏྭཱཏི ཨུཙྪགྒཱདཱིནཾ པཙལནཱཀཱརགྒཧཎམུཁེན ཏེསཾ པཧཱརཀེ ཝཱཏསངྒྷཱཏེ སཏིཾ ཨུཔཊྛཔེཏྭཱ. ཏཏྠ སཏིཾ ཋཔེཏྭཱཏི ཏསྨིཾ ཀཱཡཔདེསསྶ སངྒྷཊྚནཝསེན པཝཏྟེ ཝཱཡུཔིཎྜེ སངྒྷཊྚནཱཀཱརགྒཧཎམུཁེན སཏིཾ ཨུཔཊྛཔེཏྭཱ. ‘‘ཨུསུམཝཊྚིསདིས’’ནྟི ཨེཏེན པུརིམཀསིཎསྶ ཝིཡ ཨིམསྶཱཔི ནིམིཏྟསྶ སཾཝིགྒཧཏཾ དསྶེཏི. ‘‘ནིཙྩལ’’ནྟི ཨིམིནཱ ནིཙྩལབྷཱཝོཡེཝ ཨུགྒཧནིམིཏྟཏོ ཨིམསྶ ཝིསེསོཏི པཊིབྷཱགནིམིཏྟསྶཱཔི ཨུསུམཝཊྚིསདིསཏཱཝ ཝིབྷཱཝིཏཱ ཧོཏི.

ནཱིལཀསིཎཀཐཱཝཎྞནཱ

༩༤. ཨཉྫནརཱཛིཝཊྚཱདི ཝཎྞདྷཱཏུཡཱ ཝཱ. ཏཐཱརཱུཔཾ མཱལཱགཙྪནྟི ཨཝིརལ༹ཝིཀསིཏནཱིལཝཎྞཔུཔྥསཉྪནྣཾ པུཔྥགཙྪཾ. ཨིཏརེནཱཏི ཨཀཏཱདྷིཀཱརེན. གིརིཀཎྞིཀགྒཧནེན ནཱིལཾ གིརིཀཎྞིཀམཱཧ. ཀརཎྜཔཊལཾ སམུགྒཔིདྷཱནཾ. པཏྟེཧིཡེཝཱཏི ནཱིལུཔྤལཱདཱིནཾ ཀེསརཝཎྚཱནི ཨཔནེཏྭཱ ཀེཝལེཧི པཏྟེཧིཡེཝ. པཱུརེཏབྦནྟི ནཱིལཝཎྞཾ ཝཏྠཾ གཧེཏྭཱ བྷཎྜིཀཾ ཝིཡ བནྡྷིཏྭཱ ཡཐཱ ནཱིལམཎྜལཾ ཧུཏྭཱ པཉྙཱཡཏི, ཏཐཱ ཙངྐོཊཀཾ ཝཱ ཀརཎྜཔཊལཾ ཝཱ པཱུརེཏབྦཾ. མུཁཝཊྚིཡཾ ཝཱ ཨསྶཱཏི ཨསྶ ཙངྐོཊཀསྶ, ཀརཎྜཔཊལསྶ ཝཱ མུཁཝཊྚིཡཾ བནྡྷིཏབྦཾ. མཎིཏཱལཝཎྚཾ ཨིནྡནཱིལམཎིམཡཾ ཏཱལཝཎྚཾ.

པཱིཏཀསིཎཀཐཱཝཎྞནཱ

༩༥. པཱིཏཀསིཎེ མཱལཱགཙྪནྟི ཨིཀྐཊཱདིམཱལཱགཙྪཾ. ཧརིཏཱལཾ, མནོསིལཱ ཝཱ དྷཱཏུ. པཏྟངྒཔུཔྥེཧཱིཏི ¶ པཏྟངྒནཱམིཀཱ པཱིཏཝཎྞཔུཔྥཱ ཨེཀཱ གཙྪཛཱཏི, ཏསྶ པུཔྥེཧི. ཨཱསནཔཱུཛནྟི ཙེཏིཡངྒཎེ ཀཏཾ ཨཱསནཔཱུཛཾ ¶ . ཀཎིཀཱརཔུཔྥཱདིནཱཏི ཨཱདི-སདྡེན ཨཱཀུལིཀིངྐིརཱཏཔུཔྥཱདཱིནཾ སངྒཧོ དཊྛབྦོ.

ལོཧིཏཀསིཎཀཐཱཝཎྞནཱ

༩༦. ལོཧིཏམཎི ལོཧིཏངྒམཎིཨཱདི. ལོཧིཏདྷཱཏུ གེརུཀཛཱཏིཧིངྒུལིཀཱདི.

ཨོདཱཏཀསིཎཀཐཱཝཎྞནཱ

༩༧. ཨོདཱཏཀསིཎེ མཱལཱགཙྪནྟི ནནྡིཡཱཝཏྟཱདིམཱལཱགཙྪཾ. དྷཱཏུ ཀཀྐཊིམུཏྟསེཏིཀཱདི.

ཨཱལོཀཀསིཎཀཐཱཝཎྞནཱ

༩༨. ཏཐཱ ཨསཀྐོནྟེནཱཏི ཡཐཱ སཱུརིཡཱལོཀཱདིཝསེན ཨོབྷཱསནིམིཏྟུཔྤཱདནཾ ཝུཏྟཾ, ཏསྶ ཨོབྷཱསམཎྜལསྶ ན ཙིརཊྛིཏིཏཱཡ ཏཐཱ ནིམིཏྟུཔྤཱདནཾ ཀཱཏུཾ ཨསཀྐོནྟེན. གྷཊམུཁེན ནིགྒཙྪནཀཨོབྷཱསསྶ མཧནྟབྷཱཝཏོ ‘‘གྷཊམུཁཾ པིདཧིཏྭཱ’’ཏི ཝུཏྟཾ. བྷིཏྟིམུཁནྟི བྷིཏྟིཨབྷིམུཁཾ. ཨུཊྛིཏམཎྜལསདིསནྟི བྷིཏྟིཨཱདཱིསུ ཨུཊྛིཏཔཱཀཏིཀཨཱལོཀམཎྜལསདིསཾ. གྷནཝིཔྤསནྣཾ ཨཱལོཀཔུཉྫསདིསནྟི བྷགཝཏོ བྱཱམཔྤབྷཱ ཝིཡ བཧལོ, ཝིཔྤསནྣོ ཙ ཧུཏྭཱ པུཉྫབྷཱུཏོ ཨཱལོཀོ ཨཏྠི ཙེ, ཏཾསདིསོཏི ཨཏྠོ.

པརིཙྪིནྣཱཀཱསཀསིཎཀཐཱཝཎྞནཱ

༩༩. ཚིདྡསདིསམེཝ ཧོཏཱིཏི ཡེཧི བྷིཏྟིཔརིཡནྟཱདཱིཧི པརིཙྪིནྣཾ, ཏཾ ཚིདྡཾ, ཏཾསདིསཾ, ཏེནཝཱཀཱརེན ཨུགྒཧནིམིཏྟཾ ཨུཔཊྛཱཏཱིཏི ཨཏྠོ. ‘‘ཝཌྜྷིཡམཱནམྤི ན ཝཌྜྷཏཱི’’ཏི ཨུགྒཧནིམིཏྟསྶ ཨཝཌྜྷནཱིཡཏཾ དསྶེཏུཾ ཝུཏྟཾ. སབྦམྤི ཧི ཨུགྒཧནིམིཏྟཾ ཝཌྜྷིཡམཱནཾ ན ཝཌྜྷཏིཡེཝ. སཏིཔི ཙ ཝཌྜྷེཏུཀཱམཏཱཡཾ ཝཌྜྷནཱ ན སམྦྷཝཏི བྷཱཝནཱཡ པརིདུབྦལཏྟཱ. བྷཱཝནཱཝསེན ཧི ནིམིཏྟཝཌྜྷནཱ ¶ . པཊིབྷཱགནིམིཏྟཾ པན ཏསྨིཾ ཨུཔྤནྣེ བྷཱཝནཱ ཐིརཱཏི ཀཏྭཱ ‘‘ཝཌྜྷིཡམཱནཾ ཝཌྜྷཏཱི’’ཏི ཝུཏྟཾ.

ཀིཉྩཱཔི ¶ པཱལི༹ཡཾ ‘‘པཐཝཱིཀསིཎཱདཱིནི རཱུཔཛྷཱནཱརམྨཎཱནི ཨཊྛེཝ ཀསིཎཱནི སརཱུཔཏོ ཨཱགཏཱནི, ཨོདཱཏཀསིཎེ པན ཨཱལོཀཀསིཎཾ, ཨཱཀཱསཀསིཎེ ཙ པརིཙྪིནྣཱཀཱསཀསིཎཾ ཨནྟོགདྷཾ ཀཏྭཱ དེསནཱ ཀཏཱ’’ཏི ཨདྷིཔྤཱཡེནཱཧ ‘‘ཨིཏི ཀསིཎཱནི དསབལོ, དས ཡཱནི ཨཝོཙཱ’’ཏི. པཀིཎྞཀཀཐཱཔི ཝིཉྙེཡྻཱཏི པུབྦེ ཝིཡ ཨསཱདྷཱརཎཾ ཏསྨིཾ ཏསྨིཾ ཀསིཎེ པཊིནིཡཏམེཝ ཨཏྠཾ ཨགྒཧེཏྭཱ ཨསཱདྷཱརཎཏོ, སཱདྷཱརཎཏོ ཙ ཏཏྠ ཏཏྠ པཀིཎྞཀཾ ཝིསཊཾ ཨཏྠཾ གཧེཏྭཱ པཝཏྟཱ པཀིཎྞཀཀཐཱཔི ཝིཛཱནིཏབྦཱ.

པཀིཎྞཀཀཐཱཝཎྞནཱ

༡༠༠. ཨཱདིབྷཱཝོཏི ཨེཏྠ ཨཱདི-སདྡེན ཡསྶ ཀསྶཙི པཐཝཱིཔཀྑིཡསྶ ཝཏྠུནོ ནིམྨཱནཱདིཾ སངྒཎྷཱཏི. ཋཱནནིསཛྫཱདིཀཔྤནཾ ཝཱཏི ཨེཏྠཱཔི ‘‘ཨཱཀཱསེ ཝཱ ཨུདཀེ ཝཱ’’ཏི ཨཱནེཏྭཱ སམྦནྡྷིཏབྦཾ. པརིཏྟཨཔྤམཱཎནཡེནཱཏི ནཱིལཱདིཝཎྞཾ ཨནཱམསིཏྭཱ པརིཏྟཨཔྤམཱཎནཡེནེཝ. ཨེཝམཱདཱིནཱིཏི ཨཱདི-སདྡེན སརཱིརཏོ ཨུདཀདྷཱརཱནིམྨཱནཱདིཾ སངྒཎྷཱཏི.

ཡདེཝ སོ ཨིཙྪཏི ཏསྶ ཌཧནསམཏྠཏཱཏི བཧཱུསུ ཀཔྤཱསཔིཙུསཱརདཱརུཨཱདཱིསུ ཨེཀཛ྄ཛྷཾ རཱསིབྷཱུཏེསུ ཋིཏེསུ ཡཾ ཡདེཝ ཨིཙྪཏི, ཏསྶ ཏསྶེཝ ཌཧནསམཏྠཏཱ. ཨིདྷ ཨཱདི-སདྡེན ཨནྡྷཀཱརཝིདྷམནཱདིཾ སངྒཎྷཱཏི.

ཝཱཡུགཏིཡཱ གམནཾ ཝཱཡུགཏིགམནཾ, ཨཏིསཱིགྷགམནཾ. ཨིདྷ ཨཱདི-སདྡེན ཡདིཙྪིཏདེསནྟརཾ པཱཔུཎནཱདིཾ སངྒཎྷཱཏི.

སུཝཎྞནྟི ཨདྷིམུཙྩནཱ སུཝཎྞབྷཱཝཱདྷིཊྛཱནཾ སེཡྻཐཱཔི ཨཱཡསྨཱ པིལིནྡཝཙྪོ (པཱརཱ. ༦༡༩-༦༢༠) ཏིཎཎྜུཔགཔཱསཱདཱདཱིནཾ. ཝུཏྟནཡེནཱཏི སུཝཎྞདུབྦཎྞནཡེན.

ཝཎྞཀསིཎེསུ ¶ ཏཏྠ ཏཏྠ ཨཱདི-སདྡེན ནཱིལོབྷཱསནིམྨཱནཱདཱིནཾ སངྒཧོ དཊྛབྦོ. པཐཝཱིཔབྦཏཱདཱིཏི ཨཱདི-སདྡེན སམུདྡཱདཱིནཾ སངྒཧོ དཊྛབྦོ.

སབྦཱནེཝ ¶ དསཔི ཀསིཎཱནི. ཨིམཾ པབྷེདཾ ལབྷནྟཱིཏི ཨིམཾ ཝཌྜྷནཱདིཝིསེསཾ པཱཔུཎནྟི. ཨེཀོཏི ཨེཀཙྩོ. སཉྫཱནཱཏཱིཏི བྷཱཝནཱཔཉྙཱཡ སཉྫཱནཱཏི. ཨཱདི-སདྡེན ‘‘ཨཱཔོཀསིཎ’’ནྟིཨཱདིཔཱལི༹ཾ སངྒཎྷཱཏི.

ཨུཔརིགགནཏལཱབྷིམུཁཾ ‘‘པཐཝཱིཀསིཎམེཀོ སཉྫཱནཱཏཱི’’ཏི པཱལི༹པདཱནི ཨཱནེཏྭཱ སམྦནྡྷིཏབྦཾ. ཏཉྩ ཁོ ཝཌྜྷནཝསེན. ཏེནཱཧ ‘‘ཨེཀཙྩོ ཧི ཨུདྡྷམེཝ ཀསིཎཾ ཝཌྜྷེཏཱི’’ཏི. ཧེཊྛཱབྷཱུམིཏལཱབྷིམུཁནྟིཨཱདཱིསུཔི ཨེསེཝ ནཡོ. པུབྦེ ཝཌྜྷནཀཱལེ པཡོཛནཾ ཨནཔེཀྑིཏྭཱ ཝཌྜྷེནྟཱནཾ ཝསེན ཝུཏྟཏྟཱ ཨིདཱནི ‘‘ཏེན ཏེན ཝཱ ཀཱརཎེན ཨེཝཾ པསཱརེཏཱི’’ཏི ཨཱཧ, ཀསིཎཾ ཝཌྜྷེཏཱིཏི ཨཏྠོ. ཡཐཱ ཀིནྟི ཨཱཧ ‘‘ཨཱལོཀམིཝ དིབྦཙཀྑུནཱ རཱུཔདསྶནཀཱམོ’’ཏི. ཨུདྡྷཉྩེ རཱུཔཾ དཊྛུཀཱམོ ཨུདྡྷཾ ཨཱལོཀཾ པསཱརེཏི, ཨདྷོ ཙེ རཱུཔཾ དཊྛུཀཱམོ ཨདྷོ ཨཱལོཀཾ པསཱརེཏི, སམནྟཏོ ཙེ རཱུཔཾ དཊྛུཀཱམོ སམནྟཏོ ཨཱལོཀཾ པསཱརེཏི, ཨེཝམཡཾ ཀསིཎནྟི ཨཏྠོ.

ཨེཀསྶཱཏི པཐཝཱིཀསིཎཱདཱིསུ ཨེཀེཀསྶ. ཨཉྙབྷཱཝཱནུཔགམནཏྠནྟི ཨཉྙཀསིཎབྷཱཝཱནུཔགམནདཱིཔནཏྠཾ, ན ཨཉྙཾ པཐཝཱིཨཱདི. ན ཧི ཨུདཀེན ཋིཏཊྛཱནེ སསམྦྷཱརཔཐཝཱི ཨཏྠི. ཨཉྙོ ཀསིཎསམྦྷེདོཏི ཨཱཔོཀསིཎཱདིནཱ སངྐརོ. སབྦཏྠཱཏི སབྦེསུ ཨཱཔོཀསིཎཱདཱིསུ སེསཀསིཎེསུ. ཨེཀདེསེ ཨཊྛཏྭཱ ཨནཝསེསེན ཕརཎཔྤམཱཎསྶ ཨགྒཧཎཏོ ཕརཎཾ ཨཔྤམཱཎཾ. ཏེནེཝ ཧི ནེསཾ ཀསིཎསམཉྙཱ. ཏཐཱ ཙཱཧ ‘‘ཏཉྷཱི’’ཏིཨཱདི. ཏཏྠ ཙེཏསཱ ཕརནྟོཏི བྷཱཝནཱཙིཏྟེན ཨཱལམྦནཾ ཀརོནྟོ. བྷཱཝནཱཙིཏྟཉྷི ཀསིཎཾ པརིཏྟཾ ཝཱ ཝིཔུལཾ ཝཱ ཨེཀཀྑཎེ སཀལམེཝ མནསི ཀརོཏི, ན ཨེཀདེསནྟི.

༡༠༡. ཨཱནནྟརིཡཀམྨསམངྒིནོཏི པཉྩསུ ཨཱནནྟརིཡཀམྨེསུ ཡེན ཀེནཙི སམནྣཱགཏཱ. ནིཡཏམིཙྪཱདིཊྛིཀཱཏི ཨཧེཏུཀདིཊྛི ཨཀིརིཡདིཊྛི ནཏྠིཀདིཊྛཱིཏི ཏཱིསུ མིཙྪཱདིཊྛཱིསུ ཡཱཡ ཀཱཡཙི ནིཡཏཱཡ མིཙྪཱདིཊྛིཡཱ སམནྣཱགཏཱ. ཨུབྷཏོབྱཉྫནཀཔཎྜཀཱཏི ཨུབྷཏོབྱཉྫནཀཱ, པཎྜཀཱ ཙ. ཀཱམཉྩེཏེ ཨཧེཏུཀཔཊིསནྡྷིཀཏྟཱ ཝིཔཱཀཱཝརཎེན སམནྣཱགཏཱ ཧོནྟི, ཏཐཱཔི ཏིབྦཀིལེསཏྟཱ ཀིལེསཱཝརཎེན སམནྣཱགཏཱ ཝུཏྟཱ. ཨཧེཏུཀདྭིཧེཏུཀཔཊིསནྡྷིཀཱཏི ཨཧེཏུཀཔཊིསནྡྷིཀཱ ¶ , དྭིཧེཏུཀཔཊིསནྡྷིཀཱ ཙ. དུཧེཏུཀཔཊིསནྡྷིཀཱནམྤི ཧི ཨརིཡམགྒཔཊིཝེདྷོ, ཛྷཱནཔཊིལཱབྷོ ¶ ཙ ནཏྠི, ཏསྨཱ ཏེཔི ཝིཔཱཀཱཝརཎེན སམནྣཱགཏཱ ཨེཝ.

ཨཔཙྩནཱིཀཔཊིཔདཱཡནྟི མགྒསྶ ཨནུལོམཔཊིཔདཱཡཾ སཙྩཱནུལོམིཀཱཡཾ ཝིཔསྶནཱཡཾ. ཨཙྪནྡིཀཱཏི ‘‘ཀཏྟུཀམྱཏཱཚནྡརཧིཏཱ’’ཏི སམྨོཧཝིནོདནིཡཾ ཝུཏྟཾ, ཏམྤི ནིབྦཱནཱདྷིགམཏྠམེཝ ཀཏྟུཀམྱཏཱཚནྡཾ སནྡྷཱཡ ཝུཏྟནྟི དཊྛབྦཾ. ཨུཏྟརཀུརུཀཱཔི མནུསྶཱ མཱརཱདཡོ ཝིཡ ཨཙྪནྡིཀཊྛཱནཾ པཝིཊྛཱ ནིབྦུཏིཚནྡརཧིཏཏྟཱ. དུཔྤཉྙཱཏི བྷཝངྒཔཉྙཱཡ པརིཧཱིནཱ. ‘‘བྷཝངྒཔཉྙཱཡ པརིཔུཎྞཱཡཔི ཡསྶ བྷཝངྒཾ ལོཀུཏྟརསྶ པཱདཀཾ ན ཧོཏི, སོཔི དུཔྤཉྙོཡེཝཱ’’ཏི སམྨོཧཝིནོདནིཡཾ ཝུཏྟཾ. ཡསྨིཾ ཧི བྷཝངྒེ ཝཏྟམཱནེ ཏཾསནྟཏིཡཾ ལོཀུཏྟརཾ ནིབྦཏྟཏི, ཏཾ ཏསྶ པཱདཀཾ ནཱམ ཧོཏི.

ཀུསལེསུ དྷམྨེསཱུཏི ཨནཝཛྫདྷམྨེསུ, སུཁཝིཔཱཀདྷམྨེསུ ཝཱ. ཨོཀྐམིཏུནྟི ཨདྷིགནྟུཾ. ཀསིཎེཡེཝཱཏི ཀསིཎཀམྨཊྛཱནེཡེཝ. ཨེཏེསནྟི ཀམྨཱཝརཎསམནྣཱགཏཱདཱིནཾ. ཏསྨཱཏི ཡསྨཱ ཨེཏེ ཝིཔཱཀནྟརཱཡཱདཡོ ཨེཝཾ ཨཏྠཛཱནིཀརཱ, ཨནཏྠཧེཏུབྷཱུཏཱ ཙ, ཏསྨཱ. ཏིཎྞམེཝ ཙེཏྠ ཨནྟརཱཡཱནཾ གཧཎཾ ཨིཏརསྶ སཔྤཊིཀཱརཏྟཱ, ཀམྨནྟརཱཡཔཀྑིཀཏྟཱ ཝཱཏི དཊྛབྦཾ. སཔྤུརིསཱུཔནིསྶཡཱདཱིཧཱིཏི ཨཱདི-སདྡེན ཏཛྫཾ ཡོནིསོམནསིཀཱརཱདིཾ སངྒཎྷཱཏི. སདྡྷནྟི ཀམྨཕལསདྡྷཾ, རཏནཏྟཡསདྡྷཉྩ. ཚནྡནྟི བྷཱཝནཱནུཡོགེ ཏིབྦཀཏྟུཀམྱཏཱསངྑཱཏཾ ཀུསལཙྪནྡཾ. པཉྙནྟི པཱརིཧཱརིཡཔཉྙཾ. ཝཌྜྷེཏྭཱཏི ཡཐཱ བྷཱཝནཱ ཨིཛ྄ཛྷཏི, ཏཐཱ པརིབྲཱུཧེཏྭཱ. ཡཾ པནེཏྠ ཨཏྠཏོ ན ཝིབྷཏྟཾ, ཏཾ སུཝིཉྙེཡྻཏྟཱ, ཧེཊྛཱ ཝུཏྟནཡཏྟཱ ཙ ན ཝིབྷཏྟཾ.

སེསཀསིཎནིདྡེསཝཎྞནཱ ནིཊྛིཏཱ.

ཨིཏི པཉྩམཔརིཙྪེདཝཎྞནཱ.

༦. ཨསུབྷཀམྨཊྛཱནནིདྡེསཝཎྞནཱ

ཨུདྡྷུམཱཏཀཱདིཔདཏྠཝཎྞནཱ

༡༠༢. ‘‘ཨཝིཉྙཱཎཀཱསུབྷེསཱུ’’ཏི ¶ ¶ ཨིདཾ ཨུདྡྷུམཱཏཀཱདཱིནཾ སབྷཱཝདསྶནཝསེན ཝུཏྟཾ. ཏསྨཱ བྷཱུཏཀཐནམཏྟཾ དཊྛབྦཾ, ན སཝིཉྙཱཎཀཨསུབྷསྶ ཨཀམྨཊྛཱནབྷཱཝཏོ. ཏཐཱ ཧི ཝཀྑཏི ‘‘ན ཀེཝལཾ མཏསརཱིར’’ནྟིཨཱདི (ཝིསུདྡྷི. ༡.༡༢༢). ཨུདྡྷཾ ཛཱིཝིཏཔརིཡཱདཱནཱཏི ཛཱིཝིཏཀྑཡཏོ ཨུཔརི མརཎཏོ པརཾ. སམུགྒཏེནཱཏི ཨུཊྛིཏེན. ཨུདྡྷུམཱཏཏྟཱཏི ཨུདྡྷཾ ཨུདྡྷཾ དྷུམཱཏཏྟཱ སཱུནཏྟཱ. ཨུདྡྷུམཱཏམེཝ ཨུདྡྷུམཱཏཀནྟི ཀ-ཀཱརེན པདཝཌྜྷནམཱཧ ཨནཏྠནྟརཏོ ཡཐཱ ‘‘པཱིཏཀཾ ལོཧིཏཀ’’ནྟི. པཊིཀྐཱུལཏྟཱཏི ཛིགུཙྪནཱིཡཏྟཱ. ཀུཙྪིཏཾ ཨུདྡྷུམཱཏཾ ཨུདྡྷུམཱཏཀནྟི ཀུཙྪནཏྠེ ཝཱ ཨཡཾ ཀ-ཀཱརོཏི དསྶེཏུཾ ཝུཏྟཾ ཡཐཱ ‘‘པཱཔཀོ ཀིཏྟིསདྡོ ཨབྦྷུགྒཙྪཏཱི’’ཏི (མཧཱཝ. ༢༨༥; པརི. ༣༢༥; དཱི. ནི. ༢.༡༤༩; ཨ. ནི. ༥.༢༡༣). ཏཐཱརཱུཔསྶཱཏི ‘‘བྷསྟཱ ཝིཡ ཝཱཡུནཱ’’ཏིཨཱདིནཱ ཡཐཱརཱུཔཾ ཝུཏྟཾ, ཏཐཱརཱུཔསྶ.

སེཏརཏྟེཧི པརིབྷིནྣཾ ཝིམིསྶིཏཾ ནཱིལཾ ཝིནཱིལཾ, པུརིམཝཎྞཝིཔརིཎཱམབྷཱུཏཾ ཝཱ ནཱིལཾ ཝིནཱིལཾ.

པརིབྷིནྣཊྛཱནེསུ ཀཱཀཀངྐཱདཱིཧི. ཝིསྶནྡམཱནཔུབྦནྟི ཝིསྶཝནྟཔུབྦཾ, ཏཧཾ ཏཧཾ པགྒྷརནྟཔུབྦནྟི ཨཏྠོ.

ཨཔདྷཱརིཏནྟི ཝིཝཊཾ ཨུགྒྷཱཊིཏཾ. ཁིཏྟནྟི ཚཌྜིཏཾ, སོཎསིངྒཱལཱདཱིཧི ཝིསུཾ ཀཏྭཱ ཁཱདནེན སརཱིརསངྒྷཱཏཏོ ལུཉྩིཏྭཱ ཏཧཾ ཏཧཾ ཚཌྜིཏཾ. ཝིཝིདྷཾ ཁིཏྟནྟི ཝིཀྑིཏྟཾ.

པུརིམནཡེནཱཏི ‘‘ཝིཝིདྷཾ ཁིཏྟ’’ནྟིཨཱདིནཱ པུབྦེ ཝུཏྟནཡེན. སཏྠེན ཧནིཏྭཱཏི ཝེརཱིཧི ཁགྒཀརཝཱལཱདིནཱ ¶ སཏྠེན པཧརིཏྭཱ. ཝུཏྟནཡེནཱཏི ‘‘ཨཉྙེན ཧཏྠ’’ནྟིཨཱདིནཱ པུབྦེ ཝུཏྟནཡེན.

ཨབྦྷནྟརཏོ ནིཀྑམནྟེཧི ཀིམཱིཧི པགྒྷརནྟཀིམིཀུལཾ པུལ༹ཝཀནྟི ཨཱཧ ‘‘ཀིམིཔརིཔུཎྞསྶཱ’’ཏི.

ཨུདྡྷུམཱཏཀཱདཱིནི ¶ ཨཱམཀསུསཱནཱདཱིསུ ཚཌྜིཏཱསུབྷཱནི. ནིསྶཱཡཱཏི པཊིཙྩ ཏཱནིཔི ཨཱརབྦྷ. ནིམིཏྟཱནནྟི ཨུགྒཧཔཊིབྷཱགནིམིཏྟཱནཾ. ཨེཏཱནེཝ ཨུདྡྷུམཱཏཀཱདཱིནེཝ ནཱམཱནི.

ཨུདྡྷུམཱཏཀཀམྨཊྛཱནཝཎྞནཱ

༡༠༣. བྷཱཝེཏུཀཱམེནཱཏི ཨུཔྤཱདེཏུཀཱམེན. ཏེནཱཏི ཨཱཙརིཡེན. ཨསྶཱཏི ཡོགིནོ. ཨསུབྷནིམིཏྟཏྠཱཡཱཏི ཨསུབྷནིམིཏྟསྶ ཨུགྒཎྷནཏྠཱཡ, ཨསུབྷེ ཝཱ ཨུགྒཧནིམིཏྟསྶ ཨཏྠཱཡ. གམནཝིདྷཱནནྟི གམནཝིདྷི. ཡེན ཝིདྷིནཱ གནྟབྦཾ, སོ ཝིདྷི. ཨུགྒཧནིམིཏྟསྶ ཨུཔྤནྣཀཱལཏོ པཊྛཱཡ པཐཝཱིཀསིཎེ ཝུཏྟཾ པཊིཔཛྫནཝིདྷིཾ སནྡྷཱཡཱཧ ‘‘ཨཔྤནཱཝིདྷཱནཔརིཡོསཱན’’ནྟི.

༡༠༤. ཏཱཝདེཝཱཏི སུཏཀྑཎེཡེཝ. ཨཏིཏྠེན པུཎྞནདཱིཨཱདིཾ པཀྑནྡནྟེན ཝིཡ ཨནུཔཝིསནྟེན ཝིཡ. ཀེདཱརཀོཊིཡཱཏི ཀེདཱརམརིཡཱདཱཡ. ཝིསབྷཱགརཱུཔནྟི ཁེཏྟརཀྑིཀཱདིཝིསབྷཱགཝཏྠུརཱུཔཾ. སརཱིརནྟི ཨུདྡྷུམཱཏཀཀལེ༹ཝརཾ. ཨདྷུནཱམཏནྟི ཨཙིརམཏཾ ཨུདྡྷུམཱཏཀབྷཱཝཾ ཨཔྤཏྟཾ. ཏཀྐཡཏཱིཏི སམྦྷཱཝེཏི བྷཱརིཡཾ ཀཏྭཱ ན མཉྙཏི.

༡༠༥. རཱུཔསདྡཱདཱིཏི ཨེཏྠ ཨམནུསྶཱནཾ རཱུཔེཧི, སཱིཧབྱགྒྷཱདཱིནཾ སདྡཱདཱིཧི, ཨམནུསྶཱནམྤི ཝཱ རཱུཔསདྡཱདཱིཧི. ཏཐཱ སཱིཧབྱགྒྷཱདཱིནནྟི ཡཐཱརཧཾ ཡོཛེཏབྦཾ. ཨནིཊྛཱརམྨཎཱབྷིབྷཱུཏསྶཱཏི བྷེརཝཱདིབྷཱཝེན ཨནིཊྛེཧི ཨཱརམྨཎེཧི ཨབྷིབྷཱུཏསྶ ཨཛ྄ཛྷོཏྠཊསྶ. ན པཊིསཎྛཱཏཱིཏི ཝིདཱཧཝསེན ཨཱསཡེ ན ཏིཊྛཏི, ཨུཙྪཌྜེཏབྦཾ ཧོཏཱིཏི ཨཏྠོ. ཨཉྙོཏི ཨམནུསྶཱདཱིནཾ ཝསེན ཝཱ ཨཉྙཐཱ ཝཱ ཝུཏྟཔྤཀཱརཏོ ཨཉྙོ ཨཱབཱདྷོ ཧོཏི. སོཏི སངྒྷཏྠེརོ, ཨབྷིཉྙཱཏབྷིཀྑུ ཝཱ. ཡསྶཱནེན ཨཱརོཙིཏཾ, སོ. ཀཏཀམྨཱཏི ཀཏཐེཡྻཀམྨཱ. ཨཀཏཀམྨཱཏི ཐེཡྻཀམྨཾ ཀཱཏུཀཱམཱ. ཀཏཀམྨཱ པན ཨིདྷཱདྷིཔྤེཏཱ. ཏསྨཱ ཏེཏི ཀཏཀམྨཱ ཙོརཱ. སཧ ཨོཌྜྷེནཱཏི སཧོཌྜྷཾ, ཐེནེཏྭཱ གཧིཡམཱནབྷཎྜེན སདྡྷིནྟི ཨཏྠོ. ཡཛམཱནོཏི ཡཉྙཾ ཡཛནྟོ ¶ ཡཉྙསཱམིཀོ. ‘‘ཨདྡྷཱ ཨིམཱཡ པཊིཔཏྟིཡཱ ཛརཱམརཎཏོ མུཙྩིསྶཱམཱི’’ཏི པཱིཏིསོམནསྶཾ ཨུཔྤཱདེཏྭཱ.

ཨེཝཾ ¶ གམནཝིདྷཱནཾ ཨེཀདེསེན ཝཏྭཱ ཨིདཱནི ཨཊྛཀཐཱསུ ཨཱགཏནཡེན ཏཾ དསྶེཏུཾ ‘‘ཨཊྛཀཐཱསུ ཝུཏྟེན ཝིདྷིནཱ’’ཏིཨཱདིམཱཧ. ཏཏྠ ཨུགྒཎྷནྟོཏི ཨུགྒཎྷནཧེཏུ. ཨེཀོཏི ཨཡཾ ཨེཀ-སདྡོ ཨསཧཱཡཏྠོ, ན ཨཉྙཱདིཨཏྠོཏི ‘‘ཨདུཏིཡོ’’ཏི ཝུཏྟཾ. ཡཐཱ ཝཎྞཱདིཏོ ཝཝཏྠཱནཾ ཨེཀཾསཏོ སམུདིཏམེཝ ཨིཙྪིཏབྦཾ སབྦཏྠཀབྷཱཝཏོ, ན ཏཐཱ སནྡྷིཨཱདིཏོཏི དསྶནཏྠཾ ‘‘ཝཎྞཏོཔཱི’’ཏིཨཱདིནཱ ཚསུ ཋཱནེསུ སམྤིཎྜནཏྠོ པི-སདྡོ གཧིཏོ. པུན ཨེཀོ ཨདུཏིཡོཏིཨཱདི གཧིཏནིམིཏྟསྶ ཡོགིནོ ནིཝཏྟིཏྭཱ ཝསནཊྛཱནགམནཾ སནྡྷཱཡ ཝུཏྟཾ. ཏབྦྷཱགིཡཉྙེཝཱཏི ཏཔྤཀྑིཡཾཡེཝ ཨསུབྷནིམིཏྟམནསིཀཱརསཧིཏམེཝ. ཨཱསནཾ པཉྙཔེཏཱིཏི ནིསཛྫཾ ཀཔྤེཏི. ཡཾ པན ‘‘ཨསུབྷནིམིཏྟདིསཱབྷིམུཁེ བྷཱུམིཔྤདེསེ’’ཏི (ཝིསུདྡྷི. ༡.༡༡༣) ཝཀྑཏི, ཏམྤི ཨིམམེཝཏྠཾ སནྡྷཱཡ ཝུཏྟཾ. ན ཧི ཀེཝལེན དིསཱབྷིམུཁབྷཱཝེན ཀིཉྩི ཨིཛ྄ཛྷཏི.

སམནྟཱ ནིམིཏྟུཔལཀྑཎཱཏི ཨུདྡྷུམཱཏཀསྶ སམནྟཱ པཱསཱཎཱདིནིམིཏྟསལླཀྑཎཱ. ཨསམྨོཧཏྠཱཏི ཨུགྒཧནིམིཏྟེ ཨུཔཊྛིཏེ ཨུཔྤཛྫནཀསམྨོཧཝིགམཏྠཱ. ཨེཀཱདསཝིདྷེནཱཏི ཝཎྞཱདིཝསེན ཨེཀཱདསཝིདྷེན. ཨུཔནིབནྡྷནཏྠོཏི ཨསུབྷཱརམྨཎེ ཙིཏྟཾ ཨུཔནེཏྭཱ ནིབནྡྷནཏྠོ. ཝཱིཐིསམྤཊིཔཱདནཏྠཱཏི ཀམྨཊྛཱནཝཱིཐིཡཱ སམྨདེཝ པཊིཔཱདནཏྠཱ. པུཉྙཀིརིཡཝཏྠུ ཨདྷིགཏཾ ཧོཏཱིཏི སམྦནྡྷོ.

༡༠༦. ཏསྨཱཏི ཡསྨཱ ཨསུབྷནིམིཏྟསྶ ཨུགྒཎྷནཾ ཨརིཡམགྒཔདཊྛཱནསྶ པཋམཛ྄ཛྷཱནསྶ ཨདྷིགམུཔཱཡོ, ཡསྨཱ ཝཱ ‘‘ཨསུབྷནིམིཏྟཾ ཨུགྒཎྷནྟོ ཨེཀོ ཨདུཏིཡོ གཙྪཏཱི’’ཏི ཝུཏྟཾ, ཏསྨཱ. ཙིཏྟསཉྙཏྟཏྠཱཡཱཏི སརཱིརསབྷཱཝསལླཀྑཎེན, སཾཝེགཛནནེན ཙ ཨཏྟནོ ཙིཏྟསྶ སཉྙཏྟིཨཏྠཾ སཉྙཱཔནཏྠཾ. ‘‘ཙིཏྟསཉྙཏཏྠཱཡཱ’’ཏི ཝཱ པཱཋོ, ཀིལེསཝསེན ཨསཾཡཏསྶ ཙིཏྟསྶ སཾཡམནཏྠཾ དམནཏྠཾ, ན ཀམྨཊྛཱནཏྠནྟི ཨཏྠོ. ཀམྨཊྛཱནསཱིསེནཱཏི ཀམྨཊྛཱནེན སཱིསབྷཱུཏེན, ཏཾ ཨུཏྟམངྒཾ པདྷཱནཾ ཀཱརཎཾ ཀཏྭཱ. མཱུལཀམྨཊྛཱནནྟི པཀཏིཡཱ ཨཏྟནཱ ཀཱལེན ཀཱལཾ པརིཧརིཡམཱནཾ བུདྡྷཱནུསྶཏིཨཱདིསབྦཏྠཀཀམྨཊྛཱནཾ. ‘‘ཀམྨཊྛཱནསཱིསེན གཙྪཱམཱི’’ཏི ཏཾ ཨཝིསྶཛྫེཏྭཱ. ཏེནཱཧ ‘‘ཏཾ མནསིཀརོནྟེནེཝཱ’’ཏི. སཱུཔཊྛིཏབྷཱཝསམྤཱདནེནཱཏི མཱུལཀམྨཊྛཱནེ སུཊྛུ ཨུཔཊྛིཏབྷཱཝསྶ སམྤཱདནེན. ཨེཝཾ ¶ ཧི སཏི ཨསམྨུཊྛཱ ནཱམ ཧོཏི. བཧིདྡྷཱ ¶ པུཐུཏྟཱརམྨཎེ ཨཔྤཝཏྟིཏྭཱ ཀམྨཊྛཱནེཡེཝ པཝཏྟམཱནཾ མཱནསཾ ཨབཧིགཏཾ ནཱམ. ཏཐཱབྷཱུཏེན ཙཱནེན རཱུཔིནྡྲིཡཱནི ཨཔྤཝཏྟཀིཙྩཱནི ཀཏཱནི ཧོནྟཱིཏི ཨཱཧ ‘‘མནཙྪཊྛཱནཾ…པེ… གནྟབྦ’’ནྟི.

དྭཱརཾ སལླཀྑེཏབྦནྟི ཝིཧཱརེ པུརཏྠིམཱདཱིསུ དིསཱསུ ཨསུཀདིསཱཡ ཨིདཾ དྭཱརཾ, ཏཏོ ཨེཝ ཏཱཡ དིསཱཡ སལླཀྑིཏེན ཨསུཀདྭཱརེན ནིཀྑནྟོམྷཱིཏི དྭཱརཾ ཨུཔདྷཱརེཏབྦཾ. ཏཏོཏི དྭཱརསལླཀྑཎཏོ པཙྪཱ. ཡེན མགྒེན གཙྪཏི སཡཾ. ནིམིཏྟཊྛཱནནྟི ཨསུབྷནིམིཏྟསྶ གཎྷནཊྛཱནཾ. ཨཱཧཱརཾ ཚཌྜཱཔེཡྻཱཏི ཝམནཾ ཀཱརཱཔེཡྻ. ཀཎྚཀཊྛཱནནྟི ཀཎྚཀཝནྟཾ ཋཱནཾ.

༡༠༧. དིསཱ ཝཝཏྠཔེཏབྦཱཏི སངྑེཔཏོ ཝུཏྟམཏྠཾ ཝིཝརིཏུཾ ‘‘ཨེཀསྨིཾ ཧཱི’’ཏིཨཱདི ཝུཏྟཾ. ཁཱཡཏཱིཏི ཨུཔཊྛཱཏི. ཀམྨནིཡནྟི བྷཱཝནཱཡ ཀམྨཀྑམཾ. ཨུབྦཱལ༹ྷསྶཱཏི བཱདྷིཏསྶ. ཝིདྷཱཝཏཱིཏི ནཱནཱརམྨཎེ ཝིསརཏི. ཨུཀྐམྨཱཏི ཨུཛུཀཾ ཨནུཝཱཏཏོ ཨཔཀྐམྨ. མཏཀལེ༹ཝརཾ པུཐུཛྫནསྶ ཡེབྷུཡྻེན བྷཡཏོ ཨུཔཊྛཱཏཱིཏི ཨཱཧ ‘‘ཨཙྩཱསནྣེ བྷཡམུཔྤཛྫཏཱི’’ཏི. ཨནུཔཱདནྟི པཱདསམཱིཔཾ. ཡཏྠ ཋིཏསྶ སུཁེན ཨོལོཀེཏུཾ སཀྐཱ, ཏཾ ཨོལོཀེནྟསྶ ཕཱསུཀཊྛཱནཾ.

༡༠༨. སམནྟཱཏི སམནྟཏོ. པུན སམནྟཱཏི སཱམནྟཱ སམཱིཔེ. ཀཙྪཀོཏི ཀཱལ༹ཀཙྪཀོ, ‘‘པིལཀྑོ’’ཏིཔི ཝདནྟི. ཀཔཱིཏནོཏི པིཔྤལིརུཀྑོ. སིནྡཱིཏི ཁུདྡཀཁཛྫུརཱི. ཀརམནྡཱདཡོ པཱཀཊཱ ཨེཝ. སཱམཱཏི སཱམལཏཱ. ཀཱལ༹ཝལླཱིཏི ཀཱལ༹ཝཎྞཱ ཨཔཏྟིཀཱ ཨེཀཱ ལཏཱཛཱཏི. པཱུཏིལཏཱཏི ཛཱིཝནཝལླི, ཡཱ ‘‘གལོཙཱི’’ཏི ཝུཙྩཏི.

༡༠༩. ཏཾ ནིམིཏྟཀརཎཱདི ཨིདྷེཝ ཡཐཱཝུཏྟེ པཱསཱཎཱདིནིམིཏྟཀརཎེ ཨེཝ ཨནྟོགདྷཾ པརིཡཱཔནྣཾ. སནིམིཏྟཾ ཀརོཏཱིཏི སཧ ནིམིཏྟཾ ཀརོཏི, ཨསུབྷཾ པཱསཱཎཱདིནིམིཏྟེན སཧ ཀརོཏི ཝཝཏྠཔེཏི. ཨཐ ཝཱ ཨསུབྷནིམིཏྟཾ, པཱསཱཎཱདིནིམིཏྟཉྩ སཧ ཨེཀཛ྄ཛྷཾ ཀརོནྟོ ཝཝཏྠཔེནྟོ ‘‘སནིམིཏྟཾ ཀརོཏཱི’’ཏི ཝུཏྟོ. སམཱནཀཱལཏཱདཱིཔཀེན ཧི སཧ-སདྡེན ཨཡཾ སམཱསོ ཡཐཱ ‘‘སཙཀྐཾ དེཧཱི’’ཏི. ཏཡིདཾ ནིམིཏྟཀརཎཾ ཨཔརཱཔརཾ སལླཀྑཎེན ¶ ཧོཏི, ན ཨེཀཝཱརམེཝཱཏི ཨཱཧ ‘‘པུནཔྤུནཾ ཝཝཏྠཔེནྟོ ཧི སནིམིཏྟཾ ཀརོཏཱི’’ཏི. དྭེཏི པཱསཱཎཱསུབྷནིམིཏྟཱནི. སམཱསེཏྭཱ སངྒཧེཏྭཱ ཨེཀཛ྄ཛྷཾ ཀཏྭཱ. སཱརམྨཎནྟི ཨསུབྷཱརམྨཎེན སདྡྷིཾ པཱསཱཎཱདིཾ སམཱནཱརམྨཎཾ ཀརོཏི, སཧ ཝཱ ཨཱརམྨཎཾ ཀརོཏི, ཨེཀཱརམྨཎཾ ཝིཡ ཨུབྷཡཾ ¶ ཨཱརམྨཎཾ ཀརོཏི, ཨེཀཛ྄ཛྷཾ ཝིཡ ཙ ཨཔརཱཔརཾ སལླཀྑེནྟོ པཱསཱཎཱདིཾ, ཨསུབྷནིམིཏྟཉྩཱཏི དྭཡཾ ཨཱརམྨཎཾ ཀརོཏཱིཏི ཨཏྠོ.

ཨཏྟནིཡོཏི སཀོ. ཝཎིཏནྟི སཱུནཾ. སབྷཱཝེན སརསེནཱཏི ཨུདྡྷུམཱཏཀབྷཱཝསངྑཱཏེན ཨཏྟནོ ལཀྑཎེན, པརེསཾ ཛིགུཙྪུཔྤཱདནསངྑཱཏེན ཨཏྟནོ ཀིཙྩེན ཙ, སབྷཱཝོ ཨེཝ ཝཱ ཏཐཱ ནིཔྥཛྫནཏོ ‘‘རསོ’’ཏི ཝུཏྟོ.

༡༡༠. ཚབྦིདྷེན ནིམིཏྟཾ གཧེཏབྦནྟི ཝཎྞཱདིནཱ ཚཔྤཀཱརེན ཏཱཝ ཨུདྡྷུམཱཏཀཨསུབྷནིམིཏྟཾ གཧེཏབྦཾ. ཀེཙི ‘‘ཀལེ༹ཝརསྶ དཱིགྷརསྶཱདིཔྤམཱཎེན སདྡྷིཾ སཏྟཝིདྷེནཱ’’ཏི ཝདནྟི, ཏཾ ཨཊྛཀཐཱཡཾ ནཏྠི. ལིངྒཏོཏི ཨེཏྠ ལིངྒཾ ནཱམ ཝཡོ ལིངྒཾ, ན ཐནམསྶུཨཱདི ཨིཏྠིཔུརིསལིངྒནྟི དསྶེནྟེན ‘‘ཨིཏྠིལིངྒཾ ཝཱ’’ཏིཨཱདི ཝུཏྟཾ. ཋིཏསྶ སཏྟསྶ ཨིདཾ སརཱིརནྟི སམྦནྡྷོ. ཨུདྡྷུམཱཏཀསཎྛཱནཝསེནེཝ, ན པཱཀཏིཀསཎྛཱནཝསེན. ཨེཏེན ཡདི ཏཏྠ ཀོཙི ཨནུདྡྷུམཱཏཀབྷཱཝཔྤཏྟོ པདེསོ སིཡཱ, སོ ན གཧེཏབྦོཏི དསྶེཏི. ཨོལཱ༹རིཀཱཝཡཝཝསེན ཨིདཾ སཎྛཱནཝཝཏྠཱནཾ, ན སུཁུམཱཝཡཝཝསེནཱཏི སཱིསསཎྛཱནཱདིཀཾ ནཝཝིདྷམེཝ སཎྛཱནཾ གཧིཏཾ.

ཨིམིསྶཱ དིསཱཡཱཏི ཨིམིསྶཱ པུརཏྠིམཱཡ, དཀྑིཎཔཙྪིམཨུཏྟརཱཡ དིསཱཡ, ཨནུདིསཱཡ ཝཱ ཋིཏོཏི ཡོཛནཱ. ཨིམསྨིཾ ནཱམ ཨོཀཱསེ ཧཏྠཱཏི ཨིམསྨིཾ ནཱམ བྷཱུམིཔྤདེསེ ཨིམསྶ ཀལེ༹ཝརསྶ ཧཏྠཱ ཋིཏཱཏི ཝཝཏྠཔེཏབྦནྟི ཡོཛནཱ.

ཨདྷོ པཱདཏལེནཱཏིཨཱདི ནཱབྷིཡཱ ཧེཊྛཱ ཨདྷོ, ཏཏོ ཨུདྡྷཾ ཨུཔརཱིཏི ཨིམསྶ ཝཝཏྠཱནསྶ ཝསེན ཝུཏྟཾ. ཧཏྠཔརིཙྪེདོ ཧེཊྛཱ ཨངྒུལིཨགྒེན ཨུཔརི ཨཾསཀཱུཊསནྡྷིནཱ ཏིརིཡཾ ཏཙཔརིཡནྟེན གཧེཏབྦོ. ཨེས ནཡོ པཱདཔརིཙྪེདཱདཱིསུཔི. ཡཏྟཀཾ ཝཱ པན ཋཱནཾ གཎྷཏཱིཏི སཙེ སབྦཾ སརཱིརཾ པརིཙྪིནྡིཏྭཱ གཧེཏུཾ ན སཀྐོཏི, པདེསོ ཏསྶ ཨུདྡྷུམཱཏོ, སོ ¶ ཡཏྟཀཾ སརཱིརཔྤདེསཾ ཨུདྡྷུམཱཏཀཝསེན ཉཱཎེན པརིགྒཎྷཱཏི, ཏཏྟཀམེཝ ཡཐཱཔརིགྒཧིཏམེཝ. ཨིདཾ ཨཱིདིསནྟི ཨིདཾ ཧཏྠཱདིཀཾ ཨཱིདིསཾ ཨེཝམཱཀཱརཾ. ཨུདྡྷུམཱཏཀནྟི ཡཐཱསབྷཱཝཏོ པརིཙྪིནྡིཏབྦཾ. ཝིསབྷཱགེ སརཱིརེ ཨཱརམྨཎནྟི ཀམྨཊྛཱནཾ པཊིཀྐཱུལཱཀཱརོ ན ཨུཔཊྛཱཏི ན ཁཱཡཏི, སུབྷཏོ ཨུཔཊྛཧེཡྻ. ཏེནཱཧ ‘‘ཝིཔྥནྡནསྶེཝ པཙྩཡོ ཧོཏཱི’’ཏི, ཀིལེསཔརིཔྥནྡནསྶེཝ ནིམིཏྟཾ ཧོཏཱིཏི ཨཏྠོ. ཨུགྒྷཱཊིཏཱཔཱིཏི ¶ ཨུདྡྷུམཱཏབྷཱཝཔྤཏྟཱཔི, སབྦསོ ཀུཐིཏསརཱིརཱཔཱིཏི ཝཱ ཨཏྠོ. སྭཱཡམཏྠོ པཋམཔཱརཱཛིཀེ (པཱརཱ. ༦༧ ཨཱདཡོ) ཝིནཱིཏཝཏྠཱུཧི དཱིཔེཏབྦོ.

༡༡༡. ཨཱསེཝིཏཀམྨཊྛཱནོཏི ཨསུབྷཀམྨཊྛཱནེ ཀཏཔརིཙཡོ. སོསཱནིཀངྒཱདཱིནཾ ཝསེན པརིཧཏདྷུཏངྒོ. ཙཏུདྷཱཏུཝཝཏྠཱནཝསེན པརིམདྡིཏམཧཱབྷཱུཏོ. སལཀྑཎཏོ ཉཱཎེན པརིགྒཧིཏསངྑཱརོ. པཙྩཡཔརིགྒཧཝསེན ཝཝཏྠཱཔིཏནཱམརཱུཔོ. སལཀྑཎཱརམྨཎིཀཝིཔསྶནཱཡ ཨུཀྐཾསནེན སུཉྙཏཱནུཔསྶནཱབལེན ཨུགྒྷཱཊིཏསཏྟསཉྙོ. ཝིཔསྶནཱཡ པཊིཔདཱཉཱཎདསྶནཝིསུདྡྷིསམྤཱཔནེན ཀཏསམཎདྷམྨོ. ཏཏོ ཨེཝ སབྦསོ ཀུསལཝཱསནཱཡ, ཀུསལབྷཱཝནཱཡ ཙ པཱུརཎེན ཝཱསིཏཝཱསནོ བྷཱཝིཏབྷཱཝནོ. ཝིཝཊྚཱུཔནིསྶཡཀུསལབཱིཛེན སབཱིཛོ. ཉཱཎསྶ པརིཔཀྐབྷཱཝེན ཉཱཎུཏྟརོ. ཡཐཱཝུཏྟཱཡ པཊིཔཏྟིཡཱ ཀིལེསཱནཾ ཏནུཀརཎེན ཨཔྤཀིལེསོ. ཨོལོཀིཏོལོཀིཏཊྛཱནེཡེཝཱཏི ཨུདྡྷུམཱཏཀཱདིཨསུབྷསྶ ཡཏྠ ཡཏྠ ཨོལོཀིཏོལོཀིཏཊྛཱནེ ཨེཝ, ཏཱདིསསྶ ཀཱལཝིསེསོ, ཨསུབྷསྶ པདེསཝིསེསོ ཝཱ ཨཔེཀྑིཏབྦོ ནཏྠཱིཏི ཨཏྠོ. ནོ ཙེ ཨེཝཾ ཨུཔཊྛཱཏཱིཏི ཨེཝཾ ཡཐཱཝུཏྟཔུརིསཝིསེསསྶ ཝིཡ པཊིབྷཱགནིམིཏྟཾ ནོ ཙེ ཨུཔཊྛཱཏི. ཨེཝཾ ཚབྦིདྷེནཱཏི ཨེཝཾ ཝུཏྟཱཀཱརེན ཝཎྞཱདིཝསེན ཚབྦིདྷེན. པུནཔཱིཏི པི-སདྡོ སམྤིཎྜནཏྠོ. ཏེན ནིམིཏྟགྒཧཎཝིདྷིཾ སམྤིཎྜེཏི, ན པཉྩཝིདྷཏཾ. ཚབྦིདྷེན ཧི པུབྦེ ནིམིཏྟགྒཧཎཾ ཝིཧིཏཾ.

༡༡༢. ཨསཱིཏིསཏསནྡྷིཏོཏི སབྦེཔི སནྡྷཡོ ཏདཱཔི ཨཏྠེཝཱཏི དསྶནཏྠཾ ཝཏྭཱ ཨུདྡྷུམཱཏབྷཱཝེན ཡེབྷུཡྻེན ན པཉྙཱཡནྟི. ཡེ པན པཉྙཱཡནྟི, ཏེ ཝཝཏྠཔེཏབྦཱཏི དསྶེཏུཾ ‘‘ཨུདྡྷུམཱཏཀེ པནཱ’’ཏིཨཱདི ཝུཏྟཾ. ཏཏྠ ཏཡོ དཀྑིཎཧཏྠསནྡྷཱིཏི ཨཾསཀཔྤརམཎིབནྡྷཱནཾ ཝསེན ¶ ཏཡོ དཀྑིཎཧཏྠསནྡྷཡོ. ཏཐཱ ཝཱམཧཏྠསནྡྷཡོ. ཀཊིཛཎྞུགོཔྥཀཱནཾ ཝསེན ཏཡོ དཀྑིཎཔཱདསནྡྷཡོ. ཏཐཱ ཝཱམཔཱདསནྡྷཡོ. ཨེཀོ ཀཊིསནྡྷཱིཏི ཀཊིཡཱ སདྡྷིཾ པིཊྛིཀཎྚཀསནྡྷིཾ སནྡྷཱཡ ཝདཏི. ཧཏྠནྟརནྟི དཀྑིཎཧཏྠདཀྑིཎཔསྶཱནཾ, ཝཱམཧཏྠཝཱམཔསྶཱནཉྩ ཨནྟརཾ ཝིཝརཾ. པཱདནྟརནྟི ཨུབྷིནྣཾ པཱདཱནཾ ཝེམཛ྄ཛྷཾ. ཨུདརནྟརནྟི ནཱབྷིཊྛཱནསཉྙིཏཾ ཀུཙྪིཝེམཛ྄ཛྷཾ, ཨུདརསྶ ཝཱ ཨབྦྷནྟརཾ. ཀཎྞནྟརནྟི ཀཎྞཚིདྡཾ. ཨིཏི-སདྡོ ཨཱདིཨཏྠོ, ཏེན ནཱསཙྪིདྡཱདཱིནམྤི སངྒཧོ དཊྛབྦོ. ཨཀྑཱིནཾ, མུཁསྶ ཙ ཝསེནཱཔི ཝིཝརཾ ལབྦྷཏེཝཱཏི དསྶེཏུཾ ‘‘ཨཀྑཱིནམྤཱི’’ཏིཨཱདི ཝུཏྟཾ. སམནྟཏོཏི ཨེཝཾ སནྡྷིཨཱདིཏོ ཨུདྡྷུམཱཏཀཾ ཝཝཏྠཔེནྟསྶ ཙེ ནིམིཏྟཾ ཨུཔཏིཊྛཏི, ཨིཙྩེཏཾ ཀུསལཾ. ནོ ཙེ, སམནྟཏོ ཝཝཏྠཔེཏབྦནྟི ཝཝཏྠཱཔནཝིདྷིཾ དསྶེཏུཾ ‘‘སཀལསརཱིརེ’’ཏིཨཱདི ཝུཏྟཾ. ཏཏྠ ཉཱཎཾ ཙཱརེཏྭཱཏི སབྦཏྠཀམེཝ སརཱིརཾ ¶ ཨཱཝཛྫེཏྭཱ ཏཏྠ པཊིཀྐཱུལཱཀཱརསཧིཏཾ ཨུདྡྷུམཱཏཀབྷཱཝཾ ཨཱརབྦྷ ནིརནྟརཾ བྷཱཝནཱཉཱཎཾ པཝཏྟེཏྭཱ. ཡཾ ཋཱནནྟི ཨེཝཾ པན ཉཱཎཾ ཙཱརེནྟསྶ ཏསྨིཾ སརཱིརེ ཡོ པདེསོ ཝིབྷཱུཏོ ཧུཏྭཱ ཨུདྡྷུམཱཏཀཱཀཱརེན ཝིབྷཱུཏབྷཱཝེན ཨུཔཊྛཱཏི. ཨུདརཔརིཡོསཱནཾ ཨུཔརིམསརཱིརཾ.

ཝིནིཙྪཡཀཐཱཝཎྞནཱ

༡༡༣. ཝིནིཙྪཡཀཐཱཏི ཝིནིཙྪཡསཧིཏཱ ཨཏྠཝཎྞནཱ. ཡཐཱཝུཏྟནིམིཏྟགྒཱཧཝསེནཱཏི ཝཎྞཱདིཏོ, སནྡྷིཨཱདིཏོ ཙ ཝུཏྟཔྤཀཱརཨུདྡྷུམཱཏཀནིམིཏྟགྒཧཎཝསེན. སུཊྛུ ནིམིཏྟཾ གཎྷིཏབྦནྟི ཡཐཱ ཨུགྒཧནིམིཏྟཾ ཨུཔཊྛཧཏི, ཨེཝཾ སམྨདེཝ ཨསུབྷནིམིཏྟཾ གཧེཏབྦཾ. ཨིདཱནི ཏམེཝ ནིམིཏྟསྶ སུཊྛུ གཧཎཱཀཱརཾ ཨུཔདིསནྟོ ‘‘སཏིཾ སཱུཔཊྛིཏཾ ཀཏྭཱ’’ཏིཨཱདིམཱཧ. ཏཏྠ ཨེཝཾ པུནཔྤུནཾ ཀརོནྟེནཱཏི ཡཐཱ ‘‘ཨིམཱཡ པཊིཔདཱཡ ཛརཱམརཎཏོ མུཙྩིསྶཱམཱི’’ཏི སཉྫཱཏཱདརེན སཏིསམྤཛཉྙཉྩ སུཊྛུ ཨུཔཊྛཔེཏྭཱ ཨུདྡྷུམཱཏཀཨསུབྷཾ པཋམཾ ཨཱཝཛྫིཏཾ, ཨེཝཾ པུནཔྤུནཾ ཏཏྠ ཨཱཝཛྫནཾ ཀརོནྟེན. སཱདྷུཀཾ ཨུཔདྷཱརེཏབྦཉྩེཝ ཝཝཏྠཔེཏབྦཉྩཱཏི སཀྐཙྩཾ སཏིཡཱ སལླཀྑེཏབྦཉྩེཝ པཉྙཱཡ ནིཙྪེཏབྦཉྩ. སཏི ཧི ‘‘དྷཱརཎཱ’’ཏི ནིདྡིཊྛཱ, དྷཱརཎཉྩེཏྠ སལླཀྑཎཾ. པཉྙཱ ‘‘པཝིཙཡོ’’ཏི (དྷ. ས. ༡༦) ནིདྡིཊྛཱ, པཝིཙཡོ ཙེཏྠ ནིཙྪཡོཏི. ཨཐ ཝཱ ཨུཔདྷཱརེཏབྦནྟི སཏིཔུབྦངྒམཱཡ པཉྙཱཡ ཨུཔལཀྑེཏབྦཾ ¶ . ན ཧི ཀདཱཙི སཏིརཧིཏཱ པཉྙཱ ཨཏྠི. ཝཝཏྠཔེཏབྦནྟི པཉྙཱཔུབྦངྒམཱཡ སཏིཡཱ ནིཙྪིནིཏབྦཾ. པཉྙཱསཧིཏཱ ཨེཝ ཧི སཏི ཨིདྷཱདྷིཔྤེཏཱ, ན ཏབྦིརཧིཏཱ. ཨདྡྷཀྑིཨཔངྒཱདིཝསེནཱཔི ཨོལོཀནཾ ཨཏྠཱིཏི ‘‘ཨུམྨཱིལེཏྭཱ ཨོལོཀེཏྭཱ’’ཏི ཝུཏྟཾ. ཏེན པརིབྱཏྟམེཝ ཨོལོཀནཾ དསྶེཏི. ཨེཝཾ པུནཔྤུནཾ ཀརོནྟསྶཱཏི ཝུཏྟཔྤཀཱརེན ཙཀྑུཾ ཨུམྨཱིལེཏྭཱ ཨོལོཀནཾ, ནིམྨཱིལེཏྭཱ ཨཱཝཛྫནཉྩ ཨཔརཱཔརཾ ཨནེཀཝཱརཾ ཀརོནྟསྶ. ཨུགྒཧནིམིཏྟནྟི ཨུདྡྷུམཱཏཀེ ཨུགྒཎྷནནིམིཏྟཾ. སུགྒཧིཏནྟི སུཊྛུ གཧིཏཾ. ཡཐཱ ན ཝིནསྶཏི ན པམུཊྛཾ ཧོཏི, ཨེཝཾ གཧིཏཾ. ཨེཀསདིསནྟི སམཱནསདིསཾ. སམཱནཏྠོ ཧི ཨཡཾ ཨེཀ-སདྡོ, ཡཐཱ ‘‘ཨརིཡཝིནཡེཏི ཝཱ, སཔྤུརིསཝིནཡེཏི ཝཱ, ཨེསེསེ ཨེཀེ ཨེཀཊྛེ སམེ སམབྷཱགེ ཏཛྫཱཏེ ཏཉྙེ ཝཱ’’ཏི.

ཨཱགམནཀཱལེཏི ཝིཧཱརཏོ སུསཱནཾ ཨུདྡིསྶ ཨཱགམནཀཱལེ. ཝུཏྟནཡེནེཝཱཏི ཨཏིདེསཝསེན དཱིཔིཏམྤི ཨཏྠཾ ‘‘ཨེཀཀེནཱ’’ཏིཨཱདིནཱ སརཱུཔཏོ དསྶེཏི. ཏཏྠ ཏདེཝ ཀམྨཊྛཱནནྟི ཨུདྡྷུམཱཏཀཀམྨཊྛཱནཾ. མཱུལཀམྨཊྛཱནནྟི ཨེཀེ, ཏདཡུཏྟཾ. ཨུཔཊྛིཏནིམིཏྟཾ ཧི ཀམྨཊྛཱནཾ ཝིསྶཛྫེཏྭཱ ¶ ཀམྨཊྛཱནནྟརམནསིཀཱརོ རཉྙོ རཛྫཾ ཚཌྜེཏྭཱ ཝིདེསགམནཾ ཝིཡཱཏི. ཨཱགཏེནཱཏི ཨཏྟནོ ཝསནཊྛཱནཾ ཨཱགཏེན.

༡༡༤. ཨཝེལཱཡནྟི སཉྫྷཱཝེལཱདིཨཡུཏྟཝེལཱཡཾ. བཱིབྷཙྪནྟི ཝིརཱུཔཾ. བྷེརཝཱརམྨཎནྟི ཝེཏཱལ༹སདིསཾ བྷཡཱནཀཾ ཝིསཡཾ. ཝིཀྑིཏྟཙིཏྟོཏི བྷཱིརུཀཔུརིསོ ཝིཡ པིསཱཙཱདིཾ དིསྭཱ ཙིཏྟཝིཀྑེཔཾ པཏྟོ. ཨུམྨཏྟཀོ ཝིཡཱཏི ཡཀྑུམྨཏྟཀོ ཝིཡ ཨེཀཙྩོ ཧོཏི. ཛྷཱནཝིབྦྷནྟཀོཏི ཛྷཱནཏོ ཝིཙྩུཏཀོ སཱིལཝིབྦྷནྟཀམནྟཝིབྦྷནྟཀཱ ཝིཡ. སནྠམྦྷེཏྭཱཏི ཨུཔྤནྣཔརིཏྟཱསཝཱུཔསམནེན ཝིགཏཀམྤཏཱཡ ནིཙྩལོ ཧུཏྭཱ. སཏིཾ སཱུཔཊྛིཏནྟིཨཱདི སནྠམྦྷནསྶ ཨུཔཱཡདསྶནཾ. མཏསརཱིརཾ ཨུཊྛཧིཏྭཱ ཨནུབནྡྷནཀཾ ནཱམ ནཏྠི ཨསཏི ཏཱདིསེ མནྟཔྤཡོགེ. སོཔི ཨུདྡྷུམཱཏཀཱདིབྷཱཝམཔྤཏྟེ ཨཝིནཊྛརཱུཔེ ཨེཝ ཨིཛ྄ཛྷཏི, ཏཐཱ དེཝཏཱདྷིགྒཧོ, ན ཨེཝརཱུཔེཏི ཨདྷིཔྤཱཡོ. སཉྙཛོཏི བྷཱཝནཱཔརིཀཔྤསཉྙཱཡ ཛཱཏོ. ཏཏོ ཨེཝ སཉྙཱསམྦྷཝོ སཉྙཱམཏྟསམུཊྛཱནོ. ཏཱསཾ ཝིནོདེཏྭཱཏི ནིམིཏྟུཔཊྛཱནནིམིཏྟཾ ཨུཔྤནྣཙིཏྟསནྟཱསཾ ཝུཏྟཔྤཀཱརེན ཝིནོདེཏྭཱ ཝཱུཔསམེཏྭཱ ¶ . ‘‘ཨིདཱནི ཏཝ པརིསྶམོ སཔྥལོ ཛཱཏོ’’ཏི ཧཱསཾ པཱིཏིཾ པམོདནཾ ཨུཔྤཱདེཏྭཱ. ཙིཏྟཾ སཉྩརཱཔེཏབྦནྟི བྷཱཝནཱཙིཏྟཾ པཝཏྟེཏབྦཾ མནསིཀཱཏབྦཾ.

ནིམིཏྟགྒཱཧནྟི ནིམིཏྟསྶ ཨུགྒཎྷནཾ, ཨུགྒཧནིམིཏྟཾ. སམྤཱདེནྟོཏི སཱདྷེནྟོ ནིཔྥཱདེནྟོ. ཀམྨཊྛཱནཾ ཨུཔནིབནྡྷཏཱིཏི བྷཱཝནཾ ཡཐཱཝུཏྟེ ནིམིཏྟེ ཨུཔནེནྟོ ནིབནྡྷཏི. ཡོགཀམྨཾ ཧི ཡོགིནོ སུཁཝིསེསཱནཾ ཀཱརཎབྷཱཝཏོ ‘‘ཀམྨཊྛཱན’’ནྟི ཨདྷིཔྤེཏཾ, ཡོགཀམྨསྶ ཝཱ པཝཏྟིཊྛཱནཏཱཡ ཡཐཱཨུཔཊྛིཏནིམིཏྟཾ ཀམྨཊྛཱནཾ, ཏཾ བྷཱཝནཱཙིཏྟེ ཨུཔནིབནྡྷཏི. ཏཾ པནསྶ ཨུཔནིབནྡྷནཾ སནྡྷཱཡ ཙིཏྟཾ སཉྩརཱཔེཏབྦཾ. ཨེཝཾ ‘‘ཝིསེསམདྷིགཙྪཏཱི’’ཏི ཝུཏྟནྟི དསྶེནྟོ ‘‘ཏསྶ ཧཱི’’ཏིཨཱདིམཱཧ. ཏཏྠ ཏསྶཱཏི ཡོགིནོ, ཏསྶ ཝཱ ཨུདྡྷུམཱཏཀཱསུབྷསྶ. མཱནསཾ ཙཱརེནྟསྶཱཏི བྷཱཝནཱཙིཏྟཾ ཨཔརཱཔརཾ པཝཏྟེནྟསྶ, ཨུགྒཧནིམིཏྟཾ པུནཔྤུནཾ མནསི ཀརོནྟསྶཱཏི ཨཏྠོ.

༡༡༥. ‘‘ཝཱིཐིསམྤཊིཔཱདནཏྠཱ’’ཏི པདསྶ ‘‘ཀམྨཊྛཱནཝཱིཐིཡཱ སམྤཊིཔཱདནཏྠཱ’’ཏི ཨཏྠཾ ཝཏྭཱ ཏཾ པན ཀམྨཊྛཱནཝཱིཐིཾ, ཏསྶཱ ཙ སམྤཊིཔཱདནཝིདྷིཾ ཝིཏྠཱརཏོ དསྶེཏུཾ ‘‘སཙེ ཧཱི’’ཏིཨཱདི ཝུཏྟཾ. ཏཏྠ ཀཏིམཱིཏི པཀྑསྶ ཀཏམཱི, ཀིཾ དུཏིཡཱ, ཏཏིཡཱདཱིསུ ཝཱ ཨཉྙཏརཱཏི ཨཏྠོ. ཏུཎྷཱིབྷཱུཏེན གནྟུཾ ན ཝཊྚཏི པུཙྪནྟཱནཾ ཙིཏྟསྶ ཨཉྙཐཏྟཔརིཧརཎཏྠཾ. ཨཔྤསནྣཱནཉྷི པསཱདཱཡ, པསནྣཱནཉྩ བྷིཡྻོབྷཱཝཱཡ སཱསནསམྤཊིཔཏྟི. ནསྶཏཱིཏི ན དིསྶཏི ¶ , ན ཨུཔཊྛཱཏཱིཏི ཨཏྠོ. ‘‘ཨཱགནྟུཀཔཊིསནྠཱརོ ཀཱཏབྦོ’’ཏི ཨིམིནཱ ཨཱགནྟུཀཝཏྟཾ ཨེཀདེསེན དསྶིཏནྟི ‘‘ཨཝསེསཱནིཔཱི’’ཏི ཝཏྭཱ ཨཱགནྟུཀཝཏྟཾ པརིཔུཎྞཾ གཧེཏུཾ པུན ཨཱགནྟུཀགྒཧཎཾ ཀཏཾ. གམིཀཝཏྟཱདཱིནཱིཏི ཨཱདི-སདྡེན ཨཱཝཱསིཀཨནུམོདནཔིཎྜཙཱརིཀཨནུམོདནཔིཎྜཙཱརིཀཨཱརཉྙིཀསེནཱསནཝཙྩཀུཊིཝཏྟཱདཱིནཾ སངྒཧོ དཊྛབྦོ. ཝཏྟཀྑནྡྷཀེ (ཙཱུལ༹ཝ. ༣༥༦) ཧི ཨཱགཏཱནི མཧཱཝཏྟཱནི ཨིདྷ ‘‘ཁནྡྷཀཝཏྟཱནཱི’’ཏི ཝུཏྟཱནི. ཏཛྫནཱིཡཀམྨཀཏཱདིཀཱལེ པན པཱརིཝཱསིཀཱདིཀཱལེ ཙ ཙརིཏབྦཱནི ཨིམསྶ བྷིཀྑུནོ ཨསམྦྷཝཏོ ཨིདྷ ནཱདྷིཔྤེཏཱནི. ནིམིཏྟཾ ཝཱ ཨནྟརདྷཱཡཏཱིཏི སུསཱནེ ཋིཏཾ ཨསུབྷནིམིཏྟཾ ཨུདྡྷུམཱཏཀབྷཱཝཱཔགམེན ཨནྟརདྷཱཡཏི. ཏེནཱཧ ‘‘ཨུདྡྷུམཱཏཀ’’ནྟིཨཱདི. ཏསྨཱཏི ཏེན ¶ ཀཱརཎེན, ཨིམསྶ ཀམྨཊྛཱནསྶ དུལླབྷཏྟཱཏི ཨཏྠོ. ནིསཱིདིཏྭཱ པཙྩཝེཀྑིཏབྦོཏི སམྦནྡྷོ.

ནིམིཏྟཾ གཧེཏུཾ གམནེ ཝིཡ ནིམིཏྟཾ གཧེཏྭཱ ནིཝཏྟནེཔི ཡཐཱསལླཀྑིཏདིསཱདིཔཙྩཝེཀྑཎཾ ཡཱཝ ནིམིཏྟཝིནཱསཱ པཝཏྟིཏཀིརིཡཱཡ ཨཝིཙྪེདེན ཨུཔདྷཱརཎཏྠཾ. སཏི ཧི ཏསྶ ནིརནྟརཱུཔདྷཱརཎེ ཝིཧཱརཾ པཝིསིཏྭཱ ནིསིནྣཀཱལེ ཀམྨཊྛཱནསྶ ཨུཔཊྛིཏཱཀཱརོ སམཐནིམིཏྟསྶ གཧཎེ ཙིཏྟསྶ སམཱཧིཏཱཀཱརོ ཝིཡ པཱཀཊོ ཧུཏྭཱ ཨུཔཏིཊྛེཡྻཱཏི. ཏེནཱཧ ‘‘ཏསྶེཝཾ…པེ… ཝཱིཐིཾ པཊིཔཛྫཏཱི’’ཏི. པུརིམཱཀཱརེན ནིམིཏྟསྶ པཱཀཊབྷཱཝེན ཨུཔཊྛིཏཏྟཱ པུརིམཱཀཱརེནེཝ ཀམྨཊྛཱནམནསིཀཱརོ བྷཱཝནཱཝཱིཐིཾ པཊིཔཛྫཏི.

༡༡༦. ཨུདྡྷུམཱཏཀཾ ནཱམ ཨཏིཝིཡ ཨསུཙིདུགྒནྡྷཛེགུཙྪཔཊིཀྐཱུལཾ བཱིབྷཙྪཾ བྷཡཱནཀཉྩ, ཨེཝརཱུཔེ ཨཱརམྨཎེ བྷཱཝནམནུཡུཉྫནྟསྶ ཨེཝཾ ཨཱབདྡྷཔརིཀམྨསྶ ཐིརཱིབྷཱུཏསྶེཝ ཡོགིནོ ཨདྷིཔྤཱཡོ སམིཛ྄ཛྷཏཱིཏི དསྶེཏུཾ ‘‘ཨཱནིསཾསདསྶཱཝཱི’’ཏིཨཱདི ཝུཏྟཾ. ཨེཝནྟི ཨེཝམེཝ ཝུཏྟཔྤཀཱརེནེཝ ཨཱནིསཾསདསྶཱཝིནཱ. ཏཾ རཀྑེཡྻཱཏི ‘‘ཨདྡྷཱ ཨིམིནཱ སུཁཾ ཛཱིཝིསྶཱམཱི’’ཏི ཨཏྟནོ ཛཱིཝིཏཾ ཝིཡ ཏཾ མཎིརཏནཾ རཀྑེཡྻ. ཙཏུདྷཱཏུཀམྨཊྛཱནིཀོཏིཨཱདི ནེསཾ ཀམྨཊྛཱནཱནཾ སུལབྷཏཱདསྶནཾ. ཏཏྠ ཙཏུདྷཱཏུཀམྨཊྛཱནིཀོཏི ཙཏུདྷཱཏུཀམྨཊྛཱནཾ ཝཱ ཏཏྠ ཝཱ ནིཡུཏྟོ, ཙཏུདྷཱཏུཀམྨཊྛཱནཾ ཝཱ པརིཧརནྟོ. ཨིཏརཱནཱིཏི ཝུཏྟཱཝསིཊྛཱནི ཨནུསྶཏིབྲཧྨཝིཧཱརཱདཱིནི. ཏཾ ནིམིཏྟནྟི ཏཾ ཡཐཱལདྡྷཾ ཨུགྒཧནིམིཏྟཾ. ‘‘རཀྑིཏབྦ’’ནྟི ཝཏྭཱ རཀྑཎཝིདྷིཾ པུན དསྶེཏུཾ ‘‘རཏྟིཊྛཱནེ’’ཏིཨཱདི ཝུཏྟཾ.

༡༡༧. ནཱནཱ ཀརཱིཡཏི ཨེཏེནཱཏི ནཱནཱཀརཎཾ, བྷེདོ. བཱིབྷཙྪཾ བྷེརཝདསྶནཾ ཧུཏྭཱ ཨུཔཊྛཱཏི མནསིཀཱརསྶ ¶ ཨནུལཱ༹རཏཱཡ, ཨནུཔསནྟཏཱཡ ཙ ཨཱརམྨཎསྶ. ཏབྦིཔརིཡཱཡཏོ ‘‘པཊིབྷཱགནིམིཏྟཾ ཐཱུལངྒཔཙྩངྒཔུརིསོ ཝིཡ ཨུཔཊྛཱཏཱི’’ཏི ཨཱནེཏྭཱ སམྦནྡྷིཏབྦཾ. བཧིདྡྷཱཏི གོཙརཛ྄ཛྷཏྟཏོ བཧིདྡྷཱ. ཀཱམཱནཾ ཨམནསིཀཱརཱཏི ཨསུབྷབྷཱཝནཱནུབྷཱཝེན ཀཱམསཉྙཱཡ དཱུརསམུསྶཱརིཏཏྟཱ ཀཱམགུཎེ ཨཱརབྦྷ མནསིཀཱརསྶེཝ ཨབྷཱཝཱ. ཨམནསིཀཱརཱཏི ཝཱ མནསིཀཱརཔཊིཔཀྑཧེཏུ. ཡཱཡ ཧི ཀཱམསཉྙཱཡ ཝསེན སཏྟཱ ཀཱམེ མནསི ཀརོནྟི, ཏསྶཱ པཊིཔཀྑབྷཱུཏཱ ཨསུབྷསཉྙཱ ཀཱམཱནཾ ཨམནསིཀཱརོ, ཏནྣིམིཏྟནྟི ཨཏྠོ. ཏེནཱཧ ¶ ‘‘ཝིཀྑམྦྷནཝསེན ཀཱམཙྪནྡོ པཧཱིཡཏཱི’’ཏི. པཊིབྷཱགནིམིཏྟཱརམྨཎཱཡ ཧི ཨསུབྷསཉྙཱཡ སདྡྷིཾ བལཔྤཏྟོ སམཱདྷི ཨུཔྤཛྫམཱནོཝ ཀཱམཙྪནྡཾ ཝིཀྑམྦྷེཏི, ཨནུརོདྷམཱུལཀོ ཨཱགྷཱཏོ མཱུལཀཱརཎེ ཝིཀྑམྦྷིཏེ ཝིཀྑམྦྷིཏོཡེཝ ཧོཏཱིཏི ཨཱཧ ‘‘ཨནུནཡ…པེ… པཧཱིཡཏཱི’’ཏི. ན ཧི ཀདཱཙི པཧཱིནཱནུནཡསྶ བྱཱཔཱདོ སམྦྷཝཏི. ཡཐཱཝུཏྟཨསུབྷསཉྙཱསཧགཏཱ ཧི པཱིཏི སཱཏིསཡཱ པཝཏྟམཱནཱཝ བྱཱཔཱདཾ ཝིཀྑམྦྷེནྟཱི པཝཏྟཏི. ཏཐཱ ཨཱརདྡྷཝཱིརིཡཏཱཡཱཏི ཡཐཱ ཨུཔཙཱརཛ྄ཛྷཱནཾ ཨུཔྤཛྫཏི, ཏཐཱ ཀམྨཊྛཱནམནསིཀཱརཝསེན པགྒཧིཏཝཱིརིཡཏཱཡ. ཝཱིརིཡཉྷི པགྒཎྷནྟསྶ སམྨཱསངྐཔྤོ མིཙྪཱསངྐཔྤཾ ཝིཡ སཝིཔྥཱརཏཱཡ ཐིནམིདྡྷཾ ཝིཀྑམྦྷེནྟམེཝ ཨུཔྤཛྫཏི.

ཝིཔྤཊིསཱརོ པཙྪཱནུཏཱཔོ, ཏཔྤཊིཔཀྑཏོ ཨཝིཔྤཊིསཱརོ དརཐཔརིལཱ༹ཧཱབྷཱཝེན ཙིཏྟསྶ ནིབྦུཏཏཱ. ཏསྶ ཨཝིཔྤཊིསཱརསྶ པཙྩཡབྷཱུཏཾ སཱིལཾ, ཏཾསཧགཏཱ ཏདུཔནིསྶཡཱ ཙ པཱིཏིཔསྶདྡྷིསུཁཱདཡོ སབྷཱཝཏོ, ཧེཏུཏོ ཙ སནྟསབྷཱཝཱ, ཏེསཾ ཨནུཡུཉྫནེན ཨཝཱུཔསནྟསབྷཱཝཾ ཨུདྡྷཙྩཀུཀྐུཙྩཾ པཧཱིཡཏཱིཏི ཨཱཧ ‘‘ཨཝིཔྤཊིསཱརཀརསནྟདྷམྨཱནུཡོགཝསེན ཨུདྡྷཙྩཀུཀྐུཙྩཾ པཧཱིཡཏཱི’’ཏི. བྷཱཝནཱཡ ཧི པུབྦེནཱཔརཾ ཝིསེསཾ ཨཱཝཧནྟིཡཱ ཡཾ སཱཏིསཡཾ སུཁཾ ལབྦྷཏི, ཏཾ ཨནུཔསནྟསབྷཱཝཾ ཨུདྡྷཙྩཀུཀྐུཙྩཾ ཝིཀྑམྦྷེནྟམེཝ ཨུཔྤཛྫཏི. ཨདྷིགཏཝིསེསསྶཱཏི ཡཐཱདྷིགཏསྶ བྷཱཝནཱཝིསེསསྶ. པཙྩཀྑཏཱཡཱཏི པཊིཔཛྫནྟསྶ ཡོགིནོ པཙྩཀྑབྷཱཝཏོ ‘‘སམྨཱསམྦུདྡྷོ ཝཏ སོ བྷགཝཱ, ཡོ ཨེཝརཱུཔིཾ སམྨཱཔཊིཔཏྟིཾ དེསེཏཱི’’ཏི པཊིཔཏྟིདེསཀེ སཏྠརི. པཊིཔཏྟིཡནྟི པཊིཔཛྫམཱནཛ྄ཛྷཱནཔཊིཔཏྟིཡཾ. པཊིཔཏྟིཕལེཏི ཏཱཡ སཱདྷེཏབྦེ ལོཀིཡལོཀུཏྟརཕལེ. ཝིཙིཀིཙྪཱ པཧཱིཡཏི དྷམྨནྭཡཝིཙཱརཱཧིཏབལེན ཝིཙཱརབལེན. ཨིཏི པཉྩ ནཱིཝརཎཱནི པཧཱིཡནྟཱིཏི ཨེཝཾ པཊིབྷཱགནིམིཏྟཔཊིལཱབྷསམཀཱལམེཝ ཧེཊྛཱ པཝཏྟབྷཱཝནཱནུབྷཱཝནིཔྥནྣེཧི སམཱདྷིཨཱདཱིཧི ཀཱམཙྪནྡཱདཱིནི པཉྩ ནཱིཝརཎཱནི ཝིཀྑམྦྷནཝསེན པཧཱིཡནྟི. ན ཧི པཊིཔཀྑེན ཝིནཱ པཧཱཏབྦསྶ པཧཱནཾ སམྦྷཝཏི, པཊིཔཀྑཱ ¶ ཙ སམཱདྷིཨཱདཡོ ཀཱམཙྪནྡཱདཱིནཾ. ཡཐཱཧ པེཊཀེ ‘‘སམཱདྷི ཀཱམཙྪནྡསྶ པཊིཔཀྑོ’’ཏིཨཱདི.

ཏེནེཝ ¶ ཙ ‘‘ཨིམེཧི ཏེསཾ ནཱིཝརཎཱནཾ པཧཱན’’ནྟི པཧཱནཔརིདཱིཔནམུཁེན ཛྷཱནངྒཱནི སརཱུཔཏོ དསྶེཏུཾ ‘‘ཏསྨིཉྙེཝ ཙཱ’’ཏིཨཱདི ཝུཏྟཾ. ཏཏྠ ཏསྨིཉྙེཝ ཙཱཏི ཡཾ ཏཾ ཡཐཱཨུཔཊྛིཏཾ ཨུགྒཧནིམིཏྟཾ བྷིནྡིཏྭཱ ཝིཡ ཨུཔཊྛིཏཾ, ཏསྶ པཊིཙྪནྣབྷཱུཏཾ པཊིབྷཱགནིམིཏྟཾ, ཏསྨིཉྙེཝ ནིམིཏྟེ. ཙེཏསོཏི ཨཏྟནཱ སམྤཡུཏྟཙིཏྟསྶ. ཨབྷིནིརོཔནལཀྑཎོཏི ཨཱརོཔནལཀྑཎོ, ཨཔྤནཱསབྷཱཝོཏི ཨཏྠོ. ནིམིཏྟཱནུམཛྫནཾ པཊིབྷཱགནིམིཏྟེ ཨནུཝིཙརཎཾ. ཨཱརམྨཎེ ཧི བྷམརསྶ པདུམསྶཱུཔརི ཨནུཔརིབྦྷམནཾ ཝིཡ ཝིཙཱརསྶ ཨནུཝིཙཱརཎཱཀཱརེན པཝཏྟི ཨནུམཛྫནཀིཙྩཾ. ཝིསེསོ ཨེཝ ཨདྷིགནྟབྦཏོ ཝིསེསཱདྷིགམོ, པཊིལདྡྷོ ཙ སོ ཝིསེསཱདྷིགམོ ཙཱཏི པཊི…པེ… གམོ, ཏཔྤཙྩཡཱ ཏཾཧེཏུཀཱ པཊིལདྡྷཝིསེསཱདྷིགམཔཙྩཡཱ པཱིཏི. པཱིཏིམནསྶ པཱིཏིསཧིཏཙིཏྟསྶ. པསྶདྡྷིསམྦྷཝཏོཏི ཀཱཡཙིཏྟཔསྶདྡྷཱིནཾ སཾསིཛ྄ཛྷནཏོ. ‘‘པཱིཏིམནསྶ ཀཱཡོ པསྶམྦྷཏཱི’’ཏི ཧི ཝུཏྟཾ. པསྶདྡྷིནིམིཏྟཾ པསྶདྡྷིཧེཏུཀཾ སུཁཾ ‘‘པསྶདྡྷཀཱཡོ སུཁཾ ཝེདིཡཏཱི’’ཏི ཝཙནཏོ. སུཁནིམིཏྟཱ སུཁཔཙྩཡཱ ཨེཀགྒཏཱ. ‘‘སུཁིནོ ཙིཏྟཾ སམཱདྷིཡཏཱི’’ཏི (དཱི. ནི. ༡.༤༦༦; ཨ. ནི. ༣.༩༦; ༡༡.༡༢) ཧི ཝུཏྟཾ. ཨིཏི ཛྷཱནངྒཱནི པཱཏུབྷཝནྟཱིཏི ཨེཝཾ ཨེཏཱནི ཝིཏཀྐཱདཱིནི ཛྷཱནངྒཱནི ཏསྨིཾཡེཝ ནིམིཏྟེ ཨུཔྤཛྫནྟི. པཋམཛ྄ཛྷཱནཔཊིབིམྦབྷཱུཏནྟི པཋམཛ྄ཛྷཱནསྶ པཊིཙྪནྣབྷཱུཏཾ. ཏངྑཎཉྙེཝ པཊིབྷཱགནིམིཏྟཔཊིལཱབྷསམཀཱལམེཝ ཨུཔཙཱརཛ྄ཛྷཱནམྤི ནིབྦཏྟཏི, ན ནཱིཝརཎཔྤཧཱནམེཝཱཏི ཨདྷིཔྤཱཡོ.

ཝིནཱིལཀཱདིཀམྨཊྛཱནཝཎྞནཱ

༡༡༨. ཝིནཱིལཀཱདཱིསུཔི ཀམྨཊྛཱནེསུ. ལཀྑཎཾ ཝུཏྟནྟི ཡཾ ཏཾ ནིམིཏྟགྒཧཎལཀྑཎཾ ཝུཏྟཾ. ཝུཏྟནཡེནེཝཱཏི ཨུདྡྷུམཱཏཀེ ཝུཏྟནཡེནེཝ. སཧ ཝིནིཙྪཡེན, ཨདྷིཔྤཱཡེན ཙཱཏི སཝིནིཙྪཡཱདྷིཔྤཱཡཾ. ཏཾ སབྦཾ ལཀྑཎཾ ཝེདིཏབྦནྟི སམྦནྡྷོ.

ཀབརཀབརཝཎྞནྟི ཡེབྷུཡྻེན སབལཝཎྞཾ. ཨུསྶདཝསེནཱཏི རཏྟསེཏནཱིལཝཎྞེསུ ཨུསྶདསྶ ཝཎྞསྶ ཝསེན.

སནྣིསིནྣནྟི ¶ ནིཙྩལབྷཱཝེནེཝ སབྦསོ ཐིརཏཾ.

ཙོརཱཊཝིཡནྟི ཙོརེཧི པརིཡུཊྛིཏཨརཉྙེ. ཡཏྠཱཏི ཡསྨིཾ ཨཱགྷཱཏནེ. ཚིནྣཔུརིསཊྛཱནེཏི ཚིནྣཔུརིསཝནྟེ ཋཱནེ. ནཱནཱདིསཱཡཾ པཏིཏམྤཱིཏི ¶ ཚིནྣཾ ཧུཏྭཱ སརཱིརསྶ ཁཎྜདྭཡཾ ཝིསུཾ དིསཱསུ པཏིཏམྤི. ཨེཀཱཝཛྫནེནཱཏི ཨེཀསམནྣཱཧཱརེན. ཨཱཔཱཐམཱགཙྪཏཱིཏི ཨེཀཛ྄ཛྷཾ ཨཱཔཱཐཾ ཨཱགཙྪཏི. ཝིསྶཱསཾ ཨཱཔཛྫཏཱིཏི ཨཛེགུཙྪིཏཾ ཨུཔགཙྪེཡྻ སེཡྻཐཱཔི ཚཝཌཱཧཀོ. སཧཏྠཱ ཨཔརཱམསནེ ཛིགུཙྪཱ སཎྛཱཏིཡེཝཱཏི ཨཱཧ ‘‘ཀཏྟརཡཊྛིཡཱ ཝཱ དཎྜཀེན ཝཱ…པེ… ཨུཔནཱམེཏབྦ’’ནྟི. ཝིཙྪིདྡཀབྷཱཝཔཉྙཱཡནཏྠཾ ཨེཀངྒུལནྟརཀརཎཾ. ཨུཔནཱམེཏབྦནྟི ཨུཔནེཏབྦཾ.

ཁཱཡིཏསདིསམེཝཱཏི ཁཱཡིཏཱསུབྷསདིསམེཝ. ཨངྒུལངྒུལནྟརནྟི ཝིཝིདྷཾ ཁིཏྟཾ སརཱིརཱཝཡཝཾ ཨངྒུལནྟརཾ ཨངྒུལནྟརཾ. ཀཏྭཱ ཝཱཏི ཀཏྟརཡཊྛིཡཱ ཝཱ དཎྜཀེན ཝཱ སཡཾ ཀཏྭཱ ཝཱ.

ལདྡྷཔྤཧཱརཱནནྟི ལདྡྷཱཝུདྷཔྤཧཱརཱནཾ མུཁཏོཏི སམྦནྡྷོ. མུཁཏོཏི པཧཱརཱདིམུཁཏོ. པགྒྷརམཱནཀཱལེཏི ལོཧིཏཾ པགྒྷརམཱནཀཱལེ. ལོཧིཏཀཾ ལབྦྷཏཱིཏི ཡོཛནཱ.

ཏནྟི པུལ༹ཝཀཾ. ཏེསཱུཏི སོཎཱདིསརཱིརེསུ. ཨཊྛིཀནྟི ཨཊྛིཀཨསུབྷཾ ནཱནཔྤཀཱརཏོ ཝུཏྟནྟི སམྦནྡྷོ. པུརིམནཡེནེཝཱཏི པུབྦེ ཨུདྡྷུམཱཏཀེ ཝུཏྟནཡེནེཝ.

༡༡༩. ཏནྟི ཨཊྛིཀཾ. ན ཨུཔཊྛཱཏཱིཏི སབྷཱཝཏོ ན ཨུཔཊྛཱཏི, པཊིཀྐཱུལཝསེན ན ཨུཔཊྛཱཏཱིཏི ཨཏྠོ. ཏེནཱཧ ‘‘ཨོདཱཏཀསིཎསམྦྷེདོ ཧོཏཱི’’ཏི. ཨཊྛིཀེ པཋམཝཡཱདིསཾལཀྑཎཾ ན སཀྐཱཏི ‘‘ལིངྒནྟི ཨིདྷ ཧཏྠཱདཱིནཾ ནཱམ’’ནྟི ཝུཏྟཾ. ཨཊྛིཀསངྑལིཀཱ པན ‘‘ཨཡཾ དཧརསྶ, ཨཡཾ ཡོབྦནེ ཋིཏསྶ, ཨཡཾ ཨཝཡཝེཧི ཝུདྡྷིཔཏྟིསྶཱ’’ཏི ཨེཝཾ ཝཡཝསེན ཝཝཏྠཔེཏུཾ སཀྐུཎེཡྻཱཝ, ཨབྱཱཔིཏཱཡ པན ན གཧིཏནྟི ཝེདིཏབྦཾ. ཡདིཔི ཨཊྛིཀསངྑལིཀཱཡཾ སནྡྷིཏོ ཝཝཏྠཱཔནཾ ལབྦྷཏི, ཨཊྛིཀེ པན ན ལབྦྷཏཱིཏི ཏསྶ ཨནིཡཏབྷཱཝདཱིཔནཏྠཾ ཀམཝིལངྒྷནཾ ཀཏྭཱ ‘‘ཏསྶ ཏསྶ ཨཊྛིནོ ནིནྣཊྛཱནཐལཊྛཱནཝསེནཱ’’ཏིཨཱདི ཝུཏྟཾ. ཏཏྠ ནིནྣཊྛཱནཾ ནཱམ ཨཊྛིནོ ཝིནཏཔྤདེསོ. ཐལཊྛཱནཾ ཨུནྣཏཔྤདེསོ. གྷཊིཏགྷཊིཏཊྛཱནཝསེནཱཏི ཨནུཔགཏནྷཱརུབནྡྷཱནཾ, ཨིཏརེསཉྩ ཨཉྙམཉྙཾ སཾཀིལིཊྛསཾཀིལིཊྛཊྛཱནཝསེན. ཨནྟརཝསེནཱཏི ཨཉྙམཉྙསྶ ཨནྟརཝསེན, སུསིརཝསེན ཙ. སབྦཏྠེཝཱཏི སཀལཱཡ ཨཊྛིསངྑལིཀཱཡ, སབྦསྨིཾ ཝཱ ཨཊྛིཀེ.

༡༢༠. ཨེཏྠཱཏི ¶ ¶ ཨེཏསྨིཾ ཨཊྛིཀཱསུབྷེ. ཡུཛྫམཱནཝསེན སལླཀྑེཏབྦནྟི ཡཾ ནིམིཏྟགྒཧཎཾ ཡཏྠ ཡུཛྫཏི, ཏཾ ཏཏྠ ཨུགྒཎྷནཏྠཾ ནིམིཏྟགྒཧཎཝསེན ཨུཔལཀྑེཏབྦཾ. སཀལཱཡཱཏི ཨནཝསེསབྷཱགཱཡ པརིཔུཎྞཱཝཡཝཱཡ. སམྤཛྫཏི ནིམིཏྟུཔཊྛཱནཝསེན. ཏེསཱུཏི ཨཊྛིཀསངྑལིཀཊྛིཀེསུ. ཝུཏྟཾ ཨཊྛཀཐཱཡཾ. ཏནྟི ‘‘ཨེཀསདིསམེཝཱ’’ཏི ཝཙནཾ. ཨེཀསྨིཾ ཨཊྛིཀེ ཡུཏྟནྟི ཨིདཾ ཡཐཱ ཝིནཱིལཀཱདཱིསུ ཨུབྷིནྣཾ ནིམིཏྟཱནཾ ཡཐཱརཧཾ ཝཎྞཝིསེསཏོ, པརིཔུཎྞཱཔརིཔུཎྞཏོ, སཝིཝརཱཝིཝརཏོ, ཙལཱཙལཏོ ཙ ཝིསེསོ ལབྦྷཏི, ན ཨེཝམེཏསྶཱཏི ཀཏྭཱ ཝུཏྟཾ, ན པན སབྦེན སབྦཾ ཝིསེསཱབྷཱཝཏོ. ཏེནེཝཱཧ ‘‘ཨེཀཊྛིཀེཔི ཙཱ’’ཏིཨཱདི. ཏཏྠ བཱིབྷཙྪེནཱཏི སུཝིབྷཱུཏཨཊྛིརཱུཔཏྟཱ ཨཊྛིབྷཱཝེནེཝ ཝིརཱུཔེན. བྷཡཱནཀེནཱཏི ཏེནེཝ པཱཀཏིཀསཏྟཱནཾ བྷཡཱཝཧེན. པཱིཏིསོམནསྶཛནཀེནཱཏི སཎྷམཊྛབྷཱཝེན ཨུཔཊྛཱནཏོ, བྷཱཝནཱཡ ཙ སཝིསེསཏྟཱ པཱིཏིཡཱ, སོམནསྶསྶ ཙ ཨུཔྤཱདཀེན. ཏེནེཝཱཧ ‘‘ཨུཔཙཱརཱཝཧཏྟཱ’’ཏི.

ཨིམསྨིཾ ཨོཀཱསེཏི ཨུགྒཧཔཊིབྷཱགནིམིཏྟཱནཾ ཝུཏྟཊྛཱནེ. དྭཱརཾ དཏྭཱ ཝཱཏི ‘‘པཊིཀྐཱུལབྷཱཝེཡེཝ དིཊྛེ ནིམིཏྟཾ ནཱམ ཧོཏཱི’’ཏི ཨེཏྟཀེ ཨེཝ ཨཊྛཏྭཱ ཨནནྟརམེཝ ‘‘དུཝིདྷཾ ཨིདྷ ནིམིཏྟ’’ནྟིཨཱདིནཱ ཨུགྒཧཔཊིབྷཱགནིམིཏྟཱནི ཝིབྷཛིཏྭཱ ཝཙནེན ཡཐཱཝུཏྟསྶ ནིམིཏྟཝིབྷཱགསྶ དྭཱརཾ དཏྭཱཝ ཝུཏྟཾ. ནིབྦིཀཔྤནྟི ‘‘སུབྷ’’ནྟི ཝིཀཔྤེན ནིབྦིཀཔྤཾ, ཨསུབྷནྟྭེཝཱཏི ཨཏྠོ. ཝིཙཱརེཏྭཱཏི ‘‘ཨེཀསྨིཾ ཨཊྛིཀེ ཡུཏྟ’’ནྟིཨཱདིནཱ ཝིཙཱརེཏྭཱ.

མཧཱཏིསྶཏྠེརསྶཱཏི ཙེཏིཡཔབྦཏཝཱསཱིམཧཱཏིསྶཏྠེརསྶ. ནིདསྶནཱནཱིཏི དནྟཊྛིཀམཏྟདསྶནེན སཀལསྶཱཔི ཏསྶཱ ཨིཏྠིཡཱ སརཱིརསྶ ཨཊྛིསངྒྷཱཏབྷཱཝེན ཨུཔཊྛཱནཱདཱིནི ཨེཏྠ ཨཊྛིཀཀམྨཊྛཱནེ ཨུགྒཧཔཊིབྷཱགནིམིཏྟཱནཾ ཝིསེསཝིབྷཱཝནཱནི ཨུདཱཧརཎཱནི.

སུབྷགུཎོཏི སཝཱསནཱནཾ ཀིལེསཱནཾ པཧཱིནཏྟཱ སུཔརིསུདྡྷགུཎོ. དསསཏལོཙནེནཱཏི སཧསྶཀྑེན དེཝཱནམིནྡེན. སོ ཧི ཨེཀཱསནེནེཝ སཧསྶཨཏྠཱནཾ ཝིཙཱརཎསམཏྠེན པཉྙཱཙཀྑུནཱ སམནྣཱགཏཏྟཱ ‘‘སཧསྶཀྑོ’’ཏི ཝུཙྩཏི. ཐུཏཀིཏྟཱིཏི ‘‘ཡོ དྷཱིརོ སབྦདྷི དནྟོ’’ཏིཨཱདིནཱ (མཧཱཝ. ༥༨) ཨབྷིཏྠུཏཀིཏྟིསདྡོ.

པཀིཎྞཀཀཐཱཝཎྞནཱ

༡༢༡. ཨུཛུཔཊིཔཀྑེན ¶ ¶ པཧཱིནབྷཱཝཾ སནྡྷཱཡཱཧ ‘‘སུཝིཀྑམྦྷིཏརཱགཏྟཱ’’ཏི. ཨསུབྷཔྤབྷེདོཏི ཨུདྡྷུམཱཏཀཱདིཨསུབྷཝིབྷཱགོ. སརཱིརསབྷཱཝཔྤཏྟིཝསེནཱཏི སརཱིརསྶ ཨཏྟནོ སབྷཱཝཱུཔགམནཝསེན. སརཱིརཉྷི ཝིནསྶམཱནཾ ཨཉྙརཱུཔེན ཋིཏསྶ རཀྑསསྶ ཝིཡ སབྷཱཝཔྤཏྟིཝསེནེཝ ཝིནསྶཏི. རཱགཙརིཏབྷེདཝསེནཱཏི རཱགཙརིཏཝིབྷཱགཝསེན. ཡདི སརཱིརསབྷཱཝཔྤཏྟིཝསེན ཨཡམསུབྷཔྤབྷེདོ ཝུཏྟོ, མཧཱསཏིཔཊྛཱནཱདཱིསུ (དཱི. ནི. ༢.༣༧༢ ཨཱདཡོ; མ. ནི. ༡.༡༠༥ ཨཱདཡོ) ཀཐཾ ནཝཔྤབྷེདོཏི? སོ སརསཏོ ཨེཝ སབྷཱཝཔྤཏྟིཝསེན ཝུཏྟོ, ཨཡཾ པན པརཱུཔཀྐམེནཱཔི. ཏཏྠ ཙ ཨིདྷཱགཏེསུ དསསུ ཨསུབྷེསུ ཨེཀཙྩཱནེཝ གཧིཏཱནི, ཨཊྛིཀཉྩ པཉྩཝིདྷཱ ཝིབྷཏྟཾ. ཏཱནི ཙ ཝིཔསྶནཱཝསེན, ཨིམཱནི སམཐཝསེནཱཏི པཱཀཊོཡཾ བྷེདོཏི.

ཨིམེསཾ པན དསྶནམྤི ཨསུབྷབྷཱཝསཱམཉྙེན སཏིཔི ཨཝིསེསཏོ རཱགཙརིཏཱནཾ སཔྤཱཡབྷཱཝེ ཡཾ ཝུཏྟཾ ‘‘རཱགཙརིཏབྷེདཝསེན ཙཱ’’ཏི, ཏཾ ཝིབྷཛིཏྭཱ དསྶེཏུཾ ‘‘ཝིསེསཏོ’’ཏིཨཱདི ཝུཏྟཾ. སཱུནབྷཱཝེན སུསཎྛིཏམྤི སརཱིརཾ དུསྶཎྛིཏམེཝ ཧོཏཱིཏི ཨུདྡྷུམཱཏཀསརཱིརེ སཎྛཱནཝིཔཏྟིཾ དཱིཔེཏཱིཏི ཨཱཧ ‘‘སརཱིརསཎྛཱནཝིཔཏྟིཔྤཀཱསནཏོ’’ཏི. སཎྛཱནསམྤཏྟིཡཾ རཏྟོ སཎྛཱནརཱགཱི, ཏསྶ སཔྤཱཡཾ སཎྛཱནརཱགསྶ ཝིཀྑམྦྷནུཔཱཡབྷཱཝཏོ. ཀཱཡོ ཨེཝ ཀཱཡཝཎོ, ཏཏྠ པཊིབདྡྷསྶ ནིསྶིཏསྶ. སུསིརབྷཱཝཔྤཀཱསནཏོཏི སུསིརསྶ ཝིཝརསྶ ཨཏྠིབྷཱཝཔྤཀཱསནཏོ. སརཱིརེ གྷནབྷཱཝརཱགིནོཏི སརཱིརེ ཨངྒཔཙྩངྒཱནཾ ཐིརབྷཱཝཾ པཊིཙྩ ཨུཔྤཛྫནཀརཱགཝཏོ. ཝིཀྑེཔཔྤཀཱསནཏོཏི སོཎསིངྒཱལཱདཱིཧི ཨིཏོ ཙིཏོ ཙ ཝིཀྑེཔསྶ པཀཱསནཏོ ཨངྒཔཙྩངྒལཱིལཱརཱགིནོ སཔྤཱཡཾ. ཨཱིདིསཱནཾ ཀིར ཨནཝཊྛིཏརཱུཔཱནཾ ཨཝཡཝཱནཾ ཀོ ལཱིལཱ༹ཝིལཱསོཏི ཝིརཱགསམྦྷཝཏོ. སངྒྷཱཏབྷེདཝིཀཱརཔྤཀཱསནཏོཏི སངྒྷཱཏསྶ ཨངྒཔཙྩངྒཱནཾ སཾཧཏབྷཱཝསྶ སུསམྦནྡྷཏཱཡ བྷེདོ ཨེཝ ཝིཀཱརོ སངྒྷཱཏབྷེདཝིཀཱརོ, ཏསྶ པཀཱསནཏོ. ལོཧིཏཾ མཀྑིཏཾ ཧུཏྭཱ པཊིཀྐཱུལབྷཱཝོ ལོཧིཏམཀྑིཏཔཊིཀྐཱུལབྷཱཝོ, ཏསྶ པཀཱསནཏོ. མམཏྟརཱགིནོཏི ‘‘མམ ཨཡ’’ནྟི ཨུཔྤཛྫནཀརཱགཝཏོ. དནྟསམྤཏྟིརཱགིནོཏི དནྟསམྤཏྟིཡཾ རཛྫནསཱིལསྶ.

ཀསྨཱ ¶ པནེཏྠ ཨུདྡྷུམཱཏཀཱདིཀེ པཋམཛ྄ཛྷཱནམེཝ ཨུཔྤཛྫཏི, ན དུཏིཡཱདཱིནཱིཏི ཨནུཡོགཾ ¶ མནསི ཀཏྭཱ ཨཱཧ ‘‘ཡསྨཱ པནཱ’’ཏིཨཱདི. ཨཔརིསཎྛིཏཛལཱཡཱཏི སོཏཝསེན པཝཏྟིཡཱ སམནྟཏོ ཨཊྛིཏཛལཱཡ ཨསནྣིསིནྣསལིལཱཡ. ཨརིཏྟབལེནཱཏི པཱཛནདཎྜབལེན. དུབྦལཏྟཱ ཨཱརམྨཎསྶཱཏི པཊིཀྐཱུལབྷཱཝེན ཨཏྟནི ཙིཏྟཾ ཋཔེཏུཾ ཨསམཏྠབྷཱཝོ ཨཱརམྨཎསྶ དུབྦལཏཱ. པཊིཀྐཱུལེ ཧི ཨཱརམྨཎེ སརསཏོ ཙིཏྟཾ པཝཏྟིཏུཾ ན སཀྐོཏི, ཨབྷིནིརོཔནལཀྑཎེན པན ཝིཏཀྐེན ཨབྷིནིརོཔིཡམཱནམེཝ ཙིཏྟཾ ཨེཀགྒཏཾ ལབྷཏི. ན ཝིནཱ ཝིཏཀྐེནཱཏི ཝིཏཀྐརཧིཏཱནི དུཏིཡཱདིཛ྄ཛྷཱནཱནི ཏཏྠ པཏིཊྛཾ ན ལབྷནྟི. ཏེནཱཧ ‘‘ཝིཏཀྐབལེནེཝཱ’’ཏིཨཱདི.

ཡདི པཊིཀྐཱུལབྷཱཝཏོ ཨུདྡྷུམཱཏཱདིཨཱརམྨཎེ དུཏིཡཱདིཛ྄ཛྷཱནཱནི ན པཝཏྟནྟི, ཨེཝཾ སནྟེ པཋམཛ྄ཛྷཱནེནཱཔི ཏཏྠ ན ཨུཔྤཛྫིཏབྦཾ. ན ཧི ཏཏྠ པཱིཏིསོམནསྶཱནཾ སམྦྷཝོ ཡུཏྟོཏི ཙོདནཾ སནྡྷཱཡཱཧ ‘‘པཊིཀྐཱུལེཔི ཙ ཨེཏསྨི’’ནྟིཨཱདི. ཏཏྠ ཨཱནིསཾསདསྶཱཝིཏཱནཱིཝརཎསནྟཱཔརོགཝཱུཔསམཱནཾ ཡཐཱཀྐམཾ པུཔྥཙྪཌྜཀ, ཝམནཝིརེཙནཨུཔམཱ ཡོཛེཏབྦཱ.

༡༢༢. ཡཐཱཝུཏྟཀཱརཎེན དསདྷཱ ཝཝཏྠིཏམྤི སབྷཱཝཏོ ཨེཀཝིདྷམེཝཱཏི དསྶེཏུཾ ‘‘དསཝིདྷམྤི ཙེཏ’’ནྟིཨཱདིཾ ཝཏྭཱ སྭཱཡཾ སབྷཱཝོ ཡཐཱ ཨཝིཉྙཱཎཀེསུ, ཨེཝཾ སཝིཉྙཱཎཀེསུཔི ལབྦྷཏེཝ. ཏསྨཱ ཏཏྠཱཔི ཡོནིསོམནསིཀཱརཝཏོ བྷཱཝནཱ ཨིཛ྄ཛྷཏེཝཱཏི དསྶེནྟོ ‘‘ཏདེཏཾ ཨིམིནཱ ལཀྑཎེནཱ’’ཏིཨཱདིམཱཧ. ཨེཏྠཱཏི ཨེཏསྨིཾ ཛཱིཝམཱནཀསརཱིརེ. ཨལངྐཱརེནཱཏི པཊིཛགྒནཔུབྦཀེན ཨལངྐརཎེན. ན པཉྙཱཡཏི པཙུརཛནསྶཱཏི ཨདྷིཔྤཱཡོ. ཨཏིརེཀཏིསཏཨཊྛིཀསམུསྶཡཾ དནྟཊྛིཀེཧི སདྡྷིཾ, ཏེཧི པན ཝིནཱ ‘‘ཏིམཏྟཱནི ཨཊྛིསཏཱནཱི’’ཏི (ཝིསུདྡྷི. ༡.༡༩༠) ཀཱཡགཏཱསཏིཡཾ ཝཀྑཏི. ཚིདྡཱཝཚིདྡནྟི ཁུདྡཱནུཁུདྡཚིདྡཝནྟཾ. མེདཀཐཱལིཀཱ མེདབྷརིཏབྷཱཛནཾ. ནིཙྩུགྒྷརིཏཔགྒྷརིཏནྟི ནིཙྩཀཱལཾ ཨུཔརི, ཧེཊྛཱ ཙ ཝིསྶཝནྟཾ. ཝེམཏྟནྟི ནཱནཏྟཾ. ནཱནཱཝཏྠེཧཱིཏི ནཱནཱཝཎྞེཧི ཝཏྠེཧི. ཧིརིཡཱ ལཛྫཱཡ ཀོཔནཏོ ཝིནཱསནཏོ ཧིརིཀོཔིནཾ, ཨུཙྩཱརཔསྶཱཝམགྒཾ. ཡཱཐཱཝསརསནྟི ཡཐཱབྷཱུཏཾ སབྷཱཝཾ. ཡཱཐཱཝཏོ རསཱིཡཏི ཉཱཡཏཱིཏི ཧི རསོ, སབྷཱཝོ. རཏིནྟི ཨབྷིརཏིཾ ཨབྷིརུཙིཾ. ཨཏྟསིནེཧསངྑཱཏེན ¶ རཱགེན རཏྟཱ ཨཏྟསིནེཧརཱགརཏྟཱ. ཝིཧཉྙམཱནེནཱཏི ཨིཙྪིཏཱལཱབྷེན ཝིགྷཱཏཾ ཨཱཔཛྫནྟེན.

ཀིཾསུཀནྟི པཱལིབྷདྡཀཾ, པལཱསོཏི ཀེཙི, སིམྦལཱིཏི ཨཔརེ. ཨཏིལོལུཔོཏི ཨཏིཝིཡ ལོལསབྷཱཝོ ¶ . ཨདུནྟི ཨེཏཾ. ནནྟི ཀེསཱདིསརཱིརཀོཊྛཱསཾ. མུཙྪིཏཱཏི མོཧིཏཱ, མུཙྪཱཔཱཔིཀཱཡ ཝཱ ཏཎྷཱཡ ཝསེན མུཙྪཾ པཏྟཱ. སབྷཱཝནྟི པཊིཀྐཱུལབྷཱཝཾ.

ཨུཀྐརཱུཔམོཏི ཨུཙྩཱརཔསྶཱཝཊྛཱནསམོ, ཝཙྩཀཱུཔསམོ ཝཱ. ཙཀྑུབྷཱུཏེཧཱིཏི ཙཀྑུཾ པཏྟེཧི པཊིལདྡྷཔཉྙཱཙཀྑུཀེཧི, ལོཀསྶ ཝཱ ཙཀྑུབྷཱུཏེཧི. ཨལླཙམྨཔཊིཙྪནྣོཏི ཨལླཙམྨཔརིཡོནདྡྷོ.

དབྦཛཱཏིཀེནཱཏི ཨུཏྟརིམནུསྶདྷམྨེ པཊིལདྡྷུཾ བྷབྦརཱུཔེན. ཡཏྠ ཡཏྠ སརཱིརེ, སརཱིརསྶ ཝཱ ཡཏྠ ཡཏྠ ཀོཊྛཱསེ. ནིམིཏྟཾ གཧེཏྭཱཏི ཨསུབྷཱཀཱརསྶ སུཊྛུ སལླཀྑཎཝསེན ཡཐཱ ཨུགྒཧནིམིཏྟཾ ཨུཔྤཛྫཏི, ཨེཝཾ ཨུགྒཎྷནཝསེན ནིམིཏྟཾ གཧེཏྭཱ, ཨུགྒཧནིམིཏྟཾ ཨུཔྤཱདེཏྭཱཏི ཨཏྠོ. ཀམྨཊྛཱནཾ ཨཔྤནཾ པཱཔེཏབྦནྟི ཡཐཱལདྡྷེ ཨུགྒཧནིམིཏྟེ ཀམྨཾ ཀརོནྟེན པཊིབྷཱགནིམིཏྟཾ ཨུཔྤཱདེཏྭཱ ཨུཔཙཱརཛ྄ཛྷཱནེ ཋིཏེན ཏམེཝ བྷཱཝནཾ ཨུསྶུཀྐཱཔེནྟེན ཨསུབྷཀམྨཊྛཱནཾ ཨཔྤནཾ པཱཔེཏབྦཾ. ཨདྷིགཏཔྤནོ ཧི པཋམཛ྄ཛྷཱནེ ཋིཏོ ཏམེཝ ཛྷཱནཾ པཱདཀཾ ཀཏྭཱ ཝིཔསྶནཾ ཨཱརབྷིཏྭཱ སངྑཱརེ སམྨསནྟོ ནཙིརསྶེཝ སབྦཱསཝེ ཁེཔེཏཱིཏི.

ཨསུབྷཀམྨཊྛཱནནིདྡེསཝཎྞནཱ ནིཊྛིཏཱ.

ཨིཏི ཚཊྛཔརིཙྪེདཝཎྞནཱ.

༧. ཚཨནུསྶཏིནིདྡེསཝཎྞནཱ

༡. བུདྡྷཱནུསྶཏིཀཐཱཝཎྞནཱ

༡༢༣. ཨསུབྷཱནནྟརནྟི ¶ ¶ ཨསུབྷཀམྨཊྛཱནཱནནྟརཾ. ཨནུསྶཏཱིསཱུཏི ཨནུསྶཏིཀམྨཊྛཱནེསུ. ‘‘ཨནུ ཨནུ སཏི ཨནུསྶཏཱི’’ཏི ཨིམམཏྠཾ དསྶེཏུཾ ‘‘པུནཔྤུནཾ ཨུཔྤཛྫནཏོ’’ཏི ཝཏྭཱ ན ཨེཏྠ ཨནུ-སདྡཡོགེན སཏི-སདྡོ ཨཏྠནྟརཝཱཙཀོཏི དསྶེཏུཾ ‘‘སཏིཡེཝ ཨནུསྶཏཱི’’ཏི ཝུཏྟཾ. ཏེན ནཱཡམནུ-སདྡོ ‘‘ཨུཔལབྦྷཏཱི’’ཏིཨཱདཱིསུ ཨུཔ-སདྡོ ཝིཡ ཨནཏྠཀོ, ནཱཔི ‘‘སཉྫཱནནཾ པཛཱནན’’ནྟིཨཱདཱིསུ སཾ-སདྡཱདཡོ ཝིཡ ཨཏྠནྟརདཱིཔཀོཏི དསྶེཏི. ‘‘པཝཏྟིཏབྦཊྛཱནམྷིཡེཝ ཝཱ པཝཏྟཏྟཱ’’ཏི ཨིམིནཱ ཙ ཨནུསྶཏིཡཱ ཨནུསྶརིཏབྦཱནུརཱུཔཏཱ ཝུཏྟཱ ཧོཏཱིཏི པཝཏྟཀསྶེཝ ཨནུརཱུཔཏཾ དསྶེཏུཾ ‘‘ཀུལཔུཏྟསྶ ཨནུརཱུཔཱ’’ཏི ཝུཏྟཾ, སདྡྷཱཔབྦཛིཏསྶ ཝཱ ཀུལཔུཏྟསྶ. ཨནུརཱུཔཏཱ ནཱམ པཝཏྟིཏབྦཊྛཱནསྶ ཨནུརཱུཔཏཱཡ ཨེཝ ཧོཏཱིཏི པཝཏྟཀསྶེཝ ཨནུརཱུཔཏཱ ཝུཏྟཱ, ན ཨུབྷཡསྶ. ཨནུརཱུཔཱཏི ཙ ཡུཏྟཱཏི ཨཏྠོ. བུདྡྷནྟི ཡེ གུཎེ ཨུཔཱདཱཡ བྷགཝཏི ‘‘བུདྡྷོ’’ཏི པཉྙཏྟི, ཏེ གུཎེ ཨེཀཛ྄ཛྷཾ གཧེཏྭཱ ཝུཏྟཾ. ཏེནཱཧ ‘‘བུདྡྷགུཎཱརམྨཎཱཡ སཏིཡཱ ཨེཏམདྷིཝཙན’’ནྟི. ཨཱརབྦྷཱཏི ཨཱལམྦིཏྭཱ. དྷམྨནྟི པརིཡཏྟིདྷམྨེན སདྡྷིཾ ནཝཝིདྷམྤི ལོཀུཏྟརདྷམྨཾ. ནནུ ཙ ནིབྦཱནཾ ཝིསུཾ ཀམྨཊྛཱནབྷཱཝེན ཝཀྑཏི? ཀིཉྩཱཔི ཝཀྑཏི, དྷམྨབྷཱཝསཱམཉྙེན པན མགྒཕལེཧི སདྡྷིཾ ཨིདྷ པཱལི༹ཡཱ སངྒཧིཏཏྟཱ ཏསྶཱཔི དྷམྨཱནུསྶཏིཀམྨཊྛཱནེ གཧཎཾ དཊྛབྦཾ, ཨསངྑཏཱམཏཱདིབྷཱཝེན པན མགྒཕལེཧི ཝིསིཊྛཏཱཡ ཏསྶ ཝིསུཾ ཀམྨཊྛཱནབྷཱཝེན གཧཎཾ ཀཏཾ. སཱིལཱནུསྶཏིཨཱདཱིནཾ པན ཏིསྶནྣཾ ཨནུསྶཏཱིནཾ ཝིསུཾ ཀམྨཊྛཱནབྷཱཝེན གཧཎཾ ཡོགཱཝཙརསྶ ཨཏྟནོ ཨེཝ སཱིལསྶ ཙཱགསྶ སདྡྷཱདཱིནཉྩ ཨནུསྶཏིཊྛཱནབྷཱཝེན གཧེཏབྦཏྟཱ. རཱུཔཀཱཡཾ གཏཱཏི ཨཏྟནོ ཀརཛཀཱཡཾ ཨཱརབྦྷ ཨཱརམྨཎཀརཎཝསེན པཝཏྟཱ. ཀཱཡེཏི ཀཱཡེ ཝིསཡབྷཱུཏེ. ཀོཊྛཱསནིམིཏྟཱརམྨཎཱཡཱཏི ཀེསཱདིཀོཊྛཱསེསུ པཊིཀྐཱུལནིམིཏྟཱརམྨཎཱཡ. ཨིཏོ པུརིམཱསུ སཏྟསུ ཨནུསྶཏཱིསུ ནཏྠི ནིམིཏྟུཔྤཏྟི ¶ , ཨིདྷ ཨཏྠཱིཏི དསྶནཏྠཾ ནིམིཏྟ-གྒཧཎཾ. ཏཐཱ ཨསྶཱསཔསྶཱསནིམིཏྟཱརམྨཎཱཡཱཏི ཨེཏྠཱཔི. ཨུཔསམནྟི སབྦསངྑཱརཱུཔསམཾ, ནིབྦཱནནྟི ཨཏྠོ.

༡༢༤. ཨཝེཙྩ ¶ བུདྡྷགུཎེ ཡཱཐཱཝཏོ ཉཏྭཱ ཨུཔྤནྣོ པསཱདོ ཨཝེཙྩཔྤསཱདོ, ཨརིཡམགྒེན ཨཱགཏཔྤསཱདོ, ཏཾསདིསོཔི ཝཱ ཡོ དིཊྛིགཏཝཱཏེཧི ཨཙལོ ཨསམྤཀམྤིཡོ, ཏེན སམནྣཱགཏེན. ཏཱདིསསྶ བུདྡྷཱནུསྶཏིབྷཱཝནཱ ཨིཛ྄ཛྷཏི, ན ཨིཏརསྶ. པཏིརཱུཔསེནཱསནེཏི ཡཐཱཝུཏྟཨཊྛཱརསདོསཝཛྫིཏེ པཉྩངྒསམནྣཱགཏེ སེནཱསནེ. རཧོགཏེནཱཏི རཧསི གཏེན. ཏེན ཀཱཡཝིཝེཀཾ དསྶེཏི. པཊིསལླཱིནེནཱཏི ནཱནཱརམྨཎཏོ པཊིསལླཱིནེན, བཧིདྡྷཱ པུཐུཏྟཱརམྨཎཏོ པཊིཀྐམཱཔེཏྭཱ ཀམྨཊྛཱནེ སལླཱིནེན, སུསིལིཊྛཙིཏྟེནཱཏི ཨཏྠོ. ཨེཝནྟི ཨིམཱཡ པཱལི༹ཡཱ ཨཱགཏནཡེན.

སོ བྷགཝཱཏི ཨེཏྠ སོཏི ཡོ སོ སམཏིཾས པཱརམིཡོ པཱུརེཏྭཱ སབྦཀིལེསེ བྷཉྫིཏྭཱ ཨནུཏྟརཾ སམྨཱསམྦོདྷིཾ ཨབྷིསམྦུདྡྷོ དེཝཱནཾ ཨཏིདེཝོ བྲཧྨཱནཾ ཨཏིབྲཧྨཱ ལོཀནཱཐོ བྷཱགྱཝནྟཏཱདཱིཧི ཀཱརཎེཧི སདེཝཀེ ལོཀེ ‘‘བྷགཝཱ’’ཏི པཏྠཊཀིཏྟིསདྡོ, སོ. བྷགཝཱཏི ཨིདཾ སཏྠུ ནཱམཀིཏྟནཾ. ཏཐཱ ཧི ཝུཏྟཾ ‘‘བྷགཝཱཏི ནེཏཾ ནཱམཾ མཱཏརཱ ཀཏ’’ནྟིཨཱདི (མཧཱནི. ༡༩༨, ༢༡༠; ཙཱུལ༹ནི. ཨཛིཏམཱཎཝཔུཙྪཱནིདྡེས ༢). པརཏོ པན བྷགཝཱཏི གུཎཀིཏྟནཾ. ཨརཧནྟིཨཱདཱིསུ ནཝསུ ཋཱནེསུ པཙྩེཀཾ ཨིཏིཔི-སདྡཾ ཡོཛེཏྭཱ བུདྡྷགུཎཱ ཨནུསྶརིཏབྦཱཏི དསྶེནྟོ ‘‘ཨིཏིཔི ཨརཧཾ…པེ… ཨིཏིཔི བྷགཝཱཏི ཨནུསྶརཏཱི’’ཏི ཨཱཧ. ‘‘ཨིཏིཔེཏཾ བྷཱུཏཾ ཨིཏིཔེཏཾ ཏཙྪ’’ནྟིཨཱདཱིསུ (དཱི. ནི. ༡.༦) ཝིཡ ཨིཏི-སདྡོ ཨཱསནྣཔཙྩཀྑཀརཎཏྠོ, པི-སདྡོ སམྤིཎྜནཏྠོ. ཏེན ནེསཾ བཧུབྷཱཝོ དཱིཔིཏོ, ཏཱནི ཙ གུཎསལླཀྑཎཀཱརཎཱནི བྷཱཝེནྟེན ཙིཏྟསྶ སམྨུཁཱིབྷཱུཏཱནི ཀཱཏབྦཱནཱིཏི དསྶེནྟོ ‘‘ཨིམིནཱ ཙ ཨིམིནཱ ཙ ཀཱརཎེནཱཏི ཝུཏྟཾ ཧོཏཱི’’ཏི ཨཱཧ.

༡༢༥. དཱུརཏཱ ནཱམ ཨཱསནྣཏཱ ཝིཡ ཨུཔཱདཱཡུཔཱདཱཡ ཝུཙྩཏཱིཏི པརམུཀྐཾསགཏཾ དཱུརབྷཱཝཾ དསྶེནྟོ ‘‘སུཝིདཱུརཝིདཱུརེ’’ཏི ཨཱཧ, སུཊྛུ ཝིདཱུརབྷཱཝེནེཝ ཝིདཱུརེཏི ཨཏྠོ. སཱ པནསྶ ཀིལེསཏོ དཱུརཏཱ ཏེསཾ སབྦསོ པཧཱིནཏྟཱཏི དསྶེནྟོ ཨཱཧ ‘‘མགྒེན ཀིལེསཱནཾ ཝིདྡྷཾསིཏཏྟཱ’’ཏི. ནནུ ཨཉྙེསམྤི ཁཱིཎཱསཝཱནཾ ཏེ པཧཱིནཱ ཨེཝཱཏི ཨནུཡོགཾ མནསི ཀཏྭཱ ཝུཏྟཾ ‘‘སཝཱསནཱན’’ནྟི. ན ཧི བྷགཝནྟཾ ཋཔེཏྭཱ ཨཉྙེ སཧ ཝཱསནཱཡ ཀིལེསེ པཧཱཏུཾ སཀྐོནྟི ¶ , ཨེཏེན ཨཉྙེཧི ཨསཱདྷཱརཎཾ ¶ བྷགཝཏོ ཨརཧཏྟནྟི དསྶིཏཾ ཧོཏི. ཀཱ པནཱཡཾ ཝཱསནཱ ནཱམ? པཧཱིནཀིལེསསྶཱཔི ཨཔྤཧཱིནཀིལེསསྶ པཡོགསདིསཔཡོགཧེཏུབྷཱུཏོ ཀིལེསནིཧིཏོ སཱམཏྠིཡཝིསེསོ ཨཱཡསྨཏོ པིལིནྡཝཙྪསྶ (པཱརཱ. ༦༢༡) ཝསལསམུདཱཙཱརནིམིཏྟཾ ཝིཡ. ཀཐཾ པན ‘‘ཨཱརཀཱ’’ཏི ཝུཏྟེ ‘‘ཀིལེསེཧཱི’’ཏི ཨཡམཏྠོ ལབྦྷཏཱིཏི? སཱམཉྙཛོཏནཱཡ ཝིསེསེ ཨཝཊྛཱནཏོ, ཝིསེསཏྠིནཱ ཙ ཝིསེསསྶ ཨནུཔཡོཛེཏབྦཏོ, ‘‘ཨཱརཀཱསྶ ཧོནྟི པཱཔཀཱ ཨཀུསལཱ དྷམྨཱ’’ཏིཨཱདཱིནི (མ. ནི. ༡.༤༣༤) སུཏྟཔདཱནེཏྠ ཨུདཱཧརིཏབྦཱནི. ཨཱརཀཱཏི ཙེཏྠ ཨཱ-ཀཱརསྶ རསྶཏྟཾ, ཀ-ཀཱརསྶ ཙ ཧ-ཀཱརཾ, སཱནུསཱརཾ ཀཏྭཱ ནིརུཏྟིནཡེན ‘‘ཨརཧ’’ནྟི པདསིདྡྷི ཝེདིཏབྦཱ. ཝུཏྟམེཝཏྠཾ སུཁགྒཧཎཏྠཾ ‘‘སོ ཏཏོ ཨཱརཀཱ ནཱམཱ’’ཏི གཱཐཱབནྡྷམཱཧ. ཏཏྠ སམཉྫནསཱིལོ སམངྒཱི, ན སམངྒིཏཱ ཨསམངྒིཏཱ ཨསམནྣཱགམོ ཨསཧཝུཏྟིཏཱ.

༡༢༦. ཨནཏྠཙརཎེན ཀིལེསཱ ཨེཝ ཨརཡོཏི ཀིལེསཱརཡོ. ‘‘ཨརཱིནཾ ཧཏཏྟཱ ཨརིཧཱ’’ཏི ཝཏྟབྦེ ནིརུཏྟིནཡེན ‘‘ཨརཧ’’ནྟི ཝུཏྟཾ.

༡༢༧. ཡཉྩེཏཾ སཾསཱརཙཀྐནྟི སམྦནྡྷོ. རཐཙཀྐསྶ ནཱབྷི ཝིཡ མཱུལཱཝཡཝབྷཱུཏཾ ཨནྟོ, བཧི ཙ སམཝཊྛིཏཾ ཨཝིཛྫཱབྷཝཏཎྷཱམཡཾ དྭཡནྟི ཝུཏྟཾ ‘‘ཨཝིཛྫཱབྷཝཏཎྷཱམཡནཱབྷཱི’’ཏི. ནཱབྷིཡཱ, ནེམིཡཱ ཙ སམྦནྡྷཱ ཨརསདིསཱ པཙྩཡཕལབྷཱུཏེཧི ཨཝིཛྫཱཏཎྷཱཛརཱམརཎེཧི སམྦནྡྷཱ པུཉྙཱདིསངྑཱརཱཏི ཝུཏྟཾ ‘‘པུཉྙཱདིཨབྷིསངྑཱརཱར’’ནྟི. ཏཏྠ ཏཏྠ བྷཝེ པརིཡནྟབྷཱཝེན པཱཀཊཾ ཛརཱམརཎནྟི ཏཾ ནེམིཊྛཱནིཡཾ ཀཏྭཱ ཨཱཧ ‘‘ཛརཱམརཎནེམཱི’’ཏི. ཡཐཱ ཙ རཐཙཀྐཔཝཏྟིཡཱ པདྷཱནཀཱརཎཾ ཨཀྑོ, ཨེཝཾ སཾསཱརཙཀྐཔཝཏྟིཡཱ ཨཱསཝསམུདཡོཏི ཨཱཧ ‘‘ཨཱསཝསམུདཡམཡེན ཨཀྑེན ཝིཛ྄ཛྷིཏྭཱ’’ཏི. ཨཱསཝཱ ཨེཝ ཨཝིཛྫཱདཱིནཾ ཀཱརཎཏྟཱ ཨཱསཝསམུདཡོ. ཡཐཱཧ ‘‘ཨཱསཝསམུདཡཱ ཨཝིཛྫཱསམུདཡོ’’ཏི (མ. ནི. ༡.༡༠༣). ཝིཔཱཀཀཊཏྟཱརཱུཔཔྤབྷེདོ ཀཱམབྷཝཱདིཀོ ཏིབྷཝོ ཨེཝ རཐོ, ཏསྨིཾ ཏིབྷཝརཐེ. ཨཏྟནོ པཙྩཡེཧི སམཾ, སབྦསོ ཝཱ ཨཱདིཏོ པཊྛཱཡ ཡོཛིཏནྟི སམཱཡོཛིཏཾ. ཨཱདིརཧིཏཾ ཀཱལཾ པཝཏྟཏཱིཏི ཀཏྭཱ ཨནཱདིཀཱལཔྤཝཏྟཾ.

‘‘ཁནྡྷཱནཉྩ ¶ པཊིཔཱཊི, དྷཱཏུཨཱཡཏནཱན ཙ;

ཨབྦོཙྪིནྣཾ ཝཏྟམཱནཱ, ‘སཾསཱརོ’ཏི པཝུཙྩཏཱི’’ཏི. (དཱི. ནི. ཨཊྛ. ༢.༩༥ ཨཔསཱདནཱཝཎྞནཱ; སཾ. ནི. ཨཊྛ. ༢.༢.༦༠; ཨ. ནི. ཨཊྛ. ༢.༤.༡༩༩) –

ཨེཝཾ ¶ ཝུཏྟསཾསཱརོཝ སཾསཱརཙཀྐཾ. ཨནེནཱཏི བྷགཝཏཱ. བོདྷིམཎྜེཏི བོདྷིསངྑཱཏསྶ ཉཱཎསྶ མཎྜབྷཱཝཔྤཏྟེ ཋཱནེ, ཀཱལེ ཝཱ. ཝཱིརིཡཔཱདེཧཱིཏི སཾཀིལེསཝོདཱནཔཀྑིཡེསུ སནྣིརུམྦྷནསནྣིཀྑིཔནཀིཙྩཏཱཡ དྭིདྷཱ པཝཏྟེཧི ཨཏྟནོ ཝཱིརིཡསངྑཱཏེཧི པཱདེཧི. སཱིལཔཐཝིཡནྟི པཏིཊྛཊྛེན སཱིལམེཝ པཐཝཱི, ཏསྶཾ. པཏིཊྛཱཡཱཏི སམྤཱདནཝསེན པཏིཊྛཧིཏྭཱ. སདྡྷཱཧཏྠེནཱཏི ཨནཝཛྫདྷམྨཱདཱནསཱདྷནཏོ སདྡྷཱཝ ཧཏྠོ, ཏེན. ཀམྨཀྑཡཀརནྟི ཀཱཡཀམྨཱདིབྷེདསྶ སབྦསྶཔི ཀམྨསྶ ཁཡཀརཎཏོ ཀམྨཀྑཡཀརཾ. ཉཱཎཕརསུནྟི སམཱདྷིསིལཱཡཾ སུནིསིཏམགྒཉཱཎཕརསུཾ གཧེཏྭཱ.

༡༢༨. ཨེཝཾ ‘‘ཨརཱནཾ ཧཏཏྟཱ’’ཏི ཨེཏྠ ཝུཏྟཨརགྷཱཏེ སཾསཱརཾ ཙཀྐཾ ཝིཡ ཙཀྐནྟི གཧེཏྭཱ ཨཏྠཡོཛནཾ ཀཏྭཱ ཨིདཱནི པཊིཙྩསམུཔྤཱདདེསནཱཀྐམེནཔི ཏཾ དསྶེཏུཾ ‘‘ཨཐ ཝཱ’’ཏིཨཱདི ཝུཏྟཾ. ཏཏྠ ཨནམཏགྒཾ སཾསཱརཝཊྚནྟི ཨནུ ཨནུ ཨམཏགྒཾ ཨཝིཉྙཱཏཀོཊིཀཾ སཾསཱརམཎྜལཾ. སེསཱ དས དྷམྨཱ སངྑཱརཱདཡོ ཛཱཏིཔརིཡོསཱནཱ ཨརཱ. ཀཐཾ? ནཱབྷིཡཱ ཨཝིཛྫཱཡ མཱུལཏོ, ནེམིཡཱ ཛརཱམརཎེན ཨནྟཏོ སམྦནྡྷཏྟཱཏི དསྶེནྟོ ཨཱཧ ‘‘ཨཝིཛྫཱམཱུལཀཏྟཱ ཛརཱམརཎཔརིཡནྟཏྟཱ ཙཱ’’ཏི. དུཀྑཱདཱིསཱུཏི དུཀྑསམུདཡནིརོདྷམགྒེསུ. ཏཏྠ དུཀྑེ ཨཉྙཱཎཾ ཏདནྟོགདྷཏྟཱ, ཏཔྤཊིཙྪཱདནཏོ ཙ, སེསེསུ པཊིཙྪཱདནཏོཝ. དུཀྑནྟི ཙེཏྠ དུཀྑཾ ཨརིཡསཙྩཾ ཨདྷིཔྤེཏནྟི ཏཾ ཀཱམབྷཝཱདིཝསེན ཏིདྷཱ བྷིནྡིཏྭཱ ཏཐཱ ཏཔྤཊིཙྪཱདིཀཾ ཨཝིཛྫཾ, ཨཝིཛྫཱདིཔཙྩཡེ ཏཱིསུ བྷཝེསུ སངྑཱརཱདིཀེ ཙ པཊིཔཱཊིཡཱ དསྶེནྟོ ‘‘ཀཱམབྷཝེ ཙ ཨཝིཛྫཱ’’ཏིཨཱདིམཱཧ. ཏཏྠ ཀཱམབྷཝེ ཨཝིཛྫཱཏི ཀཱམབྷཝེ ཨཱདཱིནཝཔྤཊིཙྪཱདིཀཱ ཨཝིཛྫཱ. རཱུཔབྷཝེ ཨརཱུཔབྷཝེ ཨཝིཛྫཱཏི ཨེཏྠཱཔི ཨེསེཝ ནཡོ. ཀཱམབྷཝེ སངྑཱརཱནནྟི ཀཱམབྷཱུམིཔརིཡཱཔནྣཱནཾ སངྑཱརཱནཾ, ཀཱམབྷཝེ ཝཱ ནིཔྥཱདེཏབྦཱ ཡེ སངྑཱརཱ, ཏེསཾ ཀཱམབྷཝཱུཔཔཏྟིནིབྦཏྟཀསངྑཱརཱནནྟི ཨཏྠོ. པཙྩཡོ ཧོཏཱིཏི པུཉྙཱབྷིསངྑཱརཱནཾ ཏཱཝ ཨཱརམྨཎཔཙྩཡེན ཙེཝ ཨུཔནིསྶཡཔཙྩཡེན ཙཱཏི དྭིདྷཱ པཙྩཡོ ཧོཏི. ཨཔུཉྙཱབྷིསངྑཱརེསུ སཧཛཱཏསྶ སཧཛཱཏཱདིཝསེན ¶ , ཨསཧཛཱཏསྶ ཨནནྟརསམནནྟརཱདིཝསེན, ནཱནནྟརསྶ པན ཨཱརམྨཎཝསེན ཙེཝ ཨུཔནིསྶཡཝསེན ཙ པཙྩཡོ ཧོཏི. ཨརཱུཔབྷཝེ སངྑཱརཱནནྟི ཨཱནེཉྫཱབྷིསངྑཱརཱནཾ ¶ . པཙྩཡོ ཧོཏི ཨུཔནིསྶཡཝསེནེཝ. ཨིམསྨིཾ པནཏྠེ ཨེཏྠ ཝིཏྠཱརིཡམཱནེ ཨཏིཔྤཔཉྩོ ཧོཏི, སཡམེཝ ཙ པརཏོ ཨཱགམིསྶཏཱིཏི ན ནཾ ཝིཏྠཱརཡཱམ.

ཏིཎྞཾ ཨཱཡཏནཱནནྟི ཙཀྑུསོཏམནཱཡཏནཱནཾ. ཨེཀསྶཱཡཏནསྶཱཏི མནཱཡཏནསྶ. ཨིམིནཱ ནཡེན ཕསྶཱདཱིནམྤི ཝིབྷཱགོ ཝེདིཏབྦོ. ཏཏྠ ཏཏྠ སཱ སཱ ཏཎྷཱཏི རཱུཔཏཎྷཱདིབྷེདཱ ཏཏྠ ཏཏྠ ཀཱམབྷཝཱདཱིསུ ཨུཔྤཛྫནཀཱ ཏཎྷཱ.

ཏཎྷཱདིམཱུལིཀཱ ཀཐཱ ཨཏིསཾཁིཏྟཱཏི ཏཾ, ཨུཔཱདཱནབྷཝེ ཙ ཝིབྷཛིཏྭཱ ཝིཏྠཱརེཏྭཱ དསྶེཏུཾ ‘‘ཀཐ’’ནྟིཨཱདི ཝུཏྟཾ. ཏཏྠ ‘‘ཀཱམེ པརིབྷུཉྫིསྶཱམཱི’’ཏི ཨིམིནཱ ཀཱམཏཎྷཱཔཝཏྟིམཱཧ. ཏཐཱ ‘‘སགྒསམྤཏྟིཾ ཨནུབྷཝིསྶཱམཱི’’ཏིཨཱདཱིཧི. སཱ པན ཏཎྷཱ ཡསྨཱ བྷུསམཱདཱནཝསེན པཝཏྟམཱནཱ ཀཱམུཔཱདཱནཾ ནཱམ ཧོཏི, ཏསྨཱ ཝུཏྟཾ ‘‘ཀཱམུཔཱདཱནཔཙྩཡཱ’’ཏི. ཏཐེཝཱཏི ཀཱམུཔཱདཱནཔཙྩཡཱ ཨེཝ.

བྲཧྨལོཀསམྤཏྟིནྟི རཱུཔཱིབྲཧྨལོཀེ སམྤཏྟིཾ. ‘‘སབྦེཔི ཏེབྷཱུམཀཱ དྷམྨཱ ཀཱམནཱིཡཊྛེན ཀཱམཱ’’ཏི (མཧཱནི. ༡; ཙཱུལ༹ནི. ཨཛིཏམཱཎཝཔུཙྪཱནིདྡེས ༨ ཐོཀ ཝིསདིསཾ) ཝཙནཏོ བྷཝརཱགོཔི ཀཱམུཔཱདཱནམེཝཱཏི ཀཏྭཱ ‘‘ཀཱམུཔཱདཱནཔཙྩཡཱ ཨེཝ མེཏྟཾ བྷཱཝེཏཱི’’ཏིཨཱདི ཝུཏྟཾ. སེསུཔཱདཱནམཱུལིཀཱསུཔཱིཏི ཨེཏྠཱཡཾ ཡོཛནཱ – ཨིདྷེཀཙྩོ ‘‘ནཏྠི པརོ ལོཀོ’’ཏི ནཏྠིཀདིཊྛིཾ གཎྷཱཏི, སོ དིཊྛུཔཱདཱནཔཙྩཡཱ ཀཱཡེན དུཙྩརིཏཾ ཙརཏཱིཏིཨཱདི ཝུཏྟནཡེན ཡོཛེཏབྦཾ. ཨཔརོ ‘‘ཨསུཀསྨིཾ སམྤཏྟིབྷཝེ ཨཏྟཱ ཨུཙྪིཛྫཏཱི’’ཏི ཨུཙྪེདདིཊྛིཾ གཎྷཱཏི, སོ ཏཏྲཱུཔཔཏྟིཡཱ ཀཱཡེན སུཙརིཏཾ ཙརཏཱིཏིཨཱདི ཝུཏྟནཡེནེཝ ཡོཛེཏབྦཾ. ཨཔརོ ‘‘རཱུཔཱི མནོམཡོ ཧུཏྭཱ ཨཏྟཱ ཨུཙྪིཛྫཏཱི’’ཏི རཱུཔཱུཔཔཏྟིཡཱ མགྒཾ བྷཱཝེཏི. བྷཱཝནཱཔཱརིཔཱུརིཡཱཏི སབྦཾ ཝུཏྟནཡེནེཝ ཝེདིཏབྦཾ. ཨཔརོ ‘‘ཨརཱུཔབྷཝེ ཨུཔྤཛྫིཏྭཱ ཨཏྟཱ ཨུཙྪིཛྫཏཱི’’ཏི ཨརཱུཔཱུཔཔཏྟིཡཱ མགྒཾ བྷཱཝེཏི. བྷཱཝནཱཔཱརིཔཱུརིཡཱཏི སབྦཾ ཝུཏྟནཡེནེཝ ཝེདིཏབྦཾ. ཨེཏཱཧིཡེཝ ཨཏྟཝཱདུཔཱདཱནམཱུལིཀཱཔི ཡོཛནཱ སཾཝཎྞིཏཱཏི དཊྛབྦཾ. ཨེཝཾ དིཊྛདྷམྨནིབྦཱནཝཱདཝསེནཱཔི ¶ ཡོཛནཱ ཝེདིཏབྦཱ. ཨཔརོ ‘‘སཱིལེན སུདྡྷཱི’’ཏི ‘‘ཨསུདྡྷིམགྒཾ སུདྡྷིམགྒོ’’ཏི པརཱམསནྟོ སཱིལབྦཏུཔཱདཱནཔཙྩཡཱ ཀཱཡེན དུཙྩརིཏཾ ཙརཏཱིཏིཨཱདིནཱ སབྦཾ ཝུཏྟནཡེནེཝ ཡོཛེཏབྦཾ.

ཨིདཱནི ཡྭཱཡཾ སཾསཱརཙཀྐཾ དསྶེནྟེན ‘‘ཀཱམབྷཝེ ཨཝིཛྫཱ ཀཱམབྷཝེ སངྑཱརཱནཾ པཙྩཡོ ཧོཏཱི’’ཏིཨཱདིནཱ ¶ ཨཝིཛྫཱདཱིནཾ པཙྩཡབྷཱཝོ, སངྑཱརཱདཱིནཾ པཙྩཡུཔྤནྣབྷཱཝོ ཙ དསྶིཏོ, ཏམེཝ པཊིསམྦྷིདཱམགྒཔཱལི༹ཾ ཨཱནེཏྭཱ ནིགམནཝསེན དསྶེནྟོ ‘‘ཨེཝཾ ཨཡ’’ནྟིཨཱདིམཱཧ. ཏཏྠ ཡཐཱ སངྑཱརཱ ཧེཏུནིབྦཏྟཱ, ཨེཝཾ ཨཝིཛྫཱཔི ཀཱམཱསཝཱདིནཱ སཧེཏུཀཱ ཨེཝཱཏི ཨཱཧ ‘‘ཨུབྷོཔེཏེ ཧེཏུསམུཔྤནྣཱ’’ཏི. པཙྩཡཔརིགྒཧེཏི ནཱམརཱུཔསྶ པཙྩཡཱནཾ ཨཝིཛྫཱདཱིནཾ པརིཙྪིཛྫ གཧཎེ, ནིཔྥཱདེཏབྦེ བྷུམྨཾ. པཉྙཱཏི ཀངྑཱཝིཏརཎཝིསུདྡྷིསངྑཱཏཱ པཀཱརཏོ ཛཱནནཱ. དྷམྨཊྛིཏིཉཱཎནྟི པཊིཙྩསམུཔྤཱདཱཝབོདྷོ. ཨིདཉྩ དྷམྨཊྛིཏིཉཱཎཾ ཡསྨཱ ཨདྡྷཱཏྟཡེ ཀངྑཱམལཝིཏརཎཝསེན པཝཏྟཏི, ཏསྨཱ ‘‘ཨཏཱིཏམྤི ཨདྡྷཱན’’ནྟིཨཱདི ཝུཏྟཾ. ཨེཏེནེཝ ནཡེནཱཏི ཨེཏེན ‘‘ཨཝིཛྫཱ ཧེཏཱུ’’ཏིཨཱདིནཱ ཨཝིཛྫཱཡཾ ཝུཏྟེན ནཡེན. ‘‘སངྑཱརཱ ཧེཏུ, ཝིཉྙཱཎཾ ཧེཏུསམུཔྤནྣ’’ནྟིཨཱདིནཱ (པཊི. མ. ༡.༤༦) སབྦཔདཱནི ཝིཏྠཱརེཏབྦཱནི.

སཾཁིཔྤནྟི ཨེཏྠ ཨཝིཛྫཱདཡོ, ཝིཉྙཱཎཱདཡོ ཙཱཏི སངྑེཔོ, ཧེཏུ, ཝིཔཱཀོ ཙ. ཧེཏུ ཝིཔཱཀོཏི ཝཱ སཾཁིཔྤཏཱིཏི སངྑེཔོ, ཨཝིཛྫཱདཡོ ཝིཉྙཱཎཱདཡོ ཙ. སངྑེཔབྷཱཝསཱམཉྙེན པན ཨེཀཝཙནཾ ཀཏནྟི དཊྛབྦཾ. ཏེ པན སངྑེཔཱ ཨཏཱིཏེ ཧེཏུ, ཨེཏརཧི ཝིཔཱཀོ, ཨེཏརཧི ཧེཏུ, ཨཱཡཏིཾ ཝིཔཱཀོཏི ཨེཝཾ ཀཱལཝིབྷཱགེན ཙཏྟཱརོ ཛཱཏཱ. ཏེནཱཧ ‘‘པུརིམསངྑེཔོ ཙེཏྠ ཨཏཱིཏོ ཨདྡྷཱ’’ཏིཨཱདི. སངྑེཔ-སདྡོ ཝཱ བྷཱགཱདྷིཝཙནནྟི ཨཏཱིཏོ ཧེཏུབྷཱགོ པཋམོ སངྑེཔོ. ཨེས ནཡོ སེསེསུཔི. ཏཎྷུཔཱདཱནབྷཝཱ གཧིཏཱཝ ཧོནྟི ཀིལེསཀམྨབྷཱཝསཱམཉྙཏོ, ཏེཧི ཝིནཱ ཨཝིཛྫཱསངྑཱརཱནཾ སཀིཙྩཱཀརཎཏོ ཙ. ཀམྨཾ ཏཎྷཱ ཙ ཏསྶ སཧཀཱརཱིཀཱརཎཾ ཧུཏྭཱ ཝཊྚནཏྠེན ཀམྨཝཊྚཾ.

ཝིཉྙཱཎནཱམརཱུཔསལཱ༹ཡཏནཕསྶཝེདནཱནཾ ཛཱཏིཛརཱབྷངྒཱཝཏྠཱ ‘‘ཛཱཏིཛརཱམརཎ’’ནྟི ཝུཏྟཱཏི ཨཱཧ ‘‘ཛཱཏིཛརཱམརཎཱཔདེསེན ཝིཉྙཱཎཱདཱིནཾ ¶ ནིདྡིཊྛཏྟཱ’’ཏི. ཨིམེཏི ཝིཉྙཱཎཱདཡོ. ཨཱཡཏིཾ ཝིཔཱཀཝཊྚཾ པཙྩུཔྤནྣཧེཏུཏོ བྷཱཝཱིནཾ ཨནཱགཏཱནཾ གཧིཏཏྟཱ. ཏེཏི ཨཝིཛྫཱདཡོ. ཨཱཀཱརཏོཏི སརཱུཔཏོ ཨཝུཏྟཱཔི ཏསྨིཾ ཏསྨིཾ སངྒཧེ ཨཱཀིརཱིཡནྟི ཨཝིཛྫཱསངྑཱརཱདིགྒཧཎེཧི པཀཱསཱིཡནྟཱིཏི ཨཱཀཱརཱ, ཨཏཱིཏཧེཏུཨཱདཱིནཾ ཝཱ པཀཱརཱ ཨཱཀཱརཱ, ཏཏོ ཨཱཀཱརཏོ. ཝཱིསཏིཝིདྷཱ ཧོནྟི ཨཏཱིཏེཧེཏུཔཉྩཀཱདིབྷེདཏོ.

སངྑཱརཝིཉྙཱཎཱནཾ ཨནྟརཱ ཨེཀོ སནྡྷཱིཏི ཧེཏུཏོ ཕལསྶ ཨཝིཙྪེདཔྤཝཏྟིབྷཱཝཏོ ཧེཏུཕལསམྦནྡྷབྷཱུཏོ ཨེཀོ སནྡྷི. ཏཐཱ བྷཝཛཱཏཱིནམནྟརཱ. ཝེདནཱཏཎྷཱནམནྟརཱ པན ཕལཏོ ཧེཏུནོ ¶ ཨཝིཙྪེདཔྤཝཏྟིབྷཱཝཏོ ཕལཧེཏུསམྦནྡྷབྷཱུཏོ ཨེཀོ སནྡྷི. ཕལབྷཱུཏོཔི ཧི དྷམྨོ ཨཉྙསྶ ཧེཏུསབྷཱཝསྶ དྷམྨསྶ པཙྩཡོ ཧོཏཱིཏི.

ཨིཏཱིཏི ཝུཏྟཔྤཀཱརཔརཱམསནཾ. ཏེནཱཧ ‘‘ཙཏུསངྑེཔ’’ནྟིཨཱདི. སབྦཱཀཱརཏོཏི ཨིདྷ ཝུཏྟེཧི, ཨཝུཏྟེཧི ཙ པཊིཙྩསམུཔྤཱདཝིབྷངྒེ (ཝིབྷ. ༢༢༥ ཨཱདཡོ), ཨནནྟནཡསམནྟཔཊྛཱནཱདཱིསུ ཙ ཨཱགཏེཧི སབྦེཧི ཨཱཀཱརེཧི. ཛཱནཱཏཱིཏི ཨཝབུཛ྄ཛྷཏི. པསྶཏཱིཏི དསྶནབྷཱུཏེན ཉཱཎཙཀྑུནཱ པཙྩཀྑཏོ པསྶཏི. ཨཉྙཱཏི པཊིཝིཛ྄ཛྷཏཱིཏི ཏེསཾཡེཝ ཝེཝཙནཾ. ཏནྟི ཏཾ ཛཱནནཾ. ཉཱཏཊྛེནཱཏི ཡཐཱསབྷཱཝཏོ ཛཱནནཊྛེན. པཛཱནནཊྛེནཱཏི ཨནིཙྩཱདཱིཧི པཀཱརེཧི པཊིཝིཛ྄ཛྷནཊྛེན.

ཨིདཱནི ཡདཏྠམིདཾ བྷཝཙཀྐཾ ཨིདྷཱནཱིཏཾ, ཏཾ དསྶེཏུཾ ‘‘ཨིམིནཱ’’ཏིཨཱདི ཝུཏྟཾ. ཏཏྠ ཏེ དྷམྨེཏི ཏེ ཨཝིཛྫཱདིཀེ དྷམྨེ. ཡཐཱབྷཱུཏཾ ཉཏྭཱཏི མཧཱཝཛིརཉཱཎེན ཡཱཐཱཝཏོ ཛཱནིཏྭཱ. ནིབྦིནྡནྟོ བལཝཝིཔསྶནཱཡ ཝིརཛྫནྟོ ཝིམུཙྩནྟོ ཨརིཡམགྒེཧི ཨརེ ཧནཱིཏི ཡོཛནཱ. ཏཏྠ ཡདཱ བྷགཝཱ ཝིརཛྫཏི ཝིམུཙྩཏི, ཏདཱ ཨརེ ཧནཏི ནཱམ. ཏཏོ པརཾ པན ཨབྷིསམྦུདྡྷཀྑཎཾ གཧེཏྭཱ ཝུཏྟཾ ‘‘ཧནི ཝིཧནི ཝིདྡྷཾསེསཱི’’ཏི.

༡༢༩. ཙཀྐཝཏྟིནོ ཨཙེཏནེ ཙཀྐརཏནེ ཨུཔྤནྣེ ཏཏྠེཝ ལོཀོ པཱུཛཾ ཀརོཏི, ཨཉྙཏྠ པཱུཛཱཝིསེསཱ པཙྪིཛྫནྟི, ཀིམངྒཾ པན སམྨཱསམྦུདྡྷེ ཨུཔྤནྣེཏི དསྶེནྟོ ‘‘ཨུཔྤནྣེ ཏཐཱགཏེ’’ཏིཨཱདིམཱཧ. ཀོ པན ཝཱདོ ཨཉྙེསཾ པཱུཛཱཝིསེསཱནནྟི ཡཐཱཝུཏྟཏོ ཨཉྙེསཾ ཨམཧེསཀྑེཧི དེཝམནུསྶེཧི ཀརིཡམཱནཱནཾ ནཱཏིཨུལཱ༹རཱནཾ པཱུཛཱཝིསེསཱནཾ ཨརཧབྷཱཝེ ¶ ཀཱ ནཱམ ཀཐཱ. ཨཏྠཱནུརཱུཔནྟི ཨརཧཏྟཏྠསྶ ཨནུརཱུཔཾ ཨནྭཏྠཾ.

༡༣༠. ཨསིལོཀབྷཡེནཱཏི ཨཀིཏྟིབྷཡེན. རཧོ པཱཔཾ ཀརོནྟི ‘‘མཱ ནཾ ཀོཙི ཛཉྙཱ’’ཏི ཨེས བྷགཝཱ ན ཀདཱཙི ཀརོཏི པཱཔཧེཏཱུནཾ བོདྷིམཎྜེ ཨེཝ སུཔྤཧཱིནཏྟཱ. ཨཔརོ ནཡོ – ཨཱརཀཱཏི ཨརཧཾ, སུཝིདཱུརབྷཱཝཏོཨིཙྩེཝ ཨཏྠོ. ཀུཏོ པན སུཝིདཱུརབྷཱཝཏོཏི? ཡེ ཨབྷཱཝིཏཀཱཡཱ ཨབྷཱཝིཏསཱིལཱ ཨབྷཱཝིཏཙིཏྟཱ ཨབྷཱཝིཏཔཉྙཱ, ཏཏོ ཨེཝ ཨཔྤཧཱིནརཱགདོསམོཧཱ ཨརིཡདྷམྨསྶ ཨཀོཝིདཱ ཨརིཡདྷམྨེ ཨཝིནཱིཏཱ ཨརིཡདྷམྨསྶ ཨདསྶཱཝིནོ ཨཔྤཊིཔནྣཱ མིཙྪཱཔཊིཔནྣཱ ཙ, ཏཏོ སུཝིདཱུརབྷཱཝཏོ. ཝུཏྟཉྷེཏཾ བྷགཝཏཱ –

‘‘སངྒྷཱཊིཀཎྞེཙེཔི ¶ མེ, བྷིཀྑཝེ, བྷིཀྑུ གཧེཏྭཱ པིཊྛིཏོ པིཊྛིཏོ ཨནུབནྡྷོ ཨསྶ པཱདེ པཱདཾ ནིཀྑིཔནྟོ, སོ ཙ ཧོཏི ཨབྷིཛ྄ཛྷཱལུ ཀཱམེསུ ཏིབྦསཱརཱགོ བྱཱཔནྣཙིཏྟོ པདུཊྛམནསངྐཔྤོ མུཊྛསྶཏི ཨསམྤཛཱནོ ཨསམཱཧིཏོ ཝིབྦྷནྟཙིཏྟོ པཱཀཏིནྡྲིཡོ. ཨཐ ཁོ སོ ཨཱརཀཱཝ མཡ྄ཧཾ, ཨཧཉྩ ཏསྶ. ཏཾ ཀིསྶ ཧེཏུ? དྷམྨཾ ཧི སོ, བྷིཀྑཝེ, བྷིཀྑུ ན པསྶཏི, དྷམྨཾ ཨཔསྶནྟོ མཾ ན པསྶཏཱི’’ཏི (ཨིཏིཝུ. ༩༢).

ཡཐཱཝུཏྟཔུགྒལཱ ཧི སཙེཔི སཱཡཾ པཱཏཾ སཏྠུ སནྟིཀཱཝཙརཱཝ སིཡུཾ, ན ཏེ ཏཱཝཏཱ ‘‘སཏྠུ སནྟིཀཱ’’ཏི ཝཏྟབྦཱ, ཏཐཱ སཏྠཱཔི ནེསཾ. ཨིཏི ཨསཔྤུརིསཱནཾ ཨཱརཀཱ དཱུརེཏི ཨརཧཾ.

‘‘སམྨཱ ན པཊིཔཛྫནྟི, ཡེ ནིཧཱིནཱསཡཱ ནརཱ;

ཨཱརཀཱ ཏེཧི བྷགཝཱ, དཱུརེ ཏེནཱརཧཾ མཏོ’’ཏི.

ཏཐཱ ཨཱརཀཱཏི ཨརཧཾ, ཨཱསནྣབྷཱཝཏོཏི ཨཏྠོ. ཀུཏོ པན ཨཱསནྣབྷཱཝཏོཏི? ཡེ བྷཱཝིཏཀཱཡཱ བྷཱཝིཏསཱིལཱ བྷཱཝིཏཙིཏྟཱ བྷཱཝིཏཔཉྙཱ, ཏཏོ ཨེཝ པཧཱིནརཱགདོསམོཧཱ ཨརིཡདྷམྨསྶ ཀོཝིདཱ ཨརིཡདྷམྨེ སུཝིནཱིཏཱ ཨརིཡདྷམྨསྶ དསྶཱཝིནོ སམྨཱཔཊིཔནྣཱ, ཏཏོ ཨཱསནྣབྷཱཝཏོ. ཝུཏྟམྤི ཙེཏཾ བྷགཝཏཱ –

‘‘ཡོཛནསཏེ ¶ ཙེཔི མེ, བྷིཀྑཝེ, བྷིཀྑུ ཝིཧརེཡྻ, སོ ཙ ཧོཏི ཨནབྷིཛ྄ཛྷཱལུ ཀཱམེསུ ན ཏིབྦསཱརཱགོ ཨབྱཱཔནྣཙིཏྟོ ཨཔྤདུཊྛམནསངྐཔྤོ ཨུཔཊྛིཏསྶཏི སམྤཛཱནོ སམཱཧིཏོ ཨེཀགྒཙིཏྟོ སཾཝུཏིནྡྲིཡོ. ཨཐ ཁོ སོ སནྟིཀེཝ མཡ྄ཧཾ, ཨཧཉྩ ཏསྶ. ཏཾ ཀིསྶ ཧེཏུ? དྷམྨཾ ཧི སོ, བྷིཀྑཝེ, བྷིཀྑུ པསྶཏི, དྷམྨཾ པསྶནྟོ མཾ པསྶཏཱི’’ཏི (ཨིཏིཝུ. ༩༢).

ཏཐཱརཱུཔཱ ཧི པུགྒལཱ སཏྠུ ཡོཛནསཧསྶནྟརིཀཱཔི ཧོནྟི, ན ཏཱཝཏཱ ཏེ ‘‘སཏྠུ དཱུརཙཱརིནོ’’ཏི ཝཏྟབྦཱ, ཏཐཱ སཏྠཱཔི ནེསཾ. ཨིཏི སཔྤུརིསཱནཾ ཨཱརཀཱ ཨཱསནྣེཏི ཨརཧཾ.

ཡེ ¶ སམྨཱ པཊིཔཛྫནྟི, སུཔྤཎཱིཏཱདྷིམུཏྟིཀཱ;

ཨཱརཀཱ ཏེཧི ཨཱསནྣེ, ཏེནཱཔི ཨརཧཾ ཛིནོ.

ཡེ ཨིམེ རཱགཱདཡོ པཱཔདྷམྨཱ ཡསྨིཾ སནྟཱནེ ཨུཔྤཛྫནྟི, ཏསྶ དིཊྛདྷམྨིཀམྤི སམྤརཱཡིཀམྤི ཨནཏྠཾ ཨཱཝཧནྟི. ནིབྦཱནགཱམིནིཡཱ པཊིཔདཱཡ ཨེཀཾསེནེཝ ཨུཛུཝིཔཙྩནཱིཀབྷཱུཏཱ ཙ, ཏེ ཨཏྟཧིཏཾ, པརཧིཏཉྩ པརིཔཱུརེཏུཾ སམྨཱ པཊིཔཛྫནྟེཧི སཱདྷཱུཧི དཱུརཏོ རཧིཏབྦཱ པརིཙྩཛིཏབྦཱ པཧཱཏབྦཱཏི རཧཱ ནཱམ, ཏེ ཙ ཡསྨཱ བྷགཝཏོ བོདྷིམཱུལེཡེཝ ཨརིཡམགྒེན སབྦསོ པཧཱིནཱ སམུཙྪིནྣཱ. ཡཐཱཧ –

‘‘ཏཐཱགཏསྶ ཁོ, བྲཱཧྨཎ, རཱགོ པཧཱིནོ དོསོ མོཧོ, སབྦེཔི པཱཔཀཱ ཨཀུསལཱ དྷམྨཱ པཧཱིནཱ ཨུཙྪིནྣམཱུལཱ ཏཱལཱཝཏྠུཀཏཱ ཨནབྷཱཝཾཀཏཱ ཨཱཡཏིཾ ཨནུཔྤཱདདྷམྨཱ’’ཏི (པཱརཱ. ༩-༡༠ ཨཏྠཏོ སམཱནཾ).

ཏསྨཱ སབྦསོ ན སནྟི ཨེཏསྶ རཧཱཏི ཨརཧོཏི ཝཏྟབྦེ ཨོཀཱརསྶ སཱནུསཱརཾ ཨ-ཀཱརཱདེསཾ ཀཏྭཱ ‘‘ཨརཧ’’ནྟི ཝུཏྟཾ.

པཱཔདྷམྨཱ རཧཱ ནཱམ, སཱདྷཱུཧི རཧིཏབྦཏོ;

ཏེསཾ སུཊྛུ པཧཱིནཏྟཱ, བྷགཝཱ ཨརཧཾ མཏོ.

ཡེ ཏེ སབྦསོ པརིཉྙཱཏཀྑནྡྷཱ པཧཱིནཀིལེསཱ བྷཱཝིཏམགྒཱ སཙྪིཀཏནིརོདྷཱ ཨརཧནྟོ ཁཱིཎཱསཝཱ, ཡེ ཙ སེཀྑཱ ཨཔྤཏྟམཱནསཱ ཨནུཏྟརཾ ¶ ཡོགཀྑེམཾ པཏྠཡམཱནཱ ཝིཧརནྟི, ཡེ ཙ པརིསུདྡྷཔཡོགཱ ཀལྱཱཎཛ྄ཛྷཱསཡཱ སདྡྷཱསཱིལསུཏཱདིགུཎསམྤནྣཱ པུགྒལཱ, ཏེཧི ན རཧིཏབྦོ ན པརིཙྩཛིཏབྦོ, ཏེ ཙ བྷགཝཏཱཏི ཨརཧཾ. ཏཐཱ ཧི ཨརིཡཔུགྒལཱ སཏྠཱརཱ དིཊྛདྷམྨསྶ པཙྩཀྑཀརཎཏོ སཏྠུ དྷམྨསརཱིརེན ཨཝིརཧིཏཱ ཨེཝ ཧོནྟི. ཡཐཱཧ ཨཱཡསྨཱ པིངྒིཡོ –

‘‘པསྶཱམི ནཾ མནསཱ ཙཀྑུནཱཝ,

རཏྟིནྡིཝཾ བྲཱཧྨཎ ཨཔྤམཏྟོ;

ནམསྶམཱནོ ¶ ཝིཝསེམི རཏྟིཾ,

ཏེནེཝ མཉྙཱམི ཨཝིཔྤཝཱསཾ.

‘‘སདྡྷཱ ཙ པཱིཏི ཙ མནོ སཏི ཙ,

ནཱཔེནྟིམེ གོཏམསཱསནམྷཱ;

ཡཾ ཡཾ དིསཾ ཝཛཏི བྷཱུརིཔཉྙོ,

ས ཏེན ཏེནེཝ ནཏོཧམསྨཱི’’ཏི. (སུ. ནི. ༡༡༤༨-༡༡༤༩);

ཏེནེཝ ཙ ཏེ ཨཉྙཾ སཏྠཱརཾ ན ཨུདྡིསནྟི. ཡཐཱཧ –

‘‘ཨཊྛཱནམེཏཾ, བྷིཀྑཝེ, ཨནཝཀཱསོ, ཡཾ དིཊྛིསམྤནྣོ པུགྒལོ ཨཉྙཾ སཏྠཱརཾ ཨུདྡིསེཡྻཱཏི ནེཏཾ ཋཱནཾ ཝིཛྫཏཱི’’ཏི (མ. ནི. ༣.༡༢༨; ཨ. ནི. ༡.༢༧༦).

ཀལྱཱཎཔུཐུཛྫནཱཔི ཡེབྷུཡྻེན སཏྠརི ནིཙྩལསདྡྷཱ ཨེཝ ཧོནྟི. ཨིཏི སུཔྤཊིཔནྣེཧི པུརིསཝིསེསེཧི ཨཝིརཧིཏབྦཏོ, ཏེསཉྩ ཨཝིརཧནཏོ ན སནྟི ཨེཏསྶ རཧཱ པརིཙྩཛནཀཱ, ནཏྠི ཝཱ ཨེཏསྶ རཧོ སཱདྷཱུཧི པརིཙྩཛིཏབྦཏཱཏི ཨརཧཾ.

‘‘ཡེ སཙྪིཀཏསདྡྷམྨཱ, ཨརིཡཱ སུདྡྷགོཙརཱ;

ན ཏེཧི རཧིཏོ ཧོཏི, ནཱཐོ ཏེནཱརཧཾ མཏོ’’ཏི.

རཧོཏི ཙ གམནཾ ཝུཙྩཏི, བྷགཝཏོ ཙ ནཱནཱགཏཱིསུ པརིབྦྷམནསངྑཱཏཾ སཾསཱརེ གམནཾ ནཏྠི ཀམྨཀྑཡཀརེན ཨརིཡམགྒེན བོདྷིམཱུལེཡེཝ སབྦསོ སསམྦྷཱརསྶ ཀམྨཝཊྚསྶ ཝིདྡྷཾསིཏཏྟཱ. ཡཐཱཧ –

‘‘ཡེན ¶ དེཝཱུཔཔཏྱསྶ, གནྡྷབྦོ ཝཱ ཝིཧངྒམོ;

ཡཀྑཏྟཾ ཡེན གཙྪེཡྻཾ, མནུསྶཏྟཉྩ ཨབྦཛེ;

ཏེ མཡ྄ཧཾ ཨཱསཝཱ ཁཱིཎཱ, ཝིདྡྷསྟཱ ཝིནལཱི༹ཀཏཱ’’ཏི. (ཨ. ནི. ༤.༣༦);

ཨེཝཾ ¶ ནཏྠི ཨེཏསྶ རཧོགམནཾ གཏཱིསུ པཙྩཱཛཱཏཱིཏིཔི ཨརཧཾ.

རཧོ ཝཱ གམནཾ ཡསྶ, སཾསཱརེ ནཏྠི སབྦསོ;

པཧཱིནཛཱཏིམརཎོ, ཨརཧཾ སུགཏོ མཏོ.

པཱསཾསཏྟཱ ཝཱ བྷགཝཱ ཨརཧཾ. ཨཀྑརཙིནྟཀཱ ཧི པསཾསཱཡཾ ཨརཧ-སདྡཾ ཝཎྞེནྟི. པཱསཾསབྷཱཝོ ཙ བྷགཝཏོ ཨནཉྙསཱདྷཱརཎོ ཡཐཱབྷུཙྩགུཎཱདྷིགཏོ སདེཝཀེ ལོཀེ སུཔྤཏིཊྛིཏོ. ཏཐཱ ཧེས ཨནུཏྟརེན སཱིལེན ཨནུཏྟརེན སམཱདྷིནཱ ཨནུཏྟརཱཡ པཉྙཱཡ ཨནུཏྟརཱཡ ཝིམུཏྟིཡཱ ཨསམོ ཨསམསམོ ཨཔྤཊིམོ ཨཔྤཊིབྷཱགོ ཨཔྤཊིཔུགྒལོཏི ཨེཝཾ ཏསྨིཾ ཏསྨིཾ གུཎེ ཝིབྷཛིཏྭཱ ཝུཙྩམཱནེ པཎྜིཏཔུརིསེཧི དེཝེཧི བྲཧྨེཧི བྷགཝཏཱ ཝཱ པན པརིཡོསཱཔེཏུཾ ཨསཀྐུཎེཡྻརཱུཔོ. ཨིཏི པཱསཾསཏྟཱཔི བྷགཝཱ ཨརཧཾ.

གུཎེཧི སདིསོ ནཏྠི, ཡསྨཱ ལོཀེ སདེཝཀེ;

ཏསྨཱ པཱསཾསིཡཏྟཱཔི, ཨརཧཾ དྭིཔདུཏྟམོ.

ཨེཝཾ སབྦཐཱཔི –

‘‘ཨཱརཀཱ མནྡབུདྡྷཱིནཾ, ཨཱརཀཱ ཙ ཝིཛཱནཏཾ;

རཧཱནཾ སུཔྤཧཱིནཏྟཱ, ཝིདཱུནམརཧེཡྻཏོ;

བྷཝེསུ ཙ རཧཱབྷཱཝཱ, པཱསཾསཱ ཨརཧཾ ཛིནོ’’ཏི.

༡༣༡. སམྨཱཏི ཨཝིཔརཱིཏཾ. སཱམནྟི སཡམེཝ. སམྦུདྡྷོཏི ཧི ཨེཏྠ སཾ-སདྡོ ‘‘སཡ’’ནྟི ཨེཏསྶ ཨཏྠསྶ བོདྷཀོ དཊྛབྦོ. སབྦདྷམྨཱནནྟི ཨནཝསེསཱནཾ ཉེཡྻདྷམྨཱནཾ. ཀཐཾ པནེཏྠ སབྦདྷམྨཱཝབོདྷོ ¶ ལབྦྷཏཱིཏི? ཨེཀདེསསྶ ཨགྒཧཎཏོ. པདེསགྒཧཎེ ཧི ཨསཏི གཧེཏབྦསྶ ནིཔྤདེསཏཱཝ ཝིཉྙཱཡཏི ཡཐཱ ‘‘དིཀྑིཏོ ན དདཱཏཱི’’ཏི. ཨེཝཉྩ ཀཏྭཱ ཨཏྠཝིསེསཱནཔེཀྑཱ ཀཏྟརི ཨེཝ བུདྡྷསདྡསིདྡྷི ཝེདིཏབྦཱ ཀམྨཝཙནིཙྪཱཡ ཨབྷཱཝཏོ. ‘‘སམྨཱ སཱམཾ བུདྡྷཏྟཱ སམྨཱསམྦུདྡྷོ’’ཏི ཨེཏྟཀམེཝ ཧི ཨིདྷ སདྡཏོ ལབྦྷཏི, ‘‘སབྦདྷམྨཱན’’ནྟི པན ཨཏྠཏོ ལབྦྷམཱནཾ གཧེཏྭཱ ཝུཏྟཾ. ན ཧི བུཛ྄ཛྷནཀིརིཡཱ ཨཝིསཡཱ ཡུཛྫཏི.

ཨིདཱནི ¶ ཏསྶཱ ཝིསཡཾ ‘‘སབྦདྷམྨེ’’ཏི སཱམཉྙཏོ ཝུཏྟཾ ཝིབྷཛིཏྭཱ དསྶེཏུཾ ‘‘ཨབྷིཉྙེཡྻེ དྷམྨེ’’ཏིཨཱདི ཝུཏྟཾ. ཏཏྠ ཨབྷིཉྙེཡྻེཏི ཨབྷིཝིསིཊྛེན ཉཱཎེན ཛཱནིཏབྦེ. ཀེ པན ཏེཏི? ཙཏུསཙྩདྷམྨེ. ཨབྷིཉྙེཡྻཏོ བུདྡྷོཏི ཨབྷིཉྙེཡྻབྷཱཝཏོ བུཛ྄ཛྷི. པུབྦབྷཱགེ ཝིཔསྶནཱཔཉྙཱཡ, ཨདྷིགམཀྑཎེ མགྒཔཉྙཱཡ, ཨཔརབྷཱགེ སབྦཉྙུཏཉྙཱཎཱདཱིཧི ཨཉྙཱསཱིཏི ཨཏྠོ. ཨིཏོ པརེསུཔི ཨེསེཝ ནཡོ. པརིཉྙེཡྻེ དྷམྨེཏི དུཀྑཾ ཨརིཡསཙྩམཱཧ. པཧཱཏབྦེཏི སམུདཡཔཀྑིཡེ. སཙྪིཀཱཏབྦེཏི ནིབྦཱནཾ སནྡྷཱཡཱཧ. བཧུཝཙནནིདྡེསོ པན སོཔཱདིསེསཱདིཀཾ པརིཡཱཡསིདྡྷཾ བྷེདཾ གཧེཏྭཱ ཀཏོ, ཨུདྡེསོ ཝཱ ཨཡཾ ཙཏུསཙྩདྷམྨཱནནྟི. ཏཐཱ ཧི ཝཀྑཏི ‘‘ཙཀྑུཾ དུཀྑསཙྩ’’ནྟིཨཱདི. ཨུདྡེསོ ཙ ཨཝིནིཙྪིཏཏྠཔརིཙྪེདསྶ དྷམྨསྶ ཝསེན ཀརཱིཡཏི. ཨུདྡེསེན ཧི ཨུདྡིསིཡམཱནཱནཾ དྷམྨཱནཾ ཨཏྠིཏཱམཏྟཾ ཝུཙྩཏི, ན པརིཙྪེདོཏི ཨཔརིཙྪེདེན བཧུཝཙནེན ཝུཏྟཾ ཡཐཱ ‘‘ཨཔྤཙྩཡཱ དྷམྨཱ, ཨསངྑཏཱ དྷམྨཱ’’ཏི (དྷ. ས. དུཀམཱཏིཀཱ ༧-༨). སཙྪིཀཱཏབྦེཏི ཝཱ ཕལཝིམུཏྟཱིནམྤི གཧཎཾ, ན ནིབྦཱནསྶེཝཱཏི བཧུཝཙནནིདྡེསོ ཀཏོ. ཨེཝཉྩ བྷཱཝེཏབྦེཏི ཨེཏྠ ཛྷཱནཱནམྤི གཧཎཾ དཊྛབྦཾ.

གཱཐཱཡཾ བྷཱཝེཏབྦཉྩཱཏི ཨེཏྠ ཙ-སདྡོ ཨཝུཏྟསམུཙྩཡཏྠོ, ཏེན སཙྪིཀཱཏབྦསྶ གཧཎཾ ཝེདིཏབྦཾ. ཏསྨཱ བུདྡྷོསྨཱིཏི ཡསྨཱ ཙཏྟཱརི སཙྩཱནི མཡཱ བུདྡྷཱནི, སཙྩཝིནིམུཏྟཉྩ ཀིཉྩི ཉེཡྻཾ ནཏྠི, ཏསྨཱ སབྦམྤི ཉེཡྻཾ བུདྡྷོསྨི, ཨབྦྷཉྙཱསིནྟི ཨཏྠོ.

༡༣༢. ཨེཝཾ སཙྩཝསེན སཱམཉྙཏོ ཝུཏྟམཏྠཾ དྭཱརཱརམྨཎེཧི སདྡྷིཾ དྭཱརཔྤཝཏྟདྷམྨེཧི, ཁནྡྷཱདཱིཧི ཙ སཙྩཝསེནེཝ ཝིབྷཛིཏྭཱ དསྶེཏུཾ ‘‘ཨཔི ཙཱ’’ཏིཨཱདི ཨཱརདྡྷཾ. ཏཏྠ མཱུལཀཱརཎབྷཱཝེནཱཏི སནྟེསུཔི ཨཝིཛྫཱདཱིསུ ཨཉྙེསུ ཀཱརཎེསུ ཏེསམྤི མཱུལབྷཱུཏཀཱརཎབྷཱཝེན. ཏཎྷཱ ཧི ཀམྨསྶ ཝིཙིཏྟབྷཱཝཧེཏུཏོ, སཧཱཡབྷཱཝཱུཔགམནཏོ ཙ དུཀྑཝིཙིཏྟཏཱཡ པདྷཱནཀཱརཎཾ. སམུཊྛཱཔིཀཱཏི ཨུཔྤཱདིཀཱ. པུརིམཏཎྷཱཏི པུརིམབྷཝསིདྡྷཱ ཏཎྷཱ. ཨུབྷིནྣནྟི ཙཀྑུསྶ ¶ , ཏཾསམུདཡསྶ ཙ. ཨཔྤཝཏྟཱིཏི ཨཔྤཝཏྟིནིམིཏྟཾ. ནིརོདྷཔཛཱནནཱཏི སཙྪིཀིརིཡཱབྷིསམཡཝསེན ནིརོདྷསྶ པཊིཝིཛ྄ཛྷནཱ. ཨེཀེཀཔདུདྡྷཱརེནཱཏི ‘‘ཙཀྑུཾ ཙཀྑུསམུདཡོ’’ཏིཨཱདིནཱ ཨེཀེཀཀོཊྛཱསནིདྡྷཱརཎེན ¶ . ཏཎྷཱཡཔི པརིཉྙེཡྻབྷཱཝསབྦྷཱཝཏོ, ཨུཔཱདཱནཀྑནྡྷནྟོགདྷཏྟཱ ཙ དུཀྑསཙྩསངྒཧཾ དསྶེཏུཾ ‘‘རཱུཔཏཎྷཱདཡོ ཚ ཏཎྷཱཀཱཡཱ’’ཏི ཝུཏྟཾ.

ཀསིཎཱནཱིཏི ཀསིཎཛ྄ཛྷཱནཱནི. དྭཏྟིཾསཱཀཱརཱཏི དྭཏྟིཾས ཀོཊྛཱསཱ, ཏདཱརམྨཎཛ྄ཛྷཱནཱནི ཙ. ནཝ བྷཝཱཏི ཀཱམབྷཝཱདཡོ ཏཡོ, སཉྙཱིབྷཝཱདཡོ ཏཡོ, ཨེཀཝོཀཱརབྷཝཱདཡོ ཏཡོཏི ནཝ བྷཝཱ. ཙཏྟཱརི ཛྷཱནཱནཱིཏི ཨགྒཧིཏཱརམྨཎཝིསེསཱནི ཙཏྟཱརི རཱུཔཱཝཙརཛ྄ཛྷཱནཱནི, ཝིཔཱཀཛ྄ཛྷཱནཱནཾ ཝཱ ཨེཏཾ གཧཎཾ. ཨེཏྠ ཙ ཀུསལདྷམྨཱནཾ ཨུཔནིསྶཡབྷཱུཏཱ ཏཎྷཱ སམུཊྛཱཔིཀཱ པུརིམཏཎྷཱཏི ཝེདིཏབྦཱ. ཀིརིཡདྷམྨཱནཾ པན ཡཏྠ ཏེ ཏསྶ ཨཏྟབྷཱཝསྶ ཀཱརཎབྷཱུཏཱ.

ཨནུབུདྡྷོཏི བུཛ྄ཛྷིཏབྦདྷམྨསྶ ཨནུརཱུཔཏོ བུདྡྷོ. ཏེནཱཏི ཏསྨཱ. ཡསྨཱ སཱམཉྙཏོ, ཝིསེསཏོ ཙ ཨེཀེཀཔདུདྡྷཱརེན སབྦདྷམྨེ བུདྡྷོ, ཏསྨཱ ཝུཏྟཾ. ཀིནྟི ཨཱཧ ‘‘སམྨཱ སཱམཉྩ སབྦདྷམྨཱནཾ བུདྡྷཏྟཱ’’ཏི, སབྦསྶཔི ཉེཡྻསྶ སབྦཱཀཱརཏོ ཨཝིཔརཱིཏཾ སཡམེཝ ཨབྷིསམྦུདྡྷཏྟཱཏི ཨཏྠོ. ཨིམིནཱསྶ པརོཔདེསརཧིཏསྶ སབྦཱཀཱརེན སབྦདྷམྨཱཝབོདྷནསམཏྠསྶ ཨཱཀངྑཔྤཊིབདྡྷཝུཏྟིནོ ཨནཱཝརཎཉཱཎསངྑཱཏསྶ སབྦཉྙུཏཉྙཱཎསྶ ཨདྷིགམོ དསྶིཏོ.

ནནུ ཙ སབྦཉྙུཏཉྙཱཎཏོ ཨཉྙཾ ཨནཱཝརཎཉཱཎཾ, ཨཉྙཐཱ ‘‘ཚ ཨསཱདྷཱརཎཉཱཎཱནི བུདྡྷཉཱཎཱནཱི’’ཏི (པཊི. མ. མཱཏིཀཱ ༡.༧༣) ཝཙནཾ ཝིརུཛ྄ཛྷེཡྻཱཏི? ན ཝིརུཛ྄ཛྷཏི, ཝིསཡཔཝཏྟིབྷེདཝསེན ཨཉྙེཧི ཨསཱདྷཱརཎབྷཱཝདསྶནཏྠཾ ཨེཀསྶེཝ ཉཱཎསྶ དྭིདྷཱ ཝུཏྟཏྟཱ. ཨེཀམེཝ ཧི ཏཾ ཉཱཎཾ ཨནཝསེསསངྑཏཱསངྑཏསམྨུཏིདྷམྨཝིསཡཏཱཡ སབྦཉྙུཏཉྙཱཎཾ, ཏཏྠ ཙ ཨཱཝརཎཱབྷཱཝཏོ ནིསྶངྒཙཱརམུཔཱདཱཡ ‘‘ཨནཱཝརཎཉཱཎ’’ནྟི ཝུཏྟཾ. ཡཐཱཧ པཊིསམྦྷིདཱཡཾ ‘‘སབྦཾ སངྑཏམསངྑཏཾ ཨནཝསེསཾ ཛཱནཱཏཱིཏི སབྦཉྙུཏཉྙཱཎཾ, ཏཏྠ ཨཱཝརཎཾ ནཏྠཱིཏི ཨནཱཝརཎཉཱཎ’’ནྟིཨཱདི (པཊི. མ. ༡.༡༡༩). ཏསྨཱ ནཏྠི ནེསཾ ཨཏྠཏོ བྷེདོ, ཨེཀནྟེན ཙེཏཾ ཨེཝམིཙྪིཏབྦཾ. ཨཉྙཐཱ སབྦཉྙུཏཱནཱཝརཎཉཱཎཱནཾ སཱདྷཱརཎཏཱ, ཨསབྦདྷམྨཱརམྨཎཏཱ ཙ ཨཱཔཛྫེཡྻ. ན ཧི བྷགཝཏོ ཉཱཎསྶ ཨཎུམཏྟམྤི ཨཱཝརཎཾ ཨཏྠི, ཨནཱཝརཎཉཱཎསྶ ཙ ཨསབྦདྷམྨཱརམྨཎབྷཱཝེ ཡཏྠ ཏཾ ན པཝཏྟཏི, ཏཏྠཱཝརཎསབྦྷཱཝཏོ ཨནཱཝརཎབྷཱཝོཡེཝ ན སིཡཱ. ཨཐ ཝཱ པན ཧོཏུ ¶ ཨཉྙམེཝ ཨནཱཝརཎཉཱཎཾ སབྦཉྙུཏཉྙཱཎཏོ, ཨིདྷ པན སབྦཏྠ ཨཔྤཊིཧཏཝུཏྟིཏཱཡ ¶ ཨནཱཝརཎཉཱཎནྟི སབྦཉྙུཏཉྙཱཎམེཝ ཨདྷིཔྤེཏཾ. ཏསྶ ཙཱདྷིགམེན བྷགཝཱ ‘‘སབྦཉྙཱུ, སབྦཝིདཱུ, སམྨཱསམྦུདྡྷོ’’ཏི ཙ ཝུཙྩཏི ན སཀིཾཡེཝ སབྦདྷམྨཱཝབོདྷཏོ. ཏཐཱ ཙ ཝུཏྟཾ པཊིསམྦྷིདཱཡཾ (པཊི. མ. ༡.༡༦༢) ‘‘ཝིམོཀྑནྟིཀམེཏཾ བུདྡྷཱནཾ བྷགཝནྟཱནཾ བོདྷིཡཱ མཱུལེ སཧ སབྦཉྙུཏཉྙཱཎསྶ པཊིལཱབྷཱ སཙྪིཀཱ པཉྙཏྟི ཡདིདཾ ‘‘བུདྡྷོ’’ཏི. སབྦདྷམྨཱཝབོདྷནསམཏྠཉཱཎསམདྷིགམེན ཧི བྷགཝཏོ སནྟཱནེ ཨནཝསེསདྷམྨེ པཊིཝིཛ྄ཛྷིཏུཾ སམཏྠཏཱ ཨཧོསཱིཏི.

ཨེཏྠཱཧ – ཀིཾ པནིདཾ ཉཱཎཾ པཝཏྟམཱནཾ སཀིཾཡེཝ སབྦསྨིཾ ཝིསཡེ པཝཏྟཏི, ཨུདཱཧུ ཀམེནཱཏི? ཀིཉྩེཏྠ – ཡདི ཏཱཝ སཀིཾཡེཝ སབྦསྨིཾ ཝིསཡེ པཝཏྟཏི, ཨཏཱིཏཱནཱགཏཔཙྩུཔྤནྣཨཛ྄ཛྷཏྟབཧིདྡྷཱདིབྷེདབྷིནྣཱནཾ སངྑཏདྷམྨཱནཾ, ཨསངྑཏསམྨུཏིདྷམྨཱནཉྩ ཨེཀཛ྄ཛྷཾ ཨུཔཊྛཱནེ དཱུརཏོ ཙིཏྟཔཊཾ པེཀྑནྟསྶ ཝིཡ པཊིཝིབྷཱགེནཱཝབོདྷོ ན སིཡཱ, ཏཐཱ ཙ སཏི ‘‘སབྦེ དྷམྨཱ ཨནཏྟཱ’’ཏི ཝིཔསྶནྟཱནཾ ཨནཏྟཱཀཱརེན ཝིཡ སབྦདྷམྨཱ ཨནིརཱུཔིཏརཱུཔེན བྷགཝཏོ ཉཱཎསྶ ཝིསཡཱ ཧོནྟཱིཏི ཨཱཔཛྫཏི. ཡེཔི ‘‘སབྦཉེཡྻདྷམྨཱནཾ ཋིཏལཀྑཎཝིསཡཾ ཝིཀཔྤརཧིཏཾ སབྦཀཱལཾ བུདྡྷཱནཾ ཉཱཎཾ པཝཏྟཏི, ཏེན ཏེ ‘སབྦཝིདཱུ’ཏི ཝུཙྩནྟི, ཨེཝཉྩ ཀཏྭཱ ‘ཙརཾ སམཱཧིཏོ ནཱགོ, ཏིཊྛནྟོཔི སམཱཧིཏོ’ཏི ཨིདམྤི ཝཙནཾ སུཝུཏྟཾ ཧོཏཱི’’ཏི ཝདནྟི, ཏེསམྤི ཝུཏྟདོསཱནཱཏིཝཏྟི, ཋིཏལཀྑཎཱརམྨཎཏཱཡ ཙ ཨཏཱིཏཱནཱགཏསམྨུཏིདྷམྨཱནཾ ཏདབྷཱཝཏོ ཨེཀདེསཝིསཡམེཝ བྷགཝཏོ ཉཱཎཾ སིཡཱ. ཏསྨཱ སཀིཾཡེཝ ཉཱཎཾ པཝཏྟཏཱིཏི ན ཡུཛྫཏི.

ཨཐ ཀམེན སབྦསྨིཾ ཝིསཡེ ཉཱཎཾ པཝཏྟཏི? ཨེཝམྤི ན ཡུཛྫཏི. ན ཧི ཛཱཏིབྷཱུམིསབྷཱཝཱདིཝསེན, དིསཱདེསཀཱལཱདིཝསེན ཙ ཨནེཀབྷེདབྷིནྣེ ཉེཡྻེ ཀམེན གཡ྄ཧམཱནེ ཏསྶ ཨནཝསེསཔཊིཝེདྷོ སམྦྷཝཏི, ཨཔརིཡནྟབྷཱཝཏོ ཉེཡྻསྶ. ཡེ པན ‘‘ཨཏྠསྶ ཨཝིསཾཝཱདནཏོ ཉེཡྻསྶ ཨེཀདེསཾ པཙྩཀྑཾ ཀཏྭཱ ‘སེསེཔི ཨེཝ’ནྟི ཨདྷིམུཙྩིཏྭཱ ཝཝཏྠཱཔནེན སབྦཉྙཱུ བྷགཝཱ, ཏཉྩ ཉཱཎཾ ན ཨནུམཱནིཀཾ སཾསཡཱབྷཱཝཏོ. སཾསཡཱནུབདྡྷཾ ཧི ལོཀེ ཨནུམཱནཉཱཎ’’ནྟི ཝདནྟི, ཏེསམྤི ཏཾ ན ཡུཏྟཾ. སབྦསྶ ཧི ཨཔྤཙྩཀྑབྷཱཝེ ཨཏྠཱཝིསཾཝཱདནེན ཉེཡྻསྶ ཨེཀདེསཾ པཙྩཀྑཾ ¶ ཀཏྭཱ ‘‘སེསེཔི ཨེཝ’’ནྟི ཨདྷིམུཙྩིཏྭཱ ཝཝཏྠཱཔནསྶ ཨསམྦྷཝཏོ. ཡཉྷི ཏཾ སེསཾ, ཏཾ ཨཔྤཙྩཀྑནྟི.

ཨཐ ཏམྤི པཙྩཀྑཾ, ཏསྶ སེསབྷཱཝོ ཨེཝ ན སིཡཱཏི? སབྦམེཏཾ ཨཀཱརཎཾ. ཀསྨཱ ¶ ? ཨཝིསཡཝིཙཱརཎབྷཱཝཏོ. ཝུཏྟཾ ཧེཏཾ བྷགཝཏཱ ‘‘བུདྡྷཝིསཡོ, བྷིཀྑཝེ, ཨཙིནྟེཡྻོ ན ཙིནྟེཏབྦོ. ཡོ ཙིནྟེཡྻ, ཨུམྨཱདསྶ ཝིགྷཱཏསྶ བྷཱགཱི ཨསྶཱ’’ཏི (ཨ. ནི. ༤.༧༧). ཨིདཾ པནེཏྠ སནྣིཊྛཱནཾ – ཡཾཀིཉྩི བྷགཝཏཱ ཉཱཏུཾ ཨིཙྪིཏཾ སཀལཾ, ཨེཀདེསོ ཝཱ, ཏཏྠ ཨཔྤཊིཧཏཝུཏྟིཏཱཡ པཙྩཀྑཏོ ཉཱཎཾ པཝཏྟཏི, ནིཙྩསམཱདྷཱནཉྩ ཝིཀྑེཔཱབྷཱཝཏོ. ཉཱཏུཾ ཨིཙྪིཏསྶ ཙ སཀལསྶ ཨཝིསཡབྷཱཝེ ཏསྶ ཨཱཀངྑཔྤཊིབདྡྷཝུཏྟིཏཱ ན སིཡཱ, ཨེཀནྟེནེཝ སཱ ཨིཙྪིཏབྦཱ ‘‘སབྦེ དྷམྨཱ བུདྡྷསྶ བྷགཝཏོ ཨཱཝཛྫནཔྤཊིབདྡྷཱ ཨཱཀངྑཔྤཊིབདྡྷཱ མནསིཀཱརཔྤཊིབདྡྷཱ ཙིཏྟུཔྤཱདཔྤཊིབདྡྷཱ’’ཏི ཝཙནཏོ. ཨཏཱིཏཱནཱགཏཝིསཡམྤི བྷགཝཏོ ཉཱཎཾ ཨནུམཱནཱགམཏཀྐགྒཧཎཝིརཧིཏཏྟཱ པཙྩཀྑམེཝ.

ནནུ ཙ ཨེཏསྨིཾ པཀྑེ ཡདཱ སཀལཾ ཉཱཏུཾ ཨིཙྪིཏཾ, ཏདཱ སཀིཾཡེཝ སཀལཝིསཡཏཱཡ ཨནིརཱུཔིཏརཱུཔེན བྷགཝཏོ ཉཱཎཾ པཝཏྟེཡྻཱཏི ཝུཏྟདོསཱནཱཏིཝཏྟིཡེཝཱཏི? ན, ཏསྶ ཝིསོདྷིཏཏྟཱ. ཝིསོདྷིཏོ ཧི སོ བུདྡྷཝིསཡོ ཨཙིནྟེཡྻོཏི. ཨཉྙཐཱ པཙུརཛནཉཱཎསམཱནཝུཏྟིཏཱཡ བུདྡྷཱནཾ བྷགཝནྟཱནཾ ཉཱཎསྶ ཨཙིནྟེཡྻཏཱ ན སིཡཱ. ཏསྨཱ སཀལདྷམྨཱརམྨཎམྤི ཏཾ ཨེཀདྷམྨཱརམྨཎཾ ཝིཡ སུཝཝཏྠཱཔིཏེཡེཝ ཏེ དྷམྨེ ཀཏྭཱ པཝཏྟཏཱིཏི ཨིདམེཏྠ ཨཙིནྟེཡྻཾ. ཝུཏྟཉྷེཏཾ ‘‘ཡཱཝཏཀཾ ཉེཡྻཾ, ཏཱཝཏཀཾ ཉཱཎཾ. ཡཱཝཏཀཾ ཉཱཎཾ, ཏཱཝཏཀཾ ཉེཡྻཾ. ཉེཡྻཔརིཡནྟིཀཾ ཉཱཎཾ, ཉཱཎཔརིཡནྟིཀཾ ཉེཡྻ’’ནྟི (མཧཱནི. ༦༩; ཙཱུལ༹ནི. མོགྷརཱཛམཱཎཝཔུཙྪཱནིདྡེས ༨༥; པཊི. མ. ༣.༥). ཨེཝམེཀཛ྄ཛྷཾ, ཝིསུཾ, སཀིཾ, ཀམེན ཝཱ ཨིཙྪཱནུརཱུཔཾ སམྨཱ སཱམཉྩ སབྦདྷམྨཱནཾ བུདྡྷཏྟཱ སམྨཱསམྦུདྡྷོ.

༡༣༣. ཝིཛྫཱཧཱིཏི ཨེཏྠ ཝིནྡིཡཾ ཝིནྡཏཱིཏི ཝིཛྫཱ, ཡཱཐཱཝཏོ ཨུཔལབྦྷཏཱིཏི ཨཏྠོ. ཨཏྟནོ ཝཱ པཊིཔཀྑསྶ ཝིཛ྄ཛྷནཊྛེན ཝིཛྫཱ, ཏམོཀྑནྡྷཱདིཀསྶ པདཱལནཊྛེནཱཏི ཨཏྠོ. ཏཏོ ཨེཝ ཨཏྟནོ ཝིསཡསྶ ཝིདིཏཀརཎཊྛེནཔི ཝིཛྫཱ. སམྤནྣཏྟཱཏི སམནྣཱགཏཏྟཱ, པརིཔུཎྞཏྟཱ ཝཱ, ཨཝིཀལཏྟཱཏི ཨཏྠོ. ཏིསྶནྣཾ, ཨཊྛནྣཾ ཙ ཝིཛྫཱནཾ ཏཏྠ ཏཏྠ སུཏྟེ གཧཎཾ ཝིནེཡྻཛ྄ཛྷཱསཡཝསེནཱཏི ¶ དཊྛབྦཾ. སཏྟ སདྡྷམྨཱ ནཱམ སདྡྷཱ ཧིརཱི ཨོཏྟཔྤཾ བཱཧུསཙྩཾ ཝཱིརིཡཾ སཏི པཉྙཱ ཙ. ཡེ སནྡྷཱཡ ཝུཏྟཾ ‘‘ཨིདྷ བྷིཀྑུ སདྡྷོ ཧོཏཱི’’ཏིཨཱདི (ཨ. ནི. ༡༠.༡༡). ཙཏྟཱརི ཛྷཱནཱནཱིཏི ཡཱནི ཀཱནིཙི ཙཏྟཱརི རཱུཔཱཝཙརཛ྄ཛྷཱནཱནི.

ཀསྨཱ པནེཏྠ སཱིལཱདཡོ པནྣརསེཝ ‘‘ཙརཎ’’ནྟི ཝུཏྟཱཏི ཙོདནཾ སནྡྷཱཡཱཧ ‘‘ཨིམེཡེཝ ཧཱི’’ཏིཨཱདི ¶ . ཏེན ཏེསཾ སིཀྑཏྟཡསངྒཧཏོ ནིབྦཱནུཔགམནེ ཨེཀཾསཏོ སཱདྷནབྷཱཝམཱཧ. ཨིདཱནི ཏདཏྠསཱདྷནཱཡ ཨཱགམཾ དསྶེནྟོ ‘‘ཡཐཱཧཱ’’ཏིཨཱདིམཱཧ. བྷགཝཱཏིཨཱདི ཝུཏྟསྶེཝཏྠསྶ ནིགམནཝསེན ཝུཏྟཾ.

ནནུ ཙཱཡཾ ཝིཛྫཱཙརཎསམྤདཱ སཱཝཀེསུཔི ལབྦྷཏཱིཏི? ཀིཉྩཱཔི ལབྦྷཏི, ན པན ཏཐཱ, ཡཐཱ བྷགཝཏོཏི དསྶེཏུཾ ‘‘ཏཏྠ ཝིཛྫཱསམྤདཱ’’ཏིཨཱདི ཝུཏྟཾ. ཙརཎདྷམྨཔརིཡཱཔནྣཏྟཱ ཀརུཎཱབྲཧྨཝིཧཱརསྶ, སོ ཙེཏྠ མཧགྒཏབྷཱཝཔྤཏྟཱ སཱདྷཱརཎབྷཱཝོཏི ཨཱཧ ‘‘ཙརཎསམྤདཱ མཧཱཀཱརུཎིཀཏཾ པཱུརེཏྭཱ ཋིཏཱ’’ཏི. ཡཐཱ སཏྟཱནཾ ཨནཏྠཾ པརིཝཛྫེཏྭཱ ཨཏྠེ ནིཡོཛནཾ པཉྙཱཡ ཝིནཱ ན ཧོཏི, ཨེཝཾ ནེསཾ ཨཏྠཱནཏྠཛཱནནཾ སཏྠུ ཀརུཎཱཡ ཝིནཱ ན ཧོཏཱིཏི ཨུབྷཡམྤི ཨུབྷཡཏྠ སཀིཙྩཀམེཝ སིཡཱ. ཡཏྠ པན ཡསྶཱ པདྷཱནབྷཱཝོ, ཏཾ དསྶེཏུཾ ‘‘སོ སབྦཉྙུཏཱཡཱ’’ཏིཨཱདི ཝུཏྟཾ. ཏཏྠ ཡཐཱ ཏཾ ཝིཛྫཱཙརཎསམྤནྣོཏི ཡཐཱ ཨཉྙོཔི ཝིཛྫཱཙརཎསམྤནྣོ, ཏེན ཝིཛྫཱཙརཎསམྤནྣསྶེཝཱཡཾ ཨཱཝེཎིཀཱ པཊིཔཏྟཱིཏི དསྶེཏི. སཱ པནཱཡཾ སཏྠུ ཝིཛྫཱཙརཎསམྤདཱ སཱསནསྶ ནིཡྻཱནིཀཏཱཡ སཱཝཀཱནཾ སམྨཱཔཊིཔཏྟིཡཱ ཨེཀནྟཀཱརཎནྟི དསྶེཏུཾ ‘‘ཏེནསྶཱ’’ཏིཨཱདི ཝུཏྟཾ. ཏཾ སུཝིཉྙེཡྻམེཝ.

ཨེཏྠ ཙ ཝིཛྫཱསམྤདཱཡ སཏྠུ པཉྙཱམཧཏྟཾ པཀཱསིཏཾ ཧོཏི, ཙརཎསམྤདཱཡ ཀརུཎཱམཧཏྟཾ. ཏེསུ པཉྙཱཡ བྷགཝཏོ དྷམྨརཛྫཔྤཏྟི, ཀརུཎཱཡ དྷམྨསཾཝིབྷཱགོ. པཉྙཱཡ སཾསཱརདུཀྑནིབྦིདཱ, ཀརུཎཱཡ སཾསཱརདུཀྑསཧནཾ. པཉྙཱཡ པརདུཀྑཔརིཛཱནནཾ, ཀརུཎཱཡ པརདུཀྑཔཏིཀཱརཱརམྦྷོ. པཉྙཱཡ པརིནིབྦཱནཱབྷིམུཁབྷཱཝོ, ཀརུཎཱཡ ཏདདྷིགམོ. པཉྙཱཡ སཡཾ ཏརཎཾ, ཀརུཎཱཡ པརེསཾ ཏཱརཎཾ. པཉྙཱཡ བུདྡྷབྷཱཝསིདྡྷི, ཀརུཎཱཡ བུདྡྷཀིཙྩསིདྡྷི. ཀརུཎཱཡ ཝཱ བོདྷིསཏྟབྷཱུམིཡཾ སཾསཱརཱབྷིམུཁབྷཱཝོ, པཉྙཱཡ ཏཏྠ ཨནབྷིརཏི. ཏཐཱ ཀརུཎཱཡ པརེསཾ ཨབྷིཾསཱཔནཾ ¶ , པཉྙཱཡ སཡཾ པརེཧི ཨབྷཱཡནཾ. ཀརུཎཱཡ པརཾ རཀྑནྟོ ཨཏྟཱནཾ རཀྑཏི, པཉྙཱཡ ཨཏྟཱནཾ རཀྑནྟོ པརཾ རཀྑཏི. ཏཐཱ ཀརུཎཱཡ ཨཔརནྟཔོ, པཉྙཱཡ ཨནཏྟནྟཔོ. ཏེན ཨཏྟཧིཏཱཡ པཊིཔནྣཱདཱིསུ ཙཏཱུསུ པུགྒལེསུ ཙཏུཏྠཔུགྒལབྷཱཝོ སིདྡྷོ ཧོཏི. ཏཐཱ ཀརུཎཱཡ ལོཀནཱཐཏཱ, པཉྙཱཡ ཨཏྟནཱཐཏཱ. ཀརུཎཱཡ ཙསྶ ནིནྣཏཱབྷཱཝོ, པཉྙཱཡ ཨུནྣམཱབྷཱཝོ. ཏཐཱ ཀརུཎཱཡ སབྦསཏྟེསུ ཛནིཏཱནུགྒཧོ པཉྙཱནུགཏཏྟཱ ན ཙ ན སབྦཏྠ ཝིརཏྟཙིཏྟོ, པཉྙཱཡ སབྦདྷམྨེསུ ཝིརཏྟཙིཏྟོ ཀརུཎཱནུགཏཏྟཱ ན ཙ ན སབྦསཏྟཱནུགྒཧཱཡ པཝཏྟོ. ཡཐཱ ཧི ཀརུཎཱ བྷགཝཏོ སིནེཧསོཀཝིརཧིཏཱ, ཨེཝཾ པཉྙཱ ཨཧཾཀཱརམམཾཀཱརཝིནིམུཏྟཱཏི ¶ ཨཉྙམཉྙཝིསོདྷིཏཱ པརམཝིསུདྡྷཱ གུཎཝིསེསཱ ཝིཛྫཱཙརཎསམྤདཱཧི པཀཱསིཏཱཏི དཊྛབྦཾ.

༡༣༤. གམནམྤི ཧི གཏནྟི ཝུཙྩཏི ‘‘གཏེ ཋིཏེ’’ཏིཨཱདཱིསུ (དཱི. ནི. ༡.༢༡༤; ༢.༣༧༦). སོབྷནནྟི སུབྷཾ. སུབྷབྷཱཝོ ཝིསུདྡྷཏཱཡ, ཝིསུདྡྷཏཱ དོསཝིགམེནཱཏི ཨཱཧ ‘‘པརིསུདྡྷམནཝཛྫ’’ནྟི. གམནཉྩ ནཱམ བཧུཝིདྷནྟི ཨིདྷཱདྷིཔྤེཏཾ གམནཾ དསྶེནྟོ ‘‘ཨརིཡམགྒོ’’ཏི ཨཱཧ. སོ ཧི ནིབྦཱནསྶ གཏི ཨདྷིགམོཏི ཀཏྭཱ ‘‘གཏཾ, གམན’’ནྟི ཙ ཝུཙྩཏི. ཨིདཱནི ཏསྶེཝ གཧཎེ ཀཱརཎཾ དསྶེཏུཾ ‘‘ཏེན ཧེསཱ’’ཏིཨཱདི ཝུཏྟཾ. ཁེམཾ དིསནྟི ནིབྦཱནཾ. ཨསཛྫམཱནོཏི པརིཔནྠཱབྷཱཝེན སུགཏིགམནེཔི ཨསཛྫནྟོ སངྒཾ ཨཀརོནྟོ, པགེཝ ཨིཏརཏྠ. ཨཐ ཝཱ ཨེཀཱསནེ ནིསཱིདིཏྭཱ ཁིཔྤབྷིཉྙཱཝསེནེཝ ཙཏུནྣམྤི མགྒཱནཾ པཊིལདྡྷབྷཱཝཏོ ཨསཛྫམཱནོ ཨསཛྫནྟོ གཏོ. ཡཾ གམནཾ གཙྪནྟོ སབྦམནཏྠཾ ཨཔཧརཏི, སབྦཉྩ ཨནུཏྟརཾ སམྤཏྟིཾ ཨཱཝཧཏི, ཏདེཝ སོབྷནཾ ནཱམ. ཏེན ཙ བྷགཝཱ གཏོཏི ཨཱཧ ‘‘ཨིཏི སོབྷནགམནཏྟཱ སུགཏོ’’ཏི སོབྷནཏྠོ སུ-སདྡོཏི ཀཏྭཱ.

ཨསུནྡརཱནཾ དུཀྑཱནཾ སངྑཱརཔྤཝཏྟཱིནཾ ཨབྷཱཝཏོ ཨཙྩནྟསུཁཏྟཱ ཨེཀནྟཏོ སུནྡརཾ ནཱམ ཨསངྑཏཱ དྷཱཏཱུཏི ཨཱཧ ‘‘སུནྡརཉྩེས ཋཱནཾ གཏོ ཨམཏཾ ནིབྦཱན’’ནྟི. ཏེནཱཧ བྷགཝཱ ‘‘ནིབྦཱནཾ པརམཾ སུཁ’’ནྟི (མ. ནི. ༢.༢༡༥; དྷ. པ. ༢༠༣-༢༠༤). སམྨཱཏི སུཊྛུ. སུཊྛུ གམནཉྩ ནཱམ པཊིཔཀྑེན ཨནབྷིབྷཱུཏསྶ གམནནྟི ཨཱཧ ‘‘པཧཱིནེ ཀིལེསེ པུན ཨཔཙྩཱགཙྪནྟོ’’ཏི. ཨིདཉྩ སིཁཱཔྤཏྟཾ སམྨཱགམནཾ, ཡཱཡ ཨཱགམནཱིཡཔཊིཔདཱཡ སིདྡྷཾ, སཱཔི སམྨཱགམནམེཝཱཏི ཨེཝམྤི ¶ བྷགཝཱ སུགཏོཏི དསྶེཏུཾ ‘‘སམྨཱ ཝཱ གཏོ’’ཏིཨཱདི ཝུཏྟཾ. སམྨཱཔཊིཔཏྟིཡཱཏི སམྨཱསམྦོདྷིཡཱ སམྤཱཔནེ ཨཝིཔརཱིཏཔཊིཔཏྟིཡཱ. ‘‘སབྦལོཀསྶ ཧིཏསུཁམེཝ ཀརོནྟོ’’ཏི ཨེཏེན མཧཱབོདྷིཡཱ པཊིཔདཱ ཨཝིབྷཱགེན སབྦསཏྟཱནཾ སབྦདཱ ཧིཏསུཁཱཝཧབྷཱཝེནེཝ པཝཏྟཏཱིཏི དསྶེཏི. ‘‘སསྶཏཾ ཨུཙྪེདནྟི ཨིམེ ཨནྟེ ཨནུཔགཙྪནྟོ གཏོ’’ཏི ཨེཏེན པཊིཙྩསམུཔྤཱདགཏིཾ དསྶེཏི. ‘‘ཀཱམསུཁཾ ཨཏྟཀིལམཐནྟི ཨིམེ ཨནུཔགཙྪནྟོ གཏོ’’ཏི ཨེཏེན ཨརིཡམགྒགཏིཾ དསྶེཏི.

ཏཏྲཱཏི ཡུཏྟཊྛཱནེ ཡུཏྟསྶེཝ བྷཱསནེ ནིཔྥཱདེཏབྦེ, སཱདྷེཏབྦེ ཙེཏཾ བྷུམྨཾ. ཨབྷཱུཏནྟི ཨབྷཱུཏཏྠཾ. ཨཏྠམུཁེན ཧི ཝཱཙཱཡ ཨབྷཱུཏཏཱ, བྷཱུཏཏཱ ཝཱ. ཨཏཙྪནྟི ཏསྶེཝ ཝེཝཙནཾ. ཨབྷཱུཏནྟི ¶ ཝཱ ཨསནྟཾ ཨཝིཛྫམཱནཾ. ཨཏཙྪནྟི ཨཏཐཱཀཱརཾ ཨཉྙཐཱསནྟཾ. ཨནཏྠསཉྷིཏནྟི དིཊྛདྷམྨིཀེན, སམྤརཱཡིཀེན ཝཱ ཨནཏྠེན སཉྷིཏཾ, ཨནཏྠཱཝཧཾ. ན ཨཏྠོཏི ཨནཏྠོ, ཨཏྠསྶ པཊིཔཀྑོ, ཨབྷཱཝོ ཙ, ཏེན སཉྷིཏཾ, པིསུཎཝཱཙཾ, སམྥཔྤལཱཔཉྩཱཏི ཨཏྠོ. ཨེཝམེཏྠ ཙཏུབྦིདྷསྶཱཔི ཝཙཱིདུཙྩརིཏསྶ སངྒཧོ དཊྛབྦོ. ཨེཏྠ ཙ པཋམཱ ཝཱཙཱ སཱིལཝནྟཾ ‘‘དུསྶཱིལོ’’ཏི, ཨཙཎྜཱལཱདིམེཝ ‘‘ཙཎྜཱལོ’’ཏིཨཱདིནཱ བྷཱསམཱནསྶ དཊྛབྦཱ. དུཏིཡཱ དུསྶཱིལཾ ‘‘དུསྶཱིལོ’’ཏི, ཙཎྜཱལཱདིམེཝ ‘‘ཙཎྜཱལོ’’ཏིཨཱདིནཱ ཨཝིནཡེན བྷཱསམཱནསྶ. ཏཏིཡཱ ནེརཡིཀཱདིཀསྶ ནེརཡིཀཱདིབྷཱཝཝིབྷཱཝནཱིཀཐཱ ཡཐཱ ‘‘ཨཱཔཱཡིཀོ དེཝདཏྟོ ནེརཡིཀོ’’ཏིཨཱདིཀཱ (ཙཱུལ༹ཝ. ༣༤༨). ཙཏུཏྠཱི ‘‘ཝེདཝིཧིཏེན ཡཉྙཝིདྷིནཱ པཱཎཱཏིཔཱཏཱདིཀཏཾ སུགཏིཾ ཨཱཝཧཏཱི’’ཏི ལོཀསྶ བྱཱམོཧནཀཐཱ. པཉྩམཱི བྷཱུཏེན པེསུཉྙཱུཔསཾཧཱརཱདིཀཐཱ. ཚཊྛཱ ཡུཏྟཔྤཏྟཊྛཱནེ པཝཏྟིཏཱ དཱནསཱིལཱདིཀཐཱ ཝེདིཏབྦཱ. ཨེཝཾ སམྨཱ གདཏྟཱཏི ཡཐཱཝུཏྟཾ ཨབྷཱུཏཱདིཾ ཝཛྫེཏྭཱ བྷཱུཏཾ ཏཙྪཾ ཨཏྠསཉྷིཏཾ པིཡཾ མནཱཔཾ ཏཏོ ཨེཝ སམྨཱ སུཊྛུ གདནཏོ སུགཏོ ད-ཀཱརསྶ ཏ-ཀཱརཾ ཀཏྭཱ. ཨཱཔཱཐགམནམཏྟེན ཀསྶཙི ཨཔྤིཡམྤི ཧི བྷགཝཏོ ཝཙནཾ པིཡཾ མནཱཔམེཝ ཨཏྠསིདྡྷིཡཱ ལོཀསྶ ཧིཏསུཁཱཝཧཏྟཱ.

ཨཔིཙ སོབྷནཾ གཏཾ གམནཾ ཨེཏསྶཱཏི སུགཏོ. བྷགཝཏོ ཧི ཝེནེཡྻཛནུཔསངྐམནཾ ཨེཀནྟེན ཏེསཾ ཧིཏསུཁནིཔྥཱདནཏོ སོབྷནཾ བྷདྡཀཾ ¶ . ཏཐཱ ལཀྑཎཱནུབྱཉྫནཔཊིམཎྜིཏརཱུཔཀཱཡཏཱཡ དུཏཝིལམྦིཏཁལིཏཱནུཀཌྜྷནནིཔྤཱིལ༹ནུཀྐུཊིཀཀུཊིལཱཀུལཏཱདིདོསརཧིཏཝིལཱསིཏརཱཛཧཾསཝསབྷཝཱརཎམིགརཱཛགམནཾ ཀཱཡགམནཾ, ཉཱཎགམནཉྩ ཝིཔུལནིམྨལཀརུཎཱསཏིཝཱིརིཡཱདིགུཎཝིསེསསཧིཏཾ ཨབྷིནཱིཧཱརཏོ ཡཱཝ མཧཱབོདྷི ཨནཝཛྫཏཱཡ, སཏྟཱནཾ ཧིཏསུཁཱཝཧཏཱཡ ཙ སོབྷནམེཝ. ཨཐ ཝཱ སཡམྦྷཱུཉཱཎེན སཀལམྤི ལོཀཾ པརིཉྙཱབྷིསམཡཝསེན པརིཛཱནནྟོ སམྨཱ གཏོ ཨཝགཏོཏི སུགཏོ. ཏཐཱ ལོཀསམུདཡཾ པཧཱནཱབྷིསམཡཝསེན པཛཧནྟོ ཨནུཔྤཏྟིདྷམྨཏཾ ཨཱཔཱདེནྟོ སམྨཱ གཏོ ཨཏཱིཏོཏི སུགཏོ. ལོཀནིརོདྷཾ ནིབྦཱནཾ སཙྪིཀིརིཡཱབྷིསམཡཝསེན སམྨཱ གཏོ ཨདྷིགཏོཏི སུགཏོ. ལོཀནིརོདྷགཱམིནིཾ པཊིཔདཾ བྷཱཝནཱབྷིསམཡཝསེན སམྨཱ གཏོ པཊིཔནྣོཏི སུགཏོ. ཏཐཱ ཡཾ ཨིམསྶ སདེཝཀསྶ ལོཀསྶ དིཊྛཾ སུཏཾ མུཏཾ ཝིཉྙཱཏཾ པཏྟཾ པརིཡེསིཏཾ ཨནུཝིཙརིཏཾ མནསཱ, སབྦཾ ཏཾ ཧཏྠཏལེ ཨཱམལཀཾ ཝིཡ སམྨཱ པཙྩཀྑཏོ གཏོ ཨབྦྷཉྙཱསཱིཏི སུགཏོ.

༡༣༥. སབྦཐཱཏི སབྦཔྤཀཱརེན. ཡོ ཡོ ལོཀོ ཡཐཱ ཡཐཱ ཝེདིཏབྦོ, ཏཐཱ ཏཐཱ. ཏེ ¶ པན པཀཱརེ དསྶེཏུཾ ‘‘སབྷཱཝཏོ’’ཏིཨཱདི ཝུཏྟཾ. ཏཏྠ སབྷཱཝཏོཏི དུཀྑསབྷཱཝཏོ. སབྦོ ཧི ལོཀོ དུཀྑསབྷཱཝོ. ཡཐཱཧ ‘‘སཾཁིཏྟེན པཉྩུཔཱདཱནཀྑནྡྷཱ དུཀྑཱ’’ཏི (མཧཱཝ. ༡༤; དཱི. ནི. ༢.༣༨༧). སམུདཡཏོཏི ཡཏོ སོ སམུདེཏི, ཏཏོ ཏཎྷཱདིཏོ. ནིརོདྷཏོཏི ཡཏྠ སོ ནིརུཛ྄ཛྷཏི, ཏཏོ ཝིསངྑཱརཏོ. ནིརོདྷཱུཔཱཡཏོཏི ཡེན ཝིདྷིནཱ སོ ནིརོདྷོ པཏྟབྦོ, ཏཏོ ཨརིཡམགྒཏོ, ཨིཏོ ཨཉྙསྶ པཀཱརསྶ ཨབྷཱཝཱ.

ཨིཏི ‘‘སབྦཐཱ ལོཀཾ ཨཝེདཱི’’ཏི ཝཏྭཱ ཏདཏྠསཱདྷཀཾ སུཏྟཾ དསྶེནྟོ ‘‘ཡཏྠ ཁོ ཨཱཝུསོ’’ཏིཨཱདིམཱཧ. ཏཏྠ ‘‘ན ཛཱཡཏཱི’’ཏིཨཱདིནཱ ཨུཛུཀཾ ཛཱཏིཨཱདཱིནི པཊིཀྑིཔིཏྭཱ ‘‘ན ཙཝཏི ན ཨུཔཔཛྫཏཱི’’ཏི པདདྭཡེན ཨཔརཱཔརཾ ཙཝནུཔཔཛྫནཱནི པཊིཀྑིཔཏི. ཀེཙི པན ‘‘ན ཛཱཡཏཱིཏིཨཱདི གབྦྷསེཡྻཀཝསེན ཝུཏྟཾ, ཨིཏརཾ ཨོཔཔཱཏིཀཝསེནཱ’’ཏི ཝདནྟི. ཏནྟི ཛཱཏིཨཱདིརཧིཏཾ. གམནེནཱཏི པདསཱ གམནེན. ཉཱཏེཡྻནྟི ཛཱནིཏབྦཾ. ‘‘ཉཱཏཱཡ’’ནྟི ཝཱ པཱཋོ, ཉཱཏཱ ཨཡཾ ནིབྦཱནཏྠིཀོཏི ཨདྷིཔྤཱཡོ.

ཀཱམཾ ¶ པཱདགམནེན གནྟྭཱ ལོཀསྶནྟཾ ཉཱཏུཾ, དཊྛུཾ, པཏྟུཾ ཝཱ ན སཀྐཱ, ཨཔིཙ པརིམིཏཔརིཙྪིནྣཊྛཱནེ ཏཾ པཉྙཱཔེཏྭཱ དསྶེམཱིཏི དསྶེནྟོ ‘‘ཨཔིཙཱ’’ཏིཨཱདིམཱཧ. ཏཏྠ སསཉྙིམྷཱིཏི སཉྙཱསཧིཏེ. ཏཏོ ཨེཝ སམནཀེ སཝིཉྙཱཎཀེ. ཨཝིཉྙཱཎཀེ པན ཨུཏུསམུཊྛཱནརཱུཔསམུདཱཡམཏྟེ པཉྙཱཔེཏུཾ ན སཀྐཱཏི ཨདྷིཔྤཱཡོ. ལོཀནྟི ཁནྡྷཱདིལོཀཾ. ལོཀནིརོདྷནྟི ཏསྶ ལོཀསྶ ནིརུཛ྄ཛྷནཾ, ནིབྦཱནམེཝ ཝཱ. ཨདེསམྤི ཧི ཏཾ ཡེསཾ ནིརོདྷོ, ཏེསཾ ཝསེན ཨུཔཙཱརཏོ, དེསཏོཔི ནིདྡིསཱིཡཏི ཡཐཱ ‘‘ཙཀྑུཾ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ པཧཱིཡམཱནཱ པཧཱིཡཏི, ཨེཏྠ ནིརུཛ྄ཛྷམཱནཱ ནིརུཛ྄ཛྷཏཱི’’ཏི (དཱི. ནི. ༢.༤༠༡; མ. ནི. ༡.༡༣༤; ཝིབྷ. ༢༠༤).

གམནེནཱཏི པཱཀཏིཀགམནེན. ལོཀསྶནྟོཏི སངྑཱརལོཀསྶ ཨནྟོ ཨནྟཀིརིཡཱཧེཏུབྷཱུཏཾ ནིབྦཱནཾ. ཀུདཱཙནནྟི ཀདཱཙིཔི. ཨཔཏྭཱཏི ཨགྒམགྒེན ཨནདྷིགནྟྭཱ. པམོཙནནྟི པམུཏྟི ནིསྶརཎཾ. ཏསྨཱཏི ཡསྨཱ ལོཀསྶནྟཾ ཨཔཏྭཱ ཝཊྚདུཀྑཏོ མུཏྟི ནཏྠི, ཏསྨཱ. ཧཝེཏི ནིཔཱཏམཏྟཾ. ལོཀཝིདཱུཏི སབྷཱཝཱདིཏོ སབྦཾ ལོཀཾ ཛཱནནྟོ. སུམེདྷོཏི སུནྡརཔཉྙོ. ལོཀནྟགཱུཏི པརིཉྙཱབྷིསམཡེན ལོཀཾ ཝིདིཏྭཱ པཧཱནཱབྷིསམཡེན ལོཀནྟགཱུ. མགྒབྲཧྨཙརིཡཝཱསསྶ པརིནིཊྛིཏཏྟཱ ཝུསིཏབྲཧྨཙརིཡོ. སབྦེསཾ ཀིལེསཱནཾ སམིཏཏྟཱ, ཙཏུསཙྩདྷམྨཱནཾ ¶ ཝཱ ཨབྷིསམིཏཏྟཱ སམིཏཱཝཱི. ནཱསཱིསཏི ན པཏྠེཏི. ཡཐཱ ཨིམཾ ལོཀཾ, ཨེཝཾ པརཉྩ ལོཀཾ ཨཔྤཊིསནྡྷིཀཏྟཱ.

༡༣༦. ཨེཝཾ ཡདིཔི ལོཀཝིདུཏཱ ཨནཝསེསཏོ དསྶིཏཱ སབྷཱཝཏོ དསྶིཏཏྟཱ, ལོཀོ པན ཨེཀདེསེནེཝ ཝུཏྟོཏི ཏཾ ཨནཝསེསཏོ དསྶེཏུཾ ‘‘ཨཔིཙ ཏཡོ ལོཀཱ’’ཏིཨཱདི ཝུཏྟཾ. ཏཏྠ ཨིནྡྲིཡབདྡྷཱནཾ ཁནྡྷཱནཾ སམཱུཧོ, སནྟཱནོ ཙ སཏྟལོཀོ. རཱུཔཱདཱིསུ སཏྟཝིསཏྟཏཱཡ སཏྟོ, ལོཀཱིཡནྟི ཨེཏྠ ཀུསལཱཀུསལཾ, ཏབྦིཔཱཀོ ཙཱཏི ལོཀོཏི. ཨནིནྡྲིཡབདྡྷཱནཾ རཱུཔཱདཱིནཾ སམཱུཧོ, སནྟཱནོ ཙ ཨོཀཱསལོཀོ ལོཀིཡནྟི ཨེཏྠ ཏསཱ, ཐཱཝརཱ ཙ, ཏེསཉྩ ཨོཀཱསབྷཱུཏོཏི. ཏདཱདྷཱརཏཱཡ ཧེས ‘‘བྷཱཛནལོཀོ’’ཏིཔི ཝུཙྩཏི. ཨུབྷཡེཔི ཁནྡྷཱ སངྑཱརལོཀོ པཙྩཡེཧི སངྑརཱིཡནྟི, ལུཛྫནྟི པལུཛྫནྟི ཙཱཏི. ཨཱཧཱརཊྛིཏིཀཱཏི པཙྩཡཊྛིཏིཀཱ, པཙྩཡཱཡཏྟཝུཏྟིཀཱཏི ¶ ཨཏྠོ. པཙྩཡཏྠོ ཧེཏྠ ཨཱཧཱར-སདྡོ ‘‘ཨཡམཱཧཱརོ ཨནུཔྤནྣསྶ ཝཱ ཀཱམཙྪནྡསྶ ཨུཔྤཱདཱཡཱ’’ཏིཨཱདཱིསུ (སཾ. ནི. ༥.༢༣༢) ཝིཡ. ཨེཝཾ ཧི ‘‘སབྦེ སཏྟཱ’’ཏི ཨིམིནཱ ཨསཉྙསཏྟཱཔི པརིགྒཧིཏཱ ཧོནྟི. སཱ པནཱཡཾ ཨཱཧཱརཊྛིཏིཀཏཱ ནིཔྤརིཡཱཡཏོ སངྑཱརདྷམྨོ, ན སཏྟདྷམྨོཏི ཨཱཧ ‘‘ཨཱཧཱརཊྛིཏིཀཱཏི ཨཱགཏཊྛཱནེ སངྑཱརལོཀོ ཝེདིཏབྦོ’’ཏི.

ཡདི ཨེཝཾ ‘‘སབྦེ སཏྟཱ’’ཏི ཨིདཾ ཀཐནྟི? པུགྒལཱདྷིཊྛཱནཱ དེསནཱཏི ནཱཡཾ དོསོ. ཡཐཱ ཨཉྙཏྠཱཔི ‘‘ཨེཀདྷམྨེ, བྷིཀྑཝེ, བྷིཀྑུ སམྨཱ ནིབྦིནྡམཱནོ སམྨཱ ཝིརཛྫམཱནོ སམྨཱ ཝིམུཙྩམཱནོ སམྨཱ པརིཡནྟདསྶཱཝཱི སམྨདཏྠཾ ཨབྷིསམེཙྩ དིཊྛེཝ དྷམྨེ དུཀྑསྶནྟཀརོ ཧོཏི. ཀཏམསྨིཾ ཨེཀདྷམྨེ? སབྦེ སཏྟཱ ཨཱཧཱརཊྛིཏིཀཱ’’ཏི (ཨ. ནི. ༡༠.༢༧). དིཊྛིགཏིཀཱནཾ སསྶཏཱདིཝསེན ‘‘ཨཏྟཱ, ལོཀོ’’ཏི ཙ པརིཀཔྤནཱ ཡེབྷུཡྻེན སཏྟཝིསཡཱ, ན སངྑཱརཝིསཡཱཏི ཨཱཧ ‘‘སསྶཏོ ལོཀོཏི ཝཱ ཨསསྶཏོ ལོཀོཏི ཝཱ ཨཱགཏཊྛཱནེ སཏྟལོཀོ ཝེདིཏབྦོ’’ཏི.

ཡཱཝཏཱ ཙནྡིམསཱུརིཡཱ པརིཧརནྟཱིཏི ཡཏྟཀེ ཋཱནེ ཙནྡིམསཱུརིཡཱ པརིཝཏྟནྟི པརིབྦྷམནྟི. དིསཱ བྷནྟི ཝིརོཙམཱནཱཏི ཏེསཾ པརིབྦྷམནེནེཝ ཏཱ དིསཱ པབྷསྶརཱ ཧུཏྭཱ ཝིརོཙནྟི. ཏཱཝ སཧསྶདྷཱ ལོཀོཏི ཏཏྟཀཾ སཧསྶཔྤཀཱརོ ཨོཀཱསལོཀོ, སཧསྶལོཀདྷཱཏུཡོཏི ཨཏྠོ. ‘‘ཏཱཝ སཧསྶཝཱ’’ཏི ཝཱ པཱཋོ.

ཏམྤཱིཏི ¶ ཏཾ ཏིཝིདྷམྤི ལོཀཾ. ཏཐཱ ཧིསྶ སབྦཐཱཔི ཝིདིཏོཏི སམྦནྡྷོ. ཨེཀོ ལོཀོཏི ‘‘སབྦེ སཏྟཱ ཨཱཧཱརཊྛིཏིཀཱ’’ཏི ཡཱཡ པུགྒལཱདྷིཊྛཱནཱཡ ཀཐཱཡ སབྦེསཾ སངྑཱརཱནཾ པཙྩཡཱཡཏྟཝུཏྟིཏཱ ཝུཏྟཱ, ཏཱཡ སབྦོ སངྑཱརལོཀོ ཨེཀོ ཨེཀཝིདྷོ པཀཱརནྟརསྶ ཨབྷཱཝཏོ. དྭེ ལོཀཱཏིཨཱདཱིསུཔི ཨིམིནཱ ནཡེན ཨཏྠོ ཝེདིཏབྦོ. ནཱམ-གྒཧཎེན ཙེཏྠ ནིབྦཱནསྶ ཨགྒཧཎཾ, ཏསྶ ཨལོཀསབྷཱཝཏྟཱ. ནནུ ཙ ‘‘ཨཱཧཱརཊྛིཏིཀཱ’’ཏི ཨེཏྠ པཙྩཡཱཡཏྟཝུཏྟིཏཱཡ མགྒཕལདྷམྨཱནམྤི ལོཀཏཱ ཨཱཔཛྫཏཱིཏི? ནཱཔཛྫཏི, པརིཉྙེཡྻཱནཾ དུཀྑསཙྩདྷམྨཱནཾ ཨིདྷ ‘‘ལོཀོ’’ཏི ཨདྷིཔྤེཏཏྟཱ. ཨཐ ཝཱ ‘‘ན ལུཛྫཏི ན པལུཛྫཏཱི’’ཏི ¶ ཡོ གཧིཏོ ཏཐཱ ན ཧོཏི, སོ ལོཀོཏི ཏཾགཧཎརཧིཏཱནཾ ལོཀུཏྟརཱནཾ ནཏྠི ལོཀཏཱ. ཨུཔཱདཱནཱནཾ ཨཱརམྨཎབྷཱུཏཱ ཁནྡྷཱ ཨུཔཱདཱནཀྑནྡྷཱ. དསཱཡཏནཱནཱིཏི དས རཱུཔཱཡཏནཱནི.

ཨེཏྠ ཙ ‘‘ཨཱཧཱརཊྛིཏིཀཱ’’ཏི པཙྩཡཱཡཏྟཝུཏྟིཏཱཝཙནེན སངྑཱརཱནཾ ཨནིཙྩཏཱ. ཏཱཡ ཙ ‘‘ཡདནིཙྩཾ, ཏཾ དུཀྑཾ. ཡཾ དུཀྑཾ, ཏདནཏྟཱ’’ཏི (སཾ. ནི. ༣.༡༥) ཝཙནཏོ དུཀྑཱནཏྟཏཱ ཙ པཀཱསིཏཱ ཧོནྟཱིཏི ཏཱིཎིཔི སཱམཉྙལཀྑཎཱནི གཧིཏཱནི. ནཱམནྟི ཙཏྟཱརོ ཨརཱུཔིནོ ཁནྡྷཱ, ཏེ ཙ ཨཏྠཏོ ཕསྶཱདཡོ. རཱུཔནྟི བྷཱུཏུཔཱདཱཡརཱུཔཱནི, ཏཱནི ཙ ཨཏྠཏོ པཐཝཱིཨཱདཡོཏི ཨཝིསེསེནེཝ སལཀྑཎཏོ སངྑཱརཱ གཧིཏཱ. ཏགྒཧཎེནེཝ ཡེ ཏེསཾ ཝིསེསཱ ཀུསལཱདཡོ, ཧེཏུཨཱདཡོ ཙ, ཏེཔི གཧིཏཱ ཨེཝ ཧོནྟཱིཏི ཨཱཧ ‘‘ཨིཏི ཨཡཾ སངྑཱརལོཀོཔི སབྦཐཱ ཝིདིཏོ’’ཏི.

ཨཱགམྨ ཙིཏྟཾ སེཏི ཨེཏྠཱཏི ཨཱསཡོ མིགཱསཡོ ཝིཡ. ཡཐཱ མིགོ གོཙརཱཡ གནྟྭཱ པཙྩཱགནྟྭཱ ཏཏྠེཝ ཝནགཧནེ སཡཏཱིཏི སོ ཏསྶ ཨཱསཡོ, ཨེཝཾ ཨཉྙཐཱ པཝཏྟིཏྭཱཔི ཙིཏྟཾ ཨཱགམྨ ཡཏྠ སེཏི, སོ ཏསྶ ཨཱསཡོཏི ཝུཙྩཏི. སོ པན སསྶཏདིཊྛིཨཱདིཝསེན ཙཏུབྦིདྷོ. ཝུཏྟཉྩ –

‘‘སསྶཏུཙྪེདདིཊྛི ཙ, ཁནྟི ཙེཝཱནུལོམིཀཱ;

ཡཐཱབྷཱུཏཉྩ ཡཾ ཉཱཎཾ, ཨེཏཾ ཨཱསཡསདྡིཏ’’ནྟི.

ཏཏྠ སབྦདིཊྛཱིནཾ སསྶཏུཙྪེདདིཊྛཱིཧི སངྒཧིཏཏྟཱ སབྦེཔི དིཊྛིགཏིཀཱ སཏྟཱ ཨིམཱ ཨེཝ དྭེ དིཊྛིཡོ སནྣིསྶིཏཱ. ཡཐཱཧ ‘‘དྭཡནིསྶིཏོ ཁྭཱཡཾ, ཀཙྩཱན, ལོཀོ ཡེབྷུཡྻེན ཨཏྠིཏཉྩ ནཏྠིཏཉྩཱ’’ཏི ¶ (སཾ. ནི. ༢.༡༥). ཨཏྠིཏཱཏི ཧི སསྶཏགྒཱཧོ ཨདྷིཔྤེཏོ, ནཏྠིཏཱཏི ཨུཙྪེདགྒཱཧོ. ཨཡཾ ཏཱཝ ཝཊྚནིསྶིཏཱནཾ པུཐུཛྫནཱནཾ ཨཱསཡོ. ཝིཝཊྚནིསྶིཏཱནཾ པན སུདྡྷསཏྟཱནཾ ཨནུལོམིཀཱ ཁནྟི, ཡཐཱབྷཱུཏཉཱཎནྟི དུཝིདྷོ ཨཱསཡོ.

ཨཱསཡཾ ཛཱནཱཏཱིཏི ཙཏུབྦིདྷམྤི སཏྟཱནཾ ཨཱསཡཾ ཛཱནཱཏི. ཛཱནནྟོ ཙ ཏེསཾ དིཊྛིགཏཱནཾ, ཏེསཉྩ ཉཱཎཱནཾ ཨཔྤཝཏྟིཀྑཎེཔི ཛཱནཱཏི. ཝུཏྟཉྷེཏཾ –

‘‘ཀཱམཾ ¶ སེཝནྟཉྙེཝ ཛཱནཱཏི ‘ཨཡཾ པུགྒལོ ཀཱམགརུཀོ ཀཱམཱསཡོ ཀཱམཱདྷིམུཏྟོ’ཏི, ཀཱམཾ སེཝནྟཉྙེཝ ཛཱནཱཏི ‘ཨཡཾ པུགྒལོ ནེཀྑམྨགརུཀོ ནེཀྑམྨཱསཡོ ནེཀྑམྨཱདྷིམུཏྟོ’ཏི’’ཨཱདི (པཊི. མ. ༡.༡༡༣).

ཨཔྤཧཱིནབྷཱཝེན སནྟཱནེ ཨནུ ཨནུ སཡནྟཱིཏི ཨནུསཡཱ, ཨནུརཱུཔཾ ཀཱརཎཾ ལབྷིཏྭཱ ཨུཔྤཛྫནྟཱིཏི ཨཏྠོ. ཨེཏེན ནེསཾ ཀཱརཎལཱབྷེ ཨུཔྤཛྫནཱརཧཏཾ དསྶེཏི. ཨཔྤཧཱིནཱ ཧི ཀིལེསཱ ཀཱརཎལཱབྷེ སཏི ཨུཔྤཛྫནྟི. ཀེ པན ཏེ? རཱགཱདཡོ སཏྟ ཨནཱགཏཱ ཀིལེསཱ, ཨཏཱིཏཱ, པཙྩུཔྤནྣཱ ཙ ཏཾསབྷཱཝཏྟཱ ཏཐཱ ཝུཙྩནྟི. ན ཧི དྷམྨཱནཾ ཀཱལབྷེདེན སབྷཱཝབྷེདོ ཨཏྠི. ཏཾ སཏྟཝིདྷཾ ཨནུསཡཾ ཏསྶ ཏསྶ སཏྟསྶ སནྟཱནེ པརོཔརབྷཱཝེན པཝཏྟམཱནཾ ཛཱནཱཏི.

ཙརིཏནྟི སུཙརིཏདུཙྩརིཏཾ. ཏཾ ཧི ཝིབྷངྒེ (ཝིབྷ. ༨༡༤, ༨༡༧) ཙརིཏནིདྡེསེ ནིདྡིཊྛཾ. ཨཐ ཝཱ ཙརིཏནྟི ཙརིཡཱ ཝེདིཏབྦཱ. ཏཱ པན རཱགདོསམོཧསདྡྷཱབུདྡྷིཝིཏཀྐཝསེན ཚ མཱུལཙརིཡཱ, ཏཱསཾ ཨཔརིཡནྟོ ཨནྟརབྷེདོ, སཾསགྒབྷེདོ པན ཏེསཊྛིཝིདྷོ. ཏཾ ཙརིཏཾ སབྷཱཝཏོ སཾཀིལེསཝོདཱནཏོ སམུཊྛཱནཏོ ཕལཏོ ནིསྶནྡཏོཏི ཨེཝམཱདིནཱ པཀཱརེན ཛཱནཱཏི.

ཨདྷིམུཏྟི ཨཛ྄ཛྷཱསཡདྷཱཏུ. སཱ དུཝིདྷཱ ཧཱིནཱདྷིམུཏྟི པཎཱིཏཱདྷིམུཏྟཱིཏི. ཡཱཡ ཧཱིནཱདྷིམུཏྟིཀཱ སཏྟཱ ཧཱིནཱདྷིམུཏྟིཀེཡེཝ སེཝནྟི, པཎཱིཏཱདྷིམུཏྟིཀཱ ཙ པཎཱིཏཱདྷིམུཏྟིཀེཡེཝ. སཱ ཨཛ྄ཛྷཱསཡདྷཱཏུ ཨཛ྄ཛྷཱསཡསབྷཱཝོ ཨདྷིམུཏྟི. ཏཾ ཨདྷིམུཏྟིཾ ཛཱནཱཏི ‘‘ཨིམསྶ ཨདྷིམུཏྟི ཧཱིནཱ, ཨིམསྶ པཎཱིཏཱ’’ཏི, ཏཏྠཱཔི ‘‘ཨིམསྶ མུདུ, ཨིམསྶ མུདུཏརཱ, ཨིམསྶ མུདུཏམཱ’’ཏིཨཱདིནཱ. ཨིནྡྲིཡཱནཾ ཧི ཏིཀྑམུདུབྷཱཝཱདིནཱ ཡཐཱརཧཾ ཨདྷིམུཏྟིཡཱ ཏིཀྑམུདུབྷཱཝཱདིཀོ ཝེདིཏབྦོ. ཏཐཱ ཧི ཝུཏྟཾ སམྨོཧཝིནོདནཱིཡཾ (ཝིབྷ. ཨཊྛ. ༨༡༨, ༨༢༠) ‘‘ཧེཊྛཱ ¶ གཧིཏཱཔི ཨདྷིམུཏྟི ཨིདྷ སཏྟཱནཾ ཏིཀྑིནྡྲིཡམུདིནྡྲིཡབྷཱཝདསྶནཏྠཾ པུན གཧིཏཱ’’ཏི.

ཨཔྤརཛཾ ཨཀྑཾ ཨེཏེསནྟི ཨཔྤརཛཀྑཱ, ཨཔྤཾ ཝཱ རཛཾ པཉྙཱམཡེ ཨཀྑིམྷི ཨེཏེསནྟི ཨཔྤརཛཀྑཱ, ཨནུསྶདརཱགཱདིརཛཱ སཏྟཱ, ཏེ ཨཔྤརཛཀྑེ. མཧཱརཛཀྑེཏི ཨེཏྠཱཔི ཨེསེཝ ནཡོ. ཨུསྶདརཱགཱདིརཛཱ མཧཱརཛཀྑཱ.

ཏིཀྑིནྡྲིཡེཏི ¶ ཏིཁིཎེཧི སདྡྷཱདཱིཧི ཨིནྡྲིཡེཧི སམནྣཱགཏེ. མུདིནྡྲིཡེཏི མུདུཀེཧི སདྡྷཱདཱིཧི ཨིནྡྲིཡེཧི སམནྣཱགཏེ. ཨུཔནིསྶཡཨིནྡྲིཡཱནི ནཱམ ཨིདྷཱདྷིཔྤེཏཱནི. སྭཱཀཱརེཏི སུནྡརཱཀཱརེ ཀལྱཱཎཔཀཏིཀེ, ཝིཝཊྚཛ྄ཛྷཱསཡེཏི ཨཏྠོ. སུཝིཉྙཱཔཡེཏི སམྨཏྟནིཡཱམཾ ཝིཉྙཱཔེཏུཾ སུཀརེ སདྡྷེ, པཉྙཝནྟེ ཙ. བྷབྦེ ཨབྷབྦེཏི ཨེཏྠ བྷབྦེཏི ཀམྨཱཝརཎཀིལེསཱཝརཎཝིཔཱཀཱཝརཎརཧིཏེ. ཝུཏྟཝིཔརིཡཱཡེན དྭཱཀཱརདུཝིཉྙཱཔཡཱབྷབྦཱ ཝེདིཏབྦཱ. ཨེཏྠ ཙ ‘‘ཨིམསྶ རཱགརཛོ ཨཔྤོ, ཨིམསྶ དོསརཛོ ཨཔྤོ’’ཏིཨཱདིནཱ ཨཔྤརཛཀྑེསུ ཛཱནནཾ ཝེདིཏབྦཾ. སེསེསུཔི ཨེསེཝ ནཡོ. ཏསྨཱཏི ཡསྨཱ བྷགཝཱ ཨཔརིམཱཎེ སཏྟེ ཨཱསཡཱདིཏོ ཨནཝསེསེཏྭཱ ཛཱནཱཏི, ཏསྨཱ ཨསྶ བྷགཝཏོ སཏྟལོཀོཔི སབྦཐཱ ཝིདིཏོ.

ནནུ ཙ སཏྟེསུ པམཱཎཱདིཔི ཛཱནིཏབྦོ ཨཏྠཱིཏི? ཨཏྠི. ཏསྶ པན ཛཱནནཾ ན ནིབྦིདཱཡ ཝིརཱགཱཡ ནིརོདྷཱཡཱཏི ཨིདྷ ན གཧིཏཾ, བྷགཝཏོ པན ཏམྤི སུཝིདིཏཾ སུཝཝཏྠཱཔིཏམེཝ, པཡོཛནཱབྷཱཝཱ དེསནཾ ནཱརུལ༹ྷཾ. ཏེན ཝུཏྟཾ –

‘‘ཨཐ ཁོ བྷགཝཱ པརིཏྟཾ ནཁསིཁཱཡཾ པཾསུཾ ཨཱརོཔེཏྭཱ བྷིཀྑཱུ ཨཱམནྟེསི ‘ཏཾ ཀིཾ མཉྙཐ, བྷིཀྑཝེ, ཀཏམཾ ནུ ཁོ བཧུཏརཾ – ཡོ ཝཱཡཾ མཡཱ པརིཏྟོ ནཁསིཁཱཡཾ པཾསུ ཨཱརོཔིཏོ, ཨཡཾ ཝཱ མཧཱཔཐཝཱི’’’ཏིཨཱདི (སཾ. ནི. ༥.༡༡༢༡).

༡༣༧. ཨོཀཱསལོཀོཔི སབྦཐཱ ཝིདིཏོཏི སམྦནྡྷོ. ཙཀྐཝཱལ༹ནྟི ལོཀདྷཱཏུ. སཱ ཧི ནེམིམཎྜལསདིསེན ཙཀྐཝཱལ༹པབྦཏེན སམནྟཏོ པརིཀྑིཏྟཏྟཱ ‘‘ཙཀྐཝཱལ༹’’ནྟི ཝུཙྩཏི. ཙཏུཏིཾསསཏཱནི ཙཱཏི ཙཏུཨདྷིཀཱནི ཏིཾསསཏཱནི, ཏཱིཎིསཧསྶཱནི, ཙཏྟཱརིསཏཱནི ཙཱཏི ཨཏྠོ ¶ . ཨཌྜྷུཌྜྷཱནཱིཏི ཨུཔཌྜྷཙཏུཏྠཱནི, ཏཱིཎིསཏཱནི, པཉྙཱསཉྩཱཏི ཨཏྠོ. ནཧུཏཱནཱིཏི དསསཧསྶཱནི. སངྑཱཏཱཏི ཀཐིཏཱ. སཎྛིཏཱིཏི ཧེཊྛཱ, ཨུཔརིཏོ ཙཱཏི སབྦསོ ཋིཏི.

ཨེཝཾ སཎྛིཏེཏི ཨེཝམཝཊྛིཏེ. ཨེཏྠཱཏི ཙཀྐཝཱལེ༹. ཨཙྩུགྒཏོ ཏཱཝདེཝཱཏི ཏཏྟཀམེཝ ཙཏུརཱསཱིཏི ཡོཛནསཧསྶཱནིཡེཝ ཨུབྦེདྷོ ¶ . ན ཀེཝལཾ ཙེཏྠ ཨུབྦེདྷོཝ, ཨཐ ཁོ ཨཱཡཱམཝིཏྠཱརཱཔིསྶ ཏཏྟཀཱཡེཝ. ཝུཏྟཉྷེཏཾ –

‘‘སིནེརུ, བྷིཀྑཝེ, པབྦཏརཱཛཱ ཙཏུརཱསཱིཏི ཡོཛནསཧསྶཱནི ཨཱཡཱམེན, ཙཏུརཱསཱིཏི ཡོཛནསཧསྶཱནི ཝིཏྠཱརེནཱ’’ཏི (ཨ. ནི. ༧.༦༦).

ཏཏོཏི སིནེརུསྶ ཧེཊྛཱ, ཨུཔརི ཙ ཝུཏྟཔྤམཱཎཏོ. ཨུཔཌྜྷུཔཌྜྷེནཱཏི ཨུཔཌྜྷེན ཨུཔཌྜྷེན. ཨིདཾ ཝུཏྟཾ ཧོཏི – དྭཱཙཏྟཱལཱིས ཡོཛནསཧསྶཱནི སམུདྡེ ཨཛ྄ཛྷོགཱལ༹ྷོ ཏཏྟཀམེཝ ཙ ཨུཔརི ཨུགྒཏོ ཡུགནྡྷརཔབྦཏོ, ཨེཀཝཱིས ཡོཛནསཧསྶཱནི སམུདྡེ ཨཛ྄ཛྷོགཱལ༹ྷོ ཏཏྟཀམེཝ ཙ ཨུཔརི ཨུགྒཏོ ཨཱིསདྷརོ པབྦཏོཏི ཨིམིནཱ ནཡེན སེསེསུཔི ཨུཔཌྜྷུཔཌྜྷཔམཱཎཏཱ ཝེདིཏབྦཱ. ཡཐཱ མཧཱསམུདྡོ ཡཱཝ ཙཀྐཝཱལ༹པཱདམཱུལཱ ཨནུཔུབྦནིནྣོ, ཨེཝཾ ཡཱཝ སིནེརུཔཱདམཱུལཱཏི ཧེཊྛཱ སིནེརུཔམཱཎཏོ ཨུཔཌྜྷཔམཱཎོཔི ཡུགནྡྷརཔབྦཏོ པཐཝིཡཾ སུཔྤཏིཊྛིཏོ, ཨེཝཾ ཨཱིསདྷརཱདཡོཔཱིཏི དཊྛབྦཾ. ཝུཏྟཾ ཧེཏཾ ‘‘མཧཱསམུདྡོ, བྷིཀྑཝེ, ཨནུཔུབྦནིནྣོ ཨནུཔུབྦཔོཎོ ཨནུཔུབྦཔབྦྷཱརོ’’ཏི (ཨུདཱ. ༤༥; ཙཱུལ༹ཝ. ༣༨༤; ཨ. ནི. ༨.༡༩). སིནེརུཡུགནྡྷརཱདཱིནཾ ཨནྟརེ སཱིདནྟརསམུདྡཱ ནཱམ. ཏེ ཝིཏྠཱརཏོ ཡཐཱཀྐམཾ སིནེརུཨཱདཱིནཾ ཨཙྩུགྒཏསམཱནཔརིམཱཎཱཏི ཝདནྟི. བྲཧཱཏི མཧནྟོ.

སིནེརུསྶ སམནྟཏོཏི པརིཀྑིཔནཝསེན སིནེརུསྶ སམནྟཏོ ཋིཏཱ. སིནེརུཾ ཏཱཝ པརིཀྑིཔིཏྭཱ ཋིཏོ ཡུགནྡྷརོ, ཏཾ པརིཀྑིཔིཏྭཱ ཨཱིསདྷརོ. ཨེཝཾ ཏཾ ཏཾ པརིཀྑིཔིཏྭཱ ཋིཏཱ ‘‘སིནེརུསྶ སམནྟཏོ’’ཏི ཝུཏྟཱ.

ཡོཛནཱནཾ སཏཱནུཙྩོ, ཧིམཝཱ པཉྩ པབྦཏོཏི ཧིམཝཱ པབྦཏོ པཉྩ ཡོཛནཱནཾ སཏཱནི ཨུཙྩོ ཨུབྦེདྷོ. ནགཝ྄ཧཡཱཏི ནག-སདྡེན ཨཝ྄ཧཱཏབྦཱ རུཀྑཱབྷིདྷཱནཱ. པཉྙཱསཡོཛནཀྑནྡྷསཱཁཱཡཱམཱཏི’ ཨུབྦེདྷཏོ པཉྙཱསཡོཛནཀྑནྡྷཱཡཱམཱ, ཨུབྦེདྷཏོ, སམནྟཏོ ཙ པཉྙཱསཡོཛནསཱཁཱཡཱམཱ ¶ ཙ. ཏཏོ ཨེཝ སཏཡོཛནཝིཏྠིཎྞཱ, ཏཱཝདེཝ ཙ ཨུགྒཏཱ. ཡསྶཱནུབྷཱཝེནཱཏི ཡསྶཱ མཧནྟཏཱ ཀཔྤཊྛཱཡིཏཱདིཔྤཀཱརེན པབྷཱཝེན.

གརུལཱ༹ནཾ སིམྦལིརུཀྑོ སིནེརུསྶ དུཏིཡཔརིབྷཎྜེ པཏིཊྛིཏོ.

སིརཱིསེནཱཏི ¶ པཙྩཏྟེ ཀརཎཝཙནཾ. སཏྟམནྟི ལིངྒཝིཔལླཱསེན ཝུཏྟཾ, སིརཱིསོ བྷཝཏི སཏྟམོཏི ཨཏྠོ.

ཏཏྠ ཙཎྜམཎྜལཾ ཧེཊྛཱ, སཱུརིཡམཎྜལཾ ཨུཔརི. ཏསྶ ཨཱསནྣབྷཱཝེན ཙནྡམཎྜལཾ ཨཏྟནོ ཚཱཡཱཡ ཝིཀལབྷཱཝེན ཨུཔཊྛཱཏི. ཏཱནི ཡོཛནནྟརིཀཱནི ཡུགནྡྷརགྒཔམཱཎེ ཨཱཀཱསེ ཝིཙརནྟི. ཨསུརབྷཝནཾ སིནེརུསྶ ཧེཊྛཱ. ཨཝཱིཙི ཛམྦུདཱིཔསྶ. ཛམྦུདཱིཔོ སཀཊསཎྛཱནོ. ཨཔརགོཡཱནཾ ཨཱདཱསསཎྛཱནོ. པུབྦཝིདེཧོ ཨདྡྷཙནྡསཎྛཱནོ. ཨུཏྟརཀུརུ པཱིཋསཎྛཱནོ. ཏཾཏཾནིཝཱསཱིནཾ, ཏཾཏཾཔརིཝཱརདཱིཔཝཱསཱིནཉྩ མནུསྶཱནཾ མུཁམྤི ཏཾཏཾསཎྛཱནནྟི ཝདནྟི. ཏདནྟརེསཱུཏི ཏེསཾ ཙཀྐཝཱལཱ༹ནཾ ཨནྟརེསུ. ཏིཎྞཾ ཧི པཏྟཱནཾ ཨཉྙམཉྙཨཱསནྣབྷཱཝེན ཋཔིཏཱནཾ ཨནྟརསདིསེ ཏིཎྞཾ ཏིཎྞཾ ཙཀྐཝཱལཱ༹ནཾ ཨནྟརེ ཨེཀེཀོ ལོཀནྟརནིརཡོ.

ཨནནྟཱནཱིཏི ཨཔརིམཱཎཱནི, ‘‘ཨེཏྟཀཱནཱི’’ཏི ཨཉྙེཧི མིནིཏུཾ ཨསཀྐུཎེཡྻཱནི. བྷགཝཱ ཨནནྟེན བུདྡྷཉཱཎེན ཨཝེདི ‘‘ཨནནྟོ ཨཱཀཱསོ, ཨནནྟོ སཏྟནིཀཱཡོ, ཨནནྟཱནི ཙཀྐཝཱལཱ༹ནཱི’’ཏི ཏིཝིདྷམྤི ཨནནྟཾ བུདྡྷཉཱཎཾ པརིཙྪིནྡཏི སཡམྤི ཨནནྟཏྟཱ. ཡཱཝཏཀཾ ཧི ཉེཡྻཾ, ཏཱཝཏཀཾ ཉཱཎཾ. ཡཱཝཏཀཾ ཉཱཎཾ, ཏཱཝཏཀཾ ཉེཡྻཾ. ཉེཡྻཔརིཡནྟིཀཾ ཉཱཎཾ, ཉཱཎཔརིཡནྟིཀཾ ཉེཡྻནྟི. ཏེན ཝུཏྟཾ ‘‘ཨནནྟེན བུདྡྷཉཱཎེན ཨཝེདཱི’’ཏི. ཨནནྟཏཱ ཙསྶ ཨནནྟཉེཡྻཔཊིཝིཛ྄ཛྷནེནེཝ ཝེདིཏབྦཱ ཏཏྠ ཨཔྤཊིཧཏཙཱརཏྟཱ. ནནུ ཙེཏྠ ཝིཝཊྚཱདཱིནམྤི ཝིདིཏཏཱ ཝཏྟབྦཱཏི? སཙྩཾ ཝཏྟབྦཾ, སཱ པན པརཏོ ཨབྷིཉྙཱཀཐཱཡཾ ཨཱགམིསྶཏཱིཏི ཨིདྷ ན གཧིཏཱ.

༡༣༨. ཨཏྟནཱཏི ནིསྶཀྐཝཙནམེཏཾ. གུཎེཧི ཨཏྟནཱ ཝིསིཊྛཏརསྶཱཏི སམྦནྡྷོ. ཏར-གྒཧཎཾ ཙེཏྠ ‘‘ཨནུཏྟརོ’’ཏི པདསྶ ཨཏྠནིདྡེསཏཱཡ ཀཏཾ, ན ཝིསིཊྛསྶ ཀསྶཙི ཨཏྠིཏཱཡ. སདེཝཀེ ཧི ལོཀེ སདིསཀཔྤོཔི ནཱམ ཀོཙི ཏཐཱགཏསྶ ནཏྠི, ཀུཏོ སདིསོ. ཝིསིཊྛེ པན ཀཱ ¶ ཀཐཱ. ཀསྶཙཱིཏི ཀསྶཙིཔི. ཨབྷིབྷཝཏཱིཏི སཱིལསམྤདཱཡ ཨུཔནིསྶཡབྷཱུཏཱནཾ ཧིརོཏྟཔྤམེཏྟཱཀརུཎཱནཾ, ཝིསེསཔཙྩཡཱནཾ སདྡྷཱསཏིཝཱིརིཡཔཉྙཱནཉྩ ཨུཀྐཾསཔྤཏྟིཡཱ སམུདཱགམཏོ པཊྛཱཡ ཨནཉྙསཱདྷཱརཎོ སཝཱསནཔཊིཔཀྑསྶ པཧཱིནཏྟཱ ཨུཀྐཾསཔཱརམིཔྤཏྟོ སཏྠུ སཱིལགུཎོ. ཏེན བྷགཝཱ སདེཝཀཾ ལོཀཾ ཨཉྙདཏྠུ ཨབྷིབྷུཡྻ ¶ པཝཏྟཏི, ན སཡཾ ཀེནཙི ཨབྷིབྷུཡྻཏཱིཏི ཨདྷིཔྤཱཡོ. ཨེཝཾ སམཱདྷིགུཎཱདཱིསུཔི ཡཐཱརཧཾ ཝཏྟབྦཾ. སཱིལཱདཡོ ཙེཏེ ལོཀིཡལོཀུཏྟརམིསྶཀཱ ཝེདིཏབྦཱ. ཝིམུཏྟིཉཱཎདསྶནཾ པན ལོཀིཡཾ ཀཱམཱཝཙརམེཝ.

ཡདི ཨེཝཾ, ཀཐཾ ཏེན སདེཝཀཾ ལོཀཾ ཨབྷིབྷཝཏཱིཏི? ཏསྶཱཔི ཨཱནུབྷཱཝཏོ ཨསདིསཏྟཱ. ཏམྤི ཧི ཝིསཡཏོ, པཝཏྟིཏོ, པཝཏྟི ཨཱཀཱརཏོ ཙ ཨུཏྟརིཏརམེཝ. ཏཾ ཧི ཨནཉྙསཱདྷཱརཎཾ སཏྠུ ཝིམུཏྟིགུཎཾ ཨཱརབྦྷ པཝཏྟཏི, པཝཏྟམཱནཉྩ ཨཏཀྐཱཝཙརཾ པརམགམྦྷཱིརཾ སཎྷསུཁུམཾ སཝིསཡཾ པཊིཔཀྑདྷམྨཱནཾ སུཔྤཧཱིནཏྟཱ སུཊྛུ པཱཀཊཾ ཝིབྷཱུཏཏརཾ ཀཏྭཱ པཝཏྟཏི, སམྨདེཝ ཙ ཝསཱིབྷཱཝསྶ པཱཔིཏཏྟཱ, བྷཝངྒཔརིཝཱསསྶ ཙ ཨཏིཔརིཏྟཀཏྟཱ ལཧུཾ ལཧུཾ པཝཏྟཏཱིཏི.

ཨེཝཾ སཱིལཱདིགུཎེཧི བྷགཝཏོ ཨུཏྟརིཏརསྶ ཨབྷཱཝཾ དསྶེཏྭཱ ཨིདཱནི སདིསསྶཱཔི ཨབྷཱཝཾ དསྶེཏུཾ ‘‘ཨསམོ’’ཏིཨཱདི ཝུཏྟཾ. ཏཏྠ ཨསམོཏི ཨེཀསྨིཾ ཀཱལེ ནཏྠི ཨེཏསྶ སཱིལཱདིགུཎེན སམཱ སདིསཱཏི ཨསམོ. ཏཐཱ ཨསམེཧི ཨཏཱིཏཱནཱགཏབུདྡྷེཧི སམོ, ཨསམཱ ཝཱ སམཱ ཨེཏསྶཱཏི ཨསམསམོ. སཱིལཱདིགུཎེན ནཏྠི ཨེཏསྶ པཊིམཱཏི ཨཔྤཊིམོ. སེསཔདདྭཡེཔི ཨེསེཝ ནཡོ. ཏཏྠ ཨུཔམཱམཏྟཾ པཊིམཱ, སདིསཱུཔམཱ པཊིབྷཱགོ, ཡུགགྒཱཧཝསེན ཋིཏོ པཊིཔུགྒལོ ཝེདིཏབྦོ.

ན ཁོ པནཱཧཾ སམནུཔསྶཱམཱིཏི མམ སམནྟཙཀྑུནཱ ཧཏྠཏལེ ཨཱམལཀཾ ཝིཡ སབྦལོཀཾ པསྶནྟོཔི ཏཏྠ སདེཝཀེ…པེ… པཛཱཡ ཨཏྟནཱ ཨཏྟཏོ སཱིལསམྤནྣཏརཾ སམྤནྣཏརསཱིལཾ ཀཉྩི པུགྒལཾ ན ཁོ པན པསྶཱམི, ཏཱདིསསྶ ཨབྷཱཝཏོཏི ཨདྷིཔྤཱཡོ. ཨགྒཔྤསཱདསུཏྟཱདཱིནཱིཏི ཨེཏྠ –

‘‘ཡཱཝཏཱ, བྷིཀྑཝེ, སཏྟཱ ཨཔདཱ ཝཱ དྭིཔདཱ ཝཱ ཙཏུཔྤདཱ ཝཱ བཧུཔྤདཱ ཝཱ རཱུཔིནོ ཝཱ ཨརཱུཔིནོ ཝཱ སཉྙིནོ ཝཱ ཨསཉྙིནོ ཝཱ ནེཝསཉྙིནཱསཉྙིནོ ཝཱ, ཏཐཱགཏོ ཏེསཾ ཨགྒམཀྑཱཡཏི ཨརཧཾ སམྨཱསམྦུདྡྷོ. ཡེ, བྷིཀྑཝེ, བུདྡྷེ པསནྣཱ, ཨགྒེ ¶ ཏེ པསནྣཱ. ཨགྒེ ཁོ པན པསནྣཱནཾ ཨགྒོ ཝིཔཱཀོ ཧོཏཱི’’ཏི (ཨ. ནི. ༤.༣༤; ༥.༣༢; ༡༠.༡༥; ཨིཏིཝུ༩༠) –

ཨིདཾ ¶ ཨགྒཔྤསཱདསུཏྟཾ. ཨཱདི-སདྡེན –

‘‘སདེཝཀེ…པེ… སདེཝམནུསྶཱཡ ཏཐཱགཏོ ཨབྷིབྷཱུ ཨནབྷིབྷཱུཏོ ཨཉྙདཏྠུདསོ ཝསཝཏྟཱི, ཏསྨཱ ‘ཏཐཱགཏོ’ཏི ཝུཙྩཏཱི’’ཏི (ཨ. ནི. ༤.༢༤; དཱི. ནི. ༣.༡༨༨) –

ཨེཝམཱདཱིནི སུཏྟཔདཱནི ཝེདིཏབྦཱནི. ཨཱདིཀཱ གཱཐཱཡོཏི ཨེཏྠ –

‘‘ཨཧཾ ཧི ཨརཧཱ ལོཀེ, ཨཧཾ སཏྠཱ ཨནུཏྟརོ;

ཨེཀོམྷི སམྨཱསམྦུདྡྷོ, སཱིཏིབྷཱུཏོསྨི ནིབྦུཏོ. (མཧཱཝ. ༡༡; མ. ནི. ༡.༢༨༥; ༢.༣༤༡);

‘‘དནྟོ དམཡཏཾ སེཊྛོ, སནྟོ སམཡཏཾ ཨིསི;

མུཏྟོ མོཙཡཏཾ ཨགྒོ, ཏིཎྞོ ཏཱརཡཏཾ ཝརོ. (ཨིཏིཝུ. ༡༡༢);

‘‘ནཡིམསྨིཾ ལོཀེ པརསྨིཾ ཝཱ པན,

བུདྡྷེན སེཊྛོ སདིསོ ཙ ཝིཛྫཏི;

ཡམཱཧུ དཀྑིཎེཡྻཱནཾ ཨགྒཏཾ གཏོ,

པུཉྙཏྠིཀཱནཾ ཝིཔུལཕལེསིན’’ནྟི. (ཝི. ཝ. ༡༠༤༧; ཀཐཱ. ༧༩༩) –

ཨེཝམཱདིཀཱ གཱཐཱ ཝིཏྠཱརེཏབྦཱ.

༡༣༩. དམེཏཱིཏི སམེཏི, ཀཱཡསམཱདཱིཧི ཡོཛེཏཱིཏི ཨཏྠོ. ཏཾ པན ཀཱཡསམཱདཱིཧི ཡོཛནཾ ཡཐཱརཧཾ ཏདངྒཝིནཡཱདཱིསུ པཏིཊྛཱཔནཾ ཧོཏཱིཏི ཨཱཧ ‘‘ཝིནེཏཱིཏི ཝུཏྟཾ ཧོཏཱི’’ཏི. དམེཏུཾ ཡུཏྟཱཏི ¶ དམནཱརཧཱ. ཨམནུསྶཔུརིསཱཏི ཨེཏྠ ན མནུསྶཱཏི ཨམནུསྶཱ. ཏཾསདིསཏཱ ཨེཏྠ ཛོཏཱིཡཏི, ཏེན མནུསྶཏྟམཏྟཾ ནཏྠི, ཨཉྙཾ སམཱནནྟི ཡཀྑཱདཡོ ‘‘ཨམནུསྶཱ’’ཏི ཨདྷིཔྤེཏཱ, ན ཡེ ཀེཙི མནུསྶེཧི ཨཉྙེ. ཏཐཱ ཧི ཏིརཙྪཱནཔུརིསཱནཾ ཝིསུཾ གཧཎཾ ཀཏཾ, ཡཀྑཱདཡོ ཨེཝ ཙ ནིདྡིཊྛཱ. ཨཔལཱལོ ཧིམཝནྟཝཱསཱི. ཙཱུལོ༹དརམཧོདརཱ ནཱགདཱིཔཝཱསིནོ. ཨགྒིསིཁདྷཱུམསིཁཱ སཱིཧལ༹དཱིཔཝཱསིནོ. ནིབྦིསཱ ཀཏཱ དོསཝིསསྶ ཝིནོདནེན. ཏེནཱཧ ‘‘སརཎེསུ ཙ སཱིལེསུ ཙ པཏིཊྛཱཔིཏཱ’’ཏི. ཀཱུཊདནྟཱདཡོཏི ཨཱདི-སདྡེན གྷོཊམུཁཨུཔཱལིགཧཔཏིཨཱདཱིནཾ སངྒཧོ དཊྛབྦོ. སཀྐདེཝརཱཛཱདཡོཏི ཨཱདི-སདྡེན ཨཛཀལཱཔཡཀྑབཀབྲཧྨཱདཱིནཾ ¶ སངྒཧོ དཊྛབྦོ. ཨིདཾ ཙེཏྠ སུཏྟནྟི ཨིདཾ ཀེསིསུཏྟཾ. ཝིནཱིཏཱ ཝིཙིཏྲེཧི ཝིནཡནཱུཔཱཡེཧཱིཏི ཨེཏསྨིཾ ཨཏྠེ ཝིཏྠཱརེཏབྦཾ ཡཐཱརཧཾ སཎྷཱདཱིཧི ཨུཔཱཡེཧི ཝིནཡསྶ དཱིཔནཏོ.

ཝིསུདྡྷསཱིལཱདཱིནཾ པཋམཛ྄ཛྷཱནཱདཱིནཱིཏི ‘‘ཝིསུདྡྷསཱིལསྶ པཋམཛ྄ཛྷཱནཾ, པཋམཛ྄ཛྷཱནལཱབྷིནོ དུཏིཡཛ྄ཛྷཱན’’ནྟིཨཱདིནཱ ཏསྶ ཏསྶ ཨུཔརཱུཔརི ཝིསེསཾ ཨཱཙིཀྑནྟོཏི སམྦནྡྷོ. སོཏཱཔནྣཱདཱིནནྟི ཨེཏྠཱཔི ཨེསེཝ ནཡོ. ‘‘དནྟེཔི དམེཏིཡེཝཱ’’ཏི ཨིདཾ པུབྦེ ‘‘སབྦེན སབྦཾ དམཐཾ ཨནུཔགཏཱ པུརིསདམྨཱ’’ཏི ཝུཏྟཱཏི ཀཏྭཱ ཝུཏྟཾ. ཡེ པན ཝིཔྤཀཏདམྨབྷཱཝཱ སབྦཐཱ དམེཏབྦཏཾ ནཱཏིཝཏྟཱ, ཏེ སཏྟེ སནྡྷཱཡ ‘‘དནྟེཔི དམེཏིཡེཝཱ’’ཏི ཝུཏྟཾ. ཏེཔི ཧི པུརིསདམྨཱ ཨེཝཱཏི, ཡཏོ ནེ སཏྠཱ དམེཏི.

ཨཏྠཔདནྟི ཨཏྠཱབྷིབྱཉྫཀཔདཾ, ཝཱཀྱནྟི ཨཏྠོ. ཝཱཀྱེན ཧི ཨཏྠཱབྷིབྱཏྟི, ན ནཱམཱདིཔདམཏྟེན. ཨེཀཔདབྷཱཝེན ཙ ཨནཉྙསཱདྷཱརཎོ སཏྠུ པུརིསདམྨསཱརཐིབྷཱཝོ དསྶིཏོ ཧོཏི. ཏེནཱཧ ‘‘བྷགཝཱ ཧཱི’’ཏིཨཱདི. ཨཊྛ དིསཱཏི ཨཊྛ སམཱཔཏྟིཡོ. ཏཱ ཧི ཨཉྙམཉྙསམྦནྡྷཱཔི ཨསཾཀིཎྞབྷཱཝེན དིསྶནྟི ཨཔདིསྶནྟཱིཏི དིསཱ, དིསཱ ཝིཡཱཏི ཝཱ དིསཱ. ཨསཛྫམཱནཱཏི ན སཛྫམཱནཱ ཝསཱིབྷཱཝཔྤཏྟིཡཱ ནིསྶངྒཙཱརཱ. དྷཱཝནྟི ཛཝནཝུཏྟིཡོགཏོ. ཨེཀཾཡེཝ དིསཾ དྷཱཝཏི, ཨཏྟནོ ཀཱཡཾ ཨཔརིཝཏྟེནྟོཏི ཨདྷིཔྤཱཡོ. སཏྠཱརཱ པན དམིཏཱ པུརིསདམྨཱ ཨེཀིརིཡཱཔཐེནེཝ ཨཊྛ དིསཱ དྷཱཝནྟི. ཏེནཱཧ ‘‘ཨེཀཔལླངྐེནེཝ ནིསིནྣཱ’’ཏི. ཨཊྛ དིསཱཏི ཙ ནིདསྶནམཏྟམེཏཾ, ལོཀིཡེཧི ཨགཏཔུབྦཾ ནིརོདྷསམཱཔཏྟིདིསཾ, ཨམཏདིསཉྩ པཀྑནྡནཏོ.

༡༤༠. དིཊྛདྷམྨོ ཝུཙྩཏི པཙྩཀྑོ ཨཏྟབྷཱཝོ, ཏཏྠ ནིཡུཏྟོཏི དིཊྛདྷམྨིཀོ, ཨིདྷལོཀཏྠོ ¶ . ཀམྨཀིལེསཝསེན སམྤརེཏབྦཏོ སམྨཱ གནྟབྦཏོ སམྤརཱཡོ, པརལོཀོ, ཏཏྠ ནིཡུཏྟོཏི སམྤརཱཡིཀོ, པརལོཀཏྠོ. པརམོ ཨུཏྟམོ ཨཏྠོ པརམཏྠོ, ནིབྦཱནཾ. ཏེཧི དིཊྛདྷམྨིཀསམྤརཱཡིཀཔརམཏྠེཧི. ཡཐཱརཧནྟི ཡཐཱནུརཱུཔཾ. ཏེསུ ཨཏྠེསུ ཡོ ཡོ པུགྒལོ ཡཾ ཡཾ ཨརཧཏི, ཏདནུརཱུཔཾ. ཨནུསཱསཏཱིཏི ཝིནེཏི ཏསྨིཾ ཨཏྠེ པཏིཊྛཔེཏི, སཧ ཨཏྠེན ཝཏྟཏཱིཏི སཏྠོ, བྷཎྜམཱུལེན ཝཱཎིཛྫཱཡ དེསནྟརཾ གཙྪནྟོ ཛནསམཱུཧོ. ཧིཏུཔདེསཱདིཝསེན པརིཔཱལེཏབྦོ སཱསིཏབྦོ སོ ཨེཏསྶ ¶ ཨཏྠཱིཏི སཏྠཱ, སཏྠཝཱཧོ. སོ ཝིཡ བྷགཝཱཏི ཨཱཧ ‘‘སཏྠཱ ཝིཡཱཏི སཏྠཱ, བྷགཝཱ སཏྠཝཱཧོ’’ཏི.

ཨིདཱནི ཏམཏྠཾ ནིདྡེསཔཱལི༹ནཡེན དསྶེཏུཾ ‘‘ཡཐཱ སཏྠཝཱཧོ’’ཏིཨཱདི ཝུཏྟཾ. ཏཏྠ སཏྠེཏི སཏྠིཀེ ཛནེ. ཀཾ ཏཱརེནྟི ཨེཏྠཱཏི ཀནྟཱརོ, ནིརུདཀོ ཨརཉྙཔྤདེསོ. རུལ༹ྷཱིཝསེན པན ཨིཏརོཔི ཨརཉྙཔྤདེསོ ཏཐཱ ཝུཙྩཏི. ཙོརཀནྟཱརནྟི ཙོརེཧི ཨདྷིཊྛིཏཀནྟཱརཾ. ཏཐཱ ཝཱལ༹ཀནྟཱརཾ. དུབྦྷིཀྑཀནྟཱརནྟི དུལླབྷབྷིཀྑཾ ཀནྟཱརཾ. ཏཱརེཏཱིཏི ཨཁེམནྟཊྛཱནཾ ཨཏིཀྐཱམེཏི. ཨུཏྟཱརེཏཱིཏིཨཱདི ཨུཔསགྒེན པདཾ ཝཌྜྷེཏྭཱ ཝུཏྟཾ. ཨཐ ཝཱ ཨུཏྟཱརེཏཱིཏི ཁེམནྟབྷཱུམིཾ ཨུཔནེནྟོ ཏཱརེཏི. ནིཏྟཱརེཏཱིཏི ཨཁེམནྟཊྛཱནཏོ ནིཀྑཱམེནྟོ ཏཱརེཏི. པཏཱརེཏཱིཏི པརིགྒཧེཏྭཱ ཏཱརེཏི, ཧཏྠེན པརིགྒཧེཏྭཱ ཝིཡ ཏཱརེཏཱིཏི ཨཏྠོ. སབྦམྤེཏཾ ཏཱརཎུཏྟཱརཎཱདིཁེམཊྛཱནེ ཋཔནམེཝཱཏི ཨཱཧ ‘‘ཁེམནྟབྷཱུམིཾ སམྤཱཔེཏཱི’’ཏི. སཏྟེཏི ཝེནེཡྻསཏྟེ. མཧཱགཧནཏཱཡ, མཧཱནཏྠཏཱཡ, དུནྣིཏྠརཎཏཱཡ ཙ ཛཱཏིཡེཝ ཀནྟཱརོ ཛཱཏིཀནྟཱརོ, ཏཾ ཛཱཏིཀནྟཱརཾ.

ཨུཀྐཊྛཔརིཙྪེདཝསེནཱཏི ཨུཀྐཊྛསཏྟཔརིཙྪེདཝསེན. དེཝམནུསྶཱ ཨེཝ ཧི ཨུཀྐཊྛསཏྟཱ, ན ཏིརཙྪཱནཱདཡོ. བྷབྦཔུགྒལཔརིཙྪེདཝསེནཱཏི སམྨཏྟནིཡཱམོཀྐམནསྶ ཡོགྱཔུགྒལསྶ པརིཙྪིནྡནཝསེན. ཨེཏནྟི ‘‘དེཝམནུསྶཱན’’ནྟི ཨེཏཾ ཝཙནཾ. བྷགཝཏོཏི ནིསྶཀྐཝཙནཾ ཡཐཱ ‘‘ཨུཔཛ྄ཛྷཱཡཏོ ཨཛ྄ཛྷེཏཱི’’ཏི, བྷགཝཏོ སནྟིཀེཏི ཝཱ ཨཏྠོ. ཨུཔནིསྶཡསམྤཏྟིནྟི ཏིཧེཏུཀཔཊིསནྡྷིཨཱདིཀཾ མགྒཕལཱདྷིགམསྶ བལཝཀཱརཎཾ.

གགྒརཱཡཱཏི གགྒརཱཡ ནཱམ རཉྙོ དེཝིཡཱ, ཏཱཡ ཝཱ ཀཱརིཏཏྟཱ ‘‘གགྒརཱ’’ཏི ལདྡྷནཱམཱཡ. སརེ ནིམིཏྟཾ ཨགྒཧེསཱིཏི ‘‘དྷམྨོ ཨེསོ ཝུཙྩཏཱི’’ཏི དྷམྨསཉྙཱཡ སརེ ནིམིཏྟཾ གཎྷི, གཎྷནྟོ ཙ པསནྣཙིཏྟོ པརིསཔརིཡནྟེ ནིཔཛྫི. སནྣིརུམྦྷིཏྭཱ ཨཊྛཱསཱིཏི ཏསྶ སཱིསེ དཎྜསྶ ཋཔིཏབྷཱཝཾ ཨཔསྶནྟོ ཏཏྠ དཎྜཾ ཨུཔྤཱིལེ༹ཏྭཱ ཨཊྛཱསི. མཎྜཱུཀོཔི དཎྜེ ཋཔིཏེཔི ¶ ཨུཔྤཱིལི༹ཏེཔི དྷམྨགཏེན པསཱདེན ཝིསྶརམཀརོནྟོཝ ཀཱལམཀཱསི. དེཝལོཀེ ནིབྦཏྟསཏྟཱནཾ ཨཡཾ དྷམྨཏཱ, ཡཱ ‘‘ཀུཏོཧཾ ཨིདྷ ནིབྦཏྟོ, ཏཏྠ ཀིཾ ནུ ཁོ ཀམྨམཀཱསི’’ནྟི ཨཱཝཛྫནཱ. ཏསྨཱ ཨཏྟནོ པུརིམབྷཝསྶ དིཊྛཏྟཱ ཨཱཧ ‘‘ཨརེ ཨཧམྤི ནཱམ ཨིདྷ ནིབྦཏྟོ’’ཏི ¶ . བྷགཝཏོ པཱདེ ཝནྡི ཀཏཉྙུཏཱསཾཝཌྜྷིཏེན པེམགཱརཝབཧུམཱནེན.

བྷགཝཱ ཛཱནནྟོཝ མཧཱཛནསྶ ཀམྨཕལཾ, བུདྡྷཱནུབྷཱཝཉྩ པཙྩཀྑཾ ཀཱཏུཀཱམོ ‘‘ཀོ མེ ཝནྡཏཱི’’ཏི གཱཐཱཡ པུཙྪི. ཏཏྠ ཀོཏི དེཝནཱགཡཀྑགནྡྷབྦཱདཱིསུ ཀོ, ཀཏམོཏི ཨཏྠོ. མེཏི མམ. པཱདཱནཱིཏི པཱདེ. ཨིདྡྷིཡཱཏི ཨིམཱཡ ཨེཝརཱུཔཱཡ དེཝིདྡྷིཡཱ. ‘‘ཡསསཱ’’ཏི ཨིམིནཱ ཨེདིསེན པརིཝཱརེན, པརིཙྪེདེན ཙ. ཛལནྟི ཝིཛྫོཏམཱནོ. ཨབྷིཀྐནྟེནཱཏི ཨཏིཝིཡ ཀནྟེན ཀམནཱིཡེན སུནྡརེན. ཝཎྞེནཱཏི ཚཝིཝཎྞེན སརཱིརཝཎྞནིབྷཱཡ. སབྦཱ ཨོབྷཱསཡཾ དིསཱཏི སབྦཱ དསཔི དིསཱ པབྷཱསེནྟོ, ཙནྡོ ཝིཡ, སཱུརིཡོ ཝིཡ ཙ ཨེཀོབྷཱསཾ ཨེཀཱལོཀཾ ཀརོནྟོཏི ཨཏྠོ.

ཨེཝཾ པན བྷགཝཏཱ པུཙྪིཏོ དེཝཔུཏྟོ ཨཏྟཱནཾ པཝེདེནྟོ ‘‘མཎྜཱུཀོཧཾ པུརེ ཨཱསི’’ནྟི གཱཐམཱཧ. ཏཏྠ པུརེཏི པུརིམཛཱཏིཡཾ. ‘‘ཨུདཀེ’’ཏི ཨིདཾ ཏདཱ ཨཏྟནོ ཨུཔྤཏྟིཊྛཱནདསྶནཾ. ‘‘ཨུདཀེ མཎྜཱུཀོ’’ཏི ཨེཏེན ཨུདྡྷམཱཡིཀཱདིཀསྶ ཐལེ མཎྜཱུཀསྶ ནིཝཏྟནཾ ཀཏཾ ཧོཏི. གཱཝོ ཙརནྟི ཨེཏྠཱཏི གོཙརོ, གུནྣཾ གྷཱསེསནཊྛཱནཾ. ཨིདྷ པན གོཙརོ ཝིཡཱཏི གོཙརོ, ཝཱརི ཨུདཀཾ གོཙརོ ཨེཏསྶཱཏི ཝཱརིགོཙརོ. ཨུདཀཙཱརཱིཔི ཧི ཀོཙི ཀཙྪཔཱདི ཨཝཱརིགོཙརོཔི ཧོཏཱིཏི ‘‘ཝཱརིགོཙརོ’’ཏི ཝིསེསེཏྭཱ ཝུཏྟཾ. ཏཝ དྷམྨཾ སུཎནྟསྶཱཏི བྲཧྨསྶརེན ཀརཝཱིཀརུཏམཉྫུནཱ དེསེནྟསྶ ཏཝ དྷམྨཾ ‘‘དྷམྨོ ཨེསོ ཝུཙྩཏཱི’’ཏི སརེ ནིམིཏྟགྒཱཧཝསེན སུཎནྟསྶ. ཨནཱདརེ ཙེཏཾ སཱམིཝཙནཾ. ཨཝདྷི ཝཙྪཔཱལཀོཏི ཝཙྪེ རཀྑནྟོ གོཔཱལདཱརཀོ མམ སམཱིཔཾ ཨཱགནྟྭཱ དཎྜམོལུབྦྷ ཏིཊྛནྟོ མམ སཱིསེ དཎྜཾ སནྣིརུམྦྷིཏྭཱ མཾ མཱརེསཱིཏི ཨཏྠོ.

སིཏཾ ཀཏྭཱཏི ‘‘ཏཐཱ པརིཏྟཏརེནཱཔི པུཉྙཱནུབྷཱཝེན ཨེཝཾ ཨཏིཝིཡ ཨུལཱ༹རཱ ལོཀིཡལོཀུཏྟརཱ སམྤཏྟིཡོ ལབྦྷནྟཱི’’ཏི པཱིཏིསོམནསྶཛཱཏོ བྷཱསུརཏརདྷཝལཝིཔྥུརནྟདསྶནཀིརཎཱཝལཱིཧི བྷིཡྻོསོ མཏྟཱཡ ཏཾ པདེསཾ ཨོབྷཱསེནྟོ སིཏཾ ཀཏྭཱ. པཱིཏིསོམནསྶཝསེན ཧི སོ –

‘‘མུཧུཏྟཾ ¶ ཙིཏྟཔསཱདསྶ, ཨིདྡྷིཾ པསྶ ཡསཉྩ མེ;

ཨཱནུབྷཱཝཉྩ མེ པསྶ, ཝཎྞཾ པསྶ ཛུཏིཉྩ མེ.

‘‘ཡེ ¶ ཙ ཏེ དཱིགྷམདྡྷཱནཾ, དྷམྨཾ ཨསྶོསུཾ གོཏམ;

པཏྟཱ ཏེ ཨཙལཊྛཱནཾ, ཡཏྠ གནྟྭཱ ན སོཙརེ’’ཏི. (ཝི. ཝ. ༨༥༩-༨༦༠);

ཨིམཱ དྭེ གཱཐཱ ཝཏྭཱ པཀྐཱམི.

༡༤༡. ཡཾ པན ཀིཉྩཱིཏི ཨེཏྠ ཡནྟི ཨནིཡམིཏཝཙནཾ. ཏཐཱ ཀིཉྩཱིཏི. པནཱཏི ཝཙནཱལངྐཱརམཏྟཾ. ཏསྨཱ ཡཾ ཀིཉྩཱིཏི ཉེཡྻསྶ ཨནཝསེསཔརིཡཱདཱནཾ ཀཏཾ ཧོཏི. པནཱཏི ཝཱ ཝིསེསཏྠདཱིཔཀོ ནིཔཱཏོ. ཏེན ‘‘སམྨཱསམྦུདྡྷོ’’ཏི ཨིམིནཱ སངྑེཔཏོ, ཝིཏྠཱརཏོ ཙ སཏྠུ ཙཏུསཙྩཱབྷིསམྦོདྷོ ཝུཏྟོ. ‘‘བུདྡྷོ’’ཏི པན ཨིམིནཱ ཏདཉྙསྶཔི ཉེཡྻསྶཱཝབོདྷོ. པུརིམེན ཝཱ སཏྠུ པཊིཝེདྷཉཱཎཱནུབྷཱཝོ, པཙྪིམེན དེསནཱཉཱཎཱནུབྷཱཝོ. པཱིཏི ཨུཔརི ཝུཙྩམཱནོ ཝིསེསོ ཛོཏཱིཡཏི. སབྦསོ པཊིཔཀྑེཧི ཝིམུཙྩཏཱིཏི ཝིམོཀྑོ, ཨགྒམགྒོ. ཏསྶ ཨནྟོ ཨགྒཕལཾ, ཏཏྠ བྷཝཾ ཏསྨིཾ ལདྡྷེ ལདྡྷབྦཏོ ཝིམོཀྑནྟིཀཉཱཎཾ, སབྦཉྙུཏཉྙཱཎེན སདྡྷིཾ སབྦམྤི བུདྡྷཉཱཎཾ. ཨེཝཾ པཝཏྟོཏི ཨེཏྠ –

‘‘སབྦཉྙུཏཱཡ བུདྡྷོ, སབྦདསྶཱཝིཏཱཡ བུདྡྷོ, ཨནཉྙནེཡྻཏཱཡ བུདྡྷོ, ཝིསཝིཏཱཡ བུདྡྷོ, ཁཱིཎཱསཝསངྑཱཏེན བུདྡྷོ, ནིརུཔལེཔསངྑཱཏེན བུདྡྷོ, ཨེཀནྟཝཱིཏརཱགོཏི བུདྡྷོ, ཨེཀནྟཝཱིཏདོསོཏི བུདྡྷོ, ཨེཀནྟཝཱིཏམོཧོཏི བུདྡྷོ, ཨེཀནྟནིཀྐིལེསོཏི བུདྡྷོ, ཨེཀཱཡནམགྒཾ གཏོཏི བུདྡྷོ, ཨེཀོ ཨནུཏྟརཾ སམྨཱསམྦོདྷིཾ ཨབྷིསམྦུདྡྷོཏི བུདྡྷོ, ཨབུདྡྷིཝིཧཏཏྟཱ བུདྡྷིཔཊིལཱབྷཱ བུདྡྷོ. བུདྡྷོཏི ནེཏཾ ནཱམཾ མཱཏརཱ ཀཏཾ, ན པིཏརཱ ཀཏཾ, ན བྷཱཏརཱ ཀཏཾ, ན བྷགིནིཡཱ ཀཏཾ, ན མིཏྟཱམཙྩེཧིཀཏཾ, ན ཉཱཏིསཱལོཧིཏེཧི ཀཏཾ, ན སམཎབྲཱཧྨཎེཧི ཀཏཾ, ན དེཝཏཱཧི ཀཏཾ. ཝིམོཀྑནྟིཀམེཏཾ བུདྡྷཱནཾ བྷགཝནྟཱནཾ བོདྷིཡཱ མཱུལེ སཧ སབྦཉྙུཏཉྙཱཎསྶ པཊིལཱབྷཱ སཙྪིཀཱ པཉྙཏྟི ཡདིདཾ བུདྡྷོ’’ཏི (མཧཱནི. ༡༩༢) –

ཨཡཾ ¶ ནིདྡེསཔཱལི༹ནཡོ. ཡསྨཱ ཙེཏྠ ཏསྶཱ པཊིསམྦྷིདཱཔཱལི༹ཡཱ བྷེདོ ནཏྠི, ཏསྨཱ དྭཱིསུ ཨེཀེནཱཔི ཨཏྠསིདྡྷཱིཏི དསྶནཏྠཾ ‘‘པཊིསམྦྷིདཱནཡོ ཝཱ’’ཏི ཨནིཡམཏྠོ ཝཱ-སདྡོ ཝུཏྟོ.

ཏཏྠ ¶ ཡཐཱ ལོཀེ ཨཝགནྟཱ ‘‘ཨཝགཏོ’’ཏི ཝུཙྩཏི, ཨེཝཾ བུཛ྄ཛྷིཏཱ སཙྩཱནཱིཏི བུདྡྷོ སུདྡྷཀཏྟུཝསེན. ཡཐཱ པཎྞསོསཱ ཝཱཏཱ ‘‘པཎྞསུསཱ’’ཏི ཝུཙྩནྟི, ཨེཝཾ བོདྷེཏཱ པཛཱཡཱཏི བུདྡྷོ ཧེཏུཀཏྟུཝསེན, ཧེཏུཨཏྠོ ཙེཏྠ ཨནྟོནཱིཏོ.

སབྦཉྙུཏཱཡ བུདྡྷོཏི སབྦདྷམྨབུཛ྄ཛྷནསམཏྠཱཡ བུདྡྷིཡཱ བུདྡྷོཏི ཨཏྠོ. སབྦདསྶཱཝིཏཱཡ བུདྡྷོཏི སབྦདྷམྨཱནཾ ཉཱཎཙཀྑུནཱ དིཊྛཏྟཱ བུདྡྷོཏི ཨཏྠོ. ཨནཉྙནེཡྻཏཱཡ བུདྡྷོཏི ཨཉྙེན ཨབོདྷནཱིཏོ སཡམེཝ བུདྡྷཏྟཱ བུདྡྷོཏི ཨཏྠོ. ཝིསཝིཏཱཡ བུདྡྷོཏི ནཱནཱགུཎཝིསཝནཏོ པདུམམིཝ ཝིཀསནཊྛེན བུདྡྷོཏི ཨཏྠོ. ཁཱིཎཱསཝསངྑཱཏེན བུདྡྷོཏི ཨེཝམཱདཱིཧི ཚཧི པརིཡཱཡེཧི ནིདྡཀྑཡཝིབུདྡྷོ པུརིསོ ཝིཡ སབྦཀིལེསནིདྡཀྑཡཝིབུདྡྷཏྟཱ བུདྡྷོཏི ཝུཏྟཾ ཧོཏི. ཨེཀཱཡནམགྒཾ གཏོཏི བུདྡྷོཏི གམནཏྠཱནཾ བུདྡྷིཨཏྠཏཱཡ བུདྡྷིཨཏྠཱནམྤི གམནཏྠཏཱ ལབྦྷཏཱིཏི ཨེཀཱཡནམགྒཾ གཏཏྟཱ བུདྡྷོཏི ཝུཙྩཏཱིཏི ཨཏྠོ. ཨེཀོ ཨནུཏྟརཾ སམྨཱསམྦོདྷིཾ ཨབྷིསམྦུདྡྷོཏི བུདྡྷོཏི ན པརེཧི བུདྡྷཏྟཱ བུདྡྷོ, ཨཐ ཁོ སཡམེཝ ཨནུཏྟརཾ སམྨཱསམྦོདྷིཾ ཨབྷིསམྦུདྡྷཏྟཱ བུདྡྷོཏི ཨཏྠོ. ཨབུདྡྷིཝིཧཏཏྟཱ བུདྡྷིཔཊིལཱབྷཱ བུདྡྷོཏི བུདྡྷི བུདྡྷཾ བོདྷོཏི ཨནཏྠནྟརཾ. ཏཏྠ ཡཐཱ རཏྟགུཎཡོགཏོ རཏྟོ པཊོ, ཨེཝཾ བུདྡྷགུཎཡོགཏོ བུདྡྷོཏི ཉཱཔནཏྠཾ ཝུཏྟཾ. ཏཏོ པརཾ བུདྡྷོཏི ནེཏཾ ནཱམནྟིཨཱདི ཨཏྠཱནུགཏཱཡཾ པཉྙཏྟཱིཏི བོདྷནཏྠཾ ཝུཏྟནྟི ཨེཝམེཏྠ ཨིམིནཱཔི ཀཱརཎེན བྷགཝཱ བུདྡྷོཏི ཝེདིཏབྦཾ.

༡༤༢. ཨསྶཱཏི བྷགཝཏོ. གུཎཝིསིཊྛསབྦསཏྟུཏྟམགརུགཱརཝཱདྷིཝཙནནྟི སབྦེཧི སཱིལཱདིགུཎེཧི ཝིསིཊྛསྶ ཏཏོ ཨེཝ སབྦསཏྟེཧི ཨུཏྟམསྶ གརུནོ གཱརཝཝསེན ཝུཏྟཝཙནམིདཾ བྷགཝཱཏི. ཏཐཱ ཧི ལོཀནཱཐོ ཨཔརིམིཏནིརུཔམཔྤབྷཱཝསཱིལཱདིགུཎཝིསེསསམངྒིཏཱཡ སབྦཱནཏྠཔརིཧཱརཔུབྦངྒམཱཡ ¶ ནིརཝསེསཧིཏསུཁཝིདྷཱནཏཔྤརཱཡ ནིརཏིསཡཱཡ པཡོགསམྤཏྟིཡཱ སདེཝམནུསྶཱཡ པཛཱཡ, ཨཙྩནྟུཔཀཱརིཏཱཡ ཙ ཨཔརིམཱཎཱསུ ལོཀདྷཱཏཱུསུ ཨཔརིམཱཎཱནཾ སཏྟཱནཾ ཨུཏྟམགཱརཝཊྛཱནནྟི.

བྷགཝཱཏི ཝཙནཾ སེཊྛནྟི སེཊྛཝཱཙཀཾ ཝཙནཾ སེཊྛགུཎསཧཙརཎཏོ ‘‘སེཊྛ’’ནྟི ཝུཏྟཾ. ཨཐ ཝཱ ཝུཙྩཏཱིཏི ཝཙནཾ, ཨཏྠོ. ཏསྨཱ ཡོ ‘‘བྷགཝཱ’’ཏི ཝཙནེན ཝཙནཱིཡོ ཨཏྠོ, སོ སེཊྛོཏི ཨཏྠོ. བྷགཝཱཏི ཝཙནམུཏྟམནྟི ཨེཏྠཱཔི ཨེསེཝ ནཡོ. གཱརཝཡུཏྟོཏི གརུབྷཱཝཡུཏྟོ གརུགུཎཡོགཏོ, གརུཀརཎཾ ཝཱ སཱཏིསཡཾ ཨརཧཏཱིཏི གཱརཝཡུཏྟོ, གཱརཝཱརཧོཏི ཨཏྠོ.

གུཎཝིསེསཧེཏུཀཾ ¶ ‘‘བྷགཝཱ’’ཏི ཨིདཾ བྷགཝཏོ ནཱམནྟི སངྑེཔཏོ ཝུཏྟམཏྠཾ ཝིཏྠཱརཏོ ཝིབྷཛིཏུཀཱམོ ནཱམཾཡེཝ ཏཱཝ ཨཏྠུདྡྷཱརཝསེན དསྶེནྟོ ‘‘ཙཏུབྦིདྷཾ ཝཱ ནཱམ’’ནྟིཨཱདིམཱཧ. ཏཏྠ ཨཱཝཏྠིཀནྟི ཨཝཏྠཱཡ ཝིདིཏཾ ཏཾ ཏཾ ཨཝཏྠཾ ཨུཔཱདཱཡ པཉྙཏྟཾ ཝོཧརིཏཾ. ཏཐཱ ལིངྒིཀཾ ཏེན ཏེན ལིངྒེན ཝོཧརིཏཾ. ནེམིཏྟིཀནྟི ནིམིཏྟཏོ ཨཱགཏཾ. ཨདྷིཙྩསམུཔྤནྣནྟི ཡདིཙྪཱཡ པཝཏྟཾ, ཡདིཙྪཱཡ ཨཱགཏཾ ཡདིཙྪཀཾ. པཋམེན ཨཱདི-སདྡེན བཱལོ, ཡུཝཱ, ཝུཌྜྷོཏི ཨེཝམཱདིཾ སངྒཎྷཱཏི, དུཏིཡེན མུཎྜཱི, ཛཊཱིཏི ཨེཝམཱདིཾ, ཏཏིཡེན བཧུསྶུཏོ, དྷམྨཀཐིཀོ, ཛྷཱཡཱིཏི ཨེཝམཱདིཾ, ཙཏུཏྠེན ཨགྷམརིསནཾ པཱཝཙནནྟི ཨེཝམཱདིཾ སངྒཎྷཱཏི. ‘‘ནེམིཏྟིཀ’’ནྟི ཝུཏྟམཏྠཾ བྱཏིརེཀཝསེན པཏིཊྛཱཔེཏུཾ ‘‘ན མཧཱམཱཡཱཡཱ’’ཏིཨཱདི ཝུཏྟཾ. ‘‘ཝིམོཀྑནྟིཀ’’ནྟི ཨིམིནཱ ཨིདཾ ནཱམཾ ཨརིཡཱཡ ཛཱཏིཡཱ ཛཱཏཀྑཎེཡེཝ ཛཱཏནྟི དསྶེཏི. ཡདི ཝིམོཀྑནྟིཀཾ, ཨཐ ཀསྨཱ ཨཉྙེཧི ཁཱིཎཱསཝེཧི ཨསཱདྷཱརཎནྟི ཨཱཧ ‘‘སཧ སབྦཉྙུཏཉྙཱཎསྶ པཊིལཱབྷཱ’’ཏི. བུདྡྷཱནཉྷི ཨརཧཏྟཕལཾ ནིཔྥཛྫམཱནཾ སབྦཉྙུཏཉྙཱཎཱདཱིཧི སབྦེཧི བུདྡྷགུཎེཧི སདྡྷིཾཡེཝ ནིཔྥཛྫཏི. ཏེན ཝུཏྟཾ ‘‘ཝིམོཀྑནྟིཀ’’ནྟི. སཙྪིཀཱ པཉྙཏྟཱིཏི སབྦདྷམྨཱནཾ སཙྪིཀིརིཡཱནིམིཏྟཱ པཉྙཏྟི. ཨཐ ཝཱ སཙྪིཀཱ པཉྙཏྟཱིཏི པཙྩཀྑསིདྡྷཱ པཉྙཏྟི. ཡཾགུཎནིམིཏྟཱ ཧི སཱ, ཏེ སཏྠུ པཙྩཀྑབྷཱུཏཱཏི གུཎཱ ཝིཡ སཱཔི སཙྪིཀཏཱ ཨེཝ ནཱམ ཧོཏི, ན པརེསཾ ཝོཧཱརམཏྟེནཱཏི ཨདྷིཔྤཱཡོ.

༡༤༣. ཝདནྟཱིཏི ¶ མཧཱཐེརསྶ གརུབྷཱཝཏོ བཧུཝཙནེནཱཧ, སངྒཱིཏིཀཱརེཧི ཝཱ ཀཏམནུཝཱདཾ སནྡྷཱཡ. ཨིསྶརིཡཱདིབྷེདོ བྷགོ ཨསྶ ཨཏྠཱིཏི བྷགཱི. ཨཀཱསི བྷགྒནྟི རཱགཱདིཔཱཔདྷམྨཾ བྷགྒཾ ཨཀཱསི, བྷགྒཝཱཏི ཨཏྠོ. བཧཱུཧི ཉཱཡེཧཱིཏི ཀཱཡབྷཱཝནཱདིཀེཧི ཨནེཀེཧི བྷཱཝནཱཀྐམེཧི. སུབྷཱཝིཏཏྟནོཏི སམྨདེཝ བྷཱཝིཏསབྷཱཝསྶ. པཙྩཏྟེ ཙེཏཾ སཱམིཝཙནཾ.

ནིདྡེསེ ཝུཏྟནཡེནཱཏི ཨེཏྠཱཡཾ ནིདྡེསནཡོ –

‘‘བྷགཝཱཏི གཱརཝཱདྷིཝཙནམེཏཾ. ཨཔིཙ བྷགྒརཱགོཏི བྷགཝཱ, བྷགྒདོསོཏི བྷགཝཱ, བྷགྒམོཧོཏི བྷགཝཱ, བྷགྒམཱནོཏི བྷགཝཱ, བྷགྒདིཊྛཱིཏི བྷགཝཱ, བྷགྒཏཎྷོཏི བྷགཝཱ, བྷགྒཀིལེསོཏི བྷགཝཱ, བྷཛི ཝིབྷཛི པཝིབྷཛི དྷམྨརཏནནྟི བྷགཝཱ, བྷཝཱནཾ ཨནྟཀརོཏི བྷགཝཱ, བྷཱཝིཏཀཱཡོ བྷཱཝིཏསཱིལོ བྷཱཝིཏཙིཏྟོ བྷཱཝིཏཔཉྙོཏི བྷགཝཱ, བྷཛི ¶ ཝཱ བྷགཝཱ ཨརཉྙཝནཔཏྠཱནི པནྟཱནི སེནཱསནཱནི ཨཔྤསདྡཱནི ཨཔྤནིགྒྷོསཱནི ཝིཛནཝཱཏཱནི མནུསྶརཱཧསྶེཡྻཀཱནི པཊིསལླཱནསཱརུཔྤཱནཱིཏི བྷགཝཱ, བྷཱགཱི ཝཱ བྷགཝཱ ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱནནྟི བྷགཝཱ, བྷཱགཱི ཝཱ བྷགཝཱ ཨཏྠརསསྶ དྷམྨརསསྶ ཝིམུཏྟིརསསྶ ཨདྷིསཱིལསྶ ཨདྷིཙིཏྟསྶ ཨདྷིཔཉྙཱཡཱཏི བྷགཝཱ, བྷཱགཱི ཝཱ བྷགཝཱ ཙཏུནྣཾ ཛྷཱནཱནཾ ཙཏུནྣཾ ཨཔྤམཉྙཱནཾ ཙཏུནྣཾ ཨརཱུཔསམཱཔཏྟཱིནནྟི བྷགཝཱ, བྷཱགཱི ཝཱ བྷགཝཱ ཨཊྛནྣཾ ཝིམོཀྑཱནཾ ཨཊྛནྣཾ ཨབྷིབྷཱཡཏནཱནཾ ནཝནྣཾ ཨནུཔུབྦཝིཧཱརསམཱཔཏྟཱིནནྟི བྷགཝཱ, བྷཱགཱི ཝཱ བྷགཝཱ དསནྣཾ སཉྙཱབྷཱཝནཱནཾ དསནྣཾ ཀསིཎསམཱཔཏྟཱིནཾ ཨཱནཱཔཱནསྶཏིསམཱདྷིསྶ ཨསུབྷསམཱཔཏྟིཡཱཏི བྷགཝཱ, བྷཱགཱི ཝཱ བྷགཝཱ ཙཏུནྣཾ སཏིཔཊྛཱནཱནཾ ཙཏུནྣཾ སམྨཔྤདྷཱནཱནཾ ཙཏུནྣཾ ཨིདྡྷིཔཱདཱནཾ པཉྩནྣཾ ཨིནྡྲིཡཱནཾ པཉྩནྣཾ བལཱནཾ སཏྟནྣཾ བོཛ྄ཛྷངྒཱནཾ ཨརིཡསྶ ཨཊྛངྒིཀསྶ མགྒསྶཱཏི བྷགཝཱ, བྷཱགཱི ཝཱ བྷགཝཱ དསནྣཾ ཏཐཱགཏབལཱནཾ ཙཏུནྣཾ ཝེསཱརཛྫཱནཾ ཙཏུནྣཾ པཊིསམྦྷིདཱནཾ ཚནྣཾ ཨབྷིཉྙཱནཾ ཚནྣཾ བུདྡྷདྷམྨཱནནྟི བྷགཝཱ, བྷགཝཱཏི ནེཏཾ ནཱམཾ…པེ… སཙྪིཀཱ པཉྙཏྟི ཡདིདཾ བྷགཝཱ’’ཏི (མཧཱནི. ༨༣).

ཨེཏྠ ¶ ཙ ‘‘གཱརཝཱདྷིཝཙན’’ནྟིཨཱདཱིནི ཡདིཔི གཱཐཱཡཾ ཨཱགཏཔདཱནུཀྐམེན ན ནིདྡིཊྛཱནི, ཡཐཱརཧཾ པན ཏེསཾ སབྦེསམྤི ནིདྡེསབྷཱཝེན ཝེདིཏབྦཱནི. ཏཏྠ གཱརཝཱདྷིཝཙནནྟི གརཱུནཾ གརུབྷཱཝཝཱཙཀཾ ཝཙནཾ. བྷཛཱིཏི བྷཱགསོ ཀཐེསི. ཏེནཱཧ ‘‘ཝིབྷཛཱི’’ཏི. དྷམྨརཏནནྟི མགྒཕལཱདིཨརིཡདྷམྨརཏནཾ. པུན བྷཛཱིཏི སེཝི. བྷཱགཱིཏི བྷཱགདྷེཡྻཝཱ. པུན བྷཱགཱིཏི བྷཛནསཱིལོ. ཨཏྠརསསྶཱཏི ཨཏྠསནྣིསྶཡསྶ རསསྶ. ཝིམུཏྟཱཡཏནསཱིསེ ཧི ཋཏྭཱ དྷམྨཾ ཀཐེནྟསྶ, སུཎནྟསྶ ཙ ཏདཏྠཾ ཨཱརབྦྷ ཨུཔྤཛྫནཀཔཱིཏིསོམནསྶཾ ཨཏྠརསོ. དྷམྨཾ ཨཱརབྦྷ དྷམྨརསོ. ཡཾ སནྡྷཱཡ ཝུཏྟཾ ‘‘ལབྷཏི ཨཏྠཝེདཾ, ལབྷཏི དྷམྨཝེད’’ནྟི (ཨ. ནི. ༦.༡༠). ཝིམུཏྟིརསསྶཱཏི ཝིམུཏྟིབྷཱུཏསྶ, ཝིམུཏྟིསནྣིསྶཡསྶ ཝཱ རསསྶ. སཉྙཱབྷཱཝནཱནནྟི ཨནིཙྩསཉྙཱདཱིནཾ དསནྣཾ སཉྙཱབྷཱཝནཱནཾ. ཚནྣཾ བུདྡྷདྷམྨཱནནྟི ཚ ཨསཱདྷཱརཎཉཱཎཱནི སནྡྷཱཡ ཝུཏྟཾ. ཏཏྠ ཏཏྠ ‘‘བྷགཝཱ’’ཏི སདྡསིདྡྷི ནིརུཏྟིནཡེན ཝེདིཏབྦཱ.

༡༤༤. ཡདིཔི ‘‘བྷཱགྱཝཱ’’ཏིཨཱདཱིཧི པདེཧི ཝུཙྩམཱནོ ཨཏྠོ ‘‘བྷགཱི བྷཛཱི’’ཏི ནིདྡེསགཱཐཱཡ སངྒཧིཏོ ཨེཝ, ཏཐཱཔི པདསིདྡྷི ཨཏྠཝིབྷཱགཨཏྠཡོཛནཱདིསཧིཏོ སཾཝཎྞནཱནཡོ ཏཏོ ཨཉྙཱཀཱརོཏི ཝུཏྟཾ ‘‘ཨཡཾ པན ཨཔརོ ནཡོ’’ཏི. ཨཱདིཀནྟི ཨཱདི-སདྡེན ཝཎྞཝིཀཱརོ ¶ , ཝཎྞལོཔོ, དྷཱཏུཨཏྠེན ནིཡོཛནཉྩཱཏི ཨིམཾ ཏིཝིདྷཾ ལཀྑཎཾ སངྒཎྷཱཏི. སདྡནཡེནཱཏི བྱཱཀརཎནཡེན. པིསོདརཱདཱིནཾ སདྡཱནཾ ཨཱཀཏིགཎབྷཱཝཏོ ཝུཏྟཾ ‘‘པིསོདརཱདིཔཀྑེཔལཀྑཎཾ གཧེཏྭཱ’’ཏི. པཀྑིཔནམེཝ ལཀྑཎཾ. ཏཔྤརིཡཱཔནྣཏཱཀརཎཾ ཧི པཀྑིཔནཾ. པཱརཔྤཏྟནྟི པརམུཀྐཾསགཏཾ པཱརམིབྷཱཝཔྤཏྟཾ. བྷཱགྱནྟི ཀུསལཾ. ཏཏྠ མགྒཀུསལཾ ལོཀུཏྟརསུཁནིབྦཏྟཀཾ, ཨིཏརཾ ལོཀིཡསུཁནིབྦཏྟཀཾ, ཨིཏརམྤི ཝཱ ཝིཝཊྚཱུཔནིསྶཡཾ པརིཡཱཡཏོ ལོཀུཏྟརསུཁནིབྦཏྟཀཾ སིཡཱ.

ལོབྷཱདཡོ ཨེཀཀཝསེན གཧིཏཱ. ཏཐཱ ཝིཔརཱིཏམནསིཀཱརོ ཝིཔལླཱསབྷཱཝསཱམཉྙེན, ཨཧིརིཀཱདཡོ དུཀཝསེན. ལོབྷཱདཡོ ཙ པུན ‘‘ཏིཝིདྷཱཀུསལམཱུལ’’ནྟི ཏིཀཝསེན གཧིཏཱ. ཀཱཡདུཙྩརིཏཱདི-ཏཎྷཱསཾཀིལེསཱདིརཱགམལཱདིརཱགཝིསམཱདིཀཱམསཉྙཱདིཀཱམཝིཏཀྐཱདིཏཎྷཱཔཔཉྩཱདཡོ ཏིཝིདྷདུཙྩརིཏཱདཡོ. སུབྷསཉྙཱདིཀཱ ཙཏུབྦིདྷཝིཔརིཡེསཱ. ‘‘ཙཱིཝརཧེཏུ ཝཱ བྷིཀྑུནོ ཏཎྷཱ ཨུཔྤཛྫམཱནཱ ཨུཔྤཛྫཏི, པིཎྜཔཱཏ ¶ , སེནཱསན, ཨིཏིབྷཝཱབྷཝཧེཏུ ཝཱ’’ཏི (ཨ. ནི. ༤.༩) ཨེཝམཱགཏཱ ཙཏྟཱརོ ཏཎྷུཔྤཱདཱ. ‘‘བུདྡྷེ ཀངྑཏི, དྷམྨེ, སངྒྷེ, སིཀྑཱཡ, སབྲཧྨཙཱརཱིསུ ཀུཔིཏོ ཧོཏི ཨནཏྟམནོ ཨཱཧཏཙིཏྟོ ཁཱིལཛཱཏོ’’ཏི (དཱི. ནི. ༣.༣༡༩; མ. ནི. ༡.༡༨༥; ཨ. ནི. ༥.༢༠༥; ༩.༧༡; ཝིབྷ. ༩༤༡) ཨེཝམཱགཏཱནི པཉྩ ཙེཏོཁཱིལཱནི. ‘‘ཀཱམེ ཨཝཱིཏརཱགོ ཧོཏི, ཀཱཡེ ཨཝཱིཏརཱགོ, རཱུཔེ ཨཝཱིཏརཱགོ, ཡཱཝདཏྠཾ ཨུདརཱཝདེཧཀཾ བྷུཉྫིཏྭཱ སེཡྻསུཁཾ པསྶསུཁཾ མིདྡྷསུཁཾ ཨནུཡུཏྟོ ཝིཧརཏི, ཨཉྙཏརཾ དེཝནིཀཱཡཾ པཎིདྷཱཡ བྲཧྨཙརིཡཾ ཙརཏཱི’’ཏི (དཱི. ནི. ༣.༣༢༠; མ. ནི. ༡.༡༨༦) ཨཱགཏཱ པཉྩ ཝིནིབནྡྷཱ. རཱུཔཱབྷིནནྡནཱདཡོ པཉྩཱབྷིནནྡནཱ. ཀོདྷོ, མཀྑོ, ཨིསྶཱ, སཱཋེཡྻཾ, པཱཔིཙྪཏཱ, སནྡིཊྛིཔརཱམཱསོཏི ཨིམཱནི ཚ ཝིཝཱདམཱུལཱནི. རཱུཔཏཎྷཱདཡོ ཚ ཏཎྷཱཀཱཡཱ.

ཀཱམརཱགཔཊིགྷདིཊྛིཝིཙིཀིཙྪཱབྷཝརཱགམཱནཱཝིཛྫཱ སཏྟཱནུསཡཱ. མིཙྪཱདིཊྛིཨཱདཡོ ཨཊྛ མིཙྪཏྟཱ. ‘‘ཏཎྷཾ པཊིཙྩ པརིཡེསནཱ, པརིཡེསནཾ པཊིཙྩ ལཱབྷོ, ལཱབྷཾ པཊིཙྩ ཝིནིཙྪཡོ, ཝིནིཙྪཡཾ པཊིཙྩ ཚནྡརཱགོ, ཚནྡརཱགཾ པཊིཙྩ ཨཛ྄ཛྷོསཱནཾ, ཨཛ྄ཛྷོསཱནཾ པཊིཙྩ པརིགྒཧོ, པརིགྒཧཾ པཊིཙྩ མཙྪརིཡཾ, མཙྪརིཡཾ པཊིཙྩ ཨཱརཀྑཱ, ཨཱརཀྑཱདྷིཀརཎཾ དཎྜཱདཱནཱདཡོ’’ཏི (དཱི. ནི. ༢.༡༠༣; ༣.༣༥༩) ཨེཏེ ནཝ ཏཎྷཱམཱུལཀཱ. ཙཏྟཱརོ སསྶཏཝཱདཱ, ཙཏྟཱརོ ཨེཀཙྩསསྶཏཝཱདཱ, ཙཏྟཱརོ ཨནྟཱནནྟིཀཱ, ཙཏྟཱརོ ཨམརཱཝིཀྑེཔིཀཱ, དྭེ ཨདྷིཙྩསམུཔྤནྣིཀཱ, སོལ༹ས སཉྙཱིཝཱདཱ, ཨཊྛ ཨསཉྙཱིཝཱདཱ, ཨཊྛ ནེཝསཉྙཱིནཱསཉྙཱིཝཱདཱ ¶ , སཏྟ ཨུཙྪེདཝཱདཱ, པཉྩ པརམདིཊྛདྷམྨནིབྦཱནཝཱདཱཏི ཨེཏཱནི དྭཱསཊྛི དིཊྛིགཏཱནི. ཨཛ྄ཛྷཏྟིཀསྶ ཨུཔཱདཱཡ ‘‘ཨསྨཱི’’ཏི ཧོཏི, ‘‘ཨིཏྠསྨཱི’’ཏི, ‘‘ཨེཝསྨཱི’’ཏི, ‘‘ཨཉྙཐཱསྨཱི’’ཏི, ‘‘བྷཝིསྶ’’ནྟི, ‘‘ཨིཏྠཾ བྷཝིསྶ’’ནྟི, ‘‘ཨེཝཾ བྷཝིསྶ’’ནྟི, ‘‘ཨཉྙཐཱ བྷཝིསྶ’’ནྟི, ‘‘ཨསསྨཱི’’ཏི, ‘‘སཱཏསྨཱི’’ཏི, ‘‘སིཡ’’ནྟི, ‘‘ཨིཏྠཾ སིཡ’’ནྟི, ‘‘ཨེཝཾ སིཡ’’ནྟི, ‘‘ཨཉྙཐཱ སིཡ’’ནྟི, ‘‘ཨཔཱཧཾ སིཡ’’ནྟི, ‘‘ཨཔཱཧཾ ཨིཏྠཾ སིཡ’’ནྟི, ‘‘ཨཔཱཧཾ ཨེཝཾ སིཡ’’ནྟི, ‘‘ཨཔཱཧཾ ཨཉྙཐཱ སིཡ’’ནྟི ཧོཏཱིཏི ཨཊྛཱརས, བཱཧིརསྶུཔཱདཱཡ ‘‘ཨིམིནཱ ཨསྨཱི’’ཏི ཧོཏི, ‘‘ཨིམིནཱ ཨིཏྠསྨཱི’’ཏི, ‘‘ཨིམིནཱ ཨེཝསྨཱི’’ཏི, ‘‘ཨིམིནཱ ཨཉྙཐཱསྨཱི’’ཏིཨཱདིཀཱ (ཝིབྷ. ༩༧༥-༩༧༦) ཝུཏྟནཡཱ ཨཊྛཱརསཱཏི ཚཏྟིཾས, ཨཏཱིཏཱ ཚཏྟིཾས, ཨནཱགཏཱ ཚཏྟིཾས, པཙྩུཔྤནྣཱ ཚཏྟིཾསཱཏི ཨཊྛསཏཏཎྷཱཝིཙརིཏཱནི.

པབྷེད-སདྡོ ¶ པཙྩེཀཾ སམྦནྡྷིཏབྦོ. ཏཏྠཱཡཾ ཡོཛནཱ – ལོབྷཔྤབྷེདཱ དོསཔྤབྷེདཱ ཡཱཝ ཨཊྛསཏཏཎྷཱཝིཙརིཏཔྤབྷེདཱཏི. སབྦཱནི སཏྟཱནཾ དརཐཔརིལཱ༹ཧཀརཱནི ཀིལེསཱནཾ ཨནེཀཱནི སཏསཧསྶཱནི ཨབྷཉྫཱིཏི ཡོཛནཱ. ཨཱརམྨཎཱདིཝིབྷཱགཏོ ཧི པཝཏྟིཨཱཀཱརཝིབྷཱགཏོ ཙ ཨནནྟཔྤབྷེདཱ ཀིལེསཱཏི. སངྑེཔཏོཏི ཨེཏྠ སམུཙྪེདཔྤཧཱནཝསེན སབྦསོ ཨཔྤཝཏྟིཀརཎེན ཀིལེསམཱརཾ, སམུདཡཔྤཧཱནཔརིཉྙཱཝསེན ཁནྡྷམཱརཾ, སཧཱཡཝེཀལླཀརཎཝསེན སབྦཐཱ ཨཔྤཝཏྟིཀརཎེན ཨབྷིསངྑཱརམཱརཾ, བལཝིདྷམནཝིསཡཱཏིཀྐམནཝསེན དེཝཔུཏྟམཙྩུམཱརཉྩ ཨབྷཉྫི བྷགྒེ ཨཀཱསི. པརིསྶཡཱནནྟི ཨུཔདྡཝཱནཾ. སམྤཏི, ཨཱཡཏིཉྩ སཏྟཱནཾ ཨནཏྠཱཝཧཏྟཱ མཱརཎཊྛེན ཝིབཱདྷནཊྛེན ཀིལེསཱཝ མཱརོཏི ཀིལེསམཱརོ. ཝདྷཀཊྛེན ཁནྡྷཱཝ མཱརོཏི ཁནྡྷམཱརོ. ཏཐཱ ཧི ཝུཏྟཾ ‘‘ཝདྷཀཾ རཱུཔཾ ‘ཝདྷཀཾ རཱུཔ’ནྟི ཡཐཱབྷཱུཏཾ ནཔྤཛཱནཱཏཱི’’ཏིཨཱདི (སཾ. ནི. ༣.༨༥). ཛཱཏིཛརཱདིམཧཱབྱསནནིབྦཏྟནེན ཨབྷིསངྑཱརོཝ མཱརོཏི ཨབྷིསངྑཱརམཱརོ. སཾཀིལེསནིམིཏྟཾ ཧུཏྭཱ གུཎམཱརཎཊྛེན དེཝཔུཏྟོཝ མཱརོཏི དེཝཔུཏྟམཱརོ. སཏྟཱནཾ ཛཱིཝིཏསྶ, ཛཱིཝིཏཔརིཀྑཱརཱནཉྩ ཛཱནིཀརཎེན མཧཱབཱདྷརཱུཔཏྟཱ མཙྩུ ཨེཝ མཱརོཏི མཙྩུམཱརོ.

སཏཔུཉྙལཀྑཎདྷརསྶཱཏི ཨནེཀསཏཔུཉྙནིབྦཏྟམཧཱཔུརིསལཀྑཎཝཧཏོ རཱུཔཀཱཡསམྤཏྟི དཱིཔིཏཱ ཧོཏི, ཨིཏརཱསཾ ཕལསམྤདཱནཾ མཱུལབྷཱཝཏོ, ཨདྷིཊྛཱནབྷཱཝཏོ ཙ. དྷམྨཀཱཡསམྤཏྟི དཱིཔིཏཱ ཧོཏི, པཧཱནསམྤདཱཔུབྦཀཏྟཱ ཉཱཎསམྤདཱདཱིནཾ. བྷཱགྱཝཏཱཡ ལོཀིཡཱནཾ བཧུམཏབྷཱཝོ. བྷགྒདོསཏཱཡ པརིཀྑཀཱནཾ བཧུམཏབྷཱཝོཏི ཡོཛནཱ. ཨེཝཾ ཨིཏོ པརེསུཔི ཡཐཱསངྑྱཾ ཡོཛེཏབྦཾ. པུཉྙཝནྟཾ ཧི གཧཊྛཱ ཁཏྟིཡཱདཡོ ཨབྷིགཙྪནྟི, པཧཱིནདོསཾ པབྦཛིཏཏཱཔསཔརིབྦཱཛཀཱདཡོ ¶ ‘‘དོསཝིནཡཱཡ དྷམྨཾ དེསེཏཱི’’ཏི. ཨབྷིགཏཱནཉྩ ནེསཾ ཀཱཡཙིཏྟདུཀྑཱཔནཡནེ པཊིབལབྷཱཝོ, ཨཱམིསདཱནདྷམྨདཱནེཧི ཨུཔཀཱརསབྦྷཱཝཏོ. རཱུཔཀཱཡཾ ཏསྶ པསཱདཙཀྑུནཱ, དྷམྨཀཱཡཾ པཉྙཱཙཀྑུནཱ དིསྭཱ དུཀྑདྭཡསྶ པཊིཔྤསྶམྦྷནཏོ ཨུཔགཏཱནཉྩ ཏེསཾ ཨཱམིསདཱནདྷམྨདཱནེཧི ཨུཔཀཱརིཏཱ, ‘‘པུབྦེ ཨཱམིསདཱནདྷམྨདཱནེཧི མཡཱ ཨཡཾ ¶ ལོཀགྒབྷཱཝོ ཨདྷིགཏོ, ཏསྨཱ ཏུམྷེཧིཔི ཨེཝམེཝ པཊིཔཛྫིཏབྦ’’ནྟི ཨེཝཾ སམྨཱཔཊིཔཏྟིཡཾ ནིཡོཛནེན ཨབྷིགཏཱནཾ ལོཀིཡལོཀུཏྟརསུཁེཧི སཾཡོཛནསམཏྠཏཱ ཙ དཱིཔིཏཱ ཧོཏི.

སཀཙིཏྟེ ཨིསྶརིཡཾ ཨཏྟནོ ཙིཏྟསྶ ཝསཱིབྷཱཝཱཔཱདནཾ, ཡེན པཊིཀྐཱུལཱདཱིསུ ཨཔྤཊིཀྐཱུལསཉྙིཏཱདིཝིཧཱརསིདྡྷི, ཨདྷིཊྛཱནིདྡྷིཨཱདིཀོ ཨིདྡྷིཝིདྷོཔི ཙིཏྟིསྶརིཡམེཝ ཙིཏྟབྷཱཝནཱཡ ཝསཱིབྷཱཝཔྤཏྟིཡཱ ཨིཛ྄ཛྷནཏོ. ཨཎིམཱལགྷིམཱདིཀནྟི ཨཱདི-སདྡེན མཧིམཱ པཏྟི པཱཀམྨཾ ཨཱིསིཏཱ ཝསིཏཱ ཡཏྠཀཱམཱཝསཱཡིཏཱཏི ཨིམེ ཚཔི སངྒཧིཏཱ. ཏཏྠ ཀཱཡསྶ ཨཎུབྷཱཝཀརཎཾ ཨཎིམཱ. ལཧུབྷཱཝོ ལགྷིམཱ ཨཱཀཱསེ པདསཱ གམནཱདིནཱ. མཧཏྟཾ མཧིམཱ ཀཱཡསྶ མཧནྟཏཱཔཱདནཾ. ཨིཊྛདེསཔྤཏྟི པཏྟི. ཨདྷིཊྛཱནཱདིཝསེན ཨིཙྪིཏནིཔྥཱདནཾ པཱཀམྨཾ. སཡཾཝསིཏཱ ཨིསྶརབྷཱཝོ ཨཱིསིཏཱ. ཨིདྡྷིཝིདྷེ ཝསཱིབྷཱཝོ ཝསིཏཱ. ཨཱཀཱསེན ཝཱ གཙྪཏོ, ཨཉྙཾ ཝཱ ཀིཉྩི ཀརོཏོ ཡཏྠ ཀཏྠཙི ཝོསཱནཔྤཏྟི ཡཏྠཀཱམཱཝསཱཡིཏཱ. ‘‘ཀུམཱརཀརཱུཔཱདིདསྶན’’ནྟིཔི ཝདནྟི. ཨེཝམིདཾ ཨཊྛཝིདྷཾ ལོཀིཡསམྨཏཾ ཨིསྶརིཡཾ. ཏཾ པན བྷགཝཏོ ཨིདྡྷིཝིདྷནྟོགདྷཾ, ཨནཉྙསཱདྷཱརཎཉྩཱཏི ཨཱཧ ‘‘སབྦཱཀཱརཔརིཔཱུརཾ ཨཏྠཱི’’ཏི.

ཀེསཉྩི པདེསཝུཏྟི, ཨཡཐཱབྷཱུཏགུཎསནྣིསྶཡཏྟཱ ཨཔརིསུདྡྷོ ཙ ཡསོ ཧོཏི, ན ཨེཝཾ ཏཐཱགཏསྶཱཏི དསྶེཏུཾ ‘‘ལོཀཏྟཡབྱཱཔཀོ’’ཏིཨཱདི ཝུཏྟཾ. ཏཏྠ ཨིདྷ ཨདྷིགཏསཏྠུགུཎཱནཾ ཨཱརུཔྤེ ཨུཔྤནྣཱནཾ ‘‘ཨིཏིཔི སོ བྷགཝཱ’’ཏིཨཱདིནཱ བྷགཝཏོ གུཎེ ཨནུསྶརནྟཱནཾ ཡསོ པཱཀཊོ ཧོཏཱིཏི ཨཱཧ ‘‘ལོཀཏྟཡབྱཱཔཀོ’’ཏི. ཡཐཱབྷུཙྩགུཎཱདྷིགཏཏྟཱ ཨེཝ ཨཏིཝིཡ པརིསུདྡྷོ. ཨནཝསེསལཀྑཎཱནུབྱཉྫནཱདིསམྤཏྟིཡཱ སབྦཱཀཱརཔརིཔཱུརཱ. སབྦངྒཔཙྩངྒསིརཱི སབྦེསཾ ཨངྒཔཙྩངྒཱནཾ སོབྷཱ. ‘‘ཏིཎྞོ ཏཱརེཡྻ’’ནྟིཨཱདིནཱ ཡཾ ཡཾ ཨེཏེན ལོཀནཱཐེན ཨིཙྪིཏཾ མནོཝཙཱིཔཎིདྷཱནཝསེན, པཏྠིཏཾ ཀཱཡཔཎིདྷཱནཝསེན. ཏཐེཝཱཏི པཎིདྷཱནཱནུརཱུཔམེཝ. ཝཱིརིཡཔཱརམིབྷཱཝཔྤཏྟོ, ཨརིཡམགྒཔརིཡཱཔནྣོ ཙ སམྨཱཝཱཡཱམསངྑཱཏོ པཡཏྟོ.

བྷེདེཧཱིཏི སབྦཏྟིཀདུཀཔདསཾཧིཏེཧི པབྷེདེཧི. པཊིཙྩསམུཔྤཱདཱདཱིཧཱིཏི ཨཱདི-སདྡེན ན ཀེཝལཾ ¶ ཝིབྷངྒཔཱལི༹ཡཾ ཨཱགཏཱ སཏིཔཊྛཱནཱདཡོཝ སངྒཧིཏཱ, ཨཐ ཁོ སངྒཧཱདཡོ, སམཡཝིམུཏྟཱདཡོ, ཋཔནཱདཡོ ¶ , ཏིཀཔཊྛཱནཱདཡོ ཙ སངྒཧིཏཱཏི ཝེདིཏབྦཾ. དུཀྑསཙྩསྶ པཱིལ༹ནཊྛོ ཏཾསམངྒིནོ སཏྟསྶ ཧིཾསནཾ ཨཝིཔྥཱརིཀཏཱཀརཎཾ. སངྑཏཊྛོ སམེཙྩསམྦྷཱུཡཔཙྩཡེཧི ཀཏབྷཱཝོ. སནྟཱཔཊྛོ དུཀྑདུཀྑཏཱདཱིཧི སནྟཔྤནཾ པརིདཧནཾ. ཝིཔརིཎཱམཊྛོ ཛརཱཡ, མརཎེན ཙཱཏི དྭིདྷཱ ཝིཔརིཎཱམེཏབྦཏཱ. སམུདཡསྶ ཨཱཡཱུཧནཊྛོ དུཀྑསྶ ནིབྦཏྟནཝསེན སམྤིཎྜནཾ. ནིདཱནཊྛོ ‘‘ཨིདཾ ཏཾ དུཀྑ’’ནྟི ནིདདནྟསྶ ཝིཡ སམུཊྛཱཔནཾ. སཾཡོགཊྛོ སཾསཱརདུཀྑེན སཾཡོཛནཾ. པལིབོདྷཊྛོ མགྒཱདྷིགམསྶ ནིཝཱརཎཾ. ནིརོདྷསྶ ནིསྶརཎཊྛོ སབྦཱུཔདྷཱིནཾ པཊིནིསྶགྒསབྷཱཝཏྟཱ ཏཏོ ཝིནིསྶཊཏཱ, ཏནྣིསྶརཎནིམིཏྟཏཱ ཝཱ. ཝིཝེཀཊྛོ སབྦསངྑཱརཝིསཾཡུཏྟཏཱ. ཨསངྑཏཊྛོ ཀེནཙིཔི པཙྩཡེན ཨནབྷིསངྑཏཏཱ. ཨམཏཊྛོ ནིཙྩསབྷཱཝཏྟཱ མརཎཱབྷཱཝོ, སཏྟཱནཾ མརཎཱབྷཱཝཧེཏུཏཱ ཝཱ. མགྒསྶ ནིཡྻཱནཊྛོ ཝཊྚདུཀྑཏོ ནིགྒམནཊྛོ. ཧེཏུཨཏྠོ ནིབྦཱནསྶ སམྤཱཔཀབྷཱཝོ. དསྶནཊྛོ ཨཙྩནྟསུཁུམསྶ ནིབྦཱནསྶ སཙྪིཀརཎཾ. ཨཱདྷིཔཏེཡྻཊྛོ ཙཏུསཙྩདསྶནེ སམྤཡུཏྟཱནཾ ཨཱདྷིཔཙྩཀརཎཾ, ཨཱརམྨཎཱདྷིཔཏིབྷཱཝོ ཝཱ ཝིསེསཏོ མགྒཱདྷིཔཏིཝཙནཏོ. སཏིཔི ཧི ཛྷཱནཱདཱིནཾ ཨཱརམྨཎཱདྷིཔཏིབྷཱཝེ ‘‘ཛྷཱནཱདྷིཔཏིནོ དྷམྨཱ’’ཏི ཨེཝམཱདིཾ ཨཝཏྭཱ ‘‘མགྒཱདྷིཔཏིནོ དྷམྨཱ’’ ཨིཙྩེཝ ཝུཏྟཾ, ཏསྨཱ ཝིཉྙཱཡཏི ‘‘ཨཏྠི མགྒསྶ ཨཱརམྨཎཱདྷིཔཏིབྷཱཝེ ཝིསེསོ’’ཏི. ཨེཏེ ཙ པཱིལ༹ནཱདཡོ སོལ༹སཱཀཱརཱ ནཱམ. ཀསྨཱ པནེཏྠ ཨཉྙེསུ རོགགཎྛཱདིཨཱཀཱརེསུ ཝིཛྫམཱནེསུ ཨེཏེཝ པརིགྒཡ྄ཧནྟཱིཏི? སལཀྑཎཏོ ཙ སཙྩནྟརདསྶནཏོ ཙ ཨཱཝིབྷཱཝཏོ. སྭཱཡམཏྠོ པརཏོ སཙྩཀཐཱཡམེཝ ཨཱཝི བྷཝིསྶཏི.

དིབྦཝིཧཱརོ ཀསིཎཱདིཨཱརམྨཎཱནི རཱུཔཱཝཙརཛ྄ཛྷཱནཱནི. མེཏྟཱདིཛ྄ཛྷཱནཱནི བྲཧྨཝིཧཱརོ. ཕལསམཱཔཏྟི ཨརིཡཝིཧཱརོ. ཀཱམེཧི ཝིཝེཀཊྛཀཱཡཏཱཝསེན ཨེཀཱིབྷཱཝོ ཀཱཡཝིཝེཀོ. པཋམཛ྄ཛྷཱནཱདིནཱ ནཱིཝརཎཱདཱིཧི ཝིཝིཏྟཙིཏྟཏཱ ཙིཏྟཝིཝེཀོ. ཨུཔདྷིཝིཝེཀོ ནིབྦཱནཾ. ཨཉྙེཏི ལོཀིཡཱབྷིཉྙཱདིཀེ.

ཀིལེསཱབྷིསངྑཱརཝསེན བྷཝེསུ པརིབྦྷམནཾ, སོ ཙ ཏཎྷཱཔྤདྷཱནོཏི ཝུཏྟཾ ‘‘ཏཎྷཱསངྑཱཏཾ གམན’’ནྟི. ཝནྟནྟི ཨརིཡམགྒམུཁེན ཨུགྒིརིཏཾ པུན ཨཔཙྩཱཝམནཝསེན ཚཌྜིཏཾ. བྷགཝཱཏི ཝུཙྩཏི ནིརུཏྟིནཡེནཱཏི དསྶེནྟོ ཨཱཧ ‘‘ཡཐཱ…པེ… མེཁལཱ’’ཏི.

ཨཔརོ ¶ ¶ ནཡོ – བྷཱགཝཱཏི བྷགཝཱ, བྷཏཝཱཏི བྷགཝཱ, བྷཱགེ ཝནཱིཏི བྷགཝཱ, བྷགེ ཝནཱིཏི བྷགཝཱ, བྷཏྟཝཱཏི བྷགཝཱ, བྷགེ ཝམཱིཏི བྷགཝཱ. བྷཱགེ ཝམཱིཏི བྷགཝཱ.

བྷཱགཝཱ བྷཏཝཱ བྷཱགེ, བྷགེ ཙ ཝནི བྷཏྟཝཱ;

བྷགེ ཝམི ཏཐཱ བྷཱགེ, ཝམཱིཏི བྷགཝཱ ཛིནོ.

ཏཏྠ ཀཐཾ བྷཱགཝཱཏི བྷགཝཱ? ཡེ ཏེ སཱིལཱདཡོ དྷམྨཀྑནྡྷཱ གུཎཀོཊྛཱསཱ, ཏེ ཨནཉྙསཱདྷཱརཎཱ ནིརཏིསཡཱ ཏཐཱགཏསྶ ཨཏྠི ཨུཔལབྦྷནྟི. ཏཐཱ ཧིསྶ སཱིལཾ སམཱདྷི པཉྙཱ ཝིམུཏྟི ཝིམུཏྟིཉཱཎདསྶནཾ, ཧིརཱི ཨོཏྟཔྤཾ, སདྡྷཱ ཝཱིརིཡཾ, སཏི སམྤཛཉྙཾ, སཱིལཝིསུདྡྷི དིཊྛིཝིསུདྡྷི, སམཐོ ཝིཔསྶནཱ, ཏཱིཎི ཀུསལམཱུལཱནི, ཏཱིཎི སུཙརིཏཱནི, ཏཡོ སམྨཱཝིཏཀྐཱ, ཏིསྶོ ཨནཝཛྫསཉྙཱ, ཏིསྶོ དྷཱཏུཡོ, ཙཏྟཱརོ སཏིཔཊྛཱནཱ, ཙཏྟཱརོ སམྨཔྤདྷཱནཱ, ཙཏྟཱརོ ཨིདྡྷིཔཱདཱ, ཙཏྟཱརོ ཨརིཡམགྒཱ, ཙཏྟཱརི ཨརིཡཕལཱནི, ཙཏསྶོ པཊིསམྦྷིདཱ, ཙཏུཡོནིཔརིཙྪེདཀཉཱཎཱནི, ཙཏྟཱརོ ཨརིཡཝཾསཱ, ཙཏྟཱརི ཝེསཱརཛྫཉཱཎཱནི, པཉྩ པདྷཱནིཡངྒཱནི, པཉྩངྒིཀོ སམྨཱསམཱདྷི, པཉྩཉཱཎིཀོ སམྨཱསམཱདྷི, པཉྩིནྡྲིཡཱནི, པཉྩ བལཱནི, པཉྩ ནིསྶཱརཎཱིཡཱ དྷཱཏུཡོ, པཉྩ ཝིམུཏྟཱཡཏནཉཱཎཱནི, པཉྩ ཝིམུཏྟིཔརིཔཱཙནཱིཡཱ སཉྙཱ, ཚ ཨནུསྶཏིཊྛཱནཱནི, ཚ གཱརཝཱ, ཚ ནིསྶཱརཎཱིཡཱ དྷཱཏུཡོ, ཚ སཏཏཝིཧཱརཱ, ཚ ཨནུཏྟརིཡཱནི, ཚ ནིབྦེདྷབྷཱགིཡཱ སཉྙཱ, ཚ ཨབྷིཉྙཱ, ཚ ཨསཱདྷཱརཎཉཱཎཱནི, སཏྟ ཨཔརིཧཱནིཡཱ དྷམྨཱ, སཏྟ ཨརིཡདྷམྨཱ, སཏྟ ཨརིཡདྷནཱནི, སཏྟ བོཛ྄ཛྷངྒཱ, སཏྟ སཔྤུརིསདྷམྨཱ, སཏྟ ནིཛྫརཝཏྠཱུནི, སཏྟ སཉྙཱ, སཏྟདཀྑིཎེཡྻཔུགྒལདེསནཱ, སཏྟཝིཉྙཱཎཊྛིཏིདེསནཱ, སཏྟཁཱིཎཱསཝབལདེསནཱ, ཨཊྛཔཉྙཱཔཊིལཱབྷཧེཏུདེསནཱ, ཨཊྛ སམྨཏྟཱནི, ཨཊྛལོཀདྷམྨཱཏིཀྐམཱ, ཨཊྛ ཨཱརམྦྷཝཏྠཱུནི, ཨཊྛཨཀྑཎདེསནཱ, ཨཊྛ མཧཱཔུརིསཝིཏཀྐཱ, ཨཊྛཨབྷིབྷཱཡཏནདེསནཱ, ཨཊྛ ཝིམོཀྑཱ, ནཝ ཡོནིསོམནསིཀཱརམཱུལཀཱ དྷམྨཱ, ནཝ པཱརིསུདྡྷིཔདྷཱནིཡངྒཱནི, ནཝསཏྟཱཝཱསདེསནཱ, ནཝ ཨཱགྷཱཏཔཊིཝིནཡཱ, ནཝ སཉྙཱ, ནཝ ནཱནཏྟཱ, ནཝ ཨནུཔུབྦཝིཧཱརཱ, དས ནཱཐཀཱརཎཱ དྷམྨཱ, དས ཀསིཎཱཡཏནཱནི, དས ཀུསལཀམྨཔཐཱ, དས སམྨཏྟཱནི, དས ཨརིཡཝཱསཱ, དས ཨསེཀྑདྷམྨཱ, དས ཏཐཱགཏབལཱནི, ཨེཀཱདས མེཏྟཱནིསཾསཱ, དྭཱདས ¶ དྷམྨཙཀྐཱཀཱརཱ, ཏེརས དྷུཏགུཎཱ, ཙུདྡས བུདྡྷཉཱཎཱནི, པཉྩདས ཝིམུཏྟིཔརིཔཱཙནཱིཡཱ དྷམྨཱ, སོལ༹སཝིདྷཱ ཨཱནཱཔཱནསྶཏི, སོལ༹ས ཨཔརནྟཔནཱིཡཱ དྷམྨཱ, ཨཊྛཱརས བུདྡྷདྷམྨཱ, ཨེཀཱུནཝཱིསཏི པཙྩཝེཀྑཎཉཱཎཱནི, ཙཏུཙཏྟཱལཱིས ཉཱཎཝཏྠཱུནི ¶ , པཉྙཱས ཨུདཡབྦཡཉཱཎཱནི, པརོཔཉྙཱས ཀུསལདྷམྨཱ, སཏྟསཏྟཏིཉཱཎཝཏྠཱུནི, ཙཏུཝཱིསཏིཀོཊིསཏསཧསྶསམཱཔཏྟིསཉྩཱརིམཧཱཝཛིརཉཱཎཾ, ཨནནྟནཡསམནྟཔཊྛཱནཔཝིཙཡཔཙྩཝེཀྑཎདེསནཱཉཱཎཱནི, ཏཐཱ ཨནནྟཱསུ ལོཀདྷཱཏཱུསུ ཨནནྟཱནཾ སཏྟཱནཾ ཨཱསཡཱདིཝིབྷཱཝནཉཱཎཱནི ཙཱཏི ཨེཝམཱདཡོ ཨནནྟཱཔརིམཱཎབྷེདཱ ཨནཉྙསཱདྷཱརཎཱ ནིརཏིསཡཱ གུཎབྷཱགཱ གུཎཀོཊྛཱསཱ སཾཝིཛྫནྟི ཨུཔལབྦྷནྟི. ཏསྨཱ ཡཐཱཝུཏྟཝིབྷཱགཱ གུཎབྷཱགཱ ཨསྶ ཨཏྠཱིཏི བྷཱགཝཱཏི ཝཏྟབྦེ ཨཱ-ཀཱརསྶ རསྶཏྟཾ ཀཏྭཱ ‘‘བྷགཝཱ’’ཏི ཝུཏྟོ. ཨེཝཾ ཏཱཝ བྷཱགཝཱཏི བྷགཝཱ.

ཡསྨཱ སཱིལཱདཡོ སབྦེ, གུཎབྷཱགཱ ཨསེསཏོ;

ཝིཛྫནྟི སུགཏེ ཏསྨཱ, ‘‘བྷགཝཱ’’ཏི པཝུཙྩཏི.

ཀཐཾ བྷཏཝཱཏི བྷགཝཱ? ཡེ ཏེ སབྦལོཀཧིཏཱཡ ཨུསྶུཀྐམཱཔནྣེཧི མནུསྶཏྟཱདིཀེ ཨཊྛ དྷམྨེ སམོདྷཱནེཏྭཱ སམྨཱསམྦོདྷིཡཱ ཀཏམཧཱབྷིནཱིཧཱརེཧི མཧཱབོདྷིསཏྟེཧི པརིཔཱུརེཏབྦཱ དཱནཔཱརམཱི, སཱིལནེཀྑམྨཔཉྙཱཝཱིརིཡཁནྟིསཙྩཨདྷིཊྛཱནམེཏྟཱཨུཔེཀྑཱཔཱརམཱིཏི དས པཱརམིཡོ, དས ཨུཔཔཱརམིཡོ, དས པརམཏྠཔཱརམིཡོཏི སམཏིཾས པཱརམིཡོ, དཱནཱདཱིནི ཙཏྟཱརི སངྒཧཝཏྠཱུནི, སཙྩཱདཱིནི ཙཏྟཱརི ཨདྷིཊྛཱནཱནི, ཨཏྟཔརིཙྩཱགོ, ནཡན, དྷན, རཛྫ, པུཏྟདཱརཔརིཙྩཱགོཏི པཉྩ མཧཱཔརིཙྩཱགཱ, པུབྦཡོགོ, པུབྦཙརིཡཱ, དྷམྨཀྑཱནཾ, ཉཱཏཏྠཙརིཡཱ, ལོཀཏྠཙརིཡཱ, བུདྡྷཏྠཙརིཡཱཏི ཨེཝམཱདཡོ, སངྑེཔཏོ ཝཱ སབྦེ པུཉྙསམྦྷཱརཉཱཎསམྦྷཱརབུདྡྷཀཱརཀདྷམྨཱ, ཏེ མཧཱབྷིནཱིཧཱརཏོ པཊྛཱཡ ཀཔྤཱནཾ སཏསཧསྶཱདྷིཀཱནི ཙཏྟཱརི ཨསངྑྱེཡཱནི ཡཐཱ ཧཱནབྷཱགིཡཱ, སཾཀིལེསབྷཱགིཡཱ, ཋིཏིབྷཱགིཡཱ ཝཱ ན ཧོནྟི, ཨཐ ཁོ ཨུཏྟརུཏྟརི ཝིསེསབྷཱགིཡཱཝ ཧོནྟི, ཨེཝཾ སཀྐཙྩཾ ནིརནྟརཾ ཨནཝསེསཏོ བྷཏཱ སམྦྷཏཱ ཨསྶ ཨཏྠཱིཏི བྷཏཝཱཏི ཝཏྟབྦེ ‘‘བྷགཝཱ’’ཏི ཝུཏྟོ ནིརུཏྟིནཡེན ཏ-ཀཱརསྶ ག-ཀཱརཾ ཀཏྭཱ. ཨཐ ཝཱ བྷཏཝཱཏི ཏེཡེཝ ཡཐཱཝུཏྟེ བུདྡྷཀཱརཀདྷམྨེ ཝུཏྟནཡེན བྷརི སམྦྷརི, པརིཔཱུརེསཱིཏི ཨཏྠོ. ཨེཝམྤི བྷཏཝཱཏི བྷགཝཱ.

སམྨཱསམྦོདྷིཡཱ ¶ སབྦེ, དཱནཔཱརམིཨཱདིཀེ;

སམྦྷཱརེ བྷཏཝཱ ནཱཐོ, ཏསྨཱཔི བྷགཝཱ མཏོ.

ཀཐཾ ¶ བྷཱགེ ཝནཱིཏི བྷགཝཱ? ཡེ ཏེ ཙཏུཝཱིསཏིཀོཊིསཏསཧསྶསངྑཱ དེཝསིཀཾ ཝལ༹ཉྫནཀསམཱཔཏྟིབྷཱགཱ, ཏེ ཨནཝསེསཏོ ལོཀཧིཏཏྠཾ, ཨཏྟནོ ཙ དིཊྛདྷམྨསུཁཝིཧཱརཏྠཾ ནིཙྩཀཔྤཾ ནིཙྩཀཔྤཾ ཝནི བྷཛི སེཝི བཧུལམཀཱསཱིཏི བྷཱགེ ཝནཱིཏི བྷགཝཱ. ཨཐ ཝཱ ཨབྷིཉྙེཡྻདྷམྨེསུ, ཀུསལཱདཱིསུ, ཁནྡྷཱདཱིསུ ཙ ཡེ ཏེ པརིཉྙེཡྻཱདིཝསེན སངྑེཔཏོ ཝཱ ཙཏུབྦིདྷཱ ཨབྷིསམཡབྷཱགཱ, ཝིཏྠཱརཏོ པན ‘‘ཙཀྑུཾ པརིཉྙེཡྻཾ…པེ… ཛརཱམརཎཾ པརིཉྙེཡྻ’’ནྟིཨཱདིནཱ ཨནེཀཔརིཉྙེཡྻབྷཱགཱ, ‘‘ཙཀྑུསྶ སམུདཡོ པཧཱཏབྦོ…པེ… ཛརཱམརཎསྶ སམུདཡོ པཧཱཏབྦོ’’ཏིཨཱདིནཱ པཧཱཏབྦབྷཱགཱ, ‘‘ཙཀྑུསྶ ནིརོདྷོ…པེ… ཛརཱམརཎསྶ ནིརོདྷོ སཙྪིཀཱཏབྦོ’’ཏིཨཱདིནཱ (པཊི. མ. ༡.༢༡) སཙྪིཀཱཏབྦབྷཱགཱ, ‘‘ཙཀྑུསྶ ནིརོདྷགཱམིནཱི པཊིཔདཱ’’ཏིཨཱདིནཱ, ‘‘ཙཏྟཱརོ སཏིཔཊྛཱནཱ’’ཏིཨཱདིནཱ ཙ ཨནེཀབྷེདཱ བྷཱཝེཏབྦབྷཱགཱ ཙ དྷམྨཱ, ཏེ སབྦེ ཝནི བྷཛི ཡཐཱརཧཾ གོཙརབྷཱཝནཱསེཝནཱནཾ ཝསེན སེཝི. ཨེཝམྤི བྷཱགེ ཝནཱིཏི བྷགཝཱ. ཨཐ ཝཱ ཡེ ཨིམེ སཱིལཱདཡོ དྷམྨཀྑནྡྷཱ སཱཝཀེཧི སཱདྷཱརཎཱ གུཎཀོཊྛཱསཱ གུཎབྷཱགཱ, ‘‘ཀིནྟི ནུ ཁོ ཏེ ཝེནེཡྻསནྟཱནེསུ པཏིཊྛཔེཡྻ’’ནྟི མཧཱཀརུཎཱཡ ཝནི ཨབྷིཔཏྠཡི, སཱ ཙསྶ ཨབྷིཔཏྠནཱ ཡཐཱདྷིཔྤེཏཕལཱཝཧཱ ཨཧོསི. ཨེཝམྤི བྷཱགེ ཝནཱིཏི བྷགཝཱ.

ཡསྨཱ ཉེཡྻསམཱཔཏྟི-གུཎབྷཱགེ ཏཐཱགཏོ;

བྷཛི པཏྠཡི སཏྟཱནཾ, ཧིཏཱཡ བྷགཝཱ ཏཏོ.

ཀཐཾ བྷགེ ཝནཱིཏི བྷགཝཱ? སམཱསཏོ ཏཱཝ ཀཏཔུཉྙེཧི པཡོགསམྤནྣེཧི ཡཐཱཝིབྷཝཾ བྷཛཱིཡནྟཱིཏི བྷགཱ, ལོཀིཡལོཀུཏྟརསམྤཏྟིཡོ. ཏཏྠ ལོཀིཡེ ཏཱཝ ཏཐཱགཏོ སམྦོདྷིཏོ པུབྦེ བོདྷིསཏྟབྷཱུཏོ པརམུཀྐཾསགཏེ ཝནི བྷཛི སེཝི, ཡཏྠ པཏིཊྛཱཡ ནིརཝསེསཏོ བུདྡྷཀཱརཀདྷམྨེ སམནྣཱནེནྟོ བུདྡྷདྷམྨེ པརིཔཱཙེསི. བུདྡྷབྷཱུཏོ ¶ པན ཏེ ནིརཝཛྫསུཁཱུཔསཾཧིཏེ ཨནཉྙསཱདྷཱརཎེ ལོཀུཏྟརེཔི ཝནི བྷཛི སེཝི. ཝིཏྠཱརཏོ པན པདེསརཛྫཨིསྶརིཡཙཀྐཝཏྟིསམྤཏྟིདེཝརཛྫསམྤཏྟིཨཱདིཝསེན, ཛྷཱནཝིམོཀྑསམཱདྷིསམཱཔཏྟིཉཱཎདསྶནམགྒབྷཱཝནཱཕལསཙྪིཀིརིཡཱདིཨུཏྟརིམནུསྶདྷམྨཝསེན ཙ ཨནེཀཝིཧིཏེ ཨནཉྙསཱདྷཱརཎེ བྷགེ ཝནི བྷཛི སེཝི. ཨེཝམྤི བྷགེ ཝནཱིཏི བྷགཝཱ.

ཡཱ ¶ ཏཱ སམྤཏྟིཡོ ལོཀེ, ཡཱ ཙ ལོཀུཏྟརཱ པུཐཱུ;

སབྦཱ ཏཱ བྷཛི སམྦུདྡྷོ, ཏསྨཱཔི བྷགཝཱ མཏོ.

ཀཐཾ བྷཏྟཝཱཏི བྷགཝཱ? བྷཏྟཱ དལ༹ྷབྷཏྟིཀཱ ཨསྶ བཧཱུ ཨཏྠཱིཏི བྷཏྟཝཱ. ཏཐཱགཏོ ཧི མཧཱཀརུཎཱསབྦཉྙུཏཉྙཱཎཱདིཨཔརིམིཏནིརུཔམཔྤབྷཱཝགུཎཝིསེསསམངྒི བྷཱཝཏོ སབྦསཏྟུཏྟམོ སབྦཱནཏྠཔརིཧཱརཔུབྦངྒམཱཡ ནིརཝསེསཧིཏསུཁཝིདྷཱནཏཔྤརཱཡ ནིརཏིསཡཱཡ པཡོགསམྤཏྟིཡཱ སདེཝམནུསྶཱཡ པཛཱཡ ཨཙྩནྟུཔཀཱརིཏཱཡ དྭཏྟིཾསམཧཱཔུརིསལཀྑཎཨསཱིཏིཨནུབྱཉྫནབྱཱམཔྤབྷཱདིཨནཉྙསཱདྷཱརཎགུཎཝིསེསཔཊིམཎྜིཏརཱུཔཀཱཡཏཱཡ ཡཐཱབྷུཙྩགུཎཱདྷིགཏེན ‘‘ཨིཏིཔི སོ བྷགཝཱ’’ཏིཨཱདིནཡཔྤཝཏྟེན ལོཀཏྟཡབྱཱཔིནཱསུཝིཔུལེན, སུཝིསུདྡྷེན ཙ ཐུཏིགྷོསེན སམནྣཱགཏཏྟཱ, ཨུཀྐཾསཔཱརམིཔྤཏྟཱསུ ཨཔྤིཙྪཏཱསནྟུཊྛིཨཱདཱིསུ སུཔཏིཊྛིཏབྷཱཝཏོ, དསབལཙཏུཝེསཱརཛྫཱདིནིརཏིསཡགུཎཝིསེསསམངྒིབྷཱཝཏོ ཙ ‘‘རཱུཔཔྤམཱཎོ རཱུཔཔྤསནྣོ, གྷོསཔྤམཱཎོ གྷོསཔྤསནྣོ, ལཱུཁཔྤམཱཎོ ལཱུཁཔྤསནྣོ, དྷམྨཔྤམཱཎོ དྷམྨཔྤསནྣོ’’ཏི ཨེཝཾ ཙཏུཔྤམཱཎིཀེ ལོཀསནྣིཝཱསེ སབྦཐཱཔི པསཱདཱཝཧབྷཱཝེན སམནྟཔཱསཱདིཀཏྟཱ ཨཔརིམཱཎཱནཾ སཏྟཱནཾ སདེཝམནུསྶཱནཾ ཨཱདརབཧུམཱནགཱརཝཱཡཏནཏཱཡ པརམཔེམསམྦྷཏྟིཊྛཱནཾ. ཡེ ཏསྶ ཨོཝཱདེ པཏིཊྛིཏཱ ཨཝེཙྩཔྤསཱདེན སམནྣཱགཏཱ ཧོནྟི, ཀེནཙི ཨསཾཧཱརིཡཱ ཏེསཾ སམྦྷཏྟི སམཎེན ཝཱ བྲཱཧྨཎེན ཝཱ དེཝེན ཝཱ མཱརེན ཝཱ བྲཧྨུནཱ ཝཱཏི. ཏཐཱ ཧི ཏེ ཨཏྟནོ ཛཱིཝིཏཔརིཙྩཱགེཔི ཏཏྠ པསཱདཾ ན པརིཙྩཛནྟི, ཏསྶ ཝཱ ཨཱཎཾ དལ༹ྷབྷཏྟིབྷཱཝཏོ. ཏེནེཝཱཧ –

‘‘ཡོ ཝེ ཀཏཉྙཱུ ཀཏཝེདི དྷཱིརོ,

ཀལྱཱཎམིཏྟོ དལ༹ྷབྷཏྟི ཙ ཧོཏཱི’’ཏི. (ཛཱ. ༢.༡༧.༧༨);

‘‘སེཡྻཐཱཔི ¶ , བྷིཀྑཝེ, མཧཱསམུདྡོ ཋིཏདྷམྨོ ཝེལཾ ནཱཏིཝཏྟཏི, ཨེཝམེཝ ཁོ, བྷིཀྑཝེ, ཡཾ མཡཱ སཱཝཀཱནཾ སིཀྑཱཔདཾ པཉྙཏྟཾ, ཏཾ མམ སཱཝཀཱ ཛཱིཝིཏཧེཏུཔི ནཱཏིཀྐམནྟཱི’’ཏི (ཨུདཱ. ༤༥; ཙཱུལ༹ཝ. ༣༨༥) ཙ.

ཨེཝཾ བྷཏྟཝཱཏི བྷགཝཱ ནིརུཏྟིནཡེན ཨེཀསྶ ཏ-ཀཱརསྶ ལོཔཾ ཀཏྭཱ ཨིཏརསྶ ག-ཀཱརཾ ཀཏྭཱ.

གུཎཱཏིསཡཡུཏྟསྶ ¶ , ཡསྨཱ ལོཀཧིཏེསིནོ;

སམྦྷཏྟཱ བཧཝོ སཏྠུ, བྷགཝཱ ཏེན ཝུཙྩཏི.

ཀཐཾ བྷགེ ཝམཱིཏི བྷགཝཱ? ཡསྨཱ ཏཐཱགཏོ བོདྷིསཏྟབྷཱུཏོཔི པུརིམཱསུ ཛཱཏཱིསུ པཱརམིཡོ པཱུརེནྟོ བྷགསངྑཱཏཾ སིརིཾ, ཨིསྶརིཡཾ, ཡསཉྩ ཝམི ཨུགྒིརི ཁེལ༹པིཎྜཾ ཝིཡ ཨནཔེཀྑོ ཚཌྜཡི. ཏཐཱ ཧིསྶ སོམནསྶཀུམཱརཀཱལེ (ཛཱ. ༡.༡༥.༢༡༡ ཨཱདཡོ) ཧཏྠིཔཱལཀུམཱརཀཱལེ (ཛཱ. ༡.༡༥.༣༣༧ ཨཱདཡོ) ཨཡོགྷརཔཎྜིཏཀཱལེ (ཛཱ. ༡.༡༥.༣༦༣ ཨཱདཡོ) མཱུགཔཀྑཔཎྜིཏཀཱལེ (ཛཱ. ༢.༢༢.༡ ཨཱདཡོ) ཙཱུལ༹སུཏསོམཀཱལེཏི (ཛཱ. ༢.༡༧.༡༩༥ ཨཱདཡོ) ཨེཝམཱདཱིསུ ནེཀྑམྨཔཱརམིཔཱུརཎཝསེན དེཝརཛྫསདིསཱཡ རཛྫསིརིཡཱ པརིཙྩཏྟཨཏྟབྷཱཝཱནཾ པརིམཱཎཾ ནཏྠི. ཙརིམཏྟབྷཱཝེཔི ཧཏྠགཏཾ ཙཀྐཝཏྟིསིརིཾ དེཝལོཀཱདྷིཔཙྩསདིསཾ ཙཏུདཱིཔིསྶརིཡཾ, ཙཀྐཝཏྟིསམྤཏྟིསནྣིསྶཡཾ སཏྟརཏནསམུཛྫལཾ ཡསཉྩ ཏིཎཱཡཔི ཨམཉྙམཱནོ ནིརཔེཀྑོ པཧཱཡ ཨབྷིནིཀྑམིཏྭཱ སམྨཱསམྦོདྷིཾ ཨབྷིསམྦུདྡྷོ, ཏསྨཱ ཨིམེ སིརིཨཱདིཀེ བྷགེ ཝམཱིཏི བྷགཝཱ. ཨཐ ཝཱ བྷཱནི ནཱམ ནཀྑཏྟཱནི, ཏེཧི སམཾ གཙྪནྟི པཝཏྟནྟཱིཏི བྷགཱ, སིནེརུཡུགནྡྷརཨུཏྟརཀུརུཧིམཝནྟཱདིབྷཱཛནལོཀཝིསེསསནྣིསྶཡཱ སོབྷཱ ཀཔྤཊྛིཡབྷཱཝཏོ. ཏེཔི བྷགཝཱ ཝམི ཏནྣིཝཱསསཏྟཱཝཱསསམཏིཀྐམནཏོ ཏཔྤཊིབདྡྷཚནྡརཱགཔྤཧཱནེན པཛཧཱིཏི. ཨེཝམྤི བྷགེ ཝམཱིཏི བྷགཝཱ.

ཙཀྐཝཏྟིསིརིཾ ཡསྨཱ, ཡསཾ ཨིསྶརིཡཾ སུཁཾ;

པཧཱསི ལོཀཙིཏྟཉྩ, སུགཏོ བྷགཝཱ ཏཏོ.

ཀཐཾ བྷཱགེ ཝམཱིཏི བྷགཝཱ? བྷཱགཱ ནཱམ སབྷཱཝདྷམྨཀོཊྛཱསཱ, ཏེ ཁནྡྷཱཡཏནདྷཱཏཱདིཝསེན, ཏཏྠཱཔི རཱུཔཝེདནཱདིཝསེན, ཨཏཱིཏཱདིཝསེན ཙ ཨནེཀཝིདྷཱ, ཏེ ཙ བྷགཝཱ ‘‘སབྦཾ པཔཉྩཾ, སབྦཾ ཡོགཾ, སབྦཾ ¶ གནྠཾ, སབྦཾ སཾཡོཛནཾ སམུཙྪིནྡིཏྭཱ ཨམཏཾ དྷཱཏུཾ སམདྷིགཙྪནྟོ ཝམི ཨུགྒིརི ཨནཔེཀྑོ ཚཌྜཡི ན པཙྩཱཝམི. ཏཐཱ ཧེས སབྦཏྠཀམེཝ པཐཝིཾ ཨཱཔཾ ཏེཛཾ ཝཱཡཾ, ཙཀྑུཾ སོཏཾ གྷཱནཾ ཛིཝ྄ཧཾ ཀཱཡཾ མནཾ, རཱུཔེ སདྡེ གནྡྷེ རསེ ཕོཊྛབྦེ དྷམྨེ, ཙཀྑུཝིཉྙཱཎཾ…པེ… མནོཝིཉྙཱཎཾ, ཙཀྑུསམྥསྶཾ…པེ… མནོསམྥསྶཾ, ཙཀྑུསམྥསྶཛཾ ཝེདནཾ…པེ… མནོསམྥསྶཛཾ ཝེདནཾ, ཙཀྑུསམྥསྶཛཾ སཉྙཾ…པེ… མནོསམྥསྶཛཾ སཉྙཾ, ཙཀྑུསམྥསྶཛཾ ཙེཏནཾ…པེ… མནོསམྥསྶཛཾ ཙེཏནཾ, རཱུཔཏཎྷཾ ¶ …པེ… དྷམྨཏཎྷཾ, རཱུཔཝིཏཀྐཾ…པེ… དྷམྨཝིཏཀྐཾ, རཱུཔཝིཙཱརཾ…པེ… དྷམྨཝིཙཱར’’ནྟིཨཱདིནཱ ཨནུཔདདྷམྨཝིབྷཱགཝསེནཔི སབྦེཝ དྷམྨཀོཊྛཱསེ ཨནཝསེསཏོ ཝམི ཨུགྒིརི ཨནཔེཀྑཔརིཙྩཱགེན ཚཌྜཡི. ཝུཏྟཾ ཧེཏཾ –

‘‘ཡཾ ཏཾ, ཨཱནནྡ, ཙཏྟཾ ཝནྟཾ མུཏྟཾ པཧཱིནཾ པཊིནིསྶཊྛཾ, ཏཾ ཏཐཱགཏོ པུན པཙྩཱཝམིསྶཏཱིཏི ནེཏཾ ཋཱནཾ ཝིཛྫཏཱི’’ཏི (དཱི. ནི. ༢.༡༨༣).

ཨེཝམྤི བྷཱགེ ཝམཱིཏི བྷགཝཱ. ཨཐ ཝཱ བྷཱགེ ཝམཱིཏི སབྦེཔི ཀུསལཱཀུསལེ སཱཝཛྫཱནཝཛྫེ ཧཱིནཔཎཱིཏེ ཀཎྷསུཀྐསཔྤཊིབྷཱགེ དྷམྨེ ཨརིཡམགྒཉཱཎམུཁེན ཝམི ཨུགྒིརི ཨནཔེཀྑོ པརིཙྩཛི པཛཧི, པརེསཉྩ ཏཐཏྟཱཡ དྷམྨཾ དེསེསི. ཝུཏྟམྤི ཙེཏཾ –

‘‘དྷམྨཱཔི ཝོ, བྷིཀྑཝེ, པཧཱཏབྦཱ, པགེཝ ཨདྷམྨཱ (མ. ནི. ༡.༢༤༠). ཀུལླཱུཔམཾ ཝོ, བྷིཀྑཝེ, དྷམྨཾ དེསེསྶཱམི ནིཏྠརཎཏྠཱཡ, ནོ གཧཎཏྠཱཡཱ’’ཏིཨཱདི (མ. ནི. ༡.༢༤༠).

ཨེཝམྤི བྷཱགེ ཝམཱིཏི བྷགཝཱ.

ཁནྡྷཱཡཏནདྷཱཏཱདི-དྷམྨབྷེདཱ མཧེསིནཱ;

ཀཎྷཱ སུཀྐཱ ཡཏོ ཝནྟཱ, ཏཏོཔི བྷགཝཱ མཏོ.

ཏེན ཝུཏྟཾ –

‘‘བྷཱགཝཱ བྷཏཝཱ བྷཱགེ, བྷགེ ཙ ཝནི བྷཏྟཝཱ;

བྷགེ ཝམི ཏཐཱ བྷཱགེ, ཝམཱིཏི བྷགཝཱ ཛིནོ’’ཏི.

ཨེཏྠ ཙ ཡསྨཱ སངྑེཔཏོ ཨཏྟཧིཏསམྤཏྟིཔརཧིཏཔཊིཔཏྟིཝསེན དུཝིདྷཱ བུདྡྷགུཎཱ, ཏཱསུ ཨཏྟཧིཏསམྤཏྟི པཧཱནསམྤདཱཉཱཎསམྤདཱབྷེདཏོ དུཝིདྷཱ, ཨཱནུབྷཱཝསམྤདཱདཱིནཾ ཏདཝིནཱབྷཱཝེན ཏདནྟོགདྷཏྟཱ. པརཧིཏཔཊིཔཏྟི པཡོགཱསཡབྷེདཏོ ¶ དུཝིདྷཱ. ཏཏྠ པཡོགཏོ ལཱབྷསཀྐཱརཱདིནིརཔེཀྑཙིཏྟསྶ སབྦདུཀྑནིཡྻཱནིཀདྷམྨཱུཔདེསོ, ཨཱསཡཏོ པཊིཝིརུདྡྷེསུཔི ནིཙྩཾ ཧིཏེསིཏཱ, ཉཱཎཔརིཔཱཀཀཱལཱགམནཱདིཔརཧིཏཔཊིཔཏྟི ཙ, ཨཱམིསཔཊིགྒཧཎཱདིནཱཔི ཨཏྠཙརིཡཱ ¶ པརཧིཏཔཊིཔཏྟི ཧོཏིཡེཝ. ཏསྨཱ ཏེསཾ ཝིབྷཱཝནཝསེན པཱལི༹ཡཾ ‘‘ཨརཧ’’ནྟིཨཱདཱིནཾ པདཱནཾ གཧཎཾ ཝེདིཏབྦཾ.

ཏཏྠ ‘‘ཨརཧ’’ནྟི ཨིམིནཱ པདེན པཧཱནསམྤདཱཝསེན བྷགཝཏོ ཨཏྟཧིཏསམྤཏྟི ཝིབྷཱཝིཏཱ. ‘‘སམྨཱསམྦུདྡྷོ, ལོཀཝིདཱུ’’ཏི ཙ ཨིམེཧི པདེཧི ཉཱཎསམྤདཱཝསེན. ནནུ ཙ ‘‘ལོཀཝིདཱུ’’ཏི ཨིམིནཱཔི སམྨཱསམྦུདྡྷཏཱ ཝིབྷཱཝཱིཡཏཱིཏི? སཙྩཾ ཝིབྷཱཝཱིཡཏི, ཨཏྠི པན ཝིསེསོ, ‘‘སམྨཱསམྦུདྡྷོ’’ཏི ཨིམིནཱ སབྦཉྙུཏཉྙཱཎཱནུབྷཱཝོ ཝིབྷཱཝིཏོ, ‘‘ལོཀཝིདཱུ’’ཏི པན ཨིམིནཱ ཨཱསཡཱནུསཡཉཱཎཱདཱིནམྤི ཨཱནུབྷཱཝོ ཝིབྷཱཝིཏོཏི. ‘‘ཝིཛྫཱཙརཎསམྤནྣོ’’ཏི ཨིམིནཱ སབྦཱཔི བྷགཝཏོ ཨཏྟཧིཏསམྤཏྟི ཝིབྷཱཝིཏཱ. ‘‘སུགཏོ’’ཏི པན ཨིམིནཱ སམུདཱགམཏོ པཊྛཱཡ བྷགཝཏོ ཨཏྟཧིཏསམྤཏྟི, པརཧིཏཔཊིཔཏྟི ཙ ཝིབྷཱཝིཏཱ. ‘‘ཨནུཏྟརོ པུརིསདམྨསཱརཐི སཏྠཱ དེཝམནུསྶཱན’’ནྟི ཨིམེཧི པདེཧི བྷགཝཏོ པརཧིཏཔཊིཔཏྟི ཝིབྷཱཝིཏཱ. ‘‘བུདྡྷོ’’ཏི ཨིམིནཱ བྷགཝཏོ ཨཏྟཧིཏསམྤཏྟི, པརཧིཏཔཊིཔཏྟི ཙ ཝིབྷཱཝིཏཱ. ཨེཝཉྩ ཀཏྭཱ ‘‘སམྨཱསམྦུདྡྷོ’’ཏི ཝཏྭཱ ‘‘བུདྡྷོ’’ཏི ཝཙནཾ སམཏྠིཏཾ ཧོཏི. ཏེནེཝཱཧ ‘‘ཨཏྟནཱཔི བུཛ྄ཛྷི ཨཉྙེཔི སཏྟེ བོདྷེསཱི’’ཏིཨཱདི. ‘‘བྷགཝཱ’’ཏི ཙ ཨིམིནཱཔི སམུདཱགམཏོ པཊྛཱཡ བྷགཝཏོ སབྦཱ ཨཏྟཧིཏསམྤཏྟི, པརཧིཏཔཊིཔཏྟི ཙ ཝིབྷཱཝིཏཱ.

ཨཔརོ ནཡོ – ཧེཏུཕལསཏྟཱུཔཀཱརཝསེན སངྑེཔཏོ ཏིཝིདྷཱ བུདྡྷགུཎཱ. ཏཏྠ ‘‘ཨརཧཾ སམྨཱསམྦུདྡྷོ ཝིཛྫཱཙརཎསམྤནྣོ ལོཀཝིདཱུ’’ཏི ཨིམེཧི པདེཧི ཕལསམྤཏྟིཝསེན བུདྡྷགུཎཱ ཝིབྷཱཝིཏཱ. ‘‘ཨནུཏྟརོ པུརིསདམྨསཱརཐི སཏྠཱ དེཝམནུསྶཱན’’ནྟི ཨིམེཧི སཏྟཱུཔཀཱརཝསེན བུདྡྷགུཎཱ པཀཱསིཏཱ. ‘‘བུདྡྷོ’’ཏི ཨིམིནཱ ཕལཝསེན, སཏྟཱུཔཀཱརཝསེན ཙ བུདྡྷགུཎཱ ཝིབྷཱཝིཏཱ. ‘‘སུགཏོ བྷགཝཱ’’ཏི པན ཨིམེཧི པདེཧི ཧེཏུཕལསཏྟཱུཔཀཱརཝསེན བུདྡྷགུཎཱ ཝིབྷཱཝིཏཱཏི ཝེདིཏབྦཾ.

༡༤༥. ཏསྶཱཏི ¶ བུདྡྷཱནུསྶཏིཀམྨཊྛཱནིཀསྶ ཡོགིནོ. ཨེཝནྟི ‘‘ཏཏྲཱཡཾ ནཡོ’’ཏིཨཱདིནཱ ཝུཏྟཔྤཀཱརེན. ཏསྨིཾ སམཡེཏི བུདྡྷགུཎཱནུསྶརཎསམཡེ. རཱགཔརིཡུཊྛིཏནྟི རཱགེན པརིཡུཊྛིཏཾ, པརིཡུཊྛཱནཔྤཏྟེཧི རཱགེཧི སཧིཏཾ ཙིཏྟཾ ཨརཉྙམིཝ ཙོརེཧི ཏེན པརིཡུཊྛིཏནྟི ཝུཏྟཾ, ཏསྶ པརིཡུཊྛཱནཊྛཱནབྷཱཝཏོ, པརིཡུཊྛིཏརཱགནྟི ཨཏྠོ. ཡཾ ཝཱ རཱགསྶ པརིཡུཊྛཱནཾ, ཏཾ ཏཾསཧིཏེ ཙིཏྟེ ཨུཔཙརིཏནྟི དཊྛབྦཾ. ཨེཏསྨིཾ པཀྑེ རཱགེནཱཏི རཱགེན ཧེཏུནཱཏི ¶ ཨཏྠོ. ཨུཛུགཏམེཝཱཏི པགེཝ ཀཱཡཝངྐཱདཱིནཾ ཨཔནཱིཏཏྟཱ, ཙིཏྟསྶ ཙ ཨནུཛུབྷཱཝཀརཱནཾ མཱཡཱདཱིནཾ ཨབྷཱཝཏོ, རཱགཱདིཔརིཡུཊྛཱནཱབྷཱཝེན ཝཱ ཨོནཏིཨུནྣཏིཝིརཧཏོ ཨུཛུབྷཱཝམེཝ ཀཏཾ. ཨཐ ཝཱ ཨུཛུགཏམེཝཱཏི ཀམྨཊྛཱནསྶ ཝཱིཐིཾ ཨོཏིཎྞཏཱཡ ལཱིནུདྡྷཙྩཝིགམནཏོ མཛ྄ཛྷིམསམཐནིམིཏྟཔཊིཔཏྟིཡཱ ཨུཛུབྷཱཝམེཝ གཏཾ. ཏཐཱགཏཾ ཨཱརབྦྷཱཏི ཏཐཱགཏགུཎེ ཨཱརམྨཎཾ ཀཏྭཱ.

ཨིཙྩསྶཱཏི ཨིཏི ཨསྶ. ‘‘སོ བྷགཝཱ ཨིཏིཔི ཨརཧ’’ནྟིཨཱདིནཱ པུབྦེ ཝུཏྟཔྤཀཱརེན བུདྡྷགུཎེ ཨནུཝིཏཀྐཡཏོཏི སམྦནྡྷོ. ཨེཝནྟི ‘‘ནེཝ ཏསྨིཾ སམཡེ’’ཏིཨཱདིནཱ ཝུཏྟནཡེན. བུདྡྷགུཎཔོཎཱཏི བུདྡྷགུཎནིནྣཱ. ‘‘ཝིཏཀྐཝིཙཱརཱ པཝཏྟནྟཱི’’ཏི ཨེཏེན བུདྡྷགུཎསངྑཱཏཾ ཀམྨཊྛཱནཾ ཝིཏཀྐཱཧཏཾ, ཝིཏཀྐཔརིཡཱཧཏཾ, པུནཔྤུནཾ ཨནུམཛྫནཉྩ ཀརོཏཱིཏི དསྶེཏི. པཱིཏི ཨུཔྤཛྫཏཱིཏི བྷཱཝནཱཝསེན ཨུཔཙཱརཛ྄ཛྷཱནནིཔྥཱདིཀཱ བལཝཏཱི པཱིཏི ཨུཔྤཛྫཏི. པཱིཏིམནསྶ ཝུཏྟཔྤཀཱརཔཱིཏིསཧིཏཙིཏྟསྶ. ཀཱཡཙིཏྟདརཐཱཏི ཀཱཡཙིཏྟཔསྶདྡྷཱིནཾ པཊིཔཀྑབྷཱུཏཱ སུཁུམཱཝཏྠཱ ཨུདྡྷཙྩསཧགཏཱ ཀིལེསཱ. པཊིཔྤསྶམྦྷནྟཱིཏི སནྣིསཱིདནྟི. ཨནུཀྐམེན ཨེཀཀྑཎེཏི ཡདཱ བུདྡྷགུཎཱརམྨཎཱ བྷཱཝནཱ ཨུཔརཱུཔརི ཝིསེསཾ ཨཱཝཧནྟཱི པཝཏྟཏི, ཏདཱ ནཱིཝརཎཱནི ཝིཀྑམྦྷིཏཱནེཝ ཧོནྟི, ཀིལེསཱ སནྣིསིནྣཱཝ ཧོནྟི, སུཝིསདཱནི སདྡྷཱདཱིནི ཨིནྡྲིཡཱནི ཧོནྟི, བྷཱཝནཱཡ པགུཎཏཱཡ ཝིཏཀྐཝིཙཱརཱ སཱཏིསཡཾ པཊུཀིཙྩཱཝ ཧོནྟི, བལཝཏཱི པཱིཏི ཨུཔྤཛྫཏི, པཱིཏིཔདཊྛཱནཱ པསྶདྡྷི སཝིསེསཱ ཛཱཡཏི, པསྶདྡྷཀཱཡསྶ སམཱདྷིཔདཊྛཱནཾ སུཁཾ ཐིརཏརཾ ཧུཏྭཱ པཝཏྟཏི, སུཁེན ཨནུབྲཱུཧིཏཾ ཙིཏྟཾ ཀམྨཊྛཱནེ སམྨདེཝ སམཱདྷིཡཏི. ཨེཝཾ ཨནུཀྐམེན པུབྦབྷཱགེ ཝིཏཀྐཱདཡོ ཨུཔརཱུཔརི པཊུཔཊུཏརབྷཱཝེན པཝཏྟིཏྭཱ བྷཱཝནཱཡ མཛ྄ཛྷིམསམཐཔཊིཔཏྟིཡཱ ཨིནྡྲིཡཱནཉྩ ཨེཀརསབྷཱཝེན པཊུཏམཱནི ཧུཏྭཱ ཨེཀཀྑཎེ ཛྷཱནངྒཱནི ཨུཔྤཛྫནྟི. ཡཾ སནྡྷཱཡ ཝུཏྟཾ བྷགཝཏཱ –

‘‘ཡསྨིཾ ¶ , མཧཱནཱམ, སམཡེ ཨརིཡསཱཝཀོ ཏཐཱགཏཾ ཨནུསྶརཏི, ནེཝསྶ ཏསྨིཾ སམཡེ རཱགཔརིཡུཊྛིཏཾ ཙིཏྟཾ ཧོཏི…པེ… སུཁིནོ ཙིཏྟཾ སམཱདྷིཡཏཱི’’ཏི (ཨ. ནི. ༦.༡༠).

ཀསྨཱ པནེཏྠ ཛྷཱནཾ ཨཔྤནཱཔཏྟཾ ན ཧོཏཱིཏི ཨཱཧ ‘‘བུདྡྷགུཎཱནཾ པན གམྦྷཱིརཏཱཡཱ’’ཏིཨཱདི. གམྦྷཱིརེ ཧི ཨཱརམྨཎེ གམྦྷཱིརེ ཨུདཀེ པཏིཏནཱཝཱ ཝིཡ སམཐབྷཱཝནཱ པཏིཊྛཾ ¶ ན ལབྷཏི, ‘‘གམྦྷཱིརཏཱཡཱ’’ཏི ཙ ཨིམིནཱ སབྷཱཝདྷམྨཏཱཔི སངྒཧིཏཱ. སབྷཱཝདྷམྨོ ཧི གམྦྷཱིརོ ན པཉྙཏྟི. ནནུ ཙ ཏཛྫཱཔཉྙཏྟིཝསེན སབྷཱཝདྷམྨོ གཡ྄ཧཏཱིཏི? སཙྩཾ གཡ྄ཧཏི པུབྦབྷཱགེ, བྷཱཝནཱཡ པན ཝཌྜྷམཱནཱཡ པཉྙཏྟིཾ སམཏིཀྐམིཏྭཱ སབྷཱཝེཡེཝ ཙིཏྟཾ ཏིཊྛཏི. ནནུ ཙ སབྷཱཝདྷམྨེཔི ཀཏྠཙི ཨཔྤནཱ སམིཛ྄ཛྷཏི དུཏིཡཱརུཔྤཛ྄ཛྷཱནཱདཱིཏི? སཙྩཾ སམིཛ྄ཛྷཏི, ཏཉྩ ཁོ ཨེཀཔྤཀཱརེ ཨཱརམྨཎེ, ཨིདཾ པན ནཱནཔྤཀཱརནྟི དསྶེནྟོ ‘‘ནཱནཔྤཀཱརགུཎཱནུསྶརཎཱདྷིམུཏྟཏཱཡཱ’’ཏི ཨཱཧ. ཨེཝམྤི ཡཐཱ ནཱནཔྤཀཱརེསུ ཀེསཱདིཀོཊྛཱསེསུ མནསིཀཱརཾ པཝཏྟེནྟསྶ ཨེཀསྨིཾཡེཝ ཀོཊྛཱསེ ཨཔྤནཱཝསེན བྷཱཝནཱ ཨཝཏིཊྛཏི, ཨེཝམིདྷ ཀསྨཱ ན ཧོཏཱིཏི? ཝིསམོཡཾ ཨུཔཉྙཱསོ. ཏཏྠ ཧི སཏིཔི ཀོཊྛཱསབཧུབྷཱཝེ ཨེཀཔྤཀཱརེནེཝ བྷཱཝནཱ ཝཏྟཏི པཊིཀྐཱུལཱཀཱརསྶེཝ གཧཎཏོ, ཨིདྷ པན ནཱནཔྤཀཱརེན གུཎཱནཾ ནཱནཔྤཀཱརཏྟཱ, ན ཨཡམེཀསྨིཾཡེཝ གུཎེ ཋཱཏུཾ སཀྐོཏི བྷཱཝནཱབལེན པཙྩཀྑཏོ བུདྡྷགུཎེསུ ཨུཔཊྛཧནྟེསུ སདྡྷཱཡ བལཝབྷཱཝཏོ. ཏེནེཝ ཧི ‘‘ཨདྷིམུཏྟཏཱཡཱ’’ཏི ཝུཏྟཾ. ཡདི ཨུཔཙཱརཔྤཏྟཾ ཛྷཱནཾ ཧོཏི, ཀཐཾ བུདྡྷཱནུསྶཏཱིཏི ཝུཏྟནྟི ཨཱཧ ‘‘ཏདེཏ’’ནྟིཨཱདི.

སགཱརཝོ ཧོཏི སཔྤཏིསྶོ, སཏྠུ གུཎསརཱིརསྶ པཙྩཀྑཏོ ཨུཔཊྛཧནཏོ. ཏཏོཡེཝ སདྡྷཱཝེཔུལླཾ ཨཝེཙྩཔྤསཱདསདིསཾ སདྡྷཱམཧཏྟཾ. བུདྡྷགུཎཱནཾ ཨནུསྶརཎཝསེན བྷཱཝནཱཡ པཝཏྟཏྟཱ སཏིཝེཔུལླཾ. ཏེསཾ པརམགམྦྷཱིརཏཱཡ, ནཱནཔྤཀཱརཏཱཡ ཙ པཉྙཱཝེཔུལླཾ. ཏེསཾ ཨུལཱ༹རཔུཉྙཀྑེཏྟཏཱཡ པུཉྙཝེཔུལླཉྩ ཨདྷིགཙྪཏི. པཱིཏིཔཱམོཛྫབཧུལོ ཧོཏི པཱིཏིསམྦོཛ྄ཛྷངྒཊྛཱནཱིཡཏྟཱ བུདྡྷཱནུསྶཏིཡཱ. བྷཡབྷེརཝསཧོ བུདྡྷགུཎཱརམྨཎཱཡ སཏིཡཱ བྷཡབྷེརཝཱབྷིབྷཝནཏོ. ཏེནཱཧ བྷགཝཱ ‘‘ཨནུསྶརེཐ སམྦུདྡྷཾ, བྷཡཾ ཏུམྷཱཀ ནོ སིཡཱ’’ཏི (སཾ. ནི. ༡.༢༤༩ ཐོཀཾ ཝིསདིསཾ). དུཀྑཱདྷིཝཱསནསམཏྠོ བུདྡྷཱནུསྶཏིཡཱ སརཱིརདུཀྑསྶ པདུམཔལཱསེ ཨུདཀསྶ ཝིཡ ཝིནིཝཊྚནཏོ ¶ . སཾཝཱསསཉྙནྟི སཧཝཱསསཉྙཾ. བུདྡྷབྷཱུམིཡཾ ཙིཏྟཾ ནམཏི བུདྡྷགུཎཱནཾ མཧནྟབྷཱཝསྶ པཙྩཀྑཏོ ཨུཔཊྛཱནཏོ. བུདྡྷཱནུསྶཏིབྷཱཝནཱཡ སབྦདཱ བུདྡྷགུཎཱནཾ ཙིཏྟེ ཝིཔརིཝཏྟནཏོ ཝུཏྟཾ ‘‘སམྨུཁཱ སཏྠཱརཾ པསྶཏོ ཝིཡཱ’’ཏི. ཨུཏྟརི ཨཔྤཊིཝིཛ྄ཛྷནྟོཏི ཨིམཱཡ བྷཱཝནཱཡ ཨུཔརི ཏཾ ཨདྷིཊྛཱནཾ ཀཏྭཱ སཙྩཱནི ཨཔྤཊིཝིཛ྄ཛྷནྟོ. སུགཏིཔརཱཡཎོཏི སུགཏིསམྤརཱཡོ.

ཨཔྤམཱདནྟི ཨཔྤམཛྫནཾ སཀྐཙྩཾ ཨནུཡོགཾ. ཀཡིརཱཐཱཏི ཀརེཡྻ. སུམེདྷསོཏི སུནྡརཔཉྙོ ¶ . ཨེཝཾ མཧཱནུབྷཱཝཱཡཱཏི ཝུཏྟཔྤཀཱརེན ནཱིཝརཎཝིཀྑམྦྷནཱདིསམཏྠེན སཏྠརི སགཱརཝབྷཱཝཱདིཧེཏུབྷཱུཏེན མཧཏཱ སཱམཏྠིཡེན སམནྣཱགཏཱཡ.

༢. དྷམྨཱནུསྶཏིཀཐཱཝཎྞནཱ

༡༤༦. དྷམྨཱནུསྶཏིནྟི ཨེཏྠ པདཏྠོ, སབྷཱཝཏྠོ ཙ ཨཱདིཏོ ཝུཏྟོཡེཝཱཏི ཏཾ ཨནཱམསིཏྭཱ བྷཱཝནཱཝིདྷཱནམེཝ དསྶེཏུཾ ‘‘དྷམྨཱནུསྶཏིཾ བྷཱཝེཏུཀཱམེནཱཔཱི’’ཏིཨཱདི ཨཱརདྡྷཾ. ཀསྨཱ པནེཏྠ བུདྡྷཱནུསྶཏིཡཾ ཝིཡ ‘‘ཨཝེཙྩཔྤསཱདསམནྣཱགཏེནཱ’’ཏི ན ཝུཏྟཾ. ནནུ ཨེཏཱ པཊིཔཱཊིཡཱ ཚ ཨནུསྶཏིཡོ ཨརིཡསཱཝཀཱནཾ ཝསེན དེསནཾ ཨཱརུལ༹ྷཱཏི? སཙྩམེཏཾ, ཨེཝཾ སནྟེཔི ‘‘པརིསུདྡྷསཱིལཱདིགུཎཱནཾ པུཐུཛྫནཱནམྤི ཨིཛ྄ཛྷནྟཱི’’ཏི དསྶནཏྠཾ ‘‘ཨཝེཙྩཔྤསཱདསམནྣཱགཏེནཱ’’ཏི ཨིདྷ ན ཝུཏྟཾ, ཨརིཡསཱཝཀཱནཾ པན སུཁེན ཨིཛ྄ཛྷནྟཱིཏི. ཏཐཱཔི པཱལི༹ཡཾ ཨཱགཏཏྟཱ ཙ བུདྡྷཱནུསྶཏིནིདྡེསེ ཝུཏྟནྟི དཊྛབྦཾ, ཨཡཉྩ ཝིཙཱརོ པརཏོ ཨཱགམིསྶཏེཝ.

༡༤༧. པརིཡཏྟིདྷམྨོཔཱིཏི པི-སདྡེན ལོཀུཏྟརདྷམྨཾ སམྤིཎྜེཏི. ཨིཏརེསཱུཏི སནྡིཊྛིཀཱདིཔདེསུ. ལོཀུཏྟརདྷམྨོཝཱཏི ཨཝདྷཱརཎཾ ནིཔྤརིཡཱཡེན སནྡིཊྛིཀཱདིཨཏྠཾ སནྡྷཱཡ ཝུཏྟཾ, པརིཡཱཡཏོ པནེཏེ པརིཡཏྟིདྷམྨེཔི སམྦྷཝནྟེཝ. ཏཐཱ ཧི པརིཡཏྟིདྷམྨོ བཧུསྶུཏེན ཨཱགཏཱགམེན པརམེན སཏིནེཔཀྐེན སམནྣཱགཏེན པཉྙཝཏཱ ཨཱདིཀལྱཱཎཏཱདིཝིསེསཏོ སཡཾ དཊྛབྦོཏི སནྡིཊྛིཀོ. ཨཱཙརིཡཔཡིརུཔཱསནཱཡ ཝིནཱ ན ལབྦྷཱཏི ཙེ? ལོཀུཏྟརདྷམྨེཔི སམཱནེ ཀལྱཱཎམིཏྟསནྣིསྶཡེནེཝ སིཛ྄ཛྷནཏོ, ཏཐཱ སཏྠུསནྡསྶནེཔི. ‘‘སནྡིཊྛིཡཱ ཛཡཏཱི’’ཏི ཨཡཾ པནཏྠོ ཏིཏྠིཡནིམྨདྡནེ ནིཔྤརིཡཱཡཏོཝ ལབྦྷཏི ¶ , ཀིལེསཛཡེ པརིཡཱཡཏོ པརམྤརཱཧེཏུབྷཱཝཏོ. ‘‘སནྡིཊྛཾ ཨརཧཏཱི’’ཏི ཨཡམྤི ཨཏྠོ ལབྦྷཏེཝ, སབྦསོ སཾཀིལེསདྷམྨཱནཾ པཧཱནཾ, ཝོདཱནདྷམྨཱནཾ པརིབྲཱུཧནཉྩ ཨུདྡིསྶ པཝཏྟཏྟཱ. ཨཡཉྩ ཨཏྠོ ‘‘ཡེ ཁོ ཏྭཾ, གོཏམི, དྷམྨེ ཛཱནེཡྻཱསི, ཨིམེ དྷམྨཱ སརཱགཱཡ སཾཝཏྟནྟི ནོ ཝིརཱགཱཡ, སཉྙོགཱཡ སཾཝཏྟནྟི ནོ ཝིསཉྙོགཱཡ, སཨུཔཱདཱནཱཡ སཾཝཏྟནྟི ནོ ཨནུཔཱདཱནཱཡ. ཨེཀཾསེན, གོཏམི, དྷཱརེཡྻཱསི ‘ནེསོ དྷམྨོ, ནེསོ ཝིནཡོ, ནེཏཾ སཏྠུསཱསན’’’ནྟི (ཙཱུལ༹ཝ. ༤༠༦; ཨ. ནི. ༨.༥༣), ‘‘དྷམྨཱཔི ཝོ, བྷིཀྑཝེ, པཧཱཏབྦཱ, པགེཝ ཨདྷམྨཱ’’ཏི (མ. ནི. ༡.༢༤༠) ཙ ཨེཝམཱདཱིཧི སུཏྟཔདེཧི ཝིབྷཱཝེཏབྦོ. ཨཀཱལིཀཱདྷིགམུཔཱཡཏཱཡ ཨཀཱལིཀོ. ཝིཛྫམཱནཏཱཔརིསུདྡྷཏཱཧི ཨེཧིཔསྶཝིདྷིཾ ཨརཧཏཱིཏི ཨེཧིཔསྶིཀོ. ཏཏོ ཨེཝ ཝཊྚདུཀྑནིཏྠརཎཏྠིཀེཧི ¶ ཨཏྟནོ ཙིཏྟེ ཨུཔནཡནཾ, ཙིཏྟསྶ ཝཱ ཏཏྠ ཨུཔནཡནཾ ཨརཧཏཱིཏི ཨོཔནེཡྻིཀོ. ཝིམུཏྟཱཡཏནསཱིསེ ཋཏྭཱ པརིཙཡེན སམྨདེཝ ཨཏྠཝེདཾ, དྷམྨཝེདཉྩ ལབྷནྟེཧི པཙྩཏྟཾ ཝེདིཏབྦོ ཝིཉྙཱུཧཱིཏི. ཨེཝཾ སནྡིཊྛིཀཱདིཔདེསུ པརིཡཏྟིདྷམྨམྤི པཀྑིཔིཏྭཱ མནསིཀཱརོ ཡུཛྫཏེཝ.

སཱཏི གཱཐཱ. སམནྟབྷདྲཀཏྟཱཏི སབྦབྷཱགེཧི སུནྡརཏྟཱ. དྷམྨསྶཱཏི སཱསནདྷམྨསྶ. ཀིཉྩཱཔི ཨཝཡཝཝིནིམུཏྟོ སམུདཱཡོ ནཱམ པརམཏྠཏོ ཀོཙི ནཏྠི, ཡེསུ པན ཨཝཡཝེསུ སམུདཱཡརཱུཔེན ཨཝེཀྑིཏེསུ ‘‘གཱཐཱ’’ཏི སམཉྙཱ, ཏཾ ཏཏོ བྷིནྣཾ ཝིཡ ཀཏྭཱ སཾསཱམིཝོཧཱརཾ ཨཱརོཔེཏྭཱ དསྶེནྟོ ‘‘པཋམེན པཱདེན ཨཱདིཀལྱཱཎཱ’’ཏིཨཱདིམཱཧ. ‘‘ཨེཀཱནུསནྡྷིཀ’’ནྟི ཨིདཾ ནཱཏིབཧུཝིབྷཱགཾ ཡཐཱནུསནྡྷིནཱ ཨེཀཱནུསནྡྷིཀཾ སནྡྷཱཡ ཝུཏྟཾ, ཨིཏརསྶ པན ཏེནེཝ དེསེཏབྦདྷམྨཝིབྷཱགེན ཨཱདིམཛ྄ཛྷཔརིཡོསཱནབྷཱགཱ ལབྦྷནྟཱིཏི. ནིདཱནེནཱཏི ཀཱལདེསདེསཀཔརིསཱདིཨཔདིསནལཀྑཎེན ནིདཱནགནྠེན. ནིགམནེནཱཏི ‘‘ཨིདམཝོཙཱ’’ཏིཨཱདིཀེན (སཾ. ནི. ༡.༢༤༩), ‘‘ཨིཏི ཡཾ ཏཾ ཝུཏྟཾ, ཨིདམེཏཾ པཊིཙྩ ཝུཏྟ’’ནྟི (ཨ. ནི. ༡༠.༢༧) ཝཱ ཡཐཱཝུཏྟཏྠནིགམནེན.

ཨཡཾ ཀཐཱ ཝིསེསཏོ སུཏྟཔིཊཀསཾཝཎྞནཱཏི ཀཏྭཱ སུཏྟཔིཊཀཝསེན དྷམྨསྶ ཨཱདིཀལྱཱཎཱདིཀཾ དསྶེཏྭཱ ཨིདཱནི སུཏྟཔིཊཀཝིནཡཔིཊཀཱནཾ ཝསེན ཏཾ དསྶེཏུཾ ‘‘སནིདཱནསཨུཔྤཏྟིཀཏྟཱ’’ཏིཨཱདི ཝུཏྟཾ. ཏཏྠ སནིདཱནསཨུཔྤཏྟིཀཏྟཱཏི ཡཐཱཝུཏྟནིདཱནེན སནིདཱནཏཱཡ, སཨཊྛུཔྤཏྟིཀཏཱཡ ¶ ཙ. ཝེནེཡྻཱནཾ ཨནུརཱུཔཏོཏི སིཀྑཱཔདཔཉྙཏྟིཡཱ, དྷམྨདེསནཱཡ ཙ ཏཾཏཾསིཀྑཱཔདབྷཱཝེན པཉྙཱཔིཡམཱནསྶ ཝེནེཡྻཛ྄ཛྷཱསཡཱནུརཱུཔཾ པཝཏྟིཡམཱནསྶ ཨནུརཱུཔཏོ. ཨཏྠསྶཱཏི དེསིཡམཱནསྶ ཙ སཱིལཱདིཨཏྠསྶ. ‘‘ཏཾ ཀིསྶ ཧེཏུ (སཾ. ནི. ༡.༢༤༩)? སེཡྻཐཱཔི, བྷིཀྑཝེ’’ཏིཨཱདིནཱ (སཾ. ནི. ༣.༩༥) ཏཏྠ ཏཏྠ ཧེཏཱུཔམཱགཧཎེན ཧེཏུདཱཧརཎཡུཏྟཏོ.

ཨེཝཾ སུཏྟཝིནཡཝསེན པརིཡཏྟིདྷམྨསྶ ཨཱདིམཛ྄ཛྷཔརིཡོསཱནཀལྱཱཎཏཾ དསྶེཏྭཱ ཨིདཱནི ཏཱིཎི པིཊཀཱནི ཨེཀཛ྄ཛྷཾ གཧེཏྭཱ ཏཾ དསྶེཏུཾ ‘‘སཀལོཔཱི’’ཏིཨཱདི ཝུཏྟཾ. ཏཏྠ སཱསནདྷམྨོཏི –

‘‘སབྦཔཱཔསྶ ¶ ཨཀརཎཾ, ཀུསལསྶ ཨུཔསམྤདཱ;

སཙིཏྟཔརིཡོདཔནཾ, ཨེཏཾ བུདྡྷཱན སཱསན’’ནྟི. (དྷ. པ. ༡༨༣; དཱི. ནི. ༢.༩༠) –

ཨེཝཾ ཝུཏྟསྶ སཏྠུསཱསནསྶ པཀཱསཀོ པརིཡཏྟིདྷམྨོ. སཱིལེན ཨཱདིཀལྱཱཎོ སཱིལམཱུལཀཏྟཱ སཱསནསྶ. སམཐཱདཱིཧི མཛ྄ཛྷེཀལྱཱཎོ ཏེསཾ སཱསནསམྤཏྟིཡཱ ཝེམཛ྄ཛྷབྷཱཝཏོ. ནིབྦཱནེན པརིཡོསཱནཀལྱཱཎོ ཏདདྷིགམཏོ ཨུཏྟརིཀརཎཱིཡཱབྷཱཝཏོ. སཱསནེ སམྨཱཔཊིཔཏྟི ནཱམ པཉྙཱཡ ཧོཏི, ཏསྶཱ ཙ སཱིལཾ, སམཱདྷི ཙ མཱུལནྟི ཨཱཧ ‘‘སཱིལསམཱདྷཱིཧི ཨཱདིཀལྱཱཎོ’’ཏི. པཉྙཱ པན ཨནུབོདྷཔཊིཝེདྷཝསེན དུཝིདྷཱཏི ཏདུབྷཡམྤི གཎྷནྟོ ‘‘ཝིཔསྶནཱམགྒེཧི མཛ྄ཛྷེཀལྱཱཎོ’’ཏི ཨཱཧ. ཏསྶ ནིཔྥཏྟི ཕལཾ, ཀིཙྩཾ ནིབྦཱནསཙྪིཀིརིཡཱ, ཏཏོ པརཾ ཀཏྟབྦཾ ནཏྠཱིཏི དསྶེནྟོ ཨཱཧ ‘‘ཕལནིབྦཱནེཧི པརིཡོསཱནཀལྱཱཎོ’’ཏི. ཕལགྒཧཎེན ཝཱ སཨུཔཱདིསེསནིབྦཱནམཱཧ, ཨིཏརེན ཨིཏརཾ, ཏདུབྷཡཉྩ སཱསནསམྤཏྟིཡཱ ཨོསཱནནྟི ཨཱཧ ‘‘ཕལནིབྦཱནེཧི པརིཡོསཱནཀལྱཱཎོ’’ཏི.

བུདྡྷསྶ སུབོདྷིཏཱ སམྨཱསམྦུདྡྷཏཱ, ཏཱཡ ཨཱདིཀལྱཱཎོ ཏཔྤབྷཝཏྟཱ. སབྦསོ སཾཀིལེསཔྤཧཱནཾ ཝོདཱནཾ, པཱརིཔཱུརཱི ཙ དྷམྨསུདྷམྨཏཱ, ཏཱཡ མཛ྄ཛྷེཀལྱཱཎོ ཏཾསརཱིརཏྟཱ. སཏྠཱརཱ ཡཐཱནུསིཊྛཾ ཏཐཱ པཊིཔཏྟི སངྒྷསུཔྤཊིཔཏྟི, ཏཱཡ པརིཡོསཱནཀལྱཱཎོ, ཏཱཡ སཱསནསྶ ལོཀེ སུཔྤཏིཊྛིཏབྷཱཝཏོ. ཏནྟི སཱསནདྷམྨཾ. ཏཐཏྟཱཡཱཏི ཡཐཏྟཱཡ བྷགཝཏཱ དྷམྨོ དེསིཏོ, ཏཐཏྟཱཡ ཏཐབྷཱཝཱཡ. སོ པན ཨབྷིསམྦོདྷི པཙྩེཀབོདྷི སཱཝཀབོདྷཱིཏི ཏིཝིདྷོ ¶ , ཨིཏོ ཨཉྙཐཱ ནིབྦཱནཱདྷིགམསྶ ཨབྷཱཝཏོ. ཏཏྠ སབྦགུཎེཧི ཨགྒབྷཱཝཏོ, ཨིཏརབོདྷིདྭཡམཱུལཏཱཡ ཙ པཋམཱཡ བོདྷིཡཱ ཨཱདིཀལྱཱཎཏཱ, གུཎེཧི ཝེམཛ྄ཛྷབྷཱཝཏོ དུཏིཡཱཡ མཛ྄ཛྷེཀལྱཱཎཏཱ, ཏདུབྷཡཱཝརཏཱཡ, ཏདོསཱནཏཱཡ ཙ སཱསནདྷམྨསྶ ཏཏིཡཱཡ པརིཡོསཱནཀལྱཱཎཏཱ ཝུཏྟཱ.

ཨེསོཏི སཱསནདྷམྨོ. ནཱིཝརཎཝིཀྑམྦྷནཏོཏི ཝིམུཏྟཱཡཏནསཱིསེ ཋཏྭཱ སདྡྷམྨཾ སུཎནྟསྶ ནཱིཝརཎཱནཾ ཝིཀྑམྦྷནསམྦྷཝཏོ. ཝུཏྟཾ ཧེཏཾ –

‘‘ཡཐཱ ཡཐཱཝུསོ, བྷིཀྑུནོ སཏྠཱ ཝཱ དྷམྨཾ དེསེཏི, ཨཉྙཏརོ ཝཱ གརུཊྛཱནིཡོ སབྲཧྨཙཱརཱི ¶ , ཏཐཱ ཏཐཱ སོ ཏཏྠ ལབྷཏི ཨཏྠཝེདཾ ལབྷཏི དྷམྨཝེད’’ནྟི (ཨ. ནི. ༥.༢༦).

‘‘ཡསྨིཾ, བྷིཀྑཝེ, སམཡེ ཨརིཡསཱཝཀོ ཨོཧིཏསོཏོ དྷམྨཾ སུཎཱཏི, པཉྩསྶ ནཱིཝརཎཱནི ཏསྨིཾ སམཡེ པཧཱིནཱནི ཧོནྟཱི’’ཏི (སཾ. ནི. ༥.༢༡༩) –

ཙ ཨཱདི. སམཐཝིཔསྶནཱསུཁཱཝཧནཏོཏི སམཐསུཁསྶ ཙ ཝིཔསྶནཱསུཁསྶ ཙ སམྤཱདནཏོ. ཝུཏྟམྤི ཙེཏཾ –

‘‘སོ ཝིཝིཙྩེཝ ཀཱམེཧི ཝིཝིཙྩ ཨཀུསལེཧི དྷམྨེཧི སཝིཏཀྐཾ སཝིཙཱརཾ ཝིཝེཀཛཾ པཱིཏིསུཁ’’ནྟིཨཱདི (དཱི. ནི. ༡.༢༧༩; མ. ནི. ༢.༡༣༨).

ཏཐཱ –

‘‘ཡཏོ ཡཏོ སམྨསཏི, ཁནྡྷཱནཾ ཨུདཡབྦཡཾ;

ལབྷཏཱི པཱིཏིཔཱམོཛྫཾ, ཨམཏཾ ཏཾ ཝིཛཱནཏཾ;

ཨམཱནུསཱི རཏཱི ཧོཏི, སམྨཱ དྷམྨཾ ཝིཔསྶཏོ’’ཏི ཙ. (དྷ. པ. ༣༧༤, ༣༧༣);

ཏཐཱཔཊིཔནྣོཏི ཡཐཱ སམཐཝིཔསྶནཱསུཁཾ ཨཱཝཧཏི, ཡཐཱ ཝཱ སཏྠཱརཱ ཨནུསིཊྛཾ, ཏཐཱ པཊིཔནྣོ སཱསནདྷམྨོ. ཏཱདིབྷཱཝཱཝཧནཏོཏི ཚལ༹ངྒུཔེཀྑཱཝསེན ཨིཊྛཱདཱིསུ ཏཱདིབྷཱཝསྶ ལོཀདྷམྨེཧི ཨནུཔལེཔསྶ ཨཱཝཧནཏོ. ཨེས བྷགཝཱ ཝུཏྟནཡེན ཏིཝིདྷཀལྱཱཎཾ དྷམྨཾ དེསེནྟོ ཡཾ སཱསནབྲཧྨཙརིཡཾ, མགྒབྲཧྨཙརིཡཉྩ པཀཱསེཏི, ཏཾ ཡཐཱནུརཱུཔཾ ཨཏྠསམྤཏྟིཡཱ སཱཏྠཾ, བྱཉྫནསམྤཏྟིཡཱ སབྱཉྫནནྟི ཡོཛནཱ.

ཏཏྠ ¶ ཨཝིསེསེན ཏིསྶོ སིཀྑཱ, སཀལོ ཙ ཏནྟིདྷམྨོ སཱསནབྲཧྨཙརིཡཾ. ཡཾ སནྡྷཱཡ ཝུཏྟཾ ‘‘ཀཏམེསཱནཾ ཁོ, བྷནྟེ, བུདྡྷཱནཾ བྷགཝནྟཱནཾ བྲཧྨཙརིཡཾ ནཙིརཊྛིཏིཀཾ ཨཧོསཱི’’ཏིཨཱདི (པཱརཱ. ༡༨). སབྦསིཀྑཱནཾ མཎྜབྷཱུཏསིཀྑཏྟཡསངྒཧིཏོ ཨརིཡམགྒོ མགྒབྲཧྨཙརིཡཾ. ཡཾ སནྡྷཱཡ ¶ ཝུཏྟཾ ‘‘ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡ’’ནྟི (མཧཱཝ. ༢༣; སཾ. ནི. ༥.༡༨༦). ཡཐཱནུརཱུཔནྟི ཡཐཱརཧཾ. སིཀྑཏྟཡསངྒཧཾ ཧི སཱསནབྲཧྨཙརིཡཾ ཨཏྠསམྤཏྟིཡཱ སཱཏྠཾ. མགྒབྲཧྨཙརིཡེ ཝཏྟབྦམེཝ ནཏྠི. ཨཏྠསམྤཏྟིཡཱཏི སམྤནྣཏྠཏཱཡ. སམྤཏྟིཨཏྠོ ཧི ཨིདྷ སཧ-སདྡོ. ཨིཏརཾ པན ཡཐཱཝུཏྟེནཏྠེན སཱཏྠཾ, སབྱཉྫནཉྩ. ཡེ པནེཏྠ ‘‘ཝཙནསབྷཱཝཾ སཱཏྠཾ, ཨཏྠསབྷཱཝཾ སབྱཉྫན’’ནྟི ཝིབྷཛིཏྭཱ ཝདནྟི, ཏཾ ན སུནྡརཾ, ཏཐཱ ཝིབྷཏྟསྶ པརིཡཏྟིདྷམྨསྶ ཨབྷཱཝཏོ. སདྡཏྠཱ ཧི ཨབྷིནྣརཱུཔཱ ཝིཡ ཧུཏྭཱ ཝིནིཡོགཾ གཙྪནྟི. ཏཐཱ ཧི ནེསཾ ལོཀིཡཱམིསྶཱིབྷཱཝཾ པཊིཛཱནནྟི. སཏིཔི ཝཱ བྷེདེ ‘‘སབྱཉྫན’’ནྟི ཨེཏྠ ཡདི ཏུལྱཡོགོ ཨདྷིཔྤེཏོ ‘‘སཔུཏྟོ ཨཱགཏོ’’ཏིཨཱདཱིསུ ཝིཡ, ཨེཝཾ སཏི ‘‘ཨཏྠཔཊིསརཎཱ, བྷིཀྑཝེ, ཧོཐ, མཱ བྱཉྫནཔཊིསརཎཱ’’ཏི ཨཏྠཔྤདྷཱནཝཱདོ བཱདྷིཏོ སིཡཱ, ཨཐ ཝིཛྫམཱནཏཱམཏྟཾ ‘‘སལོམཀོ སཔཀྑཀོ’’ཏིཨཱདཱིསུ ཝིཡ བྱཉྫནསམྤཏྟི ཨགྒཧིཏཱ སིཡཱ. ཏསྨཱ ཨཊྛཀཐཱཡཾ ཝུཏྟནཡེནེཝ ཨཏྠོ གཧེཏབྦོ.

སཱཏྠཾ སབྱཉྫནནྟི ཨེཏྠ ནེཏྟིནཡེནཱཔི ཨཏྠཾ དསྶེཏུཾ ‘‘སངྐཱསན…པེ… སབྱཉྫན’’ནྟི ཝུཏྟཾ. ཏཏྠ ཡདིཔི ནེཏྟིཡཾ བྱཉྫནམུཁེན བྱཉྫནཏྠགྒཧཎཾ ཧོཏཱིཏི ‘‘ཨཀྑརཾ པད’’ནྟིཨཱདིནཱ (ནེཏྟི. ༤ དྭཱདསཔད) བྱཉྫནཔདཱནི པཋམཾ ཨུདྡིཊྛཱནི, ཨིདྷ པན པཱལི༹ཡཾ ‘‘སཱཏྠཾ སབྱཉྫན’’ནྟི ཨཱགཏཏྟཱ ཨཏྠཔདཱནིཡེཝ པཋམཾ དསྶེཏུཾ ‘‘སངྐཱསནཔཀཱསནཱ’’ཏིཨཱདི ཝུཏྟཾ. ཏཏྠ སངྑེཔཏོ ཀཱསནཾ དཱིཔནཾ སངྐཱསནཾ ‘‘མཉྙམཱནོ བྷིཀྑུ བདྡྷོ མཱརསྶ, ཨམཉྙམཱནོ མུཏྟོ’’ཏིཨཱདཱིསུ (སཾ. ནི. ༣.༦༤) ཝིཡ. ཏཏྟཀེན ཧི ཏེན བྷིཀྑུནཱ པཊིཝིདྡྷཾ. ཏེནཱཧ ‘‘ཨཉྙཱཏཾ བྷགཝཱ’’ཏིཨཱདི. པཋམཾ ཀཱསནཾ པཀཱསནཾ. ཨཱདིཀམྨསྨིཾ ཧི ཨཡཾ པསདྡོ ‘‘པཉྙཔེཏི པཊྛཔེཏཱི’’ཏིཨཱདཱིསུ (སཾ. ནི. ༢.༢༠) ཝིཡ. ཏིཀྑིནྡྲིཡཱཔེཀྑཾ ཙེཏཾ པདདྭཡཾ ཨུདྡེསབྷཱཝཏོ. ཏིཀྑིནྡྲིཡོ ཧི སངྑེཔཏོ པཋམཉྩ ཝུཏྟམཏྠཾ པཊིཔཛྫཏི ¶ . སཾཁིཏྟསྶ ཝིཏྠཱརཝཙནཾ, སཀིཾ ཝུཏྟསྶ པུན ཝཙནཉྩ ཝིཝརཎཝིབྷཛནཱནི. ཡཐཱ ‘‘ཀུསལཱ དྷམྨཱ’’ཏི སངྑེཔཏོ སཀིཾཡེཝ ཙ ཝུཏྟསྶ ཨཏྠསྶ ‘‘ཀཏམེ དྷམྨཱ ཀུསལཱ? ཡསྨིཾ སམཡེ ཀཱམཱཝཙརཾ ཀུསལཾ ཙིཏྟ’’ནྟིཨཱདིནཱ (དྷ. ས. ༡) ཝིཏྠཱརཏོ ཝིཝརཎཝསེན, ཝིབྷཛནཝསེན ཙ པུན ཝཙནཾ. མཛ྄ཛྷིམིནྡྲིཡཱཔེཀྑམེཏཾ པདདྭཡཾ ནིདྡེསབྷཱཝཏོ. ཝིཝཊསྶ ཝིཏྠཱརཏརཱབྷིདྷཱནཾ, ཝིབྷཏྟསྶ ཙ པཀཱརེཧི ཉཱཔནཾ ཝེནེཡྻཱནཾ ཙིཏྟཔརིཏོསནཾ ཨུཏྟཱནཱིཀརཎཔཉྙཱཔནཱནི. ཡཐཱ ‘‘ཕསྶོ ཧོཏཱི’’ཏིཨཱདིནཱ (དྷ. ས. ༢) ཝིཝཊཝིབྷཏྟསྶ ཨཏྠསྶ ‘‘ཀཏམོ ཏསྨིཾ སམཡེ ཕསྶོ? ཡོ ཏསྨིཾ སམཡེ ཕསྶོ ཕུསནཱ སམྥུསནཱ’’ཏིཨཱདིནཱ ¶ (དྷ. ས. ༢) ཨུཏྟཱནཱིཀིརིཡཱ, པཉྙཱཔནཱ ཙ. མུདིནྡྲིཡཱཔེཀྑམེཏཾ པདདྭཡཾ པཊིནིདྡེསབྷཱཝཏོ. ‘‘པཉྙཱཔནཔཊྛཔནཝིཝརཎཝིབྷཛནཨུཏྟཱནཱིཀརཎཔཀཱསནཨཏྠཔདསམཱཡོགཏོ’’ཏིཔི པཱཋོ.

ཀཐཾ པནཱཡཾ པཱཋཝིཀཔྤོ ཛཱཏོཏི? ཝུཙྩཏེ – ནེཏྟིཔཱལི༹ཡཾ ཨཱགཏནཡེན པུརིམཔཱཋོ. ཏཏྠ ཧི –

‘‘སངྐཱསནཱ པཀཱསནཱ,

ཝིཝརཎཱ ཝིབྷཛནུཏྟཱནཱིཀམྨཔཉྙཏྟི;

ཨེཏེཧི ཚཧི པདེཧི,

ཨཏྠོ ཀམྨཉྩ ནིདྡིཊྛ’’ནྟི. (ནེཏྟི. ༤ དྭཱདསཔད) –

དེསནཱཧཱརཡོཛནཱཡ ཙ ཨེཏསྶེཝཏྠསྶ ‘‘སངྐཱསནཱ པཀཱསནཱ’’ཏིཨཱདིནཱ ཨཱགཏཾ. པཙྪིམོ པན ‘‘པཉྙཔེཏི པཊྛཔེཏི ཝིཝརཏི ཝིབྷཛཏི ཨུཏྟཱནཱིཀརོཏི ‘པསྶཐཱ’ཏི ཙཱཧཱ’’ཏི (སཾ. ནི. ༢.༢༠) སུཏྟེ ཨཱགཏནཡེན བྱཉྫནམཏྟཀཏོ. ཨེཝཉྩ ནེསཾ དྭིནྣཾ པཱཋཱནཾ ཝིསེསོ, ན ཨཏྠཏོ. ཏཐཱ ཧི སངྑེཔཏོ ‘‘པཋམཾ ཉཱཔནཾ པཉྙཱཔནཾ, པཋམམེཝ ཋཔནཾ པཊྛཔན’’ནྟི ཨིམཱནི པདཱནི སངྐཱསནཔཀཱསནཔདེཧི ཨཏྠཏོ ཨཝིསིཊྛཱནི. ཡཉྩ པུརིམཔཱཋེ ཚཊྛཾ པདཾ ‘‘པཀཱརཏོ ཉཱཔན’’ནྟི པཉྙཱཔནཾ ཝུཏྟཾ, ཏཾ དུཏིཡཔཱཋེ པཀཱསནཔདེན ‘‘ནིབྦིསེསཾ པཀཱརཏོ ཀཱསན’’ནྟི ཀཏྭཱ. ཡསྨཱ ཉཱཔནཀཱསནཱནི ཨཏྠཱཝབྷཱསནསབྷཱཝཏཱཡ ཨབྷིནྣཱནི, སབྦེསཉྩ ཝེནེཡྻཱནཾ ཙིཏྟསྶ ཏོསནཾ, བུདྡྷིཡཱ ཙ ནིསཱནཾ ཡཱཐཱཝཏོ ཝཏྠུསབྷཱཝཱཝབྷཱསནེ ཛཱཡཏཱིཏི. ཨེཝཾ ཨཏྠཔདརཱུཔཏྟཱ པརིཡཏྟིཨཏྠསྶ ཡཐཱཝུཏྟཚཨཏྠཔདསམཱཡོགཏོ སཱཏྠཾ སཱསནཾ.

ཨཀྑརཔདབྱཉྫནཱཀཱརནིརུཏྟིནིདྡེསསམྤཏྟིཡཱཏི ¶ ཨེཏྠ ཨུཙྩཱརཎཝེལཱཡཾ ཨཔརིཡོསིཏེ པདེ ཝཎྞོ ཨཀྑརཾ. ‘‘ཨེཀཀྑརཾ པདཾ ཨཀྑར’’ནྟི ཨེཀེ ‘‘ཨཱ ཨེཝཾ ཀིར ཏ’’ནྟིཨཱདཱིསུ ཨཱ-ཀཱརཱདཡོ ཝིཡ. ‘‘ཝིསུདྡྷཀརཎཱནཾ མནསཱ དེསནཱཝཱཙཱཡ ཨཀྑརཎཏོ ཨཀྑར’’ནྟི ཨཉྙེ. ཝིབྷཏྟིཡནྟཾ ཨཏྠཉཱཔནཏོ པདཾ. སངྑེཔཏོ ཝུཏྟཾ པདཱབྷིཧིཏཾ ཨཏྠཾ བྱཉྫེཏཱིཏི བྱཉྫནཾ, ཝཱཀྱཾ. ‘‘ཀིརིཡཱཔདཾ ཨབྱཡཀཱརཀཝིསེསནཡུཏྟཾ ཝཱཀྱ’’ནྟི ཧི ཝདནྟི. པཀཱརཏོ ཝཱཀྱཝིབྷཱགོ ¶ ཨཱཀཱརོ. ཨཱཀཱརཱབྷིཧིཏཾ ནིབྦཙནཾ ནིརུཏྟི. ནིབྦཙནཝིཏྠཱརོ ནིསྶེསུཔདེསཏོ ནིདྡེསོ. ཨེཏེསཾ ཨཀྑརཱདཱིནཾ བྱཉྫནཔདཱནཾ སམྤཏྟིཡཱ སམྤནྣཏཱཡ སབྱཉྫནཾ.

ཏཏྲཱཡམསྶ ཨཏྠཔདསམཱཡོགོ, བྱཉྫནསམྤཏྟི ཙ – ཨཀྑརེཧི སངྐཱསེཏི, པདེཧི པཀཱསེཏི, བྱཉྫནེཧི ཝིཝརཏི, ཨཱཀཱརེཧི ཝིབྷཛཏི, ནིརུཏྟཱིཧི ཨུཏྟཱནཱིཀརོཏི, ནིདྡེསེཧི པཉྙཔེཏི, ཏཐཱ ཨཀྑརེཧི ཨུགྒྷཱཊེཏྭཱ པདེཧི ཝིནེཏི ཨུགྒྷཊིཏཉྙུཾ, བྱཉྫནེཧི ཝིཔཉྩེཏྭཱ ཨཱཀཱརེཧི ཝིནེཏི ཝིཔཉྩིཏཉྙུཾ, ནིརུཏྟཱིཧི ནེཏྭཱ ནིདྡེསེཧི ཝིནེཏི ནེཡྻཾ. ཨེཝཉྩཱཡཾ དྷམྨོ ཨུགྒྷཊིཡམཱནོ ཨུགྒྷཊིཏཉྙུཾ ཝིནེཏི, ཝིཔཉྩིཡམཱནོ ཝིཔཉྩིཏཉྙུཾ, ནིཡྻམཱནོ ནེཡྻཾ. ཏཏྠ ཨུགྒྷཊནཱ ཨཱདི, ཝིཔཉྩནཱ མཛ྄ཛྷེ, ནཡནམནྟེ. ཨེཝཾ ཏཱིསུ ཀཱལེསུ ཏིདྷཱ དེསིཏོ དོསཏྟཡཝིདྷམནོ གུཎཏྟཡཱཝཧོ ཏིཝིདྷཝེནེཡྻཝིནཡནོཏི. ཨེཝམྤི ཏིཝིདྷཀལྱཱཎོཡཾ དྷམྨོ ཨཏྠབྱཉྫནཔཱརིཔཱུརིཡཱ ‘‘སཱཏྠོ སབྱཉྫནོ’’ཏི ཝེདིཏབྦོ ‘‘པརིཔུཎྞོ, པརིསུདྡྷོ’’ཏི ཙ.

ཨཏྠགམྦྷཱིརཏཱཏིཨཱདཱིསུ ཨཏྠོ ནཱམ ཏནྟིཨཏྠོ. དྷམྨོ ཏནྟི. པཊིཝེདྷོ ཏནྟིཡཱ, ཏནྟིཨཏྠསྶ ཙ ཡཐཱབྷཱུཏཱཝབོདྷོ. དེསནཱ མནསཱ ཝཝཏྠཱཔིཏཱཡ ཏནྟིཡཱ དེསནཱ. ཏེ པནེཏེ ཨཏྠཱདཡོ ཡསྨཱ སསཱདཱིཧི ཝིཡ མཧཱསམུདྡོ མནྡབུདྡྷཱིཧི དུཀྑོགཱཧཱ, ཨལབྦྷནེཡྻཔཏིཊྛཱ ཙ, ཏསྨཱ གམྦྷཱིརཱ. ཨཐ ཝཱ ཨཏྠོ ནཱམ ཧེཏུཕལཾ. དྷམྨོ ཧེཏུ. དེསནཱ པཉྙཏྟི, ཡཐཱདྷམྨཾ དྷམྨཱབྷིལཱཔོ, ཨནུལོམཔཊིལོམསངྑེཔཝིཏྠཱརཱདིཝསེན ཝཱ ཀཐནཾ. པཊིཝེདྷོ ཨབྷིསམཡོ, ཨཏྠཱནུརཱུཔཾ དྷམྨེསུ, དྷམྨཱནུརཱུཔཾ ཨཏྠེསུ, པཉྙཏྟིཔཐཱནུརཱུཔཾ པཉྙཏྟཱིསུ ཨཝབོདྷོ, ཏེསཾ ཏེསཾ ཝཱ དྷམྨཱནཾ པཊིཝིཛ྄ཛྷིཏབྦོ སལཀྑཎསངྑཱཏོ ཨཝིཔརཱིཏསབྷཱཝོ. ཏེཔི ཙེཏེ ཨཏྠཱདཡོ ཡསྨཱ ཨནུཔཙིཏཀུསལསམྦྷཱརེཧི དུཔྤཉྙེཧི ¶ སསཱདཱིཧི ཝིཡ མཧཱསམུདྡོ དུཀྑོགཱཧཱ, ཨལབྦྷནེཡྻཔཏིཊྛཱ ཙ, ཏསྨཱ གམྦྷཱིརཱ. ཏེསུ པཊིཝེདྷསྶཱཔི ཨཏྠསནྣིསྶིཏཏྟཱ ཝུཏྟཾ ‘‘ཨཏྠགམྦྷཱིརཏཱཔཊིཝེདྷགམྦྷཱིརཏཱཧི སཱཏྠ’’ནྟི ཨཏྠགུཎདཱིཔནཏོ. ཏཱསཾ དྷམྨདེསནཱནཾ བྱཉྫནསནྣིསྶིཏཏྟཱ ཝུཏྟཾ ‘‘དྷམྨགམྦྷཱིརཏཱདེསནཱགམྦྷཱིརཏཱཧི སབྱཉྫན’’ནྟི ཏཱསཾ བྱཉྫནསམྤཏྟིདཱིཔནཏོ.

ཨཏྠེསུ པབྷེདགཏཾ ཉཱཎཾ ཨཏྠཔཊིསམྦྷིདཱ. ཨཏྠདྷམྨནིརུཏྟིཔཊིསམྦྷིདཱསུ པབྷེདགཏཾ ཉཱཎཾ པཊིབྷཱནཔཊིསམྦྷིདཱཏི ཨིམིསྶཱཔི པཊིསམྦྷིདཱཡ ཨཏྠཝིསཡཏྟཱ ཨཱཧ ‘‘ཨཏྠཔཊིབྷཱནཔཊིསམྦྷིདཱཝིསཡཏོ སཱཏྠ’’ནྟི, ཨཏྠསམྤཏྟིཡཱ ཨསཏི ཏདབྷཱཝཏོ. དྷམྨོཏི ཏནྟི ¶ . ནིརུཏྟཱིཏི ཏནྟིཔདཱནཾ ནིདྡྷཱརེཏྭཱ ཝཙནཾ. ཏཏྠ པབྷེདགཏཱནི ཉཱཎཱནི དྷམྨནིརུཏྟིཔཊིསམྦྷིདཱཏི ཨཱཧ ‘‘དྷམྨནིརུཏྟིཔཊིསམྦྷིདཱཝིསཡཏོ སབྱཉྫནནྟི, ཨསཏི བྱཉྫནསམྤཏྟིཡཱ ཏདབྷཱཝཏོ. པརིཀྑཀཛནཔྤསཱདཀནྟི ཨེཏྠ ཨིཏི-སདྡོ ཧེཏུཨཏྠོ. ཡསྨཱ པརིཀྑཀཛནཱནཾ ཀིཾཀུསལགཝེསཱིནཾ པསཱདཱཝཧཾ, ཏསྨཱ སཱཏྠཾ. ཨཏྠསམྤནྣནྟི ཕལེན ཧེཏུནོ ཨནུམཱནཾ ནདཱིཔཱུརེན ཝིཡ ཨུཔརི ཝུཊྛིཔྤཝཏྟིཡཱ. སཱཏྠཀཏཱ པནསྶ པཎྜིཏཝེདནཱིཡཏཱཡ, སཱ པརམགམྦྷཱིརསཎྷསུཁུམབྷཱཝཏོ ཝེདིཏབྦཱ. ཝུཏྟཉྷེཏཾ ‘‘གམྦྷཱིརོ དུདྡསོ’’ཏིཨཱདི (མཧཱཝ. ༨). ལོཀིཡཛནཔྤསཱདཀནྟི སབྱཉྫནནྟི ཡསྨཱ ལོཀིཡཛནསྶ པསཱདཱཝཧཾ, ཏསྨཱ སབྱཉྫནཾ. ལོཀིཡཛནོ ཧི བྱཉྫནསམྤཏྟིཡཱ ཏུསྶཏི, ཨིདྷཱཔི ཕལེན ཧེཏུནོ ཨནུམཱནཾ. སབྱཉྫནཏཱ པནསྶ སདྡྷེཡྻཏཱཡ, སཱ ཨཱདིཀལྱཱཎཱདིབྷཱཝཏོ ཝེདིཏབྦཱ.

ཨཐ ཝཱ པཎྜིཏཝེདནཱིཡཏོ སཱཏྠ’’ནྟི པཉྙཱཔདཊྛཱནཏཱཡ ཨཏྠསམྤནྣཏཾ ཨཱཧ, ཏཏོ པརིཀྑཀཛནཔྤསཱདཀཾ. སདྡྷེཡྻཏོ སབྱཉྫནནྟི སདྡྷཱཔདཊྛཱནཏཱཡ བྱཉྫནསམྤནྣཏཾ, ཏཏོ ལོཀིཡཛནཔྤསཱདཀནྟི ཨེཝམེཏྠ ཨཏྠོ དཊྛབྦོ. གམྦྷཱིརཱདྷིཔྤཱཡཏོ སཱཏྠནྟི ཨདྷིཔྤཱཡཏོ ཨགཱདྷཱཔཱརཏཱཡ ཨཏྠསམྤནྣཾ ཨཉྙཐཱ ཏདབྷཱཝཏོ. ཨུཏྟཱནཔདཏོ སབྱཉྫནནྟི སུབོདྷསདྡཏཱཡ བྱཉྫནསམྤནྣཾ, པརམགམྦྷཱིརསྶཔི ཨཏྠསྶ ཝེནེཡྻཱནཾ སུཝིཉྙེཡྻབྷཱཝཱཔཱདནཏོ. སབྦོཔེས པཋམསྶ ཨཏྠདྭཡསྶ པབྷེདོ དཊྛབྦོ, ཏཐཱ ཙེཝ ཏཏྠ ཏཏྠ སཾཝཎྞིཏཾ. ཏཐཱ ཧེཏྠ ¶ ཝིཀཔྤསྶ, སམུཙྩཡསྶ ཝཱ ཨགྒཧཎཾ. ཨུཔནེཏབྦསྶཱཏི པཀྑིཔིཏབྦསྶ ཝོདཱནཏྠསྶ ཨཝུཏྟསྶ ཨབྷཱཝཏོ. སཀལཔརིཔུཎྞབྷཱཝེནཱཏི སབྦབྷཱགེཧི པརིཔུཎྞཏཱཡ. ཨཔནེཏབྦསྶཱཏི སཾཀིལེསདྷམྨསྶ.

པཊིཔཏྟིཡཱཏི སཱིལཝིསུདྡྷིཡཱདིསམྨཱཔཊིཔཏྟིཡཱ, ཏནྣིམིཏྟཾ. ཨདྷིགམབྱཏྟིཏོཏི སཙྩཔཊིཝེདྷེན ཨདྷིགམཝེཡྻཏྟིཡསབྦྷཱཝཏོ སཱཏྠཾ ཀཔིལཝཏཱདི ཝིཡ ཏུཙྪཾ ནིརཏྠཀཾ ཨཧུཏྭཱ ཨཏྠསམྤནྣནྟི ཀཏྭཱ. པརིཡཏྟིཡཱཏི པརིཡཏྟིདྷམྨཔརིཙཡེན. ཨཱགམབྱཏྟིཏོཏི དུརཀྑཱཏདྷམྨེསུ པརིཙཡཾ ཀརོནྟསྶ ཝིཡ སམྨོཧཾ ཨཛནེཏྭཱ བཱཧུསཙྩཝེཡྻཏྟིཡསབྦྷཱཝཏོ སབྱཉྩནཾ. བྱཉྫནསམྤཏྟིཡཱ ཧི སཏི ཨཱགམབྱཏྟཱིཏི. སཱིལཱདིཔཉྩདྷམྨཀྑནྡྷཡུཏྟཏོཏི སཱིལཱདཱིཧི པཉྩཧི དྷམྨཀོཊྛཱསེཧི ཨཝིརཧིཏཏྟཱ. ཀེཝལཔརིཔུཎྞཾ ཨནཝསེསེན སམནྟཏོ པུཎྞཾ པཱུརིཏཾ. ནིརུཔཀྐིལེསཏོཏི དིཊྛིམཱནཱདིཨུཔཀྐིལེསཱབྷཱཝཏོ. ནིཏྠརཎཏྠཱཡཱཏི ཝཊྚདུཀྑཏོ ནིསྶརཎཱཡ. ལོཀཱམིསནིརཔེཀྑཏོཏི ཀཐཉྩིཔི ཏཎྷཱསནྣིསྶཡསྶ ཨནིསྶཡནཏོ.

ཨེཝཾ ¶ ཨཱདིཀལྱཱཎཏཱདིཨཔདེསེན སཏྠུ པུརིམཝེསཱརཛྫདྭཡཝསེན དྷམྨསྶ སྭཱཀྑཱཏཏཾ ཝིབྷཱཝེཏྭཱ ཨིདཱནི པཙྪིམཝེསཱརཛྫདྭཡཝསེནཱཔི ཏཾ དསྶེཏུཾ ‘‘ཨཏྠཝིཔལླཱསཱབྷཱཝཏོ ཝཱ སུཊྛུ ཨཀྑཱཏོཏི སྭཱཀྑཱཏོ’’ཏི ཝཏྭཱ ཏམཏྠཾ བྱཏིརེཀམུཁེན ཝིབྷཱཝེནྟོ ‘‘ཡཐཱ ཧཱི’’ཏིཨཱདིམཱཧ. ཏཏྠ ཝིཔལླཱསམཱཔཛྫཏཱིཏི ཏེསཾ དྷམྨེ ‘‘ཨནྟརཱཡིཀཱ’’ཏི ཝུཏྟདྷམྨཱནཾ ཝིཔཱཀཱདཱིནཾ ཨནྟརཱཡིཀཏྟཱབྷཱཝཏོ ཨེཀཾསེན ཨཔཱཡཱུཔཔཏྟིཧེཏུཏཱཡ ཨབྷཱཝཏོ. ནིཡྻཱནིཀཏྟཱབྷཱཝཏོཏི ཨཏམྨཡཏཱབྷཱཝཏོ, སཾསཱརཏོ ཙ ནིཡྻཱནིཀཱཏི ཝུཏྟདྷམྨཱནཾ ཨེཀཙྩཡཉྙཀིརིཡཱཔཀཏིཔུརིསནྟརཉྙཱཎཱདཱིནཾ ཏཏོ ནིཡྻཱནིཀཏྟཱབྷཱཝཏོ ཝིཔརཱིཏོ ཨེཝ ཧོཏི. ཏེནཱཏི ཨཏྠསྶ ཝིཔལླཱསཱཔཛྫནེན. ཏེ ཨཉྙཏིཏྠིཡཱ. ཏཐཱབྷཱཝཱནཏིཀྐམནཏོཏི ཀམྨནྟརཱཡཱདཱིནཾ པཉྩནྣཾ ཨནྟརཱཡིཀབྷཱཝསྶ ཨརིཡམགྒདྷམྨཱནཾ ནིཡྻཱནིཀབྷཱཝསྶ ཀདཱཙིཔི ཨནཏིཝཏྟནཏོ.

ནིབྦཱནཱནུརཱུཔཱཡ པཊིཔཏྟིཡཱཏི ཨདྷིགནྟབྦསྶ སབྦསངྑཏཝིནིསྶཊསྶ ནིབྦཱནསྶ ཨནུརཱུཔཱཡ སབྦསངྑཱརནིསྶརཎཱུཔཱཡབྷཱུཏཱཡ སཔུབྦབྷཱགཱཡ སམྨཱཔཊིཔཏྟིཡཱ ¶ ཨཀྑཱཏཏྟཱཏི ཡོཛནཱ. པཊིཔདཱནུརཱུཔསྶཱཏི སབྦདུཀྑནིཡྻཱནིཀབྷཱུཏཱ ཨཱརམྨཎཀརཎམཏྟེནཱཔི ཀིལེསེཧི ཨནཱམསནཱིཡཱ ཡཱདིསཱི པཊིཔདཱ, ཏདནུརཱུཔསྶ. སུཔཉྙཏྟཱཏི སཱིལཱདིཀྑནྡྷཏྟཡསངྒཧིཏཱ སམྨཱདིཊྛིཨཱདིཔྤབྷེདཱ མིཙྪཱདིཊྛིཨཱདཱིནཾ པཧཱཡིཀབྷཱཝེན སུཊྛུ སམྨདེཝ ཝིཧིཏཱ. སཾསནྡཏི ཀིལེསམལཝིསུདྡྷིཏཱཡ སམེཏི. ཨེཝཾ མགྒནིབྦཱནཱནཾ པཊིཔདཱཔཊིཔཛྫནཱིཡབྷཱཝེཧི ཨཉྙམཉྙཱནུརཱུཔཏཱཡ སྭཱཀྑཱཏཏཾ དསྶེཏྭཱ ཨིདཱནི ཏིཝིདྷསྶཱཔི ལོཀུཏྟརདྷམྨསྶ པཙྩེཀཾ སྭཱཀྑཱཏཏཾ དསྶེཏུཾ ‘‘ཨརིཡམགྒོ ཙེཏྠཱ’’ཏིཨཱདི ཝུཏྟཾ. ཏཏྠ ཨནྟདྭཡནྟི སསྶཏུཙྪེདཾ, ཀཱམསུཁཨཏྟཀིལམཐཱནུཡོགཾ, ལཱིནུདྡྷཙྩཾ, པཏིཊྛཱནཱཡཱུཧནནྟི ཨེཝཾ པབྷེདཾ ཨནྟདྭཡཾ. ཨནུཔགམྨཱཏི ཨནུཔགནྟྭཱ, ཨནུཔགམནཧེཏུ ཝཱ. པཊིཔསྶདྡྷཀིལེསཱནཱིཏི སུཊྛུ ཝཱུཔསནྟཀིལེསཱནི, པཊིཔསྶདྡྷིཔྤཧཱནཝསེན སམྨདེཝ པཧཱིནདོསཱནི. སསྶཏཱདིསབྷཱཝཝསེནཱཏི ‘‘སསྶཏཉྩ ཝོ, བྷིཀྑཝེ, དྷམྨཾ དེསེསྶཱམི ཨམཏཉྩ ཏཱཎཉྩ ལེཎཉྩཱ’’ཏིཨཱདིནཱ ཏེསུ ཏེསུ སུཏྟེསུ སསྶཏཱདིབྷཱཝཀིཏྟནཝསེན.

༡༤༨. ‘‘རཱགཱདཱིནཾ ཨབྷཱཝཾ ཀརོནྟེན ཨརིཡཔུགྒལེན སཱམཾ དཊྛབྦོ’’ཏི ཨིམིནཱ ‘‘ཨརིཡམགྒེན མམ རཱགཱདཡོ པཧཱིནཱ’’ཏི སཡཾ ཨཏྟནཱ ཨནཉྙནེཡྻེན དཊྛབྦོཏི སནྡིཊྛི, སནྡིཊྛི ཨེཝ སནྡིཊྛིཀོ.

ཏེན ¶ ཏེན ཨརིཡསཱཝཀེན པརསདྡྷཱཡ པརསྶ སདྡཧནེན པརནེཡྻེན གནྟབྦཏཾ ཧིཏྭཱ ཉཱཔེཏབྦཏཾ པཧཱཡ པཙྩཝེཀྑཎཉཱཎེན ཀརཎབྷཱུཏེན. པསཏྠཱ དིཊྛི སནྡིཊྛི ཡཐཱ སམྦོཛ྄ཛྷངྒོ. ཨརིཡམགྒོ ཨཏྟནཱ སམྤཡུཏྟཱཡ སནྡིཊྛིཡཱ ཀིལེསེ ཛཡཏི, ཨརིཡཕལཾ ཏཱཡ ཨེཝ ཨཏྟནོ ཀཱརཎབྷཱུཏཱཡ, ནིབྦཱནཾ ཨཱརམྨཎཀརཎེན ཨཏྟནོ ཝིསཡཱིབྷཱུཏཱཡ སནྡིཊྛིཡཱ ཀིལེསེ ཛཡཏཱིཏི ཡོཛནཱ.

བྷཱཝནཱབྷིསམཡཝསེན མགྒདྷམྨོ. སཙྪིཀིརིཡཱབྷིསམཡཝསེན ནིབྦཱནདྷམྨོ. ཕལམྤི ཧེཊྛིམཾ སཀདཱགཱམིཝིཔསྶནཱདཱིནཾ པཙྩཡབྷཱཝེན ཨུཔརི མགྒཱདྷིགམསྶ ཨུཔནིསྶཡབྷཱཝཏོ པརིཡཱཡཏོ ‘‘དིསྶམཱནོ ཝཊྚབྷཡཾ ནིཝཏྟེཏཱི’’ཏི ཝཏྟབྦཏཾ ལབྷཏི.

༡༤༩. ནཱསྶ ¶ ཀཱལོཏི ནཱསྶ ཨཱགམེཏབྦོ ཀཱལོ ཨཏྠི. ཡཐཱ ཧི ལོཀིཡཀུསལསྶ ‘‘ཨུཔཔཛྫེ, ཨཔརཔརིཡཱཡེ’’ཏིཨཱདིནཱ ཕལདཱནཾ པཏི ཨཱགམེཏབྦོ ཀཱལོ ཨཏྠི, ན ཨེཝམེཏསྶཱཏི ཨཏྠོ. ཏེནཱཧ ‘‘ན པཉྩཱཧཱ’’ཏིཨཱདི. པཀཊྛོཏི དཱུརོ. ཕལདཱནཾ པཏི ཀཱལོ པཀཊྛོ ཨསྶཱཏི ཀཱལིཀོ, ཀཱལནྟརཕལདཱཡཱི. ཏེནཱཧ ‘‘ཨཏྟནོ ཕལདཱནེ’’ཏི. པཏྟོཏི ཨུཔནཱིཏོ. ཨིདནྟི ‘‘ཨཀཱལིཀོ’’ཏི པདཾ.

༡༥༠. ཝིདྷིནྟི ཝིདྷཱནཾ, ‘‘ཨེཧི པསྶཱ’’ཏི ཨེཝཾཔཝཏྟཝིདྷིཝཙནཾ. ཝིཛྫམཱནཏྟཱཏི པརམཏྠཏོ ཨུཔལབྦྷམཱནཏྟཱ. པརིསུདྡྷཏྟཱཏི ཀིལེསམལཝིརཧེན སབྦཐཱ ཝིསུདྡྷཏྟཱ. ཨམནུཉྙམྤི ཀདཱཙི པཡོཛནཝསེན ཡཐཱསབྷཱཝཔྤཀཱསནེན དསྶེཏབྦཾ བྷཝེཡྻཱཏི ཏདབྷཱཝཾ དསྶེནྟོ ཨཱཧ ‘‘མནུཉྙབྷཱཝཔྤཀཱསནེནཱ’’ཏི.

༡༥༡. ཨུཔནེཏབྦོཏི ཨུཔནེཡྻོ, ཨུཔནེཡྻོཝ ཨོཔནེཡྻིཀོཏི ཨིམསྶ ཨཏྠསྶ ཨདྷིཔྤེཏཏྟཱ ཨཱཧ ‘‘ཨུཔནེཏབྦོཏི ཨོཔནེཡྻིཀོ’’ཏི. ཙིཏྟེ ཨུཔནཡནཾ ཨུཔྤཱདནནྟི ཨཱཧ ‘‘ཨིདཾ སངྑཏེ ལོཀུཏྟརདྷམྨེ ཡུཛྫཏཱི’’ཏི. ཙིཏྟེ ཨུཔནཡནནྟི པན ཨཱརམྨཎབྷཱུཏསྶ དྷམྨསྶ ཨཱརམྨཎབྷཱཝཱུཔནཡནེ ཨདྷིཔྤེཏེ ཨསངྑཏེཔི ཡུཛྫེཡྻ ‘‘ཨཱརམྨཎཀརཎསངྑཱཏཾ ཨུཔནཡནཾ ཨརཧཏཱིཏི ཨོཔནེཡྻིཀོ’’ཏི. ཨལླཱིཡནནྟི ཕུསནཾ. ནིབྦཱནཾ ཨུཔནེཏི ཨརིཡཔུགྒལནྟི ཨདྷིཔྤཱཡོ.

༡༥༢. ཝིཉྙཱུཧཱིཏི ¶ ཝིདཱུཧི, པཊིཝིདྡྷསཙྩེཧཱིཏི ཨཏྠོ. ཏེ པན ཨེཀཾསཏོ ཨུགྒྷཊིཏཉྙཱུཨཱདཡོ ཧོནྟཱིཏི ཨཱཧ ‘‘ཨུགྒྷཊིཏཉྙཱུཨཱདཱིཧཱི’’ཏི. ‘‘པཙྩཏྟ’’ནྟི ཨེཏསྶ ‘‘པཏི ཨཏྟནཱི’’ཏི བྷུམྨཝསེན ཨཏྠོ གཧེཏབྦོཏི ཨཱཧ ‘‘ཨཏྟནི ཨཏྟནཱི’’ཏི. ཝེདིཏབྦོཏི ཝུཏྟཾ, ཀཐཾ ཝེདིཏབྦོཏི ཨཱཧ ‘‘བྷཱཝིཏོ མེ’’ཏིཨཱདི. ཏཏྠ ‘‘མེ’’ཏི ཨིམིནཱ ‘‘པཙྩཏྟ’’ནྟི པདེན ཝུཏྟམཏྠཾ ཨནྭཡཏོ དསྶེཏྭཱ པུན བྱཏིརེཀེན དསྶེཏུཾ ‘‘ན ཧཱི’’ཏིཨཱདི ཝུཏྟཾ, ཏཾ སུཝིཉྙེཡྻམེཝ. ‘‘ཝིཉྙཱུཧཱི’’ཏི ཨིདཾ ཨནྟོགདྷཱཝདྷཱརཎནྟི དསྶེནྟོ ‘‘བཱལཱནཾ པན ཨཝིསཡོ ཙེསཱ’’ཏི ཨཱཧ.

ཨེཝཾ ཨཱདིཀལྱཱཎཏཱདིནཱ ཨཉྙམཉྙསྶ ཨནུརཱུཔདེསནཱཡ དྷམྨསྶ སྭཱཀྑཱཏཏཾ དསྶེཏྭཱ ཨིདཱནི པུརིམསྶ པུརིམསྶ པཙྪིམཾ པཙྪིམཾ པདཾ ཀཱརཎཝཙནནྟི དསྶེནྟོ ‘‘ཨཔིཙཱ’’ཏིཨཱདིམཱཧ. ཏཏྠ སནྡིཊྛིཀཏྟཱཏི ཡསྨཱ ¶ ཨཡཾ དྷམྨོ ཝུཏྟནཡེན སཱམཾ དཊྛབྦོ, སནྡིཊྛིཡཱ ཀིལེསེ ཝིདྡྷཾསེཏི, སནྡསྶནཉྩ ཨརཧཏི, ཏསྨཱ སྭཱཀྑཱཏོ དུརཀྑཱཏེ ཏིཏྠིཡདྷམྨེ ཏདབྷཱཝཏོ. ཨིམིནཱ ནཡེན སེསཔདེསུཔི ཡཐཱརཧཾ ཨཏྠོ དཊྛབྦོ.

༡༥༣. ཏསྶེཝནྟིཨཱདཱིསུ ཡཾ ཝཏྟབྦཾ, ཏཾ བུདྡྷཱནུསྶཏིཡཾ ཝུཏྟནཡེན ཝེདིཏབྦཾ.

༣. སངྒྷཱནུསྶཏིཀཐཱཝཎྞནཱ

༡༥༤. ཨརིཡསངྒྷགུཎཱཏི ཨཱརཀཏྟཱ ཀིལེསེཧི, ཨནཡེ ན ཨིརིཡནཏོ, ཨཡེ ཙ ཨིརིཡནཏོ, སདེཝཀེན ཙ ལོཀེན ‘‘སརཎ’’ནྟི ཨརཎཱིཡཏོ ཨརིཡོ ཙ སོ སངྒྷོ ཙ, ཨརིཡཱནཾ ཝཱ སངྒྷོ ཨརིཡསངྒྷོ, ཏསྶ གུཎཱ.

༡༥༥. ཡཾ སམྨཱཔཊིཔདཾ པཊིཔནྣོ ‘‘སུཊྛུ པཊིཔནྣོ’’ཏི ཝུཙྩཏི. སཱ ཨརིཡམགྒཔཊིཔདཱ པཊིཔཀྑདྷམྨེ ཨནིཝཏྟིདྷམྨེ ཀཏྭཱ པཛཧནཏོ པཡོཛནཱབྷཱཝཱ སཡམྤི ཨནིཝཏྟིདྷམྨཱ, ཨདྷིགནྟབྦསྶ ཙ ནིབྦཱནསྶ ཨེཀཾསཏོ ཨནུལོམཱིཏི. ཏཏོ ཨེཝ ཨཔཙྩནཱིཀཱ, ཨནུདྷམྨབྷཱུཏཱ ཙ, ཏསྶཱ ཙ པཊིཔནྣཏྟཱ ཨརིཡསངྒྷོ ‘‘སུཔྤཊིཔནྣོ’’ཏི ཝུཏྟོཏི དསྶེཏུཾ ‘‘སུཊྛུ པཊིཔནྣོ’’ཏིཨཱདི ཝུཏྟཾ. ཏཏྠ ‘‘ཨནིཝཏྟིཔཊིཔད’’ནྟི ཨིམིནཱ ཨུཛུཔྤཊིཔཏྟིཾ དསྶེཏི. པུནཔྤུནཾ ནིཝཏྟནེ ཧི སཏི ཨུཛུཔྤཊིཔཏྟི ན ཧོཏི. ‘‘ཨནུལོམཔཊིཔདཾ ཨཔཙྩནཱིཀཔཊིཔད’’ནྟི ¶ ཨིམིནཱ ཉཱཡཔྤཊིཔཏྟིཾ. པཊིཔཛྫིཏབྦསྶ ཧི ནིབྦཱནསྶ ཨནུལོམནེན, ཨཔཙྩནཱིཀཏཱཡ ཙསྶཱ ཉཱཡཏོ. ‘‘དྷམྨཱནུདྷམྨཔཊིཔད’’ནྟི ཨིམིནཱ སཱམཱིཙིཔྤཊིཔཏྟིཾ ཨནུཙྪཝིཀབྷཱཝདཱིཔནཏོ. ཨེཏེན པཋམཔདསྶ པཔཉྩནིདྡེསོ, ཨིཏརཱནི ཏཱིཎི པདཱནཱིཏི དསྶེཏི. ཏེནཱཧ ‘‘ཡསྨཱ པནཱ’’ཏིཨཱདི.

ཡཐཱནུསིཊྛཾ པཊིཔཛྫནེན ཀིཙྩསིདྡྷིཏོ ཨརིཡབྷཱཝཱཝཧཾ སཝནཾ སཀྐཙྩསཝནཾ ནཱམཱཏི ཝུཏྟཾ ‘‘སཀྐཙྩཾ སུཎནྟཱིཏི སཱཝཀཱ’’ཏི, ཏེན ཨརིཡཱ ཨེཝ ནིཔྤརིཡཱཡཏོ སཏྠུ སཱཝཀཱ ནཱམཱཏི དསྶེཏི. སཱིལདིཊྛིསཱམཉྙཏཱཡཱཏི ཨརིཡེན སཱིལེན, ཨརིཡཱཡ ཙ དིཊྛིཡཱ སམཱནབྷཱཝེན. ཨརིཡཱནཉྷི སཱིལདིཊྛིཡོ མཛ྄ཛྷེ བྷིནྣསུཝཎྞཾ ཝིཡ ནིནྣཱནཱཀརཎཾ མགྒེནཱགཏཏྟཱ. ཏེན ¶ ཏེ ཡཏྠ ཀཏྠཙི ཋིཏཱཔི སཾཧཏཱཝ. ཏེནཱཧ ‘‘སངྒྷཱཏབྷཱཝམཱཔནྣོ’’ཏི. མཱཡཱསཱཋེཡྻཱདིཔཱཔདྷམྨསམུཙྪེདེན ཨུཛུ. ཏཏོ ཨེཝ གོམུཏྟཝངྐཱབྷཱཝེན ཨཝངྐཱ. ཙནྡལེཁཱཝངྐཱབྷཱཝེན ཨཀུཊིལཱ. ནངྒལཀོཊིཝངྐཱབྷཱཝེན ཨཛིམྷཱ. ཨཝངྐཱདིབྷཱཝེན ཝཱ ཨུཛུ. པརིསུདྡྷཊྛེན ཨརིཡཱ. ཨཔཎྞཀབྷཱཝེན ཉཱཡཏི ཀམཏི ནིབྦཱནཾ, ཏཾ ཝཱ ཉཱཡཏི པཊིཝིཛ྄ཛྷཱིཡཏི ཨེཏེནཱཏི ཉཱཡོ. ཝཊྚདུཀྑནིཡྻཱནཱཡ ཨནུཙྪཝིཀཏྟཱ. ཨནུརཱུཔཏྟཱ སཱམཱིཙི ཨོཔཱཡིཀཱཏིཔི སངྑཾ སམཉྙཾ གཏཱ སམྨཱཔཊིཔཏྟི, ཏཱཡ སམངྒིཏཱཡ སུཔྤཊིཔནྣཱ ‘‘སམྨཱ པཊིཔཛྫནྟཱི’’ཏི ཀཏྭཱ. ཝཏྟམཱནཏྠོ ཧི ཨཡཾ པཊིཔནྣ-སདྡོ ཡཐཱ ‘‘སོཏཱཔཏྟིཕལསཙྪིཀིརིཡཱཡ པཊིཔནྣོ’’ཏི (པུ. པ. ༢༠༦). ཨཏཱིཏཾ པཊིཔདནྟི ཡཐཱཝུཏྟམགྒསམྨཱཔཊིཔཏྟིཾ ཝདཏི. ཨུབྷཡེན ཙ སཱམཉྙནིདྡེསེན, ‘‘སུཔྤཊིཔནྣཱ ཙ སུཔྤཊིཔནྣཱ ཙ སུཔྤཊིཔནྣཱ’’ཏི ཨེཀསེསནཡེན ཝཱ གཧིཏཱནཾ སམཱུཧོ ‘‘སུཔྤཊིཔནྣོ’’ཏི ཝུཏྟོཏི དསྶེཏི.

ཨེཝཾ ཨཱདིཔདཏྠནིདྡེསབྷཱཝེན ཨིཏརཔདཱནཾ ཨཏྠཾ ཝཏྭཱ ཨིདཱནི ཙཏུནྣམྤི པདཱནཾ ཨཝོམིསྶཀཾ ཨཏྠཾ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ཏཏྠ ཡཐཱནུསིཊྛནྟི སཏྠཱརཱ ཡཐཱ ཨནུསིཊྛཾ, ཏཐཱ ཨནུསཱསནཱིཨནུརཱུཔནྟི ཨཏྠོ. ཨཔཎྞཀཔཊིཔདནྟི ཨཝིརཛ྄ཛྷནཀཔཊིཔདཾ, ཨནཝཛྫཔཊིཔཏྟིནྟི ཨཏྠོ. ཨེཏྠ ཙ སྭཱཀྑཱཏེ དྷམྨཝིནཡེ ཨཔཎྞཀཔཊིཔདཾ པཊིཔནྣཏྟཱཏི ཨེཝཾ སམྦནྡྷིཏབྦཾ. པུརིམཔདེན སམྦནྡྷེ དུཏིཡཔདཾ ན ཝཏྟབྦཾ སིཡཱ, ནནུ ཙ དུཏིཡཔདེན སམྦནྡྷེཔི པཋམཾ པདཾ ན ཝཏྟབྦཾ སིཡཱཏི? ན ཏསྶ པཋམཾ ཨཔེཀྑིཏཏྟཱ. སཱ པན སཱཝཀཱནཾ ཨཔཎྞཀཔཊིཔདཱ ཡཐཱནུསིཊྛཾ པཊིཔདཱཏི དསྶནཏྠཾ ‘‘ཡཐཱནུསིཊྛཾ པཊིཔནྣཏྟཱ’’ཏི ཝཏྟབྦཾ ¶ . ཨུབྷཡསྶཱཔི ཝཱ སུཔྤཊིཔནྣབྷཱཝསཱདྷནཏྟཱ ཨུབྷཡཾ ཝུཏྟཾ. ཏཐཱ ཧི པི-སདྡེན ཨུབྷཡཾ སམུཙྩིནོཏི.

ཀིལེསཛིམྷཝསེན ཨནྟདྭཡགཱཧོཏི སབྦསོ ཏཾ པཧཱཡ སམྨཱཔཊིཔདཱ ཀཱཡཱདིཝངྐཔྤཧཱཡིནཱི ཨུཛུཔྤཊིཔཏྟི ཧོཏཱིཏི ཨཱཧ ‘‘མཛ྄ཛྷིམཱཡ པཊིཔདཱཡ…པེ… ཨུཛུཔྤཊིཔནྣོ’’ཏི.

ཉཱཡོ ནཱམ ཡུཏྟཔྤཏྟཔཊིཔཏྟི, ནིབྦཱནཉྩ, སབྦསངྑཱརསམཐཏཱཡ ཨཱདིཏྟཾ ཙེལཾ, སཱིསཾ ཝཱ ཨཛ྄ཛྷུཔེཀྑིཏྭཱཔི པཊིཔཛྫིཏབྦམེཝཱཏི ཨཱཧ ‘‘ཉཱཡོ ཝུཙྩཏི ནིབྦཱན’’ནྟི. ནིབྦཱཡནཀིརིཡཱམུཁེན ཙེཏྠ ནིབྦཱནཾ ཝུཏྟནྟི དཊྛབྦཾ ¶ , མགྒཉཱཎཱདཱིཧི ཝཱ ཉཱཡཏི པཊིཝིཛ྄ཛྷཱིཡཏི སཙྪིཀརཱིཡཏི ཙཱཏི ཉཱཡོ ནིབྦཱནནྟི ཨེཝམེཏྠ ཨཏྠོ དཊྛབྦོ.

གུཎསམྦྷཱཝནཱཡ པརེཧི ཀཡིརམཱནཾ པཙྩུཔཊྛཱནཱདིསཱམཱིཙིཀམྨཾ ཨརཧནྟཱིཏི སཱམཱིཙིཀམྨཱརཧཱ.

༡༥༦. ཡདིདནྟི ཨནྟོགདྷལིངྒཝཙནབྷེདོ ནིཔཱཏོཏི ཏསྶ ཝཙནབྷེདེན ཨཏྠམཱཧ ‘‘ཡཱ ཨིམཱནཱི’’ཏི. ཨེཝནྟི པཀཱརཏྠེ ནིཔཱཏོ, ཨིམིནཱ པཀཱརེནཱཏི ཨཏྠོ. ཏེན ཨིཏརཱནི ཏཱིཎི ཡུགལཱ༹ནི དསྶིཏཱནི ཧོནྟཱིཏི ཨཱཧ ‘‘ཨེཝཾ ཙཏྟཱརི པུརིསཡུགལཱ༹ནི ཧོནྟཱི’’ཏི. ཨེཏནྟི ཨེཏཾ ‘‘པུརིསཔུགྒལཱ’’ཏི བཧུཝཙནཝསེན ཝུཏྟཾ པདཾ. པུརིསཱ ཙ ཏེ པུགྒལཱ ཙ པུརིསཔུགྒལཱ. ཏཏྠ ‘‘པུརིསཱ’’ཏི ཨིམིནཱ པཋམཱཡ པཀཏིཡཱ གཧཎཾ, ‘‘པུགྒལཱ’’ཏི པན དུཏིཡཱཡཔི སཏྟསཱམཉྙེནཱཏི ཨེཝཾ ཝཱ ཨེཏྠ ཨཏྠོ དཊྛབྦོ. ཙཏུནྣཾ པཙྩཡཱནཾ ཀཱིདིསཱནཾ? ཨཱནེཏྭཱ ཧུནིཏབྦཱནནྟི ཨདྷིཀཱརཏོ པཱཀཊོཡམཏྠོ. དཱཏབྦནྟི ཝཱ པཙྩཏྟཝཙནཾ ‘‘ཙཏུནྣཾ པཙྩཡཱན’’ནྟི པདཾ ཨཔེཀྑིཏྭཱ སཱམིཝསེན པརིཎཱམེཏབྦཾ, ཨཉྙཐཱ ཡེསཾ ཀེསཉྩི ཙཏུནྣཾ པཙྩཡཱནཾ ‘‘ཨཱཧུན’’ནྟི སམཉྙཱ སིཡཱ. ཨཱཧུནཾ ཨརཧཏཱིཏི ཝཱ ཨཱཧུནེཡྻོ. སཀྐཱདཱིནམྤི ཝཱ ཨཱཧཝནནྟི སཀྐཱདཱིཧིཔི དིཡྻམཱནཾ དཱནཾ. ཡཏྠ ཧུཏཾ མཧཔྥལནྟི ཡསྨིཾ ཨཱཝཧནཱིཡགྒིམྷི ཧུཏཾ དདྷིཨཱདི ཨཱཧུནེཡྻགྒིགཧཔཏགྒིདཀྑིཎེཡྻགྒཱིསུ ཧུཏཏོ ཨུལཱ༹རཕལནྟི ཏེསཾ བྲཱཧྨཎཱནཾ ལདྡྷི. ཧུཏནྟི དིནྣཾ. ནིཀཱཡནྟརེཏི སབྦཏྠིཀཝཱདིནིཀཱཡེ.

ཋཔེཏྭཱ ༡༦༥ ཏེཏི ཏེ པིཡམནཱཔེ ཉཱཏིམིཏྟེ ཨཔནེཏྭཱ, ཏེསཾ ཨདཏྭཱཏི ཨདྷིཔྤཱཡོ. ཨེས ཨེསོ. ཨེཀབུདྡྷནྟརེ ཙ དིསྶཏཱིཏི ཨེཀསྨིཾ བུདྡྷནྟརེ ཝཱིཏིཝཏྟེ དིསྶཏི. ཙ-སདྡེན ཀདཱཙི ཨསངྑྱེཡྻེཔི ཀཔྤེ ཝཱིཏིཝཏྟེཏི དསྶེཏི. ཨབྦོཀིཎྞནྟི པཊིཔཀྑེཧི ཨཝོམིསྶཾ, ཀིརིཡཱཝིསེསཀཉྩེཏཾ. པིཡམནཱཔཏྟཀརདྷམྨཱ ནཱམ སཱིལཱདཡོ, ཏེ ཨརིཡསངྒྷེ སུཔྤཏིཊྛིཏཱ. ཨཡཾ ཧེཏྠ ཨདྷིཔྤཱཡོ – ཉཱཏིམིཏྟཱ ཝིཔྤཡུཏྟཱ ན ཙིརསྶེཝ སམཱགཙྪནྟི, ཨནཝཊྛིཏཱ ཙ ཏེསུ པིཡམནཱཔཏཱ, ན ཨེཝམརིཡསངྒྷོ. ཏསྨཱ སངྒྷོཝ པཱཧུནེཡྻོཏི. པུབྦཀཱརནྟི ཨགྒཀིརིཡཾ. སབྦཔྤཀཱརེནཱཏི ཨཱདརགཱརཝབཧུམཱནཱདིནཱ, དེཡྻདྷམྨསྶ སཀྐཙྩཀརཎཱདིནཱ ¶ ཙ སབྦེན པཀཱརེན. སྭཱཡཾ པཱཧཝནཱིཡ-སདྡོ ‘‘པཱཧུནེཡྻོ’’ཏི ཝུཙྩཏི པརིཡཱཡབྷཱཝེན.

དཀྑནྟི ཨེཏཱཡ སཏྟཱ ཡཐཱདྷིཔྤེཏཱཧི སམྤཏྟཱིཧི ཝཌྜྷནྟཱིཏི དཀྑིཎཱ. ཏཐཱབྷཱཝཀརཎེན དཀྑིཎཾ ཨརཧཏི. ཡཐཱ ཨུལཱ༹རཱཏིཝིཔུལུདྲཡལཱབྷེན ཝིསོདྷིཏཾ ནཱམ ཧོཏི, ཨེཝཾ དཀྑིཎཱ ཝིཔུལཕལཏཱཡཱཏི ཝུཏྟཾ ‘‘མཧཔྥལཀརཎཏཱཡ ཝིསོདྷེཏཱི’’ཏི.

པུཉྙཏྠིཀེཧི ཨཉྫལི ཀརཎཱིཡཱ ཨེཏྠཱཏི ཨཉྫལིཀརཎཱིཡོ.

ཡདིཔི པཱལི༹ཡཾ ‘‘ཨནུཏྟར’’ནྟི ཝུཏྟཾ. ནཏྠི ཨིཏོ ཨུཏྟརཾ ཝིསིཊྛནྟི ཧི ཨནུཏྟརཾ. སམམྤིསྶ པན ནཏྠཱིཏི དསྶེནྟོ ‘‘ཨསདིས’’ནྟི ཨཱཧ. ཁིཏྟཾ ཝུཏྟཾ བཱིཛཾ མཧཔྥལབྷཱཝཀརཎེན ཏཱཡཏི རཀྑཏི, ཁིཔནྟི ཝཔནྟི ཨེཏྠ བཱིཛཱནཱིཏི ཝཱ ཁེཏྟཾ, ཀེདཱརཱདི, ཁེཏྟཾ ཝིཡ ཁེཏྟཾ, པུཉྙཱནཾ ཁེཏྟཾ པུཉྙཀྑེཏྟཾ. སེསཾ བུདྡྷཱནུསྶཏིཡཾ ཝུཏྟནཡཱནུསཱརེན ཝེདིཏབྦཾ.

༤. སཱིལཱནུསྶཏིཀཐཱཝཎྞནཱ

༡༥༨. ཨཧོ ཝཏ སཱིལཱནི ཨཁཎྜཱནི, ཨཧོ ཝཏ ཨཙྪིདྡཱནཱིཏི ཨེཝཾ སབྦཏྠ ཡོཛེཏབྦཾ. ཨཧོ ཝཏཱཏི ཙ སམྦྷཱཝནེ ནིཔཱཏོ. ཏེནཱཧ ‘‘ཨཁཎྜཏཱདིགུཎཝསེནཱ’’ཏི. ཨཁཎྜབྷཱཝཱདིསམྤཏྟིཝསེནཱཏི ཨཏྠོ. པརསྶ སཱིལཱནི ཨནུསྶརིཡམཱནཱནི པིཡམནཱཔབྷཱཝཱཝཧནེན ཀེཝལཾ མེཏྟཱཡ པདཊྛཱནཾ ཧོནྟི, ན ཝིསུཾ ཀམྨཊྛཱནནྟི ཨཱཧ ‘‘ཨཏྟནོ སཱིལཱནི ཨནུསྶརིཏབྦཱནཱི’’ཏི. ཙཱགཱདཱིསུཔི ཨེསེཝ ནཡོ.

ཡེསནྟི ¶ སཱིལཱདཱིནཾ. པཊིཔཱཊིཡཱ སམཱདཱནེ སམཱདཱནཀྐམེན, ཨེཀཛ྄ཛྷཾ སམཱདཱནེ ཨུདྡེསཀྐམེན སཱིལཱནཾ ཨཱདིཨནྟཾ ཝེདིཏབྦཾ. པརིཡནྟེ ཚིནྣསཱཊཀོ ཝིཡཱཏི ཝཏྠནྟེ, དསནྟེ ཝཱ ཚིནྣཝཏྠཾ ཝིཡ, ཝིསདིསཱུདཱཧརཎཾ ཙེཏཾ. ཨེཝཾ སེསཱནིཔི ཨུདཱཧརཎཱནི. ཝིནིཝེདྷཝསེན ཚིནྣསཱཊཀོ ཝིནིཝིདྡྷསཱཊཀོ. ཝིསབྷཱགཝཎྞེན གཱཝཱི ཝིཡཱཏི སམྦནྡྷོ. སབལརཧིཏཱནི ཝཱ ཨསབལཱནི. ཏཐཱ ཨཀམྨཱསཱནི. སཏྟཝིདྷམེཐུནསཾཡོགོ ཧེཊྛཱ སཱིལཀཐཱཡཾ ཝུཏྟོ ཨེཝ. ཀོདྷཱུཔནཱཧཱདཱིཧཱིཏི ཨཱདི-སདྡེན མཀྑཔལཱ༹སཨིསྶཱམཙྪརིཡམཱཡཱསཱཋེཡྻམཱནཱཏིམཱནཱདཡོ གཧིཏཱ. ཏཱནིཡེཝ ཨཁཎྜཱདིགུཎཱནི སཱིལཱནི. སཱིལསྶ ཏཎྷཱདཱསབྱཏོ ¶ མོཙནཾ ཝིཝཊྚཱུཔནིསྶཡབྷཱཝཱཔཱདནཾ. ཏཏོ ཨེཝ ཏཾསམངྒཱིཔུགྒལོ སེརཱི སཡཾཝསཱི བྷུཛིསྶོ ནཱམ ཧོཏི. ཏེནཱཧ ‘‘བྷུཛིསྶབྷཱཝཀརཎེན བྷུཛིསྶཱནཱི’’ཏི. ‘‘ཨིམིནཱཧཾ སཱིལེན དེཝོ ཝཱ བྷཝེཡྻཾ དེཝཉྙཏརོ ཝཱ, ཏཏྠ ནིཙྩོ དྷུཝོ སསྶཏོ’’ཏི, ‘‘སཱིལེན སུདྡྷཱི’’ཏི ཙ ཨེཝམཱདིནཱ ཏཎྷཱདིཊྛཱིཧི ཨཔརཱམཊྛཏྟཱ ཨཡཾ ཏེ སཱིལེསུ དོསོཏི ཙཏཱུསུ ཝིཔཏྟཱིསུ ཡཱཡ ཀཱཡཙི ཝིཔཏྟིཡཱ དསྶནེན པརཱམཊྛུཾ ཨནུདྡྷཾསེཏུཾ. སམཱདྷིསཾཝཏྟནཔྤཡོཛནཱནི སམཱདྷིསཾཝཏྟནིཀཱནི.

༡༥༩. སིཀྑཱཡ སགཱརཝོཏི སཱིལདྷནཾ ནིསྶཱཡ པཊིལདྡྷསམཱདཱནཏྟཱ སཱཏིསཡཾ སིཀྑཱཡ སགཱརཝོ སཔྤཏིསྶོ ཧོཏི. སབྷཱགཝུཏྟཱིཏི སམྤནྣསཱིལེཧི སབྷཱགཝུཏྟིཀོ, ཏཱཡ ཨེཝ ཝཱ སིཀྑཱཡ སབྷཱགཝུཏྟི. ཡོ ཧི སིཀྑཱགཱརཝརཧིཏོ, སོ ཏཱཡ ཝིསབྷཱགཝུཏྟི ནཱམ ཧོཏི ཝིལོམནཏོ. ཡཐཱ པརེཧི སདྡྷིཾ ཨཏྟནོ ཚིདྡཾ ན ཧོཏི, ཨེཝཾ དྷམྨཱམིསེཧི པཊིསནྠརཎཾ པཊིསནྠཱརོ. སིཀྑཱཡ སགཱརཝཏྟཱ ཨེཝ ཏཏྠ ཨཔྤམཏྟོ ཧོཏི. ཨཏྟཱནུཝཱདབྷཡཾ པརཱནུཝཱདབྷཡཾ དཎྜབྷཡཾ དུགྒཏིབྷཡནྟི ཨེཝམཱདཱིནི བྷཡཱནི ཨིམསྶ དཱུརསམུསྶཱརིཏཱནཱིཏི ཨཱཧ ‘‘ཨཏྟཱནུཝཱདཱདིབྷཡཝིརཧིཏོ’’ཏི. སེསཾ སུཝིཉྙེཡྻམེཝ.

༥. ཙཱགཱནུསྶཏིཀཐཱཝཎྞནཱ

༡༦༠. པཀཏིཡཱཏི སབྷཱཝེན. ཙཱགཱདྷིམུཏྟེནཱཏི དེཡྻདྷམྨཔརིཙྩཱགེ ཡུཏྟཔྤཡུཏྟེན ཏནྣིནྣེན ཏཔྤོཎེན. ནིཙྩཾ སདཱ པཝཏྟཱ དཱནསཾཝིབྷཱགཱ ཡསྶ སོ ནིཙྩཔཝཏྟདཱནསཾཝིབྷཱགོ, ཏེན. ཨིདྷཱཔི ‘‘པཀཏིཡཱ’’ཏི ཨཱནེཏྭཱ སམྦནྡྷིཏབྦཾ. ཡཾ པརསྶ པཊིཡཏྟཾ དིཡྻཏི, ཏཾ དཱནཾ. ཡཾ ཨཏྟནཱ པརིབྷུཉྫིཏབྦཏོ སཾཝིབྷཛཏི, སོ སཾཝིབྷཱགོ. ཨིཏོ དཱནི པབྷུཏཱིཏི ཨིཏོ པཊྛཱཡ དཱནི ཨཛྫཏགྒེ ཨཛྫདིཝསཾ ཨཱདིཾ ཀཏྭཱ. ཨདཏྭཱ ན བྷུཉྫིསྶཱམཱིཏི དཱནསམཱདཱནཾ ཀཏྭཱ ¶ . ཏཾདིཝསནྟི ཏསྨིཾ བྷཱཝནཱརམྦྷདིཝསེ. ཏཏྠ ནིམིཏྟཾ གཎྷིཏྭཱཏི ཏསྨིཾ དཱནེ པརིཙྩཱགཙེཏནཱཡ པཝཏྟིཨཱཀཱརསྶ སལླཀྑཎཝསེན ནིམིཏྟཾ གཧེཏྭཱ. ཝིགཏམལམཙྪེརཏཱདིགུཎཝསེནཱཏི ཝིགཏཱནི མལམཙྪེརཱནི ཨེཏསྨཱཏི ཝིགཏམལམཙྪེརོ, ཙཱགོ, ཏསྶ བྷཱཝོ ཝིགཏམལམཙྪེརཏཱ. ཏདཱདཱིནཾ གུཎཱནཾ, སམྤཏྟཱིནཾ, ཨཱནིསཾསཱནཾ ཝཱ ཝསེན.

སཏཾ ¶ དྷམྨཾ ཨནུཀྐམནྟི སཱདྷཱུནཾ བོདྷིསཏྟཱནཾ དྷམྨཾ པཝེཎིཾ ཨནུ ཨནུ ཀམནྟོ ཨོཀྐམནྟོ, ཨཝོཀྐམནྟོ ཝཱ. ཡེ ཨིམེ དཱཡཀསྶ ལཱབྷཱ ཨཱཡུཝཎྞསུཁབལཔཊིབྷཱནཱདཡོ, པིཡབྷཱཝཱདཡོ ཙ བྷགཝཏཱ སཾཝཎྞིཏཱ པཀིཏྟིཏཱ. མནུསྶཏྟཾ ཝཱཏི ཝཱ-སདྡོ ཨཝུཏྟཝིཀཔྤཏྠོ, ཏེན ཨིནྡྲིཡཔཱཊཝབྷཱཝཀམྨསྶཀཏཱཉཱཎཱདཱིནཾ སངྒཧོ དཊྛབྦོ.

མཙྪེརམལེནཱཏི མཙྪེརསངྑཱཏེན མལེན. ཨཐ ཝཱ མཙྪེརཉྩ མལཉྩ མཙྪེརམལཾ, ཏེན མཙྪེརེན ཙེཝ ལོབྷཱདིམལེན ཙཱཏི ཨཏྠོ. པཛཱཡནཝསེནཱཏི ཡཐཱསཀཾ ཀམྨནིབྦཏྟནཝསེན. ཀཎྷདྷམྨཱནནྟི ལོབྷཱདིཨེཀནྟཀཱལ༹ཀཱནཾ པཱཔདྷམྨཱནཾ. ཝིགཏཏྟཱཏི པཧཱིནཏྟཱ. ཝིགཏམལམཙྪེརེན ཙེཏསཱཏི ཨིཏྠམྦྷཱུཏལཀྑཎེ ཀརཎཝཙནཾ. སོཏཱཔནྣསྶ སཏོཏི གེཧཾ ཨཱཝསནྟསྶ སོཏཱཔནྣསྶ སམཱནསྶ. ནིསྶཡཝིཧཱརནྟི ནིསྶཱཡ ཝིཧརིཏབྦཝིཧཱརཾ, དེཝསིཀཾ ཝལ༹ཉྫནཀཀམྨཊྛཱནནྟི ཨཏྠོ. ཨབྷིབྷཝིཏྭཱཏི ཨགཱརཾ ཨཱཝསནྟཱནཾ ཨཉྙེསཾ ཨུཔྤཛྫནཀརཱགཱདིཨུཔཀྐིལེསེ ཨབྷིབྷུཡྻ.

ཡོ ཀིཉྩི དེནྟོཔི སཱཔེཀྑོཝ དེཏི, སོ མུཏྟཙཱགོ ན ཧོཏི, ཨཡཾ པན ན ཨེཝནྟི ‘‘མུཏྟཙཱགོ’’ཏི ཝུཏྟཾ. ཝིསྶཊྛཙཱགོཏི ནིརཔེཀྑཔརིཙྩཱགོཏི ཨཏྠོ. ཡཐཱ པཱཎཱཏིཔཱཏབཧུལོ པུགྒལོ ‘‘ལོཧིཏཔཱཎཱི’’ཏི ཝུཙྩཏི, ཨེཝཾ དཱནབཧུལོ པུགྒལོ ‘‘པཡཏཔཱཎཱི’’ཏི ཝུཏྟོཏི དསྶེནྟོ ‘‘དཱཏུཾ སདཱ དྷོཏཧཏྠོཡེཝཱ’’ཏི ཨཱཧ. ཏཏྠ སདཱཏི ནིཙྩཾ, ཨབྷིཎྷནྟི ཨཏྠོ. པརིཙྩཱགོཏི དེཡྻདྷམྨཔརིཙྩཱགོཏི ཨདྷིཀཱརཏོ ཝིཉྙཱཡཏི. ཡཾ ཡཾ དེཡྻདྷམྨཾ པརེ ཡཱཙནཀཱ. ཡཱཙནེ ཡོགོ ཡཱཙནཡོགོ, པརེཧི ཡཱཙིཏུཾ ཡུཏྟོཏི ཨཏྠོ. ཡཱཛེན ཡུཏྟོཏི དཱནེན ཡུཏྟོ སདཱ པརིཙྩཛནཏོ. ཨུབྷཡེཏི ཡཐཱཝུཏྟེ དཱནེ, སཾཝིབྷཱགེ ཙ རཏོ ཨབྷིརཏོ.

༡༦༡. ཡཐཱ པརིསུདྡྷསཱིལསྶ པུགྒལསྶ ཨཁཎྜཏཱདིགུཎཝསེན ཨཏྟནོ སཱིལསྶ ཨནུསྶརནྟསྶ སཱིལཱནུསྶཏིབྷཱཝནཱ ཨིཛ྄ཛྷཏི, ཨེཝཾ པརིསུདྡྷཨུལཱ༹རཔརིཙྩཱགསྶ པུགྒལསྶ ཨནུཔཀྐིལིཊྛམེཝ ¶ ཨཏྟནོ པརིཙྩཱགཾ ཨནུསྶརནྟསྶ བྷཱཝནཱ ཨིཛ྄ཛྷཏཱིཏི དསྶེཏུཾ ‘‘ཝིགཏམལམཙྪེརཏཱདིགུཎཝསེནཱ’’ཏིཨཱདི ཝུཏྟཾ, ཏཾ ཝུཏྟཏྠམེཝ.

བྷིཡྻོསོཏི ¶ ཨུཔརིཔི. མཏྟཱཡ པམཱཎསྶ མཧཏིཡཱ མཏྟཱཡ, ཝིཔུལེན པམཱཎེནཱཏི ཨཏྠོ. ཙཱགཱདྷིམུཏྟོཏི པརིཙྩཱགེ ཨདྷིམུཏྟོ ནིནྣཔོཎཔབྦྷཱརོ. ཏཏོ ཨེཝ ཨལོབྷཛ྄ཛྷཱསཡོ ཀཏྠཙིཔི ཨནབྷིསངྒཙིཏྟོ. པཊིགྒཱཧཀེསུ མེཏྟཱཡནཝསེན པརིཙྩཱགོ ཧོཏཱིཏི མེཏྟཱཡ མེཏྟཱབྷཱཝནཱཡ ཨནུལོམཀཱརཱི ཨནུརཱུཔཔཊིཔཏྟི. ཝིསཱརདོཏི ཝིསདོ ཨཏྟནོཝ གུཎེན ཀཏྠཙིཔི ཨམངྐུབྷཱུཏོ ཨབྷིབྷུཡྻ ཝིཧཱརཱི. སེསཾ སུཝིཉྙེཡྻམེཝ.

༦. དེཝཏཱནུསྶཏིཀཐཱཝཎྞནཱ

༡༦༢. ཨརིཡམགྒཝསེནཱཏི ཨརིཡམགྒསྶ ཨདྷིགམཝསེན. སམུདཱགཏེཧཱིཏི སམྨདེཝ ཏདུཔྤཏྟིཏོ ཨུདྡྷཾ ཨཱགཏེཧི. ཡཱདིསཱ ཧི ཨརིཡཱནཾ སནྟཱནེ ལོཀིཡཱཔི སདྡྷཱདཡོ, ན ཏཱདིསཱ ཀདཱཙིཔི པོཐུཛྫནིཀཱ སདྡྷཱདཡོ. དིབྦནྟཱིཏི དེཝཱ. ཙཏྟཱརོ མཧཱརཱཛཱནོ ཨེཏེསནྟི ཙཏུམཧཱརཱཛཱ, ཏེ ཨེཝ ཙཱཏུམཧཱརཱཛིཀཱ. ཏེཏྟིཾས སཧཔུཉྙཀཱརིནོ ཏཏྠཱུཔཔནྣཱཏི ཏཾསཧཙརིཏཾ ཋཱནཾ ཏཱཝཏིཾསཾ, ཏནྣིཝཱསིནོཔི དེཝཱ ཏཾསཧཙརཎཏོ ཨེཝ ཏཱཝཏིཾསཱ. དུཀྑཏོ ཡཱཏཱ ཨཔཡཱཏཱཏི ཡཱམཱ. ཏུསཱཡ པཱིཏིཡཱ ཨིཏཱ ཨུཔགཏཱཏི ཏུསིཏཱ. བྷོགཱནཾ ནིམྨཱནེ རཏི ཨེཏེསནྟི ནིམྨཱནརཏིནོ. པརནིམྨིཏེསུ བྷོགེསུ ཝསཾ ཝཏྟེནྟཱིཏི པརནིམྨིཏཝསཝཏྟིནོ. བྲཧྨཱནཾ ཀཱཡོ སམཱུཧོ བྲཧྨཀཱཡོ, ཏཔྤརིཡཱཔནྣཏཱཡ ཏཏྠ བྷཝཱཏི བྲཧྨཀཱཡིཀཱ. ཏཏུཏྟརཱིཏི ཏཏོ བྲཧྨཀཱཡིཀེཧི ཨུཏྟརི, ཨུཔརི པརིཏྟཱབྷཱདིཀེ སནྡྷཱཡ ཝདཏི. དེཝཏཱ སཀྑིཊྛཱནེ ཋཔེཏྭཱཏི ‘‘ཡཐཱརཱུཔཱཡ མགྒེནཱགཏཱཡ སདྡྷཱཡ སམནྣཱགཏཱ, སཱིལེན སུཏེན ཙཱགེན པཉྙཱཡ སམནྣཱགཏཱ ཨིཏོ ཙུཏཱ ཏཏྠ ཨུཔཔནྣཱ ཏཱ དེཝཏཱ, མཡ྄ཧམྤི ཏཐཱརཱུཔཱ སདྡྷཱ སཱིལཾ སུཏཾ ཙཱགོ པཉྙཱ ཙ སཾཝིཛྫཏཱི’’ཏི དེཝཏཱ སཀྑིཊྛཱནེ ཋཔེཏྭཱ སཀྑིཾ ཨོཏཱརེནྟེན ཝིཡ ཨཏྟནོ སདྡྷཱདིགུཎཱ ཨནུསྶརིཏབྦཱ.

ཡདི ཨེཝཾ སུཏྟེ (ཨ. ནི. ༦.༡༠) ཨུབྷཡགུཎཱནུསྶརཎཾ ཝུཏྟཾ, ཏཾ ཀཐནྟི ཨནུཡོགཾ མནསི ཀཏྭཱ ཨཱཧ ‘‘སུཏྟེ པནཱ’’ཏིཨཱདི. ཏཏྠ ཀིཉྩཱཔི ཝུཏྟནྟི ‘‘ཨཏྟནོ ཙ, ཏཱསཉྩ དེཝཏཱན’’ནྟི ཨུབྷཡཾ སམདྷུརཾ ཝིཡ སུཏྟེ (ཨ. ནི. ༦.༡༠) ཀིཉྩཱཔི ཝུཏྟཾ. ཨཐ ¶ ཁོ ཏཾ ‘‘དེཝཏཱནཾ སདྡྷཉྩ སཱིལཉྩཱ’’ཏིཨཱདིཝཙནཾ. སཀྑིཊྛཱནེ ཋཔེཏབྦནྟི ‘‘ཝུཏྟ’’ནྟི པརཏོ པདཾ ¶ ཨཱནེཏྭཱ སམྦནྡྷིཏབྦཾ. ཀིམཏྠཾ པན སཀྑིཊྛཱནེ ཋཔནནྟི ཨཱཧ ‘‘དེཝཏཱནཾ ཨཏྟནོ སདྡྷཱདཱིཧི སམཱནགུཎདཱིཔནཏྠནྟི ཝེདིཏབྦ’’ནྟི. ཀསྨཱ པན སུཏྟེ ཡཐཱརུཏཝསེན ཨཏྠཾ ཨགྒཧེཏྭཱ ཨེཝཾ ཨཏྠོ གཡ྄ཧཏཱིཏི ཨཱཧ ‘‘ཨཊྛཀཐཱཡཉྷཱི’’ཏིཨཱདི.

༡༦༣. ཏསྨཱཏི ཡསྨཱ ཨཊྛཀཐཱཡཾ དེཝཏཱ སཀྑིཊྛཱནེ ཋཔེཏྭཱ ཨཏྟནོ གུཎཱནུསྶརཎཾ དལ༹ྷཾ ཀཏྭཱ ཝུཏྟཾ, སཱིལཙཱགཱནུསྶཏཱིསུ ཝིཡ ཨིདྷཱཔི ཨཏྟནོ གུཎཱནུསྶརཎཾ ཛྷཱནུཔྤཏྟིནིམིཏྟཾ ཡུཏྟཾ, ཏསྨཱ. པུབྦབྷཱགེ བྷཱཝནཱརམྦྷེ. ཨཔརབྷཱགེཏི ཡཐཱ བྷཱཝེནྟསྶ ཨུཔཙཱརཛ྄ཛྷཱནཾ ཨིཛ྄ཛྷཏི, ཏཐཱ བྷཱཝནཱཀཱལེ. ཡདི ཨཏྟནོ ཨེཝ ཨིདྷ གུཎཱ ཨནུསྶརིཏབྦཱ, ཀཐམཡཾ དེཝཏཱནུསྶཏཱིཏི ཨཱཧ ‘‘དེཝཏཱནཾ གུཎསདིསསདྡྷཱདིགུཎཱནུསྶརཎཝསེནཱ’’ཏི. ཏེན སདིསཀཔྤནཱཡ ཨཡཾ བྷཱཝནཱ ‘‘དེཝཏཱནུསྶཏཱི’’ཏི ཝུཏྟཱ, ན དེཝཏཱནཾ, ཏཱསཾ གུཎཱནཾ ཝཱ ཨནུསྶརཎེནཱཏི དསྶེཏི. པུབྦབྷཱགེ ཝཱ པཝཏྟཾ དེཝཏཱགུཎཱནུསྶརཎཾ ཨུཔཱདཱཡ ‘‘དེཝཏཱནུསྶཏཱི’’ཏི ཨིམིསྶཱ སམཉྙཱ ཝེདིཏབྦཱ. ཏཐཱ ཧི ཝཀྑཏི ‘‘པུབྦབྷཱགེ དེཝཏཱ ཨཱརབྦྷ པཝཏྟཙིཏྟཝསེནཱ’’ཏི. སེསཾ སུཝིཉྙེཡྻམེཝ.

པཀིཎྞཀཀཐཱཝཎྞནཱ

༡༦༤. ཨེཏཱསནྟི ཨེཏཱསཾ བུདྡྷཱནུསྶཏིཨཱདཱིནཾ ཚནྣཾ ཨནུསྶཏཱིནཾ. ཝིཏྠཱརདེསནཱཡནྟི ཝིཏྠཱརཝསེན པཝཏྟདེསནཱཡཾ, མཧཱནཱམསུཏྟཾ (ཨ. ནི. ༦.༡༠; ༡༡.༡༡) སནྡྷཱཡ ཝདཏི. བྷགཝཱཏིཨཱདཱིནཾ ཨཏྠནྟི བྷགཝཱཏིཨཱདཱིནཾ པདཱནཾ ཨཏྠཾ. ཨཏྠཝེདནྟི ཝཱ ཧེཏུཕལཾ པཊིཙྩ ཨུཔྤནྣཾ ཏུཊྛིམཱཧ. དྷམྨཝེདནྟི ཧེཏུཾ པཊིཙྩ ཨུཔྤནྣཾ ཏུཊྛིཾ. ‘‘ཨཱརཀཏྟཱ ཨརཧ’’ནྟི ཨནུསྶརནྟསྶ ཧི ཡཾ ཏཾ བྷགཝཏོ ཀིལེསེཧི ཨཱརཀཏྟཾ, སོ ཧེཏུ. ཉཱཔཀོ ཙེཏྠ ཧེཏུ ཨདྷིཔྤེཏོ, ན ཀཱརཀོ, སམྤཱཔཀོ ཝཱ. ཡོནེན ཉཱཡམཱནོ ཨརཧཏྟཏྠོ, ཏཾ ཕལཾ. ཨིམིནཱ ནཡེན སེསཔདེསུཔི ཧེཏུཕལཝིབྷཱགོ ཝེདིཏབྦོ. དྷམྨཱནུསྶཏིཨཱདཱིསུཔི ‘‘ཨཱདིམཛ྄ཛྷཔརིཡོསཱནཀལྱཱཎཏྟཱ’’ཏིཨཱདིནཱ, ‘‘ཡསྨཱ པན སཱ སམྨཱཔཊིཔདཱ’’ཏིཨཱདིནཱ ཙ ཏཏྠ ཏཏྠ ཧེཏུཨཔདེསོ ཀཏོཡེཝཱཏི. དྷམྨཱུཔསཾཧིཏནྟི ཡཐཱཝུཏྟཧེཏུཧེཏུཕལསངྑཱཏགུཎཱུཔསཾཧིཏཾ. གུཎེཏི ཨཏྟནོ གུཎེ.

༡༦༥. ཨརིཡསཱཝཀཱནཉྙེཝ ¶ ཨིཛ྄ཛྷནྟཱིཏི ཨརིཡསཱཝཀཱནཾ ཨིཛ྄ཛྷནྟིཡེཝཱཏི ཨུཏྟརཔདཱཝདྷཱརཎཾ དཊྛབྦཾ, ཨཝདྷཱརཎཉྩ ཏེསཾ སུཁསིདྡྷིདསྶནཏྠཾ. ཏེནཱཧ ‘‘ཏེསཾ ཧཱི’’ཏིཨཱདི. ན པུཐུཛྫནཱནཾ སབྦེན སབྦཾ ཨིཛ྄ཛྷནྟཱིཏི. ཏཐཱ ཧི ཝཀྑཏི ‘‘ཨེཝཾ སནྟེཔཱི’’ཏིཨཱདི. ཡདི ཨེཝཾ ¶ , ཀསྨཱ མཧཱནཱམསུཏྟཱདཱིསུ (ཨ. ནི. ༦.༡༠; ༡༡.༡༡) བཧཱུསུ སུཏྟེསུ ཨརིཡསཱཝཀགྒཧཎཾ ཀཏནྟི? ཏེསཾ བཧུལཝིཧཱརཏཱཡཱཏི ཨཱཙརིཡཱ.

ནིཀྑནྟནྟི ནིགྒཏཾ ནིསྶཊཾ. མུཏྟནྟི ཝིསྶཊྛཾ. ཝུཊྛིཏནྟི ཨཔེཏཾ. སབྦམེཏཾ ཝིཀྑམྦྷནམེཝ སནྡྷཱཡ ཝདཏི. གེདྷམྷཱཏི པལིབོདྷཏོ. ཨིདམྤཱིཏི བུདྡྷཱནུསྶཏིཝསེན ལདྡྷཾ ཨུཔཙཱརཛ྄ཛྷཱནམཱཧ. ཨཱརམྨཎཾ ཀརིཏྭཱཏི པཙྩཡཾ ཀཏྭཱ, པཱདཀཾ ཀཏྭཱཏི ཨཏྠོ. ཝིསུཛ྄ཛྷནྟཱིཏི པརམཏྠཝིསུདྡྷིཾ པཱཔུཎནྟི.

སམྦཱདྷེཏི ཏཎྷཱསཾཀིལེསཱདིནཱ སམྤཱིལེ༹ སཾཀཊེ གྷརཱཝཱསེ. ཨོཀཱསཱདྷིགམོ ལོཀུཏྟརདྷམྨསྶ ཨདྷིགམཱཡ ཨདྷིགནྟབྦཨོཀཱསོ. ཨནུསྶཏིཡོ ཨེཝ ཨནུསྶཏིཊྛཱནཱནི. ཝིསུདྡྷིདྷམྨཱཏི ཝིསུཛ྄ཛྷནསབྷཱཝཱ, ཝིསུཛ྄ཛྷིཏུཾ ཝཱ བྷབྦཱ. པརམཏྠཝིསུདྡྷིདྷམྨཏཱཡཱཏི པརམཏྠཝིསུདྡྷིཡཱ ནིབྦཱནསྶ བྷབྦབྷཱཝེན. ཨུཔཀྐམེནཱཏི པཡོགེན. པརིཡོདཔནཱཏི ཝིསོདྷནཱ.

༡༦༦. ཨེཝཾ སནྟེཔཱིཏི ཨེཝཾ མཧཱནཱམསུཏྟཱདཱིསུ ཨནེཀེསུ སུཏྟེསུ ཨརིཡསཱཝཀསྶེཝ ཝསེན ཚསུ ཨནུསྶཏཱིསུ དེསིཏཱསུཔི. ཡསྶཱནུབྷཱཝེནཱཏི ཡསྶ ཙིཏྟཔྤསཱདསྶ བལེན. པཱིཏིཾ པཊིལབྷིཏྭཱཏི ཨནུསྶཝཝསེན བུདྡྷཱརམྨཎཾ པཱིཏིཾ ཨུཔྤཱདེཏྭཱ.

ཚཨནུསྶཏིནིདྡེསཝཎྞནཱ ནིཊྛིཏཱ.

ཨིཏི སཏྟམཔརིཙྪེདཝཎྞནཱ.

༨. ཨནུསྶཏིཀམྨཊྛཱནནིདྡེསཝཎྞནཱ

མརཎསྶཏིཀཐཱཝཎྞནཱ

༡༦༧. ཨིཏོཏི ¶ ¶ དེཝཏཱནུསྶཏིཡཱ. སཱ ཧི ཚསུ ཨནུསྶཏཱིསུ སབྦཔཙྪཱ ནིདྡིཊྛཏྟཱ ཨཱསནྣཱ, པཙྩཀྑཱ ཙ. ཨནནྟརཱཡཱཏི ཏདནནྟརཾ ཨུདྡིཊྛཏྟཱ ཝུཏྟཾ. མརཎསྶ སཏི མརཎསྶཏཱིཏི མརཎཾ ཏཱཝ དསྶེཏུཾ ‘‘ཏཏྠ མརཎ’’ནྟིཨཱདི ཝུཏྟཾ. ཀཱམཉྩེཏྠ ཁནྡྷཱནཾ བྷེདོ ‘‘ཛརཱམརཎཾ དྭཱིཧི ཁནྡྷེཧི སངྒཧིཏ’’ནྟི (དྷཱཏུ. ༧༡) ཝཙནཏོ ཙུཏིཁནྡྷཱནཾ ཝིནཱསོ མརཎནྟི ཝཏྟབྦཾ, ཝིསེསཏོ པན ཏཾ ཛཱིཝིཏིནྡྲིཡསྶ ཝིནཱསབྷཱཝེན ཀམྨཊྛཱནིཀཱནཾ པཙྩུཔཏིཊྛཏཱིཏི ‘‘ཛཱིཝིཏིནྡྲིཡསྶ ཨུཔཙྪེདོ’’ཏི ཝུཏྟཾ. ཏེནེཝཱཧ ནིདྡེསེ ‘‘ཀལེ༹ཝརསྶ ནིཀྑེཔོ ཛཱིཝིཏིནྡྲིཡསྶུཔཙྪེདོ’’ཏི (ཝིབྷ. ༢༣༦; དཱི. ནི. ༢.༣༩༠; མ. ནི. ༡.༩༢, ༡༢༣). ཏཏྠ ཨེཀབྷཝཔརིཡཱཔནྣསྶཱཏི ཨེཀེན བྷཝེན པརིཙྪིནྣསྶ. ཛཱིཝིཏིནྡྲིཡསྶ ཨུཔཙྪེདོཏི ཛཱིཝིཏིནྡྲིཡཔྤབནྡྷསྶ ཝིཙྪེདོ ཨཱཡུཀྑཡཱདིཝསེན ཨནྟརདྷཱནཾ. སམུཙྪེདམརཎནྟི ཨརཧཏོ སནྟཱནསྶ སབྦསོ ཨུཙྪེདབྷཱུཏཾ མརཎཾ. སངྑཱརཱནཾ ཁཎབྷངྒསངྑཱཏནྟི སངྑཏདྷམྨཱནཾ ཨུདཡཝཡཔརིཙྪིནྣསྶ པཝཏྟིཁཎསྶ བྷངྒོ ནིརོདྷོཏི སངྑཾ གཏཾ. ཁཎིཀམརཎནྟི ཡཐཱཝུཏྟཁཎཝནྟཾ ཏསྨིཾཡེཝ ཁཎེ ལབྦྷམཱནཾ མརཎཾ. ཡཾ ཁནྡྷཔྤབནྡྷཾ ཨུཔཱདཱཡ རུཀྑཱདིསམཉྙཱ, ཏསྨིཾ ཨནུཔཙྪིནྣེཔི ཨལླཏཱདིཝིགམནཾ ནིསྶཱཡ མཏཝོཧཱརོ སམྨུཏིམརཎཾ. ན ཏཾ ཨིདྷ ཨདྷིཔྤེཏནྟི ཏཾ སམུཙྪེདཁཎིཀསམྨུཏིམརཎཾ ཨིདྷ མརཎཱནུསྶཏིཡཾ ནཱདྷིཔྤེཏཾ ཨབཱཧུལླཏོ, ཨནུཔཊྛཧནཏོ, ཨསཾཝེགཝཏྠུཏོ ཙཱཏི ཨདྷིཔྤཱཡོ.

ཨདྷིཔྤེཏཾ སཏིཡཱ ཨཱརམྨཎབྷཱཝེན. ཨཱཡུཨཱདཱིནཾ ཁཡཀཱལེ མརཎཾ ཀཱལམརཎཾ. ཏེསཾ ཨཔརིཀྑཱིཎཀཱལེ མརཎཾ ཨཀཱལམརཎཾ. ‘‘ཀཱལམརཎཾ པུཉྙཀྑཡེནཱ’’ཏི ཨིདཾ ཡཐཱདྷིཀཱརཾ སམྤཏྟིབྷཝཝསེན ཝུཏྟཾ, ཝིཔཏྟིབྷཝཝསེན པན ‘‘པཱཔཀྑཡེནཱ’’ཏི ཝཏྟབྦཾ.

ཨཱཡུསནྟཱནཛནཀཔཙྩཡསམྤཏྟིཡཱཏི ¶ ཨཱཡུཔྤབནྡྷསྶ པཝཏྟཱཔནཀཱནཾ ཨཱཧཱརཱདིཔཙྩཡཱནཾ སམྤཏྟིཡཾ. ཝིཔཀྐཝིཔཱཀཏྟཱཏི ཨཏྟནོ ཕལཱནུརཱུཔཾ དཱཏབྦཝིཔཱཀསྶ དིནྣཏྟཱ. གཏིཀཱལཱཧཱརཱདིསམྤཏྟིཡཱ ཨབྷཱཝེནཱཏི ¶ དེཝཱནཾ ཝིཡ གཏིསམྤཏྟིཡཱ, པཋམཀཔྤིཡཱནཾ ཝིཡ ཀཱལསམྤཏྟིཡཱ, ཨུཏྟརཀུརུཀཱདཱིནཾ ཝིཡ ཨཱཧཱརསམྤཏྟིཡཱ ཙ ཨབྷཱཝེན. ཨཱདི-སདྡེན ཨུཏུསུཀྐསོཎིཏཱདིཾ པརིགྒཡ྄ཧཏི. ཨཛྫཏནཀཱལཔུརིསཱནཾ ཝིཡཱཏི ཝིཡ-སདྡོ ཨཊྛཱནེ པཊྛཔིཏོ, ཨཛྫཏནཀཱལཔུརིསཱནཾ ཝསྶསཏམཏྟཔརིམཱཎསྶ ཝིཡ ཨཱཡུནོ ཁཡཝསེནཱཏི ཡོཛནཱ. ཨེཝཾ ཧི ཨནཱགཏེཔི པརམཱཡུནོ སངྒཧོ ཀཏོ ཧོཏི, ཨཏཱིཏེ པན གཏིསམྤཏྟིཡཱ ཝིཡ ཀཱལཱཧཱརཱདིསམྤཏྟིཡཱ བྷཱཝེན ཨནེཀཝསྶསཧསྶ པརིམཱཎོཔི ཨཱཡུ ཨཧོསི. ཨཡཉྩ ཝིབྷཱགོ ཝཏྟམཱནསྶ ཨནྟརཀཔྤསྶ ཝསེན ཝུཏྟོཏི དཊྛབྦཾ. ཀལཱབུརཱཛཱདཱིནནྟི ཨཱདི-སདྡེན ནནྡཡཀྑནནྡམཱཎཝཀཱདཱིནཾ སངྒཧོ དཊྛབྦོ. ཏཾ སབྦམྤཱིཏི ཡཾ ‘‘ཀཱལམརཎཾ ཨཀཱལམརཎཾ, ཏཏྠཱཔི པུཉྙཀྑཡམརཎཾ ཨཱཡུཀྑཡམརཎཾ ཨུབྷཡཀྑཡམརཎཾ ཨུཔཀྐམམརཎ’’ནྟི ཝུཏྟཔྤབྷེདཾ མརཎཾ, ཏཾ སབྦམྤི.

༡༦༨. ཡོནིསོཏི ཨུཔཱཡེན. མནསིཀཱརོཏི མརཎཱརམྨཎོ མནསིཀཱརོ. ཡེན པན ཨུཔཱཡེན མནསིཀཱརོ པཝཏྟེཏབྦོ, ཏཾ བྱཏིརེཀམུཁེན དསྶེཏུཾ ‘‘ཨཡོནིསོ པཝཏྟཡཏོ’’ཏིཨཱདི ཝུཏྟཾ. ཏཏྠ ཨཡོནིསོ པཝཏྟཡཏོཏི ཨནུཔཱཡེན སཏིཾ, སཾཝེགཾ, ཉཱཎཉྩ ཨནུཔཊྛཔེཏྭཱ མརཎཾ ཨནུསྶརཏོ. ཏདེཏཾ སབྦམྤཱིཏི སོཀཔཱམོཛྫཱནཾ ཨུཔྤཛྫནཾ, སཾཝེགསྶ ཨནུཔྤཛྫནཾ, སནྟཱསསྶ ཨུཔྤཛྫནཉྩ ཡཐཱཀྐམཾ སཏིསཾཝེགཉཱཎཝིཧརཏོ ཧོཏི. ཡོ ཧི ‘‘མརཎཾ ནཱམེཏཾ ཛཱཏསྶ ཨེཀནྟིཀ’’ནྟི པཎྜིཏཱནཾ ཝཙནཾ སརཏི, ཏཏྠ སཾཝེགཛཱཏོ ཧོཏི སམྤཛཱནོ ཙ, ཏསྶ ཨིཊྛཛནམརཎཱདིནིམིཏྟཾ སོཀཱདཡོ ཨནོཀཱསཱཝ. ཏསྨཱཏི ཡསྨཱ ཨཡོནིསོ མནསིཀཱརཾ པཝཏྟཡཏོ ཨེཏེ དོསཱ, ཏསྨཱ. ཏཏྠ ཏཏྠཱཏི ཨརཉྙསུསཱནཱདཱིསུ. ཧཏམཏསཏྟེཏི ཙོརཱདཱིཧི ཧཏེ, སརསེན མཏེ ཙ སཏྟེ. དིཊྛཔུབྦཱ སམྤཏྟི ཡེསཾ ཏེ དིཊྛཔུབྦསམྤཏྟཱི, ཏེསཾ དིཊྛཔུབྦསམྤཏྟཱིནཾ. ཡོཛེཏྭཱཏི ཨུཔཊྛཔེཏྭཱ. ཨེཀཙྩསྶཱཏི ཏིཀྑིནྡྲིཡསྶ ཉཱཎུཏྟརསྶ.

༡༦༩. ཝདྷཀཔཙྩུཔཊྛཱནཏོཏི གྷཱཏཀསྶ ཝིཡ པཏི པཏི ཨུཔཊྛཱནཏོ ཨཱསནྣབྷཱཝཏོ. སམྤཏྟིཝིཔཏྟིཏོཏི ཨཱརོགྱཱདིསམྤཏྟཱིནཾ ཝིཡ ཛཱིཝིཏསམྤཏྟིཡཱ ཝིཔཛྫནཏོ. ཨུཔསཾཧརཎཏོཏི པརེསཾ མརཎཾ དསྶེཏྭཱ ཨཏྟནོ ¶ མརཎསྶ ཨུཔནཡནཏོ. ཀཱཡབཧུསཱདྷཱརཎཏོཏི སརཱིརསྶ བཧཱུནཾ སཱདྷཱརཎབྷཱཝཏོ. ཨཱཡུདུབྦལཏོཏི ཛཱིཝིཏསྶ དུབྦལབྷཱཝཏོ. ཨནིམིཏྟཏོཏི མརཎསྶ ཝཝཏྠིཏནིམིཏྟཱབྷཱཝཏོ ¶ . ཨདྡྷཱནཔརིཙྪེདཏོཏི ཀཱལསྶ པརིཙྪནྣབྷཱཝཏོ. ཁཎཔརིཏྟཏོཏི ཛཱིཝིཏཀྑཎསྶ ཨིཏྟརབྷཱཝཏོ.

ཝདྷཀཔཙྩུཔཊྛཱནཏོཏི ཨེཏྠ ཝིཡ-སདྡོ ལུཏྟནིདྡིཊྛོཏི དསྶེནྟོ ‘‘ཝདྷཀསྶ ཝིཡ པཙྩུཔཊྛཱནཏོ’’ཏི ཝཏྭཱ ཏམེཝཏྠཾ ཝིཝརནྟོ ‘‘ཡཐཱ ཧཱི’’ཏིཨཱདིམཱཧ. ཏཏྠ ཙཱརཡམཱནོཏི ཨཱགུརེནྟོ པཧརཎཱཀཱརཾ ཀརོནྟོ. པཙྩུཔཊྛིཏོཝ ཨུཔགནྟྭཱ ཋིཏོ སམཱིཔེ ཨེཝ. ཛརཱམརཎཾ གཧེཏྭཱཝ ནིབྦཏྟནྟི ‘‘ཡཐཱ ཧི ཨཧིཙྪཏྟཀམཀུལ༹ཾ ཨུགྒཙྪནྟཾ པཾསུཝིརཧིཏཾ ན ཧོཏི, ཨེཝཾ སཏྟཱ ནིབྦཏྟནྟཱ ཛརཱམརཎཝིརཧིཏཱ ན ཧོནྟཱི’’ཏི ཨེཏྟཀེན ཨུཔམཱ. ཨཧིཙྪཏྟཀམཀུལ༹ཾ ཀདཱཙི ཀཏྠཙི པཾསུཝིརཧིཏམྤི བྷཝེཡྻ, སཏྟཱ པན ཀཐཉྩིཔི ཛརཱམརཎཝིརཧིཏཱ ན ཧོནྟཱིཏི ཁཎིཀམརཎཾ ཏཱཝ ཨུཔམཱབྷཱཝེན དསྶེཏྭཱ ཨིདྷཱདྷིཔྤེཏཾ མརཎཾ དསྶེཏུཾ ‘‘ཏཐཱ ཧཱི’’ཏིཨཱདི ཝུཏྟཾ. ཨཐ ཝཱ ཡདིམེ སཏྟཱ ཛརཱམརཎཾ གཧེཏྭཱཝ ནིབྦཏྟནྟི, ནིབྦཏྟིསམནནྟརམེཝ མརིཏབྦནྟི ཙོདནཾ སནྡྷཱཡཱཧ ‘‘ཏཐཱ ཧཱི’’ཏིཨཱདི. ཨཝསྶཾ མརཎཏོཏི ཨཝསྶཾ མརིཏབྦཏོ, ཨེཀནྟེན མརཎསབྦྷཱཝཏོ ཝཱ. པབྦཏེཡྻཱཏི པབྦཏཏོ ཨཱགཏཱ. ཧཱརཧཱརིནཱིཏི པཝཱཧེ པཏིཏསྶ ཏིཎཔཎྞཱདིཀསྶ ཨཏིཝིཡ ཧརཎསཱིལཱ. སནྡཏེཝཱཏི སཝཏི ཨེཝ. ཝཏྟཏེཝཱཏི པཝཱཧཝསེན ཝཏྟཏི ཨེཝ ན ཏིཊྛཏི.

ཡམེཀརཏྟིནྟི ཡསྶཾ ཨེཀརཏྟིཡཾ, བྷུམྨཏྠེ ཨུཔཡོགཝཙནཾ དཊྛབྦཾ, ཨཙྩནྟསཾཡོགེ ཝཱ. པཋམནྟི སབྦཔཋམཾ པཊིསནྡྷིཀྑཎེ. གབྦྷེཏི མཱཏུཀུཙྪིཡཾ. མཱཎཝོཏི སཏྟོ. ཡེབྷུཡྻེན སཏྟཱ རཏྟིཡཾ པཊིསནྡྷིཾ གཎྷནྟཱིཏི རཏྟིགྒཧཎཾ. ཨབྦྷུཊྛིཏོཝཱཏི ཨུཊྛིཏཨབྦྷོ ཝིཡ, ཨབྷིམུཁབྷཱཝེན ཝཱ ཨུཊྛིཏོཝ མརཎསྶཱཏི ཨདྷིཔྤཱཡོ. སོ ཡཱཏཱིཏི སོ མཱཎཝོ ཡཱཏི, པཋམཀྑཎཏོ པཊྛཱཡ གཙྪཏེཝ. ས གཙྪཾ ན ནིཝཏྟཏཱིཏི སོ ཨེཝཾ གཙྪནྟོ ཁཎམཏྟམྤི ན ནིཝཏྟཏི, ཨཉྙདཏྠུ མརཎཾཡེཝ ཨུཔགཙྪཏི.

ཀུནྣདཱིནནྟི པབྦཏཏོ པཏིཏཱནཾ ཁུདྡཀནདཱིནཾ. པཱཏོ ཨཱཔོརསཱནུགཏབནྡྷནཱནནྟི པུརིམདིཝསེ དིཝཱ སཱུརིཡསནྟཱཔེན ཨནྟོ ཨནུཔཝིསིཏྭཱ པུན རཏྟིཡཾ བནྡྷནམཱུལཾ ཨུཔགཏེན ཨཱཔོརསེན ཏིནྟསིཐིལབནྡྷནཏཱཡ པཱཏོ ཨཱཔོརསཱནུགཏབནྡྷནཱནཾ.

ཨཙྩཡནྟཱིཏི ¶ ཨཏིཀྐམནྟི. ཨུཔརུཛ྄ཛྷཏཱིཏི ནིརུཛ྄ཛྷཏི. ཨུདཀམེཝ ཨོདཀཾ, ཨུདཀོགྷཾ ཝཱ ¶ . ཡསྨཱ ཨཙྩཡནྟི ཨཧོརཏྟཱ, ཏསྨཱ ཛཱིཝིཏཾ ཨུཔརུཛ྄ཛྷཏི. ཡསྨཱ ཛཱིཝིཏཾ ཨུཔརུཛ྄ཛྷཏི, ཏསྨཱ ཨཱཡུ ཁཱིཡཏི མཙྩཱནཾ. པཔཏཏོཏི པཔཏནཏོ བྷཡཾ སཱམིཀཱནཾ རུཀྑེ ཋཏྭཱ ཀམྨེ ཝིནིཡུཉྫིཏུཀཱམཱནཾ, ཧེཊྛཱ པཝིཊྛཱནཾ ཝཱ. ཨུགྒམནཾ པཏི ཨུགྒམནནིམིཏྟཾ. མཱ མཾ ཨམྨ ནིཝཱརཡ པབྦཛྫཱཡཱཏི ཨདྷིཔྤཱཡོ.

ཀོཙི མིཏྟམུཁསཏྟུརནྡྷགཝེསཱི སཧ ཝཏྟམཱནོཔི ན ཧནེཡྻ, ཨཡཾ པན ཨེཀཾསེན ཧནཏིཡེཝཱཏི དསྶེཏུཾ ‘‘སཧཛཱཏིཡཱ ཨཱགཏཏོ’’ཏི ཝཏྭཱ ‘‘ཛཱིཝིཏཧརཎཏོ ཙཱ’’ཏི ཝུཏྟཾ.

༡༧༠. ནནྟི སམྤཏྟིཾ. སུཁཱིཏི དིབྦསདིསེཧི བྷོགེཧི, ཨཱདྷིཔཏེཡྻེན ཙ སུཁསམངྒཱི. དེཧབནྡྷེནཱཏི སརཱིརེན. ཨསོཀོཏི ཨསོཀམཧཱརཱཛཱ. སོཀམཱགཏོཏི སོཙིཏབྦཏཾ གཏོ.

ཨཱརོགྱཾ ཡོབྦནཱནཾ. བྱཱདྷིཛརཱཔརིཡོསཱནཏཱ ཛཱིཝིཏསྶ མརཎཔརིཡོསཱནཏཱཡ ཨུདཱཧརཎཝསེན ཨཱནཱིཏཱ, པཙྩཡབྷཱགཝསེན ཝཱ. ལོཀོཡེཝ ལོཀསནྣིཝཱསོ ཡཐཱ སཏྟཱཝཱསཱཏི, སནྣིཝསིཏབྦཏཱཡ ཝཱ སཏྟནིཀཱཡོ ལོཀསནྣིཝཱསོ. ཨནུགཏོཏི ཨནུབནྡྷོ པཙྩཏྠིཀེན ཝིཡ. ཨནུསཊོཏི ཨནུཔཝིཊྛོ ཨུཔཝིསེན ཝིཡ. ཨབྷིབྷཱུཏོཏི ཨཛ྄ཛྷོཏྠཊོ མདྡཧཏྠཱིཧི ཝིཡ. ཨབྦྷཱཧཏོཏི པཧཊོ བྷཱུཏེཧི ཝིཡ.

སེལཱཏི སིལཱམཡཱ, ན པཾསུཨཱདིམཡཱ. ཝིཔུལཱཏི མཧནྟཱ ཨནེཀཡོཛནཱཡཱམཝིཏྠཱརཱ. ནབྷཾ ཨཱཧཙྩཱཏི ཝིཔུལཏྟཱ ཨེཝ ཨཱཀཱསཾ ཨབྷིཝིཧཙྩ སབྦདིསཱསུ ཕརིཏྭཱ. ཨནུཔརིཡེཡྻུནྟི ཨནུཝིཙརེཡྻུཾ. ནིཔྤོཐེནྟཱཏི ཨཏྟནཱ ཨཱགྷཱཏིཏཾ ཙུཎྞཝིཙུཎྞཾ ཀརོནྟཱ. ཨདྷིཝཏྟནྟཱིཏི ཨདྷིབྷཝནྟི. ཀུལེན ཝཱ རཱུཔེན ཝཱ སཱིལེན ཝཱ སུཏེན ཝཱ སདྡྷཱདཱིཧི ཝཱ སེཊྛོཏི སམྦྷཱཝནཱཡ ཁཏྟིཡཱདཱིསུ ན ཀཉྩི པརིཝཛྫེཏི. ཏེཧི ཨེཝ ནིཧཱིནོཏི ཨཝམཉྙམཱནཱཡ སུདྡཱདཱིསུ ན ཀཉྩི པརིཝཛྫེཏི. ཨཉྙདཏྠུ སབྦམེཝ ཨབྷིམདྡཏི ནིམྨཐཏི. དཎྜཱདིཨུཔཱཡཱ ཙ ཏཏྠ ཨཝིསཡཱ ཨེཝཱཏི དསྶེཏུཾ ‘‘ན ཏཏྠ ཧཏྠཱིནཾ བྷཱུམཱི’’ཏིཨཱདི ཝུཏྟཾ. ཏཏྠ མནྟཡུདྡྷེནཱཏི ¶ ཨཱཐབྦཎཝེདཝིཧིཏེན མནྟསངྒཱམཔྤཡོགེན. དྷནེནཱཏི དྷནདཱནེན. ཝཱ-སདྡོ ཨཝུཏྟཝིཀཔྤནཏྠོ. ཏེན སཱམཾ, བྷེདཉྩ སངྒཎྷཱཏི.

༡༧༡. པརེཧི སདྡྷིཾ ཨཏྟནོ ཨུཔསཾཧརཎཏོཏི པརེཧི མཏེཧི སདྡྷིཾ ‘‘ཏེཔི ནཱམ མཏཱ, ཀིམངྒཾ ¶ པན མཱདིསཱ’’ཏི ཨཏྟནོ མརཎསྶ ཨུཔནཡནཏོ. ཡསམཧཏྟཏོཏི པརིཝཱརམཧཏྟཏོ, ཝིབྷཝམཧཏྟཏོ ཙ. པུཉྙམཧཏྟཏོཏི མཧཱཔུཉྙབྷཱཝཏོ. ཐཱམམཧཏྟཏོཏི ཝཱིརིཡབལམཧཏྟཏོ. ཡུདྷིཊྛིལོ དྷམྨཔུཏྟོ. ཙཱནུརོ ཡོ བལདེཝེན ནིབྦུདྡྷཾ ཀཏྭཱ མཱརིཏོ.

སཧ ཨིདྡྷཱིཧཱིཏི ཝེཛཡནྟཀམྤནནནྡོཔནནྡདམནཱདཱིསུ དིཊྛཱནུབྷཱཝཱཧི ཨཏྟནོ ཨིདྡྷཱིཧི སདྡྷིཾ མཙྩུམུཁཾ པཝིཊྛོ.

ཀལཾ ནགྒྷནྟི སོལ༹སིནྟི སོལ༹སནྣཾ པཱུརཎབྷཱགཾ ན ཨགྒྷནྟི. ཨིདཾ ཝུཏྟཾ ཧོཏི – ཨཱཡསྨཏོ ཐེརསྶ སཱརིཔུཏྟསྶ པཉྙཾ སོལ༹སབྷཱགེ ཀཏྭཱ ཏཏོ ཨེཀཾ བྷཱགཾ སོལ༹སདྷཱ གཧེཏྭཱ ལདྡྷཾ ཨེཀབྷཱགསངྑཱཏཾ ཀལཾ སམྨཱསམྦུདྡྷཾ ཋཔེཏྭཱ ཨཉྙེསཾ སཏྟཱནཾ པཉྙཱ ན ཨགྒྷནྟཱིཏི.

སབྦསྶཱཔི སཾཀིལེསཔཀྑསྶ སམུགྒྷཱཏོ ཉཱཡེན ཨཱརདྡྷཝཱིརིཡསྶ ཧོཏཱིཏི ཨཱཧ ‘‘ཉཱཎཝཱིརིཡབལེནཱ’’ཏི. སམྨཱདིཊྛིསམྨཱཝཱཡཱམེསུ ཧི སིདྡྷེསུ ཨཊྛངྒིཀོ ཨརིཡམགྒོ སིདྡྷོཝ ཧོཏཱིཏི. ཨེཀཱཀཱིབྷཱཝེན ཁགྒཝིསཱཎཀཔྤཱ. པརཏོགྷོསེན ཝིནཱ སཡམེཝ བྷཱུཏཱ པཊིཝིདྡྷཱཀུཔྤཱཏི སཡམྦྷུནོ.

ཧཏྠགཏསུཝཎྞཝལཡཱནཾ ཨཉྙམཉྙཾ སངྒྷཊྚནཾ ཝཾསཀལཱི༹རསྶ ཀཏྠཙི ཨསཏྟཏཱཏི ཨེཝམཱདིཀཾ ཏཾ ཏཾ ནིམིཏྟཾ ཀཱརཎཾ ཨཱགམྨ. ཝཱིམཾསནྟཱཏི པཝཏྟིནིཝཏྟིཡོ ཨུཔཔརིཀྑནྟཱ. མཧནྟཱནཾ སཱིལཀྑནྡྷཱདཱིནཾ ཨེསནཊྛེན མཧེསཡོ. ཨེཀཙརིཡནིཝཱསེནཱཏི ཨེཀཙརིཡནིཝཱསམཏྟེན, ན སཱིལཱདིནཱ. ཁགྒམིགསིངྒསམཱ ཨུཔམཱ ཡེསཾ, ཁགྒམིགསིངྒཾ ཝཱ སམཱུཔམཱ ཡེསཾ ཏེ ཁགྒསིངྒསམཱུཔམཱ.

ཏམྦནཁཏུངྒནཁཏཱདིཨསཱིཏིཨནུབྱཉྫནཔཊིམཎྜིཏེཧི སུཔྤཏིཊྛིཏཔཱདཏཱདཱིཧི དྭཏྟིཾསཱཡ མཧཱཔུརིསལཀྑཎེཧི ཝིཙིཏྲོ ཨཙྪརིཡབྦྷུཏོ རཱུཔཀཱཡོ ཨེཏསྶཱཏི ཨསཱིཏི…པེ… རཱུཔཀཱཡོ. སཧ ཝཱསནཱཡ སབྦེསཾ ཀིལེསཱནཾ ¶ པཧཱིནཏྟཱ སབྦཱཀཱརཔརིསུདྡྷསཱིལཀྑནྡྷཱདིགུཎརཏནེཧི སམིདྡྷོ དྷམྨཀཱཡོ ཨེཏསྶཱཏི སབྦཱཀཱར…པེ… དྷམྨཀཱཡོ. ཋཱནསོཏི ཏངྑཎེཡེཝ.

ཨེཝཾ ¶ མཧཱནུབྷཱཝསྶཱཏི ཨེཝཾ ཡཐཱཝུཏྟརཱུཔཀཱཡསམྤཏྟིཡཱ, དྷམྨཀཱཡསམྤཏྟིཡཱ ཙ ཝིཉྙཱཡམཱནཝིཔུལཱཔརིམེཡྻབུདྡྷཱནུབྷཱཝསྶ, ཝསཾ ནཱགཏཾ ཨནུཔགམནཝསེནཱཏི ཨདྷིཔྤཱཡོ.

མརཎཾ སཱམཉྙཾ ཨེཏསྶཱཏི མརཎསཱམཉྙོ, ཏསྶ བྷཱཝོ མརཎསཱམཉྙཏཱ, ཏཱཡ.

༡༧༢. ཀིམིཀུལཱནནྟི ཀིམིསམཱུཧཱནཾ, ཀིམིཛཱཏཱིནཾ ཝཱ. ཛཱིཡནྟཱིཏི ཛརཾ པཱཔུཎནྟི.

ནིཀྑནྟེཏི ཝཱིཏིཝཏྟེ. པཊིཧིཏཱཡཱཏི པཙྩཱནུགཏཱཡ. སོ མམསྶ ཨནྟརཱཡོཏི སཱ ཡཐཱཝུཏྟཱ ན ཀེཝལཾ ཀཱལཀིརིཡཱཝ, ཨཐ ཁོ མམ ཨཏིདུལླབྷཾ ཁཎཾ ལབྷིཏྭཱ ཋིཏསྶ སཏྠུསཱསནམནསིཀཱརསྶ ཨནྟརཱཡོ ཨསྶ བྷཝེཡྻ. བྱཱཔཛྫེཡྻཱཏི ཝིཔཏྟིཾ གཙྪེཡྻ. སཏྠཀེན ཝིཡ ཨངྒཔཙྩངྒཱནཾ ཀནྟནཀཱ མརཎཀཱལེ སནྡྷིབནྡྷནཙྪེདནཀཝཱཏཱ སཏྠཀཝཱཏཱ.

༡༧༣. ཨབལནྟི བལཧཱིནཾ. དུབྦལནྟི ཏསྶེཝ ཝེཝཙནཾ. ཨབྷཱཝཏྠོ ཧི ཨཡཾ དུ-སདྡོ ‘‘དུསྶཱིལོ (ཨ. ནི. ༥.༢༡༣; ཨ. ནི. ༡༠.༧༥) དུཔྤཉྙོ’’ཏིཨཱདཱིསུ (མ. ནི. ༡.༤༤༩) ཝིཡ. ཏདེཏཾ ཨཱཡུ. ཨསྶཱསཔསྶཱསཱནཾ སམཝུཏྟིཏཱ ཨཔརཱཔརཾ པཝེསནིཀྑམོཝ. བཧི ནིཀྑནྟནཱསིཀཝཱཏེ ཨནྟོ ཨཔཝིསནྟེ, པཝིཊྛེ ཝཱ ཨནིཀྑམནྟེཏི ཨེཀསྶེཝ པཝེསནིཀྑམོ ཝིཡ ཝུཏྟཾ, ཏཾ ནཱསིཀཝཱཏབྷཱཝསཱམཉྙེནཱཏི དཊྛབྦཾ. ཨདྷིམཏྟཏཱཡ ཨཙྩཱསནྣཨདྷིཊྛཱནཱདིནཱ. ཏདབྷཱཝོ ཧི ཨིརིཡཱཔཐཱནཾ སམཝུཏྟིཏཱ. ཨཏིསཱིཏེན ཨབྷིབྷཱུཏསྶ ཀཱཡསྶ ཝིཔཛྫནཾ མཧིཾསརཊྛཱདཱིསུ ཧིམཔཱཏཀཱལེན དཱིཔེཏབྦཾ. ཏཏྠ ཧི སཏྟཱ སཱིཏེན བྷིནྣསརཱིརཱ ཛཱིཝིཏཀྑཡཾ པཱཔུཎནྟི. ཨཏིཨུཎྷེན ཨབྷིབྷཱུཏསྶ ཝིཔཛྫནཾ མརུཀནྟཱརེ ཨུཎྷཱབྷིཏཏྟཱཡ པཙྪིཾ, ཏཏྠ ཋཔིཏཾ ཨུཔརི སཱཊཀཾ, པུཏྟཉྩ ཨཀྐམིཏྭཱ མཏཱཡ ཨིཏྠིཡཱ དཱིཔེཏབྦཾ. མཧཱབྷཱུཏཱནཾ སམཝུཏྟིཏཱ པཀོཔཱབྷཱཝོ ¶ . པཐཝཱིདྷཱཏུཨཱདཱིནཾ པཀོཔེན སརཱིརསྶ ཝིཀཱརཱཔཏྟི པརཏོ དྷཱཏུཀམྨཊྛཱནཀཐཱཡཾ ཨཱགམིསྶཏི. ཡུཏྟཀཱལེཏི བྷུཉྫིཏུཾ ཡུཏྟཀཱལེ ཁུདྡཱབྷིབྷཱུཏཀཱལེ.

༡༧༤. ཨཝཝཏྠཱནཏོཏི ཀཱལཱདིཝསེན ཝཝཏྠཱནཱབྷཱཝཏོ. ཝཝཏྠཱནནྟི ཙེཏྠ པརིཙྪེདོ ཨདྷིཔྤེཏོ, ན ཨསངྐརཏོ ཝཝཏྠཱནཾ, ནིཙྪཡོ ཙཱཏི ཨཱཧ ‘‘པརིཙྪེདཱབྷཱཝཏོ’’ཏི. ན ནཱཡརེཏི ན ཉཱཡནྟི.

ཨིཏོ ¶ པརནྟི ཨེཏྠ པརནྟི པརཾ ཨཉྙཾ ཀཱལནྟི ཨཏྠོ. ཏེན ཨོརཀཱལསྶཱཔི སངྒཧོ སིདྡྷོ ཧོཏི. པརམཱཡུཏོ ཨོརཀཱལཾ ཨེཝ ཙེཏྠ ‘‘པར’’ནྟི ཨདྷིཔྤེཏཾ. ཏཏོ པརཾ སཏྟཱནཾ ཛཱིཝནསྶ ཨབྷཱཝཏོ ‘‘ཝཝཏྠཱནཱབྷཱཝཏོ’’ཏི ཝཏྟུཾ ན སཀྐཱཏི. ཨབྦུདཔེསཱིཏིཨཱདཱིསུ ‘‘ཨབྦུདཀཱལེ པེསིཀཱལེ’’ཏིཨཱདིནཱ ཀཱལ-སདྡོ པཙྩེཀཾ ཡོཛེཏབྦོ. ཀཱལོཏི ཨིདྷ པུབྦཎྷཱདིཝེལཱ ཨདྷིཔྤེཏཱ. ཏེནཱཧ ‘‘པུབྦཎྷེཔི ཧཱི’’ཏིཨཱདི. ཨིདྷེཝ དེཧེན པཏིཏབྦནྟི སམྦནྡྷོ. ཨནེཀཔྤཀཱརཏོཏི ནགརེ ཛཱཏཱནཾ གཱམེ, གཱམེ ཛཱཏཱནཾ ནགརེ, ཝནེ ཛཱཏཱནཾ ཛནཔདེ, ཛནཔདེ ཛཱཏཱནཾ ཝནེཏིཨཱདིནཱ ཨནེཀཔྤཀཱརཏོ. ཨིཏོ ཙུཏེནཱཏི ཨིཏོ གཏིཏོ ཙུཏེན. ཨིདྷ ཨིམིསྶཾ གཏིཡཾ. ཡནྟཡུཏྟགོཎོ ཝིཡཱཏི ཡཐཱ ཡནྟེ ཡུཏྟགོཎོ ཡནྟཾ ནཱཏིཝཏྟཏི, ཨེཝཾ ལོཀོ གཏིཔཉྩཀནྟི ཨེཏྟཀེན ཨུཔམཱ.

༡༧༥. ཨཔྤཾ ཝཱ བྷིཡྻོཏི ཝསྶསཏཏོ ཨུཔརི ‘‘དས ཝཱ ཝསྶཱནི, ཝཱིསཏི ཝཱ’’ཏིཨཱདིནཱ དུཏིཡཾ ཝསྶསཏཾ ཨཔཱཔུཎནྟོ ཨཔྤཀཾ ཝཱ ཛཱིཝཏཱིཏི ཨཏྠོ. གམནཱིཡོཏི གནྡྷབྦོ ཨུཔཔཛྫནཝསེན. སམྤརཱཡོཏི པརལོཀོ.

ཧཱིལེ༹ཡྻཱཏི པརིབྷཝེཡྻ ན སམྦྷཱཝེཡྻ. ནནྟི ཨཱཡུཾ. སུཔོརིསོཏི སཱདྷུཔུརིསོ པཉྙཝཱ. ཙརེཡྻཱཏི སུཙརིཏཾ ཙརེཡྻ. ཏེནཱཧ ‘‘ཨཱདིཏྟསཱིསོཝཱ’’ཏི.

སཏྟཧི ཨུཔམཱཧཱིཏི –

‘‘སེཡྻཐཱཔི, བྲཱཧྨཎ, ཏིཎགྒེ ཨུསྶཱཝབིནྡུ སཱུརིཡེ ཨུགྒཙྪནྟེ ཁིཔྤཾཡེཝ པཊིཝིགཙྪཏི, ན ཙིརཊྛིཏིཀཾ ཧོཏི. ཨུདཀེ ཨུདཀཔུབྦུལ༹ཾ. ཨུདཀེ ¶ དཎྜརཱཛི. ནདཱི པབྦཏེཡྻཱ དཱུརངྒམཱ སཱིགྷསོཏཱ ཧཱརཧཱརིནཱི. བལཝཱ པུརིསོ ཛིཝ྄ཧགྒེ ཁེལ༹པིཎྜཾ སཾཡཱུཧིཏྭཱ ཨཀསིརེནེཝ ཝམེཡྻ. དིཝསཾ སནྟཏྟེ ཨཡོཀཊཱཧེ མཾསཔེསི པཀྑིཏྟཱ ཁིཔྤཾཡེཝ པཊིཝིགཙྪཏི, ན ཙིརཊྛིཏིཀཱ ཧོཏི. གཱཝཱི ཝཛ྄ཛྷཱ ཨཱགྷཱཏནཾ ནཱིཡམཱནཱ ཡཾ ཡདེཝ པཱདཾ ཨུདྡྷརཏི, སནྟིཀེཝ ཧོཏི ཝདྷསྶ, སནྟིཀེཝ མརཎསྶ, ཨེཝམེཝཾ ཁོ, བྲཱཧྨཎ, གོཝཛ྄ཛྷཱུཔམཾ ཛཱིཝིཏཾ མནུསྶཱནཾ པརིཏྟཾ ལཧུཀཾ བཧུདུཀྑཾ བཧུཔཱཡཱསཾ མནྟཱཡཾ བོདྡྷབྦཾ, ཀཏྟབྦཾ ཀུསལཾ, ཙརིཏབྦཾ བྲཧྨཙརིཡཾ, ནཏྠི ཛཱཏསྶ ཨམརཎ’’ནྟི (ཨ. ནི. ༧.༧༤) –

ཨེཝམཱགཏཱཧི ¶ ཨིམཱཧི སཏྟཧི ཨུཔམཱཧི ཨལངྐཏཾ.

རཏྟིནྡིཝནྟི ཨེཀཾ རཏྟིནྡིཝཾ. བྷགཝཏོ སཱསནནྟི ཨརིཡམགྒཔཊིཝེདྷཱཝཧཾ སཏྠུ ཨོཝཱདཾ. བཧུཾ ཝཏ མེ ཀཏཾ ཨསྶཱཏི བཧུཾ ཝཏ མཡཱ ཨཏྟཧིཏཾ པབྦཛིཏཀིཙྩཾ ཀཏཾ བྷཝེཡྻ. ཏདནྟརནྟི ཏཾ ཁཎཾ ཏཏྟཀཾ ཝེལཾ. ཨེཀཾ པིཎྜཔཱཏནྟི ཨེཀཾ དིཝསཾ ཡཱཔནཔྤཧོནཀཾ པིཎྜཔཱཏཾ. དནྡྷནྟི མནྡཾ ཙིརཱཡ. ཨཝིསྶཱསིཡོ ཨཝིསྶཱསནཱིཡོ.

༡༧༦. ཙིཏྟེ དྷརནྟེཡེཝ སཏྟཱནཾ ཛཱིཝིཏཝོཧཱརོ, ཙིཏྟསྶ ཙ ཨཏིཨིཏྟརོ ཁཎོ ལཧུཔརིཝཏྟིབྷཱཝཏོ. ཡཐཱཧ བྷགཝཱ ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི, ཡཾ ཨེཝཾ ལཧུཔརིཝཏྟཾ, ཡཐཡིདཾ ཙིཏྟ’’ནྟི (ཨ. ནི. ༡.༤༨; ཀཐཱ. ༣༣༥). ཏསྨཱ སཏྟཱནཾ ཛཱིཝིཏཾ ཨེཀཙིཏྟཀྑཎིཀཏྟཱ ལཧུསཾ ཨིཏྟརནྟི དསྶེནྟོ ‘‘པརམཏྠཏོ’’ཏིཨཱདིམཱཧ. ཏཏྠ ‘‘པརམཏྠཏོ’’ཏི ཨིམིནཱ ཡཱཡཾ ‘‘ཡོ ཙིརཾ ཛཱིཝཏི, སོ ཝསྶསཏ’’ནྟིཨཱདིནཱ སཏྟཱནཾ (དཱི. ནི. ༢.༧; སཾ. ནི. ༡.༡༤༥; ཨ. ནི. ༧.༧༤) ཛཱིཝིཏཔྤཝཏྟི ཝུཏྟཱ, སཱ པབནྡྷཝིསཡཏྟཱ ཝོཧཱརཝསེནཱཏི ཏཾ པཊིཀྑིཔཏི. ‘‘ཨཏིཔརིཏྟོ’’ཏི ཨིམིནཱ –

‘‘སེཡྻཐཱཔི, བྷིཀྑཝེ, ཙཏྟཱརོ དལ༹ྷདྷམྨཱ དྷནུགྒཧཱ སུསིཀྑིཏཱ ཀཏཧཏྠཱ ཀཏཱུཔཱསནཱ ཙཏུདྡིསཱ ཋིཏཱ ཨསྶུ, ཨཐ པུརིསོ ཨཱགཙྪེཡྻ ‘ཨཧཾ ཨིམེསཾ…པེ… ཀཏཱུཔཱསནཱནཾ ཙཏུདྡིསཱ ཀཎྜེ ཁིཏྟེ ཨཔྤཏིཊྛིཏེ པཐཝིཡཾ གཧེཏྭཱ ཨཱཧརིསྶཱམཱི’ཏི. ཡཐཱ ¶ ཙ, བྷིཀྑཝེ, ཏསྶ པུརིསསྶ ཛཝོ, ཡཐཱ ཙ ཙནྡིམསཱུརིཡཱནཾ ཛཝོ, ཏཏོ སཱིགྷཏརོ. ཡཐཱ ཙ, བྷིཀྑཝེ, ཏསྶ པུརིསསྶ ཛཝོ, ཡཐཱ ཙ ཙནྡིམསཱུརིཡཱནཾ ཛཝོ, ཡཐཱ ཙ ཡཱ དེཝཏཱ ཙནྡིམསཱུརིཡཱནཾ པུརཏོ དྷཱཝནྟི, ཏཱསཾ དེཝཏཱནཾ ཛཝོ, ཏཏོ སཱིགྷཏརཾ ཨཱཡུསངྑཱརཱ ཁཱིཡནྟཱི’’ཏི (སཾ. ནི. ༢.༢༢༨) –

ཨེཝཾ ཝུཏྟཾ པརིཏྟམྤི པཊིཀྑིཔཏི. ཏཏྲ ཧི གམནསྶཱདཱནཾ དེཝཔུཏྟཱནཾ ཧེཊྛུཔརིཡེན པཊིམུཁཾ དྷཱཝནྟཱནཾ སིརསི, པཱདེ ཙ བདྡྷཁུརདྷཱརཱསནྣིཔཱཏཏོཔི པརིཏྟཀོ རཱུཔཛཱིཝིཏིནྡྲིཡསྶ སོ ཁཎོ ཝུཏྟོ, ཙིཏྟསྶ པན ཨཏིཝིཡ པརིཏྟཏརོ, ཡསྶ ཨུཔམཱཔི ནཏྠི. ཏེནེཝཱཧ ‘‘ཡཱཝཉྩིདཾ, བྷིཀྑཝེ, ཨུཔམཱཔི ན སུཀརཱ, ཡཱཝ ལཧུཔརིཝཏྟཾ ཙིཏྟ’’ནྟི (ཨ. ནི. ༡.༤༨). ཛཱིཝིཏཀྑཎོཏི ཛཱིཝནཀྑཎོ. ཨེཀཙིཏྟཔྤཝཏྟིམཏྟོཡེཝ ཨེཀསྶ ཙིཏྟསྶ པཝཏྟིམཏྟེནེཝ ¶ སཏྟཱནཾ པརམཏྠཏོ ཛཱིཝནཀྑཎསྶ པརིཙྪིནྣཏྟཱ. ཨིདཱནི ཏམཏྠཾ ཨུཔམཱཡ པཀཱསེནྟོ ‘‘ཡཐཱ ནཱམཱ’’ཏིཨཱདིམཱཧ. ཏཏྠ པཝཏྟམཱནནྟི པཝཏྟནྟཾ. ཨེཀཙིཏྟཀྑཎིཀནྟི ཨེཀཙིཏྟཀྑཎམཏྟཝནྟཾ. ཏསྨིཾ ཙིཏྟེ ནིརུདྡྷམཏྟེཏི ཡེན ཝཏྟམཱནཙིཏྟཀྑཎེན ‘‘ཛཱིཝཏཱི’’ཏི ཝུཙྩཏི, ཏསྨིཾ ཙིཏྟེ ནིརོདྷཾ བྷངྒཾ པཏྟམཏྟེ ཏཾསམངྒཱི སཏྟོ ནིརུདྡྷོ མཏོཏི ཝུཙྩཏི. ཝུཏྟམེཝཏྠཾ པཱལི༹ཡཱ ཝིབྷཱཝེཏུཾ ‘‘ཡཐཱཧཱ’’ཏིཨཱདི ཝུཏྟཾ. ཏེན ཏཱིསུཔི ཀཱལེསུ སཏྟཱནཾ པརམཏྠཏོ ཛཱིཝནཾ ནཱམ ཙིཏྟཀྑཎཝསེནེཝཱཏི དསྶེཏི.

ཛཱིཝིཏནྟི ཛཱིཝིཏིནྡྲིཡཾ. སུཁདུཀྑཱཏི སུཁདུཀྑཝེདནཱ. ཨུཔེཀྑཱཔི ཧི སུཁདུཀྑཱསུ ཨེཝ ཨནྟོགདྷཱ ཨིཊྛཱནིཊྛབྷཱཝཏོ. ཨཏྟབྷཱཝོཏི ཛཱིཝིཏཝེདནཱཝིཉྙཱཎཱནི ཋཔེཏྭཱ ཨཝསིཊྛདྷམྨཱ ཝུཏྟཱ. ཀེཝལཱཏི ཨཏྟནཱ, ནིཙྩབྷཱཝེན ཝཱ ཨཝོམིསྶཱ. ཨེཀཙིཏྟསམཱཡུཏྟཱཏི ཨེཀེཀེན ཙིཏྟེན སཧིཏཱ. ལཧུསོ ཝཏྟཏི ཁཎོཏི ཝུཏྟནཡེན ཨེཀཙིཏྟཀྑཎིཀཏཱཡ ལཧུཀོ ཨཏིཨིཏྟརོ ཛཱིཝིཏཱདཱིནཾ ཁཎོ ཝཏྟཏི.

ཡེ ནིརུདྡྷཱ མརནྟསྶཱཏི ཙཝནྟསྶ སཏྟསྶ ཙུཏིཏོ ཨུདྡྷཾ ‘‘ནིརུདྡྷཱ’’ཏི ཝཏྟབྦཱ ཡེ ཁནྡྷཱ. ཏིཊྛམཱནསྶ ཝཱ ཨིདྷཱཏི ཡེ ཝཱ ཨིདྷ པཝཏྟིཡཾ ཏིཊྛནྟསྶ དྷརནྟསྶ བྷངྒཔྤཏྟིཡཱ ནིརུདྡྷཱ ཁནྡྷཱ. སབྦེཔི སདིསཱ ཏེ སབྦེཔི ཨེཀསདིསཱ. ཀཐཾ? གཏཱ ཨཔྤཊིསནྡྷིཀཱ པུན ཨཱགནྟྭཱ པཊིསནྡྷཱནཱབྷཱཝེན ཝིགཏཱ. ཡཐཱ ¶ ཧི ཙུཏིཁནྡྷཱ ན ནིཝཏྟནྟི, ཨེཝཾ ཏཏོ པུབྦེཔི ཁནྡྷཱ, ཏསྨཱ ཨེཀཙིཏྟཀྑཎིཀཾ སཏྟཱནཾ ཛཱིཝིཏནྟི ཨདྷིཔྤཱཡོ.

ཨནིབྦཏྟེན ན ཛཱཏོཏི ཨནུཔྤནྣེན ཙིཏྟེན ཛཱཏོ ན ཧོཏི ཨཛཱཏོ ནཱམ ཧོཏི. པཙྩུཔྤནྣེན ཝཏྟམཱནེན ཙིཏྟེན ཛཱིཝཏི ཛཱིཝམཱནོ ནཱམ ཧོཏི. ཙིཏྟབྷངྒཱ མཏོ ལོཀོཏི ཙུཏིཙིཏྟསྶ ཝིཡ སབྦསྶཔི ཏསྶ ཏསྶ ཙིཏྟསྶ བྷངྒཔྤཏྟིཡཱ ཨཡཾ ལོཀོ པརམཏྠཏོ མཏོ ནཱམ ཧོཏི ནིརུདྡྷསྶ ཨཔྤཊིསནྡྷིཀཏྟཱ. ཨེཝཾ སནྟེཔི པཉྙཏྟི པརམཏྠིཡཱ ཡཱ ཏཾ ཏཾ དྷརནྟཾ ཙིཏྟཾ ཨུཔཱདཱཡ ‘‘ཏིསྶོ ཛཱིཝཏི, ཕུསྶོ ཛཱིཝཏཱི’’ཏི ཝཙནཔྤཝཏྟིཡཱ ཝིསཡབྷཱུཏཱ སནྟཱནཔཉྙཏྟི, སཱ ཨེཏྠ པརམཏྠིཡཱ པརམཏྠབྷཱུཏཱ. ཏཐཱ ཧི ཝདནྟི ‘‘ནཱམགོཏྟཾ ན ཛཱིརཏཱི’’ཏི (སཾ. ནི. ༡.༧༦).

༡༧༧. ཨཉྙཏརཉྙཏརེན ཨཱཀཱརེན. ཙིཏྟནྟི ཀམྨཊྛཱནཱརམྨཎཾ ཙིཏྟཾ. ཨཱསེཝནཾ ལབྷཏཱིཏི བྷཱཝནཱསེཝནཾ ¶ ལབྷཏི, བཧིདྡྷཱ ཝིཀྑེཔཾ པཧཱཡ ཨེཀཏྟཝསེན མརཎཱརམྨཎམེཝ ཧོཏཱིཏི. ཏེནཱཧ ‘‘མརཎཱརམྨཎཱ སཏི སནྟིཊྛཏཱི’’ཏི. སབྷཱཝདྷམྨཱནཾ བྷེདོ སབྷཱཝདྷམྨགཏིཀོ ཨེཝཱཏི ཨཱཧ ‘‘སབྷཱཝདྷམྨཏྟཱ པན ཨཱརམྨཎསྶཱ’’ཏི. ཏེནཱཧ བྷགཝཱ ‘‘ཛརཱམརཎཾ, བྷིཀྑཝེ, ཨནིཙྩཾ སངྑཏཾ པཊིཙྩསམུཔྤནྣ’’ནྟིཨཱདི (སཾ. ནི. ༢.༢༠). སཾཝེཛནཱིཡཏྟཱཏི སཾཝེགཛནནཏོ མཧཱབྷཱུཏེསུ མཧཱཝིཀཱརཏཱ ཝིཡ གཡ྄ཧམཱནཱ མརཎཾ ཨནུསྶརིཡམཱནཾ ཨུཔརཱུཔརི ཨུབྦེགམེཝ ཨཱཝཧཏཱིཏི ཏཏྠ ན བྷཱཝནཱཙིཏྟཾ ཨཔྤེཏུཾ སཀྐོཏི. ཡདི སབྷཱཝདྷམྨཏྟཱ ཨཔྤནཾ ན པཱཔུཎཱཏི, ལོཀུཏྟརཛ྄ཛྷཱནཾ ཨེཀཙྩཱནི ཨརཱུཔཛ྄ཛྷཱནཱནི ཙ ཀཐནྟི ཨཱཧ ‘‘ལོཀུཏྟརཛ྄ཛྷཱནཾ པནཱ’’ཏིཨཱདི. ཝིསུདྡྷིབྷཱཝནཱནུཀྐམཝསེནཱཏི ཧེཊྛིམཝིསུདྡྷིཡཱ ཨཱནུབྷཱཝེན ཨདྷིགཏཱཏིསཡཱཡ པཊིཔདཱཉཱཎདསྶནཝིསུདྡྷིབྷཱཝནཱཡ, སབྦསངྑཱརེཧི ནིབྦིནྡནཝིརཛྫནཱདིཝིསཾཡོགཱདྷིམུཏྟིཨཔྤནཱཡ ཙ པཊིཔཀྑབྷཱུཏཱནཾ པཱཔདྷམྨཱནཾ ཝིགམོཏི ཨེཝཾབྷཱུཏསྶ ཝིསུདྡྷིབྷཱཝནཱནུཀྐམསྶ ཝསེན ལོཀུཏྟརཛ྄ཛྷཱནཾ ཨཔྤནཱཔྤཏྟམེཝ ཧོཏི. ཨཱརམྨཎསམཏིཀྐམནམཏྟཾ ཏཏྠ ཧོཏཱིཏི ཨཉྙེསཾ སབྷཱཝདྷམྨཱརམྨཎཀམྨཊྛཱནཱནཾ ཝིཡ ཙིཏྟསྶ སམཱདྷཱནེ བྱཱཔཱརོ ནཏྠི. ཡཐཱསམཱཧིཏེན པན ཙིཏྟེན ཨཱརམྨཎསམཏིཀྐམནམཏྟམེཝ བྷཱཝནཱཡ ཀཱཏབྦཾ, ཏསྨཱ སབྷཱཝདྷམྨེཔི ཨཱརུཔྤཛ྄ཛྷཱནཾ ཨཔྤེཏཱིཏི.

སཏཏཾ ¶ ཨཔྤམཏྟོ ཧོཏི སཾཝེགབཧུལཏྟཱ, ཏཏོ ཨེཝསྶ སབྦབྷཝེསུ ཨནབྷིརཏིསཉྙཱཔཊིལཱབྷོ. ཛཱིཝིཏནིཀནྟིཾ ཛཧཱཏི མརཎསྶ ཨཝསྶཾབྷཱཝིཏཱདསྶནཏོ. པཱཔགརཧཱི ཧོཏི ཨནིཙྩསཉྙཱཔཊིལཱབྷཏོ, ཏཏོ ཨེཝ ཨསནྣིདྷིབཧུལཏཱ, ཝིགཏམལམཙྪེརཏཱ ཙ. ཏདནུསཱརེནཱཏི ཨནིཙྩསཉྙཱཔརིཙཡཱནུསཱརེན. ཨབྷཱཝིཏམརཎཱཏི ཨབྷཱཝིཏམརཎཱནུསྶརཎཱ. ཨབྷཡོ ཨསམྨཱུལ༹ྷོ ཀཱལཾ ཀརོཏི པགེཝ མརཎསཉྙཱཡ སཱུཔཊྛིཏཏྟཱ.

ཀཱཡགཏཱསཏིཀཐཱཝཎྞནཱ

༡༧༨. བུདྡྷཱ ཨུཔྤཛྫནྟི ཨེཏྠཱཏི བུདྡྷུཔྤཱདོ, བུདྡྷཱནཾ ཨུཔྤཛྫནཀཱལོ, ཏསྨཱ. ཨཉྙཏྲ ཏཾ ཋཔེཏྭཱ, ཨཉྙསྨིཾ ཀཱལེཏི ཨཏྠོ. ན པཝཏྟཔུབྦནྟི ཨཔཝཏྟཔུབྦཾ. ཏཏོ ཨེཝ སབྦཏིཏྠིཡཱནཾ ཨཝིསཡབྷཱུཏཾ. ནནུ ཙ སུནེཏྟསཏྠཱརཱདཡོ (ཨ. ནི. ༦.༥༤; ༧.༦༦, ༧༣), ཨཉྙེ ཙ ཏཱཔསཔརིབྦཱཛཀཱ སརཱིརཾ ‘‘ཨསུབྷ’’ནྟི ཛཱནིཾསུ. ཏཐཱ ཧི སུམེདྷཏཱཔསེན སརཱིརཾ ཛིགུཙྪནྟེན ཝུཏྟཾ –

‘‘ཡནྣཱུནིམཾ ¶ པཱུཏིཀཱཡཾ, ནཱནཱཀུཎཔཔཱུརིཏཾ;

ཚཌྜཡིཏྭཱན གཙྪེཡྻཾ, ཨནཔེཀྑོ ཨནཏྠིཀོ’’ཏི. (བུ. ཝཾ. ༢.༨) –

ཨཱདི. ཀཱམཾ བོདྷིསཏྟཱ, ཨཉྙེ ཙ ཏཱཔསཱདཡོ སརཱིརཾ ‘‘ཨསུབྷ’’ནྟི ཛཱནནྟི, ཀམྨཊྛཱནབྷཱཝེན པན ན ཛཱནནྟི. ཏེན ཝུཏྟཾ ‘‘ཨཉྙཏྲ བུདྡྷུཔྤཱདཱ’’ཏིཨཱདི. སཾཝེགཱཡ སཾཝཏྟཏི ཡཱཐཱཝཏོ ཀཱཡསབྷཱཝཔྤཝེདནཏོ. ཨཏྠཱཡཱཏི དིཊྛདྷམྨིཀཱདིཨཏྠཱཡ. ཡོགཀྑེམཱཡཱཏི ཙཏཱུཧི ཡོགེཧི ཁེམབྷཱཝཱཡ. སཏིསམྤཛཉྙཱཡཱཏི སབྦཏྠ སཏིཨཝིཔྤཝཱསཱཡ ཙ སཏྟཊྛཱནིཡསམྤཛཉྙཱཡ ཙ. ཉཱཎདསྶནཔཊིལཱབྷཱཡཱཏི ཝིཔསྶནཱཉཱཎཱདྷིགམཱཡ. ཝིཛྫཱཝིམུཏྟིཕལསཙྪིཀིརིཡཱཡཱཏི ཏིསྶོ ཝིཛྫཱ, ཙིཏྟསྶ ཨདྷིམུཏྟི ནིབྦཱནཾ, ཙཏྟཱརི སཱམཉྙཕལཱནཱིཏི ཨེཏེསཾ པཙྩཀྑཀརཎཱཡ. ཨམཏསྶ ནིབྦཱནསྶ ཨདྷིགམཧེཏུཏཱཡ, ཨམཏསདིསཱཏཔྤཀསུཁསཧིཏཏཱཡ ཙ ཀཱཡགཏཱསཏི ‘‘ཨམཏ’’ནྟི ཝུཏྟཱ. པརིབྷུཉྫནྟཱིཏི ཛྷཱནསམཱཔཛྫནེན ཝལ༹ཉྫནྟི. པརིཧཱིནནྟི ཛིནཾ. ཝིརདྡྷནྟི ཨནདྷིགམེན ཝིརཛ྄ཛྷིཏཾ. ཨཱརདྡྷནྟི སཱདྷིཏཾ ནིཔྥཱདིཏཾ. ཨནེཀེཧི ཨཱཀཱརེཧི ཏེསུ ཏེསུ སུཏྟནྟེསུ པསཾསིཏྭཱ ཡཾ ཏཾ ཀཱཡགཏཱསཏིཀམྨཊྛཱནཾ ནིདྡིཊྛནྟི སམྦནྡྷོ ¶ . ཀཏྠ པན ནིདྡིཊྛནྟི? ཀཱཡགཏཱསཏིསུཏྟེ (མ. ནི. ༣.༡༥༣ ཨཱདཡོ). ཏཏྠ ཧི ‘‘ཀཐཾ བྷཱཝིཏཱ ཙ བྷིཀྑཝེ’’ཏིཨཱདིནཱ ཨཡཾ དེསནཱ ཨཱགཏཱ. ཏཏྲཱཡཾ སངྑེཔཏྠོ – བྷིཀྑཝེ, ཀེན པཀཱརེན ཀཱཡགཏཱསཏིབྷཱཝནཱ བྷཱཝིཏཱ, ཀེན ཙ པཀཱརེན པུནཔྤུནཾ ཀཏཱ ཨཱནཱཔཱནཛ྄ཛྷཱནཱདཱིནཾ ནིཔྥཏྟིཡཱ མཧཔྥལཱ, ཏེསཾ ཏེསཾ ཝིཛྫཱབྷཱགིཡཱནཾ, ཨབྷིཉྙཱསཙྪིཀརཎཱིཡཱནཉྩ དྷམྨཱནཾ, ཨརཏིརཏིསཧནཏཱདཱིནཉྩ སཾསིདྡྷིཡཱ མཧཱནིསཾསཱ ཙ ཧོཏཱིཏི? ཨཱནཱཔཱནཔབྦནྟི ཨཱནཱཔཱནཀམྨཊྛཱནཱཝདྷི. ཨེས ནཡོ སེསེསུཔི.

དྷཱཏུམནསིཀཱརཀམྨཊྛཱནེན ཡདིཔི ཨུཔཙཱརསམཱདྷི ཨིཛ྄ཛྷཏི, སམྨསནཝཱརོ པན ཏཏྠ སཱཏིསཡོཏི དྷཱཏུམནསིཀཱརཔབྦམྤི ‘‘ཝིཔསྶནཱཝསེན ཝུཏྟ’’ནྟི ཝུཏྟཾ. ‘‘ཨཡམྤི ཁོ ཀཱཡོ ཨེཝཾདྷམྨོ ཨེཝཾབྷཱཝཱི ཨེཝཾཨནཏཱིཏོ’’ཏི (དཱི. ནི. ༢.༣༧༩; མ. ནི. ༡.༡༡༢) ཏཏྠ ཏཏྠ ཨསུབྷཱནིཙྩཏཱདཱིཧི སདྡྷིཾ ཀཱཡེ ཨཱདཱིནཝསྶ ཝིབྷཱཝནཝསེན དེསནཱཡ ཨཱགཏཏྟཱ ‘‘ནཝསིཝཐིཀ…པེ… ཝུཏྟཱནཱི’’ཏི ཝུཏྟཾ. ཨེཏྠ ཨུདྡྷུམཱཏཀཱདཱིསཱུཏི ཨེཏེསུ སིཝཐིཀཔབྦེསུ ཨཱགཏཨུདྡྷུམཱཏཀཱདཱིསུ. ཨཱནཱཔཱནསྶཏིཝསེནཱཏི ཨཱནཱཔཱནསྶཏིབྷཱཝནཱཝསེན. ཡོ ཨུཔརི ‘‘ཀརཱིསཾ མཏྠལུངྒ’’ནྟི མཏྠལུངྒཀོཊྛཱསོ གཡ྄ཧཏི, ཏཾ ཨིདྷ པཱལི༹ཡཾ (མ. ནི. ༣.༡༥༤) ཨཊྛིམིཉྫེནེཝ སངྒཎྷིཏྭཱ དེསནཱ ཨཱགཏཱཏི དསྶེནྟོ ‘‘མཏྠལུངྒཾ ཨཊྛིམིཉྫེན སངྒཧེཏྭཱ’’ཏི ཨཱཧ ¶ . ཨིདྷཱཏི ཨིམསྨིཾ ཨནུསྶཏིནིདྡེསེ. ཀཱཡཾ གཏཱ, ཀཱཡེ ཝཱ གཏཱ སཏི ཀཱཡགཏཱསཏཱིཏི སཏིསཱིསེན ཨིདཾ དྭཏྟིཾསཱཀཱརཀམྨཊྛཱནཾ ཨདྷིཔྤེཏནྟི ཡོཛནཱ.

༡༧༩. ཙཏུམཧཱབྷཱུཏིཀནྟི ཙཏུམཧཱབྷཱུཏསནྣིསྶཡཾ. པཱུཏིཀཱཡནྟི པཱུཏིབྷཱུཏཾ པརམདུགྒནྡྷཀཱཡཾ. ཋཱནགམནཱཝཏྠཾ སརཱིརཾ སནྡྷཱཡ, ཏསྶ ཝཱ ཨཝཡཝེསུ སབྦཧེཊྛིམཾ པཱདཏལནྟི ཝུཏྟཾ ‘‘ཨུདྡྷཾ པཱདཏལཱ’’ཏི. ཏིརིཡཾ ཏཙཔརིཙྪིནྣནྟི ཨེཏྠ ནནུ ཀེསལོམནཁཱནཾ, ཏཙསྶ ཙ ཨཏཙཔརིཙྪིནྣཏཱ ཨཏྠཱིཏི? ཀིཉྩཱཔི ཨཏྠི, ཏཙཔརིཙྪིནྣབཧུལཏཱཡ པན ཀཱཡསྶ ཏཙཔརིཙྪིནྣཏཱ ཧོཏཱིཏི ཨེཝཾ ཝུཏྟཾ. ཏཙོ པརིཡནྟོ ཨསྶཱཏི ཏཙཔརིཡནྟོཏི ཨེཏེན པན ཝཙནེན ཀཱཡེཀདེསབྷཱུཏོ ཏཙོ གཧིཏོ ཨེཝ, ཏཔྤཊིབདྡྷཱ ཙ ཀེསཱདཡོ ཏདནུཔཝིཊྛམཱུལཱ ཏཙཔརིཡནྟཱཝ ཧོནྟཱིཏི ¶ དྭཏྟིཾསཱཀཱརསམཱུཧོ སབྦོཔི ཀཱཡོ ཏཙཔརིཡནྟོ ཝུཏྟོཏི ཝེདིཏབྦོ.

ཨཏྠཱིཏི ཝཙནཝིཔལླཱསེན ཝུཏྟཾ, ནིཔཱཏཔདཾ ཝཱ ཨེཏཾ. ཏསྨཱ ཏཱིསུཔི སངྑཱསུ ཏདེཝསྶ རཱུཔཾ. ཏེནཱཧ ‘‘སཾཝིཛྫནྟཱི’’ཏི. ཨཀྑརཙིནྟཀེཧི སརཱིརེ ཀཱཡ-སདྡཾ ཝཎྞནྟེཧིཔི ཨསུཙིསམུདཱཡབྷཱཝེནེཝ ཨིཙྪིཏབྦོཏི དསྶེནྟོ ‘‘ཨསུཙིསཉྩཡཏོ’’ཏི ཝཏྭཱ པུན ནཾ ནིརུཏྟིནཡེན དསྶེཏུཾ ‘‘ཀུཙྪིཏཱན’’ནྟིཨཱདི ཝུཏྟཾ. ཏཏྠ ཨཱཡབྷཱུཏཏོཏི ཨུཔྤཏྟིཊྛཱནབྷཱུཏཏྟཱ. ‘‘པཱུརཾ ནཱནཔྤཀཱརསྶཱ’’ཏི ཝུཏྟཾ. ‘‘ཀེ པན ཏེ པཀཱརཱ? ཡེཧི ནཱནཔྤཀཱརཾ ཨསུཙི ཝུཏྟ’’ནྟི ཏེ ཀེསཱདིཀེ དསྶེཏུཾ པཱལི༹ཡཾ ‘‘ཀེསཱ ལོམཱ’’ཏིཨཱདི ཝུཏྟནྟི ཨིམམཏྠཾ དཱིཔེནྟོ ཨཱཧ ‘‘ཨེཏེ ཀེསཱདཡོ དྭཏྟིཾསཱཀཱརཱ’’ཏི. ཨཱཀཱརཱ པཀཱརཱཏི ཧི ཨེཀོ ཨཏྠོཏི. ཨེཝཾ སམྦནྡྷོཏི ‘‘ཨཏྠི ཨིམསྨིཾ ཀཱཡེ ནཁཱ’’ཏིཨཱདིནཱ སབྦཀོཊྛཱསེསུ ‘‘ཨཏྠི ཨིམསྨིཾ ཀཱཡེ’’ཏི པདཏྟཡེན སམྦནྡྷོ ཝེདིཏབྦོ.

པརིཏོཏི ཏིརིཡཾ, སམནྟཏོ ཝཱ པཱདཏལཀེསམཱུལེསུ ཙ ཏཙསྶ ལབྦྷནཏོ. སུཙིབྷཱཝནྟི སུཙིནོ སབྦྷཱཝཾ, སུཙིམེཝ ཝཱ.

༡༨༠. ཡེན ཝིདྷིནཱ ཨུགྒཧེ ཀུསལོ ཧོཏི, སོ སཏྟཝིདྷོ ཝིདྷི ‘‘ཨུགྒཧཀོསལླ’’ནྟི ཝུཙྩཏི, ཏནྣིབྦཏྟཾ ཝཱ ཉཱཎཾ. མནསིཀཱརཀོསལླེཔི ཨེསེཝ ནཡོ.

སཛ྄ཛྷཱཡནྟཱ ཝཱཏི སཛ྄ཛྷཱཡཾ ཀརོནྟཱ ཨེཝ. ཏེསཾ ཀིར ཙཏྟཱརོ མཱསེ སཛ྄ཛྷཱཡནྟཱནཾ སཛ྄ཛྷཱཡམགྒེནེཝ ¶ ཀོཊྛཱསེ ཨུཔདྷཱརེནྟཱནཾ པཊིཔཱཊིཡཱ དྭཏྟིཾསཱཀཱརཱ ཝིབྷཱུཏཏརཱ ཧུཏྭཱ ཁཱཡིཾསུ, པཊིཀྐཱུལསཉྙཱ སཎྛཱསི, ཏེ ཏསྨིཾ ནིམིཏྟེ ཛྷཱནཾ ཨཔྤེཏྭཱ ཛྷཱནཔཱདཀཾ ཝིཔསྶནཾ ཝཌྜྷེཏྭཱ དསྶནམགྒཾ པཊིཝིཛ྄ཛྷིཾསུ. ཏེན ཝུཏྟཾ ‘‘སཛ྄ཛྷཱཡནྟཱ ཝ སོཏཱཔནྣཱ ཨཧེསུ’’ནྟི.

པརིཙྪིནྡིཏྭཱཏི ཏཙཔཉྩཀཱདིཝསེནེཝ པརིཙྪེདཾ ཀཏྭཱ. པཐཝཱིདྷཱཏུབཧུལབྷཱཝཏོ མཏྠལུངྒསྶ ཀརཱིསཱཝསཱནེ ཏནྟིཨཱརོཔནམཱཧ. ཨེཏྠ ཙ མཾསཾ, ནྷཱརུ, ཨཊྛི, ཨཊྛིམིཉྫཾ ཝཀྐཾ, ཝཀྐཾ ཨཊྛིམིཉྫཾ, ཨཊྛི, ནྷཱརུ, མཾསཾ, ཏཙོ, དནྟཱ, ནཁཱ, ལོམཱ, ཀེསཱཏི ཨེཝཾ ཝཀྐཔཉྩཀཱདཱིསུ ཨནུལོམསཛ྄ཛྷཱཡཾ ཝཏྭཱ པཊིལོམསཛ྄ཛྷཱཡོ པུརིམེཧི སམྦནྡྷོ ཝུཏྟོ. སྭཱཡཾ སམྨོཧཝིནོདནིཡཾ ¶ (ཝིབྷ. ཨཊྛ. ༣༥༦) ཝིསུཾ ཏིཔཉྩཱཧཾ, པུརིམེཧི ཨེཀཏོ ཏིཔཉྩཱཧནྟི ཚཔཉྩཱཧཾ སཛ྄ཛྷཱཡོ ཝུཏྟོ, ཏཏྠ ཨཱདིཨནྟདསྶནཝསེན ཝུཏྟོཏི དཊྛབྦོ. ཨནུལོམཔཊིལོམསཛ྄ཛྷཱཡེཔི ཧི པཊིལོམསཛ྄ཛྷཱཡོ ཨནྟིམོ ཧོཏི, སཛ྄ཛྷཱཡཔྤཀཱརནྟརཾ ཝཱ ཨེཏམྤཱིཏི ཝེདིཏབྦཾ.

ཧཏྠསངྑལིཀཱཏི ཨངྒུལིཔནྟིམཱཧ.

མནསཱ སཛ྄ཛྷཱཡོཏི ཙིཏྟེན ཙིནྟནམཱཧ, ཡཾ མཱནསཾ ‘‘ཛཔྤན’’ནྟི ཝུཙྩཏི, སམྨདེཝ ཨཛ྄ཛྷཱཡོཏི ཝཱ སཛ྄ཛྷཱཡོ, ཙིནྟནནྟི ཨཏྠོ. ཙིརཏརཾ སུཊྛུ པཝཏྟནེན པགུཎབྷཱུཏཱ ཀམྨཊྛཱནཏནྟི སམཱཝཛྫིཏྭཱ མནསི ཀརོནྟསྶ ཨཱདིཏོ པཊྛཱཡ ཡཱཝ པརིཡོསཱནཱ ཀཏྠཙི ཨསཛྫམཱནཱ ནིརནྟརམེཝ ཨུཔཊྛཱཏི, ཏདནུསཱརེན ཏདཏྠོཔི ཝིབྷཱུཏཏརོ ཧུཏྭཱ ཁཱཡཏཱིཏི ཨཱཧ ‘‘ཝཙསཱ སཛ྄ཛྷཱཡོ ཧི…པེ… པཊིཝེདྷསྶ པཙྩཡོ ཧོཏཱི’’ཏི. ལཀྑཎཔཊིཝེདྷསྶཱཏི ཨསུབྷལཀྑཎཔཊིཝེདྷསྶ.

པཊིཀྐཱུལསབྷཱཝསལླཀྑཎསྶ ཀསྶཙི ཝཎྞགྒཧཎམུཁེན ཀོཊྛཱསཱ ཝཝཏྠཱནཾ གཙྪནྟི, ཀསྶཙི སཎྛཱནགྒཧཎམུཁེན, ཀསྶཙི དིསཱཝིབྷཱགགྒཧཎམུཁེན, ཀསྶཙི པཏིཊྛིཏོཀཱསགྒཧཎམུཁེན, ཀསྶཙི སབྦསོ པརིཙྪིཛྫགྒཧཎམུཁེནཱཏི ཝཎྞཱདིཏོ སལླཀྑཎཾ ཨུགྒཧཀོསལླཱཝཧཾ ཝུཏྟནྟི ཏཾ དསྶེནྟོ ‘‘ཀེསཱདཱིནཾ ཝཎྞོ ཝཝཏྠཔེཏབྦོ’’ཏིཨཱདིམཱཧ.

ཨཏྟནོ བྷཱགོ སབྷཱགོ, སབྷཱགེན པརིཙྪེདོ སབྷཱགཔརིཙྪེདོ, ཧེཊྛུཔརིཏིརིཡཔརིཡནྟེཧི, སཀོཊྛཱསིཀཀེསནྟརཱདཱིཧི ¶ ཙ པརིཙྪེདོཏི ཨཏྠོ. ཨམིསྶཀཏཱཝསེནཱཏི ཀོཊྛཱསནྟརེཧི ཨཝོམིསྶཀཏཱཝསེན. ཨསབྷཱགོ ཧི ཨིདྷ ‘‘ཝིསབྷཱགོ’’ཏི ཨདྷིཔྤེཏོ, ན ཝིརུདྡྷསབྷཱགོ. སྭཱཡམཏྠོ ཀེསཱདིསདྡཏོ ཨེཝ ལབྦྷཏི. སདྡནྟརཏྠཱཔོཧནཝསེན སདྡོ ཨཏྠཾ ཝདཏཱིཏི ‘‘ཀེསཱ’’ཏི ཝུཏྟེ ‘‘ཨཀེསཱ ན ཧོནྟཱི’’ཏི ཨཡམཏྠོ ཝིཉྙཱཡཏི. ཀེ པན ཏེ ཨཀེསཱ? ལོམཱདཡོ, ན ཙ གྷཊཱདཱིསུ པསངྒོཔཀརཎེནེཝ ཏེསཾ ནིཝཏྟིཏཏྟཱ.

པཊིཀྐཱུལཝསེནེཝ ཀཐིཏཾ དྷཱཏུཝིབྷཱགསྶ སཱམཉྙཏོཔི ཨགཧིཏཏྟཱ. ཏཏྠེཝ ཝིསུཾ དྷཱཏུཀམྨཊྛཱནསྶ ཀཐིཏཏྟཱ ཙ དྷཱཏུཝིབྷངྒོ པཀྐུསཱཏིསུཏྟཾ ¶ (མ. ནི. ༣.༣༤༢) ཝིབྷངྒཔྤཀརཎེ དྷཱཏུཝིབྷངྒཔཱལི༹ (ཝིབྷ. ༡༧༢ ཨཱདཡོ) ཙ. ཡསྶ ཝཎྞཏོ ཨུཔཊྛཱཏི ཀེསཱདི, ཏཾ པུགྒལཾ སནྡྷཱཡ ཛྷཱནཱནི ཀེསཱདཱིསུ ཝཎྞཀསིཎཱརམྨཎཱནི ཝིབྷཏྟཱནི. ཉཏྭཱ ཨཱཙིཀྑིཏབྦནྟི ཡདཏྠཾ ཝུཏྟཾ, ཏཾ དསྶེཏུཾ ‘‘ཏཏྠ དྷཱཏུཝསེནཱ’’ཏིཨཱདི ཝུཏྟཾ. ཨིདྷཱཏི ཨིམསྨིཾ པཊིཀྐཱུལམནསིཀཱརཔབྦེ. ཀཱཡགཏཱསཏིསུཏྟེ (མ. ནི. ༣.༡༥༣ ཨཱདཡོ) ཧི པཊིཀྐཱུལམནསིཀཱརཔབྦཾ གཧེཏྭཱ ཨིདྷ ཀཱཡགཏཱསཏིབྷཱཝནཱ ནིདྡིསཱིཡཏི.

༡༨༡. ན ཨེཀནྟརིཀཱཡཱཏི ཨེཀནྟརིཀཱཡཔི ན མནསི ཀཱཏབྦཾ, པགེཝ དྭནྟརིཀཱདིནཱཏི ཨདྷིཔྤཱཡོ. ན བྷཱཝནཾ སམྤཱདེཏི, ལཀྑཎཔཊིཝེདྷཾ ན པཱཔུཎཱཏི ཨེཀནྟརིཀཱཡ མནསི ཀརོནྟོཏི སམྦནྡྷོ.

ཨོཀྐམནཝིསྶཛྫནནྟི པཊིཔཛྫིཏབྦཝིསྶཛྫེཏབྦེ མགྒེ. པུཙྪིཏྭཱཝ གནྟབྦཾ ཧོཏི གཧེཏབྦཝིསྶཛྫེཏབྦཊྛཱནསྶ ཨསལླཀྑཎཏོ. ཀམྨཊྛཱནཾ པརིཡོསཱནཾ པཱཔུཎཱཏཱིཏི ཨཱདིཏོ པཊྛཱཡ ཡཱཝ པརིཡོསཱནཱ མནསིཀཱརམཏྟཾ ཧོཏཱིཏི ཨདྷིཔྤཱཡོ. ཨཝིབྷཱུཏཾ པན ཧོཏི པཊིཀྐཱུལཱཀཱརསྶ སུཊྛུ ཨསལླཀྑཎཏོ. ཏཏོ ཨེཝ ན ཝིསེསཾ ཨཱཝཧཏི.

ཀམྨཊྛཱནཾ པརིཡོསཱནཾ ན གཙྪཏཱིཏི པཊིཔཱཊིཡཱ སབྦཀོཊྛཱསེ མནསི ཀརོཏོཡེཝ ཝིབྷཱུཏཱ ཧུཏྭཱ ཨུཔཊྛཧནྟི. ཏེ སཱཏིསཡཾ པཱཊིཀྐཱུལཏོ མནསི ཀརོནྟསྶ ཀམྨཊྛཱནཾ པརིཡོསཱནཾ གཙྪེཡྻ, ཨིམསྶ པན ཨཏིཝིཡ དནྡྷཾ མནསི ཀརོཏོ ཝིབྷཱུཏཏོ ཨུཔཊྛཱནམེཝ ནཏྠི, ཀུཏོ པཊིཀྐཱུལཏཱཡ སཎྛཱནཾ. ཏེནཱཧ ‘‘ཝིསེསཱདྷིགམསྶ པཙྩཡོ ན ཧོཏཱི’’ཏི.

བཧིདྡྷཱ ¶ པུཐུཏྟཱརམྨཎེཏི ‘‘ཨསུཙི པཊིཀྐཱུལ’’ནྟི ཀེསཱདཱིསུ པཝཏྟེཏབྦཾ ཨསུབྷཱནུཔསྶནཾ ཧིཏྭཱ སུབྷཱདིཝསེན གཡ྄ཧམཱནཱ ཀེསཱདཡོཔི ཨིདྷ ‘‘བཧིདྡྷཱ པུཐུཏྟཱརམྨཎམེཝཱ’’ཏི ཝེདིཏབྦཱ. རཱུཔཱདཡོ ཧི ནཱིལཱདིཝསེན པུཐུསབྷཱཝཏཱཡ པུཐུཏྟཱརམྨཎཾ ནཱམ, ནཱནཱརམྨཎནྟི ཨཏྠོ. ཨསམཱདྷཱནཾ ཙེཏསོ ཝིརཱུཔོ ཁེཔོཏི ཝིཀྑེཔོ. སོ སཏིཾ སཱུཔཊྛིཏཾ ཀཏྭཱ སཀྐཙྩཾ ཀམྨཊྛཱནཾ མནསི ཀརོནྟེན པཊིབཱཧིཏབྦོ. པརིཧཱཡཏཱིཏི ཧཱཡཏི. པརིདྷཾསཏཱིཏི ཝིནསྶཏི.

ཡཱ ¶ ཨཡཾ ཀེསཱ ལོམཱཏིཨཱདིཀཱ ལོཀསངྐེཏཱནུགཏཱ. པཎྞཏྟཱིཏི ཨཊྛ དྷམྨེ ཨུཔཱདཱཡ པཎྞཏྟི. ཏཾ ཀེསཱདིཔཎྞཏྟིཾ. ཨཏིཀྐམིཏྭཱཏི པཊིཀྐཱུལབྷཱཝནཱཡ ཨཏིཀྐམིཏྭཱ ཨུགྒྷཱཊེཏྭཱ. ཏསྶཱ ཨུགྒྷཱཊིཏཏྟཱ ཏསྨིཾ ཏསྨིཾ ཀོཊྛཱསེ པཊིཀྐཱུལཏོ ཨུཔཊྛཧནྟེ ‘‘པཊིཀྐཱུལ’’ནྟི ཙིཏྟཾ ཋཔེཏབྦཾ. ཨིདཱནི ཏམཏྠཾ ཨུཔམཱཡ ཝིབྷཱཝེནྟོ ‘‘ཡཐཱ ཧཱི’’ཏིཨཱདིམཱཧ. ཏཏྲིདཾ ཨུཔམཱསཾསནྡནཾ – མནུསྶཱ ཝིཡ ཡོགཱཝཙརོ. ཨུདཔཱནཾ ཝིཡ ཀོཊྛཱསཱ. ཏཱལཔཎྞཱདིསཉྙཱཎཾ ཝིཡ ཀེསཱདིཔཉྙཏྟི. ཏེན མནུསྶཱནཾ ཨུདཔཱནེ ནྷཱནཔིཝནཱདི ཝིཡ ཡོགཱཝཙརསྶ པུབྦབྷཱགེ ཀེསཱ ལོམཱཏི པཎྞཏྟིཝསེན མནསིཀཱརོ. ཨབྷིཎྷསཉྩཱརེན མནུསྶཱནཾ སཉྙཱཎེན ཝིནཱ ཨུདཔཱནེ ཀིཙྩཀརཎཾ ཝིཡ ཡོགཱཝཙརསྶ མནསིཀཱརབལེན པཎྞཏྟིཾ ཨཏིཀྐམིཏྭཱ པཊིཀྐཱུལབྷཱཝེཡེཝ ཙིཏྟཾ ཋཔེཏྭཱ བྷཱཝནཱནུཡོགོ. པུབྦབྷཱགེ…པེ… པཱཀཊོ ཧོཏཱིཏི ‘‘ཀེསཱ ལོམཱ’’ཏིཨཱདིནཱ (མ. ནི. ༣.༡༥༤) བྷཱཝནམནུཡུཉྫནྟསྶ ཀེསཱདིཔཉྙཏྟིཡཱ སདྡྷིཾཡེཝ ཀོཊྛཱསཱནཾ པཊིཀྐཱུལབྷཱཝོ པུབྦབྷཱགེ པཱཀཊོ ཧོཏི. ཨཐཱཏི པཙྪཱ བྷཱཝནཱཡ ཝཱིཐིཔཊིཔནྣཀཱལེ. པཊིཀྐཱུལབྷཱཝེཡེཝ ཙིཏྟཾ ཋཔེཏབྦནྟི ཀོཊྛཱསཱནཾ པཊིཀྐཱུལཱཀཱརེཡེཝ བྷཱཝནཱཙིཏྟཾ པཝཏྟེཏབྦཾ.

ཨནུཔུབྦེན མུཉྩནཾ ཨནུཔུབྦམུཉྩནཾ, ཨནུཔཊྛཧནྟསྶ ཨནུཔཊྛཧནྟསྶ མུཉྩནནྟི ཨཏྠོ. ཀཐཾ པན ཨནུཔཊྛཱནཾ ཧོཏཱིཏི ཨཱཧ ‘‘ཨཱདིཀམྨིཀསྶཱ’’ཏིཨཱདི. པརིཡོསཱནཀོཊྛཱསམེཝ ཨཱཧཙྩ ཏིཊྛཏཱིཏི ཨིདཾ ཀམྨཊྛཱནཾ ཏནྟིཨནུསཱརེན ཨཱདིཏོ ཀམྨཊྛཱནམནསིཀཱརོ པཝཏྟཏཱིཏི ཀཏྭཱ ཝུཏྟཾ. ཏཐཱ ཧིསྶ མནསཱ སཛ྄ཛྷཱཡོ ཝིཡ མནསིཀཱརོ ཏེ ཏེ ཀོཊྛཱསེ ཨཱམཊྛམཏྟེ ཀཏྭཱ གཙྪཏི, ན ལཀྑཎསལླཀྑཎཝསེན. ཡདཱ པན ནེ ལཀྑཎསལླཀྑཎཝསེན སུཊྛུ ཨུཔདྷཱརེནྟོ མནསི ཀརོཏི, ཏདཱ ཀེཙི ཨུཔཊྛཧནྟི, ཀེཙི ན ཨུཔཊྛཧནྟི. ཏཏྠ པཊིཔཛྫནཝིདྷིཾ དསྶེནྟོ ‘‘ཨཐསྶཱ’’ཏིཨཱདིམཱཧ. ཏཏྠ ཀམྨནྟི མནསིཀཱརཀམྨཾ ཏཱཝ ཀཱཏབྦཾ. ཀཱིཝ ཙིརནྟི? ཡཱཝ དྭཱིསུ ཨུཔཊྛིཏེསུ, ཏེསམྤི དྭིནྣཾ ཨེཀོ སུཊྛུཏརཾ ཨུཔཊྛཧཏི ཏཱཝ.

ཨུཀྐུཊྛུཀྐུཊྛིཊྛཱནེཡེཝ ¶ ཨུཊྛཧིཏྭཱཏི པུབྦེ ཝིཡ ཨེཀཏྠཀཏཱཡ ཨུཀྐུཊྛིཡཱ ཀམེན སབྦཏཱལེསུ པཏིཏྭཱ ཨུཊྛཧིཏྭཱ ཨུཊྛཧིཏྭཱ པརིཡནྟཏཱལཾ ¶ , ཨཱདིཏཱལཉྩ ཨཱགནྟྭཱ ཏཏོ ཏཏོ ཏཏྠ ཏཏྠེཝ ཀཏཱཡ ཨུཀྐུཊྛིཡཱ ཨུཊྛཧིཏྭཱཏི ཨཏྠོ.

དྭེ བྷིཀྑཱཏི དྭཱིསུ གེཧེསུ ལདྡྷབྷིཀྑཱ.

ཨཔྤནཱཏོཏི ཨཔྤནཱཀཱརཏོ དྭཏྟིཾསཱཀཱརེ ཨཔྤནཱ ཧོནྟི. ཀིཾ པཙྩེཀཾ ཀོཊྛཱསེསུ ཧོཏི ཨུདཱཧུ ཨཉྙཐཱཏི ཝིཙཱརཎཱཡཾ ཨཱཧ ‘‘ཨཔྤནཱཀོཊྛཱསཏོ’’ཏི, ཀོཊྛཱསཏོ ཀོཊྛཱསཏོཏི ཨཏྠོ. ཏེནཱཧ ‘‘ཀེསཱདཱིསཱུ’’ཏིཨཱདི.

ཨདྷིཙིཏྟནྟི སམཐཝིཔསྶནཱཙིཏྟཾ.

ཨནུཡུཏྟེནཱཏི ཡུཏྟཔྤཡུཏྟེན, བྷཱཝེནྟེནཱཏི ཨཏྠོ. ཀཱལེནཀཱལནྟི ཀཱལེ ཀཱལེ. སམཱདྷིནིམིཏྟཾ ཨུཔལཀྑིཏསམཱདྷཱནཱཀཱརོ སམཱདྷི ཨེཝ. མནསི ཀཱཏབྦནྟི ཙིཏྟེ ཀཱཏབྦཾ, ཨུཔྤཱདེཏབྦནྟི ཨཏྠོ. སམཱདྷིཀཱརཎཾ ཝཱ ཨཱརམྨཎཾ སམཱདྷིནིམིཏྟཾ, ཏཾ ཨཱཝཛྫིཏབྦནྟི ཨཏྠོ. པགྒཧནིམིཏྟཨུཔེཀྑཱནིམིཏྟེསུཔི ཨེསེཝ ནཡོ. ཋཱནཾ ཨཏྠཱིཏི ཝཙནསེསོ. ཏཾ བྷཱཝནཱ ཙིཏྟཾ ཀོསཛྫཱཡ སཾཝཏྟེཡྻ, ཨེཏསྶ སཾཝཏྟནསྶ ཋཱནཾ ཀཱརཎཾ ཨཏྠཱིཏི ཨཏྠོ. ཏཾ ཝཱ མནསིཀརཎཙིཏྟཾ ཀོསཛྫཱཡ སཾཝཏྟེཡྻ, ཨེཏསྶ ཋཱནཾ ཀཱརཎཾ ཨཏྠཱིཏི ཨཏྠོ. མུདུནྟི སུབྷཱཝིཏབྷཱཝེན མུདུབྷཱུཏཾ, ཝསཱིབྷཱཝཔྤཏྟནྟི ཨཏྠོ. མུདུཏྟཱ ཨེཝ ཀམྨཉྙཾ ཀམྨཀྑམཾ ཀམྨཡོགྒཾ. པབྷསྶརནྟི ཨུཔཀྐིལེསཝིགམེན པརིསུདྡྷཾ, པརིཡོདཱཏནྟི ཨཏྠོ. ན ཙ པབྷངྒཱུཏི ཀམྨནིཡབྷཱཝཱུཔགམནེན ན ཙ པབྷིཛྫནསབྷཱཝཾ སུདྡྷནྟཾ ཝིཡ སུཝཎྞཾ ཝིནིཡོགཀྑམཾ. ཏེནཱཧ ‘‘སམྨཱ སམཱདྷིཡཏི ཨཱསཝཱནཾ ཁཡཱཡཱ’’ཏི.

ཨུཀྐཾ བནྡྷཏཱིཏི མཱུསཾ སམྤཱདེཏི. ཨཱལིམྤེཏཱིཏི ཨཱདཱིཔེཏི ཛཱལེཏི. ཏཉྩཱཏི ཏཾ པིལ༹ནྡྷནཝིཀཏིསངྑཱཏཾ ཨཏྠཾ པཡོཛནཾ ཨསྶ སུཝཎྞཀཱརསྶ ཨནུབྷོཏི པཧོཏི སཱདྷེཏི. ཨསྶ ཝཱ སུཝཎྞསྶ ཨཏྠཾ སུཝཎྞཀཱརོ ཨནུབྷོཏི པཱཔུཎཱཏི.

ཨབྷིཉྙཱཡ ཨིདྡྷིཝིདྷཱདིཉཱཎེན སཙྪིཀརཎཱིཡསྶ ཨིདྡྷིཝིདྷཔཙྩནུབྷཝནཱདིཀསྶ ཨབྷིཉྙཱ སཙྪིཀརཎཱིཡསྶ ¶ . ཡསྶ པཙྩཀྑཾ ཨཏྠི, སོ སཀྑི. སཀྑིནོ བྷབྦཏཱ སཀྑིབྷབྦཏཱ, སཀྑིབྷཝནནྟི ཝུཏྟཾ ཧོཏི. སཀྑི ཙ སོ ¶ བྷབྦོ ཙཱཏི ཝཱ སཀྑིབྷབྦོ. ཨཡཉྷི ཨིདྡྷིཝིདྷཱདཱིནཾ བྷབྦོ, ཏཏྠ ཙ སཀྑཱིཏི སཀྑིབྷབྦོ, ཏསྶ བྷཱཝོ སཀྑིབྷབྦཏཱ, ཏཾ པཱཔུཎཱཏི. སཏི སཏི ཨཱཡཏནེཏི ཏསྨིཾ ཏསྨིཾ པུབྦཧེཏུཨཱདིཀེ ཀཱརཎེ སཏི.

སཱིཏིབྷཱཝནྟི ནིབྦཱནཾ, ཀིལེསདརཐཝཱུཔསམཾ ཝཱ. ནིགྒཎྷཱཏཱིཏི ཨུདྡྷཊཾ ཙིཏྟཾ ཨུདྡྷཙྩཔཱཏཏོ རཀྑཎཝསེན ནིགྒཎྷཱཏི. པགྒཎྷཱཏཱིཏི ལཱིནཾ ཙིཏྟཾ ཀོསཛྫཔཱཏཏོ རཀྑཎཝསེན པགྒཎྷཱཏི. སམྤཧཾསེཏཱིཏི སམཔྤཝཏྟཾ ཙིཏྟཾ ཏཐཱཔཝཏྟིཡཾ པཉྙཱཡ ཏོསེཏི, ཨུཏྟེཛེཏི ཝཱ. ཡདཱ ཝཱ ནིརསྶཱདཾ ཙིཏྟཾ བྷཱཝནཱཡ ན པཀྑནྡཏི, ཏདཱ ཛཱཏིཨཱདཱིནི སཾཝེགཝཏྠཱུནི (ཨ. ནི. ཨཊྛ. ༡.༡.༤༡༨; ཨིཏིཝུ. ཨཊྛ. ༣༧) པཙྩཝེཀྑིཏྭཱ སམྤཧཾསེཏི སམུཏྟེཛེཏི. ཨཛ྄ཛྷུཔེཀྑཏཱིཏི ཡདཱ པན ཙིཏྟཾ ཨལཱིནཾ ཨནུདྡྷཏཾ སམྨདེཝ བྷཱཝནཱཝཱིཐིཾ ཨོཏིཎྞཾ ཧོཏི, ཏདཱ པགྒཧནིགྒཧསམྤཧཾསནེསུ ཀཉྩི བྱཱཔཱརཾ ཨཀཏྭཱ སམཔྤཝཏྟེསུ ཡུགེསུ སཱརཐི ཝིཡ ཨཛ྄ཛྷུཔེཀྑཏི ཨུཔེཀྑཀོཝ ཧོཏི. པཎཱིཏཱདྷིམུཏྟིཀོཏི པཎཱིཏེ ཨུཏྟམེ མགྒཕལེ ཨདྷིམུཏྟོ ནིནྣཔོཎཔབྦྷཱརོ.

སུགྒཧིཏཾ ཀཏྭཱཏི ཡཐཱཝུཏྟཾ ཨུགྒཧཀོསལླསངྑཱཏཾ ཝིདྷིཾ སུཊྛུ ཨུགྒཧིཏཾ པརིཡཱཔུཎནཱདིནཱ སུཔརིགྒཧིཏཾ ཀཏྭཱ. སུཊྛུ ཝཝཏྠཔེཏྭཱཏི མནསིཀཱརཀོསལླསངྑཱཏཾ ཝིདྷིཾ སམྨདེཝ སལླཀྑཎཝསེན ཨུཔདྷཱརེཏྭཱ. ཝིསེསནྟི པུབྦེནཱཔརཾ བྷཱཝནཱཡ ཝིསེསཾ. པུནཔྤུནཾ པརིཝཏྟེཏྭཱཏི ཀམྨཊྛཱནཏནྟིཾ པགུཎབྷཱཝཾ པཱཔེནྟོ བྷིཡྻོ བྷིཡྻོ ཝཱཙཱཡ, མནསཱ ཙ པརིཝཏྟེཏྭཱ. གཎྛིཊྛཱནནྟི ཡཐཱ རུཀྑསྶ དུབྦིནིབྷེདོ ཨརཉྙསྶ ཝཱ གཧནབྷཱུཏོ པདེསོ ‘‘གཎྛིཊྛཱན’’ནྟི ཝུཙྩཏི, ཨེཝཾ ཀམྨཊྛཱནཏནྟིཡཱ ཨཏྠཏོ དུབྦིནིབྷེདོ གཧནབྷཱུཏོ ཙ པདེསོ ‘‘གཎྛིཊྛཱན’’ནྟི ཝུཙྩཏི. ཏཾ པརིཔུཙྪནཱདིལདྡྷེན ཉཱཎཕརསུནཱ ཚིནྡིཏྭཱ.

ནིམིཏྟནྟི ཀམྨཊྛཱནནིམིཏྟཾ, ཨསུབྷཱཀཱརོ. ཨེདིསེན པཡོཛནེན ལུཉྩནམྤི ཨནཝཛྫནྟི དསྶེཏུཾ ‘‘ལུཉྩིཏྭཱ’’ཏི ཝུཏྟཾ. ཚིནྣཊྛཱནེཏི མུཎྜིཏཊྛཱནེ. ཝཊྚཏིཡེཝ ནིསྶརཎཛ྄ཛྷཱསཡེན ཨོལོཀནཏོ. ཨུསྶདཝསེནཱཏི ཨཕལིཏཱནཾ, ཕལིཏཱནཾ ཝཱ བཧུལཏཱཝསེན. དིསྭཱཝ ནིམིཏྟཾ གཧེཏབྦཾ དསྶནཡོགྱཏཱཡ ཏཙཔཉྩཀསྶ, ཨིཏརེསུ སུཏྭཱ ཙ ཉཏྭཱ ཙ ནིམིཏྟཾ གཧེཏབྦཾ.

ཀོཊྛཱསཝཝཏྠཱཔནཀཐཱཝཎྞནཱ

༡༨༢. ཨདྡཱརིཊྛཀཝཎྞཱཏི ¶ ¶ ཨབྷིནཝཱརིཊྛཕལཝཎྞཱ. ཀཎྞཙཱུལི༹ཀཱཏི ཨུཔརིཀཎྞསཀྑལིཀཱཡ པརབྷཱགཾ སནྡྷཱཡ ཝུཏྟཾ. ཏིརིཡཾ ཨཉྙམཉྙེན པརིཙྪིནྣཱ, ཀཐཾ? དྭེ ཀེསཱ ཨེཀཏོ ནཏྠཱིཏི.

ཨཱསཡོཏི ནིསྶཡོ, པཙྩཡོཏི ཨཏྠོ.

༡༨༤. ཨསམྦྷིནྣཀཱལ༹ཀཱ ཨཉྙེན ཝཎྞེན ཨསམྨིསྶཀཱལ༹ཀཱ.

༡༨༥. པཏྟསདིསཏྟཱ ནཁཱ ཨེཝ ནཁཔཏྟཱནི. ནཁཱ ཏིརིཡཾ ཨཉྙམཉྙེན པརིཙྪིནྣཱཏི ཝིསུཾ ཝཝཏྠིཏཏཾ སནྡྷཱཡ ཝུཏྟཾ. ཏམེཝ ཧི ཨཏྠཾ དསྶེཏུཾ ‘‘དྭེ ནཁཱ ཨེཀཏོ ནཏྠཱི’’ཏི ཨཱཧ.

༡༨༦. དནྟཔཱལི༹ཡཱཏི དནྟཱཝལིཡཱ. ཡཱནཀཨུཔཏྠམྦྷིནཱིཏི སཀཊསྶ དྷུརཊྛཱནེ ཨུཔཏྠམྦྷཀདཎྜོ. དནྟཱནཾ ཨཱདྷཱརབྷཱུཏཱ ཨཊྛི ཧནུཀཊྛི.

༡༨༧. སངྐཌྜྷིཡམཱནཱཏི སམྤིཎྜིཡམཱནཱ. ཀོསཀཱརཀཀོསོ ཨུཔལླིཎྜུཔོཊྚལཀཾ, ཡཾ ‘‘ཀོསེཡྻཕལ’’ནྟིཔི ཝུཙྩཏི. པུཊབནྡྷཨུཔཱཧནོ སཀལཔིཊྛིཔཱདཙྪཱདནཨུཔཱཧནོ. ཨཱནིསདཾ ཨཱསནཔདེསོ. ཏཱུཎིརོ སརཱཝཱསོ. གལཀཉྩུཀཾ ཀཎྛཏྟཱཎཾ. ཀཱིཊཀུལཱཝཀཾ ཁརམུཁཀུཊི.

ཨནུལོམེན པཊིལོམེན ཙཱཏི ཨེཏྠ ཨཾསཔདེསཏོ པཊྛཱཡ བཱཧུནོ པིཊྛིཔདེསེན ཨོཏརཎཾ ཨནུལོམོ, མཎིབནྡྷཏོ པཊྛཱཡ བཱཧུནོ པུརིམབྷཱགེན ཨཱརོཧནཾ པཊིལོམོ. ཏེནེཝ ནཡེནཱཏི དཀྑིཎཧཏྠེ ཝུཏྟེན ནཡེན ཨནུལོམེན པཊིལོམེན ཙཱཏི ཨཏྠོ. སུཁུམམྤཱིཏི ཡཐཱཝུཏྟཨོལཱ༹རིཀཙམྨཏོ སུཁུམཾ. ཨནྟོམུཁཙམྨཱདིཀོཊྛཱསེསུ ཝཱ ཏཙེན པརིཙྪིནྣཏྟཱ ཡཾ དུརུཔལཀྑཎཱིཡཾ, ཏཾ ‘‘སུཁུམ’’ནྟི ཝུཏྟཾ. ཏཉྷི ཝུཏྟནཡེན ཉཱཎེན ཏཙཾ ཝིཝརིཏྭཱ པསྶནྟསྶ པཱཀཊཾ ཧོཏི. ཨིདྷ ཚཝིཔི ཏཙགཏིཀཱ ཨེཝཱཏི ‘‘ཏཙོ ཨུཔརི ཨཱཀཱསེན པརིཙྪིནྣོ’’ཏི ཝུཏྟོ.

༡༨༨. ནིསདཔོཏོ ¶ ¶ སིལཱཔུཏྟཀོ. ཨུདྡྷནཀོཊཱིཏི མཏྟིཀཱཔིཎྜེན ཀཏཨུདྡྷནསྶ ཀོཊི. ཏཱལགུལ༹པཊལཾ ནཱམ པཀྐཏཱལཕལལསིཀཾ ཏཱལཔཊྚིཀཱདཱིསུ ལིམྤིཏྭཱ སུཀྑཱཔེཏྭཱ ཨུདྡྷརིཏྭཱ གཧིཏཔཊལཾ. སུཁུམནྟི ཡཐཱཝུཏྟམཾསཏོ སུཁུམཾ. པཎྷིཀམཾསཱདིཐཱུལཱནཾ སཀལསརཱིརསྶ ཀིསཱནཾ ཡེབྷུཡྻེན མཾསེན པཊིཙྪཱདིཏཏྟཱ ཝུཏྟཾ ‘‘ཏིརིཡཾ ཨཉྙམཉྙེན པརིཙྪིནྣ’’ནྟི.

༡༨༩. ཛཱལཱཀཱརོ ཀཉྩུཀོ ཛཱལཀཉྩུཀོ. ཝིསུཾ ཝཝཏྠིཏབྷཱཝེནེཝ ནྷཱརཱུ ཏིརིཡཾ ཨཉྙམཉྙེན པརིཙྪིནྣཱ.

༡༩༠. དནྟཱནཾ ཝིསུཾ གཧིཏཏྟཱ ‘‘ཋཔེཏྭཱ དྭཏྟིཾས དནྟཊྛཱིནཱི’’ཏི ཝུཏྟཾ. ཨེཀཾ ཛཎྞུཀཊྛི, ཨེཀཾ ཨཱུརུཊྛཱིཏི ཨེཀ-གྒཧཎཾ ‘‘ཨེཀེཀསྨིཾ པཱདེ’’ཏི ཨདྷིཀཏཏྟཱ. ཨེཝཾ ཏིམཏྟཱནཱིཏི ཨེཝཾ མཏྟསདྡེཧི ཨཱནིསདཊྛིཨཱདཱིནི ཨིདྷ ཨཝུཏྟཱནིཔི དསྶེཏཱིཏི ཝེདིཏབྦཾ. ཨེཝཉྩ ཀཏྭཱ ‘‘ཨཏིརེཀཏིསཏཨཊྛིཀསམུསྶཡ’’ནྟི (ཝིསུདྡྷི. ༡.༡༢༢) ཨིདཉྩ ཝཙནཾ སམཏྠིཏཾ ཧོཏི.

ཀཱིལཱ༹གོལ༹ཀཱནི སུཏྟེན བནྡྷིཏྭཱ ཨཉྙམཉྙཾ གྷཊྚེཏྭཱ ཀཱིལ༹ནགོལ༹ཀཱནི. དྷནུཀདཎྜོ དཱརཀཱནཾ ཀཱིལ༹ནཀཁུདྡཀདྷནུཀཾ. ཏཏྠ ཛངྒྷཊྛིཀསྶ པཏིཊྛིཏཊྛཱནནྟི ཛཎྞུཀཊྛིམྷི པཝིསིཏྭཱ ཋིཏཊྛཱནནྟི ཨདྷིཔྤཱཡོ. ཏེན ཨཱུརུཊྛིནཱ པཏིཊྛིཏཾ ཋཱནཾ ཡཾ ཀཊིཊྛིནོ, ཏཾ ཨགྒཙྪིནྣམཧཱཔུནྣཱགཕལསདིསཾ.

ཀུམྦྷཀཱརེན ནིཔྥཱདིཏཾ ཨུདྡྷནཾ ཀུམྦྷཀཱརིཀཨུདྡྷནཾ. སཱིསཀཔཊྚཝེཋཀཾ ཝེཋེཏྭཱ ཋཔིཏཾ སཱིསམཡཾ པཊྚཀཾ. ཡེན སུཏྟཾ ཀནྟནྟི, ཏསྨིཾ ཏཀྐམྷི ཝིཛ྄ཛྷིཏྭཱ ཋཔིཏགོལ༹ཀཱ ཝཊྚནཱ ནཱམ, ཝཊྚནཱནཾ ཨཱཝལི༹ ཝཊྚནཱཝལི༹.

མཎྜལཱཀཱརེན ཚིནྣཝཾསཀལཱི༹རཁཎྜཱནི ཝཾསཀལཱི༹རཙཀྐལཀཱནི. ཨཝལེཁནསཏྠཀཾ ཨུཙྪུཏཙཱཝལེཁནསཏྠཀཾ.

༡༩༢. ཝཀྐབྷཱགེན པརིཙྪིནྣནྟི ཝཀྐཔརིཡནྟེན བྷཱགེན པརིཙྪིནྣཾ. ཨིཏོ པརེསུཔི ཨེཝརཱུཔེསུ ཨེསེཝ ནཡོ.

༡༩༣. ཡཾ ¶ ནིསྶཱཡཱཏི ཡཾ ལོཧིཏཾ ནིསྶཱཡ, ནིསྶཡནིསྶཡོཔི ‘‘ནིསྶཡོ’’ཏྭེཝ ཝུཙྩཏི. བྷཝཏི ཧི ཀཱརཎཀཱརཎེཔི ཀཱརཎཝོཧཱརོ ཡཐཱ ‘‘ཙོརེཧི གཱམོ དཌྜྷོ’’ཏི. ཨཐ ཝཱ ཡསྨིཾ རཱུཔཀལཱཔེ ཧདཡཝཏྠུ ¶ , ཏམྤི ལོཧིཏགཏིཀམེཝ ཧུཏྭཱ ཏིཊྛཏཱིཏི ‘‘ཡཾ ནིསྶཱཡཱ’’ཏི ཝུཏྟཾ.

༡༩༤. པཎྜུཀདྷཱཏུཀནྟི པཎྜུསབྷཱཝཾ.

༡༩༥. པརིཡོནཧནམཾསནྟི པཊིཙྪཱདཀམཾསཾ.

༡༩༦. ཨུདརཛིཝ྄ཧཱམཾསནྟི ཛིཝ྄ཧཱསཎྛཱནཾ ཨུདརསྶ མཏྠཀཔསྶེ ཏིཊྛནཀམཾསཾ. ‘‘ནཱིལ’’ནྟི ཝཏྭཱ ནཱིལཾ ནཱམ བཧུདྷཱཏུཀནྟི ཨཱཧ ‘‘ནིགྒུཎྜིཔུཔྥཝཎྞ’’ནྟི.

༡༩༧. པཔྥཱསམཾསནྟི ཡཐཱཋཱནེ ཨེཝ ལམྦིཏྭཱ ཐོཀཾ པརིཝཏྟཀམཾསཾ. ནིརསནྟི ནིཧཱིནརསཾ. ནིརོཛནྟི ནིཔྤབྷཾ, ཨོཛཱརཧིཏཾ ཝཱ.

༡༩༨. ཨོབྷགྒཱཏི ཨཝབྷུཛིཏྭཱ ཋིཏཱ. སཀྑརསུདྷཱཝཎྞནྟི མརུམྦེཧི ཀཏསུདྷཱཝཎྞཾ. ‘‘སེཏསཀྑརསུདྷཱཝཎྞ’’ནྟིཔི པཱཋོ, སེཏསཀྑརཝཎྞཾ, སུདྷཱཝཎྞཉྩཱཏི ཨཏྠོ.

༡༩༩. ཨནྟསྶ ཨཱབྷུཛིཏྭཱ ཨཱབྷུཛིཏྭཱ ཋིཏཔྤདེསཱ ཨནྟབྷོགཊྛཱནཱནི. ཏེསཾ བནྡྷནབྷཱུཏཾ ཨནྟགུཎཾ ནཱམཱཏི དསྶེནྟོ ཨཱཧ ‘‘ཨནྟགུཎནྟི ཨནྟབྷོགཊྛཱནེསུ བནྡྷན’’ནྟི. ཀུདྡཱལཕརསུཀམྨཱདཱིནི ཀརོནྟཱནཾ ཨནྟབྷོགེ ཨགལ༹ནྟེ ཨེཀཏོ ཨཱབནྡྷིཏྭཱ, ཀིཾ ཝིཡ? ཡནྟསུཏྟཀམིཝ ཡནྟཕལཀཱནཱིཏི. ཀིམིཝ ཏཏྠ ཋིཏནྟི ཨཱཧ ‘‘པཱདཔུཉྪན…པེ… ཋིཏ’’ནྟི. པུརིམཉྩེཏྠ ཨཱབནྡྷནསྶ, དུཏིཡཾ ཋཱནཱཀཱརསྶ ནིདསྶནནྟི དཊྛབྦཾ.

༢༠༠. ཨསིཏཾ ནཱམ བྷུཏྟཾ ཨོདནཱདི. པཱིཏཾ ནཱམ པིཝནཝསེན ཨཛ྄ཛྷོཧཊཔཱནཀཱདི. ཁཱཡིཏཾ ནཱམ སཾཁཱདིཏཾ པིཊྛམཱུལཕལཁཛྫཱདི. སཱཡིཏཾ ནཱམ ཨསྶཱདིཏཾ ཨམྦཔཀྐམདྷུཕཱཎིཏཱདི.

ཡཏྠཱཏི ¶ ཡསྨིཾ ཨུདརེ. ཡནྟི ཙ ཨུདརམེཝ པཙྩཱམསཏི. ཡཏྠ པཱནབྷོཛནཱདཱིནི པཏིཏྭཱ ཏིཊྛཏཱིཏི སམྦནྡྷོ. སུཝཱནཝམཐུ སཱརམེཡྻཝནྟཾ. ཝིཝེཀནྟི ཝིབྷཱགཾ.

༢༠༡. ཧེཊྛཱནཱབྷིཔིཊྛིཀཎྚཀམཱུལཱནཾ ¶ ཨནྟརེཏི པུརིམབྷཱགཝསེན ནཱབྷིཡཱ ཧེཊྛཱཔདེསསྶ པཙྪིམབྷཱགཝསེན ཧེཊྛིམཔིཊྛིཀཎྚཀཱནཾ ཝེམཛ྄ཛྷེ. ཝེལུ༹ནཱལི༹ཀསདིསོ པདེསོཏི ཨདྷིཔྤཱཡོ.

༢༠༢. སམོཧིཏནྟི ནིཙིཏཾ.

༢༠༤. པཱུཏིབྷཱཝཾ ཨཱཔནྣཾ ཀུཀྐུཊཎྜཾ པཱུཏིཀུཀྐུཊཎྜཾ. ཨུདྡེཀོ པིཏྟཱདཱིཧི ཝིནཱ ཀེཝལོ ཨུདྡྷངྒམཝཱཏོ.

༢༠༥. ཨཱཙཱམོ ཨཝསྶཱཝནཀཉྫིཀཾ.

༢༠༦. ཝཀྐཧདཡཡཀནཔཔྥཱསེ ཏེམཡམཱནནྟི ཨེཏྠ ཡཀནཾ ཧེཊྛཱབྷཱགཔཱུརཎེནེཝ ཏེམེཏི, ཨིཏརཱནི ཏེསཾ ཨུཔརི ཐོཀཾ ཐོཀཾ པགྒྷརཎེནཱཏི དཊྛབྦཾ.

༢༠༧. ཨུཏུཝིཀཱརོ ཨུཎྷཝལཱཧཀཱདིཧེཏུཀོ. ཝིསམཙྪིནྣོ བྷིསཱདིཀལཱཔོ ཝིསམཾ ཨུདཀཾ པགྒྷརཏི, ཨེཝམེཝཾ སརཱིརཾ ཀེསཀཱུཔཱདིཝིཝརེཧི ཨུཔརི, ཧེཊྛཱ, ཏིརིཡཉྩ སེདཾ ཝིསམཾ པགྒྷརཏཱིཏི དསྶེཏུཾ ཝིསམཙྪིནྣ-གྒཧཎཾ ཀཏཾ.

༢༠༨. ཝིསམཱཧཱརནྟི ཏདཱཔཝཏྟམཱནསརཱིརཱཝཏྠཱཡ ཨསཔྤཱཡཱཧཱརཾ, ཨཏིཀཊུཀཨཙྩུཎྷཱདིཝིསབྷཱགཱཧཱརཾ ཝཱ. སམྨོཧཝིནོདནིཡཾ (ཝིབྷ. ཨཊྛ. ༣༥༦) པན ‘‘ཝིསབྷཱགཱཧཱར’’ནྟྭེཝ ཝུཏྟཾ ཏདཱ པཝཏྟམཱནཱནཾ དྷཱཏཱུནཾ ཝིསབྷཱགཏྟཱ.

༢༠༩. ‘‘ནྷཱནཀཱལེ’’ཏི ཨིདཾ ཨུདཀསྶ ཨུཔརི སིནེཧསྶ སམྦྷཝདསྶནཏྠཾ ཝུཏྟཾ. པརིབྦྷམནྟསིནེཧབིནྡུཝིསཊསཎྛཱནཱཏི ཝིསཊཾ ཧུཏྭཱ པརིབྦྷམནྟསིནེཧབིནྡུསཎྛཱནཱ. ཨུཏུཝིསབྷཱགོ བཧིདྡྷཱསམུཊྛཱནོ. དྷཱཏུཝིསབྷཱགོ ཨནྟོསམུཊྛཱནོ. ཏེ པདེསཱཏི ཏེ ཧཏྠཏལཱདིཔདེསཱ.

༢༡༠. ཀིཉྩཱིཏི ¶ ཨུཎྷཱདིརསཱནཾ ཨཉྙཏརཾ ཨཱཧཱརཝཏྠུ. ནེསནྟི སཏྟཱནཾ. ཧདཡཾ ཨཱགིལཱཡཏཱིཏི ཝིསབྷཱགཱཧཱརཱདིཾ པཊིཙྩ ཧདཡཔྤདེསོ ཝིཝཏྟཏི.

༢༡༡. དདྷིནོ ¶ ཝིསྶནྡནཨཙྪརསོ དདྷིམུཏྟཾ. གལི༹ཏྭཱཏི སནྡིཏྭཱ. ཏཱལུམཏྠཀཝིཝརེན ཨོཏརིཏྭཱཏི མཏྠཀཝིཝརཏོ ཨཱགནྟྭཱ ཏཱལུམཏྠཀེན ཨོཏརིཏྭཱ.

༢༡༢. ཏེལཾ ཝིཡ སཀཊསྶ ནཱབྷིཨཀྑསཱིསཱནཾ ཨཊྛིསནྡྷཱིནཾ ཨབྦྷཉྫནཀིཙྩཾ སཱདྷཡམཱནཱ. ཀཊཀཊཱཡནྟཱིཏི ‘‘ཀཊ ཀཊཱ’’ཏི སདྡཾ ཀརོནྟི. ཨནུརཝདསྶནཾ ཧེཏཾ. དུཀྑནྟཱིཏི དུཀྑིཏཱནི སཉྫཱཏདུཀྑཱནི ཧོནྟི.

༢༡༣. སམཱུལཀཱུལམཱསཾ ཛྷཱཔེཏྭཱ ཚཱརིཀཾ ཨཝསྶཱཝེཏྭཱ གཧིཏཡཱུསོ མཱསཁཱརོ. ཨུཙྪིཊྛོདཀགབྦྷམལཱདཱིནཾ ཚཌྜནཊྛཱནཾ ཙནྡནིཀཱ. རཝཎགྷཊཾ ནཱམ པཀཏིཡཱ སམྨུཁམེཝ ཧོཏི. ཡསྶ པན ཨཱརགྒམཏྟམྤི ཨུདཀསྶ པཝིསནམུཁཾ ནཏྠི, ཏཾ དསྶེཏུཾ ‘‘ཨམུཁེ རཝཎགྷཊེ’’ཏི ཝུཏྟཾ. ཨཱཡཱུཧནནྟི སམཱིཧནཾ.

༢༡༤. ཨེཝཉྷཱིཏིཨཱདི ཡཐཱཝུཏྟཱཡ ཨུགྒཧཀོསལླཔཊིཔཏྟིཡཱ ནིགམནཾ. ཨིདཱནི ཡཐཱཝུཏྟཾ མནསིཀཱརཀོསལླཔཊིཔཏྟིམྤི ནིགམནཝསེན གཧེཏྭཱ ཀམྨཊྛཱནཾ མཏྠཀཾ པཱཔེཏྭཱ དསྶེཏུཾ ‘‘ཨནུཔུབྦཏོ’’ཏིཨཱདི ཨཱརདྡྷཾ. ཏཏྠ པཎྞཏྟིསམཏིཀྐམཱཝསཱནེཏི ཀེསཱདིཔཎྞཏྟིསམཏིཀྐམཝསེན པཝཏྟཱཡ བྷཱཝནཱཡ ཨཝསཱནེ. ཨཔུབྦཱཔརིཡམིཝཱཏི ཨེཀཛ྄ཛྷམིཝ. ཀེསཱཏི ཨིཏི-སདྡོ ཨཱདིཨཏྠོ, པཀཱརཏྠོ ཝཱ, ཨེཝམཱདིནཱ ཨིམིནཱ པཀཱརེན ཝཱཏི ཨཏྠོ. ཏེ དྷམྨཱཏི ཝཎྞཱདིཝསེན ཝཝཏྠཱཔིཏཱ པཊིཀྐཱུལཱཀཱརཏོ ཨུཔཊྛིཏཱ ཀོཊྛཱསདྷམྨཱ.

བཧིདྡྷཱཔཱིཏི སསནྟཱནཏོ བཧིཔི, པརསནྟཱནཀཱཡེཔཱིཏི ཨཏྠོ. མནསིཀཱརཾ ཨུཔསཾཧརཏཱིཏི ཡཐཱཝུཏྟཾ པཊིཀྐཱུལམནསིཀཱརཾ ཨུཔནེཏི. ཡཐཱ ཨིདཾ, ཏཐཱ ཨེཏནྟི. ཨེཝཾ སབྦཀོཊྛཱསེསུ པཱཀཊཱིབྷཱུཏེསཱུཏི ཡཐཱ ཨཏྟནོ ཀཱཡེ, ཨེཝཾ པརེསམྤི ཀཱཡེ སབྦེསུ ཀེསཱདིཀོཊྛཱསེསུ པཊིཀྐཱུལཝསེན ཝིབྷཱུཏབྷཱཝེན ཨུཔཊྛིཏེསཱུཏི ཨཏྠོ. ཨཡམེཏྠ ཀསིཎེསུ ཝཌྜྷནསདིསོ ཡོགིནོ བྷཱཝནཱཝིསེསོ དསྶིཏོ.

ཨནུཔུབྦམུཉྩནཱདཱིཏི ¶ ཨཱདི-སདྡེན སུཏྟནྟནཡེན ཝིབྷཱཝིཏཾ ཝཱིརིཡསམཏཱཡོཛནཾ སངྒཎྷཱཏི. པུནཔྤུནཾ མནསི ཀརོཏོཏི ཝུཏྟནཡེན ཨཏྟནོ ¶ ཀཱཡེ ཀེསཱདིཀེ ‘‘པཊིཀྐཱུལཱ པཊིཀྐཱུལཱ’’ཏི ཨབྷིཎྷསོ མནསིཀཱརཾ པཝཏྟེནྟསྶ ཡདཱ སདྡྷཱདཱིནི ཨིནྡྲིཡཱནི ལདྡྷསམཐཱནི ཝིསདཱནི པཝཏྟནྟི, ཏདཱ ཨསྶདྡྷིཡཱདཱིནཾ དཱུརཱིབྷཱཝེན སཱཏིསཡཾ བལཔྤཏྟེཧི སཏྟཧི སདྡྷམྨེཧི ལདྡྷཱུཔཏྠམྦྷཱནི ཝིཏཀྐཱདཱིནི ཛྷཱནངྒཱནི པཊུཏརཱནི ཧུཏྭཱ པཱཏུབྷཝནྟི. ཏེསཾ ཨུཛུཝིཔཙྩནཱིཀཏཱཡ ནཱིཝརཎཱནི ཝིཀྑམྦྷིཏཱནེཝ ཧོནྟི སདྡྷིཾ ཏདེཀཊྛེཧི པཱཔདྷམྨེཧི. ཨུཔཙཱརསམཱདྷིནཱ ཙིཏྟཾ སམཱདྷིཡཏི, སོ ཏཾཡེཝ ནིམིཏྟཾ ཨཱསེཝནྟོ བྷཱཝེནྟོ བཧུལཱིཀརོནྟོ ཨཔྤནཾ པཱཔུཎཱཏི. ཏེན ཝུཏྟཾ ‘‘ཨནུཀྐམེན ཨཔྤནཱ ཨུཔྤཛྫཏཱི’’ཏི. སབྦཱཀཱརཏོཏི ཝཎྞཱདིཝསེན པཉྩདྷཱཔི. སཱཏི ཨཔྤནཱ.

ཡདི པནེཏཾ ཀམྨཊྛཱནཾ ཨཝིཉྙཱཎཀཱསུབྷཀམྨཊྛཱནཱནི ཝིཡ པཋམཛ྄ཛྷཱནཝསེན སིཛ྄ཛྷཏི, ཨཐ ཀསྨཱ ‘‘ཀཱཡགཏཱསཏཱི’’ཏི ཝུཏྟནྟི ཨཱཧ ‘‘ཨེཝཾ པཋམཛ྄ཛྷཱནཝསེནཱ’’ཏིཨཱདི. ནཱནཱཝཎྞསཎྛཱནཱདཱིསུ དྭཏྟིཾསཱཡ ཀོཊྛཱསེསུ པཝཏྟམཱནཱཡ སཏིཡཱ ཀིཙྩམེཏྠ སཱཏིསཡནྟི ཨཱཧ ‘‘སཏིབལེན ཨིཛ྄ཛྷནཏོ’’ཏི.

པནྟསེནཱསནེསུ, ཨདྷིཀུསལེསུ ཙ ཨརཏིཾ, ཀཱམགུཎེསུ ཙ རཏིཾ སཧཏི ཨབྷིབྷཝཏཱིཏི ཨརཏིརཏིསཧོ སརཱིརསབྷཱཝཙིནྟནེན ཨནབྷིརཏིཡཱ པཧཱིནཏྟཱ. ཏཐཱ ཀོཊྛཱསབྷཱཝནཱཡ ཨཏྟསིནེཧསྶ པརིཀྑཱིཎཏྟཱ བྷཡབྷེརཝཾ སཧཏི, སཱིཏཱདཱིནཉྩ ཨདྷིཝཱསཀཛཱཏིཀོ ཧོཏི. ཨཏྟསིནེཧཝསེན ཧི པུརིསསྶ བྷཡབྷེརཝཾ ཧོཏི, དུཀྑསྶ ཙ ཨནདྷིཝཱསནཾ. ཨིམཾ པན ཀོཊྛཱསབྷཱཝནམནུཡུཏྟསྶ ན ཀེཝལཾ པཋམཛ྄ཛྷཱནམཏྟམེཝ, ཨུཏྟརིཔི པཊིཝེདྷོ ཨཏྠཱིཏི དསྶེཏུཾ ‘‘ཀེསཱདཱིན’’ནྟིཨཱདི ཝུཏྟཾ.

ཨཱནཱཔཱནསྶཏིཀཐཱཝཎྞནཱ

༢༡༥. ཡཾ ཏཾ ཨེཝཾ པསཾསིཏྭཱ ཨཱནཱཔཱནསྶཏིཀམྨཊྛཱནཾ ནིདྡིཊྛནྟི སམྦནྡྷོ. ཏཏྠ ཡསྨཱ ‘‘ཀཐཾ བྷཱཝིཏོ’’ཏིཨཱདིཀཱཡ པུཙྪཱཔཱལི༹ཡཱ ཨཏྠེ ཝིབྷཱཝིཏེ ཐོམནཱཔཱལི༹ཡཱཔི ཨཏྠོ ཝིབྷཱཝིཏོཡེཝ ཧོཏི བྷེདཱབྷཱཝཏོ, ཏསྨཱ ཏཾ ལངྒྷིཏྭཱ ‘‘ཀཐཾ བྷཱཝིཏོ ཙཱ’’ཏིཨཱདིནཱ ཨཱརབྷཏི. ཏཏྠ ཧི ཨིཏོ པསཾསཱབྷཱཝོ ‘‘ཨཡམྤི ཁོ’’ཏི ཝཙནཉྩ ཝིསེསོ. ཏེསུ པསཾསཱབྷཱཝཾ ¶ དསྶེཏུཾ ‘‘ཨེཝཾ པསཾསིཏྭཱ’’ཏི ཝུཏྟཾ. པསཾསཱ ཙ ཏཏྠ ཨབྷིརུཙིཛནནེན ཨུསྶཱཧནཏྠཱ. ཏཉྷི སུཏྭཱ བྷིཀྑཱུ ‘‘བྷགཝཱ ཨིམཾ སམཱདྷིཾ ཨནེཀེཧི ཨཱཀཱརེཧི པསཾསཏི, སནྟོ ¶ ཀིརཱཡཾ སམཱདྷི པཎཱིཏོ ཙ ཨསེཙནཀོ ཙ སུཁོ ཙ ཝིཧཱརོ པཱཔདྷམྨེ ཙ ཋཱནསོ ཨནྟརདྷཱཔེཏཱི’’ཏི སཉྫཱཏཱབྷིརུཙཡོ ཨུསྶཱཧཛཱཏཱ སཀྐཙྩཾ ཨནུཡུཉྫིཏབྦཾ པཊིཔཛྫིཏབྦཾ མཉྙནྟི. ‘‘ཨཡམྤི ཁོ’’ཏི པདསྶ ཡེ ཨིམེ མཡཱ ནིབྦཱནམཧཱསརསྶ ཨོཏརཎཏིཏྠབྷཱུཏཱ ཀསིཎཛ྄ཛྷཱནཨསུབྷཛ྄ཛྷཱནཱདཡོ དེསིཏཱ, ན ཀེཝལཾ ཏེ ཨེཝ, ཨཡམྤི ཁོཏི བྷགཝཱ ཨཏྟནོ པཙྩཀྑབྷཱུཏཾ སམཱདྷིཾ དེསནཱནུབྷཱཝེན ཏེསམྤི བྷིཀྑཱུནཾ ཨཱསནྣཾ, པཙྩཀྑཉྩ ཀརོནྟོ སམྤིཎྜནཝསེན ཨེཝམཱཧཱཏི སམྦནྡྷམུཁེན ཨཏྠོ ཝེདིཏབྦོ.

སོལ༹སཝཏྠུཀནྟི ཙཏཱུསུ ཨནུཔསྶནཱསུ ཙཏུནྣཾ ཙཏུཀྐཱནཾ ཝསེན སོལ༹སཊྛཱནཾ. སབྦཱཀཱརཔརིཔཱུརོཏི ཀམྨཊྛཱནཔཱལི༹ཡཱ པདཏྠོ པིཎྜཏྠོ ཨུཔམཱ ཙོདནཱ པརིཧཱརོ པཡོཛནནྟི ཨེཝམཱདཱིཧི སབྦེཧི ཨཱཀཱརེཧི པརིཔུཎྞོ. ནིདྡེསོཏི ཀམྨཊྛཱནསྶ ནིསྶེསཏོ ཝིཏྠཱརོ.

༢༡༦. ཀཐནྟི ཨིདཾ པུཙྪནཱཀཱརཝིབྷཱཝནཔདཾ. པུཙྪཱ ཙེཏྠ ཀཐེཏུཀམྱཏཱཝསེན ཨཉྙཱསཾ ཨསམྦྷཝཏོ. སཱ ཙ ཨུཔརི དེསནཾ ཨཱརུལ༹ྷཱནཾ སབྦེསཾ པཀཱརཝིསེསཱནཾ ཨཱམསནཝསེནཱཏི ཨིམམཏྠཾ དསྶེནྟོ ‘‘ཀཐནྟི…པེ… ཀམྱཏཱཔུཙྪཱ’’ཏི ཨཱཧ. ཀཐཾ བཧུལཱིཀཏོཏི ཨེཏྠཱཔི ‘‘ཨཱནཱཔཱནསྶཏིསམཱདྷཱི’’ཏི པདཾ ཨཱནེཏྭཱ སམྦནྡྷིཏབྦཾ. ཏཏྠ ཀཐནྟི ཨཱནཱཔཱནསྶཏིསམཱདྷིབཧུལཱིཀཱརཾ ནཱནཔྤཀཱརཏོ ཝིཏྠཱརེཏུཀམྱཏཱཔུཙྪཱ. བཧུལཱིཀཏོ ཨཱནཱཔཱནསྶཏིསམཱདྷཱིཏི ཏཐཱཔུཊྛདྷམྨནིདསྶནནྟི ཨིམམཏྠཾ ‘‘ཨེསེཝ ནཡོ’’ཏི ཨིམིནཱ ཨཏིདིསཏི. ཏཐཱ སནྟབྷཱཝཱདཡོཔི ཏསྶ ཡེཧི བྷཱཝནཱབཧུལཱིཀཱརེཧི སིདྡྷཱ, ཏགྒཧཎེནེཝ གཧིཏཱ ཧོནྟཱིཏི དསྶེཏུཾ ‘‘ཀཐཾ བཧུལཱིཀཏོ…པེ… ཝཱུཔསམེཏཱིཏི ཨེཏྠཱཔི ཨེསེཝ ནཡོ’’ཏི ཝུཏྟཾ.

‘‘པུན ཙ པརཾ, ཨུདཱཡི, ཨཀྑཱཏཱ མཡཱ སཱཝཀཱནཾ པཊིཔདཱ, ཡཐཱཔཊིཔནྣཱ མེ སཱཝཀཱ ཙཏྟཱརོ སཏིཔཊྛཱནེ བྷཱཝེནྟཱི’’ཏིཨཱདཱིསུ (མ. ནི. ༢.༢༤༧) ཨུཔྤཱདནཝཌྜྷནཊྛེན བྷཱཝནཱ ཝུཙྩཏཱིཏི ཏདུབྷཡཝསེན ཨཏྠཾ དསྶེནྟོ ‘‘བྷཱཝིཏོཏི ཨུཔྤཱདིཏོ ཝཌྜྷིཏོ ཝཱ’’ཏི ཨཱཧ. ཏཏྠ བྷཱཝཾ ཝིཛྫམཱནཏཾ ཨིཏོ གཏོཏི བྷཱཝིཏོ, ཨུཔྤཱདིཏོ པཊིལདྡྷམཏྟོཏི ཨཏྠོ. ཨུཔྤནྣོ པན ལདྡྷཱསེཝནོ, བྷཱཝིཏོ པགུཎབྷཱཝཾ ཨཱཔཱདིཏོ, ཝཌྜྷིཏོཏི ཨཏྠོ ¶ . ཨཱནཱཔཱནཔརིགྒཱཧིཀཱཡཱཏི དཱིགྷརསྶཱདིཝིསེསེཧི སདྡྷིཾ ཨསྶཱསཔསྶཱསེ པརིཙྪིཛྫགཱཧིཀཱཡ, ཏེ ཨཱརབྦྷ པཝཏྟཱཡ, སཏིཡཾ ¶ པཙྩཡབྷཱུཏཱཡནྟི ཨཏྠོ. པུརིམསྨིཉྷི ཨཏྠེ སམཱདྷིསྶ སཏིཡཱ སཧཛཱཏཱདིཔཙྩཡབྷཱཝོ ཝུཏྟོ སམྤཡུཏྟཝཙནཏོ, དུཏིཡསྨིཾ པན ཨུཔནིསྶཡབྷཱཝོཔི. ཨུཔཙཱརཛ྄ཛྷཱནསཧགཏཱ ཧི སཏི ཨཔྤནཱསམཱདྷིསྶ ཨུཔནིསྶཡོ ཧོཏཱིཏི. བཧུལཱིཀཏོཏི བཧུལཾ པཝཏྟིཏོ, ཏེན ཨཱཝཛྫནཱདིཝསཱིབྷཱཝཔྤཏྟིམཱཧ. ཡོ ཧི ཝསཱིབྷཱཝཾ ཨཱཔཱདིཏོ, སོ ཨིཙྪིཏིཙྪིཏཀྑཎེ སམཱཔཛྫིཏབྦཏོ པུནཔྤུནཾ པཝཏྟཱིཡཏི. ཏེན ཝུཏྟཾ ‘‘པུནཔྤུནཾ ཀཏོ’’ཏི. ཡཐཱ ‘‘ཨིདྷེཝ, བྷིཀྑཝེ, སམཎོ’’ཏི (མ. ནི. ༡.༡༣༩; ཨ. ནི. ༤.༢༤༡), ‘‘ཝིཝིཙྩེཝ ཀཱམེཧཱི’’ཏི (དཱི. ནི. ༡.༢༢༦; སཾ. ནི. ༢.༡༥༢; ཨ. ནི. ༤.༡༢༣) ཙ ཨེཝམཱདཱིསུ པཋམཔདེ ཝུཏྟོ ཨེཝ-སདྡོ དུཏིཡཱདཱིསུཔི ཝུཏྟོ ཨེཝ ཧོཏི, ཨེཝམིདྷཱཔཱིཏི ཨཱཧ ‘‘ཨུབྷཡཏྠ ཨེཝསདྡེན ནིཡམོ ཝེདིཏབྦོ’’ཏི. ཨུབྷཡཔདནིཡམེན ལདྡྷགུཎཾ དསྶེཏུཾ ‘‘ཨཡཉྷཱི’’ཏིཨཱདི ཝུཏྟཾ.

ཨསུབྷཀམྨཊྛཱནནྟི ཨསུབྷཱརམྨཎཛྷཱནམཱཧ. ཏཾ ཧི ཨསུབྷེསུ ཡོགཀམྨབྷཱཝཏོ, ཡོགིནོ སུཁཝིསེསཱནཾ ཀཱརཎབྷཱཝཏོ ཙ ‘‘ཨསུབྷཀམྨཊྛཱན’’ནྟི ཝུཙྩཏི. ‘‘ཀེཝལ’’ནྟི ཨིམིནཱ ཨཱརམྨཎཾ ནིཝཏྟེཏི. པཊིཝེདྷཝསེནཱཏི ཛྷཱནཔཊིཝེདྷཝསེན. ཛྷཱནཉྷི བྷཱཝནཱཝིསེསེན ཨིཛ྄ཛྷནྟཾ ཨཏྟནོ ཝིསཡཾ པཊིཝིཛ྄ཛྷནྟམེཝ པཝཏྟཏི, ཡཐཱསབྷཱཝཏོ པཊིཝིཛ྄ཛྷཱིཡཏི ཙཱཏི ‘‘པཊིཝེདྷོ’’ཏི ཝུཙྩཏི. ཨོལཱ༹རིཀཱརམྨཎཏྟཱཏི བཱིབྷཙྪཱརམྨཎཏྟཱ. པཊིཀྐཱུལཱརམྨཎཏྟཱཏི ཛིགུཙྪིཏབྦཱརམྨཎཏྟཱ. པརིཡཱཡེནཱཏི ཀཱརཎེན, ལེསནྟརེན ཝཱ. ཨཱརམྨཎསནྟཏཱཡཱཏི ཨནུཀྐམེན ཝིཙེཏབྦཏཾ པཏྟཾ ཨཱརམྨཎསྶ པརམསུཁུམཏཾ སནྡྷཱཡཱཧ. སནྟེ ཧི སནྣིསིནྣེ ཨཱརམྨཎེ པཝཏྟམཱནོ དྷམྨོ སཡམྤི སནྣིསིནྣོཝ ཧོཏི. ཏེནཱཧ ‘‘སནྟོ ཝཱུཔསནྟོ ནིབྦུཏོ’’ཏི, ནིབྦུཏསབྦཔརིལཱ༹ཧོཏི ཨཏྠོ. ཨཱརམྨཎསནྟཏཱཡ ཏདཱརམྨཎདྷམྨཱནཾ སནྟཏཱ ལོཀུཏྟརདྷམྨཱརམྨཎཱཧི པཙྩཝེཀྑཎཱཧི དཱིཔེཏབྦཱ.

ནཱསྶ སནྟཔཎཱིཏབྷཱཝཱཝཧཾ ཀིཉྩི སེཙནནྟི ཨསེཙནཀོ. ཨསེཙནཀཏྟཱ ཨནཱསིཏྟཀོ. ཨནཱསིཏྟཀཏྟཱ ཨེཝ ཨབྦོཀིཎྞོ ཨསམྨིསྶོ པརིཀམྨཱདིནཱ. ཏཏོ ཨེཝ པཱཊིཡེཀྐོ ཝིསུཾཡེཝེཀོ. ཨཱཝེཎིཀོ ཨསཱདྷཱརཎོ. སབྦམེཏཾ སརསཏོ ཨེཝ སནྟབྷཱཝཾ དསྶེཏུཾ ¶ ཝུཏྟཾ. པརིཀམྨཾ ཝཱ སནྟབྷཱཝནིམིཏྟཾ, པརིཀམྨནྟི ཙ ཀསིཎཀརཎཱདཱིནི ནིམིཏྟུཔྤཱདཔརིཡོསཱནཾ, ཏཱདིསཾ ཨིདྷ ནཏྠཱིཏི ཨདྷིཔྤཱཡོ. ཏདཱ ཧི ཀམྨཊྛཱནཾ ནིརསྶཱདཏྟཱ ཨསནྟམཔྤཎཱིཏཾ སིཡཱ. ཨུཔཙཱརེན ཝཱ ནཏྠི ཨེཏྠ སནྟཏཱཏི ཡོཛནཱ. ཡཐཱ ཨུཔཙཱརཀྑཎེ ནཱིཝརཎཝིགམེན, ཨངྒཔཱཏུབྷཱཝེན ¶ ཙ པརེསཾ སནྟཏཱ ཧོཏི, ན ཨེཝམིམསྶ. ཨཡཾ པན ཨཱདིསམནྣཱ…པེ… པཎཱིཏོ ཙཱཏི ཡོཛནཱ. ཀེཙཱིཏི ཨུཏྟརཝིཧཱརཝཱསིཀེ སནྡྷཱཡཱཧ. ཨནཱསིཏྟཀོཏི ཨུཔསེཙནེན ན ཨཱསིཏྟཀོ. ཏེནཱཧ ‘‘ཨོཛཝནྟོ’’ཏི, ཨོཛཝནྟསདིསོཏི ཨཏྠོ. མདྷཱུརོཏི ཨིཊྛོ, ཙེཏསིཀསུཁཔཊིལཱབྷསཾཝཏྟནཾ ཏིཀཙཏུཀྐཛ྄ཛྷཱནཝསེན, ཨུཔེཀྑཱཡ ཝཱ སནྟབྷཱཝེན སུཁགཏིཀཏྟཱ སབྦེསམྤི ཝསེན ཝེདིཏབྦཾ. ཛྷཱནསམུཊྛཱནཔཎཱིཏརཱུཔཕུཊྛསརཱིརཏཱཝསེན པན ཀཱཡིཀསུཁཔཊིལཱབྷསཾཝཏྟནཾ དཊྛབྦཾ, ཏཉྩ ཁོ ཛྷཱནཏོ ཝུཊྛིཏཀཱལེ. ཨིམསྨིཾ པཀྑེ ‘‘ཨཔྤིཏཔྤིཏཀྑཎེ’’ཏི ཨིདཾ ཧེཏུམྷི བྷུམྨཝཙནཾ དཊྛབྦཾ. ཨཝིཀྑམྦྷིཏེཏི ཛྷཱནེན སཀསནྟཱནཏོ ཨནཱིཧཊེ ཨཔྤཧཱིནེ. ཨཀོསལླསམྦྷཱུཏེཏི ཨཀོསལླཾ ཝུཙྩཏི ཨཝིཛྫཱ, ཏཏོ སམྦྷཱུཏེ. ཨཝིཛྫཱཔུབྦངྒམཱ ཧི སབྦེ པཱཔདྷམྨཱ. ཁཎེནེཝཱཏི ཨཏྟནོ པཝཏྟིཀྑཎེནེཝ. ཨནྟརདྷཱཔེཏཱིཏི ཨེཏྠ ཨནྟརདྷཱཔནཾ ཝིནཱསནཾ, ཏཾ པན ཛྷཱནཀཏྟུཀསྶ ཨིདྷཱདྷིཔྤེཏཏྟཱ པརིཡུཊྛཱནཔྤཧཱནཾ ཧོཏཱིཏི ཨཱཧ ‘‘ཝིཀྑམྦྷེཏཱི’’ཏི. ཝཱུཔསམེཏཱིཏི ཝིསེསེན ཨུཔསམེཏི. ཝིསེསེན ཨུཔསམནཾ པན སམྨདེཝ ཨུཔསམནཾ ཧོཏཱིཏི ཨཱཧ ‘‘སུཊྛུ ཨུཔསམེཏཱི’’ཏི.