📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཝིསུདྡྷིམགྒ-མཧཱཊཱིཀཱ

(དུཏིཡོ བྷཱགོ)

༡༢. ཨིདྡྷིཝིདྷནིདྡེསཝཎྞནཱ

ཨབྷིཉྙཱཀཐཱཝཎྞནཱ

༣༦༥. སཾཝཎྞནཱཝསེན ¶ ¶ ཨནནྟརསམཱདྷིཀཐཱཡ ཨཱསནྣཔཙྩཀྑཏཾ དཱིཔེནྟོ ‘‘ཨཡཾ སམཱདྷིབྷཱཝནཱ’’ཏི ཨཱཧ. ‘‘ཨབྷིཉྙཱ སམྤཱདེཏུཾ ཡོགོ ཀཱཏབྦོ’’ཏི ཝཏྭཱ ཏཏྠ པཡོཛནཝིསེསེ དསྶེཏུཾ ‘‘ཨེཝཉྷཱི’’ཏིཨཱདི ཝུཏྟཾ. ཀིཉྩཱཔི ཐིརཏརབྷཱཝོ, ཝིཔསྶནཱབྷཱཝནཱསུཁཏཱ ཙ སམཱདྷིབྷཱཝནཱཡ ཨཱནིསཾསོ ཨེཝ, ཏཐཱཔི པཉྩ ལོཀིཡཱབྷིཉྙཱ ཡཐཱཝུཏྟསམཱདྷིབྷཱཝནཱཡ ཨཱནིསཾསབྷཱཝེན པཱཀཊཱ པཉྙཱཏཱཏི ཏཱསཾཡེཝ ཝསེན ཡོགིནོ ཨདྷིགཏཱནིསཾསཏཱ ཝུཏྟཱ, ཙུདྡསདྷཱ ཙིཏྟཔརིདམནེན ཐིརཏརཏཱ ཝུཏྟཱ. ལོཀིཡཱབྷིཉྙཱསུ ཝསཱིབྷཱཝོཔི སམཱདྷིསྶེཝ ཝསཱིབྷཱཝོ, ཏཐཱ ཙ ‘‘སམཱཧིཏོ ཡཐཱབྷཱུཏཾ པཛཱནཱཏཱི’’ཏི (སཾ. ནི. ༣.༥; ༤.༩༩; ༥.༡༠༧༡; ནེཏྟི. ༤༠; མི. པ. ༢.༡.༡༤) ཝཙནཏོ ¶ ‘‘སུཁེནེཝ པཉྙཱབྷཱཝནཾ སམྤཱདེསྶཏཱི’’ཏི ཝུཏྟཾ. ཏསྨཱཏི ཡསྨཱ སམཱདྷིབྷཱཝནཱཡ ཨཱནིསཾསལཱབྷོ ཐིརཏརཏཱ, སུཁེནེཝ ཙ པཉྙཱབྷཱཝནཱ ཨིཛ྄ཛྷཏི, ཏསྨཱ ཨབྷིཉྙཱཀཐཾ ཏཱཝ ཨཱརབྷིསྶཱམ, པཉྙཱབྷཱཝནཱཡ ཨོཀཱསེ སམྤཏྟེཔཱིཏི ཨདྷིཔྤཱཡོ.

བྷགཝཏཱ པཉྩ ལོཀིཀཱབྷིཉྙཱ ཝུཏྟཱཏི སམྦནྡྷོ. ན ཙཏུཀྐཛ྄ཛྷཱནམཏྟམེཝ ཨིདྷ སཱསནེ སམྤཱདེཏབྦཾ, ནཔི ཨིདྡྷིཝིདྷཉཱཎམེཝ, ཨཐ ཁོ ཨཉྙམྤི ཨཏྠཱིཏི ཨུཏྟརུཏྟརིཔཎཱིཏཔཎཱིཏདྷམྨདེསནཏྠཉྩ.

ཨིདྡྷིཝིཀུབྦནནྟི ¶ ཨིདྡྷིསངྑཱཏཾ པཀཏིཝཎྞཛཧནཀིརིཡཾ, ཨིདཾ ཨིདྡྷཱིསུ ཝིཀུབྦནིདྡྷིཡཱ པདྷཱནཏཱཡ ཝུཏྟཾ, ཨིདྡྷིཾ ཝིཀུབྦནཉྩཱཏི ཨེཝཾ ཝཱ ཨཏྠོ དཊྛབྦོ. ཝིཀུབྦནསྶ ཝིསུཾ གཧཎམྤི ཝུཏྟཀཱརཎེནེཝ དཊྛབྦཾ. ཨཱཀཱསཀསིཎཝསེན ཨརཱུཔསམཱཔཏྟིཡོ ན སམྦྷཝནྟི, ཨཱལོཀཀསིཎཉྩ ཨོདཱཏཀསིཎནྟོགདྷཾ ཀཏྭཱ ‘‘ཨོདཱཏཀསིཎཔརིཡནྟེསཱུ’’ཏི ཝུཏྟཾ ཀསིཎཱནུལོམཱདིཙིཏྟཔརིདམནཝིདྷིནོ ཨདྷིཔྤེཏཏྟཱ, ཨཱཀཱསནིམྨཱནཱདིཨཏྠཾ པན ཏདུབྷཡམྤི ཨིཙྪིཏབྦམེཝ. ཨཊྛ ཨཊྛཱཏི ཡཐཱཝུཏྟེསུ ཀསིཎེསུ ཨེཀེཀསྨིཾ ཨཊྛ ཨཊྛ སམཱཔཏྟིཡོ. ཀསིཎཱནུལོམཏོཏི ཀསིཎཔཊིཔཱཊིཏོ, པཊིཔཱཊི ཙ དེསནཱཝསེན ཝེདིཏབྦཱ. ཛྷཱནཱནུལོམོ པན པཊིཔཏྟིཝསེནཔི. ཨུཀྐམནཾ ཨུཀྐནྟཾ, ཨུཀྐནྟམེཝ ཨུཀྐནྟིཀཾ, ཛྷཱནསྶ ཨུཀྐནྟིཀཾ ཛྷཱནུཀྐནྟིཀཾ, ཏཏོ, ཛྷཱནལངྒྷནཏོཏི ཨཏྠོ. ཨངྒསངྐནྟིཏོ ཨངྒཱཏིཀྐམཏོ. ཙིཏྟཾ པརིདམེཏབྦཾ ཡདིཙྪཀཾ ཡཏྠིཙྪཀཾ ཛྷཱནཱནཾ སམཱཔཛྫནཱདིསུཁཏྠཾ, ཏེསཾ ཨཱརམྨཎཱནཉྩ སལླཀྑཎཏྠཾ. ཨེཝཉྷིསྶ ཏཏྠ ཝིསཝིཏཱ སམིཛ྄ཛྷཏཱིཏི.

༣༦༦. ཛྷཱནཾ སམཱཔཛྫཏཱིཏི ཀིཾ ཙཏུབྦིདྷམྤི ཛྷཱནཾ སམཱཔཛྫཏི, ཨུདཱཧུ ཨེཀེཀནྟི? ཀིཉྩེཏྠ ཡདི ཙཏུབྦིདྷམྤི སམཱཔཛྫཏི, ཨངྒསངྐནྟིཏོ ཝིསེསོ ན སིཡཱ, ཨཐ ཨེཀེཀཾ ཨཱརམྨཎསངྐནྟིཏོ. ནཱཡཾ དོསོ ཨཱབྷོགཝསེན ཏེསཾ ཝིསེསསིདྡྷིཏོ. ཡདཱ ཧི ཀསིཎཱནུལོམམེཝ ཨཱབྷུཛིཏྭཱ ཏཏྠ ཏཏྠ ཀསིཎེ ཛྷཱནཱནི སམཱཔཛྫཏི, ན ཨངྒསངྐནྟིཾ, ཏདཱ ཀསིཎཱནུལོམོ. ཡདཱ པན ཨངྒསངྐནྟིཾ ཨཱབྷུཛིཏྭཱ ཛྷཱནཱནི སམཱཔཛྫཏི, ཏདཱ ཨངྒསངྐནྟི ཝེདིཏབྦཱ. ཨིམིནཱ ནཡེན ཀསིཎཱནུལོམཨཱརམྨཎསངྐནྟིཨཱདཱིནམྤི ཨཉྙམཉྙཾ ཝིསེསོ ཝེདིཏབྦོ. ཨིདཾ ཀསིཎཱནུལོམཾ ནཱམ ཙིཏྟཔརིདམནནྟི ཨདྷིཔྤཱཡོ.

ཏཐེཝཱཏི ¶ ‘‘པཊིཔཱཊིཡཱ ཨཊྛསུ ཀསིཎེསུ སཏཀྑཏྟུམྤི སཧསྶཀྑཏྟུམྤཱི’’ཏི ཨེཏསྶ ཨུཔསཾཧཱརཏྠོ ཏཐཱ-སདྡོ. པཊིལོམཏོ ཙེཏྠ པཊིཔཱཊི. ཏེནཱཧ ‘‘པཊིལོམཀྐམེནཱ’’ཏི. ཨཡཉྷེཏྠ ཨཏྠོ – པཋམཾ ཨོདཱཏཀསིཎེ ཛྷཱནཾ སམཱཔཛྫཏི, ཏཏོ ལོཧིཏཀསིཎེཏི ཡཱཝ པཐཝཱིཀསིཎཱ ཝཏྟབྦཱ.

པུནཔྤུནཾ སམཱཔཛྫནནྟི ‘‘སཏཀྑཏྟུཾ སཧསྶཀྑཏྟུ’’ནྟི ཝུཏྟཾ བཧུལཱཀཱརམཱཧ.

ཏཏྠེཝཱཏི ¶ པཐཝཱིཀསིཎེཡེཝ. ཏཏོཏི པཙྪཱ ཏཏིཡཛ྄ཛྷཱནཏོ ཝུཊྛཱནནྟརཀཱལཾ. ཏདེཝཱཏི པཐཝཱིཀསིཎམེཝ. ཏཏོ ཨཱཀིཉྩཉྙཱཡཏནནྟི ཏཏོ པཐཝཱིཀསིཎུགྒྷཱཊིམཱཀཱསེ པཝཏྟིཏཨཱཀཱསཱནཉྩཱཡཏནསམཱཔཏྟིཏོ ཝུཊྛཱཡ ཝིཉྙཱཎཉྩཱཡཏནཾ ཨམནསིཀརིཏྭཱ ཏཾ ལངྒྷིཏྭཱ ཡཐཱཝུཏྟཨཱཀཱསཱནཉྩཱཡཏནཝིཉྙཱཎསྶ ཨབྷཱཝེ པཝཏྟིཏཾ ཨཱཀིཉྩཉྙཱཡཏནཾ སམཱཔཛྫཏི. པཐཝཱིཀསིཎུགྒྷཱཊིམཱཀཱསཀསིཎཾ པཐཝཱིཀསིཎཔཀྑིཀམེཝ ཧོཏཱིཏི ཝུཏྟཾ ‘‘ཀསིཎཾ ཨནུཀྐམིཏྭཱ’’ཏི. ཨཐ ཝཱ ཨཊྛསུ ཀསིཎེསུ ཀསྶཙི ཨུཀྐམནཾ ཨིདྷ ཀསིཎུཀྐནྟིཀཾ ནཱམཱཏི ཨཱཧ ‘‘ཀསིཎཾ ཨནུཀྐམིཏྭཱ’’ཏི. ཛྷཱནུཀྐནྟིཀནྟི ཨེཏྠ ཨིཙྪིཏཾ ཨཝདྷཱརཎེན ནིཝཏྟེཏབྦཾ, ཨུཀྐམནསྶ ཙ སརཱུཔཾ དསྶེཏུཾ ‘‘ཨེཝཾ ཀསིཎ’’ནྟིཨཱདིཾ ཝཏྭཱ པུན ཏཾ པཀཱརཾ སཧ ནིསྶཡེན སེསཀསིཎེསུ ཨཏིདིསནྟོ ‘‘ཨེཝཾ ཨཱཔོཀསིཎཱདི…པེ… ཀཱཏབྦཱ’’ཏི ཨཱཧ. ཏེནཱཧ ‘‘ཨིམིནཱ ནཡེནཱ’’ཏིཨཱདི. ཡཐཱ པཋམཛ྄ཛྷཱནམཱུལཀཾ པཐཝཱིཀསིཎཱདཱིསུ ཛྷཱནུཀྐནྟིཀཾ དསྶིཏཾ, ཨེཝཾ དུཏིཡཛ྄ཛྷཱནཱདིམཱུལཀམྤི ཏཾ ཡཐཱརཧཾ དསྶེཏབྦཾ.

ཏདེཝཱཏི པཋམཛ྄ཛྷཱནམེཝ. ཀསིཎུཀྐནྟིཀེཔི ཨཱཔོཀསིཎཱདིམཱུལིཀཱ ཡོཛནཱ ཝུཏྟནཡེནེཝ ཀཱཏབྦཱ, ཏཐཱ ཡཐཱརཧཾ དུཏིཡཛ྄ཛྷཱནཱདིམཱུལིཀཱ.

ལོཧིཏཀསིཎཏོ ཨཱཀིཉྩཉྙཱཡཏནནྟི ལོཧིཏཀསིཎཾ ཨཱཝཛྫེནྟོ ཨབྷིམུཁཾ ཀཏྭཱ ཏསྶ ཨུགྒྷཱཊནེན ཨུཔཊྛིཏེ ཀསིཎུགྒྷཱཊིམཱཀཱསེ ཨམནསིཀཱརེན ཨཱཀཱསཱནཉྩཱཡཏནཛ྄ཛྷཱནཾ སམཱཔཛྫིཏྭཱ ཏཏྠ པུབྦེ པཝཏྟཝིཉྙཱཎསྶ ཨཔགམཾ ཨཱརམྨཎཾ ཀཏྭཱ ཨཱཀིཉྩཉྙཱཡཏནཾ སམཱཔཛྫཏི.

ཨིཏརེསནྟི ཨཝསིཊྛརཱུཔཱཝཙརཛ྄ཛྷཱནཱནཾ. ན ཧི ཨརཱུཔཛ྄ཛྷཱནེསུ ཨངྒསངྐནྟི ཨཏྠི, ནཱཔི ཏཱནི ¶ པཐཝཱིཀསིཎེ པཝཏྟནྟི. ཡཾ པན ཨངྒཱརམྨཎསངྐནྟིཝཙནེ ‘‘ནཱིལཀསིཎཾ ཨུགྒྷཱཊེཏྭཱ ཨཱཀཱསཱནཉྩཱཡཏན’’ནྟིཨཱདི ཝུཏྟཾ, ཏཾ ཡཐཱལཱབྷཝསེན ཝུཏྟཾ, པརིཡཱཡེན ཝཱཏི དཊྛབྦཾ. ནིཔྤརིཡཱཡཏོ པན ཡཐཱ ཨངྒསངྐནྟི རཱུཔཛ྄ཛྷཱནེསུ ཨེཝ ལབྦྷཏི, ཨེཝཾ ཨརཱུཔཛ྄ཛྷཱནེསུ ཨེཝ ཨཱརམྨཎསངྐནྟི. ཏསྶ ཏསྶེཝ ཧི ཛྷཱནསྶ ཨཱརམྨཎནྟརེ པཝཏྟི ཨཱརམྨཎསངྐནྟི. ཏེནཱཧ ‘‘སབྦཀསིཎེསུ ཨེཀསྶེཝ ཛྷཱནསྶ སམཱཔཛྫནཾ ཨཱརམྨཎསངྐནྟིཀཾ ནཱམཱ’’ཏི.

ཡཐཱ ¶ པན ‘‘སབྦཀསིཎེསཱུ’’ཏི ཨིམིནཱ ཨཱཀཱསཝིཉྙཱཎཀསིཎཱནམྤི སངྒཧོ ཧོཏཱིཏི ན སཀྐཱ ཝཏྟུཾ ཨིདྷ ཨཊྛནྣཾཡེཝ ཀསིཎཱནཾ ཨདྷིགཏཏྟཱ, ཨེཝཾ སབྦམྤི ཨརཱུཔཛ྄ཛྷཱནཾ ‘‘ཨེཀཾ ཛྷཱན’’ནྟི ན སཀྐཱ ཝཏྟུཾ ཨཊྛནྣཾ སམཱཔཏྟཱིནཾ ཝསེན ཙིཏྟཔརིདམནསྶ ཨིཙྪིཏཏྟཱ. ཏསྨཱ ཨཱརུཔྤཛ྄ཛྷཱནཱནཾ ཝསེན ཨངྒཱརམྨཎསངྐནྟི པརིཡཱཡེན ཝུཏྟཱཏི ཝེདིཏབྦཾ. ཏཐཱ ཧི པཱིཏཀསིཎུགྒྷཱཊིམཱཀཱསེ ཡཾ པཋམཱརུཔྤཝིཉྙཱཎཾ, ཏདཱརམྨཎཾ ཝིཉྙཱཎཉྩཱཡཏནཾ སནྡྷཱཡཱཧ ‘‘པཱིཏཀསིཎཏོ ཝིཉྙཱཎཉྩཱཡཏནཾ སམཱཔཛྫིཏྭཱ’’ཏི. ཨིམིནཱ ནཡེན སེསདྭཡེཔི ཨཏྠོ ཝེདིཏབྦོ. ཨེཀནྟརིཀཝསེནཱཏི ཨཉྙཏྠོ ཨནྟར-སདྡོ. ཨནྟརམེཝ ཨནྟརིཀཾ, ཨེཀཛ྄ཛྷཾ ཨནྟརིཀཾ ཨེཏསྨིནྟི ཨེཀནྟརིཀཾ, ཛྷཱནསམཱཔཛྫནཾ, ཏསྶ ཝསེན. ཡཐཱ ཨངྒཱནཾ, ཨཱརམྨཎསྶ ཙ ཨེཀཛ྄ཛྷཾ ཨཉྙཐཱ ཝིསེསོ ཧོཏི, ཏཐཱ སམཱཔཛྫནཝསེནཱཏི. སོ པན ཝིསེསོ ཧེཊྛིམཱནཾ ཏེསཾ ཨངྒཱརམྨཎཱནཾ སམཏིཀྐམནཝསེན ཧོཏཱིཏི ཝུཏྟཾ ‘‘ཨེཀནྟརིཀཝསེན ཨངྒཱནཉྩ ཨཱརམྨཎཱནཉྩ སངྐམན’’ནྟི. ‘‘ཨིདཾ ཛྷཱནཾ པཉྩངྒིཀ’’ནྟིཨཱདིནཱ ཨངྒེསུ, ‘‘ཨིདཾ པཐཝཱིཀསིཎ’’ནྟིཨཱདིནཱ ཨཱརམྨཎེསུ ཙ ཝཝཏྠཱཔིཏེསུ ཨེཀཛ྄ཛྷཾ ཏེསཾ ཝཝཏྠཱཔནེ ན ཀོཙི ཝིསེསོ ཨཏྠཱིཏི ཨཊྛཀཐཱསུ ཨཡཾ ཝིདྷི ནཱབྷཏོ. ཨེཝཉྩ ཀཏྭཱ ཛྷཱནུཀྐནྟིཀཱདཱིསུ པཊིལོམཀྐམེན, ཨནུལོམཔཊིལོམཀྐམེན ཙ ཨེཀནྟརིཀབྷཱཝེན ལབྦྷམཱནམྤི ཛྷཱནཱདཱིནཾ ཨུཀྐམནཾ ན ཨུདྡྷཊཾ, ཏེཧི ནཡེཧི ཝིནཱཔི ཙིཏྟཔརིདམནཾ ཨིཛ྄ཛྷཏཱིཏི པཔཉྩཔརིཧཱརཏྠཾ ཝཱ ཏེ ཨཊྛཀཐཱསུ ཨནཱགཏཱཏི དཊྛབྦཾ.

༣༦༧. ཨབྷཱཝིཏབྷཱཝནོ ཛྷཱནཱབྷིཉྙཱསུ ཨཀཏཱདྷིཀཱརོ. ཏཏྠ ཨུཔནིསྶཡརཧིཏོཔཱིཏི ཀེཙི. ཨཱདིབྷཱུཏཾ ཡོགཀམྨཾ ཨཱདིཀམྨཾ, ཏཾ ཨེཏསྶ ཨཏྠཱིཏི ཨཱདིཀམྨིཀོ, པུབྦེ ཨཀཏཔརིཙཡོ བྷཱཝནཾ ཨནུཡུཉྫནྟོ. ཏེནཱཧ ‘‘ཡོགཱཝཙརོ’’ཏི. ཀསིཎཔརིཀམྨམྤི བྷཱརོཏི དོསཝིཝཛྫནཱདིཝིདྷིནཱ ཀསིཎམཎྜལེ པཊིཔཏྟི ཡཱཝ ཨུགྒཧནིམིཏྟུཔྤཏྟི ཀསིཎཔརིཀམྨཾ, ཏམྤི ནཱམ བྷཱརོ, པགེཝ ཨིདྡྷིཝིཀུབྦནཱཏི ཨདྷིཔྤཱཡོ. ནིམིཏྟུཔྤཱདནནྟི པཊིབྷཱགནིམིཏྟུཔྤཱདནཾ ¶ . ཏཾ ཝཌྜྷེཏྭཱཏི ཏཾ ནིམིཏྟཾ, བྷཱཝནཉྩ ཝཌྜྷེཏྭཱ. ན ཧི བྷཱཝནཱཡ ཝིནཱཝ ནིམིཏྟཝཌྜྷནཾ ལབྦྷཏི. ཀེཙི ཨུཔཙཱརསམཱདྷིཾ ལབྷིཏྭཱ ཨཔྤནཱསམཱདྷིཾ ཨདྷིགནྟུཾ ན སཀྐོནྟི, ཏཱདིསཱཔི བཧཱུ ཧོནྟེཝཱཏི ཨཱཧ ‘‘ཨཔྤནཱདྷིགམོ བྷཱརོ’’ཏི. ཨཔྤནཱདྷིགམོཏི ཝཱ ཨཊྛནྣཾ སམཱཔཏྟཱིནཾ ཨདྷིགམམཱཧ. ཨཉྙོཝ སམཱཔཏྟཱིནཾ ཨུཔནིསྶཡོ ¶ , ཨཉྙོ ཨབྷིཉྙཱནནྟི ཨཱཧ ‘‘པརིདམིཏཙིཏྟསྶཱཔི ཨིདྡྷིཝིཀུབྦནཾ ནཱམ བྷཱརོ’’ཏི. ཁིཔྤཾ ནིསནྟི ནིསཱམནཾ ཛྷཱནཙཀྑུནཱ པཐཝཱིཀསིཎཱདིཛྷཱནཱརམྨཎསྶ དསྶནཾ ཨེཏསྶཱཏི ཁིཔྤནིསནྟི, སཱིགྷཏརཾ ཛྷཱནཾ སམཱཔཛྫིཏཱ, ཏསྶ བྷཱཝོ ཁིཔྤནིསནྟིབྷཱཝོ. ཨམྦཏརུནིཙིཏཾ མཧཱམཧིནྡཏྠེརཱདཱིཧི ཨོཏིཎྞཊྛཱནཾ ཐེརམྦཏྠལཾ. ཡཐཱ པཊིཔཀྑཝིཛཡཱཡ ཡོདྷཱཛཱིཝཱ ནིམྨལམེཝ ཨསིཏོམརཱདིཾ གཧེཏྭཱ ཝིཙརནྟི, ཨེཝཾ བྷིཀྑུནཱཔི ཀིལེསཝིཛཡཱཡ ནིམྨལཱཝ ཛྷཱནཱབྷིཉྙཱ ཝལ༹ཉྫིཏབྦཱཏི ཨིམམཏྠཾ དསྶེཏུཾ ‘‘ཏསྨཱ’’ཏིཨཱདི ཝུཏྟཾ.

པཏིཊྛཱབྷཱཝོཏི ཨིདྷ པརསྶ ཨུཔདྡཝཱུཔསམནཾ ཨདྷིཔྤེཏཾ. ཏཾ ཧི ཁིཔྤནིསནྟིབྷཱཝཏོཔི གརུཏརཾ ཨཙྩཱཡིཀཀིཙྩསཱདྷནཝསེན ཝིདྷཱཏབྦཏོ དུརབྷིསམྦྷཝཏརཏྟཱ. ཏཾ པན རཀྑིཏཏྠེརནིདསྶནེནེཝ སིདྡྷམྤི ཏཏོ གརུཏརེན ཨངྒཱརཝསྶཔརིཏྟཱཎེན ཝིབྷཱཝེཏུཾ ‘‘གིརིབྷཎྜཝཱཧནཔཱུཛཱཡ…པེ… ཐེརོ ཝིཡཱ’’ཏི ཨཱཧ. གིརིབྷཎྜཝཱཧནཔཱུཛཱ ནཱམ ཙེཏིཡགིརིམཱདིཾ ཀཏྭཱ སཀལདཱིཔེ, སམུདྡེ ཙ ཡཱཝ ཡོཛནཱ མཧཏཱི དཱིཔཔཱུཛཱ. པཐཝིཾ མཱཔེཏྭཱཏི མཱརེན པཝཏྟིཏཾ ཨངྒཱརཝསྶཾ ཕུལིངྒམཏྟེནཔི ཡཱཝ མནུསྶེ ན པཱཔུཎཱཏི, ཏཱཝདེཝ ཨཱཀཱསེ པཐཝིཾ ནིམྨིནིཏྭཱ.

བལཝཔུབྦཡོགཱནནྟི གརུཏརཱུཔནིསྶཡཱནཾ, ཨིདྡྷིཝིདྷཱདཱིནཾ ཧེཏུབྷཱུཏམཧཱབྷིནཱིཧཱརཱནནྟི ཨཏྠོ. ཨགྒསཱཝཀཱདཱིནནྟི ཨཱདི-སདྡེན ཨེཀཙྩེ མཧཱསཱཝཀེ སངྒཎྷཱཏི. བྷཱཝནཱནུཀྐམོ ཡཐཱཝུཏྟཾ ཙིཏྟཔརིདམནཾ. པཊིསམྦྷིདཱདཱིཏི ཨཱདི-སདྡེན ཋཱནཱཋཱནཉཱཎཱདཱིནམྤི སངྒཧོ ཝེདིཏབྦོ, ན སེསཱབྷིཉྙཱནམེཝ. སཱཝཀཱནམྤི ཧི ཋཱནཱཋཱནཉཱཎཱདཱིནི པདེསཝསེན ཨིཛ྄ཛྷནྟི. ཏསྨཱཏི ཡསྨཱ པུབྦཧེཏུསམྤནྣསྶེཝ ཡཐཱཝུཏྟཾ བྷཱཝནཱནུཀྐམཾ ཝིནཱ ཨབྷིཉྙཱཡོ ཨིཛ྄ཛྷནྟི, ན ཨིཏརསྶ, ཏསྨཱ. ཨགྒིདྷམནཱདཱིཧཱིཏི ཨགྒིམྷི ཏཱཔནཀོཊྚནཱདཱིཧི. ཡཐཱ ཙཱཏི ཙ-སདྡེན ལཱཁཱཀཱརཱདཱིནཾ ལཱཁཱཀོཊྚནཱདིཾ ཨཝུཏྟམྤི སངྒཎྷཱཏི. ཚནྡ…པེ… ཝསེནཱཏི ‘‘ཚནྡཝཏོ ཙེ ཨབྷིཉྙཱ སིཛ྄ཛྷཏི, མཡ྄ཧམྤི སིཛ྄ཛྷཏཱི’’ཏི ཀཏྟུཀམྱཏཱཚནྡཾ སཱིསཾ དྷུརཾ ཛེཊྛཾ པུབྦངྒམཾ ཀཏྭཱ, ཚནྡཾ ཝཱ ཨུཔྤཱདེཏྭཱ ཏཾ བྷཱཝནཱཡ མུཁཾ ཀཏྭཱ ཛྷཱནསྶ སམཱཔཛྫནཝསེན. ཨེསེཝ ¶ ནཡོ སེསེསུཔི. ‘‘ཨཱཝཛྫནཱདིཝསཱིབྷཱཝཝསེནཱ’’ཏི ཨིདཾ ཨཊྛསུཔི སམཱཔཏྟཱིསུ སཱཏིསཡཾ ཝསཱིབྷཱཝཱཔཱདནཾ སནྡྷཱཡ ཝུཏྟཾ. ཏཉྩ ཁོ ཨཱདིཀམྨིཀཝསེན, ན ¶ ཀཏཱདྷིཀཱརཝསེནཱཏི ཨཱཧ ‘‘པུབྦཧེཏུ…པེ… ཝཊྚཏཱི’’ཏི. པུབྦཧེཏུསམྤནྣསྶ ཧི ཡཾ ཛྷཱནཾ པཱདཀཾ ཀཏྭཱ ཨབྷིཉྙཱ ནིབྦཏྟེཏབྦཱ, ཏཏྠེཝ སཱཏིསཡཾ ཙིཎྞཝསིཏཱཔི ཨིཙྪིཏབྦཱ, ན སབྦཏྠེཝཱཏི ཨདྷིཔྤཱཡོ. ‘‘ཙཏུཏྠཛ྄ཛྷཱནམཏྟེ ཙིཎྞཝསིནཱ’’ཏི ཝཙནཏོ ཨརཱུཔསམཱཔཏྟིཡོ ཝིནཱཔི ཨབྷིཉྙཱ ཨིཛ྄ཛྷནྟཱིཏི ཝདནྟི. ཏམྤི ཡདི པུབྦཧེཏུསམྤནྣསྶ ཝསེན ཝུཏྟཾ, ཡུཏྟམེཝ. ཨཐེཏརསྶ, ཏེསཾ མཏིམཏྟཾ. ཡཐཱཏི ཡེན པཀཱརེན ཡེན ཝིདྷིནཱ. ཨེཏྠཱཏི ཨེཏསྨིཾ ཨིདྡྷིཝིདྷནིཔྥཱདནེ.

༣༦༨. ཏཏྲཱཏི ཙ ཏདེཝ པཙྩཱམསཏི. པཱལི༹ནཡཱནུསཱརེནེཝཱཏི པཱལི༹གཏིཡཱ ཨནུསརཎེནེཝ, པཱཋསཾཝཎྞནཱནུཀྐམེནེཝཱཏི ཨཏྠོ. ‘‘ཙཏུཏྠཛ྄ཛྷཱནཾ ཨུཔསམྤཛྫ ཝིཧརཏཱི’’ཏི ཝཏྭཱ ‘‘སོ’’ཏི ཝུཏྟཏྟཱ ཨཱཧ ‘‘ཨདྷིགཏཙཏུཏྠཛ྄ཛྷཱནོ ཡོགཱི’’ཏི. ‘‘ཨེཝཾ སམཱཧིཏེ’’ཏི ཨེཏྠ ཨེཝཾ-སདྡོ ཧེཊྛཱཛྷཱནཏྟཡཱདྷིགམཔཊིཔཱཊིསིདྡྷསྶ ཙཏུཏྠཛ྄ཛྷཱནསམཱདྷཱནསྶ ནིདསྶནཏྠོཏི ཨཱཧ ‘‘ཨེཝནྟི ཙཏུཏྠཛ྄ཛྷཱནཀྐམནིདསྶནམེཏ’’ནྟི, ཙཏུཏྠཛ྄ཛྷཱནསྶ, ཏསྶ ཙ ཨདྷིགམཀྐམསྶ ནིདསྶནཾ. ཡེན སམཱདྷཱནཱནུཀྐམེན ཙཏུཏྠཛ྄ཛྷཱནསམཱདྷི ལདྡྷོ, ཏདུབྷཡནིདསྶནནྟི ཨཏྠོ. ཏེནཱཧ ‘‘ཨིམིནཱ…པེ… ཝུཏྟཾ ཧོཏཱི’’ཏི. ཡདིཔི ‘‘ཨེཝ’’ནྟི ཨིདཾ ཨཱགམནསམཱདྷིནཱ སདྡྷིཾ ཙཏུཏྠཛ྄ཛྷཱནསམཱདྷཱནཾ དཱིཔེཏི. སཏིཔཱརིསུདྡྷིསམཱདྷི ཨེཝ པན ཨིདྡྷིཡཱ ཨདྷིཊྛཱནབྷཱཝཏོ པདྷཱནནྟི ཨཱཧ ‘‘ཙཏུཏྠཛ྄ཛྷཱནསམཱདྷིནཱ སམཱཧིཏེ’’ཏི. ཨུཔེཀྑཱསཏིཔཱརིསུདྡྷིབྷཱཝེནཱཏི ཨུཔེཀྑཱཡ ཛནིཏསཏིཔཱརིསུདྡྷིསབྦྷཱཝེན. སབྦཔཙྩནཱིཀདྷམྨཱུཔཀྐིལེསཔརིསུདྡྷཱཡ ཧི པཙྩནཱིཀསམནེཔི ཨབྱཱཝཊཱཡ པཱརིསུདྡྷིཨུཔེཀྑཱཡ ཝཏྟམཱནཱཡ ཙཏུཏྠཛ྄ཛྷཱནཾ, ཏཾསམྤཡུཏྟདྷམྨཱ ཙ སུཔརིསུདྡྷཱ, སུཝིསདཱ ཙ ཧོནྟི, སཏིསཱིསེན པན ཏཏྠ དེསནཱ ཀཏཱཏི ཨཱཧ ‘‘ཨུཔེཀྑཱསཏིཔཱརིསུདྡྷིབྷཱཝེན པརིསུདྡྷེ’’ཏི. པརིསུདྡྷིཡཱ ཨེཝ པཙྩཡཝིསེསེན པཝཏྟིཝིསེསོ པརིཡོདཱཏཏཱ སུདྷནྟསུཝཎྞསྶ ནིགྷཾསནེན པབྷསྶརཏཱ ཝིཡཱཏི ཨཱཧ ‘‘པརིསུདྡྷཏྟཱཡེཝ པརིཡོདཱཏེ, པབྷསྶརེཏི ཝུཏྟཾ ཧོཏཱི’’ཏི.

སུཁཱདཱིནཾ པཙྩཡཱནཾ གྷཱཏེནཱཏི སུཁསོམནསྶཱནཾ, དུཀྑདོམནསྶཱནཉྩ ཡཐཱཀྐམཾ རཱགདོསཔཙྩཡཱནཾ ཝིཀྑམྦྷནེན. ‘‘སུཁཾ སོམནསྶསྶ པཙྩཡོ, སོམནསྶཾ རཱགསྶ, དུཀྑཾ དོམནསྶསྶཱ’’ཏི ཧི ཝུཏྟཾ. ཡཐཱ རཱགཱདཡོ ཙེཏསོ མལཱསུཙིབྷཱཝེན ‘‘ཨངྒཎཱནཱི’’ཏི ཝུཙྩནྟི, ཨེཝཾ ཨུཔགནྟྭཱ ¶ ཀིལེསནཊྛེན ཨུཔཀྐིལེསཱཏི ཨཱཧ ‘‘ཨནངྒཎཏྟཱཡེཝ ཝིགཏཱུཔཀྐིལེསེ’’ཏི. ཏེནཱཧ ‘‘ཨངྒཎེན ཧི ཏཾ ཙིཏྟཾ ཨུཔཀྐིལིསྶཏཱི’’ཏི, ཝིབཱདྷཱིཡཏི ཨུཔཏཱཔཱིཡཏཱིཏི ¶ ཨཏྠོ. སུབྷཱཝིཏཏྟཱཏི པགུཎབྷཱཝཱཔཱདནེན སུཊྛུ བྷཱཝིཏཏྟཱ. ཏེནཱཧ ‘‘ཝསཱིབྷཱཝཔྤཏྟེ’’ཏི, ཨཱཝཛྫནཱདིནཱ པཉྩདྷཱ, ཙུདྡསཝིདྷེན ཝཱ པརིདམནེན ཝསཝཏྟིཏཾ ཨུཔགཏེཏི ཨཏྠོ. ཝསེ ཝཏྟམཱནཾ ཧི ཙིཏྟཾ པགུཎབྷཱཝཱཔཏྟིཡཱ སུཔརིམདྡིཏཾ ཝིཡ ཙམྨཾ, སུཔརིཀམྨཀཏཱ ཝིཡ ཙ ལཱཁཱ མུདུནྟི ཝུཙྩཏི. ཀམྨཀྑམེཏི ཝིཀུབྦནཱདིཨིདྡྷིཀམྨཀྑམེ. ཏཉྩ ཨུབྷཡནྟི མུདུཏཱཀམྨནིཡདྭཡཾ.

ནཱཧནྟིཨཱདཱིསུ ན-ཀཱརོ པཊིསེདྷཏྠོ. ཨཧནྟི སཏྠཱ ཨཏྟཱནཾ ནིདྡིསཏི. བྷིཀྑཝེཏི བྷིཀྑཱུ ཨཱལཔཏི. ཨཉྙནྟི ཨིདཱནི ཝུཙྩམཱནཙིཏྟཏོ ཨཉྙཾ. ཨེཀདྷམྨམྤཱིཏི ཨེཀམྤི སབྷཱཝདྷམྨཾ ན སམནུཔསྶཱམཱིཏི སམྦནྡྷོ. ཨཡཾ ཧེཏྠ ཨཏྠོ – ཨཧཾ, བྷིཀྑཝེ, སབྦཉྙུཏཉྙཱཎེན ཨོལོཀེནྟོཔི ཨཉྙཾ ཨེཀདྷམྨམྤི ན སམནུཔསྶཱམི. ཡཾ ཝསཱིབྷཱཝཱཔཱདནེན བྷཱཝིཏཾ, ཏཐཱ པུནཔྤུནཾ ཀརཎེན བཧུལཱིཀཏཾ, ཨེཝཾ སཝིསེསམུདུབྷཱཝཔྤཏྟིཡཱ མུདུཾ, ཀམྨཀྑམཏཱཡ ཀམྨནིཡཉྩ ཧོཏི. ཡཐཡིདཾ ཙིཏྟནྟི ཨཏྟནོ, ཏེསཉྩ པཙྩཀྑཏཱཡ ཨེཝམཱཧཱཏི. ཡཐཱ ཡཐཱཝུཏྟཱ པརིསུདྡྷཏཱདཡོ ན ཝིགཙྪནྟི, ཨེཝཾ སུབྷཱཝིཏཾ ཙིཏྟཾ.

ཏཏྠ ཨཝཊྛིཏཾ ཨིདྷ ‘‘ཋིཏཾ, ཨཱནེཉྫཔྤཏྟ’’ནྟི ཙ ཝུཏྟནྟི ཨཱཧ ‘‘ཨེཏེསུ པརིསུདྡྷཏཱདཱིསུ ཋིཏཏྟཱ ཋིཏེ, ཋིཏཏྟཱཡེཝ ཨཱནེཉྫཔྤཏྟེ’’ཏི. ཡཐཱ མུདུཀམྨཉྙཏཱ ཝསཱིབྷཱཝཔྤཏྟིཡཱ ལཀྑཱིཡནྟི, ཨེཝཾ ཝསཱིབྷཱཝཔྤཏྟིཔི མུདུཀམྨཉྙཏཱཧི ལཀྑཱིཡཏཱིཏི, མུདུཀམྨཉྙབྷཱཝེན ཝཱ ཨཏྟནོ ཝསེ ཋིཏཏྟཱ ‘‘ཋིཏེ’’ཏི ཝུཏྟཾ. ཡཐཱ ཧི ཀཱརཎེན ཕལཾ ནིདྡྷརཱིཡཏི, ཨེཝཾ ཕལེནཱཔི ཀཱརཎཾ ནིདྡྷརཱིཡཏཱིཏི ནིཙྩལབྷཱཝེན ཨཝཊྛཱནཾ ཨཱནེཉྫཔྤཏྟི. སཱ ཙ སམྤཡུཏྟདྷམྨེསུ ཐིརབྷཱཝེན, པཊིཔཀྑེཧི ཨཀམྨནིཡཏཱཡ ཙ སམྦྷཝནྟཱི སདྡྷཱདིབལཱནཾ ཨཱནུབྷཱཝེན ཧོཏཱིཏི ‘‘སདྡྷཱདཱིཧི པརིགྒཧིཏཏྟཱ ཨཱནེཉྫཔྤཏྟེ’’ཏི སངྑེཔཏོ ཝུཏྟམཏྠཾ ཝིཝརིཏུཾ ‘‘སདྡྷཱཔརིགྒཧིཏཾ ཧཱི’’ཏིཨཱདི ཝུཏྟཾ. ཏཏྠ སདྡྷཱཔརིགྒཧིཏནྟི ཨེཝཾ སུབྷཱཝིཏཾ ཝསཱིབྷཱཝཔྤཏྟཾ ཨེཏཾ ཙིཏྟཾ ཨེཀཾསེན ཨབྷིཉྙཱསཙྪིཀརཎཱིཡཱནཾ དྷམྨཱནཾ ཨབྷིཉྙཱསཙྪིཀིརིཡཱཡ སཾཝཏྟཏཱིཏི ཨེཝཾ པཝཏྟཱཡ སདྡྷཱཡ པརིགྒཧིཏཾ ཡཐཱཝུཏྟསདྡྷཱབལེན ཨུཔཏྠམྦྷིཏཾ. ཨསྶདྡྷིཡེནཱཏི ཏཔྤཊིཔཀྑེན ཨསྶདྡྷིཡེན ཧེཏུནཱ ན ཨིཉྫཏི ན ཙལཏི ན ཀམྤཏི, ཨཉྙདཏྠུ ཨུཔརི ཝིསེསཱཝཧབྷཱཝེནེཝ ཏིཊྛཏི. ཝཱིརིཡཔརིགྒཧིཏནྟིཨཱདཱིསུཔི ¶ ཨིམིནཱ ནཡེན ཨཏྠོ ཝེདིཏབྦོ. ཨཡཾ པན ཝིསེསོ – ཝཱིརིཡཔརིགྒཧིཏནྟི ཝསཱིབྷཱཝཱཔཱདནཔརིདམནསཱདྷནེན ཝཱིརིཡེན ཨུཔཏྠམྦྷིཏཾ. སཏིཔརིགྒཧིཏནྟི ཡཐཱཝུཏྟེ བྷཱཝནཱབཧུལཱིཀཱརེ ཨསམྨོསསཱདྷིཀཱཡ, ཀུསལཱནཉྩ དྷམྨཱནཾ གཏིཡོ སམནྣེསམཱནཱཡ སཏིཡཱ ¶ ཨུཔཏྠམྦྷིཏཾ. སམཱདྷིཔརིགྒཧིཏནྟི ཏཏྠེཝ ཨཝིཀྑེཔསཱདྷནེན སམཱདྷཱནེན ཨུཔཏྠམྦྷིཏཾ. པཉྙཱཔརིགྒཧིཏནྟི ཏསྶཱ ཨེཝ བྷཱཝནཱཡ ཨུཔཀཱརཱནུཔཀཱརདྷམྨཱནཾ པཛཱནནལཀྑཎཱཡ པཉྙཱཡ ཨུཔཏྠམྦྷིཏཾ. ཨོབྷཱསགཏནྟི ཉཱཎོབྷཱསསཧགཏཾ. ཨོབྷཱསབྷཱུཏེན ཧི ཡཐཱཝུཏྟསམཱདྷཱནསཾཝདྡྷིཏེན ཉཱཎེན སཾཀིལེསཔཀྑཾ ཡཱཐཱཝཏོ པསྶནྟོ ཏཏོ ཨུཏྲསནྟོ ཨོཏྟཔྤནྟོ ཏཾ ཨདྷིབྷཝཏི, ན ཏེན ཨབྷིབྷཱུཡཏི. ཏེནཱཧ ‘‘ཀིལེསནྡྷཀཱརེན ན ཨིཉྫཏཱི’’ཏི. ཨེཏེན ཉཱཎཔརིགྒཧིཏཾ ཧིརོཏྟཔྤབལཾ དསྶེཏི.

ཨཊྛངྒསམནྣཱགཏནྟི ཙཏུཏྠཛ྄ཛྷཱནསམཱདྷིནཱ སམཱཧིཏཏཱ, པརིསུདྡྷཏཱ, པརིཡོདཱཏཏཱ, ཨནངྒཎཏཱ, ཝིགཏཱུཔཀྐིལེསཏཱ, མུདུབྷཱཝོ, ཀམྨནིཡཏཱ, ཨཱནེཉྫཔྤཏྟིཡཱ ཋིཏཏཱ, སམཱཧིཏསྶ ཝཱ ཙིཏྟསྶ ཨིམཱནི ཨངྒཱནཱིཏི ‘‘སམཱཧིཏེ’’ཏི ཨིམཾ ཨངྒབྷཱཝེན ཨགྒཧེཏྭཱ ཋིཏིཨཱནེཉྫཔྤཏྟིཡོ ཝིསུཾ གཧེཏྭཱ ཨིམེཧི ཨཊྛཧི ཨངྒེཧི སམནྣཱགཏཾ. ཨབྷིནཱིཧཱརཀྑམནྟི ཨིདྡྷིཝིདྷཱདིཨཏྠཾ ཨབྷིནཱིཧཱརཀྑམཾ ཏདབྷིམུཁཾ ཀརཎཡོགྒཾ. ཏེནཱཧ ‘‘ཨབྷིཉྙཱསཙྪིཀརཎཱིཡཱནཾ དྷམྨཱནཾ ཨབྷིཉྙཱསཙྪིཀིརིཡཱཡཱ’’ཏི.

ཀཱམཾ ནཱིཝརཎཱནི ཝིཀྑམྦྷེཏྭཱ ཨེཝ པཋམཛ྄ཛྷཱནསམདྷིགམོ, ཝིཏཀྐཱདིཀེ ཝཱུཔསམེ ཨེཝ ཙ དུཏིཡཛ྄ཛྷཱནཱདིསམདྷིགམོ, ཏཐཱཔི ན ཏཐཱ ཏེཧི དཱུརཱིབྷཱུཏཱ ཨཔེཏཱ ཝཱ ཡཐཱ ཙཏུཏྠཛ྄ཛྷཱནཏོ, ཙེཏསོ མལཱིནབྷཱཝསངྑཱཏཨུཔྤིལཱབྷོགཀརེཧི ནཱིཝརཎཱདཱིཧི སུཊྛུ ཝིམུཏྟིཡཱ ཏསྶ པརིསུདྡྷི, པརིཡོདཱཏཏཱ ཙ ཡུཏྟཱཏི ཨཱཧ ‘‘ནཱིཝརཎ…པེ… པརིཡོདཱཏེ’’ཏི. ཛྷཱནཔཊིལཱབྷཔཙྩཡཱནནྟི ཛྷཱནཔཊིལཱབྷཧེཏུཀཱནཾ ཛྷཱནཔཊིལཱབྷཾ ནིསྶཱཡ ཨུཔྤཛྫནཀཱནཾ. པཱཔཀཱནནྟི ལཱམཀཱནཾ. ཨིཙྪཱཝཙརཱནནྟི ཨིཙྪཱཡ ཨཝཙརཱནཾ ཨིཙྪཱཝསེན ཨོཏིཎྞཱནཾ ‘‘ཨཧོ ཝཏ མམེཝ སཏྠཱ པཊིཔུཙྪིཏྭཱ པཊིཔུཙྪིཏྭཱ བྷིཀྑཱུནཾ དྷམྨཾ དེསེཡྻཱ’’ཏིཨཱདིནཡཔྤཝཏྟཱནཾ མཱནམཱཡཱསཱཋེཡྻཱདཱིནཾ. ཨབྷིཛ྄ཛྷཱདཱིནནྟི ཨཱདི-སདྡེནཱཔི ཏེསཾཡེཝ སངྒཧོ. ཨབྷིཛ྄ཛྷཱ ཙེཏྠ པཋམཛ྄ཛྷཱནེན ཨཝིཀྑམྦྷནེཡྻཱ, མཱནཱདཡོ ཙ ཏདེཀཊྛཱ དཊྛབྦཱ ¶ ‘‘ཛྷཱནཔཊིལཱབྷཔཙྩཡཱན’’ནྟི ཨནུཝཏྟམཱནཏྟཱ. ཝིཀྑམྦྷནེཡྻཱ པན ནཱིཝརཎགྒཧཎེནེཝ གཧིཏཱ, ཀཐཾ པན པཋམཛ྄ཛྷཱནེན ཨཝིཀྑམྦྷནེཡྻཱ ཨིདྷ ཝིགཙྪནྟཱིཏི? ‘‘སབྦེ ཀུསལཱ དྷམྨཱ སབྦཱཀུསལཱནཾ པཊིཔཀྑཱ’’ཏི སལླེཁཔཊིཔཏྟིཝསེན ཨེཝཾ ཝུཏྟཾ ཛྷཱནསྶ ཨཔརཱམཊྛབྷཱཝདསྶནཏོ. ཡེ པནེཏྠ ‘‘ཨིཙྪཱཝཙརཱནཾ ཨབྷིཛ྄ཛྷཱདཱིན’’ནྟི ཨིམེཧི པདེཧི ཀོཔཨཔཙྩཡཀཨཱམརཱགབྱཱཔཱདཱདཡོ གཧིཏཱཏི ཨདྷིཔྤཱཡེན ‘‘ཛྷཱནཔཊིལཱབྷཔཙྩཡཱན’’ནྟི པཱཋཾ པཊིཀྑིཔིཏྭཱ ‘‘ཛྷཱནཔཊིལཱབྷཔཙྩནཱིཀཱན’’ནྟི ¶ པཱཋོཏི ཝདནྟི, ཏཾ ཏེསཾ མཏིམཏྟཾ ཏཐཱ པཱཋསྶེཝ ཨབྷཱཝཏོ. ཛྷཱནཔཊིལཱབྷཔཙྩནཱིཀཱ ཙ ནཱིཝརཎཱ ཙེཝ ཏདེཀཊྛཱ ཙ ཏེསཾ དཱུརཱིབྷཱཝཾ ཝཏྭཱ པུན ཨབྷཱཝཝིགམཙོདནཱཡ ཨཡུཛྫམཱནཏྟཱ. ནནུ ཙ ཨནངྒཎསུཏྟ- (མ. ནི. ༡.༥༧ ཨཱདཡོ) ཝཏྠསུཏྟེསུ (མ. ནི. ༡.༧༠ ཨཱདཡོ) ཨཡམཏྠོ ན ལབྦྷཏི, ཨོལཱ༹རིཀཱནཾཡེཝ པཱཔདྷམྨཱནཾ ཏཏྠ ཨདྷིཔྤེཏཏྟཱ? སཙྩམེཏཾ, ཨིདྷ པན ཨདྷིགཏཙཏུཏྠཛ྄ཛྷཱནསྶ ཝསེན ཝུཏྟཏྟཱ སུཁུམཱཡེཝ ཏེ གཧིཏཱ, ཨངྒཎཱུཔཀྐིལེསཏཱསཱམཉྙེན པནེཏྠ སུཏྟཱནཾ ཨཔདིསནཾ. ཏཐཱ ཧི ‘‘སུཏྟཱནུསཱརེནཱ’’ཏི ཝུཏྟཾ, ན པན སུཏྟཝསེནཱཏི. ཨཝསྶཾ ཙེ ཏམེཝཾ སམྤཊིཙྪིཏབྦཾ ཨདྷིགཏཛ྄ཛྷཱནཱནམྤི ཀེསཉྩི ཨིཙྪཱཝཙརཱནཾ པཝཏྟིསབྦྷཱཝཏོ.

ཨིདྡྷིཔཱདབྷཱཝཱུཔགམེནཱཏི ཨིདྡྷིཡཱ པཱདཀབྷཱཝསྶ པདཊྛཱནབྷཱཝསྶ ཨུཔགམནེན. བྷཱཝནཱཔཱརིཔཱུརིཡཱཏི ཨིཏོ པརཾ ཀཏྟབྦསྶ ཨབྷཱཝཝསེན ཨབྷིནཱིཧཱརཀྑམབྷཱཝནཱཡ པརིཔུཎྞཏྟཱ. པཎཱིཏབྷཱཝཱུཔགམེནཱཏི ཏཏོ ཨེཝ པདྷཱནབྷཱཝཾ ནཱིཏཏཱཡ ཨུཏྟམཊྛེན, ཨཏིཏྟིཀརཊྛེན ཙ པཎཱིཏབྷཱཝསྶ ཨུཔགམནེན. ཨུབྷཡཉྩེཏཾ ཋིཏིཡཱ ཀཱརཎཝཙནཾ པརིཔུཎྞཱཡ བྷཱཝནཱཡ པཎཱིཏབྷཱཝཔྤཏྟིཡཱ ‘‘ཋིཏེ’’ཏི. ‘‘ཨཱནེཉྫཔྤཏྟེ’’ཏི ཨིདཾ ཋིཏིཡཱ ཝིསེསནཾ. ཏེནཱཧ ‘‘ཡཐཱ ཨཱནེཉྫཔྤཏྟཾ ཧོཏི, ཨེཝཾ ཋིཏེ’’ཏི. ཨིམསྨིཾ པཀྑེ ‘‘ཋིཏེ ཨཱནེཉྫཔྤཏྟེ’’ཏི ཨུབྷཡམེཀཾ ཨངྒཾ, ‘‘སམཱཧིཏེ’’ཏི པན ཨིདམྤི ཨེཀམངྒཾ. ཏེནེཝསྶ པཋམཝིཀཔྤཏོ ཝིསེསཾ སནྡྷཱཡཱཧ ‘‘ཨེཝམྤི ཨཊྛངྒསམནྣཱགཏ’’ནྟི.

དསཨིདྡྷིཀཐཱཝཎྞནཱ

༣༦༩. ནིཔྥཏྟིཨཏྠེནཱཏི སིཛ྄ཛྷནཊྛེན. པཊིལཱབྷཊྛེནཱཏི པཱཔུཎནཊྛེན. ཏནྟི ཀཱམིཏཾ ཝཏྠུཾ. སམིཛ྄ཛྷཏཱིཏི ནིཔྥཛྫཏི. པབྦཛྫཾ ཨཱདིཾ ཀཏྭཱ ཡཱཝ ཛྷཱནམགྒཱ ¶ ཨིདྷ ནེཀྑམྨཾ. ཨིཛ྄ཛྷཏཱིཏི པཱཔུཎཱིཡཏི. པཊིཧརཏཱིཏི པཱཊིཧཱརིཡནྟི ཡསྨཱ པཊིཔཀྑཾ ཧརཏི ཨཔནེཏི, ཏསྨཱ པཱཊིཧཱརིཡཾ. ཨཏྟནོ པཊིཔཀྑཾ ཧརཏཱིཏི པཊིཧཱརིཡཾ, ནེཀྑམྨཱདི, པཊིཧཱརིཡམེཝ པཱཊིཧཱརིཡཾ, ཡཐཱ ‘‘ཝེཀཏཾ, ཝེསམ’’ནྟི ཙ.

ཨིཛ྄ཛྷནཊྛེནཱཏི ནིཔྥཛྫནཊྛེན. ཨུཔཱཡསམྤདཱཡཱཏི སམྤནྣཨུཔཱཡསྶ, ཉཱཡཱརམྦྷསྶཱཏི ཨཏྠོ. ཨིཛ྄ཛྷཏཱིཏི པསཝེཏི. སཱིལཝཱཏི ཨཱཙཱརསཱིལེན སཱིལཝཱ. ཀལྱཱཎདྷམྨོཏི དསཀུསལཀམྨཔཐཝསེན ¶ སུནྡརདྷམྨོ. སཱིལསམྤཏྟིཡཱ ཝཱ སཱིལཝཱ. དཱནཱདིསེསཔུཉྙཀིརིཡཝཏྠུཝསེན ཀལྱཱཎདྷམྨོ. པཎིདཧིསྶཏཱིཏི པཏྠེསྶཏི.

ཨིཛ྄ཛྷནྟཱིཏི ཝཌྜྷནྟི, ཨུཀྐཾསཾ པཱཔུཎནྟཱིཏི ཨཏྠོ. སཱཏིསཡནིཔྥཛྫནཔཊིལཱབྷསིཛ྄ཛྷནབུདྡྷིཨཏྠེ ཧི ཨིདྡྷི ཝུཏྟཱ. སཱ དསཝིདྷཱཏི སབྦཱ ཨིདྡྷིཡོ ཨཱནེཏྭཱ ཨཏྠུདྡྷཱརཝསེན ཨིདྷཱདྷིཔྤེཏཾ ཨིདྡྷིཾ དསྶེཏུཾ ཝུཏྟཾ. བཧུབྷཱཝཱདིཀསྶ ཨདྷིཊྛཱནཾ ཨདྷིཊྛཧནཾ ཨེཏིསྶཱ ཨཏྠཱིཏི ཨདྷིཊྛཱནཱ. ཝིཝིདྷཾ རཱུཔནིམྨཱནསངྑཱཏཾ ཀུབྦནཾ ཨེཏིསྶཱ ཨཏྠཱིཏི ཝིཀུབྦནཱ. མནོམཡཱཏི ཛྷཱནམནེན ནིབྦཏྟིབྷཱཝཏོ མནོམཡཱ. ཉཱཎསྶ ཝིཔྥཱརོ ཝེགཱཡིཏཏྟཾ ཨེཏིསྶཱ ཨཏྠཱིཏི ཉཱཎཝིཔྥཱརཱ. ཨརིཡཱནཾ ཨཡནྟི ཨརིཡཱ. ཡཏོ ཀུཏོཙི ཀམྨཝིཔཱཀཏོ ཛཱཏཱ ཨིདྡྷི ཀམྨཝིཔཱཀཛཱ. སཱཏིསཡཔུཉྙནིབྦཏྟཱ ཨིདྡྷི པུཉྙཝཏོ ཨིདྡྷི. ཀམྨཝིཔཱཀཛཱ ཨིདྡྷི ཛཱཏིཏོ པཊྛཱཡ ཧོཏི, ཨིཏརཱ ཡདཱ ཏདཱ པུཉྙསྶ ཝིཔཙྩནཀཱལེཏི ཨེཝཾ ཝཱ ཨིམཱསཾ ཝིསེསོ ཝེདིཏབྦོ. ཨཱཐབྦནཝིཛྫཱབྷིནིབྦཏྟཱ ཝིཛྫཱམཡཱ. སམྨཱཔཡོགོ ཨུཔཱཡཔཡོགོ ཉཱཡཱརམྦྷོ.

༣༧༠. པཀཏིཡཱ ཨེཀོཏི སབྷཱཝེན ཨེཀོ. བཧུཀནྟི བཧུཾ. ཏེན ཨགྒཧིཏཔརིཙྪེདཾ ཨདྷིཊྛཱཏབྦསྶ ཨནེཀབྷཱཝཾ དསྶེཏྭཱ པུན པརིཙྪེདཏོ དསྶེཏུཾ ‘‘སཏཾ ཝཱ’’ཏིཨཱདི ཝུཏྟཾ. ཨཱཝཛྫཏཱིཏི པརིཀམྨསངྑཱཏེན ཨཱབྷོགེན ཨཱབྷུཛཏི བྷཱཝིརཱུཔེ ཏེན པརིཀམྨམནསིཀཱརེན མནསི ཀརོཏི. ཉཱཎེན ཨདྷིཊྛཱཏཱིཏི ཏཐཱ པརིཀམྨཾ ཀཏྭཱ ཨབྷིཉྙཱཉཱཎེན ཡཐཱདྷིཔྤེཏེ བཧུཀེ ཨདྷིཊྛཱཏི, ཨདྷིཊྛཱནཙིཏྟེན སཧེཝ བཧུབྷཱཝཱཔཏྟིཏོ བཧུབྷཱཝཱཔཱདཀཾ ཨིདྡྷིཝིདྷཉཱཎཾ པཝཏྟེནྟོ ཙ ཏཐཱ ཨདྷིཊྛཱཏཱིཏི ཝུཙྩཏི. སེསེསུཔི ཨེསེཝ ནཡོ. ཨེཝནྟི ¶ པཀཱརཏྠོ ཨེཝཾ-སདྡོ, ཏེན སབྦམྤི ཨདྷིཊྛཱནཔྤཀཱརཾ སངྒཎྷཱཏི. ཨདྷིཊྛཱནཝསེནཱཏི ‘‘ཉཱཎེན ཨདྷིཊྛཱཏཱི’’ཏི (པཊི. མ. ༣.༡༠) ཨེཝཾ ཝུཏྟཨདྷིཊྛཱནཝསེན ནིཔྥནྣཏྟཱ.

༣༧༡. པཀཏིཝཎྞནྟི པཀཏིསཎྛཱནཾ ཨཏྟནོ པཱཀཏིཀརཱུཔཾ. པཀཏིཝཎྞཝིཛཧནཝིཀཱརཝསེནཱཏི ཨཏྟནོ པཀཏིཝཎྞཝིཛཧནཔུབྦཀསྶ ཀུམཱརཀཝཎྞཱདིཝཎྞཝིཀཱརསྶ ཝསེན.

༣༧༢. ཨིམམྷཱ ཀཱཡཱཏི པཙྩཀྑབྷཱཝེན ‘‘ཨིམམྷཱ’’ཏི ཝུཏྟཱ བྷིཀྑུསྶ ཀརཛཀཱཡཱ. ཨཉྙཾ ཀཱཡནྟི ཨཉྙཾ ཨིདྡྷིམཡཾ ཀཱཡཾ. ཏཏོ ཨེཝ ཨིདྡྷིམཡརཱུཔཝནྟཏཱཡ རཱུཔིཾ. ཨབྷིཉྙཱམནེན ¶ ནིབྦཏྟཏྟཱ མནོམཡཾ. ནིཔྥཏྟིཝསེནཱཏི ནིཔྥཛྫནཝསེན. ཨབྷིཉྙཱཉཱཎསྶ ཧི ཡཐཱ མནོམཡོ ཀཱཡོ ནིཔྥཛྫཏི, ཏཐཱ པཝཏྟི མནོམཡིདྡྷི. ཨེསེཝ ནཡོ སེསེསུཔི. ཡདི ཨེཝཾ ཀཐམཡམེཝ མནོམཡིདྡྷཱིཏི? རུལ༹ྷཱིཝེསཱ ཝེདིཏབྦཱ ཡཐཱ ‘‘མནོམཡོ ཨཏྟབྷཱཝོ’’ཏི, ཡཐཱ ཝཱ ‘‘གོསམཉྙཱ ཝིསཱཎཱདིམཏི པིཎྜེ’’. ཨཐ ཝཱ ཨབྦྷནྟརཏོ ནིཀྑནྟེ, ཨིདྡྷིམཏཱ ཙ ཨེཀནྟསདིསེ ཨིམསྨིཾ ནིམྨཱནེ སུཔཱཀཊོ མནསཱ ནིབྦཏྟིཏབྷཱཝོཏི ཡཐཱ སཱཏིསཡོ མནོམཡཝོཧཱརོ, ན ཏཐཱ ཨཉྙཱསུ ཨདྷིཊྛཱནཝིཀུབྦནིདྡྷཱིསུ སམཉྙནྟརཝནྟཱསཱུཏི ཝེདིཏབྦཾ.

༣༧༣. ཉཱཎུཔྤཏྟིཏོ པུབྦེ ཝཱཏི ཨརཧཏྟམགྒཉཱཎུཔྤཏྟིཏོ པུབྦེ ཝཱ ཝིཔསྶནཱཀྑཎེ, ཏཏོཔི ཝཱ པུབྦེ ཨནྟིམབྷཝིཀསྶ པཊིསནྡྷིགྒཧཎཏོ པཊྛཱཡ. པཙྪཱ ཝཱ ཡཱཝ ཁནྡྷཔརིནིབྦཱནཱ. ཏངྑཎེ ཝཱ མགྒུཔྤཏྟིསམཡེ. ཉཱཎཱནུབྷཱཝནིབྦཏྟོ ཝིསེསོཏི སཱུརིཡསྶ ཨུཊྛིཏཊྛཱནེ, སམནྟཏོ ཙ ཨཱལོཀཀརཎསམཏྠཏཱ ཝིཡ ཏསྶེཝ ཉཱཎསྶ ཨཱནུབྷཱཝེན ནིབྦཏྟོ སབྦསོ པཧཱཏབྦཔཧཱནབྷཱཝེཏབྦབྷཱཝནཱཔཱརིཔཱུརིསངྑཱཏོ ཝིསེསོ. ཝཏྠཱུནི པན ཨནནྟརཱཡཏཱཝསེན ཨཱགཏཱནི. ཨནིཙྩཱནུཔསྶནཱཡཱཏི སངྑཱརེ ཨནིཙྩཏོ ཨནུཔསྶནྟིཡཱ བལཝཝིཔསྶནཱཡ. ཨཱརདྡྷཝིཔསྶནསྶ ཧི ཡཐཱཝུཏྟཝིཔསྶནཱཡ པཝཏྟིཀྑཎེ ཏཏོ པུབྦེ, པཙྪཱ ཙ པཀིཎྞཀསམྨསནཝཱརེ ནིཙྩསཉྙཱཡ པཧཱནཊྛོ ཨིཛ྄ཛྷཏི. ཨེསེཝ ནཡོ སབྦཏྠ. ཀཱམཾ ཨེཏྟཀཱཡ སངྑེཔཀཐཱཡཔི ཨདྷིཔྤེཏཏྠོ པཀཱསིཏོཝ ¶ , ཝིཏྠཱརཀཐཱཡ པན ཝིབྷཱུཏཏརོ ཧོཏཱིཏི ཨཱཧ ‘‘ཝིཏྠཱརེན ཀཐེཏབྦ’’ནྟི.

གབྦྷགཏསྶེཝཱཏི ཨནཱདརེ སཱམིཝཙནཾ. ཝུཏྟནཡེནཱཏི ‘‘པཙྪིམབྷཝིཀསྶཱ’’ཏིཨཱདིནཱ བཱཀུལཏྠེརཝཏྠུམྷི ཝུཏྟནཡེན.

དཱརུབྷཱརཾ ཀཏྭཱཏི དཱརུབྷཱརཾ སཀཊེ ཀཏྭཱ, ཨཱརོཔེཏྭཱཏི ཨཏྠོ. ཨོསྶཛྫིཏྭཱཏི ཚཌྜེཏྭཱ. སཀཊམཱུལེཏི སཀཊསམཱིཔེ. ཝཱལ༹ཡཀྑཱནུཙརིཏེཏི ཀུརུརེཧི ཡཀྑེཧི ཨནུཝིཙརིཏབྦེ. ཡཀྑཔརིགྒཧིཏཉྷི རཱཛགཧནགརཾ.

༣༧༤. སམཱདྷིཏོཏི པཋམཛ྄ཛྷཱནཱདིསམཱདྷིཏོ. པུབྦེཏི ཨུཔཙཱརཛ྄ཛྷཱནཀྑཎེ. པཙྪཱཏི སམཱཔཏྟིཡཱ ཙིཎྞཔརིཡནྟེ. ཏངྑཎེཏི སམཱཔནྣཀྑཎེ. སམཐཱནུབྷཱཝནིབྦཏྟོ ཝིསེསོཏི ཏསྨིཾ ཏསྨིཾ ¶ ཛྷཱནེ སམཱདྷིཏེཛེན ནིབྦཏྟོ ནཱིཝརཎཝིཀྑམྦྷནཝིཏཀྐཱདིསམཏིཀྐམསཉྙཱཝེདཡིཏནིརོདྷཔརིསྶཡསཧནཱདིཀོ ཝིསེསོ.

ཀཔོཏཀནྡརཱཡནྟི ཨེཝཾནཱམཀེ ཨརཉྙཝིཧཱརེ. ཛུཎྷཱཡ རཏྟིཡཱཏི ཙནྡཱལོཀཝཏིཡཱ རཏྟིཡཱ. ནཝོརོཔིཏེཧི ཀེསེཧཱིཏི ཨིཏྠམྦྷཱུཏལཀྑཎེ ཀརཎཝཙནཾ. ཡསྶཱཏི པཧཱརསྶ. ཏསྶཱཏི ཡཀྑསྶ. ཁིཔྤནིསནྟིབྷཱཝསྶ ཨུཀྐཾསགཏཏྟཱ ཐེརོ ཏསྨིཾ པཧརནྟེ ཨེཝ སམཱཔཏྟིཾ སམཱཔཛྫཱིཏི ཨཱཧ ‘‘པཧརཎསམཡེ སམཱཔཏྟིཾ ཨཔྤེསཱི’’ཏི. པཱལི༹ཡཾ པན ‘‘ནིསིནྣོ ཧོཏི ཨཉྙཏརཾ སམཱདྷིཾ སམཱཔཛྫིཏྭཱ’’ཏི (ཨུདཱ. ༣༤) ཝུཏྟཾ. ཨིམེ པན ཐེརཱ སམཱཔཏྟིཏོ ཝུཊྛཱནསམཀཱལཾ ཏེན པཧཱརོ དིནྣོཏི ཝདནྟི.

སཉྫཱིཝཏྠེརནྟི ཀཀུསནྡྷསྶ བྷགཝཏོ དུཏིཡཾ ཨགྒསཱཝཀཾ མཧཱཐེརཾ སནྡྷཱཡཱཧ. སོ ཧི ཨཱཡསྨཱ ཨརཉྙཱདཱིསུ ཡཏྠ ཀཏྠཙི ནིསིནྣོ ཨཔྤཀསིརེནེཝ ནིརོདྷཾ སམཱཔཛྫཏི, ཏསྨཱ ཨེཀདིཝསཾ ཨཉྙཏརསྨིཾ རུཀྑམཱུལེ ནིརོདྷཾ སམཱཔཛྫི, ཏཾ སནྡྷཱཡ ཝུཏྟཾ ‘‘ནིརོདྷསམཱཔནྣ’’ནྟིཨཱདི. ཙཱིཝརེ ཨཾསུམཏྟམྤི ན ཛྷཱཡིཏྠ, སརཱིརེ ཀཱ ཀཐཱ. ཏེནེཝ ཧི ཐེརོ ‘‘སཉྫཱིཝོ’’ ཏྭེཝ པཉྙཱཡིཏྠ. ཨཡམསྶཱཏི ཨསྶ ཨཱཡསྨཏོ སཉྫཱིཝཏྠེརསྶ ཡོ ནིརོདྷསམཱཔཏྟིཡཾ ཨགྒིཔརིསྶཡཱབྷཱཝོ, ཨཡཾ སམཱདྷིཝིཔྥཱརཱ ¶ ཨིདྡྷཱིཏི ཡོཛནཱ. ཀཐཾ པན ནིརོདྷསམཱཔཏྟིཡཾ སམཱདྷིཝིཔྥཱརསམྦྷཝོཏི ཨཱཧ ‘‘ཨནུཔུབྦ…པེ… ནིབྦཏྟཏྟཱ’’ཏི.

པཋམཾ ཋཔིཏབྷཎྜཀསྶཱཏི སབྦཔཋམཾ ཋཔིཏབྷཎྜཀསྶ. ཏཉྷི གཧཎཀཱལེ སབྦཔཙྪིམཾ གཡ྄ཧཏི. ཀཱལཔརིཙྪེདཝསེནཱཏི ‘‘ཨེཏྟཀེ ཀཱལེ གཏེ ཝུཊྛཧིསྶཱམཱི’’ཏི སམཱཔཏྟིཏོ པུབྦེ ཀཏཀཱལཔརིཙྪེདཝསེན. བྷཱིཏཱ ཝིརཝིཾསཱུཏི རཏྟནྡྷཀཱརེ རཱུཔདསྶནེན ‘‘པིསཱཙོ ཨུཊྛཧཏཱི’’ཏི མཉྙམཱནཱ. ཨེཏྟཀེཧི ནཱམ བྷཎྜཀེཧི ཨཛ྄ཛྷོཏྠཊོ ནིབྦིཀཱརོ ‘‘ཨཧོ མཧཱནུབྷཱཝོ, ཨཧོ ཝིཝེཀཝཱསཱི’’ཏི ཙ ཐེརགཏེན པསཱདེན.

ཏཏྟཏེལཀཊཱཧནྟི ཨཱདྷཱརསཱིསེན ཨཱདྷེཡྻམཱཧ, ཀཊཱཧེ ཏཏྟཏེལཾ ཀཊཱཧེན ཨཱསིཉྩཱིཏི ཨདྷིཔྤཱཡོ. ཝིཝཊྚམཱནནྟི ཀཏྠཙིཔི ཨལགྒནཝསེན བྷསྶནྟཾ.

སཔརིཝཱརཱཏི པཉྩཧི ཨིཏྠིསཏེཧི སཔརིཝཱརཱ. རཱཛཱནཾ མེཏྟཱཡ ཕརཱིཏི ཨོདིསྶཀམེཏྟཱསམཱཔཏྟིཡཱ ¶ རཱཛཱནཾ ཕུསི. ཁིཔིཏུནྟི ཝིཛ྄ཛྷིཏུཾ. ཨོརོཔེཏུནྟི སརསནྣཱཧཾ པཊིསཾཧརིཏུཾ.

༣༧༥. པཊིཀྐཱུལཱདཱིསཱུཏི ཨནིཊྛཱདཱིསུ. ཨནིཊྛཾ ཧི པཊིཀྐཱུལཾ, ཨམནུཉྙམྤི ‘‘པཊིཀྐཱུལ’’ནྟི ཝུཙྩཏི. ཨཱདི-སདྡེན ཨཔཊིཀྐཱུལཱདིཾ སངྒཎྷཱཏི. ཏཏྠཱཏི པཊིཀྐཱུལཱརམྨཎེ. ཨུཔེཀྑཀོཏི ཚལ༹ངྒུཔེཀྑཱཡ ཨུཔེཀྑཀོ. ཏཏྠཱཏི པཊིཀྐཱུལཱཔཊིཀྐཱུལབྷེདེ ཝཏྠུསྨིཾ. སཏོཏི སཏིཝེཔུལླཔྤཏྟིཡཱ སཏིམཱ. སམྤཛཱནོཏི པཉྙཱཝེཔུལླཔྤཏྟིཡཱ སམྤཛཱནཀཱརཱི. ཨཡནྟི ཨཡཾ པཊིཀྐཱུལཱདིཝཏྠཱུསུ ཨཔཊིཀྐཱུལསཉྙཱིཝིཧཱརཱདིཀཱ ཁཱིཎཱསཝཱནཾ ཨགྒམགྒཱདྷིགམསིདྡྷཱ ཙིཏྟིསྶརིཡཏཱ. ཏེནཱཧ ‘‘ཙེཏོཝསིཔྤཏྟཱནཾ…པེ… ཝུཙྩཏཱི’’ཏི.

ཨནིཊྛེ ཝཏྠུསྨིཾ སཏྟསཉྙིཏེ མེཏྟཱཕརཎཾ ཝཱ དྷཱཏུསོ པཙྩཝེཀྑཎཱཡ དྷཱཏུམནསིཀཱརཾ ཝཱ གཱུཐཱདིཀེ དྷཱཏུམནསིཀཱརཾ ཀརོནྟོཏི ཡོཛེཏབྦཾ. ཨཔཊིཀྐཱུལསཉྙཱི ཝིཧརཏཱིཏི ཧིཏེསིཏཱཡ, དྷམྨསབྷཱཝཙིནྟནཱཡ ཙ ན པཊིཀྐཱུལསཉྙཱི ཧུཏྭཱ ཨིརིཡཱཔཐཝིཧཱརེན ཝིཧརཏི. ཨིཊྛེ ཝཏྠུསྨིཾ ཉཱཏིམིཏྟཱདིཀེ. ཀེསཱདིཨསུཙིཀོཊྛཱསམཏྟམེཝཱཏི ཨསུབྷཕརཎཾ ཝཱ ཨསུབྷམནསིཀཱརཾ ཝཱ. ཏཏྠ རཱུཔདྷམྨཛཱཏཾ ཨནིཙྩནྟི ཨཱདིཨཏྠོ ཨིཏི-སདྡོ, ཏསྨཱ ཨནིཙྩདུཀྑཱནཏྟཝིཔརིཎཱམདྷམྨོཏི མནསིཀཱརཾ ¶ ཝཱ ཀརོནྟོཏི ཡོཛནཱ. པཊིཀྐཱུལཱཔཊིཀྐཱུལེསཱུཏི ཨིཊྛཱནིཊྛཱནི ཝཏྠཱུནི ཨེཀཛ྄ཛྷཾ གཧེཏྭཱ ཝདཏི. ཨེས ནཡོ ཨིཏརཏྠ. ཡཾ ཝཱ སཏྟཱནཾ པཋམཾ པཊིཀྐཱུལཏོ ཨུཔཊྛིཏམེཝ པཙྪཱ ཨཔཊིཀྐཱུལཏོ ཨུཔཏིཊྛཏི, ཡཉྩ ཨཔཊིཀྐཱུལཏོ ཨུཔཊྛིཏམེཝ པཙྪཱ པཊིཀྐཱུལཏོ ཨུཔཏིཊྛཏི, ཏདུབྷཡེཔི ཁཱིཎཱསཝོ སཙེ ཨཱཀངྑཏི, ཝུཏྟནཡེན ཨཔཊིཀྐཱུལསཉྙཱི ཝཱ ཝིཧརེཡྻ, པཊིཀྐཱུལསཉྙཱི ཝཱཏི ཨཡམརིཡིདྡྷི ཝུཏྟཱ.

ཙཀྑུནཱ རཱུཔཾ དིསྭཱཏི ཀཱརཎཝསེན ‘‘ཙཀྑཱུ’’ཏི ལདྡྷཝོཧཱརེན རཱུཔདསྶནསམཏྠེན ཙཀྑུཝིཉྙཱཎེན, ཙཀྑུནཱ ཝཱ ཀཱརཎབྷཱུཏེན, དྭཱརབྷཱུཏེན ཝཱ རཱུཔཾ པསྶིཏྭཱ. ནེཝ སུམནོ ཧོཏཱིཏི གེཧསྶིཏསོམནསྶསྶཱཡཾ པཊིཀྑེཔོ, ན ནེཀྑམྨཔཀྑིཀཱཡ ཀིརིཡཱསོམནསྶཝེདནཱཡ. ཚལ༹ངྒུཔེཀྑནྟི ཨིཊྛཱནིཊྛཚལཱ༹རམྨཎཱཔཱཐེ པརིསུདྡྷཔཀཏིབྷཱཝཱཝིཛཧནལཀྑཎཾ ཚསུ དྭཱརེསུ པཝཏྟིཡཱ ‘‘ཚལ༹ངྒུཔེཀྑཱ’’ཏི ལདྡྷནཱམཾ ཏཏྲམཛ྄ཛྷཏྟུཔེཀྑཾ. ཡཐཱཝུཏྟམཏྠཾ པཱལི༹ཡཱ སམཏྠེཏུཾ ‘‘པཊིསམྦྷིདཱཡ’’ནྟིཨཱདི ཝུཏྟཾ.

༣༧༦. པཀྑཱིཨཱདཱིནནྟི ¶ ཨཱདི-སདྡེན དེཝཱདཱིནཾ སངྒཧོ. ཝེཧཱསགམནཱདིཀཱཏི པན ཨཱདི-སདྡེན ཙཀྑུཝིསུདྡྷིཨཱདིཾ སངྒཎྷཱཏི. ཀུསལཀམྨེན ནིབྦཏྟིཏྭཱཔི ཨཀུསལཝིཔཱཀཱནུབྷཱཝེན སུཁསམུསྶཡཏོ ཝིནིཔཏིཏཏྟཱ ཝིནིཔཱཏིཀཱནཾ. ཛྷཱནནྟི ཨབྷིཉྙཱཔཏྟཾ ཛྷཱནཾ སནྡྷཱཡཱཧ. ཝིཔསྶནཱཔི ཨུཀྐཾསགཏཱ ཨུབྦེགཔཱིཏིསཧིཏཱ ཨཱཀཱསེ ལངྒྷཱཔནམཏྟཱཔི ཧོཏཱིཏི ཝུཏྟཾ ‘‘ཝིཔསྶནཾ ཝཱ’’ཏི. ‘‘པཋམཀཔྤིཀཱན’’ནྟི ཨིདཾ ‘‘ཨེཀཙྩཱནཾ མནུསྶཱན’’ནྟི ཨིམསྶ ཝིསེསནཾ དཊྛབྦཾ. ཨེཝམཱདཱིནནྟི ཨཱདི-སདྡེན པུནབྦསུམཱཏཱདཱིནཾ སངྒཧོ དཊྛབྦོ.

༣༧༧. ཝེཧཱསནྟི བྷུམྨཏྠེ ཨུཔཡོགཝཙནཾ, ཨཙྩནྟསཾཡོགེ ཝཱ. ཙཀྐཝཏྟཱི ཧི ཙཀྐརཏནཾ པུརཀྑཏྭཱ ཨཏྟནོ བྷཝནཏོ ཨབྦྷུགྒནྟྭཱ ཨཱཀཱསེནེཝ སིནེརུཾ པདཀྑིཎཾ ཀཏྭཱ སཀལཙཀྐཝཱལ༹ཾ ཨནུསཾཡཱཡཏཱིཏི. ཨསྶབནྡྷཱཏི ཨསྶཔཱལཱ, ཡེ ཨསྶཱནཾ ཡཝདཱཡཀཱ. ཏཐཱ གོབནྡྷཱ.

ཙཀྐཝཏྟིཨཱདཱིནཾ པུཉྙིདྡྷིཡཱ ཝིཏྠཱརིཡམཱནཱཡ ཨཏིཔཔཉྩོ ཧོཏཱིཏི པུཉྙཝཏོ ཨིདྡྷིཾ ལཀྑཎཏོ དསྶེནྟེན ‘‘པརིཔཱཀཾ གཏེ པུཉྙསམྦྷཱརེ ཨིཛ྄ཛྷནཀཝིསེསོ’’ཏི ¶ ཝཏྭཱཔི ཛོཏིཀཱདཱིནཾ པུཉྙིདྡྷིཾ ཨེཀདེསེན དསྶེཏུཾ ‘‘ཨེཏྠ ཙཱ’’ཏིཨཱདི ཝུཏྟཾ. ཏཏྠ སུཝཎྞཔབྦཏོཏི སབྦསུཝཎྞམཡོ པབྦཏོ. ཏསྶ ཀིར གཧིཏགཧིཏཊྛཱནེ ཨོདྷི ན པཉྙཱཡཏི. ཨེཀསཱིཏཱམཏྟེཏི ཨེཏྠ སཱིཏཱ ནཱམ ཀསནཝསེན ནངྒལསྶ གཏམགྒོ. ཏུམྦཾ ནཱམ ཨཱལ༹ྷཀཾ. ཙུདྡས མགྒཱཏི ཙཏུདྡས ཀསནམགྒཱ.

༣༧༨. ཝིཛྫཾ པརིཛཔིཏྭཱཏི གནྡྷཱརཱིཝིཛྫཱདིཀཾ ཨཏྟནོ ཝིཛྫཾ ཀཏཱུཔཙཱརཾ པརིཝཏྟེཏྭཱ མནྟཔཋནཀྐམེན པཋིཏྭཱ.

༣༧༩. སམྨཱཔཡོགེནཱཏི ཨུཔཱཡཔཡོགེན, ཡཐཱ ཡཐིཙྪིཏཏྠསིདྡྷི ཧོཏི, ཏཐཱ པཝཏྟིཏཉཱཡཱརམྦྷེན. ཏསྶ ཏསྶ ཀམྨསྶཱཏི ཡཐཱདྷིཔྤེཏསྶ ནིཔྥཱདེཏབྦཀམྨསྶ. ཨེཏྠ ཙཱཏི ‘‘ཏཏྠ ཏཏྠ སམྨཱཔཡོགཔྤཙྩཡཱ ཨིཛ྄ཛྷནཊྛེན ཨིདྡྷཱི’’ཏི (པཊི. མ. ༣.༡༨) ཨིམིསྶཱ དསམཱཡ ཨིདྡྷིཡཱ ནིདྡེསེཔི. པུརིམཔཱལི༹སདིསཱཝཱ’’ཏི སམཱདྷིཝིཔྥཱརཨིདྡྷིཨཱདཱིནཾ ནིདྡེསསདིསཱཝ. སཀཊབྱཱུཧཱདིཀརཎཝསེནཱཏི སཀཊབྱཱུཧཙཀྐབྱཱུཧཔདུམབྱཱུཧཱདཱིནཾ སཾཝིདྷཱནཝསེན ནིབྦཏྟཝིསེསོཏི ¶ སམྦནྡྷོ. གཎིཏགནྡྷབྦཱདི སིཔྤཀམྨཾ. སལླཀཏྟཀཱདི ཝེཛྫཀམྨཾ. ཨིརུབྦེདཱདཱིནཾ ཏིཎྞཾ ཝེདཱནཾ.

‘‘ཨེཀོཔི ཧུཏྭཱ བཧུདྷཱཝ ཧོཏཱི’’ཏིཨཱདིནཱ (དཱི. ནི. ༡.༢༣༨; མ. ནི. ༡.༡༤༧; སཾ. ནི. ༥.༨༣༤; པཊི. མ. ༡.༡༠༢; ༣.༡༠) ཨདྷིཊྛཱནིདྡྷིཡཱ ཨེཝ གཧིཏཏྟཱ ཨཱཧ ‘‘ཨདྷིཊྛཱནཱ ཨིདྡྷིཡེཝ ཨཱགཏཱ’’ཏི. ཨིམསྨིཾ པནཏྠེཏི ཨིམསྨིཾ ཨབྷིཉྙཱནིསཾསསངྑཱཏེ, ཨིདྡྷིཝིདྷསངྑཱཏེ ཝཱ ཨཏྠེ.

༣༨༠. ‘‘ཨེཀཝིདྷེན ཉཱཎཝཏྠུ’’ནྟིཨཱདཱིསུ (ཝིབྷ. ༧༥༡) ཀོཊྛཱསཏྠོ ཝིདྷསདྡོ, ‘‘ཝིཝིདྷམྤི སེནཱབྱཱུཧཾ དསྶེཏཱི’’ཏིཨཱདཱིསུ (པཊི. མ. ༣.༡༣) ཝིཀཔྤཏྠོ, ཏདུབྷཡམྤེཏྠ ཡུཛྫཏཱིཏི དསྶེནྟོ ཨཱཧ ‘‘ཨིདྡྷིཝིདྷཱཡཱཏི ཨིདྡྷིཀོཊྛཱསཱཡ, ཨིདྡྷིཝིཀཔྤཱཡ ཝཱ’’ཏི. ཨིདྡྷི ཧི ཨབྷིཉྙཱསུ ཨེཀོ ཀོཊྛཱསོ, ཝཀྑམཱནེཧི བྷེདེཧི ཨནེཀཔྤབྷེདཱ ཙ. ཝུཏྟཔྤཀཱརཝསེནཱཏི ཝུཏྟསྶ ཙུདྡསཔྤཀཱརསྶ, ཙིཏྟཔརིདམནསྶ སམཱཧིཏཏཱདིཔྤཀཱརསྶ ཙ ཝསེན. ‘‘ཨིདྡྷིཝིདྷཱཡཱ’’ཏི ཏདཏྠསྶ སམྤདཱནཝཙནནྟི ཨཱཧ ‘‘ཨིདྡྷིཝིདྷཱདྷིགམཏྠཱཡཱ’’ཏི. ‘‘ཀསིཎཱརམྨཎཏོ ཨཔནེཏྭཱ’’ཏི ཨིདཾ ཨབྷིཉྙཱཔཱདཀཔརིཀམྨཙིཏྟཱནཾ ¶ སམཱནསནྟཱནཏཱཡ ཝུཏྟཾ, ན པརིཀམྨཙིཏྟསྶ ཀསིཎཱརམྨཎཏྟཱ. ཨིདྡྷིཝིདྷཱབྷིམུཁཾ པེསེཏཱིཏི ནིཔྥཱདེཏབྦསྶ ཨིདྡྷིཝིདྷསྶ ཨབྷིམུཁབྷཱཝེན པཝཏྟེཏི. ཡཾ ཧི ‘‘སཏཾ ཧོམཱི’’ཏིཨཱདིནཱ པརིཀམྨཙིཏྟསྶ པཝཏྟནཾ, ཏདེཝསྶ ཨབྷིནཱིཧརཎཾ, ཨིདྡྷིཝིདྷཱབྷིམུཁཔེསནཉྩ ཏཐེཝ ཨིདྡྷིཝིདྷསྶ པཝཏྟནཏོ ཨབྷིནིནྣཱམནཾ ཨིདྷ པརིཀམྨཙིཏྟསྶ ཨིདྡྷིཝིདྷེ ཨདྷིམུཏྟཱིཏི ཨཱཧ ‘‘ཨདྷིགནྟབྦཨིདྡྷིཔོཎཾ ཨིདྡྷིཔབྦྷཱརཾ ཀརོཏཱི’’ཏི. ཨིདྷ པཙྩནུབྷཝནཕུསནཱ སཙྪིཀིརིཡཱཔཏྟིཔརིཡཱཡཱ ཨེཝཱཏི དསྶེནྟོ ‘‘པཱཔུཎཱཏཱིཏི ཨཏྠོ’’ཏི ཨཱཧ. ཨསྶཱཏི ཨིདྡྷིཝིདྷསྶ.

ཨེཀོཔཱིཏི པི-སདྡོ ཝཀྑམཱནཾ བཧུབྷཱཝཾ ཨུཔཱདཱཡ སམྤིཎྜནཏྠོ. སོ ཧིསྶ པཊིཡོགཱི ‘‘ཨེཀོཔི ཧུཏྭཱ བཧུདྷཱ ཧོཏི, བཧུདྷཱཔི ཧུཏྭཱ ཨེཀོ ཧོཏཱི’’ཏི. སོ ཙ ཁོ བཧུབྷཱཝཾ ནིམྨིནིཏྭཱ ཋིཏསྶ ཨནྟརཱཝ ཨེཀབྷཱཝཱུཔགམོ. ཡཐཱཀཱལཔརིཙྪེདཾ པན སརསེནེཝ ཨེཀབྷཱཝཱུཔགམོ ཨིདྷ ནཱདྷིཔྤེཏོ ཨནིདྡྷིནིམྨཱནབྷཱཝཏོ. ཏམྤི པུབྦེ ཀཏཀཱལཔརིཙྪེདཝསེན སིདྡྷཏྟཱ ཨིདྡྷཱནུབྷཱཝོཡེཝཱཏི ཀེཙི. ཨཊྛཱནེ ཝཱཡཾ པི-སདྡོ, ཨེཀོ ཧུཏྭཱ བཧུདྷཱཔི ཧོཏི, བཧུདྷཱ ཧུཏྭཱ ཨེཀོཔི ཧོཏཱིཏི སམྦནྡྷོ. ཨིམསྨིཾ པཀྑེ པི-སདྡོ ཝཀྑམཱནཾ ཨེཀབྷཱཝཾ ཨུཔཱདཱཡ ¶ ‘‘སམྤིཎྜནཏྠོ’’ཏི ཝཏྭཱ ‘‘སོ ཧཱི’’ཏིཨཱདི སབྦཾ ཡཐཱརཧཾ ཝཏྟབྦཾ. བཧུབྷཱཝནིམྨཱནེ པཡོཛནཾ དསྶེཏུཾ ‘‘བཧཱུནཾ སནྟིཀེ’’ཏིཨཱདི ཝུཏྟཾ. ཏཏྠ བཧཱུནཾ སནྟིཀེཏི ཨཏྟནཱ ནིམྨིཏཱནཾ བཧཱུནཾ སམཱིཔེ, ཏེཧི པརིཝཱརིཏོ ཧུཏྭཱཏི ཨདྷིཔྤཱཡོ. ཝཱ-སདྡོ ཨཝུཏྟཝིཀཔྤཏྠོ, ཏེན ‘‘དྷམྨཾ ཝཱ ཀཐེཏུཀཱམོ’’ཏི ཨེཝམཱདི སངྒཡ྄ཧཏི. ‘‘ཉཱཎེན ཨདྷིཊྛཧནྟོ ཨེཝཾ ཧོཏཱི’’ཏི ཨཱནེཏྭཱ སམྦནྡྷིཏབྦཾ.

༣༨༡. བྷཝཏི ཨེཏྠ ཨིདྡྷཱིཏི བྷཱུམིཡོ, ཛྷཱནཱནི. ཨེཏྠཱཏི ཙ ཧེཏུམྷི བྷུམྨཝཙནཾ. ཝིཝེཀཏོ ཛཱཏཱ བྷཱུམི ཝིཝེཀཛབྷཱུམི. ཝིཝེཀཛཾ ཧི པཋམཾ ཛྷཱནཾ ནཱིཝརཎཝིཝེཀསམྦྷཱུཏཏྟཱ. པཱིཏིསུཁབྷཱུཏཱ བྷཱུམི པཱིཏིསུཁབྷཱུམི. དུཏིཡཛ྄ཛྷཱནཉྷི པཱིཏིསུཁབྷཱུམིབྷཱུཏཉྩེཝ པཱིཏིསུཁསཉྫཱཏཉྩ སམཱདྷིཝསེན. ཨུཔརི དྭཱིསུཔི ཨེསེཝ ནཡོ. ཨིདྡྷིལཱབྷཱཡཱཏི ཨིདྡྷིཡཱ ཨདྷིགམཱཡ. ཨིདྡྷིཔཊིལཱབྷཱཡཱཏི ཨིདྡྷིཡཱ པུནཔྤུནཾ ལབྷམཱནཱཡ, བཧུལཱིཀརཎཱཡཱཏི ཨཏྠོ. ཨིདྡྷིཝིཀུབྦནཏཱཡཱཏི ཨིདྡྷིཡཱ ཝིཝིདྷརཱུཔཀཱརཎཱཡ, ཝིཀུབྦནིདྡྷིཡཱཏི ཨཏྠོ ¶ . ཨིདྡྷིཝིསཝིཏཱཡཱཏི ཨིདྡྷིཡཱ ཝིཝིདྷཱནིསཾསཔསཝནཱཡ. ཨིདྡྷིཝསིཏཱཡཱཏི ཨིདྡྷིཡཱ ཁིཔྤནིསནྟིཨཱདིབྷཱཝཱཝཧཝསཱིབྷཱཝཏྠཱཡ. ཨིདྡྷིཝེསཱརཛྫཱཡཱཏི ཨིདྡྷིཡཱ པཊིཔཀྑདཱུརཱིབྷཱཝེན ཝིགཏསཾཀིལེསཏཱཡ སུཊྛུ ཝིསཱརདབྷཱཝཱཡ. ཙཏུཏྠཛ྄ཛྷཱནཾ ཏཱཝ ཨིདྡྷིཡཱ བྷཱུམི ཧོཏུ ཏཏྠ པཏིཊྛཱཡ ནིཔྥཱདེཏབྦཏོ, ཨིཏརཱནི པན ཀཐནྟི ཨཱཧ ‘‘ཨེཏྠ ཙཱ’’ཏིཨཱདི. ཏཏྠ ཏཱིཎི ཛྷཱནཱནི སམྦྷཱརབྷཱུམིཡོཏི ཝེདིཏབྦཱནཱིཏི སམྦནྡྷོ. ཏཏིཡཛ྄ཛྷཱནེ སུཁཕརཎེན, པཋམདུཏིཡེསུ པཱིཏིཕརཎེན སུཁཕརཎེན ཙ ཧེཏུབྷཱུཏེནཱཏི ཡཐཱརཧཝསེན ཡོཛནཱ. ཕརཎཾ ཙེཏྠ ཛྷཱནསྶ སུབྷཱཝིཏབྷཱཝེན སཱཏིསཡཱནཾ པཱིཏིསུཁཱནཾ ཝསེན ཛྷཱནཔྤཙྩཡཱདིནཱ སཧཛཱཏནཱམཀཱཡསྶ པརིབྲཱུཧནཾ, རཱུཔཀཱཡསྶ ཙ ཏཾསམུཊྛཱནེཧི པཎཱིཏརཱུཔེཧི པརིཔྥུཊཏཱ. ཏེནཱཧ བྷགཝཱ ‘‘པཱིཏིསུཁེན ཨབྷིསནྡེཏི པརིསནྡེཏི པརིཔཱུརེཏི པརིཔྥརཏཱི’’ཏི (དཱི. ནི. ༡.༢༢༦; མ. ནི. ༡.༤༢༧). སུཁསཉྙནྟི ཛྷཱནསུཁེན སཧགཏཾ སཉྙཾ. ལཧུསཉྙནྟི ཏཾསམྤཡུཏྟལཧུཏཱསཧགཏཾ སཉྙཾ. ཨོཀྐམིཏྭཱཏི ཨནུཔཝིསིཏྭཱ. ཏེསུ ཧི ཛྷཱནེསུ སཱཏིསཡཱཡ ལཧུཏཱཡ སམྤཡུཏྟཾ སུཁཾ སནྟཱནཝསེན པཝཏྟེནྟོ ཡོགཱི ཏཾ སམོཀྐནྟོ ཝིཡ ཧོཏཱིཏི ཨེཝཾ ཝུཏྟཾ. སཉྙཱསཱིསེན ནིདྡེསོ. ཛྷཱནསམྤཡུཏྟཱ ཧི ལཧུཏཱ ཝིནཱཔི ཨིདྡྷིཡཱ ཨཱཀཱསཾ ལངྒྷཱཔནཔྤམཱཎཔྤཏྟཱ ཝིཡ ཧོཏི. ལཧུབྷཱཝགྒཧཎེནེཝ ཙེཏྠ མུདུཀམྨཉྙབྷཱཝཱཔི གཧིཏཱ ཨེཝ. ཏེནཱཧ ‘‘ལཧུམུདུཀམྨཉྙཀཱཡོ ཧུཏྭཱ’’ཏི.

ཨིམིནཱ ¶ པརིཡཱཡེནཱཏི ཏིཎྞཾ ཛྷཱནཱནཾ སམཱཔཛྫནེན སུཁལཧུབྷཱཝཔྤཏྟནཱམརཱུཔཀཱཡསྶ སཏི ཙིཏྟཔརིདམནེ ཙཏུཏྠཾ ཛྷཱནཾ སུཁེནེཝ ཨིདྡྷིཔཊིལཱབྷཱཡ སཾཝཏྟཏཱིཏི ཨིམིནཱ པརིཡཱཡེན. པཀཏིབྷཱུམིཡཱ ཧི ཨདྷིཊྛཱནབྷཱུཏཱ སམྦྷཱརབྷཱུམིཡོ པཱཀཱརསྶ ནེམིཔྤདེསོ ཝིཡཱཏི.

༣༨༢. ཨིདྡྷིཔཱདནིདྡེསེ ཙཏྟཱརོཏི གཎནཔརིཙྪེདོ. ཨིདྡྷིཔཱདཱཏི ཨེཏྠ ཨིཛ྄ཛྷཏཱིཏི ཨིདྡྷི, སམིཛ྄ཛྷཏི ནིཔྥཛྫཏཱིཏི ཨཏྠོ. ཨིཛ྄ཛྷནྟི ཝཱ ཨེཏཱཡ སཏྟཱ ཨིདྡྷཱ ཝུདྡྷཱ ཨུཀྐཾསགཏཱ ཧོནྟཱིཏི ཨིདྡྷི. པཋམེནཏྠེན ཨིདྡྷི ཨེཝ པཱདོཏི ཨིདྡྷིཔཱདོ, ཨིདྡྷིཀོཊྛཱསོཏི ཨཏྠོ. དུཏིཡེནཏྠེན ཨིདྡྷིཡཱ པཱདོཏི ཨིདྡྷིཔཱདོ. པཱདོཏི པཏིཊྛཱ, ཨདྷིགམཱུཔཱཡོཏི ཨཏྠོ. ཏེན ཧི ཨུཔརཱུཔརིཝིསེསསངྑཱཏཾ ཨིདྡྷིཾ པཛྫནྟི པཱཔུཎནྟི. ཨཡཾ ཏཱཝ ཨཊྛཀཐཱནཡོ. ཏཏྠ ཨིདྡྷི-སདྡསྶ པཋམོ ཀཏྟུཨཏྠོ, དུཏིཡོ ཀརཎཏྠོ ¶ ཝུཏྟོ. པཱད-སདྡསྶ ཨེཀོ ཀརཎཏྠོཝ. པཛྫིཏབྦཱཝ ཨིདྡྷི ཝུཏྟཱ, ན ཙ ཨིཛ྄ཛྷནྟཱི, པཛྫིཏབྦཱ ཙ ཨིདྡྷི པཛྫནཀརཎེན པཱདེན སམཱནཱདྷིཀརཎཱ ཧོཏཱིཏི པཋམེན ཨཏྠེན ‘‘ཨིདྡྷི ཨེཝ པཱདོ ཨིདྡྷིཔཱདོ’’ཏི ན སཀྐཱ ཝཏྟུཾ. ཏཐཱ ཨིདྡྷིཀིརིཡཱཀརཎེན སཱདྷེཏབྦཱཝ ཝུདྡྷིསངྑཱཏཱ ཨིདྡྷི པཛྫནཀིརིཡཱཀརཎེན པཛྫིཏབྦཱཏི དྭིནྣཾ ཀརཎཱནཾ ན ཨསམཱནཱདྷིཀརཎཏཱ སམྦྷཝཏཱིཏི དུཏིཡེནཏྠེན ‘‘ཨིདྡྷིཡཱ པཱདོ ཨིདྡྷིཔཱདོ’’ཏི ཙ ན སཀྐཱ ཝཏྟུཾ. ཏསྨཱ པཋམེནཏྠེན སམཱནཱདྷིཀརཎསམཱསོ, དུཏིཡེན སཱམིཝཙནསམཱསོ ན ཡུཛྫཏཱིཏི པཋམེནཏྠེན ཨིདྡྷིཡཱ པཱདོ ཨིདྡྷིཔཱདོ, དུཏིཡེནཏྠེན ཨིདྡྷི ཨེཝ པཱདོ ཨིདྡྷིཔཱདོཏི སམཱསོ ཡུཏྟོ, ཡཐཱཝུཏྟོཔི ཝཱ, པཱདསྶ ཨིཛ྄ཛྷམཱནཀོཊྛཱསཨིཛ྄ཛྷནཀརཎཱུཔཱཡབྷཱཝཏོ.

པུབྦབྷཱགཚནྡཝསེན ཚནྡཧེཏུཀོ. སམྤཡུཏྟཚནྡཝསེན ཚནྡཱདྷིཀོ. པུབྦཱབྷིསངྑཱརཝསེན ཨེཝ པན སཧཛཱཏཚནྡསྶཱཔི ཨདྷིཀཏཱ ཝེདིཏབྦཱ. ཨཐ ཝཱ ‘‘ཚནྡཉྩེ བྷིཀྑུ ཨདྷིཔཏིཾ ཀརིཏྭཱ ལབྷཏི སམཱདྷིཾ, ལབྷཏི ཙིཏྟསྶེཀགྒཏཾ, ཨཡཾ ཝུཙྩཏི ཚནྡསམཱདྷཱི’’ཏི ཨིམཱཡ པཱལི༹ཡཱ ཚནྡཱདྷིཔཏིསམཱདྷི ཚནྡསམཱདྷཱིཏི ཨདྷིཔཏི-སདྡལོཔཾ ཀཏྭཱ སམཱསོ ཝུཏྟོཏི ཝིཉྙཱཡཏི. ཨདྷིཔཏིསདྡཏྠདསྶནཝསེན པན ཨཊྛཀཐཱཡཾ ‘‘ཚནྡཧེཏུཀོ ཚནྡཱདྷིཀོ ཝཱ སམཱདྷཱི’’ཏི ཝུཏྟཾ. ཏེནེཝཱཧ ‘‘ཚནྡཾ ཨདྷིཔཏིཾ ཀརིཏྭཱ’’ཏིཨཱདི. པདྷཱནབྷཱུཏཱཏི ཝཱིརིཡབྷཱུཏཱཏི ཀེཙི ཝདནྟི. སངྑཏསངྑཱརནིཝཏྟནཏྠཾ པན པདྷཱནགྒཧཎཾ. ཨཐ ཝཱ ཏཾ ཏཾ ཝིསེསཾ སངྑརོཏཱིཏི སངྑཱརོ, སབྦམྤི ཝཱིརིཡཾ. ཏཏྠ ཙཏུཀིཙྩསཱདྷཀཏོ ཨཉྙསྶ ནིཝཏྟནཏྠཾ པདྷཱནགྒཧཎཾ. པདྷཱནབྷཱུཏཱ སེཊྛབྷཱུཏཱཏི ཨཏྠོ. ཙཏུབྦིདྷསྶ པན ཝཱིརིཡསྶ ཨདྷིཔྤེཏཏྟཱ བཧུཝཙནནིདྡེསོ. ཡོ པན ‘‘ཨིདྡྷིཡཱ པཱདོ ཨིདྡྷིཔཱདོ’’ཏི ཨེཝཾ སམཱསཡོཛནཱཝསེན པཱདསྶ ཨུཔཱཡཏྠཏཾ གཧེཏྭཱ ཨིདྡྷིཔཱདཏྠོ ¶ ཝུཏྟོ, སོ པཊིལཱབྷཔུབྦབྷཱགཱནཾ ཀཏྟུཀརཎིདྡྷིབྷཱཝཾ ‘‘ཚནྡིདྡྷིཔཱདོ’’ཏིཨཱདིནཱ (ཝིབྷ. ༤༥༧) ཝཱ ཨབྷིདྷམྨེ ཨཱགཏཏྟཱ ཚནྡཱདཱིཧི ཨིདྡྷིཔཱདེཧི སཱདྷེཏབྦཱཡ ཝུདྡྷིཡཱ ཀཏྟིདྡྷིབྷཱཝཾ, ཚནྡཱདཱིནཾ ཀརཎིདྡྷིབྷཱཝཉྩ སནྡྷཱཡ ཝུཏྟོཏི ཝེདིཏབྦོ.

ཝཱིརིཡིདྡྷིཔཱདེ ‘‘ཝཱིརིཡསམཱདྷིཔདྷཱནསངྑཱརསམནྣཱགཏ’’ནྟི དྭིཀྑཏྟུཾ ཝཱིརིཡཾ ཨཱགཏཾ. ཏཏྠ པུརིམཾ སམཱདྷིཝིསེསནཾ ཝཱིརིཡཱདྷིཔཏི སམཱདྷི ཝཱིརིཡསམཱདྷཱིཏི. དུཏིཡཾ སམནྣཱགམངྒདསྶནཾ. དྭེ ཨེཝ ཧི སབྦཏྠ སམནྣཱགམངྒཱནི སམཱདྷི ¶ , པདྷཱནསངྑཱརོ ཙ. ཚནྡཱདཡོ སམཱདྷིཝིསེསནཱནི, པདྷཱནསངྑཱརོ པན པདྷཱནཝཙནེནེཝ ཝིསེསིཏོ, ན ཚནྡཱདཱིཧཱིཏི ན ཨིདྷ ཝཱིརིཡཱདྷིཔཏིཏཱ པདྷཱནསངྑཱརསྶ ཝུཏྟཱ ཧོཏི. ཝཱིརིཡཉྩ སམཱདྷིཾ ཝིསེསེཏྭཱ ཋིཏམེཝ སམནྣཱགམངྒཝསེན པདྷཱནསངྑཱརཝཙནེན ཝུཏྟནྟི ནཱཔི དྭཱིཧི ཝཱིརིཡེཧི སམནྣཱགམོ ཝུཏྟོ ཧོཏཱིཏི. ཡསྨཱ པན ཚནྡཱདཱིཧི ཝིསིཊྛོ སམཱདྷི, ཏཐཱ ཝིསིཊྛེནེཝ ཙ ཏེན སམྤཡུཏྟོ པདྷཱནསངྑཱརོ, སེསདྷམྨཱ ཙ, ཏསྨཱ སམཱདྷིཝིསེསནཱནཾ ཝསེན ཙཏྟཱརོ ཨིདྡྷིཔཱདཱ ཝུཏྟཱ. ཝིསེསནབྷཱཝོ ཙ ཚནྡཱདཱིནཾ ཏཾཏཾཨཝསྶཡཝསེན ཧོཏཱིཏི.

ཨཐ ཝཱཏིཨཱདིནཱ ནིསྶཡཊྛེཔི པཱད-སདྡེ ཨུཔཱཡཊྛེན ཚནྡཱདཱིནཾ ཨིདྡྷིཔཱདཏཱ ཝུཏྟཱ. ཏེནེཝ ཨབྷིདྷམྨེ ཨུཏྟརཙཱུལ༹བྷཱཛནཱིཡེ ‘‘ཙཏྟཱརོ ཨིདྡྷིཔཱདཱ ཚནྡིདྡྷིཔཱདོ’’ཏིཨཱདིནཱ (ཝིབྷ. ༤༥༧) ཚནྡཱདཱིནམེཝ ཨིདྡྷིཔཱདཏཱ ཝུཏྟཱ. པཉྷཱཔུཙྪཀེ ཙ ‘‘ཙཏྟཱརོ ཨིདྡྷིཔཱདཱ ཨིདྷ བྷིཀྑུ ཚནྡསམཱདྷཱི’’ཏིཨཱདིནཱཝ (ཝིབྷ. ༤༦༢) ཨུདྡེསཾ ཀཏྭཱཔི པུན ཚནྡཱདཱིནཾཡེཝ ཀུསལཱདིབྷཱཝོ ཝིབྷཏྟོ. ཨུཔཱཡིདྡྷིཔཱདདསྶནཏྠམེཝ ཧི སུཏྟེ, ཨབྷིདྷམྨེ ཙ ནིསྶཡིདྡྷིཔཱདདསྶནཾ ཀཏཾ, ཨཉྙཐཱ ཙཏུབྦིདྷཏཱ ན ཧོཏཱིཏི.

༣༨༣. ཚནྡཱདཱིནི ཨཊྛཱཏི ཚནྡསམཱདྷི ཝཱིརིཡསམཱདྷི ཙིཏྟསམཱདྷི ཝཱིམཾསཱསམཱདྷཱིཏི ཨེཝཾ ཚནྡཱདཱིནི ཨཊྛ. ཀཱམཾ ཙེཏྠ ཙཏཱུསུཔི ཋཱནེསུ སམཱདྷི སམཱདྷི ཨེཝ, ཏཐཱཔི ཨིདྡྷིཾ ཨུཔྤཱདེཏུཀཱམཏཱཚནྡསཧིཏོཝ སམཱདྷི ཨིདྡྷིཔཊིལཱབྷཱཡ སཾཝཏྟཏི, ན ཀེཝལོ. ཨེཝཾ ཝཱིརིཡསམཱདྷིཨཱདཡོཔི. ཏསྨཱ ཚནྡཱདིསཧིཏཱ ཨེཏེ ཙཏྟཱརོ ཙ སམཱདྷཱི, ཚནྡཱདཡོ ཙ ཙཏྟཱརོཏི ཨཊྛ པཛྫཏི ཨིདྡྷི ཨེཏེཧི པཱཔུཎཱིཡཏི, སཡཾ ཝཱ པཛྫནྟི ཨིདྡྷིཔཊིལཱབྷཱཡ སམྤཛྫནྟཱིཏི པདཱནཱིཏི ཝུཙྩནྟི. ཏེནཱཧ ‘‘ཨིདྡྷིཔཊིལཱབྷཱཡ སཾཝཏྟནྟཱི’’ཏི. ཡཾ པན པཱལི༹ཡཾ ‘‘ཚནྡོ ན སམཱདྷཱི’’ཏིཨཱདི, ཏཾ ཡདིཔི ཚནྡཱདཡོ སམཱདྷིསཧིཏཱཝ ཨིདྡྷིཾ ནིཔྥཱདེནྟི, ཏཐཱཔི ཝིསུཾ ¶ ནེསཾ པདབྷཱཝདསྶནཾ. ཨེཀཏོ ནིཡུཏྟོཝ, ན ཨེཀེཀོ ཧུཏྭཱཏི ཨདྷིཔྤཱཡོ. ནིཡུཏྟོཝཱཏི སཧིཏོ ཨེཝ, ན ཝིཡུཏྟོ.

༣༨༤. ཨནོནཏནྟི ན ཨོནཏཾ, ཝཱིརིཡེན པགྒཧིཏཏྟཱ ཨལཱིནནྟི ཨཏྠོ. ཏེནཱཧ ‘‘ཀོསཛྫེ ན ཨིཉྫཏཱི’’ཏི, ཀོསཛྫནིམིཏྟཾ ན ཙལཏཱིཏི ¶ ཨཏྠོ. ཨུདྡྷཾ ནཏཾ ཨུནྣཏཾ, ཨུདྡྷཏཾ ཝིཀྑིཏྟཾ. ན ཨུནྣཏཾ ཨནུནྣཏཾ, ཨཝིཀྑིཏྟཾ སམཱཧིཏནྟི ཨཏྠོ. ཏེནཱཧ ‘‘ཨུདྡྷཙྩེ ན ཨིཉྫཏཱི’’ཏི. ཨབྷིསངྒཝསེན ནཏཾ ཨབྷིནཏཾ, ན ཨབྷིནཏཾ ཨནབྷིནཏཾ, ཨརཏྟཾ. ཨཔགམནཝསེན ནཏཾ ཨཔནཏཾ, ཀོདྷཝསེན ཝིམུཁཾ. ན ཨཔནཏཾ ཨནཔནཏཾ, ཨདུཊྛཾ. དིཊྛིཡཱ ‘‘ཨཧཾ, མམ’’ནྟི ནིསྶཡཝསེན ན ནིསྶིཏནྟི ཨནིསྶིཏཾ. ཚནྡརཱགཝསེན ན པཊིབདྡྷནྟི ཨཔྤཊིབདྡྷཾ. རཱགོ ཀེཝལཾ ཨཱསཏྟིམཏྟཾ, ཚནྡརཱགོ པན བཧལཀིལེསོ. ཏཐཱ ཧིསྶ དཱུརེ ཋིཏམྤི ཨཱརམྨཎཾ པཊིབདྡྷམེཝ. ཝིཔྤམུཏྟནྟི ཝིསེསཏོ པམུཏྟཾ. ཛྷཱནཱནཾ ཀཱམརཱགཔཊིཔཀྑཏཱཡ ཨཱཧ ‘‘ཀཱམརཱགེ’’ཏི. ཝིསཾཡུཏྟནྟི ཝིཝིཏྟཾ སཾཀིལེསཏོ, ན ཝཱ སཾཡུཏྟཾ ཙཏཱུཧིཔི ཡོགེཧི. ཝིམརིཡཱདིཀཏཾ ཀིལེསམརིཡཱདཱཡ, ཡཐཱ ཨཱིསཀམྤི ཀིལེསམརིཡཱདཱ ན ཧོཏི, ཏཐཱ པཊིཔནྣཾ. ཨེཀཏྟགཏནྟི ཨེཀགྒཏཾ ཨུཔགཏཾ ཨཙྩནྟམེཝ སམཱཧིཏཾ. ཏཏོ ཨེཝ ནཱནཏྟཀིལེསེཧི ནཱནཱསབྷཱཝེཧི ཀིལེསེཧི ན ཨིཉྫཏི.

ཨེས ཨཏྠོཏི ཀོསཛྫཱདིནིམིཏྟཾ. ཨིམསྶ ཙིཏྟསྶ ཨཱནེཉྫནཏྠོ སིདྡྷོ ཨེཝ ཨཱནེཉྫཔྤཏྟིཡཱ པཀཱསནཝསེན དསྶིཏཏྟཱ. པུན ཝུཏྟོཏི ཨིདྡྷིཡཱ བྷཱུམིཔཱདཔདདསྶནཔྤསངྒེན ‘‘ཨིམཱནི མཱུལཱནི ནཱམཱ’’ཏི མཱུལབྷཱཝདསྶནཏྠཾ པུན ཝུཏྟོ. པུརིམོཏི ‘‘སདྡྷཱདཱིཧི པརིགྒཧིཏཏྟཱ’’ཏིཨཱདིནཱ པུབྦེ ཚདྷཱ དསྶིཏནཡོ. ཨཡནྟི ཨདྷུནཱ སོལ༹སདྷཱ དསྶིཏནཡོ. སུཏྟནཡེ, པཊིསམྦྷིདཱནཡེ ཙ དསྶིཏེ ཏཏྠ སམྨོཧོ ན ཧོཏི, ན ཨདསྶིཏེཏི ཨཱཧ ‘‘ཨུབྷཡཏྠ ཨསམྨོཧཏྠ’’ནྟི.

༣༨༥. ཉཱཎེན ཨདྷིཊྛཧནྟོཏི ‘‘ཀཐཾ པནཱཡཾ ཨེཝཾ ཧོཏཱི’’ཏི ཨེཏྠ པུབྦེ ཨཏྟནཱ ཝུཏྟཔདཾ ཨུདྡྷརཏི ཨདྷིཊྛཱནཝིདྷིཾ དསྶེཏུཾ ‘‘ཨབྷིཉྙཱཔཱདཀཾ ཛྷཱནཾ སམཱཔཛྫིཏྭཱ ཝུཊྛཱཡཱ’’ཏི. ཨེཏྠ ཨནུཔུབྦེན ཙཏྟཱརི ཛྷཱནཱནི སམཱཔཛྫིཏྭཱ ཙཏུཏྠཛ྄ཛྷཱནཏོ ཝུཊྛཱཡཱཏི ཀེཙི, ཏཾ ཨཡུཏྟཾ. ཡཐིཙྪིཏཛ྄ཛྷཱནསམཱཔཛྫནཏྠཉྷི ཙིཏྟཔརིདམནཾ, ཙཏུཏྠཛ྄ཛྷཱནམེཝ ཙ ཨབྷིཉྙཱཔཱདཀཾ, ན ཨིཏརཱནི. པརིཀམྨཾ ཀཏྭཱཏི པཱདཀཛ྄ཛྷཱནཏོ ཝུཊྛཱཡ ཀཱམཱཝཙརཙིཏྟེན ‘‘སཏཾ ཧོམཱི’’ཏིཨཱདིནཱ ¶ ཙིནྟནམེཝེཏྠ པརིཀམྨཀརཎཾ, ཏཐཱཝཛྫནམེཝ ཙ ཨཱཝཛྫནཾ. དུཏིཡམྤཱིཏི པི-སདྡོ སམུཙྩཡཏྠོ, ཏེན ཏཏིཡམྤི, ཏཏོ བྷིཡྻོཔཱིཏི ཨིམམཏྠཾ དཱིཔེཏི. ཡཐཱ ཧི ཛྷཱནབྷཱཝནཱ, ཨེཝམབྷིཉྙཱབྷཱཝནཱཔི. ‘‘ཨེཀཝཱརཾ དྭེཝཱར’’ནྟི ཨིདམྤི ནིདསྶནམཏྟཾ དཊྛབྦཾ. ནིམིཏྟཱརམྨཎནྟི པཊིབྷཱགནིམིཏྟཱརམྨཎཾ. པརིཀམྨཙིཏྟཱནཱིཏི ཨེཏྠ ཨེཀེཀསྶ པརིཀམྨཙིཏྟསྶ སཏཱརམྨཎཏཱ ¶ དཊྛབྦཱ ‘‘སཏཾ ཧོམཱི’’ཏི པཝཏྟནཏོ. སཧསྶཱརམྨཎཱནཱིཏི ཨེཏྠཱཔི ཨེསེཝ ནཡོ. ཝཎྞཝསེནཱཏི ཨཏྟནཱ པརིཀཔྤིཏཝཎྞཝསེན. ནོ པཎྞཏྟིཝསེནཱཏི ན སཏྟཔཎྞཏྟིཝསེན. ཏཾ ཨདྷིཊྛཱནཙིཏྟཾ ཨཔྤནཱཙིཏྟམིཝཱཏི ཨིཝགྒཧཎཾ ཨབྷིཉྙཱཙིཏྟསྶ ཛྷཱནཙིཏྟསྶ པཋམུཔྤཏྟིསདིསབྷཱཝཏོ ཝུཏྟཾ, ན ཏསྶ ཨཔྤནཱབྷཱཝཏོ. རཱུཔཱཝཙརཙཏུཏྠཛ྄ཛྷཱནིཀནྟི རཱུཔཱཝཙརཙཏུཏྠཛྷཱནཝནྟཾ, ཏེན སམྤཡུཏྟཾ.

༣༨༦. ཡདི ཨེཝཾ ‘‘ཨཱཝཛྫིཏྭཱ ཉཱཎེན ཨདྷིཊྛཱཏཱི’’ཏི པཊིསམྦྷིདཱཝཙནཾ ཀཐནྟི ཨཱཧ ‘‘ཡམྤཱི’’ཏིཨཱདི. ཏཏྲཱཔཱིཏི པཊིསམྦྷིདཱཡམྤི. ཨཱཝཛྫཏཱིཏི ‘‘བཧུཀཾ ཨཱཝཛྫཏཱི’’ཏི ཨིདཾ པཱཋཔདཾ པརིཀམྨཝསེནེཝ ཝུཏྟཾ, ན ཨཱཝཛྫནཝསེན. ཨཱཝཛྫིཏྭཱ ཉཱཎེན ཨདྷིཊྛཱཏཱིཏི ཨབྷིཉྙཱཉཱཎཝསེན ཝུཏྟཾ, ན པརིཀམྨཙིཏྟསམྤཡུཏྟསྶ, ཨཉྙསྶ ཝཱ ཀཱམཱཝཙརསྶ ཉཱཎསྶ ཝསེན. ན ཧི ཏསྶ ཏཱདིསོ ཨཱནུབྷཱཝོ ཨཏྠཱིཏི. ཏསྨཱཏི ཡསྨཱ ཨཔྤནཱཔྤཏྟསྶ ཨབྷིཉྙཱཉཱཎསྶེཝ ཝསེན ཨདྷིཊྛཱནཾ, ཏསྨཱ. ཨཡམདྷིཊྛཱནཀྐམོཏི དསྶེནྟོ ‘‘བཧུཀཾ ཨཱཝཛྫཏཱི’’ཏིཨཱདིམཱཧ. ཏཏྠ སནྣིཊྛཱཔནཝསེནཱཏི ནིཔྥཱདནཝསེན.

ཀཱཡསཀྑིདསྶནཏྠནྟི ན ཀེཝལཾ ཝཙནམཏྟམེཝ, ཨཐ ཁོ ཨཡམེཏསྶཏྠསྶ ཨཏྟནོ ཀཱཡེན སཙྪིཀཏཏྟཱ ཀཱཡསཀྑཱིཏི སཀྑིདསྶནཏྠཾ.

ཀོཀནདནྟི པདུམཝིསེསནཾ ཡཐཱ ‘‘ཀོཀཱསཀ’’ནྟི. ཏཾ ཀིར བཧུཔཏྟཾ, ཝཎྞསམྤནྣཾ, ཨཏིཝིཡ སུགནྡྷཉྩ ཧོཏི. པཱཏོཏི པགེཝ. ཨཡཉྷེཏྠ ཨཏྠོ – ཡཐཱ ཀོཀནདསངྑཱཏཾ པདུམཾ པཱཏོ སཱུརིཡསྶུགྒམནཝེལཱཡཾ ཕུལླཾ ཝིཀསིཏཾ ཨཝཱིཏགནྡྷཾ སིཡཱ ཝིརོཙམཱནཾ, ཨེཝཾ སརཱིརགནྡྷེན, གུཎགནྡྷེན ཙ སུགནྡྷཾ སརདཀཱལེ ཨནྟལིཀྑེ ཨཱདིཙྩམིཝ ཨཏྟནོ ཏེཛསཱ ཏཔནྟཾ ཨངྒེཧི ནིཙྪརཎཀཛུཏིཏཱཡ ཨངྒཱིརསཾ སམྨཱསམྦུདྡྷཾ པསྶཱཏི.

ཨབྷབྦོཏི པཊིཔཏྟིསཱརམིདཾ སཱསནཾ, པཊིཔཏྟི ཙ པརིཡཏྟིམཱུལིཀཱ, ཏྭཉྩ པརིཡཏྟིཾ ཨུགྒཧེཏུཾ ¶ ཨསམཏྠོ, ཏསྨཱ ཨབྷབྦོཏི ཨདྷིཔྤཱཡོ. ཨབྷབྦོ ནཱམ ན ཧོཏི ཝཱསདྷུརསྶེཝ པདྷཱནབྷཱཝཏོ.

བྷིཀྑཱུཏི པབྦཛིཏཝོཧཱརེན ཝུཏྟཾ, བྷཱཝིནཾ ཝཱ བྷིཀྑུབྷཱཝཾ ཨུཔཱདཱཡ ཡཐཱ ‘‘ཨགམཱ རཱཛགཧཾ བུདྡྷོ’’ཏི (སུ. ནི. ༤༡༠). པིལོཏིཀཁཎྜནྟི སུཝིསུདྡྷཾ ཙོལ༹ཁཎྜཾ ¶ . རཛོ ཧརཏཱིཏི རཛོཧརཎཾ. ཨབྷིནིམྨིནིཏྭཱ ཨདཱསི ཏཏྠ པུབྦེ ཀཏཱདྷིཀཱརཏྟཱ. ཏཐཱ ཧི ཡོནིསོ ཨུམྨུཛྫནྟོ ‘‘ཨཏྟབྷཱཝསྶ པནཱཡཾ དོསོ’’ཏི ཨསུབྷསཉྙཾ, ཨནིཙྩསཉྙཉྩ པཊིལབྷིཏྭཱ ནཱམརཱུཔཔརིགྒཧཱདིནཱ པཉྩསུ ཁནྡྷེསུ ཉཱཎཾ ཨོཏཱརེཏྭཱ ཀལཱཔསམྨསནཱདིཀྐམེན ཝིཔསྶནཾ ཝཌྜྷེཏྭཱ ཨུདཡབྦཡཉཱཎཱདིཔཊིཔཱཊིཡཱ ཝིཔསྶནཾ ཨནུལོམགོཏྲབྷུསམཱིཔཾ པཱཔེསི. ཨོབྷཱསཝིསྶཛྫནཔུབྦིཀཱ བྷཱསིཏགཱཐཱ ཨོབྷཱསགཱཐཱ.

རཱགོ རཛོ ཨརིཡསྶ ཝིནཡེ, ན ཙ པན རེཎུ ཝུཙྩཏི ‘‘རཛོ’’ཏི. ཀསྨཱ? ཙིཏྟསྶ མལཱིནབྷཱཝཀརཎཏོ. རཱགསྶེཏཾ ཨདྷིཝཙནཾ ‘‘རཛོ’’ཏི. ཨེཏཾ རཛནྟི ཨེཏཾ རཱགསངྑཱཏཾ རཛཾ. ཝིཔྤཛཧིཏྭཱཏི ཨགྒམགྒེན ཝིསེསཏོ པཛཧནཧེཏུ. པཎྜིཏཱ ཝིཧརནྟི ཏེཏི ཏེ པཛཧནཀཱ པཎྜིཏཱ ཧུཏྭཱ ཝིཧརནྟི. ཝཱིཏརཛསྶ སབྦསོ པཧཱིནརཱགཱདིརཛསྶ བུདྡྷསྶ བྷགཝཏོ སཱསནེ. ཏཐཱ ཧི ཝདནྟི –

‘‘ཙིཏྟམྷི སཾཀིལིཊྛམྷི, སཾཀིལིསྶནྟི མཱཎཝཱ;

ཙིཏྟེ སུདྡྷེ ཝིསུཛ྄ཛྷནྟི, ཨིཏི ཝུཏྟཾ མཧེསིནཱ’’ཏི. (དཱི. ནི. ཨཊྛ. ༢.༣༧༣; མ. ནི. ཨཊྛ. ༡.༡༠༦; སཾ. ནི. ཨཊྛ. ༢.༣.༡༠༠; ཨིཏིཝུ. ཨཊྛ. ༨༨);

ཚལ༹བྷིཉྙཱགཧཎེན གཧིཏཱཡ ཚལ༹བྷིཉྙཱཡ ཝིབྷཱཝིཏེཔི ཨརིཡམགྒེ ཨནུཏྟརབྷཱཝསཱམཉྙེན ཕལནིབྦཱནེཧི སདྡྷིཾ སངྒཎྷནྟོ ཨཱཧ ‘‘ནཝ ལོཀུཏྟརདྷམྨཱ’’ཏི.

པཏྟསྶ པིདཧནཱཀཱརེན ཧཏྠཾ ཋཔེནྟོ ‘‘ཧཏྠཾ པིདཧཱི’’ཏི ཝུཏྟོ. ཧཏྠནྟི ཝཱ ཀརཎཏྠེ ཨུཔཡོགཝཙནཾ, ཧཏྠེན པིདཧཱིཏི ཨཏྠོ.

སཧསྶཀྑཏྟུནྟི ¶ སཧསྶདྷཱ. སཧསྶདྷཱ ཧི ཨཏྟཱནཾ ཨེཀཙིཏྟེནེཝ ནིམྨིནནྟོཔི སཧསྶཝཱརཾ ནིམྨིནནྟོ ཝིཡ ཧོཏི. ཨསཏིཔི ཀིརིཡཱབྱཱཝུཏྟིཡཾ ཏདཏྠསིདྡྷིཏོཏི ཨིམམཏྠཾ དསྶེཏུཾ ‘‘སཧསྶཀྑཏྟུ’’ནྟི ཝུཏྟཾ. ཨམྦཝནེཏི ཨམྦཝནེ ཀཏཝིཧཱརེ. རམྨེཏི རམཎཱིཡེ. ཡཱཝ ཀཱལཔྤཝེདནཱ, ཏཱཝ ནིསཱིདཱིཏི ཡོཛནཱ.

ཨནིཡམེཏྭཱཏི ཝཎྞཱཝཡཝསརཱིརཱཝཡཝཔརིཀྑཱརཀིརིཡཱཝིསེསཱདཱིཧི ནིཡམཾ ཨཀཏྭཱ. ནཱནཱཝཎྞེཏི ནཱནཱཀཱརེ ཡཐཱཝུཏྟཝཎྞཱདིཝསེན ནཱནཱཝིདྷེ. མིསྶཀཀེསེཏི པལིཏེཧི མིསྶིཏཀེསེ. ཨུཔཌྜྷརཏྟཝཎྞཨུཔཌྜྷཔཎྜུཝཎྞཱདཱིསུ ཨཉྙཏརཝཎྞནྟི ཨེཝཾ ཨུཔཌྜྷརཏྟཙཱིཝརེ. པདཝསེན ཨཏྠསྶ ¶ , གམནཝསེན པཱལི༹ཡཱ བྷཎནཾ པདབྷཱཎཾ. པརིཀཐཱདིཝསེན དྷམྨསྶ ཀཐནཾ དྷམྨཀཐཱ. སརེན བྷཉྙཾ སུཏྟཱདཱིནཾ ཨུཙྩཱརཎཾ སརབྷཉྙཾ. ཨཔརེཔཱིཏི ཝུཏྟཱཀཱརཏོ ཨཉྙེཔི དཱིགྷརསྶཀིསཐཱུལཱདིཀེ ནཱནཔྤཀཱརཀེ. ཨིཙྪིཏིཙྪིཏཔྤཀཱརཱཡེཝ ཧོནྟཱིཏི ཡཐཱ ཡཐཱ ཨིཙྪིཏཱ, ཏཾཏཾཔཀཱརཱཡེཝ ཧོནྟི. ཡཏྟཀཱ ཧི ཝིསེསཱ ཝཎྞཱདིཝསེན ཏེསུ ཨིཙྪིཏཱ, ཏཏྟཀཝིསེསཝནྟོཝ ཏེ ཧོནྟི. ཏེ པན ཏཐཱ བཧུདྷཱ བྷིནྣཱཀཱརེཔི ཝཎྞཝསེན ཨཱརམྨཎཾ ཀཏྭཱ ཨེཀམེཝ ཨདྷིཊྛཱནཙིཏྟཾ པཝཏྟཏི. ཨཡཾ ཧིསྶ ཨཱནུབྷཱཝོ – ཡཐཱ ཨེཀཱཝ ཙེཏནཱ ནཱནཱཝིསེསཝནྟཾ ཨཏྟབྷཱཝཾ ནིབྦཏྟེཏི, ཏཏྠ བྷཝཔཏྠནཱ ཀམྨསྶ ཝིསེསཔཙྩཡོ ཧོཏི. ཨཙིནྟེཡྻོ ཙ ཀམྨཝིཔཱཀོཏི ཙེ, ཨིདྷཱཔི པརིཀམྨཙིཏྟཾ ཝིསེསཔཙྩཡོ ཧོཏི, ཨཙིནྟེཡྻོ ཙ ཨིདྡྷིཝིསཡོཏི གཧེཏབྦཾ. ཨེས ནཡོཏི ཡྭཱཡཾ བཧུབྷཱཝནིམྨཱནེ ‘‘ཨབྷིཉྙཱཔཱདཀཾ ཛྷཱནཾ སམཱཔཛྫིཏྭཱ’’ཏིཨཱདིནཱ ཨདྷིཊྛཱནནཡོ ཝུཏྟོ, ཨེས ནཡོ ཨིཏརེསུཔི ཨདྷིཊྛཱནེསུ.

ཨིཏི ཨཝིསེསཾ ཨཏིདེསེན དསྶེཏྭཱ ཝིསེསཾ སརཱུཔཏོ དསྶེཏུཾ ‘‘ཨཡཾ པན ཝིསེསོ’’ཏིཨཱདི ཝུཏྟཾ. ཏཏྠ ཨིམིནཱ བྷིཀྑུནཱ ཨིཙྪནྟེནཱཏི སམྦནྡྷོ. མཾ ཛཱནིསྶནྟཱིཏི ‘‘ཨིདྡྷིམཱ’’ཏི མཾ ཛཱནིསྶནྟི. ཨནྟརཱཝཱཏི པརིཙྪིནྣཀཱལསྶ ཨབྦྷནྟརེ ཨེཝ. པཱདཀཛ྄ཛྷཱནནྟིཨཱདི པརིཀམྨཀརཎཱཀཱརདསྶནཏྠཾ ཝུཏྟཾ, ཨིཏརཾ པན ཨཏིདེསེནེཝ ཝིབྷཱཝིཏནྟི. ཨེཝཾ ཨཀརོནྟོཏི ‘‘ཨེཀོ ཧོམཱི’’ཏི ཨནྟརཱ ཨདྷིཊྛཱནཾ ཨཀརོནྟོ. ‘‘ཡཐཱཔརིཙྪིནྣཀཱལཝསེནཱ’’ཏི ཨིམིནཱ ‘‘སཏཾ ཧོམཱི’’ཏིཨཱདིནཱ ཨདྷིཊྛཱནཾ ཀརོནྟེན ཀཱལཔརིཙྪེདཝསེནེཝ ཀཱཏབྦནྟི དསྶེཏི. སཡམེཝ ཨེཀོ ཧོཏི ཨདྷིཊྛཱནསྶ པཊིཔྤསྶདྡྷཏྟཱ. ཨེཏྠ ཙ པརིཀམྨཱདྷིཊྛཱནཙིཏྟཱནཾ ཨིདྡྷིམཱ ཝཎྞཝསེན སཡམེཝ ཨཱརམྨཎཾ ཧོཏི. ཏེསུ པརིཀམྨཙིཏྟཱནི ¶ སནྟཏིཔཙྩུཔྤནྣཱརམྨཎཱནི. ཨདྷིཊྛཱནཙིཏྟཾ སམྤཏིཝཏྟམཱནཱརམྨཎཾ ཨདྷིཊྛཱནསྶ ཨེཀཙིཏྟཀྑཎིཀཏྟཱཏི ཝདནྟི.

༣༨༧. ‘‘ཨཱཝིབྷཱཝ’’ནྟི པདསྶ ཧེཊྛཱ ཝུཏྟེན ཧོཏི-སདྡེན སམྦནྡྷོ ན ཡུཛྫཏི ཨུཔཡོགཝཙནེན ཝུཏྟཏྟཱ, ཏཐཱ ཝཀྑམཱནེན ཙ གཙྪཏི-སདྡེན ཨཏྟནོ, པརེསཉྩ ཨཱཝིབྷཱཝསྶ ཨིཙྪིཏཏྟཱ, ནཱམཔདཉྩ ཀིརིཡཱཔདཱཔེཀྑནྟི ཀིརིཡཱསཱམཉྙཝཱཙིནཱ ཀརོཏི-སདྡེན ཡོཛེཏྭཱ ཨཱཧ ‘‘ཨཱཝིབྷཱཝཾ ཀརོཏཱི’’ཏི. ཏིརོབྷཱཝནྟི ཨེཏྠཱཔི ཨེསེཝ ནཡོ ¶ . ཡདི ཨེཝཾ ཀཐཾ པཊིསམྦྷིདཱཡནྟི ཙོདནཾ སནྡྷཱཡཱཧ ‘‘ཨིདམེཝ ཧཱི’’ཏིཨཱདི. ཀཱམཾ པཊིསམྦྷིདཱཡཾ ‘‘ཨཱཝིབྷཱཝནྟི ཀེནཙི ཨནཱཝཊཾ ཧོཏཱི’’ཏིཨཱདིནཱ (པཊི. མ. ༣.༡༡) ཨཱགཏཾ, ཏམྤི ཨིདམེཝ ཨཱཝིབྷཱཝཀརཎཾ, ཏིརོབྷཱཝཀརཎཉྩ སནྡྷཱཡ ཝུཏྟཾ. སེསཔདཱནི ཏེསཾཡེཝ ཝེཝཙནཱནི. ཨནྡྷཀཱརནྟི རཏྟནྡྷཀཱརཾ, དིཝཱཔི ཝཱ བིལགུཧཱདིགཏཾ ཨནྡྷཀཱརཾ. པཊིཙྪནྣནྟི ཀུཊྚཀཝཱཊཱདིནཱ པཊིཙྪཱདིཏཾ. ཨནཱཔཱཐནྟི དཱུརཏཱསུཁུམཏརཏཱདིནཱ ན ཨཱཔཱཐགཏཾ. ཨཡནྟི ཨིདྡྷིམཱ. པཊིཙྪནྣོཔི དཱུརེ ཋིཏོཔི ཨཏྟཱ ཝཱ པརོ ཝཱ ཡཐཱ དིསྶཏཱིཏི ཝིབྷཏྟིཾ པརིཎཱམེཏྭཱ ཡོཛེཏབྦཾ. ཨཱལོཀཛཱཏནྟི ཨཱལོཀབྷཱུཏཾ, ཛཱཏཱལོཀཾ ཝཱ.

༣༨༨. ཨེཏཾ པན པཱཊིཧཱརིཡནྟི ཨཱཝིབྷཱཝཔཱཊིཧཱརིཡམཱཧ. ཀེན ཀཏཔུབྦནྟི ཏཏྠ ཀཱཡསཀྑིཾ པུཙྪིཏྭཱ ‘‘སཏྠཱ ཏཱཝ ཀཱཡསཀྑཱི’’ཏི དསྶེནྟེན ‘‘བྷགཝཏཱ’’ཏི ཝཏྭཱ ཏམཏྠཾ ཝིབྷཱཝེཏུཾ ‘‘བྷགཝཱ ཧཱི’’ཏིཨཱདི ཝུཏྟཾ. སཱཝཏྠིཝཱསིཀེ པསྶནྟཱིཏི ཨཱནེཏྭཱ སམྦནྡྷོ, ཏཐཱ ‘‘ཡཱཝ ཨཝཱིཙིཾ དསྶེསཱི’’ཏི. ཨཱཀཱསགཏེསུ ཧེཊྛིམཧེཊྛིམཝིམཱནེསུ ཨུཔརཱུཔརིཝིམཱནཾ བྱཝདྷཱཡཀེསུ བྱཱུཧིཡམཱནེསུ ཏགྒཏཾ ཨཱཀཱསཾ བྱཱུལ༹ྷཾ ནཱམ ཧོཏཱིཏི ཝུཏྟཾ ‘‘ཨཱཀཱསཉྩ དྭིདྷཱ ཝིཡཱུཧིཏྭཱ’’ཏི.

ཨཡམཏྠོཏི ཨཱཝིབྷཱཝཔཱཊིཧཱརིཡསྶ སཏྠཱརཱ ཀཏབྷཱཝོ. པུརིམབུདྡྷཱནཾ པཊིཔཏྟིཨཱཝཛྫནཾ བུདྡྷཔྤཝེཎིཡཱ ཨནུཔཱལནཏྠཾ. ‘‘ཨེཀེན པཱདེནཱ’’ཏིཨཱདི ཏིཝིཀྐམདསྶནཾ. ནཡཾ དེཏི ཡསྶ ནཡསྶ ཨནུསཱརེན ཝཱཙནཱམགྒཾ ཋཔེསི.

ཙཱུལ༹ཨནཱཐཔིཎྜིཀོ ནཱམ ཨནཱཐཔིཎྜིཀམཧཱསེཊྛིསྶ ཀནིཊྛབྷཱཏཱ.

སིནེརུཔབྦཏཾ ¶ ནིབྦིཛ྄ཛྷིཏྭཱཏི ཏཾ པརིསཱཡ དིསྶམཱནརཱུཔཾཡེཝ ཀཏྭཱ ནིབྦིཛ྄ཛྷིཏྭཱ. ནནྟི སིནེརུཔབྦཏཾ.

ཨནེཀསཏསཧསྶསངྑསྶ ཨོཀཱསལོཀསྶ, ཏཾནིཝཱསིསཏྟལོཀསྶ ཙ ཝིཝཊབྷཱཝཀརཎཔཱཊིཧཱརིཡཾ ལོཀཝིཝརཎཾ ནཱམ. མཧཱབྲཧྨཱཏི སཧམྤཏིམཧཱབྲཧྨཱ.

པསྶཐ ¶ ཏཱཝ ཨཔཎྞཀཔཊིཔདཱཡ ཕལནྟི ནིརཡབྷཡེན ཏཛྫེཏྭཱ སཏྠུ ཨནུཔུབྦིཀཐཱནཡེན སགྒསུཁེན པལོབྷེཏྭཱ, ན པན སགྒསམྤཏྟིཡཾ ནིནྣབྷཱཝཱཔཱདནེན.

༣༨༩. ཡཐཱ ཨཱཝིབྷཱཝཀརཎེ ཨཱལོཀཀསིཎཾ སམཱཔཛྫིཏབྦཾ ཨཱལོཀནིམྨཱནཱཡ, ཨེཝཾ ཏིརོབྷཱཝཀརཎེ ཨནྡྷཀཱརནིམྨཱནཱཡ ནཱིལཀསིཎཾ སམཱཔཛྫིཏབྦཾ. ཀཱམཉྩེཏཾ པཱལི༹ཡཾ སརཱུཔཏོ ནཱགཏཾ, ‘‘ཝིཝཊཾ ཨཱཝཊ’’ནྟི (པཊི. མ. ༣.༡༡) པན ཝཙནཏོ ཨཏྠཏོ ཨཱགཏམེཝ. ཨོདཱཏཀསིཎནྟོགདྷཾ ཝཱ ཨཱལོཀཀསིཎནྟི ཝུཏྟོཝཱཡམཏྠོ. ཨནྡྷཀཱརནྟི ཨནྡྷཀཱརཝནྟཾ.

༣༩༠. ཨཝསེསེ ཨིཊྚིཡཏྠེརཱདིཀེ.

༣༩༡. པཱཀཊོ ཨིདྡྷིམཱ ཨེཏསྶ ཨཏྠཱིཏི པཱཀཊཾ, པཱཀཊཉྩ ཏཾ པཱཊིཧཱརིཡཉྩཱཏི པཱཀཊཔཱཊིཧཱརིཡཾ. ན ཨེཏྠ ཨིདྡྷིམཱ པཱཀཊོཏི ཨཔཱཀཊཾ, ཨཔཱཀཊཉྩ ཏཾ པཱཊིཧཱརིཡཉྩཱཏི ཨཔཱཀཊཔཱཊིཧཱརིཡཾ. ཨིདྡྷིམཏོ ཨེཝ ཧི པཱཀཊཱཔཱཀཊབྷཱཝེནཱཡཾ བྷེདོ, ན པཱཊིཧཱརིཡསྶ. ན ཧི ཏཾ ཨཔཱཀཊཾ ཨཏྠི.

ཨུཏྟརིམནུསྶདྷམྨཱཏི མནུསྶདྷམྨོ ཝུཙྩཏི དས ཀུསལཀམྨཔཐདྷམྨཱ, ཏཏོ མནུསྶདྷམྨཏོ ཨུཏྟརི. ཨིདྡྷིསངྑཱཏཾ པཱཊིཧཱརིཡཾ ཨིདྡྷིཔཱཊིཧཱརིཡཾ. ཨཱལི༹ནྡེཏི པམུཁེ. ཨོཀཱསེཧཱིཏི པཀིར. ཨིདྡྷཱབྷིསངྑཱརནྟི ཨིདྡྷིཔཡོགཾ. ཨབྷིསངྑཱསཱིཏི ཨབྷིསངྑརི, ཨཀཱསཱིཏི ཨཏྠོ. ཏཱལཙྪིགྒལེ༹ནཱཏི ཀུཉྩིཀཙྪིདྡེན. ཨགྒལ༹ནྟརིཀཱཡཱཏི པིཊྛསངྒྷཱཏཱནཾ ཨནྟརེན.

ཨནྟརཧིཏོཏི ཨནྟརདྷཱཡིཏུཀཱམོ. བཀོ བྲཧྨཱ ཡཐཱ ཨནྟརདྷཱཡིཏུཾ ན སཀྐོཏི, ཏཐཱ ཀཏྭཱ བྷགཝཱ སཡཾ ཏསྶ, བྲཧྨགཎསྶ ཙ ཨནཱཔཱཐབྷཱཝགམནེན ཨནྟརཧིཏོ ཧུཏྭཱ ‘‘སམཎསྶ གོཏམསྶ ¶ ཨིམསྨིཾ ཋཱནེ ཨཏྠིབྷཱཝོ ཝཱ ནཏྠིབྷཱཝོ ཝཱ ན སཀྐཱ ཛཱནིཏུ’’ནྟི ཨེཝཾ བྲཧྨགཎསྶ ཝཙནོཀཱསོ མཱ ཧོཏཱུཏི ‘‘བྷཝེཝཱཧ’’ནྟི ཨིམཾ གཱཐཾ ཨབྷཱསི.

ཏཏྠ བྷཝེཝཱཧཾ བྷཡཾ དིསྭཱཏི ཨཧཾ བྷཝེ སཾསཱརེ ཛཱཏིཛརཱདིབྷེདཾ བྷཡཾ དིསྭཱ ཨེཝ. བྷཝཉྩ ཝིབྷཝེསིནནྟི ཨིམཉྩ ཀཱམབྷཝཱདིཾ ཏིཝིདྷམྤི ¶ སཏྟབྷཝཾ, ཝིབྷཝེསིནཾ ཝིབྷཝཾ གཝེསམཱནམྤི པརིཡེསམཱནམྤི པུནཔྤུནཾ བྷཝེ ཨེཝ དིསྭཱ. བྷཝཾ ནཱབྷིཝདིནྟི ཏཎྷཱདིཊྛིཝསེན ཀིཉྩི བྷཝཾ ན ཨབྷིཝདིཾ ན གཧེསིཾ. ནནྡིཉྩ ན ཨུཔཱདིཡིནྟི བྷཝཏཎྷཾ ན ཨུཔགཙྪིཾ, ན ཨགྒཧེསིནྟི ཨཏྠོ.

༣༩༢. ཨལགྒམཱནོཏི ཝིནིཝིཛ྄ཛྷིཏྭཱ གམནེན ཀུཊྚཱདཱིསུ ཀཏྠཙི ན ལགྒམཱནོ. ཨཱཝཛྫིཏྭཱ ཀཏཔརིཀམྨེནཱཏི ཡསྶ པརཏོ གནྟུཀཱམོ, ཏཾ ཨཱཝཛྫིཏྭཱ ‘‘ཨཱཀཱསོ ཧོཏུ, ཨཱཀཱསོ ཧོཏཱུ’’ཏི ཨེཝཾ ཀཏཔརིཀམྨེན ཨིདྡྷིམཏཱ. པཱཀཱརཔབྦཏཱཔེཀྑཱཡ ‘‘སུསིརོ, ཚིདྡོ’’ཏི ཙ པུལླིངྒཝསེན ཝུཏྟཾ. ཨུབྦེདྷཝསེན པཝཏྟཾ ཝིཝརཾ སུསིརཾ. ཏིརིཡཾ པཝཏྟཾ ཚིདྡཾ.

ཡཏྠ ཀཏྠཙི ཀསིཎེ པརིཀམྨཾ ཀཏྭཱཏི པཐཝཱིཀསིཎཱདཱིསུ ཡཏྠ ཀཏྠཙི ཀསིཎེ ཛྷཱནཾ སམཱཔཛྫིཏྭཱ པརིཀམྨཾ ཀཏྭཱ ‘‘ཨཱཀཱསོ ཧོཏཱུ’’ཏི ཨདྷིཊྛཱཏབྦོ. ཏཏྠ ཀཱརཎམཱཧ ‘‘ཨཊྛསམཱཔཏྟིཝསཱིབྷཱཝོཡེཝ པམཱཎ’’ནྟི. ཏསྨཱ ཡཾ ཡཾ ཨིཙྪཏི, ཏཾ ཏདེཝ ཧོཏི. ཨེཏེན པཐཝིཡཱ ཨུམྨུཛྫནནིམུཛྫནེ ཨཱཔོཀསིཎསམཱཔཛྫནཾ, ཨུདཀཱདཱིསུ པཐཝཱིནིམྨཱནེ པཐཝཱིཀསིཎསམཱཔཛྫནཾ ན ཨེཀནྟཏོ ཨིཙྪིཏབྦནྟི ཝུཏྟཾ ཧོཏི. ཨེཏནྟི ཨེཏཾ ཏིརོཀུཊྚཱདིགམནཔཱཊིཧཱརིཡཀརཎེ ཨཱཀཱསཀསིཎསམཱཔཛྫནཾ ཨཝསྶཾ ཝཏྟབྦཾ ཨནུཙྪཝིཀབྷཱཝཏོ. ཨེཝཉྩ ཀཏྭཱ ‘‘ཨཱཀཱསཀསིཎཝསེན པཊིཙྪནྣཱནཾ ཝིཝཊཀརཎ’’ནྟིཨཱདིཝཙནཾ ཝིཡ པཐཝཱིཀསིཎཝསེན ‘‘ཨེཀོཔི ཧུཏྭཱ བཧུདྷཱ ཧོཏཱི’’ཏིཨཱདིབྷཱཝོ ‘‘ཨཱཀཱསེ ཝཱ ཨུདཀེ ཝཱ པཐཝིཾ ནིམྨིནིཏྭཱ པདསཱ གམནཾ ཨིཙྪཏཱི’’ཏིཨཱདིནཱ ཡཾ པཀིཎྞཀནཡེ ཝུཏྟཾ, ཏམྤི སམཏྠིཏཾ ཧོཏི.

‘‘དོསོ ནཏྠཱི’’ཏི དྭིཀྑཏྟུཾ བདྡྷཾ སུབདྡྷཾ ཝིཡ དལ༹ྷཱིཀརཎཾ ནཱམ ཧོཏཱིཏི ཨདྷིཔྤཱཡེན ཝཏྭཱ ཏེན པཡོཛནཱབྷཱཝཾ དསྶེཏུཾ ‘‘པུན སམཱཔཛྫིཏྭཱ’’ཏིཨཱདི ཝུཏྟཾ. ཨདྷིཊྛིཏཏྟཱ ཨཱཀཱསོ ཧོཏིཡེཝཱཏི སཙེཔི ཀིཉྩི ཨནྟརཱ ཨུཔཊྛིཏཾ པབྦཏཱདི སིཡཱ, ཏམྤི ‘‘ཨཱཀཱསོ ཧོཏཱུ’’ཏི ཨདྷིཊྛིཏཏྟཱ ¶ ཨཱཀཱསོ ཧོཏིཡེཝ. ཨིདམྤི ཨཊྛཱནཔརིཀཔྤནམཏྟཾ, ཏཱདིསསྶ ཨུཔཊྛཱནམེཝ ནཏྠཱིཏི དསྶེཏུཾ ‘‘ཨནྟརཱ’’ཏིཨཱདི ཝུཏྟཾ.

༣༩༣. པརིཙྪིནྡིཏྭཱཏི ཡཐིཙྪིཏཊྛཱནཾ ཉཱཎེན པརིཙྪིནྡིཏྭཱ. ཏཏྲཱཏི ཏསྨིཾ པཐཝིཡཱ ཨུདཀབྷཱཝཱདྷིཊྛཱནེ ཨཡཾ ཡཐཱཝུཏྟཔཊིཔཏྟིཝིབྷཱཝིནཱི པཱལི༹ ¶ . པརཏོ ‘‘ཏཏྲཱཡཾ པཱལཱི༹’’ཏི ཨཱགཏཊྛཱནེསུཔི ཨིམིནཱ ནཡེན ཨཏྠོ ཝེདིཏབྦོ.

སོཏི ཨིདྡྷིམཱ. ཨདྷིཊྛཱནཀཱལེ ཀཱལཔརིཙྪེདཾ ཀཏྭཱ ཨདྷིཊྛཱཏཱིཏི ཝུཏྟཾ ‘‘པརིཙྪིནྣཀཱལཾ པན ཨཏིཀྐམིཏྭཱ’’ཏི. པཀཏིཡཱ ཨུདཀཾ ཨནིམྨཱནཨུདཀཾ.

༣༩༤. ཝིཔརཱིཏནྟི ཡཾ ཨུདཀཾ ཨཀྐམིཏྭཱ ཨཀྐམནྟོ ན སཾསཱིདཏི, ཏཾ པནེཏྠ ཨིདྡྷིཡཱ པཐཝཱིནིམྨཱནཝསེན ཝེདིཏབྦཾ. པཐཝཱིཀསིཎནྟི པཐཝཱིཀསིཎཛ྄ཛྷཱནཾ.

༣༩༥. པལླངྐནྟི སམནྟཏོ ཨཱུརུབདྡྷཱསནཾ. ཚིནྣཔཀྑོ, ཨསཉྫཱཏཔཀྑོ ཝཱ སཀུཎོ ཌེཏུཾ ན སཀྐོཏཱིཏི པཱལི༹ཡཾ ‘‘པཀྑཱི སཀུཎོ’’ཏི (པཊི. མ. ༣.༡༡) པཀྑཱི-སདྡེན ཝིསེསེཏྭཱ སཀུཎོ ཝུཏྟོཏི ‘‘པཀྑེཧི ཡུཏྟསཀུཎོ’’ཏི ཨཱཧ. པརིཀམྨཾ ཀཏྭཱཏི ‘‘པཐཝཱི ཧོཏཱུ’’ཏི པརིཀམྨཾ ཀཏྭཱ.

ཨཱཀཱསེ ཨནྟལིཀྑེཏི ཨནྟལིཀྑསཉྙིཏེ ཨཱཀཱསེ. ཡཏྠ ཡཏྠ ཧི ཨཱཝརཎཾ ནཏྠི, ཏཾ ཏཾ ‘‘ཨཱཀཱས’’ནྟི ཝུཙྩཏི. ཨཡཉྩ ཨིདྡྷིམཱ ན པཐཝིཡཱ ཨཱསནྣེ ཨཱཀཱསེ གཙྪཏི. ཡཏྠ པན པཀྑཱིནཾ ཨགོཙརོ, ཏཏྠ གཙྪཏི, ཏཱདིསཉྩ ལོཀེ ‘‘ཨནྟལིཀྑ’’ནྟི ཝུཙྩཏི. ཏེན ཝུཏྟཾ ‘‘ཨནྟལིཀྑསཉྙིཏེ ཨཱཀཱསེ’’ཏི.

ཐེརོཏི པུབྦེ ཝུཏྟ ཏིཔིཊཀཙཱུལཱ༹བྷཡཏྠེརོ. སམཱཔཏྟིསམཱཔཛྫནནྟི པུན སམཱཔཏྟིསམཱཔཛྫནཾ. ནནུ སམཱཧིཏམེཝསྶ ཙིཏྟནྟི ཨིདྡྷིམཏོ པཱཊིཧཱརིཡཝསེན པཝཏྟམཱནསྶ ཙིཏྟཾ ཨཙྩནྟཾ སམཱཧིཏམེཝ ཧོཏི, ན ཨཉྙདཱ ཝིཡ ཨསམཱཧིཏནྟི ཨདྷིཔྤཱཡོ. ཏཾ པན ཐེརསྶ མཏིམཏྟཾ. པུབྦེ ཧི པཐཝཱིཀསིཎཾ སམཱཔཛྫིཏྭཱ པཐཝིཾ ཨདྷིཊྛཱཡ གཙྪཏི, ཨིདཱནི པན ཨཱཀཱསོ ཨིཙྪིཏབྦོ, ཏསྨཱ ཨཱཀཱསཀསིཎཾ སམཱཔཛྫིཏབྦམེཝ. ཏེནཱཧ ‘‘ཀིཉྩཱཔཱི’’ཏིཨཱདི. ཏིརོཀུཊྚཔཱཊིཧཱརིཡེ ¶ ཝུཏྟནཡེནེཝ པཊིཔཛྫིཏབྦནྟི ཡཐཱ ཏཏྠ ཀུཊྚཱདི ‘‘ཨཱཀཱསོ ཧོཏཱུ’’ཏི ཨདྷིཊྛཱནེན ཨཱཀཱསོ ཧོཏི, ཨེཝཾ ཨིདྷཱཔི པབྦཏརུཀྑཱདིཾ ཨདྷིཊྛཱནེན ཨཱཀཱསཾ ཀཏྭཱ གནྟབྦནྟི ཨཏྠོ. ཨཐ ཝཱ ཏིརོཀུཊྚཔཱཊིཧཱརིཡེ ཝུཏྟནཡེནེཝཱཏི ‘‘སཙེ པནསྶ བྷིཀྑུནོ ཨདྷིཊྛཧིཏྭཱ གཙྪནྟསྶཱ’’ཏིཨཱདིནཱ (ཝིསུདྡྷི. ༢.༣༩༢) ཏཏྠ ¶ ཝུཏྟནཡེན. ཨེཏེན ‘‘པུརིམཱདྷིཊྛཱནབལེནེཝ ཙསྶ ཨནྟརཱ ཨཉྙོ པབྦཏོ ཝཱ རུཀྑོ ཝཱ ཨུཏུམཡོ ཨུཊྛཧིསྶཏཱིཏི ཨཊྛཱནམེཝེཏ’’ནྟི ནཱགཱདཱིཧི ཀཡིརམཱནོ ཝིབནྡྷོ གམནནྟརཱཡཾ ན ཀརོཏཱིཏི དསྶེཏི.

ཨོཀཱསེཏི ཛནཝིཝིཏྟེ ཡུཏྟཊྛཱནེ. པཱཀཊོ ཧོཏི ཨཱཀཱསཙཱརཱི ཨཡཾ སམཎོཏི.

༣༩༦. དྭཱཙཏྟཱལཱིསཡོཛནསཧསྶགྒཧཎཾ པཋམཀཔྤཝསེན ཀཏཾ, ཏཏོ པརཾ པན ཨནུཀྐམེན པཐཝིཡཱ ཨུསྶིཏབྷཱཝེན ཏཏོ ཀཏིཔཡཡོཛནཱུནཏཱ སིཡཱ, ཨཔྤཀཾ ཨདྷིཀཾ ཝཱ ཨཱུནཾ ཝཱ གཎནཱུཔགཾ ན ཧོཏཱིཏི ཏཐཱ ཝུཏྟཾ. ཏཱིསུ དཱིཔེསུ ཨེཀཀྑཎེ ཨཱལོཀཀརཎེནཱཏི ཡདཱ ཡསྨིཾ དཱིཔེ མཛ྄ཛྷེ ཏིཊྛནྟི, ཏདཱ ཏཏོ པུརིམསྨིཾ ཨཏྠཾ གཙྪནྟཱ པཙྪིམེ ཨུདེནྟཱ ཧུཏྭཱ ཨཱལོཀཀརཎེན. ཨཉྙཛོཏཱིནཾ ཝཱ ཨབྷིབྷཝནེན, དུདྡསཏཱཡ ཙ མཧིདྡྷིཀེ. སཏྟཱནཾ སཱིཏཔརིལཱ༹ཧཝཱུཔསམནེན, ཨོསདྷིཏིཎཝནཔྤཏཱིནཾ པརིབྲཱུཧནེན ཙ མཧཱནུབྷཱཝེ. ཚུཔཏཱིཏི ཕུསཏི. པརིམཛྫཏཱིཏི ཧཏྠཾ ཨིཏོ ཙིཏོ ཙ སཉྩཱརེནྟོ གྷཾསེཏི. ཨབྷིཉྙཱཔཱདཀཛ྄ཛྷཱནཝསེནེཝཱཏི ཡསྶ ཀསྶཙི ཨབྷིཉྙཱཔཱདཀཛ྄ཛྷཱནཝསེན. ཨེཝ-ཀཱརེན པཱདཀཛ྄ཛྷཱནཝིསེསཾ ནིཝཏྟེཏི, ན ཨདྷིཊྛཱནཾ. ཏེནེཝཱཧ ‘‘ནཏྠེཏྠ ཀསིཎསམཱཔཏྟིནིཡམོ’’ཏི. ཏིརོཀུཊྚཔཱཊིཧཱརིཡཱདཱིསུ ཝིཡ ཨིམསྨིཾ ནཱམ ཀསིཎེ ཛྷཱནཾ སམཱཔཛྫིཏྭཱ ཨདྷིཊྛཱཏབྦནྟི ན ཨེཏྠ ཀོཙི ནིཡམོ ཨཏྠཱིཏི ཨཏྠོ. ཏཐཱ ཧི པཱལི༹ཡཾ ཀིཉྩི སམཱཔཏྟིཾ ཨཔརཱམསིཏྭཱ ‘‘ཨིདྷ སོ ཨིདྡྷིམཱ’’ཏིཨཱདི (པཊི. མ. ༣.༡༠-༡༡) ཝུཏྟཾ. ཧཏྠཔཱསེ ཧོཏི ‘‘ཙནྡིམསཱུརིཡེ’’ཏི ཨེཝཾ ཝུཏྟཾ ཙནྡིམསཱུརིཡམཎྜལཾ. རཱུཔགཏཾ ཧཏྠཔཱསེཏི ཧཏྠཔཱསེ ཋིཏཾ རཱུཔགཏཾ, ཧཏྠཔཱསེ ཝཱ རཱུཔགཏཾ. ཧཏྠཾ ཝཱ ཝཌྜྷེཏྭཱ པརཱམསཏཱིཏི ཡོཛནཱ.

ཨུཔཱདིནྣཀཾ ནིསྶཱཡ ཨནུཔཱདིནྣཀསྶ ཝཌྜྷནཾ ཝུཏྟཾ. ཡུཏྟིཡཱ པནེཏྠ ཨུཔཱདིནྣཀསྶཔི ཝཌྜྷནཙྪཱཡཱ དིསྶཏི. ཨཏྟནོ ཨཎུམཧནྟབྷཱཝཱཔཱདནེ ཨུཔཱདིནྣཀསྶ ཧཱཔནཾ ཝིཡ ཝཌྜྷནམྤི ལབྦྷཏེཝ. ཡཐཱ ཨཱཡསྨཏོ མཧཱམོགྒལླཱནསྶ ནནྡོཔནནྡདམནེཏི ཨེཝཾ པཝཏྟཾ སཧཝཏྠུནཱ ཐེརཝཱདཾ ཨཱཧརིཏྭཱ ཏམཏྠཾ དསྶེཏུཾ ‘‘ཏིཔིཊཀཙཱུལ༹ནཱགཏྠེརོ ཨཱཧཱ’’ཏིཨཱདི ཨཱརདྡྷཾ. ཀིཾ པན ན ཧོཏི, ཧོཏིཡེཝཱཏི ¶ ཨདྷིཔྤཱཡོ. དྭེ ཧི པཊིསེདྷཱ ¶ པཀཏིཾ གམེནྟཱིཏི. ‘‘ཏདཱ མཧནྟཾ ཧོཏི མཧཱམོགྒལླཱནཏྠེརསྶ ཝིཡཱ’’ཏི ཨིདཾ ཡཐཱདྷིཀཏཏྠདསྶནཝསེན ཝུཏྟཾ, ཁུདྡཀབྷཱཝཱཔཱདནམྤེཏྠ ལབྦྷཏེཝ.

ནནྡོཔནནྡནཱགདམནཀཐཱཝཎྞནཱ

ཨོལོཀེསི བུདྡྷཱཙིཎྞཝསེན ‘‘ཨཏྠི ནུ ཁོ ཨསྶ ཨུཔནིསྶཡོ’’ཏི. ལོཀིཡཾ རཏནཏྟཡེ པསཱདལཀྑཎཾ སཱསནཱཝཏཱརཾ སནྡྷཱཡཱཧ ‘‘ཨཔྤསནྣོ’’ཏི. མིཙྪཱདིཊྛིཏོ ཝིཝེཙེཏྭཱ པསཱདེཏབྦོཏི ཨདྷིཔྤཱཡོ. ཏེནཱཧ ‘‘ཀོ ནུ ཁོ…པེ… ཝིཝེཙེཡྻཱ’’ཏི.

ཏཾ དིཝསནྟི ཡདཱ བྷགཝཱ བྷིཀྑུསངྒྷཔརིཝུཏོ ཏཱཝཏིཾསབྷཝནཱབྷིམུཁོ གཙྪཏི, ཏཾ དིཝསབྷཱགཾ. ཨཱཔཱནབྷཱུམིཾ སཛྫཡིཾསཱུཏི ཡཏྠ སོ ནིསིནྣོ བྷོཛནཀིཙྩཾ ཀརོཏི, ཏཾ པརིཝེསནཊྛཱནཾ སིཏྟཾ སམྨཊྛཾ བྷོཛནཱུཔཀརཎཱུཔནཡནཱདིནཱ སཛྫཡིཾསུ པཊིཡཱདེསུཾ. ཏིཝིདྷནཱཊཀེཧཱིཏི ཝདྷཱུཀུམཱརིཀཉྙཱཝཏྠཱཧི ཏིཝིདྷཱཧི ནཱཊཀིཏྠཱིཧི. ཨོལོཀཡམཱནོཏི པེཀྑནྟོ, ཝིཙཱརེནྟོ ཝཱ.

ཨུཔརཱུཔརཱིཏི མཏྠཀམཏྠཀེ. བྷཝནེནཱཏི བྷཝནཔདེསེན. བྷོགེཧཱིཏི སརཱིརབྷོགེཧི. ཨཝཀུཛྫེནཱཏི ནིཀུཛྫིཏེན. གཧེཏྭཱཏི ཡཐཱ ཏཱཝཏིཾསབྷཝནསྶ པདེསོཔི ནཱཝསིསྶཏི, ཨེཝཾ པརིཡཱདཱཡ.

སིནེརུཔརིབྷཎྜནྟི སིནེརུམེཁལཾ. སིནེརུསྶ ཀིར སམནྟཏོ བཧལཏོ, པུཐུལཏོ ཙ པཉྩཡོཛནསཧསྶཔརིམཱཎཱནི ཙཏྟཱརི པརིབྷཎྜཱནི ཏཱཝཏིཾསབྷཝནསྶ ཨཱརཀྑཱཡ ནཱགེཧི, གརུལེ༹ཧི, ཀུམྦྷཎྜེཧི, ཡཀྑེཧི ཙ ཨདྷིཊྛིཏཱནི, ཏཱནི པརིབྷཎྜབྷཱཝསཱམཉྙེན ཨེཀཛ྄ཛྷཾ ཀཏྭཱ ‘‘པརིབྷཎྜ’’ནྟི ཝུཏྟཾ. ཏེཧི ཀིར སིནེརུསྶ ཨུཔཌྜྷཾ པརིཡཱདིནྣཾ.

ཨཏྟབྷཱཝཾ ཝིཛཧིཏྭཱཏི མནུསྶརཱུཔཾ ཨནྟརདྷཱཔེཏྭཱ. བཱདྷཏཱིཏི ཁེདམཏྟཾ ཨུཔྤཱདེཏི.

ཨཏྟབྷཱཝཾ ཝིཛཧིཏྭཱཏི སུཁུམཏྟབྷཱཝནིམྨཱནེན ནཱགརཱུཔཾ ཝིཛཧིཏྭཱ. མུཁཾ ཝིཝརི ‘‘མུཁགཏཾ ¶ སམཎཾ སཾཁཱདིསྶཱམཱི’’ཏི. པཱཙཱིནེན ཙ པཙྪིམེན ཙཱཏི ནཱགསྶ ཏཐཱནིཔནྣཏྟཱ ཝུཏྟཾ. སུཊྛུ སཏིཡཱ པཙྩུཔཊྛཱཔནཏྠམཱཧ ‘‘མནསི ཀརོཧཱི’’ཏི.

ཨཱདིཏོ ¶ པཊྛཱཡ སབྦཔཱཊིཧཱརིཡཱནཱིཏི ཏདཱ ཐེརེན ཀཏཔཱཊིཧཱརིཡཱནི སནྡྷཱཡ ཝུཏྟཾ. ཨིམཾ པན ཋཱནནྟི ཨིམཾ ནཱསཱཝཱཏཝིསྶཛྫནཀཱརཎཾ.

ཨནུབནྡྷཱིཏི ‘‘ན སཀྐཱ ཨེཝཾམཧིདྡྷིཀསྶ ཨིམསྶ སམཎསྶ པཊིཔཧརིཏུ’’ནྟི བྷཡེན པལཱཡནྟཾ ཨནུབནྡྷི.

ཨེཀཔཊིཔཱཊིཡཱཏི ཨེཀཱཡ པཊིཔཱཊིཡཱ, ནིརནྟརནྟི ཨཏྠོ. ཨཡམེཝཱཏི ཡཱ ཨུཔཱདིནྣཀཾ ནིསྶཱཡ ཨནུཔཱདིནྣཀསྶ ཝཌྜྷི, ཨཡམེཝ. ཨེཏྠ ཨེདིསེ ཧཏྠཝཌྜྷནཱདིཔཱཊིཧཱརིཡེ ཡུཏྟི ཡུཏྟརཱུཔཱ ཙིཏྟཏོ, ཨུཏུཏོ ཝཱ ཨུཔཱདིནྣཀརཱུཔཱནཾ ཨནུཔྤཛྫནཏོ. ཨཐ ཝཱ ཨུཔཱདིནྣནྟི སཀལམེཝ ཨིནྡྲིཡབདྡྷཾ ཨདྷིཔྤེཏཾ. ཨེཝམྤི ཏསྶ ཏཐཱ ཝཌྜྷི ན ཡུཛྫཏི ཨེཝཱཏི ཝུཏྟནཡེནེཝ ཝཌྜྷི ཝེདིཏབྦཱ. ཨེཀསནྟཱནེ ཨུཔཱདིནྣཾ, ཨནུཔཱདིནྣཉྩ སམྦྷིནྣཾ ཝིཡ པཝཏྟམཱནམྤི ཨཏྠཏོ ཨསམྦྷིནྣམེཝ. ཏཏྠ ཡཐཱ ཨཱལ༹ྷཀམཏྟེ ཁཱིརེ ཨནེཀཱལ༹ྷཀེ ཨུདཀེ ཨཱསིཏྟེ ཡདིཔི ཁཱིརཾ སབྦེན སམྦྷིནྣཾ སབྦཏྠཀམེཝ ལམྦམཱནཾ ཧུཏྭཱ ཏིཊྛཏི, ཏཐཱཔི ན ཏཏྠ ཁཱིརཾ ཝཌྜྷཏི, ཨུདཀམེཝ ཝཌྜྷཏི, ཨེཝམེཝཾ ཡདིཔི ཨུཔཱདིནྣཾ ཨནུཔཱདིནྣཉྩ སམྦྷིནྣཾ ཝིཡ པཝཏྟཏི, ཏཐཱཔི ཨུཔཱདིནྣཾ ན ཝཌྜྷཏི, ཨིདྡྷཱནུབྷཱཝེན ཙིཏྟཛཾ, ཏདནུསཱརེན ཨུཏུཛཉྩ ཝཌྜྷཏཱིཏི དཊྛབྦཾ.

སོཏི སོ ཨིདྡྷིམཱ. ཨེཝཾ ཀཏྭཱཏི ཝུཏྟཱཀཱརེན ཧཏྠཾ ཝཱ ཝཌྜྷེཏྭཱ ཏེ ཝཱ ཨཱགནྟྭཱ ཧཏྠཔཱསེ ཋིཏེ ཀཏྭཱ. པཱདཊྛཔནཱདིཔི ཝུཏྟནཡེནེཝ ཝེདིཏབྦཾ. ཨཔརོཔི ཨིདྡྷིམཱ. ཏཐེཝཱཏི པཱཊིཧཱརིཡཀརཎཏོ པུབྦེ ཝིཡ. ཏཐཱུཔམམེཏནྟི ཡཐཱ ཨུདཀཔུཎྞཱསུ ནཱནཱཔཱཏཱིསུ བཧཱུཧི ནཱནཱཙནྡམཎྜལེསུ དིསྶམཱནེསུ ན ཏེན ཙནྡམཎྜལསྶ གམནཱདིཨུཔརོདྷོ, བཧཱུནཉྩ པཙྩེཀཾ དསྶནཾ ཨིཛ྄ཛྷཏི, ཏཐཱུཔམམེཏཾ པཱཊིཧཱརིཡཾ ཙནྡིམསཱུརིཡཱནཾ གམནཱདིཨུཔརོདྷཱབྷཱཝཏོ, བཧཱུནཉྩ ཨིདྡྷིམནྟཱནཾ ཏཏྠ ཨིདྡྷིཔཡོགསྶ ཡཐིཙྪིཏཾ སམིཛ྄ཛྷནཏོཏི ཨདྷིཔྤཱཡོ.

༣༩༧. པརིཙྪེདཾ ཀཏྭཱཏི ཨབྷིཝིདྷིཝསེན པན པརིཙྪེདཾ ཀཏྭཱ, ན མརིཡཱདཝསེན. ཏཐཱ ཧེས བྲཧྨལོཀེ ཨཏྟནོ ཀཱཡེན ཝསཾ ཝཏྟེཏི. པཱལཱི༹ཏི པཊིསམྦྷིདཱམགྒཔཱལི༹.

ཡཱཝ ¶ བྲཧྨལོཀཱཔི ཀཱཡེན ཝསཾ ཝཏྟེཏཱིཏི ཨེཏྠ ཡསྨཱ ན བྲཧྨལོཀསྶེཝ གམནཾ ཨདྷིཔྤེཏཾ, ནཱཔི བྲཧྨལོཀསྶ གམནམེཝ, ཨཐ ཁོ ¶ ཨཉྙཐཱ ཨཉྙམྤི. ཡཱཝ བྲཧྨལོཀཱཏི པན དཱུརཱཝདྷིནིདསྶནམེཏཾ, ཏསྨཱ ‘‘སཙེ བྲཧྨལོཀཾ གནྟུཀཱམཱ ཧོཏཱི’’ཏི ཝཏྭཱཔི ཨིཏརམྤི དསྶེཏུཾ ‘‘སནྟིཀེཔི དཱུརེ ཨདྷིཊྛཱཏཱི’’ཏིཨཱདི ཝུཏྟཾ. ཏཏྠ པི-སདྡོ སམུཙྩཡཏྠོ, ཏེན ཝུཏྟཱཝསེསསྶ ཨདྷིཊྛཱནིདྡྷིཡཱ ནིཔྥཱདེཏབྦསྶ སབྦསྶཱཔི སངྒཧོ, ན ཝུཏྟསྶེཝཱཏི དཊྛབྦཾ.

ཡམཀཔཱཊིཧཱརིཡཱཝསཱནེཏིཨཱདིནཱ ཏིཝིཀྐམསྶ ཨདྷིཊྛཱནིདྡྷིནིཔྥནྣཏཱ ཝུཏྟཱ, ཨཉྙཏྠ པན ལཀྑཎཱནིསཾསཏཱ. ཏདུབྷཡཾ ཡཐཱ ཨཉྙམཉྙཾ ན ཝིརུཛ྄ཛྷཏི, ཏཐཱ ཝིཙཱརེཏྭཱ གཧེཏབྦཾ.

ནཱིལམཱཏིཀནྟི ནཱིལཝཎྞོདཀམཱཏིཀཾ.

མཧཱབོདྷིནྟི ཨཔརཱཛིཏཔལླངྐཾ མཧཱབོདྷིཾ. ཙིཏྟེ ཨུཔྤནྣེ སནྟིཀེ ཨཀཱསཱིཏི ཏཐཱ ཙིཏྟུཔྤཏྟིསམནནྟརམེཝ པཐཝིཾ, སམུདྡཉྩ སཾཁིཔིཏྭཱ མཧཱབོདྷིསནྟིཀེ ཨཀཱསི.

ནཀྑཏྟདིཝསེཏི མཧདིཝསེ. ཙནྡཔཱུཝེཏི ཙནྡསདིསེ ཙནྡམཎྜལཱཀཱརེ པཱུཝེ. ཨེཀཔཏྟཔཱུརམཏྟམཀཱསཱིཏི ཡཐཱ ཏེ པམཱཎཏོ སརཱུཔེནེཝ ཨནྟོཔཏྟཔརིཡཱཔནྣཱ ཧོནྟི, ཏཐཱ ཨཀཱསི.

ཀཱཀཝལིཡཝཏྠུསྨིཉྩ ‘‘བྷགཝཱ ཐོཀཾ བཧུཾ ཨཀཱསཱི’’ཏི ཨཱནེཏྭཱ སམྦནྡྷིཏབྦཾ. ཏཾ པན ཝཏྠུཾ སངྑེཔཏོཝ དསྶེཏུཾ ‘‘མཧཱཀསྶཔཏྠེརོ ཀིརཱ’’ཏིཨཱདི ཝུཏྟཾ. སམཱཔཏྟིཡཱཏི ནིརོདྷསམཱཔཏྟིཡཱ.

གངྒཱཏཱིརེཏི ཏམྦཔཎྞིདཱིཔེ གངྒཱནདིཡཱ ཏཱིརེ. སཉྙཾ ཨདཱསཱིཏི ཡཐཱ ཏེ ཡཐཱདྷིཊྛིཏཾ སཔྤིཾ པསྶནྟི, ཏཐཱ སཉྙཾ ཨདཱསི.

ཏསྶཱཏི ཡསྶ བྲཧྨུནོ རཱུཔཾ དཊྛུཀཱམོ, ཏསྶ བྲཧྨུནོ རཱུཔཾ པསྶཏི. སདྡཾ སུཎཱཏཱིཏི དིབྦཱཡ སོཏདྷཱཏུཡཱ བྲཧྨུནོ སདྡཾ སུཎཱཏི. ཙིཏྟཾ པཛཱནཱཏཱིཏི ཙེཏོཔརིཡཉཱཎེན བྲཧྨུནོ ཙིཏྟཾ པཛཱནཱཏི. ཀརཛཀཱཡསྶ ཝསེནཱཏི ཙཱཏུམཧཱབྷཱུཏིཀརཱུཔཀཱཡསྶ ཝསེན. ‘‘ཙིཏྟཾ པརིཎཱམེཏཱི’’ཏི ཨེཏྠ ཀིཾ ཏཾ ཙིཏྟཾ, ཀཐཾ ཝཱ པརིཎཱམནནྟི ཨཱཧ ‘‘པཱདཀཛ྄ཛྷཱནཙིཏྟཾ གཧེཏྭཱ ཀཱཡེ ཨཱརོཔེཏཱི’’ཏི. ཀཐཾ ¶ པན ཀཱཡེ ཨཱརོཔེཏཱིཏི ཨཱཧ ‘‘ཀཱཡཱནུགཏིཀཾ ཀརོཏཱི’’ཏི. ཨེཝམྤི སདྡདནྡྷརོཝཱཡནྟི ཝཙནཔཐཾ པཙྪིནྡནྟོ ཨཱཧ ‘‘དནྡྷགམན’’ནྟི. ཀརོཏཱིཏི ¶ སམྦནྡྷོ. ཀཱཡགམནཾ ཧི དནྡྷཾ, དནྡྷམཧཱབྷཱུཏཔཙྩཡཏྟཱཏི ཨདྷིཔྤཱཡོ. ཨཡཉྷེཏྠ ཨཏྠོ – དིསྶམཱནེན ཀཱཡེན གནྟུཀཱམཏཱཡ ཝསེན ཙིཏྟཾ པརིཎཱམེནྟོ ཡོགཱི པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ‘‘ཨིདཾ ཙིཏྟཾ ཀཱཡོ ཝིཡ དནྡྷགམནཾ ཧོཏཱུ’’ཏི པརིཀམྨཾ ཀརོཏི. ཏཐཱ པརིཀམྨཀརཎཾ ཧི སནྡྷཱཡ ‘‘པཱདཀཛ྄ཛྷཱནཙིཏྟཾ གཧེཏྭཱ’’ཏི ཝུཏྟཾ. པརིཀམྨཾ པན ཀཏྭཱ པུན སམཱཔཛྫིཏྭཱ ཉཱཎེན ཨདྷིཊྛཧནྟོ ཏཾ ཙིཏྟཾ ཀཱཡེ ཨཱརོཔེཏི, ཀཱཡཱནུགཏིཀཾ དནྡྷགམནཾ ཀརོཏི.

སུཁསཉྙནྟི སུཁསཧགཏཾ སཉྙཾ, སཉྙཱསཱིསེན ནིདྡེསོ. ལཧུབྷཱཝེན སཉྙཱཏནྟི ལཧུསཉྙཾ. ཀཐཾ པན ཨིདྡྷིཙིཏྟེན སཧ སུཁསཉྙཱཡ སམྦྷཝོཏི ཨཱཧ ‘‘སུཁསཉྙཱ ནཱམ ཨུཔེཀྑཱསམྤཡུཏྟཱ སཉྙཱ’’ཏི. སུཁནྟི སཉྙཱཏནྟི ཝཱ སུཁསཉྙཾ. ཏེནེཝཱཧ ‘‘ཨུཔེཀྑཱ ཧི སནྟཾ སུཁནྟི ཝུཏྟཱ’’ཏི ཨེཀནྟགརུཀེཧི ནཱིཝརཎེཧི, ཨོལཱ༹རིཀེཧི ཨནུཔསནྟསབྷཱཝེཧི ཙ ཝིཏཀྐཱདཱིཧི ཝིཔྤཡོགོ ཙིཏྟཙེཏསིཀཱནཾ ལཧུབྷཱཝསྶ ཀཱརཎནྟི དསྶེནྟོ ཨཱཧ ‘‘སཱཡེཝ…པེ… ཝེདིཏབྦཱ’’ཏི. ཏཾ ཨོཀྐནྟསྶཱཏི ཏཾ སུཁལཧུསཉྙཾ ཨནུཔྤཏྟསྶ. ཨསྶཱཏི ཡོགིནོ. གནྟུཀཱམཏཱ ཨེཝ ཨེཏྠ པམཱཎནྟི ཨེཏྠ ཨེཏསྨིཾ དིསྶམཱནེན ཀཱཡེན གམནེ ཡཾ ཋཱནཾ གནྟུཀཱམོ, ཏཾ ཨུདྡིསྶ གནྟུཀཱམཏཱཝསེན པཝཏྟཔརིཀམྨཱདྷིཊྛཱནཱནི ཨེཝ པམཱཎཾ, ཏཱཝཏཱ གམནཾ ཨིཛ྄ཛྷཏི. ཏསྨཱ མགྒནིམྨཱནཝཱཡུཨདྷིཊྛཱནེཧི ཝིནཱཔི ཨིཙྪིཏདེསཔྤཏྟི ཧོཏཱིཏི. ཨིདཱནི ཏམེཝཏྠཾ པཱཀཊཏརཾ ཀཱཏུཾ ‘‘སཏི ཧཱི’’ཏིཨཱདི ཝུཏྟཾ.

ཀཱཡཾ གཧེཏྭཱཏི ཀརཛཀཱཡཾ ཨཱརམྨཎཀརཎཝསེན པརིཀམྨཙིཏྟེན གཧེཏྭཱ. ཙིཏྟེ ཨཱརོཔེཏཱིཏི ‘‘ཨཡཾ ཀཱཡོ ཨིདཾ ཙིཏྟཾ ཝིཡ ཧོཏཱུ’’ཏི པཱདཀཛ྄ཛྷཱནཙིཏྟེ ཨཱརོཔེཏི ཏགྒཏིཀཾ ཀརོཏི. ཏེནཱཧ ‘‘ཙིཏྟཱནུགཏིཀཾ ཀརོཏི སཱིགྷགམན’’ནྟི. ཙིཏྟགམནནྟི ཙིཏྟཔྤཝཏྟིམཱཧ. ཨིདཾ པན ཙིཏྟཝསེན ཀཱཡཔརིཎཱམནཔཱཊིཧཱརིཡཾ. ཙིཏྟགམནམེཝཱཏི ཙིཏྟེན སམཱནགམནམེཝ. ཀཐཾ པན ཀཱཡོ དནྡྷཔྤཝཏྟིཀོ ལཧུཔརིཝཏྟིནཱ ཙིཏྟེན སམཱནགཏིཀོ ཧོཏཱིཏི? ན སབྦཐཱ སམཱནགཏིཀོ. ཡཐེཝ ཧི ཀཱཡཝསེན ཙིཏྟཔརིཎཱམནེ ཙིཏྟཾ སབྦཐཱ ཀཱཡེན སམཱནགཏིཀཾ ན ཧོཏི. ན ཧི ཏདཱ ཙིཏྟཾ སབྷཱཝསིདྡྷེན ཨཏྟནོ ཁཎེན ཨཝཏྟིཏྭཱ གརུཝུཏྟིཀསྶ རཱུཔདྷམྨསྶ ཁཎེན ཝཏྟཏི. ‘‘ཨིདཾ ཙིཏྟཾ ཨཡཾ ཀཱཡོ ཝིཡ ཧོཏཱུ’’ཏི པན ཨདྷིཊྛཱནེན ¶ དནྡྷགཏིཀསྶ ཀཱཡསྶ ཨནུཝཏྟནཏོ ཡཱཝ ཨིཙྪིཏཊྛཱནཔྤཏྟི, ཏཱཝ ཀཱཡགཏིཨནུལོམེནེཝ ཧུཏྭཱ སནྟཱནཝསེན ¶ པཝཏྟམཱནཾ ཙིཏྟཾ ཀཱཡགཏིཡཱ པརིཎཱམིཏཾ ནཱམ ཧོཏི, ཨེཝཾ ‘‘ཨཡཾ ཀཱཡོ ཨིདཾ ཙིཏྟཾ ཝིཡ ཧོཏཱུ’’ཏི ཨདྷིཊྛཱནེན པགེཝ སུཁལཧུསཉྙཱཡ སམྤཱདིཏཏྟཱ ཨབྷཱཝིཏིདྡྷིཔཱདཱནཾ ཝིཡ དནྡྷཾ ཨཝཏྟིཏྭཱ ཡཐཱ ལཧུཀཏིཔཡཙིཏྟཝཱརེཧེཝ ཨིཙྪིཏཊྛཱནཔྤཏྟི ཧོཏི, ཨེཝཾ པཝཏྟམཱནོ ཀཱཡོ ཙིཏྟགཏིཡཱ པརིཎཱམིཏོ ནཱམ ཧོཏི, ན ཨེཀཙིཏྟཀྑཎེནེཝ ཨིཙྪིཏཊྛཱནཔྤཏྟིཡཱ.

ཨེཝཉྩ ཀཏྭཱ ‘‘སེཡྻཐཱཔི ནཱམ བལཝཱ པུརིསོ སམིཉྫིཏཾ ཝཱ བཱཧཾ པསཱརེཡྻ, པསཱརིཏཾ ཝཱ བཱཧཾ སམིཉྫེཡྻཱ’’ཏི ཨིདམྤི ཨུཔམཱཝཙནཾ ནིཔྤརིཡཱཡེནེཝ སམཏྠིཏཾ ཧོཏི. ཨཝསྶཾ ཙེཏཾ ཨེཝཾ སམྤཊིཙྪིཏབྦཾ, ཨཉྙཐཱ སུཏྟཱབྷིདྷམྨཔཱཋེཧི, ཝིནཡཨཊྛཀཐཱཡ ཙ ཝིརོདྷོ སིཡཱ, དྷམྨཏཱ ཙ ཝིལོམིཏཱ. ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤཱི’’ཏི (ཨ. ནི. ༡.༡༡ ཨཱདཡོ) ཧི ཨེཏྠ ཨཉྙགཧཎེན རཱུཔདྷམྨཱ གཧིཏཱ ཨལཧུཔརིཝཏྟིཏཱཡ. ཨབྷིདྷམྨེ (པཊྛཱ. ༡.༡.༡༠-༡༡) ཙ པུརེཛཱཏཔཙྩཡོ རཱུཔམེཝ ཝུཏྟོ, པཙྪཱཛཱཏཔཙྩཡོ ཙ ཏསྶེཝ. ཡཏྠ ཡཏྠ ཙ དྷམྨཱ ཨུཔྤཛྫནྟི, ཏཏྠ ཏཏྠེཝ བྷིཛྫནྟི. ནཏྠི དེསནྟརསངྐམནཾ, ན ཙ སབྷཱཝོ ཨཉྙཐཱ ཧོཏཱིཏི. ན ཧི ཨིདྡྷིབལེན དྷམྨཱནཾ ཀེནཙི ལཀྑཎཾ ཨཉྙཐཏྟཾ ཀཱཏུཾ སཀྐཱ, བྷཱཝཉྙཐཏྟམེཝ པན ཀཱཏུཾ སཀྐཱ. ‘‘ཏཱིསུཔི ཁཎེསཱུ’’ཏི ཨིདམྤི གམནཱརམྦྷཾ སནྡྷཱཡ ཝུཏྟཾ, ན གམནནིཊྛཱནནྟི ཝདནྟི. ཐེརོཏི ཨཊྛཀཐཱཙརིཡཱནཾ ཨནྟརེ ཨེཀོ ཐེརོ. ཨིདྷཱཏི ཨིདཾ པཱཊིཧཱརིཡཾ ཝིབྷཛིཏྭཱ ཝུཏྟཔཱཋེ. སཡཾ གམནམེཝ ཨཱགཏཾ ‘‘བྲཧྨལོཀཾ གཙྪཏཱི’’ཏི ཝུཏྟཏྟཱ.

ཙཀྑུསོཏཱདཱིནནྟི ཙཀྑུསོཏཱདཱིནཾ ཨངྒཱནཾ. ཏཐཱ ཧི ཝུཏྟཾ ‘‘སབྦངྒཔཙྩངྒ’’ནྟི, སབྦཨངྒཔཙྩངྒཝནྟནྟི ཨཏྠོ. པསཱདོ ནཱམ ནཏྠཱིཏི ཨིམིནཱཝ བྷཱཝཛཱིཝིཏིནྡྲིཡཱནམྤི ཨབྷཱཝོ ཝུཏྟོཏི དཊྛབྦཾ. རུཙིཝསེནཱཏི ཨིཙྪཱཝསེན. ཨཉྙམྤཱིཏི བྷགཝཏཱ ཀརིཡམཱནཏོ ཨཉྙམྤི ཀིརིཡཾ ཀརོཏི. ཨཡཉྩེཏྠ བུདྡྷཱནུབྷཱཝོ. ཡདི སཱཝཀནིམྨིཏེསུ ནཱནཔྤཀཱརཏཱ ནཏྠི, ‘‘སཙེ པན ནཱནཱཝཎྞེ ཀཱཏུཀཱམོ ཧོཏཱི’’ཏིཨཱདི ཡཾ ཧེཊྛཱ ཝུཏྟཾ, ཏཾ ཀཐནྟི? ཏཾ ཏཐཱ ཏཐཱ པརིཀམྨཾ ཀཏྭཱ ཨདྷིཊྛཧནྟསྶ ཏེ ཏེ ཝཎྞཝཡཱདིཝིསེསཱ པརིཀམྨཱནུརཱུཔཾ ཨིཛ྄ཛྷནྟཱིཏི ཀཏྭཱ ཝུཏྟཾ. ཨིདྷ པན ཡཐཱདྷིཊྛིཏེ ནིམྨིཏརཱུཔེ སཙེ སཱཝཀོ ‘‘ཨིམེ ཝིསེསཱ ཧོནྟཱུ’’ཏི ¶ ཨིཙྪཏི, ན ཨིཛ྄ཛྷཏི, བུདྡྷཱནཾ པན ཨིཛ྄ཛྷཏཱིཏི ཨཡམཏྠོ དསྶིཏོཏི ན ཀོཙི ཝིརོདྷོ.

ཨིདཱནི ཡཱནི ཏཱནི ‘‘ཡཱཝ བྲཧྨལོཀཱཔི ཀཱཡེན ཝསཾ ཝཏྟེཏཱི’’ཏི (པཊི. མ. ༣.༡༠) པཱལི༹ཡཱ ཨཏྠདསྶནཝསེན ཝིབྷཏྟཱནི ‘‘དཱུརེཔི སནྟིཀེ ཨདྷིཊྛཱཏཱི’’ཏིཨཱདཱིནི ཙུདྡས པཱཊིཧཱརིཡཱནི ¶ , ཏཏྠ སིཁཱཔྤཏྟཾ ཀཱཡེན ཝསཝཏྟནཔཱཊིཧཱརིཡཾ དསྶེཏུཾ ‘‘ཨེཏྠ ཙཱ’’ཏིཨཱདི ཨཱརདྡྷཾ. ཏཏྠ ཡནྟི ཀིརིཡཱཔརཱམསནཾ, ཏེན ‘‘རཱུཔཾ པསྶཏཱི’’ཏི ཨེཏྠ ཡདེཏཾ རཱུཔདསྶནཾ, ‘‘སདྡཾ སུཎཱཏཱི’’ཏི ཨེཏྠ ཡདེཏཾ སདྡསཝནཾ, ‘‘ཙིཏྟཾ པཛཱནཱཏཱི’’ཏི ཨེཏྠ ཡདེཏཾ ཙིཏྟཛཱནནནྟི ཨེཝཾ དིབྦཙཀྑུསོཏཙེཏོཔརིཡཉཱཎཀཏྟུཀཾ དསྶནསཝནཛཱནནཀིརིཡཾ པརཱམསཏཱིཏི དཊྛབྦཾ. ཨིཏོ པརེསུ སནྟིཊྛཏཱིཏིཨཱདཱིསུཔི ཨེསེཝ ནཡོ. ཡམྤིསྶཱཏི ཡམྤི ཨསྶ. ཡོགིནོ ཨདྷིཊྛཱནནྟི སམྦནྡྷོ. ཡཉྩ ཁོཏི ཨེཏྠ ཁོ-སདྡོ ཨཝདྷཱརཎཏྠོ, ཝིསེསཏྠོ ཝཱ, ཏེན ཨཡམེཝེཏྠ ཀཱཡེན ཝསཝཏྟནཔཱཊིཧཱརིཡེསུ ཨུཀྐཊྛཏརནྟི དཱིཔེཏི. ཀསྨཱ? ‘‘ཨཡཾ ནུ ཁོ ཨིདྡྷིམཱ, ཨཡཾ ནུ ཁོ ནིམྨིཏོ’’ཏི ཨེཀཙྩསྶ བྲཧྨུནོ ཨཱསངྐུཔྤཱདནཏོ. ཡདགྒེན ཙེཏཾ ཨདྷིཊྛིཏཾ ཝིསེསཏོ མནོམཡནྟི ཝུཙྩཏི, ཏདགྒེན ཨུཀྐཊྛཏརནྟི ཝེདིཏབྦཾ. ཏེནཱཧ ‘‘ཨེཏྟཱཝཏཱ ཀཱཡེན ཝསཾ ཝཏྟེཏི ནཱམཱ’’ཏི. ཡདི ཨེཝཾ ཀསྨཱ ཨིདྷ སེསཱནི གཧིཏཱནཱིཏི ཨཱཧ ‘‘སེསཾ…པེ… ཝུཏྟ’’ནྟི.

༣༩༨. ཨིདཾ ནཱནཱཀརཎནྟི ཀཱམམིམཱཔི དྭེ ཨིདྡྷིཡོ ཨདྷིཊྛཱནཝསེནེཝ ཨིཛ྄ཛྷནྟི, ཏཐཱཔི ཨིདཾ ཨིདཱནི ཝུཙྩམཱནཾ ཨིམཱསཾ ནཱནཱཀརཎཾ ཝིསེསོ. པཀཏིཝཎྞཾ ཝིཛཧིཏྭཱཏི ཨཏྟནོ པཀཏིརཱུཔཾ ཝིཛཧིཏྭཱ ཨཔནེཏྭཱ, པརེསཾ ཨདསྶེཏྭཱཏི ཨཏྠོ. ཀུམཱརཀཝཎྞནྟི ཀུམཱརཀསཎྛཱནཾ. དསྶེཏཱིཏི ཏཐཱ ཝིཀུབྦནྟོ ཨཏྟནི དསྶེཏི. ནཱགཝཎྞཾ ཝཱཏིཨཱདཱིསུཔི ཨེསེཝ ནཡོ. ཧཏྠིམྤི དསྶེཏཱིཏི ཨཏྟཱནམྤི ཧཏྠིཾ ཀཏྭཱ དསྶེཏི, བཧིདྡྷཱཔི ཧཏྠིཾ དསྶེཏི. ཨེཏདཏྠམེཝ ཧི ཨིདྷ ‘‘ཧཏྠིཝཎྞཾ ཝཱ དསྶེཏཱི’’ཏི ཨཝཏྭཱ ‘‘ཧཏྠིམྤི དསྶེཏཱི’’ཏི (པཊི. མ. ༣.༡༣) ཝུཏྟཾ. ཡཾ པན ཀེཙི བཧིདྡྷཱ ཧཏྠིཨཱདིདསྶནཝཙནཾ ‘‘པཀཏིཝཎྞཾ ཝིཛཧིཏྭཱ’’ཏི ཝཙནེན ཝིཀུབྦནིདྡྷིབྷཱཝེན ཝིརུཛ྄ཛྷཏཱིཏི ཝདནྟི, ཏདཡུཏྟཾ. ཀསྨཱ? པཀཏིཝཎྞཝིཛཧནཾ ནཱམ ཨཏྟནོ པཀཏིརཱུཔསྶ ཨཉྙེསཾ ཨདསྶནཾ, ན སབྦེན སབྦཾ ཏསྶ ནིརོདྷནཾ. ཨེཝཾ སཏི ཨཏྟཱནཾ ཨདསྶེཏྭཱ བཧིདྡྷཱ ཧཏྠིཾ དསྶེནྟོ ‘‘པཀཏིཝཎྞཾ ཝིཛཧིཏྭཱ ཧཏྠིཾ དསྶེཏཱི’’ཏི ¶ ཝུཙྩམཱནེ ཀོ ཨེཏྠ ཝིརོདྷོ, ཨཏྟནཱ པན ཧཏྠིཝཎྞོ ཧུཏྭཱ བཧིདྡྷཱཔི ཧཏྠིཾ དསྶནྟེ ཝཏྟབྦམེཝ ནཏྠི. ཏེནེཝཱཧ ‘‘བཧིདྡྷཱཔི ཧཏྠིཨཱདིདསྶནཝསེན ཝུཏྟ’’ནྟི. ཨེཝཉྩ ཀཏྭཱ ཝིཀུབྦནིདྡྷིབྷཱཝེན ཙ ན ཀོཙི ཝིརོདྷོ.

པཱལི༹ཡཉྩ ཀུམཱརཀཝཎྞཾ ཝཱཏིཨཱདཱིསུ ཨནིཡམཏྠོ ཝཱ-སདྡོ ཝུཏྟོ. ཏེསུ ཨེཀེཀསྶེཝ ཀརཎདསྶནཏྠཾ. ཧཏྠིམྤཱིཏིཨཱདཱིསུ པན ཧཏྠིཨཱདཱིནཾ བཧཱུནཾ ཨེཀཛ྄ཛྷཾ ཀཱཏབྦཱབྷཱཝདསྶནཏྠཾ སམུཙྩཡཏྠོ པི-སདྡོ ཝུཏྟོ. ཏེན ‘‘ཧཏྠིམྤི དསྶེཏཱི’’ཏིཨཱདཱིསུ དུཏིཡེ ཝུཏྟནཡེནེཝ ཨཏྠོ གཧེཏབྦོ.

ཨིདྡྷིམཏོ ¶ ཨཏྟནོ ཀུམཱརཀཱཀཱརེན པརེསཾ དསྶནཾ ཀུམཱརཀཝཎྞནིམྨཱནཾ, ན ཨེཏྠ ཀིཉྩི ཨཔུབྦཾ པཐཝཱིཨཱདིཝཏྠུ ནིཔྥཱདཱིཡཏཱིཏི ཀསིཎནིཡམེན པཡོཛནཱབྷཱཝཏོ ‘‘པཐཝཱིཀསིཎཱདཱིསུ ཨཉྙཏརཱརམྨཎཏོ’’ཏི ཝུཏྟཾ. སཏིཔི ཝཱ ཝཏྠུནིཔྥཱདནེ ཡཐཱརཧཾ ཏཾ པཐཝཱིཀསིཎཱདིཝསེནེཝ ཨིཛ྄ཛྷཏཱིཏི ཨེཝམྤེཏྠ ཀསིཎནིཡམེན པཡོཛནཾ ནཏྠེཝ. ཀུམཱརཀཝཎྞཉྷི དསྶེནྟེན ནཱིལཝཎྞཾ ཝཱ དསྶེཏབྦཾ སིཡཱ, པཱིཏཱདཱིསུ ཨཉྙཏརཝཎྞཾ ཝཱ. ཏཐཱ སཏི ནཱིལཱདིཀསིཎཱནི སམཱཔཛྫིཏབྦཱནཱིཏི ཨཱཔནྣོཝ ཀསིཎནིཡམོ. ཨེསེཝ ནཡོ སེསེསུཔི. ཨེཝམདྷིཊྛིཏེ ཡདེཀེ པཐཝཱིཀསིཎཝསེན ‘‘ཨེཀོཔི ཧུཏྭཱ བཧུདྷཱ ཧོཏཱི’’ཏིཨཱདི (དཱི. ནི. ༡.༢༣༨; མ. ནི. ༡.༡༤༧; སཾ. ནི. ༥.༨༤༢; པཊི. མ. ༣.༡༠) བྷཱཝོཏི ཨེཝཾ པཝཏྟེན ཀསིཎནིདྡེསེན ཨིདྷ ཝིཀུབྦནིདྡྷིནིདྡེསེ ‘‘པཐཝཱིཀསིཎཱདཱིསུ ཨཉྙཏརཱརམྨཎཏོ’’ཏིཨཱདིཝཙནསྶ ཝིརོདྷཾ ཨཱསངྐནྟི, སོ ཨནོཀཱསོཝཱཏི དཊྛབྦཾ. ནིམྨིནིཏབྦབྷཱཝེན ཨཏྟནཱ ཨིཙྪིཏོཏི ཨཏྟནོ ཀུམཱརཀཝཎྞོ, ན པན ཨཏྟནོ དཧརཀཱལེ ཀུམཱརཀཝཎྞོཏི. ནཱགཱདིཝཎྞེསུཔི ཨཡཾ ནཡོ བྱཱཔཱི ཨེཝཱཏི ཡདེཀེ ‘‘ནཱགཱདིནིམྨཱནེ ན ཡུཛྫཏི ཝིཡཱ’’ཏི ཝདནྟི, ཏདཔོཧཏཾ དཊྛབྦཾ.

བཧིདྡྷཱཔཱིཏི པི-སདྡེན ཨཛ྄ཛྷཏྟཾ སམྤིཎྜེཏི. ཨཡཉྷེཏྠ ཨཏྠོ – ཧཏྠིམྤི དསྶེཏཱིཏིཨཱདི ཨཛ྄ཛྷཏྟཾ, བཧིདྡྷཱཔི ཧཏྠིཨཱདིདསྶནཝསེན ཝུཏྟཾ, ན ‘‘ཀུམཱརཀཝཎྞཾ ཝཱ’’ཏིཨཱདི ཝིཡ ཨཛ྄ཛྷཏྟམེཝ ཀུམཱརཀཝཎྞཱདཱིནཾ དསྶནཝསེནཱཏི. ཡཾ ཨེཏྠ ཝཏྟབྦཾ ཨདྷིཊྛཱནཝིདྷཱནཾ, ཏཾ ཧེཊྛཱ ཝུཏྟམེཝ.

༣༩༩. ཀཱཡནྟི ¶ ཨཏྟནོ ཀརཛཀཱཡཾ. ཝུཏྟནཡེནེཝཱཏི ‘‘ཨཡཾ ཀཱཡོ སུསིརོ ཧོཏཱུ’’ཏི པརིཀམྨཾ ཀཏྭཱ པུན ‘‘པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡཱ’’ཏི ཨིམཾ ཧེཊྛཱ ཝུཏྟནཡཱནུསཱརམཱཧ. ཨཉྙཾ ཀཱཡནྟི ཡཾ མནོམཡཾ ཀཱཡཾ ནིམྨིནིཏུཀཱམོ, ཏཾ. མུཉྫམྷཱཏི མུཉྫཏིཎཏོ. ཨཱིསིཀནྟི ཏསྶ ཀཎྜཾ. ཀོསིཡཱཏི ཨསིཀོསཏོ. ཀརཎྜཱཡཱཏི པེལཱ༹ཡ, ནིམྨོཀཏོཏི ཙ ཝདནྟི. ཨབྦཱཧཏཱིཏི ཨུདྡྷརཏི. པཝཱཧེཡྻཱཏི ཨཱཀཌྜྷེཡྻ.

ཨིདྡྷིཝིདྷནིདྡེསཝཎྞནཱ ནིཊྛིཏཱ.

ཨིཏི དྭཱདསམཔརིཙྪེདཝཎྞནཱ.

༡༣. ཨབྷིཉྙཱནིདྡེསཝཎྞནཱ

དིབྦསོཏདྷཱཏུཀཐཱཝཎྞནཱ

༤༠༠. ཏཏྠཱཏི ¶ ¶ དིབྦསོཏདྷཱཏུཡཱ ནིདྡེསེ. ཨབྷིཉྙཱཔཱལི༹ཡཱ ཧི ནིདྡེསམུཁེན ཨབྷིཉྙཱནཾ ནིབྦཏྟནཝིདྷི ཝིདྷཱིཡཏི. ཨབྷིཉྙཱསཱིསེནེཏྠ ཨབྷིཉྙཱཔཱལི༹ ཝུཏྟཱ. ཏེནཱཧ ‘‘ཏཏོ པརཱསུ ཙ ཏཱིསུ ཨབྷིཉྙཱསཱུ’’ཏི. ཏཏོ པརཱསཱུཏི ཙ སཏྠུནོ དེསནཱཀྐམཾ, ཨཏྟནོ ཙ ཨུདྡེསཀྐམཾ སནྡྷཱཡ ཝུཏྟཾ, ན པཊིཔཏྟིཀྐམཾ. ན ཧི པཊིཔཛྫནྟཱ ཨིམིནཱཝ ཀམེན པཊིཔཛྫནྟི. སབྦཏྠཱཏི དིབྦསོཏདྷཱཏུཔཱལི༹ཡཾ, སེསཱབྷིཉྙཱཔཱལི༹ཡཉྩཱཏི སབྦཏྠ. ཏཏྲཱཏི ཝཱཀྱོཔཉྙཱསེ ནིཔཱཏམཏྟཾ, ཏཏྲ ཝཱ ཡཐཱཝུཏྟཔཱཋེ. དིབྦསདིསཏྟཱཏི དིབྦེ བྷཝཱཏི དིབྦཱ, དེཝཱནཾ སོཏདྷཱཏུ, ཏཱཡ དིབྦཱཡ སདིསཏྟཱ. ཨིདཱནི ཏཾ དིབྦསདིསཏཾ ཝིབྷཱཝེཏུཾ ‘‘དེཝཱནཾ ཧཱི’’ཏིཨཱདི ཝུཏྟཾ. ཏཏྠ སུཙརིཏཀམྨནིབྦཏྟཱཏི སདྡྷཱབཧུལཏཱཝིསུདྡྷདིཊྛིཏཱནིསཾསདསྶཱཝིཏཱདིསམྤཏྟིཡཱ སུཊྛུ ཙརིཏཏྟཱ སུཙརིཏེན དེཝཱུཔཔཏྟིཛནཀེན པུཉྙཀམྨེན ནིབྦཏྟཱ. པིཏྟསེམྷརུཧིརཱདཱིཧཱིཏི ཨཱདི-སདྡེན ཝཱཏརོགཱདཱིནཾ སངྒཧོ. ཨཔལིབུདྡྷཱཏི ཨནུཔདྡུཏཱ. པིཏྟཱདཱིཧི ཨནུཔདྡུཏཏྟཱ, ཀམྨསྶ ཙ ཨུལཱ༹རཏཱཡ ཨུཔཀྐིལེསཝིམུཏྟི ཝེདིཏབྦཱ. ཨུཔཀྐིལེསདོསརཧིཏཾ ཧི ཀམྨཾ ཏིཎཱདིདོསརཧིཏཾ ཝིཡ སསྶཾ ཨུལཱ༹རཕལཾ ཨནུཔཀྐིལིཊྛཾ ཧོཏི. ཀཱརཎཱུཔཙཱརེན ཙསྶ ཕལཾ ཏཐཱ ཝོཧརཱིཡཏི, ཡཐཱ ‘‘སུཀྐཾ སུཀྐཝིཔཱཀ’’ནྟི (དཱི. ནི. ༣.༣༡༢; མ. ནི. ༢.༨༡; ཨ. ནི. ༤.༢༣༣). དཱུརེཔཱིཏི པི-སདྡེན སུཁུམསྶཱཔི ཨཱརམྨཎསྶ སམྤཊིཙྪནསམཏྠཏཾ སངྒཎྷཱཏི. པསཱདསོཏདྷཱཏཱུཏི ཙཏུམཧཱབྷཱུཏཱནཾ པསཱདལཀྑཎཱ སོཏདྷཱཏུ.

ཝཱིརིཡཱརམྦྷཝསེནེཝ ཨིཛ྄ཛྷནཏོ སབྦཱཔི ཀུསལབྷཱཝནཱ ཝཱིརིཡབྷཱཝནཱ, པདྷཱནསངྑཱརསམནྣཱགཏཱ ཝཱ ཨིདྡྷིཔཱདབྷཱཝནཱཔི ཝིསེསཏོ ཝཱིརིཡབྷཱཝནཱ, ཏསྶཱ ཨཱནུབྷཱཝེན ནིབྦཏྟཱ ཝཱིརིཡབྷཱཝནཱབལནིབྦཏྟཱ. ཉཱཎམཡཱ སོཏདྷཱཏུ ཉཱཎསོཏདྷཱཏུ. ཏཱདིསཱཡེཝཱཏི ཨུཔཀྐིལེསཝིམུཏྟཏཱཡ, དཱུརེཔི སུཁུམསྶཔི ཨཱརམྨཎསྶ སམྤཊིཙྪནསམཏྠཏཱཡ ཙ ཏཾསདིསཱ ཨེཝ ¶ . དིབྦཝིཧཱརཝསེན པཊིལདྡྷཏྟཱཏི དིབྦཝིཧཱརསངྑཱཏཱནཾ ཙཏུནྣཾ བྷཱུམཱིནཾ ཝསེན པཊིལདྡྷཏྟཱ, ཨིམིནཱ ཀཱརཎཝསེནསྶཱ དིབྦབྷཱཝམཱཧ. ཡཾ ཙེཏྠ ཝཏྟབྦཾ, ཏཾ ཧེཊྛཱ ཝུཏྟམེཝ. དིབྦཝིཧཱརསནྣིསྶིཏཏྟཱཏི ¶ ཨཊྛངྒསམནྣཱགམེན ཨུཀྐཾསགཏཾ པཱདཀཛ྄ཛྷཱནསངྑཱཏཾ དིབྦཝིཧཱརཾ སནྣིསྶཱཡ པཝཏྟཏྟཱ, དིབྦཝིཧཱརཔརིཡཱཔནྣཾ ཝཱ ཨཏྟནཱ སམྤཡུཏྟཾ རཱུཔཱཝཙརཙཏུཏྠཛ྄ཛྷཱནཾ ནིསྶཡཔཙྩཡབྷཱུཏཾ སནྣིསྶིཏཏྟཱཏི ཨེཝམྤེཏྠ ཨཏྠོ དཊྛབྦོ. སཝནཊྛེནཱཏི སདྡགཧཎཊྛེན. ཡཱཐཱཝཏོ ཧི སདྡཱུཔལདྡྷི སདྡསབྷཱཝཱཝབོདྷོ སཝནཾ. སནྟེསུཔི ཨཉྙེསུ སབྷཱཝདྷཱརཎཱདཱིསུ དྷཱཏུཨཏྠེསུ ཨཏྟསུཉྙཏཱསནྡསྶནཏྠཱ སཏྠུ དྷཱཏུདེསནཱཏི ཨཱཧ ‘‘ནིཛྫཱིཝཊྛེན ཙཱ’’ཏི. སོཏདྷཱཏུཀིཙྩཾ སདྡསམྤཊིཙྪནཾ, སདྡསནྣིཊྛཱནཔཙྩཡཏཱ ཙ.

ཉཱཎསྶ པརིསུདྡྷི ཨུཔཀྐིལེསཝིགམེནེཝཱཏི ཨཱཧ ‘‘ནིརུཔཀྐིལེསཱཡཱ’’ཏི. མཱནུསིཀཱ མནུསྶ སནྟཀཱ, མཾསསོཏདྷཱཏུ, དིབྦཝིདཱུརཱདིཝིསཡགྒཧཎསངྑཱཏེན ཨཏྟནོ ཀིཙྩཝིསེསེན ཨཏིཀྐནྟཾ མཱནུསིཀཾ ཨེཏཱཡཱཏི ཨཏིཀྐནྟམཱནུསིཀཱ. ཏེནཱཧ ‘‘མནུསྶཱུཔཙཱརཾ ཨཏིཀྐམིཏྭཱ སདྡསཝནེནཱ’’ཏི. ཏཏྠ མནུསྶཱུཔཙཱརནྟི མནུསྶེཧི ཨུཔཙརིཏབྦཊྛཱནཾ, པཀཏིཡཱ སོཏདྭཱརེན གཧེཏབྦཾ ཝིསཡནྟི ཨདྷིཔྤཱཡོ. ཏེནཱཧ ‘‘སདྡསཝནེནཱ’’ཏི. དིབྦེཏི དེཝལོཀཔརིཡཱཔནྣེ. ཏེ པན ཝིསེསཏོ དེཝཱནཾ ཀཐཱ སདྡཱ ཧོནྟཱིཏི ཨཱཧ ‘‘དེཝཱནཾ སདྡེ’’ཏི. མནུསྶཱནཾ ཨེཏེཏི མཱནུསཱ, ཏེ མཱནུསེ. ཨེཝཾ དེཝམནུསྶསདྡཱནཾཡེཝ གཧིཏཏྟཱ ཝུཏྟཾ ‘‘པདེསཔརིཡཱདཱན’’ནྟི, ཨེཀདེསགྒཧཎནྟི ཨཏྠོ. སདེཧསནྣིསྶིཏཱ ཨཏྟནོ སརཱིརེ སནྣིསྶིཏཱ. ནིཔྤདེསཔརིཡཱདཱནཾ ཋཱནབྷེདགྒཧཎམུཁེན སཝིཉྙཱཎཀཱདིབྷེདབྷིནྣསྶ སདྡསྶ ཨནཝསེསེན སངྒཎྷནཏོ.

ཨཡཾ དིབྦསོཏདྷཱཏུ. པརིཀམྨསམཱདྷིཙིཏྟེནཱཏི པརིཀམྨབྷཱུཏཱཝེཎིཀསམཱདྷིཙིཏྟེན, དིབྦསོཏཉཱཎསྶ པརིཀམྨཝསེན པཝཏྟཀྑཎིཀསམཱདྷིནཱ སམཱཧིཏཙིཏྟེནཱཏི ཨཏྠོ. པརིཀམྨསམཱདྷི ནཱམ དིབྦསོཏདྷཱཏུཡཱ ཨུཔཙཱརཱཝཏྠཱཏིཔི ཝདནྟི. སཱ པན ནཱནཱཝཛྫནཝསེན ཝུཏྟཱཏི དཊྛབྦཱ. སབྦོལཱ༹རིཀསདྡདསྶནཏྠཾ སཱིཧཱདཱིནཾ སདྡོ པཋམཾ གཧིཏོ. ཏིཡོཛནམཏྠཀེཔི ཀིར ཀེསརསཱིཧསྶ སཱིཧནཱདསདྡོ སུཡྻཏི. ཨཱདི-སདྡེན མེགྷསདྡབྱགྒྷསདྡཱདཱིནཾ སངྒཧོ དཊྛབྦོ. ཨེཏྠ ཙ ཡཐཱ ཨོལཱ༹རིཀསདྡཱཝཛྫནཾ ཡཱཝདེཝ སུཁུམསདྡཱཝཛྫནཱུཔཱཡདསྶནཏྠཾ, ཏཐཱ སདྡགྒཧཎབྷཱཝནཱབལེན སུཁུམཏརསདྡགྒཧཎསཾསིདྡྷིཏོ.

ཨེཝཾ ¶ ཨཱསནྣསདྡགྒཧཎཱནུསཱརེན དཱུརདཱུརཏརསདྡགྒཧཎམྤི སམིཛ྄ཛྷཏཱིཏི དསྶེཏུཾ ‘‘པུརཏྠིམཱཡ ¶ དིསཱཡཱ’’ཏིཨཱདིནཱ དིསཱསམྦནྡྷཝསེན སདྡཱནཾ མནསིཀཱརཝིདྷི ཨཱརདྡྷོ. ཏཏྠ སདྡནིམིཏྟནྟི ཉཱཎུཔྤཏྟིཧེཏུབྷཱཝཏོ སདྡོ ཨེཝ སདྡནིམིཏྟཾ, ཡོ ཝཱ ཡཐཱཝུཏྟོ ཨུཔཱདཱཡུཔཱདཱཡ ལབྦྷམཱནོ སདྡཱནཾ ཨོལཱ༹རིཀསུཁུམཱཀཱརོ, ཏཾ སདྡནིམིཏྟཾ. ཏེནེཝཱཧ ‘‘སདྡཱནཾ སདྡནིམིཏྟ’’ནྟི. ཡཾ པན ཝུཏྟཾ ‘‘ཨོལཱ༹རིཀཱནམྤི སུཁུམཱནམྤི སདྡཱནཾ སདྡནིམིཏྟཾ མནསི ཀཱཏབྦ’’ནྟི, ཏཾ ཨོལཱ༹རིཀསུཁུམསམྨཏེསུཔི ཨོལཱ༹རིཀསུཁུམསབྦྷཱཝདསྶནཏྠཾ. ཏཉྩ སབྦཾ སུཁུམེ ཉཱཎཔརིཙཡདསྶནཏྠཾ དཊྛབྦཾ. སདྡནིམིཏྟསྶ ཨཔཙྩུཔྤནྣསབྷཱཝཏྟཱ ‘‘སདྡོཝ སདྡནིམིཏྟ’’ནྟི ཨཡམེཝ པཀྑོ ཉཱཡཱགཏོཏི ཀེཙི, ཏཾ ན ཨོལཱ༹རིཀསུཁུམཱནཾ སདྡཱནཾ ཝཎྞཱརམྨཎེན ཉཱཎེན ནཱིལཔཱིཏཱདིཝཎྞཱནཾ ཝིཡ ཏཏྠེཝ གཧེཏབྦཏོ. ཨོལཱ༹རིཀསུཁུམབྷཱཝོ ཙེཏྠ སདྡནིམིཏྟནྟི ཨདྷིཔྤེཏནྟི. ཏསྶཱཏི ཡཐཱཝུཏྟེན ཝིདྷིནཱ པཊིཔཛྫནྟསྶ ཡོགིནོ. ཏེ སདྡཱཏི ཡེ སབྦོལཱ༹རིཀཏོ པབྷུཏི ཨཱཝཛྫནྟསྶ ཨནུཀྐམེན སུཁུམསུཁུམཱ སདྡཱ ཨཱཝཛྫིཏཱ, ཏེ. པཱཀཏིཀཙིཏྟསྶཱཔཱིཏི པཱདཀཛ྄ཛྷཱནསམཱཔཛྫནཏོ པུབྦེ པཝཏྟཙིཏྟསྶཱཔི. པརིཀམྨསམཱདྷིཙིཏྟསྶཱཏི དིབྦསོཏདྷཱཏུཡཱ ཨུཔྤཱདནཏྠཾ པཱདཀཛ྄ཛྷཱནཾ སམཱཔཛྫིཏྭཱ ཝུཊྛིཏསྶ སདྡཾ ཨཱརབྦྷ པརིཀམྨཀརཎཝསེན པཝཏྟཀྑཎིཀསམཱདྷིཙིཏྟསྶ. པུབྦེཔི ཉཱཎེན པརིམདྡིཏཏྟཱ ཨཏིཝིཡ པཱཀཊཱ ཧོནྟཱིཏི སམྦནྡྷོ.

ཏེསུ སདྡེསཱུཏི ཡེ པརིཀམྨསྶ ཝིསཡདསྶནཏྠཾ བཧཱུ སདྡཱ ཝུཏྟཱ, ཏེསུ སདྡེསུ. ཨཉྙཏརནྟི ཡཏྠསྶ པརིཀམྨཀརཎཝསེན ཨབྷིཎྷཾ མནསིཀཱརོ པཝཏྟོ, ཏཾ ཨེཀཾ སདྡཾ. ཏཏོ པརནྟི ཏཏོ ཨཔྤནུཔྤཏྟིཏོ པརཾ. ཏསྨིཾ སོཏེཏི ཏསྨིཾ ཉཱཎསོཏེ. པཏིཏོ ཧོཏཱིཏི དིབྦསོཏདྷཱཏུ ཨནྟོགདྷཱ ཧོཏི ཨཔྤནཱཙིཏྟསྶ ཨུཔྤཏྟིཏོ པབྷུཏི དིབྦསོཏཉཱཎལཱབྷཱི ནཱམ ཧོཏི, ན དཱནིསྶ ཏདཏྠཾ བྷཱཝནཱབྷིཡོགོ ཨིཙྪིཏབྦོཏི ཨཏྠོ. ཏནྟི དིབྦསོཏདྷཱཏུཾ. ཐཱམཛཱཏནྟི ཛཱཏཐཱམཾ དལ༹ྷབྷཱཝཔྤཏྟཾ. ཝཌྜྷེཏབྦཾ པཱདཀཛ྄ཛྷཱནཱརམྨཎཾ. ཀིནྟི ཀིཏྟཀནྟི ཨཱཧ ‘‘ཨེཏྠནྟརེ སདྡཾ སུཎཱམཱིཏི ཨེཀངྒུལམཏྟཾ པརིཙྪིནྡིཏྭཱ’’ཏི. པཱདཀཛ྄ཛྷཱནསྶ ཧི ཨཱརམྨཎབྷཱུཏཾ ཀསིཎནིམིཏྟཾ ‘‘ཨེཏྟཀཾ ཋཱནཾ ཕརཏཱུ’’ཏི མནསི ཀརིཏྭཱ པཱདཀཛ྄ཛྷཱནཾ སམཱཔཛྫནྟསྶ ཀསིཎནིམིཏྟཾ ཏཏྟཀཾ ཋཱནཾ ཕརིཏྭཱ ཏིཊྛཏི ¶ . སོ སམཱཔཏྟིཏོ ཝུཊྛཱཡ ཏཏྠ གཏེ སདྡེ ཨཱཝཛྫཏི, སུབྷཱཝིཏབྷཱཝནཏྟཱ ཏཏྠ ཨཉྙཏརཾ སདྡཾ ཨཱརབྦྷ ཨུཔྤནྣཱཝཛྫནཱནནྟརཾ ཙཏྟཱརི, པཉྩ ཝཱ ཛཝནཱནི ཨུཔྤཛྫནྟི. ཏེསུ པཙྪིམཾ ཨིདྡྷིཙིཏྟཾ, ཨིཏརསྶ པུནཔི པཱདཀཛ྄ཛྷཱནཾ སམཱཔཛྫིཏབྦམེཝ. ཏཏོ ཨེཝ ཧི པཱདཀཛ྄ཛྷཱནཱརམྨཎེན ཕུཊྛོཀཱསབྦྷནྟརགཏེཔི སདྡེ སུཎཱཏིཡེཝཱཏི སཱསངྐཾ ཝདཏི. ཨེཀངྒུལདྭངྒུལཱདིགྒཧཎཉྩེཏྠ སུཁུམསདྡཱཔེཀྑཱཡ ཀཏཾ.

ཨེཝཾ ¶ སུཎནྟོཝཱཏི ཨེཝཾ པརིཙྪིནྡིཏྭཱ པརིཙྪིནྡིཏྭཱ སཝནེན ཝསཱིཀཏཱབྷིཉྙོ ཧུཏྭཱ ཡཐཱཝཛྫིཏེ སདྡེ སུཎནྟོ ཨེཝ. པཱཊིཡེཀྐནྟི ཨེཀཛ྄ཛྷཾ པཝཏྟམཱནེཔི ཏེ སདྡེ པཙྩེཀཾ ཝཏྠུབྷེདེན ཝཝཏྠཔེཏུཀཱམཏཱཡ སཏི.

དིབྦསོཏདྷཱཏུཀཐཱཝཎྞནཱ ནིཊྛིཏཱ.

ཙེཏོཔརིཡཉཱཎཀཐཱཝཎྞནཱ

༤༠༡. པརིཡཱཏཱིཏི སརཱགཱདིཝིབྷཱགེན པརིཙྪིཛྫ ཛཱནཱཏི. ཏེནཱཧ ‘‘པརིཙྪིནྡཏཱིཏི ཨཏྠོ’’ཏི. ཡེསཉྷི དྷཱཏཱུནཾ གཏི ཨཏྠོ, བུདྡྷིཔི ཏེསཾ ཨཏྠོ. ‘‘པརསཏྟཱན’’ནྟི ཨེཏྠ པར-སདྡོ ཨཉྙཏྠོཏི ཨཱཧ ‘‘ཨཏྟཱནཾ ཋཔེཏྭཱ སེསསཏྟཱན’’ནྟི, ཡཐཱ ཧི ཡོ པརོ ན ཧོཏི, སོ ཨཏྟཱ. ཡོ ཨཏྟཱ ན ཧོཏི, སོ པརོཏི. སཏྟཱནནྟི ཙེཏྠ རཱུཔཱདཱིསུ སཏྟཱཏི སཏྟཱ. ཏསྶཱ པན པཉྙཏྟིཡཱ སཝིཉྙཱཎཀསནྟཱནེ ནིརུལ༹ྷཏྟཱ ནིཙྪནྡརཱགཱཔི སཏྟཱཏྭེཝ ཝུཙྩནྟི, བྷཱུཏཔུབྦགཏིཡཱ ཝཱ. ‘‘པུ’’ནྟི ནརཀཾ, ཏཏྠ གལནྟི པཔཏནྟཱིཏི པུགྒལཱ, པཱཔཀཱརིནོ. ཨིཏརེཔི སཾསཱརེ སཾསཱརིནོ ཏཾསབྷཱཝཱནཱཏིཝཏྟནཏོ པུགྒལཱཏྭེཝ ཝུཙྩནྟི. ཏཾཏཾསཏྟནིཀཱཡསྶ ཝཱ ཏཏྠ ཏཏྠ ཨུཔཔཏྟིཡཱ པཱུརཎཏོ, ཨནིཙྩཏཱཝསེན གལནཏོ ཙ པུགྒལཱཏི ནེརུཏྟཱ.

ཨེཏཉྷཱིཏི ཨེཏྠ ཧི-སདྡོ ཧེཏུཨཏྠོ. ཡསྨཱ ‘‘ཨེཏཾ ཙེཏོཔརིཡཉཱཎཾ དིབྦཙཀྑུཉཱཎཝསེན ཨིཛ྄ཛྷཏཱི’’ཏི ཏཾ དིབྦཙཀྑུཉཱཎཾ, ཨེཏསྶ ཙེཏོཔརིཡཉཱཎསྶ ཨུཔྤཱདནེ པརིཀམྨཾ, ཏསྨཱ ཏེན ཙེཏོཔརིཡཉཱཎཾ ཨུཔྤཱདེཏུཀཱམེན ཨདྷིགཏདིབྦཙཀྑུཉཱཎེན བྷིཀྑུནཱཏི ཨེཝཾ ཡོཛནཱ ཀཱཏབྦཱ ¶ . ཧདཡརཱུཔནྟི ན ཧདཡཝཏྠུ, ཨཐ ཁོ ཧདཡམཾསཔེསི. ཡཾ བཧི ཀམལམཀུལ༹སཎྛཱནཾ, ཨནྟོ ཀོསཱཏཀཱིཕལསདིསནྟི ཝུཙྩཏི, ཏཉྷི ནིསྶཱཡ དཱནི ཝུཙྩམཱནཾ ལོཧིཏཾ ཏིཊྛཏི. ཧདཡཝཏྠུ པན ཨིམཾ ལོཧིཏཾ ནིསྶཱཡ པཝཏྟཏཱིཏི. ཀཐཾ པན དིབྦཙཀྑུནཱ ལོཧིཏསྶ ཝཎྞདསྶནེན ཨརཱུཔཾ ཙིཏྟཾ པརིཡེསཏཱིཏི ཨཱཧ ‘‘ཡདཱ ཧཱི’’ཏིཨཱདི. ཀཐཾ པན སོམནསྶསཧགཏཱདིཙིཏྟཝུཏྟིཡཱ ཀམྨཛསྶ ལོཧིཏསྶ ཝིཝིདྷཝཎྞབྷཱཝཱཔཏྟཱིཏི? ཀོ ཝཱ ཨེཝམཱཧ ‘‘ཀམྨཛམེཝ ཏཾ ལོཧིཏ’’ནྟི ཙཏུསནྟཏིརཱུཔསྶཱཔི ཏཏྠ ལབྦྷམཱནཏྟཱ. ཏེནེཝཱཧ ‘‘ཨིདཾ རཱུཔཾ སོམནསྶིནྡྲིཡསམུཊྛཱན’’ནྟིཨཱདི. ཨེཝམྤི ཡཾ ཏཏྠ ཨཙིཏྟཛཾ, ཏསྶ ཡཐཱཝུཏྟཝཎྞབྷེདེན ¶ ན བྷཝིཏབྦནྟི? བྷཝིཏབྦཾ, སེསཏིསནྟཏིརཱུཔཱནཾ ཏདནུཝཏྟནཏོ. ཡཐཱ ཧི གམནཱདཱིསུ ཙིཏྟཛརཱུཔཱནི ཨུཏུཀམྨཱཧཱརསམུཊྛཱནརཱུཔེཧི ཨནུཝཏྟཱིཡནྟི, ཨཉྙཐཱ ཀཱཡསྶ དེསནྟརུཔྤཏྟིཡེཝ ན སིཡཱ, ཨེཝམིདྷཱཔི ཙིཏྟཛརཱུཔཾ སེསཏིསནྟཏིརཱུཔཱནི ཨནུཝཏྟམཱནཱནི པཝཏྟནྟི. པསཱདཀོདྷཝེལཱསུ ཙཀྑུསྶ ཝཎྞབྷེདཱཔཏྟིཡེཝ ཙ ཏདཏྠསྶ ནིདསྶནཾ དཊྛབྦཾ.

པརིཡེསནྟེནཱཏི པཋམཾ ཏཱཝ ཨནུམཱནཏོ ཉཱཎཾ པེསེཏྭཱ གཝེསནྟེན. ཙེཏོཔརིཡཉཱཎཉྷི ཨུཔྤཱདེཏུཀཱམེན ཡོགིནཱ ཧེཊྛཱ ཝུཏྟནཡེན རཱུཔཱཝཙརཙཏུཏྠཛ྄ཛྷཱནཾ ཨཊྛངྒསམནྣཱགཏཾ ཨབྷིནཱིཧཱརཀྑམཾ ཀཏྭཱ དིབྦཙཀྑུཉཱཎསྶ ལཱབྷཱི སམཱནོ ཨཱལོཀཾ ཝཌྜྷེཏྭཱ དིབྦེན ཙཀྑུནཱ པརསྶ ཧདཡམཾསཔེསིཾ ནིསྶཱཡ པཝཏྟམཱནསྶ ལོཧིཏསྶ ཝཎྞདསྶནེན ‘‘ཨིདཱནི ཨིམསྶ ཙིཏྟཾ སོམནསྶསཧགཏ’’ནྟི ཝཱ ‘‘དོམནསྶསཧགཏ’’ནྟི ཝཱ ‘‘ཨུཔེཀྑཱསཧགཏ’’ནྟི ཝཱ ནཡགྒཱཧཝསེནཔི ཝཝཏྠཔེཏྭཱ པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ‘‘ཨིམསྶ ཙིཏྟཾ ཛཱནཱམཱི’’ཏི པརིཀམྨཾ ཀཱཏབྦཾ. ཀཱལསཏམྤི ཀཱལསཧསྶམྤི པུནཔྤུནཾ པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ཏཐེཝ པཊིཔཛྫིཏབྦཾ. ཏསྶེཝཾ དིབྦཙཀྑུནཱ ཧདཡལོཧིཏཝཎྞདསྶནཱདིཝིདྷིནཱ པཊིཔཛྫནྟསྶ ཨིདཱནི ཙེཏོཔརིཡཉཱཎཾ ཨུཔྤཛྫིསྶཏཱིཏི ཡཾ ཏདཱ པཝཏྟཏཱིཏི ཝཝཏྠཱཔིཏཾ ཙིཏྟཾ, ཏཾ ཨཱརམྨཎཾ ཀཏྭཱ མནོདྭཱརཱཝཛྫནཾ ཨུཔྤཛྫཏི, ཏསྨིཾ ནིརུདྡྷེ ཙཏྟཱརི, པཉྩ ཝཱ ཛཝནཱནི ཛཝནྟི. ཏེསཾ པུརིམཱནི ཏཱིཎི, ཙཏྟཱརི ཝཱ པརིཀམྨཱདིསམཉྙཱནི ཀཱམཱཝཙརཱནི, ཙཏུཏྠཾ, པཉྩམཾ ཝཱ ཨཔྤནཱཙིཏྟཾ རཱུཔཱཝཙརཙཏུཏྠཛ྄ཛྷཱནིཀཾ. ཏཏྠ ཡཾ ཨནྟེན ཨཔྤནཱཙིཏྟེན སདྡྷིཾ ཨུཔྤནྣཾ ཉཱཎཾ, ཨིདཾ ཙེཏོཔརིཡཉཱཎཾ. ཏཉྷི ཡཏྠཱནེན པརིཀམྨཾ ཀཏཾ, ཏཾ པརསྶ ཙིཏྟཾ པཙྩཀྑཏོ པཊིཝིཛ྄ཛྷནྟཾ ཝིབྷཱཝེནྟམེཝ ཧུཏྭཱ ¶ པཝཏྟཏི རཱུཔཾ ཝིཡ ཙ དིབྦཙཀྑུཉཱཎཾ, སདྡཾ ཝིཡ ཙ དིབྦསོཏཉཱཎཾ. ཏཏོ པརཾ པན ཀཱམཱཝཙརཙིཏྟེཧི སརཱགཱདིཝཝཏྠཱཔནཾ ཧོཏི ནཱིལཱདིཝཝཏྠཱཔནཾ ཝིཡ. ཨེཝམདྷིགཏསྶ པན ཙེཏོཔརིཡཉཱཎསྶ ཐཱམགམནཝིདྷཱནམྤི ཨདྷིགམནཝིདྷཱནསདིསམེཝཱཏི ཏཾ དསྶེཏུཾ ‘‘ཏསྨཱ ཏེན…པེ… ཐཱམགཏཾ ཀཱཏབྦ’’ནྟི ཝུཏྟཾ.

ཨེཝཾ ཐཱམགཏེ ཧཱིཏིཨཱདི ཐཱམགཏཱནིསཾསདསྶནཾ. སབྦམྤི ཀཱམཱཝཙརཙིཏྟནྟི ཙཏུཔཎྞཱསཝིདྷམྤི ཀཱམཱཝཙརཙིཏྟཾ. ‘‘སབྦམྤཱི’’ཏི པདཾ ‘‘རཱུཔཱཝཙརཱརཱུཔཱཝཙརཙིཏྟ’’ནྟི ཨེཏྠཱཔི ཨཱནེཏྭཱ སམྦནྡྷིཏབྦཾ. ཏེན པཉྩདསཝིདྷམྤི རཱུཔཱཝཙརཙིཏྟཾ, དྭཱདསཝིདྷམྤི ཨརཱུཔཱཝཙརཙིཏྟནྟི ཝུཏྟཾ ཧོཏི. པཛཱནཱཏཱིཏི སརཱགཱདིཔཀཱརེཧི ཛཱནཱཏི, པཙྩཀྑཏོ པཊིཝིཛ྄ཛྷཏཱིཏི ཨདྷིཔྤཱཡོ. པུཐུཛྫནཝསེནཱཡཾ ཨབྷིཉྙཱཀཐཱཏི ལོཀུཏྟརཾ ཙིཏྟཾ ཨིདྷ ཨནུདྡྷཊཾ. ཏམྤི ¶ ཧི ཨུཔརིམོ, སདིསོ ཝཱ ཨརིཡོ ཧེཊྛིམསྶ, སདིསསྶ ཙ ཙིཏྟམྤི པཛཱནཱཏི ཨེཝ. ཏེནཱཧ ‘‘ཨནུཏྟརཾ ཝཱ ཙིཏྟ’’ནྟིཨཱདི. སངྐམནྟོཏི ཉཱཎེན ཨུཔསངྐམནྟོ. ཨེཀཙྩཉྷི ཙིཏྟཾ ཉཏྭཱ པརིཀམྨེན ཝིནཱ ཏདཉྙཾ ཙིཏྟཾ ཛཱནནྟོ ‘‘ཙིཏྟཱ ཙིཏྟཾ སངྐམནྟོ’’ཏི ཝུཏྟོ. ཏེནཱཧ ‘‘ཝིནཱཔི ཧདཡརཱུཔདསྶནེནཱ’’ཏི. ཧདཡརཱུཔདསྶནཱདིཝིདྷཱནཾ ཧི ཨཱདིཀམྨིཀཝསེན ཝུཏྟཾ. ཏེནཱཧ ‘‘ཝུཏྟམྤི ཙེཏ’’ནྟིཨཱདི. ཡཏྠ ཀཏྠཙཱིཏི པཉྩཝོཀཱརབྷཝེ, ཙཏུཝོཀཱརབྷཝེཔི ཝཱ. ན ཀཏོ ཨབྷིཉྙཱནུཡོགསངྑཱཏོ ཨབྷིནིཝེསོ ཨེཏེནཱཏི ཨཀཏཱབྷིནིཝེསོ, ཏསྶ, ཨཱདིཀམྨིཀསྶཱཏི ཨཏྠོ. ཨཡཾ ཀཐཱཏི ‘‘ཨཱལོཀཾ ཝཌྜྷེཏྭཱ’’ཏིཨཱདིནཱ ཝུཏྟཔརིཀམྨཀཐཱ.

ཨཝསེསནྟི ཝུཏྟཱཝསེསཾ. ཨེཝཾ ཨཝིབྷཱགེན ཝུཏྟཾ ཝིབྷཱགཏོ དསྶེཏུཾ ‘‘ཙཏུབྷཱུམཀཾ ཀུསལཱབྱཱཀཏཾ ཙིཏྟཾ ཝཱིཏརཱག’’ནྟི ཨཱཧ. ཏཉྷི ཡོནིསོམནསིཀཱརཔྤཙྩཡཏཾཧེཏུཀཏཱཧི རཱགེན སམྤཡོགཱསངྐཱབྷཱཝཏོ ‘‘ཝཱིཏརཱག’’ནྟི ཝཏྟབྦཏཾ ལབྷཏི. སེསཱཀུསལཙིཏྟཱནཾ རཱགེན སམྤཡོགཱབྷཱཝཏོ ནཏྠེཝ སརཱགཏཱ, ཏཾནིམིཏྟཀཏཱཡ པན སིཡཱ ཏཾསཧིཏཏཱལེསོཏི ནཏྠེཝ ཝཱིཏརཱགཏཱཔཱིཏི དུཀཝིནིམུཏྟཏཱཝ ཡུཏྟཱཏི ཝུཏྟཾ ‘‘ཨིམསྨིཾ དུཀེ སངྒཧཾ ན གཙྪནྟཱི’’ཏི. ཡདི ཨེཝཾ པདེསིཀཾ ཙེཏོཔརིཡཉཱཎཾ ཨཱཔཛྫཏཱིཏི? ནཱཔཛྫཏི, དུཀནྟརཔརིཡཱཔནྣཏྟཱ ཏེསཾ. ཡེ པན ‘‘པཊིཔཀྑབྷཱཝེ ཨསཏིཔི སམྤཡོགཱབྷཱཝོ ཨེཝེཏྠ པམཱཎཾ ཨེཀཙྩཨབྱཱཀཏཱནཾ ཝིཡཱ’’ཏི སེསཱཀུསལཙིཏྟཱནམྤི ཝཱིཏརཱགཏཾ པཊིཛཱནནྟི ¶ , ཏེ སནྡྷཱཡཱཧ ‘‘ཀེཙི པན ཐེརཱ ཏཱནིཔི སངྒཎྷནྟཱི’’ཏི. སདོསདུཀེཔི ཨིམིནཱཝ ནཡེན ཨཏྠོ ཝེདིཏབྦོ.

པཱཊིཔུགྒལིཀནཡེནཱཏི ཨཱཝེཎིཀནཡེན, ཏདཉྙཱཀུསལཙིཏྟེསུ ཝིཡ ལོབྷདོསེཧི ཨམིསྶིཏསྶ མོཧསྶེཝ སབྦྷཱཝཏོཏི ཨཏྠོ. ཨཀུསལམཱུལསངྑཱཏེསུ སཧ མོཧེནེཝཱཏི སམོཧཾ པཋམནཡེ, དུཏིཡནཡེ པན སཧེཝ མོཧེནཱཏི སམོཧནྟི ཨེཝཾ ཨུཏྟརཔུརིམཔདཱཝདྷཱརཎཏོ དྭཱིསུ ནཡེསུ བྷེདོ ཝེདིཏབྦོ. ཨཏྟནཱ སམྤཡུཏྟཾ ཐིནམིདྡྷཾ ཨནུཝཏྟནཝསེན གཏཾ པཝཏྟཾ ཐིནམིདྡྷཱནུགཏཾ པཉྩཝིདྷཾ སསངྑཱརིཀཱཀུསལཙིཏྟཾ སཾཁིཏྟཾ, ཨཱརམྨཎེ སངྐོཙནཝསེན པཝཏྟནཏོ. ཝུཏྟནཡེན ཨུདྡྷཙྩཱནུགཏཾ ཝེདིཏབྦཾ, ཏཾ པན ཨུདྡྷཙྩསཧགཏཾ ཙིཏྟཾ, ཡཏྠ ཝཱ ཨུདྡྷཙྩཾ པཙྩཡཝིསེསེན ཐཱམཛཱཏཾ ཧུཏྭཱ པཝཏྟཏི. ཀིལེསཝིཀྑམྦྷནསམཏྠཏཱཡ, ཝིཔུལཕལཏཱཡ, དཱིགྷསནྟཱནཏཱཡ ཙ མཧནྟབྷཱཝཾ གཏཾ, མཧནྟེཧི ཝཱ ཨུལཱ༹རཙྪནྡཝཱིརིཡཙིཏྟཔཉྙེཧི གཏཾ པཊིཔནྣནྟི མཧགྒཏཾ. ཨཝསེསནྟི པརིཏྟཨཔྤམཱཎཾ. ཨཏྟཱནཾ ཨུཏྟརིཏུཾ སམཏྠེཧི སཧ ཨུཏྟརེཧཱིཏི སཨུཏྟརཾ. ཨུཏྟིཎྞནྟི ཨུཏྟརཾ, ལོཀེ ཨཔརིཡཱཔནྣབྷཱཝེན ལོཀཏོ ཨུཏྟརནྟི ལོཀུཏྟརཾ. ཏཏོ ཨེཝ ནཏྠི ¶ ཨེཏསྶ ཨུཏྟརནྟི ཨནུཏྟརཾ. ཨུཔནིཛ྄ཛྷཱནལཀྑཎཔྤཏྟེན སམཱདྷིནཱ སམྨདེཝ ཨཱཧིཏནྟི སམཱཧིཏཾ. ཏདངྒཝིམུཏྟིཔྤཏྟཾ ཀཱམཱཝཙརཀུསལཙིཏྟཾ. ཝིཀྑམྦྷནཝིམུཏྟིཔྤཏྟཾ མཧགྒཏཙིཏྟཾ. སམུཙྪེདཝིམུཏྟིཔྤཏྟཾ མགྒཙིཏྟཾ. པཊིཔྤསྶདྡྷིཝིམུཏྟིཔྤཏྟཾ ཕལཙིཏྟཾ. ནིསྶརཎཝིམུཏྟིཔྤཏྟམྤི ཏདུབྷཡམེཝ. ཀཱམཾ ཀཱནིཙི པཙྩཝེཀྑཎཙིཏྟཱདཱིནི ནིབྦཱནཱརམྨཎཱནི ཧོནྟི, ནིསྶརཎཝིམུཏྟིཔྤཏྟཱནི པན ན ཧོནྟི ཏཱདིསཀིཙྩཱཡོགཏོ. པཱལི༹ཡཾ ཨཱགཏསརཱགཱདིབྷེདཝསེན ཙེཝ ཏེསཾ ཨནྟརབྷེདཝསེན ཙ སབྦཔྤཀཱརམྤི.

ཙེཏོཔརིཡཉཱཎཀཐཱཝཎྞནཱ ནིཊྛིཏཱ.

པུབྦེནིཝཱསཱནུསྶཏིཉཱཎཀཐཱཝཎྞནཱ

༤༠༢. པུབྦེནིཝཱསཾ ཨནུསྶརཏི, ཏསྶ ཝཱ ཨནུསྶརཎཾ པུབྦེནིཝཱསཱནུསྶཏི, ཏཾ ནིསྶཡཱདིཔཙྩཡབྷཱུཏཾ པཊིཙྩ ཨུཔྤཛྫནཏོ ‘‘པུབྦེནིཝཱསཱནུསྶཏིམྷི ཡཾ ཉཱཎཾ, ཏདཏྠཱཡཱ’’ཏི སངྑེཔེན ཝུཏྟམཏྠཾ ཝིཝརནྟོ ¶ པུབྦེནིཝཱསཾ ཏཱཝ དསྶེཏྭཱ ཏཏྠ སཏིཉཱཎཱནི དསྶེཏུཾ ‘‘པུབྦེནིཝཱསོ’’ཏིཨཱདིམཱཧ. ཏཏྠ ‘‘པུབྦེ’’ཏི ཨིདཾ པདཾ ‘‘ཨེཀམྤི ཛཱཏི’’ནྟིཨཱདིཝཙནཏོ ཨཏཱིཏབྷཝཝིསཡཾ ཨིདྷཱདྷིཔྤེཏནྟི ཨཱཧ ‘‘ཨཏཱིཏཛཱཏཱིསཱུ’’ཏི ནིཝཱས-སདྡོ ཀམྨསཱདྷནོ, ཁནྡྷཝིནིམུཏྟོ ཙ ནིཝསིཏདྷམྨོ ནཏྠཱིཏི ཨཱཧ ‘‘ནིཝུཏྠཀྑནྡྷཱ’’ཏི. ནིཝུཏྠཏཱ ཙེཏྠ སསནྟཱནེ པཝཏྟཏཱ, ཏཐཱབྷཱུཏཱ ཙ ཏེ ཨནུ ཨནུ བྷཱུཏཱ ཛཱཏཱ པཝཏྟཱ ཏཏྠ ཨུཔྤཛྫིཏྭཱ ཝིགཏཱཝ ཧོནྟཱིཏི ཨཱཧ ‘‘ནིཝུཏྠཱཏི ཨཛ྄ཛྷཱཝུཏྠཱ ཨནུབྷཱུཏཱ ཨཏྟནོ སནྟཱནེ ཨུཔྤཛྫིཏྭཱ ནིརུདྡྷཱ’’ཏི. ཨེཝཾ སསནྟཏིཔརིཡཱཔནྣདྷམྨཝསེན ནིཝཱས-སདྡསྶ ཨཏྠཾ ཝཏྭཱ ཨིདཱནི ཨཝིསེསེན ཝཏྟུཾ ‘‘ནིཝུཏྠདྷམྨཱ ཝཱ ནིཝུཏྠཱ’’ཏི ཝཏྭཱ ཏཾ ཝིཝརིཏུཾ ‘‘གོཙརནིཝཱསེནཱ’’ཏིཨཱདི ཝུཏྟཾ. གོཙརབྷཱུཏཱཔི ཧི གོཙརཱསེཝནཱཡ ཨཱསེཝིཏཱ ཨཱརམྨཎཀརཎཝསེན ཨནུབྷཱུཏཱ ནིཝུཏྠཱ ནཱམ ཧོནྟཱིཏི. ཏེ པན དུཝིདྷཱ སཔརཝིཉྙཱཎགོཙརཏཱཡཱཏི ཨུབྷཡེཔི ཏེ དསྶེཏུཾ ‘‘ཨཏྟནོ’’ཏིཨཱདི ཝུཏྟཾ.

ཏཏྠ ‘‘ཨཏྟནོ ཝིཉྙཱཎེན ཝིཉྙཱཏཱ’’ཏི ཝཏྭཱ ‘‘པརིཙྪིནྣཱ’’ཏི ཝཙནཾ ཡེ ཏེ གོཙརནིཝཱསེན ནིཝུཏྠདྷམྨཱ, ཏེ ན ཀེཝལཾ ཝིཉྙཱཎེན ཝིཉྙཱཎམཏྟཱ, ཨཐ ཁོ ཡཐཱ པུབྦེ ཛཱཏིནཱམགོཏྟཝཎྞལིངྒཱཧཱརཱདིཝིསེསེཧི པརིཙྪེདཀཱརིཀཱཡ པཉྙཱཡ པརིཙྪིཛྫ གཧིཏཱ, ཏཐེཝེཏཾ ¶ ཉཱཎཾ པརིཙྪིཛྫ གཎྷཱཏཱིཏི ཨིམསྶ ཨཏྠསྶ དཱིཔནཏྠཾ ཝུཏྟཾ. པརཝིཉྙཱཎཝིཉྙཱཏཱཔི ཝཱ ནིཝུཏྠཱཏི སམྦནྡྷོ. ན ཀེཝལཾ ཨཏྟནོཝ ཝིཉྙཱཎེན, ཨཐ ཁོ པརེསཾ ཝིཉྙཱཎེན ཝིཉྙཱཏཱཔི ཝཱཏི ཨཏྠོ. ཨིདྷཱཔི ‘‘པརིཙྪིནྣཱ’’ཏི པདཾ ཨཱནེཏྭཱ སམྦནྡྷིཏབྦཾ ‘‘པརེསམྤི ཝཱ ཝིཉྙཱཎེན ཝིཉྙཱཏཱ པརིཙྪིནྣཱ’’ཏི. ཏསྶ ཙ གཧཎེ པཡོཛནཾ ཝུཏྟནཡེནེཝ ཝཏྟབྦཾ. ཏེ ཙ ཁོ ཡསྨཱ ཨབྷཱིཏཱསུ ཨེཝ ཛཱཏཱིསུ ཨཉྙེཧི ཝིཉྙཱཏཱ པརིཙྪིནྣཱ, ཏེ ཙ པརིནིབྦུཏཱཔི ཧོནྟི. ཡེ ཧི ཏེ ཝིཉྙཱཏཱ, ཏེསཾ ཏདཱ ཝཏྟམཱནསནྟཱནཱནུསཱརེན ཏེསམྤི ཨཏཱིཏེ པཝཏྟི ཉཱཡཏཱིཏི སིཁཱཔྤཏྟཾ པུབྦེནིཝཱསཱནུསྶཏིཉཱཎསྶ ཝིསཡབྷཱུཏཾ པུབྦེནིཝཱསཾ དསྶེཏུཾ ‘‘ཚིནྣཝཊུམཀཱནུསྶརཎཱདཱིསཱུ’’ཏི ཝུཏྟཾ. ཚིནྣཝཊུམཀཱ སམྨཱསམྦུདྡྷཱ, ཏེསཾ ཨནུསྶརཎཱ ཚིནྣཝཊུམཀཱནུསྶརཎཾ. ཨཱདི-སདྡེན པཙྩེཀསམྦུདྡྷབུདྡྷསཱཝཀཱནུསྶརཎཱནི གཡ྄ཧནྟཱིཏི ཝདནྟི. ཚིནྣཝཊུམཀཱ པན སབྦེཝ ཨནུཔཱདིསེསཱཡ ནིབྦཱནདྷཱཏུཡཱ ¶ པརིནིབྦུཏཱ. ཏེསཾ ཨནུསྶརཎཾ ནཱམ ཏེསཾ པཊིཔཏྟིཡཱ ཨནུསྶརཎཾ, སཱ པན པཊིཔཏྟི སངྑེཔཏོ ཚལཱ༹རམྨཎགྒཧཎལཀྑཎཱཏི ཏཱནི ཨིདྷ པརཝིཉྙཱཎཝིཉྙཱཏགྒཧཎེན གཧིཏཱནི, ཏེ པནེཏེ སམྨཱསམྦུདྡྷཱནཾཡེཝ ཝིསཡཱ, ན ཨཉྙེསནྟི ཨཱཧ ‘‘ཏེ བུདྡྷཱནཾཡེཝ ལབྦྷནྟཱི’’ཏི. ན ཧི ཨཏཱིཏེ བུདྡྷཱ བྷགཝནྟོ ཨེཝཾ ཝིཔསྶིཾསུ, ཨེཝཾ མགྒཾ བྷཱཝེསུཾ, ཨེཝཾ ཕལནིབྦཱནཱནི སཙྪཱཀཾསུ, ཨེཝཾ ཝེནེཡྻེ ཝིནེསུནྟི ཨེཏྠ སབྦདཱ ཨཉྙེསཾ ཉཱཎསྶ གཏི ཨཏྠཱིཏི. ཡཱཡ སཏིཡཱ པུབྦེནིཝཱསཾ ཨནུསྶརཏི, སཱ པུབྦེནིཝཱསཱནུསྶཏཱིཏི ཨཱནེཏྭཱ སམྦནྡྷིཏབྦཾ.

ཨནེཀཝིདྷནྟི ནཱནཱབྷཝཡོནིགཏིཝིཉྙཱཎཊྛིཏིསཏྟཱཝཱསཱདིཝསེན བཧུཝིདྷཾ. པཀཱརེཧཱིཏི ནཱམགོཏྟཱདིཨཱཀཱརེཧི སདྡྷིཾ, སཧཡོགེ ཙེཏཾ ཀརཎཝཙནཾ. པཝཏྟིཏཾ དེསནཱཝསེན. ཏེནཱཧ ‘‘སཾཝཎྞིཏ’’ནྟི, ཝིཏྠཱརིཏནྟི ཨཏྠོ. ‘‘ནིཝཱས’’ནྟི ཨནྟོགདྷབྷེདསཱམཉྙཝཙནམེཏནྟི ཏེ བྷེདེ བྱཱཔནིཙྪཱཝསེན སངྒཧེཏྭཱ དསྶེནྟོ ‘‘ཏཏྠ ཏཏྠ ནིཝུཏྠསནྟཱན’’ནྟི ཨཱཧ. སཱཝཀསྶེཝེཏཾ ཨནུསྶརཎཾ, ན སཏྠུནོཏི ཝུཏྟཾ ‘‘ཁནྡྷཔཊིཔཱཊིཝསེན ཙུཏིཔཊིསནྡྷིཝསེན ཝཱ’’ཏི. ཁནྡྷཔཊིཔཱཊི ཁནྡྷཱནཾ ཨནུཀྐམོ. སཱ ཙ ཁོ ཙུཏིཏོ པཊྛཱཡ ཨུཔྤཊིཔཱཊིཝསེན. ཀེཙི པནེཏྠ ‘‘ཨིརིཡཱཔཐཔཊིཔཱཊི ཁནྡྷཔཊིཔཱཊཱི’’ཏི ཝདནྟི. ཨནུགནྟྭཱ ཨནུགནྟྭཱཏི ཉཱཎགཏིཡཱ ཨནུགནྟྭཱ ཨནུགནྟྭཱ. ཏིཏྠིཡཱཏི ཨཉྙཏིཏྠིཡཱ, ཏེ པན ཀམྨཝཱདིནོ ཀིརིཡཝཱདིནོ ཏཱཔསཱདཡོ. ཋཔེཏྭཱ ཨགྒསཱཝཀམཧཱསཱཝཀེ ཨིཏརེ སཏྠུ སཱཝཀཱ པཀཏིསཱཝཀཱ.

ཡསྨཱ ཏིཏྠིཡཱནཾ བྲཧྨཛཱལཱདཱིསུ ཙཏྟཱལཱིསཱཡ ཨེཝ སཾཝཊྚཝིཝཊྚཱནཾ ཨནུསྶརཎཾ ཨཱགཏཾ, ཏསྨཱ ¶ ‘‘ན ཏཏོ པར’’ནྟི ཝཏྭཱ ཏཾ ཀཱརཎཾ ཝདནྟོ ‘‘དུབྦལཔཉྙཏྟཱ’’ཏིཨཱདིམཱཧ, ཏེན ཝིཔསྶནཱབྷིཡོགོ པུབྦེནིཝཱསཱནུསྶཏིཉཱཎསྶ ཝིསེསཀཱརཎནྟི དསྶེཏི. བལཝཔཉྙཏྟཱཏི ཨེཏྠ ནཱམརཱུཔཔརིཙྪེདཱདིཡེཝ པཉྙཱཡ བལཝཀཱརཎཾ དཊྛབྦཾ. ཏཉྷེཏྠ ནེསཾ སཱདྷཱརཎཀཱརཎཾ. ཨེཏྟཀོཏི ཀཔྤཱནཾ ལཀྑཾ, ཏདདྷིཀཾ ཨེཀཾ, དྭེ ཙ ཨསངྑྱེཡྻཱནཱིཏི ཀཱལཝསེན ཨེཝཾཔརིམཱཎོ ཡཐཱཀྐམཾ ཏེསཾ མཧཱསཱཝཀཨགྒསཱཝཀཔཙྩེཀབུདྡྷཱནཾ པུཉྙཉཱཎཱབྷིནཱིཧཱརོ སཱཝཀཔཙྩེཀབོདྷིཔཱརམིཏཱ སམིཏཱ. ཡདི བོདྷིསམྦྷཱརསམྦྷརཎཀཱལཔརིཙྪིནྣོ ཏེསཾ ཏེསཾ ཨརིཡཱནཾ ཨབྷིཉྙཱཉཱཎཝིབྷཱགོ, ཨེཝཾ སནྟེ ¶ བུདྡྷཱནམྤི ཝིསཡཔརིཙྪེདཏཱ ཨཱཔནྣཱཏི ཨཱཧ ‘‘བུདྡྷཱནཾ པན པརིཙྪེདོ ནཱམ ནཏྠཱི’’ཏི. ‘‘ཡཱཝཏཀཾ ཉེཡྻཾ, ཏཱཝཏཀཾ ཉཱཎ’’ནྟི (མཧཱནི. ༡༥༦; ཙཱུལ༹ནི. མོགྷརཱཛམཱཎཝཔུཙྪཱནིདྡེས ༨༥; པཊི. མ. ༣.༥) ཝཙནཏོ སབྦཉྙུཏཉྙཱཎསྶ ཝིཡ བུདྡྷཱནཾ ཨབྷིཉྙཱཉཱཎཱནམྤི ཝིསཡེ པརིཙྪེདོ ནཱམ ནཏྠི. ཏཏྠ ཡཾ ཡཾ ཉཱཏུཾ ཨིཙྪནྟི, ཏཾ ཏཾ ཛཱནནྟི ཨེཝ. ཨཐ ཝཱ སཏིཔི ཀཱལཔརིཙྪེདེ ཀཱརཎཱུཔཱཡཀོསལླཔརིགྒཧཱདིནཱ སཱཏིསཡཏྟཱ མཧཱབོདྷིསམྦྷཱརཱནཾ པཉྙཱཔཱརམིཏཱཡ པཝཏྟིཨཱནུབྷཱཝསྶ པརིཙྪེདོ ནཱམ ནཏྠི, ཀུཏོ ཏནྣིབྦཏྟཱནཾ ཨབྷིཉྙཱཉཱཎཱནནྟི ཨཱཧ ‘‘བུདྡྷཱནཾ པན པརིཙྪེདོ ནཱམ ནཏྠཱི’’ཏི. ཨཏཱིཏེ ཨེཏྟཀཱནི ཀཔྤཱནཾ ཨསངྑྱེཡྻཱནཱིཏི ཨེཝཾ ཀཱལཔརིཙྪེདོ ནཱམ ནཏྠི, ཨནཱགཏེ ཨནཱགཏཾསཉཱཎསྶ ཝིཡ.

ཨེཝཾ ཚནྣཾ ཛནཱནཾ པུབྦེནིཝཱསཱནུསྶརཎཾ ཀཱལཝིབྷཱགཏོ དསྶེཏྭཱ ཨིདཱནི ཨཱརམྨཎགྒཧཎཏོ ཨཱནུབྷཱཝཝིསེསཏོ, པཝཏྟིཨཱཀཱརཏོ ཙ དསྶེཏུཾ ‘‘ཏིཏྠིཡཱ ཙཱ’’ཏིཨཱདི ཝུཏྟཾ. ཙུཏིཔཊིསནྡྷིཝསེནཱཏི ཨཏྟནོ, པརསྶ ཝཱ ཏསྨིཾ ཏསྨིཾ ཨཏྟབྷཱཝེ ཙུཏིཾ དིསྭཱ ཨནྟརཱ ཀིཉྩི ཨནཱམསིཏྭཱ པཊིསནྡྷིཡཱ ཨེཝ གཧཎཝསེན. ཝུཏྟམེཝཏྠཾ བྱཏིརེཀཏོ, ཨནྭཡཏོ ཙ ཝིབྷཱཝེཏུཾ ‘‘ཏེསཉྷཱི’’ཏིཨཱདི ཝུཏྟཾ. པཀཏིསཱཝཀཱ ཙུཏིཔཊིསནྡྷིཝསེནཔི སངྐམནྟཱིཏི ཨཡམཏྠོ ཧེཊྛཱ ཝུཏྟནཡེན ‘‘བལཝཔཉྙཏྟཱ’’ཏི ཧེཏུནཱ ཝིབྷཱཝེཏབྦོ, ཙུཏིཔཊིསནྡྷིཝསེན སངྐམནཾ ཝེམཛ྄ཛྷདསྶནེ པཡོཛནཱབྷཱཝཏོ. ཉཱཎབལདསྶནཏྠཾ པནེཏྠ ཝུཏྟཾ.

ཏཾ ཏཾ པཱཀཊམེཝཱཏི ཡཐཱ ནཱམ སརདསམཡེ ཋིཏམཛ྄ཛྷནྷིཀཝེལཱཡཾ ཙཏུརཏནིཀེ གེཧེ ཙཀྑུམཏོ པུརིསསྶ རཱུཔགཏཾ སུཔཱཀཊམེཝ ཧོཏཱིཏི ལོཀསིདྡྷམེཏཾ, སིཡཱ པན ཏསྶ སུཁུམཏརཏིརོཧིཏཱདིབྷེདསྶ རཱུཔགཏསྶ ཨགོཙརཏཱ. ནཏྠེཝ བུདྡྷཱནཾ ཉཱཏུཾ ཨིཙྪིཏསྶ ཉེཡྻསྶ ཨགོཙརཏཱ, ཨཐ ཁོ ཏཾ ཉཱཎཱལོཀེན ཨོབྷཱསིཏཾ ཧཏྠཏལེ ཨཱམལཀཾ ཝིཡ སུཔཱཀཊཾ སུཝིབྷཱུཏམེཝ ¶ ཧོཏི ཏཐཱ ཉེཡྻཱཝརཎསྶ སུཔཧཱིནཏྟཱ. པེཡྻཱལཔཱལི༹ཾ ཝིཡ སངྑིཔིཏྭཱཏི ཡཐཱ པེཡྻཱལཔཱལི༹ཾ པཋནྟཱ ‘‘པཋམཾ ཛྷཱནཾ…པེ… པཉྩམཾ ཛྷཱན’’ནྟི ཨཱདིཔརིཡོསཱནམེཝ གཎྷནྟཱ སངྑིཔིཏྭཱ སཛ྄ཛྷཱཡནྟི, ན ཨནུཔདཾ, ཨེཝཾ ཨནེཀཱཔི ཀཔྤཀོཊིཡོ སངྑིཔིཏྭཱ. ཡཾ ཡཾ ཨིཙྪནྟཱིཏི ཡསྨིཾ ཀཔྤེ, ཡསྨིཾ བྷཝེ ཡཾ ¶ ཡཾ ཛཱནིཏུཾ ཨིཙྪནྟི, ཏཏྠ ཏཏྠེཝ ཉཱཏུཾ ཨིཙྪིཏེ ཨེཝ ཉཱཎེན ཨོཀྐམནྟཱ. སཱིཧོཀྐནྟཝསེན སཱིཧགཏིཔཏནཝསེན ཉཱཎགཏིཡཱ གཙྪནྟི. སཏདྷཱ བྷིནྣསྶ ཝཱལ༹སྶ ཀོཊིཡཱ ཀོཊིཔཊིཔཱདནཝསེན ཀཏཝཱལཝེདྷཔརིཙཡསྶ. སརབྷངྒསདིསསྶཱཏི སརབྷངྒབོདྷིསཏྟསདིསསྶ (ཛཱ. ༢.༡༧.༥༠ ཨཱདཡོ). ལཀྑཊྛཱནསྶ ཨཔྤཏྟཝསེན ན སཛྫཏི. ཨཏིཀྐམནཔསྶགམནཝསེན ན ཝིརཛ྄ཛྷཏི.

ཁཛྫུཔནཀཔྤབྷཱསདིསཾ ཧུཏྭཱ ཨུཔཊྛཱཏཱིཏི ཉཱཎསྶ ཨཏིཝིཡ ཨཔྤཱནུབྷཱཝཏཱཡ ཁཛྫོཏོབྷཱསསམཾ ཧུཏྭཱ པུབྦེནིཝཱསཱནུསྶཏིཉཱཎཾ ཨུཔཊྛཱཏི. ཨེས ནཡོ སེསེསུཔི. དཱིཔཔྤབྷཱསདིསནྟི པཱཀཏིཀདཱིཔཱལོཀསདིསཾ. ཨུཀྐཱཔབྷཱ མཧཱཨུམྨུཀཱལོཀོ. ཨོསདྷིཏཱརཀཔྤབྷཱཏི ཨུསྶནྣཱ པབྷཱ ཨེཏཱཡ དྷཱིཡཏཱིཏི ཨོསདྷི, ཨོསདྷཱིནཾ ཝཱ ཨནུབལཔྤདཱཡིཀཏྟཱ ཨོསདྷཱིཏི ཨེཝཾ ལདྡྷནཱམཱཡ ཏཱརཀཱཡ པབྷཱ. སརདསཱུརིཡམཎྜལསདིསཾ སཝིསཡེ སབྦསོ ཨནྡྷཀཱརཝིདྷམནཏོ.

ཡཊྛིཀོཊིགམནཾ ཝིཡ ཁནྡྷཔཊིཔཱཊིཡཱ ཨམུཉྩནཏོ. ཀུནྣདཱིནཾ ཨཏིཀྐམནཱཡ ཨེཀེནེཝ རུཀྑདཎྜེན ཀཏསངྐམོ དཎྜཀསེཏུ. ཙཏཱུཧི, པཉྩཧི ཝཱ ཛནེཧི གནྟུཾ སཀྐུཎེཡྻོ ཕལཀེ ཨཏྠརིཏྭཱ ཨཱཎིཡོ ཀོཊྚེཏྭཱ ཀཏསངྐམོ ཛངྒྷསེཏུ. ཛངྒྷསཏྠསྶ གམནཡོགྒོ སངྐམོ ཛངྒྷསེཏུ ཛངྒྷམགྒོ ཝིཡ. སཀཊསྶ གམནཡོགྒོ སངྐམོ སཀཊསེཏུ སཀཊམགྒོ ཝིཡ. མཧཏཱ ཛངྒྷསཏྠེན གནྟབྦམགྒོ མཧཱཛངྒྷམགྒོ. བཧཱུཧི ཝཱིསཱཡ ཝཱ ཏིཾསཱཡ ཝཱ སཀཊེཧི ཨེཀཛ྄ཛྷཾ གནྟབྦམགྒོ མཧཱསཀཊམགྒོ.

ཨིམསྨིཾ པན ཨདྷིཀཱརེཏི ‘‘ཙིཏྟཾ པཉྙཉྩ བྷཱཝཡ’’ནྟི (སཾ. ནི. ༡.༢༣, ༡༩༢; པེཊཀོ. ༢༢; མི. པ. ༢.༡.༩) ཙིཏྟསཱིསེན སཱཝཀསྶ ནིདྡིཊྛསམཱདྷིབྷཱཝནཱདྷིཀཱརེ.

༤༠༣. ཏསྨཱཏི ཡསྨཱ སཱཝཀཱནཾ པུབྦེནིཝཱསཱནུསྶརཎཾ ཨིདྷཱདྷིཔྤེཏཾ, ཏསྨཱ. ཨེཝནྟི ཡཐཱ ཏེ ཨནུསྶརནྟི, ཨེཝཾ ཨནུསྶརིཏུཀཱམེན. ཧེཊྛཱ ཏཱིསུ ཛྷཱནེསུ ཡཐཱརཧཾ པཱིཏིསུཁེཧི ཀཱཡཙིཏྟཱནཾ ¶ སམྤཱིནནཱཡ ‘‘ཙཏྟཱརི ཛྷཱནཱནི སམཱཔཛྫིཏྭཱ’’ཏི ཝུཏྟཾ, ཨཉྙཐཱ པཱདཀཛ྄ཛྷཱནམེཝ སམཱཔཛྫིཏབྦཾ སིཡཱ. ཡཱཡ ནིསཛྫཱཡ ནིསིནྣསྶ ཨནུསྶརཎཱརམྦྷོ, སཱ ཨིདྷ སབྦཔཙྪིམཱ ནིསཛྫཱ. ཏཏོ ཨཱསནཔཉྙཱཔནནྟི ཏཏོ ནིསཛྫཱཡ པུརིམཀཾ ཨཱསནཔཉྙཱཔནཾ ཨཱཝཛྫིཏབྦནྟི སམྦནྡྷོ. ཨེས ནཡོ སེསེསུཔི ¶ . བྷོཛནཀཱལོཏིཨཱདཱིསུ ཀཱལསཱིསེན ཏསྨིཾ ཏསྨིཾ ཀཱལེ ཀཏཀིཙྩམཱཧ. ཙེཏིཡངྒཎབོདྷིཡངྒཎཝནྡནཀཱལོཏི ཙེཏིཡངྒཎབོདྷིཡངྒཎེསུ ཙེཏིཡབོདྷཱིནཾ ཝནྡནཀཱལོ. སཀལཾ རཏྟིནྡིཝནྟི ཨཙྩནྟསཾཡོགེ ཨུཔཡོགཝཙནཾ.

ཀིཉྩི ཀིཙྩཾ. ཨེཏྟཀེནཱཏི པཱདཀཛ྄ཛྷཱནསམཱཔཛྫནེན. པཱདཀཛ྄ཛྷཱནཉྷི སཏྠཀསྶ ཝིཡ ནིསཱནསིལཱ སཏིཔཉྙཱནམྤི ནིསིཏབྷཱཝཱཝཧཾ. ཡཾ ཏསྶ, ཏཱ ཏཾ སམཱཔཛྫནེན པརམནེཔཀྐཔྤཏྟཱ ཧོནྟི. ཏེནཱཧ ‘‘དཱིཔེ ཛལིཏེ ཝིཡ པཱཀཊཾ ཧོཏཱི’’ཏི, ཨནྡྷཀཱརཊྛཱནེཏི ཨདྷིཔྤཱཡོ. པུརིམབྷཝེཏི ཨིམསྶ བྷཝསྶ ཨནནྟརེ པུརིམསྨིཾ བྷཝེ. པཝཏྟིཏནཱམརཱུཔནྟི ཨཏྟནོ པཙྩཡེཧི པཝཏྟིཏནཱམརཱུཔཾ. ཏཉྩ ཁོ པཋམཾ རཱུཔཾ ཨཱཝཛྫིཏྭཱ ནཱམཾ ཨཱཝཛྫིཏབྦཾ. པཋམཾ ནཱམཾ ཨཱཝཛྫིཏྭཱ པཙྪཱ རཱུཔནྟི ཨཔརེ. པཧོཏཱིཏི སཀྐོཏི. པཎྜིཏོ ནཱམ ཨིམིསྶཱ ཨབྷིཉྙཱབྷཱཝནཱཡ ཀཏཱདྷིཀཱརོ.

‘‘ཨཉྙཾ ཨུཔྤནྣ’’ནྟི ཨིདཾ ཨཉྙསྨཱ ཀམྨབྷཝཱ ཨཉྙོ ཨུཔཔཏྟིབྷཝོ ཨུཔྤནྣོཏི ཀཏྭཱ ཝུཏྟཾ ཨདྡྷཱཔཙྩུཔྤནྣནྟརབྷཱཝཏོ. ཨཉྙཐཱ ཨེཀབྷཝེཔི ཨཉྙམཉྙམེཝ ནཱམརཱུཔཾ ཨུཔྤཛྫཏི, ནིརུདྡྷཉྩ ཨཔྤཊིསནྡྷིཀཾ. ཏེནེཝཱཧ –

‘‘ཡེ ནིརུདྡྷཱ མརནྟསྶ, ཏིཊྛམཱནསྶ ཝཱ ཨིདྷ;

སབྦེཔི སདིསཱ ཁནྡྷཱ, གཏཱ ཨཔྤཊིསནྡྷིཀཱ’’ཏི. (མཧཱནི. ༣༩);

ཏཾ ཋཱནནྟི ཏཾ ནིཀྑེཔཊྛཱནཾ. ཨཱཧུནྡརིཀནྟི སམནྟཏོ, ཨུཔརི ཙ གྷནསཉྪནྣཾ སམྦཱདྷཊྛཱནཾ. ཨནྡྷཏམམིཝཱཏི ཨནྡྷཀཱརཏིམིསཱ ཝིཡ.

ཀཱུཊཱགཱརཀཎྞིཀཏྠཱཡཱཏི ཀཱུཊཱགཱརསྶ ཀཱུཊཏྠཱཡ. ཀཱུཊཱགཱརསྶ ཀཎྞིཀཱ ཝིཡ པུབྦེནིཝཱསཱནུསྶཏིཉཱཎཾ, མཧཱརུཀྑོ ཝིཡ པུརིམབྷཝེ ཙུཏིཀྑཎེ པཝཏྟནཱམརཱུཔཾ, སཱཁཱཔལཱསཱ ཝིཡ ཏེན སམྦནྡྷཾ ཨིམསྨིཾ བྷཝེ པཊིསནྡྷིཙིཏྟཾ, ཕརསུདྷཱརཱ ཝིཡ པརིཀམྨབྷཱཝནཱ ¶ , ཀམྨཱརསཱལཱ ཝིཡ པཱདཀཛ྄ཛྷཱནནྟི ཨེཝཾ ཨུཔམཱསཾསནྡནཾ ཝེདིཏབྦཾ. ཀཊྛཕཱལཀོཔམཱཔི ‘‘ཡཐཱ ནཱམ བལཝཱ པུརིསོ ཨོདནཔཙནཱདིཨཏྠཾ མཧནྟཾ དཱརུཾ ཕཱལེནྟོ ཏསྶ ཏཙཕེགྒུམཏྟཕཱལནེ ཕརསུདྷཱརཱཡ ཝིཔནྣཱཡ མཧནྟཾ དཱརུཾ ཕཱལེཏུཾ ཨསཀྐོནྟོ དྷུརནིཀྑེཔཾ ཨཀཏྭཱ’’ཏིཨཱདིནཱ ཝུཏྟནཡཱནུསཱརེན ཝེདིཏབྦཱ. ཏཐཱ ཀེསོཧཱརཀཱུཔམཱ.

པུབྦེནིཝཱསཉཱཎཾ ¶ ནཱམ ན ཧོཏི ཨཏཱིཏཱསུ ཛཱཏཱིསུ ནིཝུཏྠདྷམྨཱརམྨཎཏྟཱབྷཱཝཱ. ཏནྟི པཙྪིམནིསཛྫཏོ པབྷུཏི ཡཱཝ པཊིསནྡྷི པཝཏྟཾ ཉཱཎཾ པུབྦེནིཝཱསཱནུསྶཏིཉཱཎསྶ པརིཀམྨབྷཱཝེན པཝཏྟསམཱདྷིནཱ སམྤཡུཏྟཉཱཎཾ པརིཀམྨསམཱདྷིཉཱཎཾ. ཏཾ རཱུཔཱཝཙརཾ སནྡྷཱཡ ན ཡུཛྫཏཱིཏི ཏཾ ཏེསཾ ཝཙནཾ ཨཏཱིཏཾསཉཱཎཾ ཙེ, རཱུཔཱཝཙརཾ ཨདྷིཔྤེཏཾ ན ཡུཛྫཏི པརིཀམྨསམཱདྷིཉཱཎསྶ ཀཱམཱཝཙརབྷཱཝཏོ. ན ཧི ཨནནྟརཙུཏིཙིཏྟསྶ ཨོརཏོ པཝཏྟིཀྑནྡྷེ ཨཱརབྦྷ རཱུཔཱཝཙརཾ ཙིཏྟཾ ཨུཔྤཛྫཏཱིཏི པཱལི༹ཡཾ, ཨཊྛཀཐཱཡཾ ཝཱ ཨཱགཏཾ ཨཏྠི. ཡེསཾ ཛཝནཱནཾ པུརིམཱནཱིཏི ཡོཛནཱ. ཡདཱ པན ཨཔྤནཱཙིཏྟཾ ཧོཏི, ཏདཱསྶཱཏི སམྦནྡྷོ. ཨིདཾ པུབྦེནིཝཱསཱནུསྶཏིཉཱཎཾ ནཱམཱཏི ཀཱམཾ ཨནནྟརསྶ བྷཝསྶ ཙུཏིཀྑཎེ པཝཏྟིཏནཱམརཱུཔཾ ཨཱརམྨཎཾ ཀཏྭཱ པཝཏྟཉཱཎཾ དསྶིཏཾ, ཏཾ པན ནིདསྶནམཏྟཾ དཊྛབྦཾ ཉཱཎསཱམཉྙསྶ ཛོཏིཏབྷཱཝཏོ. ཡཐེཝ ཧི ཏཏོ ནཱམརཱུཔཏོ པབྷུཏི སབྦེ ཨཏཱིཏཱ ཁནྡྷཱ, ཁནྡྷཔཊིབདྡྷཱ ཙ སབྦོ པུབྦེནིཝཱསོ, ཨེཝཾ ཏསྶ པཊིཝིཛ྄ཛྷནཝསེན པཝཏྟཉཱཎཾ པུབྦེནིཝཱསཱནུསྶཏིཉཱཎཾ. ཏེནཱཧ ‘‘ཏེན ཉཱཎེན སམྤཡུཏྟཱཡ སཏིཡཱ ཨནེཀཝིཧིཏཾ པུབྦེནིཝཱསཾ ཨནུསྶརཏཱི’’ཏི.

༤༠༤. ཨེཀམྤི ཛཱཏིནྟི ཨེཀམྤི བྷཝཾ. སོ ཧི ཨེཀཀམྨནིབྦཏྟོ ཨཱདཱནནིཀྑེཔཔརིཙྪིནྣོ ཨནྟོགདྷདྷམྨཔྤབྷེདོ ཁནྡྷཔྤབནྡྷོ ཨིདྷ ཛཱཏཱིཏི ཨདྷིཔྤེཏོ. ཏེནཱཧ ‘‘ཨེཀམྤི…པེ… ཁནྡྷསནྟཱན’’ནྟི. པརིཧཱཡམཱནོཏི ཁཱིཡམཱནོ ཝིནསྶམཱནོ. ཀཔྤོཏི ཨསངྑྱེཡྻཀཔྤོ. སོ པན ཨཏྠཏོ ཀཱལོ, ཏདཱ པཝཏྟམཱནསངྑཱརཝསེནསྶ པརིཧཱནི ཝེདིཏབྦཱ. ཝཌྜྷམཱནོ ཝིཝཊྚཀཔྤོཏི ཨེཏྠཱཔི ཨེསེཝ ནཡོ. ཡོ པན ‘‘ཀཱལཾ ཁེཔེཏཱི’’ཏི, ‘‘ཀཱལོ གྷསཏི བྷཱུཏཱནི, སབྦཱནེཝ སཧཏྟནཱ’’ཏི (ཛཱ. ༡.༢.༡༩༠) ཙ ཨཱདཱིསུ ཀཱལསྶཱཔི ཁཡོ ཝུཙྩཏི, སོ ཨིདྷ ནཱདྷིཔྤེཏོ ཨནིཊྛཔྤསངྒཏོ. སཾཝཊྚནཾ ཝིནསྶནཾ སཾཝཊྚོ, སཾཝཊྚཏོ ཨུདྡྷཾ ཏཐཱ ཋཱཡཱི སཾཝཊྚཊྛཱཡཱི. ཏཾམཱུལཀཏྟཱཏི ཏཾཔུབྦཀཏྟཱ. ཝིཝཊྚནཾ ནིབྦཏྟནཾ, ཝཌྜྷནཾ ཝཱ ཝིཝཊྚོ.

ཏེཛོསཾཝཊྚོ ཨཱཔོསཾཝཊྚོ ཝཱཡོསཾཝཊྚོཏི ཨེཝཾ སཾཝཊྚསཱིམཱནུཀྐམེན སཾཝཊྚེསུ ཝཏྟབྦེསུ ཏཐཱ ¶ ཨཝཏྭཱ ‘‘ཨཱཔོསཾཝཊྚོ ཏེཛོསཾཝཊྚོ ¶ ཝཱཡོསཾཝཊྚོ’’ཏི ཝཙནཾ སཾཝཊྚཀམཧཱབྷཱུཏདེསནཱནུཔུབྦིཡཱཏི ཀེཙི. སཾཝཊྚཱནུཔུབྦིཡཱཏི ཨཔརེ. ཨཱཔེན སཾཝཊྚོ ཨཱཔོསཾཝཊྚོ. སཾཝཊྚསཱིམཱཏི སཾཝཊྚམརིཡཱདཱ.

སཾཝཊྚཏཱིཏི ཝིནསྶཏི. སདཱཏི སབྦཀཱལཾ, ཏཱིསུཔི སཾཝཊྚཀཱལེསཱུཏི ཨཏྠོ.

‘‘ཨེཀཾ བུདྡྷཁེཏྟ’’ནྟི ཨིདྷ ཡཾ སནྡྷཱཡ ཝུཏྟཾ, ཏཾ ནིཡམེཏྭཱ དསྶེཏུཾ ‘‘བུདྡྷཁེཏྟཾ ནཱམ ཏིཝིདྷ’’ནྟིཨཱདི ཝུཏྟཾ. ཡཏྟཀེ ཋཱནེ ཏཐཱགཏསྶ པཊིསནྡྷིཉཱཎཱནུབྷཱཝོ པུཉྙཕལསམུཏྟེཛིཏོ སརསེནེཝ པཐཝཱི ཝིཛམྦྷཏི, ཏཾ སབྦམྤི བུདྡྷངྐུརསྶ ནིབྦཏྟནཁེཏྟཾ ནཱམཱཏི ཨཱཧ ‘‘ཛཱཏིཁེཏྟཾ དསསཧསྶཙཀྐཝཱལ༹པརིཡནྟ’’ནྟི. ཨཱནུབྷཱཝོ ཝཏྟཏཱིཏི ཨིདྷ ཨིདྡྷིམཱ ཙེཏོཝསིཔྤཏྟོ ཨཱཎཱཁེཏྟཔརིཡཱཔནྣེ ཡཏྠ ཀཏྠཙི ཙཀྐཝཱལེ༹ ཋཏྭཱ ཨཏྟནོ ཨཏྠཱཡ པརིཏྟཾ ཀཏྭཱ ཏཏྠེཝ ཨཉྙཾ ཙཀྐཝཱལ༹ཾ གཏོཔི ཀཏཔརིཏྟོ ཨེཝ ཧོཏི. ཨཐ ཝཱ ཏཏྠ ཨེཀཙཀྐཝཱལེ༹ ཋཏྭཱ སབྦསཏྟཱནཾ ཨཏྠཱཡ པརིཏྟེ ཀཏེ ཨཱཎཱཁེཏྟེ སབྦསཏྟཱནཾ ཨབྷིསམྦྷུཎཱཏྭེཝ པརིཏྟཱནུབྷཱཝོ ཏཏྠ དེཝཏཱཧི པརིཏྟཱཎཱཡ སམྤཊིཙྪིཏབྦཏོ. ཡཾ ཝིསཡཁེཏྟཾ སནྡྷཱཡ ཨེཀསྨིཾཡེཝ ཁཎེ སརེན ཨབྷིཝིཉྙཱཔནཾ, ཨཏྟནོ རཱུཔདསྶནཉྩ པཊིཛཱནནྟེན བྷགཝཏཱ ‘‘ཡཱཝཏཱ ཝཱ པན ཨཱཀངྑེཡྻཱ’’ཏི (ཨ. ནི. ༣.༨༡) ཝུཏྟཾ. ཡཏྠཱཏི ཡསྨིཾ ཨནནྟཱཔརིམཱཎེ ཝིསཡཁེཏྟེ. ཡཾ ཡཾ ཏཐཱགཏོ ཨཱཀངྑཏི, ཏཾ ཏཾ ཛཱནཱཏི ཨཱཀངྑཱམཏྟཔཊིབདྡྷཝུཏྟིཏཱཡ བུདྡྷཉཱཎསྶ. སཎྛཧནྟནྟི ཝིཝཊྚམཱནཾ ཛཱཡམཱནཾ.

༤༠༥. གོཁཱཡིཏཀམཏྟེསཱུཏི གོཧི ཁཱདིཏབྦཔྤམཱཎེསུ. ཡནྟི ཡསྨིཾ སམཡེ. པུཔྥཕལཱུཔཛཱིཝིནིཡོ ཙ དེཝཏཱ བྲཧྨལོཀེ ནིབྦཏྟནྟཱིཏི སམྦནྡྷོ.

ཨེཏེསནྟི ‘‘ཝསྶཱུཔཛཱིཝིནོ’’ཏིཨཱདིནཱ ཝུཏྟསཏྟཱནཾ. ཏཏྠཱཏི བྲཧྨལོཀེ. སོ ཙ ཁོ པརིཏྟཱབྷཱདིབྲཧྨལོཀོ ཝེདིཏབྦོ. ‘‘པཊིལདྡྷཛ྄ཛྷཱནཝསེནཱ’’ཏི ཝཏྭཱ ཛྷཱནཔྤཊིལཱབྷསྶ སམྦྷཝཾ དསྶེཏུཾ ‘‘ཏདཱ ཧཱི’’ཏིཨཱདི ཝུཏྟཾ. ལོཀཾ བྱཱུཧེནྟི སམྤིཎྜེནྟཱིཏི ལོཀབྱཱུཧཱ. ཏེ ཀིར དིསྭཱ མནུསྶཱ ཏཏྠ ཏཏྠ ཋིཏཱཔི ནིསིནྣཱཔི སཾཝེགཛཱཏཱ, སམྦྷམཔྤཏྟཱ ¶ ཙ ཧུཏྭཱ ཏེསཾ ཨཱསནྣེ ཋཱནེ སནྣིཔཏནྟི. སིཁཱབནྡྷསྶ མུཏྟཏཱཡ མུཏྟསིརཱ. ཨིཏོ ཙིཏོ ཙ ཝིདྷཱུཡམཱནཀེསཏཱཡ ཝིཀིཎྞཀེསཱ. ལོཀཝིནཱསབྷཡེན སོཀཝནྟཙིཏྟཏཱཡ ཨཏིཝིཡ ཝིརཱུཔཝེསདྷཱརིནོ. མཱརིསཱཏི དེཝཱནཾ ¶ པིཡསམུདཱཙཱརོ. ཀཐཾ པནེཏེ ཀཔྤཝུཊྛཱནཾ ཛཱནནྟཱིཏི? དྷམྨཏཱཡ སཉྩོདིཏཱཏི ཨཱཙརིཡཱ. ཏཱདིསནིམིཏྟདསྶནེནཱཏི ཨེཀེ. བྲཧྨདེཝཏཱཧི ཨུཡྻོཛིཏཱཏི ཨཔརེ.

མེཏྟཱདཱིནཱིཏི མེཏྟཱམནསིཀཱརཱདཱིནི ཀཱམཱཝཙརཔུཉྙཱནི. དེཝལོཀེཏི ཀཱམདེཝལོཀེ. དེཝཱནཾ ཀིར སུཁསམྥསྶཝཱཏགྒཧཎཔརིཙཡེན ཝཱཡོཀསིཎེ ཛྷཱནཱནི སུཁེནེཝ ཨིཛ྄ཛྷནྟི. ཏེན ཝུཏྟཾ ‘‘ཝཱཡོཀསིཎེ པརིཀམྨཾ ཀཏྭཱ ཛྷཱནཾ པཊིལབྷནྟཱི’’ཏི. ཏདཉྙེ པནཱཏི ཨཱཔཱཡིཀེ སནྡྷཱཡཱཧ. ཏཏྠཱཏི དེཝལོཀེ.

དུཏིཡོ སཱུརིཡོཏི དུཏིཡཾ སཱུརིཡམཎྜལཾ. སཏྟསཱུརིཡནྟི སཏྟསཱུརིཡཔཱཏུབྷཱཝསུཏྟཾ. པཀཏིསཱུརིཡེཏི ཀཔྤཝུཊྛཱནཀཱལཏོ པུབྦེ ཨུཔྤནྣསཱུརིཡཝིམཱནེ. ཀཔྤཝུཊྛཱནཀཱལེ པན ཡཐཱ ཨཉྙེ ཀཱམཱཝཙརདེཝཱ, ཨེཝཾ སཱུརིཡདེཝཔུཏྟོཔི ཛྷཱནཾ ནིབྦཏྟེཏྭཱ བྲཧྨལོཀཾ ཨུཔཔཛྫཏི, སཱུརིཡམཎྜལཾ པན པབྷསྶརཏརཉྩེཝ ཏེཛཝནྟཏརཉྩ ཧུཏྭཱ པཝཏྟཏི. ཏཾ ཨནྟརདྷཱཡིཏྭཱ ཨཉྙམེཝ ཨུཔྤཛྫཏཱིཏི ཨཔརེ. གངྒཱ ཡམུནཱ སརབྷཱུ ཨཙིརཝཏཱི མཧཱིཏི ཨིམཱ པཉྩ མཧཱནདིཡོ.

པབྷཝཱཏི ཨུཔྤཏྟིཊྛཱནབྷཱུཏཱ. ཧཾསཔཱཏནོཏི མནྡཱཀིནིམཱཧ.

ན སཎྛཱཏཱིཏི ན ཏིཊྛཏི.

པརིཡཱདིནྣསིནེཧནྟི པརིཀྑཱིཎསིནེཧཾ. ཡཱཡ ཨཱཔོདྷཱཏུཡཱ ཏཏྠ ཏཏྠ པཐཝཱིདྷཱཏུ ཨཱབནྡྷཏྟཱ སམྤིཎྜཏཱ ཧུཏྭཱ ཏིཊྛཏི, སཱ ཚསཱུརིཡཔཱཏུབྷཱཝེན པརིཀྑཡཾ གཙྪཏི. ཡཐཱ ཙིདནྟི ཡཐཱ ཙ ཨིདཾ ཙཀྐཝཱལ༹ཾ. ཨེཝཾ ཀོཊིསཏསཧསྶཙཀྐཝཱལཱ༹ནིཔཱིཏི ཝིཔཏྟིམཧཱམེགྷུཔྤཏྟིཏོ པཊྛཱཡ ཨིདྷ ཝུཏྟཾ སབྦཾ ཀཔྤཝུཊྛཱནཾ, ཏཾ ཏཏྠ ཨཏིདིསཏི.

པལུཛྫིཏྭཱཏི ཚིཛྫིཏྭཱ. སངྑཱརགཏནྟི བྷཱུཏུཔཱདཱཡཔྤབྷེདཾ སངྑཱརཛཱཏཾ. སབྦསངྑཱརཔརིཀྑཡཱཏི ཛྷཱཔེཏབྦསངྑཱརཔརིཀྑཡཱ. སཡམྤི སངྑཱརགཏཾ སམཱནཾ ཨིནྡྷནཱབྷཱཝཏོ ཚཱརིཀམྤི ཨསེསེཏྭཱ ནིཌྜཧིཏྭཱ ཝཱུཔསམཏཱིཏི ཨཱཧ ‘‘སཔྤི…པེ… ནིབྦཱཡཏཱི’’ཏི.

༤༠༦. དཱིགྷསྶ ¶ ཨདྡྷུནོཏི སཾཝཊྚཊྛཱཡཱིཨསངྑྱེཡྻཀཔྤསངྑཱཏསྶ དཱིགྷསྶ ཀཱལསྶ ཨཙྩཡེན ¶ . ཏཱལཀྑནྡྷཱདཱིཏི ཨཱདི-སདྡེན སཱཀསཱལཱདིརུཀྑེ སངྒཎྷཱཏི. གྷནཾ ཀརོཏཱིཏི ཝིསརིཏུཾ ཨདཏྭཱ པིཎྜིཏཾ ཀརོཏི. ཏེནཱཧ ‘‘པརིཝཊུམ’’ནྟི, ཝཊྚབྷཱཝེན པརིཙྪིནྣཾ. ཏནྟི ཨུདཀཾ. ཨསྶཱཏི ཝཱཏསྶ. ཝིཝརཾ དེཏཱིཏི ཡཐཱ གྷནཾ ཀརོཏི སམྤིཎྜེཏི, ཨེཝཾ ཏཏྠ ཨནྟརཾ དེཏི. པརིཀྑཡམཱནནྟི པུབྦེ ཡཱཝ བྲཧྨལོཀཱ ཨེཀོགྷབྷཱུཏེན ཝཱཏེན པརིསོསིཡམཱནཏཱཡ པརིཀྑཡཾ གཙྪནྟཾ. བྲཧྨལོཀོ པཱཏུབྷཝཏཱིཏི ཡོཛནཱ. བྲཧྨལོཀོཏི ཙ པཋམཛ྄ཛྷཱནབྷཱུམིམཱཧ. ཨུཔརི ཙཏུཀཱམཱཝཙརདེཝལོཀཊྛཱནེཏི ཡཱམདེཝལོཀཱདཱིནཾ ཙཏུནྣཾ པཏིཊྛཱནཊྛཱནེ. ཙཱཏུམཧཱརཱཛིཀཏཱཝཏིཾསབྷཝནཱནཾ པན པཏིཊྛཱནཊྛཱནཱནི པཐཝཱིསམྦནྡྷཏཱཡ ན ཏཱཝ པཱཏུབྷཝནྟི.

རུནྡྷནྟཱིཏི ཡཐཱ ཧེཊྛཱ ན བྷསྶཏི, ཨེཝཾ ནིརོདྷེནྟི.

‘‘པཋམཏརཱབྷིནིབྦཏྟཱ’’ཏི ཨིདཾ ཨཱཡུཀྑཡསྶ སམྦྷཝདསྶནཾ, ཏེན དྭིནྣཾ, ཙཏུནྣཾ, ཨཊྛནྣཾ ཝཱ ཀཔྤཱནཾ ཨཱདིམྷི ནིབྦཏྟཱཏི དསྶེཏི. ཏཏོཏི ཨཱབྷསྶརབྲཧྨལོཀཏོ. པརིཏྟཱབྷཨཔྤམཱཎཱབྷཱཔི ཧི ཨཱབྷསྶརགྒཧཎེནེཝ སངྒཧཾ གཙྪནྟི. ‘‘ཏེ ཧོནྟི སཡཾཔབྷཱ ཨནྟལིཀྑཙརཱ’’ཏི ཨིདཾ ཨུཔཙཱརཛ྄ཛྷཱནཔུཉྙསྶ མཧཱནུབྷཱཝཏཱཡ ཝུཏྟཾ. ཨཱལུཔྤཀཱརཀནྟི ཨཱལོཔཾ ཀཏྭཱ ཀཏྭཱཏི ཝདནྟི, ཨཱལུཔྤནཾ ཝིལོཔཾ ཀཏྭཱཏི ཨཏྠོ.

ཧཊྛཏུཊྛཱཏི ཨཏིཝིཡ ཧཊྛཱ ཨུཔྤིལཱཝིཏཙིཏྟཱ. ནཱམཾ ཀརོནྟཱིཏི ཏཐཱ ཝོཧརནྟི.

སིནེརུཙཀྐཝཱལ༹ཧིམཝནྟཔབྦཏཱཏི ཨེཏྠ དཱིཔསམུདྡཱཔཱིཏི ཝཏྟབྦཾ. ཏཐཱ ཧི ཝཀྑཏི ‘‘ནིནྣནིནྣཊྛཱནེ སམུདྡཱ, སམསམཊྛཱནེ དཱིཔཱ’’ཏི. ཐཱུཔཐཱུཔཱཏི ཨུནྣཏུནྣཏཱ.

ཨཏིམཉྙནྟཱིཏི ཨཏིཀྐམིཏྭཱ མཉྙནྟི, ཧཱིལེ༹ནྟཱིཏི ཨཏྠོ. ཏེནེཝ ནཡེནཱཏི ‘‘ཨེཀཙྩེ ཝཎྞཝནྟོ ཧོནྟཱི’’ཏིཨཱདིནཱ (དཱི. ནི. ༣.༡༢༣) ཝུཏྟེན ནཡེནེཝ. པདཱལཏཱཏི ཨེཝཾནཱམིཀཱ ལཏཱཛཱཏི. ཏསྶཱ ཀིར པཱརཱསཝཛཱཏི གལོ༹ཙཱིཏི ཝདནྟི. ཨཀཊྛེ ཨེཝ བྷཱུམིཔྤདེསེ པཙྩནཀོ ཨཀཊྛཔཱཀོ. ཨཀཎོཏི ཀུཎྜཀརཧིཏོ.

སུམནསངྑཱཏཛཱཏིཔུཔྥསདིསོ ¶ སུམནཛཱཏིཔུཔྥསདིསོ. ཡོ ཡོ རསོ ཨེཏསྶཱཏི ཡཾཡཾརསོ, ཨོདནོ, ཏཾ ཡཾཡཾརསཾ, ཡཱདིསརསཝནྟནྟི ཨཏྠོ. རསཔཐཝཱི, བྷཱུམིཔཔྤཊཀོ, པདཱལཏཱ ཙ ¶ པརིབྷུཏྟཱ སུདྷཱཧཱརོ ཝིཡ ཁུདྡཾ ཝིནོདེཏྭཱ རསཧརཎཱིཧི རསམེཝ བྲཱུཧེནྟཱ ཏིཊྛནྟི, ན ཝཏྠུནོ སུཁུམབྷཱཝེན ནིསྶནྡཱ, སུཁུམབྷཱཝེནེཝ གཧཎིནྡྷནམེཝ ཙ ཧོནྟི. ཨོདནོ པན པརིབྷུཏྟོ རསཾ ཝཌྜྷེནྟོཔི ཝཏྠུནོ ཨོལཱ༹རིཀབྷཱཝེན ནིསྶནྡཾ ཝིསྶཛྫེནྟོ པསྶཱཝཾ, ཀསཊཉྩ ཨུཔྤཱདེཏཱིཏི ཨཱཧ ‘‘ཏཏོ པབྷུཏི མུཏྟཀརཱིསཾ སཉྫཱཡཏཱི’’ཏི. པུརིམཏྟབྷཱཝེསུ པཝཏྟཨུཔཙཱརཛ྄ཛྷཱནཱནུབྷཱཝེན ཡཱཝ སཏྟསནྟཱནེ ཀཱམརཱགཝིཀྑམྦྷནཝེགོ ན སམིཏོ, ན ཏཱཝ བལཝཀཱམརཱགཱུཔནིསྶཡཱནི ཨིཏྠིཔུརིསིནྡྲིཡཱནི པཱཏུརཧེསུཾ. ཡདཱ པནསྶ ཝིཙྪིནྣཏཱཡ བལཝཀཱམརཱགོ ལདྡྷཱཝསརོ ཨཧོསི, ཏདཱ ཏདུཔནིསྶཡཱནི ཏཱནི སཏྟཱནཾ ཨཏྟབྷཱཝེསུ སཉྫཱཡིཾསུ. ཏེན ཝུཏྟཾ ‘‘པུརིསསྶ…པེ… པཱཏུབྷཝཏཱི’’ཏི. ཏེནེཝཱཧ ‘‘ཏཏྲ སུད’’ནྟིཨཱདི.

ཨལསཛཱཏིཀསྶཱཏི སཛྫུཀམེཝ ཏཎྜུལཾ ཨགྒཧེཏྭཱ པརདིཝསསྶཏྠཱཡ གཧཎེན ཨལསཔཀཏིཀསྶ.

ཨནུཏྠུནནྟཱིཏི ཨནུསོཙནྟི. སམྨནྣེཡྻཱམཱཏི སམནུཛཱནེཡྻཱམ. ནོཏི ཨམྷེསུ. སམྨཱཏི སམྨདེཝ ཡཐཱརཧཾ. ཁཱིཡིཏབྦནྟི ཁཱིཡནཱརཧཾ ནིནྡནཱིཡཾ. གརཧིཏབྦནྟི ཧཱིལེ༹ཏབྦཾ.

ཨཡམེཝ བྷགཝཱ པཊིབལོ པགྒཧནིགྒཧཾ ཀཱཏུནྟི ཡོཛནཱ. རཉྫེཏཱིཏི སངྒཧཝཏྠཱུཧི སམྨདེཝ རམེཏི པཱིཎེཏི.

ཝིཝཊྚཊྛཱཡཱིཨསངྑྱེཡྻཾ ཙཏུསཊྛིཨནྟརཀཔྤསངྒཧཾ. ཝཱིསཏིཨནྟརཀཔྤསངྒཧནྟི ཀེཙི. སེསཱསངྑྱེཡྻཱནི ཀཱལཏོ ཏེན སམཔྤམཱཎཱནེཝ.

༤༠༧. མཧཱདྷཱརཱཧཱིཏི ཏཱལསཱལཀྑནྡྷཔྤམཱཎཱཧི མཧཏཱིཧི ཁཱརུདཀདྷཱརཱཧི. སམནྟཏོཏི སབྦསོ. པཐཝིཏོཏི པཐཝིཡཱ ཧེཊྛིམནྟཏོ པབྷུཏི. ཏེན ཧི ཁཱརུདཀེན ཕུཊྛཕུཊྛཱ པཐཝཱིཔབྦཏཱདཡོ ཨུདཀེ ¶ པཀྑིཏྟལོཎསཀྑརཱ ཝིཡ ཝིལཱིཡནྟེཝ, ཏསྨཱ པཐཝཱིསནྡྷཱརུདཀེན སདྡྷིཾ ཨེཀཱུདཀམེཝ ཏཾ ཧོཏཱིཏི ཀེཙི. ཨཔརེ ‘‘པཐཝཱིསནྡྷཱརཀཾ ཨུདཀཀྑནྡྷཉྩ ཨུདཀསནྡྷཱརཀཾ ཝཱཡུཀྑནྡྷཉྩ ཨནཝསེསཏོ ཝིནཱསེཏྭཱ སབྦཏྠ སཡམེཝ ཨེཀོགྷབྷཱུཏཾ ཏིཊྛཏཱི’’ཏི ཝདནྟི, ཏཾ ཡུཏྟཾ. ཏཡོཔི བྲཧྨལོཀེཏི པརིཏྟཱབྷཨཔྤམཱཎཱབྷཨཱབྷསྶརབྲཧྨལོཀེ, ཏཡིདཾ ‘‘ཨཡཾ པན ཝིསེསོ’’ཏི ཨཱརདྡྷཏྟཱ ཝུཏྟཾ, ཨཉྙཐཱ ‘‘ཚཔི བྲཧྨལོཀེ’’ཏི ཝཏྟབྦཾ སིཡཱ. སུབྷཀིཎྷེཏི ཨུཀྐཊྛནིདྡེསེན ¶ ཏཏིཡཛ྄ཛྷཱནབྷཱུམིཡཱ ཨུཔལཀྑཎཾ. པརིཏྟཱསུབྷཨཔྤམཱཎཱསུབྷེཔི ཧི ཨཱཧཙྩ ཨུདཀཾ ཏིཊྛཏི. ཧེཊྛཱ ‘‘ཨཱབྷསྶརེ ཨཱཧཙྩ ཏིཊྛཏཱི’’ཏི ཨེཏྠཱཔི ཨེསེཝ ནཡོ. ཏནྟི ཏཾ ཀཔྤཝིནཱསཀཨུདཀཾ. ཨུདཀཱནུགཏནྟི ཨུདཀེན ཨནུགཏཾ ཕུཊྛཾ. ཨབྷིབྷཝིཏྭཱཏི ཝིལཱིཡཱཔེཏྭཱ.

ཨིདམེཀཾ ཨསངྑྱེཡྻནྟི ཨིདཾ སཾཝཊྚསངྑཱཏཾ ཀཔྤསྶ ཨེཀཾ ཨསངྑྱེཡྻཾ.

༤༠༨. ཐཱུལརཛེ ཨཔགཏེ ཨེཝ པཐཝཱིནིསྶིཏཾ སཎྷརཛཾ ཨཔགཙྪཏཱིཏི ཝུཏྟཾ ‘‘ཏཏོ སཎྷརཛ’’ནྟི. སམུཊྛཱཔེཏཱིཏི སམྦནྡྷོ. ‘‘ཝིསམཊྛཱནེ ཋིཏམཧཱརུཀྑེ’’ཏི ཨིདཾ པཋམཾ སམུཊྛཱཔེཏབྦཏཾ སནྡྷཱཡ ཝུཏྟཾ.

ཙཀྐཝཱལ༹པབྦཏམྤི སིནེརུཔབྦཏམྤཱིཏི མཧཱཔཐཝིཡཱ ཝིཔརིཝཏྟནེནེཝ ཝིཔརིཝཏྟིཏཾ ཙཀྐཝཱལ༹པབྦཏམྤི སིནེརུཔབྦཏམྤི ཝཱཏོ ཨུཀྑིཔིཏྭཱ ཨཱཀཱསེ ཁིཔཏི. ཏེ ཙཀྐཝཱལ༹པབྦཏཱདཡོ. ཨབྷིཧནྟྭཱཏི གྷཊྚེཏྭཱ. ཨཉྙམཉྙནྟི ཨེཀིསྶཱ ལོཀདྷཱཏུཡཱ ཙཀྐཝཱལ༹ཧིམཝནྟསིནེརུཾ ཨཉྙིསྶཱ ལོཀདྷཱཏུཡཱ ཙཀྐཝཱལཱ༹དཱིཧཱིཏི ཨེཝཾ ཨཉྙམཉྙཾ སམཱགམཝསེན གྷཊྚེཏྭཱ. སབྦསངྑཱརགཏནྟི པཐཝཱིསནྡྷཱརཀཨུདཀཾ, ཏཾསནྡྷཱརཀཝཱཏནྟི སབྦཾ སངྑཱརགཏཾ ཝིནཱསེཏྭཱ སཡམྤི ཝིནསྶཏི ཨཝཊྛཱནསྶ ཀཱརཎཱབྷཱཝཏོ.

༤༠༩. ཡདིཔི སངྑཱརཱནཾ ཨཧེཏུཀོ སརསནིརོདྷོ ཝིནཱསཀཱབྷཱཝཏོ, སནྟཱནནིརོདྷོ པན ཧེཏུཝིརཧིཏོ ནཏྠི ཡཐཱ ཏཾ སཏྟཀཱཡེསཱུཏི. བྷཱཛནལོཀསྶཱཔི སཧེཏུཀེན ཝིནཱསེན བྷཝིཏབྦནྟི ཧེཏུཾ པུཙྪཏི ‘‘ཀིཾ ཀཱརཎཱ ཨེཝཾ ལོཀོ ཝིནསྶཏཱི’’ཏི. ཨིཏརོ ཡཐཱ ཏཏྠ ནིབྦཏྟནཀསཏྟཱནཾ པུཉྙབལེན པཋམཾ ལོཀོ ཝིཝཊྚཏི, ཨེཝཾ ཏེསཾ པཱཔབལེན སཾཝཊྚཏཱིཏི དསྶེནྟོ ‘‘ཨཀུསལམཱུལཀཱརཎཱ’’ཏི ཨཱཧ. ཡཐཱ ཧི རཱགདོསམོཧཱནཾ ཨདྷིཀབྷཱཝེན ཡཐཱཀྐམཾ རོགནྟརཀཔྤོ, སཏྠནྟརཀཔྤོ, དུབྦྷིཀྑནྟརཀཔྤོཏི ཨིམེ ཏིཝིདྷཱ ¶ ཨནྟརཀཔྤཱ ཝིཝཊྚཊྛཱཡིམྷི ཨསངྑྱེཡྻཀཔྤེ ཛཱཡནྟི, ཨེཝམེཏེ ཡཐཱཝུཏྟཱ ཏཡོ སཾཝཊྚཱ རཱགཱདཱིནཾ ཨདྷིཀབྷཱཝེནེཝ ཧོནྟཱིཏི དསྶེནྟོ ‘‘ཨཀུསལམཱུལེསུ ཧཱི’’ཏིཨཱདིམཱཧ. ཨུསྶནྣཏརེཏི ཨཏིཝིཡ ཨུསྶནྣེ. དོསེ ཨུསྶནྣཏརེ ཨདྷིཀཏརདོསེན ཝིཡ ཏིཀྑཏརེན ཁཱརུདཀེན ཝིནཱསོ ཡུཏྟོཏི ཝུཏྟཾ ‘‘དོསེ ཨུསྶནྣཏརེ ཨུདཀེན ཝིནསྶཏཱི’’ཏི. པཱཀཊསཏྟུསདིསསྶ དོསསྶ ཨགྒིསདིསཏཱ, ཨཔཱཀཊསཏྟུསདིསསྶ རཱགསྶ ཁཱརུདཀསདིསཏཱ ཙ ཡུཏྟཱཏི ཨདྷིཔྤཱཡེན ‘‘དོསེ ཨུསྶནྣཏརེ ཨགྒིནཱ, རཱགེ ཨུསྶནྣཏརེ ཨུདཀེནཱ’’ཏི ¶ ཀེཙིཝཱདསྶ ཨདྷིཔྤཱཡོ ཝེདིཏབྦོ. རཱགོ སཏྟཱནཾ བཧུལཾ པཝཏྟཏཱིཏི རཱགཝསེན བཧུསོ ལོཀཝིནཱསོ.

༤༡༠. ཨེཝཾ པསངྒེན སཾཝཊྚཱདིཀེ པཀཱསེཏྭཱ ཨིདཱནི ཡཐཱདྷིཀཏཾ ནེསཾ ཨནུསྶརཎཱཀཱརཾ དསྶེཏུཾ ‘‘པུབྦེནིཝཱསཾ ཨནུསྶརནྟོཔཱི’’ཏིཨཱདི ཨཱརདྡྷཾ.

‘‘ཨམུམྷི སཾཝཊྚཀཔྤེ’’ཏི ཨིདཾ སཾཝཊྚཀཔྤསྶ ཨཱདིཏོ པཱལི༹ཡཾ (དཱི. ནི. ༡.༢༤༤) གཧིཏཏྟཱ ཝུཏྟཾ. ཏཏྠཱཔི ཧི ཨིམསྶ ཀཏིཔཡཾ ཀཱལཾ བྷཝཱདཱིསུ སཾསརཎཾ ཨུཔལབྦྷཏཱིཏི. སཾཝཊྚཀཔྤེ ཝཱ ཝཊྚམཱནེསུ བྷཝཱདཱིསུ ཨིམསྶ ཨུཔཔཏྟི ཨཧོསི, ཏཾདསྶནམེཏཾ དཊྛབྦཾ. ཨཐ ཝཱ ཨམུམྷི སཾཝཊྚཀཔྤེཏི ཨེཏྠ ཝཱ-སདྡོ ལུཏྟནིདྡིཊྛོ དཊྛབྦོ, ཏེན ཙ ཨནིཡམཏྠེན ཨིཏརཱསངྑྱེཡྻཱནམྤི སངྒཧོ སིདྡྷོ ཧོཏི. བྷཝེ ཝཱཏིཨཱདཱིསུ ཀཱམཱདིབྷཝེ ཝཱ ཨཎྜཛཱདིཡོནིཡཱ ཝཱ དེཝཱདི གཏིཡཱ ཝཱ ནཱནཏྟཀཱཡནཱནཏྟསཉྙཱིཨཱདིཝིཉྙཱཎཊྛིཏིཡཱ ཝཱ སཏྟཱཝཱསེ ཝཱ ཁཏྟིཡཱདི སཏྟནིཀཱཡེ ཝཱ. ཨཱསིནྟི ཨཧོསིཾ. ཝཎྞསམྤཏྟིཾ ཝཱཏི ཝཱ-སདྡེན ཝཎྞཝིཔཏྟིཾ ཝཱཏི དསྶེཏི.

སཱལིམཾསོདནཱཧཱརོ ཝཱ གིཧིཀཱལེ. པཝཏྟཕལབྷོཛནོ ཝཱ ཏཱཔསཱདིཀཱལེ. སཱམིསཱ གེཧསྶིཏཱ སོམནསྶཱདཡོ. ནིརཱམིསཱ ནེཀྑམྨསྶིཏཱ. ཨཱདི-སདྡེན ཝིཝེཀཛསམཱདྷིཛསུཁཱདཱིནཾ སངྒཧོ.

‘‘ཨམུཏྲཱསི’’ནྟིཨཱདིནཱ སབྦཾ ཡཱཝདིཙྪཀཾ ཨནུསྶརཎཾ དསྶེཏྭཱ ཨིདཱནི ཨཉྙཐཱ ཨཏྠཾ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ཏཏྠ ཨམུཏྲཱསིནྟི སཱམཉྙནིདྡེསོཡཾ, བྱཱཔནིཙྪཱལོཔོ ཝཱ, ཨམུཏྲ ཨམུཏྲཱསིནྟི ཝུཏྟཾ ཧོཏི. ཨནུཔུབྦེན ཨཱརོཧནྟསྶ ཡཱཝདིཙྪཀཾ ཨནུསྶརཎནྟི ཨེཏྠ ¶ ཨཱརོཧནྟསྶཱཏི པཊིལོམཏོ ཉཱཎེན པུབྦེནིཝཱསཾ ཨཱརོཧནྟསྶ. པཙྩཝེཀྑཎནྟི ཨནུསྶརིཏཱནུསྶརིཏསྶ པཙྩཝེཀྑཎཾ, ན ཨནུསྶརཎཾ. ཨིཏཱིཏི ཝུཏྟཏྠནིདསྶནཾ. ཏཉྩ ཁོ ཡཐཱརཧཏོ, ན ཡཐཱནུཔུབྦཏོཏི དསྶེནྟོ ‘‘ནཱམགོཏྟཝསེནཱ’’ཏིཨཱདིམཱཧ. ཝཎྞཱདཱིཧཱིཏི ཝཎྞཱཧཱརཝེདཡིཏཱཡུཔརིཙྪེདེཧི. ཨོདཱཏོཏཱིཏི ཨེཏྠ ཨིཏི-སདྡོ ཨཱདིཨཏྠོ, པཀཱརཏྠོ ཝཱ, ཏེན ཨེཝམཱདི ཨེཝཾཔཀཱརནཱནཏྟཏོཏི དསྶིཏཾ ཧོཏི.

པུབྦེནིཝཱསཱནུསྶཏིཉཱཎཀཐཱཝཎྞནཱ ནིཊྛིཏཱ.

ཙུཏཱུཔཔཱཏཉཱཎཀཐཱཝཎྞནཱ

༤༡༡. ཙུཏིཡཱཏི ¶ ཙཝནེ. ཨུཔཔཱཏེཏི ཨུཔཔཛྫནེ. སམཱིཔཏྠེ ཙེཏཾ བྷུམྨཝཙནཾ, ཙུཏིཀྑཎསཱམནྟཱ, ཨུཔཔཏྟིཀྑཎསཱམནྟཱ ཙཱཏི ཝུཏྟཾ ཧོཏི. ཏཐཱ ཧི ཝཀྑཏི ‘‘ཡེ པན ཨཱསནྣཙུཏིཀཱ’’ཏིཨཱདི (ཝིསུདྡྷི. ༢.༤༡༡). དིབྦཙཀྑུཉཱཎེནེཝ སཏྟཱནཾ ཙུཏི ཙ ཨུཔཔཏྟི ཙ ཉཱཡཏཱིཏི ཨཱཧ ‘‘དིབྦཙཀྑུཉཱཎཏྠནྟི ཝུཏྟཾ ཧོཏཱི’’ཏི. དིབྦསདིསཏྟཱཏིཨཱདཱིསུ ཡཾ ཝཏྟབྦཾ, ཏཾ ཧེཊྛཱ ཝུཏྟམེཝ. ཨཡཾ པན ཝིསེསོ – ཏཏྠ ‘‘སོཏདྷཱཏཱུ’’ཏི པདཾ ཨཔེཀྑིཏྭཱ ཨིཏྠིལིངྒཝསེན ཝུཏྟཾ, ཨིདྷ ནཔུཾསཀལིངྒཝསེན ཝཏྟབྦཾ. ཏཏྠ ཙ ཨཱལོཀཔརིགྒཧེན པཡོཛནཾ ནཏྠི, ཨིདྷ ཨཏྠཱིཏི ཝུཏྟཾ ‘‘ཨཱལོཀཔརིགྒཧེན མཧཱཛུཏིཀཏྟཱཔི དིབྦ’’ནྟི, ཀསིཎཱལོཀཱནུགྒཧེན པཏྟབྦཏྟཱ, སཡཾ ཉཱཎཱལོཀཕརཎབྷཱཝེན ཙ མཧཱཛུཏིཀབྷཱཝཏོཏི ཨཏྠོ. མཧཱཛུཏིཀམྤི ཧི ‘‘དིབྦ’’ནྟི ཝུཙྩཏི ‘‘དིབྦམིདཾ བྱམྷ’’ནྟིཨཱདཱིསུ. མཧཱགཏིཀཏྟཱཏི མཧནཱིཡགམནཏྟཱ, ཝིམྷཡནཱིཡཔཝཏྟིཀཏྟཱཏི ཨཏྠོ. ཝིམྷཡནཱིཡཱ ཧིསྶ པཝཏྟི ཏིརོཀུཊྚཱདིགཏརཱུཔདསྶནཏོ. ‘‘དིབྦསདིསཏྟཱ’’ཏི ཙ ཧཱིནཱུཔམཱདསྶནཾ དེཝཏཱནཾ དིབྦཙཀྑུཏོཔི ཨིམསྶ མཧཱནུབྷཱཝཏྟཱ. ཏེན དིབྦཙཀྑུལཱབྷཱཡ ཡོགིནོ པརིཀམྨཀརཎཾ ཏཔྤཊིཔཀྑཱབྷིབྷཝསྶ ཨཏྠཏོ ཏསྶ ཝིཛཡིཙྪཱ ནཱམ ཧོཏི, དིབྦཙཀྑུལཱབྷཱི ཙ ཨིདྡྷིམཱ དེཝཏཱནཾ ཝཙནགྒཧཎཀྑམནདྷམྨདཱནཝསེན མཧཱམོགྒལླཱནཏྠེརཱདཡོ ཝིཡ དཱནགྒཧཎལཀྑཎེ, ཝོཧཱརེ ཙ པཝཏྟེཡྻཱཏི ཨེཝཾ ཝིཧཱརཝིཛཡིཙྪཱཝོཧཱརཛུཏིགཏིསངྑཱཏཱནཾ ཨཏྠཱནཾ ཝསེན ཨིམསྶ ཨབྷིཉྙཱཉཱཎསྶ དིབྦཙཀྑུབྷཱཝསིདྡྷིཏོ ¶ . སདྡཝིདཱུ ཙ ཏེསུ ཨེཝ ཨཏྠེསུ དིཝུ-སདྡཾ ཨིཙྪནྟཱིཏི ཝུཏྟཾ ‘‘ཏཾ སབྦཾ སདྡསཏྠཱནུསཱརེན ཝེདིཏབྦ’’ནྟི.

དསྶནཊྛེནཱཏི རཱུཔདསྶནབྷཱཝེན. ཙཀྑུནཱ ཧི སཏྟཱ རཱུཔཾ པསྶནྟི. ཡཐཱ མཾསཙཀྑུ ཝིཉྙཱཎཱདྷིཊྛིཏཾ སམཝིསམཾ ཨཱཙིཀྑནྟཾ ཝིཡ པཝཏྟཏི, ན ཏཐཱ ཨིདཾ. ཨིདཾ པན སཡམེཝ ཏཏོ སཱཏིསཡཾ ཙཀྑུཀིཙྩཀཱརཱིཏི ཨཱཧ ‘‘ཙཀྑུཀིཙྩཀརཎེན ཙཀྑུམིཝཱཏིཔི ཙཀྑཱུ’’ཏི. ‘‘དིཊྛིཝིསུདྡྷིཧེཏུཏྟཱ’’ཏི སངྑེཔཏོ ཝུཏྟམཏྠཾ ཝིཝརིཏུཾ ‘‘ཡོ ཧཱི’’ཏིཨཱདི ཝུཏྟཾ. ཨུཙྪེདདིཊྛིཾ གཎྷཱཏི པརཏོ ཨུཔཔཏྟིཡཱ ཨདསྶནཏོ ཨེཏྠེཝཱཡཾ སཏྟོ ཨུཙྪིནྣོ, ཨེཝམིཏརེཔཱིཏི. ནཝསཏྟཔཱཏུབྷཱཝདིཊྛིཾ གཎྷཱཏི ལཱབྷཱི ཨདྷིཙྩསམུཔྤཏྟིཀོ ཝིཡ. བུདྡྷཔུཏྟཱ པསྶནྟིཡེཝཱཏི ཨུཏྟརཔདཱཝདྷཱརཎཾ, ན པུརིམཔདཱཝདྷཱརཎཾ. ཨེཝཾ ཧི ཛཡདྡིསཛཱཏཀཱདཱིཧི ཨཝིརོདྷོ སིདྡྷོ ཧོཏི.

མནུསྶཱནཾ ¶ ཨིདནྟི མཱནུསཀཾ, མནུསྶཱནཾ གོཙརབྷཱུཏཾ རཱུཔཱརམྨཎཾ. ཏདཉྙསྶ པན དིབྦཏིརོཧིཏཱཏིསུཁུམཱདིབྷེདསྶ རཱུཔསྶ དསྶནཏོ ཨཏིཀྐནྟམཱནུསཀཾ. ཨེཝརཱུཔཉྩ མནུསྶཱུཔཙཱརཾ ཨཏིཀྐནྟཾ ནཱམ ཧོཏཱིཏི ཨཱཧ ‘‘མནུསྶཱུཔཙཱརཾ ཨཏིཀྐམིཏྭཱ རཱུཔདསྶནེནཱ’’ཏི. ཨེཝཾ ཝིསཡམུཁེན དསྶེཏྭཱ ཨིདཱནི ཝིསཡཱིམུཁེན དསྶེཏུཾ ‘‘མཱནུསཀཾ ཝཱ’’ཏིཨཱདི ཝུཏྟཾ. ཏཏྠཱཔི མཾསཙཀྑཱཏིཀྐམོ ཏསྶ ཀིཙྩཱཏིཀྐམེནེཝ དཊྛབྦོ.

དིབྦཙཀྑུནཱཏི དིབྦཙཀྑུཉཱཎེནཔི. དཊྛུཾ ན སཀྐཱ ཁཎསྶ ཨཏིཨིཏྟརཏཱཡ ཨཏིསུཁུམཏཱཡ ཀེསཉྩི རཱུཔསྶ. ཨཔིཙ དིབྦཙཀྑུསྶ པཙྩུཔྤནྣཾ རཱུཔཱརམྨཎཾ, ཏཉྩ པུརེཛཱཏཔཙྩཡབྷཱུཏཾ, ན ཙ ཨཱཝཛྫནཔརིཀམྨེཧི ཝིནཱ མཧགྒཏསྶ པཝཏྟི ཨཏྠི, ནཱཔི ཨུཔྤཛྫམཱནམེཝ རཱུཔཾ ཨཱརམྨཎཔཙྩཡོ བྷཝིཏུཾ སཀྐོཏི, བྷིཛྫམཱནཾ ཝཱ. ཏསྨཱ ‘‘ཙུཏཱུཔཔཱཏཀྑཎེ རཱུཔཾ དིབྦཙཀྑུནཱ དཊྛུཾ ན སཀྐཱ’’ཏི སུཝུཏྟམེཏཾ. ཡདི དིབྦཙཀྑུཉཱཎཾ རཱུཔཱརམྨཎམེཝ, ཨཐ ཀསྨཱ ‘‘སཏྟེ པསྶཏཱི’’ཏི ཝུཏྟནྟི? ཡེབྷུཡྻེན སཏྟསནྟཱནགཏརཱུཔདསྶནཏོ ཨེཝཾ ཝུཏྟཾ. སཏྟགཧཎསྶ ཝཱ ཀཱརཎབྷཱཝཏོ ཝོཧཱརཝསེན ཝུཏྟནྟིཔི ཀེཙི. ཏེ ཙཝམཱནཱཏི ཨདྷིཔྤེཏཱཏི སམྦནྡྷོ. ཨེཝརཱུཔེཏི ན ཙུཏཱུཔཔཱཏཀྑཎསམངྒིནོཏི ཨདྷིཔྤཱཡོ.

མོཧཱུཔནིསྶཡཾ ནཱམ ཀམྨཾ ནིཧཱིནཾ ནིཧཱིནཕལཾ ཧོཏཱིཏི ཨཱཧ ‘‘མོཧནིསྶནྡཡུཏྟཏྟཱ’’ཏི. ཏབྦིཔརཱིཏེཏི ཏསྶ ཧཱིལི༹ཏཱདིབྷཱཝསྶ ཝིཔརཱིཏེ ¶ , ཨཧཱིལི༹ཏེ ཨནོཧཱིལི༹ཏེ ཨནོཉྙཱཏེ ཨནཝཉྙཱཏེ ཙིཏྟཱིཀཏེཏི ཨཏྠོ. སུཝཎྞེཏི སུནྡརཝཎྞེ. དུབྦཎྞེཏི ཨསུནྡརཝཎྞེ. སཱ པནཱཡཾ སུཝཎྞདུབྦཎྞཏཱ ཡཐཱཀྐམཾ ཀམྨསྶ ཨདོསདོསཱུཔནིསྶཡཏཱཡ ཧོཏཱིཏི ཨཱཧ ‘‘ཨདོསནིསྶནྡཡུཏྟཏྟཱ’’ཏིཨཱདི. སུནྡརཾ གཏིཾ གཏཱ སུགཏཱཏི ཨཱཧ ‘‘སུགཏིགཏེ’’ཏི, སུགཏིཾ ཨུཔཔནྣེཏི ཨཏྠོ. ཨལོབྷཛ྄ཛྷཱསཡཱ སཏྟཱ ཝདཉྙཱུ ཝིགཏམཙྪེརཱ ཨལོབྷཱུཔནིསྶཡེན ཀམྨུནཱ སུབྷགཱ སམིདྡྷཱ ཧོནྟཱིཏི ཨཱཧ ‘‘ཨལོབྷནིསྶནྡཡུཏྟཏྟཱ ཝཱ ཨཌྜྷེ མཧདྡྷནེ’’ཏི. དུཀྑཾ གཏིཾ གཏཱ དུགྒཏཱཏི ཨཱཧ ‘‘དུགྒཏིགཏེ’’ཏི. ལོབྷཛ྄ཛྷཱསཡཱ སཏྟཱ ལུདྡྷཱ མཙྪརིནོ ལོབྷཱུཔནིསྶཡེན ཀམྨུནཱ དུགྒཏཱ དུརུཔེཏཱ ཧོནྟཱིཏི ཨཱཧ ‘‘ལོབྷནིསྶནྡཡུཏྟཏྟཱ ཝཱ དལིདྡེ ཨཔྤནྣཔཱནེ’’ཏི.

ཨུཔཙིཏནྟི ཕལཱཝཧབྷཱཝེན ཀཏཾ. ཡཐཱ ཀཏཾ ཧི ཀམྨཾ ཕལདཱནསམཏྠཾ ཧོཏི, ཏཐཱ ཀཏཾ ཨུཔཙིཏཾ. ཙཝམཱནེཏིཨཱདཱིཧི དིབྦཙཀྑུཀིཙྩཾ ཝུཏྟནྟི ཝིསཡམུཁེན ཝིསཡཱིབྱཱཔཱརམཱཧ. པུརིམེཧཱིཏི ཝཱ ‘‘དིབྦེན ཙཀྑུནཱ’’ཏིཨཱདཱིནི པདཱནི སནྡྷཱཡ ཝུཏྟཾ. ཨཱདཱིཧཱིཏི ཨེཏྠ ཙ-སདྡོ ལུཏྟནིདྡིཊྛོ ¶ . ཏསྨཱ ‘‘དིབྦེན…པེ… པསྶཏཱི’’ཏི ཨིམེཧི, ‘‘ཙཝམཱནེ’’ཏིཨཱདཱིཧི ཙ དིབྦཙཀྑུཀིཙྩཾ ཝུཏྟནྟི ཨཏྠོ.

ཨིམིནཱ པན པདེནཱཏི ‘‘ཡཐཱཀམྨཱུཔགེ སཏྟེ པཛཱནཱཏཱི’’ཏི ཨིམིནཱ ཝཱཀྱེན. ཨིདྷ བྷིཀྑཱུཏི ཨིམསྨིཾ སཱསནེ བྷིཀྑུ, དིབྦཙཀྑུཉཱཎལཱབྷཱིཏི ཨདྷིཔྤཱཡོ. སོ ཙ དིབྦཙཀྑུཉཱཎལཱབྷཱི ནེརཡིཀེ ཙ སཏྟེ པཙྩཀྑཏོ དིསྭཱ ཋིཏོ. ཨེཝཾ མནསི ཀརོཏཱིཏི ཏེསཾ ནེརཡིཀཱནཾ ནིརཡསཾཝཏྟནིཡསྶ ཀམྨསྶ ཉཱཏུཀཱམཏཱཝསེན པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ པརིཀམྨཝསེན མནསི ཀརོཏི. ཀིཾ ནུ ཁོཏིཨཱདི མནསིཀཱརཝིདྷིདསྶནཾ. ཨེཝཾ པན པརིཀམྨཾ ཀཏྭཱ པཱདཀཛ྄ཛྷཱནཾ སམཱཔཛྫིཏྭཱ ཝུཊྛིཏསྶ ཏཾ ཀམྨཾ ཨཱརམྨཎཾ ཀཏྭཱ ཨཱཝཛྫནཾ ཨུཔྤཛྫཏི, ཏསྨིཾ ནིརུདྡྷེ ཙཏྟཱརི, པཉྩ ཝཱ ཛཝནཱནི ཛཝནྟཱིཏིཨཱདི སབྦཾ ཝུཏྟནཡམེཝ. ‘‘ཝིསུཾ པརིཀམྨཾ ནཱམ ནཏྠཱི’’ཏི ཨིདཾ པན དིབྦཙཀྑུཉཱཎེན ཝིནཱ ཡཐཱཀམྨཱུཔགཉཱཎསྶ ཝིསུཾ པརིཀམྨཾ ནཏྠཱིཏི ཨདྷིཔྤཱཡེན ཝུཏྟཾ. ཨེཝཉྩེཏཾ ཨིཙྪིཏབྦཾ, ཨཉྙཐཱ ཡཐཱཀམྨཱུཔགཉཱཎསྶ མཧགྒཏབྷཱཝོ ཨེཝ ན སིཡཱ. དེཝཱནཾ དསྶནེཔི ཨེསེཝ ནཡོ. ནེརཡིཀདེཝགྒཧཎཾ ཙེཏྠ ནིདསྶནམཏྟཾ དཊྛབྦཾ. ཨཱཀངྑམཱནོ ཧི དིབྦཙཀྑུལཱབྷཱི ¶ ཨཉྙགཏིཀེསུཔི ཨེཝཾ པཊིཔཛྫཏིཡེཝ. ཏཐཱ ཧི ཝཀྑཏི ‘‘ཨཔཱཡགྒཧཎེན ཏིརཙྪཱནཡོནིཾ དཱིཔེཏཱི’’ཏི (ཝིསུདྡྷི. ༢.༤༡༡), ‘‘སུགཏིགྒཧཎེན མནུསྶགཏིཔི སངྒཡ྄ཧཏཱི’’ཏི (ཝིསུདྡྷི. ༢.༤༡༡) ཙ. ཏཾ ནིརཡསཾཝཏྟནིཡཾ ཀམྨཾ ཨཱརམྨཎཾ ཨེཏསྶཱཏི ཏཾཀམྨཱརམྨཎཾ. ཕཱརུསཀཝནཱདཱིསཱུཏི ཨཱདི-སདྡེན ཙིཏྟལཏཱཝནཱདཱིནཾ སངྒཧོ.

ཡཐཱ ཙིམསྶཱཏི ཡཐཱ ཙ ཨིམསྶ ཡཐཱཀམྨཱུཔགཉཱཎསྶ ཝིསུཾ པརིཀམྨཾ ནཏྠི, ཨེཝཾ ཨནཱགཏཾསཉཱཎསྶཔཱིཏི ཝིསུཾ པརིཀམྨཱབྷཱཝཾ ནིདསྶེཏི. ཏཏྠ ཀཱརཎམཱཧ ‘‘དིབྦཙཀྑུཔཱདཀཱནེཝ ཧི ཨིམཱནཱི’’ཏི. ཏཏྲཱཡམདྷིཔྤཱཡོ – ཡཐཱ དིབྦཙཀྑུལཱབྷཱི ནིརཡཱདིཨབྷིམུཁཾ ཨཱལོཀཾ ཝཌྜྷེཏྭཱ, ནེརཡིཀཱདིཀེ སཏྟེ དིསྭཱ ཏེཧི པུབྦེ ཨཱཡཱུཧིཏཾ ནིརཡསཾཝཏྟནིཡཱདིཀཾ ཀམྨཾ ཏཱདིསེན སམཱདཱནེན, ཏཛྫེན ཙ མནསིཀཱརེན པརིཀྑཏེ ཙིཏྟེ ཡཱཐཱཝཏོ ཛཱནཱཏི, ཨེཝཾ ཡསྶ ཡསྶ སཏྟསྶ སམནནྟརཱ ཨནཱགཏཾ ཨཏྟབྷཱཝཾ ཉཱཏུཀཱམོ ཏཾ ཏཾ ཨོདིསྶ ཨཱལོཀཾ ཝཌྜྷེཏྭཱ ཏེན ཏེན ཨཏཱིཏེ, ཨེཏརཧི ཝཱ ཨཱཡཱུཧིཏཾ ཏསྶ ནིབྦཏྟཀཾ ཀམྨཾ ཡཐཱཀམྨཱུཔགཉཱཎེན དིསྭཱ ཏེན ནིབྦཏྟེཏབྦཾ ཨནཱགཏཾ ཨཏྟབྷཱཝཾ ཉཱཏུཀཱམོ ཏཱདིསེན སམཱདཱནེན, ཏཛྫེན ཙ མནསིཀཱརེན པརིཀྑཏེ ཙིཏྟེ ཡཱཐཱཝཏོ ཛཱནཱཏི. ཨེསེཝ ནཡོ ཏཏོ པརེསུཔི ¶ ཨཏྟབྷཱཝེསུ. ཨེཏཾ ཨནཱགཏཾསཉཱཎཾ ནཱམ. ཡསྨཱ ཨེཏཾ དྭཡཾ དིབྦཙཀྑུཉཱཎེ སཏིཡེཝ སིཛ྄ཛྷཏི, ནཱསཏི. ཏེན ཝུཏྟཾ ‘‘ཨིམཱནི དིབྦཙཀྑུནཱ སཧེཝ ཨིཛ྄ཛྷནྟཱི’’ཏི.

ཀཱཡེན དུཊྛུ ཙརིཏཾ, ཀཱཡཏོ ཝཱ ཨུཔྤནྣཾ ཀིལེསཔཱུཏིཀཏྟཱ དུཊྛཾ ཙརིཏཾ ཀཱཡདུཙྩརིཏནྟི ཨེཝཾ ཡོཛེཏབྦོ. ཀཱཡོཏི ཙེཏྠ ཙོཔནཀཱཡོ ཨདྷིཔྤེཏོ. ཀཱཡཝིཉྙཏྟིཝསེན པཝཏྟཾ ཨཀུསལཾ ཀཱཡཀམྨཾ ཀཱཡདུཙྩརིཏནྟི. ཨིཏརེསཱུཏི ཝཙཱིམནོདུཙྩརིཏེསུ. ཡསྨིཾ སནྟཱནེ ཀམྨཾ ཀཏཱུཔཙིཏཾ, ཨསཏིསྶ ཨནྟརུཔཙྪེདེ ཝིཔཱཀཱརཧབྷཱཝསྶ ཨཝིགཙྪནཏོ སོ ཏེན སཧིཏོཡེཝཱཏི ཝཏྟབྦོཏི ཨཱཧ ‘‘སམནྣཱགཏཱཏི སམངྒཱིབྷཱུཏཱ’’ཏི. ‘‘ཨནཏྠཀཱམཱ ཧུཏྭཱ’’ཏི ཨེཏེན མཱཏཱཔིཏརོ ཝིཡ པུཏྟཱནཾ, ཨཱཙརིཡུཔཛ྄ཛྷཱཡཱ ཝིཡ ཙ ནིསྶིཏཀཱནཾ ཨཏྠཀཱམཱ ཧུཏྭཱ གརཧཀཱ ཨུཔཝཱདཀཱ ན ཧོནྟཱིཏི དསྶེཏི. གུཎཔརིདྷཾསནེནཱཏི ཝིཛྫམཱནཱནཾ གུཎཱནཾ ཝིདྡྷཾསནེན, ཝིནཱསནེནཱཏི ཨཏྠོ. ནནུ ཙ ¶ ཨནྟིམཝཏྠུནཱཔི ཨུཔཝཱདོ གུཎཔརིདྷཾསནམེཝཱཏི? སཙྩམེཏཾ. གུཎཱཏི པནེཏྠ ཛྷཱནཱདིཝིསེསཱ ཨུཏྟརིམནུསྶདྷམྨཱ ཨདྷིཔྤེཏཱཏི སཱིལཔརིདྷཾསནཾ ཝིསུཾ གཧིཏཾ. ཏེནཱཧ ‘‘ནཏྠི ཨིམེསཾ སམཎདྷམྨོ’’ཏིཨཱདི. སམཎདྷམྨོཏི ཙ སཱིལསཾཡམཾ སནྡྷཱཡ ཝདཏི. ཛཱནཾ ཝཱཏི ཡཾ ཨུཔཝདཏི, ཏསྶ ཨརིཡབྷཱཝཾ ཛཱནནྟོ ཝཱ. ཨཛཱནཾ ཝཱཏི ཨཛཱནནྟོ ཝཱ. ཛཱནནཾ ཨཛཱནནཾ ཙེཏྠ ཨཔྤམཱཎཾ, ཨརིཡབྷཱཝོ ཨེཝ པམཱཎཾ. ཏེནཱཧ ‘‘ཨུབྷཡཐཱཔི ཨརིཡཱུཔཝཱདོཝ ཧོཏཱི’’ཏི. ‘‘ཨརིཡོ’’ཏི པན ཨཛཱནཏོ ཨདུཊྛཙིཏྟསྶེཝ ཏཏྠ ཨརིཡགུཎཱབྷཱཝཾ པཝེདེནྟསྶ གུཎཔརིདྷཾསནཾ ན ཧོཏཱིཏི ཏསྶ ཨརིཡཱུཔཝཱདོ ནཏྠཱིཏི ཝདནྟི. སཏེཀིཙྪཾ པན ཧོཏི ཁམཱཔནེན, ན ཨནནྟརིཡཾ ཝིཡ ཨཏེཀིཙྪཾ.

རུཛ྄ཛྷཏཱིཏི ཏུདཏི, དུཀྑཾ ཝེདནཾ ཨུཔྤཱདེཏཱིཏི ཨཏྠོ. ཏནྟི ཏཾ ཐེརཾ, ཏཾ ཝཱ ཀིརིཡཾ. ཛཱནནྟོ ཨེཝ ཐེརོ ‘‘ཨཏྠི ཏེ, ཨཱཝུསོ, པཏིཊྛཱ’’ཏི པུཙྪི. ཨིཏརོཔི སཙྩཱབྷིསམཡོ སཱསནེ པཏིཊྛཱཏི ཨཱཧ ‘‘སོཏཱཔནྣོ ཨཧ’’ནྟི. ཐེརོ ཏཾ ཀརུཎཱཡམཱནོ ‘‘ཁཱིཎཱསཝོ ཏཡཱ ཨུཔཝདིཏོ’’ཏི ཨཏྟཱནཾ ཨཱཝིཀཱསི.

སཙེ ནཝཀཏརཱ ཧོནྟི ཏསྨིཾ ཝིཧཱརེ བྷིཀྑཱུ. སམྨུཁཱ ཨཁམཱཔེནྟེཔཱིཏི པུརཏོ ཁམཱཔནེ ཨསམྦྷཝནྟེཔི. ‘‘ཨཁམནྟེ’’ཏི ཝཱ པཱཋོ. ཏཾ སོཏཱཔནྣསྶ ཝསེན ཝེདིཏབྦཾ.

པརིནིབྦུཏམཉྩཊྛཱནནྟི པཱུཛཱཀརཎཊྛཱནཾ སནྡྷཱཡཱཧ.

སམཱདཱཏབྦཊྛེན ¶ སམཱདཱནཱནི, ཀམྨཱནི སམཱདཱནཱནི ཡེསཾ, ཏེ ཀམྨསམཱདཱནཱ, མིཙྪཱདིཊྛིཝསེན ཀམྨསམཱདཱནཱ, ཧེཏུཨཏྠཾ ཝཱ ཨནྟོགདྷཾ ཀཏྭཱ མིཙྪཱདིཊྛིཝསེན པརེ ཀམྨེསུ སམཱདཱཔཀཱ མིཙྪཱདིཊྛིཀམྨསམཱདཱནཱ. ཏཡིམམཏྠཾ དསྶེནྟོ ‘‘མིཙྪཱདིཊྛིཝསེནཱ’’ཏིཨཱདིམཱཧ. སཱིལསམྤནྣོཏིཨཱདི པརིཔཀྐིནྡྲིཡསྶ མགྒསམངྒིནོ ཝསེན ཝུཏྟཾ. ཨགྒམགྒཊྛེ པན ཝཏྟབྦམེཝ ནཏྠི. ཨཉྙནྟི ཨརཧཏྟཾ. ཨེཝཾསམྤདནྟི ཡཐཱ ཏཾ ཨཝསྶམྦྷཱཝཱི, ཨེཝམིདམྤཱིཏི ཨཏྠོ. ཏཾ ཝཱཙཾ ཨཔྤཧཱཡཱཏིཨཱདཱིསུ ཨརིཡཱུཔཝཱདཾ སནྡྷཱཡ ‘‘པུན ཨེཝརཱུཔིཾ ཝཱཙཾ ན ཝཀྑཱམཱི’’ཏི ཝདནྟོ ཝཱཙཾ པཛཧཏི ནཱམ, ‘‘པུན ཨེཝརཱུཔཾ ཙིཏྟཾ ན ཨུཔྤཱདེསྶཱམཱི’’ཏི ཙིནྟེནྟོ ཙིཏྟཾ པཛཧཏི ནཱམ, ‘‘པུན ཨེཝརཱུཔིཾ དིཊྛིཾ ན གཎྷིསྶཱམཱི’’ཏི པཛཧནྟོ དིཊྛིཾ པཛཧཏི ནཱམ, ཏཐཱ ཨཀརོནྟོ ནེཝ པཛཧཏི, ན པཊིནིསྶཛྫཏི. ཡཐཱབྷཏཾ ¶ ནིཀྑིཏྟོ, ཨེཝཾ ནིརཡེཏི ཡཐཱ ནིརཡཔཱལེཧི ཨཱཧརིཏྭཱ ནིརཡེ ཋཔིཏོ, ཨེཝཾ ནིརཡེ ཋཔིཏོཡེཝཱཏི ཨཏྠོ. མིཙྪཱདིཊྛིཝསེན ཨཀཏྟབྦཾ ནཱམ པཱཔཾ ནཏྠི, ཡཏོ སཾསཱརཁཱཎུབྷཱཝོཔི ནཱམ ཧོཏཱིཏི ཨཱཧ ‘‘མིཙྪཱདིཊྛིཔརམཱནི, བྷིཀྑཝེ, ཝཛྫཱནཱི’’ཏི.

‘‘ཨུཙྪིནྣབྷཝནེཏྟིཀོ, བྷིཀྑཝེ, ཏཐཱགཏསྶ ཀཱཡོ ཏིཊྛཏི, ཨཡཉྩེཝ ཀཱཡོ, བཧིདྡྷཱ ཙ ནཱམརཱུཔ’’ནྟི (དཱི. ནི. ༡.༡༤༧) ཨེཝམཱདཱིསུ ཝིཡ ཨིདྷ ཀཱཡ-སདྡོ ཁནྡྷཔཉྩཀཝིསཡོཏི ཨཱཧ ‘‘ཀཱཡསྶ བྷེདཱཏི ཨུཔཱདིནྣཀྑནྡྷཔརིཙྩཱགཱ’’ཏི. ཨཝཱིཏརཱགསྶ མརཎཏོ པརཾ ནཱམ བྷཝནྟརཱུཔཱདཱནམེཝཱཏི ཨཱཧ ‘‘པརཾ མརཎཱཏི ཏདནནྟརཾ ཨབྷིནིབྦཏྟིཀྑནྡྷགྒཧཎེ’’ཏི. ཡེན ཏིཊྛཏི, ཏསྶ ཨུཔཙྪེདེནེཝ ཀཱཡོ བྷིཛྫཏཱིཏི ཨཱཧ ‘‘ཀཱཡསྶ བྷེདཱཏི ཛཱིཝིཏིནྡྲིཡསྶ ཨུཔཙྪེདཱ’’ཏི.

ཨེཏི ཨིམསྨཱ སུཁནྟི ཨཡོ, པུཉྙནྟི ཨཱཧ ‘‘པུཉྙསམྨཏཱ ཨཡཱ’’ཏི. ཨཡནྟི ཨེཏསྨཱ སུཁཱནཱིཏི ཨཱཡོ, པུཉྙཀམྨཱདིསུཁསཱདྷནཾ. ཏེནཱཧ ‘‘སུཁཱནཾ ཝཱ ཨཱཡསྶ ཨབྷཱཝཱ’’ཏི. ཨིཡཏི ཨསྶཱདིཡཏཱིཏི ཨཡོ, ཨསྶཱདོཏི ཨཱཧ ‘‘ཨསྶཱདསཉྙིཏོ ཨཡོ’’ཏི.

ནཱགརཱཛཱདཱིནནྟི ཨཱདི-སདྡེན སུཔཎྞཱདཱིནཾ སངྒཧོ. ཨསུརསདིསནྟི པེཏཱསུརསདིསཾ. སོཏི ཨསུརཀཱཡོ. སབྦསམུསྶཡེཧཱིཏི སབྦེཧི སམྤཏྟིསམུསྶཡེཧི. ཝུཏྟཝིཔརིཡཱཡེནཱཏི ‘‘སུཊྛུ ཙརིཏཾ, སོབྷནཾ ཝཱ ཙརིཏཾ ཨནཝཛྫཏྟཱ’’ཏིཨཱདིནཱ ‘‘ཀཱཡདུཙྩརིཏེནཱ’’ཏིཨཱདཱིནཾ པདཱནཾ ཝུཏྟསྶ ཨཏྠསྶ ཝིཔརིཡཱཡེན.

ནིགམནཝཙནཾ ¶ ཝུཏྟསྶེཝཏྠསྶ པུན ཝཙནནྟི ཀཏྭཱ. ཨཡམེཏྠ སངྑེཔཏྠོཏི ‘‘དིབྦེན ཙཀྑུནཱ…པེ… པསྶཏཱི’’ཏི ཨེཏྠ ཨཡཾ ཡཐཱཝུཏྟོ སངྑེཔཏྠོ.

༤༡༢. ཀསིཎཱརམྨཎནྟི ཨཊྛནྣམྤི ཀསིཎཱནཾ ཝསེན ཀསིཎཱརམྨཎཾ. སབྦཱཀཱརེནཱཏི ‘‘ཙུདྡསཝིདྷེན ཙིཏྟཔརིདམནེན ཨཊྛངྒསམནྣཱགམེན བྷཱུམིཔཱདཔདམཱུལསམྤཱདནེནཱ’’ཏི ཨིམིནཱ སབྦཔྤཀཱརེན. ཨབྷིནཱིཧཱརཀྑམཾ དིབྦཙཀྑུཉཱཎཱབྷིམུཁཾ པེསནཱརཧཾ པེསནཡོགྒཾ ཀཏྭཱ. ཨཱསནྣཾ ཀཱཏབྦནྟི དིབྦཙཀྑུཉཱཎུཔྤཏྟིཡཱ སམཱིཔབྷཱུཏཾ ཀཱཏབྦཾ. ཏཏྠ ཨུཔཙཱརཛ྄ཛྷཱནཾ པགུཎཏརཾ ཀཏྭཱ ཨཱརམྨཎཉྩ ཝཌྜྷེཏབྦཾ. ཏེནཱཧ ‘‘ཨུཔཙཱརཛ྄ཛྷཱནགོཙརཾ ཀཏྭཱ ¶ ཝཌྜྷེཏྭཱ ཋཔེཏབྦ’’ནྟི. ཏཏྠཱཏི ཏསྨིཾ ཝཌྜྷིཏེ ཀསིཎཱརམྨཎེ. ཨཔྤནཱཏི ཛྷཱནཝསེན ཨཔྤནཱ. ན ཧི ཨཀཏཔརིཀམྨསྶ ཨབྷིཉྙཱཝསེན ཨཔྤནཱ ཨིཛ྄ཛྷཏི. ཏེནཱཧ ‘‘པཱདཀཛ྄ཛྷཱནནིསྶཡཾ ཧོཏཱི’’ཏི, པཱདཀཛ྄ཛྷཱནཱརམྨཎཾ ཧོཏཱིཏི ཨཏྠོ. ན པརིཀམྨནིསྶཡནྟི པརིཀམྨསྶ ཏཾ ཀསིཎཱརམྨཎཾ ཨཔསྶཡོ ན ཧོཏི. ཏཐཱ སཏི རཱུཔདསྶནཾ ན སིཡཱ. ཨིམེསཱུཏི ཡཐཱཝུཏྟེསུ ཏེཛོཀསིཎཱདཱིསུ ཏཱིསུ ཀསིཎེསུ. ཨུཔྤཱདེཏྭཱཏི ཨུཔཙཱརཛ྄ཛྷཱནུཔྤཱདནེན ཨུཔྤཱདེཏྭཱ. ཨུཔཙཱརཛ྄ཛྷཱནཔཝཏྟིཡཱ ཧི སདྡྷིཾ པཊིབྷཱགནིམིཏྟུཔྤཏྟི. ཏཏྠཱཏི ཀསིཎནིདྡེསེ.

ཨནྟོཡེཝ རཱུཔགཏཾ པསྶིཏབྦཾ ན བཧིདྡྷཱ ཝིཀྑེཔཱཔཏྟིཧེཏུབྷཱཝཏོ. པརིཀམྨསྶ ཝཱརོ ཨཏིཀྐམཏཱིཏི ཨིདྷ པརིཀམྨཾ ནཱམ ཡཐཱཝུཏྟཀསིཎཱརམྨཎཾ ཨུཔཙཱརཛ྄ཛྷཱནཾ, ཏཾ རཱུཔགཏཾ པསྶཏོ ན པཝཏྟཏི. ཀསིཎཱལོཀཝསེན ཙ རཱུཔགཏདསྶནཾ, ཀསིཎཱལོཀོ ཙ པརིཀམྨཝསེནཱཏི ཏདུབྷཡམྤི པརིཀམྨསྶ ཨཔྤཝཏྟིཡཱ ན ཧོཏི. ཏེནཱཧ ‘‘ཏཏོ ཨཱལོཀོ ཨནྟརདྷཱཡཏི, ཏསྨིཾ ཨནྟརཧིཏེ རཱུཔགཏམྤི ན དིསྶཏཱི’’ཏི. རཱུཔགཏཾ པསྶཏོ པརིཀམྨསྶ ཝཱརོ ཨཏིཀྐམཏི, པརིཀམྨམཏིཀྐནྟསྶ ཀསིཎཱརམྨཎཾ ཉཱཎཾ ན ཧོཏཱིཏི རཱུཔགཏཾ ན དིསྶཏི, ཀཐཾ པན པཊིཔཛྫིཏབྦནྟི ཨཱཧ ‘‘ཨཐཱནེནཱ’’ཏིཨཱདི. ཨེཝཾ ཨནུཀྐམེནཱཏི པུནཔྤུནཾ པཱདཀཛ྄ཛྷཱནཾ སམཱཔཛྫིཏྭཱ ཏཏོ ཏཏོ ཝུཊྛཱཡ ཨབྷིཎྷཾ ཨཱལོཀསྶ ཕརཎཝསེན ཨཱལོཀོ ཐཱམགཏོ ཧོཏི ཙིརཊྛཱཡཱི. ཏཐཱ ཙ སཏི ཏཏྠ སུཙིརམྤི རཱུཔགཏཾ པསྶཏེཝ. ཏེན ཝུཏྟཾ ‘‘ཨེཏྠ ཨཱལོཀོ…པེ… ཧོཏཱི’’ཏི.

སྭཱཡམཏྠོ ཏིཎུཀྐཱུཔམཱཡ ཝིབྷཱཝེཏབྦོཏི དསྶེནྟོ ཨཱཧ ‘‘རཏྟིཾ ཏིཎུཀྐཱཡཱ’’ཏིཨཱདི. ཏཏྠ པུནཔྤུནཾ པཝེསནནྟི པུནཔྤུནཾ པཱདཀཛ྄ཛྷཱནསམཱཔཛྫནཾ. ཐཱམགཏཱལོཀསྶ ¶ ཡཐཱཔརིཙྪེདེན ཋཱནནྟི ཡཏྟཀཾ ཋཱནཾ པརིཙྪིནྡིཏྭཱ ཀསིཎཾ ཝཌྜྷིཏཾ, ཐཱམགཏསྶ ཨཱལོཀསྶ ཏཏྟཀཾ ཕརིཏྭཱ ཨཝཊྛཱནཾ.

ཨནཱཔཱཐགཏནྟི ཨཱཔཱཐགམནཡོགྱསྶ ཝསེན ཝུཏྟཾ. ཨནྟོཀུཙྪིགཏཱདི པན ཏདབྷཱཝཏོ ཏེན ཝིསེསིཏབྦམེཝ. ཏདེཝཱཏི དིབྦཙཀྑུམེཝ ¶ . ཨེཏྠཱཏི ཨེཏེསུ རཱུཔམཱརབྦྷ པཝཏྟཙིཏྟེསུ. རཱུཔདསྶནསམཏྠནྟི རཱུཔཾ སབྷཱཝཏོ ཝིབྷཱཝནསམཏྠཾ ཙཀྑུཝིཉྙཱཎཾ ཝིཡ. པུབྦབྷཱགཙིཏྟཱནཱིཏི ཨཱཝཛྫནཔརིཀམྨསངྑཱཏཱནི པུབྦབྷཱགཙིཏྟཱནི. ཏཱནི ཧི ཨཱརམྨཎཾ ཀརོནྟཱནིཔི ན ཡཱཐཱཝཏོ ཏཾ ཝིབྷཱཝེཏྭཱ པཝཏྟནྟི ཨཱཝཛྫནསམྤཊིཙྪནཙིཏྟཱནི ཝིཡ.

ཏཾ པནེཏཾ དིབྦཙཀྑུ. པརིཔནྠོཏི ཨནྟརཱཡིཀོ. ཛྷཱནཝིབྦྷནྟཀོཏི ཛྷཱནུམྨཏྟཀོ ཛྷཱནབྷཱཝནཱམུཁེན ཨུམྨཱདཔྤཏྟོ. ཨཔྤམཏྟེན བྷཝིཏབྦནྟི ‘‘དིབྦཙཀྑུ མཡཱ ཨདྷིགཏ’’ནྟི སནྟོསཾ ཨནཱཔཛྫིཏྭཱ ཝིཔསྶནཱནུཡོགཝསེན ཝཱ སཙྩཱབྷིསམཡཝསེན ཝཱ ཨཔྤམཏྟེན བྷཝིཏབྦཾ.

‘‘ཨེཝཾ པསྶིཏུཀཱམེནཱ’’ཏིཨཱདིནཱ དིབྦཙཀྑུསྶ ནཱནཱཝཛྫནཔརིཀམྨཉྩེཝ དིབྦཙཀྑུཉཱཎཉྩ དསྶིཏཾ, ན ཏསྶ ཨུཔྤཏྟིཀྐམོཏི ཏཾ དསྶེཏུཾ ‘‘ཏཏྲཱཡ’’ནྟིཨཱདི ཝུཏྟཾ. ཏཾ ཧེཊྛཱ ཝུཏྟནཡཏྟཱ སུཝིཉྙེཡྻམེཝ.

ཙུཏཱུཔཔཱཏཉཱཎཀཐཱཝཎྞནཱ ནིཊྛིཏཱ.

པཀིཎྞཀཀཐཱཝཎྞནཱ

༤༡༣. ཨིཏཱིཏི ཨེཝཾ ཝུཏྟཔྤཀཱརེནཱཏི ཨཏྠོ. ཏེན ‘‘སོ ཨེཝཾ སམཱཧིཏེ ཙིཏྟེ’’ཏིཨཱདིནཱ (དཱི. ནི. ༡.༢༤༤-༢༤༥; མ. ནི. ༡.༣༨༤, ༤༣༡-༤༣༣; པཱརཱ. ༡༢-༡༤) ཡཐཱདསྶིཏཔཱལི༹གཏིཾ, ཏསྶཱ ཨཏྠཝིཝརཎནཡཉྩ པཙྩཱམསཏི. སཙྩེསུ ཝིཡ ཨརིཡསཙྩཱནི ཁནྡྷེསུ ཨུཔཱདཱནཀྑནྡྷཱ ཨནྟོགདྷཱ. ཏདུབྷཡེ ཙ སབྷཱཝཏོ, སམུདཡཏོ, ཨཏྠངྒམཏོ, ཨསྶཱདཏོ, ཨཱདཱིནཝཏོ, ནིསྶརཎཏོ ཙ ཡཐཱབྷཱུཏཾ སཡམྦྷུཉཱཎེན ཨཝེདི ཨཉྙཱསི ¶ པཊིཝིཛ྄ཛྷི པཝེདེསི ཝཱཏི སཱཏིསཡེན པཉྩཀྑནྡྷཱཝབོདྷེན བྷགཝཱཝ ཐོམེཏབྦོཏི ཨཱཧ ‘‘པཉྩཀྑནྡྷཝིདཱུ’’ཏི. ཉཏྭཱ ཝིཉྙེཡྻཱཏི སམྦནྡྷོ. ཏཱསཱུཏི པཉྩསུ ཨབྷིཉྙཱསུ. ཏགྒཧཎེནེཝ ཙ པརིབྷཎྜཉཱཎཱནཾ གཧིཏཏྟཱ ‘‘པཉྩཱ’’ཏི ཝུཏྟཾ. ཏེནཱཧ ‘‘ཨེཏཱསུ ཧཱི’’ཏིཨཱདི.

ཏཏྠ པརིབྷཎྜཉཱཎཱནཱིཏི པརིཝཱརཉཱཎཱནི. ཡཐཱ ཧི སིནེརུསྶ པརིཝཱརཊྛཱནཱནི ཡཱནི ཏཾསིདྡྷིཡཱ སིདྡྷཱནི མེཁལཊྛཱནཱནི པརིབྷཎྜཱནཱིཏི ཝུཙྩནྟི, ཨེཝཾ ཨིམཱནིཔི དིབྦཙཀྑུསིདྡྷིཡཱ སིདྡྷཱནི ཏསྶ པརིབྷཎྜཱནཱིཏི ཝུཏྟཱནི. ཨིདྷཱགཏཱནཱིཏི ཨེཏྠ ཨིདྷཱཏི ཡཐཱདསྶིཏཱནི སུཏྟཔདཱནི སནྡྷཱཡ ཝུཏྟཾ. ཏཏོ ¶ ཨཉྙེསུ པན སཱམཉྙཕལཱདཱིསུ མནོམཡཉཱཎམྤི ཝིསུཾ ཨབྷིཉྙཱཉཱཎབྷཱཝེན ཨཱགཏཾ.

‘‘ཏེསཱུ’’ཏི ཨིདཾ པཙྩཱམསནཾ ཀིཾ ཏིཀཱནཾ, ཨུདཱཧུ ཨཱརམྨཎཱནནྟི? ཀིཉྩེཏྠ ཡདི ཏིཀཱནཾ, ཏདཡུཏྟཾ. ན ཧི ཏིཀེསུ ཨབྷིཉྙཱཉཱཎཱནི པཝཏྟནྟི. ཨཐ ཨཱརམྨཎཱནཾ, ཏམྤི ཨཡུཏྟཾ. ན ཧི ཨཉྙཾ ཨུདྡིསིཏྭཱ ཨཉྙསྶ པཙྩཱམསནཾ ཡུཏྟནྟི. ཡཐཱ ཨིཙྪཏི, ཏཐཱ བྷཝཏུ ཏཱཝ ཏིཀཱནཾ, ནནུ ཝུཏྟཾ ‘‘ན ཧི ཏིཀེསུ ཨབྷིཉྙཱཉཱཎཱནི པཝཏྟནྟཱི’’ཏི? ནཱཡཾ ཝིརོདྷོ ཏིཀཝོཧཱརེན ཨཱརམྨཎཱནཾཡེཝ གཡ྄ཧམཱནཏྟཱ. ཨཐ ཝཱ པན ཧོཏུ ཨཱརམྨཎཱནཾ, ནནུ ཝུཏྟཾ ‘‘ན ཧི ཨཉྙཾ ཨུདྡིསིཏྭཱ ཨཉྙསྶ པཙྩཱམསནཾ ཡུཏྟ’’ནྟི? ཨཡམྤི ན དོསོ ཡཐཱཝུཏྟཀཱརཎེནེཝཱཏི.

༤༡༤. ཨསཏིཔི ཝཏྠུབྷེདེ བྷཱུམིཀཱལསནྟཱནབྷེདཝསེན བྷིནྣེསུ སཏྟསུ ཨཱརམྨཎེསུ. ཏིཀཝསེན ཧེས བྷེདོ གཧིཏོ. ཨིདྡྷིཝིདྷཉཱཎསྶ མགྒཱརམྨཎཏཱཡ ཨབྷཱཝཏོ ཨིདྷ མགྒཱརམྨཎཏིཀོ ན ལབྦྷཏི. ཏནྟི ཨིདྡྷིཝིདྷཉཱཎཾ. ཀཱཡཾ ཙིཏྟསནྣིསྶིཏཾ ཀཏྭཱཏིཨཱདཱིསུ ཡཾ ཝཏྟབྦཾ, ཏཾ ཧེཊྛཱ ཝུཏྟམེཝ. ཨུཔཡོགལདྡྷནྟི ལདྡྷཨུཔཡོགཝཙནཾ. དུཏིཡཱཝིབྷཏྟིཝསེན ཝུཏྟཾ ‘‘ཀཱཡཾ པརིཎཱམེཏཱི’’ཏི. ཏེནཱཧ ‘‘རཱུཔཀཱཡཱརམྨཎཏོ’’ཏི, རཱུཔཀཱཡསྶ ཝཎྞཱརམྨཎཏོཏི ཨཏྠོ.

ཏདེཝ ཙིཏྟནྟི ཡདེཝ ཀཱཡཝསེན ཙིཏྟཔརིཎཱམནེ ཝུཏྟཾ པཱདཀཛ྄ཛྷཱནཙིཏྟཾ, ཏདེཝ. རཱམགཱམེ ཙེཏིཡཾ ཋཔེཏྭཱ སེསེསུ སཏྟསུ ཙེཏིཡེསུ དྷཱཏུཡོ ཨིདྡྷིཡཱ ཨཱཧརིཏྭཱ རཱཛགཧེ བྷཱུམིགྷརམཎྜཔེ ཀཏཾ མཧཱདྷཱཏུནིདྷཱནཾ. ‘‘ཨིམེ གནྡྷཱ’’ཏིཨཱདིནཱ པཙྩུཔྤནྣེ གནྡྷཱདིཀེ གཧེཏྭཱཔི ཨསུསྶནཱདིཝིསེསཡུཏྟཾ ¶ ཨནཱགཏམེཝ ནེསཾ རཱུཔཾ ཨདྷིཊྛཱནཙིཏྟསྶ ཨཱརམྨཎཾ ཧོཏི ཨནཱགཏཱདྷིཊྛཱནཏྟཱ. ཝཏྟནིཡསེནཱསནཾ ནཱམ ཝིཉྫྷཱཊཝིཡཾ ཝིཧཱརོ. དདྷིརསནྟི དདྷིམཎྜོ, ཏཾ ཨདྷིཊྛཧནྟསྶ ཨནཱགཏཾ དདྷིཝཎྞཾ ཨཱརམྨཎཾ ཧོཏི. པཙྩུཔྤནྣཱརམྨཎཾ ཧོཏི པཙྩུཔྤནྣསྶ རཱུཔཀཱཡསྶ ཨཱརམྨཎཀརཎཏོ.

སཀཱཡཙིཏྟཱནནྟི ཨཏྟནོ ཀཱཡསྶ, ཙིཏྟསྶ ཙ.

༤༡༥. སདྡོ ཙ པརིཏྟོ སབྦསྶ རཱུཔསྶ ཀཱམཱཝཙརབྷཱཝཏོ. ཝིཛྫམཱནམེཝཱཏི ཝཏྟམཱནཾཡེཝ.

༤༡༦. སོཏཱཔནྣསྶ ¶ ཙིཏྟནྟི སོཏཱཔནྣསྶ ཨཱཝེཎིཀཾ ཙིཏྟཾ. སཀདཱགཱམིསྶཱཏིཨཱདཱིསུཔི ཨེསེཝ ནཡོ. ཡཱཝ ཨརཧཏོ ནེཏབྦནྟི ‘‘སཀདཱགཱམཱི ཨནཱགཱམིནོ ཙིཏྟཾ ན ཛཱནཱཏི, ཨནཱགཱམཱི ཨརཧཏོ’’ཏི ཨེཝཾ ནེཏབྦཾ. སབྦེསནྟི སབྦེསཾ ཨརིཡཱནཾ ཛཱནཱཏི, ཀོ པན ཝཱདོ ཨནརིཡཱནཾ. ཨཉྙོཔི ཙ ཨུཔརིམོ ཨནཱགཱམིཨཱདི ཧེཊྛིམསྶ སཀདཱགཱམིཨཱདིཀསྶ ཙིཏྟཾ ཛཱནཱཏཱིཏི སམྦནྡྷོ.

ཨཏཱིཏསྶ, ཨནཱགཏསྶ ཙ པརསྶ ཙིཏྟསྶ ཛཱནནཾ སམྦྷཝཏི, པཙྩུཔྤནྣསྶ པན ན སམྦྷཝཏཱིཏི ཨདྷིཔྤཱཡེན པུཙྪཏི ‘‘ཀཐཾ པཙྩུཔྤནྣཾ ཨཱརམྨཎཾ ཧོཏཱི’’ཏི. ཨིཏརོ ཡཏྠ སམྦྷཝཏི, ཏཾདསྶནཏྠཾ པཙྩུཔྤནྣཾ ཏཱཝ ཝིབྷཛིཏྭཱ དསྶེནྟོ ‘‘པཙྩུཔྤནྣཾ ནཱམ ཏིཝིདྷ’’ནྟིཨཱདིམཱཧ. ཏཏྠ ཨུཔྤཱདཊྛིཏིབྷངྒཔྤཏྟནྟི ཨུཔྤཱདཾ, ཋིཏིཾ, བྷངྒཉྩ པཏྟཾ, ཁཎཏྟཡཔརིཡཱཔནྣནྟི ཨཏྠོ. ཨེཏྠནྟརེ ཨེཀདྭེསནྟཏིཝཱརཱ ཝེདིཏབྦཱཏི ཨེཏྠནྟརེ པཝཏྟཱ རཱུཔསནྟཏིཝཱརཱ ཨེཀདྭེསནྟཏིཝཱརཱ ནཱམཱཏི ཝེདིཏབྦཱཏི ཨཏྠོ. ཨཱལོཀཊྛཱནཏོ ཨོཝརཀཾ པཝིཊྛསྶ པགེཝ ཏཏྠ ནིསིནྣསྶ ཝིཡ ཡཱཝ རཱུཔགཏཾ པཱཀཊཾ ཧོཏི. ཏཏྠ ཨུཔཌྜྷཝེལཱ ཨཝིབྷཱུཏཝཱརཱ, ཨུཔཌྜྷཝེལཱ ཝིབྷཱུཏཝཱརཱ, ཏདུབྷཡཾ གཧེཏྭཱ ‘‘དྭེ སནྟཏིཝཱརཱ’’ཏི ཝུཏྟཾ. ཏཡིདཾ ན སབྦསཱདྷཱརཎཾ, ཨེཀཙྩསྶ སཱིགྷམྤི པཱཀཊཾ ཧོཏཱིཏི ‘‘ཨེཀདྭེསནྟཏིཝཱརཱ’’ཏི ཨེཀགྒཧཎམྤི ཀཏཾ, ཨཏིཔརིཏྟསབྷཱཝཨུཏུཨཱདིསམུཊྛཱནཱ ཝཱ ཨེཀདྭེསནྟཏིཝཱརཱ ཝེདིཏབྦཱ.

ཏཱིརེ ཨཀྐནྟཨུདཀལེཁཱ ནཱམ ཀཱལུསྶིཡཾ གཏཱ ཏཱིརསམཱིཔེ ཨུདཀརཱཛི. ཡཱཝ ན ཝིཔྤསཱིདཏཱིཏི ¶ ཀཱལུསྶིཡཝིགམེན ཡཱཝ ཝིཔྤསནྣཱ ན ཧོཏི. ཀེཙི པན ‘‘ཨཏིནྟེ ཏཱིརེ ཨལླཔཱདེན ཨཀྐནྟེ ཡཱཝ པཱདེ ཨུདཀལེཁཱ ན ཝིཔྤསཱིདཏི, ན སཾསཱིདཏི, ན ཝཱུཔསམྨཏཱི’’ཏི ཨེཝམེཏྠ ཨཏྠཾ ཝདནྟི. ཏེ པནེཏེ ཀིརིཡཱབྷེདེན ཝུཏྟཱ ཀཱལཝིསེསཱ, ན ཨཉྙམཉྙཾ སམསམཱ, ཨཱུནཱདྷིཀབྷཱགཝནྟོཝ དཊྛབྦཱ. དྭེ ཏཡོ ཛཝནཝཱརཱ ཀཱམཱཝཙརཛཝནཝསེན ཝེདིཏབྦཱ, ན ཨིཏརཛཝནཝསེན. ན ཧི ཏེ པརིམིཏཀཱལཱ, ཨནནྟརཱ པཝཏྟབྷཝངྒཱདཡོཔི ཏདནྟོགདྷཱཝ དཊྛབྦཱ. ཏདུབྷཡནྟི རཱུཔཱརཱུཔསནྟཏིདྭཡཾ.

ཨེཀབྷཝཔརིཙྪིནྣནྟི པཊིསནྡྷིཙུཏིཔརིཙྪིནྣཾ. ཨེཀབྷཝཔརིཡཱཔནྣཾ དྷམྨཛཱཏཾ ཨེཏརཧཱིཏི ཝཏྟབྦཾ ཨདྡྷཱཔཙྩུཔྤནྣཾ ནཱམ. མནོཏི སསམྤཡུཏྟཾ ཝིཉྙཱཎམཱཧ. དྷམྨཱཏི ཨཱརམྨཎདྷམྨཱ. མནོཏི ཝཱ མནཱཡཏནཾ. དྷམྨཱཏི ཝེདནཱདཡོ ¶ ཨརཱུཔཀྑནྡྷཱ. ཨུབྷཡམེཏཾ པཙྩུཔྤནྣནྟི ཨདྡྷཱཔཙྩུཔྤནྣཾ ཧོནྟཾ ཨེཏཾ ཨུབྷཡཾ ཧོཏཱིཏི ཨཏྠོ. ཝིཉྙཱཎནྟི ནིཀནྟིཝིཉྙཱཎཾ. ཏཉྷི ཏསྨིཾ པཙྩུཔྤནྣེ ཚནྡརཱགཝསེན པཊིབདྡྷཾ ཧོཏི. ཨབྷིནནྡཏཱིཏི ཏཎྷཱདིཊྛཱབྷིནནྡནཱཧི ཨབྷིནནྡཏི. ཏཐཱབྷཱུཏོ ཙ ཝཏྠུཔརིཉྙཱཡ ཨབྷཱཝཏོ ཏེསུ པཙྩུཔྤནྣེསུ དྷམྨེསུ སཾཧཱིརཏི ཏཎྷཱདིཊྛཱིཧི ཨཱཀཌྜྷཱིཡཏི. ཨེཏྠ ཙ དྭཱདསཱཡཏནཱནཾ ‘‘ཨེཏཾ པཙྩུཔྤནྣ’’ནྟི (མ. ནི. ༣.༢༨༤) ཨཱགཏཏྟཱ ཏཏྠ པཝཏྟོ ཚནྡརཱགོ ཨདྡྷཱཔཙྩུཔྤནྣཱརམྨཎོ, ན ཁཎཔཙྩུཔྤནྣཱརམྨཎོཏི ཝིཉྙཱཡཏཱིཏི དསྶེནྟོ ‘‘ཡཾ སནྡྷཱཡ བྷདྡེཀརཏྟསུཏྟེ…པེ… སཾཧཱིརཏཱིཏི ཝུཏྟ’’ནྟི ཨཱཧ. ‘‘པཙྩུཔྤནྣཉྩ ཡོ དྷམྨཾ, ཏཏྠ ཏཏྠ ཝིཔསྶཏཱི’’ཏི (མ. ནི. ༣.༢༧༢, ༢༨༥) ཨེཏྠཱཔི ཝིཔསྶནཱཙིཏྟཾ ཁཎཔཙྩུཔྤནྣཾ, ཝིཔསྶིཏབྦདྷམྨཱ ཨདྡྷཱཔཙྩུཔྤནྣཱཏི གཧེཏབྦཾ. ཨཉྙཐཱ ཝིཔསྶནཱཝ ན སམྦྷཝེཡྻ. ‘‘ཁཎཔཙྩུཔྤནྣཾ པཱལི༹ཡཾ ཨཱགཏ’’ནྟི ན ཝུཏྟཾ ཏསྶ ཝསེན ཨཱརམྨཎཀརཎསྶ ཨཊྛཀཐཱཡཾ ཨནཱགཏཏྟཱ.

ཀེཙཱིཏི ཨབྷཡགིརིཝཱསིནོ. ཨེཀཀྑཎེ ཙིཏྟཾ ཨུཔྤཛྫཏཱིཏི ཨིདྡྷིཙིཏྟསྶ ཨུཔྤཏྟིསམཀཱལམེཝ པརཙིཏྟསྶཔི ཨུཔྤཏྟིསམྦྷཝཏོཏི ཡུཏྟིདསྶནཾ. ཡཐཱ ཨཱཀཱསེཏིཨཱདི སདིསཱུདཱཧརཎཾ. ཏཾ པན ཏེསཾ ཝཙནཾ ཨཡུཏྟཾ. ཀསྨཱ? མགྒཕལཝཱིཐིཏོ ཨཉྙཏྠ ཨནིཊྛེ ཋཱནེ ཨཱཝཛྫནཛཝནཱནཾ ནཱནཱརམྨཎབྷཱཝཔྤཏྟིདོསཏོཏི ཡུཏྟིཝཙནཾ.

ཡདི ཨེཝཾ ཀཐཾ ཙེཏོཔརིཡཉཱཎཾ པཙྩུཔྤནྣཱརམྨཎཾ ཧོཏཱིཏི ཨཱཧ ‘‘སནྟཏིཔཙྩུཔྤནྣཾ པནཱ’’ཏིཨཱདི ¶ . ཨདྡྷཱཔཙྩུཔྤནྣཾ པན ཛཝནཝཱརེན དཱིཔེཏབྦཾ, ན སཀལེན པཙྩུཔྤནྣདྡྷུནཱཏི ཨདྷིཔྤཱཡོ.

ཏཏྲཱཡཾ དཱིཔནཱཏིཨཱདི ཛཝནཝཱརསྶ ཨདྡྷཱཔཙྩུཔྤནྣབྷཱཝདཱིཔནམུཁེན ཨིདྡྷིཙིཏྟསྶ པཝཏྟིཨཱཀཱརདཱིཔནཾ. ཨིཏརཱནཱིཏི ཨཱཝཛྫནཔརིཀམྨཙིཏྟཱནི. ཨེཏྠ ཙ ‘‘ཀེཙཱི’’ཏི ཡདིཔི ཨབྷཡགིརིཝཱསིནོ ཨདྷིཔྤེཏཱ, ཏེ པན ཙིཏྟསྶ ཋིཏིཀྑཎཾ ན ཨིཙྪནྟཱིཏི ‘‘ཋིཏིཀྑཎེ ཝཱ པཊིཝིཛ྄ཛྷཏཱི’’ཏི ན ཝཏྟབྦཾ སིཡཱ. ཏཐཱ ཡེ ‘‘ཨིདྡྷིམསྶ ཙ པརསྶ ཙ ཨེཀཀྑཎེ ཙིཏྟཾ ཨུཔྤཛྫཏཱི’’ཏི ཝདནྟི, ཏེསཾ ‘‘ཋིཏིཀྑཎེ ཝཱ བྷངྒཀྑཎེ ཝཱ པཊིཝིཛ྄ཛྷཏཱི’’ཏི ཝཙནཾ ན སམེཏི. ན ཧི ཏསྨིཾ ཁཎདྭཡེ ཨུཔྤཛྫམཱནཾ པརཙིཏྟེན སཧ ཨེཀཀྑཎེ ཨུཔྤཛྫཏི ནཱམཱཏི. ཋིཏིབྷངྒཀྑཎེསུ ཙ ཨུཔྤཛྫམཱནཾ ཨེཀདེསཾ པཙྩུཔྤནྣཱརམྨཎཾ, ཨེཀདེསཾ ཨཏཱིཏཱརམྨཎཾ ཨཱཔཛྫཏི. ཡཉྩ ཝུཏྟཾ ‘‘པརསྶ ཙིཏྟཾ ཛཱནིསྶཱམཱིཏི རཱསིཝསེན མཧཱཛནསྶ ¶ ཙིཏྟེ ཨཱཝཛྫིཏེ’’ཏི, ཨེཏྠ ཙ མཧཱཛནོ ཨཏྠཏོ པརེ ཨནེཀཔུགྒལཱཏི ‘‘པརེསཾ ཙིཏྟཾ ཛཱནིསྶཱམཱི’’ཏི ཨཱཝཛྫནཔྤཝཏྟི ཝཏྟབྦཱ སིཡཱ. ཨཐཱཔི པརསྶཱཏི མཧཱཛནསྶཱཏི ཨཏྠོ སམྦྷཝེཡྻ, ཏཐཱཔི ཏསྶ ཨེཀཔུགྒལསྶེཝ ཝཱ ཙིཏྟརཱསིཾ ཨཱཝཛྫིཏྭཱ ཨེཀསྶ པཊིཝིཛ྄ཛྷནཾ ཨཡུཏྟཾ. ན ཧི རཱསིཨཱཝཛྫནཾ ཨེཀདེསཱཝཛྫནཾ ཧོཏཱིཏི, ཏསྨཱ ཏེཧི ‘‘མཧཱཛནསྶ ཙིཏྟེ ཨཱཝཛྫིཏེ’’ཏིཨཱདི ན ཝཏྟབྦཾ.

ཡཾ པན ཏེ ཝདནྟི ‘‘ཡསྨཱ ཨིདྡྷིམསྶ ཙ པརསྶ ཙ ཨེཀཀྑཎེ ཙིཏྟཾ ཨུཔྤཛྫཏཱི’’ཏི. ཏཏྠཱཡཾ ཨདྷིཔྤཱཡོ ཡུཏྟོ སིཡཱ, ཙེཏོཔརིཡཉཱཎལཱབྷཱི པརསྶ ཙིཏྟཾ ཉཱཏུཀཱམོ པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ ཨཏཱིཏཱདིཝིབྷཱགཾ ཨཀཏྭཱ ཙིཏྟསཱམཉྙེན ‘‘ཨིམསྶ ཙིཏྟཾ ཛཱནཱམི, ཨིམསྶ ཙིཏྟཾ ཛཱནཱམཱི’’ཏི པརིཀམྨཾ ཀཏྭཱ པུན པཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ སཱམཉྙེནེཝ ཙིཏྟཾ ཨཱཝཛྫིཏྭཱ ཏིཎྞཾ, ཙཏུནྣཾ ཝཱ པརིཀམྨཱནཾ ཨནནྟརཱ ཙེཏོཔརིཡཉཱཎེན པརཙིཏྟཾ པཊིཝིཛ྄ཛྷཏི ཝིབྷཱཝེཏི རཱུཔཾ ཝིཡ དིབྦཙཀྑུནཱ. ཏཏོ པརཾ པན ཀཱམཱཝཙརཙིཏྟེཧི སརཱགཱདིཝཝཏྠཱནཾ ཧོཏི ནཱིལཱདིཝཝཏྠཱནཾ ཝིཡ. ཏཏྠ དིབྦཙཀྑུནཱ དིཊྛཧདཡཝཏྠུརཱུཔསྶ སཏྟསྶ ཨབྷིམུཁཱིབྷཱུཏསྶ ཙིཏྟསཱམཉྙེན ཙིཏྟཾ ཨཱཝཛྫཡམཱནཾ ཨཱཝཛྫནཾ ཨབྷིམུཁཱིབྷཱུཏཾ ཝིཛྫམཱནཾ ཙིཏྟཾ ཨཱརམྨཎཾ ཀཏྭཱ ཙིཏྟཾ ཨཱཝཛྫེཏི. པརིཀམྨཱནི ཙ ཏཾ ཏཾ ཝིཛྫམཱནཾ ཙིཏྟཾ ཙིཏྟསཱམཉྙེནེཝ ཨཱརམྨཎཾ ཀཏྭཱ ཙིཏྟཛཱནནཔརིཀམྨཱནི ¶ ཧུཏྭཱ པཝཏྟནྟི. ཙེཏོཔརིཡཉཱཎཾ པན ཝིཛྫམཱནཾ ཙིཏྟཾ པཊིཝིཛ྄ཛྷནྟཾ ཝིབྷཱཝེནྟཾ ཏེན སཧ ཨེཀཀྑཎེ ཨེཝ ཨུཔྤཛྫཏི.

ཏཏྠ ཡསྨཱ སནྟཱནསྶ སནྟཱནགྒཧཎཏོ ཨེཀཏྟཝསེན ཨཱཝཛྫནཱདཱིནི ‘‘ཙིཏྟ’’ནྟྭེཝ པཝཏྟཱནི. ཏཉྩ ཙིཏྟམེཝ, ཡཾ ཙེཏོཔརིཡཉཱཎེན ཝིབྷཱཝིཏཾ. ཏསྨཱ སམཱནཱཀཱརཔྤཝཏྟིཏོ ན ཨནིཊྛེ མགྒཕལཝཱིཐིཏོ ཨཉྙསྨིཾ ཋཱནེ ནཱནཱརམྨཎཏཱ ཨཱཝཛྫནཛཝནཱནཾ ཧོཏི. པཙྩུཔྤནྣཱརམྨཎཉྩ པརིཀམྨཾ པཙྩུཔྤནྣཱརམྨཎསྶ ཙེཏོཔརིཡཉཱཎསྶ ཨཱསེཝནཔཙྩཡེན པཙྩཡོཏི སིདྡྷཾ ཧོཏི. ཨཏཱིཏཏྟིཀོ ཙ ཨེཝཾ ཨུཔཔནྣོ ཧོཏི. ཨཉྙཐཱ སནྟཏིཔཙྩུཔྤནྣེ, ཨདྡྷཱཔཙྩུཔྤནྣེ ཙ ‘‘པཙྩུཔྤནྣ’’ནྟི ཨིདྷ ཝུཙྩམཱནེ ཨཏཱིཏཱནཱགཏཱནཉྩ པཙྩུཔྤནྣཏཱ ཨཱཔཛྫེཡྻ. ཏཐཱ ཙ སཏི ‘‘པཙྩུཔྤནྣོ དྷམྨོ པཙྩུཔྤནྣསྶ དྷམྨསྶ ཨནནྟརཔཙྩཡེན པཙྩཡོ’’ཏི ཝཏྟབྦཾ སིཡཱ, ན ཙ ཏཾ ཝུཏྟཾ. ‘‘ཨཏཱིཏོ དྷམྨོ པཙྩུཔྤནྣསྶ དྷམྨསྶ ཨནནྟརཔཙྩཡེན པཙྩཡོ. པུརིམཱ པུརིམཱ ཨཏཱིཏཱ ཁནྡྷཱ པཙྪིམཱནཾ པཙྪིམཱནཾ པཙྩུཔྤནྣཱནཾ ཁནྡྷཱནཾ ཨནནྟར ¶ …པེ… ཨནུལོམཾ གོཏྲབྷུསྶཱ’’ཏིཨཱདི ཝཙནཏོ (པཊྛཱ. ༢.༡༨.༥) ན ཨདྡྷཱསནྟཏིཔཙྩུཔྤནྣེསྭེཝ ཙ ཨནནྟརཱཏཱིཏཱ ཙཏྟཱརོ ཁནྡྷཱ ཨཏཱིཏཱཏི ཝིཉྙཱཡནྟི. ན ཙ ཨབྷིདྷམྨམཱཏིཀཱཡཾ (དྷ. ས. ཏིཀམཱཏིཀཱ ༡༨-༡༩) ཨཱགཏསྶ པཙྩུཔྤནྣཔདསྶ ཨདྡྷཱསནྟཏིཔཙྩུཔྤནྣཔདཏྠཏཱ ཀཏྠཙི པཱལི༹ཡཾ ཝུཏྟཱ. ཏསྨཱ ཏེཧི ཨིདྡྷིམསྶ ཙ པརསྶ ཙ ཨེཀཀྑཎེ ཙིཏྟུཔྤཏྟིཡཱ ཙེཏོཔརིཡཉཱཎསྶ པཙྩུཔྤནྣཱརམྨཎཏཱ ཝུཏྟཱ. ཡདཱ པན ‘‘ཡཾ ཨིམསྶ ཙིཏྟཾ པཝཏྟཾ, ཏཾ ཛཱནཱམི. ཡཾ བྷཝིསྶཏི, ཏཾ ཛཱནཱམཱི’’ཏི ཝཱ ཨཱབྷོགཾ ཀཏྭཱ པཱདཀཛ྄ཛྷཱནསམཱཔཛྫནཱདཱིནི ཀརོཏི, ཏདཱ ཨཱཝཛྫནཔརིཀམྨཱནི, ཙེཏོཔརིཡཉཱཎཉྩ ཨཏཱིཏཱནཱགཏཱརམྨཎཱནེཝ ཧོནྟི ཨཱཝཛྫནེནེཝ ཝིབྷཱགསྶ ཀཏཏྟཱ.

ཡེ པན ‘‘ཨིདྡྷིམཱ པརསྶ ཙིཏྟཾ ཛཱནིཏུཀཱམོ ཨཱཝཛྫེཏི, ཨཱཝཛྫནཾ ཁཎཔཙྩུཔྤནྣཾ ཨཱརམྨཎཾ ཀཏྭཱ ཏེནེཝ སཧ ནིརུཛ྄ཛྷཏི. ཏཏོ ཙཏྟཱརི, པཉྩ ཝཱ ཛཝནཱནི, ཡེསཾ པཙྪིམཾ ཨིདྡྷིཙིཏྟཾ, སེསཱནི ཀཱམཱཝཙརཱནི, ཏེསཾ སབྦེསམྤི ཏདེཝ ནིརུདྡྷཾ ཙིཏྟཾ ཨཱརམྨཎཾ ཧོཏི, ན ཙ ཏཱནི ནཱནཱརམྨཎཱནི ཧོནྟི ཨདྡྷཱནཝསེན པཙྩུཔྤནྣཱརམྨཎཏྟཱ’’ཏི ཨིདཾ ཝཙནཾ ནིསྶཱཡ ‘‘ཨཱཝཛྫནཛཝནཱནཾ པཙྩུཔྤནྣཱཏཱིཏཱརམྨཎབྷཱཝེཔི ནཱནཱརམྨཎཏཱབྷཱཝོ ཝིཡ ཨེཀདྭིཏིཙཏུཔཉྩཙིཏྟཀྑཎཱནཱགཏེསུཔི ཙིཏྟེསུ ཨཱཝཛྫིཏེསུ ཨཱཝཛྫནཛཝནཱནཾ ཡཐཱསམྦྷཝཾ ཨནཱགཏཔཙྩུཔྤནྣཱཏཱིཏཱརམྨཎབྷཱཝེཔི ནཱནཱརམྨཎཏཱ ན སིཡཱ. ཏེན ཙཏུཔཉྩཙིཏྟཀྑཎཱནཱགཏེ ཨཱཝཛྫིཏེ ¶ ཨནཱགཏཱརམྨཎཔརིཀམྨཱནནྟརཾ ཁཎཔཙྩུཔྤནྣཱརམྨཎཾ ཙེཏོཔརིཡཉཱཎཾ སིདྡྷ’’ནྟི ཝདནྟི. ཏེསཾ ཝཱདོ ‘‘ཨནཱགཏཱརམྨཎོ དྷམྨོ པཙྩུཔྤནྣཱརམྨཎསྶ དྷམྨསྶ ཨཱསེཝནཔཙྩཡེན པཙྩཡོ, པཙྩུཔྤནྣཱརམྨཎོ དྷམྨོ ཨཏཱིཏཱརམྨཎསྶ དྷམྨསྶ ཨཱསེཝནཔཙྩཡེན པཙྩཡོ’’ཏི ཨིམེསཾ པཉྷཱནཾ ཨནུདྡྷཊཏྟཱ, གཎནཱཡ ཙ ‘‘ཨཱསེཝནེ ཏཱིཎཱི’’ཏི (པཊྛཱ. ༢.༡༩.༣༩) ཝུཏྟཏྟཱ ན སིཛ྄ཛྷཏི. ན ཧི ཀུསལཀིརིཡཱམཧགྒཏཾ ཨནཱསེཝནཾ ཨཏྠཱིཏི. ཨེཏསྶ ཙ ཝཱདསྶ ནིསྶཡབྷཱཝོ ཨཱཝཛྫནཛཝནཱནཾ ཁཎཔཙྩུཔྤནྣནིརུདྡྷཱརམྨཎཏཱཝཙནསྶ ན སིཛ྄ཛྷཏི, ‘‘ཡཾ པཝཏྟཾ, པཝཏྟིསྶཏི ཙཱ’’ཏི ཝིསེསཾ ཨཀཏྭཱ གཧཎེ ཨཱཝཛྫནསྶ ཨནཱགཏགྒཧཎཱབྷཱཝཾ, ཏདབྷཱཝཱ ཛཝནཱནམྤི ཝཏྟམཱནགྒཧཎཱབྷཱཝཉྩ སནྡྷཱཡེཝ ཏསྶ ཝུཏྟཏྟཱ. ཏདཱ ཧི བྷཝངྒཙལནཱནནྟརཾ ཨབྷིམུཁཱིབྷཱུཏམེཝ ཙིཏྟཾ ཨཱརབྦྷ ཨཱཝཛྫནཱ པཝཏྟཏཱིཏི ཛཱནནཙིཏྟསྶཔི ཝཏྟམཱནཱརམྨཎབྷཱཝེ ཨཱཝཛྫནཛཱནནཙིཏྟཱནཾ སཧཊྛཱནདོསཱཔཏྟིཡཱ, རཱསིཨེཀདེསཱཝཛྫནཔཊིཝེདྷེ ¶ སམྤཏྟསམྤཏྟཱཝཛྫནཛཱནནེ ཙ ཨནིཊྛེ ཋཱནེ ཨཱཝཛྫནཛཝནཱནཾ ནཱནཱརམྨཎབྷཱཝདོསཱཔཏྟིཡཱ ཙ ཡཾ ཝུཏྟཾ ‘‘ཁཎཔཙྩུཔྤནྣཾ ཙིཏྟཾ ཙེཏོཔརིཡཉཱཎསྶ ཨཱརམྨཎཾ ཧོཏཱི’’ཏི, ཏཾ ཨཡུཏྟནྟི པཊིཀྑིཔིཏྭཱ ཡཐཱཝུཏྟདོསཱཔཏྟིཾ, ཀཱལཝསེན ཙ ཨདྡྷཱསནྟཏིཔཙྩུཔྤནྣཱརམྨཎཏྟཱ ནཱནཱརམྨཎཏཱབྷཱཝཾ དིསྭཱ ཨཱཝཛྫནཛཝནཱནཾ ཝཏྟམཱནཏཾ ནིརུདྡྷཱརམྨཎབྷཱཝོ ཝུཏྟོཏི. ཏམྤི ཝཙནཾ པུརིམཝཱདིནོ ནཱནུཛཱནེཡྻུཾ. ཏསྨིཾ ཧི སཏི ‘‘ཨཱཝཛྫནཱ ཀུསལཱན’’ནྟིཨཱདཱིསུ (པཊྛཱ ༡.༡.༤༡༧) ཝིཡ ཨཉྙཔདསངྒཧིཏསྶ ཨནནྟརཔཙྩཡཝིདྷཱནཏོ ‘‘པཙྩུཔྤནྣཱརམྨཎཨཱཝཛྫནཱ ཨཏཱིཏཱརམྨཎཱནཾ ཁནྡྷཱནཾ ཨནནྟརཔཙྩཡེན པཙྩཡོ’’ཏི ཙ ཝཏྟབྦཾ སིཡཱ, ན ཙ ཝུཏྟནྟི.

ཀསྨཱ པནེཝཾ ཙེཏོཔརིཡཉཱཎསྶ པཙྩུཔྤནྣཱརམྨཎཏཱ ཝིཙཱརིཏཱ, ནནུ ‘‘ཨཏཱིཏོ དྷམྨོ པཙྩུཔྤནྣསྶ དྷམྨསྶ, ཨནཱགཏོ དྷམྨོ པཙྩུཔྤནྣསྶ དྷམྨསྶ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༡༨.༢) ཨེཏེསཾ ཝིབྷངྒེསུ ‘‘ཨཏཱིཏཱ ཁནྡྷཱ ཨིདྡྷིཝིདྷཉཱཎསྶ ཙེཏོཔརིཡཉཱཎསྶ པུབྦེནིཝཱསཱནུསྶཏིཉཱཎསྶ ཡཐཱཀམྨཱུཔགཉཱཎསྶ ཨཱཝཛྫནཱཡ ཨཱརམྨཎཔཙྩཡེན པཙྩཡོ, ཨནཱགཏཱ ཁནྡྷཱ ཨིདྡྷིཝིདྷཉཱཎསྶ ཙེཏོཔརིཡཉཱཎསྶ ཨནཱགཏཾསཉཱཎསྶ ཨཱཝཛྫནཱཡ ཨཱརམྨཎཔཙྩཡེན པཙྩཡོ’’ཏི, ཨུཔྤནྣཏྟིཀེ ཙ ‘‘ཨནུཔྤནྣཱ ཁནྡྷཱ ཨུཔྤཱདིནོ ཁནྡྷཱ ཨིདྡྷིཝིདྷཉཱཎསྶ ཙེཏོཔརིཡཉཱཎསྶ ཨནཱགཏཾསཉཱཎསྶ ཨཱཝཛྫནཱཡ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༡༧.༣) ཙེཏོཔརིཡཉཱཎགྒཧཎཾ ཀཏྭཱ ‘‘པཙྩུཔྤནྣོ དྷམྨོ པཙྩུཔྤནྣསྶ དྷམྨསྶཱ’’ཏི (པཊྛཱ. ༢.༡༨.༣) ཨེཏསྶ ཝིབྷངྒེ ‘‘པཙྩུཔྤནྣཱ ཁནྡྷཱ ཨིདྡྷིཝིདྷཉཱཎསྶ ཨཱཝཛྫནཱཡ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༡༨.༣), ཨུཔྤནྣཏྟིཀེ ཙ ‘‘ཨུཔྤནྣཱ ཁནྡྷཱ ¶ ཨིདྡྷིཝིདྷཉཱཎསྶ ཨཱཝཛྫནཱཡ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༡༧.༢) ཨེཏྟཀསྶེཝ ཝུཏྟཏྟཱ པཙྩུཔྤནྣེ ཙིཏྟེ ཙེཏོཔརིཡཉཱཎཾ ནཔྤཝཏྟཏཱིཏི ཝིཉྙཱཡཏི. ཡདི ཧི པཝཏྟེཡྻ, པུརིམེསུ ཝིཡ ཨིཏརེསུ ཙ ཙེཏོཔརིཡཉཱཎགྒཧཎཾ ཀཏྟབྦཾ སིཡཱཏི? སཙྩཾ ཀཏྟབྦཾ, ནཡདསྶནཝསེན པན ཏཾ སཾཁིཏྟནྟི ཨཉྙཱཡ པཱལི༹ཡཱ ཝིཉྙཱཡཏི.

‘‘ཨཏཱིཏཱརམྨཎོ དྷམྨོ པཙྩུཔྤནྣཱརམྨཎསྶ དྷམྨསྶ ཨཱརམྨཎཔཙྩཡེན པཙྩཡོ, ཨནཱགཏཱརམྨཎོ དྷམྨོ པཙྩུཔྤནྣཱརམྨཎསྶ, པཙྩུཔྤནྣཱརམྨཎོ ¶ དྷམྨོ པཙྩུཔྤནྣཱརམྨཎསྶཱ’’ཏི (པཊྛཱ. ༢.༡༩.༢༠-༢༢) ཨེཏེསཾ ཧི ཝིབྷངྒེསུ ‘‘ཙེཏོཔརིཡཉཱཎེན ཨཏཱིཏཱརམྨཎཔཙྩུཔྤནྣཙིཏྟསམངྒིསྶ ཙིཏྟཾ ཛཱནཱཏི, ཨཏཱིཏཱརམྨཎཱ པཙྩུཔྤནྣཱ ཁནྡྷཱ ཙེཏོཔརིཡཉཱཎསྶ ཨཱཝཛྫནཱཡ ཨཱརམྨཎཔཙྩཡེན པཙྩཡོ, ཙེཏོཔརིཡཉཱཎེན ཨནཱགཏཱརམྨཎཔཙྩུཔྤནྣཙིཏྟསམངྒིསྶ ཙིཏྟཾ ཛཱནཱཏི, ཨནཱགཏཱརམྨཎཱ པཙྩུཔྤནྣཱ ཁནྡྷཱ ཙེཏོཔརིཡཉཱཎསྶ ཨཱཝཛྫནཱཡ ཨཱརམྨཎཔཙྩཡེན པཙྩཡོ, ཙེཏོཔརིཡཉཱཎེན པཙྩུཔྤནྣཱརམྨཎཔཙྩུཔྤནྣཙིཏྟསམངྒིསྶ ཙིཏྟཾ ཛཱནཱཏི, པཙྩུཔྤནྣཱརམྨཎཱ པཙྩུཔྤནྣཱ ཁནྡྷཱ ཙེཏོཔརིཡཉཱཎསྶ ཨཱཝཛྫནཱཡ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༡༩.༢༠-༢༢) ཙེཏོཔརིཡཉཱཎསྶ པཙྩུཔྤནྣཱརམྨཎེ པཝཏྟི ཝུཏྟཱཏི. ཏེནེཝཱཡཾ ཝིཙཱརཎཱ ཀཏཱཏི ཝེདིཏབྦཱ.

༤༡༧. ཏེསནྟི ཏེསུ དྭཱིསུ ཉཱཎེསཱུཏི ནིདྡྷཱརཎེ སཱམིཝཙནཾ. ཙིཏྟམེཝ ཨཱརམྨཎཾ ཙེཏོཔརིཡཉཱཎཏྟཱཏི ཨདྷིཔྤཱཡོ. ཏེནཱཧ ‘‘ཨཉྙཾ ཁནྡྷཾ ཝཱ ཁནྡྷཔྤཊིབདྡྷཾ ཝཱ ན ཛཱནཱཏཱི’’ཏི. ཏཏྠ ཁནྡྷཔྤཊིབདྡྷཾ ནཱམགོཏྟཱདི. ཡདི ཨེཝཾ ཀཐཾ མགྒཱརམྨཎནྟི ཨཱཧ ‘‘མགྒསམྤཡུཏྟཙིཏྟཱརམྨཎཏྟཱ པན པརིཡཱཡཏོ མགྒཱརམྨཎནྟི ཝུཏྟ’’ནྟི. ཙེཏནཱམཏྟམེཝ ཨཱརམྨཎཾ, ཏཐཱ ཧི ཏཾ ‘‘ཡཐཱཀམྨཱུཔགཉཱཎ’’ནྟི ཝུཙྩཏཱིཏི ཨདྷིཔྤཱཡོ. ཁནྡྷཔྤཊིབདྡྷེསཱུཏི ཨེཏྠ ནིབྦཱནམྤི ཁནྡྷཔྤཊིབདྡྷམེཝ. ཁནྡྷེཧི ཝིསཡཱིཀཏཏྟཱཏི ཝདནྟི. ཏཐཱ ཧི ཝུཏྟཾ ཨཊྛསཱལིནིཡཾ ‘‘ཨཏཱིཏེ བུདྡྷཱ མགྒཾ བྷཱཝཡིཾསུ, ཕལཾ སཙྪཱཀཾསུ, ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡིཾསཱུཏི ཚིནྣཝཊུམཀཱནུསྶརཎཝསེན མགྒཕལནིབྦཱནཔཙྩཝེཀྑཎཏོཔི ཨཔྤམཱཎཱརམྨཎ’’ནྟི (དྷ. ས. ཨཊྛ. ༡༤༢༡). ཏཏྠ མགྒཕལཔཙྩཝེཀྑཎཱནི ཏཱཝ པུབྦེནིཝཱསཱནུསྶཏིཉཱཎེན མགྒཕལེསུ ཉཱཎེསུ པཝཏྟནྟི. ནིབྦཱནཔཙྩཝེཀྑཎཉྩ ནིབྦཱནཱརམྨཎེསུ ཨཔྤམཱཎདྷམྨེསུ ཉཱཎེསཱུཏི མགྒཱདིཔཙྩཝེཀྑཎཱནི པུབྦེནིཝཱསཱནུསྶཏིཉཱཎསྶ ཨཔྤམཱཎཱརམྨཎཏཾ སཱདྷེནྟཱིཏི ཝེདིཏབྦཱནི. ‘‘ཨཔྤམཱཎཱ ཁནྡྷཱ པུབྦེནིཝཱསཱནུསྶཏིཉཱཎསྶ ¶ ཨཱརམྨཎཔཙྩཡེན པཙྩཡོ’’ཨིཙྩེཝ (པཊྛཱ. ༩.༡༢.༥༨) ཧི ཝུཏྟཾ, ན ཝུཏྟཾ ‘‘ནིབྦཱན’’ནྟི. ཏསྨཱ པུབྦེནིཝཱསཉཱཎེན ཨེཝ མགྒཕལཔཙྩཝེཀྑཎཀིཙྩེ ཝུཙྩམཱནེཔི ནིབྦཱནཔཙྩཝེཀྑཎཏཱ ན སཀྐཱ ཝཏྟུཾ. ཨཊྛཀཐཱཡཾ པན ནིབྦཱནཱརམྨཎཏཱ ནིདསྶིཏཱ.

ཀུསལཱ ¶ ཁནྡྷཱཏི ཨིདྡྷིཝིདྷཔུབྦེནིཝཱསཱནཱགཏཾསཉཱཎཱཔེཀྑོ བཧུཝཙནནིདྡེསོ, ན ཙེཏོཔརིཡཡཐཱཀམྨཱུཔགཉཱཎཱཔེཀྑཱཏི ཏེསཾ ཙཏུཀྑནྡྷཱརམྨཎབྷཱཝསྶ ཨསཱདྷཀོཏི ཙེ? ན, ཨཉྙཏྠ ‘‘ཨཝིཏཀྐཝིཙཱརམཏྟཱ ཁནྡྷཱ ཙ ཝིཙཱརོ ཙ ཙེཏོཔརིཡཉཱཎསྶ པུབྦེནིཝཱསཱནུསྶཏིཉཱཎསྶ ཨནཱགཏཾསཉཱཎསྶ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༦.༧༢), ‘‘སཝིཏཀྐསཝིཙཱརཱ ཁནྡྷཱ ཙ ཝིཏཀྐོ ཙ ཙེཏོཔརིཡཉཱཎསྶ པུབྦེནིཝཱསཱནུསྶཏིཉཱཎསྶ ཨནཱགཏཾསཉཱཎསྶ ཨཱརམྨཎཔཙྩཡེན པཙྩཡོ’’ཏི (པཊྛཱ. ༢.༦.༧༣) ཙ ཝུཏྟཏྟཱ ཙེཏོཔརིཡཉཱཎཱཔེཀྑཱཔི བཧུཝཙནནིདྡེསོཏི ཨིམསྶ ཨཏྠསྶ སིདྡྷིཏོ. ཨེཝམྤི ཡཐཱཀམྨཱུཔགཉཱཎསྶ ‘‘ཨཝིཏཀྐཝིཙཱརམཏྟཱ ཁནྡྷཱ ཙ ཝིཙཱརོ ཙཱ’’ཏིཨཱདཱིསུ ཨཝུཏྟཏྟཱ ཙཏུཀྑནྡྷཱརམྨཎཏཱ ན སིཛ྄ཛྷཏཱིཏི? ན, ཏཏྠ ཨཝཙནསྶ ཨཉྙཀཱརཎཏྟཱ. ཡཐཱཀམྨཱུཔགཉཱཎེན ཧི ཀམྨསཾསཊྛཱ ཙཏྟཱརོ ཁནྡྷཱ ཀམྨམུཁེན གཡ྄ཧཏི. ཏཉྷི ཡཐཱ ཙེཏོཔརིཡཉཱཎཾ པུརིམཔརིཀམྨཝསེན ཨཝིཏཀྐཱདིཝིབྷཱགཾ, སརཱགཱདིཝིབྷཱགཉྩ ཙིཏྟཾ ཝིབྷཱཝེཏི, ན ཨེཝཾ ཝིབྷཱགཾ ཝིབྷཱཝེཏི. ཀམྨཝསེནེཝ པན སམུདཱཡཾ ཝིབྷཱཝེཏི, ཏསྨཱ ‘‘ཨཝིཏཀྐཝིཙཱརམཏྟཱ ཁནྡྷཱ ཙ ཝིཙཱརོ ཙཱ’’ཏིཨཱདིཀེ ཝིབྷཱགཀརཎེ ཏཾ ན ཝུཏྟཾ, ན ཙཏུཀྑནྡྷཱནཱརམྨཎཏོཏི. ཨིདཾ པནསྶ ཨཀཱརཎནྟི ཀེཙི. ཏཏྠཱཔི ‘‘པུབྦེནིཝཱསཱནུསྶཏིཉཱཎསྶ ཡཐཱཀམྨཱུཔགཉཱཎསྶ ཨནཱགཏཾསཉཱཎསྶཱ’’ཏི པཋནྟི ཨེཝ. ན ཧི ཏཾ ཀུསལཱཀུསལཝིབྷཱགཾ ཝིཡ སཝིཏཀྐཱདིཝིབྷཱགཾ ཀམྨཾ ཝིབྷཱཝེཏུཾ ཨསམཏྠཾ. དུཙྩརིཏསུཙརིཏཝིབྷཱཝནམྤི ཧི ལོབྷཱདིཨལོབྷཱདིསམྤཡོགཝིབྷཱགཝིསེསཝིབྷཱཝནཾ ཧོཏཱིཏི.

‘‘པུབྦེནིཝཱསཱནུསྶཏིཉཱཎཾ ནཱམགོཏྟཱནུསྶརཎཀཱལེ ན ཝཏྟབྦཱརམྨཎ’’ནྟི ཨེཏྟཀམེཝ ཨཊྛཀཐཱཡཾ ཝུཏྟཾ. ནཱམགོཏྟཾ པན ཁནྡྷཱུཔནིབནྡྷོ སམྨུཏིསིདྡྷོ བྱཉྫནཏྠོ, ན བྱཉྫནནྟི. ཨཡམེཏྠ ཨམྷཱཀཾ ཁནྟཱིཏི ཨཱཙརིཡསྶཱཡཾ ཨཏྟནོ མཏི. ཡཾ པན ཝུཏྟཾ ‘‘ན བྱཉྫན’’ནྟི, ཏསྶ སམཏྠནཾ ‘‘བྱཉྫནཉྷཱི’’ཏིཨཱདི.

༤༡༩. ཀཱམཱཝཙརེ ¶ ནིབྦཏྟིསྶཏཱིཏི ནིབྦཏྟིཀྑནྡྷཛཱནནམཱཧ.

༤༢༠. ཨེཏྠཱཏི ཨེཏསྨིཾ ཨཛ྄ཛྷཏྟཱརམྨཎཏྟིཀཝསེན ཨབྷིཉྙཱཉཱཎཱནཾ, ཨཱརམྨཎཝིཙཱརེ. ‘‘ཨཛ྄ཛྷཏྟཱརམྨཎཉྩེཝ བཧིདྡྷཱརམྨཎཉྩཱ’’ཏི ཨེཀཛ྄ཛྷཾ གཧེཏྭཱ ¶ ཡཾ ཝུཏྟཾ པོརཱཎཊྛཀཐཱཡཾ, ཏཾ ‘‘ཀཱལེན…པེ… ཧོཏིཡེཝཱ’’ཏི ཨིམིནཱ ཨདྷིཔྤཱཡེན ཝུཏྟནྟི ཨཏྠོ. ན ཧི ཨཛ྄ཛྷཏྟབཧིདྡྷཱ ནཱམ ཝིསུཾ ཨེཀཾ ཨཏྠི, ནཱཔི ཏཾ ཨེཀཛ྄ཛྷཾ ཨཱརམྨཎཾ ཀརཱིཡཏཱིཏི. ཡདི ཨེཝཾ ཏིཀོ ཨེཝ ན པཱུརཏི པདདྭཡཱསངྒཧིཏསྶ ཏཏིཡསྶ ཨཏྠནྟརསྶ ཨབྷཱཝཏོ, ན, པཀཱརབྷེདཝིསཡཏྟཱ ཏིཀནིདྡེསསྶ. ཏཐཱ ཧི ཨཊྛཀཐཱཡཾ ‘‘ཏེ ཨེཝ ཏིཔྤཀཱརེཔི དྷམྨེ’’ཏི ཝུཏྟཾ. ཏེ ཨེཝ ཨཛ྄ཛྷཏྟཱདིཝསེན ཏིཝིདྷེཔི དྷམྨེཏི ཨཏྠོ. ཨེཏྠ ཧི ‘‘ཏེ ཨེཝ དྷམྨེ’’ཏི ཨཝཏྭཱ ‘‘ཏིཔྤཀཱརེ’’ཏི ཝཙནཾ པཀཱརབྷེདནིབནྡྷནཱ ཨཡཾ ཏིཀདེསནཱཏི དསྶནཏྠཾ. ཡཐཱ ཧི ཀུསལཏྟིཀཱདཱིནཾ དེསནཱ ཡཐཱརཧཾ དྷམྨཱནཾ ཛཱཏིསམྤཡོགཔྤཧཱནསིཀྑཱབྷཱུམིཨཱརམྨཎཔྤབྷེདནིཡམཀཱལཱདིབྷེདནིབནྡྷནཱ, ན ཨེཝམཡཾ ཛཱཏིཨཱདིབྷེདནིབནྡྷནཱ, ནཱཔི སནིདསྶནཏྟིཀཧེཏུདུཀཱདིདེསནཱ ཝིཡ སབྷཱཝཱདིབྷེདནིབནྡྷནཱ, ཨཐ ཁོ པཀཱརབྷེདནིབནྡྷནཱ. པཉྩེཝ ཧི ཁནྡྷཱ སསནྟཏིཔརིཡཱཔནྣཏཾ ཨུཔཱདཱཡ ‘‘ཨཛ྄ཛྷཏྟཱ’’ཏི ཝུཏྟཱ, པརསནྟཏིཔརིཡཱཔནྣཏཾ ཨུཔཱདཱཡ ‘‘བཧིདྡྷཱ’’ཏི, ཏདུབྷཡཾ ཨུཔཱདཱཡ ‘‘ཨཛ྄ཛྷཏྟབཧིདྡྷཱ’’ཏི. ཏེནཱཧ ‘‘ཨནིནྡྲིཡབདྡྷརཱུཔཉྩ ནིབྦཱནཉྩ ཋཔེཏྭཱ སབྦེ དྷམྨཱ སིཡཱ ཨཛ྄ཛྷཏྟཱ, སིཡཱ བཧིདྡྷཱ, སིཡཱ ཨཛ྄ཛྷཏྟབཧིདྡྷཱ’’ཏི (དྷ. ས. ༡༤༣༥). ནནུ ཙེཏྠ ཨཏྠནྟརཱབྷཱཝཏོ, པཀཱརནྟརསྶ ཙ ཨནཱམཊྛཏྟཱ ཏཏིཡོ རཱསི ནཏྠཱིཏི? ནཡིདམེཝཾ. ཡདིཔི ཧི པཋམཔདེན ཨསངྒཧིཏསངྒཎྷནཝསེན དུཏིཡཔདསྶ པཝཏྟཏྟཱ སབྦེཔི སབྷཱཝདྷམྨཱ པདདྭཡེནེཝ པརིགྒཧིཏཱ, ཏེཧི པན ཝིསུཾ ཝིསུཾ གཧིཏདྷམྨེ ཨེཀཛ྄ཛྷཾ གཧཎཝསེན ཏཏིཡཔདཾ ཝུཏྟནྟི ཨཏྠེཝ ཏཏིཡོ རཱསི. ན ཧི སམུདཱཡོ ཨཝཡཝོ ཧོཏི, བྷིནྣཝཏྠུཀེ པན དྷམྨེ ཨདྷིཊྛཱནབྷེདཾ ཨམུཉྩིཏྭཱ ཨེཀཛ྄ཛྷཾ གཧཎཾ ན སམྦྷཝཏཱིཏི ཀཱལེན ཨཛ྄ཛྷཏྟཾ, ཀཱལེན བཧིདྡྷཱ ཛཱནནཀཱལེཏི ཝུཏྟནྟི དཊྛབྦཾ.

ཨབྷིཉྙཱནིདྡེསཝཎྞནཱ ནིཊྛིཏཱ.

ཨིཏི ཏེརསམཔརིཙྪེདཝཎྞནཱ.

༡༤. ཁནྡྷནིདྡེསཝཎྞནཱ

པཉྙཱཀཐཱཝཎྞནཱ

༤༢༡. སབྦཱཀཱརེནཱཏི ¶ ¶ ཨུཔཙཱརཱཀཱརོ, ཨཔྤནཱཀཱརོ, ཝསཱིབྷཱཝཱཀཱརོ, ཝིཏཀྐཱདིསམཏིཀྐམཱཀཱརོ, རཱུཔཱདཱིཧི ཝིརཛྫནཱཀཱརོ, ཙུདྡསདྷཱ ཙིཏྟསྶ པརིདམནཱཀཱརོ, པཉྩཝིདྷཨཱནིསཾསཱདྷིགམཱཀཱརོཏི ཨེཝམཱདིནཱ སབྦེན བྷཱཝནཱཀཱརེན.

ཏདནནྟརཱཏི ‘‘ཙིཏྟཾ པཉྙ’’ནྟི ཨེཝཾ དེསནཱཀྐམེན, པཊིཔཏྟིཀྐམེན ཙ ཏསྶ སམཱདྷིསྶ ཨནནྟརཱ. པཉྙཱ བྷཱཝེཏབྦཱ སམཱདྷིབྷཱཝནཱཡ སམནྣཱགཏེན བྷིཀྑུནཱཏི སམྦནྡྷོ. ‘‘པཉྙཉྩ བྷཱཝཡ’’ནྟི ཨེཝཾ ཨཏིསངྑེཔདེསིཏཏྟཱ, གཱཐཱཝཎྞནཱཡཾ ཝཱ ‘‘སམཱདྷིསིལཱཡཾ སུནིསིཏཾ ཝིཔསྶནཱཔཉྙཱསཏྠ’’ནྟི ཨེཝཾ ཨཏིཝིཡ སངྑེཔེན བྷཱསིཏཏྟཱ ཨཡཾ སཱ པཉྙཱཏི སབྷཱཝཏོ ཝིཉྙཱཏུམྤི ཏཱཝ ན སུཀརཱ. བྷཱཝནཱཝིདྷཱནསྶ པན ཨདསྶིཏཏྟཱ པགེཝ བྷཱཝེཏུཾ ན སུཀརཱཏི སམྦནྡྷོ. པུཙྪནཊྛེན པཉྷཱ, ཀམྨཾ ཀིརིཡཱ ཀརཎཾ, པཉྷཱཝ ཀམྨཾ པཉྷཱཀམྨཾ, པུཙྪནཔཡོགོཏི ཨཏྠོ.

ཀཱ པཉྙཱཏི སརཱུཔཔུཙྪཱ. ཀེནཊྛེན པཉྙཱཏི ཀེན ཨཏྠེན པཉྙཱཏི ཝུཙྩཏི, ‘‘པཉྙཱ’’ཏི པདཾ ཀཾ ཨབྷིདྷེཡྻཏྠཾ ནིསྶཱཡ པཝཏྟནྟི ཨཏྠོ. སཱ པནཱཡཾ པཉྙཱ སབྷཱཝཏོ, ཀིཙྩཏོ, ཨུཔཊྛཱནཱཀཱརཏོ, ཨཱསནྣཀཱརཎཏོ ཙ ཀཐཾ ཛཱནིཏབྦཱཏི ཨཱཧ ‘‘ཀཱནསྶཱ ལཀྑཎརསཔཙྩུཔཊྛཱནཔདཊྛཱནཱནཱི’’ཏི. ཀཏིཝིདྷཱཏི པབྷེདཔུཙྪཱ. ཀསྨཱ པནེཏྠ སཾཀིལེསཝོདཱནཔུཙྪཱ ན གཧིཏཱཏི? ཝུཙྩཏེ – ལོཀུཏྟརཱཡ ཏཱཝ པཉྙཱཡ ནཏྠེཝ སཾཀིལེསོ. ཨསཏི ཙ ཏསྨིཾ ཀུཏོ ཝོདཱནཔུཙྪཱཏི ཏདུབྷཡཾ ན གཧིཏཾ. ལོཀིཡཱཡ པན ཏཱནི བྷཱཝནཱཝིདྷཱནེ ཨེཝ ཨནྟོགདྷཱནཱིཏི ཀཏྭཱ ཝིསུཾ ན གཧིཏཱནི མགྒཱམགྒཉཱཎདསྶནཝིསུདྡྷིཨནྟོགདྷཏྟཱ ¶ , སམཱདྷིབྷཱཝནཱཡཾ ཝཱ ཝུཏྟནཡཱནུསཱརེན ཝེདིཏབྦཱནཱིཏི ན གཧིཏཱནི. པཊིཔཏྟི ནཱམ དིཊྛཱནིསཾསེ ཨེཝ ཧོཏཱིཏི ཨཱཧ ‘‘པཉྙཱབྷཱཝནཱཡ ཀོ ཨཱནིསཾསོ’’ཏི.

༤༢༢. ཏཏྲཱཏི ཏསྨིཾ, ཏསྶ ཝཱ པཉྷཱཀམྨསྶ. ཝིསྶཛྫནནྟི ཝིཝརཎཾ. པུཙྪིཏོ ཧི ཨཏྠོ ཨཝིབྷཱཝིཏཏྟཱ ནིགཱུལ༹ྷོ མུཊྛིཡཾ ཀཏོ ཝིཡ ཏིཊྛཏི, ཏསྶ ¶ ཝིཝརཎཾ ཝིསྶཛྫནཾ ཝིབྷཱུཏབྷཱཝཀརཎཏོ. ཀཱ པཉྙཱཏི ཀཱམཉྩཱཡཾ སརཱུཔཔུཙྪཱ, ཝིབྷཱགཝནྟཱནཾ པན སབྷཱཝཝིབྷཱཝནཾ ཝིབྷཱགདསྶནམུཁེནེཝ ཧོཏཱིཏི ཝིབྷཱགོ ཏཱཝ ཨནཝསེསཏོ དསྶེཏབྦོ. ཏཾདསྶནེན ཙ ཨཡམཱདཱིནཝོཏི དསྶེཏུཾ ‘‘པཉྙཱ བཧུཝིདྷཱ’’ཏིཨཱདི ཝུཏྟཾ. ཏཏྠ བཧུཝིདྷཱཏི ཀུསལཱདིཝསེན ཨནེཀཝིདྷཱ. ནཱནཔྤཀཱརཱཏི ཨཏྠཛཱཔིཀཱདིབྷེདེན, སུཏམཡཉཱཎཱདིབྷེདེན ཙ ནཱནཱཝིདྷཱ. ཏཾ སབྦནྟི ཏཾ ཨནཝསེསཾ པཉྙཱཝིབྷཱགཾ. ན སཱདྷེཡྻཱཏི ཝིཔསྶནཱབྷཱཝནཱཡ སདྡྷིཾ མགྒབྷཱཝནཱ ཨིདྷ ཨདྷིཔྤེཏཏྠོ. ཏཱཡ ཧི ཏཎྷཱཛཊཱཝིཛཊནཾ, ཏཉྩ ན སཱདྷེཡྻ. ཨནཝསེསཏོ ཧི པཉྙཱཔབྷེདེ ཝིསྶཛྫིཡམཱནེ ‘‘ཨེཀཝིདྷེན ཉཱཎཝཏྠཱུ’’ཏིཨཱདིཀོ (ཝིབྷ. ༧༥༡) སབྦོ ཉཱཎཝཏྠུ ཝིབྷངྒེ, སུཏྟནྟེསུ ཙ ཏཏྠ ཏཏྠ ཨཱགཏོ པཉྙཱཔབྷེདོ. སཀལོཔི ཝཱ ཨབྷིདྷམྨནཡོ ཨཱཧརིཏྭཱ ཝིསྶཛྫེཏབྦོ བྷཝེཡྻ, ཏཐཱ ཙ སཏི ཡྭཱཡཾ ཨིདྷ པཉྙཱབྷཱཝནཱཝིདྷི ཨདྷིཔྤེཏོ, ཏསྶ ཝིསྶཛྫནཱཡ ཨོཀཱསོཝ ན བྷཝེཡྻ. ཀིཉྩ ཡྭཱཡཾ ཋཱནཱཋཱནཀམྨནྟརཝིཔཱཀནྟརཱདིཝིསཡེ པཉྙཱཡ པཝཏྟིབྷེདོ, སོཔི ཡཐཱརཧཾ སདྡྷིཾ ཕལཱཕལབྷེདེན ཝིབྷཛིཏྭཱ ཝིསྶཛྫེཏབྦོ སིཡཱ. སོ ཙ པན ཝིསྶཛྫིཡམཱནོ ཨཉྙདཏྠུ ཝིཀྑེཔཱཡ སཾཝཏྟེཡྻ, ཡཐཱ ཏཾ ཨཝིསཡེ. ཏེནཱཧ ‘‘ཨུཏྟརི ཙ ཝིཀྑེཔཱཡ སཾཝཏྟེཡྻཱ’’ཏི. ཀུསལཙིཏྟསམྤཡུཏྟཾ ཝིཔསྶནཱཉཱཎནྟི ཨེཏྠ ཀུསལ-གྒཧཎེན དུཝིདྷམྤི ཨབྱཱཀཏཾ ནིཝཏྟེཏི, ཏཐཱ ‘‘ཨཏྠི སཾཀིལིཊྛཔཉྙཱ’’ཏི ཨེཝཾ པཝཏྟཾ མིཙྪཱཝཱདཾ པཊིསེདྷེཏི. ཝིཔསྶནཱཉཱཎ-གྒཧཎེན སེསཀུསལཔཉྙཱ.

༤༢༣. སཉྫཱནནཝིཛཱནནཱཀཱརཝིསིཊྛནྟི སཉྫཱནནཱཀཱརཝིཛཱནནཱཀཱརེཧི སཱཏིསཡཾ. ཡཏོ ནཱནཔྤཀཱརཏོ ཛཱནནཾ ཛཱནནབྷཱཝོ ཝིསཡགྒཧཎཱཀཱརོ. སོ ཧི ནེསཾ སམཱནོ, ན སཉྫཱནནཱདིཨཱཀཱརོ. པཱིཏཀནྟཱིཏི ཨེཏྠ ཨིཏི-སདྡོ ཨཱདིཨཏྠོ, ཏེན ‘‘ལོཧིཏཀཾ ཨོདཱཏཾ དཱིགྷཾ རསྶ’’ནྟིཨཱདིཀེ སཉྙཱཡ གཧེཏབྦཱཀཱརེ སངྒཎྷཱཏི. སཉྫཱནནམཏྟམེཝཱཏི ཨེཏྠ སཉྫཱནནཾ ནཱམ ‘‘ནཱིལཾ པཱིཏ’’ནྟིཨཱདིཀཾ ཨཱརམྨཎེ ཝིཛྫམཱནཾ ཝཱ ཨཝིཛྫམཱནཾ ཝཱ སཉྙཱནིམིཏྟཾ ཀཏྭཱ ཛཱནནཾ. ཏཐཱ ཧེསཱ པུན སཉྫཱནནཔཙྩཡནིམིཏྟཀརཎརསཱ. མཏྟ-སདྡེན ཝིསེསནིཝཏྟིཨཏྠེན ཝིཛཱནནཔཛཱནནཱཀཱརེ ནིཝཏྟེཏི, ཨེཝ-སདྡེན ཀདཱཙིཔི ཨིམིསྶཱ ཏེ ཝིསེསཱ ¶ ནཏྠེཝཱཏི ཨཝདྷཱརེཏི. ཏེནཱཧ ‘‘ཨནིཙྩཾ དུཀྑ’’ནྟིཨཱདི ¶ . ཏཏྠ ཝིཉྙཱཎཀིཙྩམྤི ཀཱཏུཾ ཨསཀྐོནྟཱི སཉྙཱ ཀུཏོ པཉྙཱཀིཙྩཾ ཀརེཡྻཱཏི ‘‘ལཀྑཎཔཊིཝེདྷཾ པཱཔེཏུཾ ན སཀྐོཏི’’ཙྩེཝ ཝུཏྟཾ, ན ཝུཏྟཾ ‘‘མགྒཔཱཏུབྷཱཝ’’ནྟི. ཨཱརམྨཎེ པཝཏྟམཱནཾ ཝིཉྙཱཎཾ ན ཏཏྠ སཉྙཱ ཝིཡ ནཱིལཔཱིཏཱདིཀསྶ སཉྫཱནནཝསེནེཝ པཝཏྟཏི, ཨཐ ཁོ ཏཏྠ ཨཉྙཉྩ ཝིསེསཾ ཛཱནནྟམེཝ པཝཏྟཏཱིཏི ཨཱཧ ‘‘ཝིཉྙཱཎ’’ནྟིཨཱདི. ཀཐཾ པན ཝིཉྙཱཎཾ ལཀྑཎཔཊིཝེདྷཾ པཱཔེཏཱིཏི? པཉྙཱཡ དསྶིཏམགྒེན. ལཀྑཎཱརམྨཎིཀཝིཔསྶནཱཡ ཧི ཨནེཀཝཱརཾ ལཀྑཎཱནི པཊིཝིཛ྄ཛྷིཏྭཱ པཊིཝིཛ྄ཛྷིཏྭཱ པཝཏྟམཱནཱཡ པགུཎབྷཱཝཏོ པརིཙཡཝསེན ཉཱཎཝིཔྤཡུཏྟཙིཏྟེནཔི ཝིཔསྶནཱ སམྦྷཝཏི, ཡཐཱ ཏཾ པགུཎསྶ གནྠསྶ སཛ྄ཛྷཱཡནེ ཉཱཡཱགཏཱཔི ཝཱརཱ ན ཝིཉྙཱཡནྟི. ལཀྑཎཔཊིཝེདྷནྟི ཙ ལཀྑཎཱནཾ ཨཱརམྨཎཀརཎམཏྟཾ སནྡྷཱཡ ཝུཏྟཾ, ན པཊིཝིཛ྄ཛྷནཾ. ཨུསྶཀྐིཏྭཱཏི ཨུདཡབྦཡཉཱཎཔཊིཔཱཊིཡཱ ཨཱཡཱུཧིཏྭཱ. མགྒཔཱཏུབྷཱཝཾ པཱཔེཏུཾ ན སཀྐོཏི ཨསམྦོདྷསབྷཱཝཏྟཱ. ཝུཏྟནཡཝསེནཱཏི ཝིཉྙཱཎེ ཝུཏྟནཡཝསེན ཨཱརམྨཎཉྩ ཛཱནཱཏི, ལཀྑཎཔཊིཝེདྷཉྩ པཱཔེཏི. ཨཏྟནོ པན ཨནཉྙསཱདྷཱརཎེན ཨཱནུབྷཱཝེན ཨུསྶཀྐིཏྭཱ མགྒཔཱཏུབྷཱཝཉྩ པཱཔེཏི.

ཨིདཱནི ཡཐཱཝུཏྟམཏྠཾ ཨུཔམཱཡ པཏིཊྛཱཔེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. ཏཏྠ ཨཛཱཏབུདྡྷཱིཏི ཨསཉྫཱཏབྱཝཧཱརབུདྡྷི. ཨུཔབྷོགཔརིབྷོགནྟི ཨུཔབྷོགཔརིབྷོགཱརཧཾ, ཨུཔབྷོགཔརིབྷོགཝཏྠཱུནཾ པཊིལཱབྷཡོགྱནྟི ཨཏྠོ. ཚེཀོཏི མཧཱསཱརོ. ཀཱུཊོཏི ཀཧཱཔཎཔཏིརཱུཔཀོ ཏམྦཀཾསཱདིམཡོ. ཨདྡྷསཱརོཏི ཨུཔཌྜྷགྒྷནཀོ. ཨིཏི-སདྡོ ཨཱདིཨཏྠོ, ཏེན པཱདསཱར སམསཱརཔརོཔཱདསཱརཱདཱིནཾ སངྒཧོ. ཏེ པཀཱརེཏི ཨིནྡཛཱལཱཛཱཏིཔུཔྥཱདིཔྤཀཱརེ ཙེཝ ཚེཀཱདིཔྤཀཱརེ ཙ.

སཉྙཱ ཧཱིཏིཨཱདི ཨུཔམཱསཾསནྡནཾ. སཉྙཱ ཝིབྷཱགཾ ཨཀཏྭཱ པིཎྜཝསེནེཝ ཨཱརམྨཎསྶ གཧཎཏོ དཱརཀསྶ ཀཧཱཔཎདསྶནསདིསཱི ཝུཏྟཱ. ཏཐཱ ཧི སཱ ‘‘ཡཐཱཨུཔཊྛིཏཝིསཡཔདཊྛཱནཱ’’ ཝུཙྩཏི. ཝིཉྙཱཎཾ ཨཱརམྨཎེ ཨེཀཙྩཝིསེསགཧཎསམཏྠཏཱཡ གཱམིཀཔུརིསསྶ ཀཧཱཔཎདསྶནསདིསཾ ཝུཏྟཾ. པཉྙཱ ཨཱརམྨཎེ ཨནཝསེསཝིསེསཱཝབོདྷཏོ ཧེརཉྙིཀསྶ ཀཧཱཔཎདསྶནསདིསཱི ཝུཏྟཱཏི དཊྛབྦཾ. ‘‘ནཱནཔྤཀཱརཏོ ¶ ཛཱནན’’ནྟི ཨིམིནཱ ཉེཡྻདྷམྨཱ པཙྩེཀཾ ནཱནཔྤཀཱརཱཏི ཏེསཾ ཡཱཐཱཝཏོ ཨཝབོདྷོ པཉྙཱཏི དསྶེཏི. ཏཐཱ ཧི ཝུཏྟཾ ‘‘སབྦེ དྷམྨཱ སབྦཱཀཱརེན བུདྡྷསྶ བྷགཝཏོ ཉཱཎམུཁེ ཨཱཔཱཐམཱགཙྪནྟཱི’’ཏི (མཧཱནི. ༡༥༦; ཙཱུལ༹ནི. མོགྷརཱཛམཱཎཝཔུཙྪཱནིདྡེས ༨༥).

ཡཏྠཱཏི ¶ ཡསྨིཾ ཙིཏྟུཔྤཱདེ. ན ཏཏྠ ཨེཀཾསེན ཧོཏཱིཏི ཏསྨིཾ ཙིཏྟུཔྤཱདེ པཉྙཱ ཨེཀནྟེན ན ཧོཏི. ན ཧི དུཧེཏུཀཨཧེཏུཀཙིཏྟུཔྤཱདེསུ པཉྙཱ ཨུཔྤཛྫཏི. ཨཝིནིབྦྷུཏྟཱཏི ཨཝིཡུཏྟཱ. ཏེཧཱིཏི སཉྙཱཝིཉྙཱཎེཧི. ཡཐཱ ཧི སུཁཾ པཱིཏིཡཱ ན ནིཡམཏོ ཨཝིཡུཏྟཾ, ཨེཝཾ སཉྙཱཝིཉྙཱཎཱནི པཉྙཱཡ ན ནིཡམཏོ ཨཝིཡུཏྟཱཏི. ཡཐཱ པན པཱིཏི སུཁེན ནིཡམཏོ ཨཝིཡུཏྟཱ, ཨེཝཾ པཉྙཱ སཉྙཱཝིཉྙཱཎེཧི ནིཡམཏོ ཨཝིཡུཏྟཱ. ཏསྨཱ ཨེཝཾ ཨཝིནིབྦྷུཏྟེསུ ཨིམེསུ ཏཱིསུ དྷམྨེསུ ཏེསཾ ཝིནིབྦྷོགོ དུཀྐརོཏི ཏིཎྞཾ ཛནཱནཾ ཀཧཱཔཎདསྶནཾ ནིདསྶིཏནྟི. ཏེསཾ དུཝིཉྙེཡྻནཱནཏྟཏཾཡེཝ ཝཙནནྟརེནཔི དསྶེཏུཾ ‘‘ཏེནཱཧཱ’’ཏིཨཱདི ཝུཏྟཾ. ཏཏྠ རཱུཔདྷམྨེསུཔི ཏཱཝ ནཱནཱནདཱིནཾ ཨུདཀསྶ, ནཱནཱཏེལསྶ ཝཱ ཨེཀསྨིཾ བྷཱཛནེ པཀྑིཔིཏྭཱ མཐིཏསྶ ‘‘ཨིདཾ ཨསུཀཱཡ ནདིཡཱ ཨུདཀཾ, ཨིདཾ ཨསུཀཏེལ’’ནྟི ནིདྡྷཱརེཏྭཱ སརཱུཔཏོ དསྶནཾ དུཀྐརཾ, ཀིམངྒཾ པན ཨརཱུཔདྷམྨེསཱུཏི དསྶེནྟོ ‘‘ཡཾ ཨརཱུཔཱིནཾ ཙིཏྟཙེཏསིཀཱན’’ནྟིཨཱདིམཱཧ.

༤༢༤. དྷམྨཱནཾ སཀོ བྷཱཝོ, སམཱནོ ཙ བྷཱཝོ དྷམྨསབྷཱཝོ. ཏཏྠ པཋམེན ཀཀྑལ༹ཕུསནཱདིསལཀྑཎཾ གཧིཏཾ, དུཏིཡེན ཨནིཙྩདུཀྑཏཱདིསཱམཉྙལཀྑཎཾ. ཏདུབྷཡསྶ ཙ ཡཱཐཱཝཏོ པཊིཝིཛ྄ཛྷནལཀྑཎཱ པཉྙཱཏི ཨཱཧ ‘‘དྷམྨསབྷཱཝཔཊིཝེདྷལཀྑཎཱ པཉྙཱ’’ཏི. གྷཊཔཊཱདིཔཊིཙྪཱདཀསྶ བཱཧིརནྡྷཀཱརསྶ དཱིཔཱལོཀཱདི ཝིཡ ཡཐཱཝུཏྟདྷམྨསབྷཱཝཔཊིཙྪཱདཀསྶ མོཧནྡྷཀཱརསྶ ཝིདྡྷཾསནརསཱ. ཨུཔྤཛྫམཱནོ ཨེཝ ཧི པཉྙཱལོཀོ ཧདཡནྡྷཀཱརཾ ཝིདྷམེནྟོ ཨེཝཾ ཨུཔྤཛྫཏི, ཏཏོ ཨེཝ དྷམྨསབྷཱཝེསུ ཨསམྨུཡ྄ཧནཱཀཱརེན པཙྩུཔཏིཊྛཏཱིཏི ཨསམྨོཧཔཙྩུཔཊྛཱནཱ. ཀཱརཎབྷཱུཏཱ ཝཱ སཡཾ ཕལབྷཱུཏཾ ཨསམྨོཧཾ པཙྩུཔཊྛཱཔེཏཱིཏི ཨེཝམྤི ཨསམྨོཧཔཙྩུཔཊྛཱནཱ. ཝིཔསྶནཱཔཉྙཱཡ ཨིདྷ ཨདྷིཔྤེཏཏྟཱ ‘‘སམཱདྷི ཏསྶཱ པདཊྛཱན’’ནྟི ཝུཏྟཾ. ཏཐཱ ཧི ‘‘སམཱཧིཏོ ཡཐཱབྷཱུཏཾ པཛཱནཱཏཱི’’ཏི སུཏྟཔདཾ ནིབནྡྷནབྷཱཝེན ཨཱགཏཾ (སཾ. ནི. ༣.༥, ༩༩; སཾ. ནི. ༥.༡༠༧༡; ནེཏྟི. ༤༠; མི. པ. ༢.༡.༡༤).

པཉྙཱཔབྷེདཀཐཱཝཎྞནཱ

༤༢༥. དྷམྨསབྷཱཝཔཊིཝེདྷོ ¶ ནཱམ པཉྙཱཡ ཨཱཝེཎིཀོ སབྷཱཝོ, ན ཏེནསྶཱ ཀོཙི ཝིབྷཱགོ ལབྦྷཏཱིཏི ཨཱཧ ‘‘དྷམྨསབྷཱཝཔཊིཝེདྷལཀྑཎེན ཏཱཝ ཨེཀཝིདྷཱ’’ཏི. ལུཛྫནཔལུཛྫནཊྛེན ལོཀོ ཝུཙྩཏི ཝཊྚཾ, ཏཔྤརིཡཱཔནྣཏཱཡ ལོཀེ ནིཡུཏྟཱ, ཏཏྠ ཝཱ ཝིདིཏཱཏི ལོཀིཡཱ. ཏཏྠ ཨཔརིཡཱཔནྣཏཱཡ ལོཀཏོ ཨུཏྟརཱ ཨུཏྟིཎྞཱཏི ལོཀུཏྟརཱ. ལོཀུཏྟརཱཔི ¶ ཧི མགྒསམྤཡུཏྟཱ བྷཱཝེཏབྦཱ. ཝིཔསྶནཱཔརིཡཱཡོཔི ཏསྶཱ ལབྦྷཏེཝཱཏི ལོཀུཏྟར-གྒཧཎཾ ན ཝིརུཛ྄ཛྷཏི. ཨཏྟཱནཾ ཨཱརམྨཎཾ ཀཏྭཱ པཝཏྟེཧི སཧ ཨཱསཝེཧཱིཏི སཱསཝཱ, ཨཱརམྨཎཀརཎཝསེནཔི ནཏྠི ཨེཏིསྶཱ ཨཱསཝཱཏི ཨནཱསཝཱ. ཨཱདི-སདྡེན ཨཱསཝཝིཔྤཡུཏྟསཱསཝདུཀཱདཱིནཾ སངྒཧོ དཊྛབྦོ. ནཱམརཱུཔཝཝཏྠཱནཝསེནཱཏི ནཱམཝཝཏྠཱནཝསེན, རཱུཔཝཝཏྠཱནཝསེན ཙ. པཋམཾ ནིབྦཱནདསྶནཏོ དསྶནཉྩ, ནིསྶཡབྷཱཝཏོ སམྤཡུཏྟཱ དྷམྨཱ བྷཝནྟི ཨེཏྠ, སཡམྤི ཝཱ བྷཝཏི ཨུཔྤཛྫཏི ན ནིབྦཱནཾ ཝིཡ ཨཔཱཏུབྷཱཝནྟི བྷཱུམི ཙཱཏི དསྶནབྷཱུམི, པཋམམགྒོ. སེསམགྒཏྟཡཾ པན ཡསྨཱ པཋམམགྒེན དིཊྛསྨིཾཡེཝ དྷམྨེ བྷཱཝནཱཝསེན ཨུཔྤཛྫཏི, ན ཨདིཊྛཔུབྦཾ ཀིཉྩི པསྶཏི, ཏསྨཱ བྷཱཝནཱ ཙ ཡཐཱཝུཏྟེནཏྠེན བྷཱུམི ཙཱཏི བྷཱཝནཱབྷཱུམི. ཏཏྠ པཉྙཱ དསྶནབྷཱུམིབྷཱཝནཱབྷཱུམིཝསེན དུཝིདྷཱཏི ཝུཏྟཱ. སུཏཱདིནིརཔེཀྑཱཡ ཙིནྟཱཡ ནིབྦཏྟཱ ཙིནྟཱམཡཱ. ཨེཝཾ སུཏམཡཱ, བྷཱཝནཱམཡཱ ཙ. མཡསདྡོ པཙྩེཀཾ སམྦནྡྷིཏབྦོ. ཨཱཡེ ཝཌྜྷིཡཾ ཀོསལླཾ ཨཱཡཀོསལླཾ, ཨཔཱཡེ ཨཝཌྜྷིཡཾ ཀོསལླཾ ཨཔཱཡཀོསལླཾ, ཨུཔཱཡེ ཏསྶ ཏསྶ ཨཏྠསྶ ནིབྦཏྟིཀཱརཎེ ཀོསལླཾ ཨུཔཱཡཀོསལླནྟི ཝིསུཾ ཝིསུཾ ཀོསལླཔདཾ སམྦནྡྷིཏབྦཾ. ཨཛ྄ཛྷཏྟཾ ཨབྷིནིཝེསོ པཊིཔཛྫནཾ ཨེཏིསྶཱཏི ཨཛ྄ཛྷཏྟཱབྷིནིཝེསཱ. ཨེཝཾ བཧིདྡྷཱབྷིནིཝེསཱ, ཨུབྷཡཱབྷིནིཝེསཱ ཙ ཝེདིཏབྦཱ.

༤༢༦. ལོཀིཡམགྒསམྤཡུཏྟཱཏི ལོཀིཡཀུསལཙིཏྟུཔྤཱདེསུ མགྒསམྤཡུཏྟཱ, ཝིསེསཏོ དིཊྛིཝིསུདྡྷིཨཱདིཝིསུདྡྷིཙཏུཀྐསངྒཧིཏམགྒསམྤཡུཏྟཱ. སམུདཱཡེསུ པཝཏྟཱ སམཉྙཱ ཏདེཀདེསེསུཔི ཝཏྟཏཱིཏི ཨཱཧ ‘‘མགྒསམྤཡུཏྟཱ’’ཏི, པཙྩེཀམྤི ཝཱ སམྨཱདིཊྛིཨཱདཱིནཾ མགྒསམཉྙཱཏི ཀཏྭཱ ཨེཝཾ ཝུཏྟཾ.

དྷམྨནཱནཏྟཱབྷཱཝེཔི ¶ པདཏྠནཱནཏྟམཏྟེན དུཀྐརཝཙནཾ ཧོཏཱིཏི ཝུཏྟཾ ‘‘ཨཏྠཏོ པནེསཱ ལོཀིཡལོཀུཏྟརཱཝཱ’’ཏི. ཨཱསཝཝིཔྤཡུཏྟསཱསཝདུཀཱདཱིསུཔི ཝིཔྤཡུཏྟཏཱདིགྒཧཎམེཝ ཝིསེསོ, ཨཏྠཏོ ལོཀིཡལོཀུཏྟརཱཝ པཉྙཱཏི ཨཱཧ ‘‘ཨེསེཝ ནཡོ’’ཏི. ཨཱདི-སདྡེན ཨོགྷནཱིཡཨོགྷཝིཔྤཡུཏྟཨོགྷནཱིཡཱདིདུཀཱནཾ སངྒཧོ དཊྛབྦོ. པཋམཛ྄ཛྷཱནིཀཱནི ཙཏྟཱརི མགྒཙིཏྟཱནི, ཏཐཱ དུཏིཡཱདིཛ྄ཛྷཱནིཀཱནི ཙཱཏི ཨེཝཾ སོལ༹སསུ མགྒཙིཏྟེསུ. ཝིཔསྶནཱཔཉྙཱཡ ཨིདྷ ཨདྷིཔྤེཏཏྟཱ མཧགྒཏཔཉྙཱ ན གཧིཏཱ.

༤༢༧. ཨཏྟནོ ཙིནྟཱཝསེནཱཏི ཏསྶ ཏསྶ ཨནཝཛྫསྶ ཨཏྠསྶ སཱདྷནེ པརོཔདེསེན ཝིནཱ ¶ ཨཏྟནོ ཨུཔཱཡཙིནྟཱཝསེནེཝ. སུཏཝསེནཱཏི ཡཐཱསུཏསྶ པརོཔདེསསྶ ཝསེན. ཡཐཱ ཏཐཱ ཝཱཏི པརཏོ ཨུཔདེསཾ སུཏྭཱ ཝཱ ཨསུཏྭཱ ཝཱ སཡམེཝ བྷཱཝནཾ ཨནུཡུཉྫནྟསྶ. ‘‘ཨཔྤནཱཔྤཏྟཱ’’ཏི ཨིདཾ སིཁཱཔྤཏྟབྷཱཝནཱམཡཾ དསྶེཏུཾ ཝུཏྟཾ, ན པན ‘‘ཨཔྤནཱཔྤཏྟཱཝ བྷཱཝནཱམཡཱ’’ཏི.

ཡོགཝིཧིཏེསཱུཏི པཉྙཱཝིཧིཏེསུ པཉྙཱཔརིཎཱམིཏེསུ ཨུཔཱཡསམྤཱདིཏེསུ. ཀམྨཱཡཏནེསཱུཏི ཨེཏྠ ཀམྨམེཝ ཀམྨཱཡཏནཾ, ཀམྨཉྩ ཏཾ ཨཱཡཏནཉྩ ཨཱཛཱིཝཱནནྟི ཝཱ ཀམྨཱཡཏནཾ. ཨེས ནཡོ སིཔྤཱཡཏནེསུཔི. ཏཏྠ དུཝིདྷཾ ཀམྨཾ ཧཱིནཉྩ ཝཌྜྷཀཱིཀམྨཱདི, ཨུཀྐཊྛཉྩ ཀསིཝཱཎིཛཱདི. སིཔྤམྤི དུཝིདྷཾ ཧཱིནཉྩ ནལ༹ཀཱརསིཔྤཱདི, ཨུཀྐཊྛཉྩ མུདྡཱགཎནཱདི. ཝིཛྫཱཝ ཝིཛྫཱཊྛཱནཾ. ཏཾ དྷམྨིཀམེཝ ནཱགམཎྜལཔརིཏྟཕུདྷམནཀམནྟསདིསཾ ཝེདིཏབྦཾ. ཏཱནི པནེཏཱནི ཨེཀཙྩེ པཎྜིཏཱ བོདྷིསཏྟསདིསཱ མནུསྶཱནཾ ཕཱསུཝིཧཱརཾ ཨཱཀངྑནྟཱ ནེཝ ཨཉྙེཧི ཀརིཡམཱནཱནི པསྶནྟི, ན ཝཱ ཀཏཱནི ཨུགྒཎྷནྟི, ན ཀཐེནྟཱནཾ སུཎནྟི. ཨཐ ཁོ ཨཏྟནོ དྷམྨཏཱཡ ཙིནྟཱཡ ཀརོནྟི, པཉྙཝནྟེཧི ཨཏྟནོ དྷམྨཏཱཡ ཙིནྟཱཡ ཀཏཱནིཔི ཨཉྙེཧི ཨུགྒཎྷིཏྭཱ ཀརོནྟེཧི ཀཏསདིསཱནེཝ ཧོནྟི.

ཀམྨསྶཀཏནྟི ‘‘ཨིདཾ ཀམྨཾ སཏྟཱནཾ སཀཾ, ཨིདཾ ནོ སཀ’’ནྟི ཨེཝཾ ཛཱནནཉཱཎཾ. སཙྩཱནུལོམིཀནྟི ཝིཔསྶནཱཉཱཎཾ. ཏཾ ཧི སཙྩཔཊིཝེདྷསྶ ཨནུལོམནཏོ ‘‘སཙྩཱནུལོམིཀ’’ནྟི ཝུཙྩཏི. ཨིདཱནིསྶ པཝཏྟནཱཀཱརཾ དསྶེཏུཾ ‘‘རཱུཔཾ ཨནིཙྩནྟི ཝཱ’’ཏིཨཱདི ཝུཏྟཾ. ཏཏྠ ཝཱ-སདྡེན ཨནིཡམཏྠེན དུཀྑཱནཏྟལཀྑཎཱནིཔི ¶ གཧིཏཱནེཝཱཏི དཊྛབྦཾ ནཱནནྟརིཡཀབྷཱཝཏོ. ཡཾ ཧི ཨནིཙྩཾ, ཏཾ དུཀྑཾ. ཡཾ དུཀྑཾ, ཏདནཏྟཱཏི. ཡཾ ཨེཝརཱུཔིནྟི ཡཾ ཨེཝཾ ཧེཊྛཱ ནིདྡིཊྛསབྷཱཝཾ. ཨནུལོམིཀཾ ཁནྟིནྟིཨཱདཱིནི པཉྙཱཝེཝཙནཱནི. སཱ ཧི ཧེཊྛཱ ཝུཏྟཱནཾ ཀམྨཱཡཏནཱདཱིནཾ ཨཔཙྩནཱིཀདསྶནེན ཨནུལོམནཏོ, ཏཐཱ སཏྟཱནཾ ཧིཏཙརིཡཱཡ མགྒསཙྩསྶ, པརམཏྠསཙྩསྶ, ནིབྦཱནསྶ ཙ ཨཝིལོམནཏོ ཨནུལོམེཏཱིཏི ཨནུལོམིཀཱ. སབྦཱནིཔི ཨེཏཱནི ཀཱརཎཱནི ཁམཏི དཊྛུཾ སཀྐོཏཱིཏི ཁནྟི. པསྶཏཱིཏི དིཊྛི. རོཙེཏཱིཏི རུཙི. མུནཱཏཱིཏི མུཏི. པེཀྑཏཱིཏི པེཀྑཱ. ཏེ ཙ ཀམྨཱཡཏནཱདཡོ དྷམྨཱ ཨེཏཱཡ ནིཛ྄ཛྷཱཡམཱནཱ ནིཛ྄ཛྷཱནཾ ཁམནྟཱིཏི དྷམྨནིཛ྄ཛྷཱནཁནྟི. པརཏོ ཨསུཏྭཱ པཊིལབྷཏཱིཏི ཨཉྙསྶ ཨུཔདེསཝཙནཾ ཨསུཏྭཱ སཡམེཝ ཙིནྟེནྟོ པཊིལབྷཏི. ཨཡཾ ཝུཙྩཏཱིཏི ཨཡཾ ཙིནྟཱམཡཱ པཉྙཱ ནཱམ ཝུཙྩཏི. སཱ པནེསཱ ཨབྷིཉྙཱཏཱནཾ བོདྷིསཏྟཱནམེཝ ཨུཔྤཛྫཏི. ཏཏྠཱཔི ¶ སཙྩཱནུལོམིཀཉཱཎཾ དྭིནྣཾཡེཝ བོདྷིསཏྟཱནཾ ཨནྟིམབྷཝིཀཱནཾ, སེསཔཉྙཱ སབྦེསམྤི པཱུརིཏཔཱརམཱིནཾ མཧཱཔཉྙཱནཾ ཨུཔྤཛྫཏི. པརཏོ སུཏྭཱ པཊིལབྷཏཱིཏི ཀམྨཱཡཏནཱདཱིནི པརེན ཀརིཡམཱནཱནི ཝཱ ཀཏཱནི ཝཱ དིསྭཱཔི པརསྶ ཀཐཡམཱནསྶ ཝཙནཾ སུཏྭཱཔི ཨཱཙརིཡསནྟིཀེ ཨུགྒཧེཏྭཱཔི པཊིལདྡྷཱ སབྦཱ པརཏོ སུཏྭཱཝ པཊིལདྡྷཱ ནཱམཱཏི ཝེདིཏབྦཱ. སམཱཔནྣསྶཱཏི སམཱཔཏྟིསམངྒིསྶ, ནིདསྶནམཏྟཉྩེཏཾ. ཝིཔསྶནཱམགྒཔཉྙཱ ཨིདྷ ‘‘བྷཱཝནཱམཡཱ པཉྙཱ’’ཏི ཨདྷིཔྤེཏཱ.

སཱཏི ‘‘པརིཏྟཱརམྨཎཱ མཧགྒཏཱརམྨཎཱ’’ཏི (ཝིབྷ. ༧༥༣) ཝུཏྟཔཉྙཱ. ལོཀིཡཝིཔསྶནཱཏི ལོཀིཡཝིཔསྶནཱཔཉྙཱ. སཱ ལོཀུཏྟརཝིཔསྶནཱཏི ཡཱ ནིབྦཱནཾ ཨཱརབྦྷ པཝཏྟཱ ཨཔྤམཱཎཱརམྨཎཱ པཉྙཱ ཝུཏྟཱ, སཱ ལོཀུཏྟརཝིཔསྶནཱཏི མགྒཔཉྙཾ སནྡྷཱཡཱཧ. སཱ ཧི སངྑཱརཱནཾ ཨནིཙྩཏཱདིཾ ཨགཎྷནྟཱིཔི ཝིཔསྶནཱཀིཙྩཔཱརིཔཱུརིཡཱ, ནིབྦཱནསྶ ཝཱ ཏཐལཀྑཎཾ ཝིསེསཏོ པསྶཏཱིཏི ཝིཔསྶནཱཏི ཝུཙྩཏི. གོཏྲབྷུཉཱཎཾ པན ཀིཉྩཱཔི ཨཔྤམཱཎཱརམྨཎཾ, མགྒསྶ པན ཨཱཝཛྫནཊྛཱནིཡཏྟཱ ན ཝིཔསྶནཱཝོཧཱརཾ ལབྷཏི.

ཨཡནྟི ཨེཏཱཡ སམྤཏྟིཡོཏི ཨཱཡོ, ཝུདྡྷི. ཏཏྠ ཀོསལླནྟི ཏསྨིཾ ཨནཏྠཧཱནིཨཏྠུཔྤཏྟིལཀྑཎེ ཨཱཡེ ཀོསལླཾ ཀུསལཏཱ ནིཔུཎཏཱ.

ཏཾ ¶ པན ཨེཀནྟིཀཾ ཨཱཡཀོསལླཾ པཱལི༹ཝསེནེཝ དསྶེཏུཾ ‘‘ཨིམེ དྷམྨེ’’ཏིཨཱདི ཝུཏྟཾ. ཏཏྠ ཨིདཾ ཝུཙྩཏཱིཏི ཡཱ ཨིམེསཾ ཨཀུསལདྷམྨཱནཾ ཨནུཔྤཏྟིཔཧཱནེསུ, ཀུསལདྷམྨཱནཉྩ ཨུཔྤཏྟིཊྛིཏཱིསུ པཉྙཱ, ཨིདཾ ཨཱཡཀོསལླཾ ནཱམཱཏི ཝུཙྩཏི.

ཝུདྡྷིལཀྑཎཱ ཨཱཡཏོ ཨཔེཏཏྟཱ ཨཔཱཡོ, ཨཝུདྡྷི. ཏཏྠ ཀོསལླནྟི ཏསྨིཾ ཨཏྠཧཱནིཨནཏྠུཔྤཏྟིལཀྑཎེ ཨཔཱཡེ ཀོསལླཾ ཀུསལཏཱ ཨཔཱཡཀོསལླཾ. ཏམྤི པཱལི༹ཝསེནེཝ དསྶེཏུཾ ‘‘ཨིམེ དྷམྨེ’’ཏིཨཱདི ཝུཏྟཾ. ཏཏྠ ཨིདཾ ཝུཙྩཏཱིཏི ཡཱ ཨིམེསཾ ཀུསལདྷམྨཱནཾ ཨནུཔྤཛྫནནིརུཛ྄ཛྷནེསུ, ཨཀུསལདྷམྨཱནཾ ཝཱ ཨུཔྤཏྟིཊྛིཏཱིསུ པཉྙཱ, ཨིདཾ ཨཔཱཡཀོསལླཾ ནཱམཱཏི ཝུཙྩཏི. ཨཱཡཀོསལླཾ ཏཱཝ པཉྙཱ ཧོཏུ, ཨཔཱཡཀོསལླཾ ཀཐཾ པཉྙཱ ནཱམ ཛཱཏཱཏི? ཨེཝཾ མཉྙཏི ‘‘ཨཔཱཡུཔྤཱདནསམཏྠཏཱ ཨཔཱཡཀོསལླཾ ནཱམ སིཡཱ’’ཏི, ཏཾ པན ཏསྶ མཏིམཏྟཾ. ཀསྨཱ? པཉྙཝཱ ཨེཝ ཧི ‘‘མཡ྄ཧཾ ཨེཝཾ མནསི ཀརོཏོ ཨནུཔྤནྣཱ ཀུསལཱ དྷམྨཱ ནུཔྤཛྫནྟི, ཨུཔྤནྣཱ ¶ ནིརུཛ྄ཛྷནྟི. ཨནུཔྤནྣཱ ཨཀུསལཱ དྷམྨཱ ཨུཔྤཛྫནྟི, ཨུཔྤནྣཱ པཝཌྜྷནྟཱི’’ཏི པཛཱནཱཏི, སོ ཨེཝཾ ཉཏྭཱ ཨནུཔྤནྣེ ཨཀུསལེ ན ཨུཔྤཱདེཏི, ཨུཔྤནྣེ པཛཧཏི. ཨནུཔྤནྣེ ཀུསལེ ཨུཔྤཱདེཏི, ཨུཔྤནྣེ བྷཱཝནཱཔཱརིཔཱུརིཾ པཱཔེཏི. ཨེཝཾ ཨཔཱཡཀོསལླམྤི པཉྙཱ ཨེཝཱཏི.

སབྦཏྠཱཏི སབྦེསུ. ཏེསཾ ཏེསཾ དྷམྨཱནནྟི སཏྟཱནཾ ཏཾཏཾཧིཏསུཁདྷམྨཱནཾ. ཏངྑཎཔྤཝཏྟནྟི ཨཙྩཱཡིཀེ ཀིཙྩེ ཝཱ བྷཡེ ཝཱ ཨུཔྤནྣེ ཏསྶ ཏིཀིཙྪནཏྠཾ ཏསྨིཾཡེཝ ཁཎེ པཝཏྟཾ. ཋཱནེན ཨུཔྤཏྟི ཨེཏསྶ ཨཏྠཱིཏི ཋཱནུཔྤཏྟིཀཾ, ཋཱནསོ ཨེཝ ཨུཔྤཛྫནཀཾ. ཏཏྲུཔཱཡཱཏི ཏཏྲ ཏཏྲ ཀརཎཱིཡེ ཨུཔཱཡབྷཱུཏཱ.

གཧེཏྭཱཏི ‘‘ཨིདཾ རཱུཔཾ, ཨེཏྟཀཾ རཱུཔ’’ནྟིཨཱདིནཱ པརིགྒཎྷནཝསེན གཧེཏྭཱ. ཨུབྷཡཾ གཧེཏྭཱཏི ‘‘ཨཛ྄ཛྷཏྟཾ བཧིདྡྷཱ’’ཏི ཨུབྷཡཾ ཨནུཔུབྦཏོ པརིགྒཧེཏྭཱ. ཨཐ ཝཱ ‘‘ཡཾ ཀིཉྩི སམུདཡདྷམྨཾ, སབྦཾ ཏཾ ནིརོདྷདྷམྨ’’ནྟི ཨེཀཔྤཧཱརེནེཝ སབྦེཔི པཉྩཀྑནྡྷེ ཨཝིབྷཱགེན པརིགྒཧེཏྭཱ. ཨཡཾ པན ཏིཀྑཝིཔསྶཀསྶ མཧཱཔུཉྙསྶ བྷིཀྑུནོ ཝིཔསྶནཱབྷིནིཝེསོ.

༤༢༨. དུཀྑསཙྩཾ ཨཱརབྦྷཱཏི དུཀྑསཙྩཾ ཨཱརམྨཎཾ ཀཏྭཱ, ཏཔྤཊིཙྪཱདཀསམྨོཧཝིདྷཾསནཝསེན ཙ པཝཏྟཾ ཉཱཎཾ དུཀྑེ ཉཱཎཾ. དུཀྑསམུདཡཾ ཨཱརབྦྷཱཏི ¶ ཨེཏྠཱཔི ཨེསེཝ ནཡོ. ཏཐཱ སེསཔདདྭཡེཔི. པཙྩཝེཀྑཎཉཱཎཾ ཧི ཙཏུསཙྩཾ ཨཱརབྦྷ པཝཏྟཉཱཎཾ ནཱམ, ཏཏིཡཾ པན མགྒཉཱཎཾ, ཨིཏརསཙྩཱནི ཝིཔསྶནཱཉཱཎནྟི པཱཀཊམེཝ.

‘‘ཨཏྠཱདཱིསུ པབྷེདགཏཱནི ཉཱཎཱནཱི’’ཏི སངྑེཔེན ཝུཏྟམཏྠཾ པཱལི༹ཝསེནེཝ ཝིཝརིཏུཾ ‘‘ཝུཏྟཉྷེཏ’’ནྟིཨཱདི ཝུཏྟཾ. ཏཏྠ ཨཏྠེ ཉཱཎཾ ཨཏྠཔཊིསམྦྷིདཱཏི ཡཾ ཨཏྠཔྤབྷེདསྶ སལླཀྑཎཝིབྷཱཝནཝཝཏྠཱནཀརཎསམཏྠཾ ཨཏྠེ པབྷེདགཏཾ ཉཱཎཾ, ཨཡཾ ཨཏྠཔཊིསམྦྷིདཱ ནཱམ. སེསཔདེསུཔི ཨེསེཝ ནཡོ. དྷམྨཔྤབྷེདསྶ ཧི སལླཀྑཎཝིབྷཱཝནཝཝཏྠཱནཀརཎསམཏྠཾ དྷམྨེ པབྷེདགཏཾ ཉཱཎཾ དྷམྨཔཊིསམྦྷིདཱ. ནིརུཏྟིཔྤབྷེདསྶ སལླཀྑཎཝིབྷཱཝནཝཝཏྠཱནཀརཎསམཏྠཾ ནིརུཏྟཱབྷིལཱཔེ པབྷེདགཏཾ ཉཱཎཾ ནིརུཏྟིཔཊིསམྦྷིདཱ. པཊིབྷཱནཔྤབྷེདསྶ སལླཀྑཎཝིབྷཱཝནཝཝཏྠཱནཀརཎསམཏྠཾ པཊིབྷཱནེ པབྷེདགཏཾ ཉཱཎཾ པཊིབྷཱནཔཊིསམྦྷིདཱ. ནིརུཏྟིཔཊིབྷཱནཔྤབྷེདཱ ཏབྦིསཡཱནཾ ཨཏྠཱདཱིནཾ པཙྩཡུཔྤནྣཏཱདིབྷེདེཧི བྷིནྡིཏྭཱ ཝེདིཏབྦཱ.

ནིབྦཱནམྤི ¶ སམྤཱཔཀཧེཏུཨནུསཱརེན ཨརཱིཡཏི, ཨདྷིགམྨཏཱིཏི ཨཏྠོ. ‘‘ཡཾ ཀིཉྩི པཙྩཡསམྦྷཱུཏ’’ནྟི ཨེཏེན སཙྩཧེཏུདྷམྨཔཙྩཡཱཀཱརཝཱརེསུ ཨཱགཏཱནི དུཀྑཱདཱིནི གཧིཏཱནི. སཙྩཔཙྩཡཱཀཱརཝཱརེསུ ནིབྦཱནཾ, པརིཡཏྟིཝཱརེ བྷཱསིཏཏྠོ, ཨབྷིདྷམྨབྷཱཛནཱིཡེ ཝིཔཱཀོ, ཀིརིཡཱ ཙཱཏི ཨེཝཾ པཱལི༹ཡཾ ཝུཏྟཱནཾ ཨེཝ ཝསེན པཉྩ ཨཏྠཱ ཝེདིཏབྦཱ. དཧཏཱིཏི ཝིདཧཏི, ནིབྦཏྟཀཧེཏུཨཱདཱིནཾ སཱདྷཱརཎམེཏཾ ནིབྦཙནཾ. ཏདཏྠཾ པན ཝིབྷཱཝེཏུཾ ‘‘པཝཏྟེཏི ཝཱ སམྤཱཔུཎིཏུཾ ཝཱ དེཏཱི’’ཏི ཝུཏྟཾ. ཏེསུ པུརིམོ ཨཏྠོ མགྒཝཛྫེསུ དཊྛབྦོ. བྷཱསིཏམྤི ཧི ཨཝབོདྷནཝསེན ཨཏྠཾ པཝཏྟེཏི, མགྒོ པན ནིབྦཱནཾ པཱཔེཏཱིཏི ཏསྨིཾ པཙྪིམོ ཨཏྠོ. ནིབྦཱནཾ ཧི པཏྟབྦོ ཨཏྠོ, བྷཱསིཏཏྠོ ཉཱཔེཏབྦོ ཨཏྠོ, ཨིཏརོ ནིབྦཏྟེཏབྦོ ཨཏྠོཏི ཨེཝཾ ཏིཝིདྷོ ཧོཏི.

‘‘ཡོ ཀོཙི ཕལནིབྦཏྟཀོ ཧེཏཱུ’’ཏི ཨེཏེན སཙྩཧེཏུདྷམྨཔཙྩཡཱཀཱརཝཱརེསུ ཨཱགཏཱནི སམུདཡཱདཱིནི གཧིཏཱནི, སཙྩཔཙྩཡཱཀཱརཝཱརེསུ མགྒོ, པརིཡཏྟིཝཱརེ བྷཱསིཏཾ, ཨབྷིདྷམྨབྷཱཛནཱིཡེ ཀུསལཱཀུསལནྟི ཨེཝཾ པཱལི༹ཡཾ ཝུཏྟཱནཾ ཨེཝ ཝསེན པཉྩ དྷམྨཱ ཝེདིཏབྦཱ. ཏཏྠ ¶ མགྒོ སམྤཱཔཀོ, བྷཱསིཏཾ ཉཱཔཀོ, ཨིཏརཾ ནིབྦཏྟཀོཏི ཨེཝཾ ཏིཝིདྷོ ཧེཏུ ཝེདིཏབྦོ. ཨེཏྠ ཙ ཀིརིཡཱནཾ ཨཝིཔཱཀཏཱཡ དྷམྨབྷཱཝོ ན ཝུཏྟོ. ཡདི ཨེཝཾ ཝིཔཱཀཱ ན ཧོནྟཱིཏི ཨཏྠབྷཱཝོཔི ན ཝཏྟབྦོ? ན, པཙྩཡུཔྤནྣབྷཱཝཏོ. ཨེཝཾ སཏི ཀུསལཱཀུསལཱནམྤི ཨཏྠབྷཱཝོ ཨཱཔཛྫཏཱིཏི ཙེ? ནཱཡཾ དོསོ ཨཔྤཊིསིདྡྷཏྟཱ. ཝིཔཱཀསྶ པན པདྷཱནཧེཏུཏཱཡ པཱཀཊབྷཱཝཏོ དྷམྨབྷཱཝོ ཨེཝ ཏེསཾ ཝུཏྟོ. ཀིརིཡཱནཾ པཙྩཡབྷཱཝཏོ དྷམྨབྷཱཝོ ཨཱཔཛྫཏཱིཏི ཙེ? ནཱཡཾ དོསོ ཨཔྤཊིསིདྡྷཏྟཱ. ཀམྨཕལསམྦནྡྷསྶ པན ཧེཏུབྷཱཝསྶཱབྷཱཝཏོ དྷམྨབྷཱཝོ ན ཝུཏྟོ. ཨཔིཙ ‘‘ཨཡཾ ཨིམསྶ པཙྩཡོ, ཨཡཾ པཙྩཡུཔྤནྣོ’’ཏི ཨེཏཾ བྷེདམཀཏྭཱ ཀེཝལཾ ཀུསལཱཀུསལེ, ཝིཔཱཀཀིརིཡཱདྷམྨེ ཙ པཙྩཝེཀྑནྟསྶ དྷམྨཏྠཔཊིསམྦྷིདཱ ཧོནྟཱིཏི ཏེསཾ ཨཏྠདྷམྨཏཱ ན ཝུཏྟཱཏི དཊྛབྦཾ.

ཨཡམེཝ ཧི ཨཏྠོཏི ཡྭཱཡཾ ཨཏྠདྷམྨཱནཾ པཉྩདྷཱ ཝིབྷཛནཝསེན ཨཏྠོ ཝུཏྟོ, ཨཡམེཝ ཨབྷིདྷམྨེ ཝིབྷཛིཏྭཱ དསྶིཏོཏི སམྦནྡྷོ.

‘‘དྷམྨནིརུཏྟཱབྷིལཱཔེ’’ཏི ཨེཏྠ དྷམྨ-སདྡོ སབྷཱཝཝཱཙཀོཏི ཀཏྭཱ ཨཱཧ ‘‘སབྷཱཝནིརུཏྟཱི’’ཏི, ཨཝིཔརཱིཏནིརུཏྟཱིཏི ཨཏྠོ. ཏེནཱཧ ‘‘ཨབྱབྷིཙཱརཱི ཝོཧཱརོ’’ཏི, ཏསྶ ཏསྶ ཨཏྠསྶ བོདྷནེ པཊིནིཡཏསམྦནྡྷོ སདྡཝོཧཱརོཏི ཨཏྠོ. ཏདབྷིལཱཔེཏི ཏསྶ སབྷཱཝནིརུཏྟིསཉྙིཏསྶ ¶ ཨབྱབྷིཙཱརིཝོཧཱརསྶ ཨབྷིལཱཔནེ. སཱ པནཱཡཾ སབྷཱཝནིརུཏྟི མཱགདྷབྷཱསཱ. ཨཏྠཏོ ནཱམཔཉྙཏྟཱིཏི ཨཱཙརིཡཱ. ཨཔརེ པན ཡདི སབྷཱཝནིརུཏྟི པཉྙཏྟིསབྷཱཝཱ, ཨེཝཾ སཏི པཉྙཏྟི ཨབྷིལཔིཏབྦཱ, ན ཝཙནནྟི ཨཱཔཛྫཏི. ན ཙ ཝཙནཏོ ཨཉྙཾ ཨབྷིལཔིཏབྦཾ ཨུཙྩཱརེཏབྦཾ ཨཏྠི. ཨཐ ཕསྶཱདིཝཙནེཧི བོདྷེཏབྦཾ ཨབྷིལཔིཏབྦཾ, ཨེཝཉྩ སཏི ཨཏྠདྷམྨཱནམྤི བོདྷེཏབྦཏྟཱ ཏེསམྤི ནིརུཏྟིབྷཱཝོ ཨཱཔཛྫཏི. ཕསྶོཏི ཙ སབྷཱཝནིརུཏྟི, ཕསྶཾ ཕསྶཱཏི ན སབྷཱཝནིརུཏྟཱིཏི དསྶིཏོཝཱཡམཏྠོ. ན ཙ ཨཝཙནཾ ཨེཝཾཔཀཱརཾ ཨཏྠི. ཏསྨཱ ཝཙནབྷཱུཏཱཡ ཨེཝ ཏསྶཱ སབྷཱཝནིརུཏྟིཡཱ ཨབྷིལཱཔེ ཨུཙྩཱརཎེཏི ཨཏྠོ དཊྛབྦོ.

ཏཾ སབྷཱཝནིརུཏྟིསདྡཾ ཨཱརམྨཎཾ ཀཏྭཱ པཙྩཝེཀྑནྟསྶ ཏསྨིཾ སབྷཱཝནིརུཏྟཱབྷིལཱཔེ པབྷེདགཏཾ ཉཱཎཾ ནིརུཏྟིཔཊིསམྦྷིདཱ, ‘‘ཨེཝམཡཾ ནིརུཏྟིཔཊིསམྦྷིདཱ སདྡཱརམྨཎཱ ¶ ནཱམ ཛཱཏཱ, ན པཉྙཏྟིཨཱརམྨཎཱ’’ཏི (ཝིབྷ. ཨཊྛ. ༧༡༨) ཙ ཨཊྛཀཐཱཡཾ ཝུཏྟཏྟཱ ནིརུཏྟིསདྡཱརམྨཎཱཡ སོཏཝིཉྙཱཎཝཱིཐིཡཱ པརཏོ མནོདྭཱརེ ནིརུཏྟིཔཊིསམྦྷིདཱ པཝཏྟཏཱིཏི ཝདནྟི. ‘‘ནིརུཏྟིཔཊིསམྦྷིདཱ པཙྩུཔྤནྣཱརམྨཎཱ’’ཏི (ཝིབྷ. ༧༤༩) ཙ ཝཙནསདྡཾ གཧེཏྭཱ པཙྪཱ ཛཱནནཾ སནྡྷཱཡ ཝུཏྟནྟི. ཨེཝཾ པན ཨཉྙསྨིཾ པཙྩུཔྤནྣཱརམྨཎེ ཨཉྙཾ པཙྩུཔྤནྣཱརམྨཎཾ ཝུཏྟནྟི ཨཱཔཛྫཏི. ཡཐཱ པན དིབྦསོཏཉཱཎཾ མནུསྶཱདིསདྡབྷེདནིཙྪཡསྶ པཙྩཡབྷཱུཏཾ ཏཾཏཾསདྡཝིབྷཱཝཀཾ, ཨེཝཾ སབྷཱཝཱསབྷཱཝནིརུཏྟིནིཙྪཡསྶ པཙྩཡབྷཱུཏཾ པཙྩུཔྤནྣསབྷཱཝནིརུཏྟིསདྡཱརམྨཎཾ ཏཾཝིབྷཱཝཀཾ ཉཱཎཾ ནིརུཏྟིཔཊིསམྦྷིདཱཏི ཝུཙྩམཱནེ ན ཀོཙི པཱལི༹ཝིརོདྷོ. ‘‘ཏཾ སབྷཱཝནིརུཏྟིསདྡཾ ཨཱརམྨཎཾ ཀཏྭཱ པཙྩཝེཀྑནྟསྶཱ’’ཏི ཙ ‘‘པཙྩུཔྤནྣསདྡཱརམྨཎཾ པཙྩཝེཀྑཎཾ པཝཏྟེནྟསྶཱ’’ཏི ན ནསཀྐཱ ཝཏྟུཾ. ཏཉྷི ཉཱཎཾ སབྷཱཝནིརུཏྟིཾ ཝིབྷཱཝེནྟམེཝ ཏཾཏཾསདྡཔཙྩཝེཀྑཎཱནནྟརཾ ཏཾཏཾཔབྷེདནིཙྪཡཧེཏུབྷཱཝཏོ ནིརུཏྟིཾ བྷིནྡནྟཾ པཊིཝིཛ྄ཛྷནྟམེཝ ཨུཔྤཛྫཏཱིཏི པབྷེདགཏམྤི ཧོཏཱིཏི.

སབྦཏྠ ཉཱཎནྟི སབྦསྨིཾ ཝིསཡེ ཉཱཎཾ, སབྦམྤི ཉཱཎནྟི ཨདྷིཔྤཱཡོ. ཏེནཱཧ ‘‘ཉཱཎཱརམྨཎཾ ཉཱཎ’’ནྟི. སབྦཏྠཱཏི ཝཱ སབྦེསུ ཨཏྠཱདཱིསུ, ཏཱིསུ, ཙཏཱུསུཔི ཝཱ པཝཏྟཏྟཱ, ཀུསལཀིརིཡཱབྷཱུཏཱཡ པཊིབྷཱནཔཊིསམྦྷིདཱཡ དྷམྨཏྠབྷཱཝཏོ ཏཱིསུ ཨེཝ ཝཱ པཝཏྟཏྟཱ ‘‘སབྦཏྠ ཉཱཎ’’ནྟི ཝུཏྟཾ. ཏེནཱཧ ‘‘ཡཐཱཝུཏྟེསུ ཝཱ’’ཏིཨཱདི. ཏཏྠ སགོཙརཀིཙྩཱདིཝསེནཱཏི སགོཙརསྶ, ཀིཙྩཱདིཀསྶ ཙ ཝསེན ‘‘ཨིདཾ ཉཱཎཾ ཨིདཾ ནཱམ ཨཱརམྨཎཾ ཀཏྭཱ པཝཏྟཾ ཨིམིནཱ ནཱམ ¶ ཀིཙྩེནཱ’’ཏི ཛཱནནཾ. ཨཱདི-སདྡེན ལཀྑཎཔཙྩུཔཊྛཱནཔདཊྛཱནབྷཱུམིཨཱདཱིནཾ སངྒཧོ. ཏེནེཝཱཧ ‘‘ཨིམཱནི ཉཱཎཱནི ཨིདམཏྠཛོཏཀཱནཱི’’ཏིཨཱདི.

༤༢༩. པབྷེདཾ གཙྪནྟཱིཏི ཨནེཀབྷེདབྷིནྣེསུ ཨཱརམྨཎེསུ ཏེསཾ ཡཱཐཱཝཏོ ཏཾཏཾཔབྷེདཱཝབོདྷནསམཏྠཏཾ ཨུཔགཙྪནྟི.

མཧཱསཱཝཀཱནཉྩ ཨསེཀྑབྷཱུམིཡཾ པབྷེདཾ གཏཱཏི སཱམཉྙཝིདྷིནཱ དསྶིཏམཏྠཾ ཨཔཝཱདེན ནིཝཏྟེཏུཾ ཨཱནནྡཏྠེར-གྒཧཎཾ ཀཏཾ.

ཨེཏཱ པཊིསམྦྷིདཱ. སེཀྑབྷཱུམིཡཾ པབྷེདགམནཾ ཨཔྤཝིསཡཾ, ཨསེཀྑབྷཱུམིཡཾ བཧུཝིསཡནྟི ཨཱཧ ‘‘ཨདྷིགམོ ནཱམ ཨརཧཏྟཔྤཏྟཱི’’ཏི, སཱཏིསཡཾ ཝཱ ཨདྷིགམཾ སནྡྷཱཡ ཨེཝཾ ཝུཏྟཾ. སེཀྑེན པཏྟཱནམྤི ཧི ཨིམཱསཾ ཨརཧཏྟཔྤཏྟིཡཱ ཝིསདབྷཱཝཱདྷིགམོཏི ¶ . པུབྦཡོགོ ཝིཡ པན ཨརཧཏྟཔྤཏྟི ཨརཧཏོཔི པཊིསམྦྷིདཱཝིསདཏཱཡ པཙྩཡོ ན ན ཧོཏཱིཏི པཉྩནྣམྤི ཡཐཱཡོགཾ སེཀྑཱསེཀྑཔཊིསམྦྷིདཱཝིསདཏཱཡ ཀཱརཎཏཱ ཡོཛེཏབྦཱ. ཨཏྠདྷམྨཱདཱིནཾ ཨནཝསེསསངྒཎྷནཏོ བུདྡྷཝཙནཝིསཡཱ ཨེཝ པརིཡཏྟིཨཱདཡོ དསྶིཏཱ. པཱལི༹ཡཱ སཛ྄ཛྷཱཡོ པརིཡཱཔུཎནཾ, ཏདཏྠསཝནཾ སཝནཾ, པརིཏོ སབྦསོ ཉཱཏུཾ ཨིཙྪཱ པརིཔུཙྪཱཏི ཨཱཧ ‘‘པཱལི༹ཨཊྛཀཐཱདཱིསུ གཎྛིཔདཨཏྠཔདཝིནིཙྪཡཀཐཱ’’ཏི, པདཏྠཏོ, ཨདྷིཔྤཱཡཏོ ཙ དུཝིཉྙེཡྻཊྛཱནཾ ཝིཏྠཱརཏོ སནྣིཊྛཱནཀཐཱཏི ཨཏྠོ. ཡསྶ ཧི པདསྶ ཨཏྠོ དུཝིཉྙེཡྻོ, ཏཾ གཎྛིཔདཾ, ཡསྶ ཨདྷིཔྤཱཡོ དུཝིཉྙེཡྻོ, ཏཾ ཨཏྠཔདཾ. ཨཱདི-སདྡེན ཁནྡྷཱདིཔཊིསཾཡུཏྟེ ཀཐཱམགྒེ སངྒཎྷཱཏི. བྷཱཝནཱནུཡོགསཧིཏཾ གཏཾ, པཙྩཱགཏཉྩ ཨེཏསྶ ཨཏྠཱིཏི གཏཔཙྩཱགཏིཀོ, ཏསྶ བྷཱཝོ, ཏེན གཏཔཙྩཱགཏིཀབྷཱཝེན. ཝསནཊྛཱནཏོ ཡཱཝ གོཙརགཱམོ, ཏཏོ ཙ ཡཱཝ ཝསནཊྛཱནཾ ཀམྨཊྛཱནཱནུཡུཏྟོཏི ཨཏྠོ. ཡཱཝ ཨནུལོམགོཏྲབྷུསམཱིཔནྟི སངྑཱརུཔེཀྑཱཉཱཎམཱཧ. ཏཉྷི ཏེསཾ སམཱིཔཔྤཝཏྟཾ.

སཏྠེསཱུཏི ཨནཝཛྫེསུ སཏྟཱནཾ ཧིཏསུཁཱཝཧེསུ གནྠེསུ. ཏཐཱ སིཔྤཱཡཏནེསཱུཏི ཨེཏྠཱཔི. པུབྦཀཱལེ ཨེཀསཏརཱཛཱུནཾ དེསབྷཱསཱ ཨེཀསཏཝོཧཱརཱ. དྷམྨཔདེ (དྷ. པ. ༡ ཨཱདཡོ) ཡམཀཝགྒོ ཨོཔམྨཝགྒོཏི ཝདནྟི, མཱུལཔཎྞཱསེ (མ. ནི. ༡.༣༢༥ ཨཱདཡོ; ༤༣༩ ཨཱདཡོ) ཡམཀཝགྒོ ཨོཔམྨཝགྒོ ཨེཝཱཏི ཨཔརེ. སུཏཔཊིབྷཱནབཧུལཱནནྟི བཧུསྶུཏཱནཾ པཊིབྷཱནཝནྟཱནཾ.

སབྦཱནཱིཏི ¶ པུབྦེ ཝུཏྟཱནི པཉྩ, པཙྪཱ ཝུཏྟཱནི ཨཊྛཔི ཝཱ. སེཀྑཕལཝིམོཀྑཔརིཡོསཱནེ བྷཝཱ སེཀྑཕལཝིམོཀྑནྟིཀཱ. ཋཱནཱཋཱནཉཱཎབལཱདཱིནི སབྦབུདྡྷགུཎེསུ སཀིཙྩཏོ པཱཀཊཏརཱནཱིཏི ཝུཏྟཾ ‘‘དས བལཱནི ཝིཡཱ’’ཏི, ཨཉྙེ ཝཱ སབྦཉྙུཏཉྙཱཎཱདཡོཔི སབྦེ བྷགཝཏོ གུཎཝིསེསཱ ཨསེཀྑཕལཝིམོཀྑནྟིཀཱ ཨེཝ.

པཉྙཱབྷཱུམི-མཱུལ-སརཱིརཝཝཏྠཱནཝཎྞནཱ

༤༣༠. ཨིམཱཡ པཉྙཱཡཱཏི ཝིཔསྶནཱཔཉྙཱཡ. བྷཱུམི སལླཀྑཎཱདིགྒཧཎཝསེན པཝཏྟིཊྛཱནབྷཱཝཏོ. ཨཱདི-སདྡེན ཨཱཧཱརཱདཱིནཾ སངྒཧོ དཊྛབྦོ. ཀསྨཱ པནེཏེ ཨེཝཾ བཧུདྷམྨཱ བྷཱུམིབྷཱཝེན གཡ྄ཧནྟི, ནནུ ཁནྡྷཱདཱིསུ ཨེཀེནཱཔི ¶ ཨཏྠསིདྡྷི ཧོཏཱིཏི? ན, ཏིཝིདྷསཏྟཱནུགྒཧཏྠཾ ཁནྡྷཱདིཏྟཡགྒཧཎཾ ཀཏྟབྦཾ, ཨཉྙཐཱ སབྦསཱདྷཱརཎོ ཨནུགྒཧོ ན ཀཏོ སིཡཱ. ཏིཝིདྷཱ ཧི སཏྟཱ རཱུཔསམྨཱུལ༹ྷཱ ཨརཱུཔསམྨཱུལ༹ྷཱ ཨུབྷཡསམྨཱུལ༹ྷཱཏི. ཏེསུ ཡེ ཨརཱུཔསམྨཱུལ༹ྷཱ, ཏདཏྠཾ ཁནྡྷཱནཾ གཧཎཾ ཨརཱུཔདྷམྨཱནཾ ཙཏུདྷཱ ཝིབྷཏྟཏྟཱ. ཡེ རཱུཔསམྨཱུལ༹ྷཱ, ཏདཏྠཾ ཨཱཡཏནཱནཾ རཱུཔདྷམྨཱནཾ ཨདྡྷེཀཱདསདྷཱ ཝིབྷཏྟཏྟཱ. ཡེ པན ཨུབྷཡསམྨཱུལ༹ྷཱ, ཏདཏྠཾ དྷཱཏཱུནཾ ཨུབྷཡེསམྤི ཝིབྷཏྟཏྟཱ. ཏཐཱ ཨིནྡྲིཡབྷེདེན ཏིཀྑིནྡྲིཡཱ མཛ྄ཛྷིམིནྡྲིཡཱ མུདིནྡྲིཡཱ, སཾཁིཏྟརུཙཱི མཛ྄ཛྷིམརུཙཱི ཝིཏྠཱརརུཙཱིཏི ཙ ཏིཝིདྷཱ སཏྟཱ, ཏེསམྤི ཨཏྠཱཡ ཡཐཱཀྐམཾ ཁནྡྷཱདིགྒཧཎཾ ཀཏནྟི ཡོཛེཏབྦཾ. ཨིནྡྲིཡགྒཧཎཾ པན ཀཱམཾ ཨེཏེ དྷམྨཱ ཨིསྶརཱ ཝིཡ སཧཛཱཏདྷམྨེསུ ཨིསྶརིཡཾ ཨཱདྷིཔཙྩཾ པཝཏྟེནྟི, ཏཾ པན ནེསཾ དྷམྨསབྷཱཝསིདྡྷཾ, ན ཨེཏྠ ཀསྶཙི ཝསཱིབྷཱཝོ ‘‘སུཉྙཱ ཨེཏེ ཨཝསཝཏྟིནོ’’ཏི ཨནཏྟལཀྑཎསྶ སུཁགྒཧཎཏྠཾ. ཏཾ པནེཏཾ ཙཏུབྦིདྷམྤི པཝཏྟིནིཝཏྟིཏདུབྷཡཧེཏུཝསེན དིཊྛམེཝ ཨུཔཀཱརཱཝཧཾ, ན ཨཉྙཐཱཏི སཙྩཱདིདྭཡཾ གཧིཏཾ. ཨཱདི-སདྡེན གཧིཏདྷམྨེསུཔི ཨཡཾ ནཡོ ནེཏབྦོ. མཱུལཾ པཏིཊྛཱབྷཱཝཏོ. སཏི ཧི སཱིལཝིསུདྡྷིཡཾ, ཙིཏྟཝིསུདྡྷིཡཉྩ ཨཡཾ པཉྙཱ མཱུལཛཱཏཱ ཧོཏི, ནཱསཏཱིཏི. སརཱིརཾ པརིབྲཱུཧེཏབྦཏོ. ཨིམིསྶཱ ཧི པཉྙཱཡ སནྟཱནཝསེན པཝཏྟམཱནཱཡ པཱདཔཱཎིསཱིསཊྛཱནིཡཱ དིཊྛིཝིསུདྡྷིཨཱདིཀཱ ཨིམཱ པཉྩ ཝིསུདྡྷིཡོ ཨཝཡཝེན སམུདཱཡཱུཔལཀྑཎནཡེན ‘‘སརཱིར’’ནྟི ཝེདིཏབྦཱ.

༤༣༡. པཉྩ ཁནྡྷཱཏི ཨེཏྠ པཉྩཱཏི གཎནཔརིཙྪེདོ, ཏེན ན ཏཏོ ཧེཊྛཱ, ན ཨུདྡྷནྟི དསྶེཏི. ཁནྡྷཱཏི པརིཙྪིནྣདྷམྨནིདསྶནཾ. ཡསྨཱ ཙེཏྠ ཁནྡྷ-སདྡོ རཱསཊྛོ ‘‘མཧཱཨུདཀཀྑནྡྷོ’’ཏིཨཱདཱིསུ (ཨ. ནི. ༤.༥༡; ༦.༣༧) ཝིཡ, ཏསྨཱ ཨཏཱིཏཱདིཝིབྷཱགབྷིནྣཾ ¶ སབྦཾ རཱུཔཾ རཱསིཝསེན བུདྡྷིཡཱ ཨེཀཛ྄ཛྷཾ གཧེཏྭཱ ‘‘རཱུཔམེཝ ཁནྡྷོ རཱུཔཀྑནྡྷོ’’ཏི སམཱནཱདྷིཀརཎསམཱསོ དཊྛབྦོ. ‘‘ཏཱིཧི ཁནྡྷེཧི ཨིཎཾ དསྶཱམཱ’’ཏིཨཱདཱིསུ ཝིཡ ཀོཊྛཱསཊྛེ པན ཁནྡྷ-སདྡེ ནིབྦཱནསྶཱཔི ཁནྡྷནྟརབྷཱཝོ ཨཱཔཛྫཏཱིཏི? ནཱཔཛྫཏི ཨཏཱིཏཱདིཝིབྷཱགཱབྷཱཝཏོ. ན ཧི ཨེཀསྶ ནིཙྩསྶ སཏོ ནིབྦཱནསྶ ཨཏཱིཏཱདིཝིབྷཱགོ ཨཏྠཱིཏི. པཋམེནཏྠེན རཱུཔརཱསཱིཏི ཨཏྠོ, དུཏིཡེན རཱུཔཀོཊྛཱསོཏི. ཝེདནཱཀྑནྡྷོཏིཨཱདཱིསུཔི ཨེསེཝ ནཡོ. ཀསྨཱ པནེཏེ ཁནྡྷཱ པཉྩེཝ ཝུཏྟཱ ཨིམིནཱ ཨེཝ ཙ ཀམེནཱཏི? བྷཱཛནབྷོཛནབྱཉྫནབྷཏྟཀཱརཀབྷུཉྫཀཝིཀཔྤདསྶནཏོ ¶ , ཡཐོལཱ༹རིཀཡཐཱསཾཀིལེསཱུཔདེསཏོ ཙཱཏི ཝེདིཏབྦཾ. ཝིཝཱདམཱུལཧེཏུབྷཱཝཾ སཾསཱརཧེཏུཏཾ, ཀམྨཧེཏུཏཉྩ ཙིནྟེཏྭཱ ཝེདནཱསཉྙཱ སངྑཱརཀྑནྡྷཏོ ནཱིཧརིཏྭཱ ཝིསུཾ ཁནྡྷབྷཱཝེན དེསིཏཱ.

རཱུཔཀྑནྡྷཀཐཱཝཎྞནཱ

༤༣༢. ཏཏྠཱཏི ཏེསུ པཉྩསུ ཁནྡྷེསུ. ཡཾ ཀིཉྩཱིཏི ཨནཝསེསཔརིཡཱདཱནཾ. རུཔྤནལཀྑཎནྟི ཨཏིཔྤསངྒནིཡམནཾ. ཡཾ-སདྡེན ཧི སནིཔཱཏེན ཀིཾ-སདྡེན ཙ གཧིཏེན ཨནིཡམཏྠཏཱཡ ཨཏིཔྤསངྒེ ཨཱཔནྣེ ཏཾ རུཔྤནསདྡོ ནིཝཏྟེཏི, ཏེན རཱུཔསྶ ཨནཝསེསཔརིགྒཧོ ཀཏོ ཧོཏི. སཱིཏཱདཱིཧཱིཏི སཱིཏུཎྷཛིགྷཙྪཱཔིཔཱསཱདཱིཧི. ཧེཏུཨཏྠེ ཙེཏཾ ཀརཎཝཙནཾ. རུཔྤནཾ ལཀྑཎཾ ཨེཏསྶཱཏི རུཔྤནལཀྑཎཾ. དྷམྨོ ཨེཝ དྷམྨཛཱཏཾ. རུཔྤནཉྩེཏྠ སཱིཏཱདིཝིརོདྷིཔཙྩཡསནྣིཔཱཏེ ཝིསདིསུཔྤཏྟི. ནནུ ཙ ཨརཱུཔདྷམྨཱནམྤི ཝིརོདྷིཔཙྩཡསམཱགམེ ཝིསདིསུཔྤཏྟི ལབྦྷཏཱིཏི? སཙྩཾ ལབྦྷཏི, ན པན ཝིབྷཱུཏཏརཾ. ཝིབྷཱུཏཏརཾ ཧེཏྠ རུཔྤནཾ ཨདྷིཔྤེཏཾ སཱིཏཱདིགྒཧཎཏོ. ཡདི ཨེཝཾ, ཀཐཾ བྲཧྨལོཀེ རཱུཔསམཉྙཱ? ཏཏྠཱཔི ཏཾསབྷཱཝཱནཏིཝཏྟནཏོ ཧོཏིཡེཝ རཱུཔསམཉྙཱ, ཨནུགྒཱཧཀཔཙྩཡཝསེན ཝཱ. ཝིརོདྷིཔཙྩཡསནྣིཔཱཏེ ཡོ ཨཏྟནོ སནྟཱནེ བྷིནྣེ བྷིཛྫམཱནསྶེཝ ཝིསདིསུཔྤཏྟིཧེཏུབྷཱཝོ, ཏཾ རུཔྤནནྟི ཨཉྙེ. ཨིམསྨིཾ པཀྑེ རཱུཔཡཏི ཝིཀཱརཾ ཨཱཔཱདེཏཱིཏི རཱུཔཾ, པུརིམཔཀྑེ པན རུཔྤཏཱིཏི. སངྒྷཊྚནེན ཝིཀཱརཱཔཏྟིཡཾ རུཔྤནསདྡོ ནིརུལ༹ྷོཏི ཀེཙི. ཨིམསྨིཾ པཀྑེ ཨརཱུཔདྷམྨེསུ རཱུཔསམཉྙཱཡ པསངྒོ ཨེཝ ནཏྠི སངྒྷཊྚནཱབྷཱཝཏོ. པཊིགྷཱཏོ རུཔྤནནྟི ཨཔརེ. སབྦཾ ཏཾ ཨེཀཏོ ཀཏྭཱཏི རཱསཊྛཾ ཧདཡེ ཋཔེཏྭཱ ཝདཏི.

བྷཱུཏོཔཱདཱཡབྷེདཏོཏི ¶ ཨེཏྠ ཏདདྷཱིནཝུཏྟིཏཱཡ བྷཝཏི ཨེཏྠ ཨུཔཱདཱཡརཱུཔནྟི བྷཱུཏཾ. བྷཱུཏཱནི ཨུཔཱདིཡཏེཝ, ན པན སཡཾ ཏེཧི, ཨཉྙེཧི ཝཱ ཨུཔཱདཱིཡཏཱིཏི ཨུཔཱདཱཡཾ.

ཀཱམཾ ཙཏུདྷཱཏུཝཝཏྠཱནེ ཝཙནཏྠཱདིཏོཔི བྷཱུཏཱནི ཝིབྷཱཝིཏཱནེཝ, སབྷཱཝདྷམྨཱནཾ པན ལཀྑཎཱདིཝིབྷཱཝནཱཏི ཀཏྭཱ ཝུཏྟཾ ‘‘ལཀྑཎརསཔཙྩུཔཊྛཱནཱནི ཙཏུདྷཱཏུཝཝཏྠཱནེ ཝུཏྟཱནཱི’’ཏི. ཏཏྠ པདཊྛཱནསྶ ཨཝུཏྟཏྟཱ ཨཱཧ ‘‘པདཊྛཱནཏོ པནཱ’’ཏིཨཱདི. ཨཝཙནཉྩ ཏསྶ ཏསྶཏྠསྶ པཙྩཡཏོཏི ཨེཏྠ པཀཱརནྟརེན ཝིབྷཱཝིཏཏྟཱཏི དཊྛབྦཾ. སབྦཱཔཱིཏི ཙཏསྶོཔི དྷཱཏུཡོ. ཨཱཔོསངྒཧིཏཱཡ ཏེཛོནུཔཱལིཏཱཡ ཝཱཡོཝིཏྠམྦྷིཏཱཡ ¶ ཨེཝ པཐཝཱིདྷཱཏུཡཱ པཝཏྟི, ན ཨཉྙཐཱཏི སཱ སེསབྷཱུཏཏྟཡཔདཊྛཱནཱ, ཨེཝམིཏརཱཔཱིཏི ཨཱཧ ‘‘ཨཝསེསདྷཱཏུཏྟཡཔདཊྛཱནཱ’’ཏི.

ཙཏུཝཱིསཏིཝིདྷནྟི གཎནཔརིཙྪེདོ བལརཱུཔཱདཱིནཾ པཊིསེདྷནཏྠོ. ཏཏྠ ཡཾ ཝཏྟབྦཾ, ཏཾ པརཏོ ཨཱཝི བྷཝིསྶཏི. ཙཀྑཏཱིཏི ཙཀྑུ, ཝིཉྙཱཎཱདྷིཊྛིཏཾ རཱུཔཾ ཨསྶཱདེནྟཾ ཝིཡ ཧོཏཱིཏི ཨཏྠོ. ཙཀྑཏཱིཏི ཧི ཨཡཾ ཙཀྑཏི-སདྡོ ‘‘མདྷུཾ ཙཀྑཏི, བྱཉྫནཾ ཙཀྑཏཱི’’ཏིཨཱདཱིསུ ཝིཡ ཨསྶཱདནཏྠོ. ཝུཏྟཉྷེཏཾ ‘‘ཙཀྑུཾ ཁོ, མཱགཎྜིཡ, རཱུཔཱརཱམཾ རཱུཔརཏཾ རཱུཔསམུདིཏ’’ནྟི (མ. ནི. ༢.༢༠༩). ཨཊྛཀཐཱཡམྤི ཝུཙྩཏི ‘‘རཱུཔེསུ ཨཱཝིཉྪནརས’’ནྟི (ཝིསུདྡྷི. ༢.༤༣༣; དྷ. ས. ཨཊྛ. ༦༠༠). སཏིཔི སོཏཱདཱིནཾ སདྡཱརམྨཎཱདིབྷཱཝེ ནིརུལ༹ྷཏྟཱ དསྶནེ ཨེཝ ཙཀྑུ-སདྡོ པཝཏྟཏི པདུམཱདཱིསུ པངྐཛཱདིསདྡཱ ཝིཡཱཏི དཊྛབྦཾ. ཨཐ ཝཱ ཙཀྑཏཱིཏི ཝིཉྙཱཎཱདྷིཊྛིཏཾ སམཝིསམཾ ཨཱཙིཀྑནྟཾ ཝིཡ ཨབྷིབྱཏྟཾ ཝདནྟཾ ཝིཡ ཧོཏཱིཏི ཨཏྠོ. ཨཊྛཀཐཱཡཾ པན ‘‘ཝིབྷཱཝེཏི ཙཱ’’ཏི (མཧཱནི. ཨཊྛ. ༡༣; ཝིབྷ. ཨཊྛ. ༡༥༤) ཝུཏྟཾ. ཏཾ ཨནེཀཏྠཏྟཱ དྷཱཏཱུནཾ ཝིབྷཱཝནཏྠཏཱཔི ཙཀྑཏི-སདྡསྶ སམྦྷཝཏཱིཏི ཀཏྭཱ ཝུཏྟཾ. སུཎཱཏི ཨེཏེན, ཝིཉྙཱཎཱདྷིཊྛིཏཾ སཡཾ ཝཱ སུཎཱཏཱིཏི སོཏཾ. གྷཱཡཏི ཨེཏེན, སཡཾ ཝཱ གྷཱཡཏཱིཏི གྷཱནཾ. རསགྒཧཎམཱུལཀཏྟཱ ཨཛ྄ཛྷོཧརཎསྶ ཛཱིཝིཏནིམིཏྟཾ ཨཱཧཱརརསོ ཛཱིཝིཏཾ, ཏསྨིཾ ནིནྣཏཱཡ ཏཾ ཨཝ྄ཧཱཡཏཱིཏི ཛིཝ྄ཧཱ ནིརུཏྟིནཡེན. ཀུཙྪིཏཱནཾ སཱསཝདྷམྨཱནཾ ཨཱཡོ ཨུཔྤཏྟིཊྛཱནནྟི ཀཱཡོ ཨནུཏྟརིཡཧེཏུབྷཱཝཾ ཨནཱགཙྪནྟེསུ ཀཱམརཱགནིདཱནཀམྨཛནིཏེསུ, ཀཱམརཱགསྶ ཙ ཝིསེསཔཙྩཡེསུ གྷཱནཛིཝ྄ཧཱཀཱཡེསུ ཀཱཡསྶ ཝིསེསཏོ སཱསཝཔཙྩཡཏྟཱ. ཏེན ཧི ཕོཊྛབྦསུཁཾ ཨསྶཱདེནྟཱ སཏྟཱ མེཐུནམྤི སེཝནྟི. ཀཱཡིནྡྲིཡཝཏྠུཀཱ ཝཱ ཙཏྟཱརོ ཁནྡྷཱ བལཝཀཱམཱསཝཱདིཧེཏུབྷཱཝཏོ ཝིསེསེན སཱསཝཱཏི ཀུཙྪིཏཱནཾ སཱསཝདྷམྨཱནཾ ཨཱཡོཏི ཀཱཡོ ཝུཏྟོ. ཝཎྞཝིཀཱརཾ ཨཱཔཛྫམཱནཾ ཧདཡངྒཏབྷཱཝཾ རཱུཔཡཏཱིཏི རཱུཔཾ, རཱུཔམིཝ པཀཱསཾ ཀརོཏི སཝིགྒཧམིཝ ¶ དསྶེཏཱིཏི ཨཏྠོ. ཨནེཀཏྠཏྟཱ ཝཱ དྷཱཏཱུནཾ པཀཱསནཏྠོ ཨེཝ རཱུཔསདྡོ དཊྛབྦོ. སཔྤཏཱིཏི སདྡོ, ཨུདཱཧརཱིཡཏི, སཀེཧི ཝཱ པཙྩཡེཧི སཔྤཱིཡཏི སོཏཝིཉྙེཡྻབྷཱཝཾ ཨུཔནཱིཡཏཱིཏི ཨཏྠོ. གནྡྷཡཏཱིཏི གནྡྷོ, ཨཏྟནོ ཝཏྠུཾ སཱུཙཡཏི ཨཔཱཀཊཾ ‘‘ཨིདཾ སུགནྡྷཾ, དུགྒནྡྷ’’ནྟི པཀཱསེཏི ¶ , པཊིཙྪནྣཾ ཝཱ པུཔྥཕལཱདིཾ ‘‘ཨིདམེཏྠ ཨཏྠཱི’’ཏི པེསུཉྙཾ ཀརོནྟཾ ཝིཡ ཧོཏཱིཏི ཨཏྠོ. རསནྟི ཏཾ སཏྟཱཏི རསོ, ཨསཱདེནྟཱིཏི ཨཏྠོ.

ཨིཏྠིཡཱཝ ཨིནྡྲིཡཾ ཨིཏྠིནྡྲིཡཾ, ཏཐཱ པུརིསིནྡྲིཡཾ. ཛཱིཝནྟི ཏེན སཧཛཱཏདྷམྨཱཏི ཛཱིཝིཏཾ, ཏདེཝ ཨིནྡྲིཡཾ ཛཱིཝིཏིནྡྲིཡཾ. ཧདཡཉྩ ཏཾ ཝཏྠུ ཙ, ཧདཡསྶ ཝཱ མནོཝིཉྙཱཎསྶ ཝཏྠུ ཧདཡཝཏྠུ. ཙོཔནཀཱཡབྷཱཝཏོ ཀཱཡོ ཙ སོ ཨདྷིཔྤཱཡཝིཉྙཱཔནཏོ ཝིཉྙཏྟི ཙཱཏི ཀཱཡཝིཉྙཏྟི. ཙོཔནཝཱཙཱབྷཱཝཏོ, ཨདྷིཔྤཱཡཝིཉྙཱཔནཏོ ཙ ཝཙཱི ཙ སཱ ཝིཉྙཏྟི ཙཱཏི ཝཙཱིཝིཉྙཏྟི. ཝིགྒཧཱབྷཱཝཏོ ན ཀསྶཏི, ཀསིཏུཾ ཚིནྡིཏུཾ ན སཀྐཱ, ན ཝཱ ཀཱསཏི དིབྦཏཱིཏི ཨཀཱསཾ, ཨཀཱསམེཝ ཨཱཀཱསཾ, ཏདེཝ ནིསྶཏྟནིཛྫཱིཝཊྛེན ཨཱཀཱསདྷཱཏུ. རཱུཔསྶཱཏི ནིཔྥནྣརཱུཔསྶ. ལཧུབྷཱཝོ ལཧུཏཱ. སཡཾ ཨནིཔྥནྣཏཱཡ ‘‘རཱུཔསྶཱ’’ཏི ཝིསེསིཏཾ. ཨེས ནཡོ སེསེསུཔི. ཨཡཾ པན ཝིསེསོ – ཀམྨནི སཱདྷུ ཀམྨཉྙཾ, ཏསྶ བྷཱཝོ ཀམྨཉྙཏཱ. པཋམཾ, ཨུཔརི ཙ ཙཡོ པཝཏྟི ཨུཔཙཡོ. པུབྦཱཔརཝསེན སམྦནྡྷཱ ཏཏི པཝཏྟི སནྟཏི. ཨནིཙྩསྶ ཝིནཱསིནོ བྷཱཝོ ཨནིཙྩཏཱ. ཀབལཾ ཀརཱིཡཏཱིཏི ཀབལཱི༹ཀཱརོ. ཨཱཧརཏཱིཏི ཨཱཧཱརོ. ཨེཝཾ ཏཱཝ ཨུཔཱདཱཡརཱུཔཾ སདྡཏྠཏོ ཝེདིཏབྦཾ.

ཀམཏོ པན སབྦེསཾ རཱུཔདྷམྨཱནཾ ནིསྶཡབྷཱཝེན མཱུལབྷཱུཏཏྟཱ པཋམཾ བྷཱུཏརཱུཔཱནི ཨུདྡིཊྛཱནི. ཨིཏརེསུ ཨཛ྄ཛྷཏྟིཀབྷཱཝེན ཨཏྟབྷཱཝསམཉྙཱཡ མཱུལབྷཱཝཏོ ཙཀྑཱདཱིནི པཉྩ ཨཱདིཏོ ཨུདྡིཊྛཱནི. ཏེསཾ ཝིསཡཱིནཾ ཨིམེ ཝིསཡཱཏི དསྶེཏུཾ རཱུཔཱདཱིནི ཙཏྟཱརི ཨུདྡིཊྛཱནི. ཕོཊྛབྦཾ པན ཨནུཔཱདཱརཱུཔཏྟཱ, བྷཱུཏགྒཧཎེན གཧིཏཏྟཱ ཙ ཨིདྷ ན གཧིཏཾ. སྭཱཡཾ ཨཏྟབྷཱཝོ ཨིམེཧི ‘‘ཨིཏྠཱི’’ཏི ཝཱ ‘‘པུརིསོ’’ཏི ཝཱ སངྑཾ གཙྪཏཱིཏི དསྶནཏྠཾ ཏདནནྟརཾ ཨིཏྠིཔུརིསིནྡྲིཡདྭཡཾ ཨུདྡིཊྛཾ. ‘‘ཨིམིནཱ ཛཱིཝཏཱི’’ཏི ཝོཧཱརཾ ལབྦྷཏཱིཏི དསྶནཏྠཾ ཏཏོ ཛཱིཝིཏིནྡྲིཡཾ. ཏསྶ ཨིམཾ ནིསྶཱཡ ཝིཉྙཱཎཔྤཝཏྟིཡཾ ཨཏྟཧིཏཱདིསིདྡྷཱིཏི དསྶནཏྠཾ ཧདཡཝཏྠུ. ཏསྶ ཨིམཱསཾ ཝསེན སབྦེ ཀཱཡཝཙཱིཔཡོགཱཏི དསྶནཏྠཾ ཝིཉྙཏྟིདྭཡཾ. ཨིམཱཡ རཱུཔཀཱཡསྶ པརིཙྪེདོ, ཨཉྫསོ ཙཱཏི དསྶནཏྠཾ ཨཱཀཱསདྷཱཏུ. ཨིམེཧིསྶ སུཁཔྤཝཏྟི, ཨུཔྤཏྟིཨཱདཡོ ¶ ཙཱཏི དསྶནཏྠཾ ལཧུཏཱདཡོ. སབྦོ ཙཱཡཾ ཙཏུསནྟཏིརཱུཔསནྟཱནོ ཨིམིནཱ ཨུཔཏྠམྦྷཱིཡཏཱིཏི དསྶནཏྠཾ ཨནྟེ ཀབལཱི༹ཀཱརོ ཨཱཧཱརོ ཨུདྡིཊྛོཏི ཝེདིཏབྦོ.

༤༣༣. ཨིདཱནི ¶ ཡཐཱཨུདྡིཊྛཱནི ཨུཔཱདཱརཱུཔཱནི ལཀྑཎཱདིཏོ ནིདྡིསིཏུཾ ‘‘ཏཏྠ རཱུཔཱབྷིགྷཱཏཱརཧབྷཱུཏཔྤསཱདལཀྑཎ’’ནྟིཨཱདི ཨཱརདྡྷཾ. ཏཏྠ ཏཏྠཱཏི ཏེསུ ཨུཔཱདཱརཱུཔེསུ. རཱུཔེ, རཱུཔསྶ ཝཱ ཨབྷིགྷཱཏོ རཱུཔཱབྷིགྷཱཏོ, ཏཾ ཨརཧཏཱིཏི རཱུཔཱབྷིགྷཱཏཱརཧོ, རཱུཔཱབྷིགྷཱཏོ ཧོཏུ ཝཱ མཱ ཝཱ ཨེཝཾསབྷཱཝོ ཙཏུནྣཾ བྷཱུཏཱནཾ པསཱདོ རཱུཔཱབྷིགྷཱཏཱརཧབྷཱུཏཔྤསཱདོ, ཨེཝཾལཀྑཎཾ ཙཀྑཱུཏི ཨཏྠོ. ཡསྨཱ པཙྩཡནྟརསཧིཏོ ཨེཝ ཙཀྑུཔསཱདོ རཱུཔཱབྷིཧནནཝསེན པཝཏྟཏི, ན ཀེཝལོ. ཏསྨཱ ཏཾསབྷཱཝཏཱཝ པམཱཎཾ, ན རཱུཔཱབྷིགྷཱཏོཏི དསྶནཏྠཾ རཱུཔཱབྷིགྷཱཏཱརཧཏཱ ཝུཏྟཱ ཡཐཱ ཝིཔཱཀཱརཧཾ ཀུསལཱཀུསལནྟི. ཨབྷིགྷཱཏོ ཙ ཝིསཡཝིསཡཱིནཾ ཨཉྙམཉྙཾ ཨབྷིམུཁཱིབྷཱཝོ ཡོགྱདེསཱཝཊྛཱནཾ ཨབྷིགྷཱཏོ ཝིཡཱཏི ཀཏྭཱ. སོ རཱུཔེ ཙཀྑུསྶ, རཱུཔསྶ ཝཱ ཙཀྑུམྷི ཧོཏི. ཏེནཱཧ ‘‘ཡཾ ཙཀྑུ ཨནིདསྶནཾ སཔྤཊིགྷཾ རཱུཔམྷི སནིདསྶནམྷི སཔྤཊིགྷམྷི པཊིཧཉྙི ཝཱ’’ཏི, ‘‘ཡམྷི ཙཀྑུམྷི ཨནིདསྶནམྷི སཔྤཊིགྷམྷི རཱུཔཾ སནིདསྶནཾ སཔྤཊིགྷཾ པཊིཧཉྙི ཝཱ པཊིཧཉྙཏི ཝཱ’’ཏི (དྷ. ས. ༥༩༧) ཙ ཨཱདི. པརིཔུཎྞཱཔརིཔུཎྞཱཡཏནཏྟབྷཱཝནིབྦཏྟཀསྶ ཀམྨསྶ ནིདཱནབྷཱུཏཱ ཀཱམཏཎྷཱ, རཱུཔཏཎྷཱ ཙ ཏདཱཡཏནིཀབྷཝཔཏྠནཱབྷཱཝཏོ དཊྛུཀཱམཏཱདིཝོཧཱརཾ ཨརཧཏཱིཏི དུཏིཡནཡོ སབྦཏྠ ཝུཏྟོ. ཏཏྠ དཊྛུཀཱམཏཱནིདཱནཀམྨཾ སམུཊྛཱནཾ ཨེཏེསནྟི དཊྛུཀཱམཏཱནིདཱནཀམྨསམུཊྛཱནཱནི. ཨེཝཾཝིདྷཱནཾ བྷཱུཏཱནཾ པསཱདོ དཊྛུཀཱམཏཱ…པེ… པསཱདོ, ཨེཝཾལཀྑཎཾ ཙཀྑུ. ཏསྶ ཏསྶ ཧི བྷཝསྶ མཱུལཀཱརཎབྷཱུཏཱ ཏཎྷཱ ཏསྨིཾ ཏསྨིཾ བྷཝེ ཨུཔྤཛྫནཱརཧཱཡཏནཝིསཡཱཔི ནཱམ ཧོཏཱིཏི ཀཱམཏཎྷཱདཱིནཾ དཊྛུཀཱམཏཱདིཝོཧཱརཱརཧཏཱ ཝུཏྟཱ.

དཊྛུཀཱམཏཱཏི ཧི དཊྛུམིཙྪཱ, རཱུཔཏཎྷཱཏི ཨཏྠོ. ཨེཏྠ ཙ དཊྛུཀཱམཏཱཡ, སེསཱནཉྩ ཏཾཏཾཨཏྟབྷཱཝནིབྦཏྟཀཀམྨཱཡཱུཧནཀྑཎཏོ སཏི པུརིམནིབྦཏྟིཡཾ ཝཏྟབྦཾ ནཏྠི, ཨསཏི པན མགྒེན ཨསམུགྒྷཱཏིཏབྷཱཝོཡེཝ ཀཱརཎནྟི དཊྛབྦཾ. ཡཏོ མགྒེན ཨསམུཙྪིནྣཾ ཀཱརཎལཱབྷེ སཏི ཨུཔྤཛྫིཏྭཱ ཨཏྟནོ ཕལསྶ པཙྩཡབྷཱཝཱུཔགམནཏོ ཝིཛྫམཱནམེཝཱཏི ཨུཔྤནྣཏཱ ཨཏྠིཏཱ པརིཡཱཡེཧི ཝུཙྩཏི ‘‘ཨརིཡཾ ཨཊྛངྒིཀཾ མགྒཾ བྷཱཝེནྟོ ཨརིཡཾ ཨཊྛངྒིཀཾ མགྒཾ བཧུལཱིཀརོནྟོ ཨུཔྤནྣུཔྤནྣེ ¶ པཱཔཀེ ཨཀུསལེ དྷམྨེ ཨནྟརཱཡེཝ ཨནྟརདྷཱཔེཏཱི’’ཏི (སཾ. ནི. ༥.༡༥༦), ‘‘སནྟཾ ¶ ཝཱ ཨཛ྄ཛྷཏྟཾ ཀཱམཙྪནྡཾ ‘ཨཏྠི མེ ཨཛ྄ཛྷཏྟཾ ཀཱམཙྪནྡོ’ཏི པཛཱནཱཏཱི’’ཏི (དཱི. ནི. ༢.༣༨༢; མ. ནི. ༡.༡༡༥) ཙ ཨེཝམཱདཱིསུ.

རཱུཔེསུ པུགྒལསྶ, ཝིཉྙཱཎསྶ ཝཱ ཨཱཝིཉྪནརསཾ. ཨཱདྷཱརབྷཱཝཔཙྩུཔཊྛཱནཾ ནིསྶཡཔཙྩཡབྷཱཝཏོ. དཊྛུཀཱམཏཱནིདཱནཀམྨཛབྷཱུཏཔདཊྛཱནཾ ཡེསཾ བྷཱུཏཱནཾ པསཱདོ, ཏེཝསྶ ཨཱསནྣཀཱརཎནྟི ཀཏྭཱ. ཨེཏྠ ཙ ཏཾཏཾཨཏྟབྷཱཝནིཔྥཱདཀསཱདྷཱརཎཀམྨཝསེན པུརིམཾ ཙཀྑུལཀྑཎཾ ཝུཏྟཾ ཀཱརཎཝིསེསསྶ ཨནཱམཊྛཏྟཱ. ‘‘ཨེཝརཱུཔཾ ནཱམ མེ ཙཀྑུ ཧོཏཱུ’’ཏི ཨེཝཾ ནིབྦཏྟིཏཨཱཝེཎིཀཀམྨཝསེན དུཏིཡནྟི ཝདནྟི. སཏིཔི པན པཉྩནྣཾ པསཱདབྷཱཝསཱམཉྙེ སཝིསཡཱཝབྷཱསནསངྑཱཏསྶ པསཱདབྱཱཔཱརསྶ ཝསེན པུརིམཾ ཝུཏྟཾ. པསཱདཀཱརཎསྶ སཏིཔི ཀམྨབྷཱཝསཱམཉྙེ, ཨེཀཏྟེ ཝཱ ཨཏྟནོ ཀཱརཎབྷེདེན བྷེདདསྶནཝསེན དུཏིཡནྟི དཊྛབྦཾ. སོཏཱདཱིནཾ ལཀྑཎཱདཱིསུ ཝུཏྟནཡེནེཝ ཨཏྠོ ཝེདིཏབྦོ.

ཨེཏྠཱཧ – ཙཀྑཱདཱིནཾ ཨིནྡྲིཡཱནཾ ཀིཾ ཨེཀཀམྨུནཱ ཨུཔྤཏྟི, ཨུདཱཧུ ནཱནཱཀམྨུནཱཏི? ཨུབྷཡཐཱཔཱིཏི པོརཱཎཱ. ཏཏྠ ནཱནཱཀམྨུནཱ ཏཱཝ ཨུཔྤཏྟིཡཾ ཙཀྑཱདཱིནཾ ཝིསེསེ ཝཏྟབྦཾ ནཏྠི ཀཱརཎསྶ བྷིནྣཏྟཱ. ཨེཀཀམྨུནཱ པན ཨུཔྤཏྟིཡཾ ཀཐཾ ནེསཾ ཝིསེསོཏི? ཀཱརཎསྶ བྷིནྣཏྟཱ ཨེཝ. ཏཾཏཾབྷཝཔཏྠནཱབྷཱུཏཱ ཧི ཏཎྷཱ ཏཾཏཾབྷཝཔརིཡཱཔནྣཱཡཏནཱབྷིལཱསཏཱཡ སཡཾ ཝིཙིཏྟརཱུཔཱ ཨུཔནིསྶཡབྷཱཝེན ཏཾཏཾབྷཝནིབྦཏྟཀཀམྨསྶ ཝིཙིཏྟབྷེདཏཾ ཝིདཧཏི. ཡཏོ ཏདཱཧིཏཝིསེསཾ ཏཾ ཏཐཱརཱུཔསམཏྠཏཱཡོགེནཱནེཀརཱུཔཱཔནྣཾ ཝིཡ ཨནེཀཾ ཝིསིཊྛསབྷཱཝཾ ཕལཾ ནིབྦཏྟེཏི. ན ཙེཏྠ སམཏྠཏཱ སམཏྠབྷཱཝཏོ ཨཉྙཱ ཝེདིཏབྦཱ ཀཱརཎཝིསེསེན ཨཱཧིཏཝིསེསསྶ ཝིསིཊྛཕལནིཔྥཱདནཡོགྱཏཱམཏྟཏོ. ཨཡཉྩ ཨེཀསྶཔི ཀམྨསྶ ཨནེཀིནྡྲིཡཧེཏུཏཱཝིསེསཡོགོ ཡུཏྟིཏོ, ཨཱགམནཏོ ཙ པརཏོ ཨཱགམིསྶཏི. ཨཔིཙ ཨེཀསྶེཝ ཀུསལཙིཏྟསྶ སོལ༹སཱདིཝིཔཱཀཙིཏྟནིབྦཏྟིཧེཏུཏཱ ཝུཙྩཏི. ལོཀེཔི ཨེཀསྶེཝ སཱལིབཱིཛསྶ པརིཔུཎྞཱཔརིཔུཎྞཏཎྜུལཨཱཏཎྜུལཕལནིབྦཏྟིཧེཏུཏཱ དིསྶཏེཝ, ཀིཾ ཝཱ ཨེཏཱཡ ཡུཏྟིཙིནྟཱཡ. ཡཏོ ཀམྨཕལཾ ཙཀྑཱདཱིནི, ཀམྨཝིཔཱཀོ ཙ སབྦསོ བུདྡྷཱནཾཡེཝ ཉཱཎསྶ ཝིསཡོཏི.

༤༣༤. ཀེཙཱིཏི ¶ མཧཱསངྒྷིཀེསུ ཨེཀཙྩེ. ཏེསུ ཧི ཝསུདྷམྨོ ཨེཝཾ ཝདཏི ‘‘ཙཀྑུམྷི ཏེཛོ ཨདྷིཀཾ, སོཏེ ཝཱཡུ, གྷཱནེ པཐཝཱི, ཛིཝ྄ཧཱཡ ཨཱཔོ, ཀཱཡེ སབྦེཔི སམཱ’’ཏི. ཙཀྑཱདཱིསུ ཏེཛཱདིཨདྷིཀཏཱ ནཱམ ཏནྣིསྶཡབྷཱུཏཱནཾ ཏདདྷིཀཏཱཡཱཏི དསྶེནྟོ ‘‘ཏེཛཱདྷིཀཱནཾ བྷཱུཏཱནཾ ¶ པསཱདོ ཙཀྑཱུ’’ཏིཨཱདིམཱཧ. ཀཱཡོ སབྦེསནྟི ཀོ ཨེཏྠ ཝིསེསོ, ནནུ ཏེཛཱདིཨདྷིཀཱནཉྩ བྷཱུཏཱནཾ པསཱདཱ སབྦེསཾཡེཝཱཏི? སཙྩམེཏཾ, ཨིདཾ པན ‘‘སབྦེས’’ནྟི ཝཙནཾ སམཱནཱནནྟི ཨིམམཏྠཾ དཱིཔེཏི ཨནུཝཏྟམཱནསྶ ཨེཀདེསཱདྷིཀབྷཱཝསྶ ནིཝཱརཎཝསེན ཝུཏྟཏྟཱ. ཏེཛཱདཱིནཾ ཧི པཙྩེཀཾ ཨདྷིཀབྷཱཝེ ཝིཡ དྭིནྣཾ, ཏིཎྞཾ ཝཱ ཨདྷིཀབྷཱཝེཔི ཡཐཱཝུཏྟཱདྷིཀབྷཱཝེནེཝ ཨེཀཀཱདིཝསེན ལབྦྷམཱནཱཡ ཨོམཏྟཏཱཡཔི ཀཱཡཔྤསཱདོ ན ཧོཏཱིཏི པཱཀཊོཡམཏྠོ. ཏསྨཱ ཙཏུནྣམྤི བྷཱུཏཱནཾ སམབྷཱཝེན ཀཱཡཔྤསཱདོ ཧོཏཱིཏི སབྦསདྡོ ཨིདྷ སམབྷཱཝདཱིཔཀོ དཊྛབྦོ. ཏེཛཱདཱིནནྟི པདཱིཔསངྑཱཏསྶ ཏེཛསྶ ཨོབྷཱསརཱུཔེན, ཝཱཡུསྶ སདྡེན, པཐཝིཡཱ གནྡྷེན, ཁེལ༹སངྑཱཏསྶ ཨུདཀསྶ རསེནཱཏི པུརིམཝཱདེ, པཙྪིམཝཱདེ ཙ ཡཐཱཡོགཾ ཏཾཏཾབྷཱུཏགུཎེཧི ཨནུགྒཡ྄ཧབྷཱཝཏོ, རཱུཔཱདཱིནཾ གཧཎེ ཨུཔཀཱརིཏབྦཏོཏི ཨཏྠོ. ཨཱལོཀཱདིསཧཀཱརཱིཀཱརཎསཧིཏཱནཾཡེཝ ཙཀྑཱདཱིནཾ རཱུཔཱདིཨཝབྷཱསནསམཏྠཏཱ, ཝིཝརསྶ ཙ སོཏཝིཉྙཱཎཱུཔནིསྶཡབྷཱཝོ གུཎོཏི ཏེསཾ ལདྡྷི. ཏེཛཱདཱིནཾ ཝིཡ པན ཝིཝརསྶ བྷཱུཏབྷཱཝཱབྷཱཝཏོ ཡཐཱཡོག-གྒཧཎཾ. ཨཐ ཝཱ རཱུཔཱདཡོ ཝིཡ ཝིཝརམྤི བྷཱུཏགུཎོཏི པརཱདྷིཔྤཱཡེ ཏེཛསྶ ཨཱལོཀརཱུཔེན, ཨཱཀཱསསངྑཱཏསྶ ཝིཝརསྶ སདྡེན, ཝཱཡུསྶ གནྡྷེན, ཨུདཀསྶ རསེན, པཐཝིཡཱ ཕོཊྛབྦེནཱཏི ཨེཝཾ ཡཐཱཡོགཾ ཏཾཏཾབྷཱུཏགུཎེཧཱིཏི ཡོཛནཱ.

རཱུཔཱདཱིནཾ ཨདྷིཀབྷཱཝདསྶནཏོཏི ཨགྒིམྷི རཱུཔསྶ པབྷསྶརསྶ, ཝཱཡུམྷི སདྡསྶ སབྷཱཝེན སུཡྻམཱནསྶ, པཐཝིཡཱ སུརབྷིཨཱདིནོ གནྡྷསྶ, ཨཱཔེ ཙ རསསྶ མདྷུརསྶཱཏི ཨིམེསཾ ཝིསེསཡུཏྟཱནཾ དསྶནཏོ ‘‘རཱུཔཱདཡོ ཏེསཾ གུཎཱ’’ཏི པཋམཝཱདཱི ཨཱཧཱཏི. ཏསྶེཝ ‘‘ཨིཙྪེཡྻཱམཱ’’ཏིཨཱདིནཱ ཨུཏྟརམཱཧ. ཨིམིནཱཝ ཨུཔཱཡེན དུཏིཡཝཱདིནོཔི ནིགྒཧོ ཧོཏཱིཏི. ཨཐ ཝཱ རཱུཔཱདིཝིསེསགུཎེཧི ཏེཛཨཱཀཱསཔཐཝཱིཨཱཔཝཱཡཱུཧི ཙཀྑཱདཱིནི ཀཏཱནཱིཏི ཝདནྟསྶ ཀཎཱདསྶ ཝཱདཾ ཨུདྡྷརིཏྭཱ ¶ ཏཾ ནིགྒཧེཏུཾ ‘‘ཨཐཱཔི ཝདེཡྻུ’’ནྟིཨཱདི ཝུཏྟནྟི དཊྛབྦཾ. ཨཱསཝེ ཨུཔལབྦྷམཱནོཔི གནྡྷོ པཐཝིཡཱ ཨཱཔོསཾཡུཏྟཱཡ ཀཔྤཱསཏོ ཝིསདིསཱཡཱཏི ན ཀཔྤཱསགནྡྷསྶ ཨདྷིཀབྷཱཝཱཔཏྟཱིཏི ཙེ? ན, ཨནབྷིབྷཱུཏཏྟཱ. ཨཱསཝེ ཧི ཨུདཀསཾཡུཏྟཱ པཐཝཱི ཨུདཀེན ཨབྷིབྷཱུཏཱ, ན ཀཔྤཱསཔཐཝཱིཏི ཏསྶ ཨེཝ གནྡྷེན ཨདྷིཀེན བྷཝིཏབྦཾ. ཨུཎྷོདཀསཾཡུཏྟོ ཙ ཨགྒི ཨུཔལབྦྷནཱིཡོ མཧནྟོཏི ཀཏྭཱ ཏསྶ ཕསྶོ ཝིཡ ཝཎྞོཔི པབྷསྶརོ ཨུཔལབྦྷེཡྻཱཏི ཨུཎྷོདཀེ ཝཎྞཏོ ཨགྒིནཱ ཨནབྷིསམྦནྡྷསྶ སཱིཏོདཀསྶ ཝཎྞོ པརིཧཱཡེཐ. ཏསྨཱཏི ཨེཏསྶ ཨུབྷཡསྶ ཨབྷཱཝཱ. ཏདབྷཱཝེན ཧི རཱུཔཱདཱིནཾ ཏེཛཱདིཝིསེསགུཎཏཱ ནིཝཏྟིཏཱ. ཏནྣིཝཏྟནེན ‘‘ཏེཛཱདཱིནཾ གུཎེཧི རཱུཔཱདཱིཧི ཨནུགྒཡ྄ཧབྷཱཝཏོ’’ཏི ཨིདཾ ཀཱརཎཾ ནིཝཏྟིཏནྟི ཨེཝཾ ¶ པརམྤརཱཡ ཨུབྷཡཱབྷཱཝོ ཝིསེསཔརིཀཔྤནཔཧཱནསྶ ཀཱརཎཾ ཧོཏཱིཏི ཨཱཧ ‘‘ཏསྨཱ པཧཱཡེཏ’’ནྟིཨཱདི. ཨེཀཀལཱཔེཔི རཱུཔརསཱདཡོ ཝིསདིསཱ, ཀོ པན ཝཱདོ ནཱནཱཀལཱཔེ ཙཀྑཱདཡོ བྷཱུཏཝིསེསཱབྷཱཝེཔཱིཏི དསྶེཏུཾ རཱུཔརསཱདིནིདསྶནཾ ཝུཏྟཾ.

ཡདི བྷཱུཏཝིསེསོ ནཏྠི, ཀིཾ པན ཙཀྑཱདིཝིསེསསྶ ཀཱརཎནྟི ཏཾ དསྶེཏུཾ ‘‘ཡཾ ཨཉྙམཉྙསྶཱ’’ཏིཨཱདི ཝུཏྟཾ. ཨེཀམྤི ཀམྨཾ པཉྩཱཡཏནིཀཏྟབྷཱཝབྷཝཔྤཏྠནཱནིཔྥནྣཾ ཙཀྑཱདིཝིསེསཧེཏུཏཱཡ ཨཉྙམཉྙསྶ ཨསཱདྷཱརཎནྟི ཙ ཀམྨཝིསེསོཏི ཙ ཝུཏྟནྟི དཊྛབྦཾ. ན ཧི ཏཾ ཡེན ཝིསེསེན ཙཀྑུསྶ པཙྩཡོ, ཏེནེཝ སོཏསྶ པཙྩཡོ ཧོཏི ཨིནྡྲིཡནྟརཱབྷཱཝཔྤཏྟིཏོ. ‘‘པཊིསནྡྷིཀྑཎེ མཧགྒཏཱ ཙེཏནཱ ཀཊཏྟཱརཱུཔཱནཾ ཀམྨཔཙྩཡེན པཙྩཡོ’’ཏི (པཊྛཱ. ༢.༡༢.༧༨) ཝཙནེན པཊིསནྡྷིཀྑཎེ ཝིཛྫམཱནཱནཾ སབྦེསཾ ཀཊཏྟཱརཱུཔཱནཾ ཨེཀཱ ཙེཏནཱ ཀམྨཔཙྩཡོ ཧོཏཱིཏི ཝིཉྙཱཡཏི. ནཱནཱཙེཏནཱཡ ཧི ཏདཱ ཨིནྡྲིཡུཔྤཏྟིཡཾ སཏི པརིཏྟེན ཙ མཧགྒཏེན ཙ ཀམྨུནཱ ནིབྦཏྟིཏཾ ཀཊཏྟཱརཱུཔཾ ཨཱཔཛྫེཡྻཱཏི. ན ཙེཀཱ པཊིསནྡྷི ཨནེཀཀམྨནིབྦཏྟཱ ཧོཏཱིཏི སིདྡྷམེཀེན ཀམྨེན ཨནེཀིནྡྲིཡུཔྤཏྟི ཧོཏཱིཏི.

༤༣༥. ཨནལླཱིནོ ནིསྶཡོ ཨེཏསྶཱཏི ཨནལླཱིནནིསྶཡོ, རཱུཔསདྡསངྑཱཏོ ཝིསཡོ. གནྡྷརསཱནཾ ནིསྶཡཱ གྷཱནཛིཝ྄ཧཱནཾ ནིསྶཡེ ཨལླཱིཡནྟཱིཏི ¶ ཏེ ནིསྶཡཝསེན ཨལླཱིནཱ. ཕོཊྛབྦཾ སཡཾ ཀཱཡནིསྶཡཨལླཱིནཾ བྷཱུཏཏྟཱ. ཨཔརོ ནཡོ – ཙཀྑུསོཏཱནི ཨཔྤཏྟཝིསཡགྒཱཧཀཱནི སཱནྟརེ, ཨདྷིཀེ ཙ ཝིསཡེ ཝིཉྙཱཎུཔྤཏྟིཧེཏུབྷཱཝཏོ. སོཏམྤི སམྤཏྟཝིསཡགྒཱཧཱིཏི ཀེཙི. ཡདི སོཏཾ སམྤཏྟགྒཱཧི, ཙིཏྟཛོ སདྡོ སོཏཝིཉྙཱཎསྶ ཨཱརམྨཎཾ ན སིཡཱ. ན ཧི བཧིདྡྷཱ ཙིཏྟསམུཊྛཱནཱནཾ ཨུཔྤཏྟི ཨཏྠི. པཱལི༹ཡཉྩ ཨཝིསེསེན སདྡཱརམྨཎསྶ སོཏཝིཉྙཱཎཱརམྨཎབྷཱཝོ ཝུཏྟོ. ཀིཉྩ དིསཱདེསཝཝཏྠཱནཉྩ སདྡསྶ ན སིཡཱ, ཨཏྟནོ ཝིསཡིཔདེསསྶ ཨེཝ གཧེཏབྦཏོ གནྡྷོ ཝིཡ. ཏསྨཱ ཡཏྠ ཨུཔྤནྣོ སདྡོ, ཏཏྠེཝ ཋིཏོ. སཙེ སོཏཔཐེ ཨཱཔཱཐམཱགཙྪཏི, ནནུ དཱུརེ ཋིཏེཧི རཛཀཱདིསདྡཱ ཙིརེན སུཡྻནྟཱིཏི? ན དཱུརཱསནྣཱནཾ ཡཐཱཔཱཀཊེ སདྡེ གཧཎཝིསེསཏོ. ཡཐཱ ཧི དཱུརཱསནྣཱནཾ ཝཙནསདྡེ ཡཐཱཔཱཀཊེ གཧཎཝིསེསཏོ ཨཱཀཱརཝིསེསཱནཾ ཨགྒཧཎཾ, གཧཎཉྩ ཧོཏི, ཨེཝཾ རཛཀཱདིསདྡེཔི ཨཱསནྣསྶ ཨཱདིཏོ པབྷུཏི ཡཱཝ ཨཝསཱནཱ ཀམེན པཱཀཊཱིབྷཱུཏེ, དཱུརསྶ ཙ ཨཝསཱནེ, མཛ྄ཛྷེ ཝཱ པིཎྜཝསེན པཝཏྟིཔཱཀཊཱིབྷཱུཏེ ནིཙྪཡགྒཧཎཱནཾ སོཏཝིཉྙཱཎཝཱིཐིཡཱ པརཏོ པཝཏྟཱནཾ ཝིསེསཏོ ལཧུཀཾ སུཏོ ‘‘ཙིརེན སུཏོ’’ཏི ཨདྷིམཱནོ ཧོཏི. སོ པན སདྡོ ཡཏྠ ཨུཔྤནྣོ, ཏནྣིསྶིཏོཝ ཨཏྟནོ ཝིཛྫམཱནཀྑཎེ སོཏསྶ ཨཱཔཱཐམཱགཙྪཏི ¶ . ཡདི སདྡསྶ བྷཱུཏཔརམྤརཱཡ སམནྟཏོ པཝཏྟི ནཏྠི, ཀཐཾ པཊིགྷོསུཔྤཏྟཱིཏི? དཱུརེ ཋིཏོཔི སདྡོ ཨཉྙཏྠ པཊིགྷོསུཔྤཏྟིཡཱ, བྷཱཛནཱདིཙལནསྶ ཙ ཨཡོཀནྟོ ཝིཡ ཨཡོཙལནསྶ པཙྩཡོ ཧོཏཱིཏི དཊྛབྦཾ.

༤༣༦. པུབྦེ ལཀྑཎཱདིནཱ ཝིབྷཱཝིཏམྤི ཙཀྑུཾ ཋིཏཊྛཱནཱདིཏོ ཝིབྷཱཝེཏུཾ ‘‘ཙཀྑུ ཙེཏྠཱ’’ཏིཨཱདི ཨཱརདྡྷཾ. ཏཏྠ ཙཀྑུ སཱདྷཡམཱནཾ ཏིཊྛཏཱིཏི སམྦནྡྷོ. ཙ-ཀཱརོ བྱཏིརེཀཏྠོ, ཏེནསྶ ཝུཙྩམཱནམེཝ ཝིསེསཾ ཛོཏེཏི. ཨེཏྠཱཏི ཨེཏེསུ ཡཐཱནིདྡིཊྛེསུ པཉྩསུ ཨུཔཱདཱརཱུཔེསུ. ‘‘སརཱིརསཎྛཱནུཔྤཏྟིདེསེ’’ཏི ཨེཏེན ཨཝསེསཾ ཀཎྷམཎྜལཾ པཊིཀྑིཔཏི. སྣེཧམིཝ སཏྟ ཨཀྑིཔཊལཱནི བྱཱཔེཏྭཱ ཋིཏཱཧེཝ ཨཏྟནོ ནིསྶཡབྷཱུཏཱཧི ཙཏཱུཧི དྷཱཏཱུཧི ཀཏཱུཔཀཱརཾ ཏནྣིསྶིཏེཧེཝ ཨཱཡུཝཎྞཱདཱིཧི ཨནུཔཱལིཏཾ པརིཝཱརིཏཾ ཏིསནྟཏིརཱུཔསམུཊྛཱཔཀེཧི ཨུཏུཙིཏྟཱཧཱརེཧི ¶ ཨུཔཏྠམྦྷིཡམཱནཾ ཏིཊྛཏི. སཏྟཨཀྑིཔཊལབྱཱཔནཝཙནེནེཝ ཙཀྑུསྶ ཨནེཀཀལཱཔགཏབྷཱཝཾ དསྶེཏི. པམཱཎཏོ ཨཱུཀཱསིརམཏྟནྟི ཨཱུཀཱསིརམཏྟེ པདེསེ པཝཏྟནཏོ ཝུཏྟཾ. ཙཀྑུཝིཉྙཱཎསྶ ཝཏྠུབྷཱཝཾ ནིསྶཡབྷཱཝཏོ ཨཱཝཛྫནསམྤཊིཙྪནཱདཱིནཾ ཏདཱརམྨཎཱཝསཱནཱནཾ དྭཱརབྷཱཝཾ སམཝསརཊྛཱནཏོ. ཏཾ པནེཏཾ ཙཀྑུ ཨདྷིཊྛཱནབྷེདཏོ, ཏཏྠཱཔི པཙྩེཀཾ ཨནེཀཀལཱཔགཏབྷཱཝཏོ ཨནེཀམྤི སམཱནཾ སཱམཉྙནིདྡེསེན ཨཱཝཛྫནཱཡ ཨེཀཏྟཱ, ཨེཀསྨིཾ ཁཎེ ཨེཀསྶེཝ ཙ ཀིཙྩཀརཏྟཱ ཨེཀཾ ཀཏྭཱ ཝུཏྟཾ. ཨེཝམྤི བཧཱུསུ ཀཐམེཀསྶེཝ ཀིཙྩཀརཏྟཾ. ཡཾ ཏཏྠ ཝིསདཾ ཧུཏྭཱ རཱུཔཱབྷིགྷཱཏཱརཧཾ, ཏཾ ཝིཉྙཱཎསྶ ནིསྶཡོ ཧོཏཱིཏི གཧེཏབྦཾ. ཕོཊྛབྦཝིསེསོ ཝིཡ ཀཱཡཝིཉྙཱཎསྶ ཨཱརམྨཎབྷཱཝེ.

མནུཔསྶཏཱིཏི མ-ཀཱརོ པདསནྡྷིཀརོ, ཨཐ ཝཱ མནཱུཏི མཙྩོ.

ཨངྒུལིཝེདྷཀཾ ཨངྒུལཱིཡཀཾ.

ཝིསམཛ྄ཛྷཱསཡཏཱཡ ཙཀྑུ ཝམྨིཀཚིདྡཱབྷིརཏསཔྤོ ཝིཡ, བིལཛ྄ཛྷཱསཡཏཱཡ སོཏཾ ཨུདཀབིལཱབྷིརཏཀུམྦྷཱིལོ ཝིཡ, ཨཱཀཱསཛ྄ཛྷཱསཡཏཱཡ གྷཱནཾ ཨཛཊཱཀཱསཱབྷིརཏཔཀྑཱི ཝིཡ, གཱམཛ྄ཛྷཱསཡཏཱཡ ཛིཝ྄ཧཱ གཱམཱབྷིརཏཀུཀྐུརོ ཝིཡ, ཨུཔཱདིནྣཀཛ྄ཛྷཱསཡཏཱཡ ཀཱཡོ ཨཱམཀསུསཱནཱབྷིརཏསིངྒཱལོ ཝིཡ པསྶིཏབྦོཏི དསྶེནྟོ ‘‘ཝམྨི…པེ… དཊྛབྦཱ’’ཏི ཨཱཧ. ཝིསམཛ྄ཛྷཱསཡཏཱ ཙ ཙཀྑུསྶ ཝིསམཛ྄ཛྷཱསཡཾ ཝིཡ ཧོཏཱིཏི ཀཏྭཱ ཝུཏྟཱ, ཙཀྑུམཏོ ཝཱ པུགྒལསྶ ¶ ཨཛ྄ཛྷཱསཡཝསེན ཙཀྑུ ཝིསམཛ྄ཛྷཱསཡཾ དཊྛབྦཾ. ཨེས ནཡོ སེསེསུཔི. སབྦོཔི ཙ ཡཐཱཝུཏྟོ པཔཉྩོ སོཏཱདཱིསུཔི ཡཐཱརཧཾ ཝེདིཏབྦོ.

༤༣༧. ཙཀྑུམྷི, ཙཀྑུསྶ ཝཱ པཊིཧནནཾ ཙཀྑུཔཊིཧནནཾ, ཏཾ ལཀྑཎཾ ཨེཏསྶཱཏི ཙཀྑུཔཊིཧནནལཀྑཎཾ. པཊིཧནནཉྩེཏྠ ཡཐཱཝུཏྟོ ཨབྷིགྷཱཏོཝ. ཝིསཡབྷཱཝོ ཨཱརམྨཎཔཙྩཡཏཱ. ཀཱམཾ སཱ ཨེཝ གོཙརཏཱ, ཏཐཱཔི ཝིསཡགོཙརཱནཾ ཨཡཾ ཝིསེསོ – ཨནཉྙཏྠབྷཱཝོ, ཏབྦཧུལཙཱརིཏཱ ཙ ཙཀྑུཝིཉྙཱཎསྶ. ཝིསཡབྷཱཝེ ཙསྶ ཡཾ ཝཏྟབྦཾ, ཏཾ པརཏོ ཨཱཝི བྷཝིསྶཏི. ཡཏྠ པན ཀཱཡཝིཉྙཏྟིཨཱདིཀེ.

༤༣༨. ཨིཏྠིཡཱ ¶ བྷཱཝོ, ‘‘ཨིཏྠཱི’’ཏི ཝཱ བྷཝཏི ཨེཏེན ཙིཏྟཾ, ཨབྷིདྷཱནཉྩཱཏི ཨིཏྠིབྷཱཝོ, ཏཾ ལཀྑཎཾ ཨེཏསྶཱཏི ཨིཏྠིབྷཱཝལཀྑཎཾ. ཏཏོ ཨེཝ ‘‘ཨིཏྠཱི’’ཏི ཏཾསཧིཏཾ སནྟཱནཾ པཀཱསེནྟཾ ཝིཡ ཧོཏཱིཏི ཝུཏྟཾ ‘‘ཨིཏྠཱིཏི པཀཱསནརས’’ནྟི. ཝཊྚཾསཏཱ ཨཝིསདཧཏྠཔཱདཱདིཏཱ ཙ ཨིཏྠིལིངྒཾ. ཐནམཾསཱཝིསདཏཱ, ནིམྨསྶུདཱཋིཏཱ, ཀེསབནྡྷནཾ, ཝཏྠགྒཧཎཉྩ ‘‘ཨིཏྠཱི’’ཏི སཉྫཱནནསྶ པཙྩཡབྷཱཝཏོ ཨིཏྠིནིམིཏྟཾ. དཧརཀཱལེཔི སུཔྤཀམུསལཀཱདཱིཧི ཀཱིལཱ༹, མཏྟིཀཏཀྐེན སུཏྟཀནྟནཱདི ཙ ཨིཏྠིཀུཏྟཾ, ཨིཏྠིཀིརིཡཱཏི ཨཏྠོ. ཨཝིསདཊྛཱནགམནཱདིཀོ ཨཱཀཱརོ ཨིཏྠཱཀཔྤོ. ཨཔརོ ནཡོ – ཨིཏྠཱིནཾ མུཏྟཀརཎཾ ཨིཏྠིལིངྒཾ. སརཱདྷིཔྤཱཡཱ ཨིཏྠིནིམིཏྟཾ. ཨཝིསདཊྛཱནགམནནིསཛྫཱཁཱདནབྷོཛནཱདིཀཱ ཨིཏྠིཀུཏྟཾ. ཨིཏྠིསཎྛཱནཾ ཨིཏྠཱཀཔྤོ. ཨིམཱནི ཙ ཨིཏྠིལིངྒཱདཱིནི ཡཐཱསཀཾ ཀམྨཱདིནཱ པཙྩཡེན ཨུཔྤཛྫམཱནཱནིཔི ཡེབྷུཡྻེན ཨིཏྠིནྡྲིཡསཧིཏེ ཨེཝ སནྟཱནེ ཏཾཏདཱཀཱརཱནི ཧུཏྭཱ ཨུཔྤཛྫནྟཱིཏི ཨིཏྠིནྡྲིཡཾ ཏེསཾ ཀཱརཎནྟི ཀཏྭཱ ཝུཏྟཾ ‘‘ཨིཏྠིལིངྒནིམིཏྟཀུཏྟཱཀཔྤཱནཾ ཀཱརཎབྷཱཝཔཙྩུཔཊྛཱན’’ནྟི. ཨིཏྠིལིངྒཱདཱིསུ ཨེཝ ཙ ཀཱརཎབྷཱཝསངྑཱཏེན ཨདྷིཔཏིབྷཱཝེན ཏསྶ ཨིནྡྲིཡཏཱ ཝུཏྟཱ, ཨིནྡྲིཡསཧིཏེ སནྟཱནེ ཨིཏྠིལིངྒཱདིཨཱཀཱརརཱུཔཔཙྩཡཱནཾ ཨཉྙཐཱ ཨནུཔྤཱདནཏོ, ཨིཏྠིགྒཧཎསྶ ཙ ཏེསཾ རཱུཔཱནཾ པཙྩཡབྷཱཝཏོ.

ཡསྨཱ པན བྷཱཝདསཀེཔི རཱུཔཱནཾ ཨིཏྠིནྡྲིཡཾ ན ཛནཀཾ, ནཱཔི ཨནུཔཱལཀཾ, ཨུཔཏྠམྦྷཀཾ ཝཱ, ན ཙ ཨཉྙེསཾ ཀལཱཔརཱུཔཱནཾ, ཏསྨཱ ཏཾ ཛཱིཝིཏིནྡྲིཡཾ ཝིཡ སཀལཱཔརཱུཔཱནཾ, ཨཱཧཱརོ ཝིཡ ཝཱ ཀལཱཔནྟརརཱུཔཱནཉྩ ‘‘ཨིནྡྲིཡཨཏྠིཨཝིགཏཔཙྩཡོ’’ཏི པཱལི༹ཡཾ ན ཝུཏྟཾ. ཡསྨཱ ཙ པཙྩཡནྟརཱདྷཱིནཱནི ལིངྒཱདཱིནི, ཏསྨཱ ཡཏྠསྶ ཨཱདྷིཔཙྩཾ, ཏཾསདིསེསུ མཏཙིཏྟཀཏརཱུཔེསུཔི ཏཾསཎྛཱནཏཱ དིསྶཏི. ཨེས ནཡོ པུརིསིནྡྲིཡེཔི. ཡཾ པནེཏྠ ཝིསདིསཾ, ཏཾ ཝུཏྟནཡཱནུསཱརེན ཝེདིཏབྦཾ ¶ . ཏཡིདཾ དྭཡཾ ཡསྨཱ ཨེཀསྨིཾ སནྟཱནེ སཧ ན པཝཏྟཏི ‘‘ཡསྶ ཨིཏྠིནྡྲིཡཾ ཨུཔྤཛྫཏི, ཏསྶ པུརིསིནྡྲིཡཾ ཨུཔྤཛྫཏཱིཏི? ནོ’’ཏིཨཱདི (ཡམ. ༣.ཨིནྡྲིཡཡམཀ.༡༨༨) ཝཙནཏོ, ཏསྨཱ ཨུབྷཏོབྱཉྫནཀསྶཱཔི ཨེཀསྨིཾ ཁཎེ ཨེཀམེཝ ཧོཏཱིཏི ཝེདིཏབྦཾ. ཡེ པན ‘‘སརཱིརེཀདེསཝུཏྟི བྷཱཝརཱུཔ’’ནྟི ཝདནྟི, ཏེསམྤི ཏཾ མིཙྪཱཏི དསྶེཏུཾ ‘‘ཏདུབྷཡམྤི…པེ… བྱཱཔཀམེཝཱ’’ཏི ཝཏྭཱ ཡདི ཨེཝཾ ཀཱཡཔྤསཱདེན སངྐརོ སིཡཱཏི ཨཱསངྐཾ ནིཝཏྟེནྟོ ‘‘ན ཙ ཀཱཡཔྤསཱདེནཱ’’ཏིཨཱདིམཱཧ. ཏསྶཏྠོ – ཡདིཔི ¶ སཀལསརཱིརབྱཱཔིཏཱཡ ཀཱཡཔྤསཱདེན ཨཊྛིཏོཀཱསེ ཋིཏནྟི ཝཏྟབྦཏཾ ནཱཔཛྫཏི, ཏེན པན བྷིནྣནིསྶཡཏྟཱ ཋིཏོཀཱསེ ཋིཏནྟིཔི ཝཏྟབྦཏཾ ནཱཔཛྫཏཱིཏི ཨཡམེཝ ཙེཏྠ ནིཔྤརིཡཱཡཀཐཱ. ‘‘རཱུཔརསཱདཡོ ཝིཡཱ’’ཏི ཨེཏེན སམཱནནིསྶཡེསུཔི ནཱམ སངྐརོ ནཏྠི ལཀྑཎབྷེདཏོ, ཀིམངྒཾ པན བྷིནྣནིསྶཡསབྷཱཝེསཱུཏི དསྶེཏི.

༤༣༩. སཧཛརཱུཔཱནུཔཱལནལཀྑཎནྟི ཨཏྟནཱ སཧཛཱཏརཱུཔཱནཾ ཨནུཔཱལནལཀྑཎཾ. ཛཱིཝིཏིནྡྲིཡསྶ ཨེཀནྟཀམྨཛཏྟཱ སཧཛ-གྒཧཎེནེཝ ཨནུཔཱལེཏབྦཱནམྤི ཀམྨཛབྷཱཝོ སིདྡྷོཏི ཀམྨཛ-གྒཧཎཾ ན ཀཏཾ. ཡཐཱསཀཾ ཁཎམཏྟཊྛཱཡིནོཔི ཀམྨཛརཱུཔསྶ པཝཏྟིཧེཏུབྷཱཝེན ཏཾ ཨནུཔཱལཀཾ, ཏསྨཱ སཧཛརཱུཔཱནུཔཱལནལཀྑཎཾ. ན ཧི ཀམྨཛཱནཾ ཀམྨཾཡེཝ ཋིཏིཧེཏུ བྷཝིཏུཾ ཨརཧཏི ཨཱཧཱརཛཱདཱིནཾ ཨཱཧཱརཱདི ཝིཡ. ཀིཾ ཀཱརཎཱ? ཏངྑཎཱབྷཱཝཏོ. ཏེསནྟི སཧཛརཱུཔཱནཾ. པཝཏྟནཾ ཡཱཔནཾ. ཋཔནཾ ཋིཏིཧེཏུཏཱ. ཨཏྟནཱ ཨནུཔཱལནཝསེན ཡཱཔེཏབྦཱནི པཝཏྟེཏབྦཱནི བྷཱུཏཱནི ཨེཏསྶ པདཊྛཱནནྟི ཡཱཔཡིཏབྦབྷཱུཏཔདཊྛཱནཾ. ཨནུཔཱལནལཀྑཎཱདིམྷཱིཏི ཨཱདི-སདྡེན པཝཏྟནརསཱདིམེཝ སངྒཎྷཱཏི. ཨཏྠིཀྑཎེཡེཝཱཏི ཨནུཔཱལེཏབྦཱནཾ ཨཏྠིཀྑཎེཡེཝ. ཨསཏི ཨནུཔཱལེཏབྦེ ཨུཔྤལཱདིམྷི ཀིཾ ཨུདཀཾ ཨནུཔཱལེཡྻ. ཡདི ཀམྨཛཱནཾ ཋིཏིཧེཏུམནྟརེན ཋིཏི ན ཧོཏི, ཛཱིཝིཏིནྡྲིཡསྶ ཀོ ཋིཏིཧེཏཱུཏི ཨཱཧ ‘‘སཡ’’ནྟིཨཱདི. ཡདི ཀམྨཛཱནཾ ཋཱནཾ ཛཱིཝིཏིནྡྲིཡཔཊིབདྡྷཾ, ཨཐ ཀསྨཱ སབྦཀཱལཾ ན ཋཔེཏཱིཏི ཨཱཧ ‘‘ན བྷངྒཏོ’’ཏིཨཱདི. ཏསྶ ཏསྶ ཨནུཔཱལནཱདིཀསྶ སཱདྷནཏོ. ཏཾ སཱདྷནཉྩ ཛཱིཝམཱནཏཱཝིསེསསྶ པཙྩཡབྷཱཝཏོ. ཨིནྡྲིཡབདྡྷརཱུཔསྶ ཧི མཏརཱུཔཏོ ཀམྨཛསྶ, ཏདནུབནྡྷབྷཱུཏསྶ ཙ ཨུཏུསམུཊྛཱནཱདིཏོ ཛཱིཝིཏིནྡྲིཡཀཏོ ཝིསེསོ, ན ཀེཝལཾ ཁཎཊྛིཏིཡཱ ཨེཝ, པབནྡྷཱནུཔཙྪེདསྶཱཔི ཛཱིཝིཏིནྡྲིཡཾ ཀཱརཎནྟི དཊྛབྦཾ, ཨིཏརཐཱ ཨཱཡུཀྑཡཏོ མརཎཾ ན ཡུཛྫེཡྻཱཏི.

༤༤༠. མནོདྷཱཏུམནོཝིཉྙཱཎདྷཱཏཱུནཾ ནིསྶཡལཀྑཎཾ ཧདཡཝཏྠཱུཏི ཀཐམེཏཾ ཝིཉྙཱཏབྦནྟི? ཨཱགམཏོ, ཡུཏྟིཏོ ཙ. ‘‘ཡཾ རཱུཔཾ ནིསྶཱཡ མནོདྷཱཏུ ཙ མནོཝིཉྙཱཎདྷཱཏུ ཙ ¶ པཝཏྟནྟི, ཏཾ རཱུཔཾ མནོདྷཱཏུཡཱ ཙ མནོཝིཉྙཱཎདྷཱཏུཡཱ ཙ ཏཾསམྤཡུཏྟཀཱནཉྩ དྷམྨཱནཾ ནིསྶཡཔཙྩཡེན པཙྩཡོ’’ཏི ¶ (པཊྛཱ. ༡.༡.༨) ཨེཝམཱདི ཨཱགམོ. ཡདི ཨེཝཾ, ཀསྨཱ རཱུཔཀཎྜེ ཏཾ ན ཝུཏྟནྟི? ཏཏྠ ཨཝཙནཾ ཨཉྙཀཱརཎཾ. ཀིཾ པན ཏནྟི? དེསནཱབྷེདོ. ཡཐཱ ཧི ཙཀྑུཝིཉྙཱཎཱདཱིནི ཨེཀནྟཏོ ཙཀྑཱདིནིསྶཡཱནི, ན ཨེཝཾ མནོཝིཉྙཱཎཾ ཨེཀནྟེན ཧདཡཝཏྠུནིསྶཡཾ. ནིསྶིཏཝསེན ཙ ཝཏྠུདུཀཱདིདེསནཱ པཝཏྟཱ ‘‘ཨཏྠི རཱུཔཾ ཙཀྑུཝིཉྙཱཎསྶ ཝཏྠུ, ཨཏྠི རཱུཔཾ ཙཀྑུཝིཉྙཱཎསྶ ན ཝཏྠཱུ’’ཏིཨཱདིནཱ (དྷ. ས. ༥༨༤). ཡམྤི ཨེཀནྟཏོ ཧདཡཝཏྠུནིསྶཡཾ, ཏསྶ ཝསེན ‘‘ཨཏྠི རཱུཔཾ མནོཝིཉྙཱཎསྶ ཝཏྠཱུ’’ཏིཨཱདིནཱ དུཀཱདཱིསུ ཝུཙྩམཱནེསུཔི ན ཏདནུགུཎཱ ཨཱརམྨཎདུཀཱདཡོ སམྦྷཝནྟི. ན ཧི ‘‘ཨཏྠི རཱུཔཾ མནོཝིཉྙཱཎསྶ ཨཱརམྨཎཾ, ཨཏྠི རཱུཔཾ ན མནོཝིཉྙཱཎསྶ ཨཱརམྨཎ’’ནྟི སཀྐཱ ཝཏྟུནྟི ཝཏྠཱརམྨཎདུཀཱ བྷིནྣགཏིཀཱ སིཡུནྟི ཨེཀརསཱ དེསནཱ ན བྷཝེཡྻ. ཨེཀརསཉྩ དེསནཾ དེསེཏུཾ ཨིདྷ སཏྠུ ཨཛ྄ཛྷཱསཡོ. ཏསྨཱ ཏཏྠ ཧདཡཝཏྠུ ན ཝུཏྟཾ, ན ཨལབྦྷམཱནཏྟཱཏི དཊྛབྦཾ.

ཡུཏྟི པན ཨེཝཾ ཝེདིཏབྦཱ – ནིཔྥནྣཨུཔཱདཱཡརཱུཔནིསྶཡཾ དྷཱཏུདྭཡཾ པཉྩཝོཀཱརབྷཝེ. ཏཏྠ རཱུཔཱཡཏནཱདཱིནཾ, ཨོཛཱཡ ཙ ཨིནྡྲིཡབདྡྷཏོ བཧིཔི པཝཏྟིདསྶནཏོ ན ཏཾནིསྶཡཏཱ ཡུཛྫཏི, ཨིཏྠིཔུརིསིནྡྲིཡཱནམྤི ཏདུབྷཡརཧིཏེཔི སནྟཱནེ དྷཱཏུདྭཡདསྶནཏོ ན ཏཾནིསྶཡཏཱ ཡུཛྫཏི, ཛཱིཝིཏིནྡྲིཡསྶཱཔི ཨཉྙཀིཙྩཾ ཝིཛྫཏཱིཏི ན ཏཾནིསྶཡཏཱ ཡུཛྫཏི ཨེཝཱཏི པཱརིསེསཏོ ཧདཡཝཏྠུ, ཏེསཾ ནིསྶཡོཏི ཝིཉྙཱཡཏི. སཀྐཱ ཧི ཝཏྟུཾ ནིཔྥནྣཨུཔཱདཱཡརཱུཔནིསྶཡཾ དྷཱཏུདྭཡཾ པཉྩཝོཀཱརབྷཝེ རཱུཔཔཊིབདྡྷཝུཏྟིབྷཱཝཏོ. ཡཾ ཡཉྷི རཱུཔཔཊིབདྡྷཝུཏྟི, ཏཾ ཏཾ ནིཔྥནྣཨུཔཱདཱཡརཱུཔནིསྶཡཾ དིཊྛཾ ཡཐཱ ‘‘ཙཀྑུཝིཉྙཱཎདྷཱཏཱུ’’ཏི. ‘‘པཉྩཝོཀཱརབྷཝེ’’ཏི ཙ ཝིསེསནཾ མནོཝིཉྙཱཎདྷཱཏུཝསེན ཀཏཾ. མནོདྷཱཏུ པན ཙཏུཝོཀཱརབྷཝེ ནཏྠེཝ. ནནུ ཙ ཨིནྡྲིཡནིསྶཡཏཱཡཔི སཱདྷནཏོ ཝིརུདྡྷོ ཧེཏུ ཨཱཔཛྫཏཱིཏི? ན དིཊྛབཱདྷནཏོ. དིཊྛཾ ཧེཏཾ ཙཀྑུཝིཉྙཱཎསྶ ཝིཡ དྷཱཏུདྭཡསྶ ཝཏྠུནོ མནྡཏིཀྑཱདིཨནནུཝིདྷཱནཾ. ཏཐཱ ཧིསྶ པཱལི༹ཡཾ ཨིནྡྲིཡཔཙྩཡཏཱ ན ཝུཏྟཱ. ཏེན ཏདནུཝིདྷཱནསངྑཱཏཱ ཨིནྡྲིཡནིསྶཡཏཱ བཱདྷཱིཡཏི. ཧོཏུ དྷཱཏུདྭཡནིསྶཡོ ཧདཡཝཏྠུ, ཨུཔཱདཱཡརཱུཔཉྩ, ཨེཏཾ པན ཀམྨསམུཊྛཱནཾ, པཊིནིཡཏཀིཙྩཾ, ཧདཡཔདེསེ ཋིཏམེཝཱཏི ཀཐཾ ཝིཉྙཱཡཏཱིཏི? ཝུཙྩཏེ – ཝཏྠུརཱུཔབྷཱཝཏོ ཀམྨསམུཊྛཱནཾ ཙཀྑུ ཝིཡ, ཏཏོ ཨེཝ ¶ པཊིནིཡཏཀིཙྩཾ, ཝཏྠུརཱུཔབྷཱཝཏོཏི ཙ ཝིཉྙཱཎནིསྶཡབྷཱཝཏོཏི ཨཏྠོ. ཨཊྛིཾ ཀཏྭཱ མནསི ཀཏྭཱ སབྦཙེཏསཱ སམནྣཱཧརིཏྭཱ ཀིཉྩི ཙིནྟེནྟསྶ ཧདཡསྶ ཁིཛྫནཏོ ཏཏྠེཏམཝཊྛིཏནྟི ཝིཉྙཱཡཏི. ཏཱསཉྙེཝ དྷཱཏཱུནནྟི མནོདྷཱཏུམནོཝིཉྙཱཎདྷཱཏཱུནཾཡེཝ ¶ . ནིསྶཡབྷཱཝཏོ ཨུཔརི ཨཱརོཔེཏྭཱ ཝཧནྟཾ ཝིཡ པཙྩུཔཏིཊྛཏཱིཏི ཨུབྦཧནཔཙྩུཔཊྛཱནཾ. སེསཾ ཧེཊྛཱ ཝུཏྟནཡམེཝ.

༤༤༡. ཨབྷིཀྐམོ ཨཱདི ཡེསཾ ཏེ ཨབྷིཀྐམཱདཱི. ཨཱདི-སདྡེན པཊིཀྐམསམིཉྫནཔསཱརཎཨུཀྑེཔནཨཝེཀྑེཔནཱདིཀཱ སབྦཱ ཀིརིཡཱ པརིགྒཡ྄ཧཏི. ཏེསཾ ཨབྷིཀྐམཱདཱིནཾ པཝཏྟཀཾ ཙིཏྟཾ སམུཊྛཱནཾ ཡསྶཱ སཱ ཨབྷིཀྐམཱདིཔྤཝཏྟཀཙིཏྟསམུཊྛཱནཱ, ཝཱཡོདྷཱཏུ. ཏསྶཱ ཡཾ སཧཛརཱུཔཀཱཡསྶ ཐམྦྷནསནྡྷཱརཎཙལནསངྑཱཏཾ ཀིཙྩཾ, ཏསྶ སཧཀཱརཱིཀཱརཎབྷཱུཏོ ཨཱཀཱརཝིསེསོ ཀཱཡཝིཉྙཏྟི ནཱམཱཏི དསྶེནྟོ ཨཱཧ ‘‘ཨབྷིཀྐམཱདི…པེ… ཀཱཡཝིཉྙཏྟཱི’’ཏི.

ཀསྶ པན ཨཱཀཱརཝིཀཱརོཏི? སཱམཏྠིཡཏོ ཝཱཡོདྷཱཏུཨདྷིཀཱནཾ ཙིཏྟཛམཧཱབྷཱུཏཱནཾ. ཀིཾ ཏཾ སཱམཏྠིཡཾ? ཙིཏྟཛཏཱ, ཨུཔཱདཱཡརཱུཔཏཱ ཙ. ཨཐ ཝཱ ཝཱཡོདྷཱཏུཡཱ ཨཱཀཱརཝིཀཱརོ སཧཛ…པེ… པཙྩཡོཏི སམྦནྡྷིཏབྦཾ. ཡདི ཨེཝཾ ཝིཉྙཏྟིཡཱ ཨུཔཱདཱཡརཱུཔབྷཱཝོ ན ཡུཛྫཏི. ན ཧི ཨུཔཱདཱཡརཱུཔཾ ཨེཀབྷཱུཏསནྣིསྶཡཾ ཨཏྠི. ‘‘ཙཏུནྣཾ མཧཱབྷཱུཏཱནཾ ཨུཔཱདཱཡརཱུཔ’’ནྟི ཧི ཝུཏྟཾ, ནཱཡཾ དོསོ ཙཏུནྣཾ ཝིཀཱརོ ཙཏཱུསུ ཨེཀསྶཱཔི ཧོཏི ཙཏུསཱདྷཱརཎདྷནཾ ཝིཡ. ཝཱཡོདྷཱཏུཨདྷིཀཏཱཡ ཙ ཀལཱཔསྶ ‘‘ཝཱཡོདྷཱཏུཡཱ’’ཏི ཝཙནཾ ན ཝིརུཛ྄ཛྷཏི. ཨེཝཾ ཨདྷིཀཏཱ ཙ སཱམཏྠིཡཏོ, ན པམཱཎཏོ. ཨཉྙཐཱ ཧི ཨཝིནིབྦྷོགཝུཏྟིཏཱ ན ཡུཛྫེཡྻ. ཝཱཡོདྷཱཏུཡཱ ཨེཝཱཏི ཀེཙི. ཏེསཾ མཏེན ཝིཉྙཏྟིཡཱ ཨུཔཱདཱཡརཱུཔཏཱ དུརུཔཔཱདཱ. ན ཧི ཨེཀསྶ ཝིཀཱརོ ཙཏུནྣཾ ཧོཏི. སཱ པནཱཡཾ ཧཏྠཙལནཱདཱིསུ ཕནྡམཱནཝཎྞགྒཧཎཱནནྟརམཝིཉྙཱཡམཱནནྟརེན མནོདྭཱརཛཝནེན གཡ྄ཧཏི. ཕནྡམཱནཝཎྞཝིནིམུཏྟོ ཀོཙི ཝིཀཱརོ ཨཏྠི. ཏསྶ ཙ ཏགྒཧཎཱནནྟརཾ གཧཎཾ ཧོཏཱིཏི ཀཐམེཏཾ ཝིཉྙཱཡཏཱིཏི ཨདྷིཔྤཱཡགྒཧཎཏོ. ན ཧི ཝིཉྙཏྟིཝིཀཱརརཧིཏེསུ རུཀྑཙལནཱདཱིསུ ‘‘ཨིདམེས ཀཱརེཏི མཉྙེ’’ཏི ཨདྷིཔྤཱཡགྒཧཎཾ ¶ དིཊྛཾ, ཧཏྠཙལནཱདཱིསུ པན དིཊྛཾ. ཏསྨཱ ཕནྡམཱནཝཎྞཝིནིམུཏྟོ ཀོཙི ཝིཀཱརོ ཨཏྠི ཨདྷིཔྤཱཡསྶ ཉཱཔཀོཏི ཝིཉྙཱཡཏི. ཉཱཔཀོ ཙ ཧེཏུ ཉཱཔེཏབྦམཏྠཾ སཡཾ གཧིཏོ ཨེཝ ཉཱཔེཏི, ན ཝིཛྫམཱནཏཱམཏྟེནཱཏི ཝཎྞགྒཧཎཱནནྟརཾ ཝིཀཱརགྒཧཎམྤི ཨནུམཱནཏོ ཝིཉྙཱཡཏི. ཏཐཱ ཧི ཝདནྟི –

‘‘ཝིསཡཏྟམནཱཔནྣཱ, སདྡཱ ནེཝཏྠབོདྷཀཱ;

ན སཏྟཱམཏྟཏོ ཨཏྠེ, ཏེ ཨཉྙཱཏཱ པཀཱསཀཱ’’ཏི.

ཡདི ¶ ཝིཀཱརགྒཧཎམེཝ ཀཱརཎཾ ཨདྷིཔྤཱཡགྒཧཎསྶ, ཀསྨཱ ཨགྒཧིཏསངྐེཏཱནཾ ཨདྷིཔྤཱཡགྒཧཎཾ ན ཧོཏཱིཏི? ན ཀེཝལཾ ཝིཀཱརགྒཧཎམེཝ ཨདྷིཔྤཱཡགྒཧཎསྶ ཀཱརཎཾ, ཨཐ ཁོ པུརིམསིདྡྷསམྦནྡྷགྒཧཎཉྩ ཨིམསྶ ཨུཔནིསྶཡོཏི དཊྛབྦཾ. ཐམྦྷནསནྡྷཱརཎཙལནཱནི ཝིཉྙཏྟིཝིཀཱརསཧིཏཱཡ ཝཱཡོདྷཱཏུཡཱ ཧོནྟཱིཏི ཝུཏྟཾ. ཀིཾ སབྦཱཝ ཝཱཡོདྷཱཏཱུ སབྦཱནི ཏཱནི ཀརོནྟཱིཏི? ནཡིདམེཝཾ. སཏྟམཛཝནསམྦྷཱུཏཱ ཧི ཝཱཡོདྷཱཏུ པུརིམཛཝནསམྦྷཱུཏཱ ཝཱཡོདྷཱཏུཡོ ཨུཔཐམྦྷཀཔཙྩཡེ ལབྷིཏྭཱ དེསནྟརུཔྤཏྟིཧེཏུབྷཱཝེན ཙལཡཏི ཙིཏྟཛརཱུཔཾ, ན ཨིཏརཱ. ཨིཏརཱ པན སནྠམྦྷནསནྡྷཱརཎམཏྟཾ ཀརོནྟིཡོ ཏསྶཱ ཨུཔཀཱརཱཡ ཧོནྟི. དེསནྟརུཔྤཏྟི ཨེཝ ཙལནནྟི ནིམིཏྟེ ཙ ཀཏྟུབྷཱཝོ སམཱརོཔིཏོཏི དཊྛབྦཾ. ཨཉྙཐཱ དྷམྨཱནཾ ཨབྱཱཔཱརཏཱ, ཁཎིཀཏཱ ཙ ན སིཡཱ. སཏྟཧི ཡུགེཧི ཨཱཀཌྜྷིཏབྦསཀཊམེཏྠ ཨཊྛཀཐཱཡཾ ནིདསྶིཏཾ. ཙིཏྟཛརཱུཔེ པན ཙལནྟེ ཏཾསམྦནྡྷཏཱཡ ཨུཏུཀམྨཱཧཱརཛརཱུཔམྤི ཙལཏི ནདཱིསོཏེ པཀྑིཏྟསུཀྑགོམཡཔིཎྜཾ ཝིཡ ཕནྡམཱནཝཎྞགྒཧཎཱནནྟརཾ ཝིཉྙཏྟིགྒཧཎསྶ ཝུཏྟཏྟཱ. ཀིཾ ཙལནཀརཱ ཨེཝ ཝཱཡོདྷཱཏུ ཝིཉྙཏྟིཝིཀཱརསཧིཏཱཏི? ནཡིདམེཝཾ, ཏཐཱ ཙལཡིཏུམསཀྐུཎནྟིཡོཔི ཐམྦྷནསནྡྷཱརཎམཏྟཀརཱ པཋམཛཝནཱདིསམྦྷཱུཏཱཔི ཝཱཡོདྷཱཏུཡོ ཝིཉྙཏྟིཝིཀཱརསཧིཏཱ ཨེཝཱཏི གཧེཏབྦཾ. ཡེན དིསཱབྷཱགེནཱཡཾ ཨབྷིཀྐམཱདིཾ པཝཏྟེཏུཀཱམོ, ཏདབྷིམུཁཝིཀཱརསབྦྷཱཝཏོ. ཨདྷིཔྤཱཡསཧབྷཱཝཱི ཧི ཝིཀཱརོ ཝིཉྙཏྟི. ཨེཝཉྩ ཀཏྭཱ མནོདྭཱརཱཝཛྫནསྶཱཔི ཝིཉྙཏྟིསམུཊྛཱཔཀཝཙནཾ སུཊྛུ ཡུཛྫཏི. ཡཐཱཝུཏྟཝིཀཱརགྒཧཎམུཁེན ཏཾསམངྒིནོ ཨདྷིཔྤཱཡོ ཝིཉྙཱཡཏཱིཏི ཝུཏྟཾ ‘‘ཨདྷིཔྤཱཡཔྤཀཱསནརསཱ’’ཏི.

ཀཱཡཝིཔྥནྡནསྶ ¶ ཧེཏུབྷཱུཏཱཡ ཝཱཡོདྷཱཏུཡཱ ཝིཀཱརབྷཱཝཏོ པརིཡཱཡེན ཝིཉྙཏྟི ཀཱཡཝིཔྥནྡནཧེཏུབྷཱཝཔཙྩུཔཊྛཱནཱ ཝུཏྟཱ. ཙིཏྟསམུཊྛཱནཝཱཡོདྷཱཏུཔདཊྛཱནཱཏི ཙ ཝཱཡོདྷཱཏུཡཱ ཀིཙྩཱདྷིཀཏཱཡ ཝུཏྟཾ. ཀཱཡཝིཔྥནྡནེན ཨདྷིཔྤཱཡཝིཉྙཱཔནཧེཏུཏྟཱཏི ཀཱཡཝིཔྥནྡནེན ཀརཎབྷཱུཏེན ཨདྷིཔྤཱཡསྶ ཝིཉྙཱཔནཧེཏུབྷཱཝཏོ ཀཱཡཝིཉྙཏྟཱིཏི ཝུཙྩཏཱིཏི སམྦནྡྷོ. ཨཡཉྷེཏྠ ཨཏྠོ – ཝིཉྙཱཔེཏཱིཏི ཝིཉྙཏྟི. ཀིཾ ཝིཉྙཱཔེཏི? ཨདྷིཔྤཱཡཾ. ཀེན? ཀཱཡེན. ཀཱིདིསེན? ཝིཔྥནྡམཱནེནཱཏི. དུཏིཡནཡེ པན ཡཐཱཝུཏྟེན ཀཱཡེན ཝིཉྙཱཡཏཱིཏི ཀཱཡཝིཉྙཏྟི. སེསཾ ཝུཏྟནཡམེཝ.

ཨཏྠཱཝབོདྷནསམཏྠོ ཝཙཱིཝིསེསོ ཝཙཱིབྷེདོ. ཏེན ཝཱཡུཝནཔྤཏིནདཱིགྷོསཱདིཾ ནིཝཏྟེཏི. ཏསྶ པཝཏྟཀཾ ཙིཏྟཾ སམུཊྛཱནཾ ཡསྶཱ སཱ ཝཙཱིབྷེདཔྤཝཏྟཀཙིཏྟསམུཊྛཱནཱ, པཐཝཱིདྷཱཏུ. ཏསྶཱ ཡཾ ཨུཔཱདིནྣསངྑཱཏསྶ ¶ ཨཀྑརུཔྤཏྟིཊྛཱནསྶ གྷཊྚནསཉྙིཏཾ ཀིཙྩཾ, ཏསྶ སཧཀཱརཱིཀཱརཎབྷཱུཏོ ཨཱཀཱརཝིསེསོ ཝཙཱིཝིཉྙཏྟི ནཱམཱཏི དསྶེནྟོ ཨཱཧ ‘‘ཝཙཱིབྷེ…པེ… ཝཙཱིཝིཉྙཏྟཱི’’ཏི.

ཨིདཱནི ‘‘ཀསྶ པན ཨཱཀཱརཝིཀཱརོ’’ཏིཨཱདི ཀཱཡཝིཉྙཏྟིཡཾ ཝུཏྟནཡེནེཝ ཝེདིཏབྦཾ. ཨཡཾ པན ཝིསེསོ – ཡཐཱ ཏཏྠ ‘‘ཕནྡམཱནཝཎྞགྒཧཎཱནནྟར’’ནྟི ཝུཏྟཾ, ཨེཝམིདྷ ‘‘སུཡྻམཱནསདྡསཝནཱནནྟར’’ནྟི ཡོཛེཏབྦཾ. ཨིདྷ ཙ ཐམྦྷནཱདཱིནཾ ཨབྷཱཝཏོ ‘‘སཏྟམཛཝནསམྦྷཱུཏཱ’’ཏིཨཱདིནཡོ ན ལབྦྷཏི. གྷཊྚནེན ཧི སདྡྷིཾ སདྡོ ཨུཔྤཛྫཏི. གྷཊྚནཉྩ པཋམཛཝནཱདཱིསུཔི ལབྦྷཏེཝ. གྷཊྚནཾ པཙྩཡཝསེན བྷཱུཏཀལཱཔཱནཾ ཨཉྙམཉྙཾ ཨཱསནྣཏརུཔྤཱདོ. ཙལནཾ ཨེཀསྶཱཔི དེསནྟརུཔྤཱདཔརམྤརཏཱཏི ཨཡམེཏེསཾ ཝིསེསོ. ཡཐཱ ཙ ཝཱཡོདྷཱཏུཡཱ ཙལནཾ ཀིཙྩཾ, ཨེཝཾ པཐཝཱིདྷཱཏུཡཱ གྷཊྚནཾ. ཏེནེཝཱཧ ‘‘པཐཝཱིདྷཱཏུཡཱ ཨུཔཱདིནྣགྷཊྚནསྶ པཙྩཡོ’’ཏི. སེསཾ ཝུཏྟནཡམེཝ. ཡཐཱ ཧཱིཏིཨཱདི ཀཱཡཝཙཱིཝིཉྙཏྟཱིནཾ ཨནུམཱནཝསེན གཧེཏབྦབྷཱཝཝིབྷཱཝནཾ. ཡཐཱ ཧི ཨུསྶཱཔེཏྭཱ བདྡྷགོསཱིསཱདིརཱུཔཱནི དིསྭཱ ཏདནནྟརཔྤཝཏྟཱཡ ཨཝིཉྙཱཡམཱནནྟརཱཡ མནོདྭཱརཝཱིཐིཡཱ གོསཱིསཱདཱིནཾ ཨུདཀསཧཙཱརིཔྤཀཱརསཉྙཱཎཱཀཱརཾ གཧེཏྭཱ ཨུདཀགྒཧཎཾ ཧོཏི, ཨེཝཾ ཝིཔྥནྡམཱནསམུཙྩཱརིཡམཱནཝཎྞསདྡེ གཧེཏྭཱ ཏདནནྟརཔཝཏྟཱཡ ཨཝིཉྙཱཡམཱནནྟརཱཡ མནོདྭཱརཝཱིཐིཡཱ པུརིམསིདྡྷསམྦནྡྷགཧཎཱུཔནིསྶཡསཧིཏཱཡ སཱདྷིཔྤཱཡཝིཀཱརགྒཧཎཾ ཧོཏི.

༤༤༢. རཱུཔཱནི ¶ པརིཙྪིནྡཏི, སཡཾ ཝཱ ཏེཧི པརིཙྪིཛྫཏི, རཱུཔཱནཾ ཝཱ པརིཙྪེདམཏྟཾ རཱུཔཔརིཙྪེདོ, ཏཾ ལཀྑཎཾ ཨེཏིསྶཱཏི རཱུཔཔརིཙྪེདལཀྑཎཱ. ཨཡཾ ཧི ཨཱཀཱསདྷཱཏུ ཏཾ ཏཾ རཱུཔཀལཱཔཾ པརིཙྪིནྡནྟཱི ཝིཡ ཧོཏི. ཏེནཱཧ ‘‘རཱུཔཔརིཡནྟཔྤཀཱསནརསཱ’’ཏི. ཨཏྠཏོ པན ཡསྨཱ རཱུཔཱནཾ པརིཙྪེདམཏྟཾ ཧུཏྭཱ གཡ྄ཧཏི, ཏསྨཱ ཝུཏྟཾ ‘‘རཱུཔམརིཡཱདཔཙྩུཔཊྛཱནཱ’’ཏི. ཡསྨིཾ ཀལཱཔེ བྷཱུཏཱནཾ པརིཙྪེདོ, ཏེཧེཝ ཨསམྥུཊྛབྷཱཝཔཙྩུཔཊྛཱནཱ. ཝིཛྫམཱནེཔི ཧི ཀལཱཔནྟརབྷཱུཏཱནཾ ཀལཱཔནྟརབྷཱུཏེཧི སམྥུཊྛབྷཱཝེ ཏཾཏཾབྷཱུཏཝིཝིཏྟཏཱ རཱུཔཔརིཡནྟོ ཨཱཀཱསོཏི ཡེསཾ སོ པརིཙྪེདོ, ཏེཧི སོ ཨསམྥུཊྛོཝ. ཨཉྙཐཱ པརིཙྪིནྣཏཱ ན སིཡཱ ཏེསཾ བྷཱུཏཱནཾ བྱཱཔིབྷཱཝཱཔཏྟིཏོ. ཨབྱཱཔིཏཱ ཧི ཨསམྥུཊྛཏཱ. ཏེནཱཧ བྷགཝཱ ‘‘ཨསམྥུཊྛཾ ཙཏཱུཧི མཧཱབྷཱུཏེཧཱི’’ཏི (དྷ. ས. ༦༣༧, ༧༢༤). ཀཎྞཙྪིདྡམུཁཝིཝརཱདིཝསེན ཙ ཚིདྡཝིཝརབྷཱཝཔཙྩུཔཊྛཱནཱ ཝཱ. ཡེསཾ རཱུཔཱནཾ པརིཙྪེདོ, ཏཏྠེཝ ཏེསཾ པརིཙྪེདབྷཱཝེན ལབྦྷཏཱིཏི ཝུཏྟཾ ‘‘པརིཙྪིནྣརཱུཔཔདཊྛཱནཱ’’ཏི. ‘‘ཡཱཡ པརིཙྪིནྣེསཱུ’’ཏིཨཱདིནཱ ཨཱཀཱསདྷཱཏུཡཱ ཏཾཏཾཀལཱཔཱནཾ ཀལཱཔནྟརེཧི ཨསངྐརཀཱརཎཏཾ དསྶེཏི.

༤༤༣. ཨདནྡྷཏཱཏི ¶ ཨགརུཏཱ. ཝིནོདནཾ ཝིཀྑིཔནཾ, ཨཔནཡནནྟི ཨཏྠོ. ཨཐདྡྷཏཱཏི ཨཀཐིནཏཱ. ཨཏྟནོ མུདུབྷཱཝེནེཝ སབྦཀིརིཡཱསུ ཨཝིརོདྷིཏཱ. མུདུ ཧི ཀཏྠཙི ན ཝིརུཛ྄ཛྷཏི. ཏཱིསུཔི ཋཱནེསུ པཊིཔཀྑེ ཨ-ཀཱརོ དནྡྷཏཱདིཧེཏཱུནཾ པཊིཔཀྑསམུཊྛཱནཏྟཱ ལཧུཏཱདཱིནནྟི ཀེཙི. ཨཔརེ པན ‘‘སཏྟཱཔཊིསེདྷེ’’ཏི ཝདནྟི. སརཱིརེན ཀཏྟབྦཀིརིཡཱནཾ ཨནུཀཱུལཏཱསངྑཱཏཀམྨཉྙབྷཱཝོ ལཀྑཎཾ ཨེཏིསྶཱཏི སརཱིརཀིརིཡཱནུཀཱུལཀམྨཉྙབྷཱཝལཀྑཎཱ. ཨཀམྨཉྙཾ དུབྦལཾ ནཱམ ཧོཏཱིཏི ཀམྨཉྙཏཱ ཨདུབྦལབྷཱཝཔཙྩུཔཊྛཱནཱ ཝུཏྟཱ.

ལཧུཏཱདཱིནཾ ཨཉྙམཉྙཱཝིཛཧནེན དུཝིཉྙེཡྻནཱནཏྟཏཱ ཝུཏྟཱཏི ཏཾཏཾཝིཀཱརཱདྷིཀརཱུཔེཧི ཏཾནཱནཏྟཔྤཀཱསནཏྠཾ ‘‘ཨེཝཾ སནྟེཔཱི’’ཏི ཝུཏྟཾ. དྷཱཏུཀྑོབྷོ ཝཱཏཔིཏྟསེམྷཔཀོཔོ, རསཱདིདྷཱཏཱུནཾ ཝཱ ཝིཀཱརཱཝཏྠཱ. དྭིདྷཱ ཝུཏྟོཔི ཨཏྠཏོ པཐཝཱིདྷཱཏུཨཱདཱིནཾ དྷཱཏཱུནཾཡེཝ ཝིཀཱརོཏི དཊྛབྦོ. པཊིཔཀྑཔཙྩཡཱ སཔྤཱཡཨུཏུཨཱཧཱརཱཝིཀྑིཏྟཙིཏྟཏཱ. ཏེ ཙ ཏཾཏཾཝིཀཱརསྶ ཝིསེསཔཙྩཡབྷཱཝཏོ ཝུཏྟཱ, ཨཝིསེསེན པན ¶ སབྦེ སབྦེསཾ པཙྩཡཱ. ཡཏོ ནེསཾ ཨཉྙམཉྙཱཝིཛཧནཾ, ཨིདྡྷིཝལ༹ཉྫནཱདཱིསུ ཝིཡ ཝསཝཏྟནཾ མདྡཝཔྤཀཱརོ. སུཔརིམདྡིཏཙམྨསུདྷནྟསུཝཎྞགཧཎཉྩེཏྠ མུདུཀམྨཉྙསདིསརཱུཔནིདསྶནམཏྟཾ, ན ཏཾ ཨིདྷ ཨདྷིཔྤེཏཾ མུདུཏཱཀམྨཉྙཏཱསབྦྷཱཝཏོ. ན ཧི ཨནིནྡྲིཡབདྡྷརཱུཔསནྟཱནེ ལཧུཏཱདཱིནི སམྦྷཝནྟི, ཨིནྡྲིཡབདྡྷེཔི རཱུཔབྷཝེ ན སནྟི དནྡྷཏྟཀརཱདིདྷཱཏུཀྑོབྷཱབྷཱཝཏོ. སཏི ཧི ཏཱདིསེ དྷཱཏུཀྑོབྷེ ཏཔྤཊིཔཀྑཔཙྩཡསམུཊྛཱནཱཧི ལཧུཏཱདཱིཧི བྷཝིཏབྦནྟི ཀེཙི, ཏཾ ཨཀཱརཎཾ. ན ཧི ཝཱུཔསམེཏབྦཔཙྩནཱིཀཱཔེཀྑོ ཏབྦིརོདྷིདྷམྨསམུཔྤཱདོ, ཏཐཱ སཏི སཧེཏུཀཀིརིཡཙིཏྟུཔྤཱདེསུ ཀཱཡལཧུཏཱདཱིནཾ ཨབྷཱཝོཝ སིཡཱ. ཀསྨཱ པན ཀམྨཛརཱུཔེསུ ལཧུཏཱདཡོ ན ཧོནྟཱིཏི? པཙྩུཔྤནྣཔཙྩཡཱཔེཀྑཏྟཱ. ཨཉྙཐཱ སབྦདཱབྷཱཝཱིཧི ལཧུཏཱདཱིཧི བྷཝིཏབྦཾ སིཡཱཏི.

༤༤༤. ཨཱདི ཙཡོ, ཨཱིསཾ ཝཱ ཙཡོཏི ཨཱཙཡོ, ཡཐཱཔཙྩཡཾ ཏཏོ ཏཏོ ཨཱགཏསྶ ཝིཡ ཙཡོཏི ཝཱ ཨཱཙཡོ, ཏདུབྷཡཾ ཨེཀཛ྄ཛྷཾ གཧེཏྭཱ ཨཱཙཡོ ལཀྑཎཾ ཨེཏསྶཱཏི ཨཱཙཡལཀྑཎོ. རཱུཔསྶ ཨུཔཙཡོ པཋམུཔྤཱདོ, ཝཌྜྷི ཙ ‘‘ཨུཔཉྙཏྟཾ ཨུཔསིཏྟ’’ནྟིཨཱདཱིསུ ཝིཡ ཨུཔ-སདྡསྶ པཋམཱུཔརིཨཏྠསྶ ནིདསྶནཏོ. པུབྦནྟཏོཏི པུབྦཀོཊྛཱསཏོ, ཨནཱགཏབྷཱཝཏོཏི ཨཏྠོ. ཨུཔྤཛྫམཱནེ རཱུཔདྷམྨེ ཨུཔྤཱདོ ཨནཱགཏཀྑཎཏོ ཨུམྨུཛྫཱཔེནྟོ ཝིཡ ཧོཏཱིཏི ཝུཏྟཾ ‘‘ཨུམྨུཛྫཱཔནརསོ’’ཏི. ཏཐཱ སོ ‘‘ཨིམེ རཱུཔདྷམྨཱ’’ཏི ནིཡྻཱཏེནྟོ ཝིཡ གཡ྄ཧཏཱིཏི ཨཱཧ ‘‘ནིཡྻཱཏནཔཙྩུཔཊྛཱནོ’’ཏི. པརིཔུཎྞབྷཱཝཔཙྩུཔཊྛཱནཏཱ ‘‘ཨུཔརིཙཡོ ཨུཔཙཡོ’’ཏི ཨིམསྶ ཨཏྠསྶ ཝསེན ¶ ཝེདིཏབྦཱ. པཝཏྟིལཀྑཎཱཏི རཱུཔཱནཾ པཝཏྟནནྟི ལཀྑིཏབྦཱ. ཨནུཔྤབནྡྷནརསཱཏི པུབྦཱཔརཝསེན ཨནུ ཨནུ པབནྡྷནཀིཙྩཱ. ཏཏོ ཨེཝ ཨནུཔཙྪེདཝསེན གཧེཏབྦཏོ ཨནུཔཙྪེདཔཙྩུཔཊྛཱནཱ.

ཨུབྷཡམྤཱིཏི ཨུཔཙཡོ སནྟཏཱིཏི ཨུབྷཡམྤི. ཛཱཏིརཱུཔསྶེཝཱཏི རཱུཔུཔྤཱདསྶེཝ ཨདྷིཝཙནཾ. ཡདི ཨེཝཾ ཀསྨཱ ཝིབྷཛྫ ཝུཏྟཱཏི ཨཱཧ ‘‘ཨཱཀཱརནཱནཏྟཏོ’’ཏི, ཛཱཏིརཱུཔསྶ པཝཏྟིཨཱཀཱརབྷེདཏོཏི ཨཏྠོ. ཝེནེཡྻཝསེན ཝིབྷཛྫཀཐནེ ཀཱརཎཾ པརཏོ ཨཱཝི བྷཝིསྶཏི. ཀཐཾ པནེཏཾ ཝིཉྙཱཏབྦཾ, པཝཏྟིཨཱཀཱརནཱནཏྟཏོ ཛཱཏིརཱུཔསྶ བྷེདོ, ན སབྷཱཝཏོཏི ¶ ? ནིདྡེསཏོཏི དསྶེནྟོ ‘‘ཡསྨཱ པནཱ’’ཏིཨཱདིམཱཧ. ཏཏྠ ཡོ ཨཱཡཏནཱནནྟི ཡོ ཨཌྜྷེཀཱདསནྣཾ རཱུཔཱཡཏནཱནཾ ཨཱདིཙཡཏྟཱ ‘‘ཨཱཙཡོ’’ཏི ཝུཏྟོ. སོ ཨེཝ ཨུཔཙཡོ པཋམུཔྤཱདབྷཱཝཏོ ཨུཔ-སདྡོ པཋམཏྠོཏི ཀཏྭཱ. ཡོ པན ཏཏྠེཝ ཨུཔྤཛྫམཱནཱནཾ ཨུཔརི ཙཡཏྟཱ ཨུཔཙཡོ, སཱ ཨེཝ སནྟཏི ཨནུཔབནྡྷཝསེན ཨུཔྤཏྟིབྷཱཝཏོ. ཨཐ ཝཱ ཡོ ཨཱཡཏནཱནཾ ཨཱཙཡོ པཋམབྷཱཝེན ཨུཔལཀྑིཏོ ཨུཔྤཱདོ, སོ པན ཏཏྠེཝ ཨུཔྤཛྫམཱནཱནཾ ཨུཔརི ཙཡཏྟཱ ཨུཔཙཡོ, ཝཌྜྷཱིཏི ཨཏྠོ. ཨུཔཙཡོ ཝཌྜྷིབྷཱཝེན ཨུཔལཀྑིཏོ ཨུཔྤཱདོ, སཱ ཨེཝ སནྟཏི པབནྡྷཱཀཱརེན ཨུཔྤཏྟིབྷཱཝཏོ. ཏེནཱཧ ‘‘ཨཊྛཀཐཱཡམྤཱི’’ཏིཨཱདི.

ཏཏྠ ཨེཝཾ ཀིཾ ཀཐིཏནྟི ‘‘ཡོ ཨཱཡཏནཱནཾ ཨཱཙཡོ’’ཏིཨཱདིནཱ (དྷ. ས. ༦༤༡) ནིདྡེསེན ཀིཾ ཨཏྠཛཱཏཾ ཀཐིཏཾ ཧོཏི? ཨཱཡཏནེན ཨཱཙཡོ ཀཐིཏོ. ཨཱཙཡུཔཙཡསནྟཏིཡོ ཧི ནིབྦཏྟིབྷཱཝེན ཨཱཙཡོ ཨེཝཱཏི ཨཱཡཏནེཧི ཨཱཙཡཱདཱིནཾ པཀཱསིཏཏྟཱ ཏེཧི ཨཱཙཡོ ཀཐིཏོ. ཨཱཡཏནཱནཾ ཨཱཙཡཱདིཝཙནེནེཝ ཨཱཙཡསབྷཱཝཱནི ཨུཔྤཱདདྷམྨཱནི ཨཱཡཏནཱནཱིཏི ཨཱཙཡེན ཏཾཔཀཏིཀཾ ཨཱཡཏནཾ ཀཐིཏཾ. ལཀྑཎཉྷི ཨུཔྤཱདོ, ན རཱུཔརཱུཔནྟི.

རཱུཔཔརིཔཱཀོ རཱུཔདྷམྨཱནཾ ཛིཎྞཏཱ. ཨུཔནཡནརསཱཏི བྷངྒུཔནཡནཀིཙྩཱ. སབྷཱཝཱནཔགམེཔཱིཏི ཀཀྑལ༹ཏཱདིསབྷཱཝསྶ ཨཝིགམེཔི. ཋིཏིཀྑཎེ ཧི ཛརཱ, ན ཙ ཏདཱ དྷམྨོ སབྷཱཝཾ ཝིཛཧཏི ནཱམ. ནཝབྷཱཝོ ཨུཔྤཱདཱཝཏྠཱ, ཏསྶ ཨཔགམབྷཱཝེན གཡ྄ཧཏཱིཏི ཨཱཧ ‘‘ནཝབྷཱཝཱཔགམཔཙྩུཔཊྛཱནཱ’’ཏི. ‘‘ཨརཱུཔདྷམྨཱན’’ནྟི ཨིདཾ ཏེསཾ ཛརཱཡ སུཊྛུ པཊིཙྪནྣཏཱཡ ཝུཏྟཾ. རཱུཔདྷམྨཱནམྤི ཧི ཁཎིཀཛརཱ པཊིཙྪནྣཱ ཨེཝ, ཡཱ ཨཝཱིཙིཛརཱཏིཔི ཝུཙྩཏི. ཨེས ཝིཀཱརོཏི ཁཎྜིཙྩཱདིཝིཀཱརམཱཧ. སོ ཧི ཨརཱུཔདྷམྨེསུ ན ལབྦྷཏི. ཡཱ ཨཝཱིཙིཛརཱ ནཱམ, ཏསྶཱཔི ¶ ཨེས ཝིཀཱརོ ནཏྠཱིཏི སམྦནྡྷིཏབྦཾ. ནཏྠི ཨེཏིསྶཱ ཛརཱཡ ཝཱིཙཱིཏི ཨཝཱིཙིཛརཱ, ནཝབྷཱཝཏོ དུཝིཉྙེཡྻནྟརཛརཱཏི ཨཏྠོ.

པརིཏོ སབྦསོ ‘‘བྷིཛྫན’’ནྟི ལཀྑིཏབྦཱཏི པརིབྷེདལཀྑཎཱ. ནིཙྩཾ ནཱམ དྷུཝཾ, རཱུཔཾ པན ཁཎབྷངྒིཏཱཡ ཡེན བྷངྒེན ན ནིཙྩནྟི ཨནིཙྩཾ, སོ ཨནིཙྩསྶ བྷཱཝོཏི ཨནིཙྩཏཱ. སཱ པན ཡསྨཱ ཋིཏིཔྤཏྟཾ རཱུཔཾ ཝིནཱསབྷཱཝེན ¶ སཾསཱིདནྟཱི ཝིཡ ཧོཏཱིཏི ཝུཏྟཾ ‘‘སཾསཱིདནརསཱ’’ཏི. ཡསྨཱ ཙ སཱ རཱུཔདྷམྨཱནཾ བྷངྒབྷཱཝཏོ ཁཡཝཡཱཀཱརེནེཝ གཡ྄ཧཏི, ཏསྨཱ ཝུཏྟཾ ‘‘ཁཡཝཡཔཙྩུཔཊྛཱནཱ’’ཏི.

༤༤༥. ཨོཛཱལཀྑཎོཏི ཨེཏྠ ཨངྒམངྒཱནུསཱརིནོ རསསྶ སཱརོ ཨུཔཐམྦྷབལཀརོ བྷཱུཏནིསྶིཏོ ཨེཀོ ཝིསེསོ ཨོཛཱ. ཀབལ༹ཾ ཀརཱིཡཏཱིཏི ཀབལཱི༹ཀཱརོ. ཨཱཧརཱིཡཏཱིཏི ཨཱཧཱརོ, ཀབལ༹ཾ ཀཏྭཱ ཨཛ྄ཛྷོཧརཱིཡཏཱིཏི ཨཏྠོ. ཨིདཾ པན སཝཏྠུཀཾ ཨོཛཾ དསྶེཏུཾ ཝུཏྟཾ. བཱཧིརཾ ཨཱཧཱརཾ པཙྩཡཾ ལབྷིཏྭཱ ཨེཝ ཨཛ྄ཛྷཏྟིཀཱཧཱརོ རཱུཔཾ ཨུཔྤཱདེཏི, སོ པན རཱུཔཾ ཨཱཧརཏཱིཏི ཨཱཧཱརོ. ཏེནཱཧ ‘‘རཱུཔཱཧརཎརསོ’’ཏི. ཏཏོ ཨེཝ ཨོཛཊྛམཀརཱུཔུཔྤཱདནེན ཨིམསྶ ཀཱཡསྶ ཨུཔཐམྦྷནཔཙྩུཔཊྛཱནོ. ཨོཛཱཡ རཱུཔཱཧརཎཀིཙྩཾ བཱཧིརཱདྷཱིནནྟི ཨཱཧ ‘‘ཨཱཧརིཏབྦཝཏྠུཔདཊྛཱནོ’’ཏི.

༤༤༦. བལརཱུཔནྟིཨཱདཱིསུ ཨིམསྨིཾ ཀཱཡེ བལཾ ནཱམ ཨཏྠི, སམྦྷཝོ ནཱམ ཨཏྠི, རོགོ ནཱམ ཨཏྠི, ‘‘ཛཱཏི སཉྫཱཏཱི’’ཏི (ཝིབྷ. ༡༩༡) ཝཙནཏོ ཛཱཏི ནཱམ ཨཏྠི, ཏེཧིཔི ཙཏཱུཧི མཧཱབྷཱུཏེཧི ཝིནཱ ཨབྷཱཝཏོ ཨུཔཱདཱཡརཱུཔེཧི བྷཝིཏབྦནྟི ཨདྷིཔྤཱཡོ. ཨེཀཙྩཱནནྟི ཨབྷཡགིརིཝཱསཱིནཾ. པཊིཀྑིཏྟནྟི ཨེཏྠ ཨེཝཾ པཊིཀྑེཔོ ཝེདིཏབྦོ – མིདྡྷཾ རཱུཔམེཝ ན ཧོཏི ནཱིཝརཎེསུ དེསིཏཏྟཱ. ཡསྶ ཧི ནཱིཝརཎེསུ དེསནཱ, ཏཾ ན རཱུཔཾ ཡཐཱ ཀཱམཙྪནྡོ. སིཡཱ པནེཏཾ དུཝིདྷཾ མིདྡྷཾ རཱུཔཾ, ཨརཱུཔཉྩཱཏི. ཏཏྠ ཡཾ ཨརཱུཔཾ, ཏཾ ནཱིཝརཎེསུ དེསིཏཾ ‘‘ན རཱུཔ’’ནྟི? ཏཾ ན, ཝིསེསཝཙནཱབྷཱཝཏོ. ན ཧི ཝིསེསེཏྭཱ མིདྡྷཾ ནཱིཝརཎེསུ དེསིཏཾ, ཏསྨཱ མིདྡྷསྶ དུཝིདྷཏཾ པརིཀཔྤེཏྭཱཔི ན སཀྐཱ ནཱིཝརཎབྷཱཝཾ ནིཝཏྟེཏུཾ. སཀྐཱ ཧི ཝཏྟུཾ ‘‘ཡཾ ཏཾ ཨརཱུཔཏོ ཨཉྙཾ མིདྡྷཾ པརིཀཔྤིཏཾ, ཏམྤི ནཱིཝརཎཾ མིདྡྷསབྷཱཝཏྟཱ ཨིཏརཾ མིདྡྷཾ ཝིཡཱ’’ཏི.

བྷཝཏུ ¶ ནཱིཝརཎཾ, ཀོ ཝིརོདྷོཏི ཙེ? ནཱིཝརཎཉྩ པཧཱཏབྦཾ. པཉྩ ནཱིཝརཎེ པཧཱཡ ‘‘ཨདྡྷཱ མུནཱིསི སམྦུདྡྷོ, ནཏྠི ནཱིཝརཎཱ ཏཝཱ’’ཏི (སུ. ནི. ༥༤༦) ཝཙནཏོ. ཨཔྤཧཱཏབྦཉྩ རཱུཔཾ ‘‘ཀཏམེ དྷམྨཱ ནེཝ དསྶནེན ན བྷཱཝནཱཡ པཧཱཏབྦཱ? ཙཏཱུསུ བྷཱུམཱིསུ ཀུསལཾ, ཙཏཱུསུ བྷཱུམཱིསུ ཝིཔཱཀོ, ཏཱིསུ བྷཱུམཱིསུ ཀིརིཡཱབྱཱཀཏཾ, རཱུཔཉྩ ནིབྦཱནཉྩ. ཨིམེ དྷམྨཱ ནེཝ དསྶནེན ན བྷཱཝནཱཡ པཧཱཏབྦཱ’’ཏི ¶ (དྷ. ས. ༡༤༠༧) ཝཙནཏོ. ན ཙེཏྠ ཏདཱརམྨཎཀིལེསཔྤཧཱནཾ ཨདྷིཔྤེཏཾ ‘‘རཱུཔཾ, བྷིཀྑཝེ, ན ཏུམྷཱཀཾ, ཏཾ པཛཧཐཱ’’ཏིཨཱདཱིསུ (སཾ. ནི. ༣.༣༤) ཝིཡ ཀཱམཙྪནྡཱདཱིནཾ ཏཐཱ པཧཱནསྶ ཨནདྷིཔྤེཏཏྟཱ. ཏསྨཱ ན མིདྡྷཾ རཱུཔཾ. ཡདི མིདྡྷསྶ རཱུཔབྷཱཝཾ ན སམྤཊིཙྪཐ, ཀཐཾ བྷགཝཏོ ནིདྡཱ. མིདྡྷཉྷི ‘‘ནིདྡཱཔཙལཱཡིཀཱ’’ཏིཨཱདིནཱ ཝིབྷངྒེ ཝིབྷཏྟཏྟཱ ནིདྡཱཏི? ན མིདྡྷཾ ནིདྡཱ, ནིདྡཱཧེཏུབྷཱཝཏོ པན ཏཾ ‘‘ནིདྡཱ’’ཏི ཝིབྷཏྟཾ ཡཐཱ ཨིཏྠིལིངྒཱདི. ཨེཝམྤི ནིདྡཱཧེཏུནོ མིདྡྷསྶ ཨབྷཱཝཏོ ཀཐཾ བྷགཝཏོ ནིདྡཱཏི? ནིདྡཱ བྷགཝཏོ སརཱིརགིལཱནིཡཱ, ན མིདྡྷེན. སཱ ཙ ནཏྠཱིཏི ན སཀྐཱ ཝཏྟུཾ ‘‘པིཊྛི མེ ཨཱགིལཱཡཏི, ཏམཧཾ ཨཱཡམིསྶཱམཱི’’ཏི (མ. ནི. ༢.༢༢) ཝཙནཏོ. ན ཙེཏྠ ཨེཝམཝདྷཱརཎཾ མིདྡྷམེཝ ནིདྡཱཧེཏཱུཏི, ནིདྡཱཧེཏུ ཨེཝ མིདྡྷནྟི ཨེཝམཝདྷཱརཎཱ. ཏསྨཱ ཨཉྙོཔི ཨཏྠི ནིདྡཱཧེཏུ, ཀོ པན སོཏི? སརཱིརགིལཱནིཡཱ. ཏེན ཝུཏྟཾ ‘‘ནིདྡཱ བྷགཝཏོ སརཱིརགིལཱནིཡཱ, ན མིདྡྷེནཱ’’ཏི.

ནིདྡཱ ཙ བྷགཝཏོ ནཏྠཱིཏི ན སཀྐཱ ཝཏྟུཾ ‘‘ཨབྷིཛཱནཱམི ཁོ པནཱཧཾ ཨགྒིཝེསྶན…པེ… དིཝཱ སུཔིཏཱ’’ཏི (མ. ནི. ༡.༣༨༧) ཝཙནཏོ. ཨིཏོཔི ན མིདྡྷཾ རཱུཔཾ སམྤཡོགཝཙནཏོ. ཝུཏྟཉྷི ‘‘ཐིནམིདྡྷནཱིཝརཎཾ ཨཝིཛྫཱནཱིཝརཎེན ནཱིཝརཎཉྩེཝ ནཱིཝརཎསམྤཡུཏྟཉྩཱ’’ཏིཨཱདི (དྷ. ས. ༡༡༧༦). ན ཙེཏྠ ཡཐཱལཱབྷབྷཝནཾ? སཀྐཱ པཙྩེཏུཾ ‘‘སཀྑརཀཐལིཀམྤི མཙྪགུམྦམྤི ཙརནྟམྤི ཏིཊྛནྟམྤཱི’’ཏིཨཱདི (དཱི. ནི. ༡.༢༤༩) ཝིཡ ཨཔྤསིདྡྷཏཱཡ རཱུཔབྷཱཝསྶ. སིདྡྷེ ཧི ཏསྶ རཱུཔབྷཱཝེ སམྦྷཝཏོ ཡཐཱལཱབྷཔཙྩཡོ ཡུཛྫེཡྻཱཏི. ཨིཏོཔི ན རཱུཔཾ མིདྡྷཾ ཨཱརུཔྤེསུ ཨུཔྤཛྫནཏོ. ཝུཏྟམྤི ཙེཏཾ ‘‘ནཱིཝརཎཾ དྷམྨཾ པཊིཙྩ ནཱིཝརཎོ དྷམྨོ ཨུཔྤཛྫཏི ནཔུརེཛཱཏཔཙྩཡཱ’’ཏི (པཊྛཱ. ༣.༨.༨) ཨིམསྶ ཝིབྷངྒེ ‘‘ཨཱརུཔྤེ ཀཱམཙྪནྡནཱིཝརཎཾ པཊིཙྩ ཐིནམིདྡྷནཱིཝརཎཾ ཨུདྡྷཙྩནཱིཝརཎཾ ཨཝིཛྫཱནཱིཝརཎཾ ཨུཔྤཛྫཏཱི’’ཏི ཝིཏྠཱརོ. ཏསྨཱ ‘‘ན མིདྡྷཾ རཱུཔ’’ནྟི ཡཾ ཨཊྛཀཐཱསུ པཊིཀྑིཏྟཾ, ཏཾ སུཔཊིཀྑིཏྟམེཝ.

ཨིཏརེསཱུཏི ¶ བལརཱུཔཱདཱིསུ. ཀམྨསམུཊྛཱནསྶཱཔི རོགསྶ ཝིསབྷཱགཔཙྩཡསམུཔྤནྣོ དྷཱཏུཀྑོབྷོ ཨཱསནྣཀཱརཎཾ, པགེཝ ཨིཏརསྶ. སོ ཙ ཨཏྠཏོ རཱུཔདྷམྨཱནཾ ཝིཀཱརཱཝཏྠཱཋིཏིབྷངྒཀྑཎེསུ ཨེཝ སིཡཱཏི ཝུཏྟཾ ‘‘རོགརཱུཔཾ ཛརཏཱཨནིཙྩཏཱགཧཎེན གཧིཏམེཝཱ’’ཏི. ཨུཔཙཡསནྟཏིགཧཎེན གཧིཏམེཝཱཏི ཏབྦིནིམུཏྟསྶ རཱུཔུཔྤཱདསྶ ཨབྷཱཝཏོ. ཨུཔཱདཱཝཏྠཱཡ ¶ ཙ ཨཉྙཱ ཛཱཏི ནཱམ ནཏྠེཝ. སམྦྷཝོ ཀཱམདྷཱཏུཡཾ ཨེཀཙྩིཡསཏྟཱནཾ ཨིནྡྲིཡཔརིཔཱཀཔཙྩཡོ ཨཱཔོདྷཱཏུཡཱ པཝཏྟིཨཱཀཱརཝིསེསོཏི ཨཱཧ ‘‘སམྦྷཝརཱུཔཾ ཨཱཔོདྷཱཏུགྒཧཎེན གཧིཏམེཝཱ’’ཏི. ཀཱཡབལཾ ནཱམ ཨཏྠཏོ ཝཱཡོདྷཱཏུཡཱ པཝཏྟིཨཱཀཱརཝིསེསོ ཏསྶཱ ཝིཔྥཱརབྷཱཝཏོ. ཡཏོ ནཾ ‘‘པཱཎབལ’’ནྟི ཝདནྟི, ཏེནཱཧ ‘‘བལརཱུཔཾ ཝཱཡོདྷཱཏུགྒཧཎེན གཧིཏམེཝཱ’’ཏི. ཀསྨཱ པན ནེསཾ ཨཡཐཱཀྐམཏོ པཊིཀྑེཔོ ཀཏོཏི? ཝིསུཾ ནཏྠཱིཏི ཀཏྭཱ ཨནུཔལབྦྷམཱནཏྟཱ ཨནཱདརདསྶནཏྠཾ, མིདྡྷཔཊིཀྑེཔོ ཝཱ མཧཱཔཉྷོཏི པཋམཾ ཀཏོ. ཏདནུསཱརེན པཊིལོམནཡེན ཨིཏརེསམྤི ཨབྷཱཝོ ཝུཏྟོཏི ཝེདིཏབྦཾ.

‘‘ཨིཏཱི’’ཏི ཨིདཾ ‘‘ཨཊྛཝཱིསཏིཝིདྷ’’ནྟི ཨིམིནཱ སམྦནྡྷིཏབྦཾ, ཨིམིནཱ ཝུཏྟཀྐམེན ཨཊྛཝཱིསཏིཝིདྷཾ ཧོཏཱིཏི. སོ ཙ ཁོ པཱལི༹ཡཾ ཨཱགཏནཡེནེཝཱཏི ཨནཱུནཏཱ ཝེདིཏབྦཱ. ཨནདྷིཀབྷཱཝོ པན དསྶིཏོ ཨེཝ.

༤༤༧. སམྤཡུཏྟདྷམྨརཱསི ཧིནོཏི ཨེཏེན པཏིཊྛཧཏཱིཧི ཧེཏུ, མཱུལཊྛེན ལོབྷཱདིཀོ, ཨལོབྷཱདིཀོ ཙ, ཏཱདིསོ ཧེཏུ ན ཧོཏཱིཏི ནཧེཏུ. ནཱསྶ ཧེཏུ ཨཏྠཱིཏི ཨཧེཏུཀཾ, སཧེཏུཀཔཊིཡོགིབྷཱཝཏོ ཧེཏུནཱ སཧ ན ཨུཔྤཛྫཏཱིཏི ཨཏྠོ. ཨཧེཏུཀམེཝ ཧེཏུནཱ ཝིཔྤཡུཏྟཏཱཡ ཧེཏུཝིཔྤཡུཏྟཾ. དྷམྨནཱནཏྟཱབྷཱཝེཔི ཧི སདྡཏྠནཱནཏྟེན ཝེནེཡྻཝསེན དུཀནྟརདེསནཱ ཧོཏཱིཏི དུཀཔདཝསེན ཙེཏཾ ཝུཏྟཾ. པཙྩཡཱདྷཱིནཝུཏྟིཏཱཡ སཧ པཙྩཡེནཱཏི སཔྤཙྩཡཾ. ཨཏྟནོ པཙྩཡེཧི ལོཀེ ནིཡུཏྟཾ, ཝིདིཏནྟི ཝཱ ལོཀིཡཾ. ཨཱ བྷཝགྒཾ, ཨཱ གོཏྲབྷུཾ ཝཱ སཝནྟཱིཏི ཨཱསཝཱ, སཧ ཨཱསཝེཧཱིཏི སཱསཝཾ, ཨཱསཝེཧི ཨཱལམྦིཏབྦནྟི ཨཏྠོ. ཨཱདིསདྡེན སཾཡོཛནཱིཡཾ ཨོགྷནཱིཡཾ ཡོགནཱིཡཾ ནཱིཝརཎཱིཡཾ སཾཀིལེསིཀཾ པརཱམཊྛཾ ཨཙེཏསིཀཾ ཙིཏྟཝིཔྤཡུཏྟཾ ནརཱུཔཱཝཙརཾ ནཨརཱུཔཱཝཙརཾ ནཨཔརིཡཱཔནྣཾ ཨནིཡཏཾ ཨནིཡྻཱནིཀཾ ཨནིཙྩནྟི ཨེཝམཱདཱིནཾ སངྒཧོ དཊྛབྦོ.

ཨཱཧིཏོ ཨཧཾ མཱནོ ཨེཏྠཱཏི ཨཏྟཱ, ཨཏྟབྷཱཝོ. ཏཾ ཨཏྟཱནཾ ཨདྷིཀིཙྩ ཨུདྡིསྶ པཝཏྟཱ ཨཛ྄ཛྷཏྟཱ ¶ , ཨིནྡྲིཡབདྡྷདྷམྨཱ, ཏེསུ བྷཝཾ ཨཛ྄ཛྷཏྟིཀཾ, ཙཀྑཱདི. ཨཊྛཀཐཱཡཾ པན ཝུཏྟནཡེན ཨཛ྄ཛྷཏྟམེཝ ཨཛ྄ཛྷཏྟིཀཾ ཡཐཱ ཝེནཡིཀོཏི ¶ (ཨ. ནི. ༨.༡༡; པཱརཱ. ༨) ཨིམམཏྠཾ སནྡྷཱཡ ཝུཏྟཾ ‘‘ཨཏྟབྷཱཝཾ ཨདྷིཀིཙྩ པཝཏྟཏྟཱ ཨཛ྄ཛྷཏྟིཀ’’ནྟི. སེསཾ ཏེཝཱིསཏིཝིདྷཾ. ‘‘ཏཏོ བཱཧིརཏྟཱ’’ཏི ཨིདཾ ཨཛ྄ཛྷཏྟིཀལཀྑཎཱབྷཱཝཏོ ཝུཏྟཾ. གྷཊྚནཝསེནཱཏི ཝིསཡཱི, ཝིསཡོ ཙ ཧུཏྭཱ སངྒྷཊྚནཝསེན. སེསཾ སོལ༹སཝིདྷཾ. ཝིཔརཱིཏཏྟཱཏི གྷཊྚནཝསེན ཨགཧེཏབྦཏོ. དུཔྤཊིཝིཛ྄ཛྷསབྷཱཝཏྟཱཏི སུཁུམབྷཱཝེན དུཝིཉྙེཡྻསབྷཱཝཏྟཱ. ཉཱཎསྶ ཨཱསནྣེ ན ཧོཏཱིཏི དཱུརེ. ཏེརས ཧདཡཝཏྠུཔརིཡོསཱནཱནི. སབྷཱཝེནེཝཱཏི ‘‘རཱུཔསྶ པརིཙྪེདོ, རཱུཔསྶ ཝིཀཱརོ, རཱུཔསྶ ཨུཔཙཡོ’’ཏིཨཱདིནཱ ཨགྒཧེཏྭཱ ཨཏྟནོ སབྷཱཝེནེཝ ཀཀྑལ༹ཏྟཱདིནཱ ཉཱཎེན པརིཙྪིཛྫ གཧེཏབྦཏོ. སེསཾ དསཝིདྷཾ. ཏབྦིཔརཱིཏཏཱཡཱཏི སབྷཱཝེན ཨཔརིགྒཧིཏབྦཏོ. སོཏཱདཱིནམྤི ཙཀྑུནོ ཝིཡ པསནྣསབྷཱཝཏྟཱ ཨེཝ ཡཐཱསཀཾ ཝིསཡགྒཧཎཔཙྩཡཏཱཏི དསྶེནྟོ ཨཱཧ ‘‘ཙཀྑཱདི…པེ… པསཱདརཱུཔ’’ནྟི. ཝིཔརཱིཏཏྟཱཏི ཏབྦིདྷུརསབྷཱཝཏྟཱ. ཨདྷིཔཏིཡཊྛེནཱཏི ཨེཏྠ ཙཀྑཱདཱིནཾ ཏཱཝ པཉྩནྣཾ ཙཀྑུཝིཉྙཱཎཱདཱིསུ ཨཱདྷིཔཏེཡྻཾ ཏེསཾ པཊུམནྡབྷཱཝཱནུཝཏྟནཏོ, ཨིཏྠིཔུརིསིནྡྲིཡདྭཡསྶ སཀིཙྩེ ཛཱིཝིཏིནྡྲིཡསྶ སཧཛརཱུཔཱནུཔཱལནེ. ཏདུབྷཡཾ ཧེཊྛཱ ཝུཏྟམེཝ. ཨུཔཱདིནྣཏྟཱཏི གཧིཏཏྟཱ. ཀམྨནིབྦཏྟཉྷི ‘‘མམེཏཾ ཕལཾ’’ནྟི ཀམྨུནཱ གཧིཏཾ ཝིཡ ཧོཏི ཨཔཊིཀྑེཔཏོ.

༤༤༨. སནིདསྶནཀམྨཛཱདཱིནཾ ཏིཀཱནནྟི སནིདསྶནཏྟིཀསྶ, ཀམྨཛཱདིཏྟིཀཱནཉྩ. ཨོལཱ༹རིཀེཏི དྭཱདསཝིདྷེ ཨོལཱ༹རིཀརཱུཔེ. རཱུཔནྟི རཱུཔཱཡཏནཾ. དཊྛབྦབྷཱཝསངྑཱཏེན སཧ ནིདསྶནེནཱཏི སནིདསྶནཾ, པཊིཧནནབྷཱཝསངྑཱཏེན སཧ པཊིགྷེནཱཏི སཔྤཊིགྷཾ, སནིདསྶནཉྩ ཏཾ སཔྤཊིགྷཉྩཱཏི སནིདསྶནསཔྤཊིགྷཾ. ཏཏྠ ཡསྶ དཊྛབྦབྷཱཝོ ཨཏྠི, ཏཾ སནིདསྶནཾ. ཙཀྑུཝིཉྙཱཎགོཙརབྷཱཝོཝ དཊྛབྦབྷཱཝོ. ཏསྶ རཱུཔཱཡཏནཏོ ཨནཉྙཏྟེཔི ཨཉྙེཧི དྷམྨེཧི རཱུཔཱཡཏནཾ ཝིསེསེཏུཾ ཨཉྙཾ ཝིཡ ཀཏྭཱ ཝུཏྟཾ ‘‘སཧ ནིདསྶནེན སནིདསྶན’’ནྟི. དྷམྨབྷཱཝསཱམཉྙེན ཧི ཨེཀཱིབྷཱུཏེསུ དྷམྨེསུ ཡོ ནཱནཏྟཀརོ ཝིསེསོ, སོ ཨཉྙོ ཝིཡ ཀཏྭཱ ཨུཔཙརིཏུཾ ཡུཏྟོ. ཨེཝཾ ཧི ཨཏྠཝིསེསཱཝབོདྷོ ཧོཏཱིཏི. ཡོ སཡཾ, ནིསྶཡཝསེན ཙ སམྤཏྟཱནཾ, ཨསམྤཏྟཱནཉྩ པཊིམུཁབྷཱཝོ ཨཉྙམཉྙཾ པཏནཾ, སོ པཊིཧནནབྷཱཝོ, ཡེན བྱཱཔཱརཱདིཝིཀཱརཔཙྩཡནྟརསཧིཏེསུ ཙཀྑཱདཱིནཾ ¶ ཝིསཡེསུ ཝིཀཱརུཔྤཏྟི. སེསཾ ཨེཀཱདསཝིདྷཾ ཨོལཱ༹རིཀརཱུཔཾ. ཏཉྷི སནིདསྶནཏྟཱབྷཱཝཏོ ཨནིདསྶནཾ, ཝུཏྟནཡེནེཝ སཔྤཊིགྷཾ. ཨུབྷཡཔཊིཀྑེཔེན ཨནིདསྶནཨཔྤཊིགྷཾ. ཀམྨཏོ ཛཱཏནྟི ཨེཏྠ ཡཾ ཨེཀནྟཀམྨསམུཊྛཱནཾ ཨཊྛིནྡྲིཡཱནི, ཧདཡཉྩཱཏི ནཝཝིདྷཾ རཱུཔཾ, ཡཉྩ ནཝཝིདྷེ ཙཏུསམུཊྛཱནེ ཀམྨསམུཊྛཱནཾ ནཝཝིདྷམེཝ རཱུཔནྟི ¶ ཨེཝཾ ཨཊྛཱརསཝིདྷམྤི ཀམྨཏོ ཨུཔྤཛྫནཏོ ཀམྨཛཾ. ཡཉྷི ཛཱཏཉྩ ཡཉྩ ཛཱཡཏི ཡཉྩ ཛཱཡིསྶཏི, ཏཾ སབྦམྤི ‘‘ཀམྨཛ’’ནྟི ཝུཙྩཏི ཡཐཱ དུདྡྷནྟི. ཏདཉྙཔཙྩཡཛཱཏནྟི ཀམྨཏོ ཨཉྙཔཙྩཡཏོ ཛཱཏཾ ཨུཏུཙིཏྟཱཧཱརཛཾ. ནཀུཏོཙིཛཱཏནྟི ལཀྑཎརཱུཔམཱཧ. ཝིཉྙཏྟིདྭཡཾ, སདྡོ, ཨཱཀཱསདྷཱཏུ, ལཧུཏཱདིཏྟཡཾ ཙིཏྟསམུཊྛཱནཱནི ཨཝིནིབྦྷོགརཱུཔཱནཱིཏི ཨེཏཾ པཉྩདསཝིདྷཾ རཱུཔཾ ཙིཏྟཛཾ. ཨཱཀཱསདྷཱཏུ, ལཧུཏཱདིཏྟཡཾ, ཨཱཧཱརསམུཊྛཱནཱནི ཨཝིནིབྦྷོགརཱུཔཱནཱིཏི ཨེཏཾ དྭཱདསཝིདྷཾ རཱུཔཾ ཨཱཧཱརཛཾ. ཨེཏྠ སདྡཾ པཀྑིཔིཏྭཱ ཏེརསཝིདྷཾ རཱུཔཾ ཨུཏུཏོ སམུཊྛིཏཾ ཨུཏུཛཾ. སེསཾ ཀམྨཛཏིཀེ ཝུཏྟནཡཱནུསཱརེནེཝ ཝེདིཏབྦཾ.

༤༤༩. དིཊྛཱདིཙཏུཀྐཝསེན, རཱུཔརཱུཔཱདིཙཏུཀྐཝསེན, ཝཏྠཱདིཙཏུཀྐཝསེནཱཏི པཱཊེཀྐཾ ཙཏུཀྐསདྡོ ཡོཛེཏབྦོ. ཡཾ རཱུཔཱཡཏནཾ ཨདཀྑི ཡཾ པསྶཏི ཡཾ དཀྑིསྶཏི ཡཾ པསྶེཡྻ, ཏཾ སབྦཾ དིཊྛཾ ནཱམ དིཊྛསབྷཱཝཱནཱཏིཝཏྟནཏོ ཡཐཱ དུདྡྷནྟི. ཨེས ནཡོ སེསེསུཔི. དསྶནཝིསཡཏྟཱཏི ཙཀྑུཝིཉྙཱཎཝིཉྙེཡྻཏྟཱ. སཝནཝིསཡཏྟཱཏི སོཏཝིཉྙཱཎཝིཉྙེཡྻཏྟཱ. གནྡྷརསཕོཊྛབྦཏྟཡནྟི གནྡྷོ རསོ ཕོཊྛབྦནྟི ཨེཏཾ ཏཡཾ. མུཏཾ ནཱམ མུཏྭཱ པཏྭཱ གཧེཏབྦཏོ. ཏེནཱཧ ‘‘སམྤཏྟགྒཱཧཀཨིནྡྲིཡཝིསཡཏྟཱ’’ཏི.

ཀིམིདཾ ཕོཊྛབྦཾ ནཱམཱཏི? པཐཝཱིཏེཛོཝཱཡོདྷཱཏུཏྟཡཾ. ཀསྨཱ པནེཏྠ ཨཱཔོདྷཱཏུ ཨགྒཧིཏཱ, ནནུ སཱིཏཏཱ ཕུསིཏྭཱ གཡ྄ཧཏི, སཱ ཙ ཨཱཔོདྷཱཏཱུཏི? སཙྩཾ གཡ྄ཧཏི, ན པན སཱ ཨཱཔོདྷཱཏུ. ཀིཉྩརཧཱིཏི? ཏེཛོདྷཱཏུ ཨེཝ. མནྡེ ཧི ཨུཎྷབྷཱཝེ སཱིཏབུདྡྷི. ན ཧི སཱིཏཾ ནཱམ ཀོཙི གུཎོ ཨཏྠི, ཀེཝལཾ པན ཨུཎྷབྷཱཝསྶ མནྡཏཱཡ སཱིཏཏཱབྷིམཱནོ. ཀཐམེཏཾ ཝིཉྙཱཏབྦནྟི ཙེ? ཨནཝཊྛིཏཏྟཱ སཱིཏབུདྡྷིཡཱ ཡཐཱ པཱརཱཔཱརེ. ཏཐཱ ཧི གྷམྨཀཱལེ ཨཱཏཔེ ཋིཏཱནཾ ཚཱཡཾ པཝིཊྛཱནཾ སཱིཏབུདྡྷི ཧོཏི, ཏཏྠེཝ པན པཐཝཱིགབྦྷཏོ ཨུཊྛིཏཱནཾ ཨུཎྷབུདྡྷི. ཡདི ཧི སཱིཏཏཱ ཨཱཔོདྷཱཏུ སིཡཱ, ཨེཀསྨིཾ ཀལཱཔེ ཨུཎྷབྷཱཝེན སདྡྷིཾ ཨུཔལབྦྷེཡྻ, ན ཙ ཨུཔལབྦྷཏི. ཏསྨཱ ཝིཉྙཱཡཏི ན ཨཱཔོདྷཱཏུ སཱིཏཏཱཏི ¶ . ཨིདཉྩ བྷཱུཏཱནཾ ཨཝིནིབྦྷོགཝུཏྟིཏཾ ཨིཙྪནྟཱནཾ ཨུཏྟརཾ, ཨནིཙྪནྟཱནམྤི པན ཙཏུནྣཾ བྷཱུཏཱནཾ ཨེཀསྨིཾ ཀལཱཔེ ཀིཙྩདསྶནེན སབྷཱགཝུཏྟིཏཱཡ སཱདྷིཏཱཡ ཨུཏྟརམེཝ. ཡེ པན ‘‘ཝཱཡོདྷཱཏུཡཱ ལཀྑཎཾ སཱིཏཏཱ’’ཏི ཝདནྟི, ཏེསམྤི ཨིདམེཝ ཨུཏྟརཾ. ཡདི ཧི ཝཱཡོདྷཱཏུ སཱིཏཏཱ སིཡཱ, ཨེཀསྨིཾ ཀལཱཔེ ཨུཎྷབྷཱཝེན སདྡྷིཾ སཱིཏཏཱ ཨུཔལབྦྷེཡྻ, ན ཙ ཨུཔལབྦྷཏི. ཏསྨཱ ཝིཉྙཱཡཏི ན ཝཱཡོདྷཱཏུ སཱིཏཏཱཏི. ཡེསཾ པན དྲཝཏཱ ཨཱཔོདྷཱཏུ, སཱ ཙ ཕུསིཏྭཱ ¶ གཡ྄ཧཏཱིཏི དསྶནཾ. ཏེ ཝཏྟབྦཱ ‘‘དྲཝབྷཱཝོཔི ཕུསཱིཡཏཱིཏི ཨཱཡསྨནྟཱནཾ ཨདྷིམཱནམཏྟཾ སཎྛཱནཾ ཝིཡཱ’’ཏི. ཝུཏྟཉྷེཏཾ པུརཱཏནེཧི –

‘‘དྲཝཏཱ སཧཝུཏྟཱིནི, ཏཱིཎི བྷཱུཏཱནི སམྥུསཾ;

‘དྲཝཏཾ སམྥུསཱམཱི’ཏི, ལོཀོཡམབྷིམཉྙཏི.

‘‘ཕུསཾ བྷཱུཏཱནི སཎྛཱནཾ, མནསཱ གཎྷཏེ ཡཐཱ;

‘པཙྩཀྑཏོ ཕུསཱམཱི’ཏི, ཉཱཏབྦཱ དྲཝཏཱ ཏཐཱ’’ཏི.

སེསནྟི ཡཐཱཝུཏྟཾ རཱུཔཱདིསཏྟཝིདྷཾ རཱུཔཾ ཋཔེཏྭཱ ཨཝསིཊྛཾ ཨེཀཝཱིསཏིཝིདྷཾ རཱུཔཾ. ཝིཉྙཱཎསྶེཝཱཏི མནོཝིཉྙཱཎསྶེཝ. ཨཝདྷཱརཎེན རཱུཔཱཡཏནཱདཱིནམྤི མནོཝིཉྙཱཎཝིཉྙེཡྻཏྟེ ནིཡམཱབྷཱཝཏོ ན ཝིཉྙཱཏརཱུཔཏཱཏི སངྐརཱབྷཱཝཾ དསྶེཏི.

ནིཔྥནྣརཱུཔཾ པནེཏྠ རཱུཔརཱུཔཾ ནཱམཱཏི ཡདེཏྠ ཨཊྛཝཱིསཏིཝིདྷེ རཱུཔེ ‘‘ནིཔྥནྣ’’ནྟི ཝུཏྟཾ རཱུཔཾ, ཏདེཝ རཱུཔལཀྑཎཡོགཏོ རཱུཔཾ. རུཔྤནཾ རཱུཔཾ, ཏཾ ཨེཏསྶ ཨཏྠཱིཏི ཡཐཱ ཨརིསསོཏི, རཱུཔགུཎཡོགཏོ ཝཱ ཡཐཱ ནཱིལགུཎཡོགཏོ ནཱིལཾ ཝཏྠནྟི. སྭཱཡཾ རཱུཔསདྡོ རུལ༹ྷིཡཱ ཨཏཾསབྷཱཝེཔི པཝཏྟཏཱིཏི ཨཔརེན རཱུཔསདྡེན ཝིསེསེཏྭཱ ཝུཏྟཾ ‘‘རཱུཔརཱུཔ’’ནྟི ཡཐཱ ཏིལཏེལཾ, དུཀྑདུཀྑནྟི (ཝིསུདྡྷི. ༢.༥༣༩) ཙ, རུཔྤནསབྷཱཝཾ རཱུཔནྟི ཨཏྠོ. ཡདི ཨེཝཾ, ཨཱཀཱསདྷཱཏུཨཱདཱིནཾ ཀཐཾ རཱུཔབྷཱཝོཏི? ནིཔྥནྣརཱུཔསྶ པརིཙྪེདཝིཀཱརལཀྑཎབྷཱཝཏོ ཏགྒཏིཀམེཝཱཏི ‘‘རཱུཔ’’ནྟྭེཝ ཝུཙྩཏི.

ཝསནྟི ཨེཏྠ ཙིཏྟཙེཏསིཀཱ པཝཏྟནྟཱིཏི ཝཏྠུ, ཙིཏྟཏཾསམྤཡུཏྟཱནཾ ཨཱདྷཱརབྷཱུཏཾ རཱུཔཾ. ཏཾ པན ཚབྦིདྷཾ. ཏཏྠ ཧདཡརཱུཔཾ ཝཏྠུ ཨེཝ མནོདྷཱཏུམནོཝིཉྙཱཎདྷཱཏཱུནཾ ནིསྶཡབྷཱཝཏོ. ན དྭཱརཾ ཨཉྙནིསྶཡཱནཾ ཙཀྑཱདི ཝིཡ. ཡཐཱ ཧི ཙཀྑཱདཱིནི སམྤཊིཙྪནཱདཱིནཾ པཝཏྟིཡཱ དྭཱརཾ ཧོནྟི, ན ¶ ཨེཝཾ ཧདཡཝཏྠུ. ཏེན ཝུཏྟཾ ‘‘ཡཾ པནེཏྠ ཧདཡརཱུཔཾ ནཱམ, ཏཾ ཝཏྠུ, ན དྭཱར’’ནྟི. ཝིཉྙཏྟིདྭཡཾ དྭཱརཾ ཀམྨདྭཱརབྷཱཝཏོ. ཏནྣིསྶིཏསྶ ཙིཏྟུཔྤཱདསྶ ཨབྷཱཝཏོ ན ཝཏྠུ. པསཱདརཱུཔཾ ཝཏྠུ ཙེཝ ཨཏྟསནྣིསྶིཏསྶ ཙཀྑུཝིཉྙཱཎཱདིཀསྶ, དྭཱརཉྩ ཨཉྙནིསྶིཏསྶ སམྤཊིཙྪནཱདིཀསྶ. སེསཾ ཨེཀཝཱིསཏིཝིདྷཾ རཱུཔཾ ཝུཏྟཝིཔརིཡཱཡཏོ ནེཝ ཝཏྠུ ན ཙ དྭཱརཾ.

༤༥༠. ཨེཀཏོ ¶ ཨེཝ ཛཱཏཾ ཨེཀཛཾ. ནནུ ཙ ཨེཀཏོ ཨེཝ པཙྩཡཏོ པཙྩཡུཔྤནྣསྶ ཨུཔྤཏྟི ནཏྠཱིཏི? སཙྩཾ ནཏྠི, རཱུཔཛནཀཔཙྩཡེསུ ཨེཀཏོཏི ཨཡམེཏྠ ཨདྷིཔྤཱཡོ. ན ཧི རཱུཔུཔྤཏྟི རཱུཔཛནཀཏོ ཨཉྙཾ པཙྩཡཾ ཨཔེཀྑཏི. དྭིཛནྟིཨཱདཱིསུཔི ཨེསེཝ ནཡོ. ཨིམེསནྟི ཨིམེསཾ པབྷེདཱནཾ ཝསེན. ཀམྨཛམེཝཱཏི ཀམྨཏོ ཨེཝ ཛཱཏཾ. ཙིཏྟཛམེཝཱཏི ཨེཏྠཱཔི ཨེསེཝ ནཡོ. ཙིཏྟཏོ ཙ ཨུཏུཏོ ཙ ཛཱཏནྟི ཀཱལེན ཙིཏྟཏོ, ཀཱལེན ཨུཏུཏོཏི ཨེཝཾ ཙིཏྟཏོ ཙ ཨུཏུཏོ ཙ ཛཱཏཾ དཊྛབྦཾ. ཏཾ དྭིཛཾ དྭཱིཧི ཛཱཏནྟི. པརཏོ དྭཱིསུཔི ཨེསེཝ ནཡོ. སདྡཱཡཏནམེཝཱཏི ཨེཏྠ ཡཾ ཙིཏྟཛཾ སདྡཱཡཏནཾ, ཏཾ སཝིཉྙཏྟིཀམེཝཱཏི ཨེཀེ. ཨཝིཉྙཏྟིཀོཔི ཨཏྠི ཝིཏཀྐཝིཔྥཱརསདྡོཏི པོརཱཎཱ.

ཝིཏཀྐཝིཔྥཱརསདྡོ ན སོཏཝིཉྙེཡྻོཏི ཧི ཨེཝཾ པཝཏྟམཧཱཨཊྛཀཐཱཝཱདཾ ནིསྶཱཡ ཙིཏྟསམུཊྛཱནསྶ སདྡསྶ ཝིཉྙཏྟིཡཱ ཝིནཱཔི ཨུཔྤཏྟི ཨིཙྪིཏབྦཱ. ན ཧི ཝིཉྙཏྟི ‘‘ཀཱཡཝཱཙཱཡ ཝིཉྙཏྟཱི’’ཏི ཝཙནཏོ ཨསོཏཝིཉྙེཡྻེན སདྡེན སཧ ཨུཔྤཛྫཏི, ཨེཝཾ སནྟེ ཙིཏྟཛེནཱཔི སདྡནཝཀེན བྷཝིཏབྦཾ. སོ ཙ ཝཱདོ ‘‘སདྡོ ཙ ཧོཏི, ན སོཏཝིཉྙེཡྻོ ཙཱ’’ཏི ཝིརུདྡྷམེཝེཏནྟི མཉྙམཱནེཧི སངྒཧཀཱརེཧི པཊིཀྑིཏྟོ. ཨཔརེ པན མཧཱཨཊྛཀཐཱཝཱདཾ ཨཔྤཊིཀྑིཔིཏྭཱ ཏསྶ ཨདྷིཔྤཱཡཾ ཝཎྞེནྟི. ཀཐཾ? ‘‘ཛིཝ྄ཧཱཏཱལུཙལནཱདིཀཾ ཝིཏཀྐསམུཊྛིཏཾ ཝིཉྙཏྟིསཧཛམེཝ སུཁུམསདྡཾ དིབྦསོཏེན སུཏྭཱ ཨཱདིསཏཱི’’ཏི སུཏྟེ, པཊྛཱནེ ཙ ཨོལཱ༹རིཀཾ སདྡཾ སནྡྷཱཡ སོཏཝིཉྙཱཎསྶ ཨཱརམྨཎཔཙྩཡབྷཱཝོ ཝུཏྟོཏི ཨིམིནཱ ཨདྷིཔྤཱཡེན ཝིཏཀྐཝིཔྥཱརསདྡསྶ ཨསོཏཝིཉྙེཡྻཏཱ ཝུཏྟཱཏི. ཏཾ ཙཏུཛཾ. ཨཝསེསནྟི ཨཝིནིབྦྷོགརཱུཔེན སདྡྷིཾ ཨཱཀཱསདྷཱཏུམཱཧ.

ལཀྑཎརཱུཔཾ ¶ པན ནཀུཏོཙིཛཱཏནྟི ཀུཏོཙིཔི པཙྩཡཏོ ན ཛཱཏཾ, ནཱཔི སཡམེཝ ཛཱཏཾ པཙྩཡེཧི ཝིནཱ སཡམེཝ ཛཱཏསྶ སབྦེན སབྦཾ ཨབྷཱཝཏོ. ཀཐཾ པནེཏཾ ཝིཉྙཱཏབྦཾ ལཀྑཎརཱུཔཾ ན ཛཱཡཏཱིཏི? ལཀྑཎཱབྷཱཝཏོ. ཨུཔྤཏྟིམནྟཱནཾ ཧི རཱུཔཱཡཏནཱདཱིནཾ ཛཱཏིཨཱདཱིནི ལཀྑཎཱནི ཝིཛྫནྟི, ན ཨེཝཾ ཛཱཏིཨཱདཱིནཾ. ཏསྨཱ ཝིཉྙཱཏབྦམེཏཾ ཛཱཏིཨཱདཱིནི ན ཛཱཡནྟཱིཏི. སིཡཱ པནེཏཾ ‘‘ཛཱཏིཨཱདཱིནཾ ཛཱཏིཨཱདཱིནི ལཀྑཎཱནི ཝིཛྫནྟཱི’’ཏི? ཏཾ ན, ཀསྨཱ? ཏཐཱ སཏི ཨནཝཊྛཱནཱཔཏྟིཏོ. ཡདི ཧི ཛཱཏིཨཱདཱིནི ཛཱཏིཨཱདིམནྟཱནི སིཡུཾ, ཏཱནིཔི ཛཱཏིཨཱདིམནྟཱནི, ཏཱནིཔི ཛཱཏིཨཱདིམནྟཱནཱིཏི ཨནཝཊྛཱནམེཝ ཨཱཔཛྫཏི. ཏསྨཱ སུཊྛུ ཝུཏྟཾ ‘‘ཛཱཏིཨཱདཱིནི ¶ ན ཛཱཡནྟཱི’’ཏི. ཏེནཱཧ ‘‘ན ཧི ཨུཔྤཱདསྶ ཨུཔྤཱདོ ཨཏྠི, ཨུཔྤནྣསྶ ཙ པརིཔཱཀབྷེདམཏྟཾ ཨིཏརདྭཡ’’ནྟི, ཛརཱམརཎནྟི ཨཏྠོ.

ཏཏྠ ‘‘ཨུཔྤཱདོ ནཏྠཱི’’ཏི ཨེཏེན ཨུཔྤཱདསྶ ཛརཱམརཎཱབྷཱཝམཱཧ. ཨསཏི ཨུཔྤཱདེ ཀུཏོ ཛརཱམརཎནྟི མཏྟགྒཧཎེན ཛརཱམརཎསྶ ཨུཔྤཱདཱབྷཱཝམྤི. ཡདི ཨེཝཾ ཛཱཏིཡཱ ཀུཏོཙི ཛཱཏཏཱཝཙནཾ ཀཐནྟི ཨཱཧ ‘‘ཡམྤཱི’’ཏིཨཱདི. ཏཏྠ ཀིཙྩཱནུབྷཱཝཀྑཎེ དིཊྛཏྟཱཏི ཡེ ཏེ ཙིཏྟཱདཡོ རཱུཔཱཡཏནཱདཱིནཾ རཱུཔཱནཾ ཛནཀཔཙྩཡཱ, ཏེསཾ ཏདུཔྤཱདནཾ པཏི ཨནུཔརཏབྱཱཔཱརཱནཾ ཡོ སོ པཙྩཡབྷཱཝཱུཔལཀྑཎཱིཡོ ཀིཙྩཱནུབྷཱཝཀྑཎོ, ཏདཱ ཛཱཡམཱནཱནཾ རཱུཔཱཡཏནཱདཱིནཾ དྷམྨཱནཾ ཝིཀཱརབྷཱཝེན ཨུཔལབྦྷམཱནཏཾ སནྡྷཱཡ ཝེནེཡྻཔུགྒལཝསེན ཛཱཏིཡཱ ཀུཏོཙི པཙྩཡཏོ ཛཱཏཏྟཾ པཱལི༹ཡཾ ཨནུཉྙཱཏཾ ཡཐཱ ཏཾ ཙིཏྟསམུཊྛཱནཏཱདི ཝིཉྙཏྟིཨཱདཱིནཾ. ཨཡཉྷེཏྠ སངྑེཔཏྠོ – ཡེཧི པཙྩཡདྷམྨེཧི རཱུཔཱདཡོ ཨུཔྤཛྫེཡྻུཾ, ཏེསཾ པཙྩཡབྷཱཝཱུཔགམནཀྑཎེ ཨུཔལབྦྷམཱནཱ རཱུཔཱདཡོ ཏཏོ པུརེ, པཙྪཱ ཙ ཨནུཔལབྦྷམཱནཱ ཏཏོ ཨུཔྤཛྫནྟཱིཏི ཝིཉྙཱཡནྟི, ཨེཝཾ ཛཱཏིཔི ཝེདིཏབྦཱ. ཡདི ཨེཝཾ ནིཔྤརིཡཱཡཏོ ཛཱཏིཡཱ ཀུཏོཙི ཛཱཏཏཱ སིདྡྷཱ, ཨཐ ཀསྨཱ ཝེནེཡྻཔུགྒལཝསེནཱཏི ཝུཏྟནྟི? ནཡིདམེཝཾ ཛཱཡམཱནདྷམྨཝིཀཱརབྷཱཝེན ཨུཔལབྦྷམཱནཏྟཱ. ཡདི ཧི དྷམྨོ ཝིཡ ཨུཔལབྦྷེཡྻ ཛཱཏི, ནིཔྤརིཡཱཡོཝ ཏསྶཱ ཀུཏོཙི ཛཱཏབྷཱཝོ, ན ཨེཝམུཔལབྦྷཏི, ཨཐ ཁོ ཝིཀཱརབྷཱཝེན. ཏསྨཱ ཝུཏྟཾ ‘‘ཝེནེཡྻཔུགྒལཝསེནཱ’’ཏི.

ཏདཱ ཀིར སོཏཱུནཾ ཨེཝཾ ཙིཏྟཾ ཨུཔྤནྣཾ ‘‘ཨཡཾ ཛཱཏི སབྦེསཾ དྷམྨཱནཾ པབྷཝོ, སཡཉྩ ན ཀུཏོཙི ཛཱཡཏི ཡཐཱ ཏཾ པཀཏིཝཱདཱིནཾ པཀཏཱི’’ཏི, ཏཾ ¶ ནེསཾ མིཙྪཱགཱཧཾ ཝིདྷམེནྟོ སཏྠཱ ‘‘ཨུཔཙཡོ སནྟཏཱི’’ཏི དྭིདྷཱ བྷིནྡིཏྭཱ ཀུཏོཙི པཙྩཡཏོ ཛཱཏཉྩ ཀཏྭཱ དེསེསི, ན པན ཛརཱམརཎཾ པཙྩཡདྷམྨཱནཾ ཀིཙྩཱནུབྷཱཝཀྑཎེ ཨདསྶནཏོ. ཡདི ཨེཝཾ ཀཐཾ ‘‘ཛརཱམརཎཾ པཊིཙྩསམུཔྤནྣ’’ནྟི (སཾ. ནི. ༢.༢༠) ཝུཏྟཾ? ཡསྨཱ པཊིཙྩསམུཔྤནྣཱནཾ དྷམྨཱནཾ པརིཔཱཀབྷངྒཏཱཡ ཏེསུ སནྟེསུ ཧོནྟི, ན ཨསནྟེསུ. ན ཧི ཨཛཱཏཾ པརིཔཙྩཏི, བྷིཛྫཏི ཝཱ, ཏསྨཱ ཏཾ ཛཱཏིཔཙྩཡཏཾ སནྡྷཱཡ ‘‘ཛརཱམརཎཾ པཊིཙྩསམུཔྤནྣ’’ནྟི (སཾ. ནི. ༢.༢༠) པརིཡཱཡེན སུཏྟེསུ ཝུཏྟཾ. ཡོ པནེཏྠ ཀཱམབྷཝཱདཱིསུ ཀམྨཱདིནཱ པཙྩཡེན ཡོནིཝིབྷཱགཏོ པཊིསནྡྷིཡཾ, པཝཏྟིཡཉྩ རཱུཔདྷམྨཱནཾ པཝཏྟིབྷེདོ ཝཏྟབྦོ, སོ པརཏོ པཊིཙྩསམུཔྤཱདཀཐཱཡཾ ཨཱཝི བྷཝིསྶཏཱིཏི ན ཝུཏྟོཏི དཊྛབྦོ.

ཨིཏི རཱུཔཀྑནྡྷེ ཝིཏྠཱརཀཐཱམུཁཝཎྞནཱ.

ཝིཉྙཱཎཀྑནྡྷཀཐཱཝཎྞནཱ

༤༥༡. ཡཾ ¶ ཀིཉྩཱིཏི ཨནཝསེསཔརིཡཱདཱནདཱིཔཀེན པདདྭཡེན ཝེདཡིཏསྶ བཧུབྷེདཏཾ དསྶེནྟོ ཝུཙྩམཱནཾ རཱསཊྛཾ ཨུལླིངྒེཏི. ཝེདཡིཏཾ ཨཱརམྨཎརསཱནུབྷཝནཾ ལཀྑཎཾ ཨེཏསྶཱཏི ཝེདཡིཏལཀྑཎཾ. སབྦཾ ཏཾ དྷམྨཛཱཏནྟི ཨདྷིཔྤཱཡོ, པུབྦེ ཝཱ རཱུཔཀྑནྡྷཀཐཱཡཾ ཝུཏྟཾ ཨདྷིཀཱརཏོ ཨཱནེཏྭཱ སམྦནྡྷིཏབྦཾ. ཨེཀཏོ ཀཏྭཱཏི ཨཏཱིཏཱདིབྷེདབྷིནྣཾ སབྦཾ ཏཾ བུདྡྷིཡཱ ཨེཀཏོ ཀཏྭཱ. ཨེཝཉྷི རཱསཊྛསྶ སམྦྷཝོ. ནཱིལཱདིབྷེདསྶ ཨཱརམྨཎསྶ སཉྫཱནནཾ, ‘‘ནཱིལཾ པཱིཏཾ དཱིགྷཾ རསྶ’’ནྟི (དྷ. ས. ༦༡༥) ཙ ཨཱདིནཱ སཉྙུཔྤཱདཝསེན ཛཱནནཾ གཧཎཾ ལཀྑཎཾ ཨེཏསྶཱཏི སཉྫཱནནལཀྑཎཾ. ཨབྷིསངྑརཎཾ ཨཱཡཱུཧནཾ བྱཱཔཱརཱཔཏྟི, ཨབྷིསནྡཧནཾ ཝཱ, ཨུབྷཡཐཱཔི ཙེཏནཱཔདྷཱནཏཱཡ སངྑཱརཀྑནྡྷསྶ ཨེཝཾ ཝུཏྟཾ ‘‘ཨབྷིསངྑརཎལཀྑཎ’’ནྟི. ཏཐཱ ཧི སུཏྟནྟབྷཱཛནཱིཡེ སངྑཱརཀྑནྡྷཾ ཝིབྷཛནྟེན བྷགཝཏཱ ‘‘ཙཀྑུསམྥསྶཛཱ ཙེཏནཱ’’ཏིཨཱདིནཱ (ཝིབྷ. ༢༡) ཙེཏནཱཝ ཝིབྷཏྟཱ. མིནིཏབྦཝཏྠུཾ ནཱལི༹ཡཱ མིནམཱནོ པུརིསོ ཝིཡ ཡེན སཉྫཱནནཱཀཱརཝིསིཊྛེན ཨཱཀཱརེན ཝིསཡཾ གཎྷཱཏི, ཏཾ ཨཱརམྨཎཱུཔལདྡྷིསངྑཱཏཾ ཝིཛཱནནཾ ལཀྑཎཾ ཨེཏསྶཱཏི ཝིཛཱནནལཀྑཎཾ. ཨིཏརེ ཝེདནཱཀྑནྡྷཱདཡོ སུཝིཉྙེཡྻཱ ཧོནྟཱིཏི ཝིཉྙཱཎེན ཨེཀུཔྤཱདཱདིབྷཱཝཏོ, སམཱནཛཱཏིཨཱདིཝིབྷཱགཏོ ཙ.

ཨཏྟནཱ ¶ ‘‘ཝིཛཱནནལཀྑཎ’’ནྟི ཝུཏྟམཏྠཾ སུཏྟེན སམཏྠེཏུཾ ‘‘ཡཾ ཀིཉྩཱི’’ཏིཨཱདི ཝུཏྟཾ. ཡཐཱཔཙྩཡཾ པཝཏྟིམཏྟམེཏཾ, ཡདིདཾ སབྷཱཝདྷམྨོཏི དསྶེཏུཾ ‘‘ཝིཛཱནནལཀྑཎ’’ནྟི བྷཱཝསཱདྷནཝསེན ཝུཏྟཾ. དྷམྨསབྷཱཝཱ ཝིནིམུཏྟོ ཀོཙི ཀཏྟཱ ནཱམ ནཏྠཱིཏི ཏསྶེཝ ཀཏྟུབྷཱཝཾ དསྶེཏུཾ ‘‘ཝིཛཱནཱཏཱི’’ཏི ཝུཏྟཾ. ཡཾ ཝིཛཱནནཊྛེན ཝིཉྙཱཎཾ, ཏདེཝ ཙིནྟནཱདིཨཏྠེན ཙིཏྟཾ, མནནཊྛེན མནོཏི པརིཡཱཡཏོཔི ནཾ བོདྷེཏི. ཨེཏྟཱཝཏཱ ཙ ཁནྡྷཏོ, བྷེདཏོ, པརིཡཱཡཏོ ཙ ཝིཉྙཱཎཾ ཝིབྷཱཝིཏཾ ཧོཏི.

ཛཱཡནྟི ཨེཏྠ ཝིསདིསཱཔི སདིསཱཀཱརཱཏི ཛཱཏི, སམཱནཱཀཱརོ. སཱ པནཱཡཾ ཛཱཏི ཀཱམཾ ཨནེཀཝིདྷཱ ནཱནཔྤཀཱརཱ, ཏཾ ཨིདྷཱདྷིཔྤེཏམེཝ པན དསྶེནྟོ ‘‘ཀུསལཾ, ཨཀུསལཾ, ཨབྱཱཀཏཉྩཱ’’ཏི ཨཱཧ. ཏཏྠ ཀུསལཊྛེན ཀུསལཾ. ཀོཡཾ ཀུསལཊྛོ ནཱམ? ཨཱརོགྱཊྛོ ཨནཝཛྫཊྛོ སུཁཝིཔཱཀཊྛོ. ཨཱརོགྱཊྛེནཱཔི ཧི ཀུསལཾ ཝུཙྩཏི ‘‘ཀཙྩི ནུ བྷོཏོ ཀུསལ’’ནྟིཨཱདཱིསུ (ཛཱ. ༡.༡༥.༡༤༦; ༢.༢༠.༡༢༩). ཨནཝཛྫཊྛེནཱཔི ‘‘ཀཏམོ པན, བྷནྟེ, ཀུསལོ ཀཱཡསམཱཙཱརོ? ཡོ ཁོ, མཧཱརཱཛ ¶ , ཨནཝཛྫོ ཀཱཡསམཱཙཱརོ’’ཏིཨཱདཱིསུ (མ. ནི. ༢.༣༦༡). སུཁཝིཔཱཀཊྛེནཱཔི ‘‘ཀུསལཱནཾ, བྷིཀྑཝེ, དྷམྨཱནཾ སམཱདཱནཧེཏཱུ’’ཏིཨཱདཱིསུ (དཱི. ནི. ༣.༨༠). ཀུསལཙིཏྟཉྷི རཱགཱདཱིནཾ ཙེཏསིཀརོགཱནཾ ཨཝཛྫསབྷཱཝཱནཾ པཊིཔཀྑབྷཱཝཏོ, སུཁཝིཔཱཀཝིཔཙྩནཏོ ཙ ཨརོགཾ, ཨནཝཛྫཾ, སུཁཝིཔཱཀཉྩཱཏི.

སདྡཏྠཏོ པན ཀུཙྪིཏེ པཱཔདྷམྨེ སལཡཏི ཙལཡཏི ཀམྨེཏི ཝིདྡྷཾསེཏཱིཏི ཀུསལཾ. ཀུཙྪིཏེན ཝཱ ཨཱཀཱརེན སཡནྟཱིཏི ཀུསཱ, པཱཔདྷམྨཱ, ཏེ ཀུསེ ལུནཱཏི ཚིནྡཏཱིཏི ཀུསལཾ. ཀུཙྪིཏཱནཾ ཝཱ སཱནཏོ ཏནུཀརཎཏོ ཉཱཎཾ ཀུསཾ ནཱམ, ཏེན ལཱཏབྦཾ གཧེཏབྦཾ པཝཏྟེཏབྦནྟི ཀུསལཾ. ཡཐཱ ཝཱ ཀུསོ ཨུབྷཡབྷཱགགཏཾ ཧཏྠཔདེསཾ ལུནཱཏི, ཨེཝམིདཾ ཨུཔྤནྣཱནུཔྤནྣཝསེན ཨུབྷཡབྷཱགགཏཾ སཾཀིལེསཔཀྑཾ ལུནཱཏི ཚིནྡཏི, ཏསྨཱ ཀུསོ ཝིཡ ལུནཱཏཱིཏི ཀུསལཾ. ཀུཙྪིཏཱནཾ ཝཱ སཱཝཛྫདྷམྨཱནཾ སལནཏོ སཾཝརཎཏོ ཀུསལཾ. ཀུསལདྷམྨཝསེན ཧི ཨཀུསལཱ པཝཏྟིནིཝཱརཎེན, ཨཔྤཝཏྟིབྷཱཝཱཔཱདནེན ཙ མནཙྪཊྛེསུ དྭཱརེསུ ཨཔྤཝཏྟིཡཱ སཾཝུཏཱ པིཧིཏཱ ཧོནྟི. ཀུཙྪིཏེ ཝཱ པཱཔདྷམྨེ སལཡཏི ཀམྤེཏི ཨཔནེཏཱིཏི ཀུསལཾ. ཀུཙྪིཏཱནཾ ཝཱ པཱཎཱཏིཔཱཏཱདཱིནཾ པཱཔདྷམྨཱནཾ ¶ སཱནཏོ ནིསཱནཏོ ཏེཛནཏོ ཀུསཱ, དོསལོབྷཱདཡོ. དོསཱདཱིནཉྷི ཝསེན ཙེཏནཱཡ ཏིཀྑབྷཱཝཔྤཏྟིཡཱ པཱཎཱཏིཔཱཏཱདཱིནཾ མཧཱསཱཝཛྫཏཱ, ཏེ ཀུསེ ལུནཱཏི ཚིནྡཏཱིཏི ཀུསལཾ. ཀུཙྪིཏཱནཾ ཝཱ སཱནཏོ ཨནྟཀརཎཏོ ཝིནཱསནཏོ ཀུསཱནི, པུཉྙཀིརིཡཝསེན པཝཏྟཱནི སདྡྷཱདཱིནི ཨིནྡྲིཡཱནི, ཏེཧི ལཱཏབྦཾ པཝཏྟེཏབྦནྟི ཀུསལཾ. ‘‘ཀུ’’ ཨིཏི ཝཱ བྷཱུམི ཝུཙྩཏི, ཨདྷིཊྛཱནབྷཱཝེན ཏཾསདིསསྶ ཨཏྟནོ ནིསྶཡབྷཱུཏསྶ རཱུཔཱརཱུཔཔྤབནྡྷསྶ སམྤཏི, ཨཱཡཏིཉྩ ཨནུདཧནེན ཝིནཱསནཏོ ཀུཾ སིཡནྟཱིཏི ཀུསཱ, རཱགཱདཡོ, ཏེ ཝིཡ ཨཏྟནོ ནིསྶཡསྶ ལཝནཏོ ཚིནྡནཏོ ཀུསལཾ. པཡོགསམྤཱདིཏཱ ཧི ཀུསལདྷམྨཱ ཨཙྩནྟམེཝ རཱུཔཱརཱུཔདྷམྨེ ཨཔྤཝཏྟིཀརཎེན སམུཙྪིནྡནྟཱིཏི.

ན ཀུསལནྟི ཨཀུསལཾ, ཀུསལཔཊིཔཀྑནྟི ཨཏྠོ. ན ཀུསལནྟི ཧི ཀུསལཔཊིཀྑེཔེན ཨཀུསལཔདསྶ ཨཝཡཝབྷེདེན ཨཏྠེ ཝུཙྩམཱནེ ཡཐཱ ཡཾ དྷམྨཛཱཏཾ ན ཨརོགཾ, ན ཨནཝཛྫཾ, ན སུཁཝིཔཱཀཾ, ན ཙ ཀོསལླསམྦྷཱུཏཾ, ཏཾ ཨཀུསལནྟི ཨཡམཏྠོ དསྶིཏོ ཧོཏི, ཨེཝཾ ཡཾ ན ཀུཙྪིཏཱནཾ སལནསབྷཱཝཾ, ན ཀུསཱནཾ ལཝནསབྷཱཝཾ, ན ཀུསེན ཀུསེཧི ཝཱ པཝཏྟེཏབྦཾ, ན ཙ ཀུསོ ཝིཡ ལཝནཀཾ, ཏཾ ཨཀུསལཾ ནཱམཱཏི ཨཡམྤི ཨཏྠོ དསྶིཏོ ཧོཏི. ཨེཏྠ ཙ ཡསྨཱ ཀུསལཾ ཨཀུསལསྶ ཨུཛུཝིཔཙྩནཱིཀབྷཱུཏཾ, ཡཏོ ཙེཏསིཀརོགཔཊིཔཀྑཱདིབྷཱཝཏོ ཨརོགཱདིཔརིཡཱཡེནཔི ¶ བོདྷིཏཾ, ཏསྨཱ ཨཀུསལཾ པན ཀུསལསྶ ཨུཛུཝིཔཙྩནཱིཀབྷཱུཏནྟི ཝུཏྟཾ ‘‘ཀུསལཔཊིཔཀྑནྟི ཨཏྠོ’’ཏི. ཏཾ པན ཡཐཱཀྐམཾ པཧཱཡཀཔཧཱཏབྦབྷཱཝེནེཝཱཏི དཊྛབྦཾ.

ན བྱཱཀཏནྟི ཨབྱཱཀཏཾ, ཀུསལཱཀུསལབྷཱཝེན ཨཀཐིཏནྟི ཨཏྠོ. ཏཏྠ ཀུསལབྷཱཝོ ཨནཝཛྫསུཁཝིཔཱཀཊྛོ. ཨཀུསལབྷཱཝོ སཱཝཛྫདུཀྑཝིཔཱཀཊྛོ, ཏདུབྷཡབྷཱཝེན ཨཝུཏྟནྟི ཝུཏྟཾ ཧོཏི. ཨེཏེནེཝ ཨརོགསརོགཱདིབྷཱཝེན ཙ ཨཝུཏྟཏཱ ཝཎྞིཏཱཏི དཊྛབྦཱ. ཨེཏྠ ཙ ‘‘ཀུསལཾ ཨཀུསལ’’ནྟི ཙ ཝཏྭཱ ‘‘ཨབྱཱཀཏ’’ནྟི ཝུཏྟཏྟཱ ཀུསལཱཀུསལབྷཱཝེནེཝ ཨཝུཏྟཏཱ ཝིཉྙཱཡཏི, ན པཀཱརནྟརེན. ཨཝུཏྟཏཱ ཙེཏྠ ན ཏཐཱ ཨཝཏྟབྦཏཱམཏྟེན, ཨཐ ཁོ ཏདུབྷཡཝིནིམུཏྟསབྷཱཝཏཱཡ ཏེསཾ དྷམྨཱནནྟི དཊྛབྦཾ. ཏཐཱ ཧེཏཾ ‘‘ཨཝིཔཱཀལཀྑཎ’’ནྟི ཝུཙྩཏི.

༤༥༢. བྷཱུམིབྷེདཏོཏི བྷཝནྟི ཨེཏྠ དྷམྨཱཏི བྷཱུམི, ཋཱནཾ, ཨཝཏྠཱ ཙ. ཨཝཏྠཱཔི ཧི ཨཝཏྠཱཝནྟཱནཾ པཝཏྟིཊྛཱནཾ ཝིཡ གཡ྄ཧཏི, ཨེཝཾ ནེསཾ སུཁགྒཧཎཾ ཧོཏཱིཏི ¶ . ཏཏྠ ལོཀིཡཱ བྷཱུམི ཋཱནཝསེནེཝ ཝེདིཏབྦཱ, ལོཀུཏྟརཱ ཨཝཏྠཱཝསེན. ལོཀིཡཱ ཝཱ ཋཱནཱཝཏྠཱཝསེན, ལོཀུཏྟརཱ ཨཝཏྠཱཝསེནེཝ. ཀཱམཱཝཙརནྟི ཨེཏྠ ཝཏྠུཀཱམོ ཀིལེསཀཱམོཏི དྭེ ཀཱམཱ. ཏེསུ ཝཏྠུཀཱམོ ཝིསེསཏོ པཉྩ ཀཱམགུཎཱ ཀཱམཱིཡནྟཱིཏི, ཀིལེསཀཱམོ ཏཎྷཱ ཀཱམེཏཱིཏི. ཏེ དྭེཔི སཧིཏཱ ཧུཏྭཱ ཡཏྠ ཨཝཙརནྟི, ཏཾ ཀཱམཱཝཙརཾ. ཀིཾ པན ཏནྟི? ཨེཀཱདསཝིདྷོ ཀཱམབྷཝོ. ཨིདཾ ཡེབྷུཡྻེན ཏཏྠ ཨཝཙརཏི པཝཏྟཏཱིཏི ཀཱམཱཝཙརཾ ཨེཀསྶ ཨཝཙརསདྡསྶ ལོཔཾ ཀཏྭཱ. ཨེཝཾ རཱུཔཱརཱུཔཱཝཙརཱནིཔི ཝེདིཏབྦཱནི རཱུཔཏཎྷཱ རཱུཔཾ, ཨརཱུཔཏཎྷཱ ཨརཱུཔནྟི ཀཏྭཱ. ཨཐ ཝཱ ཀཱམཏཎྷཱ ཀཱམོ ཨུཏྟརཔདལོཔེན, ཨཝཙརཏི ཨེཏྠཱཏི ཨཝཙརཾ, ཀཱམསྶ ཨཝཙརཾ ཀཱམཱཝཙརཾ. ཨེཝཾ རཱུཔཱཝཙརཱརཱུཔཱཝཙརཱནིཔི ཝེདིཏབྦཱནི. ལོཀཏོ ཨུཏྟརཏཱིཏི ལོཀུཏྟརཾ ཀུསལསྶ ཨདྷིཔྤེཏཏྟཱ. ཨིཏརཾ པན ལོཀཏོ ཨུཏྟིཎྞནྟི ལོཀུཏྟརཾ.

སོམནསྶུཔེཀྑཱཉཱཎསངྑཱརབྷེདཏོཏི ཨེཏྠ སོམནསྶུཔེཀྑཱབྷེདོ ཏཱཝ ཡུཏྟོ ཏེསཾ བྷིནྣསབྷཱཝཏྟཱ, ཉཱཎསངྑཱརབྷེདོ པན ཀཐནྟི? ནཱཡཾ དོསོ ཉཱཎསངྑཱརཀཏོ བྷེདོཉཱཎསངྑཱརབྷེདོ, སོ ཙ ཏེསཾ བྷཱཝཱབྷཱཝཀཏོཏི ཀཏྭཱ. སོབྷནཾ མནོ, སུནྡརཾ ཝཱ མནོ ཨེཏསྶཱཏི སུམནོ, སུམནསྶ བྷཱཝོ སོམནསྶཾ, མཱནསིཀསུཁཱ ཝེདནཱ རུལ༹ྷིཡཱ, སོམནསྶེན ཨུཔྤཱདཏོ པཊྛཱཡ ཡཱཝ བྷངྒཱ སཧགཏཾ པཝཏྟཾ སཾསཊྛཾ, སམྤཡུཏྟནྟི ཨཏྠོ. སོམནསྶསཧགཏཏཱ ཙསྶ ཨཱརམྨཎཝསེན ཝེདིཏབྦཱ. ཨིཊྛཱརམྨཎེ ཧི ཙིཏྟཾ སོམནསྶསཧགཏཾ ཧོཏི. ནནུ ཙ ཨིཊྛཱརམྨཎཾ ལོབྷསྶ ཝཏྠུ, ཀཐཾ ¶ ཏཏྠ ཀུསལཾ ཧོཏཱིཏི? ནཡིདམེཀནྟིཀཾ ཨིཊྛེཔི ཨཱབྷོགཱདིཝསེན ཀུསལསྶ ཨུཔྤཛྫནཏོ. ཡསྶ ཧི ཙཏུསམྤཏྟིཙཀྐསམཱཡོགཱདིཝསེན ཡོནིསོཝ ཨཱབྷོགོ ཧོཏི, ཀུསལམེཝ ཙ མཡཱ ཀཏྟབྦནྟི ཀུསལཀརཎེ ཙིཏྟཾ ནིཡམིཏཾ, ཨཀུསལཔྤཝཏྟིཏོ ཙ ནིཝཏྟེཏྭཱ ཀུསལཀརཎེ ཨེཝ པརིཎཱམིཏཾ, ཨབྷིཎྷཀརཎཝསེན ཙ སམུདཱཙརིཏཾ, ཏསྶ ཨིཊྛེཔི ཨཱརམྨཎེ ཨལོབྷཱདིསམྤཡུཏྟམེཝ ཙིཏྟཾ ཧོཏི, ན ལོབྷཱདིསམྤཡུཏྟཾ.

ཉཱཎེན ¶ སམཾ པཀཱརེཧི ཡུཏྟནྟི ཉཱཎསམྤཡུཏྟཾ. ཨེཀུཔྤཱདཱདཡོ ཨེཝ ཙེཏྠ པཀཱརཱཏི ཝེདིཏབྦཱ. ཏཏྠ ཀམྨཱུཔཔཏྟིཨིནྡྲིཡཔརིཔཱཀཀིལེསདཱུརཱིབྷཱཝཱ ཉཱཎསམྤཡུཏྟཏཱཡ ཀཱརཎཾ. ཡོ ཧི པརེསཾ དྷམྨཾ དེསེཏི, ཨནཝཛྫཱནི སིཔྤཱཡཏནཀམྨཱཡཏནཝིཛྫཊྛཱནཱནི སིཀྑཱཔེཏཱིཏི ཨེཝམཱདིཀཾ པཉྙཱསཾཝཏྟནིཡཾ ཀརོཏི, ཏསྶ ཀམྨཱུཔནིསྶཡཝསེན ཀུསལཙིཏྟཾ ཨུཔྤཛྫམཱནཾ ཉཱཎསམྤཡུཏྟཾ ཧོཏི. ཏཐཱ ཨབྱཱཔཛྫེ ལོཀེ ཨུཔྤནྣསྶ ཨུཔཔཏྟིཾ ནིསྶཱཡ ཉཱཎསམྤཡུཏྟཾ ཧོཏི. ཝུཏྟཉྷེཏཾ ‘‘ཏསྶ ཏཏྠ སུཁིནོ དྷམྨཔདཱ པླཝནྟི, དནྡྷོ, བྷིཀྑཝེ, སཏུཔྤཱདོ, ཨཐ ཁོ སོ སཏྟོ ཁིཔྤཾཡེཝ ཝིསེསབྷཱགཱི (ཨ. ནི. ༤.༡༩༡) ཧོཏཱི’’ཏི. ཏཐཱ པཉྙཱདསཀཔཏྟསྶ ཨིནྡྲིཡཔརིཔཱཀཾ ནིསྶཱཡ ཀུསལཾ ཨུཔྤཛྫམཱནཾ ཉཱཎསམྤཡུཏྟཾ ཧོཏི. ཡེན པན ཀིལེསཱ ཝིཀྑམྦྷིཏཱ, ཏསྶ ཀིལེསདཱུརཱིབྷཱཝཾ ནིསྶཱཡ ཉཱཎསམྤཡུཏྟཾ ཧོཏི. ཝུཏྟམྤི ཙེཏཾ ‘‘ཡོགཱ ཝེ ཛཱཡཏེ བྷཱུརི, ཨཡོགཱ བྷཱུརིསངྑཡོ’’ཏི (དྷ. པ. ༢༨༢). ཨཏྟནོ ཝཱ པརསྶ ཝཱ སམུསྶཱཧཛནིཏཾ ཙིཏྟཔཡོགསངྑཱཏཾ སངྑརཎཾ སངྑཱརོ, སོ ཨེཏསྶ ནཏྠཱིཏི ཨསངྑཱརཾ. ཏེན པན སཧ སངྑཱརེན པཝཏྟཏཱིཏི སསངྑཱརཾ. ཉཱཎེན ཝིཔྤཡུཏྟཾ ཝིརཧིཏནྟི ཉཱཎཝིཔྤཡུཏྟཾ. ཝིཔྤཡོགོཏི ཙེཏྠ ཉཱཎསྶ ཨབྷཱཝོ ཨཔྤཝཏྟིཡེཝཱཏི དཊྛབྦཾ. ཨུཔེཀྑཏཱིཏི ཨུཔེཀྑཱ, ཝེདཡམཱནཱཔི ཨཱརམྨཎཾ ཨཛ྄ཛྷུཔེཀྑཏི མཛ྄ཛྷཏྟཏཱཀཱརསཎྛིཏཏྟཱཏི ཨཏྠོ. ཨཐ ཝཱ ཨུཔེཏཱ སུཁདུཀྑཱནཾ ཨཝིརུདྡྷཱ ཨིཀྑཱ ཨནུབྷཝནནྟི ཨུཔེཀྑཱ. ཨཐ ཝཱ ཨིཊྛེ ཙ ཨནིཊྛེ ཙ ཨཱརམྨཎེ པཀྑཔཱཏཱབྷཱཝེན ཨུཔཔཏྟིཏོ ཡུཏྟིཏོ ཨིཀྑཏི ཨནུབྷཝཏཱིཏི ཨུཔེཀྑཱ, ཏཱཡ སཧགཏནྟི ཨུཔེཀྑཱསཧགཏཾ. སེསཾ སབྦཾ ཧེཊྛཱ ཝུཏྟནཡམེཝ.

ཨེཝཾ ཨཊྛ ཀཱམཱཝཙརཀུསལཙིཏྟཱནི ཨུདྡིསིཏྭཱ ཨིདཱནི ཏེསཾ པཝཏྟིཨཱཀཱརཾ དསྶེཏུཾ ‘‘ཡདཱ ཧཱི’’ཏིཨཱདི ཨཱརདྡྷཾ. ཏཏྠ པཊིགྒཱཧཀཱདིསམྤཏྟིནྟི ཨེཏྠ ཨཱདི-སདྡེན དེསཀཱལཀལྱཱཎམིཏྟཱདིསམྤཏྟིཾ སངྒཎྷཱཏི. ཨཉྙཾ ཝཱ སོམནསྶཧེཏུནྟི ཨེཏྠ ཨཉྙགྒཧཎེན སདྡྷཱབཧུལཏཱ, ཝིསུདྡྷདིཊྛིཏཱ, ཀུསལཀིརིཡཱཡ ཨཱནིསཾསདསྶཱཝིཏཱ, སོམནསྶཔཊིསནྡྷིཀཏཱ, ཨེཀཱདས ¶ པཱིཏིསམྦོཛ྄ཛྷངྒཊྛཱནིཡཱ དྷམྨཱཏི ཨེཝམཱདཱིནཾ སངྒཧོ. ཨཱདིནཡཔྤཝཏྟནྟི ཨེཏྠ ཨཱདི-སདྡེན ན ཀེཝལཾ ‘‘ཨཏྠི ཡིཊྛ’’ནྟིཨཱདཱིནཾ (མ. ནི. ༡.༤༤༡; ༢.༩༥) ནཝནྣཾཡེཝ སམྨཱདིཊྛིཝཏྠཱུནཾ གཧཎཾ, ཨཐ ཁོ དྷམྨཝིཙཡསམྦོཛ྄ཛྷངྒཊྛཱནིཡཱདཱིནམྤི ¶ སངྒཧོ ཝེདིཏབྦོ. པུརཀྑཏྭཱཏི པུབྦངྒམཾ ཀཏྭཱ. ཏཉྩ ཁོ སཧཛཱཏཔུབྦངྒམཝསེན ‘‘མནོཔུབྦངྒམཱ དྷམྨཱ’’ཏིཨཱདཱིསུ (དྷ. པ. ༡-༢) ཝིཡ སམྤཡོགསྶ ཨདྷིཔྤེཏཏྟཱ. ཨསཾསཱིདནྟོཏི སིལོཀམཙྪརིཡཱདིཝསེན པུཉྙཀིརིཡཱཡཾ སཾསཱིདཾ སངྐོཙཾ ཨནཱཔཛྫནྟོ, ཏེན མུཏྟཙཱགཏཱདིཾ དསྶེཏི. ཨནུསྶཱཧིཏོཏི ཀེནཙིཔི ན ཨུསྶཱཧིཏོ. སརསཏོ ཧི པུཉྙཔཊིཔཏྟིདསྶནམིདཾ. པརེཧཱིཏི པན པཱཀཊུསྶཱཧནདསྶནཾ.

དཱནཱདཱིནཱིཏི དཱནཾ སཱིལཾ ཡཱཝ དིཊྛིཛུཀམྨནྟི ཨིམཱནི དཱནཱདཱིནི དས པུཉྙཱནི, དཱནཱདཱིནཱིཏི ཝཱ དཱནསཱིལབྷཱཝནཱམཡཱནི ཨིཏརེསམྤི སཏྟནྣཾ ཨེཏྠེཝནྟོགདྷཏྟཱ. ཡཏྠ སཡཾ ཨུཔྤཛྫནྟི, ཏཾ སནྟཱནཾ པུནནྟི, པུཛྫཾ བྷཝཕལཾ ནིབྦཏྟེནྟཱིཏི ཝཱ པུཉྙཱནི. ཨསྶ པུཉྙཙེཏནཱསམངྒིནོ. ཨམུཏྟཙཱགཏཱ དེཡྻདྷམྨེ སཱཔེཀྑཙིཏྟཏཱ. ཨཱདི-སདྡེན སཱིལསམཱདཱནཱདཱིསུ ཨནདྷིམུཏྟཏཱདིཾ སངྒཎྷཱཏི. ཏདེཝཱཏི སོམནསྶསཧགཏཱདིནཱ སདིསཏཱཡ ཝུཏྟཾ. སདིསམྤི ཧི ‘‘ཏདེཝཱ’’ཏི ཝོཧརཱིཡཏི ཡཐཱ ‘‘སཱ ཨེཝ ཏིཏྟིརཱི, ཏཱནིཡེཝ ཨོསདྷཱནཱི’’ཏི. ཨིམསྨིཉྷི ཨཏྠེཏི ལཱིནསྶ ཙིཏྟསྶ ཨུསྶཱཧནཔཡོགསངྑཱཏེ ཨཏྠེ. ཨེཏནྟི ‘‘སངྑཱརོ’’ཏི ཨེཏཾ པདཾ. པུབྦཔཡོགསྶཱཏི པུཉྙཀིརིཡཱཡཾ སངྐོཙེ ཛཱཡམཱནེ ཏཏོ ཝིཝེཙེཏྭཱ སམུསྶཱཧནཝསེན པཝཏྟསྶ ཙིཏྟཔཡོགསྶ, པུབྦགྒཧཎཉྩེཏྠ ཏཐཱཔཝཏྟཔུབྦཱབྷིསངྑཱརཝསེན སོ སངྑཱརོ ཧོཏཱིཏི ཀཏྭཱ ཝུཏྟཾ, ན ཏསྶ སངྑཱརསྶ པུབྦཀཱལིཀཏྟཱ. ‘‘ཨཏྠི དིནྣ’’ནྟིཨཱདི (མ. ནི. ༡.༤༤༡; ༢.༩༥) ནཡཔྤཝཏྟཱཡ སམྨཱདིཊྛིཡཱ ཨསམྦྷཝདསྶནཏྠཾ བཱལ-གྒཧཎཾ. སཾསཱིདནུསྶཱཧནཱབྷཱཝདསྶནཏྠཾ སཧསཱ-གཧཎཾ. སོམནསྶརཧིཏཱ ཧོནྟི པུཉྙཾ ཀརོནྟཱཏི ཨདྷིཔྤཱཡོ. སོམནསྶཧེཏཱུནཾ ཨབྷཱཝཾ ཨཱགམྨཱཏི ཨིདཾ ནིདསྶནམཏྟཾ དཊྛབྦཾ. མཛ྄ཛྷཏྟཱརམྨཎཏཐཱརཱུཔཙེཏོསངྑཱརཱདཡོཔི ཧི ཨུཔེཀྑཱསཧགཏཏཱཡ ཀཱརཎཾ ཧོནྟིཡེཝཱཏི.

ཨེཝནྟིཨཱདི ནིགམནཾ. ཏཡིདཾ ཨཊྛཝིདྷམྤི ཀཱམཱཝཙརཾ ཀུསལཙིཏྟཾ རཱུཔཱརམྨཎཾ ཡཱཝ དྷམྨཱརམྨཎནྟི ཚསུ ཨཱརམྨཎེསུ ཡཾ ཝཱ ཏཾ ཝཱ ཨཱལམྦིཏྭཱ ཨུཔེཀྑཱསཧགཏཱཧེཏུཀཀིརིཡཱམནོཝིཉྙཱཎདྷཱཏཱནནྟརཾ ཀཱཡདྭཱརཱདཱིཧི ཏཱིཧི དྭཱརེཧི ཀཱཡཀམྨཱདིཝསེན ཨུཔྤཛྫཏཱིཏི ཝེདིཏབྦཾ. ཏཏྠ ¶ ཉཱཎསམྤཡུཏྟཱནི ཙཏྟཱརི ཡདཱ ཏིཧེཏུཀཔཊིསནྡྷིཾ ཨུཔྤཱདེནྟི, ཏདཱ སོལ༹ས ཝིཔཱཀཙིཏྟཱནི ¶ ཕལནྟི. ཡདཱ པན དུཧེཏུཀཾ, ཏདཱ དྭཱདས ཏིཧེཏུཀཝཛྫཱནི. ཨཧེཏུཀཾ པན པཊིསནྡྷིཾ ཏིཧེཏུཀཱནི ན ཨུཔྤཱདེནྟེཝ, དུཧེཏུཀཱནི པན དུཧེཏུཀཔཊིསནྡྷིདཱནཀཱལེ དྭཱདས, ཨཧེཏུཀཔཊིསནྡྷིཾ དཱནཀཱལེ ཨཊྛ ཕལནྟི. ཏིཧེཏུཀཱ པན པཊིསནྡྷི དུཧེཏུཀེཧི ན ཧོཏིཡེཝ. ‘‘ཨཊྛ ཕལནྟཱི’’ཏི ཙེཏཾ པཊིསནྡྷིཾ ཛནཀཀམྨཝསེན ཝུཏྟཾ. ཨཉྙེན པན ཀམྨུནཱ ‘‘སཧེཏུཀཾ བྷཝངྒཾ ཨཧེཏུཀསྶ བྷཝངྒསྶ ཨནནྟརཔཙྩཡེན པཙྩཡོ’’ཏི (པཊྛཱ. ༣.༡.༡༠༢) ཝཙནཏོ སཧེཏུཀམྤི ཝིཔཱཀཙིཏྟཾ ཨཧེཏུཀཔཊིསནྡྷིཀསྶ ཧོཏིཡེཝ. ཨིམསྨིཾ ཙ པཀྑེ བལཝཏཱ པཙྩཡེན ཨུཔྤནྣཾ ཨསངྑཱརཾ, དུབྦལེན སསངྑཱརནྟི ཝེདིཏབྦཾ. ཡེ པན ཨཱགམནཏོ ཙ ཝིཔཱཀསྶ ཨསངྑཱརསསངྑཱརབྷཱཝཾ ཨིཙྪནྟི, ཏེསཾ མཏེན དྭཱདས, ཨཊྛ ཙ ཕལནྟཱིཏི ཡོཛེཏབྦཾ. ཨེཝཾ ཏིདྷཱ ཕལཾ དདནྟཉྩེཏཾ ཀཱམཱཝཙརསུགཏིཡཾ ཨུཔཔཏྟིཾ, སུགཏིདུགྒཏཱིསུ བྷོགསམྤདཉྩ ཀརོཏི. ནཱགསུཔཎྞཱདཱིནམྤི ཧི ཡཾ དེཝབྷོགསམྤཏྟིསདིསཾ བྷོགཛཱཏཾ ཨུཔྤཛྫཏི, ཏམྤི ཀཱམཱཝཙརཀུསལསྶེཝ ཕལཾ. ན ཧི ཨཀུསལསྶ ཨིཊྛཾ ཕལཾ ཨཏྠཱིཏི.

རཱུཔཱཝཙརཾ པནཱཏི པན-སདྡོ ཝིསེསཏྠཛོཏཀོ. ཏེན ཡཐཱ ཀཱམཱཝཙརཾ ཀིལེསཱནཾ ཏདངྒཔྤཧཱནམཏྟཀརཾ, ན ཨེཝམིདཾ, ཨིདཾ པན ཝིཀྑམྦྷནཔྤཧཱནཀརཾ. ཡཐཱ ཝཱ ཏཾ ཝེདནཱཉཱཎསངྑཱརབྷེདཏོ ཨཊྛདྷཱ བྷིཛྫཏི, ན ཨེཝམིདཾ, ཨིདཾ པན ཏཏོ ཨཉྙཐཱ ཝཱཏི ཝཀྑམཱནཾ ཝིསེསཾ ཛོཏེཏི. ཏཾ པནེཏཾ སཝཏྠུཀཾ, སཱསཝཾ, ཝིནཱིཝརཎཉྩ རཱུཔཱཝཙརནྟི དཊྛབྦཾ. ‘‘སཝཏྠུཀཾ ཨེཝཱ’’ཏི ཧི ཨིམིནཱ ཨརཱུཔཱཝཙརཾ ནིཝཏྟེཏི, ‘‘སཱསཝ’’ནྟི ཨིམིནཱ པཋམམགྒཙིཏྟཾ, ‘‘ཝིནཱིཝརཎ’’ནྟི ཨིམིནཱ པཊིགྷསཧིཏདྭཡཾ. ཀཏྠཙི པཉྩ ཛྷཱནངྒཱནི, ཀཏྠཙི ཙཏྟཱརི, ཀཏྠཙི ཏཱིཎི, ཀཏྠཙི དྭེ, ཀཏྠཙི ཨཔརཱནི དྭེཏི ཨེཝཾ ཛྷཱནངྒཡོགབྷེདཏོ པཉྩཝིདྷནྟི སངྑེཔཏོ ཝུཏྟམཏྠཾ ཝིཝརིཏུཾ ‘‘སེཡྻཐིད’’ནྟིཨཱདི ཨཱརདྡྷཾ. ཏཏྠ ཡཾ ཝཏྟབྦཾ, ཏཾ ཧེཊྛཱ ཛྷཱནཀཐཱཡཾ (ཝིསུདྡྷི. ༡.༧༩ ཨཱདཡོ) ཝུཏྟམེཝ. ཏཡིདཾ བྷཱཝནཱམཡམེཝ ཧུཏྭཱ ཝུཏྟནཡེན པཐཝཱིཀསིཎཱདིཀཾ ཨཱལམྦིཏྭཱ ཡཐཱརཧཾ ཉཱཎསམྤཡུཏྟཀུསལཱནནྟརཾ ཨུཔྤཛྫཏི, ཧཱིནཱདིབྷེདབྷིནྣཾ པནེཏཾ ཡཐཱཀྐམཾ བྲཧྨཔཱརིསཛྫཱདཱིསུ སོལ༹སསུཔི བྲཧྨལོཀེསུ ཨུཔཔཏྟིནིཔྥཱདཀནྟི དཊྛབྦཾ.

རཱུཔསཉྙཱསམཏིཀྐམཱདིནཱ ¶ སམདྷིགནྟབྦཾ ཨརཱུཔཱཝཙརཾ. ཙཏུནྣཾ ཨརཱུཔཱནནྟི ཨུཔེཀྑཱསམཱདྷིསངྑཱཏེཧི ཙཏཱུཧི ཨརཱུཔཛ྄ཛྷཱནེཧི. ཀརཎེ ཧི ཨེཏཾ སཱམིཝཙནཾ. ཨརཱུཔཱནཾ ཝཱ ཡོ ཨཱརམྨཎཱདིཀཏོ སམྤཡུཏྟདྷམྨེཧི ཡོགོ ཡོགབྷེདོ, ཏསྶ ཝསེན. ཝུཏྟཔྤཀཱརེནཱཏི ཧེཊྛཱ ཨཱརུཔྤཀཐཱཡཾ ¶ (ཝིསུདྡྷི. ༡.༢༧༥ ཨཱདཡོ) ཝུཏྟཔྤཀཱརེན. པཋམནྟི པཋམཾ ཨརཱུཔཱཝཙརཀུསལཙིཏྟཾ. དུཏིཡཏཏིཡཙཏུཏྠཱནཱིཏི ཨེཏྠཱཔི ཨེསེཝ ནཡོ. ཏཱནིམཱནི བྷཱཝནཱམཡཱནེཝ ཧུཏྭཱ ཡཐཱནུཔུབྦཾ ཀསིཎུགྒྷཱཊིམཱཀཱསཾ, པཋམཱརུཔྤཝིཉྙཱཎཾ, ནཏྠིབྷཱཝཾ, ཨཱཀིཉྩཉྙཱཡཏནནྟི ཨིམཱནི ཨཱལམྦིཏྭཱ ཨུཔེཀྑཱསཧགཏཉཱཎསམྤཡུཏྟཀུསལཱནནྟརཾ ཨུཔྤཛྫིཏྭཱ ཙཏཱུསུ ཨརཱུཔཱིབྲཧྨལོཀེསུ པཊིསནྡྷིཔཝཏྟིཝིཔཱཀདཱཡཱིནི. སེསཾ པནེཏྠ ཡཾ ཝཏྟབྦཾ, ཏཾ ཧེཊྛཱ ཝུཏྟམེཝ. ཚཝིསུདྡྷིཔརམྤརཱཡ སམདྷིགནྟབྦཾ ལོཀུཏྟརཾ. ཏཏྠ ཝཏྟབྦཾ པརཏོ ཨཱགམིསྶཏི. ཙཏུམགྒསམྤཡོགཏོཏི སོཏཱཔཏྟིམགྒོ ཡཱཝ ཨརཧཏྟམགྒོཏི ཨིམེཧི ཙཏཱུཧི ཨརིཡམགྒེཧི སམྤཡོགཏོ. ཙཏུབྦིདྷམྤི ཙེཏཾ བྷཱཝནཱམཡམེཝ ཧུཏྭཱ ནིབྦཱནཾ ཨཱལམྦིཏྭཱ སུཉྙཏོ ཝིམོཀྑོ, ཨནིམིཏྟོ ཝིམོཀྑོ, ཨཔྤཎིཧིཏོ ཝིམོཀྑོཏི ནཱམེན ཨུཔྤཛྫཏི, སཏྟབྷཝཱདིབྷཝཱུཔཔཏྟིནིཝཏྟཀནྟི དཊྛབྦཾ. ཨེཀཝཱིསཏིཝིདྷཾ ཧོཏི ནཱཏིསངྑེཔཝིཏྠཱརནཡེནཱཏི ཨདྷིཔྤཱཡོ.

༤༥༣. ཀཱམཱཝཙརམེཝཱཏི ཨེཏྠ ནིཀཱཡནྟརིཡཱ རཱུཔཱརཱུཔཱཝཙརམྤི ཨཀུསལཾ ཨིཙྪནྟཱིཏི ཏེསཾ མཏིནིསེདྷནཏྠཾ ཀཱམཱཝཙརགྒཧཎཾ. མཧགྒཏབྷཱུམིཡཾ ཨུཔྤཛྫནྟམྤི ཏཏྠ རཱུཔདྷཱཏུཡཾ པཝཏྟིཝིཔཱཀཾ དེནྟམྤི ཨེཀནྟེན ཀཱམཱཝཙརམེཝཱཏི དསྶནཏྠཾ ཨཝདྷཱརཎཾ. ཡདི ཨེཝཾ, ཀསྨཱ ཀཱམཱཝཙརམེཝཱཏི? ཏཏྠ ཀཱརཎཾ ཝུཏྟམེཝ. ཀཐཾ ཝུཏྟཾ? ‘‘ཀཱམཏཎྷཱ ཀཱམོ ཨུཏྟརཔདལོཔཏོ, ཨཝཙརཏི ཨེཏྠཱཏི ཨཝཙརཾ, ཀཱམསྶ ཨཝཙརཾ ཀཱམཱཝཙར’’ནྟི. ཨེཏྠ ཧི ཀཱམཏཎྷཱཝིསཡཏཱ ‘‘ཀཱམཱཝཙརབྷཱཝསྶ ཀཱརཎཾ’’ ཝུཏྟཱ ཡཐཱ རཱུཔཱརཱུཔཏཎྷཱཝིསཡཏཱ ‘‘རཱུཔཱརཱུཔཱཝཙརབྷཱཝསྶ’’. ཨེཀཾསེན ཙེཏཾ ཨེཝཾ ཨིཙྪིཏབྦཾ. ཨཉྙཐཱ བྱཱཔིལཀྑཎཾ ན སིཡཱ. ཡདི ཧི ཨཱལམྦིཏབྦདྷམྨཝསེན བྷཱུམིཝཝཏྠཱནཾ ཀརེཡྻ, ཨེཝཾ སཏི ཨནཱརམྨཎཱནཾ སངྒཧོ ན སིཡཱ. ཨཐ ཝིཔཱཀདཱནཝསེན, ཨེཝམྤི ཨཝིཔཱཀཱནཾ སངྒཧོ ན སིཡཱ. ཏསྨཱ ཨཱལམྦཎདྷམྨཝསེན པརིཡཱཔནྣཱནཾ སཱ ཀཱཏབྦཱ, ཨཔརིཡཱཔནྣཱནཾ པན ལོཀཏོ ཨུཏྟིཎྞཏཱཡ ལོཀུཏྟརཏཱ, ཨུཏྟརིཏརཱབྷཱཝཏོ ཨནུཏྟརཏཱ ཙ ཝེདིཏབྦཱ.

པརིཡཱཔནྣཱཏི ¶ ཙ པརིཙྪེདཀཱརིཀཱཡ ཏཎྷཱཡ པརིཙྪིཛྫ ཨཱཔནྣཱ, གཧིཏཱཏི ཨཏྠོ. ནནུ ཙེཏྠ ཀཱམཏཎྷཱ ཀཏམཱ? ཀཱམཱཝཙརདྷམྨཱརམྨཎཱ ཏཎྷཱ, ཀཱམཱཝཙརདྷམྨཱ ཀཏམེ? ཀཱམཏཎྷཱཝིསཡཱཏི ཨིཏརེཏརསནྣིསྶཡཏཱདོསོཏི? ནཡིདམེཝཾ ཨཝཱིཙིཨཱདིཨེཀཨཱདསོཀཱསནིནྣཏཱཡ ཀཉྩི ཏཎྷཾ ཀཱམཏཎྷཱབྷཱཝེན གཧེཏྭཱ ཏཾསབྷཱཝཱཡ ཏཎྷཱཡ ཝིསཡབྷཱཝེན ¶ ཀཱམཱཝཙརདྷམྨཱནཾ ཨུཔལཀྑིཏབྦཏྟཱ. ནིཀྑེཔཀཎྜེཔི (དྷ. ས. ༩༨༥ ཨཱདཡོ) ‘‘ཨེཏྠཱཝཙརཱ’’ཏི ཝཙནཾ ཨཝཱིཙིཔརནིམྨིཏཔརིཙྪིནྣོཀཱསཱཡ ཀཱམཏཎྷཱཡ ཝིསཡབྷཱཝཾ སནྡྷཱཡ ཝུཏྟནྟི གཧེཏབྦཾ. ཏདོཀཱསཏཱ ཙ ཏཎྷཱཡ ཏནྣིནྣཏཱཡ ཝེདིཏབྦཱ.

མཱུལཏོ ཏིཝིདྷནྟི ཏཱིཎི ཨཀུསལམཱུལཱནི ལོབྷཱདཱིནི, ཏེསཾ ཝསེན ཏཾསཧིཏམྤི ཏིཝིདྷནྟི ཨཏྠོ. ཏཱནི ཧི སུཔྤཏིཊྛིཏབྷཱཝཀཱརཎཏྟཱ མཱུལམིཝཱཏི མཱུལཱནི, ལོབྷོ མཱུལཾ ཨེཏསྶཱཏི ལོབྷམཱུལཾ. ཨསཱདྷཱརཎེན ནིདྡེསོ ཡཐཱ བྷེརིསདྡོ, ཡཝངྐུརོཏི. ཏཐཱ དོསམཱུལཾ. མོཧོ ཨེཝ མཱུལཾ ཨིམསྶ, ནཱཉྙནྟི མོཧམཱུལཾ.

སོམནསྶུཔེཀྑཱདིཊྛིགཏསངྑཱརབྷེདཏོཏི སོམནསྶུཔེཀྑཱབྷེདཏོ དིཊྛིགཏབྷེདཏོ སངྑཱརབྷེདཏོཏི པཙྩེཀཾ བྷེདསདྡོ ཡོཛེཏབྦོ. ཡདེཏྠ ཝཏྟབྦཾ, ཏཾ ཧེཊྛཱ ཝུཏྟནཡམེཝ. དིཊྛིགཏསམྤཡུཏྟནྟི དིཊྛིཡེཝ དིཊྛིགཏཾ ‘‘གཱུཐགཏཾ, མུཏྟགཏ’’ནྟི (མ. ནི. ༢.༡༡༩; ཨ. ནི. ༩.༡༡) ཡཐཱ. ཨཐ ཝཱ ཝིཔརིཡེསགྒཱཧཏཱཡ དིཊྛིཡཱ གཏམེཝ, ན ཨེཏྠ གནྟབྦཝཏྠུ ཏཐཱ སབྷཱཝནྟི དིཊྛིགཏཾ. ཏཡིདཾ ‘‘ཨིདམེཝ སཙྩཾ, མོགྷམཉྙ’’ནྟི (མ. ནི. ༢.༡༨༧, ༢༠༢, ༢༠༣, ༤༢༧; ༣.༢༧-༢༩) ཨབྷིནིཝེསབྷཱཝཏོ ལོབྷེནེཝ སདྡྷིཾ པཝཏྟཏི, ན དོསེན.

ཡདཱཧཱིཏིཨཱདི ལོབྷམཱུལཙིཏྟཱནཾ པཝཏྟིཨཱཀཱརདསྶནཾ. མིཙྪཱདིཊྛིནྟི ཨུཙྪེདདིཊྛིཨཱདིམིཙྪཱདིཊྛིཾ. ཏཱཡ ཧི ཝིཔལླཏྠཙིཏྟཱ སཏྟཱ ‘‘ཨེཏཱཝཀོ ཛཱིཝཝིསཡོ ཡཱཝ ཨིནྡྲིཡགོཙརོ’’ཏི པརལོཀཾ པཊིཀྑིཔིཏྭཱ ‘‘ནཏྠི ཀཱམེསུ ཨཱདཱིནཝོ’’ཏི ཡཐཱ ཏཐཱ ཀཱམེསུ པཱཏབྱཏཾ ཨཱཔཛྫནྟི. ཨཱདི-སདྡེན ‘‘ཨེས པནྠོ པགེཝ ཝིཧིཏོ དེཝཡཱནེ, ཡེན ཡནྟི པུཏྟཝནྟོ ཝིསོཀཱ. ཏཾ པསྶནྟི པསཝོ, པཀྑིནོ ཙ, ཏེན ཏེ མཱཏརིཔི མིཐུནཾ ཙརནྟཱི’’ཏིཨཱདིནཱ ནཡེན པུཏྟམུཁདསྶནཾ སགྒམོཀྑམགྒོཏི ཨེཝམཱདིཀཾ མིཙྪཱདིཊྛིཾ སངྒཎྷཱཏི.

ཀཱམེ ¶ ཝཱཏི ཨེཏྠ ཝཱ-སདྡོ ཨནིཡམཏྠོ, ཏེན བྲཱཧྨཎཱནཾ སུཝཎྞཧརཎམེཝ ཨདིནྣཱདཱནེ སཱཝཛྫཾ, ཨིཏརཾ ཨནཝཛྫཾ. གརཱུནཾ, གུནྣཾ, ཨཏྟནོ, ཛཱིཝིཏསྶ, ཝིཝཱཧསྶ ཙ ཨཏྠཱཡ མུསཱཝཱདོ ཨནཝཛྫོ, ཨིཏརོ སཱཝཛྫོ. གརུཨཱདཱིནཾ ཨཏྠཱཡ པེསུཉྙཧརཎཾ ཨནཝཛྫཾ, ཨིཏརཾ སཱཝཛྫཾ. བྷཱརཏཡུདྡྷསཱིཏཱཧརཎཱདིཀཐཱ པཱཔཝཱུཔསམཱཡ ཧོཏཱིཏི ཨེཝམཱདིཀེ མིཙྪཱགཱཧེ སངྒཎྷཱཏི. དིཊྛམངྒལཱདཱིནཱིཏི དིཊྛསུཏམུཏམངྒལཱནི. སབྷཱཝཏིཀྑེནཱཏི ལོབྷསྶ, མིཙྪཱབྷིནིཝེསསྶ ¶ ཝཱ ཝསེན སརསེནེཝ ཏིཁིཎེན ཀུརཱུརེན. མནྡེནཱཏི དནྡྷེན ཨཏིཁིཎེན. ཏཱདིསཾ པན ཨཏྟནོ, པརསྶ ཝཱ སམུསྶཱཧནེན པཝཏྟཏཱིཏི ཨཱཧ ‘‘སམུསྶཱཧིཏེནཱ’’ཏི. པརབྷཎྜཾ ཝཱ ཧརཏཱིཏི ཝཱ-སདྡེན ཏཐཱཔཝཏྟནཀམུསཱཝཱདཱདཱིནམྤི སངྒཧོ དཊྛབྦོ. ཀཱམཱནཾ ཝཱ ཨནུབྷུཡྻམཱནཱནཾ. ཝཱ-སདྡེན པརསནྟཀསྶ ཝཱ ཨཡཐཱདྷིཔྤེཏཏཱཡ ཡཾ ལདྡྷཾ, ཏཾ གཧེཏབྦནྟི གཧཎཱདིཀཾ སངྒཎྷཱཏི.

དུཝིདྷམེཝ ཧོཏི སམྤཡུཏྟདྷམྨཝསེན བྷེདཱབྷཱཝཏོ. ཡདི ཨེཝཾ, ཀསྨཱ ‘‘དོམནསྶསཧགཏཾ པཊིགྷསམྤཡུཏྟ’’ནྟི ཝུཏྟནྟི? ཨསཱདྷཱརཎདྷམྨེཧི ཏསྶ ཙིཏྟསྶ ཨུཔལཀྑཎཏྠཾ. པཱཎཱཏིཔཱཏཱདཱིསཱུཏི པཱཎཱཏིཔཱཏནཱདཱིསུ. ཨཱདི-སདྡེན ཨདིནྣཱདཱནམུསཱཝཱདཔེསུཉྙཕརུསསམྥཔྤལཱཔབྱཱཔཱདེ སངྒཎྷཱཏི. སབྷཱཝཏིཀྑཾ ཧུཏྭཱ པཝཏྟམཱནཾ ཙིཏྟཾ ཨསངྑཱརམེཝ ཧོཏི, ཨིཏརཾ སསངྑཱརནྟི ཨདྷིཔྤཱཡེནཱཧ ‘‘ཏིཀྑམནྡཔྤཝཏྟིཀཱལེ’’ཏི. མནྡཾ པན ཧུཏྭཱ པཝཏྟམཱནཾ ཨེཀཾསེན སསངྑཱརམེཝཱཏི ན སཀྐཱ ཝིཉྙཱཏུཾ. ཡཾ སསངྑཱརེན སཔྤཡོགེན པཝཏྟཏི, ཏཾ མནྡམེཝ ཧོཏཱིཏི ཀཏྭཱ ཏཐཱཝུཏྟནྟི དཊྛབྦཾ.

མོཧེཀཧེཏུཀཾ ཙིཏྟཾ མཱུལནྟརཝིརཧཏོ ཨཏིམཱུལ༹ྷཾ, ཝིཙིཀིཙྪུདྡྷཙྩཡོགཏོ ཙཉྩལཉྩཱཏི ཨུཔེཀྑཱསཧགཏམེཝ ཧོཏི, ན ཏསྶ ཀདཱཙིཔི སབྷཱཝཏིཀྑཏཱ ཨཏྠི. ཨཱརམྨཎེ ཧི སཾསཔྤནཝསེན, ཝིཀྑིཔནཝསེན ཙ པཝཏྟམཱནསྶ ཙིཏྟདྭཡསྶ ཀཱིདིསེ ཀིཙྩེ སབྷཱཝཏིཀྑཏཱཡ, ཨུསྶཱཧེཏབྦཏཱཡ ཝཱ བྷཝིཏབྦཾ, ཏསྨཱ ན ཏཏྠ སངྑཱརབྷེདོ ཨཏྠི. ཨཉྙེསུ ཨཀུསལཙིཏྟེསུ ལབྦྷམཱནམྤི ཨུདྡྷཙྩཾ ཝིསེསཏོ ཨེཏྠེཝ བལཝཾ, ཏཏོ ཨེཝ སམྤཡུཏྟདྷམྨེསུ པདྷཱནཾ ཧུཏྭཱ པཝཏྟཏཱིཏི ཨིདམེཝ ཨུདྡྷཙྩེན ཝིསེསེཏྭཱ ཝུཏྟཾ ‘‘ཨུདྡྷཙྩསམྤཡུཏྟ’’ནྟི. ཏཐཱ ཧི པཱལི༹ཡཾ (དྷ. ས. ༤༢༧) ཨིདྷ སརཱུཔཏོ ¶ ཨུདྡྷཙྩཾ ཨཱགཏཾ, ཨེཝཾ ཨསཱདྷཱརཎཔདྷཱནདྷམྨཝསེན མོཧམཱུལཾ ‘‘ཝིཙིཀིཙྪཱསམྤཡུཏྟཾ, ཨུདྡྷཙྩསམྤཡུཏྟ’’ནྟི དུཝིདྷཾ ཝུཏྟནྟི དཊྛབྦཾ. ཨསནྣིཊྛཱནཾ སཾསཡོ. ཝིཀྑེཔོ ཨཝཱུཔསམོ, བྷནྟཏཱཏི ཨཏྠོ.

ཏཡིདཾ དྭཱདསཝིདྷམྤི ཨཀུསལཙིཏྟཾ ཚསུ ཨཱརམྨཎེསུ ཡཾ ཝཱ ཏཾ ཝཱ ཨཱལམྦིཏྭཱ ཨུཔེཀྑཱསཧགཏཱཧེཏུཀཀིརིཡཱམནོཝིཉྙཱཎདྷཱཏཱནནྟརཾ ཀཱཡདྭཱརཱདཱིཧི ཏཱིཧི དྭཱརེཧི ཀཱཡཀམྨཱདིཝསེན ཡཐཱརཧཾ པཱཎཱཏིཔཱཏཱདིཀམྨཔཐཝསེན ཙེཝ ཀམྨཝསེན ཙ ཨུཔྤཛྫཏཱིཏི ཝེདིཏབྦཾ.

ཏཏྠ ¶ ཋཔེཏྭཱ ཨུདྡྷཙྩསཧགཏཾ སེསཾ ཨེཀཱདསཝིདྷམྤི ཙཏཱུསུཔི ཨཔཱཡེསུ པཊིསནྡྷིཾ དེཏི, པཝཏྟིཝིཔཱཀཾ སུགཏིཡམྤི. ཨུདྡྷཙྩསཧགཏཾ པན པཝཏྟིཝིཔཱཀམེཝཱཏི. ཨེཏྠཱཧ – ཀིཾ པན ཀཱརཎཾ སབྦདུབྦལཾ ཝིཙིཀིཙྪཱསམྤཡུཏྟཾ པཊིསནྡྷིཾ དེཏི, ཨདྷིམོཀྑསབྦྷཱཝཏོ ཏཏོ བལཝནྟམྤི ཨུདྡྷཙྩསཧགཏཾ ན དེཏཱིཏི? དསྶནེན པཧཱཏབྦེསུ ཨཝུཏྟཏྟཱ. ཨིདཾ ཧི པཊིསནྡྷིཾ དེནྟཾ ཨཔཱཡེསུ དདེཡྻ, ཨཔཱཡགམནཱིཡཉྩ དསྶནཔཧཱཏབྦནྟི ཏཏྠ ཝུཙྩེཡྻ, ན ཙ ཝུཏྟཾ. ཏསྨཱ པཊིསནྡྷིཾ ན དེཏི, པཝཏྟིཝིཔཱཀདཱནཾ པནསྶ ན སཀྐཱ པཊིཀྑིཔིཏུཾ. པཊིསམྦྷིདཱཝིབྷངྒེ ‘‘ཨུདྡྷཙྩསཧགཏེ ཉཱཎཾ དྷམྨཔཊིསམྦྷིདཱ, ཏསྶ ཝིཔཱཀེ ཉཱཎཾ ཨཏྠཔཊིསམྦྷིདཱ’’ཏི (ཝིབྷ. ༧༣༠ ཨཏྠཏོ སམཱནཾ) ཝཙནཏོ.

ཨཔརེ པནཱཧུ – པུཐུཛྫནསྶ ཨུཔྤཛྫམཱནཾ ཨུདྡྷཙྩསཧགཏཾ དསྶནཔྤཧཱཏབྦསཧཱཡསབྦྷཱཝཏོ ཨུབྷཡཝིཔཱཀམྤི དེཏི, ན སེཀྑསྶ ཏདབྷཱཝཏོཏི. ཨིདམེཏྠ ཝིཙཱརེཏབྦཾ, ཡསྶ ཝིཔཱཀདཱནཾ ཝུཏྟཾ, ཀིཾ ཏཾ བྷཱཝནཱཡ པཧཱཏབྦཾ, ཨུདཱཧུ ནོཏི? ཀིཉྩེཏྠ – ཡདི ཏཱཝ བྷཱཝནཱཡ པཧཱཏབྦཾ, པཊྛཱནེ བྷཱཝནཱཡ པཧཱཏབྦསྶ ནཱནཱཀྑཎིཀཀམྨཔཙྩཡབྷཱཝོ ཝཏྟབྦོ སིཡཱ. ཨཐ ན བྷཱཝནཱཡ པཧཱཏབྦཾ, དསྶནེནཔཧཱཏབྦཏྟིཀེ ‘‘ནེཝདསྶནེནནབྷཱཝནཱཡཔཧཱཏབྦ’’མིཙྩསྶ ཝིབྷངྒེ ཝཏྟབྦཾ སིཡཱ. ཡདི ཏབྦིརུདྡྷསབྷཱཝཏཱཡ ཏཏྠ ན ཝུཙྩེཡྻ, ཨེཝམྤི ཏསྨིཾ ཏིཀེ ཏསྶ ནཝཏྟབྦཏཱ ཨཱཔཛྫཏཱིཏི? ནཱཔཛྫཏི, ཀིཾ ཀཱརཎཾ? ཙིཏྟུཔྤཱདཀཎྜེ (དྷ. ས. ༣༦༥ ཨཱདཡོ) ཨཱགཏཱནཾ དྭཱདསནྣཾ ཨཀུསལཙིཏྟུཔྤཱདཱནཾ དྭཱིཧི པདེཧི སངྒཧིཏཏྟཱ ཝིབྷཛིཏྭཱ དསྶེཏབྦསྶ ནིཡོགཏོ ཀསྶཙི ཙིཏྟུཔྤཱདསྶ ཨབྷཱཝཱ, ཡཐཱ ཨུཔྤནྣཏྟིཀེ ཨཏཱིཏཱདཱིནཾ ནཝཏྟབྦཏཱ ན ཝུཏྟཱ, ཨེཝམེཏསྶཱཔི. ཨཐ ཝཱ བྷཱཝནཱཡ པཧཱཏུཾ ཨསཀྐུཎེཡྻསྶཱཔི ཏསྶ པུཐུཛྫནེ ཝཏྟམཱནསྶ ¶ བྷཱཝནཱཡ པཧཱཏབྦསབྷཱཝསཱམཉྙཏོ, སཱཝཛྫཏོ ཙ བྷཱཝནཱཡ པཧཱཏབྦཔརིཡཱཡོ ཝིཛྫཏཱིཏི ནཏྠི ནཝཏྟབྦཏཱཔསངྒདོསོ. ནིཔྤརིཡཱཡེན ཙ ན བྷཱཝནཱཡ པཧཱཏབྦནྟི ཏསྶ ཝསེན ནཱནཱཀྑཎིཀཀམྨཔཙྩཡབྷཱཝོཔི ན ཝུཏྟོ. དསྶནཔཧཱཏབྦཔཙྩཡསྶཱཔི ཨུདྡྷཙྩསཧགཏསྶ སཧཱཡཝེཀལླམཏྟམེཝ དསྶནེན ཀཏཾ, ན ཀོཙིཔི བྷཱཝོ ཨནུཔྤཱདདྷམྨཏཾ ཏསྶ ཨཱཔཱདིཏོཏི ཨེཀནྟེན བྷཱཝནཱཡ པཧཱཏབྦཏཱ ཝུཏྟཱ. ཨཐ ཝཱ ཨཔཱཡགམནཱིཡབྷཱཝཱཔེཀྑཾ དསྶནཔྤཧཱཏབྦཝཙནནྟི ཏདབྷཱཝཏོ ཏཾ ཝིབྷཛནཾ ཝུཏྟནྟི.

༤༥༤. ‘‘ཝིཉྙཱཎ’’ནྟི པདཾ ཨཔེཀྑིཏྭཱ ‘‘ཨབྱཱཀཏཾ ཝིཔཱཀ’’ནྟི ཨཱདིཀོ ནཔུཾསཀནིདྡེསོ, ཏཏོ ཨེཝ ཨདྷིཀཏཱབྱཱཀཏཱཔེཀྑཱཡ དུཝིདྷནྟི ཝུཏྟཾ. ཨཉྙཐཱ རཱུཔནིབྦཱནཱནམྤི ཨབྱཱཀཏབྷཱཝཏོ ¶ ཏཾ ཙཏུབྦིདྷནྟི ཝཏྟབྦཾ སིཡཱ. ཝིཔཱཀསྶ ཀཱམཱཝཙརཱདིབྷཱཝོ ཀུསལེ ཝུཏྟནཡེནེཝ ཝེདིཏབྦོ. ཨཧེཏུཀཏཱ སཧེཏུཀཏཱ ཝིཡ སམྤཡུཏྟཧེཏུཝསེན, ན ནིབྦཏྟཀཧེཏུཝསེན. ཝིཔཱཀསྶ ཧི སཧེཏུཀཏཱ སཧེཏུཀཀམྨཝསེན སིཛ྄ཛྷམཱནཱཔི སམྤཡུཏྟཧེཏུཝསེནེཝ ཝུཙྩཏི, ཨཉྙཐཱ ཨཧེཏུཀཱནམྤི སཧེཏུཀཏཱ ཨཱཔཛྫེཡྻཱཏི. ཀསྨཱ པན སཧེཏུཀསྶ ཨཧེཏུཀོ ཝིཔཱཀོ ཧོཏཱིཏི? ཏཏྠ ཀཱརཎཾ ཝུཏྟམེཝ. ཀིཉྩ ཨཱརམྨཎཱབྷིནིཔཱཏམཏྟེསུ པཉྩསུ ཝིཉྙཱཎེསུ ཡཐཱ ཨལོབྷཱདིསམྤཡོགོ ན སམྦྷཝཏི, ཨེཝཾ མནྡཏརམནྡཀིཙྩེསུ སམྤཊིཙྪནསནྟཱིརཎེསཱུཏི ཧེཏཱུནཾ ཨུཔྤཏྟིཡཱ ཨསམྦྷཝཏོཔི ནེསཾ ཨཧེཏུཀཏཱ དཊྛབྦཱ.

མནོཝིཉྙཱཎཏོ ཨུཔྤཛྫནཝིསིཊྛམནནཀིཙྩཱནཾ ཨབྷཱཝཏོ མནོམཏྟཱ དྷཱཏུ མནོདྷཱཏུ.

ཙཀྑུསནྣིསྶིཏཾ ཧུཏྭཱ རཱུཔསྶ ཝིཛཱནནཾ ལཀྑཎཾ ཨེཏསྶཱཏི ཙཀྑུསནྣིསྶིཏརཱུཔཝིཛཱནནལཀྑཎཾ. ཏཏྠ ཙཀྑུསནྣིསྶིཏཝཙནེན རཱུཔཱརམྨཎཾ ཨཉྙཾ ཝིཉྙཱཎཾ ནིཝཏྟེཏི. ཝིཛཱནནགྒཧཎེན ཙཀྑུསནྣིསྶིཏེ ཕསྶཱདིཀེ ནིཝཏྟེཏི. ཙཀྑུརཱུཔགྒཧཎེན ནིསྶཡཏོ, ཨཱརམྨཎཏོ ཙ ཝིཉྙཱཎཾ ཝིབྷཱཝེཏི ཨུབྷཡཱདྷཱིནཝུཏྟིཀཏྟཱ. ཡདི ཧི ཙཀྑུ ནཱམ ན སིཡཱ, ཨནྡྷཱཔི རཱུཔཾ པསྶེཡྻུཾ, ན ཙ པསྶནྟི. ཡདི ཙ ནཱིལཱདིརཱུཔཾ ནཱམ ན སིཡཱ, དེསཱདིནིཡམེན ན བྷཝིཏབྦཾ, ཨཏྠེཝ ཙ ནིཡམོ, ཨེཀནྟསཱརམྨཎཏཱ ཙ ཙིཏྟསྶ ཝུཏྟཱཏི ‘‘ཨཱརམྨཎེན ཝིནཱ ནཱིལཱདིཨཱབྷཱསཾ ཙིཏྟཾ པཝཏྟཏཱི’’ཏི ཨེཝཾ ¶ པཝཏྟོ ཝཱདོ མིཙྪཱཝཱདོཏི ཝེདིཏབྦཾ. ཏེནཱཧ བྷགཝཱ ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎ’’ནྟིཨཱདི (མ. ནི. ༡.༢༠༤, ༤༠༠; ༣.༤༢༡, ༤༢༥; སཾ. ནི. ༢.༤༤; ༤.༦༠; ཀཐཱ. ༤༦༥).

ཀསྨཱ པནེཏྠ ཝཙནབྷེདོ ཀཏོཏི? ཨེཀམྤི ཙཀྑུ ཝིཉྙཱཎསྶ པཙྩཡོ ཧོཏི, རཱུཔཾ པན ཨནེཀམེཝ སཾཧཏནྟི ཨིམསྶ ཝིསེསསྶ དསྶནཏྠཾ. ཀིཾ པན ཀཱརཎཾ ཨེཀམྤི ཙཀྑུ ཝིཉྙཱཎསྶ པཙྩཡོ ཧོཏི, རཱུཔཾ པན ཨནེཀམེཝཱཏི? པཙྩཡབྷཱཝཝིསེསཏོ. ཙཀྑུ ཧི ཙཀྑུཝིཉྙཱཎསྶ ནིསྶཡཔུརེཛཱཏཨིནྡྲིཡཝིཔྤཡུཏྟཔཙྩཡེཧི པཙྩཡོ ཧོནྟཾ ཨཏྠིབྷཱཝེནེཝ ཧོཏི, ཏསྨིཾ སཏི ཏསྶ བྷཱཝཏོ, ཨསཏི ཨབྷཱཝཏོ. ཡཏོ ཏཾ ཨཏྠིཨཝིགཏཔཙྩཡེཧིསྶ པཙྩཡོ ཧོཏཱིཏི ཝུཙྩཏི, ཏཾནིསྶཡཏཱ ཙསྶ ན ཨེཀདེསེན ཨལླཱིཡནཝསེན ཨིཙྪིཏབྦཱ ཨརཱུཔབྷཱཝཏོ, ཨཐ ཁོ གརུརཱཛཱདཱིསུ སིསྶརཱཛཔུརིསཱདཱིནཾ ཝིཡ ཏཔྤཊིབདྡྷཝུཏྟིཏཱཡ. ཨིཏརེ པན པཙྩཡཱ ཏེན ¶ ཏེན ཝིསེསེན ཝེདིཏབྦཱ. སྭཱཡཾ པཙྩཡབྷཱཝོ ན ཨེཀསྨིཾ ན སམྦྷཝཏཱིཏི ཨེཀམྤི ཙཀྑུ ཝིཉྙཱཎསྶ པཙྩཡོ ཧོཏཱིཏི ‘‘ཙཀྑུཉྩ པཊིཙྩཱ’’ཏི ཨེཀཝཙནེན ནིདྡེསོ ཀཏོ.

རཱུཔཾ པན ཡདིཔི ཙཀྑུ ཝིཡ པུརེཛཱཏཨཏྠིཨཝིགཏཔཙྩཡེཧི པཙྩཡོ ཧོཏི པུརེཏརཾ ཧུཏྭཱ ཝིཛྫམཱནཀྑཎེཡེཝ ཨུཔཀཱརཀཏྟཱ, ཏཐཱཔི ཨནེཀམེཝ སཾཧཏཾ ཧུཏྭཱ པཙྩཡོ ཧོཏི ཨཱརམྨཎབྷཱཝཏོ. ཡཉྷི པཙྩཡདྷམྨཾ སབྷཱཝབྷཱུཏཾ, པརིཀཔྤིཏཱཀཱརམཏྟཾ ཝཱ ཝིཉྙཱཎཾ ཝིབྷཱཝེནྟཾ པཝཏྟཏི, ཏདཉྙེསཉྩ སཏིཔི པཙྩཡབྷཱཝེ སོ ཏསྶ སཱརམྨཎསབྷཱཝཏཱཡ ཡཾ ཀིཉྩི ཨནཱལམྦིཏྭཱ པཝཏྟིཏུཾ ཨསམཏྠསྶ ཨོལུབྦྷ པཝཏྟིཀཱརཎཏཱཡ ཨཱལམྦནཱིཡཏོ ཨཱརམྨཎཾ ནཱམ. ཏསྶ ཡསྨཱ ཡཐཱ ཏཐཱ སབྷཱཝཱུཔལདྡྷིཝསེན ཨཱརམྨཎཔཙྩཡལཱབྷོ, ཏསྨཱ ཙཀྑུཝིཉྙཱཎཾ རཱུཔཾ ཨཱརབྦྷ པཝཏྟམཱནཾ ཏསྶ སབྷཱཝཾ ཝིབྷཱཝེནྟམེཝ པཝཏྟཏི. སཱ ཙསྶ ཨིནྡྲིཡཱདྷཱིནཝུཏྟིཀསྶ ཨཱརམྨཎསབྷཱཝཱུཔལདྡྷི, ན ཨེཀདྭིཀལཱཔགཏཝཎྞཝསེན ཧོཏི, ནཱཔི ཀཏིཔཡཀལཱཔགཏཝཎྞཝསེན, ཨཐ ཁོ ཨཱབྷོགཱནུརཱུཔཾ ཨཱཔཱཐགཏཝཎྞཝསེནཱཏི ཨནེཀམེཝ རཱུཔཾ སཾཧཙྩཀཱརིཏཱཡ ཝིཉྙཱཎསྶ པཙྩཡོ ཧོཏཱིཏི དསྶེནྟོ བྷགཝཱ ‘‘རཱུཔེ ཙཱ’’ཏི བཧུཝཙནེན ནིདྡིསི.

ཡཾ ¶ པན ‘‘རཱུཔཱཡཏནཾ ཙཀྑུཝིཉྙཱཎདྷཱཏུཡཱ ཏཾསམྤཡུཏྟཀཱནཉྩ དྷམྨཱནཾ ཨཱརམྨཎཔཙྩཡེན པཙྩཡོ’’ཏི (པཊྛཱ. ༡.༡.༢) ཝུཏྟཾ, ཏཾ ཀཐནྟི? ཏམྤི ཡཱདིསཾ རཱུཔཱཡཏནཾ ཙཀྑུཝིཉྙཱཎསྶ ཨཱརམྨཎཔཙྩཡེན པཙྩཡོ ཧོཏི, ཏཱདིསམེཝ སནྡྷཱཡ ཝུཏྟཾ. ཀཱིདིསཾ པན ཏནྟི? སམུདིཏནྟི པཱཀཊོཡམཏྠོ. ཨེཝཉྩ ཀཏྭཱ ཡདེཀེ ཝདནྟི ‘‘ཨཱཡཏནསལླཀྑཎཝསེན ཙཀྑུཝིཉྙཱཎཱདཡོ སལླཀྑཎཱརམྨཎཱ, ན དབྦསལླཀྑཎཝསེནཱ’’ཏི, ཏམྤི ཡུཏྟམེཝ ཧོཏི. ན ཙེཏྠ སམུདཱཡཱརམྨཎཏཱ ཨཱསངྐིཏབྦཱ སམུདཱཡཱབྷོགསྶེཝཱབྷཱཝཏོ. སམུདིཏཱ པན ཝཎྞདྷམྨཱ ཨཱརམྨཎཔཙྩཡཱ ཧོནྟི. ཀཐཾ པན པཙྩེཀཾ ཨསམཏྠཱ སམུདིཏཱ ཨཱརམྨཎཱ པཙྩཡཱ ཧོནྟི, ན ཧི པཙྩེཀཾ དཊྛུཾ ཨསཀྐོནྟཱ ཨནྡྷཱ སམུདིཏཱ པསྶནྟཱིཏི? ནཡིདམེཀནྟིཀཾ ཝིསུཾ ཝིསུཾ ཨསམཏྠཱནཾ སིཝིཀཱཝཧནཱདཱིསུ སམཏྠཏཱཡ དསྶནཏོ. ཀེསཱདཱིནཉྩ ཡསྨིཾ ཋཱནེ ཋིཏཱནཾ པཙྩེཀཾ ཝཎྞཾ གཧེཏུཾ ན སཀྐཱ, ཏསྨིཾཡེཝ ཋཱནེ སམུདིཏཱནཾ ཝཎྞཾ གཧེཏུཾ སཀྐཱཏི བྷིཡྻོཔི ཏེསཾ སཾཧཙྩཀཱརིཏཱ པརིབྱཏྟཱ. ཨེཏེན ཙཀྑུཝིཉྙཱཎསྶ པརམཱཎུརཱུཔཾ ཨཱརམྨཎཾ, ཨུདཱཧུ ཏཾསམུདཱཡོཏིཨཱདིཀཱ ཙོདནཱ པཊིཀྑིཏྟཱཏི ཝེདིཏབྦཱ. ‘‘སོཏཉྩ པཊིཙྩ སདྡེ ཙཱ’’ཏིཨཱདཱིསུཔི (མ. ནི. ༡.༢༠༤, ༤༠༠; ༣.༤༢༡, ༤༢༥, ༤༢༦) ཨེསེཝ ¶ ནཡོ. ཨེཝཾ ཨུབྷཡཱདྷཱིནཝུཏྟིཀཏཱཡ ཙཀྑུཝིཉྙཱཎསྶ ནིསྶཡཏོ, ཨཱརམྨཎཏོ ཙ ཝིབྷཱཝནཾ ཀཏཾ, ཨེཝཾ སོཏཝིཉྙཱཎཱདཱིསུཔི ཡཐཱརཧཾ ཝཏྟབྦཾ.

རཱུཔམཏྟཱརམྨཎརསནྟི རཱུཔཱཡཏནམཏྟསྶེཝ ཨཱརམྨཎཀརཎརསཾ. མཏྟསདྡེན ཡཐཱ ཨཱརམྨཎནྟརཾ ནིཝཏྟེཏི, ཨེཝཾ རཱུཔཱཡཏནེཔི ལབྦྷམཱནེ ཨེཀཙྩེ ཝིསེསེ ནིཝཏྟེཏི. ན ཧི ཙཀྑུཝིཉྙཱཎཾ ཝཎྞམཏྟཏོ ཨཉྙཾ ཀིཉྩི ཝིསེསཾ ཏཏྠ གཧེཏུཾ སཀྐོཏི. ཏེནཱཧ བྷགཝཱ ‘‘པཉྩཧི ཝིཉྙཱཎེཧི ན ཀིཉྩི དྷམྨཾ པཊིཝིཛཱནཱཏི ཨཉྙཏྲ ཨབྷིནིཔཱཏམཏྟཱ’’ཏི. ཙཀྑུཝིཉྙཱཎཾ ཨུཔྤཛྫམཱནཾ རཱུཔཱརམྨཎེ ཨེཝ ཨུཔྤཛྫནཏོ ཏདབྷིམུཁབྷཱཝེན གཡ྄ཧཏཱིཏི ཝུཏྟཾ ‘‘རཱུཔཱབྷིམུཁབྷཱཝཔཙྩུཔཊྛཱན’’ནྟི. ཨཏྟནོ ཨནནྟརཾ ཨུཔྤཛྫམཱནཱནཾ ཨརཱུཔདྷམྨཱནཾ སམནནྟརཝིགཏཱ ཨརཱུཔདྷམྨཱ པཝཏྟིཨོཀཱསདཱནེན ཨནནྟརསམནནྟརནཏྠིཝིགཏཔཙྩཡེཧི ཨུཔཀཱརཀཱ ནིསྶཡཱརམྨཎདྷམྨཱ ཝིཡ ཨཱསནྣཀཱརཎནྟི དསྶེནྟོ ཨཱཧ ‘‘རཱུཔཱརམྨཎཱཡ ཀིརིཡམནོདྷཱཏུཡཱ ཨཔགམཔདཊྛཱན’’ནྟི. སོཏཝིཉྙཱཎཱདཱིསུཔི ཝུཏྟནཡེནེཝ ཨཏྠོ ཝེདིཏབྦོ.

ཙཀྑུཝིཉྙཱཎཱདིགཧིཏཾ ¶ རཱུཔཱདིཨཱརམྨཎཾ ཏདནནྟརམེཝ ཨཔརིཔཏནྟཾ ཀཏྭཱ སམྤཊིཙྪནྟཱི གཎྷནྟཱི ཝིཡ ཧོཏཱིཏི ཝུཏྟཾ ‘‘རཱུཔཱདིསམྤཊིཙྪནརསཱ’’ཏི. ཏཐཱབྷཱཝེན སམྤཊིཙྪནབྷཱཝེན པཙྩུཔཏིཊྛཏཱིཏི ཏཐཱབྷཱཝཔཙྩུཔཊྛཱནཱ.

ཚསུ ཨཱརམྨཎེསུ ཀདཱཙི པཉྩནྣཾ, ཏཏོ ཝཱ ཀཏིཔཡཱནཾ ཝིཛཱནནསབྷཱཝཱཔི ཚལཱ༹རམྨཎཝིཛཱནནལཀྑཎཱ ཝུཏྟཱ ཏཾསབྷཱཝཱནཏིཝཏྟནཏོ, ཚསྭེཝ ཝཱ ཨིཏརེསཾ ཨཱརམྨཎཱནཾ ཨནྟོགདྷཏྟཱ. སནྟཱིརཎཱདིཀིཙྩཱཏི སནྟཱིརཎཏདཱརམྨཎཀིཙྩཱ ཝཱ, སནྟཱིརཎཏདཱརམྨཎཔཊིསནྡྷིབྷཝངྒཙུཏིཀིཙྩཱ ཝཱཏི ཨདྷིཔྤཱཡོ. ‘‘ཧདཡཝཏྠུཔདཊྛཱནཱ’’ཏི ཨིདཾ ཨིམཱསཾ དྭིནྣཾ མནོཝིཉྙཱཎདྷཱཏཱུནཾ ཨེཀནྟེནེཝ ཧདཡཝཏྠུསནྣིསྶཡཏཱཡ ཝུཏྟཾ. ཧེཊྛཱ ཝུཏྟནཡེན པན ཏཾཏཾཨནནྟརཱཏཱིཏཝིཉྙཱཎཱཔགམཔདཊྛཱནཱཏིཔི ཝཏྟུཾ ཝཊྚཏིཡེཝ. ཏསྶཱ བྷེདོཏི ཏསྶཱ ཝིཔཱཀམནོཝིཉྙཱཎདྷཱཏུཡཱ ‘‘དུཝིདྷཱ’’ཏི ཝུཏྟཱཡ དུཝིདྷཏཱསངྑཱཏོ བྷེདོ. ཨེཀནྟམིཊྛཱརམྨཎེཏི ཨེཀནྟེནེཝ ཨིཊྛེ ཨཱརམྨཎེ, ཨཏིཝིཡ ཨིཊྛཱརམྨཎེཏི ཨཏྠོ. པཉྩདྭཱརེ ཙེཝ ཛཝནཱཝསཱནེ ཙཱཏི ཨེཏྠ པཉྩདྭཱརེ སམྤཊིཙྪནཝོཊྛབྦནཱནཾ ཨནྟརཱལ༹ཾ ཋཱནཾ, ཨིཏརཏྲ ཛཝནབྷཝངྒཱནནྟི ཨེཝཾ དྭིཋཱནཱ ཧོཏི. ཨིཏརཱཡཔི སནྟཱིརཎཏདཱརམྨཎཀཱལེ ཡཐཱཝུཏྟམེཝ ཋཱནཾ, པཊིསནྡྷིཨཱདིཀཱལེ པན ཙུཏིབྷཝངྒཱནཾ ¶ ཨནྟརཱལ༹ཾ པཊིསནྡྷིཡཱ, པཊིསནྡྷིཨཱཝཛྫནཱནཾ ཏདཱརམྨཎཱཝཛྫནཱནཾ ཛཝནཱཝཛྫནཱནཾ ཝོཊྛབྦནཱཝཛྫནཱནཉྩ ཨནྟརཱལ༹ཾ བྷཝངྒསྶ, ཏདཱརམྨཎཔཊིསནྡྷཱིནཾ ཛཝནཔཊིསནྡྷཱིནཾ ཝཱ ཨནྟརཱལ༹ཾ ཙུཏིཡཱ ཋཱནནྟི ཝེདིཏབྦཾ.

ཚསཱུཏི ཨེཏྠ པུབྦེ ཝུཏྟནཡེནེཝ ཝིབྷཱགོ ཝེདིཏབྦོ. ཀཱཡསྶ ནིསྶཡབྷཱུཏཱནཾ ནཱཏིཨིཊྛཕོཊྛབྦབྷཱུཏཱནཾ པཊིགྷཊྚནཱནིགྷཾསསྶ བལཝབྷཱཝཏོ ཀཱཡཝིཉྙཱཎཾ སུཁསམྤཡུཏྟཾ. ཨུཔཱདཱརཱུཔཱནཾཡེཝ གྷཊྚནཱ དུབྦལཱཏི ཙཀྑུཝིཉྙཱཎཱདཱིནི ཨུཔེཀྑཱསཧགཏཱནི. ཏེནཱཧ ‘‘སེསཾ ཨུཔེཀྑཱཡུཏྟ’’ནྟི. སེསཾ ཚབྦིདྷམྤི.

ཨལོབྷཱདོསཱམོཧཱ ཙེཝ ཨལོབྷཱདོསཱ ཙ ཨལོབྷཱདཡོ, ཏེཧི ཨལོབྷཱདཱིཧི ཝིཔཱཀཧེཏཱུཧི སམྤཡུཏྟཾ ཨལོབྷཱདིཝིཔཱཀཧེཏུསམྤཡུཏྟཾ. ཀཱམཱཝཙརཀུསལཾ ཝིཡ སོམནསྶཱདིབྷེདཏོཏི ཡཐཱ ཀཱམཱཝཙརཾ ཀུསལཾ སོམནསྶུཔེཀྑཱཉཱཎསངྑཱརབྷེདཏོ ཨཊྛཝིདྷཾ, ཨེཝམིདམྤཱིཏི ཨཊྛཝིདྷཏཱཡ སདིསཏཾ དསྶེཏི. ཀཱམཱཝཙརབྷཱཝཏོ ཧཱིནཱདིཏོ, ཡོནཱིསུ ཨུཔྤཏྟིཏོ ཙ སདིསམེཝ, སམྤཡུཏྟདྷམྨཏོ པན ཨཱརམྨཎཏོ, པཝཏྟིཨཱཀཱརཏོ ཙ ཝིསདིསཾ. ཏཐཱ ¶ ཧི ཀུསལཾ ཀམྨདྭཱརཝསེན པཝཏྟཏི, ན ཨིདཾ, ཝིཔཱཀཱནཾ ཨཝིཉྙཏྟིཛནཀཏྟཱ. ཨུཔྤཏྟིདྭཱརཝསེན པན ཨིམསྶཱཔི ཨཏྠེཝ པཝཏྟིབྷེདོ པཉྩདྭཱརམནོདྭཱརེསུ མཧཱཝིཔཱཀཱནཾ ཏདཱརམྨཎཝསེན པཝཏྟིསམྦྷཝཏོ. ཡཐཱ པན ཀུསལཾ གཏིཝསེན པཉྩཝིདྷཾ, ཝིཉྙཱཎཊྛིཏིཝསེན སཏྟཝིདྷཉྩ, ན ཨེཝམིདཾ ཏདེཀདེསེ ཨེཝ ཨུཔྤཛྫནཏོ. ཏཏྠ ཨཱརམྨཎཏོ, ཨེཀཙྩཔཝཏྟིཨཱཀཱརཏོ ཙ ཝིསདིསཏཾ དསྶེཏུཾ ‘‘ཡཐཱ པནཱ’’ཏིཨཱདི ཝུཏྟཾ. ཚསུ ཨཱརམྨཎེསཱུཏི པརིཏྟཱདིཨཏཱིཏཱདིཨཛ྄ཛྷཏྟཱདིཔྤབྷེདེསུ ཚསུ ཨཱརམྨཎེསུ.

ཨཱགམནཱདིཝསེནཱཏི ཨཱགམནཔཙྩཡཝསེན. ཏཏྠ ཨེཀཙྩཱནཾ ཨཱཙརིཡཱནཾ མཏེན མུཁེ ཙལིཏེ ཨཱདཱསཏལེ མུཁནིམིཏྟཾ ཙལནཾ ཝིཡ ཨསངྑཱརསྶ ཀུསལསྶ ཝིཔཱཀོ ཨསངྑཱརོ, སསངྑཱརསྶ ཀུསལསྶ ཝིཔཱཀོ སསངྑཱརོཏི ཨེཝཾ ཨཱགམནཝསེན. ཨེཀཙྩཱནཾ པན ཨཱཙརིཡཱནཾ མཏེན བལཝནྟེཧི ཝིབྷཱུཏེཧི པཙྩཡེཧི ཀམྨཱདཱིཧི ཨུཔྤནྣོ ཨསངྑཱརོ, དུབྦལེཧི སསངྑཱརོཏི ཨེཝཾ པཙྩཡཝསེན. སམྤཡུཏྟདྷམྨཱནནྟི པཱལི༹ཡཾ སརཱུཔཏོ ཨཱགཏསམྤཡུཏྟདྷམྨཱནཾ. ཏེསཾ ཧི ཝསེན ཀུསལཏོ ཝིཔཱཀསྶ ཝིསེསཱབྷཱཝོ. ནིརུསྶཱཧནྟི ཨེཏྠ ཨུསྶཱཧོ ནཱམ ཨནུཔཙྪིནྣཱཝིཛྫཱཏཎྷཱམཱནསནྟཱནེ ¶ ཝིཔཱཀུཔྤཱདནསམཏྠཏཱསངྑཱཏོ བྱཱཔཱརོ, སོ ཝིཔཱཀེསུ ནཏྠཱིཏི ཏཾ ནིརུསྶཱཧཾ. ཀུསལེསུ པན ཨབྷིཉྙཱཝསཔཝཏྟེསུཔི ཨཏྠེཝཱཏི ཏཾ སཨུསྶཱཧཾ.

ལོབྷཱདཱིནཾ ཨེཀནྟསཱཝཛྫཏཱཡ ཨཡོནིསོམནསིཀཱརཧེཏུཀཱནཾ ནཏྠི ཝིཔཱཀབྷཱཝོ, ཨལོབྷཱདཱིནམྤི ཨེཀནྟཨནཝཛྫསབྷཱཝཱནཾ ཀཱརཎསྶ ཏབྦིདྷུརཏཱཡ ནཏྠེཝ ཨཀུསལཝིཔཱཀབྷཱཝོཏི ཨཱཧ ‘‘ཨཀུསལཝིཔཱཀཾ ཨཧེཏུཀམེཝཱ’’ཏི. ཡཐཱ ཨཏིཨིཊྛེ, ཨིཊྛམཛ྄ཛྷཏྟེ ཙ ཨཱརམྨཎེ ཝེདནཱབྷེདསབྦྷཱཝཏོ ཀུསལཝིཔཱཀམནོཝིཉྙཱཎདྷཱཏུ དུཝིདྷཱ ཧོཏི སོམནསྶསཧགཏཱ, ཨུཔེཀྑཱསཧགཏཱཏི, ན ཨེཝཾ ཨཏིཨནིཊྛེ, ཨནིཊྛམཛ྄ཛྷཏྟེ ཙ ཨཱརམྨཎེ ཝེདནཱབྷེདོ ཨཏྠཱིཏི ཨཀུསལཝིཔཱཀམནོཝིཉྙཱཎདྷཱཏུ ཨེཀམེཝཱཏི ‘‘སཏྟཝིདྷ’’ནྟི ཝུཏྟཾ. སཏི ཧི ཏཏྠ ཝེདནཱབྷེདེ ཨཏིཨནིཊྛེ དོམནསྶེན བྷཝིཏབྦཾ, ན ཙ པཊིགྷེན ཝིནཱ དོམནསྶཾ ཨུཔྤཛྫཏཱིཏི.

ཀཱཡཝིཉྙཱཎསྶ དུཀྑསཧགཏཏཱ ཀུསལཝིཔཱཀེ ཝུཏྟཝིཔརིཡཱཡེན ཝེདིཏབྦཱ. ཨུཔེཀྑཱ ཧཱིནཱཏི ཨེཀནྟནིཧཱིནསྶ ཨཀུསལསྶ ཝིཔཱཀབྷཱཝཏོ ཨུཔེཀྑཱཔི སམཱནཱ ཧཱིནཱ ཨེཝ དུཀྑསབྷཱཝཏྟཱ. ཏེནཱཧ ‘‘དུཀྑཾ ཝིཡ ¶ ནཱཏིཏིཁིཎཱ’’ཏི. ཡཐཱ དུཀྑཾ ཨཏིཝིཡ ཏིཁིཎཾ ཀཊུཀཾ, ན ཨེཝམཡཾ, ཏཐཱཔི དུཀྑསབྷཱཝེནེཝ པཝཏྟཏི. ན ཧི ཨཀུསལསྶ ཝིཔཱཀོ ཨདུཀྑོ ཧོཏི. ཨུཔེཀྑཱབྷཱཝོ ཙསྶ བལཝཏཱ བཱདྷིཡམཱནསྶ པཊིཔྤཧརིཏུཾ ཨསཀྐོནྟསྶ དུབྦལསྶ པུརིསསྶ ཏེན ཀརིཡམཱནབཱདྷཱཡ ཨུཔེཀྑནཱ ཝིཡཱཏི དཊྛབྦོ. ཨིཏརེསཱུཏི ཀུསལཝིཔཱཀེསུ.

རཱུཔཱཝཙརནྟི རཱུཔཱཝཙརཝིཔཱཀཝིཉྙཱཎཾ. ཝིཔཱཀཀཐཱ ཧེསཱཏི. ཀུསལཾ ཝིཡཱཏི རཱུཔཱཝཙརཀུསལཾ ཝིཡ. ན ཧི རཱུཔཱཝཙརཝིཔཱཀོ ཏདཉྙཀུསལསདིསོ. ཨཔིཙ སམྦནྡྷིསདྡཱ ཨེཏེ, ཡདིདཾ ‘‘ཀུསལཾ, ཝིཔཱཀོ’’ཏི ཙ. ཏསྨཱ ཡཐཱ ‘‘མཱཏརཾ པཡིརུཔཱསཏཱི’’ཏི ཝུཏྟེ ཨཏྟནོ མཱཏརནྟི ཨཝུཏྟམྤི སིདྡྷམེཝེཏཾ, ཨེཝཾ ཨིདྷཱཔཱིཏི ཨཏྟནོ ཀུསལཾ ཝིཡཱཏི ཨཏྠོ. ཀུསལསདིསཏཱ ཙེཏྠ དྷམྨཏོ, ཨཱརམྨཎཏོ ཙ ཝེདིཏབྦཱ. ཏཐཱ ཧི ཡེ ཕསྶཱདཡོ ཀུསལེ ལབྦྷནྟི, ཏེ ཝིཔཱཀེཔི ལབྦྷནྟི. ཡསྨིཾ ཙ ཨཱརམྨཎེ ཀུསལཾ པཝཏྟཏི, ཏཏྠེཝ ཨཡཾ ཝིཔཱཀོཔི པཝཏྟཏི. ཡཾ པནེཏྠ པཉྩམཛ྄ཛྷཱནཙིཏྟཾ ཨབྷིཉྙཱཔྤཏྟཾ, ཏསྶ ཝིཔཱཀོ ཨེཝ ནཏྠི. ཀསྨཱ ནཏྠི? ཨསམྦྷཝཏོ, ཨཱནིསཾསབྷཱུཏཏྟཱ ཙ. ཏཉྷི ཝིཔཱཀཾ དེནྟཾ རཱུཔཱཝཙརམེཝ དདེཡྻ. ན ཧི ཨཉྙབྷཱུམིཀཾ ཀམྨཾ ཨཉྙབྷཱུམིཀཾ ཝིཔཱཀཾ དེཏི. ཀམྨནིམིཏྟཱརམྨཎཏཱ ཙ རཱུཔཱཝཙརཝིཔཱཀསྶ ཝུཏྟཱཏི ན ཏཾ ཨཉྙཾ ཨཱརབྦྷ ¶ པཝཏྟཏི. པརིཏྟཱརམྨཎཱདིཨཱརམྨཎཉྩ ཏཾ ན ཧོཏཱིཏི ཨཡམསམྦྷཝོ. ཛྷཱནསྶ ཨཱནིསཾསབྷཱུཏཉྩ དཱནཱདཱིནཾ ཏསྨིཾ ཨཏྟབྷཱཝེ པཙྩཡལཱབྷོ ཝིཡཱཏི.

པཝཏྟིཏོ པན ཝིཔཱཀསྶ, ཀུསལསྶ ཙ ཨཏྠེཝ བྷེདོཏི ཏཾ དསྶེཏུཾ ‘‘ཀུསལཾ པནཱ’’ཏིཨཱདི ཝུཏྟཾ. ཀུསལཾ ཝིཡ ཀསིཎུགྒྷཱཊིམཱཀཱསཱདིཨཱརམྨཎབྷེདཏོ ཙཏུབྦིདྷཾ. པཝཏྟིབྷེདོ ཝུཏྟནཡོཝ ཛཝནཝསེན, པཊིསནྡྷིཨཱདིཝསེན ཙ པཝཏྟནཏོ.

ཙཏུམགྒཡུཏྟཙིཏྟཕལཏྟཱཏི ཙཏཱུཧི ཨརིཡམགྒེཧི སམྤཡུཏྟཀུསལཙིཏྟསྶ ཕལཏྟཱ, ཙཏུབྦིདྷསཱམཉྙཕལསམྤཡུཏྟབྷཱཝཏོཏི ཨཏྠོ. མགྒཝཱིཐིཡཾ དྭིཀྑཏྟུཾ, ཏིཀྑཏྟུཾ ཝཱ ཕལསམཱཔཏྟིཡཾ ཨཔརིཙྪིནྣཔརིམཱཎཾ པཝཏྟམཱནམྤི དྭཱིསུ ཋཱནེསུ པཝཏྟིཡཱ ‘‘དྭིདྷཱ པཝཏྟཏཱི’’ཏི ཝུཏྟཾ. སབྦམྤཱིཏི ཏེཝཱིསཏིཝིདྷཾ ཀཱམཱཝཙརཝིཔཱཀཾ, པཉྩཝིདྷཾ རཱུཔཱཝཙརཝིཔཱཀཾ, ཙཏུབྦིདྷཾ ཨརཱུཔཱཝཙརཝིཔཱཀཾ, ཙཏུབྦིདྷམེཝ ལོཀུཏྟརཝིཔཱཀནྟི སབྦམྤི ཝིཔཱཀཝིཉྙཱཎཾ ནཱཏིསངྑེཔཝིཏྠཱརནཡེན ཚཏྟིཾསཝིདྷཾ ཧོཏི.

བྷཱུམིབྷེདཏོ ¶ ཏིཝིདྷཾ ལོཀུཏྟརསྶ ཨབྷཱཝཏོ. ལོཀུཏྟརཉྷི ཀིརིཡཙིཏྟཾ ནཏྠི ཨེཀནྟེན ཨནནྟརཝིཔཱཀདཱཡིབྷཱཝཏོ. ཝུཏྟཉྷི ‘‘སམཱདྷིམཱནནྟརིཀཉྙམཱཧཱུ’’ཏི (ཁུ. པཱ. ༦.༥; སུ. ནི. ༢༢༨). ཧོཏུ ཏཱཝ སེཀྑཱནཾ ཨུཔྤཛྫམཱནཾ ཨནུཏྟརཾ ཀུསལཾ པུགྒལནྟརབྷཱཝཱུཔནཡནཏོ སཕལཾ, ཨརཧཏོ པན ཨུཔྤཛྫམཱནཾ པུགྒལནྟརབྷཱཝཱུཔནཡནཏོ ནིཔྥལཾ, ཏསྶ ཀིརིཡབྷཱཝོ ཀསྨཱ ན ཨིཙྪིཏོཏི? ཨིཙྪིཏབྦོ སིཡཱ. ཡདི ཏསྶ པུནཔྤུནཾ ཨུཔྤཏྟི སིཡཱ, སཀིཾཡེཝ པན ལོཀུཏྟརཀུསལཾ པཝཏྟཏི. ཡདི ཧི པུནཔྤུནཾ པཝཏྟེཡྻ, མགྒཙིཏྟཾ ཨརཧཏོཔི པཝཏྟཏཱིཏི ལོཀུཏྟརཀིརིཡཙིཏྟཾ སིཡཱ, ན ཙེཏཾ ཨཏྠི པཡོཛནཱབྷཱཝཏོ. ཏསྨཱ ནཏྠི ལོཀུཏྟརཀིརིཡཝིཉྙཱཎཾ. ཀིརིཡཝིཉྙཱཎནྟི ཙ ཀིརིཡཱམཏྟཾ ཝིཉྙཱཎཾ, ཀུསལཱཀུསལཾ ཝིཡ ཀིཉྩི ཝིཔཱཀཾ ཨནུཔྤཱདེཏྭཱ ཀིརིཡཱམཏྟམེཝ ཧུཏྭཱ པཝཏྟནཀཝིཉྙཱཎནྟི ཨཏྠོ. ཀསྨཱ པནེཏཾ ཝིཔཱཀཾ ན ཨུཔྤཱདེཏཱིཏི? ཝུཙྩཏེ – ཨེཏྠ ཧི ཡདེཏཾ ཨཱཝཛྫནདྭཡཾ, ཏཾ ཨནུཔཙྪིནྣབྷཝམཱུལེཔི སནྟཱནེ པཝཏྟཾ ཨནཱསེཝནཏཱཡ དུབྦལབྷཱཝཏོ ཨབཱིཛསཱམཏྠིཡཾ ཝིཡ པུཔྥཾ ཨཕལམེཝ ཧོཏི. ཡཾ པན ཨུཙྪིནྣབྷཝམཱུལཱཡཾ སནྟཏིཡཾ པཝཏྟཾ ཨཊྛཱརསཝིདྷཾ ཝིཉྙཱཎཾ, ཏཾ སམུཙྪིནྣམཱུལཱཡ ལཏཱཡ པུཔྥཾ ཝིཡ ཕལདཱཡི ན ཧོཏཱིཏི ཝེདིཏབྦཾ. ཨཉྙསྶ ཨསམྦྷཝཏོ ¶ ཀིརིཡཧེཏུནཱ ནཱམ ཨལོབྷཱདིནཱཝ བྷཝིཏབྦནྟི ཨཱཧ ‘‘ཨལོབྷཱདིཀིརིཡཧེཏུཝིརཧིཏ’’ནྟི.

ཙཀྑུཝིཉྙཱཎཱདཱིནཾ པུརེཙརཱ ཧུཏྭཱ རཱུཔཱདིཨཱརམྨཎཱནཾ ཝིཛཱནནལཀྑཎཱ ཙཀྑུཝིཉྙཱཎཱདིཔུརེཙརརཱུཔཱདིཝིཛཱནནལཀྑཎཱ. ཨཡཾ པན མནོཝིཉྙཱཎཏོ ཨུཔྤནྣཱཔི ཝིསིཊྛམནནཀིཙྩཱབྷཱཝེན མནོམཏྟཱ དྷཱཏཱུཏི མནོདྷཱཏུ. ཏཐཱ ཧེསཱ མནོཝིཉྙཱཎསྶ པཙྩཡོ ན ཧོཏི. ཨཡམེཏྠ སངྑེཔོ, ཝིཏྠཱརོ པན དྷཱཏུནིདྡེསེ (ཝིསུདྡྷི. ༢.༥༡༧) ཨཱགམིསྶཏི. ཨཱཝཛྫནརསཱཏི ཨཱབྷོགརསཱ, ཙིཏྟསནྟཱནསྶ ཝཱ པུརིམཱཀཱརཏོ ཨཉྙཐཱ ཨོཎོཛནརསཱ. བྷཝངྒཝིཙྪེདཔདཊྛཱནཱཏི བྷཝངྒསནྟཱནཝིཙྪེདཔདཊྛཱནཱ. ཨཔུབྦཱརམྨཎཱ སཀིདེཝ པཝཏྟམཱནཱ སབྦཐཱ ཝིསཡརསཾ ཨནུབྷཝིཏུཾ ན སཀྐོཏཱིཏི ཨིཊྛཱདཱིསུ སབྦཏྠ ཨུཔེཀྑཱཡུཏྟཱཝ ཧོཏི.

སཱདྷཱརཎཱཏི སེཀྑཱསེཀྑཔུཐུཛྫནཱནཾ སཱདྷཱརཎཱ. ཨསཱདྷཱརཎཱཏི ཨསེཀྑཱནཾཡེཝ ཨཱཝེཎིཀཱ. ཝོཊྛབྦནཱཝཛྫནརསཱཏི པཉྩདྭཱརེ སནྟཱིརཎེན གཧིཏཱརམྨཎཾ ཝཝཏྠཔེནྟཱི ཝིཡ པཝཏྟནཏོ ཝོཊྛབྦནརསཱ, མནོདྭཱརེ ¶ པན ཝུཏྟནཡེན ཨཱཝཛྫནརསཱ. ཏཐཱབྷཱཝེན པཉྩདྭཱརམནོདྭཱརེསུ ཡཐཱཀྐམཾ ཝོཊྛབྦནཱཝཛྫནབྷཱཝེན པཙྩུཔཏིཊྛཏཱིཏི ཏཐཱབྷཱཝཔཙྩུཔཊྛཱནཱ. ཝོཊྛབྦནཀཱལེ སནྟཱིརཎཀིཙྩཱནཾ ཏིསྶནྣཾ ཨཧེཏུཀཝིཔཱཀམནོཝིཉྙཱཎདྷཱཏཱུནཾ ཨཱཝཛྫནཀཱལེ ཡསྶ ཀསྶཙི བྷཝངྒསྶཱཏི ཨིམེསཾ ཨཉྙཏརཱཔགམོ ཨེཏིསྶཱ ཨཱསནྣཀཱརཎནྟི ཨཱཧ ‘‘ཨཧེཏུཀ…པེ… པདཊྛཱནཱ’’ཏི.

ཨརཧཏནྟི ཨརཧཏཾཡེཝ ཨསཱདྷཱརཎབྷཱཝཏོ. ཨནུལཱ༹རེསཱུཏི ཨཊྛིཀསངྑལིཀཔེཏརཱུཔཱདཱིསུ, ཨཉྙེསུ ཝཱ ཨཔྤཎཱིཏེསུ ཝཏྠཱུསུ. ཧསིཏུཔྤཱདནརསཱཏི ཧསིཏསྶེཝ ཨུཔྤཱདནརསཱ. ཏཐཱ ཧི ཏཾ ཙིཏྟཾ ‘‘ཧསིཏུཔྤཱདན’’ནྟྭེཝ ཝུཙྩཏི, ན ཨཉྙེསཾ ཧསིཏུཔྤཱདཀཙིཏྟཱནཾ ཨབྷཱཝཏོ. ཨཉྙཱནིཔི ཧི དྭཱདས སོམནསྶསཧགཏཱནི པརིཏྟཀུསལཱཀུསལཀིརིཡཙིཏྟཱནི ཡཐཱརཧཾ པུཐུཛྫནཱདཱིནཾ ཧསིཏུཔྤཱདཀཱནི ཝིཛྫནྟི, ཨིདཾ པན ཙིཏྟཾ ཝིཙཱརཎཔཉྙཱཝིརཧིཏཾ པརིཏྟེསུ ཨཔྤཎཱིཏེསུ ཨཱརམྨཎེསུ ཨརཧནྟཱནཾ སོམནསྶམཏྟཾ ཨུཔྤཱདེནྟཾ ཨུཔྤཛྫཏི. བྷགཝཏོཔི ཨུཔྤཛྫཏཱིཏི ཨཊྛཀཐཱཡཾ ཝུཏྟཾ, ཏཾ ཨཏཱིཏཾསཱདཱིསུ ཨཔྤཊིཧཏཉཱཎཾ ཝཏྭཱ ‘‘ཨིམེཧི ཏཱིཧི དྷམྨེཧི སམནྣཱགཏསྶ བུདྡྷསྶ བྷགཝཏོ སབྦཾ ཀཱཡཀམྨཾ ཉཱཎཔུབྦངྒམཾ ཉཱཎཱནུཔརིཝཏྟཱི’’ཏི (མཧཱནི. ༦༩; ཙཱུལ༹ནི. མོགྷརཱཛམཱཎཝཔུཙྪཱནིདྡེས ༨༥; པཊི. མ. ༣.༥) ཝཙནཏོ ཝིཙཱརེཏབྦནྟི ཨེཀེ ¶ . ཏཏྠ ཧསིཏུཔྤཱདཙིཏྟེན པཝཏྟིཡམཱནམྤི བྷགཝཏོ སིཏཀརཎཾ པུབྦེནིཝཱསཱནཱགཏཾསསབྦཉྙུཏཉྙཱཎཱནཾ ཨནུཝཏྟཀཏྟཱ ཉཱཎཱནུཔརིཝཏྟིཡེཝཱཏི ཨེཝཾ པན ཉཱཎཱནུཔརིཝཏྟིབྷཱཝེ སཏི ན ཀོཙི པཱལི༹ཨཊྛཀཐཱནཾ ཝིརོདྷོ. ཨེཝཉྩ ཀཏྭཱ ཨཊྛཀཐཱཡཾ ‘‘ཏེསཾ ཉཱཎཱནཾ ཙིཎྞཔརིཡནྟེ ཨིདཾ ཙིཏྟཾ ཨུཔྤཛྫཏཱི’’ཏི ཝུཏྟཾ. ཨཝསྶཉྩ ཨེཏཾ ཨེཝཾ ཨིཙྪིཏབྦཾ, ཨཉྙཐཱ ཨཉྙསྶཱཔི ཝིཉྙཏྟིསམུཊྛཱཔཀསྶ ཨཧེཏུཀཙིཏྟསྶ བྷགཝཏོ ཨུཔྤཏྟི ན ཡུཛྫེཡྻ. ན ཧི ཝིཉྙཏྟིསམུཊྛཱཔཀསྶ ཏཾསམུཊྛིཏཱཡ ཝིཉྙཏྟིཡཱ ཀཱཡཀམྨཱདིབྷཱཝཾ ཨཱཔཛྫནབྷཱཝོ ཝིབནྡྷཏཱིཏི. ཨེཀནྟཏོ ཧདཡཝཏྠུཔདཊྛཱནཱ པཉྩཝོཀཱརབྷཝེ ཨེཝ ཨུཔྤཛྫནཏོ.

ཨཡམེཏྠ ཝིསེསོཏི ཨཡཾ སེཀྑཔུཐུཛྫནཱནཾ ཨུཔྤཏྟིཡཱ ཝིཔཱཀུཔྤཱདནསམཏྠཏཱ, ཨརཧཏཾ ཨུཔྤཏྟིཡཱ ཏདབྷཱཝོཏི ཨུབྷཡེསཾ སནྟཱནེ ཨུཔྤཏྟིསམུཔལཀྑིཏོ ཨེཏྠ ཀུསལཀིརིཡཝིཉྙཱཎེསུ ཝིསེསོ. ཨེཝཉྩ ཀཏྭཱ པཙྩཡཝེཀལླེན ཨཝིཔཱཀསྶཱཔི ཀུསལཱཀུསལསྶ ཀིརིཡབྷཱཝཔྤསངྒོ ¶ ནིཝཏྟིཏོ ཧོཏི. པརཏོ ཀུསལཏོ ཝིསེསོཏི ཨེཏྠཱཔི ཨེསེཝ ནཡོ.

༤༥༥. སབྦཱནིཔི ཀུསལཱཀུསལབྱཱཀཏཱནི ཨེཀཱུནནཝུཏི ཝིཉྙཱཎཱནི ཧོནྟི ནཱཏིསངྑེཔཝིཏྠཱརནཡེནཱཏི ཨདྷིཔྤཱཡོ. པཊིསནྡྷིཝིཉྙཱཎཱདཱིནཾ ཀིཙྩཾ ནཱམ བྷཝནྟརཔཊིསནྡྷཱདིནཱ ཨཱཀཱརེན པཝཏྟི ཨེཝ. ཏབྦིནིམུཏྟཉྩ ཙིཏྟསྶ ཨཉྙཾ ཀིཙྩཾ ནཏྠཱིཏི ཨཱཧ ‘‘ཙུདྡསཧི ཨཱཀཱརེཧི པཝཏྟནྟཱི’’ཏི.

ཨཱནུབྷཱཝེནཱཏི སཱམཏྠིཡེན. ཀཏཱུཔཙིཏཾ ཧི ཀམྨཾ ཨཝསེསཔཙྩཡསམཝཱཡེ ཝིཔཱཀཾ དེནྟཾ ཨཏྟནོ ཨཱནུབྷཱཝཾ ཝིསྶཛྫནྟཾ ཝིཡ ཧོཏི. དེཝམནུསྶེསཱུཏི ཚསུ ཀཱམཱཝཙརདེཝེསུ ཙེཝ མནུསྶེསུ ཙ. ཀམྨཀམྨནིམིཏྟགཏིནིམིཏྟཱནནྟི ཨེཏྠ ཀམྨཾ ནཱམ ཀཏཱུཔཙིཏཾ ཀཱམཱཝཙརཀུསལཀམྨཾ, ཏཉྩ ཁོ ཝིཔཱཀདཱནཱཡ ལདྡྷོཀཱསཾ. ཏེནཱཧ ‘‘པཙྩུཔཊྛིཏ’’ནྟི. ཀམྨནིམིཏྟཾ ཀམྨཱཡཱུཧནཀྑཎེ ཙེཏནཱཡ པཙྩཡབྷཱུཏཾ དེཡྻདྷམྨཱདི. གཏིནིམིཏྟཾ ཡཾ གཏིཾ ཨུཔཔཛྫཏི, ཏཔྤརིཡཱཔནྣཾ རཱུཔཱཡཏནཾ. པཎྜཀཱདིབྷཱཝནྟི པཎྜཀམཱུགམམྨནཱདིབྷཱཝཾ. དུབྦལསྶ དྭིཧེཏུཀཀུསལསྶ ཝིཔཱཀབྷཱུཏཱ ཨུཔེཀྑཱསཧགཏཱཧེཏུམནོཝིཉྙཱཎདྷཱཏུ དུབྦལ…པེ… མནོཝིཉྙཱཎདྷཱཏུ. ནེསནྟི བྷཱཝིཏརཱུཔཱརཱུཔཱཝཙརཀུསལཱནཾ སཏྟཱནཾ. ཀམྨནིམིཏྟམེཝཱཏི པཐཝཱིཀསིཎཱདིཀཾ ཨཏྟནོ ཀམྨཱརམྨཎམེཝ.

ཨེཝཾ ¶ ཏཱཝེཏྠཱཏི ཨེཏྠ ཝིཉྙཱཎཀྑནྡྷནིདྡེསེ ཨེཝཾ སངྑེཔཏོ སརཱུཔདསྶནམཏྟེནེཝ ཨེཀཱུནཝཱིསཏིཡཱ ཝིཔཱཀཝིཉྙཱཎཱནཾ པཊིསནྡྷིཝསེན པཝཏྟི ཝེདིཏབྦཱ. བྷཝཱལམྦནཱདིཝིབྷཱགེན པན ཡདེཏྠ ཝཏྟབྦཾ, ཏཾ པཊིཙྩསམུཔྤཱདཀཐཱཡཾ ཨཱགམིསྶཏཱིཏི.

ཏཾ ཏནྟི ཨེཀཱུནཝཱིསཏིཡཱ པཊིསནྡྷིཝིཉྙཱཎེསུ ཡཾ ཡཾ ཨུཔྤཛྫིཏྭཱ ནིརུདྡྷཾ, ཏཾ ཏཾ ཨནནྟརཾ ཨུཔྤཏྟིཡཱ ཨནུབནྡྷམཱནཾ. ཏསྶ ཏསྶེཝཱཏི ཡསྶ ཡསྶ ཀམྨསྶ ཝིཔཱཀབྷཱུཏཾ པཊིསནྡྷིཝིཉྙཱཎཾ, ཏསྶ ཏསྶེཝ. ཏསྨིཉྙེཝཱཏི ཀམྨཱདིཀེ ཨེཝ. ཀམྨཉྩེ པཊིསནྡྷིཝིཉྙཱཎསྶ ཨཱརམྨཎཾ, ཏསྨིཾ ཀམྨེ, ཨཐ ཀམྨནིམིཏྟཾ, གཏིནིམིཏྟཉྩ, ཏསྨིཾ ཀམྨནིམིཏྟེ གཏིནིམིཏྟེཏི ཨཏྠོ. ཏཱདིསམེཝཱཏི ཡཱདིསཾ པཊིསནྡྷིཝིཉྙཱཎཾ ཧེཏུཏོ, སེསསམྤཡུཏྟདྷམྨཏོ ཙ ཏཱདིསམེཝ. སནྟཱནཝིནིཝཏྟཀེཏི བྷཝངྒསནྟཱནསྶ ཝིནིཝཏྟནཀེ. ཨཉྙསྨིཾ ཨཱཝཛྫནསངྑཱཏེ ཙིཏྟུཔྤཱདེ. ཀིརིཡམཡཙིཏྟེནེཝ སུཔིནདསྶནཾ ¶ ཧོཏཱིཏི ཨཱཧ ‘‘སུཔིནཾ ཨཔསྶཏོ’’ཏི. ཨཔརིམཱཎསངྑྱམྤི པཝཏྟཏིཡེཝ, ཏཐཱ ཧིདཾ ཨུཔཔཏྟིབྷཝསྶ ཨངྒབྷཱཝེན པཝཏྟནཏོ ‘‘བྷཝངྒ’’ནྟི ཝུཙྩཏི. ཏེསཉྙེཝཱཏི པཊིསནྡྷིབྷཱུཏཱནཾཡེཝ.

ཨིནྡྲིཡཱནཱིཏི ཙཀྑཱདཱིནི ཨིནྡྲིཡཱནི. ཨཱརམྨཎགཧཎཀྑམཱནཱིཏི རཱུཔཱདིཨཱརམྨཎཾ གཧེཏུཾ སམཏྠཱནི. མཱཏུཀུཙྪིགཏཀཱལེ ཝིཡ ཧི བཧིནིཀྑནྟཀཱལེཔི ན ཏཱཝ ཨིནྡྲིཡཱནི སཀིཙྩཀཱནི ཧོནྟི, ཨནུཀྐམེན པན ཝིསདབྷཱཝཾ པཏྟཀཱལེ ཨེཝ སཀིཙྩཀཱནི ཧོནྟི. ཏེནེཝཱཧ ‘‘ཨིདྷ པརིཔཀྐཏྟཱ ཨཱཡཏནཱན’’ནྟི. ཨཱཔཱཐགཏེཏི ཡོགྱདེསཱཝཊྛིཏེ. ཏམེཝ ཡོགྱདེསཱཝཊྛིཏཾ རཱུཔཾ པཊིཙྩ གྷཊྚནཱ པཙྩཡཾ ལདྡྷཱ. གྷཊྚནཱཏི པཊིགྷཱཏོ, ཡེན བྱཱཔཱརཱདིཝིསེསཔཙྩཡནྟརསཧིཏེ ཙཀྑུསྶ ཝིསཡེ ཝིཀཱརུཔྤཏྟིཝིསདིསུཔྤཏྟིཝིསཡསྶ ཨིཊྛཱནིཊྛབྷཱཝེན ཨནུགྒཧོ, ཨུཔགྷཱཏོ ཙཱཏི ཨཏྠོ. ཏཏོཏི གྷཊྚནཱནནྟརཾ. གྷཊྚནཱནུབྷཱཝེནཱཏི གྷཊྚནཱབལེན. བྷཝངྒཙལནནྟི བྷཝངྒཙིཏྟསྶ པཀམྤནཾ, ཏཐཱ དྭིཀྑཏྟུཾ པཝཏྟིཡཱ ཝིསདིསསྶ ཀཱརཎབྷཱཝཱུཔགམནནྟི ཨཏྠོ. ཏཉྷི ཙིཏྟསནྟཱནསྶ པུརིམཱཝཏྠཱཡ བྷིནྣཱཝཏྠཱཧེཏུཏཱཡ ཙལནཾ ཝིཡཱཏི ‘‘ཙལན’’ནྟི ཝུཏྟཾ. ཝིསཡཝིསཡཱིབྷཱཝསིདྡྷཱཡ དྷམྨཏཱཡ ཨཱརམྨཎསྶ ཨབྷིམུཁཱིབྷཱཝེན པསཱདསྶ ཏཱཝ གྷཊྚནཱ ཧོཏུ, ཨཉྙསནྣིསྶིཏསྶ པན བྷཝངྒསྶ ཙལནཾ ཀཐཾ ཧོཏཱིཏི? ཏཾསམྦནྡྷབྷཱཝཏོ. བྷེརིཏལེ ཋཔིཏཱསུ སཀྑརཱསུ ཨེཀིསྶཱ སཀྑརཱཡ གྷཊིཏཱཡ ཏདཉྙསཀྑརཱཡཾ ཋིཏམཀྑིཀཱ ཙལནཾ ཙེཏྠ ཨུདཱཧརཎནྟི. ཏདེཝ རཱུཔནྟི ཏདེཝ བྷཝངྒཙལནསྶ པཙྩཡབྷཱུཏཾ ཨཱཔཱཐགཏཾ རཱུཔཱཡཏནཾ. བྷཝངྒཾ ཝིཙྪིནྡམཱནཱ ཝིཡཱཏི བྷཝངྒསནྟཱནཾ ཝིཙྪིནྡནྟཱི ¶ ཝིཡ. ཏདཱརམྨཎུཔྤཏྟིཡཱ པརཏོ བྷཝངྒསྶ ཨུཔྤཛྫནཏོ ཝིསཡགྒཧཎཾ པཉྩདྭཱརཱཝཛྫནཾ ཝཏྭཱ ཏདནནྟརཾ དསྶནཱདཱིསུ ཝཏྟབྦེསུ ཏཱནི ཨཝཏྭཱ མནོདྭཱརཱཝཛྫནསྶ གཧཎཾ ཨུདྡེསེ དྭིནྣཾ ཨཱཝཛྫནཱནཾ ཨཱཝཛྫནསཱམཉྙེན གཧིཏཏྟཱ.

ཨཱཝཛྫནཱནནྟརནྟི པཉྩདྭཱརཱཝཛྫནཱནནྟརཾ. ཡེ ཧདཡཝཏྠུ ཝིཡ སམྤཊིཙྪནཱདིཝཱིཐིཙིཏྟཱནིཔི ནཱནུཛཱནནྟི, ཏེསཾ ‘‘སམྤཊིཙྪནཱཡ ཙཀྑུཝིཉྙཱཎདྷཱཏུཡཱ’’ཏིཨཱདིནཱ ཏཏྠ ཏཏྠ པཱལི༹ ཨཱགཏཱ. ན ཧི སཀྐཱ པཱལི༹ཾ པཊིསེདྷེཏུཾ.

‘‘སཙེ ¶ མཧནྟཾ ཧོཏཱི’’ཏི ཨིདཾ ཛཝནཔརིཡོསཱནཱཡ ཙིཏྟཔྤཝཏྟིཡཱ ཝུཙྩམཱནཏྟཱ ཝུཏྟཾ. ཙུདྡསཙིཏྟཀྑཎཱཡུཀཉྷི ཨཱརམྨཎམིདྷ ‘‘མཧནྟ’’ནྟི ཨདྷིཔྤེཏཾ, ཏཉྩ ཨུཔྤཛྫིཏྭཱ དྭིཏིཙིཏྟཀྑཎཱཏཱིཏཾ ཧུཏྭཱ ཨཱཔཱཐགམནཝསེན ཝེདིཏབྦཾ.

ཡཐཱཝཝཏྠཱཔིཏེཏི ཝོཊྛབྦནེན ཝུཏྟཱཀཱརེན ཀཏཝཝཏྠཱཔནེ. ཨཱཝཛྫནཱཡ, ཝོཊྛབྦནསྶ ཙ ཝུཏྟཏྟཱ ‘‘ཨཝསེསཀཱམཱཝཙརཀིརིཡཱན’’ནྟི ཨཝསེསགྒཧཎཾ ཀཏཾ. ཚ སཏྟ ཝཱཏི ཝཱ-སདྡེན ‘‘པཉྩ ཝཱ’’ཏི ཨིདམྤི ཝུཏྟམེཝཱཏི དཊྛབྦཾ. སུཏྟམུཙྪིཏཱདིཀཱལེ ཧི པཉྩཔི ཛཝནཱནི ཛཝནྟཱིཏི.

ཏཱནིཡེཝཱཏི ‘‘ཨཊྛནྣཾ ཝཱ’’ཏིཨཱདིནཱ (ཝིསུདྡྷི. ༢.༤༥༥) ཝུཏྟཱནི ཨེཀཱུནཏིཾས ཀཱམཱཝཙརཛཝནཱནིཡེཝ. ཨིཏོ ཨཉྙཾ མནོདྭཱརཱཝཛྫནཱནནྟརཾ ཨུཔྤཛྫནཀཙིཏྟཾ ནཱམ ནཏྠཱིཏི དསྶནཏྠཾ ཨེཝཀཱརགྒཧཎཾ. ‘‘གོཏྲབྷཱུཏོ’’ཏི ཨིདཾ གོཏྲབྷུཊྛཱནིཡཱནཾ པརིཀམྨཝོདཱནཱནམྤི གཧཎཾ, ན གོཏྲབྷུནོ ཨེཝ. ཕལཙིཏྟཱནཱིཏི སམཱཔཏྟིཝསེན པཝཏྟནཀཕལཙིཏྟཱནི. ཡཾ ཡཾ ལདྡྷཔཙྩཡནྟི ཡཾ ཡཾ ཛཝནཾ རཱུཔཱཝཙརཛཝནཱདིཝསེན གོཏྲབྷུཨནནྟརཾ ཨུཔྤཏྟིཡཱ ལདྡྷཔཙྩཡཾ.

ཨཏིམཧནྟནྟི སོལ༹སཙིཏྟཀྑཎཱཡུཀཾ. ཏཏྠ ཧི ཏདཱརམྨཎཙིཏྟཾ ཨུཔྤཛྫཏི, ན ཨཉྙཏྠ. ཝིབྷཱུཏནྟི སུཔཱཀཊཾ, ཏཉྩ ཀཱམཱཝཙརམེཝ. ཏཏྠ ཧི ཏདཱརམྨཎསྶ ཨུཔྤཏྟི. ཀཱམཱཝཙརཛཝནཱཝསཱནེཏི ཀཱམཱཝཙརཛཝནསྶེཝ ཨཝསཱནེ. ན ཧི ཏཾ ཀཱམཏཎྷཱཧེཏུཀཀམྨནིབྦཏྟཾ མཧགྒཏཱནུཏྟརཛཝནཾ ཨནུབནྡྷཏི ཨཛནཀཏྟཱ, ཛནཀཱསདིསཏྟཱ ཙ. ཡཐཱ གེཧཏོ བཧི གནྟུཀཱམོ ཏརུཎདཱརཀོ ཛནཀཾ, ཛནཀསདིསཾ ཝཱ ཨནུབནྡྷཏི, ན ཨཉྙཾ, ཨེཝམིདམྤི ¶ . ཏཏྠཱཔི ན སབྦསྨཱ ཛཝནཱ སབྦཾ ཛཝནེན ཏདཱརམྨཎསྶ ནིཡམེཏབྦཏོ, ཨཱརམྨཎེན ཙ ཝེདནཱཡ པརིཝཏྟེཏབྦཏོ. ཏཏྠཱཡཾ ནིཡམོ – པརིཏྟཀུསལལོབྷམོཧམཱུལསོམནསྶསཧགཏཀིརིཡཛཝནཱནཾ ཨཉྙཏརཱནནྟརཾ ཨཏིམཧཏི ཝིསཡེ པཉྩནྣཾ སོམནསྶསཧགཏཱནཾ ཨཉྙཏརཾ ཏདཱརམྨཎཾ ཨུཔྤཛྫཏི, ཏཐཱ པརིཏྟཀུསལཱཀུསལཨུཔེཀྑཱསཧགཏཀིརིཡཛཝནཱནཾ ཨཉྙཏརཱནནྟརཾ ཨུཔེཀྑཱསཧགཏཱནཾ ཚནྣཾ ཏདཱརམྨཎཱནཾ ཨཉྙཏརཾ པཝཏྟཏི. ཨིཊྛཱརམྨཎཱདཱིནནྟི ཨིཊྛཨིཊྛམཛ྄ཛྷཏྟཨནིཊྛཱརམྨཎཱནཾ ཝསེནཱཏི སམྦནྡྷོ. ཏཡིདཾ ཨཱརམྨཎེན ཝེདནཱཔརིཝཏྟིདསྶནཏྠཾ ཝུཏྟཾ. ‘‘པུརིམཀམྨཝསེནཱ’’ཏི ཨིདཾ ཏདཱརམྨཎཝིསེསདསྶནཏྠཾ. ན ¶ ཧི པཊིསནྡྷིཛནཀམེཝ ཀམྨཾ ཏདཱརམྨཎཾ ཛནེཏི, ཨཐ ཁོ ཨཉྙཀམྨམྤི. ཏཾ པན པཊིསནྡྷིདཱཡིནཱ ཀམྨེན ནིབྦཏྟེཏབྦཏདཱརམྨཎཏོ ཝིསདིསམྤི ནིབྦཏྟེཏཱིཏི. ‘‘ཛཝནཙིཏྟཝསེནཱ’’ཏི ཨིདཾ ཏདཱརམྨཎནིཡམདསྶནཏྠཾ. ‘‘ཛཝནེན ཏདཱརམྨཎཾ ནིཡམེཏབྦ’’ནྟི ཧི ཝུཏྟཾ. ཨཱདི-སདྡེན པཊིསནྡྷིཙིཏྟཾ སངྒཎྷཱཏི. ཏཉྷི ཨཏྟནོ ཨུཀྐཊྛཏརསྶ ཏདཱརམྨཎསྶ པཙྩཡོ ན ཧོཏི. ཡོ ཡོ པཙྩཡོ ལདྡྷོ ཧོཏཱིཏི ཡཐཱཝུཏྟེསུ ཨིཊྛཱརམྨཎཱདཱིསུ ཡོ ཡོ ཏདཱརམྨཎསྶ ཨུཔྤཏྟིཡཱ པཙྩཡོ སམཝེཏོ ཧོཏི. ཀིཉྩི ཨནྟརནྟི ཀིཉྩི ཁཎནྟརཾ. ཨུདཀམིཝཱཏི པཊིསོཏཾ གཙྪནྟཾ ཨུདཀམིཝ.

དྭིཀྑཏྟུཾ སཀིཾ ཝཱཏི ཝཙནསིལིཊྛཝསེན ཝུཏྟཾ ‘‘ཨཊྛ ཝཱ དས ཝཱ’’ཏིཨཱདཱིསུ (ཨ. ནི. ༨.༡༡; པཱརཱ. ༡༡) ཝིཡ. དྭིཀྑཏྟུཾཡེཝ པན ཝཎྞེནྟི. ཝིཔཱཀཙིཏྟཏྟཱ, ཨཱཝཛྫནསྶ ཙ ཝིདཱུརཏྟཱ, མཱུལབྷཝངྒཱདིབྷཝངྒསཱམཉྙསབྦྷཱཝཏོ ཙ བྷཝངྒསྶ ཨཱརམྨཎེ པཝཏྟནཱརཧཾ སམཱནཾ ཏསྶ ཛཝནསྶ ཨཱརམྨཎཾ ཨཱརམྨཎཾ ཨེཏསྶཱཏི ཏདཱརམྨཎནྟི ཝུཙྩཏི ཨེཀསྶ ཨཱརམྨཎསདྡསྶ ལོཔཾ ཀཏྭཱ ‘‘ཀཱམཱཝཙརཾ, ཨོཊྛམུཁ’’ནྟི ཙ ཡཐཱ. ཨེཏྠ ཙ ཀེཙི ‘‘པཊྛཱནེ ‘ཀུསལཱཀུསལེ ནིརུདྡྷེ ཝིཔཱཀོ ཏདཱརམྨཎཏཱ ཨུཔྤཛྫཏཱི’ཏི (པཊྛཱ. ༡.༡.༤༠༦) ཝིཔཱཀདྷམྨདྷམྨཱནཾ ཨེཝ ཨནནྟརཾ ཏདཱརམྨཎཾ ཝུཏྟ’’ནྟི ཀིརིཡཱཛཝནཱནནྟརཾ ན ཨིཙྪནྟི. ཝིཔྥཱརཝནྟཾ ཧི ཛཝནཾ ནཱཝཾ ཝིཡ ནདཱིསོཏོ བྷཝངྒཾ ཨནུབནྡྷཏི, ན པན ཚལ༹ངྒུཔེཀྑཱཝཏོ སནྟཝུཏྟིཀིརིཡཛཝནཾ པཎྞཔུཊཾ ཝིཡ ནདཱིསོཏོཏི. ཏཡིདཾ ལབྦྷམཱནསྶཱཔི ཀེནཙི ཨདྷིཔྤཱཡེན ཀཏྠཙི ཨཝཙནཾ དིསྶཏི, ཡཐཱ ཏཾ དྷམྨསངྒཧེ ཨཀུསལནིདྡེསེ ལབྦྷམཱནོཔི ཨདྷིཔཏི ན ཝུཏྟོ. ཡཉྩ པཎྞཔུཊཾ ནིདསྶིཏཾ, ཏམྤི ནིདསྶིཏབྦེན ན སམཱནཾ. ནཱཝཱཔཎྞཔུཊཱནཉྷི ནདཱིསོཏསྶ ཨཱཝཊྚནཾ, གཏི ཙ ཝིསདིསཱིཏི ནཱཝཱཡ ནདཱིསོཏསྶ ཨནུབནྡྷནཾ, པཎྞཔུཊསྶ ཨནནུབནྡྷནཉྩ ཡུཛྫཏི, ཨིདྷ པན ཀིརིཡཛཝནེཏརཛཝནཱནཾ བྷཝངྒསོཏསྶ ¶ ཨཱཝཊྚནཾ, གཏི ཙ སདིསཱིཏི ཨེཏསྶ ཨནནུབནྡྷནཾ, ཨིཏརསྶ ཨནུབནྡྷནཉྩ ན ཡུཛྫཏི. ཏསྨཱ ཝིཙཱརེཏབྦཾ.

བྷཝངྒམེཝཱཏི ཨཝདྷཱརཎཾ བྷཝཔརིཡོསཱནསྶ ཨིདྷ ན ཨདྷིཔྤེཏཏྟཱ. ཨཉྙཐཱ ཏདཱརམྨཎཱཝསཱནེ ཙུཏིཔི ན ཧོཏིཡེཝ. དསྶནཱདཱིནཱིཏི དསྶནསཝནགྷཱཡནསཱཡནཕུསནཱནི. ཨིཏི-སདྡོ ཨཱདིཨཏྠོ, ཏེན སམྤཊིཙྪནཱདཱིནཾ སངྒཧོ དཊྛབྦོ. པཊིསནྡྷིཏོ བྷཝངྒམེཝ, བྷཝངྒཏོ ཨཱཝཛྫནམེཝཱཏི ¶ ཨེཝཾ པཝཏྟཙིཏྟནིཡམཝསེནེཝ. ཏམྤཱིཏི ཙུཏིཙིཏྟམྤི. པཊིསནྡྷིབྷཝངྒཙིཏྟཱནི ཝིཡ ཨེཀཱུནཝཱིསཏིཝིདྷམེཝ ཧོཏི ཨཏྠཏོ བྷེདཱབྷཱཝཏོ.

བྷཝགཏིཋིཏིནིཝཱསེསཱུཏི ཏཱིསུ བྷཝེསུ, པཉྩསུ གཏཱིསུ, སཏྟསུ ཝིཉྙཱཎཊྛིཏཱིསུ, ནཝསུ སཏྟཱཝཱསེསུ ཙ. ཡོ པནེཏྠ ཨཙིཏྟཀོ, སོ ཨིདྷ ན གཧེཏབྦོ ཝིཉྙཱཎཀཐཱབྷཱཝཏོ. ‘‘ཨེཏྠཱ’’ཏི ཨིདཾ ‘‘སཾསརམཱནཱནཾ སཏྟཱན’’ནྟི ཨིམིནཱ སམྦནྡྷིཏབྦཾ. ཨེཏྠ ཨེཏེསུ ཝུཏྟནཡེན སཾསརམཱནེསུ སཏྟེསུ ཡོ པན ཨརཧཏྟཾ པཱཔུཎཱཏི སམྨཱཔཊིཔཏྟིམནྭཱཡཱཏི ཨདྷིཔྤཱཡོ. ཏསྶ ཨརཧཏོ ནིརུདྡྷམེཝ ཧོཏི ཙིཏྟཾ ཨཔྤཊིསནྡྷིཀབྷཱཝཏོ.

ཨིཏི ཝིཉྙཱཎཀྑནྡྷེ ཝིཏྠཱརཀཐཱམུཁཝཎྞནཱ.

ཝེདནཱཀྑནྡྷཀཐཱཝཎྞནཱ

༤༥༦. ཝེདེན ཨནུབྷཝནཱཀཱརེན ཨཡིཏཾ པཝཏྟཾ ཝེདཡིཏཾ, ཝེདཡིཏནྟི ལཀྑིཏབྦདྷམྨཛཱཏཾ ཝེདཡིཏལཀྑཎཾ. ཏཾ པན ཨཏྠཏོ ཝེདནཱ ཨེཝཱཏི ཨཱཧ ‘‘ཝེདཡིཏལཀྑཎཾ ནཱམ ཝེདནཱཝཱ’’ཏི. ཨཐ ཝཱ ཝེདཡིཏཾ ལཀྑཎཾ ཨེཏིསྶཱཏི ཀཔྤནཱསིདྡྷཾ བྷེདཾ ནིསྶཱཡ ཨཉྙཔདཏྠསམཱསཝསེནཱཔི ཝེདནཱཝ ཝུཙྩཏཱིཏི ཨཱཧ ‘‘ཝེདཡིཏལཀྑཎཾ ནཱམ ཝེདནཱཝཱ’’ཏི. ཝེདཡཏི ཝེདཡཏཱིཏི བྱཱཔནིཙྪཱཝསེན ཝཙནཾ ཝེདནཱཡ སཝིསཡེ ཨབྷིཎྷཔྤཝཏྟིདསྶནཏྠཾ. སབྷཱཝདྷམྨཏོ ཨཉྙོ ཀཏྟཱ ནཏྠཱིཏི དསྶནཏྠཾ ཀཏྟུནིདྡེསོ. ཨིཏཱིཏི ཨནིཡམཏོ ཧེཏུཨཏྠོ. ཁོཏི ཝཙནཱལངྐཱརམཏྟཾ. ཏསྨཱཏི ཏསྶ ནིཡམནཾ. ཨིདཾ ཝུཏྟཾ ཧོཏི – ཡསྨཱ ཡཐཱཔཙྩཡཾ ཨཱརམྨཎརསཾ ཨནུབྷཝཏི, ཏསྨཱ ཝེདནཱཏི ཝུཙྩཏཱིཏི.

‘‘ཀུསལཝིཉྙཱཎེན ¶ སམྤཡུཏྟཱ’’ཏི ཨིདཾ ཀུསལཱཡ ཝེདནཱཡ ཨུཔལཀྑཎཾ དཊྛབྦཾ. ཡཱ ཀཱཙི ཀུསལཱ ཝེདནཱ, སབྦཱ སཱ ཀུསལེན ཝིཉྙཱཎེན སམྤཡུཏྟཱཏི, ན པན ཏསྶཱ ཀུསལབྷཱཝསཾསིདྡྷིདསྶནཏྠཾ. ན ཧི ཀུསལེན ཝིཉྙཱཎེན སམྤཡོགཏོ ཀུསལཱཡ ཝེདནཱཡ ཀུསལབྷཱཝོ, ཨཐ ¶ ཁོ ཡོནིསོམནསིཀཱརཱདིཀཏོ. ཏེནཱཧ ‘‘ཛཱཏིཝསེནཱ’’ཏི. ཨཀུསལཱདཱིསུཔི ཨེསེཝ ནཡོ. ཡཐཱ པན ཛཱཏིཝསེན ཀུསལཱདིཝིཉྙཱཎསམྤཡུཏྟཏཱཡ ཏིཝིདྷཱ, ཨེཝཾ ཡཱཝ ཨེཀཱུནནཝུཏིཝིཉྙཱཎསམྤཡུཏྟཱཏི ཨེཀཱུནནཝུཏིཝིདྷཱ ཝེདིཏབྦཱ. སབྷཱཝབྷེདཏོཏི སམྤཡུཏྟབྷཱུམིཨཱརམྨཎཱདིཝསེན ལབྦྷམཱནཾ བྷེདཾ ཨགྒཧེཏྭཱ ཀེཝལཾ སབྷཱཝཀཏབྷེདཏོ ཨེཝཱཏི ཨཏྠོ.

‘‘པཉྩཝིདྷཱ’’ཏི ཝཏྭཱ ཏཾ པཉྩཝིདྷཏཾ དསྶེཏུཾ ‘‘སུཁ’’ནྟིཨཱདི ཝུཏྟཾ. ཏཏྠ སུཁཡཏཱིཏི སུཁཾ, ཀཱཡཾ, སམྤཡུཏྟདྷམྨེ ཙ ལདྡྷསྶཱདེ ཀརོཏཱིཏི ཨཏྠོ. སུཊྛུ ཝཱ ཁཱདཏི, ཁཎཏི ཝཱ ཀཱཡིཀཾ ཨཱབཱདྷནྟི སུཁཾ. སུཀརཾ ཨོཀཱསདཱནཾ ཨེཏསྶཱཏི སུཁནྟི ཨཔརེ. དུཀྑཡཏཱིཏི དུཀྑཾ, ཀཱཡཾ, སམྤཡུཏྟདྷམྨེ ཙ ཝིབཱདྷཏཱིཏི ཨཏྠོ. དུཊྛུ ཝཱ ཁཱདཏི, ཁཎཏི ཝཱ ཀཱཡིཀཾ ཨསྶཱདནྟི དུཀྑཾ. དུཀྐརཾ ཨོཀཱསདཱནཾ ཨེཏསྶཱཏི དུཀྑནྟི ཨཔརེ. སོམནསྶུཔེཀྑཱནཾ སདྡཏྠོ ཧེཊྛཱ ཝུཏྟོཡེཝ. དོམནསྶསྶ སོམནསྶེ ཝུཏྟནཡཱནུསཱརེན ཝེདིཏབྦཾ. ཀིཾ པན ཀཱརཎཾ མཱནསེཏརསཱཏཱསཱཏཝསེན སུཁཾ, དུཀྑཉྩ ཝིབྷཛིཏྭཱ ཝུཏྟཾ ‘‘སུཁཾ སོམནསྶཾ དུཀྑཾ དོམནསྶ’’ནྟི, ཨུཔེཀྑཱ པན མཱནསཱི, ཨིཏརཱ ཙ ཨེཀདྷཱཝ ཝུཏྟཱཏི? བྷེདཱབྷཱཝཏོ. ཡཐཱ ཧི ཨནུགྒཧཱུཔགྷཱཏཀཏཱཡ སུཁདུཀྑཱནི ཨཉྙཐཱ ཀཱཡསྶ ཨནུགྒཧམུཔགྷཱཏཉྩ ཀརོནྟི, ཨཉྙཐཱ མནསོ, ན ཨེཝམུཔེཀྑཱ. ཏསྨཱ བྷེདཱབྷཱཝཏོ ཨེཀདྷཱཝ ཨུཔེཀྑཱ ཝུཏྟཱཏི.

ཏཏྠ ཡེན སབྷཱཝབྷེདེན ཝེདནཱ པཉྩཝིདྷཱ, སཱ པཝཏྟིཊྛཱནེ དསྶིཏེ སུཔཱཀཊཱ ཧོཏཱིཏི པཝཏྟིཊྛཱནཾ ཏཱཝ དསྶེཏུཾ ‘‘ཏཏྠཱ’’ཏིཨཱདི ཨཱརདྡྷཾ. ཨཀུསལཝིཔཱཀེནཱཏི ཨེཏྠཱཔི ‘‘ཀཱཡཝིཉྙཱཎེན སམྤཡུཏྟ’’ནྟི ཨཱནེཏྭཱ སམྦནྡྷིཏབྦཾ. ཡཐཱ ཨདྷིཀརཎཱིམཏྠཀེ ཀཔྤཱསཔིཙུཔིཎྜཾ ཋཔེཏྭཱ ཨཡོཀཱུཊེན པཧརནྟསྶ པིཙུཔིཎྜཾ ཨཏིཀྐམིཏྭཱ ཀཱུཊཾ ཨདྷིཀརཎིཾ གཎྷཱཏི, ནིགྷཾསོ བལཝཱ ཧོཏི, ཨེཝཾ པཊིགྷཊྚནཱནིགྷཾསསྶ བལཝབྷཱཝཏོ ཨིཊྛེ, ཨིཊྛམཛ྄ཛྷཏྟེ ཙ ཨཱརམྨཎེ ཀཱཡཝིཉྙཱཎཾ སུཁསཧགཏཾ ཧོཏི. ཨནིཊྛེ, ཨནིཊྛམཛ྄ཛྷཏྟེ ཙ དུཀྑསཧགཏནྟི ཨཱཧ ‘‘ཀུསལ…པེ… དུཀྑ’’ནྟི. ཀཱམཱཝཙརཝིཔཱཀཝིཉྙཱཎཱནི པཉྩ ཀམྨཱརམྨཎཝསེན སོམནསྶསཧགཏཱནི ཧོནྟི, རཱུཔཱཝཙརཝིཔཱཀཱནི ཙཏྟཱརི ཀམྨཝསེན, སེསཱནི ཏེརས ཀཱམཱཝཙརཱནི, ཨཊྛ རཱུཔཱཝཙརཱནི, དྭཏྟིཾས ལོཀུཏྟརཱནི, ཡཐཱརཧཾ ¶ ཙེཏོབྷིསངྑཱརཱརམྨཎཔཱདཀཱདིཝསེན ¶ སོམནསྶསཧགཏཱནི ཧོནྟཱིཏི ཨཱཧ ‘‘སོམནསྶཾ དྭཱསཊྛིཡཱ ཝིཉྙཱཎེཧི སམྤཡུཏྟ’’ནྟི. དོམནསྶཾ དྭཱིཧི ཨཀུསལཝིཉྙཱཎེཧི སམྤཡུཏྟཾ ཙེཏོབྷིསངྑཱརཱརམྨཎཱདིཝསེན.

ཨཝསེསཔཉྩཔཉྙཱསཱཡཱཏི ཡཐཱཝུཏྟཱནི ཚསཊྛི ཝིཉྙཱཎཱནི ཋཔེཏྭཱ ཨཝསེསཱཡ པཉྩཔཉྙཱསཱཡ. ཏཏྠ ཀུསལཱཀུསལཝིཔཱཀཱནི ཨིཊྛཱནིཊྛེསུ ནིབྦིཀཔྤཀཱནི སུཁདུཀྑསམྤཡུཏྟཱནི བྷཝིཏུཾ ཡུཏྟཱནིཔི དྭིནྣཾ པིཙུཔིཎྜཱནཾ ཝིཡ དྭིནྣཾ དྭིནྣཾ ཨུཔཱདཱརཱུཔཱནཾ གྷཊྚནཱནིགྷཾསསྶ མནྡབྷཱཝཏོ ཙཀྑཱདིསནྣིསྶིཏཱནི ཨཊྛཔི ཝིཉྙཱཎཱནི སབྦཏྠ ཨུཔེཀྑཱསམྤཡུཏྟཱནེཝ ཧོནྟི, ཏཐཱ བལཝཔཙྩཡཏཱཡ སུཁདུཀྑཱནཾ ཏེསཉྩ ཏདབྷཱཝཏོ. ཨཔུབྦཱརམྨཎནིསྶཡཔྤཝཏྟཱིནི ཨཱཝཛྫནསམྤཊིཙྪནཝིཉྙཱཎཱནི, ཨསདིསཱནནྟརཔྤཙྩཡཾ ཀིརིཡཱརམྦྷསྶ ཨཱདིབྷཱུཏཾ ཝོཊྛབྦནཾ, ཀཱཡདུཀྑཔདྷཱནཏཱཡ ཨཀུསལཕལསྶ ཏདུཔནིསྶཡབྷཱུཏཾ ཨཀུསལཝིཔཱཀཔཊིསནྡྷིཨཱདི, ཨིཊྛམཛ྄ཛྷཏྟཱརམྨཎཔྤཝཏྟཱིནི ཀཱམཱཝཙརཀུསལཝིཔཱཀཝིཉྙཱཎཱནི ཙ ཨུཔེཀྑཱསཧགཏཱནིཡེཝ ཧོནྟི. ཀམྨཝསེན ཝཱ ཝིཔཱཀཱནུབྷཝནསྶ ཨིཊྛཱནིཊྛཱརམྨཎེསུ ཨདུཀྑམསུཁབྷཱཝོ ཡུཏྟོ. སཏི ཙ ཝིཔཱཀབྷཱུཏཱཡ ཨུཔེཀྑཱཡ སུཁདུཀྑམཛ྄ཛྷཏྟབྷཱཝེ ཀམྨཱརམྨཎཝསེན ཀུསལཝིཔཱཀཱཡ ཨིཊྛབྷཱཝོ, ཨཀུསལཝིཔཱཀཱཡ ཨནིཊྛབྷཱཝོ ཙ ཝེདིཏབྦོ. ཨཝསིཊྛཱནི པན སཏྟཏིཾས ཝིཉྙཱཎཱནི ཙེཏོབྷིསངྑཱརཱརམྨཎཔཱདཀཱདིཝསེན ཨུཔེཀྑཱསམྤཡུཏྟཱནི ཧོནྟཱིཏི ཨེཝཾ པཉྩཔཉྙཱསཱཡ ཝིཉྙཱཎེཧི ཨུཔེཀྑཱཡ སམྤཡུཏྟཏཱ ཝེདིཏབྦཱ.

སལཀྑཎཾ ནཱམ དྷམྨཱནཾ ཨནཉྙསཱདྷཱརཎོ སབྷཱཝོ, ཨནུབྷཝནཉྩ སབྦཝེདནཱནཾ སཱདྷཱརཎལཀྑཎནྟི ཏཾ པཊིནིཡཏེན ཨཱརམྨཎེན ནིཡམེཏྭཱ དསྶེནྟོ ཨཱཧ ‘‘ཨིཊྛཕོཊྛབྦཱནུབྷཝནལཀྑཎཾ སུཁ’’ནྟི ཏསྶ བྱབྷིཙཱརཱབྷཱཝཏོ. བྷུསཾ བྲཱུཧནཾ ཝཌྜྷནཾ ཨུཔབྲཱུཧནཾ. ཏཡིདཾ ཀཱམཉྩ ཙེཏསིཀསུཁེཔི ལབྦྷཏི, ཏཾ པན སཝིཀཔྤཀཾ ཙེཏོབྷིསངྑཱརཝསེནཱཔི ཧོཏི. ཨིདནྟུ ནིབྦིཀཔྤཀཾ སབྷཱཝསིདྡྷཏྟཱ ཏཏོ སཱཏིསཡནྟི ཨཱཧ ‘‘སམྤཡུཏྟཱནཾ ཨུཔབྲཱུཧནརས’’ནྟི. ཨསྶཱདིཡཏཱིཏི ཨསྶཱདོ, སུཁཱཝེདནཱ. ཏེནཱཧ བྷགཝཱ ‘‘ཡཾ, བྷིཀྑཝེ, པཉྩུཔཱདཱནཀྑནྡྷེ པཊིཙྩ ཨུཔྤཛྫཏི སུཁཾ སོམནསྶཾ, ཨཡཾ ཝུཙྩཏི, བྷིཀྑཝེ, པཉྩུཔཱདཱནཀྑནྡྷེསུ ཨསྶཱདོ’’ཏི ¶ (སཾ. ནི. ༣.༢༦). ཀཱཡནིསྶིཏཏྟཱ ཀཱཡེ བྷཝོ ཀཱཡིཀོ, སོ ཨེཝ ཨསྶཱདོ ཏཐཱ པཙྩུཔཏིཊྛཏཱིཏི ཀཱཡིཀཨསྶཱདཔཙྩུཔཊྛཱནཾ. ཀཱཡིནྡྲིཡཔདཊྛཱནཾ ཨནཉྙཝཏྠུཀཏྟཱ.

དུཀྑསྶ ལཀྑཎཱདཱིནི ཝུཏྟནཡཱནུསཱརེན ཝེདིཏབྦཱནི.

སབྷཱཝཏོ ¶ , པརིཀཔྤཏོ ཝཱ ཨིཊྛསྶ ཨཱརམྨཎསྶ ཨནུབྷཝནལཀྑཎཾ ཨིཊྛཱརམྨཎཱནུབྷཝནལཀྑཎཾ. ཏེནཱཧ ‘‘ཡཐཱ ཏཐཱ ཝཱ ཨིཊྛཱཀཱརསམྦྷོགརས’’ནྟི, ཡཐཱབྷཱུཏེན ཝཱ ཨཡཐཱབྷཱུཏེན ཝཱ ཨིཊྛཱཀཱརེན ཨཱརམྨཎསྶ སཾབྷུཉྫནརསཾ, པཙྩནུབྷཝནཀིཙྩནྟི ཨཏྠོ. ‘‘པསྶདྡྷིཔདཊྛཱན’’ནྟི ཨིདཾ ‘‘པསྶདྡྷཀཱཡོ སུཁཾ ཝེདེཏཱི’’ཏི (སཾ. ནི. ༥.༣༧༦; ཨ. ནི. ༡༡.༡༢) སུཏྟཔདཾ ནིསྶཱཡ ཝུཏྟཾ, ཏཾ པན ནིརཱམིསསོམནསྶཝསེན ཝེདིཏབྦཾ.

སོམནསྶེ ཝུཏྟཝིཔརིཡཱཡེན དོམནསྶསྶ ལཀྑཎཱདཱིནི ཝེདིཏབྦཱནི. དོམནསྶསྶ ཀཱམདྷཱཏུཡཾ ཨུཔྤཛྫནཏོ ཨེཀནྟེན ཧདཡཝཏྠུཔདཊྛཱནཏཱ ཏཏོ ཝིསེསོ.

མཛ྄ཛྷཏྟསྶ, ཨཱརམྨཎསྶ མཛ྄ཛྷཏྟཾ ཝཱ ཝེདཡིཏཾ ཨནུབྷཝནཾ ལཀྑཎཾ ཨེཏིསྶཱཏི མཛ྄ཛྷཏྟཝེདཡིཏལཀྑཎཱ. མཛ྄ཛྷཏྟཱནུབྷཝནཏོ ཨེཝ སམྤཡུཏྟཱནཾ ནཱཏིཨུཔབྲཱུཧནམིལཱཔནརསཱ. ‘‘སནྟབྷཱཝཔཙྩུཔཊྛཱནཱ’’ཏི ཨིདཾ ཨནཝཛྫཱཡ ནིརཱམིསཱཡ ཨུཔེཀྑཱཡ ཝསེན ཝེདིཏབྦཾ, ན སབྦཱཡ.

ཨིཏི ཝེདནཱཀྑནྡྷེ ཝིཏྠཱརཀཐཱམུཁཝཎྞནཱ.

སཉྙཱཀྑནྡྷཀཐཱཝཎྞནཱ

༤༥༧. སཉྫཱནནལཀྑཎཾ ནཱམ སཉྙཱཝཱཏིཨཱདཱིསུ ཡཾ ཝཏྟབྦཾ, ཏཾ ཝེདནཱཀྑནྡྷནིདྡེསེ ཝུཏྟནཡེནེཝ ཝེདིཏབྦཾ.

ཀཱམཾ ཝེདནཱཡཔི ཝིཔྤཡུཏྟཾ ཝིཉྙཱཎཾ ནཏྠི, ཏསྶཱ པན སབྷཱཝཏོ བྷིནྣཏྟཱ ཀཱཡཙི ཝེདནཱཡ སམྤཡུཏྟམྤི ཀཱཡཙི ཝིཔྤཡུཏྟཾ ཧོཏི. སཉྙཱཡ པན ཨཱིདིསཾ ནཏྠཱིཏི ཨཱཧ ‘‘ན ཧི ཏཾ ཝིཉྙཱཎཾ…པེ… སཉྙཱཡཱ’’ཏི.

སབྦཱཝཱཏི ཙཏུབྷཱུམིཀཱཔི. ཨཐ ཝཱ ཡཐཱ ཝེདནཱ བྷིནྣསབྷཱཝཏྟཱ བྷེདནལཀྑཎཱདིཏོ ཝུཏྟཱ, ན ཨེཝམཡཾ, ཨཡཾ པན སབྦཱཝ སཉྫཱནནལཀྑཎཱ ¶ . ནཱིལཱདིབྷེདསྶ ཨཱརམྨཎསྶ སཉྫཱནནཾ སཉྙཾ ཀཏྭཱ ཛཱནནཾ ལཀྑཎཾ ཨེཏིསྶཱཏི སཉྫཱནནལཀྑཎཱ. ཏཐཱ ཧི སཱ ཨབྷིཉྙཱཎེན སཉྫཱནནཏོ ¶ པཙྩཱབྷིཉྙཱཎརསཱཏི ཝུཙྩཏི. ནིམིཏྟེན ཧི པུན སཉྫཱནནཀིཙྩཱ པཙྩཱབྷིཉྙཱཎརསཱ. ཏསྶཱ ཝཌྜྷཀིསྶ དཱརུམྷི ཨབྷིཉྙཱཎཾ ཀཏྭཱ ཏེན ཨབྷིཉྙཱཎེན པཙྩཱབྷིཛཱནནཀཱལེ པཝཏྟི ཝེདིཏབྦཱ. ཏེནཱཧ ‘‘ཏདེཝེཏ’’ནྟིཨཱདི. པུན སཉྫཱནནསྶ པཙྩཡོ པུནསཉྫཱནནཔཙྩཡོ, ཏདེཝ ནིམིཏྟཾ པུན…པེ… ནིམིཏྟཾ, ཏསྶ ཀརཎཾ, པུན…པེ… ཀརཎཾ, པུནསཉྫཱནནཔཙྩཡབྷཱུཏཾ ཝཱ ནིམིཏྟཀརཎཾ པུན…པེ… ཀརཎཾ, ཏདསྶཱ ཀིཙྩནྟི པུནསཉྫཱནནཔཙྩཡནིམིཏྟཀརཎརསཱ. པུནསཉྫཱནནནིམིཏྟཀརཎཾ ནིམིཏྟཀཱརིཀཱཡ, ནིམིཏྟེན སཉྫཱནནནྟིཡཱ ཙ སབྦཱཡ སཉྙཱཡ སམཱནཾ ཡོཛེཏབྦཾ. ཨབྷིནིཝེསཀརཎཾ ‘‘ཨིདམེཝ སཙྩ’’ནྟི (མ. ནི. ༢.༡༨༧, ༢༠༢, ༢༠༣, ༤༢༧; མ. ནི. ༣.༢༧-༢༩) སཉྙཱབྷིནིཝེསམཏྟེནེཝ དཊྛབྦཾ. ཡཐཱཨུཔཊྛིཏཝིསཡཔདཊྛཱནཱ ཨཝིཀཔྤསབྷཱཝཏྟཱ. ཉཱཎསམྤཡུཏྟཱ པན སཉྙཱ ཉཱཎམེཝ ཨནུཝཏྟཏི, ཏསྨཱ ཨབྷིནིཝེསཀཱརིཀཱ, ཝིཔརཱིཏགྒཱཧིཀཱ ཙ ན ཧོཏི. ཨེཏེནེཝ སམཱདྷིསམྤཡུཏྟཏཱཡ ཨཙིརཊྛཱནཏཱ ཙ ན ཧོཏཱིཏི ཝེདིཏབྦཱ. ཨེཝཾ རཱགདིཊྛིམཱནཱདིསམྤཡུཏྟཱཡ སཉྙཱཡ རཱགཱདིཨནུཝཏྟིཀབྷཱཝོཏི.

ཨིཏི སཉྙཱཀྑནྡྷེ ཝིཏྠཱརཀཐཱམུཁཝཎྞནཱ.

སངྑཱརཀྑནྡྷཀཐཱཝཎྞནཱ

༤༥༨. རཱསིཀརཎལཀྑཎནྟི སམྤིཎྜནལཀྑཎཾ, ཏཏོ སངྑཱརཱ ཨཱཡཱུཧནརསཱ ཝུཙྩནྟི. ཙེཏནཱཔདྷཱནཏཱཡ ཧི སངྑཱརཀྑནྡྷདྷམྨཱ ཨེཝཾ ཝུཏྟཱ. ཏེནེཝཱཧ ‘‘ཀིཾ པན ཏནྟི སངྑཱརཱཡེཝཱ’’ཏིཨཱདི. ཏཏྠ སངྑཏམབྷིསངྑརོནྟཱིཏི ཡཐཱ ཨཏྟནོ ཕལཾ སངྑཏཾ སམྨདེཝ ནིཔྥནྣཾ ཧོཏི, ཨེཝཾ ཨབྷིསངྑརོནྟཱིཏི ཨཏྠོ. ཝིཔྥཱརཔཙྩུཔཊྛཱནཱཏི ཨེཏྠ ཝིཔྥཱརོ ནཱམ ཝིཔྥཱརཝནྟཏཱ, ཏསྨཱ སབྱཱཔཱརཔཙྩུཔཊྛཱནཱཏི ཨཏྠོ.

ཏསྨིཾ ཏསྨིཾ ཙིཏྟེ ཨུཔྤནྣེ ནིཡམེན ཨུཔྤཛྫནཏོ ནིཡཏཱ. སརཱུཔེན ཨཱགཏཱཏི ཨེཝཾ པིཊྛིཝཏྟཀེ ཨཀཏྭཱ པཱལི༹ཡཱ སརཱུཔེནེཝ ཨཱགཏཱ. ཀདཱཙིདེཝ ཨུཔྤཛྫནཏོ ན ནིཡཏཱཏི ཨནིཡཏཱ. ཡདིཔི ཨནིཡཏཱ ཨེཀཛ྄ཛྷཾ ¶ ན ཨུཔྤཛྫནྟི, ཏསྨིཾ པན ཙིཏྟེ ཨུཔྤཛྫནདྷམྨཏཱཡ ‘‘ཚཏྟིཾསཱ’’ཏི ཝུཏྟཾ. ཏེནཱཧ ‘‘ཨུཔྤཛྫམཱནཱཔི ཙ ན ཨེཀཏོ ཨུཔྤཛྫནྟཱི’’ཏི.

༤༥༩. ཕུསཏཱིཏི ¶ ཀཏྟུནིདྡེསོ. ཡཾ ཏཏྠ ཀཱརཎཾ, ཏཾ ཧེཊྛཱ ཝུཏྟམེཝ. ཕུསནྟི ཨེཏེནཱཏི ཝཱ ཕསྶོ. སམྤཡུཏྟདྷམྨཱ ཧི ཨཱརམྨཎེ པཝཏྟམཱནཱ ཏཾ ཕུསནལཀྑཎེན ཕསྶེན ཕུསནྟཱ ཝིཡ ཧོནྟི. ཨཱརམྨཎཕུསནམཏྟཾ ཝཱ ཕསྶོཏི སཱདྷནཏྟཡམྤི ཡུཛྫཏེཝ. སབྷཱཝདྷམྨེསུ ཀཏྟུཀརཎསཱདྷནཝཙནཾ ཏདཱཀཱརསམཱརོཔནཏོ པརིཡཱཡཀཐཱ, བྷཱཝསཱདྷནཝཙནམེཝ ནིཔྤརིཡཱཡཀཐཱཏི ཝུཏྟཾ ‘‘ཕུསནལཀྑཎོ’’ཏི. ཨཡཉྷཱིཏིཨཱདི ཡཐཱཝུཏྟལཀྑཎཱདིསམཏྠནཾ. ཡདི ཨཡཾ དྷམྨོ ཙེཏསིཀོ, སྭཱཡཾ ཨརཱུཔདྷམྨོ སམཱནོ ཀཐཾ ཕུསནལཀྑཎོ, སངྒྷཊྚནརསཱདིཀོ ཙ ཧོཏཱིཏི ཨནྟོལཱིནཾ ཙོདནཾ ཧདཡེ ཋཔེཏྭཱ ཏསྶ སོདྷནཏྠཾ ‘‘ཨརཱུཔདྷམྨོཔི སམཱནོ’’ཏིཨཱདི ཝུཏྟཾ. ཏཏྠ ‘‘ཕུསནཱཀཱརེནེཝ པཝཏྟཏཱི’’ཏི ཨིམིནཱ ཨརཱུཔསྶཱཔི ཏསྶ དྷམྨསྶ ཨཡཾ སབྷཱཝོཏི དསྶེཏི. སཱ ཙ ཏསྶ ཕུསནཱཀཱརཔྤཝཏྟི ཨམྦིལཨམྦཔཀྐཱདིཾ ཁཱདནྟཾ པསྶནྟསྶ པརསྶ ཁེལུ༹པྤཏྟི, པརཾ ཝིབཱདྷིཡམཱནཾ དིསྭཱ དཡཱལུཀསྶ སརཱིརཀམྤནཾ, རུཀྑསཱཁགྒེ དུཊྛིཏཾ པུརིསཾ དིསྭཱ བྷཱུམིཡཾ ཋིཏསྶ བྷཱིརུཀཔུརིསསྶ ཛངྒྷཙལནཾ, པིསཱཙཱདིབྷཱཡིཏབྦཾ དིསྭཱ ཨཱུརུཁམྦྷོཏི ཨེཝམཱདཱིསུ པརིབྱཏྟཱ ཧོཏི.

ཨེཀདེསེནཱཏི ཀཊྛདྭཡཱདི ཝིཡ ཨཏྟནོ ཨེཀཔསྶེན. ཨནལླཱིཡམཱནོཔཱིཏི ཨསཾསིལིཡམཱནོཔི. རཱུཔསདྡེཧི སཧ ཕསྶསྶ སཱམཉྙཾ ཨནལླཱིཡམཱནསངྒྷཊྚནམེཝ, ན ཝིསཡབྷཱཝོ. ཡཐཱ རཱུཔསདྡཱ ཙཀྑུསོཏཱནི ཨནལླཱིཡམཱནཱ ཨེཝ ‘‘ཕུསིཏ’’ནྟིཨཱདིནཱ ཝུཏྟཱ, ཨེཝཾ ཕསྶསྶཱཔི ཨཱརམྨཎཕུསནསངྒྷཊྚནཱནཱིཏི. སངྒྷཊྚནཉྩ ཕསྶསྶ ཙིཏྟཱརམྨཎཱནཾ སནྣིཔཏནབྷཱཝོ ཨེཝ. ཏེནཱཧ ‘‘ཙིཏྟམཱརམྨཎཉྩ སངྒྷཊྚེཏཱི’’ཏི. ཀིཙྩཊྛེན རསེན སངྒྷཊྚནརསཏཱ ཝུཏྟཱ, ཝཏྠཱརམྨཎསནྣིཔཱཏེན ཝཱ སམྤཛྫཏཱིཏི སངྒྷཊྚནསམྤཏྟིཀོ ཕསྶོ སངྒྷཊྚནརསོ ཝུཏྟོ. ཡཐཱ ‘‘དྭེ པཱཎཱི ཝཛྫེཡྻུ’’ནྟིཨཱདཱིསུ (མི. པ. ༢.༣.༨) པཱཎིསྶ པཱཎིམྷི སངྒྷཊྚནཾ ཏབྦིསེསབྷཱུཏཱ རཱུཔདྷམྨཱ, ཨེཝཾ ཙིཏྟསྶ ཨཱརམྨཎེ སངྒྷཊྚནཾ ཏབྦིསེསབྷཱུཏོ ཨེཀོ ཙེཏསིཀདྷམྨོ དཊྛབྦོ. ‘‘ཏིཎྞཾ སངྒཏི ཕསྶོ’’ཏི (མ. ནི. ༡.༢༠༤; ༣.༤༢༡, ༤༢༥, ༤༢༦; སཾ. ནི. ༢.༤༣-༤༤; ༤.༦༠) ཝཙནཏོ ཙཀྑུརཱུཔཝིཉྙཱཎཱདཱིནཾ ¶ སངྒཏིཝསེན གཧེཏབྦཏྟཱ ཨཱཧ ‘‘ཏིཀསནྣིཔཱཏསངྑཱཏསྶཱ’’ཏིཨཱདི. ཏསྶ ཕསྶསྶ ཀཱརཎབྷཱུཏོ ཏདནུརཱུཔོ སམནྣཱཧཱརོ ཏཛྫཱསམནྣཱཧཱརོ. ཨིནྡྲིཡསྶ ཏདབྷིམུཁབྷཱཝོ, ཨཱཝཛྫནཱཡ ཙ ཨཱརམྨཎཀརཎཾ ཝིསཡསྶ པརིཀྑཏཏཱ ཨབྷིསངྑཏཏཱ, ཝིཉྙཱཎསྶ ཝིསཡབྷཱཝཀརཎནྟི ཨཏྠོ. ཡཐཱ ནིཙྩམྨཱ གཱཝཱི ཡཾ ཡཾ ཋཱནཾ ཨུཔགཏཱ, ཏཏྠ ཏཏྠ དུཀྑམེཝ པཱཔུཎཱཏི, ཨེཝཾ ཕསྶེ སཏི ཝེདནཱ ཨུཔྤཛྫཏེཝ. ཝེདནཱ ཙ དུཀྑསལླཱདིསབྷཱཝཱཏི ཝུཏྟཾ ‘‘ཝེདནཱདྷིཊྛཱནབྷཱཝཏོ པན ནིཙྩམྨགཱཝཱི ཝིཡ དཊྛབྦོ’’ཏི.

༤༦༠. ཨབྷིསནྡཧཏི ¶ པབནྡྷཏི པཝཏྟེཏི. ཙེཏནཱབྷཱཝོ བྱཱཔཱརབྷཱཝོ. ཨཱཡཱུཧནཾ ཙེཏཡནཾ ཨཱིརིཡནཾ. སཾཝིདཧནཾ ཝིཙཱརཎཾ. ཨཱཡཱུཧནརསཱཡ ཙེཏནཱཡ པཝཏྟམཱནཱཡ སབྦེཔི སམྤཡུཏྟདྷམྨཱ ཡཐཱསཀཾ ཀིཙྩཔྤསུཏཱ ཧོནྟཱིཏི སཱ སཀིཙྩཔརཀིཙྩསཱདྷིཀཱ ཝུཏྟཱ. ཛེཊྛསིསྶོ པརེ སཛ྄ཛྷཱཡནེ ཨུཡྻོཛེནྟོ སཡམྤི སཛ྄ཛྷཱཡཏི. མཧཱཝཌྜྷཀིམྷི ཝཌྜྷཀིཀམྨཾ ཀཱཏུམཱརདྡྷེ ཨིཏརེཔི ཀརོནྟིཡེཝ. ཨུསྶཱཧནབྷཱཝེནཱཏི ཨཱདརཀརཎབྷཱཝེན. སཱ ཧི སཡཾ ཨཱདརབྷཱུཏཱ སམྤཡུཏྟདྷམྨེ ཨཱདརཡཏཱིཏི. ཨཱཡཱུཧནཝསེན ཨུསྶཱཧནཾ དཊྛབྦཾ, ན ཝཱིརིཡུསྶཱཧཝསེན.

༤༦༡. ཝཱིརབྷཱཝོཏི ཡེན ཝཱིརོ ནཱམ ཧོཏི, སོ དྷམྨོཏི ཨཏྠོ. ཝིདྷིནཱ ཨཱིརེཏབྦཾ པཝཏྟེཏབྦནྟི ཝཱ ཝཱིརིཡཾ, ཨུསྶཱཧོ, ཏཾཏཾཀིཙྩསམཱརམྦྷོ, པརཀྐམོ ཝཱ. ཨུཔཏྠམྦྷནཾ སམྤཡུཏྟདྷམྨཱནཾ ཀོསཛྫཔཀྑེ པཏིཏུཾ ཨདཏྭཱ དྷཱརཎཾ ཨནུབལཔྤདཱནཾ, སམྤགྒཎྷནཾ ཝཱ. སཾསཱིདནཔཊིཔཀྑོ དྷམྨོ ཨསཾསཱིདནཾ, ན སཾསཱིདནཱབྷཱཝམཏྟནྟི ཨསཾསཱིདནབྷཱཝེན པཙྩུཔཏིཊྛཏཱིཏི ཝུཏྟཾ ‘‘ཨསཾསཱིདནབྷཱཝཔཙྩུཔཊྛཱན’’ནྟི. སཾཝེགཔདཊྛཱནནྟི ཨཊྛསཾཝེགཔུབྦིཀཱཡ (ཨ. ནི. ཨཊྛ. ༡.༡.༤༡༨) ཀུསལཀིརིཡཱཡ ཝཱིརིཡཱརམྦྷཝཏྠུཔདཊྛཱནཾ. ‘‘མགྒོ གནྟབྦོ ཧོཏི, མགྒོ གཏོ, ཀམྨཾ ཀཱཏབྦཾ, ཀམྨཾ ཀཏཾ, ཨཔྤམཏྟཀོ ཨཱབཱདྷོ ཨུཔྤནྣོ, གིལཱནཱ ཝུཊྛིཏོ ཧོཏི, ཨཙིརཝུཊྛིཏོ གེལཉྙཱ, གཱམཾ ཝཱ ནིགམཾ ཝཱ པིཎྜཱཡ ཝིཙརནྟོ ན ལབྷཏི ལཱུཁསྶ ཝཱ པཎཱིཏསྶ ཝཱ བྷོཛནསྶ ཡཱཝདཏྠཾ པཱརིཔཱུརིཾ, ལབྷཏི…པེ… པཱརིཔཱུརི’’ནྟི ཨེཝཾ ཝུཏྟཱནི ཨེཏཱནི ཨནུརཱུཔཔཙྩཝེཀྑཎཱསཧིཏཱནི ཨཊྛ ཝཱིརིཡཱརམྦྷཝཏྠཱུནི, ཏཾམཱུལཀཱནི ཝཱ པཙྩཝེཀྑཎཱནི.

༤༦༢. ཨཏྟནཱ ¶ ཨནུཔཱལེཏབྦཱནཾ སཧཛཱཏདྷམྨཱནཾ ཨནུཔཱལནཾ ཛཱིཝིཏསྶ བྱཱཔཱརོ, ཏཉྩ ནེསཾ ཛཱིཝནནྟི ཏཾ ཏསྶ ཀཱརཎབྷཱཝཾ པུརཀྑཏྭཱ ཝུཏྟཾ ‘‘ཛཱིཝནྟི ཏེནཱ’’ཏི. ཏམྤི ཙསྶ ཨཏྠཏོ ཛཱིཝནམེཝཱཏི ཨཱཧ ‘‘ཛཱིཝནམཏྟམེཝ ཝཱ ཏ’’ནྟི.

༤༦༣. ཨཱདྷིཡཏཱིཏི ཋཔེཏི. ཨཝིསཱརོ ཨཏྟནོ ཨེཝ ཨཝིསརཎསབྷཱཝོ. ཨཝིཀྑེཔོ སམྤཡུཏྟཱནཾ དྷམྨཱནཾ ཨཝིཀྑིཏྟཏཱ. ཡེན སམྤཡུཏྟཱ ཨཝིཀྑིཏྟཱ ཧོནྟི, སོ དྷམྨོ ཨཝིཀྑེཔོཏི. ཨཝཱུཔསམལཀྑཎསྶ ཝིཀྑེཔསྶ པཊིཔཀྑཏཱཡ ཙིཏྟསྶ ཨུཔསམནཱཀཱརེན པཙྩུཔཏིཊྛཏཱིཏི ཨུཔསམཔཙྩུཔཊྛཱནོ. ཝིསེསཏོཏི ཡེབྷུཡྻེན. སུཁཝིརཧིཏོཔི ཧི ཨཏྠི སམཱདྷཱིཏི. དཱིཔཙྩིནིདསྶནེན སནྟཱནཋིཏིབྷཱཝཾ སམཱདྷིསྶ དསྶེཏི.

༤༦༤. སདྡཧནྟི ¶ ཨེཏཱཡཱཏི སདྡཧནཀིརིཡཱཡ པཝཏྟམཱནཱནཾ དྷམྨཱནཾ ཏཏྠ ཨཱདྷིཔཙྩབྷཱཝེན སདྡྷཱཡ པཙྩཡཏཾ དསྶེཏི. ཏསྶཱ ཧི དྷམྨཱནཾ ཏཐཱཔཙྩཡབྷཱཝེ སཏི པུགྒལོ སདྡཧཏཱིཏི ཝོཧཱརོ ཧོཏི. སདྡཧནཾ སདྡྷེཡྻཝཏྠུནོ པཏྟིཡཱཡནཾ, ཏཾ ལཀྑཎཾ ཨེཏིསྶཱཏི སདྡཧནལཀྑཎཱ. ཨོཀཔྤནལཀྑཎཱཏི ཨནུཔཝིསིཏྭཱ ཨེཝམེཏནྟི ཀཔྤནལཀྑཎཱ. ཀཱལུསྶིཡམལཾ ཝིདྷམེཏྭཱ སམྤཡུཏྟཱནཾ, པུགྒལསྶེཝ ཝཱ པསཱདནཾ ཨནཱཝིལབྷཱཝཀརཎཾ རསོ ཨེཏིསྶཱཏི པསཱདནརསཱ. པཀྑནྡནཾ ཨདྷིམུཙྩནཝསེན ཨཱརམྨཎསྶ ཨནུཔཝིསནཾ. ཨཀཱལུསབྷཱཝོ ཨཀཱལུསྶིཡཾ, ཨནཱཝིལབྷཱཝོཏི ཨཏྠོ. པསཱདནཱིཡཊྛཱནེསུ པསཱདཝིཔརཱིཏཾ ཨཀུསལཾ ཨསྶདྡྷིཡཾ, མིཙྪཱདྷིམུཏྟི ཙ, ཏཔྤཙྩནཱིཀོཝ པསཱདབྷཱུཏོ ཝཏྠུགཏོ ནིཙྪཡོ ཨདྷིམུཏྟི, ན ཡེཝཱཔནཀཱདྷིམོཀྑོ. རཏནཏྟཡཾ, ཀམྨཾ, ཀམྨཕལཉྩ སདྡྷེཡྻཝཏྠུ. སཔྤུརིསསཾསེཝནསདྡྷམྨསཝནཡོནིསོམནསིཀཱརདྷམྨཱནུདྷམྨཔྤཊིཔཏྟིཡོ སོཏཱཔཏྟིཡངྒཱནི. ཀུསལདྷམྨཱནཾ ཨཱདཱནེ ཧཏྠཾ ཝིཡ, སབྦསམྤཏྟིསམྤདཱནེ ཝིཏྟཾ ཝིཡ, ཨམཏཀསིཕལཕལནེ བཱིཛཾ ཝིཡ དཊྛབྦཱ.

༤༦༥. སརནྟི ཏཱཡཱཏི སརཎཀིརིཡཱཡ པཝཏྟམཱནཱནཾ དྷམྨཱནཾ ཏཏྠ ཨཱདྷིཔཙྩབྷཱཝེན སཏིཡཱ པཙྩཡཏཾ དསྶེཏི. ཏསྶཱ ཧི དྷམྨཱནཾ ཏཐཱཔཙྩཡབྷཱཝེ སཏི ཏཾསམངྒིཔུགྒལོ སརཏཱིཏི ཝོཧཱརོ ཧོཏི. ཨུདཀེ ཨལཱབུ ཝིཡ པིལཝིཏྭཱ གནྟུཾ ཨདཏྭཱ པཱསཱཎསྶ ཝིཡ ནིཙྩལསྶ ¶ ཨཱརམྨཎསྶ ཋཔནཾ སརཎཾ ཨསམྨུཊྛཏཱཀརཎཾ ཨཔིལཱཔནཾ. སམྨོསཔཙྩནཱིཀཾ ཀིཙྩཾ ཨསམྨོསོ, ན སམྨོསཱབྷཱཝམཏྟཾ. ‘‘སཏཱརཀྑེན ཙེཏསཱ’’ཏི (ཨ. ནི. ༡༠.༢༠) ཝཙནཏོ ཨཱརཀྑཔཙྩུཔཊྛཱནཱ. ཨཉྙཏོ ཨཱགནྟྭཱ ཙིཏྟཝིསཡེ ཨབྷིམུཁོ བྷཝཏི ཨེཏཱཡཱཏི ཝིསཡཱབྷིམུཁབྷཱཝོ, སཏི. སཏིཡཱ ཝཏྠུབྷཱུཏཱ ཀཱཡཱདཡོཝ ཀཱཡཱདིསཏིཔཊྛཱནཱནི, སཏི ཨེཝ ཝཱ པུརིམཱ པཙྪིམཱཡ པདཊྛཱནཾ.

༤༦༦. ཀཱཡདུཙྩརིཏཱདཱིཧཱིཏི ཧེཏུམྷི ཀརཎཝཙནཾ. ཧིརིཡཏཱིཏི ལཛྫཱཀཱརེན ཛིགུཙྪཏི. ཏེཧིཡེཝཱཏི ཀཱཡདུཙྩརིཏཱདཱིཧིཡེཝ. ཨོཏྟཔྤཏཱིཏི ཨུབྦིཛྫཏི. ཧིརཱི པཱཔདྷམྨེ གཱུཐཾ ཝིཡ པསྶནྟཱི ཛིགུཙྪཏཱིཏི ཨཱཧ ‘‘པཱཔཏོ ཛིགུཙྪནལཀྑཎཱ ཧིརཱི’’ཏི. ཨོཏྟཔྤཾ ཏེ ཨུཎྷཾ ཝིཡ པསྶནྟཾ ཏཏོ ཨུཏྟསཏཱིཏི ཝུཏྟཾ ‘‘ཨུཏྟཱསལཀྑཎཾ ཨོཏྟཔྤ’’ནྟི. ཝུཏྟཔྤཀཱརེནཱཏི ལཛྫཱཀཱརེན, ཨུཏྟཱསཱཀཱརེན ཙ. ཨཏྟགཱརཝཔདཊྛཱནཱ ཧིརཱི ཨཛ྄ཛྷཏྟསམུཊྛཱནཏཱཡ, ཨཏྟཱདྷིཔཏིཏཱཡ ཙ. པརགཱརཝཔདཊྛཱནཾ ཨོཏྟཔྤཾ བཧིདྡྷཱསམུཊྛཱནཏཱཡ, ལོཀཱདྷིཔཏིཏཱཡ ཙ. ཏམེཝཏྠཾ པཱཀཊཏརཾ ཀཱཏུཾ ‘‘ཨཏྟཱནཾ ¶ ཧཱི’’ཏིཨཱདི ཝུཏྟཾ. ཨཛ྄ཛྷཏྟསམུཊྛཱནཱདིཏཱ ཙ ཧིརིཨོཏྟཔྤཱནཾ ཏཏྠ ཏཏྠ པཱཀཊབྷཱཝེན ཝུཏྟཱ, ན པནེཏེསཾ ཀདཱཙི ཨཉྙམཉྙཝིཔྤཡོགཱ. ན ཧི ལཛྫནཾ ནིབྦྷཡཾ, པཱཔབྷཡཾ ཝཱ ཨལཛྫནཾ ཨཏྠཱིཏི. ལོཀཔཱལཀཱཏི ཨེཏྠ ‘‘དྭེམེ, བྷིཀྑཝེ, སུཀྐཱ དྷམྨཱ ལོཀཾ པཱལེནྟཱི’’ཏི (ཨ. ནི. ༢.༩; ཨིཏིཝུ. ༤༢) སུཏྟཔདཾ ཨཏྟཱདྷིཔཏི, ལོཀཱདྷིཔཏིབྷཱཝེ ཙ ‘‘སོ ཨཏྟཱནཾཡེཝ ཨདྷིཔཏིཾ ཀརིཏྭཱ, སོ ལོཀཾཡེཝ ཨདྷིཔཏིཾ ཀརིཏྭཱ’’ཏི (ཨ. ནི. ༣.༤༠) ཙ སུཏྟཔདཱནི ཨཱཧརིཏྭཱ ཝཏྟབྦཱནི.

༤༦༧. ཡསྨཱ ལོབྷཔཊིཔཀྑོ ཨལོབྷོཏི ཡེ དྷམྨཱ ཏེན སམྤཡུཏྟཱ, ཏཾསམངྒིནོ ཝཱ སཏྟཱ ཏེན ན ལུབྦྷནྟི, སཡཾ ཀདཱཙིཔི ན ལུབྦྷཏེཝ, ཨཏྠཏོ ཝཱ ཨལུབྦྷནཱཀཱརོ ཨེཝ ཙ ཧོཏི, ཏསྨཱ ཝུཏྟཾ ‘‘ན ལུབྦྷནྟཱི’’ཏིཨཱདི. ཨེསེཝ ནཡོཏི ‘‘ན དུསྶནྟི ཏེནཱ’’ཏིཨཱདིནཱ ཀཱརཀཏྟཡཡོཛནཾ ཨཏིདིསཏི. ཨགེདྷོ ཨགིཛ྄ཛྷནཾ ཨནབྷིཀངྑནཾ. ཨལགྒབྷཱཝོ ཨནཱསཏྟཏཱ. ཨཔརིགྒཧོ ཀསྶཙི ཝཏྠུནོ མམཏྟཝསེན ཨསངྒཧོ. ཨནལླཱིནོ བྷཱཝོ ཨདྷིཔྤཱཡོ ཨེཏསྶཱཏི ཨནལླཱིནབྷཱཝོ. ཨེཝཉྷི ཨུཔམཱཡ སམེཏི.

༤༦༨. ཙཎྜིཀསྶ ¶ བྷཱཝོ ཙཎྜིཀྐཾ, ཀོཔོ. ཏཔྤཊིཔཀྑོ ཨཙཎྜིཀྐཾ, ཨབྱཱཔཱདོ. ཨཝིརོདྷོ ཨཝིགྒཧོ. ཨནུཀཱུལམིཏྟོ ཨནུཝཏྟཀོ. ཝིནཡརསོཏི ཝིནཡནརསོ. སོམྨབྷཱཝོ མེཛྫནཝསེན ཧིལཱདནཱིཡཏཱ.

༤༦༩. དྷམྨཱནཾ ཡོ ཡོ སབྷཱཝོ ཡཐཱསབྷཱཝོ, ཏསྶ ཏསྶ པཊིཝིཛ྄ཛྷནཾ ཡཐཱསབྷཱཝཔཊིཝེདྷོ. ཨཀྑལིཏཾ ཨཝིརཛ྄ཛྷིཏྭཱ པཊིཝེདྷོ ཨཀྑལིཏཔཊིཝེདྷོ. ཝིསཡསྶ ཨོབྷཱསནཾ ཏཔྤཊིཙྪཱདཀསམྨོཧནྡྷཀཱརཝིདྷམནཾ ཝིསཡོབྷཱསནཾ. ཀཏྠཙིཔི ཝིསཡེ ཨསམྨུཡ྄ཧནཱཀཱརེནེཝ པཙྩུཔཏིཊྛཏི, སམྨོཧཔཊིཔཀྑཏཱཡ ཝཱ ཏདབྷཱཝཾ པཙྩུཔཊྛཔེཏཱིཏི ཨསམྨོཧཔཙྩུཔཊྛཱནོ. སབྦཀུསལཱནཾ མཱུལབྷཱུཏཱཏི སབྦེསཾ ཙཏུབྷཱུམཀཀུསལདྷམྨཱནཾ སུཔྤཏིཊྛིཏབྷཱཝསཱདྷནེན པཏིཊྛཱབྷཱུཏཱ, ན ཏེསཾ ཀུསལབྷཱཝསཱདྷནེན. ཡདི ཧི ཏེསཾ ཀུསལབྷཱཝོ ཀུསལམཱུལཔཊིབདྡྷོ སིཡཱ, ཨེཝཾ སཏི ཏཾསམུཊྛཱནརཱུཔེསུ ཧེཏུཔཙྩཡཏཱ ན སིཡཱ. ན ཧི ཏེ ཏེསཾ ཀུསལཱདིབྷཱཝཾ སཱདྷེནྟི, ན ཙ པཙྩཡཱ ན ཧོནྟི. ཝུཏྟཉྷེཏཾ ‘‘ཧེཏཱུ ཧེཏུསམྤཡུཏྟཀཱནཾ དྷམྨཱནཾ ཏཾསམུཊྛཱནཱནཉྩ རཱུཔཱནཾ ཧེཏུཔཙྩཡེན པཙྩཡོ’’ཏི (པཊྛཱ. ༡.༡.༡). ཡཐཱ ཙ ཀུསལབྷཱཝོ, ཨེཝཾ ཨབྱཱཀཏབྷཱཝོཔི ཨབྱཱཀཏམཱུལཔྤཊིབདྡྷོ སིཡཱ. ཏཐཱ སཏི ཨཧེཏུཀཙིཏྟཱནཾ ¶ ཨབྱཱཀཏབྷཱཝོ ཨེཝ ན སིཡཱ, ཨཀུསལེསུ ཙ ཡཏྠ ཨེཀཾཡེཝ མཱུལཾ, ཏསྶ ཨཀུསལབྷཱཝོ ན སིཡཱ, ཨུབྷཡམྤི ཧོཏིཡེཝ. ཏསྨཱ ན མཱུལཔྤཊིབདྡྷོ ཀུསལཱདིབྷཱཝོ, ཨཐ ཁོ ཡོནིསོམནསིཀཱརཱདིཔཊིབདྡྷོ. ཏེསཾ པན སུཔྤཏིཊྛིཏབྷཱཝསཱདྷནཱནི མཱུལཱནཱིཏི གཧེཏབྦཾ.

༤༧༠. པསྶམྦྷནཾ དརཐཝཱུཔསམོ. ཀཱཡསདྡོ སམཱུཧཝཱཙཱི, སོ ཙ ཁོ ཝེདནཱདིཀྑནྡྷཏྟཡཝསེནཱཏི ཨཱཧ ‘‘ཀཱཡོཏི ཙེཏྠ ཝེདནཱདཡོ ཏཡོ ཁནྡྷཱ’’ཏི. ཏེནེཝཱཧ ‘‘ཏཏྠ ཀཏམཱ ཏསྨིཾ སམཡེ ཀཱཡཔསྶདྡྷི ཧོཏི? ཡཱ ཏསྨིཾ སམཡེ ཝེདནཱཀྑནྡྷསྶཱ’’ཏིཨཱདི (དྷ. ས. ༤༠). དརཐོ སཱརམྦྷོ, དོམནསྶཔཙྩཡཱནཾ ཨུདྡྷཙྩཱདྷིཀཱནཾ ཀིལེསཱནཾ, ཏཐཱཔཝཏྟཱནཾ ཝཱ ཙཏུནྣཾ ཁནྡྷཱནཾ ཨེཏཾ ཨདྷིཝཙནཾ. དརཐནིམྨདྡནེན པརིལཱ༹ཧཔརིཔྥནྡཝིརཧིཏོ སཱིཏིབྷཱཝོ ཨཔརིཔྥནྡསཱིཏིབྷཱཝོ. ཨུདྡྷཙྩཔྤདྷཱནཱ ཀིལེསཱ ¶ ཨུདྡྷཙྩཱདིཀིལེསཱ, ཨུདྡྷཙྩཾ ཝཱ ཨཱདིཾ ཀཏྭཱ སབྦཀིལེསེ སངྒཎྷཱཏི. སེསེསུཔི ཨེསེཝ ནཡོ.

གརུབྷཱཝོ དནྡྷཏཱ, ཐིནམིདྡྷཱདྷིཀཱནཾ, ཏཐཱཔཝཏྟཱནཾ ཝཱ ཙཏུནྣཾ ཁནྡྷཱནཾ ཨེཏཾ ཨདྷིཝཙནཾ. དནྡྷཏཱཡ པཊིཔཀྑོ ཨདནྡྷཏཱ, ན དནྡྷཏཱཡ ཨབྷཱཝམཏྟཾ.

ཐདྡྷབྷཱཝོ ཐམྦྷོ, དིཊྛིམཱནཱདྷིཀཱནཾ, ཏཔྤདྷཱནཱནཾ ཝཱ ཙཏུནྣཾ ཁནྡྷཱནམེཏཾ ནཱམཾ. ཐདྡྷབྷཱཝནིམྨདྡནཏོ ཨེཝ ཀཏྠཙི ཨཱརམྨཎེ ཨཔྤཊིཧཏཱཀཱརེན པཙྩུཔཏིཊྛནྟི, སམྤཡུཏྟཱནཾ ཝཱ ཏཏྠ ཨཔྤཊིགྷཱཏཾ པཙྩུཔཊྛཱཔེནྟཱིཏི ཨཔྤཊིགྷཱཏཔཙྩུཔཊྛཱནཱ.

ཀམྨནི སཱདྷུ ཀམྨཉྙཾ, ན ཀམྨཉྙཾ ཨཀམྨཉྙཾ, ཏསྶ བྷཱཝོ ཨཀམྨཉྙབྷཱཝོ, དཱནསཱིལཱདིཔུཉྙཀིརིཡཱཡཾ ཨཡོགྱཏཱ. ཨཏྠཏོ ཀཱམཙྪནྡཱདིསཾཀིལེསདྷམྨཱ, ཏཔྤདྷཱནཱ ཝཱ ཙཏྟཱརོ ཨཀུསལཀྑནྡྷཱ. ཀམྨཉྙབྷཱཝེནེཝ སམྤནྣཱཀཱརེན ཨཱརམྨཎསྶ གཧཎཾ ཨཱརམྨཎཀརཎསམྤཏྟི. ཝུཏྟཱཝསེསཱ ཀཱམཙྪནྡཱདཡོ, ཏདེཀཊྛཱ ཙ སཾཀིལེསདྷམྨཱ ཨཝསེསནཱིཝརཎཱདཡོ. ཝིནིབནྡྷནིམྨདྡནེན སུཁཔྤཝཏྟིཧེཏུཏཱཡ པསཱདནཱིཡཝཏྠཱུསུ པསཱདཱཝཧཱ. སུཝཎྞཝིསུདྡྷི ཝིཡཱཏི ཡཐཱ སུཝཎྞཝིསུདྡྷི ཨཔགཏཀཱལ༹ཀཱ ཨལངྐཱརཝིཀཏིཝིནིཡོགཀྑམཱ, ཨེཝམཡམྤི སཾཀིལེསཝིགམེན ཧིཏཀིརིཡཱཝིནིཡོགཀྑམཱ.

ཀཱཡཙིཏྟཱནཾ གེལཉྙཾ, ཨསྶདྡྷིཡཱདི, ཏདེཀཊྛཱ ཙ པཱཔདྷམྨཱ. གེལཉྙཔཊིཔཀྑོ ཨགེལཉྙཾ ¶ , ཏབྦྷཱཝོ ལཀྑཎཾ ཨེཏཱསནྟི ཨགེལཉྙབྷཱཝལཀྑཎཱ. ཡཐཱཝུཏྟགེལཉྙནིམྨདྡནེནེཝ ནཏྠི ཨེཏཱསཾ ཨཱདཱིནཝོ དོསོ, ན ཝཱ ཨེཏཱ ཨཱདཱིནཾ ཀཔཎཾ ཝནྟི པཝཏྟནྟཱིཏི ནིརཱདཱིནཝཱ, ཏེནཱཀཱརེན པཙྩུཔཏིཊྛནྟི, ཏཾ ཝཱ སམྤཡུཏྟེསུ པཙྩུཔཊྛཔེནྟཱིཏི ནིརཱདཱིནཝཔཙྩུཔཊྛཱནཱ.

ཀཱཡསམྦནྡྷཱི, ཙིཏྟསམྦནྡྷཱི ཙ ཨུཛུབྷཱཝོཏི ལཀྑིཏབྦཏཱཡ ཀཱཡཙིཏྟཨཛྫཝལཀྑཎཱ. ཀཱཡཙིཏྟཱནཾ ནངྒལསཱིསཙནྡཀོཊིགོམུཏྟཝངྐཏཱསངྑཱཏཱནཾ ཀུཊིལབྷཱཝཱནཾ ནིམྨདྡནཏོ ཀཱཡཙིཏྟཀུཊིལབྷཱཝནིམྨདྡནརསཱ. ཏཏོ ཨེཝ སབྦཐཱཔི ཨཛིམྷབྷཱཝེན པཙྩུཔཏིཊྛནྟི, སམྤཡུཏྟཱནཾ ཝཱ ཨཛིམྷཏཾ པཙྩུཔཊྛཔེནྟཱིཏི ཨཛིམྷཏཱཔཙྩུཔཊྛཱནཱ. ‘‘སནྟདོསཔཊིཙྪཱདནལཀྑཎཱ མཱཡཱ, ཨསནྟགུཎསམྦྷཱཝནལཀྑཎཾ སཱཋེཡྻ’’ནྟི ཨེཝཾ ཝུཏྟཱ ཏདཱཀཱརཔྤཝཏྟཱ ¶ ཨཀུསལཱ ཁནྡྷཱ, ཏདེཀཊྛཱ ཙ སཾཀིལེསདྷམྨཱ མཱཡཱསཱཋེཡྻཱདིཀཱ. ཨེཏྠ ཙ ཙིཏྟཔསྶདྡྷིཨཱདཱིཧི ཙིཏྟམེཝ པསྶདྡྷཾ, ལཧུ, མུདུ, ཀམྨཉྙཾ, པགུཎཾ, ཨུཛུ ཙ ཧོཏི. ཀཱཡཔསྶདྡྷིཨཱདཱིཧི པན རཱུཔཀཱཡོཔི. ཏེནེཝེཏྠ བྷགཝཏཱ དྷམྨཱནཾ དུཝིདྷཏཱ ཝུཏྟཱ, ན སབྦཏྠ.

༤༧༡. ཚནྡནཾ ཚནྡོ, ཨཱརམྨཎེན ཨཏྠིཀཏཱ. ‘‘ཚནྡོ ཀཱམོ’’ཏིཨཱདཱིསུ (ཝིབྷ. ༥༦༤) པན ཏཎྷཱཔི ཝུཙྩཏི, ‘‘ཚནྡཾ ཛནེཏི ཝཱཡམཏཱི’’ཏིཨཱདཱིསུ (ཝིབྷ. ༤༣༢) ཝཱིརིཡམྤཱིཏི ཏཏོ ནིཝཏྟནཏྠཾ ‘‘ཀཏྟུཀཱམཏཱཡེཏཾ ཨདྷིཝཙན’’ནྟི ཝུཏྟཾ. ཀཏྟུཀཱམཏཱ ཝུཙྩཏི ཀརཎིཙྪཱ. ཙེཏསིཀསྶ ཙ དྷམྨསྶ སཱརམྨཎཏྟཱ ཀརཎིཙྪཱ ནཱམ ཨཱལམྦནསྶ ཨཱལམྦིཏུཀཱམཏཱམུཁེནེཝ ཧོཏཱིཏི ཨཱརམྨཎཀརཎིཙྪཱལཀྑཎོ ཚནྡོ ཀཏྟུཀཱམཏཱལཀྑཎོ ཝུཏྟོ. ཏེནེཝཱཧ ‘‘ཨཱརམྨཎཔརིཡེསནརསོ, ཨཱརམྨཎེན ཨཏྠིཀཏཱཔཙྩུཔཊྛཱནོ’’ཏི ཙ. ཡདགྒེན པནཱཡཾ ཨཏྟནོ ཨཱརམྨཎཔརིཡེསནརསོ, ཏདགྒེན སམྤཡུཏྟཱནམྤི ཧོཏིཡེཝ ཨེཀཱརམྨཎཏཱཡ ཏེན ཏེསཾ. ཏེནེཝཱཧ ‘‘ཨཱརམྨཎགྒཧཎེ ཙཱཡཾ ཙེཏསོ ཧཏྠཔྤསཱརཎཾ ཝིཡ དཊྛབྦོ’’ཏི. སྭཱཡཾ ཀུསལེསུ ཨུཔྤནྣོ ཀུསལཙྪནྡོཏི ཝུཙྩཏི ཡོནིསོམནསིཀཱརསམུཊྛཱནཏྟཱ.

༤༧༢. ཨདྷིམུཙྩནཾ ཨཱརམྨཎེ སནྣིཊྛཱནཝསེན ཝེདིཏབྦཾ, ན པསཱདནཝསེན. ཡཐཱ ཏཐཱ ཝཱ ཧི ཨཱརམྨཎེ ནིཙྪཡནཾ ཨདྷིམུཙྩནཾ ཨནདྷིམུཙྩནྟསྶ པཱཎཱཏིཔཱཏཱདཱིསུ, དཱནཱདཱིསུ ཝཱ པཝཏྟིཡཱ ཨབྷཱཝཱ, སདྡྷཱ པན པསཱདནཱིཡེསུ པསཱདཱདྷིམོཀྑཱཏི ཨཡམེཏེསཾ ཝིསེསོ. ཝོཊྛབྦནཾ པན ཡཐཱ སནྟཱིརིཏེ ཨཏྠེ ནིཙྪཡནཱཀཱརེན པཝཏྟིཏྭཱ པརཏོ ཏྟམཱནཱནཾ ཏཐཱ པཝཏྟིཡཱ པཙྩཡོ ཧོཏི. ཡདི ཨེཝཾ, ཝིཙིཀིཙྪཱསམྤཡུཏྟེསུ ཀཐནྟི? ཏེསམྤི ཨེཀཾསེནེཝ སཾསཔྤནཱཀཱརསྶ ¶ པཙྩཡཏཱཡ དཊྛབྦཾ. དཱརཀསྶ ཝིཡ ཨིཏོ ཙིཏོ ཙ སཾསཔྤནསྶ ‘‘ཀརིསྶཱམི ན ཀརིསྶཱམཱི’’ཏི ཨནིཙྪཡསྶ པཊིཔཀྑཀིརིཡཱ ཨསཾསཔྤནཾ, ཡེསུ ཙིཏྟུཔྤཱདེསུ ཨཡཾ སནྣིཊྛཱནལཀྑཎོ ཨདྷིམོཀྑོ, ཏེསཾ ཨཱརམྨཎདྷམྨོ ཨེཝ སནྣིཊྛེཡྻདྷམྨོ.

༤༧༣. ཀིརིཡཱ ¶ ཀཱརོཏི ཀཱརསདྡསྶ བྷཱཝསཱདྷནཏམཱཧ. མནམྷི ཀཱརོཏི མནསི ཨཱརམྨཎསྶ ཀརཎཾ. ཡེན ཧི མནོ ཨཱརམྨཎེ ཀརཱིཡཏི ཨཱརམྨཎེནསྶ སཾཡོཛནཏོ, ཏཏོ ཨེཝ ཏེན ཨཱརམྨཎམྤི མནསི ཀརཱིཡཏཱིཏི. པུརིམམནཏོཏི བྷཝངྒམནཏོ. ཝིསདིསམནནྟི ཝཱིཐིཛཝནཾ མནཾ ཀརོཏཱིཏི མནསིཀཱརསཱམཉྙེན ཝཱིཐིཛཝནཔཊིཔཱདཀེ དསྶེཏི.

སམྤཡུཏྟདྷམྨེ ཨཱརམྨཎཱབྷིམུཁཾ སཱརེནྟོ ཝིཡ ཧོཏཱིཏི མནསིཀཱརོ སཱརཎལཀྑཎོ ཝུཏྟོ. སཏིཡཱ ཨསམྨུསྶནཝསེན ཝིསཡཱབྷིམུཁབྷཱཝཔཙྩུཔཊྛཱནཏཱ, མནསིཀཱརསྶ པན སཾཡོཛནཝསེན ཨཱརམྨཎཱབྷིམུཁབྷཱཝཔཙྩུཔཊྛཱནཏཱཏི ཨཡམེཏེསཾ ཝིསེསོ. ཨཱརམྨཎཔཊིཔཱདཀསྶ སངྑཱརཀྑནྡྷཔརིཡཱཔནྣཏཱཝཙནཾ ཨིཏརམནསིཀཱརཱནཾ ཏདཉྙཀྑནྡྷཔརིཡཱཔནྣཏཱམཏྟཾ ཛོཏེཏཱིཏི ཏཐཱཛོཏིཏཾ ཏཾ ཝིཉྙཱཎཀྑནྡྷེ ཨོཏཱརེཏྭཱ དསྶེཏུཾ ‘‘ཝཱིཐིཔཊིཔཱདཀོ’’ཏིཨཱདི ཝུཏྟཾ.

༤༧༤. ཏེསུ དྷམྨེསཱུཏི ཡེསུ དྷམྨེསུ སཡཾ ཨུཔྤནྣཱ, ཏེསུ ཨཏྟནཱ སམྤཡུཏྟེསུ ཙིཏྟཙེཏསིཀདྷམྨེསུ. ཨནཱརམྨཎཏྟེཔི ཧི ཏེསུ སམཔྤཝཏྟེསུ ཨུདཱསིནབྷཱཝཏོ ‘‘ཏཏྲམཛ྄ཛྷཏྟཏཱ’’ཏི ཝུཙྩཏི. སམཝཱཧིཏལཀྑཎཱཏི སམཾ ཨཝིསམཾ ཡཐཱསཀཀིཙྩེསུ པཝཏྟནལཀྑཎཱ. ཨུདཱསིནབྷཱཝེན པཝཏྟམཱནཱཔི ཧེསཱ སམྤཡུཏྟདྷམྨེ ཡཐཱསཀཀིཙྩེསུ པཝཏྟེཏི, ཡཐཱ རཱཛཱ ཏུཎྷཱི ནིསིནྣོཔི ཨཏྠཀརཎེ དྷམྨཊྛེ ཡཐཱསཀཀིཙྩེསུ ཨཔྤམཏྟེ པཝཏྟེཏི. ཨལཱིནཱནུདྡྷཏཔཝཏྟིཔཙྩཡཏཱ ཨཱུནཱདྷིཀཏཱནིཝཱརཎརསཱ, ཀིཙྩཝསེན ཙེཏཾ ཝུཏྟཾ. ཡདི ཨེཝཾ, སཧཛཱཏཱདྷིཔཏིནོ ཀཐནྟི? ཏམྤི ཏསྶཱ ཀིཙྩམེཝ. ཡཾ སཧཛཱཏདྷམྨཱནཾ ཨདྷིཔཏིབྷཱཝོཏི, ཏསྶཱཔི ཏཐཱཔཝཏྟནམེཝཱཏི ནཱཡཾ དོསོ. ‘‘ཨིདཾ ནིཧཱིནཀིཙྩཾ ཧོཏུ, ཨིདཾ ཨཏིརེཀཏརཀིཙྩ’’ནྟི ཨེཝཾ པཀྑཔཱཏཝསེན ཝིཡ པཝཏྟི པཀྑཔཱཏོ, ཏཾ ཨུཔཙྪིནྡནྟཱི ཝིཡ ཧོཏཱིཏི ཨདྷིཔྤཱཡོ.

‘‘ཨནིཡཏེསུ ཨིཙྪནྟཱི’’ཏི ཨིམིནཱ ཙེཏསིཀནྟརབྷཱཝེན ཨིཙྪནྟཱིཏི དསྶེཏི. ཨདོསོཡེཝ མེཏྟཱ. ཏཐཱ ¶ ཧི སོཡེཝ ‘‘མེཏྟཱ མེཏྟཱཡནཱ’’ཏིཨཱདིནཱ (དྷ. ས. ༡༠༦༢) ནིདྡིཊྛོ. ཨུཔེཀྑཱཏི ཡཾ ཨུཔེཀྑཾ མེཏྟཱཡ སདྡྷིཾ པརིཀཔྤེནྟི, སཱ ཏཏྲམཛ྄ཛྷཏྟུཔེཀྑཱཡེཝ.

༤༧༥. ཀཱཡདུཙྩརིཏཱདིཝཏྠཱུནནྟི ¶ པརཔཱཎཔརདྷནཔརཨིཏྠིཨཱདཱིནཾ. ཨམདྡནཾ མདྡནཔཊིཔཀྑབྷཱཝོ. ཀཱཡདུཙྩརིཏཱདིཝཏྠུཏོ སངྐོཙནཀིརིཡཱཔདེསེན ཀཱཡདུཙྩརིཏཱདིཏོ ཨེཝ སངྐོཙནཀིརིཡཱ ཝུཏྟཱཏི དཊྛབྦཾ. ན ཧི ཝིརཏིཡོ དུཙྩརིཏཝཏྠུནོ ཨཀིརིཡཔཙྩུཔཊྛཱནཱ ཡུཛྫནྟི, ཨཐ ཁོ དུཙྩརིཏསྶ, ཝིརཏཱིནཉྩ སོརཙྩཝསེན སངྐོཙནཾ, ཨཀིརིཡཱནཉྩ ཧིརོཏྟཔྤཱནཾ ཛིགུཙྪནཱདིཝསེནཱཏི ཨཡམེཏེསཾ ཝིསེསོ.

༤༧༦. སངྑཱརཱཏི སངྑཱརཀྑནྡྷདྷམྨེ སནྡྷཱཡཱཧ. ཏེ ཧི ཨིདྷཱདྷིཔྤེཏཱ, ཨཉྙཐཱ ཨཊྛཏིཾསཱཏི ཝཏྟབྦཾ སིཡཱ. ཡཐཱ ཙིཏྟཾ, ཨེཝཾ ཏཾསམྤཡུཏྟདྷམྨཱཔི དུཏིཡེ སསངྑཱརཱ ཨེཝཱཏི ཨཱཧ ‘‘སསངྑཱརབྷཱཝམཏྟམེཝ ཧེཏྠ ཝིསེསོ’’ཏི. ཨཝསེསཱ པཋམེ ཝུཏྟདྷམྨཱ.

ཨཝསེསཱ པཉྩམེན སམྤཡོགཾ གཙྪནྟཱིཏི ཨེཏྠ ཀཐཾ ཀརུཎཱམུདིཏཱཨུཔེཀྑཱསཧགཏེ སམྦྷཝནྟཱིཏི? པུབྦབྷཱགབྷཱཝཏོ. ཨཔྤནཱཔྤཏྟཱ ཨེཝ ཧི ཀརུཎཱམུདིཏཱ ཨུཔེཀྑཱསཧགཏཱ ན ཧོནྟི, ཏཏོ ཨཉྙཏྠ པན ཨུཔེཀྑཱསཧགཏཱཔི ཧོནྟཱིཏི ཨཱཙརིཡཱ.

སུཝིསུདྡྷསྶ ཀཱཡཀམྨཱདིཀསྶ ཙིཏྟསམཱདྷཱནཝསེན རཱུཔཱརཱུཔཱཝཙརཀུསལཔྤཝཏྟི, ན ཀཱཡཀམྨཱདཱིནཾ སོདྷནཝསེན, ནཱཔི དུཙྩརིཏདུརཱཛཱིཝཱནཾ སམུཙྪིནྡནཔཊིཔྤསྶམྦྷནཝསེནཱཏི མཧགྒཏཙིཏྟུཔྤཱདེསུ ཝིརཏཱིནཾ ཨསམྦྷཝོཡེཝཱཏི ཨཱཧ ‘‘ཋཔེཏྭཱ ཝིརཏིཏྟཡ’’ནྟི. ཏཏོཏི རཱུཔཱཝཙརཔཋམེ ཝུཏྟཙེཏསིཀཏོ. ཏེཡེཝཱཏི རཱུཔཱཝཙརཔཉྩམེ ཝུཏྟཙེཏསིཀཱ ཨེཝ. ཡདི ཨེཝ རཱུཔཱཝཙརཏོ ཀོ ཝིསེསོཏི ཨཱཧ ‘‘ཨརཱུཔཱཝཙརབྷཱཝོཡེཝ ཧི ཨེཏྠ ཝིསེསོ’’ཏི.

པཋམཛ྄ཛྷཱནིཀེཏི པཋམཛ྄ཛྷཱནཝཏི. མགྒཝིཉྙཱཎེཏི ཙཏུབྦིདྷེཔི མགྒཝིཉྙཱཎེ ཝུཏྟནཡེནེཝ ཝེདིཏབྦཱཏི སམྦནྡྷོ. དུཏིཡཛ྄ཛྷཱནིཀཱདིབྷེདེ མགྒཝིཉྙཱཎེཏི ཨེཏྠ ཨཱདི-སདྡེན ཏཏིཡཙཏུཏྠཔཉྩམཛ྄ཛྷཱནིཀཱནི སངྒཎྷཱཏི. ‘‘ཝུཏྟནཡེནཱ’’ཏི ཝུཏྟཾ ཀིཾ ཨཝིསེསེནཱཏི ཙོདནཱཡནེ ཏཾ དསྶེནྟོ ‘‘ཀརུཎཱམུདིཏཱན’’ནྟིཨཱདིམཱཧ. ཏཏྠ མགྒཝིཉྙཱཎཱནཾ ནིབྦཱནཱརམྨཎཏྟཱ, ཀརུཎཱམུདིཏཱནཉྩ སཏྟཱརམྨཎཏྟཱ ན ཏཱསཾ ཏཏྠ སམྦྷཝོ. མགྒདྷམྨེསུ ཙ པཱདཀཱདིནིཡམེན ¶ ཀདཱཙི སམྨཱསངྐཔྤཝིརཧོ སིཡཱ ¶ , ན པན ཝིརཏིཝིརཧོ ཀཱཡདུཙྩརིཏཱདཱིནཾ སམུཙྪིནྡནཝསེནེཝ ཨརིཡམགྒསྶ པཝཏྟནཏོཏི ནིཡཏཝིརཏིཏཱ.

༤༧༨. ན ཧིརིཡཏི ན ལཛྫཏཱིཏི ཨཧིརིཀོ, པུགྒལོ, ཙིཏྟཾ, ཏཾསམྤཡུཏྟདྷམྨསམུདཱཡོ ཝཱ. ‘‘ཨཧིརིཀྐ’’ནྟི ཝཏྟབྦེ ཨེཀསྶ ཀཀཱརསྶ ལོཔཾ ཀཏྭཱ ‘‘ཨཧིརིཀ’’ནྟི ཝུཏྟཾ. ‘‘ན ཨོཏྟཔྤ’’ནྟི ཨོཏྟཔྤསྶ པཊིཔཀྑབྷཱུཏཾ དྷམྨམཱཧ. ཨཛིགུཙྪནཾ ཨཧཱིལ༹ནཾ. ཨལཛྫཱ ཨཝིརིལཱ༹. ཏེཧེཝཱཏི ཀཱཡདུཙྩརིཏཱདཱིཧི ཨེཝ. ཨསཱརཛྫཾ ནིབྦྷཡཏཱ. ཨནུཏྟཱསོ ཨསམྦྷམོ. ཝུཏྟཔཊིཔཀྑཝསེནཱཏི ཨལཛྫནཱཀཱརེན པཱཔཱནཾ ཀརཎརསཾ ཨཧིརིཀཾ, ཨནུཏྟཱསཱཀཱརེན ཨནོཏྟཔྤཾ, ཝུཏྟཔྤཀཱརེནེཝ པཱཔཏོ ཨསངྐོཙནཔཙྩུཔཊྛཱནཱནི ཨཏྟནི, པརེསུ ཙ ཨགཱརཝཔདཊྛཱནཱནི. གཱམསཱུཀརསྶ ཝིཡ ཨསུཙིཏོ ཀིལེསཱསུཙིཏོ ཨཛིགུཙྪནཾ ཨཧིརིཀེན ཧོཏི, སལབྷསྶ ཝིཡ ཨགྒིཏོ པཱཔཏོ ཨནུཏྟཱསོ ཨནོཏྟཔྤེན ཧོཏཱིཏི ཨེཝཾ ཝུཏྟཔྤཊིཔཀྑཝསེན ཝིཏྠཱརོ ཝེདིཏབྦོ.

༤༧༩. ལུབྦྷནྟི ཏེནཱཏིཨཱདཱིསུ ཡཾ ཝཏྟབྦཾ, ཏཾ ཧེཊྛཱ ཝུཏྟནཡཱནུསཱརེན ཝེདིཏབྦཾ. ལུབྦྷནྟཱིཏི ཨབྷིགིཛ྄ཛྷནྟི. མུཡ྄ཧནྟཱིཏི ན བུཛ྄ཛྷནྟི. ཨཱརམྨཎགྒཧཎཾ ‘‘མམ ཨིད’’ནྟི ཏཎྷཱབྷིནིཝེསཝསེན ཨབྷིནིཝིསྶ ཨཱརམྨཎསྶ ཨཝིསྶཛྫནཾ, ན ཨཱརམྨཎཀརཎམཏྟཾ. ཨབྷིསངྒོ ཨབྷིམུཁབྷཱཝེན ཨཱསཏྟི. ཨཔརིཙྩཱགོ ཨཝིཛཧནཾ, དུམྨོཙནཱིཡཏཱ ཝཱ. ཨསྶཱདདསྶནཾ ཨསྶཱདདིཊྛི. ‘‘ཨསྶཱདཱནུཔསྶིནོ ཙ ཏཎྷཱ པཝཌྜྷཏཱི’’ཏི (སཾ. ནི. ༢.༥༢, ༥༤, ༥༧) ཧི ཝུཏྟཾ.

༤༨༠. དྷམྨསབྷཱཝསྶ ཡཱཐཱཝཏོ ཨདསྶནཾ ཙིཏྟསྶ ཨནྡྷབྷཱཝོ. ཨཉྙཱཎཾ ཉཱཎཔཊིཔཀྑོ. སམྤཊིཝིཛ྄ཛྷིཏུཾ ཨསམཏྠཏཱ ཨསམྤཊིཝེདྷོ. ཡཐཱ ཉཱཎཾ ཨཱརམྨཎསབྷཱཝཾ པཊིཝིཛ྄ཛྷིཏུཾ ན ལབྦྷཏི, མོཧསྶ ཏཐཱ པཝཏྟི ཨཱརམྨཎསབྷཱཝཙྪཱདནཾ. ཨསམྨཱཔཊིཔཏྟིཾ པཙྩུཔཊྛཔེཏི, སམྨཱཔཊིཔཏྟིཡཱ པཊིཔཀྑབྷཱཝེན གཡ྄ཧཏཱིཏི ཝཱ ཨསམྨཱཔཊིཔཏྟིཔཙྩུཔཊྛཱནོ. ཡསྶ ཨུཔྤཛྫཏི, ཏསྶ ཨནྡྷཀརཎཾ ཨནྡྷཀཱརོ, ཏཐཱ པཙྩུཔཏིཊྛཏཱིཏི ཨནྡྷཀཱརཔཙྩུཔཊྛཱནོ.

༤༨༡. མིཙྪཱཏི དྷམྨསབྷཱཝསྶ ཝིཔརཱིཏཾ, ནིཙྩཱདིཏོཏི ཨཏྠོ. ཨཡོནིསོ ཨབྷིནིཝེསོ ཨནུཔཱཡཱབྷིནིཝེསོ ཨུཔྤཐཱབྷིནིཝེསོ. དྷམྨསབྷཱཝཾ ¶ ཨཏིཀྐམིཏྭཱ པརཏོ ཨཱམསནཾ ¶ པརཱམཱསོ. ཝིཔརཱིཏགྒཱཧཝསེན ‘‘ཨིདམེཝ སཙྩཾ, མོགྷམཉྙ’’ནྟི (མ. ནི. ༢.༡༨༧, ༢༠༢, ༢༠༣; ༣.༢༧-༢༩) ཨབྷིནིཝིསནཾ མིཙྪཱབྷིནིཝེསོ.

༤༨༢. ཡསྶ དྷམྨསྶ ཝསེན ཨུདྡྷཏཾ ཧོཏི ཙིཏྟཾ, ཏཾསམྤཡུཏྟདྷམྨཱ ཝཱ, སོ དྷམྨོ ཨུདྡྷཙྩཾ. ཨཝཱུཔསམོཏི ཨསནྣིསིནྣཨཔྤསནྣབྷཱཝམཱཧ. ཨནཝཊྛཱནརསནྟི ཙལནཀིཙྩཾ. བྷནྟཏྟནྟི པརིབྦྷམནཱཀཱརཾ. ཙེཏསོ ཨཝཱུཔསམེཏི ནིཔྥཱདེཏབྦེ པཡོཛནེ བྷུམྨཾ, ཨཝཱུཔསམཔཙྩཡབྷཱུཏཾ ཨཱརམྨཎཾ ཝཱ ‘‘ཨཝཱུཔསམོ’’ཏི ཝུཏྟཾ. ཨཀུསལདྷམྨཱནཾ ཨེཀནྟནིཧཱིནཏཱཡ ‘‘ཨཀུསལབྷཱཝེན ཙ ལཱམཀཏྟ’’ནྟི ཝུཏྟཾ.

༤༨༣. ཐིནམིདྡྷམེཏྠ ཨནིཡཏཾ, ན མཱནཱདཱིཏི ཐིནམིདྡྷསྶ ཨནིཡཏཏཱ ཙ ཨེཏྠ དུཏིཡཙིཏྟེ པཋམཱཀུསལཏོ ཝིསེསོ.

ཨནུསྶཱཧནཱཝསཱིདནབྷཱཝེན སཾཧཏབྷཱཝོ ཐིནཾ, ཏེན ཡོགཏོ ཙིཏྟཾ ཐིནཾ, ཏསྶ བྷཱཝོཏི ཐིནཏཱ. ཨསམཏྠཏཱཝིགྷཱཏཝསེན ཨཀམྨཉྙཏཱ མིདྡྷཾ. ཡསྨཱ ཏཏོ ཨེཝ ཏེན སམྤཡུཏྟདྷམྨཱ མེདྷིཏཱ ཝིཧཏསཱམཏྠིཡཱ ཧོནྟི, ཏསྨཱ ‘‘མིདྡྷནཏཱ མིདྡྷ’’ནྟི ཝུཏྟཾ. ཨནུསྶཱཧལཀྑཎནྟི ཨུསྶཱཧཔཊིཔཀྑལཀྑཎཾ. ཝཱིརིཡསྶ ཨཝནོདནཾ ཁིཔནཾ ཝཱིརིཡཱཝནོདནཾ. སམྤཡུཏྟདྷམྨཱནཾ སཾསཱིདནཱཀཱརེན པཙྩུཔཏིཊྛཏི, ཏེསཾ ཝཱ སཾསཱིདནཾ པཙྩུཔཊྛཔེཏཱིཏི སཾསཱིདནཔཙྩུཔཊྛཱནཾ. ཨཀམྨཉྙཏཱལཀྑཎནྟི ཨེཏྠ ཀཱམཾ ཐིནམྤི ཨཀམྨཉྙསབྷཱཝམེཝ, ཏཾ པན ཙིཏྟསྶ, མིདྡྷཾ ཝེདནཱདིཀྑནྡྷཏྟཡསྶཱཏི ཨཡམེཏྠ ཝིསེསོ. ཏཐཱ ཧི པཱལི༹ཡཾ ‘‘ཏཏྠ ཀཏམཾ ཐིནཾ? ཡཱ ཙིཏྟསྶ ཨཀལླཏཱ ཨཀམྨཉྙཏཱ. ཏཏྠ ཀཏམཾ མིདྡྷཾ? ཡཱ ཀཱཡསྶ ཨཀལླཏཱ ཨཀམྨཉྙཏཱ’’ཏི (དྷ. ས. ༡༡༦༢-༡༡༦༣) ཙ ཨཱདིནཱ ཨིམེསཾ ནིདྡེསོ པཝཏྟོ. ཨོནཧནཾ ཝིཉྙཱཎདྭཱརཱནཾ པིདཧནཾ. ལཱིནཏཱ ལཱིནཱཀཱརོ ཨཱརམྨཎགྒཧཎེ སངྐོཙོ. ཡསྨཱ ཐིནེན ཙིཏྟསྶེཝ སཾཧནནཾ ཧོཏི, མིདྡྷེན པན ཝེདནཱདིཀྑནྡྷཏྟཡསྶ ཝིཡ རཱུཔཀཱཡསྶཱཔི, ཏསྨཱ ཏཾ པཙལཱཡིཀཱནིདྡཾ པཙྩུཔཊྛཔེཏཱིཏི པཙལཱཡིཀཱནིདྡཱཔཙྩུཔཊྛཱནཾ ཝུཏྟཾ. ཨརཏི པནྟསེནཱསནེསུ, ཨདྷིཀུསལདྷམྨེསུ ཙ ཨརོཙནཱ. ཝིཛམྦྷིཀཱ ཝིཛམྦྷནསངྑཱཏསྶ ཀཱཡདུཊྛུལླསྶ ཀཱརཎབྷཱུཏཱ སཾཀིལེསཔྤཝཏྟི. ཨརཏིཝིཛམྦྷིཀཱདཱིསཱུཏི ¶ ཙ ཨཱདི-སདྡེན ཏནྡིཨཱདཱིནཾ གཧཎཾ. ནིཔྥཱདེཏབྦེ པཡོཛནེ ཙེཏཾ བྷུམྨཝཙནཾ.

ཨཝསེསཱ ¶ སོལ༹ས. མཱནོ པནེཏྠ ཨནིཡཏོ ཧོཏི, ཏེན སདྡྷིཾ སཏྟརསེཝ ཧོནྟི. པཊྛཱནེ ཧི ‘‘སཾཡོཛནཾ དྷམྨཾ པཊིཙྩ སཾཡོཛནོ དྷམྨོ ཨུཔྤཛྫཏི ཧེཏུཔཙྩཡཱ’’ཏི ཨེཏྠ ཙཏུཀྑཏྟུཾ ཀཱམརཱགེན, ཏིཀྑཏྟུཾ པཊིགྷེན ཙ མཱནོ ཝིཙིཀིཙྪཱ བྷཝརཱགོཏི ཏཡོཔེཏེ སཀདཱགཱམིནོ སཾཡོཛནཱནཾ སཾཡོཛནེཧི དསཝིདྷཱ ཡོཛནཱཏི དསྶིཏཱཡ དསཝིདྷཱཡ ཡོཛནཱཡ ‘‘ཀཱམརཱགསཾཡོཛནཾ པཊིཙྩ མཱནསཾཡོཛནཾ ཨཝིཛྫཱསཾཡོཛན’’ནྟི (པཊྛཱ. ༣.༤.༡) ཝཏྭཱ ‘‘ཀཱམརཱགསཾཡོཛནཾ པཊིཙྩ ཨཝིཛྫཱསཾཡོཛན’’ནྟི (པཊྛཱ. ༣.༤.༡) ཏཐཱ ‘‘མཱནསཾཡོཛནཾ པཊིཙྩ བྷཝརཱགསཾཡོཛནཾ ཨཝིཛྫཱསཾཡོཛན’’ནྟི (པཊྛཱ ༣.༤.༡) ཝཏྭཱ ‘‘བྷཝརཱགསཾཡོཛནཾ པཊིཙྩ ཨཝིཛྫཱསཾཡོཛན’’ནྟི (པཊྛཱ. ༣.༤.༡) ཙ ཨེཝམཱགཏཱཧི ཡོཛནཱཧི མཱནསྶ ཨནིཡཏབྷཱཝོ པཀཱསིཏོ. ཡདི ཧི མཱནོ ནིཡཏོ སིཡཱ, ཀཱམརཱགསྶ མཱནརཧིཏཱ པཝཏྟི ན སིཡཱ, ཏཐཱ བྷཝརཱགསྶ. ཨེཝཾ སཏི པཊྛཱནེ ཙཏུཀྑཏྟུཾ ཀཱམརཱགེན ཡོཛནཱ ན སིཡཱ, ཏིཀྑཏྟུཾཡེཝ སིཡཱ. བྷཝརཱགམཱུལིཀཱ ཙ ན སིཡཱ. ཨེཝཉྩ སཾཡོཛནཱནཾ སཾཡོཛནེཧི ཨཊྛཝིདྷེན ཡོཛནཱ སིཡཱ, ན དསཝིདྷེན. དསཝིདྷཱཝ ཙ དསྶིཏཱཏི. སེཡྻཱདིཝསེན ཨུཙྩཏོ ནམནཾ ཨུནྣཏི. ཨུནྣམནཝསེནེཝ སཾཔགྒཧརསོ. ན ཝཱིརིཡཾ ཝིཡ ཏཾཏཾཀིཙྩསཱདྷནེ ཨབྦྷུསྶཧནཝསེན. ཨོམཱནསྶཱཔི ཨཏྟཱནཾ ཨཝཾ ཀཏྭཱ གཧཎམྤི སམྤགྒཧཎཝསེནེཝཱཏི དཊྛབྦཾ. ཀེཏུ ཝུཙྩཏི ཨཙྩུགྒཏདྷཛོ, ཨིདྷ པན ཀེཏུ ཝིཡཱཏི ཀེཏུ, ཨུལཱ༹རཏམཱདིབྷཱཝོ. ཏཾ ཀེཏུབྷཱཝསངྑཱཏཾ ཀེཏུཾ ཀཱམེཏཱིཏི ཀེཏུཀམྱཾ, ཙིཏྟཾ. ཡསྶ དྷམྨསྶ ཝསེན ཀེཏུཀམྱཾ, སཱ ཀེཏུཀམྱཏཱ. ‘‘ཨཧ’’ནྟི པཝཏྟནཏོ མཱནསྶ དིཊྛིསདིསཱི པཝཏྟཱིཏི སོ དིཊྛིཡཱ སདྡྷིཾ ཨེཀཙིཏྟུཔྤཱདེ ན པཝཏྟཏི, ཨཏྟསིནེཧསནྣིསྶཡོ ཙཱཏི ཨཱཧ ‘‘དིཊྛིཝིཔྤཡུཏྟལོབྷཔདཊྛཱནོ’’ཏི.

ཨེཏྠཱཔི ཙཱཏི ཙ-སདྡེན ཐིནམིདྡྷཾ ཨཱཀཌྜྷཏི.

༤༨༥. དུསྶནྟཱིཏི བྱཱཔཛྫནྟི. ཙཎྜིཀྐཾ ཀུཛ྄ཛྷནཾ. ཨཏྟནོ པཝཏྟིཨཱཀཱརཝསེན, ཝིརཱུཔསཾསཔྤནཀཨནིཊྛརཱུཔསམུཊྛཱཔནཝསེན ཙ ཝིསཔྤནརསོ. ཀཱཡསྶ ¶ ཝིཛ྄ཛྷཏྟབྷཱཝཱཔཱདནཏོ ཨཏྟནོ ནིསྶཡདཧནརསོ. དུསྶནཾ ཨཏྟནོ, པརསྶ ཙ ཨུཔབྷོགཕལཀཱལེསུ ཨནིཊྛཏྟཱ ཝིསསཾསཊྛཔཱུཏིམུཏྟཾ ཝིཡ དཊྛབྦོཏི སབྦེན སབྦཾ ཨགྒཧེཏབྦཏཾ དསྶེཏི.

༤༨༦. ཡཾ པརསམྤཏྟཱིསུ ཨིསྶཱཀརཎཾ, སཱ ཨིསྶཱཏི དསྶེནྟོ ཨཱཧ ‘‘ཨིསྶཱཡནཱ ཨིསྶཱ’’ཏི ¶ . ཨུསཱུཡནཾ ཨསཧནཾ. ཏཏྠེཝཱཏི པརསམྤཏྟཱིསུ ཨེཝ. ཨབྷིརཏིཔཊིཔཀྑབྷཱུཏཾ ཨིསྶཱཡ ཀིཙྩཾ, ན ཨབྷིརཏིཡཱ ཨབྷཱཝམཏྟནྟི ཨཱཧ ‘‘ཨནབྷིརཏིརསཱ’’ཏི.

༤༨༧. མཙྪརཡོགེན ‘‘མཙྪརཱི’’ཏི པཝཏྟམཱནཾ མཙྪརིསདྡཾ གཧེཏྭཱ ཨཱཧ ‘‘མཙྪརབྷཱཝོ མཙྪརིཡ’’ནྟི. ནིརུཏྟིནཡེན པན མཱ ཨིདཾ ཨཙྪརིཡཾ ཨཉྙེསཾ ཧོཏུ, མཡ྄ཧམེཝ ཧོཏཱུཏི མཙྪརིཡནྟི པོརཱཎཱ. ཏཾ མཙྪརིཡཾ ཝུཙྩམཱནཱནི ལཀྑཎཱདཱིནི པརིཡཱདཱཡ ཏིཊྛཏི. སངྐོཙནཔཙྩུཔཊྛཱནནྟི ཨཏྟསམྤཏྟཱིནཾ པརེཧི ཨསཱདྷཱརཎབྷཱཝཀརཎེན སངྐོཙནཔཙྩུཔཊྛཱནཾ. ཀཊུཀཱཀཱརགཏི ཀཊུཀཉྩུཀཏཱ. ཨཏྟསམྤཏྟི ཨཱཝཱསཱདི.

༤༨༨. ཀུཀཏནྟི ཨེཏྠ ཨཀཏམྤི ཀུཀཏམེཝ. ཨེཝཉྷི ཝཏྟཱརོ ཧོནྟི ‘‘ཡཾ མཡཱ ན ཀཏཾ, ཏཾ ཀུཀཏ’’ནྟི. ཏཐཱ ཧི ཝཀྑཏི ‘‘ཀཏཱཀཏཱནུསོཙནརས’’ནྟི. ཨེཝཾ ཀཏཱཀཏཾ དུཙྩརིཏཾ, སུཙརིཏཉྩ ཀུཀཏཾ, ཏཾ ཨཱརབྦྷ ཝིཔྤཊིསཱརཝསེན པཝཏྟཾ པན ཙིཏྟཾ ཏཾསཧཙརིཏཏཱཡ ཨིདྷ ‘‘ཀུཀཏ’’ནྟི གཧེཏྭཱ ‘‘ཏསྶ བྷཱཝོ ཀུཀྐུཙྩ’’ནྟི ཝུཏྟནྟི དཊྛབྦཾ. པཙྪཱ ཨནུཏཱཔནཾ ཝིབཱདྷནཾ པཙྪཱནུཏཱཔོ. ཡཐཱཔཝཏྟསྶ ཀཏཱཀཏཱཀཱརཝིསིཊྛསྶ དུཙྩརིཏསུཙརིཏསྶ ཨནུསོཙནཝསེན ཝིརཱུཔཾ པཊིསརཎཾ ཝིཔྤཊིསཱརོ. པརཱཡཏྟཏཱཧེཏུཏཱཡ དཱསབྱམིཝ དཊྛབྦཾ. ཡཐཱ ཧི དཱསབྱེ སཏི དཱསོ པརཱཡཏྟོ ཧོཏི, ཨེཝཾ ཀུཀྐུཙྩེ སཏི ཏཾསམངྒཱི. ན ཧི སོ ཨཏྟནོ དྷམྨཏཱཡ ཀུསལེ པཝཏྟིཏུཾ སཀྐོཏི. ཨཐ ཝཱ ཀཏཱཀཏཱཀུསལཀུསལཱནུསོཙནེ ཨཱཡཏྟཏཱཡ ཏདུབྷཡཝསེན ཀུཀྐུཙྩེན ཏཾསམངྒཱི ཧོཏཱིཏི ཏཾ དཱསབྱཾ ཝིཡ ཧོཏཱིཏི.

ཨནིཡཏེསུ ཨིསྶཱདཱིསུ ཐིནམིདྡྷསམྦྷཝོཝ ཙཱཏི ཙ-སདྡཾ ཨཱནེཏྭཱ སམྦནྡྷིཏབྦཾ.

༤༩༠. པཝཏྟིཊྛིཏིམཏྟོཏི ¶ ཁཎཊྛིཏིམཏྟོ. ‘‘ནིཝཱཏེ དཱིཔཙྩཱིནཾ ཋིཏི ཝིཡཱ’’ཏི ཧི ཨེཝཾ ཝུཏྟཙིཏྟཊྛིཏི ཝིཡ སནྟཱནཊྛིཏིཡཱ པཙྩཡོ བྷཝིཏུཾ ཨསམཏྠོ ནིཙྪཡཱབྷཱཝེན ཨསཎྛཧནཏོ ཙེཏསོ པཝཏྟིཔཙྩཡམཏྟཏཱཡ པཝཏྟིཊྛིཏིམཏྟོ. ཏེནཱཧ ‘‘དུབྦལོ སམཱདྷཱི’’ཏི. ཝིགཏཱ ཙིཀིཙྪཱཏི ཙིཀིཙྪིཏུཾ དུཀྐརཏཱཡ ཝུཏྟཾ, ན སབྦཐཱ ཝིཙིཀིཙྪཱཡ ཙིཀིཙྪཱབྷཱཝཏོཏི ཏདཏྠམཏྟཾ དསྶེཏི. ‘‘ཨེཝཾ ནུ ཁོ, ནནུ ཁོ’’ཏིཨཱདིནཱ སཾསཔྤནཝསེན སེཏཱིཏི སཾསཡོ. ཀམྤནརསཱཏི ནཱནཱརམྨཎེ ཙིཏྟསྶ ཀམྤནཀིཙྩཱ. ཨུདྡྷཙྩཉྷི ཨཏྟནཱ གཧིཏཱཀཱརེ ¶ ཨེཝ ཋཏྭཱ བྷམཏཱིཏི ཨེཀཱརམྨཎསྨིཾཡེཝ ཝིཔྥནྡནཝསེན པཝཏྟཏི. ཝིཙིཀིཙྪཱ པན ཡདིཔི རཱུཔཱདཱིསུ ཨེཀསྨིཾཡེཝ ཨཱརམྨཎེ ཨུཔྤཛྫཏི, ཏཐཱཔི ‘‘ཨེཝཾ ནུ ཁོ, ནནུ ཁོ, ཨིདཾ ནུ ཁོ, ཨཉྙཾ ནུ ཁོ’’ཏི ཨཉྙཾ གཧེཏབྦཱཀཱརཾ ཨཔེཀྑཏཱིཏི ནཱནཱརམྨཎེ ཀམྤནཾ ཧོཏཱིཏི. ཨནིཙྪཡཾ དྭེལ༹ྷཀཾ པཙྩུཔཊྛཔེཏཱིཏི ཨནིཙྪཡཔཙྩུཔཊྛཱནཱ. ཨནེཀཾསསྶ ཨཱརམྨཎེ ནཱནཱསབྷཱཝསྶ གཧཎཱཀཱརེན པཙྩུཔཏིཊྛཏཱིཏི ཨནེཀཾསགཱཧཔཙྩུཔཊྛཱནཱ.

༤༩༡. སཏྟཱརམྨཎཏྟཱཏི སཏྟཔཉྙཏྟིཨཱརམྨཎཏྟཱ. ནནུ ཙ པཉྙཏྟིཨཱརམྨཎཱཔི ཝིཔཱཀཱ ཧོནྟཱིཏི ཙོདནཾ སནྡྷཱཡཱཧ ‘‘ཨེཀནྟཔརིཏྟཱརམྨཎཱ ཧི ཀཱམཱཝཙརཝིཔཱཀཱ’’ཏི. ཝིརཏིཡོཔི ཝིཔཱཀེསུ ན སནྟཱིཏི ཨེཏྠཱཔི ནནུ ཀེསུཙི ཝིཔཱཀེསུ ཝིརཏིཡོཔི སནྟཱིཏི ཙོདནཾ མནསི ཀཏྭཱ ཨཱཧ ‘‘པཉྩ སིཀྑཱཔདཱ ཀུསལཱཡེཝཱཏི ཧི ཝུཏྟ’’ནྟི, ཏེན ལོཀིཡཝིཔཱཀེསུ ཝིརཏིཡོ ན སནྟཱིཏི དསྶེཏི.

ཏེསནྟི རཱུཔཱཝཙརཱདིཝིཔཱཀཝིཉྙཱཎཱནཾ. ཛནེཏབྦཛནཀསམྦནྡྷེ ཧི ཨིདཾ སཱམིཝཙནཾ.

༤༩༢. ཏེཏི ཏེ ཨཧེཏུཀཀིརིཡསངྑཱརཱ. ཏཏྠ ཀུསལཝིཔཱཀམནོདྷཱཏུསམྤཡུཏྟེཧི སམཱནཱ ཨཧེཏུཀཀིརིཡམནོདྷཱཏུསམྤཡུཏྟཱ, སོམནསྶསཧགཏསནྟཱིརཎསམྤཡུཏྟེཧི སམཱནཱ ཧསིཏུཔྤཱདསམྤཡུཏྟཱ, ཨུཔེཀྑཱསཧགཏསནྟཱིརཎསམྤཡུཏྟེཧི སམཱནཱ ཝོཊྛབྦནསམྤཡུཏྟཱཏི ཨིམམཏྠཾ དསྶེནྟེན ‘‘ཀུསལ…པེ… སམཱནཱ’’ཏི ཝཏྭཱ ཏཏོ ལབྦྷམཱནཾ ཝིསེསཾ དསྶེཏུཾ ‘‘མནོཝིཉྙཱཎདྷཱཏུདྭཡེ པནཱ’’ཏིཨཱདི ཝུཏྟཾ. ཝཱིརིཡསབྦྷཱཝཏོ བལཔྤཏྟོ སམཱདྷི ཧོཏི ‘‘ཝཱིརིཡནྟཾ བལ’’ནྟི ཀཏྭཱ.

སམུཙྪེདཝིརཏཱིཧི ¶ ཨེཝ ཨརཧནྟཱནཾ ཝིརམནཀིཙྩསྶ ནིཊྛིཏཏྟཱ ཀིརིཡཙིཏྟེསུ ཝིརཏིཡོ ན སནྟཱིཏི ཨཱཧ ‘‘ཋཔེཏྭཱ ཝིརཏིཡོ’’ཏི. ཀཱམཱཝཙརསཧེཏུཀཀིརིཡསངྑཱརཱནཾ ཀཱམཱཝཙརཀུསལེཧི ཝིརཏིཀཏོ ཝིསེསོ ཨཏྠི, མཧགྒཏེསུ པན ཏཱདིསོཔི ནཏྠཱིཏི ཨཱཧ ‘‘སབྦཱཀཱརེནཔཱི’’ཏི, དྷམྨཏོ, ཨཱརམྨཎཏོ, པཝཏྟིཨཱཀཱརཏོཏི སབྦཔཀཱརེནཔཱིཏི ཨཏྠོ.

ཨིཏི སངྑཱརཀྑནྡྷེ ཝིཏྠཱརཀཐཱམུཁཝཎྞནཱ.

ཨཏཱིཏཱདིཝིབྷཱགཀཐཱཝཎྞནཱ

ཨབྷིདྷམྨནྟོགདྷམྤི ¶ སུཏྟནྟབྷཱཛནཱིཡཾ སུཏྟནྟནཡོ ཨེཝ, ཨེཀནྟཨབྷིདྷམྨནཡོ པན ཨབྷིདྷམྨབྷཱཛནཱིཡནྟི ཨཱཧ ‘‘ཨབྷིདྷམྨེ པདབྷཱཛནཱིཡནཡེནཱ’’ཏི.

༤༩༣. བྷགཝཏཱ པན ཨེཝཾ ཁནྡྷཱ ཝིཏྠཱརིཏཱཏི སམྦནྡྷོ. ཏསྨཱ ཨིམཱཡཔི པཱལི༹ཡཱ ཝསེན ཁནྡྷཱནཾ སཾཝཎྞནཾ ཀརིསྶཱམཱཏི ཨདྷིཔྤཱཡོ. ཡཾ ཀིཉྩཱིཏི ཨེཏྠ ཡནྟི སཱམཉྙེན ཨནིཡམདསྶནཾ. ཀིཉྩཱིཏི པཀཱརབྷེདཾ ཨཱམསིཏྭཱ ཨནིཡམདསྶནཾ. ཨུབྷཡེནཱཔི ཨཏཱིཏཾ ཝཱ…པེ… སནྟིཀེ ཝཱ ཨཔྤཾ ཝཱ བཧུཾ ཝཱ ཡཱདིསཾ ཝཱ ཏཱདིསཾ ཝཱ ནཔུཾསཀནིདྡེསཱརཧཾ སབྦཾ བྱཱཔེཏྭཱ གཎྷཱཏཱིཏི ཨཱཧ ‘‘ཨནཝསེསཔརིཡཱདཱན’’ནྟི. ཨེཝཾ པན ཨཉྙེསུཔི ནཔུཾསཀནིདྡེསཱརཧེསུ པསངྒཾ དིསྭཱ ཏཏྠ ཨདྷིཔྤེཏཏྠཾ ཨཏིཙྩ པཝཏྟནཏོ ཨཏིཔྤསངྒསྶ ནིཡམནཏྠཾ རཱུཔནྟི ཝུཏྟནྟི དསྶེནྟོ ‘‘རཱུཔནྟི ཨཏིཔྤསངྒནིཡམན’’ནྟི ཨཱཧ. ཡཾ ཀིཉྩཱིཏི ཙ ཡཾ-སདྡཾ ཨེཀཾ པདཾ, སནིཔཱཏཾ ཀིཾ-སདྡཉྩ ཨེཀཾ པདནྟི གཧེཏྭཱ ཨནིཡམེཀཏྠདཱིཔནཏོ ‘‘པདདྭཡེནཱཔཱི’’ཏི ཝུཏྟཾ. ཨསྶཱཏི རཱུཔསྶ. ཨཏཱིཏཱདིནཱ ཝིབྷཱགཾ ཨཱརབྷཏི ཨཏཱིཏཱནཱགཏཔཙྩུཔྤནྣནྟིཨཱདིནཱ.

༤༩༤. ཨདྡྷཱསནྟཏིསམཡཁཎཝསེནཱཏི ཨེཏྠ ཙུཏིཔཊིསནྡྷིཔརིཙྪིནྣེ ཀཱལེ ཨདྡྷཱ-སདྡོ ཝཏྟཏཱིཏི ‘‘ཨཧོསིཾ ནུ ཁོ ཨཧམཏཱིཏམདྡྷཱན’’ནྟིཨཱདིསུཏྟཝསེན (མ. ནི. ༡.༡༨; སཾ. ནི. ༢.༢༠) ཝིཉྙཱཡཏི. ཏཐཱ ཧི བྷདྡེཀརཏྟསུཏྟེཔི ‘‘ཨཏཱིཏཾ ནཱནྭཱགམེཡྻཱ’’ཏིཨཱདིནཱ (མ. ནི. ༣.༢༧༢, ༢༧༥, ༢༧༦, ༢༧༧) ཨདྡྷཱཝསེནེཝ ཨཏཱིཏཱདིབྷཱཝོ ཝུཏྟོ. ‘‘ཏཡོམེ, ¶ བྷིཀྑཝེ, ཨདྡྷཱ, ཀཏམེ ཏཡོ? ཨཏཱིཏོ ཨདྡྷཱ ཨནཱགཏོ ཨདྡྷཱ པཙྩུཔྤནྣོ ཨདྡྷཱ’’ཏི (དཱི. ནི. ༣.༣༠༥; ཨིཏིཝུ. ༦༣) པན པརམཏྠཏོ པརིཙྪིཛྫམཱནོ ཨདྡྷཱ ནིརུཏྟིཔཐསུཏྟཝསེན ཁཎཔརིཙྪིནྣོ ཝུཏྟོ. ཏཏྠ ཧི ‘‘ཡཾ, བྷིཀྑཝེ, རཱུཔཾ ཛཱཏཾ…པེ… པཱཏུབྷཱུཏཾ. ཨཏྠཱིཏི ཏསྶ སངྑཱ’’ཏི (སཾ. ནི. ༣.༦༢) ཝིཛྫམཱནསྶ པཙྩུཔྤནྣཏཱ, ཏཏོ པུབྦེ, པཙྪཱ ཙ ཨཏཱིཏཱནཱགཏཏཱ ཝུཏྟཱ. ཏདཉྙསུཏྟེསུ པན ཡེབྷུཡྻེན ཙུཏིཔཊིསནྡྷིཔརིཙྪིནྣོ ཨཏཱིཏཱདིཀོ ཨདྡྷཱ ཝུཏྟོཏི སོ ཨེཝ ཨིདྷཱཔི ‘‘ཨདྡྷཱཝསེནཱ’’ཏི ཝུཏྟོ.

སཱིཏཾ སཱིཏསྶ སབྷཱགོ, ཏཐཱ ཨུཎྷཾ ཨུཎྷསྶ. ཡཾ པན སཱིཏཾ, ཨུཎྷཾ ཝཱ སརཱིརེ སནྣིཔཏིཏཾ ¶ སནྟཱནཝསེན པཝཏྟམཱནཾ ཨནཱུནཾ ཨནདྷིཀཾ ཨེཀཱཀཱརཾ, ཏཾ ཨེཀོ ཨུཏཱུཏི ཝུཙྩཏཱིཏི སབྷཱགཨུཏུནོ ཨནེཀཏྟཱ ཨེཀ-གྒཧཎཾ ཀཏཾ, ཨེཝཾ ཨཱཧཱརེཔི. ཨེཀཝཱིཐིཨེཀཛཝནསམུཊྛཱནནྟི པཉྩཚཊྛདྭཱརཝསེན ཝུཏྟཾ. སནྟཏིསམཡཀཐཱ ཝིཔསྶཀཱནཾ ཨུཔཀཱརཏྠཱཡ ཨཊྛཀཐཱསུ ཀཐིཏཱ. ཛནཀོ ཧེཏུ, ཨུཔཐམྦྷཀོ པཙྩཡོ, ཏེསཾ ཨུཔྤཱདནཾ, ཨུཔཏྠམྦྷནཉྩ ཀིཙྩཾ. ཡཐཱ བཱིཛསྶ ཨངྐུརུཔྤཱདནཾ, པཐཝཱིཨཱདཱིནཉྩ ཏདུཔཏྠམྦྷནཾ, ཀམྨསྶ ཀཊཏྟཱརཱུཔཝིཔཱཀུཔྤཱདནཾ, ཨཱཧཱརཱདཱིནཾ ཏདུཔཏྠམྦྷནཾ, ཨེཝཾ ཨེཀེཀསྶ ཀལཱཔསྶ, ཙིཏྟུཔྤཱདསྶ ཙ ཛནཀཱནཾ ཀམྨཱནནྟརཱདིཔཙྩཡབྷཱུཏཱནཾ, ཨུཔཏྠམྦྷཀཱནཉྩ སཧཛཱཏཔུརེཛཱཏཔཙྪཱཛཱཏཱནཾ ཀིཙྩཾ ཡཐཱསམྦྷཝཾ ཡོཛེཏབྦཾ. ཨེཝཾ ཨུཏུཨཱདཱིནཾ སབྷཱགཝིསབྷཱགཏཱསམྦྷཝཏོ ཏཾསམུཊྛཱནཱནཾ རཱུཔཱནཾ སནྟཏིཝསེན ཨཏཱིཏཱདིཝིབྷཱགོ ཝུཏྟོ, ཀམྨསྶ པན ཨེཀབྷཝནིབྦཏྟཀསྶ སབྷཱགཝིསབྷཱགཏཱ ནཏྠཱིཏི ཏཾསམུཊྛཱནཱནཾ རཱུཔཱནཾ སནྟཏིཝསེན ཨཏཱིཏཱདིཝིབྷཱགཾ ཨཝཏྭཱ ཨུཔཏྠམྦྷཀཝསེནེཝ ཝུཏྟོ. ཡདཱ པན ལིངྒཔརིཝཏྟནཾ ཧོཏི, ཏདཱ བལཝཏཱ ཨཀུསལེན པུརིསལིངྒཾ ཨནྟརདྷཱཡཏི, དུབྦལེན ཀུསལེན ཨིཏྠིལིངྒཾ པཱཏུབྷཝཏི. དུབྦལེན ཙ ཨཀུསལེན ཨིཏྠིལིངྒཾ ཨནྟརདྷཱཡཏི, བལཝཏཱ ཀུསལེན པུརིསལིངྒཾ པཱཏུབྷཝཏཱིཏི ཀམྨསམུཊྛཱནརཱུཔཱནམྤི ཨཏྠེཝ ཝིསབྷཱགཏཱཏི ཏེསམྤི སནྟཏིཝསེན ཨཏཱིཏཱདིཝིབྷཱགོ སམྦྷཝཏི, སོ པན ན སབྦཀཱལིཀོཏི ན གཧིཏོ.

ཏཾཏཾསམཡནྟི ཨེཀམུཧུཏྟཱདིཀོ སོ སོ སམཡོ ཨེཏསྶཱཏི ཏཾཏཾསམཡཾ, རཱུཔཾ, ཏཾཏཾསམཡཝནྟནྟི ཨཏྠོ.

ཏཏོ ¶ པུབྦེཏི ཏཏོ ཁཎཏྟཡསྶ པརིཡཱཔཏྟིཏོ པུབྦེ. ཨནུཔྤནྣཏྟཱ ཨནཱགཏཾ. པཙྪཱཏི ཏཏོ པཙྪཱ. ཁཎཏྟཡཾ ཨཏིཀྐནྟཏྟཱ ཨཏཱིཏཾ. ཡསྶ ཧེཏུཀིཙྩཾ, པཙྩཡཀིཙྩཉྩ ནིཊྛིཏཏྟཱ ཨཏིཀྐནྟཾ, ཏཾ ཨཏཱིཏཾ ཨུཔྤཱདཀྑཎེ ཧེཏུཀིཙྩཾ, ཨུཔྤནྣཕལཏྟཱ ནིཊྛིཏཉྩཱཏི དཊྛབྦཾ. ཏཱིསུཔི ཁཎེསུ པཙྩཡཀིཙྩཾ. པཐཝཱིཨཱདཱིནཾ སནྡྷཱརཎཱདིཀཾ, ཕསྶཱདཱིནཾ ཕུསནཱདིཀཉྩ ཨཏྟནོ ཀིཙྩཾ སཀིཙྩཾ, སཀིཙྩསྶ ཀརཎཀྑཎོ སཀིཙྩཀྑཎོ, སཧ ཝཱ ཀིཙྩེན སཀིཙྩཾ, ཡསྨིཾ ཁཎེ སཀིཙྩཾ རཱུཔཾ ཝཱ ཨརཱུཔཾ ཝཱ ཧོཏི, སོ སཀིཙྩཀྑཎོ, ཏསྨིཾ ཁཎེ པཙྩུཔྤནྣཾ. ཨེཏྠ ཙ ཁཎཱདིཀཐཱཡཾ ‘‘ཏཏོ པུབྦེ ཨནཱགཏཾ, པཙྪཱ ཨཏཱིཏ’’ནྟི ཝཙནཾ ཨདྡྷཱདཱིསུ ཝིཡ བྷེདཱབྷཱཝཏོ ནིཔྤརིཡཱཡཾ. ཨདྡྷཱདིཝསེན ཧི ཨཉྙེཝ དྷམྨཱ ཨཏཱིཏཱ ཨཉྙེ ཨནཱགཏཱ ཨཉྙེ པཙྩུཔྤནྣཱ ལབྦྷནྟི, ཁཎཱདིཝསེན པན ནཏྠི དྷམྨཏོ བྷེདོ, ཀཱལཏོ ཨེཝ བྷེདོ. ཨུཔྤཱདཏོ པུབྦེ ཨནཱགཏོ ¶ , ཁཎཏྟཡེ ཝཏྟམཱནོ, ཏཏོ པརཾ ཨཏཱིཏོཏི ནིཔྤརིཡཱཡཱ, ཨདྡྷཱཔཙྩུཔྤནྣཱདི ཝིཡ ཀེནཙི པརིཡཱཡེན ཨཏཱིཏམནཱགཏནྟི ཙ ཝཏྟབྦཏཱབྷཱཝཏོ.

༤༩༥. ཧེཊྛཱ ཝུཏྟཾ ཨཛ྄ཛྷཏྟིཀབཱཧིརབྷེདཾ སནྡྷཱཡ ‘‘ཝུཏྟནཡོ ཨེཝཱ’’ཏི ཝཏྭཱ ཏེན ཨཔརིཏུསྶམཱནེན ཡདིཔི ཏཏྠ ཨཛ྄ཛྷཏྟམེཝ ཨཛ྄ཛྷཏྟིཀནྟི སདྡཏྠོ ལབྦྷཏི, ཏཐཱཔི ཨཏྠེཝ ཨཛ྄ཛྷཏྟཨཛ྄ཛྷཏྟིཀསདྡཱནཾ, བཧིདྡྷཱབཱཧིརསདྡཱནཉྩ ཨཉྙམཉྙཾ ཨཏྠབྷེདོ. ཏཐཱ ཧི ཨཛ྄ཛྷཏྟིཀསདྡོ སཔརསནྟཱནིཀེསུ ཙཀྑཱདཱིསུ རཱུཔཱདཱིསུ བཱཧིརསདྡོ ཝིཡ པཝཏྟཏི, ཨཛ྄ཛྷཏྟསདྡོ པན ཏསྶ ཏསྶ སཏྟསྶ སསནྟཱནིཀེསྭེཝ ཙཀྑུརཱུཔཱདཱིསུ ཏཏོ ཨཉྙེསུ བཧིདྡྷཱསདྡོ ཝིཡ པཝཏྟཏི. ཏསྨཱ ཏམཏྠཾ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ཏཏྠ ཨིདྷཱཏི ཨིམསྨིཾ སུཏྟནྟནཡེ. ནིཡཀཛ྄ཛྷཏྟམྤི ན པུབྦེ ཝུཏྟཨཛ྄ཛྷཏྟིཀམེཝ, པརཔུགྒལིཀམྤི ན པུབྦེ ཝུཏྟབཱཧིརམེཝཱཏི ཨདྷིཔྤཱཡོ.

༤༩༦. ཧཱིནཔཎཱིཏབྷེདོ པརིཡཱཡཏོ, ནིཔྤརིཡཱཡཏོ ཙ ཝེདིཏབྦོཏི སམྦནྡྷོ. ཏདེཝ སུདསྶཱིནཾ རཱུཔཾ. ཡཏྠཱཏི ཡསྨིཾ ཨཱརམྨཎབྷཱུཏེ. ཡཾ ཨཱརམྨཎཾ ཀཏྭཱ ཨཀུསལཝིཔཱཀཝིཉྙཱཎཾ ཨུཔྤཛྫཏི, ཏཾ ཧཱིནཾ ཨནིཊྛབྷཱཝཏོ. ཡཾ ཀུསལཝིཔཱཀཾ, ཏཾ པཎཱིཏཾ ཨིཊྛབྷཱཝཏོ. ཡཐཱ ཧི ཨཀུསལཝིཔཱཀོ སཡཾ ཨནིཊྛོ ཨནིཊྛེ ཨེཝ ཨུཔྤཛྫཏི, ན ཨིཊྛེ, ཨེཝཾ ཀུསལཝིཔཱཀོཔི སཡཾ ཨིཊྛོ ཨིཊྛེ ཨེཝ ཨུཔྤཛྫཏི, ན ཨནིཊྛེ. ཏཐཱ ཧི ཝུཏྟཾ ཨཊྛཀཐཱཡཾ –

‘‘ཨཀུསལཀམྨཛཝསེན ¶ ཨནིཊྛཱ པཉྩ ཀཱམགུཎཱ ཝིབྷཏྟཱ, ཀུསལཀམྨཛཾ པན ཨནིཊྛཾ ནཱམ ནཏྠི, སབྦཾ ཨིཊྛམེཝ. ཀུསལཀམྨཛཝསེན ཨིཊྛཱ པཉྩ ཀཱམགུཎཱ ཝིབྷཏྟཱ. ཀུསལཀམྨཛཉྷི ཨནིཊྛཾ ནཱམ ནཏྠི, སབྦཾ ཨིཊྛམེཝཱ’’ཏི (ཝིབྷ. ཨཊྛ. ༦) ཙ.

ཏཏྠ མནཱཔཱནིཔི ཀཱནིཙི ཧཏྠིརཱུཔཱདཱིནི ཨཀུསལཀམྨནིབྦཏྟཱནི སནྟི, ན པན ཏཱནི ཏེསཾཡེཝ ཧཏྠིཨཱདཱིནཾ སུཁསྶ ཧེཏུབྷཱཝཾ གཙྪནྟི. ཏསྶ ཏསྶེཝ ཧི སཏྟསྶ ཨཏྟནཱ ཀཏེན ཀུསལེན ནིབྦཏྟཾ སུཁསྶ པཙྩཡོ ཧོཏི, ཨཀུསལེན ནིབྦཏྟཾ དུཀྑསྶ. ཏསྨཱ ཀམྨཛཱནཾ ཨིཊྛཱནིཊྛཏཱ ཀམྨཀཱརཀསཏྟསྶ ཝསེན ཡོཛནཱརཧཱ སིཡཱ. ཏཏྠ ཡཾ ཝུཏྟཾ ‘‘ཀུསལཀམྨཛཾ ཨནིཊྛཾ ནཱམ ནཏྠཱི’’ཏི, ན ཙ ཝུཏྟཾ ‘‘ཨཀུསལཀམྨཛཾ ཨིཊྛཾ ནཱམ ནཏྠཱི’’ཏི, ཏེན ¶ ཨཀུསལཀམྨཛམྤི སོབྷནཾ པརསཏྟཱནཾ ཨིཊྛཾ ཨཏྠཱིཏི ཨནུཉྙཱཏཾ བྷཝིསྶཏི, ཀུསལཀམྨཛཾ པན སབྦེསཾ ཨིཊྛམེཝཱཏི.

ཏིརཙྪཱནགཏཱནཾ པན ཀེསཉྩི མནུསྶརཱུཔཾ ཨམནཱཔཾ, ཡཏོ ཏེ དིསྭཱཝ པལཱཡནྟི, མནུསྶཱ ཙ དེཝཏཱརཱུཔཾ པསྶིཏྭཱ བྷཱཡནྟི, ཏེསམྤི ཝིཔཱཀཝིཉྙཱཎཾ ཏཾ རཱུཔཾ ཨཱརབྦྷ ཀུསལཝིཔཱཀམེཝ ཨུཔྤཛྫཏི, ཏཱདིསསྶ པན པུཉྙསྶ ཨབྷཱཝཱ ན ཏེསཾ ཏཏྠ ཨབྷིརཏི ཧོཏི. ཀུསལཀམྨཛསྶ པན ཨནིཊྛསྶ ཨབྷཱཝོ ཝིཡ ཨཀུསལཀམྨཛསྶ ཙ ཨིཊྛསྶ ཨབྷཱཝོ ཝཏྟབྦོ. ཧཏྠིཨཱདཱིནམྤི ཧི ཨཀུསལཀམྨཛཾ མནུསྶཱནཾ ཨཀུསལཝིཔཱཀསྶེཝ ཨཱརམྨཎཾ, ཀུསལཀམྨཛཾ པན པཝཏྟེ སམུཊྛིཏཾ ཀུསལཝིཔཱཀསྶ. ཨིཊྛཱརམྨཎེན པན ཝོམིསྶཀཏྟཱ ཨཔྤཀཾ ཨཀུསལཀམྨཛཾ བཧུལཾ ཨཀུསལཝིཔཱཀུཔྤཏྟིཡཱ ཀཱརཎཾ ན བྷཝིསྶཏཱིཏི སཀྐཱ ཝིཉྙཱཏུཾ, ཝིཔཱཀཾ པན ན སཀྐཱ ཝཉྩེཏུནྟི ཝིཔཱཀཝསེན ཨིཊྛཱནིཊྛཱརམྨཎཝཝཏྠཱནཾ སུཊྛུ ཡུཛྫཏི. ཡཾ པན ཝུཏྟཾ ‘‘ཨནིཊྛཱ པཉྩ ཀཱམགུཎཱ’’ཏི, ཏཾ རཱུཔཱདིབྷཱཝསཱམཉྙཏོ ཀཱམགུཎསདིསཏཱཡ ཏཾསདིསེསུ ཏབྦོཧཱརེན ཝུཏྟཾ. ཨིཊྛཱནེཝ ཧི རཱུཔཱདཱིནི ‘‘ཀཱམགུཎཱ’’ཏི པཱལི༹ཡཾ (མ. ནི. ༡.༡༦༤-༡༦༥, ༡༧༧-༡༧༨, ༢༨༧; ༢.༡༥༥, ༢༨༠; ༣.༥༧, ༡༩༠; སཾ. ནི. ༥.༣༠) ཝུཏྟཱནི. ཀཱམགུཎཝིསབྷཱགཱ ཝཱ རཱུཔཱདཡོ ‘‘ཀཱམགུཎཱ’’ཏི ཝུཏྟཱ ཨསིཝེ སིཝོཏི ཝོཧཱརོ ཝིཡ, སབྦཱནི ཝཱ ཨིཊྛཱནིཊྛཱནི རཱུཔཱདཱིནི ཏཎྷཱཝཏྠུབྷཱཝཏོ ཀཱམགུཎཱ ཨེཝ. ཝུཏྟཉྷི ‘‘རཱུཔཱ ལོཀེ པིཡརཱུཔཾ སཱཏརཱུཔ’’ནྟིཨཱདི (དཱི. ནི. ༢.༤༠༠; མ. ནི. ༡.༡༣༣). ཨཏིསཡེན པན ཀམནཱིཡཏྟཱ སུཏྟེསུ ཀཱམགུཎཱཏི ཨིཊྛརཱུཔཱདཱིནི ཝུཏྟཱནི.

ཝུཏྟནཡམེཝཱཏི ¶ ཨབྷིདེསེན ལཀྑཎཏོ དཱུརསནྟིཀཾ དསྶིཏནྟི ཨཱཧ ‘‘ཨོཀཱསཏོཔེཏྠ ཨུཔཱདཱཡུཔཱདཱཡ དཱུརསནྟིཀཏཱ ཝེདིཏབྦཱ’’ཏི. ཏཏྠ ཀིཏྟཀཏོ པཊྛཱཡ རཱུཔཾ ཨོཀཱསཝསེན སནྟིཀེ ནཱམ, ཀིཏྟཀཏོ པན པཊྛཱཡ དཱུརེ ནཱམ? པཀཏིཀཐཱཡ ཀཐེནྟཱནཾ དྭཱདས ཧཏྠཱ སཝནཱུཔཙཱརོ ནཱམ, ཏསྶ ཨོརཏོ སནྟིཀེ, པརཏོ དཱུརེ. ཏཏྠ སུཁུམརཱུཔཾ དཱུརེ ཧོནྟཾ ལཀྑཎཏོཔི ཨོཀཱསཏོཔི དཱུརེ ཧོཏི, སནྟིཀེ ཧོནྟཾ པན ཨོཀཱསཏོཝ སནྟིཀེ ཧོཏི, ན ལཀྑཎཏོ. ཨོལཱ༹རིཀརཱུཔཾ སནྟིཀེ ཧོནྟཾ ལཀྑཎཏོཔི ཨོཀཱསཏོཔི སནྟིཀེ ཧོཏི, དཱུརེ ཧོནྟཾ ཨོཀཱསཏོཝ ཧོཏི, ན ལཀྑཎཏོ. ‘‘ཨུཔཱདཱཡུཔཱདཱཡཱ’’ཏི པན ཝུཏྟཏྟཱ ཨཏྟནོ རཱུཔཾ སནྟིཀེ ནཱམ, ཨནྟོཀུཙྪིགཏསྶཱཔི པརསྶ དཱུརེ. ཨནྟོཀུཙྪིགཏསྶ སནྟིཀེ, བཧི ཋིཏསྶ དཱུརེཏི ¶ ཨེཝཾ ཨནྟོགབྦྷཔམུཁཔརིཝེཎསངྒྷཱརཱམསཱིམཱགཱམཁེཏྟཛནཔདརཛྫསམུདྡཙཀྐཝཱལེ༹སུ ཏདནྟོགཏབཧིགཏཱནཾ ཝསེན དཱུརསནྟིཀཏཱ ཝེདིཏབྦཱ.

༤༩༧. ཏདེཀཛ྄ཛྷནྟི ཏཾ ཨེཀཛ྄ཛྷཾ ཨེཀཏོ. ཨབྷིསཾཡཱུཧིཏྭཱཏི སཾཧརིཏྭཱ, སམཱུཧཾ ཝཱ ཀཏྭཱ. ཨབྷིསངྑིཔིཏྭཱཏི སངྑིཔིཏྭཱ སངྑེཔཾ ཀཏྭཱ. ‘‘སབྦམྤི རཱུཔཾ…པེ… དསྶིཏཾ ཧོཏཱི’’ཏི ཨིམིནཱ རཱུཔཁནྡྷསདྡཱནཾ སམཱནཱདྷིཀརཎསམཱསབྷཱཝཾ དསྶེཏི. ཏེནེཝཱཧ ‘‘ན ཧི རཱུཔཏོ ཨཉྙོ རཱུཔཀྑནྡྷོ ནཱམ ཨཏྠཱི’’ཏི.

༤༩༨. རཱསིབྷཱཝཱུཔགམནེན ཝེདནཱཀྑནྡྷཱདཡོཏི དསྶིཏཱ ཧོནྟཱིཏི ཨཱནེཏྭཱ སམྦནྡྷིཏབྦཾ.

སནྟཏིཝསེན, ཁཎཱདིཝསེན ཙཱཏི ཨེཏྠ ཨདྡྷཱསམཡཝསེན ཨཏཱིཏཱདིཝིབྷཱགསྶ ཨཝཙནཾ སུཁཱདིཝསེན བྷིནྣཱཡ ཨཏཱིཏཱདིབྷཱཝཝཙནཏོ. ན ཧི སུཁཱ ཨེཝ ཨདྡྷཱཝསེན, སམཡཝསེན ཙ ཨཏཱིཏཱདིཀཱ ཧོཏི, ཏཐཱ དུཀྑཱ ཨེཝ, ཨདུཀྑམསུཁཱ ཨེཝ ཙ ཀཱཡིཀཙེཏསིཀཱདིབྷཱཝེན བྷིནྣཱ, ཏེན ཝེདནཱསམུདཱཡོ ཨདྡྷཱསམཡཝསེན ཨཏཱིཏཱདིབྷཱཝེན ཝཏྟབྦཏཾ ཨརཧཏི སམུདཱཡསྶ ཏེཧི པརིཙྪིནྡིཏབྦཏྟཱ, ཝེདནེཀདེསཱ པན གཡ྄ཧམཱནཱ སནྟཏིཁཎེཧི པརིཙྪེདཾ ཨརཧནྟི ཏཐཱ པརིཙྪིནྡིཏྭཱ གཧེཏབྦཏོ. ཨེཀསནྟཏིཡཾ པན སུཁཱདཱིསུ ཨནེཀབྷེདབྷིནྣེསུ ཡོ བྷེདོ པརིཙྪིནྡིཏབྦབྷཱཝེན གཧིཏོ, ཏསྶ ཨེཀཔྤཀཱརསྶ ¶ པཱཀཊསྶ པརིཙྪེདིཀཱ ཏཾསཧིཏདྭཱརཱལམྦནཔྤཝཏྟཱ, ཨཝིཙྪེདེན ཏདུཔྤཱདཀེཀཝིདྷཝིསཡསམཱཡོགཔྤཝཏྟཱ ཙ སནྟཏི བྷཝིཏུཾ ཨརཧཏཱིཏི ཏསྶཱ བྷེདནྟརཾ ཨནཱམསིཏྭཱ པརིཙྪེདཀབྷཱཝེན གཧཎཾ ཀཏཾ, ལཧུཔརིཝཏྟིནོ ཝཱ ཨརཱུཔདྷམྨཱ པརིཝཏྟནེནེཝ པརིཙྪེདེན པརིཙྪིནྡནཾ ཨརཧནྟཱིཏི སནྟཏིཁཎཝསེནེཝ པརིཙྪེདོ ཝུཏྟོ. ཨེཀཝིདྷཝིསཡསམཱཡོགཔྤཝཏྟཱ དིཝསམྤི བུདྡྷརཱུཔཾ པསྶནྟསྶ, དྷམྨཾ སུཎནྟསྶ པཝཏྟསདྡྷཱདིསཧིཏཝེདནཱ པཙྩུཔྤནྣཱ. ‘‘པུབྦནྟཱཔརནྟམཛ྄ཛྷཏྟགཏཱ’’ཏི ཨེཏེན ཧེཏུཔཙྩཡཀིཙྩཝསེན ཝུཏྟནཡཾ དསྶེཏི.

༤༩༩. སབྱཱཔཱརསཨུསྶཱཧསཝིཔཱཀཏཱ ཀུསལཱདཱིཧི ཏཱིཧིཔི སཱདྷཱརཎཱཏི ཨསཱདྷཱརཎམེཝ དསྶེཏུཾ ‘‘སཱཝཛྫཀིརིཡཧེཏུཏོ’’ཏིཨཱདི ཝུཏྟཾ. ཏཏྠ སཱཝཛྫཀིརིཡཧེཏུཏོཏི པཱཎཱཏིཔཱཏཱདིགཱརཡ྄ཧཀིརིཡཱནིམིཏྟཏོ. ཀིལེསསནྟཱཔབྷཱཝཏོཏི ཀིལེསཔརིལཱ༹ཧེན སདརཐབྷཱཝཏོ ¶ . ཝཱུཔསནྟསབྷཱཝཱཡ ཀུསལཱཡ ཝེདནཱཡ ཨོལཱ༹རིཀཱ. སབྱཱཔཱརཏོཏི སཨཱིཧཏོ. ཏེན ཡཐཱ པཝཏྟམཱནཱཡསྶཱ ཝིཔཱཀེན བྷཝིཏབྦཾ, ཏཐཱ པཝཏྟིཾ ཝདནྟོ ཝིཔཱཀུཔྤཱདནཡོགྱཏམཱཧ. སཨུསྶཱཧཏོཏི སསཏྟིཏོ, ཏེན ཝིཔཱཀུཔྤཱདནསམཏྠཏཾ. སཝིཔཱཀཏོཏི ཝིཔཱཀསབྦྷཱཝཏོ, ཏེན པཙྩཡནྟརསམཝཱཡེནསྶཱ ཝིཔཱཀནིབྦཏྟནཾ. ཏཱིཧིཔི པདེཧི ཝིཔཱཀདྷམྨཏཾཡེཝ དསྶེཏི. ཀཱཡཀམྨཱདིབྱཱཔཱརསབྦྷཱཝཏོ ཝཱ སབྱཱཔཱརཏོ, ཛཝནུསྶཱཧཝསེན སཨུསྶཱཧཏོ, ཝིཔཱཀུཔྤཱདནསམཏྠཏཱཝསེན སཝིཔཱཀཏོཏི ཨེཝམེཏྠ ཨཏྠོ ཝེདིཏབྦོ. ཝིཔཱཀཾ ཨནུཔྤཱདེནྟཱིཔི ཀིརིཡཱ ཀུསལཱ ཝིཡ སབྱཱཔཱརཱ, སཨུསྶཱཧཱ ཨེཝ ཙ ཧོཏཱིཏི ཏདུབྷཡཾ ཨནཱམསིཏྭཱ ཀིརིཡཱབྱཱཀཏཝཱརེ ‘‘སཝིཔཱཀཏོ’’ ཨིཙྩེཝ ཝུཏྟཾ. སབྱཱབཛ྄ཛྷཏོཏི ཀིལེསདུཀྑེན སདུཀྑཏོ. ཝུཏྟཝིཔརིཡཱཡཏོཏི ཨནཝཛྫཀིརིཡཧེཏུཏོ, ཀིལེསསནྟཱཔཱབྷཱཝཏོ, ཨབྱཱབཛ྄ཛྷཏོ ཙ ཝཱུཔསནྟཝུཏྟཱིཏི ཨེཝཾ ཨཀུསལཱཡ ཝུཏྟཝིཔལླཱསཏོ. ཡཐཱཡོགནྟི ཡོགཱནུརཱུཔཾ. ཏཱིསུ ཀཱརཎེསུ ཡཾ ཡཾ ཡསྶཱ ཡསྶཱ ཡུཛྫཏི, ཏདནུརཱུཔནྟི ཨཏྠོ. ཀུསལཱཀུསལཝེདནཱཧི ཝིཔཱཀབྱཱཀཏཱཡ ཏཱིཧིཔི ཀཱརཎེཧི ཨོལཱ༹རིཀཱ. ཀིརིཡཱབྱཱཀཏཱཡ སཝིཔཱཀཏོ སཝིཔཱཀཏཱཝིསིཊྛསབྱཱཔཱརསཨུསྶཱཧཏོ ཝཱཏི. ཝུཏྟཔརིཡཱཡེནཱཏི ཝིཔཱཀབྱཱཀཏཱ ཨབྱཱཔཱརཏོ ¶ , ཨནུསྶཱཧཏོ, ཨཝིཔཱཀཏོ ཙ ཏཱཧི ཀུསལཱཀུསལཝེདནཱཧི སུཁུམཱ. ཀིརིཡཱབྱཱཀཏཱ ཨཝིཔཱཀཏོ, ཨཝིཔཱཀཏཱཝིསིཊྛསབྱཱཔཱརསཨུསྶཱཧཏོ ཝཱཏི ཨེཝཾ ཀུསལཱཀུསལཱཡ ཝུཏྟཝིཔལླཱསེན. ཀམྨཝེགཀྑིཏྟཱ ཧི ཀམྨཔཊིབིམྦབྷཱུཏཱ ཙ ཀཱཡཀམྨཱདིབྱཱཔཱརཝིརཧཏོ ནིརུསྶཱཧཱ ཝིཔཱཀཱ. སཨུསྶཱཧཱ ཙ ཀིརིཡཱ ཨཝིཔཱཀདྷམྨཱ. སཝིཔཱཀདྷམྨཱ ཧི སགབྦྷཱ ཝིཡ ཨོལཱ༹རིཀཱཏི.

༥༠༠. ནིརསྶཱདཏོཏི ཨསྶཱདཱབྷཱཝཏོ སུཁཔཊིཀྑེཔཏོ. སཝིཔྥཱརཏོཏི སཔརིཔྥནྡཏོ, ཨནུཔསནྟཏོཏི ཨཏྠོ. ཨབྷིབྷཝནཏོཏི ཨཛ྄ཛྷོཏྠརཎཏོ. སུཁཱཡ མཛ྄ཛྷཏྟཏཱ ནཏྠི, ཨུཔེཀྑཱཡ སཱཏཏཱ. སནྟཏཱདཡོ པན སབྦཏྠ སུཁུཔེཀྑཱསུ ལབྦྷནྟཱིཏི ‘‘ཡཐཱཡོག’’ནྟི ཝུཏྟཾ. པཱཀཊཏོཏི སུཁིཏོ དུཀྑིཏོཏི དིསྭཱཔི ཛཱནིཏབྦཏྟཱ ཝིབྷཱུཏབྷཱཝཏོ. སཱ ཨདུཀྑམསུཁཱ ཝེདནཱ.

༥༠༡. ཨསམཱཔནྣསམཱཔནྣ-གྒཧཎེན ཙེཏྠ བྷཱུམིཝསེནཱཔི ཝེདནཱནཾ ཨོལཱ༹རིཀསུཁུམཏཱ ཝུཏྟཱཏི ཝེདིཏབྦཱ. ཨིཏརཱ སམཱཔནྣསྶ ཝེདནཱ.

ཨོགྷནིཡཏོཏི ¶ ཨོགྷེཧི ཨཱརམྨཎཾ ཀཏྭཱ ཨཏིཀྐམིཏབྦཏོ. ཏཐཱ ཡོགནིཡཏོ, གནྠནིཡཏོ ཙཱཏི ཨེཏྠཱཔི གནྠོཝ གནྠནཾ, ཏསྶ ཧིཏཾ ཨཱརམྨཎབྷཱཝེན སམྦནྡྷནཏོཏི གནྠནིཡཾ. ཨེཝཾ ནཱིཝརཎིཡཾ, ཨུཔཱདཱནིཡཉྩ ཝེདིཏབྦཾ. སཾཀིལེསེ ནིཡུཏྟཱ, སཾཀིལེསཾ ཝཱ ཨརཧནྟཱིཏི སཾཀིལེསིཀཱ. སཱ ཨནཱསཝཱ.

༥༠༢. ཏཏྠཱཏི ཡཐཱཝུཏྟཱཡ ཨོལཱ༹རིཀསུཁུམཏཱཡ. སམྦྷེདོཏི སངྐརོ. ‘‘ཨོལཱ༹རིཀཱ, སུཁུམཱ’’ཏི ཙ ཝུཏྟཱནམྤི ཛཱཏིཨཱདིཝསེན པུན སུཁུམོལཱ༹རིཀབྷཱཝཱཔཏྟིདོསོ ཡཐཱ ན ཧོཏི, ཏཐཱ པརིཧརིཏབྦོ. ཛཱཏིཝསེན སུཁུམཱཡ ཝེདནཱཡ སབྷཱཝཔུགྒལལོཀིཡཝསེན ཨོལཱ༹རིཀཏཾ པཱལི༹ཝསེན དསྶེཏུཾ ‘‘ཝུཏྟཉྷེཏ’’ནྟིཨཱདི ཝུཏྟཾ. ཨེཝཾ སུཁཱདཡོཔཱིཏི ཨེཏྠ ཨཀུསལཱ ཝེདནཱ ཛཱཏིཝསེན ཨོལཱ༹རིཀཱ, སབྷཱཝཝསེན སུཁུམཱ. ཀུསལཛ྄ཛྷཱནསཧགཏཱ སུཁཱ ཝེདནཱ ཛཱཏིཝསེན ཨོལཱ༹རིཀཱ, སམཱཔནྣསྶ ཝེདནཱཏི ཀཏྭཱ པུགྒལཝསེན སུཁུམཱཏི ཨེཝམཱདིནཱ ཡོཛེཏབྦཱ. ‘‘ན པརཱམསིཏབྦོ’’ཏི ཨེཏེན ཛཱཏིཨཱདཡོ ¶ ཙཏྟཱརོ ཀོཊྛཱསཱ ཨཉྙམཉྙཾ ཨཝོམིསྶཀཱ ཨེཝ གཧེཏབྦཱ. ཨེཝཾ སམྦྷེདསྶ པརིཧཱརོ, ན ཨཉྙཐཱཏི དསྶེཏི. ཡཐཱ ཨབྱཱཀཏམུཁེན, ཨེཝཾ ཀུསལཱཀུསལམུཁེནཔི, ཡཐཱ ཙ ཛཱཏིམུཁེན, ཨེཝཾ སབྷཱཝཱདིམུཁེནཔི དསྶེཏབྦནྟི ཨིམམཏྠཾ ‘‘ཨེས ནཡོ སབྦཏྠཱ’’ཏི ཨཏིདིསཏི.

ཨིདཱནི ཛཱཏིཨཱདིཀོཊྛཱསེསུཔི མིཐོ ཨཀུསལཱདཱིནཾ ཨུཔཱདཱཡུཔཱདཱཡ ཨོལཱ༹རིཀསུཁུམཏཾ དསྶེཏུཾ ‘‘ཨཔིཙཱ’’ཏིཨཱདི ཨཱརདྡྷཾ. ‘‘ནིསྶཡདཧནཏོ’’ཏི ཨིམིནཱ དོསསཧགཏཱཡ པཱཀཊཾ ཀུརཱུརཔྤཝཏྟིཾ དསྶེཏི. ནིཡཏཱཏི མིཙྪཏྟནིཡཱམེན ནིཡཏཱ, ཨཱནནྟརིཡབྷཱཝཔྤཏྟཱ ཀཔྤཏིཊྛནཀཝིཔཱཀཏཱཡ ཀཔྤཊྛིཏིཀཱ དེཝདཏྟཱདཱིནཾ ཝིཡ. ཨསངྑཱརིཀཱ སབྷཱཝཏིཁིཎཏཱཡ ཨོལཱ༹རིཀཱ. དིཊྛིསམྤཡུཏྟཱ མཧཱསཱཝཛྫཏཱཡ ཨོལཱ༹རིཀཱ. སཱཔི དིཊྛིསམྤཡུཏྟཱ ནིཡཏཱ ཨོལཱ༹རིཀཱ, ཏཏོ ཀཔྤཊྛིཏིཀཱ, ཏཏོ ཨསངྑཱརིཀཱཏི ཏིཝིདྷཱཔི ཧེཊྛཱ ཝུཏྟནཡཏྟཱ ཨེཀཛ྄ཛྷཾ ཝུཏྟཱ ཝིསུཾ ཝིསུཾཡེཝ ཡོཛེཏབྦཱ. ཏེནཱཧ ‘‘ཨིཏརཱ སུཁུམཱ’’ཏི. ཨཝིསེསེནཱཏི དོསསཧགཏཱ, ལོབྷསཧགཏཱཏི ཨབྷེདེན. ཨཀུསལཱ བཧུཝིཔཱཀཱ དོསུསྶནྣཏཱཡ ཨོལཱ༹རིཀཱ. ཏཐཱ ཀུསལཱ ཨཔྤཝིཔཱཀཱ. མནྡདོསཏྟཱ ཨཀུསལཱ ཨཔྤཝིཔཱཀཱ སུཁུམཱ. ཏཐཱ ཀུསལཱ བཧུཝིཔཱཀཱ.

ཨོལཱ༹རིཀསུཁུམནིཀནྟིཝཏྠུབྷཱཝཏོ ཀཱམཱཝཙརཱདཱིནཾ ཨོལཱ༹རིཀསུཁུམཏཱ, ལོཀུཏྟརཱ པན ཨེཀནྟསུཁུམཱཝ. ཏཏྠཱཔི ཙ ཝིབྷཱགཾ པརཏོ ཝཀྑཏི. བྷཱཝནཱམཡཱཔཱིཏི བྷཱཝནཱམཡཱཡ བྷེདནེན ¶ དཱནསཱིལམཡཱནམྤི བྷེདནཾ ནཡཏོ དསྶིཏནྟི ཝེདིཏབྦཾ. བྷཱཝནཱཡ པགུཎབལཝཀཱལཱདཱིསུ ཀདཱཙི ཉཱཎཝིཔྤཡུཏྟཙིཏྟེནཔི མནསིཀཱརོ ཧོཏཱིཏི ཝུཏྟཾ ‘‘བྷཱཝནཱམཡཱཔི དུཧེཏུཀཱ’’ཏི. ཏཾཏཾབྷཱུམིཝིཔཱཀཀིརིཡཱཝེདནཱསཱུཏི ཨེཏྠ ‘‘ཀཱམཱཝཙརཝིཔཱཀཱ ཨོལཱ༹རིཀཱ, རཱུཔཱཝཙརཱ སུཁུམཱ’’ཏིཨཱདིནཱ ཡཱཝ ཨརཧཏྟཕལཱ ནེཏབྦཾ. ‘‘ཀཱམཱཝཙརཀིརིཡཱ ཨོལཱ༹རིཀཱ, རཱུཔཱཝཙརཀིརིཡཱ སུཁུམཱ’’ཏིཨཱདིནཱ ཀཱམཱཝཙརཱ ཙ ‘‘དཱནཱཀཱརཔྤཝཏྟཱ ཨོལཱ༹རིཀཱ, སཱིལཱཀཱརཔྤཝཏྟཱ སུཁུམཱ’’ཏིཨཱདིནཱ ཡཱཝ ནེཝསཉྙཱནཱསཉྙཱཡཏནཱ ནེཏབྦཾ. ཡཐཱ ཙ ཛཱཏིཀོཊྛཱསེ ཨཡཾ ཝིབྷཱགོ, ཨེཝཾ སབྷཱཝཀོཊྛཱསཱདཱིསུཔཱིཏི དསྶེཏུཾ ‘‘དུཀྑཱདཱི’’ཏིཨཱདི ཝུཏྟཾ.

སབྦོ ¶ ཙཱཡཾ ཝིབྷཱགོ ལཀྑཎསནྣིསྶིཏོ ཝུཏྟོཏི ཀཏྭཱ ཨཱཧ ‘‘ཨོཀཱསཝསེན ཙཱཔཱི’’ཏིཨཱདི. སུཁཱཔཱིཏི པི-སདྡེན ཨདུཀྑམསུཁཾ སམྤིཎྜེཏི. སབྦཏྠཱཏི སབྦཱསུ བྷཱུམཱིསུ. ཡཐཱནུརཱུཔནྟི ཡཱ ཡཱ ཝེདནཱ ཡཏྠ ཡཏྠ ལབྦྷཏི, ཏདནུརཱུཔཾ. ཝཏྠུཝསེནཱཏི ཡཾ ཝཏྠུཾ ཨཱརབྦྷ ཝེདནཱ པཝཏྟཏི, ཏསྶ ཝསེནཱཔི. ཧཱིནཝཏྠུཀཱཏི ཧཱིནཾ ཝཏྠུཾ ཨཱརམྨཎཾ ཀཏྭཱ ཀངྒུབྷཏྟཾ བྷུཉྫནྟསྶ ཝེདནཱ ཧཱིནཝཏྠུཀཏཱཡ ཨོལཱ༹རིཀཱ. སཱལིམཾསོདནཾ བྷུཉྫནྟསྶ པཎཱིཏཝཏྠུཀཏཱཡ སུཁུམཱཏི.

༥༠༣. ཨཱདིནཱ ནཡེནཱཏི སབྦཾ པཱལི༹གཏིཾ ཨཱམསཏི. ཛཱཏིཨཱདིཝསེན ཨསམཱནཀོཊྛཱསཏཱ ཝིསབྷཱགཏཱ. དུཀྑཝིཔཱཀཏཱདིཝསེན ཨསདིསཀིཙྩཏཱ ཨསཾསཊྛཏཱ, ན ཨསམྤཡོགོ. ཡདི སིཡཱ, དཱུརཝིཔརིཡཱཡེན སནྟིཀཾ ཧོཏཱིཏི སཾསཊྛཏཱ སནྟིཀཏཱ ཨཱཔཛྫཏི, ན ཙ ཝེདནཱཡ ཝེདནཱསམྤཡོགོ ཨཏྠི. སནྟིཀཔདཝཎྞནཱཡ ཙ ‘‘སབྷཱགཏོ ཙ སརིཀྑཏོ ཙཱ’’ཏི ཝཀྑཏཱིཏི ཝུཏྟནཡེནེཝ ཨཏྠོ ཝེདིཏབྦོ. ཨསདིསསབྷཱཝཏཱ ཨསརིཀྑཏཱ. སབྦཝཱརེསཱུཏི ཨོལཱ༹རིཀསུཁུམབྷེདེ ཝུཏྟནཡཱནུསཱརེན ཝཏྟབྦེསུ སབྦེསུ ཝཱརེསུ. ཛཱཏིཨཱདིཝསེན སམཱནཀོཊྛཱསཏཱ སབྷཱགཏཱ, དུཀྑཝིཔཱཀཏཱདིཝསེན པན སདིསསབྷཱཝཏཱ སརིཀྑཏཱ. ཏེནཱཧ ‘‘ཨཀུསལཱ པན…པེ… སནྟིཀེ’’ཏི.

ཨིཏི ཝེདནཱཀྑནྡྷསྶ ཨཏཱིཏཱདིཝིབྷཱགེ ཝིཏྠཱརཀཐཱམུཁཝཎྞནཱ.

ཀམཱདིཝིནིཙྪཡཀཐཱཝཎྞནཱ

༥༠༤. ཨེཏནྟི ¶ ཨེཝཾ ཨཏཱིཏཱདིཝིབྷཱགེ ཝིཏྠཱརཀཐཱམུཁཾ. ཉཱཎབྷེདཏྠནྟི ནཱནཔྤཀཱརཾ ཉཱཎཔྤབྷེདཏྠཾ. ཀམཏོཏི དེསནཱཀྐམཏོ, ཡེན ཀཱརཎེནཱཡཾ དེསནཱཀྐམོ ཀཏོ, ཏཏོཏི ཨཏྠོ. ཝིསེསཏོཏི བྷེདཏོ, ཁནྡྷུཔཱདཱནཀྑནྡྷཝིབྷཱགཏོཏི ཨཏྠོ. ཨནཱུནཱདྷིཀཏོཏི པཉྩབྷཱཝཏོ. ཨུཔམཱཏོཏི ཨུཔམཱཧི ཨུཔམེཏབྦཏོ. དཊྛབྦཏོ དྭིདྷཱཏི དྭཱིཧི ཨཱཀཱརེཧི ཉཱཎེན པསྶིཏབྦཏོ. པསྶནྟསྶཏྠསིདྡྷིཏོཏི ¶ ཡཐཱ པསྶནྟསྶ ཡཐཱདྷིཔྤེཏཏྠནིཔྥཏྟིཏོ. ཝིབྷཱཝིནཱཏི པཉྙཝཏཱ.

ཨུཔྤཏྟིཀྐམོཏི ཡཐཱཔཙྩཡཾ ཨུཔྤཛྫནྟཱནཾ ཨུཔྤཛྫནཔཊིཔཱཊི. ‘‘དསྶནེནཔཧཱཏབྦཱ’’ཏིཨཱདིནཱ (དྷ. ས. ཏིཀམཱཏིཀཱ ༨, ༩) པཋམཾ པཧཱཏབྦཱ པཋམཾ ཝུཏྟཱ, དུཏིཡཾ པཧཱཏབྦཱ དུཏིཡཾ ཝུཏྟཱཏི ཨཡཾ པཧཱནཀྐམོ. སཱིལཝིསུདྡྷིཾ པཊིཔཛྫ ཙིཏྟཝིསུདྡྷི པཊིཔཛྫིཏབྦཱ, ཏཐཱ ཏཏོ པརཱཔཱིཏི ཨཱཧ ‘‘སཱིལཝིསུདྡྷི…པེ… པཊིཔཏྟིཀྐམོ’’ཏི, ཨནུཔུབྦཔཎཱིཏཱ བྷཱུམིཡོ ཨནུཔུབྦེན ཝཝཏྠིཏཱཏི ཨཡཾ བྷཱུམིཀྐམོ. ‘‘ཙཏྟཱརོ སཏིཔཊྛཱནཱ’’ཏིཨཱདིཀོ (ཝིབྷ. ༣༥༥) ཨེཀཀྑཎེཔི སཏིཔཊྛཱནཱདིསམྦྷཝཏོ དེསནཱཀྐམོ ཙ. དཱནཀཐཱདཡོ ཨནུཔུབྦུཀྐཾསཏོ ཀཐིཏཱ, ཨུཔྤཏྟིཨཱདིཝཝཏྠཱནཱབྷཱཝཏོ པན དཱནཱདཱིནཾ ཨིདྷ དེསནཱཀྐམཝཙནཾ. ཨུཔྤཏྟིཨཱདིཝཝཏྠཱནཧེཏུཀཏཱཡ ཧི ‘‘པཋམཾ ཀལལཾ ཧོཏཱི’’ཏིཨཱདིཀཱ (སཾ. ནི. ༡.༢༣༥; ཀཐཱ. ༦༩༢) དེསནཱཔི སམཱནཱ ཨུཔྤཏྟིཨཱདིཀམབྷཱཝེནེཝ ཝུཏྟཱ. ཡཐཱཝུཏྟཝཝཏྠཱནཱབྷཱཝེན པན ཨནེཀེསཾ ཝཙནཱནཾ སཧཔཝཏྟིཡཱ ཨསམྦྷཝཏོ ཡེན ཀེནཙི པུབྦཱཔརིཡེན དེསེཏབྦཏཱཡ ཏེན ཏེན ཨདྷིཔྤཱཡེན དེསནཱམཏྟསྶེཝ ཀམོ དེསནཱཀྐམོ དཊྛབྦོ. པུབྦཱཔརིཡཝཝཏྠཱནེནཱཏི པཋམཾ རཱུཔཀྑནྡྷོ, ཏཏོ ཝེདནཱཀྑནྡྷོཏི ཨེཝཾ པུབྦཱཔརིཡཝཝཏྠཱནེན ཨནུཔྤཏྟིཏོ. ཨཔྤཧཱཏབྦཏོཏི ཁནྡྷེསུ ཨེཀཙྩཱནཾ པཧཱཏབྦཏཱཝ ནཏྠི, ཀུཏོ པཧཱནཀྐམོ. སཏི ཧི སབྦེསཾ པཧཱཏབྦཏཱཡ པཧཱནཀྐམེན ནེསཾ དེསནཱ སིཡཱ. ཨཔྤཊིཔཛྫནཱིཡཏོཏི སམྨཱཔཊིཔཏྟིཝསེན ན པཊིཔཛྫིཏབྦཏོ. ‘‘ཙཏུབྷཱུམིཔརིཡཱཔནྣཏྟཱ’’ཏི ཨིམིནཱ ཝེདནཱདཱིནཾ ཨནིཡཏབྷཱུམིཀཏཾ དསྶེཏི. ནིཡཏབྷཱུམིཀཱནཉྷི བྷཱུམིཀྐམོ སམྦྷཝེཡྻ.

ཨབྷེདེནཱཏི རཱུཔཱདཱིནཾ བྷེདཾ ཝིབྷཱགཾ ཨཀཏྭཱ ཨེཀཛ྄ཛྷཾ པིཎྜགྒཧཎེན. ཨཏྟགཱཧཔཏིཏནྟི ཨཏྟགཱཧསངྑཱཏེ དིཊྛོགྷེ ནིཔཏིཏཾ. སམཱུཧགྷནཝིནིབྦྷོགདསྶནེནཱཏི རཱུཔཏོ ཨརཱུཔཾ ཝིཝེཙེནྟོ རཱུཔཱརཱུཔསམཱུཧེ ¶ གྷནཝིནིབྦྷུཛྫནདསྶནེན. ཙཀྑུཨཱདཱིནམྤི ཝིསཡབྷཱུཏནྟི ཨེཀདེསེན སམུདཱཡབྷཱུཏཾ རཱུཔཀྑནྡྷཾ ཝདཏི. ཡཱ ཨེཏྠ ཨིཊྛཾ, ཨནིཊྛཉྩ རཱུཔཾ སཾཝེདེཏི, ཨཡཾ ཝེདནཱཀྑནྡྷོཏི ཨིཊྛཱནིཊྛརཱུཔསཾཝེདནིཀཾ ཝེདནཾ དེསེསཱིཏི སམྦནྡྷོ. ཨེཝཾ སབྦཏྠ. ཨིཊྛམཛ྄ཛྷཏྟཨནིཊྛམཛ྄ཛྷཏྟཱནམྤི ཨིཊྛཱནིཊྛསབྷཱཝཏྟཱ ཨིཊྛཱནིཊྛགྒཧཎེནེཝ གཧཎཾ དཊྛབྦཾ. ཨེཝནྟི ཡཐཱཝུཏྟནཡེན. སཉྙཱཡ གཧིཏཱཀཱརེ ¶ ཝིསཡེ ཨབྷིསངྑཱརཔྤཝཏྟཱིཏི ཨཱཧ ‘‘སཉྙཱཝསེན ཨབྷིསངྑཱརཀེ’’ཏི. ཡཐཱ ཝིཉྙཱཎསྶ སམྤཡུཏྟདྷམྨཱནཾ ནིསྶཡབྷཱཝོ པཱཀཊོ, ན ཏཐཱ ཝེདནཱདཱིནནྟི ཨཱཧ ‘‘ཝེདནཱདཱིནཾ ནིསྶཡ’’ནྟི. ‘‘མནོཔུབྦངྒམཱ དྷམྨཱ (དྷ. པ. ༡-༢), ཙིཏྟཱནུཔརིཝཏྟིནོ དྷམྨཱ (དྷ. ས. དུཀམཱཏིཀཱ ༦༢), ཚདྭཱརཱདྷིཔཏི རཱཛཱ’’ཏི (དྷ. པ. ཨཊྛ. ༢.༡༨༡ ཨེརཀཔཏྠནཱགརཱཛཝཏྠུ) ཝཙནཏོ ཝིཉྙཱཎཾ ཨདྷིཔཏི.

༥༠༥. རཱུཔཀྑནྡྷེ ‘‘སཱསཝཾ ཨུཔཱདཱནིཡ’’ནྟི ཝཙནཾ ཨནཱསཝཱནཾ དྷམྨཱནཾ སབྦྷཱཝཏོ རཱུཔཀྑནྡྷསྶ ཏཾསབྷཱཝཏཱནིཝཏྟནཏྠཾ, ན ཨནཱསཝརཱུཔནིཝཏྟནཏྠཾ.

ཨནཱསཝཱཝ ཁནྡྷེསུ ཝུཏྟཱཏི ཨེཏྠ ཨཊྛཱནཔྤཡུཏྟོ ཨེཝ-སདྡོ, ཨནཱསཝཱ ཁནྡྷེསྭེཝ ཝུཏྟཱཏི ཨཏྠོ. ཨིདྷ པན ཝིསུདྡྷིམགྒེ སབྦེཔེཏེ ཁནྡྷཱཔི ཨུཔཱདཱནཀྑནྡྷཱཔི.

༥༠༦. སབྦསངྑཏཱནཾ སབྷཱགེན ཨེཀཛ྄ཛྷཾ སངྒཧོ སབྦསངྑཏསབྷཱགེཀསངྒཧོ. སབྷཱགསབྷཱཝེན ཧི སངྒཡ྄ཧམཱནཱ སབྦསངྑཏཱ པཉྩཀྑནྡྷཱ ཧོནྟི. ཏཏྠ རུཔྤནཱདིསཱམཉྙེན སམཱནཀོཊྛཱསཱ སབྷཱགཱཏི ཝེདིཏབྦཱ. ཏེསུ སངྑཏཱབྷིསངྑརཎཀིཙྩཾ ཨཱཡཱུཧནརསཱཡ ཙེཏནཱཡ བལཝནྟི སཱ ‘‘སངྑཱརཀྑནྡྷོ’’ཏི ཝུཏྟཱ. ཨཉྙེ ཙ རུཔྤནཱདིཝིསེསལཀྑཎརཧིཏཱ ཕསྶཱདཡོ སངྑཏཱབྷིསངྑརཎསཱམཉྙེནཱཏི དཊྛབྦཱ, ཕུསནཱདཡོ པན སབྷཱཝཱ ཝིསུཾ ཁནྡྷསདྡཝཙནཱིཡཱ ན ཧོནྟཱིཏི དྷམྨསབྷཱཝཉྙུནཱ ཏཐཱགཏེན ཕསྶཀྑནྡྷཱདཡོ ན ཝུཏྟཱཏི ཝེདིཏབྦཱ. ‘‘ཡེ ཧི ཀེཙི, བྷིཀྑཝེ, སམཎཱ ཝཱ བྲཱཧྨཎཱ ཝཱ སསྶཏཝཱདཱ སསྶཏཾ ཨཏྟཱནཉྩ ལོཀཉྩ པཉྙཔེནྟི, སབྦེ ཏེ ཨིམེ ཨེཝ པཉྩུཔཱདཱནཀྑནྡྷེ ནིསྶཱཡ པཊིཙྩ, ཨེཏེསཾ ཝཱ ཨཉྙཏར’’ནྟི ཨེཝམཱདིསུཏྟཱནཉྩ ཝསེན ཨཏྟཏྟནིཡགཱཧསྶ ཨེཏཔྤརམཏཱ དཊྛབྦཱ. ཨེཏེན ཙ ཝཀྑམཱནསུཏྟཝསེན ཙ ཁནྡྷེ ཨེཝ ནིསྶཱཡ པརིཏྟཱརམྨཎཱདིཝསེན ན ཝཏྟབྦཱ ཙ དིཊྛི ཨུཔྤཛྫཏི ཁནྡྷནིབྦཱནཝཛྫསྶ སབྷཱཝདྷམྨསྶ ཨབྷཱཝཏོཏི ཝུཏྟཾ ཧོཏི. རཱུཔནྟི རུཔྤནསབྷཱཝཾ དྷམྨཛཱཏམཱཧ. ཝེདནནྟིཨཱདཱིསུཔི ཨེསེཝ ནཡོ. ‘‘སཱིལཀྑནྡྷོ སམཱདྷིཀྑནྡྷོ’’ཏིཨཱདི (དཱི. ནི. ༣.༣༥༥) ཝཙནཏོ ¶ ཨཉྙེསཉྩ ཁནྡྷསདྡཝཙནཱིཡཱནཾ ¶ སཱིལཀྑནྡྷཱདཱིནཾ སབྦྷཱཝཏོ ན པཉྩེཝཱཏི ཙོདནཾ ནིཝཏྟེཏུམཱཧ ‘‘ཨཉྙེསཾ ཏདཝརོདྷཏོ’’ཏི.

༥༠༧. པཝཏྟིཊྛཱནབྷཱུཏཾ ཝསནཊྛཱནཾ ཝིཡ ཧོཏཱིཏི ཝུཏྟཾ ‘‘ནིཝཱསཊྛཱནཏོ’’ཏི. དུཀྑདུཀྑཝིཔརིཎཱམདུཀྑསངྑཱརདུཀྑཏཱཝསེན ཝེདནཱཡ ཨཱབཱདྷཀཏྟཾ དཊྛབྦཾ. རཱགཱདིསམྤཡུཏྟསྶ ཝིཔརིཎཱམཱདིདུཀྑསྶ ཨིཏྠིཔུརིསཱདིཨཱཀཱརགཱཧིཀཱ ཏཾཏཾསངྐཔྤམཱུལབྷཱུཏཱ སཉྙཱ སམུཊྛཱནཾ. པིཏྟཱདི ཝིཡ རོགསྶ ཨཱསནྣཀཱརཎཾ སམུཊྛཱནཾ. ཨུཏུབྷོཛནཝིསམཏཱཝིསམཔརིཧཱརཱདི ཝིཡ མཱུལཀཱརཎཾ ནིདཱནཾ. ཙིཏྟསྶ ཨངྒབྷཱུཏཱ ཙེཏསིཀཱཏི ཝིཉྙཱཎཾ གིལཱནཱུཔམཾ ཝུཏྟཾ. ཀུཊྛརོགཝཏོ སིནིཡ྄ཧནཾ ཏསྶ བྷིཡྻོབྷཱཝཱཡ ཝིཡ བཱལསྶ པུཉྙཱབྷིསངྑཱརཱདིཝསེན པཝཏྟི ཝེདནཱདུཀྑཱཝཧཱ ཨསཔྤཱཡསེཝནསདིསཱི. ཝེདནཏྟཱཡཱཏི ཝེདནཱསབྷཱཝཏྠཾ, ཝེདནཏྟལཱབྷཱཡཱཏི ཨཏྠོ. ཀཱརཎཊྛཱནཏཱཡ, བྷོཛནཱདྷཱརཏཱཡ ཙ ཙཱརཀཱུཔམཾ, བྷཱཛནཱུཔམཉྩ རཱུཔཾ. སུབྷསཉྙཱདིཝསེན ཝེདནཱཀཱརཎསྶ ཧེཏུབྷཱཝཏོ, ཝེདནཱབྷོཛནསྶ ཚཱདཱཔནཏོ ཙ ཨཔརཱདྷཱུཔམཱ, བྱཉྫནཱུཔམཱ ཙ སཉྙཱ. ཝེདནཱཧེཏུཏོ ཀཱརཎཀཱརཀཱུཔམོ, པརིཝེསཀཱུཔམོ ཙ སངྑཱརཀྑནྡྷོ. བྷཏྟཀཱརོ ཨེཝ ཡེབྷུཡྻེན པརིཝིསཏཱིཏི པརིཝེསཀགྒཧཎཾ. ཝེདནཱཡ ཝིབཱདྷིཏབྦཏོ, ཨནུགྒཧེཏབྦཏོ ཙ ཨཔརཱདྷིཀཱུཔམཾ, བྷུཉྫཀཱུཔམཉྩ ཝིཉྙཱཎཾ ཝུཏྟཾ.

༥༠༨. ‘‘པཉྩ ཝདྷཀཱ པཙྩཏྠིཀཱ ཨུཀྑིཏྟཱསིཀཱཏི ཁོ, བྷིཀྑཝེ, པཉྩནྣེཏཾ ཨུཔཱདཱནཀྑནྡྷཱནཾ ཨདྷིཝཙན’’ནྟི ཨཱསཱིཝིསཱུཔམེ (སཾ. ནི. ༤.༢༣༨) ཝདྷཀཱཏི ཝུཏྟཱ, ‘‘བྷཱརོཏི ཁོ, བྷིཀྑཝེ, པཉྩནྣེཏཾ ཨུཔཱདཱནཀྑནྡྷཱནཾ ཨདྷིཝཙན’’ནྟི བྷཱརསུཏྟེ (སཾ. ནི. ༣.༢༢) བྷཱརཱཏི, ‘‘ཨཏཱིཏམྤཱཧཾ ཨདྡྷཱནཾ ཨེཝམེཝ རཱུཔེན ཁཛྫིཾ, སེཡྻཐཱཔི ཨེཏརཧི པཙྩུཔྤནྣེན རཱུཔེན ཁཛྫཱམི. ཨཧཉྩེཝ ཁོ པན ཨནཱགཏཾ རཱུཔཾ ཨབྷིནནྡེཡྻཾ, ཨནཱགཏམྤཱཧཾ ཨདྡྷཱནཾ ཨེཝམེཝ རཱུཔེན ཁཛྫེཡྻཾ, སེཡྻཐཱཔི…པེ… ཁཛྫཱམཱི’’ཏིཨཱདིནཱ (སཾ. ནི. ༣.༧༩) ཁཛྫནཱིཡཔརིཡཱཡེ ཁཱདཀཱཏི, ‘‘སོ ཨནིཙྩཾ རཱུཔཾ ‘ཨནིཙྩཾ རཱུཔ’ནྟི ཡཐཱབྷཱུཏཾ ནཔྤཛཱནཱཏཱི’’ཏིཨཱདིནཱ (སཾ. ནི. ༣.༨༥) ཡམཀསུཏྟེ ཨནིཙྩཱདིཀཱཏི. ཡདིཔི ‘‘ཨིདྷ པན སབྦེཔེཏེ ཨེཀཛ྄ཛྷཾ ཀཏྭཱ ཁནྡྷཱཏི ཨདྷིཔྤེཏཱ’’ཏི ཝུཏྟཾ, བཱཧུལླེན པན ཨུཔཱདཱནཀྑནྡྷཱནཾ ཏདནྟོགདྷཱནཾ དཊྛབྦཏཱ ཝེདིཏབྦཱ. ཝིཔསྶནཱཡ བྷཱུམིཝིཙཱརོ ཧེསོཏི.

ཕེཎཔིཎྜོ ¶ ཝིཡཱཏིཨཱདཱིསུ རཱུཔཱདཱིནཾ ཨེཝཾ ཕེཎཔིཎྜཱདིསདིསཏཱ དཊྛབྦཱ, ཡཐཱ ཕེཎཔིཎྜོ ¶ ནིསྶཱརོ པརིདུབྦལོ ཨགཡ྄ཧུཔགོ; གཧིཏོཔི ཀིཉྩི ཨཏྠཾ ན སཱདྷེཏི, ཚིདྡཱཝཚིདྡོ ཨནེཀསནྡྷིསངྒྷཊིཏོ བཧཱུནཾ པཱཎཀཱནཾ ཨཱཝཱསོ ཨནུཔུབྦཱུཔཙིཏོ སབྦཱཝཏྠནིཔཱཏཱི ཨཝསྶཾབྷེདཱི, ཨེཝཾ རཱུཔམྤི ནིཙྩསཱརཱདིཝིརཧཏོ ནིསྶཱརཾ ཕེགྒུ ཝིཡ, སུཁབྷཉྫནཱིཡཏོ དུབྦལཾ, ནིཙྩནྟི ཝཱ དྷུཝནྟི ཝཱ ཨཧནྟི ཝཱ མམནྟི ཝཱ ན གཧེཏབྦཾ, གཧིཏམྤི ཏཐཱ ན ཧོཏི, བཧུཚིདྡཾ ཨསཱིཏིསཏསནྡྷིསངྒྷཊིཏཾ ཨནེཀཀིམིཀུལཱཝཱསཾ ཀལལཱདིཝསེན ཨནུཔུབྦཱུཔཙིཏཾ ཀལལཀཱལཏོ པཊྛཱཡ སབྦཱསུཔི ཨཝཏྠཱསུ ཝིནསྶཏི, ཨཝསྶམེཝ ཙ བྷིཛྫཏི. ཨཊྛཀཐཱཡཾ (སཾ. ནི. ཨཊྛ. ༢.༣.༩༥; ཝིབྷ. ཨཊྛ. ༢༦ ཀམཱདིཝིནིཙྪཡཀཐཱ) པན པརིམདྡནཱསཧནམེཝ ཨུཔམཱུཔམེཡྻསམྦནྡྷོ ཝུཏྟོ.

ཡཐཱ པུབྦུལོ༹ ནིསྶཱརོ པརིདུབྦལོ ཨགཡ྄ཧུཔགོ, གཧིཏོཔི ན ཀིཉྩི ཨཏྠཾ སཱདྷེཏི, ན ཙིརཊྛིཏིཀོ, ཏཐཱ ཝེདནཱཔི. ཡཐཱ ཙ པུབྦུལོ༹, ཨུདཀཏལཾ, ཨུདཀབིནྡུཾ, ཨུདཀཛལླིཀཾ སངྐཌྜྷིཏྭཱ པུཊཾ ཀཏྭཱ གཧཎཝཱཏཉྩཱཏི ཙཏྟཱརི ཀཱརཎཱནི པཊིཙྩ ཛཱཡཏི, ཨེཝཾ ཝེདནཱཔི ཝཏྠུཾ, ཨཱརམྨཎཾ, ཀིལེསཛལླཾ, ཕསྶསངྒྷཊྚནཉྩཱཏི ཙཏྟཱརི ཀཱརཎཱནི པཊིཙྩ ཨུཔྤཛྫཏི. ཡཐཱ ཧི ཨུདཀཏལེ བིནྡུནིཔཱཏཛནིཏོ ཝཱཏོ ཨུདཀཛལླིཀསངྑཱཏཾ ཨུདཀལསིཀཾ སངྐཌྜྷིཏྭཱ པུཊཾ ཀཏྭཱ པུབྦུལ༹ཾ ནཱམ ཀརོཏི, ཨེཝཾ ཝཏྠུམྷི ཨཱརམྨཎཱཔཱཐགམནཛནིཏོ ཕསྶོ ཨནུཔཙྪིནྣཾ ཀིལེསཛལླཾ སཧཀཱརཱིཔཙྩཡབྷཱཝེན སངྐཌྜྷིཏྭཱ ཝེདནཾ ནཱམ ཀརོཏི. ཨིདཉྩ ཀིལེསེཧི མཱུལཀཱརཎབྷཱུཏེཧི, ཨཱརམྨཎསྶཱདནབྷཱུཏེཧི ཙ ནིབྦཏྟཾ ཝཊྚགཏཾ ཝེདནཾ སནྡྷཱཡ ཝུཏྟཾ. ཨུཀྐཊྛཔརིཙྪེདེན ཝཱ ཙཏྟཱརོ པཙྩཡཱ ཝུཏྟཱ, ཨཱུནེཧིཔི པན ཨུཔྤཛྫཏེཝ. ཨིདྷ མུཧུཏྟརམཎཱིཡཏཱ ཨུཔམོཔམེཡྻསམྦནྡྷོ ཝུཏྟོ.

ཡཐཱ པན མརཱིཙིཀཱ ཨསཱརཱ ཨགཡ྄ཧུཔགཱ. ན ཧི ཏཾ གཧེཏྭཱ པཱཏུཾ ཝཱ ནྷཱཡིཏུཾ ཝཱ བྷཱཛནཾ ཝཱ པཱུརེཏུཾ སཀྐཱ, ཨེཝཾ སཉྙཱཔི ཨསཱརཱ ཨགཡ྄ཧུཔགཱ. ཡཐཱ ཙ མརཱིཙིཀཱ ཝིཔྥནྡམཱནཱ སཉྫཱཏཱུམིཝེགཱ ཝིཡ ཁཱཡནྟཱི མཧཱཛནཾ ཝིཔྤལམྦེཏི, ཨེཝཾ སཉྙཱཔི ‘‘ནཱིལཾ པཱིཏཾ དཱིགྷཾ རསྶ’’ནྟིཨཱདིནཱ ཨཱརམྨཎེ པཝཏྟམཱནཱ སབྷཱཝམཏྟེ ཨཊྛཏྭཱ ‘‘སུབྷཾ སུཁཾ ནིཙྩ’’ནྟིཨཱདིམིཙྪཱགཱཧསྶ ཀཱརཎབྷཱཝེན ལོཀཾ ཝིཔྤལམྦེཏི.

ཡཐཱ ¶ ཀདལིཀྑནྡྷོ ཨསཱརོ ཨགཡ྄ཧུཔགོ. ན ཧི ཏཾ གཧེཏྭཱ གོཔཱནསཱིཨཱདཱིནཾ ཨཏྠཱཡ ཨུཔནེཏུཾ སཀྐཱ, ཨུཔནཱིཏམྤི ཏཐཱ ན ཧོཏི, བཧུཝཊྚིསམོདྷཱནོ ཙ ཧོཏི, ཨེཝཾ སངྑཱརཀྑནྡྷོཔི ¶ ཨསཱརོ ཨགཡ྄ཧུཔགོ. ན ཧི ཏཾ ནིཙྩཱདིཝསེན གཧེཏུཾ སཀྐཱ, གཧིཏམྤི ཏཐཱ ན ཧོཏི, བཧུདྷམྨསམོདྷཱནོ ཙ. ཨཉྙདེཝ ཧི ཕསྶསྶ ལཀྑཎཾ, ཨཉྙཾ ཙེཏནཱདཱིནཾ, ཏེ པན སབྦེ སམོདྷཱནེཏྭཱ སངྑཱརཀྑནྡྷོཏི ཝུཙྩཏི.

ཡཐཱ ཙ མཱཡཱ ཨསཱརཱ ཨགཡ྄ཧུཔགཱ. ན ཧི ཏཾ གཧེཏྭཱ ཀིཉྩི ཨཏྠཾ ཀིཙྩཾ སཱདྷེཏུཾ སཀྐཱ, ཨིཏྟརཱ ལཧུཔཙྩུཔཊྛཱནཱ ཨམཎིཨཱདིམེཝ མཎིཨཱདིརཱུཔེན དསྶེནྟཱི མཧཱཛནཾ ཝཉྩེཏི, ཨེཝཾ ཝིཉྙཱཎམྤི ཨསཱརཾ ཨིཏྟརཾ ལཧུཔཙྩུཔཊྛཱནཾ, ཏེནེཝ ཙིཏྟེན ཨཱགཙྪནྟཾ ཝིཡ, གཙྪནྟཾ ཝིཡ, ཋིཏཾ ཝིཡ, ནིསིནྣཾ ཝིཡ ཙ ཀཏྭཱ གཱཧཱཔེཏི, ཨཉྙདེཝ ཙིཏྟཾ ཨཱགམནེ, ཨཉྙཾ གམནཱདཱིསཱུཏི. ཨེཝཾ ཝིཉྙཱཎཾ མཱཡཱསདིསཾ.

པཉྩཔི ཨུཔཱདཱནཀྑནྡྷཱ ཨསུབྷཱདིསབྷཱཝཱ ཨེཝ སཾཀིལེསཱསུཙིཝཏྠུབྷཱཝཱདིཏོཏི ཨསུབྷཱདིཏོ དཊྛབྦཱ ཨེཝ, ཏཐཱཔི ཀཏྠཙི ཀོཙི ཝིསེསོ སུཁགྒཧཎཱིཡོ ཧོཏཱིཏི ཨཱཧ ‘‘ཝིསེསཏོ ཙཱ’’ཏིཨཱདི. ཏཏྠ ཙཏྟཱརོ སཏིཔཊྛཱནཱ ཙཏུཝིཔལླཱསཔྤཧཱནཀརཱཏི ཏེསཾ གོཙརབྷཱཝེན རཱུཔཀྑནྡྷཱདཱིསུ ཨསུབྷཱདིབྷཱཝེན དཊྛབྦཏཱ ཝུཏྟཱ.

༥༠༩. ཁནྡྷེཧི ན ཝིཧཉྙཏི པརིཝིདིཏསབྷཱཝཏྟཱ. ཝིཔསྶཀོཔི ཏེསཾ ཝིཔཏྟིཡཾ ན དུཀྑམཱཔཛྫཏི, ཁཱིཎཱསཝེསུ པན ཝཏྟབྦམེཝ ནཏྠི. ཏེ ཧི ཨཱཡཏིམྤི ཁནྡྷེཧི ན བཱདྷཱིཡནྟཱིཏི.

ཀབལཱི༹ཀཱརཱཧཱརཾ པརིཛཱནཱཏཱིཏི ‘‘ཨཱཧཱརསམུདཡཱ རཱུཔསམུདཡོ’’ཏི (སཾ. ནི. ༣.༥༦,༥༧) ཝཙནཏོ ཨཛ྄ཛྷཏྟིཀརཱུཔེ ཚནྡརཱགཾ པཛཧནྟོ ཏསྶ སམུདཡབྷཱུཏེ ཀབལཱི༹ཀཱརཱཧཱརེཔི ཚནྡརཱགཾ པཛཧཏཱིཏི ཨཏྠོ. ཨཡཾ པཧཱནཔརིཉྙཱ. ཨཛ྄ཛྷཏྟིཀརཱུཔཾ པན པརིགྒཎྷནྟོ ཏསྶ པཙྩཡབྷཱུཏཾ ཀབལཱི༹ཀཱརཱཧཱརཾ པརིགྒཎྷཱཏཱིཏི ཉཱཏཔརིཉྙཱ. ཏསྶ ཙ ཨུདཡབྦཡཱནུཔསྶཱི ཧོཏཱིཏི ཏཱིརཎཔརིཉྙཱ ཙ ཡོཛེཏབྦཱ. ཨེཝཾ པརིཉྙཏྟཡེ སིཛ྄ཛྷནྟེ ཨིམེ ཝིཔལླཱསཱདཡོ ཝིདྷམཱིཡནྟི ཨེཝཱཏི ཨཱཧ ‘‘ཨསུབྷེ སུབྷནྟི ཝིཔལླཱསཾ པཛཧཏཱི’’ཏིཨཱདི. ཏཏྠ ཀཱམརཱགབྷཱུཏཾ ཨབྷིཛ྄ཛྷཾ སནྡྷཱཡཱཧ ‘‘ཨབྷིཛ྄ཛྷཱཀཱཡགནྠ’’ནྟི. ཨསུབྷཱནུཔསྶནཱཡ ཧི ཀཱམརཱགཔྤཧཱནཾ ཧོཏི ¶ , ཀཱམརཱགམུཁེན ཝཱ སབྦལོབྷཔྤཧཱནཾ ཝདཏི. ན ཨུཔཱདིཡཏི ན གཎྷཏི ན ཨུཔྤཱདེཏི.

‘‘ཕསྶཔཙྩཡཱ ¶ ཝེདནཱ’’ཏི (མ. ནི. ༣.༡༢༦; སཾ. ནི. ༢.༣༩; མཧཱཝ. ༡; ཨུདཱ. ༡; ནེཏྟི. ༢༤) ཝུཏྟཏྟཱ ‘‘ཝེདནཱཡ ཚནྡརཱགཾ པཛཧནྟོ ཏསྶཱ པཙྩཡབྷཱུཏེ ཕསྶཱཧཱརེཔི ཚནྡརཱགཾ པཛཧཏཱི’’ཏིཨཱདིནཱ ཨཱཧཱརཔརིཛཱནནེ ཝུཏྟནཡེན ཕསྶཔརིཛཱནནཾ ཡོཛེཏབྦཾ. ཝེདནཱཡ དུཀྑཏོ དསྶནེན ཏཏྠ སུཁནྟི ཝིཔལླཱསཾ པཛཧཏི. སུཁཏྠམེཝ བྷཝཔཏྠནཱ ཧོཏཱིཏི ཝེདནཱཡ ཏཎྷཾ པཛཧནྟོ བྷཝོགྷཾ ཨུཏྟརཏི. ཏཏོ ཨེཝ བྷཝཡོགེན ཝིསཾཡུཛྫཏི. བྷཝཱསཝེན ཙ ཨནཱསཝོ ཧོཏི, སབྦཝེདནཾ དུཀྑཏོ པསྶནྟོ ཨཏྟནོ པརེན ཨཔུབྦཾ དུཀྑཾ ཨུཔྤཱདིཏཾ, སུཁཾ ཝཱ ཝིནཱསིཏཾ ན ཙིནྟེཏི, ཏཏོ ‘‘ཨནཏྠཾ མེ ཨཙརཱི’’ཏིཨཱདི (དྷ. ས. ༡༢༣༧; ཝིབྷ. ༩༠༩) ཨཱགྷཱཏཝཏྠུཔྤཧཱནཏོ བྱཱཔཱདཀཱཡགནྠཾ བྷིནྡཏི. ‘‘སུཁབཧུལེ སུགཏིབྷཝེ སུདྡྷཱི’’ཏི ཨགྒཧེཏྭཱ གོསཱིལགོཝཏཱདཱིཧི སུདྡྷིཾ པརཱམསནྟོ སུཁཔཏྠནཱཝསེནེཝ པརཱམསཏཱིཏི ཝེདནཱཡ ཏཎྷཾ པཛཧནྟོཔི སཱིལབྦཏུཔཱདཱནཾ ན ཨུཔཱདིཡཏི.

མནོསཉྩེཏནཱ སངྑཱརཀྑནྡྷོ, སཉྙཱ པན ཏཾསམྤཡུཏྟཱཏི སཉྙཱསངྑཱརེ ཨནཏྟཏོ པསྶནྟོ མནོསཉྩེཏནཱཡ ཚནྡརཱགཾ པཛཧཏི, ཏཉྩ པརིགྒཎྷཱཏི, ཏཱིརེཏི ཙཱཏི ‘‘སཉྙཾ སངྑཱརེ…པེ… པརིཛཱནཱཏཱི’’ཏི ཝུཏྟཾ. སཉྙཱསངྑཱརེ ཨནཏྟཱཏི པསྶནྟོ ཨཏྟདིཊྛིམཱུལཀཏྟཱ སབྦདིཊྛཱིནཾ ཨཏྟདིཊྛིཾ ཝིཡ སབྦདིཊྛིཡོཔི ཝིདྷམཏཱིཏི དསྶེནྟོ ‘‘དིཊྛོགྷཾ ཨུཏྟརཏི…པེ… ཨཏྟཝཱདུཔཱདཱནཾ ན ཨུཔཱདིཡཏཱི’’ཏི ཨཱཧ.

ཝིཉྙཱཎཾ ཨནིཙྩཏོ པསྶནྟོ ཨནིཙྩཱནུཔསྶནཱམུཁེན ཏིསྶོཔི ཨནུཔསྶནཱ ཨུསྶུཀྐནྟོ ཏཱིཧིཔི པརིཉྙཱཧི ཝིཉྙཱཎཱཧཱརཾ པརིཛཱནཱཏི. ཝིསེསཏོ པནེཏྠ ཨནིཙྩེ ནིཙྩནྟི ཝིཔལླཱསཾ པཛཧཏི. ཏཏྠ ནིཙྩགྒཱཧབཱཧུལླཏོ ཨཝིཛྫཱཡ ཝིཉྙཱཎེ གྷནགཧཎཾ ཧོཏཱིཏི གྷནཝིནིབྦྷོགཾ ཀཏྭཱ ཏཾ ཨནིཙྩཏོ པསྶནྟོ ཨཝིཛྫོགྷཾ ཨུཏྟརཏི. ཏཏོ ཨེཝ ཨཝིཛྫཱཡོགེན ཝིསཾཡུཏྟོ ཨཝིཛྫཱསཝེན ཨནཱསཝོ ཙ ཧོཏི. མོཧབལེནེཝ སཱིལབྦཏཔརཱམསནཾ ཧོཏཱིཏི ཏཾ པཛཧནྟོ ‘‘སཱིལབྦཏཔརཱམཱསཀཱཡགནྠཾ བྷིནྡཏི.

‘‘ཡཉྩ ¶ ཁོ ཨིདཾ, བྷིཀྑཝེ, ཝུཙྩཏི ཙིཏྟཾ ཨིཏིཔི, མནོ ཨིཏིཔི, ཝིཉྙཱཎཾ ཨིཏིཔི, ཏཏྲཱསྶུཏཝཱ པུཐུཛྫནོ ནཱལཾ ནིབྦིནྡིཏུཾ, ནཱལཾ ཝིརཛྫིཏུཾ, ནཱལཾ ཝིམུཙྩིཏུཾ. ཏཾ ཀིསྶ ཧེཏུ? དཱིགྷརཏྟཾ ཧེཏཾ, བྷིཀྑཝེ, ཨསྶུཏཝཏོ པུཐུཛྫནསྶ ཨཛ྄ཛྷོསིཏཾ མམཱཡིཏཾ ¶ པརཱམཊྛཾ ‘ཨེཏཾ མམ, ཨེསོཧམསྨི, ཨེསོ མེ ཨཏྟཱ’’’ཏིཨཱདི (སཾ. ནི. ༢.༦༢) –

ཝཙནཏོ ཡཐཱ ཝིཉྙཱཎཾ ནིཙྩཏོ པསྶནྟོ དིཊྛུཔཱདཱནཾ ཨུཔཱདིཡཏི, ཨེཝཾ ཏཾ ཨནིཙྩཏོ པསྶནྟོ དིཊྛུཔཱདཱནཾ ན ཨུཔཱདིཡཏཱིཏི.

ཨེཝཾ མཧཱནིསཾསནྟི ཝུཏྟཔྤཀཱརེན ཝིཔལླཱསཱདིསཀལསཾཀིལེསཝིདྷམནུཔཱཡབྷཱཝཏོ ཨེཝཾ ཝིཔུལུདཡཾ. ཝདྷཀཱདིཝསེནཱཏི ཨུཀྑིཏྟཱསིཀཝདྷཀཱདིཝསེན. པསྶེཡྻཱཏི ཉཱཎདསྶནེན པཙྩཀྑཏོ པསྶེཡྻ.

ཁནྡྷནིདྡེསཝཎྞནཱ ནིཊྛིཏཱ.

ཨིཏི ཙུདྡསམཔརིཙྪེདཝཎྞནཱ.

༡༥. ཨཱཡཏནདྷཱཏུནིདྡེསཝཎྞནཱ

ཨཱཡཏནཝིཏྠཱརཀཐཱཝཎྞནཱ

༥༡༠. ‘‘ཁནྡྷཱཡཏནཱ’’ཏིཨཱདིནཱ ¶ ¶ ཧེཊྛཱ ཨུདྡིཊྛཱནི པདུདྡྷཱརཝསེན ‘‘ཨཱཡཏནཱནཱི’’ཏི ཝཏྭཱ གཎནཔརིཙྪེདེནཱཧ ‘‘དྭཱདསཱཡཏནཱནཱི’’ཏི. ཏཏྠ ཝཏྟབྦཾ པརཏོ སཡམེཝ ཝཀྑཏི. ཙཀྑཱཡཏནནྟིཨཱདི ནེསཾ སརཱུཔདསྶནཾ.

ཨཏྠོ ནཱམ སདྡཏྠོ, བྷཱཝཏྠོ པན ལཀྑཎམེཝ. སོ པན སདྡཏྠོ དུཝིདྷོ – ཨསཱདྷཱརཎོ སཱདྷཱརཎོཏི. ཏཏྠ ཨསཱདྷཱརཎོ ཙཀྑཱདིསདྡཏྠོ, སཱདྷཱརཎོ ཨཱཡཏནསདྡཏྠོ དྭཱདསནྣམྤི སམཱནཏྟཱ.

ཏེསུ ཨསཱདྷཱརཎཾ ཏཱཝ དསྶེནྟོ ‘‘ཝིསེསཏོ ཏཱཝཱ’’ཏིཨཱདིམཱཧ. ཏཏྠ ཝིསེསཏོཏི ཝིསེསཏྠཏོ, ཙཀྑཱདིསདྡཏྠཏོཏི ཨཏྠོ. ཨསྶཱདེཏཱིཏི ཙཀྑཏི-སདྡོ ‘‘མདྷུཾ ཙཀྑཏི, བྱཉྫནཾ ཙཀྑཏཱི’’ཏི རསསཱཡནཏྠོ ཨཏྠཱིཏི ཏསྶ ཝསེན ཨཏྠཾ ཝདཏི. ‘‘ཙཀྑུཾ ཁོ པན, མཱགཎྜིཡ, རཱུཔཱརཱམཾ རཱུཔརཏཾ རཱུཔསམྨུདིཏ’’ནྟི (མ. ནི. ༢.༢༠༩) ཝཙནཏོ ཙཀྑུ རཱུཔཾ ཨསྶཱདེཏི. སཏིཔི སོཏཱདཱིནཾ སདྡཱརཱམཏཱདིབྷཱཝེ ཡོ ‘‘ཡཾ ཙཀྑུ ཙཏུནྣཾ མཧཱབྷཱུཏཱནཾ ཨུཔཱདཱཡ པསཱདོ’’ཏིཨཱདིནཱ (དྷ. ས. ༥༩༧) པཱལི༹ཡཾ, ‘‘རཱུཔཱབྷིགྷཱཏཱརཧབྷཱུཏཔྤསཱདལཀྑཎ’’ནྟིཨཱདིནཱ (དྷ. ས. ཨཊྛ. ༦༠༠; ཝིསུདྡྷི. ༢.༤༣༣) ཨཊྛཀཐཱཡཉྩ ཝུཏྟོ ཨཏྠཝིསེསོ, ཏཏྠེཝ ནིརུལ༹ྷཏྟཱ ཙཀྑུམྷི ཨེཝ ཙཀྑུསདྡོ པཝཏྟཏི གཝཱདཱིསུ གོསདྡཱདི ཝིཡཱཏི དཊྛབྦཾ.

ཝིབྷཱཝེཏི ཙཱཏི སདྡལཀྑཎསིདྡྷསྶ ཙཀྑཏི-སདྡསྶ ཝསེན ཨཏྠཾ ཝདཏི. ཙཀྑཏཱིཏི ཧི ཨཱཙིཀྑཏི, ཨབྷིབྱཏྟཾ ཝདཏཱིཏི ཨཏྠོ. ནེཏྟསྶ ཙ ཝདནྟསྶ ཝིཡ སམཝིསམཝིབྷཱཝནམེཝ ¶ ཨཱཙིཀྑནནྟི ཀཏྭཱ ཨཱཧ ‘‘ཝིབྷཱཝེཏི ཙཱཏི ཨཏྠོ’’ཏི, ཨནེཀཏྠཏྟཱ ཝཱ དྷཱཏཱུནཾ ཝིབྷཱཝནཏྠཏཱ ཙ ཙཀྑཏི-སདྡསྶ དཊྛབྦཱ. རཏྟདུཊྛཱདིཀཱལེསུ ཀཀཎྚཀརཱུཔཾ ཝིཡ, ཨུདྡརཱུཔཾ ཝིཡ ཙ ཝཎྞཝིཀཱརཾ ཨཱཔཛྫམཱནཾ རཱུཔཾ ཧདཡངྒཏབྷཱཝཾ རཱུཔཡཏི རཱུཔམིཝ པཀཱསཾ ཀརོཏི, སཝིགྒཧམིཝ ཀཏྭཱ དསྶེཏཱིཏི ཨཏྠོ. ཝིཏྠཱརཎཾ ཝཱ ¶ རཱུཔསདྡསྶ ཨཏྠོ, ཝིཏྠཱརཎཉྩ པཀཱསནམེཝཱཏི ཨཱཧ ‘‘པཀཱསེཏཱིཏི ཨཏྠོ’’ཏི. ཨནེཀཏྠཏྟཱ ཝཱ དྷཱཏཱུནཾ པཀཱསནཏྠོ ཨེཝ རཱུཔསདྡོ དཊྛབྦོ. ཝཎྞཝཱཙཀསྶ རཱུཔསདྡསྶ རཱུཔཡཏཱིཏི ནིབྦཙནཾ, རཱུཔཀྑནྡྷཝཱཙཀསྶ རུཔྤཏཱིཏི ཨཡཾ ཝིསེསོ. ཨུདཱཧརཱིཡཏཱིཏི ཝུཙྩཏཱིཏི ཨཏྠེ ཝཙནསདྡོ ཨེཝ གཧིཏོ སིཡཱ, ན ཙ ཝཙནསདྡོ ཨེཝེཏྠ སདྡོ, ཨཐ ཁོ སབྦོཔི སོཏཝིཉྙེཡྻོཏི. སཔྤཏཱིཏི སཀེཧི པཙྩཡེཧི སཔྤཱིཡཏི, སོཏཝིཉྙེཡྻབྷཱཝཾ གམཱིཡཏཱིཏི ཨཏྠོ.

སཱུཙཡཏཱིཏི ཨཏྟནོ ཝཏྠུཾ ཨཔཱཀཊཾ གནྡྷཝསེན ‘‘ཨིདཾ སུགནྡྷཾ, དུགྒནྡྷ’’ནྟི པཀཱསེཏི, པཊིཙྪནྣཾ ཝཱ པུཔྥཱདིཝཏྠུཾ ‘‘ཨེཏྠ པུཔྥམཏྠི, ཙམྤཀཱདིཕལམཏྠི, ཨམྦཱདཱི’’ཏི པེསུཉྙཾ ཀརོནྟཾ ཝིཡ ཧོཏཱིཏི ཨཏྠོ. རསགྒཧཎམཱུལཀཏྟཱ ཨཛ྄ཛྷོཧརཎསྶ ཛཱིཝིཏཧེཏུམྷི ཨཱཧཱརརསེ ནིནྣཏཱཡ ཛཱིཝིཏཾ ཨཝ྄ཧཡཏཱིཏི ཛིཝ྄ཧཱ ནིརུཏྟིལཀྑཎེན. ཀུཙྪིཏཱནཾ སཱསཝདྷམྨཱནཾ ཨཱཡོཏི ཝིསེསེན ཀཱཡོ ཝུཏྟོ ཨནུཏྟརིཡཧེཏུབྷཱཝཾ ཨནཱགཙྪནྟེསུ ཀཱམརཱགནིདཱནཀམྨཛནིཏེསུ, ཀཱམརཱགསྶ ཙ ཝིསེསཔཙྩཡེསུ གྷཱནཛིཝ྄ཧཱཀཱཡེསུ ཀཱཡསྶ ཝིསེསཏརསཱསཝཔཙྩཡཏྟཱ. ཏེན ཧི ཕོཊྛབྦསུཁཾ ཨསྶཱདེནྟཱ སཏྟཱ མེཐུནམྤི སེཝནྟི. ཨུཔྤཏྟིདེསོཏི ཨུཔྤཏྟིཊྛཱནནྟི ཨཏྠོ, ཀཱཡིནྡྲིཡཝཏྠུཀཱ ཝཱ ཙཏྟཱརོ ཁནྡྷཱ བལཝཀཱམཱསཝཱདིཧེཏུབྷཱཝཏོ ཝིསེསེན སཱསཝཱཏི ཝུཏྟཱཏི ཏེསཾ ཨུཔྤཏྟིཊྛཱནནྟི ཨཏྠོ.

མུནཱཏཱིཏི ནཱལི༹ཡཱ མིནམཱནོ ཝིཡ, མཧཱཏུལཱཡ དྷཱརཡམཱནོ ཝིཡ ཙ ཨཱརམྨཎཾ ཝིཛཱནཱཏཱིཏི ཨཏྠོ. མནཏེ ཨིཏི ཝཱ མནོ, ཏཾ ཏཾ ཨཱརམྨཎཾ པརིཙྪེདཝསེན ཛཱནཱཏཱིཏི ཝུཏྟཾ ཧོཏི. ཨཏྟནོ ལཀྑཎཾ དྷཱརེནྟཱིཏི ཡེ ཝིསེསལཀྑཎེན ཨཱཡཏནསདྡཔརཱ ཝཏྟབྦཱ, ཏེ ཙཀྑཱདཡོ ཏཐཱ ཝུཏྟཱཏི ཏཏོ ཨཉྙེ མནོགོཙརབྷཱུཏཱ དྷམྨཱ སཱམཉྙལཀྑཎེནེཝ ཨེཀཱཡཏནབྷཱཝཾ ཨུཔནེཏྭཱ ཝུཏྟཱ. ཡཐཱ ཧི ཨོལཱ༹རིཀཝཏྠཱརམྨཎམནནསངྑཱཏེཧི ཝིསཡཝིསཡཱིབྷཱཝེཧི པུརིམཱནི པཱཀཊཱནི, ཏཐཱ ཨཔཱཀཊཱ ཙ ཨཉྙེ མནོགོཙརཱ ན ཨཏྟནོ སབྷཱཝཾ ན དྷཱརེནྟཱིཏི ཨིམསྶ ཨཏྠསྶ དཱིཔནཏྠོ དྷམྨསདྡོ. དྷཱརཱིཡནྟི སཱམཉྙརཱུཔེན ཨཝདྷཱརཱིཡནྟཱིཏི ཝཱ དྷམྨཱ. ཡཐཱ ཧི རཱུཔཱདཡོ ཙཀྑུཝིཉྙཱཎཱདཱིཧི ཨསཱདྷཱརཎཏོ ཨེཝ ཡཐཱསཀཾ ¶ སབྷཱཝཏོ ཝིཉྙཱཡནྟི ¶ , ན ཨེཝམེཏེ, ཨེཏེ པན ཨནེཀདྷམྨབྷཱཝཏོ, སཱདྷཱརཎཏོ, སབྷཱཝསཱམཉྙཏོཔི མནསཱ ཝིཉྙཱཡནྟཱིཏི.

༥༡༡. སེན སེནཱཏི སཀེན སཀེན. ཨུཊྛཧནྟཱིཏི ཨུཊྛཱནཾ ཀརོནྟི. ཝཱཡམནྟཱིཏི ཨུསྶཧནྟི, ཨཏྟནོ ཀིཙྩཾ ཀརོནྟིཙྩེཝ ཨཏྠོ. ཨིམསྨིཾ ཙ ཨཏྠེ ཨཱཡཏནྟི ཨེཏྠཱཏི ཨཱཡཏནཱནཱིཏི ཨདྷིཀརཎཏྠོ ཨཱཡཏནསདྡོ, དུཏིཡཏཏིཡེསུ ཀཏྟུཨཏྠོ. ཏེ ཙཱཏི ཙིཏྟཙེཏསིཀེ དྷམྨེ. ཏེ ཧི ཏཾཏཾདྭཱརཱརམྨཎེསུ ཨཡནྟི གཙྪནྟི པཝཏྟནྟཱིཏི ཨཱཡཱ. ཝིཏྠཱརེནྟཱིཏི པུབྦེ ཨནུཔྤནྣཏྟཱ ལཱིནཱནི ཨཔཱཀཊཱནི པུབྦནྟཏོ ཨུདྡྷཾ པཏྠརེནྟི པཱཀཊཱནི ཀརོནྟི, ཨུཔྤཱདེནྟཱིཏི ཨཏྠོ. ཨིདཉྩ སཾསཱརདུཀྑཾ. ན ནིཝཏྟཏཱིཏི ཨནུཔྤཱདནིརོདྷཝསེན ན ནིརུཛ྄ཛྷཏི. ཨཱཡཏནཾ ཨཱཡཏནནྟི ཨཱམེཌིཏཝཙནཾ ཨསྶཱ སམཉྙཱཡ ཙཀྑཱདཱིསུ ནིརུལ༹ྷབྷཱཝདསྶནཏྠཾ.

༥༡༢. ཨེཝཾ ཨཝཡཝབྷེདཝསེན ཨཱཡཏནསདྡསྶ ཨཏྠཾ ཝཏྭཱ ཨིདཱནི ཏཏྠ པརིཡཱཡཏོཔི དསྶེཏུཾ ‘‘ཨཔིཙཱ’’ཏིཨཱདི ཨཱརདྡྷཾ. སཱདྷུཕལབྷརིཏཏཱཡ, ཨཔརིསྶཡཏཱཡ ཙ མནོརམྨེ.

ཏཏྠ ནིཝསནྟཱིཏི ནིཝསནྟཱ ཝིཡ ཧོནྟི. ཏེནཱཧ ‘‘ཏདཱཡཏྟཝུཏྟིཏཱཡཱ’’ཏི. ཡཏྠ སུཝཎྞརཏནཱདཱིནི ནིཝུཏྠཱནི ཝིཡ ཨཱཀིཎྞཱནི ཏིཊྛནྟི, སོ པདེསོ ཏེསཾ ཨཱཀརོ, ཨེཝཾ ཙིཏྟཙེཏསིཀཱ ཙཀྑཱདཱིསཱུཏི ཏེ ཏེསཾ ཨཱཀརོཏི དསྶེནྟོ ཨཱཧ ‘‘ཙཀྑཱདཱིསུ ཙ…པེ… ཨཱཀརོ’’ཏི. ཏནྣིསྶིཏཏྟཱཏི ཨེཏྠ མནོ མནོཝིཉྙཱཎཱདཱིནཾ ཙིཏྟཙེཏསིཀཱནཾ ནིསྶཡཔཙྩཡོ ན ཧོཏཱིཏི ཏསྶ ཏེསཾ དྭཱརབྷཱཝོ ནིསྶཡབྷཱཝོཏི དཊྛབྦོ. ཨཧུཏྭཱ ཨེཝ པཙྩཡསཱམགྒིཝསེན ཨུཔྤཛྫནྟཱཔི ཙིཏྟཙེཏསིཀཱ ཨནེཀེ ཨེཀཛ྄ཛྷཾ ཏཏྠ ལབྦྷམཱནཱ སམོསཊཱ ཝིཡ ཧོནྟཱིཏི ཝུཏྟཾ ‘‘ཝཏྠུདྭཱརཱརམྨཎཝསེན སམོསརཎཏོ’’ཏི. ན ཧི དྷམྨཱནཾ ཨནཱགཏདྡྷེ ཝིཛྫམཱནཏཱལེསོཔི ཨཏྠི. ཏེནཱཧ ‘‘པུཉྫོ ནཏྠི ཨནཱགཏེ’’ཏི (མཧཱནི. ༡༠). ཏཏྠེཝ ཨུཔྤཏྟིཏོཏི ཏེསུ ཙཀྑཱདཱིསུ ཨེཝ ཨུཔྤཏྟིཏོ. ཨུཔྤཏྟིཡཱ པཙྩཡབྷཱུཏེ ཙཀྑཱདིཀེ ཨུཔྤཏྟིཊྛཱནཾ ཝིཡ ཀཏྭཱ ཨུཔཙཱརཝསེན ཝུཏྟཾ. ན ཧི ཨརཱུཔདྷམྨཱནཾ ནིཔྤརིཡཱཡཏོ ཨུཔྤཏྟིདེསོ ནཱམ ཨཏྠི. ཡདགྒེན ཝཱ ཏེ ¶ ཏེསཾ ནིསྶཡཱརམྨཎབྷཱུཏཱ, ཏདགྒེན སཉྫཱཏིདེསོ. ན ཧི པཙྩཡབྷཱཝམནྟརེན རཱུཔདྷམྨཱནམྤི ཨཱདྷཱརཱདྷེཡྻབྷཱཝོ ཨཏྠི. ཏེནཱཧ ‘‘ནིསྶཡཱརམྨཎབྷཱཝེནཱ’’ཏི. བྱཏིརེཀཔདྷཱནཏཱཡ ཀཱརཎལཀྑཎསྶ ‘‘ཏེསཾ ཨབྷཱཝེ ཨབྷཱཝཏོ’’ ཨིཙྩེཝཱཧ, ན ‘‘བྷཱཝེ བྷཱཝཏོ’’ཏི.

ཡཐཱཝུཏྟེནཏྠེནཱཏི ¶ ‘‘ཙཀྑཏཱི’’ཏིཨཱདིནཱ, ‘‘ཨཱཡཏནཏོ ཨཱཡཱནཾ ཏནནཏོ’’ཏིཨཱདིནཱ, ‘‘ནིཝཱསཊྛཱན’’ནྟིཨཱདིནཱ ཙ ཝུཏྟཔྤཀཱརེན ཨཏྠེན. དྷམྨཱཡཏནཔརིཡཱཔནྣཱནཾ དྷམྨཱནཾ བཧུབྷཱཝཏོ ཡེབྷུཡྻེན ཙ ཏེ བཧཱུ ཨེཝ ཧུཏྭཱ ཀིཙྩཀརཱཏི ‘‘དྷམྨཱ ཙ ཏེ ཨཱཡཏནཉྩཱ’’ཏི བཧུཝཙནནིདྡེསོ.

༥༡༣. ཏཐཱ ཏཐཱ ལཀྑིཏབྦཏོ ལཀྑཱིཡཏི ཨེཏེནཱཏི ཝཱ ལཀྑཎཾ, སབྷཱཝོ.

ཏཱཝབྷཱཝཏོཏི ཏཏྟཀཏོ, ཏེན ཨནཱུནཱདྷིཀབྷཱཝཾ དསྶེཏི. ཏཏྠ དྭཱདསཱཡཏནཝིནིམུཏྟསྶ ཀསྶཙི དྷམྨསྶ ཨབྷཱཝཱ ཨདྷིཀབྷཱཝཏོ ཙོདནཱ ནཏྠི, སལཀྑཎདྷཱརཎཾ པན སབྦེསཾ སཱམཉྙལཀྑཎནྟི ཨཱུནཙོདནཱ སམྦྷཝཏཱིཏི ཏཾ དསྶེནྟོ ཨཱཧ ‘‘ཙཀྑཱདཡོཔི ཧཱི’’ཏིཨཱདི. བྷཝངྒམནསངྑཱཏོཏི དྭིཀྑཏྟུཾ ཙལིཏྭཱ པཝཏྟབྷཝངྒམནསངྑཱཏོ. ཙལནཝསེན བྷཝངྒཔྤཝཏྟིཡཱ སཏི ཨེཝ ཨཱཝཛྫནུཔྤཏྟི, ན ཨཉྙཏྠཱཏི ཨཱཝཛྫནསྶཱཔི ཀཱརཎབྷཱུཏནྟི ཀཏྭཱ ཝུཏྟཾ ‘‘བྷཝངྒམནསངྑཱཏོ…པེ… ཨུཔྤཏྟིདྭཱར’’ནྟི. ཨསཱདྷཱརཎནྟི ཙཀྑུཝིཉྙཱཎཱདཱིནཾ ཨསཱདྷཱརཎཾ. སཏིཔི ཨསཱདྷཱརཎབྷཱཝེ ཙཀྑཱདཱིནཾ དྭཱརབྷཱཝེན གཧིཏཏྟཱ དྷམྨཱཡཏནེན ཨགྒཧཎཾ དཊྛབྦཾ. དྭཱརཱརམྨཎབྷཱཝེཧི ཝཱ ཨསཱདྷཱརཎཏཾ སནྡྷཱཡ ‘‘ཨསཱདྷཱརཎ’’ནྟི ཝུཏྟཾ.

༥༡༤. ཡེབྷུཡྻསཧུཔྤཏྟིཨཱདཱིཧི ཨུཔྤཏྟིཀྐམཱདཱིསུ ཨཡུཏྟི ཡོཛེཏབྦཱ. ཡེབྷུཡྻེན ཧི ཙཀྑཱཡཏནཱདཱིནི ཀསྶཙི ཀདཱཙི ཨེཀཏོ ཨུཔྤཛྫནྟི. ཏཐཱ ཧི ཝུཏྟཾ ‘‘ཀཱམདྷཱཏུཡཱ ཨུཔཔཏྟིཀྑཎེ ཀསྶཙི ཨེཀཱདསཱཡཏནཱནི པཱཏུབྷཝནྟཱི’’ཏིཨཱདི (ཡམ. ཨཊྛ. ཨཱཡཏནཡམཀ ༡༨-༢༡). ཏསྨཱ ཨཱཡཏནཱནཾ ཨུཔྤཏྟིཀྐམོ ཏཱཝ ན ཡུཛྫཏི, ན པཧཱནཀྐམོ ཀུསལཱབྱཱཀཏཱནཾ ཨཔྤཧཱཏབྦཏོ, ན པཊིཔཏྟིཀྐམོ ཨཀུསལཱནཾ ཨེཀཙྩཨབྱཱཀཏཱནཉྩ ཨཔྤཊིཔཛྫནཱིཡཏོ ¶ , ན བྷཱུམིཀྐམོ ཨཌྜྷེཀཱདསནྣཾ ཨཱཡཏནཱནཾ ཨེཀནྟཀཱམཱཝཙརཏྟཱ, ཨིཏརེསཉྩ ཙཏུབྷཱུམིཔརིཡཱཔནྣཏྟཱ, ཨེཀཙྩསྶ ལོཀུཏྟརབྷཱཝཏོ ཙཱཏི. ‘‘ཨཛ྄ཛྷཏྟིཀེསུ ཧཱི’’ཏི ཨེཏེན ཨཛ྄ཛྷཏྟིཀབྷཱཝེན, ཝིསཡཱིབྷཱཝེན ཙ ཨཛ྄ཛྷཏྟིཀཱནཾ པཋམཾ དེསེཏབྦཏཾ དསྶེཏི, ཏེསུཔི པཋམཾ དེསེཏབྦེསུ པཱཀཊཏྟཱ པཋམཏརཾ ཙཀྑཱཡཏནཾ དེསིཏནྟི.

ཏཏོ གྷཱནཱཡཏནཱདཱིནཱིཏི ཨེཏྠ བཧུཔཀཱརཏྟཱབྷཱཝེན ཙཀྑུསོཏེཧི པུརིམཏརཾ ཨདེསེཏབྦཱནི, སཧ ཝཏྟུཾ ཨསཀྐུཎེཡྻཏྟཱ ཨེཀེན ཀམེན དེསེཏབྦཱནཱིཏི གྷཱནཱདིཀྐམེན དེསིཏཱནཱིཏི ཨདྷིཔྤཱཡོ ¶ . ཨཉྙཐཱཔི ཧི དེསིཏེསུ ན ན སཀྐཱ ཙོདེཏུཾ, ན ཙ སཀྐཱ བོདྷེཏབྦཱནི ན དེསེཏུནྟི. པཙྩུཔྤནྣཱརམྨཎཏྟཱ ཝཱ ཙཀྑཱདཱིནི པཋམཾ ཝུཏྟཱནི ཨཱརམྨཎཏོ སུཔཱཀཊཱནཱིཏི, མནཱཡཏནཾ པན ཀིཉྩི པཙྩུནྣཱརམྨཎཾ…པེ… ཀིཉྩི ཡཱཝ ནཝཏྟབྦཱརམྨཎནྟི པཙྪཱ ཝུཏྟཾ. པཙྩུཔྤནྣཱརམྨཎེསུཔི ཨུཔཱདཱརཱུཔཱརམྨཎཱནི ཙཏྟཱརི པཋམཾ ཝུཏྟཱནི, ཏཏོ བྷཱུཏརཱུཔཱརམྨཎཾ. ཨུཔཱདཱརཱུཔཱརམྨཎེསུཔི དཱུརཏརེ དཱུརེ, སཱིགྷཏརཾ སཱིགྷཉྩ ཨཱརམྨཎསམྤཊིཙྪནདཱིཔནཏྠཾ ཙཀྑཱདཱིནཾ དེསནཱཀྐམོ. ཙཀྑུསོཏདྭཡཉྷི དཱུརགོཙརནྟི པཋམཾ ཝུཏྟཾ, ཏཏྲཱཔི ཙཀྑུ དཱུརཏརགོཙརནྟི སབྦཔཋམཾ ཝུཏྟཾ. པསྶནྟོཔི ཧི དཱུརཏརེ ནདཱིསོཏཾ, ན ཏསྶ སོཏཔཊིགྷཱཏསདྡཾ སུཎཱཏི. གྷཱནཛིཝ྄ཧཱསུཔི གྷཱནཾ སཱིགྷཏརཝུཏྟཱིཏི པཋམཾ ཝུཏྟཾ པུརཏོ ཋཔིཏམཏྟསྶཔི བྷོཛནསྶ གནྡྷོ གཡ྄ཧཏཱིཏི. ཡཐཱཋཱནཾ ཝཱ ཏེསཾ དེསནཱཀྐམོ. ཨིམསྨིཉྷི སརཱིརེ སབྦུཔརི ཙཀྑུསྶ ཨདྷིཊྛཱནཾ, ཏསྶ ཨདྷོ སོཏསྶ, ཏསྶ ཨདྷོ གྷཱནསྶ, ཏསྶ ཨདྷོ ཛིཝ྄ཧཱཡ, ཏཐཱ ཀཱཡསྶ ཡེབྷུཡྻཏོ, མནོ པན ཨརཱུཔིབྷཱཝཏོ སབྦཔཙྪཱ ཝུཏྟོ. ཏཾཏཾགོཙརཏྟཱ ཏསྶ ཏསྶ ཨནནྟརཾ བཱཧིརཱཡཏནཱནི ཝུཏྟཱནཱིཏི ཝུཏྟོཝཱཡམཏྠོཏི ཨེཝམྤི ཨིམེསཾ ཀམོ ཝེདིཏབྦོ. གོཙརོ ཝིསཡོ ཨེཏསྶཱཏི གོཙརཝིསཡོ, མནོ. ཀསྶ པན གོཙརོ ཨེཏསྶ ཝིསཡོ? ཙཀྑཱདཱིནཾ པཉྩནྣམྤི. ཝིཉྙཱཎུཔྤཏྟིཀཱརཎཝཝཏྠཱནཏོཏི ཙཀྑུཝིཉྙཱཎཱདཱིནཾ ཨུཔྤཏྟིཀཱརཎསྶ ཝཝཏྠིཏབྷཱཝཏོ སཝིབྷཏྟིབྷཱཝཏོ. ཨེཏེན ཙཀྑཱདིཨནནྟརཾ རཱུཔཱདིཝཙནསྶ ཙ ཀཱརཎམཱཧ.

༥༡༥. སངྒཧིཏཏྟཱཏི གཎནསངྒཧཝསེན སངྒཧིཏཏྟཱ. ཛཱཏིཝསེནཱཏི ཙཀྑུབྷཱཝསམཱནཏཱཝསེན. པཙྩཡབྷེདོ ཀམྨཱདིབྷེདོ. དཱནཱདིཔཱཎཱཏིཔཱཏཱདིབྷེདབྷིནྣསྶ ¶ ཧི ཀུསལཱཀུསལཀམྨསྶ, ཏསྶ ཙ སཧཀཱརཱིཀཱརཎབྷཱུཏཱནཾ ཨབྦྷནྟརཱནཾ, བཱཧིརཱནཉྩ པཙྩཡཱནཾ བྷེདེན ཙཀྑཱཡཏནཾ བྷིནྣཾ ཝིསདིསཾ ཧོཏཱིཏི. ནིརཡཱདིཀོ, ཨཔདཱདིགཏིནཱནཱཀརཎཉྩ གཏིབྷེདོ གཏཱིནཾ, གཏཱིསུ ཝཱ བྷེདོཏི ཀཏྭཱ. ཧཏྠིཨསྶཱདིཀོ, ཁཏྟིཡཱདིཀོ ཙ ནིཀཱཡབྷེདོ. ཏཾཏཾསཏྟསནྟཱནབྷེདོ པུགྒལབྷེདོ. ཡཱ ཙཀྑཱདཱིནཾ ཝཏྠཱུནཾ ཨནནྟཔྤབྷེདཏཱ ཝུཏྟཱ, སོ ཨེཝ ཧདཡཝཏྠུསྶ བྷེདོ ཏཱདིསབྷེདཱནཱཏིཝཏྟནཏོ. ཏཏོ མནཱཡཏནསྶ ཨནནྟཔྤབྷེདཏཱ ཡོཛེཏབྦཱ. ཡསྨཱ ཛྷཱནཝིརཧིཏཾ ནཱམ ལོཀུཏྟརཾ ནཏྠི, ཏསྨཱ པཉྩནྣཾ ཛྷཱནཱནཾ ཝསེན ཨཊྛ ལོཀུཏྟརཙིཏྟཱནི ཙཏྟཱལཱིསཾ ཧོནྟཱིཏི ཏཱནི ཨེཀཱསཱིཏིཡཱ ལོཀིཡཙིཏྟེསུ པཀྑིཔིཏྭཱ ཨཱཧ ‘‘ཨེཀཝཱིསུཏྟརསཏཔྤབྷེདཉྩཱ’’ཏི. ཝཏྠཱུཏི ཙཀྑཱདིཝཏྠུ. ཏཔྤབྷེདེན ཝིཉྙཱཎཾ ཨནནྟཔྤབྷེདཾ. པཊིཔདཱ དུཀྑཱཔཊིཔདཱདི. ཨཱདི-སདྡེན ཛྷཱནཱདྷིཔཏིབྷཱུམིཨཱརམྨཎཱདཱིནཾ སངྒཧོ དཊྛབྦོ. ནཱིལཾ ནཱིལསྶ སབྷཱགཾ, ཨཉྙཾ ཝིསབྷཱགཾ. པཙྩཡོ ཀམྨཱདི. ཏཏྠཱཔི ཀུསལསམུཊྛཱནཱདིཏཱ, སཱིཏཨུཏུསམུཊྛཱནཱདིཏཱ ¶ ཙ བྷེདོ ཝེདིཏབྦོ. ཨཱདིསདྡེན གཏིནིཀཱཡབྷེདོ. སབྷཱཝནཱནཏྟབྷེདཏོཏི སུཁཱ དུཀྑཱ ཨདུཀྑམསུཁཱཏི ཨེཝམཱདིཀོ སབྷཱཝབྷེདོ. ཙཀྑུསམྥསྶཛཱ སོཏསམྥསྶཛཱཏི ཨེཝམཱདིཀཾ ནཱནཏྟཾ.

༥༡༦. ‘‘ཨནཱགམནཏོ ཨནིགྒམནཏོ’’ཏི སངྑེཔེན ཝུཏྟམཏྠཾ ཝིཝརིཏུཾ ‘‘ན ཧཱི’’ཏིཨཱདི ཝུཏྟཾ. པུབྦནྟཱཔརནྟེསུ ཨཝིཛྫམཱནསརཱུཔཏྟཱ ཨུདཡཏོ པུབྦེ ཀུཏོཙི ནཱགཙྪནྟི, ཝཡཏོ ཙ ཨུདྡྷཾ ན ཀཏྠཙི གཙྪནྟི, ཝིཛྫམཱནཀྑཎེཔི ཨིཏྟརཀཱལཏཱཡ ཨནིཙྩཱ དུཀྑཱ ཝིཔརིཎཱམདྷམྨཱ. ཏེནཱཧ ‘‘ཨཐ ཁོ’’ཏིཨཱདི. སཔརིཔྥནྡཀིརིཡཱཝསེན ཨཱིཧནཾ ཨཱིཧཱ, ཙིནྟནཝསེན བྱཱཔཱརནཾ བྱཱཔཱརོ, ཏཏྠ བྱཱཔཱརཾ དསྶེནྟོ ཨཱཧ ‘‘ན ཧི ཙཀྑུརཱུཔཱདཱིནཾ ཨེཝཾ ཧོཏཱི’’ཏི. ཨཱིཧཾ དསྶེནྟོ ‘‘ན ཙ ཏཱནཱི’’ཏིཨཱདི. ཨུབྷཡམྤི པན ཨཱིཧཱ ཙ ཧོཏི བྱཱཔཱརོ ཙཱཏི ཨུཔྤཊིཔཱཊིཝཙནཾ. དྷམྨཏཱཝཱཏི སབྷཱཝོ ཨེཝ, ཀཱརཎསམཏྠཏཱ ཝཱ ཨཱིཧཱབྱཱཔཱརརཧིཏཱནཾ དྭཱརཱདིབྷཱཝོ དྷམྨཏཱ. ཨིམསྨིཉྩ ཨཏྠེ ‘‘ཡ’’ནྟི ཨེཏསྶ ཡསྨཱཏི ཨཏྠོ. པུརིམསྨིཾ སམྦྷཝནཝིསེསནཾ ཡཾ-སདྡོ. ‘‘སུཉྙོ གཱམོཏི ཁོ, བྷིཀྑཝེ, ཚནྣེཏཾ ཨཛ྄ཛྷཏྟིཀཱནཾ ཨཱཡཏནཱནཾ ཨདྷིཝཙན’’ནྟི (སཾ. ནི. ༤.༢༣༨) ཝཙནཏོ སུཉྙགཱམོ ཝིཡ ¶ དཊྛབྦཱནི. ཨནྣཔཱནསཧིཏནྟི གཧིཏེ སུཉྙགཱམེ ཡཾ ཡདེཝ བྷཱཛནཾ པརཱམསཱིཡཏི, ཏཾ ཏཾ རིཏྟཀཾཡེཝ པརཱམསཱིཡཏི, ཨེཝཾ དྷུཝཱདིབྷཱཝེན གཧིཏཱནི ཡོནིསོ ཨུཔཔརིཀྑིཡམཱནཱནི རིཏྟཀཱནེཝ ཨེཏཱནི དིསྶནྟཱིཏི. ཏེནཱཧ ‘‘དྷུཝསུབྷསུཁཏྟབྷཱཝཝིརཧིཏཏྟཱ’’ཏི. ཙཀྑཱདིདྭཱརེསུ ཨབྷིཛ྄ཛྷཱདོམནསྶུཔྤཱདཀབྷཱཝེན རཱུཔཱདཱིནི ཙཀྑཱདཱིནཾ ཨབྷིགྷཱཏཀཱནཱིཏི ཝུཏྟཱནི. ཨཧིསུསུམཱརཔཀྑཱིཀུཀྐུརསིངྒཱལམཀྐཊཱ ཚ པཱཎཀཱ. ཝིསམབིལཱཀཱསགཱམསུསཱནཝནཱནི ཏེསཾ གོཙརཱ. ཏཏྠ ཝིསམཱདིཨཛ྄ཛྷཱསཡེཧི ཙཀྑཱདཱིཧི ཝིསམབྷཱཝབིལཱཀཱསགཱམསུསཱནསནྣིསྶིཏསདིསཱུཔཱདིནྣདྷམྨཝནབྷཱཝེཧི ཨབྷིརམིཏཏྟཱ རཱུཔཱདཱིནཾ ཝིསམཱདིསདིསཏཱ ཡོཛེཏབྦཱ.

ཨིཏི ཨཱཡཏནཱནཾ ཝིཏྠཱརཀཐཱམུཁཝཎྞནཱ.

དྷཱཏུཝིཏྠཱརཀཐཱཝཎྞནཱ

༥༡༧. ཙཀྑུསྶ ཝིཉྙཱཎནྟི ཙཀྑུསྶ ཀཱརཎབྷཱུཏསྶ ཝིཉྙཱཎཾ. ཀཱམཾ རཱུཔཱལོཀམནསིཀཱརཱདཡོཔི ¶ ཏསྶ ཝིཉྙཱཎསྶ ཀཱརཎཱ, ཏེ པན སཱདྷཱརཎཀཱརཎཾ, ཙཀྑུ ཨསཱདྷཱརཎནྟི ཨསཱདྷཱརཎཀཱརཎེནཱཡཾ ནིདྡེསོ ཡཐཱ བྷེརིསདྡོ, ཡཝངྐུརོཏི. ཏཐཱ ཧི ཙཀྑུ པུགྒལནྟརཱསཱདྷཱརཎཾ, ནཱིལཱདིསབྦརཱུཔསཱདྷཱརཎཉྩཱཏི སཱམིབྷཱཝེན ནིདྡིཊྛཾ.

ཝིདཧཏཱིཏི ཨེཝཾ ཨེཝཉྩ ཏཡཱ པཝཏྟིཏབྦནྟི ཝིནིཡུཉྫམཱནཾ ཝིཡ ཨུཔྤཱདེཏཱིཏི ཨཏྠོ. ཝིདཧཏཱིཏི ཙ དྷཱཏྭཏྠོ ཨེཝ ཝིསིཊྛོ ཨུཔསགྒེན དཱིཔཱིཡཏཱིཏི ཝིནཱཔི ཨུཔསགྒེན དྷཱཏཱུཏི ཨེས སདྡོ ཏམཏྠཾ ཝདཏཱིཏི དཊྛབྦོ. ཀཏྟུཀམྨབྷཱཝཀརཎཱདྷིཀརཎེསུ ཙ དྷཱཏུསདྡསིདྡྷི ཧོཏཱིཏི པཉྩཱཔི ཏེ ཨཏྠཱ ཝུཏྟཱ. ལོཀུཏྟརཱ དྷཱཏུཡོ སཾསཱརདུཀྑཾ ན ཝིདཧནྟི, ཨཉྙདཏྠུ ཝིདྷཾསེནྟཱིཏི ཀཏྭཱ ‘‘ལོཀིཡཱ’’ཏི ཝིསེསིཏཾ. ཝཝཏྠིཏཱཏི ཨཝཏྠིཏཱ, ཨཉྙམཉྙཾ ཝཱ ཨསཾཀིཎྞཱ. སུཝཎྞརཛཏཱདིདྷཱཏུཡོ སུཝཎྞཱདཱིནཾ བཱིཛབྷཱུཏཱ སེལཱདཡོ. ཡཐཱསམྦྷཝནྟི ཨེཏྠ ཀེཙི ‘‘ལོཀིཡལོཀུཏྟརཱསུ དྷཱཏཱུསུ ཡོ ཡོ ཨཏྠོ སམྦྷཝཏི, ཏདནུརཱུཔ’’ནྟི ཨཏྠཾ ཝདནྟི, ཏདཡུཏྟཾ ‘‘ལོཀིཡཱ ཧི དྷཱཏུཡོ’’ཏི ཝིསེསེཏྭཱ ཝུཏྟཏྟཱ. ཨཏྠཝསེན ཙེཏཾ ཡཐཱསམྦྷཝགྒཧཎཾ ཀཏཾ, ན དྷཱཏུཝསེན ¶ . ཀཱམཾ པཉྩཔི ཨཏྠཱ ཙཀྑཱདཱིནཾ སབྦེསཾ ཨིཙྪིཏབྦཱ, ཏཐཱཔི ཙཀྑཱདཱིསུ ཡསྶ ཡསྶ དྷམྨསྶ ཡདཱ ཀཏྟུཝཙནིཙྪཱ, ན ཏདཱ ཀམྨབྷཱཝོ. ཡདཱ པན ཀམྨཝཙནིཙྪཱ, ན ཏདཱ ཀཏྟུབྷཱཝོ. ཨེཝཾ སེསེསུཔཱིཏི ཡཐཱསམྦྷཝགྒཧཎཾ. ཏེནཱཧ ‘‘ཨིཏི ཙཀྑཱདཱིསཱུ’’ཏིཨཱདི.

༥༡༨. ཨཏྟནོ སབྷཱཝཾ དྷཱརེནྟཱིཏི དྷཱཏུཡོཏི ཨེཏྠཱཔི དྷཱཏཱིཏི དྷཱཏཱུཏི པདསིདྡྷི ཝེདིཏབྦཱ དྷཱརཎཏྠོ དྷཱ-སདྡོཏི ཀཏྭཱ. ཀཏྟུཨཏྠོཔི ཙཱཡཾ པུརིམེན ཨསདིསོ ཝིདྷཱནདྷཱརཎཏྠཱནཾ བྷིནྣསབྷཱཝཏྟཱ. ནིསྶཏྟསབྷཱཝམཏྟདྷཱརཎཉྩ དྷཱཏུསདྡསྶ པདྷཱནོ ཨཏྠོཏི ཝིསུཾ ཝུཏྟོ. དྷཱཏུཡོ ཝིཡ དྷཱཏུཡོཏི ཨེཏྠ སཱིཧསདྡོ ཝིཡ ཀེསརིམྷི ནིརུལ༹ྷཱ པུརིསེ སེལཱཝཡཝེསུ ནིརུལ༹ྷོ དྷཱཏུསདྡོ ཙཀྑཱདཱིསུ ཨུཔཙརིཏོཏི དཊྛབྦོ. ཉཱཎཉྩ ཉེཡྻཉྩ ཉཱཎཉེཡྻཱནི, ཏེསཾ ཨཝཡཝཱ ཏཔྤབྷེདབྷཱུཏཱ དྷཱཏུཡོ ཉཱཎཉེཡྻཱཝཡཝཱ. ཏཏྠ ཉཱཎཔྤབྷེདོ དྷམྨདྷཱཏུཨེཀདེསོ, ཉེཡྻཔྤབྷེདོ ཨཊྛཱརསཱཔཱིཏི ཉཱཎཉེཡྻཱཝཡཝམཏྟཱ དྷཱཏུཡོ ཧོནྟཱིཏི. ཨཐ ཝཱ ཉཱཎེན ཉཱཏབྦོ སབྷཱཝོ ཨཝིཔརཱིཏོ དྷཱཏུསདྡེན ཝུཙྩམཱནོ ཉཱཎཉེཡྻོ, ན དིཊྛིཨཱདཱིཧི ཝིཔརཱིཏགྒཱཧཀེཧི ཉེཡྻོཏི ཨཏྠོ, ཏསྶ ཉཱཎཉེཡྻསྶ ཨཝཡཝཱ ཙཀྑཱདཡོ, ཝིསབྷཱགལཀྑཎཱཝཡཝེསུ རསཱདཱིསུ ནིརུལ༹ྷོ དྷཱཏུསདྡོ ཏཱདིསེསུ ཨཉྙཱཝཡཝེསུ ཙཀྑཱདཱིསུ ཨུཔཙརིཏོཏི དཊྛབྦོ. རསཱདཱིསུ ཝིཡ ཝཱ ཙཀྑཱདཱིསུཔི ནིརུལ༹ྷོ ཨེཝ. ‘‘ནིཛྫཱིཝམཏྟསྶེཏཾ ཨདྷིཝཙན’’ནྟི ཨེཏེན ནིཛྫཱིཝམཏྟཔདཏྠེ དྷཱཏུསདྡསྶ ནིརུལ༹ྷཏཾ དསྶེཏི. ཚ དྷཱཏུཡོ ཨེཏསྶཱཏི ཚདྷཱཏུརོ. ཡོ ལོཀེ པུརིསོཏི དྷམྨསམུདཱཡོ ¶ ཝུཙྩཏི, སོ ཚདྷཱཏུརོ ཚནྣཾ པཐཝཱིཨཱདཱིནཾ ནིཛྫཱིཝམཏྟཱནཾ སབྷཱཝཱནཾ སམུདཱཡམཏྟོ, ན ཨེཏྠ ཛཱིཝོ ཝཱ པུརིསོ ཝཱ ཨཏྠཱིཏི ཨཏྠོ.

༥༡༩. ཙཀྑཱདཱིནཾ ཀམོ པུབྦེ ཝུཏྟོཏི ཨིདྷེཀེཀསྨིཾ ཏིཀེ ཏིཎྞཾ དྷཱཏཱུནཾ ཀམཾ དསྶེནྟོ ཨཱཧ ‘‘ཧེཏུཕལཱནུཔུབྦཝཝཏྠཱནཝསེནཱ’’ཏི. ཧེཏུཕལཱནཾ ཨནུཔུབྦཝཝཏྠཱནཾ ཧེཏུཕལབྷཱཝོ ཨེཝ, མནོདྷམྨདྷཱཏཱུནཉྩ མནོཝིཉྙཱཎསྶ ཧེཏུབྷཱཝོ ཡཐཱསམྦྷཝཾ ཡོཛེཏབྦོ. ཀིརིཡམནོདྷཱཏུ མནོཝིཉྙཱཎསྶ ཨུཔནིསྶཡཀོཊིཡཱ, ཝིཔཱཀམནོདྷཱཏུ ཝིཔཱཀམནོཝིཉྙཱཎསྶ ཨནནྟརཱདིནཱཔི, ཨིཏརསྶ སབྦཱཔི ཨུཔནིསྶཡཀོཊིཡཱ ¶ ཙ, དྷམྨདྷཱཏུ པན ཝེདནཱདིཀཱ སཧཛཱཏཱ སཧཛཱཏཱདིནཱ, ཨསཧཛཱཏཱ ཨནནྟརཱདིནཱ, ཨུཔནིསྶཡེན, ཨཱརམྨཎཱདིནཱ ཙ མནོཝིཉྙཱཎསྶ པཙྩཡོ ཧོཏཱིཏི དྭཱརབྷཱུཏམནོཝསེན ཝཱ. དྭཱརབྷཱུཏམནོཔི ཧི སུཏྟེསུ མནོདྷཱཏཱུཏི ཝུཙྩཏཱིཏི ཏསྶཱ ཝཱ མནོདྷཱཏུཡཱ མནོཝིཉྙཱཎསྶ ཧེཏུབྷཱཝོ ཡཐཱསམྦྷཝཾ ཡོཛེཏབྦོ. ཏཏྠ ཧེཏཱུཏི པཙྩཡོ ཨདྷིཔྤེཏོ, ཕལནྟི པཙྩཡུཔྤནྣནྟི ཨཱཧ ‘‘ཙཀྑུདྷཱཏཱུ’’ཏིཨཱདི.

༥༢༠. སབྦཱསཾ ཝསེནཱཏི ཡཐཱཝུཏྟཱནཾ ཨཱབྷཱདྷཱཏུཨཱདཱིནཾ པཉྩཏིཾསཱཡ དྷཱཏཱུནཾ ཝསེན. ཨཔརམཏྠསབྷཱཝསྶ པརམཏྠསབྷཱཝེསུ ན ཀདཱཙི ཨནྟོགདྷཏཱ ཨཏྠཱིཏི ཨཱཧ ‘‘སབྷཱཝཏོ ཝིཛྫམཱནཱན’’ནྟི.

ཙནྡཱབྷཱསཱུརིཡཱབྷཱདིཀཱ ཝཎྞནིབྷཱ ཨེཝཱཏི ཨཱཧ ‘‘རཱུཔདྷཱཏུཡེཝ ཧི ཨཱབྷཱདྷཱཏཱུ’’ཏི. རཱུཔཱདིཔཊིབདྡྷཱཏི རཱགཝཏྠུབྷཱཝེན གཧེཏབྦཱཀཱརོ སུབྷནིམིཏྟནྟི ཀཏྭཱ ‘‘རཱུཔཱདཡོ ཨེཝཱ’’ཏི ཨཝཏྭཱ པཊིབདྡྷཝཙནཾ ཝུཏྟཾ. ཨསཏིཔི རཱགཝཏྠུབྷཱཝེ ཀུསལཝིཔཱཀཱརམྨཎཾ སུབྷདྷཱཏཱུཏི དུཏིཡོ ཝིཀཔྤོ ཝུཏྟོ. སེསཱཏི མནོཝིཉྙཱཎདྷཱཏུསམྤཡུཏྟཱ. དྷཱཏུདྭཡནིརོདྷམཏྟནྟི མནོཝིཉྙཱཎདྷཱཏཱུནཾ ནིརོདྷམཏྟཾ ཙཏུཏྠཱརུཔྤཙིཏྟུཔྤཱདནིརོདྷབྷཱཝཏོ. ཏདཉྙཝིཉྙཱཎནིརོདྷོ ཝིཡ ཧི ཝིཉྙཱཎདྷཱཏུམནོདྷཱཏཱུནཾ ནིརོདྷོ སམཱཔཏྟིབལསིདྡྷོཏི ཀཏྭཱ དྷཱཏུདྭཡགྒཧཎཾ.

‘‘དྷམྨདྷཱཏུམཏྟ’’ནྟི ཨིདཾ ཀཱམདྷཱཏུཡཱ དྷམྨདྷཱཏུཔརིཡཱཔནྣཏྟཱ ཝུཏྟཾ. ཀཱམཔཊིསཾཡུཏྟོཏི ཀཱམརཱགསམྤཡུཏྟོ, ཨཱརམྨཎཀརཎེན ཝཱ ཀཱམགུཎོཔསཾཧིཏོ. ཡཾ ཨེཏསྨིཾ ཨནྟརེཏི ཡེ ཨེཏསྨིཾ ཨཝཱིཙིཔརནིམྨིཏཝསཝཏྟིཔརིཙྪིནྣེ ཨོཀཱསེ. ཨོགཱལ༹ྷཱ ཧུཏྭཱ ཨདྷོབྷཱགེ ཙ ཨོཀཱསེ ཙརནྟཱིཏི ཨེཏྠཱཝཙརཱ. ཨཉྙཏྠ ཙརནྟཱཔི ཡཐཱཝུཏྟེ ཨེཝ ཋཱནེ པརིཡཱཔནྣཱཏི ཨེཏྠ པརིཡཱཔནྣཱ.

ནེཀྑམྨདྷཱཏུ ¶ དྷམྨདྷཱཏུ ཨེཝ ཝིཏཀྐཔཀྑེ. སབྦེཔི ཀུསལཱ དྷམྨཱཏི དཱནམཡཔུཉྙཀིརིཡཏོ, སཱིལམཡཔུཉྙཀིརིཡཏོ, པབྦཛྫཏོ ཙ པཊྛཱཡ ཡཱཝ ཨགྒམགྒཱདྷིགམཱ པཝཏྟཱ སབྦེཔི ཨནཝཛྫདྷམྨཱ. ཝིཧིཾསཱདྷཱཏུ ཙེཏནཱ, པརཝིཧེཋནཙྪནྡོ ཝཱ. ཨཝིཧིཾསཱ ཀརུཎཱ.

ཧཱིནཱཏི ¶ ཧཱིལི༹ཏཱ. པཎཱིཏཱཏི སམྦྷཱཝིཏཱ. ‘‘ནཱཏིཧཱིལི༹ཏཱ ནཱཏིསམྦྷཱཝིཏཱ མཛ྄ཛྷིམཱ’’ཏི ཁནྡྷནིདྡེསེ ཨཱགཏཱ ཧཱིནདུཀཏོ ཨེཝ ནཱིཧརིཏྭཱ མཛ྄ཛྷིམཱ དྷཱཏུ ཝུཏྟཱཏི ཝེདིཏབྦཱ. ཨུབྷོཔཱིཏི དྷམྨདྷཱཏུམནོཝིཉྙཱཎདྷཱཏུཡོ.

ཝིཉྙཱཎདྷཱཏུ ཡདིཔི ཚཝིཉྙཱཎདྷཱཏུཝསེན ཝིབྷཏྟཱ, ཏཐཱཔི ཝིཉྙཱཎདྷཱཏུགྒཧཎེན ཏསྶ པུརེཙཱརིཀཔཙྪཱཙཱརིཀཏྟཱ མནོདྷཱཏུ གཧིཏཱཝ ཧོཏཱིཏི ཨཱཧ ‘‘ཝིཉྙཱཎདྷཱཏུ ཙཀྑུཝིཉྙཱཎཱདིསཏྟཝིཉྙཱཎདྷཱཏུ སངྑེཔོཡེཝཱ’’ཏི. ཨནེཀེསཾ ཙཀྑུདྷཱཏུཨཱདཱིནཾ, ཏཱསུ ཙ ཨེཀེཀིསྶཱ ནཱནཔྤཀཱརཏཱཡ ནཱནཱདྷཱཏཱུནཾ ཝསེན ཨནེཀདྷཱཏུ ནཱནཱདྷཱཏུ ལོཀོ ཝུཏྟོཏི ཨཱཧ ‘‘ཨཊྛཱརསདྷཱཏུཔྤབྷེདམཏྟམེཝཱ’’ཏི.

༥༢༡. ཙཀྑུསོཏགྷཱནཛིཝ྄ཧཱཀཱཡམནོདྷཱཏུམནོཝིཉྙཱཎདྷཱཏུབྷེདེནཱཏི བཧཱུསུ པོཏྠཀེསུ ལིཁིཏཾ, ཀེསུཙི ‘‘ཙཀྑུསོཏགྷཱནཛིཝ྄ཧཱཀཱཡམནོམནོཝིཉྙཱཎདྷཱཏུབྷེདེནཱ’’ཏི. ཏཏྠ ན ཙཀྑཱདཱིནཾ ཀེཝལེན དྷཱཏུསདྡེན སམྦནྡྷོ ཨདྷིཔྤེཏོ ཝིཛཱནནསབྷཱཝསྶ པབྷེདཝཙནཏོ. ཝིཉྙཱཎདྷཱཏུསདྡེན ཙ སམྦནྡྷེ ཀརིཡམཱནེ དྭེ མནོགཧཎཱནི ན ཀཱཏབྦཱནི. ན ཧི དྭེ མནོཝིཉྙཱཎདྷཱཏུཡོ སནྟི. ཨནྟརཱ ཝཱ མནོདྷཱཏུགཧཎཾ ཨཀཏྭཱ ‘‘ཙཀྑུ…པེ… ཀཱཡམནོཝིཉྙཱཎདྷཱཏུམནོདྷཱཏཱུ’’ཏི ཝཏྟབྦཾ ཨཏུལྱཡོགེ དྭནྡསམཱསཱབྷཱཝཏོ. ཨཡཾ པནེཏྠ པཱཋོ སིཡཱ ‘‘ཙཀྑུ…པེ… ཀཱཡཝིཉྙཱཎམནོམནོཝིཉྙཱཎདྷཱཏུབྷེདེནཱ’’ཏི. ཏསྶ ཝིཉྙཱཎསྶ ཡེབྷུཡྻེན ཨཏྟཝཱདིནོ ཏསྶ ཨེཀམེཀསྶ ཨཏྟསྶ ཨདྭཡཏཾ, ནིཙྩཏྟཉྩ པཝེདེནྟཱིཏི ཨནེཀཏཱནིཙྩཏཱཔཀཱསནཾ ཏེསཾ ཛཱིཝསཉྙཱསམཱུཧནནཱཡ ཧོཏི. ཁནྡྷཱཡཏནདེསནཱ སངྑེཔདེསནཱ, ཨིནྡྲིཡདེསནཱ ཝིཏྠཱརདེསནཱ, ཏདུབྷཡཾ ཨཔེཀྑིཏྭཱ ཨཡཾ ཨནཏིསངྑེཔཝིཏྠཱརཱ དྷཱཏུདེསནཱ. ཨབྷིདྷམྨེ ཝཱ སུཏྟནྟབྷཱཛནཱིཡེ (ཝིབྷ. ༡༧༢ ཨཱདཡོ) ཝུཏྟཱ དྷཱཏུདེསནཱ ཨཏིསངྑེཔདེསནཱ, ཨཱབྷཱདྷཱཏུཨཱདཱིནཾ ཨནེཀདྷཱཏུནཱནཱདྷཱཏུཨནྟཱནཾ ཝསེན དེསེཏབྦཱ ཨཏིཝིཏྠཱརདེསནཱ, ཏདུབྷཡཾ ཨཔེཀྑིཏྭཱ ཨཡཾ ཨནཏིསངྑེཔཝིཏྠཱརཱ.

ཨསྶ ¶ བྷགཝཏོ. སདྡྷམྨཏེཛསཱ ཝིཧཏཾ སདྡྷམྨཏེཛཝིཧཏཾ.

༥༢༢. སངྑཏོཏི ¶ གཎནཏོ. ཛཱཏིཏོཏི ཙཀྑུབྷཱཝསཱམཉྙཏོ. ཨཐ ཝཱ ཛཱཏིཏོཏི ཙཀྑུསབྷཱཝཏོ. ཏེནཱཧ ‘‘ཙཀྑུཔསཱདོ’’ཏི. ཝཱིསཏི དྷམྨཱཏི སངྑཾ གཙྪཏི ཝེདནཱདཱིནཾ ཨབྷིནྡིཏྭཱ གཧཎཏོ. སེསཀུསལཱཀུསལཱབྱཱཀཏཝིཉྙཱཎཝསེནཱཏི ཨེཏྠ ཨབྱཱཀཏཱཔེཀྑཱཡ སེསགྒཧཎཾ, ཀུསལཱཀུསལཾ པན སབྦསོ ཨགྒཧིཏམེཝཱཏི.

༥༢༣. ཏཱ ཙ ཙཀྑུཝིཉྙཱཎདྷཱཏུཨཱདཡོ པཉྩཔི.

པུརིམེཧེཝཱཏི ཨནནྟརཱདཱིཧི ཨེཝ. ཛཝནམནོཝིཉྙཱཎདྷཱཏུ པན ཛཝནམནོཝིཉྙཱཎདྷཱཏུཡཱ ཨཱསེཝནཔཙྩཡེནཱཔི པཙྩཡོ ཧོཏཱིཏི ཝུཏྟོཝཱཡམཏྠོ. དྷམྨདྷཱཏཱུཏི པན སཧཛཱཏོ ཝེདནཱདིཀྑནྡྷོ ཨདྷིཔྤེཏོ. ཏེནཱཧ ‘‘སཧཛཱཏ…པེ… པཙྩཡོ ཧོཏཱི’’ཏི. ཨཝིགཏཱདཱིཧཱིཏི ཨེཏྠ ཨཱདི-སདྡེན མནོཝིཉྙཱཎདྷཱཏུཡཱ ཡཐཱརཧཾ ཧེཏུཨདྷིཔཏིཀམྨཝིཔཱཀཱཧཱརིནྡྲིཡཛྷཱནམགྒཔཙྩཡབྷཱཝོ སངྒཡ྄ཧཏི. ཏེནཱཧ ‘‘བཧུདྷཱ པཙྩཡོ ཧོཏཱི’’ཏི. ཨེཀཙྩཱ ཙ དྷམྨདྷཱཏུ སུཁུམརཱུཔནིབྦཱནཔྤཀཱརཱ, ཡཱ ཙ སམྤཡོགཱནནྟརབྷཱཝཱདཱིནཾ ཨབྷཱཝེན ཨཱརམྨཎཀརཎེ ཡོགྱཱ. པཉྩདྭཱརིཀཝིཔཱཀཝཛྫནཏྠཾ ‘‘ཨེཀཙྩཱཡ མནོཝིཉྙཱཎདྷཱཏུཡཱ’’ཏི ཝུཏྟཾ, མནོདྭཱརིཀཱ པན ཝིཔཱཀཱཔི ཏདཱརམྨཎབྷཱུཏཱ ཨེཀཙྩཾ དྷམྨདྷཱཏུཾ ཨཱརབྦྷ པཝཏྟཏཱིཏི. ཨཐ ཝཱ ‘‘ཨེཀཙྩཱཡ མནོཝིཉྙཱཎདྷཱཏུཡཱ’’ཏི ཨིདཾ སབྦཾ ཀཱམཱཝཙརཀུསལཾ ཀཱམཱཝཙརཀིརིཡཾ ཨབྷིཉྙཱདྭཡཾ ཨཱརུཔྤདྭཡནྟི ཨེཝརཱུཔཾ མནོཝིཉྙཱཎདྷཱཏུཾ སནྡྷཱཡ ཝུཏྟཾ, ལོཀུཏྟརམནོཝིཉྙཱཎདྷཱཏུཡཱ པན ཨེཀཙྩཱ དྷམྨདྷཱཏུ ཨཱརམྨཎཔཙྩཡོཏི པཱཀཊོཡམཏྠོ. ཙཀྑུཝིཉྙཱཎདྷཱཏུཨཱདཱིནཾ ཙཀྑཱདཱིནཾ ཡཐཱཝུཏྟཔཙྩཡདྷམྨཏོ ཨཏིརེཀེཔི པཙྩཡདྷམྨེ དསྶེཏུཾ ‘‘ན ཀེཝལ’’ནྟིཨཱདི ཨཱརདྡྷཾ. ཏཏྠ ཨཱལོཀཱདཡོཏི ཨཱལོཀོ ནཱམ སཱུརིཡཱལོཀཱདི. ཏསྶ སུཏྟནྟནཡེན ཨུཔནིསྶཡབྷཱཝོ ཝེདིཏབྦོ, ཨེཝཾ སེསཱནིཔི.

ཝིཝརཾ ནཱམ ཝིསེསཏོ སོཏབིལཾ. ཝཱཡུ གནྡྷཱུཔསཾཧརཎཀཝཱཏོ. ཨཱཔོ མུཁེ པཀྑིཏྟཨཱཧཱརསྶ ཏེམནཀཨུདཀཾ. པཐཝཱི ཀཱཡཔྤསཱདསྶ ནིསྶཡབྷཱུཏཱ པཐཝཱིདྷཱཏུ. བྷཝངྒམནཾ དྭིཀྑཏྟུཾ ཙལིཏཾ བྷཝངྒཙིཏྟཾ. སབྦཏྠ མནསིཀཱརོ ཨཱཝཛྫནམནསིཀཱརོ.

༥༢༤. ཨཝིསེསཏོ ¶ ¶ དཊྛབྦཱཀཱརསྶ ཝུཙྩམཱནཏྟཱ ཨཱཧ ‘‘སབྦཱ ཨེཝཱ’’ཏི. ཝིསེསཏོ ཝིཔསྶནཱཡ བྷཱུམིཝིཙཱརོ ཨེསོཏི ‘‘སངྑཏཱ’’ཏི ཝིསེསིཏཾ. པུབྦནྟཱཔརནྟཝིཝིཏྟཏོཏི ཨེཏྠ ‘‘པུབྦནྟོནཱམ ཨཏཱིཏོ ཨདྡྷཱ, ཨཔརནྟོ ནཱམ ཨནཱགཏོ. ཨུབྷཡཏྠ ཙ སངྑཏཱ དྷཱཏུཡོ སབྷཱཝཝིཝིཏྟཱ ཨནུཔལབྦྷམཱནསབྷཱཝཏྟཱ. པུབྦནྟོ ཝཱ སབྷཱཝདྷམྨསྶ ཨུདཡོ ཏཏོ པུབྦེ ཨཝིཛྫམཱནཏྟཱ. ཨཔརནྟོ ཝཡོ ཏཏོ པརཾ ཨབྷཱཝཏོ. ཏསྨཱ པུབྦནྟཱཔརནྟཝིཝིཏྟཏོཏི པཱཀཱབྷཱཝཏོ ཝིདྡྷཾསཱབྷཱཝཏོཏི ཝུཏྟཾ ཧོཏི.

བྷེརིཏལཾ ཝིཡ ཙཀྑུདཱཏུ སདྡསྶ ཝིཡ ཝིཉྙཱཎསྶ ནིསྶཡབྷཱཝཏོ. ཨཱདཱསཏལཱདཱིསུཔི ཨེསེཝ ནཡོ. ཡནྟཾ ནཱམ ཨུཙྪུཡནྟཾ. ཙཀྐཡཊྛཱིཏི ཏིལམནྠཾ ཨཱཧ. སོ ཧི ཨཙཀྐབནྡྷོཔི ཏཾསདིསཏཱཡ ཙཀྐཡཊྛཱིཏྭེཝ ཝུཙྩཏི, ཙཀྐབནྡྷམེཝ ཝཱ སནྡྷཱཡ ཏཐཱ ཝུཏྟཾ. ཨིམཱཧི ཙ ཨུཔམཱཧི ནིཛྫཱིཝཱན. བྷེརིཏལདཎྜཱདཱིནཾ སམཱཡོགེ, ནིཛྫཱིཝཱནཾ སདྡཱདཱིནཾ ཝིཡ ནིཛྫཱིཝཱནཾ ཙཀྑུརཱུཔཱདཱིནཾ སམཱཡོགེ ནིཛྫཱིཝཱནཾ ཙཀྑུཝིཉྙཱཎཱདཱིནཾ པཝཏྟཱིཏི ཀཱརཎཕལཱནཾ དྷཱཏུམཏྟཏཾ, ཀཱརཀཝེདཀཝིརཧཉྩ དསྶེཏི.

པུརེཙརཱནུཙརཱ ཝིཡཱཏི ནིཛྫཱིཝསྶ ཀསྶཙི ཀེཙི ནིཛྫཱིཝཱ པུརེཙརཱནུཙརཱ ཝིཡཱཏི ཨཏྠོ. མནོདྷཱཏུཡེཝ ཝཱ ཨཏྟནོ ཁཎཾ ཨནཏིཝཏྟནྟཱི ཨཏྟནོ ཁཎ ཨནཏིཝཏྟནྟཱནཾཡེཝ ཙཀྑུཝིཉྙཱཎཱདཱིནཾ ཨཝིཛྫམཱནཱཡཔི པུརེཙརཱནུཙརཱབྷིསནྡྷིཡཾ ཨནནྟརཔུབྦཀཱལཱཔརཀཱལཏཱཡ པུརེཙརཱནུཙརཱ ཝིཡ དཊྛབྦཱ.

ཚནྣཉྷི ཝིཉྙཱཎདྷཱཏཱུནཾ ཨེཀཛ྄ཛྷཾ ཨནེཀཱནནྟརཔཙྩཡཱབྷཱཝཏོ ཨེཀཛ྄ཛྷཾ ཨུཔྤཏྟིཨབྷཱཝོ ཝིཡ ཨཉྙམཉྙཱནནྟརཔཙྩཡཏཱབྷཱཝཏོ ཨནནྟརུཔྤཏྟིཔི ནཏྠི. ཡདི སིཡཱ, ཚལཱ༹རམྨཎསནྣིདྷཱནེ མནསིཀཱརམནྟརེནཱཔི ཚལཱ༹རམྨཎཱུཔལདྡྷི སིཡཱ, ན ཙ ཧོཏི, ཏསྨཱ དསྶནཱདིཨནནྟརཾ སཝནཱདཱིནཾ ཨབྷཱཝོ ཝིཡ མནོཝིཉྙཱཎདྷཱཏཱནནྟརཾ ན དསྶནཱདཱིནི, ན ཙ དསྶནཱདིཨནནྟརཾ མནོཝིཉྙཱཎདྷཱཏུ ཧོཏི. ཏཏྠ བྷཝངྒསྶ, དསྶནཱདཱིནཉྩ བྷིནྣཱརམྨཎཏཱཡ མནོཝིཉྙཱཎདྷཱཏཱནནྟརཾ དསྶནཱདཱིནི, དསྶནཱདཱིནཾ ཨནནྟརཉྩ སཝནཱདཱིནི ན ཨུཔྤཛྫནྟཱིཏི ཡུཏྟམེཏཾ. དསྶནཱདཱིནཾ, པན སནྟཱིརམཎསྶ ཙ ཨབྷིནྣཝིསཡཏཱཡ དསྶནཱདིཨནནྟརཾ ན མནཱཝིཉྙཱཎདཱཏུ ཧོཏཱིཏི ཨཡུཏྟནྟི ¶ ? ནཡིདམེཝཾ ནིཡཏཱནིཡཏཝིསཡཱནཾ བྷིནྣཝིསཡབྷཱཝུཔཔཏྟིཏོ. ཡདི ཙ དསྶནཱདིཨནནྟརཾ ཀཱཙི ཝིཉྙཱཎདྷཱཏུ ཨུཔྤཛྫེཡྻ, སཱཔི དསྶནཱདིདྭཱརཏཱཡ ¶ དསྶནཱདིཝིཉྙཱཎདྷཱཏུ ཨེཝ སིཡཱ, ན མནོཝིཉྙཱཎདྷཱཏུ, ཏཏོ ཙ དསྶནཱདིཀིཙྩཝིདྷུརཾ ཙིནྟནཾ མནནནྟི མནོདྭཱརཔྤཝཏྟཱནཾ མནནཀིཙྩཱཔརིཙྩཱགོ ཝིཡ དསྶནཝིཉྙཱཎདྷཱཏུཡཱ དསྶནཀིཙྩཱཔརིཙྩཱགོ ཨཱཔཛྫཏི. ཏཐཱ ཏདནནྟརསྶཱཏི སབྦཱཡཔི དསྶནཝིཉྙཱཎབྷཱཝཏོ ཙ ཝིཉྙཱཎཀཱཡཱ ན བྷཝེཡྻུཾ.

ཡཐཱ པན མནོཝིཉྙཱཎདྷཱཏཱནནྟརཾ མནོདྷཱཏུ, ཏཏོ ཙཀྑུཝིཉྙཱཎཱདཱིནི, ཨེཝཾ དསྶནཝིཉྙཱཎདྷཱཏཱནནྟརཾ མནོདྷཱཏུ, ཏཏོ སོཏཝིཉྙཱཎཱདཱིནི ཧོནྟཱིཏི ཙེ? ན, མནོདྷཱཏུཡཱ དསྶནདྷཱཏུབྷཱཝཔྤསངྒཏོ. ཡཐཱ ཧི མནསོ ནིབྦིསེསཱཝཏྠཱ མནནམཏྟཏཱཡ མནོདྷཱཏུ, ཨེཝཾ དསྶནསྶ ནིབྦིསེསཱཝཏྠཱ དསྶནམཏྟཏཱཡ དསྶནདྷཱཏུ སིཡཱ. ཏཉྩ ཙཀྑཱུཝིཉྙཱཎཾ རཱུཔཝིསཡནྟི སདྡཱདིཝིསཡཱབྷོགཱབྷཱཝཏོ སཝནཝིཉྙཱཎཱདཱིནཾ ཨསམྦྷཝོ. ཏཏོ ཙ རཱུཔཱརམྨཎཔསུཏམེཝ ཝིཉྙཱཎཾ སིཡཱ མནོཝིཉྙཱཎཱནཾ ཝིཡ དསྶནཝིཉྙཱཎཱདཱིནཾ སམཱནཝཏྠུབྷཱཝཔྤསངྒཏོ, ཨཉྙཝཏྠུསནྣིསྶིཏཉྩ ཝིཉྙཱཎཾ ན སིཡཱ, ན ཙེཏཾ ཡུཏྟཾ. ཏསྨཱ སུཁདུཀྑཱནཾ ཝིཡ ཨུཔེཀྑཱ ཙཀྑུཝིཉྙཱཎཱདཱིནཾ, མནོཝིཉྙཱཎསྶ ཙ བྱཝདྷཱཡིཀཱ མནོདྷཱཏུ དཊྛབྦཱ, ན ཙསྶཱ ཨུཔེཀྑཱཡ ཝིཡ ཨདུཀྑམསུཁཏཱ ཨདསྶནཱདིཨམནནཏཱ, ཨཏ ཁོ མནནཀིཙྩཱཝིསེསཏོ མནོཝིཉྙཱཎསབྷཱགཏཱ. མནོ ཧི ཧདཡཝཏྠུམྷི ཝཏྟམཱནོ ཨཉྙཝཏྠུསནྣིསྶིཏཱནཾ ཝིཉྙཱཎཱནཾ ཝིསཡཾ དསྶེཏྭཱ ནིཝཏྟམཱནོ ཨགྒི ཝིཡ ཨུསུམམཏྟེ མནནམཏྟེ ཋཏྭཱ ནིཝཏྟཏི, ཨཉྙཝཏྠུསནྣིསྶིཏཝིཉྙཱཎནིརོདྷེ ཙ ཨུཊྛཧནྟོ ཨགྒི ཝིཡ ཨུསུམམཏྟེ ཨུཊྛཧཏི. པཙྩཡཱནུརཱུཔཔཝཏྟིཀཱནི ཙ མནནམཏྟཱནི མནོཝིཉྙཱཎདྷཱཏུཡཱ ཨནྟཱནི ཧོནྟི. པཊིགྷསཉྙཱསཧགཏཱནཉྷི པཉྩནྣཾ ཝིཉྙཱཎཱནཾ ཨིནྡྲིཡཱརམྨནཔཊིགྷཱཏཛཏཱཡ ཨབྷིནིཔཱཏམཏྟཀིཙྩཾ, མནནལཀྑཎིནྡྲིཡསམུཔྤནྣསྶ ཙ མནོཝིཉྙཱཎསྶ ཝིསཡཝིཙིནྟནཱསམྦྷཱུཏཏཱཡ ཏདནུརཱུཔཱཙིནྟནཱ. ཏསྨཱ ཨབྷིནིཔཱཏཔྤཙྩཡཔཊིགྷཊྚནཱནིགྷཾསབལེན བྷཝངྒལཀྑཎཾ ཙིཏྟཾ ཙལནཱཝཏྠཾ ཧུཏྭཱ ནིཝཏྟམཱནཾ ཙིནྟནཱཝིསེསཝིརཧཏོ ཨབྷིནིཔཱཏཱནུགུཎཾ ཙིནྟནཱཝསཱནཾ མནནམཏྟཾ ཨུཔྤཱདེཏི.

དསྶནཱདིཔི ¶ ཨབྷིནིཔཱཏམཏྟཾ དུཏིཡཾ ཁཎཾ ཨནཏིཝཏྟམཱནཾ ཨཏྟཱནུགུཎཾ ཙིནྟནཱམནནསམཉྙཱཝིརཧཏོ དསྶནཱདིཨབྷིནིཔཱཏཝིསེསཝིཙིཏྟཾ ཙིཏྟབྷཱཝཱདིནཱ སམཱནཾ ཙིནྟནཱདིམནནམཏྟཾ ཨཉྙཝཏྠུསྨིཾ ནིབྦཏྟེཏི, ཏསྨཱ ཝཏྠུཀིཙྩེཧི ཏཾ མནོཝིཉྙཱཎཀཱཡསངྒཧིཏཱཔི མནོདྷཱཏུ མནོདྭཱརནིཀྑམཔཝེསབྷཱུཏཱ ཨཱརམྨཎནྟརེ དྭཱརནྟརམནསིཀཱརཏབྦིསཡསམྤཊིཙྪནབྷཱཝེན ¶ པཉྩནྣཾ ཝིཉྙཱཎདྷཱཏཱུནཾ ཡཐཱཀྐམཾ པུརེཙརཱ, ཨནུཙརཱཏི ཙ ཝུཏྟཱ. སཱ པནཱཡཾ སཏིཔི ཝིཉྙཱཎབྷཱཝེ མནསོ སམྦྷཱུཡ ཝིསིཊྛམནནཀིཙྩཱབྷཱཝཏོ དྷཱཏུབྷཱཝསཱམཉྙེན མནོམཏྟཱ དྷཱཏུ མནོདྷཱཏཱུཏི ཝུཙྩཏི.

ཡཐཱཝུཏྟེནེཝ ཙ ཧེཏུནཱ མཏྟ-སདྡལོཔཾ ཀཏྭཱ ཝིཉྙཱཎཊྛཡོགཏོ མནོམཏྟཾ ཝིཉྙཱཎནྟི མནོཝིཉྙཱཎཀཱཡསངྒཧོཔི ཙསྶཱ ཡུཛྫཏི ཨེཝ. ཨཉྙཝིཉྙཱཎེཧི པན དྭཱརཱརམྨཎེཧི ཙ ཝིསེསནཏྠཾ ‘‘མནོདྷཱཏཱུ’’ཏི ཝུཏྟཱཏི. མནོཝིཉྙཱཎདྷཱཏཱུཏི པན ཝིཉྙཱཎདྷཱཏུཝིསེསནཾ མནོགཧཎཾ. དྷཱཏུཝིསེསནཏྠེ ཙ མནོཝིཉྙཱཎགྒཧཎེ ཝིཉྙཱཎཝིསེསནཾ དྭཱརབྷཱུཏམནོདསྶནམེཝཱཏི དྭཱརསམཉྙཱརཧཏྟཱ ན མནོདྷཱཏཱུཏི ཝུཙྩཏི. ཏཉྷི མནོདྭཱརནྟོགདྷཾ, ན ཙ དསྶནཱདིཔུརེཙརཱནུཙརནྟི མནསོ ཝིཉྙཱཎདྷཱཏུ, མནསོ ཝིཉྙཱཎནྟི ཙ མནོདྭཱརསམཉྙཱརཧཾ, སཝིསེསཉྩ ཏསྶ མནནཀིཙྩཾ, ཝིཉྙཱཎཀིཙྩཉྩཱཏི མཏྟསདྡསྶ ལོཔམནྟརེན ‘‘མནོཝིཉྙཱཎ’’ནྟི, ནིཛྫཱིཝབྷཱཝཝིབྷཱཝནཏྠཾ ‘‘མནོཝིཉྙཱཎདྷཱཏཱུ’’ཏི ཙ ཝུཙྩཏཱིཏི.

སལླམིཝ སཱུལམིཝ ཏིཝིདྷདུཀྑཏཱསམཱཡོགཏོ དཊྛབྦོ. ཝེདནཱསལླསཱུལཡོགཱཏི ཝེདནཱསངྑཱཏསལླསཱུལཡོགཏོ. ཨཱཏུརཱ ཝིཡཱཏི ཏེན ཨཱཏུརིབྷཱུཏཱ པུགྒལཱ ཝིཡ. ཨཱསཱཡེཝ དུཀྑཾ ཨཱསཱདུཀྑཾ, ཨཱསཱཝིགྷཱཏཾ དུཀྑཾ ཝཱ. སཉྙཱ ཧི ཨསུབྷཱདིཀམྤི སུབྷཱདིཏོ སཛྫཱནནྟཱི ཨཱསཾ, ཏསྶཱ ཙ ཝིགྷཱཏཾ ཨཱསཱིསིཏསུབྷཱདིཨསིདྡྷིཡཱ ཛནེཏཱིཏི. ཝནམིགོ ཏིཎཔུརིསཾ པུརིསོཏི གཎྷནྟོ ཨཡཐཱབྷཱུཙྩནིམིཏྟགྒཱཧཀོ, ཏཐཱ སཉྙཱཔཱིཏི ཨཱཧ ‘‘ཝནམིགོ ཝིཡཱ’’ཏི. ཀམྨཔདྷཱནཱ སངྑཱརཱཏི ‘‘པཊིསནྡྷིཡཾ པཀྑིཔནཏོ’’ཏིཨཱདི ཝུཏྟཾ. ཛཱཏིདུཀྑཱནུབནྡྷཏོཏི ཨཏྟནཱ ནིབྦཏྟིཡམཱནེན ཛཱཏིདུཀྑེན ཨནུབནྡྷཏཱ. བྷཝཔཙྩཡཱ ཛཱཏི ཧི ཛཱཏིདུཀྑནྟི. པདུམཾ ཝིཡ དིསྶམཱནཾ ཁུརཙཀྐཾ ཝིཡ རཱུཔམྤི ¶ ཨིཏྠིཨཱདིབྷཱཝེན དིསྶམཱནཾ ནཱནཱཝིདྷུཔདྡཝཾ ཛནེཏི. སབྦེ ཨནཏྠཱ རཱགཱདཡོ, ཛཱཏིཨཱདཡོ ཙ ཝིསཡབྷཱུཏཱ, ཨནུཔསནྟཱ, སཔྤཊིབྷཡཱ ཙཱཏི. ཏཔྤཊིཔཀྑབྷཱུཏཏྟཱ ཨསངྑཏཱ དྷཱཏུ ཨམཏཱདིཏོ དཊྛབྦཱ.

ཝཝཏྠཱནཱབྷཱཝོ ‘‘ཨིདམེཝ ཨིམསྶ ཨཱརམྨཎ’’ནྟི ནིཡམཱབྷཱཝོ, ཏེན ཡཐཱ ཨརཉྙམཀྐཊོ ཀེནཙི ཨནིཝཱརིཏོ གཧིཏཾ ཨེཀཾ རུཀྑསཱཁཾ མུཉྩིཏྭཱ ཨཉྙཾ གཎྷཱཏི, ཏམྤི མུཉྩིཏྭཱ ཨཉྙནྟི ཀཏྠཙི ཨནཝཊྛིཏོ པརིབྦྷམཏི, ཨེཝཾ གཧིཏཾ ཨེཀཾ ཨཱརམྨཎཾ མུཉྩིཏྭཱ ཨཉྙཾ, ཏམྤི མུཉྩིཏྭཱ ཨཉྙནྟི ཨནཝཊྛིཏཏཱ, ཨཱརམྨཎཾ ཨགྒཧེཏྭཱ པཝཏྟིཏུཾ ཨསམཏྠཏཱ ཙ མཀྐཊསམཱནཏཱཏི ¶ དསྶེཏི. ཨཊྛིཝེདྷཝིདྡྷོཔི ཨུཔྤཐཾ ཨནུགཙྪནྟོ དུཊྛསྶོ ཨསྶཁལུ༹ངྐོ. ཡཏྠཀཱམནིཔཱཏིཏོཏི ཡཏྠ ཀཏྠཙི ཨིཙྪིཏཱརམྨཎེ ནིཔཱཏིབྷཱཝཏོ. ནཱནཱཝེསདྷཱརཱི རངྒནཊོ.

ཨཱཡཏནདཱཏུནིདྡེསཝཎྞནཱ ནིཊྛིཏཱ.

ཨིཏི པནྣརསམཔརིཙྪེདཝཎྞནཱ.

༡༦. ཨིནྡྲིཡསཙྩནིདྡེསཝཎྞནཱ

ཨིནྡྲིཡཝིཏྠཱརཀཐཱཝཎྞནཱ

༥༢༥. བཱཝཱིསཏཱིཏི ¶ ¶ གཎནཔརིཙྪེདོ. ཨིནྡྲིཡཱནཱིཏི པརིཙྪིནྣདྷམྨནིདསྶནཾ. ཙཀྑུནྡྲིཡནྟིཨཱདི ཏེསཾ སརཱུཔདསྶནཾ. ཏཏྠ ཙཀྑུདྭཱརེ ཨིནྡཊྛཾ ཀཱརེཏི ཙཀྑུདྭཱརབྷཱཝེ ཏཾདྭཱརིཀེཧི ཨཏྟནོ ཨིནྡབྷཱཝཾ པརམིསྶརབྷཱཝཾ ཀཱརཡཏཱིཏི ཙཀྑུནྡྲིཡཾ. ཏཉྷི ཏེ རཱུཔགྒཧཎེ ཨཏྟཱནཾ ཨནུཝཏྟེཏི, ཏེ ཙ ཏཾ ཨནུཝཏྟནྟི. སེསེསུཔི ཨེསེཝ ནཡོ. ཏསྨཱ སོཏགྷཱནཛིཝ྄ཧཱཀཱཡདྭཱརེ ཨིནྡཊྛཾ ཀཱརེཏཱིཏི. ཀཱཡིནྡྲིཡཾ. ཝིཛཱནནལཀྑཎེ ཨིནྡཊྛཾ ཀཱརེཏཱིཏི མནིནྡྲིཡཾ. ཨིཏྠིབྷཱཝལཀྑཎེ, པརིསབྷཱཝལཀྑཎེ, ཨནུཔཱལནལཀྑཎེ, སུཁལཀྑཎེ, དུཀྑལཀྑཎེ, སོམནསྶལཀྑཎེ, དོམནསྶལཀྑཎེ, ཨུཔེཀྑཱལཀྑཎེ, ཨདྷིམོཀྑལཀྑཎེ, པགྒཧལཀྑཎེ, ཨུཔཊྛཱནལཀྑཎེ, ཨཝིཀྑེཔལཀྑཎེ, དསྶནལཀྑཎེ, ཨནཉྙཱཏཾ ཉསྶཱམཱིཏི པཝཏྟེ ཛཱནནལཀྑཎེ, ཉཱཏཱནཾ ཨེཝ དྷམྨཱནཾ པུན ཨཱཛཱནནེ ཨཉྙཱཏཱཝིབྷཱཝེ ཨིནྡཊྛཾ ཀཱརེཏཱིཏི ཨཉྙཱཏཱཝིནྡྲིཡཾ.

ཝིཛཱནིཡཱཏི ཝིཛཱནེཡྻ. བྷཱུམིཏོ ཙཱཏི ཙ-སདྡོ ཨཝུཏྟསམྤིཔཎྜནཏྠོ, ཏེན ཏཱཝཏྭཾ སངྒཎྷཱཏི, ཏཾ པན ཏཱཝཏྭཾ པརཏོ ཝཎྞཡིསྶཱམ. ཨསམྨསནུཔགཱནམྤི ཨཏྠིབྷཱཝཏོ དཊྛབྦཏཱ ཨིདྷ ན གཧིཏཱ.

པུབྦབྷཱགེཏི ཨརིཡམགྒཏོ པུབྦབྷཱགེ. ཨནཉྙཱཏནྟི ན ཨཉྙཱཏཾ ན ཨདྷིགཏཾ. ནིཙྩཏཱཡ ནཏྠི ཨེཏསྶ མཏཾ བྷངྒོ, ན ཝཱ ཨེཏསྨིཾ ཨདྷིགཏེ མརཎནྟི ཨམཏཾ, པཛྫིཏབྦཏོ པདཉྩཱཏི ཨམཏཔདཾ ནིབྦཱནཾ. ‘‘ཨེཝཾ པཊིཔནྣསྶ ཨུཔྤཛྫནཏོ’’ཏི ཨེཏེན པུབྦབྷཱགཝསེནེཏཾ ཨིནྡྲིཡཾ ཨེཝཾ ཝོཧརཱིཡཏཱིཏི དསྶེཏི. ཨཱཛཱནནཏོཏི པཋམམགྒེན དིཊྛམརིཡཱདཾ ཨནཏིཀྐམིཏྭཱཝ ཛཱནནཏོ. ཡེན ཏཾསམངྒིཔུགྒལོ, ཏཾསམྤཡུཏྟདྷམྨཱ ཝཱ ཨཉྙཱཏཱཝིནོ ཧོནྟི ¶ , སོ ཨཉྙཱཏཱཝིབྷཱཝོ པརིནིཊྛིཏཀིཙྩཛཱནནཁཱིཎཱསཝསྶ བྷཱཝབྷཱུཏོ ཧུཏྭཱ ཨུཔྤཏྟིཏོ ‘‘ཁཱིཎཱསཝསྶ ཨུཔྤཛྫནཏོ’’ཏི ཝུཏྟཾ.

ལིངྒེཏི གམེཏི ཉཱཔེཏཱིཏི ལིངྒཾ, ལིངྒཱིཡཏི ཝཱ ཨེཏེནཱཏི ལིངྒཾ. ཀིཾ ལིངྒེཏི, ཀིཾ ཝཱ ལིངྒཱིཡཏཱིཏི? ཨིནྡཾ, ཨིནྡོ ཝཱ. ཨིནྡསྶ ལིངྒ ཨིནྡལིངྒཾ, ཨིནྡལིངྒསྶ ཨཏྠོ ཏཾསབྷཱཝོ ཨིནྡལིངྒཊྛོ, ཨིནྡལིངྒམེཝ ཝཱ ཨིནྡྲིཡསདྡསྶ ¶ ཨཏྠོཏི ཨིནྡལིངྒཊྛོ. སཛྫིཏཾ ཨུཔྤཱདིཏནྟི སིཊྛཾ, ཨིནྡེན སིཊྛཾ ཨིནྡསིཊྛཾ. ཛུཊྛཾ སེཝིཏཾ. ཀམྨསངྑཱཏསྶ ཨིནྡསྶ ལིངྒཱནི, ཏེན ཙ སིཊྛཱནཱིཏི ཀམྨཛཱནེཝ ཡོཛེཏབྦཱནི, ན ཨཉྙཱནི, ཏེ ཙ དྭེ ཨཏྠཱ ཀམྨེ ཨེཝ ཡོཛེཏབྦཱ, ཨིཏརེ ཙ བྷགཝཏི ཨེཝཱཏི ཨཱཧ ‘‘ཡཐཱཡོག’’ནྟི. ཏེནཱཏི བྷགཝཏོ, ཀམྨསྶ ཙ ཨིནྡཏྟཱ. ཨེཏྠཱཏི ཨེཏེསུ ཨིནྡྲིཡེསུ. ཨུལླིངྒེནྟི ཉཱཔེནྟི པཀཱསེནྟི ཕལསམྤཏྟིཝིཔཏྟཱིཧི ཀཱརཎསམྤཏྟིཝིཔཏྟིཨཝབོདྷཏོ. ‘‘སོ ཏཾ ནིམིཏྟཾ ཨཱསེཝཏཱི’’ཏིཨཱདཱིསུ (ཨ. ནི. ༩.༣༥) གོཙརཀརཎམྤི ཨཱསེཝནཱ ཝུཏྟཱཏི ཨཱཧ ‘‘ཀཱནིཙི གོཙརཱསེཝནཱཡཱ’’ཏི. ཏཏྠ སབྦེསཾ གོཙརིཀཱཏབྦཏྟེཔི ‘‘ཀཱནིཙཱི’’ཏི ཝཙནཾ ཨཝིཔསྶིཏབྦཱནཾ བཧུལཾ མནསིཀརཎེན ཨནཱསེཝནཱིཡཏྟཱ. པཙྩཝེཀྑནཱམཏྟམེཝ ཧི ཏེསུ ཧོཏཱིཏི. ‘‘ཏསྶ ཏཾ མགྒཾ ཨཱསེཝཏོ’’ཏིཨཱདཱིསུ (ཨ. ནི. ༤.༡༧༠) བྷཱཝནཱ ཨཱསེཝནཱཏི ཝུཏྟཱཏི བྷཱཝེཏབྦཱནི སདྡྷཱདཱིནི སནྡྷཱཡཱཧ ‘‘ཀཱནིཙི བྷཱཝནཱསེཝནཱཡཱ’’ཏི.

ཨཱདྷིཔཙྩཾ ཨིནྡྲིཡཔཙྩཡབྷཱཝོ. ཨསཏིཔི ཙ ཨིནྡྲིཡཔཙྩཡབྷཱཝེ ཨིཏྠིཔུརིསིནྡྲིཡཱནཾ, ཨཏྟནོ ཨཏྟནོ པཙྩཡཝསེན པཝཏྟམཱནེ ཏཾསཧིཏསནྟཱནེ ཨཉྙཱཀཱརེན ཨཔྤཝཏྟམཱནེཧི ལིངྒཱདཱིཧི ཨནུཝཏྟནཱིཡབྷཱཝེ ཨཱདྷིཔཙྩཾ. ཨིམསྨིཾ ཙ ཨཏྠེ ཨིནྡནྟི པརིམིསྶརིཡཾ ཀརོནྟིཙྩེཝ ཨིནྡྲིཡཱནི. ཙཀྑཱདཱིསུ དསྶིཏེན ནཡེན ཨཉྙེསཉྩ ཛཱིཝིཏཱདཱིནཾ ཏདནུཝཏྟཱིསུ ཨཱདྷིཔཙྩཾ ཡཐཱརཧཾ ཡོཛེཏབྦཾ.

ཨམོཧོཡེཝ ན ཝིསུཾ ཙཏྟཱརོ དྷམྨཱ, ཏསྨཱ ཏསྶ སངྑཱརཀྑནྡྷཀཐཱཡཾ ཝིབྷཱཝིཏཱནི ལཀྑཎཱདཱིནི ཏེསཉྩ ཝེདིཏབྦཱནཱིཏི ཨདྷིཔྤཱཡོ. སེསཱནི ཏཏྠ ཁནྡྷནིདྡེསེ ལཀྑཎཱདཱིཧི ཨརཱུཔེནེཝ ཨཱགཏཱནི.

༥༢༦. སཏྟཱནཾ ཨརིཡབྷཱུམིཔཊིལཱབྷོ བྷགཝཏོ དེསནཱཡ སཱདྷཱརཎཾ, པདཱནཉྩ པཡོཛནནྟི ¶ ཨཱཧ ‘‘ཨཛ྄ཛྷཏྟདྷམྨེ པརིཉྙཱཡཱ’’ཏིཨཱདི. ཨཉྙེསམྤི ཨིནྡྲིཡཱནཾ ཨཏྟབྷཱཝཔརིཡཱཔནྣཏཱཡ སཏིཔི ཨཏྟབྷཱཝཔཉྙཱཔནཱཡ མཱུལབྷཱཝཏོ ཙཀྑཱདཱིནཾ སཱཏིསཡཱ ཨཏྟབྷཱཝཔརིཡཱཔནྣཱཏི ཝུཏྟཾ ‘‘ཨཏྟབྷཱཝཔརིཡཱཔནྣཱནི ཙཀྑུནྡིཡཱདཱིནཱི’’ཏི (ཝིབྷ. ཨཊྛ. ༢༡༩). ཨབྷིདྷམྨཊྛཀཐཱཡཾ ཨིཏྠིཔུརིསིནྡྲིཡཱནནྟརཾ ཛཱིཝིཏིནྡྲིཡདེསནཱཀྐམོ ཝུཏྟོཏི ¶ ཨིདྷཱཔི ‘‘ཏཏོ ཛཱིཝིཏིནྡྲིཡ’’ནྟི ཝུཏྟཾ. ཏཾ ཨིནྡྲིཡཡམཀདེསནཱཡ (ཡམ. ༣.ཨིནྡྲིཡཡམཀ.༡ ཨཱདཡོ) སམེཏི. ཨིནྡྲིཡཝིབྷངྒེ (ཝིབྷ. ༢༡༩ ཨཱདཡོ) པན མནིནྡྲིཡཱནནྟརཾ ཛཱིཝིཏིནྡྲིཡཾ ཝུཏྟཾ, ཏཾ པུརིམཔཙྪིམཱནཾ ཨཛ྄ཛྷཱཏྟིཀབཱཧིརཱནཾ ཨནུཔཱལཀབྷཱཝདཱིཔནཏྠཾ ཏེས མཛ྄ཛྷེ ཝུཏྟནྟི ཝེདིཏབྦཾ. ཡཉྩ ཀིཉྩི ཝེདཡིཏཾ, སབྦཾ ཏཾ དུཀྑཾ. ཡཱཝ ཙ དུཝིདྷཏྟབྷཱཝཱནུཔཱལཀསྶ ཛཱིཝིཏིནྡྲིཡསྶ པཝཏྟི, ཏཱཝ དུཀྑབྷཱུཏཱནཾ ཨེཏེསཾ ཝེདཡིཏཱནཾ ཨནིཝཏྟཱིཏི ཉཱཔནཏྠཾ, ཏེན ཙ ཙཀྑཱདཱིནཾ དུཀྑཱནུབནྡྷཏཱཡ པརིཉྙེཡྻཏཾ ཉཱཔེཏི. པཊིཔཏྟིདསྶནཏྠནྟི པུབྦབྷཱགཔཊིཔཏྟིདསྶནཏྠཾ. ཏསྶེཝཱཏི ཨནཉྙཱཏཉྙསྶཱམཱིཏིནྡྲིཡསྶེཝ. ཏཏོ ཨནནྟརཾ བྷཱཝེཏབྦཏྟཱཏི བྷཱཝནཱམགྒསམྤཡུཏྟཾ ཨཉྙིནྡྲིཡཾ སནྡྷཱཡ ཝུཏྟཾ. དསྶནཱནྟརཱ ཧི བྷཱཝནཱཏི.

བྷེདོཏི ཨིདྷ སབྷཱཝཏོ བྷེདོ ཨདྷིཔྤེཏོ, ན བྷཱུམིཔུགྒལཱདིཝསེནཱཏི ཨཱཧ ‘‘སེསཱནཾ ཨབྷེདོ’’ཏི. ནནུ ཙ ཛཱིཝིཏིནྡྲིཡསྶ ཨནུཔཱལནལཀྑཎཾ སབྷཱཝོ, ཏེནསྶ དུཝིདྷསྶཱཔི ཨབྷེདོཏི? སཙྩམེཏཾ, ཏསྶ པན རཱུཔཱརཱུཔསབྷཱཝཀཏོ བྷེདོ གཧིཏོ, ན ཨེཝཾ སེསཱནཾ ཀོཙི བྷེདོ ཨཏྠཱིཏི ཏེསཾ ཨབྷེདོཏི བྷེདཱབྷཱཝོ ཝུཏྟོ. ནནུ ཙེཏྠ ཝེདནཱ, པཉྙཱ ཙ བྷིནྡིཏྭཱ ཝུཏྟཱཏི? ན, ཡཐཱ དེསིཏེསུ བཱཝཱིསཏིཡཱ ཨིནྡྲིཡེསུ བྷེདཱབྷེདསྶ ཨདྷིཔྤེཏཏྟཱ.

༥༢༧. ཙཀྑུནྡྲིཡཱདཱིནཾ སཏིཔི པུརེཛཱཏཱདིཔཙྩཡབྷཱཝེ ཨིནྡྲིཡཔཙྩཡབྷཱཝེན སཱདྷེཏབྦམེཝ ཀིཙྩཾ ཀིཙྩནྟི ཝུཏྟཾ ཏསྶ ཨནཉྙསཱདྷཱརཎཏྟཱ, ཨིནྡྲིཡཀཐཱཡ ཙ ཨདྷིཀཏཏྟཱ. ཨཏྟནོ ཏིཀྑམནྡཱདིཨཱཀཱརོ ཨཏྟཱཀཱརོ, ཏསྶ ཨནུཝཏྟཱཔནཾ ཨཏྟཱཀཱརཱནུཝཏྟཱཔནཾ. ཏེནཱཧ ‘‘ཏིཀྑམནྡཱདིསངྑཱཏཨཏྟཱཀཱརཱནུཝཏྟཱཔན’’ནྟི. ཨཐ ཝཱ ཏིཀྑམནྡཱདིསངྑཱཏསྶ ཙ ཨཏྟཱཀཱརསྶ ཙ ཨནུཝཏྟཱཔནཾ ཏིཀྑ…པེ… ཝཏྟཱཔནཾ. ཝིསུཾ ཨཏྟཱཀཱརགྒཧཎེན ཙེཏྠ རཱུཔཱཝབྷཱསནཱདིཀསྶ སངྒཧོ དཊྛབྦོ. ཙཀྑུནྡྲིཡསྶ ཧི རཱུཔཱབྷིཧནནཡོགྱཏཱསངྑཱཏེ རཱུཔཱཝབྷཱསནསཱམཏྠིཡེ ཨསཏི ན ཀདཱཙིཔི ཙཀྑུཝིཉྙཱཎསྶ དསྶནཀིཙྩཾ སམྦྷཝཏི. ཨེས ནཡོ སོཏིནྡྲིཡཱདཱིསུཔི. པུབྦངྒམབྷཱཝེན མནིནྡྲིཡསྶ ཝསཱཝཏྟཱཔནཾ ཧོཏི, ན ཨཉྙེསཾ. ཏཾསམྤཡུཏྟཱནིཔི ཧི ཨིནྡྲིཡཱནི ཏབྦསེནེཝ ཧུཏྭཱ ཨཏྟནོ ཨཏྟནོ ཨིནྡྲིཡཀིཙྩཾ སཱདྷེནྟི ཙེཏསིཀབྷཱཝཏོ ¶ , ན ཏེསཾ ཝསེན མནིནྡྲིཡཾ ¶ . ཨཡཉྷིསྶ པུབྦངྒམཏཱ. སབྦཏྠ ཙ ཨིནྡྲིཡཔཙྩཡབྷཱཝེན སཱདྷེཏབྦནྟི ཨདྷིཀཱརོ ཨནུཝཏྟཏཱིཏི དཊྛབྦོ. སཏིཔི ཨནུཔྤཱདནེ, ཨནུཔཏྠམྦྷནེ ཙ ཏཔྤཙྩཡཱནཾ ཏཔྤཝཏྟནེ ནིམིཏྟབྷཱཝོ ཨནུཝིདྷཱནཾ.

ཚཱདེཏྭཱ ཕརིཏྭཱ ཨུཔྤཛྫམཱནཱ སུཁདུཀྑཝེདནཱ སཧཛཱཏདྷམྨེ ཨབྷིབྷཝིཏྭཱ ཨཛྫོཏྠརིཏྭཱ སཡམེཝ པཱཀཊཱ ཧོཏི, སཧཛཱཏདྷམྨཱ ཙ ཏསྶཱ ཝསེན སུཁདུཀྑབཱཝཔྤཏཱ ཝིཡ ཧོནྟཱིཏི ཨཱཧ ‘‘ཡཐཱསཀཾ ཨོལཱ༹རིཀཱཀཱརཱནུཔཱཔན’’ནྟི. ཨསནྟསྶ, ཨཔཎཱིཏསྶཔི ཨཀུསལཏབྦིཔཱཀཱདིསམྤཡུཏྟསྶ ཡཐཱརཧཾ མཛ྄ཛྷཏྟཱཀཱརཱནུཔཱཔནཾ ཡོཛེཏབྦཾ. སམཱནཛཱཏིཡེཧི ཝཱ སུཁདུཀྑེཧི སནྟཔཎཱིཏཱཀཱརཱནུཔཱཔནཾ དཊྛབྦཾ. པཊིཔཀྑཱབྷིབྷཝནནྟི ཨསྶདྡྷིཡཱདིཔཊིཔཀྑཱབྷིབྷཝནཾ. པསནྣཱཀཱརཱདཱཏི པསནྣཔགྒཧིཏཨུཔཊྛིཏསམཱཧིཏདསྶནཱཀཱརཱནུཔཱཔནཾ ཡཐཱཀྐམཾ སདྡྷཱདཱིནཾ. བྱཱཔཱདཱདཱིཏི ཨཱདི-སདྡེན ཨུདྡྷམྦྷཱགིཡསཾཡོཛནཱནི གཧིཏཱནི. མགྒསམྤཡུཏྟསྶེཝ ཙ ཨཉྙིནྡྲིཡསྶ ཀིཙྩཾ དསྶིཏཾ. ཏེནེཝ ཙ ཕལསམྤཡུཏྟསྶ ཏཾཏཾསཾཡོཛནཔྤཊིཔྤསྶདྡྷིཔཧཱནཀིཙྩཏཱ དསྶིཏཱ ཧོཏཱིཏི. ཀཏསབྦཀིཙྩསྶ ཨཉྙཱཏཱཝིནྡྲིཡཾ ཨཉྙསྶ ཀཱཏབྦསྶ ཨབྷཱཝཱ ཨམཏཱབྷིམུཁམེཝ ཏབྦྷཱཝཔཙྩཡོ ཙ ཧོཏི, ན ཨིཏརཱནི ཝིཡ ཀིཙྩནྟརཔསུཏཾ. ཏེནཱཧ ‘‘ཨམཏཱབྷིམུཁབྷཱཝཔཙྩཡཏཱ ཙཱ’’ཏི.

༥༢༨. བྷཱུམིཏོ ཝིནིཙྪཡོ ཨུཏྟཱནཏྠོ ཨེཝ. ཨེཏྠཱཧ – ཀསྨཱ པན ཨེཏྟཀེནེཝ ཨིནྡྲིཡཱནི ཝུཏྟཱནི, ཨེཏཱནི ཨེཝ ཙ ཝུཏྟཱནཱིཏི? ཨཱདྷིཔཙྩཊྛཝསེན, ཨཱདྷིཔཙྩཾ ནཱམ ཨིསྶརིཡནྟི ཝུཏྟམེཝེཏཾ. ཏཡིདཾ ཨཱདྷིཔཙྩཾ ཨཏྟནོ ཨཏྟནོ ཀིཙྩེ, ཕལེ ཙཱཏི ཨཉྙེསམྤི སབྷཱཝདྷམྨཱནཾ ཀསྨཱ ན ལབྦྷཏི? པཙྩཡཱདྷཱིནཝུཏྟིཀཱ ཧི པཙྩཡུཔྤནྣཱཏི སིཡཱ ཕལཧེཏུདྷམྨེསུ ཨནུཝཏྟནཱནུཝཏྟནཱིཡཏཱཏི? སཙྩམེཏཾ, ཏཐཱཔི ཨཏྠི ཏེསཾ ཝིསེསོ. སྭཱཡཾ ‘‘ཙཀྑུཝིཉྙཱཎཱདིཔྤཝཏྟིཡཉྷི ཙཀྑཱདཱིནཾ སིདྡྷམཱདྷིཔཙྩ’’ནྟིཨཱདིནཱ (ཝིབྷ. ཨཊྛ. ༢༡༩) ཨཊྛཀཐཱཡཾ དསྶིཏོཡེཝ. ཨཔིཙ ཁནྡྷཔཉྩཀེ ཡཱཡཾ སཏྟཔཉྙཏྟི, ཏསྶཱ ཝིསེསནིསྶཡོ ‘‘ཚ ཨཛ྄ཛྷཏྟིཀཱནི ཨཱཡཏནཱནཱི’’ཏི ཏཱནི ཏཱཝ ཨཱདྷིཔཙྩཏྟཾ ཨུཔཱདཱཡ ‘‘ཙཀྑུནྡྲིཡཾ…པེ…མནིནྡྲིཡ’’ནྟིཨཱདིཏོ (ཝིབྷ. ༢༡༩) ཝུཏྟཱནི. སྭཱཡཾ ཨཏྟབྷཱཝོ ཨིམེསཾ ཝསེན ‘‘ཨིཏྠཱི པུརིསོ’’ཏི སམཉྙཾ ལབྷཏཱིཏི དསྶནཏྠཾ ¶ བྷཱཝདྭཡཾ. ཏཡིམེ ཨུཔཱདིནྣདྷམྨཱ ཡེན དྷམྨེན པཝཏྟནྟི, ཨཡཾ སོ དྷམྨོ ཏེསཾ ཋིཏིཧེཏཱུཏི དསྶནཏྠཾ ཛཱིཝིཏིནྡྲིཡཾ. སྭཱཡཾ སཏྟསཉྙིཏོ དྷམྨཔུཉྫོ པབནྡྷཝསེན པཝཏྟམཱནོ ཨིམཱཧི ཝེདནཱཧི སཾཀིལིསྶཏཱིཏི ¶ དསྶནཏྠཾ ཝེདནཱཔཉྩཀཾ. ཏཏོ ཝིསུདྡྷིཀཱམཱནཾ ཝོདཱནསམྦྷཱརདསྶནཏྠཾ སདྡྷཱདིཔཉྩཀཾ. སམྦྷཝཝོདཱནསམྦྷཱརཱ ཨིམེཧི ཝིསུཛྫནྟི, ཝིསུདྡྷིཔྤཏྟཱ ནིཊྛིཏཀིཙྩཱཝ ཧོནྟཱིཏི དསྶནཏྠཾ ཨནཉྙཱཏཉྙསྶཱམཱིཏིནྡྲིཡཱདཱིནི ཏཱིཎི ཝུཏྟཱནི. སབྦཏྠ ‘‘ཨཱདྷིཔཙྩཏྟཾ ཨུཔཱདཱཡཱ’’ཏི པདཾ ཡོཛེཏབྦཾ. ཨེཏྟཱཝཏཱ ཨདྷིཔྤེཏཏྠསིདྡྷཱིཏི ཨཉྙེསཾ ཨགྒཧཎཾ.

ཨཐ ཝཱ པཝཏྟིནིཝཏྟཱིནཾ ནིསྶརཱདིདསྶནཏྟམྤི ཨེཏཱནིཡེཝ ཝུཏྟཱནི. པཝཏྟིཡཱ ཧི ཝིསེསཏོ མཱུལནིསྶཡབྷཱུཏཱནི ཚ ཨཛ྄ཛྷཏྟིཀཱཡཏནཱནི. ཡཐཱཧ ‘‘ཚསུ ལོཀོ སམུཔྤནྣོ’’ཏིཨཱདི (སུ. ནི. ༡༧༡). ཏསྶ ཨུཔྤཏྟི ཨིཏྠིཔུརིསིནྡྲིཡེཧི ཝིསབྷཱགཝཏྠུསརཱགནིམིཏྟེཧི ཡེབྷུཡྻེན སཏྟཀཱཡསྶ ཨབྷིནིབྦཏྟི. ཝུཏྟཉྷེཏཾ ‘‘ཏིཎྞཾ ཁོ, མཧཱརཱཛ, སནྣིཔཱཏཱ གབྦྷསྶ ཨཝཀྐནྟི ཧོཏི མཱཏཱ ཙ ཨུཏུནཱི ཧོཏི, གནྡྷབྦོ ཙ པཙྩུཔཊྛིཏོ ཧོཏི, མཱཏཱཔིཏརོ ཙ སནྣིཔཏིཏཱ ཧོནྟཱི’’ཏིཨཱདི (མ. ནི. ༡.༤༠༨; མི. པ. ༤.༡.༦). ཨཝཊྛཱནཾ ཛཱིཝིཏིནྡྲིཡེན ཏེན ཨནུཔཱལེཏབྦཏོ. ཏེནཱཧ ‘‘ཨཱཡུ ཋིཏི ཡཔནཱ ཡཱཔནཱ’’ཏིཨཱདི (དྷ. ས. ༡༩). ཨུཔབྷོགོ ཝེདནཱཧི. ཝེདནཱཝསེན ཧི ཨིཊྛཱདིསབྦཝིསཡཱུཔབྷོགོ. ཡཐཱཧ ‘‘ཝེདཡཏི ཝེདཡཏཱིཏི ཁོ, བྷིཀྑཝེ, ཏསྨཱ ཝེདནཱཏི ཝུཙྩཏཱི’’ཏི (མ. ནི. ༡.༤༥༠). ཨེཝཾ པཝཏྟིཡཱ ནིསྶཡསམུཔྤཱདཊྛིཏིསམྦྷོགདསྶནཏྟཾ ཙཀྑུནྡྲིཡཾ ཡཱཝ ཨུཔེཀྑིནྡྲིཡནྟི ཙུདྡསིནྡྲིཡཱནི དེསིཏཱནི. ཡཐཱ ཙེཏཱནི པཝཏྟིཡཱ, ཨེཝཾ ཨིཏརཱནི ནིཝཏྟིཡཱ. ཝིཝཊྚསནྣིསྶིཏེན ཧི ནིབྦཏྟིཏཱནི སདྡྷཱདཱིནི པཉྩིནྡྲིཡཱནི ནིཝཏྟིཡཱ ནིསྶཡོ. ཨུཔྤཱདོ ཨནཉྙཱཏཉྙསྶཱམཱིཏིནྡྲིཡེན ཏསྶ ནིཝཏྟིཝསེན པཋམཾ ཨུཔྤཛྫནཏོ. ཨཝཊྛཱནཾ ཨཉྙིནྡྲིཡེན, ཨུཔབྷོགོ ཨཉྙཱཏཱཝིནྡྲིཡེན ཨགྒཕལསམུཔབྷོགཏོ. ཁཱིཎཱསཝཱཧི ཝིསཝིཏཱཡ ནིབྦུཏིསུཁཾ པརིབྷུཛྫནྟི. ཨེཝམྤི ཨེཏཱནི ཨེཝ ཨིནྡྲིཡཱནི དེསིཏཱནི. ཨེཏྟཱཝཏཱ ཡཐཱདྷིཔྤེཏཏྠསིདྡྷིཏོ ཨཉྙེསཾ ཨགྒཧཎཾ. ཨིམིནཱཝ ནེསཾ དེསནཱཀྐམོཔི སཾཝཎྞིཏོཏི ཝེདིཏབྦོཏི.

ཨིནྡྲིཡནིདྡེསཝཎྞནཱ ནིཊྛིཏཱ.

སཙྩཝིཏྠཱརཀཐཱཝཎྞནཱ

༥༢༩. ཨརིཡསདྡེན ¶ ¶ ཝིསེསནཾ ཨཀཏྭཱ ཀེཝལཾ སཙྩསདྡེན ཨུདྡྷིཊྛཱནིཔི ཨརིཡསཙྩཱནི ཨེཝཱཏི དསྶེནྟོ ‘‘སཙྩཱནཱིཏི ཙཏྟཱརི ཨརིཡསཙྩཱནཱི’’ཏི ཨཱད. སམཱཉྙཛོཏནཱ ཧི ཝིསེསེ ཨཝཏིཊྛཏི, ཝིསེསཏྠིནཱ ཙ ཝིསེསོ ཨནུཔཡུཛྫིཏབྦོཏི. ཨརིཡསཙྩེསུ ཝཱ ཝིཙཱརིཏེསུ ཨིཏརཱནིཔི ཨཏྠཏོ ཝིཙཱརིཏཱནེཝ ཧོནྟཱིཏི ཝིཔསྶནཱཡ ཙ བྷཱུམིབྷཱུཏཱནི, ཨརིཡསཙྩཱནེཝཱཏི ཙ ཀཏྭཱ ‘‘སཙྩཱནཱི’’ཏི ཨུདྡྷརིཏྭཱཔི ‘‘ཙཏྟཱརི ཨརིཡསཙྩཱནཱི’’ཏི ཝུཏྟཾ.

སཱསནཀྐམོཏི ཨརིཡསཙྩཱནི ཝུཙྩནྟི, ཨརིཡསཙྩདེསནཱ ཝཱ. སཀལཉྷི སཱསནཾ བྷགཝཏོ ཝཙནཾ སཙྩཝིནིམུཏྟཾ ནཏྠི པཝཏྟིནིཝཏྟིཏདུབྷཡཧེཏུསནྡསྶནཝསེན པཝཏྟནཏོ. ཏསྨཱ སཙྩེསུ ཀམཏི, སཱིལསམཱདྷིཔཉྙཱསངྑཱཏཾ ཝཱ སཱསནཾ ཨེཏེསུ ཀམཏི, པརིཉྙཱདིཀིཙྩསཱདྷནཝསེན པཝཏྟཏི, ཏསྨཱ ཀམཏི ཨེཏྠཱཏི ཀམོ, ཀིཾ ཀམཏི? སཱསནཾ. སཱསནསྶ ཀམོ ‘‘སཱསནཀྐམོ’’ཏི སཙྩཱནི སཱསནཔྤཝཏྟིཊྛཱནཱནི ཝུཙྩནྟི, ཏཾདེསནཱ ཙ ཏབྦོཧཱརེནཱཏི.

ཏཐཱཏི ཏཾསབྷཱཝཱ དུཀྑཱདིསབྷཱཝཱ. ཨཝིཏཐཱཏི ཨམུསཱསབྷཱཝཱ བཱདྷནཱདིབྷཱཝེན བྷཱུཏསབྷཱཝཱ. ཨནཉྙཐཱཏི ཨཉྙཱཀཱརརཧིཏཱ ཨབཱདྷནཱདིཨཱཀཱརཝིཝིཏྟཱ. དུཀྑདུཀྑཏཱཏནྣིམིཏྟཏཱཧི ཨདྷིཊྛིཏཏྟཱ པཱིལ༹ནཊྛོ. སམེཙྩ སམྦྷཱུཡ པཙྩཡེཧི ཀཏབྷཱཝོ སངྑཏཊྛོ. དུཀྑདུཀྑཏཱཏནྣིམིཏྟཏཱཧི པརིདཧནཾ, ཀིལེསདཱཧསམཱཡོགོ ཝཱ སནྟཱཔཊྛོ. ཛརཱཡ, མརཎེན ཙཱཏི དྭེདཱ ཝིཔརིཎཱམེཏབྦཏཱ ཝིཔརིཎཱམཊྛོ. ཨེཏྠ ཙ པཱིལ༹ནཊྛོ དུཀྑསྶ སརསེནེཝ ཨཱཝིབྷཝནཱཀཱརོ, ཨིཏརེ ཡཐཱཀྐམཾ སམུདཡམགྒནིརོདྷདསྶནེཧི ཨཱཝིབྷཝནཱཀཱརཱཏི ཨཡཾ ཙཏུནྣམྤི ཝིསེསོ. ཏཏྲཏྲཱབྷིནནྡནཝསེན བྱཱཔིཏྭཱ ཨཱུཧནཾ རཱསིཀརཎཾ དུཀྑསྶ ནིབྦཏྟནཾ ཨཱཡཱུཧནཾ ཨཱཀཱརསྶ བྱཱཔནཏྠཏྟཱ. ཨཱགཙྪཏི སམུདཡཏོཏི ཝཱ ཨཱཡཾ, དུཀྑཾ, ཏསྶ ཨཱུཧནཾ པཝཏྟནཾ ཨཱཡཱུཧནཾ, ཨཡཾ སརསེནེཝ ཨཱཝིབྷཝནཱཀཱརོ. ནིདདཱཏི དུཀྑནྟི ནིདཱནཾ, ‘‘ཨིདཾ ཏཾ དུཀྑ’’ནྟི སམྤཊིཙྪཱཔེནྟཾ ཝིཡ སམུཊྛཱཔེཏཱིཏི ཨཏྠོ. ཨཡཾ ནིདཱནཊྛོ དུཀྑདསྶནེན ཨཱཝིབྷཝནཱཀཱརོ. སཾསཱརདུཀྑེན སཾཡོཛནཾ སཾཡོགཊྛོ ¶ . མགྒཱདྷིགམནནིཝཱརཎཾ པལིབོདྷཊྛོ. ཨིམེ ཙ སཾཡོགཔལིབོདྷཊྛཱ ནིརོདྷམགྒདསྶནེཧི ཨཱཝིབྷཝནཱཀཱརཱ. ནིསྶརནྟི སཏྟཱ ཨེཏྠ, སཡམེཝ ཝཱ ནིསྶཊཾ ཝིསཾཡུཏྟཾ སབྦསངྑཏེཧི སབྦཱུཔདྷིཔཊིནིསྶགྒབྷཱཝཏོཏི ནིསྶརནཾ. ཨཡམསྶ ¶ སབྷཱཝེན ཨཱཝིབྷཝནཱཀཱརོ, ཨིཏརེ ཝིཝེཀཱསངྑཱཏཱམཏཊྚཱ, སམུདཡཀྑརཨཔཙྩཡཨཝིནཱསིཏཱ ཝཱ སམུདཡམགྒདུཀྑདསྶནེན ཨཱཝིབྷཝནཱཀཱརཱ.

སཾསཱརཏོ ནིགྒམནཾ ནིཡྻཱནཾ. ཨཡམསྶ སརསེན ཨཱཝིབྷཝནཱཀཱརོ. པརིབོདྷཱུཔཙྪེདནེན ནིབྦཱནཱདྷིགམོཝ ནིབྦཱནནིམིཏྟཏྟཱ མགྒསྶ ཧེཏུཊྛོ. པཉྙཱཔདྷཱནཏྟཱ ཙསྶ ནིབྦཱནདསྶནཾ, ཙཏུསཙྩདསྶནཾ ཝཱ དསྶནཊྛོ. ཙཏུསཙྩདསྶནེ, ཀིལེསདུཀྑསནྟཱཔཝཱུཔསམནེ ཙ ཨཱདྷིཔཙྩཾ ཀརོནྟི མགྒདྷམྨཱ སམྤཡུཏྟདྷམྨེསཱུཏི སོ མགྒསྶ ཨཱདྷིཔཏེཡྻཊྛོ. ཝིསེསཏོ ཝཱ ཨཱལམྦནཱདྷིཔཏིབྷཱུཏཱ མགྒདྷམྨཱ ཧོནྟི ‘‘མགྒཱདྷིཔཏིནོ’’ཏི (དྷ. ས. ཏིཀམཱཏིཀཱ ༡༦) ཝཙནཏོཏི སོ ཏེསཾ ཨཱཀཱརོ ཨཱདྷིཔཏེཡྻཊྛོ. ཨེཏེ ཧེཏུདསྶནཱདྷིཔཏེཡྻཊྛཱ སམུདཡནིརོདྷདུཀྑདསྶནེཧི ཨཱཝིབྷཝནཱཀཱརཱ. ཨེཝམཱདི ཨཱཧཱཏི སམྦནྡྷོ. ཨབྷིསམཡཊྛོཏི ཨབྷིསམེཏབྦཊྛོ. ཨབྷིསམཡསྶ ཝཱ ཝིསཡབྷཱུཏོ ཨཏྠོ ཨབྷིསམཡཊྛོ. ཨཐ ཝཱ ཨབྷིསམཡསྶ པཝཏྟིཨཱཀཱརོ ཨབྷིསམཡཊྛོ. སོ ཙེཏྠ ཨབྷིསམེཏབྦེན པཱིལ༹ནཱདིནཱ དསྶིཏོཏི དཊྛབྦོ.

༥༣༠. ཀུཙྪིཏཾ ཁཾ དུཀྑཾ, གཱརཡ྄ཧཾ ཧུཏྭཱ ཨསཱརནྟི ཨཏྠོ.

‘‘སམཱགམོ སམེཏ’’ནྟིཨཱདཱིསུ ཀེཝལསྶ ཨཱགམསདྡསྶ, ཨེཏ-སདྡསྶ ཙ པཡོགེ སཾཡོགཏྠསྶ ཨནུཔལབྦྷནཏོ, སཾ-སདྡསྶ ཙ སཾཡོགེ ཨུཔལབྦྷནཏོ ‘‘སཾཡོགཾ དཱིཔེཏཱི’’ཏི ཨཱཧ ཨནྭཡཏོ, བྱཏིརེཀཏོ ཙ ཏདཏྠཛོཏཀཏཱསིདྡྷིཏོ. ཨུཔྤནྣཾ ཨུདིཏནྟི ཨེཏྠཱཔི ཨེསེཝ ནཡོ. ཨཡ-སདྡོ གཏིཨཏྠེ སིདྡྷོ ཧེཏུསདྡོཝིཡ ཀཱརཎཾ དཱིཔེཏི. ཨཏྟནོ ཕལནིཔྥཱདནེན ཨཡཏི པཝཏྟཏི, ཨེཏི ཝཱ ཨེཏསྨཱ ཕལནྟི ཨཡོཏི, སཾཡོགེ ཨུཔྤཏྟིཀཱརཎཾ སམུདཡོཏི. ཨེཏྠ ཝིསུཾ པཡུཛྫམཱནཱཔི ཨུཔསགྒསདྡཱ སདྷཱཏུཀཾ སཾཡོགཏྠཾ, ཨུཔྤཱདཏྠཉྩ དཱིཔེནྟི, ཀིརིཡཱཝིསེསཀཏྟཱཏི ཝེདིཏབྦཱ.

‘‘ཨབྷཱཝོ ¶ ཨེཏྠ རོདྷསྶཱཏི ནིརོདྷོ’’ཏི ཨེཏེན ནིབྦཱནསྶ དུཀྑཝིཝིཏྟབྷཱཝཾ དསྶེཏི. སམདྷིགཏེ ཏསྨིཾ ཏདདྷིགམཏོ པུགྒལསྶ རོདྷཱབྷཱཝོ པཝཏྟིསངྑཱཏསྶ རོདྷསྶ པཊིཔཀྑབྷཱུཏཱཡ ནིཝཏྟིཡཱ ཨདྷིགཏཏྟཱཏི. ཨེཏསྨིཉྩ ཨཏྠེ ཨབྷཱཝོ ཨེཏསྨིཾ རོདྷསྶཱཏི ནིརོདྷོ ཨིཙྩེཝ པདསམཱསོ. དུཀྑཱབྷཱཝོ པནེཏྠ པུགྒལསྶ, ན ནིབྦཱནསྶེཝ. ཨནུཔྤཱདོ ཨེཝ ནིརོདྷོ ཨནུཔྤཱདནིརོདྷོ. ཨཱཡཏིཾ བྷཝཱདཱིསུ ཨཔྤཝཏྟི, ན པན བྷངྒོཏི བྷངྒཝཱཙཀཾ ནིརོདྷསདྡཾ ནིཝཏྟེཏྭཱ ¶ ཨནུཔྤཱདཝཱཙཀཾ གཎྷཱཏི. ཨེཏསྨིཾ ཨཏྠེ ཀཱརཎེ ཕལཱུཔཙཱརཾ ཀཏྭཱ ནིརོདྷཔཙྩཡོ ནིརོདྷོཏི ཝུཏྟོ.

པཊིཔདཱ ཙ ཧོཏི པུགྒལསྶ དུཀྑནིརོདཔྤཏྟིཡཱ. ནནུ ཙ སཱ ཨེཝ དུཀྑནིརོདཔྤཏྟཱིཏི ཏསྶཱ ཨེཝ སཱ པཊིཔདཱཏི ན ཡུཛྫཏཱིཏི? ན པུགྒལཱདྷིགམསྶ པཏྟིབྷཱཝེན, ཡེཧི སོ ཨདྷིགཙྪཏི, ཏེསཾ ཀཱརཎབྷཱུཏཱནཾ པཊིཔདཱབྷཱཝེན ཙ ཝུཏྟཏྟཱ. སཙྪི ཀིརིཡཱསཙྪིཀརཎདྷམྨཱནཉྷི ཨཉྙཏྠཱབྷཱཝེཔི པུགྒལསཙྪིཀིརིཡཱདྷམྨབྷཱཝེཧི ནཱནཏྟཾ ཀཏྭཱ ནིདྡེསོ ཀཏོཏི. ཨཐ ཝཱ ཡཾ དུཀྑནིརོདྷཔྤཏྟིཡཱ ནིཊྛཱནཾ ཕལཾ, སཡཉྩ དུཀྑནིརོདྷཔྤཏྟིབྷཱུཏཾ, ཏསྶ ཨབྷིསམཡབྷཱུཏཱཡ དུཀྑནིརོདྷཔྤཏྟིཡཱ པཊིཔདཏཱ དཊྛབྦཱ.

༥༣༡. བུདྡྷཱདཡོ ཨརིཡཱ པཊིཝིཛ྄ཛྷནྟཱིཏི ཨེཏྠ པཊིཝིདྡྷཀཱལེ པཝཏྟཾ བུདྡྷཱདིཝོཧཱརཾ ‘‘ཨགམཱ རཱཛགཧཾ བུདྡྷོ’’ཏིཨཱདཱིསུ (སུ. ནི. ༤༡༠) ཝིཡ བྷཱཝིནི བྷཱུཏེ ཝིཡ ཨུཔཙཱརོཏི པུརིམཀཱལེཔི ཨཱརོཔེཏྭཱ ‘‘བུདྡྷཱདཡོ’’ཏི ཝུཏྟཾ. ཏེ ཧི བུདྡྷཱདཡོ ཙཏཱུཧི མགྒེཧི པཊིཝིཛ྄ཛྷནྟཱིཏི. ཏསྨཱ ཨརིཡསཙྩཱནཱིཏི ཝུཙྩནྟཱིཏི ཨེཏྠ ཨརིཡཔཊིཝིཛ྄ཛྷིཏབྦཱནི སཙྩཱནི ཨརིཡསཙྩཱནཱིཏི པུརིམཔདེ ཨུཏྟརཔདལོཔོ ཨརིཡསཙྩཱནཱིཏི ཝུཙྩནྟཱིཏི ཨཏྠོ. ཏཐཱགཏེན ཧི སཡཾ ཨདྷིགཏཏྟཱ, པཝེདིཏཏྟཱ, ཏཏོ ཨེཝ ཙ ཨཉྙེཧི ཨདྷིགམནཱིརཏྟཱ ཏཱནི ཏསྶ ཧོནྟཱིཏི. ཨརིཡབྷཱཝསིདྡྷིཏོཔཱིཏི ཨེཏྠ ཨརིཡསཱདྷཀཱནི སཙྩཱནི ཨརིཡསཙྩཱནཱིཏི པུབྦེ ཝིཡ ཨུཏྟརཔདལོཔོ དཊྛབྦོ. ཨརིཡཱནི སཙྩཱནཱིཏིཔཱིཏི ཨེཏྠ ཨཝིཏཐབྷཱཝེན ཨརཎཱིཡཏྟཱ ཨདྷིགནྟབྦཏྟཱ ཨརིཡཱནི, ཨརིཡསམཉྙཱ ཝཱ ཨཝིསཾཝཱདཀེ ཨཝིཏཐེ ནིརུལ༹ྷཱ དཊྛབྦཱ.

༥༣༢. བཱདྷནལཀྑཎནྟི ¶ ཨེཏྠ དུཀྑདུཀྑཏནྣིམིཏྟབྷཱཝོ, ཨུདཡཝཡཔཊིཔཱིལི༹ཏབྷཱཝོ ཝཱ བཱདྷནཾ. བྷཝཱདཱིསུ ཛཱཏིཨཱདིཝསེན, ཙཀྑུརོགཱདིཝསེན ཙ ཨནེཀདཱ དུཀྑསྶ པཝཏྟནམེཝ པུགྒལསྶ སནྟཱཔནཾ, ཏདསྶ ཀིཙྩཾ རསོཏི སནྟཱཔནརསཾ. པཝཏྟིནིཝཏྟཱིསུ སཾསཱརཝིམོཀྑེསུ པཝཏྟི ཧུཏྭཱ གཡ྄ཧཏཱིཏི པཝཏྟིཔཙྩུཔཊྛཱནཾ. པབྷཝཏི ཨེཏསྨཱ དུཀྑཾ ནིབྦཏྟཏི, པུརིམབྷཝེན པཙྪིམབྷཝོ གྷཊིཏོ སཾཡུཏྟོ ཧུཏྭཱ པཝཏྟཏཱིཏི པབྷཱཝོ. ‘‘ཨེཝམྤི ཏཎྷཱནུསཡེ ཨནཱུཧཏེ, ནིབྦཏྟཏི དུཀྑམིདཾ པུནཔྤུན’’ནྟི (དྷ. པ. ༣༣༨; ནེཏྟི. ༣༠) ཨེཝཾ པུནཔྤུནཾ ཨུཔྤཱདནཾ ཨནུཔཙྪེདཀརཎཾ. བྷཝནིསྶརཎནིཝཱརཎཾ པལིབོདྷོ. ཏཎྷཀྑཡཱདིབྷཱཝེན སབྦདུཀྑསནྟཏཱ སནྟི. ཨཙྩུཏིརསནྟི ཨཙྩུཏིསམྤཏྟིཀཾ ཨཙཝནཀིཙྩཾ ཝཱ. ཀིཙྩནྟི ཙ ཙཝནཱབྷཱཝཾ ¶ ཀིཙྩམིཝ ཀཏྭཱ པརིཡཱཡེན ཝུཏྟཾ, ཨཙཝནཉྩསྶ སབྷཱཝཱཔརིཙྩཛནཾ ཨཝིཀཱརིཏཱ དཊྛབྦཱ. པཉྩཀྑནྡྷནིམིཏྟསུཉྙཏཱཡ ཨཝིགྒཧཾ ཧུཏྭཱ གཡ྄ཧཏཱིཏི ཨནིམིཏྟཔཙྩུཔཊྛཱནཾ. ཨནུསཡསམུཙྪིནྡནེན སཾསཱརཙཱརཀཏོ ནིགྒམནཱུཔཱཡབྷཱཝོ ནིཡྻཱནཾ. སབྦཀིལེསཱནཾ ཨནུཔྤཱདནིརོདྷནཾ ཀིལེསཔྤཧཱནཀརཎཾ. ནིམིཏྟཏོ, པཝཏྟཏོ ཙ ཙིཏྟསྶ ཝུཊྛཱནཾ ཧུཏྭཱ གཡ྄ཧཏཱིཏི ཝུཊྛཱནཔཙྩུཔཊྛཱནཾ.

༥༣༣. ཨསུཝཎྞཱདི སུཝཎྞཱདི ཝིཡ དིསྶམཱནཾ མཱཡཱཏི ཝཏྠུསབྦྷཱཝཱ ཏསྶཱ ཝིཔརཱིཏཏཱ ཝུཏྟཱ. ཨུདཀཾ ཝིཡ དིསྶམཱནཱ པན མརཱིཙི ཨུཔགཏཱནཾ ཏུཙྪཱ. ཝཏྠུམཏྟམྤི ཏསྶཱ ན དིསྶཏཱིཏི ཝིསཾཝཱདིཀཱ ཝུཏྟཱ. མརཱིཙིམཱཡཱཨཏྟཝིདྷུརོ བྷཱཝོ ཏཙྪཱཝིཔརཱིཏབྷཱུཏབྷཱཝོ. ཨརིཡཉཱཎསྶཱཏི ཨརིཡསྶ ཨཝིཏཐགྒཱཧཀསྶ ཉཱཎསྶ, ཏེན པཊིཝེདྷཉཱཎཾ ཝིཡ པཙྩཝེཀྑཎཉཱཎམྤི གཧིཏཾ ཧོཏི. ཏེསཾ གོཙརབྷཱཝོ པཊིཝིཛྫིཏབྦཏཱ, ཨཱརམྨཎབྷཱཝོ ཙ དཊྛབྦོ. ཨགྒིལཀྑཎཾ ཨུཎྷཏྟཾ. ཏཉྷི ཀཏྠཙི ཀཊྛཱདིཨུཔཱདཱནབྷེདེ ཝིསཾཝཱདཀཾ, ཝིཔརཱིཏཾ, ཨབྷཱུཏཾ ཝཱཀདཱཙིཔི ན ཧོཏི. ‘‘ཛཱཏིདྷམྨཱ ཛརཱདྷམྨཱ, ཨཐོ མརཎདྷམྨིནོ’’ཏི (ཨ. ནི. ༣.༣༩; ༥.༥༧) ཨེཝཾ ཝུཏྟཱ ཛཱཏིཨཱདིཀཱ ལོཀཔཀཏི. ཨེཀཙྩཱནཾ ཏིརཙྪཱནཱནཾ ཏིརིཡཾ དཱིགྷཏཱ, མནུསྶཱདཱིནཾ ཨུདྡྷཾ དཱིགྷཏཱ, ཝུདྡྷིནིཊྛཾ པཏྟཱནཾ པུན ཨཝཌྜྷནནྟི ཨེཝམཱདིཀཱ ཙ ལོཀཔཀཏཱིཏི ཝདནྟི. ཏཙྪཱཝིཔརཱིཏབྷཱུཏབྷཱཝེསུ པཙྪིམོ ཏཐཏཱ. པཋམོ ཨཝིཏཐཏཱ, མཛ྄ཛྷིམོ ཨནཉྙཏཏཱཏི ཨཡམེཏེསཾ ཝིསེསོ,

དུཀྑཱ ¶ ཨཉྙཾ ན བཱདྷཀ ནྟི ཀསྨཱ ཝུཏྟཾ, ནནུ ཏཎྷཱཔི ཛཱཏི ཝིཡ དུཀྑནིམིཏྟཏཱཡ བཱདྷིཀཱཏི? ན, བཱདྷཀཔྤབྷཝབྷཱཝེན ཝིསུཾ གཧིཏཏྟཱ. ཨེཝམྷི པཝཏྟི, པཝཏྟིཧེཏུ ཙ ཨསངྐརཏོ བོདྷིཏཱ ཧོནྟི. ཨཐ ཝཱ ཛཱཏིཨཱདཱིནཾ ཝིཡ དུཀྑསྶ ཨདྷིཊྛཱནབྷཱཝོ, དུཀྑདུཀྑཏཱ ཙ བཱདྷཀཏཱ, ན དུཀྑཔྤབྷཝཏཱཏི ནཏྠི ཏཎྷཱཡ པབྷཝབྷཱཝེན ཝིསུཾ གཧིཏཱཡ བཱདྷཀབྷཱཝཔསངྒོ. ཏེནཱཧ ‘‘དུཀྑཱ ཨཉྙཾ ན བཱདྷཀ’’ནྟི. བཱདྷཀཏྟནིཡཱམེནཱཏི དུཀྑཾ བཱདྷཀམེཝ, དུཀྑམེཝ བཱདྷཀནྟི ཨེཝཾ དྭིདྷཱཔི བཱདྷཀཏྟཱཝདྷཱརནེནཱཏི ཨཏྠོ. བཱདྷཀཏྟནིཡཱམེནཱཏི ཧི བཱདྷཀསྶ, བཱདྷཀཏྟེ ཙ ནིཡཱམེན. ཡཏཱ བཱདྷཀཏྟསྶ དུཀྑེ ནིཡཏཏཱ, ཨེཝཾ དུཀྑསྶ ཙ བཱདྷཀཏྟེ ནིཡཏཏཱཏི.

ཏཾ ཝིནཱ ནཱཉྙཏོཏི སཏིཔི ཨཝསེསཀིལེསཨཝསེསཱཀུསལསཱསཝཀུསལམཱུལཱཝསེསསཱསཝཀུསལདྷམྨཱནཾ ¶ དུཀྑཧེཏུབྷཱཝེ ན ཏཎྷཱཡ ཝིནཱ ཏེསཾ དུཀྑཧེཏུབྷཱཝོ ཨཏྠི, ཏེཧི པན ཝིནཱཔི ཏཎྷཱཡ དུཀྑཧེཏུབྷཱཝོ ཨཏྠི ཀུསལེཧི ཝིནཱ ཨཀུསལེཧི རཱུཔཱཝཙརཱདིཀུསལེཧི ཝིནཱ ཀཱམཱཝཙརཱདཱིཧི ཙ ཏཎྷཱཡ དུཀྑནིབྦཏྟཀཏྟཱ. སནྟབྷཱཝསྶ, སནྟབྷཱཝེ ཝཱ ནིཡཱམོ སནྟབྷཱཝནིཡཱམོ, ཏེན སནྟབྷཱཝནིཡཱམེན. ཏཙྪནིཡྻཱནབྷཱཝཏྟཱཏི དྭིདྷཱཔི ནིཡཱམེན ཏཙྪོ ནིཡྻཱནབྷཱཝོ ཨེཏསྶ, ན མིཙྪཱམགྒསྶ ཝིཡ ཝིཔརཱིཏཏཱཡ, ན ལོཀིཡམགྒསྶ ཝིཡ ཝཱ ཨནེཀནྟིཀཏཱཡ ཨཏཙྪོཏི ཏཙྪནིཡྻཱནབྷཱཝོ, མགྒོ, ཏསྶ བྷཱཝོ ཏཙྪནིཡྻཱནབྷཱཝཏྟཾ, ཏསྨཱ ཏཙྪནིཡྻཱནབྷཱཝཏྟཱ. སབྦཏྠ དྭིདྷཱཔི ནིཡཱམེན ཏཙྪཱཝིཔརཱིཏབྷཱུཏབྷཱཝོ ཝུཏྟོཏི ཨཱཧ ‘‘ཨིཏི ཏཙྪཱཝིཔལླཱསཱ’’ཏིཨཱདི.

༥༣༤. སཙྩསདྡསྶ སམྦྷཝནྟཱནཾ ཨཏྠཱནཾ ཨུདྡྷརཎཾ, སམྦྷཝནྟེ ཝཱ ཨཏྠེ ཝཏྭཱ ཨདྷིཔྤེཏསྶ ཨཏྠསྶ ཨུདྡྷརཎཾ ནིདྡྷཱརཎཾ ཨཏྠུདྭཱརོ. ཝིརཏིསཙྩེཏི མུསཱཝཱདཝིརཏིཡཾ. ན ཧི ཨཉྙཝིརཏཱིསུ སཙྩསདྡོ ནིརུལ༹ྷོ. ཡེ པན ‘‘ཝིརཏིསཙྩཾ སམཱདཱནཝིརཏཱི’’ཏི ཝདནྟི, ཏེསམྤི ན སམཱདཱནམཏྟཾ ཝིརཏིསཙྩཾ, ཨཐ ཁོ སམཱདཱནཱཝིསཾཝཱདནཾ. ཏཾ པན པཊིཉྙཱསཙྩཾ མུསཱཝཱདཝིརཏིཡེཝ ཧོཏི. ‘‘ཨིདམེཝ སཙྩཾ, མོགྷམཉྙ’’ནྟི (མ. ནི. ༢.༡༨༧, ༢༠༢-༢༠༣, ༤༢༧; ༣.༢༧-༢༩) པཝཏྟཱ དིཊྛི ‘‘སཙྩ’’ནྟི ཨབྷིནིཝིསནཝུཏྟིཡཱ དིཊྛིསཙྩཾ. ཨམོསདྷམྨཏྟཱ ནིབྦཱནཾ པརམཏྠསཙྩཾ. ‘‘ཨམོསདྷམྨཾ ནིབྦཱནཾ, ཏདརིཡཱ སཙྩཏོ ཝིདཱུ’’ཏི (སུ. ནི. ༧༦༣) ཧི ཝུཏྟཾ, ཏསྶ པན ཏཾསམྤཱཔཀསྶ ¶ ཙ མགྒསྶ པཛཱནནཱ པཊིཝེདྷོ ཨཝིཝཱདཀཱརཎནྟི དྭཡམྤི ‘‘ཨེཀཾ ཧི སཙྩཾ ན དུཏིཡམཏྠི, ཡསྨིཾ པཛཱ ནོ ཝིཝདེ པཛཱན’’ནྟི ཨིམིསྶཱ (སུ. ནི. ༨༩༠; མཧཱནི. ༡༡༩) གཱཐཱཡ ‘‘སཙྩ’’ནྟི ཝུཏྟཾ.

༥༣༥. ‘‘ནེཏཾ དུཀྑཾ ཨརིཡསཙྩནྟི ཨཱགཙྪེཡྻ, ནེཏཾ ཋཱནཾ ཝིཛྫཏཱི’’ཏི ཨེཏེན ཛཱཏིཨཱདཱིནཾ དུཀྑཨརིཡསཙྩབྷཱཝེ ཨཝིཔརཱིཏཏཾ དསྶེཏི ཨེཀནྟེནེཝ བཱདྷཀབྷཱཝཏོ. ‘‘ཨཉྙཾ དུཀྑཾ ཨརིཡསཙྩནྟི ཨཱགཙྪེཡྻ, ནེཏཾ ཋཱནཾ ཝིཛྫཏཱི’’ཏི ཨིམིནཱ དུཀྑཨརིཡསཙྩབྷཱཝསྶ ཛཱཏིཨཱདཱིསུ ནིཡཏཏཾ དསྶེཏི ཨནཉྙཏྠབྷཱཝཏོ. སཙེཔི ཀཐཉྩི ཀོཙི ཨེཝཾཙིཏྟོ ཨཱགཙྪེཡྻ, པཉྙཱཔནེ པན སཧདྷམྨེན ཉཱཔནེ ཨཏྟནོ ཝཱདསྶ པཏིཊྛཱཔནེ སམཏྠོ ནཏྠཱིཏི དསྶེཏུཾ ‘‘ཨཧམེཏཾ…པེ… པཉྙཔེསྶཱམཱིཏི ཨཱགཙྪེཡྻ, ནེཏཾ ཋཱནཾ ཝིཛྫཏཱི’’ཏི ཝུཏྟཾ. ཛཱཏིཨཱདཱིནཾ ཨནཉྙཐཏཱ ཨཉྙསྶ ཙ ཏཏཱབྷཱུཏསྶ ཨབྷཱཝོཡེཝེཏྠ ཋཱནཱབྷཱཝོ. སཙེཔི ཀོཙི ཨཱགཙྪེཡྻ ཨཱགཙྪཏུ, ཋཱནཾ པན ནཏྠཱིཏི ཨཡམེཏྠ སུཏྟཏྠོ. ཨེས ནཡོ དུཏིཡསུཏྟེཔི. ཏཏྠ པན ¶ ཨཏྟབྷཱཝཔཊིལཱབྷེནེཝ སཏྟཱནཾ ཛཱཏིཨཱདཱིནཾ པཏྟི, སམྨུཁཱིབྷཱཝོ ཙ ཧོཏཱིཏི སམྤཏྟཏྟཱ, པཙྩཀྑཏཱ ཙ པཋམཏཱ, ཡཏོ ཏཾ བྷགཝཏཱ པཋམཾ དེསིཏཾ, ཏནྣིམིཏྟཏཱ དུཏིཡཏཱ, ཏདུཔསམཏཱ ཏཏིཡཏཱ, ཏཾསམྤཱཔཀཏཱ ཙཏུཏྠཏཱཏི དཊྛབྦཱ.

‘‘ཨེཏཔརམཏོ’’ཏི ཨེཏེན ཙཏཱུཧི ཨརིཡསཙྩེཧི པཝཏྟིཨཱདཱིནཾ ཨནཝསེསཔརིཡཱདཱནམཱཧ. ནིབྦུཏིཀཱམེན པརིཛཱནནཱདཱིཧི ཨཉྙཾ ཀིཉྩི ཀིཙྩཾ ཀཱཏབྦཾ ནཏྟི, དྷམྨཉཱཎཀིཙྩཾ ཝཱ ཨིཏོ ཨཉྙཾ ནཏྠི, པརིཉྙེཡྻཱདཱིནི ཙ ཨེཏཔརམཱནེཝཱཏི ཙཏྟཱརིཡེཝ ཝུཏྟཱནི. ཏཎྷཱཡ ཨཱདཱིནཝདསྶཱཝཱིནཾ ཝསེན ཏཎྷཱཝཏྠུཨཱདཱིནཾ ཨེཏཔརམཏཱཡཱཏི ཝུཏྟཾ. ཏཐཱ ཨཱལཡེ པཉྩཀཱམགུཎསངྑཱཏེ, སཀལཝཏྠུཀཱམསངྑཱཏེ, བྷཝཏྟཡསངྑཱཏེ ཝཱ དུཀྑེ དོསདསྶཱཝཱིནཾ ཝསེན ཨཱལཡཱདཱིནཾ ཨེཏེཔརམཏཱཡཱཏི ཝུཏྟཾ.

༥༣༦. ‘‘ཨོལཱ༹རིཀཏྟཱ’’ཏི ཨིདཾ ཛཱཏིཨཱདཱིནཾ དུཀྑབྷཱཝསྶ པཙུརཛནཔཱཀཊཏཱམཏྟཾ སནྡྷཱཡ ཝུཏྟཾ, ན ཨརིཡེན ཉཱཎེན པཊིཝིཛ྄ཛྷིཏབྦཱཀཱརཾ. ཏནྟི དུཀྑཾ. ཨཀཏནྟི ཨནིབྦཏྟིཏཾ, ཨནིཔྥཱདིཏཀཱརཎནྟི ཨདྷིཔྤཱཡོ. ཀཱརཎེ ཧི སིདྡྷེ ཕལཾ སིདྡྷམེཝ ཧོཏི. ‘‘ནེཝ ཨཀཏཾ ཨཱགཙྪཏཱི’’ཏི ཙ ཨིམིནཱ ཨཧེཏུཝཱདཾ ¶ པཊིཀྑིཔཏི. ‘‘ན ཨིསྶརནིམྨཱནཱདིཏོ’’ཏི ཨེཏེན པཛཱཔཏིཔུརིསཔཀཏིཀཱལཱདིཝཱདེ པཊིཀྑིཔཏི. ཡཾ པནེཏྠ ཝཏྟབྦཾ, ཏཾ པརཏོ ཨཱཝི བྷཝིསྶཏི. ‘‘སཧེཏུཀེན དུཀྑེནཱ’’ཏི ཨེཏེན དུཀྑདསྶནེན ཛནིཏསྶ སཾཝེགསྶ སཾཝཌྜྷནམཱཧ. དུཀྑསྶ ཧི སཧེཏུཀབྷཱཝསཝསེན བལཝསཾཝེགོ ཛཱཡཏི ཡཱཝཱཡཾ ཧེཏུ, ཏཱཝ ཨིདཾ དུཀྑཾ ཨཝིཙྪེདེན པཝཏྟཏཱིཏི. ཨསྶཱསཛནནཏྠཾ ནིརོདྷནྟི སཾཝེགཛཱཏསྶ ཨསྶཱསཾ ཛནེཏུཾ ནིརོདྷསཙྩམཱཧ. ནིབྦིནྣསཾསཱརདུཀྑསྶ ཧི ནིརོདྷཀཐཱ ཝུཙྩམཱནཱ ཨཏིཝིཡ ཨཏིཝིཡ ཨསྶཱསཾ སཉྫནེཏི.

༥༣༧. ཡེ ཏེ ཛཱཏིཨཱདཡོ དྷམྨཱ བྷགཝཏཱ ཝུཏྟཱཏི སམྦནྡྷོ. ཀསྨཱ པནེཏྠ བྱཱདྷི ན གཧིཏོཏི? ཨནེཀནྟབྷཱཝཏོ. ཏཐཱ ཧི སོ ཀདཱཙི, ཀེསཉྩི ཙ ནཏྠི. ཡཐཱཧ ‘‘ཏཡོ རོགཱ པུརེ ཨཱསུཾ, ཨིཙྪཱ ཨནསནཾ ཛརཱ’’ཏི (སུ. ནི. ༣༡༣). བཱཀུལཏྟེརཱདཱིནཾ སོ ནཱཧོསིཡེཝ, དུཀྑགྒཧཎེན ཝཱ བྱཱདྷི ཨེཏྠ ཧིཏོཝཱཏི དཊྛབྦཾ. པརམཏྠཏོ ཧི དྷཱཏུཀྑོབྷཔཙྩཡཾ ཀཱཡིཀཾ དུཀྑཾ བྱཱདྷཱིཏི. ཨུཔཱདཱནཀྑནྡྷཔཉྩཀཾ ཨེཀཾ ཀོཊྛཱསཾ ཀཏྭཱ ‘‘དྭཱདས དྷམྨཱ’’ཏི ཝུཏྟཾ. ཀཱམཏཎྷཱབྷཱཝསཱམཉྙེན ཨེཀཛ྄ཛྷཾ ཀཏྭཱ ‘‘དུཀྑསམུདཡོ ཨརིཡསཙྩ’’ནྟི ¶ ཨཉྙེ ཨནྟོགདྷབྷེདེ ཨནཱམསིཏྭཱ ཨེཀརཱུཔེན གཧིཏཱཔི ཏཎྷཱ སསྶཏདིཊྛིསཧགཏཱ, ཨུཙྪེདདིཊྛིསཧགཏཱ, དིཊྛིཝིརཧིཏཱ ཀེཝལཾ ཀཱམསྶཱདབྷཱུཏཱ ཙཱཏི ཏིདྷཱཝ བྷིནྡིཏྭཱ ཝུཏྟཱ. ‘‘ཨཡམེཝ ཨརིཡོ ཨཊྛངྒིཀོ མགྒོ’’ཏི མགྒསཙྩབྷཱཝེན ཨེཀཛ྄ཛྷཾ ཀཏྭཱ ཝུཏྟཱཔི སབྷཱཝཏོ བྷིནྣཱ ཨེཝ ཏེ དྷམྨཱཏི ཨཱཧ ‘‘ཨཊྛ དྷམྨཱ’’ཏི.

སཙྩནིདྡེསཝཎྞནཱ ནིཊྛིཏཱ.

དུཀྑནིདྡེསཀཐཱཝཎྞནཱ

ཛཱཏིནིདྡེསཝཎྞནཱ

བྷཝེཏི ཨཱདཱནནིཀྑེཔཔརིཙྪིནྣོ དྷམྨཔྤབནྡྷོ བྷཝོ, ཏསྨིཾ བྷཝེ. སོ ཧི ཛཱཡཏི ཨེཏྠ ཡོནིགཏིཨཱདིཝིབྷཱགོཏི ཛཱཏཱིཏི ཝུཙྩཏི, ཛཱཡནྟི ཨེཏྠ སཏྟཱ སམཱནནྭཡཱཏི ཛཱཏི, ནིཀཱཡོ. སངྑཏལཀྑཎེཏི ཡཏྠ ཀཏྠཙི ཨུཔྤཱདེ. སོ ཧི ཛནནཊྛེན ཛཱཏི. པཊིསནྡྷིཡནྟི པཊིསནྡྷིཙིཏྟཀྑཎེ ¶ . སམྤཱཏིཛཱཏོཏི ཨེཏྠ ཛཱཏིསདྡེན ལབྦྷམཱནཾ མཱཏུཀུཙྪིཏོ ནིཀྑམནསངྑཱཏཾ ཛཱཡནཏྠཾ སནྡྷཱཡཱཧ ‘‘པསཱུཏིཡ’’ནྟི, ཨབྷིཛཱཏིཡནྟི ཨཏྠོ. ཛཱཡཏི ཨེཏཱཡ ཁཏྟིཡཱདིསམཉྙཱཏི ཛཱཏི, ཀུལཾ.

༥༣༨. སཡནྟི ཨེཏྠཱཏི སེཡྻཱ, མཱཏུཀུཙྪིསངྑཱཏོ གབྦྷོ སེཡྻཱ ཨེཏེསནྟི གབྦྷསེཡྻཀཱ, ཨཎྜཛཱ, ཛལཱབུཛཱ ཙ. ཨིཏརེསནྟི སཾསེདཛཱནཾ, ཨོཔཔཱཏིཀཱནཉྩ. ཨཡམྤི ཙཱཏི ‘‘པཊིསནྡྷིཁནྡྷེསྭེཝཱ’’ཏི ཨནནྟརཾ ཝུཏྟཀཐཱཔི, པགེཝ ‘‘པཊིསནྡྷིཏོ པཊྛཱཡཱ’’ཏི ཝུཏྟཀཐཱཡཾ. ཏེནཱཧ ‘‘ཏེསཾ ཏེསཾ པཋམཔཱཏུབྷཱཝོ ཛཱཏཱི’’ཏི.

ཨུམྨུཛྫནཝསེན གཡ྄ཧཏཱིཏི ཨུམྨུཛྫནཔཙྩུཔཊྛཱནཾ. ཝཀྑམཱནཝིབྷཱགཾ དུཀྑཝིཙིཏྟཏཾ པཙྩུཔཊྛཔེཏཱིཏི དུཀྑཝིཙིཏྟཏཱཔཙྩུཔཊྛཱནཱ.

༥༣༩. ‘‘ཀསྨཱ པནཱ’’ཏི ཝདཏོ ཙོདཀསྶཱཡམདྷིཔྤཱཡོ – ཨེཀནྟདུཀྑེ ནིརཡེ ཏཱཝ ཛཱཏིདུཀྑཱ ཧོཏུ, ཨཉྙཱསུཔི ཝཱ དུགྒཏཱིསུ པཱཔཀམྨསམུཊྛཱནཏོ སུཁསཾཝཏྟནིཡཀམྨསམུཊྛཱནཱསུ ¶ པན སུགཏཱིསུ ཀཐནྟི. ཨིཏརོ ‘‘ནཱཡཾ ཛཱཏི སབྷཱཝདུཀྑཝསེན དུཀྑཱཏི ཝུཏྟཱ, ན ཧི ཀཱཙི པཊིསནྡྷི དུཀྑཝེདནཱསམྤཡུཏྟཱ ཨཏྠི, ཨཐ ཁོ དུཀྑསྶ ཨདྷིཊྛཱནབྷཱཝཏོ’’ཏི དསྶེནྟོ ‘‘ཨནེཀེསཾ དུཀྑཱནཾ ཝཏྠུབྷཱཝཏོ’’ཏིཨཱདིམཱཧ. ཨདུཀྑསབྷཱཝམྤི པརིཡཱཡཏོ དུཀྑནྟི ཝུཙྩཏཱིཏི དུཀྑསབྷཱཝཾ དུཀྑསདྡེན ཝིསེསེཏྭཱ ཝུཏྟཾ ‘‘དུཀྑདུཀྑ’’ནྟི ཡཐཱ རཱུཔརཱུཔནྟི.

དུཀྑུཔྤཏྟིཧེཏུཏོཏི ‘‘ཨཧུ ཝཏ མེ, ཏཾ ཝཏ ནཱཧོསཱི’’ཏི ཙེཏསིཀདུཀྑུཔྤཏྟིཧེཏུཏོ.

‘‘ཡདནིཙྩཾ, ཏཾ དུཀྑ’’ནྟི (སཾ. ནི. ༣.༡༥, ༤༥, ༧༦, ༧༧, ༨༥; ༢.༤.༡, ༤) ཝཙནཏོ ཏེབྷཱུམཀཱ སངྑཱརཱ སངྑཱརདུཀྑཾ, ཏཏྠ ཀཱརཎམཱཧ ‘‘ཨུདཡབྦཡཔྤཊིཔཱལི༹ཏཏྟཱ’’ཏི. ཡཉྷི ཨབྷིཎྷཾ པཊིཔཱིལི༹ཏཾ, ཏཾ དུཀྑམནཏཱཡ དུཀྑནྟི, ཝིཔསྶནཱཙཱརསྶ ཨདྷིཔྤེཏཏྟཱ ཏེབྷཱུམཀགྒཧཎཾ.

དུཀྑདུཀྑནྟི དུཀྑདོམསྶུཔཱཡཱསེ ཝདཏི. ‘‘ཛཱཏིཔི དུཀྑཱ’’ཏིཨཱདིནཱ (ཝིབྷ. ༡༩༠) དུཀྑསཙྩཝིབྷངྒེ ཨཱགཏཾ.

བྷགཝཏཱཔཱིཏི ¶ ཨནཱཝརཎཉཱཎཝཏཱ ཨཙྩརིཡཱཔརིམེཡྻདེསནཱཀོསལླཝཏཱ བྷགཝཏཱཔི. ཨུཔམཱཝསེནཏི ཨངྒཱརཀཱསཱུཔམཱདིཨུཔམཱཝསེན.

༥༤༠. པུཎྜརཱིཀཱདཱིསཱུཏི ཨཱདི-སདྡེན ན མཎིཀནཀརཛཏཔཝཱལཱ༹དིརཏནསནྣིཙྩཡེ, ནཱཔི ཨཎྜཛམེཎྜཛཝཱཡཛཱཏིཀེ སུབྷམནུཉྙསཡནཏལེ, ནཱཔི རཏནམཡཀུཊྚིམམནོཧརེ པཱསཱདཏལེ, ནཱཔི སིཏྟསམྨཊྛཀུསུམོཔཧཱརཝཏི པཱསཱདཱུཔཙཱརེ, ནཱཔི མུཏྟཱཛཱལསདིསཝཱལིཀཱཝིཀིཎྞེ ཝིཝིཊངྒཎེ, ནཱཔི ཧརིཏཀམྦལསདིསམུདུསདྡལསམོཏལེ བྷཱུམིབྷཱགེཏི ཨེཝམཱདཱིནཾ སངྒཧོ དཊྛབྦོ. པརམསམྦཱདྷེཏི ཨཏིཝིཡ སམྦཱདྷེ. ཏིབྦནྡྷཀཱརེཏི བཧལནྡྷཀཱརེ. པིཏྟསེམྷཔུབྦརུཧིརགཱུཐོདརིཡཱདི ནཱནཱཀུཎཔསམྦཱདྷེ. མཱཏཱ ཡདི ཝཱིསཏིཝསྶཱ, ཨཐ ཏིཾས, ཙཏྟཱལཱིསཱདིཝསྶཱ, ཏཏྟཀཾ ཀཱལཾ ཨདྷོཏཝཙྩཀཱུཔསདིསཏཱཡ ཨདྷིམཏྟཛེགུཙྪེ. པཱུཏིམཙྪཱ དི སབྦཾ ན སདིསཱུཔམྨཾ ཏསྶ ཝཱཏཱདིཝསེན ཨེཀཙྩདུགྒནྡྷཱཔགམསབྦྷཱཝཏོ. དས མཱསེཏི ཨཙྩནྟསཾཡོགེ ཨུཔཡོགཝཙནཾ, ཡེབྷུཡྻཝསེན ཝུཏྟཾ ཏཏོ བྷིཡྻོཔི ཨེཀཙྩཱནཾ ཏཏྠཱཝཊྛཱནསམྦྷཝཏོ ¶ . ཨཏྟནོ ཨདྷོམུཁཾ ཋཔིཏསངྐུཙིཏཧཏྠདྭཡསྶ ཨུཀྐུཊིཀསྶེཝ ནིསཱིདཏོ སམིཛྫནཔྤསཱརཎཱདིརཧིཏོ.

ཨབྷིམུཁཾ ཀཌྜྷནཾ ཨཱཀཌྜྷནཾ. པརིཏོ སམནྟཏོ ཀཌྜྷནཾ པརིཀཌྜྷནཾ. ཧེཊྛཱ དྷུནནཾ ཨོདྷཱུནནཾ. ནིདྷཱཡ ནིདྷཱཡ དྷཱུནནཾ ནིདྡྷཱུནནཾ. ཨཱཀཌྜྷནཱདིསདིསཉྩེཏྠ ‘‘ཨཱཀཌྜྷནཱདཱི’’ཏི ཝུཏྟཾ. ཏརུཎཝཎསདིསཾ ཨཏིཝིཡ སུཁུམཱལཾ གབྦྷགཏཾ སརཱིརཾ སཱིཏཱདིཨཔྤཀམྤི ན སཧཏཱིཏི སཱིཏནརཀཱུཔཔནྣཏཱདི ནིདསྶིཏཾ. ཏཉྷི ཏསྶ ཨཏིཝིཡ སཱིཏཾ, ཨཏིཝིཡ ཨུཎྷཉྩ ཧུཏྭཱ ཨུཔཏིཊྛཏི. སརཱིརཾ ཝཱསིཡཱདཱིཧི ཏཙྪེཏྭཱ ཁཱརཱཝསེཙནཀརཎཾ ཁཱརཱཔཊིཙྪཀཾ. དུཀྑུཔྤཏྟིཊྛཱནེཏི གབྦྷཱསཡསཉྙིཏཾ ཏཏིཡཾ ཨཱཝཊྚཾ སནྡྷཱཡཱཧ.

པརིཝཏྟེཏྭཱཏི ཨུདྡྷཾཔཱདཨདྷོསཱིསབྷཱཝེན པརིཝཏྟེཏྭཱ. ཨིདཾ ཝིཛཱཡནམཱུལཀཾ དུཀྑཾ, ཡེན མརཎདུཀྑེན ཙ ཨཊྚིཏཱ ཝེདནཱཔྤཏྟཱ སཏྟཱ ཀཏིཔཡམཱསམཏྟཱཏིཀྐནྟམྤི པཝཏྟིཾ ཝིསྶརནྟི, མཧནྡྷཀཱརཾ མཧཱཝིདུགྒཾ པཀྑནྡྷཱ ཝིཡ ཧོནྟི.

ཝདྷེནྟསྶཱཏི ¶ སོཙནཔརིདེཝནསཱིསཔཊིཧནནཱདིནཱ བཱདྷེནྟསྶ. ཁུཔྤིཔཱསཱ ཧི ཨཱཏཔཱཝཊྛཱནཱདིནཱ ཙ ཨཱཏཱཔནཾ. པཉྩགྒིཏཱཔནཱདིནཱ པརིཏཱཔནཾ.

ཨིམསྶཱཏི ཡཐཱཝུཏྟསྶ སཏྟཝིདྷསྶ. སབྦསྶཱཔཱིཏི གབྦྷཀཱལཱདཱིསུ ཏཱཔནམདྡནཱདིནིརཡགྒིདཱཧཱདིསཉྫནིཏསྶ སཀལསྶཱཔི. ཝཏྠུམེཝ ཧོཏི ཏདབྷཱཝེ ཨབྷཱཝཏོ. ཏེནེཝཱཧ ‘‘ཛཱཡེཐ ནོ ཙེ’’ཏིཨཱདི.

༥༤༡. ཝིཙིཏྟནྟི ཝིཝིདྷཾ, ཨཙྪརིཡཾ ཝཱ.

ཨིཏི ཛཱཏིནིདྡེསཝཎྞནཱ.

ཛརཱནིདྡེསཝཎྞནཱ

༥༤༢. སངྑཱཏལཀྑཎནྟི ¶ ‘‘ཋིཏསྶ ཨཉྙཐཏྟ’’ནྟི (སཾ. ནི. ༣.༣༨; ཨ. ནི. ༣.༤༧; ཀཐཱ. ༢༡༤) ཝུཏྟཾ ཁཎིཀཛརཾ སནྡྷཱཡཱཧ. ཁཎྜིཙྩཱདིསམྨཏོཏི ཁཎྜིཙྩཔཱལིཙྩཝལིཏྟཙཏཱདིནཱ སམཉྙཏོ. སཱཏི ཁནྡྷཔུརཱཎབྷཱཝསཉྙིཏཱ པཱཀཊཛརཱ. ཁནྡྷཔརིཔཱཀོ ཨེཀབྷཝཔརིཡཱཔནྣཱནཾ ཁནྡྷཱནཾ པུརཱཎབྷཱཝོ.

ཨིཏི ཛརཱནིདྡེསཝཎྞནཱ.

མརཎནིདྡེསཝཎྞནཱ

༥༤༣. སངྑཏལཀྑཎནྟི སངྑཱརཱནཾ ཝཡསཉྙིཏཾ ཁཎིཀམརཎམཱཧ. ཡཾ སནྡྷཱཡཱཏི ཡཾ ཁཎིཀམརཎཾ སནྡྷཱཡ, ‘‘ཛརཱམརཎཾ དྭཱིཧི ཁནྡྷེཧི སངྒཧིཏ’’ནྟི (དྷཱཏུ. ༧༡) ཨེཏྠ ‘‘མརཎ’’ནྟི ཝུཏྟནྟི ཨཏྠོ. ཏནྟི ཛཱིཝིཏིནྡྲིཡུཔཙྩེདསཉྙིཏཾ པཱཀཊམརཎཾ. ‘‘ཙཝན’’ནྟི ལཀྑིཏབྦཏཱཡ ཙུཏིལཀྑཎཾ. ཝིཡོགརསནྟི ཡཐཱདྷིགཏེཧི སཏྟསངྑཱརེཧི ཝིཡོཛནརསཾ. ཡཐཱུཔཔནྣཱཡ གཏིཡཱ ཝིཔྤཝཱསཝསེན གཡ྄ཧཏཱིཏི གཏིཝིཔྤཝཱསཔཙྩུཔཊྛཱནཾ.

པཱཔསྶཱཏི པཱཔཡོགེན པཱཔསྶ, ཨུཔཙིཏཔཱཔཀམྨསྶཱཏི ཨཏྠོ. པཱཔཀམྨཱདིནིམིཏྟནྟི པཱཔཀམྨཀམྨནིམིཏྟགཏིནིམིཏྟསངྑཱཏཾ མརཎཀཱལེ ཨུཔཊྛིཏཾ ¶ ཨཀུསལཝིཔཱཀཱརམྨཎཾ. ཏམྷི པསྶནྟསྶེཝ ཀསྶཙི ཨནུབྷཝནྟསྶ ཝིཡ མཧཱདུཀྑཾ ཧོཏི. བྷདྡསྶཱཏི བྷདྡཀམྨསྶ, ཀཏཀུསལསྶཱཏི ཨཏྠོ. ཏསྶ པན ཀཱམཾ ཨིཊྛམེཝ ཨཱརམྨཎཾ ཨུཔཊྛཱཏི, པིཡཝིཔྤཡོགཝཏྠུཀཾ པན མཧནྟཾ དུཀྑཾ ཨཱརམྨཎཾ ཨུཔཊྛཱཏི, པིཡཝིཔྤཡོགཝཏྠུཀཾ པན མཧནྟཾ དུཀྑཾ ཨུཔྤཛྫཏཱིཏི ཨཱཧ ‘‘ཨསཧནྟསྶ ཝིཡོགཾ པིཡཝཏྠུཀ’’ནྟི. ཨཝིསེསཏོཏི པཱཔསྶ, བྷདྡསྶ ཙ སཱམཉྙཏོ. ‘‘ཨཝིསེསཏོ’’ཏི ཝཏྭཱཔི ‘‘སབྦེས’’ནྟི ཝཙནཾ ཏཾ ཨིདཾ དུཀྑཾ པརིམདྡིཏསངྑཱརཱནཾ ཨེཀཙྩཱནཾ ཁཱིཎཱསཝཱནམྤི ཧོཏིཡེཝཱཏི དསྶནཏྠཾ. ཝིཏུཛྫམཱནམམྨཱནནྟི སནྡྷིབནྡྷནཱཝཙྪེདཀཝཱཡུནཱ ཝིཛ྄ཛྷིཡམཱནམམྨཊྛཱནཱནཾ.

ཨིཏི མརཎནིདྡེསཝཎྞནཱ.

སོཀནིདྡེསཝཎྞནཱ

༥༤༤. སོཏི ¶ སོཀོ. ཨཏྠཏོ དོམནསྶམེཝ ཧོཏི ཙེཏསིཀནྟརཱབྷཱཝཏོ. དོམནསྶཝིསེསོ པན ཧོཏི ཝིསཡཝིསེསེ པཝཏྟིཨཱཀཱརཝིསེསསབྦྷཱཝཏོཏི ཏཾ ཝིསེསཾ ལཀྑཎཱདིཏོ དསྶེཏུཾ ‘‘ཨེཝཾ སནྟེཔཱི’’ཏིཨཱདི ཝུཏྟཾ. ཨནྟོ ནིཛ྄ཛྷཱནཾ ཙིཏྟསནྟཱཔོ. པརིཛ྄ཛྷཱཔནཾ རཱགདོསཔརིལཱ༹ཧཝིསིཊྛཾ དཧནཾ. ཀཏཱཀཏཀུསལཱཀུསལཝིསཡཾ ཝིཔྤཊིསཱརཱཀཱརེན པཝཏྟཾ ཨནུསོཙནཾ ཀུཀྐུཙྩཾ, ཉཱཏིབྱསནཱདིཝིསཡཾ ཀེཝལཾ ཙིཏྟསནྠཱཔབྷཱུཏཾ ཨནུསོཙནཾ སོཀོཏི ཨནུསོཙནཔཙྩུཔཊྛཱནཏྟེཔི ཨཡམེཏེསཾ ཝིསེསོ.

ཝིསཔཱིཏཾ སལླཾ ཝིསསལླཾ. སོཀཝསེན ཨཏིསཱརཱདི བྱཱདྷིཔི ཧོཏི, སོཀབཧུལསྶ སརཱིརཾ ན ཙིརསྶེཝ ཛཱིརཏི, བལཝསོཀཱབྷིབྷཱུཏོ མརཎམྤི པཱཔུཎཱཏཱིཏི ཨཱཧ ‘‘སམཱཝཧཏི ཙ བྱཱདྷིཛརཱམརཎབྷེདན’’ནྟི.

ཨིཏི སོཀནིདྡེསཝཎྞནཱ.

པརིདེཝནིདྡེསཝཎྞནཱ

༥༤༥. ཝཙཱིཔལཱཔོཏི ཝཱཙཱཝིཔྤལཱཔོ, སོ ཨཏྠཏོ སདྡོ ཨེཝ. བྷིཡྻོཏི སོཀདུཀྑཏོ ཨུཔརི. སོཀསམུཊྛཱནོ ཧི པརིདེཝོ.

ཨིཏི པརིདེཝནིདྡེསཝཎྞནཱ.

དུཀྑནིདྡེསཝཎྞནཱ

༥༤༦. ཛཱཏིཨཱདཱིནམྤི ¶ ཡཐཱརཧཾ དུཀྑཝཏྠུདུཀྑདུཀྑཏཱཧི སཏིཔི དུཀྑབྷཱཝེ ཀཱཡསྶ པཱིལ༹ནཝསེན ཨིདཾ སཝིསེསཾ དུཀྑམནྟི ཨཱཧ ‘‘དུཀྑནྟི ཝིསེསཏོ ཝུཏྟ’’ནྟི.

ཨིཏི དུཀྑནིདྡེསཝཎྞནཱ.

དོམནསྶནིདྡེསཝཎྞནཱ

༥༤༧. མནོཝིགྷཱཏརསནྟི ¶ བྱཱཔཱདསམྤཡོགཝསེན མནསོ ཝིཧཉྙནཀིཙྩཾ. ཙེཏོདུཀྑསམཔྤིཏཱཏི ཙེཏསིཀདུཀྑསམངྒིནོ. ཨཱཝཊྚནྟཱིཏི ཨཱམུཁཾ ཝཊྚནྟི, ཡཾདིསཱབྷིམུཁཾ པཏིཏཱ, ཏཾདིསཱབྷིམུཁཱ ཨེཝ ཝཊྚནྟི. ཝིཝཊྚནྟཱིཏི ཝིཔརིཝཏྟནཝསེན ཝཊྚནྟི. ཨུདྡྷཾཔཱདཾ པཔཏནྟཱིཏི ཨུདྡྷཾམུཁཔཱདཱ ཧུཏྭཱ པཏནྟི. སཏྠཾ ཨཱཧརནྟཱིཏི ཨཏྟནོ སརཱིརསྶ ཝིཛ྄ཛྷནབྷེདནཝསེན སཏྠཾ ཨུཔནེནྟི.

ཨིཏི དོམནསྶནིདྡེསཝཎྞནཱ.

ཨུཔཱཡཱསནིདྡེསཝཎྞནཱ

༥༤༨. དོསོཡེཝཱཏི ཀཱཡཙིཏྟཱནཾ ཨཱཡཱསནཝསེན དོསསྶེཝ པཝཏྟིཨཱཀཱརོཏི ཨཏྠོ, ཡཏོ བྷུསོ ཨཱཡཱསོཏི ཨུཔཱཡཱསོཏི ཝུཙྩཏི ཡཐཱ བྷུསམཱདཱནཾ ཨུཔཱདཱནནྟི. ཨེཀོ དྷམྨོཏི ཙུདྡསཧི ཨཀུསལཙེཏསིཀེཧི ཨཉྙོ ཨེཀོ ཙེཏསིཀདྷམྨོ, ཡཾ ‘‘ཝིསཱདོ’’ཏི ཙ ཝདནྟི. ནིཏྠུནནཝསེན སམྤཛྫནཏོ ནིཏྠུནནརསོ, ཀཱཡེ ཝཱ ནིཏྠུནནཀརཎཀིཙྩོ. ‘‘སངྑཱརདུཀྑབྷཱཝཏོ’’ཏི ཝཏྭཱ སོ པནེཏྠ སཱཏིསཡོཏི དསྶེནྟོ ‘‘ཙིཏྟཔརིདཧནཏོ, ཀཱཡཝིསཱདནཏོ ཙཱ’’ཏི ཨཱཧ.

ཨེཏེ ཙ སོཀཔརིདེཝུཔཱཡཱསཱ ཝིཉྙཏྟིཡཱ ཝིནཱ, སཧ ཙ ཡཐཱཔཙྩཡཾ དོམནསྶཙིཏྟུཔྤཱདསྶ པཝཏྟིཨཱཀཱརཝིསེསོཏི དསྶེཏུཾ ‘‘ཨེཏྠ ཙཱ’’ཏིཨཱདི ཝུཏྟཾ. ཏཏྠ པཱཀོ ཝིཡཱཏི རཛནཱདིནོ པཙིཏབྦཝཏྠུནོ པཱཀོ ཝིཡ.

ཨིཏི ཨུཔཱཡཱསནིདྡེསཝཎྞནཱ.

ཨཔྤིཡསམྤཡོགནིདྡེསཝཎྞནཱ

༥༤༩. སམོདྷཱནཾ ¶ ¶ སམཱགམོ. ཀཱཡིཀདུཀྑཙིཏྟཝིགྷཱཏཱདིཨནཏྠཱནཾ ཨཏྠིབྷཱཝསྶ པཙྩུཔཊྛཱནོ ཨནཏྠབྷཱཝཔཙྩུཔཊྛཱནོ.

ཏེསཾ ཨཔྤིཡཱནཾ ཀཱཡིཀཝཱཙསིཀཔཡོགསངྑཱཏོ ཨུཔཀྐམོ ཏདུཔཀྐམོ, ཏཏོ སམྦྷཱུཏོ ཏདུཔཀྐམསམྦྷཱུཏོ.

ཨིཏི ཨཔྤིཡསམྤཡོགནིདྡེསཝཎྞནཱ.

པིཡཝིཔྤཡོགནིདྡེསཝཎྞནཱ

༥༥༠. ཨུཔདྡཝབྷཱཝེན པཙྩུཔཏིཊྛཏཱིཏི བྱསནཔཙྩུཔཊྛཱནོ.

ཨིཏི པིཡཝིཔྤཡོགནིདྡེསཝཎྞནཱ.

ཨིཙྪིཏཱལཱབྷནིདྡེསཝཎྞནཱ

༥༥༡. ཨིཙྪིཏཱལཱབྷོ ནཱམ ཡསྶ ཀསྶཙི ཨཏྟནཱ ཨིཙྪིཏསྶ ཝཏྠུནོ ཨལཱབྷོ. ‘‘ཡམྤིཙྪཾ ན ལབྷཏཱི’’ཏི ཧི ཝུཏྟཾ. མཏྠཀཔྤཏྟཾ པན ཨིཙྪིཏཱལཱབྷཾ དསྶེཏུཾ པཱལི༹ཡཾ ‘‘ཛཱཏིདྷམྨཱནཾ སཏྟཱན’’ནྟིཨཱདིནཱ ནིདྡིཊྛནྟི ཏམེཝ དསྶེཏུཾ ‘‘ཨཧོ ཝཏཱ’’ཏིཨཱདི ཝུཏྟཾ. ཨིཙྪཱཝཱཏི ཨེཏྠ ཨིཙྪཱསཧིཏོ ཨལཱབྷོཝཱཏི ཙ ཝདནྟི. ཏཔྤརིཡེསནརསཱཏི ཏེསཾ ཨལབྦྷནེཡྻཝཏྠཱུནཾ པརིཡེསནརསཱ. ཨཔྤཏྟི ཨལཱབྷོ.

ཨིཏི ཨིཙྪིཏཱལཱབྷནིདྡེསཝཎྞནཱ.

པཉྩུཔཱདཱནཀྑནྡྷནིདྡེསཝཎྞནཱ

༥༥༢. ཡཾ ¶ ཝུཏྟམིདྷཱཏི ཨིདྷ སཙྩནིདྡེསེ ཡཾ སརཱུཔཏོ ཝུཏྟཾ. ཨཝུཏྟནྟི ཨཉྙཏྠ དུཀྑཀྑནྡྷབཱལཔཎྜིཏསུཏྟཱདཱིསུ ཝུཏྟམྤི ཨིདྷ སརཱུཔཏོ ཨཝུཏྟཾ. ཏཉྩ སབྦཾ ཨིམེ ཨུཔཱདཱནཀྑནྡྷེ ཝིནཱ ན ལབྦྷཏཱིཏི ཏཏྠ ཁནྡྷསནྣིསྶཡམེཝ དུཀྑཾ ཁནྡྷེ ཝིབཱདྷཏཱིཏི དསྶེཏུཾ ‘‘ཨིནྡནམིཝ པཱཝཀོ’’ཏི ཝུཏྟཾ. ཡཐཱ ¶ ཝཱ ལཀྑཾ པཧརཎཔཧཱརསྶ ཝཏྠུ, ཨེཝཾ ཁནྡྷཱ སཾསཱརདུཀྑསྶ. ཡཐཱ ཙ གོརཱུཔཾ ཌཾསམཀསཱདིཝིབཱདྷཱཡ, ཡཐཱ ཙ ཁེཏྟཾ ནིཔྥནྣསསྶལཱཡནསྶ, གཱམོ ཙ གཱམགྷཱཏཀཝིབཱདྷཱཡ, ཨེཝཾ ཁནྡྷཱ ཛཱཏིཨཱདིདུཀྑསྶ ཝཏྠཱུཏི དསྶེཏུཾ ‘‘ལཀྑམིཝཱ’’ཏིཨཱདི ཝུཏྟཾ. ཡེབྷུཡྻེན ལོཀེ ཝིབཱདྷཀཱ ཝིབཱདྷེཏབྦཱདྷཱིནཱ ན ཧོནྟི, ཨིམེ པན ཝིབཱདྷེཏབྦཱདྷཱིནཱ ཨེཝཱཏི དསྶེཏུཾ ‘‘ཏིཎལཏཱདཱིནཱི’’ཏི ཝུཏྟཾ. ཀཱམཾ ཨནཱདིམཏི སཾསཱརེ ཨཱདི ནཱམ ཀསྶཙི ནཏྠི, ཨེཀབྷཝཔརིཙྪིནྣསྶ པན ཁནྡྷསནྟཱནསྶ ཝསེན ཝུཏྟཾ ‘‘ཨཱདིདུཀྑཾ ཛཱཏཱི’’ཏི. ཏེནེཝཱཧ ‘‘པརིཡོསཱནདུཀྑཾ མརཎ’’ནྟི. ན ཧེཏྠ སམུཙྪེདམརཎམེཝ ཨདྷིཔྤེཏཾ. མརཎསྶ ཨནྟིཀེ ཨཱསནྣེ ཛཱཏཾ དུཀྑཾ མཱརཎནྟིཀདུཀྑཾ. པརིདཡ྄ཧནཾ ཙིཏྟསནྟཱཔོ. ལཱལཔྤནཾ ཨཏིཝིཡ ཝིཔྤལཱཔོ. ཨནུཏྠུནནཾ ཨནྟོ ནིཛ྄ཛྷཱཡནཾ. ཨེཀམེཀནྟི ཛཱཏིཨཱདཱིནཾ ཨནྟརབྷེདབྷིནྣཱནཾ, ཛཱཏིཨཱདཱིནམེཝ ཝཱ ཨུཔཱདཱནཀྑནྡྷཔཉྩཀཱནཾ ཝཱ ཨེཀམེཀཾ. སངྑིཔིཏྭཱཏི སམཱསེཏྭཱ, སཱམཉྙནིདྡེསེན ཝཱ སངྑེཔཾ ཀཏྭཱ.

ཨིཏི དུཀྑནིདྡེསཀཐཱཝཎྞནཱ.

སམུདཡནིདྡེསཀཐཱཝཎྞནཱ

༥༥༣. པུནབྦྷཝཀརཎཾ པུནབྦྷཝོ ཨུཏྟརཔདལོཔེན, ཡཐཱ ཝཱ ཨཔཱུཔབྷཀྑནསཱིལོ ཨཱཔཱུཔིཀོ, ཨེཝཾ པུནབྦྷཝཀརཎསཱིལཱ, པུནབྦྷཝཾ ཝཱ ཕལཾ ཨརཧཏི, སོ ཝཱ ཨེཏིསྶཱ པཡོཛནནྟི པོནོབྷཝིཀཱ. ནནྡནཏོ, རཉྫནཏོ ཙ ནནྡཱིརཱགབྷཱཝཾ སབྦཱསུ ཨཝཏྠཱསུ ཨཔཙྩཀྑཱཡ ཝུཏྟིཡཱ ནནྡཱིརཱགསཧགཏཱ. ཏཱཡ ཙ སཏྟཱ ཏཏྠ ཏཏྠ བྷཝཱདིཀེ ཀིམིཀཱིཊཔཊངྒཱདིཨཏྟབྷཱཝེཔི ནནྡནྟི, རཱུཔཱབྷིནནྡནཱདིབྷཱུཏཱཡ རཉྫནྟི ཙཱཏི ཏཏྲཏཏྲཱབྷིནནྡིནཱི. ཏེནཱཧ ‘‘ནནྡཱིརཱགེན སཧགཏཱ’’ཏིཨཱདི. ཏབྦྷཱཝཏྠོ ཧི ཨེས སཧགཏསདྡོ. ཀཱམབྷཝཝིབྷཝབྷེདཝསེན ¶ པཝཏྟིཡཱ ཀཱམཏཎྷཱ, བྷཝཏཎྷཱ, ཝིབྷཝཏཎྷཱ ཙ ཝེདིཏབྦཱ. ཀཱམཏཎྷཱདིབྷེདཾ ཨནཱམསིཏྭཱ ཀེཝལཾ ཏཎྷཱབྷཱཝེནེཝ ཨེཀབྷཱཝགྒཧཎེན ཨེཀཏྟཾ ཨུཔནེཏྭཱ ཀསྶཙིཔི སཏྟསྶ ཀེནཙི སདིསཏཱབྷཱཝཏོ ཏཾཏཾཝིཙིཏྟབྷཱཝཛནཀཀམྨནིཔྥཱདནེན ¶ ཨཏིཝིཙིཏྟསབྷཱཝཱ སཀལསྶ དུཀྑསྶ ཧེཏུབྷཱཝཏོ དུཀྑསམུདཡོ ཨརིཡསཙྩཾ.

ཀསྨཱ པནེཏྠ ཏཎྷཱཝ སམུདཡསཙྩཾ ཝུཏྟཱཏི? ཝིསེསཧེཏུབྷཱཝཏོ. ཨཝིཛྫཱ ཧི བྷཝེསུ ཨཱདཱིནཝཾ པཊིཙྪཱདེནྟཱི, དིཊྛིཨཱདིཨུཔཱདཱནཉྩ ཏཏྠ ཏཏྠ ཨབྷིནིཝིསམཱནཾ ཏཎྷཾ ཨབྷིཝཌྜྷེནྟཱི དོསཱདཡོཔི ཀམྨསྶ ཀཱརཎཾ ཧོནྟི, ཏཎྷཱ པན ཏཾཏཾབྷཝཡོནིགཏིཝིཉྙཱཎཊྛིཏིསཏྟཱཝཱསསཏྟནིཀཱཡཀུལབྷོགིསྶརིཡཱདིཝིཙིཏྟཏཾ ཨབྷིཔཏྠེནྟཱི, ཀམྨཝིཙིཏྟཏཱཡ ཨུཔནིསྶཡཏཾ ཀམྨསྶ ཙ སཧཱཡབྷཱཝཾ ཨུཔགཙྪནྟཱི བྷཝཱདིཝིཙིཏྟཏཾ ནིཡམེཏི, ཏསྨཱ དུཀྑསྶ ཝིསེསཧེཏུབྷཱཝཏོ ཨཉྙེསུཔི ཨཝིཛྫཱཨུཔཱདཱནཀམྨཱདཱིསུ སུཏྟེ (དཱི. ནི. ༢.༤༠༠; མ. ནི. ༡.༡༣༣; ༣.༣༧༤) ཨབྷིདྷམྨེ (ཝིབྷ. ༢༠༣) ཙ ཨཝསེསཀིལེསཱཀུསལམཱུལཱདཱིསུ ཝུཏྟེསུ དུཀྑཧེཏཱུསུ ཝིཛྫམཱནེསུ ཏཎྷཱཝ སམུདཡསཙྩནྟི ཝུཏྟཱཏི ཝེདིཏབྦཾ.

ཨིཏི སམུདཡནིདྡེསཀཐཱཝཎྞནཱ.

ནིརོདྷནིདྡེསཀཐཱཝཎྞནཱ

༥༥༤. ཏསྶཱཡེཝཱཏི ཡདགྒེན ཏཎྷཱ སམུདཡསཙྩནྟི ཝུཏྟཱ, ཏདགྒེན ཏསྶཱཡེཝཱཏི ཨཝདྷཱརཎཾ. སཏི ཧི པདྷཱནཧེཏུནིརོདྷེ ཏདཉྙཧེཏཱུ ནིརུདྡྷཱཡེཝ ཧོནྟཱིཏི བྱཱདྷིནིམིཏྟཝཱུཔསམནེན བྱཱདྷིཝཱུཔསམོ ཝིཡ ཧེཏུནིརོདྷེན ཕལནིརོདྷོཏི ཨཱཧ ‘‘སམུདཡནིརོདྷེན དུཀྑནིརོདྷོ’’ཏི. ན ཨཉྙཐཱཏི ཡཐཱཝུཏྟསྶ ཨཏྠསྶ ཨེཀནྟིཀཏཾ དསྶེཏི.

ཨནུཔདྡཝེཏི པཱཎཀཝིཛ྄ཛྷནསཏྠཔྤཧཱརཱདིཨུཔདྡཝརཧིཏེ. ཏཏོ ཨེཝ དལ༹ྷེ ཐིརེ. སཱཁཱདིཚེདནེན ཚིནྣོཔི. ཏཎྷཱནུསཡེཏི ཀཱམརཱགབྷཝརཱགཱནུསཡེ. ཨནཱུཧཏེཏི ཨསམུཔགྷཱཊིཏེ.

ཡཐཱ སཱིཧོ ཡེནཏྟནི སརོ ཁིཏྟོ, ཏཏྠེཝ ཨཏྟནོ བལཾ དསྶེཏི, ན སརེ, ཏཐཱ བུདྡྷཱནཾ ཀཱརཎེ ¶ པཊིཔཏྟི, ན ཕལེ. ཡཐཱ པན སཱརམེཡྻཱ ཀེནཙི ལེཌྜུཔྤཧཱརེ དིནྣེ བྷུསྶནྟཱ ལེཌྜུཾ ཁཱདནྟི, ན ¶ པཧཱརདཱཡཀེ ཨུཊྛཧནྟི, ཨེཝཾ ཨཉྙཏིཏྠིཡཱ དུཀྑཾ ནིརོདྷེཏུཀཱམཱ ཀཱཡཙྪེདམནུཡུཉྫནྟི, ན ཀིལེསནིརོདྷནནྟི ཨིམམཏྠཾ དསྶེཏུཾ ‘‘སཱིཧསམཱནཝུཏྟིནོ’’ཏིཨཱདི ཝུཏྟཾ.

༥༥༥. ཝིརཛྫཏི པལུཛྫཏི ཚིཛྫཏི སམུདཡོ ཨེཏེནཱཏི ཝིརཱགོ ཝུཙྩཏི མགྒོ. ཝིརཛྫནཾ པལུཛྫནཾ སམུཙྪིནྡནཾ ཝིརཱགོཏི པཧཱནཾ ཝུཙྩཏི. ཏསྨཱཏི ཡསྨཱ པཧཱནཔརིཡཱཡོ ཝིརཱགསདྡོ, ནིརོདྷསདྡོ ཙ, ཏསྨཱ. ཨནུསཡསམུགྒྷཱཏཏོ ཨསེསོ ཝིརཱགོ ཨསེསོ ནིརོདྷོཏི སམྦནྡྷནཱིཡཾ. ཙཱགཱདིཔདཱནིཔི གཧེཏྭཱ ཝདཏི སབྦཱནེཝ ཨེཏཱནཱིཏི. ཡསྨཱ ནིབྦཱནཾ ཝུཙྩཏི, ན དུཀྑསྶ ནིརུཛ྄ཛྷནམཏྟཾ, ཏསྨཱ ཏཎྷཱཡ ཨསེསཝིརཱགནིརོདྷཱདིཔདཱནིཔི ནིབྦཱནཝེཝཙནཱནཱིཏི. ཝུཏྟམེཝཏྠཾ སམཏྠེཏི ‘‘ཡསྨཱ པནཱ’’ཏིཨཱདི. ཡཐཱ ཝིརཱགཱདིཔདཱནི ནིབྦཱནེ ཡུཛྫནྟི, ཏཾདསྶནཾ. ཏཏྠ ཏཾ ཨཱགམྨཱཏི ཏཾ ནིབྦཱནཾ ཨཱརམྨཎཀརཎཝསེན པཏྭཱ. ཏཎྷཱ ཝིརཛྫཏཱིཏི ཨརིཡམགྒེན ཨཙྩནྟཝིརཱགཝསེན ཏཎྷཱ ཝིརཛྫཱིཡཏི. ནིརུཛ྄ཛྷཏཱིཏི ནིརོདྷཱིཡཏི, ཏེན ཝིརཱགནིརོདྷསདྡཱནཾ ཨདྷིཀརཎསཱདྷནཏམཱཧ. ཏདེཝཱཏི ནིབྦཱནམེཝ. ཙཱགཱདཡོ ཧོནྟཱིཏི ཙཱགཱདིཧེཏུཾ ཕལཝོཧཱརེན ཝདཏི. ‘‘ཀཱམགུཎཱལཡེསཱུ’’ཏི པོཏྠཀེསུ ལིཁནྟི, ‘‘ཀཱམགུཎཱལཡཱདཱིསཱུ’’ཏི པན པཱཋོ.

༥༥༦. ཏཡིདནྟིཨཱདི ན པོརཱཎཔཱཋོ, སཙྩཏྠདཱིཔནེ པན ཝུཏྟནིཡཱམེན ཏཏོ ཨཱནེཏྭཱ པཙྪཱ ཋཔིཏཾ. ཏཐཱ ཧི པུབྦེ ཝུཏྟཱནིཔི ལཀྑཎཱདཱིནི པུནཔི ཝུཏྟཱནི. སཾསཱརདུཀྑཏོ ནིབྦིནྣམཱནསསྶ ཨསྶཱསཾ ཀརོནྟོ ཝིཡ ཧོཏཱིཏི ཨསྶཱསཀརཎརསཾ. རཱགཱདིསབྦཔཔཉྩཝཱུཔསམནིམིཏྟཏཱཡ ནིཔྤཔཉྩཏཾ པཙྩུཔཊྛཔེཏཱིཏི ནིཔྤཔཉྩཔཙྩུཔཊྛཱནཾ.

༥༥༧. ནཏྠེཝ ནིབྦཱནནྟི ཡདི སཱམཉྙཏོ པཊིཉྙཱ, ཨཏྟནཱ ཨདྷིཔྤེཏནིབྦཱནསྶཔི ཨབྷཱཝོ ཨཱཔཛྫཏི, ཏཐཱ སཏི པཊིཉྙཱཝིརོདྷོ. ཨཐ པརཱབྷིམཏཾ ནིབྦཱནཾ པཏི, ཨེཝཾ སཏི དྷམྨིཨསིདྡྷི, ཏཏོ ཙ ནིསྶཡཱསིདྡྷོ ཧེཏུ. ཨནུཔལབྦྷནཱིཡཏོཏི ཀིཾ པཙྩཀྑཏོ, ཨུདཱཧུ ཨནུམཱནཏོ? པུརིམསྨིཾ པཀྑེ ཙཀྑཱདཱིཧི ཨནེཀནྟིཀཏཱ, དུཏིཡསྨིཾ པརཾ པཏི ཨསིདྡྷོ ཧེཏུ. ཏེནཱཧ ‘‘ན, ཨུཔཱཡེན ཨུཔལབྦྷནཱིཡཏོ’’ཏིཨཱདི. ཏཏྠ ཡཐཱ ཙེཏོཔརིཡཉཱཎལཱབྷིནོ ཨེཝ ཨརིཡཱ པརེསཾ ལོཀུཏྟརཙིཏྟཾ ཛཱནནྟི, ཏཏྠཱཔི ཙ ཨརཧཱ ཨེཝ སབྦེསཾ, ན སབྦེ, ཨེཝཾ ནིབྦཱནམྤི ¶ ¶ སཱིལསམཱདྷིཔཉྙཱསངྑཱཏསམྨཱཔཊིཔཏྟིབྷཱུཏེན ཨུཔཱཡེན ཨུཔལབྦྷཏཱིཏི ཨཏྠཝཙནཾ ཙེཏཾ དཊྛབྦཾ, ན པཡོགཝཙནཾ. ཏཾ པརཏོ ཨཱཝི བྷཝིསྶཏི.

༥༥༨. ནཏྠཱིཏི ན ཝཏྟབྦཾ, ཨརིཡེཧི ཨུཔལབྦྷནཱིཡཏོཏི ཨདྷིཔྤཱཡོ. སཾསཱརཏོ སཾཝིགྒམཱནསཱ སམྨཱཔཊིཔཏྟིཡཱ ནིབྦཱནཾ ཨདྷིགཙྪནྟཱིཏི སབྦསམཡསིདྡྷོཡཾ ནཡོ. ཏཏྠ སཱསནིཀམེཝ ནིསྶཱཡ ཝདཏི ‘‘པཊིཔཏྟིཡཱ ཝཉྩུབྷཱཝཱཔཛྫནཏོ’’ཏི. ཏེནཱཧ ‘‘ཨསཏི ཧཱི’’ཏིཨཱདི. སམྨཱདིཊྛིཔུརེཛཝཱཡཱཏི སམྨཱདིཊྛིཔུབྦངྒམཱཡ. པུབྦངྒམཏཱ ཙསྶཱ པདྷཱནབྷཱཝཏོ. ཏཐཱ ཧི སཱ པཋམཾ དེསནཱརུལ༹ྷཱ, ན སབྦཔཋམཾ ཨུཔྤཛྫནཏོ. ན ཙཱཡཾ སམྨཱཔཊིཔཏྟི ཝཉྫྷཱ, ནིབྦཱནཔཱཔནཏོ ནིབྦཱནསྶ སམྤཱཔཀཏོ. ཏཝ མཏེན པན ནིབྦཱནསྶེཝ ཨབྷཱཝཏོ ཝཉྫྷབྷཱཝོ ཨཱཔཛྫཏཱིཏི ཡོཛནཱ. ཨབྷཱཝཔཱཔཀཏྟཱཏི སམྨཱཔཊིཔཏྟིཡཱ ཀིལེསསམུཙྪིནྡནམུཁེན ཁནྡྷཱནཾ ཨབྷཱཝསམྤཱཔཀབྷཱཝཏོ, ན ཝཉྫྷབྷཱཝཱཔཏྟཱིཏི ཙེ ཝདེཡྻཱསཱིཏི ཨཏྠོ. ན ཨིཏི པཊིཀྑེཔེ. ཡཾ ཏཡཱ ‘‘ཨབྷཱཝཔཱཔཀཏྟཱ’’ཏི ཝདནྟེན ཁནྡྷཱབྷཱཝོ ནིབྦཱནནྟི པཊིཉྙཱཏཾ, ཏཾ ན. ཀསྨཱ? ཨཏཱིཏཱནཱགཏཱབྷཱཝེཔི ནིབྦཱནཔྤཏྟིཡཱ ཨབྷཱཝཏོ. ཨཏཱིཏཱནཱགཏཱ ཧི ཁནྡྷཱ ན སནྟཱིཏི ཏསྨིཾ ཨབྷཱཝེ ནིབྦཱནཾ ཨདྷིགཏཾ ནཱམ སིཡཱ, སོ པན ནཏྠཱིཏི. ན ཀེཝལཾ ཨཏཱིཏཱནཱགཏཱནམེཝ, ཨཐ ཁོ ཝཏྟམཱནཱནམྤཱིཏི ཏིཡདྡྷགཏཱནཾ སབྦེསཾ ཁནྡྷཱནཾ ཨབྷཱཝོ ནིབྦཱནཾ. ན ཧི ཏཾ ཨེཀདེསཱབྷཱཝོ བྷཝིཏུཾ ཡུཏྟནྟི ཝཏྟམཱནཱ ཙེ, ན ན སནྟི, ན སནྟི ཙེ, ན ཝཏྟམཱནཱཏི ‘‘ཝཏྟམཱནཱ, ན སནྟི ཙཱ’’ཏི ཝིཔྤཊིསིདྡྷམེཏནྟི ཨཱཧ ‘‘ན, ཏེསཾ…པེ… པཛྫནཏོ’’ཏི.

ཀིཉྩ བྷིཡྻོ – ཡདི ཝཏྟམཱནཱབྷཱཝོ ནིབྦཱནཾ, ཡདཱ ཨརིཡམགྒོ ཝཏྟཏི, ཏདཱ ཏསྶ ནིསྶཡབྷཱུཏཱ ཁནྡྷཱ ཝཏྟམཱནཱཏི ཀཏྭཱ ཏདཱ ནིབྦཱནསྶ ཨབྷཱཝོ སིཡཱ. ཏཐཱ ཙ སཏི མགྒཀྑཎེཔི ནིབྦཱནསཙྪིཀིརིཡཱཡ ཨབྷཱཝོ ཨཱཔཛྫཏཱིཏི དསྶེནྟོ ‘‘ཝཏྟམཱན…པེ… དོསཏོ’’ཏི ཨཱཧ. ན མཡཾ སབྦེསཾཡེཝ ཨཝཏྟམཱནཏཱཡ ནིབྦཱནཾ ཝདཱམ. ཀིཉྩརཧཱིཏི, ཏདཱ མགྒཀྑཎེ ཀིལེསཱནཾ ཨཝཏྟམཱནཏྟཱ, ཏསྨཱ ན དོསོ ཡཐཱཝུཏྟདོསཱབྷཱཝོཏི? ཡདི ཀིལེསཱནཾ ཨཝཏྟམཱནཏཱསངྑཱཏོ ཨབྷཱཝོ ནིབྦཱནཾ, ཨེཝཾ སཏི ཨརིཡམགྒསྶ ནིརཏྠཀཏཱ ཨཱཔཛྫཏི ¶ མགྒཀྑཎཏོ པུབྦེཔི ཏདབྷཱཝསིདྡྷིཏོ. ཏེནཱཧ ‘‘ཨརིཡམགྒསྶཱ’’ཏིཨཱདི. ཏསྨཱ ཨཀཱརཎམེཏནྟི ཡསྨཱ ན ནིབྦཱནསྶ ཨནུཔལབྦྷནཱིཡཏཱ, ཨབྷཱཝམཏྟཏཱ, པཊིཔཏྟིཡཱ ཝཉྫྷབྷཱཝོ, ཨཏཱིཏཱནཱགཏཱབྷཱཝེ ནིབྦཱནཱདྷིགམོ ཙ ཨཱཔཛྫཏི, ཝཏྟམཱནཱནཾ ཨབྷཱཝོཔི ན སམྦྷཝཏི ¶ , པགེཝ ཀིལེསཱནཾ ཨཝཏྟམཱནཏཱ, ཨརིཡམགྒསྶ ཙ ནིརཏྠཀབྷཱཝཱཔཏྟི, ཏསྨཱ ནིབྦཱནསྶ ཨབྷཱཝསཱདྷནཏྠཾ ཡདིདཾ ‘‘ཨནུཔལབྦྷནཱིཡཏོ, ཨབྷཱཝཔཱཔཀཏྟཱ, ཏདཱ ཀིལེསཱནཾ ཨཝཏྟམཱནཏྟཱ’’ཏི ཙ ཀཱརཎཾ ཝུཏྟཾ, ཨཀཱརཎམེཏཾ, ཨཡུཏྟིརེསཱཏི ཨཏྠོ.

༥༥༩. ཨཱདིཝཙནཏོཏི ཨཱདི-སདྡེན ཨཝསིཊྛཾ ཛམྦུཁཱདཀསུཏྟཔདེསཾ (སཾ. ནི. ༤.༣༡༤ ཨཱདཡོ), ཨཉྙམྤི ཨསངྑཏཱཡ དྷཱཏུཡཱ ནིདྡེསཔཱལི༹ཾ སངྒཎྷཱཏི. ཏཐཱ ཧི ‘‘ནིབྦཱནཾ ནིབྦཱནནྟི, ཨཱཝུསོ སཱརིཔུཏྟ, ཝུཙྩཏི, ཀཏམཾ ནུ ཁོ, ཨཱཝུསོ, ནིབྦཱནནྟི? ཡོ ཁོ, ཨཱཝུསོ, རཱགཀྑཡོ དོསཀྑཡོ མོཧཀྑཡོ, ཨིདཾ ཝུཙྩཏི ནིབྦཱན’’ནྟི ཛམྦུཁཱདཀསུཏྟེ (སཾ. ནི. ༤.༣༡༤ ཨཱདཡོ), ‘‘ཏཏྠ ཀཏམཱ ཨསངྑཏཱ དྷཱཏུ? རཱགཀྑཡོ དོསཀྑཡོ མོཧཀྑཡོ’’ཏི (ཝིབྷ. ༡༨༤) ཨཱཡཏནཝིབྷངྒེ ཝུཏྟཾ. ཏཏྲཱཡམཏྠོ – ནིབྦཱནཾ ཨསངྑཏཱ དྷཱཏུ ཨསངྑཏསབྷཱཝོ དྷམྨོ. ཡསྨཱ ཏཾ ཨཱགམྨ རཱགཱདཡོ ཁཱིཡནྟི, ཏསྨཱ རཱགཀྑཡོ, དོསཀྑཡོ, མོཧཀྑཡོཏི ཙ ཝུཙྩཏཱིཏི. ཨཱགམྨཱཏི ཙ སབྦསངྑཱརེཧི ནིབྦིནྣསྶ ཝིསངྑཱརནིནྣསྶ གོཏྲབྷུནཱ ཝིཝཊྚིཏམཱནསསྶ མགྒེན སཙྪིཀརཎེནཱཏི ཨཏྠོ. སཙྪིཀིརིཡམཱནཉྷི ཏཾ ཨདྷིགནྟྭཱ ཨཱརམྨཎཔཙྩཡབྷཱུཏཉྩ པཊིཙྩ ཨདྷིཔཏིཔཙྩཡབྷཱུཏེ ཙ ཏསྨིཾ པརམསྶཱསབྷཱཝེན ཝིནིམུཏྟསངྑཱརསྶ པརམགཏིབྷཱཝེན ཙ པཏིཊྛཱནབྷཱུཏེ པཏིཊྛཱཡ ཁཡསངྑཱཏོ མགྒོ རཱགཱདཡོ ཁེཔེཏཱིཏི ཏཾསཙྪིཀརཎཱབྷཱཝེ རཱགཱདཱིནཾ ཨནུཔྤཏྟིནིརོདྷགམནཱབྷཱཝཱ ཏཾ ཨཱགམྨ རཱགཱདཡོ ཁཱིཡནྟཱིཏི ཝུཙྩནྟི. ཨེཀཾསེན ཙེཏཾ ཨེཝཾ སམྤཊིཙྪིཏབྦཾ, ཨིཏརཐཱ ཡཐཱརུཏཝསེན པཱལི༹ཡཱ ཨཏྠེ གཡ྄ཧམཱནེ བཧཱུ དོསཱ ཨཱཔཛྫནྟཱིཏི ཏེ དསྶེཏུཾ ‘‘ཨརཧཏྟསྶཱཔཱི’’ཏིཨཱདི ཝུཏྟཾ. ཨརཧཏྟཉྷི ཨགྒཕལཔམུཁཱ ཙཏྟཱརོ ཁནྡྷཱཏི ན ཏསྶ རཱགཱདིཁཡམཏྟཏཱ ཡུཏྟཱ. ཏམྤི ཧི…པེ… ནིདྡིཊྛཾ. ཏཏྠ ཡཐཱ རཱགཱདཱིནཾ ཁཱིཎནྟེ ཨུཔྤནྣཏྟཱ ཨརཧཏྟཾ ‘‘རཱགཀྑཡོ’’ཏིཨཱདིནཱ ནིདྡིཊྛནྟི སུཏྟསྶ ནེཡྻཏྠཏྟཱ. ཨེཝཾ ནིབྦཱནཾ ཨཱགམྨ རཱགཱདཡོ ཁཱིཡནྟཱིཏི ནིབྦཱནཾ ‘‘རཱགཀྑཡོ’’ཏིཨཱདིནཱ ནིདྡིཊྛནྟི ¶ ཨིམསྶཱཔི སུཏྟསྶ ནེཡྻཏྠཏཱ ཝེདིཏབྦཱ. ནིབྦཱནསྶ རཱགཱདིཀྑཡམཏྟཏཱཡ བཧཱུདོསཱ ཨཱཔཛྫནྟཱིཏི དསྶེཏུཾ ‘‘ཀིཉྩ བྷིཡྻོ’’ཏིཨཱདི ཨཱརདྡྷཾ.

ཏཏྠ ཨིཏྟརཀཱལཱདིཔྤཏྟིདོསཏོཏི རཱགཱདཱིནཾ ཁཡམཏྟཏཱཡ པརིཏྟཀཱལཏཱ, སངྑཏལཀྑཎཏཱ, པཡོགེན ཝིནཱ སརསེནེཝ ཨདྷིགནྡྷབྦཏཱ, རཱགཱདཱིཧི ཨཔརིམུཏྟཏཱ, ཨཱདིཏྟཏཱ, དུཀྑཏཱ, ཨནུཔསནྟཏཱ, བཧུབྷཱཝོ, ཨོལཱ༹རིཀཏཱ, གོཏྲབྷུམགྒཱནཾ ཨནཱརམྨཎཏཱཏི ཨེཝམཱདིདོསཱཔཛྫནཏོ ¶ . རཱགསྶེཝ ཁཡོ རཱགཀྑཡོ, ན དོསཱདཱིནཾ. ཏཐཱ དོསཀྑཡཱདཡོཔཱིཏི ཨཉྙོ རཱགཀྑཡོ, ཨཉྙོ དོསཀྑཡོ, ཨཉྙོ མོཧཀྑཡོཏི ཏིཎྞཾ ཨཀུསལམཱུལཱནཾ ཁཡབྷཱུཏཱནི ཏཱིཎི ནིབྦཱནཱནི, ཙཏུནྣཾ ཨུཔཱདཱནཱནཾ ཁཡེ ཙཏྟཱརི, པཉྩནྣཾ ནཱིཝརཎཱནཾ ཁཡེ པཉྩ, ཚནྣཾ ཏཎྷཱཀཱཡཱནཾ ཁཡེ ཚ, སཏྟནྣཾ ཨནུསཡཱནཾ ཁཡེ སཏྟ, ཨཊྛནྣཾ མིཙྪཏྟཱནཾ ཁཡེ ཨཊྛ, ནཝནྣཾ ཏཎྷཱམཱུལཀཱནཾ ཁཡེ ནཝ, དསནྣཾ སཾཡོཛནཱནཾ ཁཡེ དས, དིཡཌྜྷཀིལེསསཧསྶསྶ ཁཡེ པཱཊིཡེཀྐཾ ནིབྦཱནནྟི བཧཱུནི ནིབྦཱནཱནི ཧོནྟི. རཱགཱདིཀྑཡོ ནཱམ ཨནྡྷབཱལཱནམྤི པཱཀཊོ, ཨནྟམསོ དཱིཔིམིགམཀྐཊཱདཱིནམྤི སུཝིཉྙེཡྻོཏི ཨོལཱ༹རིཀཾ ནིབྦཱནཾ ཧོཏི. གོཏྲབྷུཀྑཎེ ཀིལེསཀྑཡསྶ ཨབྷཱཝཏོ, མགྒཀྑཎེ ཙ ཨཁཱིཎཏྟཱ, ཨཱརམྨཎཀརཎསྶ ཙ ཨསམྦྷཝོ ཨེཝ. ཏསྶ ནིབྦཱནབྷཱཝཏོཏི སབྦཔརིཡོསཱནསྶ རཱགཱདིཀྑཡསྶ ནིབྦཱནབྷཱཝཏོ. ཡཏོ ཁཡཏོ པཊྛཱཡ རཱགཱདཱིནཾ པཝཏྟི ན ཧོཏི, སོ ‘‘ཨཡཾ ནཱམཱ’’ཏི ནིཡམེཏབྦོ མགྒཕལཉཱཎཱནཾ ཨཱརམྨཎབྷཱུཏོ ནཏྠཱིཏི ཨཱཧ ‘‘ན ཏཱདིསསྶ ཁཡསྶ ཨབྷཱཝཏོ’’ཏི.

ཀིཉྩ བྷིཡྻོ – ཡོ པཙྪིམབྷཝཏོ ཏཏིཡཏྟབྷཱཝེཡེཝ རཱགཱདཱིསུ ཨཱདཱིནཝཾ དིསྭཱ ཛྷཱནབྷཱཝནཱཡ ཏེ ཝིཀྑམྦྷེཏྭཱ ཨཔརིཧཱིནཛ྄ཛྷཱནོ ཀཱལཾ ཀཏྭཱ བྲཧྨལོཀཾ ཨུཔཔནྣོ, ཏཏྠ ཡཱཝཏཱཡུཀཾ ཋཏྭཱ ཨིདྷཱགཏོཔི ཀཱམེསུ ཝཱིཏརཱགོཝ ཧུཏྭཱ པབྦཛིཏྭཱ ཨརཧཏྟཾ པཏྟོ, ཡོ ཙ པཋམཝཡེ ཨེཝ རཱགཱདིཏོ ནིབྦིནྣོ ཏེ ཙ ཛྷཱནེན ཝིཀྑམྦྷེཏྭཱ པཙྪིམཝཡེ ཨརཧཏྟཾ པཏྟོ, ཏེསཾ རཱགཱདཱིནཾ ཝིཀྑམྦྷནཏོ པཊྛཱཡ ཨནུཔྤཛྫནཏོ ནིརོདྷསདིསཏཱཡ ཨནུཔྤཏྟིཡེཝ ནིརོདྷོ. ཏེ ནིབྦཱནཔྤཏྟཱ ནཱམ སིཡུཾ, ན ཙ ཧོནྟི, ཏསྨཱ ན ཏཱདིསསྶ ཁཡསྶ ནིབྦཱནབྷཱཝོ. ཏསྶཱཔི ཨིཏྟརཀཱལཏཱདིདོསསམཱཡོགོ ཨེཝཱཏི ཨཱཧ ‘‘བྷཱཝེཔི ཙཱ’’ཏིཨཱདི ¶ .

ཡདི ‘‘ཁཡོ’’ཏི ཝཙནཏོ ཡཏོ ཁཡཏོ པཊྛཱཡ རཱགཱདཱིནཾ ཨཔྤཝཏྟི, ཏཾ ཁཡམཏྟཾ ནིབྦཱནཾ མཉྙསི, ཨེཝཾ སཏི ‘‘ཁཡེ ཉཱཎ’’ནྟིཨཱདཱིསུ (དྷ. ས. དུཀམཱཏིཀཱ ༡༤༢; ༡༣༨༢) ‘‘ཁཡོ’’ཏི ཝུཏྟཏྟཱ ཏདུཔྤཏྟིཏོ པཊྛཱཡ ཙ རཱགཱདཱིནཾ ཨནུཔྤཏྟཱིཏི མགྒསྶཱཔི ནིབྦཱནབྷཱཝཱཔཏྟཱིཏི དསྶེནྟོ ‘‘ཨརིཡམགྒསྶ ཙཱ’’ཏིཨཱདིམཱཧ.

ཡཐཱ ནིརུདྡྷཱ ན སནྟི, ཨེཝཾ ཨནུཔྤནྣཱཔཱིཏི ཨབྷཱཝསཱམཉྙཏོ ནིརོདྷསདིསཏཱཡ ཨནུཔྤཏྟི ཨེཝ ནིརོདྷོ ཨནུཔྤཏྟིནིརོདྷོ. ཨཡཉྷི མགྒེན ཁེཔེཏབྦཱཀཱརོ, ཡདིདཾ ཨུཔྤཛྫནཱརཧསྶ ཨནུཔྤཏྟིདྷམྨཏཱཔཱདནནྟི ‘‘ཁཡོ’’ཏི ཙ ཝུཙྩཏཱིཏི. ཏཾ ཨིཏརཁཡཏོ ཝིསེསེནྟོ ‘‘ཨནུཔྤཏྟིནིརོདྷསངྑཱཏསྶ པན ཁཡསྶཱ’’ཏི ཨཱཧ. ཨནིཔྥནྣཏཱ པན ཏསྶ ཁཡསྶ ¶ པརིཡཱཡེན ཨུཔནིསྶཡཏྟཱཏི ཝུཏྟཾ. ཨནུཔྤཏྟིནིརོདྷཀྑཡཀརསྶ ཧི མགྒསྶ ཨཱརམྨཎབྷཱུཏཾ ནིབྦཱནཾ ཨཏྠཏོ ཏསྶ ཨུཔནིསྶཡོ ཝིཡཱཏི ཝཏྟབྦཏཾ ལབྷཏི. ཏདུཔཙཱརེནཱཏི ཨཏྠཏོ ཕལབྷཱུཏཁཡཝོཧཱརེན. ཕལཱུཔཙཱརེན ཧི ཀཱརཎཾ ཝོཧརཱིཡཏི ཡཐཱ ‘‘ཨཱཡུ གྷཏཾ, སེམྷོ གུལོ༹’’ཏི ཙ.

ཨསྶཱཏི ནིབྦཱནསྶ. ‘‘ཨིདམྤི ཁོ ཋཱནཾ སུདུདྡས’’ནྟིཨཱདིནཱ (དཱི. ནི. ༢.༦༤, ༦༦-༦༧; མ. ནི. ༢.༣༣༧; སཾ. ནི. ༡.༡༧༢; མཧཱཝ. ༧-༨) པཙྩཝེཀྑཏོ བྷགཝཏོ ཨཔྤོསྶུཀྐབྷཱཝཱཝཧནཏོ. ‘‘ཏཉྷི ཏེ, མཱགཎྜིཡ, ཨརིཡཾ ཙཀྑུཾ ནཏྠི, ཡེན ཏྭཾ ཨརིཡེན ཙཀྑུནཱ ཨཱརོགྱཾ ཛཱནེཡྻཱསི, ནིབྦཱནཾ པསྶེཡྻཱསཱི’’ཏི (མ. ནི. ༢.༢༡༨) ཝཙནཏོ ཨརིཡེན ཙཀྑུནཱ པསྶིཏབྦཾ.

༥༦༠. ཡདི ནིབྦཱནཾ ནཱམ སབྷཱཝདྷམྨོ ཨཏྠི སཏྟསནྟཱནཔརིཡཱཔནྣོ ཙ, ཨཐ ཀསྨཱ ཙཏུམཧཱཔཐེ སབྷཱ ཝིཡ སབྦསཱདྷཱརཎཱ ན ལབྦྷཏཱིཏི ཨཱཧ ‘‘མགྒསམངྒིནཱ པཏྟབྦཏོ ཨསཱདྷཱརཎ’’ནྟི. ‘‘ཨསུཀསྶ སམྨཱསམྦུདྡྷསྶ ཀཱལེ ཨུཔྤནྣ’’ནྟི ཨེཝཾ པུརིམཱཡ ཀོཊིཡཱ ཨབྷཱཝཏོ ཨཔྤབྷཝཾ. མགྒབྷཱཝེཏི ཨརིཡམགྒསྶ ཨཏྠིབྷཱཝེ. བྷཱཝཏོ ཝིཛྫམཱནཏོ ལདྡྷབྦཏོ.

ཨཎུཨཱདཱིནནྟི ཨཎུཔཀཏིཀཱལཔུརིསཱདཱིནཾ. ནིཙྩབྷཱཝཱཔཏྟཱིཏི སསྶཏབྷཱཝསིདྡྷི. ཀཱུཊཊྛནིཙྩཏཱ ཧི ཨིདྷཱདྷིཔྤེཏཱ. ཧེཏུནོ ཨབྷཱཝཱཏི ཨུཔཔཏྟིཡཱ སཱདྷནཧེཏུནོ ཨབྷཱཝཱ. ནིཙྩཱ ཏེ ཨཎུཨཱདཡོ. ནིབྦཱནསྶ ¶ ནིཙྩཏྟཱཏི ཨཔེཀྑདྷམྨཏྟཱཏི ཧེཏུལཀྑཎཱནུཔཔཏྟི. ‘‘ཨཎུཨཱདཱིནཾ ཨསིདྡྷཏྟཱ’’ཏི ཨེཏེན ‘‘ནིཙྩཱ ཨཎུཨཱདཡོ’’ཏི པཊིཉྙཱཡ དྷམྨིཨསིདྡྷི, ཏཏོ ཙ ནིསྶཡཱསིདྡྷོ ཧེཏཱུཏི དསྶེཏི.

༥༦༡. ཡཐཱཝུཏྟཡུཏྟིསབྦྷཱཝཏོཏི ‘‘ཨཔྤབྷཝཏྟཱ’’ཏི ཨཏྟནཱ ཝུཏྟཾ ཧེཏུཾ སནྡྷཱཡཱཧ. ཨཔྤབྷཝཏཱ ཙསྶ ཨཔཙྩཡཏཱཡ དཊྛབྦཱ, ཏཱཡ ཏསྶ པུརིམཱཡ ཀོཊིཡཱ ཨབྷཱཝོ. ‘‘རཱུཔསབྷཱཝཱཏིཀྐམཏོ’’ཏི ཨེཏེན ཡཐཱ རཱུཔདྷམྨཱནཾ རུཔྤནསབྷཱཝོ, པཊིགྷཱཏཝནྟཏཱཡ ཀལཱཔསོ ཝུཏྟིཡཱ པདེསསམྦནྡྷོ ཙ སབྷཱཝོ, ཨེཝཾ ནིབྦཱནསྶ ཀཏྠཙི པཊིགྷཱཏོ, སཔྤདེསཏཱ ཙ ནཏྠཱིཏི དསྶེཏི. ན ཧི ནིབྦཱནཾ ‘‘ཨསུཀདིསཱཡ, ཨསུཀདེསེ’’ཏི ཝཱ ནིདྡིསཱིཡཏི, ཡཏོ ཏཾ ཨཔྤཏིཊྛམེཝཱཏི.

‘‘ཨསིཐིལ ¶ …པེ… གམནཱིཡཏོ’’ཏི ཨེཏེན ནིབྦཱནསྶ ཨརིཡཱནཾ པཙྩཀྑསིདྡྷཏཾ དསྶེཏི. ‘‘སབྦཉྙུཝཙནཏོ’’ཏི ཨེཏེན ཏདཉྙེསཾ ཨནུམཱནསིདྡྷཏཾ, ཏདུབྷཡེན ‘‘ཨནུཔལབྦྷནཱིཡཏོ’’ཏི པནསྶ ཧེཏུནོ ཨསིདྡྷཏཾ དསྶེཏི. པརམཏྠེན ནཱཝིཛྫམཱནཾ ཝིཛྫམཱནམེཝཱཏི ཡཐཱརདྡྷམཏྠཾ ནིགམེཏྭཱ ཏདཏྠསཱདྷནཾ ཨཱགམཾ དསྶེནྟོ ‘‘ཝུཏྟཉྷེཏ’’ནྟི-. ཨཱདིམཱཧ.

ཏཏྠ ཨཛཱཏཾ ཨབྷཱུཏཾ ཨཀཏཾ ཨསངྑཏནྟི (ཨུདཱ. ༧༣; ནེཏྟི. ༤༡) ཙཏྟཱརིཔི པདཱནི ཨཉྙམཉྙཝེཝཙནཱནི. ཨཐ ཝཱ ཝེདནཱདཡོ ཝིཡ ཧེཏུཔཙྩཡསམཝཱཡསངྑཱཏཱཡ ཀཱརཎསཱམགྒིཡཱ ན ཛཱཏཾ ན ནིབྦཏྟནྟི ཨཛཱཏཾ. ཀཱརཎེན ཝིནཱ, སཡམེཝ ཙ ན བྷཱུཏཾ ན པཱཏུབྷཱུཏཾ ན ཨུཔྤནྣནྟི ཨབྷཱུཏཾ. ཨེཝཾ ཨཛཱཏཏྟཱ, ཨབྷཱུཏཏྟཱ ཙ ཡེན ཀེནཙི ཀཱརཎེན ན ཀཏནྟི ཨཀཏཾ. ཛཱཏབྷཱུཏཀཏབྷཱཝོ ཙ ནཱམ རཱུཔཱདཱིནཾ སངྑཏདྷམྨཱནཾ ཧོཏི, ན ཨསངྑཏབྷཱཝསྶ ནིབྦཱནསྶཱཏི དསྶནཏྠཾ ‘‘ཨསངྑཏ’’ནྟི ཝུཏྟཾ. པཊིལོམཏོ ཝཱ སམེཙྩ སམྦྷཱུཡ པཙྩཡེཧི ཀཏནྟི སངྑཏཾ, ཏཐཱ ན སངྑཏཾ སངྑཏལཀྑཎརཧིཏནྟི ཙ ཨསངྑཏནྟི ཨེཝཾ ཨནེཀེཧི ཀཱརཎེཧི ནིབྦཏྟིཏབྷཱཝེ པཊིསིདྡྷེ ‘‘པཀཏིཝཱདཱིནཾ པཀཏི ཝིཡ སིཡཱ ནུ ཁོ ཨེཀེནེཝ ཀཱརཎེན ཨེཏཾ ཀཏ’’ནྟི ཨཱསངྐཱཡཾ ཀེནཙི ན ཀཏནྟི དསྶནཏྠཾ ‘‘ཨཀཏ’’ནྟི ཝུཏྟཾ. ཨེཝཾ ཨཔཙྩཡམྤི སམཱནཾ ‘‘སཡམེཝ ནུ ཁོ ཨིདཾ བྷཱུཏཾ པཱཏུབྷཱུཏ’’ནྟི ¶ ཨཱསངྐཱཡཾ ཏཾ ནིཝཏྟནཏྠཾ ‘‘ཨབྷཱུཏ’’ནྟི ཝུཏྟཾ. ཨཡཉྩེཏསྶ ཨསངྑཏཱཀཏཱབྷཱུཏབྷཱཝོ སབྦེན སབྦཾ ཨཛཱཏིདྷམྨཏྟཱཏི དསྶེཏུཾ ‘‘ཨཛཱཏ’’ནྟི ཝུཏྟཾ.

ཨེཝམེཏྠ སཏྠཱ པརམཏྠཏོ ནིབྦཱནསྶ ཨཏྠིབྷཱཝཾ པཝེདེསི. པཝེདེནྟོ ཙ ‘‘ཨཧཾ དྷམྨིསྶརོ དྷམྨསྶཱམཱི’’ཏི ན ཨཏྟནོ ཨཱཎཱམཏྟེན པཝེདེསི, ཨཔིཙ ཁོ པན པདཔརམེ ཨནུཀམྤམཱནོ ཡུཏྟིཏོཔི པཝེདེསི. ཡཐཱཧ –

‘‘ནོ ཙེཏཾ, བྷིཀྑཝེ, ཨབྷཝིསྶ ཨཛཱཏཾ ཨབྷཱུཏཾ ཨཀཏཾ ཨསངྑཏཾ, ནཡིདྷ ཛཱཏསྶ བྷཱུཏསྶ ཀཏསྶ སངྑཏསྶ ནིསྶརཎཾ པཉྙཱཡེཐ. ཡསྨཱ ཙ ཁོ, བྷིཀྑཝེ, ཨཏྠི ཨཛཱཏཾ ཨབྷཱུཏཾ ཨཀཏཾ ཨསངྑཏཾ, ཏསྨཱ ཛཱཏསྶ བྷཱུཏསྶ ཀཏསྶ སངྑཏསྶ ནིསྶརཎཾ པཉྙཱཡཏཱི’’ཏི (ཨུདཱ. ༧༣; ནེཏྟི. ༤༡).

ཏསྶཏྠོ ¶ – བྷིཀྑཝེ, ཡདི ཨཛཱཏཱདིསབྷཱཝཱ ཨསངྑཏཱ དྷཱཏུ ན ཨབྷཝིསྶ ན སིཡཱ, ཨིདྷ ལོཀེ ཛཱཏཱདིསབྷཱཝསྶ རཱུཔཱདིཀྑནྡྷཔཉྩཀསངྑཱཏསྶ སངྑཏསྶ ནིསྶརཎཾ ཨནཝསེསཝཱུཔསམོ ན པཉྙཱཡེཡྻ ན ཨུཔལབྦྷེཡྻ ན སམྦྷཝེཡྻ. ནིབྦཱནཉྷི ཨཱརམྨཎཾ ཀཏྭཱ པཝཏྟམཱནཱ སམྨཱདིཊྛིཨཱདཡོ ཨརིཡམགྒདྷམྨཱ ཨནཝསེསཾ སཾཀིལེསེ སམུཙྪིནྡནྟི, ཏེནེཏྠ སབྦསྶཱཔི ཝཊྚདུཀྑསྶ ཨཔགམོ ནིསྶརཎཾ པཉྙཱཡཏི. ཨེཝཾ བྱཏིརེཀཝསེན ནིབྦཱནསྶ ཨཏྠིབྷཱཝཾ དསྶེཏྭཱ ཨིདཱནི ཨནུགམནཝསེནཔི ཏཾ དསྶེཏྭཱ ནིགམེཏུཾ ‘‘ཡསྨཱ ཙ ཁོ’’ཏིཨཱདི ཝུཏྟཾ. ཏསྶཏྠོ ཝུཏྟནཡེནེཝ ཝེདིཏབྦོ.

ཨེཏྠ ཙ ཡསྨཱ ‘‘ཨཔྤཙྩཡཱ དྷམྨཱ ཨསངྑཏཱ དྷམྨཱ (དྷ. ས. དུཀམཱཏིཀཱ ༧-༨). ཨཏྠི, བྷིཀྑཝེ, ཏདཱཡཏནཾ, ཡཏྠ ནེཝ པཐཝཱི (ཨུདཱ. ༧༡). ཨིདམྤི ཁོ ཋཱནཾ སུདུདྡསཾ, ཡདིདཾ སབྦསངྑཱརསམཐོ སབྦཱུཔདྷིཔཊིནིསྶགྒོ (དཱི. ནི. ༢.༦༤, ༦༧; མ. ནི. ༢.༣༣༧; སཾ. ནི. ༢.༡༧༢; མཧཱཝ. ༧-༨). ཨསངྑཏཉྩ ཝོ, བྷིཀྑཝེ, དྷམྨཾ དེསེསྶཱམི ཨསངྑཏགཱམིནིཉྩ པཊིཔད’’ནྟིཨཱདཱིཧི (སཾ. ནི. ༤.༣༦༦) ཨནེཀེཧི སུཏྟཔདེཧི ‘‘ཨཏྠི, བྷིཀྑཝེ, ཨཛཱཏ’’ནྟི (ཨུདཱ. ༧༣; ནེཏྟི. ༤༡) ཨིམིནཱ ཙ སུཏྟཔདེན ནིབྦཱནདྷཱཏུཡཱ པརམཏྠཏོ སབྦྷཱཝོ སབྦལོཀཾ ཨནུཀམྤམཱནེན སམྨཱསམྦུདྡྷེན པཀཱསིཏོ, ཏསྨཱ ¶ ཡདིཔི ཀཏྠ ཨཔཙྩཀྑཀཱརཱིནམྤི སཱསནེ ཨབྷིཔྤསནྣཱནཾ ཝིཉྙཱུནཾ སཾསཡོ ནཏྠིཡེཝ. ཡེ པན པརནེཡྻབུདྡྷིནོ པུགྒལཱ, ཏེསཾ ཝིམཏིཝིནོདནཏྠཾ ཨཡམེཏྠ ཨདྷིཔྤཱཡནིདྡྷཱརཎམུཁེན ཡུཏྟིཝིཙཱརཎཱ.

ཡཐཱ པརིཉྙེཡྻཏཱཡ སཨུཏྟརཱནཾ ཀཱམཱནཾ, རཱུཔཱནཉྩ པཊིཔཀྑབྷཱུཏཾ ཏབྦིདྷུརསབྷཱཝཾ ནིསྶརཎཾ པཉྙཱཡཏི, ཨེཝཾ སབྷཱཝཱནཾ སབྦེསམྤི སངྑཏདྷམྨཱནཾ པཊིཔཀྑབྷཱུཏེན ཏབྦིདྷུརསབྷཱཝེན ནིསྶརཎེན བྷཝིཏབྦཾ. ཡཉྩ ཏཾ ནིསྶརཎཾ, སཱ ཨསངྑཏཱ དྷཱཏུ. ཀིཉྩ བྷིཡྻོ – སངྑཏདྷམྨཱརམྨཎཝིཔསྶནཱཉཱཎཾ, ཨཔིཙ ཨནུལོམཉཱཎཾ ཀིལེསེ ཏདངྒཝསེན པཛཧཏི, ན སམུཙྪེདཝསེན པཛཧིཏུཾ སཀྐོཏི. ཏཐཱ སམྨུཏིསཙྩཱརམྨཎཾ པཋམཛ྄ཛྷཱནཱདཱིསུ ཉཱཎཾ ཝིཀྑམྦྷནཝསེནེཝ ཀིལེསེ པཛཧཏི, ན སམུཙྪེདཝསེན. ཨིཏི སངྑཏདྷམྨཱརམྨཎསྶ, སམྨུཏིསཙྩཱརམྨཎསྶ ཙ ཉཱཎསྶ ཀིལེསཱནཾ སམུཙྪེདཔྤཧཱནེ ཨསམཏྠབྷཱཝཏོ ཏེསཾ སམུཙྪེདཔྤཧཱནཀརསྶ ཨརིཡམགྒཉཱཎསྶ ཏདུབྷཡཝིཔརཱིཏསབྷཱཝེན ཨཱརམྨཎེན བྷཝིཏབྦཾ, སཱ ཨསངྑཏཱ དྷཱཏུ.

ཏཐཱ ¶ ‘‘ཨཏྠི, བྷིཀྑཝེ, ཨཛཱཏཾ ཨབྷཱུཏཾ ཨཀཏཾ ཨསངྑཏ’’ནྟི (ཨུདཱ. ༧༣; ནེཏྟི. ༤༡) ཨེཝམཱདི ནིབྦཱནསྶ པརམཏྠཏོ ཨཏྠིབྷཱཝཛོཏཀཝཙནཾ ཨཝིཔརཱིཏཏྠཾ བྷགཝཏཱ བྷཱསིཏཏྟཱ. ཡཉྷི བྷགཝཏཱ བྷཱསིཏཾ, ཏཾ ཨཝིཔརཱིཏཏྠཾ ཡཐཱ ཏཾ ‘‘སབྦེ སངྑཱརཱ ཨནིཙྩཱ, སབྦེ སངྑཱརཱ དུཀྑཱ, སབྦེ དྷམྨཱ ཨནཏྟཱ’’ཏི (མ. ནི. ༡.༣༥༣, ༣༥༦; དྷ. པ. ༢༧༧-༢༧༩; ཐེརགཱ. ༦༧༦-༦༧༨; ནེཏྟི. ༥), ཏཐཱ ནིབྦཱནསདྡོ ཀཏྠཙི ཝིསཡེ ཡཐཱབྷཱུཏཔརམཏྠཝིསཡོ ཨུཔཙཱརཝུཏྟིསབྦྷཱཝཏོ. སེཡྻཐཱཔི སཱིཧསདྡོཏི ཨེཝམཱདཱིཧི ནཡེཧི ཡུཏྟིཏོཔི ཨསངྑཏཱཡ དྷཱཏུཡཱ པརམཏྠཏོ ཨཏྠིབྷཱཝོ ཝེདིཏབྦོ.

ཨཔརོ ནཡོ – ཡདི པན ནིབྦཱནཾ ཨབྷཱཝམཏྟམེཝ སིཡཱ, ཏསྶ ‘‘གམྦྷཱིརོ དུདྡསོ དུརནུབོདྷོ སནྟོ པཎཱིཏོ ཨཏཀྐཱཝཙརོ ནིཔུཎོ པཎྜིཏཝེདནཱིཡོ’’ཏི (དཱི. ནི. ༢.༦༤, ༦༧; མ. ནི. ༢.༣༣༧; སཾ. ནི. ༡.༡༧༢; མཧཱཝ. ༧-༨) གམྦྷཱིརཱདིཏཱ, ‘‘ཨསངྑཏཉྩ ཝོ, བྷིཀྑཝེ, དྷམྨཾ དེསེསྶཱམཱི’’ཏིཨཱདིནཱ (སཾ. ནི. ༤.༣༦༦) ཨསངྑཏཱདིཏཱ, ‘‘ཨབྱཱཀཏཱ དྷམྨཱ ཨཔཙྩཡཱདྷམྨཱ’’ཏིཨཱདིནཱ ཨབྱཱཀཏདྷམྨཱདིཏཱ ཙ ན ཝཏྟབྦཱ སིཡཱ. ན ཧི ཨབྷཱཝསྶ ¶ ཀོཙི སབྷཱཝོ ཨཏྠི, ཡེན སོ གམྦྷཱིརཱསངྑཏཱདིཨཱཀཱརཏོ ཝིཉྙཱཡེཡྻ. ཨབྷཱཝོ ཧི ཨབྷཱཝོ ཨེཝ, ཀུཏོ ཏསྶ གམྦྷཱིརཱསངྑཱཏཱདིབྷཱཝསམྦནྡྷོ. ཀིཉྩཱཡམབྷཱཝོ སབྦེསཾ ཀིལེསཱནཾ སབྦསཏྟསནྟཱནགཏཱནཾ ཨེཀོ ཝཱ བྷཝེཡྻ ཨནེཀོ ཝཱ. ཡདི ཨེཀོ, ཨེཀེནེཝ མགྒེན སབྦཀིལེསཱབྷཱཝོ ཀཏོ, སཙྪིཀཏོ ཙཱཏི ཨཉྙསྶ, ཨཉྙེསཉྩ མགྒཱནཾ ནིརཏྠཀཏཱཏི ན སིཡཱ མགྒབཧུཏཱ, ཨེཀཛ྄ཛྷཉྩ སབྦསཏྟཱནཾ ནིབྦཱནཱདྷིགམོ ཨཱཔཛྫཏི. སིཡཱ པནེཝཾ ཨེཀོ ཨེཝ སོ ནིབྦཱནསཉྙིཏོ ཀིལེསཱབྷཱཝོ, སོ པན ན མགྒེཧི ཀཱཏབྦོ, ཨཐ ཁོ སཙྪིཀཱཏབྦོཏི. ཨེཝཾ སཏི ཝིསེསཏོ མགྒསྶ ནིརཏྠཀཏཱ ཨཱཔཛྫཏི, ཀིལེསཱནཾ ཨཔྤཧཱནཏོཏི ཨེཀོཔི མགྒོ ན སིཡཱ. ཨསཏི ཙ ཀིལེསཔྤཧཱནེ དུཀྑསྶ ཨནུཔཙྪེདནཏོ ཀིལེསཱབྷཱཝསཙྪིཀིརིཡཱ ཀིམཏྠིཡཱ སིཡཱ, ཨཐ པན མགྒཱནཾ སནྟཱནགཏསཾཡོཛནཏྟཡཔྤཧཱནཱདིཔཊིནིཡཏཀིཙྩཏཱཡ ཙཏཱུསུ མགྒེསུ པཱཊིཡེཀྐཾ ཀིལེསཱབྷཱཝོ. ཨེཝཾ སཏི སབྷཱཝཔབྷེདེན ཝིནཱ ན བཧུབྷཱཝོཏི སོ ཀིལེསཀྑཡཔརིཡཱཡེན ཝུཏྟོ སབྷཱཝདྷམྨོ ཨེཝ སིཡཱ.

ཡེསཾ ཨབྷཱཝོ, ཏཔྤབྷེདེན ཨབྷཱཝེ བྷེདོཔཙཱརོཏི ཙེ? ཡེསཾ ཨབྷཱཝོ, ཏེསཾ སསབྷཱཝཏཱཡ ཏསྶ སབྷཱཝོཔཙཱརོཔི སིཡཱ. ཏཐཱ ཙ ཏེ སཾཀིལེསསངྑཏཏཱདིཏོ ཀིལེསསངྑཏཏཱདིཨུཔཙཱརཱཔི ¶ སིཡུཾ. ནོ ཙེ ཏེ ཨིཙྪིཏཱ, ཏཔྤབྷེདེན བྷེདོཔཙཱརོཔི ན ཨིཙྪིཏབྦོ. ན ཙ པཧོཏི ཨུཔཙརིཏོ བཧུབྷཱཝོ ཨཏྠཏོ བཧུབྷཱཝཱཡ. ན ཧི ཛལཾ ཨནལནྟི ཨུཔཙརིཏཾ དཧཏི, པཙཏི ཝཱ. ཨེཀཏྟཔཉྷམྤི ཙཱཡམབྷཱཝོ ཨསབྷཱཝཏཱཡ ན སཧཏཱིཏི ན སཀྐཱ ཝཏྟུཾ ནཏྠིབྷཱཝསཱམཉྙཏོ ཨབྷེདཝོཧཱརོ ཡུཏྟརཱུཔོཏི. ཨེཀཏྟེ ཙ པུབྦེ ཝུཏྟཱ ཨེཝ དོསཱ, བཧུབྷཱཝེ པན སཏི ཝུཏྟནཡེནེཝ སིདྡྷཱ སབྷཱཝདྷམྨཏཱ. སབྷཱཝདྷམྨཏྟེཔི ཙ བཧུབྷཱཝོ ཝིཡ བྷཱཝཾ བྷཱཝོཔི བཧུབྷཱཝཾ ན བྱབྷིཙརེཡྻཱཏི ནིབྦཱནསྶ བཧུབྷཱཝཔསངྒོ སིཡཱཏི ཙེ? ན བཧུབྷཱཝསྶེཝ ཨབྷཱཝཔྤསངྒཏོ. ཡདི ཧི ཡཐཱ ཀཀྑལ༹ཏཱ བྷཱཝཾ, ཨེཝཾ བྷཱཝོཔི ཀཀྑལ༹ཏཾ ན བྱབྷིཙརེཡྻ. ཨེཝཾ སཏི སབྦེསཾ བྷཱཝཱནཾ པཐཝཱིབྷཱཝཱཔཏྟིཏོ ཀུཏོ བྷཱཝསྶ བཧུབྷཱཝོ, ཏསྨཱ ལོཀཝོཧཱརཱནཾ ཝིཙིཏྟཏཱཡ ཡདིཔི བཧུཏཱ བྷཱཝཱཔེཀྑཱ, བྷཱཝཏཱ པན ན བཧུཏཱཔེཀྑཱཏི ན བྷཱཝསྶ སཏོ ནིབྦཱནསྶ བཧུབྷཱཝོ ‘‘ཨེཀཱ ནིཊྛཱ ¶ ན པུཐུ ནིཊྛཱ’’ཏི ཝཙནཏོ. ཨེཀསྨིཾཡེཝ ཙ དསྶནབྷཱཝནཱདྭཡཾ སམྦྷཝཏི.

པརིནིབྦུཏཱནཾ པཙྩེཀཾ ནིབྦཱནབྷཱཝེ སཏྟསནྟཱནནིཡཏཾ ནཱམ ནིབྦཱནཾ སིཡཱ. ཏཐཱ ཙ སཏི སངྑཏཏཱདིདོསཱནཏིཝཏྟིཡེཝ, ཀིལེསཔྤཧཱནཾ ཝཱ མགྒཀིཙྩཾ ཀིལེསཱནཾ ཨབྷཱཝོ. ཏསྶ ཙ ཨེཀཏྟེ ན མགྒབཧུཏཱ ཀིཙྩནྟརསྶ ཀཏྟབྦསྶ ཨབྷཱཝཏོ. མགྒབཧུབྷཱཝོ ཙ མགྒེཧི སཙྪིཀཱཏབྦེ ཨེཀསྨིཾ དྷམྨེ ཨིནྡྲིཡཱནཾ ཨཔཱཊཝཔཱཊཝཔཱཊཝཏརཔཱཊཝཏམབྷཱཝེན སཙྪིཀིརིཡཱཝིསེསེན ཀིལེསཱནཾ པཧཱནབྷེདེན ཧོཏཱིཏི ནིབྦཱནསྶ སབྷཱཝདྷམྨཏྟེ ཨེཝ སིཡཱ. ཨབྷཱཝོཔི ཙ ཀིལེསཱནཾ མགྒེན སཀིཙྩཀཏཱཡ ཀཱཏབྦོ ཨེཝ སིཡཱ, ན སཙྪིཀཱཏབྦོ. ཀོ ཧི སབྷཱཝོ ཨབྷཱཝསྶ? ཡོ སཙྪིཀཱཏབྦོ སིཡཱ, སོ ཙེ ནིབྦཱནཾ ཨེཀེནེཝ མགྒེན སབྦཀིལེསཱནཾ ཨབྷཱཝོ ཨེཀོ ཨབྷིནྣོ ཀཱཏབྦོ ཨཱཔནྣོ. ཨཉྙཐཱ མགྒཝསེན ཙཏུབྦིདྷབྷཱཝེ ནིབྦཱནསྶ ཙཏུབྦིདྷབྷཱཝཔྤསངྒོ, ནིབྦཱནཝིསེསཔྤསངྒོ ཙ ཨཱཔཛྫེཡྻཱཏི མགྒཀིཙྩསྶ ཨེཀཏྟེན མགྒབཧུཏཱ སིཡཱ. བཧུབྷཱཝེ པན ཏེསཾ སོ ཝུཏྟནཡེན ཨེཀསྨིཾ དྷམྨེ སཙྪིཀིརིཡཱཝིསེསཏོཏི སིདྡྷཱ ནིབྦཱནསྶ སབྷཱཝདྷམྨཏཱ. ཁཡཱདྷིགནྟབྦཏཱཡ པནེཏཾ ‘‘ཁཡོ’’ཏི ཝུཏྟཾ. ‘‘ཁཡེ ཉཱཎ’’ནྟི (དྷ. ས. དུཀམཱཏིཀཱ ༡༤༢; ༡༣༨༢) ཧི ཝཙནཏོ ཨརིཡམགྒོ ཁཡོ ནཱམ. ཏེན ཙེཏཾ ཨདྷིགནྟབྦཾ སཙྪིཀཱཏབྦཾ, ཏསྨཱ ‘‘ཁཡོ’’ཏི ཝུཏྟནྟི.

ཨིཏི ནིརོདྷནིདྡེསཀཐཱཝཎྞནཱ.

མགྒནིདྡེསཀཐཱཝཎྞནཱ

༥༦༢. ཨཊྛ ¶ དྷམྨཱཏི ‘‘ཀཏམཾ དུཀྑནིརོདྷགཱམིནཱི པཊིཔདཱ ཨརིཡསཙྩ’’ནྟི ཨཱརབྷིཏྭཱ ‘‘སམྨཱདིཊྛཱི’’ཏིཨཱདིནཱ པཱལི༹ཡཾ (ཝིབྷ. ༢༠༥) དུཀྑནིརོདྷགཱམིནིཔཊིཔདཱནིདྡེསེ ཨཱགཏཱ, ཏམེཝ ཙ པཱལི༹ཾ ཨཱནེཏྭཱ ཨུདྡེསཝསེན ཨིདྷ ཙ ཝུཏྟཱ སམྨཱདིཊྛིཨཱདཡོ ཨཊྛ དྷམྨཱ ཨཏྠཏོ པཀཱསིཏཱ, ན མགྒསཙྩནིདྡེསཝསེནཱཏི ཨདྷིཔྤཱཡོ. ཡདི ཨཏྠཏོ པཀཱསིཏཱ, ཀིམཏྠིཡཾ པན ཨིདྷ ཀཐནནྟི ཨཱཧ ‘‘ཨིདྷ པནཱ’’ཏིཨཱདི. ཏཏྠ ‘‘ཨེཀཀྑཎེ པཝཏྟམཱནཱན’’ནྟི ཨིདཾ ལོཀིཡཀུསལཙིཏྟུཔྤཱདེསུ ཝིརཏིཡོ ནཱནཱཀྑཎིཀཱ ཨེཝ ¶ ཧོནྟཱིཏི ཀཏྭཱ ཝུཏྟཾ. སེསམགྒདྷམྨཱ པན ཏཏྠཱཔི ཨེཀཛ྄ཛྷཾ ཨུཔྤཛྫནྟིཡེཝ. ཝིསེསཱཝབོདྷནཏྠནྟི པཊིཔཀྑསམུགྒྷཱཏཱདིཔཝཏྟིཨཱཀཱརཝིསེསསྶ ཨཝབོདྷནཏྠཾ. ཝིཏྠཱརཏོ མགྒཀཐཱ པརཏོ ཨཱཝི བྷཝིསྶཏཱིཏི ཨཱཧ ‘‘སངྑེཔཏོ’’ཏི. ཙཏུསཙྩཔཊིཝེདྷཱཡ པཊིཔནྣསྶཱཏི ཡཐཱ ཙཏུསཙྩཱབྷིསམཡོ ཧོཏི, ཨེཝཾ སབྦསོ པུབྦབྷཱགཔཊིཔཏྟིཡཱ པརིཔཱུརཎཝསེན པཊིཔནྣསྶ. ཨརིཡམགྒསངྑཱཏསྶ ཡོགསྶ སབྦྷཱཝཏོ ཡོགིནོ. ཀཱམཾ ཨཝིཛྫཱནུསཡསམུགྒྷཱཏེ ཏདེཀཊྛཀིལེསཱནཾ ལེསོཔི ནཱཝསིསྶཏི, ཝིཛྫཱཡ པན ཨཝིཛྫཱ ཨུཛུཝིཔཙྩནཱིཀདྷམྨོཏི དསྶནཏྠཾ ‘‘ཨཝིཛྫཱནུསཡསམུགྒྷཱཏཀ’’ནྟི ཝུཏྟཾ. པརཏོ མིཙྪཱསངྐཔྤཱདིགྒཧཎེཔི ཨེསེཝ ནཡོ. དྷཱཏུཔྤཀཱསནརསཱཏི པརམཏྠཔཀཱསནརསཱ, ཙཏུསཙྩཝིབྷཱཝནཀིཙྩཱཏི ཨཏྠོ. མགྒདྷམྨཱནཾ པཊིཔཀྑཝིདྷམནཱཀཱརོ སཱཏིསཡཾ པཱཀཊོ ཧུཏྭཱ ཨུཔཊྛཱཏཱིཏི ཨཝིཛྫཱནུསཡསམུགྒྷཱཏཀཏཾ སམྨཱདིཊྛིཡཱ ཝཏྭཱཔི ཨཝིཛྫནྡྷཀཱརཝིདྡྷཾསནཔཙྩུཔཊྛཱནཏཱ ཝུཏྟཱ.

ཏཐཱ སམྤནྣདིཊྛིནོཏི ཡཐཱ ཨཝིཛྫཱནུསཡསམུགྒྷཱཏོ ཧོཏི, ཏཐཱ མགྒསམྨཱདིཊྛིཡཱ སམྤནྣདིཊྛིནོ. ཨེཝཉྷི ཙཏུསཙྩཔཊིཝེདྷཱཡ པཊིཔནྣསྶ ཡོགིནོཏི ཨིམམཏྠཾ ཏཐཱ-སདྡོ ཨུཔསཾཧརཏི. ནིབྦཱནཱརམྨཎཏཱ པན ཏཾསམྤཡུཏྟཝཙནེནེཝ བོདྷིཏཱ. མིཙྪཱསངྐཔྤནིགྷཱཏཀནྟི ཀཱམསངྐཔྤཱདིམིཙྪཱསངྐཔྤསམུཙྪེདཀཾ. ཨཔྤནཱརསོཏི ནིབྦཱནཱརམྨཎེ མགྒཙིཏྟསྶ སམུཔྤཱདཝསེན པཝཏྟནཏོ ཨཔྤནཱཀིཙྩོ.

ཏཐཱ པསྶཏོ ཝིཏཀྐཡཏོ ཙཱཏི ཝུཏྟཔྤཀཱརཱཡ སམྨཱདིཊྛིཡཱ པསྶཏོ, ནིབྦཱནཱརམྨཎེ ཙ སམྨཱསངྐཔྤེན ཙིཏྟཾ ཨབྷིནིརོཔཡཏོ. ཝཙཱིདུཙྩརིཏསམུགྒྷཱཏིཀཱཏི ཙཏུབྦིདྷསྶཔི ཝཙཱིདུཙྩརིཏསྶ སམུཙྪེདིཀཱ. མུསཱཝཱདཱདཱིནཾ ཝིསཾཝཱདནཱདིཀིཙྩཏཱཡ ལཱུཁཱནཾ ཨཔརིགྒཱཧཀཱནཾ ¶ པཊིཔཀྑབྷཱཝཏོ སིནིདྡྷབྷཱཝེན སམྤཡུཏྟདྷམྨཱནཾ པརིགྒཱཧཀསབྷཱཝཱ སམྨཱཝཱཙཱཏི ཨཱཧ ‘‘སཱ པརིགྒཧལཀྑཎཱ’’ཏི. ཀཱཡིཀཀིརིཡཱ ཀིཉྩི ཀཏྟབྦཾ སམུཊྛཱཔེཏི, སཡཉྩ སམུཊྛཧནཾ གྷཊནཾ ཧོཏཱིཏི སམྨཱཀམྨནྟསངྑཱཏཱ ཝིརཏིཔི སམུཊྛཱནསབྷཱཝཱ ཝུཏྟཱ. སམྤཡུཏྟདྷམྨཱནཾ ཝཱ ཨུཀྑིཔནཾ སམུཊྛཱཔནཾ ཀཱཡིཀཀིརིཡཱཡ བྷཱརུཀྑིཔནཾ ཝིཡ.

ཨསྶཱཏི ཡོགིནོ. ཏསྨིཾ སཏི ཝིསུཛ྄ཛྷནཏོ ཝིསུདྡྷིབྷཱུཏཱ. ཛཱིཝམཱནསྶ སཏྟསྶ, སམྤཡུཏྟདྷམྨཱནཾ ཝཱ སུདྡྷི ཝོདཱནཾ, ཨཱཛཱིཝསྶེཝ ཝཱ ཛཱིཝིཏིནྡྲིཡཝུཏྟིཡཱ ¶ . ཉཱཡཱཛཱིཝསྶ ཨབུདྡྷཔཊིཀུཊྛཱཡ སམྨཱཛཱིཝིཀཱཡ པཝཏྟིཧེཏུཏཱཡ ཉཱཡཱཛཱིཝཔཝཏྟིརསོ. ཨིམསྶ ཧི པཝཏྟིཏོ པཊྛཱཡ མིཙྪཱཛཱིཝོ ན པཝཏྟཏཱིཏི.

སབྦཱཀུསལཝིདྡྷཾསཀོཔི སམྨཱཝཱཡཱམོ ཨུཛུཔཊིཔཀྑདསྶནཝསེན ཀོསཛྫསམུཙྪེདཀོ ཝུཏྟོ. སཾཀིལེསཔཀྑཏོཔི ཏསྶ པགྒཎྷནཾ པགྒཧོ. ཀཱཡཱདཱིསུ སུབྷཱདིཨཱཀཱརུཔདྷཱརཎཝསེན པཝཏྟཱ སུབྷསཉྙཱདིཔུབྦངྒམཱ ཨཀུསལཀྑནྡྷཱ མིཙྪཱསཏི, ཏསྶཱ ཝིདྡྷཾསནོ མིཙྪཱསཏིཝིནིདྡྷུནནོ. ཨསམྨོསོཏི སམྨོསཝིདྡྷཾསནཏོ ཏཔྤཊིཔཀྑོ. ཨཱརམྨཎསྶ ཡཐཱསབྷཱཝསལླཀྑཎཾ ཨུཔཊྛཱནཾ. ‘‘ཨཱརཀྑཔཙྩུཔཊྛཱནཱ’’ཏི, ‘‘སཏཱརཀྑེན ཙེཏསཱ’’ཏི (དཱི. ནི. ༣.༣༤༨) ཙ ཝཙནཏོ ཝིསེསཏོ སཏི ཀུསལཙིཏྟསྶ ཨཱརཀྑཱཏི ཨཱཧ ‘‘སཏིཡཱ སཾརཀྑིཡམཱནཙིཏྟསྶཱ’’ཏི.

༥༦༣. སཙྩཉཱཎསྶཱཏི སཙྩཱནི ཨཱརབྦྷ པཝཏྟནཀཉཱཎསྶ, ན པཊིཝེདྷཉཱཎཾ ཝིཡ སཀིདེཝ བུཛ྄ཛྷཏི, ཨཐ ཁོ པུནཔྤུནཾ ཨུཔྤཛྫནཏོ ཨནུ ཨནུ བོདྷོ ཨནུབོདྷོ, ཨནུསྶཝཱཀཱརཔརིཝིཏཀྐདིཊྛིནིཛ྄ཛྷཱནཀྑནྟིཨནུགཏོ ཝཱ བོདྷོ ཨནུབོདྷོ, ཏདེཝ ཉཱཎནྟི ཨནུབོདྷཉཱཎཾ. ན ཧི ཏཾ པཙྩཀྑཏོ བུཛ྄ཛྷཏི, ཨནུསྶཝཱདིཝསེན པན ཀཔྤནམུཁེན བུཛ྄ཛྷཏི. ཀིཙྩཏོཏི པརིཛཱནནཱདིཏོ. ཏཾཀིཙྩཀརཎེནེཝ ཧི པརིཉྙེཡྻཱདཱིནི ཝིཡ ཏཱནིཔི ཏསྶ པཱཀཊཱནི ཧོནྟི. ཝིཝཊྚཱནུཔསྶནཱཡ ཧི སངྑཱརེཧི པཏིལཱིཡམཱནམཱནསསྶ ཨུཔྤཛྫམཱནཾ མགྒཉཱཎཾ ཝིསངྑཱརཾ དུཀྑནིསྶརཎཾ ཨཱརམྨཎཾ ཀཏྭཱ དུཀྑཾ པརིཙྪིནྡཏི, དུཀྑགཏཉྩ ཏཎྷཾ པཛཧཏི, ནིརོདྷཉྩ སཙྪིཀརོཏི ཕུསཏི. ཨཱདིཙྩོ ཝིཡ པབྷཱཡ སམྨཱསངྐཔྤཱདཱིཧི སཧ སམུཔྤནྣཾ ཏཾ མགྒཾ བྷཱཝེཏི, ན ཙ སངྑཱརེ ཨམུཉྩིཏྭཱ པཝཏྟམཱནེན ཉཱཎེན ཨེཏཾ སབྦཾ ཀཱཏུཾ སཀྐཱ ནིམིཏྟཔཝཏྟེཧི ཨཝུཊྛིཏཏྟཱ. ཏསྨཱ ཨེཏཱནི ཀིཙྩཱནི ཀརོནྟཾ ཏཾ ཉཱཎཾ དུཀྑཱདཱིནི ཝིབྷཱཝེཏི ¶ ཏཏྠ སམྨོཧནིཝཏྟནེནཱཏི ‘‘ཙཏྟཱརིཔི སཙྩཱནི པཊིཝིཛ྄ཛྷཏཱི’’ཏི ཝུཏྟཾ, ཨེཀཔཊིཝེདྷེནཱཏི ཨདྷིཔྤཱཡོ.

དུཀྑསམུདཡམྤི སོ པསྶཏཱིཏི ཀཱལནྟརདསྶནཾ སནྡྷཱཡ ཝུཏྟནྟི ཙེ? ན, ‘‘ཡོ ནུ ཁོ, ཨཱཝུསོ, དུཀྑཾ པསྶཏི, དུཀྑསམུདཡམྤི སོ པསྶཏཱི’’ཏིཨཱདིནཱ (སཾ. ནི. ༥.༡༡༠༠) ཨེཀདསྶིནོ ཨཉྙཏྟཡདསྶིཏཱཝིཙཱརཎཱཡཾ ཏཾསཱདྷནཏྠཾ ཨཱཡསྨཏཱ ¶ གཝམྤཏིཏྠེརེན ཨིམསྶ སུཏྟསྶ ཨཱནཱིཏཏྟཱ, པཙྩེཀཉྩ སཙྩེསུ དིསྶམཱནེསུ ཨཉྙཏྟཡདསྶནསྶ ཡོཛིཏཏྟཱ. ཨཉྙཐཱ ཨནུཔུབྦཱབྷིསམཡེ པུརིམདིཊྛསྶ པཙྪཱ ཨདསྶནཏོ སམུདཡཱདིདསྶིནོ དུཀྑཱདིདསྶིཏཱ ན ཡོཛེཏབྦཱ སིཡཱ. ཡོཛིཏཱ ཙ སཱ ‘‘ཡོ དུཀྑསམུདཡཾ པསྶཏི, དུཀྑམྤི སོ པསྶཏཱི’’ཏིཨཱདིནཱ (སཾ. ནི. ༥.༡༡༠༠). ལོཀིཡཾ སཙྩཉཱཎཾ. ཏཏྠ ལོཀིཡཉཱཎེ. པརིཡུཊྛཱནསངྑཱཏོ ཨབྷིབྷཝོ པརིཡུཊྛཱནཱབྷིབྷཝོ, ཏསྶ ཝསེན. སུདྡྷསངྑཱརཔུཉྫམཏྟདསྶནཏོ སཀྐཱཡདིཊྛིཔརིཡུཊྛཱནཾ ནིཝཏྟེཏི. ‘‘ལོཀསམུདཡཾ ཁོ, ཀཙྩཱན, ཡཐཱབྷཱུཏཾ སམྨཔྤཉྙཱཡ པསྶཏོ ཡཱ ལོཀེ ནཏྠིཏཱ, སཱ ན ཧོཏཱི’’ཏི (སཾ. ནི. ༢.༡༥) ཝཙནཏོ སམུདཡདསྶནཾ ཧེཏུཕལཔབནྡྷཱཝིཙྪེདདསྶནཏོ པརིཡུཊྛཱནཱབྷིབྷཝཝསེན པཝཏྟམཱནཾ ཨུཙྪེདདིཊྛིཾ ནིཝཏྟེཏི. ‘‘ལོཀནིརོདྷཾ ཁོ…པེ… པསྶཏོ ཡཱ ལོཀེ ཨཏྠིཏཱ, སཱ ན ཧོཏཱི’’ཏི (སཾ. ནི. ༢.༡༥) ཝཙནཏོ ནིརོདྷདསྶནཾ ཧེཏུནིརོདྷཱ ཕལནིརོདྷདསྶནཏོ སསྶཏདིཊྛིཾ ནིཝཏྟེཏི. ཨཏྟཀཱརསྶ པཙྩཀྑདསྶནཏོ མགྒདསྶནཾ ‘‘ནཏྠི ཨཏྟཀཱརེ, ནཏྠི པརཀཱརེ, ནཏྠི པུརིསཀཱརེ’’ཏིཨཱདིཀཾ (དཱི. ནི. ༡.༡༦༨) ཨཀིརིཡདིཊྛིཾ པཛཧཏི. ‘‘ནཏྠི ཧེཏུ, ནཏྠི པཙྩཡོ སཏྟཱནཾ སཾཀིལེསཱཡ, ཨཧེཏཱུ ཨཔྤཙྩཡཱ སཏྟཱ སཾཀིལིསྶནྟི, ནཏྠི ཧེཏུ…པེ… ཝིསུདྡྷིཡཱ, ཨཧེཏཱུ ཨཔྤཙྩཡཱ སཏྟཱ ཝིསུཛ྄ཛྷནྟཱི’’ཏིཨཱདིཀཱ (དཱི. ནི. ༡.༡༦༨; མ. ནི. ༢.༡༠༡, ༢༢༧; སཾ. ནི. ༣.༢༡༢) ཨཧེཏུཀདིཊྛི ཙ ཨིདྷ ཨཀིརིཡཱདིཊྛིགྒཧཎེནེཝ གཧིཏཱཏི དཊྛབྦཱ. སཱཔི ཧི ཝིསུདྡྷིམགྒདསྶནེན པཧཱིཡཏཱིཏི. དུཀྑེ ཉཱཎཾ སམུདཡཕལསྶ དུཀྑསྶ ཨདྡྷུཝཱདིབྷཱཝཾ པསྶཏཱིཏི ཕལེ ཝིཔྤཊིཔཏྟིཾ ནིཝཏྟེཏི.

ཨིསྶརོ ལོཀཾ པཝཏྟེཏི སཛྫེཏི ནིཝཏྟེཏི སཾཧརཏཱིཏི ཨིསྶརཀཱརཎིནོ ཝདནྟི. པདྷཱནཏོ ལོཀོ ཨཱཝི བྷཝཏི, ཏཏྠེཝ ཙ པཏིལཱིཡཏཱིཏི པདྷཱནཀཱརཎིནོ.

‘‘ཀཱལོ ¶ ཀརོཏི བྷཱུཏཱནི, ཀཱལོ སཾཧརཏཱི པཛཱ;

ཀཱལོ སུཏྟེ ཛཱགརཏི, ཀཱལོ ཧི དུརཏིཀྐམོ’’ཏི. –

ཀཱལཝཱདིནོ. ཀཎྚཀསྶ ཏིཁིཎབྷཱཝོ ཝིཡ, ཀཔིཊྛཕལཱདཱིནཾ པརིམཎྜལཏཱ ཝིཡ, མིགཔཀྑིསརཱིསཔཱདཱིནཾ ཝིཙིཏྟཏཱ ཝིཡ ཙ སབྷཱཝེནེཝ ལོཀོ སམྦྷོཏི, ཝིབྷོཏི ཙཱཏི སབྷཱཝཝཱདིནོ. ཨཱདི-སདྡེན ཨཎཱུཧི ¶ ལོཀོ པཝཏྟཏི, སབྦཾ པུབྦེཀཏཧེཏུ, ལོཀོ ནིཡཏོ ཨཙྪེཛྫསུཏྟཱཝུཏཱབྷེཛྫམཎིསདིསོ, ན ཨེཏྠ ཀསྶཙི པུརིསཀཱརོཏི ནིཡཏིཝཱདིནོ.

‘‘ཡདིཙྪཱཡ པཝཏྟནྟི, ཡདིཙྪཱཡ ནིཝཏྟརེ;

ཡདིཙྪཱཡ སུཁཾ དུཀྑཾ, ཏསྨཱ ཡཱདིཙྪཀཱི པཛཱ’’ཏི. –

ཡདིཙྪཱཝཱདིནོ, ཡེ ཨདྷིཙྩསམུཔྤཏྟིཝཱདིནོཏི ཙ ཝུཙྩནྟི. ཨེཝམཱདིཨཀཱརཎཝཱདསངྒཧོ དཊྛབྦོ. རཱམུདཀཨཱལཱ༹རཱདཱིནཾ ཝིཡ, ཨརཱུཔལོཀེ ནིགཎྛཱནཾ ཝིཡ ཙ ལོཀཐཱུཔིཀཱཡཾ ཨཔཝགྒོ མོཀྑོཏི གཧཎཾ ཨཔཝགྒགཱཧོ. ཨཱདི-སདྡེན པདྷཱནསྶ ཨཔྤཝཏྟི, གུཎཝིཡུཏྟསྶ ཨཏྟནོ སཀཏྟནི ཨཝཊྛཱནཾ, བྲཧྨུནཱ སལོཀཏཱ, སམཱིཔཏཱ, སཾཡོགོ, དིཊྛདྷམྨནིབྦཱནཝཱདཱཏི ཨེཝམཱདཱིནཾ གཧཎཾ དཊྛབྦཾ. ཨེཏྠ ཙ པདྷཱནསྶ ཨཔྤཝཏྟི མཧཏཱདིབྷཱཝེན ཨཔརིཎཱམོ, ཨནབྷིབྱཏྟི ཝཱ. ‘‘ཨཧམཉྙོ, པཀཏི ཨཉྙཱ’’ཏི ཨེཝཾ པཝཏྟཔཀཏིཔུརིསནྟརཛཱནནེན ཨཏྟསུཁདུཀྑམོཧེསུ ཨཝིབྷཱགགྒཧཎེ ཀིར ནིཝཏྟིཏེ ཝུཏྟནཡེན པདྷཱནཾ ནཔྤཝཏྟཏི, སོ ཝིམོཀྑོཏི ཀཱཔིལཱ. གུཎཝིཡུཏྟསྶཱཏི བུདྡྷིསུཁདུཀྑཨིཙྪཱདོསཔྤཡཏྟདྷམྨཱདྷམྨསངྑཱརེཧི ནཝཧི ཨཏྟགུཎེཧི ཝིཡུཏྟསྶཱཏི ཀཎཱདམཏཱནུསཱརིནོ. སལོཀཏཱ བྲཧྨུནཱ སམཱནལོཀཏཱ. སམཱིཔཏཱ ཏསྶ སམཱིཔཔྤཝཏྟིཏཱ. སཾཡོགོ ཏེན ཨེཀཱིབྷཱཝཱུཔགམནཾ. ‘‘ཨིནྡྲིཡཏཔྤནཔུཏྟམུཁདསྶནཱདཱིཧི ཝིནཱ ཨཔཝགྒོ ནཏྠཱི’’ཏི གཧེཏྭཱ ཏཐཱ པཝཏྟནཾ ཀཱམསུཁལླིཀཱནུཡོགོ. ཨནསནཀེསལུཉྩནཱདིཏཔཙརིཡཱཡ ནགྒསཱིལགོསཱིལཀུཀྐུརསཱིལཱདཱིཧི ཙ ཨཏྟཔརིཏཱཔནེན མོཀྑོ ཧོཏཱིཏི ཨཏྟཀིལམཐོ.

སྭཱཡཾ སབྦོ མིཙྪཱགཱཧོ སཙྩཉཱཎེ སཏི པཏིཊྛཾ ན ལབྷཏཱིཏི ཝུཏྟམེཝཏྠཾ སངྒཎྷནྟོ ‘‘ལོཀེ ལོཀཔྤབྷཝེ’’ཏི གཱཐམཱཧཱཏི.

ཉཱཎཀིཙྩཏོ ཝིནིཙྪཡཝཎྞནཱ ནིཊྛིཏཱ.

༥༦༤. སེསཱ ¶ ¶ སབྦདྷམྨཱཏི སེསཱ ཨེཀཱསཱིཏི ལོཀིཡདྷམྨཱ. ཨཛ྄ཛྷཏྟིཀབཱཧིརེསུ དྭཱདསསུ ཨཱཡཏནེསུ ཀཱམབྷཝཝིབྷཝཏཎྷཱཝསེན དྭཱདསཏིཀཱ ཚཏྟིཾས ཏཎྷཱཝིཙརིཏཱནི, ཁུདྡཀཝཏྠུཝིབྷངྒེ ཝཱ ཨཱགཏནཡེན ཀཱལཝིབྷཱགཾ ཨནཱམསིཏྭཱ ཝུཏྟཱནི. ཏདཱམསནེ ཧི ཨཊྛསཏཾ ཧོནྟི. ཨསམྨིསྶནྟི ཨེཀཀཏྟཱ ཀེནཙི ཨསམྨིསྶཾ, ཀུཏོ ཏདནྟོགདྷཔྤབྷེདོཏི ཨདྷིཔྤཱཡོ. ཝཱིམཾསིདྡྷིཔཱདཱདཱིནཾ བོདྷིཔཀྑིཡཱནཾ སཏིཔི ཀིཙྩནཱནཏྟེ ཨཏྠཏོ ཨེཀཏྟཱ སམྨཱདིཊྛིཡཱ སངྒཧོཏི སམྨཱདིཊྛིམུཁེན ཏདནྟོགདྷཏཱ ཝུཏྟཱ.

ཏཡོ ནེཀྑམྨཝིཏཀྐཱདཡོཏི ལོཀིཡཀྑཎེ ཨལོབྷམེཏྟཱཀརུཎཱསམྤཡོགཝསེན བྷིནྣཱ, མགྒཀྑཎེ ལོབྷབྱཱཔཱདཝིཧིཾསཱསམུཙྪེདནཝསེན ཏཡོཏི ཨེཀོཔི ཝུཏྟོ. ཨེས ནཡོ སམྨཱཝཱཙཱདཱིསུ. ཨཔྤིཙྪཏཱསནྟུཊྛིཏཱནཾ པན བྷཱཝེ སམྨཱཨཱཛཱིཝསམྦྷཝཏོ ཏེན ཏེསཾ སངྒཧོ དཊྛབྦོ. བྷཝནྟརེཔི ཛཱིཝིཏཧེཏུཔི ཨརིཡེཧི ཨཝཱིཏིཀྐམནཱིཡཏྟཱ ཨརིཡཀནྟཱནཾ སམྨཱཝཱཙཱདིསཱིལཱནཾ གཧཎེན ཡེན སདྡྷཱཧཏྠེན ཏཱནི གཧེཏབྦཱནི, སོ སདྡྷཱཧཏྠོ གཧིཏོ ཨེཝ ཧོཏཱིཏི ཏཏོ ཨནཉྙཱནི སདྡྷིནྡྲིཡསདྡྷཱབལཱནི ཏཏྠ ཨནྟོགདྷཱནི ཝུཏྟཱནི. ཚནྡོ པན སདྡྷཱནུགུཎོཏི ཀཏྭཱ ཚནྡིདྡྷིཔཱདསྶཱཔི ཏདནྟོགདྷཏཱ ཝུཏྟཱ. ཏེསཾ ཨཏྠིཏཱཡཱཏི སདྡྷིནྡྲིཡསདྡྷཱབལཚནྡིདྡྷིཔཱདཱནཾ ཨཏྠིཏཱཡ སཱིལསྶ ཨཏྠིབྷཱཝཏོ ཏིཝིདྷེནཱཔི སཱིལེན ཏེ ཏཡོཔི གཧིཏཱཏི ཏཏྠ ཨནྟོགདྷཱ. ཙིཏྟསམཱདྷཱིཏི ཙིཏྟིདྡྷིཔཱདཾ ཝདཏི. ‘‘ཙིཏྟཾ པཉྙཉྩ བྷཱཝཡ’’ནྟི (སཾ. ནི. ༡.༢༣, ༡༩༢; པེཊཀོ. ༢༢; མི. པ. ༢.༡.༩) ཧི ཙིཏྟམུཁེན སམཱདྷི ཝུཏྟོཏི སམཱདྷིམུཁེན ཙིཏྟམྤི ཝཏྟབྦཏཾ ཨརཧཏི. ཙིཏྟིདྡྷིཔཱདབྷཱཝནཱཡ པན སམཱདྷིཔི ཨདྷིམཏྟོ ཧོཏཱིཏི ཝཱིམཾསིདྡྷིཔཱདཱདིཝཙནཾ ཝིཡ ཙིཏྟིདྡྷིཔཱདོཏི ཨཝཏྭཱ ཨིདྷ ‘‘ཙིཏྟསམཱདྷཱི’’ཏི ཝུཏྟཾ. ‘‘པཱིཏིམནསྶ ཀཱཡོ པསྶམྦྷཏི, པསྶདྡྷཀཱཡོ སུཁཾ ཝེདེཏི, སུཁིནོ ཙིཏྟཾ སམཱདྷིཡཏཱི’’ཏི (དཱི. ནི. ༡.༤༦༦; ༣.༣༥༩; སཾ. ནི. ༥.༣༧༦; ཨ. ནི. ༣.༩༦; ༡༡.༡༢) ཝཙནཏོ སམཱདྷིཨུཔཀཱརཱ པཱིཏིཔསྶདྡྷིཡོ, ཏསྨཱ སམཱདྷིགྒཧཎེན གཧིཏཱ. ཨུཔེཀྑཱ པན སམཱདྷིཨུཔཀཱརཀཏོ, ཏཾསདིསཀིཙྩཏོ ཙ. ཏསྨཱ སམཱདྷིསཱིསེན ཨེཏེསཾ ཨནྟོགདྷཏཱ དཊྛབྦཱ.

ཨནྟོགདྷཱནཾ པབྷེདཝིནིཙྪཡཝཎྞནཱ ནིཊྛིཏཱ.

༥༦༥. བྷཱརོ ¶ ཝིཡ དུཀྑསཙྩཾ ཝིགྷཱཏཀཏྟཱ, སཾཧརཎཱིཡཝསེན ཝིཧནྟབྷཱཝཏོཏི ཨཏྠོ. བྷཱརཱདཱནམིཝ ཏཏྠ ཏཏྠ བྷཝེ ཨུཔྤཛྫནཀཝིགྷཱཏསྶ ཧེཏུབྷཱཝཏོ. བྷཱརནིཀྑེཔནམིཝ པཝཏྟིདུཀྑཝཱུཔསམབྷཱཝཏོ ¶ . རོགོ ཝིཡ, དུབྦྷིཀྑམིཝ ཙ བཱདྷཀཏྟཱ. རོགནིདཱནཾ ཝིཡ, དུབྦུཊྛི ཝིཡ ཙ པབྷཝལཀྑཎཏྟཱ. དུབྦུཊྛཱིཏི ཙ ཨཝསྶནཾ ཝཱ ཨཏིཝསྶནཾ ཝཱ. རོགཝཱུཔསམོ ཝིཡ, སུབྷིཀྑམིཝ ཙ སནྟིལཀྑཎཏྟཱ, སུཁབྷཱཝཏོ. ‘‘ནིབྦཱནཾ པརམཾ སུཁ’’ནྟི (དྷ. པ. ༢༠༣-༢༠༤) ཧི ཝུཏྟཾ. བྷེསཛྫམིཝ, སུཝུཊྛི ཝིཡ ཙ དུཀྑསྶ ཧེཏུཔཙྪེདཏོ, ཏསྶ ཙ ཨཔགམཱུཔཱཡབྷཱཝཏོ. ནིཡྻཱནལཀྑཎཉྷི མགྒསཙྩཾ. ཨནིཊྛབྷཱཝཏོ, སཱསངྐསཔྤཊིབྷཡཏོ ཙ དུཀྑཾ ཝེརིཝིསརུཀྑབྷཡཨོརིམཏཱིརཱུཔམཾ. ཝེརཾ བྱཱཔཱདོ, པཙྩཏྠིཀབྷཱཝོ ཝཱ. ཝེརསམུགྒྷཱཏོ ཝེརཝཱུཔསམོ མེཏྟཱ. ཝེརསམུགྒྷཱཏུཔཱཡོ སངྒཧཝཏྠཱུནི.

ཨུཔམཱཏོ ཝིནིཙྪཡཝཎྞནཱ ནིཊྛིཏཱ.

༥༦༦. ཨེས ནཡོ སམུདཡཱདཱིསཱུཏི ཨཏྠི ཙེཏྠ སམུདཡོ, ན ཨརིཡསཙྩཾ, ཨཏྠི ཨརིཡསཙྩཾ, ན སམུདཡོ, ཨཏྠི སམུདཡོ ཙེཝ ཨརིཡསཙྩཉྩ, ཨཏྠི ནེཝ སམུདཡོ ན ཨརིཡསཙྩནྟི. སེསསཙྩདྭཡེཔི ཨེསེཝ ནཡོ. ན ཨརིཡསཙྩཾ པརིཉྙེཡྻཔཧཱཏབྦཱསངྑཏནིཡྻཱནབྷཱཝཱབྷཱཝཏོ. ཨིཏརཾ པན ཨརིཡསཙྩདྭཡནྟི སམུདཡམགྒསཙྩདྭཡམཱཧ. སིཡཱ དུཀྑཾ སངྑཱརདུཀྑཏཱཡ. ཏེནཱཧ ‘‘ཨནིཙྩཏོ’’ཏི. ཏཐཏྟེནཱཏི ཏཐསབྷཱཝེན, པརིཉྙེཡྻབྷཱཝེནཱཏི ཨཏྠོ. ཨེཏེན ཏཾ ཨརིཡསཙྩདྭཡཾ ‘‘སིཡཱ དུཀྑཾ, ན ཨརིཡསཙྩཾ, སིཡཱ ཨརིཡསཙྩཾ, ན དུཀྑ’’ནྟི ཨིམམཏྠཾ དསྶེཏི. ཨརིཡསཙྩསདྡཔརཱ ཧི དུཀྑཱདིསདྡཱ པརིཉྙེཡྻཱདིབྷཱཝཾ ཝདནྟི. ཏེནེཝ ཨརིཡསཙྩསདྡཱནཔེཀྑཾ དུཀྑསདྡཾ སནྡྷཱཡ མགྒསམྤཡུཏྟསཱམཉྙཕལདྷམྨཱནཾ ཨཱདིཔདསངྒཧོ ཝུཏྟོ, ཨརིཡསཙྩསདྡཱཔེཀྑཾ པན སནྡྷཱཡ ཙཏུཏྠཔདསངྒཧོ.

སབྦཱཀཱརེནཱཏི སབྦཔྤཀཱརེན. ཡཐཱ མགྒསམྤཡུཏྟདྷམྨཱདཡོ ཨེཀངྒཝིཀལཱ, ཨེཝཾ ཨཧུཏྭཱ སབྦངྒཡོགེན དུཀྑཏཱཡ ཙེཝ ཨརིཡསཙྩཏཱཡ ཙཱཏི ཨཏྠོ. ‘‘ཨུཔཱདཱནཀྑནྡྷཔཉྩཀ’’ནྟི ཝུཏྟེ ཏཎྷཱཡཔི སངྒཧོ སིཡཱཏི ཏཾནིཝཏྟནཏྠཾ ‘‘ཨཉྙཏྲ ཏཎྷཱཡཱ’’ཏི ཝུཏྟཾ ཏསྶཱ ཝིསུཾ ཨརིཡསཙྩབྷཱཝཏོ. སམུདཡཱདཱིསུ ཨཝསེསཀིལེསཱདཡོ པབྷཝཊྛེན སམུདཡོ, ན ཨརིཡསཙྩཾ སུཏྟནྟསཾཝཎྞནཱ ཨཡནྟི ཀཏྭཱ ¶ . ནིརོདྷོ ཨརིཡསཙྩཾ, ན སམུདཡོ. ཨིཏརཾ པན ཨརིཡསཙྩདྭཡཾ སིཡཱ སམུདཡོ ཨཏྟནོ ཕལསྶ པཙྩཡཊྛེན, ན པན ཡསྶ པཧཱནཱཡ བྷགཝཏི བྲཧྨཙརིཡཾ ཝུསྶཏི ཏཐཏྟེན, སབྦཱཀཱརེན པན ཏཎྷཱསམུདཡོ ཙེཝ ཨརིཡསཙྩཉྩ. མགྒསམྤཡུཏྟདྷམྨཱ, སཱམཉྙཕལཱནི ཙ ཡསྶ པཧཱནཱཡ བྷགཝཏི བྲཧྨཙརིཡཾ ཝུསྶཏི ཏཐཏྟེན ནེཝ སམུདཡོ, ན ཨརིཡསཙྩཾ. སངྑཱརནིརོདྷོ, ནིརོདྷསམཱཔཏྟི ཙ ནིརོདྷོ, ན ཨརིཡསཙྩཾ. སམུདཡོ ¶ ཨརིཡསཙྩཾ, ན ནིརོདྷོ. ཨིཏརཾ པན ཨརིཡསཙྩདྭཡཾ སིཡཱ ནིརོདྷོ ཁཎནིརོདྷསབྦྷཱཝཏོ, ན པན ཡསྶ སཙྪིཀིརིཡཱཡ བྷགཝཏི བྲཧྨཙརིཡཾ ཝུསྶཏི ཏཐཏྟེན. སབྦཱཀཱརེན པན ཨསངྑཏཱ དྷཱཏུ ནིརོདྷོ ཙེཝ ཨརིཡསཙྩཉྩ. སེསཾ ཝུཏྟནཡམེཝ. ཨརིཡམགྒཏོ ཨཉྙཱནི མགྒཱནི མགྒོ, ན ཨརིཡསཙྩཾ. ནིརོདྷོ ཨརིཡསཙྩཾ, ན མགྒོ. ཨིཏརཾ པན སཙྩདྭཡཾ སིཡཱ མགྒོ བྷཝགཱམིནིཔཊིཔདཱབྷཱཝཏོ, ན པན ཡསྶ བྷཱཝནཱཡ བྷགཝཏི བྲཧྨཙརིཡཾ ཝུསྶཏི ཏཐཏྟེན, སབྦཱཀཱརེན པན ནིརོདྷགཱམིནིཔཊིཔདཱ མགྒོ ཙེཝ ཨརིཡསཙྩཉྩ. སེསཾ ཝུཏྟནཡམེཝ.

ཙཏུཀྐཏོ ཝིནིཙྪཡཝཎྞནཱ ནིཊྛིཏཱ.

༥༦༧. སུཉྙཱནཱིཏི ཝེདཀཱདཱིཧི བཱཧིརཀཔརིཀཔྤིཏེཧཱིཏི ཨདྷིཔྤཱཡོ. དུཀྑཉྷི ཝེདནཱིཡམྤི སནྟཾ ཝེདཀརཧིཏཾ, ཀེཝལཾ པན ཏསྨིཾ ཨཏྟནོ པཙྩཡེཧི པཝཏྟམཱནེ དུཀྑཾ ཝེདེཏཱིཏི ཝོཧཱརམཏྟཾ ཧོཏི. ཨེས ནཡོ ཨིཏརེསུཔི.

‘‘དུཀྑམེཝཱ’’ཏི ཨཝདྷཱརཎེན ནིཝཏྟིཏམཏྠཾ དསྶེཏུཾ ‘‘ན ཀོཙི དུཀྑིཏོ’’ཏི ཝུཏྟཾ. ཀིརིཡཱཝ ཝིཛྫཏཱིཏི སམུདཡསཙྩཾ སནྡྷཱཡ ཝདཏི. པུརིམསཙྩདྭཡསྶ ཝིཔཱཀཝཊྚཀམྨཝཊྚསངྒཧཏོ ཀཱརཀསྶ ཝཱ དུཀྑསཙྩསབྷཱཝམཱཧ. ཀཱཏབྦཱཔི ཧི ཀིརིཡཱ ཀཱརཀརཧིཏཱ ཀེཝལཾ ཨཏྟནོ པཙྩཡེཧི ཏཱཡ པཝཏྟམཱནཱཡ དུཀྑསཉྙིཏེ དྷམྨཔྤབནྡྷེ ཀིརིཡཾ ཀརོཏཱིཏི ཝོཧཱརམཏྟཾ ཧོཏི. ནིབྦུཏགམཀེསུཔི ཨེསེཝ ནཡོ. ‘‘མགྒོ ཨཏྠཱི’’ཏི ཝཏྟབྦེ ‘‘མགྒམཏྠཱི’’ཏི ཨོཀཱརསྶ ཨབྷཱཝོ ཀཏོཏི དཊྛབྦཾ. གམཀོཏི ནིབྦུཏིཾ གནྟཱ.

ཀིལེསཱསུཙིཔགྒྷརཎཊྛེན སཱསཝཏཱ ཨསུབྷཏཱཏི ཀཏྭཱ ཨནཱསཝཏྟཱ ནིརོདྷམགྒཱ སུབྷཱ ཨེཝ. དུཀྑཱདཱིནཾ པརིཡཱཡེན སམུདཡཱདིབྷཱཝོ ཙ ཨཏྠི ¶ , ན པན ནིརོདྷབྷཱཝོ, ནིརོདྷསྶ ཝཱ ན དུཀྑཱདིབྷཱཝོཏི ནིརོདྷཱཝསེསཏྟཡཱནཾ ན ཨཉྙམཉྙསམངྒིཏཱཏི ཨཱཧ ‘‘ནིརོདྷསུཉྙཱནི ཝཱ’’ཏིཨཱདི.

སམུདཡེ དུཀྑསྶཱབྷཱཝཏོཏི པོནོབྷཝིཀཱཡ ཏཎྷཱཡ པུནབྦྷཝསྶ ཨབྷཱཝཏོ. ཡཐཱ ཝཱ པཀཏིཝཱདཱིནཾ ཝིཀཱརཱ ཨཝིཀཱརིབྷཱཝཏོ, པུབྦེ པཏིཔལཱིནཱ ཙ པཀཏིབྷཱཝེནེཝ ཏིཊྛནྟི, ན ཨེཝཾ སམུདཡསམྤཡུཏྟམྤི དུཀྑཾ སམུདཡབྷཱཝེན ཏིཊྛཏཱིཏི ཨཱཧ ‘‘སམུདཡེ དུཀྑསྶཱབྷཱཝཏོ’’ཏི ¶ . མགྒེ ཙ ནིརོདྷསྶ ཨབྷཱཝཏོཏི སམྦནྡྷོ. ཡཐཱ ཨཝིབྷཏྟེཧི ཝིཀཱརེཧི མཧཱཧངྐཱརཏམྨཏྟཝིསེསིནྡྲིཡབྷཱུཏཝིསེསེཧི པཀཏིབྷཱཝེནེཝ ཋིཏེཧི པཀཏི སགབྦྷཱ ཨིཙྪིཏཱ པཀཏིཝཱདཱིཧི, ཨེཝཾ ན ཕལེན སགབྦྷོ ཧེཏཱུཏི ཨཏྠོ. ‘‘དུཀྑསམུདཡཱནཾ ནིརོདྷམགྒཱནཉྩ ཨསམཝཱཡཱ’’ཏི ཨེཏཾ ཝིཝརནྟོ ཨཱཧ ‘‘ན ཧེཏུསམཝེཏཾ ཧེཏུཕལ’’ནྟིཨཱདི. ཏཏྠ ‘‘ཨིདྷ ཏནྟཱུསུ པཊོ, ཀཔཱལེསུ གྷཊོ, བཱིརཎེསུ ཀཊོ དྭཱིསུ ཨཎཱུསུ དྭིཨཎུཀ’’ནྟིཨཱདིནཱ ཨིདྷ ཝུདྡྷིཝོཧཱརཛནཀོ ཨཝིསུཾ སིདྡྷཱནཾ སམྦནྡྷོ སམཝཱཡོ, ཏེན སམཝཱཡེན ཀཱརཎེསུ དྭཱིསུ ཨཎཱུསུ དྭིཨཎུཀཾ ཕལཾ སམཝེཏཾ ཨེཀཱིབྷཱུཏམིཝ སམྦདྡྷཾ, ཏཱིསུ ཨཎཱུསུ ཏིཨཎུཀནྟི ཨེཝཾ མཧཱཔཐཝཱིམཧཱཨུདཀམཧཱཨགྒིམཧཱཝཱཏཀྑནྡྷཔརིཡནྟཾ ཕལཾ ཨཏྟནོ ཀཱརཎེསུ སམཝེཏནྟི སམཝཱཡཝཱདིནོ ཝདནྟི. ཨེཝཾ པན ཝདནྟེཧི ཨཔརིམཱཎེསུ ཀཱརཎེསུ མཧཱཔརིམཱཎཾ ཨེཀཾ ཕལཾ སམཝེཏཾ ཨཏྟནོ ཨནྟོགདྷེཧི ཀཱརཎེཧི སགབྦྷཾ ཨསུཉྙནྟི ཝུཏྟཾ ཧོཏི. ཨེཝམིདྷ སམཝཱཡཱབྷཱཝཱ ཕལེ ཧེཏུ ནཏྠཱིཏི ཧེཏུསུཉྙཾ ཕལནྟི ཨཏྠོ.

སུཉྙཏོ ཝིནིཙྪཡཝཎྞནཱ ནིཊྛིཏཱ.

ཨིཏི མགྒནིདྡེསཀཐཱཝཎྞནཱ.

ཨེཀཝིདྷཱདིཝིནིཙྪཡཀཐཱཝཎྞནཱ

༥༦༨. པཝཏྟིབྷཱཝཏོཏི སཾསཱརསྶ པཝཏྟིབྷཱཝཏོ. ཙཏུཨཱཧཱརབྷེདཏོཏི ཙཏུཨཱཧཱརཔྤཙྩཡཝིསེསཏོ. ཨེཏེན ཙཏྟཱརོ ཀབལཱི༹ཀཱརཱདིཨཱཧཱརཝིསེསེ, ཨཛ྄ཛྷོཧརཎཱིཡཝཏྠུ, སལཱ༹ཡཏན, ཨཝིཛྫཱ, ཨབྷིསངྑཱརསངྑཱཏེ ཏཔྤཙྩཡབྷཱུཏདྷམྨཝིསེསེ ཙ སངྒཎྷཱཏི ¶ , ཨོཛཊྛམཀརཱུཔ, ཝེདནཱ, པཊིསནྡྷིཝིཉྙཱཎ, ནཱམརཱུཔསངྑཱཏེ ཏནྣིབྦཏྟདྷམྨཝིསེསེ ཙ.

པཝཏྟཀབྷཱཝཏོ པཝཏྟིདུཀྑསྶ. རཱུཔཱབྷིནནྡནཱདིབྷེདོ རཱུཔཀྑནྡྷཱདིཨབྷིནནྡནབྷེདོ, རཱུཔཱརམྨཎཱདིཝསེནཱཔཱིཏི ཝདནྟི. རཱུཔཏཎྷཱདཱིནཾ པཙྩེཀཾ ཨནེཀབྷེདཏྟཱ ཚ ཏཎྷཱཀཱཡཱ, ཏེསཾ བྷེདཏོ.

ཨུཔཱདཱནེཧི ཨུཔཱདཱིཡཏཱིཏི ཨུཔཱདི, ཨུཔཱདཱནཀྑནྡྷཔཉྩཀཾ. ཏནྣིསྶརཎབྷཱུཏཾ ནིབྦཱནཾ, ཏསྶ ཝཱུཔསམོ ཏཾསནྟཱིཏི ཀཏྭཱ ཏསྶ ཡཱཝ པཙྪིམཾ ཙིཏྟཾ, ཏཱཝ སེསཏཾ, ཏཏོ པརཾ ཨནཝསེསཏཉྩ ¶ ཨུཔཱདཱཡ སཨུཔཱདིསེསནིབྦཱནདྷཱཏུ, ནིརུཔཱདིསེསནིབྦཱནདྷཱཏཱུཏི དྭིདྷཱ ཝོཧརཱིཡཏི. ཡཐཱ ཙཱཡཾ བྷེདོ ཝོཧཱརཏོ, ཨེཝམིཏརེཔཱིཏི ཏེ ཀཏིཔཡེ དསྶེཏུཾ ‘‘ཏིཝིདྷོ’’ཏིཨཱདི ཝུཏྟཾ. ཨཉྙཐཱ ཨེཀསྶ སཏོ ནིབྦཱནསྶ ཀུཏོ བྷེདོཏི.

སམཐཝིཔསྶནཱབྷེདཏོཏི ཨེཏྠ སམྨཱདིཊྛིསམྨཱསངྐཔྤཱ ཝིཔསྶནཱ, ཨིཏརེ སམཐཱཏི ཝདནྟི. སཱིལམྤི ཧི སམཐསྶ ཨུཔཀཱརཀཏྟཱ སམཐགྒཧཎེན གཡ྄ཧཏཱིཏི ཏེསཾ ཨདྷིཔྤཱཡོ. ཨཐ ཝཱ ཡཱནདྭཡསྶ ཝསེན ལདྡྷོ མགྒོ སམཐོ ཝིཔསྶནཱཏི ཨཱགམནཝསེན ཝུཏྟོཏི དཊྛབྦོ. ཨཡནྟི ཨརིཡམགྒོ. སཔྤདེསཏྟཱཏི སཱིལཀྑནྡྷཱདཱིནཾ ཨེཀདེསཏྟཱཏི ཨཏྠོ. ཨེཀདེསོ ཧི པདིསྶཏི ཨཝཡཝབྷཱཝེན ཨཔདིསཱིཡཏཱིཏི པདེསོ, ཨཏྟནོ སམུདཱཡཾ པཏི སཧ པདེསེནཱཏི སཔྤདེསོཏི ཝུཙྩཏི ཡཐཱ ‘‘སནིདསྶནཱ དྷམྨཱ’’ཏི (དྷ. ས. དུཀམཱཏིཀཱ ༩), སཱིལཀྑནྡྷཱདཡོ ཙ སབྦལོཀིཡལོཀུཏྟརསཱིལཱདིསངྒཱཧཀཱ, ཨརིཡམགྒོ ལོཀུཏྟརོ ཨེཝཱཏི ཏདེཀདེསོ ཧོཏི.

སཛཱཏིཏོཏི སམཱནཛཱཏིཏོ, ཝཙཱིདུཙྩརིཏཝིརཏིཨཱདིབྷེདེསུ སམཱནཱཡ སཱིལཛཱཏིཡཱཏི ཨཏྠོ.

ཨོནཏསཧཱཡོ ཝིཡ ཝཱཡཱམོ པགྒཧཀིཙྩསཱམཉྙཏོ. ཨཾསཀཱུཊཾ དཏྭཱ ཋིཏསཧཱཡོ ཝིཡ སཏི ཨཔིལཱཔནཝསེན ནིཙྩལབྷཱཝཀརཎསཱམཉྙཏོ. སཛཱཏིཏོཏི སཝིཏཀྐསཝིཙཱརཱདིབྷེདེསུ སམཱནཱཡ སམཱདྷིཛཱཏིཡཱཏི ཨཏྠོ. ཀིརིཡཏོཏི སམཱདྷིཨནུརཱུཔཀིརིཡཏོ. ཏཏོ ཨེཝ ཧི ‘‘ཙཏྟཱརོ སཏིཔཊྛཱནཱ སམཱདྷིནིམིཏྟཱ, ཙཏྟཱརོ སམྨཔྤདྷཱནཱ ¶ སམཱདྷིཔརིཀྑཱརཱ’’ཏི (མ. ནི. ༡.༤༦) སཏིཝཱཡཱམཱནཾ སམཱདྷིསྶ ནིམིཏྟཔརིཀྑཱརབྷཱཝོ ཝུཏྟོ.

ཨཱཀོཊེནྟེན ཝིཡཱཏི ‘‘ཨནིཙྩཾ ཨནིཙྩ’’ནྟིཨཱདིནཱ པཉྙཱཀིཙྩསདིསེན ཀིཙྩེན སམནྟཏོ ཀོཊེནྟེན ཝིཡ, ‘‘ཨནིཙྩཾ ཁཡཊྛེན, དུཀྑཾ བྷཡཊྛེནཱ’’ཏིཨཱདིནཱ (པཊི. མ. ༡.༤༨) པརིཝཏྟེནྟེན ཝིཡ ཙ ཨཱདཱཡ ཨཱུཧིཏྭཱ དིནྣམེཝ པཉྙཱ པཊིཝིཛ྄ཛྷཏི. དྭིནྣཾ སམཱནཀཱལཏྟེཔི པཙྩཡབྷཱཝེན སམྨཱསངྐཔྤསྶ པུརིམཀཱལསྶ ཝིཡ ནིདྡེསོ ཀཏོ. སཛཱཏིཏོཏི ‘‘དུཀྑེ ཉཱཎ’’ནྟིཨཱདཱིསུ (སཾ. ནི. ༥.༨) སམཱནཱཡ པཉྙཱཛཱཏིཡཱ. ཀིརིཡཏོཏི ཨེཏྠ པཉྙཱསདིསཾ ཀིཙྩཾ ‘‘ཀིརིཡཱ’’ཏི ཝུཏྟཾ, པུབྦེ པན སམཱདྷིཨུཔཀཱརཀཾ ཏདནུརཱུཔཀིཙྩནྟི ཨཡམེཏྠ ཝིསེསོ.

‘‘སབྦཾ ¶ , བྷིཀྑཝེ, ཨབྷིཉྙེཡྻ’’ནྟི (སཾ. ནི. ༤.༤༦) ཝཙནཏོ ཙཏྟཱརིཔི ཨབྷིམུཁཾ པཙྩཀྑཏོ ཉཱཏབྦཱནི, ཨབྷིཝིསིཊྛེན ཝཱ ཉཱཎེན ཉཱཏབྦཱནཱིཏི ཨབྷིཉྙེཡྻཱནི.

༥༦༩. ཨཉྙམཉྙཾ སབྷཱགཱནཱིཏི ཨཉྙམཉྙསམཱནབྷཱགཱནི, སདིསརཱུཔཱནཱིཏི ཨཏྠོ.

དུརབྷིསམྦྷཝཏརནྟི ཨབྷིསམྦྷཝིཏུཾ སཱདྷེཏུཾ ཨསཀྐུཎེཡྻཏརཾ, སཏྟིཝིགྷཱཏེན དུརདྷིགམནྟི ཨཏྠོ. ཨསནནྟི ཀཎྜཾ. ཨཏིཔཱཏེཡྻཱཏི ཁིཔེཡྻ. ཀོཊིཡཱཏི ཀཎྜསྶ ཀོཊིཡཱ ཝཱལགྒེན. ཀོཊིནྟི ཝཱལསྶེཝ ཀོཊིཾ. པཊིཝིཛ྄ཛྷེཡྻཱཏི པཊིམུཁབྷཱཝེན ཝིཛ྄ཛྷེཡྻ.

བཱདྷཀཔབྷཝསནྟིནིཡྻཱནལཀྑཎེཧི ཝཝཏྠཱནཾ སལཀྑཎཝཝཏྠཱནཾ. དུརཝགཱཧཏྠེན གམྦྷཱིརཏྟཱཏི ཨོལཱ༹རིཀཱ དུཀྑསམུདཡཱ. ཏིརཙྪཱནགཏཱནམྤི ཧི དུཀྑཾ, ཨཱཧཱརཱདཱིསུ ཙ ཨབྷིལཱསོ པཱཀཊོ. པཱིལ༹ནཱདིཨཱཡཱུཧནཱདིཝསེན པན ‘‘ཨིདཾ དུཀྑཾ, ཨིདམསྶ ཀཱརཎ’’ནྟི ཡཱཐཱཝཏོ ཨོགཱཧིཏུཾ ཨསཀྐུཎེཡྻཏྟཱ གམྦྷཱིརཱ. སཎྷསུཁུམདྷམྨཏྟཱ ནིརོདྷམགྒཱ སབྷཱཝཏོ ཨེཝ གམྦྷཱིརཊྛེན དུརཝགཱཧཱ. ཏེནེཝ ཨུཔྤནྣེ མགྒེ ནཏྠི ནིརོདྷམགྒཱནཾ ཨནཝགཱཧོཏི. ནིབྦཱནམྤི མགྒེན ཨདྷིགནྟབྦཏྟཱ ཏསྶ ཕལནྟི ཨཔདིསཱིཡཏཱིཏི ཨཱཧ ‘‘ཕལཱཔདེསཏོ’’ཏི. ཝུཏྟཉྷེཏཾ ‘‘དུཀྑནིརོདྷེ ཉཱཎཾ ཨཏྠཔཊིསམྦྷིདཱ’’ཏི (ཝིབྷ. ༧༡༩). མགྒོཔི ནིརོདྷསྶ སམྤཱཔཀབྷཱཝཏོ ‘‘ཧེཏཱུ’’ཏི ¶ ཨཔདིསཱིཡཏཱིཏི ཨཱཧ ‘‘ཧེཏུཨཔདེསཏོ’’ཏི. ཝུཏྟམྤི ཙེཏཾ ‘‘དུཀྑནིརོདྷགཱམིནིཡཱ པཊིཔདཱཡ ཉཱཎཾ དྷམྨཔཊིསམྦྷིདཱ’’ཏི (ཝིབྷ. ༧༡༩).

ཨིཏི ཨེཝཾ པཀཱརེཧཱིཏི ཨིཏི ཝིཛཉྙཱཏི སམྦནྡྷོ. ཏཏྠ ཨིཏིསདྡེན ཝིཛཱནནཀྐམཾ དསྶེཏི. ཨེཝཾ པཀཱརེཧཱིཏི ཨེཝཾ-སདྡེན ཝིཛཱནནཀཱརཎབྷཱུཏེན ཨེཝ.

སབྷཱགཝིསབྷཱགཏོཝིནིཙྪཡཝཎྞནཱ ནིཊྛིཏཱ.

ཨིནྡྲིཡསཙྩནིདྡེསཝཎྞནཱ ནིཊྛིཏཱ.

ཨིཏི སོལ༹སམཔརིཙྪེདཝཎྞནཱ.

༡༧. པཉྙཱབྷཱུམིནིདྡེསཝཎྞནཱ

པཊིཙྩསམུཔྤཱདཀཐཱཝཎྞནཱ

༥༧༠. ཨིམིསྶཱ ¶ ¶ པཉྙཱཡཱཏི ཨིམིསྶཱ ཡཐཱདྷིགཏཱཡ ཝིཔསྶནཱཡ. བྷཱུམིབྷཱུཏེསཱུཏི པཝཏྟིཊྛཱནབྷཱུཏེསུ. ཀཱམཉྩཱཡཾ པཊིཙྩསམུཔྤཱདཔཊིཙྩསམུཔྤནྣསམཉྙཱ པིཏཱཔུཏྟསམཉྙཱ ཝིཡ ཨཔེཀྑཱསིདྡྷཱ, ཧེཏུཕལདྷམྨེསུ པན ཡཐཱཀྐམཾ ཝཝཏྠིཏཱཝཱཏི ‘‘པཊིཙྩསམུཔྤཱདོ ཙེཝཱ’’ཏིཨཱདིནཱ ཝིབྷཛྫ ཝུཏྟཾ. ཨཱདིསདྡེནཱཏི ‘‘པཊིཙྩསམུཔྤཱདཱདིབྷེདཱ’’ཏི ཨེཏྠ ཝུཏྟཨཱདིསདྡེན. ཨཝསེསཱ ཧོནྟི, སཾཝཎྞནཱཝསེནཱཏི ཨདྷིཔྤཱཡོ. ཏེནཱཧ ‘‘ཏེསཾ ཝཎྞནཱཀྐམོ ཨནུཔྤཏྟོ’’ཏི.

ཨཝིཛྫཱདཡོ དྷམྨཱ པཊིཙྩསམུཔྤཱདོ, ན སམུཔྤཏྟིམཏྟཾ. སྭཱཡམཏྠོ ཨིམིནཱ སུཏྟཔདེན ཝེདིཏབྦོཏི དསྶེནྟོ ‘‘ཝུཏྟཉྷེཏ’’ནྟིཨཱདིཾ ཝཏྭཱ པཊིཙྩསམུཔྤནྣེ པན དསྶེཏུཾ ‘‘ཛརཱམརཎཱདཡོ པནཱ’’ཏིཨཱདི ཨཱརདྡྷཾ. ཀསྨཱ པནེཏྠ ཨནུལོམཏོ པཊིཙྩསམུཔྤཱདདྷམྨཱ དསྶིཏཱ, པཊིལོམཏོ པཊིཙྩསམུཔྤནྣཱ དྷམྨཱཏི? ཡཏོ ཏེ པཙྩཡཏོ ཨུཔྤནྣཱ, ཏསྶ སམནནྟརདསྶནཏྠཾ.

ན ནིཙྩཾ ན སསྶཏནྟི ཨནིཙྩཾ. སམེཙྩ སམྦྷཱུཡ པཙྩཡེཧི ཀཏནྟི སངྑཏཾ. པཊིཙྩ པཙྩཡཱརཧཾ པཙྩཡཾ ནིསྶཱཡ སཧིཏམེཝ ཨུཔྤནྣནྟི པཊིཙྩསམུཔྤནྣཾ. ཁཡནསབྷཱཝཾ ཁཡདྷམྨཾ. ཝཡནསབྷཱཝཾ ཝཡདྷམྨཾ. ཝིརཛྫནསབྷཱཝཾ པལུཛྫནསབྷཱཝཾ ཝིརཱགདྷམྨཾ. ནིརུཛ྄ཛྷནསབྷཱཝཾ ནིརོདྷདྷམྨཾ. སེསཾ ཡདེཏྠ ཝཏྟབྦཾ, ཏཾ པརཏོ ཨཱཝི བྷཝིསྶཏི.

༥༧༡. ཨེཏྠཱཏི ཨེཏེསུ ཡཐཱཝུཏྟེསུ སུཏྟཔདེསུ. སངྑེཔོཏི ཨཏྠསངྑེཔོ.

ཛཱཏིཔཙྩཡཱཏི ཛཱཏིསངྑཱཏཱ པཙྩཡཱ. ཧེཏུམྷི ནིསྶཀྐཝཙནཾ. ཋིཏཱཝ སཱ དྷཱཏཱུཏི ཡཱཡཾ ཛརཱམརཎསྶ ཨིདཔྤཙྩཡཏཱ ‘‘ཛཱཏིཔཙྩཡཱ ཛརཱམརཎ’’ནྟི, ཨེསཱ དྷཱཏུ ཨེས སབྷཱཝོ. སཱ ¶ ཏཐཱགཏཱནཾ ཨུཔྤཱདཏོ པུབྦེ, ཨུདྡྷཉྩ ཨཝིཉྙཱཡམཱནོ, མཛ྄ཛྷེ ཙ ཝིཉྙཱཡམཱནོ, ན ཏཐཱགཏེཧི ཨུཔྤཱདིཏོ, ཨཐ ཁོ སམྦྷཝནྟསྶ ཛརཱམརཎསྶ སབྦཀཱལཾ ཛཱཏིཔཙྩཡཏོ སམྦྷཝོཏི ཋིཏཱ ཨེཝ. ཀེཝལཾ པན སཡམྦྷཱུཉཱཎེན ¶ ཨབྷིསམྦུཛ྄ཛྷནཏོ, ‘‘ཨཡཾ དྷམྨོ ཏཐཱགཏེན ཨདྷིགཏོ’’ཏི པཝེདནཏོ ཙ ཏཐཱགཏོ ‘‘དྷམྨསྶཱམཱི’’ཏི ཝུཙྩཏི ན ཨཔུབྦསྶ ཨུཔྤཱདནཏོ. ཏེན ཝུཏྟཾ ‘‘ཋིཏཱཝ སཱ དྷཱཏཱུ’’ཏི. སཱ ཨེཝ ཛཱཏིཔཙྩཡཱ ཛརཱམརཎནྟི ཨེཏྠ ཝིཔལླཱསཱབྷཱཝཏོ ཨེཝཾ ཨཝབུཛ྄ཛྷམཱནསྶ ཨེཏསྶ སབྷཱཝསྶ, ཧེཏུནོ ཝཱ ཏཐེཝ བྷཱཝཏོ ཋིཏཏཱཏི དྷམྨཊྛིཏཏཱ. ཛཱཏི ཝཱ ཛརཱམརཎསྶ ཨུཔྤཱདཊྛིཏི པཝཏྟཨཱཡཱུཧནསཾཡོགཔལིབོདྷསམུདཡཧེཏུཔཙྩཡཊྛིཏཱིཏི ཏདུཔྤཱདཱདིབྷཱཝེནསྶཱ ཋིཏཏཱ ‘‘དྷམྨཊྛིཏཏཱ’’ཏི ཕལཾ པཏིསཱམཏྠིཡཏོ ཧེཏུམེཝ ཝདཏི.

ཨཐ ཝཱ དྷཱརཱིཡཏི པཙྩཡེཧཱིཏི དྷམྨོ, ཏིཊྛཏི ཏཏྠ ཏདཱཡཏྟཝུཏྟིཏཱཡ ཕལནྟི ཋིཏི, དྷམྨསྶ ཋིཏི དྷམྨཊྛིཏི. དྷམྨོཏི ཝཱ ཀཱརཎཾ, པཙྩཡོཏི ཨཏྠོ. དྷམྨསྶ ཋིཏིསབྷཱཝོ, དྷམྨཏོ ཙ ཨཉྙོ སབྷཱཝོ ནཏྠཱིཏི དྷམྨཊྛིཏི, པཙྩཡོ. ཏེནཱཧ ‘‘པཙྩཡཔརིགྒཧེ པཉྙཱ དྷམྨཊྛིཏིཉཱཎ’’ནྟི (པཊི. མ. ༡.༤༥). དྷམྨཊྛིཏི ཨེཝ དྷམྨཊྛིཏཏཱ. སཱ ཨེཝ དྷཱཏུ ‘‘ཛཱཏིཔཙྩཡཱ ཛརཱམརཎ’’ནྟི ཨིམསྶ སབྷཱཝསྶ, ཧེཏུནོ ཝཱ ཨཉྙཐཏྟཱབྷཱཝཏོ ‘‘ན ཛཱཏིཔཙྩཡཱ ཛརཱམརཎ’’ནྟི ཝིཉྙཱཡམཱནསྶ ཏབྦྷཱཝཱབྷཱཝཏོ ནིཡཱམཏཱ ཝཝཏྠིཏབྷཱཝོཏི དྷམྨནིཡཱམཏཱ. ཕལསྶ ཝཱ ཛརཱམརཎསྶ ཛཱཏིཡཱ སཏི སམྦྷཝོ དྷམྨེ ཧེཏུམྷི ཋིཏཏཱཏི དྷམྨཊྛིཏཏཱ. ཨསཏི ཨསམྦྷཝོ དྷམྨེ ནིཡཏཏཱཏི དྷམྨནིཡཱམཏཱཏི ཨེཝཾ ཕལེན ཧེཏུཾ ཝིབྷཱཝེཏི. ཏཾ ‘‘ཋིཏཱཝ སཱ དྷཱཏཱུ’’ཏིཨཱདིནཱ (སཾ. ནི. ༢.༢༠) ཝུཏྟཾ ཨིདཔྤཙྩཡཏཾ ཨབྷིསམྦུཛ྄ཛྷཏི པཙྩཀྑཀརཎེན ཨབྷིམུཁཾ བུཛ྄ཛྷཏི ཡཱཐཱཝཏོ པཊིཝིཛ྄ཛྷཏི. ཨབྷིསམེཏཱིཏི ཏསྶ ཝེཝཙནཾ. ཨཱདིཏོ ཀཐེནྟོ ཨཱཙིཀྑཏི, ཨུདྡིསཏཱིཏི ཨཏྠོ. ཏམེཝ ཨུདྡེསཾ པརིཡོསཱཔེནྟོ དེསེཏི. ཡཐཱཨུདྡིཊྛམཏྠཾ ནིདྡིསནཝསེན པཀཱརེཧི ཉཱཔེནྟཱ པཉྙཔེཏི. པཀཱརེཧིཡེཝ པཏིཊྛཔེནྟོ པཊྛཔེཏི. ཡཐཱནིདྡིཊྛམཏྠཾ པཊིནིདྡིསནཝསེན ཝིཝརཏི ཝིབྷཛཏི, ཝིཝཊཉྷི ཝིབྷཏྟཉྩ ཨཏྠཾ ཧེཏུདྷཱརཎདསྶནེཧི པཱཀཊཾ ཀརོནྟོ ཨུཏྟཱནཱིཀརོཏི. ཨུཏྟཱནཱིཀརོནྟོ ཏཐཱཔཙྩཀྑབྷཱུཏཾ ཀཏྭཱ ནིགམནཝསེན པསྶཐཱཏི ཙཱཧ.

༥༧༢. པཙྩཡལཀྑཎོཏི པཙྩཡབྷཱཝལཀྑཎོ, པཙྩཡོཏི ཝཱ ལཀྑིཏབྦོ. པཝཏྟིདུཀྑསྶ ¶ ཨནུབནྡྷཱཔནཀིཙྩཏཱཡ དུཀྑཱནུབནྡྷནརསོ. ནིབྦཱནགཱམིམགྒསྶ ཨུཔྤཐབྷཱཝཏོ ཀུམྨགྒཔཙྩུཔཊྛཱནོ.

སོ ¶ པནཱཡཾ པཊིཙྩསམུཔྤཱདོ. ཡཱཝཏྟཀེཧི པཙྩཡེཧི ཡཾ ཕལཾ ཨུཔྤཛྫནཱརཧཾ, ཨཝིཀལེཧེཝ ཏེཧི ཏསྶ ཨུཔྤཏྟི, ཏདཉྙེན ཙ ཏསྶ པཡོཛནཾ ནཏྠཱིཏི ཨཱཧ ‘‘ཨནཱུནཱདྷིཀེཧེཝཱ’’ཏི. ཡཐཱ ཏཾ ཙཀྑུརཱུཔཱལོཀམནསིཀཱརེཧི ཙཀྑུཝིཉྙཱཎསྶ, ཨེཏེན ཏཾཏཾཕལནིཔྥཱདནེན ཏསྶཱ པཙྩཡསཱམགྒིཡཱ ཏཔྤརཏཱ ཏཐཏཱཏི དསྶེཏི. སཱམགྒིནྟི སམོདྷཱནཾ, སམཝཱཡནྟི ཨཏྠོ. ཨསམྦྷཝཱབྷཱཝཏོཏི ཨནུཔྤཛྫནསྶ ཨབྷཱཝཏོ. པཙྩཡསཱམགྒིཡཉྷི སཏི ཨནུཔྤཛྫནེ ཏསྶཱ ཝིཏཐཏཱ སིཡཱ. ཨཉྙདྷམྨཔྤཙྩཡེཧཱིཏི ཨཉྙསྶ ཕལདྷམྨསྶ པཙྩཡེཧི. ཨཉྙདྷམྨཱནུཔྤཏྟིཏོཏི ཏཏོ ཨཉྙསྶ ཕལདྷམྨསྶ ཨནུཔྤཛྫནཏོ. ན ཧི ཀདཱཙི ཙཀྑུརཱུཔཱལོཀམནསིཀཱརེཧི སོཏཝིཉྙཱཎསྶ སམྦྷཝོ ཨཏྠི, ཡདི སིཡཱ, ཏསྶཱ སཱམགྒིཡཱ ཨཉྙཐཏཱ ནཱམ སིཡཱ, ན ཙེཏཾ ཨཏྠཱིཏི ‘‘ཨནཉྙཐཏཱ’’ཏི ཝུཏྟཾ. པཙྩཡཏོཏི པཙྩཡབྷཱཝཏོ. པཙྩཡསམཱུཧཏོཏི ཨེཏྠཱཔི ཨེསེཝ ནཡོ.

༥༧༣. ཨིདཔྤཙྩཡཱ ཨེཝ ཨིདཔྤཙྩཡཏཱཏི ཏཱ-སདྡེན པདཾ ཝཌྜྷིཏཾ, ན ཀིཉྩི ཨཏྠནྟརཾ ཡཐཱ དེཝོ ཨེཝ དེཝཏཱཏི. ཨིདཔྤཙྩཡཱནཾ ཝཱ སམཱུཧོ ཨིདཔྤཙྩཡཏཱཏི སམཱུཧཏྠཾ ཏཱ-སདྡམཱཧ ཡཐཱ ‘‘ཛནཱནཾ སམཱུཧོ ཛནཏཱ’’ཏི. ནནུ ཙ ‘‘ཨཏྠི ཨིདཔྤཙྩཡཱ ཛརཱམརཎནྟི ཨིཏི པུཊྛེན སཏཱ, ཨཱནནྡ, ཨཏྠཱིཏིསྶ ཝཙནཱིཡཾ. ཀིཾ པཙྩཡཱ ཛརཱམརཎནྟི ཨིཏི ཙེ ཝདེཡྻ, ཛཱཏིཔཙྩཡཱ ཛརཱམརཎནྟི ཨིཙྩསྶ ཝཙནཱིཡ’’ནྟི (དཱི. ནི. ༢.༩༦) ཛཱཏིསདྡཔཙྩཡསདྡསམཱནཱདྷིཀརཎེན ཀིཾ-སདྡེན ཨིདཾསདྡསྶ སམཱནཱདྷིཀརཎཏཱདསྶནཏོ ཨིདཔྤཙྩཡསདྡསྶ ཀམྨདྷཱརཡསམཱསོ དིསྶཏི, ན ཧེཏྠ ‘‘ཨིམསྶ པཙྩཡཱ ཨིདཔྤཙྩཡཱ’’ཏི ཛརཱམརཎསྶ, ཨཉྙསྶ ཝཱ པཙྩཡཏོ ཛརཱམརཎསམྦྷཝཔུཙྪཱ སམྦྷཝཏི ཝིདིཏབྷཱཝཏོ, ཨསམྦྷཝཏོ ཙ, ཛརཱམརཎསྶ པན པཙྩཡཔུཙྪཱ སམྦྷཝཏི. པཙྩཡ-སདྡེན ཙ སམཱནཱདྷིཀརཎཏཱཡ ཨིདཾ-སདྡསྶ ཨིམསྨཱ པཙྩཡཱཏི པཙྩཡཔུཙྪཱ ཡུཛྫཏི. སཱ ཙ སམཱནཱདྷིཀརཎཏཱ བཱཧིརཏྠསམཱསེཔི ལབྦྷཏི. ཏཏོ ཙ ཨཉྙཔདཏྠཝཙནིཙྪཱབྷཱཝེ ཀམྨདྷཱརཡསམཱསོ ལབྦྷཏི.

སཱམིཝཙནསམཱསེ པན སམཱནཱདྷིཀརཎཏཱ ནཏྠཱིཏི ན ཀཐཉྩི ཀམྨདྷཱརཡསམཱསསམྦྷཝོཏི? ནཡིདམེཝཾ ཝཙནིཙྪནྟརབྷཱཝཏོ. པཊིཙྩསམུཔྤཱདཝཙནིཙྪཱ ཧེསཱ ‘‘ཨིདཔྤཙྩཡཏཱ ¶ པཊིཙྩསམུཔྤཱདོ’’ཏི ཨེཏྠ. ‘‘ཨཏྠི ཨིདཔྤཙྩཡཱ ¶ ཛརཱམརཎ’’ནྟི ཨེཏྠ པན ཛརཱམརཎསྶ པཙྩཡམཏྟཔརིཔུཙྪཱ, ཏསྨཱ ཡཐཱ ཨིདཾ-སདྡསྶ པཊིཙྩསམུཔྤཱདཝིསེསནཏཱ, པུཙྪིཏབྦཔཙྩཡཝིསེསནཏཱ ཙ ཧོཏི, ཏཐཱ སམཱསཝིཀཔྤོ ཨེཏྠ, ཏཏྠ ཙ ཀཱཏབྦོཏི ན སམཱསནྟརདསྶནཾ སཱམིཝཙནསམཱསབཱདྷཀཾ. ཀསྨཱ པནེཏྠཱཔི ཀམྨདྷཱརཡསམཱསོ ན ཨིཙྪིཏོཏི? ཧེཏུཔྤབྷཝཱནཾ ཧེཏུ པཊིཙྩསམུཔྤཱདོཏི ཨིམསྶཏྠསྶ ཀམྨདྷཱརཡསམཱསེ ཨསམྦྷཝཏོ, ‘‘ཨིམསྶ ཨཏྟནོ པཙྩཡཱནུརཱུཔསྶ ཨནུརཱུཔོ པཙྩཡོ ཨིདཔྤཙྩཡོ’’ཏི ཨིམསྶ ཙ ཨཏྠསྶ ཨིཙྪིཏཏྟཱ. ཡོ པནེཏྠ ཨིདཾ-སདྡེན གཧིཏོ ཨཏྠོ, སོ ‘‘ཨཏྠི ཨིདཔྤཙྩཡཱ ཛརཱམརཎ’’ནྟི ཨེཏྠ ཛརཱམརཎགྒཧཎེནེཝ གཧིཏོཏི ཨིདཾ-སདྡོ པཊིཙྩསམུཔྤནྣཏོ ཨབྷསྶིཏྭཱ ཨཉྙཱསམྦྷཝཏོ པཙྩཡེ ཨཝཏིཊྛཏི, ཏསྨཱ ཏཏྠ ཀམྨདྷཱརཡསམཱསོ. ཨེཏྠ པན ཨིདཾ-སདྡསྶ ཏཏོ པརིཙྩཛནཀཱརཎཾ ནཏྠཱིཏི སཱམིཝཙནསམཱསོ ཨེཝ. ཨེཝམྤི ན ཨིདཔྤཙྩཡོ ཨེཝ ཨིདཔྤཙྩཡབྷཱཝོ བྷཝིཏུཾ ཡུཏྟོཏི ཨིདཔྤཙྩཡཏཱཡ པཊིཙྩསམུཔྤཱདཏཱནུཔཔཏྟཱིཏི? ནཱཡཾ དོསོ ཨཏྠནྟརཱབྷཱཝཏོཏི ཝུཏྟོཝཱཡམཏྠོ.

ཨཐ ཝཱ པན ཧོཏུ ཨིདཔྤཙྩཡབྷཱཝོ ཨིདཔྤཙྩཡཏཱཏི. བྷཱཝོཏི ཙེཏྠ ཨཝིནཱབྷཱཝིཕལཾ པཏི ཧེཏུནོ སཏྭཾ. ཏཐཱ ཧི ཨིདཔྤཙྩཡ-སདྡོ ཛཱཏིཨཱདཱིསུ ནིརུལ༹ྷོ. ཏཉྩ ཨིདཔྤཙྩཡསཏྭཾ ཨིདཔྤཙྩཡཏོ ཨཉྙཾ ནཏྠི. ཡདི ཨཉྙཾ སིཡཱ, ཏཾ ཨཝིཛྫམཱནཾ སིཡཱ. ན ཧི སཏཱ ཨཉྙཾ ཝིཛྫམཱནཾ ཧོཏི. ཨཐ སཏྭཾ སཾ ནཱམ, ཡསྶ སཏོ བྷཱཝོ, ཏཾ ཨསཾ ནཱམ སིཡཱ. ན ཧི ཏཾ སཏྭཾ སབྷཱཝཾ སཏྭཏོ ཨཉྙཏྟཱ, ཏསྨཱ སཏོ བྷཱཝོ སཏྭནྟི ནིདྡེསོ ན ཡུཛྫཏི. ན ཙ སཾ-སམྦནྡྷེན ཨསཾ སཾ ནཱམ ཧོཏི, པགེཝ སཾ-སམྦནྡྷེན. ཨསཏི ཙ སདིཏིགྒཧཎཾ ཝིཔརཱིཏགྒཱཧོཏི ན གཧཎཏོ སཾསིདྡྷི. སདིསཀཔྤནཱཡཉྩ མཱཎཝཀསྶ སཱིཧབྷཱཝོ ཝིཡ ན ཨསཏོ སཾ-སབྷཱཝཏཱ. ཡསྨཱ པན ཨིདཔྤཙྩཡབྷཱཝོ ཡཐཱཝུཏྟཾ སཏྭཾ, ན ཨསཏྭཾ. ནཱཔི ཡསྶ ཏཾ སཏྭཾ, ཏདསཾ, ཏསྨཱ ཨིདཔྤཙྩཡབྷཱཝོ ཨིདཔྤཙྩཡསརཱུཔཾ སབྷཱཝནྟརེཧི ཝིནིཝཏྟབྷཱཝདསྶནཏྠཾ ཨིམསྶཱཡནྟི ཝིསེསེཏྭཱ ཨིདཔྤཙྩཡཏཱཏི ཝུཏྟནྟི ན ཨིདཔྤཙྩཡཏཱཡ པཊིཙྩསམུཔྤཱདབྷཱཝཱསམྦྷཝོ.

པཊིཙྩ སམུཔྤཛྫཏི ཨེཏསྨཱཏི པཊིཙྩསམུཔྤཱདོཏི ཏསྶཱཔི ཧེཏུཨཏྠབྷཱཝཏོ ཛཱཏིཨཱདིཔདཱནཾ ཨེཝམེཝ ཧེཏུབྷཱཝཝཱཙཀཏཱཡ ཧེཏུཔདྷཱནཏཱ ཡོཛེཏབྦཱ ཧེཏུཔྤབྷཝཱནཾ ཧེཏུ པཊིཙྩསམུཔྤཱདོཏི ཀཏྭཱ ¶ . ཏཐཱ ཧི ‘‘དསབལསམནྣཱགཏོ, བྷིཀྑཝེ, ཏཐཱགཏོ ཙཏཱུཧི ཝེསཱརཛྫེཧི ¶ སམནྣཱགཏོ ཨཱསབྷཾ ཋཱནཾ པཊིཛཱནཱཏི, པརིསཱསུ སཱིཧནཱདཾ ནདཏི, བྲཧྨཙཀྐཾ པཝཏྟེཏི, ཨིམསྨིཾ སཏི ཨིདཾ ཧོཏི ཡཱཝ ‘ཨེཝམེཏསྶ ཀེཝལསྶ དུཀྑཀྑནྡྷསྶ ནིརོདྷོ ཧོཏཱི’’’ཏི (སཾ. ནི. ༢.༢༡-༢༢) ཨནེན སཱིཧནཱདསུཏྟེན པཀཱསིཏོ ཨེཝམཏྠོ. ‘‘ཀིཾ ཝཱདཱི པནཱཡསྨཏོ སཏྠཱ ཀིམཀྑཱཡཱི’’ཏི པུཊྛེན ཨཱཡསྨཏཱ ཨསྶཛིཏྠེརེན –

‘‘ཡེ དྷམྨཱ ཧེཏུཔྤབྷཝཱ, ཏེསཾ ཧེཏུཾ ཏཐཱགཏོ ཨཱཧ;

ཏེསཉྩ ཡོ ནིརོདྷོ, ཨེཝཾཝཱདཱི མཧཱསམཎོ’’ཏི. (མཧཱཝ. ༦༠; ཨཔ. ཐེར ༡.༡.༢༨༦) –

ཝུཏྟོ. ཏེན ཝིཉྙཱཡཏི ཧེཏུཔྤབྷཝཱནཾ ཧེཏུ པཊིཙྩསམུཔྤཱདོཏི. སེསམེཏྠ ཝཏྟབྦཾ པརཏོ ཨཱཝི བྷཝིསྶཏི.

༥༧༤. པཊིཙྩཱཏི ཏཾ ཏཾ ཀཱརཎཾ ནིསྶཱཡ. སམྨཱཏི ཨཝིཔརཱིཏཾ ཨནིཙྩཏོ ཨནིཙྩསྶ ཨུཔྤཱདོཏི ཀཏྭཱ. ནིཙྩཏོ ཧི ཀཱརཎཏོ ཕལསྶ ཨུཔྤཱདོ ཝིཔརཱིཏོ. ཏེནཱཧ ‘‘ཏིཏྠིཡ…པེ… ནིརཔེཀྑོ’’ཏི. ‘‘ཨུཔྤཱདོ པཉྙཱཡཏཱི’’ཏི (སཾ. ནི. ༣.༣༨; ཨ. ནི. ༣.༤༧; ཀཐཱ. ༢༡༤) ཨེཝཾ ཝུཏྟསངྑཏལཀྑཎཏོ ཨཉྙོ ‘‘པཙྩཡཏོ ཁཎཏོ’’ཏི ཨེཏྠ ཝུཏྟཔཙྩཡལཀྑཎོ ཨེཀོ ཨཱཀཱརོ ཨུཔྤཱདོཏི ཏེསཾ ཨདྷིཔྤཱཡོ. ཡཾ སནྡྷཱཡ ཏེ ‘‘ཛཱཏིཨཱདཱིནཾ ཧེཏཝོ ཛཱཏིཨཱདཡོ’’ཏི ཝདནྟི, ཏཾ ཏེསཾ མཏིམཏྟཾ, ནིབྦཏྟིལཀྑཎཝིནིམུཏྟསྶ ཏཱདིསསྶ ཀསྶཙི ཨབྷཱཝཏོ. ཏེནཱཧ ‘‘ཏཾ ན ཡུཛྫཏཱི’’ཏིཨཱདི. གམྦྷཱིརནཡཱསམྦྷཝཏོཏི གམྦྷཱིརཱནཾ ནཡཱནཉྩ ཨསམྦྷཝཏོ. སདྡབྷེདཏོཏི སདྡཝིནཱསཏོ སདྡཱཡོགཏོ. སུཏྟཾ ནཏྠི ‘‘པཊིཙྩསམུཔྤཱདཾ ཝོ, བྷིཀྑཝེ, དེསེསྶཱམཱི’’ཏིཨཱདིསུཏྟཔདེཧི (སཾ. ནི. ༢.༡, ༢༠) ཨུཔྤཱདམཏྟསྶ ཨཔྤཀཱསིཏཏྟཱ. ཨཡམེཝ ཧི ཨཏྠོ ཧེཊྛཱ དསྶིཏོ ཨིདཱནིཔི དསྶཱིཡཏི. ཏཾ ཨུཔྤཱདམཏྟཾ. ཝིཧརཱམི ཏསྨིཾ པཋམཱབྷིསམྦུདྡྷཀཱལེཏི ཨདྷིཔྤཱཡོ. ཝིཧརཱམཱིཏི ཝཱ ཀཱལཝིཔལླཱསེན ཝུཏྟཾ, ཝིཧཱསིནྟི ཨཏྠོ. ཏཏྲཱཏི ཏསྨིཾ པདེསཝིཧཱརེ. པཙྩཡཱཀཱརདསྶནེནཱཏི ཡེནཱཀཱརེན པཙྩཡདྷམྨོ པཙྩཡུཔྤནྣསྶ པཙྩཡོ ཧོཏི, སོ པཙྩཡཱཀཱརོ པཙྩཡབྷཱཝོ, ཏསྶ དསྶནེན. ཨིདྷ པན ཝེདནཱནཾ པཙྩཡབྷཱཝོ ཨདྷིཔྤེཏོ. ཏེནཱཧ ¶ ‘‘མིཙྪཱདིཊྛིཔཙྩཡཱཔི ཝེདཡིཏ’’ནྟིཨཱདི. ཝེདནཱནཾཡེཝ ཧི པཙྩཡཾ པསྶནྟེན ཝུཏྟཝིཧཱརོ པཊིཙྩསམུཔྤཱདསྶ ཨེཀདེསམེཝ པསྶཏོ ཝིཧཱརོཏི ¶ ཀཏྭཱ པདེསཝིཧཱརོ ཛཱཏོ, ཨནནྟནཡསམནྟཔཊྛཱནམནསིཀཱརོ པཋམཱབྷིསམྦུདྡྷཝིཧཱརོ. ཏཉྷི ནིཔྤདེསཏོ པཙྩཡཱཀཱརདསྶནནྟི ཨེཀེ. པདེསཝིཧཱརསུཏྟཝིརོདྷོ ཨཱཔཛྫཏི ཏསྶ ཝེདནཱནཾ པཙྩཡདྷམྨམནསིཀཱརཝིབྷཱཝནཏོ.

ལོཀོ སམུདེཏི ཨེཏསྨཱཏི ལོཀསམུདཡོ, ཨཝིཛྫཱདིཀོ པཙྩཡགཎོ, ན ལོཀསམུདཡམཏྟཾ. ཏེནཱཧ ‘‘ཨནུལོམཔཊིཙྩསམུཔྤཱདོ’’ཏི. ནཏྠིཏཱཏི སབྦསོ ཨབྷཱཝོ, ནརནྭཡཝིནཱསོ ཨུཙྪེདོཏི ཨཏྠོ. ནཏྠིཏཱསཧཙརཎཏོ པན ཨུཙྪེདདིཊྛི ནཏྠིཏཱཏི ཨདྷིཔྤེཏཱ. པཙྩཡཱནུཔརམོ པཙྩཡཱནཾ ཨཝིཙྪེདོ. ཡཐཱ ཧི ཨཏཱིཏཧེཏུཔཉྩཀསནྣིསྶཡེན ཨེཏརཧིཕལཔཉྩཀཾ ཝིཡ ཧེཏུཔཉྩཀམྤི ཧོཏི, ཨེཝཾ ཨེཏརཧིཧེཏུཔཉྩཀསནྣིསྶཡེན ཨཱཡཏིཾཕལཔཉྩཀམྤི བྷཝིསྶཏི. ཏེནཱཧ ‘‘པཙྩཡཱནུཔརམེ ཕལཱནུཔརམཏོ’’ཏི.

ཏཾ གམྦྷཱིརཏྟཾ ཨུཔྤཱདམཏྟེ ནཏྠི ཨསབྷཱཝདྷམྨཏྟཱ. ཨེཀཏྟནཡཱདཡོ ནཡཱ སབྷཱཝདྷམྨེསུ ལབྦྷམཱནཏོ ཨུཔྤཱདམཏྟེ ཀཐཉྩིཔི ན ལབྦྷེཡྻུནྟི ཨཱཧ ‘‘ནཡཙཏུཀྐཾ ཨུཔྤཱདམཏྟེ ནཏྠཱི’’ཏི.

༥༧༥. སམཱནེ ཀཏྟརཱིཏི ཨེཀསྨིཾཡེཝ ཀཏྟརི ཨུཔྤཛྫནཀིརིཡཱཡ ཡོ ཀཏྟཱ, ཏསྨིཾཡེཝ པཙྩཡནཀིརིཡཱཡ ཙ ཀཏྟུབྷཱུཏེཏི ཨཏྠོ. ཡཐཱ ‘‘ནྷཏྭཱ བྷུཉྫཏི, བྷུཏྭཱ སཡཏཱི’’ཏི. ‘‘པུབྦཀཱལེ’’ཏི ཨིདཉྩ ཏྭཱསདྡནྟཱནཾ པདཱནཾ ཡེབྷུཡྻེན པུརིམཀཱལཀིརིཡཱཡ དཱིཔནཏོ ཝུཏྟཾ, ན ཨིདྷ པཊིཙྩསདྡསྶ པུརིམཀཱལཏྠཏྟཱ. ཨེཝཉྷི ‘‘ཙཀྑུཾ པཊིཙྩཱ’’ཏི ནིདསྶནཝཙནཾ ནིདསྶིཏབྦེན སཾསནྡེཡྻ. ཨཐ ཝཱ ཀཱམཉྩེཏྠ ཨུབྷིནྣཾ ཀིརིཡཱནཾ སམཀཱལཏཱ ཨུཔྤཛྫནཀིརིཡཱཡ པུབྦེ པཙྩཡནཀིརིཡཱཡ ཨསམྦྷཝཏོ, ཏཐཱཔི ཕལཀིརིཡཱཡ ཧེཏུཀིརིཡཱ པུརིམཀཱལོ ཝིཡ ཝོཧརིཏུཾ ཡུཏྟཱ. ཨེཝམེཏྠ ཧེཏུཕལཝཝཏྠཱནཾ སུཔཱཀཊཾ ཧོཏཱིཏི ཨུཔཙཱརསིདྡྷཾ པུརིམཀཱལཾ གཧེཏྭཱ ཝུཏྟཾ ‘‘པུབྦཀཱལེ’’ཏི. ཨཏྠསིདྡྷིཀརོཏི ཝཱཀྱཏྠཔཊིཝིཉྙཏྟིཀརོ. པཊིཙྩསམུཔྤཱདོཏི ཧི ཨེཏྠ ཝཱཀྱཏྠཱཝབོདྷོ ཨིདྷ ཨཏྠསིདྡྷཱིཏི ཨདྷིཔྤེཏོ. པཡུཛྫམཱནོ པཊིཙྩསདྡོ ཨུཔྤཱདསདྡེན ཝུཙྩམཱནསྶ ¶ སམཱནསྶ ‘‘ཀཏྟུ ཨབྷཱཝཏོ’’ཏི པདཾ ཨཱནེཏྭཱ ཡོཛེཏབྦཾ. ཨཡཉྷེཏྠ ཨཏྠོ ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎ’’ནྟིཨཱདཱིསུ (མ. ནི. ༡.༢༠༤, ༤༠༠; ༣.༤༢༡, ༤༢༥-༤༢༦; སཾ. ནི. ༢.༤༣-༤༤; ༢.༤.༦༠; ཀཐཱ. ༤༦༥) པཙྩཡནཀིརིཡཱཡ, ཨུཔྤཛྫནཀིརིཡཱཡ ཙ ཝིཉྙཱཎམེཝ ཀཏྟཱཏི སམཱནཀཏྟུཀཏཱ ལབྦྷཏི.

‘‘པཊིཙྩསམུཔྤཱདོ’’ཏི ¶ ཨེཏྠ པན ཨུཔྤཱདསདྡསྶ བྷཱཝསཱདྷནཏཱཡ ཀིརིཡཱཝ ཝུཏྟཱཏི སམཱནཀཏྟུལཀྑཎོ སདྡཔྤཡོགོ ན སམྦྷཝཏཱིཏི. ཏེནཱཧ ‘‘སདྡབྷེདཾ གཙྪཏཱི’’ཏི, ཨཔསདྡཔྤཡོགོ ཧོཏཱིཏི ཨཏྠོ. ན ཙེཏྠ པརཱཝརཡོགོ (པཱཎིནཱི ༣.༤.༢༠) ‘‘ཨཔྤཏྭཱ ནདིཾ པབྦཏོ, ཨཏིཀྐམྨ པབྦཏཾ ནདཱི’’ཏིཨཱདཱིསུ ཝིཡ, ནཱཔི ལཀྑཎཧེཏུཨཱདིཔཡོགོ ‘‘སཱིཧཾ དིསྭཱ བྷཡཾ ཧོཏི, གྷཏཾ པིཝིཏྭཱ བལཾ ཛཱཡཏེ, ‘དྷ’ནྟི ཀཏྭཱ དཎྜོ པཏིཏོ’’ཏིཨཱདཱིསུ ཝིཡ. ནེཝེཏྠ སདྡབྷེདོ. ན ཧི ཧཏྠཏལེ ཨཱམལཀཾ ཝིཡ སབྦཉྙེཡྻཾ པཙྩཀྑཾ ཀཏྭཱ ཋིཏཱནཾ མཧེསཱིནཾ ཝཙནེ ཨཀྑརཙིནྟཀཱནཾ ཝིཔྤལཱཔོ ཨཝསརཾ ལབྷཏི. ལབྷཏུ, ཝཱཀྱཏྠེན སདྡསིདྡྷིཏོ ‘‘ནྷཏྭཱ གམནཾ, བྷུཏྭཱ སཡན’’ནྟིཨཱདཱིསུ ཝིཡཱཏི. ཨེཝམྤི ན ཙ ཀིཉྩི ཨཏྠཾ སཱདྷེཏི. ཡདིཔི པཙྩེཀཾ པདཏྠོ ལབྦྷཏི, ཝཱཀྱཏྠོ པན ན ཡུཛྫཏི, ཏསྨཱ དསདཱལི༹མཱདིཝཱཀྱཱནི ཝིཡ ཨསམྦནྡྷཏྠཏཱཡ ནིརཏྠཀཾ ཧོཏཱིཏི ཨདྷིཔྤཱཡོ.

ནཱམཔདེ ཝུཏྟེ ཨཔྤཡུཏྟཱནིཔི ‘‘ཨཏྠི, ཧོཏི, ཝིཛྫཏཱི’’ཏི ཨེཝརཱུཔཱནི ཀིརིཡཱཔདཱནི ཨཱནེཏྭཱ སམྦནྡྷིཏབྦཱནཱིཏི ཉཱཡཾ སནྡྷཱཡཱཧ ‘‘ཧོཏིསདྡེན སདྡྷིཾ ཡོཛཡིསྶཱམཱ’’ཏི. ཨིམེསཱུཏི ཡཐཱཝུཏྟེསུ དེསནཱཔཊིཉྙཱཔུཙྪཱནིགམནཝསེན ཝུཏྟེསུ པཊིཙྩསམུཔྤཱདཔདེསུ. ནིདསྶནམཏྟཉྩེཏཾ, ཨཉྙེསུཔི ‘‘པཊིཙྩསམུཔྤཱདམེཝ སཱདྷུཀཾ ཡོནིསོ མནསི ཀཱརོཏི. ཡདིདཾ ཨིདཔྤཙྩཡཏཱ པཊིཙྩསམུཔྤཱདོ (དཱི. ནི. ༢.༦༧; མ. ནི. ༢.༣༣༧; ས. ནི. ༡.༡༧༢; མཧཱཝ. ༧). གམྦྷཱིརོ ཙཱཡཾ, ཨཱནནྡ, པཊིཙྩསམུཔྤཱདོ’’ཏི (དཱི. ནི. ༢.༩༥; སཾ. ནི. ༢.༦༠) ཨེཝམཱདཱིསུཔི ཨེཀེནཔི སདྡྷིཾ ཧོཏི-སདྡོ སམྦནྡྷཾ ན གཙྪཏི. ཡོགཾ ན གཙྪཏི ཏཐཱ སམྦནྡྷཝསེན ཨཝུཏྟཏྟཱ. ‘‘ན ཙ ཨུཔྤཱདོ ཧོཏཱི’’ཏི ཨིདཾ ཨསབྷཱཝདྷམྨཏྟཱ ཨུཔྤཱདསྶ ནིབྦཏྟིལཀྑཎཱཡོགཾ སནྡྷཱཡ ཝུཏྟཾ. ཡཐཱ ཧི ཝིནཱསསྶ ཝིནཱསོ ནཏྠི, ཨེཝཾ ཨུཔྤཱདསྶ ཝིནཱསོ ཝིཡ ཨུཔྤཱདོཔི ནཏྠི. ཡདི སིཡཱ, ཡེན ཨུཔྤཱདེན ཨུཔྤཱདོ ཨུཔྤཱདཝཱ, སོཔི ཨུཔྤཱདཝཱཏི ¶ ཨནཝཊྛཱནམེཝ ཨཱཔཛྫེཡྻཱཏི ཝུཏྟོཝཱཡམཏྠོ. ཏེནཱཧ ‘‘སཙེ ཧེཡྻཱ’’ཏིཨཱདི. ཡདི ཨེཝཾ, ཀཐཾ སམུདཡོ ཧོཏཱིཏི? ནཱཡཾ དོསོ ནིབྦཏྟིཡཱ ཨནདྷིཔྤེཏཏྟཱ. ཨེཝཾ དུཀྑཀྑནྡྷསྶ སམུདཡོ པཱཏུབྷཱཝོ སམྦྷཝཏཱིཏི ཨཡཉྷེཏྠ ཨཏྠོ, ཨིདྷ པན པཊིཙྩསམུཔྤཱདོ ཧོཏཱིཏི ཏསྶ ཨཏྠིབྷཱཝཙོདནཱཏི ཀཏྭཱ ཧོཏི, ཛཱཡཏཱིཏི ནིབྦཏྟིཙོདནཱ ཀཏཱ སིཡཱཏི ཨདྷིཔྤཱཡེན ཝུཏྟཾ ‘‘ན ཨུཔྤཱདོ ཧོཏཱི’’ཏི.

༥༧༦. ཨིམེསཾ སངྑཱརཱདཱིནཾ པཙྩཡཱ ཨིདཔྤཙྩཡཱ, ཨཝིཛྫཱདཡོ, ཏེསཾ བྷཱཝོ ཨིདཔྤཙྩཡཏཱ ¶ . ཀོ པན སོ བྷཱཝོཏི ཨཱཧ ‘‘བྷཱཝོ ཙ ནཱམཱ’’ཏིཨཱདི. ཏསྶཏྠོ – ཡེནཱཀཱརེན ཨཝིཛྫཱདཡོ སངྑཱརཱདིཔཱཏུབྷཱཝཧེཏཱུ ཧོནྟི, ཏསྨིཾ ཨཝིཛྫཱདཱིནཾ པཝཏྟིཨཱཀཱརཝིསེསེ ཝིཀཱརེ པཊིཙྩསམུཔྤཱདོཏི ཨཡཾ སམཉྙཱཏི. ཏེསཾ ཝཱདཱིནཾ ཏཾ མཉྙནཾ. ཧེཏུཝཙནཏོཏི ཧེཏུབྷཱཝཝཙནཏོ.

༥༧༧. ཨེཏྠཱཏི པཊིཙྩསམུཔྤཱདཔདེ. སམུཔྤཱདཔདྷཱནཝཙནཝིཉྙེཡྻོ སསཏྟིཀོ ཧེཏུ པཊིཙྩསམུཔྤཱདོཏི ཨཝིཔརཱིཏཾ ཨཏྠཾ ཨཛཱནནྟཱནཾ ཨཉྙཏྠ སམུཔྤཱདསདྡསྶ བྷཱཝསཱདྷནསྶ དསྶནཏོ ཏཐཱ ཨིདྷཱཔི བྱཉྫནཙྪཱཡཱཡ ཨུཔྤཱདོཡེཝཱཡཾ ཝུཏྟོ, ན ཧེཏཱུཏི ཡཱ སཉྙཱ ཨུཔྤཛྫཏི, སཱ ཨིམསྶ པཊིཙྩསམུཔྤཱདཔདསྶ ཨེཝཾ ཨིདཱནི ཝུཙྩམཱནཱཀཱརེན ཨཏྠཾ གཧེཏྭཱ ཝཱུཔསམེཏབྦཱ ཝིནོདེཏབྦཱ.

དྭེདྷཱཏི གཱཐཱཡ ཨཡཾ སངྑེཔཏྠོ – ཡསྨཱ ཨཏྟནོ པཙྩཡཝསེན པཝཏྟོ པཙྩཡུཔྤནྣདྷམྨསམཱུཧོ པཙྩེཏབྦཏོ པཊིཙྩོ ཙ སོ སཧ ཨུཔྤཛྫནཏོ སམུཔྤཱདོ ཙ, པཊིཙྩ ཝཱ ཀཱརཎསཱམགྒིཾ ཨཔཙྩཀྑཱཡ སཧ ཨུཔྤཛྫནཏོ ཨེཝཱཏི ཙ ཨེཝཾ དྭེདྷཱ ‘‘པཊིཙྩསམུཔྤཱདོ’’ཏི ཨིདཾ ཝཙནཾ ཨིཙྪིཏབྦཾ, ཏསྨཱ ཏསྶ པཙྩཡདྷམྨོཔི ཕལཱུཔཙཱརེན པཊིཙྩསམུཔྤཱདོ ཨིཙྩེཝ ཝུཏྟོཏི.

པཙྩཡཏཱཡཱཏི པཙྩཡསམཱུཧཏོ. པཝཏྟོཏི ནིབྦཏྟོ. དྷམྨསམཱུཧོཏི པཙྩཡུཔྤནྣདྷམྨཔུཉྫོ. པཏཱིཡམཱནོཏི ཉཱཎགཏིཡཱ ཨབྷིམུཁཾ ཨུཔེཡམཱནོ, ཨབྷིསམིཡམཱནོཏི ཨཏྠོ. ཧིཏཱཡ སུཁཱཡ ཙཱཏི ལོཀུཏྟརཧིཏཱཡ, ལོཀུཏྟརསུཁཱཡ ཙ. སཧ ཨུཔྤཛྫཏི ཨེཀེཀསྶ ཀདཱཙིཔི ¶ ཨུཔྤཏྟིཡཱ ཨབྷཱཝཏོ. སམྨཱ ཨུཔྤཛྫཏི ཨཧེཏུཏོ, ཝིསམཧེཏུཏོ ཙ ཨནུཔྤཛྫནཏོ. སཧ ཨུཔྤཛྫཏཱིཏི ཨེཀཛ྄ཛྷཾ ཨུཔྤཛྫཏི ཨནྟམསོ ཨཊྛནྣཾ དྷམྨཱནཾ ཨུཔྤཛྫནཏོ. ན པཙྩཀྑཱཡཱཏི ཨཔཊིཀྑིཔིཏྭཱ, ཨཏྟནོ པཙྩཡབྷཱུཏདྷམྨསམུདཱཡེན ཀེནཙི ན ཝིནཱཏི ཨཏྠོ. ཏསྶཱཏི ཡྭཱཡཾ ‘‘པཊིཙྩསམུཔྤཱདོ’’ཏི ཝུཏྟོ པཙྩཡུཔྤནྣདྷམྨསམཱུཧོ, ཏསྶ ཨཡཾ ཨཝིཛྫཱདིཀོ ཧེཏུསམཱུཧོ. ‘‘ཏཔྤཙྩཡཏྟཱ’’ཏི ཨེཏེན པཊིཙྩསམུཔྤཱདཔཙྩཡེ པཊིཙྩ སམུཔྤཱདསམཉྙཱཏི དསྶེཏི. ཏེནཱཧ ‘‘ཡཐཱ ལོཀེ’’ཏིཨཱདི. ཡཐཱ ཧི ལོཀེ ‘‘པིཏྟཾ མཐིཏཾ, སཱུརཱ དདྷི, ཏིཔུསཾ ཛརོ, སེམྷོ གུལོ༹, ཨཱཡུ གྷཏ’’ནྟི ཙ པཙྩཡོ ཕལཝོཧཱརེན ཝུཙྩཏི, ཨེཝཾ ཕལཱུཔཙཱརེན པཊིཙྩསམུཔྤཱདོ ཝུཏྟོཏི ཝེདིཏབྦོ.

༥༧༨. པཊིཙྩ-སདྡེ ¶ པཊི-སདྡོ ཨབྷིམུཁཏྠོ, ཨིཙྩ-སདྡོ གམྨཏྠོཏི དསྶེནྟོ ཨཱཧ ‘‘པཊིམུཁམིཏོ’’ཏི. ཀསྶ པན པཊིམུཁཾ, ཀེན ཝཱ ཨིཏོ, ཀོ ཝཱ ཨིཏོཏི ཙོདནཏྟཡེ པཙྪིམཾ ཝིསྶཛྫེནྟོ ‘‘ཧེཏུསམཱུཧོ’’ཏི ཨཱཧ. ཏསྨིཉྷི ཝིསྶཊྛེ ཧེཏུསམཱུཧོ ནཱམ པཙྩཡསཱམགྒཱིཏི ཏཏྠ ཨཉྙམཉྙསྶ པཊིམུཁཾ, ཨཉྙམཉྙེནེཝ ཙ ཨིཏོཏི ཝིསྶཊྛོཝཱཡམཏྠོ ཧོཏཱིཏི. སཧིཏེཏི སམུདིཏེ ཨཝིནིབྦྷུཏྟེ. སོཏི ཧེཏུསམཱུཧོ. སམུཔྤཱདོ ཨིཏི ཝུཏྟོཏི ཡོཛནཱ.

པཱཏུབྷཱཝཱཡཱཏི ཨུཔྤཱདཱཡ. ཀཱམཾ པཱལི༹ཡཾ ‘‘ཨཝིཛྫཱཔཙྩཡཱ སངྑཱརཱ’’ཏི (སཾ. ནི. ༢.༡; ཨུདཱ. ༡; མཧཱཝ. ༡; ནེཏྟི. ༢༤; ཝིབྷ. ༢༢༥) ཨཝིཛྫཱཝ པཙྩཡབྷཱཝེན ཝུཏྟཱ, ཏཐཱཔི ན ཨཝིཛྫཱ ཨེཀཱཝ པཙྩཡོ ཧོཏི, ཨཐ ཁོ སཧཛཱཏདྷམྨཝཏྠུཨཱརམྨཎཱདཡོ, ཡོནིསོམནསིཀཱརཱདཡོ, ཏཎྷུཔཱདཱནཱདཡོ ཙ དྷམྨཱ ཡཐཱརཧཾ སངྑཱརུཔྤཱདནེ ཨཝིཛྫཱཡ སཧཀཱརཱིཀཱརཎཾ ཧོནྟིཡེཝ. ཨེཝཾ སངྑཱརཱདཡོཔི ཝིཉྙཱཎཱདཱིནནྟི ཨཱཧ ‘‘ཨཝིཛྫཱདིཨེཀེཀཧེཏུསཱིསེན ནིདྡིཊྛོ ཧེཏུསམཱུཧོ’’ཏི. སཱདྷཱརཎཕལནིཔྥཱདཀཊྛེནཱཏི ཏཾསམཱུཧཔརིཡཱཔནྣཱནཾ ཧེཏུདྷམྨཱནཾ སཱདྷཱརཎསྶ ཕལསྶ ནིབྦཏྟཀབྷཱཝེན. ཨཝེཀལླཊྛེནཱཏི ཨནཱུནབྷཱཝེན. ཏསྨིཉྷི ཧེཏུསམཱུཧེ ཨེཀཙྩཱསཱདྷཱརཎཉྩེཏཾ ཕལཾ, ཨེཀཙྩེཧེཝ ཙ ནིབྦཏྟེཏབྦཾ སིཡཱ, སབྦེསཾ ཏེསཾ པཙྩཡདྷམྨཱནཾ ཨཉྙམཉྙཱཔེཀྑཱ ནཏྠཱིཏི པཊིམུཁགམནཱབྷཱཝཏོ པཊིཙྩཏྠོ ན པརིཔཱུརེཡྻཱཏི. སཱམགྒིཨངྒཱནནྟི པཙྩཡསཱམགྒིཡཱ ཨངྒབྷཱུཏཱནཾ, སམཱུཧཱིནནྟི ཨཏྠོ ¶ . ནིདྡྷཱརཎེ ཙེཏཾ སཱམིཝཙནཾ. ཕལདྷམྨཱནཾ སཧིཏཏཱ ནཱམ ཝིསུཾ ཨབྷཱཝོ, ན ཧེཏུདྷམྨཱནཾ ཝིཡ ཨཉྙམཉྙཱཔེཀྑཱཏི ཨཱཧ ‘‘ཨཉྙམཉྙཾ ཨཝིནིབྦྷོགཝུཏྟིདྷམྨེ’’ཏི ཨཝིནིབྦྷོགགྒཧཎཉྩེཏྠ རཱུཔདྷམྨཱནམྤི སངྒཎྷནཏྠཾ. ཨཉྙཐཱ སམྤཡུཏྟདྷམྨེཏི ཝུཙྩེཡྻ.

༥༧༩. པཙྩཡཏཱཏི ཨཡཾ ཨཝིཛྫཱདིཀོ པཙྩཡསམཱུཧོ. ཨཉྙོཉྙནྟི ཨཉྙམཉྙཾ. པཊིཙྩཱཏི ནིསྶཱཡ སཧཀཱརཱིཀཱརཎཾ ལདྡྷཱ. སམནྟི ཨཝིསམཾ ཨཝེཀལླེན. སཧཱཏི ཨེཀཛ྄ཛྷཾ. དྷམྨེཏི ཨཏྟནོ པཙྩཡུཔྤནྣདྷམྨེ. ཡསྨཱ ཨུཔྤཱདེཏི, ཏཏོཔི ཏསྨཱཔི. ཨེཝཾ པཊིཙྩསམུཔྤཱདོཏི མུནིནཱ བྷགཝཏཱ བྷཱསིཏཱཏི ཡོཛནཱ. ན ཨཔཊིཙྩ པཊིཙྩེཝཱཏི ཨཝདྷཱརཎཏྠཾ དསྶེནྟོ གཱཐཱཡཾ ཨེཝ-ཀཱརོ ལུཏྟནིདྡིཊྛོཏི དསྶེཏི.

ཨེཀེཀདེསནྟི ཕལསམུདཱཡསྶ ཨེཀདེསེཀདེསཾ, བྷཱགསོཏི ཨཏྠོ. པུབྦཱཔརབྷཱཝེནཱཏི པཊིཔཱཊིཡཱ ¶ . སབྦམེཏཾ རཱུཔཱརཱུཔཀལཱཔུཔྤཱདནཾ སནྡྷཱཡ ཝུཏྟཾ. ཨཏྠཱནུསཱརཝོཧཱརཀུསལེནཱཏི པརམཏྠདྷམྨཱནུགཏཝོཧཱརནིཔུཎེན.

༥༨༠. པུརིམེན པདེནཱཏི ཡོཛནཱ. སསྶཏཱདཱིནནྟི སསྶཏབྷཱཝཱདཱིནཾ, སསྶཏཝཱདཱདཱིནཾ ཝཱ. སསྶཏསཧཙརིཏཱ ཧི ཝཱདཱཔི སསྶཏཱདཡོཏི ཝུཙྩནྟི ཡཐཱ ‘‘དུཀྑདེསནཱ དུཀྑ’’ནྟི. ཨུཙྪེདཱདཱིཏི ཨེཏྠཱཔི ཨེསེཝ ནཡོ. ཝིགྷཱཏོ ཝིནཱསོ, པཧཱནནྟི ཨཏྠོ. ཉཱཡོཏི ཨནྟདྭཡཝིརཧིཏཱ མཛ྄ཛྷིམཱ པཊིཔཏྟི.

པཝཏྟིདྷམྨཱནནྟི པཝཏྟིབྷཱུཏཱནཾ དྷམྨཱནཾ, ཀིལེསཝཊྚཱདཱིནནྟི ཨཏྠོ. ‘‘སསྶཏོ ཨཏྟཱ ཙ ལོཀོ ཙཱ’’ཏིཨཱདིནཡཔྤཝཏྟོ (དཱི. ནི. ༡.༣༡) སསྶཏཝཱདོ. ‘‘ནཏྠི ཧེཏུ, ནཏྠི པཙྩཡོ སཏྟཱནཾ སཾཀིལེསཱཡཱ’’ཏིཨཱདིནཡཔྤཝཏྟོ (དཱི. ནི. ༡.༡༦༨; མ. ནི. ༢.༡༠༡, ༢༢༧; སཾ. ནི. ༣.༢༡༢) ཨཧེཏུཝཱདོ. པཀཏི ཨཎུཀཱལཱདིཝསེན ལོཀོ པཝཏྟཏཱིཏི ཨེཝཾ པཝཏྟོ ཝིསམཧེཏུཝཱདོ. ཨིསྶརཔུརིསཔཛཱཔཏིཝཱདཱ ཝསཝཏྟིཝཱདཱ. ཨཧེཏུཝཱདགྒཧཎེནེཝ ཙེཏྠ སབྷཱཝནིཡཏི ཡདིཙྪཱཝཱདཱནམྤི སངྒཧོ དཊྛབྦོ. ཀེཙི པན ‘‘ཙཀྑུ ཨེཝ ཙཀྑུསྶ ཀཱརཎ’’ནྟི ཨེཝམཱདིཀོ ཝིསམཧེཏུཝཱདོ. ཨིསྶརཱདིཝཱདོ ཨཧེཏུཝཱདནྟོགདྷོ. སབྷཱཝེནེཝ དྷམྨཱ པཝཏྟནྟཱིཏི ཝཱདོ ‘‘ཝསཝཏྟིཝཱདོ’’ཏི ཝདནྟི. ཀིཾ ¶ ཧི པཙྩཡསཱམགྒིཡཱ པཡོཛནནྟི ཨདྷིཔྤཱཡོ. སམུཔྤཱདཔདེན པརིདཱིཔིཏོ ཧོཏཱིཏི ཡོཛནཱ. པརིདཱིཔནསྶ པན ཨཝིཔརཱིཏཀཱརཎཾ དསྶེཏུཾ ‘‘པཙྩཡསཱམགྒིཡཾ དྷམྨཱནཾ ཨུཔྤཏྟིཏོ’’ཏི ཝུཏྟཾ. ཝིཧཏཱཏི ཨབྦྷཱཧཏཱ. ‘‘པུརིམཔུརིམཔཙྩཡཝསེནཱ’’ཏི ཨིམིནཱ ཨཝིཙྪེདཝསེན པཝཏྟམཱནཾ ཨུཙྪེདདིཊྛིནིཝཏྟཀཾ ཧེཏུཕལཔབནྡྷཾ དསྶེཏི. ཏེནཱཧ ‘‘ཀུཏོ ཨུཙྪེདོ’’ཏི. ཨུཙྪེདཱབྷཱཝཀཐནེནེཝ ཙེཏྠ ཨུཙྪེདཝཱདསྶཱཔི ཨབྷཱཝཾ དསྶེཏཱིཏི དཊྛབྦཾ.

ཏསྶཱ ཏསྶཱ པཙྩཡསཱམགྒིཡཱཏི ཏསྨིཾ ཏསྨིཾ ཧེཏུཔཙྩཡསམཝཱཡེ. སནྟཏིཾ ཨཝིཙྪིནྡིཏྭཱཏི ཧེཏུཕལཔབནྡྷསངྑཱཏསྶ སནྟཱནསྶ ཨཝིཙྪིནྡནེན. ཏེསཾ ཏེསཾ པཙྩཡུཔྤནྣདྷམྨཱནཾ སམྦྷཝཏོ ཨུཔྤཛྫནཏོ སསྶཏུཙྪེདསངྑཱཏཾ ཨནྟདྭཡཾ ཨནུཔགྒམྨ ཡཐཱསཀཾ པཙྩཡེཧི ཨནུརཱུཔཕལུཔྤཏྟི ཨིདྷ མཛ྄ཛྷིམཔཊིཔདཱཏི ཨདྷིཔྤེཏཱ. ཀམྨཝཊྚསྶ, ཝིཔཱཀཝཊྚསྶ ཙ བྷིནྣསབྷཱཝཏྟཱ, བྷིནྣཀཱལཏྟཱ ཙ སོ ཀརོཏི སོ པཊིསཾཝེདེཏཱིཏི ཝཱདཔྤཧཱནཾ. ཀུསལཱཀུསལཀྑནྡྷཔྤཝཏྟིཡཉྷི ཀཱརཀཝོཧཱརོ, ཝིཔཱཀཀྑནྡྷཔཝཏྟིཡཾ ཝེདཀཝོཧཱརོཏི. ཡསྨིཾ སནྟཱནེ ¶ ཀམྨཾ ནིབྦཏྟཾ, ཏཏྠེཝ ཏསྶ ཕལསྶ ནིབྦཏྟནཏོ ཨཉྙོ ཀརོཏི ཨཉྙོ པཊིསཾཝེདེཏཱིཏི ཝཱདཔྤཧཱནཾ. ན ཧི ཀཏསྶ ཝིནཱསོ, ཨཀཏསྶ ཝཱ ཨབྦྷཱགམོ ཨཏྠི. ‘‘ཨིཏྠཱི, པུརིསཱ’’ཏི ཝོཧཱརེན ཛནཔདནིརུཏྟི. ཏཏྠ ཡསྨཱ པཎྜིཏཱཔི ལོཀེ ‘‘པཉྩཀྑནྡྷེ ཨཱནེཏུ, ནཱམརཱུཔཾ ཨཱགཙྪཏཱུ’’ཏི ཨཝཏྭཱ ཨིཏྠཱི, པུརིསོཏྭེཝ ཝོཧརནྟི, ཏསྨཱ ‘‘ཨིཏྠཱི ཨེཝཱཡཾ, པུརིསོ ཨེཝཱཡནྟི ཨཔརིཉྙཱཏཝཏྠུཀཱནཾ ཧོཏི ཨབྷིནིཝེསོ. ཝིདྡསུནོ པན པཊིཙྩསམུཔྤཱདཾ ཛཱནནྟསྶ ཏཐཱ ཏཐཱ པཝཏྟམཱནེ དྷམྨེ ཨུཔཱདཱཡ པཉྙཏྟིམཏྟཏོ ཏཏྠ པརམཏྠཏོ ན ཨབྷིནིཝེསོཏི ཨཱཧ ‘‘ཛནཔདནིརུཏྟིཡཱ ཨནབྷིནིཝེསོ’’ཏི. སམཉྙཱཡཱཏི ལོཀསམཉྙཱཡ. ཨནཏིདྷཱཝནནྟི ཨནཏིཀྐམནཾ. ‘‘སཏྟོ’’ཏི ཧི ཝུཏྟེ ‘‘ཀོ ཨེཏྠ སཏྟོ, ཀིཾ རཱུཔཾ, ཨུདཱཧུ ཝེདནཱདཡོ’’ཏི ཝིབྷཱགཾ ཨཀཏྭཱ ལོཀསམཉྙཱཝསེནེཝ ལོཀིཡེཧི ཝིཡ ལོཀིཡོ ཨཏྠོ སམཉྙཾ ཨཝིལངྒྷནྟེན ཝོཧརིཏབྦོ.

ཨཔརོ ནཡོ – པཙྩེཏུམརཧཏཱིཏི པཊིཙྩོ. ཡོ ཧི ནཾ པཙྩེཏི ཨབྷིསམེཏི, ཏསྶ ཨཙྩནྟམེཝ དུཀྑཝཱུཔསམཱཡ སཾཝཏྟཏི. སམྨཱ, སཧ ཙ ཨུཔྤཱདེཏཱིཏི སམུཔྤཱདོ. པཙྩཡདྷམྨོ ཧི ཨཏྟནོ ཕལཾ ཨུཔྤཱདེནྟོ སམྤུཎྞམེཝ ¶ ཨུཔྤཱདེཏི, ན ཝིཀལཾ. ཡེ ཙ དྷམྨེ ཨུཔྤཱདེཏི, ཏེ སབྦེ སཧེཝ ཨུཔྤཱདེཏི, ན ཨེཀེཀཾ. ཨིཏི པཊིཙྩོ ཙ སོ སམུཔྤཱདོ ཙཱཏི པཊིཙྩསམུཔྤཱདོ. ཨཐ ཝཱ པཊིཙྩ པཊིམུཁཾ ཨིཏྭཱ ཀཱརཎསཱམགྒིཾ ཨཔྤཊིཀྑིཔིཏྭཱ སཧིཏེ ཨུཔྤཱདེཏཱིཏི པཊིཙྩསམུཔྤཱདོ. པཊིམུཁགམནཉྩ པཙྩཡསྶ ཀཱརཎསཱམགྒིཡཱ ཨངྒབྷཱཝེན ཕལསྶ ཨུཔྤཱདནམེཝ. ཨཔྤཊིཀྑིཔིཏྭཱཏི ཙ ན ཝིནཱ ཏཱཡ ཀཱརཎསཱམགྒིཡཱ, ཨངྒབྷཱཝཾ ཨགནྟྭཱ སཡམེཝ ན ཨུཔྤཱདེཏཱིཏི ཨཏྠོ. ཨེཏེན ཀཱརཎབཧུཏཱ དསྶིཏཱ, ‘‘སཧིཏེ’’ཏི ཨིམིནཱ པཙྩཡུཔྤནྣདྷམྨབཧུཏཱ. ཨུབྷཡེནཱཔི ‘‘ཨེཀཾ ན ཨེཀཏོ’’ཏིཨཱདིནཱ (ཝིསུདྡྷི. ༢.༦༡༧) པརཏོ ཝུཙྩམཱནོ སཱསནནཡོ དཱིཔིཏོ ཧོཏི.

ཨཐ ཝཱ པཊིཙྩ པཙྩེཏབྦཾ པཙྩཡཾ པཊིགནྟྭཱ ན ཝིནཱ ཏེན སམྦནྡྷསྶ ཨུཔྤཱདོ པཊིཙྩསམུཔྤཱདོ (ཨུདཱ. ཨཊྛ. ༡). པཊིཙྩསམུཔྤཱདོཏི ཙེཏྠ སམུཔྤཱདཔྤདྷཱནཝཙནཝིཉྙེཡྻོ སསཏྟིཀོ ཧེཏཱུཏི ཝེདིཏབྦོ. ཏཏྠ ‘‘པཊིཙྩཱ’’ཏི ཝུཏྟེ ཀིཾ པཊིཙྩཱཏི ཝཏྟབྦནྟི ཨཱཧ ‘‘པཙྩེཏབྦ’’ནྟི. སོ ཙ པཙྩཡདྷམྨོཏི ཀཏྭཱ ཝུཏྟཾ ‘‘པཙྩཡ’’ནྟི. ཨིདཱནི པཊིཙྩསདྡསྶ ཨཏྠམཱཧ ‘‘པཊིགནྟྭཱ’’ཏི. ཀཱརཎསྶ སབྷཱཝེན ཏཔྤཊིལཱབྷགཏིཡཱ པཏྭཱ. ཀཐཾ ན ཝིནཱ ཏེན? སཏི ཨེཝ ཏསྨིཾ, ཏསྶ ཙ ཕལསྶ ཨུཔྤཱདཏོ ཨེཝ, ན ཨཉྙཐཱ. ཨསཏི, ནིརོདྷཏོ ཙཱཏི ¶ ཨཡཾ པཙྩཡཊྛིཏི པཊིཙྩསདྡསྶ ཨཏྠོ. ཏེནཱཡཾ པཊིཙྩསདྡོ ཡཐཱ ‘‘ཨིམསྨིཾ སཏི ཨིམསྶུཔྤཱདོ’’ཏི ཨེཏེ སདྡཱ བྷུམྨནིསྶཀྐཝཙནཛོཏནཱིཡེན ཨིདཾ-སདྡཝཙནཱིཡསྶ ཧེཏུམཏོ ཧེཏུཨཱཡཏྟབྷཱཝེན བྷཱཝུཔྤཱདུཏྟརཀིརིཡཱཔེཀྑེན ཡཱཡསྶ ཏདཱཡཏྟཏཱ, ཏཱཡ སམཏྠཏཱཡ ཧེཏུཾ ཝདནྟི, ཨེཝཾ གནྟྭཱ-སདྡནྟརཝཙནཱིཡེན ཏཾཝིཉྙེཡྻསྶེཝ པཙྩཡནཀིརིཡཱཀཏྟུཧེཏུམཏོ ཧེཏུཔཙྩཡནེན ཧེཏུཨཱཡཏྟབྷཱཝེན སམུཔྤཱདུཏྟརཀིརིཡཱཔེཀྑེན ཡཱཡསྶ ཏདཱཡཏྟཏཱ, ཏཱཡ སམཏྠཏཱཡ ཧེཏུམཱཧ. ཨེཝཉྩ ཀཏྭཱ ‘‘ཨཝིཛྫཱ པཊིཙྩ, སངྑཱརཱ པཊིཙྩསམུཔྤནྣཱ’’ཏིཨཱདི (པཊི. མ. ༡.༤༦) སངྑཱརཔིཊཀེ ཝུཏྟཾ. སམཏྠཏཱ ཙེཏྠ ནིདཱནཱདིབྷཱཝོ. སོ ཙ ཏདཝིནཱབྷཱཝིཕལཾ པཏི སཏྭམེཝ. སམྦནྡྷསྶཱཏི ཙ སཾཡོཛནཱནུརཱུཔཏཱཝསེན ཛཱཏིཨཱདིནཱ སམྦནྡྷསྶ ཛརཱམརཎཱདིཔཙྩཡུཔྤནྣསྶ. ཨུཔྤཱདོཏི ཨུཔྤཛྫནཾ. ཡདི ཨེཝཾ ཀཐཾ པཊིཙྩསདྡཔྤཡོགོ, ནནུ སམཱནཀཏྟུཀཱནཾ པུབྦཀཱལེ ཨཱིདིསོ སདྡཔྤཡོགོཏི? ‘‘བྷུཏྭཱ གཙྪཏི, ཀསིཏྭཱ ཝཔཏཱི’’ཏིཨཱདཱིསུ སཙྩམེཏཾ, ཏཾ པན ཡེབྷུཡྻཝསེན དཊྛབྦཾ ¶ སམཱནཱཔརཀཱལེ, ཨསམཱནཀཏྟུཀེ ཙ དསྶནཏོ. སམཱནཀཱལེ ཏཱཝ –

‘‘ཨནྡྷཀཱརཾ ནིཧནྟྭཱན, ཨུདིཏཱཡཾ དིཝཱཀརོ;

ཝཎྞཔཉྙཱཝབྷཱསེཧི, ཨོབྷཱསེཏྭཱ སམུགྒཏོ’’ཏི. –

ཨུདཱཧརཎཾ. ཀེཙི པན ‘‘མུཁཾ བྱཱདཱཡ སཡཏི, ཨཀྑཱིནི པརིཝཏྟེཏྭཱ པསྶཏཱི’’ཏི ཨུདཱཧརནྟི. ཨཔརེ ‘‘ནིསཛྫ ཨདྷཱིཏེ, ཋཏྭཱ ཀཐེཏཱི’’ཏི.

ཏཏྠ བྱཱདཱནཔརིཝཏྟནུཏྟརཀཱལབྷཱཝིསཡནདསྶནཀིརིཡཱཔེཀྑཱ པུབྦུཏྟརཀཱལཏཱ ཨཏྠི, སཱ ཙ བྷེདཱནུཔལཀྑཎཱ ཀེཧིཙི ན ལཀྑཱིཡཏི. ‘‘ནིསཛྫ ཨདྷཱིཏེ, ཋཏྭཱ ཀཐེཏཱི’’ཏི ཙ སམཱནཀཱལཏཱཡཔི ཨཛ྄ཛྷེནཀཐནེཧི པུབྦེཔི ནིསཛྫཊྛཱནཱནི ཧོནྟཱིཏི སཀྐཱ པུབྦུཏྟརཀཱལཏཱ སམྦྷཱཝེཏུཾ, ཏསྨཱ པུརིམཱནིཡེཝ ཨུདཱཧརཎཱནི ཡུཏྟཱནི. ཨུདཡསམཀཱལམེཝ ཧི ཏནྣིཝཏྟནིཡནིཝཏྟནནྟི. ཨཔརཀཱལེ ‘‘དྭཱརམཱཝརིཏྭཱ པཝིསཏི, ཨཱཝརིཏྭཱ ནིཀྑམཏཱི’’ཏི. ཀེཙི པན ‘‘ཌཀྐཙྩ པཏིཏོ དཎྜོ’’ཏི ཨུདཱཧརནྟི. ཨབྷིགྷཱཏབྷཱུཏསཧཛཱཏཱཡ པན ཨབྷིགྷཱཏཛསདྡསྶ སམཱནཀཱལཏཱ ཨེཏྠ ལབྦྷཏི, ཏསྨཱ ཨིདྷཱཔི པུརིམཱནིཡེཝ ཨུདཱཧརཎཱནི ཡུཏྟཱནི. པུརིམཏཱཝཙནིཙྪཱཝསེནེཝ པན ལཀྑཎཧེཏུཀིརིཡཱནཾ ལཀྑཎཧེཏུབྷཱཝཝཙནིཙྪཱཏི ལཀྑཎབྷཱཝཏོ པུརིམཀཱལོ ཨིཙྩེཝ ‘‘ནིཧནྟྭཱནཱ’’ཏི སདྡསིདྡྷི ཨིཙྪིཏཱ, ཨེཝཉྩ པཙྩཡནཀིརིཡཱ ¶ སམུཔྤཛྫནཀིརིཡཱཡ པུརིམིཀཱཝཱཏི པཊིཙྩ-སདྡསིདྡྷི. ཏཏྠ ཡུཏྟཾ པཙྩཀྑཏོ ཀཏྟུདསྶནཏོ. ཨིདྷ པན ཏདབྷཱཝཏོ ན ཡུཏྟནྟི ཙེ? ནཱཡཾ དོསོ. ཨིདྷཱཔི ཨནུམཱནཏོ སིདྡྷོ. ཛརཱམརཎཱདིཀོ ཀཏྟཱ ཨཏྠེཝ ‘‘ཉཏྭཱ ཀིརིཡཏོ ཝཡ’’ནྟི ཨེཝམཱདིཔཡོགདསྶནཏོ ཨཝསྶཾ ཨནུམིཡམཱནེན ཀཏྟུནཱ ཨཱིདིསོ སདྡཔཡོགོ ཨིཙྪིཏབྦོ. ཨསམཱནེ པན ཀཏྟརི ‘‘པིསཱཙཾ དིསྭཱ བྷཡཾ ཧོཏི, པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟཱི’’ཏི (མ. ནི. ༡.༢༧༡; ༢.༡༨༢; པུ. པ. ༢༠༤) ཨེཝམཱདི ཝེདིཏབྦཾ. ཡཐཱ ཙ ཏཏྠ པིསཱཙདསྶནཱདིཔུརིསབྱཱཔཱརོ, ཨེཝམིདྷཱཔི པཙྩཡནཾ པཙྩཡབྱཱཔཱརོ ཨཏྟནོ ཕལུཔྤཱདནཾ, ཏཉྩ སཏྭཾ སམུཔྤཱདོཝཱཏི ‘‘པཙྩཡེ སཏི, པཙྩཡསྶ ཨུཔྤཱདཱ’’ཏི པཙྩཡནསྶ སམུཔྤཱདཧེཏུཏཱཡ གམཀོ སམཱནསྶ ཀཏྟུ ཨབྷཱཝེཔི པཊིཙྩ-སདྡོ སིདྡྷོཏི ཝེདིཏབྦོ. ཡདི པཊིཙྩསམྦནྡྷསྶ ཨུཔྤཱདོ པཊིཙྩསམུཔྤཱདོ, ཀཐཾ པཙྩཡོ ¶ པཊིཙྩསམུཔྤཱདོཏི? ཧེཊྛཱ ཝིཙཱརིཏོཝཱཡམཏྠོ. ཨཔིཙ ཡོཡཾ སམུཔྤཱད-སདྡཝིབྷཱཝིཏཱནཾ པཙྩཡུཔྤནྣཱནཾ པཊིཙྩསདྡཝིབྷཱཝིཏོ སསཏྟིཀོ ཧེཏུ ཨདྷིཔྤེཏོ, ཏསྶ སམུཔྤཱདཱབྷིམུཁཏཱཡ པདྷཱནཝཙནཝིཉྙེཡྻསབྷཱཝཏྟཱ ཏཐཱ ཝུཏྟོཏི.

ཀིཾ པན ཀཱརཎཾ སམུཔྤཱདཔདྷཱནེན ཝཙནེན སམུཔྤཱདསྶ ཧེཏུ ཝེདིཏབྦོ, ན པན སཧེཏུཀོ སམུཔྤཱདོ ཨེཝཱཏི? ཝུཙྩཏེ – དིཊྛསྶ དུཀྑསྶ ཡོ པཙྩཡོ པཙྩཡནིདྡེསེན ཏསྶ ཝིབྷཱཝིཏཏྟཱ. ཀཐཾ? ཡཐཱཧ –

‘‘ཨིདྷ, བྷིཀྑཝེ, བྷིཀྑུ པརིཝཱིམཾསམཱནོ པརིཝཱིམཾསཏི ‘ཡཾ ཁོ ཨིདཾ ཨནེཀཝིདྷཾ ནཱནཔྤཀཱརཀཾ དུཀྑཾ ལོཀེ ཨུཔྤཛྫཏི ཛརཱམརཎཾ, ཨིདཾ ནུ ཁོ དུཀྑཾ ཀིཾ ནིདཱནཾ ཀིཾ སམུདཡཾ ཀིཾ ཛཱཏིཀཾ ཀིཾ པབྷཝཾ, ཀིསྨིཾ སཏི ཛརཱམརཎཾ ཧོཏི, ཀིསྨིཾ ཨསཏི ཛརཱམརཎཾ ན ཧོཏཱི’ཏི. སོ པརིཝཱིམཾསམཱནོ ཨེཝཾ པཛཱནཱཏི ‘ཡཾ ཁོ ཨིདཾ…པེ… ཨིདཾ ཁོ དུཀྑཾ ཛཱཏིནིདཱན’’’མིཙྩཱདིནཱ (སཾ. ནི. ༢.༥༡) –

དིཊྛསྶ དུཀྑསྶ ནིདཱནཾ པརིཝཱིམཾསསུཏྟེ ཝུཏྟཾ. ཏཾ པཛཱནནཉྩ ནིདཱནམྤི ཝིཉྙཱཏབྦནྟི. ཡཐཱ ཙཱཧ –

‘‘པུབྦེ མེ, བྷིཀྑཝེ, སམྦོདྷཱ ཨནབྷིསམྦུདྡྷསྶ བོདྷིསཏྟསྶེཝ སཏོ ཨེཏདཧོསི ‘ཀིཙྪཾ ¶ ཝཏཱཡཾ ལོཀོ ཨཱཔནྣོ ཛཱཡཏི ཙ ཛཱིཡཏི ཙ མཱིཡཏི ཙ ཙཝཏི ཙ ཨུཔཔཛྫཏི ཙ, ཨཐ ཙ པནིམསྶ དུཀྑསྶ ནིསྶརཎཾ ནཔྤཛཱནཱཏི ཛརཱམརཎསྶ. ཀུདཱསྶུ ནཱམ ཨིམསྶ དུཀྑསྶ ནིསྶརཎཾ པཉྙཱཡིསྶཏི ཛརཱམརཎསྶཱ’ཏི…པེ… ཏསྶ མཡ྄ཧཾ, བྷིཀྑཝེ, ཡོནིསོ མནསིཀཱརཱ ཨཧུ པཉྙཱཡ ཨབྷིསམཡོ ‘ཛཱཏིཡཱ ཁོ སཏི ཛརཱམརཎཾ ཧོཏི, ཛཱཏིཔཙྩཡཱ ཛརཱམརཎ’’’ནྟི (སཾ. ནི. ༢.༡༠) –

ཨཱདིནཱ དིཊྛསྶ དུཀྑསྶ པཙྩཡཝཱིམཾསཱབྷིསམཡཱ ཝུཏྟཱ. པཙྩཡོ ཧི ཉཱཏབྦོ. ཏདབྷིསམཡཱཡཏྟཉྩ དུཀྑནིསྶརཎཔཛཱནནནྟི ཡོ ཙ ཉཱཏབྦོ, སོ པཝེདེཏབྦོཏི པཊིཙྩསམུཔྤཱདསདྡོ ཡཾ ཡདིདཾ སམུཔྤཱདསདྡཝིབྷཱཝིཏཾ དིཊྛཾ དུཀྑཾ, ཏཾ པཙྩཡཾ པཊིཙྩེཝ, ན ཨཉྙཐཱཏི ཨེཝཾ པཙྩཡཝིབྷཱཝནཏྠཾ ཝུཙྩཏི. བྷཝཏི ཧི ཉཱཏུཾ, པཝེདེཏུཉྩ ཨིཙྪིཏབྷཱཝེན པདྷཱནསྶཱཔི ཀེནཙི ཝིསེསེན ཉཱཏབྦཏཱཡ ཨཔྤདྷཱནབྷཱཝེན ནིདྡེསོ ཡཐཱ ¶ ‘‘ཀོ སོཏཱཔནྣོ, ཡསྶ ཏཱིཎི སཾཡོཛནཱནི པཧཱིནཱནི. ཀོ དེཝདཏྟོ, ཡསྶ ཨུཙྩཏརཱནི གེཧཱནཱི’’ཏི, ཨེཝམིདྷཱཔི པཙྩཡཔཙྩཡནཔཝེདནཊྛེན ནིདྡེསེ སཏྟིཝིསེསེན ཨཏྟནོ ཕལེན པཙྩནཱིཡཏཱཡ ཉཱཏབྦབྷཱཝེན ‘‘པཊིཙྩཱ’’ཏི པརིཡཱཡེན པཙྩཡོ ཝུཏྟོ.

ཡོ ཙཱཡཾ ‘‘ཨཝིཛྫཱཔཙྩཡཱ སངྑཱརཱ’’ཏིཨཱདིཀོ ནིདྡེསོ, སོ ཙ སཀལསྶ དུཀྑཀྑནྡྷསྶ མཱུལཏོ པཊྛཱཡ པཙྩཡཱནཾ པཝེདནཱཡ ནིདྡིཊྛོཏི པརིཡོསཱནེཔི ‘‘ཨེཝམེཏསྶ ཀེཝལསྶ དུཀྑཀྑནྡྷསྶ སམུདཡོ ཧོཏཱི’’ཏི ཨེཝཾ-སདྡེན སམུགྒྷཱཏཾ དུཀྑཾ དསྶེཏྭཱ ཏསྶ ཡཐཱཝུཏྟེ པཙྩཡེ ཏཾསམུདཡཱབྷིམུཁེ ཀཏྭཱ ནིགམིཏཱ པཙྩཡཱ. པཊིཔདཱསུཏྟེཔི (སཾ. ནི. ༢.༣) ‘‘ཨཝིཛྫཱཔཙྩཡཱ…པེ… སམུདཡོ ཧོཏཱི’’ཏི ཝཏྭཱ ‘‘ཨཡཾ ཝུཙྩཏི, བྷིཀྑཝེ, མིཙྪཱཔཊིཔདཱ’’ཏི ཝུཏྟཾ. ན ཙ པཊིཙྩསམུཔྤནྣབྷཱཝེན གཧིཏཾ དུཀྑཾ མིཙྪཱཔཊིཔདཾ, ཨཐ ཁོ དུཀྑསམུདཡབྷཱུཏཱ པཙྩཡཱཏི. ཡཐཱ ཙ ‘‘པཉྩངྒིཀོ སམྨཱསམཱདྷི (དཱི. ནི. ༣.༣༣༥), པཉྩཉཱཎིཀོ སམྨཱསམཱདྷཱི’’ཏི (དཱི. ནི. ༣.༣༥༥) ཨངྒཉཱཎཔཊིཝེདནཏྠཏྟཱ དེསནཱཡ སམྨཱསམཱདྷིཔདྷཱནེཧི སདྡེཧི ཨངྒཉཱཎཔཊིཝེདནཾ ཀཏཾ, ཨེཝམིདྷཱཔི སམུཔྤཱདཔདྷཱནེན སདྡེན པཙྩཡཔཊིཝེདནཾ ཀཏནྟི ཝེདིཏབྦཾ.

༥༨༡. ཡཱ པནཱཡཾ ཏནྟཱིཏི སམྦནྡྷོ. ནིཀྑིཏྟཱཏི ཋཔིཏཱ, དེསིཏཱཏི ཨཏྠོ. ཡཐཱདྷིཔྤེཏསྶ ཨཏྠསྶ ཏནནཏོ ཏནྟི, གནྠོ. ‘‘ཀིཾ ཝཱདཱི, བྷནྟེ, སམྨཱསམྦུདྡྷོ’’ཏི པུཙྪིཏེན ¶ ‘‘ཝིབྷཛྫཝཱདཱི, མཧཱརཱཛཱ’’ཏི (པཱརཱ. ཨཊྛ. ༡.ཏཏིཡསངྒཱིཏིཀཐཱ; ཀཐཱ. ཨཊྛ. ནིདཱནཀཐཱ) མོགྒལིཔུཏྟཏིསྶཏྠེརེན ཝུཏྟཏྟཱ སམྨཱསམྦུདྡྷསཱཝཀཱ ཝིབྷཛྫཝཱདིནོ. ཏེ ཧི སཏྠཱརཱ ཝེནཡིཀཱདིབྷཱཝཾ ཝིབྷཛྫ ཝུཏྟཾ ཨནུཝདནྟི, སོམནསྶཱདཱིནཾ, ཙཱིཝརཱདཱིནཉྩ སེཝིཏབྦཱསེཝིཏབྦབྷཱཝཾ. སསྶཏུཙྪེདཝཱདེ ཝཱ ཝིབྷཛྫ ཝདནྟི. ‘‘སསྶཏོ ཨཏྟཱ ཙ ལོཀོ ཙཱ’’ཏིཨཱདཱིནཾ (དཱི. ནི. ༡.༣༡) ཋཔནཱིཡཱནཾ ཋཔནཏོ, རཱགཱདིཀྑཡསྶ སསྶཏསྶ, རཱགཱདིཀཱཡདུཙྩརིཏཱདིཨུཙྪེདསྶ ཙ ཝཙནཏོ, ན པན ཨེཀཾསབྱཱཀརཎཱིཡཱདིཀེ ཏཡོ པཉྷེ ཨཔནེཏྭཱ ཝིབྷཛྫབྱཱཀརཎཱིཡམེཝ ཝདནྟི. ཝིབྷཛྫཝཱདཱིནཾ མཎྜལཾ སམཱུཧོ ཝིབྷཛྫཝཱདིམཎྜལཾ. ཝིབྷཛྫཝཱདིནོ ཝཱ བྷགཝཏོ པརིསཱ ཝིབྷཛྫཝཱདིམཎྜལནྟིཔི ཝདནྟི, ཝིབྷཛྫ ཝཱ སསྶཏུཙྪེདེ ཨུབྷོ ཨནྟེ ཨནུཔགམྨ མཛ྄ཛྷིམཔཊིཔདཱབྷཱུཏསྶ པཊིཙྩསམུཔྤཱདསྶ དེསནཏོ བྷགཝཱ, ཏདནུཝཱདཏོ ཏསྶ སཱཝཀཱ ཙ ཝིབྷཛྫཝཱདིནོཏི. སེསཾ པུརིམསདིསཾ.

ཨོཏརིཏྭཱཏི ¶ ཨོགཱཧེཏྭཱ, ཝིབྷཛྫཝཱདཱི ཧུཏྭཱཏི ཨཏྠོ. ན ཧི སཡཾ ཨཝིབྷཛྫཝཱདཱི སམཱནོ ཝིབྷཛྫཝཱདཱིནཾ ཨནྟརེ ཋཱནམཏྟེན ཝིབྷཛྫཝཱདིམཎྜལཾ ཨོཏིཎྞོ ནཱམ ཧོཏི. ཨཱཙརིཡེཧི ཨཝུཏྟཝིཔརཱིཏཏྠདཱིཔནེན ཏེ ནཨབྦྷཙིཀྑནྟེན. ཨཝིཛྫཱ པུཉྙཱནེཉྫཱབྷིསངྑཱརཱནམྤི ཧེཏུ པཙྩཡོ ཧོཏཱིཏི ཝདནྟོ, ཀཐཱཝཏྠུམྷི པཊིཀྑིཏྟེ པུགྒལཝཱདཱདིཀེ ཙ ཝདནྟོ སཀསམཡཾ ཝོཀྐམཏི ནཱམ, ཏཐཱ ཨཝོཀྐམནྟེན. པརསམཡཾ དོསཱརོཔནབྱཱཔཱརཝིརཧེན ཨནཱཡཱུཧནྟེན. ‘‘ཨིདམྤི སུཏྟཾ གཧེཏབྦ’’ནྟི པརསམཡཾ ཨསམྤིཎྜེནྟེནཱཏི ཀེཙི ཝདནྟི. ‘‘ཏཐཱཧཾ བྷགཝཏཱ དྷམྨཾ དེསིཏཾ ཨཱཛཱནཱམི, ཡཐཱ ཏདེཝིདཾ ཝིཉྙཱཎཾ སནྡྷཱཝཏི སཾསརཏི ཨནཉྙ’’ནྟིཨཱདཱིནི (མ. ནི. ༡.༣༩༦) ཝདནྟོ སུཏྟཾ པཊིབཱཧཏི ནཱམ, ཏཐཱ ཨཔཊིབཱཧནྟེན. ‘‘ཏཐཱཧཾ བྷགཝཏཱ དྷམྨཾ དེསིཏཾ ཨཱཛཱནཱམི, ཡཐཱ ཡེམེ ཨནྟརཱཡིཀཱ དྷམྨཱ ཝུཏྟཱ བྷགཝཏཱ, ཏེ པཊིསེཝཏོ ནཱལཾ ཨནྟརཱཡཱཡ (མ. ནི. ༡.༢༣༤; པཱཙི. ༤༡༧, ༤༡༨), སུཔིནནྟེ ཀཏོ ཝཱིཏིཀྐམོ ཨཱཔཏྟིཀརོ ཧོཏཱི’’ཏི ཙ ཨེཝམཱདིཾ ཝདནྟོ ཝིནཡཾ པཊིལོམེཏི ནཱམ, ཏབྦིཔརིཡཱཡེན ཏཾ ཨནུལོམེནྟེན. པཊིལོམེནྟོ ཧི ཀམྨནྟརཾ བྷིནྡནྟོ, དྷམྨཏཉྩ ཝིལོམེནྟོ ཀུཏོ ཀིལེསཝིནཡཾ ཨནུལོམེཏི. སུཏྟེ (དཱི. ནི. ༢.༡༨༧ ཨཱདཡོ; ཨ. ནི. ༤.༡༨༠) ཝུཏྟེ ཙཏྟཱརོ མཧཱཔདེསེ, ཨཊྛཀཐཱཡཉྩ ཝུཏྟེ སུཏྟསུཏྟཱནུལོམཨཱཙརིཡཝཱདཨཏྟནོམཏིམཧཱཔདེསེ ཨོལོཀེནྟེན. ཏདོལོཀནེན ཧི སུཏྟེ, ཝིནཡེ ཙ སནྟིཊྛཏི ནཱཏིདྷཱཝཏི.

དྷམྨནྟི ¶ པཊིཙྩསམུཔྤཱདཔཱལི༹ཾ. ཨཏྠནྟི ཏདཏྠཾ. ཧེཏུ, ཧེཏུཕལཱནི ཝཱ ཨཡམེཏྠ ཧེཏུ དྷམྨོ, ཨིདམེཏྠ ཧེཏུཕལཾ ཨཏྠོཏི. དྷམྨནྟི ཝཱ དྷམྨཏཾ. ཡཐཱ ཨེཀེ ‘‘ཨུཔྤཱདཱ ཝཱ ཏཐཱགཏཱནཾ ཨནུཔྤཱདཱ ཝཱ ཏཐཱགཏཱནཾ ཋིཏཱཝ སཱ དྷཱཏཱུ’’ཏི (སཾ. ནི. ༢.༢༠) སུཏྟཔདསྶ ཨཏྠཾ མིཙྪཱ གཱཧེནྟཱ ‘‘ནིཙྩོ པཊིཙྩསམུཔྤཱདོ’’ཏི པཙྩཡཱཀཱརདྷམྨཾ མིཙྪཱ དཱིཔེནྟི, ཨེཝཾ ཨདཱིཔེཏྭཱ ཧེཊྛཱ ཝུཏྟནཡེནེཝ ཨཏྟནོ ཕལཾ པཏི ཀཱརཎསྶ ཝཝཏྠིཏསབྷཱཝཾ དཱིཔེནྟེན. ཡཐཱ ཙ ཨེཀེ ‘‘ཨནིརོདྷཾ ཨནུཔྤཱད’’ནྟིཨཱདིནཱ པཊིཙྩསམུཔྤཱདསྶ ཨཏྠཾ མིཙྪཱ གཱཧེནྟི, ཨེཝཾ གཱཧེ ཨཀཏྭཱ ཝུཏྟནཡེནེཝ ཨཝིཔརཱིཏཾ ཨཏྠཾ སངྒཱཧེནྟེན. ‘‘དུཀྑཱདཱིསུ ཨཉྙཱཎཾ ཨཝིཛྫཱ’’ཏི ཝུཏྟམཏྠཾ པརིཝཏྟེཏྭཱ པུན ‘‘པུབྦནྟེ ཨཉྙཱཎ’’ནྟིཨཱདཱིཧི (དྷ. ས. ༡༠༦༧) ཨཔརེཧིཔི པརིཡཱཡེཧི ནིདྡིསནྟེན ¶ . ‘‘སངྑཱརཱ ཨིམིནཱ པརིཡཱཡེན བྷཝོཏི ཝུཙྩནྟི, ཏཎྷཱ ཨིམིནཱ པརིཡཱཡེན ཨུཔཱདཱན’’ནྟིཨཱདིནཱ ནིདྡིསནྟེནཱཏི ཙ ཝདནྟི. པཀཏིཡཱཏི ཡཐཱཝུཏྟཝིདྷཱནཾ ཨནཱམསིཏྭཱ ཀེཝལམེཝ.

སཙྩནྟི ཙཏུསཙྩཾ. སཏྟོཏི སཏྟསུཉྙཏཱཏི ཝདནྟི, སཏྟསུཉྙེསུ པན སངྑཱརེསུ སཏྟཝོཧཱརོ, སཏྟཏྠཀིཙྩསིདྡྷི ཙ. པཙྩཡཱཀཱརམེཝ ཙཱཏི པཙྩཡཱཀཱརོ ཨེཝ ཙ, མ-ཀཱརོ པདསནྡྷིཀརོ. པཙྩཡདྷམྨཱནཾ ཨཏྟནོཡེཝ ཕལསྶ པཙྩཡབྷཱཝོ པཊིཙྩསམུཔྤཱདོཏི ཨཏྠོ.

ཏསྨཱཏི ཝུཏྟནཡེན ཨཏྠཝཎྞནཱཡ ཀཱཏབྦཏྟཱ, དུཀྐརཏྟཱ ཙ པཏིཊྛཾ ནཱདྷིགཙྪཱམཱིཏི ཡཏྠ ཋིཏསྶ ཝཎྞནཱ སུཀརཱ ཧོཏི, ཏསྶཱ པཏིཊྛཱབྷཱུཏཾ ཏཾ ནཡཾ ཨཏྟནོཡེཝ ཉཱཎབལེན ནཱདྷིགཙྪཱམཱིཏི ཨཏྠོ. ནིསྶཡཾ པན ཨཱཙིཀྑནྟོ ‘‘སཱསནཾ པནིད’’ནྟིཨཱདིམཱཧ. ཨིདྷ སཱསནནྟི པཱལི༹དྷམྨམཱཧ, པཊིཙྩསམུཔྤཱདམེཝ ཝཱ. སོ ཧི ཨནུལོམཔཊིལོམཱདིནཱནཱདེསནཱནཡཔཊིམཎྜིཏོ ཨབྦོཙྪིནྣོ ཨཛྫཱཔི པཝཏྟཏཱིཏི ནིསྶཡོ ཧོཏི. ཏདཊྛཀཐཱསངྑཱཏོ ཙ པུབྦཱཙརིཡམགྒོ. ‘‘ཏཾ སུཎཱཐ སམཱཧིཏཱ’’ཏི ཨཱདརཛནནེ, ཨུསྶཱཧནེ ཙ ཀིཾ པཡོཛནནྟི ཙེ, ཏཾ དསྶེནྟོ ཨཱཧ ‘‘ཝུཏྟཉྷེཏ’’ནྟིཨཱདི. ཨཊྛི ཀཏྭཱཏི ཨཏྠཾ ཀཏྭཱ. ཡཐཱ ཝཱ ན ནསྶཏི, ཨེཝཾ ཨཊྛིགཏཾ ཝིཡ ཀརོནྟོ ཨཊྛིཾ ཀཏྭཱ. པུབྦཀཱལཏོ ཨཔརཀཱལེ བྷཝཾ པུབྦཱཔརིཡཾ. ཝིསེསནྟི པཋམཱརམྦྷཏོ པབྷུཏི ཁཎེ ཁཎེ ཉཱཎཝིསེསཾ, ཀིལེསཀྑཡཝིསེསཉྩ ལབྷཏཱིཏི ཨཏྠོ.

༥༨༢. དེསནཱབྷེདཏོཏི དེསནཱཝིསེསཏོ. ཨཏྠཏོ, ལཀྑཎཱདིཏོ, ཨེཀཝིདྷཱདིཏོ ཙ ཨཏྠལཀྑཎེཀཝིདྷཱདིཏོ ¶ . ཨངྒཱནཉྩ ཝཝཏྠཱནཱཏི ཨཝིཛྫཱདཱིནཾ དྭཱདསནྣཾ ཨངྒཱནཾ ཝཝཏྠཱནདསྶནཏོ.

ཀམྨཝིཔཱཀཀིལེསཝཊྚཱནཾ མཱུལཀཱརཎཏྟཱ, ཨཱདིཏོ ཝུཏྟཏྟཱ ཙ ཨཝིཛྫཱ པཊིཙྩསམུཔྤཱདསྶ མཱུལཾ. ཏཏྠ ཝལླིཡཱ མཱུལེ དིཊྛེ ཏཏོ པབྷུཏི ཝལླིཧརཎཾ ཝིཡ པཊིཙྩསམུཔྤཱདསྶ མཱུལེ དིཊྛེ ཏཏོ པབྷུཏི པཊིཙྩསམུཔྤཱདདེསནཱཏི ཨུཔམཱསཾསནྡནཱ ན ཀཱཏབྦཱ. ན ཧི བྷགཝཏོ ཨིདམེཝ དིཊྛཾ, ཨིདཾ ཨདིཊྛནྟི ཝིབྷཛནཱིཡཾ ཨཏྠི སབྦསྶ དིཊྛཏྟཱ. མཱུལཏོ པབྷུཏི པན ཝལླིཧརཎཾ ཝིཡ མཱུལཏོ པབྷུཏི པཊིཙྩསམུཔྤཱདདེསནཱ ཀཏཱཏི ཨིདམེཏྠ སཱམཉྙཾ ¶ ཨདྷིཔྤེཏཾ, བོདྷནེཡྻཛ྄ཛྷཱསཡཝསེན ཝཱ བོདྷེཏབྦབྷཱཝེན མཱུལཱདིདསྶནསཱམཉྙཾ ཡོཛེཏབྦཾ.

ཏསྶཱཏི –

‘‘ས ཁོ སོ, བྷིཀྑཝེ, ཀུམཱརོ ཝུདྡྷིམནྭཱཡ ཨིནྡྲིཡཱནཾ པརིཔཱཀམནྭཱཡ པཉྩཧི ཀཱམགུཎེཧི སམཔྤིཏོ…པེ… རཛནཱིཡེཧི. སོ ཙཀྑུནཱ རཱུཔཾ དིསྭཱ པིཡརཱུཔེ རཱུཔེ སཱརཛྫཏི, ཨཔྤིཡརཱུཔེ རཱུཔེ བྱཱཔཛྫཏི, ཨནུཔཊྛིཏཀཱཡསཏི ཙ ཝིཧརཏི པརིཏྟཙེཏསོ, ཏཉྩ ཙེཏོཝིམུཏྟིཾ པཉྙཱཝིམུཏྟིཾ ཡཐཱབྷཱུཏཾ ནཔྤཛཱནཱཏི, ཡཏྠསྶ ཏེ པཱཔཀཱ ཨཀུསལཱ དྷམྨཱ ཨཔརིསེསཱ ནིརུཛ྄ཛྷནྟི. སོ ཨེཝཾ ཨནུརོདྷཝིརོདྷཾ སམཱཔནྣོ ཡཾ ཀིཉྩི ཝེདནཾ ཝེདེཏི སུཁཾ ཝཱ དུཀྑཾ ཝཱ ཨདུཀྑམསུཁཾ ཝཱ, སོ ཏཾ ཝེདནཾ ཨབྷིནནྡཏི ཨབྷིཝདཏི, ཨཛ྄ཛྷོསཱཡ ཏིཊྛཏཱི’’ཏི (མ. ནི. ༡.༤༠༨) –

ཨེཝཾ ཝུཏྟསྶ. ཨེཝཾ སོཏདྭཱརཱདཱིསུཔི. ཏསྶ ཨབྷིནནྡཏོཏི སཔྤཱིཏིཀཏཎྷཱཡ ཨབྷིམུཁབྷཱཝེན ནནྡཏོ. ཨབྷིཝདཏོཏི ‘‘ཨཧོ སུཁཾ, ཨཧོ སུཁ’’ནྟི ཝཙཱིབྷེདཀརཎཔཝཏྟཱཡ བལཝཏཎྷཱཡ ‘‘ཨཧཾ, མམཱ’’ཏི ཨབྷིཝདཏོ. ཏཏོ བལཝཏིཡཱ མོཙེཏུཾ ཨསཀྐུཎེཡྻཏཱཡ ཨཛ྄ཛྷོསཱཡ ཏིཊྛཏོ. ཏཏོཔི བལཝཏཱི པན ཨུཔཱདཱནབྷཱུཏཱ ཏཎྷཱ ནནྡཱི. ཨེཏྠ ཙ ཨབྷིནནྡནཱདིནཱ ཏཎྷཱ ཝུཏྟཱ, ནནྡིཝཙནེན ཏཔྤཙྩཡཾ ཨུཔཱདཱནཾ ཙཏུབྦིདྷམྤི ནནྡིཏཱཏདཝིཔྤཡོགཏཱཧི, ཏཎྷཱདིཊྛཱབྷིནནྡནབྷཱཝེཧི ཙཱཏི ཝེདིཏབྦཾ.

ཛཱཏིཔཙྩཡཱ ཛརཱམརཎནྟིཨཱདིཀཉྩ ཏཏྠེཝ མཧཱཏཎྷཱསངྑཡསུཏྟེ ཝུཏྟཾ.

ཝིཔཱཀཝཊྚབྷཱུཏེ ¶ པཊིསནྡྷིཔཝཏྟིཕསྶཱདིཀེ ཀམྨསམུཊྛཱནཉྩ ཨོཛཾ སནྡྷཱཡ ‘‘ཙཏྟཱརོ ཨཱཧཱརཱ ཏཎྷཱནིདཱནཱ’’ཏིཨཱདི ཝུཏྟཾ. ཝཊྚཱུཔཐམྦྷཀཱ པན ཨིཏརེཔི ཨཱཧཱརཱ ཏཎྷཱཔབྷཝེ ཏསྨིཾ ཨཝིཛྫམཱནེ ན ཝིཛྫནྟཱིཏི ‘‘ཏཎྷཱནིདཱནཱ’’ཏི ཝཏྟུཾ ཝཊྚནྟི.

༥༨༣. ཏཏོ ¶ ཏཏོཏི ཙཏུབྦིདྷཱསུ དེསནཱསུ ཏཏོ ཏཏོ དེསནཏོ. ཉཱཡཔྤཊིཝེདྷཱཡ སཾཝཏྟཏཱིཏི ཉཱཡོཏི མགྒོ, སོ ཨེཝ ཝཱ པཊིཙྩསམུཔྤཱདོ ‘‘ཨརིཡོ ཙསྶ ཉཱཡོ པཉྙཱཡ སུདིཊྛོ ཧོཏཱི’’ཏི (སཾ. ནི. ༢.༤༡; ༥.༡༠༢༤) ཝཙནཏོ. སཡམེཝ ཧི སོ སམནྟབྷདྡཀཏྟཱ ཏཐཱ ཏཐཱ པཊིཝིཛ྄ཛྷིཏབྦཏྟཱ ཏཱཡ ཏཱཡ དེསནཱཡ ཨཏྟནོ པཊིཝེདྷཱཡ སཾཝཏྟཏི. ཙཏུབྦིདྷགམྦྷཱིརབྷཱཝཔྤཏྟིཡཱཏི དྷམྨཏྠདེསནཱཔཊིཝེདྷགམྦྷཱིརེསུ པཏིཊྛཱདྷིགམནེན པཏིཊྛིཏཏྟཱཏི ཨཏྠོ.

སམནྟབྷདྡཀཏཱ, དེསནཱཝིལཱསཔྤཏྟི ཙ ཙཏུནྣམྤི དེསནཱནཾ སམཱནཾ ཀཱརཎནྟི ཝིསེསཀཱརཎཾ ཝཏྟུཀཱམོ ཨཱཧ ‘‘ཝིསེསཏོ’’ཏི. ཨསྶཱཏི ཨསྶ བྷགཝཏོ དེསནཱ, ཨསྶ ཝཱ པཊིཙྩསམུཔྤཱདསྶ དེསནཱཏི ཡོཛེཏབྦཾ. པཝཏྟིཀཱརཎཝིབྷཱགོ ཨཝིབྷཏྟསབྷཱཝཱ ཨཝིཛྫཱདཡོཝ, ཀཱརཎནྟི ཝཱ གཧིཏཱནཾ པཀཏིཨཱདཱིནཾ, ཨཝིཛྫཱདཱིནཉྩ ཨཀཱརཎཏཱ, ཀཱརཎཏཱ ཙ. ཏཏྠ སམྨཱུལ༹ྷཱ ཀེཙི ཨཀཱརཎཾ ཀཱརཎནྟི གཎྷནྟི, ཀེཙི ན ཀིཉྩི ཀཱརཎཾ བུཛ྄ཛྷནྟཱིཏི ཏེསཾ ཡཐཱསཀེཧི ཨནུརཱུཔེཧི ཀཱརཎེཧི སངྑཱརཱདིཔཝཏྟིསནྡསྶནཏྠཾ, སཾསཱརཔྤཝཏྟིསནྡསྶནཏྠནྟི ཨཏྠོ. པཝཏྟིཨཱདཱིནཝཔཊིཙྪཱདིཀཱ ཨཝིཛྫཱ ཨཱདི, ཏཏོ སངྑཱརཱ ཨུཔྤཛྫནྟི, ཏཏོ ཝིཉྙཱཎནྟི ཨེཝཾ པཝཏྟིཡཱ ཨུཔྤཏྟིཀྐམསནྡསྶནཏྠཾ, གབྦྷསེཡྻཀཱདིཝསེན ཝཱ ཏཏྠ ཏཏྠ བྷཝེ ཨཏྟབྷཱཝསྶ ཨུཔྤཛྫནཱནུཔུབྦིསནྡསྶནཏྠཉྩ ཨནུལོམདེསནཱ པཝཏྟཱཏི. ཨིཏརཱསཾ ཏདཏྠཏཱསམྦྷཝེཔི ན ཏཱསཾ ཏདཏྠམེཝ པཝཏྟི ཨཏྠནྟརསབྦྷཱཝཏོ. ཨཡཾ པན ཏདཏྠཱ ཨེཝཱཏི ཨེཏིསྶཱ ཏདཏྠཏཱ ཝུཏྟཱ.

ཨནུཝིལོཀཡཏོ ཡོ སམྦོདྷིཏོ པུབྦབྷཱགེ ཏཾཏཾཔཙྩཡུཔྤནྣཱཝབོདྷསངྑཱཏོ པུབྦབྷཱགཔཊིཝེདྷོ པཝཏྟོ, ཏདནུསཱརེན ཏདནུགམེན ཛརཱམརཎཱདིཀསྶ ཛཱཏིཨཱདིཀཱརཎཾ ཡཾ ཨདྷིགཏཾ, ཏསྶ སནྡསྶནཏྠཾ ཨཡཾ པཊིལོམདེསནཱ པཝཏྟཱ. ཨནུཝིལོཀཡཏོ པཊིལོམདེསནཱ པཝཏྟཱཏི ཝཱ སམྦནྡྷོ. དེསེནྟོཔི ཧི བྷགཝཱ ཀིཙྪཱཔནྣཾ ལོཀཾ ཨནུཝིལོཀེཏྭཱ པུབྦབྷཱག…པེ… སནྡསྶནཏྠཾ དེསེསཱིཏི. ཨཱཧཱརཏཎྷཱདཡོ པཙྩུཔྤནྣདྡྷཱ, སངྑཱརཱཝིཛྫཱ ཨཏཱིཏདྡྷཱཏི ཨིམིནཱ ཨདྷིཔྤཱཡེནཱཧ ¶ ‘‘ཡཱཝ ཨཏཱིཏཾ ཨདྡྷཱནཾ ཨཏིཧརིཏྭཱ’’ཏི. ཨཱཧཱརཱ ཝཱ ཏཎྷཱཡ པབྷཱཝེཏབྦཱ ཨནཱགཏོ ཨདྡྷཱ, ཏཎྷཱདཡོ པཙྩུཔྤནྣོ ¶ , སངྑཱརཱཝིཛྫཱ ཨཏཱིཏོཏི. པཙྩཀྑཾ པན ཕལཾ དསྶེཏྭཱ ཏནྣིདཱནདསྶནཝསེན ཕལཀཱརཎཔརམྤརདསྶནཾ ཡུཛྫཏཱིཏི ཨཱཧཱརཱ པུརིམཏཎྷཱཡ ཨུཔྤཱདིཏཱ པཙྩུཔྤནྣོ ཨདྡྷཱ, ཏཎྷཱདཡོ ཨཏཱིཏོ, སངྑཱརཱཝིཛྫཱ ཏཏོཔི ཨཏཱིཏཏརོ སཾསཱརསྶ ཨནཱདིབྷཱཝདསྶནཏྠཾ ཝུཏྟོཏི. ཡཱཝ ཨཏཱིཏདྡྷཱནནྟི ཡཱཝ ཨཏཱིཏཏརཾ ཨདྡྷཱནནྟི ཨཏྠོ ཡུཏྟོཏི. ཨཱཡཏིཾ པུནབྦྷཝཱབྷིནིབྦཏྟིཨཱཧཱརཀཱ ཝཱ ཙཏྟཱརོ ཨཱཧཱརཱ ‘‘ཨཱཧཱརེཏཱིཏཱཧཾ ན ཝདཱམི…པེ… ཨེཝཾ པན མཾ ཨཝདནྟཾ ཡོ ཨེཝཾ པུཙྪེཡྻ ‘ཀིསྶ ནུ ཁོ, བྷནྟེ, ཝིཉྙཱཎཱཧཱརོ’ཏི, ཨེས ཀལློ པཉྷོ, ཏཏྲ ཀལླཾ ཝེཡྻཱཀརཎཾ, ཝིཉྙཱཎཱཧཱརོ ཨཱཡཏིཾ པུནབྦྷཝཱབྷིནིབྦཏྟིཡཱ’’ཏི (སཾ. ནི. ༢.༡༢) ཝཙནཏོ, ཏཾསམྤཡུཏྟཏྟཱ ཕསྶཙེཏནཱནཾ, ཏཔྤཝཏྟིཧེཏུཏྟཱ ཙ ཀབལཱི༹ཀཱརཱཧཱརསྶ. ཏེན ཧི ཨུཔཏྠམྦྷིཏརཱུཔཀཱཡསྶ, ཏཉྩ ཨིཙྪནྟསྶ ཀཱམཝིཉྙཱཎཱཡཱུཧནཾ ཧོཏི. བྷོཛནཉྷི སདྡྷཱདཱིནཾ, རཱགཱདཱིནཉྩ ཨུཔནིསྶཡོཏི ཝུཏྟཾ. ཏསྨཱ ཏེ ཀམྨཝཊྚསངྒཧིཏཱ ཨཱཧཱརཱ པཙྩུཔྤནྣོ ཨདྡྷཱཏི ཨིམསྨིཾ པརིཡཱཡེ པུརིམོཡེཝ ཨཏྠོ ཡུཏྟོ.

ཨཏཱིཏདྡྷཏོ པབྷུཏི ‘‘ཨིཏི ཁོ, བྷིཀྑཝེ, ཨཝིཛྫཱཔཙྩཡཱ སངྑཱརཱ’’ཏིཨཱདིནཱ (སཾ. ནི. ༢.༢) ཨཏཱིཏེ, ཏཏོ པརཉྩ ཧེཏུཕལཔཊིཔཱཊིཾ པཙྩཀྑབྷཱུཏཱནཾ ཨཱཧཱརཱནཾ ནིདཱནདསྶནཝསེན ཨཱརོཧིཏྭཱ ནིཝཏྟནེན ཝིནཱ ཨབུཛ྄ཛྷནྟཱནཾ ཏཾསནྡསྶནཏྠཾ སཱ ཨཡཾ དེསནཱ པཝཏྟཱཏི ཨཏྠོ. ཨནཱགཏདྡྷཧེཏུསམུཊྛཱནཏོ པབྷུཏཱིཏི ཨནཱགཏསྶ བྷཝསྶ ཧེཏུབྷཱུཏཱནཾ དྷམྨཱནཾ ཨུཔྤཏྟིཏོ པཊྛཱཡ. ཨནཱགཏདྡྷསནྡསྶནཏྠནྟི ཨནཱགཏདྡྷུནོ ཨཔྤཊིཝིཛ྄ཛྷནྟཱནཾ ཨཔསྶནྟཱནཾ པཙྩཀྑཾ པཙྩུཔྤནྣཾ ཧེཏུཾ དསྶེཏྭཱ ཧེཏུཕལཔརམྤརཱཡ ཏསྶ སནྡསྶནཏྠནྟི ཨཏྠོ. ཨེཏྠ ཙ ཨཱདིཏོ པཊྛཱཡ ཡཱཝ པརིཡོསཱནཱ, པརིཡོསཱནཏོ ཙ པཊྛཱཡ ཡཱཝ ཨཱདི པཝཏྟཱ དེསནཱ དྭཱདསངྒཱ, ཏཏོ ཨེཝ ཏིསནྡྷི ཙཏུསངྑེཔཱ. མཛ྄ཛྷཏོ པཊྛཱཡ ཡཱཝ ཨཱདི པཝཏྟཱ དེསནཱ ཨཊྛངྒཱ དྭིསནྡྷི ཏིསངྑེཔཱ. མཛ྄ཛྷཏོ པན པཊྛཱཡ ཡཱཝ པརིཡོསཱནཱ པཝཏྟཱ དེསནཱ ཚལ༹ངྒཱ དྭིསནྡྷི ཏིསངྑེཔཱ. ‘‘སཾཡོཛནིཡེསུ, བྷིཀྑཝེ, དྷམྨེསུ ཨསྶཱདཱནུཔསྶིནོ ཝིཧརཏོ ཏཎྷཱ པཝཌྜྷཏི, ཏཎྷཱཔཙྩཡཱ ཨུཔཱདཱན’’ནྟིཨཱདིནཱ (སཾ. ནི. ༢.༥༣, ༥༧) མཛ྄ཛྷཏོ པཊྛཱཡ ཡཱཝ པརིཡོསཱནཱ པཝཏྟཱ དེསནཱ ཨེཀསནྡྷི དྭིསངྑེཔཱ. ཨེཝཾ ཨཡཾ ཨནེཀངྒཱ ཨེཝ ¶ པཊིཙྩསམུཔྤཱདདེསནཱ ཨཱགཏཱ. ཨེཀངྒཝསེནཱཔི ཙ པཊིཙྩསམུཔྤཱདདེསནཱ ལབྦྷཏེཝ. ཡཐཱཧ –

‘‘ཏཏྲ, བྷིཀྑཝེ, སུཏཝཱ ཨརིཡསཱཝཀོ པཊིཙྩསམུཔྤཱདཾཡེཝ སཱདྷུཀཾ ཡོནིསོ མནསི ¶ ཀརོཏི ‘ཨིཏི ཨིམསྨིཾ སཏི ཨིདཾ ཧོཏི, ཨིམསྶུཔྤཱདཱ ཨིདཾ ཨུཔྤཛྫཏི. ཨིམསྨིཾ ཨསཏི ཨིདཾ ན ཧོཏི, ཨིམསྶ ནིརོདྷཱ ཨིདཾ ནིརུཛ྄ཛྷཏཱི’ཏི. སུཁཝེདནིཡཾ, བྷིཀྑཝེ, ཕསྶཾ པཊིཙྩ ཨུཔྤཛྫཏི སུཁཝེདནཱ’’ཏི (སཾ. ནི. ༢.༦༢) –

ཨཱདི. ཨེཏྠ ཧི ‘‘ཕསྶཔཙྩཡཱ’’ཏི ཨེཏྟཀོ ཨེཝ པཊིཙྩསམུཔྤཱདོ ཝུཏྟོ. ཏེནེཏཾ ཝིཉྙཱཡཏི ‘‘ཨེཀངྒཔཊིཙྩསམུཔྤཱདོ’’ཏི.

ཏཏྠ ཨིམསྨིཾ སཏི ཨིདཾ ཧོཏཱིཏི ཨིམསྨིཾ ཨཝིཛྫཱདིཀེ པཙྩཡེ སཏི ཨིདཾ སངྑཱརཱདིཀཾ ཕལཾ ཧོཏི. ཨིམསྶུཔྤཱདཱ ཨིདཾ ཨུཔྤཛྫཏཱིཏི ཨིམསྶ ཨཝིཛྫཱདིཀསྶ པཙྩཡསྶ ཨུཔྤཱདཱ ཨིདཾ སངྑཱརཱདིཀཾ ཕལཾ ཨུཔྤཛྫཏཱིཏི ཨཏྠོ. ཨིམསྨིཾ ཨསཏི ཨིདཾ ན ཧོཏི, ཨིམསྶ ནིརོདྷཱ ཨིདཾ ནིརུཛ྄ཛྷཏཱིཏི ཨཝིཛྫཱདཱིནཾ ཨབྷཱཝེ སངྑཱརཱདཱིནཾ ཨབྷཱཝསྶ, ཨཝིཛྫཱདཱིནཾ ནིརོདྷཱ སངྑཱརཱདཱིནཾ ནིརོདྷསྶ ཙ ཝཙནེན པུརིམསྨིཾ པཙྩཡལཀྑཎེ ནིཡམོ དསྶིཏོ ཧོཏི ‘‘ཨིམསྨིཾ སཏི ཨེཝ, ན ཨསཏི, ཨིམསྶ ཨུཔྤཱདཱ ཨེཝ, ན ནིརོདྷཱ’’ཏི. ཏེནེཏཾ ལཀྑཎཾ ཨནྟོགདྷནིཡམཾ ཨིདྷ པཊིཙྩསམུཔྤཱདསྶ ཝུཏྟནྟི དཊྛབྦཾ.

ནིརོདྷོཏི ཙ ཨཝིཛྫཱདཱིནཾ ཝིརཱགཱདྷིགམེན ཨཱཡཏིཾ ཨནུཔྤཱདོ ཨཔྤཝཏྟི. ཏཐཱ ཧི ཝུཏྟཾ ‘‘ཨཝིཛྫཱཡཏྭེཝ ཨསེསཝིརཱགནིརོདྷཱ’’ཏིཨཱདི (མཧཱཝ. ༡; ཨུདཱ. ༣). ནིརོདྷཝིརོདྷཱི ཙ ཨུཔྤཱདོ, ཡེན སོ ཨུཔྤཱདཝིརོདྷིབྷཱཝེན ཝུཏྟོ ‘‘ཨིམསྶ ནིརོདྷཱ ཨིདཾ ནིརུཛ྄ཛྷཏཱི’’ཏི, ཏེནེཏཾ དསྶེཏི ‘‘ཨནིརོདྷོ ཨུཔྤཱདོ ནཱམ, སོ ཙེཏྠ ཨཏྠིབྷཱཝོཏིཔི ཝུཙྩཏཱི’’ཏི. ‘‘ཨིམསྨིཾ སཏི ཨིདཾ ཧོཏཱི’’ཏི ཨིདམེཝ ཧི ལཀྑཎཾ པརིཡཱཡནྟརེན ‘‘ཨིམསྶུཔྤཱདཱ ཨིདཾ ཨུཔྤཛྫཏཱི’’ཏི ཝདནྟེན པརེན པུརིམཾ ཝིསེསིཏཾ ཧོཏི, ཏསྨཱ ན དྷརམཱནཏཾཡེཝ སནྡྷཱཡ ‘‘ཨིམསྨིཾ སཏཱི’’ཏི ཝུཏྟཾ, ཨཐ ཁོ མགྒེན ཨནིརུདྡྷབྷཱཝཉྩཱཏི ཝིཉྙཱཡཏི. ཡསྨཱ ཙ ‘‘ཨིམསྨིཾ ཨསཏི ཨིདཾ ན ཧོཏི, ཨིམསྶ ནིརོདྷཱ ཨིདཾ ནིརུཛ྄ཛྷཏཱི’’ཏི (ཨུདཱ. ༢) དྭིདྷཱཔི ཨུདྡིཊྛལཀྑཎསྶ ནིརོདྷསྶ ནིདྡེསཾ ཝདནྟེན ‘‘ཨཝིཛྫཱཡཏྭེཝ ཨསེསཝིརཱགནིརོདྷཱ སངྑཱརནིརོདྷོ’’ཏིཨཱདིནཱ (མཧཱཝ. ༡; ཨུདཱ. ༣) ནིརོདྷོ ¶ ཨེཝ ཝུཏྟོ, ཏསྨཱ ནཏྠིབྷཱཝོཔི ནིརོདྷོ ཨེཝཱཏི ནཏྠིབྷཱཝཝིརུདྡྷོ ཨཏྠིབྷཱཝོ ཨནིརོདྷོཏི དསྶིཏཾ ཧོཏི. ཏེན ཨནིརོདྷསངྑཱཏེན ཨཏྠིབྷཱཝེན ཨུཔྤཱདཾ ཝིསེསེཏི. ཏཏོ ན ཨིདྷ ཨཏྟལཱབྷམཏྟཾ ཨུཔྤཱདོཏི ཨདྷིཔྤེཏོ, ཨཐ ཁོ ཨནིརོདྷསངྑཱཏོ ཨཏྠིབྷཱཝོ ཙཱཏི ཨཡམཏྠོ ཝིབྷཱཝིཏོཏི ¶ ཨེཝམེཏཾ ལཀྑཎདྭཡཝཙནཾ ཨཉྙམཉྙཾ ཝིསེསནཝིསེསིཏབྦབྷཱཝེན སཱཏྠཀནྟི ཝེདིཏབྦཾ.

ཀོ པནཱཡཾ ཨནིརོདྷོ ནཱམ, ཡོ ཨཏྠིབྷཱཝོ, ཨུཔྤཱདོཏི ཙ ཝུཙྩཏཱིཏི? ཨཔྤཧཱིནབྷཱཝོ, ཨནིབྦཏྟིཏཕལཏཱཔྤཧཱིནཱརཧཏཱཧི ཕལུཔྤཱདནཱརཧཏཱ ཙ. ཡེ ཏེཧི པཧཱཏབྦཱ ཨཀུསལཱ དྷམྨཱ, ཏེསཾ ཨརིཡམགྒེན ཨསམུགྒྷཱཏིཏབྷཱཝོ, ཡེ པན ན པཧཱཏབྦཱ ཀུསལཱབྱཱཀཏཱ དྷམྨཱ, ཡཱནི ཏེསུ སཾཡོཛནཱནི ཨཁཱིཎཱསཝཱནཾ, ཏེསཾ ཨཔརིཀྑཱིཎཏཱ ཙ. ཨསམུགྒྷཱཏིཏཱནུསཡཏཱཡ ཧི སསཾཡོཛནཱཁནྡྷཔྤཝཏྟི པཊིཙྩསམུཔྤཱདོ. ཏཐཱ ཧི ཝུཏྟཾ –

‘‘ཡཱཡ ཙ, བྷིཀྑཝེ, ཨཝིཛྫཱཡ ནིཝུཏསྶ བཱལསྶ, ཡཱཡ ཙ ཏཎྷཱཡ སམྤཡུཏྟསྶ ཨཡཾ ཀཱཡོ སམུདཱགཏོ, སཱ ཙེཝ ཨཝིཛྫཱ བཱལསྶ ཨཔྤཧཱིནཱ, སཱ ཙ ཏཎྷཱ ཨཔརིཀྑཱིཎཱ. ཏཾ ཀིསྶ ཧེཏུ? ན, བྷིཀྑཝེ, བཱལོ ཨཙརི བྲཧྨཙརིཡཾ སམྨཱ དུཀྑཀྑཡཱཡ, ཏསྨཱ བཱལོ ཀཱཡསྶ བྷེདཱ ཀཱཡཱུཔགོ ཧོཏི, སོ ཀཱཡཱུཔགོ སམཱནོ ན པརིམུཙྩཏི ཛཱཏིཡཱ ཛརཱམརཎེནཱ’’ཏི (སཾ. ནི. ༢.༡༩) –

ཨཱདི. ཁཱིཎསཾཡོཛནཱནཾ པན ཨཝིཛྫཱཡ ཨབྷཱཝཏོ སངྑཱརཱནཾ, ཏཎྷུཔཱདཱནཱནཾ ཨབྷཱཝཏོ ཨུཔཱདཱནབྷཝཱནཾ ན སམྦྷཝོཏི ཝཊྚསྶ ཨུཔཙྪེདོ པཉྙཱཡཏི. ཏེནེཝཱཧ –

‘‘ཚནྣནྟྭེཝ, ཕགྒུན, ཕསྶཱཡཏནཱནཾ ཨསེསཝིརཱགནིརོདྷཱ ཕསྶནིརོདྷོ, ཕསྶནིརོདྷཱ ཝེདནཱནིརོདྷོ’’ཏི (སཾ. ནི. ༢.༡༢) –

ཨཱདི. ན ཧི ཨགྒམགྒཱདྷིགམཏོ ཨུདྡྷཾ ཡཱཝ པརིནིབྦཱནཱ སལཱ༹ཡཏནཱདཱིནཾ ཨཔྤཝཏྟི, ཨཐ ཁོ ནཏྠིཏཱ, ནིརོདྷསདྡཝཙནཱིཡཏཱ, ཁཱིཎསཾཡོཛནཏཱཏི ནིརོདྷོ ཝུཏྟོ. ཨཔིཙ ཙིརཀཏམྤི ཀམྨཾ ཨནིབྦཏྟིཏཕལཏཱཡ, ཨཔྤཧཱིནཱརཧཏཱཡ ཙ ཕལཱརཧཾ སནྟཾ ཨེཝ ནཱམ ཧོཏི, ན ནིབྦཏྟིཏཕལཾ, ནཱཔི ¶ པཧཱིནཱརཧནྟི ཕལུཔྤཏྟིཔཙྩཡཱནཾ ཨཝིཛྫཱསངྑཱརཱདཱིནཾ ཝུཏྟནཡེན ཕལཱརཧབྷཱཝོ ཨནིརོདྷོཏི ཝེདིཏབྦཾ. ཨེཝཾ ཨནིརུདྡྷབྷཱཝེནེཝ ཧི ཡེན ཝིནཱ ཕལཾ ན སམྦྷཝཏི, ཏཾ ཀཱརཎཾ ཨཏཱིཏཱདིཔི ‘‘ཨིམསྨིཾ སཏཱི’’ཏི ཨིམིནཱ ཝཙནེན ཝུཏྟཾ. ཏཏོ ཨེཝ ཙ ཨཝུསིཏབྲཧྨཙརིཡསྶ ཨཔྤཝཏྟིདྷམྨཏཾ ཨནཱཔནྣོ པཙྩཡུཔྤཱདོ ཀཱལབྷེདཾ ཨནཱམསིཏྭཱ ཨནིཝཏྟིཏཱཡ ¶ ཨེཝ ‘‘ཨིམསྶུཔྤཱདཱ’’ཏི ཝུཏྟོ. ཨཐ ཝཱ ཨཝསེསཔཙྩཡསམཝཱཡེ ཨཝིཛྫམཱནསྶཱཔི ཝིཛྫམཱནསྶ ཝིཡ པགེཝ ཝིཛྫམཱནསྶ ཡཱ ཕལུཔྤཏྟིཨབྷིམུཁཏཱ, སཱ ‘‘ཨིམསྶུཔྤཱདཱ’’ཏི ཝུཏྟཱ. ཏདཱ ཧི ཏཏོ ཕལཾ ཨུཔྤཛྫཏཱིཏི ཏདཝཏྠཾ ཀཱརཎཾ ཕལསྶ ཨུཔྤཱདནབྷཱཝེན ཨུཔཊྛིཏཾ ཨུཔྤཏིཏཾ ནཱམ ཧོཏི, ན ཝིཛྫམཱནམྤི ཨཏདཝཏྠནྟི ཏདཝཏྠཏཱ ཨུཔྤཱདོཏི ཝེདིཏབྦཱ.

ཏཏྠ ‘‘སཏཱི’’ཏི ཨིམིནཱ ཝིཛྫམཱནཏཱམཏྟེན པཙྩཡབྷཱཝཾ ཝདནྟོ ཨབྱཱཔཱརཏཾ པཊིཙྩསམུཔྤཱདསྶ དསྶེཏི. ཨུཔྤཱདཱཏི ཨུཔྤཏྟིདྷམྨཏཾ, ཨསབྦཀཱལབྷཱཝིཏཾ, ཕལུཔྤཏྟིཨབྷིམུཁཏཉྩ དཱིཔེནྟོ ཨནིཙྩཏཾ པཊིཙྩསམུཔྤཱདསྶ དསྶེཏི. ‘‘སཏི, ན ཨསཏི, ཨུཔྤཱདཱ, ན ནིརོདྷཱ’’ཏི པན ཧེཏུཨཏྠེཧི བྷུམྨནིསྶཀྐཝཙནེཧི སམཏྠིཏཾ ནིདཱནསམུདཡཛཱཏིཔབྷཝབྷཱཝཾ པཊིཙྩསམུཔྤཱདསྶ དསྶེཏི. ཧེཏུཨཏྠཏཱ ཙེཏྠ བྷུམྨཝཙནེ ཡསྶ བྷཱཝེན ཏདཝིནཱབྷཱཝིཕལསྶ བྷཱཝོ ལཀྑཱིཡཏི, ཏཏྠ པཝཏྟིཡཱ ཝེདིཏབྦཱ, ཡཐཱ ཨདྷནཱནཾ དྷནེ ཨནནུཔྤདཱིཡམཱནེ དཱལིདྡིཡཾ ཝེཔུལླམགམཱསི (དཱི. ནི. ༣.༩༡), ནིཔྥནྣེ སསྶེ སུབྷིཀྑཾ ཛཱཡཏཱིཏི ཙ. ནིསྶཀྐཝཙནསྶཱཔི ཧེཏུཨཏྠཏཱ ཕལསྶ པབྷཝེ པཀཏིཡཉྩ པཝཏྟིཡཱ, ཡཐཱ ‘‘ཀལལཱ ཧོཏི ཨབྦུདཾ, ཨབྦུདཱ ཛཱཡཏེ པེསཱི’’ཏི (སཾ. ནི. ༡.༢༣༥; ཀཐཱ. ༦༩༢), ‘‘ཧིམཝཏཱ གངྒཱ པབྷཝཏི, སིངྒཏོ སརོ ཛཱཡཏཱི’’ཏི ཙ. ཨཝིཛྫཱདིབྷཱཝེན ཙ ཏདཝིནཱབྷཱཝིསངྑཱརཱདིབྷཱཝོ ལཀྑཱིཡཏི, ཨཝིཛྫཱདཱིཧི ཙ སངྑཱརཱདཡོ པབྷཝནྟི, པཀརཱིཡནྟི ཙཱཏི ཏེསཾ པབྷཝོ, པཀཏི ཙ, ཏསྨཱ ཏདཏྠདཱིཔནཏྠཾ ‘‘ཨིམསྨིཾ སཏི ཨིམསྶུཔྤཱདཱ’’ཏི ཧེཏུཨཏྠཱ བྷུམྨནིསྶཀྐནིདྡེསཱ ཀཏཱ.

ཡསྨཱ ཙེཏྠ ‘‘ཨིམསྨིཾ སཏི ཨིདཾ ཧོཏི, ཨིམསྶུཔྤཱདཱ ཨིདཾ ཨུཔྤཛྫཏཱི’’ཏི སངྑེཔེན ཨུདྡིཊྛསྶ པཊིཙྩསམུཔྤཱདསྶ ‘‘ཨཝིཛྫཱཔཙྩཡཱ སངྑཱརཱ’’ཏིཨཱདིཀོ ནིདྡེསོ, ཏསྨཱ ཡཐཱཝུཏྟོ ཨཏྠིབྷཱཝོ, ཨུཔྤཱདོ ཙ ཏེསཾ ¶ ཏེསཾ པཙྩཡུཔྤནྣདྷམྨཱནཾ པཙྩཡབྷཱཝོཏི ཝིཉྙཱཡཏི. ན ཧི ཨནིརུདྡྷཏཱསངྑཱཏཾ ཨཏྠིབྷཱཝཾ, ཨུཔྤཱདཉྩ ཨནིཝཏྟསབྷཱཝཏཱསངྑཱཏཾ, ཨུདཡཱཝཏྠཏཱསངྑཱཏཾ ཝཱ ‘‘སཏིཡེཝ, ན ཨསཏི, ཨུཔྤཱདཱ ཨེཝ, ན ནིརོདྷཱ’’ཏི ཨནྟོགདྷནིཡམེཧི ཝཙནེཧི པཀཱསིཏཾ མུཉྩིཏྭཱ ཨཉྙོ པཙྩཡབྷཱཝོ ནཱམ ཨཏྠི, ཏསྨཱ ཡཐཱཝུཏྟོ ཨཏྠིབྷཱཝོ, ཨུཔྤཱདོ ཙ པཙྩཡབྷཱཝོཏི ཝེདིཏབྦོ. ཡེཔི ཧི པཊྛཱནེ ཨཱགཏཱ ཧེཏུཨཱདཡོ ཙཏུཝཱིསཏི པཙྩཡཱ, ཏེཔི ཨེཏསྶེཝ པཙྩཡབྷཱཝསྶ ཝིསེསཱཏི ཝེདིཏབྦཱ. ཏཐཱ ཡྭཱཡཾ མཱུལཧེཏུནིདཱནསམྦྷཝཔབྷཝཱདིཔརིཡཱཡེཧི ¶ , ཨུཔྤཱདཊྛིཏི པཝཏྟཊྛིཏི ནིམིཏྟཊྛིཏི ཨཱཡཱུཧནཊྛིཏི སཾཡོགཊྛིཏི པལིབོདྷཊྛིཏཱིཏིཨཱདིཔརིཡཱཡེཧི ཙ པཀཱསིཏོ ཀཱརཎཏྠོ, སོཔི ཨེཏྠེཝ ཨནྟོགདྷོཏི དཊྛབྦོ.

༥༨༤. མཱུལཀཱརཎསདྡཾ ཨཔེཀྑིཏྭཱ ན ཨཀཱརཎནྟི ནཔུཾསཀནིདྡེསོ, ཨཀཱརཎཱཏི ཨཏྠོ. ཨཀཱརཎཾ ཡདི སིཡཱ, སུཏྟཾ པཊིབཱཧིཏཾ སིཡཱཏི དསྶེནྟོ ‘‘ཨཱསཝསམུདཡཱ’’ཏི སུཏྟཾ ཨཱཧརཏི. པརིཡཱཡོ ཀཱརཎཾ. ཝཊྚཀཐཱཡ སཱིསབྷཱཝོ ཝཊྚཧེཏུནོ ཀམྨསྶཱཔི ཧེཏུབྷཱཝོ. ཏཏྠ བྷཝཏཎྷཱཡཔི ཧེཏུབྷཱུཏཱ ཨཝིཛྫཱ, ཏཱཡ པཊིཙྪཱདིཏཱདཱིནཝེ བྷཝེ ཏཎྷཱཡ ཨུཔྤཛྫནཏོ ཨཝིཛྫཱ ཝིསེསེན སཱིསབྷཱུཏཱཏི ‘‘མཱུལཀཱརཎ’’ནྟི ཝུཏྟཱ.

པུརིམཱཡ ཀོཊིཡཱ ཨཔཉྙཱཡམཱནཱཡ ཨུཔྤཱདཝིརཧཏོ ནིཙྩཏཾ གཎྷེཡྻཱཏི ཨཱཧ ‘‘ཨེཝཾ ཙེཏཾ, བྷིཀྑཝེ, ཝུཙྩཏཱི’’ཏིཨཱདི. ཏེན ཨིཏོ པུབྦེ ཨུཔྤནྣཔུབྦཏཱ ནཏྠཱིཏི ཨཔཉྙཱཡནཏོ པུརིམཀོཊིཨཔཉྙཱཡནཾ ཝུཏྟནྟི ཨིམམཏྠཾ དསྶེཏི.

༥༨༥. ཨཝིཛྫཱཏཎྷཱཧེཏུཀྐམེན ཕལེསུ ཝཏྟབྦེསུ ‘‘སུགཏིདུགྒཏིགཱམིནོ’’ཏི ཝཙནཾ སདྡལཀྑཎཱཝིརོདྷནཏྠཾ. པཱུཛིཏསྶ ཧི དྭནྡེ པུབྦནིཔཱཏོ. སཝརཱ ཀིར མཾསསྶ ཨཊྛིནཱ ཨལགྒནཏྠཾ པུནཔྤུནཾ ཏཱཔེཏྭཱ ཀོཊྚེཏྭཱ ཨུཎྷོདཀཾ པཱཡེཏྭཱ ཝིརིཏྟཾ སཱུནཾ ཨཊྛིཏོ མུཏྟམཾསཾ གཱཝིཾ མཱརེནྟི. ཏེནཱཧ ‘‘ཨགྒིསནྟཱཔཱ’’ཏིཨཱདི. ཏཏྠ ཡཐཱ ཝཛ྄ཛྷགཱཝཱི ཙ ཨཝིཛྫཱབྷིབྷཱུཏཏཱཡ ཡཐཱཝུཏྟཾ ཨུཎྷོདཀཔཱནཾ ཨཱརབྷཏི, ཨེཝཾ པུཐུཛྫནོ ཡཐཱཝུཏྟཾ དུགྒཏིགཱམིཀམྨཾ. ཡཐཱ པན སཱ ཨུཎྷོདཀཔཱནེ ཨཱདཱིནཝཾ དིསྭཱ ཏཎྷཱཝསེན སཱིཏུདཀཔཱནཾ ཨཱརབྷཏི, ཨེཝཾ པུཐུཛྫནོ ཨཝིཛྫཱཡ ནཱཏིབལཝབྷཱཝཏོ དུགྒཏིགཱམིཀམྨེ ཨཱདཱིནཝཾ དིསྭཱ ཏཎྷཱཝསེན ¶ སུགཏིགཱམིཀམྨཾ ཨཱརབྷཏི. དུཀྑེ ཧི ཨཝིཛྫཾ ཏཎྷཱ ཨནུཝཏྟཏི, སུཁེ ཏཎྷཾ ཨཝིཛྫཱཏི.

༥༨༦. ཀཏྠཙི སུཏྟེ. ཨེཀདྷམྨམཱུལིཀཾ དེསནནྟི ཨཝིཛྫཱཏཎྷཱསུ ཨེཀོཡེཝ དྷམྨོ མཱུལཾ ཨེཏིསྶཱཏི ཨེཀདྷམྨམཱུལིཀཱ, ཏཾ, ཏཏྠ ཨེཀཾ ཨེཝ དྷམྨཾ མཱུལཾ ཀཏྭཱ པཊིཙྩསམུཔྤཱདདེསནཾ དེསེཏཱིཏི ཨཏྠོ. ཨུཔནིསཱིདཏི ཕལཾ ཨེཏྠཱཏི ཨུཔནིསཱ, ཀཱརཎཾ, ཨཝིཛྫཱ ཨུཔནིསཱ ཨེཏེསནྟི ཨཝིཛྫཱུཔནིསཱ. ཨསྶཱདཱནུཔསྶིནོཏི ཨུཔཱདཱནིཡེསུ ཏེབྷཱུམཀདྷམྨེསུ ཝིསཡབྷཱུཏེསུ ཨསྶཱདེཏབྦཏོ ཨསྶཱདསཉྙིཏཾ ¶ སུཁསོམནསྶཾ ཨནུཔསྶནསཱིལསྶ. ཨཔྤཧཱིནཱཝིཛྫཏཱཡ བཱལལཀྑཎཡོགེན བཱལསྶ. ཨེཝནྟི ཨཝིཛྫཱནིཝུཏཏྟཱ, ཏཎྷཱསཾཡུཏྟཏྟཱ ཙ. ཨཡཾ ཀཱཡོཏི ཨཡཾ མམཉྩེཝ ཏུམྷཱཀཉྩ པཙྩཀྑབྷཱུཏོ སཝིཉྙཱཎཀཀཱཡོ ཁནྡྷཔཉྩཀཾ. ‘‘སལཱ༹ཡཏནཔཙྩཡཱ ཕསྶོ’’ཏི (མཧཱཝ. ༡; ཨུདཱ. ༡) ཝཙནཏོ ཕསྶཀཱརཎཉྩེཏཾ ཝུཙྩཏཱིཏི ཨཱཡཏནཙྪཀྐཾ ཝཱ. སམུདཱགཏོཏི ཨུཔྤནྣོ. བཧིདྡྷཱ ཙ ནཱམརཱུཔནྟི བཧིདྡྷཱ སཝིཉྙཱཎཀཀཱཡོ ཁནྡྷཔཉྩཀཾ, སལཱ༹ཡཏནཱནི ཝཱ. ཨིཏྠེཏནྟི ཨིཏྠཾ ཨེཏཾ. ཨཏྟནོ ཙ པརེསཉྩ པཉྩཀྑནྡྷཱ དྭཱདསཱཡཏནཱནི དྭཱརཱལམྦནབྷཱཝེན ཝཝཏྠིཏཱནི དྭཡཾ ནཱམཱཏི ཨཏྠོ. དྭཡཾ པཊིཙྩ ཕསྶོཏི ཨཉྙཏྠ ཙཀྑུརཱུཔཱདཱིནི དྭཡཱནི པཊིཙྩ ཙཀྑུསམྥསྶཱདཡོ ཝུཏྟཱ, ཨིདྷ པན ཨཛ྄ཛྷཏྟིཀབཱཧིརཱནི ཨཱཡཏནཱནི, མཧཱདྭཡཾ ནཱམ ཀིརེཏནྟི ཝུཏྟཾ. ཨཡམེཏྠ ཨདྷིཔྤཱཡོ – ཨཉྙཏྠ ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎཾ, ཏིཎྞཾ སངྒཏི ཕསྶོ’’ཏིཨཱདིནཱ (མ. ནི. ༡.༢༠༤, ༤༠༠; ༣.༤༢༡, ༤༢༥, ༤༢༦; སཾ. ནི. ༢.༤༤; ༤.༦༠; ཀཐཱ. ༤༦༥) ཙཀྑུ ཙེཝ རཱུཔཱ ཙ…པེ… མནོ ཙེཝ དྷམྨཱ ཙཱཏི ཝུཏྟཱནི དྭཡཱནི པཊིཙྩ ཙཀྑུསམྥསྶཱདཡོ ཝུཏྟཱ. ཨིདྷ པན ‘‘ཨཡཉྩེཝ ཀཱཡོ’’ཏི ཙཀྑཱདིནིསྶཡེ སེསདྷམྨེ ཙཀྑཱདིནིསྶིཏེ ཨེཝ ཀཏྭཱ ཝུཏྟཾ ཙཀྑཱདིཀཱཡཾ ཨེཀཏྟེན ‘‘ཨཛ྄ཛྷཏྟིཀཱཡཏན’’ནྟི གཧེཏྭཱ, ‘‘བཧིདྡྷཱ ཙ ནཱམརཱུཔ’’ནྟི ཝུཏྟཾ རཱུཔཱདིཨཱརམྨཎཾ ཨེཀཏྟེནེཝ ‘‘བཱཧིརཱཡཏན’’ནྟི ཏཱནི ཨཛ྄ཛྷཏྟིཀབཱཧིརཱནི ཨཱཡཏནཱནི པཊིཙྩ ཕསྶོ ཝུཏྟོ, ཏསྨཱ མཧཱདྭཡམེཏནྟི.

ཨེཝཉྩ ཀཏྭཱ ཨཏྟནོ ཙ པརསྶ ཙ པཉྩཧི ཁནྡྷེཧི, ཚཧི ཨཱཡཏནེཧི ཙཱཏི ཨཡམཏྠོ དཱིཔེཏབྦོཝཱཏི ཝུཏྟཾ. ‘‘ཨཡཾ ཀཱཡོ’’ཏི ཧི ཝུཏྟཱནི སནིསྶཡཱནི ཙཀྑཱདཱིནི ཨཏྟནོ པཉྩཀྑནྡྷཱ, ‘‘བཧིདྡྷཱ ནཱམརཱུཔ’’ནྟི ཝུཏྟཱནི རཱུཔཱདཱིནི ¶ པརེསཾ. ཏཐཱ ཨཡཾ ཀཱཡོ ཨཏྟནོ ཚ ཨཛ྄ཛྷཏྟིཀཱནི ཨཱཡཏནཱནི, བཧིདྡྷཱ ནཱམརཱུཔཾ པརེསཾ བཱཧིརཱནཱིཏི. ཨཉྙཐཱ ཨཛ྄ཛྷཏྟིཀཱཡཏནམཏྟེ ཨེཝ ‘‘ཨཡཾ ཀཱཡོ’’ཏི ཝུཏྟེན ཨཛ྄ཛྷཏྟིཀཱཡཏནཱནེཝ ཨཏྟནོ པཉྩཀྑནྡྷཱ ཧོནྟཱིཏི ཨཏྟནོ ཙ པརེསཉྩ པཉྩཧི ཁནྡྷེཧི དཱིཔནཱ ན སམྦྷཝེཡྻཱཏི. སལེ༹ཝཱཡཏནཱནཱིཏི སལེ༹ཝ ཕསྶཀཱརཎཱནི, ཡེཧི ཀཱརཎབྷཱུཏེཧི ཨཱཡཏནེཧི ཨུཔྤནྣེན ཕསྶེན ཕུཊྛོ བཱལོ སུཁདུཀྑཾ པཊིསཾཝེདེཏི. ཨཱདི-སདྡེན ‘‘ཨེཏེསཾ ཝཱ ཨཉྙཏརེན. ཨཝིཛྫཱནཱིཝརཎསྶ, བྷིཀྑཝེ, པཎྜིཏསྶ ཏཎྷཱཡ སམྤཡུཏྟསྶཱ’’ཏིཨཱདི (སཾ. ནི. ༢.༡༩) ཡོཛེཏབྦཾ. ཨིམསྨིཉྷི སུཏྟེ སངྑཱརེ ཨཝིཛྫཱཏཎྷཱནིསྶིཏེ ཨེཝ ཀཏྭཱ ཀཱཡགྒཧཎེན ཝིཉྙཱཎནཱམརཱུཔསལཱ༹ཡཏནཱནི གཧེཏྭཱ ཏསྨིཾ ཀཱཡེ སལཱ༹ཡཏནཱནཾ ཕསྶཾ ཏཾནིསྶིཏམེཝ ¶ ཀཏྭཱ ཝེདནཱཡ ཝིསེསཔཙྩཡབྷཱཝཾ དསྶེནྟེན བྷགཝཏཱ བཱལཔཎྜིཏཱནཾ ཨཏཱིཏདྡྷཱཝིཛྫཱཏཎྷཱམཱུལཀོ ཝེདནཱནྟོ པཊིཙྩསམུཔྤཱདོ དསྶིཏོ. པུན ཙ བཱལཔཎྜིཏཱནཾ ཝིསེསཾ དསྶེནྟེན –

‘‘ཡཱཡ ཙ, བྷིཀྑཝེ, ཨཝིཛྫཱཡ ནིཝུཏསྶ བཱལསྶ, ཡཱཡ ཙ ཏཎྷཱཡ སམྤཡུཏྟསྶ ཨཡཾ ཀཱཡོ སམུདཱགཏོ, སཱ ཙེཝ ཨཝིཛྫཱ བཱལསྶ ཨཔྤཧཱིནཱ, སཱ ཙ ཏཎྷཱ ཨཔརིཀྑཱིཎཱ. ཏཾ ཀིསྶ ཧེཏུ? ན, བྷིཀྑཝེ, བཱལོ ཨཙརི བྲཧྨཙརིཡཾ སམྨཱ དུཀྑཀྑཡཱཡ. ཏསྨཱ བཱལོ ཀཱཡསྶ བྷེདཱ ཀཱཡཱུཔགོ ཧོཏི, སོ ཀཱཡཱུཔགོ སམཱནོ ན པརིམུཙྩཏི ཛཱཏིཡཱ…པེ… དུཀྑསྨཱཏི ཝདཱམཱི’’ཏི (སཾ. ནི. ༢.༡༩) –

ཝེདནཱཔབྷཝཾ སཱཝིཛྫཾ ཏཎྷཾ དསྶེཏྭཱ, ཨུཔཱདཱནབྷཝེ ཙ ཏནྣིསྶིཏེ ཀཏྭཱ ‘‘ཀཱཡཱུཔགོ ཧོཏཱི’’ཏིཨཱདིནཱ ཛཱཏིཨཱདིཀེ དསྶེནྟེན པཙྩུཔྤནྣཧེཏུསམུཊྛཱནཏོ པབྷུཏི ཨུབྷཡམཱུལཝསེན པཊིཙྩསམུཔྤཱདོ ཝུཏྟོ, ཏབྦིཔརིཡཱཡེན ཙ པཎྜིཏསྶ པཙྩུཔྤནྣཧེཏུཔརིཀྑཡཏོ པབྷུཏི ཨུབྷཡམཱུལཀོ པཊིལོམཔཊིཙྩསམུཔྤཱདོཏི.

༥༨༧. པཱུརེཏུནྟི ཝཌྜྷེཏུཾ, ཨུཔཙིནིཏུནྟི ཨཏྠོ. དུགྒཏིགཱམིཀམྨསྶ ཝིསེསཔཙྩཡཏྟཱ ཨཝིཛྫཱ ‘‘ཨཝིནྡིཡཾ ཝིནྡཏཱི’’ཏི ཝུཏྟཱ, ཏཐཱ ཝིསེསཔཙྩཡོ ཝིནྡིཡསྶ ན ཧོཏཱིཏི ‘‘ཝིནྡིཡཾ ན ཝིནྡཏཱི’’ཏི ཙ. ཨཏྟནིསྶིཏཱནི ཀཏྭཱ ¶ ཙཀྑུཝིཉྙཱཎཱདཱིནཾ པཝཏྟནཾ ཨུཔྤཱདནཾ ཨཱཡཏནཾ. སམྨོཧབྷཱཝེནེཝ ཨནབྷིསམཡབྷཱུཏཏྟཱ ཨཝིདིཏཾ ཨཉྙཱཏཾ ཀརོཏི. ཨནྟཝིརཧིཏེ ཛཝཱཔེཏཱིཏི ཝཎྞཱགམཝིཔརིཡཱཡཝིཀཱརཝིནཱསདྷཱཏུཨཏྠཝིསེསཡོགེཧི པཉྩཝིདྷསྶ ནིརུཏྟིལཀྑཎསྶ ཝསེན ཨ-ཀཱར ཝི-ཀཱར ཛ-ཀཱརེ གཧེཏྭཱ ཨཉྙེསཾ ཝཎྞཱནཾ ལོཔཾ, ཛ-ཀཱརསྶ ཙ དུཏིཡསྶཱགམཾ ཀཏྭཱ ‘‘ཨཝིཛྫཱ’’ཏི ཝུཏྟཾ. བྱཉྫནཏྠཾ ཝཏྭཱ སབྷཱཝཏྠཾ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ཙཀྑུཝིཉྙཱཎཱདཱིནཾ ཝཏྠཱརམྨཎཱནི ‘‘ཨིདཾ ཝཏྠུ, ཨིདཾ ཨཱརམྨཎ’’ནྟི ཨཝིཛྫཱཡ ཉཱཏུཾ ན སཀྐཱཏི ཨཝིཛྫཱ ཏཔྤཊིཙྪཱདིཀཱ ཝུཏྟཱ. ཝཏྠཱརམྨཎསབྷཱཝཚཱདནཏོ ཨེཝ ཨཝིཛྫཱདཱིནཾ པཊིཙྩསམུཔྤཱདབྷཱཝསྶ, ཛརཱམརཎཱདཱིནཾ པཊིཙྩསམུཔྤནྣབྷཱཝསྶ ཙ ཚཱདནཏོ པཊིཙྩསམུཔྤཱདཔཊིཙྩསམུཔྤནྣཙྪཱདནཾ ཝེདིཏབྦཾ.

ཨཔཙྩཀྑིཏྭཱཏི ¶ པཙྩཀྑཱནཾ ཨཀཏྭཱ ཨཔཊིཀྑིཔིཏྭཱ. ཨུཔཀཱརཀཊྛོ པཙྩཡཊྛོ ཡཐཱ པིཎྜཔཱཏཱདི སརཱིརསྶ.

སངྑཏམབྷིསངྑརོནྟཱིཏི ཡཐཱ སངྑཏཾ ཧོཏི, ཨེཝཾ ཨབྷིསངྑརོནྟི. སངྑཱརསདྡགྒཧཎེན ཨཱགཏཱ སངྑཱརཱ སངྑཱརསདྡེན ཨཱགཏསངྑཱརཱ. ཡདིཔི ཨཝིཛྫཱཔཙྩཡཱ སངྑཱརཱཔི སངྑཱརསདྡེན ཨཱགཏཱ, ཏེ པན ཨིམིསྶཱ དེསནཱཡ པདྷཱནཱཏི ཝིསུཾ ཝུཏྟཱ, ཏསྨཱ ‘‘དུཝིདྷཱ’’ཏི ཨེཏྠ སངྑཱརསདྡེན ཨཱགཏསངྑཱརེསུ ཨབྷིསངྑརཎཀསངྑཱརཾ ཝཛྫེཏྭཱ ཏདཉྙེ སངྑཱརསདྡེན ཨཱགཏསངྑཱརཱ ཡོཛེཏབྦཱ. སངྑཱརསདྡེན ཨཱགཏསངྑཱརཱཏི ཝཱ སམུདཱཡོ ཝུཏྟོ. ཏདེཀདེསཱ ཙ ཨིདྷ ཝཎྞེཏབྦབྷཱཝེན གཧིཏཱ ཨཝིཛྫཱཔཙྩཡཱ སངྑཱརཱ, ཏསྨཱ ཝཎྞེཏབྦསབྦསངྒཱཧཀཝསེན དུཝིདྷཏཱ ཝུཏྟཱཏི ཝེདིཏབྦཱ. ‘‘པཋམཾ ནིརུཛ྄ཛྷཏི ཝཙཱིསངྑཱརོ’’ཏིཨཱདིནཱ (མ. ནི. ༡.༤༦༤) ཝིཏཀྐཝིཙཱརཨསྶཱསཔསྶཱསསཉྙཱཝེདནཱཝཙཱིསངྑཱརཱདཡོ ཝུཏྟཱ, ན ཨཝིཛྫཱཔཙྩཡཱ སངྑཱརེསུ ཝུཏྟཱ ཀཱཡསཉྩེཏནཱདཡོ.

སངྑཏསངྑཱརཱ ནཱམ ཡཐཱསཀཾ པཙྩཡེཧི སངྑཏཏྟཱ. སཏིཔི པཙྩཡནིབྦཏྟཱནཾ སབྦེསམྤི སངྑཏབྷཱཝེ ‘‘མམེཏཾ ཕལ’’ནྟི ཏཏྠཱབྷིམུཁེན ཝིཡ ཀམྨུནཱ ནིབྦཏྟིཏཏྟཱ ཏེབྷཱུམཀཝིཔཱཀཀཊཏྟཱརཱུཔེསུ སཱཏིསཡོ སངྑཏབྷཱཝོཏི ཨདྷིཔྤཱཡེན ཨཊྛཀཐཱཡཾ (ཝིསུདྡྷི. ༢.༥༨༧) ཀམྨནིབྦཏྟཱནཾ ཨབྷིསངྑཏསངྑཱརཏཱ ཝུཏྟཱ. པཱལི༹ཡཾ པན ཏཐཱ ཨཱགཏཊྛཱནསྶ ཨབྷཱཝཏོ ‘‘ཏེཔི ¶ …པེ… ཨེཏྠེཝ སངྒཧཾ གཙྪནྟཱི’’ཏི ཝུཏྟཾ. ཨནིཙྩཱ ཝཏ སངྑཱརཱཏི ཝུཏྟཱ ཨུབྷུཨཱདིསམུཊྛཱནཱཔི སབྦདྷམྨཱ. ཨབྷིསངྑརཎཀསངྑཱརོཏི ཝུཙྩཏི ཨཏྟནོ ཕལསྶ ཨབྷིསངྑརཎཏོ. ཀཱཡཔཡོགསམུཊྛཱཔནཝཱིརིཡཾ ཀཱཡིཀཝཱིརིཡཾ. ཨབྷིསངྑཱརསྶཱཏི པཡོགཝེགསྶ.

ཝཱཙཾ སངྑརོཏཱིཏི ཝཙཱིསངྑཱརོ. ཀཱཡེན སངྑརཱིཡཏཱིཏི ཀཱཡསངྑཱརོ. ཙིཏྟེན སངྑརཱིཡཏི, ཙིཏྟཾ ཝཱ སངྑརོཏཱིཏི ཙིཏྟསངྑཱརོ. སངྑེཔཏོ པན སབྦེཔི ཡཐཱརཧཾ སངྑརོནྟི, སངྑརཱིཡནྟཱིཏི ཙ སངྑཱརཱཏི ཝེདིཏབྦཱ. ཝུཏྟནྟི སངྑཱརཊྛཔཙྩཡཊྛཱདིམཱཧ.

ནམཏཱིཏི ཨེཀནྟསཱརམྨཎཏཱཡ ཨཱརམྨཎཱབྷིམུཁཾ ནམཏི. པརིཏསྶཏཱིཏི པིཔཱསཏི, ཏཎྷཱཔརིཏཱཔཏཱཡ ཝཱ ཝིཙལཏི. ཨུཔཱདིཡཏཱིཏི དལ༹ྷཾ ཨཱདིཡཏི. བྷཝཏཱིཏི ཨུཔཔཏྟིབྷཝཾ སནྡྷཱཡཱཧ. བྷཱཝཡཏཱིཏི ཀམྨབྷཝཾ. ཙུཏི ཁནྡྷཱནཾ མརཎནྟི ‘‘མརནྟི ཨེཏེནཱ’’ཏི ཝུཏྟཾ. དུཀྑཱ ཝེདནཱ ¶ ཨུཔྤཱདདུཀྑཱ, ཋིཏིདུཀྑཱཏི ཙ ཀཏྭཱ ‘‘དྭེདྷཱ ཁཎཏཱི’’ཏི ཝུཏྟཾ. ཨཱཡཱསོ པརིསྶམོ ཝིསཱདོ.

ནིདྡིཊྛནཡདསྶནནྟི ཡཐཱནིདྡིཊྛཝིདྷིསནྡསྶནཾ. ཀེཝལ-སདྡོ ཨསམྨིསྶཝཱཙཀོ ཙ ཧོཏི ‘‘ཀེཝལཱ སཱལཡོ’’ཏིཨཱདཱིསུ, ནིརཝསེསཝཱཙཀོ ཙ ‘‘ཀེཝལཱ ཨངྒམགདྷཱ’’ཏིཨཱདཱིསུ, ཏསྨཱ དྭིདྷཱཔི ཨཏྠཾ ཝདཏི. ཏཏྠ ཨསམྨིསྶསྶཱཏི སུཁརཧིཏསྶ. ན ཧི ཨེཏྠ ཀིཉྩི ཨུཔྤཱདཝཡརཧིཏཾ ཨཏྠི. སཀལསྶཱཏི སབྦབྷཝཱདིགཏསྶ, སབྦཀཱལིཀསྶ ཙ.

༥༨༨. ‘‘ལཀྑཎེཀཝིདྷཱདིཏོ’’ཏི ཨེཏྠ ཨཱདི-སདྡོ པཙྩེཀཾ པརིསམཱཔེཏབྦོཏི དསྶེནྟོ ཨཱཧ ‘‘ལཀྑཎཱདིཏོ’’ཏི. སམྤཡུཏྟེ, ཏཾསམངྒིཔུགྒལེ ཝཱ སམྨོཧཡཏཱིཏི སམྨོཧནརསཱ. ཨཱརམྨཎསབྷཱཝསྶ ཚཱདནཾ ཧུཏྭཱ གཡ྄ཧཏཱིཏི ཚཱདནཔཙྩུཔཊྛཱནཱ. ‘‘ཨཱསཝསམུདཡཱ ཨཝིཛྫཱསམུདཡོ’’ཏི (མ. ནི. ༡.༡༠༣) ཝཙནཏོ ཨཱསཝཔདཊྛཱནཱ. པཊིསནྡྷིཛནནཏྠཾ ཨཱཡཱུཧནྟི བྱཱཔཱརཾ ཀརོནྟཱིཏི ཨཱཡཱུཧནརསཱ. རཱསིཀརཎཾ ཝཱ ཨཱཡཱུཧནཾ. ཙེཏནཱསབྷཱཝཏྟཱ ཙེཏནཱ ཧུཏྭཱ གཡ྄ཧཏཱིཏི ཙེཏནཱཔཙྩུཔཊྛཱནཱ. ནཱམརཱུཔསྶ པུརེཙཱརིཀབྷཱཝེན པཝཏྟཏཱིཏི པུབྦངྒམརསཾ. པུརིམབྷཝེན སདྡྷིཾ གྷཊནཾ ཧུཏྭཱ གཡ྄ཧཏཱིཏི པཊིསནྡྷིཔཙྩུཔཊྛཱནཾ. ཝིཉྙཱཎེན སཧ, ཨཉྙམཉྙཉྩ སམྤཡུཛྫཏཱིཏི སམྤཡོགརསཾ. སམཾ པཀཱརེཧི ཡོགོ ¶ སམྤཡོགོ. ཝིསུཾ ཨབྷཱཝོ ཨཝིནིབྦྷོགོ. རཱུཔཾ སམྤཡོགཱབྷཱཝཏོ ཝིཀིརཏཱིཏི ཝིཀིརཎརསཾ. ཏཏོ ཨེཝ ཧི པིསིཡམཱནཱ ཏཎྜུལཱདཡོ ཝིཀིརནྟི, ཙུཎྞཱིབྷཱུཏཱ ཝིདྡྷཾསནྟི, ནཱམསྶ ཀདཱཙི ཀུསལཱདིབྷཱཝོཔི ཨཏྠཱིཏི ཏཏོ ཝིསེསནཏྠཾ ‘‘ཨབྱཱཀཏཔཙྩུཔཊྛཱན’’ནྟི ཝུཏྟཾ. ‘‘ཨཙེཏནོ ཨབྱཱཀཏོ’’ཏི (ཝིསུདྡྷི. ༡.༣༡༡; ཝིབྷ. ཨཊྛ. ༡༧༣) ཨེཏྠ ཝིཡ ཨནཱརམྨཎཏཱ ཝཱ ཨབྱཱཀཏཏཱ དཊྛབྦཱ. ཨཱཡཏནལཀྑཎནྟི གྷཊྚནལཀྑཎཾ, ཨཱཡཱནཾ ཏནནལཀྑཎཾ ཝཱ. དསྶནསྶ ཡཐཱསཀཾ ཝིསཡགྒཧཎསྶ ཀརཎཏོ དསྶནརསཾ. ‘‘དསྶནཱདིརས’’ནྟི པན སམྨོཧཝིནོདནིཡཾ ཝུཏྟཾ. ཝཏྠུདྭཱརབྷཱཝཔཙྩུཔཊྛཱནཾ ཡཐཱརཧཾ ཝིཉྙཱཎམནོཝིཉྙཱཎདྷཱཏཱུནནྟི ཨདྷིཔྤཱཡོ. ཝཏྠུགྒཧཎཉྩེཏྠ ཙཀྑཱདིཔཉྩཀཱཔེཀྑཾ. ཨཀུསལཝིཔཱཀུཔེཀྑཱཡ ཨནིཊྛབྷཱཝཏོ དུཀྑེན, ཨིཏརཱཡ ཨིཊྛབྷཱཝཏོ སུཁེན སངྒཧིཏཏྟཱ ‘‘སུཁདུཀྑཔཙྩུཔཊྛཱནཱ’’ཏི ཝུཏྟཾ. དུཀྑསམུདཡཏྟཱ ཧེཏུལཀྑཎཱ ཏཎྷཱ. ‘‘ཏཏྲཏཏྲཱབྷིནནྡིནཱི’’ཏི (མ. ནི. ༡.༩༡, ༤༦༠; སཾ. ནི. ༥.༡༠༨༡; ཝིབྷ. ༢༠༣; མཧཱཝ. ༡༤) ཝཙནཏོ ཨབྷིནནྡནརསཱ. ཙིཏྟསྶ, པུགྒལསྶ ཝཱ རཱུཔཱདཱིསུ ཨཏིཏྟབྷཱཝོ ཧུཏྭཱ གཡ྄ཧཏཱིཏི ཨཏིཏྟབྷཱཝཔཙྩུཔཊྛཱནཱ. ཨམུཉྩནརསཾ ཏཎྷཱདིཊྛཱབྷིནིཝེསཝསེན. ཏཎྷཱདལ༹ྷཏྟཾ ¶ ཧུཏྭཱ ཀཱམུཔཱདཱནཾ, སེསཱནི དིཊྛི ཧུཏྭཱ ཨུཔཊྛཧནྟཱིཏི ཏཎྷཱདལ༹ྷཏྟདིཊྛིཔཙྩུཔཊྛཱནཾ. ཀམྨུཔཔཏྟིབྷཝཝསེན བྷཝསྶ ལཀྑཎཱདཡོ ཡོཛེཏབྦཱ.

༥༨༩. མོཧཱདིབྷཱཝཏོཏི ཨེཏྠ ཨཱདི-སདྡེན ཨནནུབོདྷཱདཱིནཾ སངྒཧོ. དུཀྑཱདཱིསུ ཨཉྙཱཎཝསེན ཨཔྤཊིཔཏྟི, ཨསུབྷཱདཱིསུ སུབྷཱདིཝིཔལླཱསཝསེན མིཙྪཱཔཊིཔཏྟི. དིཊྛིཝིཔྤཡུཏྟཝསེན ཝཱ ཨཔྤཊིཔཏྟི, དིཊྛིསམྤཡུཏྟཝསེན མིཙྪཱཔཊིཔཏྟི. དྭཱརཱརམྨཎཏོཏི དྭཱརཏོ, ཨཱརམྨཎཏོ ཙ ཚསུ དྭཱརེསུ, ཚསུ ཨཱརམྨཎེསུ ཙ པཝཏྟནཏོ. ཨཡཾ པན ཝིབྷཱགོ ན ཨཝིཛྫཱཡ ཨེཝ, ཨཉྙེསུཔི པཊིཙྩསམུཔྤཱདངྒེསུ ཨརཱུཔདྷམྨཱནཾ ལབྦྷཏཱིཏི ཨཱཧ ‘‘སབྦེསུཔཱི’’ཏི.

ཝིཔཱཀདྷམྨདྷམྨཱདིབྷཱཝཏོཏི ཨེཏྠ ཨཱདི-སདྡེན ནེཝསེཀྑཱནཱསེཀྑསཾཡོཛནིཡཱདིབྷཱཝེ སངྒཎྷཱཏི. ཙཏུཡོནིསཾཝཏྟནཏོཏི ཙཏུཡོནིཔརིཡཱཔནྣཏྟབྷཱཝནིབྦཏྟནཏོ.

ལོཀིཡཝིབྷཱགཱདིབྷཱཝཏོཏི ¶ ཨེཏྠ ཨཱདི-སདྡེན ཨབྱཱཀཏསཔྤཙྩཡསངྑཏཱདིབྷཱཝེ སངྒཎྷཱཏི. སཧེཏུཀཱཧེཏུཀཱདིཏོཏི ཨཱདི-སདྡེན སསངྑཱརཱསངྑཱརཱདིབྷེདེ སངྒཎྷཱཏི.

ཀཱམཾ ནཱམརཱུཔཾ པཙྩུཔྤནྣདྡྷཝསེན ཝུཙྩཏི, ཏཐཱཔི ཡཐཱ པཙྩུཔྤནྣཾ, ཨེཝཾ ཨཏཱིཏཱནཱགཏམྤཱིཏི ཨདྡྷདྭཡཔརིཡཱཔནྣསྶཱཔི ནཡཏོ གཧེཏབྦཏྟཱ ཝུཏྟཾ ‘‘ཨཏཱིཏཱདིཏོ ཏིཝིདྷ’’ནྟི.

སཉྫཱཏིསམོསརཎཊྛཱནཏོཏི ཝིཉྙཱཎཏཾསམྤཡུཏྟདྷམྨཱནཾ ཨུཔྤཏྟིཔཝཏྟིདེསབྷཱཝཏོ. ‘‘བྷཱུཏཔྤསཱདཝིཉྙཱཎཏོ’’ཏི པཱཋོ ཡུཏྟོ. ‘‘ཝིཉྙཱཎཱདིཏོ’’ཏི པན པཋནྟི. ཨེཀསེསནཡེན བཱཧིརཱཡཏནསྶཱཔི སངྒཧེ སཏི ཨཱདི-སདྡེན ཏསྶ སངྒཧིཏཏཱ དཊྛབྦཱ. ནོབྷཡགོཙརནྟི མནཱཡཏནམཱཧ. ན ཧི ཨརཱུཔདྷམྨཱནཾ དེསཝསེན ཨཱསནྣཏཱ, དཱུརཏཱ ཝཱ ཨཏྠི ཨཝིགྒཧཏྟཱ, ཏསྨཱ མནཱཡཏནསྶ གོཙརོ མནཱཡཏནཾ སམྤཏྟོ, ཨསམྤཏྟོ ཝཱཏི ན ཝུཙྩཏི. ཕསྶཱདཱིནམྤཱིཏི ཨེཏྠ ཕསྶོ ཏཱཝ ཕུསནསབྷཱཝཏོ, ལོཀིཡསཱསཝཱདིབྷཱཝཏོ ཙ ཨེཀཝིདྷོ. པཊིགྷསམྥསྶཨདྷིཝཙནསམྥསྶབྷེདཏོ, སཧེཏུཀཱདིབྷཱཝཏོ ཙ དུཝིདྷོ. བྷཝཏྟཡཔརིཡཱཔནྣཏོ, ཝེདནཱཏྟཡསམྤཡོགཏོ ¶ , ཨཧེཏུཀདུཧེཏུཀཏིཧེཏུཀཏོ ཙ ཏིཝིདྷོ. ཡོནིགཏིཝསེན ཙཏུབྦིདྷོ, པཉྩཝིདྷོ ཙ.

ཝེདནཱ ཨནུབྷཝནལཀྑཎཏོ, ལོཀིཡསཱསཝཱདིབྷཱཝཏོ ཙ ཨེཀཝིདྷཱ. པཉྩདྭཱརིཀམནོདྭཱརིཀབྷེདཏོ དུཝིདྷཱ. སུཁཱདིབྷེདཏོ ཏིཝིདྷཱ. ཡོནིགཏིཝསེན ཙཏུབྦིདྷཱ, པཉྩཝིདྷཱ ཙ. ཚལཱ༹རམྨཎབྷེདཏོ ཚབྦིདྷཱ.

ཏཎྷཱ ལོཀསྶ སམུདཡབྷཱཝཏོ ཨེཀཝིདྷཱ. དུཝིདྷཱ དིཊྛིསམྤཡུཏྟཝིཔྤཡུཏྟབྷཱཝཏོ. ཏིཝིདྷཱ ཀཱམབྷཝཝིབྷཝཏཎྷཱབྷེདཏོ. ཙཏུབྦིདྷཱ ཙཏུམགྒཔཧེཡྻཏོ. པཉྩཝིདྷཱ རཱུཔཱབྷིནནྡནཱདིབྷཱཝཏོ. ཚབྦིདྷཱ ཚཏཎྷཱཀཱཡབྷེདཏོ.

ཨུཔཱདཱནཾ ཨེཀཝིདྷཾ དལ༹ྷགྒཱཧབྷཱཝཏོ. དུཝིདྷཾ ཏཎྷཱདིཊྛིབྷེདཏོ. ཏིཝིདྷཾ བྷཝཏྟཡཱུཔནིསྶཡབྷཱཝཏོ. ཙཏུབྦིདྷཾ ཀཱམུཔཱདཱནཱདིབྷེདཏོ. པཉྩཝིདྷཾ པཉྩགཏིསཾཝཏྟནཏོ.

བྷཝོ ¶ ཨེཀཝིདྷོ ལོཀིཡསཱསཝཱདིབྷཱཝཏོ. དུཝིདྷོ ཀམྨུཔཔཏྟིབྷེདཏོ. ཏིཝིདྷོ ཀཱམབྷཝཱདིབྷེདཏོ. ཙཏུབྦིདྷོ ཙཏུརུཔཱདཱནཔཙྩཡཏོ. པཉྩཝིདྷོ པཉྩགཏིསཾཝཏྟནཏོ. ཚབྦིདྷོ ཀཱམཀམྨབྷཝཱདིབྷེདཏོ. སཏྟཝིདྷོ སཏྟཝིཉྙཱཎཊྛིཏིསངྒཧཏོ. ཨཊྛཝིདྷོ ཙཏུརུཔཱདཱནཔཙྩཡཀམྨབྷཝཱདིབྷེདཏོ. ནཝཝིདྷོ ཀཱམབྷཝཱདིབྷེདཏོ.

ཛཱཏི ཨེཀཝིདྷཱ ཏཏྠ ཏཏྠ བྷཝེ པཋམཱབྷིནིབྦཏྟིབྷཱཝཏོ. དུཝིདྷཱ རཱུཔཀྑནྡྷསངྑཱརཀྑནྡྷསངྒཧཏོ. ཏིཝིདྷཱ བྷཝཏྟཡཔརིཡཱཔནྣཏོ. ཡོནིགཏིཝསེན ཙཏུབྦིདྷཱ, པཉྩཝིདྷཱ ཙ. ཨིམིནཱ ནཡེན ཛརཱམརཎཱདཱིནམྤི ཨེཀཝིདྷཱདིབྷཱཝོ ཝེདིཏབྦོ.

༥༩༠. སོཀཱདཱིནམྤི གཧིཏཏྟཱ ཨངྒབཧུཏྟཔྤསངྒེ ‘‘དྭཱདསེཝཱ’’ཏི ཨངྒཝཝཏྠཱནཾ ཝེདིཏབྦཾ. ན ཧི སོཀཱདཡོ ཨངྒབྷཱཝེན ཝུཏྟཱ, ཕལེན པན ཀཱརཎཾ ཨཝིཛྫཾ མཱུལངྒཾ དསྶེཏུཾ ཏེ ཝུཏྟཱ. ཛརཱམརཎབྦྷཱཧཏསྶ ཧི བཱལསྶ ཏེ སམྦྷཝནྟཱིཏི སོཀཱདཱིནཾ ཛརཱམརཎཀཱརཎཏཱ ཝུཏྟཱ, ན པན ‘‘ཀཱཡིཀཱཡ དུཀྑཱཡ ཝེདནཱཡ ཕུཊྛོ’’ཏི ཙ སུཏྟེ ཛརཱམརཎནིམིཏྟཉྩ དུཀྑཾ སངྒཧིཏནྟི ཏཾ ཏནྣིམིཏྟཱནཾ ཛརཱམརཎབྦྷཱཧཏསྶ སམྦྷཝེ སཱདྷཀབྷཱཝེན ཝུཏྟཾ. ཡསྨཱ པན ཛརཱམརཎེནེཝ ¶ སོཀཱདཱིནཾ ཨེཀསངྑེཔོ ཀཏོ, ཏསྨཱ ཏེསཾ ཛཱཏིཔཙྩཡཏཱ ཡུཛྫཏི. ཛརཱམརཎཔཙྩཡབྷཱཝེ ཧི ཨཝིཛྫཱཡ ཨེཀསངྑེཔོ ཀཱཏབྦོ སིཡཱ. ཛཱཏིཔཙྩཡཱ པན ཛརཱམརཎཾ ¶ , སོཀཱདཡོ ཙ སམྦྷཝནྟཱིཏི ཏཏྠ ཛརཱམརཎཾ ཨེཀནྟིཀཾ ཨངྒབྷཱཝེན གཧིཏཾ. སོཀཱདཡོ པན རཱུཔབྷཝཱདཱིསུ ཨབྷཱཝཏོ ཨནེཀནྟིཀཱ ཀེཝལཾ པཱཀཊེན ཕལེན ཨཝིཛྫཱནིདསྶནཏྠཾ གཧིཏཱ. ཏེན ཨནཱགཏེ ཛཱཏིཡཱ སཏི ཏཏོ པརཱཡ པཊིསནྡྷིཡཱ ཧེཏུཧེཏུབྷཱུཏཱ ཨཝིཛྫཱ དསྶིཏཱཏི བྷཝཙཀྐསྶ ཨཝིཙྪེདོ དསྶིཏོ ཧོཏཱིཏི. སུཏྟཉྩ སོཀཱདཱིནཾ ཨཝིཛྫཱ ཀཱརཎནྟི ཨེཏསྶེཝ ཨཏྠསྶ སཱདྷཀཾ དཊྛབྦཾ, ན སོཀཱདཱིནཾ བཱལསྶ ཛརཱམརཎནིམིཏྟཏཱམཏྟསྶ. ‘‘ཨསྶུཏཝཱ པུཐུཛྫནོ’’ཏི ཧི ཝཙནེན ཨཝིཛྫཱ སོཀཱདཱིནཾ ཀཱརཎནྟི དསྶིཏཱ, ན ཙ ཛརཱམརཎནིམིཏྟམེཝ དུཀྑཾ དུཀྑནྟི.

ཨཔརོ ནཡོ ཛརཱམརཎམྤི པཙྩཡོ, ཨཉྙཐཱ དྭཱདསངྒཱནི ན པརིཔཱུརེནྟི. ཀསྶ པན སོ པཙྩཡོ? སོཀཱདཱིནཾ. ཡདི ཨེཝཾ ཀསྨཱ ‘‘ཛརཱམརཎཔཙྩཡཱ སོཀཱདཡོ སམྦྷཝནྟཱི’’ཏི ཨཝཏྭཱ ‘‘ཛཱཏིཔཙྩཡཱ ཛརཱམརཎཾ, སོཀཱདཡོ ཙ སམྦྷཝནྟཱི’’ཏི ཝུཏྟནྟི? ཡསྨཱ ཏདཉྙེནཔི དུཀྑདྷམྨེན ཕུཊྛསྶ ཏེ སམྦྷཝནྟི, ཏསྨཱ ཨཔྤཧཱིནསཾཡོཛནསྶཱཔི ཏེསཾ ཏཔྤཙྩཡཏཱ ན ཨེཀཾསིཀཱཏི ཛཱཏིཔཙྩཡཏཱཝ ཝུཏྟཱ. ཨཐ ཝཱ ཛརཱམརཎགྒཧཎེན ཨུཔཔཏྟིབྷཝོ སངྒཧིཏོ. ཨུཔཱདིནྣཀྑནྡྷཔརིཔཱཀོ ཧི ཨཱཡུནོ སཾཧཱནི, ཨིནྡྲིཡཱནཾ པརིཔཱཀོ ཙ ཛརཱ, ཏེསཉྩ བྷེདོ མརཎནྟི. སཏི ཙ ཨུཔཔཏྟིབྷཝེ ཏཏྠ ཀཏུཔཙིཏཾ, པོརཱཎཾ ཝཱ ཀམྨཾ ཀམྨབྷཝོ, ཀམྨཱདིཨུཔཊྛཱནེ ཙུཏིཨནནྟརཾ པཊིསནྡྷིཾ ཛནེཏཱིཏི ཨུཔཔཏྟིབྷཝོ ཛཱཏིཡཱ པཙྩཡོ, ཏསྨཱ ཛརཱམརཎམྤི ཛཱཏིཡཱ པཙྩཡཏཱཡ པཊིཙྩསམུཔྤཱདོ. ཡསྨཱ པན ‘‘བྷཝཔཙྩཡཱ ཛཱཏཱི’’ཏི ཨེཏྠེཝ ཨུཔཔཏྟིབྷཝསྶ ཛཱཏིཡཱ པཙྩཡཏཱ སངྒཧིཏཱ, ཏསྨཱ ཝུཏྟཔརིཡཱཡསངྒཧཏོ ཙ ‘‘ཛརཱམརཎཔཙྩཡཱ ཛཱཏཱི’’ཏི ན ཝུཏྟཾ. ཨེཝཾ ཛརཱམརཎསྶཱཔི པཙྩཡབྷཱཝསིདྡྷིཏོ པཊིཙྩསམུཔྤཱདཏཱཏི དྭཱདསངྒཏཱ ཝཝཏྠིཏཱཏི ཝེདིཏབྦཱ. ཏེནཱཧ ‘‘དྭཱདསེཝཱ’’ཏིཨཱདི. ཨཡཾ ཏཱཝཱཏི ‘‘དེསནཱབྷེདཏོ’’ཏིཨཱདིནཱ ཝུཏྟཾ ཨཏྠསཾཝཎྞནཾ སནྡྷཱཡཱཧ.

ཨཝིཛྫཱཔཙྩཡཱསངྑཱརཔདཀཐཱཝཎྞནཱ

༥༩༡. ཨཡཾ པནཱཏི ཨིདཱནི ཝཀྑམཱནཾ. ‘‘ཀཏམཱ ཙ, བྷིཀྑཝེ, ཨཝིཛྫཱ དུཀྑེ ཨཉྙཱཎ’’ནྟིཨཱདིནཱ (མ. ནི. ༡.༡༠༣) སུཏྟནྟེསུ ཙཏུཊྛཱནིཀཱ ཨཝིཛྫཱ ཝུཏྟཱཏི ‘‘སུཏྟནྟཔརིཡཱཡེནཱ’’ཏི ¶ ཝུཏྟཾ. ནིཀྑེཔཀཎྜེ (དྷ. ས. ༡༡༠༦) པན སུཏྟནྟེསུ ཙཏཱུསུ ཋཱནེསུ ཀཐིཏཱཡ ཨེཝ ཨཝིཛྫཱཡ ཨཊྛསུ ཋཱནེསུ ཀིཙྩཛཱཏིཏོ ཀཐིཏཏྟཱ ཏདཏྠཝཎྞནཱཝསེན ཝིབྷཱཝནཾ ཀཱཏུཾ ‘‘ཨབྷིདྷམྨཔརིཡཱཡེནཱ’’ཏི ཨཱརབྷིཏྭཱ ‘‘ཝུཏྟཉྷེཏ’’ནྟིཨཱདི ཝུཏྟཾ. ཨཧཱཔེཏྭཱ ཝིབྷཛིཏབྦཾ. ཝིབྷཛནཉྷི ཨབྷིདྷམྨཔརིཡཱཡོ. ‘‘ཨཊྛསུ ཋཱནེསུ ཨཉྙཱཎ’’ནྟི ཨཱནེཏྭཱ ཏཾ སམྦནྡྷིཏབྦཾ. སེསཊྛཱནེསཱུཏི དུཀྑསམུདཡེསུ, པུབྦནྟཱདཱིསུ ཙ. ཨཱརམྨཎཝསེནཱཏི ཨཱརམྨཎཀརཎཝསེནཱཔི. ཨིདྷཱཏི ཨིམསྨིཾ ‘‘དུཀྑེ ཨཉྙཱཎ’’ནྟིཨཱདིཀེ པཱཋེ. སཱཏི ཨཝིཛྫཱ. ཨུཔྤནྣཱཏི ཨསམཱུཧཏུཔྤནྣཱ, པགེཝ པཙྩུཔྤནྣཱ. ‘‘པཊིཙྪཱདེཏྭཱ’’ཏི ཨེཏྠ ཝུཏྟཾ པཊིཙྪཱདནཱཀཱརཾ དསྶེཏུཾ ‘‘ཡཱཐཱཝསརསལཀྑཎཾ པཊིཝིཛ྄ཛྷིཏུཾ ན དེཏཱི’’ཏི ཝུཏྟཾ. རསིཏབྦོ པཊིཝིཛ྄ཛྷིཏབྦོ སབྷཱཝོ རསོ, ཨཏྟནོ རསོ སརསོ, ཡཱཐཱཝོ ཡཐཱབྷཱུཏོ སརསོ ཡཱཐཱཝསརསོ, ཡོ ‘‘པཱིལ༹ནཊྛོ’’ཏིཨཱདིནཱ (པཊི. མ. ༢.༨) ཝུཏྟོ ¶ དུཀྑསཙྩཔྤབྷེདཱ ཨེཝ ཙ པུབྦནྟཱདཡོ, སོ ཨེཝ ལཀྑིཏབྦཏྟཱ ཡཱཐཱཝསརསལཀྑཎཾ. ཏཾ པཊིཝིཛ྄ཛྷིཏུཾ པཙྩཀྑཏོ ཛཱནིཏུཾ ན དེཏི.

ཏདུབྷཡནྟི པུབྦནྟཉྩེཝ ཨཔརནྟཉྩ ཨཏཱིཏཾ, ཨནཱགཏཉྩ ཁནྡྷཔཉྩཀཾ. པུབྦནྟཱཔརནྟབྷཱགཝནྟཏཱཡ ཝཱ པཙྩུཔྤནྣདྡྷབྷཱུཏོ མཛ྄ཛྷནྟོ པུབྦནྟཱཔརནྟོ. ཨཡཾ ཨཝིཛྫཱ ཨིམེ སངྑཱརཱཏི ཨིདཔྤཙྩཡཏཱཔཊིཙྩསམུཔྤནྣདྷམྨེསུ པཙྩཀྑཏོ ཛཱནནཱཀཱརདསྶནཾ. ཨེཏྠཱཏི ཨེཏེསུ དུཀྑཱདཱིསུ. ཡདིཔི ཨཝིཛྫཱ དུཀྑཱདཱིསུ ཨཱརམྨཎཀརཎཝསེནཔི པཝཏྟཏི, ཡཐཱ པན ནིརོདྷམགྒེ ཨཱརམྨཎཾ ཀཱཏུཾ ཨསཀྐོནྟཱི ཏེ ཛཱནིཏུཀཱམསྶ ཏཔྤཊིཙྪཱདནཝསེན, ཨནིརོདྷམགྒེསུ ནིརོདྷམགྒགྒཧཎཀཱརཎབྷཱཝེན ཙ པཝཏྟམཱནཱ ཏེ ཡཱཐཱཝཏོ པཊིཝིཛ྄ཛྷིཏུཾ ན དེཏི, ཨེཝཾ དུཀྑཱདཱིསུཔཱིཏི ཝེདིཏབྦཾ. ཏཐཱ ཧི ཝུཏྟཾ ‘‘པཊིཙྪཱདནཝསེནེཝ ཨིདྷཱདྷིཔྤེཏཱ’’ཏི. དུཀྑཱདིཝིསཡོ ཨནྡྷཏམཀརོ, ལོབྷཱདཱིནཉྩ ཨནྡྷཏམཀརཱནཾ པཙྩཡབྷཱུཏོ ཨདསྶནཱཀཱརོ ཨཉྙཱཎཾ.

༥༩༢. པུཉྙཱདཡོཏི པུཉྙཱབྷིསངྑཱརཱདཡོ. ཏཏྠ པུནཱཏི ཨཏྟནོ སནྟཱནཾ ཨཔུཉྙཕལཏོ, དུཀྑསཾཀིལེསཏོ ཙ སོདྷེཏཱིཏི པུཉྙཾ. ཧིཏསུཁཛ྄ཛྷཱསཡེན པུཉྙཾ ཀརོཏཱིཏི ཏནྣིཔྥཱདནེན ཀཱརཀསྶ ཨཛ྄ཛྷཱསཡཾ པཱུརེཏི, པུཛྫབྷཝཾ ནིབྦཏྟེཏཱིཏི ཝཱ པུཉྙཾ. ཨིཏི པཱུརཀོ, པུཛྫནིབྦཏྟཀོ ཙ ནིརུཏྟིནཡེན པུཉྙནྟི ཝེདིཏབྦོ. པུཉྙཉྩ སོ ཨཏྟནོ ཕལསྶ ཨབྷིསངྑརཎཊྛེན ཨབྷིསངྑཱརོ ཙཱཏི པུཉྙཱབྷིསངྑཱརོ. པུཉྙཔཊིཔཀྑཏོ ཨཔུཉྙནྟི ཝུཏྟཝིཔརིཡཱཡེན ཨཔུཉྙཱབྷིསངྑཱརོ ཝེདིཏབྦོ. སམཱདྷིཔཙྩནཱིཀཱནཾ ཨཏིདཱུརཏཱཡ ན ཨིཉྫཏི, ཨནིཉྫཉྩ ¶ བྷཝཾ ཨབྷིསངྑརོཏཱིཏི ཨཱནེཉྫཱབྷིསངྑཱརོ. ཀཱཡེན པཝཏྟིཏོ, ཀཱཡཏོ ཝཱ པཝཏྟོ, ཀཱཡསྶ ཝཱ སངྑཱརོཏི ཀཱཡསངྑཱརོ. ཝཙཱིཙིཏྟསངྑཱརེསུཔི ཨེསེཝ ནཡོ. ཏཏྠ པཋམཏྟིཀོ པརིཝཱིམཾསནསུཏྟཱདིཝསེན གཧིཏོ. ཏཏྠ ཧི ‘‘པུཉྙཾ ཙེ སངྑཱརཾ ཨབྷིསངྑརོཏི, པུཉྙཱུཔགཾ ཧོཏི ཝིཉྙཱཎ’’ནྟིཨཱདིནཱ (སཾ. ནི. ༢.༥༡) ཨཱགཏཾ. དུཏིཡཏྟིཀོ ཝིབྷངྒསུཏྟཝསེན. ཏཏྠ ཧི ‘‘ཏཡོམེ, བྷིཀྑཝེ, སངྑཱརཱ. ཀཏམེ ཏཡོ? ཀཱཡསངྑཱརོ ཝཙཱིསངྑཱརོ ཙིཏྟསངྑཱརོ’’ཏི (སཾ. ནི. ༢.༢༨) ཝུཏྟཾ.

ཝིཏྠཱརཏོ པནཱཏིཨཱདི པུཉྙཱབྷིསངྑཱརཱདཱིནཾ སརཱུཔཏོ, པབྷེདཏོ ཙ ཝིབྷཱཝནཾ. བྷཱཝནཱཝསེནེཝ པཝཏྟཱ, ན དཱནསཱིལཝསེནཱཏི ཏཏྠ ལབྦྷམཱནཾ པུཉྙཀིརིཡཝཏྠུཾ དསྶེཏི. ཨེཝཉྩ ཀཏྭཱ ཨརཱུཔཱཝཙརཙེཏནཱཔི ‘‘བྷཱཝནཱཝསེནེཝ ¶ པཝཏྟཱ’’ཏི ཝུཏྟཱ. ཡེ པན ‘‘བྷཱཝནཱཝསེནེཝཱ’’ཏི ཨཝདྷཱརཎེན ཨབྷིཉྙཱཙེཏནཾ ནིཝཏྟེཏཱིཏི ཝདནྟི, ཏདཡུཏྟཾ ཏཱསམྤི ཨཝིཛྫཱཔཙྩཡཏཱཡ ཝིཡ པུཉྙཱབྷིསངྑཱརབྷཱཝསྶ ཙ ཨིཙྪིཏཏྟཱ. ཨཉྙཐཱ ཨབྷིཉྙཱཙིཏྟུཔྤཱདསྶ པུཉྙཀིརིཡཝཏྠཱུསུ ཨསངྒཧོ ཨེཝ སིཡཱ, ན ཙ ཡུཏྟཾ ‘‘ཀུསལཉྩ པུཉྙཀིརིཡཝཏྠུཉྩ ན ཧོཏཱི’’ཏི. པཱཎཱཏིཔཱཏཱདཱིཏི ཨཱདི-སདྡེན ན ཏདཝསིཊྛཨཀུསལཀམྨཔཐཱནཾཡེཝ གཧཎཾ, ཨཐ ཁོ ཨནཝསེསཨཀུསལཀམྨསྶཱཔི གཧཎཾ དཊྛབྦཾ.

ཨིཏརེསུ པནཱཏི ཀཱཡསངྑཱརཱདཱིསུ. པུཉྙཱབྷིསངྑཱརཱདཡོ པཝཏྟམཱནཱ ཨིམེཧི དྭཱརེཧི པཝཏྟནྟཱིཏི དྭཱརཏོ པཝཏྟིདསྶནཏྠཾ. ‘‘སམཝཱིསཏི ཙེཏནཱ’’ཏི ཀསྨཱ ཝུཏྟཾ, ཡདི ཀཱཡཝཙཱིཝིཉྙཏྟིཡོ སམུཊྛཱཔེནྟིཡོ ཀུསལཱཀུསལཙེཏནཱ ཀཱཡསངྑཱརོ, ཝཙཱིསངྑཱརོཏི ཙ ཝུཙྩནྟི, ཨེཝཾ སནྟེ ཨབྷིཉྙཱཙེཏནཱཡཔི ཀུསལཱཡ ཏཐཱ པཝཏྟཱཡ ཝཙཱིསངྑཱརབྷཱཝོ ཝཏྟབྦོཏི ཙོདནཾ སནྡྷཱཡཱཧ ‘‘ཨབྷིཉྙཱཙེཏནཱ’’ཏིཨཱདི. ཨེཏྠཱཏི ཀཱཡཝཙཱིསངྑཱརགྒཧཎེ, ཀཱཡཝཙཱིསཉྩེཏནཱགྒཧཎེ ཝཱ. ན གཧིཏཱཏི ཨཊྛཀཐཱཡཾ ན གཧིཏཱ ‘‘ཨབྷིཉྙཱཙེཏནཱ ཝིཉྙཱཎསྶ པཙྩཡོ ན ཧོཏཱི’’ཏི. ཀསྨཱ པན ན ཧོཏི, ནནུ སཱཔི ཀུསལཱ, ཝིཔཱཀདྷམྨཱ ཙཱཏི? སཙྩམེཏཾ, ཨནུཔཙྪིནྣཏཎྷཱཝིཛྫམཱནེ པན སནྟཱནེ སབྱཱཔཱརཔྤཝཏྟིཡཱ ཏསྶཱ ཀུསལཏཱ, ཝིཔཱཀདྷམྨཏཱ ཙ ཝུཏྟཱ, ན ཝིཔཱཀུཔྤཱདནེན. སཱ པན ཝིཔཱཀཾ ཨུཔྤཱདེནྟཱི རཱུཔཱཝཙརམེཝ ཨུཔྤཱདེཡྻ. ན ཧི ཨཉྙབྷཱུམིཀཾ ཀམྨཾ ཨཉྙབྷཱུམིཀཾ ཝིཔཱཀཾ ཨུཔྤཱདེཏཱིཏི. ཨཏྟནཱ སདིསཱརམྨཎཾ ཏིཊྛཱནིཀམེཝ ཙ ཨུཔྤཱདེཡྻ ཙིཏྟུཔྤཱདཀཎྜེ རཱུཔཱཝཙརཝིཔཱཀསྶ ཀམྨསདིསཱརམྨཎསྶེཝ ཝུཏྟཏྟཱ. ན ཙ རཱུཔཱཝཙརཝིཔཱཀོ པརིཏྟཱདིཨཱརམྨཎོ ཨཏྠི, ཨབྷིཉྙཱཙེཏནཱ ¶ ཙ པརིཏྟཱདིཨཱརམྨཎཱཝ ཧོཏི. ཏསྨཱ ཝིཔཱཀཾ ན ཨུཔྤཱདེཏཱིཏི ཝིཉྙཱཡཏི. ཀསིཎེསུ ཙ ཨུཔྤཱདིཏསྶ ཙཏུཏྠཛ྄ཛྷཱནསམཱདྷིསྶ ཨཱནིསཾསབྷཱུཏཱ ཨབྷིཉྙཱ. ཡཐཱཧ ‘‘སོ ཨེཝཾ སམཱཧིཏེ ཙིཏྟེ’’ཏིཨཱདི (དཱི. ནི. ༡.༢༤༤-༢༤༥; མ. ནི. ༡.༣༨༤-༣༨༦, ༤༣༡-༤༣༣; པཱརཱ. ༡༢). ཏསྨཱ སམཱདྷིཕལསདིསཱ སཱ, ན ཙ ཕལཾ དེཏི. དཱནསཱིལཱནིསཾསབྷཱུཏོ ཏསྨིཾ བྷཝེ པཙྩཡལཱབྷོ ཝིཡཱཏི སཱཔི ཝིཔཱཀཾ ན ཨུཔྤཱདེཏཱིཏི.

‘‘ཡཐཱ ཙ ཨབྷིཉྙཱཙེཏནཱ, ཨེཝཾ ཨུདྡྷཙྩཙེཏནཱཔི ན ཧོཏཱི’’ཏི ཨིདཾ ཨུདྡྷཙྩསཧགཏདྷམྨེ ཝིསུཾ ཨུདྡྷརིཏྭཱ ‘‘ཏེསཾ ཝིཔཱཀེ ཉཱཎཾ ཨཏྠཔཊིསམྦྷིདཱ’’ཏི (ཝིབྷ. ༧༢༥) ཝུཏྟཏྟཱ ¶ ཝིཙཱརེཏབྦཾ. སཱ པན ཝིཙཱརཎཱ ཧེཊྛཱ ཁནྡྷནིདྡེསཝཎྞནཱཡཾ ཨཀུསལཀཐཱཡཾ ཝིཙཱརིཏཱ ཨེཝཱཏི ཏཏྠ ཝིཙཱརིཏནཡེནེཝ ཝེདིཏབྦཱ. ཨཔིཙེཏྠ ཡདེཀེ ཝིབྷཛྫ ཝདནྟི, དསྶནབྷཱཝནཱནཾ ཨབྷཱཝེཔི ཡེསཾ པུཐུཛྫནཱནཾ, སེཀྑཱནཉྩ དསྶནབྷཱཝནཱཧི བྷཝིཏབྦཾ, ཏེསཾ ཏདུཔྤཏྟིཀཱལེ ཏེཧི པཧཱཏུཾ སཀྐུཎེཡྻཱ ཨཀུསལཱ དསྶནེན པཧཱཏབྦཱ, བྷཱཝནཱཡ པཧཱཏབྦཱཏི ཙ ཝུཙྩནྟི. པུཐུཛྫནཱནཾ པན བྷཱཝནཱཡ ཨབྷཱཝཱ བྷཱཝནཱཡ པཧཱཏབྦཙིནྟཱ ནཏྠི. ཏེན ཏེསཾ པཝཏྟམཱནཱ དསྶནེན པཧཱཏུཾ ཨསཀྐུཎེཡྻཱཔི བྷཱཝནཱཡ པཧཱཏབྦཱཏི ན ཝུཙྩནྟི. ཡདི ཝུཙྩེཡྻུཾ, དསྶནེནཔཧཱཏབྦཱ བྷཱཝནཱཡཔཧཱཏབྦཱནཾ ཀེསཉྩི ཀེནཙི ཀདཱཙི ཨཱརམྨཎཨཱརམྨཎཱདྷིཔཏིཨུཔནིསྶཡཔཙྩཡེཧི པཙྩཡོ བྷཝེཡྻུཾ? ན ཙ པཊྛཱནེ དསྶནེནཔཧཱཏབྦཱ བྷཱཝནཱཡཔཧཱཏབྦཱནཾ ཀེནཙི པཙྩཡེན པཙྩཡོཏི ཝུཏྟཱ. སེཀྑཱནཾ པན ཝིཛྫམཱནཱ བྷཱཝནཱཡ པཧཱཏུཾ སཀྐུཎེཡྻཱཏི བྷཱཝནཱཡ པཧཱཏབྦཱ. ཏེནེཝ སེཀྑཱནཾ དསྶནེན པཧཱཏབྦཱ, ཙཏྟཏྟཱ ཝནྟཏྟཱ མུཏྟཏྟཱ པཧཱིནཏྟཱ པཊིནིསྶཊྛཏྟཱ ཨུཀྑེཊིཏཏྟཱ སམུཀྑེཊིཏཏྟཱ ཨསྶཱདིཏབྦཱ, ཨབྷིནནྡིཏབྦཱ ཙ ན ཧོནྟི. པཧཱིནཏཱཡ ཨེཝ སོམནསྶཧེཏུབྷཱུཏཱ, ཨཝིཀྑེཔཧེཏུབྷཱུཏཱ ཙ ན དོམནསྶཾ, ཨུདྡྷཙྩཉྩ ཨུཔྤཱདེནྟཱིཏི ན ཏེ ཏེསཾ ཨཱརམྨཎཨཱརམྨཎཱདྷིཔཏིབྷཱཝཾ, པཀཏཱུཔནིསྶཡབྷཱཝཉྩ གཙྪནྟི. ན ཧི པཧཱིནེ ཨུཔནིསྶཱཡ ཨརིཡོ རཱགཱདིཀིལེསེ ཨུཔྤཱདེཏི.

ཝུཏྟཉྷེཏཾ ‘‘སོཏཱཔཏྟིམགྒེན ཡེ ཀིལེསཱ པཧཱིནཱ, ཏེ ཀིལེསེ ན པུནེཏི ན པཙྩེཏི ན པཙྩཱགཙྪཏི…པེ… ཨརཧཏྟམགྒེན…པེ… པཙྩཱགཙྪཏཱི’’ཏི (མཧཱནི. ༨༠; ཙཱུལ༹ནི. མེཏྟགཱུམཱཎཝཔུཙྪཱནིདྡེས ༢༧). ན ཙ པུཐུཛྫནཱནཾ དསྶནེན པཧཱཏུཾ སཀྐུཎེཡྻཱ, ཨིཏརེསཾ ན ཀེནཙི པཙྩཡེན པཙྩཡོ ཧོནྟཱིཏི ན སཀྐཱ ཝཏྟུཾ ‘‘དིཊྛིཾ ཨསྶཱདེཏི ཨབྷིནནྡཏི, ཏཾ ཨཱརབྦྷ རཱགོ ཨུཔྤཛྫཏི, དིཊྛི, ཝིཙིཀིཙྪཱ, ཨུདྡྷཙྩཾ ཨུཔྤཛྫཏི. ཝིཙིཀིཙྪཾ ཨཱརབྦྷ ཝིཙིཀིཙྪཱ ¶ , དིཊྛི, ཨུདྡྷཙྩཾ ཨུཔྤཛྫཏཱི’’ཏི (པཊྛཱ. ༡.༡.༤༠༧) དིཊྛིཝིཙིཀིཙྪཱནཾ ཨུདྡྷཙྩཱརམྨཎཔཙྩཡབྷཱཝསྶ ཝུཏྟཏྟཱ. ཨེཏྠ ཧི ཨུདྡྷཙྩནྟི ཨུདྡྷཙྩསཧགཏཙིཏྟུཔྤཱདཾ སནྡྷཱཡ ཝུཏྟཾ. ཨེཝཉྩ ཀཏྭཱ ཨདྷིཔཏིཔཙྩཡནིདྡེསེ ‘‘དིཊྛིཾ གརུཾ ཀཏྭཱ ཨསྶཱདེཏི ཨབྷིནནྡཏི, ཏཾ གརུཾ ཀཏྭཱ རཱགོ ཨུཔྤཛྫཏི, དིཊྛི ཨུཔྤཛྫཏཱི’’ཏི (པཊྛཱ. ༡.༡.༤༡༥) ཨེཏྟཀམེཝ ¶ ཝུཏྟཾ, ན ཝུཏྟཾ ‘‘ཨུདྡྷཙྩཾ ཨུཔྤཛྫཏཱི’’ཏི. ཏསྨཱ དསྶནབྷཱཝནཱཧི པཧཱཏབྦཱནཾ ཨཏཱིཏཱདིབྷཱཝེན ན ཝཏྟབྦཏྟེཔི ཡཱདིསཱནཾ ཏཱཧི ཨནུཔྤཏྟིདྷམྨཏཱ ཨཱཔཱདེཏབྦཱ, ཏེསུ པུཐུཛྫནེསུ ཝཏྟམཱནཱ དསྶནཾ ཨཔེཀྑིཏྭཱ ཏེན པཧཱཏུཾ སཀྐུཎེཡྻཱ དསྶནེན པཧཱཏབྦཱ, སེཀྑེསུ ཝཏྟམཱནཱ བྷཱཝནཾ ཨཔེཀྑིཏྭཱ ཏཱཡ པཧཱཏུཾ སཀྐུཎེཡྻཱ བྷཱཝནཱཡ པཧཱཏབྦཱ.

ཏེསུ བྷཱཝནཱཡ པཧཱཏབྦཱ སཧཱཡཝིརཧཱ ཝིཔཱཀཾ ན ཛནཡནྟཱིཏི བྷཱཝནཱཡ པཧཱཏབྦཙེཏནཱཡ ནཱནཱཀྑཎིཀཀམྨཔཙྩཡབྷཱཝོ ན ཝུཏྟོ, ཨཔེཀྑིཏབྦདསྶནབྷཱཝནཱརཧིཏཱནཾ པན པུཐུཛྫནེསུ ཨུཔྤཛྫམཱནཱནཾ སཀབྷཎྜེ ཚནྡརཱགཱདཱིནཾ, ཨུདྡྷཙྩསཧགཏཙིཏྟུཔྤཱདསྶ ཙ སཾཡོཛནཏྟཡཏདེཀཊྛཀིལེསཱནཾ ཨནུཔཙྪིནྣཏཱཡ ཨཔརིཀྑཱིཎསཧཱཡཱནཾ ཝིཔཱཀུཔྤཱདནཾ ན སཀྐཱ པཊིསེདྷིཏུནྟི ཨུདྡྷཙྩསཧགཏདྷམྨཱནཾ ཝིཔཱཀོ ཝིབྷངྒེ ཝུཏྟོ. ཡདི ཨེཝཾ, ཨཔེཀྑིཏབྦདསྶནབྷཱཝནཱརཧིཏཱནཾ ཨཀུསལཱནཾ ནེཝདསྶནེན-ནབྷཱཝནཱཡཔཧཱཏབྦཏཱཡ ནཝཏྟབྦཏཱ ཨཱཔཛྫཏཱིཏི? ནཱཔཛྫཏི, ཨཔྤཧཱཏབྦཱནཾ ‘‘ནེཝདསྶནེན-ནབྷཱཝནཱཡ པཧཱཏབྦཱ’’ཏི (དྷ. ས. ཏིཀམཱཏིཀཱ ༩) ཝུཏྟཏྟཱ, ཨཔྤཧཱཏབྦཝིརུདྡྷསབྷཱཝཏྟཱ ཙ ཨཀུསལཱནཾ.

ཨེཝམྤི ཏེ ཨིམསྨིཾ ཏིཀེ ‘‘ནཝཏྟབྦཱ’’ཏི ཝཏྟབྦཱ ཨཱཔཛྫནྟཱིཏི? ནཱཔཛྫནྟི, ཙིཏྟུཔྤཱདཀཎྜེ དསྶིཏཱནཾ དྭཱདསཨཀུསལཙིཏྟུཔྤཱདཱནཾ དྭཱིཧི པདེཧི སངྒཧིཏཏྟཱ. ཡཐཱ ཧི དྷམྨཝསེན སབྦེ སངྑཏདྷམྨཱ སངྒཧིཏཱཏི ཨུཔྤནྣཏྟིཀེ ཀཱལཝསེན ཨསངྒཧིཏཱཔི ཨཏཱིཏཱ ‘‘ནཝཏྟབྦཱ’’ཏི ན ཝུཏྟཱ ཙིཏྟུཔྤཱདརཱུཔབྷཱཝེན གཧིཏེསུ ནཝཏྟབྦསྶ ཨབྷཱཝཱ, ཨེཝམིདྷཱཔི ཙིཏྟུཔྤཱདབྷཱཝེན གཧིཏེསུ ནཝཏྟབྦསྶ ཨསངྒཧིཏསྶ ཨབྷཱཝཱ ནཝཏྟབྦཏཱ ནཝུཏྟཱཏི ཝེདིཏབྦཱ. ཡཏྠ ཧི ཙིཏྟུཔྤཱདོ ཀོཙི ནིཡོགཏོ ནཝཏྟབྦོ ཨཏྠི, ཏཏྠ ཏེསཾ ཙཏུཏྠོ ཀོཊྛཱསོ ཨཏྠཱིཏི ཡཐཱཝུཏྟཔདེསུ ཝིཡ ཏཏྠཱཔི བྷིནྡིཏྭཱ བྷཛཱཔེཏབྦཙིཏྟུཔྤཱདེ བྷིནྡིཏྭཱ བྷཛཱཔེཏི ‘‘སིཡཱ ནཝཏྟབྦཱ པརིཏྟཱརམྨཎཱ’’ཏིཨཱདིནཱ (དྷ. ས. ༡༤༢༢). ཏདབྷཱཝཱ ཨུཔྤནྣཏྟིཀེ, ཨིདྷ ཙ ཏཐཱ ན ཝུཏྟཱ.

ཨཐ ¶ ཝཱ ཡཐཱ སཔྤཊིགྷེཧི སམཱནསབྷཱཝཏྟཱ རཱུཔདྷཱཏུཡཾ ཏཡོ མཧཱབྷཱུཏཱ སཔྤཊིགྷཱཏི ཝུཏྟཱ. ཡཐཱཧ ‘‘ཨསཉྙསཏྟཱནཾ ཨནིདསྶནསཔྤཊིགྷཾ ཨེཀཾ མཧཱབྷཱུཏཾ པཊིཙྩ དྭེ མཧཱབྷཱུཏཱ, དྭེ མཧཱབྷཱུཏེ པཊིཙྩ ཨེཀཾ མཧཱབྷཱུཏ’’ནྟི ¶ , ཨེཝཾ པུཐུཛྫནཱནཾ པཝཏྟམཱནཱ བྷཱཝནཱཡ པཧཱཏབྦསམཱནསབྷཱཝཱ བྷཱཝནཱཡ པཧཱཏབྦཱཏི ཝུཙྩེཡྻུནྟི? ནཏྠི ནཝཏྟབྦཏཱཔསངྒོ. ཨེཝཉྩ སཏི པུཐུཛྫནཱནཾ པཝཏྟམཱནཱཔི བྷཱཝནཱཡ པཧཱཏབྦཱ སཀབྷཎྜེ ཚནྡརཱགཱདཡོ པརབྷཎྜེ ཚནྡརཱགཱདཱིནཾ ཨུཔནིསྶཡཔཙྩཡོ, རཱགོ ཙ རཱགདིཊྛཱིནཾ ཨདྷིཔཏིཔཙྩཡོཏི ཨཡམཏྠོ ལདྡྷོ ཧོཏི. ཡཐཱ པན ཨཕོཊྛབྦཏྟཱ རཱུཔདྷཱཏུཡཾ ཏཡོ མཧཱབྷཱུཏཱ ན པརམཏྠཏོ སཔྤཊིགྷཱ, ཨེཝཾ ཨཔེཀྑིཏབྦབྷཱཝནཱརཧིཏཱ པུཐུཛྫནེསུ ཝཏྟམཱནཱ སཀབྷཎྜེ ཚནྡརཱགཱདཡོ ན པརམཏྠཏོ བྷཱཝནཱཡ པཧཱཏབྦཱཏི བྷཱཝནཱཡ པཧཱཏབྦཱནཾ ནཱནཱཀྑཎིཀཀམྨཔཙྩཡཏཱ ན ཝུཏྟཱ. ན ཙ དསྶནེནཔཧཱཏབྦཱ བྷཱཝནཱཡཔཧཱཏབྦཱནཾ ཀེནཙི པཙྩཡེན པཙྩཡོཏི ཝུཏྟཱ. ཡེ ཧི དསྶནེན པཧཱཏབྦཔཙྩཡཱ ཀིལེསཱ, ན ཏེ དསྶནཏོ ཨུདྡྷཾ པཝཏྟནྟི. དསྶནེན པཧཱཏབྦཔཙྩཡསྶཔི པན ཨུདྡྷཙྩསཧགཏསྶ སཧཱཡཝེཀལླམཏྟམེཝ དསྶནེན ཀཏཾ, ན ཏསྶ ཀོཙི བྷཱཝོ དསྶནེན ཨནུཔྤཏྟིདྷམྨཏཾ ཨཱཔཱདིཏོཏི ཏསྶ ཨེཀནྟབྷཱཝནཱཡཔཧཱཏབྦཏཱ ཝུཏྟཱ. ཏསྨཱ ཏསྶ ཏཱདིསསྶེཝ སཏི སཧཱཡེ ཝིཔཱཀུཔྤཱདནཝཙནཾ, ཨསཏི ཙ ཝིཔཱཀཱནུཔྤཱདནཝཙནཾ ན ཝིརུཛ྄ཛྷཏཱིཏི.

ཏཡིདཾ སབྦཾ ཏེསཾ ཨཱཙརིཡཱནཾ ཨཧོཔུརིསིཀཱམཏྟནྟི ཨཔརེ. ཀསྨཱ? ཨུདྡྷཙྩསཧགཏསྶ ཨེཀནྟེན བྷཱཝནཱཡ པཧཱཏབྦཏྟཱ. ཨེཝཉྷི ཝུཏྟཾ བྷགཝཏཱ ‘‘ཀཏམེ དྷམྨཱ བྷཱཝནཱཡ པཧཱཏབྦཱ? ཨུདྡྷཙྩསཧགཏོ ཙིཏྟུཔྤཱདོ’’ཏི (དྷ. ས. ༡༤༠༦). ཡདི ཧི ཏཾ ཨིཙྪིཏཾ སིཡཱ, ཡཐཱ ཨཏཱིཏཱརམྨཎཏྟིཀེ ‘‘ནིཡོགཱ ཨནཱགཏཱརམྨཎཱ ནཏྠཱི’’ཏི (དྷ. ས. ༡༤༣༣) ཝཏྭཱ ཝིབྷཛྫ ཝུཏྟཾ, ཨེཝམིདྷཱཔི ‘‘ནིཡོགཱ བྷཱཝནཱཡ པཧཱཏབྦཱ ནཏྠཱི’’ཏི ཝཏྭཱ ‘‘ཨུདྡྷཙྩསཧགཏོ སིཡཱ བྷཱཝནཱཡ པཧཱཏབྦོ, སིཡཱ ན ཝཏྟབྦོ’’ཏི ཝདེཡྻ. ཡཱ ཙ ཏཾ སམཏྠེནྟེན ‘‘ཡདི ཝུཙྩེཡྻུ’’ནྟིཨཱདིནཱ ཡུཏྟི ཝུཏྟཱ, སཱཔི ཨཡུཏྟི. ཀསྨཱ? ཡསྨཱ དསྶནེན པཧཱཏབྦཱརམྨཎཱནཾ རཱགདིཊྛིཝིཙིཀིཙྪཱཨུདྡྷཙྩཱནཾ དསྶནེན པཧཱཏབྦབྷཱཝོ ཨེཝ ཨིཙྪིཏོཏི. ཡཾ པན ཨུདྡྷཙྩགྒཧཎེན པཱལི༹ཡཾ ཨུདྡྷཙྩསཧགཏོ ཙིཏྟུཔྤཱདོ ཝུཏྟོཏི ཝཏྭཱ ཏཾ སཱདྷེཏུཾ ཨདྷིཔཏིཔཙྩཡནིདྡེསེ ཨུདྡྷཙྩསྶ ཨནུདྡྷརཎཾ ནིབནྡྷནཾ ཝུཏྟཾ, ཏམྤི ཨནིབནྡྷནཾ པཊྛཱནེ སཱཝསེསཔཱཋདསྶནཏོ. ཏཐཱ ཧི ‘‘ཨཏཱིཏོ དྷམྨོ པཙྩུཔྤནྣསྶ དྷམྨསྶ, ཨནཱགཏོ དྷམྨོ པཙྩུཔྤནྣསྶ དྷམྨསྶ ཨཱརམྨཎཔཙྩཡེན པཙྩཡོ’’ཏི ¶ (པཊྛཱ. ༢.༡༨.༢) ཨེཏེསཾ ཝིབྷངྒེ ཙེཏོཔརིཡཉཱཎགྒཧཎཾ ¶ ཀཏྭཱ ‘‘པཙྩུཔྤནྣོ དྷམྨོ པཙྩུཔྤནྣསྶ དྷམྨསྶཱ’’ཏི ཨེཏསྶ ཝིབྷངྒེ ལབྦྷམཱནམྤི ན ཨུདྡྷཊཾ.

བྷཱཝནཱཡ པཧཱཏབྦསྶ ཝིཔཱཀདཱནཾ པཏི དསྶནེན པཧཱཏབྦསྶ སཧཱཡབྷཱཝཱུཔགམནཾ ཝིཙཱརེཏབྦཾ. ཀིཾ ཨཝིཛྫཱདི ཝིཡ དཱནསཱིལཱདཱིནཾ ཨུཔྤཏྟིཡཱཡེཝ ཝིཔཱཀདཱནསཱམཏྠིཡཱ ཋཱནཝསེན དསྶནེནཔཧཱཏབྦཾ བྷཱཝནཱཡཔཧཱཏབྦསྶ སཧཱཡབྷཱཝཾ ཨུཔགཙྪཏི, ཨུདཱཧུ ཀིལེསཱ ཝིཡ ཀམྨསྶ པཊིསནྡྷིདཱནཾ པཏཱིཏི? ཀིཉྩེཏྠ – ཡདི ཏཱཝ པུརིམོ པཀྑོ པཧཱིནདསྶནཔྤཧཱཏབྦཏྟཱ སེཀྑསནྟཱནེ པཝཏྟིནོ བྷཱཝནཱཔཧཱཏབྦསྶ ཀིརིཡབྷཱཝོ ཨཱཔཛྫཏི པཧཱིནཱཝིཛྫཱཏཎྷཱམཱནེ སནྟཱནེ པཝཏྟདཱནཱདི ཝིཡ. ཨཐ དུཏིཡོ, ཏསྶཱཔི དསྶནེནཔཧཱཏབྦཏཱ ཨཱཔཛྫཏི ཨཔཱཡགམནཱིཡསབྷཱཝཱནཏིཝཏྟནཏོ, ཏསྨཱ ཧེཊྛཱ ཝིཙཱརིཏནཡེནེཝ ཨུདྡྷཙྩསཧགཏསྶ ཝིཔཱཀདཱནཾ པཏི པཱལི༹ཡཱ, ཨཊྛཀཐཱཡ ཙ ཨཝིརུཛ྄ཛྷནཝསེནེཏྠ ཨཏྠཝིནིཙྪཡོ ཝེདིཏབྦོ.

སཱཔཱིཏི ཨུདྡྷཙྩཙེཏནཱཔི. ཝིཉྙཱཎསྶ པཙྩཡབྷཱཝེཏི སམྤུཎྞསྶ ཝིཔཱཀཝིཉྙཱཎསྶ པཙྩཡབྷཱཝེ. ཡདི ཨཔནེཏབྦཱ, ཀསྨཱ ‘‘སམཝཱིསཏི ཙེཏནཱ’’ཏི ཝུཏྟནྟི ཏསྶ ཀཱརཎཾ དསྶེནྟོ ཨཱཧ ‘‘ཨཝིཛྫཱཔཙྩཡཱ པན སབྦཱཔེཏཱ ཧོནྟཱི’’ཏི. ཨབྷིཉྙཱཙེཏནཱཡཔི པཙྩཡབྷཱཝཾ དསྶེཏི. ཡདི ཨེཝཾ ཨབྷིཉྙཱཙེཏནཱཡ སཧ ཨེཀཝཱིསཏཱིཏི ཝཏྟབྦཾ, ན, ཏཐཱ ཨཝཙནསྶ ཝུཏྟཀཱརཎཏྟཱ. ཏཾ པན ཨིཏརཱཝཙནསྶཱཔི ཀཱརཎནྟི སམཱནརཱུཔཱཡ ཨེཀིསྶཱ ཨཝཙནེ ཡཾ ཀཱརཎཾ ཨཔེཀྑིཏྭཱ ཨེཀཱ ན ཝུཏྟཱ, ཏེན ཀཱརཎེན ཝུཏྟཱཡཔི ཨཝཏྟབྦཏཾ དསྶེཏི. ཨཡཾ ཏིཀོཏི ཀཱཡསངྑཱརཏྟིཀོ. པུརིམཏྟིཀནྟི པུཉྙཱབྷིསངྑཱརཏྟིཀཾ. པཝིསཏཱིཏི ཀཐཾ པཝིསཏི. པུཉྙཱབྷིསངྑཱརོ ཧི ཨཊྛཀཱམཱཝཙརཙེཏནཱཔབྷེདོ ཀཱཡདུཙྩརིཏཏོ ཝིརམནྟསྶ སིཡཱ ཀཱཡསངྑཱརོ, ཝཙཱིདུཙྩརིཏཏོ ཝིརམནྟསྶ སིཡཱ ཝཙཱིསངྑཱརོ, མནོདྭཱརེ པན ཨུཔྤནྣཱ ཏེརསཔི ཙེཏནཱ པུཉྙཱབྷིསངྑཱརོ ཙ ཧོཏི ཙིཏྟསངྑཱརོ ཙ. ཨཔུཉྙཱབྷིསངྑཱརོཔི ཀཱཡདུཙྩརིཏཝསེན པཝཏྟིཡཾ སིཡཱ ཀཱཡསངྑཱརོ, ཝཙཱིདུཙྩརིཏཝསེན པཝཏྟིཡཾ སིཡཱ ཝཙཱིསངྑཱརོ, དྭེ དྭཱརཱནི མུཉྩིཏྭཱ མནོདྭཱརེ པཝཏྟིཡཾ སིཡཱ ཙིཏྟསངྑཱརོ, ཨཱནེཉྫཱབྷིསངྑཱརོ ཙཱཏི ཨེཝཾ དུཏིཡཏྟིཀོ པུརིམཏྟིཀམེཝ ¶ པཝིསཏི. ཏེན ཝུཏྟཾ ‘‘ཨཏྠཏོ པུཉྙཱབྷིསངྑཱརཱདཱིནཾཡེཝ ཝསེན ཨཝིཛྫཱཡ པཙྩཡབྷཱཝོ ཝེདིཏབྦོ’’ཏི.

༥༩༣. ཨཝིཛྫཱབྷཱཝེ ¶ བྷཱཝཏོཏི ཨཝིཛྫཱཡ ཨཏྠིབྷཱཝེ སངྑཱརཱནཾ བྷཱཝཏོ. ན ཧི ཨཝིཛྫཱཡ ཨསཏི ཀདཱཙི སངྑཱརཱ སམྦྷཝནྟི. ཨིདཱནི ཏཾ ཨཝིཛྫཱཡ བྷཱཝཾ དསྶེནྟོ ‘‘ཨཉྙཱཎཾ ཨཔྤཧཱིནཾ ཧོཏཱི’’ཏི ཨཱཧ. ཏེན མགྒེན ཨནིརོདྷོ ཨིདྷ ཨཝིཛྫཱཡ ཨཏྠིབྷཱཝོ, ན དྷརམཱནཏཱ ཨེཝཱཏི དསྶེཏི. སྭཱཡམཏྠོ ཧེཊྛཱ ཝིབྷཱཝིཏོཡེཝ. ‘‘ཨཝིཛྫཱསངྑཱཏ’’ནྟི ཙ ཨིམིནཱ ཉཱཎཱབྷཱཝཱདིཾ ནིཝཏྟེཏི. ཨཡཉྷི ཨ-ཀཱརོ ‘‘ཨཧེཏུཀཱ དྷམྨཱ (དྷ. ས. དུཀམཱཏིཀཱ ༢) ཨབྷིཀྑུཀོ ཨཱཝཱསོ’’ཏིཨཱདཱིསུ (ཙཱུལ༹ཝ. ༧༦) ཏཾཡོགནིཝཏྟིཡཾ དིསྶཏི. ཨབྷཱཝོ ཧེཏྠ དཱིཔིཏོ. ‘‘ཨཔྤཙྩཡཱ དྷམྨཱ’’ཏི (དྷ. ས. དུཀམཱཏིཀཱ ༧) ཏཾསམྦནྡྷིཏཱནིཝཏྟིཡཾ. པཙྩཡུཔྤནྣཉྷི པཙྩཡསམྦནྡྷཱིཏི ཨཔྤཙྩཡུཔྤནྣཏྟཱཏི ཏཾསམྦནྡྷིཏཱ ཨེཏྠ ཛོཏཱིཡཏི. ‘‘ཨནིདསྶནཱ དྷམྨཱ’’ཏི (དྷ. ས. དུཀམཱཏིཀཱ ༩) ཏཾསབྷཱཝནིཝཏྟིཡཾ. ནིདསྶནཉྷི དཊྛབྦཏཱ. ཨཐ ཙཀྑུཝིཉྙཱཎཾ ནིདསྶནཾ ན པསྶཏཱིཏི ཏགྒཧེཏབྦཏཱནིཝཏྟིཡཾ. ཏཐཱ ‘‘ཨནཱསཝཱ དྷམྨཱ’’ཏི (དྷ. ས. དུཀམཱཏིཀཱ ༡༥). ‘‘ཨཔྤཊིགྷཱ དྷམྨཱ (དྷ. ས. དུཀམཱཏིཀཱ ༡༠), ཨནཱརམྨཎཱ དྷམྨཱ’’ཏི (དྷ. ས. དུཀམཱཏིཀཱ ༥༥) ཏཾཀིཙྩནིཝཏྟིཡཾ. ‘‘ཨརཱུཔིནོ དྷམྨཱ (དྷ. ས. ཏིཀམཱཏིཀཱ ༡༡), ཨཙེཏསིཀཱ དྷམྨཱ’’ཏི (དྷ. ས. དུཀམཱཏིཀཱ ༥༧) ཏབྦྷཱཝནིཝཏྟིཡཾ. ཏདཉྙཐཱ ཧི ཨེཏྠ པཀཱསཱིཡཏི. ‘‘ཨམནུསྶོ’’ཏི (དཱི. ནི. ༢.༣༢༡) ཏབྦྷཱཝམཏྟནིཝཏྟིཡཾ. མནུསྶཏྟམཏྟཾ ནཏྠི, ཨཉྙཾ སམཱནནྟི སདིསཏཱ ཧེཏྠ སཱུཙཱིཡཏི. ‘‘ཨསྶམཎོ སམཎཔཊིཉྙོ (ཨ. ནི. ༣.༡༣, ༢༧; པུ. པ. ༩༡, ༡༢༤), ཨཔུཏྟོ’’ཏི ཏཐཱ སམྦྷཱཝནཱིཡགུཎནིཝཏྟིཡཾ. གརཧཱ ཧི ཨེཏྠ ཉཱཡཏི. ‘‘ཀཙྩི བྷོཏོ ཨནཱམཡཾ (ཛཱ. ༡.༡༥.༡༤༦; ༢.༢༠.༡༢༩), ཨནུདརཱ ཀཉྙཱ’’ཏི ཏདནཔྤབྷཱཝནིཝཏྟིཡཾ. ‘‘ཨནུཔྤནྣཱ དྷམྨཱ’’ཏི (དྷ. ས. ཏིཀམཱཏིཀཱ ༡༧) ཏཾསདིསབྷཱཝནིཝཏྟིཡཾ. ཨཏཱིཏཱནཉྷི ཨུཔྤནྣཔུབྦཏྟཱ, ཨུཔྤཱདིདྷམྨཱནཉྩ པཙྩཡེཀདེསནིབྦཏྟིཡཱ ཨཱརདྡྷུཔྤཱདབྷཱཝཱ, ཀཱལཝིནིམུཏྟསྶ ཙ ཝིཛྫམཱནཏྟཱ ཨུཔྤནྣཱནུཀཱུལཏཱ, པགེཝ པཙྩུཔྤནྣཱནནྟི ཏབྦིདྷུརབྷཱཝོ ཨེཏྠ ཝིཉྙཱཡཏི. ‘‘ཨསེཀྑཱ དྷམྨཱ’’ཏི (དྷ. ས. ཏིཀམཱཏིཀཱ ༡༡) ཏདཔརིཡོསཱནནིཝཏྟིཡཾ. ཏནྣིཊྛཱནཉྷེཏྠ པཀཱསཱིཡཏི. ཨིམེསཾ པན ཨཏྠཱནཾ ཨསམྦྷཝཏོ པཱརིསེསེན ཡཐཱ ཀུསལཔཊིཔཀྑཱ དྷམྨཱ ཨཀུསལཱ, ཨེཝཾ ཝིཛྫཱཔཊིཔཀྑཱ ཨཝིཛྫཱཏི ཀཏྭཱ ཉཱཎཔཊིཔཀྑོ དྷམྨོ ཨཉྙཱཎནྟི ཝེདིཏབྦཾ.

སུཁསཉྙཱཡ ¶ གཧེཏྭཱ དུཀྑདུཀྑཝིཔརིཎཱམདུཀྑསངྑཱརདུཀྑཏཱཧི ཝིཉྙཱུཧི དུཀྑནྟྭེཝ གཧེཏབྦཾ སཾསཱརདུཀྑཾ སུཁནྟི སཉྙཱཡ ཨབྷིནིཝིསིཏྭཱ, ཨེཏེན ཏཏྠ ཏཎྷཱཔཝཏྟིཾ དསྶེཏི. ཨཱརབྷཏཱིཏི ¶ ནིབྦཏྟེཏི. ཏཎྷཱཔརིཀྑཱརེཏི ཏཎྷཱཡ ‘‘སུཁཾ སུབྷ’’ནྟིཨཱདིནཱ སངྑཏེ པརིཀྑཏེ, ཨལངྐཏེཏི ཨཏྠོ. ཏཎྷཱ ཧི དུཀྑསྶ སམུདཡོཏི ཨཛཱནནྟོ བཱལོ ‘‘ཨཧོ ཝཏཱཧཾ ཀཱཡསྶ བྷེདཱ པརཾ མརཎཱ ཁཏྟིཡམཧཱསཱལཱནཾ སཧབྱཏཾ ཨུཔཔཛྫེཡྻ’’ནྟིཨཱདིནཱ (མ. ནི. ༡.༤༤༢) པརིཏསྶནྟོ ཀཱཡསངྑཱརེ པརིཀྑརོཏི. ཏཎྷཱཔརིཀྑཱརེཏི ཝཱ ཏཎྷཱཡ པརིཝཱརབྷཱུཏེ. ཏཎྷཱཝཏྠུཾ ཧི ཙཀྑཱདིཾ, རཱུཔཱདིཉྩ ཨབྷིསངྑརིཏྭཱ ཏཾསམངྒཱིནཾ དེནྟཱ སངྑརཱ ཏཎྷཱཡ ཨུཔནེནྟཱ ཏསྶཱ པརིཝཱརཱ ཝིཡ ཧོནྟཱིཏི. གཏིཝིསེསེ བྲཧྨལོཀཱདིཀེ. ཨནེཀསཏཔསུབདྡྷབྷིཾསནོ ཝཱཛཔེཡྻཱདིཀོ ཡཉྙོ. ཨམརཎཏྠཱཏི གཧིཏཱ དུཀྐརཀིརིཡཱ ཨམརཏཔོ. ཨམརོ ཝཱ དེཝོ ཝཱ བྷཝེཡྻཾ, དེཝཉྙཏརོ ཝཱཏི པཝཏྟིཏཱ ཝཏཙརིཡཱ ཨམརཏཔོ. དུཀྑཏྟཱ ཝཱ མརོ མཱརཀོ ཏཔོ ཨམརཏཔོ. དིཊྛེ ཨདིཊྛསདྡོ ཝིཡ མརེ ཨམརསདྡོ དཊྛབྦོ.

ཛཱཏིཨཱདིཔཔཱཏདུཀྑཛནནཏོ མརུཔྤཔཱཏསདིསཏཱ པུཉྙཱབྷིསངྑཱརསྶ ཝུཏྟཱ. ‘‘མཧཱཔརིལཱ༹ཧཛནིཀ’’ནྟི ཨིམིནཱ ཨནུདཧནཊྛེན ཏིཎུཀྐཱསདིསཏཾ པུཉྙཕལསྶ དསྶེཏི. ཨཔྤསྶཱདཏཉྩཱཏི ཙ-སདྡེན ཨདྷིཀུཊྚནཝིནིཝིཛ྄ཛྷནཨངྒཔཙྩངྒཔལིབྷཉྫནཱདིཾ སངྒཎྷཱཏི. ཏཔྤཙྩཡནྟི ཏསྶ ཝིཔརིཎཱམདུཀྑསབྷཱཝསྶ སུགཏིཕལསྶ པཙྩཡབྷཱུཏཾ. རམཎཱིཡབྷཱཝེན ཙ ཨསྶཱདབྷཱཝེན ཙ གཡ྄ཧམཱནཾ པུཉྙཕལཾ དཱིཔསིཁཱམདྷུལིཏྟསཏྠདྷཱརཱསདིསཾ. ཏདཏྠོ ཙ པུཉྙཱབྷིསངྑཱརོ ཏཾནིཔཱཏལེཧནསདིསོ ཝུཏྟོ. ‘‘སུཁོ ཨིམིསྶཱ པརིབྦཱཛིཀཱཡ ཏརུཎཱཡ མུདུཀཱཡ ལོམསཱཡ བཱཧཱཡ སམྥསྶོ’’ཏིཨཱདིནཱ (མ. ནི. ༡.༤༦༩) སུཁསཉྙཱཡ ཨསུབྷབྷཱཝསྶ ཨསལླཀྑཎེནེཝ ཨེཀཙྩཀཱམཔརིབྷོགོཏི བཱལོ ཝིཡ གཱུཐཀཱིལ༹ནཾ, ཀིལེསཱབྷིབྷཱུཏཏཱཡ ཀོདྷཱརཏིཨབྷིབྷཱུཏོ ཨསཝསོ མརིཏུཀཱམོ ཝིཡ ཝིསཁཱདནཾ སམྤཏི ཀིརིཡཱཁཎེ, ཨཱཡཏིཾ ཕལཀྑཎེ ཙ ཛིགུཙྪནཱིཡཾ, དུཀྑཉྩ ཨཔུཉྙཱབྷིསངྑཱརཾ ཨཱརབྷཏི. ལོབྷསཧགཏསྶ ཝཱ གཱུཐཀཱིལ༹ནསདིསཏཱ, དོསསཧགཏསྶ ཝིསཁཱདནསདིསཏཱ ཡོཛེཏབྦཱ. སབྷཡསྶཱཔི པིསཱཙནགརསྶ ཀཱམགུཎསམིདྡྷིཡཱ སུཁཝིཔལླཱསཧེཏུབྷཱཝོ ཝིཡ ཨཱརུཔྤཝིཔཱཀཱནཾ ¶ ནིརནྟརཏཱཡ, ཨནུཔལཀྑིཡམཱནཨུཔྤཱདཝཡཱནཾ དཱིགྷསནྟཱནཏཱཡ ཨགཡ྄ཧམཱནཝིཔརིཎཱམཱནཾ སངྑཱརཝིཔརིཎཱམདུཀྑབྷཱུཏཱནམྤི ནིཙྩཱདིཝིཔལླཱསཧེཏུབྷཱཝོཏི, ཏེསཾ པིསཱཙནགརསདིསཏཱ, ཏདབྷིམུཁགམནསདིསཏཱ ཙ ཨཱནེཉྫཱབྷིསངྑཱརསྶ ཡོཛེཏབྦཱ.

ཨཝིཛྫཱབྷཱཝཏོཝ སངྑཱརབྷཱཝོ, ན ཨབྷཱཝཏོཏི སངྑཱརཱནཾ ཨཝིཛྫཱཔཙྩཡབྷཱཝེ སངྑེཔེན ཨནྭཡཏོ, བྱཏིརེཀཏོ ཙ ཝུཏྟམཏྠཾ སུཏྟེན སམཏྠེཏུཾ ‘‘ཝུཏྟམྤི ཙེཏ’’ནྟིཨཱདིནཱ སུཏྟཔདཾ ཨཱབྷཏཾ ¶ . ཏཏྠ ཨཝིདྭཱཏི ཨཝིདྡསུ. ཨཝིཛྫཱགཏོཏི ཨཝིཛྫཱཡ སམནྣཱགཏོ, ཨཔྤཧཱིནཱཝིཛྫོཏི ཨདྷིཔྤཱཡོ.

པཊྛཱནཔཙྩཡཀཐཱཝཎྞནཱ

༥༩༤. ཏཱཝཱཏི ཝཏྟབྦནྟརཱཔེཀྑོ ནིཔཱཏོ, ཏེན ‘‘ཨཝིཛྫཱ སངྑཱརཱནཾ པཙྩཡོ’’ཏི ཨིདཾ ཏཱཝ སིདྡྷཾ, ཨིདཾ པན ཨཔརཾ ཝཏྟབྦནྟི དསྶེཏི. ‘‘ཨིདཾ པན ཝཏྟབྦ’’ནྟི ཡམཏྠཾ སནྡྷཱཡ ཝུཏྟཾ, ཏཾ དསྶེཏུཾ པཙྩཡདྷམྨཱ ནཱམ ཡེསཾ པཙྩཡཱ ཧོནྟི, ཡཐཱ ཝཱ པཙྩཡཱ ཧོནྟི, ཏདུབྷཡེསཾ བཧུབྷཱཝཏོ ཨནེཀདྷཱཝ པཙྩཡཱ ཧོནྟཱིཏི ཨཝིཛྫཱཡཔི ཏཾ ཨཱསངྐནྟོ པུཙྪི ‘‘ཀཏམེསཾ སངྑཱརཱནཾ ཀཐཾ པཙྩཡོ ཧོཏཱི’’ཏི, པུཉྙཱབྷིསངྑཱརཱདཡོ བཧཱུ སངྑཱརཱ ཝུཏྟཱ. ཨཝིཛྫཱ ཙ ཏེསཾ པཙྩཡོ ཧོཏི, ན སབྦེསཾ ཨེཀདྷཱཝ ཧོཏི, ཏསྨཱ ཨིམེསཾ སངྑཱརཱནཾ ཨེཝཾ པཙྩཡོ ཧོཏཱིཏི ཨིདཾ ཝཏྟབྦནྟི ཨཏྠོ. ཏཏྲཱཏི ཏསྨིཾ པཙྩཡབྷཱཝེ. ཡདིཔི ‘‘ཀཏམེསཾ སངྑཱརཱན’’ནྟིཨཱདིནཱ ཨསཱདྷཱརཎཏོ པུཙྪཱ ཨཱརདྡྷཱ, ཨེཀདེསེན པན སམུདཱཡོཔལཀྑཎམེཏནྟི དྭཱདསནྣཾ པཊིཙྩསམུཔྤཱདངྒཱནཾ ཡཐཱསཀཾ པཙྩཡུཔྤནྣཱནཾ པཙྩཡབྷཱཝོ ཝཏྟབྦོཏི ཏཾ དསྶེཏུཾ, ཨཝིཛྫཱཡ ཝཱ པཙྩཡབྷཱཝེ པུཙྪིཏེ ཏཔྤསངྒེན སབྦེསམྤི པཙྩཡདྷམྨཱནཾ པཙྩཡབྷཱཝཾ ཝིསཛྫེཏུཀཱམོ པཙྩཡེ ཏཱཝ པཱལི༹ནཡེནེཝ དསྶེཏུཾ ‘‘བྷགཝཏཱ ཧཱི’’ཏིཨཱདི ཨཱརདྡྷཾ. ཏཏྠ ཙ བྷགཝཏཱ ཙཏུཝཱིསཏི པཙྩཡཱ ཝུཏྟཱཏི སམྦནྡྷོ. ཏེསཾ ཝསེན ཨཝིཛྫཱདཱིནཾ པཙྩཡབྷཱཝོ ཝེདིཏབྦོཏི ཨདྷིཔྤཱཡོ.

‘‘ཧེཏུ ཙ སོ པཙྩཡོ ཙཱ’’ཏི ཨིམིནཱ ཝཙནེན ཧེཏུནོ, ཨདྷིཔཏིཔཙྩཡཱདིབྷཱུཏསྶ ཙ གཧཎཾ སིཡཱཏི ཏཾ ནིཝཱརེནྟོ ཨཱཧ ‘‘ཧེཏུ ཧུཏྭཱ པཙྩཡོ’’ཏི. ཨེཝམྤི སོ ཨེཝ དོསོ ཨཱཔཛྫཏཱིཏི པུན ཨཱཧ ‘‘ཧེཏུབྷཱཝེན པཙྩཡོཏི ཝུཏྟཾ ཧོཏཱི’’ཏི. ཏེན ན ཨིདྷ ཧེཏུསདྡེན དྷམྨགྒཧཎཾ ¶ ཀཏཾ, ཨཐ ཁོ དྷམྨསྶ སཏྟིཝིསེསོ གཧིཏོཏི དསྶེཏི. ཏསྶ ཧི པཙྩཡསདྡསྶ ཙ སམཱནཱདྷིཀརཎཏཾ སནྡྷཱཡ ‘‘ཧེཏུ ཙ སོ པཙྩཡོ ཙ, ཧེཏུ ཧུཏྭཱ པཙྩཡོ’’ཏི ཙ ཝུཏྟཾ. ཨེཝཉྩ ཀཏྭཱ པརཏོ པཱལི༹ཡཾ ‘‘ཧེཏཱུ ཧེཏུ…པེ… ཧེཏུཔཙྩཡེན པཙྩཡོ’’ཏིཨཱདིནཱ (པཊྛཱ. ༡.༡.༡) ཏེན ཏེན ཧེཏུབྷཱཝཱདིཨུཔཀཱརེན ཏསྶ ཏསྶ དྷམྨསྶ ཨུཔཀཱརཀཏྟཾ ཝུཏྟཾ. ཨབྷིདྷམྨཊྛཀཐཱཡཾ པན ‘‘ཡོ ཧི དྷམྨོ ཡཾ དྷམྨཾ ཨཔྤཙྩཀྑཱཡ ཏིཊྛཏི ཝཱ ཨུཔྤཛྫཏི ཝཱ, སོ ཏསྶ པཙྩཡོ’’ཏི (པཊྛཱ. ཨཊྛ. པཙྩཡུདྡེསཝཎྞནཱ), ‘‘མཱུལཊྛེན ཨུཔཀཱརཀོ དྷམྨོ ཧེཏུཔཙྩཡོ’’ཏི (པཊྛཱ. ཨཊྛ. པཙྩཡུདྡེསཝཎྞནཱ) ཙ ཨེཝམཱདིནཱ དྷམྨཔཊྛཱནནིདྡེསེན ¶ དྷམྨཏོ ཨཉྙཱ དྷམྨསཏྟི ནཱམ ནཏྠཱིཏི དྷམྨེཧེཝ དྷམྨསཏྟིཝིབྷཱཝནཾ ཀཏནྟི དཊྛབྦཾ. ཨིདྷཱཔི ཝཱ ‘‘ཧེཏུ ཙ སོ པཙྩཡོ ཙཱ’’ཏི དྷམྨེནེཝ དྷམྨསཏྟིཾ དསྶེཏི. ན ཧི ‘‘ཧེཏུཔཙྩཡོ’’ཏིཨཱདིཀོ ཨུདྡེསོ ཀུསལཱདིཨུདྡེསོ ཝིཡ དྷམྨཔྤདྷཱནོ, ཨཐ ཁོ དྷམྨཱནཾ ཨུཔཀཱརཀབྷཱཝཔྤདྷཱནོཏི.

‘‘ཨེསེཝ ནཡོ’’ཏི ཨིམིནཱ ཏབྦྷཱཝེན པཙྩཡབྷཱཝཾ ཨཱརམྨཎཱདཱིསུ ཨཏིདིསཏི ‘‘ཨཱརམྨཎཉྩ ཏཾ པཙྩཡོ ཙཱཏི ཨཱརམྨཎཔཙྩཡོ, ཨཱརམྨཎཾ ཧུཏྭཱ པཙྩཡོ, ཨཱརམྨཎབྷཱཝེན པཙྩཡོཏི ཨཏྠོ’’ཏི, ན ཀམྨདྷཱརཡམཏྟཾ.

༥༩༥. ཝཙནཱཝཡཝོཏི སཱདྷནཱཝཡཝཾ སནྡྷཱཡཱཧ. ཝཙནསབྷཱཝཉྷི སཱདྷནཾ པརེསཾ ཨཝིདིཏཏྠཉཱཔནཏོ ལོཀེ སཱདྷནནྟི པཱཀཊཾ པཉྙཱཏཾ. ཏཐཱ ཧི ནཾ ཨཝཡཝལཀྑཎཾ, ཝཙནསབྷཱཝཉྩ སཱདྷནཾ, ཨཝཡཝཔཀྑཱདཱིནི ཝཙནཱནི སཱདྷནནྟི ཙ ཉཱཡཝཱདིནོ ཝདནྟི. པཊིཉྙཱ, ཧེཏཱུཏིཨཱདཱིསཱུཏི པཊིཉྙཱ, ཧེཏུ, ཨུདཱཧརཎ, ཨུཔནཡ, ནིགམནཱནི. ཨུདཱཧརཎསཱདྷམྨིཡཱ སཱདྷྱསཱདྷནཾ ཧེཏུ. ཝིརཱུཔོ ཧེཏཱུཏི ཙ ཨེཝམཱདཱིསུ ཀཱརཎཾ ཡཾ ཀིཉྩི ཀཱརཎལཀྑཎཾ, སམྤཱཔཀལཀྑཎམྤི ཝཱ. ཨཱདི-སདྡེན ཏསྶཱཔི སངྒཧེཏབྦཏཱཡ, ཉཱཔཀལཀྑཎཾ པན ཝཙནཱཝཡཝགྒཧཎེན གཧིཏཾ. ཀཱམཾ མཱུལམྤི ཀཱརཎལཀྑཎཾ ཀཱརཎམེཝ, ཀཱརཎནྟི པནེཏྠ པཙྩཡཧེཏུ གཧིཏོ. མཱུལནྟི ཧེཏུཧེཏཱུཏི ཀཱརཎཝིསེསཝིསཡཏྟཱ མཱུལསྶ ཝིསུཾ གཧཎཾ. ཨེཏཱིཏི ཨེཏསྶ ཨཏྠཝཙནཾ ཝཏྟཏཱིཏི, ཏཉྩ ཨུཔྤཏྟིཊྛིཏཱིནཾ སཱདྷཱརཎཝཙནཾ. ཏེནེཝཱཧ ‘‘ཏིཊྛཏི ཝཱ ཨུཔྤཛྫཏི ཝཱ’’ཏི. ཨེཀཙྩོ ཧི པཙྩཡོ ཋིཏིཡཱ ཨེཝ ཨུཔཀཱརཀོ ཧོཏི ཡཐཱ པཙྪཱཛཱཏཔཙྩཡོ, ཨེཀཙྩོ ¶ ཨུཔྤཏྟིཡཱ ཨེཝ ཡཐཱ ཨནནྟརཱདིཀོ, ཨེཀཙྩོ ཨུབྷཡསྶ ཡཐཱ ཧེཏུཨཱདཡོ.

ཨུཔཀཱརཀལཀྑཎོཏི ཙ དྷམྨེན དྷམྨསཏྟིཾ ཨུཔཀཱརཾ དསྶེཏཱིཏི དཊྛབྦཾ. ཧིནོཏི པཏིཊྛཱཏི ཨེཏྠཱཏི ཧེཏུ, ཨནེཀཏྠཏྟཱ དྷཱཏུསདྡཱནཾ ཧི-སདྡོ མཱུལསདྡོ ཝིཡ པཏིཊྛཏྠོ ཝེདིཏབྦོ. ཧིནོཏི ཝཱ ཨེཏེན ཀམྨནིདཱནབྷཱུཏེན ཨུདྡྷཾ ཨོཛཾ ཨཏིཧརནྟེན མཱུལེན ཝིཡ པཱདཔོ ཏཔྤཙྩཡཾ ཕལཾ གཙྪཏི པཝཏྟཏི ཝུདྡྷིཾ ཝིརུལ༹ྷིཾ ཨཱཔཛྫཏཱིཏི ཧེཏུ. ཨཏྟནོ ཕལཾ ཀརོཏཱིཏི ཀཱརཎཾ. ནིདདཱཏི དསྶེནྟཾ ཝིཡ ཧོཏཱིཏི ནིདཱནཾ. སམྦྷཝཏི ཏཾ ཨེཏསྨཱཏི སམྦྷཝོ. པབྷཝཏི ཨེཏསྨཱཏི པབྷཝོཏི པཙྩཡཧེཏུསདྡེཧི ཨིཏརེསམྤི སམཱནཏྠཏཱ ཝེདིཏབྦཱ. ཨེཝཾ སནྟེཔི ཀཱརཎཝིསེསཝིསཡོ ¶ ཧེཏུསདྡོ, ཀཱརཎསཱམཉྙཝིསཡོ པཙྩཡསདྡོཏི དསྶེནྟོ ‘‘མཱུལཊྛེནཱ’’ཏིཨཱདིམཱཧ. ཧེཏུཨཏྠོ, པཙྩཡཊྛོ ཙ ཧེཊྛཱ པཔཉྩཝསེན ཝུཏྟོཏི ཏཾ སངྑིཔྤཾ དསྶེནྟོ ཨཱཧ ‘‘སངྑེཔཏོ…པེ… ཧེཏུཔཙྩཡོ’’ཏི.

ཡཐཱ སཱལིཝཱིཧིབཱིཛཱདཱིནི ཏཾཏཾཨོསདྷཱིནཾ སཱལིཝཱིཧིཨཱདིབྷཱཝསྶ སཱདྷཀཱནི, མཎིཨཱདིཔྤབྷཱཝཏྠཱུནི ཙ ནཱིལཱདིཝཎྞཱནི ནཱིལཱདིཔྤབྷཱསཱདྷཀཱནི, ཨེཝཾ ཧེཏུཔཙྩཡོ ཡཐཱརཧཾ ཨཏྟནཱ སམྤཡུཏྟདྷམྨཱནཾ ཀུསལཱདིབྷཱཝསྶ སཱདྷཀོཏི ཨིམམཏྠཾ དསྶེཏི ‘‘སོ སཱལིཨཱདཱིན’’ནྟིཨཱདིནཱ. ཨཱཙརིཡཱནནྟི ཙ རེཝཏཱཙརིཡཾ སནྡྷཱཡཱཧ. ཨེཝཾ སནྟེཏི ཧེཏུཔཙྩཡོ ཡདི ཀུསལཱདིབྷཱཝསཱདྷཀོ, ཨེཝཾ སཏི. ན སམྤཛྫཏི ན སིཛ྄ཛྷཏི. ཡཐཱ ཀུསལཱཀུསལཧེཏུ ཏཾསམུཊྛཱནརཱུཔསྶ ཀུསལཱཀུསལབྷཱཝཱཡ ན པརིཡཏྟོ, ཨེཝཾ ཨབྱཱཀཏོཔི ཧེཏུ ཏཾསམུཊྛཱནརཱུཔསྶ ཨབྱཱཀཏབྷཱཝཱཡ. སབྷཱཝེནེཝ ཧི ཏཾ ཨབྱཱཀཏནྟི ཨཱཧ ‘‘ན ཧི སོ ཏེསཾ ཀུསལཱདིབྷཱཝཾ སཱདྷེཏཱི’’ཏི. ཧེཏུཔཙྩཡོ ཙ ཏེསཾ ཧོཏིཡེཝཱཏི ཨཱཧ ‘‘ན ཙ པཙྩཡོ ན ཧོཏཱི’’ཏི. ཨིདཱནི ཏམཏྠཾ པཱལི༹ཡཱ སམཏྠེཏུཾ ‘‘ཝུཏྟཉྷེཏ’’ནྟིཨཱདི ཝུཏྟཾ. ཝིནཱ ཨེཏེནཱཏི ཨེཏེན ཧེཏུནཱ ཨབྱཱཀཏབྷཱཝསཱདྷཀེན ཝིནཱ ཨཧེཏུཀཏྟཱ, ཨབྱཱཀཏབྷཱཝོ སིདྡྷོ སབྷཱཝེནེཝཱཏི ཨདྷིཔྤཱཡོ.

‘‘ཡོནིསོ, བྷིཀྑཝེ, མནསི ཀརོཏོ ཨནུཔྤནྣཱ ཙེཝ ཀུསལཱ དྷམྨཱ ཨུཔྤཛྫནྟི, ཨུཔྤནྣཱ ཙ ཀུསལཱ དྷམྨཱ ཨབྷིཝཌྜྷནྟཱི’’ཏིཨཱདི (ཨ. ནི. ༡.༦༧) ཝཙནེཧི ཀུསལབྷཱཝསྶ ¶ ཡོནིསོམནསིཀཱརཔྤཊིབདྡྷཏཱ སིདྡྷཱཏི ཨཱཧ ‘‘ཡོནིསོམནསིཀཱརཔྤཊིབདྡྷོ ཀུསལབྷཱཝོ’’ཏི. ཨེཏེནེཝ ཨཀུསལཨབྱཱཀཏབྷཱཝཱཔི ཀུསལབྷཱཝོ ཝིཡ ན ཧེཏུཔཊིབདྡྷཱཏི དསྶིཏཾ ཧོཏི. ཡཾ པནེཀེ མཉྙེཡྻུཾ ‘‘ཨཧེཏུཀཧེཏུསྶ ཨཀུསལབྷཱཝོ ཝིཡ སཧེཏུཀཧེཏཱུནམྤི སབྷཱཝཏོཝ ཀུསལཱདིབྷཱཝོ, ཨཉྙེསཾ ཏཾསམྤཡུཏྟཱནཾ ཧེཏུཔཊིབདྡྷོ’’ཏི, ཏསྶ ཨུཏྟརཾ ཝཏྟུཾ ‘‘ཡདི ཙཱ’’ཏིཨཱདིམཱཧ. ཨལོབྷོ ཀུསལོ ཝཱ སིཡཱ ཨབྱཱཀཏོ ཝཱཏི ཡདི ཨལོབྷོ སབྷཱཝཏོ ཀུསལོ, སོ ཀུསལསབྷཱཝཏྟཱ ཨབྱཱཀཏོ ན སིཡཱ. ཨཐ ཨབྱཱཀཏོ ཏཾསབྷཱཝཏྟཱ ཀུསལོ ན སིཡཱ ཨལོབྷསབྷཱཝསྶ ཨདོསཏྟཱབྷཱཝོ ཝིཡ. ཡསྨཱ པན ཨུབྷཡཐཱཔི ཧོཏི, ཏསྨཱ ཡཐཱ ཨུབྷཡཐཱ ཧོནྟེསུ སདྡྷཱདཱིསུ སམྤཡུཏྟེསུ ཧེཏུཔཊིབདྡྷཾ ཀུསལཱདིབྷཱཝཾ པརིཡེསེཐ, ན སབྷཱཝཏོ, ཨེཝཾ ཧེཏཱུསུཔི ཀུསལཱདིཏཱ ཨཉྙཔཊིབདྡྷཱ པརིཡེསིཏབྦཱ, ན སབྷཱཝཏོཏི ཡཾ ཝུཏྟཾ ‘‘སམྤཡུཏྟཧེཏཱུསུ སབྷཱཝཏོཝ ཀུསལཱདིབྷཱཝོ’’ཏི, ཏཾ ན ཡུཛྫཏི. སཱ པན པརིཡེསིཡམཱནཱ ཡོནིསོམནསིཀཱརཱདིཔཊིབདྡྷཱ ¶ ཧོཏཱིཏི ཧེཏཱུསུ ཝིཡ སམྤཡུཏྟེསུཔི ཡོནིསོམནསིཀཱརཱདིཔཊིབདྡྷོ ཀུསལཱདིབྷཱཝོ, ན ཧེཏུཔཊིབདྡྷོཏི སིདྡྷཾ ཧོཏཱིཏི ཨདྷིཔྤཱཡོ.

ཝིརུལ༹ྷམཱུལཱ ཝིཡཱཏི ཨེཏེན མཱུལཱནི ཝིཡ མཱུལཱནཱིཏི དསྶེཏི. ཏེནེཝཱཧ ‘‘སུཔྤཏིཊྛིཏབྷཱཝསཱདྷནེནཱ’’ཏི. སྭཱཡཾ ‘‘ཀུསལོ དྷམྨོ ཀུསལསྶ, ཀུསལོ དྷམྨོ ཨབྱཱཀཏསྶ, ཀུསལོ དྷམྨོ ཀུསལཱབྱཱཀཏསྶ, ཨཀུསལོ དྷམྨོ ཨཀུསལསྶ, ཨཀུསལོ དྷམྨོ ཨབྱཱཀཏསྶ, ཨཀུསལོ དྷམྨོ ཨཀུསལཱབྱཱཀཏསྶ, ཨབྱཱཀཏོ དྷམྨོ ཨབྱཱཀཏསྶཱ’’ཏི ཨེཝཾ སཏྟདྷཱ པཉྷཱཝཱརེ ནིདྡིཊྛོ. ཡཾ པན ཝུཏྟཾ ཧེཏུཀིཙྩཾ དསྶེནྟེན ‘‘ཧེཏཱུ ཧེཏུསམྤཡུཏྟཀཱནཾ དྷམྨཱནཾ, ཏཾསམུཊྛཱནཱནཉྩ རཱུཔཱནཾ ཧེཏུཔཙྩཡེན པཙྩཡོ’’ཏི (པཊྛཱ. ༡.༡.༡), ཏཏྠ པཋམོ ཧེཏུསདྡོ པཙྩཏྟནིདྡིཊྛོ པཙྩཡདྷམྨནིདྡེསོ, ཏེནསྶ ཧེཏུབྷཱཝེན ཨུཔཀཱརཀཏཱ ཧེཏུཔཙྩཡཏཱཏི དསྶེཏི. དུཏིཡོ པཙྩཡུཔྤནྣཝིསེསནཾ, ཏེན ན ཡེསཾ ཀེསཉྩི སམྤཡུཏྟཀཱནཾ ཧེཏཱུ ཧེཏུཔཙྩཡེན པཙྩཡོ, ཨཐ ཁོ ཧེཏུནཱ སམྤཡུཏྟཱནམེཝཱཏི དསྶེཏི. ནནུ ཙ སམྤཡུཏྟསདྡསྶ ¶ སཱཔེཀྑཏྟཱ དུཏིཡེ ཧེཏུསདྡེ ཨཝིཛྫམཱནེཔི ཨཉྙསྶ ཨཔེཀྑིཏབྦསྶ ཨནིདྡིཊྛཏྟཱ ཧེཏཱུ ཨཏྟནཱཝ སམྤཡུཏྟཀཱནཾ ཧེཏུཔཙྩཡེན པཙྩཡོཏི ཨཡམཏྠོ ཝིཉྙཱཡཏཱིཏི? ནཱཡམེཀནྟོ. ཧེཏུསདྡོ ཧི པཙྩཏྟནིདྡིཊྛོ ‘‘ཧེཏུཔཙྩཡེན པཙྩཡོ’’ཏི ཨེཏྠེཝ བྱཱཝཊོ ཡདཱ གཡ྄ཧཏི, ན ཏདཱ སམྤཡུཏྟཝིསེསནཾ ཧོཏཱིཏི སམྤཡུཏྟཨཝིསིཊྛཱ ཡེ ཀེཙི གཧིཏཱ བྷཝེཡྻུནྟི. ནནུ ཙ ཡཐཱ ‘‘ཨརཱུཔིནོ ཨཱཧཱརཱ སམྤཡུཏྟཀཱནཾ དྷམྨཱནཾ, ཨརཱུཔིནོ ཨིནྡྲིཡཱ སམྤཡུཏྟཀཱནཾ དྷམྨཱན’’ནྟི ཙ ཝུཏྟེ དུཏིཡེན ཨཱཧཱརགྒཧཎེན, ཨིནྡྲིཡགྒཧཎེན ཙ ཝིནཱཔི ཨཱཧཱརིནྡྲིཡསམྤཡུཏྟཀཱཝ གཡ྄ཧནྟི, ཨེཝམིདྷཱཔི སིཡཱཏི? ན, ཨཱཧཱརིནྡྲིཡཱསམྤཡུཏྟསྶ ཝཛྫེཏབྦསྶ ཨབྷཱཝཏོ. ཝཛྫེཏབྦཱབྷཱཝཏོ ཧི ཏཏྠ དུཏིཡེ ཨཱཧཱརིནྡྲིཡགྒཧཎེ ཨསཏིཔི ཏཾསམྤཡུཏྟཀཱཝ གཡ྄ཧནྟཱིཏི ཏཾ ན ཀཏཾ, ཨིདྷ པན ཝཛྫེཏབྦཾ ཨཏྠཱིཏི ཀཏྟབྦཾ དུཏིཡཾ ཧེཏུགྒཧཎཾ. ཨེཝམྤི ‘‘ཧེཏཱུ ཧེཏུསམྤཡུཏྟཀཱན’’ནྟི ཨེཏྠ ཧེཏུསམྤཡུཏྟཀཱནཾ སོ ཨེཝ སམྤཡུཏྟཀཧེཏཱུཏི ཝིསེསནསྶ ཨཀཏཏྟཱ ཡོ ཀོཙི ཧེཏུ ཡསྶ ཀསྶཙི ཧེཏུསམྤཡུཏྟསྶ ཧེཏུཔཙྩཡེན པཙྩཡོཏི ཨཱཔཛྫཏཱིཏི? ནཱཔཛྫཏི, པཙྩཏྟནིདྡིཊྛསྶེཝ ཧེཏུནོ པུན སམྤཡུཏྟཝིསེསནབྷཱཝེན ཝུཏྟཏྟཱ. ཨེཏདཏྠམེཝ ཧི ཝིནཱཔི དུཏིཡེན ཧེཏུསདྡེན ཧེཏུསམྤཡུཏྟབྷཱཝེ སིདྡྷེཔི ཏསྶ གཧཎཾ ཀཏཾ.

ཨཐ ཝཱ ཨསཏི དུཏིཡེ ཧེཏུསདྡེ ཧེཏུསམྤཡུཏྟཀཱནཾ ཧེཏུཔཙྩཡེན པཙྩཡོ, ན པན ཧེཏཱུནནྟི ཨེཝམྤི གཧཎཾ སིཡཱཏི ཏནྣིཝཱརཎཏྠཾ སོ ཝུཏྟོ. ཏེན ཧེཏུསམྤཡུཏྟབྷཱཝཾ ཡེ ལབྷནྟི, ཏེསཾ ¶ སབྦེསཾ ཧེཏཱུནཾ, ཨཉྙེསམྤི ཧེཏཱུ ཧེཏུཔཙྩཡེན པཙྩཡོཏི དསྶིཏཾ ཧོཏི. ཡསྨཱ པན ཧེཏུཛྷཱནམགྒཱ པཏིཊྛཱམཏྟཱདིབྷཱཝེན ཨཉྙདྷམྨནིརཔེཀྑཱ, ན ཨཱཧཱརིནྡྲིཡཱ ཝིཡ སཱཔེཀྑཱ ཨེཝ, ཏསྨཱ ཨེཏེསྭེཝ དུཏིཡཾ ཧེཏཱདིགྒཧཎཾ ཀཏཾ. ཨཱཧཱརིནྡྲིཡཱ པན ཨཱཧརིཏབྦཨཱིསིཏབྦཱཔེཀྑཱ ཨེཝ, ཏསྨཱ ཏེ ཝིནཱཔི དུཏིཡེན ཨཱཧཱརིནྡྲིཡགྒཧཎེན ཨཏྟནཱ ཨེཝ ཨཱཧརིཏབྦེ, ཨཱིསིཏབྦེ ཙ ཨཱཧཱརིནྡྲིཡབྷཱུཏེ, ཨཉྙེ ཙ སམྤཡུཏྟཀེ པརིཙྪིནྡནྟཱིཏི ཏཾ ཏཏྠ ན ཀཏཾ. ཨིདྷ ཙ དུཏིཡེན ཧེཏུགྒཧཎེན པཙྩཡུཔྤནྣཱནཾ ཧེཏུནཱ, པཙྩཡབྷཱུཏེནེཝ ཙ སམྤཡུཏྟཱནཾ ཧེཏཱུནཾ, ཨཉྙེསཉྩ པརིཙྪིནྣཏྟཱ པུན ཝིསེསེན ཀིཙྩཾ ནཏྠཱིཏི པཉྷཱཝཱརེ ‘‘ཀུསལཱ ¶ ཧེཏཱུ སམྤཡུཏྟཀཱནཾ ཁནྡྷཱན’’ནྟིཨཱདཱིསུ དུཏིཡཾ ཧེཏུགྒཧཎཾ ན ཀཏནྟི དཊྛབྦཾ.

༥༩༦. ཨཱརམྨཎབྷཱཝེནཱཏི ཝིསཡབྷཱཝེན, ཨཱལམྦིཏབྦབྷཱཝེནཱཏི ཨཏྠོ. ཨཱརབྷིཏྭཱཔཱིཏི པི-སདྡེན ཨིམམཏྠཾ དསྶེཏི – རཱུཔཱཡཏནཱདིམཏྟེ ཡསྨིཾ ཀིསྨིཉྩི ཨེཀསྨིཾ ཨཊྛཏྭཱ ‘‘ཡཾ ཡཾ དྷམྨཾ ཨཱརབྦྷཱ’’ཏི (པཊྛཱ ༡.༡.༢) ཨནིཡམེན སབྦརཱུཔཱཡཏནཱནཾ…པེ… སབྦདྷམྨཱཡཏནཱནཉྩ ཨཱརམྨཎཔཙྩཡབྷཱཝསྶ ཝུཏྟཏྟཱ རཱུཔཱདིབྷེདེན ཚབྦིདྷེསུ སངྑཏཱསངྑཏཔཉྙཏྟིདྷམྨེསུ ན ཀོཙི དྷམྨོ ཨཱརམྨཎཔཙྩཡོ ན ཧོཏཱིཏི. སྭཱཡཾ ཨཱརམྨཎཔཙྩཡབྷཱཝོ ཧེཊྛཱ ཝིབྷཱཝིཏོ ཨེཝ. ཨཱལམྦིཏྭཱཏི གཧེཏྭཱ. ཨེཀནྟསཱརམྨཎབྷཱཝཏོ ཨནཱརབྦྷ པཝཏྟི ཨེཝ ནཏྠཱིཏི ཨཱཧ ‘‘ཨཱརབྦྷེཝཱ’’ཏི. སྭཱཡཾ ‘‘ཀུསལོ དྷམྨོ ཀུསལསྶ, ཀུསལོ དྷམྨོ ཨཀུསལསྶ, ཀུསལོ དྷམྨོ ཨབྱཱཀཏསྶ, ཨཀུསལོ དྷམྨོ ཨཀུསལསྶ, ཀུསལསྶ, ཨབྱཱཀཏསྶ, ཨབྱཱཀཏོ དྷམྨོ ཨབྱཱཀཏསྶ, ཀུསལསྶ, ཨཀུསལསྶཱ’’ཏི ཨེཝཾ ནཝཔྤཀཱརོ ཝེདིཏབྦོ.

༥༩༧. ཛེཊྛཀཊྛེནཱཏི པམུཁབྷཱཝེན. ཨཏྟཱདྷཱིནཱནཉྷི པཏིབྷཱུཏོ དྷམྨོ ཨདྷིཔཏི. སོ ཏེསཾ པམུཁབྷཱཝེན པཝཏྟཏི. ‘‘ཚནྡཝཏོ ཀིཾ ནཱམ ན སིཛ྄ཛྷཏཱི’’ཏིཨཱདིཀཾ པུརིམཱབྷིསངྑཱརཱུཔནིསྶཡཾ ལབྷིཏྭཱ ཨུཔྤཛྫམཱནེ ཙིཏྟུཔྤཱདེ ཚནྡཱདཡོ དྷུརབྷཱུཏཱ ཛེཊྛཀབྷཱུཏཱ སམྤཡུཏྟདྷམྨེ སཱདྷཡམཱནཱ ཝསེ ཝཏྟཡམཱནཱ ཧུཏྭཱ པཝཏྟནྟི, སམྤཡུཏྟདྷམྨཱ ཙ ཏེསཾ ཝསེན ཝཏྟནྟི ཧཱིནཱདིབྷཱཝེན ཏདནུཝཏྟནཏོ, ཏེན ཏེ ཨདྷིཔཏིཔཙྩཡཱ ཧོནྟི. གརུཀཱཏབྦམྤི ཨཱརམྨཎཾ ཏནྣིནྣཔོཎཔབྦྷཱརཱནཾ ཨསྶཱདནཔཙྩཝེཀྑཎམགྒཕལཱནཾ ཨཏྟནོ ཝསེ ཝཏྟཡམཱནཾ ཝིཡ པཙྩཡོ ཧོཏི. ཏསྨཱ ཨཡཾ ཨཏྟཱདྷཱིནཱནཾ པཏིབྷཱཝེན ཨུཔཀཱརཀཏྟཱ ཨདྷིཔཏིཔཙྩཡོཏི དཊྛབྦོ. ཚནྡཱདྷིཔཏཱིཏི ཚནྡསངྑཱཏོ ཨདྷིཔཏི, ཚནྡཾ དྷུརཾ ཚནྡཾ ཛེཊྛཀཾ ཀཏྭཱ ཙིཏྟུཔྤཏྟིཀཱལེ ཨུཔྤནྣསྶ ཀཏྟུཀམྱཏཱཚནྡསྶེཏཾ ནཱམཾ. སེསེསུཔི ཨེསེཝ ནཡོ. ཀསྨཱ པན ཡཐཱ ཧེཏུཔཙྩཡནིདྡེསེ ¶ ‘‘ཧེཏཱུ ཧེཏུསམྤཡུཏྟཀཱན’’ནྟི (པཊྛཱ. ༡.༡.༡) ཝུཏྟཾ, ཨེཝམིདྷ ‘‘ཨདྷིཔཏཱི ཨདྷིཔཏིསམྤཡུཏྟཀཱན’’ནྟི ཨཝཏྭཱ ‘‘ཚནྡཱདྷིཔཏི ཚནྡསམྤཡུཏྟཀཱན’’ནྟིཨཱདིནཱ (པཊྛཱ. ༡.༡.༣) ནཡེན ཝུཏྟནྟི? ཨེཀཀྑཎེ ¶ ཨབྷཱཝཏོ. ཧེཏཝོ ཧི དྭེ ཏཡོཔི ཨེཀཀྑཎེ ཧེཏུཔཙྩཡཱ ཧོནྟི, མཱུལཊྛེན ཨུཔཀཱརཀབྷཱཝསྶ ཨཝིཛཧནཏོ. ཨདྷིཔཏི པན ཛེཊྛཀཊྛེན ཨུཔཀཱརཀོ, ན ཙ ཨེཀཀྑཎེ བཧཱུ ཛེཊྛཀཱ ཧོནྟི. ཏསྨཱ ཨེཀཏོ ཨུཔྤནྣཱནམྤི ཏེསཾ ཨེཀཀྑཎེ ཨདྷིཔཏིཔཙྩཡབྷཱཝོ ནཏྠཱིཏི ‘‘ཨདྷིཔཏཱི ཨདྷིཔཏིསམྤཡུཏྟཀཱན’’ནྟི ཨཝཏྭཱ ‘‘ཚནྡཱདྷིཔཏི ཚནྡསམྤཡུཏྟཀཱན’’ནྟིཨཱདིནཱ ནཡེན ཝུཏྟཾ.

ཡཾ ཡཾ དྷམྨནྟི ཡཾ ཡཾ ཨཱརམྨཎདྷམྨཾ. གརུཾ ཀཏྭཱཏི གརུཀཱརཙིཏྟཱིཀཱརཝསེན ཝཱ ཨསྶཱདནཝསེན ཝཱ གརུཀཱརིཀཾ ལདྡྷབྦཾ ཨཝིཛཧིཏབྦཾ ཨནཝཉྙཱཏཾ ཀཏྭཱ. ཏེ ཏེ དྷམྨཱཏི ཏེ ཏེ གརུཀཱཏབྦཱ དྷམྨཱ. ཏེསཾ ཏེསནྟི ཏཾཏཾགརུཀཱརཀདྷམྨཱནཾ. ཨདྷིཔཏིཔཙྩཡེནཱཏི ཨཱརམྨཎཱདྷིཔཏིཔཙྩཡེན. སྭཱཡཾ ‘‘ཀུསལོ དྷམྨོ ཀུསལསྶ སཧཛཱཏཱརམྨཎེཧི, ཨཀུསལསྶ ཨཱརམྨཎེནེཝ, ཨབྱཱཀཏསྶ སཧཛཱཏཱརམྨཎེཧི, ཀུསལཱབྱཱཀཏསྶ སཧཛཱཏེནེཝཱཏི ཀུསལམཱུལཱ ཙཏྟཱརོ, ཨཀུསལོ དྷམྨོ ཨཀུསལསྶ སཧཛཱཏཱརམྨཎེཧི, ཨབྱཱཀཏསྶ སཧཛཱཏེནེཝ, ཏཐཱ ཨཀུསལཱབྱཱཀཏསྶཱཏི ཨཀུསལམཱུལཱ ཏཡོ, ཨབྱཱཀཏོ དྷམྨོ ཨབྱཱཀཏསྶ སཧཛཱཏཱརམྨཎེཧི, ཀུསལསྶ ཨཱརམྨཎེནེཝ, ཏཐཱ ཨཀུསལསྶཱཏི ཨབྱཱཀཏམཱུལཱ ཏཡོ’’ཏི སངྑེཔཏོ དསཔྤཀཱརོ ཨདྷིཔཏིཔཙྩཡོ. ཨེཏྠ ཙ སཏྟདྷཱ སཧཛཱཏཱདྷིཔཏི, སཏྟདྷཱ ཨཱརམྨཎཱདྷིཔཏི ཝེདིཏབྦོ.

༥༩༨. ཨནྟརཱཡཏཱིཏི ཨནྟརཾ, བྱཝདྷཱཡཀནྟི ཨཏྠོ. ནཱསྶ ཨནྟརཾ ཝིཛྫཏཱིཏི ཨནནྟརོ, ཨནནྟརོ ཙ སོ པཙྩཡོ ཙཱཏི ཨནནྟརཔཙྩཡོ. ‘‘ཨཏྠཱནནྟརཏཱ ཨནནྟརཔཙྩཡོ, ཀཱལཱནནྟརཏཱ སམནནྟརཔཙྩཡོ’’ཏིཨཱདིནཱ བཧུདྷཱ པཔཉྩཡནྟི, ཨསཱརཾ གནྠཝིཏྠཱརཾ ཀརོནྟི. ཡཐཱ པཝཏྟིཨོཀཱསདཱནཝིསེསབྷཱཝེན ནཏྠིཝིགཏཔཙྩཡཱ ཝུཏྟཱ, ན ཨེཝཾ ཨནནྟརསམནནྟརཔཙྩཡཱ, ཨེཏེ པན ཙིཏྟནིཡམཧེཏུབྷཱཝེན ཝུཏྟཱཏི ཏཾ ཙིཏྟནིཡམཧེཏུབྷཱཝཾ དསྶེཏུཾ ‘‘ཡོ ཧི ཨེསཱ’’ཏིཨཱདི ཨཱརདྡྷཾ. ཏཏྠ མནོཝིཉྙཱཎདྷཱཏཱུཏིཨཱདི ཙིཏྟནིཡམོཏི ཨེཏྠ ཨཱདི-སདྡེན སནྟཱིརཎཱནནྟརཱ ཝོཊྛབྦནཾ, ཙུཏིཨནནྟརཱ པཊིསནྡྷཱིཏི ཡསྶ ཡསྶ ཙིཏྟསྶ ཨནནྟརཱ ཡཾ ཡཾ ཙིཏྟཾ ཨུཔྤཛྫཏི, ཏསྶ ཏསྶ ཏདནནྟརུཔྤཱདནིཡམོ ཏཾཏཾསཧཀཱརིཔཙྩཡཝིསིཊྛསྶ པུརིམཔུརིམཙིཏྟསྶེཝ ཝསེན ཨིཛ྄ཛྷཏཱིཏི དསྶེཏི.

ཨཏྠཱནནྟརཏཱཡཱཏི ¶ ཨཏྠེན ཀེནཙི དྷམྨེན ཨནནྟརཏཱཡ. ཀཱལཱནནྟརཏཱཡཱཏི ཀཱལབྷེདེན ཨནནྟརཏཱཡ ¶ . ཨཱཙརིཡཱནནྟི ཨིདྷཱཔི རེཝཏཱཙརིཡམེཝ སནྡྷཱཡ ཝུཏྟཾ. ཏཏྠཱཏི ཏསྨིཾ ཀཱལཱནནྟརཏཱཡ སམནནྟརཔཙྩཡབྷཱཝེ, ཏསྨིཾ ཝཱ ཡཐཱཝུཏྟཝིརོདྷེ. བྷཱཝནཱབལེན པན ཝཱརིཏཏྟཱཏི ཨེཏྠ ཡཐཱ རུཀྑསྶ ཝེདྷེ དིནྣེ པུཔྥིཏུཾ སམཏྠསྶེཝ པུཔྥནཾ ན ཧོཏི, ཝེདྷེ པན ཨཔནཱིཏེ ཏཱཡ ཨེཝ སམཏྠཏཱཡ པུཔྥནཾ ཧོཏི, ཨེཝམིདྷཱཔི བྷཱཝནཱབལེན ཝཱརིཏཏྟཱ སམུཊྛཱཔནསམཏྠསྶེཝ ཨསམུཊྛཱཔནཾ, ཏསྨིཉྩ ཨཔགཏེ ཏཱཡ ཨེཝ སམཏྠཏཱཡ སམུཊྛཱཔནཾ ཧོཏཱིཏི ཨདྷིཔྤཱཡོ. ཏམྤི ཝཙནཾ ཀཱལཱནནྟརཏཱ ནཏྠི སཏྟཱཧཱདིནཱ ཀཱལེན ཨནྟརིཏབྷཱཝཏོ. ཨེཏདེཝ ‘‘ཀཱལནྟརིཏཏཱ ཨཏྠི’’ ཨིཙྩེཝ ཝདཱམ. ནནུ ཙ ཀཱལོ ནཱམ ཀོཙི པརམཏྠཏོ ནཏྠཱིཏི ཝདེཡྻཱཏི ཨཱསངྐནྟོ ཨཱཧ ‘‘ཀཱལཱནནྟར…པེ… ལདྡྷཱི’’ཏི.

བྱཉྫནམཏྟཏོཝེཏྠ ནཱནཱཀརཎཾ པཙྩེཏབྦཾ, ན ཨཏྠཏོཏི ཨུཔཙཡསནྟཏིཨདྷིཝཙནནིརུཏྟིཔདཱནཾ ཝིཡ སདྡཏྠམཏྟཏོ ནཱནཱཀརཎཾ, ན ཝཙནཱིཡཏྠཏོཏི ཨདྷིཔྤཱཡོ. ཏེནེཝ སདྡཏྠཝིསེསཾ དསྶེཏུཾ ‘‘ཀཐ’’ནྟིཨཱདིམཱཧ. ཏཏྠ པུརིམཔཙྪིམཱནཾ ནིརོདྷུཔྤཱདནྟརཱབྷཱཝཏོ ནིརནྟརུཔྤཱདནསམཏྠཏཱ ཨནནྟརཔཙྩཡབྷཱཝོ. རཱུཔཀལཱཔཱནཾ ཝིཡ སཎྛཱནཱབྷཱཝཏོ, པཙྩཡཔཙྩཡུཔྤནྣཱནཾ སཧཱཝཊྛཱནཱབྷཱཝཏོ ཙ ‘‘ཨིདམིཏོ ཧེཊྛཱ, ཨུདྡྷཾ, ཏིརིཡ’’ནྟི ཝིབྷཱགཱབྷཱཝཱ ཨཏྟནཱ ཨེཀཏྟམིཝ ཨུཔནེཏྭཱ སུཊྛུ ཨནནྟརབྷཱཝེན ཨུཔྤཱདནསམཏྠཏཱ སམནནྟརཔཙྩཡཏཱ. ཨུཔྤཱདནསམཏྠཏཱཏི ཙ ཨབྱཱཔཱརཏྟཱ དྷམྨཱནཾ ཡསྨིཾ ཡདཱཀཱརེ ནིརུདྡྷེ, ཝཏྟམཱནེ ཝཱ སཏི ཏཾཏཾཝིསེསཝནྟོ དྷམྨཱ ཧོནྟི, ཏསྶ སོཝ ཨཱཀཱརོ ཝུཙྩཏཱིཏི དཊྛབྦོ. དྷམྨཱནཾ པཝཏྟིམཏྟམེཝ ཙ ཨུཔཱདཱཡ ཀཱལཝོཧཱརོཏི ནིརོདྷཱ ཝུཊྛཧནྟསྶ ནེཝསཉྙཱནཱསཉྙཱཡཏནཕལསམཱཔཏྟཱིནཾ ¶ ཨསཉྙབྷཝཱ ཙཝནྟསྶ, པུརིམཙུཏིཔཙྪིམཔཊིསནྡྷཱིནཉྩ ནིརོདྷུཔྤཱདནིརནྟརཏཱཡ ཀཱལནྟརཏཱ ནཏྠི. ན ཧི ཏེསཾ ཨནྟརཱ ཨརཱུཔདྷམྨཔྤཝཏྟི ཨཏྠི, ཡཾ ཨུཔཱདཱཡ ཀཱལནྟརཏཱ ཝུཙྩེཡྻ, ན ཙ རཱུཔདྷམྨཔྤཝཏྟི ཨརཱུཔདྷམྨཔྤཝཏྟིཡཱ ཨནྟརཾ ཀརོཏི ཨཉྙསནྟཱནཏྟཱ. རཱུཔཱརཱུཔསནྟཏིཡོ ཧི དྭེ ཨཉྙམཉྙཾ ཝིསདིསསབྷཱཝཏྟཱ ཨཉྙམཉྙཱུཔཀཱརབྷཱཝེན པཝཏྟམཱནཱཔི ཝིསུཾཡེཝ ཧོནྟི. ཨེཀསནྟཏིཡཉྩ པུརིམཔཙྪིམཱནཾ མཛ྄ཛྷེ པཝཏྟམཱནཾ ཏཾསནྟཏིཔརིཡཱཔནྣཏཱཡ ཨནྟརཀཱརཀཾ ཧོཏི. ཏཱདིསཉྩ ཀིཉྩི ནེཝསཉྙཱནཱསཉྙཱཡཏནཕལསམཱཔཏྟཱིནཾ མཛ྄ཛྷེ ནཏྠི, ན ཙ ཨབྷཱཝོ ཨནྟརཀཱརཀོ ཧོཏི ཨབྷཱཝཏྟཱ ཨེཝ. ཏསྨཱ ཛཝནཱནནྟརསྶ ཛཝནསྶ ཝིཡ, བྷཝངྒཱནནྟརསྶ བྷཝངྒསྶ ཝིཡ ཙ ནིརནྟརཏཱ སུཊྛུ ཨནནྟརཏཱ ཧོཏཱིཏི ཏཐཱ ཨུཔྤཱདནསམཏྠཏཱ ནེཝསཉྙཱནཱསཉྙཱཡཏནཙུཏཱིནམྤི དཊྛབྦཱ. ཨུཔྤཏྟིཡཱ པཙྩཡབྷཱཝོ ཙེཏྠ ཨནནྟརཔཙྩཡཱདཱིནཾ པཱཀཊོཏི ཨུཔྤཱདནསམཏྠཏཱཝ ཝུཏྟཱ ¶ . པཙྩུཔྤནྣཱནཾ པན དྷམྨཱནཾ པུབྦནྟཱཔརནྟཔརིཙྪེདེན གཧིཏཱནཾ ཨུཔྤཛྫཏཱིཏི ཝཙནཾ ཨལབྷནྟཱནཾ ‘‘ཨཏཱིཏོ དྷམྨོ པཙྩུཔྤནྣསྶ དྷམྨསྶ ཨནནྟརཔཙྩཡེན པཙྩཡོ’’ཏིཨཱདིནཱ (པཊྛཱ. ༢.༡༨.༤) ཨནནྟརཱདིཔཙྩཡབྷཱཝོ ཝུཏྟོཏི ན སོ ཨུཔྤཏྟིཡཱ ཨེཝཱཏི ཝིཉྙཱཡཏི. ན ཧི ཀུསལཱདིགྒཧཎཾ ཝིཡ པཙྩུཔྤནྣགྒཧཎཾ ཨཔརིཙྪེདཾ. ཡཏོ ཨུཔྤཏྟིམཏྟསམངྒིནོ ཨེཝ གཧཎཾ སིཡཱ. ཏེནེཝ ཙ ཨཏཱིཏཏྟིཀེ པཊིཙྩཝཱརཱདཡོ ན སནྟཱིཏི. ཏསྶ ‘‘ཀུསལོ དྷམྨོ ཀུསལསྶ, ཀུསལོ དྷམྨོ ཨབྱཱཀཏསྶ, ཨཀུསལོ དྷམྨོ ཨཀུསལསྶ, ཨཀུསལོ དྷམྨོ ཨབྱཱཀཏསྶ, ཨབྱཱཀཏོ དྷམྨོ ཨབྱཱཀཏསྶ, ཨབྱཱཀཏོ དྷམྨོ ཀུསལསྶ, ཨབྱཱཀཏོ དྷམྨོ ཨཀུསལསྶཱ’’ཏི སཏྟདྷཱ བྷེདོ ཝེདིཏབྦོ.

༥༩༩. ཨུཔྤཛྫམཱནོཝ སཧ ཨུཔྤཱདནབྷཱཝེནཱཏི ཨེཏྠཱཔི ཨུཔྤཏྟིཡཱ པཙྩཡབྷཱཝེན པཱཀཊེན ཋིཏིཡཱཔི པཙྩཡབྷཱཝཾ ནིདསྶེཏཱིཏི དཊྛབྦཾ, ཨཉྙཐཱ པདཱིཔནིདསྶནཾ ན ཡུཛྫེཡྻ. པདཱིཔོ ཧི པབྷཱསསྶ ཋིཏིཡཱཔི པཙྩཡོ, ན ཨུཔྤཏྟིཡཱ ཨེཝ. པཙྩཡུཔྤནྣཱནཾ སཧཛཱཏབྷཱཝེན ཨུཔཀཱརཀཏཱ སཧཛཱཏཔཙྩཡཏཱ. ཨོཀྐནྟིཀྑཎེཏི པཊིསནྡྷིཀྑཎེ. ཏསྨིཾ ཧི ཁཎེ ནཱམརཱུཔཾ ཨོཀྐནྟཾ ཝིཡ པརལོཀཏོ ཨཱགནྟྭཱ ཨིདྷ མཱཏུཀུཙྪིཨཱདིཾ པཝིསནྟཾ ཝིཡ ཨུཔྤཛྫཏི, ཏསྨཱ སོ ཁཎོ ཨོཀྐནྟིཀྑཎོཏི ཝུཙྩཏི. ཨེཏྠ ཙ རཱུཔནྟི ཧདཡཝཏྠུཡེཝ ཨདྷིཔྤེཏཾ. ཏཉྷི ནཱམསྶ, ནཱམཉྩ ཏསྶ སཧཛཱཏཔཙྩཡོ ཧོཏི. ཙིཏྟཙེཏསིཀཱཏི པཝཏྟིཡཾ ཙཏྟཱརོ ཁནྡྷཱ པཊིསནྡྷིཀྑཎེ ཙིཏྟསམུཊྛཱནཱནཾ ཨབྷཱཝཏོ. རཱུཔིནོ དྷམྨཱཏི ཧདཡཝཏྠུཾ སནྡྷཱཡཱཧ. ཏཏྠ ཡདིཔི པུབྦེ ‘‘ཨོཀྐནྟིཀྑཎེ ནཱམརཱུཔ’’ནྟི ཝུཏྟཾ, ཏཐཱཔི ཏེན ཁཎནྟརེ སཧཛཱཏཔཙྩཡབྷཱཝོ རཱུཔདྷམྨཱནཾ ན ནིཝཱརིཏོཏི ཏནྣིཝཱརཎཏྠམིདཾ ཝུཏྟནྟི གཧེཏབྦཾ. ཀིཉྩི ཀཱལེཏི ཀེཙི ཀིསྨིཉྩི ཀཱལེཏི ཨཏྠོ, ཏེན རཱུཔིནོ དྷམྨཱ ཀེཙི ཝཏྠུབྷཱུཏཱ ཀིསྨིཉྩི པཊིསནྡྷིཀཱལེཏི ཨཉྙེསཾ རཱུཔདྷམྨཱནཾ, ཝཏྠུནོ ཙ པཝཏྟིཡཾ ཨརཱུཔདྷམྨཱནཾ ¶ སཧཛཱཏཔཙྩཡབྷཱཝཾ པུབྦེ ཨནིཝཱརིཏཾ ནིཝཱརེཏི. ཨེཝཉྩ ཀཏྭཱ ‘‘ཀིཉྩི ཀཱལ’’ནྟི ཝཱ ‘‘ཀིསྨིཉྩི ཀཱལེ’’ཏི ཝཱ ཝཏྟབྦེ ཏཐཱ ཨཝཏྭཱ ཝིབྷཏྟིཝིཔལླཱསཾ ཀཏྭཱ ཝུཏྟཾ. ཏེན ཀིཉྩཱིཏི ཨུཔཡོགེཀཝཙནཾ. ‘‘རཱུཔིནོ དྷམྨཱ’’ཏི ཨེཏེན སམྦནྡྷེ པཙྩཏྟབཧུཝཙནཾ ཛཱཡཏི. ‘‘ཀཱལེ’’ཏི ཨེཏེན སམྦནྡྷེ བྷུམྨེཀཝཙནནྟི དཱིཔིཏནྟི ཝེདིཏབྦཾ. པུརིམེན ཙ ‘‘ཨེཀོ ཁནྡྷོ, ཝཏྠུ ཙ ཏིཎྞནྣཾ ཁནྡྷཱན’’ནྟི (པཊྛཱ. ༡.༡.༤༡༩) ཨཱདིཝཙནེན ནཱམསཧིཏཾ ཨེཝ ཝཏྠུ ནཱམསྶ པཙྩཡོཏི ཝཏྟབྦེ ཨཱཔནྣེ ཨིཏརེན ཀེཝལསྶ ཙ ཏཐཱཝཏྟབྦཏཾ དསྶེཏི. སྭཱཡཾ སཧཛཱཏཔཙྩཡོ ‘‘ཀུསལོ དྷམྨོ ཀུསལསྶ, ཨབྱཱཀཏསྶ, ཀུསལཱབྱཱཀཏསྶ, ཨཀུསལོ དྷམྨོ ཨཀུསལསྶ ¶ , ཨབྱཱཀཏསྶ, ཨཀུསལཱབྱཱཀཏསྶ, ཨབྱཱཀཏོ དྷམྨོ ཨབྱཱཀཏསྶ, ཀུསལཱབྱཱཀཏོ དྷམྨོ ཨབྱཱཀཏསྶ, ཨཀུསལཱབྱཱཀཏོ དྷམྨོ ཨབྱཱཀཏསྶཱ’’ཏི (པཊྛཱ. ༡.༡.༤༡༩) ནཝཝིདྷོ ཝེདིཏབྦོ.

༦༠༠. ཨཏྟནོ ཨུཔཀཱརཀསྶ ཨུཔཀཱརཀཏཱ ཨཉྙམཉྙཔཙྩཡཏཱ. ཏཐཱ ཧིསྶ ཏིདཎྜཾ ནིདསྶིཏཾ. ཨུཔཀཱརཀཏཱ ཙ ཨཉྙམཉྙཏཱཝསེནེཝ དཊྛབྦཱ, ན སཧཛཱཏཏཱདིཝསེན. སཧཛཱཏཱདིཔཙྩཡོ ཧོནྟོཡེཝ ཧི ཀོཙི ཨཉྙམཉྙཔཙྩཡོ ན ཧོཏི, ན ཙ སཧཛཱཏཱདིཔཙྩཡདྷམྨེཧི ཝིནཱ ཨིམསྶ པཝཏྟི ཨཏྠི. ཏཐཱ ཧི སཧཛཱཏཱདིཔཙྩཡོ ཙ ཧོནྟོཡེཝ ཧི ཀོཙི ཨཉྙམཉྙཔཙྩཡོ ཧོཏི. ཡདི ཙ ཨཏྟནོ ཨུཔཀཱརཀསྶ ཨུཔཀཱརཀཏཱམཏྟཾ ཨཉྙམཉྙཔཙྩཡོ སིཡཱ, པུརེཛཱཏཔཙྪཱཛཱཏབྷཱཝེན ཨུཔཀཱརསྶ ཨུཔཀཱརཀཱ ཝཏྠུཁནྡྷཱ ཨཉྙམཉྙཔཙྩཡཱ སིཡུཾ, ན ཙ ཏཾ ཨིཙྪིཏཾ. ཏེན ཝུཏྟཾ ‘‘ཨུཔཀཱརཀཏཱ ཙ ཨཉྙམཉྙཝསེནེཝ དཊྛབྦཱ’’ཏི. ཨཡཉྩ ཨུཔྤཏྟིཡཱ, ཋིཏིཡཱ ཙ ཨུཔཀཱརཀོཏི ཝེདིཏབྦོ. ཨཡཾ པན ‘‘ཀུསལོ དྷམྨོ ཀུསལསྶ, ཨཀུསལོ དྷམྨོ ཨཀུསལསྶ, ཨབྱཱཀཏོ དྷམྨོ ཨབྱཱཀཏསྶཱ’’ཏི ཏིཝིདྷོ ཝེདིཏབྦོ.

༦༠༡. ཏརུཨཱདཱིནཾ པཐཝཱི ཝིཡ ཨདྷིཊྛཱནཱཀཱརེན པཐཝཱིདྷཱཏུ སེསདྷཱཏཱུནཾ, ཙཀྑཱདཡོ ཙཀྑུཝིཉྙཱཎཱདཱིནཾ ཨུཔཀཱརཀཱ ཙིཏྟཀམྨསྶ པཊཱདཡོ ཝིཡ ནིསྶཡཱཀཱརེན ཁནྡྷཱདཡོ ཏཾཏཾནིསྶཡཱནཾ ཁནྡྷཱདཱིནཾ. པཐཝཱིདྷཱཏུཡཾ པཏིཊྛཱཡ ཨེཝ ཧི སེསདྷཱཏུཡོ ཨུཔཱདཱརཱུཔཱནི ཝིཡ ཡཐཱསཀཾ ཀིཙྩཾ ཀརོནྟི.

ཨདྷིཊྛཱནཱཀཱརེནཱཏི ¶ ཨཱདྷཱརཱཀཱརེན. ཨཱདྷཱརཱཀཱརོ ཙེཏྠ ཏེསཾ སཱཏིསཡཾ ཏདདྷཱིནཝུཏྟིཏཱཡ ཝེདིཏབྦོ. ཡཏོ བྷཱུཏཱནི ཨནིདྡིསིཏབྦཊྛཱནཱནི ཝུཙྩནྟི, ཨེཝཉྩ ཀཏྭཱ ཙཀྑཱདཱིནམྤི ཨདྷིཊྛཱནཱཀཱརེན ཨུཔཀཱརཀཏཱ སུཊྛུ ཡུཛྫཏི. ན ཧི ཡཐཱཝུཏྟཾ ཏདདྷཱིནཝུཏྟིཏཱཝིསེསཾ མུཉྩིཏྭཱ ཨཉྙོ ཙཀྑཱདཱིསུ ཨདེསཀཱནཾ ཨརཱུཔདྷམྨཱནཾ ཨདྷིཊྛཱནཱཀཱརོ སམྦྷཝཏི. ཡདིཔི ཡཾ ཡཾ དྷམྨཾ པཊིཙྩ ཡེ ཡེ དྷམྨཱ ཨུཔྤཛྫནྟི, ཏེསཾ སབྦེསཾ ཏདདྷཱིནཝུཏྟིབྷཱཝོ. ཡེན པན པཙྩཡབྷཱཝཝིསེསེན ཙཀྑཱདཱིནཾ པཊུམནྡབྷཱཝེསུ ཙཀྑུཝིཉྙཱཎཱདཡོ ཏདནུཝིདྷཱནཱཀཱརེནེཝ པཝཏྟནྟི, སྭཱཡམིདྷ ཏེསཾ ཏདདྷཱིནཝུཏྟིཏཱསིདྡྷོ ཝིསེསོཏི. ཨེཝཉྷི པཙྩཡབྷཱཝསཱམཉྙེ སཏིཔི ཨཱརམྨཎཔཙྩཡཏོ ནིསྶཡཔཙྩཡསྶ ཝིསེསོ ཝིབྷཱཝིཏོ ཧོཏི. སྭཱཡཾ ནཡོ ཧེཊྛཱ པཀཱསིཏོཝ. ཚཊྛོ པནཱཏི ཨེཏྠ ‘‘རཱུཔིནོ ¶ དྷམྨཱ ཨརཱུཔཱིནཾ དྷམྨཱནཾ ཀིསྨིཉྩི ཀཱལེ’’ཏི ཨིདཾ ན ལབྦྷཏི. ཡཾ པནེཏྠ ལབྦྷཏི ‘‘རཱུཔིནོ དྷམྨཱ ཀེཙཱི’’ཏི, ཏཏྠ ཏེ ཨེཝ དྷམྨེ དསྶེཏུཾ ‘‘ཙཀྑཱཡཏན’’ནྟིཨཱདི ནིདྡིཊྛཾ. ཡཾ རཱུཔནྟི ཧདཡཝཏྠུཾ སནྡྷཱཡ ཝུཏྟཾ. ཨཡཾ པན ནིསྶཡཔཙྩཡོ ཏེརསཝིདྷོ. ཀཐཾ? སཧཛཱཏཏོ ཀུསལམཱུལཱ ཏཡོ, ཏཐཱ ཨཀུསལམཱུལཱ, ཨབྱཱཀཏམཱུལེསུ པན པུརེཛཱཏཾ ལབྦྷཏི. ཨབྱཱཀཏཉྷི ཨབྱཱཀཏསྶ སཧཛཱཏམྤི པཙྩཡོ ཧོཏི, པུརེཛཱཏམྤི ཀུསལསྶ པུརེཛཱཏམེཝ, ཏཐཱ ཨཀུསལསྶ, ཀུསལཱབྱཱཀཏཾ སཧཛཱཏཔུརེཛཱཏཏོ ཀུསལསྶ, སཧཛཱཏཏོ ཨེཝ ཨབྱཱཀཏསྶ, ཏཐཱ ཨཀུསལཱབྱཱཀཏ’’ནྟི ཨེཝཾ ཏེརས.

༦༠༢. ཏདདྷཱིནཝུཏྟིཏཱཡ ཨཏྟནོ ཕལེན ནིསྶིཏོཏི ཡཾ ཀིཉྩི ཀཱརཎཾ ནིསྶཡོཏི ཝཏྭཱ ཏཏྠ ཡོ བྷུསོ ནིསྶཡོ, ཏཾ ཨུཔནིསྶཡོཏི ནིདྡྷཱརེཏི. བལཝཀཱརཎབྷཱཝེན ཨུཔཀཱརཀོཏི ཨཱརམྨཎབྷཱཝཝསེན ཨནནྟརཾ ཨནུརཱུཔཙིཏྟུཔྤཱདནསམཏྠཏཱཝསེན, ཀེཝལཉྩ བལཝནྟཾ ཀཱརཎཾ ཧུཏྭཱ ཨུཔཀཱརཀོ. ཏེནཱཧ ‘‘སོ’’ཏིཨཱདི.

ཏཏྠ དཱནཾ དཏྭཱཏི དེཡྻདྷམྨཾ ཙཛིཏྭཱ. ཡཱཡ ཝཱ ཙེཏནཱཡ སོ དིཡྻཏི, སཱ ཙེཏནཱ དཱནཾ. དཏྭཱཏི ཏཾ ཙེཏནཾ པརིཡོདཔེཏྭཱ ཝིསུདྡྷཾ ཀཏྭཱ. སཱིལཾ སམཱདིཡིཏྭཱཏི པཉྩངྒདསངྒཱདིཝསེན ནིཙྩསཱིལཾ གཎྷིཏྭཱ. ཨིམིནཱ སམཱདཱནཝིརཏིཡེཝ དསྶིཏཱ, སམྤཏྟཝིརཏིསམུཙྪེདཝིརཏིཡོ པན ལོཀེ ‘‘སཱིལ’’ནྟི ཨཔཱཀཊཏྟཱ ན ཝུཏྟཱ. ཀིཉྩཱཔི ན ཝུཏྟཱ, ཨཱརམྨཎཔཙྩཡོ ¶ པན ཧོནྟིཡེཝ. ཏཏྠ སམུཙྪེདཝིརཏི སེཀྑཱནཾཡེཝ ཀུསལསྶ ཨཱརམྨཎཾ ཧོཏི, ན ཨིཏརེསཾ. ཨུཔོསཐཀམྨནྟི ‘‘པཱཎཾ ན ཧནེ, ན ཙཱདིནྣམཱདིཡེ’’ཏི (སུ. ནི. ༤༠༢) ཨེཝཾ ཝུཏྟཾ ཨུཔོསཐསཱིལཾ. ཏཾ གརུཾ ཀཏྭཱ པཙྩཝེཀྑཏཱིཏི ཏཾ ཡཐཱཝུཏྟཾ ཀུསལཾ སེཀྑོཔི པུཐུཛྫནོཔི པཙྩཝེཀྑཏི, ཨརཧཱཔི ཏཾ པཙྩཝེཀྑཏེཝ. ཨརཧཏོཔི ཧི པུབྦེ ཀཏཾ ཀུསལཾ ཀུསལམེཝ. ཡེན པན ཙིཏྟེན པཙྩཝེཀྑཏི, ཏཾ ཀིརིཡཙིཏྟཾ ནཱམ ཧོཏི. ཏསྨཱ ‘‘ཀུསལོ ཀུསལསྶཱ’’ཏི ཨིམསྨིཾ ཨདྷིཀཱརེ ན ལབྦྷཏི. པུབྦེ སུཙིཎྞཱནཱིཏི ‘‘དཏྭཱ ཀཏྭཱ’’ཏི ཧི ཨཱསནྣཀཏཱནི ཝུཏྟཱནི, ཨིམིནཱ ན ཨཱསནྣཀཏཱནཱིཏི ཝེདིཏབྦཱནི, དཱནཱདཱིཧི ཝཱ སེསཱནི ཀཱམཱཝཙརཀུསལཱནི དསྶེཏུཾ ཨིདཾ ཝུཏྟཾ. ཛྷཱནཱ ཝུཊྛཧིཏྭཱཏི ཛྷཱནཾ སམཱཔནྣོ ཛྷཱནཏོ ཝུཊྛཧིཏྭཱ. ‘‘ཛྷཱནཾ ཝུཊྛཧིཏྭཱ’’ཏིཔི པཱལི༹. སེཀྑཱ གོཏྲབྷུནྟི སོཏཱཔནྣཾ སནྡྷཱཡ ཝུཏྟཾ. སོ ཧི གོཏྲབྷུཾ པཙྩཝེཀྑཏི. ‘‘ཝོདཱན’’ནྟི ཨིདཾ པན སཀདཱགཱམིཨནཱགཱམིནོ སནྡྷཱཡ ཝུཏྟཾ. ཏེསཉྷི ཏཾ ཙིཏྟཾ ཝོདཱནཾ ནཱམ ཧོཏི. སེཀྑཱཏི སོཏཱཔནྣསཀདཱགཱམིཨནཱགཱམིནོ ¶ . མགྒཱ ཝུཊྛཧིཏྭཱཏི མགྒཕལབྷཝངྒཱཏིཀྐམཝསེན ཨཏྟནཱ པཊིལདྡྷམགྒཱ ཝུཊྛཧིཏྭཱ, སུདྡྷམགྒཏོཡེཝ པན ཝུཊྛཱཡ པཙྩཝེཀྑཎཾ ནཱམ ནཏྠི. ཨཱདི-སདྡེན ‘‘ཀུསལཾ ཨནིཙྩཏོ དུཀྑཏོ ཨནཏྟཏོ ཝིཔསྶནྟཱི’’ཏི (པཊྛཱ. ༡.༡.༤༠༤) ཨེཝམཱདིཾ སངྒཎྷཱཏི. ཡདིཔི ནཱནཏྟཾ ཨཀཏྭཱཝ ཝིབྷཏྟོ, ཏཐཱཔི ཨིདམྤི ཨཱརམྨཎཱདྷིཔཏིཨཱརམྨཎཱུཔནིསྶཡཱནཾ ཝིསེསོཏི དསྶེཏུཾ ‘‘ཏཏྠཱ’’ཏིཨཱདི ཝུཏྟཾ.

ནེསཾ ཙིཏྟཙེཏསིཀཱནཾ ཨནནྟརཔཙྩཡཨནནྟརཱུཔནིསྶཡཱནཾ ནིཀྑེཔཝིསེསོ ཨཏྠི. ཡསྨཱ པུརིམོ ཨབྱཱཀཏདྷམྨཝསེན པཝཏྟོ, ཨིཏརོ ཀུསལཱདིཝསེནཔཱིཏི སོཔི ནིཀྑེཔཝིསེསོ ཨཏྠཏོ ཨེཀཱིབྷཱཝམེཝ གཙྪཏི སབྦེསུཔི ཙིཏྟུཔྤཱདེསུ ཏདུབྷཡསྶ ཨིཙྪིཏབྦཏྟཱ. ཨེཝཾ སནྟེཔཱིཏིཨཱདི ཨནནྟརཨནནྟརཱུཔནིསྶཡཱནཾ ཝིསེསདསྶནཾ. ཡཐཱ ཧཱིཏིཨཱདི ཨནནྟརཱུཔནིསྶཡསྶ སམྦྷཝདསྶནཾ.

པཀཏོཏི ཨེཏྠ པ-ཀཱརོ ཨུཔསགྒོ, སོ ཨཏྟནོ ཕལསྶ ཨུཔྤཱདནསམཏྠབྷཱཝེན སུཊྛུཀཏཏཾ དཱིཔེཏི. ཏཐཱ ཙ ཀཏཾ ཨཏྟནོ སནྟཱནེ ཀཏཾ ཧོཏཱིཏི ཨཱཧ ‘‘ཨཏྟནོ སནྟཱནེ’’ཏིཨཱདི. ཀརཎཉྩ དུཝིདྷཾ ནིཔྥཱདནཾ, ཨུཔསེཝནཉྩཱཏི ཏཾ དསྶེཏུཾ ‘‘ནིཔྥཱདིཏོ ཝཱ’’ཏིཨཱདི ཝུཏྟཾ. ཏཏྠ ནིཔྥཱདནཾ ¶ ཧེཏུཔཙྩཡསམོདྷཱནེན ཕལསྶ ནིབྦཏྟནཾ. ཨུཔསེཝནཾ པན ཀཱཡེ ཨལླཱིཡཱཔནཝསེན ཨུཔཡོགཱུཔསེཝནཾ, ཝིཛཱནནསཉྫཱནནཱདཱིནཾ ཝསེན ཨཱརམྨཎཱུཔསེཝནཉྩ. ཏེནེཝ ཨནཱགཏཱནམྤི ཨུཏུསམྤདཱདཱིནཾ ཨཱརམྨཎཱུཔསེཝནེན ཨུཔསེཝིཏཱནཾ པཀཏཱུཔནིསྶཡཏཱ ཝུཏྟཱ ཧོཏི, པགེཝ ཨཏཱིཏཔཙྩུཔྤནྣཱནཾ. པཙྩུཔྤནྣསྶཱཔི ཧི ‘‘པཙྩུཔྤནྣཾ ཨུཏུབྷོཛནཾ སེནཱསནཾ ཨུཔནིསྶཱཡ ཛྷཱནཾ ཨུཔྤཱདེཏཱི’’ཏིཨཱདིཝཙནཏོ (པཊྛཱ. ༢.༡༨.༨) པཀཏཱུཔནིསྶཡབྷཱཝོ ལབྦྷཏཱིཏི. པཀཏིཡཱ ཨེཝཱཏི པཙྩཡནྟརསངྐརརཧིཏེན ཨཏྟནོ སབྷཱཝེནེཝ. ཨུཔནིསྶཡོཏི བལཝཀཱརཎཾ ཀཏྭཱ. ཨནེཀཔྤཀཱརཏོ པབྷེདོ ཝེདིཏབྦོ པཉྷཱཝཱརེ ཨཱགཏནཡེན. པཙྩཡཝཱརེ པན –

‘‘པུརིམཱ པུརིམཱ ཀུསལཱ དྷམྨཱ པཙྪིམཱནཾ པཙྪིམཱནཾ ཀུསལཱནཾ དྷམྨཱནཾ ཨུཔནིསྶཡཔཙྩཡེན པཙྩཡོ, པུརིམཱ པུརིམཱ ཀུསལཱ དྷམྨཱ པཙྪིམཱནཾ པཙྪིམཱནཾ ཨཀུསལཱནཾ དྷམྨཱནཾ ཀེསཉྩི, ཀུསལཱ ཨབྱཱཀཏཱནཾ, ཨཀུསལཱ ཨཀུསལཱནཾ, ཀུསལཱནཾ ཀེསཉྩི, ཨཀུསལཱ ཨབྱཱཀཏཱནཾ, ཨབྱཱཀཏཱ ཨབྱཱཀཏཱནཾ, ཨབྱཱཀཏཱ ཀུསལཱནཾ, ཨབྱཱཀཏཱ ཨཀུསལཱནཾ ¶ , པུགྒལོཔི, སེནཱསནམྤི ཨུཔནིསྶཡཔཙྩཡེན པཙྩཡོ’’ཏི (པཊྛཱ. ༡.༡.༩).

ཏཏྠ ཡེ པུརིམཱ ཡེསཾ པཙྪིམཱནཾ ཨནནྟརཱུཔནིསྶཡོ ཧོནྟི, ཏེ ཏེསཾ སབྦེསམྤི ཨེཀནྟེནེཝ ཧོནྟི, ན ཀེསཉྩི ཀདཱཙི. ཏསྨཱ ཡེསུ པདེསུ ཨནནྟརཱུཔནིསྶཡོ ལབྦྷཏི, ཏེསུ ‘‘ཀེསཉྩཱི’’ཏི ན སཀྐཱ ཝཏྟུནྟི ན ཝུཏྟཾ. ཡེ པན པུརིམཱ ཡེསཾ པཙྪིམཱནཾ ཨཱརམྨཎཱུཔནིསྶཡོ ཝཱ པཀཏཱུཔནིསྶཡོ ཝཱ ཧོནྟི, ཏེ ཏེསཾ, ན སབྦེསཾ ཨེཀནྟེན ཧོནྟི. ཡེསཾ ཨུཔྤཏྟིཝིབནྡྷཀཱ པཙྩཡཱ བལཝནྟོ ཧོནྟི, ཏེསཾ ན བྷཝནྟི, ཨིཏརེསཾ བྷཝནྟི. ཏསྨཱ ཡེསུ པདེསུ ཨནནྟརཔཙྩཡོ ན ལབྦྷཏི, ཏེསུ ‘‘ཀེསཉྩཱི’’ཏི ཝུཏྟཾ. སིདྡྷཱནཾ པཙྩཡདྷམྨཱནཾ ཡེཧི པཙྩཡུཔྤནྣེཧི བྷཝིཏབྦཾ, ཏེསཾ ‘‘ཀེསཉྩཱི’’ཏི ཨཡམེཏྠ ཨཏྠོ.

ཀསིཎཔཉྙཏྟིཡཱ ཨཱརམྨཎཱུཔནིསྶཡཏཱབྷཱཝཏོ ཨེཀཙྩཱཡ པཉྙཏྟིཡཱ སདྡྷིཾ སབྦོ དྷམྨོ ཨཱརམྨཎཱུཔནིསྶཡོ, ཨནནྟརཱཏཱིཏོ ཙིཏྟཙེཏསིཀརཱསི ཨནནྟརཱུཔནིསྶཡོ, ཀུསལཱཀུསལཝིཔཱཀཀིརིཡཱརཱུཔཝསེན པཉྩཝིདྷོ ¶ པཀཏཱུཔནིསྶཡོཏི ཨཡམེཏྠ སངྑེཔོ. ཝིཏྠཱརོ པན པཊྛཱནཊྛཀཐཱཡཾ ཝེདིཏབྦོ.

༦༠༣. པཋམཏརནྟི པཙྩཡུཔྤནྣཏོ པུརེཏརཾ. ཨཡཉྷི པུརེཛཱཏཔཙྩཡོ རཱུཔདྷམྨཝསེནེཝ ལབྦྷཏི. པཙྩཡུཔྤནྣོ ཙ ཨརཱུཔདྷམྨཱཡེཝ. ཏེནཱཧ ‘‘ཝཏྟམཱནབྷཱཝེན ཨུཔཀཱརཀོ’’ཏི. ནིསྶཡཱརམྨཎཱཀཱརཱདཱིཧི ཝིསིཊྛཱ པུརེཛཱཏབྷཱཝེན ཝིནཱ ཨུཔཀཱརཀབྷཱཝཾ ཨགཙྪནྟཱནཾ ཝཏྠཱརམྨཎཱནཾ པུརེཛཱཏཱཀཱརེན ཨུཔཀཱརཀཏཱ པུརེཛཱཏཔཙྩཡཏཱ. ཨེཝཾ ཝཏྠཱརམྨཎཝསེན དུཝིདྷེ པུརེཛཱཏཔཙྩཡེ ‘‘ཙཀྑཱཡཏན’’ནྟིཨཱདི ཝཏྠུཝསེན ཝུཏྟཾ, ‘‘རཱུཔཱརམྨཎ’’ནྟིཨཱདི ཨཱརམྨཎཝསེན.

ཡཾ རཱུཔནྟི ཧདཡཝཏྠུཾ སནྡྷཱཡཱཧ. ཏཏྠ ‘‘ཀིཉྩི ཀཱལེ’’ཏི པཝཏྟིཀཱལཝསེན ཝུཏྟཾ. ‘‘ཀིཉྩི ཀཱལེན’’ ཨིཏི པཊིསནྡྷིཀཱལཝསེན. ཡཱནི ཨཱརམྨཎཔུརེཛཱཏེན ཝིནཱ ན ཝཏྟནྟི, ཏེསཾ ཙཀྑུཝིཉྙཱཎཱདཱིནཾ ཨཱརམྨཎཔུརེཛཱཏདསྶནེན མནོདྭཱརེཔི ཡཾ ཡཾ ཨཱརམྨཎཔུརེཛཱཏེན ཝཏྟཏི, ཏསྶ ཏསྶ ཨཱརམྨཎཔཙྩཡབྷཱུཏཾ སབྦཾ རཱུཔརཱུཔཾ ཨཱརམྨཎཔུརེཛཱཏནྟི དསྶིཏམེཝ ཧོཏི. ཏཐཱ ཧི ཝུཏྟཾ པཉྷཱཝཱརེ ‘‘ཨཱརམྨཎཔུརེཛཱཏཾ སེཀྑཱ ཝཱ པུཐུཛྫནཱ ཝཱ ཙཀྑུཾ ཨནིཙྩཏོ ¶ དུཀྑཏོ ཨནཏྟཏོ ཝིཔསྶནྟཱི’’ཏིཨཱདི (པཊྛཱ. ༡.༡.༤༢༤). ‘‘ཨབྱཱཀཏོ དྷམྨོ ཨབྱཱཀཏསྶ དྷམྨསྶ པུརེཛཱཏཔཙྩཡེན པཙྩཡོ, ཨབྱཱཀཏོ དྷམྨོ ཀུསལསྶ དྷམྨསྶ པུརེཛཱཏཔཙྩཡེན པཙྩཡོ, ཨབྱཱཀཏོ དྷམྨོ ཨཀུསལསྶ དྷམྨསྶ པུརེཛཱཏཔཙྩཡེན པཙྩཡོ’’ཏི (པཊྛཱ. ༡.༡.༤༢༤) ཨབྱཱཀཏམཱུལཀཱ ཏཡོཝ ཝཱརཱ. ཏེ ཙ པཙྩེཀཾ ཝཏྠུཔུརེཛཱཏཾ, ཨཱརམྨཎཔུརེཛཱཏནྟི དྭིདྷཱ ཝིབྷཏྟཱ.

༦༠༤. པཙྩཡུཔྤནྣདྷམྨསྶ པུརེཏརཾ སིདྡྷབྷཱཝེ སཏི པཙྩཡདྷམྨསྶ པཙྪཱཛཱཏཏཱཏི ཝུཏྟཾ ‘‘པུརེཛཱཏཱན’’ནྟི. ཨཡཉྩ ནཡོ རཱུཔདྷམྨེསུ ཨེཝ ལབྦྷཏི, ན ཨརཱུཔདྷམྨེསཱུཏི ཝུཏྟཾ ‘‘རཱུཔདྷམྨཱན’’ནྟི. ཡདི པཙྩཡུཔྤནྣདྷམྨཱ པུརེཏརམེཝ ཛཱཏཱ, ཀཐཾ པཙྩཡབྷཱཝོཏི ཨཱཧ ‘‘ཨུཔཐམྦྷཀཏྟེནཱ’’ཏི. པཙྪཱཛཱཏེན ཧི ཝིནཱ སནྟཱནཱཝིཙྪེདཧེཏུབྷཱཝཾ ཨགཙྪནྟཱནཾ དྷམྨཱནཾ ཡེ པཙྪཱཛཱཏཱཀཱརེན ཨུཔཀཱརཀཱ, ཏེསཾ སཱ ཝིཔྤཡུཏྟཱཀཱརཱདཱིཧི ཝིསིཊྛཱ ཨུཔཀཱརཀཏཱ ¶ པཙྪཱཛཱཏཔཙྩཡཏཱ. ཨེཝཾ སབྦཔཙྩཡཱནཾ པཙྩཡནྟརཱཀཱརཝིསིཊྛཱ ཨུཔཀཱརཀཏཱ ཡོཛེཏབྦཱ. ‘‘གིཛ྄ཛྷཔོཏཀསརཱིརཱནཾ ཨཱཧཱརཱསཱཙེཏནཱ ཝིཡཱ’’ཏི ཨེཏེན མནོསཉྩེཏནཱཧཱརཝསེན པཝཏྟམཱནེཧི ཨརཱུཔདྷམྨེཧི རཱུཔཀཱཡསྶ ཨུཔཏྠམྦྷིཏབྷཱཝཾ དསྶེཏི. ཏེནེཝ ‘‘ཨཱཧཱརཱསཱ ཝིཡཱ’’ཏི ཨཝཏྭཱ ཙེཏནཱགྒཧཎཾ ཀཏཾ. ཀཱཡསྶཱཏི ཙཏུསམུཊྛཱནིཀབྷཱུཏུཔཱདཱཡརཱུཔསངྑཱཏསྶ རཱུཔཀཱཡསྶ. སངྑེཔཏོ ཋཔེཏྭཱ རཱུཔདྷམྨེ ཨཝིསིཊྛོ ཨརཱུཔཀྑནྡྷོ པཙྪཱཛཱཏཔཙྩཡོ. སོ ཛཱཏིཝསེན ཀུསལོ, ཨཀུསལོ, ཝིཔཱཀོ, ཀིརིཡཱཏི ཙཏུབྦིདྷོཏི ཝེདིཏབྦཾ.

༦༠༥. ཀུསལཱདིབྷཱཝེན ཨཏྟནཱ སདིསསྶ པཡོགེན ཀརཎཱིཡསྶ པུནཔྤུནཾ ཀརཎཾ པཝཏྟནཾ ཨཱསེཝནཊྛོ, ཨཏྟསདིསསབྷཱཝཏཱཔཱདནཾ ཝཱསནཾ ཝཱ. པུརིམཔུརིམཱབྷིཡོགོ ཝིཡཱཏི ཨུགྒཧཎསཝནདྷཱརཎཱདིཔུརིམཱཔུརིམཱསེཝནཱ ཝིཡ. ཏཱིསུ པན ཨེཏེསུ པུརིམཱ པུརིམཱཏི སམནནྟརཱཏཱིཏཱ དཊྛབྦཱ. ཀསྨཱ པནེཏྠ ཨནནྟརཔཙྩཡེ ཝིཡ ‘‘པུརིམཱ པུརིམཱ ཀུསལཱ དྷམྨཱ པཙྪིམཱནཾ པཙྪིམཱནཾ ཨབྱཱཀཏཱན’’ནྟིཨཱདིནཱ བྷིནྣཛཱཏིཡེཧི སདྡྷིཾ ནིདྡེསོ ན ཀཏོཏི? ཨཏྟནོ གཏིཾ གཱཧེཏུཾ ཨསམཏྠཏྟཱ. བྷིནྣཛཱཏིཀཱ ཧི བྷིནྣཛཱཏིཀཱནཾ ཨཱསེཝནགུཎེན པགུཎབལཝབྷཱཝཾ སམྤཱདེནྟཱ ཨཏྟནོཝ ཀུསལཱདིབྷཱཝསངྑཱཏཾ གཏིཾ གཱཧེཏུཾ ན སཀྐུཎནྟི. ཏསྨཱ ཏེཧི སདྡྷིཾ ནིདྡེསཾ ཨཀཏྭཱ ཡེ ཡེསཾ ཝཱསནཱསངྑཱཏེན ཨཱསེཝནགུཎེན པགུཎབལཝབྷཱཝཝིསིཊྛཾ ཨཏྟནོ ཀུསལཱདིབྷཱཝསངྑཱཏཾ གཏིཾ གཱཧེཏུཾ སམཏྠཱ, ཏེསཾ ཏེཧི སམཱནཛཱཏིཀེཧེཝ སདྡྷིཾ ནིདྡེསོ ཀཏོཏི དཊྛབྦོ.

ཨཐ ¶ ཝིཔཱཀཱབྱཱཀཏཾ ཀསྨཱ ན གཧིཏཾ? ཨཱསེཝནཱབྷཱཝཏོ. ཝིཔཱཀཱབྱཱཀཏཉྷི ཀམྨཝསེན ཝིཔཱཀབྷཱཝཔྤཏྟཾ ཀམྨཔརིཎཱམིཏཾ ཧུཏྭཱ པཝཏྟམཱནཾ ནིརུསྶཱཧཾ དུབྦལཾ སནྟཾ ཨཱསེཝནགུཎེན ཨཏྟནོ སབྷཱཝཾ གཱཧེཏྭཱ པརིབྷཱཝེཏྭཱ ནེཝ ཨཉྙཾ ཝིཔཱཀཾ པཝཏྟེཏི, ན ཙ པུརིམཝིཔཱཀཱནུབྷཱཝཾ གཧེཏྭཱ ཨུཔྤཛྫཏི, ཨཐ ཁོ ཀམྨཝེགཀྑིཏྟཾ པཏིཏཾ ཝིཡ ཧུཏྭཱ ཨུཔྤཛྫཏི. ཏསྨཱ སབྦཐཱཔི ཝིཔཱཀེ ཨཱསེཝནཱ ནཏྠཱིཏི ན གཧིཏཾ. ཀུསལཱཀུསལཀིརིཡཱནནྟརཾ ཨུཔྤཛྫམཱནམྤི སཀམྨཔཊིབདྡྷཝུཏྟིཏཱཡ ཨཱསེཝནགུཎཾ ན གཎྷཱཏཱིཏི ཀུསལཱདཡོཔི ཏསྶ ཨཱསེཝནཔཙྩཡོ ན ཧོནྟི. ནཱནཱཛཱཏིཀཏྟཱཔི ཙེཏེ ཏསྶ ཨཱསེཝནཱདྷཱནཾ ན ¶ ཀརོནྟེཝ. བྷཱུམིཏོ, པན ཨཱརམྨཎཏོ ཝཱ ནཱནཱཛཱཏིཀཏཱ ནཱམ ནཏྠཱིཏི པརིཏྟཀུསལཀིརིཡཱ མཧགྒཏཀུསལཀིརིཡཱནཾ, སངྑཱརཱརམྨཎཉྩ ཀུསལཾ ནིབྦཱནཱརམྨཎསྶ ཨཱསེཝནཔཙྩཡོ ཧོཏིཡེཝ. སྭཱཡཾ ‘‘ཀུསལོ དྷམྨོ ཀུསལསྶ, ཨཀུསལོ དྷམྨོ ཨཀུསལསྶ, ཨབྱཱཀཏོ དྷམྨོ ཨབྱཱཀཏསྶ ཨཱསེཝནཔཙྩཡེན པཙྩཡོ’’ཏི (པཊྛཱ. ༡.༡.༤༢༦) ཏིདྷཱཝ ཝུཏྟོ. ཨབྱཱཀཏགྒཧཎེན ཨཱཝཛྫནཝཛྫིཏཱ ཀིརིཡདྷམྨཱ གཧིཏཱ.

༦༠༦. ཙིཏྟཔཡོགོ ཙིཏྟཀིརིཡཱ, ཨཱཡཱུཧནནྟི ཨཏྠོ. ཡཐཱ ཧི ཀཱཡཝཙཱིཔཡོགོ ཝིཉྙཏྟི, ཨེཝཾ ཙིཏྟཔཡོགོ ཙེཏནཱ. ཏེན ཧི སཱ ཨུཔྤནྣཀིརིཡཏཱཝིསིཊྛེ སནྟཱནེ སེསཔཙྩཡསམཱགམེ པཝཏྟམཱནཱནཾ ཝིཔཱཀཀཊཏྟཱརཱུཔཱནམྤི ཏེནེཝ སནྟཱནཝིསེསེན ཀིརིཡཱབྷཱཝེན ཨུཔཀཱརིཀཱ ཧོཏི. ཏསྶ ཧི ཀིརིཡཱབྷཱཝསྶ པཝཏྟཏྟཱ ཏེསཾ པཝཏྟི, ན ཨཉྙཐཱ. སཧཛཱཏཱནཾ པན ཨཱཡཱུཧནཀིརིཡཱབྷཱཝེན པཝཏྟམཱནཱ ཨུཔཀཱརིཀཱཏི ཀིཾ ཝཏྟབྦཾ. ཀམྨནྟི ཙ ཙེཏནཱཀམྨམེཝ ཨདྷིཔྤེཏཾ. ན ཧི ཙེཏནཱསམྤཡུཏྟཾ ཀམྨཾ ཨབྷིཛ྄ཛྷཱདི ཀམྨཔཙྩཡོ ཧོཏི. སཏིཔི ཝིཔཱཀདྷམྨབྷཱཝེ ཙེཏནཱཝཛྫཱནཾ ཨཏཾསབྷཱཝཏྟཱ ཝིཔཱཀཱཔི ཙེཏནཱ སཧཛཱཏཀམྨཔཙྩཡོ ཧོཏིཡེཝ, སྭཱཡཾ ཀམྨཔཙྩཡོ ཛཱཏིཝསེན ཙཏུབྦིདྷོཏི སབྦཾ ཝཏྟབྦཾ.

༦༠༧. ‘‘ནིརུསྶཱཧསནྟབྷཱཝེནཱ’’ཏི ཨེཏེན སཨུསྶཱཧེཧི ཝིཔཱཀདྷམྨདྷམྨེཧི ཀུསལཱཀུསལེཧི སཱརམྨཎཱདིབྷཱཝེན སདིསཱནམྤི ཨསདིསཾ ཝིཔཱཀབྷཱཝཾ དསྶེཏི. སོ ཧི ཝིཔཱཀཱནཾ པཡོགེན ཨསཱདྷེཏབྦཏཱཡ པཡོགེན, ཨཉྙཐཱ ཝཱ སེསཔཙྩཡེསུ སིདྡྷེསུ ཀམྨསྶ ཀཊཏྟཱ ཨེཝ སིཛ྄ཛྷནཏོ ནིརུསྶཱཧོ སནྟབྷཱཝོ ཧོཏི, ན ཀིལེསཝཱུཔསནྟབྷཱཝོ. ཏཐཱསནྟབྷཱཝཏོ ཨེཝ ཧི བྷཝངྒཱདཡོ དུཝིཉྙེཡྻཱ. པཉྩདྭཱརེཔི ཧི ཛཝནཔྤཝཏྟིཡཱ རཱུཔཱདཱིནཾ གཧིཏཏཱ ཝིཉྙཱཡཏི, ཨབྷིནིཔཱཏསམྤཊིཙྪནསནྟཱིརཎམཏྟཱ པན ཝིཔཱཀཱ དུཝིཉྙེཡྻཱ ཨེཝ. ནིརུསྶཱཧསནྟབྷཱཝཱཡཱཏི ¶ ནིརུསྶཱཧསནྟབྷཱཝཏྠཱཡ. ཨེཏེན ཏཔྤཙྩཡཝནྟཱནཾ ཨཝིཔཱཀཱནམྤི རཱུཔདྷམྨཱནཾ ཝིཔཱཀཱནུཀཱུལཾ པཝཏྟིཾ དསྶེཏི. པཝཏྟེཏིཨཱདི པཉྷཱཝཱརནཡཾ གཧེཏྭཱ ཝུཏྟཾ. པཊིཙྩཝཱརེ པན ‘‘ཝིཔཱཀཱ ཙཏྟཱརོ ¶ ཁནྡྷཱ ཨརཱུཔིནོ ཨཉྙམཉྙཾ ཝིཔཱཀཔཙྩཡེན པཙྩཡོ’’ཏིཨཱདིནཱ (པཊྛཱ. ༡.༡.༡༤) ཨཱགཏཱ. ཨེཏྠ ཙ ཡེསཾ ཨེཀནྟེན ཝིཔཱཀོ ཝིཔཱཀཔཙྩཡོ ཧོཏི, ཏེསཾ ཝསེན ནཡདསྶནཾ ཀཏནྟི དཊྛབྦཾ. ན ཧི ཨཱརུཔྤེ ཀཱམརཱུཔབྷཱུམཱིསུ ཝིཡ ཝིཔཱཀོ རཱུཔསྶ པཙྩཡོ ཧོཏི.

༦༠༨. སཏིཔི ཛནཀབྷཱཝེ ཨུཔཏྠམྦྷཀཏྟཾ ཨཱཧཱརཱནཾ པདྷཱནཀིཙྩནྟི ཨཱཧ ‘‘རཱུཔཱརཱུཔཱནཾ ཨུཔཏྠམྦྷཀཏྟེནཱ’’ཏི. ཨུཔཏྠམྦྷཀཏྟཉྷི སཏིཔི ཛནཀཏྟེ ཨརཱུཔཱིནཾ ཨཱཧཱརཱནཾ, ཨཱཧཱརཛརཱུཔསམུཊྛཱཔཀརཱུཔཱཧཱརསྶ ཙ ཧོཏི. ཨསཏིཔི ཙཏུསམུཊྛཱནིཀརཱུཔཱུཔཏྠམྦྷཀརཱུཔཱཧཱརསྶ, ཨསཏི པན ཨུཔཏྠམྦྷཀཏྟེ ཨཱཧཱརཱནཾ ཛནཀཏྟཾ ནཏྠཱིཏི ཨུཔཏྠམྦྷཀཏྟཾ པདྷཱནཾ. ཨཐ ཝཱ ཛནཡམཱནོཔི ཨཱཧཱརོ ཨཝིཙྪེདཝསེན ཨུཔཏྠམྦྷེནྟོ ཛནེཏཱིཏི ཨུཔཏྠམྦྷནབྷཱཝོ ཨེཝ ཨཱཧཱརབྷཱཝོཏི ‘‘ཨུཔཏྠམྦྷཀཏྟེནཱ’’ཏི ཝུཏྟཾ. ཀེཙི པན ‘‘རཱུཔཱཧཱརོ ཨཏྟནཱ ཛནིཏསྶ ཨཱཧཱརཔཙྩཡོ ན ཧོཏི, ཨཉྙེན ཛནིཏསྶ ཧོཏི, ཏསྨཱ ‘ཨུཔཏྠམྦྷཀཏྟེནཱ’ཏི ཝུཏྟ’’ནྟི ཝདནྟི. ཏཾ ‘‘ཨཱཧཱརོ རཱུཔསྶ པཙྩཡོ ཧོནྟོ ཨཱཧཱརཔཙྩཡོ ན ཧོཏཱིཏི ཝིརུདྡྷམེཏ’’ནྟི ཨཔརེ ནཱནུཛཱནནྟི. རཱུཔཱཧཱརོ ཙེཏྠ རཱུཔདྷམྨཱནཾ ཨེཝ ཨཱཧཱརཔཙྩཡོ ཧོཏི. ཨརཱུཔཱཧཱརཱ པན རཱུཔདྷམྨཱནམྤི ཨཱཧཱརཔཙྩཡོ ཧོནྟི. ཏཉྩ ཁོ ན ཀེཝལཾ ཙིཏྟསམུཊྛཱནཱནཾ རཱུཔཱནམེཝ, ཨཐ ཁོ ཀདཱཙི ཀཊཏྟཱརཱུཔཱནམྤཱིཏི དསྶེཏུཾ ‘‘པཉྷཱཝཱརེ པནཱ’’ཏིཨཱདི ཝུཏྟཾ.

༦༠༩. ཨདྷིཔཏིཡཊྛེནཱཏི ཨེཏྠ ན ཨདྷིཔཏིཔཙྩཡདྷམྨཱནཾ ཝིཡ པཝཏྟིནིཝཱརཀེ ཨབྷིབྷཝིཏྭཱ པཝཏྟནེན གརུབྷཱཝོ ཨདྷིཔཏིཡཊྛོ, ཨཐ ཁོ དསྶནཱདིཀིཙྩེསུ ཙཀྑུཝིཉྙཱཎཱདཱིཧི, ཛཱིཝནེ ཀམྨཛརཱུཔེཧི ཨརཱུཔདྷམྨེཧི ཙ ཛཱིཝནྟེཧི, མནནེ སམྤཡུཏྟདྷམྨེཧི, སུཁིཏཱདིབྷཱཝེ སུཁིཏཱདཱིཧི, ཨདྷིམོཀྑཔགྒཧཱུཔཊྛཱནཱཝིཀྑེཔཔཛཱནནེསུ, ‘‘ཨནཉྙཱཏཾ ཉསྶཱམཱི’’ཏི པཝཏྟིཡཾ ཨཱཛཱནནེ, ཨཉྙཱཏཱཝིབྷཱཝེ ཙ སདྡྷཱདིསཧཛཱཏེཧཱིཏི ཨེཝཾ ཏཾཏཾཀིཙྩེསུ ཙཀྑཱདིཔཙྩཡེཧི དྷམྨེཧི ཙཀྑཱདཱིནཾ ཨནུཝཏྟནཱིཡཏཱ. ཏེསུ ཧི ཀིཙྩེསུ ཙཀྑཱདཱིནཾ ཨིསྶརིཡཾ, ཏཔྤཙྩཡཱནཉྩ ཏདནུཝཏྟནེན ཏཏྠ པཝཏྟི. ཀསྨཱ པནེཏྠ ཨིཏྠིཔུརིསིནྡྲིཡདྭཡཾ ན གཧིཏཾ, ནནུ ཙེཏམྤི ལིངྒཱདཱིཧི ཨནུཝཏྟཱིཡཏཱིཏི? སཙྩཾ ཨནུཝཏྟཱིཡཏི, ན པན པཙྩཡབྷཱཝཏོ. ཡཐཱ ཧི ཛཱིཝིཏཱཧཱརཱ ¶ ཡེསཾ པཙྩཡཱ ཧོནྟི, ཏེསཾ ཨནུཔཱལཀཨུཔཏྠམྦྷཀཱ ¶ , ཨཏྠིཨཝིགཏཔཙྩཡབྷཱུཏཱ ཙ ཧོནྟི, ན ཨེཝཾ ཨིཏྠིཔུརིསབྷཱཝཱ ལིངྒཱདཱིནཾ ཀེནཙི པཀཱརེན ཨུཔཀཱརཀཱ ཧོནྟི. ཡཏོ པཙྩཡཱ སིཡུཾ, ཀེཝལཾ པན ཡཐཱསཀེཧི ཨེཝ པཙྩཡེཧི པཝཏྟམཱནཱནཾ ལིངྒཱདཱིནཾ ཡཐཱ ཨིཏྠིཨཱདིགྒཧཎསྶ པཙྩཡབྷཱཝོ ཧོཏི, ཏཏོ ཨཉྙེནཱཀཱརེན ཏཾསཧིཏསནྟཱནེ ཨཔྤཝཏྟིཏོ ལིངྒཱདཱིཧི ཨནུཝཏྟནཱིཡཏཱ, ཨིནྡྲིཡཏཱ ཙ ཏེསཾ ཝུཙྩཏི. ཏསྨཱ ན ཏེསཾ ཨིནྡྲིཡཔཙྩཡབྷཱཝོ ཝུཏྟོ. ཙཀྑཱདཡོ ཨརཱུཔདྷམྨཱནཾཡེཝཱཏི ཨེཏྠ སུཁིནྡྲིཡདུཀྑིནྡྲིཡཱནིཔི ཙཀྑཱདིགྒཧཎེན གཧིཏཱནཱིཏི དཊྛབྦཱནི.

༦༡༠. ལཀྑཎཱརམྨཎཱུཔནིཛ྄ཛྷཱནབྷཱུཏཱནཾ ཝིཏཀྐཱདཱིནཾ ཝིཏཀྐནཱདིཝསེན ཨཱརམྨཎཾ ཨུཔགནྟྭཱ ནིཛ྄ཛྷཱནཾ པེཀྑནཾ, ཙིནྟནཾ ཝཱ ཝིཏཀྐཱདཱིནཾཡེཝ ཨཱཝེཎིཀོ བྱཱཔཱརོ ཨུཔནིཛ྄ཛྷཱཡནཊྛོ. ‘‘ཋཔེཏྭཱ དྭིཔཉྩཝིཉྙཱཎེ སུཁདུཀྑཝེདནཱདྭཡ’’ནྟི ཝཏྭཱཔི ‘‘སཏྟ ཛྷཱནངྒཱནཱི’’ཏི ཝཙནེན ཨཛྷཱནངྒཱནཾ ཨུཔེཀྑཱཙིཏྟེཀགྒཏཱནཾ ནིཝཏྟནཾ ཀཏནྟི དཊྛབྦཾ. ཡདི ཨེཝཾ ‘‘སཏྟ ཛྷཱནངྒཱནཱི’’ཏི ཨེཏེནེཝ སིདྡྷེ ‘‘ཋཔེཏྭཱ སུཁདུཀྑཝེདནཱདྭཡ’’ནྟི ཀསྨཱ ཝུཏྟཾ? ཝེདནཱབྷེདེསུ པཉྩསུ སུཁདུཀྑདྭཡསྶ ཨེཀནྟེན ཨཛྷཱནངྒབྷཱཝདསྶནཏྠཾ ཛྷཱནངྒཊྛཱནེ ནིདྡིཊྛཏྟཱ, སཏིཔི ཝཱ ཛྷཱནངྒཝོཧཱརེ ཝེདནཱབྷེདདྭཡསྶ ཨེཀནྟེན ཛྷཱནཔཙྩཡཏྟཱབྷཱཝདསྶནཏྠཾ. ཨུཔེཀྑཱཙིཏྟེཀགྒཏཱནཾ པན ཡདིཔི ཛྷཱནཔཙྩཡཏྟཱབྷཱཝོ ཨཏྠི, ནཛྷཱནཔཙྩཡབྷཱཝོ པན ནཏྠཱིཏི སབྦཱནིཔི སཏྟ ཛྷཱནངྒཱནཱིཏི ཨེཏྠ གཧཎཾ ཀཏཾ. ཏཏྠ ‘‘སབྦཱནིཔཱི’’ཏི ཝཙནཾ སབྦཀུསལཱདིབྷེདསངྒཎྷནཏྠཾ, ན པན སབྦཙིཏྟུཔྤཱདགཏསངྒཎྷནཏྠནྟི དཊྛབྦཾ. ཡེསཾ པན ‘‘ཋཔེཏྭཱ དྭིཔཉྩཝིཉྙཱཎེ ཝེདནཱཏྟཡ’’ནྟི པཱཋོ, ཏེསཾ ཡཐཱཝུཏྟོ ཝིཙཱརོ ཙིཏྟེཀགྒཏཱཝསེནེཝ ཝེདིཏབྦོ.

༦༡༡. ཡཏོ ཏཏོ ཝཱཏི སམྨཱ ཝཱ མིཙྪཱ ཝཱཏི ཨཏྠོ. པཉྷཱཝཱརེ པནཱཏིཨཱདི ཡདིཔི པཙྩཡནིདྡེསེ ཏཾསམུཊྛཱནགྒཧཎེན སོ ཨཏྠོ ཉཱཔིཏོ ཨེཝ, པཉྷཱཝཱརེ པན སརཱུཔེནེཝ གཧིཏོཏི དསྶནཏྠཾ ཝུཏྟཾ. ཨེཏེ པན དྭེཔི…པེ… ན ལབྦྷནྟི ‘‘ཡཐཱསངྑྱ’’ནྟི ཝཙནསེསོ ཝེདིཏབྦོ. པཊྛཱནཊྛཀཐཱཡཾ པན ‘‘དྭེཔི ཛྷཱནམགྒཔཙྩཡཱ ཨཧེཏུཀཙིཏྟེསུ ན ལབྦྷནྟཱི’’ཏི ཝུཏྟཾ. ཏེནསྶ ཀཐམཝིརོདྷོཏི? ཨདྷིཔྤཱཡཝསེན ¶ . ཨཡཉྷི ཏཏྠ ཨདྷིཔྤཱཡོ – ཨཧེཏུཀཙིཏྟེསུ ཨེཝ ཛྷཱནམགྒཔཙྩཡཱ ན ལབྦྷནྟི, ན སཧེཏུཀཙིཏྟེསཱུཏི སཧེཏུཀཙིཏྟེསུ ཨལཱབྷཱབྷཱཝདསྶནཏྠཾ ཝུཏྟཾ, ན ཨཧེཏུཀཙིཏྟེསུ ལཱབྷཱབྷཱཝདསྶནཏྠནྟི. ཨེཝཉྷི ཨཏྠེ གཡ྄ཧམཱནེ ཨཧེཏུཀཙིཏྟེསུ ཀཏྠཙི ཀསྶཙི ལཱབྷོ ན ནིཝཱརིཏོཏི ཝིཉྙཱཡཏི. ཏེན སཝིཏཀྐཱཧེཏུཀཙིཏྟེསུ ཛྷཱནཔཙྩཡསྶ སམྦྷཝོ ཨནུཉྙཱཏོ ཧོཏི. ཏཏྠ ཧི ཡེན ཨལཱབྷེན དྷམྨསངྒཎིཡཾ ¶ མནོདྷཱཏུཨཱདཱིནཾ སངྒཧསུཉྙཏཝཱརེསུ ཛྷཱནཾ ན ཨུདྡྷཊཾ, ཏཾ ཨལཱབྷཾ སནྡྷཱཡ ཛྷཱནཔཙྩཡསྶཔི ཨཧེཏུཀཙིཏྟེསུ ཨལཱབྷོ ཝུཏྟོ. ཡཐཱ ཧི སཧེཏུཀཙིཏྟུཔྤཱདེསུ ཝིཏཀྐཱདཱིནཾ སཧཛཱཏེ སངྐཌྜྷིཏྭཱ ཨེཀཏྟགཏབྷཱཝཀརཎཾ ཨུཔནིཛ྄ཛྷཱཡནབྱཱཔཱརོ བལཝཱ, ན ཏཐཱ ཨཧེཏུཀཙིཏྟུཔྤཱདེསཱུཏི. ཨིདྷ པན དུབྦལམྤི ཨུཔནིཛ྄ཛྷཱཡནཾ ཡདི ཀིཉྩིམཏྟམྤི ཨཏྠི, ན ཏེན ཨུཔཀཱརཀཏཱ ན ཧོཏཱིཏི སཝིཏཀྐཱཧེཏུཀཙིཏྟེསུཔི ཛྷཱནཔཙྩཡཾ ཨནུཛཱནནྟེན ‘‘ཨེཏེ པན དྭེཔི ཛྷཱནམགྒཔཙྩཡཱ དྭིཔཉྩཝིཉྙཱཎཱཧེཏུཀཙིཏྟེསུ ན ལབྦྷནྟཱི’’ཏི (པཊྛཱ. ཨཊྛ. པཙྩཡུདྡེསཝཎྞནཱ) ཝུཏྟཾ. པཙྩཡཀཐཱ ནཱམ སམནྟཔཊྛཱནནིསྶིཏཱ, ན དྷམྨསངྒཎཱིནིསྶིཏཱཏི.

༦༡༢. སམཾ ཨཝིསམཾ, སམྨཱ, སཧ ཝཱ པཀཱརེཧི ཡུཏྟཏཱཡ ཨེཀཱིབྷཱཝཱུཔགམེན ཝིཡ ཨུཔཀཱརཀཏཱ སམྤཡུཏྟཔཙྩཡཏཱ. ཀཱ པན སཱ པཀཱརེཧི ཡུཏྟཏཱཏི ཨཱཧ ‘‘ཨེཀཝཏྠུཀཨེཀཱརམྨཎཨེཀུཔྤཱདེཀནིརོདྷསངྑཱཏེནཱ’’ཏི. ཏཏྠ ཡེ ཨེཀཝཏྠུཀཱ, ཏེ སམྤཡུཏྟཱཏི ཨེཏྟཀེ ཝུཙྩམཱནེ ཨཝིནིབྦྷོགརཱུཔེསུ ཨེཀཾ མཧཱབྷཱུཏཾ སེསམཧཱབྷཱུཏུཔཱདཱརཱུཔཱནཾ ནིསྶཡཔཙྩཡོ ཧོཏི, ཏེན ཏཱནི ཨེཀཝཏྠུཀཱནི, ཙཀྑཱདིནིསྶཡབྷཱུཏཱནི ཝཱ བྷཱུཏཱནི ཨེཀཾ ཝཏྠུ ཨེཏེསུ ནིསྶིཏནྟི ཨེཀཝཏྠུཀཱནཱིཏི ཀཔྤེནྟསྶ ཏེསཾ སམྤཡུཏྟཏཱཔཏྟི སིཡཱཏི ཏནྣིཝཱརཎཏྠཾ ཨེཀཱརམྨཎགྒཧཎཾ. ཡེ ཨེཀཝཏྠུཀཱ, ཨེཀཱརམྨཎཱ ཙ, ཏེ སམྤཡུཏྟཱཏི ཨེཝམྤི ཙུཏིཨཱསནྣཱནཾ སམྤཊིཙྪནསནྟཱིརཎཱདཱིནཾ སམྤཡུཏྟཏཱ ཨཱཔཛྫེཡྻཱཏི ཨེཀུཔྤཱདགྒཧཎཾ. ཡེ ཨེཀཝཏྠུཀེཀཱརམྨཎེཀུཔྤཱདཱ, ཏེ སམྤཡུཏྟཱཏི ཀིཾ པན ནཱནཱནིརོདྷཱཔི ཨེཝཾཏིཝིདྷལཀྑཎཱ ཧོནྟི, ཨུདཱཧུ ཨེཀནིརོདྷཱ ཨེཝཱཏི ཝིཙཱརཎཱཡཾ ཨེཀནིརོདྷཱ ཨེཝ ཨེཝཾལཀྑཎཱ ཧོནྟཱིཏི དསྶནཏྠཾ ‘‘ཨེཀནིརོདྷཱ’’ཏི ཝུཏྟཾ.

པཊིལོམཏོ ཝཱ ཨེཀནིརོདྷཱ སམྤཡུཏྟཱཏི ཝུཙྩམཱནེ ཨེཀསྨིཾ ཁཎེ ནིརུཛ྄ཛྷམཱནཱནཾ རཱུཔཱརཱུཔདྷམྨཱནཾ སམྤཡུཏྟཏཱ ཨཱཔཛྫེཡྻཱཏི ‘‘ཨེཀུཔྤཱདཱ’’ཏི ¶ ཝུཏྟཾ. ཨེཝམྤི ཨཝིནིབྦྷོགརཱུཔཱནཾ ཨཏྠི ཨེཀུཔྤཱདེཀནིརོདྷཏཱཏི ཏེསམྤི སམྤཡུཏྟཏཱ ཨཱཔཛྫེཡྻཱཏི ཏནྣིཝཱརཎཏྠཾ ཨེཀཱརམྨཎགྒཧཎཾ. ཡེ ཨེཀཱརམྨཎཱ ཧུཏྭཱ ཨེཀུཔྤཱདེཀནིརོདྷཱ, ཏེ སམྤཡུཏྟཱཏི ཨཡཉྩ ནཡོ ཨེཀཝཏྠུཀེསུ ཨེཝ ལབྦྷཏི, ན ནཱནཱཝཏྠུཀེསཱུཏི དསྶནཏྠཾ ཨེཀཝཏྠུཀགྒཧཎཾ. ཡེ ཨེཀཝཏྠུཀེཀཱརམྨཎེཀུཔྤཱདེཀནིརོདྷཱ, ཏེ སམྤཡུཏྟཱཏི པཉྩཝོཀཱརབྷཝཱཔེཀྑཱཡ ཙེཏཾ ཨེཀཝཏྠུཀགྒཧཎཾ. ཨཱརུཔྤེ པན ཝཏྠུཡེཝ ནཏྠཱིཏི ཀུཏོ ཨེཀཝཏྠུཀགྒཧཎསྶ ཨཝསརོ.

༦༡༣. ཨཉྙམཉྙཾ ¶ སམྦནྡྷཏཱཡ ཡུཏྟཱནམྤི སམཱནཱནཾ ཝིཔྤཡུཏྟབྷཱཝེན ཝིསཾསཊྛཏཱཡ ནཱནཏྟཱུཔགམེན ཨུཔཀཱརཀཏཱ ཝིཔྤཡུཏྟཔཙྩཡཏཱ. ཨཡཉྩ ཝིཔྤཡུཏྟཏཱ ན སམྤཡུཏྟཔཙྩཡཏཱཡ ཝིཡ ཨཉྙམཉྙཾ པཙྩཡཔཙྩཡུཔྤནྣདྷམྨཝསེན གཧེཏབྦཱ, ཨཐ ཁོ ཝིསུཾཡེཝ. ཏཏྠ ཧི ཨརཱུཔདྷམྨཱནཾ སམཱནཛཱཏིཡཏཱཡ སམདྷུརཾ, ཨིདྷ རཱུཔཱརཱུཔདྷམྨཱནཾ ཝིཛཱཏིཡཏཱཡ ཝིདྷུརཾ. ཏེན ཝུཏྟཾ ‘‘ཡུཏྟཱནམྤི…པེ… ཝིཔྤཡུཏྟཔཙྩཡཏཱ’’ཏི. ན ཧི ཝཏྠུསཧཛཱཏཔཙྪཱཛཱཏཝསེན ཨཡུཏྟཱནཾ རཱུཔཱདཱིནཾ ཨཱརམྨཎཱདིབྷཱཝེན ཨུཔཀཱརཀཱནཾ ཝིཔྤཡུཏྟཱནམྤི ཝིཔྤཡུཏྟཔཙྩཡཏཱ ཨཏྠི. ཡཐཱ ཧི ‘‘ཝཏྠུ ཁནྡྷཱནཾ ཝིཔྤཡུཏྟཔཙྩཡེན པཙྩཡོ, སཧཛཱཏཱ ཀུསལཱ ཁནྡྷཱ ཙིཏྟསམུཊྛཱནཱནཾ རཱུཔཱནཾ, པཙྪཱཛཱཏཱ ཀུསལཱ ཁནྡྷཱ པུརེཛཱཏསྶ ཨིམསྶ ཀཱཡསྶ ཝིཔྤཡུཏྟཔཙྩཡེན པཙྩཡོ’’ཏིཨཱདིཝཙནཏོ (པཊྛཱ. ༡.༡.༤༣༤) ཝཏྠུནཱ, སཧཛཱཏཔཙྪཱཛཱཏཝསེན ཙ ཡུཏྟཱནཾ ཨཏྠི ཝིཔྤཡུཏྟཔཙྩཡབྷཱཝོ, ན ཨེཝཾ ཨཡུཏྟཱནཾ ཨཏྠཱིཏི. ཡདི ཨེཝཾ རཱུཔཱནཾ རཱུཔེཧི ཀསྨཱ ཝིཔྤཡུཏྟཔཙྩཡོ ན ཝུཏྟོཏི? རཱུཔཱནཾ རཱུཔེཧི སཏིཔི ཨཝིནིབྦྷོགེ སམྤཡོགོ ཝིཡ ཝིཔྤཡོགོ (དྷཱཏུ. ༣) ནཏྠཱིཏི ན ཏེསཾ ཝིཔྤཡུཏྟཔཙྩཡཏཱ. ཝུཏྟཉྷི ‘‘ཙཏཱུཧི སམྤཡོགོ, ཙཏཱུཧི ཝིཔྤཡོགོ’’ཏི. སམྤཡུཛྫམཱནཱནཉྷི ཨརཱུཔཱནཾ རཱུཔེཧི, རཱུཔཱནཉྩ ཏེཧི སིཡཱ སམྤཡོགཱསངྐཱཏི ཏེསཾ ཨཉྙམཉྙཾ ཝིཔྤཡུཏྟཔཙྩཡཏཱ ཝུཏྟཱ. རཱུཔཱནཾ པན རཱུཔེཧི སམྤཡོགོ ནཏྠཱིཏི ན ཏེསཾ ཝིཔྤཡུཏྟཔཙྩཡཏཱ ཝུཏྟཱ.

རཱུཔིནོ དྷམྨཱ ཨརཱུཔཱིནཾ དྷམྨཱནཾ, ཨརཱུཔིནོཔི རཱུཔཱིནནྟི ཨེཏྠ ཨརཱུཔགྒཧཎཾ ཙཏུནྣཾ ཁནྡྷཱནཾ ཝསེན ཝེདིཏབྦཾ. ཨརཱུཔདྷམྨེསུ ཧི ཙཏྟཱརོ ཨེཝ ཁནྡྷཱ སཧཛཱཏཔུརེཛཱཏཱནཾ རཱུཔདྷམྨཱནཾ ཝིཔྤཡུཏྟཔཙྩཡཱ ཧོནྟི. ནིབྦཱནཾ པན ཡཐཱ ¶ ཨརཱུཔདྷམྨཱནཾ སམྤཡུཏྟཔཙྩཡོ ན ཧོཏི, ཨེཝཾ རཱུཔདྷམྨཱནཾ ཝིཔྤཡུཏྟཔཙྩཡོ ན ཧོཏི. ‘‘ཙཏཱུཧི སམྤཡོགོ, ཙཏཱུཧི ཝིཔྤཡོགོ’’ཏི (དྷཱཏུ. ༣) ཧི ཝུཏྟཾ. ཏསྨཱ ཨརཱུཔདྷམྨེསུ ཙཏུནྣཾ ཁནྡྷཱནམེཝ ཝིཔྤཡུཏྟཔཙྩཡཏཱ. ཝུཏྟཉྩ པཉྷཱཝཱརེ ‘‘སཧཛཱཏཱ ཀུསལཱ ཁནྡྷཱ ཙིཏྟསམུཊྛཱནཱནཾ རཱུཔཱནཾ ཝིཔྤཡུཏྟཔཙྩཡེན པཙྩཡོ’’ཏིཨཱདི (པཊྛཱ. ༡.༡.༤༣༤). རཱུཔིནོ དྷམྨཱཏི ཙེཏཾ ཧདཡཝཏྠུནོ ཙེཝ ཙཀྑཱདཱིནཉྩ ཝསེན ཝེདིཏབྦཾ. རཱུཔདྷམྨེསུ ཧི ཚ ཝཏྠཱུནིཡེཝ ཨརཱུཔཀྑནྡྷཱནཾ ཝིཔྤཡུཏྟཔཙྩཡོ. རཱུཔཱཡཏནཱདཡོ པན ཨཱརམྨཎདྷམྨཱ ཀིཉྩཱཔི ཝིཔྤཡུཏྟདྷམྨཱ, ཝིཔྤཡུཏྟཔཙྩཡོ པན ན ཧོནྟི. ཀིཾ ཀཱརཎཱ? སམྤཡོགཱསངྐཱབྷཱཝཏོ. ཨརཱུཔཀྑནྡྷཱ ཧི ཙཀྑཱདཱིནཾ ཝཏྠཱུནཾ ཨབྦྷནྟརཏོ ནིཀྑམནྟཱ ཝིཡ ཨུཔྤཛྫནྟཱིཏི སིཡཱ ཏཏྠ ཨཱསངྐཱ ‘‘ཀིཾ ནུ ཁོ ཨིམེ ཨིམེཧི སམྤཡུཏྟཱ, ཨུདཱཧུ ཝིཔྤཡུཏྟཱ’’ཏི? ཨཱརམྨཎདྷམྨཱ པན ཝཏྠུསནྣིསྶཡེན ཨུཔྤཛྫམཱནཱནཾ ཨཱརམྨཎམཏྟཾ ཧོནྟཱིཏི ནཏྠི ཏེསུ སམྤཡོགཱསངྐཱཏི ¶ ན ཏེ ཝིཔྤཡུཏྟཱ. སམྤཡོགཱསངྐཱསབྦྷཱཝཏོ ཝཏྠཱུནིཡེཝ ཝིཔྤཡུཏྟཔཙྩཡཱ ཧོནྟི. ཝུཏྟམྤི ཙེཏཾ པཉྷཱཝཱརེ ‘‘ཝཏྠུ ཀུསལཱནཾ ཁནྡྷཱནཾ ཝིཔྤཡུཏྟཔཙྩཡེན པཙྩཡོ, ཝཏྠུ ཨཀུསལཱནཾ ཁནྡྷཱནཾ, ཙཀྑཱཡཏནཾ ཙཀྑུཝིཉྙཱཎདྷཱཏུཡཱ’’ཏིཨཱདི. སྭཱཡཾ ཝིཔྤཡུཏྟཔཙྩཡོ ‘‘སཧཛཱཏཔཙྪཱཛཱཏཏོ ཀུསལེན ཨབྱཱཀཏཾ, ཏཐཱ ཨཀུསལེན ཨབྱཱཀཏཾ, སཧཛཱཏཔུརེཛཱཏཔཙྪཱཛཱཏཏོ ཨབྱཱཀཏེན ཨབྱཱཀཏཾ, ཝཏྠུཔུརེཛཱཏཏོ ཨབྱཱཀཏེན ཀུསལཾ, ཏཐཱ ཨཀུསལནྟི ཀུསལམཱུལམེཀཾ, ཨཀུསལམཱུལམེཀཾ, ཨབྱཱཀཏམཱུལཱནི ཏཱིཎཱི’’ཏི པཉྩཝིདྷོ ཝེདིཏབྦོ.

༦༡༤. པཙྩུཔྤནྣལཀྑཎེནཱཏི པཙྩུཔྤནྣསབྷཱཝེན. ཏེན ‘‘ཨཏྠི མེ པཱཔཀམྨཾ ཀཏཾ, ཨཏྠི པུགྒལོ ཨཏྟཧིཏཱཡ པཊིཔནྣོ’’ཏི (པུ. པ. ཙཏུཀྐཨུདྡེས ༢༤) ཙ ཨེཝམཱདཱིསུ ཝུཏྟཾ ནིབྦཏྟིཏཱུཔལབྦྷམཱནཏཱལཀྑཎཾ ཨཏྠིབྷཱཝཾ ནིཝཱརེཏི. སཏིཔི ཛནཀཏྟེ ཨུཔཏྠམྦྷཀཏྟཔྤདྷཱནཱ ཨཏྠིབྷཱཝེན ཨུཔཀཱརཀཏཱཏི ཨཱཧ ‘‘ཨུཔཏྠམྦྷཀཏྟེནཱ’’ཏི. ཨིདཉྩ ཨུཔཏྠམྦྷཀཏྟཾ ཝཏྠཱརམྨཎསཧཛཱཏཱདཱིནཾ སཱདྷཱརཎཾ ཨཏྠིབྷཱཝེན ཨུཔཀཱརཀཏྟནྟི དཊྛབྦཾ. ‘‘སཏྟདྷཱ མཱཏིཀཱ ནིཀྑིཏྟཱ’’ཏི ཝུཏྟམཏྠཾ པཱལི༹ཡཱ ཨེཝ དསྶེཏུཾ ‘‘ཡཐཱཧཱ’’ཏིཨཱདི ཝུཏྟཾ. ཏཏྠ ‘‘ཙཏྟཱརོ ཁནྡྷཱ ཨརཱུཔིནོ’’ཏིཨཱདིནཱ སཧཛཱཏཝསེན ཨཏྠིཔཙྩཡོདསྶིཏོ ¶ , ‘‘ཙཀྑཱཡཏན’’ནྟིཨཱདིནཱ པུརེཛཱཏཝསེན, ‘‘ཡཾ རཱུཔཾ ནིསྶཱཡཱ’’ཏིཨཱདིནཱ སཧཛཱཏཔུརེཛཱཏཝསེན. ཨེཝམཡཾ པཱཋོ སཧཛཱཏཔུརེཛཱཏཨཏྠིཔཙྩཡཝསེནེཝ ཨཱགཏོ.

ཨཉྙཏྠ པན ཏཏོ ཨཉྙཐཱཔི ཨཱགཏོཏི དསྶེཏུཾ ‘‘པཉྷཱཝཱརེ པནཱ’’ཏིཨཱདིམཱཧ. ཏཾ ཏེན པཙྪཱཛཱཏཱཧཱརིནྡྲིཡཝསེནཱཔི ཨཏྠིཔཙྩཡཏྟཾ ཝིབྷཱཝེཏི. པུརིམཔཱཋེ པན སཱཝསེསཱ དེསནཱ ཀཏཱཏི ཝེདིཏབྦཾ. སཏི ཙ ཡེསཾ པཙྩཡཱ ཧོནྟི, ཏེཧི ཨེཀཏོ, པུརེཏརཾ, པཙྪཱ ཙ ཨུཔྤནྣབྷཱཝེ སཧཛཱཏཱདིཔཙྩཡཏྟཱབྷཱཝཏོ ཨཱཧཱརོ, ཨིནྡྲིཡཉྩ སཧཛཱཏཱདིབྷེདཾ ན ལབྷནྟི, ཏདབྷཱཝོ ཙ ཏེསཾ དྷམྨསབྷཱཝཝསེན དཊྛབྦོ. སྭཱཡཾ ཨཏྠིཔཙྩཡོ ‘‘སཧཛཱཏཏོ ཀུསལེན ཀུསལཾ, སཧཛཱཏཔཙྪཱཛཱཏཏོ ཀུསལེན ཨབྱཱཀཏཾ, སཧཛཱཏཏོ ཨེཝ ཀུསལེན ཀུསལཱབྱཱཀཏནྟི ཀུསལམཱུལཱ ཏཡོ, ཏཐཱ ཨཀུསལམཱུལཱ. སཧཛཱཏཔུརེཛཱཏཔཙྪཱཛཱཏཱཧཱརིནྡྲིཡཏོ པན ཨབྱཱཀཏེན ཨབྱཱཀཏཾ, ཝཏྠཱརམྨཎཔུརེཛཱཏཏོ ཨབྱཱཀཏེན ཀུསལཾ, ཏཐཱ ཨཀུསལཾ. སཧཛཱཏཔུརེཛཱཏཏོ ཀུསལཉྩ ཨབྱཱཀཏཉྩ ཀུསལསྶ, སཧཛཱཏཔུརེཛཱཏཔཙྪཱཛཱཏཱཧཱརིནྡྲིཡཏོ ཀུསལཉྩ ཨབྱཱཀཏཉྩ ཨབྱཱཀཏསྶ, སཧཛཱཏཔུརེཛཱཏཏོ ཨཀུསལཉྩ ཨབྱཱཀཏཉྩ ཨཀུསལསྶ, སཧཛཱཏཔུརེཛཱཏཔཙྪཱཛཱཏཱཧཱརིནྡྲིཡཏོ ¶ ཨཀུསལཉྩ ཨབྱཱཀཏཉྩ ཨབྱཱཀཏསྶཱ’’ཏི ཨེཝཾ ཏེརསཝིདྷོ. སངྑེཔེན ཀུསལཱཀུསལཝིཔཱཀཀིརིཡརཱུཔཝསེན པཉྩཝིདྷོ ཨཏྠིཔཙྩཡོ, ན ནིབྦཱནཾ. ཡོ ཧི ཨཏྠིབྷཱཝཱབྷཱཝེན ཨནུཔཀཱརཀོ ཨཏྠིབྷཱཝཾ ལབྷིཏྭཱ ཨུཔཀཱརཀོ ཧོཏི, སོ ཨཏྠིཔཙྩཡོ ཧོཏི. ནིབྦཱནཉྩ ནིབྦཱནཱརམྨཎཱནཾ ན ཨཏྟནོ ཨཏྠིབྷཱཝཱབྷཱཝེན ཨནུཔཀཱརཀཾ ཧུཏྭཱ ཨཏྠིབྷཱཝལཱབྷེན ཨུཔཀཱརཀཾ ཧོཏཱིཏི, ཨུཔྤཱདཱདིཡུཏྟཱནཾ ཝཱ ནཏྠིབྷཱཝོཔཀཱརཀཏཱཝིརུདྡྷོ ཨུཔཀཱརཀབྷཱཝོ ཨཏྠིཔཙྩཡཏཱཏི, ན ནིབྦཱནཾ ཨཏྠིཔཙྩཡོ ཧོཏི.

༦༡༥. ཨཱརམྨཎེ ཕུསནཱདིཝསེན པཝཏྟམཱནཱནཾ ཕསྶཱདཱིནཾ ཨནེཀེསཾ སཧབྷཱཝོ ནཏྠཱིཏི ཨེཀསྨིཾ ཕསྶཱདིསམུདཱཡེ སཏི དུཏིཡོ ན ཧོཏི, ཨསཏི པན ཧོཏཱིཏི ཏེན ནཏྠིབྷཱཝེན ཨུཔཀཱརཀཏཱ ནཏྠིཔཙྩཡཏཱ. སཏིཔི པུརིམཏརཙིཏྟཱནཾ ནཏྠིབྷཱཝེ ན ཏེན ཏཱནི ནཏྠིབྷཱཝེན ཨུཔཀཱརཀཱནི, ཨནནྟརམེཝ པན ཨཏྟནོ ཨཏྠིབྷཱཝེན པཝཏྟིཨོཀཱསཾ ¶ ཨལབྷམཱནཾ ནཏྠིབྷཱཝེན ཨོཀཱསཾ དདམཱནཾ ཝིཡ ཨུཔཀཱརཀཾ ཧོཏཱིཏི ‘‘པཝཏྟིཨོཀཱསདཱནེན ཨུཔཀཱརཀཱ’’ཏི ཨཱཧ. པཊུཔྤནྣཱནནྟི པཙྩུཔྤནྣཱནཾ.

‘‘ཏེ ཨེཝཱ’’ཏི ཨེཏེན ནཏྠིཝིགཏཔཙྩཡཱནཾ དྷམྨཏོ ཝིསེསཱབྷཱཝམཱཧ. ཨེཝཾ སནྟེཔི ཨབྷཱཝམཏྟེན ཨུཔཀཱརཀཏཱ ཨོཀཱསདཱནཾ ནཏྠིཔཙྩཡཏཱ, སབྷཱཝཱཝིགམེན ཨཔྤཝཏྟམཱནཱནཾ སབྷཱཝཝིགམེན ཨུཔཀཱརཀཏཱ ཝིགཏཔཙྩཡཏཱ. ནཏྠིཏཱ ཙ ནིརོདྷཱནནྟརཱ སུཉྙཏཱ, ཝིགཏཏཱ ནིརོདྷཔྤཏྟཏཱཏི ཨཡམེཏེསཾ ཝིསེསོ.

ཨཏྠིཔཙྩཡདྷམྨཱ ཨེཝ ཙཱཏི ཙ-སདྡོ སམྤིཎྜནཏྠོ. ཏེན ན ཀེཝལཾ ནཏྠིཝིགཏཔཙྩཡཱ ཨེཝ དྷམྨཏོ ཨཝིསིཊྛཱ, ཨཐ ཁོ ཨཏྠིཨཝིགཏཔཙྩཡཱཔཱིཏི ཨིམམཏྠཾ དཱིཔེཏི. ཡདིཔིམེ པཙྩཡཱ དྷམྨཏོ ཨཝིསིཊྛཱ, ཏཐཱཔི ཨཏྠིཏཱཡ སསབྷཱཝཏཱཡ ཨུཔཀཱརཀཏཱ ཨཏྠིཔཙྩཡཏཱ, སབྷཱཝཱཝིགམེན ནིརོདྷསྶ ཨཔྤཏྟིཡཱ ཨུཔཀཱརཀཏཱ ཨཝིགཏཔཙྩཡཏཱཏི པཙྩཡབྷཱཝཝིསེསོ དྷམྨཱཝིསེསེཔི ཝེདིཏབྦོ. དྷམྨཱནཉྷི སམཏྠཏཱཝིསེསཾ སབྦཾ ཡཱཐཱཝཏོ ཨབྷིསམྦུཛ྄ཛྷིཏྭཱ བྷགཝཏཱ ཙཏུཝཱིསཏིཔཙྩཡཝིསེསཱ ཝུཏྟཱཏི དྷམྨསྶཱམིམྷི སདྡྷཱཡ ‘‘ཨེཝཾ ཝིསེསཱ ཨེཏེ དྷམྨཱ’’ཏི སུཏམཡཉཱཎཾ ཨུཔྤཱདེཏྭཱ ཙིནྟཱབྷཱཝནཱམཡེཧི ཏདབྷིསམཡཱཡ ཡོགོ ཀརཎཱིཡོ.

ཨེཏྠ ¶ ཙ ཨཱརམྨཎཨནནྟརསམནནྟརཨུཔནིསྶཡཔུརེཛཱཏཨཱསེཝནསམྤཡུཏྟནཏྠིཝིགཏཔཙྩཡཱ ཨརཱུཔདྷམྨཱནཾཡེཝ, པཙྪཱཛཱཏཔཙྩཡོ རཱུཔདྷམྨཱནཾཡེཝ, ཨིཏརེ ཙུདྡས རཱུཔཱརཱུཔདྷམྨཱནཾ.

ཧེཏུཨནནྟརསམནནྟརཱསེཝནཔཙྪཱཛཱཏཀམྨཝིཔཱཀཛྷཱནམགྒསམྤཡུཏྟནཏྠིཝིགཏཔཙྩཡཱ ཨརཱུཔདྷམྨཱ ཨེཝ, པུརེཛཱཏཔཙྩཡོ རཱུཔམེཝ, ཨུབྷཡཾ ཨཱརམྨཎཱུཔནིསྶཡེ ཋཔེཏྭཱ སེསཱ, ཏེ དྭེ པཉྙཏྟིསབྷཱཝཱཔི ཧོནྟི.

ཨནནྟརསམནནྟརཱསེཝནནཏྠིཝིགཏཔཙྩཡཱ ཨཏཱིཏཱ ཨེཝ. ཨཱརམྨཎཱརམྨཎཱདྷིཔཏིཨཱརམྨཎཱུཔནིསྶཡཱ ཏིཀཱལིཀཱ, ཀཱལཝིནིམུཏྟཱ ཙ. ཀམྨཔཙྩཡོ ཨཏཱིཏཔཙྩུཔྤནྣཝསེན དྭིཀཱལིཀོ. སེསཱ པཉྩདས པཙྩུཔྤནྣཱཝ.

ཏཐཱ ཨནནྟརསམནནྟརཨནནྟརཱུཔནིསྶཡཔཀཏཱུཔནིསྶཡཱསེཝནཔཙྩཡཱ, ནཱནཱཀྑཎིཀཀམྨཔཙྩཡོ, ནཏྠིཝིགཏཔཙྩཡཱ ཙཱཏི ཨིམེ པཙྩཡཱ ཛནཀཱ ཨེཝ, ན ཨུཔཏྠམྦྷཀཱ. པཙྪཱཛཱཏཔཙྩཡོ ཨུཔཏྠམྦྷཀོ ཨེཝ, ན ཛནཀོ ¶ . སེསཱ ཛནཀཱ ཙ ཨུཔཏྠམྦྷཀཱ ཙཱཏི ཨཡམྤི ཝིསེསོ ཝེདིཏབྦོ.

ཨཝིཛྫཱཔཙྩཡཱསངྑཱརཔདཝིཏྠཱརཀཐཱཝཎྞནཱ

༦༡༦. པཙྩཡེསཱུཏི ནིདྡྷཱརཎེ བྷུམྨཾ. དུཝིདྷཱ དྭིཔྤཀཱརེན. ཨནེཀདྷཱཏི སཏྟརསདྷཱ ཨཱརམྨཎཔཙྩཡཱདིཝསེན.

ཨབྷིཉྙཱཙིཏྟེནཱཏི ཙེཏོཔརིཡཔུབྦེནིཝཱསཨནཱགཏཾསཉཱཎསངྑཱཏཱཧི ཨབྷིཉྙཱཧི སཧགཏཙིཏྟེན. སམོཧཙིཏྟཛཱནནཀཱལེཏི པརེསཾ, ཨཏྟནོ ཙ སམོཧསྶ ཙིཏྟསྶ ཛཱནནཀཱལེ. ཨཝིཛྫཱཔུབྦངྒམཱ ཨཀུསལཔྤཝཏྟིཡོ ཡཱ ཀཱཙི ཝིཔཏྟིཡོ, སབྦཱ ཏཱ མོཧམཱུལིཀཱཏི ཙ ཨཝིཛྫཱཡ ཨཱདཱིནཝདསྶནེན ཨཝིཛྫཱསམཏིཀྐམཏྠཱཡ ཝིཝཊྚཱབྷིཔཏྠནཱཡཱཏི ཨཏྠོ. དྭིནྣམྤི ཏེསཾ པུཉྙཱབྷིསངྑཱརཱནཾ. ཨཝིཛྫཱསམྨཱུལ༹ྷཏྟཱཏི བྷཝཱདཱིནཝཔྤཊིཙྪཱདིཀཱཡ ཨཝིཛྫཱཡ སམྨཱུལ༹ྷཏྟཱ. ཏཱནེཝ པུཉྙཱནཱིཏི ཏཱནེཝ ཡཐཱཝུཏྟཱནི ཀཱམཱཝཙརརཱུཔཱཝཙརཔུཉྙཱནི. ཨུཔནིསྶཡཔཙྩཡེན པཙྩཡོ ཧོཏཱིཏི སམྦནྡྷོ.

རཱགཱདཱིནནྟི ¶ རཱགདིཊྛིཝིཙིཀིཙྪུདྡྷཙྩདོམནསྶཱནཾ. ཨཝིཛྫཱསམྤཡུཏྟཏྟཱ རཱགཱདཱིནཾ རཱགཱདིཨསྶཱདནཀཱལེསུ ཨཝིཛྫཾ ཨཱརབྦྷ ཨུཔྤཏྟི ཝེདིཏབྦཱ. གརུཾ ཀཏྭཱ ཨསྶཱདནཾ རཱགདིཊྛིསམྤཡུཏྟཱཡ ཨེཝ ཨཝིཛྫཱཡ ཡོཛེཏབྦཾ. ཨསྶཱདནཉྩ རཱགོ, ཏདཝིཡུཏྟཱ ཙ དིཊྛཱིཏི ཨསྶཱདནཝཙནེནེཝ ཡཐཱཝུཏྟཾ ཨཝིཛྫཾ གརུཾ ཀརོནྟཱི དིཊྛི ཙ ཝུཏྟཱཏི ཝེདིཏབྦཱ. རཱགཱདཱིཧི ཙ པཱལི༹ཡཾ སརཱུཔཏོ ཝུཏྟེཧི ཏཾསམྤཡུཏྟསངྑཱརསྶ ཨཝིཛྫཱརམྨཎཱདིཏཾ དསྶེཏི. ཨནཱདཱིནཝདསྶཱཝིནོཏི པཱཎཱཏིཔཱཏཱདཱིསུ ན ཨཱདཱིནཝདསྶིནོ. ཨཝིཛྫཱཡ ཨནཱརམྨཎསྶ, པཋམཛཝནསྶ ཙ ཨཱརམྨཎཱདྷིཔཏིཨནནྟརཱདིཔཙྩཡཝཙནེསུ ཨཝུཏྟསྶ, ཝུཏྟསྶ ཙ སབྦསྶ སངྒཎྷནཏྠཾ ‘‘ཡཾ ཀིཉྩཱི’’ཏི ཨཱཧ.

ཝུཏྟནཡེནཱཏི སམཏིཀྐམབྷཝཔཏྠནཱཝསེན པུཉྙཱབྷིསངྑཱརེ ཝུཏྟནཡེན.

༦༡༧. ཀིཾ པནཱཡནྟིཨཱདིནཱ ཙོདཀསྶ ཨཡམདྷིཔྤཱཡོ – ‘‘ཨཝིཛྫཱཔཙྩཡཱ སངྑཱརཱ སམྦྷཝནྟཱི’’ཏི ཨེཏྠ སམྦྷཝནྟི ཨེཝཱཏི ཨཝདྷཱརཎཾ ན ཡུཛྫཏི ¶ , ཨཝསེསཔཙྩཡསམཝཱཡཱབྷཱཝེ སངྑཱརཱནཾ སམྦྷཝཱབྷཱཝཏོ. ཏཐཱ སངྑཱརཱ ཨེཝཱཏི ཨཝདྷཱརཎམྤི ན ཡུཛྫཏི. ཀསྨཱ? ཨཉྙེསཉྩ པཙྩཡུཔྤནྣདྷམྨཱནཾ སམྦྷཝསྶ ཏཏོ ཨིཙྪིཏབྦཏྟཱ. ཝཱཀྱསྶ ཨཝདྷཱརཎཕལཏྟཱ ཨཝིཛྫཱཔཙྩཡཱ ཨེཝ སངྑཱརཱ སམྦྷཝནྟཱིཏི ཨཝདྷཱརཎེ གཡ྄ཧམཱནེཔི ཨཡཾ དོསོ. ཀསྨཱ? ཡསྨཱ ལོབྷཱདིཀམྨནིདཱནཨུཔཱདཱནཝཏྠཱརམྨཎམནསིཀཱརཱདཡོ ཨཉྙེཔི པཙྩཡཱ ལབྦྷནྟིཡེཝཱཏི. ཏཏྠ ཨེཀཱཏི ཨསཧཱཡཱ, ཀཱརཎནྟརནིརཔེཀྑཱཏི ཨཏྠོ. ཨཉྙེཔི པཙྩཡཱ སཧཀཱརིཀཱརཎབྷཱུཏཱ. དོསམེཏྠ ཝཏྟུཀཱམོ ཙོདཀོ པུཙྪཏཱིཏི ཉཏྭཱ ཨཱཙརིཡོ ཨཱཧ ‘‘ཀིཾ པནེཏྠཱ’’ཏི. ཨེཏྠ ཨཝིཛྫཱཡ པཙྩཡནྟརེན རཧིཏབྷཱཝེ ཙ སཧིཏབྷཱཝེ ཙ ཀིཾ པན ཝཏྟབྦཾ, ཨསམཏྟཱ ཏེ ཙོདནཱ, ཨཝསིཊྛཉྩ ཏཱཝ ཀཐེཧཱིཏི ཝུཏྟཾ ཧོཏི. ཨེཀཀཱརཎཝཱདོ ཨཱཔཛྫཏཱིཏི དོསཔྤསངྒོ ཝུཏྟོ. ཨནིཊྛོ ཧི ཨེཀཀཱརཎཝཱདོ སབྦཏྠ སབྦཀཱལཾ སམྦྷཝཱཔཏྟིཏོ, ཨེཀསདིསཱསབྷཱཝཱཔཏྟིཏོ ཙ.

ཡསྨཱ ཨེཀཾ ན ཨེཀཏོཏིཨཱདཱིསུ ཏཱིསུ པཀཱརེསུ ཨཝིཛྫམཱནེསུ པཱརིསེསེན ཨནེཀཏོ ཨནེཀམེཝཱཏི ཨེཏསྨིཾ ཙཏུཏྠེ ཨེཝ པཀཱརེ ཝིཛྫམཱནེ ཨེཀཧེཏུཕལདཱིཔནེ ཨཏྠོ ཨཏྠི, ཏསྨཱ ན ནུཔཔཛྫཏི ཨུཔཔཛྫཏིཡེཝ. ཨེཀཾ ཕལཾ ཨེཀཏོ ནཏྠི, ཨནེཀམྤི ཨེཀཏོ ནཏྠི. ཨནེཀཏོཔི ཨེཀཾ ཕལཾ ནོ ཨཏྠཱིཏི སམྦནྡྷོ.

ཨེཀེཀཧེཏུཕལདཱིཔནནྟི ¶ ‘‘ཨཝིཛྫཱཔཙྩཡཱ སངྑཱརཱ’’ཏི ཨེཀཧེཏུདཱིཔནཾ, ‘‘སངྑཱརཔཙྩཡཱ ཝིཉྙཱཎ’’ནྟི ཨེཀཕལདཱིཔནནྟི ཨེཝཾ ཏཏྠ ཏཏྠ ཨེཀེཀཧེཏུཕལདཱིཔནཾ ཀཏཾ.

ཝེནེཡྻཱནཾ ཨནུརཱུཔཏོཏི ཝེནེཡྻཱནཾ ཨཛ྄ཛྷཱསཡསྶ ཨནུརཱུཔཏོ. ཨེཀསྶེཝ ཧེཏུནོ, ཕལསྶ ཙ དཱིཔནཱ སཏྠུ དེསནཱཝིལཱསཏོ ཝཱ ཝེནེཡྻཔུགྒལཱནཾ ཨཛ྄ཛྷཱསཡཏོ ཝཱ. ཏདུབྷཡསྶ པནེཏྠ ཀཱརཎཾ ཏཏྠ ཏཏྠ དེསེཏབྦསྶ ཨཏྠསྶ པདྷཱནཏཱ, པཱཀཊཏཱ, ཨསཱདྷཱརཎཏཱ ཙ. དེསནཱཝིལཱསཔྤཏྟཱ ཙ བུདྡྷཱ བྷགཝནྟོ ཏེ དེསེཏབྦེ ཨཏྠེ བཧཱུསུཔི པརིཡཱཡེསུ ལབྦྷམཱནེསུ ཡཐཱརུཙིཏཾ གཧེཏྭཱ དྷམྨཾ དེསེནྟི, སཱ དེསནཱཝིལཱསཱནུརཱུཔཏཱ. ཏཏྠ པན ཡེན པརིཡཱཡེན ཡེ ཝེནེཡྻཱ བུཛ྄ཛྷནྟི, ཏེནེཝ ཏེསཾ བོདྷནཾ, སཱ ཝེནེཡྻཛ྄ཛྷཱསཡཱནུརཱུཔཏཱ.

ཡཐཱཕསྶཾ ¶ ཝེདནཱཝཝཏྠཱནཏོཏི ‘‘སུཁཝེདནཱིཡཾ, བྷིཀྑཝེ, ཕསྶཾ པཊིཙྩ ཨུཔྤཛྫཏི སུཁཱ ཝེདནཱ’’ཏིཨཱདིནཱ (སཾ. ནི. ༤.༡༢༩), ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎཾ, ཏིཎྞཾ སངྒཏི ཕསྶོ, ཕསྶཔཙྩཡཱ ཝེདནཱ’’ཏིཨཱདིནཱ (མ. ནི. ༡.༢༠༤, ༤༠༠; ༣.༤༢༡, ༤༢༥, ༤༢༦; སཾ. ནི. ༢.༤༣-༤༤; ༢.༤.༦༠; ཀཐཱ. ༤༦༥, ༤༦༧) ཙ སུཁཝེདནཱིཡཕསྶཱདིཙཀྑུསམྥསྶཱདིཨནུརཱུཔེན སུཁཝེདནཱདིཙཀྑུསམྥསྶཛཱཝེདནཱདཱིནཾ ཝཝཏྠཱནཏོ. སམཱནེསུཔི ཧི ཙཀྑུརཱུཔཱདཱིསུ ཕསྶཝསེན སུཁཱདིཝིཔརིཡཱཡཱབྷཱཝཏོ, སམཱནེསུ རཱུཔམནསིཀཱརཱདཱིསུ ཙཀྑཱདིསངྒྷཊྚནཝསེན ཙཀྑུསམྥསྶཛཱདིཝིཔརིཡཱཡཱབྷཱཝཏོ, ཨཉྙཔཙྩཡསཱམཉྙེཔི ཙཀྑུསམྥསྶཝསེན སུཁཱདིཙཀྑུསམྥསྶཛཱདཱིནཾ ཨོལཱ༹རིཀསུཁུམཱདིསངྐརཱབྷཱཝཏོ ཙཱཏི ཨཏྠོ. ཡཐཱཝུཏྟཕསྶསྶ སུཁཱདཱིནཾ ཨཝིཔརཱིཏོ པཙྩཡབྷཱཝོ ཨེཝ ཡཐཱཝེདནཾ ཕསྶཝཝཏྠཱནཾ. ཀཱརཎཕལཝིསེསེན ཝཱ ཕལཀཱརཎཝིསེསནིཙྪཡོ ཧོཏཱིཏི ཨུབྷཡཏྠཱཔི ནིཙྪཡོ པཝཏྠཱནནྟི ཝུཏྟོ.

ཀམྨཱདཡོཏི ཀམྨཨཱཧཱརཨུཏུཨཱདཡོ ཨཔཱཀཊཱ སེམྷཔཊིཀཱརེན རོགཝཱུཔསམནཏོ. སེམྷསྶ མནྡབྷཱཝཱདིནཱ ཙ སེམྷཾཡེཝ པཱཀཊཾ ཀཱརཎཾ. ཨཡམིདྷ ཨཝིཛྫཱ སངྑཱརཱནཾ ཧེཏུབྷཱཝེན དཱིཔིཏཱཏི སམྦནྡྷོ. ཨསྶཱདཱནུཔསྶིནོ ཏཎྷཱ པཝཌྜྷཏཱིཏི ཝཙནཏོཏི ‘‘སཾཡོཛནིཡེསུ, བྷིཀྑཝེ, དྷམྨེསུ ཨསྶཱདཱནུཔསྶིནོ ཏཎྷཱ པཝཌྜྷཏི, ཏཎྷཱཔཙྩཡཱ ཨུཔཱདཱནཾ, ཨུཔཱདཱནཔཙྩཡཱ བྷཝོ’’ཏི (སཾ. ནི. ༢.༥༣) ཨིམིནཱ སུཏྟེན ཏཎྷཱཡ སངྑཱརཀཱརཎབྷཱཝསྶ ཝུཏྟཏྟཱཏི ཨཏྠོ. པུན ཏསྶཱཔི ཨཝིཛྫཱཡ ཀཱརཎནྟི དསྶནཏྠཾ ‘‘ཨཝིཛྫཱསམུདཡཱ ཨཱསཝསམུདཡོཏི ཙ ཝཙནཏོ’’ཏི ཨཱཧ ¶ . ཏཎྷཱ ཝཱ ཙཏུརུཔཱདཱནབྷཱུཏཱ ཀཱམཱསཝདིཊྛཱསཝཱ ཙ སངྑཱརསྶ ཀཱརཎནྟི པཱཀཊཱ ཨཝིཛྫཱཧེཏུཀཱཏི སུཏྟདྭཡེནཱཔི ཨཝིཛྫཱཡ པཱཀཊཾ སངྑཱརཱནཾ ཀཱརཎབྷཱཝམེཝ དསྶེཏི. ‘‘ཨསྶཱདཱནུཔསྶིནོ’’ཏི (སཾ. ནི. ༢.༥༣) ཧི ཝཙནེན བྷཝཱདཱིནཝཔྤཊིཙྪཱདནཀིཙྩཱ ཨཝིཛྫཱ ཏཎྷཱཡ ཀཱརཎནྟི དསྶིཏཱ ཧོཏི. ཡསྨཱ ཨཝིདྭཱ, ཏསྨཱ པུཉྙཱབྷིསངྑཱརཱདིཀེ ཨབྷིསངྑརོཏཱིཏི ཨཝིཛྫཱཡ སངྑཱརཀཱརཎབྷཱཝསྶ པཱཀཊཏྟཱ ཨཝིདྡསུབྷཱཝོཝ སངྑཱརཀཱརཎབྷཱཝེན ཝུཏྟོ. ཁཱིཎཱསཝསྶ སངྑཱརཱབྷཱཝཏོ, ཨསཱདྷཱརཎཏྟཱ ཙ པུཉྙཱབྷིསངྑཱརཱདཱིནཾ སཱདྷཱརཎཀཱརཎཱནི ཝཏྠཱརམྨཎཱདཱིནཱིཏི ¶ པུཉྙབྷཝཱདཱིནཝཔྤཊིཙྪཱདིཀཱ ཨཝིཛྫཱ པུཉྙཱབྷིསངྑཱརཱདཱིནཾ ཨསཱདྷཱརཎཾ ཀཱརཎནྟི ཝཱ ཨཏྠོ དཊྛབྦོ. ཨེཏེནེཝ ‘‘ཨཝིཛྫཱཔཙྩཡཱ སངྑཱརཱ, སངྑཱརཔཙྩཡཱ ཝིཉྙཱཎ’’ནྟི (མ. ནི. ༣.༡༢༦; སཾ. ནི. ༢.༡; ཨུདཱ. ༡; མཧཱཝ. ༡; ནེཏྟི. ༢༤) ཨེཏྠ པན པདྷཱནཏྟཱ, པཱཀཊཏྟཱ, ཨསཱདྷཱརཎཏྟཱཏི ཨེཀེཀཧེཏུཕལདཱིཔནཔརིཧཱརཝཙནེན སབྦཏྠ ‘‘ཕསྶཔཙྩཡཱ ཝེདནཱ, ཝེདནཱཔཙྩཡཱ ཏཎྷཱ’’ཏིཨཱདཱིསུ བོདྷནེཡྻཛ྄ཛྷཱསཡཝསེན དྷམྨསྶ བོདྷནསངྑཱཏཾ པཡོཛནཾ ཝེདིཏབྦཾ.

༦༡༨. ‘‘ཨེཀནྟཱནིཊྛཕལཱཡཱ’’ཏི ཨེཏེན ཝིརུདྡྷབྷཱཝཾ, ‘‘སཱཝཛྫཱཡཱ’’ཏི ཨེཏེན ཝིཛཱཏིཡབྷཱཝཾ ཨཝིཛྫཱཡ ཛོཏེཏི. པུཉྙཱནེཉྫཱབྷིསངྑཱརཱ ཧི ཨིཊྛཝིཔཱཀཏཱཡ, ཨནཝཛྫསབྷཱཝཏཱཡ ཙ ཏསྶཱ ཝིརུདྡྷཱ, ཝིཛཱཏིཡཱ ཙཱཏི. ཀཐཾ ན ཡུཛྫིསྶཏཱིཏིཨཱདི སམཱདྷཱནཾ, ཏེན ཡྭཱཡཾ ཨེཀནྟཱནིཊྛཕལཏཱདིཧེཏུཔདེསོ, ཏསྶ ཨནེཀནྟིཀཏཾ དསྶེཏི. ཨཡཾ ཧེཏྠ ཨདྷིཔྤཱཡོ – ཡཱཡཾ ཏཡཱ ཙོདནཱ ‘‘ཨེཝཾ སནྟེཔཱི’’ཏིཨཱདིནཱ ཀཏཱ, སཱ ཡུཏྟཱ ཝིཔཱཀཾ པཏི. ན ཧི ཨནིཊྛཝེཔཀྐཾ ཀཱརཎཾ ཨིཊྛཾ ཕལཏི, ཨིཊྛཝེཔཀྐཾ ཝཱ ཨནིཊྛཾ. ཡསྨཱ པནེཏྠ པཙྩཡུཔྤནྣདྷམྨཱནཾ པཙྩཡབྷཱཝལཀྑཎདྷམྨཱནཾ དྷམྨཏཱ ཨདྷིཔྤེཏཱ, ཏཏྲ ཙཱཡཾ ནིཡམོ ནཏྠི ཝིཙིཏྟརཱུཔཏྟཱ ཏསྶཱཏི. ཏེནཱཧ ‘‘ཝིརུདྡྷོ ཙཱ’’ཏིཨཱདི.

ཏཏྠ དྷམྨཱནནྟི སབྷཱཝདྷམྨཱནཾ. ཋཱནནྟི ཨཝཊྛཱནཾ. ཏསྨཱ ཋཱནཝིརུདྡྷོཏི ཨཏྠིཏཱཝིརུདྡྷོ. ཀེཙི པན ‘‘པཊིསནྡྷིཨཱདཱིནིཋཱནཱནཱི’’ཏི ཝདནྟི. ཨེཝཾ སཏི ‘‘པུརིམཙིཏྟཾ པཙྪིམཙིཏྟསྶ ཋཱནཝིརུདྡྷོ པཙྩཡོ’’ཏི ནཡིདཾ ཨེཀནྟིཀཾ སིཡཱ. བྷཝངྒམྤི ཧི བྷཝངྒསྶ ཨནནྟརཔཙྩཡོ, ཛཝནཾ ཛཝནསྶ, ན ཙ སིཔྤཱདཱིནཾ པཊིསནྡྷིཨཱདིཊྛཱནཾ ཨཏྠི, ཏསྨཱ ན ཏཾ ཨིདྷ ཨདྷིཔྤེཏཾ. ཀམྨཾ རཱུཔསྶ ནམནརུཔྤནཝིརོདྷཱ, སཱརམྨཎཱནཱརམྨཎཱདིཝིརོདྷཱ ཙ སབྷཱཝཝིརུདྡྷོ པཙྩཡོ ¶ . ཁཱིརཱདཱིནི དདྷིཨཱདཱིནཾ མདྷུརམྦིལརསཱདིསབྷཱཝཝིརོདྷཱ. ཨཝིཛཱནནཀིཙྩོ ཨཱལོཀོ ཝིཛཱནནཀིཙྩསྶ ཝིཉྙཱཎསྶ. ཨམདནཀིཙྩཱ ཙ གུལཱ༹དཡོ མདནཀིཙྩསྶ ཨཱསཝསྶ.

གོལོམཱཝིལོམཱདཱིཏིཨཱདཱིསུ གོལོམཱཝིལོམཱནི དུབྦཱཡ, ཨཝཱིཏི ཙ རཏྟཱ ཨེལ༹ཀཱ ཝེདིཏབྦཱ. ཝིསཱཎཾ སརསྶ. དདྷིཏིལཔིཊྛགུལཱ༹ནི བྷཱུཏིཎཀསྶ. སེཝཱལཾ ཏཎྜུལེཡྻཀསྶ, ཁརཝལ༹ཝཱ ཨསྶཏརསྶཱཏི ཨེཝམཱདི ཨཱདི-སདྡེན སངྒཧིཏོ. ཡསྨཱ ཝིཔཱཀཱ ཨེཝ ན, ཏསྨཱ དུཀྑཝིཔཱཀཱཡཔི ¶ ཨཝིཛྫཱཡ ཨདུཀྑཝིཔཱཀཱནཾ པུཉྙཱནེཉྫཱབྷིསངྑཱརཱནཾ པཙྩཡཏྟཾ ན ན ཡུཛྫཏཱིཏི ཨཏྠོ.

ཏདཝིཔཱཀཏྟེཔི སཱཝཛྫཏཱཡ ཏདཝིརུདྡྷཱནཾ, ཏཾསདིསཱནཉྩ ཨཔུཉྙཱབྷིསངྑཱརཱནམེཝ པཙྩཡོ, ན ཨིཏརེསནྟི ཨེཏསྶ པསངྒསྶ ནིཝཱརཎཏྠཾ ‘‘ཝིརུདྡྷོ ཙཱཝིརུདྡྷོ ཙ, སདིསཱསདིསོ ཏཐཱ. དྷམྨཱནཾ པཙྩཡོ སིདྡྷོ’’ཏི ཝུཏྟཾ. ཏསྨཱ ཏམཏྠཾ པཱཀཊཾ ཀརོནྟོ ‘‘ཨིཏི ཨཡཾ ཨཝིཛྫཱ’’ཏིཨཱདིམཱཧ.

༦༡༩. སབྦཏྠ ཁནྡྷཱནཾ བྷེདོ མརཎནྟི ཙུཏིཾ ཨགྒཎྷནྟོཏི ཨིདྷ ཙུཏི ནཱམ ཏཏྠ ཏཏྠ བྷཝཱདཱིསུ རཱུཔཱདཱིནཾ ཁནྡྷཱནཾ མརཎསཉྙིཏོ ཙརིམོ བྷེདོཏི ཡཱཐཱཝཏོ ཨཛཱནནྟོ. སཏྟསྶ སཏོ ཝིཛྫམཱནསྶེཝ. དེཧནྟརསངྐམནཾ ཨཉྙེན ཀཱཡེན སམཱགམོ.

སབྦཏྠ ཁནྡྷཱནཾ པཱཏུབྷཱཝོཏི ཏཏྠ ཏཏྠ བྷཝཱདཱིསུ ཁནྡྷཱནཾ པཋམཱབྷིནིབྦཏྟི. ནཝསརཱིརཔཱཏུབྷཱཝོཏི ཨིདྷ ཛིཎྞསྶ སརཱིརསྶ ནིཀྑེཔེ པརལོཀཔརིཡཱཔནྣསྶ ནཝཀཱཡསྶ ཨུཔྤཱདོ. ཡཐེཀེ ཝདནྟི –

‘‘ཝཏྠཱནི ཛིཎྞཱནི ཡཐཱ པཧཱཡ,

ནཝཱནི གཎྷཱཏི ནརོ པརཱནི;

ནིཀྑིཔྤ དེཧཾ ཨིདྷ ཛིཎྞམེཝཾ,

གཎྷཱཏི ཨཏྟཱབྷིནཝཾ སུཁེསཱི’’ཏི.

ཨཡཾ སཏྟོཏི ཨཡམཏྟཱ, ཡོ སཱམཱི, ནིཝཱསཱི, ཀཱརཀོ, ཝེདཀོ ཙཱཏི ཨདྷིཔྤེཏོ. སཏྟོ ¶ མརཏི, སཏྟོ ཨུཔཔཛྫཏཱིཏི ཨེཏྠཱཔི ཨེསེཝ ནཡོ. ཏཱིསུཔི ཋཱནེསུ ཨཱདི-སདྡེན ཨིསྶརཀུཏྟབྲཧྨཀུཏྟཱདིཝིཀཔྤནཾ སངྒཎྷཱཏི.

སབྷཱཝལཀྑཎནྟི’རུཔྤནཱནུབྷཝནཱདིཾ, ཀཀྑལ༹ཕུསནཱདིསབྷཱཝམེཝ ཝཱ. སཱམཉྙལཀྑཎནྟི ཨནིཙྩཏཱདིཾ. སངྑཱརེ ཨཏྟཏོ ཨཏྟནིཡཏོཏི རཱུཔཱདཱིསུ ཨེཀཙྩཾ ཨཏྟཏོ, ཏདཉྙཾ ཨཏྟནིཡཏོ.

ཨཏྟཱ ཛཱནཱཏི ཝཱཏི ཝིཀཔྤེཏི ཀཱཔིལཱདཡོ ཝིཡ. ན ཛཱནཱཏི ཝཱཏི ཀཱཎཱདཱཛཱིཝིཀཱདཡོ ཝིཡ. ཀཱཎཱདོཔི ཧི ཨཏྟཱ སབྷཱཝེན ན ཛཱནཱཏི. ཡདཱ བུདྡྷིགུཎེན སཾཡུཛྫཏི, ཏདཱ ཛཱནཱཏཱིཏི ཨིཙྪཏི. སོ ཨེཝ ཀརོཏི ཙ ཀཱརེཏི ཙཱཏི ཡོ པརཏྠ སུཁདུཀྑཾ ཨནུབྷཝཏི, སོ ཨེཝ པུཉྙཱཔུཉྙཾ སཡཾ ཀརོཏི, ཨཉྙཉྩ ཀཱརེཏི, ན ཨཉྙོཏི ཨདྷིཔྤཱཡོ ¶ . སཎྛཔེནྟཱཏི དྭིཨཎུཀཱདིཨུཔྤཱདནཝསེན, ཨིཙྪཱཝསེན ཙ སམྤཱདེནྟཱ. སོཏི ཨཏྟསཉྙིཏོ སཏྟོ. ཨིནྡྲིཡསམྤནྣོཏི ཙཀྑཱདཱིཧི ཨིནྡྲིཡེཧི སམནྣཱགཏོ, ཏེན སལཱ༹ཡཏནཔྤཝཏྟིཾ དསྶེཏི. སབྦཉྷེཏཾ ཡཐཱཔཙྩཡཾ པཝཏྟམཱནཱནཾ ཨཝིཛྫཱདཱིནཾ ཀིཙྩཾ ཨཏྟནོ བྱཱཔཱརཾ ཀཏྭཱ དིཊྛིགཏིཀོ ཝིམུཡ྄ཧཏཱིཏི དསྶནཝསེན ཝུཏྟཾ. ཨཙྪེཛྫསུཏྟཱཝུཏཱབྷེཛྫམཎཱིནཾ ཝིཡ པུབྦཱཔརིཡཝཝཏྠཱནཾ ནིཡཏི, ནིཡཏིཡཱ, ནིཡཏི ཨེཝ ཝཱ སངྒཏི སམཱགམོ ནིཡཏིསངྒཏི, ཏཱཡ བྷཱཝེསུ པརིཎཏཱ མནུསྶདེཝཝིཧངྒཱདིབྷཱཝཾ པཏྟཱ ནིཡཏིསངྒཏིབྷཱཝཔརིཎཏཱ. ནིཡཏིཡཱ, སངྒཏིཡཱ, བྷཱཝསངྑཱཏེན སབྷཱཝེན ཙ པརིཎཏཱ ནཱནཔྤཀཱརཏཾ པཏྟཱ ནིཡཏིསངྒཏིབྷཱཝཔརིཎཏཱཏི ཙ ཨཏྠཾ ཝདནྟི.

ཨེཏེཧི ཙ ཝིཀཔྤནེཧི ཨཝིཛྫཱ ཨཀུསལཾ ཙིཏྟཾ ཀཏྭཱ སཏྟེ པུཉྙཱདཱིསུ སངྑཱརེསུ ཡཏྠ ཀཏྠཙི པཝཏྟེཏཱིཏི ཨིམམཏྠཾ དསྶེནྟོ ཨཱཧ ‘‘སོ ཨཝིཛྫཱཡ ཨནྡྷཱིཀཏོ’’ཏིཨཱདི. པཊིཔཛྫཏཱིཏི ཨུཔསངྐམཏི.

ཨཔརིཎཱཡཀོཏི ཨརཧཏྟམགྒསམྤཊིཔཱདཀཀལྱཱཎམིཏྟརཧིཏོ, ཨརཧཏྟམགྒཉཱཎཱཝསཱནཾ ཝཱ ཉཱཎཾ སམཝིསམཾ དསྶེཏྭཱ སཏྟེ ནིབྦཱནཾ ནཡཏཱིཏི པརིཎཱཡཀཾ, ཏེན རཧིཏོ ཨཔརིཎཱཡཀོ. དྷམྨཾ ཉཏྭཱཏི སཔྤུརིསཱུཔསྶཡེན ཙཏུསཙྩཔྤཀཱསཀཾ སུཏྟཱདིདྷམྨཾ ཉཏྭཱ, མགྒཉཱཎེནེཝ ཝཱ སབྦདྷམྨཔཝརཾ ནིབྦཱནདྷམྨཾ ཉཏྭཱ. ཏཾཛཱནནཱཡཏྟཾ པན སེསསཙྩཏྟཡཱབྷིསམཡཾ ¶ སམཱནཀཱལམྤི ཏཾ པུརིམཀཱལཾ ཝིཡ ཀཏྭཱ ཝུཏྟཾ. ཨུཔསནྟོ ཙརིསྶཏཱིཏི ཨགྒམགྒཱདྷིགམེན སབྦསོ ཨཝིཛྫཱུཔསམཱ ཨུཔསནྟོ སཨུཔཱདིསེསནིབྦཱནདྷཱཏུཡཾ ཋིཏོ ཡཱཝ ཨནུཔཱདིསེསནིབྦཱནདྷཱཏུཔཏྟི, ཏཱཝ སཏྟཱནཾ ཧིཏཙརིཡཱཡ ཨཏྟབྷཱཝཾ པཝཏྟེནྟོ ཙརིསྶཏི, དིཊྛདྷམྨསུཁཝིཧཱརེཧི ཝིཧརིསྶཏཱིཏི ཨཏྠོ.

སངྑཱརཔཙྩཡཱཝིཉྙཱཎཔདཝིཏྠཱརཀཐཱཝཎྞནཱ

༦༢༠. ཡཐཱཝུཏྟསངྑཱརཔཙྩཡཱ ཨུཔྤཛྫམཱནཾ ཏཾ ཀམྨནིབྦཏྟམེཝ བྷཝིཏུཾ ཨརཧཏཱིཏི ‘‘བཱཏྟིཾས ལོཀིཡཝིཔཱཀཝིཉྙཱཎཱནི སངྒཧིཏཱནཱི’’ཏི ཨཱཧ. དྷཱཏུཀཐཱཡཾ པན ཝིཔྤཡུཏྟེན སངྒཧིཏཱསངྒཧིཏཔདནིདྡེསེ ‘‘སངྑཱརཔཙྩཡཱ ཝིཉྙཱཎེན ཡེ དྷམྨཱ, སལཱ༹ཡཏནཔཙྩཡཱ ཕསྶེན ཡེ དྷམྨཱ, ཕསྶཔཙྩཡཱ ཝེདནཱཡ ཡེ དྷམྨཱ ཝིཔྤཡུཏྟཱ, ཏེ ¶ དྷམྨཱ ཀཏིཧི ཁནྡྷེཧི…པེ… སངྒཧིཏཱ? ཏེ དྷམྨཱ ཨསངྑཏཾ ཁནྡྷཏོ ཋཔེཏྭཱ ཨེཀེན ཁནྡྷེན, ཨེཀཱདསཧི ཨཱཡཏནེཧི, ཨེཀཱདསཧི དྷཱཏཱུཧི སངྒཧིཏཱ. ཀཏིཧི ཨསངྒཧིཏཱ? ཙཏཱུཧི ཁནྡྷེཧི, ཨེཀེནཱཡཏནེན, སཏྟཧི དྷཱཏཱུཧི ཨསངྒཧིཏཱ’’ཏི (དྷཱཏུ. ༤༦༦) ཝཙནཏོ སབྦཝིཉྙཱཎཕསྶཝེདནཱཔརིགྒཧོ ཀཏོ. ཡདི ཧི ཨེཏྠ ཝིཉྙཱཎཕསྶཝེདནཱ སཔྤདེསཱ སིཡུཾ, ‘‘ཝིཔཱཀཱ དྷམྨཱ’’ཏི (དྷ. ས. ཏིཀམཱཏིཀཱ ༣) ཨིམསྶ ཝིཡ ཝིསཛྫནཾ སིཡཱ. ཏསྨཱ ཏཏྠ ཨབྷིདྷམྨབྷཱཛནཱིཡཝསེན སངྑཱརཔཙྩཡཱ ཝིཉྙཱཎཱདཡོ གཧིཏཱཏི ཨདྷིཔྤཱཡོ ཝེདིཏབྦོ. ཨཝིཛྫཱཔཙྩཡཱ སངྑཱརོ ཙ ཨབྷིདྷམྨབྷཱཛནཱིཡེ (ཝིབྷ. ༢༤༣) ཙཏུབྷཱུམཀཀུསལསངྑཱརོ, ཨཀུསལསངྑཱརོ ཙ ཝུཏྟོཏི ཨེསོ ཨེཝ དྷཱཏུཀཐཱཡཾ གཧིཏོཏི དཊྛབྦོ. བྷཝོ པན དྷཱཏུཀཐཱཡཾ ཀམྨཱུཔཔཏྟིབྷཝཝིསེསདསྶནཏྠཾ ན ཨབྷིདྷམྨབྷཱཛནཱིཡཝསེན གཧིཏོ, ཨེཝཉྩ ཀཏྭཱ ཏཏྠ ‘‘ཨུཔཱདཱནཔཙྩཡཱ བྷཝོ’’ཏི ཨནུདྡྷརིཏྭཱ ‘‘ཀམྨབྷཝོ’’ཏིཨཱདིནཱ (དྷཱཏུ. ༦༦) ནཡེན བྷཝོ ཨུདྡྷཊོ.

ལོཀིཡཝིཔཱཀམནོཝིཉྙཱཎམེཝ སནྡྷཱཡཱཧ ‘‘བཱཝཱིསཏིཝིདྷཾ ཧོཏཱི’’ཏི. ཚཧི ཝིཉྙཱཎེཧཱིཏི ཡཐཱཨདྷིཀཏེཧི ཙཀྑུཝིཉྙཱཎཱདཱིཧི ཚཧི ཝིཉྙཱཎེཧི. ཀསྨཱ པནེཏྠ ལོཀིཡཝིཔཱཀཝིཉྙཱཎསྶེཝ གཧཎཾ ཀཏནྟི ཨཱཧ ‘‘ལོཀུཏྟརཱནི པན ཝཊྚཀཐཱཡ ན ཡུཛྫནྟཱི’’ཏི. ཡདི ཨེཝཾ ཀསྨཱ དྷཱཏུཀཐཱཡཾ ‘‘སངྑཱརཔཙྩཡཱ ཝིཉྙཱཎེན ཡེ དྷམྨཱ ཝིཔྤཡུཏྟཱ’’ཏིཨཱདཱིསུ (དྷཱཏུ. ༣༦༢) ལོཀུཏྟརཝིཔཱཀཱནམྤི གཧཎཾ ཀཏནྟི? ཏཾ ཡཐཱདྷམྨསཱསནཏྟཱ ཨབྷིདྷམྨདེསནཱཡ ཝིཔཱཀཏྟིཀེ (དྷ. ས. ཏིཀམཱཏིཀཱ ༣) ཝིཡ ཨནཝསེསཝིཔཱཀདྷམྨསངྒཎྷནཝསེན ¶ ཝུཏྟཾ. སུཏྟནྟདེསནཱ པན ཡཐཱནུལོམདེསནཱཏི ཏཏྠ པཝཏྟིནིཝཏྟིཡོ ཨསངྐརཏོ དསྶེཏབྦཱ. ཏསྨཱ ཏདཏྠསཾཝཎྞནཱཏི ཀཏྭཱ པཝཏྟིཀཐཱཡཾ ལོཀིཡཝིཔཱཀཝིཉྙཱཎཱནིཡེཝ གཧིཏཱནི. ཏེནེཝཱཧ ‘‘ཝཊྚཀཐཱཡ ན ཡུཛྫནྟཱིཏི ན གཧིཏཱནཱི’’ཏི.

ཡཐཱ ཀཏཾ ཀམྨཾ ཕལདཱནེ སམཏྠཾ ཧོཏི, ཏཐཱ ཀཏཾ ‘‘ཨུཔཙིཏ’’ནྟི ཝུཙྩཏཱིཏི ཝིཔཱཀདཱནཡོགྱམེཝ སངྑཱརཾ གཎྷནྟོ ‘‘ཨུཔཙིཏཀམྨཱབྷཱཝེ’’ཏི ཨཱཧ. ཧེཏུ ནཱམ བྱཏིརེཀཔྤདྷཱནནྟི ཨབྷཱཝ-གྒཧཎཾ, ཏེན ཀམྨེ སཏི བྷཱཝཏོ, ཨསཏི ཨབྷཱཝཏོཏི ཨཡམེཏྠ ཨདྷིཔྤཱཡོ ¶ . ཡཐཱ པནསྶ ཝིཉྙཱཎསྶ སངྑཱརཔཙྩཡཏཱ ན སིདྡྷཱ, ན ཨེཝཾ ཝིཔཱཀབྷཱཝོ. སོ པན སིདྡྷོཏི ཀཏྭཱ ཨཱཧ ‘‘ཝིཔཱཀཾཧེཏ’’ནྟི. ཏེན ཝིཉྙཱཎསྶ ཝིཔཱཀབྷཱཝེན སངྑཱརཔཙྩཡཏྟཾ སཱདྷེཏི. ཏསྶ པན སཱདྷནཏྠཾ ‘‘ཨུཔཙིཏཀམྨཱབྷཱཝེ ཝིཔཱཀཱབྷཱཝཏོ’’ཏི ཝུཏྟནྟི ཏཾ ཝིཝརནྟོ ‘‘ཝིཔཱཀཉྩཱ’’ཏིཨཱདིམཱཧ. ཡདི ཨུཔྤཛྫེཡྻཱཏི ཡདི ཀམྨནིརཔེཀྑོ ཝིཔཱཀོ ཨུཔྤཛྫེཡྻ. སབྦེསཾ སཏྟཱནཾ བྲཧྨཏྟཾ ཨུཔགཏཱནཾ གྷཱནཱདིཝིཉྙཱཎཱནི མཧཱཝིཔཱཀཝིཉྙཱཎཱནཱིཏི ཏསྶ ཏསྶ ཝིཔཱཀསྶ ཨནོཀཱསེ ཋིཏཱནམྤི. ཝིཔཱཀཱནཱིཏི ཝིཉྙཱཎཱཔེཀྑཱཡ ནཔུཾསཀནིདྡེསོ, སབྦཝིཔཱཀཝིཉྙཱཎཱནཱིཏི ཨཏྠོ.

སངྑཱརཱ བཧཱུ ཨེཀཱུནཏིཾསཙེཏནཱབྷེདཏོ, ཝིཉྙཱཎཱནི ཙ བཧཱུནི བཱཏྟིཾསཝིདྷཏྟཱ, ན ཙ སབྦཏོ སབྦཱནཱིཏི ཨཱཧ ‘‘ཀཏརསངྑཱརཔཙྩཡཱ ཀཏརཝིཉྙཱཎནྟི ཙེ’’ཏི. ‘‘ཝིཉྙཱཎ’’ནྟི ཙ ཨིདཾ ཝིཉྙཱཎསཱམཉྙཾ གཧེཏྭཱ ཝུཏྟཾ. ཀཱམཾ ཁནྡྷནིདྡེསེཔི (ཝིསུདྡྷི. ༢.༤༥༡ ཨཱདཡོ) ཨིམཱནི ཝིཉྙཱཎཱནི ནིདྡིཊྛཱནི, ཏཾ པན ཨཏིསཾཁིཏྟཾ, ན ཙ ཏཏྠ ནེསཾ སངྑཱརཔཙྩཡཏཱ ཝིབྷཱཝིཏཱཏི ཏཾ པཝཏྟིཡཾ, པཊིསནྡྷིཡཉྩ བྷཝཱདཱིསུ པཝཏྟནཱཀཱརཝསེན ཝིཏྠཱརཏོ དསྶེཏུཾ ‘‘ཀཱམཱཝཙརཔུཉྙཱབྷིསངྑཱརཔཙྩཡཱ’’ཏིཨཱདི ཨཱརདྡྷཾ. མནོཝིཉྙཱཎེཏི ནིདྡྷཱརཎེ བྷཱུམྨཾ. མཧཱཝིཔཱཀཱནཱིཏི ཝིཉྙཱཎཱཔེཀྑཱཡ ནཔུཾསཀནིདྡེསོ. མཧཱཝིཔཱཀཱཏི པན པཱཋེ མནོཝིཉྙཱཎདྷཱཏུཡོཏི ཨཱནེཏྭཱ སམྦནྡྷིཏབྦཾ.

༦༢༡. ཡཾསངྑཱརཔཙྩཡཱཏི ཡསྶ ཡསྶ སངྑཱརསྶ པཙྩཡབྷཱཝེན. ཡཾ ཝིཉྙཱཎནྟི ‘‘ཡཾ ཡཾ ཝིཉྙཱཎ’’ནྟི ཨེཝཾ ཨུབྷཡཏྠ ཨཱམེཌིཏལོཔོ དཊྛབྦོ. ‘‘ཧོཏཱི’’ཏི ཨིམིནཱ ཀཱརཎབྷཱཝེ ཝིཉྙཱཎསྶ སབྦྷཱཝམཏྟཾ པཝེདིཏཾ, ན པཝཏྟིཝིསེསོཏི ཏཾ དསྶེནྟོ ‘‘ཨེཝཾ པཝཏྟི ཝེདིཏབྦཱ’’ཏི ཨཱཧ ¶ . བྲཧྨཱནམྤི ཨནིཊྛརཱུཔཱདིཨཱཔཱཐགམནེ ཨཀུསལཝིཔཱཀཙཀྑུཝིཉྙཱཎཱདཱིནི ཀདཱཙི ཨུཔྤཛྫནྟཱིཏི ‘‘ཨིམཱནི ཏེརས…པེ… པཝཏྟནྟཱི’’ཏི ཝུཏྟཾ. ཏཏྠ པཉྩནྣཾ ཁནྡྷཱནཾ ཝོཀཱརོ ཝིཏྠཱརོ ཨེཏྠཱཏི པཉྩཝོཀཱརོ, སོ ཨེཝ བྷཝོ, ཨེཏསྨིཾ པཉྩཝོཀཱརབྷཝེ. ཧོཏི ཧི བྷིནྣཱདྷིཀརཎཱནམྤི ཨཉྙཔདཏྠསམཱསོ ཡཐཱ ‘‘ཨུརསིལོམོ’’ཏི. ཨཐ ཝཱ ཡཐཱཔཙྩཡཾ པཝཏྟམཱནེཧི པཉྩཧི ཁནྡྷེཧི ཝོཀརཱིཡཏཱིཏི པཉྩཝོཀཱརོ, སོ ཨེཝ བྷཝོཏི སབྦཾ པུབྦེ ཝིཡ.

‘‘པཝཏྟིཡཉྙེཝ ¶ པཝཏྟནྟཱི’’ཏི སངྑེཔཏོ ཝུཏྟམཏྠཾ ཝིཝརིཏུཾ ‘‘ཀཐ’’ནྟིཨཱདི ཨཱརདྡྷཾ.

‘‘ཡེབྷུཡྻེན ལོབྷསམྤཡུཏྟཛཝནཱཝསཱནེ’’ཏི ཨིདཾ པཊིགྷཝིཙིཀིཙྪུདྡྷཙྩསམྤཡུཏྟཱནནྟརཾ སོམནསྶསཧགཏསྶ ཨནུཔྤཛྫནཏོཏི ཀེཙི, ཏཾ ན གཧེཏབྦཾ. ‘‘ཙཀྑུཾ ཨསྶཱདེཏི ཨབྷིནནྡཏི, ཏཾ ཨཱརབྦྷ རཱགོ ཨུཔྤཛྫཏི, དིཊྛི ཨུཔྤཛྫཏི…པེ… ཝིཙིཀིཙྪཱ ཨུཔྤཛྫཏི, ཨུདྡྷཙྩཾ ཨུཔྤཛྫཏི, ཨཀུསལེ ནིརུདྡྷེ ཝིཔཱཀོ ཏདཱརམྨཎཏཱ ཨུཔྤཛྫཏཱི’’ཏི ཝཙནཏོ. ཨིཊྛཾ ཙེ ཨཱརམྨཎཾ, སོམནསྶཏདཱརམྨཎཾ ན ན ཨུཔྤཛྫཏཱིཏི. ཛཝནེན ཏདཱརམྨཎནིཡམེ སོམནསྶསཧགཏཱནནྟརཾ སོམནསྶསཧགཏཱནེཝ སནྡྷཱཡ ཝུཏྟནྟི ཨཔརེ, ཏཾ ཝིཙཱརེཏབྦཾ ཨུཔེཀྑཱསཧགཏཀུསལཱཀུསལཛཝནཱནནྟརམྤི སོམནསྶཏདཱརམྨཎསྶ ཨིཙྪིཏབྦཏྟཱ. ཨུཔེཀྑཱསཧགཏཀིརིཡཱཛཝནཱནནྟརམེཝ ཧི སོམནསྶཏདཱརམྨཎཾ ན ཨིཙྪནྟི.

ཡསྨཱ པན ཏིཧེཏུཀཛཝནཱཝསཱནེ ཙ ཀདཱཙི ཨཧེཏུཀཾ ཏདཱརམྨཎཾ ཧོཏི, ཏསྨཱ ‘‘ཡེབྷུཡྻེནཱ’’ཏི ཝུཏྟཾ. ཡསྨཱ ཨེཀཙིཏྟཀྑཎཱཡུཀཾ ཛཝནཱརམྨཎཾ ཧོཏི, ཏདཱ ཏཏྠ ཨེཀམེཝ ཏདཱརམྨཎཾ ཧོཏཱིཏི ཀཏྭཱ ‘‘སཀིཾ ཝཱ’’ཏི ཝུཏྟནྟི ཀེཙི. ཨཔརེ པན ཏདཱརམྨཎཾ ནཱམ ཛཝནཱརམྨཎཱནུབྷཝནཀིཙྩཾ, ཏཾ ཨེཀཙིཏྟཀྑཎིཀེ ཏཐཱ ཨཱསནྣབྷེདེ ཨཱརམྨཎེ ནུཔྤཛྫཏི. ཏསྨཱ ‘‘སཀིཾ ཝཱ’’ཏི ཨིདཾ དིརཏྟཏིརཏྟཱདི ཝིཡ ཝཙནསིལིཊྛཏཱཝསེན ཝུཏྟནྟི ཝེདིཏབྦཾ, དྭིཀྑཏྟུམེཝ པན ཨུཔྤཛྫཏཱིཏི. ‘‘དིརཏྟཏིརཏྟ’’ནྟི (པཱཙི. ༥༠) ཨེཏྠ ཧི ཝཱ-སདྡསྶ ཨབྷཱཝཱ ཝཙནསིལིཊྛཏཱམཏྟེན དིརཏྟགྒཧཎཾ ཀཏནྟི ཡུཛྫཏི. ‘‘ནིརནྟརཾ ཏིརཏྟདསྶནཏྠཾ ཝཱ’’ཏི ཨིདྷ པན ཝཱ-སདྡོ ཝིཀཔྤཏྠོ ཝུཏྟོཏི སཀིཾ ཨེཝ ཙ ཀདཱཙི པཝཏྟིཾ སནྡྷཱཡ ‘‘སཀིཾ ཝཱ’’ཏི ཝུཏྟནྟི དཊྛབྦཾ. ཏེནེཝ ཧི སམྨོཧཝིནོདནིཡཾ སཀིཾ ཏདཱརམྨཎཔྤཝཏྟིཡཱ ཝིཙཱརེཏབྦཏཾ དསྶེནྟེན ‘‘ཙིཏྟཔྤཝཏྟིགཎནཱཡཾ པན སབྦདྭཱརེསུ ཏདཱརམྨཎེ དྭེ ཨེཝ ཙིཏྟཝཱརཱ ཨཱགཏཱ’’ཏི (ཝིབྷ. ཨཊྛ. ༢༢༧) ཝུཏྟཾ.

ཏཏྠ ¶ ཙིཏྟཔྤཝཏྟིགཎནཱཡནྟི ཝིཔཱཀཀཐཱཡཾ བལཝརཱུཔཱདིཨཱརམྨཎེ ཝུཏྟཾ ཙིཏྟཔྤཝཏྟིགཎནཾ སནྡྷཱཡཱཧ. ཏཏྠ ཧི དྭེཝ ཏདཱརམྨཎུཔྤཏྟིཝཱརཱ ཝུཏྟཱ ¶ . ཏདེཝ ཧི སནྡྷཱཡ ཨིདྷཱཔི ཝུཏྟཾ ‘‘ཨབྷིདྷམྨཊྛཀཐཱཡཾ པན ཏདཱརམྨཎེ དྭེ ཙིཏྟཝཱརཱ ཨཱགཏཱ’’ཏི. ཨབྷིདྷམྨཊྛཀཐཱཡཾ ཨནིཡཏཱརམྨཎཊྛཱནཀིཙྩཱ ཧུཏྭཱ པཝཏྟནྟཱིཏི (ཝིབྷ. ཨཊྛ. ༢༢༧) དྭཱརཾ ཨནཱམསིཏྭཱ ཨེཝ ཝུཏྟཾ, ཏཾ ཨནནྟརཾ པརཏོ ཝུཏྟསཧེཏུཀཝིཔཱཀཝིཉྙཱཎཱནཾ སདིསསཾཝཎྞནཾ ཀཱཏུཀཱམཏཱདྷིཔྤཱཡེན ཝུཏྟཾ. ཨཧེཏུཀདྭཡཱདཱིནཉྷི བྷཝངྒབྷཱུཏཱནཾ སཡམེཝ དྭཱརཏྟཱ, ཙུཏིཔཊིསནྡྷིབྷཱུཏཱནཉྩ བྷཝངྒསངྑཱཏེན, ཨཉྙེན ཙ དྭཱརེན ཨནུཔྤཏྟིཏོ ནིཡཏཾ, ཨནིཡཏཾ ཝཱ དྭཱརཾ ཨེཏེསནྟི ན སཀྐཱ ཝཏྟུནྟི.

ཨཧེཏུཀདྭཡསྶ པན སནྟཱིརཎཏདཱརམྨཎབྷཱུཏསྶ དྭཱརཾ ལབྦྷཏི, ཏཉྩ ཨནིཡཏནྟི ཏམྤི གཎྷནྟོ ‘‘ཨནིཡཏདྭཱརཱརམྨཎཊྛཱནཀིཙྩཱ ཧུཏྭཱ པཝཏྟནྟཱི’’ཏི ཨཱཧ. ཏེནེཝ ཙེཏྠ མཧཱཝིཔཱཀཱནམྤི ཏདཱརམྨཎབྷཱུཏཱནཾ དྭཱརཾ ལབྦྷཏཱིཏི ཏཏྠཱཔི དྭཱརགྒཧཎཾ ཀཏཾ.

ཨེཀསྶ སཏྟསྶ པཝཏྟོ རཱུཔཱཝཙརཝིཔཱཀོ པཐཝཱིཀསིཎཱདཱིསུ ཡསྨིཾ ཨཱརམྨཎེ པཝཏྟོ, ཏཏོ ཨཉྙསྨིཾ ཏསྶ པཝཏྟི ནཏྠཱིཏི རཱུཔཱཝཙརཱནཾ ནིཡཏཱརམྨཎཏཱ ཝུཏྟཱ. ཨིཏརཱནི ཨཱརུཔྤཝིཔཱཀཝིཉྙཱཎཱནི. ནིཡཏཾ ཨཝཏྠུཀཱནཱིཏི ནིཡཏཱཝཏྠུཀཱནི. ཀསིཎུགྒྷཱཊིམཱཀཱསཱདཱིསུཡེཝ ཨཱརམྨཎེསུ པཝཏྟནཏོ ནིཡཏཱརམྨཎཱནི. ཏཏྲཱཏི པཝཏྟིཡཾ. ཨསྶཱཏི བཱཏྟིཾསཝིདྷསྶ ཝིཔཱཀཝིཉྙཱཎསྶ. ཏེ ཏེ སངྑཱརཱཏི ཡཐཱཝུཏྟཱ པུཉྙཱབྷིསངྑཱརཱདིསངྑཱརཱ. ཀམྨཔཙྩཡེནཱཏི ནཱནཱཀྑཎིཀཀམྨཔཙྩཡེན. ཨུཔནིསྶཡཔཙྩཡེནཱཏི པཀཏཱུཔནིསྶཡཔཙྩཡེན.

༦༢༢. ཨེཝཾ པཝཏྟིཡཾ ཝིཉྙཱཎཔྤཝཏྟིཾ དསྶེཏྭཱ པཊིསནྡྷིཡཾ དསྶེཏུཾ ‘‘ཡཾ པན ཝུཏྟ’’ནྟིཨཱདིམཱཧ. ཏཏྠ ཨནུརཱུཔཱཡ པཊིསནྡྷིཡཱཏི ཨནུརཱུཔེན པཊིསནྡྷིཀིཙྩེན. ཏཾ པན ཨནུརཱུཔཏཾ སཡམེཝ ཝཀྑཏི. བྷཝནྟརེན བྷཝནྟརསྶ སནྡྷཱནཾ ཨིདྷ པཊིསནྡྷཱིཏི ཏཾ ཨཙིཏྟཀམྤི ཨཏྠེཝཱཏི ཀཏྭཱ ‘‘ཀཏི པཊིསནྡྷིཡོ’’ཏི པུཙྪཾ ཀཏྭཱཔི ‘‘ཀཏི པཊིསནྡྷིཙིཏྟཱནཱི’’ཏི པུཙྪཱ ཀཏཱ. ‘‘ཀེན ཀཏྠཱ’’ཏི ཀེན ཙིཏྟེན ཀསྨིཾ བྷཝེ.

ཏཏྠཱཏི ཏེསུ ཨེཀཱུནཝཱིསཏིཡཱ པཊིསནྡྷིཙིཏྟེསུ. ཀུསལཝིཔཱཀཱཡ ཨཧེཏུཀམནོཝིཉྙཱཎདྷཱཏུཡཱཏི ¶ སམྦནྡྷོ. ནཏྠི དེཝེསུ ཨཧེཏུཀཱ པཊིསནྡྷཱིཏི ‘‘མནུསྶལོཀེ’’ཏི ཝིསེསནཾ. ནཔུཾསཀཱདཱིནནྟི ཨཱདིསདྡེན ¶ མམྨཱདཱིནཾ སངྒཧོ. ཀེཙི པན ཨེཀཙྩེ ཨཧེཏུཀཔཊིསནྡྷིཀཱ ཨཝིཀལིནྡྲིཡཱ ཧུཏྭཱ ཐོཀཾ ཝིཙཱརཎཔཀཏིཀཱཔི ཧོནྟིཡེཝ, ཏསྨཱ ཏཱདིསཱནམྤི ཨིདྷ ཨཱདིསདྡེན སངྒཧོཏི ཝདནྟི. སངྑེཔཏོཏི སམཱསཏོ, ཨསུཀཱཡ པཊིསནྡྷིཡཱ ཨསུཀཾ ཨཱརམྨཎནྟི ཝིབྷཱགཾ ཨཀཏྭཱཏི ཨཏྠོ.

སེསཱནནྟི རཱུཔཱཝཙརཱ པཉྩ, པཋམཏཏིཡཱརུཔྤཱ དྭེཏི ཨིམཱསཾ ཝུཏྟཱཝསེསཱནཾ སཏྟནྣཾ པཊིསནྡྷཱིནཾ. པཙྩུཔྤནྣཱརམྨཎཾ ཙུཏིཙིཏྟཾ ནཱམ ནཏྠི པཊིསནྡྷིཨཱརམྨཎེ ཨེཝ པཝཏྟནཏོ. དྭཱིསུ ཨཱརམྨཎེསཱུཏི ཨཏཱིཏནཝཏྟབྦཝསེན དྭཱིསུ ཨཱརམྨཎེསུ.

༦༢༣. ཏཱནཱིཏི པུབྦེ ཀཏཱནི ཀམྨཱནི. ཨསྶཱཏི ཨཱསནྣམརཎསྶ པུགྒལསྶ. ཨོལམྦནྟཱིཏི སཱཡནྷེ མཧནྟཱནཾ པབྦཏཀཱུཊཱནཾ ཚཱཡཱ ཝིཡ བྷཱུམིཡཾ ཏསྶ ཙིཏྟེ ཨཝལམྦནྟི ཨུཔཏིཊྛནྟི. ཏསྨིཾ ནིརུདྡྷེཏི ཏསྨིཾ ཙུཏིཙིཏྟེ ནིརུདྡྷམཏྟེ ཏསྶ ནིརོདྷསམནནྟརམེཝ. ཏདེཝཱཏི ཏཾཡེཝ ཡཐཱཝུཏྟཛཝནཝཱིཐིཡཱ ཨཱརམྨཎབྷཱུཏཾ. ཨཝིཛྫཱཏཎྷཱདཱིསུ ཀིལེསེསུ ཨནུཔཙྪིནྣེསྭེཝ ཀམྨཱདིནོ ཨུཔཊྛཱནཾ, ཏཉྩ ཨཱརབྦྷ ཙིཏྟསནྟཱནསྶ བྷཝནྟརནིནྣཔོཎཔབྦྷཱརཏཱ ཧོཏཱིཏི ཨཱཧ ‘‘ཨནུཔཙྪིནྣཀིལེསབལཝིནཱམིཏ’’ནྟི. སནྟཱནེ ཧི ཝིནཱམིཏེ ཏདེཀདེསབྷཱུཏཾ པཊིསནྡྷིཙིཏྟཉྩ ཝིནཱམིཏམེཝ ཧོཏི, ན ཙ ཨེཀདེསཝིནཱམིཏབྷཱཝེན ཝིནཱ སནྟཱནསྶ ཝིནཱམིཏཏཱ ཨཏྠཱིཏི. སབྦཏྠ པན དུགྒཏིཔཊིསནྡྷིནིནྣཱཡ ཙུཏིཡཱ པུརིམཛཝནཱནི ཨཀུསལཱནི, ཨིཏརཱཡ ཙ ཀུསལཱནཱིཏི ནིཙྪིནནྟི. ‘‘ནིམིཏྟསྶཱདགདྷིཏཾ ཝཱ, བྷིཀྑཝེ, ཝིཉྙཱཎཾ ཏིཊྛམཱནཾ ཏིཊྛཏི, ཨནུབྱཉྫནསྶཱདགདྷིཏཾ ཝཱ, ཏསྨིཾ ཙེ སམཡེ ཀཱལཾ ཀརོཏི, ཋཱནམེཏཾ ཝིཛྫཏི, ཡཾ དྭིནྣཾ གཏཱིནཾ ཨཉྙཏརཾ གཏིཾ ཨུཔཔཛྫེཡྻ ནིརཡཾ ཝཱ ཏིརཙྪཱནཡོནིཾ ཝཱ’’ཏི (སཾ. ནི. ༤.༢༣༥) ཧི ཝུཏྟཾ, ཏསྨཱ ཨཀུསལཾ དུགྒཏིཡཾ, ཀུསལཉྩ སུགཏིཡཾ པཊིསནྡྷིཡཱ ཨུཔནིསྶཡོ ཧོཏཱིཏི. ཨརཧཏོ པན སབྦསོ ཀིལེསཱནཾ ཨུཔཙྪིནྣཏྟཱ པཊིཔྤསྶདྡྷསབྦབྷཝུསྶུཀྐཏཱཡ ཀམྨཱདིནིམིཏྟཾ ན ཨུཔཊྛཧཏི, ཏཏོ ཝིཛྫམཱནམྤི ཀམྨཾ ཨལདྡྷསཧཱཡཏྟཱ པཊིསནྡྷིཾ ན ཛནེཏི.

ཝུཏྟཔྤཀཱརཀམྨཝསེནཱཏི པཱཔཀམྨཝསེན, ཏདུཔཊྛཱཔིཏནྟི ཨདྷིཔྤཱཡོ. ‘‘ནརཀཱདཱིསུ ཨགྒིཛཱལཝཎྞཱདིཀ’’ནྟི ཨིདཾ ཏཾསདིསཏཱཝསེན ཝུཏྟཾ. ན ¶ ཧི སོ ཨེཝ ནིརཡགྒིཝཎྞཱདི ཏདཱ ཏསྶ ¶ ཨཱཔཱཐཾ ཨཱགཙྪཏི. ཏཏྠ ཨགྒིཛཱལཝཎྞཱདིཀནྟི ཨཱདི-སདྡེན ཝེཏྟརཎཱིསིམྦལིཨསིཔཏྟཝནཱདིཝཎྞཾ སངྒཎྷཱཏི. ནརཀཱདཱིསཱུཏི པན ཨཱདི-སདྡེན པེཏཏིརཙྪཱནཱནཾ ནིབདྡྷསཉྩརཎཊྛཱནཔརིཡཱཔནྣཝཎྞཾ. མནོདྭཱརེ ཨཱཔཱཐམཱགཙྪཏཱིཏི ཀམྨབལེན ཨུཔཊྛཱཔིཏཝཎྞཱཡཏནཾ སུཔིནཾ པསྶནྟསྶ ཝིཡ, དིབྦཙཀྑུསྶ ཝིཡ ཙ མནོདྭཱརེ ཨེཝ གོཙརབྷཱཝཾ གཙྪཏི. ཨེཀཾ ཨཱཝཛྫནཾ, པཉྩ ཛཝནཱནི, དྭེ ཏདཱརམྨཎཱནཱིཏི ཏཱིཎི ཝཱིཐིཙིཏྟཱནི.

རཱགཱདིཧེཏུབྷཱུཏཾ ཧཱིནམཱརམྨཎནྟི ཨཀུསལཝིཔཱཀསྶ ཨཱརམྨཎཾ བྷཝིཏུཾ ཡུཏྟཾ ཨནིཊྛམཱརམྨཎམཱཧ. ཏམྤི ཧི སངྐཔྤནཝསེན རཱགསྶཱཔི ཧེཏུ ཧོཏཱིཏི. ཨཀུསལཝིཔཱཀཛནཀཀམྨསཧཛཱཏཱནཾ ཝཱ ཏཾསདིསཱསནྣཙུཏིཛཝནཙེཏནཱསཧཛཱཏཱནཉྩ རཱགཱདཱིནཾ ཧེཏུབྷཱཝོ ཨེཝ ཧཱིནཏཱ. ཏཉྷི པཙྪཱནུཏཱཔཛནཀཀམྨཱནམཱརམྨཎཾ ཀམྨཝསེན ཨནིཊྛཾ ཨཀུསལཝིཔཱཀསྶ ཨཱརམྨཎཾ བྷཝེཡྻ. ཨཉྙཐཱ ཙ ཨིཊྛཱརམྨཎེ པཝཏྟསྶ ཨཀུསལཀམྨསྶ ཝིཔཱཀོ ཨཀུསལཀམྨནིམིཏྟཱརམྨཎོ ན བྷཝེཡྻ. ན ཧི ཨཀུསལཝིཔཱཀོ ཨིཊྛཱརམྨཎོ བྷཝིཏུཾ ཨརཧཏཱིཏི.

པཉྩདྭཱརེ ཙ ཨཱཔཱཐཾ ཨཱགཙྪནྟཾ པཙྩུཔྤནྣཾ ཀམྨནིམིཏྟཾ ཨཱསནྣཀཏཀམྨཱརམྨཎསནྟཏིཡཾ ཨུཔྤནྣཾ, ཏཾསདིསཉྩ དཊྛབྦཾ. ཨཉྙཐཱ ཏདེཝ པཊིསནྡྷིཨཱརམྨཎཱུཔཊྛཱཔཀཾ, ཏདེཝ ཙ པཊིསནྡྷིཛནཀཾ བྷཝེཡྻ. ན ཙ པཊིསནྡྷིཡཱ ཨུཔཙཱརབྷཱུཏཱནི ཝིཡ, ཨེཏསྨིཾ ཏཡཱ པཝཏྟིཏབྦནྟི པཊིསནྡྷིཡཱ ཨཱརམྨཎཾ ཨནུཔྤཱདེནྟཱནི ཝིཡ ཙ པཝཏྟཱནི ཙུཏིཨཱསནྣཱནི ཛཝནཱནི པཊིསནྡྷིཛནཀཱནི བྷཝེཡྻུཾ. ‘‘ཀཏཏྟཱ ཨུཔཙིཏཏྟཱ’’ཏི (དྷ. ས. ༤༣༡) ཧི ཝུཏྟཾ. ཏདཱ ཙ ཏཾསམཱནཝཱིཐིཡཾ ཝིཡ པཝཏྟམཱནཱནི ཀཐཾ ཀཏཱུཔཙིཏཱནི སིཡུཾ? ཏདཱ ན ཨསྶཱདིཏཱནི. ན ཙ ལོཀིཡཱནི ལོཀུཏྟརཱནི ཝིཡ སམཱནཝཱིཐིཕལཱནི ཧོནྟི. ‘‘པུབྦེ ཝཱསྶ ཏཾ ཀཏཾ ཧོཏི པཱཔཀམྨཾ དུཀྑཝེདནཱིཡཾ, པཙྪཱ ཝཱསྶ ཏཾ ཀཏཾ ཧོཏི པཱཔཀམྨཾ དུཀྑཝེདནཱིཡཾ, མརཎཀཱལེ ཝཱསྶ ཧོཏི མིཙྪཱདིཊྛི སམཏྟཱ ཧོཏི སམཱདིནྣཱ. ཏེན སོ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫཏཱི’’ཏིཨཱདིནཱ (མ. ནི. ༣.༣༠༣) སུཏྟེ མརཎཀཱལེ སམཏྟཱཡ སམཱདིནྣཱཡ མིཙྪཱདིཊྛིཡཱ, སམྨཱདིཊྛིཡཱ ཙ སཧཛཱཏཙེཏནཱཡ པཊིསནྡྷིདཱནཾ ཝུཏྟཾ, ན ཙ དུབྦལེཧི པཉྩདྭཱརིཀཛཝནེཧི མིཙྪཱདིཊྛི, སམྨཱདིཊྛི ¶ ཝཱ སམཏྟཱ ཧོཏི སམཱདིནྣཱ. ཏཐཱ ཧི ཝུཏྟཾ སམྨོཧཝིནོདནིཡཾ ‘‘སབྦམྤི ཧེཏཾ ཀུསལཱཀུསལདྷམྨཔཊིཝིཛཱནནཱདིཙཝནཔརིཡོསཱནཾ ཀིཙྩཾ མནོདྭཱརིཀཙིཏྟེནེཝ ཧོཏི, ན པཉྩདྭཱརིཀེནཱཏི ¶ སབྦསྶཔེཏསྶ ཀིཙྩསྶ ཀརཎེ སཧཛཝནཀཱནི ཝཱིཐིཙིཏྟཱནི པཊིཀྑིཏྟཱནཱི’’ཏི (ཝིབྷ. ཨཊྛ. ༧༦༦).

ཏཏྠ ཧི ན ཀིཉྩི དྷམྨཾ པཊིཝིཛཱནཱཏཱིཏི ‘‘མནོཔུབྦངྒམཱ དྷམྨཱ’’ཏི (དྷ. པ. ༡-༢) ཨེཝཾ ཝུཏྟཾ ཨེཀམྤི ཀུསལཾ ཝཱ ཨཀུསལཾ ཝཱ ན པཊིཝིཛཱནཱཏཱིཏི ཙ ཝུཏྟཾ. ཡེསཾ པཊིཝིབྷཱཝནཔྤཝཏྟིཡཱ སུཁཾ ཝཱ དུཀྑཾ ཝཱ ཨནྭེཏི, ཏེསཾ སཱ པཝཏྟི པཉྩདྭཱརེ པཊིཀྑིཏྟཱ. ཀུསལཱཀུསལཀམྨསམཱདཱནཉྩ ཏཱདིསམེཝཱཏི. ཏདཱརམྨཎཱནནྟརཾ པན ཙཝནཾ, ཏདནནྟརཱ ཙ ཨུཔཔཏྟི མནོདྭཱརིཀཱ ཨེཝ ཧོཏི, ན སཧཛཝནཀཝཱིཐིཙིཏྟཔརིཡཱཔནྣཱཏི ཨིམིནཱ ཨདྷིཔྤཱཡེན ཨིདྷ པཉྩདྭཱརིཀཏདཱརམྨཎཱནནྟརཱ ཙུཏི, ཏདནནྟརཱ པཊིསནྡྷི ཙ ཝུཏྟཱཏི དཊྛབྦཱ. ཏཏྠ ཨཝསེསཔཉྩཙིཏྟཀྑཎཱཡུཀེ རཱུཔཱདིམྷི ཨུཔྤནྣཾ པཊིསནྡྷིཾ སནྡྷཱཡ ‘‘པཙྩུཔྤནྣཱརམྨཎཾ ཨུཔཔཏྟིཙིཏྟཾ པཙྩུཔྤནྣཱརམྨཎསྶ བྷཝངྒསྶ ཨནནྟརཔཙྩཡེན པཙྩཡོ’’ཏི, ཨཝསེསཨེཀཙིཏྟཀྑཎཱཡུཀེ ཙ ཨུཔྤནྣཾ པཊིསནྡྷིཾ སནྡྷཱཡ ‘‘པཙྩུཔྤནྣཱརམྨཎཾ ཨུཔཔཏྟིཙིཏྟཾ ཨཏཱིཏཱརམྨཎསྶ བྷཝངྒསྶ ཨནནྟརཔཙྩཡེན པཙྩཡོ’’ཏི ཙ ཝུཏྟནྟི ཝེདིཏབྦཾ.

༦༢༤. ཀཎྷཔཀྑེ སུཀྐཔཀྑཾ ཋཔེཏྭཱཏི ཨེཏྠ ཡཐཱ པུབྦེ ‘‘པཱཔཀམྨཾ ཝཱ ཀམྨནིམིཏྟཾ ཝཱ’’ཏི ཝུཏྟེ ཀཎྷཔཀྑེ ‘‘ཨནཝཛྫཀམྨཾ ཝཱ ཀམྨནིམིཏྟཾ ཝཱ’’ཏི སུཀྐཔཀྑོ ཝུཏྟོ, ཨེཝཾ ‘‘དུགྒཏིཔརིཡཱཔནྣཾ པཊིསནྡྷིཙིཏྟཾ, ནརཀཱདཱིསུ ཨགྒིཛཱལཝཎྞཱདིཀཾ དུགྒཏིནིམིཏྟ’’ནྟི ཙ ཝུཏྟེ ཀཎྷཔཀྑེ ‘‘སུགཏིཔརིཡཱཔནྣཾ པཊིསནྡྷིཙིཏྟཾ, མནུསྶལོཀེ རཏྟཀམྦལསདིསམཱཏུཀུཙྪིཝཎྞསངྑཱཏཾ, དེཝལོཀེ ཝཱ ཨུཡྻཱནཝིམཱནཀཔྤརུཀྑཱདིཝཎྞསངྑཱཏཾ སུགཏིནིམིཏྟ’’ནྟི ཨེཝཾ སུཀྐཔཀྑཾ ཋཔེཏྭཱ སེསཾ སབྦཾ པུརིམནཡེནེཝ ཝེདིཏབྦཾ. ཨཏཱིཏཔཙྩུཔྤནྣཱརམྨཎཱཡཱཏི ཀམྨཀམྨནིམིཏྟཝསེན ཨཏཱིཏཱརམྨཎཱཡ, མཱཏུཀུཙྪིཝཎྞཱདིསུགཏིནིམིཏྟཝསེན པཙྩུཔྤནྣཱརམྨཎཱཡ.

༦༢༥. ཏཉྩ ཁོཏི ཡདེཏཾ ‘‘ཨནཝཛྫཀམྨཾ ཝཱ ཀམྨནིམིཏྟཾ ཝཱ’’ཏི ཨནིཡམནཾ ཀཏཾ, ཏཉྩ ཁོ. ཀམྨནིམིཏྟམེཝ ཨཱཔཱཐམཱགཙྪཏི ཨེཀནྟཏོ ¶ ཨཏྟནོ ཀམྨཱརམྨཎཏཱཡ མཧགྒཏཝིཔཱཀསྶ. སུདྡྷཱཡ ཝཱཏི མཧགྒཏཀམྨནིམིཏྟཱརམྨཎཱཡ ཛཝནཝཱིཐིཡཱ, ཏདཱརམྨཎརཧིཏཱཡཱཏི ཨཏྠོ, སཱ པན ཛཝནཝཱིཐི མཧགྒཏཝིཔཱཀསྶ ཨུཔཙཱརོ ཝིཡ དཊྛབྦཱ. ཀེཙི པན ཏཉྩ ཝཱིཐིཾ མཧགྒཏཱཝསཱནཾ ཝདནྟི. ‘‘ནཝཏྟབྦཱརམྨཎཱ ཝཱ’’ཏི ཨིདཾ རཱུཔཱཝཙརཔཊིསནྡྷིཾ, ཨཱརུཔྤེསུ ¶ ཙ པཋམཾ, ཏཏིཡཉྩ སནྡྷཱཡ ཝུཏྟཾ. དུཏིཡཙཏུཏྠཱ པན ཨཏཱིཏཱརམྨཎཝཙནེནེཝ གཧིཏཱ.

མཱཏུཀུཙྪིཝཎྞསངྑཱཏནྟིཨཱདིནཱ ཝཎྞོ ཨེཝ གཏིནིམིཏྟབྷཱཝེན ཨཱགཏོ. ཏཏྠ སདྡོ ཏཱཝ ཨནུཔཱདིནྣབྷཱཝེན སུགཏིཔརིཡཱཔནྣཏཱཡ གཏིནིམིཏྟབྷཱཝེན ཨཊྛཀཐཱསུ ནཱགཏོཏི ཡུཏྟམེཏཾ, གནྡྷཱདཱིནཾ པན ཨནཱགམནེ ཀཱརཎཾ ཝཱིམཾསིཏབྦཾ.

ཨཡཾ ཏཱཏ ཏཝཏྠཱཡ བུདྡྷཔཱུཛཱ ཀརཱིཡཏཱིཏིཨཱདཱིསུ པུབྦཙེཏནཱཝསེན པུཉྙཾ ཧོཏི. སབྦནྟིམཛཝནེ ཝཏྟམཱནསྶཱཔཱིཏི ཝདནྟི.

༦༢༦. ‘‘ཨེཏེནཱནུསཱརེན ཨཱརུཔྤཙུཏིཡཱཔི ཨནནྟརཱ པཊིསནྡྷི ཝེདིཏབྦཱ’’ཏི ཨིདཾ ཀསྨཱ ཝུཏྟཾ, ནནུ ‘‘པཐཝཱིཀསིཎཛ྄ཛྷཱནཱདིཝསེན པཊིལདྡྷམཧགྒཏསྶ སུགཏིཡཾ ཋིཏསྶཱ’’ཏི ཨེཝམཱདིཀེ ཨེཝ ནཡེ ཨཡམྤི པཊིསནྡྷི ཨཝརུདྡྷཱཏི? ན, ཏཏྠ རཱུཔཱཝཙརཙུཏིཨནནྟརཱཡ ཨེཝ པཊིསནྡྷིཡཱ ཝུཏྟཏྟཱ. ཏཏྠ ཧི ‘‘པཐཝཱིཀསིཎཱདིཀཾ ཝཱ ནིམིཏྟཾ མཧགྒཏཙིཏྟཾ ཝཱ མནོདྭཱརེ ཨཱཔཱཐཾ ཨཱགཙྪཏི, ཙཀྑུསོཏཱནཾ ཝཱ’’ཏིཨཱདིནཱ ཏེན ཝཙནེན རཱུཔཱཝཙརཙུཏིཡཱ ཨེཝ ཨནནྟརཱ པཊིསནྡྷི ཝུཏྟཱཏི ཝིཉྙཱཡཏི. ཨཐཱཔི ཡཐཱསམྦྷཝཡོཛནཱཡ ཨཡམྤི པཊིསནྡྷི ཏཏྠེཝ ཨཝརུདྡྷཱ, ཨརཱུཔཱཝཙརཙུཏིཨནནྟརཱ པན རཱུཔཱཝཙརཔཊིསནྡྷི ནཏྠི. ཨརཱུཔཱཝཙརེ ཙ ཨུཔརཱུཔརི ཙུཏིཡཱ ཨནནྟརཱ ཧེཊྛིམཱ ཧེཊྛིམཱ པཊིསནྡྷི ནཏྠཱིཏི ཙཏུཏྠཱརུཔྤཙུཏིཡཱ ནཝཏྟབྦཱརམྨཎཔཊིསནྡྷི ནཏྠི. ཏེན ཏཏོ ཏཏྠེཝ ཨཏཱིཏཱརམྨཎཱ, ཀཱམཱཝཙརེ ཙ ཨཏཱིཏཔཙྩུཔྤནྣཱརམྨཎཱ པཊིསནྡྷི. ཨིཏརཱཧི ཙ ཡཐཱསམྦྷཝཾ ཨཏཱིཏནཝཏྟབྦཱརམྨཎཱ ཨཱརུཔྤཔཊིསནྡྷི, ཨཏཱིཏཔཙྩུཔྤནྣཱརམྨཎཱ ཙ ཀཱམཱཝཙརཔཊིསནྡྷི ཡོཛེཏབྦཱཏི ཨིམསྶ ཝིསེསསྶ དསྶནཏྠཾ ཝིསུཾ ཨུདྡྷརཎཾ ཀཏཾ.

༦༢༧. ཨེཝཾ ཨཱརམྨཎཝསེན ཨེཀཝིདྷཱཡ ཀཱམཱཝཙརསུགཏིཙུཏིཡཱ དུཝིདྷཱ དུགྒཏིཔཊིསནྡྷི, དུགྒཏིཙུཏིཡཱ དུཝིདྷཱ སུགཏིཔཊིསནྡྷི, ཀཱམཱཝཙརསུགཏིཙུཏིཡཱ དྭིཨེཀདྭིཔྤཀཱརཱནཾ ཀཱམརཱུཔཱརཱུཔཱནཾ ཝསེན པཉྩཝིདྷཱ སུགཏིཔཊིསནྡྷི ¶ , རཱུཔཱཝཙརཙུཏིཡཱ ཏཐེཝ པཉྩཝིདྷཱ, དུཝིདྷཱཡ ཨཱརུཔྤཙུཏིཡཱ པཙྩེཀཾ དྭིནྣཾ དྭིནྣཾ ཀཱམཱརུཔྤཱནཾ ཝསེན ཨཊྛཝིདྷཱ ཙ པཊིསནྡྷི ¶ དསྶིཏཱ. དུགྒཏིཙུཏིཡཱ པན ཨེཀཝིདྷཱཡ དུགྒཏིཔཊིསནྡྷི དུཝིདྷཱ ན དསྶིཏཱ, ཏཾ དསྶེཏུཾ ‘‘དུགྒཏིཡཾ ཋིཏསྶ པནཱ’’ཏིཨཱདི ཝུཏྟཾ. ཡཐཱ ཝུཏྟཱ པན –

དྭེ དྭེ པཉྩཱཐ པཉྩཊྛ, དྭེ བྷཝཱལམྦབྷེདཏོ;

ཙུཏིཡཱ ཏཱདིསཱཡེཏཱ, ཙཏུཝཱིསཏི སནྡྷིཡོ. (ཝིབྷ. མཱུལཊཱི. ༢༢༧);

༦༢༨. ‘‘ཀཱམཱཝཙརསྶ ཀུསལསྶ ཀམྨསྶ ཀཏཏྟཱ’’ཏིཨཱདིནཱ (དྷ. ས. ༤༣༡) ནཱནཱཀྑཎིཀཀམྨཔཙྩཡབྷཱཝོ ཧེཊྛཱ དསྶིཏཔྤཀཱརོཏི ཨུཔནིསྶཡབྷཱཝམེཝ དསྶེནྟོ ‘‘ཝུཏྟཉྷེཏ’’ནྟིཨཱདིམཱཧ.

ནིསྶཡཔཙྩཡབྷཱུཏེན རཱུཔེན སཧཔཝཏྟིཡེཝེཏྠ ཝིཉྙཱཎསྶ ཏེན མིསྶིཏཱ, ཏདབྷཱཝོ ཨམིསྶིཏཱ. ཡཝནྟི ཨེཏྠ སཏྟཱ ཨེཀཛཱཏིསམནྭཡེན ཨཉྙམཉྙམིསྶིཏཱ ཧོནྟཱིཏི ཡོནིཡོ. སུཙརིཏདུཙྩརིཏཝསེན གནྟབྦཱ པཱཔུཎིཏབྦཱཏི གཏིཡོ. ཏིཊྛཏི ཨེཏྠཱཏི ཋིཏི, ཝིཉྙཱཎསྶ ཋིཏི ཝིཉྙཱཎཊྛིཏི. ནཱནཏྟཀཱཡནཱནཏྟསཉྙཱིཏིཨཱདིཨཱཝཱསོ ཨེཝ སཏྟེཧི ཨཱཝསིཏབྦཏོ སཏྟཱཝཱསོ. ཨསཉྙསཏྟཱཝཱསསྶ ཨིདྷ ཨསམྦྷཝཏོ ‘‘སཏྟཱཝཱསཝསེན ཨཊྛཝིདྷཾ ཧོཏཱི’’ཏི ཝུཏྟཾ.

༦༢༩. ཨཉྙཏྲ ཛཱཏིཔཎྜཀཔཊིསནྡྷིཡཱཏི ཨེཏྠ པཋམཀཔྤིཀཔཊིསནྡྷིཡཱཔཱིཏི ཝཏྟབྦཾ. སཱཔི ཧི བྷཱཝེན ཝིནཱཝ ཨུཔྤཛྫཏཱིཏི.

ཨོམཏོཏི ཨཝམཏོ, ཨཝཀཾསཏོཏི ཨཏྠོ. ཨཱདིནཱཏི ‘‘མིསྶཾ ཨམིསྶ’’ནྟི ཨེཏསྨིཾ དུཀེ ཨཱདིམྷི ཝུཏྟེན མིསྶཝིཉྙཱཎེན. ཨོམཏོ དྭེ ཝཱ ཏཡོ ཝཱ དསཀཱ ཨུཔྤཛྫནྟཱིཏི གབྦྷསེཡྻཀཱནཾ ཝསེན ཝུཏྟཾ. ཨཉྙཏྠ པན ཨནེཀེ ཀལཱཔཱ སཧ ཨུཔྤཛྫནྟི. བྲཧྨཏྟབྷཱཝེཔི ཧི ཨནེཀགཱཝུཏཔྤམཱཎེན ཨནེཀེ ཀལཱཔཱ སཧ ཨུཔྤཛྫནྟཱིཏི ཏིཾསཏོ ཨདྷིཀཱནེཝ རཱུཔཱནི ཧོནྟི. ཏདཧུཛཱཏཨེལ༹ཀསྶ ལོམཾ ཛཱཏིཨུཎྞཱཏི ཀེཙི. ཧིམཝནྟཔྤདེསེ ཛཱཏིམནྟཨེལ༹ཀལོམཾ ཛཱཏིཨུཎྞཱཏི ཨཔརེ. གབྦྷཾ ཕཱལེཏྭཱ གཧིཏཨེལ༹ཀལོམཾ ཛཱཏིཨུཎྞཱཏི ཨཉྙེ. ཨིམཱསུ གཏཱིསུ ཨིམཱ ཡོནིཡོ སམྦྷཝནྟི, ཨིམཱསུ ན སམྦྷཝནྟཱིཏི ཨེཝཾ ཡོནཱིནཾ གཏིཝསེན སམྦྷཝབྷེདོ.

༦༣༠. བྷུམྨཝཛྫེསཱུཏི ¶ བྷུམྨདེཝཱནཾ ཝཛྫནཾ ཡོནིཝིབྷཱགཾ པཏི ཏེསཾ མནུསྶསདིསཏྟཱ. ཡོནིཡོ ¶ ཏིསྶོ པུརིམིཀཱ ན ཧོནྟཱིཏི ཡོནིཏྟཡཔཊིཀྑེཔེན པཙྪིམཱ ཡོནི ཨནུཉྙཱཏཱཏི ཨཏྠཏོ ཨཱཔནྣམེཝ ཧོཏི. གཏིཏྟཡེཏི མནུསྶཔེཏཏིརཙྪཱནསཉྙིཏེ གཏིཏྟཡེ. ཏཉྷི ཨེཏྠ པུབྦེ ཨནཱམཊྛཾ.

ཙ-སདྡོ ཨཝུཏྟསམུཙྩཡཏྠོཏི དསྶེཏུཾ ‘‘ཙ-སདྡེནཱ’’ཏིཨཱདི ཝུཏྟཾ. ཀསྨཱ པན ནིཛ྄ཛྷཱམཏཎྷིཀཔེཏེསུ པུརིམིཀཱ ཏིསྶོ ཡོནིཡོ ན སནྟཱིཏི? ཨསམྦྷཝཏོ. ཏཱསཉྷི ནིཙྩཱཏུརབྷཱཝཏོ ཀཱམསེཝཱ ནཏྠཱིཏི ན ཏཱ ཨཎྜཛཱདཡོ ཧོནྟི. ཀུཙྪིཡཾ ཏཱསཾ གབྦྷོ ནཱཝཏིཊྛཏི ཛཱལསབྦྷཱཝཏོཏི ཀེཙི. ཨགྒིཛཱལཱཡ སནྟཔྤམཱནསརཱིརཱ ཨེཏཱ ནིབྦཏྟནྟཱིཏི ཨལླཊྛཱནེསུ, པུཔྥཱདཱིསུ ཙ སམྦྷཝཱབྷཱཝཏོ སཾསེདཛཏཱཔི ཏཱསཾ ནཏྠེཝཱཏི ཝདནྟི. ཏེནཱཧ ‘‘ཨོཔཔཱཏིཀཱ ཨེཝ ཧི ཏེ ཧོནྟཱི’’ཏི.

རཱུཔཱིབྲཧྨེསུ ཏཱཝ ཨོཔཔཱཏིཀཡོནིཀེསཱུཏི ཨོཔཔཱཏིཀཡོནིཀེཧི རཱུཔཱིབྲཧྨེ ནིདྡྷཱརེཏི. རཱུཔཱིབྲཧྨེསཱུཏི ཧི ཨདྷིཀརཎེ བྷུམྨཾ, ཨོཔཔཱཏིཀེསཱུཏི ནིདྡྷཱརཎེ. ཏེན ‘‘ཨོཔཔཱཏིཀཡོནིཀེསཱུ’’ཏི སཱམཉྙཏོ ཝུཏྟརཱསིཏོ ‘‘རཱུཔཱིབྲཧྨེསཱུ’’ཏི ཝིསེསེན ཏདེཀདེསཾ ནིདྡྷཱརེཏི. ཙཀྑུསོཏཝཏྠུདསཀཱནཾ, ཛཱིཝིཏནཝཀསྶ ཙཱཏི ཨེཏྠ ཀེཙི ‘‘ཙཀྑུསོཏཝཏྠུསཏྟཀཱནཾ, ཛཱིཝིཏཚཀྐསྶ ཙཱཏི ཙཏུནྣཾ ཀལཱཔཱནཾ ཝསེན རཱུཔབྷཝེ པཊིསནྡྷིཝིཉྙཱཎེན སཧ སཏྟཝཱིསཏི རཱུཔཱནི ཨུཔྤཛྫནྟི, ཏཏྠ གནྡྷརསཱཧཱརཱནཾ པཊིཀྑིཏྟཏྟཱ’’ཏི ཀཱརཎཾ ཝཏྭཱ ཏཾ སམཏྠེནྟཱ ‘‘པཱལི༹ཡཉྷི ‘རཱུཔདྷཱཏུཡཱ ཨུཔཔཏྟིཀྑཎེ ཋཔེཏྭཱ ཨཉྙསཏྟཱནཾ དེཝཱནཾ པཉྩཱཡཏནཱནི པཱཏུབྷཝནྟི, པཉྩ དྷཱཏུཡོ པཱཏུབྷཝནྟཱི’ཏི (ཝིབྷ. ༡༠༡༥-༡༠༡༦) ཝུཏྟཾ, ཏཐཱ ‘རཱུཔདྷཱཏུཡཱ ཚ ཨཱཡཏནཱནི, ནཝ དྷཱཏུཡོ’ཏི སབྦསངྒཧཀཝསེན ཏཏྠ ཝིཛྫམཱནཱཡཏནདྷཱཏུཡོ དསྶེཏུཾ ཝུཏྟཾ. ཀཐཱཝཏྠུམྷི ཙ གྷཱནཱཡཏནཱདཱིནཾ ཝིཡ གནྡྷཱཡཏནཱདཱིནཉྩ ཏཏྠ བྷཱཝོ པཊིཀྑིཏྟོ ‘ཨཏྠི ཏཏྠ གྷཱནཱཡཏནནྟི? ཨཱམནྟཱ. ཨཏྠི ཏཏྠ གནྡྷཱཡཏནནྟི? ན ཧེཝཾ ཝཏྟབྦེ’ཏིཨཱདིནཱ (ཀཐཱ. ༥༢༠). ན ཙ ཨཕོཊྛབྦཱཡཏནཱནཾ པཐཝཱིདྷཱཏུཨཱདཱིནཾ ཝིཡ ཨགནྡྷརསཱཡཏནཱནཾ གནྡྷརསཱནཾ ཏཏྠ བྷཱཝོ སཀྐཱ ཝཏྟུཾ, ཕུསིཏུཾ སཀྐུཎེཡྻཏཱཝིནིམུཏྟསྶ པཐཝཱིཨཱདིསབྷཱཝསྶ ཝིཡ གནྡྷརསཱཡཏནབྷཱཝཝིནིམུཏྟསྶ གནྡྷརསསབྷཱཝསྶ ¶ ཨབྷཱཝཱ. ཡདི ཙ གྷཱནསམྥསྶཱདཱིནཾ ཀཱརཎབྷཱཝོ ནཏྠཱིཏི ‘ཨཱཡཏནཱནཱི’ཏི ཏེ ན ཝུཙྩེཡྻུཾ, དྷཱཏུསདྡོ པན ནིསྶཏྟནིཛྫཱིཝཝཱཙཀོཏི ‘གནྡྷདྷཱཏུ རསདྷཱཏཱུ’ཏི ཨཝཙནེ ཀཱརཎཾ ནཏྠི, དྷམྨབྷཱཝོ ཙ ཏེསཾ ཨེཀནྟེན ཨིཙྪིཏབྦོ སབྷཱཝདྷཱརཎཱདིལཀྑཎཏོ ཨཉྙསྶ ཨབྷཱཝཱ. དྷམྨཱནཉྩ ཨཱཡཏནབྷཱཝོ ཨེཀནྟིཀོ ¶ ཡམཀེ ཝུཏྟོ ‘དྷམྨོ ཨཱཡཏནནྟི? ཨཱམནྟཱ’ཏི (ཡམ. ༡.ཨཱཡཏནཡམཀ.༡༣). ཏསྨཱ ཏེསཾ གནྡྷརསཱཡཏནབྷཱཝཱབྷཱཝེཔི ཀོཙི ཨཱཡཏནབྷཱཝོ ཝཏྟབྦོ. ཡདི ཙ ཕོཊྛབྦབྷཱཝཏོ ཨཉྙོ པཐཝཱིཨཱདིབྷཱཝོ ཝིཡ གནྡྷརསབྷཱཝཏོ ཨཉྙོ ཏེསཾ ཀོཙི སབྷཱཝོ སིཡཱ, ཏེསཾ དྷམྨཱཡཏནསངྒཧོ. གནྡྷརསབྷཱཝེ པན ཨཱཡཏནབྷཱཝེ ཙ སཏི ‘གནྡྷོ ཙ སོ ཨཱཡཏནཉྩ གནྡྷཱཡཏནཾ, རསོ ཙ སོ ཨཱཡཏནཉྩ རསཱཡཏན’ནྟི ཨིདམཱཔནྣམེཝཱཏི གནྡྷརསཱཡཏནབྷཱཝོ ཙ ན སཀྐཱ ནིཝཱརེཏུཾ. ‘ཏཡོ ཨཱཧཱརཱ’ཏི ཙ ཝཙནཏོ ཀབལཱི༹ཀཱརཱཧཱརསྶ ཏཏྠ ཨབྷཱཝོ ཝིཉྙཱཡཏི. ཏསྨཱ ཡཐཱ པཱལི༹ཡཱ ཨཝིརོདྷོ ཧོཏི, ཏཐཱ རཱུཔགཎནཱ ཀཱཏབྦཱ. ཨེཝཉྷི དྷམྨཏཱ ན ཝིལོམིཏཱ ཧོཏཱི’’ཏི ཝདནྟི.

ཨེཏྠ ཝུཙྩཏེ – རཱུཔཱཝཙརསཏྟཱནཾ གྷཱནཛིཝ྄ཧཱཡཏནཱབྷཱཝཏོ ཝིཛྫམཱནཱཔི གནྡྷརསཱ ཨཱཡཏནཀིཙྩཾ ན ཀརོནྟཱིཏི ཏེ ཨནཱམསིཏྭཱ པཱལི༹ཡཾ ‘‘པཉྩཱཡཏནཱནི པཱཏུབྷཝནྟཱི’’ཏི (ཝིབྷ. ༡༠༡༥), ‘‘ཚ ཨཱཡཏནཱནཱི’’ཏི (ཝིབྷ. ༩༩༢) ཙ ཨཱདི ཝུཏྟཾ, ‘‘ཏཡོ ཨཱཧཱརཱ’’ཏི ཙ ཨཛ྄ཛྷོཧརིཏབྦསྶ ཨཱཧཱརསྶ ཨབྷཱཝེན ཨོཛཊྛམཀརཱུཔསམུཊྛཱཔནསངྑཱཏསྶ ཨཱཧཱརཀིཙྩསྶ ཨཀརཎཏོ, ན སབྦེན སབྦཾ གནྡྷརསཱནཾ, ཨོཛཱཡ ཙ ཨབྷཱཝཏོ. ཨིཏི ཝིསཡིནོ, ཀིཙྩསྶ ཙ ཨབྷཱཝེན ཝིསཡོ, ཀིཙྩཝཱ ཙ དྷམྨོ ན ཝུཏྟོ. ཡསྨིཉྷི བྷཝེ ཝིསཡཱི ནཏྠི, ཏསྨིཾ ཏཾཧེཏུཀོ ནིཔྤརིཡཱཡེན ཝིསཡསྶ ཨཱཡཏནབྷཱཝོ ནཏྠཱིཏི ཝིཛྫམཱནསྶཱཔི ཨཝཙནཾ ཡཐཱ ཏཏྠེཝ རཱུཔབྷཝེ པཐཝཱིཏེཛོཝཱཡོདྷཱཏཱུནཾ ཕོཊྛབྦཱཡཏནབྷཱཝེན. ཡསྶ པན ཡཏྠ ཝཙནཾ, ཏསྶ ཏཏྠ ཝིསཡཱིསབྦྷཱཝཧེཏུཀོ ནིཔྤརིཡཱཡེན ཨཱཡཏནབྷཱཝོ ཝུཏྟོ ཡཐཱ ཏཏྠེཝ རཱུཔཱཡཏནསྶ.

ཡདི ཝིསཡཱིསབྦྷཱཝཧེཏུཀོ ཝིསཡསྶ ནིཔྤརིཡཱཡེན ཨཱཡཏནབྷཱཝོ, ཀཐམསཉྙསཏྟཱནཾ དྭེ ཨཱཡཏནཱནི པཱཏུབྷཝནྟཱིཏི, ཨསཉྙསཏྟཱནཉྷི ¶ ཙཀྑཱཡཏནཾ ནཏྠི, ཨཙཀྑཱཡཏནབྷཱཝེན ཙ ནེསཾ རཱུཔཱཡཏནཾ ཨཉྙེསཾ ཨཝིསཡོཏི? ནཱཡཾ ཝིརོདྷོ. ཡེན ཨདྷིཔྤཱཡེན རཱུཔདྷཱཏུཡཾ སཉྙཱིནཾ གནྡྷཱཡཏནཱདཱིནཾ ཨཝཙནཾ, ཏེན རཱུཔཱཡཏནསྶཱཔི ཨཝཙནནྟི ཨསཉྙཱིནཾ ཨེཀཾ ཨཱཡཏནཾ ཝཏྟབྦཾ. ཡཐཱསཀཉྷི ཨིནྡྲིཡགོཙརབྷཱཝཱཔེཀྑཱཡ ཡེསཾ ནིཔྤརིཡཱཡེན ཨཱཡཏནབྷཱཝོ ཨཏྠི, ཏེསུ ནིདྡིསིཡམཱནེསུ ཏདབྷཱཝཏོ རཱུཔདྷཱཏུཡཾ སཉྙཱིནཾ གནྡྷཱདིཀེ ཝིསུཾ ཨཱཡཏནབྷཱཝེན ཨཝཏྭཱ དྷམྨསབྷཱཝཱནཏིཝཏྟནཏོ, མནོཝིཉྙཱཎསྶ ཙ ཝིསཡབྷཱཝཱུཔགམནཏོ དྷམྨཱཡཏནནྟོགདྷེ ཀཏྭཱ ¶ ‘‘པཉྩཱཡཏནཱནཱི’’ཏི པཱལི༹ཡཾ (ཝིབྷ. ༡༠༡༥) ཝུཏྟཾ. ཨེཏདཏྠཉྷི ‘‘དྷམྨཱཡཏན’’ནྟི སཱམཉྙཏོ ནཱམཀརཎཾ, པིཊྛིཝཊྚཀཱནི ཝཱ ཏཱནི ཀཏྭཱ ‘‘པཉྩཱཡཏནཱནཱི’’ཏི ཝུཏྟཾ.

ཡེན ཙ པན ཨདྷིཔྤཱཡེན ཨསཉྙཱིནཾ རཱུཔཱཡཏནཾ ཝུཏྟཾ, ཏེན སཉྙཱིནམྤི གནྡྷཱདཱིནཾ ཝིསུཾ གཧཎཾ ཀཱཏབྦནྟི ཨིམསྶ ནཡསྶ དསྶནཏྠཾ ‘‘ཨསཉྙསཏྟཱནཾ དེཝཱནཾ དྭེ ཨཱཡཏནཱནི པཱཏུབྷཝནྟཱི’’ཏི (ཝིབྷ. ༡༠༡༧) ཝུཏྟཾ. ཨསཏིཔི ཧི ཏཏྠ ཨཏྟནོ ཨིནྡྲིཡེ རཱུཔསྶ ཝཎྞཱཡཏནསབྷཱཝཱཏིཀྐམོ ནཏྠེཝཱཏི ཏཾ རཱུཔཱཡཏནནྟྭེཝ ཝུཙྩཏི. ཨིམིནཱ ཙ ནཡདསྶནེན གནྡྷཱདཱིནི ཏཱིཎི པཀྑིཔིཏྭཱ སཉྙཱིནཾ ཨཊྛ ཨཱཡཏནཱནི, ཨསཉྙཱིནཾ པཉྩཱཏི ཨཡམཏྠོ དསྶིཏོ ཧོཏི. ཨེཝཉྩེཏཾ སམྤཊིཙྪིཏབྦཾ, ཨཉྙཐཱ རཱུཔལོཀེ ཕུསིཏུཾ ཨསཀྐུཎེཡྻཏཱཡ པཐཝཱིཨཱདཱིནཾ བྲཧྨཱནཾ ཝཙཱིགྷོསོ ཨེཝ ན སིཡཱ. ན ཧི པཊིགྷཊྚནཱནིགྷཾསམནྟརེན སདྡཔྤཝཏྟི ཨཏྠི, ན ཙ ཕུསནསབྷཱཝཱནཾ ཀཏྠཙི ཨཕུསནབྷཱཝཏཱ སཀྐཱ ཝིཉྙཱཏུཾ, ཕོཊྛབྦཱཡཏནསངྑཱཏསྶ ཙ བྷཱུཏཏྟཡསྶ ཨབྷཱཝེ རཱུཔབྷཝེ རཱུཔཱཡཏནཱདཱིནམྤི སམྦྷཝོ ཨེཝ ན སིཡཱ. ཏསྨཱ ཕུསིཏུཾ སཀྐུཎེཡྻཏཱཡཔི པཐཝཱིཨཱདཱིནཾ ཏཏྠ ཀཱཡིནྡྲིཡཱབྷཱཝེན ཏེསཾ ཕོཊྛབྦབྷཱཝོ ན ཝུཏྟོ. ཨེཝཉྩ ཀཏྭཱ རཱུཔདྷཱཏུཡཾ ཏེསཾ སཔྤཊིགྷཝཙནཉྩ སམཏྠིཏཾ ཧོཏི. ཝུཏྟཉྷི ‘‘ཨསཉྙསཏྟཱནཾ ཨནིདསྶནསཔྤཊིགྷཾ ཨེཀཾ མཧཱབྷཱུཏཾ པཊིཙྩ དྭེ མཧཱབྷཱུཏཱ’’ཏིཨཱདི (པཊྛཱ. ༢.༢༢.༢༠).

པཊིགྷོ ཙ ནཱམ བྷཱུཏཏྟཡསྶ ཀཱཡཔྤསཱདཾ པཏི ཏནྣིསྶཡབྷཱུཏགྷཊྚནཱདྭཱརེན ཨབྷིམུཁབྷཱཝོ, ཨིདྷ པན ཏཾསབྷཱཝཏཱ. སོ ཙ ཕུསིཏུཾ ཨསཀྐུཎེཡྻསབྷཱཝསྶ གྷཊྚནཱཡ ཨབྷཱཝཏོ ནཏྠི. ཡདི ཏཏྠ ཨསཏིཔི ཝིསཡིནི རཱུཔཱཡཏནཾ གཧེཏྭཱ ‘‘དྭེ ཨཱཡཏནཱནཱི’’ཏི ཝུཏྟཾ, ཨཐ ཀསྨཱ ¶ གནྡྷཱཡཏནཱདཱིནི གཧེཏྭཱ ‘‘པཉྩཱཡཏནཱནཱི’’ཏི ན ཝུཏྟནྟི? ནཡདསྶནཝསེན དེསནཱ པཝཏྟཱཏི ཝུཏྟོཝཱཡམཏྠོ. ཨཐ ཝཱ ཏཏྠ རཱུཔཱཡཏནསྶེཝ ཝཙནཾ ཀདཱཙི ཨཉྙབྷཱུམིཀཱནཾ པསཱདསྶ ཝིསཡབྷཱཝཾ སནྡྷཱཡ, ན པན ཨིཏརེསཾ ཨབྷཱཝཏོ, ནཱཔི པརིཡཱཡེནཔི ཨཱཡཏནབྷཱཝཱབྷཱཝཏོ. ཨསཉྙཱིནཉྷི རཱུཔཱཡཏནཾ སམཱནཏལཝཱསཱིནཾ ཝེཧཔྥལཱནཾ, ཨུཔརིབྷཱུམིཀཱནཉྩ སུདྡྷཱཝཱསཱནཾ པསཱདསྶ ཝིསཡབྷཱཝཾ གཙྪཏི, ན པན གནྡྷརསཱཏི ཏེསཾཡེཝ ཏཏྠ ཨཝཙནཾ ཡུཏྟཾ. ཀཐཱཝཏྠུམྷི ཙ ནིཔྤརིཡཱཡེན གནྡྷཱཡཏནཱདཱིནཾ ཨཏྠིབྷཱཝཾ པཊིཛཱནནྟཾ སནྡྷཱཡ པཊིསེདྷོ ཀཏོ.

ཡདིཔི ¶ ཙེཏཾ ཝཙནཾ ཏཏྠ གནྡྷཱཡཏནཱདཱིནཾ ཨབྷཱཝཝིབྷཱཝནཾ ན ཧོཏི, ཨཏྠིབྷཱཝདཱིཔནམྤི པན ཨཉྙཝཙནཾ ནཏྠེཝཱཏི? ནཡིདམེཝཾ, ཨཊྛཀཐཱསུ ཏཏྠ ནེསཾ ཨཏྠིབྷཱཝསྶ ནིདྡྷཱརེཏྭཱ ཝུཏྟཏྟཱ. ཡཉྷི ཨཊྛཀཐཱཝཙནཾ པཱལི༹ཡཱ ན ཝིརུཛ྄ཛྷཏི, ཏཾ པཱལི༹ ཝིཡ པམཱཎབྷཱུཏཾ ཨགརཧིཏཱཡ ཨཱཙརིཡཔརམྤརཱཡ ཡཱཝཛྫཏནཱ ཨཱགཏཏྟཱ. ཏཏྠ སིཡཱ – ཡཾ པཱལི༹ཡཱ ན ཝིརུཛ྄ཛྷཏི ཨཊྛཀཐཱཝཙནཾ, ཏཾ པམཱཎཾ, ཨིདཾ པན ཝིརུཛ྄ཛྷཏཱིཏི? ནཡིདམེཝཾ, ཡཐཱ ན ཝིརུཛ྄ཛྷཏི, ཏཐཱ པཊིཔཱདིཏཏྟཱ. ཙཀྑཱདཱིནཾ ཨཱཡཏནཱནཾ, ཏནྣིསྶཡཱནཉྩ ཝིཉྙཱཎཱནཾ སཏྟསུཉྙཏཱསནྡསྶནཏྠཾ བྷགཝཏོ དྷཱཏུདེསནཱཏི ཨཱཡཏནབྷཱཝེན ཝུཏྟཱནཾཡེཝ དྷཱཏུབྷཱཝདཱིཔནཏོ དྷཱཏུབྷཱཝསྶཱཔི ཏེསཾ ཨཝཙནཾ ཡུཛྫཏི ཨེཝ. ཏསྨཱ ཡཐཱ པཱལི༹ཡཱ ཨཝིརོདྷོ ཧོཏི, ཏཐཱ ཙཀྑུདསཀཱདིཝསེན ཨིདྷ རཱུཔགཎནཱ ཀཏཱཏི ན ཨེཏྠ དྷམྨཏཱཝིལོམནཱསངྐཱཡ ཨོཀཱསོཏི ཝེདིཏབྦཾ.

ཨཉྙེསུ སཾསེདཛཨོཔཔཱཏིཀཡོནིཀེསཱུཏི རཱུཔཱིབྲཧྨེ པན ཋཔེཏྭཱ ཨཉྙེསུ ཨོཔཔཱཏིཀེསུ, སཾསེདཛེསུ ཙཱཏི ཨེཝམེཏྠ སམྦནྡྷོ ཝེདིཏབྦོ. ཨོཔཔཱཏིཀཝིསེསནཉྷེཏྠ ཨཉྙགྒཧཎཾ, ན སཾསེདཛཝིསེསནཾ ཨསམྦྷཝཏོ. སཏི ཧི སམྦྷཝེ, བྱབྷིཙཱརེ ཙ ཝིསེསནཝིསེསིཏབྦཏཱ ཧོཏི. ཀཱམཱཝཙརདེཝེསུ སབྦཀཱལཾ པཊིསནྡྷིཔཝཏྟཱིསུ ཡཐཱཝུཏྟཱཡ སནྟཏིཡཱ རཱུཔཱནཾ ལབྦྷནཏོ ཝུཏྟཾ ‘‘ཏཱནི ཙ ནིཙྩཾ དེཝེསཱུ’’ཏི. ན ཧི ཏེ ཀདཱཙིཔི ཝིཀལིནྡྲིཡཱ, ཨབྷཱཝཀཱ ཙ ཧོནྟཱིཏི. ཙཀྑུ ནེསཾ དསནྣཾ པཱུརཎོཏི ཀཏྭཱ ཙཀྑུདསཀོ ནཱམ, ཨསཱདྷཱརཎེན ཝཱ ཙཀྑུནཱ ལཀྑིཏོ དསཀོ ཙཀྑུདསཀོ. ཨེཝཾ སེསཱཏི ཡཐཱ ཙཀྑུདསཀོ ཝུཏྟོ, ཨེཝཾ སེསཱཔི དསཀཱ ཡོཛེཏྭཱ ཝེདིཏབྦཱ. ‘‘སཾསེདཛཱུཔཔཱཏཡོནཱིསུ ¶ , ཨཝཀཾསཏོ ཏིཾསཱ’’ཏི སངྑེཔེན ཝུཏྟམཏྠཾ ཝིཝརནྟོ ‘‘ཨཝཀཾསཏོ པནཱ’’ཏིཨཱདིམཱཧ, ཏཾ པནེཏཾ པཱལི༹ཡཱ ན སམེཏི. ན ཧི པཱལི༹ཡཾ ཀཱམཱཝཙརཱནཾ སཾསེདཛོཔཔཱཏིཀཱནཾ ཨགྷཱནཀཱནཾ ཨུཔཔཏྟི ཝུཏྟཱ. དྷམྨཧདཡཝིབྷངྒེ ཧི ‘‘ཀཱམདྷཱཏུཡཱ ཨུཔཔཏྟིཀྑཎེ ཀསྶཙི ཨེཀཱདསཱཡཏནཱནི པཱཏུབྷཝནྟི, ཀསྶཙི དསཱཡཏནཱནི, ཀསྶཙི ཨཔརཱནི དསཱཡཏནཱནི, ཀསྶཙི ནཝཱཡཏནཱནི, ཀསྶཙི སཏྟཱཡཏནཱནི པཱཏུབྷཝནྟཱི’’ཏི ཝུཏྟཾ, ན ཝུཏྟཾ ‘‘ཨཊྛཱཡཏནཱནི པཱཏུབྷཝནྟཱི’’ཏི (ཝིབྷ. ༡༠༠༧). ཡདི ཧི ཨགྷཱནཀསྶཱཔི ཨུཔཔཏྟི སིཡཱ, ཏིཀྑཏྟུཾ ‘‘དསཱཡཏནཱནི པཱཏུབྷཝནྟཱི’’ཏི ཝཏྟབྦཾ སིཡཱ, ཏིཀྑཏྟུཉྩ ‘‘ནཝཱཡཏནཱནི པཱཏུབྷཝནྟཱི’’ཏི, ན ཙ ཏཾ ཝུཏྟཾ.

ཏཏྠ ཨུཔཔཏྟིཀྑཎེཏི པཊིསནྡྷིཀྑཎེ. ཨེཀཱདསཱཏི པརིཔུཎྞཱཡཏནསྶ སདྡཱཡཏནཝཛྫཱནི ཨེཀཱདས ཨཱཡཏནཱནི. ཀསྶཙི དསཱཡཏནཱནཱིཏི ཨནྡྷསྶ ཙཀྑཱཡཏནཝཛྫཱནི. ཨཔརཱནི དསཱཡཏནཱནཱིཏི ¶ བདྷིརསྶ སོཏཱཡཏནཝཛྫཱནི. ནཝཱཡཏནཱནཱིཏི ཨནྡྷབདྷིརསྶ ཙཀྑུསོཏཱཡཏནཝཛྫཱནི. སཏྟཱཡཏནཱནཱིཏི གབྦྷསེཡྻཀསྶ རཱུཔགནྡྷརསཀཱཡཕོཊྛབྦམནོདྷམྨཱཡཏནཝསེན ཝུཏྟཾ. ཡདི ཙཀྑུསོཏགྷཱནཝིཀལོཔི ཨུཔྤཛྫེཡྻ, ཏསྶ ཨཊྛེཝཱཡཏནཱནི སིཡུཾ, ན ཙ ཝུཏྟཾ ‘‘ཨཊྛཱཡཏནཱནི པཱཏུབྷཝནྟཱི’’ཏི. ཏསྨཱ ནཏྠེཝ ཙཀྑུསོཏགྷཱནཝིཀལོ. སཏི ཙ ཨགྷཱནཀཱུཔཔཏྟིཡཾ པུནཔི ‘‘ཀསྶཙི ཨཔརཱནིཔི དསཱཡཏནཱནི པཱཏུབྷཝནྟཱི’’ཏི ཝཏྟབྦཾ སིཡཱ. ཏཐཱ ཙ སཏི ཡཐཱ ཨནྡྷབདྷིརསྶ ཝསེན ‘‘ཀསྶཙི ནཝཱཡཏནཱནི པཱཏུབྷཝནྟཱི’’ཏི ཨེཀཝཱརཾ ཝུཏྟཾ, ཨེཝཾ ཨནྡྷཱགྷཱནཀསྶ, བདྷིརཱགྷཱནཀསྶ ཙ ཝསེན ‘‘ཀསྶཙི ཨཔརཱནི ནཝཱཡཏནཱནི, ཀསྶཙི ཨཔརཱནིཔི ནཝཱཡཏནཱནི པཱཏུབྷཝནྟཱི’’ཏི ཝཏྟབྦཾ སིཡཱཏི ཨཏྠོ. ཨེཝཾ དྷཱཏུཔཱཏུབྷཱཝཱདིཔཉྷཱནིཔི ཝཏྟབྦཱནཱིཏི ཝདནྟི. ཨེཏྠ ཙ ཡཐཱ ‘‘སཏྟཏི ཨུཀྐཾསཏོཐ རཱུཔཱནཱི’’ཏི པདཾ ‘‘སཾསེདཛཱུཔཔཱཏཡོནཱིསཱུ’’ཏི ཨེཏྠ ཡོནིདྭཡཝསེན ཡོཛཱིཡཏི, ན ཨེཝཾ ‘‘ཨཝཀཾསཏོ ཏིཾསཱ’’ཏི ཨིདཾ. ཨིདཾ པན སཾསེདཛཡོནིཝསེནེཝ ཡོཛེཏབྦཾ. ཨེཀཡོགནིདྡིཊྛསྶཱཔི ཨེཀདེསོ སམྦནྡྷཾ ལབྷཏཱིཏི སཾསེདཛསྶ ཛཙྩནྡྷབདྷིརཨགྷཱནཀནཔུཾསཀསྶ ཛིཝ྄ཧཱཀཱཡཝཏྠུདསཀཱནཾ ཝསེན ཏིཾས རཱུཔཱནི ཨུཔྤཛྫནྟཱིཏི ཝུཏྟཾ, ན ཨོཔཔཱཏིཀསྶཱཏི ཨཡམེཏྠ ཨཊྛཀཐཱཡམདྷིཔྤཱཡོ.

ཡེ ¶ པན ‘‘ཨོཔཔཱཏིཀསྶ ཛཙྩནྡྷབདྷིརཨགྷཱནཀནཔུཾསཀསྶ ཛིཝ྄ཧཱཀཱཡཝཏྠུདསཀཱནཾ ཝསེན ཏིཾས རཱུཔཱནི ཨུཔྤཛྫནྟཱིཏི མཧཱཨཊྛཀཐཱཡཾ ཝུཏྟ’’ནྟི ཝདནྟི, ཏཾ ན གཧེཏབྦཾ. སོ ཧི པམཱདཔཱཋོ. ཨེཝཉྩ ཀཏྭཱ ཨཱཡཏནཡམཀཝཎྞནཱཡཾ ‘‘ཀཱམདྷཱཏུཡཾ པན ཨགྷཱནཀོ ཨོཔཔཱཏིཀོ ནཏྠི. ཡདི བྷཝེཡྻ, ‘ཀསྶཙི ཨཊྛཱཡཏནཱནི པཱཏུབྷཝནྟཱི’ཏི ཝདེཡྻཱ’’ཏི (ཡམ. ཨཊྛ. ཨཱཡཏནཡམཀ ༡༨-༢༡) ཝུཏྟཾ. ཨཔརེ པནཱཧུ ‘‘ཀསྶཙི ཨེཀཱདསཱཡཏནཱནི པཱཏུབྷཝནྟཱིཏི ཡཱཝ ‘ཀསྶཙི ནཝཱཡཏནཱནཱི’ཏི པཱལི༹ ཨོཔཔཱཏིཀེ སནྡྷཱཡ ཝུཏྟཱ. ཏསྨཱ པུབྦེནཱཔརཾ ཨཊྛཀཐཱཡཾ ཨཝིརོདྷོ སིདྡྷོ. ཏཐཱ ཙ ཡཐཱཝུཏྟཔཱལི༹ཡཱ ཨཡམཏྠཝཎྞནཱ ཨཉྙདཏྠུ སཾསནྡཏི སམེཏིཡེཝཱ’’ཏི. ཡཾ པནེཀེ ཝདནྟི ‘‘ཨོཔཔཱཏིཀགྒཧཎེན སཾསེདཛཱཔི སངྒཡ྄ཧནྟི. ཏཐཱ ཧི དྷམྨཧདཡཝིབྷངྒེ ‘ཀཱམདྷཱཏུཡཱ ཨུཔཔཏྟིཀྑཎེ ཀསྶཙི ཨེཀཱདསཱཡཏནཱནི པཱཏུབྷཝནྟཱི’ཏིཨཱདཱིནཾ (ཝིབྷ. ༡༠༠༧) ནིདྡེསེ ‘ཨོཔཔཱཏིཀཱནཾ པེཏཱན’ནྟིཨཱདིནཱ (ཝིབྷ. ༡༠༠༩) ཨོཔཔཱཏིཀགྒཧཎམེཝ ཀཏཾ, ན སཾསེདཛགྒཧཎ’’ནྟི, ཏཾ པརིཔུཎྞཱཡཏནཱནཾཡེཝ སཾསེདཛཱནཾ ཨོཔཔཱཏིཀེསུ སངྒཧཎཝསེན ཝུཏྟནྟི ཝེདིཏབྦཾ. ཏཐཱ ཧི ཝུཏྟཾ ཨཊྛཀཐཱཡཾ ‘‘སཾསེདཛཡོནིཀཱ པརིཔུཎྞཱཡཏནཱཔརིཔུཎྞཱཡཏནབྷཱཝེན ཨོཔཔཱཏིཀསངྒཧཾ ཀཏྭཱ ཝུཏྟཱ’’ཏི, པདྷཱནཱཡ ¶ ཝཱ ཡོནིཡཱ སབྦཾ པརིཔུཎྞཱཡཏནཡོནིཾ དསྶེཏུཾ ‘‘ཨོཔཔཱཏིཀཱནནྟི ཝུཏྟ’’ནྟི ཙ, ཨིདྷ པན ཡོནིདྭཡཾ སརཱུཔེནེཝ པཀཱསེཏུཾ, སཾསེདཛཡོནིཝསེནེཝ ཙ ཨཝཀཾསཏོ རཱུཔཔཝཏྟིཾ དསྶེཏུཾ ཨོཔཔཱཏིཀཡོནིཡཱ ཨིཏརཾ ཨསངྒཧེཏྭཱ ‘‘སཾསེདཛཱུཔཔཱཏཡོནཱིསཱུ’’ཏི ཝུཏྟཾ. ཏཾ སབྦཾ ཝཱིམཾསིཏྭཱ གཧེཏབྦཾ.

ཨུཀྐཾསཱཝཀཾསཱནཾ པན ཨནྟརེཏི ‘‘སཏྟཏི, ཏིཾསཱ’’ཏི ཨེཝཾ ཝུཏྟཱནཾ རཱུཔསྶ ཨུཀྐཾསཱཝཀཾསཔརིཙྪེདཱནཾ མཛ྄ཛྷེ. ཨནུརཱུཔཏོ ཝིཀཔྤོ ཝེདིཏབྦོཏི ཨཔཱཡེསུ ཨནྡྷསྶ ཚ ཙཀྑུདསཀཱབྷཱཝཏོ, ཏཐཱ བདྷིརསྶ སོཏདསཀཱབྷཱཝཏོ, ཨནྡྷབདྷིརསྶ པན པཉྩ ཙཀྑུསོཏདསཀཱབྷཱཝཏོཏི ཨེཝམཱདིནཱ ནཡེན ཝེདིཏབྦོ. ཡཾ པནེཏྠ ཝཏྟབྦཾ, ཏཾ ཝུཏྟམེཝཱཏི.

༦༣༡. ཙུཏིཔཊིསནྡྷཱིནཾ ཁནྡྷཱདཱིཧི ཨཉྙམཉྙསམཱནཏཱ ཨབྷེདོ. ཨསམཱནཏཱ བྷེདོ.

ཨཱརམྨཎཏོཔི ¶ ཨབྷིནྣཱཏི ཙཏཱུསུ ཨཱརུཔྤེསུ ཏཏོ ཏཏོ ཙཝིཏྭཱ ཏཏྠ ཏཏྠེཝ ཨུཔཔཛྫནྟསྶ ཝསེན ཝུཏྟཾ. ཏཐེཝ པན ཧེཊྛཱ, རཱུཔབྷཝེ ཝཱ ཨུཔཔཏྟི ནཏྠི. ཨརཱུཔབྷཱུམིཏོ ཙཝིཏྭཱ ཧེཊྛཱ ཨུཔཔཏྟི ནཱམ ཀཱམབྷཝེ ཨེཝ, ཏཏྠཱཔི ཏིཧེཏུཀཔཊིསནྡྷི ཨེཝ. རཱུཔབྷཝཏོ པན ཙུཏོ དུཧེཏུཀོཔི ཧོཏཱིཏི ཝདནྟི. ཨམཧགྒཏབཧིདྡྷཱརམྨཎཱཡ ཙུཏིཡཱ ཨནནྟརཱ མཧགྒཏཨཛ྄ཛྷཏྟཱརམྨཎཱ དུཏིཡཙཏུཏྠཱརུཔྤཔཊིསནྡྷི. ཨེཝཾ ནཡམཏྟསྶ དསྶིཏཏྟཱ ཝུཏྟཾ, ཨཝུཏྟཉྩ སབྦཾ སངྒཧེཏྭཱ ཨཱཧ ‘‘ཨཡཾ ཏཱཝ ཨརཱུཔབྷཱུམཱིསུཡེཝ ནཡོ’’ཏི. རཱུཔཱརཱུཔཱཝཙརཱནཾ ཨུཔཙཱརསྶ བལཝཏཱཡ ཏཏོ ཙཝིཏྭཱ དུགྒཏིཡཾ ཨུཔཔཏྟི ནཏྠཱིཏི ‘‘ཨེཀཙྩསུགཏིཙུཏིཡཱ’’ཏི ཨཱཧ. ཨེཀཙྩདུགྒཏིཔཊིསནྡྷཱིཏི ཨེཏྠ ཨེཀཙྩགྒཧཎསྶ པཡོཛནཾ མགྒིཏབྦཾ. ཨཡཾ པནེཏྠ ཨདྷིཔྤཱཡོ སིཡཱ – ནཱནཏྟཀཱཡནཱནཏྟསཉྙཱིསུ ཝུཏྟཱ ཨེཀཙྩེ ཙ ཝིནིཔཱཏིཀཱ ཏིཧེཏུཀཱདིཔཊིསནྡྷིཀཱ, ཏེསཾ པཊིསནྡྷིཾ ཝིནིཔཱཏིཀབྷཱཝེན ‘‘དུགྒཏིཔཊིསནྡྷཱི’’ཏི གཧེཏྭཱ སབྦསུགཏིཙུཏིཡཱ ཙ སཱ པཊིསནྡྷི ཧོཏི, ན ཨེཀཙྩསུགཏིཙུཏིཡཱ ཨེཝཱཏི ཏནྣིཝཏྟནཏྠཾ ཨེཀཙྩདུགྒཏིགྒཧཎཾ ཀཏཾ. ཨཔཱཡཔཊིསནྡྷི ཨེཝ ཧི ཨེཀཙྩསུགཏིཙུཏིཡཱ ཧོཏི, ན སབྦསུགཏིཙུཏིཡཱཏི. ཨཐ ཝཱ དུགྒཏིཔཊིསནྡྷི དུཝིདྷཱ ཨེཀཙྩསུགཏིཙུཏིཡཱ ཨནནྟརཱ, དུགྒཏིཙུཏིཡཱ ཙཱཏི. ཏཏྠ པཙྪིམཾ ཝཛྫེཏྭཱ པུརིམཾཡེཝ གཧེཏུཾ ཝུཏྟཾ ‘‘ཨེཀཙྩདུགྒཏིཔཊིསནྡྷཱི’’ཏི. ཨཧེཏུཀཙུཏིཡཱ སཧེཏུཀཔཊིསནྡྷཱིཏི དུཧེཏུཀཱ ཙ ཏིཧེཏུཀཱ ཙ ཡོཛེཏབྦཱ. མཎྜཱུཀདེཝཔུཏྟཱདཱིནཾ ཝིཡ ཧི ཨཧེཏུཀཙུཏིཡཱ ཏིཧེཏུཀཔཊིསནྡྷིཔི ཧོཏཱིཏི.

ཏསྶ ¶ ཏསྶ ཝིཔརཱིཏཏོ ཙ ཡཐཱཡོགཾ ཡོཛེཏབྦནྟི ‘‘ཨེཀཙྩསུགཏིཙུཏིཡཱ ཨེཀཙྩདུགྒཏིཔཊིསནྡྷཱི’’ཏིཨཱདཱིསུ བྷེདཝིསེསེསུ ‘‘ཨེཀཙྩདུགྒཏིཙུཏིཡཱ ཨེཀཙྩདུགྒཏིཔཊིསནྡྷཱི’’ཏིཨཱདིནཱ ཡཾ ཡཾ ཡུཛྫཏི, ཏཾ ཏཾ ཡོཛེཏབྦནྟི ཨཏྠོ. ཡུཛྫམཱནམཏྟཱཔེཀྑནཝསེན ནཔུཾསཀནིདྡེསོ ཀཏོ. ཡོཛེཏབྦནྟི ཝཱ བྷཱཝཏྠཏཱ དཊྛབྦཱ. ‘‘ཨམཧགྒཏབཧིདྡྷཱརམྨཎཱཡ མཧགྒཏཨཛ྄ཛྷཏྟཱརམྨཎཱ’’ཏིཨཱདཱིསུ པན ཝིཔརཱིཏཡོཛནཱ ན ཀཱཏབྦཱ. ན ཧི མཧགྒཏཨཛ྄ཛྷཏྟཱརམྨཎཱཡ ཙུཏིཡཱ ཨརཱུཔབྷཱུམཱིསུ ཨམཧགྒཏབཧིདྡྷཱརམྨཎཱ པཊིསནྡྷི ཨཏྠི. ‘‘ཙཏུཀྑནྡྷཱཡ ཨཱརུཔྤཙུཏིཡཱ ཨནནྟརཱ པཉྩཀྑནྡྷཱ ཀཱམཱཝཙརཔཊིསནྡྷཱི’’ཏི ཨེཏསྶ ཝིཔརིཡཱཡོ སཡམེཝ ཡོཛིཏོ. ‘‘ཨཏཱིཏཱརམྨཎཱཡ ཙུཏིཡཱ པཙྩུཔྤནྣཱརམྨཎཱ པཊིསནྡྷཱི’’ཏི ¶ ཨེཏསྶ ཙ ཝིཔརིཡཱཡོ ནཏྠི ཨེཝ. བྷེདཝིསེསོ ཨེཝ ཙ ཨེཝཾ ཝིཏྠཱརེན དསྶིཏོ, ཨབྷེདཝིསེསོ པན ཨེཀེཀསྨིཾ བྷེདེ ཏཏྠ ཏཏྠེཝ ཙུཏིཔཊིསནྡྷིཡོཛནཱཝསེན ཝེདིཏབྦོ ‘‘པཉྩཀྑནྡྷཱཡ ཀཱམཱཝཙརཙུཏིཡཱ པཉྩཀྑནྡྷཱ ཀཱམཱཝཙརཱ…པེ… ཨཝིཏཀྐཨཝིཙཱརཱཡ ཨཝིཏཀྐཱཝིཙཱརཱ’’ཏི. ཙཏུཀྑནྡྷཱཡ པན ཙཏུཀྑནྡྷཱ སཡམེཝ ཡོཛིཏཱ. ཨེཏེནེཝ ནཡེན སཀྐཱ ཝིཉྙཱཏུནྟི པཉྩཀྑནྡྷཱདཱིསུ ཨབྷེདཝིསེསོ ན དསྶིཏོཏི.

༦༣༢. ཨིཏཱིཏི ཨེཝཾ ཝུཏྟཔྤཀཱརེན. ཨེཏཾ ཝིཉྙཱཎཾ ཨཝིཛྫཱདིསཧཀཱརིཀཱརཎསཧིཏསྶ སངྑཱརསྶ ཝསེན ལདྡྷཔྤཙྩཡཾ. བཱཧིརཀཀཔྤིཏསྶ ཨདྷིཔཏིཊྛནཀསྶ ཨབྷཱཝཏོ རཱུཔཱརཱུཔདྷམྨམཏྟཾ. ཏེནཱཧ ‘‘ན སཏྟོ ན ཛཱིཝོ’’ཏི. ཨུཔེཏཱིཏི ཝུཙྩཏི ཏཐཱཝོཧཱརམཏྟཾ, ཨཏྠཏོ པན པཙྩཡསཱམགྒིཡཱ བྷཝནྟརབྷཱཝེན ཨུཔྤཛྫནམཏྟནྟི ཨདྷིཔྤཱཡོ. ཏེནཱཧ ‘‘ཏསྶ ཙཱ’’ཏིཨཱདི. ཏཏོ ཧེཏུཾ ཝིནཱཏི ཏཏྠ ཧེཏུཾ ཝིནཱ. མནུསྶཙུཏིཔཊིསནྡྷིཀྐམེནཱཏི མནུསྶཙུཏིཏོ མནུསྶཔཊིསནྡྷིཀྐམེན. ཨེཝཉྷི པཱཀཊགྒཧཎཾ ཨུབྷཡཝིསེསནཾ ཧོཏི. པཱཀཊཏཱ ཙེཏྠ ཏདཱསནྣཀྑནྡྷཝསེན ཝེདིཏབྦཱ ‘‘ཙཝམཱནེ ཨུཔཔཛྫམཱནེ’’ཏིཨཱདཱིསུ (དཱི. ནི. ༡.༢༤༧) ཝིཡ. མནུསྶཙུཏིཔཊིསནྡྷིཀྐམེནཱཏི ཝཱ མནུསྶཙུཏིཏོ ཡསྶ ཀསྶཙི པཊིསནྡྷིཀྐམེན. ཏཐཱ ཧི ཝཀྑཏི ‘‘ནིསྶཡཾ ཨསྶཱདཡམཱནཾ ཝཱ ཨནཱསྶཱདཡམཱནཾ ཝཱ’’ཏི (ཝིསུདྡྷི. ༢.༦༣༢).

སརསེནཱཏི སབྷཱཝེན, པརིཀྑཱིཎཱཡུསངྑཱརཏཱཡཱཏི ཨཏྠོ. ཨུཔཀྐམེནཱཏི ཨཏྟནཱ, པརེན ཝཱ ཀཏེན སཱིསཙྪེདནཱདིཨུཔཀྐམེན. སབྦེསཾ ཨངྒཔཙྩངྒསནྡྷཱིནཾ བནྡྷནཱནི སབྦངྒཔཙྩངྒསནྡྷིབནྡྷནཱནི, ཏེསཾ ཚེདཀཱནཾ. སནྣིཔཱཏནྟི པཏནཾ པཝཏྟི. ཧདཡཔྤདེསོཔི ཨནུཀྐམེན ¶ སུསྶིཏྭཱ ཨཔྤཱཝསེསོ ཧོཏི, པགེཝ ཀཱཡོཏི ཨཱཧ ‘‘ཀམེན ཨུཔསུསྶམཱནེ སརཱིརེ’’ཏི. ཏེནེཝཱཧ ‘‘ཏངྑཎཱཝསེསཧདཡཝཏྠུསནྣིསྶིཏ’’ནྟི. ‘‘ནིརུདྡྷེསུ ཙཀྑཱདཱིསཱུ’’ཏི ཨིདཾ གབྦྷསེཡྻཀཱནཾ ཨཱཡཏནཱནཾ ཨནུཔུབྦུཔྤཏྟི ཝིཡ ནིརོདྷོཔི ཨནུཔུབྦཏོ ཧོཏཱིཏི ཨདྷིཔྤཱཡེན ཝུཏྟཾ, ཨཏིམནྡབྷཱཝཱུཔགམནཏཾ ཝཱ སནྡྷཱཡ ‘‘ནིརུདྡྷེསཱུ’’ཏི ཝུཏྟཾ, ན ཨནཝསེསནིརོདྷཾ. པཉྩདྭཱརིཀཝིཉྙཱཎཱནནྟརམྤི ཧི པུབྦེ ཙུཏི དསྶིཏཱ. ཡམཀེ ཙ ‘‘ཡསྶ ཙཀྑཱཡཏནཾ ནིརུཛ྄ཛྷཏི, ཏསྶ མནཱཡཏནཾ ནིརུཛ྄ཛྷཏཱིཏི? ཨཱམནྟཱ. ཡསྶ ¶ ཝཱ པན མནཱཡཏནཾ ནིརུཛ྄ཛྷཏི, ཏསྶ ཙཀྑཱཡཏནཾ ནིརུཛ྄ཛྷཏཱིཏི? སཙིཏྟཀཱནཾ ཨཙཀྑུཀཱནཾ ཙཝནྟཱནཾ ཏེསཾ མནཱཡཏནཾ ནིརུཛ྄ཛྷཏི, ནོ ཙ ཏེསཾ ཙཀྑཱཡཏནཾ ནིརུཛ྄ཛྷཏི. སཙཀྑུཀཱནཾ ཙཝནྟཱནཾ ཏེསཾ མནཱཡཏནཉྩ ནིརུཛ྄ཛྷཏི, ཙཀྑཱཡཏནཉྩ ནིརུཛ྄ཛྷཏཱི’’ཏིཨཱདིནཱ (ཡམ. ༡.ཨཱཡཏནཡམཀ.༡༢༠) ཙཀྑཱཡཏནཱདཱིནཾ ཙུཏིཙིཏྟེན སཧ ནིརོདྷོ ཝུཏྟོཏི.

ཧདཡཝཏྠུམཏྟེཏི ཧདཡཝཏྠུཔདེསམཏྟེ. ན ཧི ཧདཡཝཏྠུཾ ནིསྶཱཡ ཀཱཡིནྡྲིཡཾ པཝཏྟཏི. ཧདཡཝཏྠུཔི ཏདཱ ཨཱཏཔེ པཀྑིཏྟཧརིཏཏཱལཔཎྞཾ ཝིཡ ཨཔྤཱཝསེསཾ ཧོཏཱིཏི ‘‘ཏངྑཎཱཝསེསཧདཡཝཏྠུསནྣིསྶིཏ’’ནྟི ཝུཏྟནྟི ཝདནྟི. ཨིཏརཝཏྠཱུནཾ པན སཀིཙྩཱསམཏྠཏཱཡ ཀེཝལཾ ཧདཡཝཏྠུསནྣིསྶིཏམེཝ, ཏདཱ ཝིཉྙཱཎཾ ཧོཏཱིཏི ཝུཏྟཾ ‘‘ཏངྑཎཱཝསེསཧདཡཝཏྠུསནྣིསྶིཏ’’ནྟི. མཱཏུགྷཱཏཱདི, མཧགྒཏམཉྙཾ ཝཱ ཏཱདིསཾ གརུཀཾ ནཱམ. སམཱསེཝིཏཾ ཨབྷིཎྷསོ ཀཏཾ. ཨཱསནྣཾ མརཎཀཱལེ ཀཏཾ, ཡདཱ ཏདཱ ཝཱ ཀཏམྤི པརིབྱཏྟཾ ཧུཏྭཱ ཨནུསྶརིཏཾ. པུབྦཀཏཾ ཨཔརཱཔརིཡཱཡཝེདནཱིཡཾ. ལདྡྷོ ཨཝསེསོ ཨཝིཛྫཱདིཀོ ཝིཉྙཱཎསྶ པཙྩཡོ ཨེཏེནཱཏི ལདྡྷཱཝསེསཔཙྩཡོ, སངྑཱརོ. ཨེཏེན ཝིཔཙྩིཏུཾ ཀཏོཀཱསཾ ཡཐཱུཔཙིཏཾ ཀུསལཱཀུསལཙེཏནམཱཧ. ཀམྨནིམིཏྟཾ ནཱམ ཡཾ ཝཏྠུཾ ཨཱརམྨཎཾ ཀཏྭཱ ཨཱཡཱུཧནཀཱལེ ཀམྨཾ ཨཱཡཱུཧཏི, ཏཾ. ཨཏཱིཏེ ཀཔྤཀོཊིསཏསཧསྶམཏྠཀེཔི ཧི ཀམྨེ ཀཏེ ཝིཔཙྩནཀཱལེ ཨཱགནྟྭཱ ཀམྨཾ ཝཱ ཀམྨནིམིཏྟཾ ཝཱ ཨུཔཏིཊྛཏི. གཏིནིམིཏྟཾ ནཱམ ནིབྦཏྟནཀཨོཀཱསེ ཨེཀོ ཝཎྞོ. སོ ཙ ནིརཡེ ནིབྦཏྟནཱརཧསྶ ‘‘ཨགྒིཛཱལཝཎྞཱདིཀོ’’ཏིཨཱདིནཱ ཧེཊྛཱ ཝུཏྟོཡེཝ. ཨཝིཛྫཱཔཊིཙྪཱདིཏཱདཱིནཝེ ཏསྨིཾ ཀམྨཱདིཝིསཡེ པཊིསནྡྷིཝིཉྙཱཎསྶ ཨཱརམྨཎབྷཱཝེན ཨུཔྤཏྟིཊྛཱནབྷཱུཏེ.

ཏཎྷཱཡ ཨཔྤཧཱིནཏྟཱ ཨེཝ, པུརིམུཔྤནྣཱཡ ཙ སནྟཏིཡཱ ཏཐཱཔརིཎཏཏྟཱ པཊིསནྡྷིཊྛཱནཱབྷིམུཁཾ ཝིཉྙཱཎཾ ནིནྣཔོཎཔབྦྷཱརཾ ཧུཏྭཱ པཝཏྟཏཱིཏི ཨཱཧ ‘‘ཏཎྷཱ ནཱམེཏཱི’’ཏི. སཧཛཱཏསངྑཱརཱཏི ¶ ཙུཏིཨཱསནྣཛཝནཝིཉྙཱཎསཧཛཱཏཱ ཙེཏནཱ, སབྦེཔི ཝཱ ཕསྶཱདཡོ. ཏསྨིཾ པཊིསནྡྷིཊྛཱནེ ཀམྨཱདིཝིསཡེ ཝིཉྙཱཎཾ ཁིཔནྟི. ཁིཔནྟཱ ཝིཡ ཏསྨིཾ ཝིསཡེ པཊིསནྡྷིཝསེན ཝིཉྙཱཎཔཏིཊྛཱནསྶ ཧེཏུབྷཱཝེན པཝཏྟནྟཱིཏི ཨཏྠོ. ཏནྟི ཏཾ ཝིཉྙཱཎཾ. ཙུཏིཔཊིསནྡྷིཏདཱསནྣཝིཉྙཱཎཱནཾ སནྟཏིཝསེན ཝིཉྙཱཎནྟི ཨུཔནཱིཏེཀཏྟཾ ¶ . ཏཎྷཱཡ ནཱམིཡམཱནཾ…པེ… པཝཏྟཏཱིཏི ནམནཁིཔནཔུརིམནིསྶཡཛཧནཨཔརནིསྶཡསྶཱདནནིསྶཡརཧིཏཔཝཏྟནཱནི སནྟཏིཝསེན ཏསྶེཝེཀསྶ ཝིཉྙཱཎསྶ ཧོནྟི, ན ཨཉྙསྶཱཏི དསྶེཏི. སནྟཏིཝསེནཱཏི ཙ ཝདནྟོ ‘‘ཏདེཝིདཾ ཝིཉྙཱཎཾ སནྡྷཱཝཏི སཾསརཏི ཨནཉྙ’’ནྟི (མ. ནི. ༡.༣༩༦) ཨིམཉྩ མིཙྪཱགཱཧཾ པཊིཀྑིཔཏི. སཏི ཧི ནཱནཏྟནཡེ སནྟཏིཝསེན ཨེཀཏྟནཡོ ཧོཏཱིཏི. ཨེཏྠ ཙ ཨོརིམཏཱིརརུཀྑཝིནིབདྡྷརཛྫུ ཝིཡ པུརིམབྷཝཏྟབྷཱཝཝིནིབདྡྷཾ ཀམྨཱདིཨཱརམྨཎཾ དཊྛབྦཾ, པུརིསོ ཝིཡ ཝིཉྙཱཎཾ, ཏསྶ མཱཏིཀཱཏིཀྐམནིཙྪཱ ཝིཡ ཏཎྷཱ, ཨཏིཀྐམནཔཡོགོ ཝིཡ ཁིཔནཀསངྑཱརཱ, ཡཐཱ ཙ སོ པུརིསོ པརཏཱིརེ པཏིཊྛཧམཱནོ པརཏཱིརརུཀྑཝིནིབདྡྷཾ ཀིཉྩི ཨསྶཱདཡམཱནོ ཝཱ ཨནསྶཱདཡམཱནོ ཝཱ ཀེཝལཾ པཐཝིཡཾ སཀབལཔཡོགེཧེཝ པཏིཊྛཱཏི, ཨེཝམིདམྤི བྷཝནྟརཏྟབྷཱཝཝིནིབདྡྷཾ ཧདཡཝཏྠུསངྑཱཏཾ ནིསྶཡཾ པཉྩཝོཀཱརབྷཝེ ཨསྶཱདཡམཱནཾ, ཙཏུཝོཀཱརབྷཝེ ཨནསྶཱདཡམཱནཾ ཝཱ ཀེཝལཾ ཨཱརམྨཎསམྤཡུཏྟཀམྨེཧེཝ པཝཏྟཏི. ཏཏྠ ཨསྶཱདཡམཱནནྟི པཱཔུཎནྟཾ, པཊིལབྷམཱནནྟི ཨཏྠོ.

བྷཝནྟརཱདིཔཊིསནྡྷཱནཏོཏི བྷཝནྟརསྶ ཨཉྙབྷཝསྶ ཨཱདིཔཊིསནྡྷཱནབྷཱཝཏོ. བྷཝནྟརཱདཡོ ཝཱ བྷཝཡོནིགཏིཝིཉྙཱཎཊྛིཏིསཏྟཱཝཱསནྟརཱནི, ཏེསཾ པཊིསནྡྷཱནཏོཏི ཨཏྠོ. ཏདེཏཾ ཝིཉྙཱཎཾ ནཱཔི ཨིདྷཱགཏཾ ཨིམསྨིཾཡེཝ བྷཝེ ཨུཔྤནྣཏྟཱ. ཀམྨནྟི པཊིསནྡྷིཛནཀཾ ཀམྨཾ. སངྑཱརཱཏི ཙུཏིཨཱསནྣཛཝནཝིཉྙཱཎསཧགཏཱ ཁིཔནཀསངྑཱརཱ. ནཏཱིཏི ནམནཝསེན པཝཏྟཏཎྷཱ. ཝིསཡོ ཀམྨཱདི.

༦༣༣. སདྡཔཊིགྷོསཱདཱིནཾ སཏིཔི པཙྩཡཔཙྩཡུཔྤནྣབྷཱཝེ སནྟཱནབནྡྷོ ན པཱཀཊོཏི ཏེསཾ ཨེཀཏྟནཱནཏྟབྷཱཝཾ ཨནཱམསིཏྭཱ ཨནཱགམནཱཏཱིཏཧེཏུསམུཔྤཱདམེཝ དསྶེནྟོ ‘‘ཨེཏྠ ཙཱ’’ཏིཨཱདིམཱཧ. སདྡཱདིཧེཏུཀཱཏི ཨེཏྠ པཊིགྷོསོ སདྡཧེཏུཀོ. པདཱིཔོ པདཱིཔནྟརཱདིཧེཏུཀོ. མུདྡཱ ལཉྪནཧེཏུཀཱ. ཚཱཡཱ ཨཱདཱསཱདིཨབྷིམུཁམུཁཱདིཧེཏུཀཱ. ཧོནྟི ཨཉྙཏྲ ཨགནྟྭཱཏི སདྡཱདིཔཙྩཡདེསཾ ཨནུཔགནྟྭཱ སདྡཱདིཧེཏུཀཱ ཧོནྟི ཏཏོ པུབྦེ ཨབྷཱཝཱ. ཨེཝཾ ཨིདམྤི པཊིསནྡྷིཝིཉྙཱཎཾ ན ཧེཏུདེསཾ གནྟྭཱ ཏཾཧེཏུཀཾ ཧོཏི ཏཏོ པུབྦེ ཨབྷཱཝཱ. ཏསྨཱ ན ཨིདཾ ཧེཏུདེསཏོ ¶ པུརིམབྷཝཏོ ཨིདྷཱགཏཾ པཊིགྷོསཱདཡོ ཝིཡ སདྡཱདིདེསཏོ, ནཱཔི ཏཏྠ ཧེཏུནཱ ཝིནཱ ཨུཔྤནྣཾ སདྡཱདཱིཧི ཝིནཱ ¶ པཊིགྷོསཱདཡོ ཝིཡཱཏི ཨཏྠོ. ཨཐ ཝཱ ཧོནྟི ཨཉྙཏྲ ཨགནྟྭཱཏི པུབྦེ པཙྩཡདེསེ སནྣིཧིཏཱ ཧུཏྭཱ ཏཏོ ཨཉྙཏྲ གནྟྭཱ ཏཔྤཙྩཡཱ ན ཧོནྟི ཨུཔྤཏྟིཏོ པུབྦེ ཨབྷཱཝཱ, ནཱཔི སདྡཱདིཔཙྩཡཱ ན ཧོནྟི, ཨེཝཾ ཨིདམྤཱིཏི ཝུཏྟནཡེནེཝ ཡོཛེཏབྦཾ.

ནཏྠི ཨེཀཏཱ ཨེཀསནྟཱནེཀཏྟེཔི ཨཉྙསྶེཝ ཝིཉྙཱཎསྶ པཱཏུབྷཝནཏོ. ནཱཔི ནཱནཏཱ སནྟཱནབནྡྷཏོ པདཱིཔོ ཝིཡ. ཁཎིཀཱཡ ཧི པདཱིཔཛཱལཱཡ སནྟཱནེཀཏྟཾ ཨུཔཱདཱཡ སོ ཨེཝཱཏི ཝུཙྩཏི, ཨཏྠཀིཙྩཉྩ སཱདྷེཏི, ཨེཝམིདྷཱཔི དཊྛབྦཾ. ‘‘ཡདི ཧཱི’’ཏིཨཱདིནཱ སནྟཱནབནྡྷེ ཨེཀནྟཾ ཨེཀཏཱཡ, ནཱནཏཱཡ ཙ ཨགྒཧེཏབྦཏཾ, གཧཎེ ཙ དོསཾ དསྶེཏི. ཨེས ནཡོཏི ཨཏིདེསེན བཱིཛངྐུརཱདཱིསུ སབྦཧེཏུཧེཏུསམུཔྤནྣེསུ ཡཐཱསམྦྷཝཾ ཡོཛནཱ ཀཱཏབྦཱཏི དསྶེཏི. ཨིདྷཱཔི ཧི ཧེཏུཧེཏུསམུཔྤནྣཝིཉྙཱཎཱནཾ ཨེཀནྟམེཀཏྟེ སཏི ན མནུསྶགཏིཏོ དེཝགཏི སམྦྷཱུཏཱ སིཡཱ. ཨེཀནྟནཱནཏྟེ ན ཀམྨཝཏོ ཕལཾ སིཡཱ, ཏཏོ ‘‘རཏྟསྶ བཱིཛཾ རཏྟསྶ ཕལ’’ནྟིཨཱདིཀསྶ ཝིཡ ‘‘བྷཱུཏཔུབྦཱཧཾ, བྷནྟེ, རོཧིཏསྶོ ནཱམ ཨིསི ཨཧོསི’’ནྟིཨཱདིཀསྶ (སཾ. ནི. ༡.༡༠༧) ཝོཧཱརསྶ ལོཔོ སིཡཱ, ཏསྨཱ ཨེཏྠ སནྟཱནབནྡྷེསུ ཧེཏུཧེཏུསམུཔྤནྣེསུ ན ཨེཀནྟམེཀཏཱ ཝཱ ནཱནཏཱ ཝཱ ཨུཔགནྟབྦཱ ན གཧེཏབྦཱ. ཨེཏྠ ཙ ཨེཀནྟཨེཀཏཱཔཊིསེདྷེན ‘‘སཡཾཀཏཾ སུཁཾ དུཀྑ’’ནྟི (ཝིབྷ. མཱུལཊཱི. ༢༢༧) ཨིམཾ དིཊྛིཾ ནིཝཱརེཏི, ཨེཀནྟནཱནཏཱཔཊིསེདྷེན ‘‘པརཾཀཏཾ སུཁཾ དུཀྑ’’ནྟི (ཝིབྷ. མཱུལཊཱི. ༢༢༧), ཧེཏུཧེཏུསམུཔྤནྣཏཱཝཙནེན ‘‘ཨདྷིཙྩསམུཔྤནྣ’’ནྟི (ཝིབྷ. མཱུལཊཱི. ༢༢༧) ཨིམཾ དིཊྛིཾ ནིཝཱརེཏི.

༦༣༤. ཏཏྠཱཏི ཕལུཔྤཏྟིཊྛཱནེ. ཨཉྙསྶཱཏི ཡེན ཏཾ ཀམྨཾ ཀཏཾ, ཏཏོ ཨཉྙསྶ. ཨཉྙཏོཏི ཡཾ ཏཾ ཀམྨཾ ནིབྦཏྟིཏཾ, ཏཏོ ཨཉྙཏོ. ‘‘དྷམྨམཏྟཾ བྷཝནྟརམུཔེཏཱི’’ཏི (ཝིསུདྡྷི. ༢.༦༣༢; ཝིབྷ. ཨཊྛ. ༢༢༧; མཧཱནི. ཨཊྛ. ༢༧; པཊི. མ. ཨཊྛ. ༡.༡.༡༠༥) ཝུཏྟཏྟཱ ཕལསྶ ཨུཔབྷུཉྫཀེ ཙ ཨསཏི ཀསྶ ཏཾ ཕལཾ སིཡཱཏི ཨནུཡུཉྫེཏི. ཏཏྲཱཏི ཏསྨིཾ ཡཐཱཝུཏྟེ ཨནུཡོགེ.

ཏཏྠཱཏི ཨེཀསནྟཱནེ. ཡསྨིཾ དྷམྨཔུཉྫེ ཀམྨཾ ནིབྦཏྟཾ, ཏསྶེཝ སནྟཱནེཏི ཨཏྠོ. ཨེཏསྶ ཨཏྠསྶཱཏི ཧེཏུཕལཱནཾ ཨཏྠཏོ ཨཉྙཏྟེཔི ཏེནེཝ ¶ ཧེཏུཕལབྷཱཝེན སམྦནྡྷཏྟཱ ཏཾ ཕལཾ ‘‘ཨཉྙསྶ, ཨཉྙཏོ’’ཏི ཝཱ ན ཝཏྟབྦནྟི ཨེཏསྶ ཨཏྠསྶ. ཙཏུམདྷུརཨལཏྟཀརསཱདིབྷཱཝནཱ ཨམྦམཱཏུལུངྒཱདིབཱིཛཱནཾ ¶ ཨབྷིསངྑཱརོ. ཨེཏྠ ཙ ཨབྷིསངྑཏཾ བཱིཛཾ ཝིཡ ཀམྨཝཱ སཏྟོ, ཨབྷིསངྑཱརོ ཝིཡ ཀམྨཾ, བཱིཛསྶ ཨངྐུརཱདིཔྤབནྡྷོ ཝིཡ སཏྟསྶ པཊིསནྡྷིཝིཉྙཱཎཱདིཔྤབནྡྷོ. ཏཏྠུཔྤནྣསྶ མདྷུརསྶ རཏྟཀེསརསྶ ཝཱ ཕལསྶ ཝཱ ཏསྶེཝ བཱིཛསྶ, ཏཏོ ཨེཝ ཙ ཨབྷིསངྑཱརཏོ བྷཱཝོ ཝིཡ ཀམྨཀཱརཀསྶེཝ སཏྟསྶ, ཏཾཀམྨཏོ ཨེཝ ཙ ཕལསྶ བྷཱཝོ ཝེདིཏབྦོ. བཱལསརཱིརེ ཀཏཾ ཝིཛྫཱཔརིཡཱཔུཎནཾ, སིཔྤསིཀྑནཾ, ཨོསདྷཔྤཡོགོ ཙ ན ཝུཌྜྷསརཱིརཾ གཙྪནྟི. ཨཐ ཙ ཏནྣིམིཏྟཾ ཝིཛྫཱཔཱཊཝཾ སིཔྤཛཱནནཾ, ཨནཱམཡཏཱ ཙ ཝུཌྜྷསརཱིརེ ཧོནྟི, ན ཙ ཏཱནི ཨཉྙསྶ ཧོནྟི ཏཾསནྟཏིཔརིཡཱཔནྣེ ཨེཝ ཝུཌྜྷསརཱིརེ ཨུཔྤཛྫནཏོ, ན ཙ ཡཐཱཔཡུཏྟེན ཝིཛྫཱཔརིཡཱཔུཎནཱདིནཱ ཝིནཱ ཏཱནི ཨཉྙཏོ ཧོནྟི ཏདབྷཱཝེ ཨབྷཱཝཏོ, ཨེཝཾ ཨིདྷཱཔི སནྟཱནེ ཡཾ ཕལཾ, ཨེཏཾ ནཱཉྙསྶ. ན ཙ ཨཉྙཏོཏི ཡོཛེཏབྦཾ. ཨེཏེན ཙ སངྑཱརཱབྷཱཝེ ཕལཱབྷཱཝམེཝ དསྶེཏི, ན ཨཉྙཔཙྩཡནིཝཱརཎཾ ཀརོཏི.

ཡམྤི ཝུཏྟཾ, ཏཏྠ ཝདཱམཱཏི ཝཙནསེསོ. ཏཏྠ ཝཱ ཨུཔབྷུཉྫཀེ ཨསཏི སིདྡྷཱ བྷུཉྫཀསམྨུཏཱིཏི སམྦནྡྷོ. ཕལཏཱིཏི སམྨུཏི ཕལཏིསམྨུཏི.

རུཀྑསངྑཱཏཱནཾ དྷམྨཱནནྟི རུཀྑཔཉྙཏྟིཡཱ ཨུཔཱདཱནབྷཱུཏཱནཾ བྷཱུཏུཔཱདཱཡདྷམྨཱནཾ. ཏསྨཱཏི ཡསྨཱ ཡཐཱ ཁནྡྷསནྟཱནེ ཀུསལཱཀུསལཙེཏནུཔྤཏྟིཡཾ ‘‘པུཉྙཾ ཀརོཏི, པཱཔཾ ཀརོཏཱི’’ཏི ཀཏྟུཝོཧཱརོ, ཨེཝཾ ཏསྶ ཕལུཔྤཏྟིཡཾ ‘‘སུཁཾ ཨནུབྷཝཏི, དུཀྑཾ ཨནུབྷཝཏཱི’’ཏི ཨུཔབྷུཉྫཀཝོཧཱརོ, ཏསྨཱ ན ཨེཏྠ ཁནྡྷཝིནིམུཏྟེན ཨཉྙེན ཨུཔབྷུཉྫཀེན ནཱམ ཀོཙི ཨཏྠོ ཨཏྠཱིཏི.

༦༣༥. ཨེཝཾ སནྟེཔཱིཏི ཨསངྐནྟིཔཱཏུབྷཱཝེ ཏཏྠ ཙ ཡཐཱཝུཏྟདོསཔརིཧརཎེ སཏི, སིདྡྷེཏི ཨཏྠོ. པཝཏྟིཀྑཎེཡེཝཱཏི སངྑཱརཱནཾ པཝཏྟམཱནཀྑཎེ ཨེཝ. པཝཏྟིཏོ པུབྦེཏི ཀམྨཱཡཱུཧནཀྑཎཏོ པུབྦེ, ཨཝིཛྫམཱནཏཱཡ སམཱནཏྟཱ ཨེཝཾ ཝུཏྟཾ. པཙྪཱ ཙཱཏི ཝིཔཙྩནཔྤཔཏྟིཏོ པཙྪཱ ཙ.

ཨཝིཔཀྐཝིཔཱཀཱ ཀཏཏྟཱ ཙེ པཙྩཡཱ, ཝིཔཀྐཝིཔཱཀཱནམྤི ཀཏཏྟཾ སམཱནནྟི ཏེསམྤི ཕལཱཝཧཏཱ སིཡཱཏི ཨཱསངྐཱནིཝཏྟནཏྠཾ ཨཱཧ ‘‘ན ཙ ནིཙྩཾ ཕལཱཝཧཱ’’ཏི.

‘‘ན ¶ ¶ ཝིཛྫམཱནཏྟཱ ཨཝིཛྫམཱནཏྟཱ ཝཱ’’ཏི ཨེཏེན ཝིཛྫམཱནཏྟཾ, ཨཝིཛྫམཱནཏྟཉྩ ནིསྶཱཡ ཝུཏྟདོསེ པརིཧརཏི. ཏསྶཱ པཱཊིབྷོགཀིརིཡཱཡ, བྷཎྜཀཱིཎནཀིརིཡཱཡ, ཨིཎགྒཧཎཀིརིཡཱཡ ཝཱ ཀརཎམཏྟཾ ཏཾཀིརིཡཱཀརཎམཏྟཾ, ཏདེཝ ཏདཏྠནིཡྻཱཏནེ པཊིབྷཎྜདཱནེ, ཨིཎདཱནེ ཙ པཙྩཡོ ཧོཏི, ཨཕལིཏནིཡྻཱཏནཱདིཕལནྟི ཨཏྠོ.

༦༣༦. སམྨོཧཝིགྷཱཏཏྠནྟི བཱཏྟིཾསཱཡ ཝིཉྙཱཎེསུ ཡཐཱཝུཏྟསངྑཱརཱནཾ པཊིསནྡྷིཡཾ, པཝཏྟིཡཉྩ པཙྩཡབྷཱཝེ ཝིབྷཛྫ ཨཝིབྷཱཝིཏེ པཝཏྟནཀསམྨོཧསྶ ཨཔནཡནཏྠཾ.

པུཉྙཱབྷིསངྑཱརེཏི ནིདྡྷཱརཎེ བྷུམྨཾ. ཨཝིསེསེནཱཏི ‘‘ཏིཧེཏུཀོ ཏིཧེཏུཀསྶཱ’’ཏིཨཱདིཀཾ བྷེདཾ ཨཀཏྭཱ སཱམཉྙཏོ, པིཎྜཝསེནཱཏི ཨཏྠོ. སབྦཏྠ ཨུཔནིསྶཡཔཙྩཡོ བལཝཀམྨསྶ ཝསེན ཡོཛེཏབྦོ. ‘‘དུབྦལཉྷི ཀམྨཾ ཨུཔནིསྶཡཔཙྩཡོ ན ཧོཏཱི’’ཏི པཊྛཱནསཾཝཎྞནཱཡ དསྶིཏམེཏཾ. རཱུཔཱཝཙརཔཉྩཀུསལཙེཏནཱབྷེདོཏི ‘‘ཋཔེཏྭཱ ཨབྷིཉྙཱཔྤཏྟ’’ནྟི ཝིསེསེཏྭཱ ཝཏྟབྦཾ, ན ཝཱ ཝཏྟབྦཾ ཝིཔཱཀསྶ པཙྩཡབྷཱཝཀཐཱཡ ཨཝིཔཱཀཱརཧསྶ པསངྒཱབྷཱཝཏོ. ཨབྷིཉྙཱཙེཏནཱཡ ཧི ཨཝིཔཱཀཏཱ ཧེཊྛཱ ཝིབྷཱཝིཏཱ ཨེཝ. ཨཝིསེསེན པནཱཏི ཨེཏྠཱཔི ཨེསེཝ ནཡོ. པཉྩནྣཾ ཝིཔཱཀཝིཉྙཱཎཱནནྟི ཨཱནེཏྭཱ སམྦནྡྷིཏབྦཾ.

པཉྩནྣནྟི ཙཀྑུསོཏཝིཉྙཱཎཱནཾ, སམྤཊིཙྪནམནོདྷཱཏུཡཱ, དྭིནྣཾ སནྟཱིརཎམནོཝིཉྙཱཎདྷཱཏཱུནཉྩཱཏི ཨེཏེསཾ པཉྩནྣཾ. ཏཐེཝཱཏི དྭེདྷཱ ཨེཝ. ཀཐཾ པན ཨིཊྛཱརམྨཎེཡེཝ པཝཏྟནཀཱནི ཀུསལཝིཔཱཀཝིཉྙཱཎཱནི དུགྒཏིཡཾ པཝཏྟནྟཱིཏི ཨཱཧ ‘‘ནིརཡེ མཧཱམོགྒལླཱནཏྠེརསྶཱ’’ཏིཨཱདི. ཐེརོ ཧི ཏཏྠ ཨིདྡྷིཡཱ ཝསྶཾ ནིམྨིནིཏྭཱ ཀཏིཔཡཾ ཝེལཾ ནིརཡགྒིཾ ཝཱུཔསམེཏྭཱ ཏེསཾ དྷམྨཾ དེསེཏི.

སྭེཝ ཀཱམཱཝཙརོ པུཉྙཱབྷིསངྑཱརོ. ཨཝིསེསེན པན པུཉྙཱབྷིསངྑཱརོཏི ཀཱམཱཝཙརཾ, རཱུཔཱཝཙརཉྩཱཏི དུཝིདྷམྤི པུཉྙཱབྷིསངྑཱརཾ ཨེཀཛ྄ཛྷཾ སངྒཎྷཱཏི.

དྭཱདསཱཀུསལཙེཏནཱབྷེདོཏི ཨེཏྠ ཨུདྡྷཙྩསཧགཏཙེཏནཱཡ གཧཎེ ཀཱརཎཾ ན དིསྶཏི, ཝིཙཱརེཏབྦམེཏཾ. ཨེཀསྶ ཝིཉྙཱཎསྶ ཏཐེཝ ¶ པཙྩཡོ པཊིསནྡྷིཡཾ, ནོ པཝཏྟེཏི ཨེཀསྶེཝ པཙྩཡབྷཱཝནིཡམོ པཊིསནྡྷིཡཾ, ནོ པཝཏྟེ. པཝཏྟེ ཧི སཏྟནྣམྤི པཙྩཡོཏི ཨདྷིཔྤཱཡོ.

རཱུཔབྷཝེ ¶ ཙཏུནྣནྟི ཨཀུསལཝིཔཱཀཱནཾ ཙཀྑུསོཏཝིཉྙཱཎསམྤཊིཙྪནསནྟཱིརཎཱནཾ. ཏཱནི པན ཨེཀནྟཏོ ཨནིཊྛཱརམྨཎཱནི, རཱུཔབྷཝེ ཙ ཀཐཾ ཨནིཊྛཱརམྨཎསམཱཡོགོཏི ཨཱཧ ‘‘སོ ཙ ཁོ’’ཏིཨཱདི. ‘‘ཏཐཱ ཀཱམཱཝཙརདེཝལོཀེཔི ཨནིཊྛརཱུཔཱདཡོ ནཏྠཱི’’ཏི ཨིདཾ ཡེབྷུཡྻཝསེན ཝུཏྟཾ. བཧུལཉྷི ཏེསཾ ཨིཊྛཱ ཨེཝ རཱུཔཱདཡོ ཨུཔཊྛཧནྟི, ཀདཱཙི ཨནིཊྛཾ. དེཝཱནཉྷི ཀེསཉྩིདེཝ པུབྦནིམིཏྟཔཱཏུབྷཱཝཀཱལཱདཱིསུ མིལཱཏམཱལཱདིཨནིཊྛཱརམྨཎསམཱཡོགོ ཧོཏཱིཏི.

༦༣༧. ཡཏྠ ཝིཏྠཱརཔྤཀཱསནཾ ཀཏཾ, ཏཏོ བྷཝཏོ པཊྛཱཡ མུཁམཏྟཔྤཀཱསནཾ ཀཱཏུཀཱམོ ཨཱཧ ‘‘ཨཱདིཏོ པཊྛཱཡཱ’’ཏི. ཏེནེཝ ‘‘དྭཱིསུ བྷཝེསཱུ’’ཏིཨཱདི ཝུཏྟཾ. མནུསྶཱཔི ཀེཙི ཨཎྜཛཱ, སཾསེདཛཱ ཙ ཧོནྟཱིཏི ཏདཔེཀྑཱཡ ‘‘ཙཏཱུསུ ཡོནཱིསཱུ’’ཏི ཝུཏྟཾ. ཨེཀཏྟཀཱཡཨེཀཏྟསཉྙིཏཱསཱམཉྙེན ཙཏུཏྠཛྷཱནབྷཱུམིཀཱཔི ཨསཉྙཱརུཔྤཝཛྫཱ ཙཏུཏྠིཾཡེཝ ཝིཉྙཱཎཊྛིཏིཾ བྷཛནྟི. ཨེས པུཉྙཱབྷིསངྑཱརོ. ཝུཏྟནཡེནེཝཱཏི ‘‘ནཱནཱཀྑཎིཀཀམྨཔཙྩཡེན ཙེཝ ཨུཔནིསྶཡཔཙྩཡེན ཙཱ’’ཏི ཝུཏྟནཡེནེཝ. ཡཐཱསམྦྷཝནྟི ཨེཀཝཱིསཏིཀཱམཱཝཙརརཱུཔཱཝཙརཀུསལཝིཔཱཀེསུ ཙུདྡསནྣཾ པཊིསནྡྷིཡཾ, པཝཏྟེ ཙ, སཏྟནྣཾ པཝཏྟེ ཨེཝཱཏི ཨཡཾ ཡཐཱསམྦྷཝོ.

ཏཱདིསེཡེཝཱཏི ནཱནཏྟཀཱཡཨེཀཏྟསཉྙཱིསངྑཱཏེཡེཝ.

ཙཏུནྣཾ ཝིཉྙཱཎཱནནྟི བྷཝཱདཡོ ཨཔེཀྑིཏྭཱ ཝུཏྟཾ. ཙཏཱུསུ ཨནྟོགདྷཱནཾ པན ཏིཎྞཾ ཝིཉྙཱཎཱནཾ ཏཱིསུ ཝིཉྙཱཎཊྛིཏཱིསུ པཙྩཡབྷཱཝོ ཡོཛེཏབྦོ. ཨཝིཉྙཱཎཀེ སཏྟཱཝཱསེ སངྑཱརཔཙྩཡཱ ཝིཉྙཱཎེ ཨལབྦྷམཱནེཔི ཏསྶ སངྑཱརཧེཏུཀཏྟཾ ལབྦྷཏེཝ. ཏཐཱ ཧི ཏཏྠ པུཉྙཱབྷིསངྑཱརོ ཀཊཏྟཱརཱུཔཱནཾ ནཱནཱཀྑཎིཀཀམྨཔཙྩཡེན པཙྩཡོ ཧོཏི. ཨེཏསྨིཉྩ མུཁམཏྟཔྤཀཱསནེ པུཉྙཱབྷིསངྑཱརཱདཱིནཾ དུགྒཏིཨཱདཱིསུ པཝཏྟིཡཾ ཀུསལཝིཔཱཀཱདིཝིཉྙཱཎཱནཾ པཙྩཡབྷཱཝོ བྷཝེསུ ཝུཏྟནཡེནེཝ ཝིཉྙཱཡཏཱིཏི ན ཝུཏྟོཏི ཝེདིཏབྦོ.

ཝིཉྙཱཎཔཙྩཡཱནཱམརཱུཔཔདཝིཏྠཱརཀཐཱཝཎྞནཱ

༦༣༨. ཝིབྷཱགཱ ¶ ནཱམརཱུཔཱནནྟི ནཱམསྶ, རཱུཔསྶ ཙ པབྷེདཏོ.

ཏཏྠ ནཱམསྶ ཏཱཝ པབྷེདཾ དསྶེནྟེན ཀཱམཾ ཝིཉྙཱཎམྤི ནཱམམེཝ, པཙྩཡཔཙྩཡུཔྤནྣེ པན ཨསངྐརཏོ ¶ དསྶེཏུཾ ‘‘ཨཱརམྨཎཱབྷིམུཁཾ ནམནཏོ ཝེདནཱདཡོ ཏཡོ ཁནྡྷཱ’’ཏི ཝུཏྟཾ. ནིབྦཱནསྶ པནེཏྠ པཝཏྟིཀཐཱཡཾ ཨཔྤཙྩཡཏྟཱ, ནམནཊྛཱབྷཱཝཏོ ཙ པསངྒོ ཨེཝ ནཏྠི. ནཱམནཊྛེན ཧི ཏཾ ནཱམཾ, ན ནམནཊྛེན. ཏེསཾ ནཱམརཱུཔཱནཾ སུཁཱདིཝསེན, པཐཝཱིཨཱདིཝསེན ཙ ཝིབྷཱགོ.

ཨེཀཾ སཏྟཱཝཱསནྟི ཨསཉྙསཏྟཱཝཱསཾ. པུརིམེསུ ཙཏཱུསུ, ཨསཉྙསཏྟཱཝཱསེ ཙཱཏི པཉྩསུ.

གབྦྷསེཡྻགྒཧཎེན ཛལཱབུཛཱ གཧིཏཱཏི ‘‘ཨཎྜཛཱནཉྩཱ’’ཏི ཝུཏྟཾ. ཨཎྜཛཱནཉྩ ཨབྷཱཝཀཱནནྟི ཡོཛེཏབྦཾ. སནྟཏིསཱིསཱནཱིཏི ཀལཱཔསནྟཱནམཱུལཱནི. ཡདིཔི ཝིཀཱརརཱུཔཱནི པཊིསནྡྷིཀྑཎེ ན སནྟི, ལཀྑཎཔརིཙྪེདརཱུཔཱནི པན སནྟཱིཏི ཏཱནི པརམཏྠཏོ ཨཔརིནིཔྥནྣཱནཱིཏི ཝཛྫེནྟོ ཨཱཧ ‘‘རཱུཔརཱུཔཏོ’’ཏི. ཕསྶཱདིཀེ སངྑཱརཀྑནྡྷབྷཱཝེན ཨེཀཏྟཾ ནེཏྭཱ ‘‘ཏེཝཱིསཏི དྷམྨཱ’’ཏི ཝུཏྟཾ. ཨཔནེཏྭཱཏི ཀལཱཔནྟརགཏེ པཐཝཱིཨཱདིཀེ སམཱནལཀྑཎཏཱཡ ཨགྒཧེཏྭཱ.

ཏེསནྟི བྲཧྨཀཱཡིཀཱདཱིནཾ. ཝིཏྠཱརེནཱཏི ཙཏཱུསུཔི སནྟཏིསཱིསེསུ རཱུཔཱནཾ ཨསངྑིཔནེན.

ཀཱམབྷཝེ པན ཡསྨཱ སེསཨོཔཔཱཏིཀཱནནྟི ཨེཏྠ ཀིཉྩཱཔི ཀཱམབྷཝེ ཨོཔཔཱཏིཀཱ ཝུཏྟཱ ན སནྟི, ཡེན སེསགྒཧཎཾ སཱཏྠཀཾ བྷཝེཡྻ, ཨཎྜཛགབྦྷསེཡྻཀེཧི པན ཨོཔཔཱཏིཀསཾསེདཛཱ སེསཱ ཧོནྟཱིཏི སེསགྒཧཎཾ ཀཏནྟི ཝེདིཏབྦཾ. ཨཐ ཝཱ བྲཧྨཀཱཡིཀཱདིཀེཧི ཨོཔཔཱཏིཀེཧི ཝུཏྟེཧི སེསེ སནྡྷཱཡ ‘‘སེསཨོཔཔཱཏིཀཱན’’ནྟི ཨཱཧ. ཏེ པན ཨརཱུཔིནོཔི སནྟཱིཏི ‘‘ཀཱམབྷཝེ’’ཏི ཝུཏྟཾ. ཨཔརིཔུཎྞཱཡཏནཱནཾ པན ནཱམརཱུཔཾ ཡཐཱསམྦྷཝཾ རཱུཔམིསྶཀཝིཉྙཱཎནིདྡེསེ ཝུཏྟནཡེན སཀྐཱ དྷམྨགཎནཏོ ཝིཉྙཱཏུནྟི ན ཝུཏྟནྟི དཊྛབྦཾ.

པཊིསནྡྷིཙིཏྟེན སཧ པཝཏྟཨུཏུཏོཏི པཊིསནྡྷིཙིཏྟེན སཧ ཨུཔྤནྣརཱུཔེསུ ཏེཛོདྷཱཏུཏོ. ཧདཡཝཏྠུནོ ཏངྑཎུཔྤནྣཏྟཱ པཊིསནྡྷིཙིཏྟསྶ ཝཏྠུདུབྦལཏཱ. ཏེསཾ ཨཛ྄ཛྷོཧརིཏཱཧཱརེན ཨནུགཏེ སརཱིརེ ¶ ཨཱཧཱརསམུཊྛཱནཾ སུཊྛདྡྷཀནྟི སམྦནྡྷོ. ནརོཏི ཏེནེཝ མཱཏུཀུཙྪིགཏབྷཱཝེན ཏིརོཀྑོ. ཨཝཀཾསཏོ དྭེ ཨཊྛཀཱནེཝ ཨུཏུཙིཏྟསམུཊྛཱནཱནི ཧོནྟཱིཏི སསདྡཀཱལཾ སནྡྷཱཡ ‘‘ཨུཀྐཾསཏོ དྭིནྣཾ ནཝཀཱན’’ནྟི ཝུཏྟཾ. པུབྦེཏི ཡཾ པུབྦེ སནྟཏིདྭཡཱདིཀཾ སཏྟཀཔརིཡོསཱནཾ རཱུཔཾ ཨིདྷ ཝུཏྟཾ, ཏཾ ཨེཀེཀསྶ ¶ ཙིཏྟསྶ ཏཱིསུ ཏཱིསུ ཁཎེསུ ཨུཔྤཛྫམཱནམེཝ ཝུཏྟནྟི ཀཏྭཱ ཨཱཧ ‘‘པུབྦེ…པེ… སཏྟཏིཝིདྷ’’ནྟི. དུཝིདྷམྤི ཏནྟི ཨུཏུསམུཊྛཱནཾ, ཙིཏྟསམུཊྛཱནཉྩཱཏི དུཝིདྷམྤི ཏཾ སདྡཾ.

སཎྛཱཏུནྟི ཨདྡྷནིཡབྷཱཝེན ཋཱཏུཾ, ཨཏྟནོ པན ཁཎམཏྟཾ ཏིཊྛཏེཝ. ཙཏུདྡིསཱ ཝཝཏྠཱཔིཏཱཏི ཨཉྙམཉྙཾ སཾསཊྛསཱིསཱ མཱུལེན ཙཏཱུསུ དིསཱསུ ཝཝཏྠཱཔིཏཱ. ཨཉྙམཉྙཾ ཨཱལིངྒེཏྭཱ ཋིཏཱ བྷིནྣཝཱཧནིཀཱ ཝིཡ ཙ.

༦༣༩. པཉྩཝོཀཱརབྷཝེ ཙ པཝཏྟིཡནྟི རཱུཔཱཛནཀཀམྨཛཔཉྩཝིཉྙཱཎཔྤཝཏྟིཀཱལཾ, སཧཛཱཏཝིཉྙཱཎཔཙྩཡཉྩ སནྡྷཱཡཱཧ. ཏདཱ ཧི ཏཏོ ནཱམམེཝ ཧོཏཱིཏི. ཀམྨཝིཉྙཱཎཔཙྩཡཱ པན ཏདཱཔི ཨུབྷཡཾ ཧོཏཱིཏི སཀྐཱ ཝཏྟུཾ, པཙྪཱཛཱཏཝིཉྙཱཎཔཙྩཡཱ ཙ རཱུཔཾ ཨུཔཏྠདྡྷཾ ཧོཏཱིཏི. ཨསཉྙེསཱུཏིཨཱདི ཀམྨཝིཉྙཱཎཔཙྩཡཾ སནྡྷཱཡ ཝུཏྟཾ. པཉྩཝོཀཱརབྷཝེ ཙ པཝཏྟིཡནྟི བྷཝངྒཱདིཛནཀཀམྨཏོ ཨཉྙེན རཱུཔུཔྤཏྟིཀཱལཾ, ནིརོདྷསམཱཔཏྟིཀཱལཾ, བྷཝངྒཱདིཨུཔྤཏྟིཀཱལཏོ ཨཉྙཀཱལཉྩ སནྡྷཱཡ ཝུཏྟནྟི ཡུཏྟཾ. བྷཝངྒཱདིཨུཔྤཏྟིཀཱལེ ཧི ཏཾཛནཀེན ཀམྨུནཱ ཨུཔྤཛྫམཱནཾ རཱུཔཾ, སོ ཙ ཝིཔཱཀོ ཀམྨཝིཉྙཱཎཔཙྩཡོ ཧོཏཱིཏི སཀྐཱ ཝཏྟུཾ. སཧཛཱཏཝིཉྙཱཎཔཙྩཡཱནཔེཀྑམྤི ཧི པཝཏྟིཡཾ ཀམྨེན པཝཏྟམཱནཾ རཱུཔཾ, ནཱམཉྩ ན ཀམྨཝིཉྙཱཎཱནཔེཀྑཾ ཧོཏཱིཏི. སབྦཏྠཱཏི པཊིསནྡྷིཡཾ, པཝཏྟེ ཙ. སཧཛཱཏཝིཉྙཱཎཔཙྩཡཱ ནཱམརཱུཔཾ, ཀམྨཝིཉྙཱཎཔཙྩཡཱ ནཱམརཱུཔཉྩ ཡཐཱསམྦྷཝཾ ཡོཛེཏབྦཾ. ནཱམཉྩ རཱུཔཉྩ ནཱམརཱུཔཉྩཱཏི ཨེཏྠ ནཱམརཱུཔསདྡོ ཨཏྟནོ ཨེཀདེསེན ནཱམསདྡེན ནཱམསདྡསྶ སརཱུཔོ, རཱུཔསདྡེན ཙ རཱུཔསདྡསྶ, ཏསྨཱ སརཱུཔཱནཾ ཨེཀསེསོཏི ཨེཀདེསསརཱུཔེཀསེསོ, ནཱམརཱུཔསདྡསྶ ཋཱནཾ ཨིཏརེསཉྩ ནཱམརཱུཔསདྡཱནཾ ཨདསྶནནྟི ཨཏྠོ.

ཝིཔཱཀཏོ ཨཉྙཾ ཨཝིཔཱཀཾ. ཡཏོ དྭིདྷཱ མཏཾ, ཏཏོ ཡུཏྟམེཝ ཨིདནྟི ཡོཛེཏབྦཾ.

ཀུསལཱདིཙིཏྟཀྑཎེཏི ¶ ཨཱདི-སདྡེན ཨཀུསལཀིརིཡཙིཏྟཀྑཎེ ཝིཡ ཝིཔཱཀཙིཏྟཀྑཎེཔི ཝིཔཱཀཱཛནཀཀམྨསམུཊྛཱནཾ སངྒཧིཏནྟི ཝེདིཏབྦཾ. ཝིཔཱཀཙིཏྟཀྑཎེ པན ཨབྷིསངྑཱརཝིཉྙཱཎཔཙྩཡཱ པུབྦེ ཝུཏྟནཡེན ཨུབྷཡཉྩ ལབྦྷཏཱིཏི ཏཱདིསཝིཔཱཀཙིཏྟཀྑཎཝཛྫནཏྠཾ ‘‘ཀུསལཱདིཙིཏྟཀྑཎེ’’ཏི ཝུཏྟཾ.

༦༤༠. སུཏྟནྟིཀཔརིཡཱཡཏོཏི ¶ པཊྛཱནེ རཱུཔཱནཾ ཨུཔནིསྶཡཔཙྩཡསྶ ཨཝུཏྟཏྟཱ ཝུཏྟཾ. སུཏྟནྟེ པན ཡསྨིཾ སཏི ཡཾ ཧོཏི, ཨསཏི ཙ ན ཧོཏི, སོ ཏསྶ ཨུཔནིསྶཡོ ནིདཱནཾ ཧེཏུ པབྷཝོཏི ཀཏྭཱ ‘‘ཝིཉྙཱཎཱུཔནིསཾ ནཱམརཱུཔ’’ནྟི རཱུཔསྶ ཙ ཝིཉྙཱཎཱུཔནིསྶཡཏཱ ཝུཏྟཱ. ཝནཔཏྠཔརིཡཱཡེ ཙ ཝནཔཏྠགཱམནིགམནགརཛནཔདཔུགྒལཱུཔནིསྶཡོ ཨིརིཡཱཔཐཝིཧཱརོ, ཏཏོ ཙ ཙཱིཝརཱདཱིནཾ ཛཱིཝིཏཔརིཀྑཱརཱནཾ ཀསིརེན, ཨཔྤཀསིརེན ཙ སམུདཱགམནཾ ཝུཏྟཾ, ན ཙ ཝནཔཏྠཱདཡོ ཨཱརམྨཎཱུཔནིསྶཡཱདིབྷཱཝཾ ཨིརིཡཱཔཐཱནཾ, ཙཱིཝརཱདིསམུདཱགམནསྶ ཙ བྷཛནྟི. ཏསྨཱ ཝིནཱ ཨབྷཱཝོ ཨེཝ སུཏྟནྟིཀཔརིཡཱཡཏོ ཨུཔནིསྶཡབྷཱཝོ དཊྛབྦོ. ནཱམསྶ ཨབྷིསངྑཱརཝིཉྙཱཎཾ ཀམྨཱརམྨཎཔཊིསནྡྷིཨཱདིཀཱལེ ཨཱརམྨཎཔཙྩཡོཝ ཧོཏཱིཏི ཝཏྟབྦམེཝ ནཏྠཱིཏི རཱུཔསྶེཝ སུཏྟནྟིཀཔརིཡཱཡཏོ ཨེཀདྷཱཝ པཙྩཡབྷཱཝོ ཝུཏྟོ. སསཾསཡསྶ ཧི རཱུཔསྶེཏཾ པཙྩཡོ ཧོཏཱིཏི ཝུཏྟེ ནཱམསྶ ཧོཏཱིཏི ཝཏྟབྦམེཝ ནཏྠཱིཏི.

པཝཏྟསྶ པཱཀཊཏྟཱ ཨཔཱཀཊཾ པཊིསནྡྷིཾ གཧེཏྭཱ པུཙྪཏི ‘‘ཀཐཾ པནེཏ’’ནྟིཨཱདིནཱ. སུཏྟཏོ ནཱམཾ, ཡུཏྟིཏོ རཱུཔཾ ཝིཉྙཱཎཔཙྩཡཱ ཧོཏཱིཏི ཛཱནིཏབྦཾ.

ཡུཏྟིཏོ སཱདྷེཏྭཱ སུཏྟེན ཏཾ དལ༹ྷཾ ཀརོནྟོ ‘‘ཀམྨསམུཊྛཱནསྶཱཔི ཧཱི’’ཏིཨཱདིམཱཧ. ཙིཏྟསམུཊྛཱནསྶེཝཱཏི ཙིཏྟསམུཊྛཱནསྶ ཝིཡ. ཨེཏྠ ཙ ‘‘ཝིཉྙཱཎཔཙྩཡཱ ནཱམརཱུཔ’’ནྟི (མ. ནི. ༣.༡༢༦; སཾ. ནི. ༢.༡, ༣༩; མཧཱཝ. ༡; ཨུདཱ. ༡) བྷཱསམཱནེན བྷགཝཏཱ ཡསྨཱ ཨུཔཔརིཀྑམཱནཱནཾ པཎྜིཏཱནཾ པརམཏྠཏོ ནཱམརཱུཔམཏྟམེཝ པཝཏྟམཱནཾ དིསྶཏི, ན སཏྟོ, ན ཛཱིཝོ, ཏསྨཱ ཀེནཙི ཨཔྤཊིཝཏྟིཡཾ ཨནུཏྟརཾ དྷམྨཙཀྐཾ པཝཏྟིཏཾ ཧོཏི. སུཉྙཏཔྤཀཱསནཉྷི དྷམྨཙཀྐཔྤཝཏྟནནྟི. ཨཐ ཝཱ ནཱམརཱུཔམཏྟཏཱཝཙནེན པཝཏྟིཡཱ དུཀྑསཙྩམཏྟཏཱ ཝུཏྟཱ. དུཀྑསཙྩཔྤཀཱསནེན ཙ ཏསྶ སམུདཡོ, ཏསྶ ཙ ནིརོདྷོ, ནིརོདྷགཱམིནིཔཊིཔདཱ ཙ ¶ པཀཱསིཏཱ ཨེཝ ཧོཏི. ཨཧེཏུཀསྶ དུཀྑསྶ, ཧེཏུནིརོདྷཱ ཨནིརུཛ྄ཛྷནཀསྶ ཙ ཨབྷཱཝཱ, ནིརོདྷསྶ ཙ ཨུཔཱཡེན ཝིནཱ ཨནདྷིགནྟབྦཏྟཱཏི ཙཏུསཙྩཔྤཀཱསནཾ དྷམྨཙཀྐཔྤཝཏྟནཾ ནིདྡྷཱརེཏབྦཾ.

ནཱམརཱུཔཔཙྩཡཱསལཱ༹ཡཏནཔདཝིཏྠཱརཀཐཱཝཎྞནཱ

༦༤༡. ཏནྟི ¶ ནཱམརཱུཔཾ. ཏསྶཱཏི སལཱ༹ཡཏནསྶ. ཏཱདིསསྶེཝཱཏི ཀཏེཀསེསསྶེཝ.

ཨིདྷཱཔི ནཱམནྟི ཁནྡྷཏྟཡསྶེཝ གཧཎེ ཀཱརཎཾ ཝུཏྟནཡམེཝ. ནིཡམཏོཏི ཨིདཉྩ ཙཏུནྣཾ བྷཱུཏཱནཾ, ཚནྣཾ ཝཏྠཱུནཾ, ཛཱིཝིཏསྶ ཙ ཡཐཱསམྦྷཝཾ སཧཛཱཏནིསྶཡཔུརེཛཱཏཨིནྡྲིཡཱདིནཱ སལཱ༹ཡཏནསྶ པཝཏྟམཱནསྶ ཨེཀནྟེན པཙྩཡབྷཱཝཾ སནྡྷཱཡ ཝུཏྟཾ. རཱུཔཱཡཏནཱདཱིནཾ པན སཧཛཱཏནིསྶཡཱནུཔཱལནབྷཱཝོ ནཏྠཱིཏི ཨགྒཧཎཾ ཝེདིཏབྦཾ. ཨཱརམྨཎཱརམྨཎཔུརེཛཱཏཱདིབྷཱཝོ ཙ ཏེསཾ ན སསནྟཏིཔརིཡཱཔནྣཱནམེཝ, ན ཙ ཙཀྑཱདཱིནཾ ཝིཡ ཨེཀཔྤཧཱརེནེཝཱཏི ཨནིཡམཏོ པཙྩཡབྷཱཝོ. ནིཡམཏོ…པེ… ཛཱིཝིཏིནྡྲིཡནྟི ཨེཝནྟི ཨེཏྠ ཨེཝཾ-སདྡེན ཝཱ རཱུཔཱཡཏནཱདཱིནམྤི སངྒཧོ དཊྛབྦོ. ཚཊྛཱཡཏནཉྩ སལཱ༹ཡཏནཉྩ སལཱ༹ཡཏནནྟི ཨེཏྠ ཡདིཔི ཚཊྛཱཡཏནསལཱ༹ཡཏནསདྡཱནཾ སདྡཏོ སརཱུཔཏཱ ནཏྠི, ཨཏྠཏོ པན སལཱ༹ཡཏནེཀདེསོཝ ཚཊྛཱཡཏནནྟི ཨེཀདེསསརཱུཔཏཱ ཨཏྠཱིཏི ཨེཀདེསསརཱུཔེཀསེསོ ཀཏོཏི ཝེདིཏབྦོ. ཨཏྠཏོཔི ཧི སརཱུཔཱནཾ ཨེཀདེསསརཱུཔེཀསེསཾ ཨིཙྪནྟི ‘‘ཝངྐོ ཙ ཀུཊིལོ ཙ ཀུཊིལཱ’’ཏི. ཏསྨཱ ཨཏྠཏོ ཨེཀདེསསརཱུཔཱནཉྩ ཨེཀསེསེན བྷཝིཏབྦནྟི.

ཨཐ ཝཱ ཚཊྛཱཡཏནཉྩ མནཱཡཏནཉྩ ཚཊྛཱཡཏནནྟི ཝཱ མནཱཡཏནནྟི ཝཱ ཚཊྛཱཡཏནཉྩ ཚཊྛཱཡཏནཉྩ ཚཊྛཱཡཏནནྟི ཝཱ མནཱཡཏནཉྩ མནཱཡཏནཉྩ མནཱཡཏནནྟི ཝཱ ཨེཀསེསཾ ཀཏྭཱ ཙཀྑཱདཱིཧི སདྡྷིཾ ‘‘སལཱ༹ཡཏན’’ནྟི ཝུཏྟནྟི ཏམེཝ ཨེཀསེསཾ ནཱམམཏྟཔཙྩཡསྶ, ནཱམརཱུཔཔཙྩཡསྶ ཙ མནཱཡཏནསྶ ཝསེན ཀཏཾ ཨཏྠཏོ དསྶེནྟོ ཨཱཧ ‘‘ཚཊྛཱཡཏནཉྩ སལཱ༹ཡཏནཉྩ སལཱ༹ཡཏནནྟི ཨེཝཾ ཀཏེཀསེསསྶཱ’’ཏི. ཡཐཱཝུཏྟོཔི ཧི ཨེཀསེསོ ཨཏྠཏོ ཚཊྛཱཡཏནཉྩ སལཱ༹ཡཏནཉྩཱཏི ཨེཝཾ ཀཏོ ནཱམ ¶ ཧོཏཱིཏི. སབྦཏྠ ཙ ཨེཀསེསེ ཀཏེ ཨེཀཝཙནནིདྡེསོ ཀཏེཀསེསཱནཾ སལཱ༹ཡཏནཱདིསདྡཝཙནཱིཡཏཱསཱམཉྙཝསེན ཀཏོཏི དཊྛབྦོ.

‘‘ན ཨཉྙཐཱ’’ཏི ཨེཏེན ཏསྶ ཏསྶ ནཱམསྶ, རཱུཔསྶ ཙ ཨབྷཱཝེ ཏཾ ཏཾ ཨཱཡཏནཾ ན ཧོཏཱིཏི བྱཏིརེཀཾ ཝིབྷཱཝེཏི.

ཡནྟི ¶ ཡཾ ཡཾ ནཱམཾ, རཱུཔཉྩ. ཡསྶཱཏི ཡསྶ ཡསྶ ཨཱཡཏནསྶ. ཡཐཱཏི སཧཛཱཏཱདིནཱ ཡེན ཡེན པཀཱརེན. ནེཡྻནྟི ཉེཡྻཾ.

ཏསྶ ཝསེནཱཏི ཏསྶ ཧེཏུཨཱདིཔཙྩཡསྶ ཝསེན. ཨུཀྐཾསཱཝཀཾསོཏི ཨེཏྠ སཏྟདྷཱ པཙྩཡབྷཱཝཏོ ཨུཀྐཾསོ ཨཊྛདྷཱ པཙྩཡབྷཱཝོ, ཏཏོ ནཝདྷཱ, ཏཏོ དསདྷཱཏི ཨཡཾ ཨུཀྐཾསོ. ཨཝཀཾསོ པན དསདྷཱ པཙྩཡབྷཱཝཏོ ནཝདྷཱ པཙྩཡབྷཱཝོ, ཏཏོ ཨཊྛདྷཱ, ཏཏོ སཏྟདྷཱཏི ཨེཝཾ ཝེདིཏབྦོ, ན པན སཏྟདྷཱ པཙྩཡབྷཱཝཏོ ཨེཝ དྭེཔི ཨུཀྐཾསཱཝཀཾསཱ ཡོཛེཏབྦཱ, ཏཏོ ཨཝཀཾསཱབྷཱཝཏོཏི.

ཝིཔཱཀཾ ནཱམནྟི སམྦནྡྷོ. ཝུཏྟནཡེནེཝཱཏི སཧཛཱཏཱདིཝསེན, སཏྟདྷཱ, ཧེཏུཨཱདིཝསེན ཙ. ཨིཏརནྟི ཨཝིཔཱཀཾ ནཱམཾ.

‘‘ཧདཡཝཏྠུནོ སཧཱཡཾ ཧུཏྭཱ’’ཏི ཨེཏེན ཨརཱུཔེ ཝིཡ ཨསཧཱཡཾ ནཱམཾ ན ཧོཏི, ཧདཡཝཏྠུ ཙ ནཱམེན སཧ ཚཊྛཱཡཏནསྶ པཙྩཡོ ཧོཏཱིཏི ཨེཏྟཀམེཝ དསྶེཏི, ན པན ཡཐཱ ཧདཡཝཏྠུ པཙྩཡོ ཧོཏི, ཏཐཱ ནཱམམྤཱིཏི ཨཡམཏྠོ ཨདྷིཔྤེཏོ. ཝཏྠུ ཧི ནཱམསྶ ཝིཔྤཡུཏྟཔཙྩཡོ ཧོཏི, ན ནཱམཾ. ནཱམཉྩ ཝིཔཱཀཧེཏཱདིཔཙྩཡོ ཧོཏི, ན ཝཏྠཱུཏི. པཝཏྟེ ཨརཱུཔདྷམྨཱ ཀམྨཛརཱུཔསྶ ཋིཏིཔྤཏྟསྶེཝ པཙྩཡཱ ཧོནྟི, ན ཨུཔྤཛྫམཱནསྶཱཏི ཝིཔྤཡུཏྟཨཏྠིཨཝིགཏཱ ཙ པཙྪཱཛཱཏཝིཔྤཡུཏྟཱདཡོ ཨེཝ ཙཀྑཱདཱིནཾ ཡོཛེཏབྦཱ.

‘‘ཏཏྠེཝཱ’’ཏི ཨིམིནཱ ‘‘པཝཏྟེ’’ཏི ཨིདཾ པཙྩཱམཊྛནྟི ཨཱཧ ‘‘ཏཏྠེཝ ཧི པཝཏྟེ’’ཏི. ‘‘པཉྩཝོཀཱརབྷཝེ’’ཏི པན ཨིདཾ ‘‘པཉྩནྣ’’ནྟི ཨིམིནཱ དཱིཔིཏམེཝཱཏི. པཝཏྟིཡཾ ཙཀྑཱཡཏནཱདིཀསྶ ནཱམཾ ཝིཔཱཀཔཙྩཡོ ན ཧོཏི, ཨཏྟནཱ ཛནིཏརཱུཔསྶེཝ ཧོཏི. པཊིསནྡྷིཡཾ པན ཀམྨསམུཊྛཱནཾ ཙིཏྟསམུཊྛཱནསདིསཾ, ཏསྨཱ ཝཏྠུནོཔི ཝིཔཱཀཔཙྩཡོ ཧོཏིཡེཝ.

རཱུཔཏོཏི ¶ རཱུཔེསུ. ཡཾ ཡཾ ཨཱཡཏནཾ ཨུཔྤཛྫཏཱིཏི པཊིསནྡྷིཡཾ ཨཎྜཛཛལཱབུཛཱནཾ པཉྩསུ ཨཱཡཏནེསུ ཀཱཡཱཡཏནམེཝ ཨུཔྤཛྫཏི. ཨིཏརེསཾ ཡཐཱརཧཾ ཨིཏརཱནིཔི.

ཨཝསེསམནཱཡཏནསྶཱཏི ཨེཏྠ ‘‘པཉྩཀྑནྡྷབྷཝེ པནཱ’’ཏི ཨེཏསྶ ཨནུཝཏྟམཱནཏྟཱ པཉྩཝོཀཱརབྷཝེ ¶ ཨེཝ པཝཏྟམཱནཾ པཉྩཝིཉྙཱཎེཧི ཨཝསེསཾ མནཱཡཏནཾ ཝུཏྟནྟི དཊྛབྦཾ. ནཱམརཱུཔསྶ སཧཛཱཏཱདིསཱདྷཱརཎཔཙྩཡབྷཱཝོ, སམྤཡུཏྟཱདིཨསཱདྷཱརཎཔཙྩཡབྷཱཝོ ཙ ཡཐཱསམྦྷཝཾ ཡོཛེཏབྦོ. ‘‘རཱུཔཔཙྩཡཱ པཉྩཱཡཏནཱནཱི’’ཏི ཨཡམྤི ནཡོ ལབྦྷཏི ནིརོདྷསམཱཔནྣཱནཾ ཝསེན, སོ པན ཨཔཙུརབྷཱཝཏོ ཡེབྷུཡྻེན ཙ པཊིསནྡྷིཡཾ པཙྩཡབྷཱུཏསྶེཝ ནཱམརཱུཔསྶ པཝཏྟིཡཾ པཙྩཡབྷཱཝོ ཝིབྷཱཝིཏོཏི ན དསྶིཏོཏི ཝེདིཏབྦཾ.

སལཱ༹ཡཏནཔཙྩཡཱཕསྶཔདཝིཏྠཱརཀཐཱཝཎྞནཱ

༦༤༢. བཱཝཱིསཏིཡཱ ལོཀིཡཝིཔཱཀཝིཉྙཱཎེཧི སམྤཡུཏྟཱ བཱཝཱིསཏིལོཀིཡཝིཉྙཱཎསམྤཡུཏྟཱ. ཏཏོ ཨེཝ བཱཝཱིསཏི.

ཏཏྠཱཏི ཏསྨིཾ སལཱ༹ཡཏནེ, ཏེསུ ཚསུ ཨཱཡཏནེསཱུཏི ཨཏྠོ. ཨཛ྄ཛྷཏྟནྟི སསནྟཏིཔརིཡཱཔནྣམེཝ གཎྷཱཏི. ཏཉྷི སསནྟཏིཔརིཡཱཔནྣཀམྨནིབྦཏྟཾ ཏཱདིསསྶ ཕསྶསྶ པཙྩཡོ ཧོཏི. རཱུཔཱདཱིནི, པན བཧིདྡྷཱ ཨནུཔཱདིནྣཱནི ཙ ཕསྶསྶ ཨཱརམྨཎཾ ཧོནྟི, ན ཏཱནི ཙཀྑཱདཱིནི ཝིཡ སསནྟཏིཔརིཡཱཔནྣཀམྨཀིལེསནིམིཏྟཔྤཝཏྟིབྷཱཝེན ཕསྶསྶ པཙྩཡཱ ཧོནྟཱིཏི པཋམཱཙརིཡཝཱདེ ན གཧིཏཱནི, དུཏིཡཱཙརིཡཝཱདེ པན ཡཐཱ ཏཐཱ ཝཱ པཙྩཡབྷཱཝེ སཏི ན སཀྐཱ ཝཛྫེཏུནྟི གཧིཏཱནི.

ཏཏྠཱཏི སལཱ༹ཡཏནཔཙྩཡཱ ཕསྶཔདེ. ཡེ ཏཱཝ ཨཱཙརིཡཱ མཧཱཝིཧཱརཝཱསིནོཝ ཡཐཱ ཝིཉྙཱཎཾ, ཨེཝཾ ནཱམརཱུཔཾ, སལཱ༹ཡཏནཾ, ཕསྶཾ, ཝེདནཉྩ པཙྩཡཾ, པཙྩཡུཔྤནྣཉྩ སསནྟཏིཔརིཡཱཔནྣཾ དཱིཔེནྟཱ ཝིཔཱཀམེཝ ཨིཙྪནྟི. ‘‘ཚཊྛཱཡཏནཔཙྩཡཱ ཕསྶོ’’ཏི ཨབྷིདྷམྨབྷཱཛནཱིཡཔཱལི༹ (ཝིབྷ. ༢༤༣) ཨཱརུཔྤཾ སནྡྷཱཡ ཝུཏྟཱཏི ‘‘ཚཊྛཱཡཏནཔཙྩཡཱ ཕསྶོཏི པཱལི༹ཨནུསཱརཏོ’’ཏི ཝུཏྟཾ.

སབྦེ ཕསྶཱ ན སམྦྷོནྟཱིཏི ཡོཛནཱ. ཡདི སབྦཱཡཏནེཧི ཨེཀོ ཕསྶོ སམྦྷཝེཡྻ, ‘‘སལཱ༹ཡཏནཔཙྩཡཱ ཕསྶོ’’ཏི ཨེཀསྶ ཝཙནཾ ཡུཛྫེཡྻ ¶ , ཨཐཱཔི ཨེཀམྷཱ ཨཱཡཏནཱ སབྦེ ཕསྶཱ སམྦྷཝེཡྻུཾ, ཏཐཱཔི སབྦཱཡཏནེཧི སབྦཕསྶསམྦྷཝཏོ ཨཱཡཏནབྷེདེན ཕསྶབྷེདོ ནཏྠཱིཏི ཏདབྷེདཝསེན ཨེཀསྶ ཝཙནཾ ཡུཛྫེཡྻ, ཏཐཱ པན ཨསམྦྷཝཏོ ན ཡུཏྟནྟི ཙོདེཏི ‘‘ན སབྦཱཡཏནེཧཱི’’ཏིཨཱདིནཱ ¶ . ཨཉྙསྶཱཔི ཝཱ ཨསམྦྷཝནྟསྶ ཝིདྷཱནསྶ བོདྷནཏྠམེཏཾ ཝུཏྟཾ ‘‘ནཱཔི ཨེཀམྷཱ ཨཱཡཏནཱ སབྦེ ཕསྶཱ’’ཏི. ‘‘ན སབྦཱཡཏནེཧི ཨེཀོ ཕསྶོ སམྦྷོཏཱི’’ཏི ཨིདམེཝ པན ཨེཀཕསྶཝཙནསྶཱཡུཏྟཏྟདཱིཔཀཾ ཀཱརཎནྟི ཝེདིཏབྦཾ. ནིདསྶནཝསེན ཝཱ ཨེཏཾ ཝུཏྟཾ. ནཱཔི ཨེཀམྷཱ ཨཱཡཏནཱ སབྦེ ཕསྶཱ སམྦྷོནྟི, ཨེཝཾ ན སབྦཱཡཏནེཧི ཨེཀོ ཕསྶོ སམྦྷོཏི. ཏསྨཱ ཨེཀསྶ ཝཙནཾ ཨཡུཏྟནྟི. པརིཧཱརཾ པན ཨནེཀཱཡཏནེཧི ཨེཀཕསྶསྶ སམྦྷཝཏོཏི དསྶེནྟོ ‘‘ཏཏྲིདཾ ཝིསྶཛྫན’’ནྟིཨཱདིམཱཧ. ཨཝསེསསམྤཡུཏྟདྷམྨཱཡཏནཱ ཕསྶཝཛྫིཏཱ ཏཾསམྤཡུཏྟཙེཏསིཀཱ དྷམྨཱ.

ཨེཀོཔི ཨནེཀཱཡཏནཔྤབྷཝོ ཨེཀོཔནེཀཱཡཏནཔྤབྷཝོ.

ཚདྷཱ པཙྩཡཏྟེ པཉྩ ཝིབྷཱཝཡེ, ཨེཀཾ ནཝདྷཱ པཙྩཡཏྟེ, བཱཧིརཱནི ཚ ཨཱཡཏནཱནི ཨཱརམྨཎཱདིནཱ ཡཐཱསམྦྷཝཾ པཙྩཡཏྟེ ཝིབྷཱཝཡེཏི སམྦནྡྷོ.

ཨནེཀབྷེདསྶཱཏི ཀུསལཝིཔཱཀཱདིཔཉྩདྭཱརཱདིཝསེན ཨནེཀཝིདྷསྶ དྭིཔཉྩཝིཉྙཱཎསམྤཡུཏྟཝཛྫསྶ ཝིཔཱཀཕསྶསྶ. ཏཱནི ཙཱཏི རཱུཔཱཡཏནཱདཱིནི. ‘‘མནོ ཙ ནེསཾ གོཙརཝིསཡཾ པཙྩནུབྷོཏཱི’’ཏི (མ. ནི. ༡.༤༥༥) ཧི ཝུཏྟཾ. ཏཐཱ ཙཱཏི པཙྩུཔྤནྣཱནི རཱུཔཱདཱིནི པཙྩུཔྤནྣཉྩ དྷམྨཱཡཏནཔརིཡཱཔནྣཾ རཱུཔརཱུཔཾ སནྡྷཱཡ ཝུཏྟཾ. ཨཱརམྨཎཔཙྩཡམཏྟེནཱཏི ཏཾ སབྦཾ ཨཔཙྩུཔྤནྣཾ, ཨཉྙཉྩ དྷམྨཱཡཏནཾ སནྡྷཱཡ ཝུཏྟཾ.

ཕསྶཔཙྩཡཱཝེདནཱཔདཝིཏྠཱརཀཐཱཝཎྞནཱ

༦༤༣. དྭཱརཏོ སལེ༹ཝཱཏི པབྷཝསཱམཉྙཏོ ཨེཀཝིདྷཱཔི ཨུཔྤཏྟིདྭཱརཏོ ཚ ཨེཝ ཧོནྟཱིཏི ཚལེ༹ཝ ཝེདནཱ ཝུཏྟཱ.

ཙིཏྟབྷེདེན ཨེཀཱུནནཝུཏིཝིདྷཱཔི ཨིདྷཱདྷིཔྤེཏཱ ཨེཝ དསྶེཏུཾ ‘‘ཝེདནཱསུ པནཱ’’ཏིཨཱདི ཝུཏྟཾ. ‘‘སེསཱན’’ནྟི ཨེཏྠ སམྤཊིཙྪནསམྤཡུཏྟཱཡ ཙཀྑུསམྥསྶཱདཡོ པཉྩ ཡདིཔི ཨནནྟརཱདཱིཧི པཙྩཡཱ ཧོནྟི, ཨནནྟརཱདཱིནཾ པན ¶ ཨུཔནིསྶཡེ ཨནྟོགདྷཏྟཱ སནྟཱིརཎཏདཱརམྨཎཱནཉྩ སཱདྷཱརཎསྶ ཏསྶ ཝསེན ‘‘ཨེཀདྷཱ’’ཏི ཝུཏྟཾ. ཨེཀེཀསྨིཾ དྭཱརེ ཧི ཙཀྑུདྭཱརཱདཱིསུ ཨུཔྤནྣཙཀྑུཝིཉྙཱཎཱདཱིཧི ¶ སཧཛཱཏཱ ཕསྶཱ སཀསཀཝཱིཐཱིསུ སམྤཊིཙྪནཱདཱིཧི སམྤཡུཏྟཝེདནཱནཾ, མནོདྭཱརེ ཏདཱརམྨཎཝསེནེཝ པཝཏྟཱནཾ ཏེབྷཱུམཀཝིཔཱཀཝེདནཱནམྤི སཧཛཱཏམནོསམྥསྶསངྑཱཏོ སོ ཕསྶོ ཨཊྛདྷཱ པཙྩཡོ ཧོཏཱིཏི ཡོཛེཏབྦཾ.

རཱུཔཱརཱུཔཱཝཙརཝིཔཱཀཝེདནཱ པཊིསནྡྷིཨཱདིཝསེནེཝ པཝཏྟནྟི, ཀཱམཱཝཙརཱཔི ཨེཀཙྩཱཏི ‘‘ཏེབྷཱུམཀཝིཔཱཀཝེདནཱནམྤཱི’’ཏི ཝུཏྟཾ. ཏཱསམྤི ཧི སཧཛཱཏམནོསམྥསྶོ ཨཊྛདྷཱཝ པཙྩཡོ ཧོཏི. པཙྩཡཾ ཨནུཔཱདིནྣམྤི ཀེཙི ཨིཙྪནྟཱིཏི ‘‘ཡཱ པནཱ’’ཏིཨཱདིནཱ མནོདྭཱརཱཝཛྫནསམྤཡུཏྟཕསྶསྶ པཙྩཡབྷཱཝོ ཝུཏྟོ. ཏཉྩ མུཁམཏྟདསྶནཾ དཊྛབྦཾ. ཨེཏེན ནཡེན སབྦསྶ ཨནནྟརསྶ, ཨནཱནནྟརསྶ ཙ ཕསྶསྶ ཏསྶཱ ཏསྶཱ ཝིཔཱཀཝེདནཱཡ ཨུཔནིསྶཡཏཱ ཡོཛེཏབྦཱཏི.

ཝེདནཱཔཙྩཡཱཏཎྷཱཔདཝིཏྠཱརཀཐཱཝཎྞནཱ

༦༤༤. ཨིདྷཱཏི ཨིམསྨིཾ ལོཀེ, ཨིམསྨིཾ ཝཱ སཱསནེ ཚ ཏཎྷཱ དཱིཔིཏཱ. ཨིདྷཱཏི ཝཱ ཨིམསྨིཾ ཝེདནཱཔཙྩཡཱ ཏཎྷཱཔདེ. ཏཏྠཱཏི ཏཱསུ ཚསུ ཏཎྷཱསུ.

ཨེཀེཀཱཡ སསྶཏདིཊྛིསཧགཏཱཡ, ཨུཙྪེདདིཊྛིསཧགཏཱཡ ཙ ཏཎྷཱཡ ཏདབྷིནནྡནཱནུགུཎོ རཱུཔཱདཱིསུ པཝཏྟིཨཱཀཱརོ, ཀེཝལཾ ཀཱམསྶཱདཝསེན པཝཏྟིཡཱ ཝིསིཊྛཱཀཱརཏྟཱ ཝུཏྟཔྤཝཏྟིཨཱཀཱརཏོ ཏཎྷཱཡ ཏིཝིདྷཏཱ.

མམཏྟེནཱཏི སམྤིཡཱཡནེན, ཨསྶཱདནཏཎྷཱཡ ཨིཙྩེཝ ཝུཏྟཾ ཧོཏི. ཏཏྠ པུཏྟོ ཝིཡ ཝེདནཱ དཊྛབྦཱ, ཁཱིརཱདཡོ ཝིཡ ཝེདནཱཡ པཙྩཡབྷཱུཏཱ རཱུཔཱདཡོ, ཁཱིརཱདིདཱཡིཀཱ དྷཱཏི ཝིཡ རཱུཔཱདིཚལཱ༹རམྨཎདཱཡཀཱ ཙིཏྟཀཱརཱདཡོ ཚ. ཏཏྠ སུཁསམྥསྶཝཏྠདཱཡཀོ ཏནྟཝཱཡོ, ཝེཛྫོ རསཱཡཏནོཛཱཝསེན, ཏདུཔཏྠམྦྷིཏཛཱིཝིཏཝསེན ཙ དྷམྨཱརམྨཎསྶ དཱཡཀོཏི དཊྛབྦོ. སབྦཱཔེསཱ ཨཊྛསཏཔྤབྷེདཱཔི.

ཨཱརམྨཎཔཙྩཡོ ཨུཔྤཛྫམཱནཱཡ ཨཱརམྨཎམཏྟམེཝ ཧོཏི, ན ཨུཔནིསྶཡོ ཝིཡ ཨུཔྤཱདཀོཏི ཨུཔྤཱདཀསྶ ཨུཔནིསྶཡསྶེཝ ཝསེན ‘‘ཨེཀདྷཱཝཱ’’ཏི ¶ ཝུཏྟཾ. ཨུཔནིསྶཡེན ཝཱ ཨཱརམྨཎཱུཔནིསྶཡོ ¶ སངྒཧིཏོ. ཏེན ཙ ཨཱརམྨཎབྷཱཝེན ཏཾསབྷཱགོ ཨཉྙོཔི ཨཱརམྨཎཔཙྩཡབྷཱཝོ དཱིཔིཏོ ཧོཏཱིཏི ཨུཔནིསྶཡཝསེནེཝ པཙྩཡབྷཱཝོ ཝུཏྟོཏི ཝེདིཏབྦོ.

‘‘ཡསྨཱ ཝཱ’’ཏིཨཱདིནཱ ན ཀེཝལཾ ཝིཔཱཀསུཁཝེདནཱ ཨེཝ, ཏིསྶོཔི པན ཝེདནཱ ཝིཔཱཀཱ ཝིསེསེན ཏཎྷཱཡ ཨུཔནིསྶཡཔཙྩཡོ, ཨཝིསེསེན ཨིཏརཱ ཙཱཏི དསྶེཏི. ཨུཔེཀྑཱ པན སནྟཏྟཱ, སུཁམིཙྩེཝ བྷཱསིཏཱཏི ཏསྨཱ སཱཔི བྷིཡྻོ ཨིཙྪནཝསེན ཏཎྷཱཡ ཨུཔནིསྶཡོཏི ཨདྷིཔྤཱཡོ. ཨུཔེཀྑཱ པན ཨཀུསལཝིཔཱཀབྷཱུཏཱ ཨནིཊྛཏྟཱ དུཀྑེ ཨཝརོདྷེཏབྦཱ, ཨིཏརཱ ཨིཊྛཏྟཱ སུཁེཏི སཱ དུཀྑཾ ཝིཡ, སུཁཾ ཝིཡ ཙ ཨུཔནིསྶཡཔཙྩཡོ ཧོཏཱིཏི སཀྐཱ ཝཏྟུཾ. ‘‘ཝེདནཱཔཙྩཡཱ ཏཎྷཱ’’ཏི ཝཙནེན སབྦསྶ ཝེདནཱཝཏོ པཙྩཡསྶ ཨཏྠིཏཱཡ ཏཎྷུཔྤཏྟིཔྤསངྒེ ཏནྣིཝཱརཎཏྠམཱཧ ‘‘ཝེདནཱཔཙྩཡཱ ཙཱཔཱི’’ཏིཨཱདི.

ནནུ ‘‘ཨནུསཡསཧཱཡཱ ཝེདནཱ ཏཎྷཱཡ པཙྩཡོ’’ཏི ཝཙནསྶ ཨབྷཱཝཱ ཨཏིཔྤསངྒནིཝཏྟིཾ ན སཀྐཱ ཀཱཏུནྟི? ན, ཝཊྚཀཐཱཡ པཝཏྟཏྟཱ. ཝཊྚསྶ ཙ ཨནུསཡཝིརཧེ ཨབྷཱཝཏོ ཨནུསཡསཧིཏཱཝ པཙྩཡོཏི ཨཏྠཏོ ཝུཏྟམེཝེཏཾ ཧོཏཱིཏི. ཨཐ ཝཱ ‘‘ཨཝིཛྫཱཔཙྩཡཱ’’ཏི ཨནུཝཏྟམཱནཏྟཱ ཨནུསཡསཧིཏཱཝ པཙྩཡོཏི ཝིཉྙཱཡཏི. ཝེདནཱཔཙྩཡཱ ཏཎྷཱཏི ཙེཏྠ ཝེདནཱཔཙྩཡཱ ཨེཝ ཏཎྷཱ, ན ཝེདནཱཡ ཝིནཱཏི ཨཡཾ ནིཡམོ ཨིཙྪིཏོ, ན ཝེདནཱཔཙྩཡཱ ཏཎྷཱ ཧོཏིཡེཝཱཏི, ཏསྨཱ ཨཏིཔྤསངྒོ ཨེཏྠ ནཏྠི ཨེཝཱཏི.

ཝུསཱིམཏོཏི ཝུསིཏཝཏོ, ཝུསིཏབྲཧྨཙརིཡཝཱསསྶཱཏི ཨཏྠོ. ཝུསྶཏཱིཏི ཝཱ ཝུསཱིཏི མགྒོ ཝུཙྩཏི, སོ ཨེཏསྶ ཝུཏྠོ ཨཏྠཱིཏི ཝུསཱིམཱ, ཨུཀྐཊྛནིདྡེསེན ཨརཧཱ. ཨགྒཕལཾ ཝཱ པརིནིཊྛིཏཝཱསཏྟཱ ‘‘ཝུསཱི’’ཏི ཝུཙྩཏི, ཏཾ ཨེཏསྶ ཨཏྠཱིཏི ཝུསཱིམཱ.

ཏཎྷཱཔཙྩཡཱཨུཔཱདཱནཔདཝིཏྠཱརཀཐཱཝཎྞནཱ

༦༤༥. ཨཏྠཝིབྷཱགོ ཨཏྠསྶ ཝིབྷཛནཱ. ཝཏྠུསངྑཱཏཾ ཀཱམནྟི ཀཱམགུཎསཉྙིཏཾ རཱུཔཱདིཨཱརམྨཎམཱཧ. ཨུཔཱདིཡཏཱིཏི ཀཱམཝསེན གཎྷཱཏི, དལ༹ྷཾ ཨསྶཱདེཏཱིཏི ཨཏྠོ. ཀཱམཾ ཨུཔཱདིཡཏཱིཏི ཨེཏྠ ཀམྨསཱདྷནོ ཀཱམསདྡོ ¶ , ཀཱམོ ཙ སོཏི ཨེཏྠ ཀཏྟུསཱདྷནོ ཀིལེསཀཱམསྶ ཨདྷིཔྤེཏཏྟཱ. ཨུཔཱདཱནསདྡོ པན ཨུབྷཡཏྠཱཔི ཀཏྟུསཱདྷནོཝ. དལ༹ྷཏྠོ བྷུསཏྠོ. ཡཐཱ བྷུསོ ཨཱཡཱསོ ¶ ཨུཔཱཡཱསོ, བྷུསཾ ཀུཊྛཾ ཨུཔཀུཊྛཾ, ཨེཝཾ ཨིདྷཱཔཱིཏི ཨཱཧ ‘‘ཨུཔཱཡཱསཨུཔཀུཊྛཱདཱིསུ ཝིཡཱ’’ཏི. པུརིམདིཊྛིཾ ཨུཏྟརདིཊྛི ཨུཔཱདིཡཏཱིཏི པུརིམདིཊྛིཾ སསྶཏབྷཱཝེན གཎྷནྟཱི ཨུཔཱདིཡཏི, པུརིམདིཊྛིཨཱཀཱརེན ཝཱ ཨུཏྟརདིཊྛི ཨུཔྤཛྫམཱནཱ ཏེནེཝ པུརིམདིཊྛིཾ དལ༹ྷཾ ཀརོནྟཱི ཏཾ ཨུཔཱདིཡཏཱིཏི ཝུཏྟཱ. ཨཐ ཝཱ པུརིམདིཊྛིཾ ཨུཏྟརདིཊྛི ཨུཔཱདིཡཏཱིཏི ‘‘སསྶཏོ ཨཏྟཱ’’ཏི (དཱི. ནི. ༡.༣༡) ཨིདཾ པུརིམདིཊྛིཾ ཨུཔཱདིཡམཱནཾ ཨུཏྟརདིཊྛིཾ ནིདསྶེཏུཾ ཝུཏྟཾ. ཡཐཱ ཧི ཨེསཱ དལ༹ྷཱིཀརཎཝསེན པུརིམཾ ཨུཏྟརཱ ཨུཔཱདིཡཏི, ཨེཝཾ ‘‘ནཏྠི དིནྣ’’ནྟིཨཱདིཀཱཔཱིཏི (མ. ནི. ༡.༤༤༥; ༢.༩༤; ༣.༩༡, ༡༡༦, ༡༣༦; དྷ. ས. ༡༢༢༡; ཝིབྷ. ༩༣༨). ཨཏྟགྒཧཎཾ པན ཨཏྟཝཱདུཔཱདཱནནྟི ན ཨིདཾ དིཊྛུཔཱདཱནདསྶནནྟི དཊྛབྦཾ. ལོཀོ ཙཱཏི ཝཱ ཨཏྟགྒཧཎཝིནིམུཏྟཾ གཧཎཾ དིཊྛུཔཱདཱནབྷཱུཏཾ ཨིདྷ པུརིམདིཊྛིཨུཏྟརདིཊྛིཝཙནེཧི ཝུཏྟནྟི ཝེདིཏབྦཾ.

སཱིལབྦཏཾ ཨུཔཱདིཡཏཱིཏི ཨེཏྠ ཨསུདྡྷིམགྒགོསཱིལཱདིསམཱདཱནཝསེན སཱིལཾ, ཨཝཱིཏིཀྐམནཝསེན ཝཏཾ. ཨུབྷཡཐཱཔི ཝཱ སཱིལཾ, ཏཔོཀམྨབྷཱཝེན གཧིཏཏཱཡ ཝཏཾ, གཝཱདིཔཀཏིབྷཱཝནཱ. ཨཏྟནོ ཝཱ གཝཱདིབྷཱཝཱདྷིཊྛཱནཾ སཱིལཾ, ‘‘གཙྪནྟོ བྷཀྑེཏི, ཏིཊྛནྟོ མུཏྟེཏཱི’’ཏིཨཱདིནཱ གཝཱདིཀིརིཡཱཀརཎཾ ཝཏཾ. ཏཾཏཾཨཀིཙྩསམྨཏཏོ ཝཱ ནིཝཏྟི སཱིལཾ, ཏཾསམཱདཱནཝཏོཝེས བྷོཛནཀིཙྩཀརཎཱདིཝིསེསཔཊིཔཏྟི ཝཏཾ, ཏཾ སཱིལབྦཏཾ ཨསུདྡྷིམགྒཾ ‘‘སུདྡྷིམགྒོ’’ཏི པརཱམསནྟོ ཏཐཱ ཨབྷིནིཝིསནྟོ ཨུཔཱདིཡཏི, ཏཾ གཱཧཾ དལ༹ྷཾ གཎྷཱཏཱིཏི ཨཏྠོ. སཱིལབྦཏསཧཙརིཏཾ པརཱམཱསཾ སཱིལབྦཏནྟི གཧེཏྭཱ ཨཱཧ ‘‘སཱིལབྦཏཉྩ ཏཾ ཨུཔཱདཱནཉྩཱ’’ཏི. གོསཱིལགོཝཏཱདཱིནཱིཏི ཙ ཏཐཱབྷཱུཏཾ དིཊྛིཾ ཝདཏི. ཏེནེཝཱཧ ‘‘སཡམེཝ ཨུཔཱདཱནཱནཱི’’ཏི. ཨབྷིནིཝེསཏོཏི ཨབྷིནིཝེསབྷཱཝཏོ, ཨབྷིནིཝིསནཏོ ཝཱ. ཨཏྟཝཱདུཔཱདཱནནྟི ‘‘ཨཏྟཱ’’ཏི ཝཱདསྶ པཉྙཱཔནསྶ, གཧཎསྶ ཙ ཀཱརཎབྷཱུཏཱ དིཊྛཱིཏི ཨཏྠོ. ཨཏྟཝཱདམཏྟམེཝཱཏི ཨཏྟསྶ ཨབྷཱཝཱ ‘‘ཨཏྟཱ’’ཏི ཨིདཾ ཝཙནམཏྟམེཝ. ཨུཔཱདིཡནྟཱིཏི དལ༹ྷཾ གཎྷནྟི. ཀཐཾ? ‘‘ཨཏྟཱ’’ཏི. ‘‘ཨཏྟཱ’’ཏི ཧི ཨབྷིནིཝིསནྟཱ ཝཙནམཏྟམེཝ དལ༹ྷཾ ཀཏྭཱ གཎྷནྟཱིཏི ཨཏྠོཏི. ཨེཝཾ ‘‘ཨཏྟཝཱདམཏྟམེཝ ཨུཔཱདིཡནྟཱི’’ཏི ཝུཏྟཾ ¶ . ཨཏྟཝཱདམཏྟནྟི ཝཱ ཝཱཙཱཝཏྠུམཏྟམེཝཱཧ. ཝཱཙཱཝཏྠུམཏྟམེཝ ཧི ‘‘ཨཏྟཱ’’ཏི ཨུཔཱདིཡནྟི ཨཏྟསྶ ཨབྷཱཝཱཏི.

‘‘དྷམྨསངྑེཔཝིཏྠཱརེ པན ཀཱམུཔཱདཱནཾ སངྑེཔཏོ ཏཎྷཱདལ༹ྷཏྟཾ, སེསུཔཱདཱནཏྟཡཾ དིཊྛིམཏྟམེཝ, ཝིཏྠཱརཏོ པནཱ’’ཏི ཨེཝཾ དྷམྨསངྑེཔཝིཏྠཱརསམུདཱཡཏོ ཏདཝཡཝབྷཱུཏཾ སངྑེཔཾ, ཝིཏྠཱརཉྩ ནིདྡྷཱརེཏཱིཏི. དྷམྨསངྑེཔཝིཏྠཱརེཏི ནིདྡྷཱརཎེ བྷུམྨཾ དཊྛབྦཾ. ཀཱམེསཱུཏི པཉྩསུ ཀཱམགུཎེསུ ¶ . ཀཱམཙྪནྡོཏི ཀཱམསངྑཱཏོ ཚནྡོ, ན ཀཏྟུཀམྱཏཱཚནྡོ, ན ཙ དྷམྨཙྪནྡོ. ཀཱམནཝསེན, རཉྫནཝསེན ཙ ཀཱམོཡེཝ རཱགོ ཀཱམརཱགོ, ཨེཝཾ སབྦཏྠ ཀཱམཏྠཾ ཝིདིཏྭཱ ཀཱམོ ཨེཝ ནནྡནཊྛེན ཀཱམནནྡཱི, ཏཎྷཱཡནཊྛེན ཀཱམོཡེཝ ཀཱམཏཎྷཱ, སིནེཧནཊྛེན ཀཱམོ ཨེཝ ཀཱམསྣེཧོ, པརིདཡ྄ཧནཊྛེན ཀཱམཔརིལཱ༹ཧོ, མུཙྪནཊྛེན ཀཱམམུཙྪཱ, གིལིཏྭཱ པརིནིཊྛཱཔནཊྛེན ཀཱམཛ྄ཛྷོསཱནཾ ཝེདིཏབྦཾ. ཨཔྤཏྟཝིསཡཔཏྠནཱ ཏཎྷཱ ཨཱརམྨཎེ པརིཏསྶནབྷཱཝཏོ, སམྤཏྟཝིསཡགྒཧཎཾ ཨུཔཱདཱནཾ ཨཱརམྨཎེ དལ༹ྷགྒཱཧབྷཱཝཏོ. ཨཔྤིཙྪཏཱཔཊིཔཀྑཱ ཏཎྷཱ ཝིསཡཱབྷིམུཁབྷཱཝཏོ, སནྟུཊྛིཔཊིཔཀྑཱ ཨུཔཱདཱནཾ ཏཎྷཱདལ༹ྷཏྟཾ ཧུཏྭཱ ཨཏྲིཙྪཏཱབྷཱཝཏོ. པརིཡེསནདུཀྑམཱུལཱ ཏཎྷཱ ཨཔྤཏྟཝིསཡཔཏྠནཱབྷཱཝཏོ, ཨཱརཀྑདུཀྑམཱུལཾ ཨུཔཱདཱནཾ སམྤཏྟཝིསཡགྒཧཎབྷཱཝཏོ.

ནཏྠི དིནྣནྟིཨཱདཱིསུ དིནྣནྟི དཱནམཱཧ, ཏཾ ཨཕལཏྟཱ རཱུཔཾ ཝིཡ དཱནཾ ནཱམ ན ཧོཏཱིཏི པཊིཀྑིཔཏི. ཡིཊྛཾ ཝུཙྩཏི མཧཱཝིཛིཏཡཉྙསདིསོ མཧཱཡཱགོ. ཧུཏནྟི ཨཱཧུནཔཱཧུནམངྒལཀིརིཡཱ. ཏཏྠ ཨཱམནྟེཏྭཱ ཧཝནཾ དཱནཾ ཨཱཧུནཾ, པཱཧུནཱནཾ ཨཏིཐཱིནཾ ཨཏིཐིཀིརིཡཱ པཱཧུནཾ, ཨཱཝཱཧཱདཱིསུ མངྒལཏྠཾ དཱནཾ མངྒལཀིརིཡཱ, དས ཀུསལཀམྨཔཐཱ སུཀཏཀམྨཱནི ནཱམ, དས ཨཀུསལཀམྨཔཐཱ དུཀྐཊཀམྨཱནི ནཱམ, ཕལཾ ཝིཔཱཀོཏི ནིསྶནྡཱདིཕལཉྩེཝ ནིཔྤརིཡཱཡཝིཔཱཀོ ཙ ནཏྠཱིཏི ཡོཛནཱ. ཡཐཱ ཙེཏྠ, ཨེཝཾ ‘‘ནཏྠི དིནྣ’’ནྟིཨཱདཱིསུཔི ཕལཝིཔཱཀཔཊིཀྑེཔོཝ དཊྛབྦོ. ནཏྠི ཨཡཾ ལོཀོཏི པརལོཀེ ཋིཏོ ཨིམཾ ལོཀཾ ‘‘ནཏྠཱི’’ཏི གཎྷཱཏི. ཨིམཾ ཧི ལོཀཾ ཨཝེཀྑིཏྭཱ པརལོཀོ, པརཉྩ ལོཀཾ ཨཝེཀྑིཏྭཱ ཨཡཾ ལོཀོ ཧོཏི གནྟབྦཏོ, ཨཱགནྟབྦཏོ ཙཱཏི པརལོཀཏོ ཨིདྷཱགམནསྶ ཨབྷཱཝཱ ཏཏྠེཝ ཨུཙྪིཛྫནཏོ ཙིཏྟེན པརལོཀེ ཋིཏོ ཨིམཾ ལོཀཾ ‘‘ནཏྠཱི’’ཏི གཎྷཱཏཱིཏི ཨཏྠོ. ན ཧི ཨཡཾ དིཊྛི པརལོཀེ ཋིཏསྶེཝ ཧོཏཱིཏི. ནཏྠི པརལོཀོཏི ཨིདྷལོཀེ ¶ ཋིཏོ པརལོཀཾ ‘‘ནཏྠཱི’’ཏི གཎྷཱཏི. ཨིདྷཱཔི ཝུཏྟནཡེནེཝ ཨཏྠོ ཝེདིཏབྦོ. ཨཡཾ ཝཱ ཨེཏྠ ཨཏྠོ – སཾསརཎཔྤདེསོ ཨིདྷལོཀོ, པརལོཀོ ཙ ནཱམ ཀོཙི ནཏྠི སཾསརཎསྶ ཨབྷཱཝཱ ཏཏྠ ཏཏྠེཝ ཨུཙྪིཛྫནཏོཏི.

པུརིམབྷཝཏོ པཙྪིམབྷཝེ ཨུཔཔཏནཾ ཨུཔཔཱཏོ, སོ ཡེསཾ སཱིལཾ, ཏེ ཨོཔཔཱཏིཀཱ. ཏེ པན ཙཝནཀཨུཔཔཛྫནཀསཏྟཱ ནཏྠཱིཏི དསྶེནྟོ ཨཱཧ ‘‘ནཏྠི སཏྟཱ ཨོཔཔཱཏིཀཱ’’ཏི. ནཏྠི ལོཀེ སམཎ…པེ… པཝེདེནྟཱིཏི ཨནུལོམཔཊིཔདཾ པཊིཔནྣཏྟཱ སམྨགྒཏཱ སམྨཱཔཊིཔནྣཱ དྷམྨིཀསམཎབྲཱཧྨཎཱ ¶ ལོཀསྨིཾ ནཏྠི, ཡེ ཨིམཉྩ ལོཀཾ, པརཉྩ ལོཀཾ ཨཏྟནཱ ཨེཝ ཨབྷིཝིསིཊྛེན ཉཱཎེན པཙྩཀྑཏོ ཉཏྭཱ པཝེདནསམཏྠཱ སབྦཉྙུབུདྡྷཱ ནཱམ ནཏྠཱིཏི དསྶེཏི. རཱུཔཾ ཨཏྟཏོ སམནུཔསྶཏཱིཏིཨཱདཱིསུ ཝཏྟབྦཾ ཧེཊྛཱ ཝུཏྟམེཝ.

པཀཏིཨཎུཨཱདཱིནཾ སསྶཏགྒཱཧཔུབྦངྒམོ, སརཱིརསྶ ཨུཙྪེདགྒཱཧཔུབྦངྒམོ ཙ ཏེསཾ གཱཧཱནཾ སཱམིབྷཱུཏོ ཀོཙི སསྶཏོ, ཨུཙྪིཛྫམཱནོ ཝཱ ཨཏྟཱ ཨཏྠཱིཏི ཨཏྟགྒཱཧོ ཀདཱཙི ཧོཏཱིཏི ‘‘ཡེབྷུཡྻེནཱ’’ཏི ཝུཏྟཾ. སྭཱཡཾ ཨཏྟགྒཱཧོ ཨཏྠཏོ ཁནྡྷཱརམྨཎོ ཨེཝ དཊྛབྦོ. ཡེབྷུཡྻེན པཋམཾ ཨཏྟཝཱདུཔཱདཱནནྟིཨཱདིནཱཝ སམྦནྡྷོ. ཡདིཔི བྷཝརཱགཛཝནཝཱིཐི པཋམཾ པཝཏྟཏི གཧིཏཔཊིསནྡྷིཀསྶ བྷཝནིཀནྟིཡཱ པཝཏྟིཏབྦཏྟཱ, སོ པན བྷཝརཱགོ ཏཎྷཱདལ༹ྷཏྟཾ ན ཧོཏཱིཏི མཉྙམཱནོ ན ཀཱམུཔཱདཱནསྶ པཋམུཔྤཏྟིམཱཧ.

ཏཎྷཱ ཀཱམུཔཱདཱནནྟི པན ཝིབྷཱགསྶ ཨཀརཎེ སབྦཱཔི ཏཎྷཱ ཀཱམུཔཱདཱནཾ, ཀརཎེཔི ཝཱ ཀཱམརཱགཏོ ཨཉྙཱཔི ཏཎྷཱ དལ༹ྷབྷཱཝཾ པཏྟཱ ཀཱམུཔཱདཱནནྟི ཏསྶ ཨརཧཏྟམགྒཝཛ྄ཛྷཏཱ ཝུཏྟཱ.

ཨུཔྤཏྟིཊྛཱནབྷཱུཏཱ ཙིཏྟུཔྤཱདཱ ཝིསཡོ. པཉྩུཔཱདཱནཀྑནྡྷཱ ཨཱལཡོ. ཏཏྠ རམཏཱིཏི ཨཱལཡརཱམཱ, པཛཱ. ཏེནེཝ སཱ ཨཱལཡརཱམཏཱ སསནྟཱནེ, པརསནྟཱནེ ཙ པཱཀཊཱ ཧོཏི. ཀཱམཱནནྟི ཝཏྠུཀཱམཱནཾ. ‘‘སུཁདུཀྑཾ ཀམྨུནཱ ཧོཏཱི’’ཏི ཨགྒཧེཏྭཱ ཀོཏཱུཧལམངྒལཱདིབཧུལོ ཧོཏི. སཱ ཀོཏཱུཧལམངྒལཱདིབཧུལཏཱ. ཨསྶ ཀཱམུཔཱདཱནཝཏོ. ཏནྟི དིཊྛུཔཱདཱནཾ, ཨནཏྟནི དྷམྨམཏྟེ ‘‘ཨཏྟཱ’’ཏི མིཙྪཱབྷིནིཝེསསྶ སུཁུམཏརདྷམྨུཔཱདཱནཏཱཡ སུཁུམཏཱ ཝུཏྟཱ. ཨུཔནིསྶཡཝཙནེན ཨཱརམྨཎཱནནྟརཔཀཏཱུཔནིསྶཡཱ ¶ ཝུཏྟཱཏི ཨནནྟརཔཙྩཡཱདཱིནམྤི སངྒཧོ ཀཏོ ཧོཏི.

ཨུཔཱདཱནཔཙྩཡཱབྷཝཔདཝིཏྠཱརཀཐཱཝཎྞནཱ

༦༤༦. ཨཏྠཏོཏི ཝཙནཏྠཏོ. དྷམྨཏོཏི སབྷཱཝདྷམྨཏོ. སཱཏྠཏོཏི སཱཏྠཀཏོ, པུབྦེ ཝུཏྟསྶཔི པུན ཝཙནསྶ སཔྤཡོཛནཏོ. བྷེདསངྒཧཱཏི བྷེདཏོ སངྒཧཏོ, ཝིབྷཱགཏོ ཙེཝ ཝིབྷཏྟསྶ སངྑིཔནཏོ ཙཱཏི ཨཏྠོ. ཡཾ ཡསྶ པཙྩཡོཏི ཡཾ ཡཾ ཨུཔཱདཱནཾ ཡསྶ ཡསྶ བྷཝསྶ པཙྩཡོ ཧོཏི, ཏཏོ ཙཱཏི ཨཏྠོ.

བྷཝཏཱིཏི ¶ བྷཝོཏི ཕལཝོཧཱརེན ཀམྨབྷཝོ ཝུཏྟོ. ཨུཔཔཏྟིབྷཝནིབྦཙནམེཝ ཧི དྭཡསྶཔི སཱདྷཱརཎཾ ཀཏྭཱ ཝུཏྟཾ, བྷཝཏི ཨེཏསྨཱ ཨུཔཔཏྟིབྷཝོཏི ཝཱ. དུཏིཡོ པན ཀམྨབྷཝོ སཏྟསྶ པུནབྦྷཝབྷཱཝེན སཝིསེསཾ བྷཝཏཱིཏི བྷཝོ. ཏཏོ ཨེཝ ན སབྦསྶ བྷཝནྟརསྶ, ཏཾཧེཏུནོ ཝཱ བྷཝབྷཱཝཔྤསངྒོ. དུཝིདྷེནཱཏི དྭཱིཧི ཨཱཀཱརེཧི པཝཏྟིཏོཏི ཨཏྠོ. དུཝིདྷེནཱཏི ཝཱ པཙྩཏྟཏྠེ ཀརཎཝཙནཾ, དུཝིདྷོཏི ཝུཏྟཾ ཧོཏི. ཨཏྠཱིཏི སཾཝིཛྫཏི.

༦༤༧. ཨཏྟནོ པཙྩཡེཧི ཀརཱིཡཏཱིཏི ཀམྨཾ, ཨཏྟནོ ཕལཾ ཀརོཏཱིཏི ཀམྨནྟི ཀེཙི, ‘‘ཀམྨ’’ནྟི ཨེཝཾ ཝཏྟབྦཱ ཀམྨསངྑཱཏཱ. པརིཏྟབྷཱུམཀོཏི ཀཱམབྷཱུམཀོ. མཧཱབྷཱུམཀོཏི མཧགྒཏབྷཱུམཀོ. སབྦནྟི ཨནཝསེསཾ. བྷཝཾ གཙྪཏི, གམེཏི ཙཱཏི བྷཝགཱམི. གཙྪཏཱིཏི ཙ ནིཔྥཱདནསམཏྠཏཱཝསེན, ཨཏྟནོ པཝཏྟིཀཱལེ བྷཝཱབྷིམུཁཾ ཧུཏྭཱ པཝཏྟཏཱིཏི ཨཏྠོ, ནིབྦཏྟནམེཝ ཝཱ གམནཾ ཨདྷིཔྤེཏཾ. ‘‘བྷཝགཱམཱི’’ཏི ཙ ཨེཏེན ཀམྨཀྑཡཀརཾ ཀམྨཾ ནིཝཏྟེཏི. ཨཡཉྷི ཝཊྚཀཐཱ, ཏཉྩ ཝིཝཊྚནིསྶིཏནྟི. ཨཔུཉྙཱབྷིསངྑཱརོཏི དྭཱདས ཙེཏནཱཏི ཨུདྡྷཙྩསཧགཏཙེཏནཱཡཔི གཧཎཾ ‘‘ཨཝིཛྫཱཔཙྩཡཱ སངྑཱརཱ’’ཏི ཨེཏྠ ཝིཡ ཝེདིཏབྦཾ. ‘‘བྷཝཔཙྩཡཱ ཛཱཏཱི’’ཏི ཨེཏྠ པན ‘‘སངྑཱརཔཙྩཡཱ ཝིཉྙཱཎ’’ནྟི (མ. ནི. ༣.༡༢༦; མཧཱཝ. ༡; སཾ. ནི. ༢.༡; ཨུདཱ. ༡; ནེཏྟི. ༢༤) ཨེཏྠ ཝིཡ སཱཔི ཨཔནེཏབྦཱ. མནྡབཧུཝིཔཱཀཏཱཏི ཨཔྤམཧཱཝིཔཱཀཏཱ.

‘‘སབྦམྤི བྷཝགཱམིཀམྨནྟི ཨིམིནཱ ཙེཏནཱསམྤཡུཏྟཱ ཨབྷིཛ྄ཛྷཱདཡོ ཝུཏྟཱ’’ཏི ཨེཏེན ཨཱཙཡགཱམིཏཱཡ ཏེསཾ ཀམྨསངྑཱཏཏཱ ཝུཏྟཱཏི ཀམྨབྷཝཔརིཡཱཔནྣཏཾ ¶ པརིཡཱཡེན ཝདཏི, ནིཔྤརིཡཱཡེན པན ཙེཏནཱཝ ཀམྨབྷཝོ. ཝུཏྟཉྷི ‘‘ཀམྨབྷཝོ ཏཱིཧི ཁནྡྷེཧི ཨེཀེནཱཡཏནེན ཨེཀཱཡ དྷཱཏུཡཱ སམྤཡུཏྟོ, ཨེཀེན ཁནྡྷེན ཨེཀེནཱཡཏནེན ཨེཀཱཡ དྷཱཏུཡཱ ཀེཧིཙི སམྤཡུཏྟོ’’ཏི (དྷཱཏུ. ༢༤༤). ཨུཔཔཏྟིབྷཝོ ཏཱིཧིཔི ཏིཀེཧི ཝུཏྟོ ཨུཔཱདིནྣཀྑནྡྷོཝ. ཡཐཱཧ ‘‘ཨུཔཔཏྟིབྷཝོ… ཀཱམབྷཝོ… སཉྙཱབྷཝོ… པཉྩཝོཀཱརབྷཝོ པཉྩཧི ཁནྡྷེཧི ཨེཀཱདསཧཱཡཏནེཧི སཏྟརསཧི དྷཱཏཱུཧི སངྒཧིཏོ’’ཏིཨཱདི (དྷཱཏུ. ༦༧). ཡདི ཧི ཨནུཔཱདིནྣཀཱནམྤི གཧཎཾ སིཡཱ, ‘‘དྭཱདསཧི ཨཱཡཏནེཧི ཨཊྛཱརསཧི དྷཱཏཱུཧཱི’’ཏི ཝཏྟབྦཾ སིཡཱཏི. ཀཱམཏཎྷཱཡ ཀཱམེཏབྦཏོ ཀཱམནིསྶཡཏཱཡ བྷོགཱ ཝིཡ, ཀཱམསཧཙརིཏཏཱཡ ‘‘ཀུནྟཱ པཙརནྟཱི’’ཏི ཝིཡ, ཀཱམཱརམྨཎཏཱཡ ‘‘སུཁཾ རཱུཔ’’ནྟི ཝིཡ, ཀཱམཔཙྩཡཊྛཱནཏཱཡ ‘‘སུཁོ སགྒོ’’ཏི ཝིཡ ཀཱམཱཏི ཨཝཱིཙིཔརནིམྨིཏཝསཝཏྟིཔརིཙྪིནྣཱ ཨུཔཱདིནྣཀྑནྡྷཱ ཝུཙྩནྟི ¶ . རཱུཔཱཝིརཱགཏོ ཡཾ ནིསྶིཏཱ, ཏདུཔཙཱརེན ‘‘མཉྩཱ གྷོསནྟཱི’’ཏི ཝིཡ, ‘‘ཕནྡནདེཝཏཱ’’ཏི ཝིཡ ཙ ‘‘རཱུཔ’’ནྟི ཝུཙྩནྟི བྲཧྨཀཱཡིཀཱཀནིཊྛཔརིཙྪིནྣཱ ཨུཔཱདིནྣཀྑནྡྷཱ.

རཱུཔམེཝ བྷཝོ རཱུཔབྷཝོ, ཏཐཱ ཨརཱུཔནྟི ཨཱཀཱསཱནཉྩཱཡཏནབྷཝགྒཔརིཙྪིནྣཱ ཙཏྟཱརོ ཨུཔཱདིནྣཀྑནྡྷཱ ཝུཙྩནྟི. ཨརཱུཔམེཝ བྷཝོ ཨརཱུཔབྷཝོ. ཀཱམོ ཨེཝ བྷཝོཏི ཀཱམབྷཝོ, སོ པན ཡསྨཱ ཡཐཱཝུཏྟེནཏྠེན ‘‘ཀཱམོ’’ཏི ཝཏྟབྦོ ཧོཏི, ཏསྨཱ ‘‘ཀཱམསངྑཱཏོ བྷཝོ’’ཏི ཝུཏྟཾ. ཀཱམཱཝཙརསཉྙིཏོ ཝཱ བྷཝོ ‘‘ཀཱམསངྑཱཏོ བྷཝོ’’ཏི ཝུཏྟོ. ཏཐཱ རཱུཔཱརཱུཔབྷཝོཏི ཨཱཧ ‘‘ཨེས ནཡོ རཱུཔཱརཱུཔབྷཝེསཱུ’’ཏི. སཉྙཱཝཏཾ བྷཝོཏི ཨེཏྠ ཝནྟུ-སདྡསྶ ལོཔོ དཊྛབྦོ. ཏསྶ ཝཱ ཨཏྠེ ཨཀཱརཾ ཀཏྭཱ ‘‘སཉྙབྷཝོ’’ཏིཔི པཱཋོ. ཏེནཱཧ ‘‘སཉྙཱཝཱ’’ཏིཨཱདི. ཝོཀིཎྞོཏི ཨེཏེན ཝོཀཱརསདྡསྶ ཀམྨསཱདྷནཏམཱཧ. ཝོཀིརཱིཡཏི པསཱརཱིཡཏི ཝིཏྠཱརཱིཡཏཱིཏི ཝོཀཱརོ, ཝོཀིརཎཾ ཝཱ ཝོཀཱརོ, སོ ཨེཀསྶེཝ ཁནྡྷསྶ ཝསེན པཝཏྟཏྟཱ ‘‘ཨེཀོ ཝོཀཱརོ’’ཏི ཝུཏྟོ, པསཊུཔྤཏྟཱིཏི ཨཏྠོ.

༦༤༨. ཀིཉྩཱཔི བྷཝནིདྡེསེ ‘‘སབྦམྤི བྷཝགཱམིཀམྨཾ ཀམྨབྷཝོ’’ཏི (ཝིབྷ. ༢༣༤) ཨིམིནཱ ཙེཏནཱསམྤཡུཏྟདྷམྨཱཔི ཝུཏྟཱ. པུཉྙཱབྷིསངྑཱརཱདཡོཝཱཏི པན ཨཝདྷཱརཎཾ ¶ པཙྩཡདྷམྨཝིསེསེཔི ཨཏྠཔྤབྷེདེན སངྑཱརབྷཝགྒཧཎེསུ ཨཏྠེཝ ཝིསེསོཏི དསྶནཏྠཾ ཀཏཾ. ཏེནཱཧ ‘‘ཨེཝཾ སནྟེཔཱི’’ཏིཨཱདི. སངྑཱརབྷཝཱནཾ དྷམྨབྷེདཏོ ན སངྑཱརཱ ཨེཝ པུན ཝུཏྟཱཏི ‘‘སཱཏྠཀམེཝིདཾ པུནཝཙན’’ནྟི ཨེཏཾ ཨཡུཏྟནྟི ཙེ? ན, བྷཝེཀདེསབྷཱཝེན སངྑཱརཱནཾ བྷཝོཏི པུན ཝུཏྟཏྟཱ. པརེན ཝཱ དྷམྨཝིསེསཾ ཨགྒཧེཏྭཱ པུནཝཙནཾ ཙོདིཏནྟི ཙོདཀཱབྷིལཱསཝསེན ‘‘སཱཏྠཀམེཝིདཾ པུནཝཙན’’ནྟི ཝུཏྟཾ.

༦༤༩. ཀཱམབྷཝཱདིནིབྦཏྟཀསྶ ཀམྨསྶ ཀཱམབྷཝཱདིབྷཱཝོ ཕལཝོཧཱརེན ཨཊྛཀཐཱཡཾ ཝུཏྟོ. སཧཛཱཏཝིཉྙཱཎསྶཔི པཙྩཡབྷཱུཏཾ ཨཝིཛྫཱཧེཏུཀཾ སངྑཱརགྒཧཎེན ཡཾ ཀིཉྩི ཀམྨཾ པུབྦེ ཝུཏྟཾ, ཨིདྷ པན ‘‘སབྦམྤི བྷཝགཱམིཀམྨ’’ནྟི (ཝིབྷ. ༢༣༤) ཝཙནཏོ བྷཝསྶ ནིབྦཏྟཀཾ ཨུཔཱདཱནཧེཏུཀཾ ཝིཔཙྩནཱཡ ཀཏོཀཱསམེཝ བྷཝོཏི ཨདྷིཔྤེཏོ. ཡཾ ཀཱམུཔཱདཱནཔཙྩཡཱ རཱུཔབྷཝནིབྦཏྟཀཾ, ཨརཱུཔབྷཝནིབྦཏྟཀཉྩ ཀམྨཾ ཀརཱིཡཏི, སོ ཀམྨབྷཝོ, ཏདབྷིནིབྦཏྟཱ ཁནྡྷཱ ཨུཔཔཏྟིབྷཝོཏི ཨིམམཏྠཾ ‘‘ཨེས ནཡོ རཱུཔཱརཱུཔབྷཝེསཱུ’’ཏི ཨཏིདིསཏི. དྭེ ཀཱམབྷཝཱཏི ¶ ཀཱམཀམྨབྷཝོ, ཀཱམཱུཔཔཏྟིབྷཝོཏི དྭེ ཀཱམབྷཝཱ. ཨེཝཾ ‘‘དྭེ རཱུཔབྷཝཱ, དྭེ ཨརཱུཔབྷཝཱ’’ཏི ཨེཏྠཱཔི. ཨནྟོགདྷེ ཧི ཝིསུཾ ཨགྒཧེཏྭཱ ཨབྦྷནྟརགཏེ ཨེཝ ཀཏྭཱ ཀཱམབྷཝཱདིཀེ ཀམྨཱུཔཔཏྟིབྷཝཝསེན དུགུཎེ ཀཏྭཱ ཨཱཧ ‘‘ཚ བྷཝཱ’’ཏི.

ཨཝིསེསེནཱཏི ཨུཔཱདཱནཝསེན བྷེདཾ ཨཀཏྭཱ. ཨུཔཱདཱནབྷེདཱཀརཎེནེཝ ཙ དྭཱདསཔྤབྷེདསྶ སངྒཧཝསེན སངྒཧཏོ ‘‘ཚ བྷཝཱ’’ཏི ཝུཏྟཾ. ཨནུཔགམྨཱཏི ཨནིསྶཱཡ, ཨནཱམསིཏྭཱཏི ཨཏྠོ.

༦༥༠. གོསཱིལེན, ཀུཀྐུརསཱིལེན ཙ སམཏྟེན སམཱདིནྣེན གུནྣཾ, ཀུཀྐུརཱནཉྩ སཧབྱཏཱ ཝུཏྟཱཏི ‘‘སཱིལབྦཏུཔཱདཱནཝཏོ ཛྷཱནབྷཱཝནཱ ན ཨིཛ྄ཛྷཏཱི’’ཏི མཉྙམཱནཱ ཏེན རཱུཔཱརཱུཔབྷཝཱ ན ཧོནྟཱིཏི ཀེཙི ཝདནྟི. ཝཀྑམཱནེན པན པཀཱརེན པཙྩཡབྷཱཝཏོ ‘‘ཏཾ ན གཧེཏབྦ’’ནྟི ཨཱཧ. ཨསུདྡྷིམགྒེ ཙ སུདྡྷིམགྒཔརཱམསནཾ སཱིལབྦཏུཔཱདཱནནྟི སུདྡྷིམགྒཔརཱམསནེན རཱུཔཱརཱུཔཱཝཙརཛ྄ཛྷཱནཱནཾ ནིབྦཏྟནཾ ན ན ཡུཛྫཏཱིཏི.

ཨནུསྶཝཝསེནཱཏི ‘‘སེཏཝདྷཡཛྫཾ ཨཱལབྷཏེ བྷཱུཏིཀཱམོ’’ཏི ཨཱདིནྣཨནུསྶཝཝསེན, ཡཐཱ ཨིམེ མནུསྶལོཀེ ཀཱམཱ སམིདྡྷཱ, ཨེཝཾ དེཝལོཀེ ¶ ཨིཏོ སམིདྡྷཏརཱཏི དིཊྛཱནུསཱརེན ཝཱ. པུརཱཎབྷཱརཏསཱིཏཱཧརཎཔསུབནྡྷཝིདྷིཨཱདིསཝནཾ ཨསྶདྡྷམྨསྶཝནཾ. ཨཱདི-སདྡེན ཨསཔྤུརིསཱུཔནིསྶཡཾ པུབྦེ ཙ ཨཀཏཔུཉྙཏཾ, ཨཏྟམིཙྪཱཔཎིདྷིཉྩ སངྒཎྷཱཏི. ཀཱཡདུཙྩརིཏཱདཱིནིཔཱིཏི ཨཏྟནོ ཨདྷིཔྤེཏཱནཾ ཀཱམཱནཾ ཨནུཔཱཡབྷཱུཏཱནིཔི ཀཱཡདུཙྩརིཏཱདཱིནི ཀརོཏི, ཙིརསགྒཱདིཨཏྠཾ ཡུདྡྷཱདིཝསེནཱཏི ཨདྷིཔྤཱཡོ. སནྡིཊྛིཀེ ཝཱ པན རཛྫསེནཱཔཏིཊྛཱནཱདིསངྒཧེ ཀཱམེ. ཏདནྟོགདྷཱ ཨེཝཱཏི ཏསྨིཾ དུཙྩརིཏནིབྦཏྟེ, སུཙརིཏནིབྦཏྟེ ཙ ཀཱམབྷཝེ ཨནྟོགདྷཱ ཨེཝཱཏི ཨཏྠོ. ཨནྟོགདྷཱཏི ཙ སཉྙཱབྷཝཔཉྩཝོཀཱརབྷཝཱནཾ ཨེཀདེསེན ཨནྟོགདྷཏྟཱ ཝུཏྟཾ. ན ཧི ཏེ ནིརཝསེསཱ ཀཱམབྷཝེ ཨནྟོགདྷཱཏི.

སཔྤབྷེདསྶཱཏི སུགཏིདུགྒཏིམནུསྶཱདིཔྤབྷེདཝཏོ.

ཀཱམཱཝཙརསམྤཏྟིབྷཝེ པཋམདུཏིཡཨུཙྪེདཝཱདཝསེན, རཱུཔབྷཝེ ཏཏིཡཨུཙྪེདཝཱདཝསེན, ཨརཱུཔབྷཝེ སེསཨུཙྪེདཝཱདཝསེན ཨཡམཏྟཱ སུཨུཙྪིནྣོ ཧོཏཱིཏི ཏདུཔགཾ ཀམྨཾ ཀརོཏཱིཏི ཨཱཧ ‘‘ཨཡཾ ¶ ཨཏྟཱ ནཱམཱ’’ཏིཨཱདི. ཏཏྠ སུཨུཙྪིནྣོཏི སཀལཝཊྚདུཀྑསམུཙྪེདེན སུཊྛུ ཨུཙྪིནྣོ, ཨཔུནབྦྷཝུཔྤཏྟིཀོ ཧོཏཱིཏི ཨཏྠོ.

‘‘ཀཱམཱཝཙརསམྤཏྟིབྷཝེ’’ཏི ཨིདཾ པཋམདིཊྛདྷམྨནིབྦཱནཝཱདཝསེན ཝུཏྟཾ, སེསཾ ཨིཏརདིཊྛདྷམྨནིབྦཱནཝཱདཝསེན. ཏཏྠ ཀིཉྩཱཔི པཱལི༹ཡཾ (དཱི. ནི. ༡.༩༣ ཨཱདཡོ) རཱུཔཱཝཙརཛ྄ཛྷཱནཝསེནེཝ ཨུཔརི ཙཏྟཱརོ དིཊྛདྷམྨནིབྦཱནཝཱདཱ ཨཱགཏཱ, དིཊྛིགཏིཀོ པན ཡཾ ཀིཉྩི གཧེཏྭཱ ཡཐཱ ཏཐཱ ཨབྷིནིཝིསཏཱིཏི ཨརཱུཔབྷཝགྒཧཎཾ, ཨརཱུཔཛ྄ཛྷཱནཱནམྤི ཝཱ ཙཏུཏྠཛྷཱནསངྒཧཏོ ཨརཱུཔབྷཝགྒཧཎཾ, སནྟསུཁཏཱཡ ཝཱ ཏཾསམངྒིནོ སུཁིཏབྷཱཝསཱམཉྙཏོ. ཝིགཏཔརིལཱ༹ཧོཏི ཡཐཱབྷིལཱསིཏཝིསཡཱུཔཧཱརེན, པཧཱནེན ཙ ཝཱུཔསནྟཀཱམརཱགཔརིལཱ༹ཧོ, དིཊྛེཝ དྷམྨེ ནིབྦཱནཔྤཏྟོཏི ཨཏྠོ.

སུདྡྷིམགྒཔརཱམསནཝསེན པཝཏྟིཏཾ ཡཾ ཀིཉྩི ལོཀིཡཾ སཱིལཾ, ཛྷཱནཉྩ སཱིལབྦཏམིཙྩེཝ ཨིདྷཱདྷིཔྤེཏནྟི ཨཱཧ ‘‘ཨིདཾ སཱིལབྦཏཾ ནཱམཱ’’ཏིཨཱདི. ཀམེན ཨཝཏྭཱ སཱིལབྦཏུཔཱདཱནསྶ ཨནྟེ བྷཝཔཙྩཡཏཱཝཙནཾ ཨཏྟཝཱདུཔཱདཱནཾ ཝིཡ ཨབྷིཎྷཾ ཨསམུདཱཙཱརཏོ, ཨཏྟཝཱདུཔཱདཱནནིམིཏྟཏྟཱ ཙ.

ཀམྨབྷཝེཏི ¶ ནིདྡྷཱརཎེ བྷུམྨཾ. ཧེཏུཔཙྩཡཔྤབྷེདེཧཱིཏི ཨེཏྠ མགྒཔཙྩཡོ ཙ ཝཏྟབྦོ. དིཊྛུཔཱདཱནཱདཱིནི ཧི སཧཛཱཏཀམྨབྷཝསྶ མགྒཔཙྩཡཱ ཧོནྟཱིཏི, ཏསྨཱ ཏཱནི སཧཛཱཏཱདཱིསུ ཧེཏུཔཙྩཡཾ ཨཔནཱིཡ མགྒཔཙྩཡཾ པཀྑིཔིཏྭཱ སཏྟདྷཱ པཙྩཡཱ ཧོནྟཱིཏི ཝེདིཏབྦཱནི. སབྦཱནི པན ཨནནྟརསམནནྟརཨནནྟརཱུཔནིསྶཡནཏྠིཝིགཏཱསེཝནཔཙྩཡེཧི པཙྩཡཱ ཧོནྟི. ནཱནནྟརསྶ ཨུཔནིསྶཡཔཙྩཡེན པཙྩཡཱ ཧོནྟི. ཀདཱཙི ཨཱརམྨཎཔཙྩཡཱདིནཱཔི, ཏཾ པན ཨུཔནིསྶཡཔཙྩཡེནེཝ སངྒཧེཏྭཱ ཝུཏྟཾ ‘‘ཝིཔྤཡུཏྟསྶ པན ཨུཔནིསྶཡཔཙྩཡེནེཝཱ’’ཏི.

བྷཝཔཙྩཡཱཛཱཏིཨཱདིཔདཝིཏྠཱརཀཐཱཝཎྞནཱ

༦༥༡. ཛཱཏཱིཏིཨཱདཱིསཱུཏི ཨཱདི-སདྡེན ‘‘ཛཱཏིཔཙྩཡཱ ཛརཱམརཎཾ སོཀཔརིདེཝདུཀྑདོམནསྶུཔཱཡཱསཱ སམྦྷཝནྟཱི’’ཏི (མ. ནི. ༣.༡༢༦; སཾ. ནི. ༢.༡; མཧཱཝ. ༡; ཨུདཱ. ༡; ནེཏྟི. ༢༤) སབྦཾ སངྒཎྷཱཏི. ཏེནཱཧ ‘‘ཛཱཏིཨཱདཱིན’’ནྟིཨཱདི. ཨུཔཔཏྟིབྷཝུཔྤཏྟིཡེཝ ¶ ཛཱཏཱིཏི ཨཱཧ ‘‘ན ཨུཔཔཏྟིབྷཝོ’’ཏི. ཛཱཡམཱནསྶ པན ཛཱཏི ཛཱཏཱིཏི ཨུཔཔཏྟིབྷཝོཔི ཨསཏི ཨབྷཱཝཱ ཛཱཏིཡཱ པཙྩཡོཏི སཀྐཱ ཝཏྟུཾ. ཛཱཡམཱནརཱུཔཔདཊྛཱནཏཱཔི ཧི རཱུཔཛཱཏིཡཱ ཝུཏྟཱ ‘‘ཨུཔཙིཏརཱུཔཔདཊྛཱནོ ཨུཔཙཡོ, ཨནུཔྤབནྡྷརཱུཔཔདཊྛཱནཱ སནྟཏཱི’’ཏི (དྷ. ས. ཨཊྛ. ༦༤༡).

ཛཱཏཱནཾ ཁནྡྷཱནཾ ཨུཉྙཱཏཏཱ, ཨབྷིམཏཏཱ ཙ ཧཱིནཔཎཱིཏཏཱ. ཨནིཊྛཉྷི ཧཱིནཾ, ཨིཊྛཾ པཎཱིཏཾ. ཨཱདི-སདྡེན སུཝཎྞདུབྦཎྞཧཱིནུཏྟམཱདིཾ སངྒཎྷཱཏི. ཡམཀཱནམྤི སཏནྟི ཡམཀབྷཱཝེན ནིབྦཏྟཱནམྤི སམཱནཱནཾ. སོ ཙ སཏྟཱནཾ ཝིསེསོ. བྷིནྣསནྟཱནིཀསྶ ཝིསེསཀཱརཎསྶ སབྦེན སབྦཾ ཨབྷཱཝཏོ ‘‘ཨཛ྄ཛྷཏྟསནྟཱནེ’’ཏི ཝུཏྟཾ. ཨཉྙསྶ ཀཱརཎསྶ ཨབྷཱཝཏོཏི ཨཏྟསནྟཱནགཏཏོ ཨཉྙསྶ ཝིསེསཀཱརཎསྶ ཨནུཔལབྦྷམཱནཏྟཱ, སཏི ཙ ཏསྨིཾ སབྦདཱ སབྦེསཾ ཨབྷཱཝཏོཏི པསངྒསྶ དུནྣིཝཱརཎཏོ ཀཱརཎེ ཨཝིསིཊྛེ ཕལཝིསེསསྶ ཨཡུཛྫམཱནཀཏྟཱ. ཏེནཱཧ ‘‘ཀམྨབྷཝཧེཏུཀོཝཱ’’ཏི.

ཏེན ཏེནཱཏི ཉཱཏིབྱསནཱདིནཱ ཛརཱམརཎཏོ ཨཉྙེན དུཀྑདྷམྨེན. ཛརཱམརཎནིམིཏྟཉྷི ཨུཔྤནྣཱ སོཀཱདཡོ ཛརཱམརཎཱབྷིསམྦནྡྷཱ, ཏདཉྙེ ཨནབྷིསམྦནྡྷཱ. ཨུཔནིསྶཡཀོཊིཡཱཏི ཨུཔནིསྶཡཾསེན, ཨུཔནིསྶཡལེསེནཱཏི ¶ ཨཏྠོ. ཡོ ཧི པཊྛཱནེ ཨནཱགཏོ སཏི བྷཱཝཱ, ཨསཏི ཙ ཨབྷཱཝཱ སུཏྟནྟཔརིཡཱཡེན ཨུཔནིསྶཡོ, སོ ‘‘ཨུཔནིསྶཡཀོཊཱི’’ཏི ཝུཙྩཏི. པཙྩཡམཧཱཔདེསོ ཀིརེསོ, ཡདིདཾ ཨུཔནིསྶཡོཏི.

བྷཝཙཀྐཀཐཱཝཎྞནཱ

༦༥༢. ན ཀེཝལཾ སོཀཱདཱིནཾཡེཝ ཛཱཏི པཙྩཡོ ཧོཏི, སོཀཱདཱིནཾ པན པཙྩཡཏྟཱ ཨཝིཛྫཱཡཔི པཙྩཡོ ཨེཝཱཏི དསྶེཏུཾ ‘‘ཡསྨཱ པནཱ’’ཏིཨཱདི ཨཱརདྡྷཾ. ཨེཏྠཱཏི པཊིཙྩསམུཔྤཱདདེསནཱཡཾ. ཨཝིདིཏཱདི མིདནྟི མ-ཀཱརོ པདསནྡྷིཀརོ. སཏཏནྟི སབྦཀཱལཾ ཡཱཝ ཨགྒམགྒཱདྷིགམཱ. སམིཏནྟི སངྒཏཾ, ཨབྦོཙྪིནྣནྟི ཨཏྠོ.

ཏེསཱུཏི སོཀཱདཱིསུ. སིདྡྷེསཱུཏི ལབྦྷམཱནེསུ. སིདྡྷཱ ཧོཏི ཨཝིཛྫཱ ཨཝིནཱབྷཱཝཏོ.

ཀཱམཡཱནསྶཱཏི ¶ ཀཱམཡམཱནསྶ, ཀཱམོ ཝཱ ཡཱནཾ ཨེཏསྶཱཏི ཀཱམཡཱནོ, ཏསྶ ཀཱམཝསེན ཡཱཡམཱནསྶཱཏི ཨཏྠོ. ཚནྡཛཱཏསྶཱཏི ཛཱཏཏཎྷཱཚནྡསྶ. པརིཧཱཡནྟཱིཏི ཝིགཙྪནྟི. རུཔྤཏཱིཏི སོཀཱདིནཱ ཀུཔྤཏི.

པརིཡུཊྛཱནཏཱཡ ཏིཊྛནསཱིལོ པརིཡུཊྛཱནཊྛཱཡཱི. ‘‘པརིཡུཊྛཊྛཱཡིནོ’’ཏི ཝཱ པཱཋོ. ཏཏྠ པརིཡུཊྛཱཏཱིཏི པརིཡུཊྛཾ, དིཊྛིཔརིཡུཊྛཱནཾ, ཏེན ཏིཊྛཏཱིཏི པརིཡུཊྛཊྛཱཡཱིཏི ཨཏྠོ དཊྛབྦོ.

པཉྩ པུབྦནིམིཏྟཱནཱིཏི ‘‘མཱལཱ མིལཱཡནྟི, ཝཏྠཱནི ཀིལིསྶནྟི, ཀཙྪེཧི སེདཱ མུཙྩནྟི, ཀཱཡེ ཝེཝཎྞིཡཾ ཨོཀྐམཏི, དེཝོ དེཝཱསནེ ནཱབྷིརམཏཱི’’ཏི (ཨིཏིཝུ. ༨༣) ཝུཏྟཱནི པཉྩ མརཎཔུབྦནིམིཏྟཱནཱིཏི ཨཏྠོ. ཏཱནི ཧི དིསྭཱ ཀམྨནིབྦཏྟཀྑནྡྷསངྑཱཏེ ཨུཔཔཏྟིབྷཝེ བྷཝཙྪནྡབལེན དེཝཱནཾ བལཝསོཀོ ཨུཔྤཛྫཏཱིཏི.

བཱལོཏི ཨཝིདྭཱ. ཏེན ཨཝིཛྫཱཡ ཀཱརཎབྷཱཝཾ དསྶེཏི. ཏིཝིདྷཾ དུཀྑནྟི ཏསྶཱརུཔྤཀཐཱསཝན, ཀམྨཀཱརཎཱདསྶན, མརཎཀཱལཀམྨོཔཊྛཱནནིདཱནཾ སོཀཱདིདུཀྑཾ.

ཨཱསཝེ སཱདྷེནྟཱིཏི ཨཱསཝེ གམེནྟི བོདྷེནྟཱིཏི ཨཏྠོ.

ཨེཝཾ ¶ སཏཱིཏི ཨེཝཾ བྷཝཙཀྐསྶ ཨཝིདིཏཱདིཏཱཡ ཨནཱདིབྷཱཝེ སཏི. ཨཱདིམཏྟཀཐནནྟི ཨཝིཛྫཱཝསེན ཨཱདིསབྦྷཱཝཀཐནཾ. ཨཱདི ཨེཏསྶ ཨཏྠཱིཏི ཧི ཨཱདིམཾ, བྷཝཙཀྐཾ. ཏསྶ བྷཱཝོ ཨཱདིམཏྟཾ, ཏསྶ ཀཐནཾ ཨཱདིམཏྟཀཐནཾ. ཝིསེསནིཝཏྟིཨཏྠོ ཝཱ མཏྟསདྡོ, སཏི ཨནཱདིབྷཱཝེ ཨཝིཛྫཱ ཨཱདིམྷི, མཛ྄ཛྷེ, པརིཡོསཱནེ ཙ སབྦཏྠ སིཡཱཏི ཨཱདིམཏྟཱཡ ཨཝིཛྫཱཡ ཀཐནཾ ཝིརུཛ྄ཛྷཏཱིཏི ཨཏྠོ. ‘‘ཨཝིཛྫཱ པདྷཱནཱ’’ཏི ཝཏྭཱ ཏསྶཱ པདྷཱནབྷཱཝཾ དསྶེཏུཾ ‘‘ཨཝིཛྫཱགྒཧཎེནཱ’’ཏིཨཱདི ཨཱརདྡྷཾ. ཏཏྠ ཨཝིཛྫཱགྒཧཎེནཱཏི ཨཝིཛྫཱཡ ཨུཔྤཱདནེན, ཨཔྤཧཱནེན ཝཱ, ཨཏྟནོ སནྟཱནེ སནྣིཧིཏབྷཱཝཀརཎེནཱཏི ཨཏྠོ. ཀམྨཱདཱིནཱིཏི ཀམྨཝིཔཱཀཝཊྚཱནི. པལིབོདྷེནྟཱིཏི ནཱནཱདུཀྑཔརིབྱཱུལ༹ྷེ སཾསཱརཙཱརཀེ ནིརོདྷེནྟི. ཏེཧཱིཏི ཀིལེསཀམྨཝིཔཱཀཝཊྚེཧི. ཝཊྚསྶ ཀཱརཎབྷཱཝེན པདྷཱནཏྟཱ ‘‘པདྷཱནདྷམྨོ’’ཏི ཨཝིཛྫཱ ཀཐིཏཱ.

ཏཏོ ཨཝིཛྫཱདིཏོ. བྲཧྨཱདིནཱཏི ཨཱདི-སདྡེན པཛཱཔཏིསྶརཔུརིསཱདིཀེ སངྒཎྷཱཏི. ཝདཏཱིཏི ¶ ཝདོ, ཏཾ ཏཾ ཧིཏཱཧིཏཾ པཝཏྟཱཏི ཨཏྠོ. ཝེདེཏི, ཝེདིཡཏཱིཏི ཝཱ ཝེདེཡྻོ, སུཁཱདིཾ ཨནུབྷཝཏི, སབྦཝིསཡེ ཝཱ ཛཱནཱཏི, ‘‘སུཁིཏོ དུཀྑིཏོ’’ཏིཨཱདིནཱ ཨཏྟནཱ, པརེཧི ཙ ཛཱནཱཏི, ཉཱཡཏི ཙཱཏི ཨཏྠོ. བྲཧྨཱདིནཱ ཝཱ ཨཏྟནཱ ཝཱཏི ཝཱ-སདྡོ ཙ-སདྡཏྠོ. ཏེནཱཧ ‘‘ཀཱརཀཝེདཀརཧིཏ’’ནྟི ཙ-སདྡཏྠསམཱསཾ.

དྭཱདསཝིདྷསུཉྙཏཱསུཉྙནྟི ཨཝིཛྫཱདཱིནཾ དྭཱདསནྣཾ སུཉྙསབྷཱཝཱནཾ སུཉྙཏཱཡ སུཉྙཾ དྭཱདསཝིདྷསུཉྙཏཱསུཉྙཾ, དྷུཝབྷཱཝཱདིསུཉྙཏཱཡ ཝཱ ཙཏུབྦིདྷམྤི སུཉྙཏཾ ཨེཀཾ ཀཏྭཱ དྭཱདསངྒགཏཏྟཱ དྭཱདསཝིདྷཱཏི ཏཱཡ དྭཱདསསུཉྙཏཱཡ སུཉྙནྟི ཨཏྠོ.

༦༥༣. པུབྦནྟཱཧརཎཏོཏི པུབྦནྟཏོ ཨཏཱིཏཀོཊྛཱསཏོ པཙྩུཔྤནྣཝིཔཱཀསྶ ཨཱཧརཎཏོ. ཝེདནཱཝསཱནཾ པརིཙྪིནྣཾ ཨེཀཾ བྷཝཙཀྐཾ ཧོཏི. བྷཝཙཀྐེཀདེསོཔི ཧི བྷཝཙཀྐནྟི ཝུཙྩཏི. ཝེདནཱ ཝཱ ཏཎྷཱསཧཱཡཱཡ ཨཝིཛྫཱཡ པཙྩཡོ ཧོཏཱིཏི ཝེདནཱཏོ ཨཝིཛྫཱ, ཨཝིཛྫཱཏོ སངྑཱརཱཏི སམྦཛ྄ཛྷནཏོ ཝེདནཱཝསཱནཾ བྷཝཙཀྐཾ པརིཔུཎྞམེཝཱཏི ¶ དཊྛབྦཾ. ཨཝིཛྫཱགྒཧཎེན ཝཱ ཏཎྷུཔཱདཱནཱནི ཏདཝིནཱབྷཱཝཏོ. སངྑཱརགྒཧཎེན བྷཝོ, ཝིཉྙཱཎཱདིགྒཧཎེན ཛཱཏིཛརཱམརཎཱནི, སོཀཱདཡོ ཙ གཧིཏཱཏི ཨེཝམྤི ཝེདནཱཝསཱནཾ བྷཝཙཀྐནྟི ཡུཏྟམེཝེཏཾ. ཨེཝཾ ཏཎྷཱམཱུལཀེ ཙ ཡོཛེཏབྦཾ. དྭིནྣམྤི ཧི ཨཉྙམཉྙཱནུཔྤཝེསོ ཧོཏཱིཏི. ཨཝིཛྫཱ དྷམྨསབྷཱཝཾ པཊིཙྪཱདེཏྭཱ ཝིཔརཱིཏཱབྷིནིཝེསཾ ཀཱརེནྟཱི དིཊྛིཙརིཏེ སཾསཱརེ ནཡཏི, ཏེསཾ ཝཱ སཾསཱརཾ སངྑཱརཱདིཔཝཏྟིཾ ནཡཏི པཝཏྟེཏཱིཏི སཾསཱརནཱཡིཀཱ ཝུཏྟཱ. ཏཎྷཱཡ ཏཎྷཱཙརིཏཱནཾ སཾསཱརནཱཡིཀཱབྷཱཝེ ཝཏྟབྦམེཝ ནཏྠི.

པཋམཾ བྷཝཙཀྐཾ. ཕལུཔྤཏྟིཡཱཏི ཀཏྟུཨཏྠེ ཀརཎཝཙནཾ, ཀརཎཏྠེ ཨེཝ ཝཱ. ཝིཉྙཱཎཱདིཔཙྩུཔྤནྣཕལུཔྤཏྟི ཧི ཨིདྷ དིཊྛཱ, ཨདིཊྛཱནཾ པུརིམབྷཝེ ཨཏྟནོ ཧེཏཱུནཾ ཨཝིཛྫཱསངྑཱརཱནཾ ཕལཾ ཨནུཔྤཱདེཏྭཱ ཨནུཔཙྪིཛྫནཾ པཀཱསེཏི, པཀཱསནསྶ ཝཱ ཀརཎཾ ཧོཏཱིཏི. ཨཐ ཝཱ པུརིམབྷཝཙཀྐཾ དུཏིཡེན སམྦནྡྷཾ ཝུཏྟནྟི ཝེདནཱསངྑཱཏསྶ ཕལསྶ ཨུཔྤཏྟིཡཱ ཏཎྷཱདཱིནཾ ཧེཏཱུནཾ ཨནུཔཙྪེདཾ པཀཱསེཏི, ཏསྨཱ ཕལུཔྤཏྟིཡཱ ཀཱརཎབྷཱུཏཱཡ པཋམསྶ བྷཝཙཀྐསྶ ཧེཏཱུནཾ ཨནུཔཙྪེདཔྤཀཱསནཏོཏི ཨཏྠོ. སངྑཱརཱདཱིནམེཝ ཝཱ ཕལཱནཾ ཨུཔྤཏྟིཡཱ ཨཝིཛྫཱདཱིནཾ ཧེཏཱུནཾ ཕལཾ ཨཛནེཏྭཱ ཨནུཔཙྪེདམེཝ, ཝིཉྙཱཎཱདིཧེཏཱུནཾ ཝཱ སངྑཱརཱདཱིནཾ ཨནུཔྤབནྡྷམེཝ པཀཱསེཏི པཋམཾ བྷཝཙཀྐཾ, ན དུཏིཡཾ ཝིཡ པརིཡོསཱནམྤཱིཏི ‘‘ཕལུཔྤཏྟིཡཱ ཧེཏཱུནཾ ¶ ཨནུཔཙྪེདཔྤཀཱསནཏོ’’ཏི ཝུཏྟཾ. ཨནུཔུབྦཔཝཏྟིདཱིཔནཏོཏི ‘‘སངྑཱརཔཙྩཡཱ ཝིཉྙཱཎཾ, ཝིཉྙཱཎཔཙྩཡཱ ནཱམརཱུཔ’’ནྟིཨཱདིནཱ (མ. ནི. ༣.༡༢༦; སཾ. ནི. ༢.༡; ཨུདཱ. ༡) དྷམྨཱནཾ ཨནུཔུབྦཏོ པཝཏྟིཡཱ དཱིཔནཏོ. ‘‘ཝིཉྙཱཎཔཙྩཡཱ ནཱམརཱུཔ’’ནྟི ཧི ཨེཏྠ ཨཔརིཔུཎྞཱཡཏནཾ ཀལལརཱུཔཾ ཝཏྭཱ ཏཏོ ཨུདྡྷཾ ‘‘ནཱམརཱུཔཔཙྩཡཱ སལཱ༹ཡཏན’’ནྟི སལཱ༹ཡཏནཔྤཝཏྟི ཝུཏྟཱ. སཧུཔྤཏྟིདཱིཔནཏོཏི ‘‘ཨུཔཱདཱནཔཙྩཡཱ བྷཝོ, བྷཝཔཙྩཡཱ ཛཱཏཱི’’ཏི ཝཱ ཨུཔཔཏྟིཀྑནྡྷཱནཾ ཨེཀཛ྄ཛྷཾ ཨུཔྤཏྟིཡཱ དཱིཔནཏོ. ན ཧི ཨེཏྠ པཋམེ ཝིཡ བྷཝཙཀྐེ ཨཱཡཏནཱནཾ ཀམེན ཨུཔྤཏྟི ཝུཏྟཱ.

༦༥༤. ཧེཏུཨཱདིཔུབྦཀཱ ཏཡོ སནྡྷཱི ཨེཏསྶཱཏི ཧེཏུཕལཧེཏུཔུབྦཀཏིསནྡྷི, བྷཝཙཀྐཾ. ཧེཏུཕལཧེཏུཕལཝསེན ཙཏུཔྤབྷེདོ ཨངྒཱནཾ སངྒཧོ ཨེཏསྶཱཏི ཙཏུབྷེདསངྒཧཾ. སརཱུཔཏོ ཨཝུཏྟཱཔི ཏསྨིཾ ¶ ཏསྨིཾ སངྒཧེ ཨཱཀིརཱིཡནྟི ཨཝིཛྫཱསངྑཱརཱདིགྒཧཎེཧི པཀཱསཱིཡནྟཱིཏི ཨཱཀཱརཱ. ཨཏཱིཏཧེཏུཨཱདཱིནཾ ཝཱ པཀཱརཱ ཨཱཀཱརཱ. ཀིལེསཀམྨཝིཔཱཀཱ ཝིཔཱཀཀིལེསཀམྨེཧི སམྦནྡྷཱ ཧུཏྭཱ པུནཔྤུནཾ པརིཝཏྟནྟཱིཏི ཏེསུ ཝཊྚནཱམཾ ཨཱརོཔེཏྭཱ ‘‘ཏིཝཊྚ’’ནྟི ཝུཏྟཾ, ཝཊྚེཀདེསཏྟཱ ཝཱ ‘‘ཝཊྚཱནཱི’’ཏི ཝུཏྟཱནི.

སནྡྷཱིནཾ ཨཱདིཔརིཡོསཱནཝཝཏྠིཏཱཏི སནྡྷཱིནཾ པུབྦཱཔརཝཝཏྠིཏཱཏི ཨཏྠོ.

པརིཏསྶཏཱིཏི ཏཾ ཏཾ ཝཏྠུཾ པརིགྒཧཀརཎཝསེན ཏསྶཏི, ཏཎྷཱཡཏཱིཏི ཨཏྠོ. ཨུཔཱདིཡཏཱིཏི དལ༹ྷགཱཧཾ གཎྷཱཏི. པུརིམཀམྨབྷཝསྨིནྟི པུརིམཀམྨབྷཝེ སཏི.

ཏསྶ ཙ སབྦྷཱཝོ ཀརིཡམཱནཏཱ ཨེཝཱཏི ཨཱཧ ‘‘ཀམྨབྷཝེ ཀརིཡམཱནེཏི ཨཏྠོ’’ཏི. དུཀྑཱདཱིསུ མོཧོཏི དུཀྑཱདཱིནཾ ཨཱདཱིནཝཔཊིཙྪཱདཀོ ཨཔྤཧཱིནོ མོཧོ. ཨཱཡཱུཧནཱཏི སམྤིཎྜནཀཱ དཱནཱདིཀིརིཡཱཡ པཝཏྟནཀཱ. ཨེཀཾ ཨཱཝཛྫནཾ ཨེཏེསནྟི ཨེཀཱཝཛྫནཱ, ཏེསུ ཨེཀཱཝཛྫནེསུ. སཏྟམེ ཙེཏནཱ བྷཝོ. ‘‘ཡཱ ཀཱཙི ཝཱ པན ཙེཏནཱ བྷཝོ, སམྤཡུཏྟཱ ཨཱཡཱུཧནཱ སངྑཱརཱ’’ཏི ཨིདཾ ཡཐཱདསྶིཏཱཡ དྷམྨཊྛིཏིཉཱཎབྷཱཛནཱིཡེ ཝུཏྟཱཡ པཊིསམྦྷིདཱཔཱལི༹ཡཱ (པཊི. མ. ༡.༤༥) ཝསེན ཝུཏྟཾ. ཏཏྠ ཧི ‘‘ཙེཏནཱ བྷཝོ’’ཏི ཨཱགཏཱ. བྷཝནིདྡེསེ པན ‘‘སཱཏྠཏོ’’ཏི ཨེཏྠ ‘‘ཙེཏནཱཝ སངྑཱརཱ, བྷཝོ པན ཙེཏནཱསམྤཡུཏྟཱཔཱི’’ཏི ཝིབྷངྒཔཱལི༹ཝསེན དསྶིཏཾ. ‘‘ཏཏྠ ཀཏམོ པུཉྙཱབྷིསངྑཱརོ? ཀུསལཱ ཙེཏནཱ ཀཱམཱཝཙརཱ’’ཏིཨཱདིནཱ ཧི སངྑཱརཱནཾ ¶ ཙེཏནཱབྷཱཝོ ཝིབྷངྒཔཱལི༹ཡཾ (ཝིབྷ. ༢༢༦) ཝུཏྟོ. ཏཏྠ པཊིསམྦྷིདཱཔཱལི༹ཡཾ ‘‘ཙེཏནཱསམྤཡུཏྟཱ ཝིཔཱཀདྷམྨཏྟཱ སཝིཔཱཀེན ཨཱཡཱུཧནསངྑཱཏེན སངྑཏཱབྷིསངྑརཎཀིཙྩེན སངྑཱརཱ’’ཏི ཝུཏྟཱ. ཝིབྷངྒཔཱལི༹ཡཾ ‘‘སབྦམྤི བྷཝགཱམིཀམྨཾ ཀམྨབྷཝོ’’ཏི (ཝིབྷ. ༢༣༤) བྷཝསྶ པཙྩཡབྷཱཝེན བྷཝགཱམིབྷཱཝཏོ, ཀམྨསཾསཊྛསཧཱཡཏཱཡ ཀམྨབྷཱཝཏོ ཙ ཨུཔཔཏྟིབྷཝཾ བྷཱཝེནྟཱིཏི ‘‘བྷཝོ’’ཏི ཝུཏྟཱ. ཨུཔཔཏྟིབྷཝབྷཱཝནཱཀིཙྩཾ པན ཙེཏནཱཡ སཱཏིསཡནྟི པཊིསམྦྷིདཱཔཱལི༹ཡཱ ཙེཏནཱ ‘‘བྷཝོ’’ཏི ཝུཏྟཱ. བྷཝཱབྷིསངྑརཎཀིཙྩཾ ཙེཏནཱཡ སཱཏིསཡནྟི ཝིབྷངྒཔཱལི༹ཡཾ ‘‘ཀུསལཱ ཙེཏནཱ’’ཏིཨཱདིནཱ (ཝིབྷ. ༢༢༦) ཙེཏནཱ ‘‘སངྑཱརཱ’’ཏི ཝུཏྟཱ. ཏསྨཱ ཏེན ཏེན པརིཡཱཡེན ¶ ཨུབྷཡཾ ཨུབྷཡཏྠ ཝཏྟུཾ ཡུཏྟནྟི ནཏྠེཏྠ ཝིརོདྷོ. ཏསྶ ཕལེ ཨུཔཔཏྟིབྷཝེ ནིཀཱམནཱཏི ‘‘ཏསྶ སུཏཾ ཧོཏི ‘ཙཱཏུམཧཱརཱཛིཀཱ དེཝཱ དཱིགྷཱཡུཀཱ ཝཎྞཝནྟོ སུཁབཧུལཱ’ཏི’’ཨཱདིསུཏཱནུསཱརེན བྷཱཝིནི ཨུཔཔཏྟིབྷཝེ ཨབྷིཀངྑནཱ. གཧཎནྟི ཀཱམུཔཱདཱནཾ ཀིཙྩེནཱཧ. པརཱམསནནྟི ཨིཏརཱནི. ཨཱཡཱུཧནཱཝསཱནེཏི ཏཱིསུཔི ཨཏྠཝིཀཔྤེསུ ཝུཏྟསྶ ཨཱཡཱུཧནསྶ ཨཝསཱནེ.

ཨིདྷཱཏི ཨིམསྨིཾ པཙྩུཔྤནྣབྷཝེ. བྷཝནྟརསྶ ཨཏཱིཏབྷཝསྶ ཨིམིནཱ པཙྩུཔྤནྣབྷཝེན པཊིསནྡྷཱནཾ བྷཝནྟརཔཊིསནྡྷཱནཾ, བྷཝནྟརབྷཱཝེན ཝཱ པཊིསནྡྷཱནཾ བྷཝནྟརཔཊིསནྡྷཱནཾ, ཏསྶ ཝསེན. ཡཾ པཊིསནྡྷཱིཏི ཝུཙྩཏི, ཏཾ ཝིཉྙཱཎནྟི སམྦནྡྷོ. ཏཐཱ ཧི ཝིཉྙཱཎཾ ‘‘པཊིསནྡྷཱནཔཙྩུཔཊྛཱན’’ནྟི ཝུཙྩཏི. གབྦྷེཏི མཱཏུཀུཙྪིཡཾ, གབྦྷཱཝཏྠཱཡཾ ཝཱ.

དྭཱིསུ ཨཏྠཝིཀཔྤེསུ ཝུཏྟེ ཨཱཡཱུཧནསངྑཱརེ ‘‘ཏསྶ པུབྦབྷཱགཱ’’ཏི ཨཱཧ, ཏཏིཡེ ཨཏྠཝིཀཔྤེ ཝུཏྟེ ‘‘ཏཾསམྤཡུཏྟཱ’’ཏི. ཏཾསམྤཡུཏྟཱ ཨཝིཛྫཱ གཧིཏཱཝ ཧོཏཱིཏི སམྦནྡྷོ. དཧརསྶ ཙིཏྟཔྤཝཏྟི བྷཝངྒབཧུལཱ ཡེབྷུཡྻེན བྷཝནྟརཛནཀཀམྨཱཡཱུཧནསམཏྠཱ ན ཧོཏཱིཏི ‘‘ཨིདྷ པཊིཔཀྐཏྟཱ ཨཱཡཏནཱན’’ནྟི ཝུཏྟཾ. ‘‘ཀམྨཀརཎཀཱལེ སམྨོཧོ དསྶིཏོ’’ཏི ཨེཏེན ཀམྨསྶ པཙྩཡབྷཱུཏཾ སམྨོཧཾ དསྶེཏི, ན ཀམྨསམྤཡུཏྟམེཝ.

‘‘ཏཏྠ པུརིམབྷཝསྨིཾ པཉྩ ཀམྨསམྦྷཱརཱ, ཨེཏརཧི པཉྩ ཝིཔཱཀདྷམྨཱ, ཨེཏརཧི པཉྩ ཀམྨསམྦྷཱརཱ, ཨནཱགཏེ པཉྩ ཝིཔཱཀདྷམྨཱཏི དས དྷམྨཱ ཀམྨཾ, དས དྷམྨཱ ཝིཔཱཀོ, ཨིཏི དྭཱིསུ ཋཱནེསུ ཀམྨཾ, ཀམྨཝཊྚཾ, དྭཱིསུ ཋཱནེསུ ཝིཔཱཀོ, ཝིཔཱཀཝཊྚནྟི ཀམྨསངྑེཔོ ཙ ཝིཔཱཀསངྑེཔོ ¶ ཙ, ཀམྨབྷཝོ ཙ ཝིཔཱཀབྷཝོ ཙ ཀམྨཝཊྚཉྩ ཝིཔཱཀཝཊྚཉྩ, ཀམྨཔཝཏྟཉྩ ཝིཔཱཀཔཝཏྟཉྩ, ཀམྨསནྟཏི ཙ ཝིཔཱཀསནྟཏི ཙ, ཀིརིཡཱ ཙེཝ ཀིརིཡཱཕལཉྩཱཏི –

‘‘ཨེཝཾ སམུཔྤནྣམིདཾ སཧེཏུཀཾ,

དུཀྑཾ ཨནིཙྩཾ ཙལམིཏྟརདྡྷུཝཾ;

དྷམྨེཧི དྷམྨཱ པབྷཝནྟི ཧེཏུསོ,

ན ཧེཏྠ ཨཏྟཱཝ པརོཝ ཝིཛྫཏི.

‘‘དྷམྨཱ དྷམྨེ སཉྫནེནྟི, ཧེཏུསམྦྷཱརཔཙྩཡཱ;

ཧེཏཱུནཉྩ ནིརོདྷཱཡ, དྷམྨོ བུདྡྷེན དེསིཏོ.

‘‘ཧེཏཱུསུ ¶ ཨུཔརུདྡྷེསུ, ཚིནྣཾ ཝཊྚཾ ན ཝཊྚཏི;

ཨེཝཾ དུཀྑནྟཀིརིཡཱཡ, བྲཧྨཙརིཡིདྷ ཝིཛྫཏི;

སཏྟེ ཙ ནུཔལབྦྷནྟེ, ནེཝུཙྪེདོ ན སསྶཏ’’ནྟི. (ཝིབྷ. ཨཊྛ. ༢༤༢);

ཏཏྠ ཀམྨཱནེཝ ཝིཔཱཀཾ སམྦྷརནྟི ཝཌྜྷེནྟཱིཏི ཀམྨསམྦྷཱརཱ, ཀམྨཾ ཝཱ སངྑཱརབྷཝཱ, ཏདུཔཀཱརཀཱནི ཨཝིཛྫཱཏཎྷུཔཱདཱནཱནི ཀམྨསམྦྷཱརཱ. པཊིསནྡྷིདཱཡཀོ ཝཱ བྷཝོ ཀམྨཾ, ཏདཱུཔཀཱརཀཱ ཡཐཱཝུཏྟཱ ཨཱཡཱུཧནསངྑཱརཱ, ཨཝིཛྫཱདཡོ ཙ ཀམྨསམྦྷཱརཱཏི ཀམྨཉྩ ཀམྨསམྦྷཱརཱ ཙ ཀམྨསམྦྷཱརཱཏི ཨེཀསེསཝསེན ཀམྨསམྦྷཱརགྒཧཎཾ ཝེདིཏབྦཾ. དས དྷམྨཱ ཀམྨནྟི ཨཝིཛྫཱདཡོཔི ཀམྨསཧཱཡཏཱཡ ཀམྨསརིཀྑཀཱ, ཏདཱུཔཀཱརཱ ཙཱཏི ‘‘ཀམྨ’’ནྟི ཝུཏྟཱ. སངྑིཔྤནྟི ཨེཏྠ ཨཝིཛྫཱདཡོ, ཝིཉྙཱཎཱདཡོ ཙཱཏི སངྑེཔོ, ཀམྨཾ, ཝིཔཱཀོ ཙ. ‘‘ཀམྨཾ ཝིཔཱཀོ’’ཏི ཨེཝཾ སངྑིཔཱིཡཏཱིཏི ཝཱ སངྑེཔོ, ཨཝིཛྫཱདཡོ, ཝིཉྙཱཎཱདཡོ ཙ. སངྑེཔབྷཱཝསཱམཉྙེན པན ཨེཀཝཙནཾ ཀཏནྟི དཊྛབྦཾ, སངྑེཔསདྡོ ཝཱ བྷཱགཱདྷིཝཙནནྟི ཀམྨབྷཱགོ ཀམྨསངྑེཔོ.

ཨེཝཾ སམུཔྤནྣནྟི ཀམྨཏོཔི ཝིཔཱཀོ. ཏཏྠཱཔི ‘‘ཨཝིཛྫཱཏོ སངྑཱརཱ’’ཏི ཨེཝཾ སམུཔྤནྣཾ, ཏིསནྡྷིཨཱདིཝསེན ཝཱ སམུཔྤནྣཾ ཨིདཾ བྷཝཙཀྐནྟི ཨཏྠོ. ཨིཏྟརནྟི གམནདྷམྨཾ, ཝིནསྶདྷམྨནྟི ¶ ཨཏྠོ. ཏེན ཨུཔྤཱདཝཡཝནྟཏཱདཱིཔཀེན ཨནིཙྩསདྡེན, ཝིཀཱརཱཔཏྟིདཱིཔཀེན ཙལསདྡེན ཙ ཨདཱིཔིཏཾ ཀཱལནྟརཊྛཱཡིཏཱབྷཱཝཾ ཝིབྷཱཝེཏི. ཨདྡྷུཝནྟི ཨེཏེན ཐིརབྷཱཝཱབྷཱཝནིསྶཱརཏཾ. ཧེཏུ ཨེཝ སམྦྷཱརཱ ཧེཏུསམྦྷཱརཱ. ‘‘ཋཱནསོ ཧེཏུསོ’’ཏི (ཀཐཱ. ༣༥༥; པཊི. མ. ༡.༤༤) ཨེཏྠ ཨེཝཾ ཝུཏྟཾ ཝཱ ཋཱནཾ, ཨཉྙམྤི ཏསྶ ཏསྶ སཱདྷཱརཎཾ ཀཱརཎཾ སམྦྷཱརོ, ཨསཱདྷཱརཎཾ ཧེཏུ. ཨེཝནྟི ཨེཝཾ ཧེཏུཏོ དྷམྨམཏྟསམྦྷཝེ, ཧེཏུནིརོདྷཱ ཙ ཝཊྚཙྪེདེ དྷམྨེ ཙ ཏཾནིརོདྷཱཡ དེསིཏེ སཏཱིཏི ཨཏྠོ. བྲཧྨཙརིཡཾ ཨིདྷ བྲཧྨཙརིཡིདྷ སཏྟེ ཙཱཏི ཨེཏྠ ཙ-སདྡོ ‘‘ཨེཝཾ བྲཧྨཙརིཡཉྩ ཝིཛྫཏི, སསྶཏུཙྪེདཱ ཙ ན ཧོནྟཱི’’ཏི སམུཙྩཡཏྠོ. ཨེཝཉྷི ཧེཏུཨཱཡཏྟེ དྷམྨམཏྟསམྦྷཝེ སཏྟོ ནུཔལབྦྷཏི, ཏསྨིཉྩ ཨུཔལབྦྷནྟེ སསྶཏོ, ཨུཙྪེདོ ཝཱ སིཡཱཏི ནུཔལབྦྷནྟེ ཏསྨིཾ ནེཝ ཨུཙྪེདོ ན སསྶཏནྟི ཝུཏྟཾ ཧོཏི.

༦༥༥. སཙྩཔྤབྷཝཏོཏི སཙྩཏོ, སཙྩཱནཾ ཝཱ པབྷཝཏོ ཙ.

ཀུསལཱཀུསལཾ ¶ ཀམྨནྟི ཝཊྚཀཐཱཡ ཝཏྟམཱནཏྟཱ སཱསཝནྟི ཝིཉྙཱཡཏི. ཨཝིསེསེནཱཏི ‘‘ཙེཏནཱ ཙེཏནཱསམྤཡུཏྟཀཱ’’ཏི ཝིསེསཾ ཨཀཏྭཱ, སབྦམྤི ཏཾ ཀུསལཱཀུསལཾ ཀམྨཾ སམུདཡསཙྩནྟི ཝུཏྟནྟི ཨཏྠོ. ‘‘ཏཎྷཱ ཙ…པེ… ཨཝསེསཱ ཙ སཱསཝཱ ཀུསལཱ དྷམྨཱ’’ཏི (ཝིབྷ. ༢༠༨-༢༡༠) ཧི ཙེཏནཱཙེཏནཱསམྤཡུཏྟཝིསེསཾ ཨཀཏྭཱ ཝུཏྟནྟི, ཨརིཡསཙྩཝིསེསཾ ཝཱ ཨཀཏྭཱ སམུདཡསཙྩནྟི ཝུཏྟནྟི ཨཏྠོ. སཙྩཝིབྷངྒེ ཧི སབྦེཔི ཀིལེསཱ སབྦམྤི བྷཝགཱམིཀམྨཾ ‘‘སམུདཡསཙྩ’’ནྟི ཝུཏྟཾ. དུཏིཡསཙྩཾ པབྷཝོ ཨེཏསྶཱཏི དུཏིཡསཙྩཔབྷཝཾ. ཨུཔཱདཱནཔཙྩཡཱ བྷཝོཏི ཨུཔཔཏྟིབྷཝསྶ, ཀམྨབྷཝསྶ ཙ ཨདྷིཔྤེཏཏྟཱ ཝུཏྟཾ ‘‘པཋམདུཏིཡསཙྩདྭཡ’’ནྟི.

༦༥༦. ཝཏྠཱུསཱུཏི ཨཱརམྨཎེསུ, དུཀྑཱདཱིསུ ཝཱ པཊིཙྪཱདེཏབྦེསུ ཝཏྠཱུསུ. སམྨོཧེཏཱིཏི དྷམྨསབྷཱཝཾ ཛཱནིཏུཾ པཊིཝིཛ྄ཛྷིཏུཾ ཨདེནྟཱི ཏསྶ པཊིཙྪཱདནཝསེན སམྨོཧེཏི. ཝཏྠུནྟི ཨིདྷ ཨཱརམྨཎཾ ཨདྷིཔྤེཏཾ. ཨཉྙམཉྙཉྩ ཨུཔཏྠམྦྷེཏི ཨཉྙམཉྙསནྣིསྶཡེན ཝིནཱ ཋཱཏུཾ ཨསཀྐོནྟཱ དྭེ ནལ༹ཀལཱཔཱ ཝིཡ. སཝིསཡེཏི ཡཐཱསཀཾ ཝིསཡེ རཱུཔཱཡཏནཱདིཀེ. ཛཱཡམཱནཱནཾ ཁནྡྷཱནཾ ཝིཀཱརབྷཱཝེན ལབྦྷམཱནཱ ཛཱཏི ཏེ ཛནེནྟཱི ཝིཡ ཧོཏཱིཏི ཝུཏྟཾ ‘‘ཁནྡྷེ ཙ ཛནེཏཱི’’ཏི. ཏེནཱཧ ‘‘ཏེསཾ ཨབྷིནིབྦཏྟིབྷཱཝེན པཝཏྟཏྟཱ’’ཏི. པཱཀབྷེདབྷཱཝཉྩ ཨདྷིཏིཊྛཏཱིཏི ཨེཏྠཱཔི ‘‘ཁནྡྷེ ཛནེཏཱི’’ཏི ཨེཏྠ ཝུཏྟནཡེནེཝ ཨཏྠོ གཧེཏབྦོ. པཱཀབྷེདཝསེན ཝཏྟཏིཙྩེཝ ཨཏྠོ ¶ . པཙྩཏཱིཏི པཱཀོ, བྷིཛྫཏཱིཏི བྷེདོ, པཱཀོ ཙ བྷེདོ ཙ པཱཀབྷེདཾ, ཏསྶ བྷཱཝཾ པཙྩནཾ, བྷིཛྫནཉྩཱཏི ཨཏྠོ. སོཀཱདཱིནཾ ཨདྷིཊྛཱནཏྟཱཏི ཏེསཾ ཀཱརཎཏྟཱ, ཏེཧི སིདྡྷཱཡ ཨཝིཛྫཱཡ སཧིཏེཧི སངྑཱརེཧི པཙྩཡོ ཙ ཧོཏི བྷཝནྟརཔཱཏུབྷཱཝཱཡཱཏི ཨདྷིཔྤཱཡོ. ཙུཏིཙིཏྟཾ ཝཱ པཊིསནྡྷིཝིཉྙཱཎསྶ ཨནནྟརཔཙྩཡོ ཧོཏཱིཏི ‘‘པཙྩཡོ ཙ ཧོཏི བྷཝནྟརཔཱཏུབྷཱཝཱཡཱ’’ཏི ཝུཏྟཾ. ཏཾ པན ཙུཏིཙིཏྟཾ ཨཝིཛྫཱསངྑཱརརཧིཏཾ བྷཝནྟརསྶ པཙྩཡོ ན ཧོཏཱིཏི སསཧཱཡཏྟདསྶནཏྠམཱཧ ‘‘སོཀཱདཱིནཾ ཨདྷིཊྛཱནཏྟཱ’’ཏི. དྭེདྷཱཏི ཨཏྟནོ ཨཏྟནོ སརསེན, དྷམྨནྟརཔཙྩཡབྷཱཝེན ཙཱཏི དྭེདྷཱ དྭེདྷཱ. བྱཱཔནིཙྪཱལོཔེན ཧི ནིདྡེསོ.

༦༥༧. ‘‘ཨཝིཛྫཱཔཙྩཡཱ ¶ སངྑཱརཱ’’ཏི ཨེཏེན སངྑཱརཱནཾ པཙྩཡུཔྤནྣཏཱདསྶནེན ‘‘ཀོ ནུ ཁོ ཨབྷིསངྑརོཏཱིཏི ཨེས ནོ ཀལློ པཉྷོ’’ཏི དསྶེཏི, ཏེནེཏཾ ཀཱརཀདསྶནནིཝཱརཎཾ. ཨཏྟཱ བྷཝཏོ བྷཝནྟརཾ སངྐམཏཱིཏི དསྶནཾ ཨཏྟསངྐནྟིདསྶནཾ, ཏཾ སངྑཱརཔཙྩཡཱ ཝིཉྙཱཎུཔྤཏྟིཝཙནེན ནིཝཱརིཏཾ ཧོཏི. པཉྩནྣཾ ཁནྡྷཱནཾ ཨབྷེདཏོ ཨེཀོ ཨཏྟཱཏི གཧཎཾ གྷནསཉྙཱ, ཏཾ ཡམཀཏཱལཀནྡཾ བྷིནྡནྟེན ཝིཡ ‘‘ཝིཉྙཱཎཔཙྩཡཱ ནཱམརཱུཔམཏྟམེཏ’’ནྟི ཝཙནེན ནིཝཱརིཏཾ ཧོཏི. ‘‘ཨེཝམཱདིདསྶནནིཝཱརཎ’’ནྟི ཨེཏེན ‘‘སོཙཏི པརིདེཝཏི དུཀྑིཏོ’’ཏིཨཱདིདསྶནནིཝཱརཎམཱཧ. སོཀཱདཡོཔི ཧི པཙྩཡཱཡཏྟཱ ཨཝསཝཏྟིནོཏི ‘‘ཛཱཏིཔཙྩཡཱ ཛརཱམརཎཾ སོཀ…པེ… སམྦྷཝནྟཱི’’ཏི (མ. ནི. ༣.༡༢༦; སཾ. ནི. ༢.༡; ཨུདཱ. ༡) ཨེཏེན ཝུཏྟམེཝཱཏི. མིཙྪཱདསྶནནིཝཱརཎཏོཔཱིཏི ཀཱརཀདསྶནཱདིནཱནཱཝིདྷམིཙྪཱབྷིནིཝེསནིཝཱརཎཏོཔི.

༦༥༨. ‘‘སལཀྑཎསཱམཉྙལཀྑཎཝསེནཱ’’ཏི ཨེཏེན སབྦཔྤཀཱརེན དྷམྨཱནཾ ཡཱཐཱཝཏོ ཨདསྶནམཱཧ ཏདུབྷཡཝིནིམུཏྟསྶ དྷམྨེསུ པརམཏྠཏོ པསྶིཏབྦབྷཱཝསྶ ཨབྷཱཝཏོ. ཨུཔཀྑལནཾ ཝིཡ དུཀྑུཔྤཏྟིཧེཏུཏོ. པཏནཾ ཝིཡ བྷཝནྟརཔཔཱཏཏོ. གཎྜཔཱཏུབྷཱཝོ ཝིཡ དུཀྑཏཱསཱུལཡོགཏོ, ཀིལེསཱསུཙིཔགྒྷརཎཏོ ཙ. གཎྜབྷེདཔཱིལ༹ཀཱ ཝིཡཱཏི བྷེདནཏྠཾ པཙྩམཱནེ གཎྜེ ཏསྶ ཨུཔརི ཛཱཡམཱནཱ ཁུདྡཀཔཱིལ༹ཀཱ ཝིཡ, གཎྜསྶ ཝཱ ཨནེཀདྷཱབྷེདེ པཱིལ༹ཀཱ ཝིཡ. གྷཊྚནཾ ཝིཡ སངྒྷཊྚནརསཏཱཡ ཕསྶོ. གྷཊྚནདུཀྑཾ ཝིཡཱཏི གྷཊྚནཏོ ཛཱཏཾ དུཀྑཾ ཝིཡ ཏིཝིདྷདུཀྑཏཱཝསེན ཏིསྶནྣམྤི ཝེདནཱནཾ དུཀྑབྷཱཝཏོ. པཊིཀཱརཱབྷིལཱསོ ཝིཡཱཏི སམུདཱཡསྶ ཨེཀདེསནིདསྶནབྷཱཝེནཱཧ. ཨསཔྤཱཡགྒཧཎཾ ཝིཡ བཧུཝིདྷཱནཏྠུཔྤཏྟིནིམིཏྟཏོ. ཨསཔྤཱཡལེཔནཾ ཝིཡ དུཀྑཧེཏུནོ སསནྟཱནེ སནྣིདྷཱཔནཏོ. གཎྜཝིཀཱརཔཱཏུབྷཱཝོ ཝིཡ ཨཏྟབྷཱཝགཎྜསྶ ནིབྦཏྟིཝིཀཱརབྷཱཝཏོ ¶ , ཏནྣིམིཏྟཉྩསྶ སཱུནབྷཱཝཱདིསམྦྷཝཏོ. སཱུནཏཱསརཱགཔུབྦགྒཧཎཱདཡོ ཧི གཎྜཝིཀཱརཱ. སརསཏོ གཎྜསྶ བྷིཛྫནཾ པཱཀེན ཝིནཱ ན ཧོཏཱིཏི བྷེདགྒཧཎེནེཝསྶ པཱཀོཔི གཧིཏོཏི ཀཏྭཱ ཨཱཧ ‘‘གཎྜབྷེདོ ཝིཡ ཛརཱམརཎ’’ནྟི. གཎྜསྶ ཝཱ ཝིསདིསཱཔཏྟི, བྷིཛྫནཉྩ གཎྜབྷེདོ, ཏཏྠ ཝིསདིསཱཔཏྟི པཱཀོཏི ཝེདིཏབྦཾ.

ཨུཔམཱཧི ¶ བྷཝཙཀྐཾ ཝིཉྙཱཔེནྟེན ཨེཀཱདྷིཊྛཱནེཧི ཨུཔམཱཝིསེསེཧི ཏཾ ཝིཉྙཱཔེཏྭཱ ཨིདཱནི ནཱནཱདྷིཊྛཱནེཧི ཝིཉྙཱཔེཏུཾ ‘‘ཡསྨཱ ཝཱ’’ཏིཨཱདི ཝུཏྟཾ. ཏཏྠ པཊལཱབྷིབྷཱུཏཙཀྑུཀོ རཱུཔཱནི ན པསྶཏི, ཀིཉྩི པསྶནྟོཔི ཝིཔརཱིཏཾ པསྶཏི, ཨེཝཾ ཨཝིཛྫཱབྷིབྷཱུཏོ དུཀྑཱདཱིནི ན པཊིཔཛྫཏི ན པསྶཏི, མིཙྪཱ ཝཱ པཊིཔཛྫཏཱིཏི པཊལཾ ཝིཡ ཨཝིཛྫཱ. ཀོསཀཱརཀིམི ཝིཡ ཨཏྟནཱཝ ཀཏཏྟཱ, ཝཊྚསྶ ཨཏྟནོ ཨེཝ པརིབྦྷམནཀཱརཎཏྟཱ ཙ ཀོསཔྤདེསཱ ཝིཡ སངྑཱརཱ. སངྑཱརཔརིགྒཧཾ ཝིནཱ པཏིཊྛཾ ཨལབྷམཱནཾ ཝིཉྙཱཎཾ པརིཎཱཡཀཔརིགྒཧཾ ཝིནཱ པཏིཊྛཾ ཨལབྷམཱནོ རཱཛཀུམཱརོ ཝིཡཱཏི པརིགྒཧེན ཝིནཱ པཏིཊྛཱལཱབྷོ ཨེཏྠ ཨུཔམོཔམེཡྻསཱམཉྙཾ. ཨུཔཔཏྟིནིམིཏྟནྟི ཀམྨཱདིཨཱརམྨཎམཱཧ. པརིཀཔྤནཏོཏི ཨཱརམྨཎཀརཎཏོ, སམྤཡུཏྟེན ཝཱ ཝིཏཀྐེན ཝིཏཀྐནཏོ. དེཝམནུསྶམིགཝིཧངྒཱདིཝིཝིདྷཔྤཀཱརཏཱཡ མཱཡཱ ཝིཡ ནཱམརཱུཔཾ. པཏིཊྛཱཝིསེསེན ཝུདྡྷིཝིསེསཱཔཏྟིཏོ ཝནཔྤགུམྦོ ཝིཡ སལཱ༹ཡཏནཾ. ཨཱཡཏནཱནཾ ཝིསཡིཝིསཡབྷཱུཏཱནཾ ཨཉྙམཉྙཱབྷིམུཁབྷཱཝོ ཨཱཡཏནགྷཊྚནཾ. ཏཏོ ཨཱཡཏནགྷཊྚནཏོ དྭཡསངྒྷཊྚནུཔྤཏྟིཏོ, ཝེདནཱདུཀྑཧེཏུཏོ ཙ ཨགྒི ཝིཡ ཕསྶོ. སཔརིལཱ༹ཧཏོ དཱཧོ ཝིཡ ཝེདནཱ. ཨུཔརཱུཔརི ཏཎྷཱཔཝཌྜྷནཏོ ལོཎཱུདཀཔཱནཾ ཝིཡ ཝིསཡཱནུབྷཝནཾ. ཨཱརམྨཎེ པཱཏུཀམྱཏཱབྷཱཝཏོ པིཔཱསཱ ཝིཡ ཏཎྷཱ. ཏདསྶུཔཱདཱནནྟི ཏཾ ཨབྷིལཱསཀརཎཾ ཏཎྷཱདིཊྛཱབྷིནནྡནཾ ཨསྶ ཏཾསམངྒིནོ པུགྒལསྶ, ཏདསྶ ཝཱ བྷཝེཡྻ ཨུཔཱདཱནཾ. བྱསནཱཝཧཏཱཡ ཨཛཱནནཏོ བྷཝུཔཱདཱནཾ མཙྪསྶ བལི༹སུཔཱདཱནཾ ཝིཡ. ཨེཏྠ ཙ སངྑཱརཱདཱིནཾ ཀོསཔྤདེསཔརིཎཱཡཀཱདཱིཧི དྭཱིཧི དྭཱིཧི སདིསཏཱཡ དྭེ དྭེ ཨུཔམཱ ཝུཏྟཱཏི ཝེདིཏབྦཱ.

༦༥༩. ཀོཙི ཨགམྦྷཱིརོ ཨེཝ གམྦྷཱིརོ ཝིཡ ཁཱཡཏི པུརཱཎཏིཎཔཎྞཱདིབྷརིཏོ པབྦཏསངྑེཔེ ཛལཱསཡོ ཝིཡ, ན ཨེཝམཡཾ. ཨཡཾ པན གམྦྷཱིརོཝ ཧུཏྭཱ ཨོབྷཱསཏི པཀཱསཏི དིསྶཏཱིཏི གམྦྷཱིརཱཝབྷཱསོ. ཡཐཱརཧནྟི ཨཏྠཱདིཝསེན ཡཐཱནུརཱུཔཾ.

ཛཱཏིཏོ ཛརཱམརཎཾ ན ན ཧོཏི, ཧོཏི ཨེཝཱཏི ཨཝདྷཱརཎེ སིདྡྷེ ‘‘སིཡཱ ནུ ཁོ ཛརཱམརཎཾ ¶ ཛཱཏིཏོ, ཨཉྙཏོཔཱི’’ཏི ཨཱསངྐཱཡཾ ཏདཱསངྐཱནིཝཏྟནཏྠཾ ‘‘ན ཙ ཛཱཏིཾ ཝིནཱ ཨཉྙཏོ ཧོཏཱི’’ཏི ཝུཏྟཾ. ཏཏྠ ཨཉྙགྒཧཎཾ ཛཱཏིཡཱ པཊིཡོགཱིཝིསཡཾ, ན ཨཉྙམཏྟཝིསཡཾ ¶ ‘‘ཛཱཏིཾ ཝིནཱ’’ཏི ཝཙནཏོ. ཏེནསྶ ནཱཉྙཾ ཛཱཏིཡཱ སཧཀཱརཱིཀཱརཎབྷཱུཏཾ ནིཝཏྟིཏཾ ཧོཏི. ཨེས ནཡོ ཨིཏོ པརེསུཔི. ཨིཏྠནྟི ཨིདཾ པཀཱརཾ, ཨིམིནཱ པཀཱརེནཱཏི ཨཏྠོ. ཛཱཏིཔཙྩཡསམྦྷཱུཏསམུདཱགཏཊྛོཏི ཛཱཏིཔཙྩཡསམྦྷཱུཏཾ ཧུཏྭཱ སཧིཏསྶ ཨཏྟནོ པཙྩཡཱནུརཱུཔསྶ ཨུདྡྷཾ ཨུདྡྷཾ ཨཱགཏབྷཱཝོ, ཨནུཔྤཝཏྟཊྛོཏི ཨཏྠོ. ཨཐ ཝཱ སམྦྷཱུཏཊྛོ ཙ སམུདཱགཏཊྛོ ཙ སམྦྷཱུཏསམུདཱགཏཊྛོ. ‘‘ན ཛཱཏིཏོ ཛརཱམརཎཾ ན ཧོཏི, ན ཙ ཛཱཏིཾ ཝིནཱ ཨཉྙཏོ ཧོཏཱི’’ཏི ཧི ཛཱཏིཔཙྩཡསམྦྷཱུཏཊྛོ ཝུཏྟོ. ཨིཏྠཉྩ ཛཱཏིཏོ སམུདཱགཙྪཏཱིཏི ཛཱཏིཔཙྩཡསམུདཱགཏཊྛོ, ཡཱ ཡཱ ཛཱཏི ཡཐཱ ཡཐཱ པཙྩཡོ ཧོཏི, ཏདནུརཱུཔཔཱཏུབྷཱཝོཏི ཨཏྠོ.

ཏཏྠ ‘‘ན ཛཱཏིཏོ ཛརཱམརཎཾ ན ཧོཏཱི’’ཏི ཨིམིནཱ ཛརཱམརཎསྶ ཛཱཏིཔཙྩཡཏཱཡ ཨཝིཏཐཏཾ དསྶེཏི, ‘‘ན ཛཱཏིཾ ཝིནཱ ཨཉྙཏོ ཛརཱམརཎཾ ཧོཏཱི’’ཏི ཨིམིནཱ ཨནཉྙཐཏྟཾ, ‘‘ཨིཏྠཉྩ ཛཱཏིཏོ སམུདཱགཙྪཏཱི’’ཏི ཨིམིནཱ ཏཐཏཾ. ཏེན ཙ ཡཐཱ པཙྩཡདྷམྨཱ ཨཏྟནོ པཙྩཡུཔྤནྣཱནཾ པཙྩཡབྷཱཝེ, ཏཐཱ ཨཝིཏཐཱ ཨནཉྙཐཱ, ཨེཝཾ པཙྩཡུཔྤནྣདྷམྨཱཔི ཏབྦྷཱཝེཏི དསྶེཏི. ཨེས ནཡོ སེསེསུཔི. ‘‘ཧེཏུཕལེ ཉཱཎཾ ཨཏྠཔཊིསམྦྷིདཱ’’ཏི ཨེཏེན ཝཙནེན ཨཏྠསྶ ཧེཏུཕལབྷཱཝོ ཀཐཾ ཉཱཏབྦོཏི? ‘‘ཨཏྠཔཊིསམྦྷིདཱ’’ཏི ཨེཏསྶ སམཱསཔདསྶ ཨཝཡཝཔདཏྠཾ དསྶེནྟེན ‘‘ཧེཏུཕལེ ཉཱཎ’’ནྟི ཝུཏྟཏྟཱ. ‘‘ཨཏྠེ པཊིསམྦྷིདཱ ཨཏྠཔཊིསམྦྷིདཱ’’ཏི ཨེཏྠ ཧི ‘‘ཨཏྠེ’’ཏི ཨེཏསྶ ཨཏྠཾ དསྶེནྟེན ‘‘ཧེཏུཕལེ’’ཏི ཝུཏྟཾ, ‘‘པཊིསམྦྷིདཱ’’ཏི ཨེཏསྶ ཨཏྠཾ དསྶེནྟེན ‘‘ཉཱཎ’’ནྟི, ཏསྨཱ ཧེཏུཕལཨཏྠསདྡཱ ཨེཀཏྠཱ, ཉཱཎཔཊིསམྦྷིདཱ ཙཱཏི ཨིམམཏྠཾ ཝདནྟེན སཱདྷིཏོ ཨཏྠསྶ ཧེཏུཕལབྷཱཝོ.

ཡེནཱཀཱརེནཱཏི ཡེན པཝཏྟིཨཱཀཱརེན. སབྷཱཝདྷམྨཱ ཧི པཙྩཡཝིསེསསིདྡྷེན པཝཏྟིཨཱཀཱརེན ཝིསིཊྛཱཀཱརཱ ཧོནྟི. ཏེནཱཧ ‘‘སབྦེ དྷམྨཱ སབྦཱཀཱརེན བུདྡྷསྶ བྷགཝཏོ ཉཱཎམུཁེ ཨཱཔཱཐམཱགཙྪནྟཱི’’ཏི (མཧཱནི. ༡༥༦; ཙཱུལ༹ནི. མོགྷརཱཛམཱཎཝཔུཙྪཱནིདྡེས ༨༥). ཡདཝཏྠཱཏི ཡཱཡ ཨཝཏྠཱཡ ཨཝཏྠིཏཱ. ཨཝཏྠཱཝིསེསཝནྟོ ཧི དྷམྨཱ ཏེན ཏེན ཨཝཏྠཱཝིསེསེན ཏཾ ཏཾ ཨཏྠཀིཙྩཾ སཱདྷེཏུཾ སམཏྠཱ ཧོནྟི. སྭཱཡཾ པཝཏྟིཨཱཀཱརོ, ཨཝཏྠཱཝིསེསོ ཙ ཨཝིཛྫཱཡཔི ཨནུཔཙིཏཀུསལསམྦྷཱརེཧི དུརཝབོདྷཏོ ཨེཝ ཉཱཎེན ཨལབྦྷནེཡྻཔཏིཊྛོ ¶ ¶ ཙཱཏི ཨཱཧ ‘‘ཏསྶ…པེ… གམྦྷཱིརོ’’ཏི. ཏསྶ ཨཱཀཱརསྶ, ཨཝཏྠཱཡ ཙ. ཧེཏུམྷི ཉཱཎནྟི ཨེཏྠ ཧེཏུནོ དྷམྨཔརིཡཱཡཏཱ ཝུཏྟནཡེནེཝ ཝེདིཏབྦཱ.

ཨསྶཱཏི པཊིཙྩསམུཔྤཱདསྶ. ཏེན ཏེན ཀཱརཎེནཱཏི ཏེན ཏེན ཝེནེཡྻཱནཾ བུཛ྄ཛྷནཱནུགུཎཏཱསངྑཱཏེན ཀཱརཎེན. ཏཏྠཱཏི ཏསྨིཾ དེསནཔྤཀཱརེ. ཨནུལོམཔཊིལོམཏོཏི ནཡིདྷ པཙྩཡུཔྤཱདཱ པཙྩཡུཔྤནྣུཔྤཱདསངྑཱཏཾ ཨནུལོམཾ, པཙྩཡནིརོདྷཱ པཙྩཡུཔྤནྣནིརོདྷསངྑཱཏཉྩ པཊིལོམམཱཧ. ཨཱདིཏོ པན ཨནྟགམནམནུལོམཾ, ཨནྟཏོ ཙ ཨཱདིགམནཾ པཊིལོམམཱཧ. ཨཱདིཏོ པཊྛཱཡ ཨནུལོམདེསནཱཡ, ཨནྟཏོ པཊྛཱཡ པཊིལོམདེསནཱཡ ཙ ཏིསནྡྷིཙཏུསངྑེཔཾ. ‘‘ཨིམེ ཙཏྟཱརོ ཨཱཧཱརཱ ཀིཾནིདཱནཱ’’ཏིཨཱདིཀཱཡ (སཾ. ནི. ༢.༡༡) ཝེམཛ྄ཛྷཏོ པཊྛཱཡ པཊིལོམདེསནཱཡ, ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎཾ, ཏིཎྞཾ སངྒཏི ཕསྶོ, ཕསྶཔཙྩཡཱ ཝེདནཱ’’ཏིཨཱདིཀཱཡ (མ. ནི. ༡.༢༠༤, ༤༠༠; མ. ནི. ༣.༤༢༡, ༤༢༥-༤༢༦; སཾ. ནི. ༢.༤༣-༤༥; ༢.༤.༦༠; ཀཐཱ. ༤༦༥, ༤༦༧) ཨནུལོམདེསནཱཡ ཙ དྭིསནྡྷིཏིསངྑེཔཾ. ‘‘སཾཡོཛནཱིཡེསུ, བྷིཀྑཝེ, དྷམྨེསུ ཨསྶཱདཱནུཔསྶིནོ ཝིཧརཏོ ཏཎྷཱ པཝཌྜྷཏི, ཏཎྷཱཔཙྩཡཱ ཨུཔཱདཱན’’ནྟིཨཱདཱིསུ (སཾ. ནི. ༢.༥༣, ༥༧) ཨེཀསནྡྷིདྭིསངྑེཔཾ. ཀཏྠཙི ཨེཀངྒོཔི ཙ པཊིཙྩསམུཔྤཱདོ དེསིཏོ, སོ ‘‘ཏཏྲ, བྷིཀྑཝེ, སུཏཝཱ ཨརིཡསཱཝཀོ’’ཏིཨཱདིནཱ (སཾ. ནི. ༢.༦༢) དསྶིཏོ ཨེཝ.

ཨཝིཛྫཱདཱིནཾ སབྷཱཝོ པཊིཝིཛ྄ཛྷཱིཡཏཱིཏི པཊིཝེདྷོ. ཝུཏྟཾ ཧེཏཾ ཨཊྛཀཐཱཡཾ ‘‘ཏེསཾ ཏེསཾ ཝཱ ཏཏྠ ཏཏྠ ཝུཏྟདྷམྨཱནཾ པཊིཝིཛ྄ཛྷིཏབྦོ སལཀྑཎསངྑཱཏོ ཨཝིཔརཱིཏསབྷཱཝོ པཊིཝེདྷོ’’ཏི (དྷ. ས. ཨཊྛ. ནིདཱནཀཐཱ). ཛཱནནལཀྑཎསྶ ཉཱཎསྶ པཊིཔཀྑབྷཱུཏོ ཨཝིཛྫཱཡ ཨཉྙཱཎཊྛོ. ཨཱརམྨཎསྶ པཙྩཀྑཀརཎེན དསྶནབྷཱུཏསྶ པཊིཔཀྑབྷཱུཏོ ཨདསྶནཊྛོ. ཡེན པནེསཱ དུཀྑཱདཱིནཾ ཡཱཐཱཝསརསཾ པཊིཝིཛ྄ཛྷིཏུཾ ན དེཏི, ཚཱདེཏྭཱ པརིཡོནནྡྷིཏྭཱ ཏིཊྛཏི, སོ ཏསྶཱ སཙྩཱསམྤཊིཝེདྷཊྛོ. ཨཔུཉྙཱབྷིསངྑཱརེཀདེསོ སརཱགོ, ཨཉྙོ ཝིརཱགོ. རཱགསྶ ཝཱ ཨཔཊིཔཀྑབྷཱཝཏོ རཱགཔཝཌྜྷཀོ ཨཔུཉྙཱབྷིསངྑཱརོ སབྦོཔི སརཱགོ, ཨིཏརོ ¶ ཏཔྤཊིཔཀྑབྷཱཝཏོ ཝིརཱགོ. ‘‘དཱིགྷརཏྟཾ ཧེཏཾ, བྷིཀྑཝེ, ཨསྶུཏཝཏོ པུཐུཛྫནསྶ ཨཛ྄ཛྷོསིཏཾ མམཱཡིཏཾ པརཱམཊྛཾ ‘ཨེཏཾ མམ, ཨེསོཧམསྨི, ཨེསོ མེ ཨཏྟཱ’’ཏི (སཾ. ནི. ༢.༦༢) ཨཏྟཔརཱམཱསསྶ ཝིཉྙཱཎཾ ཝིསེསཏོ ཝཏྠུ ཝུཏྟནྟི ཝིཉྙཱཎསྶ སུཉྙཏཊྛོ གམྦྷཱིརོ. ཨཏྟཱ ཝིཛཱནཱཏི སཾསརཏཱིཏི སབྱཱཔཱརཏཱསངྐནྟི ཨབྷིནིཝེསབལཝཏཱཡ ཨབྱཱཔཱརཊྛཨསངྐནྟིཔཊིསནྡྷིཔཱཏུབྷཱཝཊྛཱ ¶ ཙ གམྦྷཱིརཱ. ནཱམརཱུཔསྶ པཊིསནྡྷིཀྑཎེ ཨེཀུཔྤཱདོ, པཝཏྟིཡཾ ཝིསུཾ ཝིསུཾ ཡཐཱརཧཾ ཨེཀུཔྤཱདོ, ནཱམསྶ རཱུཔེན, རཱུཔསྶ ཙ ནཱམེན ཨསམྤཡོགཏོ ཝིནིབྦྷོགོ, ནཱམསྶ ནཱམེན, རཱུཔསྶ ཙ རཱུཔེན, ཨེཀཙྩསྶ ཨེཀཙྩེན ཨཝིནིབྦྷོགོ ཡོཛེཏབྦོ. ཨེཀུཔྤཱདེཀནིརོདྷེ ཧི ཨཝིནིབྦྷོགེ ཨདྷིཔྤེཏེ སོ རཱུཔསྶ ཙ ཨེཀཀལཱཔཝུཏྟིནོ ལབྦྷཏི. ཨཐ ཝཱ ཨེཀཙཏུཝོཀཱརབྷཝེསུ ནཱམརཱུཔཱནཾ ཨསཧཝཏྟནཏོ ཨཉྙམཉྙཝིནིབྦྷོགོ, པཉྩཝོཀཱརབྷཝེ སཧཝཏྟནཏོ ཨཝིནིབྦྷོགོ ཙ ཝེདིཏབྦོ.

ཨདྷིཔཏིཡཊྛོ ནཱམ ཨིདྷ ཨིནྡྲིཡཔཙྩཡབྷཱཝོ. ‘‘ལོཀོཔེསོ དྭཱརཱཔེསཱ ཁེཏྟམྤེཏ’’ནྟི (དྷ. ས. ༥༩༨-༥༩༩) ཝུཏྟཱ ལོཀཱདིཨཏྠཱ ཙཀྑཱདཱིསུ པཉྩསུ ཡོཛེཏབྦཱ. མནཱཡཏནསྶཱཔི ལུཛྫནཏོ, མནོསམྥསྶཱདཱིནཾ དྭཱརཁེཏྟབྷཱཝཏོ ཙ ཨེཏེ ཨཏྠཱ སམྦྷཝནྟི ཨེཝ. ཨཱཔཱཐགཏཱནཾ རཱུཔཱདཱིནཾ པཀཱསནཡོགྱཏཱལཀྑཎཾ ཨོབྷཱསནཾ ཙཀྑཱདཱིནཾ ཝིསཡིབྷཱཝོ, མནཱཡཏནསྶ ཝིཛཱནནཾ. སངྒྷཊྚནཊྛོ ཝིསེསཏོ ཙཀྑུསམྥསྶཱདཱིནཾ པཉྩནྣཾ, ཨིཏརེ ཚནྣམྤི ཡོཛེཏབྦཱ. ཕུསནཉྩ ཕསྶསྶ སབྷཱཝོ, སངྒྷཊྚནཾ རསོ, ཨིཏརེ ཨུཔཊྛཱནཱཀཱརཱ. ཨཱརམྨཎརསཱནུབྷཝནཊྛོ རསཝསེན ཝུཏྟོ, ཝེདཡིཏཊྛོ ལཀྑཎཝསེན. སུཁདུཀྑམཛ྄ཛྷཏྟབྷཱཝཱ ཡཐཱཀྐམཾ ཏིསྶནྣཾ ཝེདནཱནཾ སབྷཱཝཝསེན ཝུཏྟཱ. ཨཏྟཱ ཝེདཡཏཱིཏི ཨབྷིནིཝེསསྶ བལཝཏཱཡ ནིཛྫཱིཝཊྛོ ཝེདནཱཡ གམྦྷཱིརོ. ནིཛྫཱིཝཱཡ ཝཱ ཝེདནཱཡ ཝེདཡིཏཾ ནིཛྫཱིཝཝེདཡིཏཾ, ནིཛྫཱིཝཝེདཡིཏམེཝ ཨཏྠོ ནིཛྫཱིཝཝེདཡིཏཊྛོ. སཔྤཱིཏིཀཏཎྷཱཡ ཨབྷིནནྡིཏཊྛོ, བལཝཏརཏཎྷཱཡ གིལིཏྭཱ པརིནིཊྛཱཔནཾ ཨཛ྄ཛྷོསཱནཊྛོ. ཨིཏརོ སཱདྷཱརཎཝསེན ཝེདིཏབྦོ. ཨཱདཱནགྒཧཎཱབྷིནིཝེསཊྛཱ ཙཏུནྣམྤི ཨུཔཱདཱནཱནཾ སམཱནཱ, པརཱམཱསཊྛོ ཝུཏྟོ དིཊྛུཔཱདཱནཱདཱིནམེཝ, ཏཐཱ དུརཏིཀྐམཊྛོ. ‘‘དིཊྛིཀནྟཱརོ’’ཏི (དྷ. ས. ༣༩༢) ཧི ཝཙནཏོ དིཊྛཱིནཾ དུརཏིཀྐམཏཱ, དལ༹ྷགྒཧཎཏྟཱ ¶ ཝཱ ཙཏུནྣམྤི དུརཏིཀྐམཊྛོ ཡོཛེཏབྦོ. དུརཏིཀྐམཏཱཡཔི ཧི ཏཎྷཱཡ སམུདྡཊྛོ ཝུཏྟོ. ཡོནིགཏིཋིཏིནིཝཱསེསུཁིཔནནྟི སམཱསེ བྷུམྨཝཙནསྶ ཨལོཔོ དཊྛབྦོ. ཨེཝཉྷི ཏེན ཨཱཡཱུཧནཱབྷིསངྑརཎཔདཱནཾ སམཱསོ ཧོཏི. ཛརཱམརཎངྒཾ མརཎཔྤདྷཱནནྟི མརཎཊྛཱ ཨེཝ ཁཡཱདཡོ གམྦྷཱིརཱཏི དསྶིཏཱ. ནཝནཝཱནཉྷི ཁཡེན ཁཎྜིཙྩཱདིཔརིཔཀྐཔྤཝཏྟི ཛརཱཏི, ཁཡཊྛོ ཝཱ ཛརཱཡ ཝུཏྟོཏི དཊྛབྦོ. ནཝབྷཱཝཱཔགམོ ཧི ཁཡོཏི ཝཏྟུཾ ཡུཏྟོཏི. ཝིཔརིཎཱམཊྛོ དྭིནྣམྤི. སནྟཏིཝསེན ཝཱ ཛརཱཡ ཁཡཝཡབྷཱཝོ, སམྨུཏིཁཎིཀཝསེན མརཎསྶ བྷེདཝིཔརིཎཱམཏཱ ཡོཛེཏབྦཱ.

༦༦༠. ཨཏྠནཡཱཏི ཨཏྠཱནཾ ནཡཱ, ཨཝིཛྫཱདིཨཏྠེཧི ཨེཀཏྟཱདཱི སཀེན བྷཱཝེན ནཡནྟི གམེནྟཱིཏི ¶ ཨེཀཏྟཱདཡོ, ཏེསཾ ནཡཱཏི ཝུཏྟཱ. ནཱིཡནྟཱིཏི ཧི ནཡཱཏི. ཨཏྠཱ ཨེཝ ཝཱ ཨེཀཏྟཱདིབྷཱཝེན ནཱིཡམཱནཱ ཉཱཡམཱནཱ ཨཏྠནཡཱཏི ཝུཏྟཱ. ནཱིཡནྟི ཨེཏེཧཱིཏི ཝཱ ནཡཱ, ཨེཀཏྟཱདཱིཧི ཙ ཨཏྠཱ ‘‘ཨེཀ’’ནྟིཨཱདིནཱ ནཱིཡནྟི, ཏསྨཱ ཨེཀཏྟཱདཡོ ཨཏྠཱནཾ ནཡཱཏི ཨཏྠནཡཱ.

ཨངྐུརཱདིབྷཱཝེནཱཏི ཨངྐུརཔཏྟནཱལ༹ཁནྡྷསཱཁཱཔལླཝཔལཱསཱདིབྷཱཝེན པཝཏྟམཱནེ ཨཝཡཝེ ཨེཀཛ྄ཛྷཾ གཧེཏྭཱ སནྟཱནཱནུཔཙྪེདེན བཱིཛཾ རུཀྑབྷཱཝཾ པཏྟཾ རུཀྑབྷཱཝེན པཝཏྟཾ ཏཉྩ ཨེཀཏྟེན ཝུཙྩཏཱིཏི སནྟཱནཱནུཔཙྪེདོ ཡཐཱ ཨེཀཏྟཾ, ཨེཝཾ ཨིདྷཱཔི ཨཝིཛྫཱསངྑཱརཱདིཧེཏུཧེཏུསམུཔྤནྣཱནཾ སནྟཱནཱནུཔཙྪེདོ ཨེཀསནྟཏིཔཏིཏཏཱ ཨེཀཏྟནཡོཏི དསྶེཏི. ‘‘ཧེཏུཕལསམྦནྡྷེནཱ’’ཏི ཨེཏེན སནྟཱནཱནུཔཙྪེདཾ ཝིབྷཱཝེཏི. སཏིཔི ཧི ཧེཏུཕལཱནཾ པརམཏྠཏོ བྷེདེ ཧེཏུབྷཱཝེན, ཕལབྷཱཝེན ཙ ཏེསཾ སམྦནྡྷབྷཱཝོཡེཝེཏྠ སནྟཱནཱནུཔཙྪེདོ, ཡཏོ ཡསྨིཾ སནྟཱནེ ཀམྨཾ ནིབྦཏྟཾ, ཏཏྠེཝ ཕལུཔྤཏྟཱིཏི ཀཏསྶ ཝིནཱསོ, ཨཀཏསྶ ཨབྦྷཱགམོ ཙ ནཏྠཱིཏི. ཨེཀཏྟགྒཧཎཏོཏི ཧེཏུཕལཱནཾ བྷེདཾ ཨནུཔདྷཱརེཏྭཱ ཧེཏུཾ, ཕལཉྩ ཨབྷིནྣཾ ཀཏྭཱ ཨུབྷིནྣཾ ཨེཀབྷཱཝསྶ ཨབྷེདསྶ གཧཎེན. ‘‘ཏདེཝ ཝིཉྙཱཎཾ སནྡྷཱཝཏི སཾསརཏཱི’’ཏིཨཱདིནཱ སསྶཏདིཊྛིཾ ཨུཔཱདིཡཏི.

ལཀྑཎཝཝཏྠཱནནྟི སབྷཱཝཝཝཏྠཱནཾ ཧེཏུནོ, ཕལསྶ ཙ བྷིནྣསབྷཱཝཏཱཝབོདྷོ. བྷིནྣསནྟཱནསྶེཝཱཏི སམྦནྡྷརཧིཏསྶ ནཱནཏྟསྶ གཧཎཏོ ¶ ཨཉྙོ མཏོ, ཨཉྙོ ཛཱཏོ, ཏསྨཱ ‘‘སཏྟནྟརོ ཨུཙྪིནྣོ, སཏྟནྟརོ ཨུཔྤནྣོ’’ཏི གཎྷནྟོ ཨུཙྪེདདིཊྛིཾ ཨུཔཱདིཡཏི.

ཨམྷེཧི ཨུཔྤཱདེཏབྦནྟི ཨཱནེཏྭཱ སམྦནྡྷོ. བྱཱཔཱརཱབྷཱཝོ ཨནབྷིསནྡྷིཏཱཡ ཨབྱཱཝཊཏཱ. སམྨཱ པསྶནྟོཏི ‘‘ནིརཱིཧཱ ནིཛྫཱིཝཱ དྷམྨམཏྟཱ’’ཏི པསྶནྟོ. སབྷཱཝོ ཨེཝ ནིཡམོ སབྷཱཝནིཡམོ ‘‘སསམྦྷཱརགྒིནོ ཨུདྡྷམུཁཏཱ, སསམྦྷཱརཝཱཡུནོ ཏིརིཡགམན’’ནྟི ཨེཝམཱདི ཝིཡ. ཏེན སིདྡྷོ ཡཐཱསཀཾ པཙྩཡུཔྤནྣསྶ ཧེཏུབྷཱཝོ. ‘‘ཀསྶཙི ཀཏྟུནོ ཨབྷཱཝཱ ན ཀཱཙི ཀིརིཡཱ ཕལཔབནྡྷིནཱི’’ཏི ཨཀིརིཡདིཊྛིཾ ཨུཔཱདིཡཏི.

‘‘ཁཱིརཏོ དདྷི, ན ཨུདཀཏོ, ཏིལཏོ ཏེལཾ, ན ཝཱལིཀཏོ’’ཏི སབྦཏོ སབྦསམྦྷཝཱབྷཱཝདསྶནེན ཨཧེཏུཀདིཊྛིཾ ཧེཏུཨནུརཱུཔམེཝ ཕལཾ པསྶནྟོ ཨཀིརིཡདིཊྛིཾ པཛཧཏི. ཡཏོ ཀུཏོཙཱིཏི ཡདི ཨཉྙསྨཱ ཨཉྙསྶ ཨུཔྤཏྟི སིཡཱ, ཝཱལིཀཏོ ཏེལསྶ, ཨུཙྪུཏོ ཁཱིརསྶ ¶ ཀསྨཱ ཨུཔྤཏྟི ན སིཡཱ, ཏསྨཱ ན ཀོཙི ཀསྶཙི ཧེཏུ ཨཏྠཱིཏི ཨཧེཏུཀདིཊྛིཾ, ཨཝིཛྫམཱནེཔི ཧེཏུམྷི ནིཡཏཏཱཡ ཏིལགཱཝཱིསུཀྐསོཎིཏཱདཱིཧི ཏེལཁཱིརསརཱིརཱདཱིནི པཝཏྟནྟཱིཏི ནིཡཏིཝཱདཉྩ ཨུཔཱདིཡཏཱིཏི ཝིཉྙཱཏབྦཾ ཡཐཱརཧཾ.

༦༦༡. ཀསྨཱ? ཡསྨཱ ཨིདཉྷི བྷཝཙཀྐཾ ཨཔདཱལེཏྭཱ སཾསཱརབྷཡམཏཱིཏོ ན ཀོཙི སུཔིནནྟརེཔི ཨཏྠཱིཏི སམྦནྡྷོ. ཨགཱདྷཾ ཨཔྤཏིཊྛཾ དུརཏིཡཱནཾ དུརཏིཀྐམཾ. ཨསནིཝིཙཀྐམིཝཱཏི ཨསནིམཎྜལམིཝ. ཏཉྷི ནིམྨཐནམེཝ, ནཱནིམྨཐནཾ པཝཏྟཏི, ཨེཝཾ བྷཝཙཀྐམྤི ཨེཀནྟདུཀྑུཔྤཱདནཏོཝ ‘‘ནིཙྩནིམྨཐན’’ནྟི ཝུཏྟཾ.

ཉཱཎཱསིནཱ ཨཔདཱལེཏྭཱ སཾསཱརབྷཡམཏཱིཏོ ནཏྠཱིཏི ཨེཏསྶ སཱདྷཀསུཏྟཾ དསྶེནྟོ ‘‘ཝུཏྟམྤི ཙེཏ’’ནྟིཨཱདིམཱཧ. ཏནྟཱུནཾ ཨཱཀུལཀཾ ཏནྟཱཀུལཀཾ, ཏནྟཱཀུལཀམིཝ ཛཱཏཱ ཏནྟཱཀུལཀཛཱཏཱ, ཀིལེསཀམྨཝིཔཱཀེཧི ཨཏིཝིཡ ཛཊིཏཱཏི ཨཏྠོ. ཀུལིཡཱ སཀུཎིཡཱ ནཱིཌཾ ཀུལིཀཾ, ཏཾ ཝིཡ ཛཱཏཱ ཀུལིཀུཎྜིཀཛཱཏཱ. མུཉྩཱ ཝིཡ, པབྦཛཱ ཝིཡ ཙ བྷཱུཏཱ ཛཱཏཱ མུཉྫཔབྦཛབྷཱུཏཱ. ཏདུབྷཡཾ ¶ ཀིར ཏིཎཾ ཨཱཀུལཾ ཛཊིཏཾ ཧུཏྭཱ ཝཌྜྷཏི. ཝཌྜྷིཡཱ ཨབྷཱཝཏོ ཨཔཱཡཾ, དུཀྑགཏིབྷཱཝཏོ དུགྒཏིཾ, སུཁསམུསྶཡཏོ ཝིནིཔཏིཏཏྟཱ ཝིནིཔཱཏཉྩ, ཙཏུབྦིདྷཾ ཨཔཱཡཾ ‘‘ཁནྡྷཱནཉྩ པཊིཔཱཊཱི’’ཏིཨཱདིནཱ (ཝིསུདྡྷི. ༢.༦༡༩; དཱི. ནི. ཨཊྛ. ༢.༩༥ ཨཱཔསཱདནཱཝཎྞནཱ; སཾ. ནི. ཨཊྛ. ༢.༢.༦༠; ཨ. ནི. ཨཊྛ. ༢.༤.༡༩༩; ཝིབྷ. ཨཊྛ. ༢༢༦ སངྑཱརཔདནིདྡེས; དྷ. ས. ཨཊྛ. ནིདཱནཀཐཱ; སུ. ནི. ཨཊྛ. ༢.༥༢༣; ཨུདཱ. ཨཊྛ. ༣༩; ཨིཏིཝུ. ཨཊྛ. ༡༤, ༥༨; ཐེརགཱ. ཨཊྛ. ༡.༦༧, ༩༩; པཊི. མ. ཨཊྛ. ༢.༡.༡༡༧; ཙཱུལ༹ནི. ཨཊྛ. ༦; བུ. ཝཾ. ཨཊྛ. ༢.༥༨) ཝུཏྟཾ སཾསཱརཉྩ ནཱཏིཝཏྟཏི. སཾསཱརོ ཨེཝ ཝཱ སབྦོ ཨིདྷ ཝཌྜྷིཨཔགམཱདིཨཏྠེཧི ཨཔཱཡཱདིནཱམཀོ ཝུཏྟོ ཀེཝལཾ དུཀྑཀྑནྡྷབྷཱཝཏོ.

པཉྙཱབྷཱུམིནིདྡེསཝཎྞནཱ ནིཊྛིཏཱ.

ཨིཏི སཏྟརསམཔརིཙྪེདཝཎྞནཱ.

༡༨. དིཊྛིཝིསུདྡྷིནིདྡེསཝཎྞནཱ

ནཱམརཱུཔཔརིགྒཧཀཐཱཝཎྞནཱ

༦༦༢. ཡཱ ¶ ¶ ཝིསུདྡྷིཡོ སམྤཱདེཏབྦཱཏི སམྦནྡྷོ. ཨིམེསུ ཡཐཱཝིཙཱརིཏེསུ ཁནྡྷཱདཱིསུ ཝིཔསྶནཱཡ བྷཱུམིབྷཱུཏེསུ དྷམྨེསུ. གནྠསྶ ཨུགྒཎྷནཾ ཝཱཙུགྒཏཀརཎཾ ཨུགྒཧོ, པརིཏོ སབྦཐཱཔི ཨཏྠསྶ ཉཱཏུམིཙྪཱ པརིཔུཙྪཱ, སཝནུཔཔརིཀྑཱདིཝསེན ཏདཏྠསྶ མནསིཀཱརཝིདྷི, ཏདུབྷཡཝསེན ཡསྨཱ ཏཏྠཔི ཉཱཎཾ སྭཱསེཝིཏཾ ཧོཏི, ཏསྨཱ ཝུཏྟཾ ‘‘ཨུགྒཧཔརིཔུཙྪཱཝསེན ཉཱཎཔརིཙཡཾ ཀཏྭཱ’’ཏི, ཁནྡྷཱདཱིསུ སུཏམཡཾ ཉཱཎཾ ཨུཔྤཱདེཏྭཱཏི ཨཏྠོ. ཝིཏྠཱརིཏམེཝ, ཏསྨཱ ཏཏྠ ཝིཏྠཱརིཏནཡཱནུསཱརེན སཱིལཝིསུདྡྷི སམྤཱདེཏབྦཱཏི ཨདྷིཔྤཱཡོ. ཨུཔཙཱརསམཱདྷིཔི ཨཔྤནཱསམཱདྷི ཝིཡ ཝིཔསྶནཱཡ ཨདྷིཊྛཱནབྷཱཝཏོ ཙིཏྟཝིསུདྡྷིཡེཝཱཏི ཨཱཧ ‘‘སཨུཔཙཱརཱ’’ཏི. ཝེདིཏབྦཱཏི ཨཏྟནོ སནྟཱནེ ནིབྦཏྟནཝསེནེཝ ཝེདིཏབྦཱ. ཨེཝཉྷི ཏཱ པཙྩཀྑཏོ ཝིདིཏཱ ནཱམ ཧོནྟི, ཏསྨཱ ཝེདིཏབྦཱ སམྤཱདེཏབྦཱཏི ཝུཏྟཾ ཧོཏི. ཝེདིཏབྦཱཏི ཝཱ སམཱཔཏྟིསུཁཱདྷིགམཝསེན ཨནུབྷཝིཏབྦཱཏི ཨཏྠོ. ན ཧི ཀེཝལེན ཛཱནནམཏྟེན ཙིཏྟཝིསུདྡྷིཡཾ པཏིཊྛིཏོ ནཱམ ཧོཏི, ན ཙ ཏཏྠ ཨཔཏིཊྛཱཡ ཨུཔརིཝིསུདྡྷིཾ སམྤཱདེཏུཾ སཀྐཱཏི.

ནཱམརཱུཔཱནཾ ཡཱཐཱཝདསྶནནྟི ནཱམསྶ, རཱུཔསྶ ཙ ཝིབྷཛྫ ཡཐཱབྷཱུཏསབྷཱཝདསྶནཾ. ནཱམགྒཧཎེན ཙེཏྠ ཝེདནཱདཱིནཾ ཙཏུནྣཾ ཏེབྷཱུམཀཱནཾ ཁནྡྷཱནཾ གཧཎཾ, ན ‘‘ཝིཉྙཱཎཔཙྩཡཱ ནཱམརཱུཔ’’ནྟི ཨེཏྠ ཝིཡ ཝིཉྙཱཎཾ ཝིནཱ, ནཱཔི ‘‘ནཱམཉྩ རཱུཔཉྩཱ’’ཏི (དཱི. ནི. ༣.༣༠༤, ༣༥༢; དྷ. ས. དུཀམཱཏིཀཱ ༡༠༩) ཨེཏྠ ཝིཡ སནིབྦཱནེཧི ལོཀུཏྟརཀྑནྡྷེཧི སདྡྷིནྟི དཊྛབྦཾ.

༦༦༣. ཡཱཏི པཛྫཏི ཨེཏེནཱཏི ཡཱནཾ, སམཐོཝ ཡཱནཾ སམཐཡཱནཾ, ཏཾ ཨེཏསྶ ཨཏྠཱིཏི སམཐཡཱནིཀོ. ཛྷཱནེ, ཛྷཱནཱུཔཙཱརེ ཝཱ པཏིཊྛཱཡ ཝིཔསྶནཾ ཨནུཡུཉྫནྟསྶེཏཾ ནཱམཾ, ཏེན སམཐཡཱནིཀེན ¶ . ‘‘ཋཔེཏྭཱ ནེཝསཉྙཱནཱསཉྙཱཡཏན’’ནྟི ཨིདཾ བྷཝགྒདྷམྨཱནཾ ཨཱདིཀམྨིཀསྶ དུཔྤརིགྒཧཏཱཡ ཝུཏྟཾ. ལཀྑཎརསཱདིཝསེན པརིགྒཧེཏབྦཱ ཉཱཎེན པརིཙྪིཛྫ གཧེཏབྦཱ, པརིགྒཧཝིདྷི པན ཁནྡྷནིདྡེསེ (ཝིསུདྡྷི. ༢.༤༢༡ ཨཱདཡོ) ཝུཏྟཱ ཨེཝཱཏི ཨདྷིཔྤཱཡོ. ཨཱརམྨཎཱབྷིམུཁནམནཾ ཨཱརམྨཎེན ཝིནཱ ཨཔྤཝཏྟི, ཏེན ནམནཊྛེན, ནཱམཀརཎཊྛེན ¶ ཝཱ. ཝེདནཱདཡོ ཧི ཨརཱུཔདྷམྨཱ སབྦདཱཔི ཙ ཕསྶཱདིནཱམཀཏྟཱ པཐཝཱིཨཱདཡོ ཝིཡ ཀེསཀུམྦྷཱདིནཱམནྟརཱནཱཔཛྫནཏོ ཨཏྟནཱཝ ཀཏནཱམཏཱཡ ནཱམཀརཎཊྛེན ‘‘ནཱམ’’ནྟི ཝུཙྩནྟི. ཨཐ ཝཱ ཨདྷིཝཙནསམྥསྶོ ཝིཡ ཨདྷིཝཙནཾ ནཱམཾ ཨནྟརེན ཨནུཔཙིཏསམྦྷཱརཱནཾ གཧཎཾ ན གཙྪནྟཱིཏི ནཱམཱཡཏྟགྒཧཎཏཱཡ ཝེདནཱདཡོ ‘‘ནཱམ’’ནྟི ཝུཙྩནྟི, རཱུཔཾ པན ཝིནཱཔི ནཱམསཝནཾ ཨཏྟནོ རུཔྤནསབྷཱཝེནེཝ གཧཎཾ གཙྪཏི. ཝཝཏྠཱཔེཏབྦནྟི ཨསངྐརཏོ ཋཔེཏབྦཾ, ཨཉྙམཉྙཾ, རཱུཔེན ཙ ཨམིསྶིཏཾ ཀཏྭཱ ཙིཏྟེ ཋཔེཏབྦནྟི ཨཏྠོ.

ནཱམརཱུཔཔརིགྒཧོ ཙ ནཱམ ཡཱཝདེཝ ཏསྶ པཊིནིསྶཛྫནཏྠནྟི ཏདནུརཱུཔམེཝ ནིདསྶནཾ དསྶེནྟོ ‘‘ཡཐཱ ནཱམཱ’’ཏིཨཱདིམཱཧ. རུཔྤནཏོཏི ཨེཏྠ རུཔྤནཊྛོ ‘‘སཱིཏཱདིཝིརོདྷིཔཙྩཡསནྣིཔཱཏེ ཝིསདིསུཔྤཏྟཱི’’ཏིཨཱདིནཱ (ཝིསུདྡྷི. མཧཱཊཱི. ༢.༤༣༢) ཁནྡྷནིདྡེསཝཎྞནཱཡཾ ཝུཏྟོཡེཝ. ཨེཝཾ ཝིསུཾ ནཱམཔརིགྒཧཾ, རཱུཔཔརིགྒཧཉྩ དསྶེཏྭཱ ཨིདཱནི ཨེཀཛ྄ཛྷཾ ནཱམརཱུཔཔརིགྒཧཾ དསྶེཏུཾ ‘‘ཏཏོ ནམནལཀྑཎ’’ནྟིཨཱདི ཝུཏྟཾ.

༦༦༤. ཨིཏི ཨརཱུཔམུཁེན ཝིཔསྶནཱབྷིནིཝེསཾ དསྶེཏྭཱ ཨིདཱནི རཱུཔམུཁེན ཏཾ དསྶེནྟོ ‘‘སུདྡྷཝིཔསྶནཱཡཱནིཀོ པནཱ’’ཏིཨཱདིམཱཧ. ཏཏྠ སམཐཡཱནིཀསྶ སམཐམུཁེན ཝིཔསྶནཱབྷིནིཝེསོ, ཝིཔསྶནཱཡཱནིཀསྶ པན སམཐཾ ཨནིསྶཱཡཱཏི ཨཱཧ ‘‘སུདྡྷཝིཔསྶནཱཡཱནིཀོ’’ཏི, སམཐབྷཱཝནཱཡ ཨམིསྶིཏཝིཔསྶནཱཡཱནཝཱཏི ཨཏྠོ. ཨཡམེཝ ཝཱ སམཐཡཱནིཀོཏི ཡཐཱཝུཏྟོ སམཐཡཱནིཀོ ཨེཝ ཝཱ. ཏེན སམཐཡཱནིཀསྶཱཔི རཱུཔམུཁེན ཝིཔསྶནཱབྷིནིཝེསོ ལབྦྷཏི, ན ཨརཱུཔམུཁེནེཝཱཏི དསྶེཏི. ཏེསཾ ཏེསཾ དྷཱཏུཔརིགྒཧམུཁཱནནྟི ‘‘ཡཾ ཐདྡྷལཀྑཎཾ, ཨཡཾ པཐཝཱིདྷཱཏཱུ’’ཏིཨཱདིནཱ (ཝིསུདྡྷི. ༡.༣༠༨) སངྑེཔམནསིཀཱརཱདིཝསེན ཝུཏྟེསུ ཏེརསསུ དྷཱཏུཔརིགྒཧམུཁེསུ. ཀམྨསམུཊྛཱནོ ནཱམ ཀེསོ ཙམྨབྦྷནྟརགཏོ. ཏཏྠེཝཱཏི ཏསྨིཾཡེཝ ཀམྨསམུཊྛཱནེ ཀེསེ. ཀཱཡཔྤསཱདསྶ ཝིཡ བྷཱཝསྶཱཔི སཀལསརཱིརབྱཱཔིཏཱཡ ‘‘བྷཱཝསྶ ཨཏྠིཏཱཡཱ’’ཏི ཝུཏྟཾ. པུན ཏཏྠེཝཱཏི ཏསྨིཾཡེཝ ཀེསསཉྙིཏེ རཱུཔསམུདཱཡེ. ཨཔརཱནིཔཱིཏི པུབྦེ ཝུཏྟཱནི ཀམྨསམུཊྛཱནཱནི ཝཱིསཏི, ཨིམཱནི ཨཱཧཱརསམུཊྛཱནཱདཱིནི ཙཏུཝཱིསཏི ¶ རཱུཔཱནཱིཏི སབྦཱནིཔི ཙཏུཙཏྟཱལཱིས, ཏཉྩ ¶ ཁོ ཏཏྠ ལབྦྷམཱནསནྟཏིསཱིསསཱམཉྙེན ཝེདིཏབྦཾ. ‘‘ཙཏུཙཏྟཱལཱིསཱ’’ཏི ཙ ཨིདཾ སདྡསྶ ཨནིཡཏཏྟཱ ཝུཏྟཾ. ན ཧི སབྦཀཱལཾ ཨུཏུཙིཏྟཏོ རཱུཔཾ ཨུཔྤཛྫནྟཾ སསདྡམེཝ ཨུཔྤཛྫཏཱིཏི. ཨེཝནྟི ཡཐཱ ཀེསེ, ཨེཝཾ ལོམཱདཱིསུ ཙཏུསམུཊྛཱནིཀེསུ. ཙཏུཝཱིསཏིཀོཊྛཱསེསཱུཏི དྭཏྟིཾསཱཡ ཀོཊྛཱསེསུ ཝཀྑམཱནེ ཨཊྛ ཀོཊྛཱསེ ཨཔནེཏྭཱ ཙཏུཝཱིསཏིཀོཊྛཱསེསུ. སེདཱདཱིནཾ ཨཱཏཔཱུཔཏཱཔཱདིནཱ, ཙིཏྟཝིཀཱརེན ཙ ཨུཔྤཛྫནཏོ ཏེ ཨུཏུཙིཏྟསམུཊྛཱནཱ ཝུཏྟཱ.

དྭཏྟིཾསཀོཊྛཱསགཏེསུ རཱུཔེསུ པཱཀཊེསུ ཛཱཏེསུ ཏདཉྙཱནིཔི པཱཀཊཱནི ཧོནྟཱིཏི ཏཱནིཔི དསྶེཏུཾ ‘‘ཨཔརེ’’ཏིཨཱདི ཝུཏྟཾ. ཏཏྠ ཨཔརེ དས ཨཱཀཱརཱཏི ཏེཛོཝཱཡོཀོཊྛཱསཝསེན ཨཔརེ དས ཨཱཀཱརཱ. ཀམྨཛེཏི བྷཱུཏཀཐནཾ, ན ཝིསེསནཾ ཨསིཏཱདིཔརིཔཱཙཀསྶ ཏེཛསྶ ཨཀམྨཛསྶ ཨབྷཱཝཏོ. ཏཐཱ ཙིཏྟཛེཏི ཙ ཨེཀནྟཙིཏྟསམུཊྛཱནཏྟཱ ཨསྶཱསཔསྶཱསཱནནྟི ཀེཙི, ཏཾ ན, ཨཙིཏྟཛསནྟཱནེ པཝཏྟཱནཾ ཨུཏུཛབྷཱཝཏོ. ཨབྦྷནྟརཊྛཱ ཨེཝ ཧི ཏེ ཙིཏྟཛཱ, ན བཧིདྡྷཱ, ཏསྨཱ ཏཏྠ ‘‘ཙིཏྟཛེ’’ཏི ཨིདཾ ཝིསེསནམེཝ, ཨཡཉྩ ཨཏྠོ ཧེཊྛཱ ཨཱནཱཔཱནཀཐཱཡཾ ཝུཏྟོཡེཝ. སེསེསཱུཏི སནྟཔྤནཱདིཝསེན ཙེཝ ཨུདྡྷངྒམཱདིཝསེན ཙ པཝཏྟེསུ ཏེཛོཝཱཡོཀོཊྛཱསེསུ.

ཙཀྑུདསཀཱདཱིསུ པདྷཱནརཱུཔཾ ཙཀྑཱདཡོཏི ཏེསུ ལབྦྷམཱནཾ ཝཏྠུདྭཱརབྷཱཝཾ ཨཝཡཝཀིཙྩཾ སམུདཱཡེ ཨཱརོཔེཏྭཱ ཝུཏྟཾ ‘‘ཝཏྠུདྭཱརཝསེན པཉྩ ཙཀྑུདསཀཱདཡོ’’ཏི. ཝཏྠུཝསེན ཧདཡཝཏྠུདསཀཉྩཱཏི ཡོཛེཏབྦཾ, ཨེཀཡོགནིདྡིཊྛཱནམྤི ཨེཀདེསོ ཨནུཝཏྟཏཱིཏི. སབྦཱནིཔཱིཏི ཡཐཱཝུཏྟགཎནཱཡཾ ཙཏུནྣཝུཏིཙཏུསཏཱདྷིཀཱནི སཧསྶརཱུཔརཱུཔཱནི. ཀོཊྛཱསཱཝཡཝཱནཾ པན ཏདཝཡཝཀལཱཔཱནཉྩ བྷེདེ གཡ྄ཧམཱནེ ཨཏིཝིཡ ཏཏོ བཧུཏརོ རཱུཔབྷེདོ ཧོཏི, སོ པན བྷེདོ ཨིདྷ ཨཱདིཀམྨིཀསྶ དུཔྤརིགྒཧོཏི ན གཧེཏབྦོ.

ཀཱམཾ ཝཏྠུཝསེནཱཔི ཨརཱུཔདྷམྨཱ པཱཀཊཱ ཧོནྟི, དྭཱརཝསེན པན པརིགྒཧོ ཨནཱཀུལོཏི ཀཏྭཱ ཝུཏྟཾ ‘‘དྭཱརཝསེན ཨརཱུཔདྷམྨཱ པཱཀཊཱ ཧོནྟཱི’’ཏི ¶ . སབྦསངྒཱཧིཀཝསེན ‘‘ཨེཀཱསཱིཏི ལོཀིཡཙིཏྟཱནཱི’’ཏི ཝུཏྟཾ, ལཱབྷིནོ ཨེཝ པན མཧགྒཏཙིཏྟཱནི སུཔཱཀཊཱནི ཧོནྟི. ཨཝིསེསེནཱཏི སཱདྷཱརཎཏོ. ཕསྶཱདཡོ ཧི སཏྟ ཙེཏསིཀཱ ཙཀྑུཝིཉྙཱཎཱདཱིཧིཔི ཨུཔྤཛྫནཏོ སབྦཙིཏྟུཔྤཱདསཱདྷཱརཎཱ. སབྦེཔི ཏེཏི ཨེཀཱསཱིཏི ལོཀིཡཙིཏྟཱནི, ཏཾསམྤཡུཏྟཕསྶཱདཡོཏི ¶ སབྦེཔི ཏེ ཨརཱུཔདྷམྨེ. ཨཱརམྨཎཱདིཝིབྷཱགེན པན ཙིཏྟུཔྤཱདབྷེདེ གཡ྄ཧམཱནེ ཏཏོ བཧུཏརོ ཨེཝ ཧོཏི, སོ པན ཨིདྷ ནཱདྷིཔྤེཏོ.

༦༦༥. ཨསྶ ཙཀྑུཔསཱདསྶ ནིསྶཡབྷཱུཏཱ པན ཙཏསྶོ དྷཱཏུཡོཏི སམྦནྡྷོ. སཧཛཱཏརཱུཔཱནི ཏསྶ ཙཀྑུཔསཱདསྶ ཨིཙྩེཝ སམྦནྡྷོ. ཏཏྠེཝཱཏི ཏསྨིཾཡེཝ སསམྦྷཱརཙཀྑུཔདེསེ. ཨནུཔཱདིནྣརཱུཔཱནཱིཏི པུབྦེ ཝུཏྟརཱུཔཱནཾ ཨུཔཱདིནྣརཱུཔཏྟཱ ཝུཏྟཾ, ཨཀམྨཛརཱུཔཱནཱིཏི ཨཏྠོ. སེསཱནཱིཏི པཋམཾ ཙཀྑུནོ ཝུཏྟཏྟཱ ཏཏོ སེསཱནི, ཏེན པན སདྡྷིཾ ཙཏུཔཉྙཱས རཱུཔཱནི ཧོནྟི. ཙཀྑུདསཀཱདཱིསུ ཨེཀསྶཔི ཨགྒཧེཏབྦཏོ ‘‘ཨཝསེསཱནི ཏེཙཏྟཱལཱིས རཱུཔཱནཱི’’ཏི ཝུཏྟཾ. སདྡསྶ ཨནིཡཏཏྟཱ ཏཾ ཨགྒཧེཏྭཱ ‘‘ཏེཙཏྟཱལཱིས རཱུཔཱནཱི’’ཏི ཝཏྭཱ པུན ཨུཏུཙིཏྟསམུཊྛཱནེ དྭེ སདྡེ གཧེཏྭཱ ‘‘པཉྩཙཏྟཱལཱིསཱ’’ཏི ཀེཙིཝཱདོ དསྶིཏོ.

ཨཝསེསརཱུཔཱནཱིཏི ‘‘དས དྷཱཏུཡོ’’ཏི ཝུཏྟེ དྭཱདས རཱུཔདྷམྨེ ཋཔེཏྭཱ ཨཝསེསཱནི ཚ ནིཔྥནྣརཱུཔཱནི. རཱུཔརཱུཔཱནེཝ ཧི ཨིདྷ པརིགྒཡ྄ཧནྟི, ན རཱུཔཔརིཙྪེདཝིཀཱརལཀྑཎཱནི. ཙཀྑུསནྣིསྶཡརཱུཔཱརམྨཎབྷཱཝསཱམཉྙེན, ཙིཏྟབྷཱཝསཱམཉྙེན ཙ ཀུསལཱཀུསལཝིཔཱཀཏཱཡ དུཝིདྷམྤི ཙཀྑུཝིཉྙཱཎཾ ཙིཏྟནྟྭེཝ ཝུཏྟཾ. ཨེཝནྟི ཨིམིནཱ ‘‘ཙཀྑུཾ ནིསྶཱཡཱ’’ཏིཨཱདིནཱ ཝུཏྟཾ, ཨཝུཏྟཉྩ ‘‘སོཏཾ ནིསྶཱཡཱ’’ཏིཨཱདིཀཾ སངྒཎྷཱཏི. མནོཝིཉྙཱཎདྷཱཏཱུཏི ཨེཏྠཔི ‘‘ཨེཀཱ’’ཏི པདཾ ཨཱནེཏྭཱ སམྦནྡྷིཏབྦཾ ‘‘ཨེཀཱ མནོཝིཉྙཱཎདྷཱཏཱུ’’ཏི. ཨཌྜྷེན ཨེཀཱདས ཨཌྜྷེཀཱདས, ཨཌྜྷཾ ཝཱ ཨེཀཱདསམཾ ཨེཏཱསནྟི ཨཌྜྷེཀཱདས. ཨཌྜྷཊྛམཱཏི ཨེཏྠཱཔི ཨེསེཝ ནཡོ.

༦༦༦. ཙཀྑུདྷཱཏུཡཾ ཝུཏྟནཡེནེཝཱཏི ‘‘ཡཾ ལོཀོ སེཏཀཎྷམཎྜལཝིཙིཏྟ’’ནྟིཨཱདིནཱ (ཝིསུདྡྷི. ༢.༦༦༥) ཝུཏྟནཡེན.

༦༦༧. ཨིདྷ བྷིཀྑུ ཨིམསྨིཾ སརཱིརེཏི ཨཛ྄ཛྷཏྟཾ ཝིཔསྶནཱབྷིནིཝེསདསྶནཝསེན ཝུཏྟཾ. ཏེནེཝ ཧི ཨེཀསྶེཝ བྷཱཝསྶ གཧིཏཏྟཱ ‘‘སཏྟརས ¶ རཱུཔཱནི སམྨསནུཔགཱནཱི’’ཏི ཨཱཧ. སམྨསིཏུཾ སཀྐུཎེཡྻཱནི སམྨསནཾ ཨུཔགཙྪནྟཱིཏི སམྨསནུཔགཱནི, སམྨསནཱིཡཱནཱིཏི ཨཏྠོ. ཨཱཀཱར-གྒཧཎེན ཝིཉྙཏྟིདྭཡཾ ཝུཏྟཾ, ཝིཀཱར-གྒཧཎེན ལཧུཏཱདིཏྟཡཾ, ཨིཏརེན ཨཱཀཱསདྷཱཏཱུཏི ཝདནྟི. ཨཱཀཱར-གྒཧཎེན པན ཝིཉྙཏྟིདྭཡེན སདྡྷིཾ ལཀྑཎརཱུཔམཱཧ. ཏམྤི ཧི རཱུཔཱནཾ ཨུཔྤཛྫནཱདིཨཱཀཱརམཏྟནྟི. ཨནྟརཔརིཙྪེདོཏི ཏཾཏཾཀལཱཔཱནཾ ཨསངྐརཀཱརཎཏཱཡ ཨནྟརབྷཱུཏོ པརིཙྪེདོ ¶ . ཡདི ན སམྨསནུཔགཱནི, ཨཱཀཱརཱདིམཏྟཱནི ཙ, ཀཐཾ རཱུཔཱནཱིཏི ཨཱཧ ‘‘ཨཔིཙ ཁོ’’ཏིཨཱདི.

༦༦༨. ཨེཝཾ དྭཱཙཏྟཱལཱིསཱཡ ཀོཊྛཱསཱནཾ ཝསེན ཝིཏྠཱརཏོ རཱུཔཔརིགྒཧཾ ཏདནུསཱརེན ཝིཏྠཱརཏོ ཨེཝ ནཱམཔརིགྒཧཾ ཝིབྷཱཝེཏྭཱ ཏཏོ སཾཁིཏྟསཾཁིཏྟཏརསཾཁིཏྟཏམཝསེན, ཨཊྛཱརསདྷཱཏུཝསེན, དྭཱདསཱཡཏནཝསེན, པཉྩཀྑནྡྷཝསེན ཙ རཱུཔཱརཱུཔཔརིགྒཧཾ དསྶེཏྭཱ ཨཏིསཾཁིཏྟནཡེནཱཔི དསྶེཏུཾ ‘‘ཡཾ ཀིཉྩི རཱུཔ’’ནྟིཨཱདི ཝུཏྟཾ.

ཡཐཱ ཙ དྷཱཏུཨཱདིཝསེན, ཨེཝཾ ཨིནྡྲིཡསཙྩཔཊིཙྩསམུཔྤཱདཝསེནཔི རཱུཔཱརཱུཔཔརིགྒཧོ ཝེདིཏབྦོ. ཀཐཾ? ཨིནྡྲིཡཝསེན ཏཱཝ ཙཀྑཱདཱིནི པཉྩ, ཨིཏྠིཔུརིསིནྡྲིཡཱནི ཙཱཏི སཏྟ ཨིནྡྲིཡཱནི རཱུཔཾ, མནིནྡྲིཡཾ, པཉྩ ཝེདནིནྡྲིཡཱནི, སདྡྷཱདཱིནི པཉྩ ཙཱཏི ཨེཀཱདས ནཱམཾ, ཛཱིཝིཏིནྡྲིཡཾ ནཱམཉྩ རཱུཔཉྩ, པཙྪིམཱནི ཏཱིཎི ཨིདྷ ཨནདྷིཔྤེཏཱནི ལོཀུཏྟརཏྟཱ. དུཀྑསཙྩཾ ནཱམཉྩ རཱུཔཉྩ, སམུདཡསཙྩཾ ནཱམཾ, ཨིཏརཱནི ཨིདྷ ནཱདྷིཔྤེཏཱནི ལོཀུཏྟརཏྟཱ. པཙྩཡཱཀཱརེ ཨཱདིཏོ ཏཱིཎི ཨངྒཱནི ནཱམཾ, ཙཏུཏྠཔཉྩམཱནི ནཱམཉྩ རཱུཔཉྩ, ཚཊྛསཏྟམཨཊྛམནཝམཱནི ནཱམཾ, དསམཾ ནཱམཉྩེཝ ནཱམརཱུཔཉྩ, པཙྪིམཱནི དྭེ པཙྩེཀཾ ནཱམཉྩ རཱུཔཉྩཱཏི ཨེཝཾ ཏཏྠ ཏཏྠ ཝུཏྟནཡཱནུསཱརེན ཨིནྡྲིཡསཙྩཔཙྩཡཱཀཱརཝསེནཔི ནཱམརཱུཔཔརིགྒཧོ ཀཱཏབྦོ. ཨེཝཾ པན ནཱམརཱུཔཔརིགྒཧསྶ ཝིབྷཱགེན ཀཐནེ པཡོཛནཾ ཧེཊྛཱ ཝུཏྟམེཝ.

༦༦༩. ཀཱམཾ ཝེདནཱདཱིསུ ཨརཱུཔདྷམྨེསུ ན ཨུཏྟརུཏྟརཱ ཝིཡ པུརིམཔུརིམཱ སུཁུམཱ, ཏཐཱཔི སངྒྷཊྚནེན ཝིཀཱརཨཱཔཛྫནཀེ རཱུཔདྷམྨེ ཨུཔཱདཱཡ སབྦེཔི ཏེ སུཁུམཱ ཨེཝཱཏི ཨཱཧ ‘‘སུཁུམཏྟཱ ཨརཱུཔཾ ན ཨུཔཊྛཱཏཱི’’ཏི. སམྨསིཏབྦནྟི སམྨདེཝ ལཀྑཎཱདིཏོ ཝཱིམཾསིཏབྦཾ. མནསིཀཱཏབྦནྟི ཏཐཱ ཙིཏྟེ ཋཔེཏབྦཾ. པརིགྒཧེཏབྦནྟི པརིཙྪེདཀཱརིཀཱཡ པཉྙཱཡ པརིཙྪིཛྫ གཧེཏབྦཾ. ཝཝཏྠཔེཏབྦནྟི ཨཉྙམཉྙཾ ཨསངྐརཏོ ཝིནིཙྪིཏབྦཾ. ཨསྶཱཏི ཡོགིནོ ¶ . སུཝིཀྑཱལིཏནྟི སུཝིསོདྷིཏཾ. ཨཱདིཀམྨིཀསྶ ཧི ཀམྨཊྛཱནཾ པརིགྒཎྷནྟསྶ ཡཱཝ དྷམྨཱ སུཔརིབྱཏྟཾ ན ཨུཔཏིཊྛནྟི, ཏཱཝ ཏེ ཏཔྤཊིཙྪཱདཀསམྨོཧབལེན ཨབྷིབྷཱུཏཱ ཨཝིསུདྡྷཱ ནཱམ ཧོནྟི, ཨསངྐརཏོ ཨུཔཊྛཱནཱབྷཱཝཏོ ཨཉྙམཉྙཉྩ ཛཊིཏཱ. ཡདཱ པན སམྨསནཱདིཝིདྷིནཱ ཏཾ ཝིབྷཱུཏཾ ཧོཏི, ཏདཱ ཏེ སུཝིཀྑཱལིཏཱ, ནིཛྫཊཱ ཙ ནཱམ ཧོནྟི. ཏེནཱཧ ‘‘ཡཐཱ ཡཐཱ ཧཱི’’ཏིཨཱདི. ཨཱདིཀམྨིཀསྶ ཨརཱུཔདྷམྨཱ ཡེབྷུཡྻེན རཱུཔདྷམྨེ ཨཱརབྦྷ པཝཏྟནཱཀཱརེན ¶ གཧཎཾ གཙྪནྟཱིཏི ཀཏྭཱ ཝུཏྟཾ ‘‘ཏདཱརམྨཎཱ ཨརཱུཔདྷམྨཱ’’ཏི. ཏེནེཝ ཧི ཧེཊྛཱ ‘‘ཏསྶེཝཾ པརིགྒཧིཏརཱུཔསྶ དྭཱརཝསེན ཨརཱུཔདྷམྨཱ པཱཀཊཱ ཧོནྟཱི’’ཏི ཝུཏྟཾ, ན ཝཏྠུཝསེནཱཏི.

ཨིདཱནི རཱུཔཔརིགྒཧོ ཨརཱུཔཔརིགྒཧསྶ ཨུཔཱཡོ, ཨུཔཏྠམྦྷོ ཙཱཏི ཡཐཱཝུཏྟམཏྠཾ ཨུཔམཱཧི པཀཱསེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. མུཁནིམིཏྟནྟི མུཁསྶ པཊིབིམྦཾ. ཏཏྲིདཾ ཨུཔམཱསཾསནྡནཾ – ཙཀྑུམཱ པུརིསོ ཝིཡ ཡོགཱཝཙརོ, ཏསྶ ཙཀྑུ ཝིཡ ཡོགིནོ ཀམྨཊྛཱནཔརིགྒཱཧཀཉཱཎཾ, ཨཱདཱསཾ ཝིཡ རཱུཔཔརིགྒཧོ, མུཁནིམིཏྟཾ ཝིཡ ཨརཱུཔཔརིགྒཧོ, ཨཱདཱསསྶ ཨཔརིསུདྡྷཀཱལོ ཝིཡ རཱུཔཔརིགྒཧསྶ ཨཝིཀྑཱལིཏཀཱལོ, ཏདཱ མུཁནིམིཏྟསྶ ཨཔཉྙཱཡནཾ ཝིཡ རཱུཔཔརིགྒཧསྶ ཨཝིསུདྡྷཏཱཡ ཨརཱུཔདྷམྨཱནཾ ཨནུཔཊྛཱནཾ, ཨཱདཱསསྶ པུནཔྤུནཾ པརིམཛྫནཾ ཝིཡ རཱུཔཔརིགྒཧསྶ པུནཔྤུནཾ ཝིསོདྷནཾ, སུཔརིམཛྫིཏེ ཨཱདཱསེ སུབྱཏྟཾ མུཁནིམིཏྟསྶ པཉྙཱཡནཾ ཝིཡ སུཝིཀྑཱལིཏེ ནིཛྫཊེ རཱུཔཔརིགྒཧེ ཨརཱུཔདྷམྨཱནཾ སུཊྛུ ཨུཔཊྛཱནནྟི. ཨིམིནཱ ནཡེན ཏེལཏྠིཀོཔམཱདཱིསུཔི ཡཐཱརཧཾ ཨུཔམཱསཾསནྡནཾ ཝེདིཏབྦཾ. ཏིལཔིཊྛནྟི ཏིལཙུཎྞཾ. ཀཏཀཊྛིནྟི ཀཏཀབཱིཛཾ. ཀལལཀདྡམནྟི ཏནུཀདྡམཾ.

ཏཔྤཙྩནཱིཀཀིལེསཱཏི ཏསྶ ཨརཱུཔདྷམྨཔརིགྒཱཧཀཉཱཎསྶ ཝིབནྡྷབྷཱཝེན པཊིཔཀྑབྷཱུཏཱ སམྨོཧཱདིཀིལེསཱ. ཨུཙྪུཨཱདིཨུཔམཱསུ ཨིདཾ མུཁམཏྟསྶ དསྶནཾ – ཡཐཱ ཨུཙྪུརསཾ གཧེཏུཀཱམོ ཨུཙྪཱུནི ཨུཙྪུཡནྟེ པཀྑིཔིཏྭཱ ཨེཀཝཱརཾ དྭིཝཱརཾ ཡནྟཀྐམནམཏྟེན ཨུཙྪུརསེ ཨནིཀྑམནྟེ ན ཨུཙྪཱུནི ཚཌྜེཏྭཱ གཙྪཏི, ཡཐཱ ཝཱ ཙོརེ གཧེཏྭཱ ཏེཧི ཀཏཀམྨཾ ཛཱནིཏུཀཱམོ དྭཏྟིཔྤཧཱརམཏྟེན ཏེསུ ཏམཏྠཾ ཨཀཐེནྟེསུ ན ཏེ མུཉྩཏི, ཡཐཱ ཝཱ པན གོདམྨཀོ གོཎཾ དམེཏུཀཱམོ དྷུརེ ཏཾ ཡོཛེཏྭཱ ཨེཀཝཱརཾ དྭིཝཱརཾ ཏསྨིཾ པཐེན ཨགཙྪནྟེ ན ཝིསྶཛྫེཏི, ཡཐཱ ¶ ཙ དདྷིཾ མནྠེཏྭཱ ནཝནཱིཏཾ གཧེཏུཀཱམོ དདྷིཀལསིཡཾ མནྠཾ པཀྑིཔིཏྭཱ སཀིཾ, དྭིཀྑཏྟུཾ ཝཱ མནྠསྶ བྷམནམཏྟེན ནཝནཱིཏེ ཨནུཔྤཛྫནྟེ ན དདྷིཾ ཚཌྜེཏི, ཡཐཱ ཝཱ པན མཙྪེ པཙིཏྭཱ ཁཱདིཏུཀཱམོ ཨེཀཝཱརཾ དྭིཝཱརཾ ཨགྒིདཱནམཏྟེན མཙྪེསུ ཨཔཙྩནྟེསུ ན ཏེ ཚཌྜེཏི. ‘‘ཨཐ ཁོ ནཾ པུནཔྤུནཾ པརིམཛྫཏཱི’’ཏི ཨེཏྠ ཝུཏྟནཡཱནུསཱརེན ‘‘ཨཐ ཁོ ནཾ ཨུཙྪུཡནྟེ པུནཔྤུནཾ ཨུཔྤཱིལེ༹ཏཱི’’ཏིཨཱདིནཱ སབྦཏྠ ཨུཔམཏྠོ ཡོཛེཏབྦོ.

ཨརཱུཔདྷམྨཱནཾ ཨུཔཊྛཱནཱཀཱརཀཐཱཝཎྞནཱ

༦༧༠. ཨཱཀིརཱིཡནྟི ¶ ཨབྷིམུཁཱ ཧོནྟི ཨེཏེཧཱིཏི ཨཱཀཱརཱ, ཨརཱུཔདྷམྨཱནཾ ཨུཔཊྛཱནསྶ མུཁབྷཱུཏཱ ཕུསནཱནུབྷཝནཝིཛཱནནཔྤཀཱརཱཏི ཨཱཧ ‘‘ཨརཱུཔདྷམྨཱ ཏཱིཧི ཨཱཀཱརེཧི ཨུཔཊྛཧནྟཱི’’ཏིཨཱདི. ཨཱརམྨཎེ པཝཏྟམཱནེསུ ཙིཏྟཙེཏསིཀེསུ ཨསཏིཔི པུབྦཱཔརིཡེ ཕུསནལཀྑཎོ ཕསྶོ, ཏཏྠ སབྦཔཋམཾ ཨབྷིནིཔཏནྟོ ཝིཡ ཧོཏཱིཏི ཝུཏྟཾ ‘‘པཋམཱབྷིནིཔཱཏོ ཕསྶོ’’ཏི. ཏེནསྶ ཕུསནཱཀཱརེན སུཔཱཀཊབྷཱཝེན ཨུཔཊྛཱནཾ དསྶེཏི. ཕསྶེ པན ཨུཔཊྛིཏེ ཡསྨིཾ ཨཱརམྨཎེ སོ ཕསྶོ, ཏསྶ ཨནུབྷཝནལཀྑཎཱ ཝེདནཱ, སཉྫཱནནལཀྑཎཱ སཉྙཱ, ཨཱཡཱུཧནལཀྑཎཱ ཙེཏནཱ, པཊིཝིཛཱནནལཀྑཎཾ ཝིཉྙཱཎནྟི ཨིམེཔི པཱཀཊཱ ཧོནྟཱིཏི ཨཱཧ ‘‘ཏཾསམྤཡུཏྟཱ ཝེདནཱ’’ཏིཨཱདི. ཨེཝཾ སལཀྑཎསངྑེཔཏོ ཙཏུདྷཱཏུཝཝཏྠཱནཝསེན ཕསྶམུཁེན ཨརཱུཔཔརིགྒཧཾ དསྶེཏྭཱ ཨིདཱནི ཝིཏྠཱརཏོ ཙཏུདྷཱཏུཝཝཏྠཱནཝསེན ཏཾ དསྶེཏུཾ ‘‘ཏཐཱ ཀེསེ’’ཏིཨཱདི ཝུཏྟཾ. ཏཏྠ ཀེསེ པཐཝཱིདྷཱཏཱུཏི ཀེསསངྑཱཏེ པཐཝཱིཀོཊྛཱསེ པཐཝཱིདྷཱཏུ. ལཀྑཎཝིབྷཏྟིཏོ ཧི དྷཱཏུཝཝཏྠཱནདསྶནམེཏཾ.

པུནཔི དྭིནྣཾ དྷཱཏུཝཝཏྠཱནཱནཾ ཝསེན ཝེདནཱམུཁེན ཨརཱུཔཔརིགྒཧཾ དསྶེཏུཾ ‘‘ཨེཀསྶཱ’’ཏིཨཱདི ཝུཏྟཾ. ཏཏྠ ཏསྶ རསཱནུབྷཝནཀཝེདནཱཏི ཐདྡྷབྷཱཝསངྑཱཏསྶ ཕོཊྛབྦསབྷཱཝསྶ ཨནུབྷཝནཝསེན པཝཏྟཝེདནཱ.

ཨཔརསྶཱཏི ཨེཏྠཱཔི ཝུཏྟནཡེནེཝ སམྦནྡྷོ ཝེདིཏབྦོ. ཏཏྠ ཨཱརམྨཎཔཊིཝིཛཱནནནྟི ཐདྡྷཏཱསངྑཱཏཕོཊྛབྦཱརམྨཎཔཊིཝིཛཱནནཾ. ཀཱཡདྭཱརཱབྷིནིཧཏཾ, ཀེཝལཾ ཝཱ མནོདྭཱརིཀཛཝནཝིཉྙཱཎམཱཧ. ཏཉྷི ‘‘པཐཝཱིདྷཱཏུ ¶ ཀཀྑལ༹ལཀྑཎཱ’’ཏི པཊིཝིཛཱནཱཏི, ཨིཏརཾ པན ཀཀྑལ༹ལཀྑཎཔཊིཝིཛཱནནམཏྟམེཝཱཏི.

ཨེཏེནེཝ ཨུཔཱཡེནཱཏི ཡྭཱཡཾ སལཀྑཎསངྑེཔཏོ, སལཀྑཎཝིབྷཏྟིཏོ ཙ དྷཱཏུཝཝཏྠཱནཝསེན རཱུཔཔརིགྒཧཾ དསྶེཏྭཱ ཏཏྠ ཋིཏསྶ ཕསྶཱདིམུཁེན ཨརཱུཔཔརིགྒཎྷནུཔཱཡོ དསྶིཏོ, ཨེཏེནེཝ ཨུཔཱཡེན. ཀམྨསམུཊྛཱནཀེསེཏི ཙཏུསམུཊྛཱནཀེསཏོ ནིདྡྷཱརིཏེ ཀམྨསམུཊྛཱནཀེསེ. ཀཀྑལ༹ལཀྑཎཱཏིཨཱདིནཱ ནཡེནཱཏི ཨཱདི-སདྡེན ན ཀེཝལཾ ‘‘པགྒྷརཎལཀྑཎཱ ཨཱཔོདྷཱཏཱུ’’ཏིཨཱདིནཱ ལཀྑཎཝིསེསེན སདྡྷིཾ དྷཱཏྭནྟརཱནིཡེཝ, ཨཐ ཁོ ཨེཀསམུཊྛཱནཱདིབྷེདཱནི ཀོཊྛཱསནྟརཱནིཔཱིཏི ¶ དཊྛབྦཾ. ཏེནེཝཱཧ ‘‘དྭཱཙཏྟཱལཱིསཱཡ དྷཱཏུཀོཊྛཱསེསཱུ’’ཏི. སབྦཾ ནཡབྷེདཾ ཨནུགནྟྭཱཏི ཡྭཱཡཾ དྭཱཙཏྟཱལཱིསཱཡ དྷཱཏུཀོཊྛཱསེསུ པཐཝཱིདྷཱཏུཨཱདཱིནཾ ལཀྑཎཱདིཏོ ཝཝཏྠཱཔནཝསེན ནཱནཱཝིདྷོ རཱུཔཔརིགྒཧནཡོ ཝུཏྟོ, ཏཾ སབྦཾ ནཡབྷེདཾ ནཡཝིསེསཾ ཨནུགནྟྭཱ, ཙཀྑུདྷཱཏུཨཱདཱིསུ རཱུཔཔརིགྒཧམུཁེསུ ཨརཱུཔཔརིགྒཧདསྶནཝསེན ཡོཛནཱ ཀཱཏབྦཱཏི ཨདྷིཔྤཱཡོ. ཏཏྲིདཾ ཡོཛནཱམུཁམཏྟདསྶནཾ – ཨེཀསྶ ཏཱཝ ‘‘ཙཀྑུདྷཱཏུ རཱུཔཱབྷིགྷཱཏཱརཧབྷཱུཏཔྤསཱདལཀྑཎཱ, དཊྛུཀཱམཏཱནིདཱནཀམྨསམུཊྛཱནབྷཱུཏཔྤསཱདལཀྑཎཱ ཝཱ’’ཏིཨཱདིནཱ (དྷ. ས. ཨཊྛ. ༦༠༠) ནཡེན དྷཱཏུཡོ པརིགྒཎྷནྟསྶ ‘‘པཋམཱབྷིནིཔཱཏོ ཕསྶོ, ཏཾསམྤཡུཏྟཱ ཝེདནཱ’’ཏི སབྦཾ ཡོཛེཏབྦཾ. ཏཐཱ ‘‘ཡཐཱཝུཏྟལཀྑཎཱཡ ཙཀྑུདྷཱཏུཡཱ རསཱནུབྷཝནཀཝེདནཱ ཝེདནཱཀྑནྡྷོ’’ཏིཨཱདི ཡོཛེཏབྦཾ. ཏཐཱ ‘‘ཡཐཱཝུཏྟལཀྑཎཱ ཙཀྑུདྷཱཏཱུ’’ཏི, ‘‘ཨཱརམྨཎཔཊིཝིཛཱནནཾ ཝིཉྙཱཎཾ ཝིཉྙཱཎཀྑནྡྷོ’’ཏིཨཱདིནཱ སབྦཾ ཡོཛེཏབྦཾ. ཨཱཡཏནཱདིཝསེན རཱུཔཔརིགྒཧམུཁེསུཔི ཨེསེཝ ནཡོ.

༦༧༡. ཡཐཱ ནཱམ ཧེཊྛིམཛྷཱནཾ སུབྷཱཝིཏཾ ཝསཱིབྷཱཝཾ པཱཔིཏམེཝ ཨུཔརིཛྷཱནསྶ པཱདཀཾ པདཊྛཱནཾ ཧོཏི, ན པཊིལདྡྷམཏྟཾ, ཨེཝཾ རཱུཔཔརིགྒཧོ སུཝིསུདྡྷོ ནིཛྫཊོ ནིགྒུམྦོ ཨེཝ ཨརཱུཔཔརིགྒཧསྶ པཱདཀཾ པདཊྛཱནཾ ཧོཏི, ན ཨཝིསུདྡྷོ, ཏསྨཱ རཱུཔཱརཱུཔསྶ ཨེཀདེསེཔི ཨནུཔཊྛིཏེ སོ ཨཝིསུདྡྷོ ཨེཝ ནཱམ ཧོཏི, པགེཝ བཧཱུསུ ཨནུཔཊྛིཏེསཱུཏི དསྶེནྟོ ཨཱཧ ‘‘སཙེ ཧཱི’’ཏིཨཱདི. པབྦཏེཡྻཱ གཱཝཱི ཝིཡ བཱལཱ ཨབྱཏྟཱ ཨཁེཏྟཉྙཱུ.

ཁགྒེནཱཏི ¶ ཁགྒགྒེན. སམུགྒནྟི མཉྫཱུསཱསདིསཾ མཧཱསམུགྒཾ. ཨཔརིགྒཧིཏཀམྨཊྛཱནསྶ ཨཝིབྷཏྟཾ ཝིཡ ཨུཔཊྛཧནྟམྤི ནཱམརཱུཔཾ ཝིབྷཏྟསབྷཱཝམེཝ, ཏསྶ ཙ ཝིབྷཱགོ ཀམྨཊྛཱནཔརིགྒཧེསུ པཱཀཊོ ཧོཏཱིཏི ཙ དསྶནཏྠཾ སམུགྒཝིཝརཎཾ, ཡམཀཏཱལཀནྡཕཱལནཉྩ ནིདསྶནབྷཱཝེན ཝུཏྟཾ. ཡམཀཏཱལཀནྡཉྷི བྷིནྣསནྟཱནམྤི ཨབྷིནྣཾ ཝིཡ ཨུཔཊྛཱཏི, ཨེཝཾ རཱུཔཱརཱུཔདྷམྨཱཏི. སབྦེཔི ཏེབྷཱུམཀེ དྷམྨེ ནཱམཉྩ རཱུཔཉྩཱཏི དྭེདྷཱ ཝཝཏྠཔེཏཱིཏི ཨེཏྠ ཀིཉྩཱཔི སབྦ-སདྡོ ཨནཝསེསཔརིཡཱདཱཡཀོ, ནཱམརཱུཔབྷཱཝོ པན ཨཉྙམཉྙཝིདྷུརོཏི ན ཏདུབྷཡཾ སམུདཱཡཝསེན པརིསམཱཔཡེཏབྦཾ, ཏསྨཱ ‘‘ཡདེཏྠ ནམནལཀྑཎཾ, ཏཾ ནཱམཾ. ཡཾ རུཔྤནལཀྑཎཾ, ཏཾ རཱུཔ’’ནྟི ཨེཝཾ དྭེདྷཱ ཝཝཏྠཔེཏཱིཏི ཨཏྠོ. ཨེཝཾ ཝཝཏྠཔེནྟོཡེཝ ཙ ཏདུབྷཡཝིནིམུཏྟསྶ ཏེབྷཱུམཀདྷམྨེསུ ཀསྶཙི དྷམྨསྶ ཨབྷཱཝཏོ ‘‘སབྦེཔི ཏེབྷཱུམཀདྷམྨེ ནཱམཉྩ རཱུཔཉྩཱཏི དྭེདྷཱ ཝཝཏྠཔེཏཱི’’ཏི ཝུཙྩཏི. ‘‘ནཱམཉྩ རཱུཔཉྩཱ’’ཏི ཨེཏེནེཝ ¶ ཏསྶ དུཝིདྷབྷཱཝེ སིདྡྷེ ‘‘དྭེདྷཱ ཝཝཏྠཔེཏཱི’’ཏི ཨིདཾ ནཱམརཱུཔཝིནིམུཏྟསྶ ཨཉྙསྶ ཨབྷཱཝདསྶནཏྠཾ. ཏེནེཝཱཧ ‘‘ནཱམརཱུཔམཏྟཏོ ཨུདྡྷ’’ནྟིཨཱདི. ‘‘སབྦེཔི ཏེབྷཱུམཀེ དྷམྨེ’’ཏི པན སབྦགྒཧཎཉྩེཏྠ སམྨསམནུཔགསྶ དྷམྨསྶ ཨནཝསེསེཏབྦཏཱཡ ཝུཏྟཾ. ཏཉྷི ཨནཝསེསཏོ པརིཉྙེཡྻཾ ཨེཀཾསཏོ ཝིརཛྫིཏབྦཾ, ཏཏོ ཙ ཙིཏྟཾ ཝིརཱཛཡཾ པམོཙེཏབྦཾ. ཏེནཱཧ བྷགཝཱ –

‘‘སབྦཾ, བྷིཀྑཝེ, ཨནབྷིཛཱནཾ ཨཔརིཛཱནཾ ཏཏྠ ཙིཏྟཾ ཨཝིརཱཛཡཾ ཨཔྤཛཧཾ ཨབྷབྦོ དུཀྑཀྑཡཱཡ. སབྦཉྩ ཁོ, བྷིཀྑཝེ, ཨབྷིཛཱནཾ པརིཛཱནཾ ཏཏྠ ཙིཏྟཾ ཝིརཱཛཡཾ པཛཧཾ བྷབྦོ དུཀྑཀྑཡཱཡཱ’’ཏི (སཾ. ནི. ༤.༢༦-༢༧).

ཡདི ཏེབྷཱུམཀཾ དྷམྨཛཱཏཾ ཨནཝསེསཏོ གཧིཏཾ ‘‘ནཱམརཱུཔ’’ནྟི, ཡཾ ཨིཏོ བཱཧིརཀེཧི པདཏྠབྷཱཝེན པརིཀཔྤིཏཾ, སེཡྻཐིདཾ – པཀཏིཨཱདི དྲབྱཱདི ཛཱིཝཱདི ཀཱཡཱདི. ཏཏྠ ཀཐཾ པཊིཔཛྫིཏབྦནྟི? ཨུམྨཏྟཀཝིཔལླཱསསདིསེ ཨསམྨཱསམྦུདྡྷཔཝེདིཏེ ཀཱ ཏཏྠ ཨཉྙཱ པཊིཔཏྟི ཨཉྙཏྲ ཨཛ྄ཛྷུཔེཀྑནཏོ. ཨཐ ཝཱ ཏེཔི ནཱམརཱུཔནྟོགདྷབྷཱཝཱབྷཱཝཝསེན ནིཙྪིཏཱ ཨེཝཱཏི ཝེདིཏབྦཱ. ཀཐཾ? པཀཏི, མཧཱ, ཨཧཾཀཱརོ, ཏམྨཏྟཱནི, ཨིནྡྲིཡཱནི, བྷཱུཏཱནི, པུརིསོཏི ཨེཏེ པཀཏིཨཱདཡོ. ཏཏྠ སམབྷཱཝེན པཝཏྟམཱནཱནཾ སཏྟརཛཏམསངྑཱཏཱནཾ སུཁདུཀྑམོཧཱནཾ སམུདཱཡོ པཀཏི, པདྷཱནནྟི ཙ ཝུཙྩཏི. སཏྟམཏྟསམྤཝེདནཱིཡོ མཧཱ, བུདྡྷཱིཏི ཀེཙི. སཏྟརཛཱདཱིསུ ¶ ཨབྷིམཱནོ ཨཧཾཀཱརོ, ཨསྨིམཏྟཱཏི ཀེཙི. སདྡཕསྶརཱུཔརསགནྡྷཱ ཏམྨཏྟཱནི ཨཉྙམཉྙཝིསིཊྛཱནཾ པཐཝཱིཨཱདཱིནཾ ཨེཀུཏྟརཏཱདསྶནཏོ ཨེཀུཏྟརཱནི ཏམྨཏྟཱནཱིཏི ཝིཛ྄ཛྷཝཱསིཨེཀལཀྑཎེཧི ཏམྨཏྟེཧི ཨེཀལཀྑཎཱ ཝིསེསཱ སཛིཡནྟི, སུཁུམབྷཱཝེན པན ནེསཾ སམྤཝེསནཏོ ཨེཀུཏྟརཏཱཏི ཀེཙི. སོཏཱདཱིནི པཉྩ སཝནཱདིཝུཏྟིཀཱནི བུདྡྷིནྡྲིཡཱནི, ཝཙནཱདཱནཝིཙརཎུསྶགྒཱནནྡཀིཙྩཱནི ཝཱཙཱདཱིནི པཉྩ ཀམྨིནྡྲིཡཱནི. མནོ ཨནྟོཀརཎཾ, ཨིཏརཾ བཱཧིརཀརཎཾ. གནྡྷཱདཱིཧི ཨཱརདྡྷཱནི པཐཝཱིཨུདཀཨགྒིཝཱཡུཨཱཀཱསཱནི བྷཱུཏཱནི, ཙེཏནཱསབྷཱཝོ པུརིསོཏི ཨེཝཾ པཀཏིཨཱདཱིནི སརཱུཔཏོ ཝེདིཏབྦཱནི.

ཏཏྠ ཧི པཀཏི ཏཱཝ སུཁདུཀྑམོཧམཏྟཏཱཡ ནཱམཾ, སམཝིསམབྷཱཝཱཔཏྟིཏོ ཨནིཙྩཱ, དུཀྑཱ, སངྑཏཱ ཙ ཨཱཔནྣཱ. མཧཱཔི ‘‘ཏསྨཱ ཨལིངྒཏོ ལིངྒཝིསེསཱམཏྟོ མཧཱ ཨུཔྤཛྫཏཱི’’ཏི ཝཙནཏོ, བུདྡྷིབྷཱཝཱནུཛཱནནཏོ ཙ ནཱམཾ, ཨནིཙྩཾ, སངྑཏམེཝ ཙ ཨཱཔནྣཾ. ‘‘ཏསྨཱ ¶ མཧཏོ ཚ ཝིསེསཱ སཛིཡནྟཱི’’ཏི སཀྐཏེ ཝཙནཏོ ‘‘ཨསྨཱི’’ཏི གཧཎནིམིཏྟབྷཱཝཱནུཛཱནནེན ཨཧཾཀཱརོ ཨབྷིམཱནོཏི ཀཏྭཱ ནཱམཾ, ཏཏོ ཨེཝ ཨནིཙྩསངྑཏབྷཱཝཱཔཏྟི ཙསྶ སིདྡྷཱ. ཨིཏརཾ ཏམྨཏྟཔཉྩཀཾ གནྡྷརསརཱུཔཕསྶསདྡབྷཱཝཱནུཛཱནནཏོ རཱུཔཾ, ཨརཱུཔནྟི པན ཀཱཔིལཱནཾ མིཙྪཱབྷིནིཝེསམཏྟཾ. ཏེ ཧི སོལ༹ས ཝིསེསཱ པཉྩ བྷཱུཏཱནི, ཨེཀཱདསིནྡྲིཡཱནི བྷཱུཏེཧི བྷཱུཏཝིསེསཱནཱིཏི གནྡྷཱདིཏམྨཏྟེཧི ཏནྣིསྶཡཱནི པཐཝཱིཨཱཔོཏེཛོཝཱཡོཨཱཀཱསསངྑཱཏཱནི བྷཱུཏཱནི ཨིཙྪིཏཱནི. ‘‘ཏབྦིསེསཱ ཙ ནཱནཱཛཱཏིཀཱ ཨཧཾཀཱརཏོ ཙ ཨིནྡྲིཡཱནཱི’’ཏི ཝཙནཏོ སོཏཀཱཡཙཀྑུཛིཝ྄ཧཱགྷཱནཝཱཙཱཔཱཎིཔཱདཔཱཡཱུཔཏྠཱནི ཙེཝ མནོ ཙཱཏི ཨེཀཱདསིནྡྲིཡཱནི.

ཏཏྠ མནོ ནཱམཾ, ཨིཏརཱནི སབྦཱནི རཱུཔཾ. ཝཱཙཱཏི ཙེཏྠ ཨཏྠཱཝཛོཏཀསྶ ཨཀྑརསམུདཱཡསྶ གཧཎཾ. ཨིམེསཾ པན དྷམྨིནོ དྷམྨསྶ ཨནཉྙཏྠསྶ ཨིཙྪིཏཏྟཱ སིདྡྷཱཝ ཨནིཙྩཏཱ པརིཎཱམཔཀྑེ, ཨབྷིབྱཏྟིཔཀྑེཔི ཡདི ཏབྦིསཡཉཱཎུཔྤཱདེན ཨབྷིབྱཉྫནཾ སིདྡྷཱཝ ཨནིཙྩཏཱ, ཨཐ ཏཏོ པུབྦེཔི ཉཱཎཾ ཨཏྠེཝ. ཨཀྑབྱཏྟིཝཱདོ པན སིཡཱཏི ཨིདམེཏྠ དིསཱམཏྟཾ. དྲབྱགུཎཀམྨསཱམཉྙཝིསེསསམཝཱཡཱ དྲབྱཱདིཀཱ. ཏཏྠ པཐཝཱི ཨཱཔོ ¶ ཏེཛོ ཝཱཡུ ཨཱཀཱསོ ཀཱལོ དིསཱ ཨཏྟཱ མནོཏི ནཝ དྲབྱཱནི. སདྡ རཱུཔ རས གནྡྷ ཕསྶ སངྑཱ པརིམཱཎཱནི པུཐཱུཏྭ སཾཡོག ཝིཡོག པརཏྭཱ པརཏྭ བུདྡྷི སུཁ དུཀྑ ཨིཙྪཱ དོས པཡཏྟ གུརུཏྭ དྲཝཏྭ སྣེཧ ཝེགཱ སངྑཱརཱ དིཊྛཱ ཙེཏི ཨེཝམེཏེ ཏེཝཱིསཏི གུཎཱ. ཨུཀྑེཔནཾ ཨཝཀྑེཔནམཱཀུཙནཾ པསཱརཎཾ གམནམིཏི པཉྩ ཀམྨཱནི. ཨཉྙམཉྙཝིསིཊྛེསུ ཨཝིསིཊྛམབྷིདྷཱནཾ པཙྩཡོ ཧོཏི. སཾ-ཨིཏི ཡཏོ དྲབྱགུཎཀམྨེསུ སཱ ཨཏྠི ཨེཝཱཏི ཨེཏཾ མཧཱསཱམཉྙཾ. པཐཝཱིཨཱདཱིསུ ཨནུཝཏྟིབྱཱཝུཏྟིབུདྡྷིནིམིཏྟཾ དྲབྱཏྭཱདི, ཏཾ ཡཐཱ དྲབྱཏྭ གུཎཏྭ ཀམྨཏྭ གྷཊཏྭཱདི, ཨེསོ སཱམཉྙཝིསེསོ. ཨིཧ ཏནྟེསུ པཊོ, ཀཔཱལེསུ གྷཊོཏི ཨིཧེཏི ཡཏོ ཧེཏུཧེཏུཕལཱནཾ སམྦནྡྷོ སམཝཱཡོཏི ཝུཏྟོ, སམཝཱཡོཏི ཨེཝམེཏེ དྲབྱཱདིཀཱ.

ཏཏྠ པཐཝཱི ཨཱཔ ཏེཛ ཝཱཡཱུ བྷཱུཏརཱུཔཾ, ཨཱཀཱསཾ ཏེསཾ ཨབྷཱཝམཏྟཾ, པརིཙྪེདོ ཝཱ, ཙནྡསཱུརིཡཱདིཔརིཝཏྟནཾ, དྷམྨཔྤཝཏྟིཉྩ ཨུཔཱདཱཡ པཉྙཏྟིམཏྟཾ ཀཱལོ. ཏཐཱ དིསཱ, ཨཏྟཱ ཙ. མནོ ནཱམཾ. སདྡརཱུཔརསགནྡྷཱ རཱུཔམེཝ. ཏཐཱ ཕསྶོ བྷཱུཏཏྟཡསབྷཱཝཏོ. སངྑཱ ཨེཀཱདིཀཱ ཏཾ ཏཾ ཨུཔཱདཱཡ པཉྙཏྟིམཏྟཾ. ཏཐཱ ཨཝཡཝསམུདཱཡེ གུཎཝིསེསཝསེན, སཎྛཱནཝིསེསཝསེན ཝཱ མཧནྟཾ དཱིགྷཾ, ཏབྦིཔརིཡཱཡཏོ ཨཎུ རསྶནྟི བྷིནྣལཀྑཎདེསེསུ པུཐུཏྭནྟི. བྷིནྣདེསཛཱནཾ སཧབྷཱཝེ སཾཡོགོཏི. ཏདཔཱཡེ ཝིཡོགོཏི. སམཱནདིསཱདེསགཏཱནཾ རཱུཔཱནཾ མཧདབྦནྟརཱནཾ ཝསེན པརམཔརནྟི ¶ པཉྙཏྟིམཏྟཾ. བུདྡྷིསུཁདུཀྑཨིཙྪཱདོསཔཡཏྟཱ ནཱམམེཝ. གུརུཏྭ དྲཝཏྭ སྣེཧཝེགཱ རཱུཔདྷམྨཱནཾ པཝཏྟིཝིསེསཏོ གཧེཏབྦཱཀཱརཱ. ཨིཏརོ སངྑཱརོ ཉཱཎསྶ པཝཏྟིཝིསེསོ. ཨདིཊྛོཔི དྷམྨཱདྷམྨབྷཱཝཏོ ནཱམམེཝ. ཨུཀྑེཔནཾ ཨཝཀྑེཔནཾ ཨཱཀུཙནཾ པསཱརཎཾ གམནནྟི རཱུཔདྷམྨཱནཾ པཝཏྟིམཏྟཾ. སདིསཱསདིསཏཱཡཾ སཱམཉྙཝིསེསསཉྙཱ, ཨཡུཏྟསམྦནྡྷེ སམཝཱཡསམཉྙཱཏི དྲབྱཱདཱིནམྤི ནཱམརཱུཔནྟོགདྷཏཱ དཊྛབྦཱ.

ཛཱིཝཱཛཱིཝབནྡྷ པུཉྙ པཱཔཱསཝ སཾཝརནིཛྫརཝིམོཀྑཱ ཛཱིཝཱདིཀཱ. ཏཏྠ ཛཱིཝོཏི ཨཏྟཱ. པུགྒལདྷམྨཱདྷམྨཱཀཱསཀཱལེསུ ཨཛཱིཝསཉྙཱ. ཏེསུ སདྡཕསྶརཱུཔརསགནྡྷསཎྛཱནབནྡྷབྷེདསུཁུམཔརཨཔརཱགྷཱཏཔྤབྷཱཙྪཱཡོཛྫཱཀཏམཱནི པུགྒལལཀྑཎནྟི པུགྒལོ རཱུཔཾ རཱུཔདྷམྨཱནཾ པཝཏྟིཨཱཀཱརམཏྟཏོ. དྷམྨཱདྷམྨཱ ཛཱིཝཔུགྒལཱནཾ གཏིཊྛིཏིམཏྟཏཱཡ ཏདཝིསིཊྛཱ ¶ . ཨཱཀཱསཀཱལཱ པཉྙཏྟིམཏྟཾ. བནྡྷོ ‘‘ཀམྨཔུགྒལནྟརསཾཡོགོ’’ཏི ཝཙནཏོ ཏེཧི ཨནཉྙོ. པུཉྙཔཱཔཱནི ནཱམནྟི པཱཀཊམེཝ. ‘‘ཀམྨཔུགྒལཱནམཱསཝོ’’ཏི ཝཙནཏོ པུཉྙཱཔུཉྙསམྦྷཝེ ཨཱསཝསམཉྙཱཏི ཏཏོ ཨཝིསིཊྛོ ཨཱསཝོ. ‘‘ཨཱསཝནིརོདྷོ སཾཝརོ’’ཏི ཝཙནཏོ པཊིཔཀྑེན པུཉྙཱཔུཉྙནིརོདྷོ སཾཝརོ. ‘‘ཀམྨཕལཔྤཝཏྟིཡཱ པཀཏིཡཱ ཨཔྤཝཏྟི ནིཛྫརོ’’ཏི ཝཙནཏོ ཝིཔཱཀནིརོདྷནིམིཏྟཾ ནིཛྫརོ. མོཀྑོཔི ‘‘སབྦཀམྨཝིམོཀྑོ’’ཏི ཝཙནཏོ ཀམྨཔུགྒལཛཱིཝཝིཡོགོ. ཏཏྠ ཀམྨཔུགྒལཱནཾ སདྡཱདིལཀྑཎཏཱཡ རཱུཔམཏྟཏཱ པུཉྙཱཔུཉྙམཏྟཏཱཡ ཨརཱུཔཏཱ. ཛཱིཝོ ཙ ཨརཱུཔམཏྟམེཝཱཏི ཨཡཾ དྲབྱམོཀྑོ. བྷཱཝམོཀྑོ པན ཛཱིཝསྶ རཱགཱདིབྷཱཝཱཔརིཎཱམོ རཱགཱདཡོ ནཱམམེཝཱཏི ཛཱིཝཱདཡོཔི ནཱམརཱུཔནྟོགདྷཱ ཨེཝ.

ཀཱཡཔྤཝཏྟིགཏིཛཱཏིབནྡྷཱཔཝགྒཱ ཀཱཡཱདིཀཱ. ཏཏྠ པཐཝཱིཨཱཔཏེཛཝཱཡུཨཏྟསུཁདུཀྑེསུ ཀཱཡསམཉྙཱ. ཏདཝིསིཊྛཱ པཝཏྟིགཏིཛཱཏིབནྡྷཱཔཝགྒཱ, ‘‘བྷཱཝོཏི ཨཏྠོ, ཀཱཡོཏི ཨནཏྠནྟར’’ནྟི ཝཙནཏོ ཀཱཡཏོ ཨཉྙཾ ཀིཉྩི ནཏྠི. ‘‘པཝཏྟིསཉྙཱ ཀིརིཡཱསཾཡོགཝིབྷཱགེསཱུ’’ཏི ཝཙནཏོ གཏིཨཱདིཔྤཀཱརེན པཝཏྟཱ པཐཝཱིཨཱདཡོ ཨེཝ པཝཏྟི ཨུཔཙཱརོ. ‘‘ཏསྨིཾ ཨནཏྠནྟར’’ནྟི ཝཙནཏོ ཀཱཡཏོ ཨནཉྙཱ སུརམནུཛཔེཏཏིརཙྪཱནནརཀཱུཔཔཏྟིཡོ གཏིཡོ. ཏཱསུ པུརིམཱཔུརིམཱཝིསིཊྛོ གཏཱིསུ ཛཱཏསྶ ནིཙྪཡོཔི པཝཏྟིམཏྟནྟི ཏཏོ ཨནཉྙཱ ཀཎྷནཱིལརཏྟཔཱིཏསུཀྐཨཏིསུཀྐསངྑཱཏཱ ཛཱཏིཡོ. ཏཱ ཨུཏྟརུཏྟརཝིསིཊྛཱ ཨཉྙཱཎམོཧརཱགདོསཏཏྭཱསནྡསྶནཔྤཱཡཱ སུཀྐཛཱཏི, ཨནྟཱ ཨཙྩནྟཝིམུཏྟཱ ཨཝགཱཧིཏཏྭཱ ཙཱཏི སུཀྐཛཱཏི ¶ . ‘‘དོསེསུ བནྡྷསམཉྙཱ’’ཏི ཝཙནཏོ ཨཉྙཱཎཱདིལཀྑཎསྶ བནྡྷསྶ ཛཱིཝཏོ ཨནཉྙཏཱ. ཨཉྙཱཎཱདིདོསཱབྷཱཝཏོ ཨཔཝགྒསིདྡྷཱིཏི ཀཱཡཱདཡོཔི ནཱམརཱུཔམཏྟམེཝ.

ཡོཔི ཏཏྠ ཏཏྠ ‘‘པུརིསོ ཨཏྟཱ ཛཱིཝོ’’ཏིཨཱདིཔརིཡཱཡེཧི ཝུཏྟོ ཨཏྟཔདཏྠོ, སོཔི ཡཐཱརཧཾ ནཱམརཱུཔམཏྟཾ ཨུཔཱདཱཡ པཉྙཏྟོ, ནཱམརཱུཔམཏྟམེཝ ཝཱ. ཏེན ཝུཏྟཾ ‘‘ཏེཔི ནཱམརཱུཔནྟོགདྷབྷཱཝཱབྷཱཝཝསེན ནིཙྪིཏཱ ཨེཝཱ’’ཏི.

སམྦཧུལསུཏྟནྟསཾསནྡནཱཀཐཱཝཎྞནཱ

༦༧༢. སོཏི ¶ སོ ཝིཔསྶནཱཀམྨིཀོ ཡོགཱཝཙརོ. ཨེཝནྟི ཝུཏྟཔྤཀཱརཔརཱམསནཾ. ཡཱཐཱཝསརསཏོཏི ཡཐཱབྷཱུཏསབྷཱཝཏོ. ནཱམརཱུཔཾ ཝཝཏྠཔེཏྭཱ ཨེཏམཏྠཾ སཾསནྡེཏྭཱ ཝཝཏྠཔེཏཱིཏི སམྦནྡྷོ. ལོཀསམཉྙཱཡཔི པཧཱནཏྠཱཡ, པགེཝ ‘‘སཏྟོ ཛཱིཝོ’’ཏི པཝཏྟནཀམིཙྪཱབྷིནིཝེསསྶཱཏི ཨདྷིཔྤཱཡོ. ནཱམརཱུཔམཏྟཏཱཡ ཨཝིནིཙྪཏཏྟཱ, སནྟཱནཱདིགྷནབྷེདསྶ ཙ ཨཀཏཏྟཱ ཨབྷིནིཝེསེན ཝིནཱ སམཱུཧེཀཏྟགྒཧཎཝསེན ‘‘སཏྟོ’’ཏི པཝཏྟོ སམྨོཧོ སཏྟསམྨོཧོ. ཏསྶ ཝིཀྑམྦྷནཱ ཨསམྨོཧབྷཱུམི. སམྦཧུལསུཏྟནྟཝསེནཱཏི ‘‘ཡཐཱཔཱི’’ཏིཨཱདིནཱ ཨིདྷ ཝུཏྟཱནཾ, ཨཝུཏྟཱནཉྩ ‘‘རཱུཔཉྩ ཧིདཾ, མཧཱལི, ཨཏྟཱ ཨབྷཝིསྶ, ནཡིདཾ རཱུཔཾ ཨཱབཱདྷཱཡ སཾཝཏྟེཡྻཱ’’ཏི (སཾ. ནི. ༣.༥༩; མཧཱཝ. ༢༠) ཨེཝམཱདིནཱ སམྦཧུལཱནཾ སུཏྟནྟཱནཾ ཝསེན. ‘‘ནཱམརཱུཔམཏྟམེཝཱ’’ཏིཨཱདིནཱ ཝུཏྟམེཝཏྠཾ སནྡྷཱཡཱཧ ‘‘ཨེཏམཏྠ’’ནྟི.

ཨངྒསམྦྷཱརཱཏི ཨངྒསམྦྷཱརཧེཏུ. ཏནྣིམིཏྟཾ ཏཾ ཨམུཉྩིཏྭཱ སཏི ཨེཝ ཏསྨིཾ ‘‘སཏྟོ’’ཏི ཝོཧཱརོ.

ཨགཱརནྟྭེཝཱཏི ཡཐཱ ཀཊྛཱདཱིནི པཊིཙྩ ཨུཔཱདཱཡ ཏེསཾ ནཱམཾ ཝིསྶཛྫེཏྭཱ ཨགཱརམིཙྩེཝ སངྑཾ སམཉྙཾ གཙྪཏི, ཨེཝཾ ཨཊྛིཨཱདཱིནི པཊིཙྩ ཨུཔཱདཱཡ ཏེསཾ ནཱམཾ ཝིསྶཛྫེཏྭཱ རཱུཔཾ སརཱིརམིཙྩེཝ སངྑཾ གཙྪཏཱིཏི ཡོཛནཱ.

དུཀྑམེཝ སམྦྷོཏཱིཏི དུཀྑདུཀྑཏཱདིབྷེདཾ ཏིཝིདྷཾ དུཀྑམེཝ སམྦྷཝཏི, ཡཐཱཔཙྩཡཾ ཨུཔྤཛྫཏི, ཏདེཝ དུཀྑཾ ཁཎཊྛིཏིཔབནྡྷཊྛིཏིཝསེན ཏིཊྛཏི ཙེཝ ཁཎནིརོདྷཨཱཡུཀྑཡནིརོདྷཱདིཝསེན ¶ ནིརུཛ྄ཛྷཏི ཙཱཏི ཨཏྠོ. ཨིདཱནི དུཀྑམེཝཱཏི ཨེཝཀཱརེན ནིཝཏྟིཏམཏྠཾ དསྶེཏུཾ ‘‘ནཱཉྙཏྲཱ’’ཏིཨཱདི ཝུཏྟཾ. ཏསྶཏྠོ – ཡཐཱཝུཏྟཾ དུཀྑཾ ཋཔེཏྭཱ ཏཏོ ཨཉྙཾ ཀིཉྩི དྷམྨཛཱཏཾ ན སམྦྷཝཏི, ཡོ ‘‘སཏྟོ’’ཏི ཝཱ ‘‘ཛཱིཝོ’’ཏི ཝཱ ཝུཙྩེཡྻ, སབྦེན སབྦཾ ཨབྷཱཝཱ ཀུཏོ ཏསྶ ནིརོདྷོཏི.

ཨུཔམཱཧིནཱམརཱུཔཝིབྷཱཝནཱཀཐཱཝཎྞནཱ

༦༧༣. ཨེཀེནཱཀཱརེན སཎྛིཏེསཱུཏི ཡེན པཀཱརེན ཨཀྑཱདཱིསུ སནྣིཝིཊྛེསུ རཐསམཉྙཱ, ཏེན ཨེཀེན ཨཱཀཱརེན སམཝཊྛིཏེསུ ཨེཀཛ྄ཛྷཾ རཱསིཀཏེསུ ¶ . ཨེཝམེཝནྟི སནྣིཝེསཝིསིཊྛེ ཨཝཡཝསམུདཱཡེ སནྟཱནཝསེན པཝཏྟམཱནེ ཡཐཱ ‘‘རཐོ གེཧཾ མུཊྛི ཝཱིཎཱ སེནཱ ནགརཾ རུཀྑོ’’ཏི ཝོཧཱརམཏྟཾ, པརམཏྠཏོ པན རཐཱདི ནཱམ ཀིཉྩི ནཏྠི, ཨེཝམེཝཾ. ཨུཔཱདཱནཀྑནྡྷེསཱུཏི ཨུཔཱདཱནཀྑནྡྷསཉྙིཏེསུ རཱུཔཱརཱུཔདྷམྨེསུ སམུདིཏེསུ སནྟཱནཝསེན པཝཏྟམཱནེསུ ‘‘སཏྟོ ཛཱིཝོ’’ཏི ཝོཧཱརམཏྟཾ, པརམཏྠཏོ པན སཏྟོ ཝཱ ཛཱིཝོ ཝཱ ནཏྠཱིཏི ཡཱཐཱཝཏོ ཛཱནནཾ. ཨིདཾ ཡཐཱབྷཱུཏདསྶནཾ ‘‘དིཊྛིཝིསུདྡྷཱི’’ཏི ཝུཙྩཏི.

༦༧༤. ཏསྶཱཏི སཏྟོཏི གཧིཏསྶ ཨཏྟནོ. ཝིནཱསནྟི ནིརུདྡྷསྶ ཝིནཱསཾ. ཨཝིནཱསནྟི ཨཝིནསྶནཾ, ནིཙྩཏནྟི ཨཏྠོ. དྭཡཝསེནེཝ ཧི ཨཏྟཝཱདིནོ ཋིཏཱ, སསྶཏོ ཨཏྟཱ, ཨུཙྪིཛྫཏཱིཏི ཝཱ, ཨེཀཙྩསསྶཏཝཱདོཔི ཨེཏྠེཝ སམཝརུདྡྷོཏི. ཨཝིནཱསཾ ཨནུཛཱནནྟོཏི བུདྡྷིཨཱདཱིནཾ དྷམྨཱནཾ ཝིནཱསཾ ཨིཙྪནྟོཔི ‘‘དྷམྨཱི ནིཙྩོ ཀཱུཊཊྛོ’’ཏི ཨཏྟནོ ཝིནཱསཱབྷཱཝཾ ཨནུཛཱནནྟོ. སསྶཏེཏི སསྶཏགཱཧེ. པཏཏི ཀཏཝིནཱསཨཀཏབྦྷཱགམཱདིདོསཔྤསངྒཏོཏི ཨདྷིཔྤཱཡོ. ཁཱིརནྭཡསྶཱཏི ཁཱིརསྶ ཨནྭཡབྷཱུཏསྶ, ཕལབྷཱུཏསྶཱཏི ཨཏྠོ. ཏདནྭཡསྶཱཏི ཏསྶ ཨཏྟནོ ཨནྭཡབྷཱུཏསྶ ཨཉྙསྶ ཀསྶཙི ཨབྷཱཝཏོ. ཨོལཱིཡཏི ནཱམཱཏི ‘‘སསྶཏོ ཨཏྟཱ’’ཏི ཨབྷིནིཝེསེན བྷཝཱབྷིརཏོ ཧུཏྭཱ བྷཝནིརོདྷཏོ སངྐོཙནཾ ཨཱཔཛྫནྟོ བྷཝེཡེཝ ནིལཱིཡཏི ནཱམ. ཨཏིདྷཱཝཏི ནཱམཱཏི ཏཏྠ ཏཏྠེཝ ཧི བྷཝེ ཨཏྟཱ ཨུཙྪིཛྫཏཱིཏི ཨུཙྪེདཝཱདཱི ‘‘ཨུཙྪིཛྫཏི ཨཏྟཱ’’ཏི གཎྷནྟོ པརཾ མརཎཱ སནྟཾ བྷཝཾ ‘‘ནཏྠཱི’’ཏི ཨཏིཀྐམནྟོ ཨཏིདྷཱཝཏི ནཱམཱཏི ཝདནྟི. ཀིལེསནིརོདྷེ པན ཀམྨསྶ ཨཝིཔཙྩནཏོ བྷཝནིརོདྷེ ཨིཙྪིཏབྦེ ཏཐཱ ཨགྒཧེཏྭཱ ‘‘ཏཾ ཏཾ བྷཝཝིསེསཾ ཨཱགམྨ ཨཏྟཱ ཨུཙྪིཛྫཏཱིཏི ཨེཝཾ བྷཝནིརོདྷོ ཧོཏཱི’’ཏི གཎྷནྟོ ཏཾ ཨཏིདྷཱཝཏི ནཱམ.

པརིཡུཊྛིཏཱཏི ¶ ཨབྷིབྷཱུཏཱ. ཙཀྑུམནྟོཏི ཡཐཱབྷཱུཏདསྶནསངྑཱཏེན ཉཱཎཙཀྑུནཱ ཙཀྑུམནྟོ.

ཀཱམབྷཝཱདིབྷེདོ བྷཝོ ཨཱརམིཏབྦཊྛེན ཨཱརཱམོ ཨེཏེསནྟི བྷཝཱརཱམཱ. ཏསྨིཾ བྷཝེ རཏཱ ཨབྷིརཏཱཏི བྷཝརཏཱ. བྷཝེ སམྨོདཾ ཨཱཔནྣཱཏི བྷཝསམྨུདིཏཱ. ཏཱིཧིཔི པདེཧི བྷཝསྶཱདགདྷིཏཏཱཝ ཝུཏྟཱ. ཙིཏྟཾ ན པཀྑནྡཏཱིཏི བྷཝསྶཱདགདྷིཏཏྟཱ ཨེཝ བྷཝནིརོདྷཱཝཧེ དྷམྨེ ཙིཏྟཾ ན ¶ ཨནུཔྤཝིསཏི. ནཔྤསཱིདཏཱིཏི ན ཨོཀཔྤཏི. ན སནྟིཊྛཏཱིཏི ན པཏིཊྛཧཏི. ནཱདྷིམུཙྩཏཱིཏི ན ཨདྷིམུཙྩཏི.

ཨཊྚཱིཡམཱནཱཏི དུཀྑཱཔིཡམཱནཱ. ཧརཱཡམཱནཱཏི ལཛྫམཱནཱ. ཛིགུཙྪམཱནཱཏི ཧཱིལེ༹ནྟཱ. ཝིབྷཝནྟི ཨུཙྪེདཾ. ཨབྷིནནྡནྟཱིཏི ཝུཏྟཨབྷིནནྡནཱཀཱརདསྶནཾ ‘‘ཡཏོ ཀིར བྷོ’’ཏིཨཱདི.

བྷཱུཏནྟི ཁནྡྷཔཉྩཀཾ. ཏཉྷི ཡཐཱསཀཾ པཙྩཡེཧི ཛཱཏཏྟཱ, པརམཏྠཏོ ཝིཛྫམཱནཏྟཱ ཙ བྷཱུཏནྟི ཝུཙྩཏི. བྷཱུཏཏོཏི ཡཐཱབྷཱུཏསབྷཱཝཏོ, སལཀྑཎཏོ, སཱམཉྙལཀྑཎཏོ ཙ.

༦༧༥. ཨེཝཾ སཏྟགཱཧཏོ ཨཝལཱིཡནཱཏིདྷཱཝནདོསེ, ཡཐཱབྷཱུཏདསྶནཏོ ནིབྦིདཱདིགུཎེ ཙ སུཏྟཝསེནེཝ དསྶེཏྭཱ ཨིདཱནི ནཱམརཱུཔམཏྟེཔི གམནཱདིཨཏྟཀིཙྩསིདྡྷིཾ དསྶེཏུཾ ‘‘ཏསྨཱ’’ཏིཨཱདི ཝུཏྟཾ. ཏཏྠ ཏསྨཱཏི ཡསྨཱ ‘‘ཨསྨཱི’’ཏི ཝཱ ‘‘ཨཧ’’ནྟི ཝཱ གཱཧསྶ ཝཏྠུབྷཱུཏོ སཏྟོ ནཱམ ནཏྠི, པརམཏྠཏོ ནཱམརཱུཔམཏྟམེཝ, ཏསྨཱ. སཙེ ཀོཙི ཨཏྟཱ ནཱམ ནཏྠི, ཀཐམིདྷ ནཱམརཱུཔམཏྟེ གམནཱདིཨཏྟཀིཙྩསིདྡྷཱིཏི ཙོདནཾ སནྡྷཱཡཱཧ ‘‘དཱརུཡནྟ’’ནྟིཨཱདི. ‘‘ཁཱཡཏཱི’’ཏི ཨེཏེན ཡཐཱ ནིཛྫཱིཝེ དཱརུམཡཡནྟེ ཨབྦྷནྟརེ ཝཏྟམཱནསྶ ཛཱིཝསྶ ཝསེན སཨཱིཧསྶ སབྱཱཔཱརསྶ ཝིཡ ཨུཔཊྛཱནམཏྟཾ པཙྩཡཝིསེསཏོ, ཨེཝཾ ནིཛྫཱིཝེ ནཱམརཱུཔམཏྟེ པཙྩཡཝིསེསཏོ གམནཱདིཨཏྟཀིཙྩསིདྡྷཱིཏི སཨཱིཧསྶ སབྱཱཔཱརསྶ ཝིཡ ཨུཔཊྛཱནནྟི དསྶེཏི.

སཙྩཏོཏི བྷཱུཏཏོ, པརམཏྠཏོཏི ཨཏྠོ. སུཉྙཾ ཛཱིཝེན ཡནྟམིཝ ཨབྷིསངྑཏཾ པཙྩཡཝསེན པཝཏྟཱིཏི ཨདྷིཔྤཱཡོ. དུཀྑསྶ པུཉྫོ ནིཙྩཱཏུརཏཱཡ ཏིཎཀཊྛསདིསོ ཨཏྟསུཉྙཏཱཡཱཏི ཨཏྠོ. ཨེཏཾ ནཱམརཱུཔཾ.

ཡམཀནྟི ¶ ཡུགལ༹ཀཾ. སོ ཙ ཁོ ཡམཀབྷཱཝོ ཨཉྙམཉྙསནྣིསྶིཏབྷཱཝེནཱཏི ཨཱཧ ‘‘ཨུབྷོ ཨཉྙོཉྙནིསྶིཏཱ’’ཏི. ཏཏོ ཨེཝ ཙ ཨེཀསྨིཾ བྷིཛྫམཱནསྨིཾ ཨུབྷོ བྷིཛྫནྟི. ན ཧི ཀདཱཙི པཉྩཝོཀཱརབྷཝེ རཱུཔེ ནིརུཛ྄ཛྷནྟེ ཨརཱུཔཾ ཨནིརུཛ྄ཛྷནྟཾ, ཨརཱུཔེ ཝཱ ནིརུཛ྄ཛྷནྟེ རཱུཔཾ ཨནིརུཛ྄ཛྷནྟཾ ཨཏྠི. སྭཱཡཾ བྷངྒོ པཙྩཡཱ པཙྩཡནིརོདྷེནེཝ, ནཱམརཱུཔནིརོདྷོཏི ཨཏྠོ. པཙྩཡཱཏི ཝཱ པཙྩཡབྷཱུཏཱ, ཨཉྙམཉྙསྶ པཙྩཡཱ ཧོནྟཱཔི ཨུབྷོ བྷིཛྫནྟིཡེཝཱཏི ཨཏྠོ.

༦༧༦. དཎྜཱབྷིཧཏནྟི ¶ ཝིསེསནེན དཎྜཾ, དཎྜཱབྷིགྷཱཏསྶ པཙྩཡཾ པུརིསཝཱཡཱམཉྩ དསྶེཏི, བྷེརིཡཱ པན ཝིསེསིཏབྦཏཱ སདྡསྶ ཨསཱདྷཱརཎཀཱརཎཏཱཡ. ཏེནེཝ ཧི ‘‘ཨཉྙཱ བྷེརཱི’’ཏི བྷེརཱིཡེཝ གཧིཏཱ, ན དཎྜཱདཡོ. ཨདིསྶམཱནརཱུཔཏཱཡ སདྡཾ ནཱམཊྛཱནིཡཾ ཀཏྭཱ ‘‘ཨེཝམེཝ’’ནྟིཨཱདིནཱ ཨུཔམཱསཾསནྡནཾ ཀརོཏི.

ན ཙཀྑུཏོ ཛཱཡརེཏི ན ཙཀྑཱཡཏནཏོ ནིགྒཙྪནཝསེན ཛཱཡནྟི. ན ཧི ཙཀྑཱཡཏནསྶ པཙྩཡབྷཱཝཱུཔགམནཏོ པུབྦེ ཕསྶཔཉྩམཀཱ ལབྦྷནྟི, ན ཙ པདེསཝནྟོ, ཡེན ཏེ ཏཏོ ནིགྒཙྪེཡྻུཾ. ཏེནེཝཱཧ ‘‘པུཉྫོ ནཏྠི ཨནཱགཏེ’’ཏི (མཧཱནི. ༡༠). ན རཱུཔཏོཏི ཨེཏྠཱཔི ཨེསེཝ ནཡོ. ‘‘ནོ ཙ ཨུབྷིནྣམནྟརཱ’’ཏི ཨིདཾ པན ཏེསཾ ཨརཱུཔདྷམྨཏྟཱ ཨཔྤདེསཏཱཡ ཝུཏྟཾ. ཀེཝལཾ པན ཡསྨིཾ ཁཎེ པཙྩཡསམཝཱཡོ, ཏདཱ ཨུཔྤཛྫནམཏྟམེཝཱཏི ཨཱཧ ‘‘ཧེཏུཾ པཊིཙྩ པབྷཝནྟི སངྑཏཱ’’ཏི, ཙཀྑུརཱུཔཱལོཀམནསིཀཱརཱདིབྷེདཾ དྷམྨཛཱཏཾ ནིསྶཱཡ པཙྩཡབྷཱུཏཾ ཀཱརཎཾ ལབྷིཏྭཱ ཏེཧི སམེཙྩ སམྦྷཱུཡ ཀཏཏྟཱ སངྑཏཱ ཕསྶཱདཡོ དྷམྨཱ ཨུཔྤཛྫནྟཱིཏི ཨཏྠོ. ཏསྶཱ པན དྷམྨཱནཾ ཨུཔྤཏྟིཡཱ པཱཀཊཾ རཱུཔདྷམྨཔཝཏྟིཾ དསྶེནྟོ ‘‘ཡཐཱཔི སདྡོ པཧཊཱཡ བྷེརིཡཱ’’ཏི ཨཱཧ. ཕསྶཔཉྩམགྒཧཎཉྩེཏྠ པཱཀཊཨརཱུཔདྷམྨཱནཾ དསྶནཾ. སེསགཱཐཱསུཔི ཨེསེཝ ནཡོ.

ཝཏྠུརཱུཔཱཏི ཧདཡཝཏྠུཏོ. ཏནྣིསྶཡཱནཾ ཨརཱུཔདྷམྨཱནཾ བཧུབྷེདཏྟཱ སཱམཉྙཝོཧཱརེན ཏེ དསྶེཏུཾ ‘‘སངྑཏཱ’’ཏི ཝུཏྟཾ.

༦༧༧. ནིཏྟེཛནྟི ཏེཛཧཱིནཾ ཨཱནུབྷཱཝརཧིཏཾ. ཡཐཱ པན ཏཾ ནིཏྟེཛཾ, ཏཾ དསྶེཏུཾ ‘‘ན ཁཱདཏཱི’’ཏིཨཱདི ཝུཏྟཾ. ན ཧི ཨཉྙཐཱ སདྡཧནུསྶཧནཱདཱིསུ ནཱམཾ ‘‘ནིཏྟེཛ’’ནྟི སཀྐཱ ཝཏྟུཾ, ནཱཔི རཱུཔཾ སནྡྷཱརཎཱབནྡྷནཱདཱིསུ. ཏེནེཝ ཧི ‘‘རཱུཔཾ ནིཏྟེཛ’’ནྟི ཝཏྭཱ ‘‘ན ཧི ཏསྶ ཁཱདིཏུཀཱམཏཱ’’ཏིཨཱདི ཝུཏྟཾ. ‘‘ཨཐ ཁོ’’ཏིཨཱདིནཱ བྱཏིརེཀཝསེནཱཔི ནཱམརཱུཔཱནཾ ནིཏྟེཛཏཾཡེཝ ¶ ཝིབྷཱཝེཏི. ཨཉྙམཉྙསནྣིསྶཡེན ཧི ནཱམརཱུཔསྶ ཨཏྟཀིཙྩསིདྡྷིཔི པཙྩེཀཾ ཨསམཏྠཏཱཝིབྷཱཝནམེཝ. ཏཐཱ ཧི ནཱམརཱུཔསྶ ཨཏྟསུཉྙཏཱ, ནིརཱིཧཏཱ, བྱཱཔཱརཝིརཧཏཱ ཙ སུཊྛུཏརཾ པཱཀཊཱ ཧོནྟི.

ཀཐཾ པན པཙྩེཀཾ ཨསམཏྠཱནཾ སམུདིཏབྷཱཝེ སམཏྠཏཱ ཧོཏི? ཨསཱམགྒིཡཾ ཨཧེཏཱུནཾ སཱམགྒིཡམྤི ཨཧེཏུབྷཱཝཱཔཏྟིཏོ. ན ཧི པཙྩེཀཾ ¶ དཊྛུཾ ཨསཀྐོནྟཱནཾ ཨནྡྷཱནཾ སཏམྤི སཧསྶམྤི སམུདིཏཾ དཊྛུཾ སཀྐོཏཱིཏི ཙོདནཾ སནྡྷཱཡཱཧ ‘‘ཨིམསྶ པནཏྠསྶཱ’’ཏིཨཱདི. ཨིམཾ ཨུཔམཾ ཨུདཱཧརནྟི ཨཊྛཀཐཱཙརིཡཱ ཨུཔམཱཡཔི ཨསིདྡྷསྶ ཨཏྠསྶ སཱདྷེཏབྦཏོ. ཏེནེཝཱཧ ‘‘ཨུཔམཾ ཏེ ཀརིསྶཱམི, ཨུཔམཱཡཔིདྷེཀཙྩེ ཝིཉྙཱུ པུརིསཱ བྷཱསིཏསྶ ཨཏྠཾ ཛཱནནྟཱི’’ཏི (སཾ. ནི. ༢.༦༧). ཏུཊྛཧཊྛོཏི ཡདིཔཱཧཾ ཙཀྑུཀརཎཱིཡཾ ཀཱཏུཾ ན སཀྐོམི, པཱདཀརཎཱིཡཾ པན ཀཱཏུཾ སཀྐོམི, ཏྭཉྩ ཙཀྑུཀརཎཱིཡཾ, ཏསྨཱ ཨམྷཱཀཾ ཨུབྷིནྣཾ སཧིཏཱནཉྩ ཝསེན ཨིཙྪིཏདེསསམྤཏྟི སིཛ྄ཛྷཏཱིཏི ཏུཊྛཧཊྛོ ཛཙྩནྡྷོ. ཏཏྠ ཛཙྩནྡྷོཏིཨཱདི ཨུཔམོཔམེཡྻསཾསནྡནཾ. དྷམྨཱནཾ ཨཏྟལཱབྷོ པརཔཊིབདྡྷོཏི ཝཏྟབྦམེཝ ནཏྠི ཏཏོ པུབྦེ ཨཝིཛྫམཱནཏྟཱ, པཊིལདྡྷཏྟལཱབྷསྶཱཔི པརཔཊིབདྡྷམེཝ ཨཏྠཀིཙྩནྟི དསྶེཏུཾ ‘‘ན སཀེན ཏེཛེན ཨུཔྤཛྫཏི, ན ཏཱསུ ཏཱསུ ཀིརིཡཱསུ པཝཏྟཏཱི’’ཏི ཝུཏྟཾ. ཏེསཾ ནཱམརཱུཔཱནཾ ཨཉྙམཉྙཾ ནིསྶཱཡ ཨུཔྤཏྟི ཝཱ པཝཏྟི ཝཱ ན ཙ ན ཧོཏཱིཏི ཛཙྩནྡྷཔཱིཋསཔྤིཨུཔམཱཡ སཱདྷིཏམཏྠཾ ནིགམེནྟོ ‘‘ཨསཱམགྒིཡཾ ཨཧེཏཱུནཾ སཱམགྒིཡམྤི ཨཧེཏུཀབྷཱཝཱཔཏྟིཏོ’’ཏི ཡཐཱཝུཏྟསྶ ཧེཏུནོ ཨནེཀནྟིཀབྷཱཝཾ ཝིབྷཱཝེཏི.

པརདྷམྨཝསཱནུཝཏྟིནོཏི པརེསཾ ཨཏྟཏོ ཨཉྙེསཾ ཧེཏུཔཙྩཡསངྑཱཏཱནཾ དྷམྨཱནཾ ཝསེན ཨནུཝཏྟནསཱིལཱ. ཨཏྟདུབྦལཱཏི ཨཏྟནཱ དུབྦལཱ ཨསམཏྠཱ. པརཔཙྩཡཏོཏི པརེསཾ དྷམྨཱནཾ པཙྩཡབྷཱཝཏོ. ཨེཏེན ཛནཀཔཙྩཡཾ ཝདཏི. ཏེནེཝཱཧ ‘‘ཛཱཡརེ’’ཏི. པརཨཱརམྨཎཏོཏི པརེསཾ དྷམྨཱནཾ ཨཱརམྨཎབྷཱཝཏོ. ཨེཏེན ཨུཔཏྠམྦྷཀཔཙྩཡཾ ཝདཏི. པཙྩཡགྒཧཎཾ ཝཱ རཱུཔཱཔེཀྑཾ, ཨཱརམྨཎགྒཧཎཾ ནཱམཱཔེཀྑཾ. ‘‘པརདྷམྨེཧཱི’’ཏི ཨིདཾ ཨཱརམྨཎཔཙྩཡཱནཾ ཝིསེསནཾ. པུརིམཏྠེན ཧི ཝུཏྟམེཝཏྠཾ པཙྪིམཏྠེན པཱཀཊཾ ཀརོཏི. པབྷཱཝིཏཱཏི ཨུཔྤཱདིཏཱ.

ནཱཝཱཡནྟིཀཱུཔམཱཡཔི ནཱམརཱུཔཱནཾ ཨཝསཝཏྟིཏཾ ཝིབྷཱཝེཏུཾ ‘‘ཡཐཱཔཱི’’ཏིཨཱདིནཱ ཏིསྶོ གཱཐཱ ཝུཏྟཱ. ནིསྶཱཡཱཏི པཏིཊྛཱཡ. ཡནྟཱིཏི གཙྪནྟི. མནུསྶེ ནིསྶཱཡཱཏི ནེཏུབྷཱུཏེ ནིཡཱམཀཀམྨཀཱརཀཱདིམནུསྶེ ཨཔསྶཱཡ. ན ཧི ཏེསཾ ཨརཎགྒཧཎལངྐཱརསཎྛཱཔནཨུདཀུསྶིཉྩནཱདིཀིརིཡཱཡ ¶ ཝིནཱ ནཱཝཱ ཨིཙྪིཏདེསཾ པཱཔུཎཱཏི. ཨུབྷོཏི ཨཉྙམཉྙཾ ནཱཝཾ ནིསྶཱཡ མནུསྶཱ, མནུསྶེ ནིསྶཱཡ ནཱཝཱཏི ཨཏྠོ.

ཨེཝནྟི ¶ ཝུཏྟཔྤཀཱརེན. ནཱནཱནཡེཧཱིཏི པཋམཱདཱིནཾ སཏྟནྣཾ ཛྷཱནཱནཾ, ཏེསཾ ཨུཔཙཱརཱནཉྩ ཝསེན ཙུདྡས ཨརཱུཔཔརིགྒཧམུཁཱནི, ཙཏུདྷཱཏུཝཝཏྠཱནེ ཝུཏྟཱནཾ ཏེརསནྣཾ དྷཱཏུཔརིགྒཧམུཁཱནཾ དྷཱཏཱཡཏནཁནྡྷམཧཱབྷཱུཏཝསེན, ཨིདྷ ཝུཏྟཱནཾ ཨཝུཏྟཱནཉྩ ཨིནྡྲིཡསཙྩཔཊིཙྩསམུཔྤནྣཱནཾ ཝསེན སམཝཱིསཏི རཱུཔཔརིགྒཧམུཁཱནི, ཏཱནི པཙྩེཀཾ ‘‘ཕསྶོ ཝེདནཱ ཙིཏྟ’’ནྟི ཨིམེསཾ སམྨུཁབྷཱཝེན ཨུཔཊྛིཏཱནཾ ཏིཎྞཾ ཨརཱུཔདྷམྨཱནཾ ཝསེན ཏིགུཎིཏཱནི སམསཊྛི, ཙུདྡས ཨརཱུཔཔརིགྒཧམུཁཱནི, ཏཱནི ཙཱཏི ཙཏུསཏྟཏིཡཱ ནཱམརཱུཔཔརིགྒཧནཡེཧི ཙེཝ སམྦཧུལསུཏྟནྟརཐགེཧམུཊྛིཝཱིཎཱསེནཱརུཀྑདཱརུཡནྟནལ༹ཀལཱཔིབྷེརིཛཙྩནྡྷཔངྒུལ༹ནཱཝཱམནུསྶཱུཔམཱཧི ཙ ནཱམརཱུཔཔམཏྟཏཱཝཝཏྠཱཔནནཡེཧི ཙ. སཏྟསཉྙཾ ཨབྷིབྷཝིཏྭཱཏི ཨནཱདིཀཱལབྷཱཝིཏཾ ཁནྡྷཔཉྩཀེ ཨཏྟགཱཧཾ ཝིཀྑམྦྷེཏྭཱ. ནཱམརཱུཔཱནཾ ཡཱཐཱཝདསྶནནྟི ‘‘ཨིདཾ ནཱམཾ, ཨེཏྟཀཾ ནཱམཾ, ན ཨིཏོ བྷིཡྻོ. ཨིདཾ རཱུཔཾ, ཨེཏྟཀཾ རཱུཔཾ, ན ཨིཏོ བྷིཡྻོ’’ཏི ཙ ཏེསཾ ལཀྑཎསལླཀྑཎམུཁེན དྷམྨམཏྟབྷཱཝདསྶནཾ. ཨཏྟདིཊྛིམལཝིསོདྷནཏོ དིཊྛིཝིསུདྡྷཱིཏི ཝེདིཏབྦཾ. ཨེཏསྶེཝཱཏི ནཱམརཱུཔསྶ ཡཱཐཱཝདསྶནསྶེཝ.

དིཊྛིཝིསུདྡྷིནིདྡེསཝཎྞནཱ ནིཊྛིཏཱ.

ཨིཏི ཨཊྛཱརསམཔརིཙྪེདཝཎྞནཱ.

༡༩. ཀངྑཱཝིཏརཎཝིསུདྡྷིནིདྡེསཝཎྞནཱ

པཙྩཡཔརིགྒཧཀཐཱཝཎྞནཱ

༦༧༨. ཨནནྟརནིདྡིཊྛཱཡ ¶ ¶ དིཊྛིཝིསུདྡྷིཡཱ ཝིསཡབྷཱཝེན དསྶིཏཏྟཱ ‘‘ཨེཏསྶེཝཱ’’ཏི ཝུཏྟཾ, ན ཏདཉྙཏོ ཝིསེསནཏྠཾ ཏདཉྙསྶེཝ ཨབྷཱཝཏོ. ཨཛ྄ཛྷཏྟཾ ཝཱ ཧི ཝིཔསྶནཱབྷིནིཝེསོ ཧོཏུ བཧིདྡྷཱ ཝཱ, ཨཛ྄ཛྷཏྟསིདྡྷིཡཾ པན ལཀྑཎཏོ སབྦམྤི ནཱམརཱུཔཾ ཨནཝསེསཏོ པརིགྒཧིཏམེཝ ཧོཏཱིཏི. པཙྩཡཔརིགྒཧེནཱཏི ཧེཏུམྷི ཀརཎཝཙནཾ. པཙྩཡཔརིགྒཧཧེཏུ ཧིསྶ ཨདྡྷཏྟཡཀངྑཱཝིཏརཎཾ ཧོཏཱིཏི, ཀརཎེ ཝཱ ཨེཏཾ ཀརཎཝཙནཾ པཙྩཡཔརིགྒཧསྶ སཱདྷཀཏམབྷཱཝཏོ ཀངྑཱཝིཏརཎཀིརིཡཱཡ. ཡདཱ ཧིསྶ སུཔརིསུདྡྷོ ནིཛྫཊོ ནིགྒུམྦོ པཙྩཡཔརིགྒཧོ སིཛ྄ཛྷཏི, ཏདཱནེན ཀངྑཱ ཝིཏརཱིཡཏཱིཏི. ཝིཏརིཏྭཱཏི ཨཏིཀྐམིཏྭཱ, ཝིཀྑམྦྷེཏྭཱཏི ཨཏྠོ. ཏཾ པན ཉཱཎཾ ཏཐཱདྷིགཏཾ ཝསཱིབྷཱཝཔྤཏྟཾ ཛྷཱནཾ ཝིཡ ཡོགིནོ སནྟཱནེ པབནྡྷཝསེན པཝཏྟཏཱིཏི ཀཏྭཱ ཝུཏྟཾ ‘‘ཋིཏཾ ཉཱཎ’’ནྟི.

ཏནྟི ཀངྑཱཝིཏརཎཝིསུདྡྷིཾ. ཏཾ སམྤཱདེཏུཀཱམོ ཨཱཔཛྫཏཱིཏི སམྦནྡྷོ. ཡཱཐཱཝཏོ དིཊྛཾ ནཱམརཱུཔཾ ཏིཝིདྷདུཀྑཏཱཡོགཏོ རོགོ ཝིཡ. པཙྩཡཱ ཙསྶ རོགསམུཊྛཱནཾ ཝིཡ ཨུཔཊྛཧནྟཱིཏི ཨིམམཏྠཾ དསྶེནྟོ ‘‘ཡཐཱ ནཱམ…པེ… པརིཡེསཏཱི’’ཏི ཨཱཧ. སཾསཱརདུཀྑནིམུགྒསྶ སནྟཱནསྶ ཏཏོ ཝིམོཙེཏུཀཱམཏཱཝསེན ཨནུཀམྤིཏབྦཏཱ ལབྦྷཏཱིཏི ཏམཏྠཾ དསྶེཏུཾ ‘‘ཡཐཱ ཝཱ པནཱ’’ཏིཨཱདི ཝུཏྟཾ. ཨེཝམེཝ ཋིཏེ ཡདེཀེ ཝདནྟི ‘‘ཨནུཀམྤེཏབྦཀུམཱརཀདསྶནེན ཏསྶ མཱཏཱཔིཏུཨཱཝཛྫནཾ ཨིདྷ ཨནུདཱཧརཎཾ ནིརོདྷེཏབྦཏཱཡ ནཱམརཱུཔསྶ ཨནུཀམྤིཏབྦཏཱབྷཱཝཏོ’’ཏི, ཏདཔཱཧཏཾ ཧོཏི. ཨཝསྶཉྩེཏཾ ཨེཝཾ ཨིཙྪིཏབྦཾ, ཨཉྙཐཱ ཝེནེཡྻཔུགྒལསནྟཱནེ སཏྠུ མཧཱཀརུཎཱཔཝཏྟི ཨེཝ ཝིཙཱརེཏབྦཱ སིཡཱ. མནྡབུདྡྷིཏཱཡ མནྡཾ. ཝུཌྜྷཏརོཔི ཀོཙི མནྡབུདྡྷི ཧོཏཱིཏི ཏཏོ ཝིསེསནཏྠཾ ‘‘ཀུམཱར’’ནྟི ཝུཏྟཾ. ཡོ ཀོཙི པཋམཝཡེ ཝཏྟམཱནོ ‘‘ཀུམཱརོ’’ཏི ཝུཙྩཏཱིཏི ཏཏོ ཝིསེསནཏྠཾ ‘‘དཧར’’ནྟི ཝུཏྟཾ. ཨེཝམྤི ཡོ ཨཱདྷཱཝིཏྭཱ པརིདྷཱཝིཏྭཱ ཝིཙཱརཎཀོ ཏརུཎདཱརཀོ, སོཔི ¶ ‘‘དཧརོ’’ཏི ¶ ཝུཙྩཏཱིཏི ཏཏོ ནིཝཏྟནཏྠཾ ‘‘ཨུཏྟཱནསེཡྻཀ’’ནྟི ཝུཏྟཾ. ཙཏཱུཧིཔི པདེཧི ཀརུཎཱཡིཏབྦཏཾཡེཝ དསྶེཏི. ཨཱཔཛྫཏཱིཏི ཀརོཏི.

ཡཐཱ པནསྶ ཧེཏུཔཙྩཡཔརིཡེསནཱཔཏྟི ཧོཏི, ཏཾ དསྶེཏུཾ ‘‘སོ’’ཏིཨཱདི ཝུཏྟཾ. ཏཏྠ བྱཏིརེཀམུཁེན ཨཏྠོ སཱདྷིཏོ སམྨདེཝ སཱདྷིཏོ ཧོཏཱིཏི ཨཧེཏུཀབྷཱཝཾ ཏཱཝ པཊིཀྑིཔནྟོ ‘‘ན ཏཱཝིདཾ ནཱམརཱུཔཾ ཨཧེཏུཀ’’ནྟི ཝཏྭཱ ཏཏྠ ཀཱརཎམཱཧ ‘‘སབྦཏྠཱ’’ཏིཨཱདིནཱ. ཧེཏུམནྟརེན སཏི སམྦྷཝེ སབྦདྷམྨཱནཾ ཧེཏུཨབྷཱཝོ སམཱནོཏི སབྦསམཱནཏཱ སིཡཱ, ཏཐཱ ཙ སཏི སོཏཔདེསཱདཱིསུ, བཧིདྡྷཱ ཙ ཙཀྑུཝིཉྙཱཎཱདིཧེཏུཨབྷཱཝོཏི སབྦཏྠ, ཙཀྑཱདཱིནཾ ཨུཔྤཏྟིཏོ པུབྦེ, པརིབྷེདཏོ ཨུདྡྷཉྩ ཧེཏུཨབྷཱཝོཏི སབྦདཱ ཙ ཨནྡྷཱདཱིནཾ ཨརཱུཔཱིནཾ, ཨསཉྙཱིནཉྩ ཧེཏུཨབྷཱཝོཏི སབྦེསཉྩ ཙཀྑུཝིཉྙཱཎཱདཱིཧི བྷཝིཏབྦཾ, ཧེཏུཨབྷཱཝཱ ཝིསེསཏོ ཏཉྩ ནཏྠཱིཏི ཨཱཧ ‘‘སབྦཏྠ སབྦདཱ སབྦེསཉྩ ཨེཀསདིསབྷཱཝཱཔཏྟིཏོ’’ཏི. ནིདསྶནམཏྟཉྩེཏཾ ཡདིདཾ ‘‘ཙཀྑུཝིཉྙཱཎཱདཱིསུ ཧཱི’’ཏི. ཡཏྟཀཱ ལོཀེ ཝིསེསཱ, ཏེཧི སབྦེསཾ, སབྦཀཱལཉྩ བྷཝིཏབྦནྟི ཨདྷིཔྤཱཡོ. ཨཱདི-སདྡེན ཝཱ ཏེསམྤི གཧཎཾ ཀཏམེཝཱཏི དཊྛབྦཾ. ཏསྨཱ ཨཧེཏུཀབྷཱཝེ ཝིསིཊྛཏཱཡ ཨསམྦྷཝོ ཨེཝཱཏི སབྦཏྠ ཨེཀསདིསབྷཱཝཱཔཏྟིཏོ, སབྦདཱ ཨེཀསདིསབྷཱཝཱཔཏྟིཏོ, སབྦེསཾ ཨེཀསདིསབྷཱཝཱཔཏྟིཏོཏི པཙྩེཀཾ སམྦནྡྷོ ཝེདིཏབྦོ. ཨེཝཾ ཨཧེཏུབྷཱཝེ པཊིསིདྡྷེ ཝིསམཧེཏུཝཱདཱི ཝདེཡྻ ‘‘ན ཨིདཾ ཨཧེཏུཀཾ ཀིཉྩརཧི སཧེཏུཀཾ, ཀེན པན ཧེཏུནཱ སཧེཏུཀནྟི? ཨིསྶརཱདིནཱ’’ཏི.

ཨཱདི-སདྡེན པཀཏིཔུརིསཔཛཱཔཏིཀཱལཱདཱིནཾ གཧཎཾ ཝེདིཏབྦཾ, ཏཾ པཊིཀྑིཔནྟོ ཨཱཧ ‘‘ན ཨིསྶརཱདིཧེཏུཀ’’ནྟིཨཱདི. ན ནཱམརཱུཔཾ ཨིསྶརཱདིཧེཏུཀཾ ནཱམརཱུཔཏོ ཨཉྙསྶ ཨནུཔལབྦྷམཱནཏྟཱ ཨིསྶརཔཀཏིཨཱདིནམེཝ ཨབྷཱཝཏོ. ཡདི པན ཨསཏོ ཨིསྶརཱདིཏོ ནཱམརཱུཔསྶ ཨུཔྤཏྟི, ཨེཝཾ སཏི སཱ ཨེཝ སབྦཏྠ སབྦདཱ སབྦེསཾ ཨེཀསདིསཏཱ ཨཱཔཛྫཏི. ཨཐ ནཱམརཱུཔམཏྟམེཝ ཨིསྶརཱདིཧེཏུཀཾ, ནཱམརཱུཔཉྩ ཨཧུཏྭཱ སམྦྷཝནྟཾ, ཧུཏྭཱ ཙ ཝིནསྶནྟཾ དིསྶཏཱིཏི ཨིསྶརཱདཱིཧིཔི ཏཱདིསེཧི བྷཝིཏབྦཾ. ཏཐཱ ཙ ཏདཔི སཔྤཙྩཡཾ སངྑཏམེཝཱཏི ཏསྶཱཔི པཙྩཡཔརིགྒཧོ ཀཱཏབྦོ. ཨཐ ¶ ཏཾ ནུཔྤཛྫཏི, ཨཧེཏུཀཏཱ ཏསྶ ཨཱཔནྣཱ. ཏེནཱཧ ‘‘ཨཧེཏུཀབྷཱཝཱཔཏྟིཏོ’’ཏི.

ཨཔིཙ ན ཨིསྶརཱདིཧེཏུཀཾ ནཱམརཱུཔཾ. ཀིཾ ཀཱརཎཾ? ཀམེན ཨུཔྤཏྟིཏོ. ཡདི ཧི ཨེཝཾ ནིཙྩཾ ¶ ཨིསྶརཱདིསཉྙིཏཾ ཀམྨཀིལེསིནྡྲིཡཱརམྨཎཱདིནིརཔེཀྑཀཱརཎམྤི སིཡཱ, སབྦེསཾཡེཝ ཨེཀཛ྄ཛྷཾ ཨུཔྤཏྟི སིཡཱ, ཡཏྟཀེཧི ཏཏོ ཨུཔྤཛྫིཏབྦཾ. ཀསྨཱ? ཀཱརཎསྶ སནྣིཧིཏབྷཱཝཏོ. ཡདི པན ཏསྶ ཨིཙྪཱཝསེན ཏསྶ ཨུཔྤཏྟིཾ པརིཀཔྤེཡྻུཾ, ཏཱསཉྩ ཨིཙྪཱནཾ ཨེཀཛ྄ཛྷཾ ཨུཔྤཏྟིཡཾ ཀོ ཝིབནྡྷོ. ཨཐ ཨཉྙམྤི ཀིཉྩི ཀམྨཀིལེསིནྡྲིཡཱརམྨཎཱདིཨཔེཀྑིཏབྦཾ ཨཏྠཱིཏི ཙེ? ཏདེཝ ཧེཏུ ཀཱརཎཾ, ཀིམཉྙེན ཨདིཊྛསཱམཏྠིཡེན པརིཀཔྤིཏེན པཡོཛནཾ? དིཊྛཉྷི ཀམྨཱདཱིནཾ སཱམཏྠིཡཾ ཏདཉྙཔཙྩཡསནྣིདྷཱནེཔི ཏདབྷཱཝེ ཨབྷཱཝཏོ. ཡཐཱ ཧི རཱུཔཱལོཀམནསིཀཱརསནྣིདྷཱནེཔི ཙཀྑུནོ ཨབྷཱཝེ ཙཀྑུཝིཉྙཱཎསྶ ཨབྷཱཝཾ, བྷཱཝེ ཙ བྷཱཝཾ དིསྭཱ ཙཀྑུནོ ཙཀྑུཝིཉྙཱཎུཔྤཱདནསམཏྠཏཱ ཨཏྠཱིཏི ཝིཉྙཱཡཏི. ཡཐཱ ཙ ཡྭཱཡཾ ཡམཀཱནམྤི སམཱནཱནཾ ཛནཀཛནནཱིསུཀྐསོཎིཏཱདིབཱཧིརཔཙྩཡསམབྷཱཝེཔི སཏྟཱནཾ ཧཱིནཔཎཱིཏཏཱདིཝིསེསོ དིསྶཏི, སོ ཙ སསནྟཱནེ ཏཱདིསསྶ ཨཉྙསྶ ཧེཏུནོ ཨབྷཱཝཱ ཀམྨཀིལེསཧེཏུཀོཏི ཏསྶ ཏཏྠ སམཏྠཏཱ ཨཏྠཱིཏི ཝིཉྙཱཡཏི, ན ཨེཝམིསྶརཱདིཀསྶ. ཀཱརཎསྶ ཧི བྷཱཝཱབྷཱཝེ ཕལསྶ བྷཱཝཱབྷཱཝེཧི ཀཱརཎསྶ སམཏྠཏཱ ཝིཉྙཱཡེཡྻ. ན ཙ སནྣིཧིཏེ ཏདཀཱརཎསྶ ནཱམརཱུཔསྶ ཨིསྶརཱདིཝེཀལླེན ཀཏྠཙི ཨནུཔྤཏྟི དིཊྛཱ, ཏསྨཱ ཨཀཱརཎམིསྶརོ.

ཨཐཱཔི སགྒོ ཨེཝཾ ཨིསྶརཱདིཧེཏུཀོ ཝུཙྩེཡྻ, སོཔི སགྒཔྤཀཱརོ སབྦཀཱལཾ ཏཏོ ནིབྦཏྟེཡྻ. ན ཧི སནྣིཧིཏཀཱརཎསྶ ཕལསྶ ཨནུཔྤཏྟི ཡུཏྟཱ. ནིཙྩེ ཙ སཏི ཨཉྙནིརཔེཀྑཀཱརཎེ སགྒསྶ ཨཱདིཡེཝ ན ཡུཏྟོ, ཡཱཝ ཨིསྶརཱདིཀཾ ཀཱརཎཾ, ཏཱཝ སབྦསྶ ཨཏྠིབྷཱཝཔྤསངྒཏོ. ཨཐཱཔི ཝདེཡྻ ‘‘ཨཉྙེཔི ཡཐཱརཧཾ པཙྩཡཱ ཧོནྟིཡེཝ, ཨིསྶརཱདིཀམྤི ཏེསཾ སཧཀཱརཱིཀཱརཎཾ ཧོཏཱི’’ཏི. ཡདེཏྠ ཝཏྟབྦཾ, ཏཾ ཧེཊྛཱ ཝུཏྟམེཝ. ཡདི པརོ ཝདེཡྻ ‘‘ཨིདྷ བུདྡྷིཔུབྦོ བྷཱཝཱནཾ རཙནཱཝིསེསོ དིཊྛོ, ཡཐཱ ཏཾ གྷཊགེཧཱདཱིནཾ. ཨཏྠི ཙ ཨཛ྄ཛྷཏྟིཀབཱཧིརཱནཾ སརཱིརཔདུམཱདཱིནཾ རཙནཱཝིསེསོ, ཏསྨཱ ཏེནཱཔི བུདྡྷིཔུབྦེན བྷཝིཏབྦཾ. ཡསྶ ཙ སོ བུདྡྷིཔུབྦོ, སོ ཨིསྶརཱདིཀོ, ཏསྨཱ ཏེན ནཱམརཱུཔསཉྙིཏསྶ ལོཀསྶ ཀཱརཎེན བྷཝིཏབྦ’’ནྟི. ཏཡིདཾ ཨསིདྡྷཾ, རཙིཏཱ སརཱིརཔདུམཱདཡོཏི ¶ ཏཏྠེཝ ཨུཔྤནྣཏྟཱ. ཨུཔྤནྣསྶ ཧི སནྣིཝེསཝསེན ཏཐཱ ཏཐཱ པཊྛཔནཾ ‘‘རཙནཱ’’ཏི ཝུཙྩཏི. ཨནེཀནྟིཀོ ཙཱཡཾ ཨབུདྡྷིཔུབྦསྶཱཔི དིཊྛཏྟཱ. དིཊྛོ ཧི ནྷཱརུཨཱདཱིནཾ ཨགྒིསཾཡོགེན རཙནཱཝིསེསོ, ཏཐཱ ཝིསུསྶནྟཱནཾ པུབྦཙམྨཱདཱིནཾ. ཡདི པནཱཡམིསྶརཱདིཀོ གཝསྶཛགདྲབྷཱདཱིནཾ ཀརཱིསཱཝཏྟེ པཊིམཧུཏཾ རཙེཡྻ, ཨུམྨཏྟོ ཝིཡ ཝིཀྑིཏྟོ སིཡཱ. ཀིཉྩཱཡཾ ལོཀཾ སཛྫེནྟོ ཨཏྟཏྠཾ ཝཱ སཛྫེཡྻ ལོཀཏྠཾ ཝཱ.

ཏཏྠ ¶ ཙ ཡདི པུརིམོ མཀྑོ ཀཏཀིཙྩོ ན སིཡཱ ལོཀེན སཱདྷེཏབྦསྶ ཨཏྠིབྷཱཝཏོ. ཨཐ དུཏིཡོ, ཀསྨཱ ལོཀསྶ ཨཧིཏདུཀྑཱཝཧཾ པཱཔཾ ནིརཡཱདིཾ, ཛརཱམརཎཱདིཉྩ སཛཏི? ཨཐ ཏདུབྷཡཾ ཨནཱམསིཏྭཱ ཀཱིལ༹ཏྠཾ སཛཏི. ཀཱིལཱ༹ ཙ ནཱམ རཏིཨཏྠཱ ཧོཏི. ཝིནཱ ཀཱིལཱ༹ཡ རཏིཾ ཨཛཱནནྟཱནཾ རཏིཨཏྠཉྩ ཀཱིལ༹མཱརབྷནྟོ རཏིཡཾ ཨིསྶརོ ཨནིསྶརོ སིཡཱ. ཨཐ པཡོཛནནིརཔེཀྑོ, སབྦཀཱལཾ སཛེཡྻ, ཏསྶ ཙཱཡཾ སཛནསམཏྠཏཱ ཨཧེཏུཀཱ ཝཱ སིཡཱ སཧེཏུཀཱ ཝཱ. ཨཧེཏུཀཱ ཙེ, སབྦེསཾ སིཡཱ སཧེཏུཀཱ ཝཱ. ཨཧེཏུཀཱ ཙེ, སབྦེསམྤི སིཡཱ. ཨཐ སཧེཏུཀཱ, སོ ཙསྶ ཧེཏུ པརཏོ ཝཱ སམྦྷཱུཏོ སིཡཱ ཨཏྟཏོ ཝཱ. ཏཏྠ པརཏོ ཙེ སམྦྷཱུཏོ, ཡདསྶ སོ ལདྡྷོ, ཏསྶཱཡཾ ཝེཡྻཱཝཙྩཀརསདིསོ སིཡཱ. ཨཐ ཨཏྟཏོ ཏདུཔྤཏྟིཏོ པུབྦེ ཨཡཾ ཀཱིདིསོ ལོཀོ ཙཱཏི སབྦམིདཾ ཨཱལུནཝིསིཎཾ ཨཱཀུལབྱཱཀུལཾ གོཡཱུཐེན གཏམགྒསདིསཕེཎཔིཎྜསམཾ ཨཝིམདྡཀྑམཾ ཨསཱརཾ. ཏིཊྛཏུ པསངྒོ, ཡཐཱདྷིཀཏམེཝ ཝཎྞཡིསྶཱམ. ཏསྨཱཏི ཡསྨཱ ཨིདཾ ནཱམརཱུཔཾ ན ཨཧེཏུཀཾ, ནཱཔི ཨིསྶརཱདིཝིསམཧེཏུཀཾ, ཏསྨཱ. ཏེཏི ཧེཏུཔཙྩཡཱ.

༦༧༩. ཨོལཱ༹རིཀཏྟཱ, སུཔཱཀཊཏྟཱ ཙ རཱུཔསྶ པཙྩཡཔརིགྒཧོ སུཀརོཏི ‘‘ཨིམསྶ ཏཱཝ རཱུཔཀཱཡསྶཱ’’ཏིཨཱདིནཱ པཋམཾ ཏསྶ པཙྩཡཔརིགྒཧཝིདྷིཾ ཨཱརབྷཏི. ཏཏྠ ཡཐཱ ནཱམརཱུཔསྶ པཙྩཡཔརིགྒཧོ ཨཧེཏུཝིསམཧེཏུཝཱདནིཝཏྟིཡཱ ཧོཏི, ཨེཝཾ ནིབྦིདཱཝིརཱགཱཝཧབྷཱཝེན ཏཏྠ ཨབྷིརཏིནིཝཏྟིཡཱཔི ཨིཙྪིཏབྦོཏི ཏཾ གབྦྷསེཡྻཀཝསེན དསྶེནྟོ ནིབྦཏྟཊྛཱནསྶ སུཙིབྷཱཝཔཊིསེདྷནམུཁེན ཨསུཙིབྷཱཝཾ ཝིབྷཱཝེཏུཾ ‘‘ཨཡཾ ཀཱཡོ’’ཏིཨཱདིམཱཧ. ཏཏྠ ཨུཔྤལཱདཱིནི ཨསུཙིཊྛཱནེ ནིབྦཏྟཱནིཔི ¶ སཡཾ སུཙིསམྨཏཱནེཝཱཏི ཏཾདསྶནཏྠཾ ཨབྦྷནྟརགྒཧཎཾ. ཏེནཱཧ བྷགཝཱ –

‘‘ཡཐཱ སངྐཱརདྷཱནསྨིཾ, ཨུཛ྄ཛྷིཏསྨིཾ མཧཱཔཐེ;

པདུམཾ ཏཏྠ ཛཱཡེཐ, སུཙིགནྡྷཾ མནོརམ’’ནྟི. (དྷ. པ. ༥༨);

‘‘ནིབྦཏྟཏཱི’’ཏི ཨིདཾ མཱཏུཀུཙྪིཡཾ པཊིསནྡྷིཔཝཏྟཱིསུ རཱུཔཀཱཡསྶ ནིབྦཏྟནསཱམཉྙཏོ གཧེཏྭཱ ཝུཏྟཾ, ན པཋམཱབྷིནིབྦཏྟིམཏྟཾ. ཨེཝཉྩ ཀཏྭཱ ཨཱཧཱརསྶ ཨུཔཏྠམྦྷཀཔཙྩཡཏཱཝཙནཾ, ཨུདརཔཊལསྶ པཙྪཏོ ཀརཎཱདིཝཙནཾ, དུགྒནྡྷཛེགུཙྪཔཊིཀྐཱུལཏཱཝཙནཉྩ སམཏྠིཏཾ ཧོཏི. ཨེཝམཝཊྛིཏེ ཡདེཀཙྩེཧི པིཊྛིཏོ, པུརཏོ ཙ ཀརཎཾ ཀིཾ སིཡཱ པཊིསནྡྷིཀཱལེཏིཨཱདི ཝུཏྟཾ, ཏཾ ¶ ཨཔཱཧཏཾ ཧོཏི. ‘‘ནིབྦཏྟཀཏྟཱ’’ཏི ཨིམིནཱ བཱིཛཾ ཝིཡ ཨངྐུརསྶ ཨཝིཛྫཱདཡོ རཱུཔཀཱཡསྶ ཨསཱདྷཱརཎཀཱརཎཏཱཡ ཧེཏཱུཏི དསྶེཏི. ‘‘ཨུཔཏྠམྦྷཀཏྟཱ’’ཏི ཨིམིནཱ པན ཨངྐུརསྶ པཐཝཱིསལིལཔཱརིསིཨཱདཡོ ཝིཡ ཨཱཧཱརོ སཱདྷཱརཎཀཱརཎཏཱཡ པཙྩཡོཏི དསྶེཏི.

པཉྩ དྷམྨཱ ཧེཏུཔཙྩཡཱཏི ཨཝིཛྫཱདཡོ པཉྩ དྷམྨཱ ཡཐཱརཧཾ ཧེཏུ ཙ པཙྩཡོ ཙཱཏི ཨཏྠོ. བྷཝེསུ ཝིཛྫམཱནདོསཔཊིཙྪཱདནཔཏྠནཱ དལ༹ྷགྒཱཧབྷཱཝེན སངྑཱརབྷཝཱནཾ ཧེཏུབྷཱུཏཱ ཛནཀསཧཱཡཏཱཡ བྷཝནིཀནྟི ཏཾསཧཛཱཏཨཱསནྣཀཱརཎཏྟཱ ཨབྷིསངྑཱརིཀཱ, ཨཔསྶཡབྷཱུཏཱ ཙཱཏི ‘‘མཱཏཱ ཝིཡ དཱརཀསྶ ཨུཔནིསྶཡཱ’’ཏི ཝུཏྟཱ. ཡཐཱ པིཏུ ཛནིཏསུཀྐེ པུཏྟསྶ ཨུཔྤཏྟཱིཏི པིཏཱ ཛནཀོ, ཨེཝཾ ཀམྨཾ སཏྟསྶ ཨུཔྤཱདཀཏྟཱ ཛནཀཾ ཝུཏྟཾ. ཡཐཱ དྷཱཏི ཛཱཏསྶ དཱརཀསྶ པོསནཝསེན སནྡྷཱརིཀཱ, ཨེཝཾ ཨཱཧཱརོ ཨུཔྤནྣསྶ ཀཱཡསྶཱཏི སནྡྷཱརཀོ ཝུཏྟོ.

ཀཱམཉྩེཏྠ ཨཝིཛྫཱདཡོ ནཱམཀཱཡསྶཱཔི པཙྩཡོ, པཀཱརནྟརེན པན ཏསྶ པཱཀཊཾ པཙྩཡཔརིགྒཧཝིདྷིཾ དསྶེཏུཾ ‘‘ཙཀྑུཉྩ པཊིཙྩཱ’’ཏིཨཱདི ཝུཏྟཾ. ཏཏྠ ཙཀྑུཉྩཱཏི ཙ-སདྡོ སམུཙྩཡཏྠོ. ཏེན ཙཀྑུཝིཉྙཱཎསྶ ཨཱཝཛྫནཱདིཨཛ྄ཛྷཏྟཾ སབྦཾ པཙྩཡཛཱཏཾ སངྒཎྷཱཏི. རཱུཔེ ཙཱཏི པན ཙ-སདྡེན ཡཐཱ བཧུལཾ བཱཧིརརཱུཔཾ ཙཀྑུཝིཉྙཱཎསྶ ཨཱརམྨཎཔཙྩཡོ, ཨེཝཾ ཨཉྙམྤི བཱཧིརཾ པཙྩཡཛཱཏཾ སངྒཎྷཱཏི. པཊིཙྩཱཏི པཙྩཡབྷཱུཏཾ ¶ ལདྡྷཱཏི ཨཏྠོ. ཏེན ཙཀྑུསྶ ནིསྶཡཔུརེཛཱཏཨིནྡྲིཡཝིཔྤཡུཏྟཨཏྠིཨཝིགཏཝསེན, རཱུཔསྶ ཨཱརམྨཎཔུརེཛཱཏཨཏྠིཨཝིགཏཝསེན, ཨིཏརེསཉྩ སངྒཧིཏཱནཾ ཨནནྟརཱདིསཧཛཱཏཱདིཝསེན པཙྩཡབྷཱཝཾ དསྶེཏི. ཝཙནབྷེདེ པན ཀཱརཎཾ ཧེཊྛཱ ཝུཏྟམེཝ. ཨཱདི-སདྡེན ཙ ཕསྶཱདཱིནཾ ཝིཡ སཧཔཙྩཡེཧི སོཏཝིཉྙཱཎཱདཱིནཾ སངྒཧོ ཝེདིཏབྦོ ‘‘ཏིཎྞཾ སངྒཏི ཕསྶོ’’ཏིཨཱདིཔཱཋསྶ (མ. ནི. ༡.༢༠༤; ༣.༤༢༡, ༤༢༥-༤༢༦; སཾ. ནི. ༢.༤༣-༤༥; ཀཐཱ. ༤༦༥, ༤༦༧) ཝིཡ ‘‘སོཏཉྩ པཊིཙྩཱ’’ཏིཨཱདིཔཱཋསྶ སངྒཧིཏཏྟཱ. ཨེཝཾ སམྨསནུཔགཾ སབྦཾ ནཱམཾ སཧཔཙྩཡེན སངྒཧིཏཾ ཧོཏི. ཏེནཱཧ ‘‘ནཱམཀཱཡསྶ པཙྩཡཔརིགྒཧཾ ཀརོཏཱི’’ཏི.

པཝཏྟིཾ དིསྭཱཏི ཨེཏརཧི པཝཏྟིཾ དིསྭཱ. ཨེཝནྟི ཨིམིནཱ ན ཀེཝལཾ སཔྤཙྩཡཏཱམཏྟམེཝ པཙྩཱམཊྛཾ, ཨཐ ཁོ ཡཱདིསེཧི པཙྩཡེཧི ཨེཏརཧི པཝཏྟཏི, ཏཱདིསེཧི ཨཝིཛྫཱདིཔཙྩཡེཧེཝ ཨཏཱིཏེཔི པཝཏྟིཏྠཱཏི པཙྩཡསདིསཏཱཔི པཙྩཱམཊྛཱཏི དཊྛབྦཾ.

༦༨༠. པུབྦནྟནྟི ¶ ཨཏཱིཏཾ ཁནྡྷཔྤབནྡྷཀོཊྛཱསཾ. ཨཱརབྦྷཱཏི ཨུདྡིསྶ. ཨཧོསིཾ ནུ ཁོ, ན ནུ ཁོ ཨཧོསིནྟི སསྶཏཱཀཱརཾ, ཨདྷིཙྩསམུཔྤཏྟིཨཱཀཱརཉྩ ནིསྶཱཡ ཨཏཱིཏེ ཨཏྟནོ ཝིཛྫམཱནཏཾ, ཨཝིཛྫམཱནཏཉྩ ཀངྑཏི. ཀིཾ ནུ ཁོ ཨཧོསིནྟི ཛཱཏིལིངྒཱུཔཔཏྟིཡོ ནིསྶཱཡ ‘‘ཁཏྟིཡོ ནུ ཁོ ཨཧོསིཾ, བྲཱཧྨཎཱདཱིསུ གཧཊྛཱདཱིསུ དེཝཱདཱིསུ ཨཉྙཏརོ ནུ ཁོ’’ཏི ཀངྑཏི. ཀཐཾ ནུ ཁོཏི སཎྛཱནཱཀཱརཾ ནིསྶཱཡ ‘‘དཱིགྷོ ནུ ཁོ ཨཧོསིཾ, རསྶཨོདཱཏཀཱལ༹པམཱཎིཀཨཔྤམཱཎིཀཱདཱིནམྤི ཨཉྙཏརོ’’ཏི ཀངྑཏི. ཨིསྶརནིམྨཱནཱདིཾ ནིསྶཱཡ ‘‘ཀེན ནུ ཁོ པཀཱརེན ཨཧོསི’’ནྟི ནིབྦཏྟཱཀཱརཏོ ཀངྑཏཱིཏི ཙ ཝདནྟི. ཀིཾ ཧུཏྭཱ ཀིཾ ཨཧོསིནྟི ཛཱཏིཨཱདིཾ ནིསྶཱཡ ‘‘ཁཏྟིཡོ ཧུཏྭཱ ནུ ཁོ བྲཱཧྨཎོ ཨཧོསིཾ…པེ… དེཝོ ཧུཏྭཱ ནུ ཁོ མནུསྶོ ཨཧོསི’’ནྟི ཨཏྟནོ ཨཔརཱཔརུཔྤཏྟིཾ ཀངྑཏི. སབྦཏྠེཝ ཙ ཨདྡྷཱནནྟི ཀཱལཱདྷིཝཙནཾ. བྷཝིསྶཱམི ནུ ཁོཏི སསྶཏཱཀཱརཾ, ཨུཙྪེདཱཀཱརཉྩ ནིསྶཱཡ ཨནཱགཏེ ཨཏྟནོ ཝིཛྫམཱནཏཾ, ཨཝིཛྫམཱནཏཉྩ ཀངྑཏི. སེསམེཏྠ ཝུཏྟནཡམེཝ. ཨེཏརཧི ཝཱ པན པཙྩུཔྤནྣཾ ཨདྡྷཱནནྟི ཨིདཱནི ཝཱ པཊིསནྡྷིམཱདིཾ ཀཏྭཱ ཙུཏིཔརིཡནྟཾ སབྦམྤི ཝཏྟམཱནཀཱལཾ. ཨཛ྄ཛྷཏྟཾ ཀཐཾཀཐཱི ཧོཏཱིཏི ཨཏྟནོ ཁནྡྷེསུ ཝིཙིཀིཙྪཱ ཧོཏི. ཨཧཾ ནུ ཁོསྨཱིཏི ཨཏྟནོ ཨཏྠིབྷཱཝཾ ཀངྑཏི. ཨཡུཏྟཾ ¶ པནེཏནྟི. ཡུཏྟཾ ཨཡུཏྟནྟི ཀཱ ཨེཏྠ ཙིནྟཱ. ཨུམྨཏྟཀོ ཝིཡ ཧི བཱལཔུཐུཛྫནོ. ནོ ནུ ཁོསྨཱིཏི ཨཏྟནོ ནཏྠིབྷཱཝཾ ཀངྑཏི. ཀིཾ ནུ ཁོསྨཱིཏི ཁཏྟིཡོཝ སམཱནོ ཨཏྟནོ ཁཏྟིཡབྷཱཝཾ ཀངྑཏི. ཨེས ནཡོ སེསེསུ. ཀཐཾ ནུ ཁོསྨིནྟི ཝུཏྟནཡམེཝ. ཀེཝལཉྷེཏྠ ‘‘ཨབྦྷནྟརེ ཛཱིཝོ ནཱམ ཨཏྠཱི’’ཏི གཧེཏྭཱ ཏསྶ དཱིགྷཱདིབྷཱཝཾ ཀངྑནྟོ ‘‘ཀཐཾ ནུ ཁོསྨི’’ནྟི ཀངྑཏཱིཏི ཝེདིཏབྦོ. པཙྩུཔྤནྣཾ པན ཨཏྟནོ སརཱིརསཎྛཱནཾ ཨཛཱནནྟོ ནཱམ ནཏྠི. ཀུཏོ ཨཱགཏོ, སོ ཀུཧིཾ གཱམཱི བྷཝིསྶཏཱིཏི ཨཏྟབྷཱཝསྶ ཨཱགཏིགཏིཊྛཱནཾ ཀངྑཏི. སཱ སབྦཱཔི པཧཱིཡཏཱིཏི སཱ ཡཐཱཝུཏྟཱ སོལ༹སཝིདྷཱཔི ཝིཙིཀིཙྪཱ ཝིཀྑམྦྷནཝསེན པཧཱིཡཏི.

༦༨༡. ཀུསལཱདིབྷེདཏོ སབྦཔྤཀཱརསྶཱཔི ནཱམསྶ སཱདྷཱརཎོ པཙྩཡོཏི, ཏཏོ པཝཏྟིཏོ མནསིཀཱརཱདིཀོ ཀུསལཱདིབྷེདཏོ སབྦཔྤཀཱརསྶཱཔི ནཱམསྶ ཨསཱདྷཱརཎོ པཙྩཡོཏི ཙ ཡོཛེཏབྦཾ. ཀུསལཱདིབྷེདཏོཏི ཀུསལཱཀུསལཝིཔཱཀཀིརིཡབྷེདཏོ. ཏསྶཱཔི སོམནསྶསཧགཏཱདིཨཉྙཏརབྷེདཝསེན སབྦཔྤཀཱརསྶཱཔི. ཡཾ ཨེཀནྟཏོ ཚདྭཱརིཀཾ, ཏམྤི ཚདྭཱརགྒཧཎེནེཝ གཧིཏཾ ཡཐཱ ཚཊྛཱརམྨཎཾ ཚལཱ༹རམྨཎགྒཧཎེནཱཏིཔི ཝུཏྟཾ ‘‘སབྦཔྤཀཱརསྶཱཔཱི’’ཏི. ཏཏོཏི ཙཀྑུརཱུཔཱདིཏོ. མནསིཀཱརཱདིཀོཏི ཡོནིསོམནསིཀཱརཨཡོནིསོམནསིཀཱརཱདིཀོ ¶ , ཀམྨབྷཝངྒཱདིཀོ ཙ. ཀཱམཉྩེཏྠ དྭཱརཙྪཀྐཡོནིསོམནསིཀཱརཱདིཝསེན ནཱམསྶེཝ སཱདྷཱརཎོ, ཨསཱདྷཱརཎོ ཙ པཙྩཡོ ཝུཏྟོ, ཏཾ པན ཨཝིསེསཝསེན ཝུཏྟཾ. ཝིསེསཏོ པན ཀམྨཾ ཝིཔཱཀནཱམསྶ, ཀམྨསམུཊྛཱནརཱུཔཱནཉྩ ཙིཏྟཾ ཙེཏསིཀནཱམསྶ, ཙིཏྟསམུཊྛཱནརཱུཔཱནཉྩ སཱདྷཱརཎོ པཙྩཡོ, ཡཐཱཝུཏྟསྶེཝ ཙ ནཱམསྶ, རཱུཔསྶ ཙ ཏདཉྙནཱམརཱུཔཱཔེཀྑཱཡ ཨསཱདྷཱརཎོ པཙྩཡོ. ཏཐཱ སབྷཱགོ, ཨུཏུསབྷཱགོ ཙ ཨཱཧཱརོ ཏཾསམུཊྛཱནརཱུཔཱནཾ སཱདྷཱརཎོ པཙྩཡོ, ཏདཉྙཱཔེཀྑཱཡ ཨསཱདྷཱརཎོཏི རཱུཔསྶཱཔི སཱདྷཱརཎོ, ཨསཱདྷཱརཎོ ཙ པཙྩཡོ ཡཐཱརཧཾ ནིདྡྷཱརེཏབྦོ. པཙྩཡཔརིགྒཧོ ནཱམ ཨནདྷིགཏཱརཧཏྟེན ཀཱཏབྦོཏི ཏདཔེཀྑཱཡ ‘‘ཡོནིསོམནསིཀཱརསདྡྷམྨསྶཝནཱདིཀོ ཀུསལསྶེཝཱ’’ཏི ཝུཏྟཾ. ཨཱདི-སདྡེན སཔྤུརིསཱུཔནིསྶཡསྶ, ཙཏུནྣམྤི ཝཱ སམྤཏྟིཙཀྐཱནཾ སངྒཧོ དཊྛབྦོ. ཝིཔརཱིཏོ ཨཀུསལསྶཱཏི ཝཙནཏོ ཡཐཱ ཡོནིསོམནསིཀཱརཱདིཝིཔརཱིཏོ ཨཀུསལསྶེཝ ¶ པཙྩཡོ, ཏཐཱ ཡོནིསོམནསིཀཱརཱདི ཀུསལསྶེཝ པཙྩཡོ ཧོཏཱིཏི ཨཏྠོ. ཡསྶ ཝཱ ཀུསལཾ སམྦྷཝཏི, ཨཀུསལཾ སམྦྷཝཏི, ཀུསལཱཀུསལཱནི ཝཱ, ཏསྶཱཏི ཨཏྠསིདྡྷམེཏཾ. ཀམྨཱདིཀོཏི ཨཱདི-སདྡེན ཨཝིཛྫཱདཡོ ཝིཡ གཏིཀཱལཱདཡོཔི སངྒཧིཏཱཏི དཊྛབྦཱ. བྷཝངྒཱདིཀོཏི བྷཝངྒསནྟཱིརཎཔརིཏྟཀིརིཡཱརཧཏྟཱདིཀོ. ཏཏྠ བྷཝངྒཾ པཉྩདྭཱརམནོདྭཱརཱཝཛྫནཀིརིཡཱནཾ, སནྟཱིརཎཾ ཝོཊྛབྦནསྶ, པརིཏྟཀིརིཡཱ ཡཐཱརཧཾ པརིཏྟམཧགྒཏཀིརིཡཱནཾ, ཨརཧཏྟཾ ཨཱཝཛྫནཝཛྫཱནཾ སབྦཀིརིཡཱནཾ པཙྩཡོཏི ཝེདིཏབྦཾ.

ཀམྨནྟི ཙེཏནཱཝ ཨདྷིཔྤེཏཱ, སཱ ཙ ཁོ ཀུསལཱཀུསལཱ. ཝུཏྟཉྷེཏཾ ‘‘ཀུསལཱཀུསལཙེཏནཱ ཝིཔཱཀཱནཾ ཁནྡྷཱནཾ, ཀཊཏྟཱ ཙ རཱུཔཱནཾ ཀམྨཔཙྩཡེན པཙྩཡོ’’ཏི (པཊྛཱ. ༡.༡.༤༢༧). ན ཙིཏྟཾ ཝིཡ སསམྤཡུཏྟཱ. ཙིཏྟཉྷེཏྠ སསམྤཡུཏྟཾ ཨདྷིཔྤེཏཾ ‘‘ཧེཏཱུ ཧེཏུསམྤཡུཏྟཀཱནཾ དྷམྨཱནཾ, ཏཾསམུཊྛཱནཱནཉྩ རཱུཔཱནཾ ཧེཏུཔཙྩཡེན པཙྩཡོ’’ཏིཨཱདིཝཙནཏོ (པཊྛཱ. ༡.༡.༡). ཏཏྠཱཏི ཏེསུ ཀམྨཱདཱིསུ རཱུཔཛནཀཔཙྩཡེསུ. ཨཏཱིཏཏོ ཨེཝ ཀམྨཏོ ཕལཾ ཨུཔྤཛྫཏི, ན ཝཏྟམཱནཏོཏི ཝུཏྟཾ ‘‘ཀམྨཾ ཨཏཱིཏམེཝ ཀམྨསམུཊྛཱནསྶ རཱུཔསྶ པཙྩཡོ’’ཏི. ཡདི ཧི པཙྩུཔྤནྣཏོ ཀམྨཏོ ཕལཾ ཨུཔྤཛྫེཡྻ, ཨཱཡཱུཧནཀྑཎེ ཨེཝ ཕལེན ཨུཔྤཛྫིཏབྦཾ བྷཝེཡྻ, ན ཙ ཏཾ དིཊྛམིཙྪིཏཾ ཝཱ. ན ཧི ལོཀེ ཀུདཱཙནཾ ཀརིཡམཱནམེཝ ཀམྨཾ ཕལཾ དེནྟཾ དིཊྛཾ, ཏཐཱརཱུཔོ ཝཱ ཨཱགམོ ཨཏྠཱིཏི. ནནུ ཙ ཨིདམཔི ན དིཊྛཾ, ཡཾ ཝིནཊྛཏོ ཧེཏུཏོ ཕལཾ ཨུཔྤཛྫམཱནཾ, མཏོ ཝཱ ཀུཀྐུཊོ ཝསྶནྟོཏི? སཙྩམདིཊྛཾ རཱུཔདྷམྨཱནཾ པབནྡྷཝིཙྪེདེ, ཨིདཾ པན ཨརཱུཔཾ པབནྡྷོཔི ཨཏྠཱིཏི ཨུཔམཱ ན སཾསནྡཏི. ཀམྨཏོ ཧི ཨཏཱིཏཏོ ¶ ཨེཝ ཀམྨསྶ ཀཏཏྟཱ, ཨུཔཙིཏཏྟཱ ཙ ཕལཾ ཨུཔྤཛྫཏི. ཝུཏྟཉྷེཏཾ ‘‘ཀཱམཱཝཙརསྶ ཀུསལསྶ ཀམྨསྶ ཀཏཏྟཱ ཨུཔཙིཏཏྟཱ ཝིཔཱཀཾ ཙཀྑུཝིཉྙཱཎཾ ཨུཔྤནྣཾ ཧོཏཱི’’ཏིཨཱདི (དྷ. ས. ༤༣༡). ཡསྨཱ ཨནནྟརཱདིཔཙྩཡལཱབྷཏོ ཨུཔྤཱདཀྑཎེ ཨེཝ ཙིཏྟསྶ བལཝཏཱ, ཏསྨཱ ཏཾ ཨུཔྤཛྫམཱནམེཝ རཱུཔཾ ཛནེཏཱིཏི ཨཱཧ ‘‘ཙིཏྟཾ ཙིཏྟསམུཊྛཱནསྶ ཨུཔྤཛྫམཱན’’ནྟི. རཱུཔསྶ པཙྩཡོ ཧོཏཱིཏི སམྦནྡྷོ. ཡསྨཱ པན རཱུཔསྶ ཋིཏིཀྑཎེ བལཝཏཱ པཙྪཱཛཱཏཱདིཔཙྩཡལཱབྷཏོ, ཏསྨཱ ཝུཏྟཾ ‘‘ཨུཏུཨཱཧཱརཱ…པེ… ཧོནྟཱི’’ཏི, བཱཧིརཾ ཨུཏུཾ, ཨཱཧཱརཉྩ པཙྩཡཾ ལབྷིཏྭཱ ཨཏྟནོ ཋིཏིཀྑཎེ ཨུཏུཨཱཧཱརཱ རཱུཔཾ ཛནེནྟཱིཏི ཨཏྠོ.

ཨེཝནྟི ¶ ‘‘སཱདྷཱརཎཱསཱདྷཱརཎཝསེནཱ’’ཏིཨཱདིནཱ ཝུཏྟཔྤཀཱརེན.

༦༨༢. སངྑཱརཱནནྟི སངྑཏསངྑཱརཱནཾ. བྷངྒནྟི མརཎཾ. ཛརཱམརཎཾ ནཱམ ཛཱཏིཡཱ སཏཱིཏིཨཱདི ཕལདསྶནཱནུཔུབྦིཡཱ ཧེཏུདསྶནཀྐམེན ནཱམརཱུཔསྶ པཙྩཡཔརིགྒཧོ སུཀརོཏི ཀཏྭཱ དསྶིཏོ. ཏཏྠ བྷཝེ སཏཱིཏི ཀམྨབྷཝེ སཏི.

༦༨༣. པུབྦེ ཝིཏྠཱརེཏྭཱ དསྶིཏཨནུལོམཔཊིཙྩསམུཔྤཱདཝསེནཱཏི པརིཡོསཱནཏོ པཊྛཱཡ པཊིལོམནཡེན ཨཱདིཔཱཔནཝསེན ཝིཏྠཱརེཏྭཱ དསྶིཏཨནུལོམཔཊིཙྩསམུཔྤཱདཝསེན. ‘‘ཨསཏི ཛཱཏིཡཱ ནཏྠི ཛརཱམརཎ’’ནྟིཨཱདིནཱ (སཾ. ནི. ༢.༤) ཧི པཊིལོམཝསེན དསྶིཏེ པཙྩཡཱཀཱརེ ‘‘ཡསྶ ཨབྷཱཝཱ ཡསྶ ཨབྷཱཝོ, སོ ཏསྶ པཙྩཡོ’’ཏི བྱཏིརེཀཏོ, ཨནྭཡཏོ ཙ ནཱམརཱུཔསྶ པཙྩཡཔརིགྒཧོ སུཀརོཏི.

༦༨༤. པུརིམཀམྨབྷཝསྨིཾ མོཧོཏིཨཱདི ཝུཏྟཏྠམེཝ. ཀམྨསཧཱཡཏྟཱ ཀིལེསཝཊྚཾ ཀམྨཝཊྚེ པཀྑིཏྭཱ ཝུཏྟཾ ‘‘ཀམྨཝཊྚཝིཔཱཀཝཊྚཝསེནཱ’’ཏི.

༦༨༥. དིཊྛདྷམྨོ ཝུཙྩཏི པཙྩཀྑབྷཱུཏོ པཙྩུཔྤནྣོ ཨཏྟབྷཱཝོ, ཏཏྠ ཝེདིཏབྦཕལཾ ཀམྨཾ དིཊྛདྷམྨཝེདནཱིཡཾ. པཙྩུཔྤནྣབྷཝཏོ ཨནནྟརཾ ཝེདིཏབྦཕལཾ ཀམྨཾ ཨུཔཔཛྫཝེདནཱིཡཾ. ཨཔརཱཔརིཡཱཡེཏི དིཊྛདྷམྨཱནནྟརཱནཱགཏཏོ ཨཉྙསྨིཾ ཨཏྟབྷཱཝཔརིཡཱཡེ ཨཏྟབྷཱཝཔརིཝཏྟེ. ཨཧོསིཀམྨནྟི ཨཧོསི ཨེཝ ཀམྨཾ, ན ཏསྶ ཝིཔཱཀོ ཨཧོསི, ‘‘ཨཏྠི, བྷཝིསྶཏི ཝཱ’’ཏི ཨེཝཾ ཝཏྟབྦཀམྨཾ. པཊིཔཀྑེཧི ཨནབྷིབྷཱུཏཏཱཡ, པཙྩཡཝིསེསེན པཊིལདྡྷཝིསེསཏཱཡ ཙ བལཝབྷཱཝཾ པཏྟཱ ཏཱདིསསྶ ¶ པུབྦཱབྷིསངྑཱརསྶ ཝསེན སཱཏིསཡཱ ཧུཏྭཱ པཝཏྟཱ པཋམཛཝནཙེཏནཱ ཏསྨིཾཡེཝ ཨཏྟབྷཱཝེ ཕལདཱཡིནཱི དིཊྛདྷམྨཝེདནཱིཡཱ ནཱམ. སཱ ཧི ཝུཏྟཱཀཱརེན བལཝཏི ཛཝནསནྟཱནེ གུཎཝིསེསཡུཏྟེསུ ཨུཔཀཱརཱཔཀཱརཝསཔྤཝཏྟིཡཱ, ཨཱསེཝནཱལཱབྷེན ཨཔྤཝིཔཱཀཏཱཡ ཙ པཋམཛཝནཙེཏནཱ ཨིཏརདྭཡཾ ཝིཡ པཝཏྟསནྟཱནུཔརམཱཔེཀྑཾ, ཨོཀཱསལཱབྷཱཔེཀྑཉྩ ཀམྨཾ ན ཧོཏཱིཏི ཨིདྷེཝ པུཔྥམཏྟཾ ཝིཡ པཝཏྟིཝིཔཱཀམཏྟཾ ཕལཾ དེཏི. ཏཐཱ ཨསཀྐོནྟནྟི ཀམྨསྶ ཝིཔཱཀདཱནཾ ནཱམ ཨུཔདྷིཔཡོགཱདིཔཙྩཡནྟརསམཝཱཡེནེཝ ཧོཏཱིཏི ཏདབྷཱཝཏོ ¶ ཏསྨིཾཡེཝ ཨཏྟབྷཱཝེ ཝིཔཱཀཾ དཱཏུཾ ཨསཀྐོནྟཾ. ཨཏྠསཱདྷིཀཱཏི དཱནཱདིཔཱཎཱཏིཔཱཏཱདིཨཏྠསྶ ནིཔྥཱདིཀཱ. ཀཱ པན སཱཏི ཨཱཧ ‘‘སཏྟམཛཝནཙེཏནཱ’’ཏི. སཱ ཧི སནྣིཊྛཱཔཀཙེཏནཱ ཝུཏྟནཡེན པཊིལདྡྷཝིསེསཱ, པུརིམཛཝནཙེཏནཱཧི ལདྡྷཱསེཝནཱ ཙ སམཱནཱ ཨནནྟརཏྟབྷཱཝེ ཝིཔཱཀདཱཡིནཱི ཨུཔཔཛྫཝེདནཱིཡཀམྨཾ ནཱམ. ‘‘སཏི སཾསཱརཔྤཝཏྟིཡཱ’’ཏི ཨིམིནཱ ཨསཏི སཾསཱརཔྤཝཏྟིཡཾ ཨཧོསིཀམྨཔཀྑེ ཏིཊྛཏི ཝིཔཙྩནོཀཱསསྶ ཨབྷཱཝཏོཏི དཱིཔེཏི.

༦༨༦. ཡཾ གརུཀནྟི ཡཾ ཨཀུསལཾ མཧཱསཱཝཛྫཾ, ཀུསལཾ མཧཱནུབྷཱཝཾ ཀམྨཾ. ཡཾ བཧུལནྟི ཡཾ བཧུལཾ ཨབྷིཎྷསོ ཀཏཾ སམཱསེཝིཏཾ. མརཎཀཱལེ ཨནུསྶརིཏནྟི པརིབྱཏྟབྷཱཝེན མརཎསྶ ཨཱསནྣཀཱལེ ཨནུསྶརིཏཾ. ཨཱསནྣཀཱལེ ཀཏེ ཝཏྟབྦམེཝ ནཏྠཱིཏི ཧི ཝུཏྟཾ. ‘‘པུནཔྤུནཾ ལདྡྷཱསེཝན’’ནྟི ཨིམིནཱ ‘‘ཡཾ བཧུལ’’ནྟི ཝུཏྟཀམྨཏོ ཝིསེསེཏི. ཏཐཱ དིཊྛདྷམྨཝེདནཱིཡཾ ནིཝཏྟེཏི པཊིསནྡྷིཨཱཀཌྜྷནཱནུཛཱནནཏོ. པཊིསནྡྷིཛནཀཝསེན ཧི གརུཀཱདིཀམྨཙཏུཀྐཾ ཝུཏྟཾ.

ཏཏྠ གརུཀཾ སབྦཔཋམཾ ཝིཔཙྩཏི. ཏཐཱ ཧི ཏཾ གརུཀནྟི ཝུཏྟཾ. གརུཀེ ཨསཏི བཧུལཱིཀཏཾ, ཏསྨིཾ ཨསཏི ཨཱསནྣཾ, ཏསྨིམྤི ཨསཏི ‘‘ཀཊཏྟཱ ཝཱ པནཱ’’ཏི ཝུཏྟཾ པུརིམཛཱཏཱིསུ ཀཏཀམྨཾ ཝིཔཙྩཏི. བཧུལཱསནྣཔུབྦཀཏེསུ ཙ བལཱབལཾ ཝཱ ཛཱནིཏབྦཾ, པཱཔཏོ པཱཔནྟརཾ, ཀལྱཱཎཉྩ, ཀལྱཱཎཏོ ཙ ཀལྱཱཎནྟརཾ, པཱཔཉྩ, བཧུལཱིཀཏཏོ ཙ མཧཏོ ཙ པུབྦཀཏཱདི, ཨཔྤཉྩ. བཧུལཱནུསྶརཎེན ཝིཔྤཊིསཱརཱདིཛནནཏོ པཊིཔཀྑསྶ ཨཔརིཔུཎྞཏཱཡ ཨཱརདྡྷཝིཔཱཀསྶ ཀམྨསྶ, ཀམྨསེསསྶ ཝཱ ཨཔརཱཔརིཡཱཡེ ཝེདནཱིཡསྶ ཨཔརིཀྑཱིཎཏཱཡ སནྟཏིཡཱ པརིཎཱམཝིསེསཏོཏི ཏེཧི ཏེཧི ཀཱརཎེཧི ཨཱཧིཏབལཾ པཋམཾ ཝིཔཙྩཏི. མཧཱནཱརདཀསྶཔཛཱཏཀེ ཝིདེཧརཉྙོ སེནཱཔཏི ཨལཱཏོ, བཱིཛཀོ དཱསོ, རཱཛཀཉྙཱ རུཙཱ ཙ ཨེཏྠ ནིདསྶནཾ. ཏཐཱ ཧི ཝུཏྟཾ བྷགཝཏཱ –

‘‘ཏཏྲཱནནྡ ¶ , ཡྭཱཡཾ པུགྒལོ ཨིདྷ པཱཎཱཏིཔཱཏཱི…པེ… མིཙྪཱདིཊྛི ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫཏི. པུབྦེ ཝཱསྶ ཏཾ ཀཏཾ ཧོཏི པཱཔཀམྨཾ དུཀྑཝེདནཱིཡཾ, པཙྪཱ ཝཱསྶ ཏཾ ཀཏཾ ཧོཏི པཱཔཀམྨཾ དུཀྑཝེདནཱིཡཾ ¶ , མརཎཀཱལེ ཝཱསྶ ཧོཏི མིཙྪཱདིཊྛི སམཏྟཱ སམཱདིནྣཱ, ཏེན སོ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫཏི. ཡཉྩ ཁོ སོ ཨིདྷ པཱཎཱཏིཔཱཏཱི ཧོཏི…པེ… མིཙྪཱདིཊྛི ཧོཏི, ཏསྶ དིཊྛེ ཝཱ དྷམྨེ ཝིཔཱཀཾ པཊིསཾཝེདེཏི ཨུཔཔཛྫ ཝཱ ཨཔརེ ཝཱ པརིཡཱཡེ.

‘‘ཏཏྲཱནནྡ, ཡྭཱཡཾ པུགྒལོ ཨིདྷ པཱཎཱཏིཔཱཏཱི…པེ… མིཙྪཱདིཊྛི ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫཏི. པུབྦེ ཝཱསྶ ཏཾ ཀཏཾ ཧོཏི ཀལྱཱཎཀམྨཾ སུཁཝེདནཱིཡཾ, པཙྪཱ ཝཱསྶ ཏཾ ཀཏཾ ཧོཏི ཀལྱཱཎཀམྨཾ སུཁཝེདནཱིཡཾ, མརཎཀཱལེ ཝཱསྶ ཧོཏི སམྨཱདིཊྛི སམཏྟཱ སམཱདིནྣཱ, ཏེན སོ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫཏི. ཡཉྩ ཁོ སོ ཨིདྷ པཱཎཱཏིཔཱཏཱི ཧོཏི…པེ… མིཙྪཱདིཊྛི ཧོཏི, ཏསྶ དིཊྛེ ཝཱ དྷམྨེ ཝིཔཱཀཾ པཊིསཾཝེདེཏི ཨུཔཔཛྫ ཝཱ ཨཔརེ ཝཱ པརིཡཱཡེ.

‘‘ཏཏྲཱནནྡ, ཡྭཱཡཾ པུགྒལོ ཨིདྷ པཱཎཱཏིཔཱཏཱ པཊིཝིརཏོ…པེ… སམྨཱདིཊྛི ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫཏི. པུབྦེ ཝཱསྶ ཏཾ ཀཏཾ ཧོཏི ཀལྱཱཎཀམྨཾ སུཁཝེདནཱིཡཾ, པཙྪཱ ཝཱསྶ ཏཾ ཀཏཾ ཧོཏི ཀལྱཱཎཀམྨཾ སུཁཝེདནཱིཡཾ, མརཎཀཱལེ ཝཱསྶ ཧོཏི སམྨཱདིཊྛི སམཏྟཱ སམཱདིནྣཱ, ཏེན སོ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫཏི. ཡཉྩ ཁོ སོ ཨིདྷ པཱཎཱཏིཔཱཏཱ པཊིཝིརཏོ…པེ… སམྨཱདིཊྛི ཧོཏི, ཏསྶ དིཊྛེ ཝཱ དྷམྨེ ཝིཔཱཀཾ པཊིསཾཝེདེཏི ཨུཔཔཛྫ ཝཱ ཨཔརེ ཝཱ པརིཡཱཡེ.

‘‘ཏཏྲཱནནྡ, ཡྭཱཡཾ པུགྒལོ ཨིདྷ པཱཎཱཏིཔཱཏཱ པཊིཝིརཏོ…པེ… སམྨཱདིཊྛི ཀཱཡསྶ བྷེདཱ པརཾ…པེ… ནིརཡཾ ཨུཔཔཛྫཏི. པུབྦེ ཝཱསྶ ཏཾ ཀཏཾ ཧོཏི པཱཔཀམྨཾ དུཀྑཝེདནཱིཡཾ, པཙྪཱ ཝཱསྶ ཏཾ ཀཏཾ ཧོཏི པཱཔཀམྨཾ དུཀྑཝེདནཱིཡཾ, མརཎཀཱལེ ཝཱསྶ ཧོཏི མིཙྪཱདིཊྛི སམཏྟཱ སམཱདིནྣཱ, ཏེན སོ ཀཱཡསྶ བྷེདཱ པརཾ མརཎཱ ཨཔཱཡཾ ¶ …པེ… ནིརཡཾ ཨུཔཔཛྫཏི. ཡཉྩ ཁོ སོ ཨིདྷ པཱཎཱཏིཔཱཏཱ པཊིཝིརཏོ ཧོཏི…པེ… སམྨཱདིཊྛི ¶ ཧོཏི, ཏསྶ དིཊྛེ ཝཱ དྷམྨེ ཝིཔཱཀཾ པཊིསཾཝེདེཏི ཨུཔཔཛྫ ཝཱ ཨཔརེ ཝཱ པརིཡཱཡེ’’ཏི (མ. ནི. ༣.༣༠༣).

ཀིཾ བཧུནཱ ཡཾ ཏཾ ཏཐཱགཏསྶ མཧཱཀམྨཝིབྷངྒཉཱཎཾ, ཏསྶེཝཱཡཾ ཝིསཡོ, ཡདིདཾ ཏསྶ ཏསྶ ཀམྨསྶ ཏེན ཏེན ཀཱརཎེན པུབྦཱཔརཝིཔཱཀཏཱ སཱམཏྠིཡཾ.

༦༨༧. པཊིསནྡྷིདཱནཱདིཝསེན ཝིཔཱཀསནྟཱནསྶ ནིབྦཏྟཀཾ ཛནཀཾ. ཏེནཱཧ ‘‘ཏཾ པཊིསནྡྷིཡམྤི པཝཏྟེཔི རཱུཔཱརཱུཔཝིཔཱཀཀྑནྡྷེ ཛནེཏཱི’’ཏི. སུཁདུཀྑསནྟཱནསྶ, ནཱམརཱུཔཔྤབནྡྷསྶ ཝཱ ཙིརཏརཔྤཝཏྟིཧེཏུབྷཱུཏཾ ཨུཔཏྠམྦྷཀཾ. ཏེནཱཧ ‘‘སུཁདུཀྑཾ ཨུཔཏྠམྦྷེཏི, ཨདྡྷཱནཾ པཝཏྟེཏཱི’’ཏི. ཨུཔཔཱིལ༹ཀཾ སུཁདུཀྑཔྤབནྡྷེ པཝཏྟམཱནེ སཎིཀཾ སཎིཀཾ ཏཾ ཧཱཔེཏི. ཏེནཱཧ ‘‘སུཁདུཀྑཾ པཱིལེ༹ཏི བཱདྷཏི, ཨདྡྷཱནཾ པཝཏྟིཏུཾ ན དེཏཱི’’ཏི. གྷཱཏེཏྭཱཏི ཨུཔཙྪིནྡིཏྭཱ. ཀམྨསྶ ཨུཔཙྪིནྡནཾ ནཱམ ཏསྶ ཝིཔཱཀཔཊིབཱཧནམེཝཱཏི ཨཱཧ ‘‘ཏསྶ ཝིཔཱཀཾ པཊིབཱཧིཏྭཱ’’ཏི. ཏཉྩ ཨཏྟནོ ཝིཔཱཀུཔྤཏྟིཡཱ ཨོཀཱསཀརཎནྟི ཝུཏྟཾ ‘‘ཨཏྟནོ ཝིཔཱཀསྶ ཨོཀཱསཾ ཀརོཏཱི’’ཏི. ཝིཔཙྩནཱཡ ཀཏོཀཱསཾ ཀམྨཾ ཝིཔཀྐམེཝ ནཱམ ཧོཏཱིཏི ཨཱཧ ‘‘ཨེཝཾ པན ཀམྨེན ཀཏེ ཨོཀཱསེ ཏཾ ཝིཔཱཀཾ ཨུཔྤནྣཾ ནཱམ ཝུཙྩཏཱི’’ཏི. ཨུཔཔཱིལ༹ཀཾ ཨཉྙསྶ ཝིཔཱཀཾ ཨུཔཙྪིནྡཏི, ན སཡཾ ཨཏྟནོ ཝིཔཱཀཾ དེཏི. ཨུཔགྷཱཏཀཾ པན དུབྦལཾ ཀམྨཾ ཨུཔཙྪིནྡིཏྭཱ ཨཏྟནོ ཝིཔཱཀཾ ཨུཔྤཱདེཏཱིཏི ཨཡམེཏེསཾ ཝིསེསོ. བཝ྄ཧཱབཱདྷཏཱདིཔཙྩཡཱུཔནིཔཱཏེན ཝིཔཱཀསྶ ཝིབཱདྷཀཾ ཨུཔཔཱིལ༹ཀཾ, ཏཐཱ ཝིཔཱཀསྶེཝ ཨུཔཙྪེདཀཾ ཨུཔགྷཱཏཀཾ. ཀམྨཾ ཨུཔགྷཱཏེཏྭཱ ཨཏྟནོ ཝིཔཱཀསྶ ཨོཀཱསཀརཎེན ཝིཔཙྩནེ སཏི ཛནཀམེཝ སིཡཱ, ཛནཀཱདིབྷཱཝོ ནཱམ ཝིཔཱཀཾ པཏི ཨིཙྪིཏབྦོ, ན ཀམྨཾ པཏཱིཏི ཝིཔཱཀསྶེཝ ཨུཔགྷཱཏཀཏཱ ཡུཏྟཱ ཝིཡ དིསྶཏི, ཝཱིམཾསིཏབྦཾ.

ཀམྨནྟརནྟི ཀམྨཝིསེསོ ཀམྨཱནཾ བལཱབལབྷེདོ. ཝིཔཱཀནྟརནྟི ཝིཔཱཀཝིསེསོ, ཏསྶ ཧཱིནཔཎཱིཏཏཱདིབྷེདོ. ཨཔརོ ནཡོ – ཡསྨིཾ ཀམྨེ ཀཏེ པཊིསནྡྷིཡཾ, པཝཏྟེ ཙ ཝིཔཱཀཀཊཏྟཱརཱུཔཱནཾ ཨུཔྤཏྟི ཧོཏི, ཏཾ ཛནཀཾ. ཡསྨིཾ པན ཀཏེ ཨཉྙེན ཛནིཏསྶ ཨིཊྛསྶ ཝཱ ཨནིཊྛསྶ ཝཱ ཕལསྶ ཝིབཱདྷཀཝིཙྪེདཀཔཙྩཡཱནུཔྤཏྟིཡཱ, ཨུཔབྲཱུཧནཔཙྩཡུཔྤཏྟིཡཱ ཙ ཛནཀཱནུབྷཱཝཱནུརཱུཔཾ པརིཔོསཙིརཏརཔྤབནྡྷཱ ཧོནྟི, ཏཾ ཨུཔཏྠམྦྷཀཾ. ཛནཀེན ¶ ནིབྦཏྟིཏཾ ཀུསལཕལཾ ཝཱ ཨཀུསལཕལཾ ཝཱ ཡེན པཙྩནཱིཀབྷཱུཏེན རོགདྷཱཏུསམཏཱདིནིམིཏྟཏཱཡ བཱདྷཱིཡཏི, ཏཾ ཨུཔཔཱིལ༹ཀཾ ¶ . ཡེན པན ཀམྨུནཱ ཛནཀསཱམཏྠིཡཝསེན ཙིརཏརཔྤབནྡྷཱརཧམྤི སམཱནཾ ཕལཾ ཝིཙྪེདཀཔཙྩཡུཔྤཏྟིཡཱ ཨུཔཧཉྙཏི ཝིཙྪིཛྫཏི, ཏཾ ཨུཔགྷཱཏཀཾ. ཏཏྠ ཀེཙི དུཏིཡསྶ ཀུསལབྷཱཝཾ ཨིཏྠནྣཱམགཏསྶ ཨཔྤཱབཱདྷདཱིགྷཱཡུཀཏཱསཾཝཏྟནཝསེན, པཙྪིམཱནཾ དྭིནྣཾ ཨཀུསལབྷཱཝཾ བཝ྄ཧཱབཱདྷཨཔྤཱཡུཀཏཱསཾཝཏྟནཝསེན ཝཎྞེནྟི. དེཝདཏྟཱདཱིནཾ, པན ནཱགཱདཱིནཾ, ཨིཏོ ཨནུཔདིནྣེན ཡཱཔནཀཔེཏཱནཉྩ ནརཀཱདཱིསུ ཨཀུསལཝིཔཱཀུཔཏྠམྦྷནུཔཔཱིལ༹ནུཔགྷཱཏཀཱནི ན ན སནྟཱིཏི ཙཏུནྣམྤི ཨཀུསལཱཀུསལབྷཱཝོ ན ཝིརུཛ྄ཛྷཏི. བུདྡྷཱཝེཎིཀཏཱཡ ཨསཱདྷཱརཎསྶེཝ ཉཱཎསྶ གོཙརབྷཱཝཏོ ཀམྨནྟརཱདི ‘‘ཨསཱདྷཱརཎཾ སཱཝཀེཧཱི’’ཏི ཝུཏྟཾ. ཨེཀདེསཏོ ཛཱནིཏབྦཾ ཨནཝསེསཏོ ཛཱནིཏུཾ ན སཀྐཱ ཨཝིསཡཏྟཱ. སབྦེན སབྦཾ ཨཛཱནནེ པཙྩཡཔརིགྒཧོ ན པརིཔཱུརཏཱིཏི.

༦༨༨. ཡཐཱཝུཏྟཾ ཀམྨཾ ཝཏྟམཱནཝིཔཱཀཔྤབནྡྷནིམིཏྟམེཝ ཨདྷིཔྤེཏནྟི ཀམྨེཀདེསཏཱཡ ‘‘དྭཱདསཝིདྷཾ ཀམྨཾ ཀམྨཝཊྚེ པཀྑིཔིཏྭཱ’’ཏི ཝུཏྟཾ. ཀིལེསཝཊྚམྤི ཀམྨསཧཱཡཏཱཡ ཀམྨཝཊྚཔཀྑིཀམེཝ ཀཏྭཱ ཨཱཧ ‘‘ཀམྨཝཊྚཝིཔཱཀཝཊྚཝསེནཱ’’ཏི. ཡཱདིསཏོ པཙྩཡཏོ པཙྩུཔྤནྣེ ཨདྡྷཱནེ ནཱམརཱུཔསྶ པཝཏྟི, ཏཱདིསཏོ ཨེཝ ཨིཏརསྨིམྤི ཨདྡྷདྭཡེཏི ཡཐཱ ཨཏཱིཏཱནཱགཏེ ནཡཾ ནེཏི, ཏཾ དསྶེནྟོ ‘‘ཨིད’’ནྟིཨཱདིམཱཧ. ཏཏྠ ཨནཱགཏེཔི ཀམྨཝཊྚཝིཔཱཀཝཊྚཝསེནེཝཱཏི ཨེཏྠ ཝུཏྟཾ ཨེཝ-སདྡཾ ‘‘ཨེཏརཧི ཨཏཱིཏེཔཱི’’ཏི ཨེཏྠཱཔི ཨཱནེཏྭཱ ཝཏྟབྦཾ ཨདྡྷཏྟཡེཔི ཀིརིཡཱཀིརིཡཕལམཏྟཏཱདསྶནཔརཏྟཱ ཙོདནཱཡ. ཨིཏི ཀམྨཉྩེཝཱཏིཨཱདི ཝུཏྟསྶེཝཏྠསྶ ནིགམནཝསེན ཝུཏྟཾ. ཨཔརཱཔརཾ ཝཊྚནཊྛེན ཝཊྚཾ. ཏཐཱ པཝཏྟནཾ པཝཏྟཾ. ཧེཏུཕལབྷཱཝེན སམྦནྡྷཏཱིཏི སནྟཏི, པབནྡྷོ. ཀརཎཊྛེན, པཙྩཡེཧི ཀརཱིཡཏཱིཏི ཝཱ ཀིརིཡཱ.

ཀམྨཱཏི ཀམྨཏོ. སམྦྷཝཏི ཨེཏསྨཱཏི སམྦྷཝོ, ཀམྨཾ སམྦྷཝོ ཨེཏསྶཱཏི ཀམྨསམྦྷཝོ, ཝིཔཱཀོ.

ཀཱརཎསཱམགྒིཡཾ དཱནཱདཱིཧི སཱདྷིཏཀིརིཡཱཡ ཝཏྟམཱནཱཡ ཀཱརཎམཏྟེ ཀཏྟུཝོཧཱརོཏི ཨཱཧ ‘‘ནེཝ ཀཱརཎཏོ ཨུདྡྷཾ ཀཱརཀཾ པསྶཏཱི’’ཏི. ཀརོཏཱིཏི ཧི ཀཱརཀཾ. ཝིཔཱཀཔཊིསཾཝེདཀཾ ན པསྶཏཱིཏི སམྦནྡྷོ ¶ . ཀཱམཾ བཱལཱཔི ‘‘ཀཱརཀོ པཊིསཾཝེདཀོ’’ཏི ཝདནྟཱ ཨཏྠཏོ པཉྙཏྟིམཏྟམེཝ ཝདནྟི, ཏེ པན ཝིཔརཱིཏཱབྷིནིཝེསཝསེནཱཔི ཝདནྟཱིཏི ཏཾ ཨཔྤམཱཎནྟི ཨཱཧ ‘‘སམཉྙཱམཏྟེན པཎྜིཏཱ ཝོཧརནྟཱི’’ཏི.

༦༨༩. ཨེཝེཏནྟི ¶ ཨེཝཾཝིདྷཾ ཨེཏཾ དསྶནཾ, སམྨདསྶནཾ, ཨཝིཔརཱིཏདསྶནནྟི ཨཏྠོ. བཱིཛརུཀྑཱདིཀཱནཾཝཱཏི ཡཐཱ བཱིཛཏོ རུཀྑོ, རུཀྑཏོ པུན བཱིཛནྟི ཨནཱདིཀཱལིཀཏྟཱ བཱིཛརུཀྑསནྟཱནསྶ པུབྦཀོཊི ནཏྠི, ཨེཝཾ ཀམྨཔཙྩཡཱ ཝིཔཱཀོ, ཝིཔཱཀཔཙྩཡཱ ཀམྨནྟི ཨནཱདིཀཱལིཀཏྟཱ ཀམྨཝིཔཱཀསནྟཱནསྶ པུབྦཀོཊི ན པཉྙཱཡཏི. ཨཱདི-སདྡེན ‘‘ཀུཀྐུཊིཡཱ ཨཎྜཾ, ཨཎྜཏོ ཀུཀྐུཊཱི, པུནཔི ཀུཀྐུཊིཡཱ ཨཎྜ’’ནྟི ཨེཝམཱདིཾ སངྒཎྷཱཏི. ཨནཱགཏེཔི སཾསཱརེཏི ཡཐཱ ཨཏཱིཏེ, ཨེཝཾ ཨནཱགཏེཔི ཨདྡྷཱནེ ‘‘ཁནྡྷཱནཉྩ པཊིཔཱཊཱི’’ཏིཨཱདིནཱ (ཝིསུདྡྷི. ༢.༦༡༩; དཱི. ནི. ཨཊྛ. ༢.༩༥ ཨཔསཱདནཱཝཎྞནཱ; སཾ. ནི. ཨཊྛ. ༢.༢.༦༠; ཨ. ནི. ཨཊྛ. ༢.༤.༡༩༩; དྷ. ས. ཨཊྛ. ནིདཱནཀཐཱ; ཝིབྷ. ཨཊྛ. ༢༢༦ སངྑཱརཔདནིདྡེས; སུ. ནི. ཨཊྛ. ༢.༥༢༣; ཨུདཱ. ཨཊྛ. ༣༩; ཨིཏིཝུ. ཨཊྛ. ༡༤, ༥༨; ཐེརགཱ. ཨཊྛ. ༡.༦༧, ༩༩; པཊི. མ. ཨཊྛ. ༢.༡.༡༡༧; ཙཱུལ༹ནི. ཨཊྛ. ༦; བུ. ཝཾ. ཨཊྛ. ༢.༥༨) ཝུཏྟེ སཾསཱརེ སཏི ཀམྨཝིཔཱཀཱནཾ ཨཔྤཝཏྟཾ ན དིསྶཏི, ཀམྨཝིཔཱཀཱནཾ ཨཔྤཝཏྟི ན དིསྶཏི, པཝཏྟཏི ཨེཝཱཏི ཨཏྠོ.

ཨེཏམཏྠནྟི ‘‘ཀམྨསྶ ཀཱརཀོ ནཏྠཱི’’ཏིཨཱདིནཱ (ཝིསུདྡྷི. ༢.༦༨༩) ཝུཏྟམཏྠཾ. ཨསཡཾཝསཱིཏི ན སཡཾཝསིནོ, མིཙྪཱབྷིནིཝེསཔརཝསཱཏི ཨཏྠོ. ཨཉྙམཉྙཝིརོདྷིཏཱཏི ཨིཏརཱིཏརཝིརོདྷིཏཱ, དིཊྛིཡོ, དིཊྛིཡཱ ཝཱ ཨཉྙམཉྙེན ཝིརོདྷིཏཱ ཝིརུདྡྷཱ.

གམྦྷཱིརཉཱཎགོཙརཏཱཡ གམྦྷཱིརཾ. ཏཐཱ ནིཔུཎཾ. སཏྟསུཉྙཏཱཡ, ཨཉྙམཉྙསབྷཱཝསུཉྙཏཱཡ ཙ སུཉྙཾ. པཙྩཡནྟི ནཱམརཱུཔསྶ པཙྩཡཾ, ཏཔྤཙྩཡཔཊིཝེདྷེནེཝ ཙ སབྦཾ པཊིཝིདྡྷཾ ཧོཏཱིཏི. ཀམྨཾ ནཏྠི ཝིཔཱཀམྷཱིཏིཨཱདཱིསུ ཡཾ ཝཏྟབྦཾ, ཏཾ ཧེཊྛཱ ཝུཏྟམེཝ.

པཙྩཡསུཉྙཾ ཕལནྟི ཡཐཱཝུཏྟམཏྠཾ ཨུཔམཱཡ ཝིབྷཱཝེཏུཾ ‘‘ཡཐཱ ན སཱུརིཡེ’’ཏིཨཱདི ཝུཏྟཾ. ཏེསནྟི སཱུརིཡཱདཱིནཾ. སོཏི ཨགྒི. སམྦྷཱརེཧཱིཏི ཨཱཏཔཱདཱིཧི ཀཱརཎེཧི.

ཡདི ¶ ཙ ཧེཏུ ཙ ཕལཉྩ ཨཉྙམཉྙརཧིཏཾ, ཀཐཾ ཧེཏུཏོ ཕལཾ ནིབྦཏྟཏཱིཏི ཨཱཧ ‘‘ཀམྨཉྩ ཁོ ཨུཔཱདཱཡཱ’’ཏི. ན ཀེཝལཾ ཀམྨཕལམེཝ སུཉྙཾ ཀཏྟུརཧིཏཾ, སབྦམྤི དྷམྨཛཱཏཾ ཀཱརཀརཧིཏནྟི དསྶེཏུཾ ‘‘ན ཧེཏྠ དེཝོ’’ཏི གཱཐཱ ཝུཏྟཱ. ཧེཏུསམྦྷཱརཔཙྩཡཱཏི ཧེཏུསམཱུཧནིམིཏྟཾ, ཧེཏུཔཙྩཡནིམིཏྟཾ ཝཱ.

༦༩༠. ཙུཏིཔཊིསནྡྷིཝསེན ¶ ཝིདིཏཱ ཧོནྟཱིཏི ཀམྨཝཊྚཝིཔཱཀཝཊྚཝསེན པཙྩཡཔརིགྒཧསྶ ཀཏཏྟཱ ཙུཏིཔཊིསནྡྷིཝསེན ཝིདིཏཱ ཧོནྟཱིཏི ཝདནྟི. ཝུཏྟནཡེན པན སཔྤཙྩཡནཱམརཱུཔསྶ དསྶནེན ཏཱིསུ ཨདྡྷཱསུ པཧཱིནཝིཙིཀིཙྪསྶ ཨདྡྷཏྟཡཔརིཡཱཔནྣཱ དྷམྨཱ ཨཏཱིཏཔཙྩུཔྤནྣཱནཱགཏབྷཝེསུ ཙ ཙུཏིཔཊིསནྡྷིཝསེན ཝིདིཏཱ ཧོནྟི, ན ཨནུཔདདྷམྨཝསེན ཏཐཱཔརིགྒཧསྶ ཨཀཏཏྟཱ. སཱསྶ ཧོཏི ཉཱཏཔརིཉྙཱཏི ཡཱཡ ནཱམརཱུཔཔརིགྒཧཾ, ཏསྶ ཙ པཙྩཡཔརིགྒཧཾ ཀརོཏི, སཱ ཨསྶ ཡོགིནོ ‘‘ཨིདཾ ནཱམཾ, ཨེཏྟཀཾ ནཱམ’’ནྟིཨཱདིནཱ, ‘‘ཏསྶ ཨཡཾ པཙྩཡོ, ཨེཏྟཀོ པཙྩཡོ’’ཏིཨཱདིནཱ ཙ པརིཙྪེདཝསེན ཉཱཏཝཏཱི པཉྙཱཏི ཀཏྭཱ ཉཱཏཔརིཉྙཱ.

ཨིདཱནི ཡེན ཀཱརཎེན ཨདྡྷཏྟཡཔརིཡཱཔནྣཱ དྷམྨཱ ཙུཏིཔཊིསནྡྷིཝསེན ཝིདིཏཱ ཧོནྟི, ཏཾ དསྶེཏུཾ ‘‘སོ ཨེཝཾ པཛཱནཱཏཱི’’ཏིཨཱདི ཝུཏྟཾ. ཏེན དྷམྨཱནཾ བྷཝནྟརསངྐམོ ནཱམ ན ཀདཱཙིཔི ཨཏྠི, ཏཏྠ ཏཏྠེཝ ནིརུཛ྄ཛྷནཏོཏི དསྶེཏི. སཛ྄ཛྷཱཡ མནྟོདཀཔཱན མུཁམཎྜན པདཱིཔསཱིཁཱུཔམཱཧི ཏམེཝ དྷམྨཱནཾ སངྐམཱབྷཱཝཾ ཝིབྷཱཝེཏུཾ ‘‘ཨཔིཙ ཁོ’’ཏིཨཱདིམཱཧ.

མནོདྷཱཏུཨནནྟརནྟི ཀིརིཡམནོདྷཱཏུཡཱ ཨནནྟརཾ ལབྦྷམཱནཾ ཙཀྑུཝིཉྙཱཎཾ. ན ཙེཝ ཨཱགཏནྟི ཀིརིཡམནོདྷཱཏུཏོ ན ཙེཝ ཨཱགཏཾ ཀིརིཡམནོདྷཱཏུཡཾ ཙཀྑུཝིཉྙཱཎསྶ ཨབྷཱཝཏོ. ནཱཔི ན ནིབྦཏྟཾ ཨནནྟརནྟི ཀིརིཡམནོདྷཱཏུཏོ ཨནཱགཙྪནྟམྤི པཙྩཡསཱམགྒིལཱབྷེན ཏཏོ ཨནནྟརཾ ནཱཔི ན ནིབྦཏྟཾ, ནིབྦཏྟམེཝ ཧོཏི. ཡཐཱཡཾ པཝཏྟིཡཾ ཙིཏྟཔྤཝཏྟི, ཏཐེཝ པཊིསནྡྷིམྷི ཝཏྟཏེ ཙིཏྟསནྟཏི, ཙུཏིཙིཏྟཏོ ཨནཱགཙྪནྟམྤི པཊིསནྡྷིཙིཏྟཾ ཏཏོ ཨནནྟརཾ ནཱཔི ན ནིབྦཏྟཏི, པཙྩཡསཱམགྒིཝསེན ནིབྦཏྟཏེཝཱཏི ཨཏྠོ. སནྟཏིགཧཎེན ཙེཏྠ ཀུཏོཙི ཨཱགམཱབྷཱཝམེཝ ཝིབྷཱཝེཏི. ཧེཏུཕལབྷཱཝེན ཧི སམྦནྡྷཏཱཏི དྷམྨཔྤཝཏྟི སནྟཏཱིཏི. ཏེནཱཧ ‘‘པུརིམཾ བྷིཛྫཏེ ཙིཏྟ’’ནྟིཨཱདི. པུརིམནྟི ཙུཏིཙིཏྟཾ. བྷིཛྫཏེཏི ¶ ནིརུཛ྄ཛྷཏི. པཙྪིམནྟི པཊིསནྡྷིཙིཏྟཾ. ཏཏོཏི ཙུཏིཙིཏྟཏོ ཨནནྟརམེཝ ཛཱཡཏི. ཡཏྠ ཧི ཙུཏིཙིཏྟཏོ དཱུརེཔི ཀཱལནྟརེཔི ཨུཔྤཛྫམཱནཾ པཊིསནྡྷིཙིཏྟཾ ཨནནྟརམེཝ ཛཱཡཏཱིཏི ཝུཙྩཏི. ཏསྨཱ ཏེསཾ ཨནྟརིཀཱ ནཏྠི ཏེསཾ ཙུཏིཔཊིསནྡྷིཙིཏྟཱནཾ བྱཝདྷཱཡཀཾ ཀིཉྩི ནཏྠི. ཝཱིཙི ཏེསཾ ན ཝིཛྫཏཱིཏི ཏསྶེཝ ཝེཝཙནཾ. ཨིཏོཏི ཙུཏིཙིཏྟཏོ ཨནནྟརཾ ན ཙ གཙྪཏི ཀིཉྩི ཙིཏྟཾ. ཏཉྷི སསམྤཡུཏྟདྷམྨཾ ཏཐེཝ ནིརུཛ྄ཛྷཏི. པཊིསནྡྷི ཙཱཏི པཊིསནྡྷིཝིཉྙཱཎཉྩ ཨཉྙམེཝ ཡཐཱཔཙྩཡཾ ཛཱཡཏི ནིབྦཏྟཏཱིཏི པུནཔི སངྐམཱབྷཱཝམེཝ ཝིབྷཱཝེནྟོ སཔྤཙྩཡནཱམརཱུཔདསྶནཾ ནིགམེཏི.

༦༩༡. ནཱམརཱུཔགྒཧཎེན ¶ , ཏསྶ ཙ པཙྩཡདྷམྨགྒཧཎེན ཨགྒཧིཏསྶ ཏེབྷཱུམཀདྷམྨསྶ ཨབྷཱཝཏོ ‘‘ཝིདིཏསབྦདྷམྨསྶཱ’’ཏི ཝུཏྟཾ. ན ཙེཏྠ ལོཀུཏྟརདྷམྨཱ ཨདྷིགཏཱ. ཐཱམགཏཾ ཧོཏི ཨནེཀཱཀཱརཝོཀཱརཔཙྩཡཔརིགྒཧཝིདྷིནོ ཨནུཊྛིཏཏྟཱ. སུཊྛུཏརཾ པཧཱིཡཏི ཏིཡདྡྷགཏདྷམྨཔྤཝཏྟིཡཱ ཝིགཏསམྨོཧཏྟཱ. སཱ ཨེཝཱཏི སོལ༹སཝིདྷཱ ཀངྑཱ ཨེཝ. ཡསྨཱ ཨེཏྠ ‘‘བུདྡྷོ, དྷམྨོ, སངྒྷོ, སིཀྑཱ’’ཏི ཙ ཀངྑཱཡ གོཙརབྷཱུཏཱ ལོཀིཡཱ དྷམྨཱ ཨདྷིཔྤེཏཱ. ན ཧི ལོཀུཏྟརདྷམྨེ ཨཱརབྦྷ ཀིལེསཱ པཝཏྟིཏུཾ སཀྐོནྟི. པུབྦནྟོཏི ཨཏཱིཏཱ ཁནྡྷཱཡཏནདྷཱཏུཡོ. ཨཔརནྟོཏི ཨནཱགཏཱ. པུབྦནྟཱཔརནྟོཏི ཏདུབྷཡཾ, ཨདྡྷཱཔཙྩུཔྤནྣཾ ཝཱ ཏདུབྷཡབྷཱགཡུཏྟཏྟཱ. ཨེཝཾ བུདྡྷཱདིགྒཧཎེན, པཊིཙྩསམུཔྤནྣདྷམྨགྒཧཎེན ཙ གཧིཏོ ཨཊྛམོ ཀངྑཱཝིསཡོ ནཱམརཱུཔམཏྟཾ, ཨིདཔྤཙྩཡཏཱགྒཧཎེན པན ཏསྶ པཙྩཡོ གཧིཏོ, ཏསྨཱ སོལ༹སཝཏྠུཀཱཡ ཀངྑཱཡ པཧཱིནཱཡ ཨཊྛཝཏྠུཀཱ ཀངྑཱ ཨཔྤཏིཊྛཱཝ ཧོཏཱིཏི ཨཱཧ ‘‘ན ཀེཝལཉྩ…པེ… པཧཱིཡཏིཡེཝཱ’’ཏི.

དིཊྛེཀཊྛཏྟཱ ཝིཙིཀིཙྪཱཡ ཡཐཱ དིཊྛི སམུཙྪིཛྫམཱནཱ ཝིཙིཀིཙྪཱཡ སདྡྷིཾཡེཝ སམུཙྪིཛྫཏི, ཨེཝཾ ཝིཙིཀིཙྪཱ ཝིཀྑམྦྷིཡམཱནཱ དིཊྛིཡཱ སདྡྷིཾཡེཝ ཝིཀྑམྦྷཱིཡཏཱིཏི ཨཱཧ ‘‘དྭཱསཊྛི དིཊྛིགཏཱནི ཝིཀྑམྦྷནྟཱི’’ཏི. ཨཏྟཱབྷིནིཝེསཱུཔནིསྶཡཱ ཧི ‘‘ཨཧོསིཾ ནུ ཁོ ཨཧ’’ནྟིཨཱདི (མ. ནི. ༡.༡༨; སཾ. ནི. ༢.༢༠) ནཡཔྤཝཏྟཱ སོལ༹སཝཏྠུཀཱ ཀངྑཱ, སཱ ཨེཝ ཙ པུབྦནྟཱདིཝཏྠུཀབྷཱཝེན ཝུཏྟཱ. ཨཏྟཱབྷིནིཝེསཝཏྠུཀཱནི ཙ དྭཱསཊྛི དིཊྛིགཏཱནི, བུདྡྷཱདིཝཏྠུཀཱ ཙ ཀངྑཱ ཏདེཀཊྛཱཏི. དྷརཱིཡནྟི ¶ ཨཏྟནོ པཙྩཡེཧཱིཏི དྷམྨཱ, ཏིཊྛཏི ཨེཏྠ ཏདཱཡཏྟཝུཏྟིཏཱཡ ཕལནྟི ཋིཏི, དྷམྨཱནཾ ཋིཏི དྷམྨཊྛིཏི, པཙྩཡདྷམྨོ. ཨཐ ཝཱ དྷམྨོཏི ཀཱརཎཾ ‘‘དྷམྨཔཊིསམྦྷིདཱ’’ཏིཨཱདཱིསུ (ཝིབྷ. ༧༡༨ ཨཱདཡོ) ཝིཡ, དྷམྨསྶ ཋིཏི སབྷཱཝོ, དྷམྨཏོ ཙ ཨཉྙོ སབྷཱཝོ ནཏྠཱིཏི པཙྩཡདྷམྨཱནཾ པཙྩཡབྷཱཝོ དྷམྨཊྛིཏི, དྷམྨཊྛིཏིཡཾ ཉཱཎཾ དྷམྨཊྛིཏིཉཱཎཾ. སངྑཱརཱནཾ ཡཾ ཡཾ བྷཱུཏཾ ཨནིཙྩཏཱདི ཡཐཱབྷཱུཏཾ, ཏཏྠ ཉཱཎནྟི ཡཐཱབྷཱུཏཉཱཎཾ. སམྨཱ པསྶཏཱིཏི སམྨཱདསྶནཾ.

ཨཝིཛྫཱ པཙྩཡོཏི ཨཝིཛྫཱ ཧེཏུཨཱདིཝསེན སངྑཱརཱནཾ ཡཐཱརཧཾ པཙྩཡོ. ཏཏོ ཨེཝ སངྑཱརཱ པཙྩཡསམུཔྤནྣཱ. ཨུབྷོཔེཏེཏི ཡསྨཱ ཨཝིཛྫཱཔི ཨཱསཝཱདིཝསེན པཙྩཡསམྦྷཱུཏཱཝ, ཏསྨཱ ཨཝིཛྫཱ སངྑཱརཱཏི ཨུབྷཡེཔི ཨེཏེ དྷམྨཱ པཙྩཡསམུཔྤནྣཱ. ཨིཏཱིཏི ཨེཝཾ. པཙྩཡཔརིགྒཧེ པཉྙཱཏི པཙྩཡཱནཾ པརིཙྪིཛྫ གཧཎཝསེན པཝཏྟཱ པཉྙཱ. ཝུཏྟནཡེན དྷམྨཊྛིཏིཉཱཎཾ.

ནིམིཏྟནྟི ¶ སངྑཱརནིམིཏྟཾ, ཨཏྠཏོ པཉྩཀྑནྡྷཱ. ཏེ ཧི གྷནསཉྙཱཔཝཏྟིཡཱ ཝཏྠུབྷཱཝཏོ ནིམིཏྟཾ, སཝིགྒཧབྷཱཝེན ཨུཔཊྛཱནཏོ ཝཱ. ཡསྨཱ ཨནིཙྩཏཱ ནཱམ སངྑཱརཱནཾ ཨཝིཔརཱིཏཱཀཱརོ. ཏཏྠ ནིཙྩཏཱཡ ལེསསྶཱཔི ཨབྷཱཝཏོ ཨནིཙྩཏོ པསྶནྟོ ཡཐཱབྷཱུཏཾ ཛཱནཱཏི. ཏཉྩ ཉཱཎཾ ཨཝིཔརཱིཏགྒཧཎཏཱཡ སམྨཱདསྶནཾ. ཏཾསམངྒིནཱ ཙ པཙྩུཔྤནྣེསུ ཝིཡ ཨཏཱིཏཱནཱགཏེསུཔི ནཡཾ ནེནྟེན ཏེ སུཔརིཝིདིཏཱ ཧོནྟི.

ཨནིཙྩཏཱ ཙ ནཱམ ཨུཔྤཏྟིམཏོ, ཨུཔྤཱདོ ཙ པཙྩཡཝསེནཱཏི ཨནིཙྩཏཱ སིཛ྄ཛྷམཱནཱ སངྑཱརཱནཾ སཔྤཙྩཡཏཾ སཱདྷེནྟཱི ཡཐཱཝུཏྟཀངྑཔྤཧཱནཱཡ སཾཝཏྟཏཱིཏི ཨིམམཏྠཾ དསྶེནྟོ ‘‘ཨནིཙྩཏོ…པེ… པཧཱིཡཏཱི’’ཏི ཨཱཧ. ཏཏྠ ཏདནྭཡེནཱཏི པཙྩཀྑཏོ དིཊྛསྶ ཨནུགམནེན. ཨེཏྠཱཏི ཡཐཱདིཊྛེསུ དྷམྨེསུ. དུཀྑཏོ མནསི ཀརོནྟོཏིཨཱདཱིསུཔི ཨེསེཝ ནཡོ. པཝཏྟནྟི ཨུཔཱདིནྣཀྑནྡྷཔྤཝཏྟཾ. ཏཉྷི ཀིལེསཱབྷིསངྑཱརེཧི པཝཏྟིཏཏྟཱ སཱཏིསཡཾ དུཀྑབྷཱཝེན ཨུཔཊྛཱཏི. པཝཏྟནྟི ཋཱནནིསཛྫཱདིཝསེན དུཀྑདུཀྑཏཱདིཝསེན ཙ སངྑཱརཔྤཝཏྟནྟི ཨཔརེ. ‘‘ནིམིཏྟཾ, པཝཏྟ’’ནྟི ཙ ཝུཏྟེ ཨཛ྄ཛྷཏྟབཧིདྡྷཱསནྟཱནསཉྙིཏེ སབྦསྨིཾ སཔྤཙྩཡེ ནཱམརཱུཔེ ཡཱཐཱཝཏོ པཝཏྟཱ ཨེཀཱཝ པཉྙཱ པརིཡཱཡཝསེན ‘‘ཡཐཱབྷཱུཏཉཱཎ’’ནྟིཔི ‘‘སམྨཱདསྶན’’ནྟིཔི ཏཏྠ ཀངྑཱཝིཀྑམྦྷནེན ‘‘ཀངྑཱཝིཏརཎཱ’’ཏིཔི ཝུཙྩཏི. ཡཐཱ ‘‘རུཀྑོ པཱདཔོ ཏརཱུ’’ཏི ཨིམམཏྠཾ དསྶེནྟོ ཨཱཧ ‘‘ཡཉྩ ཡཐཱབྷཱུཏཉཱཎ’’ནྟིཨཱདི.

པརམཏྠཏོ ¶ སཱསནེ ཨསྶཱསོ ནཱམ ཨརིཡཕལཾ, པཏིཊྛཱ ནཱམ ཨརིཡམགྒོ, ཨཡཾ པན ཨནདྷིགཏམགྒཕལོཔི ཏདདྷིགམུཔཱཡཔཊིཔཏྟིཡཾ ཋིཏཏྟཱ ལདྡྷསྶཱསོ ཝིཡ, ལདྡྷཔཏིཊྛོ ཝིཡ ཙ ཧོཏཱིཏི ཝུཏྟཾ ‘‘ལདྡྷསྶཱསོ ལདྡྷཔཏིཊྛོ’’ཏི. ཨཔརིཧཱིནཀངྑཱཝིཏརཎཝིསུདྡྷིཀོ ཝིཔསྶཀོ ལོཀིཡཱཧི སཱིལསམཱདྷིཔཉྙཱསམྤདཱཧི སམནྣཱགཏཏྟཱ ཨུཏྟརི ཨཔྤཊིཝིཛ྄ཛྷནྟོ སུགཏིཔརཱཡཎོ ཙ ཧོཏཱིཏི ཝུཏྟཾ ‘‘ནིཡཏགཏིཀོ’’ཏི. ཏཏོ ཨེཝ ཙཱུལ༹སོཏཱཔནྣོ ནཱམ ཧོཏི. སོཏཱཔནྣོ ཧི ཁཱིཎཱཔཱཡདུགྒཏིཝིནིཔཱཏོཏི.

ཨཐ ཝཱ ལདྡྷསྶཱསོ དིཊྛིཝིསུདྡྷིསམདྷིགམེན. ནཱམརཱུཔཔརིཙྪེདེན ཧི ཁནྡྷཱདིཀེ སབྷཱཝསརསཏོ སལླཀྑེཏྭཱ སཱསནེ དྷམྨུཔསཾཧིཏཔཱམོཛྫཔྤཊིལཱབྷེན ལདྡྷསྶཱསོ ཧོཏི. ལདྡྷཔཏིཊྛོ ཀངྑཱཝིཏརཎཝིསུདྡྷིསམདྷིགམེན. སཔྤཙྩཡནཱམརཱུཔདསྶནེན ཧི པརིམདྡིཏདིཊྛིཀཎྚཀོ ཝིནིདྡྷཏཨཧེཏུཝིསམཧེཏུཝཱདོ ཡཐཱསཀཾ པཙྩཡེཧེཝ དྷམྨམཏྟཾ ཛཱནིཏྭཱ སཱསནེ ¶ པཏིཊྛིཏསདྡྷོ ལདྡྷཔཏིཊྛོ ནཱམ ཧོཏི. ནཱམརཱུཔཝཝཏྠཱནེན དུཀྑསཙྩཾ, དྷམྨཊྛིཏིཉཱཎེན སམུདཡསཙྩཾ, ཏསྶེཝ ཨཔརབྷཱགེན ཨནིཙྩཏོ མནསིཀཱརཱདིཝིདྷིནཱ མགྒསཙྩཉྩ ཨབྷིཉྙཱཡ པཝཏྟིཡཱ དུཀྑབྷཱཝཾ དིསྭཱ ཨཔྤཝཏྟེ ནིརོདྷེ ཨེཀཾསེནེཝ ནིནྣཛ྄ཛྷཱསཡཏཱཡ ལོཀིཡེནེཝ ཉཱཎེན ཙཏུནྣཾ ཨརིཡསཙྩཱནཾ ཨདྷིགཏཏྟཱ ཨཔཱཡེསུ ཨབྷབྦུཔྤཏྟིཀོ, སོཏཱཔནྣབྷཱུམིཡཾ བྷབྦུཔྤཏྟིཀོ ཙ ཧོཏཱིཏི ཝུཏྟཾ ‘‘ནིཡཏགཏིཀོ’’ཏི. ཏེནཱཧ ‘‘ཙཱུལ༹སོཏཱཔནྣོ ནཱམ ཧོཏཱི’’ཏི.

ཏསྨཱཏི ཡསྨཱ ཨེཝཾ མཧཱནིསཾསམེཏཾ ཡཐཱབྷཱུཏཉཱཎཾ, ཏསྨཱ. སདཱཏི སབྦཀཱལཾ རཏྟིཉྩེཝ དིཝཱ ཙ. སབྦསོཏི ནིབྦཏྟཀཧེཏུཨཱདིཔརིགྒཎྷནཝསེན སབྦཔྤཀཱརེན.

ཀངྑཱཝིཏརཎཝིསུདྡྷིནིདྡེསཝཎྞནཱ ནིཊྛིཏཱ.

ཨིཏི ཨེཀཱུནཝཱིསཏིམཔརིཙྪེདཝཎྞནཱ.

༢༠. མགྒཱམགྒཉཱཎདསྶནཝིསུདྡྷིནིདྡེསཝཎྞནཱ

སམྨསནཉཱཎཀཐཱཝཎྞནཱ

༦༩༢. ཨེཝཾ ¶ ¶ མགྒཉྩ ཨམགྒཉྩ ཉཏྭཱ ཋིཏཾ ཉཱཎནྟི ཨཡཾ ཨུཔཀྐིལེསཝིནིམུཏྟཱ ཝཱིཐིཔཊིཔནྣཱ ཝིཔསྶནཱཔཉྙཱ ཨརིཡམགྒསྶ པུབྦབྷཱགམགྒོ, ཨཡཾ ཨོབྷཱསཱདིབྷེདོ དསཝིདྷོ ཨུཔཀྐིལེསོ ན མགྒོཏི ཨེཝཾ མགྒཉྩ ཨམགྒཉྩ ཡཱཐཱཝཏོ ཝཝཏྠཔེཏྭཱ ཋིཏཾ ཉཱཎཾ.

ཨཏཱིཏཱདིཝསེན ཨནེཀབྷེདབྷིནྣེ དྷམྨེ ཀལཱཔཏོ སངྑིཔིཏྭཱ སམྨསནཾ ཀལཱཔསམྨསནཾ, ཨཡཾ ཀིར ཛམྦུདཱིཔཝཱསཱིནཾ ཨབྷིལཱཔོ. ‘‘ཡཾ ཀིཉྩི རཱུཔ’’ནྟིཨཱདིནཱ (མ. ནི. ༡.༣༦༡; ༢.༡༡༣; ༣.༨༦; ཨ. ནི. ༤.༡༨༡) ནཡེན ཧི དྷམྨཱནཾ ཝིཔསྶནཱ ནཡཝིཔསྶནཱ, ཨཡཾ ཀིར ཏམྦཔཎྞིདཱིཔཝཱསཱིནཾ ཨབྷིལཱཔོ. ཏེནེཝཱཧ ‘‘ཀལཱཔསམྨསནསངྑཱཏཱཡ ནཡཝིཔསྶནཱཡཱ’’ཏི. ཏཱཝ-སདྡོ ཀམཏྠོ, ཏེན སམྨསནཔྤཀཱརཱནཾ བཧུབྷེདཏཾ དཱིཔེཏི. བཧུབྷཱཝཏོ ཧི ཏེསཾ པཋམཾ ནཡཝིཔསྶནཱཡ ཡོགཱརམྦྷཾ ཨནུསཱསཏི ‘‘ནཡཝིཔསྶནཱཡ ཏཱཝ ཡོགོ ཀརཎཱིཡོ’’ཏི. ཀསྨཱཏི ཙོདཀཝཙནཾ. ཏསྶཱཡཾ ཨདྷིཔྤཱཡོ – ཡདི མགྒཱམགྒཉཱཎདསྶནཝིསུདྡྷི སམྤཱདེཏབྦཱ, ཨཐ ཀསྨཱ ‘‘ནཡཝིཔསྶནཱཡ ཨཱདིཏོ ཡོགོ ཀཱཏབྦོ’’ཏི ཝུཏྟནྟི. ཨིཏརོ ཏསྶཱཡཾ ཨདྷིགམཱུཔཱཡོཏི དསྶེནྟོ ‘‘ཨཱརདྡྷཝིཔསྶཀསྶཱ’’ཏིཨཱདིམཱཧ. ཏེནེཏཾ དསྶེཏི ‘‘ཝིཔསྶནཱཡ སཏི ཨུདཡབྦཡཉཱཎུཔྤཱདོ, ཨུདཡབྦཡཉཱཎེ སཏི ཨོབྷཱསཱདིཨུཔཀྐིལེསསམྦྷཝོ, ཏཏོ མགྒཱམགྒཝཝཏྠཱནཾ, ཏསྨཱ ཏསྶ ཨཱདིཏོཝ ཨཱརམྦྷསྶ སམྦྷཝོ ནཏྠཱིཏི ཝིཔསྶནཱ པཋམཾ ཨཱརདྡྷབྦཱ’’ཏི. ཨེཝམྤི པཋམཾ ནཡཝིཔསྶནཱཝ ཀསྨཱ ཨཱརདྡྷབྦཱཏི ཨཱཧ ‘‘ཝིཔསྶནཱཡ ཙ ཀལཱཔསམྨསནཾ ཨཱདཱི’’ཏི. ཏཉྷི ཨཏཱིཏཱདིབྷེདབྷིནྣཱནཾ དྷམྨཱནཾ སངྑིཔིཏྭཱ ཝཝཏྠཱནཝསེན པཝཏྟནཏོ ཨཱདིཀམྨིཀསྶ སུཀརཾ སམྨསནནྟི ཨཱདིབྷཱུཏཾ.

ཏསྨཱཏི ¶ ཨཱདིབྷཱུཏཏྟཱ. ཨཐ ཝཱ ཏསྨཱཏི ཡསྨཱ ཨཱརདྡྷཝིཔསྶཀསྶ…པེ… ཀལཱཔསམྨསནཾ ཨཱདི, ཏསྨཱ. ཨེཏནྟི ཀལཱཔསམྨསནཾ. ཨཔིཙཱཏིཨཱདི ཀལཱཔསམྨསནསྶེཝ ཝིཔསྶནཱཡ ཨཱདིབྷཱཝེ ཨུཔཙཡཧེཏུདསྶནཾ. ཨུདཡབྦཡཉཱཎཔརིཡོསཱནཱ ཏཱིརཎཔརིཉྙཱ, ཨསམྤཏྟེ ¶ ཨེཝ ཙ ཨུདཡབྦཡཉཱཎེ མགྒཱམགྒཝཝཏྠཱནཾ ཧོཏཱིཏི ཨཱཧ ‘‘ཏཱིརཎཔརིཉྙཱཡ ཝཏྟམཱནཱཡཱ’’ཏི. ཀལཱཔསམྨསནེ ཏཱཝ ཡོགོ ཀཱཏབྦོཏི ཨེཏྠཱཔི ཏསྶེཝ པཋམཱརམྦྷེ ཀཱརཎཾ ཝུཏྟནཡེནེཝ ཝེདིཏབྦཾ. ཡསྨཱ ཀལཱཔསམྨསནཾ ནཱམ ཨེཀཝིསུདྡྷིཡམྤི ན ཨནྟོགདྷཾ, ཨེཀཙྩེ ཙ ཏཾ ཨནཱམསིཏྭཱཝ ཝིཔསྶནཱཙཱརཾ ཝཎྞེནྟི. ཨེཝཾ སནྟེཔི ཏཾ སུཏྟནྟེསུ ཨེཀདེསེན, ཨནཝསེསཏོ ཙ དསྶིཏཾ. པཊིསམྦྷིདཱཡཾ ཨཱདིཀམྨིཀཱནཾ མནསིཀཱརསུཀརཏཱཡ ཝིཔསྶནཱཡ ཨཱདིབྷཱཝེན ཋཔིཏཾ. ཝིཔསྶནྟསྶ ཙ ཨོབྷཱསཱདཱིསུ ཨུཔྤནྣེསུ མགྒཱམགྒཉཱཎསམྦྷཝོ, ཏསྨཱ ‘‘ཏཾ སམྤཱདེཏུཀཱམེནཱ’’ཏིཨཱདིནཱ ཨཡཾ ཝིཙཱརོ ཀཏོཏི དཊྛབྦཾ.

༦༩༣. ཏཏྲཱཏི ཏསྨིཾ ཏཱིརཎཔརིཉྙཱཡ ཉཱཏཔརིཉྙཱནནྟརབྷཱཝེ, ཏཱསུ ཝཱ པརིཉྙཱསུ. ཝིནིཙྪཡོཏི སརཱུཔཏོ, ཀིཙྩཏོ, བྷཱུམིཏོ ཙ སནྣིཊྛཱནཾ. ལོཀུཏྟརཱཔི པུརིམསྨིཾ སཙྩདྭཡེ མགྒསམྤཡུཏྟཱ ཏིཝིདྷཱཔི པརིཉྙཱ ཀིཙྩཝསེན ལབྦྷཏཱིཏི ‘‘ལོཀིཡཔརིཉྙཱ’’ཏི ཝིསེསེཏྭཱ ཝུཏྟཾ. སབྷཱཝདྷམྨཱནཾ ལཀྑཎསལླཀྑཎཏོ ཉེཡྻཨབྷིམུཁཱ པཉྙཱ ཨབྷིཉྙཱཔཉྙཱ. ཉཱཏཊྛེཏི ཉཱཏབྷཱཝནིམིཏྟཾ. ཨབྷིཉྙེཡྻསྶ ཛཱནནཧེཏུ ‘‘ཉཱཎ’’ནྟི ཝུཙྩཏི. པརིཉྙཱཔཉྙཱཏི ཨནིཙྩཱདིལཀྑཎཱནི པརིཙྪིཛྫ ཛཱནནཔཉྙཱ. ཏཱིརཎཊྛེཏི སམྨསནབྷཱཝཧེཏུ. པཧཱནཔཉྙཱཏི པཧཱཏབྦསྶ པཛཧནཔཉྙཱ. ཝེདཡིཏཱདིལཀྑཎཝིདྷུརཏཱཡ རུཔྤནལཀྑཎཾ པཙྩཏྟལཀྑཎཾ ཝུཏྟཾ. ཏེསཾཡེཝ པཙྩཏྟལཀྑཎསལླཀྑཎཝསེན གཧིཏདྷམྨཱནཾཡེཝ. ཡཐཱ པཐཝཱིཕསྶཱདཱིནཾ ཀཀྑལ༹ཕུསནཱདིལཀྑཎཱནི ཏཱིསུཔི ཁཎེསུ སལླཀྑིཏབྦཱནི པཊིནིཡཏརཱུཔཏཱཡ སབྷཱཝསིདྡྷཱནེཝ ཧུཏྭཱ གཡ྄ཧནྟི, ན ཨེཝམནིཙྩཏཱདིལཀྑཎཱནི. ཏཱནི པན བྷངྒུདཡབྦཡཔཱིལཱ༹ཝསཝཏྟནཱཀཱརམུཁེན གཧེཏབྦཏོ སམཱརོཔིཏརཱུཔཱནི ཝིཡ གཡ྄ཧནྟཱིཏི ཝུཏྟཾ ‘‘སཱམཉྙལཀྑཎཾ ཨཱརོཔེཏྭཱ’’ཏི. ལོཀིཡཔརིཉྙཱནཾཡེཝ ཨདྷིཔྤེཏཏྟཱ ལཀྑཎཱརམྨཎིཀཝིཔསྶནཱཝ ‘‘པཧཱནཔརིཉྙཱ’’ཏི ཝུཏྟཱ.

སངྑཱརཔཊིཙྪེདཏོཏི ནཱམརཱུཔཝཝཏྠཱནཏོ, ཡཱ ‘‘དིཊྛིཝིསུདྡྷཱི’’ཏི ཝུཏྟཱ. ཀེཙི པན ‘‘ཁནྡྷཱདཱིནཾ ཝིཔསྶནཱཡ བྷཱུམིབྷཱཝཏོ སབྦོཔི ཁནྡྷཱདིཝིཙཱརོ སངྑཱརཔརིཙྪེདོ’’ཏི ཝདནྟི. ‘‘པཙྩཏྟལཀྑཎཔཊིཝེདྷསྶེཝ ཨཱདྷིཔཙྩ’’ནྟི ཨིམིནཱ ནཱམརཱུཔཔཙྩཡཔརིགྒཧཔཉྙཱནཾ ཏཱིརཎཔཧཱནཱསམཏྠཏཾ ¶ དསྶེཏི ¶ . ཏཱསམྤི པན ‘‘ནམནལཀྑཎཾ ནཱམཾ, རུཔྤནལཀྑཎཾ རཱུཔ’’ནྟི ཨརཱུཔརཱུཔཱནཾ སཱདྷཱརཎཱཀཱརསལླཀྑཎཝསེན པཝཏྟིཡཱ ཨེཀེནཱཀཱརེན ཏཱིརཎཔརིཡཱཡོ, དིཊྛིཀངྑཱཝིཀྑམྦྷནེན པཧཱནཔརིཡཱཡོ ལབྦྷཏཱིཏི སིཡཱ ཏཱིརཎཔཧཱནེསུཔི ཨཱདྷིཔཙྩནྟི ཝདནྟི. ཨུཀྐཊྛནིདྡེསེན པན ཡཐཱ དིཊྛིཝིསུདྡྷིཡཱཝ སངྑཱརཔརིཙྪེདཏཱ, ཨེཝཾ ལཀྑཎཱརམྨཎིཀཝིཔསྶནཱཡ ཨེཝ ཏཱིརཎཔཧཱནཀིཙྩཏཱ ཝེདིཏབྦཱ. ཨེཝཾ ཧི ཏིསྶོཔི པརིཉྙཱ ཝཝཏྠིཏཱ ཧོནྟི, ཨཉྙཐཱ སངྐཱརོ སིཡཱ. ཏཱིརཎཔརིཉྙཱཡ བྷཱུམི ཏཏྠ པཉྙཱཡ ཨནིཙྩཏཱདིལཀྑཎསནྟཱིརཎཏོ. ཏེནཱཧ ‘‘ཨེཏསྨིཾ…པེ… ཨཱདྷིཔཙྩ’’ནྟི. ཀཱམཾ ཨུདཡབྦཡཉཱཎམྤི ཀཉྩི མིཙྪཱབྷིནིཝེསཾ པཛཧཏི, ཏསྶ པན ཨཐཱམགཏཏྟཱ ན སཱཏིསཡཾ པཧཱནནྟི ཝུཏྟཾ ‘‘བྷངྒཱནུཔསྶནཾ ཨཱདིཾ ཀཏྭཱ ཨུཔརི པཧཱནཔརིཉྙཱཡ བྷཱུམཱི’’ཏི. ཨནིཙྩཏོ ཨནུཔསྶནྟོཏི ཨནིཙྩཱཀཱརཏོ སངྑཱརེ ཨནུཔསྶནྟོ སམྨསནྟོ. ནིཙྩསཉྙནྟི ‘‘ཏེ ནིཙྩཱ སསྶཏཱ’’ཏི པཝཏྟཾ མིཙྪཱསཉྙཾ. སཉྙཱསཱིསེན དིཊྛིཙིཏྟཱནམྤི གཧཎཾ དཊྛབྦཾ. ཨེསེཝ ནཡོ ཨིཏོ པརེསུཔི. ནིབྦིནྡནྟོཏི ཨནིཙྩཱནུཔསྶནཱདིསམྦྷཱུཏཱཡ ནིབྦིདཱནུཔསྶནཱཡ སངྑཱརེ ནིབྦིཛྫནཝསེན པསྶནྟོ. ནནྡིནྟི སཔྤཱིཏིཀཏཎྷཾ. ཝིརཛྫནྟོཏི ཝིརཱགཱནུཔསྶནཱཡ ཝིརཛྫནཝསེན ཡཐཱ སངྑཱརེསུ རཱགོ ནུཔྤཛྫཏི, ཨེཝཾ ཨནུཔསྶནྟོ. ཏཐཱབྷཱུཏོ ཧི རཱགཾ པཛཧཏཱིཏི ཝུཙྩཏི. ནིརོདྷེནྟོཏི ནིརོདྷཱནུཔསྶནཱཡ ཡཐཱ སངྑཱརཱ ནིརུཛ྄ཛྷནྟིཡེཝ, ན ཨཱཡཏིཾ པུནབྦྷཝཝསེན ཨུཔྤཛྫནྟི, ཨེཝཾ ཨནུཔསྶནྟོ. ཏཐཱབྷཱུཏོ ཧི སངྑཱརཱནཾ སམུདཡཾ པཛཧཏི ནཱམ ཨནུཔྤཏྟིདྷམྨཏཱཔཱདནཏོ. པཊིནིསྶཛྫནྟོཏི པཊིནིསྶགྒཱནུཔསྶནཱཡ ཡཐཱ སངྑཱརཱ ན པུན ཨཱདིཡནྟི, ཨེཝཾ ཝོསྶཛྫནྟོ. ཏེནཱཧ ‘‘ཨཱདཱནཾ པཛཧཏཱི’’ཏི, ནིཙྩཱདིཝསེན ཝཱ གཧཎཾ ཝིསྶཛྫེཏཱིཏི ཨཏྠོ. སཱདྷིཏཏྟཱཏི སམྤཱདིཏཏྟཱ. ཨིཏརཱཏི ཏཱིརཎཔཧཱནཔརིཉྙཱ. ཨེཝཾ པརིཉྙཱ ནིདྡིསིཏྭཱ པརིཉྙཱཀྐམཝསེནཔི ཀངྑཱཝིཏརཎཱནནྟརཾ ‘‘ཀལཱཔསམྨསནེ ཡོགོ ཀཱཏབྦོ’’ཏི ཡྭཱཡམཏྠོ ཝུཏྟོ, ཏཾ ནིགམཝསེན པཙྩཱཧརནྟོ ‘‘ཏེན ཝུཏྟ’’ནྟིཨཱདིམཱཧ, ཏཾ ཝུཏྟཏྠམེཝ.

༦༩༤. ཏཏྲཱཏི ཏསྨིཾ ཀལཱཔསམྨསནེ ཝིབྷཱཝེཏབྦེ, ཏསྶ ཝཱ ཀལཱཔསམྨསནསྶ ཨཱདིབྷཱཝེ. ཨཡཾ པཱལཱི༹ཏི དསྶིཡམཱནཾ པཊིསམྦྷིདཱམགྒཔཱལི༹མཱཧ. ཏཏྠ སངྑིཔིཏྭཱ ཝཝཏྠཱནེ པཉྙཱཏི ཨཏཱིཏཱདིབྷེདབྷིནྣེ དྷམྨེ ¶ ཨེཀཏོ སངྒཧེཏྭཱ ཨནིཙྩཱདིཝསེན ཝིནིཙྪཡེ སཱདྷེཏབྦེ ཏཾསཱདྷནཱིཡཱ པཉྙཱ. སམྨསནེ ཨནིཙྩཏཱདིཝསེན ཏཱིརཎེ ཉཱཎནྟི པཝུཙྩཏི, སཱ ཀཐཾ ཧོཏཱིཏི ཨཏྠོ. ཝཝཏྠཱནེ སམྨསནེཏི ཙ ནིཔྥཱདེཏབྦེ བྷུམྨཝཙནཾ. ཡཾ ཀིཉྩི རཱུཔནྟིཨཱདཱིནི པདཱནི ¶ ཧེཊྛཱ ཝུཏྟཏྠཱནེཝ. སབྦཾ རཱུཔཾ ཨནིཙྩཏོ ཝཝཏྠཔེཏཱིཏིཨཱདཱིནི པན ཡསྨཱ པརཏོ ཝཎྞིཡིསྶནྟི, ཏསྨཱ ཏཏྠེཝ ནེསཾ ཨཏྠཾ ཝིབྷཱཝཡིསྶཱམ.

པཱལི༹ཝཝཏྠཱནཾ པན ཨེཝཾ ཝེདིཏབྦཾ – ཨེཏྠ ཧི ཨཱདིཀམྨིཀཱནཾ ཝིཔསྶནཱམནསིཀཱརསུཁཏྠཾ ‘‘ཡཾ ཀིཉྩི རཱུཔ’’ནྟིཨཱདིནཱ པཋམཾ ཏཱཝ པཉྩཀྑནྡྷཱ ཨཏཱིཏཱདིཝིབྷཱགམུཁེན གཧིཏཱ, ཏེ པན ཁནྡྷཱ ཡསྨཱ དྭཱརཱརམྨཎེཧི སདྡྷིཾ དྭཱརཔྤཝཏྟདྷམྨཝསེན ཝིབྷཱགཾ ལབྦྷནྟི, ཏསྨཱ ཏདནནྟརཾ དྭཱརཚཀྐཱདིཝསེན དས ཚཀྐཱ གཧིཏཱ. ཡསྨཱ པན ལཀྑཎེསུ ཨནཏྟལཀྑཎཾ དུཀྑཝིབྷཱགཾ, ཏསྨཱ ཏསྶ ཝིབྷཱཝནཱཡ ཚ དྷཱཏུཡོ གཧིཏཱ. ཏཏོ ཡེསུ ཀསིཎེསུ ཨིཏོ བཱཧིརཀཱནཾ ཨཏྟཱབྷིནིཝེསོ, ཏཱནི ཨིམེསཾ ཛྷཱནཱནཾ ཨཱརམྨཎབྷཱཝེན ཨུཔཊྛཱནཱཀཱརམཏྟཱནཱིཏི དསྶནཏྠཾ དས ཀསིཎཱནི གཧིཏཱནི. ཏཏོ དུཀྑཱནུཔསྶནཱཡ པརིཝཱརབྷཱཝེན པཊིཀྐཱུལཱཀཱརཝསེན དྭཏྟིཾས ཀོཊྛཱསཱ གཧིཏཱ. པུབྦེ ཁནྡྷཝསེན སངྑེཔཏོ གཧིཏཱ དྷམྨཱ ནཱཏིསངྑེཔཝིཏྠཱརནཡེན, ཝིཏྠཱརནཡེན ཙ མནསི ཀཱཏབྦཱཏི དསྶནཏྠཾ དྭཱདསཱཡཏནཱནི, ཨཊྛཱརས དྷཱཏུཡོ ཙ གཧིཏཱ. ཏེསུ ཨིམེ དྷམྨཱ སཏིཔི སུཉྙནིརཱིཧཨབྱཱཔཱརབྷཱཝེ དྷམྨསབྷཱཝཏོ ཨཱདྷིཔཙྩཝསེན པཝཏྟནྟཱིཏི ཨནཏྟལཀྑཎཝིབྷཱཝནཏྠཾ ཨིནྡྲིཡཱནི གཧིཏཱནི. ཨེཝཾ ཨནེཀབྷེདབྷིནྣཱཔིམེ དྷམྨཱ བྷཱུམིཏྟཡཔརིཡཱཔནྣཏཱཡ ཏིཝིདྷཱཝ ཧོནྟཱིཏི དསྶནཏྠཾ ཏིསྶོ དྷཱཏུཡོ གཧིཏཱ.

ཨེཏྟཱཝཏཱ ནིམིཏྟཾ དསྶེཏྭཱ པཝཏྟཾ དསྶེཏུཾ ཀཱམབྷཝཱདཡོ ནཝ བྷཝཱ གཧིཏཱ. ཨེཏྟཀེ ཨབྷིཉྙེཡྻཝིསེསེ པཝཏྟམནསིཀཱརཀོསལླེན སཎྷསུཁུམེསུ ནིབྦཏྟིཏམཧགྒཏདྷམྨེསུ མནསིཀཱརོ པཝཏྟེཏབྦོཏི དསྶནཏྠཾ ཛྷཱནཔྤམཉྙཱརུཔྤཱནི གཧིཏཱནི. ཏཏྠ ཛྷཱནཱནི ནཱམ ཝུཏྟཱཝསེསཱརམྨཎཱནི རཱུཔཱཝཙརཛ྄ཛྷཱནཱནི. པཙྩཡཔཙྩཡུཔྤནྣཝིབྷཱགཏོ ཨིམེ དྷམྨཱ བྷིནྡིཏྭཱ མནསི ཀཱཏབྦཱཏི དསྶནཏྠཾ པཊིཙྩསམུཔྤཱདངྒཱནི གཧིཏཱནི. པཙྩཡཱཀཱརམནསིཀཱརོ ཧི ལཀྑཎཏྟཡཾ སུཁེན, སུཊྛུཏརཉྩ ཝིབྷཱཝེཏི, ཏསྨཱ པཙྪཏོ གཧིཏོ. ཨེཝམེཏེ སམྨསནཱིཡབྷཱཝེན གཧིཏཱ ¶ ཁནྡྷཱདིཝསེན ཀོཊྛཱསཏོ པཉྩཝཱིསཏིཝིདྷཱ. པབྷེདཏོ པན ཨཏཱིཏཱདིབྷེདཾ ཨནཱམསིཏྭཱཝ གཡ྄ཧམཱནཱ དྭཱིཧི ཨཱུནཱནི དྭེསཏཱནི ཧོནྟི.

ཏཏྠ ཨནིཙྩཏོ ཝཝཏྠཔེཏཱིཏིཨཱདིཀོ པཋམོ ལཀྑཎཝཝཏྠཱཔནཝཱརོ. ཨནིཙྩཾ ཁཡཊྛེནཱཏིཨཱདིཀོ དུཏིཡོ ཧེཏུཝཱརོ ལཀྑཎཱནཾ ཧེཏུཀིཏྟནཏོ. ཨནིཙྩཾ སངྑཏནྟིཨཱདིཀོ པན ཧེཏུཔཏིཊྛཱཔནཝཱརོ ¶ པཱཀཊབྷཱཝསལླཀྑཎཏོ. ཁཡཊྛེནཱཏི ཧི ཁཡསབྷཱཝཏོ ཡསྨཱ རཱུཔཾ ཁཡསབྷཱཝཾ ཨུཔྤཛྫིཏྭཱ ཁཡཾ ཝཡཾ བྷེདཾ གཙྪཏི, ཏསྨཱ ཨནིཙྩནྟི ཨཏྠོ. བྷཡཊྛེནཱཏི བྷཱཡིཏབྦབྷཱཝཏོ ཡསྨཱ རཱུཔཾ པབྷངྒུརཏཱཡ བྷཡཱནཀཾ, ཏསྨཱ དུཀྑནྟི. ཏེནཱཧ བྷགཝཱ ‘‘ཡདནིཙྩཾ, ཏཾ དུཀྑ’’ནྟི (སཾ. ནི. ༣༠.༡༥, ༤༥, ༤༦, ༧༦, ༨༥; ༢.༤.༡༤; པཊི. མ. ༢.༡༠). ཨསཱརཀཊྛེནཱཏི ཨསཱརཀབྷཱཝཏོ, ཨཏྟསཱརཝིརཧཏོཏི ཨཏྠོ. ཏཏིཡཝཱརེ པན ‘‘རཱུཔཾ ཨནིཙྩ’’ནྟི ཝཏྭཱ ཏསྶ ཧེཏུཾ པཏིཊྛཱཔེཏུཾ ‘‘སངྑཏ’’ནྟིཨཱདི ཝུཏྟཾ. ཡསྨཱ སམེཙྩ སམྦྷཱུཡ པཙྩཡེཧི ཀཏཾ, ཨནུརཱུཔེ ཙ པཙྩཡེ པཊིཙྩ, ན ཝིནཱ ཏེཧི སམཾ, སམྨཱ ཙ ཨུཔྤནྣཾ, ཏསྨཱ ཁཡཝཡཝིརཱགནིརོདྷདྷམྨནྟི. ན ཧི པཙྩཡནིབྦཏྟཾ ཨནིརུཛ྄ཛྷནཀཾ ནཱམ ཨཏྠི. ཏེནཱཧ བྷགཝཱ ‘‘ཡཾ ཏཾ རཱུཔཾ ཛཱཏཾ བྷཱུཏཾ སངྑཏཾ པལོཀདྷམྨཾ, ཏཾ ཝཏ མཱ པལུཛྫཱིཏི ནེཏཾ ཋཱནཾ ཝིཛྫཏཱི’’ཏི (སཾ. ནི. ༥.༣༧༩). ཨེཏེན ཨནིཙྩཱ པཐཝཱིདྷཱཏུ པཙྩཡནིབྦཏྟཏྟཱ ཏདཉྙཾ པཙྩཡནིབྦཏྟཾ ཝིཡཱཏི དསྶེཏི. ཨེས ནཡོ སེསདྷམྨེསུཔི.

ཨིདཱནི ཨནྭཡཏོ, བྱཏིརེཀཏོ ཙ སངྑཏདྷམྨཱནཾ ཨནིཙྩཏཾ པཏིཊྛཱཔེཏུཾ ‘‘ཛཱཏིཔཙྩཡཱ’’ཏིཨཱདི ཝུཏྟཾ. ཨནིཙྩལཀྑཎསྶེཝ ཙེཏྠ པཏིཊྛཱཔནཾ ཏསྨིཾ པཏིཊྛཱཔིཏེ སེསལཀྑཎདྭཡསྶཔི པཏིཊྛཱཔནསིདྡྷིཏོ.

ཨིམིནཱ པེཡྻཱལེན ཨིམེ དྷམྨརཱསཡོ སཾཁིཏྟཱཏི སམྦནྡྷོ. ‘‘དྭཱརཱརམྨཎེཧི སདྡྷིཾ དྭཱརཔྤཝཏྟཱ དྷམྨཱ, པཉྩཀྑནྡྷཱ’’ཏི ཨིདཾ ཨབྷིཉྙེཡྻནིདྡེསེ ‘‘ཙཀྑུཾ, བྷིཀྑཝེ, ཨབྷིཉྙེཡྻ’’ནྟིཨཱདིནཱ (པཊི. མ. ༡.༣; སཾ. ནི. ༤.༤༦) དྭཱརཱརམྨཎེཧི སདྡྷིཾ དྭཱརཔྤཝཏྟེ དྷམྨེ དསྶེཏྭཱ ཏེསཾ པཉྩཧི ཁནྡྷེཧི སངྒཧིཏཏཾ དསྶེཏུཾ ‘‘རཱུཔཾ ཨབྷིཉྙེཡྻཾ…པེ… ཝིཉྙཱཎཾ ཨབྷིཉྙེཡྻ’’ནྟི ཨཱགཏཏྟཱ ཝུཏྟཾ. པཊིསམྦྷིདཱཡཾ (པཊི. མ. ༡.༤༨) པན ‘‘ཡཾ ཀིཉྩི རཱུཔ’’ནྟིཨཱདིནཱ པཋམཾ པཉྩཀྑནྡྷེ དསྶེཏྭཱ ‘‘ཙཀྑུ’’ནྟིཨཱདིནཱ དྭཱརཱརམྨཎེཧི སདྡྷིཾ དྭཱརཔྤཝཏྟཱ དྷམྨཱ དསྶིཏཱ. ཏཐཱདསྶནེ ཀཱརཎཾ ཧེཊྛཱ ཝུཏྟམེཝ.

ཀསྨཱ ¶ པནེཏྠ ཨིམེ དྷམྨརཱསཡོ སཾཁིཏྟཱཏི པཱལི༹ཡཾ ཝིཏྠཱརཏོ ཨཱགཏཏྟཱཏི དསྶེནྟོ ‘‘ཝུཏྟཾ ཧེཏ’’ནྟིཨཱདིམཱཧ. ཏེནེཝཱཧ ‘‘ཏཾ ཏཏྠ…པེ… སཾཁིཏྟ’’ནྟི. ཏཏྠ ཏནྟི ཨབྷིཉྙེཡྻཾ. ཨེཏྠཱཏི ཨབྷིཉྙེཡྻནིདྡེསེ. ‘‘ཝིཉྙཱཎཾ མནོ དྷམྨཱ’’ཏིཨཱདིནཱ ཏཏྠ ཏཏྠ ཀོཊྛཱསེ ཡེ ལོཀུཏྟརདྷམྨཱ ཨཱགཏཱ. ཀེཙི པན ‘‘ཨེཏྠཱཏི པཊིསམྦྷིདཱཡ’’ནྟི ཝདནྟི, ཏཾ ན ¶ སུནྡརཾ. སམྨསནུཔགཱ ཨེཝ ཧི དྷམྨཱ པཊིསམྦྷིདཱཡཾ གཧིཏཱ སམྨསནཝཱརསྶ ཨདྷིཔྤེཏཏྟཱ, ན ཨབྷིཉྙེཡྻནིདྡེསེ (པཊི. མ. ༡.༣; སཾ. ནི. ༤.༤༦) ཝིཡ སབྦེཝ ཨབྷིཉྙེཡྻཱ དྷམྨཱ. ཡེ རཱུཔཱརཱུཔདྷམྨཱ. ཡསྶཱཏི ཡོགིནོ. ཏེསུ ཏེན སམྨསནཾ ཨཱརབྷིཏབྦཾ ཡཐཱཔཱཀཊཾ ཝིཔསྶནཱབྷིནིཝེསོཏི ཀཏྭཱ. པཙྪཱ པན ཨནུཔཊྛཧནྟེཔི ཨུཔཱཡེན ཨུཔཊྛཧཱཔེཏྭཱ ཨནཝསེསཏོཝ སམྨསིཏབྦཱ.

༦༩༥. ‘‘ཨཏཱིཏཾ རཱུཔཾ ཨནིཙྩ’’ནྟིཨཱདིནཱ ཨནིཙྩཏོ སམྨསནསྶ ཨཏཱིཏཱདིཝིབྷཱགཱ པཝཏྟིཊྛཱནབྷཱུཏཱཏི ཨཱཧ ‘‘ཨེཀཱདསཧི ཨོཀཱསེཧཱི’’ཏི. ཝཝཏྠཱཔནཾ ནཱམ སནྣིཊྛཱནཾ. ཨནིཙྩཏོ སནྣིཊྛཱནཉྩེཏྠ ‘‘ཨནིཙྩ’’ནྟི ཝིཔསྶནཱཝཱཏི ཨཱཧ ‘‘ཨནིཙྩནྟི སམྨསཏཱི’’ཏི.

ཀཐནྟི སམྨསནཱཀཱརོ པུཙྪིཏོཏི ཏཾ པརཏོ ཨིདྷེཝ པཱལི༹ཡཾ དུཏིཡཝཱརེ ཝུཏྟནཡེནེཝཱཏི སངྑེཔེནེཝ ཝིསྶཛྫེཏི. ཨིདཱནི ཏམཏྠཾ པཱཀཊཏརཾ ཀཱཏུཾ ‘‘ཝུཏྟཉྷེཏ’’ནྟིཨཱདིམཱཧ. ཏཏྠ ཧཱི-ཏི ཧེཏུཨཏྠེ ནིཔཱཏོ. ཡསྨཱ ‘‘རཱུཔཾ ཨཏཱིཏཱནཱགཏཔཙྩུཔྤནྣཾ ཨནིཙྩཾ ཁཡཊྛེནཱ’’ཏི ཨེཝཾ ཝུཏྟཾ, ཏསྨཱ ཨིམིནཱ ཝུཏྟནཡེན ཨནིཙྩནྟི སམྨསཏཱིཏི ཡོཛནཱ.

ཨེཝམྤི སངྑེཔོཡེཝཱཏི ཝིབྷཛིཏྭཱ དསྶེཏུཾ ‘‘ཨེསཱ’’ཏིཨཱདི ཝུཏྟཾ. ཨཏཱིཏེཏི ཨཏཱིཏེ བྷཝེ. ཨཱདིཀམྨིཀསྶ ཧི ཨིདཾ སམྨསནཝིདྷཱནཾ, ཏསྨཱ བྷཝཝསེན ཨདྡྷཱབྷེདོ ཨདྷིཔྤེཏོ. ཏེནཱཧ ‘‘ནཡིམཾ བྷཝཾ སམྤཏྟནྟཱི’’ཏི. ཨེཏྠ ཨིཏི-སདྡོ ཧེཏུཨཏྠོ. ཨིདཾ ཝུཏྟཾ ཧོཏི – ཡཾ ཨཏཱིཏབྷཝེ པརིཡཱཔནྣཾ རཱུཔཾ, ཏཾ ཨཏཱིཏེཡེཝ བྷཝེ ཁཱིཎཾ, ཏཏོ ན ཨིམཾ བྷཝཾ སམྤཏྟཾ, ཏསྨཱ ཨནིཙྩཾ ཁཡཊྛེན ཁཡསབྷཱཝཏྟཱཏི སམྨསཏཱིཏི. ཨེས ནཡོ ཡཾ ཨནཱགཏནྟིཨཱདཱིསུཔི.

ཡཾ ¶ བཧིདྡྷཱ, ཏམྤི བཧིདྡྷཱ ཨེཝ ཁཱིཡཏི, ན ཨཛ྄ཛྷཏྟབྷཱཝཾ གཙྪཏཱིཏི ཨནིཙྩཾ ཁཡཊྛེནཱཏི, ཡཾ ཨོལཱ༹རིཀཾ, ཏམྤི ཏཏྠེཝ ཁཱིཡཏཱིཏི ཨནིཙྩཾ ཁཡཊྛེནཱཏིཨཱདིནཱ ཡོཛེཏབྦཾ.

ཨིདཾ སབྦམྤཱིཏི ཨིདཾ ཨཏཱིཏཱདིབྷེདསྶ རཱུཔསྶ སམྨསནཏོ སབྦཾ ཨེཀཱདསཝིདྷམྤི སམྨསནཾ ཨེཀཾ སམྨསནཾ ཨནིཙྩཏོ སམྨསནནྟི ཀཏྭཱ.

ཏནྟི ཏཾ ཨེཀཱདསཝིདྷམྤི རཱུཔཾ. སཔྤཊིབྷཡཏཱཡཱཏི བྷཡཱནཀཏཱཡ. བྷཡཱཝཧཾ ཧོཏཱིཏི ཨཔྤཧཱིནཝིཔལླཱསསྶ ¶ ‘‘ཨཧཾ ཝིནསྶཱམི, མམ སནྟཀཾ ཝིནསྶཏཱི’’ཏི ཙིནྟེནྟསྶ བྷཡཛནཀཾ ཧོཏི. སཱིཧོཔམསུཏྟེ དེཝཱནཾ ཝིཡཱཏི སཱིཧོཔམསུཏྟེ དེསིཡམཱནེ དེཝཱནཾ ཝིཡ. ཏཏྠ ཧི –

‘‘ཡདཱ ཏཐཱགཏོ ལོཀེ ཨུཔྤཛྫཏི ཨརཧཾ སམྨཱསམྦུདྡྷོ…པེ… སོ དྷམྨཾ དེསེཏི ‘ཨིཏི རཱུཔཾ, ཨིཏི རཱུཔསྶ སམུདཡོ, ཨིཏི རཱུཔསྶ ཨཏྠངྒམོ. ཨིཏི ཝེདནཱ… ཨིཏི སཉྙཱ… ཨིཏི སངྑཱརཱ… ཨིཏི ཝིཉྙཱཎཾ, ཨིཏི ཝིཉྙཱཎསྶ སམུདཡོ, ཨིཏི ཝིཉྙཱཎསྶ ཨཏྠངྒམོ’ཏི. ཡེཔི ཏེ, བྷིཀྑཝེ, དེཝཱ དཱིགྷཱཡུཀཱ ཝཎྞཝནྟོ སུཁབཧུལཱ ཨུཙྩེསུ ཝིམཱནེསུ ཙིརཊྛིཏིཀཱ, ཏེཔི ཏཐཱགཏསྶ དྷམྨདེསནཾ སུཏྭཱ ཡེབྷུཡྻེན བྷཡཾ སཾཝེགཾ སནྟཱསཾ ཨཱཔཛྫནྟི ‘ཨནིཙྩཱཝ ཀིར བྷོ མཡཾ སམཱནཱ ནིཙྩམྷཱཏི ཨམཉྙིམྷ, ཨདྡྷུཝཱཝ…པེ… ཨསསྶཏཱཝ ཀིར བྷོ མཡཾ སམཱནཱ སསྶཏམྷཱཏི ཨམཉྙིམྷ, མཡམྤི ཀིར བྷོ ཨནིཙྩཱ ཨདྡྷུཝཱ ཨསསྶཏཱ སཀྐཱཡཔརིཡཱཔནྣཱ’’’ཏི (སཾ. ནི. ༣.༧༨; ཨ. ནི. ༤.༣༣) –

ཨེཝཾ དེཝཱནཾ བྷཡུཔྤཏྟི ཨཱགཏཱ.

ཁནྡྷཔཉྩཀཾ, ཏདེཀདེསོ ཝཱ ཨཏྟཝཱདཱིཧི ‘‘ཨཏྟཱ’’ཏི པརིཀཔྤཱིཡཏི, ཏཉྩ ཨེཀནྟཏོ ཨནིཙྩཾ, དུཀྑཉྩཱཏི ཨཱཧ ‘‘ཡཉྷི ཨནིཙྩཾ, ཏཾ དུཀྑ’’ནྟིཨཱདི. ཏཱིསུ དུཀྑཏཱསུ སངྑཱརདུཀྑཏཱཝ བྱཱཔིནཱི, ‘‘ཡདནིཙྩཾ, ཏཾ དུཀྑ’’ནྟི ཙ ཨདྷིཔྤེཏཱཏི ཝུཏྟཾ ‘‘ཨནིཙྩཏཾ ཝཱ ཨུདཡབྦཡཔཊིཔཱིལ༹ནཾ ཝཱ’’ཏི. ཨཏྟཱ ཨབྷཝིསྶཱཏི ‘‘ཀཱརཀོ ཝེདཀོ སཡཾཝསཱི’’ཏི ཨེཝཾབྷཱུཏོ ཨཏྟཱ ཨབྷཝིསྶཱཏི ཨདྷིཔྤཱཡོ. ཨེཝཉྷི སཏི རཱུཔསྶ ཨཱབཱདྷཱཡ སཾཝཏྟནཾ ཨཡུཛྫམཱནཀཾ སིཡཱ. ཡཐཱ རཱུཔཀྑནྡྷེ ཨབྷེདཏོ ཏིཝིདྷཾ སམྨསནཾ, བྷེདཏོ ཏེཏྟིཾསཝིདྷཾ, ཨེཝཾ ཝེདནཱཀྑནྡྷཱདཱིསུཔཱིཏི ཨིམམཏྠཾ ‘‘ཨེས ནཡོ’’ཏི ¶ ཨཏིདིསཏི. ཏེན ཁནྡྷཝསེན ཏཱཝ བྷེདཏོ པཉྩསཊྛིཨདྷིཀཱ སཏཾ སམྨསནཝཱརཱ དསྶིཏཱ ཧོནྟི. ཨིམིནཱ ནཡེན དྭཱརཚཀྐཱདཱིསུཔི ཡཐཱརཧཾ སམྨསནབྷེདོ ཝེདིཏབྦོ.

༦༩༦. ནིཡམཏོ སངྑཏཱདིབྷེདཾ ཧོཏཱིཏི ཨེཀཾསེན སངྑཏཏཱདིཝིསེསཝནྟཾ ཧོཏི ཨསངྑཏཱདིསབྷཱཝེ ཨནིཙྩཏཱཡ ཨསམྦྷཝཏོ. ཨསྶཱཏི ཨནིཙྩསྶ. པརིཡཱཡདསྶནཏྠནྟི ཝེཝཙནདསྶནཏྠཾ, ཏཾ པན ‘‘ཁཡདྷམྨ’’ནྟིཨཱདཱིནཾ ཝསེན ཝེདིཏབྦཾ, ན པུརིམཱནཾ ཏིཎྞཾ. ན ཧི ¶ ཏདེཝ ཏསྶ པརིཡཱཡོ ཧོཏི, ནཱཔི སངྑཏཔཊིཙྩསམུཔྤནྣཔདཱནི ཧུཏྭཱ ཨབྷཱཝདཱིཔནཏོ པཱཀབྷཱཝདཱིཔནཏོ. པཱཀབྷཱཝདཱིཔནེན པན ཨནིཙྩཏཱཡ སཱདྷནཔཀྑེ ཏིཊྛནྟི. ཏེནེཝ ཧི སབྦེསཾ པདཱནཾ པརིཡཱཡཏཱབྷཱཝཏོ ‘‘ནཱནཱཀཱརེཧི ཝཱ’’ཏི ཝིཀཔྤནྟརཾ གཧིཏཾ. མནསིཀཱརཔྤཝཏྟཱིདསྶནཏྠནྟི ཨནིཙྩཏཱཡ ཨུཔབྲཱུཧནམནསིཀཱརཔཝཏྟིདསྶནཏྠཾ.

ཙཏྟཱརཱིསཱཀཱརཨནུཔསྶནཱཀཐཱཝཎྞནཱ

༦༩༧. སོཏི ཡོགཱཝཙརོ. ཏསྶཱཏི ཡཐཱཝུཏྟབྷེདསྶ ཨནིཙྩཏཱདིསམྨསནསྶ. ཐིརབྷཱཝཏྠཱཡཱཏི དལ༹ྷབྷཱཝཏྠཱཡ ཨནིཙྩཱདིཨཱཀཱརསྶ པུནཔྤུནཾ མནསིཀཱརོ ཝིཡ བཧུལཱིཀཱརབྷཱཝཏོ. ཡཾ ཏཾ བྷགཝཏཱ ཨེཏསྶ ཝིབྷངྒེ ཨནིཙྩཱདིསམྨསནཾ ཝུཏྟནྟི སམྦནྡྷོ. ཨནུལོམིཀནྟི ཨརིཡམགྒཱདྷིགམསྶ ཨནུཀཱུལཾ. ཁནྟིནྟི ཉཱཎཁནྟིཾ. ཉཱཎཉྷི ཝིསཡསབྷཱཝཾ ཨོགཱཧེཏྭཱ ཝཝཏྠཱནེ ཁམཏི སཧཏཱིཏི ཁནྟཱིཏི ཝུཙྩཏི. སམྨཏྟནིཡཱམནྟི ཨརིཡམགྒཾ. སོ ཧི སམྨཱདིཊྛིཨཱདིསམྨཏྟཉྩེཝ ཨནིཝཏྟིདྷམྨཏཱཡ ནིཡཱམོ ཙཱཏི ཝུཙྩཏི. ‘‘ཨཱདིནཱ ནཡེནཱ’’ཏི ཨིམིནཱ ‘‘པཉྩཀྑནྡྷེ དུཀྑཏོ པསྶནྟོ ཨནུལོམིཀཾ ཁནྟིཾ པཊིལབྷཏི, ཁནྡྷཱནཾ ནིརོདྷོ སུཁཾ ནིབྦཱནནྟི པསྶནྟོ སམྨཏྟནིཡཱམཾ ཨོཀྐམཏཱི’’ཏི (པཊི. མ. ༣.༣༨) ཨེཝམཱདིཀོ པཱཋསེསོ རོགཱདིཔཊིཔཀྑཡོཛནཱཝསེན ཝིཏྠཱརེཏབྦོ. ‘‘ཁནྡྷཱནཾ ནིརོདྷོ ནིཙྩཾ ནིབྦཱན’’ནྟི ཝཙནེན སངྑཱརཱནཾ དུཀྑརོགཏཱདིཔཊིཔཀྑོ ནིབྦཱནསྶ སུཁཱརོགྱཱདིབྷཱཝོ ‘‘ཨཱདིནཱ ནཡེནཱ’’ཏི ཨེཏྠ ནཡགྒཧཎེན དཱིཔིཏོཏི. ཨཝསེསོ སབྦོ པཱཋོ པཀཱསིཏོ ཨེཝ ཧོཏཱིཏི.

ཀཱམཉྩེཏཾ ¶ ཙཏྟཱརཱིསཱཡ ཨཱཀཱརེཧི སམྨསནཾ ཨནུལོམཉཱཎེ བྷཱཝེཏབྦཝིདྷཱནཾ. ཏེནཱཧ ‘‘ཨནུལོམཉཱཎཾ ཝིབྷཛནྟེན…པེ… ཝུཏྟ’’ནྟི, ཨིཏོ པཊྛཱཡ པན ཀཏཔརིཙཡསྶེཝ ཀིཙྩཱཝཧཾ ཧོཏཱིཏི ཨིདྷཱཔི ཝུཏྟནྟཱིཏི དཊྛབྦཾ. ཏསྶཱཔཱིཏི ན ཀེཝལཾ ཀལཱཔསམྨསནསྶེཝ, ཨཐ ཁོ ཡཐཱདསྶིཏསྶ ཙཏྟཱལཱིསཔྤབྷེདསྶ ཨནིཙྩཱདིསམྨསནསྶཔི. ཏཉྷི ཨནུལོམིཀཁནྟིཔཊིལཱབྷཱཡ, སམྨཏྟནིཡཱམོཀྐམནཱཡ ཙ སཾཝཏྟནཏོ ཨེཀཾསཏོ ཨིཙྪིཏབྦཾ. ཝུཏྟཉྷི –

‘‘སོ ཝཏ, བྷིཀྑཝེ, བྷིཀྑུ ཀཉྩི སངྑཱརཾ ནིཙྩཏོ སམནུཔསྶནྟོ ཨནུལོམིཀཱཡ ཁནྟིཡཱ སམནྣཱགཏོ བྷཝིསྶཏཱིཏི ནེཏཾ ཋཱནཾ ཝིཛྫཏི, ཨནུལོམིཀཱཡ ཁནྟིཡཱ ¶ ཨསམནྣཱགཏོ སམྨཏྟནིཡཱམཾ ཨོཀྐམིསྶཏཱིཏི ནེཏཾ ཋཱནཾ ཝིཛྫཏི, སམྨཏྟནིཡཱམཾ ཨནོཀྐམམཱནོ སོཏཱཔཏྟིཕལཾ ཝཱ…པེ… ཨརཧཏྟཾ ཝཱ སཙྪིཀརིསྶཏཱིཏི ནེཏཾ ཋཱནཾ ཝིཛྫཏི. སོ ཝཏ, བྷིཀྑཝེ, བྷིཀྑུ སབྦསངྑཱརེ ཨནིཙྩཏོ སམནུཔསྶནྟོ’’ཏི (ཨ. ནི. ༦.༩༨; པཊི. མ. ༣.༣༦) –

ཨཱདི སུཀྐཔཀྑོ ཝིཏྠཱརེཏབྦོ. ཏཐཱ ‘‘སོ ཝཏ, བྷིཀྑཝེ, བྷིཀྑུ ཀཉྩི སངྑཱརཾ སུཁཏོ, དུཀྑཏོ, ཀཉྩི དྷམྨཾ ཨཏྟཏོ, ཨནཏྟཏོ’’ཏི (པཊི. མ. ༣.༣༦) ཝིཏྠཱརེཏབྦོ.

༦༩༨. ཨེཀེཀཾ ཁནྡྷཾ ཨནིཙྩཱདིསམྨསནསྶ ཝསེན སམྨསཏཱིཏི སམྦནྡྷོ. ཏསྶ པན སམྨསནསྶ པཉྩནྣཾ ཁནྡྷཱནཾ སཱདྷཱརཎཏཱཡ ‘‘ཨེཀེཀཾ ཁནྡྷ’’ནྟི ཝུཏྟཾ. ཨནཙྩནྟིཀཏཱཡཱཏི ཨཙྩནྟིཀཏཱབྷཱཝཏོ, ཨསསྶཏཏཱཡཱཏི ཨཏྠོ. སསྶཏཉྷི ཨཙྩནྟིཀཾ པརཱཡ ཀོཊིཡཱ ཨབྷཱཝཏོ. ཨཱདིཨནྟཝནྟཏཱཡཱཏི པུབྦཱཔརཀོཊིཝནྟཏཱཡ, ཨུདཡབྦཡདྷམྨཏོཏི ཨཏྠོ. ཨནིཙྩཏོ སམྨསཏཱིཏི སམྦནྡྷོ. ཨེས ནཡོ སབྦཏྠ.

ཨནིཙྩཏོཏི ཙ ཨདྡྷུཝཏོ. ཨེཏཉྷི ན ནིཙྩཾ, ཁཎིཀཏཱཡ ཨསདཱབྷཱཝིཏཱཡ ཝཱ ན ཨིཙྩཾ ན ཨུཔགནྟབྦནྟི ཨནིཙྩཾ. ཨུཔྤཱདཝཡཔཊིཔཱིལ༹ནཏཱཡཱཏི ཨུཔྤཱདེན, ཝཡེན ཙ པཏི པཏི ཁཎེ ཁཎེ ཏཾསམངྒིནོ ཝིབཱདྷནསབྷཱཝཏྟཱ, ཏེཧི ཝཱ སཡམེཝ ཝིབཱདྷེཏབྦཏྟཱ. ཨུདཡབྦཡཝནྟོ ཧི དྷམྨཱ ཨབྷིཎྷཾ ཏེཧི པཊིཔཱིལི༹ཏཱ ཨེཝ ཧོནྟི, ཡཱ པཱིལ༹ནཱ ‘‘སངྑཱརདུཀྑཏཱ’’ཏི ཝུཙྩཏི. དུཀྑཝཏྠུཏཱཡཱཏི ¶ ཏིཝིདྷསྶཱཔི དུཀྑསྶ, སཾསཱརདུཀྑསྶ ཙ ཨདྷིཊྛཱནབྷཱཝཏོ. པཙྩཡཡཱཔནཱིཡཏཱཡཱཏི ཡཐཱརཧཾ པཙྩཡེཧི ཡཱཔེཏབྦཏཱཡ. རོགམཱུལཏཱཡཱཏི མཱུལབྱཱདྷི ཝིཡ ཨནུབནྡྷབྱཱདྷཱིནཾ མཱུལབྷཱཝཏོ, པདདྭཡེནཱཔི ཡཱཔྱརོགསདིསཏོཏི དསྶེཏི. ཡཱཔྱབྱཱདྷི ཧི རོགོ ཨིཏརོ ཨཱབཱདྷོཏི. དུཀྑཏཱསཱུལཡོགིཏཱཡཱཏི ཏིཝིདྷདུཀྑཏཱསངྑཱཏེན རུཛྫནེན ཡུཛྫཏཱཡ. ཀིལེསཱསུཙིཔགྒྷརཎཏཱཡཱཏི ཡཐཱརཧམཱརམྨཎཝསེན, སམནྣཱགམཝསེན ཙ རཱགཱདིཀིལེསཱསུཙིཝིསྶནྡནཏོ. ཨཧུཏྭཱ སམྦྷཝཏོ ཨུཔྤཏྟིཡཱ ཨུདྡྷུམཱཏཏཱ.

ཨནྟོཏུདནཏཱཡཱཏི ཨབྦྷནྟརེ ཏུདནཏོ. དུཀྑཝེདནཱདཡོ ཝིཡ ཧི ཨིམེ སངྑཱརཱ ཨཏྟབྷཱཝསྶ ཨབྦྷནྟརགཏཱ ཨེཝ ཨུདཡབྦཡཝསེན ཏུདནྟི. ཨརིཡམགྒསཎྜཱསེན ཝིནཱ ནཱིཧརིཏུཾ ཨསཀྐུཎེཡྻཏཱཡ དུནྣཱིཧརཎཱིཡཏཱ ཏཎྷཱདིཊྛཱབྷིནིཝེསདལ༹ྷབྷཱཝཏོ. ཨགྷནྟི པཱཔཾ ཝིཡ ཨརིཡཛནེཧི ¶ ཝིགརཧིཏབྦཾ. སཏྟཱནཾ ཨནཏྠཛནནཏོ ཨཝཌྜྷིཨཱཝཧཾ, པཱཔསྶ ཙ ཝཏྠུབྷཱུཏཾ ཁནྡྷཔཉྩཀནྟི ཨཱཧ ‘‘ཝིགརཧ…པེ… ཨགྷཏོ’’ཏི. ཨསེརིབྷཱཝཛནཀཏཱཡཱཏི པརཝསཏཱཛནནཏོ. ཡཐཱ གིལཱནོ ཨཉྙེཧི སཾཝེསནཝུཊྛཱཔནཱདིནཱ པརཔཊིབདྡྷསརཱིརཝུཏྟིཀོ ཨསེརཱི, ཨེཝམེཏེཔི ཨསེརིབྷཱཝཛནཀཱ. ཨཝསཏཱཡཱཏི ཨཝསཝཏྟནཏོ. ཡཐཱ པརོསཏནྟོ པུརིསོ པརསྶ ཝསཾ ན གཙྪཏི, ཨེཝཾ སུབྷསུཁཱདིབྷཱཝེན ཝསེ ཝཏྟེཏུཾ ཨསཀྐུཎེཡྻཏོ. ཨཝིདྷེཡྻཏཱཡཱཏི ‘‘མཱ ཛཱིརཐ, མཱ མཱིཡཐཱ’’ཏིཨཱདིནཱ ཝིདྷཱཏུཾ ཨསཀྐུཎེཡྻཏོ. པལུཛྫནཏཱཡཱཏི བྱཱདྷིཨཱདཱིཧི པཀཱརེཧི ཚིཛྫནཏོ ཝིནསྶནཏོ. ཏེཧི ཨེཝ ཝཱ ཨཱབྱསནཏོ. བྱསནཏྠོ ཧི ལོཀསདྡོ, པསདྡོ བྷུསཏྠོ དཊྛབྦོ. བྱཱདྷིཨཱདཱིཧི ཙ ཁནྡྷཱནཾ བྱསནནྟི. བྱསནཱཝཧབྷཱཝེན ཨེཏཱིཏི ཨཱིཏི, ཨཱགནྟུཀཱནཾ ཨཀུསལཔཀྑིཡཱནཾ བྱསནཧེཏཱུནཾ ཨེཏཾ ཨདྷིཝཙནཾ. ཁནྡྷཱ ཙ ཨེདིསཱཏི ཨཱཧ ‘‘ཨནེཀབྱསནཱཝཧཏཱཡ ཨཱིཏིཏོ’’ཏི.

ཨུཔདྡཝཏཱིཏི ཨུཔདྡཝོ, ཨནཏྠཾ ཛནེནྟོ ཨབྷིབྷཝཏི ཨཛ྄ཛྷོཏྠརཏཱིཏི ཨཏྠོ, རཱཛདཎྜཱདཱིནཾ ཨེཏཾ ཨདྷིཝཙནཾ. ཁནྡྷཱ ཙ ཨེདིསཱཏི ཝུཏྟཾ ‘‘ཨཝིདིཏཱནཾ…པེ… ཨུཔདྡཝཏོ’’ཏི. དིཊྛདྷམྨིཀསམྤརཱཡིཀབྷཡཱཝཧཏོ, ཨབྷཡཔཊིཔཀྑཏོ ཙ ཁནྡྷཱ བྷཡནྟི ཨཱཧ ‘‘སབྦབྷཡཱནཾ…པེ… བྷཡཏོ’’ཏི. བཧིདྡྷཱ ཉཱཏིབྱསནཱདཱིཧི, ཨཛ྄ཛྷཏྟཾ རཱགཱདཱིཧི ཨནཏྠེཧི ཨུཔསཛྫནཊྛེན, ཨུཔསགྒསདིསཏཱཡ ¶ ཙ ཨུཔསགྒོ. ཨུཔསགྒོཏི ཙ དེཝཏཱུཔསཾཧཱརཝསེན པཝཏྟོ བྱཱདྷིཨཱདིཨནཏྠོ. སོ ཨཏྠཀཱམེན མུཧུཏྟམྤི ན ཨཛ྄ཛྷུཔེཀྑིཏབྦོ ཧོཏི. ཏེན ཝུཏྟཾ ‘‘ཨནེཀེཧི…པེ… ཨུཔསགྒཏོ’’ཏི. དོསཱུཔསཊྛཏཱཡཱཏི ཨཱརམྨཎཏོ, སམྤཡོགཏོ ཙ རཱགཱདིདོསེཧི ཨུཔེཏཏཱཡ. ལོཀདྷམྨཱ ལཱབྷཱདིཧེཏུཀཱ ཨནུནཡཔཊིགྷཱ, ཏེཧི, བྱཱདྷིཨཱདཱིཧི ཙ ཨནཝཊྛིཏཏཱ པཙལིཏཏཱ.

ཨུཔཀྐམེནཱཏི ཨཏྟནོ, པརསྶ ཝཱ པཡོགེན. སརསེནཱཏི སབྷཱཝེན. པབྷངྒུཔགམནསཱིལཏཱ བྷིདུརཏཱ. སབྦཱཝཏྠནིཔཱཏིཏཱཡཱཏི རུཀྑཕལཾ ཝིཡ ཨཏིཏརུཎཀཱལཏོ པཊྛཱཡ སབྦཱསུ ཨཝཏྠཱསུ ནིཔཏནསཱིལཏཱཡ. ཨནིཔཏསྶཔི སབྦེན སབྦཾ ཨསཱརཏཱཡ ཐིརབྷཱཝསྶ ཨབྷཱཝཏཱཡ. ཐིརཉྷི དྷུཝཾ ནཱམ ཧོཏི. ཏཱཡིཏུཾ རཀྑིཏུཾ ཨསམཏྠཏཱཡ ན ཏཱཡནོཏི ཨཏཱཡནོ, ཏབྦྷཱཝོ ཨཏཱཡནཏཱ. ཏཱཎཱསཱིསཱཡ ཨུཔགཏསྶ ཨལབྦྷནེཡྻཁེམཏཱ. དུཀྑབྷཱིཏིཡཱ ཨུཔལཱིཡནཱདྷིཔྤཱཡེན ཨལླཱིཡིཏུཾ. དུཀྑནིཝཏྟནཾ ལེཎཀིཙྩཾ. ཛཱཏིཨཱདིབྷཡཱནཾ ཧིཾསནཾ ཝིདྷམནཾ བྷཡསཱརཀཏྟཾ. ཡཐཱཔརིཀཔྤིཏེཧཱིཏི པརམཏྠཏོ ཨཝིཛྫམཱནེཧི བཱལེཧི པརིཀཔྤིཏཔྤཀཱརེཧི. རིཏྟཏཱཡཱཏི ཝིཝིཏྟཏཱཡ, ཝིརཧིཏཏཱཡཱཏི ¶ ཨཏྠོ. ཨནྟོསཱརཱབྷཱཝོ རིཏྟཏཱ. སཱ ཨེཝ ཙ ཏུཙྪཏཱཏི ཨཱཧ ‘‘རིཏྟཏཱཡེཝ ཏུཙྪཏོ’’ཏི. ཨཔྤཀཏྟཱཏི པརིཏྟཏྟཱ, ལཱམཀཏྟཱ ཝཱ. དྷུཝསཱརཱབྷཱཝཱདཱིཧི སདྡྷིཾ ཨཏྟསཱརཱབྷཱཝཾ རིཏྟཔདེན ཝཏྭཱ ནིབྦཏྟིཏམཏྟསཱརཱབྷཱཝམེཝ སུཉྙཔདེན དསྶེཏུཾ ‘‘སཱམི…པེ… སུཉྙཏོ’’ཏི ཝུཏྟཾ. ཡཐཱ ཀེནཙི སཱམིཨཱདིལཀྑཎེན ཨཏྟནཱ སུཉྙཱ ཨེཏེ, ཨེཝཾ སཡམྤི ཨཏཾསབྷཱཝོཏི ཨཱཧ ‘‘སཡཉྩ…པེ… ཨནཏྟཏོ’’ཏི. ན ཨཏྟཱཏི ཧི ཨནཏྟཱཏི.