📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

པརམཏྠདཱིཔནཱི

སངྒཧ མཧཱཊཱིཀཱ པཱཋ

གནྠཱརབྦྷཀཐཱ

[ཀ]

ཨུདཡཱ ¶ ཡསྶ ཨེཀསྶ, སདྡྷམྨརཾསི ཛཱལིནོ;

པབུཛ྄ཛྷིཾསུ ཛནམྦུཛཱ, ཛཱཏིཀྑེཏྟེ མཧཱསརེ.

[ཁ]

ཝནྡཱམི ཏཾ མཧཱསཱུརཾ, མཧཱམོཧ ཏམོནུདཾ;

སཉྫཱཏཾ སོ ཧདཡེ མཡ྄ཧཾ, ཏམོཁནྡྷཾ པནཱུདཏཾ.

[ག]

པོརཱཎཀེཧི ཝིཉྙཱུཧི, ཝཎྞིཏཱ ཝཎྞནཱ བཧཱུ;

དིསྶནྟི ཨིདྷ ལོཀམྷི, ཨབྷིདྷམྨཏྠསངྒཧེ.

[གྷ]

ན ཏཱཧི ཏུཊྛིཾ ཝིནྡནྟི, ཡེ སཱརཏྠཱ བྷིམཱནིནོ;

ཏེ མཾ སངྒམྨ ཡཱཙནྟི, པརམཏྠསྶ དཱིཔནཾ.

[ང]

མཧཎྞཝེ རཏནཱནི, ཨུདྡྷརིཏྭཱ དིཔཝཱསིནཾ;

ཡཐིཙྪཀཾཔི དཛྫེཡྻུཾ, ན ཝཏྟབྦཱཝ ཨཱུནཏཱ.

[ཙ]

ཏཐེཝེཏྠ ¶ ཝིཔུལཏྠཱ, ཨཎྞཝེ རཏནཱུཔམཱ;

སཏཀྑཏྟུཾཔི ཝཎྞེཡྻུཾ, པརིཡཱདིནྣཱ ན ཧེསྶརེ.

[ཚ]

ཏསྨཱ ཏཱསུ ཝཎྞནཱསུ, སཱརམཱདཱཡ ཝཎྞནཾ;

ནཱནཱསཱརཏྠ སམྤུཎྞཾ, ཨུཏྟཱན པདབྱཉྫནཾ.

[ཛ]

ནཱཏིསངྑེཔ ཝིཏྠཱརཾ, མནྡབུདྡྷིཔྤབོདྷནཾ;

ཀརིསྶཾ ཏཾ པརམཏྠེསུ, སུཎནྟུ པཱཊཝཏྠིནོཏི.

པཐམགཱཐཱ-པརམཏྠདཱིཔནཱི

༡. ཨབྷིདྷམྨཏྠསངྒཧཾ ཀཏྟུཀཱམོ ཨནུརུདྡྷཏྠེརོ སངྒཧཱརབྦྷེ ཏཱཝ སཔྤཡོཛནེ པཉྩཔིཎྜཏྠེ དསྶེནྟོ ཨཱདིགཱཐ མཱཧ. པཉྩཔིཎྜཏྠཱནཱམ རཏནཏྟཡཝནྡནཱ, གནྠཱབྷིདྷེཡྻོ, གནྠཔྤཀཱརོ, གནྠཱབྷིདྷཱནཾ, གནྠཔྤཡོཛནཾ. ཏཏྠ ཏཱིསུ རཏནེསུ ནིཔྤཙྩཀཱརཀརཎཾ རཏནཏྟཡཝནྡནཱནཱམ. སཱ སམྨཱསམྦུདྡྷམཏུལཾ སསདྡྷམྨགཎུཏྟམཾ ཨབྷིཝཱདིཡཱཏི ཨེཏེཧི པདེཧི དསྶིཏཱ. སཀལེན གནྠེན ཨབྷིཧིཏཱ པདྷཱནཏྠབྷཱུཏཱ ཙཏྟཱརོ ཨབྷིདྷམྨཏྠཱ གནྠཱབྷིདྷེཡྻོ. སོ ཨབྷིདྷམྨཏྠསངྒཧནྟིཔདེ ཨབྷིདྷམྨཏྠ སདྡེན དསྶིཏོ.

[༡] ཝིབྷཱཝནིཡཾ པན

སངྒཧིཏབྷཱཝོཔི ཨབྷིདྷེཡྻོཡེཝཱཏི ཀཏྭཱ ཨབྷིདྷེཡྻོ ཨབྷིདྷམྨཏྠསངྒཧཔདེན དསྶིཏོཏིཝུཏྟཾ. ཏཾ ན སུནྡརཾ.

ན ཧི སོ ཨཔྤདྷཱནཏྠབྷཱུཏོ སངྒཧིཏབྷཱཝོ ཨིམསྨིཾ པིཎྜཏྠདསྶནེ ཨབྷིདྷེཡྻོ ནཱམ བྷཝིཏུཾ ཡུཏྟོཏི. ཨིཏོ པཊྛཱཡཙ ཊཱིཀཱཡནྟི ཝུཏྟེ ཨིམསྶ སངྒཧསྶ དྭཱིསུ སཱིཧལ༹ཊཱིཀཱསུ པཐམཱཊཱིཀཱ དཊྛབྦཱ. ཝིབྷཱཝནིཡནྟི ཝུཏྟེ ཨེཏརཧི པཱཀཊཱ དུཏཱིཡཱ. ཊཱིཀཱསཱུཏི ཝུཏྟེ དྭེཔི. མཧཱཊཱིཀཱཡནྟི ཝུཏྟེ ཝིསུདྡྷིམགྒེ མཧཱཊཱིཀཱ དཊྛབྦཱ. ཡཉྩ ཝཙནཾ ཝིབྷཱཝནིཡཾཔི ཨཱགཏཾ, ཨཉྙཏྠཱཔི ཨཱགཏཾ, ཏཾཔི ཨིདྷ ཝིབྷཱཝནིཡཾཏྭེཝ ཝུཙྩཏི ཨཱསནྣཏྟཱཏི. སབྷཱགདྷམྨསངྒཧཝསེན གནྠཝིདྷཱནཱཀཱརོ གནྠཔྤཀཱརོ. སོ པན སངྒཧ སདྡེན དསྶིཏོ.

[༢] ཝིབྷཱཝནིཡཾ པན

ཨབྷིདྷམྨཏྠསངྒཧཔདེནཱཏི ¶ ཝུཏྟཾ. ཏཾ ན སུནྡརཾ.

ན ཧི ཨབྷིདྷམྨཏྠསདྡོ གནྠཝིདྷཱནཱཀཱརཾ དཱིཔེཏཱིཏི. ཨཏྠཱ ནུགཏཱ གནྠསམཉྙཱ ཝནྠཱབྷིདྷཱནཾ. ཏཾ ཨབྷིདྷམྨཏྠ སངྒཧཔདེན དསྶིཏཾ. སངྒཧགནྠེ ཀཏེ སཏི ཏདུགྒཧཔརིཔུཙྪཱདིཝསེན ཨནཱཡཱསཏོ ལདྡྷབྦཾ དྷམྨཱནཾ སརཱུཔཱཝབོདྷཱདིཀཾ ཨནུཔཱདཱཔརིནིབྦཱནནྟཾ གནྠསྶ ཕལཱནུཕལཾ གནྠཔྤཡོཛནཾ ཏཾཔི ཨབྷིདྷམྨཏྠསངྒཧཔདེནེཝ སཱམཏྠིཡཏོ དསྶིཏཾ.

[༣] ཝིབྷཱཝནིཡཾ པན

སངྒཧསདྡེནཱཏི ཝུཏྟཾ. ཏཾ ན སུནྡརཾ.

ན ཧི ཨབྷིདྷམྨཏྠསདྡེན ཝིནཱ ཨནཱཡཱསཏོ སཾསིདྡྷིམཏྟདཱིཔཀེན སངྒཧསདྡམཏྟེན ཏཱདིསོ ཨནུཔཱདཱཔརིནིབྦཱནནྟོ པཡོ ཛནཝིསེསོ སཀྐཱ ཝིཉྙཱཏུཾ, ཨསདྡྷམྨ སངྒཧཱནཾཔི ལོཀེ སནྡིསྶནཏོཏི.

༢. ཏཏྠ རཏནཏྟཡཝནྡནཱ ཏཱཝ ཨསངྑེཡྻཨཔྤམེཡྻཔྤཡོཛནཱ ཧོཏི. ཡཐཱཧ –

ཏེ ཏཱདིསེ པཱུཛཡཏོ, ནིབྦུཏེ ཨཀུཏོ བྷཡེ;

ན སཀྐཱ པུཉྙཾ སངྑཱཏུཾ, ཡམེཏྠ མཔི ཀེནཙཱིཏི.

ཡ མེཏྠམཔཱིཏིཨེཏྠ ཡེནཀེནཙི ཨཔི མནུསྶེནཝཱ དེཝེནཝཱ བྲཧྨུནཱཝཱ སངྑཱཏུཾ ན སཀྐཱཏི ཡོཛནཱ. ཊཱིཀཱཀཱརཱཔི ཏཾ པཡོཛནཾ ཏཏྠ ཏཏྠ བཧུདྷཱ པཔཉྩེནྟི. སངྒཧཀཱརཱ པན ཨནྟརཱཡནཱིཝཱརཎམེཝ ཝིསེསཏོ པཙྩཱསཱིསནྟི. སངྒཧཀཱརཱ ཏིཙ བུདྡྷགྷོསཏྠེརཱདཡོ ཨཊྛཀཐཱཙརིཡཱ ཝུཙྩནྟི.

ནིཔྤཙྩཀཱརསྶེཏསྶ,

ཀཏསྶ རཏནཏྟཡེ;

ཨཱནུབྷཱཝེན སོསེཏྭཱ,

ཨནྟརཱཡེ ཨསེསཏོཏི ཧི ཝུཏྟཾ.

༣. ཀཐཉྩ ¶ རཏནཏྟཡཝནྡནཱཡ ཨནྟརཱཡནཱིཝཱརཎཾ ཧོཏཱིཏི. ཝུཙྩཏེ-རཏནཏྟཡཝནྡནཱ ཧི ནཱམ ཝནྡནཱཀིརིཡཱབྷིནིཔྥཱདཀོ སཏྟཀྑཏྟུཾ སཏྟཀྑཏྟུཾ ཨནེཀཀོཊིསཏསཧསྶཝཱརེ པཝཏྟམཱནོ མཧནྟོ པུཉྙཱབྷིསནྡོ པུཉྙཔྤཝཱཧོ. སོ ཙ ཨནུཏྟརེསུ བུདྡྷཱདཱིསུ པུཉྙཀྑེཏྟེསུ སཾཝཌྜྷིཏཏྟཱ ཐེརསྶ ཙ ཨུལཱ༹རཙྪནྡསདྡྷཱབུདྡྷིགུཎེཧི པརིབྷཱཝིཏཏྟཱ མཧཱཛུཏིཀོ མཧཔྥལོ མཧཱནིསཾསོ ཙ པུཉྙཱཏིསཡོ ཧོཏི. སོ སཡཾ པཡོགསམྤཏྟིབྷཱཝེ ཋཏྭཱ བཧིདྡྷཱ ཝིཔཏྟིཔཙྩཡེ ཨཔནེཏྭཱ སམྤཏྟིཔཙྩཡེ ཨུཔནེཏྭཱ ཨཏིཔཎཱིཏཨུཏུཙིཏྟཱཧཱར སམུཊྛིཏཱནཾ སརཱིརཊྛཀདྷཱཏཱུནཾ ཨུཔབྲཱུཧནཾ ཀཏྭཱ པཊིསནྡྷིཏོ པཊྛཱཡ ལདྡྷོ ཀཱསསྶ ཛནཀཀམྨསྶ ཨནུབལཾ དེཏི. ཨལདྡྷོཀཱསསྶ ཙ པུཉྙནྟརསྶ ཨོཀཱསལཱབྷཾ ཀརོཏི. ཨཐ ལདྡྷཱནུབལེན ལདྡྷོ ཀཱསེན ཙ ཏདུབྷཡེན པུཉྙེན ནིབྦཏྟཱ རཱུཔཱརཱུཔསནྟཏིཡོ ཐེརསནྟཱནེ ཡམཀམཧཱནདིཡོ ཝིཡ བལཝབལཝནྟི ཡོ ཧུཏྭཱ པཝཏྟནྟི. ཏདཱ ཏསྨིཾ ཨིཊྛཕལགྷནཔརིཔཱུརིཏེ ཐེརསནྟཱནེ ཨནིཊྛཕལབྷཱུཏཱནཾ རོགཱདི ཨནྟརཱཡཱནཾ ཨུཔྤཏྟིཡཱ ཨོཀཱསོ ནཱམ ནཏྠཱིཏི ཨིཊྛཕལསནྟཱནཝིབཱདྷཀཱནི ཨནིཊྛཕལསནྟཱནཛནཀཱནི ཙ ཨཔུཉྙཀམྨཱནི དཱུརཏོ ཨཔནཱིཏཱནེཝ ཧོནྟི. ན ཧི ཀམྨཱནིནཱམ པུཉྙཱནི ཨཔུཉྙཱནི ཙ ཨཏྟནོ ཝིཔཱཀུཔྤཏྟིཡཱ ཨོཀཱསེ ཨསཏི ཝིཔཙྩནྟཱིཏི. ཏཏོ ཏསྨིཾ སནྟཱནེ ཨཱཡུཝཎྞཱ དཡོ ཨིཊྛཕལདྷམྨཱ ཡཱཝ གནྠནིཊྛཱནཱ ཡཱཝ ཨཱཡུཀཔྤཔརིཡོ སཱནཱཔི ཝཱ ཝཌྜྷནཔཀྑེ ཋཏྭཱ པཝཏྟནྟི. ཡཐཱཧ –

ཨབྷི ཝཱདནསཱིལིསྶ, ནིཙྩཾ ཝུཌྜྷཱཔཙཱཡིནོ;

ཙཏྟཱརོ དྷམྨཱ ཝཌྜྷནྟི, ཨཱཡུཝཎྞོ སུཁཾ བལནྟི.

ཨེཝཾ ཏཱཡ ཝནྡནཱཡ ཨནྟརཱཡནཱིཝཱརཎཾ ཧོཏཱིཏི. ཏསྨཱ སངྒཧཱརབྦྷེ རཏནཏྟཡཝནྡནཱཀརཎཾ ཐེརསྶ ཨཏྟནཱ ཨཱརབྦྷ མཱནསངྒཧསྶ ཨནནྟརཱཡེན པརིསམཱཔནུཏྠཾ. ན ཀེཝལཉྩ ཐེརསྶེཝ, སོཏཱུནཉྩ སངྒཧཾ གཎྷནྟཱནཾ ཨཱདིམྷིཡེཝ རཏནཏྟཡ ཝནྡནཱ སིདྡྷིཏོ ཨནནྟརཱཡེན གཧཎ ཀིཙྩསམྤཛྫནཏྠནྟི.

[༤] ཝིབྷཱཝནིཡཾ པན

སཏྟསུ ¶ ཛཝནེསུ པཐམཛཝན ཝསེནེཝ ཝནྡནཱ པཡོཛནཾ ཝིབྷཱཝིཏཾ ཝིཡ དིསྶཏི. ‘‘དིཊྛདྷམྨཝེདནཱིཡབྷཱུཏཱ’’ཏི ཧི ཏཏྠ ཝུཏྟཾ. ཏཾ ན སུནྡརཾ.

ཨུཔཏྠམྦྷནཀིཙྩསྶེཝ ཨིདྷ ཨདྷིཔྤེཏཏྟཱ. ཏསྶ ཙ སཏྟསུཔི ཛཝནེསུ ཨུཔལདྡྷཏྟཱཏི. ཡཐཱ ཧི ཨཱཧཱརརཱུཔསྶ དྭཱིསུ ཀིཙྩེསུ ཨོཛཊྛམཀརཱུཔཛནནཀིཙྩཾ པརིཏྟཀཾ ཨཔྤམཏྟཀཾ ཧོཏི. ཙཏུསྶནྟ ཏིརཱུཔུཔཏྠམྦྷནཀིཙྩམེཝ མཧནྟཾ ཨདྷིམཏྟཾ. ཏཐཱཧི པཊྛཱནེཔི ཏདུཔཏྠམྦྷནཀིཙྩམེཝ གཧེཏྭཱ ཀབལཱི༹ཀཱརོ ཨཱཧཱརོ ཨིམསྶ ཀཱཡསྶ ཨཱཧཱརཔཙྩཡེན པཙྩཡོཏི ཝིབྷངྒཝཱརོ ཝིབྷཏྟོ. ཨེཝམེཝཾ ཨིདྷཔི པཐམཛཝནསྶ ཨཝུནཱཝ ཝིཔཱཀཛནནཀིཙྩཾ པརིཏྟཀཾ ཨཔྤམཏྟཀཾ ཧོཏི. ཨཧེཏུཀཝིཔཱཀམཏྟཾ ཛནེཏཱིཏི ཨཊྛཀཐཱསུ ཝུཏྟཾ. ཀམྨནྟརུཔཏྠམྦྷནཀིཙྩམེཝ མཧནྟཾ ཨདྷིམཏྟཾ. ཏཉྩ སཏྟསུཔི ཛཝནེསུ ཨུཔལབྦྷཏི ཡེཝཱཏི. ཡསྨཱ པན གནྠཱབྷིདྷེཡྻེ གནྠཔྤཀཱརེ གནྠཔྤཡོཛནེ ཙ ཨཱདིཏོ ཝིཝིཏེསཏི སོཏུ ཛནཱནཾ གནྠསྶཝནེ ཨུསྶཱཧོ ཛཱཡཏི. ཏསྨཱ ཏེསཾ གནྠཱ བྷིདྷེཡྻཱདཱིནཾ དསྶནཾ གནྠེ ཨུསྶཱཧཛནནཏྠཾ. གནྠཱབྷིདྷཱནདསྶནཾ ཝོཧཱརསུཁཏྠནྟི. ཨིདམེཏྠ པིཎྜཏྠདསྶནཾ.

༤. ཨཡཾ པན པདཏྠོ. སམྨཱཙ བུཛ྄ཛྷི སཱམཉྩ བུཛ྄ཛྷཱིཏི སམྨཱ སམྦུདྡྷོ. ཨེཏྠ ཙ སམྨཱསདྡོ ཨཝིཔརཱིཏཏྠེ ནིཔཱཏོ. སོ བུཛ྄ཛྷིཏབྦེསུ ཉེཡྻདྷམྨེསུ བུཛ྄ཛྷནཀྲིཡཱཡ ཨསེསབྱཱཝིབྷཱཝཾ དཱིཔེཏི. ཏཐཱཧི པདེསཉཱཎེ ཋིཏཱ པཙྩེཀབུདྡྷཱདཡོ ཨཏྟནོ ཝིསཡེ ཨེཝ ཨཝིཔརཱིཏཾ བུཛ྄ཛྷནྟི. ཨཝིསཡེ པན ཨནྡྷཀཱརེ པཝིཊྛཱཝིཡ ཧོནྟཱིཏི ཨཊྛཀཐཱཡཾ ཝུཏྟཾ. ཝིསཡོ ཙ ཏེསཾ ཨཔྤམཏྟཀོཝ སབྦཉྙུཝིསཡཾ ཨུཔཱདཱཡ ཡཐཱ ཧཏྠ པུཊེ ཨཱཀཱསོ ཨཔྤམཏྟཀོཝ ཨཛཊཱཀཱསཾ ཨུཔཱདཱཡཱཏི. ཏེ ཧི ཕསྶཱདཱིསུ དྷམྨེསུ ཨེཀདྷམྨམྤི སབྦཱཀཱརཏོ བུཛ྄ཛྷིཏུཾ ནསཀྐོནྟཱིཏི. སབྦཉྙུབུདྡྷཱནཾ པན ཨཝིསཡོ ནཱམ ནཏྠི, ཡཏྠ ཏེ ཝིཔརཱིཏཾ བུཛ྄ཛྷེཡྻུཾ. ཏེ ཧི ཨནམཏགྒེ སཾསཱརེ ཨནནྟཱསུ ཙ ¶ ལོཀདྷཱཏཱུསུ ཏིཡདྡྷགཏེ ཨདྡྷམུཏྟཀེ ཙ དྷམྨེ ཧཏྠམཎིཀེ ཝིཡ སམསམེ ཀཏྭཱ བུཛ྄ཛྷནྟི. སབྦེ དྷམྨཱ སབྦཱཀཱརེན བུདྡྷསྶ བྷགཝཏོ ཉཱཎམུཁེ ཨཱཔཱཏ མཱགཙྪནྟཱིཏི ཧི ཝུཏྟཾ. ཏཏྠ ཉཱཎམུཁེཏི སབྦཉྙུཾམཧཱབྷཝངྒཾ སནྡྷཱཡཱཧ. ཏཏྠ ཧི ཏེ དྷམྨཱ བོདྷིམཎྜེ སབྦཾ ཨབྷིདྷམྨཾ སམྨསནཏོ པཊྛཱཡ ནིཙྩཀཱལཾ ཨུཔཊྛཧནྟཱིཏི. སབྦཉྙུབུདྡྷཱ པན ཡཏྟཀེ དྷམྨེ ཝིཙཱརེཏུཾ ཨིཙྪནྟི. ཏཏྟཀེ དྷམྨེ ཨཱཝཛྫནཱཡ ཝིསུཾ ཀཏྭཱ ཨཱཝཛྫིཏྭཱ ཝིཙཱརེནྟཱིཏི. ནནུ དྷམྨཱ མཧནྟཱ བྷཝངྒཾ པརིཏྟཀནྟི ན ཙོདེཏབྦམེཏཾ. ཨརཱུཔདྷམྨཱནཉྷི པརམུཀྐཾསཔཏྟཱནཾ ཨེས ཨཱནུབྷཱཝོཏི. སཾསདྡོ པན སཱམནྟི ཨེཏསྶ ཨཏྠེ ཨུཔསགྒོ. སོ བྷགཝཏོ པཊིཝེདྷདྷམྨེསུ ཨནཱཙརིཡཀཏཾ དཱིཔེཏི. ན མེ ཨཱཙརིཡོ ཨཏྠཱིཏི ཧི ཝུཏྟཾ. ནནུ བྷགཝཏོ ཏཏཱིཡཙཏུཏྠཱརུཔྤ སམཱཔཏྟིཡོ ཨཱལཱ༹རུདཀམཱུལིཀཱཏི. སཙྩཾ. ཏཱ པན ཨནལངྐརིཏྭཱ ལདྡྷམཏྟཱཝ ཧུཏྭཱ ཚཌྜིཏཏྟཱ པཙྪཱ བུཛ྄ཛྷནཀྲིཡཱཡ པཱདཀམཏྟཱཔི ནཧོནྟི. ཀུཏོ པཊིཝེདྷདྷམྨཱཏི. ཏསྨཱ ཏཱ བྷགཝཏོ བུདྡྷབྷཱཝེ སཱཙརིཡཀཏཾ ན སཱདྷེནྟཱིཏི. ཨཡམེཏྠ པཱལི༹ ཨནུགཏོ ཨཏྠོ. ཡཐཱཧ –

ཏཏྠ ཀཏམོ ཙ པུགྒལོ སམྨཱསམྦུདྡྷོ. ཨིདྷེཀཙྩོ པུགྒལོ པུབྦེ ཨནནུསྶུཏེསུ དྷམྨེསུ སཱམཾ སཙྩཱནི ཨབྷིསམྦུཛ྄ཛྷི. ཏཏྠ ཙ སབྦཉྙུཏཾ པཱཔུཎཱཏི. བལེསུ ཙ ཝསིབྷཱཝཾ. ཨཡཾ ཝུཙྩཏི པུགྒལོ སམྨཱསམྦུདྡྷོཏི.

ཏཏྠཱཏི ནིམིཏྟེ བྷུམྨཾ. བལེསཱུཏི དསབལ ཉཱཎེསུ. ཝསིབྷཱཝནྟི ཨིསྶརབྷཱཝཾ. ཨེཏྠཙ པུབྦེ. ལ. སཱམནྟིཨེཏེན སཾསདྡསྶ ཨཏྠཾ དསྶེཏི. ཏཏྠཱཏིཨཱདིནཱ [སམྨཱསདྡསྶཨཏྠནྟི. སམྨཱསམྦུདྡྷཔདཾ]

༥. ཨིདཱནི ཐེརོ ཨཏྟནོ ཝནྡནཾ སུཊྛུབལཝཾ ཀརོནྟོ ཨཏུལནྟི ཨཱཧ. ཨནེཀགུཎཔདཝིསཡཱ ཧི ཝནྡནཱ སུཊྛུཏརཾ བལཝཏཱི ཧོཏཱིཏི. ནནུ ཨེཀགུཎཔདཝིསཡཱཔི ཝནྡནཱ ཨནྟརཱ ཡནཱིཝཱརཎེསམཏྠཱ སིཡཱཏི ཀིཾ དུཏཱིཡེནཱཏི. ན ན སམཏྠཱ. ཝིཉྙུཛཱཏིཀཱ པན སཏྠུགུཎཏྠོམནེ མཏྟཀཱརིནོ ནཱམ ན ཧོནྟི ¶ . ཐེརོ ཙ ཏེསཾ ཨཉྙཏརོ. ཏྭཾ པན ཨཝིཉྙུཛཱཏིཀོ. ཏསྨཱ མཏྟཾ ཀརོནྟོ ཙོདེསཱིཏི. ཨཔིཙ. ན ཀེཝལཾ ཨནྟརཱ ཡནཱིཝཱརཎམེཝ ཝནྡནཱཡ ཨིཙྪིཏབྦཾ ཧོཏི. ཨཐཁོ པཉྙཱཔཱཊཝཱདིཨཏྠོཔི ཨིཙྪིཏབྦོཡེཝ. སོཔི ཧི ཨནཱཡཱསེན གནྠ ནིཊྛཱནསྶ གནྠཔཱརིསུདྡྷིཡཱ ཙ པཙྩཡོ ཧོཏཱིཏི. ཨནུསྶཏིཊྛཱནེསུ ཧི ཙིཏྟབྷཱཝནཱ ཙིཏྟསམཱདྷཱནཱཝཧཱ ཧོཏི. ཙིཏྟ སམཱདྷཱནེ ཙ སཏི པཉྙཱཏིཀྑཱསཱུརཱ ཧུཏྭཱ པཧཏི. སམཱཧིཏོ བྷིཀྑཝེ ཡཐཱབྷཱུཏཾ པཛཱནཱཏཱིཏི ཧི ཝུཏྟཾ. ཏསྨཱ ཏདཏྠཱཡཔི ཨཏྟནོ ཝནྡནཱ སུཊྛུ བལཝཏཱི ཀཱཏབྦཱཡེཝཱཏི.

[༥] ཝིབྷཱཝནིཡཾ པན

‘‘ཡཐཱཝུཏྟཝཙནཏྠ ཡོགེཔི སམྨཱསམྦུདྡྷསདྡསྶ བྷགཝཏི སམཉྙཱཝསེན པཝཏྟཏྟཱ ཨཏུལནྟི ཨིམིནཱ ཝིསེ སེཏཱི’’ཏི ཝུཏྟཾ. ཏཾ ན སུནྡརཾ.

མཧནྟཉྷི སཏྠུགུཎཔདཱནཾ མཛ྄ཛྷེ ཨེཏཾ སམྨཱསམྦུདྡྷཔདཾ, ཙནྡོ ཝིཡ ཏཱརཀཱནཾ མཛ྄ཛྷེ. ཏསྨཱ ཏཾ སབྷཱཝནིརུཏྟིཾ ཛཱནནྟཱནཾསནྟིཀེ བྷཱཝཏྠསུཉྙཾ སཏྠུསམཉྙཱམཏྟཾ བྷཝིཏུཾ ནཱརཧཏི. ཨཉྙེསཾ པན པདསཧསྶཾ ཝུཙྩམཱནཾཔི སཏྠུ སམཉྙཱམཏྟམེཝ སམྤཛྫཏཱིཏི. ཏུལཡིཏབྦོ ཨཉྙེན སཧ པམིཏབྦོཏི ཏུལོ. ན ཏུལོ ཨཏུལོ, ནཏྠིཏུལོ སདིསོ ཨེཏསྶཱཏི ཝཱ ཨཏུལོ. བྷགཝཱ. ན ཧི ཨཏྠི བྷགཝཏོ ཨཏྟནཱ སདིསོ ཀོཙི ལོཀསྨིནྟི. ཡཐཱཧ –

ན མེ ཨཱཙརིཡོ ཨཏྠི, སདིསོ མེ ན ཝིཛྫཏི;

སདེཝཀསྨིཾ ལོཀསྨིཾ, ནཏྠི མེ པཊིཔུགྒལོཏི.

ཨནཙྪརིཡཉྩེཏཾ, ཡཾ བུདྡྷབྷཱུཏསྶ ཨཏུལཏྟཾ. སམྤཏིཛཱཏསྶཔི པནསྶ ཨཏུལཏཱ པཉྙཱཡཏི. ཏདཱ ཧི མཧཱཔུརིསོ སམྤཏིཛཱཏོཝ སམཱནོ པུརཏྠིམདིསཱབྷིམུཁོ ཨཊྛཱསི. ཏསྨིཾ དིསཱ བྷཱགེ ཨནནྟཱནི ཙཀྐཝཱལཱ༹ནི ཨེཀངྒཎཱནི ཨཧེསུཾ. ཏེསུ ཋིཏཱ དེཝབྲཧྨཱནོ མཧཱཔུརིས ཨིདྷ ཏུམྷེཧི སདིསོ ནཏྠི. ཀུཏོ ཨུཏྟརིཏརོཏི ¶ པརམཱཡ པུཛཱཡ པཱུཛེསུཾ. ཨེཝཾ སེསདིསཱསུཔི. ཏདཱ མཧཱཔུརིསོ ཨཏྟནོ སབྦལོཀགྒབྷཱཝཾ ཉཏྭཱ ཨགྒོཧམསྨི ལོཀསྶ, སེཊྛོཧམསྨིལོཀསྶ, ཛེཊྛོཧམསྨིལོཀསྶ ཨཡམནྟི མཱཛཱཏི, ནཏྠི དཱནི པུནབྦྷཝོཏི ཨེཝཾ ཨཚམྦྷིཝཱཙཾ ནིཙྪཱརེསཱིཏི. ཨིདཾཔི ཨནཙྪརིཡཾ, ཡཾ པཙྪིམབྷཝཾ པཏྟསྶ ཨཏུལཏྟཾ. ཡདཱ པན སོ སུམེདྷབྷཱུཏོ དཱིཔངྐརབུདྡྷསྶ སནྟིཀེ ནིཡཏབྱཱཀརཎཾ གཎྷི. ཏདཱཔི ཐཔེཏྭཱ དཱིཔངྐརསམྨཱསམྦུདྡྷཾ པཱརམིཏཱགུཎེཧི ཏེན སདིསོ ཀོཙི ནཏྠེཝ. ནཏྠིབྷཱཝོཙསྶ ཏདཱ པཝཏྟེ ཧི དསསཧསྶིལོཀདྷཱཏུཀམྤནཱདཱིཧི ཨསཱདྷཱརཎཔཱཊིཧཱརིཡེཧི དཱིཔེཏབྦོ. ཏཱནི ཧི པཙྩེཀབོདྷིསཏྟཱནཾ སཏསཧསྶཾཔི པཝཏྟེཏུཾ ན སཀྑིསྶཏིཡེཝ. ཀུཏོ སཱཝཀབོདྷི སཏྟཱནནྟི. ཏེནེཝ ཧི ཏདཱ པཝཏྟིཔཱརམིཔཝིཙཡཉྙཱཎཾ ཨཏྟནོ ཝིསཡེ སབྦཉྙུཐཉྙཱཎགཏིཀནྟི ཨཊྛཀཐཱཡཾ ཝུཏྟཾ. སཱཝཀབོདྷིསཏྟཱཔི ཧི ཡཏོ པཊྛཱཡ ཨཏྟནོ བོདྷིཡཱ ཨནུརཱུཔེ སམྦྷཱརདྷམྨེ སཡམེཝ ཛཱནིཏུཾ སཀྐོནྟི. ཏཏོ པཊྛཱཡ ཨནིཝཏྟིདྷམྨཱ ཧུཏྭཱ ཝཏྟཱནུསཱརིམཧཱཔུཐུཛྫནབྷཱཝཾ ཨཏིཀྐམིཏྭཱ བོདྷིསཏྟབྷཱུམིཾ ཨོཀྐནྟཱ ཧོནྟི. ཨེཀེན པརིཡཱཡེན ནིཡཏཱ སམྦོདྷིཔརཱཡནཱ ཙ ནཱམ ཧོནྟི. ཏདཱ ཨེཝ བུདྡྷཱནཾ སམྨུཁིབྷཱཝེ སཏི ནིཡཏབྱཱཀརཎཾ ལབྷནྟི. སབྦཉྙུ བོདྷིསཏྟ པཙྩེཀབོདྷིསཏྟེསུ ཝཏྟབྦམེཝ ནཏྠཱིཏི.

[༦] ཝིབྷཱཝནིཡཾ པན

སམིཏཏྠེ ཡྻཀཱརསྶ ཨཀཱརསྶ ཝཱ ཝསེན ཨེཏཾ སིདྡྷནྟི ཝུཏྟཾ. ཏཾ ན སུནྡརཾ.

ན ཧི ཏུལསདྡོ དྷཱཏུསིདྡྷོ ཀམྨསཱདྷནོ ཙ བྷཝིཏུཾ ན ཡུཏྟོ. ཏུལཡིཏུཾ ཨསཀྐུཎེཡྻོཏི ཨཏུལོ. ཨཔྤམེ ཡྻོཏི ཧི ཊཱིཀཱཡཾ ཝུཏྟཾ. ཨེཏེན ཏུལསདྡོ ཀམྨསཱདྷནོཏི དིཔེཏི. ཨེཝཉྩ སཏི ཀམྨསཱདྷནེནེཝ ཏདཏྠསིདྡྷིཏོ ཀིཾ ཏཏོ སམིཏཏྠེ ཡྻཀཱརསྶཨཀཱརསྶ ཝཱ ཙིནྟཱཡཱཏི. ཝཏྟིཙྪཱནུགཏོ སདྡཔྤཡོགོཏི ཀཏྭཱ ཨེཏཾ ཝུཏྟནྟི ཙེ. ན. ཡཐཱ ¶ སུཏཾ ཡུཏྟཾ ཝཛྫེཏྭཱ ཨསྶུཏསྶ པརིཀཔྤནཱཡ པཡོ ཛནཱབྷཱཝཏོཏི. [ཨཏུལ པདཾ]

༦. ཨིམེཧི པན དྭཱིཧི པདེཧི སཏྠུ ཏིསྶོ སམྤདཱ ཝིབྷཱ ཝིཏཱ ཧོནྟི. ཧེཏུསམྤདཱ ཕལསམྤདཱ སཏྟུཔཀཱརསམྤདཱཙཱཏི. ཏཏྠ སཏྠུ མཧཱཀརུཎཱ སམངྒིཏཱ བོདྷིསམྦྷཱརསམྦྷརཎཉྩ ཧེཏུསམྤདཱནཱམ. བོདྷིམཎྜེ པཝཏྟིཏཱ ཙཏུཝཱིསཏི ཀོཊིསབྷསཧསྶསངྑཱ མཧཱཝཛིརཉྙཱཎསངྑཱཏཱ སབྦཉྙུམཧཱ ཝིཔསྶནཱཔི ཨེཏྠེཝ སངྒཧིཏཱ. སཱ ཧི མཧཱབོདྷིཡཱ པདཊྛཱན བྷཱུཏཱཏི. པཧཱན སམྤདཱཡམེཝ ཝཱ སཱ སངྒཧིཏཱཏི དཊྛབྦཱ. ཕལསམྤདཱ ཙཏུབྦིདྷཱ པཧཱནསམྤདཱ ཉཱཎསམྤདཱ ཨཱནུབྷཱཝསམྤདཱ རཱུཔཀཱཡསམྤདཱ ཙཱཏི. ཏཏྠ སཧ ཝཱསནཱཡ ཀིལེསཔྤཧཱནཾ པཧཱནསམྤདཱ ནཱམ. པཧཱནསྶ སབྦཔཱརིཔཱུརིཏཱཏི ཨཏྠོ. ཨཏྠཏོ པན ཨརིཡམགྒོ, ཨགྒམགྒཉྙཱཎམེཝ ཝཱ. སབྦཉྙུཏ ཉྙཱཎ དསབལཉྙཱཎཱདཱིནི ཉཱཎསམྤདཱ.

[༧] ཝིབྷཱཝནིཡཾ པན

ཨེཏཱསུ དྭཱིསུ སམྤདཱསུ ཉཱཎསམྤདཱ པཐམཾ ཝུཏྟཱ, ཏཏོ པཧཱནསམྤདཱ. པཧཱནསམྤདཱཡེཝ པན པཐམཾ ཝཏྟབྦཱ. སཱ ཧི ཉཱཎསམྤདཱཡཔུབྦངྒམབྷཱུཏཱ པཙྩཡབྷཱུཏཱ ཙ. མཧཱཊཱིཀཱཡཉྩ སཱཡེཝ པཐམཾ ཝུཏྟཱཏི.

[༨] ཡཉྩ ཝིབྷཱཝནིཡཾ

‘‘སབྦཉྙུཏཉྙཱཎཔདཊྛཱནཾ ཨགྒམགྒཉྙཱཎ’’ནྟི ཉཱཎསམྤདཱཡཾ ཝུཏྟཾ. ཏཾཔི ན ཡུཛྫཏི.

ཨགྒམགྒཉྙཱཎཉྷི པཧཱནསམྤདཱ ཨེཝ བྷཝིཏུཾ ཨརཧཏི. ན ཧི མགྒཉྙཱཎཏོ ཨཉྙཱ པཧཱནསམྤདཱནཱམ ཨཏྠཱིཏི. ཡཉྩ ཀོཙི ཝདེཡྻ མགྒཉྙཱཎཾ ཉཱཎཉྩ ཧོཏི པཧཱནཉྩ. ཏསྨཱ ཨུབྷཡཏྠ ཝཏྟུཾ ཡུཏྟནྟི. ཏཾཔི ན ཡུཛྫཏི. ཨེཝཉྷི སཏི སམྤདཱསངྐརོ ཧོཏཱིཏི.

[༩] ཏཐཱ ཝིབྷཱཝནིཡཾ

ཉཱཎསམྤདཱཡཾ ¶ སབྦཉྙུཏཉྙཱཎཾ སབྦཔཐམཾ ཝཏྟབྦཾཔི ན ཝུཏྟཾ. ཏཾཔི ན སུནྡརཾ.

ནནུ ‘‘ཏམྨཱུལཀཱནི ཙ དསབལཱདི ཉྙཱཎཱནཱི’’ཏི ཨེཏྠ ཨཱདིསདྡེན སབྦཉྙུཏཉྙཱཎཾཔི གཧིཏནྟི ཙེ. ཏཾཔི ན ཡུཛྫཏི.

ན ཧི ཨཔྤདྷཱནཾ སརཱུཔཏོ ནིདྡིསིཏྭཱ པདྷཱནཾ པཱཀཊཾ ཨཱདིསདྡེན གཧིཏནྟི ཉཱཡཱགཏཾ ཧོཏཱིཏི. ཨཙིནྟེཡྻཱནུབྷཱཝེཧི སཱིལཱ དིགུཎེཧི ཨིདྡྷི དྷམྨེཧི ཙ སམྤདཱ ཨཱནུབྷཱཝསམྤདཱ. ལཀྑཎཱ ནུབྱཉྫནཔྤཊིམཎྜིཏསྶ རཱུཔཀཱཡསྶ སམྤཏྟི རཱུཔཀཱཡསམྤདཱ. སཏྟུཔཀཱརོདུཝིདྷོ ཨཱསཡསམྤདཱ, པཡོགསམྤདཱ ཙ. ཨཛ྄ཛྷཱསཡསྶ ཨུལཱ༹རཏཱ ཀཱཡཝཙཱིཔཡོགསྶ ཙ པརིསུདྡྷཏཱཏི ཨཏྠོ. ཏཏྠ དེཝདཏྟཱདཱིསུ ཝིརོདྷིསཏྟེསུཔི ནིཙྩཾ ཧིཏཛ྄ཛྷཱསཡཏཱ ཨཱསཡ སམྤདཱ. ལོཀེ ཨབྷིཉྙཱཏཱནཾ རཱཛཱུནཾ རཱཛམཧཱམཏྟཱནཾ སེཊྛི གཧཔཏཱིནཾ དེཝརཱཛཱུནམྤི དྷམྨཾ དེསེནྟསྶ ལཱབྷསཀྐཱརཱདི ནིརཔེཀྑཏཱཝསེན དེསནཱཔཡོགསུདྡྷི པཡོགསམྤདཱ. ཏཏྠ དྭེ པཧཱནཉཱཎསམྤདཱ སམྨཱསམྦུདྡྷཔདེན ཝིབྷཱཝིཏཱ. དྭཱིཧི ཨཱནུ བྷཱཝརཱུཔཀཱཡསམྤདཱཧི སཧ དྭེ སཏྟུཔཀཱརསམྤདཱ ཨཏུལཔདེན. ཧེཏུསམྤདཱ པན དྭཱིཧིཔི པདེཧི སཱམཏྠིཡཏོ ཝིབྷཱཝིཏཱ. ན ཧི ཏཱདིསིཡཱ ཧེཏུསམྤདཱཡ ཝིནཱ ཨིཏརཱསཾ པཝཏྟི ཨཏྠཱིཏི. [སམྤདཱ]

༧. པུནཔི ཐེརོ ཨཏྟནོ ཝནྡནཾ བལཝཏརཾ ཀརོནྟོ སསདྡྷམྨགཎུཏྟམནྟི ཨཱཧ. ཨེཏེན དྷམྨསངྒྷཱནཾཔི ཝནྡནཱ ཀཏཱ ཧོཏི. དཱུརཏོཧཾ ནམསྶིསྶཾ, སསངྒྷཾ ལོཀནཱཡཀནྟི ཧི ཝུཏྟེ སངྒྷསྶཔི ནམནཀྲིཡཱཔཏྟི སཧསདྡེན ཝིཉྙཱཡཏི. ཨེཝ མིདཾ དཊྛབྦཾ. ཏཏྠ ནམསྶིསྶནྟི ནམསྶིཾ.

[༡༠] ཡམྤན ཝིབྷཱཝནིཡཾ

‘‘གུཎཱིབྷཱུཏཱནཾཔི ཧི དྷམྨསངྒྷཱནཾ ཨབྷིཝཱདེཏབྦ བྷཱཝོ སཧཡོགེན ཝིཉྙཱཡཏཱི’’ཏི ཝུཏྟཾ. ཏཏྠ ཨབྷིཝཱདེཏབྦ བྷཱཝོཏི ནཝཏྟབྦཾ. ཨབྷིཝཱདིཏབྷཱཝོཏི པན ཨབྷིཝཱདནནྟི ¶ ཝཱ ཝཏྟབྦཾ. ཨེཝཉྷི སཏི ཨིདྷ ཨདྷིཔྤེཏསྶ ཀྲིཡཱ སམཝཱཡསྶ སིདྡྷཏྟཱ དྷམྨསངྒྷཱནཾཔི ཐེརསྶ ཝནྡནཱ ཀྲིཡཱཔཏྟི སིདྡྷཱ ཧོཏཱིཏི. ཨིཏརཐཱ ཏབྦཔཙྩཡསྶ ཨརཧཏྠདཱིཔནཏོ ཨབྷིཝཱདནཱ རཧཏཱ སངྑཱཏ གུཎསམཝཱཡོ ཝུཏྟོ སིཡཱ. སོཙ ཨིདྷ ནཱདྷིཔྤེཏོ. ཨཏྟནོ ནིདསྶནེན ཙ སཧ ན སམེཏི སཔུཏྟདཱརོ ཨཱགཏོཏི.

ཨཔིཙ ཐེརོ ཨིམཾ གནྠཾ རཙཡིསྶཱམཱིཏི པུབྦབྷཱགེཡེཝ ཏཱིཎི རཏནཱནི ཝནྡི, ཨཐ ཏཾ ཨཏྟནོ ཝནྡནཾ གནྠཔྤཊིཉྙཱཡ སཧ གྷཊེཏྭཱ དསྶེནྟོ ཨིམཾ གཱཐཾ རཙཡཱིཏིཔི ན ན སཀྐཱ ཝཏྟུནྟི. ཏཐཱཧི ཨབྷིཝཱདིཡཱཏི ཝུཏྟཾ. ན ཨབྷིཝཱདིཡཱམཱིཏི. ཨེསནཡོ ཨཉྙཏྠཔི. ཏཏྠ སདྡྷམྨེན ཙ གཎུཏྟམེན ཙ ཨཏྟནཱ ནིམྨིཏེན སཀལལོཀསྶ སརཎབྷཱུཏེན སཧ ཝཏྟཏཱིཏི སསདྡྷམྨ གཎུཏྟམོ. སམྨཱསམྦུདྡྷོ. ན ཧི པརནིམྨིཏེན སདྡྷམྨེན གཎུཏྟམེན ཙ སཧིཏཱ སཱཝཀཱ སསདྡྷམྨཱཏི ཙ སགཎུཏྟམཱཏི ཙ ཝུཙྩནྟི. ན ཙ ཨཏྟནོཨེཝ སརཎབྷཱུཏེན སདྡྷམྨེན སབྲཧྨཙཱརིགཎུཏྟམེན ཙ སཧིཏཱ པཙྩེཀབུདྡྷཱ ཏཐཱ ཐོམནཾ ཨརཧནྟཱིཏི, ཏསྨཱ ཨིདཾཔི སཏྠུ ཨསཱདྷཱརཎགུཎཔདམེཝ ཧོཏཱིཏི དཊྛབྦཾ.

ཏཏྠ དྷཱརེཏཱིཏི དྷམྨོ. ཀེ དྷཱརེཏི, ཨཏྟཱནཾ དྷཱརེནྟེ. དྷམྨོ ཧཝེ རཀྑཏི དྷམྨཙཱརིནྟི ཧི ཝུཏྟཾ. ཀཐཉྩ དྷཱརེཏི, ཙཏཱུསུ ཨཔཱཡེསུ ཝཊྚདུཀྑེསུཙ ཨཔཏམཱནེ ཀརོནྟོ. ཀིཉྩ དྷཱརཎཾནཱམ, ཡེསཾ ཝསེན སཏྟཱ ཨཔཱཡེསུཝཱ ཝཊྚདུཀྑེསུཝཱ པཏནྟི, ཏེསཾ ཀིལེསཱནཾ ཨེཀདེསེནཝཱ སབྦསོཝཱ སམུཙྪིནྡནཾ. ཨིམསྨིཾ ཨཏྠེ ཙཏྟཱརོ ཨརིཡམགྒཱ ནིབྦཱནཉྩ ནིཔྤརིཡཱཡཏོ དྷམྨོནཱམ. ཨརིཡམགྒཱ ཧི ཀིལེསེ སམུཙྪིནྡནྟཱ ནིབྦཱནེན སཧེཝ ཧུཏྭཱ སམུཙྪིནྡནྟི. ན ཝིནཱཏི, ཏསྨཱ ཏེཡེཝ པཉྩ ཨེཀནྟཏོ དྷམྨོནཱམཱཏི. པརིཡཏྟིདྷམྨོ པན དྷཱརཎུཔཱཡོཡེཝ ཧོཏི. ཙཏྟཱརི སཱམཉྙཕལཱནིཙ དྷཱརཎཕལཱནིཡེཝ ཧོནྟི, ཀིལེསཱནཾ པཊིཔྤསྶམྦྷནཝསེན པཝཏྟཏྟཱ དྷཱརཎཱནུཀཱུལཔྤཝཏྟཱནི ཙ. ཏསྨཱ ཨེཏེ པཉྩ པརིཡཱཡདྷམྨཱཡེཝཱཏི. ཨཐཝཱ ¶ , དྷཱརཱིཡཏཱིཏི དྷམྨོ. དྷཱརཎཱརཧོཏི ཝུཏྟཾ ཧོཏི. ཡོ ཧི དྷཱརེནྟཾ ཨེཀནྟེན དུཀྑཏོ མོཙེཏི. ཨགྒསུཁེཙ པཏིཊྛཱཔེཏི. སོཡེཝ དྷཱརཎཱརཧཏྟཱ ཨིདྷ དྷམྨོནཱམཱཏི. ཀོཔན སོཏི, ཡཐཱ པུཏྟདྷམྨཱཡེཝ. ཏེཧི ཀེཙི བྷཱཝནཱ ཝསེན ཀེཙི སཙྪིཀིརིཡཝསེན ཀེཙི དིཊྛདྷམྨསུཁཝིཧཱརཝསེན ཀེཙི ཨུགྒཧ དྷཱརཎཝསེན དྷཱརཱིཡནྟི. ཏེ ཙ ཨེཝཾ དྷཱརཱིཡམཱནཱ དྷཱརེནྟཾ ཡཐཱརཧཾ ཨཔཱཡདུཀྑཏོ ཝཊྚདུཀྑཏོཙ མོཙེནྟི, ཨགྒེཙ ཕལསུཁེཝཱ ནིབྦཱནསུཁེཝཱ པཏིཊྛཱཔེནྟཱིཏི. དྷཱརེནྟིཝཱ སཔྤུརིསཱཛནཱ ཨཔཱཡེསུ ཝཊྚདུཀྑེསུཙ ཨཏྟཱནཾ ཨཔཏ མཱནཾ ཝཧནྟི ཨེཏེནཱཏི དྷམྨོ. དྷརནྟིཝཱ ཨེཏྠ དྷམྨདཱིཔཱ དྷམྨཔྤཊིསརཎཱ ཛནཱ ལདྡྷཔྤཏིཊྛཱ ཧོནྟཱིཏི དྷམྨོཏིཔི ཡུཛྫཏིཡེཝ. ཀསྨཱ པནེཏྠ དྷམྨོ དསཝིདྷོཝ ཝུཏྟོ. ནནུ པཊིཔཏྟིདྷམྨེན སཧ ཨེཀཱདསཝིདྷོཝ ཝཏྟབྦོཏི. སཙྩཾ. སོཔན པཊིཔཏྟིདྷམྨོ མགྒསྶ པུབྦབྷཱགཔྤཊིཔདཱཨེཝ ཧོཏཱིཏི པུབྦཙེཏནཱ ཝིཡ དཱནེ མགྒེ ཨེཝ སོ སངྒཧིཏོ. ཏསྨཱ དྷམྨོ དསཝིདྷོཝ སབྦཏྠ ཝུཏྟོཏི དཊྛབྦོ.

ཨཔིཙ, ཡདགྒེན པརིཡཏྟིདྷམྨོ ཨིདྷ དྷམྨསྨིཾ སངྒཧིཏོ. ཏདགྒེན པརིཡཏྟིདྷཱརཀོཔི སངྒྷེ ཝནྡནེཡྻེ སངྒཧིཏོཏི ཡུཏྟོ. ཡདགྒེནཙ པུཐུཛྫནཀལྱཱཎཀོ སངྒྷེ སེཀྑེསུ སངྒཧིཏོ. ཏདགྒེན ཏསྶ ཀལྱཱཎཧེཏུབྷཱུཏོ པཊིཔཏྟི དྷམྨོཔི དྷམྨེ ཝནྡནེཡྻེ སངྒཧིཏོཏི དཊྛབྦོ. སོ ཧི པུཐུཛྫནབྷཱུཏོཔི ཡེཧི དྷམྨེཧི སམནྣཱགཏཏྟཱ སེཁེ སོཏཱཔཏྟི ཕལསཙྪིཀིརིཡཱཡ པཊིཔནྣེ སངྒཧིཏོ. ཏེ པན དྷམྨཱ སེཀྑེ སོཏཱཔཏྟིམགྒེ ཨསངྒཧིཏཱཏི ནསཀྐཱ ཝཏྟུནྟི. ཨེཏྟཱཝཏཱ ཡེ ཝདནྟི སངྒྷཾ སརཎཾ གཙྪཱམཱིཏི, ཨེཏྠ པུཐུཛྫན ཀལྱཱཎཀོ སངྒྷེ ཨསངྒཧིཏོ. ན ཧི ཏཾསརཎཾ གཙྪནྟསྶ སརཎགམནཾ སམྤཛྫཏཱིཏི. ཏེསཾ ཏཾ པཊིཀྑིཏྟཾ ཧོཏི. ཨེཝཾ པན ཝཏྟབྦོ, ཡོ ཝོ ཨཱནནྡ མཡཱ དྷམྨོཙ ཝིནཡོཙ དེསིཏོ པཉྙཏྟོ, སོ ཝོ མམཙྩཡེན སཏྠཱཏི ཨེཝཾ སཏྠུཋཱནེ ཐཔེཏྭཱ བྷགཝཏཱ སཾཝཎྞིཏོ པརིཡཏྟིདྷམྨོ དྷམྨསརཎེ སངྒཧིཏོཏི ¶ ཡུཏྟོ, ཏཾ དྷཱརེནྟོཔན ཀལྱཱཎཔྤཊིཔཏྟིཡཾ ཋིཏོཔི ཨཏྠི. ཨཊྛིཏོཔི ཨཏྠི. ཡོ ཨཊྛིཏོ, སོ ཨཏྟནོཔི སརཎཾ ནཧོཏི. ཀུཏོ པརསྶ. སཏྠཱརཱ ཙ ཨནེཀེསུ སུཏྟསཧསྶེསུ སོ གརཧིཏོ. ཏསྨཱ སོ སངྒྷསརཎེ ཨསངྒཧིཏོ. ཨིཏརོཝ སངྒཧིཏོཏི ཡུཏྟོཏི.

སནྟཱནཾ དྷམྨོཏི སདྡྷམྨོ. སམིཏཀིལེསཱནཾ ཏཏོཡེཝ པསཏྠཱནཾ པཱུཛིཏཱནཾ སཔྤུརིསཱནཾ པཎྜིཏཱནཉྩ དྷམྨོཏི ཨཏྠོ. ཡོཙ སནྟཱནཾ དྷམྨོ, སོཔི ཨེཀནྟེན སནྟོཡེཝ ཧོཏཱིཏི སནྟོ དྷམྨོཏིཔི སདྡྷམྨོ. པསཏྠོ པཱུཛིཏོ དྷམྨོཏི ཨཏྠོ. སཙྩོ ཝཱ. ཨཡཉྷི ཨཉྙཏིཏྠིཡདྷམྨོ ཝིཡ དྷཱརེནྟཾ ནཝིསཾཝཱདེཏི. སོ ཧི ཨཡཾ མེ ཧིཏོཏི དྷཱརེནྟསྶ ཨཧིཏོཡེཝ སམྤཛྫཏི. ཨཡཾ པན ཏཐཱདྷཱརེནྟསྶ ཧིཏོཡེཝ སམྤཛྫཏཱིཏི. [སདྡྷམྨཔདཾ]. གཎུཏྟམཔདེ ལོཀེ སམཱན དིཊྛིསཱིལཱནཾ སཧདྷམྨིཀཱནཾ སམཱུཧོ གཎོཏི ཝུཙྩཏི. ཨིདྷ པན ཨུཏྟམེཧི སཱིལཱདིགུཎེཧི ཡུཏྟོ བྷགཝཏོ སཱཝཀསངྒྷོ ཨུཏྟམོཙ སོ གཎོཙཱཏི ཨཏྠེན ཨུཏྟམགཎོནཱམ. སོཡེཝ ཨིདྷ གཎུཏྟམོཏི ཝུཙྩཏི ཡཐཱ མུནིསེཊྛོ མུནིཝརོཏི.

[༡༡] ཝིབྷཱཝནིཡཾ པན

‘‘གཎཱནཾ གཎེསུཝཱ དེཝམནུསྶཱདིསམཱུཧེསུ ཨུཏྟམོ གཎུཏྟམོ’’ཏི ཙ ཝུཏྟཾ. ཏཾ ན སུནྡརཾ.

ཨེཏསྨིཉྷི ཨཏྠེ སཏི ཨུཏྟམསདྡོ པདྷཱནབྷཱུཏོ ཧོཏི. སོཙ གུཎམྷིཡེཝ པཝཏྟཏཱིཏི ཏེན ཨིདྷ ཨརིཡསངྒྷོ ཝུཏྟོཏི ནསིཛ྄ཛྷཏཱིཏི. ཨེཏྠཙ གཎོཏི སངྒྷོཡེཝ ཝུཙྩཏི. སོཙ སངྒྷོ དུཝིདྷོ སམྨུཏིསངྒྷོ, དཀྑིཎེཡྻསངྒྷོཏི. ཏཏྠ སམགྒེན སངྒྷེན ཀཏཾ ཨུཔསམྤདཱཀམྨཾ སམྨུཏིནཱམ. ཏཱཡ སམྨུཏིཡཱ ཨུཔསམྤནྣབྷཱུམིཾ པཏྭཱ ཋིཏོ བྷིཀྑུསངྒྷོ སམྨུཏིསངྒྷོནཱམ. སོ ཝིནཡཀམྨེསུ པསིདྡྷོ. དཀྑིཎེཡྻསངྒྷོ ནཱམ ཨཊྛ ཨརིཡཔུགྒལསམཱུཧོ. སོཔན ཀིཉྩཱཔི སམྨུཏིསངྒྷེཔི ཨནྟོགདྷོཡེཝ ཧོཏི. ཏཐཱཔི སརཎགམན ཝནྡནཱ མཱན ¶ པཱུཛཱསཀྐཱརཱནུསྶཏིཊྛཱནེསུ ཨནུཏྟར པུཉྙཀྑེཏྟ ཝིསེ སཔརིགྒཧཏྠཾ བྷགཝཏཱ ཏཐཱ ཏཐཱ སཾཝཎྞེཏྭཱ སོ ཝིསུཾ ཝུཏྟོཏི དཊྛབྦོ. པུཐུཛྫནསངྒྷོཧི པུཉྙཀྑེཏྟཾ སམཱནོཔི ཨནུཏྟརཾ པུཉྙཀྑེཏྟཾ ནཧོཏི. ཀསྨཱ. སཱལིཀྑེཏྟེ ཏིཎཱནཾ ཝིཡ ཁེཏྟདུཊྛཱནཾ སཀྐཱཡདིཊྛི ཝིཙིཀིཙྪཱནུསཡཱནཾ སབྦྷཱཝཱཏི. པུཉྙཀྑེཏྟབྷཱཝོ པནསྶ པུརིམེ སདྡྷམྨཔདེ ཝུཏྟནཡེན ཝེདིཏབྦོཏི. [སསདྡྷམྨགཎུཏྟམཔདཾ]

༨. ཨབྷིཝཱདིཡཱཏི ཝིསེསཏོ ཝནྡིཏྭཱ. ཨེཏྠ ཙ ཨཡཾ ལོཀེ སཱིལཱདིགུཎཡུཏྟོ སེཊྛོ ཝནྡནེཡྻོཏི ཨེཝཾ སེཊྛ ཙིཏྟཾ པཙྩུཔཊྛཱཔེཏྭཱ ཝནྡནྟོ ཝིསེསཏོ ཝནྡཏཱིཏི ཝུཙྩཏི. ཝནྡནཱ པན ཏིཝིདྷཱ ཀཱཡཝནྡནཱདིཝསེན. ཡཐཱཧ –

ཏིསྶོ ཨིམཱ བྷིཀྑཝེ ཝནྡནཱ, ཀཏམཱ ཏིསྶོ. ཀཱཡེན ཝནྡཏི, ཝཱཙཱཡ ཝནྡཏི, མནསཱ ཝནྡཏཱིཏི.

ཏཏྠ སེཊྛཙིཏྟཾ པཙྩུཔཊྛཱཔེཏྭཱ ཛཱཎུདྭཡ ཀཔྤརདྭཡ ནལཱཊ སངྑཱཏཱནི པཉྩ ཨངྒཱནི བྷཱུམིཡཾ པཏིཊྛཱཔེཏྭཱ ཝནྡནེཡྻཱནཾ ཨབྷིམུཁཾ ནིཔྤཛྫནྟོ ཀཱཡེན ཝནྡཏིནཱམ. ཡཾ སནྡྷཱཡ པཉྩཔྤཏིཊྛིཏེན ཝནྡིཏྭཱཏི ཏཏྠ ཏཏྠ ཝུཏྟཾ. ཡཱཡཙ ཨཝནྡིཡཊྛཱནེསུ ཝནྡནྟསྶ ཨཱཔཏྟི ཧོཏཱིཏི. གུཎཔདཱནི ཝཱཙཱཡ པཝཏྟེནྟོ ཝཱཙཱཡ ཝནྡཏིནཱམ. ནམོ བུདྡྷསྶ, ནམཏྠུ བུདྡྷསྶ, ནམོ ཝིམུཏྟིཡཱ, ནམོ ཝིམུཏྟཱནཾ, ཝིཔསྶིསྶ ནམཏྠཱུཏི ཨེཝམཱདཱིསུཔི ཝཱཙཱ ཝནྡནཱཡེཝ. གུཎཔདཱནི ཨནུགནྟྭཱ གུཎེ ཨནུསྶརནྟོ མནསཱ ཝནྡཏིནཱམཱཏི.

༩. བྷཱསིསྶནྟི ཀཐེསྶཱམི. ཀཱམཉྩ ཐེརོ ཨིམཾ སངྒཧཾ རཙཡནྟོ པོཏྠཀཱརུལ༹ྷཾ ཀཏྭཱཝ རཙཡིསྶཏི. གནྠཀམྨཾ ནཱམ ཝཱཙཱཀམྨེསུ པསིདྡྷནྟི ཀཏྭཱ བྷཱསིསྶནྟི ཝུཏྟནྟི དཊྛབྦཾ.

༡༠. ཨབྷིདྷམྨཏྠསངྒཧནྟི པདེ ཨབྷིདྷམྨེ ཝུཏྟཱ ཨཏྠཱ ཨབྷིདྷམྨཏྠཱ. ཏེ སངྒཡ྄ཧནྟི ཨེཏྠ ཨེཏེནཱཏིཝཱ ཨབྷིདྷམྨཏྠསངྒཧོ. སངྒཡ྄ཧནྟིཏིཙ ཐེརེན སཾཁིཔིཏྭཱ གཡ྄ཧནྟི ཀཐཱིཡནྟཱིཏི ཨཏྠོ. ཨབྷིདྷམྨེཏི ཙེཏྠ ཨབྷིཨཏིརེཀོ ཨབྷིཝིསེ སོཙ དྷམྨོ ཨབྷིདྷམྨོ. དྷམྨོཏི ཙ ཝིནཡཔཱལི༹ཏོ ཨཉྙཾཔཱལི༹ དྭཡཾ ¶ ཝུཙྩཏི. ཡོ ཝོ ཨཱནནྡ མཡཱ དྷམྨོཙ ཝིནཡོཙ དེསིཏོ པཉྙཏྟོཏི ཧི ཝུཏྟཾ. ཏཉྩ པཱལི༹དྭཡཾ ཨཱཎཱཝིདྷཱནསངྑཱཏཾ ཝིནཡན ཀིཙྩཾ ཝཛྫེཏྭཱ ཀུསལཱདིཀེ ཡཐཱཔཝཏྟེ པརམཏྠདྷམྨེ ཨེཝ དཱིཔེཏཱིཏི. ཨེཝཾ དཱིཔེནྟེསུཙ ཏེསུ དྭཱིསུ དྷམྨེསུ ཡོ ཨིཏརཏོ ཨཏིརེཀོཙ ཧོཏི ཝིསེསོཙ. ཨཡམེཝ ཨབྷིདྷམྨོ ནཱམ. ཨིཏརོཔན དྷམྨོཡེཝ. ཨེཝཉྩ ཀཏྭཱ དྷམྨོ ཨབྷིདྷམྨོ ཝིནཡོ ཨབྷིཝིནཡོཏི ཨིདཾ ཙཏུཀྐཾ ཝེདིཏབྦཾ. ཏཏྠ དྷམྨོནཱམ སུཏྟནྟཔིཊཀཾ. ཨབྷིདྷམྨོནཱམ ཡཏྟཔཀརཎཱནི. ཝིནཡོནཱམ ཨུབྷཏོ ཝིབྷངྒོ, ཨབྷིཝིནཡོནཱམ ཁནྡྷཀཔརིཝཱརཱཏི ཨཊྛཀཐཱསུ ཝུཏྟཾ. ཨཏིརེཀཝིསེསཏཱ ཙེཏྠ ཀུསལཱདི ཝསེན ཁནྡྷཱདིཝསེན སངྒཧཱདིཝསེན ཏཐཱ ཏཐཱ དེསེཏབྦཔྤཀཱརཱནཾ ཨནཝསེསཝིབྷཏྟིཝསེནཝཱ སུདྡྷདྷམྨཱདྷིཊྛཱན དེསནཱཔཝཏྟིཝསེནཝཱ ཝེདིཏབྦཱ. ཡཏོ སབྦཉྙུབུདྡྷཱ ཨིམཾ ཨབྷིདྷམྨདེསནཾ དེཝེསུཨེཝ དེསེནྟི. ན ཧི མནུསྶཱ ཨེཝརཱུཔཾ ཏཡོ མཱསེ ནིརནྟརཾ པཝཏྟནཡོགྱཾ ཀཐཱམགྒཾ ཨེཀེན ཨིརིཡཱཔཐེན ཨཱདིཏོ པཊྛཱཡ པརིཡོསཱནཾ པཱཔེཏྭཱ པཊིགྒཧེཏུཾ སཀྐོནྟི, ནཙ ཨེཝ རཱུཔོ ཨེཀམཱཏིཀཱནུབནྡྷོ ཀཐཱམགྒོ ནཱནཱཁཎེསུ ནཱནཱཛནཱནཾ དེསེཏུཾ སཀྐུཎེཡྻོ ཧོཏཱིཏི. ཀེཙིཔན ཝིནཡཔཱལི༹ཏོཔི ཨབྷིརེཀཝིསེསཏཾ ཏསྶ ཝཎྞེནྟི. ཏཾ ཨཊྛསཱལིནིཡཱ ན སམེཏི. ཏཏྠ ཧི དྷམྨནཱམིཀཱནཾ དྭིནྣཾ པཱལཱི༹ནཾ མཛ྄ཛྷེཨེཝ ཨཡཾ ཨཏིརེཀཝིསེསཏཱ ཝིཙཱརིཏཱ. ནཙ ཡུཛྫཏི ཝིནཡེན སཧ ཏཐཱ ཝིཙཱརེཏུཾ ཨསམཱནཀིཙྩཝིསཡཏྟཱ. ཝིནཡོ ཧི ཀཱཡཝཱཙཱནཾ ཝིནཡནཀིཙྩོ, ཨཛ྄ཛྷཱཙཱརཝིསཡོཙ. དྷམྨོ པན དྷམྨཝིབྷཱགཀིཙྩོ དྷམྨཔྤཝཏྟི ཝིསཡོཙཱཏི. ཀེཙིཔན ཝདནྟི ཨེཝཾ སནྟེཔི ཝིནཡོ ཨེཝ སབྦཛེཊྛཀོ སིཡཱ. ཝིནཡཾ ཝིཝཎྞེནྟསྶ ཧི པཱཙིཏྟིཡཱཔཏྟི ཧོཏི. དྷམྨཾ ཝིཝཎྞེནྟསྶ དུཀྐཊཱཔཏྟིམཏྟཱཏི, ཏཾ ནཡུཛྫཏི. ཝིནཡོ ཧི ཨཱཎཱཙཀྐཾ. དྷམྨོཙ དྷམྨཙཀྐཾ. ཏཏྠ ཝིནཡཾ ཝིཝཎྞེནྟོ སཏྠུ ཨཱཎཱཙཀྐེ པཧཱརཾ དེཏི. སཏྠརི ཨགཱརཝོ མཧནྟོ ཧོཏི. ཡསྶཙ སཏྠརི ཨགཱརཝོ, ཏསྶ དྷམྨསངྒྷེསུ ཏཱིསུ སིཀྑཱསུཙ ཨགཱརཝོ སིདྡྷོ ཧོཏི. ཏསྨཱ ཝིནཡ ཝིཝཎྞནེ ¶ ཨཱཔཏྟི མཧནྟཱི ཧོཏི. ན སབྦཛེཊྛཀཏྟཱཏི. ཨཔིཙ, ཝིནཡོནཱམ སཱསནསྶ མཱུལཾ. ཝིནཡེ ཨཊྛིཏེ སཱསནཾ ནཏིཊྛཏི. ཏསྨཱ སཱསནསྶ ཙིརཊྛིཏཏྠཾཔི ཝིནཡཝིཝཎྞནེ མཧཏཱི ཨཱཔཏྟི པཉྙཏྟཱཏི.

ཨིཏི པརམཏྠདཱིཔནིཡཱ ནཱམ ཨབྷིདྷམྨཏྠ སངྒཧསྶ

ཙཏུཏྠཝཎྞནཱཡ པཐམགཱཐཱཡ

པརམཏྠདཱིཔནཱ ནིཊྛིཏཱ.

དུཏཱིཡགཱཐཱ-པརམཏྠདཱིཔནཱི

༡༡. ཨེཝཾ ཨཱདིགཱཐཱཡཏཾཏཾ པཡོཛན སཧིཏེ པཉྩ ཨཏྠེ དསྶེཏྭཱ ཨིདཱནི ཏེ ཨབྷིདྷམྨཏྠེ ཨུདྡེསཏོ དསྶེནྟོ དུཏཱིཡགཱཐམཱཧ. ཏཏྠ ཏཏྠཱཏི བྷཱསིསྶཾ ཨབྷིདྷམྨཏྠ སངྒཧནྟི ཝུཏྟེ ཏསྨིཾ ཨབྷིདྷམྨཏྠསངྒཧཔདེ མཡཱ ཝུཏྟཱ ཨབྷིདྷམྨཏྠཱ སབྦཐཱཔརམཏྠཏོ ཙཏུདྷཱ ཧོནྟཱིཏི ཡོཛནཱ. ཨེཏྠཙ -

[༡༢] ཊཱིཀཱཡཾ ཏཱཝ

ཏཏྠ ཏསྨིཾ ཨབྷིདྷམྨཏྠསངྒཧཔཀརཎེཏིཝཱ ཨབྷིདྷམྨཏྠ པདེཏིཝཱ ཨབྷིདྷམྨེཏིཝཱ ཏསདྡཏྠོ ནིདྡིཊྛོ. ཝིབྷཱཝནིཡཾ པན ཏསྨིཾ ཨབྷིདྷམྨེཏི. སབྦཾ ནསུནྡརཾ.

ན ཧི ཨབྷིདྷམྨཏྠ སངྒཧཔཀརཎེ མཡཱ ཝུཏྟཱ ཨབྷིདྷམྨཏྠཱཏི ཡུཛྫཏི. པཀརཎཾཔི ཧི ཨུཔརི ཝུཙྩམཱནམེཝ ཧོཏི. ནཏུ ཝུཏྟཾ. ཀུཏོ ཨབྷིདྷམྨཏྠཱཏི. ན ཙ སཾཝཎྞནཱཔཀརཎེསུ ཨཱདིམྷིཡེཝ ཏཱཝ ཏསདྡོ ཨཔྤདྷཱནཔདཱནི པཙྩཱམསཏཱིཏི ཨཏྠི. ཏསྨཱ ཨཊྛསཱལིནིཡཾ ཨཱདིམྷི ཏཏྠ ཀེན ཊྛེན ཨབྷིདྷམྨོཏི ཝཱཀྱེཝིཡ ཨིདྷ ཏསདྡཏྠོ ཝེདིཏབྦོཏི. ཨེཝཉྷི སཏི –

[༡༣] ཊཱིཀཱསུ

སབྦཐཱ ཝུཏྟཱཏི ཡོཛནཱཔི པཊིཀྑིཏྟཱ ཧོཏི.

སཱ ཧི ཝཀྑམཱནེཧི སབྦཡཱཔི དྭཱདས, སབྦཐཱཔི ཨཊྛཱརསཱཏིཨཱདཱིཧི ནསམེཏཱིཏི. ཏཏྟ སབྦཐཱཏི དྷམྨསངྒཎིཡཾ ཝུཏྟེན ཀུསལཱདིནཱ ¶ སབྦཔྤཀཱརེནཔི ཙཏུདྷཱཝ ཧོནྟི, ཝིབྷངྒེ ཝིབྷཏྟེ ན ཁནྡྷཱདིནཱ སབྦཔྤཀཱརེནཔི ཙཏུདྷཱཝ ཧོནྟཱིཏི ཨཏྠོ. དྷཱཏུ ཀཐཱཡཾ ཝུཏྟེནཱཏིཨཱདིནཱཔི ཝཏྟབྦཾ.

༡༢. པརམཏྠཏོཏི པརམཏྠ སཙྩཏོ. དྭེ ཧི སཙྩཱནི སམྨུཏིསཙྩཾ, པརམཏྠསཙྩནྟི, ཏཏྠ སཏྟ པུགྒལ ཨཏྟ ཛཱིཝཱདིཀཱ པཉྙཏྟིཨཏྠཱ སབྷཱཝཏོ ཨཝིཛྫམཱནཱཡེཝ ཧོནྟི. དྷམྨཝཝཏྠཱནཉྙཱཎརཧིཏཱནཾཔན མཧཱཛནཱནཾ ཙིཏྟེ མཧནྟམཧནྟཱཔི ཧུཏྭཱ ཝིཛྫམཱནཱཝིཡ པཉྙཱཡནྟི, ཏེཙ མཧཱཛནཱ སམགྒཱ ཧུཏྭཱ ཏེསཾ ཨེཀནྟེན ཨཏྠིབྷཱཝཾ གཧེཏྭཱ ཏཐཱ ཏཐཱ ཝོཧརནྟི ཙེཝ སམྤཊིཙྪནྟིཙ. ཏསྨཱ ཏེ མཧཱཛནེཧི སམགྒེཧི སམྨཏཏྟཱཏཏོཡེཝཙ ཝཙཱིསཙྩཝིརཏིསཙྩཱནཾ ཝཏྠུབྷཱུཏཏྟཱསམྨུཏི སཙྩནྟི ཝུཙྩནྟི. ཏསྨིཾ སམྨུཏིསཙྩེ ཋཏྭཱ སམྨཱ པཊིཔཛྫནྟཱ སབྦ ལོཀིཡསམྤཏྟིཡོཙ སབྦབོདྷིསམྦྷཱར དྷམྨེཙ ཨཱརཱདྷེནྟི. མིཙྪཱཔཊིཔཛྫནྟཱ ཨཔཱཡཔཱུརཀཱ ཧོནྟི. ཨེཝཾ མཧནྟཉྷི སམྨུཏི སཙྩནྟི. པརམཏྠསཙྩཾ པན པཏྭཱ ཏཾ སཙྩམེཝ ནཧོཏི. ཏཉྷི སཡཾ ཨཝིཛྫམཱནཾཡེཝ སམཱནཾ མཧཱཛནེ ཝིཛྫམཱནནྟྭེཝ གཎྷཱཔེཏི. སཀྐཱཡདིཊྛི དྭཱསཊྛིདིཊྛི ཏིཝིདྷམིཙྪཱདིཊྛཱིནཾ ཝཏྠུ ཧུཏྭཱ བཱལཛནཱནཾ ཝཊྚདུཀྑཏོ ནིཡྻཱཏུཾ ནདེཏི. ཨེཝཾ ཝིཔརཱིཏཉྷི སམྨུཏིསཙྩཾ. ཨེཝཾ མཧཱསཱཝཛྫཉྩཱཏི. པརམཏྠསཙྩཾཔན དུཝིདྷཾ སབྷཱཝསཙྩཾ ཨརིཡསཙྩནྟི. ཏཏྠ དྷམྨསངྒཎིཨཱདཱིསུ སཏྟསུ པཀརཎེསུ ཝིབྷཏྟཱ ཀུསལཱདཡོ དྷམྨཱ སབྷཱཝསཙྩཾནཱམ. ཏེ ཧི སཡཾ སབྷཱཝཏོ ཝིཛྫམཱནཏྟཱ ཀུསལཱནཱམ དྷམྨཱ ཨཏྠི སུཁཱནཱམ ཝེདནཱ ཨཏྠཱིཏི གཎྷནྟེན ཝིསཾཝཱདེནྟཱིཏི. ཏཾ པན ཨརིཡསཙྩཾ པཏྭཱ ཀིཉྩི ཨསཙྩཾཔི ཧོཏིཡེཝ. ཏཐཱཧི ཨནུབྷཝནབྷེདམཏྟཾ ཨུཔཱདཱཡེཝ ཝེདནཱ སུཁཱ དུཀྑཱ ཨདུཀྑམསུཁཱཏི ཝུཏྟཱ. ན སབྦཱཀཱརཏོ སུཁབྷཱུཏཏྟཱ. སབྦེཧི པན ཨནིཙྩཏཱ སངྑཏཏཱདཱིཧི ཨནེཀསཏེཧི ཨཱཀཱརེཧི སབྦཱཔི ཝེདནཱ དུཀྑཱཨེཝ. ཏཐཱ ཨནཝཛྫསུཁཝིཔཱཀཊྛེན ཀུསལབྷཱཝོཔི ཨཀུསལཾ ཨུཔཱདཱཡེཝ ཝུཏྟོ. སབྦེཔི ཧི ཏེབྷཱུམཀཱ ཀུསལསམྨཏཱ དྷམྨཱ སཱསཝཏཱ སཾཀིལེསིཀཏཱ ཨོགྷནིཡ ཡོགནིཡ ཨུཔཱདཱནིཡཏཱ ¶ སངྑཱཏེཧི ཝཛྫེཧི སཱཝཛྫཱཨེཝ ཧོནྟི. དུཀྑསཙྩབྷཱུཏཱནཉྩ ཝིཔཱཀཱནཾ ཛནནཊྛེན ཨེཀནྟེན དུཀྑཝིཔཱཀཱཨེཝ ཧོནྟི. ཨཛ྄ཛྷཏྟཏྟིཀཉྩ སབྦལོཀིཡསམྨཏཾ ཨུཔཱདཱཡ ཝུཏྟཾ. སབྦེཔི ཧི ཙཏུབྦྷཱུ མཀདྷམྨཱ ཨེཀནྟེན ཨཏྟཱཔིནཱམ ནཏྠི. ཀུཏོ ཨཛ྄ཛྷཏྟཱནཱམ. བཧིདྡྷཱཨེཝ ཧོནྟི. སངྑཱརེ པརཏོ པསྶཱཏི ཧི ཝུཏྟནྟི. ཨཡཾ ནཡོ སེསཏྟིཀ དུཀདྷམྨེསུཔི ཡཐཱརཧཾ ནེཏབྦོ. ཨརིཡ སཙྩཾནཱམ སབྦེསཾ ཏེབྷཱུམཀདྷམྨཱནཾ ཨེཀནྟ དུཀྑབྷཱཝོ ཏཎྷཱཡ ཨེཀནྟ དུཀྑསམུདཡ བྷཱཝོ ནིབྦཱནསྶེཝ དུཀྑནིརོདྷ བྷཱཝོ ཨཊྛངྒིཀསྶ མགྒསྶེཝ དུཀྑནིརོདྷམགྒབྷཱཝོཙཱཏི. ཨིདྷམེཝ ཧི པརིསུདྡྷབུདྡྷཱིནཾ ཨརིཡཱནཾ ཉཱཎེ ཨཙལམཱནཾ སབྦཱཀཱརཔརིཔུཎྞཾ ནིཔྤརིཡཱཡསཙྩཾ ཧོཏཱིཏི. ཏེསུ ཨིདྷ སམྨུཏིསཙྩཾ ནིཝཏྟེནྟོ པརམཏྠཏོཏི ཨིད མཱཧ. ཏེན ཝུཏྟཾ པརམཏྠཏོཏི པརམཏྠསཙྩཏོཏི. ཏཏྠ ཨཏྠོ དུཝིདྷོ སབྷཱཝསིདྡྷོཙ པརིཀཔྤསིདྡྷོཙ. ཏཏྠ ཡོ ཝིནཱ ཨཉྙཱཔདེསེན ཀེཝལཾ ཝིསུཾ ཝིསུཾ ཨཏྟནོ ལཀྑཎེན ཝིཛྫམཱནོ ཧུཏྭཱ སིདྡྷོ. སོ ཙིཏྟཱདིཀོ ཨཏྠོ སབྷཱཝསིདྡྷོནཱམ. ཡོཔན ཨཏྟནོ ལཀྑཎེན ཝིཛྫམཱནོཡེཝ ནཧོཏི. ཝིཛྫམཱནསྶཔན ཨཏྠསྶ ནཱནཱ པཝཏྟིཨཱཀཱརེ ཨུཔཱདཱཡ ཙིཏྟེན པརིཀཔྤེཏྭཱ སཝིགྒཧཾ ཀཏྭཱ གཧིཏོ ཙིཏྟམཡོ ཙིཏྟནིམྨིཏོ ཧུཏྭཱ ཙིཏྟེཨེཝ ཨུཔལབྦྷམཱནོ ཧོཏི. སོ སཏྟཔུགྒལཱདིཀོ ཨཏྠོ པརིཀཔྤསིདྡྷོ ནཱམ. ཏེསུ སབྷཱཝསིདྡྷོཡེཝ པརམཏྠོནཱམ. སོ ཧི སནྟི བྷཝནྟི བུདྡྷིསདྡཱ ཨེཏྠཱཏི ཨཏྠོ. ཨེཀནྟཝིཛྫམཱནཊྛེན ཨིཏརཏོ པརམོ ཨུཀྐཾསགཏོ ཨཏྠོཏི པརམཏྠོ. ཨཔི ཙ, ཡེ ཨཡཾ ཨཏྠི ཨཡཾ ཨུཔལབྦྷཏཱིཏི གཧེཏྭཱ ཏསྶ ཨབྷིཉྙེཡྻསྶ ཨབྷིཉྙཏྠཱཡ, པརིཉྙེཡྻསྶ པརིཉྙཏྠཱཡ, པཧཱཏབྦསྶ པཧཱནཏྠཱཡ, སཙྪིཀཱཏབྦསྶ སཙྪིཀརཎཏྠཱཡ, བྷཱཝེཏབྦསྶ བྷཱཝནཏྠཱཡ པཊིཔཛྫནྟི. ཏེསཾ ཏདཏྠསཱདྷནེ ཨཝིསཾཝཱདཀཊྛེན པརམོ ཨུཏྟམོ ཨཏྠོཏི པརམཏྠོ. ཨིཏརོཔན ཨཝིཛྫམཱནཏྟཱ ཏསྶ ཨབྷིཉྙཱདིཨཏྠཱཡ པཊིཔཛྫནྟཱནཾ ཏདཏྠསཱདྷནེ ¶ ཝིསཾཝཱདཀོཡེཝ བྷཝིསྶཏི. ནཔན ཏདཏྠཾ སཱདྷེསྶ ཏཱིཏི པརམཏྠོཏི ཝཏྟུཾ ནཱརཧཏཱིཏི.

[༡༤] ཝིབྷཱཝནིཡཾ པན

‘‘པརམསྶཝཱ ཨུཏྟམསྶ ཉཱཎསྶ ཨཏྠོ གོཙརོཏི པརམཏྠོ’’ཏིཔི ཝུཏྟཾ. ཏཾ ན སུནྡརཾ.

ན ཧི པརམསདྡོཉཱཎེ ཝཏྟམཱནོ དིསྶཏི. ནཙ ཨཏྠསདྡོ གོཙརེཏི. ཡཉྩ ཨནུཊཱིཀཱཡཾ སཙྩམེཝ སཙྩིཀཾ. སོ ཨེཝ ཨཏྠོ ཨཝིཔརཱིཏསྶ ཉཱཎསྶ ཝིསཡབྷཱཝཊྛེནཱཏི སཙྩིཀཊྛོཏི ཝུཏྟཾ. ཏཾཔི ཨཝིཔརཱིཏེན ཉཱཎེན ཨརཎཱིཡཏོ ཨུཔགནྟབྦ ཏོ ཨཏྠོཏི ཨིམམཏྠཾ དསྶེཏི. ནཔརམསདྡསྶ ཨཏྠནྟི. [པརམཏྠཔདཾ]

༡༣. ཙིཏྟནྟི ཨེཏྠ ཙིནྟེཏཱིཏི ཙིཏྟཾ. ཨེཏྠཙ ཙིནྟནཀྲིཡཱ ནཱམ ནིཙྩཾ ཨཱརམྨཎཱཔེཀྑཱ ཧོཏི. ན ཧི སཱ ཨཱརམྨཎེན ཝིནཱ ལབྦྷཏཱིཏི. ཏསྨཱ ཨཱརམྨཎགྒཧཎ ཨཱརམྨཎུཔལདྡྷིཡེཝ ཨིདྷ ཙིནྟནཱཏི དཊྛབྦཱཏི. ཨེཝཉྷི སཏི བྷཝངྒསམཡ ཝིསཉྙིསམཡེསུ ཙིཏྟཾ ཨཱརམྨཎེན ཝིནཱཔི པཝཏྟཏཱིཏི ཨེཝཾ ཝཱདཱིནཾ ཝཱདོ པཊིཀྑིཏྟོ ཧོཏི. སནྟེསུཔིཙ ནིསྶཡ སམནནྟརཱདཱིསུ ཏསྶ པཙྩཡེསུ ཏེཧི ནཱམཾ ཨལབྷིཏྭཱ ཨཱརམྨཎཔཙྩཡཝསེནེཝསྶ ནཱམཾ སིདྡྷནྟི དཊྛབྦཾ. ཙིནྟེནྟི སམྤཡུཏྟཀཱ དྷམྨཱ ཨེཏེནཱཏི ཙིཏྟཾ. ཏཉྷི ཨཱརམྨཎགྒཧཎཀིཙྩེ པུབྦངྒམབྷཱུཏནྟི ཏཾ སམྤཡུཏྟདྷམྨཱཔི ཨཱརམྨཎཾ གཎྷནྟཱ ཏསྶ ཝསེནེཝ གཎྷནྟཱིཏི. ཙིནྟནམཏྟཾཝཱ ཙིཏྟཾ. སབྦེཔི ཧི དྷམྨཱ ཏཾཏཾ ཀྲིཡཱམཏྟཱཝ ཧོནྟི. ན ཏེསུ དབྦཾཝཱ སཎྛཱནཾ ཝཱ ཝིགྒཧོཝཱ ཨུཔལབྦྷཏི. པཙྩཡཱཡཏྟ ཝུཏྟིནོ ཙ ཧོནྟི. ན ཏེ ཨཏྟནོ ཐཱམེནཝཱ བལེནཝཱ ཝསེནཝཱ སཏྟིཡཱཝཱ ཨུཔྤཛྫིཏུཾཔི སཀྐོནྟི. པགེཝ ཙིནྟེཏུཾཝཱ ཕུསེཏུཾཝཱཏི. ཁཎམཏྟཊྛཱཡིནོཙ ཧོནྟི, ན ཀདཱཙི ཀསྶཙི ཝསེ ཝཏྟིཏུཾ སཀྐོནྟཱིཏི. ཏསྨཱ ཏེསུ ཨིདཾ དབྦཾ, ཨཡཾ སཏྟི, ཨཡ ཀྲིཡཱཏི ཨེཝཾ ཝིབྷཱགོ ནལབྦྷཏཱིཏི དཊྛབྦཾ. ཨེཝཉྩ ཀཏྭཱ སབྦེསུ པརམཏྠཔདེསུ ཨེཀཾ བྷཱཝསཱདྷནམེཝ པདྷཱནཏོ ལབྦྷཏི. ཏདཉྙ སཱདྷནཱནིཔན ¶ པརིཡཱཡཏོཝ ལབྦྷནྟཱིཏི ཝེདིཏབྦཾ. ཨེཏྠ ཙ དབྦཱདིཝསེན ཨབྷེདསྶ ཙིནྟནསྶ ཨཏྠཝིསེསཉཱཔནཏྠཾ ཝིབྷཱག ཀཔྤནཱཝསེན བྷེདཀརཎཾ པརིཡཱཡཀཐཱཏི དཊྛབྦཾ. ཡཐཱ སིལཱ པུཏྟཀསྶསརཱིརནྟི, ཏཐཱ ཀརཎཉྩ ཏཾ ཏཾ ཀྲིཡཱསངྑཱཏ དྷམྨཝིམུཏྟསྶ པརཔརིཀཔྤིཏསྶ ཀཱརཀབྷཱུཏསྶ ཨཏྟ ཛཱིཝ སཏྟ པུགྒལསྶ སབྦསོ ཨབྷཱཝདཱིཔནཏྠཾ. སཏི ཧི ཨཏྟཱདིམྷི ཀིཾ ཨབྷེདསྶ བྷེདཀཔྤནཱཡཱཏི.

ཝིབྷཱཝནིཡཾ པན

སསཝིསཱཎཾ ཝིཡ ཨབྷཱུཏསྶ བྷཱུཏ ཀཔྤནཱ ཝུཏྟཱ ཝིཡ དིསྶཏི. ཨཡམསྶཱདྷིཔྤཱཡོ-དྷམྨེསུ ཀཏྟཱཝཱ ཀཱརེ ཏཱཝཱ ཀོཙི ནཏྠི. ལོཀེཔན ཨཏྟཔྤདྷཱནོ ཀྲིཡཱ ནིཔྥཱདཀོ ཀཏྟཱནཱམ སིདྡྷོ. ཏསྨཱ ཙིནྟནཀིཙྩེ ཨཏྟཔྤདྷཱནཏཱ དཱིཔནཏྠཾ ཏཾ ཀཏྟུབྷཱཝཾ ཙིཏྟེ ཨཱརོཔེཏྭཱ ཙིནྟེཏཱིཏི ཙིཏྟནྟི ཝུཏྟཾ.

ཙིཏྟསྶཙ བལེན ཏཾསམྤཡུཏྟཱནཾཔི ཏསྨིཾ ཀིཙྩེ ཏདནུཀཱུལཔྤཝཏྟིདཱིཔནཏྠཾ པུནཀརཎབྷཱཝཾ ཙིཏྟེ ཀཏྟུབྷཱཝཉྩ ཏེསུ ཨཱརོཔེཏྭཱ ཙིནྟེནྟི སམྤཡུཏྟཀཱ དྷམྨཱ ཨེཏེནཱཏི ཙིཏྟནྟི ཝུཏྟནྟི. ཨཔི ཙེཏྠ ཙིཏྟསདྡོ ཝིཙིཏྲཏྠཝཱཙཀོ དཊྛབྦོ. ཝུཏྟཉྷེ ཏཾ སཾཡུཏྟཀེ –

དིཊྛཾ ཝོ བྷིཀྑཝེ ཙརཎཾནཱམ ཙིཏྟནྟི. ཨེཝཾ བྷནྟེ. ཏམྤི ཁོ བྷིཀྑཝེ ཙརཎཾ ཙིཏྟཾ ཙིཏྟེནེཝ ཙིནྟིཏནྟི. ཏེནཱཔི ཁོ བྷིཀྑཝེ ཙརཎེན ཙིཏྟེན ཙིཏྟཉྙེཝ ཙིཏྟཏརནྟི, ནཱ ཧཾ བྷིཀྑཝེ ཨཉྙཾ ཨེཀནིཀཱཡཾཔི སམནུཔསྶཱམི ཡཾ ཨེཝཾ ཙིཏྟཾ. ཡཐཡིདཾ བྷིཀྑཝེ ཏིརཙྪཱནགཏཱ པཱཎཱ. ཏེཔི ཁོ བྷིཀྑཝེ ཏིརཙྪཱནགཏཱ པཱཎཱ ཙིཏྟེནེཝ ཙིཏྟིཀཏཱ. ཏེཧིཔི ཁོ བྷིཀྑཝེ ཏིརཙྪཱན གཏེཧི པཱཎེཧི ཙིཏྟཉྙེཝ ཙིཏྟཏརནྟི.

ཏཏྠ ཙརཎཾནཱམ ཙིཏྟནྟི ཡཏྠཝིཙིཏྲཱནི དིབྦཝིམཱནཱདཱིནི ཙིཏྟཀམྨཱནི ཀཏྭཱ ཨིདཉྩིདཉྩ པུཉྙཾ ཀརོནྟཱ ཨིདྷཙིདྷཙ ནིབྦཏྟཱཏི དསྶེནྟོ ཝིཙརནྟི ¶ . ཏསྶ པཊཀོཊྛཀསྶེཏཾ ནཱམཾ. ཙིཏྟེནཱཏི ནིསྶཀྐེ ཀརཎཝཙནཾ. ཡཐཡིདནྟི ཡཐཱ ཨིམེ. ཙིཏྟིཀཏཱཏི ཝིཙིཏྲཱ ཀཏཱ. ཨེཏྠཙ ཙིཏྟཝིཙིཏྟཀཱཡ སཉྙཱཝིཙིཏྟཱ. སཉྙཱཝིཙིཏྟཏཱཡ ཏཎྷཱཝིཙིཏྟཱ. ཏཎྷཱཝིཙིཏྟཏཱཡ ཀམྨཱནི ཝིཙིཏྟཱནི. ཀམྨཝིཙིཏྟ ཏཱཡ ཡོནིཡོ ཝིཙིཏྟཱ. ཡོནིཝིཙིཏྟཏཱཡ ཏེསཾ ཏིརཙྪཱ ནགཏཱནཾ ཝིཙིཏྟཏཱ ཝེདིཏབྦཱ. [ཝཙནཏྠོ]

ཏཾ ཏཾ སབྷཱཝོ ལཀྑཎཾ, ཀིཙྩསམྤཏྟིཡོ རསོ;

གཡ྄ཧཱཀཱརོ ཕལཾཝཱཔི, པཙྩུཔཊྛཱན སཉྙིཏཾ.

ཨཱསནྣཀཱརཎཾ ཡཾ ཏཾ, པདཊྛཱནནྟི ཏཾ མཏཾ;

དྷམྨཱནཾ ཝཝཏྠཱནཱཡ, ཨལཾ ཨེཏེ ཝིབུདྡྷིནོ.

ཨཱརམྨཎཝིཛཱནནལཀྑཎཾ ཙིཏྟཾ, པུབྦངྒམརསཾ, སནྡྷཱནཔཙྩུཔཊྛཱནཾ, ནཱམརཱུཔཔདཊྛཱནཾ. [ཙིཏྟཾ]

༡༤. ཙེཏསིཀནྟི ཨེཏྠ ཙེཏསི བྷཝཾ ཏདཱཡཏྟཝུཏྟིཏཱཡཱཏི ཙེཏསིཀཾ. ཕསྶཱདི དྷམྨཛཱཏཾ. ཨེཏྠཙ ཏདཱཡཏྟཝུཏྟིཏཱ ནཱམ ཨེཀུཔྤཱདཏཱདཱིཧི ལཀྑཎེཧི ཙིཏྟེན སཧ ཨེཀཱི བྷཱུཏསྶ ཝིཡ པཝཏྟི. ཨེཏེན ཡཱ ཙིཏྟསྶ ཛཱཏི. སཱཨེཝ ཕསྶཱདཱིནཾ. ཡཱ ཙིཏྟསྶ ཛརཱ, ཡཾ ཙིཏྟསྶ མརཎཾ, ཡཾ ཙིཏྟསྶ ཨཱརམྨཎཾ, ཡཾ ཙིཏྟསྶ ཝཏྠུ, ཏདེཝ ཕསྶཱདཱིནནྟི ཨེཝཾ ཨེཀཔུཔྥ མཉྫརིཡཾ ཨེཀཝཎྚུཔནིབྦནྡྷཱནི པུཔྥཱནི ཝིཡ ཙིཏྟེན སཧ ཨེཀཛཱཏིཡཱདི ཨུཔནིབྦནྡྷཱ ཕསྶཱདཡོ དྷམྨཱ ཨིདྷ ཙེཏསིཀཾནཱམཱཏི སིདྡྷཱ ཧོནྟི. ཨེཝཉྩ སཏི ཙིཏྟཾཔི ཏེཧི ཕསྶཱདཱིཧི སཧ ཏཐེཝ ཨཱཡཏྟཾ པཝཏྟཏཱིཏི ཏཾཔི ཕསྶིཀཾ ཝེདནིཀནྟིཨཱདིནཱ ཝཏྟབྦནྟི ཙེ. ན. ཙིཏྟསྶེཝ ཛེཊྛཀཏྟཱ. མནོཔུབྦངྒམཱ དྷམྨཱ, མནོསེཊྛཱ མནོམཡཱཏི ཧི ཝུཏྟཾ. ཨེཏྠཙ མནོམཡཱཏི མནསཱཨེཝ པཀཏཱ ནིམྨིཏཱ ཙིཏྟཀྲིཡཱ བྷཱུཏཱཏི ཨཏྠོ. ཨེཏེན ཏེ ཕསྶཱདཡོ དྷམྨཱ ཙིཏྟེན ཝིནཱ ནུཔལབྦྷནྟཱིཏི དསྶེཏི. ཙིཏྟཾཔན ཏེཧི ཀེཧིཙི ཝིནཱཔི པཝཏྟཏིཡེཝ. པཉྩཝིཉྙཱཎ ཙིཏྟཉྷིཏེཧི ཀེཧིཙི ཝིཏཀྐཱདཱིཧི ཝིནཱ ཨུཔྤཛྫཏཱིཏི. ཏསྨཱ ཏེསཉྙེཝ ཏདཱཡཏྟ ཝུཏྟིཏཱ ཝཏྟབྦཱ ན ཙིཏྟསྶཱཏི.

[༡༥] ཝིབྷཱཝནིཡཾ པན

ཨེཀཱལམྦཎཏཱ ¶ མཏྟེན ཏེསཾ ཏདཱཡཏྟཝུཏྟིཏཾ ཙེཏསི ཀཏྟཉྩ ཝིབྷཱཝེཏི. ཏཾ ན སུནྡརཾ.

ན ཧི ཨེཀཱལམྦཎཏཱམཏྟེན ཙེཏསིཀཾནཱམ ཛཱཏནྟི. ཨེཏྠ ཙ ལོཀེ ནཱནཱཝཎྞདྷཱཏུཡོ ཨུདཀེ གྷཾསིཏྭཱ ཝཏྠུམྷི ནཱནཱ ཙིཏྟཀམྨཱནི ཀརོནྟི, ཏཏྠ ཝཏྠུམྷི ཕརཎཾ བནྡྷནཉྩ ཨུདཀསྶེཝ ཀིཙྩཾ, ན ཝཎྞདྷཱཏཱུནཾ. ནཱནཱརཱུཔ དསྶནཾ ཝཎྞདྷཱཏཱུནམེཝ ཀིཙྩཾ, ན ཨུདཀསྶ. ཏཏྠ ཝཏྠུཝིཡ ཨཱརམྨཎཾ དཊྛབྦཾ. ཨུདཀཾཝིཡ ཙིཏྟཾ. ནཱནཱ ཝཎྞདྷཱཏུཡོཝིཡ ཙེཏསིཀདྷམྨཱཏི. [ཙེཏསིཀཾ]

༡༥. རཱུཔནྟི ཨེཏྠ རུཔྤཏཱིཏི རཱུཔཾ. སཱིཏུཎྷཱདཱིཧི ཝིརོདྷི པཙྩཡེཧི ཝིསམ པཝཏྟི ཝསེན ཝིཀཱརཾ ཨཱཔཛྫཏི, ཏེཧི ཝཱ ཝིཀཱརཾ ཨཱཔཱདཱིཡཏཱིཏི ཨཏྠོ. ཡཐཱཧ –

རུཔྤཏཱིཏི ཁོ བྷིཀྑཝེ ཏསྨཱ རཱུཔནྟི ཝུཙྩཏི. ཀེན རུཔྤཏི. སིཏེནཔི རུཔྤཏི. ཨུཎྷེནཔི རུཔྤཏི. ཛིགྷཙྪཱཡཔི རུཔྤཏི. ཝིཔཱསཱཡཔི རུཔྤཏི. ཌཾས མཀས ཝཱཏཱཏཔ སརིཾ སཔ སཔྥསྶེཧིཔི རུཔྤཏཱིཏི. རུཔྤཏཱིཏིཙ རུཔྤཏི, ཀུཔྤཏི, གྷཊྚཱིཡཏི, པིལཱི༹ ཡཏི, བྷིཛྫཏཱིཏི.

མཧཱནིདྡེསེ ཝུཏྟཾ. ཨཡམེཏྠ པིཎྜཏྠོ, ཡེ དྷམྨཱ ཙིརཊྛིཏིཀཱཙ ཧོནྟི སཔྤཊིགྷསབྷཱཝཱཙ. ཏེསཉྙེཝ ཋིཏིཀྑཎེསུ ཝིརོདྷིཔཙྩཡེཧི སམཱགམོནཱམ ཧོཏི. ནཔནཉྙེསཾ པརིཏྟཀྑཎཱནཾ ཨཔྤཊིགྷསབྷཱཝཱནནྟི. ཏེསཉྷི ཨཔྤཊིགྷསབྷཱཝཱནཾ སུཁུམ རཱུཔཱནཾཔི བཧིདྡྷཱ སཱིཏཱདཱིཧི སམཱགམོནཱམ ནཏྠི. ཀུཏོ པརིཏྟཀྑཎཱནཾ ཨཔྤཊིགྷསབྷཱཝཱནཉྩ ཨརཱུཔདྷམྨཱནནྟི. ཡདིཨེཝཾ སུཁུམརཱུཔཱནཾ ཨརཱུཔཏཱཔཏྟི སིཡཱཏི. ནསིཡཱ. ཨོལཱ༹རིཀརཱུཔེཧི སམཱནགཏི ཀཏྟཱ. ཏཱནིཧི ཨོལཱ༹རིཀེསུ རུཔྤམཱནེསུ རུཔྤནྟིཡེཝཱཏི. སམཱགམོཙ ནཱམ ཨིདྷ ཐཔེཏྭཱ ཨཱཔཱཏགམནཾ ཨཱརམྨཎཀརཎཉྩ ཨཉྙམཉྙཝིརུདྡྷཱནཾ ཋིཏིཔཏྟཱནཾ ཨོལཱ༹རིཀརཱུཔཱནཾ མཧཱབྷཱུཏཱནམེཝཝཱ ཨཉྙམཉྙཱབྷིགྷཊྚནཾ ¶ ཝུཙྩཏི, རུཔྤཏི གྷཊྚཱིཡཏི པཱིལཱི༹ཡཏཱིཏི ཧི ཝུཏྟཾ. རུཔྤནཉྩནཱམ པརསེནཱཡུདྡྷེན རཊྛཁོབྷོཝིཡ ཀལཱཔནྟརགཏདྷཱཏཱུནཾ ཀུཔྤནཾ བྷིཛྫནཾཙ ཝུཙྩཏི. ཀུཔྤཏི བྷིཛྫཏཱིཏི ཧི ཝུཏྟཾ. ཨེཏྠཙ ཀུཔྤཏཱིཏི ཁོབྷཏི ཙཉྩལཏི, བྷིཛྫཏཱིཏི ཝིཀཱརཾ ཨཱཔཛྫཏི. ཡསྨིཾ ཁཎེ ཝིརོདྷིཔཙྩཡསམཱགམཾ ལབྷནྟི. ཏཏོ པཊྛཱཡ སཡཾཔི ཝིཀཱརཔཏྟཱ ཧོནྟི. ཨོམཏྟཱདྷིམཏྟརཱུཔསནྟཏཱིནཾ ཨུཔྤཏྟིཡཱ པཙྩཡབྷཱཝཾ པཏྟཱ ཧོནྟཱིཏི ཨཏྠོ. ཨཔིཙེཏྠ རུཔྤནཾ དུཝིདྷཾ ཝཌྜྷནཾ, ཧཱཡནཉྩ. ཏདུབྷཡཾཔི ཀཔྤཝུཊྛཱནེ ཀཔྤསཎྛཱནེ ནཱནཱཨཱཡུཀཔྤ སཾཝཙྪར ཨུཏུ མཱས རཏྟི དིཝཱདཱིནཾ པརིཝཏྟནེཙ པཱཀཊཾ ཧོཏཱིཏི. ཀསྨཱ པན རཱུཔནྟི ནཱམཾ གྷཊྚནཝསེན རུཔྤནདྷམྨཱནམེཝ སིདྡྷནྟི. ཏེསམེཝ སཝིགྒཧཏྟཱ. རཱུཔདྷམྨཱ ཧི སམཱུཧསཎྛཱནཱདི བྷཱཝཔཏྟིཡཱ སཝིགྒཧཱ ཧོནྟི. ཏསྨཱ ཏེསམེཝ རུཔྤནཾ པཙྩཀྑཏོཔི ལོཀསྶ པཱཀཊནྟི ཏེསྭེཝ རཱུཔནྟི ནཱམཾ སིདྡྷནྟི དཊྛབྦཾ. ཨརཱུཔདྷམྨཱ པན ཨཝིགྒཧཱཏི ན ཏེསཾ ཝིཀཱརོ པཙྩཀྑཏོ ལོཀསྶ པཱཀཊོ ཧོཏི. ཏཾ ཏཾ རཱུཔཝིཀཱརཾ དིསྭཱཝཱ སུཏྭཱ ཝཱ པུཙྪིཏྭཱཡེཝ ཝཱ སོ ལོཀེན ཛཱནིཏབྦོ ཨཉྙཏྲ པརཙིཏྟཝིདཱུཧི. ཏསྨཱ ཏེསཾ རཱུཔཏཱཔཏྟི ནཏྠཱིཏི.

[༡༦] ཝིབྷཱཝནིཡཾ པན

ཏེསཾ རཱུཔཏཱཔཏྟིཔྤསངྒོ སཱིཏཱདིགྒཧཎ སཱམཏྠིཡེན ནིཝཏྟིཏོ. ཡསྨཱ པན ཝོཧཱརོནཱམ ལོཀོཔཙཱརེན ཝིནཱ ནསིཛ྄ཛྷཏི. ལོཀོཔཙཱརོཙ པཱཀཊནིམིཏྟཝསེ ནེཝ པཝཏྟོ. ཏསྨཱ ཨིདྷ སཱིཏཱདིགྒཧཎེན ཝིནཱཔི ཏཔྤསངྒནིཝཏྟི ལོཀཏོཝ སིདྡྷཱཏི དཊྛབྦཱ.

ཡསྨཱ ཙ བྲཧྨལོཀེ བྲཧྨཱནཾ ཀཱཡཝིཀཱར ཝཙཱིཝིཀཱརཱ ཙ ཨིདྡྷིཝིཀུཔྤནཱཝསཔྤཝཏྟཱ ནཱནཱརཱུཔཝིཀཱརཱཙ དིསྶནྟིཡེཝ. ཏེཙ ཨེཀེན པརིཡཱཡེན རུཔྤནཱཀཱརཱཨེཝ ནཱམ ཧོནྟི, ཏསྨཱ ཏེསཾ ཝསེན ཏཏྠ རཱུཔཱནཾ རཱུཔཏཱསིདྡྷི ཧོཏཱིཏི ཝེདིཏབྦཾ. རཱུཔཡཏི ཝཱ ཨཏྟནོ སབྷཱཝེན པཀཱསཏཱིཏི རཱུཔཾ. ཨརཱུཔདྷམྨཱ ཧི ན ཨཏྟནོ སབྷཱཝེན པཱཀཊཱ ཧོནྟི. རཱུཔསནྣིསྶཡེནེཝ གཧེཏབྦཱ ¶ . ཨིདཾ པན ཨཏྟནོ སབྷཱཝེནེཝ པཱཀཊཾ པཉྩཝིཉྙཱཎེཧིཔི གཧེཏབྦནྟི. ཨིམསྨིཾ ཨཏྠེ སཏི བྲཧྨལོཀེ རཱུཔཱནཾཔི ཨུཛུ ཀཏོཝ རཱུཔཏཱསིདྡྷི ཧོཏཱིཏི.

[༡༧] ཝིབྷཱཝནིཡཾ པན

ཨནུགྒཱཧཀཱནཾ སཱིཏཱདཱིནཾ ཝསེན ཏཾ སབྷཱཝཱ ནཱཏིཝཏྟན ཝསེནཙ ཏཏྠ རཱུཔཏཱསིདྡྷི ཝིབྷཱཝིཏཱ. ཡསྨཱཔན སཱིཏེ ནཱཔི ཨུཎྷེནཱཔཱིཏིཨཱདིཝཙནཾ ནིདསྶནམཏྟཾ ཧོཏི. ཀམྨ ཙིཏྟཱཧཱརཱནཾཔི ཝསེན རུཔྤནསྶ སམྦྷཝཏོ, ཏཐཱཧི སཉྙཱ ཝིཉྙཱཎཱནིཔི རཱུཔཱརམྨཎརསཱརམྨཎེཧི ཨེཝ པཱལི༹ཡཾ ནིདྡིཊྛཱནི. ན ཧི སཉྙཱ རཱུཔཾཨེཝ སཉྫཱནཱཏི. ན ཙ ཝིཉྙཱཎཾ རས མེཝ ཝིཛཱནཱཏི. ནིདསྶནམཏྟེན དེསནཱ ཧོཏཱིཏི ཝིཉྙཱཡཏཱིཏི. ཏསྨཱ སཱིཏཱདིགྒཧཎཾ ཨམུཉྩིཏྭཱཝ ཏཏྠ རཱུཔཏཱསིདྡྷིཝིབྷཱཝནེན པཡོཛན ནཏྠཱིཏི. [རཱུཔཾ]

༡༦. ནིབྦཱནནྟི ཨེཏྠ ནིབྦཱཡནྟི སབྦེ ཝཊྚདུཀྑསནྟཱཔཱ ཨེཏསྨིནྟི ནིབྦཱནཾ. ནིབྦཱཡནྟཱིཏི ཡེ ཀིལེསཱཝཱ ཁནྡྷཱཝཱ ཨབྷཱཝིཏམགྒསྶ ཨཱཡཏིཾ ཨུཔྤཛྫནཱརཧཔཀྑེ ཋིཏཱ ཧོནྟི. ཏེཡེཝ བྷཱཝིཏམགྒསྶ ཨནུཔྤཛྫནཱརཧཔཀྑཾ པཱཔུཎནྟཱིཏི ཨཏྠོ. ན ཧི ཁཎཏྟཡཾ པཏྭཱ ནིརུདྡྷཱ ཨཏཱིཏདྷམྨཱ ནིབྦཱཡནྟི ནཱམ. པཙྩུཔྤནྣེསུ ཨཱཡཏིཾ ཨཝསྶཾ ཨུཔྤཛྫམཱནེསུཙ དྷམྨེསུ ཝཏྟབྦམེཝ ནཏྠཱིཏི. ཝཊྚདུཀྑསནྟཱཔཱཏི ཀིལེསཝཊྚ ཀམྨཝཊྚ ཝིཔཱཀཝཊྚ དུཀྑསནྟཱཔཱ. ན ཧི ཏིཝིདྷ ཝཊྚདུཀྑསནྟཱཔརཧིཏཱནཾ རུཀྑཱདཱིནཾ ཨནུཔྤཱདནིརོདྷོ ནིབྦཱནཾནཱམ ཧོཏཱིཏི. ཨེཏསྨིནྟི ཝིསཡེ བྷུམྨཾ. ཡཐཱ ཨཱཀཱསེ སཀུཎཱ པཀྑནྟཱིཏི. ཡེཧི ཏེ ནིབྦཱཡནྟི. ཏེསཾ ཏབྦིནིམུཏྟཾ ཨཉྙཾ ནིབྦུཏིཊྛཱནཾནཱམ ཀིཉྩི ནཏྠཱིཏི. ནིབྦཱཡནྟི ཝཱ ཨརིཡཛནཱ ཨེཏསྨིནྟི ནིབྦཱནཾ. ནིབྦནྟི དྷཱིརཱ ཡཐཡཾ པདཱིཔོཏི ཧི ཝུཏྟཾ. ནིབྦཱཡནྟཱིཏི ཏཾ ཏཾ ཀིལེསཱནཾཝཱ ཁནྡྷཱནཾཝཱ པུན ཨཔྤཊིསནྡྷིཀབྷཱཝཾ པཱཔུཎནྟཱིཏི ཨཏྠོ. ཨེཀསྨིནྟི ཝིསཡེཨེཝ བྷུམྨཾ, ཨེཏསྨིཾ ཨདྷི གཏེཏིཔི ཡོཛེནྟི. ཊཱིཀཱསུཔན བྷཝཱབྷཝཾ ཝིནནཏོ སཾསིབྦན ཏོ ཝཱནཾ ཝུཙྩཏི ཏཎྷཱ. ཏཏོ ནིཀྑནྟནྟི ནིབྦཱནནྟི ཝུཏྟཾ.

[༡༨] ཝིབྷཱཝནིཡཾ པན

‘‘ནིབྦཱབྷིཝཱ ¶ ཨེཏེན རཱགགྒིཨཱདིཀོཏི ནིབྦཱན’’ནྟིཔི ཝུཏྟཾ. ཏཾ ན སུནྡརཾ.

ན ཧི མགྒེཝིཡ ནིབྦཱནེ ཀཏྠཙི ཀརཎསཱདྷནཾ དིཊྛཾ, ནཙ ནིབྦཱནཾ ནིབྦཱུཏི ཀྲིཡཱསཱདྷནེ རཱགཱདིཀསྶ ཀཏྟུནོ སཧ ཀཱརིཔཙྩཡོ ཧོཏཱིཏི. [ནིབྦཱནཾ]

དུཏཱིཡགཱཐཱཡ པརམཏྠདཱིཔནཱ ནིཊྛིཏཱ.

ཙིཏྟསངྒཧ-པརམཏྠདཱིཔནཱི

༡༧. ཨིདཱནི ཨུདྡེསཀྐམེན ཙིཏྟཾ ཏཱཝ ནིདྡིསནྟོ ཏཏྠ ཙིཏྟནྟིཨཱདིམཱཧ. ཏཏྠཱཏི ཏེསུ ཙཏཱུསུ ཨབྷིདྷམྨཏྠེསུ. ཏཱཝ པཐམཾ. ཙཏྟཱརོ ཝིདྷཱ པཀཱརཱ ཡསྶ ཏཾ ཙཏུབྦིདྷཾ.

༡༨. ཀཱམཱཝཙརནྟི ཨེཏྠ ཀཱམཱིཡཏཱིཏི ཀཱམོ. ཀཱམེནྟིཝཱ ཨེཏྠ སཏྟཱ ཨཝིཀྑམྦྷིཏཀཱམརཱགཏྟཱ ཀཱམརཏིཡཱཨེཝ རམནྟི. ན ཨུཔརིབྷཱུམཱིསུ ཝིཡ ཛྷཱནརཏིཡཱཏི ཀཱམོ. ཨེཀཱདསཝིདྷཱ ཀཱམབྷཱུམི. ནནུ ཙེཏྠ ཛྷཱནལཱབྷིནོཔི སནྟཱིཏི. ན ན སནྟི. ཏེཔན ཀདཱཙི དེཝཱཏི ནཏྠེཏྠ དོསོ. ཨཝཱིཙིནིརཡཱདཡོ ཀཐཾ ཀཱམཱིཡནྟི. ཀཐཉྩ ཏཏྠ སཏྟཱ ཀཱམརཏིཡཱ རམནྟཱིཏི. ནིམིཏྟསྶཱདཝསེནཝཱ བྷཝནིཀནྟིཝསེནཝཱཏི. མརཎཀཱལེ ཧི ཨུཔཊྛིཏཱ ནིརཡགྒིཛཱལཱ སུཝཎྞཝཎྞཱཝིཡ ཁཱཡནྟི. ཨེཀོ ཀིར མིཙྪཱདིཊྛིཀོ བྲཱཧྨཎོ མརཎམཉྩེ ནིཔྤནྣོ ཧོཏི. ཏསྶ ཨཱཙརིཡབྲཱཧྨཎཱ སམཱིཔེ ཋཏྭཱ བྲཧྨལོཀཾ བྷོ གཙྪཱཏི ཝདནྟི. ཏསྶཔན ཨཝཱིཙིནིརཡེ ཨགྒིཛཱལཱ ཨུཔཊྛཧནྟི. ཏདཱ སོ བྷོ ཨཱཙརིཡཱ སུཝཎྞཝཎྞཱ པཉྙཱཡནྟཱིཏི ཨཱཧ. ཨེས བྷོ བྲཧྨལོཀོ. ཏཏྠ གཙྪཱཏི ཝདནྟི. སོ ཀཱལངྐཏྭཱ ཨཝཱིཙིམྷི ཨུཔྤཛྫི. ཨེཝཾ ནིམིཏྟསྶཱདཝསེན ཏེ ཀཱམཱིཡནྟི. ཏཏྠ ཨུཔྤནྣཱནཾཔི བྷཝནིཀནྟིནཱམ ཧོཏཱིཏི. ཨཔིཙ, ཏཏྠ ཨུཔྤནྣཱ ཨཝིཀྑམྦྷིཏཀཱམརཱགཱཨེཝ ཧོནྟི, ཨོཀཱསེ སཏི ཀཱམརཏིཡཱ རམིསྶནྟི ཡེཝཱཏི. ཏསྨིཾ ཀཱམེ ཨཝཙརཏཱིཏི ཀཱམཱཝཙརཾ. ¶ ཨེཏྠཙ ཨཝཙརཏཱིཏི པདསྶ ཨུཔྤཛྫཏཱིཏི ཨཏྠོ ན གཧེཏབྦོ. སོ ཧི ཨཏྠོ པཱལི༹ཡཱཙ ནསམེཏི. ནཱནཱདོསཡུཏྟོཙ ཧོཏཱིཏི. ཡཾ ཨེཏསྨིཾ ཨནྟརེ ཨེཏྠཱཝཙརཱ ཨེཏྠ པརིཡཱཔནྣཱཏི ཧི པཱལི༹ཡཾ ཝུཏྟཾ. ཡདི ཙེཏྠ སོ ཨཏྠོ ཨདྷིཔྤེཏོ སིཡཱ. ཨེཝཾ སབྷི ཨེཏྠཱཝཙརཱ ཨེཏྠུཔྤནྣཱཏི ཝུཏྟཾ སིཡཱ. ནཔན ཝུཏྟཾ. ནཙ པརིཡཱཔནྣསདྡོ ཨུཔྤནྣསདྡེན སཧ སམཱནཏྠོཏི སཀྐཱ ཝཏྟུཾ. ན ཧི ལོཀུཏྟརཙིཏྟཱནི ཏཱིསུ བྷཝེསུ ཨུཔྤནྣཱ ནིཔི ཏཏྲ པརིཡཱཔནྣཱནིཡེཝ ཧོནྟཱིཏི. ཨེཝཾ ཏཱཝ པཱལི༹ཡཱ ནསམེཏཱིཏི.

ཡདིཙ སོ ཨཏྠོ གཧིཏོ སིཡཱ. ཨེཝཉྩ སཏི ཏསྨིཾ ཀཱམེ ཡེ མཧགྒཏ ལོཀུཏྟརདྷམྨཱ ཨུཔྤཛྫནྟི. ཏེསཾཔི ཀཱམཱ ཝཙརཏཱཔཏྟིདོསོ རཱུཔཱཝཙརཏཱདི མུཏྟིདོསོཙ ཨཱཔཛྫཏི. ཡེཙ ཀཱམཱཝཙརདྷམྨཱ རཱུཔཱརཱུཔབྷཱུམཱིསུ ཨུཔྤཛྫནྟི. ཏེསཉྩ རཱུཔཱརཱུཔཱ ཝཙརཏཱ པཏྟིདོསོ ཀཱམཱཝཙརཏཱ མུཏྟིདོསོཙ ཨཱཔཛྫཏཱིཏི. ནནུ ཡེབྷུཡྻཝུཏྟིཝསེནཔི ཀེསཉྩི ནཱམལཱབྷོ ཧོཏི. ཡཐཱ ཝནཙརཀོ སངྒཱམཱཝཙརོཏི. ཏསྨཱ ཨིདྷཔི ཏེསཾ དྷམྨཱནཾ ཨཏྟནོ ཨཏྟནོ བྷུམྨཱིསུ ཨུཔྤནྣབཧུལཏྟཱ ཀཱམཱཝཙརཱདི ནཱམལཱབྷེ སཏི ན ཀོཙི དོསོཏི.ན. ཨེཝཉྷི སཏི ལོཀུཏྟར དྷམྨཱནཾ ཀཱམཱཝཙརཏཱདི མུཙྩནཏྠཾ ཡེབྷུཡྻེན ཨུཔྤནྣབྷཱུམི ཝིསུཾ ཝཏྟབྦཱ སིཡཱ. ན ཙ སཱ ནཱམབྷཱུམི ཨཏྠི. ཡཏྠ ཏེ ཡེབྷུཡྻེན ཨུཔྤཛྫནྟཱིཏི. ཏེཧི ཨུཔྤཛྫནྟཱ ཏཱིསུ བྷཝེསུ ཨེཝ ཨུཔྤཛྫནྟི. ཏསྨཱ ཏེསཾ ཀཱམ རཱུཔཱརཱུཔཱཝཙརཏཱཔཏྟིདོསོ དུནྣིཝཱརོ སིཡཱཏི. ཨེཝཾ ནཱནཱདོསཡུཏྟོ ཧོཏཱིཏི. ཏསྨཱསྶ ཏཐཱ ཨཏྠཾ ཨགྒཧེཏྭཱ ཨེཏྠཱཝཙརཱ ཨེཏྠ པརིཡཱཔནྣཱཏི བྷགཝཏཱ སཾཝཎྞིཏེན པཱལི༹ནཡེནེཝསྶ ཨཏྠོ གཧེཏབྦོཏི. ཨཡཉྷེཏྠ ཨཏྠོ. ཀཱམེ ཨཝཙརཏི པརིཡཱཔནྣབྷཱཝེན ཏསྨིཾ ཨཛ྄ཛྷོགཱཧེཏྭཱ ཙརཏི པཝཏྟཏཱིཏི ཀཱམཱཝཙརནྟི. པརིཡཱཔནྣབྷཱཝོཙནཱམ ཨཏྟནོ ཨཱདྷཱརབྷཱུཏེན ཏེན ཀཱམེན སཧ སམཱནཛཱཏིགོཏྟནཱམཏཱ སངྑཱཏེཧི པརིཏོབྷཱགེཧི ཏསྨིཾ ཀཱམེ ཨཱཔནྣབྷཱཝོ ཨནུཔྤཝིཊྛ བྷཱཝོ. ཨནྟོགདྷབྷཱཝོཏི ཝུཏྟཾ ཧོཏི. སོཙ ཏཐཱ ¶ པརིཡཱཔནྣབྷཱཝོ པརིགྒཱཧིནིཡཱ ཀཱམཏཎྷཱཡ ཀཏོཏི དཊྛབྦོ. ཨེཏྟཱཝཏཱ ཡེདྷམྨཱ རཱུཔཱརཱུཔསཏྟསནྟཱནབྷཱུཏཱཔི མཡ྄ཧཾ ཨེཏེཏི ཀཱམ ཏཎྷཱཡ པརིགྒཧིཏཱ ཀཱམེ པརིཡཱཔནྣཱཝ ཧོནྟི. ཏེ ཀཱམཱཝཙརཱནཱམཱཏི སིདྡྷཱ ཧོནྟི. རཱུཔཱརཱུཔཱ ཝཙརེསུཔི ཨཡཾ ནཡོ ནེཏབྦོ. ཏེསུཔན རཱུཔཏཎྷཱ ཨརཱུཔཏཎྷཱཙ པརིགྒཱཧིནཱི ཏཎྷཱ དཊྛབྦཱ.

ཡེཔན དྷམྨཱ ཏིཎྞཾ ཏཎྷཱནཾ པརིགྒཧཝིམུཏྟཱ ཧོནྟི. ཏེ ཏཱིསུ བྷཝེསུ ཨུཔྤནྣཱཔི ཏཏྲ ཨཔརིཡཱཔནྣཱཨེཝ ཧོནྟཱིཏི ལོཀུཏྟརཱ ནཱམ ཛཱཏཱཏི ཝེདིཏབྦཱ. ཨེཏྠཙ པཊྛཱནེ ཨཱརུཔྤེ ཀཱམཙྪནྡཾ ནཱིཝརཎཾ པཊིཙྩ ཨུདྡྷཙྩནཱིཝརཎནྟིཨཱདིནཱ ཨརཱུཔསཏྟསནྟཱནེཔི ཀཱམཙྪནྡསངྑཱཏཱཡ ཀཱམཏཎྷཱཡ ཨུཔྤཏྟི ཝུཏྟཱ. ཏསྨཱ རཱུཔཱརཱུཔ བྷཱུམཱིསུ ཨུཔྤནྣཱནཾ ཀཱམདྷམྨཱནཾ པརིགྒཱཧིནཱིཏཎྷཱ རཱུཔཱརཱུཔསཏྟསནྟཱན གཏཱཔི དཊྛབྦཱ. པཱལི༹ཡཾ ཀཱམཙྪནྡནཱིཝརཎནྟི ཨིདཾ ནཱིཝརཎཛཱཏིཀཏྟཱ ཝུཏྟཾ. ན ཧི ཛྷཱནབྷཱུམཱིསུ ཨེཀནྟནཱིཝརཎཀིཙྩཱནི ནཱིཝརཎཱནི སཀྐཱ ལདྡྷུནྟི. ཨཏྲ ཀཱམབྷེདོ ཝཏྟབྦོ. དྭེཀཱམཱ ཀིལེ སཀཱམོཙ, ཝཏྠུཀཱམོཙཱཏི. ཏཏྠ ཐཔེཏྭཱ རཱུཔཱརཱུཔརཱགེ ཨཉྙོ སབྦོཔི ལོབྷོ ཨིམསྨིཾ ཙཏུབྦྷཱུམིཔརིཙྪེདེ ཀིལེ སཀཱམོནཱམ. ཐཔེཏྭཱཙ རཱུཔཱརཱུཔཱཝཙརདྷམྨེ ཨཉྙེ སབྦེཔི ཏཱིསུ བྷཱུམཱིསུ ཨུཔྤནྣཱ ཀཱམཱཝཙརདྷམྨཱ ཝཏྠུཀཱམོནཱམཱཏི. ཡཾཔན ཨཊྛསཱལིནིཡཾ སབྦེཔི ཏེབྷཱུམཀཱ དྷམྨཱ ཝཏྠུཀཱམོཏི ཝུཏྟཾ. ཏཾ མཧཱནིདྡེསེ ནིདྡིཊྛེན སུཏྟནྟིཀཔརིཡཱཡེན ཝུཏྟནྟི གཧེཏབྦཾ. ན ཧི རཱུཔཱརཱུཔཱཝཙརདྷམྨཱ ཨབྷིདྷམྨེ ཀཱམནཱམེན ཝུཏྟཱ ཨཏྠཱིཏི. [ཀཱམཱཝཙརཔདཾ]

༡༩. རཱུཔཱཝཙརཾ ཨརཱུཔཱཝཙརནྟི ཨེཏྠ རཱུཔཱརཱུཔསདྡཱ ཏཱསུ བྷཱུམཱིསུ ནིརུལ༹ྷཱཏི དཊྛབྦཱ. ཨཔིཙ དྭེ བྷཱུམིཡོ རཱུཔབྷཱུམི, ཨརཱུཔབྷཱུམཱིཏི. ཏཏྠ རུཔྤནལཀྑཎཾ རཱུཔཾ ཡཏྠ ནཏྠི, སཱ ཙཏུབྦིདྷཱ བྷུམྨི ཨརཱུཔབྷཱུམིནཱམ. སེསཱ སཏྟཝཱིསཏིཝིདྷཱ བྷུམྨི རཱུཔབྷཱུམིནཱམ. ཏཏྠཙ ཧེཊྛཱ ཨེཀཱདསཝིདྷཱ བྷུམྨི ཨོལཱ༹རིཀེན ཀཱམེན ཝིསེསེཏྭཱ ཀཱམ བྷཱུམཱིཏི ཝུཏྟཱ. ཨུཔརི སོལ༹སཝིདྷཱ བྷུམྨི རཱུཔབྷཱུམིཨིཙྩེཝ ཝུཏྟཱཏི དཊྛབྦཱ. ཡཏྠཔན ཏཎྷཱཝཱ ཛྷཱནཱནིཝཱ རཱུཔཱརཱུཔསདྡེཧི ཝུཏྟཱནི. ཏཏྠ ¶ ནིསྶཡསྶནཱམཾ ནིསྶིཏེ ཨཱརོཔནཝསེན ནིསྶཡོཔཙཱརོ ཝེདིཏབྦོ. ཡཏྠཙ ཀཱམཱཝཙརཱདིསདྡེཧི བྷཱུམིཨེཝ ཝུཏྟཱ. ཏཏྠ ནིསྶིཏསྶ ནཱམཾ ནིསྶཡེ ཨཱརོཔནཝསེན ནིསྶིཏོ པཙཱརོཏི. ཡམེཏྠ ཝཏྟབྦཾ, ཏཾ ཀཱམཱཝཙརཔདེ ཝུཏྟནཡམེཝཱཏི. ཨཡམེཏྠ ཏེབྷཱུམཀ པརིཙྪེདེ པཱལི༹ཨནུགཏཱ པརམཏྠདཱིཔནཱ. ཡཐཱཧ –

ཀཏམེ དྷམྨཱ ཀཱམཱཝཙརཱ. ཧེཊྛཏོ ཨཝཱིཙིནིརཡཾ པརིཡནྟཾ ཀརིཏྭཱ ཨུཔརིཏོ པརནིམྨིཏཝསཝཏྟཱིདེཝེ ཨནྟོ ཀརིཏྭཱ ཡཾ ཨེཏསྨིཾ ཨནྟརེ ཨེཏྠཱཝཙརཱ ཨེཏྠ པརིཡཱཔནྣཱ ཁནྡྷདྷཱཏུཨཱཡཏནཱ རཱུཔཱ ཝེདནཱ སཉྙཱ སངྑཱརཱ ཝིཉྙཱཎཾ. ཨིམེདྷམྨཱ ཀཱམཱཝཙརཱ. ཀཏམེ དྷམྨཱ རཱུཔཱཝཙརཱ. ཧེཊྛཏོ བྲཧྨལོཀཾ པརིཡནྟཾ ཀརིཏྭཱ ཨུཔརིཏོ ཨཀནིཊྛེ དེཝེ ཨནྟོ ཀརིཏྭཱ ཡཾ ཨེཏསྨིཾ ཨནྟརེ ཨེཏྠཱཝཙརཱ ཨེཏྠ པརིཡཱཔནྣཱ སམཱཔནྣསྶཝཱ ཨུཔཔནྣསྶཝཱ དིཊྛདྷམྨསུཁཝིཧཱརིསྶཝཱ ཙིཏྟཙེཏསིཀཱ དྷམྨཱ, ཨིམེ དྷམྨཱ རཱུཔཱཝཙརཱ. ཀཏམེ དྷམྨཱ ཨརཱུཔཱཝཙརཱ. ཧེཊྛཏོ ཨཱཀཱསཱནཉྩཱཡཏནུཔགེ དེཝེ པརིཡནྟཾ ཀརིཏྭཱ ཨུཔརིཏོ ནེཝསཉྙཱ ནཱསཉྙཱ ཡཏནུཔགེ དེཝེ ཨནྟོ ཀརིཏྭཱ ཡཾ ཨེཏསྨིཾ ཨནྟརེ. ལ. ཨིམེ དྷམྨཱ ཨརཱུཔཱཝཙརཱཏི.

[༡༩] ཊཱིཀཱསུ པན

ཡཐཱཝུཏྟཾ སུཝིསདཾ པཱལི༹ནཡཾ ཨགྒཧེཏྭཱ ཨཉྙཐཱ ཝཙནཏྠཱཙ ཝིནིཙྪཡཱཙ ཨེཏྠ ཝུཏྟཱ. སབྦེ ཏེ སཱརཏོ ན པཙྩེཏབྦཱཏི.

ནནུ ཨཊྛསཱལིནིཡམེཝ ཏེཙ ཨཉྙེཙ ཨཏྠཱ ཝུཏྟཱཏི. སཙྩཾ. བྷཱུཏཾཔན སུཝིསདཾ པཱལི༹ཨནུགཏཾ ཨཏྠཾ ཉཏྭཱ ཀིཾཝིཀྑེཔེནཱཏི.

༢༠. ལོཀུཏྟརནྟི ཨེཏྠ ལུཛྫནཔལུཛྫནཊྛེན ལོཀོ ཝུཙྩཏི ཡཐཱཝུཏྟོ ཏེབྷཱུམཀདྷམྨོ. ཡཐཱཧ ལུཛྫཏི པལུཛྫཏཱིཏི ཁོ བྷིཀྑཝེ ཏསྨཱ ལོཀོཏི ཝུཙྩཏཱིཏི. ཨེཝཾ སནྟེ ལོཀུཏྟརདྷམྨཱནཾཔི ནིབྦཱནཝཛྫཱནཾ ལོཀཏཱཔཏྟི སིཡཱ. ཀསྨཱ, ཏེསཾཔི ¶ ལུཛྫནཔལུཛྫནདྷམྨཏྟཱཏི. ནསིཡཱ. ཡཏྠ ཧི ནིཙྩོ དྷུཝོ སསྶཏོཏི མཧཱཛནསྶ མིཙྪཱགཱཧོ ནིཝིསཏི. ཏཏྠེཝ ཏསྶ ནིཝཱརཎཏྠཾ ཨཡཾ ལོཀསམཉྙཱ ནིཡམཱིཡཏི. ཏསྨཱ སབྦསོ མིཙྪཱགཱཧཝིམུཏྟཱནཾ ཏེསཾ ལོཀཏཱཔཏྟི ནཏྠཱིཏི ཝདནྟི. ཡེསཾཝཱ ལུཛྫནཾཔལུཛྫནཉྩ མཧཱཛནསྶ པཱཀཊཾ. ཏེསཉྙེཝ ལོཀཏཱསིདྡྷཱིཏི ནཏྠི ལོཀུཏྟརཱནཾ ལོཀཏྟཔྤསངྒོཏི. ལོཀཏོ ཨུཏྟརཏཱིཏི ལོཀུཏྟརཾ. མགྒཙིཏྟཾ. ཏཏོ ཨུཏྟིཎྞནྟི ལོཀུཏྟརཾ. ཕལཙིཏྟཾ. ནིབྦཱནཾཔན ཨིདྷ ནལབྦྷཏཱིཏི. ཨུཏྟརཎཉྩེཏྠ ཏཎྷཱཏྟཡགྒཱཧ ཝིམུཏྟིཡཱ ཏཱིསུ ལོཀེསུ ཨཔརིཡཱཔནྣབྷཱཝོཡེཝ. སོཙ ཨཔརིཡཱཔནྣབྷཱཝོ ཀེསཾ དྷམྨཱནཾ ཨདྷིཊྛཱན བྷཱུཏོཝིཡ གཡ྄ཧཏཱིཏི ཝིསུཾ ཨེཀཱ ཙཏུཏྠཱི ཨཝཏྠཱབྷཱུམིནཱམཱཏི.

ཙཏུབྦྷཱུམིཝིབྷཱགསྶ པརམཏྠདཱིཔནཱ ནིཊྛིཏཱ.

༢༡. ཨེཝཾ ཙིཏྟཾ བྷཱུམིབྷེདེན ཧཱིནཔཎཱིཏཱ ནུཀྐམཏོ ཙཏུདྷཱ ནིདྡིསིཏྭཱ ཨིདཱནི ཏདེཝ ཙཏུབྦིདྷཾ ཙིཏྟཾ ཡཐཱནིདྡིཊྛཀྐམེན ཝིབྷཛནྟོ པཐམཾ ཀཱམཱཝཙརཙིཏྟཾ. ཏཏྠཙ ཧཱིནཾ ཨསོབྷཎཙིཏྟཾ. ཏཏྠཙ སབྦཧཱིནཾ ཨཀུསལཙིཏྟཾ ཏཱཝ དསྶེཏུཾ སོམནསྶསཧ གཏནྟིཨཱདིམཱཧ. ཨེཏྠཙ ཀཱམཱཝཙརཙིཏྟསྶཔི ཨཀུསལཱཧེཏུཀ སཧེཏུཀཱནུཀྐམོ ཧཱིན པཎཱིཏཱནུཀྐམཝསེན ཝུཏྟོཏི དཊྛབྦོ.

[༢༠] ཝིབྷཱཝནིཡཾ པན

ཨུཔརི ཝུཙྩམཱནཱནཾ བཧཱུནཾ ཙིཏྟཱནཾ སོབྷཎསཉྙཱཀརཎསུཁཏྠཾ ཨཔྤཀེ པཱཔཱཧེཏུཀེཡེཝ པཐམཾ དསྶེནྟོཏི ཝུཏྟཾ. ཏཾ ན སུནྡརཾ.

ཏདཏྠོ ཧི ཡཐཱཝུཏྟཧཱིནཱདིཀྐམེནེཝ སིདྡྷོཏི.

[༢༡] ཡཉྩ ཏཏྠ

ཏེསུ ཏེསུཙ བྷཝེསུ གཧིཏཔྤཊིསནྡྷིཀསྶ སཏྟསྶ ཨཱདིཏོ ཝཱིཐིཙིཏྟཝསེན ལོབྷསཧགཏ ཙིཏྟུཔྤཱདཱན མེཝ སམྦྷཝཏོ ཏེཡེཝ པཐམནྟི ཝུཏྟཾ. ཏཾཔི ནཡུཛྫཏི.

ཨཱདིཏོ ¶ ཝཱིཐིཙིཏྟཝསེན མནོདྭཱརཱ ཝཛྫནསྶེཝ སབྦཔཐམཾ ཨུཔྤཛྫནཏོཏི. ཨཀུསལེསུ པན ལོབྷམཱུལ ཙིཏྟཾ བཧུཀཉྩ ཧོཏི. དྭཱིཧི ཝཊྚམཱུལེཧི ཡུཏྟཏྟཱ པདྷཱནཾ པཱཀཊཉྩ ཧོཏཱིཏི ཏདེཝ པཐམཾ ཝུཏྟནྟི དཊྛབྦཾ.

༢༢. ཏཏྠ སུནྡརཾ མནོཏི སུམནོ. སིནིདྡྷཙིཏྟཾ. ན ཧི ཨནཝཛྫཊྛེན སུནྡརཏཱ ཨིདྷ ཡུཏྟཱཏི. སུནྡརཾ མནོ ཨེཏསྶཱབྷིཝཱ སུམནོ. སིནིདྡྷཙིཏྟསམངྒཱི པུགྒལོ. སུམནསྶ བྷཱཝོ སོམནསྶ. མཱནསིཀསུཁཝེདནཱཡེཏཾ ནཱམཾ. ཨེཏྠཙ སུམནསྶ བྷཱཝོཏི ཏསྨིཾ ཙིཏྟེ པུགྒལེཝཱ སུམནཱབྷིདྷཱནསྶཝཱ ཨཡཾ སོ སུམནོཏི སུམནབུདྡྷིཡཱཝཱ པཝཏྟིནིམིཏྟནྟི ཨཏྠོ. བྷཱཝོཏི ཧི ཨབྷིདྷཱནབུདྡྷཱིནཾ པཝཏྟིནིམིཏྟཾ ཝུཙྩཏི. བྷཝནྟི པཝཏྟནྟི ཨབྷིདྷཱནབུདྡྷིཡོ ཨེཏསྨིནྟི ཀཏྭཱ. ཨེཏསྨིནྟི ཙ ནིམིཏྟེ བྷུམྨཾ. ཡཐཱ ནཱགོ དནྟེསུ ཧཉྙཏེཏི. ཡཐཱ ཧི ཏཏྠ ཨཏྟནོ དནྟནིམིཏྟཾ དནྟཡུཏྟེ ནཱགེ ཧནནཔྤཝཏྟི ཧོཏི, ཨེཝམིདྷཔི ཏཾ ཝེདནཱནིམིཏྟཾ ཝེདནཱཡུཏྟེ མནསྨིཾ པུགྒལེཝཱ ཨབྷིདྷཱནབུདྡྷིཡོ པཝཏྟནྟཱིཏི. བྷཝནྟི བུདྡྷིསདྡཱ ཨེཏེནཱཏི བྷཱཝོཏིཙ ཝདནྟི. ཨེཏསྨཱཏི ཙ ཨཔརེ. སོམནསྶེན སཧ ཨེཀཏོ གཏཾ པཝཏྟནྟི སོམནསྶསཧགཏཾ. སོམནསྶཝེདནཱསམྤཡུཏྟནྟི ཨཏྠོ. དསྶནཾ དིཊྛི. སཱ པན སམྨཱདིཊྛི, མིཙྪཱདིཊྛིཝསེན དུཝིདྷཱ. ཨིདྷ མིཙྪཱདིཊྛིཡུཏྟཱ. ཨཀུསལཱདྷིཀཱརཏྟཱ. དིཊྛིཡེཝ དིཊྛིགཏཾ. ཡཐཱ གཱུཐགཏཾ མུཏྟགཏནྟི. དིཊྛིགཏེན སམཾ པཀཱརེཧི ཡུཏྟནྟི དིཊྛིགཏ སམྤཡུཏྟཾ. དིཊྛིགཏེན ཨེཀུཔྤཱདཏཱདཱིཧི པཀཱརེཧི སམཾ ཨེཀཱིབྷཱུཏ མིཝ ཡུཏྟཾ སཾསཊྛནྟི ཨཏྠོ. ཨསངྑཱརིཀམེཀཾ སསངྑཱརིཀམེཀནྟི ཨེཏྠ སངྑཱརོཏི པུབྦཱཏིསངྑཱརོ. སོཙ དུཝིདྷོ པཡོགོ, ཨུཔཱཡོཙཱཏི. ཏཏྠ ཨཱཎཏྟིཡཱཝཱ ཨཛ྄ཛྷེསནཱཡཝཱ ཏཛྫེཏྭཱ ཝཱ ཨིདཾ ཀརོཧཱིཏི པརེཧི ཀཏོ ཀཱཡཝཙཱིཔཡོགོ པཡོགོནཱམ. ཨཱཎཏྟཱདིནཱཔན ཝིནཱཝ ཀམྨསྶ ཀརཎཏྠཾ ཏཾ ཏཾ ཨུཔཱཡཾ པརེ ཨཱཙིཀྑནྟི. ཨཀརཎེ ཨཱདཱིནཝཾ ཀརཎེཙ ཨཱནིསཾསཾ དསྶེནྟི, ཀཏིཀཾཝཱ ཀརོནྟི, དཎྜཾཝཱ ཐཔེནྟི, སཡམེཝ ཝཱ ཏཾ ཏཾ ཀཱརཎཾ ཨནུསྶརཏི, པཙྩཝེཀྑཏི. ཨེཝམཱདིནཱ ནཡེན ¶ ཨུཔཱཡོ ཨནེཀཝིདྷོ. སོ དུཝིདྷོཔི ཨིདྷ སངྑཱརོ ནཱམ. སངྑརོཏི ཨཏྟནོ པཀཏིཡཱ ཀཱཏུཾ ཨནིཙྪམཱནཾ ཙིཏྟ སནྟཱནཾ ཨཀཱཏུཾ ཨདཏྭཱ ཀརཎཏྠཱཡ སཾཝིདཧཏི ཏསྨིཾ ཏསྨིཾ ཀམྨེ པཡོཛེཏཱིཏི ཀཏྭཱ. ཡོཔན པཙྩཡགཎོ ཏེན སངྑཱརེན ཝིརཧིཏོ ཧོཏི. སོ ཨསངྑཱརོ. ཡོཔན ཏེནསཧིཏོ ཧོཏི. སོ སསངྑཱརོཏི. ཝུཏྟཉྷེཏཾ ཨཊྛཀཐཱཡཾ –

སཧ སངྑཱརེནཱཏི སསངྑཱརོ. ཏེན སསངྑཱརེན སཔྤཡོགེན སཨུཔཱཡེན པཙྩཡགཎེནཱཏི ཨཏྠོཏི.

ཨེཏྠཙ པཙྩཡགཎོཏི ཨཱརམྨཎཱདིཀོ སཱདྷཱརཎོ པཙྩཡ གཎོ ཨཊྛཀཐཱཡཾ ཝུཏྟོ. ཨསཱདྷཱརཎོཔན ཀུསལཀམྨེསུ སཔྤུརིསུཔནིསྶཡཱདིཀོ ཨཀུསལཀམྨེསུ ཨསཔྤུརིསུཔནིསྶཡཱདིཀོ པཙྩཡགཎོ ཝིསེསེཏྭཱ ཡོཛེཏུཾ ཡུཏྟོ. སོཔན ཡདཱ དུཝིདྷེན སངྑཱརེན ཝིནཱ སཡམེཝ ཙིཏྟཾ ཨསཾསཱིདམཱནཾ ཀཏྭཱ ཨུཊྛཱཔེཏི སམུཊྛཱཔེཏི, ཏདཱ སོཨསངྑཱརོནཱམ. ཡདཱཔན ཏེན ཝིནཱ སཡམེཝ ཙིཏྟཾ ཨུཊྛཱཔེཏུཾ སམུཊྛཱཔེཏུཾ ནསཀྐོཏི, སངྑཱརཾ སཧཱཡཾ ལབྷིཏྭཱཝ སཀྐོཏི, ཏདཱ སོ སསངྑཱརོནཱམ. ཨིཏི ཨསངྑཱརོ སསངྑཱརོཏིཙ ཨིདཾ པཙྩཡ གཎསྶེཝ ནཱམཾ. ན ཙིཏྟསྶ. ཙིཏྟཾཔན ཨསངྑཱརེན སུདྡྷེན པཙྩཡགཎེན ཨུཔྤནྣཾ ཨསངྑཱརིཀཾ. སསངྑཱརེན པཙྩཡགཎེན ཨུཔྤནྣཾ སསངྑཱརིཀཾ, ཨུཔྤནྣཏྠེ ཧི ཨཡཾ ཨིཀཔཙྩཡོཏི. ཡསྨིཾ སམཡེ ཨཀུསལཾ ཙིཏྟཾ ཨུཔྤནྣཾ ཧོཏི སོམནསྶསཧགཏཾ དིཊྛིགཏསམྤཡུཏྟཾ སསངྑཱརེནཱཏི ཧི པཱལི༹ཡཾ ཝུཏྟནྟི. ཨེཏྠཙ སསངྑཱརེན པཙྩཡགཎེན ཨུཔྤནྣཾ ཧོཏཱིཏི ཡོཛེཏབྦནྟི. ཨཡམེཏྠ ཨསངྑཱརིཀསསངྑཱརིཀཔདེསུ པརམཏྠདཱིཔནཱ.

[༢༢] ཊཱིཀཱསུ པན

ཨིམམཏྠཾ ཨསལླཀྑེཏྭཱ ཙིཏྟམེཝ ཨསངྑཱརཾ སསངྑཱརནྟི ཙ གཧེཏྭཱ ཡཾ ཝུཏྟཾ, ‘‘ནཏྠི སངྑཱརོ ཨསྶཱཏི ཨསངྑཱརཾ. ཏདེཝ ཨསངྑཱརིཀཾ. སཧ སངྑཱརེན ཝཏྟཏཱིཏི སསངྑཱརཾ. སསངྑཱརམེཝ ¶ སསངྑཱརིཀནྟི ཙ. སོ ཡསྶ ནཏྠི. ཏཾ ཨསངྑཱརཾ. ཏདེཝ ཨསངྑཱརིཀཾ. སངྑཱརེན སཧིཏཾ སསངྑཱརི ཀནྟི ཙ’’. སབྦམེཏཾ ན ཡུཛྫཏིཡེཝ.

[༢༣] ཡཉྩ ཝིབྷཱཝནིཡཾ

སངྑརོཏི ཙིཏྟཾ ཏིཀྑབྷཱཝསངྑཱཏམཎྜནཝིསེསེན སཛྫེཏི. སངྑརཱིཡཏིཝཱ ཏཾ ཨེཏེན ཡཐཱཝུཏྟནཡེན སཛྫཱིཡཏཱིཏི སངྑཱརོཏི ཝུཏྟཾ. ཏཾཔི ན སུནྡརཾ.

ཨེཝཉྷི སཏི སསངྑཱརིཀཔི ཙིཏྟཾ ཏིཀྑཾནཱམ སིཡཱཏི.

[༢༤] ཡཉྩ ཏཏྠ

‘‘སོ པན ཨཏྟནོ པུབྦབྷཱགཔྤཝཏྟེ ཙིཏྟསནྟཱནེཙེཝ པརསནྟཱནེཙ པཝཏྟཏཱིཏི ཏཾ ནིབྦཏྟིཏོ ཙིཏྟསྶ ཏིཀྑབྷཱཝ སངྑཱཏོ ཝིསེསོཝ ཨིདྷ སངྑཱརོཏི’’ ཝུཏྟཾ. ཏཾཔི ཨསངྑཱརིཀ སསངྑཱརིཀཔདཱནཾ ཝཙནཏྠེསུ ཝིརཛ྄ཛྷིཏྭཱ ཏདནུ རཱུཔསྶ སངྑཱརསྶ པརིཀཔྤནཱཝསེན ཝུཏྟཏྟཱ ནཡུཏྟམེཝ.

[༢༥] ཨེཏེན

པུབྦཔྤཡོགསམྦྷཱུཏོ, ཝིསེསོ ཙིཏྟསམྦྷཔཱི;

སངྑཱརོ ཏཾ ཝསེནེཏྠ, ཧོཏྱཱསངྑཱརིཀཱདིཏཱཏི.

སཱདྷཀགཱཐཱཔི པཊིཀྑིཏྟཱ ཧོཏཱིཏི.

[༢༦] ཡཉྩ ཏཏྠ

‘‘ཨཐཝཱ, སསངྑཱརིཀཾ ཨསངྑཱརིཀནྟི ཙེ ཏཾ ཀེཝལཾསངྑཱརསྶ བྷཱཝཱབྷཱཝཾ སནྡྷཱཡ ཝུཏྟཾ. ནཏསྶ སཧཔཝཏྟིསབྦྷཱ ཝཱ བྷཱཝཏོཏི. བྷིནྣསནྟཱནཔྤཝཏྟིནོཔི སངྑཱརསྶ ཨིདྷམཏྠིཏཱཡ ཏཾ ཝསེན ནིབྦཏྟཾ ཙིཏྟཾ སངྑཱརོ ཨསྶ ཨཏྠཱིཏི སསངྑཱརིཀཾ. སལོམཀོ སཔཀྑཀོཏྱཱདཱིསུཝིཡ སཧ སདྡསྶ ཝིཛྫམཱནཏྠཔརིདཱིཔནཏོ. ཏབྦིཔརཱིཏམྤན ཏདབྷཱཝཏོ ཝུཏྟནཡེན ཨསངྑཱརིཀ’’ནྟི ཝུཏྟཾ. ཏཾཔི པཱལི༹ཨཊྛཀཐཱསིདྡྷཾ ¶ ཨུཛུཾ ཝིསདཾ ཨཏྠཾ མུཉྩིཏྭཱ ཨཏྟནོ པརིཀཔྤནཱ ཝསེན ཝུཏྟཏྟཱ ན གཧེཏབྦམེཝ.

ཨེཏྠཙ ཨཏྟནོ ཨིཙྪཱཡ ཝིནཱ པརེསཾ ཨཱཎཏྟིཡཱཝཱ ཨཛ྄ཛྷེ སནཱཡཝཱ ཡཱཙནཱཡཝཱ པཝཏྟིཏཾ ཙིཏྟཾ པཡོགསམུཊྛིཏཾ ནཱམ. ཏཐཱ ཨཏྟནོ ཨིཙྪཱཡ ཝིནཱ པརེསཾ བྷཡེནཝཱ ལཛྫཱཡཝཱ གཱརཝེནཝཱ ཀཐིཀཱཡཝཱ དཎྜབྷཡེནཝཱ པཝཏྟིཏཾ ཨུཔཱཡསམུཊྛིཏཾ ནཱམ. སཡམེཝཝཱ ཨཏྟནོ ལཱིནཾ ཙིཏྟཾ ཉཏྭཱ ཏེན ཏེན ཨུཔཱཡེན ཨཏྟཱནཾ ཨོཝདིཏྭཱཝཱ ཏཾ ཏཾ ཨུཔཱཡཾ ཨནུསྶརིཏྭཱཝཱ པཝཏྟིཏཾ ཙིཏྟཾ ཨུཔཱཡསམུཊྛིཏཾ ནཱམ. ཨིདཉྩ ནཡདསྶནམེཝཱཏི. དིཊྛིགཏེན ཝིཔྤཡུཏྟཾ དིཊྛིགཏཝིཔྤཡུཏྟཾ. ཨུདཱསིནབྷཱཝེན པེཀྑཏི ཨནུབྷཝནཱཀཱརེན ཨཱརམྨཎཾ པསྶཏཱིཏི ཨུཔེཀྑཱ. ཨུཔཔཏྟིཏོ ཡུཏྟིཏོ ཨིཀྑཏི པསྶཏཱིཏིཝཱ ཨུཔེཀྑཱ. ཡཐཱཧི སོམནསྶ དོམནསྶཱནི ཨཱརམྨཎཾ ཨདྷིམཏྟཏོ པསྶནྟི. ཡཏོ སོམནསྶིཏོ པུགྒལོ ཏེན ཨཱརམྨཎེན ཝིཡོགེ ཝིཀཱརཔཏྟོ ཧོཏི. དོམནསྶིཏོཙ ཏེན ཨཱརམྨཎེན སཾཡོགེ ཝིཀཱརཔཏྟོ ཧོཏི. ན ཏཐཱ ཨཡཾ, ཨཡཾ པན ཡུཏྟིཏོཝ པསྶཏི ན ཨཱརམྨཎསཾཡོག ཝིཡོགཧེཏུ པུགྒལཾ ཝིཀཱརཾ པཱཔེཏཱིཏི. ཀེཙིཔན ཨུཔཔཏྟིཏོ ཡུཏྟིཏོ ཨིཀྑཏཱིཏི ཨིདཾ ཨིདྷ ནསམྦྷཝཏི. ན ཧི ཨཀུསལཾ ཡུཏྟརཱུཔཾ ནཱམ ཧོཏཱིཏི ཝདནྟི. ཨུཔེཀྑཱཡ སཧགཏནྟི སམཱསོ.

༢༣. ཨེཏྠཙ ཀིཉྩཱཔི ཕསྶཱདཡོ ཝིཏཀྐཱདཡོ མོཧཱདཡོཙ དྷམྨཱ ཨིམིནཱ སཀལེན ཨཊྛཝིདྷེན ཙིཏྟེན སཧ གཏཱ སམྤཡུཏྟཱཙ ཧོནྟི, ན པན ཏེ ཝེདནཱཝིཡ སཡཾཔི བྷེདཝནྟཱ ཧོནྟི. ནཙ དིཊྛིསངྑཱརཱནཾ ཝིཡཏེསཾ ཨིམསྨིཾ ཙིཏྟེ ཀཏྠཙི ཧོནྟི ཀཏྠཙིནཧོནྟཱིཏི ཨཡཾ ཝིཀཔྤོ ཨཏྠི. ཏསྨཱཏེ ཨིམསྶཙིཏྟསྶ བྷེདཀརཱ ནཧོནྟཱིཏི ཨིདྷ ནགཧིཏཱཏི དཊྛབྦཱ. ལོབྷོཔན ཨཉྙེཧི ཨིམསྶ ཨཊྛཝིདྷསྶ བྷེདཀརོ ཧོཏི. ཝེདནཱདིཊྛི སངྑཱརཱཙ ཨིམསྶ ཨཉྙམཉྙསྶ བྷེདཀརཱ ཧོནྟཱིཏི ཏེཨེཝ ཨིདྷ གཧིཏཱཏི དཊྛབྦཱ. ནནུ པཱིཏི མཱན ཐིནམིདྡྷཱནིཔི བྷེདཀརཱནི ཧོནྟཱིཏི ཏཱནིཔི ཨིདྷ སཔཱིཏིཀཾ ཨཔཱིཏིཀནྟི མཱནསམྤཡུཏྟཾ མཱནཝིཔྤཡུཏྟནྟི ¶ ཐིནམིདྡྷསམྤཡུཏྟཾ ཐིནམིདྡྷཝིཔྤཡུཏྟནྟི ཙ གཧེཏབྦཱ ནཱིཏི. ན. ཏེསུ ཧི སོམནསྶེ གཧིཏེ པཱིཏི གཧིཏཱཝ ཧོཏི. ཨིཏརཱནིཙ ཏཱིཎི ཨནིཡཏཡོགཱིནིཙ ཧོནྟི, ཡེཝཱཔན ཀཱནིཙཱཏི ནགཧིཏཱནཱིཏི.

[༢༧] ཝིབྷཱཝནིཡཾ པན

ཕསྶཱདིཝིཏཀྐཱདིམོཧཱདིདྷམྨཱ ཨིཏོ ཨཉྙེཧིཔི ཙིཏྟེ ཧི ཡུཏྟཱ ཧོནྟཱིཏི ནཏེ ཨཉྙེཧི ཨིམསྶ ཝིསེསཾ ཀརོནྟི. ཏསྨཱ ཏེ ཨིདྷ ན གཧིཏཱཏི ཨིམིནཱ ཨདྷིཔྤཱཡེན ཡཾ ཝུཏྟཾ ‘‘ཀསྨཱ པནེཏྠ ཨཉྙེསུཔི ཕསྶཱདཱིསུ སམྤཡུཏྟདྷམྨེསུ ཝིཛྫམཱནེསུ སོམནསྶསཧགཏཱདིབྷཱཝོཝ ཝུཏྟོཏི. སོམནསྶཱདཱིནམེཝ ཨསཱདྷཱརཎ བྷཱཝཏོཏི. ཕསྶཱདཡོཧི ཀེཙི སབྦཙིཏྟ སཱདྷཱརཎཱ ཀེཙི ཀུསལཱདི སཱདྷཱརཎཱ. མོཧཱདཡོཙ སབྦཱ ཀུསལསཱདྷཱརཎཱཏི ན ཏེཧི སཀྐཱ ཙིཏྟཾ ཝིསེསེཏུ’’ནྟི. ཏཾ ཝིཙཱརེཏབྦཾ.

ཨེཝཉྷི སཏི སོམནསྶུཔེཀྑཱ སངྑཱརཱཔི ཨཉྙེསུ དིསྶནྟཱིཏི ཏེཔི ཨཉྙེཧི ཨིམསྶ ཝིསེསཾ ནཀརོནྟི. ཏསྨཱ ཏེཔི ཨིདྷ ནགཧེཏབྦཱ སིཡུནྟི.

༢༤. ཨེཏྠཙ སོམནསྶཔྤཊིསནྡྷིཀཏཱ, ཨགམྦྷཱིརཔྤཀཏིཏཱ, ཨིཊྛཱརམྨཎསམཱཡོགོ, བྱསནམུཏྟིཙ སོམནསྶསྶ ཀཱརཎཾ. སོམནསྶཔྤཊིསནྡྷིཀོཧི སདཱ བྷཝངྒསོམནསྶེན པརིབྷཱཝིཏ སནྟཱནོ ཧོཏཱིཏི ཏསྶ ཙིཏྟཾ ཨུཔྤཛྫམཱནཾ ཡེབྷུཡྻེན སོམནསྶསཧགཏཾ ཨུཔྤཛྫཏཱིཏི. ཨགམྦྷཱིརཔྤཀཏིཀོཙ ཧཱིནཛ྄ཛྷཱསཡོ ཨཔྤཀཾཔི མཧནྟཾ མཉྙཏི. ཧཱིནཾཔི པཎཱིཏཾ མཉྙཏི. ཏསྨཱ ཏསྶཔི ཙིཏྟཾ ཨུཔྤཛྫམཱནཾ ཡེབྷུཡྻེན སོམནསྶསཧགཏཾ ཧོཏཱིཏི. ཨིཊྛཱརམྨཎསམཱཡོགོཏི ཨཏྟནཱ ཨིཙྪིཏེན ཧཱིནེནཝཱ པཎཱིཏེནཝཱ ཨཱརམྨཎེན སམཱཡོགོ. བྱསནམུཏྟཱིཏི ཉཱཏིབྱསནཱདིཏོ མུཏྟི. ཨུཔེཀྑཱཔཊིསནྡྷིཀཏཱ, གམྦྷཱིརཔྤཀཏིཏཱ, མཛ྄ཛྷཏྟཱརམྨཎསམཱཡོགོ, ¶ བྱསནམུཏྟིཙ ཨུཔེཀྑཱཡ ཀཱརཎཾ. ཨེཏྠཙ གམྦྷཱིརཔྤཀབྷིཏཱནཱམ མཧཛ྄ཛྷཱསཡཏཱ. ཏཱདིསོ ཧི པུགྒལོ མཧནྟཾཔི ཨཔྤཀཾ མཉྙཏི, པཎཱིཏཾཔི ཧཱིནཾ མཉྙཏཱིཏི. དིཊྛཛ྄ཛྷཱསཡཏཱ, དིཊྛིཝིཔནྣཔུགྒལསེཝནཱ, སདྡྷམྨཝིམུཁཏཱ, མིཙྪཱཝིཏཀྐབཧུལཏཱ, ཨཡོནིསོ ཨུམྨུཛྫནཉྩ དིཊྛིཡཱ ཀཱརཎཾ. ཏཏྠ དིཊྛཛ྄ཛྷཱསཡཏཱཏི ཀཱཎཱརིཊྛསྶཝིཡ སུནཀྑཏྟསྶཝིཡཙ པུརིམབྷཝེ དིཊྛི གཏིཀབྷཱཝེན ཨཱགཏཏྟཱ ཨིམསྨིཾ བྷཝེཔི སསྶཏུཙྪེདཱསཡ བྷཱཝོ. སདྡྷམྨཝིམུཁཏཱཏི ཙིརཾཔི ཀཱལཾ སདྡྷམྨེན ཝིནཱ ཨཱགཏཏཱ. མིཙྪཱཝིཏཀྐབཧུལཏཱཏི ཨཏྟནོ ཨཝིསཡེསུ སབྦཉྙུཝིསཡེསུ ཋཱནེསུ ཨཏྟནོ པམཱཎཾ ཨཛཱནིཏྭཱ ཙིནྟཱཔསུཏཝསེན མིཙྪཱཝིཏཀྐབཧུལབྷཱཝོ. ཨཡོནིསོ ཨུམྨུཛྫནནྟི ཨཏྟནཱདིཊྛཀཱརཎམེཝ སཱརཏོ སཙྩཏོ ཨུམྨུཛྫནཾ. ཏབྦིཔརཱིཏེན དིཊྛིཝིཔྤཡུཏྟཀཱརཎཾ ཝེདིཏབྦཾ. ཨསངྑཱརིཀཀམྨཛནིཏཔྤཊིསནྡྷི ཀཏཱ, ཀལླཀཱཡ ཙིཏྟཏཱ, ཁནྟི བཧུལཏཱ, པུརིསཀཱརེསུ དིཊྛཱནིསཾསཏཱ, ཀམྨཔྤསུཏཏཱ, ཨུཏུབྷོཛནཱདི སཔྤཱཡ ལཱབྷོཏི ཨིདཾ ཨསངྑཱརིཀཀཱརཎཾ. ཏཏྠ ཁནྟིབཧུལཏཱཏི སཱིཏུཎྷཱདཱིནཾ ཁམནབཧུལཏཱ. པུརིསཀཱརེསཱུཏི པུརིསེཧི ཀཏྟབྦེསུ ཀམྨེསུ. ཀམྨཔྤསུཏབྷཱཏི ཀམྨེསུ ཙིཎྞཝསིཏཱ. ཏབྦིཔརཱི ཏེན སསངྑཱརིཀཀཱརཎཾ ཝེདིཏབྦཾ. ཨིམེསཾཔན ཙིཏྟཱནཾ ཨུཔྤཏྟི ཝིདྷཱནཾ ཝིསུདྡྷིམགྒེ གཧེཏབྦཾ. ཨཊྛཔཱིཏི པིསདྡེན ནེསཾ ལབྦྷམཱནཀམྨཔཐབྷེདཏོ ཀཱལ སནྟཱནཱ རམྨཎཱདི བྷེདཏོཙ ཨནེཀཝིདྷཏྟཾ སམྤིཎྜེཏཱིཏི.

ལོབྷམཱུལཙིཏྟསྶ པརམཏྠདིཔནཱ ནིཊྛིཏཱ.

༢༥. དོསམཱུལཙིཏྟེ དུཊྛུམནོབྷི དུམྨནོ. ཝིརཱུཔཾ ཙིཏྟཾ. དུཊྛུམནོ ཨེཏསྶཱཏིཝཱ དུམྨནོ. ཝིརཱུཔཙིཏྟསམངྒཱིཔུགྒལོ. དུམྨནསྶ བྷཱཝོ དོམནསྶཾ. མཱནསིཀདུཀྑཝེདནཱཡེཏཾ ཨདྷིཝཙནཾ. སཱ ཧི ཨཏྟནཱ སཧགཏེ ཙིཏྟེཝཱ ཏཾ སམངྒཱིཔུགྒལེཝཱ དུམྨནཱ བྷིདྷཱནསྶཝཱ ཨཡཾ སོ དུམྨནོཏི དུམྨནབུདྡྷིཡཱཝཱ པཝཏྟིནིམིཏྟཾ ཧོཏཱིཏི. སེསཾ ཧེཊྛཱ ཝུཏྟནཡམེཝ. དོམནསྶེན སཧ གཏནྟི སམཱསོ. པཊིཧཉྙཏཱིཏི པཊིགྷོ. དོསོ. སོཧི ཨུཔྤཛྫམཱནོ ¶ སམྤཡུཏྟདྷམྨེཔི པཊིཧནཏི. ལཱུཁེ སནྟཏྟེ ཀརོཏི. ཨཏྟནོ ཝཏྠུམྤི པཊིཧནཏི. ཧདཡཔྤདེསཾ དཧཏི. ཏཾ པུགྒལཾ དུམྨུཁཾ ཀརོཏི, ཨཏྟནོ ཨཱརམྨཎཾཔི པཊིཧནཏི. ཏཾ བཱདྷཡ མཱནོ གཎྷཱཏི. ཏསྨཱ པཊིགྷོཏི ཝུཙྩཏཱིཏི.

༢༦. ཨེཏྠ སིཡཱ. སངྑཱརོ ཏཱཝ ཨིམསྶ ཙིཏྟསྶ བྷེད ཀརོཏི ཏསྶ ཨིདྷ གཧཎཾ ཡུཏྟཾ. ཝེདནཱ པཊིགྷཱཔན བྷེདཀརཱ ན ཧོནྟཱིཏི ཏེ ཨིདྷ ན གཧེཏབྦཱཏི. ཝུཙྩཏེ, དོམནསྶགྒཧཎཾ ཏཱཝ ཨིམསྶ ཙིཏྟསྶ ཀདཱཙི ཨཉྙཝེདནཱཡོགཏཱ པསངྒནིཝཏྟནཏྠནྟི. ཡདཱཧི རཱཛཱནོ ཧསམཱནཱཡེཝ ཙོརཝདྷཾ པེསེནྟི. ཡདཱཙ ཛནཱ ཨཏྟནོ ཝེརཱིནཾ མརཎེ ཏུཊྛིཾ པཝེདེནྟི. མརཎཾ ཨབྷིནནྡནྟི. ཡདཱཙ བཱལཛནཱ ཧསམཱནཱཝ མིགཔཀྑིནོ མཱརེནྟི. ཏདཱ ཨིདཾ ནུཁོ སོམནསྶེན ཡུཏྟནྟི ཨཏྠེཝ པསངྒོ. ཨུཔེཀྑཱཡོགེཔན ཝཏྟབྦམེཝ ནཏྠི. ཏཔྤསངྒནིཝཏྟནཏྠཾ དོམནསྶགྒཧཎནྟི. པཊིགྷགྒཧཎཾཔི ཨཉྙདྷམྨསམྤཡུཏྟཏཱ པསངྒནིཝཏྟནཏྠཾ. ཏཐཱཧི ཡེ ནཏྠིཀཱཧེཏུཀཱ ཀིརིཡམིཙྪཱ དིཊྛིཀཱ པཱཎཝདྷེ ཨཔུཉྙཾནཱམ ནཏྠཱིཏི གཎྷནྟི. ཡེཙ མནུསྶཔཱཎ ཝདྷེཨེཝ ཨཔུཉྙཾ ཧོཏི, ཏིརཙྪཱནགཏཔཱཎཝདྷེ ཨཔུཉྙཾ ནཏྠཱིཏི གཎྷནྟི. ཡེཙ པཱཎཝདྷཾ ཀཏྭཱ ཡཉྙཾ ཡཛནྟཱནཾ མཧནྟཾ པུཉྙཾ ཧོཏི, དིབྦསཾཝཏྟནིཀནྟི གཎྷནྟི. ཏེ སཀྐཱཡདིཊྛིཡཱ ཝིསྶཊྛཱ པཱཎཝདྷཾ སཡཾཝཱ ཀརོནྟི. ཨཉྙེཝཱ པེསེནྟི. ཏདཱ ཨིདཾ དིཊྛིཡཱཔི སམྤཡུཏྟཾ སིཡཱཏི པསངྒོ ཧོཏིཡེཝ. ཡེཔན སམྨཱདིཊྛིཀེསུ བཱལཱ ཨབྱཏྟཱ, ཏེ ཀདཱཙི ཏེསཾ མིཙྪཱདིཊྛིཀཱནཾ ལདྡྷིཾ གཧེཏྭཱ པཱཎཾ ཝདྷནྟཱ ཨཱདིཏོ ཝེམཏིཀཛཱཏཱཝ ཧོནྟི. ཏདཱཏེསཾ ཨིདཾ ཝིཙིཀིཙྪཱཡཔི ཡུཏྟཾ སིཡཱཏི པསངྒོ ཧོཏི. ཏཔྤསངྒ ནིཝཏྟནཏྠཾ པཊིགྷགྒཧཎནྟི. ཨིཏརཐཱ པུརིམ ཙིཏྟསྶ ལོབྷསཧགཏབྷཱཝོཝིཡ ཨིམསྶ པཊིགྷསམྤཡུཏྟབྷཱཝོ ཙཱུལ༹ནིགམེནེཝ སིདྡྷོཏི ཏེསཾ གཧཎཾ ནིརཏྠཀཾ སིཡཱཏི. ཨེཏྠཙ ཨིསྶཱམཙྪརིཡཀུཀྐུཙྩཱནཾ ཐིནམིདྡྷསྶཙ ཨགྒཧཎཾ པུརིམཙིཏྟེ མཱནཐིནམིདྡྷནཡེན ཝེདིཏབྦཾ. ཨཡམེཏྠ པརམཏྠདཱིཔནཱ.

[༢༨] ཝིབྷཱཝནིཡཾ པན མཧཱཊཱིཀཱཡཉྩ

‘‘ཨསཱདྷཱརཎ ¶ དྷམྨཝསེན ཙིཏྟསྶ ཨུཔལཀྑཎཏྠཾ དོམནསྶགྒཧཎ’’ནྟི ཝུཏྟཾ. ཏཏྠ ཨསཱདྷཱརཎདྷམྨཝསེནཱཏི ཨིདཾ ཏཱཝ ནཡུཛྫཏི.

[༢༩] སཏིཔི ཨིམསྶ སོམནསྶུཔེཀྑཱསཧགཏབྷཱཝེ ཨནཉྙསཱདྷཱརཎེནེཝ དོམནསྶེན ཨིམསྶ ཨུཔལཀྑཎཏྠནྟི ཨཏྠསྶ ཨཱཔཛྫནཏོ. ཡཐཱཏཾ སཏིཔི པུརིམསྶ ཨིམསྶཙ ཙིཏྟསྶ མོཧསཧགཏབྷཱཝེ ཨནཉྙསཱདྷཱརཎེནེཝ ལོབྷེན པཊིགྷེནཙ ཨུཔལཀྑཎཏྠཾ ལོབྷསཧགཏཔཊིགྷ སམྤཡུཏྟགྒཧཎནྟི. ཨུཔལཀྑཎཏྠནྟི ཙ ན ཝཏྟབྦཾ.

ཨེཝཉྷི སཏི པཱཀཊེན དོམནསྶེན ཨཔཱཀཊཱནཾ ཨཉྙཝེདནཱ ནཾཔི ཨིདྷ ལདྡྷབྷཱཝཾ ཨུཔལཀྑེཏཱིཏི ཨཱཔཛྫཏི. ཡཐཱ ལདྡྷཱཏཔཏྟོ རཱཛཀུམཱརོཏི.

[༣༠] ཡཉྩ ཝིབྷཱཝནིཡཾ

‘‘པཊིགྷསམྤཡུཏྟབྷཱཝོཔན ཨུབྷིནྣཾ ཨེཀནྟ སཧཙཱརིཏཱ དསྶནཏྠཾ ཝུཏྟོ’’ཏི ཝུཏྟཾ. ཏཾཔི ན སུནྡརཾ.

ཨིམསྶ ཙཱུལ༹ནིགམེནེཝ ཏདཏྠསིདྡྷིཏོཏི.

༢༧. ཨེཏྠཙ དོསཛ྄ཛྷཱསཡཏཱ, ཨགམྦྷཱིརཔྤཀཏིཏཱ, ཨཔྤསྶུཀཏཱ, ཨཱགྷཱཏཝཏྠུསམཱཡོགོཝཱ, ཨནིཊྛཱརམྨཎསམཱཡོ གོཝཱ དོམནསྶསྶ པཊིགྷསྶཙ ཀཱརཎཾ. ཏཏྠ དོས བཧུལ བྷཱཝཏོ ཨཱགཏཝསེན དོསཛ྄ཛྷཱསཡཏཱ དཊྛབྦཱ. ཨགམྦྷཱིརཔྤཀཏིཏཱ ཧཱིནཛ྄ཛྷཱསཡཏཱ. ཨཔྤསྶུཏསྶཙ ཨནིཊྛ ལོཀ དྷམྨེཧིཕུཊྛསྶ ཏཾཀུཏེཏྠལབྦྷཱཏི པཙྩཝེཀྑནཱ ནཏྠཱིཏི. ཨིམེསམྤི དྭིནྣཾ ཨུཔྤཏྟིཝིདྷཱནཾ ཝིསུདྡྷིམགྒེ གཧེཏབྦཾ. པིསདྡསྶ ཨཏྠོཔི ཝུཏྟནཡོཨེཝཱཏི.

དོསམཱུལཙིཏྟསྶ པརམཏྠདིཔནཱ ནིཊྛིཏཱ.

༢༨. མོཧམཱུལཙིཏྟེ ཝིཙིཀིཙྪུདྡྷཙྩཱནཾ པདཏྠོ ཨུཔརི ཨཱགམིསྶཏི. ཡསྨཱཔན ཨིདཾ ཙིཏྟཾ མཱུལནྟརཝིརཧེན ལདྡྷོཀཱསེན སུཊྛུབལཝནྟེན མོཧེནཙེཝ སཾསཔྤམཱནཝིཀྑིཔམཱནེཧི ཝིཙིཀིཙྪུདྡྷཙྩེཧི ¶ ཙ ཡུཏྟཾ ཧོཏི. ཏསྨཱ ཨིདྷ ཝེདནཱཔི ཨཱརམྨཎཾ ཨདྷིམཏྟཏོ ཨནུབྷཝིཏུཾ ན སཀྐོཏཱིཏི ཨུཔེཀྑཱཝེདནཱཝ ཡུཏྟཱ ཧོཏི. ཨེཝཾ སནྟེཔི ཨིདཾ ཙིཏྟཾ སོམནསྶ དོམནསྶ སཧགཏཱནཾཔི ཨནནྟརེ ཨུཔྤཛྫཏི. ཏསྨཱ ཏདུབྷཡཝེདནཱཧིཔི ཨིདཾ ཡུཏྟཾ སིཡཱཏི པསངྒོ ཧོཏཱིཏི ཏཔྤསངྒནིཝཏྟནཏྠཾ ཨིདྷ ཨུཔེཀྑཱགཧཎཾ ཀཏཾ. ཨནཉྙཙིཏྟསཱདྷཱརཎེན དྷམྨེན ཙིཏྟསྶ ནིཡམནཏྠཾ ཝིཙིཀིཙྪཱགཧཎཾ. ཨུདྡྷཙྩཾ པན སབྦཱཀུསལེསུ ཡུཏྟཾཔི ཨིདྷ ལདྡྷོཀཱསཾ ཧུཏྭཱ སུཊྛུ བལཝཾ ཧོཏཱིཏི དསྶནཏྠཾ ཨིདྷེཝ གཧིཏནྟི དཊྛབྦཾ. ཏེནེཝཧི དྷམྨསངྒཎིཡཾ དྷམྨུདྡེསཝཱརེ ཨུདྡྷཙྩཾ ཨཉྙེསུ པཱཔཙིཏྟེསུ སརཱུཔཏོ ཨནུདྡྷརིཏྭཱ ཡེཝཱཔནཀབྷཱཝེནེཝ ཝུཏྟཾ. ཨིམསྨིཾ ཨནྟིམཙིཏྟེཨེཝ སརཱུཔཏོ ཨུདྡྷཊནྟི དཊྛབྦཾ. ཡསྨཱཙ ཨིདཾཙིཏྟདྭཡཾ སཏྟཱནཾ པཀཏིསབྷཱཝབྷཱུཏནྟི པཡོགེན ཝཱ ཨུཔཱཡེན ཝཱ ཀེནཙི ཨུཔྤཱདེཏབྦཾ ནཱམ ནཏྠི. སབྦཀཱལམྤི བྷཝངྒཙིཏྟཾཝིཡ ཨནོསཀྐམཱནཾ ཨསཾསཱིདམཱནཾ ཨཀིཙྪེན ཨཀསིརེན པཝཏྟཏི. ཏསྨཱ ཨེཀནྟེན ཨསངྑཱརིཀམེཝ ཧོཏཱིཏི ཀཏྭཱ ཨིདྷ སངྑཱརབྷེདོ ན གཧིཏོཏི དཊྛབྦཾ. ཏེནེཝཙ པཱལི༹ཡཾཔི པུརིམཙིཏྟེསུཝིཡ ཨིདྷ སསངྑཱརེནཱཏི དུཏཱིཡཙིཏྟཝཱརོ ནཝུཏྟོཏི. ཨཡམེཏྠ པརམཏྠདཱིཔནཱ.

[༣༡] ཝིབྷཱཝནིཡཾ པན

ཨིམཱནི དྭེ ཙིཏྟཱནི ཨཏིསམྨུལ༹ྷཏཱཡ ཨཏིཙཉྩལཏཱཡ ཙ སབྦཏྠཔི རཛྫནདུསྶནརཧིཏཱནི ཧོནྟི. ཏསྨཱ ཨུཔེཀྑཱ སཧགཏཱནེཝ པཝཏྟནྟཱིཏི ཝུཏྟཾ. ཏཾ ན སུནྡརཾ.

རཛྫན སཧིཏཱནཾཔི ལོབྷམཱུལ ཙིཏྟཱནཾ ཨུཔེཀྑཱ ཡོགསྶ དིཊྛཏྟཱཏི.

[༣༢] ཡཉྩ ཏཏྠ མཧཱཊཱིཀཱཡཉྩ

‘‘ཏཏོཡེཝཙ སབྷཱཝཏིཀྑཏཱཡ ཨུསྶཱཧེཏབྦཏཱཡཙ ཨབྷཱཝཏོ སངྑཱརབྷེདོཔི ནེསཾ ནཏྠཱི’’ཏི ཝུཏྟཾ. ཏཏྠ སབྷཱཝཏིཀྑཏཱཡ ཨབྷཱཝཏོཏི ཨིམིནཱ ཨིམསྶ ཨསངྑཱརིཀབྷཱཝཾ པཊིཀྑིཔཏི. ཨུསྶཱཧེཏབྦཏཱཡ ཨབྷཱཝཏོཏི ཨིམིནཱ སསངྑཱརིཀབྷཱཝཾ པཊིཀྑིཔཏི. ཏདུབྷཡེ པན ¶ ཨིདཾ ཙིཏྟདྭཡཾ སབྦསོ སངྑཱརཝིམུཏྟཾ ཧོཏཱིཏི དསྶེཏི. ཏཾ ཨཊྛཀཐཱཡཔི ཏཱཝ ན སམེཏི.

པཊིཙྩསམུཔྤཱདཝིབྷངྒཨཊྛཀཐཱཡཉྷི སངྑཱརབྷེདེན ཨཝིཛྫཱཡ དུཝིདྷབྷཱཝོཝ ཝུཏྟོ. ཡདིཙ ཨིདཾདྭཡཾ སངྑཱརམུཏྟཾ སིཡཱ. ཨེཝཾ སཏི ཨིདྷ མོཧོཔི སངྑཱརམུཏྟོ སིཡཱ. སོཙ ཨཝིཛྫཱཡེཝཱཏི ཏིཝིདྷབྷཱཝོཝ ཨཝིཛྫཱཡ ཏཏྠ ཝཏྟབྦོ. ནཙ ཝུཏྟོཏི. ཨེཝཾ ཏཱཝ ཨཊྛཀཐཱཡ ནསམེཏི.

[༣༣] ཡསྨཱཙ ཨིདྷ ཏིཀྑབྷཱཝོནཱམ ཝིནཱ སངྑཱརེན ཀེཝལཾ པཀཏི པཙྩཡ གཎ ཝསེནེཝ པཝཏྟནསམཏྠཏཱ ཝུཙྩཏི. ཨིདཉྩ ཙིཏྟཾ ཏཐེཝ པཝཏྟཏི. ཏསྨཱ ཨིདཾ སབྷཱཝཏིཀྑཾ ན ཧོཏཱིཏི ན སཀྐཱ ཝཏྟུནྟི.

ལདྡྷོཀཱསེན མོཧེན སུཊྛུ མུཡ྄ཧནྟཱིཏི མོཧམཱུཧཱནཱིཏི ཝཏྟབྦེ ནིརུཏྟནཡེན མོམཱུཧཱནཱིཏི ཝུཏྟཾ.

༢༩. ཨིཙྩེཝནྟིཨཱདི མཧཱནིགམནཾ. ཏཏྠ ཨིཙྩེཝནྟི ཨིཏི ཨེཝཾ. ནིཔཱཏསམུདཱཡོ ཧེས. པཙྪིམོཝཱ ཨེཝཾ སདྡོ པུརིམསྶ ཨིཏིསདྡསྶ ཨཏྠཝཙནོ. ཨིཙྩེཝནྟིཝཱ ཝིསུཾ ཨེཀོ ནིཔཱཏོ. སབྦཐཱཔི ཨིམིནཱ སོམནསྶསཧགཏནྟིཨཱདིནཱ ཝུཏྟཔྤཀཱརེ ནཱཏི ཨཏྠོ དཊྛབྦོ. ཨིདཉྩ དྭཱདསཱཏི ཨེཏྠ ཝིསེསནཾ ཝེདིཏབྦཾ. སབྦཐཱཔཱིཏི དྷམྨསངྒཎཱིཡཾ ཝུཏྟེན པཀཱརེནཱཔི དྭཱདསེཝ. ཝིབྷངྒེ ཝིབྷཏྟེན པཀཱརེནཱཔི དྭཱདསེཝ. དྷཱཏུཀཐཱདཱིསུ ཝུཏྟེན པཀཱརེནཱཔི དྭཱདསེཝ. ཏེསུ ཏེསུ སུཏྟནྟེསུ ཝུཏྟེན པཀཱརེནཱཔི དྭཱདསེཝ. ཀཱལདེས སནྟཱནཱདི བྷེདབྷིནྣེན པཀཱརེནཱཔི དྭཱདསེཝ. ཀཐཾ དྭཱདསེཝཱཏི. ཨིཙྩེཝཾ དྭཱདསེཝཱཏི ཡོཛེཏབྦཾ.

[༣༤] ཝིབྷཱཝནིཡཾ པན

ཧེཊྛཱ ཝུཏྟོ སམྤཡོགཱདི ཨཱཀཱརོཝ ཝིབྷཱཝིཏོ. སོཔན ཨིཙྩེཝནྟི ཨིམིནཱཝ སིདྡྷོཏི.

ཨཀུསལཙིཏྟཱནཱིཏི ཀུསལཔཊིཝིརུདྡྷསབྷཱཝཏྟཱ ཨེཝཾ ལདྡྷནཱ མཱནི ཙིཏྟཱནི. ཨེཏྠཙ ཨེཀནྟེན སདྡྷཱདཡོཨེཝ ཀུསལཱནཱམ. མོཧཱདཡོཨེཝ ཨཀུསལཱ ནཱམ. ཙིཏྟཾཔན ཕསྶཱདཡོ ཝིཡ ཨཉྙསམཱནམེཝ ¶ ཧོཏི, ན ཧི ཨཱརམྨཎ ཝིཛཱནནཾཝཱ ཨེཀནྟེན མུཡ྄ཧནཱདིཝིཡ སཱཝཛྫཾཝཱ ཧོཏི. སདྡཧནཱདིཝིཡ ཨནཝཛྫཾཝཱཏི. ཏཾཔན ཨཀུསལེཧི ཡུཏྟཾ ཨཀུསལནྟི ཝུཙྩཏི. ཀུསལེཧི ཡུཏྟཾ ཀུསལནྟི. སདྡྷཱདཱིནཾཔན མོཧཱདཱིནཉྩ པཊིཝིརུདྡྷབྷཱཝོ ཡཐཱཀྐམཾ པཧཱཡཀཔཧཱཏབྦབྷཱཝེན ཝེདིཏབྦོ. ཨཀུསལདྷམྨཱཧི དུབྦལཱ ཧོནྟི. སུཝཎྞཔྤཊིརཱུཔཀཱཝིཡ ཕེགྒུབྷཱུཏཱ ཨབྷཱཝནཱརཧཱ པུནཔྤུནཾ ཨཱསེཝཱིཡམཱནཱཔི ཙཉྩལནྟིཡེཝ ཝིཀྐིརནྟིཡེཝ. ནིཡཱམཾ ཨོཀྐམནྟཱཔི ཨེཀསྨིཾབྷཝེ ཨེཝ ཨཔཱཡབྷཱགིཏཱཡ ཨོཀྐམནྟི. ནཔན ཀུསལམཱུལཱནི སབྦསོ པཙྪིནྡིཏྭཱ སཏྟེ ཝཊྚསོཏནིཡཏེ ཀཱཏུཾ སཀྐོནྟི. ཀུསལདྷམྨཱཔན བལཝནྟཱ ཧོནྟི. ཛཱཏིསུཝཎྞཱཝིཡ སཱརབྷཱུཏཱ བྷཱཝནཱརཧཱ པུནཔྤུནཾ ཨཱསེཝཱིཡམཱནཱ ཐིརཏརཔཏྟཱ ལོཀིཡེསུ ཡཱཝ ཨིདྡྷིཝིདྷཱནཱ ལོཀུཏྟརེསུཙ ཡཱཝ ཨརཧཏྟམགྒཱ ཝུདྡྷིཝིརུལ༹ྷཱིདྷམྨཱ ཧོནྟི. ནིཡཱམཾ ཨོཀྐམནྟཱ ཨཔཱཡསོཏཾཝཱ ཝཊྚསོ ཏཾཝཱ སབྦསོ སམུཙྪིནྡིཏྭཱ ཨནུཔཱདིསེསནིབྦཱནབྷཱགིཏཱཡ ཨོཀྐམནྟི. ཏསྨཱ ཀུསལ དྷམྨཱཨེཝ པཧཱཡཀཱནཱམ. ཨིཏརེཔན པཧཱཏབྦཱཨེཝ ནཱམཱཏི ཝེདིཏབྦཱ. ཨཔིཙ ཀུསལདྷམྨཱནཱམ ཨནྟམསོ ཨཱལོཔབྷིཀྑཱ དཱནམཏྟཱཔི ལོཀེབྷེསཛྫཝིདྷཱནཱནིཝིཡཨཀུསལཔྤཧཱནཱཡ ཨེཝ པཎྜིཏེཧིཔཉྙཔཱིཡནྟི ཀརཱིཡནྟི ཙ, ཏསྨཱ ཏེཨེཝ པཧཱཡཀཱ. ཨཀུསལདྷམྨཱཔན ལོཀེ ནཱནཱརོགཛཱཏིཡོཝིཡ སཀལལོཀསྶ པཀཏིསབྷཱཝབྷཱུཏཱཨེཝ ཧོནྟཱིཏི ཏེ པཧཱཏབྦཱཨེཝཱཏི. སམནྟཏོ ཨནཝསེསཏོ ཨཱདིཡིཾསུ གཎྷིཡིཾསཱུཏི སམཏྟཱནི. ཨཔིཙ སམཏྟཱནཱིཏི ནིཊྛིཏཱནི པརིཔུཎྞཱནིཝཱ. ཨཊྛདྷཱཏིཨཱདིསངྒཧགཱཐཱ. ལོབྷོམཱུལཾ ཨེཏེསནྟི སམཱསོ. དྭཱདསཱ ཀུསལཱ སིཡུནྟི ཨེཏྠ སིཡུནྟི ནིཔཱཏཔདཾ ཨིདྷ དཊྛབྦཾ. ཨཀུསལ ཙིཏྟཱནི དྭཱདས བྷཝནྟཱིཏི ཨཏྠོ.

ཨིཏི པརམཏྠདཱིཔནིཡཱནཱམ ཨབྷིདྷམྨཏྠསངྒཧསྶ

ཙཏུཏྠཝཎྞནཱཡ ཨཀུསལཙིཏྟསྶ

པརམཏྠདིཔནཱ ནིཊྛིཏཱ.

༣༡. ཨེཝཾ ¶ སབྦནིཧཱིནཾ ཨཀུསལཾ སངྒཧེཏྭཱ ཨིདཱནི ཨཧེཏུཀཾ སངྒཎྷནྟོ ཏཏྠཙ སབྦནིཧཱིནཾ ཨཀུསལཝིཔཱཀཾ ཏཱཝ དསྶེཏུཾ ཨུཔེཀྑཱསཧགཏནྟིཨཱདིམཱཧ.

[༣༥] ཝིབྷཱཝནིཡཾ པན

ཏཾ ཨཀུསལ ཝིཔཱཀཏྟཱཡེཝ ཨཀུསལཱནནྟརཾ པཐམཾ དསྶིཏནྟི ཨདྷིཔྤཱཡེན ཡཾ ཝུཏྟཾ ‘‘ཏེསཾ ཨཀུསལཝིཔཱཀཱ དིཝསེན ཏིཝིདྷབྷཱཝེཔི ཨཀུསལཱནནྟརཾ ཨཀུསལཝིཔཱཀེཡེཝ ཝིབྷཛིཏུ’’ནྟི. ཏཾ ན སུནྡརཾ.

ཨེཝཉྷི སཏི ཀུསལཝིཔཱཀཱནིཔི ཀུསལཱ ནནྟརེཨེཝ ཝཏྟབྦཱནི སིཡུནྟི.

༣༡. ཙཀྑུསོཏཱདཱིནཾ པདཏྠོ ཨུཔརི ཨཱགམིསྶཏི. ཝིཛཱནཱཏཱིཏི ཝིཉྙཱཎཾ. ཡཐཱཧ-ཝིཛཱནཱཏི ཝིཛཱནཱཏཱིཏི ཁོ བྷིཀྑཝེ ཏསྨཱཝིཉྙཱཎནྟི ཝུཙྩཏཱིཏི. ཙཀྑུཾ ནིསྶིཏཾ ཝིཉྙཱཎཾ ཙཀྑུཝིཉྙཱཎཾ. ཙཀྑུནཱཝཱ པཙྩཡབྷཱུཏེན ཛནིཏཾ ཝིཉྙཱཎཾ ཙཀྑུཝིཉྙཱཎཾ. ཀམྨེནཝཱ ཙཀྑུསྶ ཨུཔནཱིཏཾ ཝིཉྙཱཎཾ ཙཀྑུཝིཉྙཱཎཾ. ཙཀྑུཏོཝཱ ཛཱཏཾ ཝིཉྙཱཎཾ ཙཀྑུཝིཉྙཱཎཾ. ཙཀྑུསྶཝཱ ཨིནྡྲིཡབྷཱཝེན སཱམི བྷཱུཏསྶ ཝིཉྙཱཎཾ ཙཀྑུཝིཉྙཱཎཾ. ཙཀྑུསྨིཾཝཱ ཨུཔྤནྣཾཝིཉྙཱཎཾ ཙཀྑུཝིཉྙཱཎཾ. ཨེསནཡོ སོཏཝིཉྙཱཎཱདཱིསུཔི. པཱལི༹ཡཾཔན མཧཱ ཏཎྷཱསངྑཡསུཏྟེ –

སེཡྻཐཱཔི བྷིཀྑཝེ ཀཊྛཉྩ པཊིཙྩ ཨགྒི ཛལཏི. ཀཊྛགྒཱིཏྭེཝ སངྑྱཾ གཙྪཏི. སཀལིཀཉྩ པཊིཙྩ ཨགྒི ཛལཏི. སཀལི ཀགྒཱིཏྭེཝ སངྑྱཾ གཙྪཏི. ཏིཎཉྩ པཊིཙྩ ཨགྒི ཛལཏི. ཏིཎགྒཱི ཏྭེཝ སངྑྱཾ གཙྪཏི. གོམཡཉྩ པཊིཙྩ ཨགྒི ཛལཏི. གོམཡགྒཱིཏྭེཝ སངྑྱཾ གཙྪཏི. ཐུསཉྩ པཊིཙྩ ཨགྒི ཛལཏི. ཐུསགྒཱིཏྭེཝ སངྑྱཾ གཙྪཏི. སངྐཱརཉྩ པཊིཙྩ ཨགྒི ཛལཏི. སངྐཱརགྒཱིཏྭེཝ སངྑྱཾ གཙྪཏི. ཨེཝམེཝཁོ བྷིཀྑཝེ ཙཀྑུཉྩ པཊིཙྩ རཱུཔེཙ ཨུཔྤཛྫཏི ཝིཉྙཱཎཾ. ཙཀྑུཝིཉྙཱཎནྟེཝ སངྑྱཾ གཙྪཏི. སོཏཉྩ པཊིཙྩ སདྡེ ཙ ཨུཔྤཛྫཏི ཝིཉྙཱཎཾ. སོཏཝིཉྙཱཎནྟེཝ སངྑྱཾ གཙྪཏི. གྷཱནཉྩ པཊིཙྩ གནྡྷེཙ ཨུཔྤཛྫཏི ཝིཉྙཱཎཾ. ¶ གྷཱནཝིཉྙཱཎནྟེཝ སངྑྱཾ གཙྪཏི. ཛིཝ྄ཧཉྩ པཊིཙྩ རསེཙ ཨུཔྤཛྫཏི ཝིཉྙཱཎཾ. ཛིཝ྄ཧཱཝིཉྙཱཎནྟེཝ སངྑྱཾ གཙྪཏི. ཀཱཡཉྩ པཊིཙྩ ཕོཊྛབྦེཙ ཨུཔྤཛྫཏི ཝིཉྙཱཎཾ. ཀཱཡཝིཉྙཱཎནྟེཝ སངྑྱཾ གཙྪཏི. མནཉྩ པཊིཙྩ དྷམྨེཙ ཨུཔྤཛྫཏི ཝིཉྙཱཎཾ. མནོ ཝིཉྙཱཎནྟེཝ སངྑྱཾ གཙྪཏཱིཏི ཝུཏྟཾ.

ཏཐཱཏི ཨིམིནཱ ཨུཔེཀྑཱསཧགཏནྟི པདཾ ཨཱཀཌྜྷཏི. དུཀྑཡཏཱིཏི དུཀྑཾ. སམྤཡུཏྟདྷམྨེ ཏཾ སམངྒིཔུགྒལཾཝཱ བཱདྷཏི ཧིཾསཏཱིཏི ཨཏྠོ. དུཊྛུཝཱ ཁནཏི ཀཱཡིཀསུཁནྟི དུཀྑཾ. དུཀྐརེནཝཱ ཁམིཏབྦནྟི དུཀྑཾ. དུཀྐརཾ ཨོཀཱསདཱནཾ ཨེཏསྶཱཏིཝཱ དུཀྑཾ. ཀཱཡིཀདུཀྑཝེདནཱཡེཝ ནཱམཾ. སུཊྛུ པཊིམུཁཉྩ ཨིཙྪཏཱིཏི སམྤཊིཙྪནཾ. སུཊྛཱུཏི ཨམུཉྩམཱནཾ. པཊིམུཁནྟི ཨནཉྙཱཔེཀྑཾ. ཨིཙྪཏཱིཏི ཀཱམེཏི ཨབྷིནནྡཏི པཊིགྒཎྷཏི. ཏེནེཝཧི བྷཱསིཏཾ ཨབྷིནནྡུནྟི ཨེཏྠ སམྤཊིཙྪིཾ སཱུཏི ཝཎྞཡིཾསུ. སུཊྛུ ཏཱིརེཏི ཏུལེཏི ཝིཙཱརེཏཱིཏི སནྟཱིརཎཾ. ཊཱིཀཱཡཾ ཏཱིརེཏི ནིཊྛཱཔེཏཱིཏི ཝུཏྟཾ. ཝིབྷཱཝནིཡཾ ཏཱིརེཏི ཝཱིམཾསཏཱིཏི ཝུཏྟཾ.

༣༢. ཨེཏྠཙ ཙཀྑུསྶ ཨསམྦྷིནྣཏཱ, ཨཱལོཀ སནྣིསྶཡཔྤཊིལཱབྷོ, རཱུཔཱནཾ ཨཱཔཱཏཱགམནཾ, མནསིཀཱརོཏི ཙཏྟཱརོ པཙྩཡཱ ཙཀྑུཝིཉྙཱཎསྶ ཨུཔྤཏྟིཀཱརཎཱནི. སོཏསྶ ཨསམྦྷིནྣཏཱ ཨཱཀཱསསནྣིསྶཡཔྤཊིལཱབྷོ, སདྡཱནཾ ཨཱཔཱཏཱགམནཾ མནསིཀཱརོཏི སོཏཝིཉྙཱཎསྶ. གྷཱནསྶ ཨསམྦྷིནྣཏཱ, ཝཱསུསནྣིསྶཡཔྤཊིལཱབྷོ, གནྡྷཱནཾ ཨཱཔཱཏཱགམནཾ མནསིཀཱརོཏི གྷཱནཝིཉྙཱཎསྶ. ཛིཝ྄ཧཱཡ ཨསམྦྷིནྣཏཱ ཨཱཔོསནྣིསྶཡཔྤཊིལཱབྷོ. རསཱནཾ ཨཱཔཱཏཱགམནཾ, མནསིཀཱརོཏི ཛིཝ྄ཧཱཝིཉྙཱཎསྶ. ཀཱཡསྶ ཨསམྦྷིནྣཏཱ, པཐཝིསནྣིསྶཡཔྤཊིལཱབྷོ, ཏིཎྞཾ ཕོཊྛབྦཱནཾ ཨཉྙཏརསྶ ཨཱཔཱཏཱགམནཾ, མནསིཀཱརོཏི ཀཱཡཝིཉྙཱཎསྶཱཏི. ཨེཏྠཙ ཨཱལོཀ ཨཱཀཱསཱདཱིནཾ སནྣིསྶཡཱནཾ གཧཎཾ ཏེཧི ཝིནཱ རཱུཔཱདཱིནཾ པསཱདེསུ ཨཱཔཱཏཱགམནསྶེཝ ཨབྷཱཝཏོཏི དཊྛབྦཾ, ན ཧི ཨཱལོཀེ སཏི རཱུཔཱནི སནྣིཧིཏཱནིཔི ཙཀྑུམྷི ཨཱཔཱཏམཱགཙྪནྟི. ཨེསནཡོ སེསེསུཔཱིཏི. ཡཾཔན ཨཊྛཀཐཱཡཾ -

ཙཀྑུསྨིཾཔན ¶ ཨསམྦྷིནྣེཔི བཧིདྡྷཱརཱུཔཱརམྨཎེ ཨཱཔཱཏཾ ཨནཱ གཙྪནྟེ ཙཀྑུཝིཉྙཱཎཾ ནུཔྤཛྫཏི. ཏསྨིཾ པན ཨཱཔཱཏཾ ཨཱགཙྪནྟེཔི ཨཱལོཀསནྣིསྶཡེ ཨསཏི ནུཔྤཛྫཏཱིཏི ཝུཏྟཾ.

ཏཾ ཝིནཱ ཨཱལོཀེན ཝིཉྙཱཎུཔྤཏྟིཡཱ ཨབྷཱཝདསྶནཔརཾ. ནཔན ཨཱཔཱཀཱགམནཾནཱམ ཨཱལོཀེ ཨསཏིཔི སམྦྷཝཏཱིཏི དསྶནཔརནྟི དཊྛབྦཾ. ཨིཏརཐཱ རཏྟནྡྷཀཱརེཔི རཱུཔཱནི ཙཀྑུམྷི ཨཱཔཱཏཾ ཨཱགཙྪནྟཱིཏི ཨཱཔཛྫཏཱིཏི. ཨཀུསལསྶ ཝིཔཱཀཱནི ཨཀུསལ ཝིཔཱཀཱནི.

༣༣. ཨེཏྠཱ ཀེནཊྛེན ཝིཔཱཀཾནཱམཱཏི. ཝིཔཙྩནཊྛེན. ཀིཉྩ ཝིཔཙྩནནྟི. ཡཐཱ ལོཀེ ཨམྦཕལཱདཱིནཾ ཏརུཎབྷཱཝཾ ཨཏིཀྐམྨ པརིཎཏབྷཱཝཔྤཏྟིཝིཔཙྩནནྟི ཝུཙྩཏི. ཨེཝམེཝཾ ཨིདྷཔི ཝིཔཙྩནཾ ཝེདིཏབྦནྟི. ཨཡཉྩ ཨཏྠོ ཙཏཱུཧི སམངྒཱིཏཱཧི དཱིཔེཏབྦོ. ཙཏསྶོཧི སམངྒཱིཏཱནཱམ ཙེཏནཱསམངྒིཏཱ, ཀམྨསམངྒིཏཱ, ཨུཔཊྛཱནསམངྒིཏཱ, ཝིཔཱཀསམངྒིཏཱཏི. ཏཏྠ པུབྦེ ཏཾ ཏཾ ཀམྨཱཡཱུཧནཀཱལེཡཱ ཀུསལཱཀུསལཙེཏནཱཡ ཁཎཏྟཡསམངྒིཏཱ. ཨཡཾ ཙེཏནཱསམངྒཱིཏཱནཱམ. སཱཔན ཙེཏནཱ ནིརུཛ྄ཛྷམཱནཱ སབྦསོ ཨབྷཱཝཾ པཏྭཱ ནནིརུཛ྄ཛྷཏི. ཨཱཡཏིཾཔན ཝིཔཱཀཔཱཏུབྷཱཝཱཡ ཨཏྟནོ སབྦཱཀཱརཔརིཔཱུརཾ ཀྲིཡཱཝིསེསཾ ཏསྨིཾ ཙིཏྟསནྟཱནེ ནིདཧིཏྭཱཝ ནིརུཛ྄ཛྷཏི. སོཙ ཀྲིཡཱཝིསེསོ ཡཱཝ ཨོཀཱསཾ ནལབྷཏི. ཏཱཝ ཀཔྤསཾཏསཧསྶཾཔི ཏཾསནྟཱནཾ ཨནུགཏོཡེཝ ཧོཏི. ཡཾ སནྡྷཱཡ དྷམྨཔདེ –

ན ཧི པཱཔཾ ཀཏཾ ཀམྨཾ, སཛྫུཁཱིརཾཝ མུཙྩཏི;

དཧནྟཾ བཱལམནྭེཏི, བྷསྨཱ ཚནྣོཝ པཱཝཀོཏི ཝུཏྟཾ.

སོཔན ཝིསུཾ ཨེཀོ པརམཏྠདྷམྨོཏིཔི སངྑྱཾ ནགཙྪཏི, ཨནུསཡདྷཱཏུཡོཝིཡཱཏི. ཨཡཾ ཀམྨསམངྒིཏཱནཱམ. སོཔན ཡདཱ ཨཏྟནོ ཨནུརཱུཔེ པཙྩཡེ ལབྷཏི. ཏདཱ ཝིཔཙྩནཏྠཱཡ ཨོཀཱསཾ ཀརོཏི. ཀཐཾ ཀརོཏཱིཏི. སོ ཨཱསནྣམརཎསྶ སཏྟསྶ ཨཏྟཱནཾཝཱ པཙྩུཔཊྛཱཔེཏི. ཨཏྟནོ ནིམིཏྟཾཝཱ པཙྩུཔཊྛཱཔེཏི. གཏིནིམིཏྟཾཝཱ པཙྩུཔཊྛཱཔེཏི. སོཙ སཏྟོ ཏཾ ཨམུཉྩམཱནོ ཡདི གཎྷཱཏི. ¶ ཏདཱ ཨོཀཱསཾ ལབྷཏི. ཨཡཾ ཨུཔཊྛཱནསམངྒིཏཱནཱམ. ཏཾ ཨམུཉྩིཏྭཱ ཙུཏསྶཔན ཙུཏིཨནནྟརམེཝ སོ ཀམྨསངྑཱཏོ ཀྲིཡཱ ཝིསེསོ ཝིསུཾ ཨེཀོ སསམྤཡུཏྟོ པརམཏྠདྷམྨརཱསི ཧུཏྭཱ ཨེཀཾ བྷཝཾ པཱུརཡམཱནོ ཝིཔཙྩཏི, ཨེཀཾ བྷཝཾ པཱུརཡམཱནོཏིཙ ཡཱཝ ཏཱཡུཀཾ བྷཝངྒཀིཙྩཾ ཚསུ དྭཱརེསུ ཏཾ ཏཾ དྭཱརིཀཝིཔཱཀཀིཙྩཱནི པརིཡོསཱནེ ཙུཏིཀིཙྩཉྩ སཱདྷཡམཱནོཏི ཨཏྠོ. ཏཏྠ པུརིམཱ ཏིསྶོ སམངྒཱིཏཱ ཏརུཎཱ ཝཏྠཱནཱམ ཧོནྟི. པཙྪིམཱ ཝིཔཱཀསམངྒཱིཏཱ པརིཎཏཱཝཏྠཱནཱམཱཏི ཝེདིཏབྦཱ. ཨིཏི ཝིཔཙྩནྟཱིཏི ཝིཔཱཀཱནི མུདུཏརུཎཱཝཏྠཾ ཨཏིཀྐམིཏྭཱ པརིཎཀཱཝཏྠསངྑཱཏཾ ཝིཔཀྐབྷཱཝཾ ཨཱཔཛྫནྟཱིཏི ཨེཝམེཏྠ ཨཏྠོ ཝེདིཏབྦོ. ཨེཝཉྩ ཀཏྭཱ པཱལི༹ཡཾ ཀུསལཱཀུསལཀམྨསམུཊྛཱནཱནཾཔི ཀཊཏྟཱརཱུཔཱནཾ ཝིཔཱཀཔདེ ཨགྒཧཎཾ ཧོཏཱིཏི. ཏཱནིཧི ཀམྨསནྟཱནཏོ ཝིསུཾ སིདྡྷཏྟཱ ཝིསུཾ ཀམྨཏོ ཛཱཏཱནིཡེཝ ནཱམ ཧོནྟི, ནཝིཔཀྐཱནི ནཱམཱཏི. ཨཉྙཾཧི ཨརཱུཔདྷམྨཱནཾ སནྟཱནཾ. ཨཉྙཾ རཱུཔདྷམྨཱནནྟི. ཨཡམེཏྠ ཝིཔཱཀཔདེ པརམཏྠདཱིཔནཱ.

ཡེཔན ཨརཱུཔབྷཱཝེན སཱརམྨཎབྷཱཝེནཙ ཀམྨེན སདིས ཏཱམཏྟཾ གཧེཏྭཱ ཨརཱུཔདྷམྨཱནམེཝ ཝིཔཱཀཏྟཾ སཱདྷེནྟི. ཏེསཾ ཝིཔཱཀསདྡོ ཨརཱུཔདྷམྨེསུ རུལ༹ྷཱིཝསེན པཝཏྟོཏི ཨཱཔཛྫཏཱིཏི. ཡཉྩ ཏཏྠ སཱལིབཱིཛནིབྦཏྟེསུ ནཱལ༹པཏྟཔུཔྥཕལེསུ བཱིཛསདིསཱནཾ ཕལཱནམེཝ སཱལིཕལསཱལིཔཀྐནཱམཾ སིདྡྷཾ ཝིཡཱཏི ཨུཔམཾ དསྶེནྟི, སཱཔི ནསམེཏི. ན ཧི ཕལཱནིཔི ཏརུཎཀཱལེ པཱཀནཱམཾ ལབྷནྟི. ནཙ ནཱལ༹པཏྟཔུཔྥཱནིཔི པརིཎཏཀཱལེ པཱཀནཱམཾ ནལབྷནྟཱིཏི. ཏཱནི པིཧི ཏདཱ ནཱལ༹ཾ པཀྐཾ, པཏྟཾ པཀྐཾ, པུཔྥཾ པཀྐནྟི ན ནཝུཙྩནྟཱིཏི. སུཁཡཏཱིཏི སུཁཾ, སམྤཡུཏྟདྷམྨེ ཏཾསམངྒཱིཔུགྒལཾཝཱ ལདྡྷསཱཏཾ ཀརོཏཱིཏི ཨཏྠོ.

༣༤. སུཊྛུཝཱ ཁནཏི ཀཱཡིཀདུཀྑཾ. སུཁེནཙ ཁམིཏབྦཾ. སུཀརཾ ཨོཀཱསདཱནཾ ཨེཏསྶཱཏིཝཱ སུཁཾ. ཀུསལསྶ ཝིཔཱཀཱནི སམྤཡུཏྟ ཧེཏུཝིརཧཏོ ཨཧེཏུཀཱནིཙཱཏི ཀུསལཝིཔཱཀཱ ཧེཏུཀ ཙིཏྟཱནི.

[༣༦] ཝིབྷཱཝནིཡཾ པན

པུབྦཀམྨསཧཛཱཏེན ¶ ནིབྦཏྟཀཧེཏུནཱཔི ཨིདྷ ཝིཔཱཀསྶ སཧེཏུཀཏཱཔསངྒོཀཏོ. སོ ན སུནྡརོ.

ན ཧི ཨབྷིདྷམྨེ ཀཏྠཙི པུབྦཀམྨསཧཛཱཏེན ནིབྦཏྟཀཧེཏུནཱ ཝིཔཱཀསྶ སཧེཏུཀཱཧེཏུཀཏཱ སམྦྷཝོནཱམ ཨཏྠི. ཨསཏིཙ སམྦྷཝེ བྱབྷིཙཱརསྶཔི ཨབྷཱཝཏོ སོ པསངྒོ ནིརཏྠཀོཝཱཏི. ཏཏྠ བྱབྷིཙཱརསྶཱཏི པསངྒསྶ ཨིཙྩེཝཏྠོ. ཨེཏྠཙ ཨཀུསལཝིཔཱཀཱནཾ སཡཾ ཨབྱཱཀཏདྷམྨཏྟཱ ལོབྷཱདཱིཧི ཨཀུསལཧེཏཱུཧིཙ སཡཾ ཨཀུསལཝིཔཱཀཏྟཱ ཨལོབྷཱདཱིཧི ཨནཝཛྫཧེཏཱུཧིཙ སཧེཏུཀཏཱ སམྦྷཝོ ནཏྠི. ཨསཏི ཙ ཏཾ སམྦྷཝེ ཏེསཾ ཨཧེཏུཀབྷཱཝོ ཨབྱབྷིཙཱརོཡེཝ ཧོཏཱིཏི ཏཏྠ ཨཧེཏུཀགྒཧཎཾ ན ཀཏཾ. ཀུསལཝིཔཱཀཱནཾ པན སཡཾ ཀུསལཝིཔཱཀཏྟཱཡེཝ ཨལོབྷཱདཱིཧི ཀུསལཱ བྱཱཀཏཡོགཱིཧི ཨནཝཛྫཧེཏཱུཧི སཧེཏུཀཏཱ སམྦྷཝོ ཨཏྠིཡེཝ. སཏིཙ ཏསྨིཾ སམྦྷཝེ ཏེསཾ ཨཧེཏུཀབྷཱཝོ བྱབྷིཙཱརསཧིཏོ ཧོཏཱིཏི ཏཏྠེཝ ཨཧེཏུཀགྒཧཎཾ ཀཏནྟི དཊྛབྦཾ.

༣༥. ཙཀྑཱདིཀེ པཉྩདྭཱརེ ཨུཔྤནྣཾ ཨཱཝཛྫནཾ པཉྩདྭཱརཱཝཛྫནཾ, ཏཉྷི པཉྩདྭཱརེ གྷཊྚིཏཾ ཨཱརམྨཎཾ གཧེཏྭཱ ཨཱཝཛྫནཾ ཨུཔྤཛྫཏཱིཏི. བྷཝངྒསངྑཱཏེ མནོདྭཱརེ ཨུཔྤནྣཾ ཨཱཝཛྫནཾ མནོདྭཱརཱཝཛྫནཾ. ཏཉྷི ཏསྨིཾ ཨཱཔཱཏཾ ཨཱགཙྪནྟཾ ཨཱརམྨཎཾ གཧེཏྭཱ ཨཱཝཛྫནྟཾ པཝཏྟཏཱིཏི. ཨེཏྠཙ མནོདྭཱརནྟི སཀལཾ བྷཝངྒཙིཏྟཾ དཊྛབྦཾ.

[༣༧] ཡཾཔན ཊཱིཀཱཡཾ

ཏཱཝ ‘‘མནོདྭཱརནྟི ཨེཏྠ ཨཱཝཛྫནསྶ ཨནནྟར པཙྩཡབྷཱུཏཾ བྷཝངྒཙིཏྟཾ མནོཏི ཝུཙྩཏི. ཏདེཝ དྭཱརཾ ཨཱཝཛྫནཛཝནཱདི ཐིཙིཏྟ པཝཏྟིཡཱ མུཁཏྟཱ’’ཏི ཝུཏྟཾ.

ཡཉྩ ཝིབྷཱཝནིཡཾ

‘‘ཨཱཝཛྫནསྶ ཨནནྟར པཙྩཡབྷཱུཏཾ བྷཝངྒཙིཏྟཾ མནོདྭཱརཾ, པཱིཐིཙིཏྟཱནཾ པཝཏྟིམུཁབྷཱཝཏོ’’ཏི ཝུཏྟཾ. ཏཾ སབྦཾཔི ན ཡུཛྫཏིཡེཝ.

ཡདིཧི ¶ ཡསྶ བྷཝངྒསྶ ཨནནྟརཾ ཝཱིཐིཙིཏྟཱནི པཝཏྟནྟི. ཏདེཝ ཨེཀནྟེན ཏེསཾ པཝཏྟིམུཁཏྟཱ མནོདྭཱརཾནཱམ ཧོཏི. ན ཏཏོ པུརིམཱནཱིཏི ཨཡམཏྠོ སིཡཱ. ཨེཝཉྩསཏི ཡེསུ ཙཀྑཱདཱིསུ རཱུཔཱ དཱིནཾ གྷཊྚིཏཏྟཱ ཨཱཝཛྫནཱདཱིནི ཝཱིཐིཙིཏྟཱནི པཝཏྟནྟི. ཏཱནེཝ ཨེཀནྟེན ཏེསཾ པཝཏྟིམུཁཏྟཱ དྭཱརཱནིནཱམ ཧོནྟི. ན ཏཏོ ཨཉྙཱནཱིཏི ཨཡམཏྠོ ཨཱཔཛྫཏི. ནཙ ཏཱནི ཙཀྑཱདཱིནི ནཱམ ཨཏྠི. ཡཱནི ཙཀྑཱདཱིནི དྭཱརརཱུཔཱནིནཱམ ན ཧོནྟཱིཏི. སབྦམེཏཾ ཨུཔརི དྭཱར སངྒཧེ ཨཱཝིབྷཝིསྶཏཱིཏི. ཧསནཾ ཧསིཏཾ. མུཁསྶ པཧཊྛཱཀཱརཔྤཝཏྟི. ཏཾ ཨུཔྤཱདེཏི ཛནེཏཱིཏི ཧསིཏུཔྤཱདོ. ཏཾཝཱ ཨུཔྤཱདེནྟི ཁཱིཎཱསཝཱ ཨེཏེནཱཏི ཧསིབྷུཔྤཱདོ. ཏཾཝཱ ཨུཔྤཛྫཏི ཨེཏེནཱཏི ཧསིཏུཔྤཱདོ. སོཨེཝ ཙིཏྟནྟི སམཱསོ. ཁཱིཎཱསཝཱནཾ ཨནོལཱ༹རིཀེསུ ཨཱརམྨཎེསུ ཡེན ཙིཏྟེན སིཏཾ པཱཏུཀརོནྟི, ཏསྶེཏཾ ནཱམཾ. ན ཧི ཁཱིཎཱསཝཱ ལོཀིཡ མཧཱ ཛནཱཝིཡ རཛྫནཱིཡཱདི བྷཱཝེན ཨོལཱ༹རིཀེསུ ཧསནིཡ ཝཏྠཱུསུ ཧསནྟཱིཏི. ཊཱིཀཱསུ པན ཙིཏྟཾ ཨཔེཀྑིཏྭཱ ཧསིཏུཔྤཱདནྟི ནིདྡིཊྛཾ སིཡཱཏི. ཝུཏྟནཡེན ཨཧེཏུཀཱནིཙ ཏཱནི ཝིཔཙྩན ཝིཔཱཀུཔྤཱདན ཀིཙྩརཧིཏཏྟཱ ཏཾ ཏཾ ཀྲིཡཱམཏྟབྷཱུཏཱནི ཙིཏྟཱནིཙཱཏི ཨཧེཏུཀཀྲིཡཙིཏྟཱནི. ཨེཏྠཙ ཝཱིཐིམུཏྟཙིཏྟཱནི ཀིཙྩདུབྦལཏྟཱ པཉྩཝིཉྙཱཎཱནི ཝཏྠུདུབྦལཏྟཱ སམྤཊིཙྪནཱདཱིནིཙ ཀིཙྩཊྛཱནདུབྦལཏྟཱ ཨཏྟནོ ཨུསྶཱཧེན ཝིནཱ ཀེཝལཾ ཝིཔཙྩནམཏྟེན པཝཏྟནྟཱིཏི ཏཱནི སབྦཱནི ཝིཔཱཀཱནིཨེཝ ཧོནྟི. ཡཱནིཔན བལཝཀིཙྩཏྟཱ ཨཏྟནོ ཨུསྶཱཧེན པཝཏྟནྟི. ཨཱཡཏིཾཙ ཝིཔཱཀུཔྤཱདནཏྠཾ ཨུསྶཱཧསཧིཏཱནི ཧོནྟི. ཏཱནི ཀུསལཱཀུསལཱནིནཱམ ཧོནྟི. ཡཱནི པན ཙིཏྟཱནི ཝིཔཙྩནམཏྟཾ ཨཏིཀྐམྨ ཨཏྟནོ ཨུསྶཱཧེནེཝ པཝཏྟནྟི. ཏེསུ ཨཱཝཛྫནདྭཡཾ ཝིཔཱཀསནྟཱནཏོ ལདྡྷཔཙྩཡཏྟཱ ཐོཀཾ དུབྦལབྷཱཝཏོ ཨིཏརཱནིཙ ནིརཱནུསཡསནྟཱནེ པཝཏྟཏྟཱ སབྦསོ ཝིཔཱཀུཔྤཱདནཏྠཾ ཨུསྶཱཧརཧིཏཱནིཨེཝ ཧོནྟཱིཏི ཏཱནི སབྦཱནི ཀྲིཡཱནིནཱམ ཛཱཏཱནཱིཏི དཊྛབྦཾ.

༣༦. ཨིདཱནི ཨཱདིཏོ པཊྛཱཡ ཝེདནཱཝིཙཱརཎཱ ཝུཙྩཏི. ཏཐཱཧི ཙཀྑུཝིཉྙཱཎཱདཱིནཾ ཏཱཝ ཝཏྠཱུནིཙ ཨཱརམྨཎཱནིཙ ཨུཔཱདཱརཱུཔཱནེཝ ¶ ཧོནྟི, ཨུཔཱདཱརཱུཔཱནཉྩ ཝིཙུཔིཎྜཀཱནཾཝིཡ ཨཉྙམཉྙསངྒྷཊྚནཾ དུབྦལམེཝཱཏི ཏཱནི ཨིཊྛེ ཨནིཊྛེཙ ཨཱརམྨཎེ ཨུཔེཀྑཱ སཧགཏཱནེཝ ཧོནྟཱིཏི. ཀཱཡཝིཉྙཱཎསྶཔན ཨཱརམྨཎཱནི མཧཱབྷཱུཏཱནི ཧོནྟཱིཏི ཡཐཱ ཨདྷིཀརཎིམཏྠཀེ ཐཔིཏཾ པིཙུཔིཎྜཀཾ ཨཡོཀཱུཊེན པཧརནྟཱནཾ ཨཡོཀཱུཊསྶ པིཙུཔིཎྜཀཾ ཨཏིཀྐམྨ ཨཁིཀརཎིགྷཊྚནཾ བལཝཏརཾ ཧོཏི. ཏཐཱ ཏེསཾ ཨཱརམྨབྷཱུཏཱནཾ ཀཱཡཝཏྠུཾ ཨཏིཀྐམྨ ཀཱཡནིསྶཡ བྷཱུཏེསུ སངྒྷཊྚནཾ བལཝཏརཾ. ཏསྨཱ ཀཱཡཝིཉྙཱཎཾ ཨིཊྛེ སུཁསཧགཏཾ ཨནིཊྛེ དུཁསཧགཏཾ ཧོཏཱིཏི. སམྤཊིཙྪནཙིཏྟཾཔན སབྦདུབྦལཱནཾ པཉྩཝིཉྙཱཎཱནཾ ཨནནྟརཾ ཨུཔྤཛྫཏཱིཏི ནིཙྩཾ དུབྦལཾ ཧུཏྭཱ སབྦཏྠ ཨུཔེཀྑཱསཧགཏམེཝཱཏི. ཝིབྷཱཝནིཡཾ པན ཨསམཱནནིསྶཡེ ཧི ཏེཧི ལདྡྷཔཙྩཡཏཱཝསེན ཨཡམཏྠོ ཝིབྷཱཝིཏོ, སནྟཱིརཎཾཔན སཡཾཔི བལཝཝཏྠུཾ ནིསྶཱཡ པཝཏྟཏི. ཏཱདིསེནཙ བལཝཝཏྠུནིསྶཡེན པུརིམཙིཏྟེན ལདྡྷཔཙྩཡཾ ཧོཏཱིཏི ཐོཀཾ བལཝཾ ཧོཏི. ཏསྨཱ ཏཾ ཀུསལཝིཔཱཀཾ ཨིཊྛེ ཨུཔེཀྑཱསཧགཏཾ ཨབྷིཨིཊྛེ སོམནསྶསཧགཏཾ ཧོཏི. ཨཀུསལཝིཔཱཀཾཔན ཨནིཊྛེཔི ཨབྷིཨནིཊྛེཔི ཨུཔེཀྑཱསཧགཏམེཝ ཧོཏི. ཀསྨཱ ཨིཏིཙེ. ཡདིཧི ཏཾ ཨཏིཨནིཊྛཱརམྨཎཝསེན ཝེདནཱ བྷེདཡུཏྟཾ སིཡཱ. དུཀྑེནཝཱ དོམནསྶེནཝཱ ཡུཏྟཾ སིཡཱ. ཏཏྠ དུཀྑེན ཏཱཝ ན ཡུཛྫཏི, ཀསྨཱ, ཨེཀནྟཀཱཡིཀཏྟཱ དུཀྑསྶཱཏི. དོམནསྶེནཔི ན ཡུཛྫཏི. ཀསྨཱ, པཊིགྷེན པཊིཧཉྙཏྟཱཨེཝ དོམནསྶབྷཱཝཾ པཏྟཱ དོམནསྶཝེདནཱ པཊིགྷེན ཝིནཱ ནཔྤཝཏྟཏཱིཏི. ཨེཀནྟཱཀུསལབྷཱུཏེན པཊིགྷེན ནིཙྩཡོགིནོ དོམནསྶསྶ ཨབྱཱཀཏེསུ ཨསམྦྷཝཏོཏི. ཨཱཝཛྫནདྭཡཾཔན སནྟཱིརཎཏོཔི ཐོཀཾ བལཝཾ ཧོཏི. ཝིཔཱཀཱནཉྷི པཝཏྟིཏུཾཔི ཨཏྟནོ ཨུསྶཱཧབལཾནཱམ ནཏྠི. བལཝནྟེཧིཔན ཀམྨཱདིཔཙྩཡེཧི ཛཱཏཱནི བལཝནྟཱནིནཱམ ཧོནྟི. དུབྦལེཧི ཛཱཏཱནི དུབྦལཱནི ནཱམཱཏི. ཨེཝཾ སནྟེཔི ཏཾ ཨཱཝཛྫནདྭཡཾ ཀམྨཱནུབྷཱཝཏོཙ མུཙྩིཏྭཱ ཝིཔཱཀསནྟཱནཏོཙ པཙྩཡཾ གཧེཏྭཱ ཨུཊྛིཏཏྟཱ དུབྦལམེཝ ཧོཏཱིཏི སདཱཔི ཨུཔེཀྑཱསཧགཏམེཝཱཏི.

[༣༨] ཝིབྷཱཝནིཡཾ པན

པཉྩདྭཱརཱཝཛྫནཾ ¶ པུབྦེ ཀེནཙི ཨགྒཧིཏེ ཨཱརམྨཎེ ཨེཀཝཱ རམེཝ པཝཏྟཏྟཱ མནོདྭཱརཱཝཛྫནཉྩ ཝིསདིསཙིཏྟསནྟཱནཔརཱཝཏྟནཝསེན བྱཱཔཱརནྟརསཱཔེཀྑཏྟཱ ཨཱརམྨཎརསཾ ཨདྷིམཏྟཏོ ཨནུབྷཝིཏུཾ ནསཀྐོཏཱིཏི སབྦཏྠཔི མཛ྄ཛྷཏྟ ཝེདནཱཡུཏྟམེཝཱཏི ཝུཏྟཾ. ཏཏྠ བྱཱཔཱརནྟརསཱཔེཀྑཏྟཱཏི ཨིདཾ ན ཡུཛྫཏི.

ན ཧི ཙིཏྟཱནཾ བལཝདུབྦལཏཱཝིསེསོཨཏྟནོཔཙྪཱ པཝཏྟསྶ ཙིཏྟསྶ ཝསེན སཀྐཱ ཝཏྟུཾ. ཨཏྟནོཔན པཙྩཡེཧིཨེཝ སོ སཀྐཱ ཝཏྟུནྟི. ཨིཏརཐཱ སནྟཱིརཎསྶཔི བྱཱཔཱརནྟརསཱཔེཀྑཏཱ སིཡཱ. ཏཾཔི ཧི ཝིསདིསཙིཏྟསནྟཱནཾ ཨཏྟནཱཔརཾ ཝཏྟེཏི ཡེཝཱཏི.

༣༧. ཨིམཱནི ཙིཏྟཱནི ཨཏྟནོ པཀཏི པཙྩཡགཎསམཱཡོགེ སཏི ནུཔྤཛྫནྟཱིཏི ནཏྠི. ཏསྨཱ ཨསངྑཱརིཀཱནེཝཱཏི ཝདནྟི. མཱུལཊཱིཀཱཡཾ པན ཝིཔཱཀུདྡྷཱརེ –

ཨཧེཏུཀཝིཔཱཀཱནཾ ཨཔརིབྱཏྟཀིཙྩཏྟཱ སསངྑཱརིཀ ཀམྨ ཝིརུདྡྷོ ཨསངྑཱརིཀབྷཱཝོཔི ནཏྠི. ཨསངྑཱརིཀཀམྨཝིརུདྡྷོ སསངྑཱརིཀཀཱཝོཔི ནཏྠི. ཏསྨཱ ཏེསཾ ཨུབྷཡཀམྨེནཔི ཨུཔྤཏྟི ཐེརེན ཨནུཉྙཱཏཱཏི ཝུཏྟཾ.

ཨེཏེན ཏིཎྞཾ ཀྲིཡཙིཏྟཱནཾཔི ཏདུབྷཡབྷཱཝཱབྷཱཝོ ཝུཏྟོ ཧོཏི. ཏཱནིཔིཧི ཨཔརིབྱཏྟཀིཙྩཱནིཡེཝཱཏི. ཨཐཝཱ. རཱུཔདསྶ ན སདྡསྶཝནཱདཱིནི སཏྟཱ ཀདཱཙི ཨཏྟནོ ཨིཙྪཱཡ ཀརོནྟི. ཀདཱཙི པརེཧི ཨུསྶཱཧིཏཱ ཀརོནྟཱིཏི པཙྩཀྑཏོཝ སིདྡྷམེཏཾ. ཏཏྠ ཡདཱ ཨཏྟནོ ཨིཙྪཱཡ ཀརོནྟི. ཏདཱ པཉྩདྭཱརཱཝཛྫནཱདཱིནི སབྦཱནི ཝཱིཐིཙིཏྟཱནི ཨསངྑཱརིཀཱནིནཱམ ཧོནྟི. ཡདཱ པརེཧི ཨུསྶཱཧིཏཱ ཀརོནྟི. ཏདཱ སསངྑཱརིཀཱནིནཱམ ཧོནྟི. དྭཱར ཝིམུཏྟེསུཔན དྭཱིསུ ཨུཔེཀྑཱསནྟཱིརཎེསུ ཨཊྛམཧཱཝིཔཱཀེསུཝིཡ ཝཏྟབྦོ. ཨིཏི སབྦཱནི ཨཧེཏུཀཙིཏྟཱནི ཏེན པརིཡཱཡེན སངྑཱརབྷེདེན ¶ པཙྩེཀཾ བྷིནྣཱནིཨེཝ ཧོནྟི. ཨེཝཾ སནྟེཔི ཨཔརི བྱཏྟཀིཙྩཏྟཱཡེཝ ཏེསཾ སངྑཱརབྷེདོ པཱལི༹ཡཾ ནཝུཏྟོཏི ཝེདིཏབྦོ.

༣༨. ཡསྨཱཔན ཧེཏུཡོནཱམ མཧནྟདྷམྨཱ ཧོནྟི. ཏསྨཱ ཏེ དུབྦལཀམྨནིབྦཏྟེསུ དུབྦལཝཏྠུཀིཙྩཊྛཱནེསུཙ ཨིམེསུ ཙིཏྟེསུ ནུཔྤཛྫནྟི. ཏཏྠ སབྦཾ པཱཔཀམྨཾ ཝིཀྑེཔཡུཏྟཾ སཡཾཔི ཙཉྩལཏི དུབྦལཾ ཧོཏི. ཏསྨཱ ཏཾ ཀཔྤཊྛིཏིཀཾཔི སམཱནཾ ཀཱལནྟརེ ཧེཏུཡུཏྟཾ ཝིཔཱཀཾ ཛནེཏུཾ ནསཀྐོཏི. ཏིཧེཏུཀཀམྨཾཔི སམཱནཾ དུབྦལེསུ ཙཀྑཱདིཝཏྠཱུསུཙ དསྶནཱདཱིསུ ཀིཙྩཊྛཱནེསུཙ ཧེཏུཡུཏྟཾ ཝིཔཱཀཾ ཛནེཏུཾ ནསཀྐོཏི. ཨཱཝཛྫནཧསནཀིཙྩཱ ནིཙ དུབྦལཀིཙྩཱནིཨེཝ ཧོནྟི. ཏསྨཱ ཨིམཱནི སབྦཱནི སམྤཡུཏྟཧེཏུརཧིཏཱནི ཛཱཏཱནཱིཏི དཊྛབྦཾ.

༣༩. སབྦཐཱཔཱིཏི པདསྶ ཨཏྠོ ཧེཊྛཱ ཝུཏྟནཡེནེཝ ཝེདིཏབྦོ.

[༣༩] ཝིབྷཱཝནིཡཾ པན

སབྦཐཱཔཱིཏི ཨཀུསལཝིཔཱཀ ཀུསལཝིཔཱཀ ཀྲིཡབྷེདེ ནཱཏི ཝུཏྟཾ. ཏཾ ན སུནྡརཾ.

སོཧི བྷེདོ ཨིཙྩེཝནྟི ཨིམིནཱཝ གཧིཏོཏི. སངྒཧགཱཐཱཡཾ ཨཀུསལཝིཔཱཀཱནི ཝཏྠུཀིཙྩབྷེདེན སཏྟ, པུཉྙཔཱཀཱནི ཝཏྠུཀིཙྩཝེདནཱབྷེདེན ཨཊྛདྷཱ, ཀྲིཡཙིཏྟཱནི ཀིཙྩདྭཱརབྷེདེན ཏཱིཎཱིཏི ཨཧེཏུཀཙིཏྟཱནི ཨཊྛཱརས ཧོནྟཱིཏི ཡོཛནཱ. ཨེཏྠཙ པུཉྙཔཱཀེསུ ཝེདནཱབྷེདོཔི ཝཏྟབྦོ. ཨིཏརཐཱ སནྟཱིརཎསྶ ཨབྷེདོ སིཡཱ. ཏཐཱ ཀྲིཡཱསུ དྭཱརབྷེདོཔི ཝཏྟབྦོ. ཨཉྙཐཱ ཨཱཝཛྫནསྶ ཨབྷེདོ སིཡཱཏི. ཊཱིཀཱསུཔན སོ ན ཝུཏྟོཏི.

ཨཧེཏུཀཙིཏྟསྶ པརམཏྠདཱིཔནཱ.

༤༠. ཨིདཱནི ཧེཊྛཱ ཝུཏྟཱནཾ ཙིཏྟཱནཾ ཨསོབྷཎནཱམཾ ཨུཔརི ཝུཙྩམཱནཱནཉྩ སོབྷཎནཱམཾ ཐཔེནྟོ གཱཐམཱཧ. ཨུཔརི ཝུཙྩམཱནཱནཉྷི ¶ སོབྷཎཏྟེ ཝུཏྟེ ཧེཊྛཱ ཝུཏྟཱནཾ ཨསོབྷཎཏཱ ཨཝུཏྟཱཔི སིདྡྷཱ ཧོཏཱིཏི. ཏཏྠ པཱཔཱཧེཏུཀམུཏྟཱནཱིཏི པཱཔེཧི ཨཧེཏུཀེཧིཙ མུཏྟཱནི ཨེཀཱུནསཊྛིཙིཏྟཱནི. ཨཐཝཱ. ཨེཀནཝུཏིཙིཏྟཱནིཔི སོབྷཎཱནཱིཏི ཝུཙྩརེ ཝུཙྩནྟཱིཏི ཡོཛནཱ. ཏཏྠ པཱཔེཧཱིཏི ཨཀུསལེཧི. ཨཀུསལཱནིཧི ཨཏྟསམངྒིནོ སཏྟེ ཨནིཙྪནྟེཡེཝ ཨཔཱཡཾ པཱཔེནྟི. ཏསྨཱ པཱཔཱནཱིཏི ཝུཙྩནྟི. ཨེཏེན པུཉྙཱནཾཔི སུགཏིཔཱཔནཊྛེན པཱཔཏཱ པསངྒོ ནིཝཏྟིཏོ ཧོཏི. ན ཧི ཨིཙྪནྟཱནཾ པཱཔནེ པཱཔནབྱཱཔཱརོ པཱཀཊོ ཧོཏཱིཏི. ལཱམཀཊྛེནཝཱ ཏཱནིཡེཝ པཱཔཱནཱིཏི ཝུཙྩནྟཱིཏི. སོབྷཎེཧི སདྡྷཱདིགུཎདྷམྨེཧི ཡུཏྟིཡཱ ཏཏོཡེཝ ཙ སཡཾཔི སོབྷགྒཔཏྟིཡཱ སོབྷཎཱནཱིཏི.

༤༡. ཨིདཱནི ཏཱནི སོབྷཎཱནི ཧཱིན པཎཱིཏཱ ནུཀྐམེན དསྶེནྟོ སོམནསྶསཧགཏནྟིཨཱདིམཱཧ. ཏཏྠ ཛཱནཱཏཱིཏི ཉཱཎཾ, ཡཱཐཱཝཏོ པཊིཝིཛ྄ཛྷཏཱིཏི ཨཏྠོ. ཉཱཎེན སམྤཡུཏྟཾ ཝིཔྤཡུཏྟནྟི སམཱསོ. ནཏྠི སངྑཱརོ ཨསྶཱཏི ཨསངྑཱརོ. སཾཝིཛྫཏི སངྑཱརོ ཨསྶཱཏི སསངྑཱརོ. སཔྤུརིསུཔནིསྶ ཡཱདིཀོ ཀུསལུཔྤཏྟིཡཱ པཀཏིཔཙྩཡགཎོ. སོཧི ཡདཱ དུཝིདྷེན སངྑཱརེན ཝིནཱ ཀེཝལཾ ཨཏྟནོ བལེན ཀུསལཙིཏྟཾ སམུཊྛཱཔེཏི. ཏདཱ ཨསངྑཱརོནཱམ. སོཡེཝ ཡདཱ ཨཏྟནོ བལེན ཀུསལཙིཏྟཾ སམུཊྛཱཔེཏུཾ ན སཀྐོཏི. སངྑཱརསཧཱཡཾ ལབྷིཏྭཱཝ ཏཾ སམུཊྛཱཔེཏི. ཏདཱ སསངྑཱརོནཱམ. ཨསངྑཱརེན ཨུཔྤནྣཾ ཨསངྑཱརིཀཾ. སསངྑཱརེན ཨུཔྤནྣཾ སསངྑཱརིཀནྟི སབྦཾ ཧེཊྛཱ ཝུཏྟམེཝ. ཨེཏྠཙ སོམནསྶཱདཱིནཾ ཨུཔྤཏྟིཀཱརཎཾ ཧེཊྛཱ ཝུཏྟམེཝ. ཨཔིཙ སདྡྷཱསམྤཏྟི དསྶནསམྤཏྟི དེཡྻདྷམྨ པཊིགྒཱཧཀ སམྤཏྟཱིཏི ཨེཝམཱདི སོམནསྶཀཱརཎཾ, ཏབྦིཔརཱིཏཾ ཨུཔེཀྑཱཀཱརཎཾ. ཡཱནིཙ པཱིཏིསམྦོཛ྄ཛྷངྒསྶ ཨུཔེཀྑཱསམྦོཛ྄ཛྷངྒསྶཙ ཀཱརཎཱནིཨཊྛཀཐཱསུ ཝུཏྟཱནི. ཏཱནིཔི ཨིམསྨིཾ ཋཱནེ ཝཏྟབྦཱནཱིཏི. པཉྙཱ སཾཝཏྟནིཀ ཀམྨུཔནིསྶཡཏཱ, ཨབྱཱཔཛྫལོཀུཔཔཏྟིཏཱ ཨིནྡྲིཡཔརིཔཱཀཏཱ, ཀིལེསདཱུརཏཱཙ ཉཱཎུཔྤཏྟིཡཱ ཀཱརཎཾ. ཏིཧེཏུཀཔཊིསནྡྷིཀཏཱ, ཨམོཧཛ྄ཛྷཱསཡཏཱ, པཉྙཝནྟཔུགྒལསེཝནཱ. སུཏཙིནྟཱཔསུཏཱཏིཔིཝཏྟུཾ ¶ ཡུཛྫཏི. ཡཱནིཙདྷམྨཝིཙཡསམྦོཛ྄ཛྷངྒསྶ ཀཱརཎཱནི ཨཊྛཀཐཱསུ ཝུཏྟཱནི. ཏཱནིཔི ཨིདྷ ཝཏྟབྦཱནི. ཏབྦིཔརཱིཏཾ ཉཱཎཝིཔྤཡུཏྟཀཱརཎཾ. སངྑཱརཀཱརཎཾཔི པུབྦེ ཝུཏྟམེཝ. ཡཱནིཙ ཝཱིརིཡསམྦོཛ྄ཛྷངྒསྶ པསྶདྡྷིསམྦོཛ྄ཛྷངྒསྶཙ ཀཱརཎཱནི ཨཊྛཀཐཱསུ ཝུཏྟཱནི. ཏཱནིཔི ཨིདྷ ཝཏྟབྦཱནཱིཏི. ཨིམེསཾཔི ཨུཔྤཏྟི ཝིདྷཱནཾ ཝིསུདྡྷིམགྒེ གཧེཏབྦནྟི.

༤༢. ཨཊྛཔཱིཏི ཨེཏྠ པིསདྡོ སམྤིཎྜནཏྠོ. ཏེན ཨིམེསཾ ཨིདྷ ཝུཏྟཔྤཀཱརཏོ ཨཉྙེཧི པཀཱརེཧི ཨནེཀཝིདྷཏཾ སམྤིཎྜེཏི. ཏཏྲཱཡཾ ནཡོ. ཨིམཱནི ཨཊྛཙིཏྟཱནི དསཧི པུཉྙཀྲིཡཱཝཏྠཱུཧི གུཎིཏཱནི ཨསཱིཏི ཧོནྟི. པུན ཏཱནི ཚཧི ཨཱརམྨཎེཧི གུཎིཏཱནི ཙཏྟཱརིསཏཱནིཙེཝ ཨསཱིཏི ཙ ཧོནྟི. པུན ཏཱནི ཏཱིཧི ཀམྨེཧི གུཎིཏཱནི སཧསྶཾ ཙཏྟཱརི སཏཱནི ཙཏྟཱལཱིསཾཙ ཧོནྟི. པུན ཏཱནི ཏཱིཧི ཧཱིནམཛ྄ཛྷིམཔཎཱིཏེཧི གུཎིཏཱནི ཙཏྟཱརི སཧསྶཱནི ཏཱིཎི སཏཱནི ཝཱིསཏིཙ ཧོནྟི. ཏཱནི ཨིམཱནི སུདྡྷིཀཱནཱིཏི ཀཏྭཱ དྭཱིསུ ཋཱནེསུ ཐཔེཏབྦཱནི. ཏཏོ ཨེཀཾ ཋཱནཾ གཧེཏྭཱ དྭིདྷཱ ཀརོནྟསྶ ཉཱཎསམྤཡུཏྟཱནི དྭེསཧསྶཱནི སཏཾ སཊྛིཙ ཧོནྟི. ཏཐཱ ཉཱཎཝིཔྤཡུཏྟཱནཱིཏི. པུན ཏཏྠ ཉཱཎསམྤཡུཏྟཱནི ཙཏཱུཧི ཨདྷིཔཏཱིཧི གུཎིཏཱནི ཨཊྛསཧསྶཱནི ཚསཏཱནི ཙཏྟཱལཱིསཾཙ ཧོནྟི. ཉཱཎཝིཔྤཡུཏྟཱནིཔན ཝཱིམཾསཱཝཛྫིཏེཧི ཏཱིཧི ཨདྷིཔཏཱིཧི གུཎིཏཱནི ཚསཧསྶཱནི ཙཏྟཱརིསཏཱནི ཨསཱིཏིཙ ཧོནྟི. པུན ཏདུབྷཡཱནི སམྤིཎྜིཏཱནི དསསཧསྶཾ པཉྩསཧསྶཱནི སཏཾ ཝཱིསཏིཙ ཧོནྟི. པུན ཏཱནི པུབྦེ ཝིསུཾ ཐཔིཏེཧི སུདྡྷིཀེཧི སམྤིཎྜིཏཱནི དསསཧསྶཾ ནཝསཧསྶཱནི ཙཏྟཱརི སཏཱནི ཙཏྟཱལཱིསཉྩ ཧོནྟཱིཏི. ཡཾཔན ཊཱིཀཱཡཾ ཨིདྷ ཝུཏྟནཡེན སུདྡྷིཀཱནིཙ ཉཱཎཝིཔྤཡུཏྟཱནི ཙ ཝིསུཾ ཨཀཏྭཱ སབྦཱནི པུཉྙཀྲིཡཱདཱིཧི སམཾ གུཎིཏཱནི སཏྟརས སཧསྶཱནི དྭེ སཏཱནི ཨསཱིཏིཙ ཧོནྟཱིཏི ཝུཏྟཾ.

[༤༠] ཡཉྩ ཝིབྷཱཝནིཡཾ

སུདྡྷིཀཱནི ¶ ཝིསུཾ ཨཀཏྭཱ ཉཱཎཝིཔྤཡུཏྟཱནིཨེཝ ཝིསུཾ ཀཏྭཱ ཏཐཱ གུཎིཏཱནི ཝཱིས སཏཱདྷིཀ པནྣརས སཧསྶཱནི ཧོནྟཱིཏི ཝུཏྟཾ. ཏཾ སབྦཾ ན ཡུཏྟཾ.

ཨེཝཉྷི སཏི ཨིམཱནི ཀཱམཱཝཙརཀུསལཱནི ནིཙྩཾ སཱདྷིཔཏིཀཱནི ཧུཏྭཱ ནིཡཏཱདྷིཔཏིཀཱནིནཱམ བྷཝེཡྻུཾ. ནཙ ཨིམཱནི ཨུཔརི མཧགྒཏ ཀུསལཱནི ཝིཡ ལོཀུཏྟརཱནི ཝིཡ ཙ ནིཡཏཱ དྷིཔཏིཀཱནི ཧོནྟཱིཏི. ཊཱིཀཱནཡེནཔན ཉཱཎཝིཔྤཡུཏྟཱནིཔི ཝཱིམཾསཱསཧགཏཱནཱིཏི ཨཱཔཛྫཏཱིཏི. ཡཐཱཝཱ ཀོསལླསམྦྷཱུཏཊྛེན ཀུསལཱཏིཨེཏྠ ཉཱཎཝིཔྤཡུཏྟཱནིཔི ཀོསལླེན ནཱནཱཝཛྫནཝཱིཐིཡཾ པཝཏྟེན ཨུཔནིསྶཡཉཱཎེན སམྦྷཱུཏཏྟཱ ཀུསལཱནི ཨེཝ ནཱམ ཧོནྟི. ཨེཝམིདྷཔི ཏཱནི ཏེནེཝ ཝཱིམཾསཱདྷིཔཏིབྷཱུཏེན སམྦྷཱུཏཏྟཱ ཝཱིམཾསཱདྷིཔཏེཡྻཱནིཔི ནཱམ ཧོནྟཱིཏི ན ནསཀྐཱ ཝཏྟུནྟི ཨིམིནཱ ཨདྷིཔྤཱཡེན ཏཱནི ཝིསུཾ ཨཀཏཱནི སིཡུནྟི. ཨེཝཾསནྟེཔི ཀཱམཀུསལཱནིནཱམ ཨདྷིཔཏིཝིམུཏྟཱནི ཨེཝ བཧུཏརཱནི ཧོནྟི. ཏསྨཱ ནསཀྐཱ སབྦཱནི ཀཱམཀུསལཱནི ཝཱིམཾསཱདྷིཔཏིམཱུལིཀཱནི བྷཝིཏུནྟི.

༤༣. ཀཱམཱཝཙརཱནིཙ ཏཱནི ཀུསལཱནི ཙིཏྟཱནིཙཱཏི ཝིགྒཧོ. ཏཏྠ ཀེནཊྛེན ཀུསལཱནཱིཏི. ཨཱརོགྱཊྛེན, སུནྡརཊྛེན, ཚེཀཊྛེན, ཨནཝཛྫཊྚེན, སུཁཝིཔཱཀཊྛེནཙཱཏི. རཱགཱདཡོཧི དྷམྨཱ ཙིཏྟསནྟཱནསྶ རུཛྫནཊྛེན རོགཱནཱམ. ཨཧིཏཊྛེན ཨསུནྡརཱ ནཱམ. ཨནིཔུཎཊྛེན ཨཚེཀཱནཱམ. གཱརཡ྄ཧཊྛེན ཝཛྫཱནཱམ. ཨནིཊྛ ཝིཔཱཀཊྛེན དུཀྑཝིཔཱཀཱནཱམ ཧོནྟི. ཨིམཱནིཔན ཏེཧི ཝུཊྛིཏཏྟཱ ཀུསལཱནིནཱམ ཨརོགཱནི ནཱམཱཏི ཨཏྠོ. ཏཔྤཊིཔཀྑཏྟཱཙ སུནྡརཱནི ཚེཀཱནི ཨནཝཛྫཱནི སུཁཝིཔཱཀཱནི ཙ ནཱམ ཧོནྟཱིཏི. ཀུཙྪིཏེ པཱཔདྷམྨེ སལཡནྟི ཙཱལེནྟི ཀམྤེནྟི ཝིདྡྷཾསེནྟཱིཏི ཀུསལཱནི. ཀུཙྪིཏེནཝཱ ཨཱཀཱརེན སཏྟསནྟཱནེ སེནྟི ཨནུསེནྟཱིཏི ཀུསཱ. རཱགཱདཡོ. ཏེ ལུནནྟི ཚིནྡནྟཱིཏི ཀུསལཱནི. ཀུསཾཝཱ ཝུཙྩཏི ཉཱཎཾ ཀུཙྪིཏཱནཾ སཱནཊྛེན ཏནུཀརཎཊྛེན ཨནྟཀརཎཊྛེནཝཱ. ཀུསེན ལཱཏབྦཱནཱིཏི ཀུསལཱནི. ཀུསཱཝིཡ ¶ ཧཏྠཔྤདེསཾ སཾཀིལེསཔཀྑཾ ལུནནྟཱིཏིཝཱ ཀུསལཱནི. ཨཔིཙ, ཀུཙྪིཏེ པཱཔདྷམྨེ སརནྟི ཧིཾསནྟཱིཏི ཀུསལཱནི. རཀཱརསྶ ལཀཱརོ. ཀོསལླསམྦྷཱུཏཊྛེནཝཱ ཀུསལཱནཱིཏི.

༤༤. མཧཱཝིཔཱཀེསུ པདཏྠཏོ ཝཏྟབྦཾ ནཏྠི. ཝེདནཱབྷེདོ ཨཱརམྨཎཝསེན ཝཏྟབྦོ. ཏཱནིཧི ཨཏིཨིཊྛེ ཨིཊྛམཛ྄ཛྷཏྟེ ཙ ཨཱརམྨཎེ ཡཐཱཀྐམཾ སོམནསྶེན ཨུཔེཀྑཱཡ ཙ ཡུཏྟཱནཱིཏི. སམྤཡོགབྷེདོ ཀམྨཝསེན ཛཝནཝསེནཙ ཝཏྟབྦོ. ཏཱནིཧི བལཝཀམྨེན ཛནིཏཱནི ཉཱཎསམྤཡུཏྟཱནི ཧོནྟི. དུབྦལཀམྨེན ཛནིཏཱནི ཉཱཎཝིཔྤཡུཏྟཱནི. ཀདཱཙིཔན ཏདཱརམྨཎཝསེན པཝཏྟིཀཱལེ ཡེབྷུཡྻེན ཏིཧེཏུཀཛཝནཱནུབནྡྷཱནི ཉཱཎསམྤཡུཏྟཱནི ཧོནྟི. ཨིཏརཛཝནཱནུབནྡྷཱནི ཉཱཎཝིཔྤཡུཏྟཱནཱིཏི. སངྑཱརབྷེདོཔི ཀེཧིཙི ཨཱཙརིཡེཧི ཀམྨཝསེནེཝ ཀཐིཏོ. ཨསངྑཱརིཀཀམྨཛནིཏཱནི ཨསངྑཱརིཀཱནི. སསངྑཱརིཀཀམྨཛནིཏཱནི སསངྑཱརིཀཱནཱིཏི. སངྒཧཀཱརེནཔན སནྣིཧིཏཔཙྩཡཝསེན ཝུཏྟོ. ཏཱནིཧི པཊིསནྡྷིཡཾ པུརིམབྷཝེ མརཎཱསནྣཀཱལེ ཉཱཏཀཱདཱིཧི ཏེན ཏེན པཡོགེན ཨུཔཊྛཱཔིཏཱནི ཀམྨཱདཱིནི ཨཱརམྨཎཱནི གཧེཏྭཱ པཝཏྟཱནི སསངྑཱརིཀཱནིནཱམ ཧོནྟི. ཏཱདིསེན པཡོགེན ཝིནཱ སཡམེཝ ཀམྨབལེན ཨུཔཊྛིཏཱནི གཧེཏྭཱ པཝཏྟཱནི ཨསངྑཱརིཀཱནིནཱམ ཧོནྟི. ཏདཱརམྨཎ ཀཱལེཔན ཨསངྑཱརིཀཛཝནཱནུབནྡྷཱནི ཨསངྑཱརིཀཱནིནཱམ. སསངྑཱརིཀ ཛཝནཱནུབནྡྷཱནི སསངྑཱརིཀཱནི ནཱམཱཏི. ཨེཏྠཔི སམྤིཎྜནཏྠོ ཝིསདྡོ. ཏེན ཨཱརམྨཎཚཀྐ ཧཱིནཏྟིཀཝསེནེཝ ཀཱལདེས སནྟཱནཱདིཝསེནཙ ཏེསཾ ཨནེཀབྷེདཏྟཾ སམྤིཎྜེཏི. ཡསྨཱ པནེཏཱནི དཱནཱདིཝསེན ཀཱཡཀམྨཱདིཝསེན ཚནྡཱདཱིནི དྷུརཾ ཀཏྭཱ ཙ ན པཝཏྟནྟི. ཏསྨཱ ཏཱནི པུཉྙཀྲིཡཱཝཏྠཱུནཾ ཀམྨཱདྷིཔཏཱིནཉྩ ཝསེན ཝཌྜྷནཾ ནལབྷནྟཱིཏི.

[༤༡] ཝིབྷཱཝནིཡཾ པན

ཨིམཱནི ཝིཉྙཏྟིསམུཊྛཱཔནཱབྷཱཝཏོ ཀམྨདྭཱར ཝསེན ན པཝཏྟནྟི. ཨཝིཔཱཀསབྷཱཝཏོཙ ཀམྨཝསེན ནཔཝཏྟནྟཱིཏི ཝུཏྟཾ. ཏཾ ཝིཙཱརེཏབྦཾ.

ཧེཊྛཱཧི ཀུསལེསུ ཀམྨཏྟིཀཝསེནེཝ ཝཌྜྷནཾ ཝུཏྟཾ. ནཔན ཝིསུཾ ཀམྨདྭཱརཝསེན. ཀམྨཏྟིཀཉྩནཱམ ཏིཝིདྷ ཀམྨདྭཱར ཝསེནེཝ སིདྡྷནྟི. ནནུ ཨཊྛཀཐཱཡཾ ཡོཧི ཀཱམཱཝཙརཀུསལེསུ ཀམྨདྭཱར ཀམྨཔཐ པུཉྙཀྲིཡཱཝཏྠུབྷེདོ ཝུཏྟོ. སོ ཨིདྷ ནཏྠི. ཀསྨཱ. ཨཝིཉྙཏྟིཛནཀཏོ ཨཝིཔཱཀ དྷམྨཏོ ཏཐཱ ཨཔྤཝཏྟིཡཱཙཱཏི ཝུཏྟནྟི. སཙྩཾ. ཏཏྠ པན ཨཝིཉྙཏྟིཛནཀཏོ ཀམྨདྭཱར བྷེདོ ཨིདྷ ནཏྠཱིཏི ཨེཏེན ཀཱཡཀམྨཾ ཝཙཱིཀམྨཾ མནོཀམྨནྟི ཨེཝཾ བྷེདསྶ ཨབྷཱཝཾ ཝདཏི. ཨཝིཔཱཀདྷམྨཏོ ཀམྨཔཐབྷེདོ ཨིདྷ ནཏྠཱིཏི ཨེཏེན དསཝིདྷསྶ ཀམྨཔཐབྷེདསྶ ཨབྷཱཝཾ ཝདཏི. ཨིདྷཔན ཀུསལེསུཔི ཀམྨཔཐབྷེདཾ ཨགྒཧེཏྭཱ ཏིཝིདྷཀམྨདྭཱར བྷེདབྷིནྣཾ ཀམྨཏྟིཀམེཝ གཧིཏཾ. ཏཉྩ ཝིཉྙཏྟི སམུཊྛཱཔནཱ བྷཱཝཏོ ཏིཝིདྷཀམྨདྭཱརཝསེན ནཔཝཏྟནྟཱིཏི ཨིམིནཱཝ སིདྡྷཾ. ཡདིཙ ཧེཊྛཱ ཀུསལེསུཔི དསཝིདྷཀམྨཔཐབྷེདཝསེན ཝིསུཾ ཝཌྜྷནཾ ཝུཏྟཾ སིཡཱ. ཨེཝཾསཏི ཨིདྷཔི ཨཝིཔཱཀསབྷཱཝཏོ ཀམྨཔཐཝསེན ནཔཝཏྟནྟཱིཏི ཨིདཾ ཝཏྟབྦམེཝཱཏི.

༤༥. མཧཱཀྲིཡཙིཏྟེསུཔི མཧཱཝིཔཱཀེསུཝིཡ ཨཱརམྨཎ ཝསེནེཝ ཝེདེནཱབྷེདོ ཨུཔརི སཡམེཝ ཝཀྑཏི. ཉཱཎསམྤཡུཏྟ, ཝིཔྤཡུཏྟ, ཨསངྑཱརིཀ, སསངྑཱརིཀབྷེདོཔན ཡཐཱརཧཾ ཀུསལེསུ ཝུཏྟནཡེན ཝེདིཏབྦོ.

[༤༢] ཝིབྷཱཝནིཡཾ པན

ཏཐཱ ཨཝིཙཱརེཏྭཱ ཀྲིཡཙིཏྟཱནཾཔི ཀུསལེ ཝུཏྟནཡེན ཡཐཱརཧཾ སོམནསྶ སཧགཏཱདིཏཱ ཝེདིཏབྦཱཏི ཝུཏྟཾ. ཏཾ ན ཡུཛྫཏི.

ཨིཙྩེཝཾ སབྦཐཱཔཱིཏི པདཱནཾ ཨཏྠོ ཧེཊྛཱ ཝུཏྟོཡེཝ. སཧེཏུཀ ཀཱམཱཝཙར ཀུསལ ཝིཔཱཀ ཀྲིཡ ཙིཏྟཱནཱིཏི ཨེཏྠ སཧེཏུ ཀགྒཧཎཾ ཀུསལ སདྡ སམྦནྡྷེ བྷཱུཏཀཐན ཝིསེསནཾ. ཏེནེཝཧི ཏཾ ཀུསལཙིཏྟཱནཾ ཙཱུལ༹ནིགམེན གཧིཏཾ. ཝིཔཱཀ ཀྲིཡ སདྡསམྦནྡྷེཔན བྱཝཙྪེདཀཝིསེསནཾ དཊྛབྦཾ.

[༤༣] ཝིབྷཱཝནིཡཾ པན

སཀྑརཀཐལིཀཾཔི ¶ མཙྪགུམྦཾཔི ཏིཊྛནྟཾཔི ཙརནྟཾཔི པསྶཏཱིཏི སུཏྟཔདེ ཝིཡ ཨིདྷ ཡཐཱལཱབྷ ཡོཛནཱཏི ཝུཏྟཾ. ཏཾ ན སམེཏི. ཏཏྠཧི སཀྑརཀཐལིཀཾནཱམ ནཙརཏཱིཏི ཡུཏྟཾ. ཨིདྷཔན ཀུསལཾ སཧེཏུཀཾ ནཧོཏཱིཏི ནཡུཏྟམེཏནྟི.

༤༦. སངྒཧགཱཐཱཡཾ ཝེདནཱ ཉཱཎ སངྑཱར བྷེདེནཱཏི ཝེདནཱབྷེདེན, ཉཱཎབྷེདེན, སངྑཱརབྷེདེནཙ. ཏཏྠ ཝེདནཱ བྷེདེནཱཏི ཝེདནཱབྷེདསིདྡྷེན ཙིཏྟབྷེདེན, ཉཱཎབྷེདེནཱཏི ཉཱཎཡོགཱ ཡོགསིདྡྷེནཙིཏྟབྷེདེན. སངྑཱརབྷེདེནཱཏི སངྑཱརེན ཝིནཱ སཧཙ པཝཏྟཔཙྩཡགཎབྷེདསིདྡྷེན ཙིཏྟབྷེདེནཱཏི ཨཏྠོ. ཨིདཉྷི སམཱསཔདཱནཾ སཱམཏྠིཡཾ, ཡདིདཾ སུཝིཉྙཱཏཱནཾ ནཱནཱཔྤཀཱརཱནཾ པདཏྠཱནཾ ཨཔྤཀེན བྱཉྫནེན དཱིཔནསམཏྠཏཱཏི.

[༤༤] ཨེཏེན ཝིབྷཱཝནིཡཾ

སཡཾ ཨབྷིནྣཱནཾ ཉཱཎསངྑཱརཱནཾ བྷེདཝཙནེ ཙིཏྟསྶ བྷེདཀར བྷཱཝེ ཙ ཙོདནཱཡ ཨནོཀཱསཏཱ སཱདྷིཏཱ ཧོཏཱིཏི.

ཏཏྲཱཡཾ ཡོཛནཱ. སཧེཏུ ཀཱམཱཝཙར པུཉྙཔཱཀཀྲིཡཱ ཝེདནཱཉཱཎསངྑཱརབྷེདེན ཡཐཱཀྐམཾ ཚཙ དྭཱདསཙ ཙཏུཝཱིསཏི ཙ མཏཱཏི. ཨེཏྠཙ –

ཝེདནཱཉཱཎསངྑཱར, བྷེདེནེཏཱནི ཨཊྛདྷཱ;

པུཉྙཔཱཀཀྲིཡཱབྷེདཱ, ཙཏུཝཱིསཏིཝིདྷཱ མཀཱ ཏིཔི.

ཝཏྟབྦཱ. ཨེཝཉྷི སཏི ཨཏྠགཏིཙ ཝིསདཱ ཧོཏི. ཨུཔརི ཝཀྑ, མཱནཱཧིཙ སངྒཧགཱཐཱཧི སདྡྷིཾ སམེཏཱིཏི.

༤༧. ཀཱམེཏིཨཱདི སབྦེསཾ ཀཱམཙིཏྟཱནཾ སངྒཧགཱཐཱ. ཏཏྠ ཀཱམེ ཀཱམབྷཱུམིཡཾ པཱཀཱནི སཧེཏུཀཱཧེཏུཀཝསེན སབྦཱནི ཝིཔཱཀཙིཏྟཱནི ཏེཝཱིས. པུཉྙཱཔུཉྙཱནི ཀུསལཱཀུསལཙིཏྟཱནིཙ ཝཱིསཏི. ཀྲིཡཱཙ སཧེཏུཀཱཧེཏུཀཝསེན སབྦཱནི ཀྲིཡཙིཏྟཱནི ¶ པན ཨེཀཱདས ཧོནྟི. ཨིཙྩེཝཾ སབྦཐཱཔི ཙཏུཔྤཉྙཱས ཧོནྟཱིཏི ཡོཛནཱ. སབྦཐཱཏི ཙེཏྠ ཝིསདྡོ ལུཏྟ ནིདྡིཊྛོ. དྷམྨསངྒཎིཡཾ ཝུཏྟེན སབྦཔྤཀཱརེནཔི ཙཏུཔྤཉྙཱསཨེཝ. ཝིབྷངྒེ ཝིབྷཏྟེན སབྦཔྤཀཱརེནཔི ཙཏུཔྤཉྙཱས ཨེཝཱཏིཨཱདིནཱ ཏསྶ ཨཏྠོ ཧེཊྛཱ ཝུཏྟོཡེཝཱཏི.

[༤༥] ཨེཏེན ཝིབྷཱཝནིཡཾ

ཨིདྷ ཝུཏྟཱནཾ ཀུསལཱདཱིནཾ ཨནྟོགདྷབྷེདཝསེན ཏསྶ ཨཏྠཝིབྷཱཝནཱ པཊིསིདྡྷཱ ཧོཏི.

[༤༦] ཡཉྩ ཝིབྷཱཝནིཡཾ

ཀཱམེ བྷཝེཏི ཝུཏྟཾ. ཏཾཔི ཝིཙཱརེཏབྦཾ.

བྷཝསདྡོ ཧི ཀུསལཱཀུསལཀམྨེསུ ཀམྨནིབྦཏྟེསུཙ ཝིཔཱཀ ཀཊཏྟཱརཱུཔེསུ ཝཏྟམཱནོ ཨབྷིདྷམྨེ དིཊྛོ. ན ཏདཉྙེསུ ནཱམརཱུཔདྷམྨེསཱུཐི. བྷཱུམིཔརིཡཱཡོཙ ཨིདྷ ཀཱམསདྡོ. བྷཱུམཱིཏིཙ སཧོཀཱསོ ཨིནྡྲིཡཱ ནིནྡྲིཡབདྡྷདྷམྨསམཱུཧོ ཝུཙྩཏཱིཏི ཀཱམེ ཀཱམབྷཱུམིཡནྟི ཨཡམཏྠོ དཊྛབྦོ. བྷཝོཏིཝཱ བྷཱུམིཨེཝ ཝུཙྩཏི སུཏྟནྟཔརིཡཱཡེན བྷཝནྟི ཨེཏྠ སཏྟཱ སངྑཱརཱཙཱཏི ཀཏྭཱ. ཨེསནཡོ པརཏྠཔཱིཏི.

ཨིཏི པརམཏྠདཱིཔནིཡཱནཱམ ཨབྷིདྷམྨཏྠསངྒཧསྶ

ཙཏུཏྠཝཎྞནཱཡ ཀཱམཙིཏྟསྶ

པརམཏྠདཱིཔནཱ ནིཊྛིཏཱ.

༤༨. ཨེཝཾ ཀཱམཙིཏྟསངྒཧཾ དསྶེཏྭཱ ཨིདཱནི ཡཐཱནུཔྤཏྟཾ རཱུཔཙིཏྟསངྒཧཾ དསྶེནྟོ ཝིཏཀྐཝིཙཱརཔཱིཏིསུཁེཀགྒཏཱསཧིཏནྟིཨཱདིམཱཧ. ཝིཏཀྐོཙ ཝིཙཱརོཙ པཱིཏིཙ སུཁཉྩ ཨེཀགྒཏཱཙཱཏི དྭནྡོ. ཏཱཧི སཧིཏནྟི སམཱསོ. ཝིཏཀྐཝིཙཱརཔཱིཏིསུཁེ ཀགྒཏཱ སངྑཱཏེནསམུདིཏེནཔཐམཛ྄ཛྷཱནེན སམྤཡུཏྟཾཀུསལཙིཏྟཾ པཐམཛ྄ཛྷཱནཀུསལཙིཏྟཾ. ཏཏྠ ཀེནཊྛེནཔཐམཾ, ཀེནཊྛེནཙ ཛྷཱནནྟི. ཨཱདིཏོ པཊིཔཛྫིཏབྦཏྟཱ པཐམཾ. ཀསིཎཱདིཀསྶ ཨཱརམྨཎསྶ ཨནིཙྩཱདིལཀྑཎསྶཙ ཨུཔནིཛ྄ཛྷཱཡནཏོ པཙྩནཱིཀདྷམྨཱནཉྩ ཛྷཱཔནཏོ དཡ྄ཧནཏོ ¶ ཛྷཱནཾ. ཨིམེསུ དྭཱིསུ ཨཏྠེསུ ཨེཀགྒཏཱཨེཝ སཱཏི སཡཡུཏྟཱཏི དཊྛབྦཱ. སཱཧི ཨེཀཏྟཱརམྨཎསངྑཱཏོ ཨེཀོ ཨགྒོཀོཊིཀོཊྛཱསོཝཱ ཨསྶཱཏི ཨཏྠེན ཨེཀགྒསངྑཱཏསྶ ཙིཏྟསྶ ཏཐཱཔཝཏྟནེ ཨཱདྷིཔཙྩགུཎཡོགེན ཨེཀགྒཏཱཏི ཙ ཝུཙྩཏི. སཱཡེཝ ཙིཏྟཾ ནཱནཱརམྨཎེསུ ཝིཀྑིཔིཏུཾ ཨདཏྭཱ ཨེཀསྨིཾ ཡེཝཱརམྨཎེ པཊིཔཀྑདྷམྨཱནཾ དཱུརཱིབྷཱཝེན སམྨཱཙ ཨཱདྷིཡཏི ཐཔེཏི. ཨིནྡྲིཡཱནཉྩ སམབྷཱཝཾ ཀཏྭཱ ཏཏྠེཝ ལཱིནུདྡྷཙྩཱབྷཱཝཱཔཱདནེན སམཉྩ ཨཱདྷིཡཏི ཐཔེཏཱིཏི ཨཏྠེན སམཱདྷཱིཏིཙ ཝུཙྩཏི. སཱཡེཝཙ པཱལི༹ཡཾ ཨཝིཀྑེཔོ ཨཝིསཱཧཱརོ སཎྛིཏི ཨཝཊྛིཏཱིཏི ནིདྡིཊྛཱཏི. ཝིཏཀྐཱདཡོཔི པན ཏསྶཱ སཱཏིསཡཾ ཨུཔཀཱརཀཏྟཱ ཛྷཱནནྟེཝ ཝུཏྟཱ. ཏཐཱ ཧི ཝིཏཀྐོ ཏཱཝ ཙིཏྟཾ ཐིནམིདྡྷཝསེན ཨོསཀྐིཏུཾ ཨདཏྭཱ དལ༹ྷཾ ཨཱརམྨཎཱབྷིམུཁམེཝ ཀརོཏི. ཨཱརམྨཎཱབྷིནིརོཔན ལཀྑཎོཧི ཝིཏཀྐོ. ཐིན མིདྡྷནཱིཝརཎསྶཙ ཨུཛུཔྤཊིཔཀྑོཏི. ཝིཙཱརོཙ ནཾ ཝིཙིཀིཙྪཱཝསེན སཾསཔྤིཏུཾ ཨདཏྭཱ དལ༹ྷཾ ཨཱརམྨཎཱནུབནྡྷམེཝ ཀརོཏི. ཨཱརམྨཎཱནུམཛྫནལཀྑཎོ ཧི ཝིཙཱརོ པཉྙཱཔཀཏིཀོ. ཝིཙིཀིཙྪཱནཱིཝརཎསྶཙ ཨུཛུཔྤཊིཔཀྑོཏི. པཱིཏིཙ ཙིཏྟཾ བྱཱཔཱདཝསེན ཨུཀྐཎྛིཏུཾ ཨདཏྭཱ ཨཱརམྨཎེ པརིཏུཊྛམེཝ ཀརོཏི. ཨཱརམྨཎསཾཔི ཡཱཡནལཀྑཎཱ ཧི པཱིཏི. བྱཱཔཱདནཱིཝརཎསྶཙ ཨུཛུཔྤཊིཔཀྑཱཏི. ཏཐཱ སུཁཉྩ ནཾ ཨུདྡྷཙྩ ཀུཀྐུཙྩཝསེན ཨཝཱུཔསམིཏུཾ ཨདཏྭཱ ཨཱརམྨཎེ ལདྡྷསཱཏཾ ཨུཔབྲཱུཧིཏཾ ཀརོཏི. སཱཀལཀྑཎཉྷི སུཁཾ, ཨུདྡྷཙྩཀུཀྐུཙྩནཱིཝརཎསྶཙ ཨུཛུཔྤཊིཔཀྑནྟི.

ཨུཔེཀྑཱཙ སནྟསབྷཱཝཏྟཱ སུཁེཨེཝ སངྒཧིཏཱཏི. ཨེཝཾ ཀརོནྟཱཙ ཏེ དྷམྨཱ ཏསྨིཾ ཨཱརམྨཎེ ཏསྶ ཙིཏྟསྶ སུཊྛུ ཨེཀགྒབྷཱཝཏྠཱཡཙ ཧོནྟི. ཨེཀགྒབྷཱཝོཏིཙ ཨེཀགྒཏཱཡེཝ. སཱཙ ཨེཀགྒཏཱ ཏེཧི དྷམྨེཧི ཏཐཱ ཨནུགྒཧིཏཱ སུཊྛུ བལཝཏཱི ཧུཏྭཱ སཡཾ ཀཱམཙྪནྡཝསེན ནཱནཱརམྨཎེསུ ཙིཏྟཝིདྷཱཝནཾ ནཱིཝཱརེཏྭཱ ཀསིཎནིམིཏྟཱདིཀེ ཏསྨིཾ ཨཱརམྨཎེ ནིཙྩལཾ ཋཏྭཱ ཏཾཨཱརམྨཎཾ ཨུཔགནྟྭཱ ནིཛ྄ཛྷཱཡཏི ཨོལོཀེཏི. ཏསྨཱ ཏེ སབྦེཔི དྷམྨཱ ཨུཔནིཛ྄ཛྷཱཡནཊྛེནཔི ཛྷཱནནྟི ཝུཏྟཱཏི. ཏེསུཙ ཏཐཱ པཝཏྟམཱནེསུ ¶ ཏཔྤཙྩནཱིཀཱ ནཱིཝརཎདྷམྨཱ ཨོཀཱསཾ ཨལབྷིཏྭཱ མནསྨིཾཔི པརིཡུཊྛིཏུཾ ནསཀྐོནྟི. ཛྷཱཔིཏཱནཱམ ཧོནྟི. ཏསྨཱ ཏེ པཙྩནཱིཀཛ྄ཛྷཱཔནཊྛེནཔི ཛྷཱནནྟི ཝུཏྟཱཏི. ཨེཝཾ སནྟེཔི ཡསྨཱ ཛྷཱན མགྒ སམྦོདྷིསངྑཱཏེསུ ཏཱིསུ ཋཱནེསུ དྷམྨསཱམགྒཱི པདྷཱནཾ ཧོཏི. ཨངྒཱནཾ སམགྒབྷཱཝེཨེཝ ཨཔྤནཱཔཏྟིཝསེན ཨུཔནིཛ྄ཛྷཱཡ ནཱདི ཀིཙྩསཾསིདྡྷིཏོ. ཡསྨཱཙ ཨེཏེ དྷམྨཱ ཝུཏྟནཡེན ཝིསུཾཝིསུཾ ཨཏྟནོ ཀིཙྩཾ ཀརོནྟཱཔི ཙིཏྟསྶ ཨཱརམྨཎེ ནིཙྩལཔྤཝཏྟི སངྑཱཏཾ ཨེཀམེཝ ཨུཔནིཛ྄ཛྷཱནཀིཙྩཾ སཱདྷེནྟི. ཏསྨཱ རཐངྒཱནཾ སམུདཱཡེཨེཝ རཐཝོཧཱརོཝིཡ ཏེསཾ སམུདཱཡེཨེཝ ཛྷཱན ཝོཧཱརོ སིདྡྷོཏི ཝེདིཏབྦོ. ཨཔརེཔན པཉྩནྣཾཔི ཏེསཾ ཨཱརམྨཎཱབྷིནིརོཔནཱདཱིནི ཡཐཱསཀཾ ཀིཙྩཱནིཡེཝ ཝིསུཾ ཝིསུཾ ཨུཔནིཛ྄ཛྷཱནཀིཙྩཱནིནཱམ ཧོནྟཱིཏི པཊྛཱནེ ཛྷཱནཔཙྩཡཾ པཏྭཱ སབྦེཔེཏེ ཝིསུཾ ཝིསུཾ ཛྷཱནཔཙྩཡཾ སཱདྷེནྟིཡེཝ. ཏསྨཱ ཏེ ཝིསུཾ ཝིསུཾཔི ཛྷཱནཱནིཡེཝ ཧོནྟཱིཏི སཀྐཱ ཝཏྟུཾ. ཡཐཱཙ པཉྩངྒིཀཾ སཱིལཾ དསངྒིཀཾ སཱིལནྟི ཨེཏྠ པཉྩསམུདིཏཱདཱིནི ཏེསཾ སཱིལཱནཾ པཉྩངྒིཀཱ དིནཱམལཱབྷསྶེཝ ཀཱརཎཱནི ཧོནྟི. ན སཱིལབྷཱཝསྶ. ན ཧི པཱཎཱཏིཔཱཏཱ ཝེརམཎཱདིཀཾ ཨེཀཾཔི སམཱནཾ སཱིལཾནཱམ ན ཧོཏཱིཏི. ཨེཝམེཝཾ ཨིདྷཔི པཉྩསམུདིཏཱདཱིནི པཉྩངྒིཀཱདི བྷཱཝསྶེཝ པཐམཛ྄ཛྷཱནཱདི བྷཱཝསྶེཝཙ ཀཱརཎཱནི. ནཔན ཛྷཱནབྷཱཝསྶཱཏི ནསཀྐཱ ཝིཉྙཱཏུཾ. ཨིཏརཐཱ ཛྷཱནཔཙྩཡེ ཛྷཱནངྒཱནི པཙྩནིཡཱནིཡེཝ སིཡུནྟིཔི ཝདནྟི. ཨེཏྟཱཝཏཱ སཏིཔི ཨིམསྶ ཙིཏྟསྶ ཕསྶཱདཱིཧིཔི སཧིཏབྷཱཝེ ཏེསཾ ཏཐཱཝིདྷཀིཙྩཝིསེསཱབྷཱཝཱ ཨིདྷ ཨགྒཧཎནྟིཔི སིདྡྷཾ ནཧོཏཱིཏི. ཝིཙཱརཔཱིཏིསུཁེཀགྒཏཱ སངྑཱཏེན དུཏཱིཡཛ྄ཛྷཱནེན སམྤཡུཏྟཾ ཀུསལཙིཏྟཾ དུཏཱིཡཛ྄ཛྷཱན ཀུསལཙིཏྟཾ, ཨེཝཾ སེསེསུཔི.

༤༩. ཨེཏྠ སིཡཱ. ཀེནཔན ཨིམེསཾ ཛྷཱནཱནཾ ཨངྒབྷེདོ ཀཏོཏི. པུགྒལཛ྄ཛྷཱསཡེན ཀཏོཏི. ཡོཧི ཝིཏཀྐསཧཱཡོ ཧུཏྭཱ པཉྩངྒིཀཾ པཐམཛ྄ཛྷཱནཾ ཨུཔྤཱདེཏྭཱ ཏཏྠ ཝསཱིབྷཱཝཾ ཀཏྭཱ པུནཝིཏཀྐེ ནིབྦིནྡཏི. ཏསྶ ཝིཏཀྐཾ སམཏིཀྐམིཏྭཱ ཨཝིཏཀྐཾ ཙཏུརངྒིཀཾ ཛྷཱནཾ ཨདྷིགནྟུཾ ཨཛ྄ཛྷཱསཡོ སཎྛཱཏི. ཏདཱ སོ ¶ ཏམེཝ པཐམཛ྄ཛྷཱནཾ པཱདཀབྷཱཝཏྠཱཡ དལ༹ྷཾ སམཱཔཛྫིཏྭཱ ཝུཊྛཱཡ ཏེན ཨཛ྄ཛྷཱསཡེན སཧེཝ པུནབྷཱཝནཾ ཨནུཡུཉྫནྟོ ཨཝིཏཀྐཾ ཙཏུརངྒིཀཾ ཛྷཱནཾ ཨདྷིགཙྪཏི. ཏཏྠ སཱ བྷཱཝནཱསཡཾ ཝིཏཀྐཡུཏྟཱཔི ཏེན ཨཛ྄ཛྷཱསཡེན པརིབྷཱཝིཏཏྟཱ ཝིཏཀྐཝིརཱག བྷཱཝནཱནཱམ ཧོཏི. ཏསྶཱ བྷཱཝནཱཡ. བལེན ཏཾ ཛྷཱནཾ ཨུཔྤཛྫ མཱནཾ ཨཝིཏཀྐཾ ཙཏུརངྒིཀཾ ཨུཔྤཛྫཏི. སེསཛ྄ཛྷཱནཱདྷིགམེསུཔི ཨེསེཝནཡོཏི. ཨེཝཾ པུགྒལཛ྄ཛྷཱསཡེན ཏེསཾ ཛྷཱནཱནཾ ཨངྒབྷེདོ ཀཏོཏི ཝེདིཏབྦོ. ཨེཏྠཙ ཨུཏྟརུཏྟརཛ྄ཛྷཱནཱ དྷིགམནེ པཱདཀབྷཱཝཏྠཱཡ པུརིམཔུརིམཛ྄ཛྷཱནསྶ སམཱཔཛྫནཾ ཨཝསྶཾ ཨིཙྪིཏབྦཾ. ཧེཊྛིམཾ ཧེཊྛིམཾ པགུཎཛ྄ཛྷཱནཾ ཨུཔརིམསྶ ཨུཔརིམསྶ པདཊྛཱནཾ ཧོཏཱིཏི ཨཊྛཀཐཱཡཾ ཝུཏྟཾ. ཨཛ྄ཛྷཱསཡབལེནཔན ཨུཏྟརཛ྄ཛྷཱནཾ ཨུཔྤཛྫམཱནཾ པཱདཀཛ྄ཛྷཱནསདིསཾ ནཧོཏི. པཱདཀཛ྄ཛྷཱནཏོཧི པུགྒལཛ྄ཛྷཱསཡོཝ བལཝཏརོ. ཏེནཱཧ བྷགཝཱ ཨིཛ྄ཛྷཏི བྷིཀྑཝེ སཱིལཝཏོ ཙེཏོཔཎིདྷི ཝིསུདྡྷཏྟཱཏི. ཨཡཉྩ ཨཏྠོ ཨུཔརི ལོཀུཏྟརཙིཏྟཾ པཏྭཱ ཨཱཝི བྷཝིསྶཏཱིཏི.

༥༠. ཨེཏྠ སིཡཱ. ཀསྨཱ ཨིདྷ སངྑཱརབྷེདོ ནཝུཏྟོཏི. པཱལི༹ཡམེཝ ཨཝུཏྟཏྟཱ. ཀསྨཱཙ སོ པཱལི༹ཡཾ ཨཝུཏྟོཏི. པཊིཔདཱ བྷེདཝཙནེནེཝ སིདྡྷཏྟཱཏི. ཏཐཱཧི སབྦེསཾཔི ལོཀིཡ ལོཀུཏྟརཛ྄ཛྷཱནཱནཾ སུཁཔྤཊིཔདབྷཱཝེ སིདྡྷེ ཨསངྑཱརིཀབྷཱཝོ སིདྡྷོཡེཝ ཧོཏི. དུཀྑཔྤཊིཔདབྷཱཝེཙ སིདྡྷེ ཏེསཾ སསངྑཱརིཀབྷཱཝོ སིདྡྷོཡེཝ ཧོཏཱིཏི. ཀཐཾ ཝིཉྙཱཡཏཱིཏི ཙེ. ཨཊྛཀཐཱདསྶནཏོ. ཝུཏྟཉྷེཏཾ ཨཊྛསཱལིནིཡཾ -

ཡོ ཨཱདིཏོ ཀིལེསེ ཝིཀྑམྦྷེནྟོ དུཀྑེན སསངྑཱརེན སཔྤཡོགེན ཀིལམནྟོ ཝིཀྑམྦྷེཏི. ཏསྶ དུཀྑཱ པཊིཔདཱ ཧོཏི. ཡོ ཀིལེསེ ཝིཀྑམྦྷེནྟོ སུཁེན ཨཀིལམནྟོ ཝིཀྑམྦྷེཏི. ཏསྶ སུཁཱཔཊིཔདཱ ཧོཏཱིཏི.

ཏཐཱ སམྨོཧཝིནོདནཱི ཝིསུདྡྷིམགྒེསུཔཱིཏི. ཨེཏྠཙ པུབྦཝཱཀྱེ དུཀྑེན སསངྑཱརེན སཔྤཡོགེནཱཏི དིཊྛཏྟཱ པརཝཱཀྱེཔི སུཁེ ན ཨསངྑཱརེན ཨཔྤཡོགེནཱཏི དིཊྛམེཝ ཧོཏི. ཏཏྠ སསངྑཱརེན ¶ སཔྤཡོགེནཱཏི སངྑཱརཔྤཡོགསཧིཏེན ཀཱམཱདཱིནཝདསྶནཱདིནཱ པཙྩཡགཎེནཱཏི ཨཏྠོ. ཨེཏེན སབྦེསཾ དུཀྑཔྤཊིཔདཛ྄ཛྷཱནཱནཾ སསངྑཱརིཀབྷཱཝོ ཝུཏྟོ ཧོཏི. ཨསངྑཱརེན ཨཔྤཡོགེནཱཏི སངྑཱརཔྤཡོགརཧིཏེན ཏེནེཝ པཙྩཡགཎེན. ཨེཏེན སབྦེསཾ སུཁཔྤཊིཔདཛ྄ཛྷཱནཱནཾ ཨསངྑཱརིཀབྷཱཝོ ཝུཏྟོ ཧོཏཱིཏི. ཁིཔྤཱབྷིཉྙཛ྄ཛྷཱནཱནཾཔིཧི དུཀྑཔྤཊིཔདབྷཱཝེ སཏི སསངྑཱརིཀཏཱཝ ཝིཉྙཱཡཏི. དནྡྷབྷིཉྙཛ྄ཛྷཱནཱནཾཔི སུཁཔྤཊིཔདབྷཱཝེ སཏི ཨསངྑཱརིཀཏཱཝ ཝིཉྙཱཡཏཱིཏི. ཡདིཨེཝཾ པཊིཔདཱརཧིཏཱནཾ མགྒ སིདྡྷཨུཔཔཏྟིསིདྡྷཛ྄ཛྷཱནཱནཾ ཀཐཾ སངྑཱརབྷེདོ སིདྡྷོཏི. ཏེསཾཔི ཝལ༹ཉྫནཀཱལེ སམཱཔཏྟིཔྤཊིབནྡྷཀཱནཾ པཙྩཡཱནཾ སནྣིཧིཏཱ སནྣིཧིཏཝསེན དུཀྑསུཁཔྤཊིཔདབྷཱཝསམྦྷཝོ ཧོཏིཡེཝཱཏི. ཏཏྠ མགྒསིདྡྷཛ྄ཛྷཱནཾནཱམ སུདྡྷཝིཔསྶནཱཡཱནིཀཱནཾ མགྒཔྤཊིལཱབྷེན སཧེཝ སིདྡྷཛ྄ཛྷཱནཾ. ཏཾ དུཝིདྷཾ ཧེཊྛིམམགྒསིདྡྷཾ, ཨརཧཏྟམགྒསིདྡྷནྟི. ཏཏྠ མཧཱསམཡསུཏྟེ ཨཱགཏཱནཾ པཉྩསཏཱནཾ བྷིཀྑཱུནཾ ཛྷཱནཾ ཧེཊྛིམ མགྒསིདྡྷཾ. ཨཱནནྡཏྠེརསྶ ཛྷཱནཾ ཨརཧཏྟམགྒསིདྡྷཾ. ཡཾཔི ཨནཱགཱམཱིནཾ ཨཛཱནནྟཱནཉྙེཝ སཏྠེན ཧནིཏྭཱ སཧསཱ མརནྟཱནཾ ཨུཔྤནྣཾ. ཏཾཔི མགྒསིདྡྷགཏིཀཾ. ཡོཔན ཨཊྛསམཱཔཏྟིཡོ བྷཱཝེཏྭཱ ཨཉྙཏརསྨིཾ རཱུཔི བྲཧྨལོཀེ ནིབྦཏྟི. ཏསྶ ཏཱ སམཱཔཏྟི ཡོ ཏཏྠ པཱཀཏིཀཱཨེཝ ཧོནྟི. ཨིདཾ ཨུཔཔཏྟིསིདྡྷནྟི. ཨེཀསྨིཾ བྷཝེཔི ཧི ལདྡྷཛ྄ཛྷཱནཱནི ཝལ༹ཉྫནཀཱལེ སནྣིཧིཏཔཙྩཡཝསེན ནཱནཱཔཊིཔདཱཡུཏྟཱནི ཧོནྟཱིཏི. ཛྷཱནུཔྤཏྟིཔྤཊིཔདཱ རཧིཏཏྟཱཝཱ ཨསངྑཱརིཀཛ྄ཛྷཱནེསུ ཏེསཾ སངྒཧོ ཡུཏྟོ སིཡཱཏི. ཨཔིཙ, ནེཏྟིཔཱལི༹ཡཾ སབྦེསཾ ལོཀིཡ ལོཀུཏྟརསམཱདྷཱིནཾ སངྑཱརབྷེདོ སརཱུཔཏོཝ ནིདྡིཊྛོ. ཡཐཱཧ-དྭེ སམཱདྷཡོ སསངྑཱརོ སམཱདྷི ཨསངྑཱརོ སམཱདྷཱིཏི. ཨཊྛཀཐཱཡཉྩ སུཁཔྤཊིཔདཱ པུབྦཀཱནཾ དྭིནྣཾ དནྡྷཱབྷིཉྙཁིཔྤཱབྷིཉྙསམཱདྷཱིནཾ ཨསངྑཱརབྷཱཝོ དུཀྑཔྤཊིཔདཱ པུབྦཀཱནཾ དྭིནྣཾ སསངྑཱརབྷཱཝོཙ ཝུཏྟོཏི. ཨེཏྟཱཝཏཱ སབྦེསཾ མཧགྒཏལོཀུཏྟརཛ྄ཛྷཱནཙིཏྟཱནཾ ཨསངྑཱརིཀ སསངྑཱརིཀཝསེན ཝིསུཾ ཝིསུཾ དུཝིདྷབྷཱཝོ སིདྡྷོ ཧོཏི. ཡསྨཱཔན ཨཡཾ སངྑཱརཝོཧཱརོ ཨཀུསལཱནཾཔི སཱདྷཱརཎོ. པཊིཔདཱཝོཧཱརོཔན ¶ ཝིསེསེན པཊིཔཏྟིདྷམྨེསྭེཝ པཱཀཊོ. མཧགྒཏ ལོཀུཏྟརདྷམྨཱཙ ཨེཀནྟཾ པཊིཔཏྟིདྷམྨཱཨེཝ. ཏསྨཱ ཏེསཾ བྷེདཾ སངྑཱརཝསེན ཨཝཏྭཱ པཊིཔདཱཝསེནེཝ དྷམྨསངྒཎི པཱལི༹ཡཾཔི ཝུཏྟོཏི དཊྛབྦོ. ཨཡམེཏྠ པརམཏྠདཱིཔནཱ.

༥༡. [༤༧] ཡཾཔན ཝིབྷཱཝནིཡཾ

‘‘སབྦསྶཔི ཛྷཱནསྶ པརིཀམྨསངྑཱཏཔུབྦཱབྷིསངྑཱརེན ཝིནཱ ཀེཝལཾ ཨདྷིཀཱརཝསེན ཨནུཔྤཛྫནཏོ ཨསངྑཱརིཀནྟིཔི. ཨདྷིཀཱརེནཙ ཝིནཱ ཀེཝལཾ པརིཀམྨཱབྷིསངྐཱརཝསེནེཝ ཨནུཔྤཛྫནཏོ སསངྑཱརིཀནྟིཔི ནསཀྐཱ ཝཏྟུ’’ནྟི ཝུཏྟཾ. ཏཏྠ པརིཀམྨསངྑཱཏ.ལ. ཨསངྑཱརིཀནྟིཔི ནསཀྐཱ ཝཏྟུནྟི ཨིདཾ ཏཱཝ ནཡུཛྫཏི.

ན ཧི པརིཀམྨསངྑཱཏ པུབྦཱབྷིསངྑཱརོ ཨིམསྨིཾ སངྑཱརབྷེདེ སངྑཱརོ ཨེཝནཱམ ཧོཏི. ཀསྨཱ, ཛྷཱནུཔྤཏྟིཡཱ པཀཏིཔཙྩཡ བྷཱུཏཏྟཱ, ཏཐཱཧི ལོཀེ སཱསནེཙ སབྦཾཔི ཀུསལཱཀུསལ ཀམྨཾ ཨཏྟནོ ཨནུརཱུཔེན པརིཀམྨསངྑཱཏ པུབྦཱབྷིསངྑཱརེན ཝིནཱ ཨུཔྤནྣཾནཱམ ནཏྠི. ཨནྟམསོ ཨཱལོཔབྷིཀྑཱདཱནམཏྟཾཔཱིཏི. ཡཉྩ ཙིཏྟཾ ཡེན ཨཏྟནོ ཨནུརཱུཔེན པརིཀམྨསངྑཱཏཔུབྦཱ བྷིསངྑཱརེན ཝིནཱ ན ཨུཔྤཛྫཏི. སོ ཏསྶ ཙིཏྟསྶ པཀཏིཔཙྩཡགཎེཨེཝཨནྟོ གདྷོ ཧོཏི. ཛྷཱནཱནིཙ ལོཀིཡ ལོཀུཏྟར བྷཱུཏཱནི སབྦཱནི ཨཏྟནོ ཨནུརཱུཔེན པརིཀམྨསངྑཱཏ པུབྦབྷཱགབྷཱཝནཱ བྷིསངྑཱརེན ཝིནཱ ཨུཔྤནྣཱནིནཱམ ནཏྠཱིཏི སོ ཏེསཾ པཀཏིཔཙྩཡགཎེསུཨེཝ ཨནྟོགདྷོ ཧོཏཱིཏི. ཨིཏརཐཱ སབྦཾཔི ཀུསལཱཀུསལ ཀམྨཾ ཨསངྑཱརིཀཾ ནཱམནཏྠཱིཏི ཨཱཔཛྫཏཱིཏི.

[༤༨] ཡཉྩ ཏཏྠ

ཨདྷིཀཱརེནཙ ཝིནཱ ཀེཝལཾ.ལ. སསངྑཱརིཀནྟིཔི ནསཀྐཱ ཝཏྟུནྟི ཝུཏྟཾ. ཏཾཔི ན ཡུཛྫཏིཡེཝ.

ན ཧི ལོཀིཡཛ྄ཛྷཱནཱནིནཱམ ཨདྷིཀཱརེན ཝིནཱ ནུཔྤཛྫནྟཱིཏི ཨཏྠི. ཀེཝལཾཔན པུབྦེ སམཐཀམྨེསུ ཀཏཱདྷིཀཱརསྶ སུཁཔྤཊིཔདཛ྄ཛྷཱནཾ ཨུཔྤཛྫཏི. ཨཀཏཱདྷིཀཱརསྶཔན དུཀྑཔྤཊིཔདཛ྄ཛྷཱནནྟི ཨེཝམེཝ ཨཊྛཀཐཱསུ ¶ ཨཱགཏཾ. ཝུཏྟཉྷི ཏཏྠ ཡོཙ སམཐེ ཨཀཏཱདྷིཀཱརོ. ཏསྶ དུཀྑཱ པཊིཔདཱ ཧོཏི. ཀཏཱདྷིཀཱརསྶསུཁཱཏི. ཨཔིཙ, པུརིམབྷཝེ སིདྡྷཾ ཨདྷིཀཱརཾ གཧེཏྭཱ ཨིདྷ སངྑཱརབྷེདཝིཙཱརཎཱཔི ནཡུཏྟཱཨེཝ. ཀུསལཀྲིཡཛ྄ཛྷཱནེསུ ཧི སནྣི ཧིཏཔཙྩཡཝསེནེཝ ཏབྦིཙཱརཎཱ ཡུཏྟཱཏི.

[༤༩] ཨེཏྟཱཝཏཱ

ཨཐཝཱཏིཨཱདིཀོ པཙྪིམ ཝིཀཔྤོཔི པཊིཀྑིཏྟོ ཨེཝ ཧོཏཱིཏི.

༥༢. ཨེཏྠ ཛྷཱནཾ ཨནུཡུཉྫནྟསྶ ནིམིཏྟུཔྤཱདཏོ པུབྦཾ པཊིཔདཱཡ ཁེཏྟཾ, པཙྪཱ ཨབྷིཉྙཱཡ ཁེཏྟཾ. ཏཏྠ པུབྦེ ཝིརུདྡྷཔཙྩཡཱནཾ སནྣིཧིཏེན ཀིལམནྟསྶ སཏོ པཊིཔཛྫནྟསྶ བྷཱཝནཱ པཊིཔདཱ དུཀྑཱནཱམ ཧོཏི. ཨཀིལམནྟསྶ སུཁཱ. པཙྪཱཙ དནྡྷཾ ཨཔྤནཾ པཏྟསྶ བྷཱཝནཱབྷིཉྙཱ དནྡྷཱབྷིཉྙཱནཱམ ཧོཏི. ཁིཔྤཾ པཏྟསྶ ཁིཔྤཱབྷིཉྙཱནཱམ. ཏཏྠ པུབྦེ དུཀྑཱ པཊིཔདཱ པཙྪཱ དནྡྷཾཝཱ ཁིཔྤཾཝཱ ཨུཔྤནྣཾ ཛྷཱནཾ དུཀྑཔྤཊིཔདཾནཱམ ཀརོཏི. སུཁཱཔན སུཁཔྤཊིཔདཾནཱམ ཀརོཏཱིཏི. དུཏཱིཡཛ྄ཛྷཱནཱདཱིསུཔན པུརིམཛ྄ཛྷཱནེ ནིཀནྟི ཝིཀྑམྦྷནསྶ དུཀྑསུཁཏཱཝསེན པཊིཔདཱབྷེདོ ཝེདིཏབྦོ. ཡོཔན ཨེཏརཧི གཧཊྛོཝཱ པབྦཛིཏོཝཱ པུབྦབྷཝེ ཨཀཏཱདྷིཀཱརོཔི ཨནྟརཱཡིཀདྷམྨམུཏྟོ ཀལྱཱཎཔཊིཔཏྟིཡཾ ཋིཏོ ཚིནྣཔལིབོདྷོ པཧིཏཏྟོ ཛྷཱནཾ བྷཱཝེཏི. ཏསྶ ཛྷཱནབྷཱཝནཱ ནསམྤཛྫཏཱིཏི ནཏྠཱིཏི ནིཊྛམེཏྠ གནྟབྦནྟི. [ཀུསལཛ྄ཛྷཱནཾ]

༥༣. ཝིཔཱཀཛ྄ཛྷཱནེ ཀཱམཀུསལཾ ཨཔྤནཾ ཨཔཏྟཾ མུདུབྷཱུཏཾ དུབྦལཾ ཧོཏི. པརིཏྟེསུ ནཱནཱཀིཙྩཊྛཱནེསུཙ ཧཱིནེསུཔི ཨཏྟབྷཱཝེསུཙ ཝིཔཙྩཏི. ཏསྨཱ ཏཾ ཨཏྟནཱ ཨསདིསཾཔི ཝིཔཱཀཾ ཛནེཏི. མཧགྒཏཀུསལཾཔན ཨཔྤནཱཔཏྟཾ ཏིཀྑཾ བལཝཾ ཧོཏི. ཨུལཱ༹རེ བྲཧྨཏྟབྷཱཝེ བྷཝངྒཊྛཱནེསུཡེཝ ཝིཔཙྩཏི. ཏསྨཱ ཏཾ སདཱཔི ཨཏྟནཱ སདིསམེཝ ཝིཔཱཀཾ ཛནེཏི. ཏེནེཝ ཝིཏཀྐཝིཙཱརཔཱིཏི སུཁེཀགྒཏཱ སཧིཏནྟིཨཱདིནཱ ཝིཔཱཀཾཔི སབྦསོ ཀུསལ སདིསམེཝ དསྶེཏི.

[༥༠] ཨནནྟརབྷཝེཡེཝ ¶ ཕལདཱནཏྟཱ ཏཾ ཨཏྟནཱ སདིསམེཝ ཝིཔཱཀཾ ཛནེཏཱིཏིཙ ཝདནྟི, ཏཾ ན སུནྡརཾ.

ཨེཝཉྷི སཏི ཀཱམཀུསལཾཔི སཏྟམཛཝནཾ ཨཏྟནཱ སདིསཝིཔཱཀ མེཝ ཛནེཡྻཱཏི. ཡསྨཱཙ ཀུསལམེཝ ནིརནུསཡསནྟཱནེ པཝཏྟཾ ཀྲིཡཛ྄ཛྷཱནཾ ནཱམ ཧོཏི. ཏསྨཱ ཀྲིཡཙིཏྟཾཔི ཀུསལ སདིསམེཝ དསྶེཏི.

༥༤. པཉྩདྷཱཏིཨཱདིསངྒཧགཱཐཱ. ཏཏྠ ཛྷཱནབྷེདེནཱཏི པཐམཛ྄ཛྷཱནཱདཱིཧི པཉྩཧི ཛྷཱནེཧི སམྤཡོགབྷེདེན. རཱུཔཱཝཙརམཱནསཾ ཛྷཱནབྷེདེན པཉྩདྷཱ ཧོཏི. པཐམཛ྄ཛྷཱནིཀཾ, དུཏཱིཡཛ྄ཛྷཱནིཀཾ, ཏཏཱིཡཛ྄ཛྷཱནིཀཾ, ཙཏུཏྠཛ྄ཛྷཱནིཀཾ, པཉྩམཛ྄ཛྷཱནིཀནྟི ཨེཝཾ པཉྩཝིདྷཾ ཧོཏཱིཏི ཨཏྠོ. ཏམེཝ པུཉྙཔཱཀཀྲིཡཱབྷེདེན པཉྩདསདྷཱ བྷཝེཏི ཡོཛནཱ.

[༥༡] ཝིབྷཱཝནིཡཾ པན

ཛྷཱནབྷེདེནཱཏི ཛྷཱནངྒེཧི སམྤཡོགབྷེདེནཱཏི ཝུཏྟཾ. ཏཾ ན སུནྡརཾ.

ཨཉྙོ ཧི ཛྷཱནབྷེདོ. ཨཉྙོ ཛྷཱནངྒབྷེདོ. ཏཏྠ པཐམཾ ཛྷཱནཾ དུཏཱིཡཾ ཛྷཱནནྟིཨཱདིཛྷཱནབྷེདོ. པཐམཛ྄ཛྷཱནེ པཉྩ ཨངྒཱནི. དུཏཱིཡཛ྄ཛྷཱནེ ཙཏྟཱརཱིཏིཨཱདི ཛྷཱནངྒབྷེདོ. ཏེསུ ཨིདྷ ཛྷཱནབྷེདོཝ ཨདྷིཔྤེཏོ. ན ཛྷཱནངྒབྷེདོ. ཙིཏྟཉྷི ཛྷཱནབྷེདེ ནེཝ པཉྩཝིདྷཾ ཧོཏི. ནཛྷཱནངྒབྷེདེན. ཛྷཱནམེཝ པན ཛྷཱནངྒབྷེདེན པཉྩཝིདྷནྟི.

[༥༢] ཡཉྩ ཏཏྠ

‘‘པཉྩདྷཱཏི པཉྩངྒིཀཾ ཙཏུརངྒིཀཾ ཏིཝངྒིཀཾ དུཝངྒིཀཾ པུན དུཝངྒིཀནྟི པཉྩཝིདྷཾ ཧོཏཱི’’ཏི ཝུཏྟཾ. ཏཾཔི ན སུནྡརཾ.

ཛྷཱནམེཝ ཧི པཉྩངྒིཀཱདི ཧོཏི. ན ཙིཏྟནྟི.

རཱུཔཱཝཙར ཙིཏྟསྶ པརམཏྠདྷཱིཔནཱ.

༥༥. ཨིདཱནི ཡཐཱནུཔྤཏྟཾ ཨརཱུཔཙིཏྟཾ ནིདྡིསནྟོ ཨཱཀཱསཱནཉྩཱ ཡཏནཀུསལཙིཏྟནྟིཨཱདི མཱཧ. ཏཏྠ བྷུསོ ཀཱསཏི དིབྦཏཱིཏི ¶ ཨཱཀཱསོ. སོ ཧི སཡཾ སརཱུཔཏོ ཨནུཔལབྦྷམཱནོཔི ཙནྡསཱུརིཡོབྷཱསཱདཱིནཾ ཝསེན ཨཏིཝིཛྫོཏམཱནོཝིཡ ཁཱཡཏཱིཏི. ནཀསྶཏི ཚེདན བྷེདན ཝསེན ན ཝིལེཁཱིཡཏཱིཏི ཨཀཱསོ. ཨཀཱསོཨེཝ ཨཱཀཱསོ ཏིཔི ཝདནྟི. སོ པན ཨཛཊཱཀཱསོ པརིཙྪིནྣཱཀཱསོ ཀསིཎུགྒྷཱཊིམཱཀཱསོ རཱུཔཀལཱཔཔརིཙྪེདཱཀཱསོཏི ཙཏུབྦིདྷོ ཧོཏི. ཏཏྠ ཨིདྷ ཀསིཎུགྒྷཱཊིམཱཀཱསོ ཨདྷིཔྤེཏོ. སོ ཧི ཨནནྟེན ཨཛཊཱཀཱསེན སཧ ཨེཀཱིབྷཱུཏོཝིཡ ཧོཏི. ཡོགིནཱཙ ཨནནྟབྷཱཝེན ཕརཱིཡཏི. ཏསྨཱ ཨནནྟོ ཨཱཀཱསོཏི ཨཱཀཱསཱནནྟོ. ནཱསྶ ཨུཔྤཱདནྟོཝཱ ཝཡནྟོཝཱ པཉྙཱཡཏཱིཏི ཨནནྟོཏིཔི ཝུཏྟཾ. སོཡེཝ ཨཱཀཱསཱནཉྩཾ. སཀཏྠེ ཡཀཱརེན སཧ སིདྡྷཏྟཱ. ཡཐཱ པན དེཝཱནཾ ཨདྷིཊྛཱནཝཏྠུ དེཝཱཡཏནནྟི ཝུཙྩཏི. ཏཐཱ ཨིདྷཔི ཏསྨིཾ ཨཔྤནཱཔཏྟསྶ སསམྤཡུཏྟསྶ ཛྷཱནསྶ ཨདྷིཊྛཱནཊྛེན ཏདེཝ ཨཱཡཏནནྟིཔི ཝུཙྩཏི. ཨིཏི ཨཱཀཱསཱནཉྩཾ ཨཱཡཏནམསྶཱཏི ཨཱཀཱསཱནཉྩཱཡཏནཾ. ཙིཏྟཙེཏསིཀརཱསི.

ཨཱཀཱསཱནཉྩཱ ཡཏནནྟི ཨཱཀཱསཱནཉྩཱ ཡཏནཾ སམཱཔནྣསྶཝཱ ཨུཔཔནྣསྶཝཱ དིཊྛདྷམྨསུཁཝིཧཱརིསྶཝཱ ཙིཏྟ ཙེཏ སིཀཱདྷམྨཱཏི ཧི ཝིབྷངྒེ ཝུཏྟཾ.

ཨཱཀཱསཱནཉྩཱཡཏནེ པཝཏྟཾ ཀུསལཙིཏྟནྟི ཨཱཀཱསཱནཉྩཱཡཏནཀུསལཙིཏྟཾ. ཝིཉྙཱཎཉྩཱཡཏནནྟི ཨེཏྠ ཝིཉྙཱཎཾནཱམ ཨཱཀཱསཱནཉྩཱཡཏནཙིཏྟམེཝ. ཏཾཔན སཡཾ ཨུཔྤཱདཱདི ཨནྟཝནྟཾཔི ཨནནྟསཉྙིཏེ ཨཱཀཱསེ པཝཏྟནཏོ ཨནནྟནྟི ཝུཙྩཏི. ཀོཊྛཱསཏྠོཝཱ ཨནྟསདྡོ. ཨཏྟནོ ཨུཔྤཱདཱདཱིསུ ཀོཊྛཱསེསུ ཨེཀདེསེ ཨཊྛཏྭཱ སཀལསྶ ཕརཎཝསེན ཏདཱརམྨཎཱཡ བྷཱཝནཱཡ པཝཏྟནཏོ ཨནནྟནྟི ཝུཙྩཏི. ཨནནྟསཉྙིཏེཝཱ ཨཱཀཱསེ པཝཏྟནཏོ ཨནནྟནྟི ཨེཝཾ ཏདཱརམྨཎཱཡ བྷཱཝནཱཡ པཝཏྟཏྟཱ ཨནནྟནྟི ཝུཙྩཏི. ཨནནྟསཉྙིཏེཝཱ ཨཱཀཱསེ ཨཏྟནོ ཕརཎཱཀཱར ཝསེནཔི ཨནནྟནྟི ཝཏྟུཾ ཡུཛྫཏིཡེཝ. ཨནནྟཾ ཝིཉྙཱཎནྟི ¶ ཝིཉྙཱཎཱནནྟཾ. ཏམེཝ ཝིཉྙཱཎཉྩཾ ནིརུཏྟིནཡེན, ཝིཉྙཱཎཉྩཾ ཨཱཡཏནཾ ཨསྶཱཏི ཝིཉྙཱཎཉྩཱཡཏནཾ. ཝིཉྙཱཎཉྩཱཡཏན སངྑཱཏེ ཙིཏྟཙེཏསིཀརཱསིམྷི པཝཏྟཾ ཀུསལཙིཏྟནྟིསམཱསོ.

ཝིཉྙཱཎཉྩཱཡཏནནྟི ཝིཉྙཱཎཉྩཱཡཏནཾ སམཱཔནྣསྶཝཱ ཨུཔཔནྣསྶཝཱདིཊྛདྷམྨསུཁཝིཧཱརིསྶཝཱཙིཏྟཙེཏསིཀཱདྷམྨཱཏིཧི ཝིབྷངྒེ ཝུཏྟཾ.

[༥༣] ཝིབྷཱཝནིཡཾ པན མཧཱཊཱིཀཱཡཉྩ

‘‘དུཏཱིཡཱ རུཔྤ ཝིཉྙཱཎེན ཨཉྩིཏབྦཾ པཱཔུཎིཏབྦནྟི ཝིཉྙཱཎཉྩ’’ནྟིཔི ཝུཏྟཾ. ཏཾ པཱལི༹ཡཱ ན སམེཏི.

ཨནནྟཾ ཝིཉྙཱཎནྟི ཏདེཝ ཝིཉྙཱཎཾ ཉཱཎེན ཕུཊྛཾ མནསིཀརོཏི, ཨནནྟཾ ཕརཏི. ཏེན ཝུཙྩཏི ཨནནྟཾ ཝིཉྙཱཎནྟཱིཏིཧི ཝུཏྟཾ. ཨེཏེན ཙ ཏཾཝིཉྙཱཎཾ ཨེཀནྟེན ཨནནྟཝིསེསནཡུཏྟཾ ཧོཏཱིཏི ཝིཉྙཱཡཏཱིཏི. ཏམེཝ ཨཱཀཱསནྟིཔི པཱཋོ. ཨཱཀིཉྩཉྙཱཡཏནནྟི ཨེཏྠ ཀིཉྩི ཀིཉྩནནྟི ཨཏྠཏོ ཨེཀཾ ཨཔྤམཏྟཀསྶ ནཱམཾ. ནཏྠི ཀིཉྩནཾ ཨཔྤམཏྟཀཾ ཨནྟམསོ བྷངྒམཏྟཾཔི ཨཝསིཊྛཾ ཨསྶ པཐམཱ རུཔྤཝིཉྙཱཎསྶཱཏི ཨཀིཉྩནཾ. ཨཀིཉྩནསྶ བྷཱཝོ ཨཱཀིཉྩཉྙཾ. པཐམཱརུཔྤཝིཉྙཱཎཱབྷཱཝོ. སོ ཧི ནཏྠི ཀིཉྩཱིཏི མནསིཀཱར ཝསེན ཏཾནཱམཾ ལབྷཏཱིཏི. ཨཱཀིཉྩཉྙཾ ཨཱཡཏནམསྶཱཏིཨཱདི ཝུཏྟནཡམེཝ. ནེཝསཉྙཱ ནཱསཉྙཱཡཏནནྟི ཨེཏྠ ཨོལཱ༹རིཀ སཉྙཾ སནྡྷཱཡ ནེཝཏྠི སཉྙཱ ཨསྶཱཏི ནེཝསཉྙཾ. སུཁུམསཉྙཾ སནྡྷཱཡ ནཙ ནཏྠི སཉྙཱ ཨསྶཱཏི ནཱསཉྙཾ, ནེཝསཉྙཉྩ ཏཾ ནཱསཉྙཉྩཱཏི ནེཝསཉྙཱ ནཱསཉྙཾ མཛ྄ཛྷེ དཱིགྷཾ ཀཏྭཱ, ཙིཏྟ ཙེཏསིཀརཱསིཨེཝ. ཏམེཝ ཡོགིནོ སུཁཝིསེསཱནཾ ཨདྷིཊྛཱནཊྛེན ཨཱཡཏནནྟི ནེཝསཉྙཱ ནཱསཉྙཱཡཏནཾ. ཏསྨིཾ པཝཏྟཾ ཀུསལ ཙིཏྟནྟི སམཱསོ. ཨཐཝཱ. སཉྙཱཡེཝ པཊུསཉྙཱཀིཙྩསྶ ཨབྷཱཝཏོ ནེཝསཉྙཱཙ ཧོཏི. སངྑཱརཱཝསེས སུཁུམབྷཱཝེན ཝིཛྫམཱནཏྟཱ ཨསཉྙཱཙ ནཧོཏཱིཏི ཀཏྭཱ ནེཝསཉྙཱནཱ སཉྙཱནཱམ, སཱཡེཝ ཨཱཡཏནཾ, ཏེནཙ སམྤཡུཏྟཾ ཀུསལ ཙིཏྟནྟི སམཱསོ. ཨེཏྠཙ ཡསྨཱ ཨཱདིཏོ པཊྛཱཡ ཨོལཱ༹རིཀེ ནཱིཝརཎདྷམྨེ ¶ ཝིཏཀྐཱདིཀེཙ པཛཧིཏྭཱ སེསདྷམྨེཙ བྷཱཝནཱ བལེན ཨུཔརུཔརི སུཁུམབྷཱཝཾ པཱཔེཏྭཱ ཨནུཀྐམེན པཊིཔཛྫནྟཱ སུཁུམཊྛེན ལོཀིཡདྷམྨེསུ མུདྡྷབྷཱུཏཾ ཨིམཾ སམཱཔཏྟིཾ པཱཔུཎནྟི. ཏསྨཱ ཨིདྷ ཙིཏྟཾཔི ནེཝཙིཏྟནཱཙིཏྟམེཝ ཧོཏི. ཕསྶོཔི ནེཝ ཕསྶནཱཕསྶོཨེཝ ཧོཏི, ཏཐཱ ཝེདནཱདཡོཔཱིཏི. ཏསྨཱ ཨིདྷསཉྙཱགྒཧཎཾ དེསནཱསཱིསམཏྟནྟི དཊྛབྦཾ. ཝིཔཱཀེསུ ཝིཉྙཱཎཉྩཱཡཏནནྟི ཨེཏྠ ཝིཉྙཱཎནྟི པཐམཱརུཔྤཀུསལ ཝིཉྙཱཎམེཝ. ཏཉྩ ཨཏཱིཏཱནནྟརབྷཝེ པཝཏྟཾ དཊྛབྦཾ. ཨཀིཉྩན བྷཱཝོཙ ཏསྶེཝ ནཏྠི བྷཱཝོཏི. ཀྲིཡཙིཏྟེསུ པན ཝིཉྙཱཎཾ ནཱམ ཀུསལབྷཱུཏཾ ཀྲིཡབྷཱུཏཉྩ དུཝིདྷཾ པཐམཱརུཔྤཝིཉྙཱཎཾ ཝེདིཏབྦཾ. ཨཀིཉྩནབྷཱཝོཙ ཏསྶེཝ དུཝིདྷསྶ ཝིཉྙཱཎསྶ ཨབྷཱཝོ ཡེཝཱཏི.

༥༦. སངྒཧགཱཐཱཡཾ ཨཱརམྨཎཔྤབྷེདེནཱཏི ཨཱལམྦི ཏབྦཱནཾ ཀསིཎུགྒྷཱཊིམཱཀཱསཱདཱིནཾ ཙཏུནྣཾ ཨཱརམྨཎཱནཾ པབྷེདེན. དུཝིདྷཾཧི ཨིདྷ ཨཱརམྨཎཙཏུཀྐཾ, ཨཏིམིཀྐཏབྦ ཙཏུཀྐཾ, ཨཱལམྦི ཏབྦ ཙཏུཀྐཉྩ. ཏཏྠ པཐམཱརུཔྤེ རཱུཔཔཉྩམཛ྄ཛྷཱནསྶ ཨཱརམྨཎ བྷཱུཏཾ. ཀསིཎནིམིཏྟཾ ཨཏིཀྐམི ཏབྦཾནཱམ. ཏཾ ཨུགྒྷཱཊེཏྭཱ ལདྡྷཾ ཨཱཀཱསཾ ཨཱལམྦིཏབྦཾ ནཱམ. དུཏཱིཡཱརུཔྤེ པཐམཱརུཔྤསྶ ཨཱརམྨཎབྷཱུཏཾ ཨཱཀཱསཾ ཨཏིཀྐམིཏབྦཾནཱམ. པཐམཱརུཔྤཝིཉྙཱཎཾ ཨཱལམྦི ཏབྦཾནཱམ. ཏཏཱིཡཱརུཔྤེ ཏཾཔཐམཱརུཔྤཝིཉྙཱཎཾ ཨཏིཀྐམིཏབྦཾནཱམ. ཏསྶ ནཏྠིབྷཱཝོ ཨཱལམྦིཏབྦཾནཱམ. ཙཏུཏྠཱརུཔྤེ སོ ནཏྠི བྷཱཝོ ཨཏིཀྐམིཏབྦཾ ནཱམ. ཏཏཱིཡཱརུཔྤཝིཉྙཱཎཾ ཨཱལམྦི ཏབྦཾ ནཱམཱཏི. ཏཏྠ ཀིཉྩཱཔི ཨིམཾ ཨཱརུཔྤམཱནསཾ ཙཏུནྣཾ ཨཏིཀྐམི ཏབྦཱནཾཔི བྷེདེན ཙཏུབྦིདྷཾ ཧོཏི, ཏཐཱཔི ཨཱཀཱསཱནཉྩཱཡ ཏནནྟིཨཱདིནཱ ཨིདྷ ཨཱལམྦིཏབྦཱནཉྙེཝ སརཱུཔཏོ གཧིཏཏྟཱ ཏེསཾ བྷེདེན ཨིམསྶ བྷེདོ པཱཀཊོཏི དཊྛབྦཾ. ཨཱརུཔྤམཱནསཾ ཨཱལམྦཎཔྤབྷེདེན ཙཏུདྷཱ ཋིཏཾ. ཏདེཝ པུཉྙཔཱཀ ཀྲིཡབྷེདེན དྭཱདསདྷཱ ཋིཏནྟི ཡོཛནཱ.

ཨརཱུཔཙིཏྟསྶ པརམཏྠདཱིཔནཱ.

༥༧. ཨིདཱནི ¶ ཡཐཱནུཔྤཏྟཾ ལོཀུཏྟར ཙིཏྟཾ དསྶེནྟོ སོཏཱཔཏྟིམགྒཙིཏྟནྟིཨཱདིམཱཧ. ཏཏྠ སཝཏི སནྡཏི ཨནིཝཏྟགམནཝསེན པཝཏྟཏཱིཏི སོཏོ, གངྒཱདཱིསུ ཛལཔྤཝཱཧོ. སོཧི པབྷཝཏོ པཊྛཱཡ ཡཱཝམཧཱསམུདྡཱ ཨནྟརཱ ཨནིཝཏྟ མཱནོ སཝཏི སནྡཏི པཝཏྟཏཱིཏི. སོཏོཝིཡཱཏི སོཏོ. ཨཊྛངྒིཀོ ཨརིཡམགྒོ, ཡཐཱཧ-ཡོཁོ ཨཱཝུསོ ཨརིཡོ ཨཊྛངྒིཀོ མགྒོ. སེཡྻཐིདཾ, སམྨཱདིཊྛི. ལ. སམྨཱསམཱདྷི. ཨཡཾ ཝུཙྩཏཱཝུསོ སོཏོཏི. ཨཡཾཔིཧི ཡདཱ ཨུཔྤཛྫཏི. ཏཏོ པཊྛཱཡ ཨཱནུབྷཱཝཕརཎཝསེན ཡཱཝཨནུཔཱདིསེསནིབྦཱནདྷཱཏུཡཱ ཨནྟརཱ ཨནིཝཏྟམཱནོཡེཝ ཧུཏྭཱ སཝཏི སནྡཏི པཝཏྟཏཱིཏི. ཡཐཱཧ -

སེཡྻཐཱཔི བྷིཀྑཝེ ཡཱཀཱཙི མཧཱནདིཡོ. སེཡྻཐིདཾ. གངྒཱ, ཡམུནཱ, ཨཙིརཝཏཱི, སརབྷཱུ, མཧཱི. སབྦཱ ཏཱ སམུདྡནིནྣཱ ཧོནྟི སམུདྡཔོཎཱ སམུདྡཔབྦྷཱརཱ. ཨེཝམེཝ ཁོ བྷིཀྑཝེ བྷིཀྑུ ཨརིཡཾ ཨཊྛངྒིཀཾ མགྒཾ བྷཱཝེནྟོ བཧུལིཀརོནྟོ ནིབྦཱནནིནྣོ ཧོཏི ནིབྦཱནཔོཎོ ནིབྦཱན པབྦྷཱརོཏི.

ཨེཏྠཙ ཏེན ཏེན མགྒེན པཧཱིནཱནཾ ཀིལེསཱནཾ པུན ཨནུཔགམན ཝསེན སདྡྷཱདཱིནཾ ཨིནྡྲིཡཱནཾ ཨནུཀྐམེན པརིཔཱཀགམནཝསེནཙ ཨནིཝཏྟགམནཾ དཊྛབྦཾ. ཡཐཱཧ -

སེཡྻཐཱཔི བྷིཀྑཝེ གྷཊོ ནིཀྐུཛྫོ ཝམཏེཝ ཨུདཀཾ. ནོཔཙྩཱཝམཏི. ཨེཝམེཝཁོ བྷིཀྑཝེ ཨརིཡཾ ཨཊྛངྒིཀཾ མགྒཾ བྷཱཝེནྟོ བཧུལིཀརོནྟོ ཝམཏེཝ པཱཔཀེ ཨཀུསལེ དྷམྨེ. ནོཔཙྩཱཝམཏཱིཏི. ཡཐཱཙཱཧ-སོཏཱཔཏྟི མགྒཉྙཱཎེན ཡེ ཀིལེསཱ པཧཱིནཱ, ཏེ ཀིལེསེ ནཔུནེཏི ནཔཙྩེཏི ནཔཙྩཱགཙྪཏཱིཏིཨཱདི.

ཡཐཱཙ པུཐུཛྫནཱ པཧཱིནེཔི ཀིལེསེ པུན ཨུཔགཙྪནྟི. ཏིཧེ ཏུཀབྷཱུཏཱཔི པུན དྭིཧེཏུཀཱཧེཏུཀབྷཱཝཾ གཙྪནྟི. ཡཏོ ཏེ ཨུཔརིབྷཝགྒེ ¶ ནིབྦཏྟཱཔི པུན ཨཔཱཡེསུ སནྡིསྶནྟི. སཱིལཝནྟཱཔི པུན དུསྶཱིལཱ ཧོནྟི. སམཱཧིཏཱཔི པུན ཨུམྨཏྟཀཱཝཱ ཁིཏྟཙིཏྟཱཝཱ ཧོནྟི. པཉྙཝཱཔི པུན དུཔྤཉྙཱ ཨེལ༹མཱུགཱ ཧོནྟི. ནཏཐཱ ཨརིཡཱ. ཏེཔན ཏེན ཏེན མགྒེན པཧཱིནེ ཀིལེསེ པུན ནཨུཔགཙྪནྟི. པུཐུཛྫནབྷཱཝཾཝཱ ཧེཊྛིམཱརིཡ བྷཱཝཾཝཱ ན གཙྪནྟི. ཨནུཀྐམེན སདྡྷཱདཱིནཾ ཨིནྡྲིཡཱནཾ པརིཔཀྐབྷཱཝམེཝ ཨུཔགཙྪནྟཱིཏི. སབྦཉྩེཏཾ ཨརིཡམགྒསྶེཝ ཨཱནུབྷཱཝེན སིདྡྷནྟི སོཏོཏིནཱམཾ མཱུལཔྤབྷཝབྷཱུཏེ ཏསྨིཾ མགྒེཨེཝ ནིརུལ༹ྷནྟི དཊྛབྦཾ. ཏསྶ སོཏསྶ ཨཱདིཏོ པཛྫནཾ པཱཔུཎནཾ སོཏཱཔཏྟི. སོཏཱཔཏྟིཡཱ ཨདྷིགམམཱནོ མགྒོ སོཏཱཔཏྟིམགྒོ. ཨཐཝཱ, དྷམྨསོཏ སམཱཔནྣོ ཨརིཡོཏི པཝུཙྩཏཱིཏི ཝུཏྟཏྟཱ སབྦེ ཨརིཡསནྟཱནགཏཱ ལོཀིཡ ལོཀུཏྟརབྷཱུཏཱ བོདྷིཔཀྑིཡདྷམྨཱ ཨུཔརི སམྦོདྷིཔརཱ ཡནཏཱཝསེན ཨནུཔཱདིསེསནིབྦཱན པརཱཡནཏཱཝསེནཙ ཨནིཝཏྟ གཏིཡཱ པཝཏྟམཱནཱ ཡཐཱཝུཏྟེན ཨཏྠེན སོཏོཏི ཝུཙྩནྟི. ཏཾ སོཏཾ ཨཱདིཏོ པཛྫནྟི པཱཔུཎནྟི ཨེཏཱཡ པཊིཔདཱཡཱཏི སོཏཱཔཏྟི. སོཏཱཔཏྟིཙ སཱ མགྒོཙཱཏི སོཏཱཔཏྟིམགྒོ, པཐམམགྒསངྑཱཏཱཡ སོཏཱཔཏྟིཡཱ ཨངྒནྟི སོཏཱཔཏྟི ཡངྒནྟིཧི ཨཊྛཀཐཱཡཾ ཝུཏྟཾ, མགྒོཏིཙ པཐོ ཨུཔཱཡོ. ནིབྦཱནཾ མགྒེཏི, ནིབྦཱནཏྠིཀེཧི མགྒཱིཡཏི, ཀིལེསེ མཱརེནྟོ གཙྪཏཱིཏི མགྒོཏིཙ ཝདནྟི.

[༥༤] ཝིབྷཱཝནིཡཾ པན

ཨརིཡམགྒསོཏསྶ ཨཱདིཏོ པཛྫནཾ ཨེཏསྶཱཏི སོཏཱཔཏྟི. པུགྒལོཏི ཝུཏྟཾ. ཏཾ ན སུནྡརཾ.

ན ཧི པུགྒལེ པཝཏྟོ སོཏཱཔཏྟིསདྡོ ཀཏྠཙི དིཊྛོཏི.

[༥༥] ཨེཏེན ཏསྶ མགྒོ སོཏཱཔཏྟིམགྒོཏི ཨིདཾཔི པཊིཀྑིཏྟཾ ཧོཏི.

སོཏཱཔཏྟིམགྒེན སམྤཡུཏྟཾ ཙིཏྟཾ སོཏཱཔཏྟིམགྒཙིཏྟཾ.

[༥༦] ཊཱིཀཱསུ པན

སོཏཱཔཏྟིཡཱ ¶ ལདྡྷཾ མགྒཙིཏྟཾ སོཏཱཔཏྟི མགྒཙིཏྟནྟི ཝུཏྟཾ. ཏཾ ན སུནྡརཾ.

ན ཧི ཙིཏྟསདྡསམྦནྡྷོ སོཏཱཔཏྟིསདྡོ ཀཏྠཙི པཱལི༹ཡཾ དིཊྛོཏི.

༥༨. པཊིསནྡྷིཝསེན སཀིཾ ཨིམཾལོཀཾ ཨཱགཙྪཏི སཱིལེནཱཏི སཀདཱགཱམཱི. དུཏཱིཡཕལཊྛོ. སོ ཧི ཨསམུཙྪིནྣཀཱམ རཱགཱནུསཡཏྟཱ ཀཱམལོཀཱགམན ཀིལེསསབྦྷཱཝེན ཏཾ སབྷཱཝཱནཱཏི ཝཏྟནཏོ ཨུཔརི བྷཝགྒེ ཋིཏོཔི པཊིསནྡྷིཝསེན པུན ཨིམཾ ཀཱམདྷཱཏུཾ ཨཱགམནཔྤཀཏིཀོཨེཝ ཧོཏཱིཏི. ཝུཏྟཉྷེཏཾ ཙཏུཀྐནིཔཱཏེ -

ཨིདྷ སཱརིཔུཏྟ ཨེཀཙྩསྶ པུགྒལསྶ ཨོརམྦྷཱགིཡཱནི སཾཡོཛནཱནི ཨཔྤཧཱིནཱནི ཧོནྟི, སོ དིཊྛེཝདྷམྨེ ནེཝསཉྙཱནཱསཉྙཱཡཏནཾ ཨུཔསམྤཛྫ ཝིཧརཏི. སོ ཨཔརིཧཱིནོ ཀཱལཾ ཀུརུམཱནོ ནེསཉྙཱནཱསཉྙཱ ཡཏནུཔགཱནཾ དེཝཱནཾ སཧབྱཏཾ ཨུཔཔཛྫཏི. སོ ཏཏོ ཙུཏོ ཨཱགཱམཱི ཧོཏི ཨཱགནྟྭཱ ཨིཏྠཏྟཾ. ཨིདྷ པན སཱརིཔུཏྟ ཨེཀཙྩསྶ པུགྒལསྶ ཨོརམྦྷཱགིཡཱནི སཾཡོཛནཱནི པཧཱིནཱནི ཧོནྟི, སོ དིཊྛེཝ.ལ. སོ ཏཏོ ཙུཏོ ཨནཱགཱམཱི ཧོཏི ཨནཱགནྟྭཱ ཨིཏྠཏྟནྟི.

ཨཊྛཀཐཱཡཉྩ ཨིཏྠཏྟནྟི ཨིམཾ ཀཱམཱཝཙར པཉྩཀྑནྡྷ བྷཱཝནྟི ཝུཏྟཾ. ཨཡཉྩ ཨཏྠོ ཀིལེསགཏིཝསེན ཝུཏྟོ. ན པུགྒལ གཏིཝསེན. ན ཧི བྲཧྨབྷཱུཏཱ སོཏཱཔནྣ སཀདཱ གཱམིནོ པཊིཔཊིསནྡྷིཝསེན ཧེཊྛིམཾཔི བྲཧྨལོཀཾ ཨཱགཙྪནྟི. ཀུཏོ ཀཱམ ལོཀཾ. ཀཐཾ ཝིཉྙཱཡཏཱིཏི ཙེ. ཨནུསཡཡམཀེ –

ཀཱམདྷཱཏུཡཱ ཙུཏསྶ རཱུཔདྷཱཏུཾ ཨརཱུཔདྷཱཏུཾ ཨུཔཔཛྫནྟསྶ ཀསྶཙི སཏྟཨནུསཡཱ ཨནུསེནྟི, ཀསྶཙི པཉྩཨནུསཡཱ ཨནུསེནྟི, ཀསྶཙི ཏཡོ ཨནུསཡཱ ཨནུསེནྟཱིཏི ཝཏྭཱ ¶ རཱུཔ དྷཱཏུཡཱ ཨརཱུཔདྷཱཏུཡཱ ཙུཏསྶ ཀཱམདྷཱཏུཾ ཨུཔཔཛྫནྟསྶ སཏྟེཝ ཨནུསཡཱ ཨནུསེནྟཱིཏི.

ཝུཏྟཏྟཱ ཝིཉྙཱཡཏི. ཏཏྠ པུརིམཝཱཀྱེ པུཐུཛྫནསྶ ཝསེན སཏྟ. དྭིནྣཾ སོཏཱཔནྣསཀདཱགཱམཱིནཾ ཝསེན པཉྩ. ཨནཱགཱམིསྶ ཝསེན ཀཡོཏི ཝུཏྟཾ, པཙྪིམཝཱཀྱེཔན བྲཧྨབྷཱུཏཱནཾ སོཏཱ པནྣསཀདཱགཱམིཨནཱགཱམཱིནཾ པཊིསནྡྷིཝསེན ཀཱམལོཀཾ གམནསྶ ནཏྠིཏཱཡ ཀེཝལཾ པུཐུཛྫནསྶེཝ ཝསེན སཏྟེཝཱཏི ཝུཏྟཾ. དྷམྨཧདཡ ཝིབྷངྒཊྛཀཐཱཡཉྩ –

‘‘རཱུཔཱཝཙརེ ནིབྦཏྟཱ སོཏཱཔནྣསཀདཱགཱམིནོ ནཔུན ཨིདྷཱ གཙྪནྟི, ཏཏྠེཝ པརིནིབྦཱཡནྟི. ཨེཏེཧི ཛྷཱནཨནཱགཱམིནོ ནཱམཱ’’ཏི ཙ. ‘‘ནཝསུ བྲཧྨལོཀེསུ ནིབྦཏྟཨརིཡ སཱཝཀཱནཾ ཏཏྲུཔ པཏྟིཔི ཧོཏི ཨུཔརཱུཔཔཏྟིཔི. ནཧེཊྛུ པཔཏྟི. པུཐུཛྫནཱནཾཔན ཏཏྲུཔཔཏྟིཔི ཧོཏི ཨུཔརཱུཔཔཏྟི ཧེཊྛུཔཔཏྟིཔཱི’’ཏི ཙ.

ཝུཏྟཾ. ཏཉྩཁོ ཨནཱགམནཾ མགྒསཧཱཡེན ཛྷཱནཱནུབྷཱཝེནེཝ སིདྡྷཾ. ནམགྒཱནུབྷཱཝེནཱཏི. ཨེཏྠཙ ཨིམཾ ལོཀནྟི པདསྶ ཨིམཾ མནུསྶལོཀནྟི ཝཱ ཨིམཾ ཀཱམཱཝཙརལོཀནྟིཝཱ དྭིདྷཱཔི ཨཏྠོ ཨཊྛཀཐཱསུ ཝུཏྟོ. ཏཏྠ པུརིམསྨིཾ ཨཏྠེ སཏི ཨཱགཙྪཏཱིཏི ཨེཏསྶ དེཝལོཀཏོ ཨཱགཙྪཏཱིཏི ཨཏྠོ. པཙྪིམསྨིཾ པན བྲཧྨལོཀཏོཔི ཙ ཨཱགཙྪཏཱིཏི. པཱལི༹ཡཾཔན པཙྪིམཏྠོཝ ཝུཏྟོཝིཡ དིསྶཏི. ཝུཏྟཉྷེཏཾ པུགྒལཔཉྙཏྟིཡཾ ཨནཱགནྟྭཱ ཨིཏྠཏྟཾ ཨནཱགཱམཱི ཏེན དཊྛབྦོ. ཨཱགནྟྭཱ ཨིཏྠཏྟཾ སོཏཱཔནྣསཀདཱ གཱམིནོ ཏེན དཊྛབྦཱཏི. ཨེཏྠཙ ཨནཱགནྟྭཱ ཨིཏྠཏྟནྟི ཨིམིནཱ ཨིམཾ ཀཱམཱཝཙརལོཀཾ ན ཨཱགཙྪཏཱིཏི ཨནཱགཱམཱིཏི ཨཏྠཾ དསྶེཏི. ཨཱགནྟྭཱ ཨིཏྠཏྟནྟི ཨིམིནཱཔན དྭེཔི སོཏཱཔནྣསཀདཱགཱམིནོ སཀིཾ པུན ཨིམཾ ཀཱམཱཝཙརལོཀཾ ཨཱགཙྪནྟཱིཏི སཀདཱགཱམིནོཏི ཨཏྠཾ དསྶེཏི. ཀསྨཱ, ནིརནྟརཝཱཀྱེསུ ཋིཏཱནཾ དྭིནྣཾཨིཏྠཏྟ སདྡཱནཾ ནཱནཱཏྠཱ སམྦྷཝཏོ. མཛ྄ཛྷིམཔཎྞཱསེཙ ཀཎྞཀཏྠ སུཏྟེ -

ཡོ ¶ སོ མཧཱརཱཛ བྲཧྨཱ སབྱཱཔཛ྄ཛྷོ, སོ བྲཧྨཱ ཨཱགནྟཱ ཨིཏྠཏྟཾ. ཡོསོ བྲཧྨཱ ཨབྱཱཔཛ྄ཛྷོ, སོ བྲཧྨཱ ཨནཱགནྟཱ ཨིཏྠཏྟནྟི.

བྷགཝཏཱ ཝུཏྟཾ. ཏཏྠ སབྱཱཔཛ྄ཛྷོཏི ཨེཏེན པུཐུཛྫནེན སཧ སོཏཱཔནྣསཀདཱགཱམིབྷཱུཏཱ བྲཧྨཱནོ གཧིཏཱ ཧོནྟི. ཏེཧི པཊིགྷཱནུསཡསྶ ཨཔྤཧཱིནཏྟཱ ཙེཏསིཀདུཀྑསངྑཱཏཾ བྱཱཔཛ྄ཛྷཾཔི ཨཔཧཱིནམེཝཱཏི སབྱཱཔཛ྄ཛྷཱནཱམ. ཨཱགནྟཱ ཨིཏྠཏྟནྟི ཨིམཾ ཀཱམལོཀཾ པཊིསནྡྷིཝསེན པུན ཨཱགམནསཱིལོ ཨཱགམནཔྤཀཏིཀོཏི ཨཏྠོ. ཏབྦིཔརཱིཏེན པཙྪིམསྶ ཝཱཀྱསྶ ཨཏྠོ ཝེདིཏབྦོ. ཏེསུཔན དྭཱིསུ སཀདཱགཱམཱིསུ པུརིམསྶ ཨནཉྙསཱ དྷཱརཎེནེཝ སབྦཔཐམཾ ཨརིཡ མགྒ སོཏཱདྷི གམན གུཎེན སོཏཱཔནྣོ ཏྭེཝ ནཱམཾ སིདྡྷནྟི དཊྛབྦཾ. པུགྒལགཏིཝསེན པནེཏྠ བྲཧྨལོཀེ ཋིཏཱནཾ སཏྟཀྑཏྟུཔརམཏཱདིབྷཱཝོཝིཡ སཀདཱགཱམིབྷཱཝོཔི ནཏྠི. པཐམདུཏཱིཡཕལཊྛཱཔིཧི ཏཏྠ ཨནཱགཱམིསངྑྱམེཝ གཙྪནྟི. ཏསྨཱ སཀདཱགཱམཱིཏི ཨིདཾ ཀཱམཛཱཏིཀཱ ནཾཨེཝ དུཏཱིཡཕལཊྛཱནཾ སིདྡྷཾ ནཱམནྟི ཀཏྭཱ ཏེསཾ ཀཱམལོཀེ ཨེཝ ཧེཊྛུཔརུཔཔཏྟི ཝསེན སཀིཾ ཨཱགམནཾ ཨཊྛཀཐཱསུ ཝུཏྟནྟི དཊྛབྦཾ. ཨེཝཉྩ ཀཏྭཱ པཱལི༹ཡཾཔི པཉྩནྣཾ ཨིདྷ ནིཊྛཱ སཏྟཀྑཏྟུཔརམསྶ ཀོལཾཀོལསྶ ཨེཀབཱིཛིསྶ སཀདཱགཱམིསྶ ཡོཙ དིཊྛེཝ དྷམྨེ ཨརཧཱཏི ཝུཏྟནྟི. སོཔན ཚབྦིདྷོ ཧོཏི. ཨིདྷཔཏྭཱ ཨིདྷཔརིནིབྦཱཡཱི, ཏཏྠ པཏྭཱ ཏཏྠ པརིནིབྦཱཡཱི, ཨིདྷཔཏྭཱ ཏཏྠ པརིནིབྦཱཡཱི, ཏཏྠ པཏྭཱ ཨིདྷ པརིནིབྦཱཡཱི, ཨིདྷཔཏྭཱ ཏཏྠནིབྦཏྟིཏྭཱ ཨིདྷ པརིནིབྦཱཡཱི. ཏཏྠཔཏྭཱ ཨིདྷནིབྦཏྟིཏྭཱ ཏཏྠཔརིནིབྦཱཡཱིཏི. ཏཏྠ ཨིདྷ པཏྭཱ ཨིདྷ པརིནིབྦཱཡཱིཏི ཨིདྷ མནུསྶབྷཝེ སཀདཱགཱམིམགྒཾ པཏྭཱ ཨིདྷམནུསྶ བྷཝེཡེཝ ཨརཧཏྟམགྒཾ ལབྷིཏྭཱ པརིནིབྦཱཡནདྷམྨོ. ཏཏྠ པཏྭཱ ཏཏྠ པརིནིབྦཱཡཱིཏི ཏསྨིཾདེཝལོཀེ སཀདཱགཱམིམགྒཾ པཏྭཱ ཏསྨིཾ དེཝལོཀེཡེཝ ཨརཧཏྟམགྒཾ ལབྷིཏྭཱ པརིནིབྦཱཡནདྷམྨོ. ནིབྦཏྟིཏྭཱཏི པཊིསནྡྷིགྒཧཎཝསེན ཨུཔྤཛྫིཏྭཱ. ཡེསཾ པན ཨིམཾ ལོཀནྟི པདསྶ ཨིམཾ མནུསྶལོཀནྟི ཨཏྠོ. ཏེསཾ སོ པཉྩཝིདྷོཡེཝ ཝུཏྟོ, ན ཚཊྛོ པུགྒལོ.

ཝིབྷཱཝནིཡཉྩ

‘‘པཉྩསུ ¶ སཀདཱགཱམཱིསུ པཉྩམཀོཝ ཨིདྷཱདྷིཔྤེཏོ, སོ ཧི ཨིཏོ གནྟྭཱ པུན སཀིཾ ཨིདྷ ཨཱགཙྪཏཱི’’ཏི ཝུཏྟཾ.

མཧཱཔརིནིབྦཱན སུཏྟཊྛཀཐཱཡཾ པན མཧཱཝགྒ སཾཡུཏྟཊྛཀཐཱ ཡཉྩ སོཔི ཚཊྛོ པུགྒལོ སཀིཾ ཨཱགམནཊྛེན ཨཱགཏོཡེཝ. ཡསྨཱཙ སབྦཉྙུབུདྡྷཱཔི ཡཱཝ ཨུཔརིམགྒོ ནཱགཙྪཏི. ཏཱཝ པཐམཕལཊྛབྷཱུཏཱ སཏྟཀྑཏྟུ པརམཏཱཡཾཝིཡ དུཏཱིཡཕལཊྛབྷཱུཏཱ སཀིཾ ཨཱགམནཔྤཀཏིཡཾ སཎྛིཏཱཡེཝ ཧོནྟི. ཏསྨཱ ཨིདྷ ཀོཙི དུཏཱིཡཕལཊྛོ སཀིཾ ཨཱགམནཊྛེན ནིཔྤརིཡཱཡེན སཀདཱ གཱམཱིནཱམ ན ནཧོཏཱིཏི སབྦོཔི སོ ཚབྦིདྷོ པུགྒལོ ཨིདྷ ནིཔྤརིཡཱཡེན སཀདཱགཱམིཡེཝནཱམ ཧོཏཱིཏི དཊྛབྦོ. སཀདཱ གཱམིསྶ མགྒོ སཀདཱགཱམིམགྒོ. སོ ཧི སཡཾ ཛནཀབྷཱུཏོ སཀདཱགཱམཱིནཾ ཛནེཏབྦཾ ཛནེཏཱིཏི ཨིདྷ ཛནེཏབྦ ཛནཀསམྦནྡྷེན ཝིསེསན ཝིསེསིཏབྦཏཱ ཉཱཡཱགཏཱ ཨེཝ ཧོཏི. ཡཐཱ ཏིསྶམཱཏཱ ཕུསྶམཱཏཱཏི.

[༥༧] ཝིབྷཱཝནིཡཾ པན

སཱཉཱཡཱགཏཱཨེཝ ནཧོཏི. པཡོཛནཾ པན ཀིཉྩི ཨཏྠི. པཡོཛནཝསེན ཨཝིརུདྡྷཱ ཧོཏཱིཏི ཨིམིནཱ ཨདྷིཔྤཱཡེནཡཾ ཝུཏྟཾ ‘‘ཀིཉྩཱཔི མགྒསམངྒིནོ ཏཐཱགམནཱསམྦྷཝཏོ ཕལཊྛོཡེཝ སཀདཱགཱམཱིནཱམ. ཏསྶཔན ཀཱརཎབྷཱུཏོ པུརིམུཔྤནྣོ མགྒོ མགྒནྟརཱཝཙྪེདནཏྠཾ ཕལཊྛེན ཝིསེསེཏྭཱ ཝུཙྩཏི སཀདཱགཱམིམགྒོཏི. ཨེཝཾ ཨནཱགཱམིམགྒོ’’ཏི. ཏཾ ན ཡུཛྫཏི.

སཀདཱགཱམིམགྒེན སམྤཡུཏྟཾ ཙིཏྟནྟི སམཱསོ.

༥༩. ཨོརབྦྷཱགིཡསཾཡོཛནཱནཾ སབྦསོ སམུཙྪིནྣཏྟཱ པཊིསནྡྷིཝསེན པུན ཨིམཾ ཀཱམལོཀཾ ན ཨཱགཙྪཏཱིཏི ཨནཱགཱམཱི. ཨེཀནྟེན བྲཧྨལོཀཔརཱཡནོཨེཝ ཧོཏཱིཏི ཨཏྠོ. ཨིདཉྩ ཀེཝལཾ ཨིམསྶ མགྒསྶ ཨཱནུབྷཱཝཝསེནེཝ ཝུཏྟཾ. ཨུཔརིམགྒ ཝིཔསྶནཱཡ ¶ པན ཨཱགཏཱཡ སོ ཏསྨིཾ ཋཱནེཡེཝ ཨརཧཏྟ མགྒཔརཱཡནོཔི ཧོཏིཡེཝ. ཨནཱགཱམིསྶ ཏཏཱིཡཕལཊྛསྶམགྒོ. ཏེན སམྤཡུཏྟཾ ཙིཏྟནྟི ཝིགྒཧོ.

༦༠. མཧཔྥལཀཱརིཏཱགུཎཡོགེན པཱུཛཱཝིསེསཾ ཨརཧཏཱིཏི ཨརཧཱ. ཁཱིཎཱསཝོ ཙཏུཏྠཕལཊྛོ. ཨརཧཏོ བྷཱཝོ ཨརཧཏྟཾ, ཙཏུཏྠཕལཾ. ཏསྶ མགྒོ. ཏེན སམྤཡུཏྟཙིཏྟནྟི ནིབྦཙནཾ. པིསདྡེན པཱལི༹ཡཾ ཝིབྷཏྟེ མགྒཙིཏྟཔྤབྷེདེ སམྤིཎྜེཏི. ཏཏྠ དྷམྨསངྒཎིཡཾ ཏཱཝ པཐམམགྒེ ཛྷཱནནཱམེན ཝུཏྟེསུ པཉྩསུ ཝཱརེསུ པཐམེ སུདྡྷིཀཔཊིཔདཱཝཱརེདྭིནྣཾ ཙཏུཀྐཔཉྩཀནཡཱནཾ ཝསེན ནཝཙིཏྟཱནི ཧོནྟི. ཏཐཱ སུདྡྷིཀསུཉྙཏཱཡ སུཉྙཏཔྤཊིཔདཱཡ སུདྡྷིཀཔྤཎིཧིཏེ ཨཔྤཎིཧིཏཔྤཊིཔདཱཡཙཱཏི པཉྩསུ ཝཱརེསུ དསནྣཾ ནཡཱནཾ ཝསེན པཉྩཙཏྟཱལཱིསཙིཏྟཱནི ཧོནྟི. ཏཐཱ མགྒསཏིཔཊྛཱནཱདཱིཧི ཨེཀཱུནཝཱིསཏིཡཱ ནཱམེཧི ཝུཏྟེསུ པཙྩེཀཾ པཉྩསུ ཝཱརེསཱུཏི ཝཱིསཏིཡཱ ནཱམེཧི ཝུཏྟེ ཝཱརསཏེ དྭིནྣཾ ནཡསཏཱནཾ ཝསེན ནཝཙིཏྟསཏཱནི ཧོནྟི. པུན ཙཏཱུཧི ཨདྷིཔཏཱིཧི ཡོཛེཏྭཱ ཝུཏྟེསུ ཙཏཱུསུ ཝཱརསཏེསུ ཨཊྛནྣཾ ནཡསཏཱནཾ ཝསེན ཏཱིཎི སཧསྶཱནི ཚསཏཱནིཙ ཧོནྟཱིཏི. ཨེཝཾ པཐམམགྒེ ནཡ སཧསྶཝསེན ཙཏྟཱརིཙིཏྟསཧསྶཱནི པཉྩཙིཏྟ སཏཱནིཙ ཧོནྟི. ཏཐཱ སེསམགྒེསུཔཱིཏི ཨེཝཾ ཙཏཱུསུ མགྒེསུ ཙཏུནྣཾ ནཡ སཧསྶཱནཾ ཝསེན ཨཊྛཱརས མགྒ ཙིཏྟ སཧསྶཱནི ཧོནྟི. སཙྩསཏིཔཊྛཱན ཝིབྷངྒེསུ པན ཝཱིསཏིནཡ སཧསྶཱནཾ ཝསེན ནཝུཏིམགྒཙིཏྟསཧསྶཱནི. མགྒཝིབྷངྒེ ཨཊྛཝཱིསཏིཡཱ ནཡ སཧསྶཱནཾ ཝསེན སཏསཧསྶཾ ཚབྦཱིསཏིསཧསྶཱནི ཙ མགྒཙིཏྟཱནི ཧོནྟཱིཏི. ཨཊྛཀཐཱསུཔན ནཡབྷེདཱཨེཝ ཝུཏྟཱ. ནཙིཏྟ བྷེདཱཏི.

[༥༨] ཡཾཔན ཝིབྷཱཝནིཡཾ

པིསདྡེན སཙྩཝིབྷངྒེ ཨཱགཏཾ སཊྛིསཧསྶབྷེདཾ ནཡཾ སངྒཎྷཱཏཱིཏི ཝུཏྟཾ. ཏཾ ཨིམསྨིཾ ཀུསལནིགམེ ན ཝཏྟབྦཾ.

སོཧི སཊྛིསཧསྶབྷེདོ ནཡོ ཝིཔཱཀཊྛཱནེཨེཝ ཨཊྛཀཐཱཡཾ ཨཱགཏོཏི.

[༥༩] ཡཉྩ ཏཏྠ

པཊིཔདཱབྷེདཾ ¶ ཨནཱམསིཏྭཱ ཀེཝལཾ སུཉྙཏོ ཨཔྤཎིཧི ཏོཏི དྭིདྷཱ ཝིབྷཏྟོཏི ཝུཏྟཾ. ཏཾ ནཡུཛྫཏི.

པཱལི༹ཡཉྷི པཊིཔདཱབྷེདོ ཨཱདིམྷིཡེཝ ཨཱགཏོཏི. ནཙ ཨཱདིམྷི སུཉྙཏོ ཨཔྤཎིཧིཏོཏི དྭིདྷཱ ཝིབྷཏྟོ ནིརནྟརཝཱརོ ཨཏྠཱིཏི.

[༦༠] ཡཉྩ ཏཏྠ

སུཉྙཏོ ཨེཀོ ནཡོ, ཨཔྤཎིཧིཏོ ཨེཀོ, པཊིཔདཱ ཝིསིཊྛཱ སུཉྙཏཱ ཙཏྟཱརོ, ཨཔྤཎིཧིཏཱ ཙཏྟཱརོཏི ཀཏྭཱ དསནཡཱ ཧོནྟཱིཏི ཨདྷིཔྤཱཡེན ཨེཝཾ ཛྷཱན ནཱམེན དསདྷཱ ཝིབྷཏྟོཏི ཝུཏྟཾ. ཏཾཔི ན ཡུཛྫཏིཡེཝ.

ན ཧི སུཉྙཏཱདཡོ ཨིདྷ ནཡཱནཱམ ཧོནྟི. ཏེསུ པན ཨེཀེ ཀསྨིཾ དྭེ དྭེ ཙཏུཀྐཔཉྩཀནཡཱཨེཝ ཨིདྷ ནཡཱནཱམཱཏི. ཨེཏེན ཏཐཱ མགྒསཏིཔཊྛཱནིཙྩཱདིཀཾཔི སབྦཾ པཊིཀྑིཏྟཾ ཧོཏཱིཏི. [མགྒཙིཏྟཾ]

༦༡. ཕལཙིཏྟེ ཕལནྟི ཝིཔཱཀབྷཱུཏོ ཨཊྛངྒིཀ མགྒོ. སམྤཡུཏྟདྷམྨསམཱུཧོཝཱ. སོཏཱཔཏྟིཡཱ ཨདྷིགཏཾ ཕལཾ. ཏེན སམྤཡུཏྟཾ, ཏཏྠཝཱ པརིཡཱཔནྣཾ ཙིཏྟནྟི སོཏཱཔཏྟི ཕལ ཙིཏྟཾ. ཨེསནཡོ དུཏཱིཡཏཏཱིཡེསུཔི. ཨརཧཏྟཉྩ ཏཾ ཕལཉྩཱཏི ཨརཧཏྟཕལཾ. ཏེན སམྤཡུཏྟཾ, ཏསྨིཾཝཱ པརིཡཱཔནྣཾ ཙིཏྟནྟི ནིརུཏྟི.

༦༢. སངྒཧགཱཐཱཡཾ ཙཏུམགྒཔྤབྷེདེནཱཏི ཙཏུཀྑཏྟུཾ པཏྟབྦཏྟཱ ཙཏུབྦིདྷཱནཾ ཨཊྛངྒིཀམགྒཱནཾ པབྷེདེན. ཀསྨཱཔན ཏེ ཙཏུཀྑཏྟུཾ པཏྟབྦཱཏི. ཝུཙྩཏེ. སོཏཱཔཏྟིམགྒེ ཏཱཝ སདྡྷཱདཱིནི ཨིནྡྲིཡཱནི མུདཱུནི ཧོནྟི, ཏསྨཱ སོ དིཊྛིཝིཙིཀིཙྪཱཨེཝ སམུཙྪིནྡིཏུཾ སཀྐོཏི. ཨཉྙེཔན ཀཱམརཱགབྱཱཔཱདེཔི ཏནུབྷཱུཏེཔི ཀཱཏུཾ ནསཀྐོཏི. དུཏཱིཡམགྒེ ཏཱནི ཐོཀཾ པཊཱུནི ཧོནྟི. ཏསྨཱ སོ ཀཱམརཱགབྱཱཔཱདེ ཏནུབྷཱུཏེ ཀཱཏུཾ སཀྐོཏི. སམུཙྪིནྡིཏུཾ པན ནསཀྐོཧིཡེཝ. ཏཏཱིཡམགྒེ ཏཱནི པཊུཏརཱནི ཧོནྟི. ཏསྨཱ སོ ཀཱམརཱགབྱཱཔཱདེ སམུཙྪིནྡིཏུཾ སཀྐོཏི. རཱུཔཱརཱུཔ རཱགམཱནུདྡྷཙྩཱཝིཛྫཱཡོཔན ¶ སམུཙྪིནྡིཏུཾ ནསཀྐོཏིཡེཝ. ཙཏུཏྠ མགྒེཔན ཏཱནི ཨིནྡྲིཡཱནི པཊུཏམཱནི ཧོནྟི. ཏསྨཱ སོ ཏཱཙ ཨཉྙེཙ སབྦེཔི པཱཔདྷམྨེ སམུཙྪིནྡིཏུཾ སཀྐོཏི. ཨེཝཾ ཙཏུཀྑཏྟུཾ པཝཏྟམཱནཱཨེཝ པརིནིཊྛིཏཀིཙྩཏྟཱ ཏེ མགྒཱ ཙཏུཀྑཏྟུཾ པཏྟབྦཱ ཧོནྟཱིཏི. ཀུསལཾ ཙིཏྟཾ ཙཏུམགྒཔྤབྷེདེན ཙཏུདྷཱ མཏཾ. པཱཀཾཔི ཏསྶ ཙཏུབྦིདྷསྶ ཀུསལསྶ ཕལཏྟཱ ཏཐཱ ཙཏུདྷཱམཏཾ. ཨིཏི ཨནུཏྟརཾ ཙིཏྟཾ ཨཊྛདྷཱ མཏནྟི ཡོཛནཱ. ནཏྠི ཨཏྟནོ ཨུཏྟརཾ ཨདྷིཀཾ ཨེཏསྶཱཏི ཨནུཏྟརཾ.

༦༣. ཀསྨཱ པནེཏྠ ཀྲིཡཙིཏྟཾནཱམན གཧིཏནྟི, ཀྲིཡཱནུཏྟརསྶ ཨབྷཱཝཱཏི, ཀསྨཱ པནསྶ ཨབྷཱཝོཏི. མགྒཙིཏྟསྶ ཨེཀཙིཏྟཀྑཎིཀཏྟཱཏི. ཡདི ཧི ཏཾ ལོཀིཡཀུསལཾཝིཡ ནཱནཱཀྑཎེསུ པཝཏྟེཡྻ. ཏདཱ ནིརནུསཡསནྟཱནེཔི པཝཏྟིཏྭཱ ཀྲིཡཱ ནུཏྟརཾནཱམ སིཡཱཏི. ཀསྨཱཔན ཏཾ ཨེཀཙིཏྟཀྑཎིཀམེཝ ཧོཏཱིཏི. མགྒསྶ མཧཱནུབྷཱཝཏྟཱཏི. ཀཐཉྩ མཧཱནུབྷཱཝོཏི. ཝུཙྩཏེ. ཨརིཡམགྒོཧི ནཱམ སཀིཾ པཝཏྟམཱནོཡེཝ ཨཏྟནཱ པཧཱཏབྦེ ཀིལེསེ པུན ཨནུཔྤཱདདྷམྨཏཾ ཨཱཔཱདེཏྭཱ པཛཧཏི. ཨཡམསྶ ཨེཀོ ཨཱནུབྷཱཝོ. ཝིཔཱཀཉྩ ཀུསལཀྲིཡཛཝནཾཝིཡ ཛཝནཀིཙྩ ཡུཏྟཾ ཡདཱ ཀདཱཙི སམཱཔཛྫནཀྑམཉྩ ཀཏྭཱ ཨཏྟནོ ཨནནྟརཏོ པཊྛཱཡ ཛནེཏི. ཨཡམསྶ དུཏཱིཡོ ཨཱནུབྷཱཝོ. ཏསྨཱ ཏསྶ ཀིལེསཔྤཧཱནཏྠཱཡཔི པུན ཨུཔྤཱདེཏབྦཀིཙྩཾནཱམ ནཏྠི. ཏཐཱ སམཱཔཏྟི ཨཏྠཱཡཔཱིཏི. སཙེཔི ཧི ཀོཙི ཨཧཾ ཕལཾ སམཱཔཛྫིཏུཾ ན ཨིཙྪཱམི. པུབྦེ ལདྡྷཾ མགྒམེཝ སམཱཔཛྫིསྶཱམཱིཏི པརིཀམྨཾ ཀརེཡྻ. ཏདཱ པུབྦེ སཀིཾ ཨུཔྤཛྫིཏྭཱ ནིརུདྡྷམགྒཙེཏནཱནུབྷཱཝེན ཕལཙིཏྟམེཝ པཝཏྟེཡྻ. ན མགྒཙིཏྟཾ. ཀསྨཱ, ཨཔྤཊིབཱཧི ཡཱནུབྷཱཝཏྟཱ མགྒསྶ. ཨཡཉྷི མགྒཱནུབྷཱཝོནཱམ ཀེནཙི ཚནྡེན ཝཱ ཝསེནཝཱ ཨཛ྄ཛྷཱསཡེནཝཱ པརིཀམྨེནཝཱ པཊིབཱཧིཏུཾ ཨསཀྐུཎེཡྻོཡེཝ ཧོཏཱིཏི.

༦༤. དྭཱདསཱཀུསལཱནེཝནྟིཨཱདི སབྦེསཾ ཙཏུབྦྷཱུམཀ ཙིཏྟཱནཾ ཛཱཏིཝསེན སངྒཧོ. ཨེཝཾ ཨིམིནཱ ཝུཏྟཔྤཀཱརེན ཨཀུས ལཱནི ¶ དྭཱདསེཝཧོནྟི. ཀུསལཱནི ཨེཀཝཱིསཏིཨེཝ. ཝིཔཱཀཱནིཚཏྟིཾ སེཝ. ཀྲིཡཙིཏྟཱནི ཝཱིསཏིཨེཝཱཏི ཊཱིཀཱཡཾ ཡོཛཱིཡཏི. ཀེཙིཔན ཀུསལཱནཾ ཝིཔཱཀཱནཉྩ ཨུཔརིཝཌྜྷམཱནཏྟཱཨེཝསདྡཾ ཨཱདིཨནྟཔདེསྭེཝ ཡོཛེསུཾ. ཙཏུཔཉྙཱསདྷཱཏིཨཱདི བྷཱུམིཝསེན སངྒཧོ. ཀཱམེཔརིཡཱ པནྣཱནི ཙིཏྟཱནི ཙཏུཔཉྙཱསདྷཱ ཨཱིརཡེ ཀཐེཡྻ. རཱུཔེ པནྣརས. ཨརཱུཔེ དྭཱདས. ཏཐཱ ཨནུཏྟརེ པརིཡཱཔནྣཱནི ཙིཏྟཱནི ཨཊྛདྷཱ ཨཱིརཡེཏི ཡོཛནཱ. ཨེཏྠཙ ཨནུཏྟརེཏི ལོཀུཏྟར བྷཱུམིཡཾ. སཱ པན དུཝིདྷཱ སངྑཏབྷཱུམི, ཨསངྑཏབྷཱུམཱིཏི. སངྑཏཱཔི ཙཏུབྦིདྷཱ. ཡཐཱཧ –

ཡསྨིཾ སམཡེ ལོཀུཏྟརཾ ཛྷཱནཾ བྷཱཝེཏི པཐམཱཡ བྷཱུམིཡཱ པཏྟིཡཱ.ལ. དུཏཱིཡཱཡ.ལ. ཏཏཱིཡཱཡ.ལ. ཙཏུཏྠཱཡ བྷཱུམིཡཱ པཏྟིཡཱཏི.

ཏཏྠ བྷཱུམཱིཏི སཱམཉྙཕལཾ ཨདྷིཔྤེཏནྟི ཝུཏྟཾ. པཐམམགྒཕལཡུ གལ༹ཾཝཱ པཐམབྷཱུམི.ལ. ཙཏུཏྠ མགྒཕལ ཡུགལ༹ཾ ཙཏུཏྠབྷཱུམཱིཏི ཨེཝཾཔི ཡུཛྫཏིཡེཝ. ཨཏྠཏོཔན རཱགཏྟཡཔརིགྒཧཝིམུཏྟིཡཱ ཏེབྷཱུམཀདྷམྨེསུ ཨཔརིཡཱཔནྣཏཱ སངྑཱཏེན ཨཝཏྠཱ ཝིསེསེན ཡུཏྟོ དྷམྨཝིསེསོ. སོཙ ཀིལེསཔྤཧཱན ཝིསེསེན ཙཏུབྦིདྷོ ཛཱཏོཏི.

[༦༡] ཝིབྷཱཝནིཡཾ པན

ཨིཏརབྷཱུམིཡོཝིཡ ལོཀུཏྟརབྷཱུམིནཱམ ཝིསུཾ ནཏྠི. ནཝ ཝིདྷདྷམྨསམཱུཧོཨེཝ ཏེསཾ བྷཱུམིཔརིཡཱཡོཏི ཀཏྭཱ ཡཾ ཝུཏྟཾ. ‘‘ཀཏྠཙི ཨཔརིཡཱཔནྣཱནི ནཝཝིདྷལོཀུཏྟར དྷམྨསམཱུཧེཀདེསབྷཱུཏཱནི རུཀྑེ སཱཁཱ ཏྱཱདཱིསུ ཝིཡ ཨནུཏྟརེ ཙིཏྟཱནཱིཏི ཝུཏྟཱནཱི’’ཏི. ཏཾ ནཡུཛྫཏི.

དུཝིདྷཱཧི བྷཱུམི ཨཝཏྠཱབྷཱུམི, ཨོཀཱསབྷཱུམཱིཏི. ཏཏྠ ཨཝཏྠཱ བྷཱུམིཨེཝ ནིཔྤརིཡཱཡབྷཱུམི. ན ཨིཏརཱ. སཱ ཧི ཨོཀཱསབྷཱུམིནཱམ དྷམྨཱནཾ ཏཾ ཏཾ ཨཝཏྠཱཝིསེསཝསེནེཝ སིདྡྷཱཏི. ཏཾ ཏཾ ཨཝཏྠཱ ཝིསེསོཏིཙ ¶ ཧེཊྛཱ ཝུཏྟནཡེན ཀཱམཱཝཙརཏཱདི ཨཝཏྠཱ ཝིསེསོ དཊྛབྦོ. ཨཔིཙ ཨེཀཏྟིཾསབྷཱུམིཡོཔི ཀུསལཱཀུསལདྷམྨཱནཾ ཧཱིནཔཎཱིཏཨོལཱ༹རིཀསུཁུམཏཱ སངྑཱཏེཧི ཨཝཏྠཱཝིསེསེཧིཨེཝ སིཛ྄ཛྷནྟཱིཏི.

༦༥. ཨེཝཾ ཙཏུབྦྷཱུམཀ ཙིཏྟཱནི སངྑེཔཏོ ནིདྡིསིཏྭཱ ཨིདཱནི པུན ཝིཏྠཱརཏོ ནིདྡིསནྟོ ཨིཏྠནྟིཨཱདིགཱཐམཱཧ. ཏཏྲཱཡཾ ཡོཛནཱ. ཨཐཝཱཔན ཨིཏྠཾ ཡཐཱཝུཏྟཔྤཀཱརེན ཨེཀུནནཝུཏིཔྤབྷེདཾ མཱནསཾ ཙིཏྟཾ ཨེཀཝཱིསསཏཾ ཀཏྭཱ ཝིཙཀྑཎཱ པཎྜིཏཱ ཝིབྷཛནྟཱིཏི.

[༦༢] ཊཱིཀཱསུ པན

གཱཐཱཡ པུབྦདྡྷཾ པུརིམགཱཐཱནཾ ནིགམནཾ ཀཏྭཱ ཨཔརདྡྷམེཝ ཨཱརབྦྷནྟརཾ ཀཏྭཱ ཡོཛེནྟི. ཏཾ ཀཐམེཀཱུན ནཝུཏིཝིདྷཾ ཙིཏྟཾ ཨེཀཝཱིསསཏཾ ཧོཏཱིཏི ཨིམིནཱ ནསམེཏཱིཏི.

ཨིདཱནི ཏཾ ཨེཀཝཱིསསཏཝིབྷཱགཾ དསྶེནྟོ ཀཐཾ.ལ. ཧོཏཱིཏི པུཙྪིཏྭཱ ཝིཏཀྐཝིཙཱརཔཱིཏི སུཁེཀགྒཏཱ སཧིཏནྟིཨཱདིམཱཧ. ཏཏྠ པཐམཛ྄ཛྷཱན སོཏཱཔཏྟིམགྒཙིཏྟནྟི ཨེཏྠ པཉྩངྒིཀེན པཐམཛ྄ཛྷཱནེན ཡུཏྟོ སོཏཱཔཏྟིམགྒོ པཐམཛ྄ཛྷཱནསོཏཱཔཏྟིམགྒོ. ཏེན སམྤཡུཏྟཾ ཙིཏྟནྟི སམཱསོ.

[༦༣] ཊཱིཀཱསུ པན

‘‘པཐམཛ྄ཛྷཱནཉྩ ཏཾ སོཏཱཔཏྟིམགྒཙིཏྟཉྩཱ’’ཏི ཡོཛེནྟི. ཏཾ ན ཡུཏྟཾ.

ན ཧི ཛྷཱནཾ ཙིཏྟཾ ཧོཏི. ནཙ ཙིཏྟཾ ཛྷཱནཾ. ཨཉྙཉྷི ཛྷཱནཾ, ཨཉྙཾ ཙིཏྟནྟི.

[༦༤] ཡཉྩ ཝིབྷཱཝནིཡཾ

‘‘ཛྷཱནངྒཝསེན པཐམཛ྄ཛྷཱན སདིསཏྟཱ པཐམཛ྄ཛྷཱནཉྩཱ’’ཏི ཝུཏྟཾ. ཏམྤི ན ཡུཏྟཾ.

ན ཧི པཉྩངྒིཀཾ ལོཀུཏྟརཛ྄ཛྷཱནཾ པཐམཛ྄ཛྷཱནསདིསཊྛེན པཐམཛ྄ཛྷཱནསཉྙཾ ལབྷཏཱིཏི སཀྐཱ ཝཏྟུཾ. ཏཉྷི སཡམེཝ ཨཏྟནོ པཉྩངྒིཀབྷཱཝེན ¶ ནིཔྤརིཡཱཡཏོ པཐམཛ྄ཛྷཱནཾནཱམ ཧོཏཱིཏི. ཨིདཉྷི ཛྷཱནཾནཱམ ལོཀིཡཾཝཱ ཧོཏུ ལོཀུཏྟརཾཝཱ. ཡཾ པཉྩངྒིཀཾ ཧོཏི. ཏཾ སཡམེཝ པཐམཛ྄ཛྷཱནནྟི སིདྡྷཾ. ཡཾ ཙཏུརངྒིཀཾ. ཏིཡངྒིཀཾ. དུཝངྒིཀཾ. པུན དུཝངྒིཀཾ. ཏཾ སཡམེཝ པཉྩམཛ྄ཛྷཱནནྟི སིདྡྷནྟི. ལོཀུཏྟརེཝཱ དུཏཱིཡཱདིབྷཱཝསྶ ཨུཔྤཏྟིཀྐམཝསེན ཨསིདྡྷཏྟཱ ཨེཝཾ ཝུཏྟནྟི དཊྛབྦཾ.

[༦༥] ཡཉྩ ཏཏྠ

སདིསབྷཱཝེནེཝ ལོཀུཏྟརེ ཏེསཾ པཉྩངྒིཀཱདཱིནཾ ཛྷཱན ཝོཧཱརསིདྡྷཏཱདཱིཔནཏྠཾ. ‘‘པཱདཀཛ྄ཛྷཱན སམྨསིཏཛ྄ཛྷཱན པུགྒལཛ྄ཛྷཱསཡེསུ ཧི ཨཉྙཏརཝསེན ཏཾ ཏཾ ཛྷཱནསདིསཏྟཱ ཝིཏཀྐཱདིཨངྒཔཱཏུབྷཱཝེན ཙཏྟཱརོཔི མགྒཱ པཐམཛ྄ཛྷཱནཱདི ཝོཧཱརཾ ལབྷནྟཱ པཙྩེཀཾ པཉྩདྷཱ ཝིབྷཛནྟཱི’’ཏི ཝུཏྟཾ. ཏམྤི ནཡུཛྫཏིཡེཝ.

ན ཧི མགྒཱ པཐམཛ྄ཛྷཱནཱདི ཝོཧཱརཾ ལབྷནྟི. ཨཉྙོ ཧི མགྒོ, ཨཉྙཾ ཛྷཱནནྟི. ཨཔིཙ, ཡདི ཨུཔནིཛ྄ཛྷཱཡནཊྛེན པཙྩནཱིཀཛ྄ཛྷཱཔནཊྛེནཙ ཛྷཱནཾནཱམ སིཡཱ. ཏདཱ ལོཀུཏྟརཛ྄ཛྷཱནཱནིཨེཝ སཱཏིསཡཏོ ཛྷཱནཱནིནཱམ སིཡུཾ. ན ཨིཏརཱནི. ཏཱནི ཧི ཀསིཎཱདིནིམིཏྟམཏྟཾ ཨུཔེཙྩ ནིཛ྄ཛྷཱཡནྟི. པཙྩནཱིཀདྷམྨེཙ ཝིཀྑམྦྷནམཏྟེན ཛྷཱཔེནྟི. ལོཀུཏྟརཱནིཡེཝཔན ཨཏིགམྦྷཱིརཾ ཨབྷིདུདྡསཾ ནིབྦཱནཾ ཨུཔེཙྩ ནིཛ྄ཛྷཱཡནྟི. པཙྩནཱིཀདྷམྨེཙ སམཱུལེ སཱནུསཡེ སབྦསོ སམུཙྪིནྡནཝསེན ཛྷཱཔེནྟཱིཏི. ཨེཏྠཙ ཨཔྤནཱཛྷཱནཱནཾ པཉྩངྒིཀབྷཱཝོནཱམ པཀཏིཡཱ ཨེཝ སིདྡྷོ ཧོཏཱིཏི ན པཐམཛ྄ཛྷཱནིཀེསུ མགྒཕལེསུ པཱདཀཛ྄ཛྷཱ ནཱདིནཱ པཙྩཡཝིསེསེན ཀིཙྩཾ ཨཏྠི. ཙཏུརངྒིཀཱདི བྷཱཝོ པན ཏེན པཙྩཡཝིསེསེན ཝིནཱ ན སིཛ྄ཛྷཏི. ཨསཏིཧི ཏསྨིཾ སབྦཾཔི ཛྷཱནཾ པཉྩངྒིཀམེཝ བྷཝིསྶཏཱིཏི. ཏཏྠ ཡཐཱ ལོཀིཡཛ྄ཛྷཱནེསུ ཨཱདིཀམྨིཀཀཱལེ ཏསྶ ཏསྶ དུཏཱིཡཱདིཀསྶ ཛྷཱནསྶ ཨུཔཙཱརབྷཱུཏཱ བྷཱཝནཱ སཡཾ ཝིཏཀྐཱདིཡུཏྟཱ སམཱནཱཔི ཝིཏཀྐཱདཱིསུ ཨཱདཱིནཝདསྶནཉྙཱཎེནཙེཝ ཨིདཱནི ཨཝིཏཀྐཾ ཛྷཱནཾ ཨུཔྤཱདེསྶཱམི, ཨིདཱནི ཨཝིཙཱརཾ ཛྷཱནཾ ཨུཔྤཱདེསྶཱམཱིཏི ཨེཝམཱདིནཱ པཝཏྟེན ཨཛ྄ཛྷཱསཡ ¶ ཝིསེསེནཙ ཡུཏྟཏྟཱ ཀཱཙི ཝིཏཀྐཝིརཱགབྷཱཝནཱནཱམ ཧོཏི. ཀཱཙི ཝིཙཱར ཝིརཱགབྷཱཝནཱ ནཱམ. ཀཱཙི པཱིཏིཝིརཱགབྷཱཝནཱ ནཱམ. ཀཱཙི སུཁཝིརཱགབྷཱཝནཱནཱམ. ཀཱཙཱི རཱུཔཝིརཱགབྷཱཝནཱནཱམ. ཨསཉྙིགཱམཱིནཾ པན སཉྙཱཝིརཱགབྷཱཝནཱནཱམ ཧོཏི. སཱ ཨཏྟནོ ཨཏྟནོ ཛྷཱནཾ ཨཝིཏཀྐཾཝཱ ཨཝིཙཱརཾཝཱ ཨཔྤཱིཏིཀཾཝཱ ཨུཔེཀྑཱསཧ གཏཾཝཱ ཀཱཏུཾ སཀྐོཏི. ཛྷཱནེསུ ཝསཱིབྷཱུཏཀཱལེཔན ཨཱདཱིནཝདསྶནཉྙཱཎེན ཝིནཱ ཀེཝལཾ ཨཛ྄ཛྷཱསཡམཏྟེན ཡཾཡཾ ཛྷཱནཾ ཨིཙྪཏི. ཏཾ ཏཾ ཛྷཱནཾ སམཱཔཛྫཏིཡེཝ. ཨེཝམེཝཾ ཨིདྷཔི ཏསྶ ཏསྶ མགྒསྶ ཨུཔཙཱརབྷཱུཏཱ ཝུཊྛཱནགཱམིནི ཝིཔསྶནཱསངྑཱཏཱ བྷཱཝནཱ སཡཾ ཝིཏཀྐཱདིཡུཏྟཱ སམཱནཱཔི ནཱནཱསཏྟིཡུཏྟཱ ཧོཏི. ཀཱཙི ཝིཏཀྐཝིརཱགབྷཱཝནཱནཱམ. ཀཱཙི ཝིཏཀྐཝིཙཱརཝིརཱགབྷཱཝནཱ ནཱམ. ཀཱཙི ཝིཏཀྐཝིཙཱརཔཱིཏི ཝིརཱགབྷཱཝནཱནཱམ. ཀཱཙི ཝིཏཀྐཝི ཙཱརཔཱིཏིསུཁཝིརཱགབྷཱཝནཱནཱམ. ཏཏྠ ཡཱ ཝིཏཀྐཾ ཝིརཱཛེཏུཾ ཨཏིཀྐཱམེཏུཾ སཀྐོཏི. སཱ ཝིཏཀྐཝིརཱགབྷཱཝནཱནཱམ. ཨེས ནཡོ སེསཱསུཔཱིཏི.

༦༦. ཀསྶཔན བལེན སཱ ཝིཔསྶནཱ ནཱནཱསཏྟི ཡུཏྟཱ ཧོཏཱིཏི. ཝུཙྩཏེ, པཱདཀཛ྄ཛྷཱནབལེནཱཏི ཨེཀོ ཐེརཝཱདོ. སམྨསིཏཛ྄ཛྷཱན བལེནཱཏི ཨེཀོ. པུགྒལཛ྄ཛྷཱསཡ བལེནཱཏི ཨེཀོ. ཏཏྠ ཡཾ ཡཾ ཛྷཱནཾ ཏསྶཱ ཝིཔསྶནཱཡ པཱདཀཏྠཱཡ ཨཱསནྣེ སམཱཔཛྫཱིཡཏི. ཏཾཏཾ པཱདཀཛ྄ཛྷཱནཾནཱམ. ཏཾཙེ པཐམཛ྄ཛྷཱནཾ ཧོཏི. ཝིཔསྶནཱ པཱཀཏིཀཱཨེཝ. སཙེ དུཏཱིཡཛ྄ཛྷཱནཾ ཧོཏི. ཝིཔསྶནཱ ཝིཏཀྐཝིརཱགསཏྟིཡུཏྟཱ ཧོཏི. མགྒེ ཨཝིཏཀྐཾ ཛྷཱནཾ ནིཡཱམེཏུཾ སཀྐོཏི. ཨེསནཡོ སེསེསུཔི པཱདཀཛ྄ཛྷཱནེསཱུཏི ཨཡཾ པཱདཀཝཱདོ. པཱདཀཛ྄ཛྷཱནེ སཏི ཏཾསདིསམེཝ མགྒེ ཛྷཱནཾ ཧོཏི. ཨསཏིཔན མགྒེ པཐམཛ྄ཛྷཱནམེཝ ཧོཏི. སམྨསི ཏཛ྄ཛྷཱནཾཝཱ པུགྒལཛ྄ཛྷཱསཡོཝཱ མགྒེ ཛྷཱནངྒཾ ནིཡམེཏུཾ ནསཀྐོཏཱིཏི ཨདྷིཔྤཱཡོཏི. པཱདཀཛ྄ཛྷཱནེ སཏི ཏཾཝཱ ཨཉྙཾཝཱ ཡཾཡཾ ཛྷཱནཾ སམྨསཱིཡཏི. ཏཾཙེ པཐམཛ྄ཛྷཱནཾ ཧོཏི. ཝིཔསྶནཱ པཱཀཏི ཀཱཨེཝ. སཙེ དུཏཱིཡཛ྄ཛྷཱནཾ ཧོཏི. ཝིཔསྶནཱ ཝིཏཀྐཝིརཱགསཏྟི ¶ ཡུཏྟཱ ཧོཏི. མགྒེ ཨཝིཏཀྐཾ ཛྷཱནཾ ནིཡཱམེཏུཾ སཀྐོཏི. ཨེསནཡོ སེསེསུཔི སམྨསིཏཛ྄ཛྷཱནེསཱུཏི ཨཡཾ སམྨསིཏཝཱདོ. ཝིཔསྶནཱཡ ཨཱརམྨཎབྷཱཝེན སཧ ཙརིཏཏྟཱ སམྨསིཏཛ྄ཛྷཱནམེཝ པཱདཀཛ྄ཛྷཱནཏོ ཨཛ྄ཛྷཱསཡཏོཙ བལཝཏརནྟི ཨདྷིཔྤཱཡོཏི.

ཝིབྷཱཝནིཡཾ པན

ཝིཔསྶནཱཔཱདཀཾ ཀིཉྩིཛྷཱནཾ ནཏྠཱིཏི ཨིམསྨིཾ ཝཱདེ ཝུཏྟཾ. ཏཾ ཨཊྛཀཐཱཡ ན སམེཏི.

པཱདཀཛ྄ཛྷཱནེ སཏི ཏཾཝཱ ཨཉྙཾཝཱ མགྒེ ཡཾཡཾཛྷཱནཾ ཨིཙྪཏི. ཏཾཏཾ ཛྷཱནཾ ཨིཛ྄ཛྷཏི. ཝིཔསྶནཱཔི ཨིཙྪཱནུརཱུཔཾ ཝིཏཀྐཝིརཱགཱདིབྷཱཝཾ པཏྟཱ ཧོཏཱིཏི པུགྒལཛ྄ཛྷཱསཡཝཱདོ. ཡཐཱ ལོཀིཡཛ྄ཛྷཱནེསུ ཨཱསནྣེ ཝུཊྛིཏཛ྄ཛྷཱནཾ ཨུཔརིཛ྄ཛྷཱནུཔཙཱར བྷཱཝནཱཡ ཨུཔཏྠམྦྷཀམཏྟཾ ཧོཏི. ན པན ཨུཔརིཛ྄ཛྷཱནེ ཛྷཱནཾ ཨཏྟསདིསཾ ཀཱཏུཾ སཀྐོཏི. ཨཛ྄ཛྷཱསཡོཨེཝ ཨུཔརིཛ྄ཛྷཱནེ ཛྷཱནངྒཾ ནིཡཱམེཏི. ཨེཝམེཝཾ ཨིདྷཔི པཱདཀཛ྄ཛྷཱནཾ ཝིཔསྶནཱཡ ཏིཀྑ ཝིསདབྷཱཝཏྠཱཡ བལཝུཔནིསྶ ཡོ ཧོཏི. ཨཛ྄ཛྷཱསཡོཨེཝ ཝིཔསྶནཾ ཝིཏཀྐཝིརཱགཱདིབྷཱཝཾ པཱཔེཏྭཱ མགྒེ ཛྷཱནངྒཾ ནིཡཱམེཏཱིཏི ཨདྷིཔྤཱཡོཏི. ཡོ པནེཏྠ ཝུཊྛཱནགཱམིནིཝིཔསྶནཱཨེཝ མགྒེ ཛྷཱནངྒཾ ནིཡཱམེཏཱིཏི མཧཱཊྛཀཐཱ ཝཱདོ. ཏཏྠཔི པུགྒལཛ྄ཛྷཱསཡཝིསེསབལེན ཝིཏཀྐཝིརཱགཱདིསཏྟི ཝིསེསཡུཏྟཱ ཝུཊྛཱནགཱམིནི ཝིཔསྶནཱཨེཝཱཏི ཨཏྠོ ཝེདིཏབྦོ. ཀཱམཉྩེཏྠ ཨཊྛསཱལིནིཡཾ ཨིམེསཾ ཏིཎྞཾ ཐེརཝཱདཱནཾ ཨཉྙམཉྙཾ ཨཝིརོདྷོ ཝུཏྟོཝིཡ དིསྶཏི. ཨིམེཔན ཝཱདཱ ཨཉྙམཉྙཾ སཾསནྡིཏྭཱ པཝཏྟཱ ནཧོནྟི. པཙྩེཀཾ སབྦཾ ལོཀུཏྟརཛ྄ཛྷཱནཾ པརིཔུཎྞཾ ཀཏྭཱ པཝཏྟཱ. ཏསྨཱ ནསཀྐཱ ཏེསཾ ཨཉྙམཉྙཾ ཝིརོདྷོ པརིཧརིཏུནྟི. ཨེཏྠཙ ཛྷཱནལཱབྷཱིནཾ ཝིཔསྶནཱཀམྨེ པཱདཀཛ྄ཛྷཱནསམཱ པཛྫནཾནཱམ བྷགཝཏཱཨེཝ སུཊྛུཝིཧིཏཾ. ཝུཏྟཉྷེཏཾ ཙཱུལ༹སུཉྙཏསུཏྟེ –

ཨིདྷཱནནྡ བྷིཀྑུ ཝིཝིཙྩེཝ ཀཱམེཧི ཝིཝིཙྩ ཨཀུསལེཧི དྷམྨེཧི པཐམཾ ཛྷཱནཾ ཨུཔསམྤཛྫ ཝིཧརཏི. དུཏཱིཡཾ ཛྷཱནཾ. ཏཏཱིཡཾ ཛྷཱནཾ. ཙཏུཏྠཾ ཛྷཱནཾ ཨུཔསམྤཛྫ ཝིཧརཏི. སོ ཨཛ྄ཛྷཏྟཾ སུཉྙཏཾ མནསིཀརོཏི. ཏསྶཙེཨཛ྄ཛྷཏྟཾསུཉྙཏཱཡ ཙིཏྟཾ ¶ ནཔཀྑནྡཏི. ནཔསཱིདཏི. ཏེན བྷིཀྑུནཱ ཏསྨིཾཡེཝ པུརིམསྨིཾ སམཱདྷིནིམིཏྟེ ཨཛ྄ཛྷཏྟམེཝ ཙིཏྟཾ སནྠཔེ ཏབྦཾ, སནྣིསཱདེཏབྦཾ, ཨེཀོདི ཀཱཏབྦཾ, སམཱདཧཱཏབྦནྟིཨཱདི.

ཏཏྠ སུཉྙཏཾ མནསིཀརོཏཱིཏི ཝིཔསྶནཱཀམྨཾ ཝུཏྟཾ. ཏསྨིཾཡེཝ པུརིམསྨིཾ སམཱདྷིནིམིཏྟེཏི པཱདཀཛ྄ཛྷཱནསམཱདྷི ནིམིཏྟེ. ནཝནིཔཱཏེཙ –

པཐམཾ པཱཧཾ བྷིཀྑཝེཛྷཱནཾ ནིསྶཱཡ ཨཱསཝཱནཾ ཁཡཾ ཝདཱམི.ལ. ནེཝསཉྙཱནཱསཉྙཱཡཏནཾ པཱཧཾ བྷིཀྑཝེ ཛྷཱནཾ ནིསྶཱཡ ཨཱསཝཱནཾ ཁཡཾ ཝདཱམཱིཏི ཝུཏྟཾ.

༦༧. ཨིམེསུཔན ཏཱིསུཝཱདེསུ པུགྒལཛ྄ཛྷཱསཡཝཱདོ བལཝཏརོཝིཡ ཁཱཡཏི. ལོཀིཡཛ྄ཛྷཱནེསུཔི ཧི པཱདཀཛ྄ཛྷཱནཾནཱམ ཨིཙྪིཏབྦམེཝ. ཏཉྩ ཨུཔརིཛ྄ཛྷཱནསྶ ཨུཔཙཱརབྷཱཝནཱཡ ཏིཀྑཝིསད བྷཱཝཏྠཱཡཨེཝ ཧོཏི. ཨཛ྄ཛྷཱསཡོཨེཝཔན ཨུཔཙཱར བྷཱཝནཱཡ ཝིཏཀྐཝིརཱགཱདིབྷཱཝཾ སཱདྷེཏི. ཨུཔཙཱརབྷཱཝནཱཨེཝ ཨུཔརིཛ྄ཛྷཱནེ ཛྷཱནངྒཾ ནིཡཱམེཏི. ཨེཝམེཝཾ ཨིདྷཔི པཱདཀཛ྄ཛྷཱནབལེན ཏིཀྑཝིསད བྷཱཝཔཏྟཱ ཝུཊྛཱནགཱམིནི ཝིཔསྶནཱཨེཝ ཨཛ྄ཛྷཱསཡཝིསེསབལེན ཝིཏཀྐཝིརཱགཱདིསཏྟིཝིསེསཡུཏྟཱ ཧུཏྭཱ མགྒེ ནཱནཱཛྷཱནཱནི སཱདྷེཏི. ཨསཏི པན ཨཛ྄ཛྷཱསཡཝིསེསེ ཏཾཏཾ པཱདཀཛ྄ཛྷཱནཱནུརཱུཔཾ ཨཛ྄ཛྷཱསཡསཱམཉྙཾསཎྛཱཏི. ཏསྨཱ ཨཛ྄ཛྷཱསཡཝིསེསེ ཨསཏི པཱདཀཛ྄ཛྷཱནམེཝ པམཱཎཾ ཧོཏི. སཏིཔན ཏསྨིཾ སོཨེཝ པམཱཎནྟི ཡུཏྟཾ. ཨིཙྪི ཏིཙྪིཏ ལོཀིཡཛ྄ཛྷཱན སམཱཔཛྫན སདིསཉྷི སབྦཛ྄ཛྷཱནེསུ ཙིཎྞཝསཱིབྷཱུཏཱནཾ མགྒེསུ ཨིཙྪིཏཛ྄ཛྷཱན ནིབྦཏྟནནྟི. ཡོ པནེཏྠ པཱདཀཛ྄ཛྷཱནཱདིཝསེན པཝཏྟོ ཝིསེསོ. སོ སབྦོཔི ཝིཔསྶནཱ ཝིསེསཏྠཱཡ ཨེཝ ཧོཏི. ཝིཔསྶནཱ ཝིསེསོཨེཝ མགྒེ ཛྷཱནངྒཾ ནིཡཱམེཏཱིཏི ཀཏྭཱ ཨཊྛསཱལིནིཡཾ ཝིསུདྡྷི མགྒེཙ ཝིཔསྶནཱཝ པམཱཎཾ ཀཏྭཱཝུཏྟཱ. སོ སབྦོཔི ཝིསེསོ པཱདཀཛ྄ཛྷཱནེན ཝིནཱ ནསིཛ྄ཛྷཏཱིཏི ཀཏྭཱ མགྒཝིབྷངྒམགྒསཾཡུཏྟཊྛ ཀཐཱསུ པཱདཀཛ྄ཛྷཱནཾ ཨེཝ པམཱཎཾ ཀཏྭཱ ཝུཏྟནྟི ཝེདིཏབྦཾ. ཡསྨཱ པན པཱལི༹ཡཾ –

ཨིདྷ ¶ གཧཔཏི བྷིཀྑུ ཝིཝིཙྩེཝ ཀཱམེཧི. ལ. པཐམཾ ཛྷཱནཾ ཨུཔསམྤཛྫ ཝིཧརཏི. སོ ཨིཏི པཊིསཉྩིཀྑཏི. ཨིདཾཔི ཁོ པཐམཛ྄ཛྷཱནཾ ཨབྷིསངྑཏཾ ཨབྷིསཉྩེཧཡིཏཾ ཡཾཁོཔན ཀིཉྩི ཨབྷིསངྑཏཾ ཨབྷིསཉྩེཏཡིཏཾ. ཏདནིཙྩཾ. ཏཾ ནིརོདྷདྷམྨནྟི པཛཱནཱཏི སོ ཏཏྠ ཋིཏོ ཨཱསཝཱནཾ ཁཡཾ པཱཔུཎཱཏི. ལ. དུཏཱིཡཾ ཛྷཱནཾ, ཏཏཱིཡཾ ཛྷཱནཾ, ཙཏུཏྠཾ ཛྷཱནཾ, མེཏྟཱ ཙེཏོཝིམུཏྟིཾ. ཀརུཎཱ, མུདིཏཱ, ཨུཔེཀྑཱཙེཏོ ཝིམུཏྟིཾ, ཨཱཀཱསཱནཉྩཱ ཡཏནཾ.ལ. ཨཱཀིཉྩཉྙཱ ཡཏནཾ ཨུཔསམྤཛྫ ཝིཧརཏི. སོ ཨིཏི པཊིསཉྩིཀྑཏི. ཨཡཾཔིཁོ ཨཱཀིཉྩཉྙཱ ཡཏནསམཱཔཏྟི ཨབྷིསངྑཏཱ ཨབྷིསཉྩེཏཡིཏཱ. ཡཾ ཁོཔན ཀིཉྩི ཨབྷིསངྑཏཾ.ལ. ཁཡཾ པཱཔུཎཱཏཱིཏི.

ཨེཝཾཨེཀཱདསནིཔཱཏེ –

ཨིདྷཱནནྡ བྷིཀྑུ ཝིཝིཙྩེཝ ཀཱམེཧི ཝིཝིཙྩ ཨཀུསལེཧི དྷམྨེཧི སཝིཏཀྐཾ སཝིཙཱརཾ ཝིཝེཀཛཾ པཱིཏིསུཁཾ པཐམཾ ཛྷཱནཾ ཨུཔསམྤཛྫ ཝིཧརཏི. སོ ཡདེཝ ཏཏྠ ཧོཏི རཱུཔགཏཾ ཝེདནཱགཏཾ སཉྙཱགཏཾ སངྑཱརགཏཾ ཝིཉྙཱཎགཏཾ, ཏེ དྷམྨེ ཨནིཙྩཏོ དུཀྑཏོ ཨནཏྟཏོ སམནུཔསྶཏི. སོ ཏཏྠ ཋིཏོ ཨཱསཝཱནཾ ཁཡཾ པཱཔུཎཱཏི. ནོ ཙེ ཨཱསཝཱནཾ ཁཡཾ པཱཔུཎཱཏི. ཏེནེཝ དྷམྨརཱགེན ཏཱཡ དྷམྨནནྡིཡཱ པཉྩནྣཾ ཨོརམྦྷཱགིཡཱནཾ སཾཡོཛནཱནཾ པརིཀྑཡཱ ཨུཔཔཱཏིཀོ ཧོཏི. ཏཏྠ པརིནིབྦཱཡཱི ཨནཱཝཏྟིདྷམྨོ ཏསྨཱ ལོཀཱཏི.

ཨཱདིནཱ མཱལུཀྱཔུཏྟསུཏྟ ཨནུཔདསུཏྟཱདཱིསུཙ ཨནེཀེསུ སུཏྟནྟེསུ ཨཊྛསུ སམཱཔཏྟཱིསུ ཨེཀེཀཱཡ སམཱཔཏྟིཡཱ ཝུཊྛཱཡ ཝུཊྛིཏསམཱཔཏྟིདྷམྨསམྨསནམེཝ ཨཱགཏཾ. ནཔན ཨཉྙཛ྄ཛྷཱན སམྨསནཾ. ཏསྨཱ སཏིཔི ཡོགཱིནཾ ཨིཙྪཱཝསེན པཱདཀཛ྄ཛྷཱནཏོ ཨཉྙཛ྄ཛྷཱནསམྨསནེ པཱདཀཛ྄ཛྷཱནམེཝ པམཱཎནྟི སཀྐཱ ཝིཉྙཱཏུནྟི. ཨེཏྟཱཝཏཱ སམྨསིཏཝཱདོ སབྦདུབྦལོཏི སིདྡྷོ ཧོཏཱིཏི. ཡེཔན ཨཊྛསམཱཔཏྟིལཱབྷིནོཔི ཛྷཱནཾ པཱདཀཾ ཨཀཏྭཱཝ མགྒཾ ཨུཔྤཱདེནྟི. པཐམཛ྄ཛྷཱནམེཝཝཱ པཱདཀཾ ཀཏྭཱ ཨཛ྄ཛྷཱསཡཝིསེསཾ ཨཀཏྭཱ ¶ མགྒཾ ཨུཔྤཱདེནྟི. པཐམཛ྄ཛྷཱནམཏྟལཱབྷིནོཝཱ ཧུཏྭཱ ཏམེཝ པཱདཀཾ ཀཏྭཱ མགྒཾ ཨུཔྤཱདེནྟི. ཡེཙ སུཀྑཝིཔསྶཀཱ ཧུཏྭཱ མགྒཾ ཨུཔྤཱདེནྟི. ཏེསཾ པཐམཛ྄ཛྷཱནིཀོཝ མགྒོ ཧོཏཱིཏི ཝེདིཏབྦོ. ཨཔིཙ ཡེ པཀཏིཡཱཝ ཨཊྛསུ སམཱཔཏྟཱིསུ ཙིཎྞཝསཱིབྷཱུཏཱ ཧོནྟི. ཏེ ཝིནཱཔི ཨཱསནྣཔཱདཀེན ཡཾཡཾཛྷཱནཾ ཨིཙྪནྟི. ཏཾཏཾ ཛྷཱནཾ ཏེསཾ མགྒེསུ ནསམིཛ྄ཛྷཏཱིཏི ནཝཏྟབྦཾ.

༦༦. [༦༦] ཡཾཔན ཝིབྷཱཝནིཡཾ

‘‘སཙེཔན པུགྒལསྶ ཏཐཱཝིདྷོ ཨཛ྄ཛྷཱསཡོ ནཏྠི. ཧེཊྛིམཧེཊྛིམཛ྄ཛྷཱནཏོ ཝུཊྛཱཡ ཨུཔརུཔརིཛ྄ཛྷཱནདྷམྨེ སམྨསིཏྭཱ ཨུཔྤཱདིཏམགྒོ པཱདཀཛ྄ཛྷཱནཾ ཨནཔེཀྑིཏྭཱ སམྨསིཏཛ྄ཛྷཱནསདིསོ ཧོཏཱིཏི ཝུཏྟཾ. ཏཾ ཝིཙཱརེཏབྦཾ.

ན ཧི ཨཱརམྨཎམཏྟབྷཱུཏཾ སམྨསིཏཛ྄ཛྷཱནཾ ཨུཔརིམཾཔི སམཱནཾ ཨཱསནྣེ ཝུཊྛིཏཛ྄ཛྷཱནཏོ བལཝཏརཾ བྷཝིཏུཾ ཨརཧཏི. ཨཱསནྣེ ཝུཊྛིཏསྶེཝ ཙིཏྟསནྟཱནཾ ཝིསེསེཏུཾ སམཏྠབྷཱཝཏོ. ཏཏོ ཡེཝཧི སོ སམྨསིཏཝཱདོ སབྦཨཊྛཀཐཱསུ ཀེཙིཝཱདཔཀྑེ ཨེཝ ཐཔིཏོཏི. ནནུ པུགྒལཛ྄ཛྷཱསཡཝཱདོཔི ཏཐཱཐཔིཏོཨེཝཱཏི. སཙྩཾ, སོཔན ལོཀིཡཛ྄ཛྷཱནཱནཾ ཨུཔྤཏྟིཝིདྷཱནེན སཧ སཾསནྡིཀཏྟཱ ཡུཏྟཏརོཨེཝ ཧོཏཱིཏི.

[༦༧] ཨེཏེན ཡཾ ཏཏྠ ཝུཏྟཾ.

‘‘ཨུཔརུཔརིཛ྄ཛྷཱནཏོ པན ཝུཊྛཱཡ ཧེཊྛིམ ཧེཊྛིམཛ྄ཛྷཱན དྷམྨེ སམྨསིཏྭཱ ཨུཔྤཱདིཏམགྒོ སམྨསིཏཛ྄ཛྷཱནཾ ཨནཔེཀྑིཏྭཱ པཱད ཀཛ྄ཛྷཱནསདིསོ ཧོཏི. ཧེཊྛིམཧེཊྛིམཛ྄ཛྷཱནཏོཧི ཨུཔརུ པརིཛ྄ཛྷཱནཾ བལཝཏར’’ནྟི. ཏཾཔི པཊིཀྑིཏྟཾ ཧོཏི.

ན ཧི པཱདཀཛ྄ཛྷཱནཾ ཨུཔརིམ བྷཱུཏཏྟཱཡེཝ བལཝཏརཾ ཧོཏི. པཱདཀབྷཱུཏཏྟཱཡེཝ པན བལཝཏརཾ ཧོཏཱིཏི.

[༦༨] ཡཉྩ ཏཏྠ

མགྒེ ཝེདནཱནིཡམོཔན པཱདཀཛ྄ཛྷཱནཱདཱིནཾ ཝསེན ནསིདྡྷོ. ཨཉྙཐཱ ཝིཔསྶནཱ ཡཱཡཀཱཡཙིཝེདནཱཡ ཡུཏྟཱ ཧུཏྭཱ ཏེཧི ¶ ནིཡམིཏཱཡ ཨེཀེཀཱཡ མགྒཝེདནཱཡ སདྡྷིཾ གྷཊི ཡེཡྻཱཏི ཨིམིནཱ ཨདྷིཔྤཱཡེན ‘‘ཝེདནཱནིཡམོཔན སབྦཏྠཔི ཝུཊྛཱནགཱམིནི ཝིཔསྶནཱནིཡམེན ཧོཏཱི’’ཏི ཝུཏྟཾ. ཏམྤི ན ཡུཛྫཏི.

པཱདཀཛ྄ཛྷཱནཱདཱིནཾ ཝསེནེཝ ཝིཔསྶནཱཡ སཧ ཝེདནཱནིཡམསྶ སིདྡྷཏྟཱ. ཏཐཱཧི ཏཾཏཾ པཱདཀཛ྄ཛྷཱནཏོ ཝུཊྛཱཡ ཝིཔསྶནྟསྶ ཝིཔསྶནཱ ཨཱདིཏོ ཀདཱཙི སོམནསྶསཧགཏཱཝཱ ཧོཏི. ཀདཱཙི ཨུཔེཀྑཱསཧགཏཱཝཱ. མགྒཝུཊྛཱནཀཱལེཔན ཡདིཔཱདཀཛ྄ཛྷཱནཾ སོམནསྶཛ྄ཛྷཱནཾ ཧོཏི. ཝིཔསྶནཱ ཨེཀནྟེན སོམསྶསཧ གཏཱཝ ཧུཏྭཱ མགྒེན སདྡྷིཾ གྷཊིཡཏཱིཏི. ཝུཏྟཉྷེཏཾ སལཱ༹ཡཏན ཝིབྷངྒསུཏྟེ –

ཏཏྲ བྷིཀྑཝེ ཡཱ ཚ ནེཀྑམྨསྶིཏཱ ཨུཔེཀྑཱ. ཏཱ ནིསྶཱཡ ཏཱ ཨཱགམྨ ཡཱནི ཚ ནེཀྑམྨསྶིཏཱནི སོམནསྶཱནི. ཏཱནི པཛཧཐ. ཏཱནི སམཏིཀྐམཐ. ཨེཝམེཏེསཾ པཧཱནཾ ཧོཏི. ཨེཝམེཏེསཾ སམཏིཀྐམོ ཧོཏཱིཏི.

ཨཊྛཀཐཱཡཉྩ ཨཊྛསུ སམཱཔཏྟཱིསུ པཐམཱདིནིཙ ཏཱིཎིཛྷཱནཱནི སུདྡྷསངྑཱརེཙ པཱདཀེ ཀཏྭཱ ཝིཔསྶནཾ ཨཱརདྡྷཱནཾ ཙཏུནྣཾ བྷིཀྑཱུནཾ པུབྦབྷཱག ཝིཔསྶནཱ སོམནསྶསཧགཏཱ ཝཱ ཧོཏི. ཨུཔེཀྑཱསཧ གཏཱཝཱཝུཊྛཱནགཱམིནཱིཔན སོམནསྶསཧགཏཱཝ ཧོཏི. ཙཏུཏྠཛ྄ཛྷཱནཱདཱིནི པཱདཀཱནིཀཏྭཱ ཝིཔསྶནཾ ཨཱརདྡྷཱནཾ པཉྩནྣཾ བྷིཀྑཱུནཾ པུབྦབྷཱགཝིཔསྶནཱ པུརིམ སདིསཱཝ. ཝུཊྛཱནགཱམིནཱིཔན ཨུཔེཀྑཱསཧགཏཱཝ ཧོཏི. ཨིདཾ སནྡྷཱཡཡཱ ཚནེཀྑམྨསྶིཏཱ.ལ. པཛཧཐཱཏི ཝུཏྟཾ. ཨཛ྄ཛྷཱསཡཝིསེསེན སཧ མགྒཝུཊྛཱནེཔི ཨེསེཝནཡོ. བལཝཝིཔསྶནཱཀཱལེ ཧི ཝིཔསྶནཱརཏིནཱམ སུཊྛུ པཎཱིཏཏརཱ ཧོཏི. སཀལསརཱིརཾ ཕརམཱནཱ ཨཛ྄ཛྷོཏྠརམཱནཱ པཝཏྟཏི. ཡཐཱཧ –

སུཉྙཱགཱརེ པཝིཊྛསྶ, སནྟཙིཏྟསྶ བྷིཀྑུནོ;

ཨམཱནུསཱི རཏི ཧོཏི, སམྨདྷམྨཾ ཝིཔསྶཏོཏི.

ཏསྨཱ ¶ ཏདཱ པཱདཀཛ྄ཛྷཱནཝིསེསེནཝཱ ཨཛ྄ཛྷཱསཡཝིསེསེན ཝཱ ཝིནཱ ཝིཔསྶནཱ ཨུཔེཀྑཱསཧགཏཱ ན ཧོཏི. ཨེཀནྟེན སོམནསྶསཧགཏཱཝ ཧོཏཱིཏི. ཨེཏྠཔན སབྦཛ྄ཛྷཱནེསུ ཝསཱིབྷཱུཏསྶ ཡཾཀིཉྩི ཨེཀཾ ཛྷཱནཾ པཱདཀཾ ཀཏྭཱ ཏཾ པཱ ཨཉྙཾཝཱ མགྒེཡཾཡཾ ཛྷཱནཾ ཨིཙྪཏི. མགྒཝུཊྛཱནཀཱལེ ཨཛ྄ཛྷཱསཡབལེན ཏཾཏཾཛྷཱནཱནུརཱུཔཾ ཝིཔསྶནཱཡཙ མགྒེཙ ཝེདནཱ པརིཎཱམོ ཝེདིཏབྦོ. ནཔན ཝེདནཱནིཡཱམོནཱམ ཝིསུཾ ཝཏྟབྦོཏི.

༦༧. སངྒཧགཱཐཱཡཾ ཨནུཏྟརཾ ཨཊྛཝིདྷཾ ཙིཏྟཾ ཛྷཱནངྒཡོགབྷེདེན ཨེཀེཀཾ པཉྩདྷཱ ཀཏྭཱ ཙཏྟཱལཱིསཝིདྷནྟི ཙ ཝུཙྩཏཱིཏི ཡོཛནཱ. ཨིདཱནི སབྦཱནི མཧགྒཏཱ ནུཏྟརཙིཏྟཱནི པཉྩཝིདྷེ ཛྷཱན ཀོཊྛཱསེ སངྒཧེཏྭཱ དསྶེཏུཾ ཡཐཱཙ རཱུཔཱཝཙརནྟིཨཱདིམཱཧ. ཡཐཱ རཱུཔཱཝཙརཾ ཙིཏྟཾ པཐམཱདིཛ྄ཛྷཱནབྷེདེ གཡ྄ཧཏི. ཛྷཱན བྷེདསིདྡྷེ པཐམཛ྄ཛྷཱནིཀཙིཏྟཱདིཀེ པཉྩཝིདྷེ ཙིཏྟབྷེདེ སངྒཡ྄ཧཏི, ཏཐཱ ཨནུཏྟརཉྩ ཙིཏྟཾ པཐམཱདིཛ྄ཛྷཱནབྷེདེ སངྒཡ྄ཧཏི. ཨཱརུཔྤཉྩཙིཏྟཾ ཨུཔཀྑེཀགྒཏཱ སངྑཱཏེན པཉྩམཛ྄ཛྷཱནེན ཡུཏྟཏྟཱ པཉྩམེ ཛྷཱནེ པཉྩམཛ྄ཛྷཱནིཀཙིཏྟབྷེདེ སངྒཡ྄ཧཏི. ཏསྨཱ ཨེཀེཀཾ པཏམཱདིཀཾ པཐམཛ྄ཛྷཱནིཀཙིཏྟཱདིཀཾ ཛྷཱནཾ ཛྷཱནཙིཏྟཾ ཨེཀཱདས ཝིདྷཾ ཧོཏི. ཨནྟེཏུ ཨནྟིམབྷཱུཏེ པཉྩམཛ྄ཛྷཱནིཀཙིཏྟབྷེདེཔན ཛྷཱནཾ ཙིཏྟཾ ཏེཝཱིསཏིཝིདྷཾ བྷཝེཏི ཡོཛནཱ. ཨེཏྠཙ ཛྷཱནསདྡེན ཏཾསམྤཡུཏྟཾ ཙིཏྟམེཝ ཝུཙྩཏི. ན ཧི ཛྷཱནཾ ཨེཀཱདསཝིདྷཾཝཱ ཏེཝཱིསཏིཝིདྷཾཝཱ ཧོཏཱིཏི.

[༦༩] ཡཾཔན ཝིབྷཱཝནིཡཾ

‘‘རཱུཔཱཝཙརཙིཏྟཾ པཐམཛ྄ཛྷཱནནྟིཨཱདིནཱ ཝུཙྩཏཱིཏིཙ ཨཱརུཔྤཉྩཱཔི པཉྩམཛ྄ཛྷཱནཝོཧཱརཾ ལབྷཏཱི’’ཏི ཙ ཝུཏྟཾ. ཏཾ ན ཡུཛྫཏི.

ན ཧི ཙིཏྟཾ པཐམཛ྄ཛྷཱནཾ ཧོཏི. ནཙ པཉྩམཛ྄ཛྷཱནཝོཧཱརཾ ལབྷཏཱིཏི.

[༧༠] ཡཱཙ ཨིམིསྶཱགཱཐཱཡཾ ཨཔརཱཔི ཡོཛནཱ ཝུཏྟཱ. སཱཔི ན ཡུཏྟཱཨེཝ.

ཏཐཱ སདྡསྶ པཐམཱདིཛ྄ཛྷཱནབྷེདེཏི པདསྶ པུརཏོ པཋིཏཏྟཱཏི. ཨེཝཾ ཡཐཱ ཝིབྷཛིཏབྦེ ཨེཀདེསེ ཝིབྷཏྟེ སབྦཾ ཨེཀཱུནནཝུཏིཝིདྷཾ ཙིཏྟཾ ཨེཀཝཱིསསཏཾ ཀཏྭཱ ཝིབྷཏྟཾནཱམ ཧོཏི. ཏཐཱ ཝིབྷཛིཏྭཱ ཨིདཱནི ཏཾསངྒཧཾ དསྶེནྟོ ཨནྟིམགཱཐམཱཧ. པུཉྙཾ སཏྟཏིཾསཝིདྷཾ ཧོཏི. ཏཐཱ པཱཀཾ དྭིཔཉྙཱསཝིདྷཾ ཧོཏི. ཨིཏི ཨེཀཱུནནཝུཏིཝིདྷཱནི ཙིཏྟཱནི ཨེཀཝཱིསསཏཾ ཀཏྭཱ བུདྷཱ པཎྜིཏཱ ཨཱཧུ ཀཐེསུཾ. ཀཐེནྟིཝཱ ཝིབྷཛནྟི ཝིཙཀྑཎཱཏི ཝུཏྟཾ ཧོཏཱིཏི.

ཨིཏི པརམཏྠདཱིཔནིཡཱནཱམ ཨབྷིདྷམྨཏྠསངྒཧསྶ

ཙཏུཏྠཝཎྞནཱཡ ཙིཏྟསངྒཧསྶ

པརམཏྠདཱིཔནཱ ནིཊྛིཏཱ.

ཙེཏསིཀསངྒཧ པརམཏྠདཱིཔནཱི

༦༨. ཨེཝཾ ¶ ཙིཏྟངྒཧཾ དསྶེཏྭཱ ཨིདཱནི ཨནུཔཏྟཾ ཙེཏསིཀ སངྒཧཾ དསྶེནྟོ ཙཏཱུཧི སམྤཡོགལཀྑཎེཧི སཧ ཝཙནཏྠཉྩ སརཱུཔཏྠཉྩ ཏཱཝ དསྶེཏུཾ ཨཱདི གཱཐམཱཧ. ཏཏྠ ཨེཀུཔྤཱདནིརོདྷཱཙཨེཀཱལམྦཎཝཏྠུཀཱཏི ཙཏུསྶམྤཡོགལཀྑཎདསྶནཾ. ཙེཏོ ཡུཏྟཱཏི ཝཙནཏྠདསྶནཾ. ཙེཏསིཡུཏྟཱ ཙེཏསཱཝཱ ཡུཏྟཱ ཙེཏསིཀཱཏི དསྶནཏོ. དྭིཔཉྙཱསདྷམྨཱཏི སརཱུཔདསྶནཾ. ཙེཏསིཀཱཏི པན སིདྡྷཔད དསྶནཾ. ཏཏྠ དྷམྨཱནཾ ཨནཱགཏབྷཱཝསངྑཱཏཱ པུབྦནྟཏོ ཨུདྡྷཾ པཛྫནཾ གམནཾ སརཱུཔཏོ པཱཏུབྷཝནཾ ཨུཔྤཱདོ. ཛཱཏཱིཏི ཝུཏྟཾ ཧོཏི. སབྦེཔིཧི སངྑཏ དྷམྨཱ ཨནཱགཏབྷཱཝཔུབྦཱ ཨེཝ ཧོནྟི. ཏཏོ པཙྩཡསཱམགྒིཾ ལབྷིཏྭཱ པཙྩུཔྤནྣབྷཱཝཾ གཙྪནྟི. ཏཏོ ནིརུཛ྄ཛྷིཏྭཱ ཨཏཱིཏབྷཱཝཾ གཙྪནྟཱིཏི. ནིརུཛ྄ཛྷནཾ ནིརོདྷོ. སརཱུཔཝིནཱསོ བྷངྒོ ཨནིཙྩཏཱ མརཎནྟི ཝུཏྟཾ ཧོཏི. ཡཱ ཙིཏྟསྶ ཛཱཏི, སཱཡེཝ ཕསྶཱདཱིནཾ. ཡཱ ཙིཏྟསྶ ཛརཱ, ཡཾ ཙིཏྟསྶ མརཎཾ, ཡཾ ཙིཏྟསྶ ཨཱརམྨཎཾ ཝཏྠུ. ཏདེཝ ཕསྶཱདཱིནནྟིཨཱདིནཱ ཧེཊྛཱ ཝུཏྟནཡེན ཨེཀོ ཨུཔྤཱདོ ཨེཏེསནྟི ཨེཀུཔྤཱདཱ. ཨེཀོ ནིརོདྷོ ཨེཏེསནྟི ཨེཀནིརོདྷཱ. ཨེཀུཔྤཱདཱཙ ཏེ ཨེཀནིརོདྷཱཙཱཏི ཨེཀུཔྤཱདནིརོདྷཱ. ཨུཏྟརཔདེ ཨེཀསདྡསྶ ལོཔོ. ཨེཝཾ པརཏྠཔི. ཨེཀཾ ཨཱལམྦཎཾ ཨེཏེསནྟི ཨེཀཱལམྦཎཱ. ཨེཀཾ ཝཏྠུ ཨེཏེསནྟི ཨེཀཝཏྠུཀཱ. ཨེཀཱལམྦཎཱཙ ཏེ ཨེཀཝཏྠུཀཱཙཱཏི ཨེཀཱལམྦཎཝཏྠུཀཱ. ཨཱལམྦཎཾ པནེཏྠ ཨེཀཙིཏྟསྶཔི བཧུདེཝ ཧོཏི. ཨེཀཏྟཾཔན ཨུཔནེཏྭཱ ཨེཀཾ ཨཱལམྦཎནྟི ཝུཏྟནྟི དཊྛབྦཾ.

[༧༡] ཝིབྷཱཝནིཡཾ པན

‘‘ཨེཀཏོ ཨུཔྤཱདོཙ ནིརོདྷོཙ ཡེསཾ, ཏེ ཨེཀུཔྤཱདནིརོདྷཱ’’ཏི ཝུཏྟཾ. ཏཾ ན སུནྡརཾ.

ན ཧི ཨེཀཀྑཎེ ཨེཀཏོ ཨུཔྤཱདམཏྟེན ཨེཀུཔྤཱདཏཱ ཨིདྷ ཨདྷིཔྤེཏཱ. ཨཐཁོ ཝུཏྟནཡེནེཝ ཨདྷིཔྤེཏཱ. ཝུཏྟཉྷེཏཾ མཱུལཊཱིཀཱཡཾ –

ཨེཀཀལཱཔཔརིཡཱཔནྣཱནཾ རཱུཔཱནཾསཧེཝཨུཔྤཱདཱདིཔྤཝཏྟིཏོ

ཨེཀསྶཀལཱཔསྶཨུཔྤཱདཱདཡོ ཨེཀེཀཱཝ ཧོནྟཱིཏི.

ཏཏྲཱཡཾ ཡོཛནཱ. ཨེཀུཔྤཱདནིརོདྷཱཙ ཨེཀཱལམྦཎཝཏྠུཀཱ ཙ ཧུཏྭཱ ཡེདྷམྨཱ ཙེཏོཡུཏྟཱ. ཏེ དྭིཔཉྙཱསདྷམྨཱ ཙེཏསིཀཱ མཏཱཏི. བྷཱཝཔདྷཱནཾཔིཝཱ ཨེཏྠ ཡུཏྟཾ. ཝིསེསནེཙ ནིསྶཀྐཝཙནཾ. ཨེཀུཔྤཱདནིརོདྷབྷཱཝེན ཨེཀཱལམྦཎ ཝཏྠུཀ བྷཱཝེནཙ ཡེདྷམྨཱ ཙེཏོཡུཏྟཱ. ཏེ དྭིཔཉྙཱསདྷམྨཱ ཙེཏསིཀཱནཱམ མཏཱ ཉཱཏཱཏི. ཨེཏྠཙ ཡེ ཙེཏོཡུཏྟཱ. ཏེ ཙེཏསིཀཱཏི ཝུཏྟེ ཙིཏྟསྶ སཧཛཱཏཔཙྩཡུཔྤནྣརཱུཔཱནིཔི ཏདཱཡཏྟཝུཏྟིཏཱཡ ཨེཀནྟེན ཙིཏྟསམྦནྡྷཱིནི ཧུཏྭཱ ཙེཏོཡུཏྟཱནི ཙེཏསིཀཱནི ནཱམ སིཡུཾ. ཏསྨཱ ཏེསཾ ནིཝཏྟནཏྠཾ ཨེཀུཔྤཱདནིརོདྷཱཙ, ཨེཀཱ ལམྦཎཝཏྠུཀཱཏི ཝུཏྟཾ. ཏཱནིཧི ཙིཏྟེན ཁཎཏོ སཧུཔྤནྣཱནིཔི བྷིནྣསནྟཱནཏྟཱ ཡཱ ཙིཏྟསྶ ཛཱཏི, སཱཨེཝ ཏེསནྟི ཨིམཾ ལཀྑཎཾཔི ནཱནུབྷོནྟི. ཨཉྙཾཧི རཱུཔསནྟཱནཾ. ཨཉྙཾ ཨརཱུཔསནྟཱནནྟི. ཕསྶཱདཱིནཾཔན ཨུཔྤཱདམཏྟམེཝ ཙིཏྟེན སཧ ཨེཀཾ ནཧོཏི. ཨཐཁོ ནིརོདྷོཔི ཨཱལམྦཎཾཔི ཝཏྠུཔི སབྦཾ ཨེཀམེཝཱཏི ཉཱཔནཏྠཾ ཨེཀ ནིརོདྷཱདིགྒཧཎཾ ཝུཏྟནྟི དཊྛབྦཾ. ན ཧི ཨེཝཾ ཨཝུཏྟེ སཀྐཱ ཏཐཱ ཛཱནིཏུནྟི. ཡསྨཱཔན ཡཐཱ བཧུཛནསནྟཀོ ཨེཀོ གོཎོ ཏིསྶསྶ གོཎོ དཏྟསྶ གོཎོཏི ཨེཝཾ ཝིསུཾ ཝིསུཾཔི ཝཏྟབྦོཡེཝ ཧོཏི. ཨེཝམེཝཾ ཨུཔྤཱདོ ནིརོདྷོཙ ཨེཀསྨིཾ རཱུཔཱརཱུཔཀལཱཔེ ཨེཀོཝསམཱནོཔི ཕསྶསྶ ཨུཔྤཱདོ ཝེདནཱཡ ཨུཔྤཱདོ པཐཝིདྷཱཏུཡཱ ཨུཔྤཱདོ ཨཱཔོདྷཱཏུཡཱ ཨུཔྤཱདོཏི ཨེཝམཱདིནཱ ནཡེན ཝིསུཾ ཝིསུཾཔི ཝཏྟབྦོཡེཝ. ཏསྨཱ སུཏྟནྟེསུ –

ཝེདནཱཡ ཨུཔྤཱདོ པཉྙཱཡཏི. ཝཡོ པཉྙཱཡཏི. ཋིཀཱཡ ཨཉྙཏྠཾ པཉྙཱཡཏི. སཉྙཱཡ. སངྑཱརཱནཾ. ཝིཉྙཱཎསྶ. ལ. པཉྙཱཡཏཱིཏི ཝུཏྟཾ. ཏཐཱ ཡོ བྷིཀྑཝེ པཐཝིདྷཱཏུཡཱ ཨུཔྤཱདོ ¶ ཋིཏིཨབྷིནིབྦཏྟི པཱཏུབྷཱཝོ. དུཀྑསྶེསོ ཨུཔྤཱདོ རོགཱནཾ ཋིཏི ཛརཱ མརཎསྶ པཱཏུབྷཱཝོ. ཡོ བྷིཀྑཝེ ཨཱཔོདྷཱཏུཡཱ. ཡོ བྷིཀྑཝེ ཏེཛོ དྷཱཏུཡཱ. ཡོ བྷིཀྑཝེ ཝཱཡོདྷཱཏུཡཱ. ཡོ བྷིཀྑཝེ ཙཀྑུསྶ.ལ. མནསྶ ཨུཔྤཱདོ.ལ. ཛརཱམརཎསྶ པཱཏུབྷཱཝོཏི.

ཝུཏྟནྟི དཊྛབྦཾ. ཨིཏརཐཱ ཛཱིཝིཏིནྡྲིཡཱདཱིནཔི ཨེཀསྨིཾ ཀལཱཔེ བཧུབྷཱཝོ ཝཏྟབྦོ སིཡཱ. ཡོ ཨརཱུཔཱིནཾ དྷམྨཱནཾ ཨཱཡུ ཋིཏི ཨཝཊྛིཏཱིཏི ཧི ཝུཏྟཾ. ཏཐཱ ཝིཀཱརརཱུཔཱནཾ. སབྦེསཾཔིཝཱ ཙཀྑཱདཱིནཾ ཨུཔཱདཱརཱུཔཱནཾ. ཙཏུནྣཾ ཙཧཱབྷཱུཏཱནཾ ཨུཔཱདཱཡརཱུཔནྟིཙ ཙཏུནྣཾ མཧཱབྷཱུཏཱནཾ ཨུཔཱདཱཡ པསཱདོཏིཙ ཝུཏྟནྟི. ཀཱཡལཧུཏཱ ཙིཏྟལཧུཏཱདཡོཔན ཨཏྠཝིསེསདཱིཔནཏྠཾ དྭིདྷཱ བྷིནྡིཏྭཱ ཝུཏྟཱ. སོཙ ཨཏྠཝིསེསོཨུཔརི ཨཱཝི བྷཝིསྶཏཱིཏི. ཨཡམེཏྠཔརམཏྠདཱིཔནཱ.

[༧༢] ཝིབྷཱཝནིཡཾ པན

ཨིམམཏྠཾ ཨསལླཀྑེཏྭཱ ཡཾ ཝུཏྟཾ ‘‘ཡདི ཨེཀུཔྤཱདམཏྟེནེཝ ཙེཏོཡུཏྟཱཏི ཨདྷིཔྤེཏཱ. ཏདཱ ཙིཏྟེན སཧ ཨུཔྤཛྫམཱནཱནཾ རཱུཔདྷམྨཱནམྤི ཙེཏོཡུཏྟཏཱ ཨཱཔཛྫེཡྻཱཏི ཨེཀ ནིརོདྷགྒཧཎཾ. ཨེཝམྤི ཙིཏྟཱནུཔརིཝཏྟིནོ ཝིཉྙཏྟིདྭཡསྶ པསངྒོ ནསཀྐཱ ནཱིཝཱརེཏུཾ. ཏཐཱ ཨེཀཏོ ཨུཔྤཱདོ ཝཱ ནིརོདྷོཝཱ ཨེཏེསནྟི ཨེཀུཔྤཱདནིརོདྷཱཏི པརིཀཔྤེནྟསྶ པུརེཏརམུཔྤཛྫིཏྭཱ ཙིཏྟསྶ བྷངྒཀྑཎེ ནིརུཛ྄ཛྷམཱནཱནམྤི རཱུཔདྷམྨཱནནྟི ཨེཀཱལམྦཎགྒཧཎཾ. ཡེ ཨེཝཾ ཏིཝིདྷལཀྑཎཱ. ཏེ ནིཡཱམཏོ ཨེཀཝཏྠུཀཱ ཡེཝཱཏི དསྶནཏྠཾ. ཨེཀཝཏྠུཀགྒཧཎནྟི. ཨལམཏིཔཔཉྩེནཱ’’ཏི. སབྦཾ ཏཾ ནིརཏྠཀམེཝ.

༦༩. ཀཐཉྩ དྭིཔཉྙཱས ཧོནྟཱིཏི པུཙྪིཏྭཱ པཐམཾ དྭིཔཉྙཱས སརཱུཔཾ ཏཱིཧི རཱསཱིཧི ཝིབྷཛིཏྭཱ དསྶེནྟོ ཀཐནྟིཨཱདིམཱཧ. ཏཏྠ ཕུསཏཱིཏི ཕསྶོ. ཕུསནྟི སམྤཡུཏྟཀཱ དྷམྨཱ ཨེཏེནཱཏི ཕསྶོ. ཕུསནམཏྟམེཝཝཱ ཨེཏནྟི ཕསྶོ. ཕུསནཉྩེཏྠ ཨཱརམྨཎསྶ ཨིཊྛཱནིཊྛརསཾ ཨཱཧཙྩ ཨུཔཧཙྩ གཧཎཾ དཊྛབྦཾ. ཡཏོ ཏདནུབྷཝནྟི ¶ ཝེདནཱ པཱཏུབྷཝཏི. ཕསྶཔཙྩཡཱ ཝེདནཱཏི ཧི ཝུཏྟཾ. སྭཱཡཾ ཕུསནལཀྑཎོ. ནནུཙཱཡཾ ཨརཱུཔདྷམྨོ. ནཙ ཨརཱུཔདྷམྨཱ ཨཔྤཊིགྷསབྷཱཝཱ ཀིཉྩི ཕུསནྟཱིཏི. སཙྩཾ, ཨཡཾཔན ཕུསནཱ ཀཱརེནཙ པཝཏྟཏི. ཡཉྩ ཕུསནྟེཧི སཱདྷེཏབྦཾ. ཏཉྩ ཀིཙྩཾ སཱདྷེཏི. ཏསྨཱ ཨཡཾ ཕསྶོཏིཙ ཕུསནལཀྑཎོཏིཙ ཝུཏྟོ. ཀིཾཔན སཱདྷེཏཱིཏི. ཨཱརམྨཎརསཱནུརཱུཔཾ ཙིཏྟསྶ ཝིཀཱརཔཏྟི. ཝེདནཱཝིསེསུཔྤཏྟིཾཝཱ. ཨཡཉྩ ཨཏྠོ ཨམྦིལཁཱདཱདིཀེ དིསྭཱ ཨཔརསྶ ཁེལུ༹པྤཱདཱདཱིསུ པཱཀཊོཏི.

[༧༣] ཝིབྷཱཝནིཡཾ པན

‘‘ཁེལུ༹པྤཱདཱདིཝིཡ དཊྛབྦོ’’ཏི ཝུཏྟཾ. ཨེཝཉྩསཏི ཨིདཾ ཨུཔམཱ མཏྟཾ སིཡཱ. ཨཏིཔཱཀཊཱཡཔན ཕསྶཔྤཝཏྟིཡཱ དསྶན མིདནྟི དཊྛབྦཾ.

༧༠. ཝེདཡཏཱིཏི ཝེདནཱ. ཨཱརམྨཎརསཾ ཨནུབྷཝཏི. ཨཝིདིཏཾཝཱ ཨཱརམྨཎརསཾ སམྤཡུཏྟཱནཾ ཏཾསམངྒིཔུགྒལཱནཾ ཝཱ ཝིདིཏཾཔཱཀཊཾ ཀརོཏཱིཏི ཨཏྠོ. ཝིནྡནྟིཝ ཨེཏཱཡ སཏྟཱ སཱཏཾཝཱ ཨསཱཏཾཝཱ ལབྷནྟཱིཏི ཝེདནཱ. ཝེདཡིཏམཏྟམེཝཝཱ ཨེཏནྟི ཝེདནཱ. པཱལི༹ཡཾཔན –

ཝེདཡཏི ཝེདཡཏཱིཏི ཁོ བྷིཀྑཝེ ཏསྨཱ ཝེདནཱཏི ཝུཙྩཏི. ཀིཉྩ ཝེདཡཏི, སུཁཾཔི ཝེདཡཏི. དུཀྑཾཔི ཝེདཡཏི. ཨདུཀྑམསུཁཾཔི ཝེདཡཏཱིཏི ཝུཏྟཾ.

ནནུ སབྦེཔི ཙིཏྟཙེཏསིཀཱ དྷམྨཱ ཨཱརམྨཎརསཱནུབྷཝནཔྤ ཀཏིཀཱཨེཝཱཏི ཏེཔི ཝེདནཱནཱམ སིཡུནྟི. ནསིཡུཾ. ཏེཧི ཀིཙྩནྟརབྱཱཝཊཱ ཧོནྟི. ཨཱརམྨཎརསཾ ཨུཛུཾ ཨནུབྷཝིཏུཾ ནསཀྐོནྟི. ཨཏྟནོ ཨཏྟནོ ཀིཙྩཾ ཀརོནྟཱཝ ཨེཀདེསམཏྟེན ཨནུབྷཝནྟི. ཝེདནཱཡེཝཔན ཨནཉྙཀིཙྩཏཱཡ ཨནུབྷཝནཀིཙྩེ ཨཱདྷིཔཙྩཡོགཏཱཡཙ ཨིསྶརབྷཱཝེན ཨནུབྷཝཏཱིཏི སཱཨེཝ ཝེདནཱནཱམ བྷཝིཏུཾ ཨརཧཏཱིཏི. ཨེཝཉྩཀཏྭཱ རཱཛགྒབྷོཛན རསཱནུབྷཝནེ ཏེསཾ སཱུདསདིསཏཱ ཝེདནཱཡཨེཝཙ རཱཛསདིསཏཱ ཝུཏྟཱཏི.

༧༡. སཉྫཱནཱཏཱིཏི ¶ སཉྙཱ. པུན ཛཱནནཏྠཾ སཉྙཱཎཾ ཀརོཏཱིཏི ཨཏྠོ. ཨཡཉྷི པུབྦེ གཧིཏསཉྙཱནེན སཉྫཱནནཀཱལེཔི པུན ཛཱནནཏྠཾ སཉྙཱཎཾ ཀརོཏིཡེཝཱཏི. སཱཧི ཨེཝཾ པུནཔྤུནཾ སཉྙཱཎཾ ཀཏྭཱ ཨུཔྤཛྫམཱནཱ ཐིརསཉྙཱབྷཱཝཾ པཏྭཱ ཡཱཝཏཱཡུཀཾཔི བྷཝནྟརཾ པཏྭཱཔི སཏྟཱནཾ ཨཔྤམུཊྛབྷཱཝཾ སཱདྷེཏི. མིཙྪཱ བྷིནིཝེསསཉྙཱབྷཱཝཾ པཏྭཱཙ ཨིམེ སཏྟེ སབྦཉྙུ བུདྡྷེཧིཔི བོདྷེཏུཾ ཨསཀྐུཎེཡྻེ ཀརོཏཱིཏི. ཏཐཱཧི སཱ པུན སཉྫཱནནཏྠཾ ནིམིཏྟཀརཎེ དཱརུཏཙྪཀསདིསཱཏིཙ. ཡཐཱགཧིཏ ནིམིཏྟཝསེན ཨབྷིནིཝེསཀརཎེ ཧཏྠིདསྶཀ ཨནྡྷསདིསཱཏིཙ. ཨུཔཊྛིཏཝིསཡགྒཧཎེ ཏིཎཔུརིསཀེསུ མིགཔོཏཀསདིསཱཏིཙ ཝུཏྟཱཏི. པཱལི༹ཡཾཔན –

སཉྫཱནཱཏི སཉྫཱནཱཏཱིཏིཁོ བྷིཀྑཝེ ཏསྨཱ སཉྙཱཏི ཝུཙྩཏི. ཀིཉྩ སཉྫཱནཱཏི. ནཱིལཾཔི སཉྫཱནཱཏི. པཱིཏཀཾཔི སཉྫཱནཱཏཱིཏིཨཱདི ཝུཏྟནྟི.

༧༢. ཙེཏཡཏཱིཏི ཙེཏནཱ. སམྤཡུཏྟདྷམྨེ ཏསྨིཾ ཏསྨིཾ ཨཱརམྨཎེཝཱ ཀིཙྩེཝཱ ཨབྷིསནྡཧཏི པུནཔྤུནཾ གྷཊེཏི, ཏཏྠ པབནྡྷཝསེན ནིརནྟརཾ པཝཏྟམཱནེ ཀརོཏཱིཏི ཨཏྠོ. པཀཔྤེཏི ཝཱ ཏེ. སཾཝིདཧཏི ཨཱརམྨཎཔཊིལཱབྷཱཡཝཱ ཀམྨསིདྡྷིཡཱ ཨབྷིསངྑརོཏི. ཨཱཡཱུཧཏིཝཱ ཏེ. ཨཱརམྨཎེ སམྤིཎྜེཏི ཨེཀཏོ སམོ སརནྟེ ཀརོཏཱིཏི ཨཏྠོ. ཏཐཱཧི སཱ ཨཱཡཱུཧནརསཱཧིཙ སཾཝིདྷཱནཔཙྩུཔཊྛཱནཱཏིཙ ཝུཏྟཱ. ཏཱཡཧི ཏསྨིཾ ནིརནྟརཾ ཨུསྶུཀྐན བྱཱཔཱརཝསེན པཝཏྟམཱནཱཡ ཏཾ སམྤཡུཏྟཱཔི ཨཏྟནོ ཨཏྟནོ ཀིཙྩཾ ཀུརུམཱནཱ ཏསྨིཾ ཏཐེཝ པཝཏྟནྟཱིཏི. ཏེནེཝ སཱ སཀིཙྩ པརཀིཙྩ སཱདྷཀ ཛེཊྛསིསྶ མཧཱཝཌྜྷཀི ཨཱདིསདིསཱཏི ཝུཏྟཱཏི.

[༧༤] ཝིབྷཱཝནིཡཾ པན

ཙེཏེཏི སངྑཏཱབྷིསངྑརཎེ བྱཱཔཱརམཱཔཛྫཏཱིཏི ཝཏྭཱ ཏདཏྠསཱདྷནཏྠཾ ཡཾ ཝུཏྟཾ ‘‘ཝིབྷངྒེ སུཏྟནྟབྷཱཛནིཡེ སངྑཱ རཀྑནྡྷཾ ¶ ཝིབྷཛནྟེན སངྑཏམཏིསངྑརོནྟཱིཏི སངྑཱརཱཏི ཝཏྭཱ’’ཏི. ཏཾ ན ཡུཛྫཏི.

ན ཧི ཝིབྷངྒེ སུཏྟནྟབྷཱཛནིཡེ སངྑཏམ བྷིསངྑརོནྟཱིཏི སངྑཱརཱཏི ཝུཏྟཾ ཨཏྠི. ཁནྡྷསཾཡུཏྟཀེ པནེཏཾ ཝུཏྟནྟི.

༧༣. ཨེཀཏྟཱརམྨཎསངྑཱཏོ ཨགྒོ ཀོཊྛཱསོ ཀོཊི ཝཱ ཨེཏསྶཱཏི ཨེཀགྒཾ. ཙིཏྟཾ, ཏསྶ བྷཱཝོ ཨེཀགྒཏཱ. ཨཱརམྨཎཉྷི ནཱམ ཨེཀཾཔི ནཱནཱསབྷཱཝཾ ཧོཏི. ཏསྨཱ ཏསྶ ཨེཀསྶཔི ནཱནཱསབྷཱཝེསུ ཝིཀྑེཔཾ ཨཔཏྭཱ ཨེཀསྨིཾ སབྷཱཝེ ཁཎམཏྟཾཔི པཝཏྟསྶ ཙིཏྟསྶ ཡོནིཙྩལཱཀཱརོ ཨཏྠི ཨཡཾ ཏསྨིཾ ཨེཀགྒཱབྷིདྷཱནསྶ ཨེཀགྒབུདྡྷིཡཱཙ པཝཏྟིཧེཏུབྷཱཝེན གཡ྄ཧཏཱིཏི. ཏེ ནེཝ ཧི སཱ ནིཝཱཏེ དཱིཔཙྩཱིནཾ ཋིཏིཝིཡ ཙེཏསོ ཋིཏཱིཏི དཊྛབྦཱཏི ཝུཏྟཱ.

[༧༥] ཝིབྷཱཝནིཡཾ པན

‘‘ཨེཀཾ ཨཱརམྨཎཾ ཨགྒཾ ཨིམསྶཱཏི ཨེཀགྒ’’ནྟི ཝུཏྟཾ. ཏཏྠཔི ཨགྒསདྡོ ཀོཊྛཱསེཝཱ ཀོཊིཡཾཝཱ པཝཏྟོཏི ཡུཏྟོ. ཀེཙིཔན ཨཱརམྨཎེ པཝཏྟོཏི ཝདནྟི. ཏཾ ན སུནྡརཾ.

ན ཧི ཨགྒསདྡོ ཨཱརམྨཎཔརིཡཱཡོ ཀཏྠཙི དིཊྛོཏི.

༧༤. ཛཱིཝནྟི སམྤཡུཏྟཱདྷམྨཱ ཨེཏེནཱཏི ཛཱིཝིཏཾ. ཨིནྡོཏི ཨིསྶརོ. ཨིདྷ པན ཨིསྶརབྷཱཝོ ཝུཙྩཏི. ཨིནྡཾ ཨིསྶརབྷཱཝཾ ཀཱརེཏཱིཏི ཨིནྡྲིཡཾ. ཛཱིཝིཏཉྩ ཏཾ ཨིནྡྲིཡཉྩཱཏི ཛཱིཝིཏིནྡྲིཡཾ. ཏཉྷི མཡཱ ཝིནཱ ཏུམྷཱཀཾ ཛཱིཝིཏཾ ནཏྠི. ཏསྨཱ ཏུམྷཱཀཾ ཛཱིཝནཀིཙྩེ མཾ ཨིསྶརཾ ཀརོཐཱཏི ཝདནྟམིཝ སཧཛཱཏདྷམྨེ ཨབྷིབྷཝིཏྭཱ པཝཏྟཏཱིཏི. ཏཐཱ ཧི ཏཾ པཝཏྟསནྟཏཱདྷིཔཏེཡྻནྟི ཙ པདུམུཔྤ ལཱནུཔཱལཀམུདཀཾ ཝིཡཱཏིཙ ཝུཏྟཾ. ཏཏྠ ཡཱཝ ཁནྡྷཔརིནིབྦཱནཱ ཨནུཔྤབནྡྷཝསེན པཝཏྟམཱནཱ ཙིཏྟསནྟཏི པཝཏྟསནྟཏིནཱམ. ཨདྷིཔཏིབྷཱཝོ ཨཱདྷིཔཏེཡྻཾ. པཝཏྟསནྟཏིཡཾ ཨཱདྷིཔཏེཡྻཾ ཨསྶཱཏི སམཱསོ. པུནཔྤུནཾ ནིརུདྡྷཾཔི ཧི ཙིཏྟསནྟཱནཾ ཏསྶ བལེན པུནཔྤུནཾ ཛཱིཝནྟཾ ཧུཏྭཱ ཡཱཝ ཁནྡྷཔརིནིབྦཱནཱ པུནཔྤུནཾ པཝཏྟཏིཡེཝ.

ན ¶ ཧི ཛཱིཝིཏརཧིཏེསུ ཨནིནྡྲིཡབདྡྷདྷམྨེསུ ཏཱདིསོ པཝཏྟསནྟཏི ཝིསེསོནཱམ ཨཏྠཱིཏི.

༧༥. མནསྨིཾ ཨཱརམྨཎཾ ཨསུཉྙཾ མནཾཝཱ ཨཱརམྨཎེ ནིཙྩནིནྣཾ ཀརོཏཱིཏི མནསིཀཱརོ. སོ པན ཏིཝིདྷོ ཝཱིཐིཔཊིཔཱདཀོ ཛཝནཔཊིཔཱདཀོཨཱརམྨཎཔཊིཔཱདཀོཏི. ཏཏྠ པཉྩདྭཱརཱཝཛྫནཾ ཝཱིཐི པཊིཔཱདཀོ ནཱམ. ཏཉྷི པཉྩདྭཱརིཀ ཙིཏྟསནྟཏིཾ ཨཱརམྨཎེ པཊིཔཱདེཏི ཡོཛེཏཱིཏི. མནོདྭཱརཱཝཛྫནཾ ཛཝནཔཊིཔཱདཀོ ནཱམ. ཏཾཔི ཛཝན སནྟཏིཾ ཨཱརམྨཎེ པཊིཔཱདེཏི ཡོཛེཏཱིཏི. ཨིདམེཝ དྭཡཾ ཏཏྠ ཏཏྠ ཡོནིསོ མནསིཀཱརོཏིཙ ཨཡོནིསོ མནསིཀཱརོ ཏིཙ ཝུཏྟཾ. ཏཉྷི པཀཏིཡཱ སམུདཱཙིཎྞནིནྣནིཡཱམིཏཱདཱིཧི པཙྩཡེ ཧི ཨུཔཏྠམྦྷིཏཾ ཧུཏྭཱ ཙིཏྟསནྟཱནཾ ཡོནིསོ ཨཡོནིསོཝཱ ཨཱརམྨཎེ ནིནྣཾ ཀརོཏཱིཏི. པཊིསནྡྷིཙིཏྟཏོ པན པཊྛཱཡ པཝཏྟམཱནཱ ཙིཏྟསནྟཏི ཨཱརམྨཎཾ མུཉྩིཏྭཱ ནིརུཛ྄ཛྷིཏྭཱཔི པུན ཨུཔྤཛྫམཱནཱ ཡསྶ དྷམྨསྶ ཝསེན ཏསྨིཾཡེཝ ཨཱརམྨཎེ ཨུཔྤཛྫཏི ཨསཏི ཀཱརཎཝིསེསེ. སོ ཨཱརམྨཎཔཊིཔཱདཀོནཱམ. ཨཡམིདྷཱ དྷིཔྤེཏོ. ཨཡཉྷི ཨཱརམྨཎཾ ཙིཏྟེ ཙིཏྟཾཝཱ ཨཱརམྨཎེ པཊིཔཱདེཏི ཡོཛེཏཱིཏི. ཏཐཱ ཧི ཨཡཾ སཱརཎ ལཀྑཎོཏི ཙ སམྤཡུཏྟཱནཾ ཨཱརམྨཎེན སཾཔཡོཛནརསོཏིཙ ཨཱརམྨཎཔཊིཔཱདཀཊྛེན སམྤཡུཏྟཱནཾ སཱརཐཱིཝིཡ དཊྛབྦོཏིཙ ཝུཏྟོ. ཏཏྠ སཱརཎལཀྑཎོཏི སཱརཐཱིཝིཡ ཨསྶཱནཾ སམྤཡུཏྟདྷམྨཱནཾ ཨུཛུཾ ཨཱརམྨཎཱབྷིམུཁཾ པཝཏྟཡནལཀྑཎོཏི ཨཏྠོ. སམཾ དྷཱརེནྟིཏི སཱདྷཱརཎཱ. སབྦེསཾ ཙིཏྟཱནཾ སཱདྷཱརཎཱ སབྦཙིཏྟསཱདྷཱརཎཱ.

༧༦. ཝིཏཀྐེཏཱིཏི ཝིཏཀྐོ. ཏཐཱ ཏཐཱ སངྐཔྤེཏྭཱ ཨཱརམྨཎཾ ཨཱརོཧཏཱིཏི ཨཏྠོ. ཏསྨིཾ པན ཏཾ ཀཐཱ ཨཱརོཧནྟེ སམྤཡུཏྟདྷམྨཱཔི ཏཾ ཨཱརོཧནྟི. ཏདཱ སོཡེཝ ཏེ ཨཱརམྨཎཾ ཨབྷིནིརོཔེནྟོནཱམ ཧོཏཱིཏི ཀཏྭཱ ཨཱརམྨཎཱ བྷིནིརོཔནལཀྑཎོ ཝིཏཀྐོཏི ཝུཏྟོ. རཱཛཝལླབྷཾ ནིསྶཱཡ ཛནཔདགཱསིནོ རཱཛགེཧཱརོཧནཉྩེཏྠ ནིདསྶནཾ. ཨཝིཏཀྐཾཔི ཧི ཙིཏྟཾ སཝིཏཀྐདྷམྨསནྟཱནེ ཝིཏཀྐེན སཧ པཝཏྟཔརིཙཡ བལེན ཨཱརོཧནཏོ ཝིཏཀྐེན ཨཏིནིརོཝིཏམེཝནཱམ ཧོཏཱིཏི. ཨཔིཙ, ¶ ཨཝིཏཀྐཾཔི པཉྩཝིཉྙཱཎཾ ཝཏྠཱརམྨཎ སངྒྷཊྚནཝསེན ཨཱརོཧཏི. དུཏཱིཡཛ྄ཛྷཱནཱདཱིནིཙ ཨུཔཙཱརབྷཱཝནཱཝསེན ཨཱརོཧནྟི. མཛ྄ཛྷིམཊྛཀཐཱཡཾ པན ཀིཾཝཱ ཨེཏཱཡ ཡུཏྟིཡཱཏི ཝཏྭཱ ཨིམམཏྠཾ དསྶེཏི. ཙིཏྟཾཔི ཧི ཨཱརམྨཎཾ ཨཱརུཧཏིཡེཝ. ཏསྶ པན ནིཙྩཾ སཧཱཡོ མནསིཀཱརོ. ཏསྨིཉྷི ཨསཏི ཏཾ ནིཡཱམཀརཧི ཏཱ ནཱཝཱཝིཡ ཡཾཝཱཏཾཝཱ ཨཱརམྨཎཾ གཧེཏྭཱ པཝཏྟེཡྻཱཏི. ཨིཏི པཉྩཝིཉྙཱཎཾ མནསིཀཱརསཧཱཡཾ ཧུཏྭཱ ཨཏྟནོ ཨཱརམྨཎཝིཛཱནནསཏྟིཝསེནེཝ ཨཱརམྨཎཾ ཨཱརོཧཏི. ཨཀུསལཾ པཏྭཱ པན ཙིཏྟཾཔི ལོབྷཱདཡོཔི ཨཱརམྨཎཱརུཧནེ ཐཱམཝཏཱ ཨེཝ ཧོནྟི. པཱཔསྨིཾ རམཏེ མནོཏི ཧི ཝུཏྟཾ. དུཏཱིཡཛ྄ཛྷཱན ཙིཏྟཱདཱིནིཙ མནསིཀཱར ཝཱིརིཡསྶཏཱིནཾཔི ཝསེན ཨཱརོཧནྟི. ཝིཏཀྐོ པན ཏཐཱ ཏཐཱ སངྐཔྤེཏྭཱ ཨཏྟསཧིཏེ དྷམྨེ ཨཱརམྨཎཱརུཧནེ སུཊྛུཏརཾ བལཝནྟེ ཀརོཏི. ཨིཏི ཏསྨིཾ ཀིཙྩེ ཨཉྙེསཾ སཱབྷིསཡབྱཱཔཱརཏཱཡཨེཝ ཨཡཾ ཝིཏཀྐོཏི ཝུཏྟོཏི. ཨེཝཾ པན ཝཏྟབྦཾ. ནནུ ཨཉྙེཔི ཨརཱུཔདྷམྨཱ སཱརམྨཎསབྷཱཝཱ ཨཱརམྨཎཾ ཨཱརོཧནྟི. ཨཐ ཙ པན ཀསྨཱ ཨཡམེཝ ཝིཏཀྐོཏི ཝུཏྟོཏི. ཨཉྙེསཾ པན ཨཱརུཧནཾ ཀིཙྩནྟརཡོགཝསེནེཝ སིདྡྷཾ. ཨིམསྶ པན ཨིཏོ ཨཉྙཾ ཀིཙྩཾ ནཱམ ནཏྠི. ཏསྨཱ ཨཡམེཝ ཏཐཱ ཝུཏྟོཏི.

༧༧. ཝིཙརཏཱིཏི ཝིཙཱརོ. ཝིཙཱརེཏིཝཱ སམྤཡུཏྟཀེདྷམྨེ, ཏེ ཝཱ དྷམྨཱ ཝིཙརནྟི ཨེཏེནཱཏི ཝིཙཱརོ. ཝིཙརཎཉྩེཏྠ ཝིཏཀྐཱ རུལ༹ྷེ ཏསྨིཾཡེཝ ཨཱརམྨཎེ སབྷཱཝཱཀཱརཔཱཏུབྷཱཝཏྠཾ པུནཔྤུནཾ ཨནུམཛྫནཝསེན པཝཏྟནཾ དཊྛབྦཾ. ཨེཏྠཙ ཝིཏཀྐོ ཨོལཱ༹རིཀོ པུབྦངྒམོ ཨཱརམྨཎེ ཙིཏྟསྶ པཐམཱབྷིནིཔཱཏབྷཱུཏོཙ ཧོཏཱིཏི གྷཎྜཱབྷིགྷཱཏོ ཝིཡ དཊྛབྦོ. ཝིཙཱརོ སུཁུམོ ཨནུཙརོ ཏསྨིཾཡེཝ ཨཱརམྨཎེ ཙིཏྟསྶ ཨནུབནྡྷནབྷཱུཏོ ཙ ཧོཏཱིཏི གྷཎྜཱནུརཝོཝིཡ དཊྛབྦོཏི.

༧༨. ཨདྷིམུཙྩནཾ ཨདྷིམོཀྑོ. ཨཱརམྨཎེ ཨེཝཾ ནུཁོ ནོ ནུཁོཏི ཨེཝཾ པཝཏྟཾ སཾསཔྤནཾ ཨདྷིབྷཝིཏྭཱ ཝིཙྪིནྡིཏྭཱ པཀྑཀོ མུཙྩནཝསེན ཙིཏྟསྶ པཝཏྟཱིཏི ཝུཏྟཾ ཧོཏི. ཨེཝཉྩ ཀཏྭཱ སོ ཨཱརམྨཎེ ¶ སནྣིཊྛཱནལཀྑཎོཏི ཙ ཨཱརམྨཎེ ནིཙྩལབྷཱཝེན ཨིནྡཁཱིལསདིསོཏིཙ ཝུཏྟོ.

༧༩. ཝཱིརསྶ ཀམྨསཱུརསྶ བྷཱཝོ ཀམྨཝཱ ཝཱིརིཡཾ. ཏཾསམངྒཱི པུགྒལོ ཧི ཀམྨསཱུརོ ཧོཏི. མཧནྟཾཔི ཀམྨཾ ཨཔྤཀཏོ གཎྷཱཏི. དུཀྐརཾཔི སུཀརཏོ, བྷཱརིཡཾཔི ཨབྷཱརིཡཏོ གཎྷཱཏི. ཨཏྟཀིལམཐཾ ནགཎེཏི. ཀམྨསིདྡྷིཡཱ ནིཙྩཾ པགྒཧིཏ ཀཱཡ ཙིཏྟོཝ ཧོཏི. ཏསྨཱ ཏཾ ཏསྶ པུགྒལསྶ ཏཐཱཔཝཏྟིཡཱ ཧེཏུབྷཱཝོཙེཝ ཏཐཱཔཝཏྟསྶ ཙ ཏསྶ པུགྒལསྶ ཀཱཡ ཙིཏྟཀྲིཡཱབྷཱུཏཾ ཧོཏཱིཏི. ཝིདྷིནཱཝཱ ནཡེན ཨུཔཱཡེན ཝཱིརིཡཝཏོ ཀིཾ ནཱམཀམྨཾ ན སིཛ྄ཛྷཏཱིཏིཨཱདིཀེན པུབྦཱབྷིསངྑཱརེན ཨཱིརཡིཏབྦཾ པཝཏྟཡིཏབྦནྟི ཝཱིརིཡཾ. ཝིསེསེནཝཱ སཀཔརཧིཏཧེཏུ ཨཱིརནྟི ཀམྤནྟི ཏཾ སམངྒིནོ ཨེཏེནཱཏི ཝཱིརིཡཾ. ཨེཏྠཙ ཝཱིརིཡུ པཏྠམྦྷིཏཱ སམྤཡུཏྟདྷམྨཱ སདཱ ཨནིཀྑིཏྟདྷུརཱ པགྒཧིཏསཱིསཱཝིཡ ཧུཏྭཱ ཨཏྟནོ ཨཏྟནོ ཀིཙྩསམྤཏྟིཡཱ ནིཙྩཾ ཨུསྶཱཧཛཱཏཱཝ ཧོནྟི, ཏེསུཙ ཏཐཱཧོནྟེསུ ཏཾསམངྒིནོ པུགྒལཱཔི ཨཏྟནོཝཱ པརེསཾཝཱ ཧིཏཧེཏུ ནིཙྩཾ བྱཱཝཊཀཱཡཙིཏྟཱ ཧོནྟི. ཏསྨཱ ཨཱིརནྟི ཀམྤནྟཱིཏི ཝུཙྩནྟཱིཏི. ཏཐཱ ཧི ཏཾ ཨུཔཏྠམྦྷནལཀྑཎནྟི ཙ པགྒཧལཀྑཎནྟི ཙ ཨུསྶཱཧལཀྑཎནྟི ཙ གེཧསྶ ཐཱུཎཱུཔཏྠམྦྷན སདིསནྟི ཙ སམྨཱ ཨཱརདྡྷཾ སབྦསམྤཏྟཱིནཾ མཱུལནྟི ཙ ཝུཏྟནྟི.

༨༠. ཝིནཡཏི ཀཱཡཙིཏྟཾ ཏཔྤེཏི, ཏུཊྛཾ སུཧིཏཾ ཛནེཏི, སུཔུཔྥིཏཔདུམཾཝིཡཝཱ ཝཌྜྷེཏཱིཏི པཱིཏི, ཝིནནྟིཝཱ ཨེཏཱཡ ཏཾ སམངྒིནོ པུཎྞཙནྡོཝིཡ ཝིརོཙམཱན ཀཱཡཙིཏྟཱ ཧོནྟཱིཏི པཱིཏི. སཱ པཉྩཝིདྷཱ ཁུདྡིཀཱ པཱིཏི, ཁཎིཀཱཔཱིཏི, ཨོཀྐནྟིཀཱ པཱིཏི, ཨུབྦེགཱ པཱིཏི, ཕརཎཱཔཱིཏཱིཏི.

༨༡. ཚནྡནཾ ཚནྡོ. ཨིཙྪཱ པཏྠནཱ ཨབྷིསནྡྷཱིཏི ཝུཏྟཾ ཧོཏི. སོཔན དུཝིདྷོ ཏཎྷཱཚནྡོ, ཀཏྟུཀམྱཏཱ ཚནྡོཏི. ཨིདྷ ཀཏྟུཀམྱཏཱ ཚནྡོ ཨདྷིཔྤེཏོ. ཨེཏྠཙ ཀཏྟུཾ ཀཱམེཏི ཨིཙྪཏཱིཏི ཀཏྟུཀཱམོ. ཚནྡསམངྒིཔུགྒལོ. ཏསྶ བྷཱཝོ ཀཏྟུཀམྱཾ. ཏདེཝ ཀཏྟུཀམྱཏཱ, ཡཐཱ དེཝོཡེཝ དེཝཏཱཏི. ཨེཏྠཙ ཀཏྟུསདྡོ སབྦེསཾ དྷཱཏུསདྡཱནཾ ཨཏྠེ སངྒཧེཏྭཱ པཝཏྟོ. ¶ ཏསྨཱ ཀཏྟུཀམྱཏཱཏི ཨེཏེན ཀཐེཏུཀམྱཏཱ ཙིནྟེཏུཀམྱཏཱ དཊྛུཀམྱཏཱ སོཏུཀམྱཏཱཏི ཨེཝམཱདཱིནི སབྦ ཀྲིཡཱཔདཱནི སངྒཧིཏཱནི ཧོནྟཱིཏི དཊྛབྦཾ. སོ པན ཨཱརམྨཎཾ ཨིཙྪནྟོཔི ཏཎྷཱ ཝིཡ ཨསྶཱདན རཛྫན ལགྒན ཝསེན ནཨིཙྪཏི. ཡེན ཡེན པན ཨཏྠིཀོ ཧོཏི. ཏཾ ཏཾ ཨཏྠཾ ཨཱརཱདྷེཏུ ཀཱམཏཱཝསེནེཝ ཨིཙྪཏི. ཡཐཱ རཉྙོ ཨིསྶཱསཱ དྷནེནཝཱ ཡསེནཝཱ ཨཏྠིཀཱ རཱཛཝེརཱིནཾ ཝིཛ྄ཛྷནཝསེན ཚཌྜིཏབྦཡུཏྟཀེཔི སརེ བཧཱུ ཨིཙྪནྟིཡེཝ. ཨེཝམེཝཾ ཨཡཾཔི པརསྶ ཝིསྶཛྫིཏབྦཡུཏྟ ཀཱནིཔི དཱནཝཏྠཱུནི ཨལདྡྷཱནིཔི ལདྡྷུཾ ཨིཙྪཏི. ལདྡྷཱནིཔི རཀྑིཏུཾ ཨིཙྪཏཱིཏི. ཨཡཉྩ ཨཏྠོ ཝིབྷཱཝནིཡཾཔི ཝུཏྟོཡེཝ.

ཝུཏྟཉྷི ཏཏྠ

དཱནཝཏྠུཝིསྶཛྫནཝསེན པཝཏྟཀཱལེཔི ཙེས ཝིསྶཛྫི ཏབྦེན ཏེན ཨཏྠིཀོཡེཝ. ཁིཔིཏབྦཨུསཱུནཾ གཧཎེ ཨཏྠིཀོ ཨིསྶཱསོཝིཡཱཏི.

ཏཏྠ ཡདགྒེན དཱནཾ དསྶཱམཱིཏི དཱནཝཏྠུཔརིཡེསནཱདིཝསེན པཝཏྟཱ པུབྦབྷཱགཙེཏནཱ དཱནཝཏྠུཝིསྶཛྫན སངྐཱཏེ དཱནེ སངྒཧིཏཱ ཧོཏི. ཏདགྒེན ཏསྶཱ པུབྦབྷཱགཙེཏནཱཡ པཝཏྟིཀཱལོ ཨིདྷ དཱནཝཏྠུ ཝིསྶཛྫནཝསེན པཝཏྟ ཀཱལོཏི ཝེདིཏབྦོ. ཝིསྶཛྫིཏབྦེནཱཏི ཝིསྶཛྫིཏབྦ ཡུཏྟཀེན. ཏེན ཨཏྠིཀོཡེཝ པརསྶ ཝིསྶཛྫནཏྠཱཡཱཏི ཨདྷིཔྤཱཡོ. ཁིཔིཏབྦཨུསཱུནཾ གཧཎེཏི ཏེསཾ ཨཀཏཱནཾ ཀརཎཝསེན ཨལདྡྷཱནཾ པརིཡེསནཝསེན གཧཎེ. ཨེཏྠ པན ཀེཙི ཨིསྶཱསོ ཨུསཱུནིཁིཔིཏྭཱཔི ལབྷམཱནོ ཏེཧི ཨུསཱུཧི ཨཏྠིཀོཡེཝཱཏི ཨེཝ མཏྠཾ ཝདནྟི. སོ ནཡུཛྫཏི. ཨེཝཉྷི སཏི ཁིཔིཏཨུསཱུནནྟི ཝུཏྟཾ སིཡཱ. ཡཐཱ ཀཐིཏཾ ལཔིཏཾ ཏཐཱགཏེནཱཏི. ཏཐཱ ཝིསྶཛྫིཏབྦེ ནཱཏི ཨེཏྠཔཱིཏི. ཀེཙི ཨིསྶཱསོ ཨུསཱུཧི ཨནཏྠིཀོ ཁིཔནྟོ ནཧོཏི. ཨཏྠིཀོཡེཝ སམཱནོ ཨཉྙཾ ཨཱནིསཾསཾ ཨིཙྪནྟོ ཁིཔཏཱིཏི ཨེཝཾ ཨཏྠཾ ཝདནྟི. སོཔི ནཡུཛྫཏི. ཨེཝཉྷི སཏི ཨུསཱུཧི ཨཏྠིཀོཡེཝ ཏཱནི ཁིཔནྟོ ཨིསྶཱསོཝིཡཱཏིཝུཏྟཾ སིཡཱཏི. ཨཏྠཏོ ¶ པན ཏདུབྷཡཾཔི ཨཝཧསིཏབྦམེཝ ཧོཏཱིཏི. ཡསྨཱཙ ཚནྡསམྤཡུཏྟཾ ཙིཏྟཾ ཨཱརམྨཎཾ གཎྷནྟཾ ཚནྡཝསེན ཨཏི ཨིཙྪམཱནཾ ཝིཡ ཝིལུཔྤམཱནཾ ཝིཡ གཎྷཱཏི. ཏསྨཱ ཨཡཾ ཨཱརམྨཎགྒཧཎེ ཙེཏསོ ཧཏྠཔྤསཱརཎཾཝིཡཱཏི ཝུཏྟོ. ཨེཏྠཙ ཧཏྠཔྤསཱརཎཾཝིཡཱཏི ཨིདཾ ཨབྷཱུཏཔརིཀཔྤཝཙནཾ དཊྛབྦཾ. ན ཧི ཙིཏྟསྶ ཧཏྠོནཱམ ཨཏྠི. ཨཏྠཝིསེསཔཱཀཊཏྠཾ པན ཨབྷཱུཏཾཔི བྷཱུཏཾ ཝིཡ ཀཔྤེཏྭཱ ཝུཏྟནྟི དཊྛབྦཾ. ཨཔིཙ, ཨཡཾ ཚནྡོནཱམ ཐཱམཔཏྟོ ཏཎྷཱཡ བལཝཏརོ ཧོཏི. ཏཐཱ ཧེས ཨདྷིཔཏིབྷཱུཏོ ཨིདྡྷིཔཱདབྷཱུཏོཙ ཧོཏཱིཏི. ཡདི ཧི སོ ཏཎྷཱཡ སམཱནབལོ སིཡཱ. ཨིམེ སཏྟཱ ཏཎྷཱཡ ཧཏྠེ ཋིཏཱ ཏཎྷཱ པརིགྒཧིཏཱནི དྷནབྷོགརཛྫསུཁཱནིཝཱ དིབྦབྲཧྨསམྤཏྟིཡོཝཱ ཚཌྜེཏྭཱ ཝཊྚདུཀྑཏོ ནིཡྻཱཏུཾ ནསཀྑིསྶནྟི ཡེཝཱཏི.

༨༢. སོབྷཎཱ སོབྷཎེསུ ཙིཏྟེསུ པཀིརནྟཱིཏི པཀིཎྞཱ. ཀེཨེཝ པཀིཎྞཀཱ. ཨཉྙེཧི ཨཉྙེསཾཝཱ སམཱནཱ ཨཉྙསམཱནཱ. ཡདཱ སོབྷཎཙིཏྟེསུ ཡུཏྟཱ, ཏདཱ ཏེཧི ཨསོབྷཎཏོ ཨཉྙེཧི སམཱནཱ. ཡདཱ ཨསོབྷཎཙིཏྟེསུ ཡུཏྟཱ, ཏདཱ ཏེཧི སོབྷཎཏོ ཨཉྙེཧི སམཱནཱ སདིསཱཏི ཝུཏྟཾ ཧོཏི.

ཨཉྙསམཱནརཱསིམྷི པརམཏྠདཱིཔནཱ.

༨༣. ཨིདཱནི ཨཀུསལརཱསིཾ དསྶེནྟོ མོཧོཏིཨཱདིམཱཧ. ཏཏྠ མུཡ྄ཧཏཱིཏི མོཧོ. མུཡ྄ཧནྟི སཏྟཱ ཨེཏེནཱཏིཝཱ མོཧོ. མུཡ྄ཧནམཏྟཾཝཱ མོཧོ, ཙཏུརངྒཏམསྶ ཝིཡ ཙཀྑུསྶ སབྦསོ ཀལྱཱཎཔཀྑཾ པཊིཙྪཱདེཏྭཱ ཙིཏྟསྶ ཨནྡྷབྷཱཝཀརཎནྟི ཝུཏྟཾ ཧོཏི. པཱཔཔཀྑཾ པན པཏྭཱ སོ ཉཱཎགཏིཀོ ཧོཏཱིཏི དཊྛབྦོ. ཏཐཱ ཧེས པཱལི༹ཡཾ མིཙྪཱཉཱཎནྟི ཝུཏྟོ. ཨཊྛཀཐཱསུཙ མིཙྪཱཉཱཎནྟི པཱཔཀྲིཡཱསུ ཨུཔཱཡཙིནྟཱཝསེནཔཝཏྟོ མོཧོཏི ཝུཏྟཾ. ཨཝིཛྫཱཡཙ ཨཔྤཊིཔཏྟི མིཙྪཱཔཊིཔཏྟིཝསེན དུཝིདྷབྷཱཝོ ཝུཏྟོ. ¶ ཨེཏྠཙ ཨཔྤཊིཔཏྟཱིཏི ཀལྱཱཎཔཀྑེ ཨཉྙཱཎམེཝ ཝུཙྩཏི. མིཙྪཱཔཊིཔཏྟཱིཏི པཱཔཔཀྑེ མིཙྪཱཉཱཎམེཝ ཝུཙྩཏཱིཏི, ཏཐཱ ཧི པཱཔཔཀྑཾ པཏྭཱ པཉྩདྷམྨཱ ཉཱཎགཏིཀཱ ཧོནྟི མོཧོ, ལོབྷོ, དིཊྛི, ཝིཏཀྐོ, ཝིཙཱརོཏི. ཙིཏྟེན པན སདྡྷིཾ ཚབྦིདྷཱ ཧོནྟི. ཏེཧི པཀཏིཡཱ ཝིཉྙུཛཱཏིཀེསུ སུཏཔརིཡཏྟིསམྤནྣེསུཙ ཨུཔྤནྣཱ པཱཔཀྲིཡཱསུ ཏཾ ཏཾ ཨུཔཱཡདསྶནཝསེན ཏེསཾ ཏཏྠ ཚེཀབྷཱཝཾ པཊིབལབྷཱཝཉྩ སཱདྷེནྟཱིཏི.

༨༤. ནཧིརིཡཏི ཀཱཡདུཙྩརིཏཱདཱིཧི ནལཛྫཏི ནཛིགུཙྪཏཱིཏི ཨཧིརཱི. ཧིརིཔྤཊིཔཀྑཱཝཱ ཨཧིརཱི, སཱཨེཝ ཨཧིརིཀཾ. ཏཉྷི པཱཔ ཀྲིཡཱསུ པཙྩུཔཊྛིཏཱསུ ཧིརིཡཱ ཨོཀཱསཾ ཨདཏྭཱ ཏཱསུ རུཙིཾ ཨུཔྤཱདེཏྭཱ པཝཏྟཏཱིཏི. ཏཐཱ ཧི ཏཾ ཀཱཡདུཙྩརིཏཱདཱིཧི ཨཛིགུཙྪནལཀྑཎནྟིཙ ཨལཛྫཱལཀྑཎནྟིཙ ཝུཏྟཾ.

༨༥. ནཨོཏྟཔྤཏཱིཏི ཨནོཏྟཔྤཾ. ཀཱཡདུཙྩརིཏཱདཱིཧི ནབྷཱཡཏི ནཨུཏྲསཏཱིཏི ཨཏྠོ. ཨོཏྟཔྤཔྤཊིཔཀྑཾཝཱ ཨནོཏྟཔྤཾ. ཏཾཔི ཧི ཏཱསུ པཙྩུཔཊྛིཏཱསུ ཨོཏྟཔྤསྶ ཨོཀཱསཾ ཨདཏྭཱ ཙིཏྟཾ ཏཱསུ ཨསཱརཛྫམཱནཾ ཀཏྭཱ པཝཏྟཏཱིཏི. ཏཐཱ ཧེཏཾ ཀཱཡདུཙྩརི ཏཱདཱིཧི ཨསཱརཛྫལཀྑཎནྟི ཙ ཨནུཏྟཱསལཀྑཎནྟི ཙ ཝུཏྟཾ. ཝུཙྩཏི ཙ –

ཨཛེགུཙྪཱི ཨཧིརིཀོ, པཱཔཱགཱུཐཱཝ སཱུཀརོ;

ཨབྷཱིརུཙ ཨནོཏྟཔྤཱི, སལབྷོ ཝིཡ པཱཝཀཱཏི.

༨༦. ཨུདྡྷརཏཱིཏི ཨུདྡྷཊཾ. པཱསཱཎཔིཊྛེ ཝཊྚེཏྭཱ ཝིསྶཊྛ གེཎྜུཀོ ཝིཡ ནཱནཱརམྨཎེསུ ཝིཀྑིཏྟཾ ཙིཏྟཾ, ཨུདྡྷཊསྶ པན ཙིཏྟསྶ ཨུདྡྷརཎཱཀཱརཔྤཝཏྟིཡཱ པཙྩཡབྷཱུཏོ དྷམྨོ ཨུདྡྷཙྩཾ. ཏཾ པན ཝཱཏེརིཏཾ ཛལཾ ཝིཡ དྷཛཔཊཱཀཱ ཝིཡཙ དཊྛབྦཾ.

༨༧. ལུབྦྷཏཱིཏི ལོབྷོ, ལུབྦྷནྟི སམྤཡུཏྟཱ དྷམྨཱ ཨེཏེ ནཱཏི ལོབྷོ, ལུབྦྷནམཏྟམེཝཝཱ ཨེཏནྟི ལོབྷོ. ཨེཏྠཙ ལུབྦྷནཾནཱམ ཨཱརམྨཎཱབྷིསཛྫནཾ དཊྛབྦཾ. སོཔན ཨཱརམྨཎེ ལགྒ ནཊྛེན ¶ མཀྐཊཱལེཔོཝིཡ ཨབྷིཀངྑཊྛེན ཏཏྟཀཔཱལེ ཁིཏྟམཾས པེསི ཝིཡ ཨཔརིཙཱགཊྛེན ཏེལཉྫན རཱགོཝིཡ ཏཎྷཱནདིབྷཱཝེན ཝཌྜྷིཏྭཱ སཏྟཱནཾ ཨཔཱཡཱཝཧཊྛེན སབྦཱནི སུཀྑཀཊྛ སཱཁཱཔལཱས ཏིཎཀསཊཱནི མཧཱསམུདྡཾ ཝཧནྟཱི སཱིགྷཏོཏཱ ནདཱི ཝིཡ དཊྛབྦོ.

༨༨. དསྶནཾ དིཊྛི. དྷམྨཱནཾ ཡཱཐཱཝསབྷཱཝེསུ ཉཱཎདསྶནཾ ཝིཡ ཏེསམེཝ ཨཡཱཐཱཝསབྷཱཝེསུ མིཙྪཱདསྶནནྟི ཝུཏྟཾ ཧོཏི. སཱཧི ཨེཀཙྩཱནཾ པཎྜིཏམཱནཱིནཾ མིཙྪཱཝིཏཀྐབཧུལཱནཾ ཨུཔྤནྣཱ ཐཱམགཏཱ ཨཡཱཐཱཝཔཀྑེ པཊིཝེདྷཉྙཱཎགཏིཀཱ ཧོཏཱིཏི. སཱཔན མིཙྪཱབྷིནིཝེསལཀྑཎཱ པརམཾཝཛྫནྟི དཊྛབྦཱ.

༨༩. མཉྙཏཱིཏི མཱནོ. ཨཧཾ ལོཀེ ཨེཀོ པུགྒལོ ཨསྨི. ན ཀཊྛཀལིངྒརོཝིཡ ཨཝམཉྙནཱརཧོཏི ཨེཝཾ ཨཏྟཱནཾ དལ༹ྷཾ པགྒཧེཏྭཱ སམནུཔསྶཏཱིཏི ཨཏྠོ. སོཔན ཛཱཏི ཀུལདྷན བྷོག ཡས ཨིསྶརིཡཱདཱིཧི ཙེཝ སཱིལ སུཏ ལཱབྷསཀྐཱརཱ དཱིཧིཙ གུཎེཧི ཨུཔཏྠམྦྷིཏོ ཨཏིརེཀཏརཾ ཝདྡྷིཏྭཱ ཨཏྟཱནཾ ཛནམཛ྄ཛྷེ ཀེཏུཾཝིཡ ཨཙྩུགྒཏཾ མཉྙཏི. ཏསྨཱ སོ ཨུནྣཏིལཀྑཎོཏིཙ ཨུམྨཱདོཝིཡཱཏིཙ ཝུཏྟོ.

༩༠. དུསྶཏཱིཏི དོསོ. སོཔན ཙཎྜིཀྐཊྛེན པཧཏཱ སིཝིསོཝིཡ ཝིསཔྤནཊྛེན ཨསནིཔཱཏོཝིཡ ཨཏྟནོ ནིསྶཡ དཧནཊྛེན དཱཝགྒིཝིཡ དུསྶནཊྛེན ལདྡྷོཀཱསོ སཔཏྟོཝིཡ སབྦསོ ཨཧིཏརཱསི བྷཱཝཊྛེན ཝིས སཾསཊྛ པཱུཏིམུཏྟཾ ཝིཡ དཊྛབྦོ.

༩༡. ཨིསྶཏཱིཏི ཨིསྶཱ. པརསམྤཏྟིཾ ཨུསྶཱུཡཏཱིཏི ཨཏྠོ. སཱཧི པརེསཾ པཀཏིཡཱ ལདྡྷསམྤཏྟིཾ དིསྭཱ ཝཱ སུཏྭཱཝཱ ནསཧཏི. ཏསྶཱ སམྤཏྟིཡཱ ཝིཔཏྟིཾ ཨིཙྪཏི ཨཱཀངྑཏི. ཨསུཀོ ཨིདཾནཱམ ལབྷིསྶཏཱིཏི སུཏྭཱཔི ནསཧཏི. ཏསྶ ཨལཱབྷཾ ཨིཙྪཏི ཨཱཀངྑཏི. ཏསྨཱ སཱ པརསམྤཏྟཱིནཾ ཨུསྶཱུཡནལཀྑཎཱཏི ཝུཏྟཱ.

༩༢. མམ ¶ ཨེཝ ཨིདཾ གུཎཛཱཏཾཝཱ ཝཏྠུཝཱ ཧོཏུ. མཱ ཨཉྙསྶཱཏི ཨེཝཾ ཨཏྟནོ སམྤཏྟིཧེཏུ ཨཝིཔྥཱརིཀཏཱཝསེན ཙརཏི པཝཏྟཏཱིཏི མཙྪརཾ, ཏཐཱ པཝཏྟཾ ཙིཏྟཾ. མཙྪརསྶ བྷཱཝོ མཙྪརིཡཾ. ཨིདཾཙ ཨིསྶཱ ཝིཡ དུཝིདྷཾ ཨཏྟནཱ ལདྡྷསམྤཏྟི ལབྷིཏབྦསམྤཏྟི ཝསེན. ཏཏྠ པཀཏིཡཱ ལདྡྷསམྤཏྟིཡཾ ཏཱཝ ཏཾ པརེཧི སཱ དྷཱརཎཾཝཱ ཡེན ཀེནཙིཝཱ ཀཱརཎེན ཨཏྟསནྟཀབྷཱཝཏོ མུཙྩིཏྭཱ པརེསཾ སནྟཀབྷཱཝཾ གམིསྶམཱནཾ དིསྭཱ ཝཱ སུཏྭཱཝཱ ཙིནྟེཏྭཱ དུཀྑཱི དུམྨནོ ཧོཏི, ལབྷིཏབྦསམྤཏྟིཡཾཔི ཨསུཀསྨིཾ དེསེ ཝཱཀཱལེཝཱ ཨིདཾནཱམ བྷཝིསྶཏཱིཏི སུཏྭཱཝཱ ཙིནྟེཏྭཱཝཱ ཏཾ ཨཏྟནཱཝ ལདྡྷུཾ ཨིཙྪཏི. ཨཉྙེསཾ ལཱབྷཾ ནཨིཙྪཏི. ཨཉྙེ ལབྷིསྶནྟཱིཏི སུཏྭཱཝཱ ཙིནྟེཏྭཱཝཱ དུཀྑཱི དུམྨནོ ཧོཏཱིཏི. ཏཐཱ ཧེཏཾ ལདྡྷཱནཾཝཱ ལབྷིཏབྦཱནཾཝཱ ཨཏྟནོ སམྤཏྟཱིནཾ ནིགྒུཧནལཀྑཎནྟི ཝུཏྟཾ. ཨེཏྠཙ ལབྷིཏབྦསམྤཏྟིཡཾ ཡསྶ ལཱབྷཾ ནཨིཙྪཏི. སོལབྷཏཱིཏིཝཱ ལབྷིསྶཏཱིཏིཝཱ སུཏྭཱཝཱ ཙིནྟེཏྭཱཝཱ ཙིཏྟཝིགྷཱཏོ ཨིསྶཱནཱམ. ཡཾ ཡཾ ཨཏྟནཱ ལདྡྷུཾ ཨིཙྪཏི. ཏཾ ཏཾ ཨཏྟནཱ ཨལབྦྷམཱནཀཾ ཙིནྟེཏྭཱ ཙིཏྟཝིགྷཱཏོ མཙྪརིཡཾནཱམ. ན ཧི ཨེཏེ དྭེ ཨེཀཏོ ཨུཔྤཛྫནྟཱིཏི.

༩༣. ཀུཀྐུཙྩནྟི ཨེཏྠ ཀིརིཡཱ ཀཏཾ. ཀུཙྪིཏཾ ཀཏནྟི ཀུཀཏཾ. ཀུཙྪིཏཀིརིཡཱཏི ཨཏྠོ. པཎྜིཏེཧི ཨེཀནྟེན ནིནྡིཏབྦོ ཙིཏྟཔྤཝཏྟིཝིསེསོཏི ཝུཏྟཾ ཧོཏི. ཨཏྠཏོ པན ཨཀཏཾ ཝཏ མེ ཀལྱཱཎཾ ཀཏཾ པཱཔནྟི ཨེཝཾ ཨནུསོཙནཝསེན པཝཏྟོ ཀུཀྐུཙྩ སམྤཡུཏྟཙིཏྟུཔྤཱདོཡེཝ, སོ ཧི ཏཐཱ པཝཏྟམཱནོཔི པུབྦེ ཨཀཏཾཝཱ ཀལྱཱཎཾ པུན ཀཏཾ ཀཱཏུཾ ན སཀྐོཏི. པུབྦེ ཀཏཾ ཝཱ པཱཔཾ པུན ཨཀཏཾ ཀཱཏུཾ ནསཀྐོཏི. ཨཐཁོ ཀུསལདྷམྨེསུ ཙིཏྟཔརིཡཱདཱནཱཡཨེཝ སཾཝཏྟཏི. ཏསྨཱ ཀུཙྪིཏཀིརིཡཱ མཏྟཏྟཱ ཀུཀཏནྟི ཝུཙྩཏཱིཏི. ཝུཏྟཉྷེཏཾ ཨཊྛ ཀཐཱཡཾ ཀཏཱཀཏསྶ སཱཝཛྫཱནཝཛྫསྶ ཨབྷིམུཁགམནཾ པཊིསཱརོནཱམ. ཡསྨཱ པནེསོ ཀཏཾཝཱ པཱཔཾ ཨཀཏཾ ནཀརོཏི. ཨཀཏཾཝཱ ཀལྱཱཎཾ ཀཏཾ ནཀརོཏི. ཏསྨཱ ཝིརཱུཔོ ཀུཙྪིཏོ ཝཱ པཊིསཱརོཏི ཝིཔྤཊིསཱརོཏི. ཨེཏྠཙ ཝིཔྤཊིསཱརོཏི ཀུཀྐུཙྩ མེཝ. ¶ ཀུཀྐུཙྩེཙ ཀུཙྪིཏེ སཏི ཏཾ སམྤཡུཏྟཙིཏྟུཔྤཱདོཔི ཀུཙྪིཏོཡེཝ. ཡེནཙ ཀཱརཎེན ཀུཀྐུཙྩཾ ཀུཙྪིཏཾནཱམ ཧོཏི. ཏེནེཝ ཀཱརཎེན སོ ཙིཏྟུཔྤཱདོཔི ཀུཙྪིཏོནཱམ ཧོཏཱིཏི ཀཏྭཱ སོ ཙིཏྟུཔྤཱདོཝ ཀུཀཏཔདེ གཧེཏུཾ ཡུཏྟོཏི ཝེདིཏབྦོ. སུདིནྣཀཎྜཊྛཀཐཱཡཾ པན ཨཡམཏྠོ ཨུཛུཀཏོཝ ཝུཏྟོ. ཡཐཱཧ-ཝིཉྙཱུཧི ཨཀཏྟབྦཏཱཡ ཀུཙྪིཏཀིརིཡཱབྷཱཝཏོ ཀུཀྐུཙྩནྟི.

[༧༦] ཝིབྷཱཝནིཡཾ པན

ཨིམམཏྠཾ ཨསལླཀྑེཏྭཱ ཡཾ ཝུཏྟཾ ‘‘ཀུཙྪིཏཾ ཀཏནྟི ཀུཀཏཾ. ཀཏཱཀཏ དུཙྩརིཏསུཙརིཏ’’ནྟི. ཏཾ ན ཡུཛྫཏིཡེཝ. ཨེཏེན ཡཉྩ ཏཏྠ ཝུཏྟཾ ‘‘ཨཀཏཾཔི ཧི ཀུཀཏནྟི ཝོཧརནྟི. ཡཾ མཡཱ ཨཀཐཾ. ཏཾ ཀུཀཏནྟིཙ. ཨིདྷ པན ཀཏཱ ཀཏཾ ཨཱརབྦྷ ཨུཔྤནྣོ ཝིཔྤཊིསཱརཙིཏྟུཔྤཱདོ ཀུཀཏ’’ནྟིཙ. ཏཾཔི སབྦཾ པཊིཀྑིཏྟམེཝ ཧོཏཱིཏི.

ཀུཀཏསྶ ཡཐཱཝུཏྟཙིཏྟུཔྤཱདསྶ ཏཐཱཔཝཏྟི ཧེཏུབྷཱཝོ ཀུཀྐུཙྩཾ. ཨཔིཙ, དྷཱཏུཔཱཋེསུ ཀུཙསདྡཾ སངྐོཙན མནོ ཝིལེཁནཏྠེསུ པཋནྟིཡེཝ. ཏསྨཱ ཀུཙྪིཏེན ཨཱཀཱརེན ཀོཙཏི སངྐོཙཏི ན པཱཔཛིགུཙྪནཱཀཱརེནཱཏི ཀུཀྐུཙོ. ཀུཙྪིཏེནཝཱ ཨཱཀཱརེན ཀོཙཏི ཝིལིཁཏི ནཀིལེསསལླཱིཁནཱ ཀཱརེནཱཏི ཀུཀྐུཙོ. ཏཐཱ པཝཏྟདྷམྨསམཱུཧོ. སོཧི ཀུཙྪིཏེན ཨཀཏཾ ཝཏ མེ ཀལྱཱཎཾ ཀཏཾ པཱཔནྟི ཨེཝཾ པཝཏྟེན ཨནུཏྠུནནཱཀཱརེན སངྐོཙཏི. ཀུསལདྷམྨསམཱདཱནེ ཙིཏྟཾ ནམིཏུཾཔི ནདེཏི. མནཾཝཱ ཝིལེཁཏི. སདྡྷཱདཱིནཾ སཱརདྷམྨཱནཾ ཏནུཀརཎེན ཙིཏྟཾ ཀུསལདྷམྨསམཱདཱནེ པརིཡཱདིནྣཐཱམབལཾ ཀརོཏི. ཏསྨཱ ཀུཀྐུཙོཏི ཝུཙྩཏི. ཡེན པན དྷམྨེན ཡུཏྟཏྟཱ སོ ཏཐཱ པཝཏྟོ ཧོཏི. སོ ཀུཀྐུཙྩཾནཱམ ཀུཀྐུཙསྶ བྷཱཝོཏི ཀཏྭཱ. ཏཾ པན ཡསྨཱ པུབྦེ ཨཀཏཉྩ ཀལྱཱཎཾ ཀཏཉྩ པཱཔཾ ཨཱརབྦྷ པཙྪཱ ཨནུཏཱཔནཝསེན ཨནུསོཙནཝསེནཙ པཝཏྟཏི. ཏསྨཱཏཾ པཙྪཱནུཏཱཔལཀྑཎཾ ཀཏཱཀཏཱནུཡོཙན རསནྟི ཙ ཝུཏྟཾ. ¶ ཨེཏྠཙ པཙྪཱནུཏཱཔལཀྑཎནྟི པུབྦེ ཀལྱཱཎཉྩ ཨཀཏྭཱ པཱཔཉྩ ཀཏྭཱ ཨཱགཏཏྟཱ པཙྪིམེ ཀཱལེ ཨནུཏཱཔལཀྑཎནྟི ཨཏྠོ. ཏེན ཀུཀྐུཙྩསྶ ཨེཀནྟེན ཨཏཱིཏཱརམྨཎཏཱ སིདྡྷཱ ཧོཏི. པཙྩུཔྤནྣཱནཱགཏཱརམྨཎཏཱཙ པཊིསིདྡྷཱཏི. ཀཏཱཀཏཱ ནུསོཙནརསནྟི ཨེཏྠ ཀཏཉྩ པཱཔཾ ཨཀཏཉྩ ཀལྱཱཎནྟི ཡོ ཛེཏབྦཾ. ཝུཏྟཉྷེཏཾ མཧཱནིདྡེསེ –

དྭཱིཧཱཀཱརེཧི ཀུཀྐུཙྩཾ ཨུཔྤཛྫཏི ཀཏཏྟཱ ཙ ཨཀཏཏྟཱ ཙ. ཀཐཉྩ དྭཱིཧཱ.ལ. ཨཀཏཏྟཱཙ. ཨཀཏཾ མེ ཀཱཡསུ ཙརིཏཾ. ཀཏཾ ཀཱཡདུཙྩརིཏནྟི ཨུཔྤཛྫཏི ཀུཀྐུཙྩཾ. ཨཀཏཾ མེ ཝཙཱིསུཙརིཏཾ.ལ. ཀཏཾ མནོདུཙྩརིཏནྟི ཨུཔྤཛྫཏི ཀུཀྐུཙྩཾ. ཨཀཏཱམེ པཱཎཱཏིཔཱཏཱ ཝེརམཎཱི. ཀཏོ པཱཎཱཏི པཱཏོཏི ཨུཔྤཛྫཏི ཀུཀྐུཙྩཾ.ལ. ཨཀཏཱ མེ སམྨཱདིཊྛི. ཀཏཱ མིཙྪཱམིཊྛཱིཏི ཨུཔྤཛྫཏི ཀུཀྐུཙྩནྟི.

ཨེཏེན པན ཨཀཏསུཙརིཏཱ རམྨཎཏཱཡ ཀཏདུཙྩརིཏཱ རམྨཎཏཱཡཙ ཝསེན ཀུཀྐུཙྩསྶ དྭིདྷཱབྷཱཝོཡེཝ སིདྡྷོ ཧོཏི. དྭཱིཧཱཀཱརེཧཱིཏི ཧི ཝུཏྟཾ. སོཙ ཁོ པུབྦེ པཱཔཾ ཀཏྭཱ པཙྪཱ ཨཔཱཡབྷཡཏཛྫིཏཱནཉྩེཝ ཨཔཱཡེསུ པཏིཏྭཱ པུབྦེ ཨཏྟནཱ ཀཏཀམྨཾ ཨནུསྶརནྟཱནཉྩ ཧོཏི. ནཨཉྙེསཾ, ཨཀཏཾ མེ ཀཱཡསུཙརིཏཾ. ཀཏཾ ཀཱཡདུཙྩརིཏནྟི ཧི ཝུཏྟཾ. ཡཐཱ པན མཱནོ དུཝིདྷོ ཧོཏི ཡཱཐཱཝམཱནོ ཨཡཱཐཱཝམཱནོཏི. ཏཐཱ ཀུཀྐུཙྩཾཔི, ཡཱཐཱཝཀུཀྐུཙྩཾ, ཨཡཱཐཱཝ ཀུཀྐུཙྩནྟི དུཝིདྷཾ ཧོཏི. ཏཏྠ ཨཡཱཐཱཝ ཀུཀྐུཙྩཾཔི ཨུཔྤཛྫམཱནཾ དྭཱིཧཱཀཱརེཧོ ཨུཔྤཛྫཏི ཨཀཏཾ ཝཏ མེ ཀལྱཱཎཾ ཀཏཾ པཱཔནྟི. ཀཏམཾ པན ཏནྟི. ཡཉྩ པུབྦེ ཀལྱཱཎཀམྨེཔི པཱཔསཉྙཱི པཱཔདིཊྛི ཨཀཏྭཱ པཱཔཀམྨེཔི ཀལྱཱཎསཉྙཱི ཀལྱཱཎདིཊྛི ཀཏྭཱ པཙྪཱ ཨནུསོཙནཝསེན ཨུཔྤཛྫཏི. ཡཉྩ པུབྦེ ཀལྱཱཎེ ཀལྱཱཎསཉྙཱི ཀཏྭཱ པཙྪཱ པཱཔསཉྙིནོ པཱཔེཙ པཱསཉྙཱི ཨཀཏྭཱ པཙྪཱ ཀལྱཱཎསཉྙིནོ ཨུཔྤཛྫཏི. ཨིདཾ ཨཡཱཐཱཝཀུཀྐུཙྩཾནཱམ. ཨནཝཛྫེ སཱཝཛྫསཉྙཱི, ཀཔྤིཡེ ཨཀཔྤིཡསཉྙཱི, ཨནཱཔཏྟིཡཾ ཨཱཔཏྟིསཉྙཱིཏིཨཱདིནཱཔི ¶ ཡོཛེཏབྦཾ. ཨིདཉྩ སབྦཾ ཨུཔྤཛྫམཱནཾ དྭཱིཧཱ ཀཱརེཧེཝ ཨུཔྤཛྫཏི. ཏསྨཱ དྭཱིསུཨེཝ སངྒཧིཏནྟི དཊྛབྦཾ. ཡཾ པན མཧཱནིདྡེསེཡེཝ ཧཏྠཀུཀྐུཙྩཀཾཔི ཀུཀྐུཙྩཾ. པཱདཀུཀྐུཙྩཀཾཔི ཀུཀྐུཙྩཾ. ཧཏྠཔཱདཀུཀྐུཙྩཀཾཔི ཀུཀྐུཙྩནྟི ནིདྡིཊྛཾ. ཏཾ ཨསཾཡཏ ཀུཀྐུཙྩཾནཱམ. ཡཾ པན ཏཾ བྷིཀྑུ ཀུཀྐུཙྩཱཡནྟཱ ནཔཊིགྒཎྷིཾསཱུཏི ཝིནཡེ ཨཱགཏཾ. ཡཉྩ ཀཐཾ ཀུཀྐུཙྩཔྤཀཏཏཱཡ ཨཱཔཛྫཏི ཀཔྤིཡེ ཨཀཔྤིཡསཉྙིཏཱ ཨཀཔྤིཡེ ཀཔྤིཡསཉྙིཏཱཏི ཨཱགཏཾ. ཏཾ ཝིནཡཀུཀྐུཙྩཾནཱམ. ཏཾཔན ཝིནཡསཾསཡོཨེཝ. སོཙ ཁོ ཨཏྟནོ ཨཝིསཡེ ཀཔྤཏི ནུཁོ ནོནུཁོཏི སཾསཔྤནཱཀཱརེན པཝཏྟོ ཀུསལ ཀྲིཡ ཙིཏྟུཔྤཱདོ. སོཔན ཡེསཾ ཨུཔྤཛྫཏི. ཏེསུ ཡེ སིཀྑཱཀཱམཱ, ཏེ ཏཾཀམྨཾ ནཀརོནྟི. ཏེ སནྡྷཱཡ ཀུཀྐུཙྩཱཡནྟཱ ནཔཊིགྒཎྷིཾསཱུཏི ཝུཏྟཾ. ཡེ པན ཀརོནྟིཡེཝ. ཏེ ཀཔྤིཡཝཏྠུསྨིཾཔི ཨཱཔཏྟིཾ ཨཱཔཛྫནྟི. ཏེ སནྡྷཱཡ ཀུཀྐུཙྩཔྤཀཏཏཱཡ ཨཱཔཏྟིཾ ཨཱཔཛྫཏཱིཏི ཝུཏྟཾ.

༩༤. ཐིཡཏིཙིཏྟཾ མནྡམནྡཾ ཀཏྭཱ ཨཛ྄ཛྷོཏྠརཏཱིཏི ཐིནཾ. ཐིཡིཡནཱ ཐིཡིཏཏྟནྟི ཧི པཱལི༹ཡཾ ནིདྡིཊྛཾ.

༩༥. མེདྷཏི ཙེཏསིཀེ དྷམྨེ ཨཀམྨཉྙབྷཱུཏེ ཀཏྭཱ ཝིཧིཾ སཏཱིཏི མིདྡྷཾ. ཏཐཱ ཧི ཨཱརམྨཎེ ཝིཔྥཱརཝསེན ཏཾ ཏཾ ཨིརིཡཱ པཐཾ སནྡྷཱརེཏྭཱ པཝཏྟམཱནེསུ སམྤཡུཏྟདྷམྨེསུ མུགྒརེན པོཐེཏྭཱ ཝིཡ ཏེ ཨཱརམྨཎཏོ ཨོལིཡཱཔེཏྭཱ ཨིརིཡཱཔཐཾཔི སནྡྷཱརེཏུཾ ཨསམཏྠེ ཀཏྭཱ ཐིནཾ ཙིཏྟཾ ཨབྷིབྷཝཏི. མིདྡྷཾ ཙེཏསིཀེཏི.

༩༦. ཝིཙིཀིཙྪཱཏི ཨེཏྠ. ཙིཀིཙྪནཾ ཙིཀིཙྪཱ. ཉཱཎཔྤཊིཀཱ རོཏི ཨཏྠོ. ཏིཀིཙྪིཏུཾ དུཀྐརཏཱཡ ཝིགཏཱ ཙིཀིཙྪཱ ཨེཏཱཡཱཏི ཝིཙིཀིཙྪཱ. སབྷཱཝཾ ཝིཙིནནྟཱ ཀིཙྪནྟི ཀིལམནྟི ཨེཏཱཡཱཏིཝཱ ཝིཙིཀིཙྪཱ. ཝིཙིཀིཙྪཏིཝཱ དྭེལ༹ྷཀབྷཱཝེན པཝཏྟཏཱིཏི ཝིཙིཀིཙྪཱ. སཱ ནཱིཝརཎབྷཱུཏཱ, པཊིརཱུཔཀཱཏི དུཝིདྷཱ. ཏཏྠ བུདྡྷཱདཱིསུ ཨཊྛསུ ཝཏྠཱུསུ ཝིམཏིཝསེན པཝཏྟམཱནཱ ནཱིཝརཎབྷཱུཏཱ. ཏཏོ ཨཉྙཱཔན ཨསབྦཉྙཱུནཾ ཏེསུ ཏེསུ ཨཱརམྨཎེསུ ཀཐཾ ནུཁོ ཨེཝཾ ནུཁོ ¶ ཨིདཾནུཁོཏི ཝེམཏིཀབྷཱཝེན པཝཏྟཱ སབྦཱ ཝིཙིཀིཙྪཱ པཊིརཱུཔཀཱནཱམ. སཱ པན ཀུསལཱཔི ཧོཏི, ཨཀུསལཱཔི ཁཱིཎཱ སཝཱནཾ ཨུཔྤནྣ ཀྲིཡཱབྱཱཀཏཱཔཱིཏི. ཨིདྷ པན ཨེཀནྟཱཀུསལབྷཱུཏཱ ནཱིཝརཎཝིཙིཀིཙྪཱཝ ཨདྷིཔྤེཀཱཏི.

ཨཀུསལརཱསིམྷི པརམཏྠདཱིཔནཱ.

༩༧. སདྡཧཏཱིཏི སདྡྷཱ. ཡཐཱ ཨཙྪཾ པསནྣཾ ནིསིནྣཾ ཨུདཀཾ ཙནྡ སཱུརིཡཱདཱིནི རཱུཔནིམིཏྟཱནི སུཊྛུ ཨཏྟནི དཧཏི. ཨེཝཾ ཨཡཾ བུདྡྷགུཎཱ དཱིནི སུཊྛུ ཨཏྟནི དཧཏི དྷཱརེཏི ཐཔེཏིཝཱཏི ཨཏྠོ. སདྡཧནྟིཝཱ ཨེཏཱཡཱཏི སདྡྷཱ. སདྡཧནམཏྟམེཝཝཱ ཨེཏནྟི སདྡྷཱ. སཱཔི བུདྡྷཱ དཱིསུ སདྡྷེཡྻཝཏྠཱུསུ ཨཀཱལུསྶིཡབྷཱཝེན པཝཏྟམཱནཱཨེཝ ཨིདྷ ཨདྷིཔྤེཏཱ. ཏཏོ ཨཉྙཱཔན ཏིཏྠིཡེསུཝཱ ཏིཏྠིཡདྷམྨེསུ ཝཱ ཨེཝརཱུཔེསུ ཨསདྡྷེཡྻཝཏྠཱུསུ སདྡཧནཝསེན པཝཏྟཱ ཨོཀཔྤནཱ སདྡྷཱ པཊིརཱུཔཀཱནཱམ ཧོཏི. སཱ པན ཨཏྠཏོ མིཙྪཱདྷིམོཀྑོ ཡེཝཱཏི. ཡཐཱ པན མནུསྶཱ ཧཏྠེ ཨསཏི རཏནཱནི དིསྭཱ པི-གཧེཏུཾ ན སཀྐོནྟི. ཝིཏྟེ ཨསཏི ཏེསཾ སབྦབྷོགཱ ན སམྤཛྫནྟི. བཱིཛེ ཨསཏི སསྶཱདཱིནི ནསམྤཛྫནྟི. ཨེཝཾ སདྡྷཱཡ ཨསཏི པུཉྙཀྲིཡཱཝཏྠཱུནི ནསམྤཛྫནྟི. ཏསྨཱ ཨེསཱ ཧཏྠཝིཏྟབཱིཛ སདིསཱཏི ཝུཏྟཱ.

༩༨. སརཏཱིཏི སཏི. ཨཏྟནཱ ཀཏཱནི ཀཏྟབྦཱནི ཙ ཀལྱཱཎཀམྨཱཝཱ བུདྡྷགུཎཱདཱིནིཝཱ ཨཔྤམཛྫནཝསེན ཨུཔགཙྪཏཱིཏི ཨཏྠོ. སཱཔི སམྨཱསཏི མིཙྪཱསཏི དུཝིདྷཱ ཧོཏི. ཏཏྠ སམྨཱསཏི ཨིདྷ ཨདྷིཔྤེཏཱ. ཨིཏརཱ པན སཏིཡེཝ ན ཧོཏི. ཀཏསྶ ཀཏྟབྦསྶཙ པཱཔཀམྨསྶ ཨཔྤམཛྫནཝསེན པཝཏྟོ སཏིཔཊིརཱུཔཀོ ཨཀུསལཙིཏྟུཔྤཱདོཡེཝ. ཡསྨཱ པནེསཱ ཙིཏྟཾ སབྦེཧི ཨཀུསལདྷམྨེཧིཙ རཀྑིཏུཾ ཀུསལདྷམྨེཧིཙ ཡོཛེཏུཾ སཀྐོཏི. ཏསྨཱ སཱ རཉྙོ སབྦཀམྨིཀ མཧཱཨམཙྩོ ཝིཡ དཊྛབྦཱཏི. སཏིཾཁྭཱཧཾ བྷིཀྑཝེ སབྦཏྠིཀཾ ཝདཱམཱིཏི ཧི ཝུཏྟཾ.

༩༩. ཧིརིཡཏཱིཏི ¶ ཧིརི. ཀཱཡདུཙྩརིཏཱདཱིཧི ལཛྫཏི ཛིགུཙྪཏི ཨུཀྐཎྛཏཱིཏི ཨཏྠོ.

༡༠༠. ཏེཧིཡེཝ ཨོཏྟཔྤཏཱིཏི ཨོཏྟཔྤཾ. ཨུབྦིཛྫཏཱིཏི ཨཏྠོ. ཨེཏྠཔི ཧིརིཨོཏྟཔྤཔྤཊིརཱུཔཀཱནཱམ ཨཏྠི, ཝུཏྟཉྷི –

ལཛྫིཏབྦེ ནལཛྫནྟི, ཨལཛྫིཡེསུ ལཛྫརེཏི ཙ;

བྷཱཡིཏབྦེ ནབྷཱཡནྟི, ཨབྷཡེ བྷཡདསྶིནོཏི ཙ.

ཡསྨཱ པན སཔྤུརིསཱ ཧིརིཡཱ ཨཏྟནི ཨོཏྟཔྤེནཙ པརེསུ ཨཱརཀྑདེཝཏཱདཱིསུ གཱརཝཾ ཨུཔྤཱདེཏྭཱ པཱཔཏོ ཝཛྫེཏྭཱ སུདྡྷཾ ཨཏྟཱནཾ པརིཧརནྟི. ཏསྨཱ ཨིམེ དྭེ ལོཀཔཱལདྷམྨཱཏི ཝུཏྟཱ.

༡༠༡. ལོབྷཔྤཊིཔཀྑོ ཨལོབྷོ. སོ ཧི ཡེསུ ཨཏྟནོ ཧིཏསཉྙིཏེསུ ཨཱརམྨཎེསུ ལོབྷོ ལགྒནཝསེན པཝཏྟཏི, ཏེསྭེཝ ཏཾ ལོབྷཾ ཝིདྷམིཏྭཱ ལོབྷཝཏྠུབྷཱུཏཱ བྷཝབྷོགསམྤཏྟིཡོ གཱུཐརཱསིཾཝིཡ ཧཱིལེ༹ཏྭཱ ཛིགུཙྪིཏྭཱ ཨེཀཱནེཀྑམྨ དྷཱཏུནཱམ ཧུཏྭཱ པཝཏྟཏཱིཏི.

༡༠༢. དོསཔྤཊིཔཀྑོ ཨདོསོ. སོཔི ཧི ཡེསུ ཨཏྟནོ ཨཧིཏསཉྙིཏེསུ ཨཱརམྨཎེསུ དོསོ དུསྶནཝསེན པཝཏྟཏི. ཏེསྭེཝ ཏཾདོསཾ ཝིདྷམིཏྭཱ དིཊྛདིཊྛེསུ སཏྟེསུ པུཎྞཙནྡསདིསཾ སོམྨཧདཡཾ ཨུཔྤཱདེཏྭཱ ཨེཀཱ ཨབྱཱཔཱདདྷཱཏུ ནཱམ ཧུཏྭཱ པཝཏྟཏཱིཏི. ཨཡམེཝཙ བྲཧྨཝིཧཱརེསུ མེཏྟཱཏི ཝུཏྟཱ. ཨམོཧོཔི ཨིདྷ ཝཏྟབྦོ. མོཧཔྤཊིཔཀྑོ ཨམོཧོ. སོཔི ཧི ཡེསུ དྷམྨེསུཝཱ ཨཏྠེསུཝཱ ཙཏཱུསུ ཨརིཡསཙྩེསུཝཱ མོཧོ ཨནྡྷཀཱརཾ ཀཏྭཱ པཝཏྟཏི. ཏེསྭེཝ ཏཾ མོཧཾ ཝིདྷམིཏྭཱ ཙནྡསཱུརིཡསཧསྶཾ ཨུཊྛཱཔེནྟོཝིཡ ཝིཛྫཱནཱམ ཧུཏྭཱ པཝཏྟཏཱིཏི.

༡༠༣. ཏཏྲམཛ྄ཛྷཏྟཏཱཏི ཨེཏྠ ཨཏྟཱ ཝུཙྩཏི སབྷཱཝོ. ལཱིནུདྡྷཙྩཱདཱིནཾ ཨུབྷིནྣཾ ཝིསམཔཀྑཱནཾ མཛ྄ཛྷེ པཝཏྟོ ཨཏྟཱ ཨེཏསྶཱཏི མཛ྄ཛྷཏྟཱ. སམཔྤཝཏྟོ སམྤཡུཏྟདྷམྨསམཱུཧོ. ཏསྶ བྷཱཝོ མཛ྄ཛྷཀྐཏཱ. ¶ ཏེསུ ཏེསུ སམྤཡུཏྟདྷམྨེསུ དིསྶམཱནཱ མཛ྄ཛྷཏྟཏཱ ཏཏྲམཛ྄ཛྷཏྟཏཱ ཏེསུ ཏེསུཝཱ ཧིཏཀམྨེསུ ཙིཏྟཙེཏསིཀཱནཾ མཛ྄ཛྷཏྟཏཱ ཏཏྲམཛ྄ཛྷཏྟཏཱ. ཏཐཱ ཧི སཱ སམཔྤཝཏྟཱནཾ སམྤཡུཏྟ དྷམྨཱནཾ ཨཛ྄ཛྷུཔེཀྑནཝསེན སམཔྤཝཏྟཱནཾ ཨཱཛཱནེཡྻཱནཾ ཨཛ྄ཛྷུཔེཀྑནསཱརཐཱིཝིཡ དཊྛབྦཱཏི ཝུཏྟཱ. ཨཡམེཝཙ བྲཧྨཝིཧཱརེསུ ཨུཔེཀྑཱཏི ཝུཏྟཱ.

༡༠༤. ཀཱཡཔྤསྶདྡྷཱདཱིསུ ཀཱཡོཏི ཝེདནཱདིཀྑནྡྷཏྟཡ སངྑཱཏོ ཙེཏསིཀསམཱུཧོ ཝུཙྩཏི. ཙིཏྟནྟི སོབྷཎཙིཏྟཾ. ཀཱཡསྶ པསྶདྡྷི ཀཱཡཔྤསྶདྡྷི. ཙིཏྟསྶ པསྶདྡྷི ཙིཏྟཔྤསྶདྡྷཱིཏིཨཱདིནཱ སམཱསོ. པསྶམྦྷནཾ པསྶདྡྷི. སནྟསཱིཏལབྷཱཝོཏི ཨཏྠོ. ཡེསཾ ཨིདཾ དྭཡཾ དུབྦལཾ ཧོཏི. ཏེ པུཉྙཀམྨེསུ ཙིཏྟསུཁཾ ནཔིནྡནྟི. བཧིདྡྷཱཨེཝ ནེསཾ ཙིཏྟཾ པཀྑནྡཏི. སནྟཏྟེ པཱསཱཎཔིཊྛེ ཐཔིཏམཙྪོཝིཡ ཧོཏི. ཡེསཾ པན བལཝཾ ཧོཏི. ཏེཡེཝ ཏཏྠ ཏཾ ཝིནྡནྟི. ཏེསཾ ཙིཏྟཾ སཱིཏལེ ཨུདཀེ པཀྑིཏྟ མཙྪོ ཝིཡ ཧོཏི.

༡༠༥. ལཧུབྷཱཝོ ལཧུཏཱ. ཨགརུཏཱ ཨདནྡྷཏཱཏི ཨཏྠོ. ཡེསཾ ཨིདཾ དུབྦལཾ. ཏེསཾ ཙིཏྟཾ པུཉྙཀམྨེསུ ནཔསཱརེཏི སངྐོཙཏི. ཏཏྟཔཱསཱཎེ པཀྑིཏྟཔདུམཔུཔྥཾ ཝིཡ ཧོཏི. ཡེསཾ པན བལཝཾ. ཏེསཾ ཙིཏྟཾ ཏཏྠ པསཱརེཏི. སཱིཏལེ ཨུདཀེ པཀྑིཏྟ པདུམཔུཔྥཾ ཝིཡ ཧོཏི.

༡༠༦. མུདུབྷཱཝོ མུདུཏཱ. ཡེསཾ ཨིདཾ དུབྦལཾ. ཏེསཾ ཙིཏྟཾ པུཉྙཀམྨེསུ ཐདྡྷཾ ཧོཏི. ཝེརཱིནཾ མཛ྄ཛྷེ གཏམཧཱཡོདྷོཝིཡ ཧོཏི. ཡེསཾ པན བལཝཾ. ཏེསཾ ཙིཏྟཾ ཏཏྠ མུདུ ཧོཏི. ཝིཡཉྙཱཏཱིནཾ མཛ྄ཛྷེ གཏམཧཱཡོདྷོ ཝིཡ ཧོཏི.

༡༠༧. ཀམྨནི སཱདྷུ ཀམྨཉྙཾ. ཏདེཝ ཀམྨཉྙཏཱ. ཡེསཾ ཨིདཾ དུབྦལཾ. ཏེསཾ ཙིཏྟཾ པུཉྙཀམྨེསུ ཡཐིཙྪིཏཾ ཐཔེཏུཾ ནལབྦྷཏི, ཝིཀྐིརཏི. པཊིཝཱཏེ ཁིཏྟཐུསམུཊྛིཝིཡ ཧོཏི. ཡེསཾ པན བལཝཾ. ཏེསཾཡེཝ ཏཾ ཏཏྠ ཡཐིཙྪིཏཾ ཐཔེཏུཾ ལབྦྷཏི ནཝིཀྐིརཏི. པཊིཝཱཏེ ཁིཏྟསུཝཎྞཀྑནྡྷོཝིཡ ཧོཏི.

༡༠༨. པགུཎསྶ ¶ བྷཱཝོ པཱགུཉྙཾ. ཏདེཝ པཱགུཉྙཏཱ. ཡེསཾ ཨིདཾ དུབྦལཾ. ཏེསཾ ཙིཏྟཾ པུཉྙཀམྨེསུ ཝིཀམྤཏི ཝིཧཉྙཏི. གམྦྷཱིརེ ཨུདཀེ ཁིཏྟཝཱནརོཝིཡ ཧོཏི. ཡེསཾ པན བལཝཾ, ཏེ སཾ ཏཾ ཏཏྠ ནཝིཀམྤཏི ནཝིཧཉྙཏི. གམྦྷཱིརེ ཨུདཀེ ཁིཏྟ ཀུམྦྷིལོ ཝིཡ ཧོཏི.

༡༠༩. ཨུཛུཨེཝ ཨུཛུཀཾ, ཨུཛུཀསྶ བྷཱཝོ ཨུཛུཀཏཱ. ཡེསཾ ཨིདཾ དུབྦལཾ. ཏེསཾ ཙིཏྟཾ པུཉྙཀམྨེསུ ཝིསམགཧིཀཾ ཧོཏི. ཀདཱཙི ལཱིནཾ. ཀདཱཙི ཨུདྡྷཊཾ. ཀདཱཙི ཨོནཏཾ. ཀདཱཙི ཨུནྣཏཾ. སུརཱམདམཏྟསྶ མགྒགམནཾ ཝིཡ ཧོཏི. ཡེསཾ པན བལཝཾ, ཏེསཾ ཏཾ ཝུཏྟཝིཔརིཡ ཡེན ཝེདིཏབྦནྟི.

༡༡༠. ཨེཏྠཙ སིདྡྷེསུཔི ཙིཏྟཔྤསྶདྡྷཱདིཀེསུ ཝུཏྟེསུ ཝིསུཾ ཀཱཡཔྤསྶདྡྷཱདཱིནཾ ཝཙནཾ ཏེསཾ ཝསེན རཱུཔཀཱཡསྶཔི པསྶདྡྷཱདི དཱིཔནཏྠནྟི ཝེདིཏབྦཾ. ཏཏྠ ཏཾ ཏཾ སུཏྟནྟཾ སུཏྭཱ གེལཉྙཝུཊྛཱ ནཱདཱིསུ རཱུཔཀཱཡསྶ པསྶདྡྷབྷཱཝོ པཱཀཊོ ཨིདྡྷིམནྟཱནཾ ཨིདྡྷིཡཱ ཨཱཀཱསགམནཱདཱིསུ ལཧུ བྷཱཝོ. ཀཱཡཾ ཁུདྡཀཾ ཝཱ མཧནྟཾ ཝཱ ཀཏྭཱ ནིམྨིནནེསུ མུདུབྷཱཝོ. ཨནྟོཔཐཝིཡཾཝཱ ཨནྟོཔབྦཏེ སུཝཱ ཨསཛྫམཱནཾ ཀཏྭཱ གམནཱདཱིསུ ཀམྨཉྙབྷཱཝོ. ནཱགཝཎྞཾཝཱ གརུལ༹ཝཎྞཾཝཱ ཀཏྭཱ ནིམྨིནནཱདཱིསུ པགུཎབྷཱཝོ ཏེསྭེཝ སབྦེསུ ཡཐཱནིམྨིཏཝསེན ཙིརཔྤཝཏྟིབྷཱཝེསུ ཨུཛུཀབྷཱཝོ པཱཀཊོ ཧོཏཱིཏི ཝེདིཏབྦོ. སམཾ དྷཱརེནྟཱིཏི སཱདྷཱརཎཱ, སབྦེཧི སོབྷཎཙིཏྟེཧི, ཏེསཾཝཱ སཱདྷཱརཎཱ སོབྷཎ སཱདྷཱརཎཱ.

༡༡༡. སམྨཱཝཱཙཱཏི ཨེཏྠ ཏིཝིདྷཱ སམྨཱཝཱཙཱ ཀཐཱ, ཙེཏནཱ, ཝིརཏིཝསེན, ཏཏྠ ཨཏྠདྷམྨཔྤཊིསཾཡུཏྟཱ སུབྷཱསིཏཱ ཝཱཙཱ ཀཐཱ སམྨཱཝཱཙཱནཱམ. ཏཾསམུཊྛཱཔིཀཱ ཀུསལཀྲིཡཙེཏནཱ ཙེཏནཱསམྨཱཝཱཙཱནཱམ. ཡཱ པན མུསཱཝཱདཱ ཝེརམཎཱདཱིནི སིཀྑཱཔདཱནི སམཱདིཡནྟསྶཝཱ ཨདྷིཊྛཧནྟསྶཝཱ སམྤཏྟཾ ཝཏྠུཾ ཨཝཱིཏིཀྐམནྟསྶཝཱ པཱཔཝིརམཎཱཀཱརེན ཙིཏྟསྶ པཝཏྟི. ཨཡཾ ཝིརཏི སམྨཱཝཱཙཱནཱམ. སཱ ཨིདྷ ཨདྷིཔྤེཏཱ. སམྨཱ ཝདནྟི ཨེཏཱ ཡཱཏི ¶ སམྨཱཝཱཙཱ. ཨེཏཱཡཱཏི ཙེཏྠ ཀརཎཏྠེ ཧེཏུཨཏྠེ ཝཱ ཀརཎཝཙནཾ དཊྛབྦཾ. ཏཏྠ ཝཱཙཱཡ སིཀྑཱཔདཱནི སམཱདིཡནྟསྶ སམཱདཱནཝཙནཱནི སནྡྷཱཡ ཀརཎཏྠོ ཧེཏུཨཏྠོ ཙ ཡུཛྫཏི. ཏཏོ ཡཐཱསམཱདིནྣཱནིཝཱ ཡཐཱདྷིཊྛིཏཱནིཝཱ སིཀྑཱཔདཱནི སུཊྛུརཀྑཱམཱཏི ཡཱནི ཨནཝཛྫཱནིཨེཝ ཝཙནཱནི ཝདནྟཱ ཝིཙརནྟི. ཏཱནི སནྡྷཱཡ ཀརཎཏྠཱནུཀཱུལོ ཧེཏུ ཨཏྠོཡེཝ ཡུཛྫཏཱིཏི. ཨཐཝཱ, ཏཐཱ ཝདནྟུཝཱ མཱཝཱ. ཨཡཾཔན ཝདམཱནེསུ སཏི ཏེསཾ སམྨཱ ཝཏྟུཾཨེཝ དེཏི. ནམིཙྪཱ ཝཏྟུནྟི ཀཏྭཱ སམྨཱ ཝཱཙཱཏྭེཝ ཝུཙྩཏི. ཨཔིཙ, ཨཡཾ ཝཙཱིདུཙྩརིཏཱནཾ པཛཧནཝསེན པཝཏྟམཱནཱ ཝཙཱིདྭཱརསུདྡྷིཡཱ ཨེཝ ཧོཏཱིཏི སམྨཱཝཱཙཱཏི ཝུཙྩཏཱིཏི.

༡༡༢. སམྨཱཀམྨནྟོཔི ཏིཝིདྷོ ཀྲིཡཱ, ཙེཏནཱ, ཝིརཏི ཝསེན. ཏཏྠ ཡཾཀིཉྩི ཨནཝཛྫཾ ཀམྨཾ ཀརོནྟསྶ ཀཱཡིཀཀྲིཡཱ ཀྲིཡཱཀམྨནྟོནཱམ. ཏཾསམུཊྛཱཔིཀཱ ཙེཏནཱ ཙེཏནཱཀམྨནྟོ ནཱམ. ཡཱ པན པཱཎཱཏིཔཱཏཱ ཝེརམཎཱདཱིནི སིཀྑཱཔདཱནི སམཱདི ཡནྟསྶཝཱ ཨདྷིཊྛཧནྟསྶཝཱ སམྤཏྟཾ ཝཏྠུཾ ཨཝཱིཏིཀྐམནྟསྶཝཱ པཱཔཝིརམཎཱཀཱརེན ཙིཏྟསྶ པཝཏྟི. ཨཡཾ ཝིརཏི སམྨཱཀམྨནྟོ ནཱམ. སམྨཱ ཀརོནྟི ཨེཏེནཱཏི སམྨཱཀམྨཾ, ཏདེཝ སམྨཱ ཀམྨནྟོ སུཏྟནྟོ ཝནནྟོཝིཡ. སེསམེཏྠ ཝུཏྟནཡམེཝ.

༡༡༣. སམྨཱཨཱཛཱིཝོཔི ཝཱིརིཡ, ཝིརཏིཝསེན དུཝིདྷོ. ཏཏྠ པཀཏིཡཱ ཨནཝཛྫཱནི ཀསིཀམྨཱདཱིནིཝཱ བྷིཀྑཱཙརིཡཱདཱིནིཝཱ ཀཏྭཱ ཛཱིཝིཏཾ ཀཔྤེནྟཱནཾ ཨུཊྛཱནབལསངྑཱཏོ ཝཱཡཱམོ ཝཱིརིཡསམྨཱཨཱཛཱིཝོནཱམ. ཡཱ པན ཨཱཛཱིཝསུདྡྷིཾ ཨཔེཀྑིཏྭཱ ཨཏྟནོ ཨཱཛཱིཝསཱིལཝིཔཏྟིཀཱརཎཱནི ཀཱཡཝཙཱིདུཙྩརིཏཱནི པཛཧནྟཱནཾ པཱཔཝིརམཎཱཀཱརེན ཙིཏྟསྶ པཝཏྟི. ཨཡཾ ཝིརཏི ཨཱཛཱིཝོནཱམ. ཨཡམིདྷཱདྷིཔྤེཏོ. སམྨཱ ཨཱཛཱིཝནྟི ཛཱིཝིཏཾ པཝཏྟེནྟི ཨེཏེནཱཏི སམྨཱཨཱཛཱིཝོ. སེསམེཏྠ ཝུཏྟནཡམེཝཱཏི.

༡༡༤. ཨེཀེཀཱཔི ཙེཏྠ སམྤཏྟ ཝིརཏི, སམཱདཱན ཝིརཏི, སམུཙྪེདཝིརཏིཝསེན ཏིཝིདྷཱ. ཏཏྠ ཡཱ སིཀྑཱཔདཱནི ཨསམཱ དིཡིཏྭཱཝཱ ¶ སམཱདིནྣཱནིཔིཝཱ ཏཱནི ཨནཔེཀྑིཏྭཱ ཀེཝལཾ ཧིརི ཨོཏྟཔྤབལེནེཝ སམྤཏྟཾ ཝཏྠུཾ ཨཝཱིཏིཀྐམནྟཱནཾ ཨུཔྤནྣཱ ཝིརཏི. ཨཡཾ སམྤཏྟཝིརཏིནཱམ. སཱ པཙྩུཔྤནྣཱརམྨཎཱཡེཝ. པཉྩསིཀྑཱ པདཱ པཙྩུཔྤནྣཱརམྨཎཱཏི ཧི ཝུཏྟཾ. ཡཱ པན སིཀྑཱཔདཱནི སམཱདི ཡནྟསྶཝཱ ཨདྷིཊྛཧནྟསྶཝཱ ཡཐཱསམཱདིནྣཱནིཝཱ ཡཐཱདྷིཊྛིཏཱནི ཝཱ སུཊྛུརཀྑཱམཱིཏི སམྤཏྟ ཝཏྠུཾ ཨཔཱིཏིཀྐམནྟསྶཝཱ ཨུཔྤནྣཱ. ཨཡཾ སམཱདཱནཝིརཏིནཱམ. སཱ པན པཙྩུཔྤནྣཱརམྨཎཱཝཱ ཧོཏི ཨནཱགཏཱརམྨཎཱཝཱ. ཏཐཱ ཧི པཉྩསིཀྑཱཔདཱ པཙྩུཔྤནྣཱརམྨཎཱཏི ཨིདཾ སམྤཏྟཝིརཏིཝསེན ཝུཏྟནྟི ཨཊྛཀཐཱཡཾ ཝུཏྟཾ. མགྒཀྑཎེ པན སབྦདུཙྩརིཏཱནཾ པཙྩཡསམུཙྪེདཝསེན ཨུཔྤནྣཱ སམུཙྪེདཝིརཏིནཱམ. སཱ པན ནིབྦཱནཱརམྨཎཱཨེཝ. ཕལཝིརཏིཔི ཨེཏྠེཝ སངྒཧིཏཱཏི. ཏཏྠ ལོཀིཡཝིརཏིཡོ ཛཱིཝིཏིནྡྲིཡཱདཱིནི ཝཱིཏིཀྐམིཏབྦཝཏྠཱུནི ཨཱརམྨཎཾ ཀཏྭཱ པཱཎཱཏིཔཱཏཱདཱིནི ཝིརམིཏབྦཝཏྠཱུནི པཛཧནྟི. ལོཀུཏྟརཝིརཏིཡོ པན ནིབྦཱནཾ ཨཱརམྨཎཾ ཀཏྭཱ ཏཱནིཡེཝ ཝིརམིཏབྦཝཏྠཱུནི པཛཧནྟཱིཏི དཊྛབྦཾ.

༡༡༥. པརདུཀྑེ སཏི ཀཱརུཎིཀཱནཾ ཧདཡཁེདཾ ཀརོཏཱིཏི ཀརུཎཱ. ཀིརཏིཝཱ པརདུཀྑཾ ཝིཀྑིཔཏི, ཀིཎཱཏིཝཱ པརདུཀྑཾ ཧིཾསཏཱིཏི ཀརུཎཱ. ཀིརཱིཡཏི དུཀྑིཏེསུ པསཱརཱིཡཏཱིཏིཝཱ ཀརུཎཱ. ཨཔིཙ ཀལི ཨུཎཱཏི ཚེདོ. ཀལཱིཏི དུཀྑཾ ཝུཙྩཏི, ཡཐཱ-ཀལི སམྦྷཝེ བྷཝེཏི. ཀལཱིཏིཝཱ པཱཔཔི པརཱཛཡོཔི ཝུཙྩཏི. པཱཔེ ཀལི པརཱཛཡེཏི ཧི ཝུཏྟཾ. སབྦཉྩེཏཾ ཀཱརུཎིཀཱ ནཾ ཀཱརུཉྙཧེཏུབྷཱུཏམེཝ ཧོཏི. ཨིཏི ཀལིཾ དུཀྑཾཝཱ པཱཔཾཝཱ སབྦསམྤཏྟིཏོ པརཱཛཡཾཝཱ སཏྟེཧི ཨཝནྟི རཀྑནྟི, སཏྟེཝཱ ཏཏོ ཝིདྷཀལིཏོ ཨཝནྟི རཀྑནྟི ཀཱརུཎིཀཱ ཛནཱ ཨེཏཱཡཱཏི ཀརུཎཱ.

༡༡༦. པརསམྤཏྟིཾ དིསྭཱ མོདནྟི ཨེཏཱཡཱཏི མུདིཏཱ. ནཏྠི པམཱཎཾ ཨེཏེསནྟི ཨཔྤམཱཎཱ, སཏྟཱ. ཨཔྤམཱཎེསུ བྷཝཱཏི ཨཔྤམཉྙཱ. ཨེཏཱཧི ཨེཏྟཀེསུཡེཝ སཏྟེསུ པཝཏྟེཏབྦཱ. ན ཨིཏོ ཨཉྙེསཱུཏི ཨེཝཾ པརིཙྪེདཔྤམཱཎསྶ ཨབྷཱཝཱ ཨེཀསྨིཾ སཏྟེ པཝཏྟཱཔི ཨཔྤམཉྙཱཨེཝནཱམ ཧོནྟཱིཏི.

[༧༧] ཊཱིཀཱསུ པན

ཨཔྤམཱཎསཏྟཱ ¶ རམྨཎཏྟཱ ཨཔྤམཱཎཱ. ཏཱཨེཝ ཨཔྤམཉྙཱཏི ཝུཏྟཾ. ཏཾ ན སུནྡརཾ.

༡༡༧. པཉྙིནྡྲིཡནྟི ཧེཊྛཱ ཝུཏྟོ ཨམོཧོཨེཝ. སོ ཧི པཛཱནནཊྛེན པཉྙཱ, ཨདྷིཔཏིཡཊྛེན ཨིནྡྲིཡཉྩཱཏི ཀཏྭཱ པཉྙིནྡྲིཡནྟི ཝུཙྩཏཱིཏི.

སོབྷཎརཱསིམྷི པརམཏྠདཱིཔནཱ.

༡༡༨. ཨེཏྟཱཝཏཱཏིཨཱདི ཏིཎྞཾ རཱསཱིནཾ སངྒཧོ. ཨེཝཾ དྭིཔཉྙཱས སརཱུཔཾ དསྶེཏྭཱ ཨིདཱནི ཙེཏོཡུཏྟཔྤཀཱརཾ དསྶེནྟོ ཏེསནྟིཨཱདིམཱཧ. ཨིཏོ ཙེཏསིཀཱནཾ སརཱུཔདསྶནཏོ པརཾ ཏེསཾ ཙིཏྟཱཝིཡུཏྟཱནཾ ཙིཏྟེན ཨཝིཡུཏྟཱནཾ ཙེཏསིཀཱནཾ ཙིཏྟུཔྤཱདེསུ པཙྩེཀཾ སམྤཡོགོ ཏཐཱཡོགཾ ཝུཙྩཏེཏི ཡོཛནཱ. ཙིཏྟུཔྤཱདེསཱུཏི ཙིཏྟེསུ ཨིཙྩེཝ ཨཏྠོ. ཨུཔྤཛྫནྟི ཙེཏསིཀཱ ཨེཏེསཱུཏི ཨུཔྤཱདཱ. ཙིཏྟཱནིཨེཝ ཨུཔྤཱདཱ ཙིཏྟུཔྤཱདཱཏི ཀཏྭཱ. དྭིཔཉྩཝིཉྙཱཎཱནཾ སབྦདུབྦལཏྟཱ ཏེསུ ཚ པཀིཎྞཀཱ ནུཔྤཛྫནྟི. བྷཱཝནཱབལེན པཧཱིནཏྟཱ ཝིཏཀྐོ དུཏཱིཡཛ྄ཛྷཱནིཀཱདཱིསུ, ཝིཙཱརོ ཏཏཱིཡཛ྄ཛྷཱནིཀཱདཱིསུ, པཱིཏི ཙཏུཏྠཛ྄ཛྷཱནིཀཱདཱིསུ ནུཔྤཛྫཏི. སནྣིཊྛཱནསབྷཱཝཏྟཱ ཨདྷིམོཀྑོ ཨསནྣིཊྛཱནསབྷཱཝེ ཝིཙིཀིཙྪཱ ཙིཏྟེ ནུཔྤཛྫཏི. ཝཱིརིཡཾ བལནཱཡཀཏྟཱ དུབྦལེསུ པཉྩདྭཱརཱཝཛྫནཱ དཱིསུ སོལ༹སཙིཏྟེསུ ནུཔྤཛྫཏི. པཱིཏི སམྤིཡཱཡནསབྷཱཝཏྟཱ དོམནསྶུཔེཀྑཱ སཧགཏེསུ ནུཔྤཛྫཏི. ཚནྡོ ཨིཙྪཱསབྷཱཝཏྟཱ ཨིཙྪཱརཧིཏེསུ ཨཧེཏུཀེསུ མོམཱུཧཙིཏྟེསུཙ ནུཔྤཛྫཏཱིཏི ཨཱཧ པཀིཎྞཀེསུཔན ཝིཏཀྐོ.ལ. མོམཱུཧཝཛྫིཏཙིཏྟེསཱུཏི. ཏེ པན ཙིཏྟུཔྤཱདཱ པཀིཎྞཀཝིཝཛྫིཏཱ སཔཀིཎྞཀཱཏི སམྦནྡྷོ.

༡༡༩. ཨཀུསལེསཱུཏི ཨཀུསལཙེཏསིཀེསུ. སབྦཱཀུསལ སཱདྷཱརཎཱནཱམ. ཏསྨཱ སབྦེསུཔི དྭཱདསཱཀུསལཙིཏྟེསུ ལབྦྷནྟཱིཏི ཡོཛནཱ.

[༧༨] ཝིབྷཱཝནིཡཾ པན

པཙྪིམཾ ¶ པུརིམསྶ སམཏྠནཝཙནནྟི ཨདྷིཔྤེཏཾ. ཏཾ ན སུནྡརཾ.

ཨིདཉྷི ཋཱནཾ ཙིཏྟེསུ ལབྦྷམཱནཏཱདསྶནཔདྷཱནནྟི. ཡསྨཱ པན སབྦཱནི ཨཀུསལཙིཏྟཱནི ཨིམེཧི ཙཏཱུཧི ཝིནཱ ནུཔྤཛྫནྟི. ན ཧི ཏཱནི པཱཔེསུ ཨཱདཱིནཝཾ པསྶིཏྭཱ ཋིཏཱནཾ ཨུཔྤཛྫནྟི. ནཙ ཏེཧི ལཛྫཱཡཝཱ བྷཡེནཝཱ ཨུཀྐཎྛིཏཱནཾ. ནཱཔི ཀུསལེསུ དྷམྨེསུ སམཱཧིཏཱནནྟི. ཏསྨཱ ཏེ སབྦེསུ ཏེསུ ལབྦྷནྟཱིཏི. ཡསྨཱཙ དིཊྛིམཱནཱ ཁནྡྷེསུ ཨསྶཱདཾ ཨམུཉྩིཏྭཱཝ ཏེསུ ཏཐཱ ཏཐཱ ཨཱམསིཏྭཱ པཝཏྟནྟི. ཏསྨཱ ཏེ ལོབྷམཱུལཙིཏྟེསྭེཝ ཨུཔྤཛྫནྟི. ཏཏྠ ཨུཔྤཛྫནྟེསུ པན ཏེསུ དིཊྛི ཁནྡྷེསུ ཨཏྟགྒཱཧཾ དལ༹ྷཾ གཧེཏྭཱ ཏཾ ཨཏྟཾ ནིཙྩཏཱདཱིཧི མིཙྪཱསབྷཱཝེཧིཨེཝ པརཱམསནྟཱི པཝཏྟཏི. མཱནོ པན ཁནྡྷེ ཨཧནྟི དལ༹ྷཾ གཧེཏྭཱ ཏཾ གཧིཏཱཀཱརཾ སེཡྻ ཏཱདཱིཧིཨེཝ ཨཱམསནྟོ པཝཏྟཏི. ཏསྨཱ ཏེ ཨཱམསནཱཀཱརཏོ ཨསདིསཝུཏྟིནོཨེཝ ཧོནྟཱིཏི ཨཱཧ. དིཊྛིཙཏཱུསུ.ལ. ཝིཔྤཡུཏྟེསཱུཏི. ཡེ པན དིཊྛིགཏིཀཱ དིཊྛིཡཱ ཡཐཱགཧིཏཾ ཨཏྟཱནམེཝ ཨཧནྟི གཎྷནྟི. ཏེསཾཔི དིཊྛིམཱནཱ ཨཱམསནཱཀཱརཾ པཏྭཱ ཨསདིསཝུཏྟིཀཱཨེཝ ཧོནྟི. ན ཧི མཱནསྶ ཝིཡ དིཊྛིཡཱ ཨཏྟ སཾཔགྒཧཎེ བྱཱཔཱརོ ཨཏྠི. ན ཙ དིཊྛིཡཱ ཝིཡ མཱནསྶ དྷམྨཱནཾ ཨཡཱཐཱཝཔཀྑཔརིཀཔྤནེཏི. ཏེནེཝ ཧི ཨཧཾགཱཧོ མཱནོ ཨནཱགཱམཱིནཾཔི པཝཏྟཏི. ཨཏྟགྒཱཧབྷཱུཏཱ པན དིཊྛི པུཐུཛྫནཱན མེཝཱཏི.

[༧༩] ཝིབྷཱཝནིཡཾ པན

‘‘མཱནོཔི ཨཧཾམཱནཝསེན པཝཏྟནཏོ དིཊྛིསདིསོཝ པཝཏྟཏཱིཏི དིཊྛིཡཱ སཧ ཨེཀཙིཏྟུཔྤཱདེ ནཔཝཏྟཏཱི’’ཏི ཝཏྭཱ ཀེསར སཱིཧོ པམཱཡ ཏཾ ཨཏྠཾ སཱདྷེཏི. ཏཾ ན སུནྡརཾ.

སདིསཔྤཝཏྟི ཧི ནཱམ སཧཔཝཏྟིཡཱ ཨེཝ ཀཱརཎནྟི. མཙྪརིཡཾ པན ཨཏྟསམྤཏྟཱིསུ ལགྒནལོབྷསམུཊྛིཏཾཔི ཏཱསཾ པརེཧི སཱདྷཱརཎབྷཱཝཾ ¶ ཨསཧནཱཀཱརེན པཝཏྟཏྟཱ ཨེཀནྟེན པཊིགྷསམྤ ཡུཏྟམེཝ ཧོཏཱིཏི ཝུཏྟཾ དོསོ.ལ. ཙིཏྟེསཱུཏི. ཨཀམྨཉྙ ལཀྑཎཾ ཐིནམིདྡྷཾ ཀམྨཉྙསབྷཱཝེསུ ཨསངྑཱརིཀེསུ ནསམྦྷཝཏཱིཏི ཝུཏྟཾ ཐིནམིདྡྷཾ པཉྩསུ སསངྑཱརིཀ ཙིཏྟེསཱུཏི. ཙཏྟཱརོ སབྦཱ ཀུསལསཱདྷཱརཎཱ. ཏཡོ ལོབྷ དིཊྛིམཱནཱ. ཙཏྟཱརོ དོསཱདཡོ. དྭཡཾ ཐིནམིདྡྷཾ. ཝིཙིཀིཙྪཱ ཙིཏྟེཙཱཏི ཙསདྡོ ཨཝདྷཱརཎེ. ཝིཙིཀིཙྪཱཙིཏྟེཨེཝཱཏི ཨཏྠོ. ཙཏུདྡས ཨཀུསལ ཙེཏསིཀཱ.

༡༢༠. སོབྷཎེསཱུཏི སོབྷཎཙེཏསིཀེསུ. ལོཀུཏྟརེ ཨཊྛངྒིཀམགྒེ ཏཱིསུ ཁནྡྷེསུ པཉྙཱཀྑནྡྷེ སམྨཱསངྐཔྤོ ནཱམ སམྨཱདིཊྛིཔཙྪིམཀོཝ ཧོཏི. ཏསྨཱ པཱདཀཛ྄ཛྷཱནཱདིཝསེན ཏསྨིཾ ཨསཏིཔི པཉྙཱཀྑནྡྷོ ནཔརིཧཱཡཏི. སཱིལསམཱདྷིཀྑནྡྷདྷམྨེསུ པན ཨེཀོ ཨེཀསྶ ཀིཙྩཾ ནསཱདྷེཏི. ཏསྨཱ ལོཀུཏྟར མགྒོ སཏྟངྒིཀཏོ ཧེཊྛཱ ནཔཝཏྟཏཱིཏི ཨཱཧ ཝིརཏིཡོ པན ཏིསྶོཔི.ལ. ལབྦྷནྟཱིཏི. ནིཡཏཱཝ ཨེཀཏོཝ སབྦཐཱཔི ལབྦྷནྟཱིཏི ཡོཛནཱ. ཏཏྠ ནིཡཏཱཝཱཏི ན ལོཀིཡེསུཝིཡ ཀདཱཙིཨེཝ ལབྦྷནྟི. ཨཐཁོ སབྦདཱཔི ནིཡཏཱ ཧུཏྭཱཝ ལབྦྷནྟི. ཀསྨཱ, ལོཀུཏྟརདྷམྨཱནཾ ནིཙྩཾ སཱིལེསུ པརིཔཱུརཀཱརིཏཱཝསེན པཝཏྟཏྟཱ. ན ཧི ཏེ ལོཀིཡཱ ཝིཡ ཀདཱཙི དཱནཝསེན ཀདཱཙི སུཏཔརིཡཏྟིཝསེན ཀདཱཙི ཀསིཎབྷཱཝནཱདིཝསེན པཝཏྟནྟཱིཏི. ཨེཀཏོ ཝཱཏི ནལོཀིཡེསུ ཝིཡ ཝིསུཾ ཝིསུཾ ལབྦྷནྟི. ཨཐཁོ ཏིསྶོཔི ཨེཀཏོ ཧུཏྭཱཝ ལབྦྷནྟི. ཀསྨཱ, ཨབྷིནྣཱརམྨཎཏྟཱ. ན ཧི ཏེ ལོཀིཡཱ ཝིཡ ཝཱིཏིཀྐམིཏབྦཝཏྠུསངྑཱཏཱནི ཛཱིཝིཏིནྡྲིཡཱདཱིནི ནཱནཱརམྨཎཱནི ཨཱརབྦྷ པཝཏྟནྟི. ཨེཀཾཔན ནིབྦཱནམེཝ ཨཱརབྦྷཔཝཏྟནྟཱིཏི. སབྦཐཱཔཱིཏི ན ལོཀིཡེསུ ཝིཡ ཨེཀདེ སཔྤཧཱནཝསེན ལབྦྷནྟི. ཨཐཁོ ཏིསྶོཔི ཨནཝསེས དུཙྩརིཏ དུརཱཛཱིཝཔྤཧཱནཱཀཱརེན ལབྦྷནྟི. ལོཀིཡེསུཧི སཀིཾ ཨུཔྤནྣཱ སམྨཱཝཱཙཱ ཙཏུབྦིདྷཱནི ཝཙཱིདུཙྩརིཏཱནི སབྦཱནི ཨེཀཏོ པཛཧིཏུཾ ནསཀྐོཏི. མུསཱཝཱདཝིརཏི མུསཱཝཱདམེཝ པཛཧིཏུཾ སཀྐོཏི. ན ཨིཏརཱནི. མུསཱཝཱདཾཔི སམཱུལཾ སཱནུསཡཾ པཛཧིཏུཾ ནསཀྐོཏི. ¶ ཏཐཱ པིསུཎཝཱཙཱ ཝིརཏི པིསུཎཝཱཙམེཝ པཛཧིཏུཾ སཀྐོཏི. ན ཨིཏརཱནི. པིསུཎཝཱཙཾཔི སམཱུལཾ སཱནུསཡཾ པཛཧིཏུཾ ན སཀྐོཏི. སབྦཾ ཝིཏྠཱརེཏབྦཾ. ལོཀུཏྟརེསུ པན སཀིཾ ཨུཔྤནྣཱ སམྨཱཝཱཙཱ སབྦཱནི ཝཙཱིདུཙྩརིཏཱནི སམཱུལཱནི སཱནུསཡཱནི པཛཧཏི. སཀིཾ ཨུཔྤནྣོ སམྨཱཀམྨནྟོ སབྦཱནི ཀཱཡདུཙྩརིཏཱནི སམཱུལཱནི སཱནུསཡཱནི པཛཧཏི. སཀིཾ ཨུཔྤནྣོ སམྨཱཨཱཛཱིཝོ སབྦཱནི ཨཱཛཱིཝཧེཏུཀཱནི ཀཱཡཝཙཱིདུཙྩརིཏཱནི སམཱུལཱནི སཱནུསཡཱནི པཛཧཏི. ཨིཏི ཏིསྶོ ལོཀུཏྟརེསུཨེཝ སབྦཐཱཔི ལབྦྷནྟཱིཏི. ཝིསདྡོ ཨཝཡཝསམྤིཎྜནཏྠོ. སཀིཾ ཨུཔྤནྣཱ ཨེཀཱ སམྨཱཝཱཙཱ མུསཱཝཱདཔྤཧཱནཝསེནཱཔི ལབྦྷཏི. ནཀེཝལཉྩ ཏཔྤཧཱནཝསེནེཝ. ཨཐཁོ པིསུཎཝཱཙཱཔཧཱནཝསེནཔི ལབྦྷཏཱིཏི སབྦཾ ཝཏྟབྦཾ. ཨེཏྠཙ དུཙྩརིཏཱནི སམཱུལཱནི སཱནུསཡཱནཱིཏི ཨེཏྠ ཀཱཡཝཙཱིཙོཔན བྷཱགིཡཱནི ཀཱམརཱགཱནུསཡཱདཱིནི ཨུཔརིམགྒཝཛ྄ཛྷཱནི ཀིལེསཛཱཏཱནི ཨརཱུཔསེཀྑཱནཾཔི སནྟིཡེཝ. ཀཱམརཱུཔསེཀྑཱནཾ པན ཝཏྟབྦམེཝ ནཏྠི. ཏསྨཱ ཏེསཾ པཛཧནཝསེན ཨུཔརིམགྒ ཕལཝིརཏཱིནཾ དུཙྩརིཏཔྤཧཱནཾ དཊྛབྦཾ. ཀཱམཱཝཙརཀུསལེསྭེཝ, ནཔན ཀཱམཱཝཙརཝིཔཱཀཀྲིཡཙིཏྟེསུ, ནཱཔིམཧགྒཏཙིཏྟེསཱུཏི ཨདྷིཔྤཱཡོ. ཀཱམཱཝཙརཀུསལེསུཔི ཀཱམབྷཱུམིཡཾ ཨུཔྤནྣེསུཨེཝ, ནརཱུཔཱརཱུཔབྷཱུམིཡཾ ཨུཔྤནྣེསུ. ན ཧི བྲཧྨཱནཾ ཝིརམིཏབྦཝཏྠུ སངྑཱཏཱནི ཀཱཡཝཙཱིདུཙྩརིཏཱནིནཱམ ཨཏྠི. ནཙ ལོཀིཡཝིརཏིཡོ ཝིརམིཏབྦ ཝཏྠུརཧིཏེསུ པུགྒལེསུ པཝཏྟནྟཱིཏི. ཨུཔརི ཚཀཱམཱཝཙརདེཝེ སུཔི ནཔཝཏྟནྟཱིཏི ཝདནྟི. ཏཾ ཀཐཱཝཏྠུམྷི ཝིཙཱརིཏམེཝ. ཡདི ཨེཝཾ མནུསྶལོཀེཔི ཏཱིསུ ཧེཊྛིམཕལཊྛེསུ ཏཱསཾ ཨཔྤཝཏྟི ཨཱཔཛྫཏི. ན ཧི ཏེསཾཔི པཱཎཱཏིཔཱཏཱདཱིནི ཝིརམིཏབྦཝཏྠཱུནིནཱམ ཨཏྠཱིཏི. སཙྩཾ, ཨིདྷ པན སཏྟཝིདྷཨཱཔཏྟིཀྑནྡྷཱཔི ཝིརམིཏབྦཝཏྠུཊྛཱནེ ཋིཏཱ. ཏཐཱ ཏིཝིདྷཀུཧནཝཏྠཱུནིཙ. ཏཱནིཙ ཀཱནིཙི ཏེསཾ ཕལཊྛཱནཾཔི སཱདྷཱརཎཱནིཨེཝ. མནུསྶཱནཉྩ ཡཱནི ཀཱནིཙི ཏསྶ ཏསྶ སམཱདིནྣསྶ སིཀྑཱཔདསྶ ཝཏྠཱུནིཔི ཝིརམིཏབྦཝཏྠཱུནིཨེཝ. ཡཱནིཔི ཀཱམསེཀྑཱནཾ ཀཱཡཝཱཙཱ ཝིཔྥནྡནཀརཱནི ཀིལེསཛཱཏཱནི སམུཙྪེདཝིརཏཱིནཾ ཝཏྠུབྷཱུཏཱནི སནྟི. ཏཱནི ཏེསཾ ཏདངྒ ཝིརཏཱིནཾཔི ¶ ཝཏྠཱུནིཨེཝཱཏི. ཀདཱཙི སནྡིསྶནྟཱིཏི སམཱདཱནསམྤཏྟཝིརཏཱིནཾ ཨཉྙཏརཝསེན པཝཏྟཀཱལེཨེཝ སནྡིསྶནྟི. ཨེཝཾ སནྡིསྶ མཱནཱཔི བྷིནྣཱརམྨཎཏྟཱ ནཨེཀཏོ ཧུཏྭཱ སནྡིསྶནྟཱིཏི ཝུཏྟཾ ཝིསུཾ ཝིསུནྟི. ཝིསུཾཝིསུཾ སནྡིསྶམཱནཱཔི ཨེཀེཀདུཙྩརིཏཔྤཧཱནཝསེནེཝ སནྡིསྶནྟི. ན ལོཀུཏྟརེསུ ཝིཡ སབྦཐཱཔཱིཏི དཊྛབྦཾ.

༡༢༡. ཨཔྤནཱཔཏྟཱནཾ ཨཔྤམཉྙཱནཾ སོམནསྶསཧགཏབྷཱཝོཝ ཝིབྷངྒེ ཝུཏྟོཏི ཝུཏྟཾ པཉྩམཛ྄ཛྷཱནཝཛྫིཏམཧགྒཏཙིཏྟེསཱུཏི. ཨེཏཱཧི པརསཏྟཱནཾ ཧེཏུ ཨདྷིམཏྟབྱཱཔཱརཱ ཧོནྟི, ཏསྨཱ ཨཏིསནྟཱཡ ནིབྱཱཔཱརཱཡ པཉྩམཛ྄ཛྷཱནུཔེཀྑཱཡ སཧ ནཔཝཏྟནྟཱིཏི. ཨཔྤནཱཔུབྦབྷཱགབྷཱུཏཱནཾ པན ཏཱསཾ ཨུཔེཀྑཱཝེདནཱཡཔི སམྤཡོགོ ཨཊྛཀཐཱཡཾ ཨནུཉྙཱཏོཡེཝཱཏི ཝུཏྟཾ ཀཱམཱཝཙར.ལ. ཙིཏྟེསུཙཱཏི. ཀདཱཙཱིཏི ཀཱརུཉྙཔྤཀཏིཀསྶ ཨནིསྶུཀིནོཙ པརེསཾ ཝིཔཏྟིསམྤཏྟིདསྶནཀཱལེ. ནཱནཱཧུཏྭཱ ཛཱཡནྟཱིཏི ཏེསཾ ཝིཔཏྟིདསྶནཀཱལེ ཨནུཀམྤནཝསེན ཀརུཎཱ ཨེཝ ཛཱཡཏི, ནམུདིཏཱ. སམྤཏྟིདསྶནཀཱལེ པན མོདནཝསེན མུདིཏཱཝ ཛཱཡཏི, ནཀརུཎཱཏི ཨེཝཾ ཝིསུཾ ཝིསུཾ ཧུཏྭཱ ཛཱཡནྟཱིཏི ཨཏྠོ. ཡསྨཱ པནེཏཱ དོསསམུཊྛིཏཱནཾ ཝིཧིཾསཱ ཨརཏཱིནཾ ནིསྶརཎབྷཱུཏཱཏི སུཏྟནྟེསུ ཝུཏྟཱ. དོམནསྶཔཊིཔཀྑཉྩསོ མནསྶམེཝ ཧོཏི. ཏསྨཱ ཏཱསཾ ཨཔྤནཱཔུབྦབྷཱགབྷཱུཏཱནཾཔི ནིཙྩཾ སོམནསྶཡོགམེཝ ཀེཙི ཨིཙྪནྟཱིཏི ཝུཏྟཾ ཨུཔེཀྑཱསཧགཏེསུ.ལ. ཀེཙི ཝདནྟཱིཏི. སོ པན ཏེསཾ ཝཱདོ ཨཊྛཀཐཱཡཔི སཧ ཝིརུདྡྷོ. ཏསྨཱ ཏཾ བཧཱུ ཝིཉྙུནོ ན སམྤཊིཙྪནྟཱིཏི ཀཏྭཱ སོཝཱདོ ཐེརེན ཀེཙིཝཱདོནཱམ ཀཏོ. ཡསྨཱཙ སབྦེསཾཔི ལོཀིཡ ལོཀུཏྟརཛ྄ཛྷཱནཱནཾ པུབྦབྷཱག བྷཱཝནཱ ནཱམ ཨཔྤནཱསནྣཀཱལེཨེཝ སོམནསྶཛ྄ཛྷཱནཱནཾ པུབྦབྷཱགཱ སོམནསྶསཧགཏཱ ཧོནྟི. ཨུཔེཀྑཱཛྷཱནཱནཾ པུབྦབྷཱགཱ ཨུཔེཀྑཱསཧགཏཱ ཧོནྟི. ཨནཱསནྣཀཱལེ པན སབྦེསཾཔི ཏེསཾ པུབྦབྷཱགཱ ཀདཱཙི སོམནསྶསཧགཏཱ, ཀདཱཙི ཨུཔེཀྑཱསཧགཏཱཧོནྟི. ཏསྨཱ སོ ཝཱདོ ཀེཙིཝཱདོཝ ཀཱཏུཾ ཡུཏྟོཏི. ཨེཏྠཙ སབྦཱནིཔི སམཐཝིཔསྶནཱབྷཱཝནཱཙིཏྟཱནིནཱམ ཨཱདིམྷི ཡེབྷུཡྻེན ཨུཔེཀྑཱསཧགཏཱནིཨེཝ ¶ བྷཝེཡྻུཾ, ཡདིཡི ཏཱནི ཨཱདིཏོཡེཝ པཊྛཱཡ སོམནསྶསཧཛཱཏཱནི སིཡུཾ. ཏདཱ ཨིམེ སཏྟཱ སོ མནསྶཛཱཏེསུ ཀམྨེསུ ཨནབྷིརཏཱནཱམ ནཏྠཱིཏི ཨཉྙཾ ཀམྨཾ ཚཌྜེཏྭཱ བྷཱཝནཱཀམྨམེཝ ཨནུཡུཉྫེཡྻུནྟི. པཙྪཱ པན ཨཏྟནོ བྷཱཝནཱཡ པུབྦཱཔརིཡཝིསེསདསྶནཀཱལེཨེཝ སོམནསྶ སཧཛཱཏཱནི བྷཝནྟི. པཊིཀཱུལཱ རམྨཎེསུ པན ཨསུབྷབྷཱཝནཱཙིཏྟེསུ དུཀྑིཏསཏྟཱརམྨཎེསུཙ ཀརུཎཱབྷཱཝནཱཙིཏྟེསུ ཝཏྟབྦམེཝ ནཏྠི. ཨཔིཙ ཨིམཱ ཀརུཎཱམུདིཏཱནཱམ པཀཏིཀཱལེཔི ཨུཔྤཛྫནྟིཡེཝ. ཏཱསུ པན མུདིཏཱ ཏཱཝ ཨིཊྛསམྤཏྟིཝིསཡཱཏི སཱཡེབྷུཡྻེན སོམནསྶ སཧཛཱཏཱཏི ཡུཏྟམེཏཾ. ཀརུཎཱ པན ཨནིཊྛཝིཔཏྟིཝིསཡཱཏི སཱ ཡེབྷུཡྻེན ཨུཔེཀྑཱསཧཛཱཏཱ ཨེཝ སིཡཱ. ནཙ ཨེཏཱ པརསཏྟཧེཏུ ཨདྷིམཏྟ བྱཱཔཱརཱཏི ཀཏྭཱ ཨུཔེཀྑཱཝེདནཱཡ སཧ ཝིརུདྡྷཱཨེཝཱཏི སཀྐཱ ཝཏྟུཾ. སཱ ཧི ཨཔྤནཾ ཨཔཏྟཱ ཝེདནུཔེཀྑཱནཱམ ཨཱརམྨཎརསཱནུབྷཝནེཨེཝ ནིབྱཱཔཱརཱཧོཏི. ན ཨཉྙཀིཙྩེསུ. ཏཐཱ ཧི སཏྟཱ ཨུཔེཀྑཱསཧགཏ ཙིཏྟེཧི ཨདིནྣཾཔི ཨཱདིཡནྟི, དཱནཾཔི དེནྟི, ཨཉྙཱནིཔི མཧནྟཱནི པུཉྙཱཔུཉྙཀམྨཱནི ཀརོནྟིཡེཝཱཏི. ཏསྨཱ ཨཔྤནཱ པཏྟཱནཉྙེཝ ཏཱསཾ ཝེདནུཔེཀྑཱཡ སཧ ཝིརུདྡྷབྷཱཝོ ཝཏྟུཾ ཡུཏྟོཏི.

[༨༠] ཨེཏྟཱཝཏཱ ཡཾ ཝུཏྟཾ ཝིབྷཱཝནིཡཾ

‘‘ཀརུཎཱམུདིཏཱ བྷཱཝནཱཀཱལེ ཨཔྤནཱཝཱིཐིཏོ པུབྦེ པརིཙཡཝསེན ཨུཔེཀྑཱསཧགཏཙིཏྟེཧིཔི པརིཀམྨཾ ཧོཏི. ཡཐཱཏཾ པགུཎགནྠཾ སཛ྄ཛྷཱཡནྟསྶ ཀདཱཙི ཨཉྙཝིཧི ཏསྶཱཔི སཛ྄ཛྷཱཡནཾ, ཡཐཱཙ པགུཎཝིཔསྶནཱཡ སངྑཱརེ སམྨསནྟསྶཀདཱཙི པརིཙཡབལེན ཉཱཎཝིཔྤཡུཏྟཙིཏྟེཧིཔི སམྨསནནྟི ཨུཔེཀྑཱ སཧགཏཀཱམཱཝཙརེསུ ཀརུཎཱ མུདིཏཱནཾ ཨསམྦྷཝཝཱདོ ཀེཙིཝཱདོ ཀཏོ’’ཏི. ཏཾ པཊིཀྑིཏྟཾ ཧོཏཱིཏི དཊྛབྦཾ.

ཀིཉྩཱཔི ཀསིཎནིམིཏྟཱདཱིནི ཨཱརམྨཎཱནི ཨགམྦྷཱིརཱནིཨེཝ ཧོནྟི. ཏཐཱཔི ཡོགཀམྨབལེན ཙིཏྟསམཱདྷཱནབལེན ཀིལེས དཱུརཱིབྷཱཝེནཙ ¶ ཏདཱརམྨཎེསུ ཛྷཱནཙིཏྟེསུ ཉཱཎཾ ཨེཀནྟེན པཝཏྟ ཏིཡེཝཱཏི ཨཱཧ སབྦེསུཔི པཉྩ.ལ. ཙིཏྟེསུཙཱཏི.

༡༢༢. ཏཡོ ཝིརཏིདྷམྨཱ. དྭཡཾ ཨཔྤམཉྙཱཡུགལ༹ཾ. ཨེཝཾ སོ བྷཎཙེཏསིཀཱ སོབྷཎེསྭེཝ ཙིཏྟེསུ ཙཏུདྷཱ ཙཏཱུཧི པཀཱརེཧི སམྤཡུཏྟཱཏི ཡོཛནཱ. ཨིདཱནི སབྦེསཾཔི ཙེཏོ ཡུཏྟཱནཾ ནིཡཏཱ ནིཡཏཡོགིཝིབྷཱགཾ དསྶེཏུཾ ཨིསྶཱཏིཨཱདིམཱཧ. ཀརུཎཱ ཨཱདི ཡསྶཱཏི ཀརུཎཱདི. ཨཔྤམཉྙཱ དྭཡཾ. ཨིསྶཱམཙྪེརཀུཀྐུཙྩཱནིཙ ཝིརཏིཡོཙ ཀརུཎཱདིཙ ཨིསྶཱམཙྪེ རཀུཀྐུཙྩཝིརཏིཀརུཎཱདཡོ. ཏེ ནཱནཱཙ ཛཱཡནྟི, ཀདཱཙིཙ ཛཱཡནྟི. མཱནོཙ ཀདཱཙིཨེཝ ཛཱཡཏི. ཐིནམིདྡྷཉྩ ཏཐཱ ཀདཱཙི ཨེཝ ཛཱཡཏི. ཛཱཡམཱནཾ པན ཨཉྙམཉྙཾ སཧེཝ ཛཱཡཏི. ནནཱནཱཏི ཡོཛནཱ. ཨེཏྠཙ ཨཔྤམཉྙཱཝིརཏཱིནཾ ནཱནཱ ཀདཱཙི ཡོགོ ཧེཊྛཱཙ ཝུཏྟོ. ཨུཔརིཙ ཝཀྑཏི. ཨིསྶཱདཱིནཾཙ ཨུཔརི ཝཀྑཏི. མཱནཐིནམིདྡྷཱནཾ པན ཨིདྷ ཝཏྟབྦོཏི. ཏཏྠ མཱནོ ཙཏཱུསུ དིཊྛིཝིཔྤཡུཏྟེསུ ལབྦྷམཱནོཔི ཀདཱཙི ཏེསཾ སེཡྻོ ཧམསྨཱིཏིཨཱདིནཱ པཝཏྟཀཱལེཨེཝ ལབྦྷཏི, ནཨཉྙདཱ. ཐིནམིདྡྷཾ པཉྩསུ སསངྑཱརིཀེསུ ལབྦྷམཱནཾཔི ཀདཱཙི ཏེསཾ ནིདྡཱཏིབྷཱུཏཝསེན ཨཀམྨཉྙཏཱཡ པཝཏྟིཀཱལེཨེཝ ལབྦྷཏི. ན ཨཉྙདཱ. ཏདཱ ལབྦྷམཱནཾཔན དྭཡཾ སཧེཝ ལབྦྷཏི. ན ནཱནཱཏི.

[༨༡] ཝིབྷཱཝནིཡཾ པན

‘‘ཐིནམིདྡྷཾ ཀདཱཙི ཨིསྶཱམཙྪེརཀུཀྐུཙྩེཧིཙེཝ མཱནེནཙ སཧ ཛཱཡཏི. ཀདཱཙི ཏེཧི ཏེནཙ ནཱནཱ ཛཱཡཏཱི’’ཏི ཡོཛནཱ ཝུཏྟཱ. སཱ སཱརཏོ ན པཙྩེཏབྦཱ.

ན ཧི ཏེཧི ཏེནཙ ཏསྶ སཧབྷཱཝོ ནཱནཱབྷཱཝོཙ ཀིཙྩཱརམྨཎཝིརོདྷཱཝིརོདྷབྷཱཝེན སིདྡྷོཏི.

ཡཱཙ ཊཱིཀཱཡཾ

མཱནོཙ ཐིནམིདྡྷཉྩ ཀདཱཙི ནཱནཱ ཛཱཡཏི. ཀཱརཎཾ ཝུཏྟམེཝ. ཡོཛནཱ ཝུཏྟཱ. སཱཔི ན སུནྡརཱ. ཀདཱཙི སཧཛཱཡཏཱིཏི.

ཡཐཱཝུཏྟཱནུསཱརེནཱཏི སཏྟསབྦཏྠཡུཛྫནྟཱིཏིཨཱདིནཱ ཝུཏྟཔྤཀཱརཾ ཨནུསཱརེན སེསཱཏི ཨེཀཱདསཧི ཨནིཡཏ ཡོགཱིཧི ཨཝསེསཱ ཨེཀཙཏྟཱལཱིསདྷམྨཱ. ཏེ ཡཐཱཝུཏྟཱནུསཱརེན ཨཏྟནཱ ལབྦྷམཱན ཙིཏྟུཔྤཱདེསུ ཨནིཡཏཡོགིནོ ཝེདིཏབྦཱཏི ཡོཛནཱ.

༡༢༣. ཨེཝཾ ཙེཏསིཀཱནཾ ཡོགཊྛཱནཔརིཙྪིནྡནཝསེན སམྤཡོགནཡཾ དསྶེཏྭཱ ཨིདཱནི ཡུཏྟདྷམྨརཱསིཔརིཙྪིནྡནཝསེན སངྒཧ ནཡཾ དསྶེནྟོ སངྒཧཉྩཱཏིཨཱདིམཱཧ. ཨིདཱནི ཏེསཾ སངྒཧཉྩ ཡཐཱརཧཾ པཝཀྑཱམཱིཏི ཡོཛནཱ. ཚཏྟིཾསཱཏིཨཱདི སངྒཧནཡསྶ ཨུདྡེསགཱཐཱ. སཏྟཔཉྙཏྟཱརམྨཎཱ ཨཔྤམཉྙཱ ནིབྦཱནཱ རམྨཎེསུ ནལབྦྷནྟིཏི ཝུཏྟཾ ཨཔྤམཉྙཱཝཛྫིཏཱཏི ཏཐཱ ཨཊྛསུ དུཏཱིཡཛ྄ཛྷཱནིཀཙིཏྟེསུ ཝིཏཀྐཝཛྫཱ ཨཉྙསམཱནཱ དྭཱདསཙེཏ སིཀཱ ཨཔྤམཉྙཱཝཛྫིཏཱ ཏེཝཱིསཏི སོབྷཎཙེཏསིཀཱཙེཏི པཉྩཏྟིཾས དྷམྨཱ སངྒཧཾ གཙྪནྟཱིཏིཨཱདིནཡཾ ཏཐཱསདྡེན ནིདྡིསཏི. ཏེཨེཝཱཏི ཝིཏཀྐ ཝིཙཱར པཱིཏིསུཁཝཛྫཱ ཨུཔེཀྑཱསཧགཏཱ ཏེ ཨེཝ ཏེཏྟིཾསདྷམྨཱ. ཨཊྛསཱུཏི ཨེཏྠ ཨཊྛཙ ཨཊྛཙ ཨཊྛཱཏི ཨེཀསེསནིདྡེསོ, ཝིཙྪཱལོཔནིདྡེསོཝཱ དཊྛབྦོ. པཉྩཀཛ྄ཛྷཱན ཝསེནཱཏི པཱལི༹ཡཾ པཉྩཀནཡེན ཝུཏྟསྶ ཛྷཱནབྷེདསྶ ཝསེན, ཙཏུཀྐནཡེན ཝུཏྟསྶ ཛྷཱནབྷེདསྶ ཝསེན པན ཙཏུདྷཱཝ སངྒཧོ ཧོཏཱིཏི ཨདྷིཔྤཱཡོ. དྭཱིསུ རཱུཔཔཐམཛ྄ཛྷཱནལཱབྷཱིསུ དུཏཱིཡཛ྄ཛྷཱནཾ ཨུཔྤཱདེནྟེསུ མནྡོ ཝིཏཀྐམོ ཨཏིཀྐམིཏུཾ སཀྐོཏི. ཏསྶ ཙཏུརངྒིཀཾ དུཏཱིཡཛ྄ཛྷཱནཾ ཨུཔྤཛྫཏི. ཏིཀྑཔཉྙོ པན ཝིཏཀྐ ཝིཙཱརེ ཨེཀཏོ ཨཏིཀྐམིཏུཾ སཀྐོཏི. ཏསྶ ཏིཡངྒིཀཾ དུཏཱིཡཛ྄ཛྷཱནཾ ཨུཔྤཛྫཏཱིཏི ཨཡཾ ཏེསཾ ནཡཱནཾ ཝིསེསོ.

༡༢༤. ཀིཙྩཱརམྨཎཝིརུདྡྷཏྟཱ ཝིརཏིཡོ མཧགྒཏེསུ ནུཔྤཛྫནྟཱིཏི ཨཱཧ ཝིརཏིཏྟཡཝཛྫིཏཱཏི. ཝིརཏིཡོ ཧི ཀཱཡཝཙཱི ཝིསོདྷནཀིཙྩཱ ཧོནྟི. མཧགྒཏཛ྄ཛྷཱནཱནི པན སུཝིསུདྡྷཀཱཡཝཙཱི པཡོགསྶེཝ ཙིཏྟཝིསོདྷནཀིཙྩཱནི. ཝིརཏིཡོཙ ཝཱིཏིཀྐམིཏབྦ ཝཏྠུཾཝཱ ནིབྦཱནཾཝཱ ཨཱརབྦྷ པཝཏྟནྟི. མཧགྒཏཛ྄ཛྷཱནཱནི པན པཉྙཏྟི ཡོཝཱ མཧགྒཏདྷམྨེཝཱཏི.

༡༢༥. ཀིཙྩཱརམྨཎཝི ¶ རུདྡྷཏྟཱཡེཝ ཝིརཏིཨཔྤམཉྙཱཡོ ཨེཀསྨིཾ ཙིཏྟེ དྭེ ནལབྦྷནྟཱིཏི ཝུཏྟཾ. ཨཔྤམཉྙཱ ཝིརཏིཡོ པནེཏྠ.ལ. ཡོཛེཏབྦཱཏི. ཝིརཏིཡོ ཨེཀནྟེན དུསྶིལྱཔྤཧཱན ཀིཙྩཏྟཱ ཏཔྤཧཱན ཀིཙྩརཧིཏེསུ ལོཀིཡཱབྱཱཀཏེསུ ནལབྦྷནྟཱིཏི ཝུཏྟཾ ཝིརཏིཝཛྫིཏཱཏི. པཉྩསིཀྑཱཔདཱ ཀུསལཱཡེཝཱཏི ཧི པཱལི༹ཡཾ ཝུཏྟཾ. ཨིདཉྩ ལོཀིཡསིཀྑཱཔདཱནི སནྡྷཱཡ ཝུཏྟནྟི དཊྛབྦཾ. ཨཔྤམཉྙཱནཾ སཏྟཔཉྙཏྟཱརམྨཎཏྟཱ མཧཱཝིཔཱཀཱནཉྩ ཨེཀནྟ པརིཏྟཱརམྨཎཏྟཱ ཏཱསཾ ཏེསུ སམྦྷཝོ ནཏྠཱིཏི ཝུཏྟཾ ཨཔྤམཉྙཱ ཝིརཏིཝཛྫིཏཱཏི. ནནུ ཀཱམཀུསལཾ སཏྟཔཉྙཏྟཱདི ཨཱརམྨཎཾཔི ཧོཏཱིཏི ཏབྦིཔཱཀེནཔི ཏེན སདིསཱ རམྨཎེན བྷཝིཏབྦནྟི. ན. ཝིཀཔྤརཧིཏཏྟཱ. པཉྙཏྟིཡོ ཧི ཨཝིཛྫམཱནཏྟཱ མཧགྒཏཱནུཏྟརདྷམྨཱཙ སཎྷསུཁུམདྷམྨཏྟཱ ཏཐཱ ཏཐཱ ཝིཀཔྤེཏྭཱཝཱ པཊིཝིཛ྄ཛྷིཏྭཱཝཱ གཎྷནྟཱནཾ ཀུསལཱདཱིནཾ ཨེཝ ཨཱརམྨཎབྷཱུཏཱ ཧོནྟི. ཀཱམཝིཔཱཀཱནི པན སཡཾ ཨཏིདུབྦལཏཱཡ ཨཱརམྨཎཾ ཝིཀཔྤེཏྭཱ ཝིགཧེཏུཾ ནསཀྐོནྟི, ཀུཏོ པཊིཝིཛ྄ཛྷིཏྭཱ གཧེཏུཾ. ཏསྨཱ ཏཱནི པཉྙཏྟིཡོཝཱ མཧགྒཏཱནུཏྟརདྷམྨེཝཱ ཨཱལམྦིཏུཾ ན སཀྐོནྟཱིཏི དཊྛབྦཾ. མཧགྒཏཝིཔཱཀཱནི པན ཝིཀཔྤརཧིཏཱནིཔི ཨཔྤནཱཔཏྟཀམྨཝིསེ སནིབྦཏྟཏྟཱ བྷཱཝནཱབལནིམྨིཏཱནི པཉྙཏྟིཝིསེསཱནི ཨཱལམྦིཏུཾ སཀྐོནྟཱིཏི.

[༨༢] ཝིབྷཱཝནིཡཾ པན

ཀཱམཏཎྷཱདྷིནཀམྨཛནིཏཏྟཱ ཀཱམཝིཔཱཀཱནི ཀཱམཏཎྷཱཡ ཨཱརམྨཎབྷཱུཏེ ཀཱམདྷམྨེཨེཝ ཨཱལམྦིཏུཾ ལབྷནྟཱིཏི ཨདྷིཔྤཱཡེན ‘‘ཀཱམཏཎྷཱདྷིནསྶ ཕལབྷཱུཏཏྟཱ’’ཏི ཝཏྭཱ དཱསིཔུཏྟོཔམཱཡ ཏདཏྠཾ ཝིབྷཱཝེཏི. ཏཾ ཝིཙཱརེཏབྦཾ.

ཨེཝཉྷི སཏི མཧགྒཏཝིཔཱཀཱནིཔི རཱུཔཱརཱུཔཏཎྷཱདྷིན ཀམྨཛནིཏཱནི ཨེཝ ཧོནྟཱིཏི ཏཱནིཔི རཱུཔཱརཱུཔཏཎྷཱནཾ ཨཱརམྨཎབྷཱུཏེ མཧགྒཏ དྷམྨེཨེཝ ཨཱལམྦེཡྻུནྟི. ཨཔིཙ, ཀཱམཏཎྷཱཔི ཀཱམདྷམྨེཨེཝ ཨཱརམྨཎཾ ཀརོཏི. ན པཉྙཏྟིདྷམྨེཏི ནཏྠི. ནཙ ཨིཏྠིཔུརིསཱདི ཧཏྠ པཱདཱདི པཉྙཏྟཱིསུ ཨསྶཱདཝསེན པཝཏྟཱ ཏཎྷཱ ཀཱམཏཎྷཱ ནཱམ ¶ ནཧོཏཱིཏི ཨཏྠི. སུབྷེཏི ཀུསལེ. མནེཏི ནིདྡྷཱརཎེ བྷུམྨཾ. སུབྷེ ཀྲིཡེ པཱཀེཏི ནིདྡྷཱརཎཱིཡཾ དཊྛབྦཾ. སཧེཏུ. ལ. མནེ དྭཱདསདྷཱཝ སངྒཧོཏིཝཱ ཡོཛེཏབྦཾ. ནཝིཛྫནྟེཏྠཱཏི ཝཛྫིཏཱནཾ སངྒཧོ. ཨེཏྠཱཏི སོབྷཎཙིཏྟེསུ. དྭཡནྟི ཝིརཏིཨཔྤམཉྙཱདུཀཾ. ཨནུཏྟརེཏི ཝིསེསཀཱནཾ སངྒཧོ. ཛྷཱན དྷམྨཱཏི ཝིཏཀྐཱདཡོ. མཛ྄ཛྷིམེ མཧགྒཏེ ཨཔྤམཉྙཱཙ ཛྷཱནདྷམྨཱ ཙ. པརིཏྟེསུ ཀཱམསོབྷཎེསུ ཨཔྤམཉྙཱཙ ཝིརཏི ཉཱཎཔཱིཏི ཡོཙ ཝིསེསཀཱ, སངྒཧནཡ བྷེདཀཱརཀཱཏི ཨཏྠོ.

༡༢༦. སཏྟརསདྷམྨཱ ལོབྷདིཊྛཱིཧི སདྡྷིཾ ཨེཀཱུནཝཱིསཏི ཧུཏྭཱ སངྒཧཾ གཙྪནྟཱིཏི ཡོཛནཱ. པཱིཏིཝཛྫིཏཱ ཨཉྙསམཱནཱ དྭཱདས ཙེཏསིཀཱ ཨཀུསལསཱདྷཱརཎཱ ཙཏྟཱརོཙཱཏི སོལ༹སདྷམྨཱ ལོབྷདིཊྛཱིཧི སཧ ཨཊྛཱརས ཧུཏྭཱ སངྒཧཾ གཙྪནྟཱིཏི ཡོཛནཱ. ཨིསྶཱམཙྪརིཡ ཀུཀྐུཙྩཱནི ཀིཙྩཏོ ཨཱརམྨཎཏོ ཙ བྷིནྣཱནི ཧོནྟཱིཏི ཝུཏྟཾ ཨིསྶཱ.ལ. ཡོཛེཏབྦཱནཱིཏི. སབྦེསུཔི ཨཀུསལཙིཏྟུཔྤཱདེསུ སམྤཡུཏྟདྷམྨཱ དྷམྨཏོ ཨསདིསཱཨེཝ ཧོནྟི. གཎནཏོ པན ཨེཀཙྩེ ཨེཀཙྩེཧི སདིསཱ ཨེཝ ཧོནྟཱིཏི ཝུཏྟཾ དྭཱདས.ལ. སངྒཧིཏཱབྷཝནྟཱིཏི. ཨེཏྠཙ པཉྩསུ ཨསངྑཱརིཀེསུ པཐམདུཏཱིཡེསུ ཨེཀཱུནཝཱིསཏི. ཏཏཱིཡཙཏུཏྠེསུ ཨཊྛཱརས. པཉྩམེ ཝཱིསཏི. པཉྩསུ སསངྑཱརིཀེསུ པཐམདུཏཱིཡེསུ ཨེཀཝཱིསཏི. ཏཏཱིཡཙཏུཏྠེསུ ཝཱིསཏི. པཉྩམེ དྭཱཝཱིསཏི. མོམཱུཧདྭཡེ པནྣརསཱཏི ཨེཝཾ ཨཀུསལེསུ སཏྟ སངྒཧཱ བྷཝནྟི. ཏེནཱཧ ཨེཀཱུནཝཱིསཱཏིཨཱདིཾ. སཱདྷཱརཎཱཏི སབྦཱ ཀུསལསཱདྷཱརཎཱ. སམཱནཱཏི ཨཉྙསམཱནཱ. ཨཔརེཏི ཚནྡཔཱིཏིཨདྷིམོཀྑེ ཐཔེཏྭཱ ཨེཀཙྩེ.

༡༢༧. ཧསནཙིཏྟེཏི ཧསིཏུཔྤཱདཙིཏྟེ. ཝོཊྛབྦནེཏི མནོདྭཱརཱཝཛྫནེ. སུཁསནྟཱིརཎེཏི སོམནསྶ སནྟཱིརཎེ. མནོ དྷཱཏུཏྟིཀཱ ཧེཏུཀ པཊིསནྡྷི ཡུགལེ༹ཏི པཉྩདྭཱརཱཝཛྫན སམྤཊིཙྪནདྭཡསངྑཱཏེ མནོདྷཱཏུཏྟིཀེཙེཝ ཨུཔེཀྑཱ སནྟཱིརཎ དྭཡསངྑཱཏེ ཨཧེཏུཀ པཊིསནྡྷིཡུགལེ༹ཙ. སབྦཏྠ སབྦེསུ ཨཧེཏུཀེསུ ¶ སཏྟ, ཏཏོ སེསཱ པཀིཎྞཀཱ པན ཡཐཱརཧཾ ཡུཛྫནྟི, ཨིཏི ཏེཏྟིཾས ཝིདྷསངྒཧོ མཡཱ ཝུཏྟོཏི ཡོཛནཱ.

༡༢༨. ཨིདཱནི ཨཡཾ ཙེཏསིཀནིདྡེསོཏི ཀཏྭཱ ཙིཏྟསྶ ཝིཡ ཨེཀསྶཔི ཙེཏསིཀསྶ བྷཱུམིཛཱཏི སམྤཡོགཱདི བྷེདེན ཝིབྷཱགོ ཀཐེཏབྦོཏི ཏཾ དསྶེཏུཾ ཨནྟིམགཱཐམཱཧ. ཨིཏྠཾ ཨིམིནཱ ཡཐཱཝུཏྟཔྤཀཱརེན ཙིཏྟཱཝིཡུཏྟཱནཾ ཙེཏསིཀཱནཾ སོལ༹སཝིདྷཾ སམྤཡོགཉྩ ཏེཏྟིཾསཝིདྷཾ སངྒཧཉྩ ཉཏྭཱ ཏེསཾ ཡཐཱ ཡོགཾ ཙིཏྟེན སམཾ བྷེདཾ ཨུདྡིསེཏི ཡོཛནཱ. ཕསྶོ ཏཱཝ ཨེཀཱུནནཝུཏིཡཱ ཨེཀཝཱིསསཏེསུཝཱ ཙིཏྟེསུ ཡུཏྟཏྟཱ ཨེཀཱུནནཝུཏི ཨེཀཝཱིསསཏཝིདྷེཝཱཏི ཨེཝཾ དྭིཔཉྙཱསཙེཏསིཀེ ཝིསུཾ ཝིསུཾ ཨུདྡྷརིཏྭཱ ཡཐཱཡོགཾ བྷཱུམིཛཱཏིསམྤཡོགཱདིབྷེདེཧི ཏེསཾ ཝིབྷཱགཾ ཀཐེཡྻཱཏི ཨཏྠོ.

ཨིཏི པརམཏྠདཱིཔནིཡཱནཱམ ཨབྷིདྷམྨཏྠསངྒཧསྶ

ཙཏུཏྠཝཎྞནཱཡ ཙེཏསིཀ སངྒཧསྶ

པརམཏྠདཱིཔནཱ ནིཊྛིཏཱ.

པཀིཎྞཀ སངྒཧ པརམཏྠདཱིཔནཱི

༡༢༩. ཨེཝཾ ¶ ཝིསུཾ ཝིསུཾ ཙིཏྟཙེཏསིཀཱནཾ ནིདྡེསཾ དསྶེཏྭཱ ཨིདཱནི པུན ཨུབྷིནྣཾ ནིདྡེསཾ དསྶེནྟོ སམྤཡུཏྟཱཡཐཱཡོགནྟིཨཱདིམཱཧ. ཡཐཱཡོགཾ སམྤཡུཏྟཱ སབྷཱཝཏོ ཏེཔཉྙཱས ཙིཏྟཙེཏསིཀཱ ཡེ དྷམྨཱ མཡཱ ཝིསུཾ ཝིསུཾ ནིདྡིཊྛཱ. ཨིདཱནི ཡཐཱ རཧཾ ཏེསཾ ཨུབྷིནྣཾ སངྒཧོནཱམ ནིཡྻཏེཏི ཡོཛནཱ. ཏཏྠ ཨཏྟནོ ཨཏྟནོ བྷཱཝོ སབྷཱཝོ. དྷམྨཱནཾ ཨཱཝེནིཀལཀྑཎནྟི ཝུཏྟཾ ཧོཏི. ཙིཏྟཾ ཏཱཝ བྷཱུམིཛཱཏིསམྤཡོགཱདིབྷེདེན ཨེཀཱུན ནཝུཏིཝིདྷཾཔི ཨཏྟནོ ཨཱརམྨཎ ཝིཛཱནནསངྑཱཏེན ཨཱཝེནིཀལཀྑཎེན ཨེཀམེཝ ཧོཏི. ཕསྶོཔི བྷཱུམིཛཱཏིསམྤཡོ གཱདིབྷེདེན ཨེཀཱུནནཝུཏིཝིདྷོཔི ཕུསནལཀྑཎེན ཨེཀོཝ ཧོཏི ཏཐཱ ཝེདནཱསཉྙཱདཡོཏི ཨེཝཾ སབྷཱཝཏོ ཏེཔཉྙཱས ཨེཝ ཧོནྟཱིཏི. ཝེདནཱཧེཏུཏོ ཀིཙྩདྭཱརཱལམྦཎཝཏྠུཏོ པཝཏྟོ སངྒཧོཏི སམྦནྡྷོ. ཏཏྠ ཝེདནཱཧེཏུཏོཏི ཝེདནཱབྷེད ཧེཏུབྷེདཏོ. ཨེཝཾ ཀིཙྩདྭཱརཱལམྦཎ ཝཏྠུཏོཏི ཨེཏྠཔི. ཙིཏྟུཔྤཱདཝསེནེཝཱཏི ཙིཏྟཝསེནེཝ ནིཡྻཏེཏི སམྦནྡྷོ. ཨེཝསདྡེན ཙེཏསིཀེ ནིཝཏྟེཏི. ཨེཏྟཱཝཏཱ ཚནྣཾ པཀིཎྞཀསངྒཧཱནཾ ཝཙནཏྠོ ཨིདྷེཝ ཏཱཝ ཐེརེན དསྶིཏོ ཧོཏི ཝེདནཱབྷེདེན ཙིཏྟཙེཏསིཀཱནཾ སངྒཧོ ཝེདནཱསངྒཧོ, ཧེཏུབྷེདེན ཙིཏྟཙེཏསིཀཱནཾ སངྒཧོ ཧེཏུསངྒཧོཏིཨཱདིནཱ.

[༨༣] ཝིབྷཱཝནིཡཾ པན

ཙིཏྟུཔྤཱདསདྡེན ཙེཏསིཀདྷམྨེཔི གཧེཏྭཱ ཨཉྙཾ ནིཝཏྟེ ཏབྦཾ ཨཔསྶནྟོ ‘‘ན ཀཏྠཙི ཏཾཝིརཧེནཱ’’ཏི ཝདཏི. ཏཾ ནཡུཛྫཏིཡེཝ.

ན ཧི ཨིདྷ ཨེཏྟཀཱ ཙེཏསིཀཱ སུཁསཧགཏཱ, ཨེཏྟཀཱ དུཀྑ སཧགཏཱཏིཨཱདིནཱ ཨེཀོཔི སངྒཧོ ཙེཏསིཀེཧི ནཱིཏོ ནཱམ ¶ ཨཏྠི. སུཁསཧགཏཾ ཀུསལཝིཔཱཀཾ ཀཱཡཝིཉྙཱཎམེཀམེཝཱཏིཨཱདིནཱ པན ཙིཏྟེནཨེཝ ནཱིཧོཏི. ཙིཏྟེ པན སིདྡྷེ ཙེཏ སིཀཱཔི སིདྡྷཱཨེཝཱཏི ཀཏྭཱ ཙིཏྟུཔྤཱདཝསེནེཝཱཏི ཨིདཾ ཝུཏྟནྟི དཊྛབྦཾ.

༡༣༠. ཏཏྠཱཏི ཏེསུ ཚསུ སངྒཧེསུ. ཝེདནཱབྷེདེན ཏཾསམྤཡུཏྟཱནཾ ཙིཏྟཙེཏསིཀཱནཾ སངྒཧོ ཝེདནཱསངྒཧོ.

[༨༤] ཝིབྷཱཝནིཡཾ པན

‘‘སུཁཱདིཝེདནཱནཾ ཏཾསཧགཏཙིཏྟུཔྤཱདཱནཉྩ ཝིབྷཱགཝསེན སངྒཧོ ཝེདནཱསངྒཧོ’’ཏི ཝུཏྟཾ. ཏཏྠ ཙསདྡེན ཝེདནཱསངྒཧོཙ ཝེདནཱསཧགཏ ཙིཏྟུཔྤཱད སངྒཧོཙཱཏི ཨིམསྨིཾ ཨཏྠེ ཝེདནཱསངྒཧོཏི ཨེཀསེསནིདྡེསོ ཧོཏཱིཏི དསྶེཏི. ཏཾ ན སུནྡརཾ.

ཨིདྷ ཧི ཝེདནཱབྷེདོ ཨིམསྶ སངྒཧསྶ ནིསྶཡདྷམྨཔརིགྒཧཏྠཾཨེཝ ཝུཏྟོ. ན ཝེདནཱནཾཙ ཝིསུཾ སངྒཧདསྶནཏྠནྟི. ཏཏྠཏིཝིདྷཱ ཝེདནཱཏི ཀསྨཱ ཝུཏྟཾ. ནནུ སཾཡུཏྟཀེ དྭེཔི ཏིསྶོཔི པཉྩཔི ཚཔི ཨཊྛཱརསཔི ཚཏྟིཾསཔི ཨཊྛསཏཾཔི ཝེདནཱ ཝུཏྟཱཏི. སཙྩཾ. ཨནུབྷཝནལཀྑཎེན པན ཝེདནཱ ཏིཝིདྷཱཨེཝ ཧོཏི. ཡེ ཧི ཀེཙི ཡཾཀིཉྩི ཨཱརམྨཎཾ ཨནུབྷཝནྟི. ཏེ ཏཾ སཱཏཏོཝཱ ཨནུབྷཝནྟི ཨསཱཏཏོཝཱ མཛ྄ཛྷཏྟཏོཝཱ. ཏཏོ ཨཉྙོ པཀཱརོ ནཏྠཱིཏི. ཨཉྙེ པན པབྷེདཱ ཏེན ཏེན པརིཡཱཡེན ཝུཏྟཱ. ཏཏྠ ཧི དྭེ ཀཱཡིཀཙེཏསིཀཝསེན ཝུཏྟཱ. ཡཐཱཧ-ཀཏམཱཙ བྷིཀྑཝེ དྭེ ཝེདནཱ ཀཱཡིཀཱཙ ཙེཏསིཀཱཙཱཏི. སུཁདུཀྑ ཝསེནཝཱ ཨུཔེཀྑཾ སུཁེ སངྒཧེཏྭཱ. ཡཐཱཧ-དྭེ ཝེདནཱ ཝུཏྟཱ བྷགཝཏཱ སུཁཱཝེདནཱ དུཀྑཱཝེདནཱ. ཡཱཡཾ བྷནྟེ ཨདུཀྑ མསུཁཱ ཝེདནཱ. སནྟསྨིཾ ཨེསཱཔཎཱིཏེ སུཁེ ཝུཏྟཱ བྷགཝཏཱཏི.

ཝིབྷཱཝནིཡཾ པན

ཨནཝཛྫཔཀྑིཀཾ ཨུཔེཀྑཾ སུཁེ སཱཝཛྫཔཀྑིཀཉྩ དུཀྑེ སངྒཧེཏྭཱ དྭེ ཝུཏྟཱཏི ཝུཏྟཾ. ཏཾ པཱལི༹ཡཾ ཨནཱགཏཾཔི ཡུཛྫཏིཡེཝ.

ཨིནྡྲིཡབྷེདཝསེན ¶ པཉྩ. ཕསྶབྷེདཝསེན ཚ. ཨུཔཝིཙཱརབྷེད ཝསེན ཨཊྛཱརས. ཚ གེཧསྶིཏཱནི ཚ ནེཀྑམྨསྶིཏཱནཱིཏི ཨེཝཾ པཙྩེཀཾ དྭཱདསནྣཾ སོམནསྶ དོམནསྶཨུཔེཀྑཱནཾ ཝསེན ཚཏྟིཾས. ཏཱཡེཝ ཀཱལཏྟཡཝསེན ཨཊྛསཏཾ ཝེདནཱ ཝུཏྟཱཏི. ཡཉྩ ཀཏྠཙི སུཏྟེ ཡཾཀིཉྩི ཝེདཡིཏཾ སབྦཾ ཏཾ དུཀྑསྨིནྟི ཝུཏྟཾ. ཏཾ སངྑཱརདུཀྑཏཱཝསེན ཝུཏྟནྟི. ཧེཊྛཱ པན ཙིཏྟནིདྡེསེ ཙིཏྟཱནི ཨིནྡྲིཡབྷེདཝསེན ནིདྡིཊྛཱནཱིཏི ཀཏྭཱ ཨིདྷཔི ཨིནྡྲིཡབྷེདཝསེནེཝ ཙིཏྟཱནི སངྒཧེཏུཾ པུན སུཁཾ.ལ. པཉྩདྷཱ ཧོཏཱིཏི ཝུཏྟཾ. ཨེཏྠ ཙ ཡེསུ དྷམྨེསུ ཨཱདྷི པཙྩཝསེན སུཁདུཀྑཱནི ཨིནྡྲིཡཱནི ནཱམ ཧོནྟི. ཏེསཾ ཀཱཡིཀ མཱནསིཀཝསེན དུཝིདྷཏྟཱ ཏཱནིཔི སུཁིནྡྲིཡཾ སོམནསྶིནྡྲིཡཾ དུཀྑིནྡྲིཡཾ དོམནསྶིནྡྲིཡནྟི དྭིདྷཱ ཝུཏྟཱནི. ཨུཔེཀྑཱཡ པན ཨཱདྷིཔཙྩཊྛཱནབྷཱུཏཱ དྷམྨཱ མཱནསིཀཱཨེཝ ཧོནྟཱིཏིསཱ ཨུཔེཀྑིནྡྲིཡནྟི ཨེཀདྷཱཝ ཝུཏྟཱཏི. ཨཔིཙ, ཏེཔི པརིཡཱཡེན དུཝིདྷཱ ཧོནྟི. ཙཀྑཱདིཔསཱདཀཱཡ ནིསྶིཏཱནཾཔི སབྦྷཱཝཏོ. ཝེདནཱཔན ཨེཀརསཏྟཱ ཨེཀདྷཱཝ ཝུཏྟཱཏི.

ཝིབྷཱཝནིཡཾ པན

‘‘ཀཱཡིཀ མཱནསིཀ སཱཏབྷེདཏོ སུཁདུཀྑཱནི དྭིདྷཱ ཝུཏྟཱནཱི’’ཏི ཝུཏྟཾ.

ཏཏྠ སབྷཱཝཏོ ཨིཊྛཱནིཊྛཕོཊྛབྦཱ ནུབྷཝནལཀྑཎཱནི སུཁ དུཀྑཱནི. སབྷཱཝཏོཝཱ པརིཀཔྤནཏོཝཱ ཨིཊྛཱནིཊྛམཛ྄ཛྷཏྟཱནུབྷཝན ལཀྑཎཱནི ཨིཏརཱནཱིཏི. སེསཱནཱིཏི ཡཐཱཝུཏྟ སུཁདུཀྑཏོ མནསྶ དོམནསྶཡུཏྟེཧི སེསཱནི བཱཏྟིཾས ཀཱམཱཝཙརཙིཏྟཱནི ཏེཝཱིསཏི པཉྩམཛ྄ཛྷཱནིཀཙིཏྟཱནིཙཱཏི སབྦཱནི པཉྩཔཉྙཱསཙིཏྟཱནི. ཨེཀཏྠཱཏི ཨེཀསྨིཾ ཙིཏྟེ. ཨིཏརཱ ཧི ཨུཔེཀྑཱཝེདནཱ.

༡༣༡. ཧེཏཱུནཾ བྷེདེན ཏཾསམྤཡུཏྟཱནཾ ཙིཏྟཙེཏསིཀཱན སངྒཧོ ཧེཏུསངྒཧོ.

[༨༥] ཝིབྷཱཝནིཡཾ པན

‘‘ལོབྷཱདིཧེཏཱུནཾ ཝིབྷཱགཝསེན ཏཾསམྤཡུཏྟདྷམྨཝསེནཙ སངྒཧོ ཧེཏུསངྒཧོ’’ཏི ཝུཏྟཾ. ཏཾ ན སུནྡརཾ.

ཀཱརཎཾ ¶ ཝུཏྟམེཝ. ཧེཏཱུནཱམ ཚབྦིདྷཱ བྷཝནྟཱིཏི སམྦནྡྷོ. ཏཏྠ ཧེཏུཀིཙྩཾནཱམ ཨཱརམྨཎེ སམྤཡུཏྟདྷམྨཱནཾ སུཔྤཏིཊྛིཏབྷཱཝ སཱདྷནཾ. ཡཐཱ ཧི རུཀྑསྶ མཱུལཱནི སཡཾ ཨནྟོ པཐཝིཡཾ ཝདྡྷིཏྭཱ པཐཝིརསེཙ ཨཱཔོརསེཙ གཧེཏྭཱ རུཀྑཾ ཡཱཝ ཨགྒཱ ཨབྷིཧརནྟི. ཝཱཏེཝཱ མཧོགྷེཝཱ ཨཱགཏེ རུཀྑཾ སུཊྛུ ཨཱཀཌྜྷིཏྭཱ ཏིཊྛནྟི, ཨེཝཾ རུཀྑོ ཝུདྡྷོ ཝིརུལ༹ྷོ ཝིཔུལོ ཙིརཊྛིཏིཀོཙ ཧོཏི. ཨེཝམེཝཾ ཨིམེཔི དྷམྨཱ སཡཾ ཨཱརམྨཎེསུ ཐིརཔཏྟཱ ཧུཏྭཱ སམྤཡུཏྟདྷམྨེ ཏཏྠ ཝུདྡྷེ ཝིརུལ༹ྷེ ཝིཔུལེ ཙིརཊྛིཏིཀེཙ སཱདྷེནྟཱིཏི. ཨཧེཏུཀཙིཏྟཱནིཔན ཛལཏལེ ཨམཱུལཀསེཝཱ ལཱནི ཝིཡ ཨཱརམྨཎེ སུཊྛུ པཏིཊྛིཏཱནི ན ཧོནྟཱིཏི དཊྛབྦཾ. ཨཔརེ པན དྷམྨཱནཾ ཀུསལཱདིབྷཱཝསཱདྷནཾ ཧེཏུཀིཙྩནྟི ཝདནྟི. ཨེཝཾསནྟེ ཡེསཾ སཧཛཱཏཧེཏུ ནཏྠི. ཏེསཾ ཨཀུསལབྷཱཝོ ཨབྱཱཀཏབྷཱཝོཙ ནསམྤཛྫེཡྻ. ཡཱནིཙ ལདྡྷཧེཏུཔཙྩཡཱནི རཱུཔཱནི. ཏེསཉྩ ཀུསལཱདིབྷཱཝོ ཨཱཔཛྫེཡྻཱཏི ཝཏྭཱ ཏཾཝཱདཾ པཊིཔཀྑིཔནྟི. ཡཐཱ པན ལོཀེ ཨནྡྷཀཱརོནཱམ ཀེནཙི པཙྩཡ ཝིསེསེན སཱདྷེཏབྦོ ན ཧོཏི. ཡཏྠ ཨཱལོཀོ ནཏྠི. ཏཏྠ སོ ཨཏྟནོ དྷམྨཏཱཡ སིདྡྷོ ཧོཏི. ཨེཝམེཝཾ དྷམྨེསུ མུཡ྄ཧནཀྲིཡཱབྷཱུཏོ མོཧནྡྷཀཱརོཔི ཨཏྟནོ དྷམྨཏཱཡ ཨེཝ ཨཀུསལོ བྷཝིཏུཾ ཨརཧཏི. ཏཐཱ ཧི ཨིཙྪཱནཱམ ཨཏྠི. སཱམུཡ྄ཧནཀྲིཡཱཡ ཡུཏྟཱ ལགྒནབྷཱཝཾ པཏྭཱ ལོབྷོ ཨཀུསལོ ནཱམ ཧོཏི. སདྡྷཱཡ ཡུཏྟཱ པན དྷམྨཙྪནྡབྷཱཝཾ པཏྭཱ ཀུསལཙྪནྡོནཱམ ཧོཏི. ཏཐཱ ཨཀྑནྟིནཱམ ཨཏྠི. སཱཔི མུཡ྄ཧན ཀྲིཡཱཡ ཡུཏྟཱ པཊིགྷབྷཱཝཾ པཏྭཱ དོསོ ཨཀུསལོནཱམ ཧོཏི. སདྡྷཱཡ ཡུཏྟཱ པན ཨུཔྤནྣཾ ཀཱམཝིཏཀྐཾ ནཱདྷིཝཱསེཏཱིཏིཨཱདིནཱ ནཡེན པཱཔདྷམྨ པཱཔཱརམྨཎ ཝིརོདྷབྷཱཝཾ པཏྭཱ ཨལོབྷོ ཀུསལོནཱམ ཧོཏི. མུཡ྄ཧནཀྲིཡཱ པན ཨསུཀེན ཡུཏྟཱ ཨཀུསལོནཱམ. ཨསུཀེན ཡུཏྟཱ ཀུསལོནཱམཱཏི ནཏྠི. ཨམྦིལཏྠཱཡ ཨཉྙེན སཾཡོགཀིཙྩརཧིཏོ ཛཱཏིཨམྦིལརསོ ཝིཡ ཨེཀནྟཨཀུསལཛཱཏིཀཱཨེཝ ཧོཏཱིཏི. ཡོཙ དྷམྨོ ཀུསལོ ཨཀུསལོཙ ན ཧོཏི. སོ ཨབྱཱཀཏོཏི ཨེཏྟཀམེཝ ¶ དྷམྨཱནཾ ཨབྱཱཀཏབྷཱཝསིདྡྷིཡཱ ཀཱརཎཾ. ཏསྨཱ ཨཧེཏུཀཙིཏྟཱནཾ རཱུཔནིབྦཱནཱནཉྩ ཨབྱཱཀཏབྷཱཝོཔི ཨཏྟནོ དྷམྨ ཏཱཡཨེཝ སིདྡྷོ. ཏཏྠ མོཧོ སེསམཱུལཱནཾཔི མཱུལཾ ཧོཏི. རཛྫནདུསྶནཱནིཔི ཧི མུཡ྄ཧནནིསནྡཱནིཨེཝ ཧོནྟི. ཨལོབྷཱདཱིནཉྩ ཀུསལབྷཱཝོ ཨཝིཛྫཱནུསཡེན སཧེཝ སིདྡྷོཏི. ཏཱནི པན ལོབྷཱདཱིནི ལོབྷསཧགཏཱདཱིནཾ ཝིསེསམཱུལཱནི ཧོནྟི. རཛྫནཱདི ནིསནྡཱནི ཧི དིཊྛིམཱནཱདཱིནི. ཨརཛྫནཱདིནིསནྡཱནི ཙ སདྡྷཱདཱིནཱིཏི. ཡསྨཱ པན ཧེཏུཡོནཱམ སམྤཡུཏྟེསུ པདྷཱནདྷམྨཱ ཧོནྟི. ཏསྨཱ སཧེཏུཀཝིཔཱཀཀྲིཡཱནཾ ཨབྱཱཀཏབྷཱཝོ པན ཧེཏུ མུཁེནཔི ཝཏྟུཾ ཡུཏྟོ.

[༨༦] ཨེཏྟཱཝཏཱ ཡཾ ཝུཏྟཾ ཝིབྷཱཝནིཡཾ

‘‘ཨཔརེ པན ཀུསལཱདཱིནཾ ཀུསལཱདིབྷཱཝསཱདྷནཾ ཧེཏུ བྷཱཝོ’’ཏི ཝདནྟི. ཨེཝཾ སཏི ཧེཏཱུནཾ ཨཏྟནོ ཀུསལཱ དིབྷཱཝསཱདྷནོ ཨཉྙོ ཧེཏུ མགྒིཏབྦོ སིཡཱ. ཨཐ སེསསམྤཡུཏྟཧེཏུཔཊིབདྡྷོ ཏེསཾ ཀུསལཱདིབྷཱཝོ, ཨེཝམྤི མོམཱུཧ ཙིཏྟསམྤཡུཏྟསྶ ཧེཏུནོ ཨཀུསལ བྷཱཝོ ཨཔྤཊིབདྡྷོ སིཡཱ. ཨཐ ཏསྶ སབྷཱཝཏོ ཨཀུསལབྷཱཝོཔི སིཡཱ. ཨེཝཾསཏི སེསཧེཏཱུནམྤི སབྷཱཝཏོ ཀུསལཱདིབྷཱཝོཏི ཏེསཾ ཝིཡ སམྤཡུཏྟ དྷམྨཱནམྤི སོ ཧེཏུཔཊིབདྡྷོ ནསིཡཱ, ཡདིཙ ཧེཏུཔཊིབདྡྷོ ཀུསལཱདིབྷཱཝོ. ཏདཱ ཨཧེཏུཀཱནཾ ཨབྱཱཀཏབྷཱཝོ ནསིཡཱཏི ཨལམཏིནིཔྤཱིལ༹ནེནཱཏི ཏཾ པཊིཀྑིཏྟཾ ཧོཏི.

ཡཐཱཙ ལདྡྷཛ྄ཛྷཱནཔཙྩཡེསུ རཱུཔཱརཱུཔདྷམྨེསུ ཛྷཱནངྒཱནི ཨརཱུཔདྷམྨེསུཨེཝ ཨུཔནིཛ྄ཛྷཱནཊྛཾ ཕརནྟི, ན རཱུཔདྷམྨེསུ. ཏེ པན ཛྷཱནདྷམྨ སམུཊྛི ཏཏྟཱཨེཝ ཛྷཱནཔཙྩཡུཔྤནྣེསུ ཝུཏྟཱ. ཨེཝམེཝ ཧེཏུཡོཔི ཨརཱུཔ དྷམྨེསུཨེཝ ཀུསལཱདིབྷཱཝཾ ཕརནྟི. ན རཱུཔདྷམྨེསུ. ཏེ པན ཧེཏུ སམུཊྛིཏཏྟཱཨེཝ ཧེཏུཔཙྩཡུཔྤནྣེསུ ཝུཏྟཱཏི ན ཏེསཾ རཱུཔདྷམྨཱནཾ ཀུསལཱདིབྷཱཝཱཔཏྟི ཙོདེཏབྦཱཏི.

[༨༧] ཡཉྩ ཝིབྷཱཝནིཡཾ

‘‘ཀུསལཱདིབྷཱཝོ པན ཀུསལཱཀུསལཱནཾ ཡོནིསོ ཨཡོནིསོ མནསིཀཱརཔཊིབདྡྷོ’’ཏི ཝུཏྟཾ. ཏཾཔི ཝིཙཱརེ ཏབྦཾ.

ཏཐཱ ཧི སཱུརིཡཱལོཀེ ཨཱགཏེ དིཝཱ བལཱནཾ ཧཾསཱདཱིནཾ ཨོཀཱསོ ཧོཏི. རཏྟནྡྷཀཱལེ ཨཱགཏེ རཏྟིབལཱནཾ ཨུལཱུཀཱདཱིནཾ ཨོཀཱསོ ཧོཏི. ནཙ ཏེ ཨཱལོཀནྡྷཀཱརཱ ཏེསཾ ཝཎྞཱདིཝིསེསཾ སཱམེནྟི. ཏཾ པན ཏེསཾ ཡོནིཡོཨེཝ སཱདྷེནྟི. ཏཏྠ ཨཱལོཀོ ཝིཡ ཡོནིསོམནསིཀཱརོ དཊྛབྦོ. ཨནྡྷཀཱརོ ཝིཡ ཨིཏརོ. ཏེ སཏྟཱ ཝིཡ ཀུསལཱཀུསལཱ. ཝཎྞཱདིཝིསེསོ ཝིཡ ཀུསལཱདིབྷཱཝོ. ཡོནིཡོ ཝིཡ ཧེཏུཡོ དཊྛབྦཱཏི. ཨབྱཱཀཏཱནཾ པནཱཏི སབྦཾ ཡོ དྷམྨོ ཀུསལོ ཨཀུསལོཙ ན ཧོཏི. སོ ཨབྱཱཀཏོཏི ཝུཏྟཔཀྑེ པཏཏིཡེཝཱཏི. ཏཏྠཱཏི ཧེཏུསངྒཧེ. སཧེཏུཀཱནཾ པརིགྒཧསུཁཏྠཾ ཨིདྷ ཝཛྫེཏབྦཱནིཔི ཨཧེཏུཀཱནི པཐམཾ ཨུདྡྷཊཱནི. ཏེནཱཧ སེསཱནི པན. ལ. སཧེཏུཀཱ ནེཝཱཏི. ཏེསཾཝཱ ཨཧེཏུཀནཱམཾཔི ཧེཏཱུནཾ ཝསེནེཝ ཝིསུཾ སིདྡྷནྟི ཏེསཾཔི ཨིདྷ སངྒཧཎཾ ཨཝིརུདྡྷཾ ཧོཏི. ཏེནཱཧ ཨཧེཏུ ཀཱཊྛཱརསེཀཱཏིཨཱདི. སབྷཱཝ བྷེདེན ཚབྦིདྷཱཔི ཧེཏུཡོ ཀུསལཱ ཀུསལཱ བྱཱཀཏཛཱཏིབྷེདེན ནཝདྷཱ ཧོནྟཱིཏི ཝུཏྟཾ ལོབྷོ དོསོཙཱཏིཨཱདི.

༡༣༢. ཙུདྡསནྣཾ ཀིཙྩཱནཾ བྷེདེན ཏཾཀིཙྩཝནྟཱནཾ ཙིཏྟཙེཏསིཀཱནཾ སངྒཧོ ཀིཙྩསངྒཧོ.

[༨༨] ཝིབྷཱཝནིཡཾ པན

‘‘པཊིསནྡྷཱདཱིནཾ ཀིཙྩཱནཾ ཝིབྷཱགཝསེན ཏཾཀིཙྩཝནྟཱནཉྩ པརིཙྪེདཝསེན སངྒཧོ ཀིཙྩསངྒཧོ’’ཏི ཝུཏྟཾ. ཏཾ ན སུནྡརཾ.

ཡེན ཨེཀཀམྨེན ཨེཀོ ཨུཔཔཏྟིབྷཝོནིབྦཏྟཏི. ཏསྨིཾ སརསེནཝཱ ལདྡྷཝིབཱདྷནེནཝཱ པརིཀྑཱིཎེ སོ བྷཝོ ནིརུཛ྄ཛྷཏི. ཨེཀསྶ ¶ ཀམྨསྶ ཨོཀཱསོ ཧོཏི. ཏསྨཱ ཏཏོ ནིབྦཏྟ བྷཝཏོ ཙུཏསྶ ཨནྟརཱ ཁཎམཏྟཾཔི ཨཊྛཏྭཱ ལདྡྷོཀཱསེན ཨེཀེན ཀམྨེན པུན བྷཝནྟརཱདི པཊིསནྡྷཱན ཝསེན ཨབྷིནིབྦཏྟི པཊིསནྡྷིཀིཙྩཾ. ཏཐཱ ནིབྦཏྟསྶ ཨུཔཔཏྟིབྷཝསནྟཱནསྶ ཡཱཝ ཏཾ ཀམྨཾ ནཁིཡྻཏི. ཏཱཝ ཨཝིཙྪེད པཝཏྟིཔཙྩཡངྒབྷཱཝེན པཝཏྟི བྷཝངྒཀིཙྩཾ. ཏསྶ ཧི ཏཐཱ པཝཏྟིཡཱ སཏི ཨཱཡུཔབནྡྷཱཙ ཨུསྨཱ པབནྡྷཱཙ པཝཏྟནྟིཡེཝཱཏི ཨེཏེ ཏཡོ དྷམྨཱ ཨིམཾ ཀཱཡཾ ཨབྷིཛྫམཱནཾ རཀྑནྟཱིཏི. ཡཐཱཧ –

ཨཱཡུ ཨུསྨཱཙ ཝིཉྙཱཎཾ, ཡདཱ ཀཱཡཾ ཛཧནྟི མཾ;

ཨཔཝིདྡྷོ ཏདཱ སེཏི, ནིརཏྠཾཝ ཀལིངྒརནྟི.

ཨཱཝཛྫནཾ ཙིཏྟསནྟཱནསྶ ཨཱཝཊྚནཾ, ཏཾཝཱ ཨཱཝཛྫེཏི ཨཱཝཊྚེཏི, ཨཱཝཊྚཏིཝཱ ཏཾ ཨེཏྠ ཨེཏེནཱཏིཝཱ ཨཱཝཛྫནཾ. བྷཝངྒ ཝཱིཐིཏོ ཨོཀྐམིཏྭཱ ཨཱརམྨཎནྟརཱབྷིམུཁཾ པཝཏྟཏཱིཏི ཨཏྠོ. ཨཱཝཛྫེཏིཝཱ ཨཱརམྨཎནྟརེ ཨཱབྷོགཾ ཀརོཏཱིཏི ཨཱཝཛྫནཾ. དསྶནཱདཱིནི པཱཀཊཱནི. ཝོཊྛབྦནནྟི ཝིསུཾ ཨཝཙྪིནྡིཏྭཱ ཐཔནཾ ཨིདཾ ནཱིལནྟིཝཱ པཱིཏཀནྟིཝཱ སུབྷནྟིཝཱཨསུབྷནྟིཝཱ ཨསངྐརཏོཐཔནཾ ནིཡམནནྟི ཝུཏྟཾ ཧོཏི. ཛཝནནྟིཝཱ ཛཝོཏིཝཱ ཝེགོཏིཝཱ ཨཏྠཏོ ཨེཀཾ. ཨསནིནིཔཱཏོ ཝིཡ ཝེགསཧིཏསྶ ཨེཀེཀསྶ པིཏྟསྶ པཝཏྟི ཛཝནཀིཙྩཾ.

[༨༩] ཡཾཔན ཝིབྷཱཝནིཡཾ

‘‘ཨཱརམྨཎེ ཏཾཏཾཀིཙྩསཱདྷནཝསེན ཨནེཀཀྑཏྟུཾ ཨེཀཀྑཏྟུཾཝཱ ཛཝམཱནསྶ ཝིཡ པཝཏྟི ཛཝནཀིཙྩ’’ནྟི ཝུཏྟཾ. ཏཾ ན སུནྡརཾ.

ན ཧི ཛཝམཱནསྶ ཙིཏྟསྶ ཨེཀཝཱརམཏྟེན ནིཝཏྟིནཱམ ཨཏྠི. མགྒཱཏིཉྙཱཛཝནཱནིཔི ཧི ཨེཀཱཝཛྫནཔརིཀམྨཙིཏྟཏོ པཊྛཱཡ ཨེཀཝེགེན པཝཏྟཛཝམཱནཙིཏྟསནྟཱནཔཏིཏཱནི ཨེཝ ཧོནྟི. ན པན ཏཱནི ཝིསུཾ སིདྡྷེན ཛཝེན ཛཝནྟཱིཏི.

[༩༠] ཏཏྠ ཙ

ཛཝམཱནསྶ ¶ ཝིཡ པཝཏྟཱིཏི ཨེཏེན ཝིསུཾ ཝིསུཾ ཨུཔྤཛྫིཏྭཱ ནིརུདྡྷཱ ནཾ ཁཎིཀདྷམྨཱནཾ སཱིགྷགམནསངྑཱཏོ ཛཝོནཱམ ཝིསུཾ ནཏྠི. བཧུཀྑཏྟུཾ པཝཏྟིཝསེན པན སཱིགྷགཙྪནྟཔུརིས སདིསཏྟཱ ཨེཝ ཛཝནནྟི ཝུཙྩཏཱིཏི དསྶིཏཾ ཧོཏི. ཏཾཔི ན སུནྡརཾ.

ཨསནིནིཔཱཏོ ཝིཡ ཝེགསཧིཏསྶ ཨེཀེཀསྶ ཙིཏྟསྶ པཝཏྟིཛཝནཀིཙྩནྟི ཧི ཧེཊྛཱ ཝུཏྟཾ. བྷཝངྒཙིཏྟཉྷི དཱིགྷཾ ཨདྡྷཱནཾ པཱུརེཏྭཱ པཝཏྟཾཔི ནདིསོཏེ ཝུཡ྄ཧམཱནཾ སུཀྑཔཎྞཾ ཝིཡ ཝེགརཧིཏཾ ཧོཏི. ཛཝནཙིཏྟཾ པན ཨེཀམེཀཾཔི སམཱནཾ ཨིནྡེན ཝིསྶཊྛ ཝཛིརཾ ཝིཡ ཝེགསཧིཏམེཝ པཝཏྟཏཱིཏི དཊྛབྦཾ. ཏཾ ཨཱརམྨཎཾ ཨེཏསྶཱཏི ཏདཱརམྨཎཾ. ཡཾ ཛཝནེན གཧིཏཾ, ཏདེཝསྶ ཨཱརམྨཎནྟི ཝུཏྟཾ ཧོཏི. ཡཾ ཛཝནེན གཧིཏཱརམྨཎཾ, ཏསྶེཝ གཧིཏཏྟཱ ཏདཱརམྨཎཾ ནཱམཱཏི ཧི ཝུཏྟཾ. ཏསྶཝཱ ཛཝནསྶ ཨཱརམྨཎཾ ཨསྶ ཨཱརམྨཎནྟི ཏདཱརམྨཎཾ. ཨིདྷ པན ཏདཱརམྨཎབྷཱཝོ ཨདྷིཔྤེཏོ. ནིབྦཏྟམཱནབྷཝཏོ ཝཙནཾ མུཙྩནཾ པརིགལ༹ནཾ ཙུཏི. ཨིདཱནི ཏཱནི ཀིཙྩཱནི ཨནིཡམཏོ ན པཝཏྟནྟི. ཋཱནནིཡམེནེཝ པཝཏྟནྟཱིཏི དསྶེཏུཾ ཋཱནབྷེདོ ཝུཏྟོ. ཏིཊྛཏི པཝཏྟཏི ཏཾཏཾ ཀིཙྩཝནྟཾ ཙིཏྟཾ ཨེཏྠཱཏི ཋཱནཾ. ཨོཀཱསོ. ཏཾཏཾ ཨནྟརཱཀཱལོཏི ཝུཏྟཾ ཧོཏི. ཀཱལོཔི ཧི ཀཱལཝནྟཱནཾ པཝཏྟིཝིསཡཏྟཱ ཋཱནནྟི ཝུཙྩཏི. པཊིསནྡྷིཡཱ ཋཱནཾ པཊིསནྡྷིཊྛཱནཾ. པཊིསནྡྷཀཱལོ པཊིསནྡྷིཀྑཎོཏི ཝུཏྟཾ ཧོཏི. ཨེཝཾ སེསེསུཔི.

[༩༡] ཝིབྷཱཝནིཡཾ པན

‘‘པཊིསནྡྷིཡཱ ཋཱནཾ པཊིསནྡྷིཊྛཱནནྟི ཝཏྭཱ ཀཱམཾ པཊིསནྡྷིཝིནི མུཏྟཾ ཋཱནཾནཱམ ནཏྠི. སུཁགྒཧཎཏྠཾ པན སིལཱ པུཏྟཀསྶ སརཱིརནྟིཨཱདཱིསུ ཝིཡ ཨབྷེདེཔི བྷེདཔརིཀཔྤནཱཏི དཊྛབྦ’’ནྟི ཝུཏྟཾ. ཏཾ ན གཧེཏབྦཾ.

ཀཱལོ ཧི ནཱམ སབྷཱཝཏོ ཨཝིཛྫམཱནོཔི ཙིཏྟསྶ ཝིསུཾ ཨཱརམྨཎབྷཱུཏོ ཨེཀོ པཉྙཏྟིདྷམྨོ. ཏཐཱ ཧི ཨཊྛཀཐཱཡཾ ཨིམེསཾ ཨཊྛནྣཾ མཧཱཝིཔཱཀཙིཏྟཱནཾ ཝིཔཙྩནཊྛཱནཾ ཝེདིཏབྦཾ. ཨེཏཱནི ཧི ཙཏཱུསུ ¶ ཋཱནེསུ ཝིཔཙྩནྟི. པཊིསནྡྷིཡཾ བྷཝངྒེ ཙུཏིཡཾ ཏདཱརམྨཎེཏི ཝཏྭཱ ཏཾ ཝིཏྠཱརེནྟེན པཊིསནྡྷིགྒཧཎཀཱལེ པཊིསནྡྷིཧུཏྭཱ ཝིཔཙྩནྟི. ཨསངྑྱེཡྻཾཔི ཨཱཡུ ཀཱལཾ བྷཝངྒཾ ཧུཏྭཱ མརཎ ཀཱལེ ཙུཏི ཧུཏྭཱཏི ཀཱལོཝ ཝུཏྟོཏི. ཨིཏརཐཱ ཀིཙྩཱནི ཝིཡ ཋཱནཱནིཔི ཙུདྡསཝིདྷཱནིཨེཝ ཝཏྟབྦཱནི སིཡུནྟི. ཋཱནཱནཾ ཝིཏྠཱརབྷེདོ པན ཨུཔརི དྭཱིསུ པཝཏྟིསངྒཧེསུ ཙིཏྟཔཝཏྟིཝིདྷཱནཱནུསཱརེན ཝེདིཏབྦོཏི. ཡསྨཱ ཨོམཀཾ དྭིཧེཏུཀཀུསལཾ སཡཾ སོ མནསྶཡུཏྟཾཔི སམཱནཾ ཨཏིདུབྦལཏྟཱ སོམནསྶ པཊིསནྡྷིཾ དཱཏུཾ ནསཀྐོཏི. ཏསྨཱ སོམནསྶསནྟཱིརཎཾ པཊིསནྡྷིཊྛཱནཾ ནགཙྪཏཱིཏི ཝུཏྟཾ དྭེཨུཔེཀྑཱསཧགཏསནྟཱིརཎཱནིཙེཝཱཏི. ཏཐཱ ཧི པཊྛཱནེ པཱིཏིསཧགཏཏྟིཀེ པཊིཙྩཝཱརེ ཧེཏུཔཙྩནིཀེ ཏཾ པཊི སནྡྷིཊྛཱནེན ཨུདྡྷཊནྟི. མནོདྭཱརཱཝཛྫནཾ པརིཏྟཱརམྨཎེཝཱ ཨཝིབྷཱུཏཱ རམྨཎེཝཱ དྭཏྟིཀྑཏྟུཾ པཝཏྟམཱནཾཔི ཝིཔཱཀ སནྟཱནཏོ ལདྡྷཔཙྩཡབྷཱཝེན དུབྦལཏྟཱ ཛཝནཝེགརཧིཏམེཝ ཧོཏཱིཏི ཝུཏྟཾ ཨཱཝཛྫན དྭཡ ཝཛྫིཏཱནཱིཏི.

[༩༢] ཝིབྷཱཝནིཡཾ པན

‘‘ཨཱརམྨཎརསཱནུབྷཝནཱ བྷཱཝཏོ’’ཏི ཀཱརཎཾ ཝུཏྟཾ. ཏཾ ཨ ཀཱརཎཾ.

ན ཧི ཨཱརམྨཎ རསཱནུབྷཝནཾ ཛཝནཀིཙྩ སིདྡྷིཡཱ ཛཝནནཱམ ལཱབྷསྶཙ ཀཱརཎཾ ཧོཏི. ཏཾ པན ཛཝནཀིཙྩསིདྡྷིཡཱ ཕལམེ ཝཧོཏཱིཏི. ཡསྨཱ པན ཕལཙིཏྟཾ ཨཱསེཝནབྷཱཝརཧིཏཾཔི མགྒ ཙེཏནཱཡ མཧཱནུབྷཱཝཏྟཱ པརིཀམྨབྷཱཝནཱབལེན ཙ པཝཏྟཏྟཱ ཨཱརམྨཎེ ཝེགསཧིཏམེཝ པཏཏཱིཏི ཏསྶཛཝནེསུ གཧཎཾཀཏཾ.

[༩༣] ཝིབྷཱཝནིཡཾ པན

མགྒཱབྷིཉྙཱཛཝནཱནཾ ཨེཀཝཱརམེཝ པཝཏྟཏྟཱ ཛཝནཀིཙྩཾ ན སམྤཛྫཏཱིཏི ཨདྷིཔྤཱཡེན ‘‘ཨེཀཙིཏྟཀྑཎིཀཾཔི ལོཀུཏྟར མགྒཱདིཏཾ ཏཾསབྷཱཝཝནྟཏཱཡ ཛཝནཀིཙྩཾ ནཱམཱ’’ཏི ཝཏྭཱ སབྦཉྙུཏཉྙཱཎོཔམཱཡ ཏམཏྠཾ ཝིབྷཱཝེཏི. ཏཾ ན ཡུཛྫཏིཡེཝ.

ཨིདཱནི ¶ སམཱནཀིཙྩགཎནཱནི ཙིཏྟཱནི སངྒཧེཏྭཱ དསྶེཏུཾ ཏེསུ པནཱཏིཨཱདིམཱཧ. པཊིསནྡྷཱདཡོ ནཱམ ཙིཏྟུཔྤཱདཱཏི སམྦནྡྷོ.

[༩༤] ཝིབྷཱཝནིཡཾ པན

ནཱམཀིཙྩབྷེདེནཱཏིཔི ཡོཛེཏི. ཏཾ ན སུནྡརཾ.

ནཱམབྷེདསྶ ཝིསུཾ ཝཏྟབྦཱབྷཱཝཏོཏི. ཨེཀཀིཙྩཊྛཱན དྭིཀིཙྩཊྛཱན ཏིཀིཙྩཊྛཱན ཙཏུཀིཙྩཊྛཱན པཉྩཀིཙྩཊྛཱནཱནི ཙིཏྟཱནི ཡཐཱཀྐམཾ ཨཊྛསཊྛིཙ ཏཐཱ དྭེཙ ནཝཙ ཨཊྛཙ དྭེཙ ནིདྡིསེཏི ཡོཛནཱ.

༡༣༣. ཙཀྑཱདཱིནཾ དྭཱརཱནཾ བྷེདེན ཙིཏྟཙེཏསིཀཱནཾ སངྒཧོ དྭཱརསངྒཧོ.

[༩༥] ཝིབྷཱཝནིཡཾ པན

‘‘དྭཱརཱནཉྩ དྭཱརཔཝཏྟཙིཏྟཱནཉྩ པརིཙྪེདཝསེན སངྒཧོ དྭཱརསངྒཧོ’’ཏི ཝུཏྟཾ. ཏཾ ན སུནྡརཾ.

དྭེ ཛནཱ ཨརནྟི གཙྪནྟི ཨེཏེནཱཏི དྭཱརཾ. ནགརསྶ ཨནྟོ ཛནཱ བཧིཛནཱཙ ཡེན ཚིདྡམགྒེན ནིཀྑམནྟི པཝིསནྟིཙ, ཏསྶེཏཾ ནཱམཾ. དྭེ ཛནཱ ཨརནྟི གཙྪནྟི ཨེཏྠཱཏི དྭཱརནྟིཔཱི ཝདནྟི. ཨཔིཙ, དུཝིདྷཾ དྭཱརཾ ཨཱཀཱསདྭཱརཾ མཎྜདྭཱརནྟི. ཏཏྠ ཨཱཀཱསདྭཱརཾནཱམ ཡཐཱཝུཏྟོ ཚིདྡམགྒོ. མཎྜདྭཱརཾནཱམ ཨཱདཱས པཊྚམཡོ ཨཱལོཀམགྒོ. ཏཾ པན པུཉྙཝནྟཱནཾ གེཧེསུ ཡོཛཱིཡཏི. ཡཐཱ ཙ ཏེསུ, ཏཐཱ སཏྟཱནཾ སརཱིརེསུཔི དྭེཨེཝ ཧོནྟི. ནཝདྭཱརོ མཧཱཝཎོཏི ཧི ཚིདྡདྭཱརཾ ཝུཏྟཾ. ནཝནཝུཏིལོམཀཱུཔསཧསྶཱ ནིཔི ཚིདྡདྭཱརཱནིཨེཝ. ཨིདྷ པན ཨཱདཱསཔཊྚསདིསཾ མཎྜདྭཱརཾ ཨདྷིཔྤེཏཾ. ཏཾཔི ཧི ཨཱརམྨཎིཀདྷམྨཱནཾ ཨཱརམྨཎདྷམྨཱནཉྩ ནིགྒམན པཝིསན མུཁཔཐབྷཱཝཏོ དྭཱརསདིསཏྟཱ དྭཱརནྟི ཝུཙྩཏཱིཏི. ཏཾ པན རཱུཔམཎྜ དྭཱརཾ ཨརཱུཔམཎྜདྭཱརནྟི དུཝིདྷཾ. རཱུཔམཎྜདྭཱརཾཔི ཀམྨཝིསེསམཧཱབྷཱུཏ ཝིསེསསིདྡྷེན མཎྜབྷཱཝཝིསེསེན པཉྩཝིདྷནྟི དསྶེཏུཾ ཙཀྑུདྭཱརནྟིཨཱདིམཱཧ. ཏཏྠ ཙཀྑུམེཝཙཀྑུདྭཱརནྟི ཡསྨིཾ ཙཀྑུམྷི ཙནྡ མཎྜལཱདཱིནི རཱུཔ ནིམིཏྟཱནི པཉྙཱཡནྟི. ཨཱཝཛྫནཱདཱིནིཙ ཡམྷི པཉྙཱཏཱནི ཏཱནི ནིམིཏྟཱནི གཎྷནྟི. ཏསྨཱ ཏདེཝ ཙཀྑུ ཏེསཾ དྭིནྣཾ ཝིསཡཝིས ཡིབྷཱཝུཔགམནསྶ ¶ མུཁཔཐབྷཱུཏཏྟཱ ཙཀྑུདྭཱརཾནཱམཱཏི ཨཏྠོ. ཨཐཝཱ, ཡེན ཙཀྑུམཎྜེན བཧིདྡྷཱ ཙནྡམཎྜལཱདཱིནི རཱུཔཱནི ཨནྟོ ཨཱཝཛྫནཱདཱིནཾ ཝིསཡབྷཱཝཾ ཨུཔགཙྪནྟི. ཡེནཙ ཨནྟོ ཨཱཝཛྫནཱདཱིནི བཧིདྡྷཱ ཏེསཾ རཱུཔཱནཾ ཝིསཡིབྷཱཝཾ ཨུཔགཙྪནྟི. ཏམེཝ ཡཐཱཝུཏྟ ཀཱརཎེན ཙཀྑུདྭཱརཾ ནཱམཱཏི ཨཏྠོ. ཨེཝཾ སེསེསུཔི.

[༩༦] ཊཱིཀཱསུ པན

‘‘ཨཱཝཛྫནཱདཱིནཾ ཨརཱུཔདྷམྨཱནཾ པཝཏྟིམུཁབྷཱཝཏོ དྭཱརསདིསཏྟཱ དྭཱརཱནཱི’’ཏི ཝུཏྟཾ. ཏཾ ན སུནྡརཾ.

རཱུཔཱདཱིནཾ ཨཱརམྨཎཱནཾཔི པཝཏྟིམུཁབྷཱུཏཏྟཱ. ཝཀྑཏི ཧི ཚབྦིདྷཱ ཝིསཡཔཝཏྟིཡོཏི. ཨེཏྠཙ ཝིསཡཱནཾ རཱུཔཱདཱིནཾ ཨཱརམྨཎཱནཾ དྭཱརེསུ ཨཱཔཱཏཱ གམན སངྑཱཏཱ པཝཏྟིཡོ ཝིསཡཔཝཏྟིཡོཏི ཝུཙྩནྟཱིཏི. ཏཏྠ ཙཀྑུམེཝ ཙཀྑུདྭཱརནྟི ཨེཏེན ཙཀྑུསྶ དྭཱརཾ ཙཀྑུདྭཱརནྟི ཨཏྠཾ ནིཝཏྟེཏི. ཏཐཱ སོཏཱདཡོ སོཏ དྭཱརཱདཱིནཱིཏི ཨེཏེན སོཏ མེཝ སོཏདྭཱརཾ.ལ. མནོཨེཝ མནོདྭཱརཾ. ན མནཱནཾ དྭཱརཾ མནོདྭཱརནྟི ཨིམམཏྠཾ ཨཏིདིསྶཏི. ཏསྶ པན མནསྶ བཧུཝིདྷཏྟཱ ཨིདྷ ཨདྷིཔྤེཏཾ མནཾ དསྶེནྟོ མནོདྭཱརཾ པན བྷཝངྒནྟི པཝུཙྩཏཱིཏི ཝུཏྟཾ.

[༩༧] ཝིབྷཱཝནིཡཾ པན

‘‘ཨཱཝཛྫནཱདཱིནཾ མནཱནཾ དྭཱརནྟི མནོདྭཱར’’ནྟིཔི ཝུཏྟཾ. ཏཾ ན སུནྡརཾ.

ཀཱརཎཾ ཝུཏྟམེཝ. ཏཏྠ སབྦཾ ཨེཀཱུནནཝུཏིཝིདྷཾཔི ཙིཏྟཾ མནོདྭཱར མེཝནཱམ ཧོཏི. ཨིདྷ པན ཨུཔཔཏྟིདྭཱརམེཝ ཨདྷིཔྤེཏནྟི ཀཏྭཱ བྷཝངྒནྟི པཝུཙྩཏཱིཏི ཝུཏྟཾ. པཊིསནྡྷིཏོ པཊྛཱཡ ཡཱཝཏཱཡུཀཾ ནདིསོཏམིཝ པཝཏྟམཱནཾ ཨེཀཱུནཝཱིསཏིཝིདྷཾ བྷཝངྒཙིཏྟམེཝ ཨིདྷ མནོདྭཱརནྟི ཝུཙྩཏི, ཀཐཱིཡཏཱིཏི ཨཏྠོ.

[༩༨] ཝིབྷཱཝནིཡཾ པན

ཡཐཱ གཱམསྶ དྭཱརཾནཱམ གཱམཱནནྟརམེཝ ཧོཏི. ཨེཝཾ ཨཱཝཛྫནཱདཱིནཾ མནཱནཾ པཝཏྟིམུཁཊྛེན དྭཱརཾནཱམ ཨཱཝཛྫནཱནནྟརཾ བྷཝངྒམེཝ སིཡཱ. ན ཏཏོ པུརིམཱནི བྷཝངྒཱནཱིཏི ཨདྷིཔྤཱཡེན ཡཾ ཝུཏྟཾ ‘‘བྷཝངྒནྟི ཨཱཝཛྫཱནཱནནྟརཾ བྷཝངྒ’’ནྟི. ཏཾ ན གཧེཏབྦཾ.

ཨེཝཉྷི ¶ སཏི ཡེསུ ཙཀྑུཔསཱདཱདཱིསུ རཱུཔཱདཱིནི ཨཱཔཱཏཾ ནཱགཙྪནྟི. ཏཱནིཔི ཨཱཝཛྫནཱདཱིནཾ ཝཱིཐིཙིཏྟཱནཾ པཝཏྟིམུཁཱནི ཨེཝ ན ཧོནྟཱིཏི ཀཏྭཱ དྭཱརཱནིནཱམ ནསིཡུཾ. ན ཙ ཏཐཱ སཀྐཱ ཝཏྟུཾ. པཱལི༹ཡམེཝ ཏེསཾ དྭཱརརཱུཔབྷཱཝསྶ ཝུཏྟཏྟཱ. ཨིདྷཙ ཝཀྑཏི པསཱདཝིཉྙཏྟིསངྑཱཏཾ སཏྟཝིདྷཾཔི དྭཱརརཱུཔཾནཱམཱཏི.

[༩༩] ཡཉྩ ཏཏྠ

སཱཝཛྫནཾ བྷཝངྒནྟུ, མནོདྭཱརནྟི ཝུཙྩཏཱིཏི –

སཱདྷཀཝཙནཾ ཨཱཧཊཾ; ཏཾཔི ཨིདྷ ནཡུཛྫཏིཡེཝ.

ཏཉྷི ཨཱཝཛྫནཾཔི མནོདྭཱརཔཀྑིཀཾ ཀཏྭཱ དཱིཔེཏཱིཏི. ཡཏྠ པན ཙཀྑུཉྩ པཊིཙྩ རཱུཔེཙ ཨུཔྤཛྫཏི ཙཀྑུཝིཉྙཱཎཾ. སོཏཉྩ. ལ. མནཉྩ པཊིཙྩ དྷམྨེཙ ཨུཔྤཛྫཏི མནོཝིཉྙཱཎནྟི ཝུཏྟཾ. ཏཏྠེཝ ཏཾ ཡུཏྟཾ. ཏཏྠ ཧི ཙཀྑུཝིཉྙཱཎུཔྤཏྟིཡཱ ཙཏཱུསུ པཙྩཡེསུ ཙཀྑུརཱུཔཱནི ཨེཝ སརཱུཔཏོ ཝུཏྟཱནཱིཏི ཨིཏརེ ཨཱཝཛྫནཉྩ སམྤཡུཏྟཀྑནྡྷཱ ཙཱཏི དྭེ པཙྩཡཱ ཙསདྡེན གཧིཏཱ, ཨེཝཾ སོཏཝིཉྙཱཎཱདཱིསུཔི. མནོཝིཉྙཱཎེ པན མནཉྩཱཏི ཨེཏྠ བྷཝངྒཙིཏྟེན སཧ ཨཱཝཛྫནཾ གཧེཏྭཱ ཙསདྡེན སམྤཡུཏྟཀྑནྡྷཱ གཧིཏཱ. ཨེཝཉྷི སཏི ཙཏྟཱ རོཔཙྩཡཱ ཧོནྟཱིཏི. ཝུཏྟཉྷེཏཾ དྷཱཏུཝིབྷངྒཊྛཀཐཱཡཾ པཊིཙྩཱཏི ནཱམ ཨཱགཏཊྛཱནེ ཨཱཝཛྫནཾ ཝིསུཾ ནཀཱཏབྦཾ. བྷཝངྒནིསྶིཏཀམེཝ ཀཱཏབྦནྟི. ཏསྨཱ ཨིདྷ མནོཏི སཧཱཝཛྫནཀཾ བྷཝངྒཾ. མནོ ཝིཉྙཱཎནྟི ཛཝནམནོཝིཉྙཱཎནྟི. ཨེཏྠཙ པཊིཙྩཱཏིནཱམ ཨཱགཏཊྛཱནེཏི ཨེཏེན ཨཉྙཏྠ པན ཨཱཝཛྫནཾ དྭཱརཔཀྑིཀཾ ནཀཱཏབྦནྟི སིདྡྷཾ ཧོཏི. པཊིཙྩཱཏི ཨཱགཏཏྟཱཡེཝཙ བྷཝངྒཾཔི ཨཱཝཛྫནཱ ནནྟརཾ བྷཝངྒདྭཡམེཝ ཨིམིསྶཾ པཱལི༹ཡཾ གཧེཏབྦཾ. སནྣིཧིཏཔཙྩཡཱནཾ ཨེཝ ཏཏྠ ཨདྷིཔྤེཏཏྟཱཏི. ཨིདྷ པན དྭཱརབྷཱཝཱ རཧསྶ སབྦསྶ ཨུཔཔཏྟིདྷམྨསྶ པརིགྒཧིཏཏྟཱ སབྦཾ བྷཝངྒཾ ཨདྷིཔྤེཏཾ. ན ཧི ཀིཉྩི བྷཝངྒཾ ནཱམ ཨཏྠི. ཡཾ མནོདྭཱརབྷཱཝཱརཧཾ ན སིཡཱཏི ནིཊྛམེཏྠ གནྟབྦནྟི. ཏཏྠཱཏི ནིདྡྷཱརཎེ བྷུམྨཾ, ཏེསུ ཚསུ དྭཱརེསུ ཙཀྑུ དྭཱརེཏི སམྦནྡྷོ. ཡཐཱརཧནྟི ཨཱརམྨཎབྷཱུམིཔུགྒལམནསིཀཱརཱ དཱིནཾ ཨནུརཱུཔཝསེན. སབྦཐཱཔཱིཏི ཝིསུཾ ཝིསུཾ ཚཙཏྟཱལཱིས བྷེདསངྑཱཏེན ¶ སབྦཔཀཱརེནཔི ཨགཧིཏ གཧཎ ཝསེན, ཙཏུཔཉྙཱ སཱཏི སམྦནྡྷོ. སབྦཐཱཔཱིཏིཝཱ ཨཱཝཛྫནཱདི ཏདཱརམྨཎ པརིཡོ སཱནཝསེན ཨནེཀཀིཙྩབྷེདཡུཏྟེན སབྦཔཀཱརེནཔི, ཀཱམཱཝཙརཱནེཝཱཏི སམྦནྡྷོ. ཡཱནི ཨཱཝཛྫནཱདཱིནི ཀིཙྩཱནི དྭཱརཝིཀཱརཾ པཊིཙྩ པཝཏྟནྟི, ཏཾ ཀིཙྩཝནྟཱནིཨེཝ དྭཱརེ ནིཡུཏྟཱནཱིཏི ཨཏྠེན དྭཱརིཀཱནིནཱམ ཧོནྟི. པཊིསནྡྷི བྷཝངྒ ཙུཏི ཀིཙྩཱནིཔན དྭཱརཝིཀཱརེན ཝིནཱ ཀེཝལཾ ཀམྨཝསེནེཝ སིཛ྄ཛྷནྟི. ཏསྨཱ ཏཾཀིཙྩཝནྟཱནི དྭཱརིཀཱནིནཱམ ནཧོནྟཱིཏི ཝུཏྟཾ ཨེཀཱུན.ལ. དྭཱརཝིམུཏྟཱནཱིཏི ཨེཏྠ ཙ དྭཱརཝིཀཱརོནཱམ ཨཏྟནི ཨཱརམྨཎཱནཾ ཨཱཔཱཏཱགམནཝསེན བྷཝངྒསྶ ཙལནཾ, ཙཀྑཱདཱིནཉྩ ཨཏྟནི ཝིཉྙཱཎུཔྤཱདན སཏྟིཝིསེས ཡོགོ དཊྛབྦོ.

[༡༠༠] ཝིབྷཱཝནིཡཾ པན

‘‘ཙཀྑཱདིདྭཱརེསུ ཨཔཝཏྟནཏོ མནོདྭཱརསངྑཱཏ བྷཝངྒཏོ ཨཱརམྨཎནྟརགཧཎཝསེན ཨཔཝཏྟིཏོཙ དྭཱརཝིམུཏྟཱནཱི’’ཏི ཝུཏྟཾ, ཏཾ ཨཊྛཀཐཱཡཔི སཧ ནསམེཏི.

པཊིསནྡྷི བྷཝངྒ ཙུཏི ཝསེནཱཏི ཧི ཝུཏྟཾ. ཨེཏེན ཧི ཀིཙྩསཱིསེནེཝ ཙིཏྟཱནཾ དྭཱརིཀ དྭཱརཝིམུཏྟབྷཱགོ ཐེརེན དསྶིཏོ. ཏེནེཝ ཧི ཧེཊྛཱཔི པཉྩདྭཱརཱཝཛྫན.ལ. ཏདཱརམྨཎཝསེནཱཏིཨཱདིནཱ ཀིཙྩསཱིསེནེཝ ཙིཏྟཱནཾ ཙཀྑུདྭཱརིཀཱདིབྷཱཝོ ཝུཏྟོཏི. ནནུ ཙཀྑཱདིདྭཱརེསུ ཨཔཝཏྟནཏོཏི ཨིམིནཱ ཨེཏདཏྠོཝ ཝུཏྟོཏི ཙེ. ན. ཨདྷིཔྤེཏཏྠཝིརཧསྶ ཨཔསངྒ ནིཝཏྟཀསྶཙ སཾཝཎྞནཱ ཝཱཀྱསྶ པཡོཛནཱབྷཱཝཏོཏི. ཚདྭཱརིཀཱནིཙེཝ སནྟཱིརཎ ཏདཱརམྨཎཀིཙྩཱནཾ ཝསེན དྭཱརཝིམུཏྟཱནིཙ པཊིསནྡྷཱདིཀིཙྩཱནཾ ཝསེནཱཏི ཨདྷིཔྤཱཡོ. པཉྩདྭཱརིཀཱནིཙ ཚདྭཱརིཀཱནིཙ པཉྩཚདྭཱརིཀཱནི. ཀདཱཙི ཚདྭཱརིཀཱནིཙེཝ ཏཱནི ཀདཱཙི དྭཱརཝིམུཏྟཱནིཙཱཏི ཚདྭཱརིཀཝིམུཏྟཱནི. དྭཱརསདྡོ ཙེཏྠཨདྷིཀཱརཝསེན ཡོཛཱིཡཏི.

[༡༠༡] ཝིབྷཱཝནིཡཾ པན

‘‘ཚདྭཱརིཀཱནིཙ ཚདྭཱརིཀཝིམུཏྟཱནིཙཱ’’ཏིཔི ཝུཏྟཾ. ཏཾ ན སུནྡརཾ.

ཧེཊྛཱ ཙུཎྞིཡཝཱཀྱེ ཏཐཱ ཨསུཏཏྟཱཏི. ཨེཀདྭཱརིཀཙིཏྟཱནི. ལ. སབྦཐཱ དྭཱརཝིམུཏྟཱནིཙ ཡཐཱཀྐམཾ ཚཏྟིཾསཏི.ལ. ནཝདྷཱ ཙེཏི པཉྩདྷཱ པརིདཱིཔཡེཏི ཡོཛནཱ.

༡༣༤. རཱུཔཱདཱིནཾ ཨཱརམྨཎཱནཾ བྷེདེན ཙིཏྟཙེཏསིཀཱནཾ སངྒཧོ ཨཱརམྨཎསངྒཧོ.

[༡༠༢] ཊཱིཀཱསུ པན

‘‘ཨཱརམྨཎཱནཾ སརཱུཔཏོ ཝིབྷཱགཏོ ཏཾཝིསཡཙིཏྟཏོ ཙ སངྒཧོ ཨཱརམྨཎསངྒཧོ’’ཏི ཝུཏྟཾ. ཏཾ ན སུནྡརཾ.

ཨཡཉྷི ཙིཏྟཙེཏསིཀཱནཾ ཨེཝ སངྒཧོ. ན ཨཱརམྨཎཱནནྟི. རཱུཔཱདཱིནཾ ཝཙནཏྠོ ཨུཔརི ཨཱགམིསྶཏི. དུབྦལཔུརིསེན དཎྜཱདིཝིཡ ཙིཏྟཙེཏསིཀེཧི ཨཱལམྦཱིཡཏི ཨམུཉྩམཱནེཧི གཎྷཱིཡཏཱིཏི ཨཱལམྦཎཾ. ཨཱརམྨཎསདྡེ པན སཏི ཙིཏྟཙེཏསིཀཱནི ཨཱགནྟྭཱ ཨེཏྠ རམནྟཱིཏི ཨཱརམྨཎཾ.

[༡༠༣] ཡཾཔན ཝིབྷཱཝནིཡཾ

‘‘དུབྦལཔུརིསེན དཎྜཱདིཝིཡ ཙིཏྟཙེཏསིཀེཧི ཨཱལམྦཱིཡཏི. ཏཱནིཝཱ ཨཱགནྟྭཱ ཨེཏྠ རམནྟཱིཏི ཨཱལམྦཎ’’ནྟི ཝུཏྟཾ. ཏཾ ན སུནྡརཾ.

ཝིསུཾ སིདྡྷཱནི ཧི ཨེཏཱནི པདཱནཱིཏི. རཱུཔམེཝཱཏི ཝཎྞཱཡཏནམེཝ. པཉྩཱརམྨཎཝིམུཏྟཾ ཡཾཀིཉྩི དྷམྨཛཱཏཾ ཝིཛྫམཱནཾཔིཨཝིཛྫམཱནཾཔི བྷཱུཏཾཔི ཨབྷཱུཏཾཔི དྷམྨཱརམྨཎམེཝ. ཏཾ པན སབྷཱག ཀོཊྛཱསཏོ སངྒཡ྄ཧམཱནཾ ཚབྦིདྷཾ ཧོཏཱིཏི ཝུཏྟཾ དྷམྨཱརམྨཎཾ པན.ལ. ཚདྷཱ སངྒཡ྄ཧཏཱིཏི. ཏཏྠཱཏི ཏེསུ རཱུཔཱདཱིསུ ཚསུ. ཙཀྑུདྭཱརེ གྷཊྚཡམཱན རཱུཔཱནུསཱརེནེཝ ཨུཔྤནྣཱནི ཙཀྑུདྭཱརིཀཙིཏྟཱནི ཨཉྙཱནི ཨཱརམྨཎཱནི ཨཱལམྦིཏུཾ ནལབྷནྟི. རཱུཔཱནིཔི གྷཊྚནརཧིཏཱནི ཨཏཱིཏཱནཱགཏཱནི ཨཱལམྦིཏུཾ ནལབྷནྟཱིཏི ཝུཏྟཾ ཙཀྑུདྭཱརིཀཙིཏྟཱནཾ སབྦེསཾཔི རཱུཔམེཝ ཨཱརམྨཎཾ. ཏཉྷ པཙྩུཔྤནྣནྟི. སོཏདྭཱརིཀཱ དཱིསུཔི ཨེསེཝནཡོ. ཏཏྠ ཏཾ ཏཾ ཀཱརཎཾ པཊིཙྩ ཨུཔྤནྣཾ པཙྩུཔྤནྣཾ. ཝཏྟམཱནནྟི ཨཏྠོ. ཚབྦིདྷཾཔཱིཏི རཱུཔཱདིཝསེན ཚབྦིདྷཾཔི. ཨཏིཀྐནྟབྷཱཝཾ ཨིཏཾ གཏཾ ¶ པཝཏྟནྟི ཨཏཱིཏཾ. ཨཱགཙྪཏི ཨཱགཙྪིཏྠཱཏི ཨཱགཏཾ. པཙྩུཔྤནྣཾ, ཨཏཱིཏཉྩ. ན ཨཱགཏནྟི ཨནཱགཏཾ. ཨུཔྤཱདཛཱཏིཀཱ སངྑཏདྷམྨཱཨེཝ ཏཱིསུ ཀཱལེསུ ཨནུཔཏནྟི. ཏསྨཱ ཨུཔྤཱདརཧིཏཱ ཨསངྑཏབྷཱུཏཱ ནིབྦཱནཔཉྙཏྟིཡོ ཀཱལཝིམུཏྟཾནཱམཱཏི ཝེདིཏབྦཱ.

[༡༠༤] ཝིབྷཱཝནིཡཾ པན

‘‘ཝིནཱསཱབྷཱཝཏོ ཨཏཱིཏཱདིཀཱལཝསེན ནཝཏྟབྦཏྟཱ ནིབྦཱནཾ པཉྙཏྟིཙ ཀཱལཝིམུཏྟཾནཱམཱ’’ཏི ཝུཏྟཾ. ཏཾ ཝིཙཱརེཏབྦཾ.

སབྦེཔི ཧི སངྑཏདྷམྨཱ ཨནཱགཏབྷཱཝ པུབྦཀཱཨེཝ ཧོནྟི. ཏསྨཱ ཏེ ཡདཱ པཙྩཡསཱམགྒིཾ ལབྷིཏྭཱ ཨུཔྤཛྫིསྶནྟཱིཏི ཝཏྟབྦཔཀྑེ ཏིཊྛནྟི, ཏདཱ ཨནཱགཏཱནཱམ. ཡདཱ པཙྩཡསཱམགྒིཾ ལབྷིཏྭཱ ཨུཔྤནྣཱ, ཡདཱ པཙྩུཔྤནྣཱནཱམ. ཡདཱ ནིརུདྡྷཱ, ཏདཱ ཨཏཱིཏཱནཱམ. ཨེཝཾ ཨུཔྤཱདཛཱཏིཀཱནཉྙེཝ ཨུཔྤཱདམཱུལིཀཱ ཏེཀཱལིཀཏཱ སིདྡྷཱ. ཨུཔྤཱདརཧིཏཱནཾ པན ཨནཱགཏཱཝཏྠཱཔི ནཏྠི. ཀུཏོ པཙྩུཔྤནྣཱཏཱིཏཱ ཝཏྠཱཏི. ཏསྨཱ ནིབྦཱནཔཉྙཏྟཱིནཾ ཀཱལཏྟཡ ཝིམུཏྟཏཱ ཧོཏཱིཏི. ཝིནཱསཱབྷཱཝཏོཏི ཨིདཾ པན ཨཏཱིཏཀཱལཝིམུཏྟིཡཱཨེཝ ཀཱརཎནྟི ན ཏེན ཏཱསཾ ཨིཏརཀཱལཝིམུཏྟིཾ སཱདྷེཏཱིཏི དཊྛབྦཾ. ཡཐཱརཧཝིབྷཱགོ པན ཨིདྷེཝ ཏེསཱུཏིཨཱདིནཱ པཙྪཱ ཨཱགམིསྶཏི. དྭཱརཝིམུཏྟཱནཉྩ ཚབྦིདྷཾཔི ཨཱརམྨཎཾ ཧོཏཱིཏི སམྦནྡྷོ. ཡཐཱ པན ཨཱཝཛྫནཱདཱིནཾ ཚདྭཱརིཀཙིཏྟཱནཾ ཨཱརམྨཎཾ བྷཝནྟརེཔི ཨིམསྨིཾ བྷཝེཔི པུརིམབྷཱགེ ཀེནཙི དྭཱརེན གཧིཏཾཔི ཨགཧིཏཾཔི ཧོཏི. ན ཏཐཱ ཨིམེསནྟི དསྶེཏུཾ བྷཝནྟརེ ཚདྭཱརགཧིཏནྟི ཝུཏྟཾ. བྷཝཝིསེསཉྷི པཏྠེཏྭཱ ཀམྨཾ ཀཏྭཱ ཏཏྠ ནིབྦཏྟཱནཾ ཨཱརམྨཎཾ བྷཝནྟརེཔི ཀེནཙི དྭཱརེན གཧིཏཾཔི ཧོཏི ཡེཝཱཏི.

[༡༠༥] ཝིབྷཱཝནིཡཾ པན

‘‘ཏཾ པན ནེསཾ ཨཱརམྨཎཾ ན ཨཱཝཛྫནསྶ ཝིཡ ཀེནཙི ཨགཧིཏམེཝ གོཙརབྷཱཝཾ གཙྪཏཱིཏི དསྶེཏུཾ ཚདྭཱར གཧིཏནྟི ཝུཏྟ’’ནྟི ཝུཏྟཾ. ཏཾ ན ཡུཛྫཏི.

པཉྩདྭཱརཱ ཝཛྫནསྶཔི ཧི ཨཱརམྨཎཾ པུབྦེ ཀེནཙི དྭཱརནྟརེན གཧིཏཾཔི ཨགཧིཏཾཔི ཧོཏིཡེཝ. ཏཐཱ ཧི ཨིདཾ ནཱམ ལབྷིསྶཱམི ¶ བྷུཉྫིསྶཱམི པསྶིསྶཱམཱིཏི པུབྦེ གཧིཏཾ པཙྪཱ ཨཱཝཛྫནསྶ ཨཱརམྨཎཾ ན ན ཧོཏཱིཏི. ནཙ ཨེཀཱཝཛྫནཝཱིཐིཡཾ པུབྦེ ཀེནཙི ཙིཏྟེན ཨགཧིཏབྷཱཝོ ཨིདྷ པམཱཎནྟི. ཡཐཱ ཙ པཉྩདྭཱརིཀཙིཏྟཱནཾ ཨཱརམྨཎཾ ཨེཀནྟཔཙྩུཔྤནྣམེཝ ཧོཏི. ཡཐཱ ཙ མནོདྭཱརིཀཙིཏྟཱནཾ ཨཱརམྨཎཾ ཏེཀཱལིཀཾཝཱ ཀཱལཝིམུཏྟསཱ མཉྙཾཝཱ ཧོཏི. ན ཏཐཱ ཨིམེསནྟི དསྶེཏུཾ པཙྩུཔྤནྣམཏཱིཏཾ པཉྙཏྟིབྷཱུཏཾཝཱཏི ཝུཏྟཾ. ཡཐཱ ཙ ཚདྭཱརིཀཙིཏྟཱནཾ ཨཱརམྨཎཾ ཨཱགམསིདྡྷཝོཧཱརཡུཏྟཾཔི ཏབྦོཧཱརཝིནིམུཏྟཾཔི ཧོཏི. ན ཏཐཱ ཨིམེསནྟི དསྶེཏུཾ ཀམྨ ཀམྨ ནིམིཏྟ གཏིནིམིཏྟ སམྨཏནྟི ཝུཏྟཾ.

[༡༠༦] ཝིབྷཱཝནིཡཾ པན

‘‘ནཱཔི ནེསཾ ཨཱརམྨཎཾ མརཎཱསནྣཏོ པུརིམབྷཱགཛཝནཱནཾ ཝིཡ ཀམྨཀམྨནིམིཏྟཱདིཝསེན ཨཱགམསིདྡྷཝོཧཱརཝིནིམུཏྟནྟི དསྶེཏུཾ ཀམྨ.ལ. སམྨཏནྟི ཨཱཧཱ’’ཏི ཝུཏྟཾ. ཏཾཔི ན སུནྡརཾ.

མརཎཱ སནྣཏོ པུརིམབྷཱགེཔི ཧི སཏྟཱ ཨཏྟནཱ ཀཏཀམྨཾཝཱ ཙེཏིཡཱདཱིནི ཀམྨ, པཀརཎཱནིཝཱ ཨཱརམྨཎཾ ཀརོནྟིཡེཝ. ཏདཱཔི ཧི ཀམྨཾ ཀམྨམེཝ, ཀམྨུཔཀརཎཱནིཙ ཀམྨནིམིཏྟཱནིཡེཝ. ཀམྨ སིདྡྷིཡཱནིམིཏྟཾ ཀཱརཎཾ ཀམྨནིམིཏྟནྟི ཀཏྭཱ. ཀམྨསྶ ནིམིཏྟཾ ཨཱརམྨཎཾ ཀམྨནིམིཏྟནྟིཔི ཝདནྟི. ཨཛཱཏསཏྟུརཱཛཱ ཝིཡཙ སུཔིནདསྶནཱདིཝསེན གཏིནིམིཏྟཱནིཔི ཨཱརམྨཎཾ ཀརོནྟིཡེཝ. རཱཛཱ ཧི དྭཱིསུ བྷཝེསུ པིཏརཾ མཱརེཏི. མཱརིཏཀཱལཏོཙ པཊྛཱཡ ཏསྶ ནིདྡཱཡནྟསྶ གཏིནིམིཏྟཱནི ཨུཔཊྛཧནྟཱིཏི. ཏཏྠ ཡཐཱསམྦྷཝནྟི ཏཾ ཏཾ པཊིསནྡྷཱདཱིནཾ ཚདྭཱརགཧིཏཱདིཝསེན སམྦྷཝནྟསྶ ཨཱརམྨཎསྶ ཨནུརཱུཔཏོ. ཡཐཱསམྦྷཝཝིབྷཱགོ པན ཨུཔརི མརཎུཔྤཏྟིཡཾ ཨཱགམིསྶཏི. ཡེབྷུཡྻེནཱཏི བཱཧུལླེན. བྷཝནྟརེཏི ཨཏཱིཏཱནནྟརབྷཝེ ཏཏྠཙ མརཎཱསནྣཀཱལེ. ཚདྭཱར གཧིཏནྟི ཚཧི དྭཱརེཧི མརཎཱསནྣཛཝནེཧི གཧིཏཾ. ཨེཏྠ ཙ ཡེབྷུཡྻེནཱཏི ཨེཏེན བྷཝནྟརེ ཚདྭཱརགཧིཏནྟི ཨིམསྶ ཝིདྷཱནསྶ ཨནེཀཾསབྷཱཝཾ ཝིསེསེཏི. ཀསྨཱ. ཨགཧིཏསྶཔི སམྦྷཝཏོ. ཡཉྷི ཨསཉྙིབྷཝཏོ ཙུཏཱནཾ ཀམྨ ཀམྨནིམིཏྟ གཏིནིམིཏྟ སམྨཏཾ ¶ ཨརཱུཔབྷཝཏོ ཙུཏཱནཉྩ གཏིནིམིཏྟསམྨཏཾ ཀཱམཔཊིསནྡྷི བྷཝངྒཙུཏཱིནཾ ཨཱརམྨཎཾ. ཏཾ བྷཝནྟརེ ཀེནཙི དྭཱརེན ཨགཧིཏ མེཝ ཧོཏཱིཏི. ཨེཏྠཙ ཡསྨཱ པཊྛཱནེ ཨརཱུཔབྷཝེ དུཝིདྷོཔི པུརེཛཱཏཔཙྩཡོ པཊིསིདྡྷོ. ཨཊྛཀཐཱསུཙ ཏཏོ ཙུཏཱནཾ ཀཱམཔཊིསནྡྷིཡཱ པཙྩུཔྤནྣགཏིནིམིཏྟཱརམྨཎཏཱཔི ཝུཏྟཱ. གཏིནིམིཏྟཉྩ ནཱམ རཱུཔཱརམྨཎམེཝ དཱིཔེནྟི. ཏསྨཱ ཏེསཾ ཀཱམཔཊིསནྡྷིཡཱཔི གཏིནིམིཏྟསམྨཏཾ བྷཝནྟརེ ཀེནཙི དྭཱརེན ཨགཧིཏམེཝ ཧོཏཱིཏི ཝེདིཏབྦཾ. ཨཔིཙ, མརཎཱསནྣཀཱལེ ཀམྨབལེན ཀམྨཱདཱིནཾ ཨུཔཊྛཱནཾནཱམ ཡེབྷུཡྻེན སཾམུལ༹ྷམརཎེན མརནྟཱནམེཝ ཧོཏི. ཨིཏརེསཾ པན པརེསཾ པཡོགབལེནཔི ཨཏྟནཱ པཀཏིཡཱ སུཊྛུ ཨཱསེཝིཏཱནཾ ཨནུསྶརཎབལེནཔི དྷམྨིཀཨུཔཱསཀཱདཱིནཾ ཝིཡ དེཝལོཀཏོ ཨཱགནྟྭཱ གཎྷནྟཱནཾ དེཝཱནཾ ཨཱནུབྷཱཝེནཔི ཧོཏིཡེཝ. ནིརཡཔཱལཱཔི ནིརཡཏོ ཨཱགནྟྭཱ གཎྷནྟིཡེཝ. རེཝཏིཝིམཱནཉྩེཏྠ ཝཏྟབྦཾ. ཏཉྷི དྭེ ནིརཡཔཱལཱ གཧེཏྭཱ པཐམཾ ཏཱཝཏིཾསཱབྷཝནཾ ནེཏྭཱ པཙྪཱ ནིརཡཾ ནཡིཾསུ. ཏེ ཧི ཡཀྑ ཛཱཏིཀཏྟཱ ཝེསྶཝཎཔརིསཱཝིཡ ཏཱཝཏིཾསཱ བྷཝནཾཔི གནྟུཾ སཀྐོནྟིཡེཝ. ཡམསྶ དཱུཏཱ དྭེ ཡཀྑཱཏི ཧི པཱལི༹ཡཾ ཝུཏྟཾ. ཝེསྶཝཎདཱུཏཱ ཨིདྷ ཡམསྶ དཱུཏཱཏི ཝུཏྟཱཏིཔི ཝདནྟི. ཏསྨཱ ཡེ ཀསིཎཱསུབྷཱདཱིནི སམཐནིམིཏྟཱནི སུཊྛུ ཨཱསེཝིཏྭཱ ཨུཔཙཱརཛ྄ཛྷཱནེ ཋཏྭཱ ཏཱནེཝ ནིམིཏྟཱནི གཧེཏྭཱ མརནྟི. ཏེསཾཔི ཀཱམཔཊིསནྡྷིཡཱ ཨཱརམྨཎཾ བྷཝནྟརེ ཀེནཙི དྭཱརེན ཨགཧིཏམེཝ སིཡཱ. ཨུཔཙཱརཛ྄ཛྷཱནབལེནེཝ བྲཧྨལོཀཏོ ཨིདྷཨུཔྤཛྫནྟཱནཾཔི ཨེསེཝནཡོཏི.

ཡཾཔན ཝིབྷཱཝནིཡཾ

‘‘ཀེཝལཾ ཀམྨབལེནེཝ ཏེསཾ ཨསཉྙིབྷཝཏོ ཙུཏཱནཾ པཊིསནྡྷིཡཱ ཀམྨནིམིཏྟཱདིཀཾ ཨཱརམྨཎཾ ཨུཔཊྛཱཏཱི’’ཏི ཝུཏྟཾ.

ཏཏྠ ཀམྨནིམིཏྟཱདིཀནྟི ཨེཏྠ ཨཱདིསདྡེན ཀམྨཾཔི གཧེཏབྦ མེཝ. ན ཧི ཏསྶ ཨགཧཎེ ཀཱརཎཾ ཨཏྠཱིཏི. ཏཱནི པན སབྦཱནིཔི ཀེཝལཾ པཊིསནྡྷིཛནཀསྶ ཀམྨསྶ ཨཱནུབྷཱཝེནེཝ པཊིསནྡྷིཡཾ ཨུཔཊྛཧནྟཱིཏི ¶ ཝེདིཏབྦཾ. ཨནཱགཏཾ པན ནིམིཏྟཾ ཨུཔཊྛཧམཱནཾ གཏིནིམིཏྟམེཝ སིཡཱ. ནཙ ཏསྶ ཝིསུཾ ཨུཔཊྛཱཏབྦཀིཙྩཾ ཨཏྠི. པཙྩུཔྤནྣ གཏིནིམིཏྟེ སིདྡྷེ སིདྡྷམེཝ ཧོཏཱིཏི ཝུཏྟཾ པཙྩུཔྤནྣམཏཱིཏཾ པཉྙཏྟི བྷཱུཏཾཝཱཏི.

[༡༠༧] ཝིབྷཱཝནིཡཾ པན

‘‘ཨནཱགཏཾནཱམ ཨཏཱིཏཾ ཝིཡ ཨནུབྷཱུཏཉྩ ན ཧོཏི. ནཙ པཙྩུཔྤནྣགཏིནིམིཏྟཾ ཝིཡ ཨཱཔཱཏམཱགཏ’’ནྟི ཀཱརཎཾ ཝུཏྟཾ. ཏཾ ཨཀཱརཎཾ.

པསངྒསྶ ཨནིཝཏྟིཏཏྟཱ. གཏིནིམིཏྟཉྷི ནཱམ པཙྩུཔྤནྣཾཔི ཨནུབྷཱུཏཾ ན ཧོཏི. ཏཾཔི ཀམྨབལེནེཝ ཨཱཔཱཏམཱགཏཾ. ཨེཝཾསནྟེ ཨནཱགཏཾཔི ཀམྨབལེན ཨཱཔཱཏམཱགཏམེཝ སིཡཱཏི ཨཡཾ པསངྒོ པཱཀཏིཀོཨེཝ ཧོཏཱིཏི. ཏེསཱུཏི ཡཐཱཝུཏྟེསུ ཨཱརམྨཎིཀཙིཏྟེསུ. རཱུཔཱདཱིསུ པཉྩསུ ཨེཀེཀཾ ཨཱརམྨཎཾ ཨེཏེསནྟི སམཱསོ. རཱུཔཱདཱིནི པཉྩ ཨཱརམྨཎཱནི ཨེཏསྶཱཏི ཝིགྒཧོ. སེསཱནཱིཏི པཉྩཝིཉྙཱཎསམྤཊིཙྪན དྭཡཏོ སེསཱནི སནྟཱིརཎ མཧཱཝིཔཱཀཱནི. སབྦཐཱཔི ཀཱམཱཝཙརཱ ལམྦཎཱནེཝཱཏི པཊིསནྡྷཱདཱིཧི ནཱནཱཀིཙྩེཧི རཱུཔཱདཱིསུ ནཱནཱརམྨཎེསུ པཝཏྟེན སབྦ པཀཱརེནཔི ཀཱམཱཝཙརཱལམྦཎིཀཱནིཡེཝ. ཏཱནི ཧི སབྦཉྙུབུདྡྷཱནཾ ཨུཔྤནྣཱནིཔི ཝིཀཔྤསཏྟིརཧིཏཏྟཱ ཨཝིཛྫམཱནེ པཉྙཏྟིདྷམྨེཙ སུཁུམེ མཧགྒཏདྷམྨེཙ གམྦྷཱིརེ ལོཀུཏྟརདྷམྨེཙ ཨཱལམྦིཏུཾ ན སཀྐོནྟཱིཏི. ཏཏྠ སནྟཱིརཎཏྟཡཾ ཏཱཝ སནྟཱིརཎཀིཙྩཝསེན རཱུཔཱདིཔཉྩཱལམྦཎེ པཝཏྟཏི. ཏདཱརམྨཎཱདིཝསེན པན སབྦཱནིཔི ཨེཀཱདསཝིཔཱཀཱནི ཚསུ པརིཏྟཱརམྨཎེསུ པཝཏྟནྟཱིཏི.

[༡༠༨] ཝིབྷཱཝནིཡཾ པན

‘‘ཝིཔཱཀཱནི ཏཱཝ སནྟཱིརཎཱདིཝསེན རཱུཔཱདིཔཉྩཱལམྦཎེ’’ཏི ཝུཏྟཾ. ཏཏྠ སནྟཱིརཎཱདིཝསེནཱཏི ནཝཏྟབྦཾ. སནྟཱིརཎཝསེན ཨིཙྩེཝ ཝཏྟབྦནྟི.

ཡོ པནེཏྠ ཙིཏྟཱནཾ ཨཱརམྨཎེསུ པཝཏྟིཝིབྷཱགོ ཝཏྟབྦོ. སོ ཨཊྛཀཐཱཀཎྜེ གཧེཏབྦོ. ལོཀུཏྟརདྷམྨཱ ཨཏིགམྦྷཱིརཏྟཱ ¶ ཉཱཎསྶེཝ ཝིསཡབྷཱུཏཱཏི ཝུཏྟཾ. ཨཀུསལ.ལ. ལོཀུཏྟར ཝཛྫིཏ སབྦཱ རམྨཎཱནཱིཏི. ཏཏྠ ཏཱནི ལདྡྷསམཱཔཏྟཱིནཾ ཨུཔྤནྣཀཱལེཨེཝ མཧགྒཏཱརམྨཎཱནི. ཏེསུཙ དྭེ དོསམཱུལཙིཏྟཱནི པརིཧཱིནཛ྄ཛྷཱནཱནི ཨཱརབྦྷ ཨུཔྤནྣཀཱལེཏི དཊྛབྦཾ. ཉཱཎཾཔི ཨནདྷིགཏཱནི ལོཀུཏྟརཱནི ཨཱལམྦིཏུཾ ན སཀྐོཏཱིཏི ཝུཏྟཾ ཉཱཎསམྤཡུཏྟ.ལ. ཝཛྫིཏསབྦཱ རམྨཎཱནཱིཏི. ཏཏྠ ཉཱཎསམྤཡུཏྟཀཱམཀུསལཱནི པུཐུཛྫནཱནཾ ཨཛ྄ཛྷཱནལཱབྷཱིནཾ ཨུཔྤནྣཀཱལེ པཉྙཏྟིཡཱ སཧ ཀཱམཱཝཙརཱརམྨཎཱནི. ཏཱནེཝ སོཏཱཔཏྟིམགྒཏོ པུརེ གོཏྲབྷུཀྑཎེ པུཐུཛྫནཱནཾ ནིབྦཱནཱརམྨཎཱནི. ཛྷཱནལཱབྷཱིནཾ ཏཱནེཝ ཨབྷིཉྙཱཀུསལཉྩ མཧགྒཏཱརམྨཎཱནིཔི. ཧེཊྛིམཕལཊྛཱནཾ ཨཏྟནཱ ཨདྷིགཏ མགྒཕལནིབྦཱནཱ རམྨཎཱནིཔཱིཏི ཝེདིཏབྦཱནི. ཡཐཱ ཙེཏྠ ཨརིཡཱ ཨཏྟནཱ ཨདྷིགཏ མགྒཕལཱནིཡེཝ ཨཱལམྦིཏུཾ སཀྐོནྟི. ཏཐཱ ཛྷཱནལཱབྷིནོཔི ཨཏྟནཱ ཨདྷིགཏཛ྄ཛྷཱནཱནིཨེཝ ཨཱལམྦིཏུཾ སཀྐོནྟཱིཏི ཝེདིཏབྦཾ. ཨེཏྠ སིཡཱ-ཡེ ཙ ཛྷཱནཱནི པཏྠེནྟི. ཛྷཱནཔརིཀམྨཾཔི ཀརོནྟི. ཡེཙ ཛྷཱནསུཏྟཱནི སཾཝཎྞེནྟི. ཏེ ཨལཱབྷིནོ མཧགྒཏཛ྄ཛྷཱནཱནི ཨཱལམྦིཏུཾ སཀྐོནྟི, ནསཀྐོནྟཱིཏི. ན སཀྐོནྟི. ཏེ ཧི ཛྷཱནཱནིནཱམ ཨེཝཾ མཧཱནུབྷཱཝཱནི ཨེཝཾ མཧཱནིསཾསཱནཱིཏི སུཏྭཱཝཱ སུཏཔརིཡཏྟིབལེན སིདྡྷེ ཨཱཀཱར སལླཀྑཎཉྙཱཎེ ཋཏྭཱ ཝཱ ཨནུམཱནཝསེནེཝ ཏཱནི པཏྠེནྟི. པརིཀམྨཾཔི ཀརོནྟི. སུཏྟཱནིཔི སཾཝཎྞེནྟཱིཏི. ཨིཏརཐཱ པུཐུཛྫནཱཔི ལོཀུཏྟརདྷམྨེ པཏྠེནྟི, མགྒཔརིཀམྨཾཔི ཀརོནྟི. མགྒཕལ ནིབྦཱནཝཙནཱནིཝིཀཐེནྟི སཾཝཎྞེནྟཱིཏི ཏེསཾཔི ཏེ ཨཱརམྨཎབྷཱུཏཱ ཨེཝ སིཡུནྟི. ཏེསཾ པན ཙིཏྟཱནི ཛྷཱནཱདཱིནཾ པཉྙཏྟིགུཎེ ཨེཝ ཨནུབྷོནྟཱིཏི ཝེདིཏབྦཱནི. པཎཱིཏདྷམྨཱནཉྷི པཉྙཏྟིཡོཔི པཎིཏརཱུཔཱཨེཝ ཧོནྟཱིཏི. མཧིདྡྷིཀོ ཧི པརཙིཏྟཝིདཱུ. མཱརོ དེཝ པུཏྟོཔི རཱུཔཛ྄ཛྷཱནཙིཏྟཾ ཝཊྚནིསྶིཏམེཝ པསྶཏི. ཝིཝཊྚནིསྶིཏཾ ན པསྶཏི. ཨརཱུཔཛ྄ཛྷཱནཙིཏྟཾ པན ཝཊྚནིསྶིཏཾཔི ནཔསྶཏཱིཏི ཨངྒུཏྟརེ ནཝནིཔཱཏེ ཨཊྛཀཐཱཡཾ ཝུཏྟཾ. ཡེ པན ཨགྒམགྒཕལཱནི པཊིཝིཛ྄ཛྷནྟི. ཏེསཾ ཨུཔྤནྣཱནིཉྙཎསམྤཡུཏྟཀཱམཀྲིཡཛཝནཱནི ཀྲིཡཱབྷིཉྙཱཛཝནཉྩ པུགྒལཱནུརཱུཔཾ པཉྙཏྟིཡཱ སཧ ཙཏུབྦྷཱུམཀདྷམྨེསུ ཀིཉྩི ཨཱརམྨཎཾ ¶ ཀཱཏུཾ ནསཀྐོནྟཱིཏི ནཏྠི. ཏཐཱ ཏེསཾ པུརེཙཱརི ཀམནོདྭཱརཱཝཛྫནཉྩཱཏི ཝུཏྟཾ ཋཱཎསམྤཡུཏྟ.ལ. སབྦཐཱཔིསབྦཱ རམྨཎཱནཱིཏི. ཏཏྠ སབྦཐཱཔཱིཏི སབྦཀཱམཱཝཙར སབྦམཧགྒཏ སབྦལོཀུཏྟར སབྦཔཉྙཏྟི སབྦཔཙྩུཔྤནྣཱདི པཀཱརེནཔཱིཏིཨཏྠོ. ཨིདཉྩ སབྦཉྙུབུདྡྷཱནཾ ཨུཔྤནྣཱནི སནྡྷཱཡ ཝུཏྟཾ. ཨིཏརཱནི པན པཙྩེཀ བུདྡྷཱནཾ ཨུཔྤནྣཱནིཔི པདེསསབྦཱརམྨཎཱནིཨེཝ ཧོནྟི. ཏཱནི ཧི ཨེཀཾ པཐཝིདྷཱཏུཾཔི སབྦེཧི ཨནཝསེསཔཀཱརེཧི ཛཱནིཏུཾ ནསཀྐོནྟཱིཏི. ཨཱརུཔྤེསུ དུཏཱིཡཙཏུཏྠཱནི པཐམཏཏཱིཡཱརུཔྤ ཝིཉྙཱཎཱ རམྨཎཏྟཱ མཧགྒཏཱ རམྨཎཱནི. སེསཱནཱིཏི ཨབྷིཉྙཱ དྭཡ དུཏཱིཡཙཏུཏྠཱརུཔྤེཧི ཨཝསེསཱནི སབྦཱནིཔི ཨེཀཝཱིསཏིཝིདྷཱནི མཧགྒཏཙིཏྟཱནི ཀསིཎཱདི པཉྙཏྟཱརམྨཎཱནཱིཏི ཨཏྠོ. པཉྩཝཱིསཱཏི པཉྩདྭཱརཱཝཛྫན ཏེཝཱིསཏི ཀཱམཝིཔཱཀ ཧསནཙིཏྟཱནི སནྡྷཱཡ ཝུཏྟཾ. པརིཏྟམྷཱིཏི ཀཱམཱཝཙརཱ ལམྦཎེ ཨེཝཱཏི ཨཏྠོ. ཏཉྷི ཨཔྤཱནུབྷཱཝཏོ པཊིབནྡྷཀདྷམྨེཧི པརིསམནྟཏོ དཱིཡཏི ཨཝཁཎྜཱིཡཏི ནིཏྟེཛབྷཱཝཾ པཱཔཱིཡཏཱིཏི པརིཏྟནྟི ཝུཙྩཏི.

༡༣༥. ཙཀྑཱདཱིནཾ ཝཏྠཱུནཾ བྷེདེན ཏབྦཏྠུཀཱནཾ ཙིཏྟཙེཏསི ཀཱནཾ སངྒཧོ ཝཏྠུསངྒཧོ.

[༡༠༩] ཝིབྷཱཝནིཡཾ པན

‘‘ཝཏྠུཝིབྷཱགཏོ ཏབྦཏྠུཀཙིཏྟཔརིཙྪེདཝསེནཙ སངྒཧོ ཝཏྠུསངྒཧོ’’ཏི ཝུཏྟཾ. ཏཾ ན སུནྡརཾ.

ཝསནྟིཔཏིཊྛཧནྟི ཙིཏྟཙེཏསིཀཱཨེཏེསཱུཏིཝཏྠཱུནི, ཙཀྑུཝཏྠུཙ. ལ. ཀཱཡཝཏྠུཙཧདཡཝཏྠུཙཱཏིཡོཛནཱ. ཙཀྑུམེཝ ཙཀྑུཝཏྠུ ཏཐཱ སོཏཱདཱིནིཡེཝ སོཏཝཏྠཱདཱིནི. ཝཱཀྱསངྑེཔོ ཧེས པཱཋོ. པེཡྻཱལནཡོཏིཔི ཨནྟདཱིཔཀནཡོཏིཔི ཝཏྟུཾ ཡུཛྫཏི. ཀེཙི པན དྭནྡསམཱསཾ མཉྙནྟི. ཏེསཾ ཙསདྡོ ནཡུཛྫཏི. པརཏོ ཝཏྠུསདྡོ ཙསདྡོཙ པུབྦཔདེསུ ཨཱནེཏབྦོཏིཔི ཝདནྟི. ཏེསཾ ཧདཡཝཏྠཱུཏི སམཱསཔདཾ ནཡུཛྫཏི. ཨཝིབྷཏྟིཀནིདྡེསོཏིཔི ཨཔརེ. ཏཱནི ཀཱམལོཀེ སབྦཱནིཔི ལབྦྷནྟཱིཏི ཀཱམཏཎྷཱ དྷིན ཀམྨནིབྦཏྟཱནཾ ཨཏྟབྷཱཝཱནཾཨེཝ པརིཔུཎྞིནྡྲིཡཏཱ སམྦྷཝཏོ སབྦཱནིཔི ¶ ཏཱནི ཚ ཝཏྠཱུནི ཀཱམལོཀེཨེཝ ལབྦྷནྟི. ཏཐཱ ཧི ཙཀྑཱདཱིསུ ཝཏྠཱུསུ སནྟེསུ ཨེཝརཱུཔཱདཱིནཾ པརིབྷོགོ སམྤཛྫཏི. ཏསྨཱ རཱུཔཱདཱིསུ ཀཱམཝཏྠཱུསུ ཨབྷིརཏཱ ཀཱམཏཎྷཱ སདཱ ཙཀྑཱདཱིནཾ པཉྩནྣཾ ཝཏྠཱུནཾཔི སམྤཏྟིཾ པཏྠེཏིཡེཝ. ཡཐཱཙ སབྦཀམྨིཀོ ཨམཙྩོ སདཱ རཉྙོ ཨིཙྪམེཝ པཱུརཡམཱནོ སབྦཱནི རཱཛཀམྨཱནི སམྤཱདེཏི. ཨེཝམེཝ ཀཱམཱཝཙརཀམྨཾཔི སདཱ ཀཱམཏཎྷཱཡ ཨིཙྪམེཝ པཱུརཡམཱནཾ པརིཔུཎྞིནྡྲིཡཾ ཨཏྟབྷཱཝཾ ནིབྦཏྟེཏི. ཏསྨཱ ཀཱམཏཎྷཱདྷིནཀམྨནིབྦཏྟཱ ཀཱམསཏྟཱཨེཝ པརིཔུཎྞིནྡྲིཡཱ ཧོནྟཱིཏི. ཡཐཱ ཙ དསྶནསཝནཱནུཏྟརིཡ དྷམྨབྷཱུཏཱནི ཙཀྑུསོཏཱནི བུདྡྷདསྶན དྷམྨསྶཝནཱ དིཝསེན སཏྟཱནཾ ཝིསུདྡྷིཡཱཔི ཧོནྟི, ན ཏཐཱ གྷཱནཱདིཏྟཡཾ. ཏཾ པན ཀེཝལཾ ཀཱམཔརིབྷོགཏྠཱཡཨེཝ ཧོཏི. ཏསྨཱ ཏཾ ཀཱམཝིརཱགབྷཱཝནཱ ཀམྨནིབྦཏྟེསུ བྲཧྨཏྟབྷཱཝེསུ ནཨུཔལབྦྷཏཱིཏི ཝུཏྟཾ རཱུཔལོཀེ པན གྷཱནཱདིཏྟཡཾ ནཏྠཱིཏི. ཨིདཉྩ པསཱདརཱུཔཏྟཡཾ སནྡྷཱཡ ཝུཏྟཾ. སསམྦྷཱརགྷཱན ཛིཝ྄ཧཱ ཀཱཡ སཎྛཱནཱནིཔན སུཊྛུཔརིཔུཎྞཱནིཨེཝ ཧོནྟཱིཏི. ཨརཱུཔལོཀེཔན སབྦཱནིཔི ནསཾཝིཛྫནྟཱིཏི རཱུཔཝིརཱག བྷཱཝནཱ ཀམྨནིབྦཏྟེ ཏསྨིཾ ལོཀེ ཨཛ྄ཛྷཏྟབཧིདྡྷཱསནྟཱནེསུཔི སབྦེན སབྦཾ རཱུཔཔཝཏྟིཡཱཨེཝ ཨབྷཱཝཏོ. ཏཏྠ ནིབྦཏྟཱ ཧི སཏྟཱ སུདྡྷེ ཨཱཀཱསཏལེཨེཝ ཙིཏྟཔབནྡྷམཏྟཱ ཧུཏྭཱ ཏིཊྛནྟཱིཏི. ཨིམསྨིཾ སངྒཧེ པན ཙིཏྟཱནི སཏྟཝིཉྙཱཎ དྷཱཏུཝསེན གཧེཏུཾ ཏཏྠ པཉྩཝིཉྙཱཎདྷཱཏུཡོཏིཨཱདི ཝུཏྟཾ. ཏཏྠཱཏི ཏེསུ ཚསུ ཝཏྠཱུསུ. པཉྩཝིཉྙཱཎཱནི ཨེཝ ནིསཏྟནིཛཱིཝཊྛེན དྷཱཏུཡོཏི ཝིགྒཧོ. ཨེཝཾ སེསེསུཔི. ཝིཛཱནནཀིཙྩཱབྷཱཝཏོ མནནམཏྟཱ དྷཱཏཱུཏི མནོདྷཱཏུ. པཉྩདྭཱརེ ཨཱཝཛྫནམཏྟ སམྤཊིཙྪནམཏྟ ཀིཙྩཱནི ཧི ཝིསེསཛཱནན ཀིཙྩཱནི ནཧོནྟཱིཏི. པཉྩཝིཉྙཱཎཱནི པན པཙྩཀྑཏོ དསྶནཱདིཝསེན ཐོཀཾ ཝིསེསཛཱནནཀིཙྩཱནི ཧོནྟི. ཨཝསེསཱ པན སནྟཱིརཎཱདཡོ ཨཱརམྨཎསབྷཱཝ ཝིཙཱརཎཱ དིཝསེན ཨཏིརེཀ ཝིསིཊྛཛཱནནཀིཙྩཡུཏྟཏྟཱ ན མནོདྷཱཏུཡོ ཝིཡ མནནམཏྟཱ ཧོནྟི. ནཱཔི པཉྩཝིཉྙཱཎདྷཱཏུཡོཝིཡ ཝིཛཱནན མཏྟཱ. ཨཐཁོ མནནཊྛེན མནོཙ ཏཾ ཝིཛཱནནཊྛེན ཝིཉྙཱཎཉྩཱཏི ཀཏྭཱ ¶ མནོཝིཉྙཱཎདྷཱཏུཡོནཱམ. ཨཏིསཡ ཝིསེསཛཱནན དྷཱཏུཡོཏི ཨཏྠོ. པརིཡཱཡཔདཱནཉྷི ཝིསེསན སམཱསེ ཨཏིསཡཏྠོ ཝིཉྙཱཡཏི. ཡཐཱ པདཊྛཱནནྟི.

[༡༡༠] ཝིབྷཱཝནིཡཾ པན

‘‘མནོཡེཝ ཝིཉྙཱཎཾ མནོཝིཉྙཱཎནྟི ཝཱ. མནསོ ཝིཉྙཱཎཾ མནོཝིཉྙཱཎ’’ནྟི ཝཱ ཝུཏྟཾ. ཏཏྠ མནོཡེཝ ཝིཉྙཱཎནྟི ཨིདཾ ཏཱཝ ན ཡུཛྫཏི.

ན ཧི ཨཉྙམཉྙཾ ཝིསེསེཏྭཱ ཨབྷིརེཀཊྛདཱིཔཀེ པདཊྛཱནནྟིཨཱདིཀེ ཝིསེསནསམཱསེ ཨཝདྷཱརཎ ཝིགྒཧོ ཀཏྠཙི དིསྶཏི ཡུཛྫཏིཙཱཏི.

[༡༡༡] མནསོ ཝིཉྙཱཎནྟི ཨིདཾཔི ནཡུཛྫཏིཡེཝ.

མནསོཏི ཧི མནོདྷཱཏུཏྟིཀསངྑཱཏསྶ མནསྶ. ཏཏྠ སམྤཊིཙྪནདྭཡཾ སནྟཱིརཎཱདིཀསྶ མནོཝིཉྙཱཎཔབནྡྷསྶ པཙྩཡབྷཱུཏཾ ཧོཏི. པཉྩདྭཱརཱཝཛྫནཾ པན པརཏོ དྭཱརནྟརེ པཝཏྟམཱནཾ ཏསྶེཝ མནོཝིཉྙཱཎཔབནྡྷསྶ པཙྩཡུཔྤནྣབྷཱུཏཾ ཧོཏཱིཏིཀཏྭཱ ཨཱདིམྷི པཙྩཡབྷཱུཏསྶ ཙེཝ ཨནྟེ དྭཱརནྟརེ པཙྩཡུཔྤནྣབྷཱུཏསྶ ཙ མནསྶ སམྦནྡྷིཝིཉྙཱཎནྟི ཨཏྠོ. ཨཐཝཱ, པཉྩཝིཉྙཱཎཝཛྫིཏཱནི སབྦཱནི ཝིཉྙཱཎཱནི མནནཀིཙྩཏྟཱ མནོནཱམ. ཨཱརམྨཎེ པན ཨབྷིནིཔཱཏ མཏྟཱནི པཉྩཝིཉྙཱཎཱནི མནནཀིཙྩཱནི ནཧོནྟཱིཏི དསྶནཱདཱིནི ཨེཝ ནཱམ. པཉྩདྭཱརཱཝཛྫནཉྩ མནཏོ ཛཱཏཾཔི མནསྶ པཙྩཡོ ནཧོཏི. དསྶནཱདཱིནཾ ཨེཝ པཙྩཡོ. སམྤཊིཙྪནདྭཡཉྩ མནསྶ པཙྩཡོ ཧོནྟཾཔི མནཏོ ཛཱཏཾ ནཧོཏི. དསྶནཱདིཏོ ཨེཝ ཛཱཏཾ. སནྟཱིརཎཱདཱིནི པན ཨཏྟནོ པུརེ པཙྪཱཔཝཏྟཱནཾ དྭིནྣཾ དྭིནྣཾ མནཱནཾ ཨེཝ མཛ྄ཛྷེ ཛཱཏཱནཱིཏི ཨཏྟནོ པཙྩཡ པཙྩཡུཔྤནྣབྷཱུཏསྶ མནསྶ སམྦནྡྷིཝིཉྙཱཎནྟི ཨཏྠོ. ཨེཝཉྩ སཏི པཉྩཝིཉྙཱཎཾཔི དྭིནྣཾ མནོདྷཱཏཱུནཾ ཨནྟརེ པཝཏྟཏྟཱ མནསོ པཙྩཡ པཙྩཡུཔྤནྣབྷཱུཏསྶ སམྦནྡྷིཝིཉྙཱཎཾ མནོཝིཉྙཱཎནྟི ཝཏྟབྦམེཝ སིཡཱཏི.

[༡༡༢] ཊཱིཀཱཡཾ པན

མནཏོ ཛཱཏཾ ཝིཉྙཱཎནྟིཔི ཝུཏྟཾ. ཏཾཔི ཝུཏྟནཡེན ནཡུཛྫཏིཡེཝ.

ཨཝསེསཱ པན མནོཝིཉྙཱཎདྷཱཏུསངྑཱཏཱཙ སནྟཱིརཎ.ལ. པནྣརསརཱུཔཱཝཙརཝསེན ཏིཾསདྷམྨཱ ཧདཡཾ ནིསྶཱཡེཝ པཝཏྟནྟཱིཏི ཡོཛནཱ. ཙསདྡོ པནེཏྠ ཨཝསེསཱནཾ ཚསཏྟཏི དྷམྨཱནཾ མནོཝིཉྙཱཎདྷཱཏུབྷཱཝཾ སམྦྷཱཝེཏི.

[༡༡༣] ཝིབྷཱཝནིཡཾ པན

སམྤིཎྜནཏྠཾ གཧེཏྭཱ ‘‘ན ཀེཝལཾ མནོདྷཱཏུཡེཝཱ’’ཏི ཝུཏྟཾ. ཏཾ ན ཡུཛྫཏི.

ཨེཝཉྷི སཏི ཨཝསེསཱཙ མནོཝིཉྙཱཎདྷཱཏུསངྑཱཏཱཏི ཝུཏྟཾ སིཡཱཏི.

[༡༡༤] ཡཱཙ ཊཱིཀཱསུ

སནྟཱིརཎ.ལ. རཱུཔཱཝཙརཝསེན པཝཏྟཱ, ཨཝསེསཱ མནོཝིཉྙཱཎ དྷཱཏུསངྑཱཏཱཙ ཏིཾས དྷམྨཱཏི ཡོཛནཱ. སཱཔི ན སུནྡརཱ.

ཨཏྠགཏིཡཱ ཨཝིསདཏྟཱཏི. ཏཏྠ ཀསྨཱ ཏེ ནིསྶཱཡེཝ པཝཏྟནྟཱིཏི. ཨཱརུཔྤེསུ ཨནུཔྤཛྫནཏོ, ཀསྨཱཙ ཏཏྠ ནུཔྤཛྫནྟཱིཏི ཝུཙྩཏེ. སནྟཱིརཎམཧཱཝིཔཱཀཱནི ཏཱཝ ཏཏྠ ནུཔྤཛྫནྟི པཉྩནྣཾ དྭཱརཱནཾ ཨཏྟནོ ཀིཙྩཱནཉྩ ཏཏྠ ཨབྷཱཝཏོ. པཊིགྷཙིཏྟདྭཡཾཔི ནུཔྤཛྫཏི. ཨནཱིཝརཎཱཝཏྠསྶ པཊིགྷསྶ ཨབྷཱཝཏོ. ཨེཀནྟ ནཱིཝརཎཱནཉྩ ཛྷཱནབྷཱུམཱིསུ ཨསམྦྷཝཏོ. ཨེཏྠ པན ཡདི ཨནཱིཝརཎཱཝཏྠོ པཊིགྷོ ནཏྠི. པཱལི༹ཡཾ དུཏཱིཡཛ྄ཛྷཱནེཨེཝ དོམསྶིནྡྲིཡསྶ ཨཔརིསེསནིརོདྷཝཙནཾ ཨཊྛཀཐཱསུཙ དུཏཱིཡཛ྄ཛྷཱནཱུཔཙཱརེ ཏསྶ ཨུཔྤཏྟིསམྦྷཝཝཙནཾ ཝིརུདྡྷཾ སིཡཱ. ཏསྨཱ ཨཏྟནོ སཧཱཡཔཙྩཡ བྷཱུཏསྶ ཨོལཱ༹རིཀསྶ ཀཱམརཱགསྶ ཛྷཱནབྷཱུམཱིསུ ཨབྷཱཝཏོ པཊིགྷཙིཏྟདྭཡཾ ཏཏྠ ནུཔྤཛྫཏཱིཏི ཡུཏྟནྟིཔི ཝདནྟི. ཊཱིཀཱཀཱརཱཔན དུཏཱིཡཛ྄ཛྷཱནཱུཔཙཱརེ ཏསྶ ཨུཔྤཏྟིསམྦྷཝ ཝཙནཾ པརིཀཔྤཝཙནམཏྟནྟི ཀཏྭཱ ¶ པུརིམཀཱརཎམེཝ ཨིཙྪནྟི. ཡདི པནེཏཾ པརིཀཔྤཝཙནམཏྟཾ སིཡཱ པཱལི༹ཝཙནཾཔི པརིཀཔྤཝཙནམཏྟམེཝ སིཡཱ. ཏསྨཱ པཙྪིམཀཱ རཎམེཝ ཡུཏྟརཱུཔནྟི ཨམྷཱཀཾ ཁནྟི. ཧསནཙིཏྟཾཔི ནུཔྤཛྫཏི ཨརཱུཔཱིནཾ ཧསནཀིཙྩསྶ ཨབྷཱཝཏོ. ཀཱཡཱབྷཱཝཏོཏིཔི ཡུཛྫཏི. སོཏཱཔཏྟིམགྒཙིཏྟཾཔི ནུཔྤཛྫཏི. པརཏོགྷོསཱབྷཱཝེན ཏཏྠུཔྤནྣསྶ པུཐུཛྫནསྶ དྷམྨཱབྷིསམཡཱབྷཱཝཏོ བུདྡྷཔཙྩེཀབུདྡྷཱནཉྩ ཏཏྠ ཨནུཔྤཛྫནཏོ. ཏེནེཝ ཧི ཏཏྠུཔྤནྣོ པུཐུཛྫནོ ཨཊྛསུ ཨཀྑཎཡུཏྟེསུ ཝུཏྟོཏི. རཱུཔཱཝཙརཙིཏྟཱནིཔི ཏཏྠ ནུཔྤཛྫནྟི རཱུཔཝིརཱགབྷཱཝནཱཡ རཱུཔནིམིཏྟཱརམྨཎཱནཾ ཏེསཾ སམཏིཀྐནྟཏྟཱཏི.

ཨཝསེསཱ མནོཝིཉྙཱཎདྷཱཏུསངྑཱཏཱ ཀུསལཱཀུསལཀྲིཡཱནུཏྟརཝསེན དྭེ ཙཏྟཱལཱིསདྷམྨཱ ཧདཡཾ ནིསྶཱཡཝཱ ཨནིསྶཱཡཝཱ པཝཏྟནྟཱིཏི ཡོཛནཱ. ནིསྶཱཡཝཱ པཉྩཝོཀཱརེ ཨནིསྶཱཡཝཱ ཙཏུཝོཀཱརེཏི ཨདྷིཔྤཱཡོ. ཀུསལཱནིཙ ཨཀུསལཱནིཙ ཀྲིཡཱནིཙ ཨནུཏྟརཱནིཙཱཏི ཝིགྒཧོ. ཏཏྠ ཀུསལཱནཱིཏི པཉྩརཱུཔ ཀུསལཏོ ཨཝསེསཱནི དྭཱདསལོཀིཡཀུསལཱནི. ཨཀུསལཱནཱིཏི པཊིགྷདྭཡཏོ ཨཝསེསཱནི དསཨཀུསལཱནི. ཀྲིཡཱནཱིཏི པཉྩདྭཱརཱཝཛྫན ཧསན པཉྩརཱུཔཀྲིཏོ ཨཝསེསཱནི ཏེརསཀྲིཡཙིཏྟཱནི. ཨནུཏྟརཱནཱིཏི པཐམམགྒཏོ ཨཝསེསཱནི སཏྟཨནུཏྟརཙིཏྟཱནི. ཀཱམེ ཚཝཏྠུཾ ནིསྶིཏཱ སཏྟདྷཱཏུཡོ མཏཱ. རཱུཔེ ཏིཝཏྠུཾ ནིསྶིཏཱ ཙཏུབྦིདྷཱ དྷཱཏུཡོ མཏཱ. ཨཱརུཔྤེ ཀིཉྩིཝཏྠུཾ ཨནིསྶིཏཱ ཨེཀཱ དྷཱཏུ མཏཱཏི ཡོཛནཱ. ཏེཙཏྟཱལཱིསཱཏི པཉྩཝིཉྙཱཎ མནོདྷཱཏུཏྟིཀེཧི སདྡྷིཾ སནྟཱིརཎཱདིཀེ ཏིཾསདྷམྨེ སནྡྷཱཡ ཝུཏྟནྟི.

ཨིཏི པརམཏྠདཱིཔནིཡཱནཱམ ཨབྷིདྷམྨཏྠསངྒཧསྶ

ཙཏུཏྠཝཎྞནཱཡ པཀིཎྞཀསངྒཧསྶ

པརམཏྠདཱིཔནཱ ནིཊྛིཏཱ.

ཝཱིཐི སངྒཧ པརམཏྠདཱིཔནཱི

༡༣༦. ཨེཝཾ ¶ ཙིཏྟཔྤབྷེད སངྒཧོ, ཙེཏསིཀཔྤབྷེད སངྒཧོ, ཨུབྷཡཔྤབྷེད སངྒཧོཏི ཙིཏྟཙེཏསིཀཱནཾ ཀཡོཔབྷེད སངྒཧེ དསྶེཏྭཱ ཨིདཱནི ཝཱིཐིཙིཏྟཔྤཝཏྟིསངྒཧོ ཝཱིཐིམུཏྟ ཙིཏྟཔྤཝཏྟིསངྒཧོཏི ཏེ སཉྙེཝ དྭེ པཝཏྟིསངྒཧེ དསྶེཏུཾ ཙིཏྟུཔྤཱདཱནམིཙྩེཝནྟིཨཱདིམཱཧ. ཏཏྠ ཨུཔྤཛྫནྟཱིཏི ཨུཔྤཱདཱ. ཏཏྠ ཨུཔྤཛྫནྟི. ཨཉྙསྶ ཨསུ ཏཏྟཱཙིཏྟེ ཨིཙྩེཝ ལབྦྷཏི. ཨིཏི ཙིཏྟཉྩ ཙིཏྟེཨུཔྤཱདཱཙཱཏི ཙིཏྟུཔྤཱདཱ. ཙིཏྟཙེཏསིཀཱཏི ཝུཏྟཾ ཧོཏི. ཏེསཾ ཙིཏྟུཔྤཱདཱནཾ. ཨིཙྩེཝནྟིཨཱདིཏོ པཊྛཱཡ ཝུཏྟཔྤཀཱརེན. སངྒཧམུཏྟརནྟི ཛཱཏིནིདྡེསོ ཡཾ. ཨུཏྟརེ ཨུཏྟམེ ཏཡོ པབྷེདསངྒཧེ ཀཏྭཱཏི སམྦནྡྷོ. བྷཱུམིཔུགྒལབྷེདེནཱཏི སཧཏྠེ ཀརཎཝཙནཾ. ཀཱམཱཝཙརཱདིབྷཱུམིབྷེདེན དུཧེཏུཀཱདི པུགྒལབྷེདེན སདྡྷིནྟི ཨཏྠོ. པུབྦཱཔརནིཡཱམིཏནྟི ཨཱཝཛྫནཱདི ཙཀྑུཝིཉྙཱཎཱདི པུབྦ ཙིཏྟཱཔརཙིཏྟཱནུཀྐམེན ནིཡཱམིཏཾ ཝཝཏྠིཏཾ. པཝཏྟིསངྒཧཾནཱམཱཏིཔི ཛཱཏིནིདྡེསོཡེཝ. ཨེཝཾ ནཱམཀེ དྭེ པཝཏྟིསངྒཧེཏི ཨཏྠོ. པཊིསནྡྷིཔཝཏྟིཡནྟི པཊིསནྡྷིཔཝཏྟཱིསུ. ཝཙནཝིཔལླཱསོ ཧེས. པཊིསནྡྷིཀཱལེཔཝཏྟིཀཱལེཙཱཏི ཨཏྠོ. པཊིསནྡྷིཀཱལེ པཝཏྟིསངྒཧཉྩ པཝཏྟིཀཱལེ པཝཏྟིསངྒཧཉྩཱཏི དྭེ སངྒཧེཔཝཏྟི པཝཀྑཱམཱིཏི ཝུཏྟཾ ཧོཏི. ཨཡཉྩ ཨཏྠོ ཨུཔརིསངྒཧེ ཨཱརབྦྷ གཱཐཱཡ པཱཀཊོ. ཀེཙི པན ནིདྡྷཱརཎེ བྷུམྨནྟི ཝདནྟི. ཨེཝཾསཏི ཨུཔརི སངྒཧོ པཊིསནྡྷིསངྒཧོནཱམ སིཡཱ. ན པཝཏྟི སངྒཧོ ནཱམ. ཨེཝཉྩ སཏི ཨུཔརི ཝཱིཐིམུཏྟསངྒཧེ ཨཱརབྦྷ གཱཐཱཡཾ སནྡྷིཡཾ པཝཏྟིསངྒཧོནཱམ ཨིདཱནི ཝུཙྩཏཱིཏི ཨིམིནཱ ན སམེཏི.

[༡༡༥] ཊཱིཀཱསུ པན

‘‘ཨུཏྟརཾ ཝེདནཱསངྒཧཱདིཝིབྷཱགཏོ ཨུཏྟམ’’ནྟི ཝུཏྟཾ. ཏཾ ཝིཙཱརེཏབྦཾ.

ཨེཝཉྷི ¶ སཏི པཀིཎྞཀསངྒཧོཝ ཨིདྷ སངྒཧསདྡེན གཧིཏོ སིཡཱཏི. ཡསྨཱཔན ཏིཎྞཾ དྭིནྣཉྩ པབྷེདསངྒཧཱནཾ མཛ྄ཛྷེ ཋཏྭཱ ཨཡཾ ཨནུསནྡྷིགཱཐཱ པཝཏྟཱ. ཏསྨཱ པུབྦེ ཏཡོཔི པབྷེདསངྒཧཱ ཨིདྷ སངྒཧསདྡེན གཧེཏུཾ ཡུཏྟཱཏི དཊྛབྦཱ. ཨཡཾ པན པཝཏྟིསངྒཧོ ཝཏྠུདྭཱརཱལམྦཎེཧི སདྡྷིཾ ཡོཛེཏྭཱ ཝུཏྟོ སུཝུཏྟོཏི ཏཱནི ཏཱིཎི ཚཀྐཱནིཔི པུན ཨིདྷ ནིཀྑིཏྟཱནི.

[༡༡༦] ཝིབྷཱཝནིཡཾ པན

‘‘ཝཏྠུདྭཱརཱལམྦཎ སངྒཧཱ ཧེཊྛཱ ཀཐིཏཱཔི པརིཔུཎྞཾ ཀཏྭཱ པཝཏྟིསངྒཧཾ དསྶེཏུཾ པུན ནིཀྑིཏྟཱ’’ཏི ཝུཏྟཾ. ཏཾ ན སུནྡརཾ.

ན ཧི སཀལཱ ཝཏྠུདྭཱརཱལམྦཎསངྒཧཱ ཨིདྷ ནིཀྑིཏྟཱཏི. ཝིསཡཱནཾ དྭཱརེསུ པཝཏྟི ཝིསཡཔཝཏྟི. ཨེཏྠཙ པཝཏྟཱིཏི ཨཱཔཱཏཱགམནམེཝ ཝུཙྩཏི. ཝཀྑཏི ཧི ཨེཀཙིཏྟཀྑཎཱ ཏཱིཏཱནིཝཱཏིཨཱདིཾ. སཱ པན ཀཱཙི སཱིགྷཏམཱ, ཀཱཙི སཱིགྷཏརཱ, སཱིགྷཱ, དནྡྷཱ, དནྡྷཏརཱ, དནྡྷཏམཱཏི ཚདྷཱ ཧོཏཱིཏི. ཀམྨཱདཱིནཾ ཝིསཡཱནཾ དྭཱརེསུ པཝཏྟི པཙྩུཔཊྛཱནཾ ཨཱཔཱཏཱགམནཾ ཝིསཡཔྤཝཏྟི. ཝཀྑཏི ཧི ཀམྨཾཝཱ ཀམྨནིམིཏྟཾཝཱ གཏིནིམིཏྟཾཝཱ ཀམྨབལེན ཚནྣཾ དྭཱརཱནཾ ཨཉྙཏརསྨིཾ པཙྩུཔཊྛཱཏཱིཏི.

[༡༡༧] ཝིབྷཱཝནིཡཾ པན

‘‘ཝིསཡེསུཙ ཙིཏྟཱནཾ པཝཏྟི ཝིསཡཔྤཝཏྟཱི’’ཏིཔི ཝུཏྟཾ. ཏཾ ན སུནྡརཾ.

ཨེཝཉྷི སཏི ཨཏིཔརིཏྟཱརམྨཎེ ཝིསཡཔྤཝཏྟིནཱམ ཨནུཔཔནྣཱ ཨཱཔཛྫཏཱིཏི. ཏཏྠཱཏི ཏེསུ ཚཀྐེསུ. དྷཱཏུབྷེདཾ པཏྭཱདྷཱཏུནཱནཏྟཾ པམཱཎནྟི མནནཾ ཝིཛཱནནཏོ ཝིསུཾ ཀཏྭཱ མནོདྷཱཏུ ཝིསུཾ ཝུཏྟཱ. ཝིཉྙཱཎབྷེདཾ པཏྭཱ པན ཡཾཀིཉྩི མནནཾ ཝིཛཱནནེ ཨནྟོ གདྷམེཝཱཏི ཝུཏྟཾ ཙཀྑུཝིཉྙཱཎཾ.ལ. ཚཝིཉྙཱཎཱནཱིཏི ཚཝཱིཐིཡོ པན དྭཱརཔྤཝཏྟཱ ཙིཏྟཔཝཏྟིཡོ ཡོཛེཏབྦཱཏི སམྦནྡྷོ. ཙཀྑུདྭཱརེ པཝཏྟཱ ཝཱིཐི ཙཀྑུདྭཱརཝཱིཐི. ཙཀྑུདྭཱརཝིཀཱརཾ པཊིཙྩ པཝཏྟོ ¶ ཙིཏྟཔྤབནྡྷོཏི ཨཏྠོ. ཨེཝཾ སེསེསུ. ཨསཱདྷཱརཎེན ཙཀྑུཝིཉྙཱཎེན ཨུཔལཀྑིཏཱ ཝཱིཐི ཙཀྑུཝིཉྙཱཎཝཱིཐི. སུདྡྷོ པན མནོཝིཉྙཱཎཔབནྡྷོ མནོཝིཉྙཱཎཝཱིཐི.

ཝིབྷཱཝནིཡཾ པན

‘‘ཙཀྑུཝིཉྙཱཎསམྦནྡྷིནཱི ཝཱིཐི ཏེན སཧ ཨེཀཱརམྨཎ ཨེཀ དྭཱརིཀཏཱཡ སཧ ཙརཎབྷཱཝཏོ ཙཀྑུཝིཉྙཱཎ ཝཱིཐཱི’’ཏི ཝུཏྟཾ.

དྭཱརཔྤཝཏྟཱཏི དྭཱརེ ཨུཔྤནྣཱ. ཏཾ ཏཾ དྭཱརཝིཀཱརཾ པཊིཙྩ ཨུཔྤནྣཱཏི ཨཏྠོ. ཙིཏྟཔྤཝཏྟིཡོཏི ཙིཏྟཔབནྡྷཱ. ཨཏིམཧནྟནྟི སཱམི ཨཏྠེ པཙྩཏྟཝཙནཾ. ཨཏིམཧནྟསྶ པཉྩཱལམྦཎསྶ པཝཏྟི.ལ. ཨཏིཔརིཏྟསྶ པཉྩཱལམྦཎསྶ པཝཏྟིཙཱཏི པཉྩདྭཱརེ ཙཏུདྷཱ. མནོདྭཱརེ པན ཝིབྷཱུཏསྶ ཚལཱ༹རམྨཎསྶ པཝཏྟི ཨཝིབྷཱུཏསྶ ཚལཱ༹རམྨཎསྶ པཝཏྟིཙཱཏི དྭིདྷཱཏི ཚདྷཱཝིསཡཔྤཝཏྟི ཝེདིཏབྦཱཏི ཡོཛནཱ. ཨཏིམཧནྟཱདིབྷཱཝོ ཙེཏྠ ཨཱལོཀཱདི པཙྩཡ ཝསེནཝཱ ཝཏྠུ ཨཏིམཧནྟཱདིཝསེནཝཱ ཝེདིཏབྦོ. ཏཏྠ སཎྷསུཁུམཾཔི དཱུརཾཔི རཱུཔཱདཱིནཾ ཨདྷིཊྛཱནཝཏྠུནཱམ ཨཱལོཀཱདི པཙྩཡ སམྤཏྟིཡཱ སཏི ཨཏིམཧནྟམེཝ. ཏཐཱ ཧི བུདྡྷསྶ བྷགཝཏོ པཐམཱཏི ནཱིཧཱརཀཱལཱདཱིསུ ལོཀ ཝིཝརཎ པཱཊིཧཱརིཡཔཝཏྟི ཀཱལེ ཨཝཱིཙིནིརཡེཔི ཨཀནིཊྛེཔི པརཙཀྐཝཱལེ༹སུཔི སཎྷསུཁུམཱནིཙ དཱུརཱནིཙ རཱུཔཱནི ཨིདྷ ཋིཏཱཝ པསྶནྟི. ཏདཱ ཧི ཨུལཱ༹རོ ཨོབྷཱསོ པཱཏུརཧོསི. ཏསྶ ཝསེན སབྦེཔི པཐཝིསིནེརུ ཙཀྐཝཱལ༹ སིལུཙྩཡཱདཡོ ཛཱཏིཕལིཀཀྑནྡྷཱ ཝིཡ སམྤཛྫནྟི. མཧནྟོ ཨུལཱ༹རོ ཨོབྷཱསོ པཱཏུརཧོསི ཨཏིཀམྨདེཝཱནཾ དེཝཱནུབྷཱཝནྟི ཧི ཝུཏྟཾ. ཨུཔཔཏྟིདེཝབྲཧྨཱདཱིནཾ པན པསཱདནིསྶཡབྷཱུཏཱནཾ ཨོབྷཱསཛཱཏཏཱཡཔི པཐཝིཔབྦཏཱདཡོ ཙཀྑུརཱུཔཱདཱིནཾ ཨནྟརཾ ཀཱཏུཾ ནསཀྐོནྟཱིཏི. ཏཐཱ དཱུརེཔི པབྦཏཱདིརཱུཔཱནི ཝཏྠུ ཨཏིམཧནྟཏཱཡ ཙནྡསཱུརིཡ ཏཱརཀཱདི རཱུཔཱནི ཝིསཡ ཝཏྠུ མཧནྟཏཱཡ ཨོབྷཱས ཛཱཏཏཱཡ ཙ ཨཏི མཧནྟཱནི ནཱམ ཧོནྟཱིཏི. ཨཱལོཀཱདིཔཙྩཡཱནཾ པན ཨདྷིཊྛཱནཝཏྠཱུནཉྩ དུབྦལ དུབྦལཏར ¶ དུབྦལཏམཱནུཀྐམེན མཧནྟཱདིབྷཱཝོ ཝཏྟབྦོཏི. ཡཱནི པན པཉྩཱལམྦཎཱནི ཨེཀཙིཏྟཀྑཎཾ ཨཏིཀྐམྨ ཨཱཔཱཏཾ ཨཱགཙྪནྟི, ཏཱནི ཨཏིམཧནྟཱརམྨཎཱནིནཱམ. ཡཱནི དྭཏྟིཙིཏྟཀྑཎཱནི ཨཏིཀྐམྨ, ཏཱནི མཧནྟཱརམྨཎཱནི. ཡཱནི ཙཏུ པཉྩ ཚ སཏྟ ཨཊྛ ནཝ ཙིཏྟཀྑཎཱནི ཨཏིཀྐམྨ, ཏཱནི པརིཏྟཱརམྨཎཱནི. ཡཱནིཔན དསེཀཱདསདྭཱདས ཏེརས ཙུདྡས པནྣརས ཙིཏྟཀྑཎཱནི ཨཏིཀྐམྨ ཨཱཔཱཏཾ ཨཱགཙྪནྟི. ཏཱནི ཨཏིཔརིཏྟཱ རམྨཎཱནཱིཏི. པཀྑཏིཙ ཨེཀཙིཏྟཀྑཎཱཏཱིཏཱནིཝཱཏིཨཱདི. ཝིབྷཱུཏསྶཱཏི པཱཀཊསྶ, ཨཝིབྷཱུཏསྶཱཏི ཨཔཱཀཊསྶ. ཨེཝཾ ཚཚཀྐཱནི སརཱུཔཏོ ནིདྡིསིཏྭཱ ཨིདཱནི ཏཱནི སབྦཱནི ཨེཀཏོ ཡོཛེཏྭཱ ཝཱིཐིཙིཏྟཔྤཝཏྟིཾ ཝིཏྠཱརེནྟོ ཀཐནྟི པུཙྪིཏྭཱ རཱུཔཱརཱུཔཱནཾ ཏཱཝ ཨདྡྷཱནཔརིཙྪེདཾ དསྶེཏུཾ ཨུཔྤཱདཊྛིཏཱིཏིཨཱདི མཱཧ. ཏཏྠ ཀཐནྟི ཀེན པཀཱརེན ཝཱིཐིཙིཏྟཔྤཝཏྟི ཧོཏཱིཏི ཨཏྠོ.

[༡༡༨] ཝིབྷཱཝནིཡཾ པན

‘‘ཀཐནྟི ཀེན པཀཱརེན ཨཏིམཧནྟཱདིཝསེན ཝིསཡ ཝཝཏྠཱནཾ ཧོཏཱིཏི པུཙྪིཏྭཱ ཙིཏྟཀྑཎཝསེན ཏཾ པཀཱསེཏུཾ ཨུཔྤཱདཊྛིཏཱིཏིཨཱདི ཨཱརདྡྷ’’ནྟི ཝུཏྟཾ. ཏཾ ཡུཏྟཾ ཝིཡ ན དིསྶཏི.

ཨེཝཉྷི སཏིཨཱདིཏོ པཉྩནྣཾ ཚཀྐཱནཾ ཨོཀཱསོནཱམ ནསིཡཱ. ནཙ ཨུཔྤཱདཊྛིཏི.ལ. རཱུཔདྷམྨཱནམཱཡཱུཏི ཨིདཾ ཝིསཡ ཝཝཏྠཱནཏྠམེཝ ཝུཏྟནྟི སཀྐཱ ཝིཉྙཱཏུནྟི. ཨུཔྤཛྫནཾ ཨུཔྤཱདོ. སབྷཱཝ པཊིལཱབྷོཏི ཨཏྠོ. ཋཱནཾ ཋིཏི. ཡཐཱལདྡྷསབྷཱཝསྶ ཨནིཝཏྟཱིཏི ཨཏྠོ. བྷཉྫནཾ བྷངྒོ. ཏསྶ པརིཧཱཡིཏྭཱ ཨནྟརདྷཱནནྟི ཨཏྠོ. ཨེཀཙིཏྟཀྑཎཾནཱམཱཏི ཨེཀསྶ ཙིཏྟསྶ ཁཎོནཱམ. སོ པན ཁཎོ ཨཙྪརཱསངྒྷཱཊཀྑཎསྶ ཨཀྑིནིམྨིལནཀྑཎསྶཙ ཨནེཀཀོཊི སཏསཧསྶབྷཱགོ དཊྛབྦོ. ཨཙྪརཱསངྒྷཱཊཀྑཎེ ཨནེཀཀོཊིསཏསཧསྶསངྑཱ ཝེདནཱ ཨུཔྤཛྫནྟཱིཏི ཧི ཨཊྛཀཐཱཡཾ ཝུཏྟཾ. ཨཱཙརིཡཱནནྡཏྠེརམཏེན པནེཏྠ ཨུཔྤཱདབྷངྒ ཝསེནཁཎདྭཡཾ ཨེཀཙིཏྟཀྑཎཾནཱམཱཏི ཝཏྟབྦཾ. ཡཐཱ ཧི ལོཀེ ¶ ཝིཛྫུནཱམ ཝདྡྷནཱནནྟརམེཝ བྷིཛྫཏི. ན པནསྶཱ ཝདྡྷནསྶ བྷིཛྫནསྶཙ ཨནྟརཱ ཋིཏིནཱམ ཝིསུཾ པཉྙཱཡཏི. ཡཐཱ ཙ ཨུདྡྷཾ ཨུཛུཾ ཁིཏྟཾ ལེཌྜུ ཨུཔྤཏིཏྭཱ པཏཏི. ན པན ཨུཔྤཏནསྶ པཏནསྶ ཙ ཨནྟརཱ ཋིཏིནཱམ ཝིསུཾ དིསྶཏི. ཏཐཱ ཙིཏྟཾཔི. ཏཾཔི ཧི ཨུདཡ བྷཱགཱནནྟརམེཝ ཝཡབྷཱགེ པཏཏི. ན པནསྶ རཱུཔདྷམྨཱནཾ ཝིཡ ཏེསཾ དྭིནྣཾ བྷཱགཱནཾ མཛ྄ཛྷེ ཝིསུཾ ཨེཀོ གཎནཱུཔགོ ཋིཏིབྷཱགོནཱམ ཨུཔལབྦྷཏི. ཨེཝཉྩ ཀཏྭཱ ཡམཀེསུ ཙིཏྟསྶ ཨུཔྤཱདབྷངྒཱཝ ཏཏྠ ཏཏྠ ཝུཏྟཱ. ཝིསེསཏོ པན ཙིཏྟཡམཀེ ཨུཔྤནྣཾ ཨུཔྤཛྫམཱནནྟི. བྷངྒཀྑཎེ ཨུཔྤནྣཾ. ནོ ཙ ཨུཔྤཛྫམཱནཾ. ཨུཔྤཱདཀྑཎེ ཨུཔྤནྣཉྩེཝ ཨུཔྤཛྫམཱནཉྩཱཏིཨཱདིནཱ བྷངྒུཔྤཱདཱཝ ཙིཏྟསྶ ཝུཏྟཱ. ཀཐཱཝཏྠུམྷིཙ ཨེཀཾ ཙིཏྟཾ དིཝསཾ ཏིཊྛཏཱིཏི ཨཱམནྟཱ. ཨུཔདྡྷདིཝསོ ཨུཔྤཱདཀྑཎོ. ཨུཔདྡྷདིཝསོ ཝཡཀྑཎོཏི. ན ཧེཝཾ ཝཏྟབྦེ. ཨེཀཾ ཙིཏྟཾ དྭེ དིཝསེ ཏིཊྛཏཱིཏི ཨཱམནྟཱ. ཨེཀོ དིཝསོ ཨུཔྤཱདཀྑཎོ. ཨེཀོ དིཝསོ ཝཡཀྑཎོཏི ནཧེཝཾ ཝཏྟབྦེ. ཨེཀཾ ཙིཏྟཾ ཙཏྟཱརོ དིཝསེ ཏིཊྛཏཱིཏི ཨཱམནྟཱ. དྭེ དིཝསཱ ཨུཔྤཱདཀྑཎོ. དྭེ དིཝསཱ ཝཡཀྑཎོཏི ན ཧེཝཾ ཝཏྟབྦེ.ལ. མཱསཾ. དྭེ མཱསེ. ཙཏྟཱརོམཱསེ.ལ. སཾཝཙྪརཾ, དྭེ སཾཝཙྪརཱནི. ཙཏྟཱརི སཾཝཙྪརཱནི.ལ. ཀཔྤཾ. དྭེ ཀཔྤེ. ཙཏྟཱརོ ཀཔྤེཏིཨཱདིནཱ དྭེ ཨུཔྤཱདཝཡབྷཱགཱཝ ཙིཏྟསྶ ཝུཏྟཱ. ན ཋིཏིབྷཱགོ. ཡདི སོ ཝིསུཾ ཨུཔལབྦྷེཡྻ. ཨེཀཾ ཙིཏྟཾ དིཝསཾ ཏིཊྛཏཱིཏི ཨཱམནྟཱ. དིཝསསྶ པཐམོ བྷཱགོ ཨུཔྤཱདཀྑཎོ. དུཏཱིཡོ ཋིཏིཀྑཎོ. ཏཏཱིཡོ ཝཡཀྑཎོཏི ཨེཝཾ མཧཱཐེརེན ཝིཙཱརིཏོ སིཡཱ. ཏཡོ དིཝསེ ཏཡོ མཱསེ ཏཱིཎི སཾཝཙྪརཱནི ཏཡོ ཀཔྤེཏི ཨིམཱནིཔི ཨཝཛྫེ ཏབྦཱནིཨེཝ སིཡུནྟི. ཨེཏྠ སིཡཱ, ནནུ སུཏྟནྟེསུ ཏཱིཎི མཱནི བྷིཀྑཝེ སངྑཏསྶ སངྑཏ ལཀྑཎཱནི. ཀཏམཱནིཏཱིཎི, ཨུཔྤཱདོ པཉྙཱཡཏི. ཝཡོ པཉྙཱཡཏི. ཋིཏསྶ ཨཉྙཐཏྟཾ པཉྙཱཡཏཱིཏི ཝུཏྟཾ. ཏཐཱ ཝེདནཱཡ ཨུཔྤཱདོ པཉྙཱཡཏི. ཝཡོ པཉྙཱཡཏི. ཋིཏཱཡ ཨཉྙཐཏྟཾ པཉྙཱཡཏི. སཉྙཱཡ. སངྑཱརཱནཾ. ཝིཉྙཱཎསྶ ཨུཔྤཱདོ.ལ. པཉྙཱཡཏཱིཏི ཝུཏྟཾ. ཏསྨཱ ཙིཏྟསྶ ཏཏཱིཡོ ཋིཏིབྷཱགོ ཝིསུཾ ཨུཔལབྦྷཏི ཡེཝཱཏི.ན. པབནྡྷཋིཏིཡཱ ཨེཝ ཏཏྠ ¶ ཝུཏྟཏྟཱཏི. ཀཐཾ ཝིཉྙཱཡཏཱིཏི ཙེ, ཨུཔྤཱདཝཡེ པཐམཾ ཝཏྭཱ པཙྪཱ པུན ཝིསུཾ ཋིཏསྶ ཨཉྙཐཏྠཾ པཉྙཱཡཏཱིཏི ཨིམསྶ ཝུཏྟཏྟཱཏི. ཨིཏརཐཱ ཨུཔྤཱདོ པཉྙཱཡཏི. ཋིཏསྶ ཨཉྙཐཏྟཾ པཉྙཱཡཏི. ཝཡོ པཉྙཱཡཏཱིཏི ཝུཏྟཾ སིཡཱཏི. ནནུ པབནྡྷཋིཏི ནཱམ པཉྙཏྟི ཧོཏི. སཱཙ ཨསངྑཏཱ, སུཏྟནྟཱནིཙ སངྑཏ ལཀྑཎ ཝིསཡཱནི. ཏསྨཱ སཱ པབནྡྷཊྛིཏི ཏཏྠ ཝུཏྟཱཏི ནསཀྐཱ ཝིཉྙཱཏུནྟི ཙེ. ན ན སཀྐཱ. ཨབྷིདྷམྨེཔི སངྑཏདྷམྨནིདྡེསེསུ སམཱུཧ སཎྛཱན སནྟཏི པཉྙཏྟཱིཧིཔི ནིདྡེསསྶ དིཊྛཏྟཱ. ཏཐཱ ཧི རཱུཔཱཡཏནནིདྡེསཱདཱིསུ དཱིགྷཾ རསྶཾ སཎྷཾ ཐུལཾ ཝཊྚཾ པརིམཎྜལཾ ཙཏུརསྶཾ ཚལ༹ཾསཾ ཨཊྛཾསཾ སོལ༹སཾསཾ ནིནྣཾ ཐལནྟིཨཱདིནཱ, ཝིབྷངྒེ ཙ ཀེསཱ ལོམཱ ནཁཱ དནྟཱཏིཨཱདིནཱ པཉྙཏྟིསིསེན སངྑཏདྷམྨཱ ནིདྡིཊྛཱཏི. སུཏྟནྟེསུ ཝཏྟབྦམེཝ ནཏྠི. ཨཱིདིསེསུ ཧི ཋཱནེསུ པཉྙཏྟིཝསེན པཝཏྟཱཔི དེསནཱ སངྑཏདྷམྨམེཝ ཨཱཧཙྩ ཏིཊྛཏི. ཏསྨཱ ཡཐཱ ཨུཔྤཱདབྷངྒཱནཾ པཙྩེཀཾ ཨེཀེཀོ ཁཎོ ཙིཏྟསྶ ལབྦྷཏི. ན ཏཐཱ ཋིཏིཡཱཏི. ཨཡཾ ཨཱཙརིཡཱནནྡཏྠེ རསྶ ཨདྷིཔྤཱཡོ. ཨཡཉྩ ཝཱདོ སཾཡུཏྟཊྛཀཐཱཡཾ ཨེཝ ཨཱགཏོ. སོཙ སངྒཧཀཱརེན པཊིཀྑིཏྟོ. ཝུཏྟཉྷི ཏཏྠ, ཨཔརེ པན ཝདནྟི. ཨརཱུཔདྷམྨཱནཾ ཛརཱཁཎོནཱམ ནསཀྐཱ པཉྙཔེཏུཾ. སམྨཱ སམྦུདྡྷོཙ ཝེདནཱཡ ཨུཔྤཱདོ པཉྙཱཡཏི. ཝཡོ པཉྙཱཡཏི. ཋིཏཱཡ ཨཉྙཐཏྠཾ པཉྙཱཡཏཱིཏི ཝདནྟོ ཨརཱུཔདྷམྨཱནཾཔི ཏཱིཎི ལཀྑཎཱནི པཉྙཔེཏི. བྷཱནིཨཏྠིཀྑཎཾ ཨུཔཱདཱཡ ལབྦྷནྟཱིཏི ཝཏྭཱ –

ཨཏྠིཏཱ སབྦདྷམྨཱནཾ, ཋིཏིནཱམ པཝུཙྩཏི;

ཏསྶེཝ བྷེདོ མརཎཾ; སབྦདཱ སབྦཔཱཎིནནྟི.

ཨིམཱཡ ཨཱཙརིཡགཱཐཱཡ ཏམཏྠཾ སཱདྷེནྟི. ཨཐཝཱ, སནྟཏིཝསེན ཋཱནཾ ཝེདིཏབྦནྟིཙ ཝདནྟི. ཨིམསྨིཾ པན སུཏྟེ ཨཡཾ ཝིསེསོ ནཏྠི. ཏསྨཱ ཨཱཙརིཡགཱཐཱཡ སུཏྟཾ ཨཔྤཊིབཱཧེཏྭཱ སུཏྟམེཝ པམཱཎཾ ཀཱཏབྦནྟི. ཏཏྠ ཛརཱཁཎོནཱམ ཨུཔྤཱདཀྑཎབྷངྒཀྑཎཱནཾ མཛ྄ཛྷེ ཝིསུཾ ཛརཱཡ ཁེཏྟབྷཱུཏོ ཋཱིཏིཀྑཎོ ཝུཙྩཏི. ཨཉྙཐཏྟནྟི ཛརཱཨེཝ. ཨཏྠིཀྑཎནྟི ཁཎདྭཡམེཝ. པཊིཀྑིཏྟོཔི པན ཨཡཾ ཝཱདོ ཀཐཱཝཏྠུ པཱལི༹ཡཱ སདྡྷིཾ སུཊྛུ སམེཏིཡེཝ. ¶ ཨཔིཙ, ཨུདྡྷཾ ཨུཔྤཏིཏསྶ ལེཊྚུསྶ ཨུཔྤཏནནིཝཏྟི ཝིཡ ཡཱ ཙིཏྟསྶ ཨུདཡསངྑཱཏསྶ ཝཌྜྷནསྶ ནིཝཏྟིནཱམ ཨཏྠི. ན ཧི ཨུདཡེ ཨནིཝཏྟནྟེ ཝཡོནཱམ སམྦྷཝཏིཏཱི. སཱ ཨེཝ ཨུདཡ པརིཡནྟམཏྟབྷཱུཏཱ ཨིདྷ ཋིཏིཔརིཡཱཡོཏི སཀྐཱ ཝཏྟུཾ. སོ པན ཝིསུཾ གཎནཱུཔགོ ཨེཀོ ཁཎོནཱམ ནཧོཏཱིཏི ཀཏྭཱ ཨབྷིདྷམྨེ དྭེཨེཝ ཁཎཱ ཙིཏྟསྶ ཝུཏྟཱ. ཨུདཡབྷཱགསྶ པན ཨཱདི ཀོཊིཾ ཝཡབྷཱགསྶཨནྟཀོཊིཉྩ ཐཔེཏྭཱ མཛ྄ཛྷེབྷཱགདྭཡནིསྶིཏཱ པརིཔཙྩན ལཀྑཎཱ ཛརཱནཱམ ཨརཱུཔདྷམྨཱནཾཔི ལབྦྷཏིཡེཝ. ཏཾ སནྡྷཱཡ དྷཱཏུཀཐཱཡཾ ཛརཱདྭཱིཧིཁནྡྷེཧིསངྒཧིཏཱཏིཝུཏྟནྟི དཊྛབྦཾ.

[༡༡༩] ཡཾ པན ཝིབྷཱཝནིཡཾ

‘‘ཨུཔྤཱདབྷངྒཱཝཏྠཱཧི བྷིནྣཱ བྷངྒཱབྷིམུཁཱཝཏྠཱཔི ཨིཙྪིཏབྦཱ. སཱ ཋིཏིནཱམཱ’’ཏི ཝུཏྟཾ. ཏཾ ཀཐཱཝཏྠུཔཱལི༹ཡཱ སཧ ན སམེཏི.

ཨུཔདྡྷདིཝསོ ཨུཔྤཱདཀྑཎོ. ཨུཔདྡྷདིཝསོ ཝཡཀྑཎོ. པཐམོ དིཝསོ ཨུཔྤཱདཀྑཎོ. དུཏཱིཡོ ཝཡཀྑཎོཏི ཧི ཝིཙཱརེནྟེན ཨུཔྤཱདབྷངྒཱཝཏྠཱ ཧི བྷིནྣཱ ཏཏཱིཡཱ ཨཝཏྠཱ ཏསྶཾ པཱལི༹ཡཾ པཊིཀྑིཏྟཱཡེཝ ཧོཏཱིཏི.

[༡༢༠] ཨེཏེན ཡཉྩ ཏཏྠ

‘‘པཱལི༹ཡཾ པན ཝེནེཡྻཛ྄ཛྷཱསཡཱ ནུརོམཏོ ནཡདསྶནཝསེན སཱ ན ཝུཏྟཱ. ཨཏིདྷམྨདེསནཱཔི ཧི ཀདཱཙི ཝེནེཡྻཛ྄ཛྷཱསཡཱནུརོདྷེན པཝཏྟཏི. ཡཐཱ, རཱུཔསྶ ཨུཔྤཱདོ ཨུཔཙཡོ སནྟཏཱིཏི དྭིདྷཱ བྷིནྡིཏྭཱ དེསིཏོ’’ཏི ཝུཏྟཾ. ཏཾཔི པཊིཀྑིཏྟཾ ཧོཏི. ཝིབྷཱགཱརཧསྶ ཧི དྷམྨསྶ ཝིབྷཱགཀརཎཾནཱམ ཝེནེཡྻཝསེནཱཏིཔི དྷམྨཝསེནཱཏིཔི ཡུཛྫཏི. ཝིཛྫམཱནེ སཏི ཝིསུཾ ཀཏྭཱ ཝཏྟབྦསྶ ཨབྷིདྷམྨེ ཨཝཙནཾ པན ཝེནེཡྻཝསེནཱཏི ན ཡུཏྟམེཏནྟི.

[༡༢༡] ཡམྤི ཏཏྠ

‘‘སུཏྟེཙ ཏཱིཎི མཱནི བྷིཀྑཝེ སངྑཏསྶ སངྑཏལཀྑཎཱནི. ཀཏམཱནི ཏཱིཎི. ཨུཔྤཱདོ པཉྙཱཡཏི. ཝཡོ པཉྙཱ ཡཏི. ¶ ཋིཏསྶ ཨཉྙཐཏྟཾ པཉྙཱཡཏཱིཏི ཨེཝཾ སངྑཏདྷམྨསྶེཝ ལཀྑཎདསྶནཏྠཾ ཨུཔྤཱདཱདཱིནཾ ཝུཏྟཏྟཱ ནསཀྐཱ པབནྡྷསྶ པཉྙཏྟིསབྷཱཝསྶ ཨསངྑཏསྶ ཋིཏི ཏཏྠ ཝུཏྟཱཏི ཝིཉྙཱཏུ’’ནྟི ཝུཏྟཾ. ཏཾཔི ན གཧེཏབྦཾ.

ཨབྷིདྷམྨེཔི ཧེཊྛཱ ཝུཏྟནཡེན པཉྙཏྟིསཱིསེན སངྑཏདྷམྨཱནཾ ནིདྡེསསྶ དིཊྛཏྟཱཏི.

[༡༢༢] ཡམྤི ཏཏྠ

‘‘ཨུཔསགྒསྶཙ དྷཱཏྭཏྠེཡེཝ པཝཏྟནཏོ པཉྙཱཡཏཱིཏི ཨེཏསྶ ཝིཉྙཱཡཏཱིཏི ཨཏྠོ’’ཏི ཝུཏྟཾ. ཏཾཔི ན ཡུཏྟཾ.

ཡཐཱནུལོམསཱསནཉྷི སུཏྟཾ. ཏསྨཱ ཏཏྠ ཝིནེཡྻཱནཾ སུཊྛུ པཉྙཱཡནམེཝ ཨདྷིཔྤེཏནྟི. ཨརཱུཔཾ ཨརཱུཔིསབྷཱཝཏྟཱ ལཧུཔརིཎཱམཾ. རཱུཔཾ པན རཱུཔིདྷམྨཏྟཱཡེཝ དནྡྷཔརིཎཱམནྟི ཝུཏྟཾ ཏཱནིཔན.ལ. རཱུཔདྷམྨཱན མཱཡཱུཏི.

[༡༢༣] ཝིབྷཱཝནིཡཾ པན

‘‘གཱཧཀགཧེཏབྦ བྷཱཝསྶ ཏཾཏཾ ཁཎཝསེན ནིཔྤཛྫནཏོ’’ཏི ཀཱརཎཾ ཝུཏྟཾ. ཏཾ ཨཀཱརཎཾ.

ན ཧི གཱཧཀཾ ཨརཱུཔཾ གཧེཏབྦཉྩ རཱུཔཾ གཧཎསམྤཛྫནཏྠཾ ལཧུཾ པརིཎམཏི གརུཾ པརིཎཔཏཱིཏི སཀྐཱ ཝཏྟུནྟི. ཏཱནི ཏཱདིསཱནི སཏྟརསནྣཾ ཙིཏྟཱནཾ ཁཎཱནི སཏྟརསཝཱ ཏཱནི ཙིཏྟཀྑཎཱནི རཱུཔ དྷམྨཱནམཱཡཱུཏི ཡོཛནཱ. སཏྟརས ཙིཏྟཀྑཎསམཔམཱཎཱནི ཁཎཱནི ཝིཉྙཏྟི རཱུཔལཀྑཎ རཱུཔཝཛྫཱནཾ རཱུཔདྷམྨཱནཾ ཨཱཡུནཱམཱཏི ཝུཏྟཾ ཧོཏི. ཁཎམཏྟཏོ པན ཨཊྛཀཐཱནཡེན ཨེཀཔཉྙཱསཁཎཱནི ཧོནྟི, མཱུལཊཱིཀཱནཡེན དྭཏྟིཾསཁཎཱནི. ཏཏྠཙ ཨཱདིམྷི དྭེ ཁཎཱནི རཱུཔདྷམྨཱནཾ ཨེཀཾ ཨུཔྤཱདཀྑཎམེཝ. ཨནྟེ དྭེ ཨེཀཾ བྷངྒཀྑཎམེཝ. མཛ྄ཛྷེ ཨཊྛཝཱིས ཁཎཱནི ཏེསཾ ཨེཀཾ ཋིཏིཀྑཎམེཝཱཏི དཊྛབྦཾ. ན ཧི དནྡྷཔརིཎཏཱནཾ རཱུཔཱནཾ ཨུཔྤཱདབྷངྒཱཔི ཙིཏྟསྶ ཝིཡ ལཧུཀཱ བྷཝིཏུཾ ཨརཧནྟཱིཏི. ཏཏྠ ཝིཉྙཏྟིདྭཡཾ ཨེཀཙིཏྟཀྑཎིཀཾ. ཨུཔཙཡསནྟཏིཡོ ཨུཔྤཱདམཏྟཱ ཨནིཙྩཏཱ བྷངྒམཏྟཱ. ཛརཏཱ རཱུཔ དྷམྨཱནཾ ཋིཏིཀྑཎམཏྟཱཏི དཊྛབྦཱ. མཱུལཊཱིཀཱནཡེན པནེཏྠ ཏཱནི པན ¶ སོལ༹སཙིཏྟཀྑཎཱནི རཱུཔདྷམྨཱནམཱཡཱུཏི ཝཏྟབྦཾ. ཊཱིཀཱཙརིཡོ ཧི པཊིཙྩསམུཔྤཱདཝིབྷངྒེ ཨཱགཏཾ མཧཱཊྛཀཐཱཝཙནཾ པཏིཊྛཔེནྟོ སོལ༹སཙིཏྟཀྑཎཱཡུཀབྷཱཝཾ སམྦྷཱཝེཏི, ཨེཝཾ སནྟེཔི ཁནྡྷ ཝིབྷངྒེཡེཝ ཏཱཝ རཱུཔཱནཾ ཨུཔྤཱདནིརོདྷཝིདྷཱནསྶ མཧཱཨཊྛཀཐཱ ཝཱདསྶ ཡམཀཔཱལི༹ཝིརོདྷཾ དསྶེཏྭཱ སངྒཧཀཱརེན པཊིསིདྡྷཏྟཱ ན སཀྐཱ ཏཾ པཏིཊྛཔེཏུནྟི. ཏསྨིཾ ཝཱདེ ཧི པཊིསིདྡྷེ ཏཏྠ ཨཱགཏཱ སོལ༹སཱཡུཀཏཱཝཱ ཨཏིརེཀསོལ༹སཱཡུཀཏཱཝཱ པཊིསིདྡྷཱཡེཝ ཧོཏཱིཏི.

[༡༢༤] ཡཾ པན ཝིབྷཱཝནིཡཾ

ཏཾ ཊཱིཀཱནཡཾ ཏཡིདམསཱརནྟི པཊིཀྑིཔིཏྭཱ ཏདཏྠཾ སཱ དྷེནྟེན ‘‘པཊིསནྡྷིཙིཏྟེན སཧུཔྤནྣཾ རཱུཔཾ ཏཏོ པཊྛཱཡ སཏྟརསམེན སདྡྷིཾ ནིརུཛ྄ཛྷཏི. པཊིསནྡྷིཙིཏྟསྶ ཋིཏིཀྑཎེ ཨུཔྤནྣཾ རཱུཔཾ ཨཊྛཱརསམསྶ ཨུཔྤཱདཀྑཎེ ནིརུཛ྄ཛྷཏཱིཏིཨཱདིནཱ ཨཊྛཀཐཱཡམེཝ སཏྟརསཙིཏྟཀྑཎསྶ ཨཱགཏཏྟཱ’’ཏི ཀཱརཎཾ ཝུཏྟཾ. ཏཾ ན སུནྡརཾ.

ཡཉྷི སངྒཧཀཱརསྶ སཏྟརསཱཡུཀཝཙནཾ ཊཱིཀཱཀཱརེན ཝིཙཱརིཏཾ. ཏདེཝ དསྶེཏྭཱ ཊཱིཀཱནཡོ པཊིཀྑིཏྟོཏི ན ཡུཏྟམེ ཏནྟི. ཨེཀཙིཏྟསྶ ཁཎཾ ཝིཡ ཁཎཾ ཨེཀཙིཏྟཀྑཎཾ. ཨཏྠཏོ ཨབྷིནྣཾཔི ཧི ཁཎཾ ཨིདཾ ཙིཏྟསྶ ཨིདཾ རཱུཔཱནནྟི ཀཔྤནཱཝསེན བྷིནྣཾ ཝིཡ ཀཏྭཱ ཨུཔཙརཱིཡཏཱིཏི. ཨེཀཙིཏྟཀྑཎཾ ཨཏཱིཏཾ ཨེཏེསནྟི ཨེཀཙིཏྟཀྑཎཱཏཱིཏཱནི. ཨཏིམཧནྟབྷཱུཏཱནི པཉྩཱརམྨཎཱནི.

[༡༢༥] ཝིབྷཱཝནིཡཾ པན

‘‘ཨེཏཱནིཝཱ ཏཾ ཨཏཱིཏཱནཱིཏི ཨེཀཙིཏྟཀྑཎཱཏཱི ཀཱནཱི’’ཏིཔི ཝུཏྟཾ. ཏཾ ན སུནྡརཾ.

ན ཧི ནིརུདྡྷདྷམྨཝིསཡོ ཨཏཱིཏསདྡོ ཀིཉྩི ཨཏིཀྐམིཏྭཱ ཨུདྡྷཾ ཨཱགཏཱནི པཙྩུཔྤནྣརཱུཔཱནི དཱིཔེཏཱིཏི སཀྐཱ ཝཏྟུནྟི. བཧཱུནི ཙིཏྟཀྑཎཱནི ཨཏཱིཏཱནི ཨེཏེསནྟི བཧུཙིཏྟཀྑཎཱཏཱིཏཱནི. མཧནྟཱདི བྷཱུཏཱནི པཉྩཱརམྨཎཱནི. རཱུཔདྷམྨཱནཾ པན རཱུཔདྷམྨེསྭེཝ ཨཱཔཱཏཱགམནེ ཐོཀཾ བལཝནྟཏཱ ཨིཙྪིཏབྦཱ. ཏེཙ ཋིཏིཀྑཎེཡེཝ པརིཔུཎྞཔཙྩཡུཔལདྡྷཱ ¶ ཧུཏྭཱ བལཝནྟཱ ཧོནྟཱིཏི ཝུཏྟཾ ཋིཏིཔཏྟཱནེཝཱཏི. ཨེཝསདྡེན ཊཱིཀཱཀཱརསྶ ཝཱདཾ ནཱིཝཱརེཏི. སོ ཧི ཨུཔྤཛྫམཱནམེཝ རཱུཔཾ པསཱདེ གྷཊྚེཏཱིཏི ཨིཙྪཏཱིཏི. པཉྩཱལམྦཎཱནི པཉྩདྭཱརེ ཨཱཔཱཏམཱགཙྪནྟཱིཏི ཨེཏྠ རཱུཔསདྡཱརམྨཎཱནི ཨསམྤཏྟ ཝསེན ཨིཏརཱནིཙ སམྤཏྟཝསེན གོཙརབྷཱཝཾ ཨུཔགཙྪནྟི. ཨཡཉྩ ཝིསེསོགྷཊྚནཝིསེསེན ཝེདིཏབྦོ. པུརིམཱནིཧི དྭེ ནིམིཏྟཝསེནེཝ གྷཊྚེནྟི. ན ཝཏྠུཝསེན. པཙྪིམཱནི པན ཏཱིཎིཝཏྠུཝསེན གྷཊྚེནྟི. ན ནིམིཏྟམཏྟཝསེན ནིམིཏྟགྷཊྚནཉྩནཱམ ཨསམྤཏྟཱནཉྙེཝ ན སམྤཏྟཱནཾ. ཝཏྠུགྷཊྚནཾ པན སམྤཏྟཱནཉྙེཝ. ནོ ཨསམྤཏྟཱ ཧོཏི. ནནྟི. ཡཐཱ ཧི ཏཱིརེ གཙྪནྟཱནཾསརཱིརནིམིཏྟཱནི པོཀྑརཎི ཡཱཨུདཀེ དིསྶནྟི. ཏསྨིཾ ཨུདཀེ ཨོརོཧནྟཱནཾ པན ཏཱནི ཏཏྠ ན དིསྶནྟི. ཨེཝམེཝ སམྤཏྟཱནི རཱུཔསདྡཱརམྨཎཱནི ནགྷཊྚེནྟི. ཀསྨཱ, ཝིསཡཝིསཡཱིནཾ མཛ྄ཛྷེ ཨཱལོཀསྶ ཨཱཀཱསསྶཙ ཨབྷཱཝེན ནིམིཏྟོཀཱསསྶ ཨབྷཱཝཏོ. ཨསམྤཏྟཱནིཡེཝ པན ཨཏྟནོ ནིམིཏྟུཔཊྛཱཔནཝསེན གྷཊྚེནྟི. ཀསྨཱ, ནིམིཏྟོཀཱསསྶ ལདྡྷཏྟཱ. ཨིཏརཱནི པན ཏཱིཎི ཡཐཱཛཱཏཝཏྠུཝསེནེཝ གྷཊྚེནྟི. ཏསྨཱ ཏཱནི སམྤཏྟཱནིཡེཝ གྷཊྚེནྟི. ནོ ཨསམྤཏྟཱནཱིཏི. ཏཏྠ ཡཱནི ཨསམྤཏྟཱནིཡེཝ ཧུཏྭཱ གྷཊྚེནྟི. ཏཱནི སཡཾ དཱུརེ ཋཏྭཱ ནིམིཏྟ ཨཔྤནཱཝསེན གྷཊྚིཏཏྟཱ ཨེཀེཀསྨིཾ པསཱདེ ཙནྡམཎྜལ སཱུརིཡ མཎྜལཱདིཝསེན ཨསནིསདྡམཎྜལ མེཎྜསདྡམཎྜལཱདིཝསེན ཙ མཧནྟཱནིཔི བཧཱུནིཔི ཨཱཔཱཏམཱགཙྪནྟིཡེཝ. ཨིཏརཱནི པན ཏཱིཎི སམྤཏྟཱནིཡེཝ གྷཊྚེནྟཱིཏི ཨེཀེཀསྨིཾ པསཱདེ ཨེཀེཀམེཝ ཨཱཔཱཏམཱགཙྪནྟཱིཏི དཊྛབྦཾ. ཨིདཉྩ པཉྩདྭཱརཝསེན ཝུཏྟཾ. མནོ དྭཱརེ པན སབྦཱནིཔི ཨཱརམྨཎཱནི ཨསམྤཏྟཱནིཡེཝ ཨཱཔཱཏམཱགཙྪནྟཱིཏི. ཨེཏྠཙ པཉྩདྭཱརེཏི ཨིདཾ ཨསཱདྷཱརཎ དྭཱརདསྶནཝསེན ཝུཏྟཾ. ཏཱནི པན པཉྩཱལམྦཎཱནི ཡདཱསཀསཀདྭཱརེ གྷཊྚེནྟི. ཏདཱ མནོདྭཱརེཔི ཨཔཱཏ མཱགཙྪནྟིཡེཝ. ཨེཀེཀཾ ཨཱརམྨཎཾ དྭཱིསུ དྭཱིསུ དྭཱརེསུ ཨཔཱཏ མཱགཙྪཏཱིཏི ཧི ཨཊྛཀཐཱཡཾ ཝུཏྟཾ. ཏསྨཱ ཡདཱ ཙནྡཾཝཱ སཱུརིཡཾཝཱ པབྦཏཾཝཱ རུཀྑཾཝཱ ཡཾཀིཉྩིཝཱ པསྶནྟི. ཏདཱ ཨེཀེཀསྨིཾ ཙཀྑུཔསཱདེ ཨེཀེཀཱནི མནོདྭཱརེ ཨེཀནྟི ཨནེཀཱནི ¶ ཙནྡམཎྜལཱདཱིནི ཨེཀཀྑཎེ ཨུཔཊྛཧནྟི, ཨེཝཾ སེསཱརམྨཎེ སཱུཏི དཊྛབྦཾ. ཨཔཱཏཱགམནཉྩེཏྠ ལཉྪཀཱནཾ ཏཱལཔཎྞེ ལཉྪནཁནྡྷཾ ཐཔེཏྭཱ མུགྒརེན པཧརཎཀཱལེ ལཉྪནཁནྡྷསྶ ཏཱལཔཎྞེ ཨཱཔཱཏེཏྭཱ ཨཀྑརུཔཊྛཱཔནཾ ཝིཡ དཊྛབྦཾ. ཡཏོ དྭཱརཱནཾ ཝིཀཱརཔྤཏྟི ཧོཏཱིཏི.

[༡༢༦] ཡཾ པན ཝིབྷཱཝནིཡཾ

‘‘ཨཱབྷོགཱནུརཱུཔཾ ཨནེཀཀལཱཔགཏཱནི ཨཱཔཱཏཾ ཨཱགཙྪནྟཱི’’ཏི ཝུཏྟཾ. ཏཏྠ ཨཱབྷོགཱནུརཱུཔནྟི ཨིདཾ ཝིཙཱརེཏབྦཾ.

ཡཏྟཀཱནི ཧི པཉྩཱལམྦཎཱནི ཙཀྑཱདིཔཐེ ཨཱལོཀཱདི སཧིཏཱནི ཧུཏྭཱ ཋིཏཱནི ཧོནྟི. ཏཏྟཀཱནི སབྦཱནི ནིདྡཱཡནྟསྶཔི ཝིསཉྙི བྷཱུཏསྶཔི ཨཉྙཝིཧིཏསྶཔི ཡཾཀིཉྩི ཛྷཱནཾཝཱ ཕལཾཝཱ ནིརོདྷཾཝཱ སམཱཔཛྫནྟསྶཔི ཨཱབྷོགེན ཝིནཱ ཨཏྟནོ དྭཱརེསུ ཨཱཔཱཏམཱགཙྪནྟིཡེཝ. ནཀེཝལཾ ཨཏྟནོདྭཱརེསུ ཨེཝ. ཨཐཁོ མནོདྭཱརེཔི. ནཀེཝལཾ བྷཝངྒམནོདྭཱརེཨེཝ. ཨཱཝཛྫནཱདཱིསུ པན ཙཏུབྦྷཱུམཀ ཝཱིཐིཙིཏྟེསུཔི ཨཱཔཱཏཾ ཨཱགཙྪནྟིཡེཝ. ཨཡཾནཱམ མནོ མནོདྭཱརཾ ནཧོཏཱིཏི ནཝཏྟབྦོཏི ཧི དྭཱརཀཐཱཡཾ ཝུཏྟཾ. ཨཡཉྩ ཨཏྠོ པཐམཛ྄ཛྷཱནསྶ སདྡོ ཀཎྚཀོཏི ཨིམིནཱ པཱཋེན དཱིཔེཏབྦོ. པཐམཛ྄ཛྷཱནཾ སམཱཔནྣསྶ ཧི སདྡོ སོཏམྷི གྷཊྚེཏྭཱ ཛྷཱནཙིཏྟསངྑཱཏེ མནོདྭཱརེ ཨཱཔཱཏམཱགཙྪཏི. ཏདཱ ཛྷཱནཙིཏྟ སནྟཏི ཙལིཏྭཱ ཝོཙྪིཛྫཏི. ཛྷཱནཱ ཝུཊྛཱཏི. བྷཝངྒཔཱཏོ ཧོཏི. ཏཾ སདྡཱརམྨཎཾ ཝཱིཐིཙིཏྟཾ པཝཏྟཏཱིཏི. དུཏཱིཡཛ྄ཛྷཱནཱདཱིནི སམཱཔཛྫནྟོ པན ཨཔྤཀེན སདྡེན ནཝུཊྛཱཏི. ཨདྷིམཏྟསདྡེན པན ཝུཊྛཱཏིཡེཝ. ན ཧི ཏཱནི ཨཱནེཉྫཔཏྟཱནིནཱམ ཧོནྟི. ཨརཱུཔཛ྄ཛྷཱནཱནིཨེཝ པན ཨཱནེཉྫཔཏྟཱནིནཱམ ཧོནྟི. ཏསྨཱ ཏཱནི སམཱཔཛྫནྟོ ཨདྷིམཏྟསདྡེནཔི ནཝུཊྛཱཏིཡེཝཱཏི. ཏེསུ པན ཏཐཱ ཨཱཔཱཏམཱགཏེསུ ཏདཱརམྨཎཱནི ཝཱིཐིཙིཏྟཱནི པཝཏྟནྟིཡེཝཱཏི ནཝཏྟབྦཾ. བྷཝངྒ སནྟཏིཡཱཝཱ ཛཝནསནྟཏིཡཱཝཱ ཝོཙྪིནྣཱཡ པཝཏྟནྟི. ཨཝོཙྪིནྣཱཡ ནཔཝཏྟནྟི. པཝཏྟམཱནཱནིཔི ཨཱརམྨཎཱ དྷིམཏྟཱདིཝསེན ལདྡྷཔཙྩཡཝིསེསེ ཨེཀེཀསྨིཾ ཨཱརམྨཎེཨེཝ པཝཏྟནྟི. ¶ ན ཨེཀཀྑཎེ པཉྩསཱུཏི དཊྛབྦཾ. ཨེཏྠཙ ཨཏྠཝསཱ ཝིབྷཏྟི པརིཎཱམོཏི ཀཏྭཱ ཨེཀཙིཏྟཀྑཎཱཏཱིཏཱནི ཋིཏིཔཏྟཱནེཝ པཉྩཱ ལམྦཎཱནི ཨེཀཙིཏྟཀྑཎཱཏཱིཏེ ཋིཏིཔྤཏྟེ ཨེཝ པཉྩདྭཱརེ བཧུ ཙིཏྟཀྑཎཱཏཱིཏཱནི བཧུཙིཏྟཀྑཎཱཏཱིཏེཏི ཡོཛེཏབྦཾ.

[༡༢༧] ཝིབྷཱཝནིཡཾ པན

‘‘ཏེ པན པསཱདཱ བྷཝངྒཙལནསྶ ཨནནྟརཔཙྩཡབྷཱུཏེན བྷཝངྒེན སདྡྷིཾ ཨུཔྤནྣཱ’’ཏི ཝུཏྟཾ.

ཨེཝཾ པན སཏི བཧུཙིཏྟཀྑཎཱཏཱིཏཱནིཔི པཉྩཱལམྦཎཱནི ཨེཀཙིཏྟཀྑཎཱཏཱིཏེཨེཝ པཉྩདྭཱརེ ཨཱཔཱཏམཱགཙྪནྟཱིཏི ཨཱཔཛྫཏི. ཨེཏ རཧི པན ཨེཀཀྑཎེ སཧུཔྤནྣཱནཉྙེཝ ཝཏྠཱརམྨཎཱནཾ གྷཊྚནཾ ཨིཙྪནྟི. སཧུཔྤནྣཱནིཝཱ པན ཧོནྟུ ནཱནུཔྤནྣཱནིཝཱ, བལཝབྷཱཝོཡེཝ པམཎནྟི ཨམྷཱཀཾ ཁནྟི. སབྦཾ ཝིཙཱརེཏྭཱ གཧེཏབྦཾ.

[༡༢༨] ཡཾ པན ཝིབྷཱཝནིཡཾ

‘‘ཨཱཝཛྫནེན སདྡྷིཾ ཨུཔྤནྣཱཏི ཨཔརེ’’ཏི ཝུཏྟཾ. ཏཾ ན ཡུཛྫཏི.

ཨེཝཉྷི སཏི ཨཉྙདེཝ པཉྩཱརམྨཎཱནཾ ཨཱཔཱཏཱགམནཝཏྠུ. ཨཉྙདེཝ པཉྩཝིཉྙཱཎཱནཾ ནིསྶཡཝཏྠཱུཏི ཨེཝཾ ཝིརུདྡྷསྶ ཨཏྠསྶ ཨཱཔཛྫནཏོཏི. ཨེཝཾ པཉྩདྭཱརེ ཝིསཡཔཝཏྟིཡཱ ཨཱདིལཀྑཎཾ དསྶེཏྭཱ ཨིདཱནི སབྦཔཱརིཔཱུརཾ ཝིསཡཔཝཏྟིཝིབྷཱགཾ ཝཱིཐིཙིཏྟཔཝཏྟིཉྩ དསྶེནྟོ ཏསྨཱཏིཨཱདིམཱཧ. ཏཏོཏི ཏསྨཱ ཙཀྑུསྶ ཨཱཔཱཏཱགམནཔཙྩཡཱ. ཙཀྑུསྶ ཨཱཔཱཏཱགམནེན སཧེཝ བྷཝངྒསྶཔི ཨཱཔཱཏཾ ཨཱགཙྪཏིཡེཝཱཏི ཝུཏྟཾ དྭིཀྑཏྟུཾབྷཝངྒེཙལིཏེཏི. ཙལནཉྩེཏྠ ཡཐཱ གཧིཏཾ ཀམྨཱདི ཨཱརམྨཎཾ མུཉྩིཏྭཱ ཨིདཱནི ཨཏྟནི ཨཱཔཱཏཾ ཨཱགཙྪནྟཾ ཨབྷིནཝཱརམྨཎཾ གཧེཏུཾ ཨུསྶཱཧཛཱཏསྶ ཝིཡ བྷཝངྒསནྟཱནསྶ ཝིཀཱརཔྤཏྟི དཊྛབྦཾ. ཨེཏྠཙ ཙཀྑུསྶ ཨཱཔཱཏཱགམནཾ ཙཀྑུཝིཉྙཱཎུཔྤཏྟིཡཱ ཨེཝ ཀཱརཎཾ. ན ཨཱཝཛྫནུཔྤཏྟིཡཱ. བྷཝངྒསྶ ཨཱཔཱཏཱགམནམེཝ པན ཨཱཝཛྫནུཔྤཏྟིཡཱཔི ཀཱརཎཾ ཧོཏཱིཏི དཊྛབྦཾ.

[༡༢༩] ཝིབྷཱཝནིཡཾ པན

མནོདྭཱརེཔི ¶ ཨཱཔཱཏཱགམནཾ ཝིསུཾ ཨཔཏྭཱ རཱུཔཱདཱིནཾ ཙཀྑཱདིསུ གྷཊྚནཾནཱམ ཡོགྱདེསཱཝཊྛཱནཾ ཨེཝ. ཏམེཝཙ བྷཝངྒུ པཙྪེདསྶཔི ཀཱརཎཾ ཧོཏཱིཏི ཀཏྭཱ ‘‘པཉྩསུ ཧི པསཱདེསུ ཡོགྱདེསཱཝཊྛཱན ཝསེན ཨཱརམྨཎེ གྷཊྚིཏེ པསཱདགྷཊྚནཱནུབྷཱཝེན བྷཝངྒསནྟཏི ཝོཙྪིཛྫམཱནཱཏིཨཱདི’’ ཝུཏྟཾ. ཏཾ ཏཐཱ ན དཊྛབྦཾ.

ན ཧི ཡོགྱདེསཱཝཊྛཱནམེཝ གྷཊྚནནྟི སཀྐཱ ཝཏྟུཾ. ཡོགྱདེསེཔན ཋཏྭཱ ནིམིཏྟགྷཊྚནཝསེན ཝཏྠུགྷཊྚནཝསེནཙ ཨསནི ནིཔཱཏོཝིཡ པསཱདེསུ ཡུཛ྄ཛྷནཾ མནྠནཾ ཁོབྷཀརཎཾ གྷཊྚནནྟི ཙ ཨཱཔཱཏཱགམནནྟི ཙ ཝུཙྩཏཱིཏི དཊྛབྦཾ. ཨཡཉྩ ཨཏྠོ ཧེཊྛཱ ཝུཏྟོཡེཝ. ཨེཏྠཙ ཨཡཾཔི ཨེཀོ དྷམྨནིཡཱམོཡེཝཱཏི ཀཏྭཱ ནཱནཱ ཋཱནིཡེསུ དྭཱིསུ དྭཱིསུ དྭཱརེསུ སཧེཝ ཨཱཔཱཏཱགམནཾ པཙྩེཏབྦཾ. རཱུཔཱདིནཱ པསཱདེ གྷཊྚིཏེ ཏཾ ནིསྶིཏསྶེཝ པཉྩཝིཉྙཱཎསྶ ཙལནཾ སིཡཱ. ཀཐཾ པན ཧདཡཝཏྠུནིསྶིཏསྶ བྷཝངྒསྶཱཏི ན ཙོདེཏབྦནྟི.

[༡༣༠] ཝིབྷཱཝནིཡཾ པན

ཏམེཝ ཙོདནཾ སམུཊྛཱཔེཏྭཱ ཏཾ པརིཧརནྟོ ‘‘སནྟཏི ཝསེན ཨེཀཱབདྡྷཏྟཱ’’ཏིཨཱདིམཱཧ. ཏཏྠ སནྟཏིཝསེནཱཏི ནཝཏྟབྦཾ. སཎྛཱནཝསེནཱཏི པན ཝཏྟབྦཾ. སབྦཉྩེཏཾ སཱརཏོ ན པཙྩེཏབྦཾ.

ཀསྨཱ, ཏཱདིསསྶ ཨནུཀྐམཙལནསྶ ཨཊྛཀཐཱཡམེཝ དལ༹ྷཾ པཊིཀྑིཏྟཏྟཱ. ཝུཏྟཉྷི ཏཏྠ ཨེཀེཀཾ ཨཱརམྨཎཾ དྭཱིསུ དྭཱིསུ དྭཱརེསུ ཨཱཔཱཏམཱགཙྪཏཱིཏི. རཱུཔཱརམྨཎཉྷི ཙཀྑུཔསཱདཾ གྷཊྚེཏྭཱ ཏངྑཎེཡེཝ མནོདྭཱརེ ཨཱཔཱཏཾ ཨཱགཙྪཏི. བྷཝངྒཙལནསྶ པཙྩཡོ ཧོཏཱིཏི ཨཏྠོ. སདྡ གནྡྷ རས ཕོཊྛབྦེསུཔི ཨེསེཝ ནཡོ. ཡཐཱ ཧི སཀུཎོ ཨཱཀཱསེནཱགནྟྭཱ རུཀྑགྒེ ནིལཱིཡམཱནོཝ རུཀྑསཱཁཉྩ གྷཊྚེཏི. ཚཱཡཱཙསྶ པཐཝིཡཾ པཊིཧཉྙཏི. སཱཁཱགྷཊྚན ཚཱཡཱཕརཎཱནི ཨཔུབྦཾ ཨཙརིམཾ ཨེཀཀྑཎེཡེཝ བྷཝནྟི. ¶ ཨེཝཾ པཙྩུཔྤནྣརཱུཔཱདཱིནཾ ཙཀྑུཔསཱདཱདིགྷཊྚནཉྩ བྷཝངྒཙཱལན སམཏྠཏཱཡམནོདྭཱརེཨཱཔཱཏཱགམནཉྩཨཔུབྦཾ ཨཙརིམཾ ཨེཀཀྑཎེཡེཝ ཧོཏཱིཏི. ཨེཝཾ སཀུཎོཔམཱཡ སཧཏངྑཎེཡེཝཱཏི ཙ ཨཔུབྦཾཨཙརིམཾ ཨེཀཀྑཎེ ཡེཝཱཏིཙ ཝཏྭཱ དལ༹ྷཾ པཊིབྷིདྡྷཏྟཱ ཏཾ ཨནུཀྐམཙལནཾ ཨཙིནྟེཏྭཱ དྷམྨནིཡཱམཝསེན ཨེཀཔྤཧཱརཙལནམེཝ པཙྩེཏབྦནྟི. བྷཝངྒསོཏཾཝོཙྪིནྡིཏྭཱཏི བྷཝངྒཔཝཱཧཾ སབྦསོ ཨཝཙྪིནྣཾ ཀཏྭཱ. ཨཱཝཛྫནྟནྟི ཨདིསྭཱཝ ཀིཾནཱམེཏནྟི ཨཱཝཛྫ མཱནཾ. པསྶནྟནྟི ཨཏྟ པཙྩཀྑཾ ཀུརུམཱནཾ. སམྤཊིཙྪནྟནྟི མུཉྩིཏུཾ ཨདཏྭཱ ཡཐཱདིཊྛཾ རཱུཔཾ པཊི གཎྷནྟཾ. སནྟཱིརཡམཱནནྟི སུཊྛུ ཏཱིརེནྟཾཝིཙཱརེནྟཾ. ཝཝཏྠཔེནྟནྟི སུཊྛུ ཨསངྐརཏོ ཐཔེནྟཾ སལླཀྑེནྟནྟི ཨཏྠོ. ཡོནིསོམནསིཀཱརཱདིཝསེན ལདྡྷོཔཙྩཡོ ཡེནཱཏི ལདྡྷཔཙྩཡཾ. ཡཾཀིཉྩི ཛཝནཾ ཛཝཏཱིཏི སམྦནྡྷོ. ཏཾ པན ཛཝནཾ ཨཱརམྨཎསྶ དུབྦལཀཱལེཝཱ མུཙྪཱ མརཎཱསནྣཀཱལེསུཝཱ ཚཀྑཏྟུཾ ཝཱ པཉྩཀྑཏྟུམེཝཝཱ ཛཝཏཱིཏི ཝུཏྟཾ ཡེབྷུཡྻེནཱཏི. ཛཝཏཱིཏི ཨསནིནིཔཱཏསདིསེན ཛཝེན པཝཏྟཏི. ཏཏྠ པཐམཛཝནཾ ཨལདྡྷཱ སེཝནཏྟཱ སབྦདུབྦལཾ ཧོཏི. ཏཏོ དུཏཱིཡཾ བལཝཾ. ཏཏོ ཏཏཱིཡཾ. ཏཏོ ཙཏུཏྠཾ. ཨིདཾ པན སབྦབལཝཾ མུདྡྷཔཏྟཾ ཧོཏི. ཨིཏོ པཊྛཱཡ ཨནུཀྐམེན པརིཧཱཡམཱནཾ པཝཏྟཏི. སཏྟམཝཱརེ གཏེ པརིཀྑཱིཎཛཝཾ ཧོཏཱིཏི ཝེདིཏབྦཾ. ཛཝནཱ ནུབནྡྷཱནིཏི ཡཐཱ པཊིསོཏཾ གཙྪནྟིཾ ནཱཝཾ ཨུདཀཾ ཐོཀཾ ཨནུབནྡྷཏི ཨནུགཙྪཏི. ཨེཝཾ ཛཝནཾ ཨནུབནྡྷཱནི. དྭེ ཏདཱརམྨཎཔཱཀཱནཱིཏི དྭིཀྑཏྟུཾ ཏདཱརམྨཎཀིཙྩཱནི ཝིཔཱཀཙིཏྟཱནི པཝཏྟནྟི. ཡཐཱརཧནྟི ཨཱརམྨཎཛཝན སཏྟཱནུརཱུཔཾ. བྷཝངྒཔཱཏོཏི ཨིམསྨིཾ ཨཏིཧནྟཱརམྨཎེ ཨཱཝཛྫནཏོ པཐམབྷཝངྒཙལནཏོཡེཝཝཱ པཊྛཱཡ ཨུཊྛིཏཾ སམུཊྛིཏཾ ཙིཏྟསནྟཱནཾ ཡཱཝཙཏུཏྠཛཝནཱ སམུཊྛཧིཏྭཱ པཉྩམཛཝནཏོ པཊྛཱཡ པཏིཏམེཝ ཧོཏི. ཨེཝཾ སནྟེཔི སམུཊྛིཏཝེགསྶ སབྦསོ ཨཔརིཀྑཱིཎཏཱཡ པཏིཏནྟི ནཝུཙྩཏི. དུཏཱིཡཏདཱརམྨཎཏོ པརཾ པན སམུཊྛིཏཝེགསྶ སབྦསོ པརིཀྑཱིཎཏྟཱ ཏདཱ ཨེཝ ཏཾཙིཏྟསནྟཱནཾ པཏིཏཾནཱམ ཧོཏི. ཏསྨཱ པཏནཾ པཱཏོ. བྷཝངྒབྷཱཝེནཙིཏྟསནྟཱནསྶ པཱཏོ བྷཝངྒཔཱཏོ, བྷཝངྒཾ ཧུཏྭཱ པཱཏོཏི ¶ ཨཏྠོ དཊྛབྦོ. བྷཝངྒཀིཙྩེ བྷཝངྒཊྛཱནེ བྷཝངྒཱརམྨཎེཙ པཱཏོ བྷཝངྒཔཱཏོཏིཝཱ. ཨིམསྨིཾ ཋཱནེ དོཝཱརིཀོཔམཱ, གཱམིལློཔམཱ, ཨམྦོཔམཱཙ ཝཏྟབྦཱ. ཏཱསབྦཱཔི ཨཊྛཀཐཱཡཾ གཧེཏབྦཱ. ཨེཏྟཱཝཏཱ སཏྟརསྶ ཙིཏྟཀྑཎཱནི པརིཔཱུརེཔཱཏི སམྦནྡྷོ. ཨེཏྠཙ ཚཚཀྐཡོཛནཱ ཝཏྟབྦཱ. ཡཏྠ ཧི རཱུནྟཱི རམྨཎཾ གྷཊྚེཏི. ཏཾ ཙཀྑུཝཏྠུཾ ནིསྶཱཡ ཏཏྠ གྷཊྚིཏཾ རཱུཔཱརམྨཎཾ ཨཱརབྦྷ ཙཀྑུཝིཉྙཱཎཾ ཨུཔྤཛྫཏི. ཨིཏརཱནི པན ཨཱཝཛྫནཱདཱིནི མནོ ཝིཉྙཱཎཱནི ཨཏྟནོ ཨཏྟནོ ཨཏཱིཏཱནནྟརཙིཏྟེན སཧུཔྤནྣཾ ཧདཡཝཏྠུཾ ནིསྶཱཡ ཏམེཝཱརམྨཎཾ ཨཱརབྦྷ ཨུཔྤཛྫནྟི. ཙཀྑུདྭཱར མནོདྭཱརཱནི སབྦེསཾཔི ཝཱིཐིཙིཏྟཱནཾ དྭཱརཀིཙྩཾ སཱདྷེནྟི. ཨཡཉྩ ཝཱིཐི ཙཀྑུདྭཱརེ ཨུཔྤནྣཏྟཱ ཙཀྑུདྭཱརཝཱིཐཱིཏི. ཙཀྑུཝིཉྙཱཎེན ཨུཔལཀྑིཏཏྟཱ ཙཀྑུཝིཉྙཱཎཝཱིཐཱིཏིཙ ཝུཙྩཏི. ཨེཀཙིཏྟཀྑཎཾ ཨཏིཀྐམྨ གྷཊྚནསམཏྠེ ཨཏིབལཝཱ རམྨཎེ ཨུཔྤནྣཏྟཱ ཨཏིམཧནྟཱརམྨཎ ཝཱིཐཱིཏིཙ ཝུཙྩཏཱིཏི. ཨེཏྠཙ ཡཏྟཀཱནི རཱུཔཱརམྨཎཱནི ཙཀྑུཔཐེ ཨུཔྤཛྫིཏྭཱ ཋིཏིཔྤཏྟཱནི ཧོནྟི. ཏཱནི ཏཏྟཀཱནི ཋིཏིཔྤཏྟེསུ པུབྦཱཔརབྷཱུཏེསུ ཨེཀཱུན པཉྙཱསཔརིམཱཎེསུ ཙཀྑུཔསཱདེསུ ཀིསྨིཾཙི ནགྷཊྚེནྟཱིཏི ནཝཏྟབྦཱནི. ཏེསུ པན ཡདེཝ ཨེཀཾ ཙཀྑུ ཨིམིསྶཱ ཝཱིཐིཡཱ ཡཐཱརཧཾ ཝཏྠུབྷཱཝཾ དྭཱརབྷཱཝཉྩ སཱདྷེཏི. ཡཏྠཙ གྷཊྚིཏཾ རཱུཔཾ ཨཱརབྦྷ ཨཡཾ ཝཱིཐི པཝཏྟཏི. ཨེཏདེཝ ཀིཙྩ སཱདྷནཾ ནཱམ ཧོཏི. ཡཾ མཛ྄ཛྷིམཱཡུཀནྟི ཝདནྟི, ཨིཏརཱནི པན མོགྷ ཝཏྠཱུནིནཱམ ཧོནྟི, ཡཱནིམནྡཱཡུཀཱནཱིཏིཨམནྡཱཡུཀཱནཱིཏིཙ ཝདནྟི. ཏཱནིཔན ཡཐཱཝུཏྟ ཀིཙྩ སཱདྷནཏོ པུརིམཱནི པཙྪིམཱནཱིཏི དུཝིདྷཱནི ཧོནྟི, ཏདུབྷཡཱནིཔི ཙཀྑུཝིཉྙཱཎསྶ ཨུཔྤཱདཀྑཎེ ཋིཏིབྷཱཝེན ལབྦྷམཱནཱནི ཨཊྛཙཏྟཱལཱིསམཏྟཱནི ཝེདིཏབྦཱནཱིཏི. ཨཝསེསཱནི པན ཏཏོ པུརིམཏརཱནི པཙྪིམཀརཱནིཙ ལདྡྷགྷཊྚནཱནིཔི ཝཏྠུདྭཱརཀིཙྩསིདྡྷིབྷཱཝེ ཨནཱསངྐིཏབྦཏྟཱ ཨིདྷ ནགཧིཏཱནཱིཏི. ཨེཏྠ སིཡཱ ཨིམཱཡ ཝཱིཐིཡཱ ཨུཔྤཏྟིསམཡེ སོ པུགྒལོ ཨཧཾ ཨིདཾ ནཱམ པསྶཱམཱིཏི ཛཱནཱཏི, ན ཛཱནཱཏཱིཏི. ནཛཱནཱཏི. ཀདཱ པན ཛཱནཱཏཱིཏི. སལླཀྑཎཝཱིཐིཡཱ པཝཏྟམཱནཱཡ. ཏཐཱ ཧི ¶ སབྦཔཐམཾ ཙཀྑུདྭཱརཝཱིཐི པཝཏྟཏི. ཏཏོ ཏདནུཝཏྟིཀཱ མནོདྭཱརཝཱིཐི. ཏཏོ སམུདཱཡགཱཧིཀཱ. ཏཏོ ཝཎྞསལླཀྑཎཱ. ཏཏོ ཝཏྠུགཱཧིཏཱ. ཏཏོ ཝཏྠུསལླཀྑཎཱ ཏཏོ ནཱམགཱཧིཀཱ. ཏཏོ ནཱམསལླཀྑཎཱཏི. ཏཏྠ ཝཎྞསལླཀྑཎཱཡ པཝཏྟམཱནཱཡ ཨཧཾ ནཱིལཝཎྞཾ པསྶཱམཱིཏིཨཱདིནཱ ཝཎྞཾ སལླཀྑེཏི. ཝཏྠུསལླཀྑཎཱཡ སཎྛཱནཾ སལླཀྑེཏི. ནཱམ སལླཀྑཎཱཡ ནཱམཾ སལླཀྑེཏཱིཏི. ཨིཏི ཏཾཏཾ སལླཀྑཎཝཱིཐི ཡཱ པཝཏྟམཱནཱཡཨེཝ ཏཾཏཾཔསྶཱམཱིཏི ཛཱནཱཏཱིཏི. ཨེཏྠཙ ཨལཱཏཙཀྐསྶ གཱཧིཀཱཝིཡ པུརིམཱཧི དྭཱིཧི ཝཱིཐཱིཧི པུནཔྤུནཾ གཧིཏཱནཾ རཱུཔཱནཾ སམུདཱཡཏོ གཱཧིཀཱ ཏཏཱིཡཱ མནོདྭཱརཝཱིཐི སམུདཱཡ གཱཧིཀཱནཱམ, ན ཧི སམུདཱཡགཧཎེན ཝིནཱ པརིབྱཏྟཝཎྞགཧཎཾ སམྦྷཝཏཱིཏི. ཡཱཝ ཏདཱརམྨཎུཔྤཱདཱ པན ཨཔྤཧོནྟཱཏཱིཏཀནྟི དྭིཀྑཏྟུཾ ཡཱཝ ཏདཱརམྨཎུཔྤཱདཱ པཝཏྟིཏུཾ ཨཔྤཧོནྟཾ ཧུཏྭཱ ཨཏཱིཏདྭཏྟིཙིཏྟཀྑཎིཀཾ. ཡསྶ ཧི དྭེཝཱ ཏཱིཎིཝཱ ཙིཏྟཀྑཎཱནི ཨཏཱིཏཱནི ཧོནྟི. ཏཾ ཡཱཝ ཏདཱརམྨཎུཔྤཱདཱ པཝཏྟིཏུཾ ནཔྤཧོཏི ན སཀྐོཏི. ཨེཝཾ ཨཔྤཧོནྟཾ ཧུཏྭཱ ཨཏཱིཏཀནྟི ཨཏྠོ. ཨཔཱཏམཱགཏནྟི ཙཀྑུདྭཱརེ མནོདྭཱརེཙ ཨཱཔཱཏཾ ཨཱགཏཾ. ནཏྠི ཏདཱརམྨཎུཔྤཱདོཏི ཨེཏྠ ཡསྶ ཏཱིཎི ཙིཏྟཀྑཎཱནི ཨཏཱིཏཱནི ཧོནྟི. ཏསྶ ཙུདྡས ཙིཏྟཀྑཎཱཡུཀཱཝསེ སསྶ ཨཱརམྨཎསྶ སཏྟམཛཝནེན སཧེཝ ནིརུདྡྷཏྟཱ ཏསྨིཾ ནཏྠི ཏདཱརམྨཎུཔྤཱདོཏི ཡུཏྟམེཏཾ. ན ཧི ཨེཀཱཝཛྫནཝཱིཐིཡཾ ཙིཏྟཱནི དྷམྨཝསེན ཝིཡ ཀཱལཝསེནཱཔི ནཱནཱརམྨཎཱནི ཨིཙྪནྟི ཨཊྛཀཐཱཙརིཡཱཏི. ཡསྶ པན དྭེ ཙིཏྟཀྑཎཱནི ཨཏཱིཏཱནི. ཏསྨིཾ སཏྟམཛཝནཏོ པརཾ ཨེཀཙིཏྟཀྑཎཱཡུཀཱཝསེསེ ཨཱརམྨཎེ ཨེཀེན ཏདཱརམྨཎེན ཨུཔྤཛྫིཏབྦནྟི ཙེ.ན. ན ཧི ཏཱདིསཾ ནིརོདྷཱ སནྣཾ ཨཱརམྨཎཾ ཨེཀཝཱརཾཔི ཏདཱརམྨཎུཔྤཏྟིཡཱ པཙྩཡོ བྷཝིཏུཾ སཀྐོཏཱིཏི. ཏཐཱ ཧི མཧཱཨཊྛཀཐཱཡཾ ཝིཔཱཀུདྡྷཱརེ ཙིཏྟཔྤཝཏྟིགཎནཱཡཾ ཏདཱརམྨཎཱནི དྭེཏི དྭེཨེཝ ཏདཱརམྨཎ ཝཱརཱ ཨཱགཏཱཏི.

ཡཾ པན ཝིབྷཱཝནིཡཾ

‘‘དྭིཀྑཏྟུམེཝ ¶ ཧི ཏདཱརམྨཎུཔྤཏྟི པཱལི༹ཡཾ ནིཡམིཏཱ’’ཏི ཝུཏྟཾ. ཏཏྠ པཱལི༹ཡནྟི ཨཊྛཀཐཱཏནྟིཾ སནྡྷཱཡ ཝུཏྟནྟི གཧེཏབྦཾ. ན ཧི སཱ ནཱམ པཱལི༹ ཨཏྠི, ཡཏྠ དྭིཀྑཏྟུཾ ཏདཱ རམྨཎུཔྤཏྟི ནིཡམིཏཱཏི.

མཛ྄ཛྷིམབྷཱཎཀཱཔན ཏདཱརམྨཎཾ ཨེཀཾཔི ཨིཙྪནྟི. སངྒཧཀཱརེན པན ཏཾ པཊིསིདྡྷནྟི ཨིདྷཔི ཏཾ ཐེརེན པཊིཀྑིཏྟནྟི དཊྛབྦཾ. ཡདི ཨེཝཾ ཀསྨཱ པརམཏྠཝིནིཙྪཡེ སཀིཾདྭེཝཱ ཏདཱལམྦནྟི ཐེརེན ཝུཏྟནྟི. མཛ྄ཛྷིམབྷཱཎཀཱནཾ མཏེན ཝུཏྟནྟི དཊྛབྦནྟི. ཨཱཙརིཡཱནནྡཏྠེརོ པན ཨེཀཾཔི ཨིཙྪཏིཡེཝ. ཡཐཱ ཧི ཨཱགནྟུཀབྷཝངྒཾ ཨེཀཾ པཝཏྟཏི. ཏཐཱ ཏདཱརམྨཎཾཔི ཨེཀཾ ནཔཝཏྟཏཱིཏི ནསཀྐཱ ཝཏྟུཾ. ཡཉྩ ཙིཏྟཔྤཝཏྟིགཎནཱཡཾ ཏདཱརམྨཎཱནི དྭེཏི ཝུཏྟཾ. ཏཾཔི ཨུཀྐཊྛཔརིཙྪེདཝསེན ཝུཏྟནྟི, ན ནསཀྐཱ ཝཏྟུནྟི. ཡཱཝ ཛཝནུཔྤཱདཱཔི པཝཏྟིཏུཾ ཨཔྤཧོནྟཱཏཱིཏཀནྟི སམྦནྡྷོ. ཡསྶ ཧི ཨཱརམྨཎསྶ ཙཏྟཱརི པཉྩ ཚ སཏྟ ཨཊྛནཝ ཝཱ ཙིཏྟཀྑཎཱནི ཨཏཱིཏཱནི ཧོནྟི. ཏཾ ཡཱཝ ཛཝནུཔྤཱདཱ པཝཏྟིཏུཾ ནཔྤཧོཏི. ཨེཝཾ ཨཔྤཧོནྟཾ ཧུཏྭཱ ཨཏཱིཏཀནྟི ཨཏྠོ. ཛཝནཾཔི ཨནུཔྤཛྫིཏྭཱཏི ཛཝནསྶཔི ཨནུཔྤཛྫནཏོ. ཨཡཉྷི ཏྭཱཔཙྩཡོ བྷཱཝཏྠེཨེཝ དཊྛབྦོ. ན ཀཏྟུཨཏྠེ. ཀསྨཱ. ཨཏྟནོ པདྷཱནཀྲིཡཱཡ སམཱནཀཏྟུཀཏཱཡ ཨབྷཱཝཏོཏི.

[༡༣༡] ཝིབྷཱཝནིཡཾ པན

‘‘ཧེཏུམྷིཙཱཡཾ ཏྭཱཔཙྩཡོ’’ཏི ཝུཏྟཾ. ཏཾ ན སུནྡརཾ.

ན ཧི བཱཧིརཏྠབྷཱུཏོ ཧེཏུཨཏྠོ ཀིཏཀཔཙྩཡཱནཾ ཝིསཡོ ཧོཏཱིཏི. ཏསྨཱ ཨིདྷ བྷཱཝཏྠེཨེཝ ཏྭཱཔཙྩཡོ. ཏཏོཙ ཧེཏུཨཏྠེ པཙྩཏྟཝཙནནྟི དཊྛབྦཾ. ཨེཏེན ཡཱ ལཀྑཎེ ཧེཏུམྷིཙམཱནནྟཔཙྩཡཱནཾཔི པཝཏྟི ཀཏྠཙི ཝུཏྟཱ. སཱཔིཔཊིཀྑིཏྟཱ ཧོཏི. ནཧི བཱཧིརཏྠབྷཱུཏཱ ལཀྑཎཧེཏུཡོ ཏེསཾ ཝིསཡཱ ཧོནྟཱིཏི. ཨེཏྠཙ ཡསྶ ཨཱརམྨཎསྶ ནཝཙིཏྟཀྑཎཱནི ཨཏཱིཏཱནི ཧོནྟི. ཏསྶ ཨཝསེས ཨཊྛཙིཏྟཀྑཎཱ ཡུཀསྶ དུཏཱིཡ ཝོཊྛབྦནེན སཧེཝ ¶ ནིརུདྡྷཏྟཱ ཏསྨིཾ ཛཝནཾཔི ཨནུཔྤཛྫིཏྭཱཏི ཡུཏྟམེཏཾ. ཀཱརཎཾ ཝུཏྟམེཝ. ཡསྶ པན ཙཏྟཱརི.ལ. ཨཊྛཝཱ ཙིཏྟཀྑཎཱནི ཨཏཱིཏཱནི. ཏསྨིཾ ཛཝནེན ཨུཔྤནྣེན བྷཝིཏབྦནྟི ཙེ.ན. ཨཝསེསཚཙིཏྟཀྑཎཱཡུཀཾཔི ཧི ཨཱརམྨཎཾ ཛཝནུཔྤཏྟིཡཱ པཙྩཡོ བྷཝིཏུཾ ན སཀྐོཏི. ཛཝནཉྷི ཨུཔྤཛྫམཱནཾ སཏྟཀྑཏྟུཾ པཝཏྟིཏུཾ པཧོནཀེ ཨཱརམྨཎེ ཨེཝ ཨུཔྤཛྫཏི. པཀཏིནིཡཱམེན ཛཝནསྶ སཏྟཀྑཏྟུ པརམཏཱཡ སམྦྷཝཏོཏི. ཨེཏྠ པན ཡཐཱ ཝིསཉྙིཀཱལ མུཙྪཱཀཱལ མརཎཀཱལེསུ ཝཏྠུསྶ ཨཝིསདཏཱཡ དུབྦལཏཱ ཡཙ ཛཝནཾ ཚཔཉྩཝཱརེཔི པཝཏྟཏི. ཏཐཱ པཀཏིཀཱལེཔི ཨཱརམྨཎསྶ དུབྦལབྷཱཝེ སཏི ཚཔཉྩཝཱརེཔི པཝཏྟཏིཡེཝཱཏི. དྭཏྟིཀྑཏྟུནྟི དྭིཀྑཏྟུཾཝཱ ཏིཀྑཏྟུཾཝཱ. ཏཐཱ ཧི ཨཊྛཀཐཱཡཾ ཝོཊྛབྦནེ ཋཏྭཱ ཨེཀཾཝཱ དྭེཝཱ ཙིཏྟཱནི པཝཏྟནྟི. ཏཏོ ཨཱསེཝནཾ ལབྷིཏྭཱ ཛཝནཊྛཱནེ ཋཏྭཱ པུན བྷཝངྒཾ ཨོཏརཏཱིཏི ཝུཏྟཾ. ཨེཏྠ ཧི ཏཏོ ཨཱསེཝནཾ ལབྷིཏྭཱ ཛཝནཊྛཱནེ ཋཏྭཱཏི ཨེཏེན ཏཏཱིཡསྶ ཝོཊྛབྦནསྶ པཝཏྟིཾ དསྶེཏི. ཨིཏརཐཱ ཨེཀཾཝཱ དྭེཝཱ ཙིཏྟཱནི པཝཏྟནྟི. ཏཏོ བྷཝངྒཾ ཨོཏརཏཱིཏི ཝུཏྟཾ སིཡཱཏི. ཨེཀཾཝཱཏི པན ཝཱཙཱ སིལིཊྛམཏྟཾ དཊྛབྦཾ. ཡཐཱ དིརཏྟ ཏིརཏྟཾཏི. ཨཐཝཱ, ཏཏོཏི ཨེཀཙིཏྟཏོཝཱ དྭིཙིཏྟཏོཝཱཏི ཨཏྠོ. ཏཏྠ པཐམེན དྭིཀྑཏྟུཾ དུཏཱིཡེན ཏིཀྑཏྟུཾ ཝོཊྛབྦནསྶ ཨུཔྤཏྟི ཝུཏྟཱ ཧོཏཱིཏི. ཨཱསེཝནཾ ལབྷིཏྭཱཏི ཨིདཾ པན ཨུཔཙཱརཝཙནམཏྟཾ དཊྛབྦཾ. ན ཧི ཝོཊྛབྦནསྶ ཨཱསེཝནཏཱ པཊྛཱནེ ཝུཏྟཱཏི. ཨཱཙརིཡཱནནྡཏྠེརེན པནེཏྠ ཝོཊྛབྦནཏོ པརཾ ཙཏུཔཉྩ ཙིཏྟཀྑཎཱཝསེསེ ཨཱརམྨཎེ ཙཏུཔཉྩཛཝནུཔྤཏྟིཡཱ ཨེཝ པརིཏྟཱརམྨཎཝཱརོ ཨིཙྪིཏོ. ན ཝོཊྛབྦན པརིཡོསཱནཝསེན. པཊྛཱནེཧི བྷཝངྒཾ ཨཱཝཛྫནཱཡ ཨནནྟརཔཙྩཡེན པཙྩཡོ ཏྭེཝཝུཏྟོ. ན པན ཝུཏྟོ ཨཱཝཛྫནཱ བྷཝངྒསྶ ཨནནྟརཔཙྩཡེན པཙྩཡོཏི. ཡཐཱ ཙ མུཙྪཱམརཎཀཱལེསུ ཝཏྠུདུབྦལཏཱཡ ཚ པཉྩཛཝནཝཱརཱ ཨིཙྪིཏབྦཱ. ཏཐཱ ཨིདྷཔི ཨཱརམྨཎདུབྦལཏཱཡཱཏི ན ན སཀྐཱ ཝཏྟུནྟི. ཨེཏྠ ཙ སནྟཱིརཎཏོ པརཾ ཨེཀཙིཏྟཀྑཎཱ ཝསེསེ ཨཱརམྨཎེ ཨེཀཾ ཝོཊྛབྦནཾ དྭིཙིཏྟཀྑཎཱཝསེསེ དྭེ ཏདུཏྟརི ¶ ཏཱིཎཱིཏི ཡུཏྟཾ སིཡཱ. ཨེཏརཧི པན དྭིཝོཊྛབྦནིཀཱ ཚཔརིཏྟཱརམྨཎཝཱིཐིཡོཏི ཝོཊྛབྦནིཀཱ པཉྩཱཏི ཡོཛེསུཾ. ཨེཝཾ སནྟེ ཀཱིདིསེ པརིཏྟཱརམྨཎེ དྭིཝོཊྛབྦནིཀཱ, ཀཱིདིསེ ཏིཝོཊྛབྦནིཀཱཏི ཝིཙཱརེཏབྦཱ སིཡུནྟི. ཡཾ པན ཨཱརམྨཎཾ དྭཏྟིཀྑཏྟུཾཝོཊྛབྦནུཔྤཏྟིཡཱ ཨཔྤཧོནཀཾ ཧོཏི. ཏཾ ཨཱཝཛྫནཔྤཏྟིཡཱཔི པཙྩཡོ ན ཧོཏཱིཏི ཝུཏྟཾ ཏཏྠ བྷཝངྒཙལནམེཝ ཧོཏི. ནཏྠི ཝཱིཐིཙིཏྟུཔྤཱདོཏི. ཏཏྠ བྷཝངྒཙལནམེཝཱཏི དྭིཀྑཏྟུཾ བྷཝངྒསྶ ཙལནམཏྟམེཝ ཧོཏི. ཨིཙྩེཝཾ ཙཀྑུདྭཱརེཏི ཨིཏི ཨེཝཾ ཡདི ཨེཀཙིཏྟཀྑཎཱཏཱིཏཀཾ རཱུཔཱརམྨཎཾ ཙཀྑུསྶ ཨཔཱཏམཱགཙྪཏཱིཏིཨཱདིནཱ ཝུཏྟནཡེན ཙཀྑུདྭཱརེ ཙཏུནྣཾ ཝཱརཱནཾ ཝསེན ཙཏུདྷཱ ཝིསཡཔྤཝཏྟི ཝེདིཏབྦཱ, ཏཐཱ སོཏདྭཱརཱདཱིསུ ཙཱཏིཡོཛནཱ. སབྦཐཱཔི ཙཏུདྷཱ ཝེདིཏབྦཱཏི སམྦནྡྷོ. ཨཏིཔརིཏྟཱརམྨཎཾཔི ཨཱཔཱཏཱགཏམཏྟེན མོགྷཝཱརསྶ ཨཱརམྨཎཾནཱམ ཧོཏི. ན ཨཱརམྨཎཀརཎཝསེན. ཨིཏརཱནི པན ཨུབྷཡཐཱཔི ཨིཏརེསཾ ཝཱརཱནཾ ཨཱརམྨཎཱནིནཱམ ཧོནྟཱིཏི ཝུཏྟཾ ཙཏུནྣཾ ཝཱརཱནཾ ཡཐཱཀྐམཾ ཨཱརམྨཎབྷཱུཏཱཏི.

ཝིབྷཱཝནིཡཾ པན

ཨཱརམྨཎབྷཱུཏཱཏི ཨིམསྶ ཨཏིཔརིཏྟཱརམྨཎཾ སནྡྷཱཡ པཙྩཡབྷཱུཏཱཏི ཨཏྠོ ཝུཏྟོ. ཏཉྷི མོགྷཝཱར པཉྙཱ པནཱཡ པཙྩཡོ ཧོཏཱིཏི.

པཉྩདྭཱརེཝཱིཐིཙིཏྟཱནི ཡཐཱརཧཾ ཀིཙྩཝསེན སཏྟེཝ. ཙིཏྟུཔྤཱདཱ ཙིཏྟཱནཾ ཨུཔྤཏྟིཁཎཝསེན ཙཏུདྡས. ཝིཏྠཱརཱ ཙིཏྟསརཱུཔཝིཏྠཱརཏོ ཙཏུཔཉྙཱསཱཏི ཡོཛནཱ. ཨེཏྠཱཏི པརིཏྟཛཝནཝཱརེ.

༡༣༧. མནོདྭཱརེ པན ཨཱརམྨཎདྷམྨཱ པརིཏྟཁཎཱཔི ཨཏཱིཏཱནཱགཏཱཔི ཀཱལཝིམུཏྟཱཔི ཨཱཔཱཏཾ ཨཱགཙྪནྟིཡེཝ. ཏསྨཱ ཏཏྠ ཨེཀཙིཏྟཀྑཎཱཏཱིཏཱནིཝཱ བཧུཙིཏྟཀྑཎཱཏཱིཏཱནིཝཱ ཋིཏིཔྤཏྟཱནེཝ ཨཱཔཱཏམཱགཙྪནྟཱིཏི ཨིདཾ ཝིདྷཱནཾ ནཏྠཱིཏི ཝུཏྟཾ མནོདྭཱརེཔན ཡདིཝིབྷཱུཏམཱལམྦཎཾ ཨཱཔཱཏམཱགཙྪཏཱིཏི. ཏཏྠ མནོདྭཱརེཏི སུདྡྷམནོདྭཱརེ. ཙཀྑཱདཱིསུ ཧི གྷཊྚནེན སཧེཝ ཡཏྠ ཨཔཱཏམཱགཙྪཏི. ¶ ཏཾ མིསྶཀདྭཱརནྟི ཝུཙྩཏི. ཨིདྷ པན སུདྡྷམེཝཱ དྷིཔྤེཏནྟི. ཏཾཔི པཉྩདྭཱརཱནུབནྡྷཀཾ ཝིསུཾ སིདྡྷནྟི དུཝིདྷཾ ཧོཏི. ཏཏྠ ཡཐཱ གྷཎྜེ དཎྜཀེན ཨེཀཝཱརཾ པཧཊེ གྷཎྜསརཱིརབྷཱུཏཱ རཱུཔ ཀལཱཔཱ ཙིརཾཔི ཀཱལཾ ཨཉྙམཉྙཾ གྷཊྚེཏྭཱ ཨནུརཝསདྡསནྟཱནཾ པཝཏྟེནྟི. ཏཐཱ པཉྩདྭཱརེ ཨཱརམྨཎེན ཨེཀཝཱརཾ གྷཊྚིཏེ པཉྩ དྭཱརིཀཝཱིཐིཡཱ ནིརུདྡྷཱཡཔི ཨཏཱིཏཾ པཉྩཱལམྦཎཾ མནོདྭཱརེ ཡཐཱ པཱཏཱགཏམེཝ ཧུཏྭཱ ཨནེཀསཧསྶཱནིཔི མནོདྭཱརིཀཝཱིཐིཙིཏྟ སནྟཱནཱནི པཝཏྟེཏིཡེཝ. ཏེསཾ པན དྭཱརབྷཱུཏཾ བྷཝངྒསནྟཱནཾ ཨནུབནྡྷཀཾནཱམ ཧོཏི. ཏཱནིཙ ཙིཏྟཱནི ཨནུབནྡྷཀཝཱིཐིཙིཏྟཱནིནཱམ ཧོནྟི. ཡཏྠ པན པཉྩདྭཱརགྷཊྚནཱ ནུབནྡྷབྷཱཝེན ཝིནཱ ཀེཝལཾ ཏཐཱ ཏཐཱ ཚལཱ༹རམྨཎདྷམྨཱ ཨཱཔཱཏཾ ཨཱགཙྪནྟི. ཏཾ ཝིསུཾ སིདྡྷཾ ནཱམ ཧོཏི. ཀཐཾ པན ཏསྨིཾ ཝིསུཾ སིདྡྷེ མནོདྭཱརེ ཨཱརམྨཎ དྷམྨཱ ཨཱཔཱཏཾ ཨཱགཙྪནྟཱིཏི. ཝུཙྩཏེ. དིཊྛཏོ དིཊྛསམྦནྡྷཏོ སུཏཏོ སུཏསམྦནྡྷཏོ སདྡྷཱཡ རུཙིཡཱ ཨཱཀཱརཔརིཝིཏཀྐེན དིཊྛིནིཛ྄ཛྷཱནཁནྟིཡཱ ནཱནཱཀམྨབལེན ནཱནཱཨིདྡྷིབལེན དྷཱཏུཀྑོཏ ཝསེན དེཝཏོཔསཾཧཱརཝསེན ཨནུབོདྷཝསེན པཊིཝེདྷཝསེནཱཏི ཨེཝམཱདཱིཧི ཀཱརཎེཧི ཨཱཔཱཏཾ ཨཱགཙྪནྟཱིཏི. ཏཏྠ དིཊྛཾནཱམ པུབྦེ པཉྩཧིདྭཱརེཧི གཧིཏཾ པཉྩཱལམྦཎཾ. ཏཾཔི ཀཱལནྟརེ ཀཱརཎལཱབྷེ སཏི སུདྡྷེ མནོདྭཱརེ ཨཱཔཱཏཾ ཨཱགཙྪཏིཡེཝ. དིཊྛསམྦནྡྷཾནཱམ དིཊྛསདིསཾ ཝུཙྩཏི. པུབྦེ ཧི ཀིཉྩི དིསྭཱ ཨཉྙཾ ཡཾཀིཉྩི ཨནུམཱནེནྟསྶ ཨདིཊྛཾཔི ཏཾསདིསཾ ཨཏཱིཏཾཔི ཨནཱགཏཾཔི པཙྩུཔྤནྣཾཔི བཧུཨཱཔཱཏཾ ཨཱགཙྪཏིཡེཝ. སུཏཾནཱམ པརཏོ སུཏྭཱ གཧིཏཾ ཚལཱ༹རམྨཎཾ. ཏཾ པན མཧཱཝིསཡཾ ཧོཏི. སབྦཉྙུདེསནཾ སུཏྭཱ གཧིཏཾ ན ཀིཉྩི ཨནཱརམྨཎཾནཱམ ཨཏྠཱིཏི. སུཏསམྦནྡྷཾནཱམ སུཏསདིསཾ. སདྡྷཱནཱམ པརསྶ སདྡཧནཱ. རུཙིནཱམ ཨཏྟནོ མཏི. ཨཱཀཱར པརིཝིཏཀྐོ ནཱམ ཨཏྠཙྪཱཡཾ བྱཉྫནཙྪཱཡཾ ཀཱརཎཙྪཱཡཉྩ ནིསྶཱཡ ཏཐཱ ཏཐཱ པརིཝིཏཀྐནཾ. དིཊྛིནིཛྫཱནཁནྟིནཱམ པཉྙཱཡཝཱ ཨཏྟནོ ལདྡྷིཡཱཝཱ པུནཔྤུནཾ ཨུཔཔརིཀྑིཏྭཱ ཨེཝམེཝཱཏི སནྣིཊྛཱནཾ པཱཔེཏྭཱ གཧཎཾ. སེསཾ པཱཀཊམེཝ. ཨེཏྠཙ ཨནནྟརཱུཔནིསྶཡ པཙྩཡབྷཱཝོནཱམ ཙིཏྟསནྟཱནསྶ མཧཱཝིཔྥཱརོ ཧོཏི. སཀིཾཔི ཨཱརམྨཎཾ ¶ སུཊྛུ ཨཱསེཝིཏྭཱ ནིརུདྡྷཀཱལཏོ པཊྛཱཡ ཝསྶསཏེཔི ཝསྶསཧསྶེཔི བྷཝནྟརེཔི ཏཾཨཱརམྨཎཾ པཊིཙྩ བྷཝངྒ ཙལནསྶ པཙྩཡོ ཧོཏི. ཙིཏྟཉྩནཱམ དིཊྛཱདཱིཧི ཡཐཱཝུཏྟཀཱརཎེཧི སཾཝདྡྷིཏཾ མཧཱཝིཔྥཱརཾ ཧོཏི. ཀིཉྩི ནིམིཏྟཾ ལབྷིཏྭཱ ཨེཀསྨིཾ ཁཎེ ཨནེཀསཧསྶེསུཔི དིཊྛཱདཱིསུ ཨཱརམྨཎེསུ ཕརམཱནཾ པཝཏྟཏི. ཏེཧིཙ ཀཱརཎེཧི ནིཙྩཾ ཙོདཱིཡམཱནཾ ཙིཏྟསནྟཱནཾ ཀཱཡགེལཉྙཱདིཀེ ཙིཏྟདུབྦལཔཙྩཡེ ཨསཏི ནིཙྩཀཱལཾཔི བྷཝངྒཏོ ཝུཊྛཱཏུཾ ཨཛ྄ཛྷཱསཡཡུཏྟཾ ཧོཏི. ན ཧི ཙིཏྟཾནཱམ ཨཝིབྷཱུཏེ ཨཱརམྨཎེ རམཏི. ཝིབྷཱུཏེཨེཝ རམཏི. ཏསྨཱ བྷཝངྒསམྤཡུཏྟོ མནསིཀཱརོ པུནཔྤུནཾ བྷཝངྒཾ ཙཱལེཏྭཱ ལདྡྷཔཙྩཡེསུ ཨཱརམྨཎེསུ པུནཔྤུནཾ ཨཱཝཛྫནཾ ནིཡོཛེཏིཡེཝ. ཏདཱ ཏཱནི ཨཱརམྨཎཱནི ཏདབྷིནིནྣཱཀཱར པཝཏྟམནསིཀཱར སམྤཡུཏྟསྶ བྷཝངྒ ཙིཏྟསྶ ཨཱཔཱཏཾ ཨཱགཙྪནྟི. ན ཧི ཨཉྙཾ ཨཱརམྨཎཾ གཧེཏྭཱ པཝཏྟམཱནསྶ ཙིཏྟསྶ ཨཱརམྨཎནྟརེ ཨབྷིནིནྣཱཀཱརོནཱམ ནཏྠཱིཏི སཀྐཱ ཝཏྟུནྟི. ཏདཱརམྨཎཔཱཀཱནི པཝཏྟནྟཱིཏི ཨིདཾ ཀཱམསཏྟཝསེན ཝུཏྟཾ. རཱུཔཱརཱུཔསཏྟཱནཾ པན ཝིབྷཱུཏཱརམྨཎེཔི ཏདཱརམྨཎུཔྤཱདོ ནཏྠིཡེཝ. ཡཐཱ ཙེཏྠ. ཨེཝཾ པཉྩདྭཱརེཔི རཱུཔསཏྟཱནཾ ཨཏིམཧནྟཱརམྨཎེསུ ཏདཱརམྨཎུཔྤཱདོ ནཏྠཱིཏི. ཨཝིབྷཱུཏེ པནཱ ལམྦཎེ ཛཝནཱཝསཱནེ བྷཝངྒཔཱཏོཝ ཧོཏཱིཏི ཨིདཉྩ ཨུཀྐཊྛ པརིཙྪེདཝསེན ཝུཏྟནྟི དཊྛབྦཾ. ཉཱཎཝིབྷངྒཊྛཀཐཱཡཾ པན དྭཏྟིཀྑཏྟུཾ ཝོཊྛབྦནཔྤཝཏྟིཝསེན ཨཝིབྷུཏེ ཨཱལམྦཎེ ཝོཊྛབྦནཝཱརོཔི ཨཱགཏོ. ཡོཙ པཉྩདྭཱརེབྷཝངྒཙལནམཏྟཝསེན མོགྷཝཱརོ ནཱམ ཙཏུཏྠོ ཝཱརོ ཝུཏྟོ. སོཔི ཨིདྷ ལདྡྷུཾ ཝཊྚཏིཡེཝ. སུདྡྷམནོདྭཱརེཔི ཧི ཨཱརམྨཎེ ཨཱཔཱཏམཱགཏེ ཝཱིཐིཙིཏྟཾ ཨནུཔྤཛྫིཏྭཱ དྭིཀྑཏྟུཾ བྷཝངྒེ ཙལིཏེ ནིཝཏྟནཀཝཱརཱནཾ པམཱཎཾ ནབྷཝིསྶཏིཡེཝ, ཝིསཡེཙ ཨཱཔཱཏཱགཏེ བྷཝངྒེཙ ཙལིཏེ སཏི ཝིསཡཔྤཝཏྟིནཱམ ན ན ཧོཏཱིཏི. ཨིཏི ཨིམསྨིཾ མནོདྭཱརེཔི ཏདཱརམྨཎ ཛཝན ཝོཊྛབྦན མོགྷཝཱར སངྑཱཏཱནཾ ཙཏུནྣཾ ཝཱརཱནཾ ཡཐཱཀྐམཾ ཨཱརཎབྷཱུཏཱ ཝིསཡཔྤཝཏྟི ཙཏུདྷཱ ཝེདིཏབྦཱཏི. ཏཏྠ ཏདཱརམྨཎཝཱརསྶ ཨཱརམྨཎབྷཱུཏཱ ཨབྷིཝིབྷཱུཏཱནཱམ ཛཝན ཝཱརསྶ ¶ ཝིབྷཱུཏཱནཱམ. ཝོཊྛབྦནཝཱརསྶ ཨཝིབྷཱུཏཱནཱམ. མོགྷཝཱརསྶ ཨཱརམྨཎབྷཱུཏཱ ཨཏིཨཝིབྷཱུཏཱནཱམཱཏི ཡོཛེཏབྦཱ.

ཨེཏྠཙ ཨཱརམྨཎསྶཝཱ ཙིཏྟསྶཝཱ ཨཏིབལཝཏཱཡ ཨབྷིཝིབྷཱུཏཏཱ ཝེདིཏབྦཱ. དུབྦལེཔི ཧི ཙིཏྟེ པཐཝིཔབྦཏཱདིཝསེན ཨཏིབལཝནྟཾ ཨཱརམྨཎཾ ཨཏིཝིབྷཱུཏཾནཱམ ཧོཏི. ཨཏིབལཝནྟེ ཙ ཙིཏྟེ ཨཏིསུཁུམཾཔི ནིབྦཱནཾ ཨཏིཝིབྷཱུཏཾནཱམ ཧོཏཱིཏི. ཨེཝཾ སེསེསུཔཱིཏི. ཝཱརབྷེདོ པནེཏྠ ཨནུབནྡྷཀོ, ཝིསུཾ སིདྡྷོཏི དུཝིདྷོ. ཏཏྠ ཨནུབནྡྷཀོ ཙཀྑུདྭཱརཱནུབནྡྷཀཱདིཝསེན པཉྩཝིདྷོ. ཨེཀེཀསྨིཉྩེཏྠ ཨཏཱིཏགཧཎཾ, སམུདཱཡ གཧཎཾ, ཝཏྠུགཧཎཾ, ནཱམགཧཎནྟི ཙཏྟཱརོ ཙཏྟཱརོ ཝཱརཱ. ཏེསུཙ ཏདཱརམྨཎཝཱརཱདཡོ ཡཐཱརཧཾ ཡོཛེཏབྦཱ. ཝིསུཾ སིདྡྷོ པན དིཊྛ ཝཱརོ, དིཊྛསམྦནྡྷཝཱརོ, སུཏཝཱརོ, སུཏསམྦནྡྷཝཱརོ, ཝིཉྙཱཏཝཱརོ, ཝིཉྙཱཏསམྦནྡྷཝཱརོཏི ཚབྦིདྷོ ཧོཏི. ཨེཏྠཙ སདྡྷཱ རུཙི ཨཱཀཱར པརིཝིཏཀྐཱདི ཝསེན པཝཏྟཝཱརཱ ཝིཉྙཱཏཝཱརོ, ཝིཉྙཱཏ སམྦནྡྷཝཱརོཏི ཝུཏྟཱཏི དཊྛབྦཱ. ཨཊྛསཱལིནིཡཾ པན སདྡྷཱརུཙིཡཱདིཝ སེནགཧིཏཾ ཨཱརམྨཎཾ ཏཐཱཔི ཧོཏི. ཨཉྙཐཱཔི ཧོཏི. ཏསྨཱ ཨཊྛཀཐཱཡཾ ན གཧིཏནྟི ཝུཏྟཾ. ཏཐཱཝཱ ཧོཏུ ཨཉྙཐཱཝཱ. ཝཱིཐིཙིཏྟཔཝཏྟིཡཱ སཏི གཧེཏབྦམེཝ. ཏཏྠ ཨེཀེཀསྨིཾཝཱརེ ཏདཱརམྨཎཝཱརཱདིཝསེན ཙཏྟཱརོ ཙཏྟཱརོ ཝཱརཱ. ཏེསུཙ ཀཱམ མཧགྒཏཱ ནུཏྟར པཉྙཏྟི ཝསེན པཙྩུཔྤནྣཱཏཱིཏཱནཱགཏཀཱལ ཝིམུཏྟཝསེནཙ ཨཱརམྨཎདྷམྨཱ ཡཐཱརཧཾ ཡོཛེཏབྦཱཏི. ཨེཏརཧི པན ཨཏཱིཏབྷཝངྒཝསེན ཏདཱརམྨཎཝསེན ཙ ཝཱརབྷེདཾ ཀཔྤེནྟི. ཏཏྠ ཨཏཱིཏབྷཝངྒཝསེན ཝཱརབྷེདཀཔྤནཾ ནིརཏྠཀཾ. ན ཧི མནོདྭཱརེ པཉྩདྭཱརེ ཝིཡ ཨཱརམྨཎཱནཾ ཁཎཝསེན བལཝ དུབྦལཏཱ སམྦྷཝོ ཨཏྠི. ཏདཱ ཨཝིཛྫམཱནཱནཾཔི ཨཏཱིཏཱནཱགཏཱནཾ ཀཱལཝིམུཏྟཱནཉྩ ཏཏྠ ཨཱཔཱཏཱགམནཏོཏི. ཨེཏྠ སིཡཱ, ཨེཀཱཝཛྫནཝཱིཐིཡཱ ཨཱརམྨཎཾནཱམ དྷམྨཏོཙ ཀཱལཏོཙ ཨབྷིནྣ མེཝ ཨིཙྪནྟི ཨཊྛཀཐཱཙརིཡཱ. ཨིམེཙ སཏྟཱ ཏཾ ཏཾ ཨཱཀཱརཾ སལླཀྑེཏྭཱ ཨཉྙམཉྙསྶ ཙིཏྟཾ ཛཱནནྟིཡེཝ. པརཙིཏྟཝིདུནིཡོ པན དེཝཏཱ ཨཱཀཱརསལླཀྑཎེན ཝིནཱཔི ཛཱནནྟི. ཏཏྠ པཙྩུཔྤནྣཾ པརསྶ ¶ ཙིཏྟཾ ཛཱནནཀཱལེ ཨཱཝཛྫནཾ བྷཱཝཡཾ པརསྶ ཙིཏྟཾ ཨཏྟནཱ སཧུཔྤནྣཾ. ཏཾ ཝཱ ཨཱཝཛྫཏི. ཨུདཱཧུ པརཏོ ཏཾ ཏཾ ཛཝནེན སཧུཔྤནྣཾཝཱ. ཛཝནཱནིཙ ཡཾ ཨཱཝཛྫནེན སཧུཔྤནྣཾ ཏཾ ཝཱ ཛཱནནྟི, པཙྩེཀཾ ཨཏྟནཱ སཧུཔྤནྣཾཝཱཏི. ཀིཉྩེཏྠ, ཡདི ཏཱཝ ཨཱཝཛྫནེན སཧུཔྤནྣཾ ཨཱཝཛྫཏི ཛཱནནྟིཙ. ཨེཝཾ སཏི དྷམྨཏོ ཨབྷིནྣཾ ཧོཏི. ཀཱལཏོ བྷིནྣཾ. ཏཉྷི ཙིཏྟཾ ཨཱཝཛྫནསྶ པཙྩུཔྤནྣཾ ཧོཏི. ཛཝནཱནཾ པན ཨཏཱིཏནྟི. ཨཐ པཙྩེཀཾ ཨཏྟནཱ སཧུཔྤནྣཾ ཨཱཝཛྫཏི ཛཱནནྟིཙ. ཨེཝཉྩ སཏི ཀཱལཏོ ཨབྷིནྣཾ ཧོཏི. དྷམྨཏོ བྷིནྣམེཝ. ཨཐཔི ཡཾ པཙྩེཀཾ སཧུཔྤནྣཾ ཛཱནནྟི. ཏདེཝ ཨཱཝཛྫཏི. ཨེཝཾཔི བྷིནྣམེཝ ཧོཏཱིཏི. ཨེཏྠ ཨཊྛཀཐཱཡཾ ཏཱཝ ཡཾ ཨཱཝཛྫནེན སཧུཔྤནྣཾ. ཏདེཝ ཨཱཝཛྫཏི ཛཱནནྟིཙཱཏི དྷམྨཏོ ཨབྷིནྣཾ ཝཏྭཱ ཏཾ ཙིཏྟཾ ནིརུདྡྷཾཔི ཨདྡྷཱཝསེན སནྟཏིཝསེནཙ གཧིཏཾ ཛཝནཱནཾཔི པཙྩུཔྤནྣམེཝ ཧོཏཱིཏི ཝིནིཙྪིཏཾ. ཨཱཙརིཡཱནནྡམཏེན པན པརསྶ ཏཾ ཏཾ ཨཱཀཱརཾ སལླཀྑེཏྭཱ ཏཾ ཏཾ ཨདྷིཔྤཱཡཛཱནནཀཱལེ ཨཱཝཛྫནཛཝནཱནི པཙྩེཀཾ ཨཏྟནཱ སཧུཔྤནྣཾ ཙིཏྟཾ ཨཱཝཛྫཏི ཛཱནནྟི ཙ. ན ཙེཏྠ དྷམྨཏོ ཀཱལཏོཙ བྷིནྣཾནཱམ ཧོཏི. སབྦེསཾཔི ཧི ཨཱརམྨཎཾ ཙིཏྟམེཝ ཧོཏི པཙྩུཔྤནྣཉྩཱཏི. ནཙ ཛཝནཱནི ནིརཱཝཛྫནཱནིནཱམ ཧོནྟི. ཨཱཝཛྫནེནཔི ཧི ཙིཏྟནྟེཝ ཨཱཝཛྫིཏཾ ཧོཏི. ཛཝནཱནིཙ ཙིཏྟནྟེཝ ཛཱནནྟཱིཏི. ཡདི པན ཨཱཝཛྫནེ ན ཙིཏྟནྟི ཨཱཝཛྫིཏེ ཛཝནཱནི རཱུཔནྟི ཛཱནནྟི. རཱུཔནྟིཝཱ ཨཱཝཛྫིཏེ ཙིཏྟནྟི ཛཱནནྟི, ནཱིལནྟིཝཱ ཨཱཝཛྫིཏེ པཱིཏནྟི ཛཱནནྟི. ཨེཝཾ སཏི ཛཝནཱནི དྷམྨཏོ ནིརཱཝཛྫནཱནི ནཱམ ཧོནྟི. ཏཐཱ ཨཏཱིཏནྟི ཨཱཝཛྫིཏེ པཙྩུཔྤནྣནྟི. ཨེཝཉྩ སཏི ཏཱནི ཀཱལཏོ ནིརཱཝཛྫནཱནིནཱམ ཧོནྟཱིཏི. ཡསྨཱ ཙ ཨཏཱིཏོ དྷམྨོ པཙྩུཔྤནྣསྶ དྷམྨསྶ ཨནནྟརཔཙྩཡེན པཙྩཡོཏི པཊྛཱནེ ཝུཏྟོ. ཏསྨཱ ཨིདྷ ཁཎཝསེནེཝ པཙྩུཔྤནྣཾ ཝཏྟུཾ ཡུཏྟཾ. ན ཨདྡྷཱསནྟཏི ཝསེནཱཏི. ཨིཏརཐཱ སབྦ ཝཱིཐིཙིཏྟཝཱརེསུཔི ཨཱརམྨཎཱནཾ ཨཏཱིཏཱདིབྷཱཝོ ཨདྡྷཱསནྟཏིཝསེནེཝ ཝཏྟབྦོ སིཡཱཏི. གཱཐཱཡཾ ཏཱིཎེཝཱཏི ཀིཙྩཝསེན ཏཱིཎི ཨེཝ. ཙིཏྟུཔྤཱདཱ དསེརིཏཱཏི ཙིཏྟུཔྤཏྟིཀྑཎཝསེན དས ཨཱིརིཏཱནི ཀཐིཏཱནི. ཝིཏྠཱ རེནཱཏི ¶ ཙིཏྟསརཱུཔཝིཏྠཱརེན. ཨེཏྠཱཏི མནོདྭཱརེ. ཨེཀཙཏྟཱལཱིསཱཏི པཉྩཝིཉྙཱཎམནོདྷཱཏཱུཧི ཝཛྫིཏཱནཾ ཀཱམཱཝཙརཙིཏྟཱནཾ ཝསེན ཨེཀཙཏྟཱལཱིསཾ. ཨེཏྠཱཏི པརིཏྟཛཝནཝཱརེ. [པརིཏྟཝཱརོ]

༡༣༨. ཝིབྷཱུཏཱཝིབྷཱུཏབྷེདོ ནཏྠི ཨེཀཾ ཝིབྷཱུཏམེཝ ལབྦྷཏཱིཏི ཨདྷིཔྤཱཡོ. ན ཧི ཨཝིབྷཱུཏེ ཨཱརམྨཎེ ཨཔྤནཱནཱམ སམྦྷཝཏཱིཏི. ཏཐཱ ཏདཱརམྨཎུཔྤཱདོཙ ནཏྠི. ན ཧི ཨཏིསནྟཏརཾ ཨཔྤནཱཛཝནཾ ཏདཱརམྨཎཾ ཨནུབནྡྷཏཱིཏི. ཏཏྠ ཧི ཚབྦཱིསཏི མཧགྒཏ ལོཀུཏྟར ཛཝནེསུ ཡཾཀིཉྩི ཛཝནཾ ཨཔྤནཱཝཱིཐིམོཏརཏཱིཏི སམྦནྡྷོ. ཉཱཎརཧིཏཾ དྭིཧེཏུཀཛཝནཾ ཨཐིརསབྷཱཝཏྟཱ ཨཔྤནཱཡ ཨནནྟརཱུཔནིསྶཡོ ནཧོཏཱིཏི ཝུཏྟཾ ཉཱཎསམྤཡུཏྟ ཀཱམཱཝཙརཛཝནཱནམཊྛནྣནྟི. པརིཀམྨོཔཙཱརཱནུལོམགོཏྲཏུནཱམེནཱཏི ཨེཏྠ ཨིནྡྲིཡསམཏཱདཱིཧི པརིཏོབྷཱགེཧི ཨཔྤནཱ ཀརཱིཡཏི སཛྫཱིཡཏི ཨེཏེནཱཏི པརིཀམྨཾ. ཨཔྤནཾ ཨུཔེཙྩ ཙརཏཱིཏི ཨུཔཙཱརོ. སམཱིཔཙཱརོཏི ཨཏྠོ. སམཱིཔཙརཎཉྩེཏྠ ཨཱསནྣེཀཱལེ ཨཔྤནཱཝཧསམཏྠབྷཱཝེན དཊྛབྦཾ. ཡསྶ པཝཏྟིཡཱ ཨཙིརཾ ཀཱལཾ ཨཔྤནཱ སམྦྷཝོ ཧོཏཱིཏི. ཨནུལོམནྟི ཨཔྤནཱཔཝཏྟིཡཱ པཙྩནཱིཀདྷམྨཝིདྷམནེན ཨཔྤནཱཡ ཨནུཀཱུལཾ ཨཔྤནཱཧིཏཾ ཨཔྤནཱ ཝཧནྟིཙྩེཝ ཨཏྠོ, ཡསྶ པཝཏྟིཡཱ ཨཔྤནཱ ཝིབནྡྷཀོ པཙྩནཱི ཀོནཱམ ནཏྠཱིཏི. གམཱིཡཏི བུཛ྄ཛྷཱིཡཏི ཨཏྠོ ཨེཏེནཱཏིཝོ. ཨབྷིདྷཱནཾ བུདྡྷིཙ. ཏཾ དུཝིདྷཾཔི གཝཾ ཏཱཡཏི རཀྑཏཱིཏི གོཏྟཾ. པརིཏྟ ཛཱཏིསངྑཱཏོ ཨནྭཡོ. གོཏྟཾ ཨབྷིབྷུཡྻཏི ཚིཛྫཏི ཨེཏྠཱཏི གོཏྲབྷུ. ཨེཏྠ ཙ ཙཏྟཱརིཔི ཛཝནཱནི པརིཀམྨཛཝནཱནཱིཏི ཝཱ ཨུཔཙཱརཛཝནཱནིཏིཝཱ ཨནུལོམཛཝནཱནཱིཏིཝཱ ཝུཙྩནྟིཡེཝ. གོཏྲབྷཱུཏི པན པཙྪིམསྶེཝ ནཱམཾ. ཨིདྷ པན ཙཏུནྣཾཔི ནཱམཱནཾ སངྒཧཎཏྠཾ པརིཀམྨོ པཙཱརཱནུལོམ གོཏྲབྷུནཱམེནཱཏི ཨེཝཾ ཝུཏྟནྟི དཊྛབྦཾ. ཨེཝཉྩ ཀཏྭཱ ཀསྨཱ པཐམམེཝ པརིཀམྨཾནཱམ. ནནུ ཨིཏརཱནིཔི ཨཔྤནཾ པརིསངྑརོནྟིཡེཝཱཏི ཨེཝམཱདིཀཱ ཙོདནཱ ཨནོཀཱསཱ ཧོཏཱིཏི. ཙཏུཀྑཏྟུཾ ཏིཀྑཏྟུམེཝཝཱཏི ཙཏུཀྑཏྟུམེཝཝཱ ཏིཀྑཏྟུམེཝཝཱ. ཏཏྠ པཐམེན ཨེཝ སདྡེན པཉྩམཾ གོཏྲབྷུསམྦྷཝོ པཊིཀྑིཏྟོ ཧོཏི. ཏདཱ ཧི ཛཝནཾ པཏིཏཾནཱམ ཧོཏི. པཝེདྷཏི ¶ ཀམྤཏི. ཀཱམགོཏྟཾ ཨབྷིཀྐམིཏྭཱ ཨུཔརིབྷཱུམནྟརཔྤཏྟིཡཱ པཙྩཡོ བྷཝིཏུཾ ན སཀྐོཏཱིཏི. དུཏཱིཡེན དུཏཱིཡཾ གོཏྲབྷུ སམྦྷཝོ པཊིཀྑིཏྟོ ཧོཏི. ཏདཱ ཧི ཨལདྡྷཱསེཝནཾ ཨནུལོམཾ ཨཏྟནོ ཨནནྟརེ ཙིཏྟཾ གོཏྲབྷུབྷཱཝཾ པཱཔེཏུཾ ན སཀྐོཏཱིཏི. ཨེཏེནེཝ པཉྩམཏོ པརཾ ཙཏུཏྠཏོཙ ཨོརཾ ཨཔྤནཱཡ ཨསམྦྷཝོ སཱདྷིཏོ ཧོཏཱིཏི. ཝཱསདྡེན པན མནྡཔཉྙསྶ ཙཏུཀྑཏྟུམེཝ. ན ཏིཀྑཏྟུཾ. ཏིཀྑཔཉྙསྶ ཏིཀྑཏྟུམེཝ. ན ཙཏུཀྑཏྟུནྟི དསྶིཏཾ ཧོཏི. ཨཊྛསཱལིནིཡཾ པན མནྡམཛ྄ཛྷིམ མཧཱཔཉྙཝསེན ཏིདྷཱ བྷིནྡིཏྭཱ པཉྩཀྑཏྟུཾཔི པརིཀམྨཛཝནཱནཾ ཨུཔྤཏྟི ཨནུཉྙཱཏཱ ཝིཡ དིསྶཏི. ཨིཏརཊྛཀཐཱསུ པན སུཊྛུ ཝིཙཱརེཏྭཱ པཊིསིདྡྷཏྟཱ སཱ ན གཧེཏབྦཱཝཱཏི.

ཡཾ པན ཝིབྷཱཝནིཡཾ

‘‘ཚཊྛཾ སཏྟམཾ བྷཝངྒསྶ ཨཱསནྣབྷཱཝེན པཔཱཏཱསནྣཔུརིསོ ཝིཡ ཨཔྤནཱཝསེན པཏིཊྛཱཏུཾ ན སཀྐོཏཱི’’ཏི ཝུཏྟཾ.

ཏཏྠ བྷཝངྒསྶ ཨཱསནྣབྷཱཝེནཱཏི བྷཝངྒབྷཱཝསྶ ཨཱསནྣ བྷཱཝེནཱཏི ཨཏྠོ. པཉྩམཛཝནཏོ ཧི པཊྛཱཡ ཛཝནསནྟཱནཾ ཨནུཔུབྦེན པརིཀྑཱིཎཛཝཾ ཧོཏི. བྷཝངྒབྷཱཝཏྠཱཡ པརིཎམཏཱིཏི. ཨེཝཉྩ ཀཏྭཱ པཔཱཏཱསནྣཔུརིསོཔམཱཔི ཨུཔཔནྣཱ ཧོཏཱིཏི. ནིརུདྡྷཱནནྟརམེཝཱཏི ནིརུདྡྷེ ཨནནྟརམེཝཱཏི པདཙྪེདོ. ཀསྶ ཨནནྟརནྟི, ཨཉྙསྶ ཨསུཏཏྟཱ ནིརུདྡྷསྶཱཏི ཨཏྠཏོ ལདྡྷམེཝཱཏི. ཡསྨཱ པན ཨཔྤནཱནཱམ ཨུཔྤཛྫམཱནཱ ཙཏུཏྠཏོཝཱ པཉྩམཏོཝཱ པཊྛཱཡ ཨུཔྤཛྫཏི. ན ཚཊྛཏོཝཱ སཏྟམཏོཝཱ. སཱཧི ཝསཱིབྷཱུཏཱཔི ཙཏུཏྠ པཉྩམེསུ ཨུཔྤཏྟིཾ ཨལབྷམཱནཱ སབྦསོ ནུཔྤཛྫཏིཡེཝ. ལབྷམཱནཱ པན དིཝསཾཔི ནིརནྟརཾ པཝཏྟཏིཡེཝ. ཏསྨཱ ཙཏུཏྠཾཝཱ པཉྩམཾཝཱཏི ཨིདཾ ཨཱདིམཏྟནིཡམནཏྠཾ ཝུཏྟནྟི དཊྛབྦཾ. ཏེནེཝ ཧི ཨཔྤནཱཝཱིཐིམོཏརཏཱིཏི ཙ ཏཏོཔརཾ ཨཔྤནཱཝསཱནེ བྷཝངྒཔཱཏོཝ ཧོཏཱིཏི ཙ ཝཀྑཏཱིཏི. ཡདི པན པཉྩམཏོ པཊྛཱཡ ཛཝནཾ པཏིཏཾ ནཱམ ཧོཏི. ཨེཝཾ སཏི ཀསྨཱ ཏཏོ པཊྛཱཡ པཏནཁེཏྟེ ཨཔྤནཱཛཝནཾ པཝཏྟཏཱིཏི. ཝུཙྩཏེ, ཧཏྠེ ¶ ཐཔིཏལེཌྜུསྶ པཏནཁེཏྟཾནཱམ ཧཏྠཏོ མུཏྟམཏྟེ ཧོཏི. ཨེཝཾ སནྟེཔི ཧཏྠབལེན ཁིཔིཏཾ ལེཌྜུ དཱུརཾཔི གཙྪཏིཡེཝ. ཨེཏྠ ཙ ལེཌྜུསྶ ཛཝོནཱམ ཧཏྠཛཝམཱུལཀོ ཧོཏི. ཧཏྠཛཝོཙ སརཱིརབལམཱུལཀོ. ཏཏྠ ལེཌྜུ ཝིཡ ཨཔྤནཱཛཝནཾ དཊྛབྦཾ. ལེཌྜུསྶ པཏནཁེཏྟཾ ཝིཡ ཙཏུཏྠཏོ པཙྪཱཀཱལོ. ཧཏྠཛཝོཝིཡ གོཏྲབྷུཛཝོ. སརཱིརབལཾ ཝིཡ པུརིམཱནཾ པརིཀམྨཛཝནཱནཾ བལཾ དཊྛབྦཾ. ཨུཏྟཱནསེཡྻསྶ བཱལདཱརཀསྶ བལཾ ཝིཡ ཨཱདིཀམྨིཀཝཱིཐིཡཾ ཀཱམཛཝནཱནཾ བལཾ. ཝུདྡྷིཔཏྟསྶ པུརིསསྶབལཾ ཝིཡ སམཱཔཏྟིཝཱིཐིཡཾ ཀཱམཛཝནཱནཾ བལཾ. ཡཐཱ ཙ བཱལདཱརཀེན ཁིཏྟཾ ལེཌྜུ ཧཏྠཏོ མུཏྟམཏྟེཔི པཏཏི. ཨེཝཾ ཨཱདིཀམྨིཀཝཱིཐིཡཾ ཨཔྤནཱཛཝནཾ ཨེཀཝཱརཾ ཛཝིཏྭཱ པཏཏི. ཡཐཱཝུདྡྷིཔཏྟེན ཁིཏྟཾ ལེཌྜུ པཏནཁེཏྟེཔི ཨཔཏིཏྭཱ དཱུརཾཔི དཱུརཏརཾཔི གཙྪཏི. ཏཐཱ སམཱཔཏྟིཝཱིཐིཡཾ ཨཔྤནཱཛཝནཾ ཙིརཾཔི ཙིརཏརཾཔི པཝཏྟཏཱིཏི. མཱུལཊཱིཀཱཡཾ པན ཨཔྤནཱཛཝནཾ པཏནཁེཏྟེ པཝཏྟཾཔི བྷཱུམནྟརཔཏྟིཡཱཝཱ ཨཱརམྨཎནྟརལདྡྷིཡཱཝཱ པཏིཏཾནཱམ ནཧོཏཱིཏི ཝུཏྟཾ. ཨེཏྠ སིཡཱ, ཀསྨཱ པཉྩམཏོ པཊྛཱཡ ཛཝནཾ པཏིཏནྟི ཝུཏྟཾ. ནནུ ཨཔཏི ཏཏྟཱ ཨེཝ སུཊྛུ བལཝབྷཱཝཏོ སཏྟམཛཝནཙེཏནཱ སཱིགྷཾ ཨནནྟརེ བྷཝེ ཝིཔཱཀདཱཡིནཱིཙ ཨཱནནྟརིཡཀམྨཉྩ ཧོཏི. མཛ྄ཛྷེ པཉྩཙེཏནཱ ཏཐཱ བལཝབྷཱཝཱབྷཱཝཏོ ཙིརེན ཏཏཱིཡབྷཝཱདཱིསུ ཝིཔཱཀདཱཡིནཱིཙ ཧོནྟི, ཨནནྟརིཡབྷཱཝཉྩ ན གཙྪནྟཱིཏི. ནཁོ པནེཏཾ ཨེཝཾ དཊྛབྦཾ. ཡདི ཧི སཱིགྷཾ ཝིཔཱཀདཱནཏཱཡ བལཝཏཱིནཱམ སིཡཱ. ཨེཝཾསཏི པཋམཙེཏནཱ སབྦབལཝཏཱིནཱམ སིཡཱ. སཱ ཧི ཨིམསྨིཾཡེཝ བྷཝེ ཝིཔཱཀཾ དེཏཱིཏི. ཨིདཾ པནེཏྠ སནྣིཊྛཱནཾ. ཨེཀ ཝསྶཛཱིཝཱིནཾ ཏིཎརུཀྑཱནཾ པརིཎཱམོཝིཡ པཐམཙེཏནཱཡ པརིཎཱམོ དཊྛབྦོ. དྭིཝསྶཛཱིཝཱིནཾ ཝིཡ སཏྟམཙེཏནཱཡ. མཧཱསཱལཱནཾ ཝིཡ མཛ྄ཛྷིམཙེཏནཱནནྟི. ཏཏྠ ཨེཀཝསྶཛཱིཝིནོ ཏིཎརུཀྑཱནཱམ ཨསཱརཱ ཧོནྟི. ཨསཱརཏྟཱཙ དུབྦལཱ ཨནདྡྷནིཡཱ ཨཙིརཊྛིཀཱ. ཏསྨཱ ཏེསཾ སཱིགྷཏརཔརིཎཱམོ ཧོཏི. ཏེ ཧི སཱིགྷཏརཾ རུཧནྟི. ཝུདྡྷིཾ ཝིརུལ༹ྷིཾ ཨཱཔཛྫནྟི. སཱིགྷཏརཾ པུཔྥནྟི ཕལནྟི པཏནྟི ཨནྟརདྷཱཡནྟི. ཨེཀཾ ནིདཱགྷསམཡཾ ཨཏིཀྐམིཏུཾ ནསཀྐོནྟི. དུཏཱིཡཾ ¶ ཝསྶཾ ན པཱཔུཎནྟི. ཨེཏྠཙ ནིདཱགྷསམཡོ ཝིཡ མརཎཀཱལོ ཝེདིཏབྦོ. དྭིཝསྶཛཱིཝིནོ པན ཐོཀཾ སཱརབྷཱུཏཱ ཧོནྟི. སཱརབྷཱུཏཏྟཱཙ ཐོཀཾ བལཝནྟཱ ཨདྡྷནིཡཱ. ཏཏོ ཡེཝཙཏེསཾ ཙིརཔརིཎཱམོ ཧོཏི. ཏེ ཧི པཐམཾ ཝསྶཾ རུཧནྟི ཝུདྡྷིཾ ཝིརུལ༹ྷིཾ ཨཱཔཛྫནྟི. པུཔྥིཏུཾཝཱ ཕལིཏུཾཝཱ ནསཀྐོནྟི. དུཏཱིཡཝསྶེཨེཝ པུཔྥནྟི ཕལནྟི པཏནྟི ཨནྟརདྷཱཡནྟི. དུཏཱིཡཾ པན ནིདཱགྷ སམཡཾ ཨཏིཀྐམིཏུཾ ན སཀྐོནྟི. ཏཏཱིཡཾ ཝསྶཾ ན པཱཔུཎནྟི. མཧཱསཱལཱ པན སབྦསཱརབྷཱུཏཱ ཧོནྟི. བལཝནྟཱ ཙིརཏརཊྛཱཡིནོ. ཏསྨཱ ཏེ སཎིཀམེཝ པརིཎཱམཾ གཙྪནྟི. ཏེ ཧི ཨེཀ དྭེ ཝསྶཱནི ཝིདཏྠིརཏནམཏྟཱཝ ཧོནྟི. ཝུདྡྷིཾ ཝིརུལ༹ྷིཾ ནཱཔཛྫནྟི. པུཔྥིཏུཾཝཱ ཕལིཏུཾཝཱ ན སཀྐོནྟི. ཨཏིཙིརཊྛཱཡིནོ པན ཧོནྟི. ཚ པཉྩ ཝསྶསཏཱནི ཋཏྭཱཝ པཏནྟི. ཨེཝམེཝ པཐམཛཝནཙེཏནཱ སབྦསོ ཨལདྡྷཱསེཝནཏཱཡ ཨསཱརཱ ཨབལཱ ཧོཏི. ཝིསུཾ ཨེཀཾ བྷཝཾ ནིབྦཏྟེཏུཾ ཨེཀཉྩ མརཎཀཱལཾ ཨཏིཀྐམིཏུཾ ན སཀྐོཏི. ཨིམསྨིཾ བྷཝེཨེཝ ཝིཔཙྩིཏྭཱཝཱ ཨཝིཔཙྩིཏྭཱཝཱ ཁིཡྻཏི. སཏྟམ ཛཝནཙེཏནཱ པན ལདྡྷཱསེཝནཏཱཡ ཐོཀཾ སཱརབྷཱུཏཱ ཧོཏི. ཝིསུཾ ཨེཀཾ བྷཝཾ ནིབྦཏྟེཏུཾ སཀྐོཏི. སཱརབྷཱུཏཏྟཱ ཡེཝཙ སཎིཀམེཝ པརིཎཱམཾ གཙྪཏི. ཨིམསྨིཾ བྷཝེ ཝིཔཙྩིཏུཾ ན སཀྐོཏི. བྷཝནྟརཾ པཏྭཱཝ ཝིཔཙྩཏི. པཏིཏཛཝནེསུ པན ཨནྟིམ ཛཝནཏཱཡ དུབྦལཏྟཱ དུཏཱིཡཾ མརཎཀཱལཾ ཨཏིཀྐམིཏུཾ ན སཀྐོཏི. དུཏཱིཡབྷཝེཨེཝ ཝིཔཙྩིཏྭཱཝཱ ཨཝིཔཙྩིཏྭཱཝཱ ཁིཡྻཏི. ཨཝསེསཱནཾ པན པཉྩནྣཾ མཛ྄ཛྷིམཙེཏནཱནཾ སུཊྛུ ལདྡྷཱསེཝནཱནཾ སཎིཀ ཏར པརིཎཏབྷཱཝོ ཝུཏྟནཡཱནུསཱརེན ཝེདིཏབྦོཏི. ནཾ ཀེཝལཉྩེཏྠ ཏིཎ རུཀྑོ པམཱཡ པཱཎོཔམཱཡཱཔི ཨཡམཏྠོ དཱིཔེཏབྦོ. ཡེཧིཀེཙི གབྦྷསེཡྻཀཱ པཱཎཱ ཨཔྤཱཡུཀཛཱཏིཀཱ ཧོནྟི. ཏེ སཱིགྷཏརཾ གབྦྷཝཱསཾ ཝསནྟི, སཱིགྷཏརཾ ཝིཛཱཡནྟི. ཨངྒམངྒཱནིཙ ནེསཾ སཱིགྷཏརཾ ཐཱམགཏཱནི ཧོནྟི. ཨིནྡྲིཡཱནིཙ སཱིགྷཏརཾ པརིཔཱཀགཏཱནི ཧོནྟི. ཏདཧེཝ ཨུཊྛཧིཏྭཱ གཙྪནྟི. གོཙརཾ གཎྷནྟི. ཨཏྟནོ ཨཏྟནོ ཝིསཡེ སཱིགྷཏརཾ ཝིཉྙུཏྟཾ ཨཱཔཛྫནྟི. སཱིགྷཏརཾ ཛིཎྞཱ ཧོནྟི མརནྟི. ¶ དཱིགྷཱཡུཀཛཱཏིཀཱནཾ པན གབྦྷཝཱསཱདཱིནི སབྦཱནི སཎིཀ མེཝ སིཛ྄ཛྷནྟཱིཏི. ཨེཏྠཙ མཧགྒཏ ཀུསལཱནི སཏྟམ ཛཝནཊྛཱནེ ཋིཏཱནཱིཏི ཝེདིཏབྦཱནི. པརིཀམྨཛཝནཱནི ཧི ཙིརཊྛིཏིཀཊྛེན སུཔཀྐ སཱལིདྷཉྙསདིསཱནི. ཨཔྤནཱཛཝནཱནི ཨཙིརཊྛིཏིཀཊྛེན སུཔཀྐ སཱལིབྷཏྟསདིསཱནཱིཏི ཏཱནིཔི ཨཙིརཏརཊྛིཏིཀཱནིཨེཝ ཧོནྟི. དུཏཱིཡེ བྷཝེ ཝིཔཙྩིཏྭཱཝཱ ཨཝིཔཙྩིཏྭཱཝཱ ཁིཡྻནྟི. ཨིམསྨིཾ བྷཝེཔི ཨཔྤཀེན ཀཱམཙྪནྡཱདིནཱ པཙྩནཱིཀདྷམྨེན པཊིབཱཧིཏཱནི སབྦསོ ཨཝིཔཱཀབྷཱཝཾ ཨཱཔཛྫནྟི. ཏསྨཱཏཱནི ཏེན པརིཡཱཡེན དུབྦལཱནི ནཱམ ཧོནྟཱིཏི.

ཡསྨཱ ཙ ཨཱནནྟརིཡཀམྨཱནཾ ཕལདཱནནིཡཏཏཱནཱམ ཀཱལནིཡམེན ཝིནཱ ན སམྦྷཝཏི. ཀཱལནིཡམོཙནཱམ ཨེཀནྟེན སཏྟམཛཝནསྶེཝ ཧོཏི. ན མཛ྄ཛྷིམཛཝནཱནཾ. ཏེསཉྷི ཨསུཀསྨིཾ བྷཝེཨེཝ ཝིཔཙྩནྟཱིཏི ཨེཝཾ ནིཡམོ ནཏྠཱིཏི. ཏསྨཱ དུཝིདྷསྶ ནིཡམསྶ སིདྡྷཏྟཱ ཨེཝ སཏྟམཛཝནཙེཏནཱཡ ཨནནྟརིཡཀམྨཏཱ སིདྡྷཱ ཧོཏི. ན བལཝཏརཏཱཡཱཏི ནིཊྛམེཏྠགནྟབྦནྟི. མཱུལཊཱིཀཱཡཾ པན ནནུཙ སཏྟམཛཝནཙེཏནཱཡ བལཝཏཱཡ ཨུཔཔཛྫཝེདནཱིཡབྷཱཝོ ཧོཏི ཨཱནནྟརིཡཏཱཔཱིཏི ཙོདནཾ སམུཊྛཱཔེཏྭཱ ཏཏྠཱཡཾ ཨདྷིཔྤཱཡོ སིཡཱ. པཊིསནྡྷིཡཱ ཨནནྟརཔཙྩཡབྷཱཝིནོ ཝིཔཱཀསནྟཱནསྶ ཨནནྟརཔཙྩཡབྷཱཝེན ཨནྟིམཛཝནཙེཏནཱཡ སུསངྑཏཏྟཱསཱ སཏྟམཛགནཙེཏནཱ ཨུཔཔཛྫཝེདནཱིཡཱ ཨཱནནྟརིཡཀཱཙ ཧོཏི. ན ཨཔཏིཏཛཝནཙེཏནཱ ཝིཡ བལཝཏཱཡཱཏི ཨུཏྟརཾ ཝདཏི. ཏཾ ཡུཏྟཾ ཝིཡ ན དིསྶཏི. ཨེཝཉྷི སཏི པཐམཛཝནཙེཏནཱ ཀསྶ ཨནནྟརཔཙྩཡབྷཱཝེན སུསངྑཏཏྟཱ དིཊྛདྷམྨཝེདནཱིཡཱནཱམ ཛཱཏཱཏི ཝཏྟབྦཱ ཧོཏཱིཏི. མཧཱཊཱིཀཱཡཾ པན དུབྦལཱཔི ཨནྟིམཛཝན ཙེཏནཱ སནྣིཊྛཱནཀིཙྩཝིསེསཡུཏྟཏཱཡ ཕལཝིཔཙྩནེ སཏྟིཝིསེ སཡུཏྟཱ ཧོཏཱིཏི ཨུཔཔཛྫཝེདནཱིཡཱ ཨཱནནྟརིཡཀཱཙ སཱ ཧོཏཱིཏི ཝུཏྟཾ. ཡཐཱརཧནྟི ཏཾ ཏཾ པུགྒལཱནུརཱུཔཾ. ཡཐཱབྷིནཱིཧཱར ཝསེནཱཏི ཏསྶ ཏསྶ པརིཀམྨབྷཱཝནཱ ཙིཏྟསྶ ཀསིཎནིམིཏྟཱ དཱིསུཝཱ ཨནིཙྩལཀྑཎཱདཱིསུཝཱ ཨབྷིནཱིཧརཎཱནུརཱུཔཾ. ཨཔྤནཱཝཱིཐིནྟི ཨཔྤནཱཔབནྡྷཾ. ཨིདཉྩ ཨནེཀཝཱརེ པཝཏྟཱནཾ ཨཔྤནཱཛཝནཱནཾ སངྒཧཎཏྠཾ ¶ ཝུཏྟཾ. ཏེནེཝཱཧ ཏཏོཔརཾ ཨཔྤནཱཝསཱནེ བྷཝངྒཔཱཏོཝ ཧོཏཱིཏི. ཏཏྠ ཏཏོཏི ཙཏུཏྠཏོཝཱ པཉྩམཏོ ཝཱ. ཨིམསྨིཾ ཨཏྠེ སཏི པཉྩམེཝཱ ཚཊྛེཝཱ ཨེཀནྟེན བྷཝངྒཔཱཏོ ཧོཏཱིཏི ཨཱཔཛྫཏི. ཏསྨཱ པུན ཨཔྤནཱཝསཱནེཏི ཝུཏྟཾ. བྷཝངྒཔཱཏོཝཧོཏི. ནཏྠི ཏདཱརམྨཎུཔྤཱདོཏི ཨདྷིཔྤཱཡོ.

ཝིབྷཱཝནིཡཾ པན

‘‘ཀཏྠཙི ཨཔྤནཱཝཱརེ སཏྟཛཝན པརིཔཱུརཎཏྠཾ ཨཔྤནཱཝསཱནེཔི ཀཱམཱཝཙརཛཝནཔྤཝཏྟིཾ ཝདནྟཱནཾ ནིཀཱཡནྟརིཀཱནཾ ཝཱདོ ཨིདྷ ཨེཝསདྡེན ནིཝཏྟིཏོ’’ཏི ཝུཏྟཾ.

ཏཏྠཱཏི ཏསྨིཾ ཨཔྤནཱཛཝནཝཱརེ. ནིརནྟརཔཝཏྟཱནཾ ཛཝནཱནཾ བྷིནྣཝེདནཏཱནཱམ ནཏྠཱིཏི ཝུཏྟཾ སོམནསྶསཧགཏ ཛཝནཱ ནནྟརནྟིཨཱདི.

[༡༣༢] ཝིབྷཱཝནིཡཾ པན

‘‘བྷིནྣཝེདནཱནཾ ཨཉྙམཉྙཾ ཨཱསེཝནཔཙྩཡབྷཱཝསྶ ཨནུདྡྷཊཏྟཱ’’ཏིཀཱརཎཾ ཝུཏྟཾ. ཏཾ ན སུནྡརཾ.

ན ཧི ཨིདྷ ཨཱསེཝནཔཙྩཡབྷཱཝོ པམཱཎཾ. ཀསྨཱ, ཨཱསེཝན པཙྩནིཀཱནཾ ཕལཛཝནཱནཾཔི པརིཀམྨཛཝནེཧི ཨཉྙམཉྙཉྩ ཨབྷིནྣཝེདནཏཱཡ ཨིཙྪིཏབྦཏྟཱཏི. པཱཊིཀངྑིཏབྦཱཏི ཨཝསྶཾ ཨིཙྪིཏབྦཱ.

[༡༣༣] ཝིབྷཱཝནིཡཾ པན

‘‘པསཾསིཏབྦཱ’’ཏི ཝུཏྟཾ. ཏཾ ན སུནྡརཾ.

ན ཧི ཏཱདིསོ སཾཝཎྞནཱཔདེསོ དིསྶཏཱིཏི. ཨརཧཏྟ ཕལེ མགྒཝཱིཐིཡཾ མགྒཀུསལཱནནྟརཾ པཝཏྟམཱནེཔི ཨཡཾ པུབྦཱཔར ནིཡམོ པརིཀམྨཛཝནེཧི ཨེཝ སཧ ཨཔྤནཱཛཝནཱནཾ ཧོཏཱིཏི ཀཏྭཱ ཀྲིཡཛཝནཱནནྟརཾ ཨརཧཏྟཕལཉྩཱཏི ཝུཏྟཾ. སུཁཔུཉྙམྷཱ པརཾ དྭཏྟིཾས ཨཔྤནཱཛཝནཱནི སམྦྷཝནྟི. ཨུཔེཀྑཀཱ པུཉྙམྷཱ པརཾ དྭཱདས, སུཁིཏཀྲིཡཏོ པརཾ ཨཊྛ. ཨུཔེཀྑཀཱ ཀྲིཡཏོ པརཾ ཚ ཨཔྤནཱཛཝནཱནི སམྦྷཝནྟཱིཏི ཡོཛནཱ. ཏཏྠ དྭཏྟིཾསཱཏི ཨརཧཏྟཕལསབྦཔཉྩམཛ྄ཛྷཱནཝཛྫིཏཱནཾ ཙཏུནྣཾ རཱུཔཀུསལཱནཾ སོལ༹སནྣཾ ¶ མགྒཀུསལཱནཾ དྭཱདསནྣཾ ཧེཊྛིམཕལཱནཉྩ ཝསེན དྭཏྟིཾས. དྭཱདསཱཏི པཉྩམཛ྄ཛྷཱནིཀཱནཾ རཱུཔཱརཱུཔམགྒཀུསལཱནཾ ཧེཊྛིམཕལཱནཉྩ ཝསེན དྭཱདས. ཨཊྛཱཏི པཉྩམཛ྄ཛྷཱནཝཛྫིཏཱནཾ ཙཏུནྣཾ རཱུཔཀྲིཡཱནཾ ཙཏུནྣཾ ཨརཧཏྟཕལཱནཉྩ ཝསེན ཨཊྛ. ཚཱཏི པཉྩམཛ྄ཛྷཱནིཀཱནཾ པཉྩནྣཾ རཱུཔཱརཱུཔཀྲིཡཱནཾ ཨརཧཏྟཕལསྶཙ ཝསེན ཚ. པུཐུཛྫནཱནཾ སེཀྑཱནཉྩ ཀཱམཔུཉྙཏིཧེཏུཏོ པརཾ ཙཏུཙཏྟཱལཱིས ཨཔྤནཱ སམྦྷཝནྟི. ཝཱིཏརཱགཱནཾ ཨརཧནྟཱནཾ ཏིཧེཏུཀཱམཀྲིཡཏོ པརཾ ཙུདྡས ཨཔྤནཱ སམྦྷཝནྟཱིཏི ཡོཛནཱ.

༡༣༩. སབྦཐཱཔཱིཏི ཨཏིམཧནྟཱདིནཱ སབྦཔཀཱརེནཔི. ཨེཏྠཱཏི ཨེཏེསུ ཡཐཱཝུཏྟེསུ པཉྩདྭཱར མནོདྭཱརེསུ. སབྦཏྠཱཔི པན ཨནིཊྛེ ཏིཝཱ པཱཋོ. ཏེནེཝ ཊཱིཀཱསུ སབྦཏྠཱཔཱིཏི པཉྩདྭཱར མནོདྭཱརེཔཱིཏི ཝུཏྟཾ. ཨིཙྪིཏབྦནྟི ཨིཊྛཾ. ཀེན ཨིཙྪིཏབྦནྟི. ལོཀིཡམཧཱཛནེན. ཏཏྠ ཙ ཨཏིཨུཀྐཊྛེ ཨཏིདུགྒཏེཙ ཛནེ ཨགཧེཏྭཱ མཛ྄ཛྷིམཀེན མཧཱཛནེན. ཨེཝཉྷི སཏི ཨིཊྛཱནིཊྛཱནཾ སུཊྛུཝཝཏྠཱནཾ ཧོཏཱིཏི ཨཊྛཀཐཱཡཾ ཝུཏྟཾ. ཡསྨིཾ ཨཱརམྨཎེཀུསལ ཝིཔཱཀཾ ཨུཔྤཛྫཏི, ཏདེཝ ཨིཊྛཾནཱམ. ཡསྨིཾ པན ཨཀུསལཝིཔཱཀཾ ཨུཔྤཛྫཏི, ཏདེཝ ཨནིཊྛཾནཱམ. ན ཧི སཀྐཱ ཨིཊྛཾཝཱ ཨནིཊྛཾཝཱ ཨཱརམྨཎཾ ཝིཔཱཀཙིཏྟཾ ཝཉྩེཏུནྟིཙ. ཨཔིཙ དྭཱརཝསེནཱཔི ཨིཊྛཱནིཊྛཏཱ ཝེདིཏབྦཱཏི ཙ ཝུཏྟཾ. ཏསྨཱ ཨིནྡྲིཡཱནིནྡྲིཡབདྡྷསནྟཱནགཏེ ཨེཀེ ཀསྨིཾ རཱུཔཀལཱཔེ ཝཎྞཱདཱིསུ རཱུཔེསུ ཀིཉྩི ཨིཊྛཾ ཧོཏི. ཀིཉྩི ཨནིཊྛཾ. ཀདཱཙི ཨིཊྛཾ ཧོཏི. ཀདཱཙི ཨནིཊྛཾ, ཏཏྠ ཀིཉྩི ཨིཊྛཾ ཧོཏི ཀིཉྩི ཨནིཊྛནྟི ཡཐཱ ཀིཾསྨིཾཙི ཨེཀསྨིཾ པུཔྥེ ཝཎྞོ ཨིཊྛོ. གནྡྷོ ཨནིཊྛོ, རསོ ཨནིཊྛོ, ཕོཊྛབྦོ ཨནིཊྛོ, ཁརསམྥསྶོ. ཀིཾསྨིཾཙི ཝཎྞོཔི ཨིཊྛོ, གནྡྷོཔི ཨིཊྛོ, རསཱདཡོ ཨནིཊྛཱཡེཝ. ཏཐཱ བུདྡྷསྶ སརཱིརགཏེཔི ཨེཀསྨིཾ ཀལཱཔེ ཝཎྞོ ཨིཊྛོ ཧོཏི. གནྡྷོ ཨནིཊྛོ. མཏཀཎྷསུནཁསྶ ཨུདྡྷུམཱཏསརཱིརེཔི ཝཎྞོ ཨིཊྛོ ཧོཏི. གནྡྷོ ཨནིཊྛོ. སོ ཧི ཝཎྞོ ཡདི ནིཝཏྠཔཱརུཏསྶ ཝཏྠསྶ བྷཝེཡྻ. ཏཾ ཝཏྠཾ མཧགྒྷཾ ཧོཏཱིཏི. ཀདཱཙི ཨིཊྛཾ ཀདཱཙི ཨནིཊྛནྟི ཨགྒིནཱམ ཧེམནྟེ ཨིཊྛོ སུཁཝིཔཱཀསྶ པཙྩཡོ. གིམྷེ ཨནིཊྛོ དུཀྑཝིཔཱཀསྶ པཙྩཡོ. སཱིཏུདཀཾ གིམྷེ ¶ ཨིཊྛཾ. ཧེམནྟེ ཨནིཊྛཾ. ཏཐཱ སུཁ སམྥསྶཾ ཝཏྠཾ པཀཏིཀཱཡེ ཨིཊྛཾ ཧོཏི. ཝཎཾ པཏྭཱ ཨནིཊྛཾ. ཏེནཝཱ སཎིཀཾ ཕུསནྟསྶ ཨིཊྛཾ, གཱལ༹ྷཾ ཕུསནྟསྶ ཨནིཊྛནྟི. ནཨིཊྛནྟི ཨནིཊྛཾ. ཏསྨིཾ ཨནིཊྛེ. ཨིཊྛེཏི ཨིཊྛམཛ྄ཛྷཏྟེ, ཀུསལཝིཔཱཀཱནི པཉྩཝིཉྙཱཎ སམྤཊིཙྪན སནྟཱིརཎ ཏདཱརམྨཎཱནཱིཏི སམྦནྡྷོ. སནྟཱིརཎ ཏདཱརམྨཎཱནི ཙེཏྠ ཨུཔེཀྑཱསཧགཏཱནིཨེཝ ཝེདིཏབྦཱནི. ཏེནེཝཱཧ ཨཏིཨིཊྛེཔནཱཏིཨཱདི. ཏཏྠ ཨབྷིཨིཊྛེཏི སུཝཎྞ རཛཏ མཎིཝཎྞཱདིཀེ ཧརིཏཱལཝཎྞཱདིཀེ ཀོསེཡྻ ཝཏྠཝཎྞཱདི ཀེ དེཝཙྪརཱཝཎྞཱདིཀེཙ ཨཏིཝིཡ ལོཀིཡམཧཱཛནེན ཨིཙྪིཏབྦེ ཚལཱ༹རམྨཎེ. ཡསྨཱ ཙེཏྠ ཨནིཊྛཱརམྨཎ སམཱཡོགོ ཨཀུསལཀམྨསྶེཝ ཝིཔཙྩནོཀཱསོ ཧོཏི. ཨིཊྛཱརམྨཎསམཱཡོགོཙ ཀུསལཀམྨསྶེཝ, ཏསྨཱ ཨནིཊྛེ ཨཀུསལཝིཔཱཀཱནེཝ. ཨིཊྛེ ཀུསལཝིཔཱཀཱནེཝཱཏི ཨཡཾ ནིཡམོ སིདྡྷོ. ཝེདནཱནིཡམོ པན ཨཱདཱསེ མུཁནིམིཏྟསྶ ཝིཡ ཨཏྟནོ ཨུསྶཱཧ བལེན ཝིནཱ ཀེཝལཾ ཀམྨབལེན ནིབྦཏྟཱནཾ ཝིཔཱཀཱནཾ པརིདུབྦལཏྟཱ ཏཐཱ ཏཐཱ ཀཔྤེཏྭཱ པཀཔྤེཏྭཱ གཧཎཱ བྷཱཝཏོ ཡཐཱརམྨཎམེཝ སིདྡྷོ ཧོཏཱིཏི དཊྛབྦཾ. ན ཀེཝལཉྩ ཝིཔཱཀཱནཾ ཨེཝ. ཨཐཁོ ཝིཔལླཱསརཧིཏེ ཁིཎཱསཝསནྟཱནེ པཝཏྟཱནཾ ཀཱམཀྲིཡཛཝནཱནཾ ཝིཡཐཱརམྨཎམེཝ ཝེདནཱཡོགོ ཧོཏཱིཏི ཨདྷིཔྤཱཡེན ཝུཏྟཾ ཏཏྠཱཔི སོམནསྶསཧགཏ ཀྲིཡཛཝནཱཝསཱནེ ཏིཨཱདི. ཏཏྠཱཔཱིཏི ཏེསུ ཝིཔཱཀེསུཔི. སོམནསྶསཧགཏ ཀྲིཡ ཛཝནཱ ཝསཱནེཏི བུདྡྷཝཎྞཱདིཀེ ཨཏིཨིཊྛཱརམྨཎེ པཝཏྟཱནཾ སོམནསྶ སཧགཏ ཀྲིཡཛཝནཱནཾ ཨཝསཱནེ. ཨུཔེཀྑཱསཧགཏ ཀྲིཡ ཛཝནཱ ཝསཱནེཏི ཨནིཊྛེ ཨིཊྛམཛ྄ཛྷཏྟེཙ པཝཏྟཱནཾ ཨུཔེཀྑཱསཧགཏཀྲིཡཛཝནཱནཾ ཨཝསཱནེ. ཨཡཉྩ ཀྲིཡཛཝནཱཝསཱནེ ཏདཱརམྨཎནིཡམོ ཨཊྛཀཐཱཡཾཔི ཝུཏྟོཡེཝ. ཝུཏྟཉྷི ཏཏྠ ཀཱམཱཝཙར ཏིཧེཏུཀ སོམནསྶ སཧགཏཀྲིཡདྭཡཾ ཏདཱརམྨཎཝསེན པཉྩནྣཾ སོམནསྶསཧགཏ ཝིཔཱཀཱནཾ ཨནནྟརཔཙྩཡོཏིཨཱདི. ཨིདཉྩ པཀཏིནཱིཧཱརེན པཝཏྟཱནཾ ཀྲིཡཛཝནཱནཾ ཝསེན ཝུཏྟཾ. ཏཐཱ རཱུཔེན པན ཙིཏྟཱཏིསངྑཱརེན པཝཏྟཱནཾ ¶ ཀྲིཡཛཝནཱནཾ ཨིཊྛེཔི ཨུཔེཀྑཱཝེདནཱཡོགོ ཨནིཊྛེཔི སོམནསྶ ཝེདནཱཡོགོ ཧོཏིཡེཝ. ཡཐཱཧ –

ཀཐཉྩཱནནྡ ཨརིཡོ ཧོཏི བྷཱཝིཏིནྡྲིཡོ. ཨིདྷཱནནྡ བྷིཀྑུནོ ཙཀྑུནཱ རཱུཔཾ དིསྭཱ ཨུཔྤཛྫཏི མནཱཔཾ ཨུཔྤཛྫཏི ཨམནཱཔཾ. ཨུཔྤཛྫཏི མནཱཔཱམནཱཔཾ. སོ སཙེ ཨཱཀངྑཏི པཊིཀཱུལེ ཨཔྤཊིཀཱུལསཉྙཱི ཝིཧརེཡྻནྟི. ཨཔྤཊིཀཱུལསཉྙཱི ཏཏྠ ཝིཧརཏི. སཙེ ཨཱཀངྑཏི ཨཔྤཊིཀཱུལེ པཊིཀཱུལ སཉྙཱི ཝིཧརེཡྻནྟི. པཊིཀཱུལསཉྙཱི ཏཏྠ ཝིཧརཏཱིཏི.

སབྦཾ ཨུཔརིཔཎྞཱསཀེ ཨིནྡྲིཡབྷཱཝནཱསུཏྟཾ ཨཱཧརིཏབྦཾ. ཏཏྠ ཨུཔྤཛྫཏི མནཱཔཾ ཨུཔྤཛྫཏི ཨམནཱཔཾ. ཨུཔྤཛྫཏི མནཱཔཱམནཱཔནྟི ཨེཏེན ཁཱིཎཱསཝཱནཾ ཀཱམཀྲིཡཛཝནཱནཾ པཀཏིནཱིཧཱརེན ཨིཊྛེ སོ མནསྶཡོགོ ཨནིཊྛེ ཨུཔེཀྑཱ ཡོགོ དསྶིཏོ ཧོཏི. སོསཙེ ཨཱཀངྑཏི པཊིཀཱུལེ ཨཔྤཊིཀཱུལསཉྙཱི ཝིཧརེཡྻནྟི. ཨཔྤཊིཀཱུལསཉྙཱི ཏཏྠ ཝིཧརཏཱིཏིཨཱདིནཱ པན ཏེསཾ ཏཐཱརཱུཔེ ཙིཏྟཱབྷིསངྑཱརེ སཏི ཨིཊྛེཔི ཨུཔེཀྑཱཡོགོ ཨནིཊྛེཔིསོམནསྶ ཡོགོ ཝུཏྟོ ཧོཏཱིཏི. ཡཾ པན ཁཱིཎཱསཝཱནཾ སཏཏཝིཧཱརསུཏྟེ ཨིདྷ བྷིཀྑུནཱ རཱུཔཾ དིསྭཱ ནེཝ སུམནོ ཧོཏི. ན དུམྨནོ. ཨུཔེཀྑཀོ ཝིཧརཏི སཏོ སམྤཛཱནོཏིཨཱདིནཱ ཚསུདྭཱརེསུ སོམནསྶ པཊིཀྑིཔནཾ ཝུཏྟཾ. ཏཾཔི ཏེསཾ ཏཐཱ རཱུཔཙིཏྟཱབྷིསངྑཱརབཱཧུལླཝསེན ཝུཏྟནྟི གཧེཏབྦཾ. ཡསྨཱ ཝཱ ཁཱིཎཱལཝཱཔི བུདྡྷརཱུཔདསྶནཱདཱིསུ པདྷཱནསཱརུཔྤཊྛཱནདསྶནཱདཱིསུ ཙ སོམནསྶིཏཱ ཧོནྟིཡེཝ. ཏསྨཱ ཀེཝལཾ རཱགཱདིཝཏྠུ བྷཱུཏཱནི རཱུཔཱརམྨཎཱདཱིནི ཨིཊྛཱནིཊྛཱནི སནྡྷཱཡ ཨིདཾ ཝུཏྟནྟིཔི ཡུཏྟཾ. ཨེཏྠ ཙ. ཀཐཾ པཊིཀཱུལེ ཨཔྤཊིཀཱུལསཉྙཱི ཝིཧརཏི. ཨནིཊྛསྨིཾ ཝཏྠུསྨིཾ མེཏྟཱཡཝཱ ཕརཏི. དྷཱཏུཏོཝཱ ཨུཔསཾཧརཏི. ཨེཝཾ པཊིཀཱུལེ ཨཔྤཊིཀཱུལསཉྙཱི ཝིཧརཏི. ཀཐཾ ཨཔྤཊིཀཱུལེ པཊིཀཱུལསཉྙཱི ཝིཧརཏི ཨིཊྛསྨིཾ ཝཏྠུསྨིཾ ཨསུབྷཱཡཝཱ ཕརཏི. ཨནིཙྩཏོ ཝཱ ཨུཔསཾཧརཏི. ཨེཝཾ ཨཔྤཊིཀཱུལེ པཊིཀཱུལསཉྙཱི ཝིཧརཏཱིཏིཨཱདིནཱ པཊིསམྦྷིདཱམགྒནཡེན ཨིདྷ ཏཐཱརཱུཔོ ཙིཏྟཱབྷིསངྑཱརོ ནཱམ ¶ ཝེདིཏབྦོ. ཨཔརེ པན ཝདནྟི-ཁཱིཎཱསཝཱ ཡདཱ དེཝཙྪརཱ ཝཎྞཱདིཀཾ ཨཏིཨིཊྛཱརམྨཎཾ ཨཱཔཱཏམཱ གཙྪཏི. ཏདཱ ཏཏྠ ཨསུབྷཱཡཝཱཕརནྟི. ཨནིཙྩཏོཝཱ ཨུཔསཾཧརནྟི ཏཏྠ ཨནིཊྛབྷཱུཏཾ ཨསུབྷ ལཀྑཎཾཝཱ ཨནིཙྩལཀྑཎཾཝཱ ཨུཔེཀྑཱ ཀྲིཡ ཛཝནཱནཾ ཨཱརམྨཎཾ ཧོཏི. ན ཨཏིཨིཊྛཱརམྨཎབྷཱུཏཾ དེཝཙྪརཱཝཎྞཱདིཀཾ.

ཏཐཱ ཡདཱ ཀུདྷིབྷཀུཊྛསརཱིརཱདིཀཾ ཨཏིཨནིཊྛཱརམྨཎཾ ཨཱཔཱཏམཱགཙྪཏི. ཏདཱ ཏཏྠ མེཏྟཱཡཝཱ ཕརནྟི. དྷཱཏུཏོཝཱ ཨུཔསཾཧརནྟི. ཏཏྠ ཨིཊྛབྷཱུཏཾ ཨཝེརཏཱཝཱདིལཀྑཎམེཝ སོམནསྶཀྲིཡཛཝནཱནཾ ཨཱརམྨཎཾ ཧོཏི. ན ཨཏིཨནིཊྛབྷཱུཏཾ ཀུདྷིཏ ཀུཊྛསརཱིརཱདིཀཾ. ཏསྨཱ ཏཱནི ཛཝནཱནི ཀཱམཝིཔཱཀཱནིཝིཡ སབྦདཱཔི ཨཱརམྨཎཱནུརཱུཔམེཝ ཝེདནཱཡུཏྟཱནི ཧོནྟཱིཏི. ཏཾ ནཡུཛྫཏི. ན ཧི ཏཱནི ལཀྑཎཱནི དེཝཙྪརཱཝཎྞཱདཱིཧི ཝིནཱ ཝིསུཾ ལབྦྷནྟི. ཏེཧི པན སཧེཝ ལབྦྷནྟི. ཏསྨཱ ཡཐཱ ཨཱནིསཾསདསྶནེན བྷཱཝནཱཡ པུབྦཱཔརིཡཝིསེསདསྶནེནཙ ཨུདྡྷུམཱཏཀཱདཱིསུ ཨཏི ཨནིཊྛེསུཔི སོམནསྶུཔྤཏྟི ཨཊྛཀཐཱཡཾ ཝུཏྟཱ. ཡཐཱཙ མཧཱ མོགྒལཱནཏྠེརསྶ བུདྡྷསུབུདྡྷཏཱདསྶནེན ཨཏྟསམྤཏྟིདསྶནེནཙ ཨནིཊྛབྷཱུཏེཔི ཨཊྛིཀངྐལིཀཔེཏརཱུཔེ སོམནསྶུཔྤཏྟི པཱལི༹ཡཾ ཝུཏྟཱ. ཡཐཱ ཙ མཧཱཀསྶཔཏྠེརསྶ ཏཐཱརཱུཔེན ཙིཏྟཱབྷི སངྑཱརེན ཀུཊྛིནོ ཧཏྠཏོ ལདྡྷེ ཨནིཊྛབྷཱུཏེ པཱུཏིཀུམྨཱསེཔི སོམནསྶུཔྤཏྟི ཨཊྛཀཐཱཡཾ ཝུཏྟཱ. ཨེཝམེཝཾ ཨིདྷཔི ཨསུབྷཕརཎཱདིཀོ ཙིཏྟཱབྷིསངྑཱརོ ཨཏིཨིཊྛེ ཨུཔེཀྑཱཛཝནཱནཾ ཨཏིཨནིཊྛེཙ སོམནསྶཛཝནཱནཾ ཨུཔྤཏྟིཡཱ པཙྩཡོ ཧོཏཱིཏི དཊྛབྦཾ. ཨཡཉྷི ཨཱརམྨཎཱནཾ ཨིཊྛཱནིཊྛབྷཱཝོནཱམ ལོཀིཡམཧཱཛནཱནཾ ཨིཙྪཱཝསེན སིདྡྷོ ཧོཏི ཨགམྦྷཱིརོ ཝིཔལླཱསདྷམྨཱནཾ ཀིལེསཱནཉྩ ཝཏྠུབྷཱུཏོ. ཡཐཱཧ-ཏཏྠ ཀཏམཾ རཱུཔཾ ཧཱིནཾ. ཡཾ རཱུཔཾ ཏེསཾ ཏེསཾ སཏྟཱནཾ ཨུཉྙཱཏཾ ཨཝཉྙཱཏནྟིཨཱདི. ཨེཏྠ ཧི ཏེསཾ ཏེསཾ སཏྟཱནནྟི ཨེཏེན ཨཱརམྨཎདྷམྨཱནཾ ཨིཊྛཱནིཊྛབྷཱཝོ ནཱམ ལོཀིཡམཧཱཛན སམྨུཏིཡཱ སིདྡྷོཏི དསྶེཏི. ཏསྨཱ ཡཉྩ ཨཔྤཧཱིནཝིཔལླཱསཱནཾ ལོཀིཡམཧཱཛནཱནཾ དེཝཙྪརཱཝཎྞཱ དཱིསུ ཨཏི ཨིཊྛེསུ ཨཏིཨིཊྛཱཀཱརཏོ གཧཎཾ. ཡཉྩ བུདྡྷཝཎྞཱ དཱིསུ ¶ ཨཏིཨིཊྛེསུ ཨནིཊྛཱཀཱརཏོ གཧཎཾ. ཏདུབྷཡཾཔི ཏེསཾ ཝིཔལླཱསཝསེནེཝ ཧོཏི. ཡཾཔན པཉྙཝནྟཱནཾ བུདྡྷསཱཝཀཱནཾ དེཝཙྪརཱཝཎྞཱདཱིསུ ཨནིཊྛཱཀཱརཏོ གཧཎཾ. ཡཉྩ བུདྡྷཝཎྞཱདཱིསུ ཨཏིཨིཊྛཱཀཱརཏོ གཧཎཾ. ཏདུབྷཡཾཔི པཉྙཱབལེནེཝ ཧོཏཱིཏི ཝེདིཏབྦཾ.

[༡༣༤] ཡཾ པན ཝིབྷཱཝནིཡཾ

‘‘ཀུསལཱཀུསལཱནཾ པན ཨཔྤཧཱིནཝིཔལླཱསེསུ སནྟཱནེསུ པཝཏྟིཡཱ ཨཏིཨིཊྛེཔི ཨིཊྛམཛ྄ཛྷཏྟཨནིཊྛཱཀཱརཏོ ཨནིཊྛེཔི ཨིཊྛཨིཊྛམཛ྄ཛྷཏྟཱཀཱརཏོ གཧཎཾ ཧོཏཱིཏི’’ ཝུཏྟཾ.

ཡཉྩ ཏཏྠ

‘‘ཁཱིཎཱསཝཱནཾ ཙིཏྟཝིཔལླཱསཱབྷཱཝེན ཀྲིཡཛཝནཱནིཔི ཡཐཱརམྨཎམེཝ པཝཏྟནྟཱི’’ཏི ཝུཏྟཾ. ཏཾ ཝིཙཱརེཏབྦམེཝ.

ཡེ ཧི ཏེ དྷམྨ ཙཀྑུརཧིཏཱ ཧོནྟི. ཏེཡེཝ ཝིཔལླཱས ཝསེན ཙིཏྟཝསཱནུགཱ ཨཱརམྨཎཝསཱནུགཱཙ ཧོནྟཱིཏི ཀུསལཱ ཀུསལཱནིཡེཝ ཡེབྷུཡྻེན ཡཐཱརམྨཎཾ པཝཏྟནྟི. ན པན ཀྲིཡ ཛཝནཱནི. ན ཧི ཁཱིཎཱསཝཱ ལོཀིཡམཧཱཛནསམྨཏེསུ ཨིཊྛཱནིཊྛེསུ ཙིཏྟཝསཱནུགཱ ཨཱརམྨཎཝསཱནུགཱཙ ཧོནྟཱིཏི. ཡཐཱཧ –

རཱུཔཱ སདྡཱ གནྡྷཱ རསཱ, ཕོཊྛབྦཱཙ མནོརམཱ;

ཨིཊྛདྷམྨཱ ཨནིཊྛཱཙ, ན པཝེདྷནྟི པཎྜིཏཱཏི.

ཏསྨཱ སོམནསྶ ཀྲིཡ ཛཝནཱནནྟརཾཔི ཏདཱརམྨཎཱནི སོམནསྶུཔེཀྑཱ ཝེདནཱཡུཏྟཱནི ཨེཝ སིཡུཾ. ཏཐཱ ཨུཔེཀྑཱཀྲིཡཛཝནཱནནྟརཾཔཱིཏི. མཱུལཊཱིཀཱཡཾ པནེཏྠ པཊྛཱནེ-ཀུསལཱཀུསལེ ནིརུདྡྷེ ཝིཔཱཀོ ཏདཱརམྨཎཏཱཨུཔྤཛྫཏཱིཏི ཀུསལཀུསལཱནནྟརཾ ཨེཝ ཏདཱརམྨཎཾ ཝུཏྟཾ. ན ཨབྱཱཀཏཱནནྟརཾ ནཙ ཀཏྠཙི ཀྲིཡཱནནྟརཾ ཏདཱརམྨཎསྶ ཝུཏྟཊྛཱནཾ དིསྶཏི. ཝིཛྫམཱནེཙ ཏསྨིཾ ཨཝཙནེ ཀཱརཎཾནཏྠི. བྷཝངྒཉྩནཱམེཏཾ ནདིསོཏོཝིཡ པཊིསོཏགཱམིནཱཝཾ སཝིཔྥཱརིཀཾ ཨེཝཛཝནཾ ཨནུབནྡྷཏཱིཏི ཡུཏྟཾ. ན པན ཚལ༹ངྒུཔེཀྑཱཝཏོ ཁཱིཎཱསཝསྶ སནྟཝུཏྟིཀྲིཡཛཝནཾ. ཏསྨཱ ཀྲིཡཛཝནཱནནྟརཾ ཏདཱརམྨཎཝིདྷཱནཾ ¶ ཨུཔཔརིཀྑིཏབྦནྟི ཝུཏྟཾ. པཊྛཱནེ པན ཀུསལཏྟིཀེ པཉྷཱ ཝཱརེ ཨཱརམྨཎཔཙྩཡཝིབྷངྒེ ཏཱིསུ ཨབྱཱཀཏཔདཱཝསཱནཝཱརེསུ སེཀྑཔུཐུཛྫནཱནཾ ཏདཱརམྨཎམེཝ པདྷཱནཾ ཧོཏི. ན ཀུསལཱ ཀུསལཛཝནཾ. ཏསྨཱ དྭཱིསུཔི ཝཱརེསུ སེཀྑཱཝཱ པུཐུཛྫནཱཝཱ ཀུསལཾ ཨནིཙྩཏོ ཝིཔསྶནྟི ཀུསལཾ ཨསྶཱདེནྟཱིཏིཨཱདིཀཾ ཝཏྭཱ པུནཙ ཀུསལེ ནིརུདྡྷེ ཨཀུསལེ ནིརུདྡྷེ ཝིཔཱཀོ ཏདཱརམྨཎཏཱ ཨུཔྤཛྫཏཱིཏི ཝུཏྟཾ. ཨརཧཏོ པན ཛཝནཾཔི ཏདཱརམྨཎཾཔི པདྷཱན མེཝ ཧོཏི. ཏསྨཱ ཨརཧཱ ཀུསལཾ ཨནིཙྩཏོ དུཀྑཏོ ཨནཏྟཏོ ཝིཔསྶཏི ཨིཙྩེཝ ཝུཏྟཾ. ནཔན ཝུཏྟཾ ཀྲིཡཱབྱཱཀཏེ ནིརུདྡྷེ ཝིཔཱཀོ ཏདཱརམྨཎཏཱ ཨུཔྤཛྫཏཱིཏི. ཡདི ཙེཏཾ ཝུཙྩེཡྻ ཏདཱརམྨཎམེཝ པདྷཱནཾ ཀཏཾནཱམ སིཡཱ. ཨཝུཏྟེཔིཙ ཏསྨིཾ ཝིཔསྶཏཱིཏི ཨིམིནཱ ཏདཱརམྨཎཾཔི གཧིཏམེཝ ཧོཏཱིཏི. ཏསྨཱ ཡཾ ཝུཏྟཾ པཊྛཱནེ ཀུསལཱ.ལ. ཨུཔྤཛྫཏཱིཏི ཀུསལཱཀུསལཱནནྟརམེཝ ཏདཱརམྨཎཾ ཝུཏྟཾ. ན ཨབྱཱཀཏཱནནྟརནྟིཙ. ཝིཛྫམཱནེཙ ཏསྨིཾ ཨཝཙནེ ཀཱརཎཾ ནཏྠཱིཏི ཙ ཝུཏྟཾ. ཏཾ ན ཡུཛྫཏིཡེཝ. ཨནནྟརཔཙྩཡཝིབྷངྒེསུ པན ཀུསལཾ ཝུཊྛཱནསྶ ཨཀུསལཾ ཝུཊྛཱནསྶ ཀྲིཡཾ ཝུཊྛཱནསྶཱཏིཙ ཝིཔཱཀདྷམྨདྷམྨཱ ཁནྡྷཱ ཝུཊྛཱནསྶ ནེཝཝིཔཱཀ ནཱཝིཔཱཀདྷམྨདྷམྨཱ ཁནྡྷཱ ཝུཊྛཱནསྶཱཏིཙ ཨེཝམཱདིནཱ ཀྲིཡཛཝནཱནནྟརཾ བྷཝངྒེན སཧ ཏདཱརམྨཎསྶཔི ཝུཊྛཱནནཱམེན ཝུཏྟཊྛཱནཾ དིསྶཏིཡེཝ. ཏསྨཱ ཡཉྩ ཝུཏྟཾ ན ཀཏྠཙི ཀྲིཡཱནནྟརཾ ཏདཱརམྨཎསྶ ཝུཏྟཊྛཱནཾ དིསྶཏཱིཏི. ཏཾཔི ན ཡུཛྫཏིཡེཝ. ནཙ ཚལ༹ངྒུཔེཀྑཱཝ ཏོ ཁཱིཎཱསཝསྶ སནྟཝུཏྟིཔི ཀྲིཡཛཝནཾ སཝིཔྥཱརིཀཾ ན ཧོཏི. ཀུསལཛཝནསྶ ཝིཡ ཏསྶཔི ཨོལཱ༹རིཀཀཱཡཝཙཱི པཡོགསམུཊྛཱ པནཏོཏི.

[༡༣༥] ཝིབྷཱཝནིཡཾ པན

ཊཱིཀཱཝཱདསྶ ཨུཏྟརཾ ཝདནྟེན ཡཾ ཝུཏྟཾ ‘‘ཡདི ཨབྱཱཀཏཱ ནནྟརཾཔི ཏདཱརམྨཎཾ ཝུཙྩེཡྻ. པརིཏྟཱརམྨཎེ ཝོཊྛབྦནཱ ནནྟརཾཔི ཏསྶ པཝཏྟིཾ མཉྙེཡྻུནྟི ཀྲིཡཛཝནཱནནྟརཾ ཏདཱ རམྨཎཾ ན ཝུཏྟ’’ནྟི. ཏཾ ན སུནྡརཾ.

ན ¶ ཧི པཊྛཱནེ ཨིམསྨིཾ ཝུཏྟེ ཨིདཾནཱམ མཉྙེཡྻུནྟི ཨཝུཏྟཾནཱམ ཨཏྠི. ན ཙ ཨརཧཱ ཀུསལཾ ཨནིཙྩཏོ དུཀྑཏོ ཨནཏྟཏོ ཝིཔསྶཏཱིཏིཨཱདིནཱ ཝིཔསྶནཱཙཱརཝསེན ཝུཏྟཊྛཱནེ པཉྩདྭཱརིཀ པརིཏྟཱརམྨཎ ཝཱརཔསངྒོ ཨཏྠཱིཏི. དོམནསྶ.ལ. ཨུཔེཀྑཱ སཧགཏཱནེཝ བྷཝནྟི. ན སོམནསྶསཧགཏཱནི. ཀསྨཱ, སོམནསྶ དོམནསྶཱནཾ ཨཉྙམཉྙཝིརུདྡྷཏྟཱ. ཏེནེཝ ཧི པཊྛཱནེ ཏེསཾ ཨིཏརཱིཏརཱནནྟརཔཙྩཡཏཱ ནཝུཏྟཱཏི. ཨེཏྠཙ ཀྲིཡཛཝན དོམནསྶཛཝནཱན མེཝ ཨནནྟརཾ ཏདཱརམྨཎ ནིཡམཾ དསྶེནྟེན ཐེརེན ཨིཏརེསཾ ཀུསལཱཀུསལཛཝནཱནཾ ཨནནྟརཾ པན ཏཱདིསོ ནིཡམོ ནཏྠཱིཏི དསྶིཏོ ཧོཏི. ཏསྨཱ ཨཊྛནྣཾ ཀཱམཀུསལཱནཾ ཨཊྛནྣཾ ལོབྷམཱུལཱནཾ དྭིནྣཾ མོཧམཱུལཱནནྟི ཨཊྛཱརསནྣཾ ཛཝནཱནཾ ཨནནྟརཾ ཨཱརམྨཎཱནུརཱུཔཾ སབྦཱནི ཏདཱརམྨཎཱནི བྷཝངྒཱནི ཙ པཝཏྟནྟི. ཡེབྷུཡྻེན པན ཨཀུསལཛཝནཱནནྟརཾ ཏདཱརམྨཎཾ ཨཧེཏུཀམེཝ. དྭིཧེཏུཀཛཝནཱནནྟརཾ དྭིཧེཏུཀམེཝ. ཏིཧེཏུཀཛཝནཱནནྟརཾ ཏིཧེཏུཀམེཝཱཏི ཨཡཾ ཡེབྷུཡྻནིཡམོ. ཡསྶ པན དྭིཧེཏུཀཱནིཝཱ ཏིཧེཏུཀཱནིཝཱ ཀུསལཛཝནཱནི བཧུལཾ སམུདཱཙརནྟི. ཏསྶ ཀདཱཙི ཨཀུསལཛཝནེསུ ཛཝིཏེསུ ཨཀུསལཱནནྟརཾཔི དྭིཧེཏུཀཱནིཝཱ ཏིཧེཏུཀཱནིཝཱཏདཱརམྨཎཱནི པཝཏྟནྟི. ཡསྶ ཨཀུསལཛཝནཱནི བཧུལཾ སམུདཱཙརནྟི. ཏསྶ ཀདཱཙི དྭིཧེཏུཀེསུཝཱ ཏིཧེཏུཀེསུཝཱ ཀུསལཛཝནེསུ ཛཝིཏེསུ ཀུསལཱནནྟརཾཔི ཨཧེཏུཀཏདཱརམྨཎཱནི པཝཏྟནྟི. ཝུཏྟཉྷེཏཾ པཊྛཱནེ-ཨཧེཏུཀེ ཁནྡྷེ ཨནིཙྩཏོ.ལ. དོམནསྶཾ ཨུཔྤཛྫཏི. ཀུསལཱཀུསལེ ནིརུདྡྷེ སཧེཏུཀོ ཝིཔཱཀོ ཏདཱ རམྨཎཏཱ ཨུཔྤཛྫཏི. ཨཧེཏུཀོ ཝིཔཱཀོ ཏདཱརམྨཎཏཱ ཨུཔྤཛྫཏཱིཏི. ཨེཀཱནིཧི ཏདཱརམྨཎཱནིནཱམ པཊིསནྡྷིཛནཀེན ཨེཀེན ཀམྨེན ནིབྦཏྟཱནིཔི ནཱནཱཝཱིཐཱིསུ ནཱནཱཔྤཀཱརཱནི ཧོནྟི. པཝཏྟི ཝིཔཱཀཛནཀེཧི པན ནཱནཱཀམྨེཧི ནིབྦཏྠེསུ ཝཏྟབྦམེཝ ནཏྠཱིཏི. ཏསྨཱཏི ཡསྨཱ དོམནསྶཱནནྟརཾ སོམནསྶུཔྤཏྟི ནཱམ ནཏྠི, ཏསྨཱ. སོམནསྶཔཊིསནྡྷིཀསྶཱཏི ཙཏཱུསུ སོམནསྶམཧཱ ཝིཔཱཀེསུ ཨེཀམེཀེན གཧིཏ པཊིསནྡྷིཀསྶ སཏྟསྶ. ཏདཱ རམྨཎསམྦྷཝོཏི ¶ ཏདཱརམྨཎུཔྤཏྟི ཀཱརཎཾ. ཏདཱརམྨཎུཔྤཏྟི ཡེཝཝཱ. ཡཾཀིཉྩཱིཏི ཨིཊྛཱནིཊྛབྷཱུཏེསུ རཱུཔཱརམྨཎཱདཱིསུ ཡཾཀིཉྩི. པརིཙིཏཔུབྦནྟི ཨིམསྨིཾ བྷཝེཡེཝ ཏངྑཎཏོ པུརིམཁཎེསུ གཧཎ བཧུལཏཱ ཝསེན པརིཙིཏཾ. ཨབྷིཎྷསེཝིཏནྟི ཨཏྠོ. པརིཏྟཱརམྨཎནྟི པརིཏྟདྷམྨབྷཱུཏཾ ཨཱརམྨཎཾ. ཨཱརབྦྷཱཏི ཨཱལམྦིཏྭཱ. ཨུཔེཀྑཱསཧགཏ སནྟཱིརཎནྟི དྭཱིསུ ཨུཔེཀྑཱསཧགཏསནྟཱི རཎེསུ ཨིཊྛེ ཀུསལཝིཔཱཀཾ ཨནིཊྛེ ཨཀུསལཝིཔཱཀཾ ཨུཔེཀྑཱ སཧགཏ སནྟཱིརཎཾ. ཡེསཾ པན པཀཏིཡཱ ཨིཏརཱནི ཙཏྟཱརི ཨུཔེཀྑཱསཧགཏ ཝིཔཱཀཱནི བཧུལཾ པཝཏྟནྟི. ཏེསཾ ཏཱནིཔི ཨཱགནྟུཀབྷཝངྒཾ ནཧོནྟཱིཏི ན ཝཏྟབྦཱནི. ཨཊྛཀཐཱཡཾ པན མཧཱདྷམྨརཀྑིཏཏྠེརཝཱདེ ཡེབྷུཡྻནིཡམསོཏེ པཏིཏཏྟཱ ཨཀུསལཛཝནཱནུརཱུཔཾ ཨཧེཏུཀཾ ཨུཔེཀྑཱ སནྟཱིརཎ དྭཡ མེཝ ཝུཏྟཾ. ཏེནེཝ ཧི པརཏོ ཐེརཝཱདཱནཾ ཝིཙཱརིཏཊྛཱནེ ཨཀུསལཛཝནཱནནྟརཾ ཨཧེཏུཀ ཏདཱརམྨཎ མེཝ དཱིཔེནྟསྶ ཏསྶ ཐེརཝཱདསྶ ཨཔརིཔུཎྞཝཱདབྷཱཝཾ དསྶེཏྭཱ ཡདཱ ཀུསལཛཝནཱནཾ ཨནྟརནྟརཱ ཨཀུསལཾ ཛཝཏི, ཏདཱ ཀུསལཱཝསཱནེ ཨཱཙིཎྞ སདིསམེཝ ཨཀུསལཱཝསཱནེ སཧེཏུཀཾ ཏདཱརམྨཎཾ ཡུཏྟནྟི ཨཊྛཀཐཱཡཾ ཝུཏྟཾ. ཏདཱརམྨཎེཙཡུཏྟེ ཨེཏཾཔི ཡུཛྫཏིཡེཝ. ཏསྨཱ ཚཔི ཨུཔེཀྑཱསཧགཏཝིཔཱཀཱནི ཨཱགནྟུཀབྷཝངྒཾ ཧོནྟིཡེཝཱཏི དཊྛབྦཾ. ཨེཏྠཙ ཨུཔེཀྑཱཔཊིསནྡྷིཀསྶ ཏཱཝ ཨཏིམཧནྟཱཏི ཝིབྷཱུཏེསུཔི བུདྡྷཝཎྞཱདཱིསུ ཨབྷིཨིཊྛཱརམྨཎེསུ དོམནསྶཾ ཨུཔྤཱདེནྟསྶ ཏདཱརམྨཎསམྦྷཝོ ནཏྠཱིཏི དོམནསྶ ཛཝནཱནནྟརཾ བྷཝངྒཔཱཏོཝ ཧོཏི. སོམནསྶཔཊིསནྡྷིཀསྶ པན སབྦེསུཔི ཨིཊྛཱནིཊྛབྷཱུཏེསུ མཧནྟེསུ ཨཝིབྷཱུཏེསུཙ ཚལཱ༹རམྨཎེསུ དོམནསྶ ཨུཔྤཱདེནྟསྶ ནེཝ ཏདཱརམྨཎསམྦྷཝོ ཨཏྠི. ནཙམཱུལབྷཝངྒ སམྦྷཝོཏི ཀཏྭཱ དོམནསྶཱནནྟརཾ ཚསུ ཨུཔེཀྑཱསཧགཏཝིཔཱཀེསུ ཡཐཱརཧཾ ཨེཀཾ ཨཱགནྟུཀ བྷཝངྒབྷཱཝེན པཝཏྟཏི. ཏཐཱ ཏསྶེཝ བུདྡྷཝཎྞཱདཱིསུ ཨཏིཨིཊྛབྷཱུཏེསུ ཨཏིམཧནྟེསུ ཨཏིཝིབྷཱུཏེསུཙ ཚལཱ༹རམྨཎེསུཝཱ མཧགྒཏཔཉྙཏྟཱིསུཝཱ དོམནསྶཾ ཨུཔྤཱདེནྟསྶཱཏི. ཨེཏྠ ཙ ཡསྨཱ ཨབྷིདྷམྨེ དྷཱཏུཝིབྷངྒེ སབྦདྷམྨེསུཝཱ པན ¶ པཐམ སམནྣཱཧཱརོཏི ཝུཏྟཾ. མཧཱཧཏྠིཔདོཔམ སུཏྟེཙ ཨཛ྄ཛྷཏྟི ཀཉྩེཝ ཨཱཝུསོ ཙཀྑུ ཨཔརིབྷིནྣཾ ཧོཏི. བཱཧིརཱཙ རཱུཔཱཨཱཔཱཏཾ ཨཱགཙྪནྟི. ནོཙ ཏཛྫོ སམནྣཱཧཱརོ ཧོཏི. ནེཝ ཏཱཝ ཏཛྫསྶ ཝིཉྙཱཎབྷཱགསྶ པཱཏུབྷཱཝོ ཧོཏི. ཡཏོཙ ཁོ ཨཱཝུསོ ཨཛ྄ཛྷཏྟིཀཉྩེཝ ཙཀྑུ ཨཔརིབྷིནྣཾ ཧོཏི. བཱཧིརཱཙ རཱུཔཱ ཨཱཔཱཏ མཱགཙྪནྟི. ཏཛྫོཙ སམནྣཱཧཱརོ ཧོཏི. ཨེཝཾ ཏཛྫསྶ ཝིཉྙཱཎབྷཱགསྶ པཱཏུབྷཱཝོ ཧོཏི. ཨཛ྄ཛྷཏྟིཀཉྩེཝ ཨཱཝུསོ སོཏཾ.ལ. གྷཱནཾ.ལ. ཛིཝ྄ཧཱ.ལ. ཀཱཡོ.ལ. མནོ ཨཔརིབྷིནྣོ ཧོཏི. བཱཧིརཱཙ དྷམྨཱ ཨཱཔཱཏཾ ཨཱགཙྪནྟི. ནོཙ ཏཛྫོ སམནྣཱཧཱརོ ཧོཏི. ནེཝ ཏཱཝ ཏཛྫསྶ ཝིཉྙཱཎབྷཱགསྶ པཱཏུབྷཱཝོ ཧོཏི. ཡཏོཙ ཁོ ཨཱཝུསོ ཨཛ྄ཛྷཏྟིཀོཙེཝ མནོ ཨཔརིབྷིནྣོ ཧོཏི. བཱཧིརཱཙ དྷམྨཱ ཨཱཔཱཏཾ ཨཱགཙྪནྟི. ཏཛྫོཙ སམནྣཱཧཱརོ ཧོཏི. ཨེཝཾ ཏཛྫསྶ ཝིཉྙཱཎབྷཱགསྶ པཱཏུབྷཱཝོ ཧོཏཱིཏི ཝུཏྟཾ. ཏསྨཱ ཝཱིཐིཙིཏྟཱནིནཱམ ཨཱཝཛྫནེནཝིནཱནཨུཔྤཛྫནྟི. སཙེ ཨཱཝཛྫནེན དྷམྨཏོཝཱ ཀཱལབྷོཝཱ ཡཾཡཾ ནིཡམེཏྭཱ ཨཱཝཛྫིཏཾ ཧོཏི. ཏཾ ཏདེཝ ཏཱནིཔི གཎྷནྟི. ཡདི ཨནིཡམེཏྭཱ ཡཾཀིཉྩི ཨཱཝཛྫིཏཾ ཧོཏི. ཏཱནིཔི ཨཱཝཛྫི ཏཔྤཀཱརམེཝ གཎྷནྟི. ན པན ཨེཀཱཝཛྫན ཝཱིཐིཡཾ སབྦཱནི ཝཱིཐིཙིཏྟཱནི ཨཱཝཛྫནེནཝཱ ཨཉྙམཉྙཾཝཱ དྷམྨཏོཝཱ ཀཱལཏོཝཱ བྷིནྣཱ ལམྦཎཱནི ཧོནྟཱིཏི ཝེདིཏབྦནྟི.

ཨེཏྠ སིཡཱ. ཡདི ཙེ ཏཾ ཨཱགནྟུཀབྷཝངྒཾ ཨེཀཝཱིཐིཡཾ ཨཱདིམྷི ཨཱཝཛྫནེན ཨཱཝཛྫིཏཾ ཨཱརམྨཎཾ ཨགཧེཏྭཱ ཨཉྙཾ ཡཾ ཀིཉྩི པརིཙིཏཔུབྦཾ པརིཏྟཱརམྨཎཾ ཨཱརབྦྷ ཨུཔྤཛྫཏི. ཨེཝཾ སཏི ནིརཱཝཛྫནཾནཱམ ཨེཏཾ སིཡཱ. ཨཱཝཛྫནཱདཱིཧིཙ སདྡྷིཾ དྷམྨཏོ ཀཱལཏོ ཙ བྷིནྣཱརམྨཎཾནཱམ སིཡཱཏི. སཙྩཾ, ཡཐཱ པན མགྒཝཱིཐིཡཾ གོཏྲབྷུཝོདཱནཱནི ཕལསམཱཔཏྟིཝཱིཐིཡཾ ཕལཱནི ནིརོདྷཏོ ཝུཊྛཧནྟསྶཙ ཕལཙིཏྟཾ ནིརཱཝཛྫནམེཝ ཧོནྟི བྷིནྣཱརམྨཎཉྩ. ཨེཝམེཏསྶཔི ནཏྠི ནིརཱཝཛྫནཏཱཡ བྷིནྣཱརམྨཎཏཱཡཙ དོསོཏི. ཡཉྩ ཨེཀསྨིཾབྷཝེ བྷཝངྒསྶ པཊིསནྡྷིཡཱ སཧ དྷམྨཏོཙ ཨཱརམྨཎ ཏོཙ ཨབྷིནྣཏྟཾ ཏཏྠ ཏཏྠ ཝུཏྟཾ. ཏཾཔི མཱུལབྷཝངྒཾ སནྡྷཱཡ ཝུཏྟཾ. ¶ ཨིདཉྩ ཨཱགནྟུཀབྷཝངྒནྟི ནཏྠི དོསོཏི. ཏམནནྟརིཏྭཱཏི ཏཾ ཨཱགནྟུཀབྷཝངྒཾ ཨཏྟནོ ཨནནྟརཔཙྩཡཾ ཀཏྭཱ. ཝདནྟི ཨཱཙརིཡཱ. པཱལི༹ཡཾ པན མཧཱཨཊྛཀཐཱཡཾཙ ཨེཏཾ ཝིདྷཱནཾ ནཏྠཱིཏི ཨདྷིཔྤཱཡོ. ཀཱམཱཝཙརཛཝནཱཝསཱནེཡེཝ ཏདཱརམྨཎཾ ཨིཙྪནྟི. ན མཧགྒཏཱནུཏྟརཛཝནཱཝསཱནེ. ཀསྨཱ ཨིཏི ཙེ. ཀཱམཱཝཙར ཛཝནཱནཾ ཨེཝ སཝིཔྥནྡནཏྟཱ. ཨིཏརེསཉྩ ཨཝིཔྥནྡནཏྟཱ.

[༡༣༦] ཝིབྷཱཝནིཡཾ པན

‘‘ཀཱམཏཎྷཱ ནིདཱན ཀམྨནིབྦཏྟཏྟཱ’’ཏི ཀཱརཎཾ ཝུཏྟཾ. ཏཾ ཨཀཱརཎཾ.

ཨཔིཙ ཨབྷིཉྙཱཝཛྫིཏཱནི མཧགྒཏཱནུཏྟརཛཝནཱནི ཨཔརིཏྟཱརམྨཎཱནི ཧོནྟི. ཏདཱརམྨཎཱནི པན པརིཏྟཱརམྨཎཱནེཝཱཏི ནཏེསཾ ཨཝསཱནེ ཏདཱརམྨཎུཔྤཏྟི པསངྒོ ཨཏྠི. ཨབྷིཉྙཱཛཝནཱནིཙ ཀཱནིཙི པརིཏྟཱརམྨཎཱནིཔི སནྟཏརཱནི ཧོནྟཱིཏི ཏེསཾཔི ཨཝསཱནེ ཏདུཔྤཏྟི ནཏྠིཡེཝཱཏི.

[༡༣༧] ཨེཏེན

ཨཛནཀཏྟཱ ཛནཀ སམཱནཏྟཱབྷཱཝཏོཏིཨཱདིཔི པཊིཀྑིཏྟཾ ཧོཏི.

ཀཱམཱཝཙརསཏྟཱནཾཨེཝ ཏདཱརམྨཎཾ ཨིཙྪནྟི. ན རཱུཔཱརཱུཔསཏྟཱནཾ. ན ཧི ཏེསུ ཨུཔྤནྣཱནཾ པརིཏྟཱརམྨཎཱནཾཔི ཀཱམཱཝཙརཛཝནཱནཾ ཨཝསཱནེ ཏདཱརམྨཎུཔྤཏྟི ཨཏྠི. ཏདཱརམྨཎཱུཔ ནིསྶཡསྶ ཀཱམ བྷཝངྒསྶ ཨབྷཱཝཏོ མཧགྒཏ བྷཝངྒསྶ ཙ སནྟ ཏརསྶ ཏདཱརམྨཎ ཀིཙྩཱ བྷཱཝཏོཏི. ཙཀྑུཝིཉྙཱཎ སོཏ ཝིཉྙཱཎཱནི པན རཱུཔསཏྟཱནཾ ཙཀྑུསོཏཨིནྡྲིཡ པཝཏྟིཨཱནུབྷཱཝཏོ སམྤཊིཙྪནསནྟཱིརཎཱནིཙ དྭཱརཝཱིཐིབྷེདེ ཙིཏྟནིཡམསིདྡྷིཏོ རཱུཔསཏྟེསུ པཝཏྟནྟི ཡེཝཱཏི. ཀཱམཱཝཙརདྷམྨེསྭེཝ ཨཱརམྨཎབྷཱུཏེསུ ཏདཱརམྨཎཾ ཨིཙྪནྟི, ན མཧགྒཏཱནུཏྟརཔཉྙཏྟིདྷམྨེསུ. ཨེཀནྟཔརིཏྟཱརམྨཎཏྟཱ ཏདཱརམྨཎཱནཾ. ཏེསཾ པན ཨེཀནྟཔརིཏྟཱ རམྨཎབྷཱཝེ ཀཱརཎཾ ཧེཊྛཱ ཝུཏྟམེཝཱཏི.

[༡༣༨] ཝིབྷཱཝནིཡཾ པན

‘‘ཨཔརིཙིཏཏྟཱ’’ཏི ¶ ཀཱརཎཾ ཝུཏྟཾ. ཏཾ ཨཀཱརཎཾ.

ཙིཏྟཉྷི ནཱམ ཝིཀཔྤབལེཝཱ ཨཔྤནཱཔཏྟབྷཱཝནཱཀམྨཝིསེསེ ཝཱ སཏི ནིབྦཱནེ ཝིཡ ཨཔརིཙིཏེཔི ཨཱརམྨཎེ པཝཏྟཏིཡེཝཱཏི.

[༡༣༩] ཡཉྩ ཝིབྷཱཝནིཡཾ

‘‘ཀཱམཏཎྷཱཡཏྟཀམྨཛནིཏཏྟཱཔཱི’’ཏི ཀཱརཎཾ ཝུཏྟཾ. ཏཾཔི ཧེཊྛཱ པཊིཀྑིཏྟམེཝ. ཏེནེཝ ཧི ཨཊྛཀཐཱཡཾ ཀིཾཝཱ ཨེཏཱཡ ཡུཏྟིཙིནྟཱཡཱཏི ཝཏྭཱ སབྦཱནི ཝིབྷཱཝནིཡཾ ཝུཏྟ ཀཱརཎཱནི པཊིཀྑིཏྟཱནཱིཏི.

ཀཱམེ ཛཝན སཏྟཱལམྦཎཱནཾ ནིཡམེསཏཱིཏི ཀཱམབྷཱུམིཔརིཡཱཔནྣཱནཾ ཛཝནཱནཾ སཏྟཱནཾ ཨཱརམྨཎཱནཉྩ ཝསེན ཏིཝིདྷེ ནིཡམེ སཏི. ཝིབྷཱུཏེ ཏིམཧནྟེཙ ཏདཱརམྨཎམཱིརིཏནྟི ཨེཏེན ཏདཱརམྨཎཾནཱམ པཝཏྟམཱནཾ ཝིབྷཱུཏཱརམྨཎེཝཱ ཨཏིམཧནྟཱརམྨཎེ ཝཱ པཝཏྟཏཱིཏི ཨཡམེཝ ནིཡམོ དསྶིཏོ. ན པན ཡཏྠ ཏདཱ རམྨཎཾ པཝཏྟཏི. ཨེཏདེཝ ཝིབྷཱུཏཉྩ ཨཏིམཧནྟཉྩ ནཱམཱཏི ནིཡམོ. ཏསྨཱ ཨུལཱ༹རཀམྨནིབྦཏྟཱནཾ སུཝིསདཝཏྠུཀཱནཾ རཱུཔབྲཧྨཱནཾ ཨུཔྤནྣཱཝཱིཐིཡོ ཡེབྷུཡྻེན ཝིབྷཱུཏཱརམྨཎཱཨེཝ ཨཏིམཧནྟཱ རམྨཎཱཨེཝཙ ཧོནྟཱིཏི ཝེདིཏབྦཱ. ཀེཙི པན ཨིམམཏྠཾ ཨསལླཀྑེཏྭཱ རཱུཔཱརཱུཔབྷཱུམཱིསུ ཝིབྷཱུཏཱརམྨཎཝཱིཐིཡོ ཨཏིམཧནྟཱརམྨཎཝཱིཐིཡོཙ ནལབྦྷནྟཱིཏི ཝདནྟི. [ཏདཱརམྨཎནིཡམོ].

༡༤༠. ཛཝནེསུཙཱཏི ཙསདྡོ པན སདྡཏྠོ. ཚཀྑཏྟུ མེཝཝཱ ཛཝནྟི. པཀཏིཀཱལེཔི ཨཱརམྨཎསྶ དུབྦལབྷཱཝེ སཏཱིཏི ཨདྷིཔྤཱཡོ. ཨཊྛཀཐཱཡཾཔི ཧི པཀཏིཀཱལེ ཨཱརམྨཎདུབྦ ལཊྛཱནེཨེཝ ཀཱམཱཝཙརཛཝནཱནཾ ཚཀྑཏྟུཾ པཝཏྟི ཝུཏྟཱཏི. ཀེཙི པན ཚཀྑཏྟུནྟི ཨིདཾ མུཙྪཱཀཱལཝསེན ཝུཏྟནྟི མཉྙནྟི. མནྡཝཏྟིཡནྟི མརཎཱསནྣཀཱལེ བཧུཙིཏྟཀྑཎཱཏཱིཏཀསྶ ཝཏྠུསྶ དུབྦལཏྟཱ ཨིཏརཀཱལེསུཙ མུདུཏརབྷཱཝེན ཀེནཙི ཨུཔདྡུཏ བྷཱཝེན ཨཛ྄ཛྷོཏྠཊབྷཱཝེནཙ ཝཏྠུསྶ དུབྦལཏྟཱ ཏནྣིསྶིཏཱནཾ ཛཝནཱནཾ ¶ མནྡཱིབྷཱུཏཝེགཏཱ ཝསེན པཝཏྟིཀཱལེ. མརཎཀཱལཱདཱིསཱུཏི མརཎཱསནྣཀཱལེ མུཙྪཱཀཱལེ ཝིསཉྙིབྷཱུཏ ཀཱལེ ཨཏིཏརུཎཀཱལེཙ, ཏཏྠ མུཙྪཱཀཱལོནཱམ ཨསཡ྄ཧ རཱུཔེཧི དུཀྑདྷམྨེཧི ཨཏིབྷཱུཏཱནཾ ཨདྷིམཏྟཏོ ཀརཛཀཱཡསྶ ཝིཧཉྙཔྤཏྟིཀཱལོ. ཝིསཉྙི བྷཱུཏཀཱལོནཱམ པཱིཏིཝེགེནཝཱ ནིདྡཱབྷིབྷཱུཏཏཱཡཝཱ ཡཀྑགཧཎེནཝཱ སུརཱམདཱདི ཝསེནཝཱ པཀཏིསཉྙཱཡ ཝིགཏཀཱལོ. ཨཏིཏརུཎཀཱལོནཱམ གབྦྷགཏསྶཝཱ སམྤཏིཛཱཏསྶཝཱ དཱརཀསྶ ཨཛ྄ཛྷཏྟ ཝཏྠཱུནཾ ཨཏིམུདུཀཱལོ. ཏཱདིསེསུ ཧི ཀཱལེསུ ཨནྟརནྟརཱ ཚདྭཱརིཀཝཱིཐིཡོ པཝཏྟམཱནཱཔི ཡེབྷུཡྻེན པརིཔུཎྞཛཝནཝཱརཱ ན པཝཏྟནྟི. དྭཏྟིཝོཊྛབྦནིཀཱཝཱ ཙཏུཔཉྩཛཝནིཀཱཨེཝཝཱ པཝཏྟནྟཱིཏི. ཨེཏྠཙ དྭཏྟིཝོཊྛབྦནིཀཝཱརཱ ཨཊྛཀཐཱཡཾ ཝུཏྟཱ. ཙཏུཔཉྩ ཛཝནིཀཝཱརཱ མཱུལཊཱིཀཱཡཾ ཝུཏྟཱ. པཉྩཝཱརམེཝཱཏི ཨིདཾ པན མརཎཱ སནྣཀཱལཝསེན ཝུཏྟཾ. ནམུཙྪཱཀཱལཱདིཝསེན. ཏཉྩ ཁོཔཱཀཏིཀསཏྟཱནཾ ཝསེནེཝ. ཡེ པན ཛྷཱནསམནནྟརཾཝཱ པཙྩཝེཀྑཎ སམནནྟརཾཝཱ ཨབྷིཉྙཱསམནནྟརཾཝཱ ཙཝནྟིཝཱ པརིནིབྦཱཡནྟིཝཱ. ཏེསཾ ཛྷཱནཱདཱིནིཡེཝ པཉྩཝཱརཏོ ཨདྷིཀཱནིཝཱ ཨཱུནཱནིཝཱ མརཎཱ སནྣཛཝནཱནིནཱམ ཧོནྟཱིཏི དཊྛབྦཾ. ཨཡཉྩ ཨཏྠོ ཨུཔརི མརཎུཔྤཏྟིཡཾ ཨཱཝིབྷཝིསྶཏཱིཏི. བྷགཝཏོ པན ཡམཀཔཱཊིཧཱརིཡ ཀཱལཱདཱིསཱུཏི ཨེཏྠ ཨཉྙེསཾཔི མཧཱམོགྒལཱནཏྠེརཱདཱིནཾ ཨེཝརཱུཔོ ལཧུཔྤཝཏྟིཀཱལོ ཨཱདིསདྡེན སངྒཧིཏོཏི དཊྛབྦོ. ཝུཏྟཉྷི ཝིསུདྡྷིམགྒེ ཨཡཾ པན མཏྠཀཔཏྟཱ ཝསཱི བྷགཝཏོ ཡམཀཔཱཊིཧཱརིཡེ ལབྦྷཏི. ཨཉྙེསཾཝཱ ཨེཝརཱུཔེ ཀཱལེཏི. སཀལེན པན ཝཱཀྱེན ཐཔེཏྭཱ ཡམཀཔཱཊིཧཱརིཡསདིསཾ ལཧུཀ པཝཏྟིཀཱལཾ ཨཉྙསྨིཾ ཀཱལེ བྷགཝཏོཔི ཚཝཱ སཏྟཝཱ པཙྩཝེཀྑཎཙིཏྟཱནི པཝཏྟནྟི. ཨཉྙེསཾ པན ཝཏྟབྦམེཝ ནཏྠཱིཏི དསྶེཏི. ཙཏྟཱརི པཉྩཝཱ པཙྩཝེཀྑཎཙིཏྟཱནི བྷཝནྟཱིཏི ཨེཏྠཔི བྷགཝཏོཔི ལཧུཀཔྤཝཏྟིཡཾ པཉྩ པཙྩཝེཀྑཎཙིཏྟཱནི བྷཝནྟི. ལཧུཀཏརཔཝཏྟིཡཾ ཙཏྟཱརཱིཏི ཨཏྠོཔི ཡུཛྫཏིཡེཝ.

ཝིབྷཱཝནིཡཾ པན

བྷགཝཏོ ¶ ཙཏྟཱརི ཨཉྙེསཾ པཉྩཔཱིཏི ཡུཏྟཾ ཝིཡ དིསྶཏཱིཏི ཝུཏྟཾ.

ཏཏྠ ཡམཀཔཱཊིཧཱརིཡཾ ཀརོནྟོ བྷགཝཱ ཨགྒིཀྑནྡྷཨུདཀ དྷཱརཱདཱིནཾ དྭིནྣཾ དྭིནྣཾ པཱཊིཧཱརིཡཱནཾ པཝཏྟནཏྠཾ པཐམཾ ཏེཛོཀསིཎེ པཱདཀཛ྄ཛྷཱནཾ སམཱཔཛྫི. ཏཏོ དྭེ ཛྷཱནངྒཱནི པཙྩཝེཀྑི. ཏཏོ ཨུཔརིམཀཱཡཏོ ཨགྒིཀྑནྡྷོ པཝཏྟཏཱུཏི ཨདྷིཊྛཱསི. ཏཏོ ཏསྨིཾཡེཝ ཀསིཎེ ཨབྷིཉྙཾ སམཱཔཛྫི. ཨབྷིཉྙཱཝསེན ཨུཔརིམཀཱཡཏོ ཨགྒིཀྑནྡྷོ པཝཏྟཏི. ཏཏོ ཨཱཔོཀསིཎེ པཱདཀཛ྄ཛྷཱནཾ སམཱཔཛྫི. ཏཏོ དྭེ ཛྷཱནངྒཱནི པཙྩཝེཀྑི. ཏཏོ ཧེཊྛིམཀཱཡཏོ ཨུདཀདྷཱརཱ པཝཏྟནྟཱུཏི ཨདྷིཊྛཱསི. ཏཏོ ཏསྨིཾཡེཝ ཀསིཎེ ཨབྷིཉྙཾ སམཱཔཛྫི. ཨབྷིཉྙཱཝསེན ཧེཊྛིམ ཀཱཡཏོ ཨུདཀདྷཱརཱ པཝཏྟནྟི. སེསཡམཀེསུཔི ཨེསེཝ ནཡོ. ཨེཏྠཙ ལཧུཀཔྤཝཏྟིཡཱ ཨིཙྪིཏཏྟཱ དྭེ དྭེ པཙྩཝེཀྑཎཝཱརཱ ཙཏུཔཉྩཛཝནིཀཱཨེཝ བྷཝནྟི. དྭིནྣཉྩ ཛཝནཝཱརཱནཾ ཨནྟརཱ དྭེ ཨེཝ བྷཝངྒཱནི བྷཝནྟི. ཏཱནིཙ དྭེ པཱཊིཧཱརིཡཱནི པསྶནྟཱནཾ ཨེཀཔྤཧཱརེནེཝ པཝཏྟཱནི ཝིཡ པཉྙཱཡནྟཱིཏི. ཨེཏརཧི པན ཀེཙི ཨཱདིཀམྨིཀཛ྄ཛྷཱནཔཙྩཝེཀྑཎེསུཔི ཙཏྟཱརི པཉྩཝཱཛཝནཱནི ཝདནྟི. ཨཱདིཀམྨིཀསྶཱཏི ཡོགཀམྨསིདྡྷིཡཱ ཨཱདིམྷི ནིཡུཏྟསྶ. པཐམཾ ཨུཔྤནྣཱ ཨཔྤནཱ པཐམཀཔྤནཱ. ཏསྶཾ པཐམཀཔྤནཱཡཾ. ཨཱདིཀམྨིཀཨཔྤནཱཝཱིཐིཡནྟི ཨཏྠོ. ཏདཱ ཧི སབྦཱནིཔི མཧགྒཏཛཝནཱནི པུན ཨཱསེཝནཱབྷཱཝཏོ པརིདུབྦལཱནི ཧོནྟཱིཏི ཨེཀཝཱརམེཝ ཛཝནྟཱིཏི. ཨབྷིཉྙཱཛཝནཱནི པན ཨིདྡྷིཝིཀུབྦནཱདི. ཀིཙྩསིདྡྷིཡཱཨེཝ པཡུཏྟཱནཱིཏི ཀིཙྩསིདྡྷིཏོ པརཾ ཀཏྟབྦཱབྷཱཝཏོ ཨཱདིཀམྨིཀཀཱལེཔི ཝསཱིབྷཱུཏཀཱལེཔི ཨེཀཝཱརམེཝ ཛཝནྟཱིཏི ཝུཏྟཾ ཨབྷིཉྙཱཛཝནཱནིཙ སབྦདཱཔཱིཏི. ཡཐཱཙ ཨབྷིཉྙཱཛཝནཱདི ཨེཝཾ མགྒཛཝནཱནིཔི ཏཾ ཏཾ ཀིལེསཔྤཧཱནཀིཙྩསིདྡྷིཏོ པརཾ ཀཏྟབྦཱ བྷཱཝཏོ ཨེཀཝཱརམེཝ ཛཝནྟཱིཏི ཝུཏྟཾ ཙཏྟཱརོ པན.ལ. ཨེཀ ཙིཏྟཀྑཎིཀཱཝཱཏི. ཨཐཝཱ, མགྒཙེཏནཱཡ ཨནནྟརིཀཕལཏྟཱ སཀིཾ ¶ ཨུཔྤནྣེཡེཝ མགྒེ ཕལསྶཝཱརོ ཨཱཝཏོཏི ནཏྠི མགྒཙིཏྟསྶ པུནུཔྤཏྟིཡཱ ཨོཀཱསོཏི ཝུཏྟཾ ཙཏྟཱརོ པན.ལ. ཨེཀཙིཏྟཀྑཎིཀཱཝཱཏི. ཛཝནུཔྤཏྟིཡཱ པཀཏིཡཱ སཏྟཀྑུཔརམཏྟཱ མནྡསྶ པཉྩམཾ ཨུཔྤནྣམགྒཏོ པརཾ དྭེ ཕལཙིཏྟཱནི ཨུཔྤཛྫནྟི. ཏིཀྑསྶ ཙཏུཏྠཾ ཨུཔྤནྣམགྒཏོ པརཾ ཏཱིཎཱིཏི ཝུཏྟཾ ཏཏོ པརཾ.ལ. ཨུཔྤཛྫནྟཱིཏི. ནིརོདྷསམཱཔཏྟིཀཱལེ པན པུབྦབྷཱགེཡེཝ ཏཱདི སསྶ པཡོགཱབྷིསངྑཱརསྶ ཀཏཏྟཱ དྭིནྣཾ ཝཱརཱནཾ ཨུཔརི ཙིཏྟཔྤཝཏྟི ནཏྠཱིཏི ཝུཏྟཾ ནིརོདྷ.ལ. ཛཝཏཱིཏི. ཨེཏྠཙ དྭིཀྑཏྟུནྟི ཨིདཾ ཨུཀྐཊྛ ནིདྡེསཝསེན ཝུཏྟཾ. ཨེཀཾཝཱ དྭེཝཱ ཙིཏྟཝཱརེ ཨཏིཀྐམིཏྭཱ ཨཙིཏྟཀོ ཧོཏཱིཏི ཧི ཝུཏྟཾ. ཙཏུཏྠཱརུཔྤཛཝནནྟི ཨནཱགཱམིནོ ཀུསལབྷཱུཏཾ ཨརཧཏོ ཀྲིཡབྷཱུཏཾ ནེཝསཉྙཱནཱསཉྙཱ ཡཏན ཛཝནཾ. ཝུཊྛཱནཀཱལེཙ ནིརོདྷསྶ ནིསནྡམཏྟཏྟཱ ཨེཀཝཱརམེཝ ཝཛནཾ པཝཏྟཏཱིཏི ཝུཏྟཾ ཝུཊྛཱནཀཱལེཙཱཏིཨཱདི. ཏཏྠ ཨནཱགཱམི ཕལཾཝཱ ཨརཧཏྟཕལཾཝཱཏི ཨནཱགཱམིཕལེཝཱ ཨརཧཏྟཕལེཝཱ. བྷཱཝེན བྷཱཝལཀྑཎེ ཧེཏཾ པཙྩཏྟཝཙནཾ. ཏེནཱཧ ནིརུདྡྷེཏི. སབྦཏྠཱཔི སམཱཔཏྟིཝཱིཐིཡནྟི ཛྷཱནསམཱཔཏྟི ཕལསམཱཔཏྟིཝསེན སཀལཱཡཔི སམཱཔཏྟིཝཱིཐིཡཾ. བྷཝངྒསོཏོཝིཡ ཝཱིཐིནིཡ མོ ནཏྠཱིཏི ཨིདཾ ཙིཎྞཝསཱིབྷཱུཏཀཱལཾ སནྡྷཱཡ ཝུཏྟཾ. ཨཀཏཱ དྷིཀཱརསྶ པན ཛྷཱནསམཱཔཏྟིཡཾ ཨཱདིཏོ པཊྛཱཡ དྭེ ཏཱིཎི ཙཏྟཱརཱིཏིཨཱདིནཱ ཛྷཱནཛཝནཱནི ཨནུཀྐམེན ཝདྡྷམཱནཱནི པཝཏྟནྟི. ཀཏཱ དྷིཀཱརཱནཾ པན མཧཱཔུརིསཛཱཏིཀཱནཾ པཊིལདྡྷཀཱལཏོ པཊྛཱཡ ཙིཎྞཝསཱིབྷཱཝཱནེཝ ཧོནྟི. ཏཐཱ ཕལཛཝནཱནིཙ སབྦེསཾཔི ཕལཊྛཱནནྟི དཊྛབྦཾ. བཧཱུནིཔཱིཏི པིསདྡོ སམྤིཎྜནཏྠོ. ཏེན ཨཱདིཀམྨིཀཀཱལཱདཱིསུ ཨེཀཝཱརཱདིཝསེནཔི ཨཝསེསཱནཾ པཝཏྟིཾ སམྤིཎྜེཏཱིཏི. [ཛཱནནིཡམོ].

༡༤༡. ཨེཝཾ པུབྦཱཔརནིཡཱམཝསེན ཝཱིཐིཙིཏྟཱནཾ པཝཏྟིཾ དསྶེཏྭཱ ཨིདཱནི པུགྒལབྷེདཝསེན བྷཱུམིབྷེདཝསེནཙ ཏེསཾ པཝཏྟིཾ དསྶེནྟོ དུཧེཏུཀཱནནྟིཨཱདིམཱཧ. པཊིསནྡྷིཝིཉྙཱཎསཧགཏཱ དྭེ ཧེཏུཡོ ཨེཏེསནྟི དུཧེཏུཀཱ. ཙཏཱུཧི ཉཱཎཝིཔྤ ཡུཏྟམཧཱཝིཔཱཀེཧི ¶ གཧིཏཔཊིསནྡྷིཀཱ. དྭཱིཧི པན ཨཧེཏུཀ ཝིཔཱཀེཧི གཧིཏ པཊིསནྡྷིཀཱ ཨཧེཏུཀཱ ནཏྠི པཊིསནྡྷིཧེཏུ ཨེཏེསནྟི ཀཏྭཱ. ཏེསཾ དྭིནྣཾཔི ཝིཔཱཀཱཝརཎསབྦྷཱཝཏོ མཧགྒ ཏཛ྄ཛྷཱནཱནིཔི ཏཱཝ ནུཔྤཛྫནྟི. ཀུཏོ ལོཀུཏྟརཱནི. ཀྲིཡཛཝནཱནི པན ཁཱིཎཱསཝཱནམེཝ ཨཱཝེནིཀ བྷཱུཏཱནཱིཏི ཝུཏྟཾ ཀྲིཡཛཝནཱནི ཙེཝཨཔྤནཱཛཝནཱནིཙ ན ལབྦྷནྟཱིཏི. ཏཏྠ ཝིཔཱཀཱ ཝརཎཾ ནཱམ ཨཧེཏུཀ པཊིསནྡྷིཀཏཱ དྭིཧེཏུཀ པཊིསནྡྷིཀཏཱཙ. ཏཐཱ ཉཱཎསམྤཡུཏྟཝིཔཱཀཱནིཙ སུགཏིཡནྟི སུགཏི བྷཝེ པརིཡཱཔནྣཱནཾ ཏེསཾ དྭིནྣཾ ཏཐཱ ཉཱཎམྤཡུཏྟམཧཱཝིཔཱཀཱནིཙ ན ལབྦྷནྟཱིཏི ཨཏྠོ. ཨེཏྠཙ སུགཏིཡནྟི ཨེཏེན དུགྒཏིཔརིཡཱཔནྣེ ཨཧེཏུཀ པུགྒལེ ནིཝཏྟེཏི. ན ཧི ཏེསཾ ཨིམསྨིཾ ཝཱཀྱེ ཨིཏརེསཾ ཨནུཉྙཱཏཱནི ཉཱཎཝིཔྤཡུཏྟཝིཔཱཀཱནིཔི ལབྦྷནྟཱིཏི. ཏེནཱཧ དུགྒཏི ཡཾ པནཱཏིཨཱདི. ཏཏྠ དུགྒཏིཡཾ པརིཡཱཔནྣཱནཾ ཨཧེཏུཀཱནཾ ཉཱཎསམྤཡུཏྟཝིཔཱཀཱནིཙ ཉཱཎཝིཔྤཡུཏྟཱནི མཧཱཝིཔཱཀཱནིཙ ན ལབྦྷནྟཱིཏི པརིཔུཎྞ ཡོཛནཱ དཊྛབྦཱ. ཨེཏྠ སིཡཱ. ཀསྨཱ པནེཏྠ སུགཏིཔརིཡཱཔནྣཱནཾ ཨཧེཏུཀཱནཾ ཙཏྟཱརི ཉཱཎསམྤཡུཏྟཝིཔཱཀཱནི དུགྒཏིཔརིཡཱཔནྣཱནཉྩ ཨཊྛཔི སཧེཏུཀ མཧཱཝིཔཱཀཱནི ན ལབྦྷནྟཱིཏི ཝུཏྟཾ. ནནུ པཊྛཱནེ སཧེཏུཀཾ བྷཝངྒཾ ཨཧེཏུཀསྶ བྷཝངྒསྶ ཨནནྟརཔཙྩཡེན པཙྩཡོཏི ཝུཏྟཾ. ཨེཏྠ ཧི ཨེཀསྨིཾ བྷཝེ ཨེཀསྶ སཏྟསྶ ཀདཱཙི སཧེཏུཀཾ བྷཝངྒཾ ཀདཱཙི ཨཧེཏུཀཾ བྷཝངྒནྟི ཨེཝཾ མཱུལབྷཝངྒེ པཝཏྟིབྷེདོ ནཏྠཱིཏི ཀཏྭཱ སཧེཏུཀཾ བྷཝངྒནྟི ཨིདཾ ཏདཱརམྨཎསངྑཱཏཾ ཨཱགནྟུཀབྷཝངྒཾ སནྡྷཱཡ ཝུཏྟནྟི ཝིཉྙཱཡཏི. སཧེཏུཀནྟིཙ སཱམཉྙཝཙནཏྟཱ དྭིཧེཏུཀཾ ཏིཧེཏུཀཉྩ ཏདཱརམྨཎཾ ཝིཉྙཱཏབྦཾ ཧོཏི. ཨཧེཏུཀསྶ བྷཝངྒསྶཱཏི ཨིདྷ པན ཏསྶ ཏདཱརམྨཎསྶ ཨནནྟརཾ ཨུཔྤནྣཾ མཱུལབྷཝངྒམེཝ ཨདྷིཔྤེཏཾ. ཨིདྷཔི སཱམཉྙཝཙནཏྟཱ དྭཱིསུ ཨ- ཨཧེཏུཀབྷཝངྒེསུ ཡཾཀིཉྩི གཧེཏབྦམེཝཱཏི. ཏསྨཱ དྭིནྣཾ ཨཧེཏུཀཱནཾཔི ཨཊྛསཧེཏུཀ ཏདཱརམྨཎཱནིཔི ལབྦྷམཱནཱནིཨེཝ སིཡུཾ. དུཧེཏུཀཱནཾ པན ཝཏྟབྦམེཝ ནཏྠཱིཏི. ཝུཙྩཏེ, ཨཧེཏུ ཀེསུ ¶ ཏཱཝ དུགྒཏིཔརིཡཱཔནྣཱནཾ སཧེཏུཀཏདཱརམྨཎསམྦྷཝོ སབྦཨཊྛཀཐཱསུ པཊིཀྑིཏྟོ. ཏསྨཱ ཨཧེཏུཀསྶ བྷཝངྒསྶཱཏི ཨིདཾ ཀུསལཝིཔཱཀབྷཱུཏཾ ཨཧེཏུཀབྷཝངྒཾ སནྡྷཱཡ ཝུཏྟནྟི ཡུཏྟཾ. ཨཡཉྷི པཊྛཱནེ དྷམྨཏཱ. ཡདིདཾ ཡཐཱལཱབྷགཧཎནྟི. ཨིཏརཐཱ སབྦཨཊྛཀཐཱཝིརོདྷོ སིཡཱཏི. ཡཐཱཙ ཀུསལཱནཾ ཡོགསཱདྷནཱིཡཏྟཱ པཝཏྟིཡཾཔི ཡོགཀམྨཝསེན ཉཱཎཡོགོ ཧོཏི. ན ཏཐཱ ཝིཔཱཀཱནཾ. ཏེསཾ པན ཨཡོགསཱདྷནཱི ཡཏྟཱ པཝཏྟིཡཾ བྷཝངྒཉཱཎསངྑཱཏེན ཨུཔནིསྶཡཉྙཱཎེན ཝིནཱ ཉཱཎཡོགོ ན སམྦྷཝཏི. ཏསྨཱ སཧེཏུཀཾ བྷཝངྒནྟི ཨིདྷཔི ཉཱཎཝིཔྤཡུཏྟབྷཱུཏཾ སཧེཏུཀཏདཱརམྨཎམེཝ གཧེཏུཾ ཡུཏྟནྟི ཀཏྭཱ དྭིཧེཏུཀཱནཾ ཨཧེཏུཀཱནཉྩ ཉཱཎསམྤཡུཏྟཏདཱརམྨཎ པཊིཀྑེཔོ ཐེརེན ཀཏོཏི. ཨཱཙརིཡབུདྡྷདཏྟཏྠེརེན པན ཡེན ཝིཔཱཀཙིཏྟེན པཊིསནྡྷིཾ གཎྷནྟི. ཏེན སདིསཾ ཝཱ ཏཏོ ཧཱིནཾ ཝཱ ཏདཱརམྨཎཾ ཏེསཾ སམྦྷཝཏི. ན པཎཱིཏནྟི ཀཏྭཱ དྭིནྣཾཔི ཨཧེཏུཀཱནཾ ཨཊྛམཧཱཝིཔཱཀཱནི པཊིཀྑིཔིཏྭཱ སཏྟཏིཾསཙིཏྟཔཊི ལཱབྷོ ཝུཏྟོ. སོ པན ཡཐཱ ཝུཏྟཔཊྛཱནཔཱལི༹ཡཱ ཝིརུཛ྄ཛྷཏི. ཨཔརེ པན ཡཐཱ ཨཧེཏུཀཱནཾ སུགཏིཔརིཡཱཔནྣཱནཾ དྭིཧེཏུཀ ཏདཱརམྨཎཾ ཧོཏི. ཨེཝཾ དྭིཧེཏུཀཱནཾཔི ཏིཧེཏུཀཏདཱརམྨཎཾ སམྦྷཝཏཱིཏི ཝདནྟི. ཏཾ ཡུཏྟཾཝིཡ དིསྶཏི. ཨཊྛཀཐཱཡཉྷི ཀཏྠཙི ཏེསཾ དྭིནྣཾཔི ཨཝིསེསེན ཨཊྛམཧཱཝིཔཱཀཔཝཏྟི ཝུཏྟཱཏི. པཊིསནྡྷིཝིཉྙཱཎ སཧགཏཱ ཏཡོ ཧེཏཱུ ཨེཏེསནྟི ཏིཧེཏུཀཱ. ཏེ པན ཀཱམརཱུཔཱརཱུཔཝསེན ཏིཝིདྷཱ ཧོནྟི. པུཐུཛྫནོ ཨཊྛཨརིཡཱཙཱཏི ནཝཝིདྷཱ. ཏེསུ ཁཱིཎཱསཝཱནཾ ཀུསལཱཀུསལ ཛཝནཱནིཙ ནལབྦྷནྟི. སབྦསོ ཨནུསཡཔཧཱནེན སབྦེསཾ ཀུསལཱཀུསལཱནཾ སཧ ནིརུདྡྷཏྟཱ ཨནུསཡ པཊིབདྡྷོ ཧི ཏེསཾ ཏབྦྷཱཝོཏི. ཏཐཱསདྡོ པཀྑནྟརཏྠོ. ཨཔརིནིཊྛིཏསིཀྑཱཀིཙྩཏཱཡ སིཀྑནསཱིལཡུཏྟཱ སཏྟཨརིཡཱ སེཀྑཱནཱམ. ཨིདྷ པན ཏཡོ ཧེཊྛིམཕལཊྛཱ ཨདྷིཔྤེཏཱ. ཏེསཉྷི ཨཱདིཏོ སོཏཱཔཏྟིམགྒེནེཝ དིཊྛིཝིཙིཀིཙྪཱནཾ པཧཱིནཏྟཱ ཏཾ སཧགཏཱནི ¶ པཉྩཛཝནཱནི ནལབྦྷནྟཱིཏི. ཨནཱགཱམིཔུགྒལཱནཾ པན པཊིགྷཛཝནཱནིཙ ན ལབྦྷནྟི. ཨནཱགཱམིམགྒེན པཧཱིནཏྟཱ. མགྒསྶ པན ཨེཀཙིཏྟཀྑཎིཀཏྟཱ. ཙཏུནྣཾ མགྒཊྛཱནཾ པཙྩེཀཾ ཡཐཱསཀཾ མགྒཛཝནཱནིཨེཝ ལབྦྷནྟི. ཨུཔརིམཱནཉྩ ཕལཱནཾ ཧེཊྛིམེཧི པུགྒལེཧི ཨནམིགཏཏྟཱ ཧེཊྛིམཱནཉྩ ཨུཔརིམེསུ པུགྒལནྟརེསུ ཨནུཔྤཛྫནཏོ ཙཏུནྣཾ ཕལཊྛཱནཾཔི པཙྩེཀཾ ཡཐཱསཀཾ ཕལཛཝནཱནིཨེཝ ལབྦྷནྟཱིཏི ཝུཏྟཾ ལོཀུཏྟར.ལ. སམུཔྤཛྫནྟཱིཏི. ཨེཏྠཙ ཨུཔརིམགྒེ ཨཱགཏེ ཧེཊྛིམམགྒཱནུབྷཱཝསྶ སབྦསོ པཊིཔསྶདྡྷིཝསེན ཨུཔརིམཱནཾ པུགྒལནྟརཏཱསིདྡྷི ཝེདིཏབྦཱཏི. ཨིདཱནི ཏེསཾ ཏེསཾ པུགྒལཱནཾ པཱརིསེསཏོ ལབྦྷམཱནཝཱིཐིཙིཏྟཱནི དསྶེཏུཾ གཱཐམཱཧ. པརིནིཊྛི ཏསིཀྑཱཀིཙྩཏྟཱ ནཏྠི སིཀྑིཏབྦཀིཙྩཾ ཨེཏེསནྟི ཨསེཀྑཱ. ཁཱིཎཱསཝཱ. ཏེསཾ ཏེཝཱིསཏིཀཱམཝིཔཱཀ ཝཱིསཏིཀྲིཡ ཨརཧཏྟཕལ ཝསེན ཙཏུཙཏྟཱལཱིས ཝཱིཐིཙིཏྟཱནི སམྦྷཝཱ ཡཐཱསམྦྷཝཾ ཨུདྡིསེ. སཏྟནྣཾ སེཀྑཱནཾ དིཊྛིཝིཙིཀིཙྪཱཛཝནཝཛྫིཏཱནཾ སཏྟནྣཾ ཨཀུསལཱནཾ ཨེཀཝཱིསཏིཡཱ ཀུསལཱནཾ ཏེཝཱིསཏིཡཱ ཀཱམཝིཔཱཀཱནཾ ཏིཎྞཾ ཧེཊྛིམཕལཱནཾ ཨཱཝཛྫནདྭཡསྶཙ ཝསེན ཚཔཉྙཱས ཝཱིཐིཙིཏྟཱནི སམྦྷཝཱ ཨུདྡིསེ. ཨཝསེསཱནཾ ཙཏུནྣཾ པུཐུཛྫནཱནཾ ཀཱམཝིཔཱཀ ལོཀིཡཀུསལཱཀུལཱཝཛྫན དྭཡཝསེན ཙཏུཔཉྙཱས ཝཱིཐིཙིཏྟཱནི སམྦྷཝཱ ཨུདྡིསེཏི ཡོཛནཱ. པུགྒལ བྷེདེན ཝཱིཐིཙིཏྟཱནཾ བྷེདོ པུགྒལབྷེདོ.

༡༤༢. སབྦཱནིཔི ཝཱིཐིཙིཏྟཱནི ཨུཔལབྦྷནྟི པུགྒལཱནཾ དྭཱརཱནཉྩ ཨེཏྠེཝ པརིཔུཎྞསམྦྷཝཏོ. ཡཐཱརཧནྟི ཏཾ ཏཾ བྷཱུམིཔུགྒལཱནཾ ཨུཔྤཏྟིཨརཧཱནུརཱུཔཾ. རཱུཔཱཝཙརབྷཱུམིཡཾ ཝཛྫིཏབྦེསུ སོལ༹སཝཱིཐི ཙིཏྟེསུ ཚནྣཾ ཙིཏྟཱནཾ ཨུཔརིཝཱཀྱེ ཝུཙྩམཱནཏྟཱ པཊིགྷཛཝན ཏདཱརམྨཎ ཝཛྫིཏཱནཱིཏི ཝུཏྟཾ. ཨརཱུཔཱཝཙརབྷཱུམིཡཾ པཐམམགྒ རཱུཔཱཝཙརཧསན ཧེཊྛིམཱརུཔྤཝཛྫིཏཱནི པཊིགྷཛཝན ཏདཱརམྨཎཝཛྫིཏཱནིཙ ཝཱིཐི ཙིཏྟཱནི ལབྦྷནྟཱིཏི ཡོཛནཱ. ཨེཏྠཱཔི ཝཛྫིཏབྦེསུ ཨཊྛཏིཾས ཝཱིཐིཙིཏྟེསུ སོལ༹སནྣཾ ཙིཏྟཱནཾ ཨུཔརིཝུཙྩམཱནཏཱ དཊྛབྦཱ. སབྦཏྠཱཔཱིཏི སབྦཱསུཔི རཱུཔཱརཱུཔབྷཱུམཱིསུ. ཏཾཏཾ པསཱདརཧིཏཱནཾ ཏཾཏཾདྭཱརིཀ ཝཱིཐིཙིཏྟཱནི ¶ ན ལབྦྷནྟེཝཱཏི རཱུཔཱཝཙརབྷཱུམིཡཾ ཏཱཝ གྷཱནཱདིཏྟཡཾ ནཏྠཱིཏི གྷཱནཛིཝ྄ཧཱཀཱཡཔསཱད རཧིཏཱནཾ རཱུཔཱིབྲཧྨཱནཾ གྷཱན ཛིཝ྄ཧཱཀཱཡདྭཱརིཀཱནི ཚ ཝཱིཐིཙིཏྟཱནི ནལབྦྷནྟེཝ. ཡཱནི སནྡྷཱཡ ཚནྣཾ ཙིཏྟཱནཾ ཨུཔརིཝཱཀྱེ ཝུཙྩམཱནཏྟཱཏི ཧེཊྛཱ ཝུཏྟཾ. ཨརཱུཔབྷཱུམིཡཾ པན པཉྩཔི པསཱདཱ ནཏྠཱིཏི པཉྩདྭཱརིཀཱནི དྭིཔཉྩཝིཉྙཱཎ མནོདྷཱ ཏུཏྟིཀ སནྟཱིརཎཏྟཡཝསེན སོལ༹སཝཱིཐིཙིཏྟཱནི ནལབྦྷནྟེཝ. ཡཱནི སནྡྷཱཡ སོལ༹སནྣཾ ཙིཏྟཱནཾ ཨུཔརི ཝུཙྩམཱནཏཱཏི ཝུཏྟཾ. ཀཱམབྷཱུམིཡཾ པན ཏཾཏཾ པསཱདརཧིཏཏཱ ཛཙྩནྡྷཱདཱིནཾ ཝསེན ཡོ ཛེཏབྦཱ. ཀཱམེ ཨསཱིཏི ཝཱིཐིཙིཏྟཱནི ཡཐཱརཧཾ ལབྦྷརེ ལབྦྷནྟི. རཱུཔེ ཙཏུསཊྛི ཏཐཱ ཡཐཱརཧཾ ལབྦྷརེ. ཨརཱུཔེ དྭེ ཙཏྟཱལཱིས ཡཐཱརཧཾ ལབྦྷརེཏི ཡོཛནཱ. ཨེཏྠཙ བྲཧྨལོཀེཝཱ ཨུཔརི ཚཀཱམཱཝཙར དེཝལོཀེསུཝཱ ཨནིཊྛཱརམྨཎཱནི ནཱམ ནཏྠི. ཏསྨཱ རཱུཔཱཝཙརབྷཱུམིཡཾ ཙཏུནྣཾ ཨཀུསལཝིཔཱཀཱནཾ ལབྦྷམཱནཏཱཝཙནཾ ཏཏྠ ཋཏྭཱཝཱ ཨིདྷ ཨཱགནྟྭཱཝཱ ཨིདྷ ཨནཊྛེཧི རཱུཔསདྡེཧི སམཱགཙྪནྟཱནཾ ཝསེན དཊྛབྦཾ. ཀེཙི པན ཨིདྷ ཨཱགཏཱནཾཡེཝ བྲཧྨཱནཾ ཨནིཊྛཱརམྨཎསམཱཡོགོ ཧོཏཱིཏི ཐཱནི ཙཏྟཱརི རཱུཔབྷཱུམིཡཾ ལདྡྷཱནིནཱམ ན ཧོནྟི. ཏསྨཱ ཏཏྠ སཊྛིཡེཝ ཝཱིཐིཙིཏྟཱནཱིཏི ཝདནྟི. ཏཾ ན ཡུཛྫཏི. ཨིདྷ ཨཱགཏཱནཾཡེཝ ཨུཔྤནྣཱནིཔི བྲཧྨཏྟབྷཱཝེ ཨུཔྤནྣཏྟཱ བྲཧྨལོཀེ ཨུཔྤནྣཱནི ཨིཙྩེཝ ཝཏྟབྦཏྟཱ. ནཙ ཏཏྠ ཋིཏཱཔི ཨིདྷ ཨནིཊྛཱནི ནགཎྷནྟི. དཱུརེཔི ཨཱརམྨཎཾ གཧེཏུཾ སམཏྠཏྟཱ བྲཧྨཱནནྟི.

[༡༤༠] ཡཉྩ ཝིབྷཱཝནིཡཾ

ཏསྶ ཝཱདསྶ པཊིཀྑིཔནཏྠཾ ཝུཏྟཾ ‘‘ཨིདྷ པན ཏཏྠ ཋཏྭཱཔི ཨིམཾ ལོཀཾ པསྶནྟཱནཾ ཨནིཊྛཱརམྨཎསྶ ཨསམྦྷཝོ ན སཀྐཱ ཝཏྟུ’’ནྟི. ཏེན ཏཏྠ ཋཏྭཱ ཨིམཾ ལོཀཾ པསྶནྟཱནཾ ཨུཔྤནྣཱནི ཏཱནི ཙཏྟཱརི ཙིཏྟཱནི ཏཏྠ ལདྡྷཱནིནཱམ ཧོནྟི. ཨིདྷ ཨཱགཏཱནཾ ཨུཔྤནྣཱནི ཨིདྷ ལདྡྷཱནིནཱམ ཧོནྟཱིཏི ཨནུཉྙཱཏཾ ཧོཏི. ཏཉྩ ན ཡུཏྟཾ.

ཏཾ ཏཾ བྷཱུམིཔརིཡཱཔནྣེ སཏྟསནྟཱནེ ཨུཔྤནྣཱནིཨེཝ ཏཾཏཾབྷཱུམིཡཾ ཨུཔྤནྣཱནཱིཏི སིདྡྷཏྟཱ. ཨིཙྩེཝནྟིཨཱདི མཧཱནིགམནཾ. ཡཐཱསམྦྷཝནྟི ཏཾ ཏཾ བྷཱུམིཔུགྒལདྭཱརཱརམྨཎེསུ སམྦྷཝཱནུརཱུཔཾ. བྷཝངྒེན ཨནྟརིཏཱ བྷཝངྒནྟརིཏཱ. ཡཱཝཏཱཡུཀནྟི ཏསྨིཾ ཏསྨིཾ བྷཝེ བྷཝནིཀནྟི ཝཱིཐིཏོ པཊྛཱཡ ཡཏྟཀཾ ཀཱལཾ ཛཱིཝིཏསནྟཱནཾ པཝཏྟཏི. ཏཏྟཀཾ ཀཱལནྟི ཨཏྠོ. ཨབྦྷོཙྪིནྣཱ པཝཏྟཏི ཨསཏི ནིརོདྷ སམཱཔཏྟིཡནྟི ཨདྷིཔྤཱཡོ.

ཨིཏི པརམཏྠདཱིཔནིཡཱནཱམ ཨབྷིདྷམྨཏྠསངྒཧསྶ

ཙཏུཏྠཝཎྞནཱཡ ཝཱིཐི སངྒཧསྶ

པརམཏྠདཱིཔནཱ ནིཊྛིཏཱ.

ཝཱིཐིམུཏྟ སངྒཧ པརམཏྠདཱིཔནཱི

༡༤༣. ཨེཝཾ ¶ པཝཏྟིཀཱལེ པཝཏྟིསངྒཧཾ དསྶེཏྭཱ ཨིདཱནི པཊིསནྡྷིཡཾ པཝཏྟིསངྒཧཾ དསྶེཏུཾ ཨཱདིགཱཐ མཱཧ. ཨེཝཾ ཝུཏྟནཡེན པཝཏྟིཡཾ པཝཏྟིསངྒཧོནཱམ ཝཱིཐིཙིཏྟཝསེན ཨུདཱིརིཏོཀཐིཏོ. ཨིདཱནི སནྡྷིཡཾ པཝཏྟིསངྒཧོ ནཱམ ཝཱིཐིམུཏྟ ཙིཏྟཱནཾ ཝསེན ཝུཙྩཏཱིཏི ཡོཛནཱ. ཨེཏྠཙ པཊིསནྡྷིཡཾ ཙིཏྟཙེཏསིཀཱནཾ པཝཏྟིཡཱ ཀཐིཏཱཡ ཏཏོ པརཾ བྷཝངྒཀཱལེཙ ཙུཏིཀཱལེཙ ཏེསཾ པཝཏྟི ཀཐིཏཱཡེཝ ཧོཏཱིཏི ཀཏྭཱ སནྡྷིཡམིཙྩེཝ ཝུཏྟཾ.

[༡༤༡] ཝིབྷཱཝནིཡཾ པན

པརཏོ མརཎུཔྤཏྟིཡཾ པཐམཾ ཙུཏིཾ དསྶེཏྭཱ པཙྪཱ ཨནནྟརེ པཊིསནྡྷིཡཱ ཝཀྑམཱནཏྟཱ ཨིདྷ སནྡྷིགྒཧཎེན ཨཏཱིཏཱ ནནྟར ཙུཏིཔི གཧེཏབྦཱཏི ཨདྷིཔྤཱཡེན ཡཾ ཝུཏྟཾ ‘‘ཏདཱསནྣཏཱཡ ཏཾགཧཎེནེཝ གཧིཏཙུཏིཀཱལེཙཱ’’ཏི. ཏཾ ན ཡུཛྫཏིཡེཝ.

ཝཱིཐིམུཏྟཱནཉྷི ཝིསཡཔྤཝཏྟིནཱམ ཨཏཱིཏཱནནྟརབྷཝེ མརཎུཔྤཏྟིཡཾཨེཝ སིདྡྷཱཏི ཨེཀསྨིཾ བྷཝེ ཝིསཡཔྤཔཏྟིཡཱ སཧ ཏེསཾ པཊིསནྡྷིཔམུཁཱནཾ ཝཱིཐིམུཏྟཙིཏྟཱནཾ པཝཏྟིདསྶནཏྠཾཨེཝ ཏཱཡ ཨཏཱིཏཱནནྟརཙུཏིཡཱ སདྡྷིཾ མརཎུཔྤཏྟིཝིདྷཱནཾ ཐེརེན དསྶིཏནྟི. བྷཝནྟི སཏྟཱ སངྑཱརཱཙ ཨེཏཱསཱུཏི བྷཱུམིཡོ. ཨཡོཏི ཝཌྜྷི. ཨཏྠཏོ པན སུཁཾཙ སུཁཧེཏུ སུཁཔཙྩཡཱཙ ཝེདིཏབྦཱ. ཡེབྷུཡྻེན ཏཏོ ཨཡཏོ ཨཔགཏཱ ཨེཏྠ ནིབྦཏྟཱ སཏྟཱཏི ཨཔཱཡོ. སོཨེཝ བྷཱུམཱིཏི ཨཔཱཡབྷཱུམི. ཨོལཱ༹རིཀེན ཀཱམརཱགེན ཀཱམཱིཡཏཱིཏི ཀཱམོ. གནྟབྦཱ ཨུཔགནྟབྦཱཏི གཏི. གཙྪནྟི སཏྟཱ ཨེཏྠཱཏིཝཱ གཏི. ཨནེཀཝིདྷསམྤཏྟཱིནཾ ཨདྷིཊྛཱནཏཱཡ སོབྷཎཱགཏི སུགཏི. ཀཱམོཙ སོ སུགཏིཙཱཏི སམཱསོ. ནཏྠི ཡཐཱཝུཏྟོ ཨཡོ ཨེཏྠཱཏི ནིརཡོ. ནིཙྩཾ ཝཱ རཡནྟི ཀམྤནྟི ཕནྡནྟི ¶ སཏྟཱ དུཀྑཔྤཏྟཱ ཨེཏྠཱཏི ནིརཡོ. མནུསྶཱ ཝིཡ ཨུདྡྷཾ ཨུཙྩཱ ཨཧུཏྭཱ ཏིརོ ཨཉྩིཏཱ ཨཱཡཏཱཏི ཏིརཙྪཱནཱ. ཡུཝནྟི ནཱནཱ ཝཎྞསཎྛཱནཱཔི སཏྟཱ སམཱནཛཱཏིཏཱཡ ཨེཀཱིབྷཱུཏཱཝིཡ ཧོནྟི ཨེཏཱཡཱཏི ཡོནི. ཛཱཏི.

ཝིབྷཱཝནིཡཾ པན

ཁནྡྷཱནཾ པཝཏྟིཝིསེསོཏི ཝུཏྟཾ.

ཏིརཙྪཱནཱནཾ ཡོནི ཏིརཙྪཱནཡོནི. པེཙྩ ཨིཏཱ གཏཱཏི པེཏཱ. ཨིཏོ ཨཔཀྐམྨ ཙཝིཏྭཱ བྷཝནྟརེ གཏཱཏི ཨཏྠོ. ཡེཀེཙི ཀཱལངྐཏཱ. དིཝངྒཏཱཔི ཧི ལོཀེ ཀཱལངྐཏཱ པེཏཱཏི ཝུཙྩནྟི. ཨིདྷ པན སུཁསམུསྶཡཏོ པེཙྩ པཀཊྛཾ པཝཱསཾ དཱུརཾ གཏཱཏི ཨཏྠེན ཡཱཝ ཏཏོ ན མུཙྩནྟི. ཏཱཝ ནིཙྩཾ དུཀྑཔྤཏྟཱ ལཀྑཎསཾཡུཏྟཱདཱིསུ ཨཱགཏཱ ཏཏཱིཡཱ ཨཔཱཡིཀསཏྟཱ ཨདྷིཔྤེཏཱ. པེཏཱནཾ སམཱུཧོ པེཏྟི. པེཏྟིཡཱ ཝིསཡོཏི པེཏྟི ཝིསཡོ. ཝིསཡོཏིཙ པཝཏྟིདེསོ ཝུཙྩཏི. ཨསུརཀཱཡོཏི ཨེཏྠ སུརཱ ཝུཙྩནྟི ཨུཔརི དེཝཱ སུརནྟི ཨིདྡྷིཝིསེསེཧི དིབྦནྟི, སུཊྛུཝཱ རམནྟི ཀཱམསུཁརཏིཾ པཙྩནུབྷཝནྟཱིཏི ཀཏྭཱ. ན སུརཱཏི ཨསུརཱ. ཝེཔཙིཏྟི པཧཱརཱདཱདཡོ སནྡྷཱཡ སུརཔཊིཔཀྑཱ སུར སདིསཱཝཱཏི ཨཏྠོ. ཝིཡངྐརམཱཏཱ ཨུཏྟརམཱཏཱདཡོ ཝིནི པཱཏིཀེ སནྡྷཱཡ ཁུདྡཀསུརཱ ཙཱུལ༹ཀསུརཱཏི ཨཏྠོ. ཡམརཱཛཱ དཡོ ཝེམཱནིཀཔེཏེ སནྡྷཱཡ ཨེཀདེསེན སུརསདིསཱཏི ཨཏྠོ. ཝེམཱནིཀཔེཏཱཔི ཧི ཀཏྠཙི ཨསུརཀཱཡཱཏི ཨཱགཏཱ. ལོཀནྟརིཀ ནེརཡིཀེ སནྡྷཱཡ སབྦསོ སུརགུཎ རཧིཏཱཏི ཨཏྠོ. ཏེཔི ཧི བུདྡྷཝཾསནིདཱནཊྛཀཐཱཡཾ ཛཱཏིདུཀྑ ནིདྡེསེསུཙ ཨསུརཀཱཡཱཏི ཝུཏྟཱ. ཏཐཱ ཀཱལཀཉྩིཀཔེཏེ སནྡྷཱཡ སབྦསོ སུརབྷཱཝརཧིཏཱཏི ཨཏྠོ. ཨིཏི པཉྩནྣཾ ཨསུརཱནཾ ཝསེན ཨཏྠཝིབྷཱགོ ཝེདིཏབྦོ. དིབྦཱ ཝཏ བྷོཀཱཡཱ པརིཧཱཡིསྶནྟི, པརིཔཱུརིསྶནྟི ཨསུརཀཱཡཱཏི ཨིམསྨིཾ སུཏྟཔདེ ཙཏྟཱརོཔི ཨཔཱཡཱ ཨསུརཀཱཡཱཏི ཨཊྛཀཐཱཡཾ ཝཎྞིཏཱ.

ཏཏྠ ¶ ཝེཔཙིཏྟི པཧཱརཱདཱདཡོ ཨསུརཱ ཏཱཝ ཏིཾསེསུ དེཝེསུ སངྒཧིཏཱ. ཝིནིཔཱཏིཀཱསུརཱ ཙཱཏུམཧཱརཱཛིཀདེཝེསུ. ཏཐཱ ཝེམཱནིཀཔེཏཱསུརཱ. ཏེཔི ཧི ཝིནིཔཱཏིཀཱསུརཱ ཝིཡ ཏིཧེཏུཀཱཔི དུཧེཏུཀཱཔི ཨཧེཏུཀཱཔི ཧོནྟཱིཏི ཨཊྛཀཐཱསུ ཝུཏྟཱ. ཡམརཱཛཱནོ པན ཝེསྶབྷཱུ ནོཏྟིཙ པེཏྟི རཱཛཱ སོམོ ཡམོ ཝེསྶཝཎོཙ རཱཛཱཏི ཨེཝཾ ཀཐཱ ཝཏྠུཔཱལི༹ཡཾ ཨཱགཏཱ ཝེསྶབྷཱུཨཱདཡོ སཡཾ མཧིདྡྷིཀཱ མཧཱནུབྷཱཝཱ ཝེམཱནིཀཔེཏརཱཛཱནོ ཧུཏྭཱཔི ནེརཡིཀེསུ སཏྟེསུ ཀཱརུཉྙཏཾ པཊིཙྩ ཧེཊྛཱ ནིརཡལོཀེསུཔི རཛྫཾ ཀཱརེནྟིཡེཝ. ཏེནེཝ ཧི སབྦེ པེཏལོཀཱཔི ནིརཡལོཀཱཔི ཡམལོ ཀཱཏིཙ ཡམཝིསཡཱཏིཙ ཝུཙྩནྟཱིཏི. ཡེཙ ཙཱཏུམཧཱརཱཛིཀཔརི ཡཱཔནྣཱ པཱཔཛ྄ཛྷཱསཡཱ ཀུརུརཀམྨཀཱརིནོ རེཝཏིཝིམཱནེ ཡཀྑཱཏི ཨཱགཏཱ སཾཀིཙྩཛཱཏཀེ རཀྑསཱཏི ཨཱགཏཱ ཡཀྑརཀྑསཱནཱམ ཨིཏོ གནྟྭཱ ཨུསྶདནིརཡེསུ ནེརཡིཀཱནཾ ནཱནཱཀམྨ ཀཱརཎཱཡོ ཀརོནྟོ ཝིཙརནྟི. ཏེསཾཔི ཀཱལོ ཨུཔཀཱལོཏི ཨེཝམཱདཱིཧི ནཱམེཧི ནཱརདཛཱཏཀེ ཨཱགཏཱནཾ ནིརཡ པཱལཱནཾ ཨུཔརིཡམརཱཛཱནཾ ཨཱཎཱཔཝཏྟཏིཡེཝཱཏི. ལོཀནྟརིཀཱ སུརཱ ནིརཡེ སངྒཧིཏཱ. ཨིདྷ པན ཀཱལཀཉྩིཀཱདཡོ པེཏཱསུརཱཝ ཨདྷིཔྤེཏཱ. ཏེསཾ ཨསུརཱནཾ ཀཱཡོ སམཱུཧོཏི ཨསུརཀཱཡོ. ཨེཏྠཙ ནིརཡབྷཱུམིནཱམ པཙྩེཀཾ སོལ༹སུསྶདཔརི ཝཱརཱནཾ ཨཊྛནྣཾ མཧཱནིརཡཱནཾ ཝསེན ཨནྟོ པཐཝིཡཾ ཋིཏཱཏི ཝེདིཏབྦཱ. ཨརཉྙ པབྦཏ སམུདྡ དཱིཔཀཱདཱིསུཔི ནཱནཱནིརཡ བྷཱུམིཡོ ཧོནྟིཡེཝ. ཏསྨཱ ཏཱདིསསྶ ཝིསུཾ ཝཝཏྠིཏསྶ ཨོཀཱསསྶ ཨཏྠིཏཱཡ ནིརཡོཏྭེཝ ཝུཏྟཱ. སེསཱནཾ པན ཏིསྶནྣཾ ཨཔཱཡབྷུམྨཱིནཾ ཏཱདིསསྶ ཨོཀཱསསྶ ནཏྠིཏཱཡ ཡོནི ཝིསཡ ཀཱཡ སདྡེཧི ཡོཛེཏྭཱ ཁནྡྷཱཝཱ ཁནྡྷཔྤཝཏྟིཔདེསཱཝཱ གཧིཏཱཏི. [ཨཔཱཡབྷཱུམི]

ཨུསྶིཏོ ཨུགྒཏོ ཨུསྶནྣོཝཱ མནོ ཨེཏེསནྟི མནུསྶཱ. ཏེཧི ཨནནྟེསུ ཙཀྐཝཱལེ༹སུཔི ཨིཏརབྷཱུམིཀཱནཾ སཏྟཱནཾ ཏིཀྑཏརསཱུར ཝིཙིཏྲཙིཏྟཱ ཧོནྟི. པརིཔུཎྞཱནཾ ཀུསལཱཀུསལཀམྨ པཐཱནཾ ¶ ཨཱནནྟརིཡཀམྨཱནཉྩ ཨེཏྠེཝ སམྦྷཝཏོཏི. ཏེསུཔི པན ཛམྦུདཱིཔཝཱསིནོཨེཝ ཨཏིསཡེན ཨུསྶིཏམནཱ ཧོནྟི. ཨིཏརེ པན ཏེཧི སམཱནཝཎྞཱདིཏཱཡ མནུསྶཱ ཨིཙྩེཝ ཝུཙྩནྟི. ཨིམསྨིཾ ཙཀྐཝཱལེ༹ པན ཝཏྟབྦམེཝ ནཏྠི, ཡཐཱཧ-ཏཱིཧི བྷིཀྑཝེ ཋཱནེ ཧི ཛམྦུདཱིཔཀཱ མནུསྶཱ ཨུཏྟརཀུརུཀེ མནུསྶེ ཨདྷིགྒཎྷནྟི. དེཝེཙ ཏཱཝཏིཾསེ. ཀཏམེཧི ཏཱིཧི ཋཱནེཧི. སཱུརཱཙ སཏི མནྟོཙ ཨིདྷ བྲཧྨཙརིཡཝཱསོཙཱཏི. ཨཀྑརཙིནྟཀཱ པན ཝདནྟི མནཱུཏི མཧཱསམྨཏརཱཛཱ ཝུཙྩཏི. ཨིམེཙ ཛནཱ ཏེན ཐཔིཏེསུ མརིཡཱདདྷམྨེསུ ཋིཏཱ ཏསྶ པུཏྟཊྛཱནིཡཱ ཧོནྟི. ཏསྨཱ མནུནོ ཨཔཙྩཱ པུཏྟཱཏི མནུསྶཱཏི. ཨིདྷ པན བྷཱུམིཔརིཡཱཡོཏི ཀཏྭཱ མནུསྶཱཏི ཨིཏྠིལིངྒཾ ཨེཀཝཙནཉྩ ཀཏནྟི དཊྛབྦཾ. ཨེཝཾ སེསེ སུཔི. ཡེསུ པན ཙཏྟཱརོ མཧཱརཱཛཱནོ རཛྫཾ ཀཱརེནྟི. ཏེ དེཝཱ ཙཱཏུམཧཱརཱཛིཀཱ. ཏཏྠ དྷཏརཊྛོ གནྡྷཔྤཱནཾ རཱཛཱ ཧོཏི. ཝིརུལ༹ྷཀོ ཀུམྦྷཎྜཱནཾ. ཝིརཱུཔཀྑོ ནཱགཱནཾ. ཀུཝེརོ ཡཀྑཱནཾ. ཏཏྠ པཊིསནྡྷིཝསེན གནྡྷརུཀྑེསུ ཨཔྤེནྟི ཨུཔགཙྪནྟཱིཏི གནྡྷཔྤཱ. གནྡྷརུཀྑཱདྷིཝཏྠཱ དེཝཱ. ཏེ མཱུལགནྡྷཱདིཝསེན དསདྷཱ པཱལི༹ཡཾ ཨཱགཏཱ. ཀུམྦྷཎྜཱཏི དཱནཝརཀྑསཱ. ནཱགཱ ཡཀྑཱཙ པཱཀཊཱ. སབྦེ ཏེ ཡེབྷུཡྻེན པཱཔཛ྄ཛྷཱསཡཱ ཀུརུརཀམྨཀཱརིནོ ཙ ཧོནྟི. ཏསྨཱ ཙཏྟཱརོ མཧཱརཱཛཱནོ ཨཉྙམཉྙཾཝཱ མནུསྶཱནཾ ཝཱ ཨཝིཧེཋནཏྠཱཡ ཏེསུ ནཱནཱརཱཛཱནཾཝཱ ནཱནཱསེནཱཔཏིཾཝཱ ཐཔེསུཾ.

ཨཱཊཱནཱཊིཡསུཏྟཾཙེཏྠཝཏྟབྦཾ. ཏཏྠ ཧི ཡཀྑོཡཀྑིནཱིགནྡྷཔྤོ གནྡྷཔྤཱི ཀུམྦྷཎྜོ ཀུམྦྷཎྜཱི ནཱགོ ནཱགཱིཏིཙཏསྶོ ཨཝརུདྡྷཀཛཱཏིཡོ ཨཱགཏཱ. ཏཏྠ སརཱིརོབྷཱསསིརིསམྤཏྟིཡུཏྟོ ཨམནུསྶོ ཡཀྑོཏིཙ དེཝོཏིཙ དེཝཏཱཏིཙ ཝུཙྩཏི. སརཱིརོ བྷཱས སིརིསམྤཏྟིརཧིཏོ ཝིགཙྪརཱུཔོ ཨམནུསྶོ ཡཀྑོཏྭེཝ ཝུཙྩཏི. རུཀྑཊྛཀཝིམཱནེ ཛཱཏོ རུཀྑདེཝཏཱནཱམ. རུཀྑསྶ ཨབྦྷནྟརེ ཛཱཏོ གནྡྷཔྤོནཱམ. ཡོ ལོཀེ ཀཊྛཡཀྑོཏི ཝུཙྩཏི. པུབྦེ ནིཧཱིནཀམྨཀཏཱ ཀཱཙི གནྡྷཔྤིཡོ མནུསྶིཏྠཱིནཾ སརཱིརབྦྷནྟརེསུཔི ཛཱཡནྟི. ཡཱ ཝེདགནྠེསུ ཡོགིནཱིཏིཙ ལོཀེ ¶ ཛོགིནཱིཏིཙ ཝུཙྩནྟི. ཨབྷིལཀྑིཏརཏྟཱིསུ གོཙརཔསུཏ ཀཱལེ ཛུཏིཨཏྠེན ཛུཎྷཱཏིཙ ཝུཙྩནྟི, ཀུབྦྷཎྜཱནཱམ མཧོདརཱ ཝིསཱལཀྑཱ རཀྑསཱཨེཝ. ཡེ ལོཀེ དྷན རཀྑཀཱཏི ཝུཙྩནྟི. ཏེ ཧི ཝེཔུལླཔབྦཏེ མཎིརཏནཾ རཀྑནྟི. ཨནྟོ ཧིམཝནྟེ ཨབྦྷནྟར ཨམྦརུཀྑེ རཀྑནྟི. ཨེཝཾ རཏནཊྛཱནཱནིཝཱ ཝནཔྤཏི རུཀྑེཝཱ དིབྦོསདྷརུཀྑེཝཱ དིབྦགནྡྷརུཀྑེཝཱ ཨུདཀསརེཝཱ རཀྑིཏྭཱ ཨསནྟི བྷཀྑནྟི. ཏསྨཱ རཀྑསཱཏི ཝུཙྩནྟི. ནཱགོ ནཱགཱིཏི ཨེཏྠ ཨནྟོ པབྦཏེཝཱ ཨནྟོ པཐཝིཡཾཝཱ ནིབྦཏྟཱ ཝསུནྡྷརདེཝཡཀྑཛཱཏིཡོཔི ཨིདྷ ནཱགཱཏྭེཝ ཝུཙྩནྟི. ཡཱ མཧཱཔརིནིབྦཱན སུཏྟེ བྷཱུམིཙཱལསུཏྟཔདེ པཐཝཱི དེཝཏཱཏི ཝུཏྟཱ. ཡཱསཾ ཀཱིལཱ༹པསུཏ ཝསེན ཀདཱཙི བྷཱུམིཙཱལོ ཧོཏི. ཡཱསཉྩ མནྟཔདཱནི ཝཏྠུ ཝིཛྫཱཏིཙ བྷཱུམིཝིཛྫཱཏིཙ བྲཧྨཛཱལསུཏྟེ ཝུཏྟཱནི. ཏེསུཙ ནཱནཱ ཨིདྡྷིམནྟཱ ཨཝརུདྡྷཀཱ པཱཔཱཏིརཏཱ ཀིབྦིསཀམྨཀཱརིནོ ཀཱིལཱ༹ སོཎྜཝསེནཝཱ གྷཱསསོཎྜཝསེནཝཱ པེཏེསུཙནིརཡེསུཙ པཀཏི ཝཎྞེནཝཱ སོཎགིཛ྄ཛྷཀཱཀཱདིཝཎྞེནཝཱ སཏྟེ ཝིཧེཋཡནྟཱ ཝིཙརནྟི. སབྦཉྩེ ཏཾ སུཏྟནྟེསུཝཱ ཛཱཏཀེསུཝཱ ཝེདགནྠེསུཝཱ ཀུསལེཧི ཝེདིཏབྦནྟི.

སཧ པུཉྙཀཱརིནོ ཏེཏྟིཾས ཛནཱ མཱགྷེནནཱམ ཛེཊྛཔུརིསེན སཧ ཨེཏྠ ནིབྦཏྟཱཏི ཏེཏྟིཾསཱ. སཱཨེཝ ཏཱཝཏིཾསཱ ནིརུཏྟི ནཡེན. ཀཱམཉྩེཏྠ སབྦཙཀྐཝཱལེ༹སུཔི ཨཡཾ དུཏཱིཡདེཝ ལོཀོ ཛནཝསཏསུཏྟེ ཨཱགཏ ནཡེན སཀྐཊྛཱནིཡཱནཾ པཛཱཔཏི ཝརུཎ ཨཱིསཱནཱདཱིནཾ ཏེཏྟིཾས དེཝརཱཛཱུནཾ ནིབནྡྷནོ ཀཱསོ ཧོཏི. སཧསྶཾ ཙཱཏུམཧཱརཱཛིཀཱནཾ. སཧསྶཾ ཏཱཝཏིཾསཱནནྟི ཧི ཨངྒུཏྟརེ ཝུཏྟཾ. མཱགྷཔུརིསཱ པན ཏེསུ སམུདཱགཏེསུ དེཝརཱཛཊྛཱནེསུ པཙྩཱཛཱཏཱ ཧོནྟི. ཨེཏརཧི དྷརམཱནཱཙ ཏསྨཱ ཏེསཾ ཝསེན ཨཡཾ ཝཙནཏྠོ ཀཏོཏི ཝེདིཏབྦོ. ཨཔརེ པན ཡཐཱ ཨིནྡགོཔཀཝཎྞཱབྷཱ. ཏཱཝ དིསྶནྟི ཏིཾསཏཱིཏི ཨིམསྨིཾ ཝིདྷུརཛཱཏཀེ ཏཱཝ སདྡོ ཏིཾསསདྡཔརིཝཱརམཏྟོ ཧོཏི. ཏཐཱ ཨིདྷཱཔཱིཏི ཀཏྭཱ ཏིཾསམཏྟཱནཾ སཀྐཊྛཱནིཡཱནཾ དེཝརཱཛཀུལཱནཾ ནིཝཱསཊྛཱ ནཏྟཱ ¶ ཏཱཝཏིཾསཱནཱམཱཏི ཡུཏྟཾ སིཡཱ. ཨཊྛཀཐཱསུ པན ཡཐཱཝུཏྟཾ ནིརུཏྟིནཡཾ ཀཔྤེཏྭཱ མཱགྷཝཏྠཱུསུཙ ཏེསུ ཏེསུཙ ཋཱནེསུ སཀྐཱནཾ ཏེཏྟིཾས སངྑཱཨེཝ ཝུཏྟཱཏིཔི ཝདནྟི. ཏཾ ན ཡུཛྫཏི. པཱལི༹ཡཾཨེཝ བྲཧྨཱསནངྐུམཱརོ ཏེཏྟིཾསེ ཨཏྟབྷཱཝེ ཨབྷིནིམྨིནིཏྭཱ དེཝཱནཾ ཏཱཝཏིཾསཱནཾ པལླངྐེསུ ནིསཱིདིཏྭཱཏི ཝུཏྟཏྟཱ. ཡཱམོཏི ཏསྨིཾ དེཝལོཀེ ཨིསྶརདེཝཀུལསྶ ནཱམཾ. ཏཐཱ སུཡཱམོཏིཙ. ཏཾ སཧཙརིཏཏྟཱ པན སོ དེཝ ལོཀོཔི ཏཏྠ ནིབྦཏྟདེཝཱཔི ཡཱམཱཏྭེཝ ཝུཙྩནྟི. ཝིཔུལཱཡ སིརིསམྤཏྟིཡཱ སམནྣཱགཏཏྟཱ ནིཙྩཾ ཏུསནྟི ཨཏིཝིཡ ཧཊྛཏུཊྛམུཁཱ ཧོནྟི ཨེཏྠཱཏི ཏུསིཏཱ. ཡཐཱརུཙིཏེ བྷོགེ སཡམེཝ ནིམྨིནིཏྭཱ ནིམྨིནིཏྭཱ རམནྟི ཨེཏྠཱཏི ནིམྨཱནརཏཱི. ཨཏྟནོ རུཙིཾ ཉཏྭཱ པརེཧི ནིམྨིཏེསུ བྷོགེསུ ཝསཾ ཝཏྟེནྟི ཨེཏྠཱཏི པརནིམྨིཏཝསཝཏྟཱི. བྲཱུཧནྟི ཝཌྜྷནྟི ཨཏིཔཎཱིཏེཧི ཛྷཱནཱདི གུཎེཧི ཝུདྡྷིཾ ཝིརུལ༹ྷིཾ ཝེཔུལླཾ ཨཱཔཛྫནྟཱིཏི བྲཧྨཱནོ. མཧནྟཱ བྲཧྨཱནོ མཧཱབྲཧྨཱནོཏི ཝཏྟབྦེ མཧཱསདྡསྶ ལོཔོ.

པརིསཏི བྷཝཱཏི པཱརིསཛྫཱ. པརིསཱསུ ཛཱཏཱཏིཝཱ པཱརིསཛྫཱ. པརིཙཱརིཀཱཏི ཨཏྠོ. མཧཱབྲཧྨཱནཾ པཱརིསཛྫཱཏི བྲཧྨ པཱརིསཛྫཱ. པུརེ ཨུཙྩེ ཋཱནེ ཨོདཧནྟི ཏིཊྛནྟཱིཏི པུརོཧིཏཱ. མཧཱབྲཧྨཱནཾ པུརོཧིཏཱཏི བྲཧྨཔུརོཧིཏཱ. མཧནྟཱ བྲཧྨཱནོ མཧཱབྲཧྨཱནོ. སཧསྶོབྲཧྨཱ དྭིསཧསྶོབྲཧྨཱ. ཏིསཧསྶོབྲཧྨཱཏིཨཱདིནཱ སངྑཱརུཔཔཏྟིསུཏྟེ ཨཱགཏཱ ཨདྷིཔཏིབྲཧྨཱནོཏི ཨཏྠོ. ཏཏྠ སཧསྶོབྲཧྨཱཏི ཙཀྐཝཱལ༹སཧསྶམྷི ཨིསྶརོ བྲཧྨཱ. དྭིསཧསྶོཏི དྭཱིསུ ཙཀྐཝཱལ༹ སཧསྶེསུ ཨིསྶརོཏི ཨཏྠོ. ཏཡོཔེཏེ ཨེཀཏལ ཝཱསིནོ ཧོནྟི. ཏཏྠ ལོཀེ མཧཱཛནཱ ཝིསུཾ ཝིསུཾ ཀུལདེཝཏཱཡོནཱམ ཨུཔཊྛཧནྟི. ཀེཙི མཧཱདེཝཾནཱམ ཨུཔཊྛཧནྟི. ཀེཙི ཝཱསུདེཝཾནཱམ. ཀེཙི མཧེསརཾནཱམ. ཀེཙི པརམེསྭཱརཾ ནཱམཱཏི. གྷརདེཝཏཱ གཱམདེཝཏཱ རུཀྑདེཝཏཱདཡོཔི ཏེསཾ མཧཱདེཝརཱཛཱནཾ ཨུཔཊྛཀཱཨེཝ སམྤཛྫནྟི. ཏཏྠ མཧཱདེཝརཱ ཛཱནོཝིཡ མཧཱབྲཧྨཱནོ དཊྛབྦཱ. གྷརདེཝཏཱདཡོཝིཡ བྲཧྨ པུརོཧིཏཱདཊྛབྦཱ, ¶ མནུསྶཱཝིཡ བྲཧྨཔཱརིསཛྫཱདཊྛབྦཱ. ཏཏྠཙ གྷར དེཝཏཱདཡོ མཧཱདེཝརཱ ཛཱནོ ཨདིསྭཱཝ ཨུཔཊྛཧནྟི. མནུསྶཱ ཙ ཏེཨུབྷོཔི ཨདིསྭཱཝ ཨུཔཊྛཧནྟི. ཨེཝམེཝཾ བྲཧྨཔུརོཧིཏཱ མཧཱབྲཧྨཱནོཔི ནཔསྶནྟི. མཧཱབྲཧྨཱནཾ ནིཝཱསཊྛཱནཾཔི ནཛཱནནྟི. བྲཧྨཔཱརིསཛྫཱཨུབྷོཔི ནཔསྶནྟི. ཨུབྷིནྣཾནིཝཱསཊྛཱནཾཔི ནཛཱནནྟི. ཡདཱ པན ཨོལཱ༹རིཀཾ རཱུཔཾ མཱཔེཏྭཱ ཨཏྟཱནཾ དསྶེནྟི. ཏདཱ ཨེཝ པསྶནྟི. ཨེསནཡོ ཨུཔརིབྷཱུམཱིསུཔི. ཡཾ པན བྲཧྨནིམནྟན སུཏྟཊྛཀཐཱཡཾ ཝུཏྟཾ བྲཧྨཱནཾ པཀཏིརཱུཔཾ ཀསྶཙི ཨཱཔཱཏཾ ན གཙྪཏཱིཏི. ཏཾ བྲཧྨཔུརོ ཧིཏཱ དཱིནཾ ཨུཔརིམཱནཾ བྲཧྨཱནཾ པཀཏིརཱུཔཾ ཀསྶཙི བྲཧྨཔཱརིསཛྫཱདིནོཝཱ དེཝསྶཝཱ མནུསྶསྶཝཱཨཱཔཱཏཾ ནགཙྪཏཱིཏི ཀཏྭཱ ཝུཏྟཾ. ཧེཊྛིམཱནཾ པན པཀཏིརཱུཔཾ ཨུཔརིམསྶ ཨཱཔཱཏཾ ཨཱགཙྪིསྶཏིཡེཝ. ཏེནེཝ ཧི ཛནཝསབྷསུཏྟཊྛཀཐཱཡཾ ཧེཊྛིམཧེཊྛིམཱཧི དེཝཱ ཨུཔརིམདེཝཱནཾ ཨོལཱ༹རིཀཾ ཀཏྭཱ མཱཔིཏམེཝ ཨཏྟབྷཱཝཾ པསྶིཏུཾ སཀྐོནྟཱིཏི ཝུཏྟཾ. ཏཏྠདུཏཱིཡཏལེ པརིཏྟཱབྷཱཏི བྲཧྨཔཱརིསཛྫཱཨེཝ. ཨཔྤམཱཎཱབྷཱཏི བྲཧྨཔུརོཧིཏཱ ཨེཝ. ཨཱབྷསྶརཱཏི མཧཱབྲཧྨཱནོཨེཝ. ཏསྨིཾ ཏལེ ཨདྷིཔཏི བྲཧྨཱནོཨེཝཱཏི ཨཏྠོ. ཧེཊྛིམཏལཏོ པན ཝིསེས ཀརཎཏྠཾ ཨཱབྷཱཝསེན ནཱམགཧཎཾ ཧོཏཱིཏི དཊྛབྦཾ.

ཏཏྠ པརིཏྟཱ ཨཱབྷཱ ཨེཏེསནྟི པརིཏྟཱབྷཱ. ཨཔྤམཱཎཱ ཨཱབྷཱ ཨེཏེསནྟི ཨཔྤམཱཎཱབྷཱ. ཨཱབྷཱསརནྟི ནིཙྪརནྟི ཨེཏེསཱུཏི ཨཱབྷསྶརཱཏི. ཏཏཱིཡཏལེ པརིཏྟསུབྷཱཏི བྲཧྨཔཱརིསཛྫཱཨེཝ. ཨཔྤམཱཎསུཏཱཏི བྲཧྨཔུརོཧིཏཱཨེཝ. སུཏཀིཎྞཱཏི མཧཱབྲཧྨནོཨེཝ. ཏསྨིཾ ཏལེ ཨདྷིཔཏིབྲཧྨཱནོ ཨེཝཱཏི ཨཏྠོ. ཏཏྠ སུབྷཱཏི ཨེཀགྒྷནཱ ཨཙལསཎྛིཏཱ ཨཱབྷཱཨེཝ ཝུཙྩནྟི. པརིཏྟཱ སུབྷཱ ཨེཏེསནྟི པརིཏྟསུབྷཱ. ཨཔྤམཱཎཱ སུབྷཱ ཨེཏེསནྟི ཨཔྤམཱཎསུབྷཱ. སུཏེཧི ཨཱཀིཎྞཱཏི སུབྷཱཀིཎྞཱ. སུབྷཀིཎྷཱཏིཔི པཋནྟི. ཏེསཾ ཨཱཀཱརསྶ རསྶོ ཨནྟིམཎཀཱརསྶ ཙ ཧཀཱརོ དཊྛབྦོ. ཨིམེསུ པན དྭཱིསུ ཏལེསུ པཀཏིཀཱཡཔྤབྷཱ ཨདྷིམཏྟཱ ཧོནྟི. ཏསྨཱ ཏཱསཾ ཝསེན པརིཏྟཱབྷཱཏིཨཱདིཀཾ ནཱམཾ སིདྡྷཾ. ན བྲཧྨཔཱརི སཛྫཱཏིཨཱདིཀཾ. ¶ ཨེཝཉྩ ཀཏྭཱ ཝེརཉྫསུཏྟེ པཐམཏལཝཱསིནོ བྲཧྨཀཱཡིཀཱ དེཝཱཏི ཨཱགཏཱ. དུཏཱིཡཏལཝཱསིནོ ཨཱབྷཱདེཝཱཏི. ཏཏཱིཡཏལཝཱསིནོ སུབྷཱདེཝཱཏི ཙཏུཏྠཏལེ ཝིཔུལཾ ཕལཾ ཨེཏེསནྟི ཝེཧཔྥལཱ. ཨཐཝཱ ཨིཉྫནཛཱཏིཀེཧི སོམནསྶཛ྄ཛྷཱནེཧི ནིབྦཏྟཱནཾ ཏིཎྞཾ ཧེཊྛིམཏལཱནཾ ཏེཛོསཾ ཝཊྚཱདིཀེན ཨནྟརཱཡེན བྷཱུམིཏལེན སཧ ཨཱཡུཀཔྤནིཝཏྟིཝསེན ཨིཉྫིཏཾ པུཉྙཕལཾ ཨཏྠི. ཏེསུ ཧི ཡཾ སུབྷཱཀིཎྞཱནཾ དེཝཱནཾ ཙཏུསཊྛིཀཔྤཱནཱིཏི ཝུཏྟཾ. ཏཾ ཏསྨིཾ ཏལེ ཨཱདིཀཔྤིཀཱནཾ ཝསེན ཝུཏྟཾ. པཙྪིམིཀཱནཾ པན ཏེསཊྛིཀཔྤ དྭཱསཊྛིཀཔྤ ཨེཀསཊྛི ཀཔྤཱདི ཝསེན ཨིཉྫིཏཾ པཊིལཱིནཾ པུཉྙཕལཾ ཧོཏཱིཏི. ཨཱནེཉྫཛཱཏིཀེན ཨུཔེཀྑཱཛྷཱནེན ནིབྦཏྟཱནཾ པན ཀེནཙི ཨནྟརཱཡེན ཏཱདིསཾ ཨིཉྫིཏཾ པུཉྙཕལཾ ནཱམ ནཏྠི. ཏསྨཱ ཛྷཱན སཱམཏྠིཡཱནུརཱུཔཾ ཝིསེསེན ཨཱིཧིཏཾ ཨབྷིཝཌྜྷིཏཾ པུཉྙཕལཾ ཨེཏྠ ཨཏྠཱིཏི ཝེཧཔྥལཱ.

ནཏྠི སཉྙཱམུཁེན གཧིཏཱ ཙཏྟཱརོ ཨརཱུཔཀྑནྡྷཱ ཨེཏེསནྟི ཨསཉྙཱ. ཨསཉྙཱཙ ཏེ སཏྟཱཙཱཏི ཨསཉྙསཏྟཱ. ཙིཏྟཙེ ཏསིཀཱནཾ པན ནཏྠིཏཱཡ ཏེསཾ ཨསཏྟཔསངྒཏཱ སམྦྷཝཏཱིཏི སཏྟགཧཎཾ ཀཏནྟི དཊྛབྦཾ. ཨེཏེ དྭེཔི ཨེཀཏལཝཱསིནོ ཨེཝ ཧོནྟི. ཨེཏྠཔི ནིབྦཏྟཀཛ྄ཛྷཱནསྶ ཧཱིནམཛ྄ཛྷིམཔཎཱིཏཏཱ ཝིསེསསྶ ཨཏྠིཏཱཡ ཏདནུརཱུཔཾ བྲཧྨཱནཾཔི པཱརིསཛྫ པུརོཧིཏ མཧཱབྲཧྨཏྟ ཝིསེསོ སམྦྷཝཏིཡེཝ. ཨཱཡུཝེམཏྟཏཱཡ པན ཨཉྙམཉྙ ཨདསྶནཱདཱིནཉྩ ནཏྠིཏཱཡ པཱརིསཛྫཱདིཝསེན བྷཱུམིཝིབྷཱགོ ནཏྠཱིཏི ཝེདིཏབྦོ. ཨེཝཾ ཨཝིཧཱདཱིསུཔི. ཨོལཱ༹རིཀཱནཾ ཀཱམརཱགཔཊིགྷཱནུསཡཱནཾ ནཏྠིཏཱཡ སུདྡྷཱནཾ ཨནཱགཱམིཨརཧནྟཱནམེཝ ཨཱཝཱསཱཏི སུདྡྷཱཝཱསཱ. ཏཏྠ པཐམབྷཱུམིཝཱསིནོ ཨཔྤཀེན ཀཱལེན ཨཏྟནོ ཋཱནཾ ནཝིཛཧནྟཱིཏི ཨཝིཧཱ. ཨཐཝཱ, ཨོལཱ༹རིཀཱནཾ པཉྩནྣཾ སཾཡོཛནཱནཾ པཧཱིནཏྟཱ ནཏྠི ཙིཏྟསྶ ཝིཧཉྙནཾ སམཐཝིཔསྶ ནཱདྷམྨེསུ ཨཝིཔྥཱརིཀཏཱཔཏྟི ཨེཏེསནྟི ཨཝིཧཱ. དུཏཱིཡབྷཱུམི ཝཱསིནོ ན ཀེནཙི ཙིཏྟཔརིལཱ༹ཧེན ཏཔྤནྟཱིཏི ཨཏཔྤཱ. ཏཏཱིཡ ཏལཝཱསིནོ པརིསུདྡྷེཧི པསཱདཙཀྑུ དིབྦཙཀྑུ དྷམྨཙཀྑུ པཉྙཱ ཙཀྑཱུཧི སམྤནྣཏྟཱ སུཊྛུ པསྶནྟཱིཏི སུདསྶཱ. ཙཏུཏྠབྷཱུམིཝཱསིནོ པན ¶ ཏཏོ ཨཏིསཡེན སུཊྛུ དསྶནབྷཱཝེན སམནྣཱགཏཱཏི སུདསྶིནོ. ཨཏིསཡཏྠེ ཧི ཨཡཾ ཨཱིཀཱརོཏི. པཉྩམབྷཱུམི ཝཱསིནོ ཨུཔརི ཨཉྙསྶ བྷཱུམནྟརགཏསྶ རཱུཔིབྲཧྨུནོ ནཏྠིཏཱཡ ནཏྠི རཱུཔཱིནཾ སཏྟཱནཾ མཛ྄ཛྷེ ཀེནཙི གུཎེན ཀནིཊྛབྷཱཝོ ཨེཏེསནྟི ཨཀནིཊྛཱ.

ཨཱཀཱསཱནཉྩཱཡཏནབྷཱུམཱིཏི ཨེཏྠ ཡཏྟཀཾ ཨཱཀཱསཔདེསཾ ཕརིཏྭཱ ཨཱཀཱསཱནཉྩཱཡཏན སཉྙིཏཱ ཙཏུཀྑནྡྷཱ པཝཏྟནྟི. སོ ཁནྡྷསཧིཏོ ཨཱཀཱསཔདེསོ ཨཱཀཱསཱནཉྩཱཡཡནབྷཱུམི. ཨེཝཾ སེསཱསུ. པུཐུཛྫནཱ སོཏཱཔནྣཱ སཀདཱགཱམིནོཙཱཔི པུགྒལཱ སུདྡྷཱཝཱསེསུ སབྦཐཱ སབྦཔཀཱརེནཔི ནལབྦྷནྟཱིཏི ཡོཛནཱ. ཨེཏྠཙ སཀདཱགཱམཱིནཾ པཊིཀྑེཔེན ཨནཱགཱམི མགྒཊྛསྶཔི ཏཏྠ པཊིཀྑེཔོ སིདྡྷོ ཧོཏཱིཏི ཨུཔརིམཱནཾ ཏིཎྞཾ ཨརིཡཱནམེཝ ཏཏྠ པཊིལཱབྷོ ཨིམཱཡ གཱཐཱཡ ཝུཏྟོཏི ཝེདིཏབྦོ. སེསཊྛཱནེསཱུཏི པཉྩསུདྡྷཱཝཱསཏོ ཨསཉྙཱཔཱཡཏོཙ ཨཝསེསེསུ ཨེཀཝཱིསཏིཡཱ ཋཱནེསུ, ཨནརིཡཱཏི པུཐུཛྫནཱ. [བྷཱུམིཙཏུཀྐཾ]

༡༤༤. ཨོཀྐནྟིཀྑཎེཏི པཊིསནྡྷིཀྑཎེ. པཊིསནྡྷིཧི བྷཝནྟརེ ཨོཀྐམནཾ ཨནུཔཝིསནནྠི ཨཏྠེན ཨོཀྐནྟཱིཏི ཝུཙྩཏི. ཏཏོ པརཾ བྷཝངྒཾ ཧུཏྭཱཏི ཡོཛནཱ. ཀེཙི པན བྷཝངྒཔརིཡོསཱནེཏི པཋནྟི. ཏཾ ན ཡུཛྫཏི. ཛཱཏིཡཱ ཨནྡྷོ ཛཙྩནྡྷོ. ཨཱདིསདྡེན ཛཱཏི བདྷིར ཛཙྩགྷཱནཀ ཛཱཏིམཱུག ཛཙྩེལ༹ ཛཙྩུམྨཏྟཀ པཎྜཀ ཨུབྷཏོ བྱཉྫནཀ ནཔུཾསཀ མམྨཱདཡོ སངྒཎྷཱཏི. ཏཏྠ ཡསྶ ཙཀྑུཾ ཨུཔྤཱདེཏུཾ ཨསམཏྠེན ཀམྨེན པཊིསནྡྷི ལདྡྷཱ. སོ ཛཙྩནྡྷོ ནཱམ. ཨེསནཡོ སེསེསུཔི. ཏཏྠ པསཱདསོཏ རཧིཏོ ཛཱཏིབདྷིརོ ནཱམ. པསཱད གྷཱནརཧིཏོ ཛཙྩ གྷཱནཀོ ནཱམ. པསཱདཛིཝ྄ཧཱརཧིཏོ ནཱམ ནཏྠི. ཝཙནརཧིཏོ ཛཱཏིམཱུགོནཱམ. དིསཱཝིདིསཱམཏྟཾཔི སཉྙཱཔེཏུཾ ཨསཀྐུཎེཡྻོ ཛཱཏིཨེལོ༹ ནཱམ. སབྦཀཱལཾཔི ཝིཔལླཊྛཙིཏྟོ ཛཙྩུམྨཏྟཀོནཱམ. ཀཱམཧེཏུ ཨཱསིཏྟཀཱདིབྷཱཝེན ཝིཔྤཀཱརཔཏྟོ པཎྜཀོནཱམ. དྭཱིཧི བྱཉྫནེཧི སམནྣཱགཏོ ཨུབྷཏོ བྱཉྫནཀོནཱམ. བྷཱཝདྭཡ རཧིཏོ ནཔུཾསཀོནཱམ. པཀཏིཝཙནེཔི ཨེཀམེཀཾ ཨཀྑརཾ མཧུསྶཱཧེན ¶ ཨུཔྤཱདེནྟོ ཝིབཙྪཝཙནོ མམྨོནཱམ. ཨེཏྠཙ ཙཀྑུཾ ཨུཔྤཱདེཏུཾ སམཏྠེན ཀམྨེན ལདྡྷཔཊིསནྡྷིཀསྶ པཝཏྟིཀཱལེ ཏཾཝཱ ཨཉྙཾཝཱ ཀམྨཾ ཙཀྑུཾ ཨུཔྤཱདེཏི. ཨསམཏྠེནཀམྨེན ལདྡྷཔཊིསནྡྷི ཀསྶ པན ཝཏྠུཝིཔནྣསྶ པཝཏྟིཀཱལེ ཨཉྙཾཔི ཀམྨཾ ཙཀྑུཾ ཨུཔྤཱདེཏཱིཏི ནཏྠི. ཏསྨཱ གབྦྷསེཡྻཀཱནཾཔི ཛཙྩནྡྷབྷཱཝོ པཊིསནྡྷིཀྑཎེཡེཝ སིདྡྷོཏི ཝེདིཏབྦོ. ཨེསནཡོ སེསེསུ ཛཱཏི བདྷིརཱདཱིསུ. ཨཱཡཏནཱནཾ པཊིལཱབྷོ ཛཱཏཱིཏི ཝུཏྟཏྟཱ ཙཀྑུསྶ ཨུཔྤཛྫནཱརཧཀཱལོ ཙཀྑུསྶ ཛཱཏིཀཱལོནཱམ. ཏདཱ ཨནུཔྤནྣ ཙཀྑུཀོ ཛཙྩནྡྷོནཱམཱཏི ཨེཝཾ ཨཏྟནོ ཨཏྟནོ ཨུཔྤཛྫནཱརཧ ཀཱལཝསེན ཏསྶ ཏསྶ ཨཱཡཏནསྶ ཛཱཏིཀཱལོ ཝེདིཏབྦོ. ཨེཝཉྷིསཏི ཛཱཏིམཱུགཱདཡོཔི ཨུཔཔནྣོ ཧོནྟཱིཏིཙ ཝདནྟི. ཝིབྷཱཝནི ཡཾཔི ཨཡམཏྠོ ཝིབྷཱཝིཏོཏི.

[༡༤༢] ཡཾ པན ཝིབྷཱཝནིཡཾ

‘‘ཨཔརེ པན ཛཙྩནྡྷོཏི པསུཏིཡཾཡེཝ ཨནྡྷོ. མཱཏུ ཀུཙྪིཡཾ ཨནྡྷོ ཧུཏྭཱ ནིཀྑནྟོཏི ཨཏྠོ. ཏེན དུཧེཏུཀཏིཧེཏུཀཱནཾ མཱཏུཀུཙྪིཡཾ ཙཀྑུསྶ ཨཝིཔཛྫནཾ སིདྡྷནྟི ཝདནྟཱིཏི’’ ཝུཏྟཾ. ཏཾ ན ཡུཏྟཾ.

ལོཀེ མཱཏུཀུཙྪིཡཾཡེཝ ཨནྡྷོ ཧུཏྭཱ ནིཀྑནྟསྶཔི ཨེཀཙྩསྶ ཏཾ ཏཾ སིཔྤཝིཛྫཱཋཱནེསུ པཉྙཱཝེཡྻཏྟིཡབྷཱཝསྶ དིཊྛཏྟཱ. ཐཔེཏྭཱ ཧི མཧཱབོདྷིསཏྟེ ཨཉྙེཙ པཙྪིམབྷཝིཀེ སཏྟེ ཨཝསེསཱནཾ དྭིཧེཏུཀ ཏིཧེཏུཀཱནཾཔི མཱཏུཀུཙྪིམྷི པརཱུཔཀྐམེནཝཱ མཱཏུཡཱ ཝིསམཔཡོགེནཝཱ ནཱནཱབཱདྷེནཝཱ ཨུཔྤནྣཱནཾཔི ཙཀྑུསོཏཱནཾ ཝིཔཏྟིནཱམ ནཏྠཱིཏི ན སཀྐཱ ནིཡམེཏུནྟི. བྷུམྨསྶིཏཱནཉྩ ཝིནིཔཱཏིཀཱསུརཱནནྟི ཨེཏྠ བྷཱུམིཡཾ ཛཱཏཱཏི བྷུམྨཱ. བྷཱུམིསམྦནྡྷེསུ རུཀྑཊྛཀ པབྦཏཊྛཀ ཝིམཱནེསུ ནིབྦཏྟཱ ཨཱལ༹ཝཀ སཱཏཱགིར ཧེམཝཏཱདཡོ མཧིདྡྷིཀཱ བྷུམྨཱདེཝཱ. ཡེ ལོཀེ བལིཧརཎ ཝསེན པཱུཛནཱིཡཊྛེན ཡཀྑཱཏིཔི ཝུཙྩནྟི. ཡེ པན བྷུམྨདེཝཛཱཏིཀཱཔི སམཱནཱ ཨཏྟནོ པུཉྙནིབྦཏྟསྶ ཀསྶཙི བྷོགསུཁསྶ ཨབྷཱཝཱ ཀིཙྪཛཱིཝི ཀཔྤཏྟཱ ¶ ཝིཙརནྟི. ཏེ ཏེསཾ མཧིདྡྷིཀཱནཾ བྷུམྨདེཝཱནཾ པརཾཔར པཱརིསཛྫེསུ པརིཡཱཔནྣཏྟཱ བྷུམྨེ དེཝེ སིཏཱ ནིསྶིཏཱཏི ཨཏྠེན བྷུམྨསྶིཏཱནཱམ ཧོནྟི. བྷུམྨིསྶིཏཱཏིཔི པཱཋོ. པུཉྙནིབྦཏྟསྶ ནིཝཱསཊྛཱནསྶ ཨབྷཱཝཱ རུཀྑགུམྦལེཎགུཧཱསུསཱནཱ དཱིསུ ཝིཝིཏྟེསུ བྷཱུམིཔདེསེསུ ནིསྶཱཡ ཝསནྟཱིཏི ཨཏྠོ. ཏེཡེཝ ཝིརཱུཔཱ ཧུཏྭཱ བྷཝནྟརེ ནིཔཏནྟཱིཏི ཝིནིཔཱཏིཀཱ. ཝིནིཔཱཏིཀཱཙ ཏེ ཧེཊྛཱཝུཏྟཊྛེན ཨསུརཱཙཱཏི ཝིནིཔཱཏིཀཱ སུརཱ. ཏེ པན གཱམསམཱིཔེཝཱ ཨནྟོགཱམེཝཱ ཝིཝིཏྟཊྛཱནེསུ ཝསིཏྭཱ གཱམཝཱསཱིཧི ཚཌྜིཏཱནི བྷཏྟསིཏྠཔཱུཝཁཛྫམཙྪམཾསཱདཱིནི པརིཡེསིཏྭཱཝཱ ཏཱནི ཨལབྷིཏྭཱ དཱརཀེཝཱ གིལཱནེཝཱ པཱིལེ༹ཏྭཱཝཱ སཀྐོནྟཱ པན ཨཉྙེཔི མནུསྶེ ཏཱསེཏྭཱ པཱིལེ༹ཏྭཱཝཱ ཛཱིཝིཏཾ ཀཔྤེནྟཱིཏི. ཏེསཾ ཝིནིཔཱཏིཀཱསུརཱནཾ. ཨེཀཙྩཱནནྟི ཨདྷིཔྤཱཡོ. ན ཧི སབྦེ ཝིནིཔཱཏིཀཱ སུརཱནཱམ ཨཧེཏུ ཀཱཨེཝཱཏི སཀྐཱ ཝཏྟུཾ. དྭིཧེཏུཀཏིཧེཏུཀཱནཾཔི སབྦྷཱཝཏོ. ཨེཝཉྩ ཀཏྭཱ ཏེསཾ ཨེཀཙྩཱནཾ པིཡངྐརམཱཏཱ ཨུཏྟརམཱཏཱ དྷམྨགུཏྟཱ ཕུསྶམིཏྟཱདཱིནཾ དྷམྨཱབྷིསམཡོཔི ཨཊྛཀཐཱསུ ཝུཏྟོཏི. ཨེཀཙྩེ ཡཀྑཛཱཏིཀཱཔི རཀྑསཛཱཏིཀཱཔི ཝེམཱནིཀཔེཏཱཔི པརདཏྟུཔཛཱིཝི པེཏཱཔི ཨེཏྠ སངྒཧིཏཱཏི དཊྛབྦཱ.

ཏེསཱུཏི ཡཐཱཝུཏྟཔཊིསནྡྷི ཡུཏྟེསུ པུགྒལེསུ. ཡསྨཱ ཨཱཡུཔརིཙྪེདོནཱམ ཨེཀབྷཱུམིཔརིཡཱཔནྣཱནཾ སབྦསཏྟཱནཾ ཨསེསསཱ དྷཱརཎནིཡམཔརིམཱཎཝསེན པཝཏྟོ. ཨཔཱཡཱནཾ མནུསྶཱནཾ བྷུམྨ དེཝཱནཉྩ ཏཱདིསོ ནིཡམཔརིམཱཎོནཱམ ནཏྠི. ན ཧི སཀལཙཀྐ ཝཱལ༹པརིཡཱཔནྣཱ ཨེཀབྷཱུམཀཱ སབྦནིརཡཱ ཨེཀཨཱཡུཔརིཙྪེདཱ ཧོནྟི. ཏིརཙྪཱནཱདཱིསུཔི ཨེསེཝནཡོ. ཏསྨཱ ཝུཏྟཾ ཙཏུནྣཾ ཨཔཱཡཱནནྟིཨཱདི. ཙཏུནྣཾ ཨཔཱཡཱནཾ ཨཱཔཱཡིཀཔུགྒལཱནཾ ཨཱཡུཔྤམཱཎ གཎནཱཡ ནིཡམོ ནཏྠི, ཏཏྠ ཡེབྷུཡྻེན ཀམྨཔམཱཎཏྟཱ. ཏཏྠ ནིརཡེསུ ཨབྦུདཱདཱིནཾ དསནྣཾ ནིརཡཱནཾ བྷགཝཏཱ ཝུཏྟོ ཨཱཡུཔརིཙྪེདོཔི ཏཏྠ ཏཏྠ ནིབྦཏྟཀེན ཀམྨེནེཝསིདྡྷོཏི ཝེདིཏབྦོ. མནུསྶཱནནྟི ཨིདཾ ཛམྦུདཱིཔགཱསཱིནཾ ཝསེན ཝུཏྟནྟི ཝདནྟི. ཏེ སཉྙེཝ ¶ ཧི ཨཱཡུཀཔྤསྶ ཨཱརོཧཎཾ ཨོརོཧཎཉྩ ཨཏྠི. ན ཨིཏརདཱིཔཝཱསཱིནཾ. ཏེསུ ཧི ཨུཏྟརཀུརུཝཱསཱིནཾ ནིཡམཏོ ཝསྶ སཧསྶཾ ཧོཏི. ཨིཏརེསཾ དྭིནྣཾ པཉྩཝསྶ སཏཱནཱིཏིཙ ཝདནྟི. ཨེཝཾ སནྟེ ཏེསུ དཱིཔེསུ ཨཱདིཀཔྤིཀཱནཾཔི སོཨེཝ པརིཙྪེདོཏི ཨཱཔཛྫཏི. ཛམྦུདཱིཔཝཱསཱིནཾ པན སམཝིསམཱཙཱརནིསནྡབྷཱུཏཱ ཙནྡསཱུརིཡནཀྑཏྟཱདཱིནཾ ཝིསམསམགཏིམཱུལིཀཱཨུཏུཨཱཧཱརཱནཾ སམྤཏྟི ཝིཔཏྟིཡོ ཏེསཾཔི སཱདྷཱརཎཱཨེཝ ཧོནྟི. ཏསྨཱ ཏེསུཔི ཨཱཡུཔརིཙྪེདཱནཾ ཨཱརོཧཎཾ ཨོརོཧཎཉྩ ནཏྠཱིཏི ནཝཏྟབྦཾ. ནིསནྡམཏྟཏྟཱ ཛམྦུདཱིཔགཏིཡཱ ཨེཀགཏིཀཱ ནཧོནྟཱིཏི པན ཝཏྟབྦཾ. ཏཐཱ ཧི པཱལི༹ཡཾ ཨུཏྟརཀུརུཀཱ མནུསྶཱ ཨམམཱ ཨཔརིགྒཧཱ. ནིཡཏཱཡུཀཱ ཨཝསེསཱཡུནཱཏི ཝུཏྟཾ. ཏཏྠ ཨཝསེསཱཡུནཱཏི ཨསངྑྱེཡྻཏོ ཨོརོཧིཏྭཱ ནིཙྩལཾ ཋིཏེན ཝསྶསཧསྶེནཱཏི ཨཏྠོཏི.

ཝིནིཔཱཏིཀཱསུརཱནནྟི ཨིདཾ ནིདསྶནམཏྟཾ དཊྛབྦཾ. སབྦེསཾཔི མཧེསཀྑཱནཾ ཨཔྤེསཀྑཱནཉྩ བྷུམྨདེཝཱནཾ ཝེམཱནིཀཔེཏཱདཱིནཉྩ ཨིདྷ ཨདྷིཔྤེཏཏྟཱ. ཏེསཉྷི སབྦེསཾཔི ཀམྨམེཝ པམཱཎནྟི. ཙཱཏུམཧཱརཱཛིཀཱནཾཔནདེཝཱནནྟི ཨིདཾ ཨུཔརིམེ ཙཱཏུམཧཱརཱཛིཀེ སནྡྷཱཡ ཝུཏྟཾ. དིབྦཱནཱིཏི ཏསྨིཾ དེཝལོཀེ སིདྡྷཱནི. པཉྩ ཝསྶསཏཱནཱིཏི ཨིདཉྩ ཡེབྷུཡྻཝསེན ཝུཏྟནྟི གཧེཏབྦཾ. ཡསྨཱ པན ཀསྶཔབུདྡྷསྶ སཱཝཀབྷཱུཏཱ སོཏཱཔནྣདེཝ པུཏྟཱ ཨཱཀཱསཊྛཀ ཝིམཱནེསུ ནིབྦཏྟཱ ཡཱཝ ནིམིརཱཛཀཱལཱཔི ཏིཊྛནྟཱིཏི ཛཱཏཀཊྛཀཐཱཡཾ ཝུཏྟཱ. ཏསྨཱ ཀེསཉྩི ཨཱཀཱསཊྛཀདེཝཱནཾཔི ཀམྨཔམཱཎཏཱ སིདྡྷཱ ཧོཏཱིཏི ཝེདིཏབྦཾ. ན ཙེཏྠ པུནཔྤུནཾ ནིབྦཏྟི ཙིནྟེཏབྦཱ. ན ཧི སོཏཱ པནྣཱནཾ སཏྟཀྑཏྟུཏོ པརཾ ཀཱམབྷཝེ པཊིསནྡྷིནཱམ ཨཏྠི. ན ཙ ཏསྨིཾ དེཝལོཀེ སཧསྶཀྑཏྟུཾ ནིབྦཏྟམཱནཱཔི ཏཏྟཀཾ ཀཱལཾ སཾཔཱཔུཎིཏུཾ སཀྐོནྟཱིཏི. མནུསྶགཎནཱཡཱཏི མནུསྶཱནཾ ཝསྶགཎནཱཡ. མནུསྶལོཀེ ཧི པཉྙཱསཝསྶཱནི ཙཱཏུམཧཱརཱཛིཀེ ཨེཀོ དིབྦརཏྟིདིཝོ ཧོཏི. ཏིཾསརཏྟིདིཝཱ ཨེཀོ དིབྦམཱསོ. དྭཱདསམཱསཱ ཨེཀཾ དིབྦཝསྶཾ. ཏེན དིབྦཝསྶེན ཏེསཾ པཉྩཝསྶསཏཱནི ¶ མནུསྶགཎནཱཡ ནཝུཏིཝསྶསཏསཧསྶཾ ཧོཏཱིཏི. ཏཏོཏི ཙཱཏུམཧཱརཱཛིཀཱནཾ དེཝཱནཾ ཨཱཡུཔྤམཱཎཏོ. ཙཏུགུཎནྟི ཨཱཡུཔམཱཎསྶ དིགུཎཝུདྡྷིཡཱཙེཝ དིབྦསྶ རཏྟིདིཝསྶ དིགུཎཝུདྡྷིཡཱཙ ཝསེན ཙཏཱུཧི བྷཱགེཧི གུཎིཏཾ ཝཌྜྷིཏནྟི ཨཏྠོ. ཨེསནཡོ སེསེསུཔི. ཏཏྠ ཨཱཡུཔམཱཎསྶ དིགུཎཝུདྡྷིནཱམ ཧེཊྛིམཱནཾ དེཝཱནཾ ཨཱཡུཔམཱཎཏོ ཨུཔརིམཱནཾ དེཝཱནཾ ཨཱཡུཔམཱཎསྶ དིགུཎཝུདྡྷི. ཨེཏེན ཏཱཝཏིཾསཱནཾ དིབྦཾ ཨེཀཾ ཝསྶསཧསྶཾ. ཡཱམཱནཾ དྭེཝསྶསཧསྶཱནི. ཏུསིཏཱནཾ ཙཏྟཱརི, ནིམྨཱནརཏཱིནཾ ཨཊྛ. ཝསཝཏྟཱིནཾ དིབྦཱནི སོལ༹སཝསྶ སཧསྶཱནི ཨཱཡུཔྤམཱཎཾ ཧོཏཱིཏི སིདྡྷཾ ཧོཏི.

དིབྦསྶ རཏྟིདིཝསྶ དིགུཎཝུདྡྷིནཱམ ཧེཊྛིམཱནཾ དེཝཱནཾ རཏྟིདིཝཏོ ཨུཔརིམཱནཾ རཏྟིདིཝསྶ དིགུཎཝུདྡྷི. ཨེཏེན མནུསྶལོཀེ ཨེཀཾ ཝསྶསཏཾ ཏཱཝཏིཾསེ ཨེཀོ དིབྦརཏྟིདིཝོ. དྭེཝསྶསཏཱནི ཡཱམེ. ཙཏྟཱརི ཏུསིཏེ. ཨཊྛ ནིམྨཱནརཏིཡཾ. སཧསྶཾ ཚ ཙཝསྶསཏཱནི ཝསཝཏྟིཡཾ ཨེཀོ དིབྦརཏྟིདིཝོཏི སིདྡྷཾ ཧོཏི. རཏྟིདིཝཱནཉྩ དིགུཎཝུདྡྷིཡཱ སིདྡྷཱཡ མཱསསཾཝཙྪརཱནཾཔི དིགུཎཝུདྡྷི སིདྡྷཱཝ ཧོཏཱིཏི. ཨེཝཉྩསཏི ཡཐཱཝུཏྟཱནི ཏཱཝཏིཾསཱདཱིནཾ དིབྦཝསྶསཧསྶཱདིནིཔི ཨཏྟནོ ཨཏྟནོ རཏྟིདིཝམཱསསཾཝཙྪརེཏིཨེཝ ཝེདིཏབྦཱནཱིཏི སིདྡྷཾ ཧོཏི. ཏཐཱཙ སཏི ཨུཔརིམཱནཾ ཨཱཡུཔརིམཱཎཱནི ཧེཊྛིམཱནཾ ཨཱཡུཔརིམཱཎཏོ ཙཏུགུཎཱནཱིཏི སིདྡྷཾ ཧོཏི. ཏེན ཝུཏྟཾ. ཏཏོ ཙཏུགུཎཾ ཏཱཝཏིཾསཱནཾ. ཏཏོ ཙཏུགུཎཾ ཡཱམཱནནྟིཨཱདི. དིབྦགཎནཱཡ ཙ ཏཐཱ སིདྡྷཱཡ སཏི མནུསྶགཎནཱཡཔི ཙཏུགུཎབྷཱཝོ སིདྡྷོཡེཝ ཧོཏི. ཏསྨཱ མནུསྶགཎནཱཡཔི ཧེཊྛིམཱནཾ ནཝུཏིཝསྶསཏསཧསྶཱདཱིནི ཙཏཱུཧི ཨུཔརཱུཔརིགུཎིཏཱནི ཨུཔརིམཱནཾ ཏིཀོཊིསཊྛིཝསྶསཏ སཧསྶཱདིནི བྷཝནྟཱིཏི ཀཏྭཱ ཏཱནི སབྦཱནིཔི ཨཱདིཨནྟདསྶན ཝསེན ནིདྡིསནྟོ ནཝསཏནྟི གཱཐམཱཧ. ཝསྶཱནཾ ནཝསཏཾ ཀོཊིཡོ ཙ ཨེཀཝཱིས ཀོཊིཡོ ཙ ཏཐཱསཊྛིཝསྶ སཏསཧསྶཱནི ཙ ཝསཝཏྟཱིསུ དེཝེསུ ཨཱཡུཔྤམཱཎཾ ཧོཏཱིཏི ཡོཛནཱ.

ཡསྨཱ ¶ ཨཝིཏཀྐཝིཙཱརམཏྟཾ ཛྷཱནཾ ཨོལཱ༹རིཀསྶ ཝིཏཀྐསྶ སམཏིཀྐམཱ པཐམཛ྄ཛྷཱནཏོ སུཊྛུབལཝཾ ཧོཏི. ཏཏོཡེཝ ཏཏཱིཡཛ྄ཛྷཱནཏོཔི ནཱཏིདུབྦལཉྩ ཧོཏི. ཏསྨཱ ཏཾ ཏཏཱིཡཛ྄ཛྷཱནེན ཨེཀཏོ ཧུཏྭཱ སམཏལེ བྷཱུམནྟརེ ཝིཔཱཀཾ དེཏཱིཏི ཝུཏྟཾ དུཏཱིཡཛ྄ཛྷཱནཝིཔཱཀཾ ཏཏིཡཛ྄ཛྷཱནཝིཔཱཀཉྩ དུཏཱིཡཛ྄ཛྷཱནབྷཱུམིཡནྟི. ཏེནེཝཙ བྷཱུམཱིནཾ ཋིཏིཀྐམོཔི ཙཏུཏྠཛ྄ཛྷཱན ཝསེནེཝ སིདྡྷོ. ཐེརེན པན ཧེཊྛཱ པཉྩཀནཡཝསེནེཝ ཛྷཱནཱནི ཝུཏྟཱནི. ཏསྨཱ ཨིདྷཔི ཏེནེཝ ནཡེན ཝིཔཱཀཱནི གཧེཏྭཱ ཙཏུཏྠཛ྄ཛྷཱནཝིཔཱཀཾ ཏཏཱིཡཛ྄ཛྷཱནབྷཱུམིཡནྟིཨཱདི ཝུཏྟཾ. ཏེསཱུཏི ཏཱཧི ཚཧི པཊིསནྡྷཱིཏི གཧིཏཔཊིསནྡྷིཀེསུ. ཀཔྤསྶཱཏི ཨིདཾ ཨསངྑྱེཡྻཀཔྤཾ སནྡྷཱཡ ཝུཏྟཾ. ཙཏུབྦིདྷཱ ཧི ཀཔྤཱམཧཱཀཔྤོ ཨསངྑྱེཡྻཀཔྤོ ཨནྟརཀཔྤོ ཨཱཡུཀཔྤོཏི, ཏཏྠ ཨཱཡུཀཔྤོནཱམ ཏེསཾ ཏེསཾ སཏྟཱནཾ ཏཾཏཾ ཨཱཡུཔརིཙྪེདོ ཝུཙྩཏི. ཨནྟརཀཔྤོནཱམ ཨེཀསྶཝིཝཊྚཊྛཱཡིཨསངྑྱེཡྻསྶ ཨབྦྷནྟརེ མནུསྶཱནཾ ཨཱཡུཀཔྤསྶ ཧཱཡནཝཌྜྷནཝསེན དིསྶམཱནནྟརཱ ཙཏུསཊྛིཔབྷེདཱ ཙཱུལ༹ཀཔྤཱ ཝུཙྩནྟི. པཱིསཏིབྷེདཱཏི ཀེཙི. ཨསཱིཏིབྷེདཱཏི ཨཔརེ. ཙུདྡསཔྤ བྷེདཱཏི ཝེདཝིདུ. ཡེ ལོཀེ མནྭནྟརཀཔྤཱཏི ཝུཙྩནྟི. ཨེཀམེཀེན མནུནཱམཀེན མཧཱསམྨཏརཱཛེན ཨུཔལཀྑིཏཱ ཨནྟརཀཔྤཱཏི ཝུཏྟཾ ཧོཏི. ཀེཙི པན ཨེཀསྨིཾ ཝིཝཊྚཊྛཱཡིམྷི མཧཱསམྨཏརཱ ཛཱནཾ ཨེཀམེཝ ཨིཙྪནྟི. ཙཏུསཊྛིཨནྟརཀཔྤཱ པན ཨེཀོ ཨསངྑྱེ ཀཔྤོནཱམ. སོ ཙཏུབྦིདྷོ སཾཝཊྚོ སཾཝཊྚཊྛཱཡཱི ཝིཝཊྚོ ཝིཝཊྚཊྛཱཡཱིཏི. ཏཏྠ ཝིནསྶམཱནོ ཀཔྤོ སཾཝཊྚོ. ཡཐཱ ཝིནཊྛཾ ཏིཊྛམཱནོ ཀཔྤོ སཾཝཊྚཊྛཱཡཱི. ཝཌྜྷམཱནོ ཀཔྤོ ཝིཝཊྚོ. ཡཐཱ ཝིཝཊྚཾ ཏིཊྛམཱནོ ཀཔྤོ ཝིཝཊྚཊྛཱཡཱིཏི ཝེདིཏབྦོ. ཏེ པན ཙཏྟཱརོ ཨསངྑྱེཡྻཀཔྤཱ ཨེཀོ མཧཱཀཔྤོནཱམ. ཨེཏྠཙ ཡོ ཛནཱཡཱམཝིཏྠཱརེ སེཏསཱསཔརཱསིམྷི ཝསྶསཏ ཝསྶསཏཙྩཡེན ཨེཀེཀབཱིཛཧརཎེན པརིཀྑཱིཎེཔི ཨེཀོ མཧཱཀཔྤོ པརིཀྑཡཾ ནགཙྪཏི. ཨེཝཾ དིགྷོ མཧཱཀཔྤོཏི ཝེདིཏབྦོ.

ཏཏྠ ཡདཱ ཀཔྤོ ཏེཛེན སཾཝཊྚཏི. ཨཱབྷསྶརཏོ ཧེཊྛཱ ཨགྒིནཱ དཡ྄ཧཏི. ཡདཱ ཨཱཔེན སཾཝཊྚཏི. སུབྷཱཀིཎྞཏོ ཧེཊྛཱ ཨུདཀེན ¶ ཝིལཱིཡཏི. ཡདཱ ཝཱཡུནཱ སཾཝཊྚཏི. ཝེཧཔྥལཏོ ཧེཊྛཱ ཝཱཏེན ཝིདྡྷཾསཏཱིཏི ཨེཝཾ ཨཊྛཀཐཱཡཾ ཝུཏྟཏྟཱ ཨཡཾ ལོཀོ ནིརནྟརཾ སཏྟསུ ཝཱརེསུ ཨགྒིནཱ ཝིནསྶཏི. ཨཊྛམེ ཝཱརེ ཨུདཀེན ཝིནསྶཏི. པུན སཏྟསུ ཨགྒིནཱ. ཨཊྛམེ ཨུདཀེནཱཏི ཨེཝཾ ཨཊྛནྣཾ ཨཊྛཀཱནཾ ཝསེན ཙཏུསཊྛིཝཱརེསུ ཨནྟིམེ ཨུདཀཝཱརེ ཨུདཀཾ པཧཱཡ ཝཱཏཝཱརོ ཧོཏཱིཏི ཨཡམཏྠོ སིདྡྷོ ཧོཏི. ཀཐཾ. ཡཾ ཝུཏྟཾ ཨཱབྷསྶརཱནཾ ཨཊྛཀཔྤཱནཱིཏི. ཨེཏེན ཨཊྛམེ ཝཱརེ ཨཱཔོསཾཝཊྚོ ཧོཏི. ཨནྟརཱ སཏྟསུ སཏྟསུ ཝཱརེསུ ཏེཛོསཾཝཊྚཱ ཧོནྟཱིཏི སིདྡྷཾ. ཡཉྩ ཝུཏྟཾ སུབྷཱཀིཎྞཱནཾ ཙཏུསཊྛིཀཔྤཱནཱིཏི. ཨེཏེན ཙཏུསཊྛིམེ ཙཏུསཊྛིམེ ཝཱརེ ཝཱཏསཾཝཊྚོཧོཏི. ཨནྟརཱ ཏེསཊྛིཡཱ ཝཱརེསུ ཏེཛོསཾཝཊྚཱ ཨཱཔོསཾཝཊྚཱཙ ཧོནྟཱིཏི སིདྡྷཾ ཧོཏཱིཏི. ཏེནཱཧུ པོརཱཎཱ –

ཨགྒིནཱ བྷསྶརཱ ཧེཊྛཱ, ཨཱཔེན སུབྷཱཀིཎྞཏོ;

ཝེཧཔྥལཏོ ཝཱཏེན, ཨེཝཾ ལོཀོ ཝིནསྶཏི.

སཏྟསཏྟགྒིནཱ ཝཱརཱ, ཨཊྛམེ ཨཊྛམེ དཀཱ;

ཙཏུསཊྛི ཡདཱ པུཎྞཱ, ཨེཀོ ཝཱཡུཝཱརོ སིཡཱཏི.

ཨེཝཉྩ ཝིནཊྛེ ལོཀེ ཨེཀསྨིཾ ཀཔྤེཔི པཐམཛ྄ཛྷཱནབྷཱུམི ཨཝིནཊྛཱནཱམ ནཏྠི. ཏསྨཱ བྲཧྨཔཱརིསཛྫཱནཾདེཝཱནཾ ཀཔྤསྶཏཏཱིཡོ བྷཱགོ ཨཱཡུཔྤམཱཎཾ, བྲཧྨཔུརོཧིཏཱནཾཨུཔཌྜྷཀཔྤོ, མཧཱ བྲཧྨཱནཾཨེཀོཀཔྤོཏི ཨེཏྠ ཨསངྑྱེཡྻ ཀཔྤོཝ སམྦྷཝཏི. ནམཧཱཀཔྤོ. ཏེན ཝུཏྟཾ ཀཔྤསྶཱཏི ཨིདཾ ཨསངྑྱེཡྻཀཔྤཾ སནྡྷཱཡ ཝུཏྟནྟི. ཨཱཡུཀཔྤཾ སནྡྷཱཡ ཝུཏྟནྟིཔི ཡུཛྫཏིཡེཝ. ཏེཛོསཾཝཊྚཀཔྤེསུ ཧི པཐམཛ྄ཛྷཱནཏལཾ ཝིཝཊྚམཱནཾ སབྦཔཐམཾ ཝིཝཊྚཏི. སཾཝཊྚམཱནཾ སབྦཔཙྪཱ སཾཝཊྚཏི. ཏསྨཱ ཝིཝཊྚསྶ པཙྪིམཌྜྷེན སཾཝཊྚསྶཙ པུབྦཌྜྷེན སཧ ཨེཀཾ ཝིཝཊྚཊྛཱཡིཀཔྤཾ གཧེཏྭཱ དྭེ ཨསངྑྱེཡྻཱནི ཏསྨིཾ ཏལེ ཨེཀོ ཨཱཡུཀཔྤོཏི སཀྐཱ ཝཏྟུནྟི. དུཏཱིཡ ཏལཏོ པཊྛཱཡ པན མཧཱཀཔྤོཝ གཧེཏབྦོ. ཨཔྤཀཾ ཨཱུནཀཾཝཱ ཨདྷིཀཾཝཱ གཎནཱུཔགཾ ན ཧོཏཱིཏི ཀཏྭཱ ཨུཔཌྜྷེཧི ¶ སཧ སཏྟཀཔྤཱནི སནྡྷཱཡ ཨཱབྷསྶརཱནཾ ཨཊྛཀཔྤཱནཱིཏི ཝུཏྟཾ. ཨེཝཾ ཙཏུསཊྛིཀཔྤཱནཱིཏི ཨེཏྠཔཱིཏི. ཨཱཀཱསཱནཉྩཱཡཏནབྷཝཾ ཨུཔགཙྪནྟཱིཏི ཨཱཀཱསཱནཉྩཱཡཏནུཔགཱ, ཏེསཾ. ཨེཀོཝ ཝིསཡོ ཨཱརམྨཎཾ ཡསྶ ཏཾ ཨེཀཝིསཡཾ. ཨེཀཛཱཏིཡནྟི ཨེཀསྨིཾ བྷཝེ. [པཊིསནྡྷིཙཏུཀྐཾ.]

༡༤༥. ཛནེཏཱིཏི ཛནཀཾ ཨུཔཏྠམྦྷེཏཱིཏི ཨུཔཏྠམྦྷཀཾ. ཨུཔཔཱིལེ༹ཏཱིཏི ཨུཔཔཱིལ༹ཀཾ. ཨུཔགྷཱཏེཏཱིཏི ཨུཔགྷཱཏཀཾ. ཏཏྠ ཛནཀཾ ནཱམ པཊིསནྡྷིཔཝཏྟཱིསུ ཝིཔཱཀཀྑནྡྷ ཀཊཏྟཱརཱུཔཱནཾ ནིབྦཏྟིཀཱ ཀུསལཱཀུསལཙེཏནཱ. ཏཏྠ པཊིསནྡྷིནིབྦཏྟིཀཱ ཀམྨཔཐཔཏྟཱཝ དཊྛབྦཱ. པཝཏྟིནིབྦཏྟིཀཱ པན ཀམྨཔཐཾ པཏྟཱཔི ཨཔཏྟཱཔི ཨནྟམསོ པཉྩདྭཱརིཀཛཝནཙེཏནཱཔི སུཔིནནྟེ ཀུསལཱཀུསལཙེཏནཱཔཱིཏི. ཨུཔཏྠམྦྷཀཾནཱམ ཝིཔཙྩིཏུཾ ཨལདྡྷོཀཱསཱཝཱ ཝིཔཀྐཝིཔཱཀཱ ཝཱ སབྦཱཔི ཀུསལཱཀུསལཙེཏནཱ. སཱ ཧི ཛནཀབྷཱུཏཱཔི སམཱནཱ ཨཏྟནོཝིཔཱཀཝཱརཏོ པུརེཝཱ པཙྪཱཝཱ སབྷཱངྒཾ ཀམྨནྟ རཾཝཱཀམྨནིབྦཏྟཀྑནྡྷསནྟཱནཾཝཱཨུཔཏྠམྦྷམཱནཱ པཝཏྟཏི. ཡཐཱ གནྠཱརབྦྷེ རཏནཏྟཡཔཎཱམཙེཏནཱཏི. ཡཾ པན ཝིསུདྡྷིམགྒེ ཨུཔཏྠམྦྷཀཾ པན ཝིཔཱཀཾ ཛནེཏུཾ ནསཀྐོཏཱིཏི ཝུཏྟཾ. ཏཾ ཨལདྡྷཝིཔཱཀཝཱརཾ སནྡྷཱཡ ཝུཏྟནྟི གཧེཏབྦཾ. ན ཧི པཙྩཡསཱམགྒིཡཾ སཏི ཀིཉྩིཀམྨཾ པཝཏྟིཝིཔཱཀམཏྟསྶཔི ཨཛནཀཾནཱམ ཨཏྠཱིཏི. ཏཏྠ ཀམྨནྟརསྶ ཨུཔཏྠམྦྷནཾནཱམ ཨལདྡྷོཀཱསསྶ ཨཉྙསྶ ཛནཀཀམྨསྶ ཨོཀཱསཀརཎཾ. ཏཾ པན མརཎཱསནྣཀཱལེ པཱཀཊཾ. ཏདཱ ཧི ཀུསལེ ཛཝིཏེ ཨཉྙཾ པཊིསནྡྷིཛནཀཾ ཀུསལཀམྨཾ ཨོཀཱསཾ ལབྷཏི. ཨཀུསལེ ཛཝིཏེ ཨཉྙཾ ཨཀུསལཀམྨནྟི. ཝུཏྟཉྷེཏཾ ཨིཏི ཝུཏྟཀེ –

ཨིམསྨིཾ ཙཱཡཾ སམཡེ, ཀཱལངྐརིཡཱཐ པུགྒལོ;

སགྒམྷི ཨུཔཔཛྫེཡྻ, ཙིཏྟཉྷིསྶ པསཱདིཏཾ.

ཨིམསྨིཾ ཙཱཡཾ སམཡེ, ཀཱལངྐརིཡཱཐ པུགྒལོ;

ནིརཡེ ཨུཔཔཛྫེཡྻ, ཙིཏྟཉྷིསྶ པདཱུསིཏནྟི.

པཝཏྟིཀཱལེཔི ཨེཏཾ བཧུལཾ ལབྦྷཏིཡེཝ. ཀམྨནིབྦཏྟཁནྡྷསནྟཱནསྶ ཨུཔཏྠམྦྷནཾནཱམ ཨཉྙེན ལདྡྷོཀཱསེན ཀུསལཀམྨེནཝཱ ཨཀུསལཀམྨེནཝཱ ¶ ནིབྦཏྟསྶ ཁནྡྷསནྟཱནསྶ ཛཱིཝིཏནྟརཱཡེ ཨཔནེཏྭཱ ཛཱིཝིཏཔརིཀྑཱརེ སམུདཱནེཏྭཱ ཙིརཏར པཝཏྟིཀརཎཾ. ཡཐཱཧ –

ཨབྷིཝཱདནསཱིལིསྶ, ནིཙྩཾ ཝུདྡྷཱཔཙཱཡིནོ;

ཙཏྟཱརོ དྷམྨཱ ཝཌྜྷནྟི, ཨཱཡུ ཝཎྞོ སུཁཾ བལནྟི.

ཨེཏྠ པན ཀུསལཾཔི ཨཀུསལཀམྨནིབྦཏྟསྶ ཁནྡྷསནྟཱནསྶ ཨཀུསལཾཔི ཀུསལཀམྨནིབྦཏྟསྶ ཨུཔཏྠམྦྷཀཾནཱམ ནཏྠཱིཏི ནཝཏྟབྦཾ. ཨཀུསལ ཀམྨ ནིབྦཏྟསྶཔི ཧི མཧིདྡྷིཀཱནཾ ནཱགསུཔཎྞཱདཱིནཾ ཁནྡྷསནྟཱནསྶ པཝཏྟིཀཱལེ པུབྦཀཏཾ ཀུསལཾ ཝུཏྟནཡེན ཨུཔབྲཱུཧནཾ ཀརོཏིཡེཝ. ཏཐཱཀུསལཀམྨནིབྦཏྟསྶཔི ཀེསཉྩི ཝིནིཔཱཏིཀཱསུརཱདཱིནཾ ཁནྡྷསནྟཱནསྶ པཝཏྟིཀཱལེ པུབྦཀཏཾ ཨཀུསལཾ ཙིརཏརཔྤཝཏྟིཾ ཀརོཏིཡེཝཱཏི. ཨུཔཔཱིལ༹ཀཨུཔགྷཱཏཀཱནིཔི ཝུཏྟཔྤཀཱརཱ ཀུསལཱཀུསལ ཙེཏནཱཡོཨེཝ. ཏཱཔི ཧི ཛནཀབྷཱུཏཱཔི སམཱནཱ ཨཏྟནོ ཝིཔཱཀཝཱརཏོ པུརེཝཱ པཙྪཱ ཝཱ ཝིཔཱཀཝཱར གཧཎ ཀཱལེཔི ཝཱ ཀམྨནྟརཾཝཱ ཀམྨནིབྦཏྟ ཁནྡྷསནྟཱནཾཝཱ དུབྦལཏརཾ ཀཏྭཱཝཱ ཝིབཱདྷཡམཱནཱ སབྦསོཝཱ ཨུཔཙྪིནྡམཱནཱ པཝཏྟནྟཱིཏི. ཏཏྠ ཨུཔཔཱིལ༹ཀེ ཏཱཝ ཀམྨནྟརསྶ ཝིབཱདྷནཾནཱམ ཨཉྙསྶ ཛནཀཀམྨསྶ དུབྦལབྷཱཝཀརཎཾ. ཀམྨཉྷི ནཱམ ཨཱཡཱུཧནཀཱལེ བལཝནྟཾཔི པཙྪཱ ཀཏེན ཨུཛུཔཊིཔཀྑེན ཀམྨནྟརེན ཝིབཱདྷིཡམཱནཾ པུན ཝིཧཏསཱམཏྠིཡཾ ཧོཏི. ཨུཔརིབྷཱུམི ནིབྦཏྟཀཾཔི སམཱནཾ ཧེཊྛཱབྷཱུམིཡཾ ནིབྦཏྟེཏི. མཧེསཀྑེསུ མཧིདྡྷིཀེསུ ནིབྦཏྟཀཾཔི སམཱནཾ ཨཔྤེསཀྑེསུ ནིབྦཏྟེཏི. ཏཐཱ ཨུཙྩཀུལེསུ ནིབྦཏྟཀཾཔི ནཱིཙཀུལེསུ. དཱིགྷཱཡུཀེསུ ནིབྦཏྟཀཾཔི ཨཔྤཱཡུཀེསུ. མཧཱབྷོགེསུ ནིབྦཏྟཀཾཔི ཨཔྤབྷོགེསུ. པུརིསཏྟ བྷཱཝནིབྦཏྟཀཾཔི སམཱནཾ ཨིཏྠཏྟབྷཱཝཾཝཱ ནཔུཾསཀབྷཱཝཾ ཝཱ ནིབྦཏྟེཏི. ཝཎྞསམྤཏྟིནིབྦཏྟཀཾཔི དུབྦཎྞབྷཱཝཾ. ཨིནྡྲིཡསམྤཏྟིནིབྦཏྟཀཾཔི ཨནྡྷཾཝཱ བདྷིརཾཝཱ ཡཾཀིཉྩི ཨིནྡྲིཡཝེཀལླཾ. ཨངྒཔཙྩངྒ སམྤཏྟིཛནཀཾཔི ཧཏྠཔཱདཱདི ཨངྒཝེཀལླཾ ཛནེཏི. ཏཐཱ ཨཱཡཱུཧནཀཱལེ མཧཱནིརཡེསུ ནིབྦཏྟཀཾཔི ཨཀུསལཾ པཙྪཱཀཏེན བལཝཀུསལེན ཝིབཱདྷིཡམཱནཾ ¶ ཨུསྶདེསུཝཱ པེཏེསུཝཱ ནིབྦཏྟེཏི. ཨཛཱཏསཏྟུ རཱཛཱ ཙེཏྠ ནིདསྶནཾ. ཨུསྶདེསུ ནིབྦཏྟཀཾཔི པེཏེསུཝཱ ཏིརཙྪཱ ནེསུཝཱཏི ཨཱདིསབྦཾ ཝཏྟབྦཾ.

ཨུཔཏྠམྦྷཀཾཔི ཏབྦིཔརིཡཱཡེན ཝེདིཏབྦམེཝ. ཏཐཱ ཧི ཀམྨཾ ནཱམ ཀཏཀཱལེདུབྦལཾཔིསམཱནཾ པཙྪཱསབྷཱགེནབལཝཏཱཀུསལེནཝཱ ཨཀུསལེནཝཱ ཨུཔཏྠམྦྷཱིཡམཱནཾ སུཊྛུ བལཝཾ ཧོཏཱིཏི. ཀམྨནིབྦཏྟ ཁནྡྷསནྟཱནསྶ ཝིབཱདྷནཾནཱམ ཨཉྙེན ཀམྨེན ནིབྦཏྟསྶ སཏྟསྶ གཧིཏཔཊིསནྡྷིཏོ པཊྛཱཡ ཡདཱཀདཱཙི སརཱིརེ ནཱནཱཨནྟརཱཡེ ཨུཔྤཱདེཏྭཱཝཱ ཋཱནནྟརཁེཏྟཝཏྠུ གོམཧིཾས དྷན དྷཉྙབྷོག སམྤཏྟཱིནཾ པུཏྟདཱརཉཱཏི མིཏྟཱནཉྩ ཝིཔཏྟིཾ ཀཏྭཱཝཱ དུཀྑུཔྤཏྟི ཀརཎཾ. དུཝིདྷཉྷི ཀམྨཕལཾནཱམ ཝིཔཱཀཕལཾ ནིསནྡཕལནྟི. ཏཏྠ ཝིཔཱཀཕལཾནཱམ ཀམྨཀཱརཀསྶེཝ ཧོཏི. ན ཨཉྙསྶ. ནིསནྡ ཕལཾ པན ཨཉྙེསཾཔི སཱདྷཱརཎམེཝ. དྷམྨཔདེ ཨཱནནྡསེཊྛིཝཏྠུ ཨེཏྠ ཝཏྟབྦཾ. ཙཀྑཱདཱིསུ པན ཀམྨཛསནྟཐིསཱིསེསུ ཡེན ཀམྨེན ཡཾཀིཉྩི ཨེཀཾཝཱ དྭེཝཱ ཏཱིཎིཝཱ སབྦསོ བྷིཛྫནྟི. ཙཀྑུཔཱལཏྠེ རཱདཱིནཾ ཝིཡ. ཏཾ ཀམྨཾ ཨུཔགྷཱཏཀེ སངྒཧིཏནྟི ཡུཏྟཾ. ཨུཔགྷཱ ཏཀནྟི པན ཨུཔཙྪེདཀནྟིཙ ཨཏྠཏོ ཨེཀཾ. ཏཐཱ ཧི མཛ྄ཛྷིམཊྛ ཀཐཱཡཾ པཐམཾ ཨུཔཙྪེདཀནཱམེན ཝཏྭཱ ཨུཔགྷཱཏཀནྟིཔི ཨེཏསྶེཝ ནཱམནྟི ཝུཏྟཾ. ཨངྒུཏྟརཊྛཀཐཱཡཾ པཐམཾ ཨུཔགྷཱཏཀནཱམེན ཝཏྭཱ ཨུཔཙྪེདཀནྟིཔི ཏསྶེཝེཏཾ ནཱམནྟི ཝུཏྟཾ. ཝིསུདྡྷི མགྒེཔི མརཎསྶཏིནིདྡེསེ ཏདེཝ ཀམྨུཔཙྪེདཀཀམྨནྟི ཝུཏྟཾ. ཨིདྷཙ པརཏོ ཨུཔཙྪེདཀཀམྨུནཱཏི ཝཀྑཏི.

ཨིམསྶཔི ཀམྨནྟརུཔཙྪེདནཾ མརཎཱསནྣཀཱལེ པཱཀཊཾ. ཏདཱཧི པཐམཾ པཱཔཀམྨབལེན དུགྒཏིནིམིཏྟེ ཨུཔཊྛཧནྟེ པུན ཀལྱཱཎ ཀམྨཾ ཏཾ པཊིབཱཧིཏྭཱ སུགཏིནིམིཏྟཾ དསྶེཏྭཱ སགྒེ ནིབྦཏྟེཏི. ཀལྱཱཎཀམྨབལེན སུགཏིནིམིཏྟེ ཨུཔཊྛཧནྟེ པུན པཱཔཀམྨཾ ཏཾ པཊིབཱཧིཏྭཱ དུགྒཏིནིམིཏྟཾ དསྶེཏྭཱ ཨཔཱཡེ ནིབྦཏྟེཏི. དུཊྛ གཱམཎིརཉྙོ སོཎཏྠེརཔིཏུཙ ཝཏྠཱུནི ཀཐེཏབྦཱནི. ཨངྒུཏྟརཊྛཀཐཱཡཾ པན ཀུསལཱཀུསལཀམྨཀྑཡ ཀརསྶ མགྒཀམྨསྶཔི ཀམྨནྟརུཔཙྪེདཀཧཱ ¶ ཝུཏྟཱ. ཨངྒུལིམཱལཏྠེརཱདཱིནཾ ཝིཡཱཏི. ཨིམསྨིཾ བྷཝེ ལདྡྷཱནི མཧགྒཏཀམྨཱནི ཡེན ཨཀུསལེན པརིཧཱཡནྟི. ཏསྶཔི ཀམྨནྟརུཔཙྪེདཀེ སངྒཧོ ཡུཏྟོ. དེཝདཏྟསྶ ཝིཡཱཏི. ཀམྨནིབྦཏྟཁནྡྷསནྟཱནུཔཙྪེདནཾ པན ཏསྨིཾ ཏསྨིཾ བྷཝེ ཨཱཡུ ཀམྨེསུ ཝིཛྫམཱནེསུ ལདྡྷོཀཱསསྶ ཀསྶཙི ཨཔརཱདྷཀམྨསྶ བལེན ཀལལཀཱལཏོ པཊྛཱཡ ཨནྟརཱཝ ཀེནཙིརོགེནཝཱ བྷཡེནཝཱ ཨུཔཀྐམེནཝཱ མརནྟཱནཾ ཝསེན ཝེདིཏབྦཾ.

ཨེཏྠཙ ཀམྨནྟརསྶཝཱ ཀམྨནིབྦཏྟཁནྡྷསནྟཱནསྶཝཱ ཨུཔཏྠམྦྷནཱ དཱིནི སནྡྷཱཡ ཨིམེསཾ ཙཏུནྣཾཔི ཀམྨཱནཾ ཀུསལཱཀུསལབྷཱཝོ ཝིསུདྡྷིམགྒེ ཨངྒུཏྟརཊྛཀཐཱཡཉྩ ཝུཏྟོ. མཛ྄ཛྷིམཊྛཀཐཱཡཾ པན སཾཝཎྞེཏབྦསུཏྟཱནུརཱུཔཾ ཀམྨནིབྦཏྟཁནྡྷསནྟཱནསྶེཝ ཨུཔཏྠམྦྷནཱདཱིནི སནྡྷཱཡ ཨུཔཏྠམྦྷཀསྶ ཀུསལབྷཱཝོ ཨུཔཔཱིལ༹ཀཨུཔགྷཱཏཀཱནཾ ཨཀུསལབྷཱཝོ ཝུཏྟོ. སོ པན མཛ྄ཛྷིམཊཱིཀཱཡཾ ཨངྒུཏྟརཊཱིཀཱཡཉྩ ཨརུཙྩམཱནོ ཝིཡ ཝུཏྟོ. མཧཱཊཱིཀཱཡཾ པན སོ ཀེཙི ཝཱདོཔི ཀཏོ. ཏཏྠཔན སཾཝཎྞེཏབྦསུཏྟཱནུརཱུཔཾ ཝུཏྟཏྟཱ ཝིསུཾ པཱལི༹ནཡོཏི དཊྛབྦོ. ན ཙ ཀེཙིཝཱདོ ཀཏྟབྦོ. སུཏྟསྨིཾཧི ཨཔྤཱཡུཀསཾཝཏྟནིཀཱཨེསཱ མཱཎཝཔཊིཔདཱ, ཡདིདཾ པཱཎཱཏིཔཱཏཱི ཧོཏཱིཏིཨཱདིནཱ ཨུཔགྷཱཏཀཾ པཱཎཱཏིཔཱཏཝསེནེཝ ཝུཏྟཾ. ཨུཔཔཱིལ༹ཀཉྩ བཏྭཱབཱདྷསཾཝཏྟནིཀཱ ཨེསཱ མཱཎཝ པཊིཔདཱ, ཡདིདཾ སཏྟཱནཾ ཝིཧེཋཀཛཱཏིཀོ ཧོཏཱིཏིཨཱདིནཱ ཝིཧིཾསཱདཱིནཾ ཝསེན ཝུཏྟཾ. ཨུཔཏྠམྦྷཀཉྩ དཱིགྷཱཡུཀསཾཝཏྟནིཀཱ ཨེསཱ མཱཎཝ པཊིཔདཱ. ཡདིདཾ པཱཎཱཏིཔཱཏཾ པཧཱཡ པཱཎཱཏིཔཱཏཱ པཊིཝིརཏོ ཧོཏཱིཏིཨཱདིནཱ པཱཎཱཏིཔཱཏཝིརཏིཨཱདཱིནཾ ཝསེན ཝུཏྟཾ. སབྦཉྩེཏཾ མནུསྶཏྟཾ ཨཱགཏསྶེཝ སཏྟསྶ ཝསེནཱཏི ཨེཝཾ ཝིསུཾ པཱལི༹ནཡོ ཝེདིཏབྦོཏི. མཧཱཊཱིཀཱཡཾ པན ཨངྒུཏྟརཊཱིཀཱཡཉྩ ཀམྨནྟརུཔཏྠམྦྷནཱདཱིནི ཨནིཙྪནྟེཧི ཛནཀཱདིབྷཱཝོནཱམ ཝིཔཱཀཾ པཊིཨིཙྪིཏབྦོ. ནཀམྨནྟི ཝིཔཱཀསྶེཝ ཨུཔགྷཱཏཀཏཱ ཡུཏྟཱ ཝིཡ དིསྶཏཱིཏི ཝུཏྟཾ.

ཀིཙྩཝསེནཱཏི ཛནནཾ ཨུཔཏྠམྦྷནཾ ཨུཔཔཱིལ༹ནཾ ཨུཔཙྪིནྡནནྟི ཙཏུནྣཾ ཀིཙྩཱནཾ ཝསེན. ཏཏྠ ཨེཀཱ པཱཎཱཏིཔཱཏཙེཏནཱ ཙཏྟཱརི ཀིཙྩཱནི ¶ སཱདྷེཏི. སཱ ཧི ཡཱཝ ཝིཔཙྩིཏུཾ ཨོཀཱསཾ ནལབྷཏི. ཏཱཝ ཨུཔཏྠམྦྷནཱདཱིསུ ཏཱིསུ ཀིཙྩེསུ ཡཾཀིཉྩི ལདྡྷཔཙྩཡཾ ཀིཙྩཾ ཀརོཏི. ཡདཱ ཝིཔཙྩིཏུཾ ཨོཀཱསཾ ལབྷཏི. ཏདཱ ཨེཀཱཡ ཙེཏནཱཡ ཨེཀཱཨེཝ པཊིསནྡྷི ཧོཏཱིཏི ཨེཝཾ སཱཀེཏཔཉྷེ ཝུཏྟནཡེན ཨེཀཾ ཨཔཱཡབྷཝཾ ཛནེཏི. ཏཏོ པརཾ པན པཊིསནྡྷིཛནནཀིཙྩཾ ནཏྠི. པཝཏྟི ཝིཔཱཀཛནནེན སཧ ཨིཏརཱནི ཏཱིཎི ཀིཙྩཱནི བྷཝསཏསཧསྶེཔི ཀཔྤསཏསཧསྶེཔི སཱདྷེཏིཡེཝ. དྷམྨདིནྣཱཡནཱམ ཨུགྒསེན རཉྙོ དེཝིཡཱ ཝཏྠུ ཨེཏྠ ཝཏྟབྦཾ. སཱ པན ཡདཱ ཨཏྟནོ ཝིཔཱཀཝཱརཏོ པུརེ ཨརིཡབྷཱུཏསྶཝཱ པུཐུཛྫནབྷཱུཏསྶཔི ཀལྱཱཎ ཙིཏྟསམངྒིནོཝཱ ཨུཔཙྪེདནཾ ཀརོཏི. ཏདཱ ཨུཔཙྪིནྡིཏྭཱ ཀམྨནྟ རསྶེཝ ཨོཀཱསཾ ཀརོཏི. སཡཾ ཝིཔཱཀཾ ནཛནེཏི. ཡདཱ པན པཱཔཙིཏྟསམངྒིནོ ཁནྡྷསནྟཱནཾ ཨུཔཙྪིནྡཏི. ཏདཱཨེཝ ཨུཔཙྪིནྡིཏྭཱ ཨཏྟནོ ཝིཔཱཀཾ ཛནེཏི. སཀིཾ ལདྡྷཔཊིསནྡྷིཝཱརཏོ པན པཊྛཱཡ ཨནེཀེསུ ཨཏྟབྷཱཝ སཏསཧསྶེསུཔི ཨུཔཙྪེདནཱདཱིནིཡེཝ ཀརོཏི. ཨེཏྠ མཧཱམོགྒལཱན ཏྠེར ཝཏྠུ སཱམཱཝཏི ཝཏྠུ ཝགྒུམུདཱཏཱིརིཡབྷིཀྑུ ཝཏྠུ དུསྶིམཱར ཀལཱབུརཱཛཝཏྠཱུནི ཀཐེཏབྦཱནི. ཡསྨཱ པན ཨིདཾ ཨུཔཙྪེདཀཀམྨཾ ནཱམ ཏིརཙྪཱནགཏཱནཾ བཧུལཾ ལབྦྷཏི. ཏསྨཱ སུཊྛུ བལཝཾ ཨཀུསལཀམྨཾ དུབྦལསྶ ཨཀུསལཀམྨསྶཝཱ ཨཀུསལཀམྨནིབྦཏྟཁནྡྷསནྟཱནསྶཝཱ ཨུཔཙྪེདཀཾནཱམ ན ཧོཏཱིཏི ན ཝཏྟབྦཾ. ཏེནེཝ ཧི མཛ྄ཛྷིམཊྛཀཐཱཡཾ བཧུཀསྨིཉྷི ཨཀུསལཀམྨེ ཨཱཡཱུཧིཏེ བལཝཀམྨཾ དུབྦལ ཀམྨསྶ ཝིཔཱཀཾ པཊིབཱཧིཏྭཱ ཨཏྟནོ ཝིཔཱཀསྶ ཨོཀཱསཾ ཀརོཏཱིཏི ཝུཏྟཾ.

ཨཔིཙ པཝཏྟིཡཾཔི ཀམྨནྟརཛནིཏཾ བྷཝངྒསནྟཱནཾ ཨནུཔཙྪིནྡིཏྭཱ པཉྩསུ ཙཀྑུ སོཏ གྷཱན ཛིཝ྄ཧཱ བྷཱཝ དསཀ སངྑཱཏེསུ སནྟཏི སཱིསེསུ ཨཉྙཏརསྶ སནྟཏིསཱིསསྶ སབྦསོ ཨུཔཙྪིནྡནཾཔི ཨིམསྶེཝ ཀིཙྩནྟི ཡུཏྟཾ. ཡཾ པན མཧཱཊཱིཀཱཡཾ ཨངྒུཏྟརཊཱིཀཱཡཉྩ ཨུཔཔཱིལི༹ཀཾ ཨཉྙསྶ ཝིཔཱཀཾ ཚིནྡཏི. ན སཡཾ ཨཏྟནོ ཝིཔཱཀཾ ཛནེཏཱིཏི ཝུཏྟཾ. ཏཾ ཨཊྛཀཐཱཡཾ སུཁདུཀྑཾ པཱིལེ༹ཏི, ཨདྡྷཱནཾ པཝཏྟིཏུཾ ན དེཏཱིཏི ཨིདཾ དིསྭཱ ཝུཏྟཾ སིཡཱ. ཨདྡྷཱནཾ པཝཏྟིཏུཾ ནདེཏཱིཏི ཨེཏྠ པན ¶ སུཁསནྟཱནཾཝཱ དུཀྑསནྟཱནཾཝཱ ཙིརཀཱལཾ པཝཏྟིཏུཾ ནདེཏི ཨིཙྩེཝཏྠོ. ན པན ཨུཔགྷཱཏཀཾ ཝིཡ བྷཝངྒསནྟཱནེན སཧ ཨཉྙསྶ ཀམྨསྶ ཝིཔཱཀཾ ཚིནྡཏཱིཏི.

[༡༤༣] ཡཾཔན ཝིབྷཱཝནིཡཾ

‘‘ཛནཀཾ ཀམྨནྟརསྶ ཝིཔཱཀཾ ཨནུཔཙྪིནྡིཏྭཱཝ ཝིཔཱཀཾ ཛནེཏི. ཨུཔགྷཱཏཀཾ ཨུཔཙྪེདནཔུབྦཀནྟི ཨིདཾ ཏཱཝ ཨཊྛཀཐཱསུ སནྣིཊྛཱནནྟི ཝུཏྟཾ’’. ཏཾ ན སུནྡརཾ.

ཨིདྷ པུབྦཀཏེན ཨུཔཙྪེདནཀཀམྨེན མརིཏྭཱ སགྒེ ནིབྦཏྟཱནཾ ཝཏྠཱུནཾ ཨཊྛཀཐཱསུཡེཝ ཨཱགཏཏྟཱཏི.

[༡༤༤] ཡཉྩ ཏཏྠ

ཨཔརེ པན ཨཱཙརིཡཱ ཝདནྟཱིཏིཨཱདིནཱ ཨུཔགྷཱཏཀསྶ སཡཾ ཝིཔཱཀནིབྦཏྟཀཏྟཱ བྷཱཝཝཙནཾ ཝུཏྟཾ. ཏཾཔི ན སུནྡརཾ.

ཏེནེཝ ཀམྨེན ཨཔཱཡེ ནིབྦཏྟཱནཾ དུསྶིམཱར ཀལཱབུརཱཛཱ དཱིནཾ ཏསྶ ཀམྨསྶ ཨུཔཙྪེདཀཀམྨབྷཱཝེན ཨཊྛཀཐཱསུ ཨཱགཏཏྟཱཏི. [ཛནཀཙཏུཀྐཾ]

༡༤༦. གརུཀནྟི ཨཉྙེན ཀམྨེན པཊིབཱཧིཏུཾ ཨསཀྐུཎེཡྻཾ ཀུསལཔཀྑེ མཧགྒཏཀམྨཾ ཨཀུསལཔཀྑེ ནིཡཏམིཙྪཱདིཊྛིཡཱ སཧ པཉྩཱནནྟརིཡཀམྨཾ. ཨེཏྠ སིཡཱ. མཧགྒཏཀམྨནྟི ཀསྨཱ ཝུཏྟཾ. ཏཉྷི པམཱདཝསེནཝཱ ནཱིཝརཎདྷམྨཔཝཏྟིཡཱཝཱ པརིཧཱཡིཡམཱནཾ ནིཀནྟིབལེནཝཱ པཊིབཱཧིཡམཱནཾ ཝིཔཱཀཾ ན དེཏཱིཏི. ཏཐཱ ཨེཀསྶ བཧཱུསུ ཨཱནནྟརིཡཀམྨེསུ ཀཏེསུ ཨེཀསྨིཾ ཝིཔཙྩནྟེ སེསཱནི ན ཝིཔཙྩནྟཱིཏི. ཝུཙྩཏེ, མཧགྒཏཀམྨཾ ཏཱཝཐཔེཏྭཱ པམཱདདྷམྨནཱིཝརཎདྷམྨནིཀནྟིདྷམྨེ ཨཏྟནོ བལཝཏརཉྩ མཧགྒཏཀམྨནྟརཾ ཨཉྙེན པུཉྙཀམྨེན ཨཔྤཊིབཱཧནིཡཊྛེན གརུཀཾ ནཱམ ཧོཏི. ཨཱནནྟརིཡཀམྨཱནི པན ཐཔེཏྭཱ ཨཏྟནོ བལཝཏརཾ ཨཱནནྟརིཡཀམྨཾ ཨཉྙེན ཀེནཙི དྷམྨེན ཨཔྤཊིབཱཧནིཡཊྛེནཱཏི ཨེཝཾ ཡཐཱརཧཾ ཏེསཾ གརུཀཏཱ ཝེདིཏབྦཱཏི. ཨཱསནྣནྟི མརཎཀཱལེ ¶ ཨནུསྶརིཏཾ ཏདཱ ཀཏཉྩ. ཏཏྠ ཏདཱཀཏནྟི ཨནྟིམ ཛཝནཝཱིཐིཏོ པུབྦབྷཱགེ ཨཱསནྣེ ཀཏཾ ཡཾཀིཉྩི ཀུསལཱཀུསལཀམྨཾ. མིཙྪཱདིཊྛིཀམྨཾ པན ཝིཔསྶནཱདིཝསེན པཝཏྟཾ སམྨཱདིཊྛིཀམྨཉྩ ཨནྟིམཛཝནཝཱིསིཡཾཔི ཀཏནྟི གཧེཏབྦཾ. ཡཐཱཧ-མརཎཀཱལེ ཝཱསྶ ཧོཏི མིཙྪཱདིཊྛི སམྨཱདིཊྛི སམཏྟཱ སམཱདིནྣཱཏི. ཨེཏེན ཏཏོ མིཙྪཱདིཊྛིཀམྨཏོ ཨཉྙཾ ཨནྟིམཛཝནཝཱིཐིཡཾ པཝཏྟཾ ཀམྨཾ པཊིསནྡྷིཾ ཛནེཏུཾ ན སཀྐོཏཱིཏི སིདྡྷཾ ཧོཏཱིཏི. ཨཱཙིཎྞནྟི དཱིགྷརཏྟཾ ཨབྷིཎྷསོ ཀཏཾ. སཀིཾ ཀརིཏྭཱཔིཝཱ པཙྪཱ པུནཔྤུནཾ སོམནསྶཛནཀཾ སནྟཱཔཛནཀཉྩ. ཀཊཏྟཱཀམྨནྟི ཀཱརིཡིཏྠཱཏི ཀམྨནྟི ཨེཝཾ ཀཏཀཱརཎཱཨེཝ ཀམྨནྟི ཝཏྟབྦཾ ཀམྨཾ. གརུཀཱདིབྷཱཝེན ཝཏྟབྦཾ ཀམྨཾ ན ཧོཏཱིཏི ཨཏྠོ. ཏཏྠ པུརིམཱནི ཏཱིཎི ཨིམསྨིཾ བྷཝེ ཀཏཱནི ཨུཔཔཛྫཝེདནཱིཡཀམྨཱནིཨེཝ. ཀཊཏྟཱཀམྨཾ པན ཨཏཱིཏབྷཝེསུ ཀཏེཧི ཨཔརཔརིཡཱཡཝེདནཱིཡེཧི སཧ ཨིམསྨིཾ བྷཝེ ཀཏཾ གརུཀཱ སནྣཱཙིཎྞབྷཱཝརཧིཏཾ ཀམྨཔཐཔཏྟཾ ཡཾཀིཉྩི ཨུཔཔཛྫཝེདནཱིཡཀམྨཾ. མཧཱཊཱིཀཱཡཾ པན ཀཊཏྟཱཀམྨཾ པུརིམ ཛཱཏཱིསུ ཀཏཾཨེཝ གཧིཏཾ. ཏཾ ཨཊྛཀཐཱཡ ན སམེཏི. ཨེཏེཧི པན ཏཱིཧི མུཏྟཾ པུནཔྤུནཾ ལདྡྷཱསེཝནཾ ཀཊཏྟཱཝཱ པན ཀམྨཾནཱམ ཧོཏཱིཏི ཧི ཝུཏྟཾ. ན ཙ ཨཏཱིཏབྷཝེསུ ཀཏཱནི མཱཏུགྷཱཏཀཱདཱིནིཔི ཨཔརཔརིཡཱཡ ཀམྨཱནི ཨེཏེཧི ཏཱིཧི མུཏྟཱནཱིཏིཝཱ ཨམུཏྟཱནཱིཏིཝཱ པུནཔྤུནཾ ལདྡྷཱསེཝནཱནཱིཏིཝཱ ཨལདྡྷཱསེཝནཱནཱིཏིཝཱ སཀྐཱ ཝིསེསེཏུཾ. ཏདཱ ཧི ཏཱནི གརུཀ ཀམྨསནྟཱནེ པཝཏྟཱནིཔི ཧོནྟི. ཨཱསནྣཝཙིཎྞཀམྨསནྟཱནེ པཝཏྟཱནིཔཱིཏི.

ཨངྒུཏྟརཊྛཀཐཱཡཉྩ ཨེཏེཧི པན ཏཱིཧི མུཏྟཾ ཨཉྙཱཎཝསེནཀཏཾ ཀཊཏྟཱཝཱ པན ཀམྨཾནཱམཱཏི ཝུཏྟཾ. ན ཏཱནི ཨཉྙཱཎཝསེན ཀབྷཱནཱིཏི སཀྐཱ ཝིསེསེཏུཾ. ཏཱནི ཧི པུརིམབྷཝེསུ ཨཉྙཱཎ ཝསེན ཀཏཱནིཔི ཧོནྟི. ཉཱཎཝསེན ཀཏཱནིཔཱིཏི. ཏཱནི པན ཝིསེསནཱནི ཨིམསྨིཾ བྷཝེ ཀཏཱནཾ གརུཀཱདཱིཧི ཏཱིཧི མུཏྟཱནཾ སཏྟམཛཝན ཀམྨཱནཾ ཝསེན ཝུཏྟཱནཱིཏི ཏེཧི སཧ པུརིམཛཱཏཱིསུ ཀཏཱནི ཨཔརཔརིཡཱཡ ཀམྨཱནི ཀཊཏྟཱ ཀམྨཾནཱམཱཏི ཝེདིཏབྦཱནི. ཨེཝཉྩ ཀཏྭཱ ཡཏྠ ཏཾཔུབྦཀཏཾ ཀམྨནྟི ཨཱགཏཾ. ཏཏྠཔི ཨིམསྨིཾ བྷཝེཝཱ ¶ ཨཏཱིཏབྷཝེསུཝཱ པུབྦཀཱལེ ཀཏནྟི ཨཏྠོ ཝེདིཏབྦོཏི. ཨིམེསུ པན ཙཏཱུསུ ཀམྨེསུ ཝིཛྫམཱནེསུ གརུཀམེཝ ཨནནྟརེ བྷཝེ པཊིསནྡྷིཾ དེཏི. གརུཀེ ཨསཏི ཨཱསནྣཾ. ཨཱསནྣེ ཨསཏི ཨཱཙིཎྞཾ. ཨཱཙིཎྞེ ཨསཏི ཀཊཏྟཱཀམྨཾ. ཏེནཱཧ པཱཀདཱནཔརིཡཱཡེནཱཏི. པཱཀདཱནཝཱརེནཱཏི ཨཏྠོ. ཨེཏྠ སིཡཱ. ཀསྨཱ ཨིདྷ ཨཱསནྣཾ ཨཱཙིཎྞཏོ པཐམཾ ཝུཏྟཾ. ནནུ པཱལི༹ཡཾ ཨཱསནྣཏོ ཨཱཙིཎྞམེཝ པཐམཾ ཝུཏྟཾ. ཡཐཱཧ-ཡཾ གརུཀཾ ཡཾ བཧུལཾ. ཡདཱསནྣཾ. ཀཊཏྟཱཝཱ པན ཀམྨནྟི. ཨཊྛཀཐཱསུཙ ཏེནེཝ ཀམེན པཱཀདཱནཝཱརོ ཝིཧིཏོཏི. ཝུཙྩཏེ, སབྷཱཝཏོ བལཝདུབྦལཀྐམེན པཱལི༹ཡཾ ཨཱཙིཎྞཾ པཐམཾ ཝུཏྟཾ. སོ པན ཀམོ ཀདཱཙི པཱཀདཱནཔརིཡཱཡོཔི སམྦྷཝཏཱིཏི ཀཏྭཱ ཨཊྛཀཐཱསུ ཏེནེཝ ཀམེན པཱཀདཱནཝཱརོ ཝིཧིཏོ. ཨཱསནྣཾཔི ཧིསམཱནཾ ཙིཏྟཾ ཏོསེཏུཾཝཱ སནྟཱཔེཏུཾཝཱ ཨསཀྐོནྟཾ ཧུཏྭཱ དུབྦལཾ བལཝཏོ ཨཱཙིཎྞསྶ ནིཝཏྟཀཾ ན ཧོཏཱིཏི. ཡསྨཱ པན མཧཱཀམྨཝིབྷངྒསུཏྟེ པུབྦེཝཱསྶཏཾ ཀཏཾ ཧོཏི ཀལྱཱཎཀམྨཾ སུཁཝེདནཱིཡཾ. པཙྪཱཝཱསྶཏཾ ཀཏཾ ཧོཏི ཀལྱཱཎཀམྨཾ སུཁཝེདནཱིཡཾ. མརཎཀཱལེཝཱསྶ ཧོཏི སམྨཱདིཊྛི སམཏྟཱ སམཱདིནྣཱཏི ཨེཝཾ ཨཱཙིཎྞདུཙྩརིཏསྶཔི ཨེཀཙྩསྶ ཨཱསནྣེན ཀལྱཱཎ ཀམྨེན སགྒགམནཾ ཝུཏྟཾ. ཏཐཱ པུབྦེཝཱསྶཏཾ ཀཏཾ ཧོཏི པཱཔཀམྨཾ དུཀྑཝེདནིཡཾ.ལ. མིཙྪཱདིཊྛི སམཏྟཱ སམཱདིནྣཱཏི ཨེཝཾ ཨཱཙིཎྞ སུཙརིཏསྶཔི ཨེཀཙྩསྶ ཨཱསནྣེན པཱཔཀམྨེན ཨཔཱཡགམནཾ ཝུཏྟཾ. ཡསྨཱཙ ཨུབྷིནྣཾཔི བལཝབྷཱཝེ སཏི ཨཱསནྣམེཝ པརིཡཏྟཾ བྷཝིཏུཾ ཨརཧཏི. ཏསྨཱ ཨིདྷ ཐེརེན ཨཱསནྣམེཝ པཐམཾ ཝུཏྟནྟི དཊྛབྦཾ. ཨེཏྠཙ པུབྦེཝཱསྶཀཏཾ ཧོཏཱིཏི ཨིདཾ ཨཱསནྣཱནུསྶརིཏཀམྨཝསེན ཝུཏྟནྟི ཝེདིཏབྦཾ. ཏམྦདཱཋིཀནཱམསྶ ཙོརགྷཱཏཀསྶ མཧཱཝཱཏཀཱལནཱམསྶཙ ཨུཔཱསཀསྶ ཝཏྠུ ཨེཏྠ ཀཐེཏབྦནྟི.

[༡༤༥] ཝིབྷཱཝནིཡཾ པན

ཨཊྛཀཐཱཡཾ ཨཱགཏཾ ཛརགྒཝོཔམཾ དསྶེཏྭཱ ཨཱསནྣམེཝ པཐམཾ ཝིཔཱཀཾ དེཏཱིཏི ཨེཀཾསེན ཝུཏྟཾ. ཏཾ ན སུནྡརཾ.

ན ¶ ཧི ཨཊྛཀཐཱཡཾ ཨེཝཾ ཨེཀཾསེན ཝུཏྟཾ. ནཙ ཨུཊྛཱཏུཾཔི ཨསཀྐོནྟོ སོ ཛརགྒཝོ པཛདྭཱརསྶ ཨཱསནྣེ ཋིཏོཔི པཐམཏརཾ ནིཀྑམིསྶཏཱིཏི. [གརུཀཙཏུཀྐཾ]

༡༤༧. དིཊྛདྷམྨོ ཝུཙྩཏི པཙྩཀྑབྷཱུཏོ པཙྩུཔྤནྣོ ཨཏྟབྷཱཝོ. ཝེདིཏབྦཾ ཨནུ བྷཝིཏབྦནྟི ཝེདནཱིཡཾ. ཕལཾ. དིཊྛདྷམྨེ ཝེདནཱིཡཾ ཕལཾ ཨེཏསྶཱཏི དིཊྛདྷམྨཝེདནཱིཡཾ.

[༡༤༦] ཝིབྷཱཝནིཡཾ པན

‘‘དིཊྛདྷམྨེ ཝེདིཏབྦཾ ཝིཔཱཀཱནུབྷཝན ཝསེནཱཏི དིཊྛདྷམྨཝེདནཱིཡ’’ནྟི ཝུཏྟཾ. ཏཾ ན སུནྡརཾ.

དིཊྛེཝ དྷམྨེ ཝིཔཱཀཾ པཊིསཾཝེདེཏཱིཏི ཧི པཱལི༹ཡཾ ཝུཏྟཾ. ཨེཏྠ ཧི ཝིཔཱཀཾ པཊིསཾཝེདེཏཱིཏི ཨེཏེན ཨིདྷ ཝེདནཱིཡསདྡོ ཀམྨསཱདྷནོ ཝིཔཱཀཱཏིདྷེཡྻོཙ ཧོཏཱིཏི དསྶེཏི. ཨེཝཉྩ སཏི ཨིདྷ ཨཉྙཔདཏྠསམཱསོ ཨེཝ ལབྦྷཏི. ན ཨུཏྟརཔདཏྠསམཱསོཏི. དིཊྛདྷམྨཾ ཨུཔེཙྩ ཏསྶ ཨནནྟརེ པཛྫིཏྭཱ པཱཔུཎིཏྭཱ ཝེདིཏབྦཾ ཕལཾ ཨེཏསྶཱཏི ཨུཔཔཛྫཝེདནཱིཡཾ. ཏེནེཝ ཧི ཨཊྛཀཐཱཡཾ ཨུཔཔཛྫ སདྡསྶ ཨཏྠཾ ཝདནྟེན ཨུཔཔཛྫིཏྭཱཏི ཝུཏྟཾ. སུཏྟཔདེསུ པན ཨུཔཔཛྫེཝཱཏི པཱཋོ དིཊྛོ. ཏསྨཱ དིཊྛདྷམྨསྶ སམཱིཔེ ཨནནྟརེ པཛྫིཏབྦོ གནྟབྦོཏི ཨུཔཔཛྫོ. དུཏཱིཡོ ཨཏྟབྷཱཝོ ཨུཔཔཛྫེཝེདིཏབྦཾ ཕལཾ ཨེཏསྶཱཏི ཨུཔཔཛྫཝེདནཱིཡནྟི ཨེཝམཏྠོ པཱཋསྶ ཝསེན ཝེདིཏབྦོ. ཨུཔཔཛྫཱཏིཝཱ ཨནནྟརེ བྷཝེ པཝཏྟོ ཨེཀོ ནིཔཱཏོ. ཡཐཱ པཙྩཱཏི.

[༡༤༧] ཝིབྷཱཝནིཡཾ པན

‘‘དིཊྛདྷམྨཏོ ཨནནྟརཾ ཨུཔཔཛྫིཏྭཱ ཝེདིཏབྦནྟི ཨུཔཝཛྫཝེདནཱིཡ’’ནྟི ཝུཏྟཾ. ཏཾ ན སུནྡརཾ.

ཨུཔཔཛྫཝཱ ཝིཔཱཀཾ པཊིསཾཝེདེཏཱིཏི ཧི པཱལི༹ཡཾ ཝུཏྟཾ. པརིཡཱཡཏི པུནཔྤུནཾ ཨཱགཙྪཏཱིཏི པརིཡཱཡོ. ཨཔརོཙ སོ པརིཡཱ ཡོཙཱཏི ཨཔརཔརིཡཱཡོ. དིཊྛདྷམྨཱ ནཱགཏཱ ནནྟར བྷཝེཧི ཨཉྙོ ¶ ཨཏྟ བྷཱཝ པརིཝཏྟོ. ཏེ ནེཝ ཧི མཧཱཊཱིཀཱཡཾ ཨངྒུཏྟ རཊཱིཀཱཡཉྩ ཨཔརཔརིཡཱཡེཏི དིཊྛདྷམྨཱནནྟརཱནཱགཏཏོ ཨཉྙསྨིཾ ཨཏྟབྷཱཝཔརིཡཱཡེ ཨཏྟབྷཱཝཔརིཝཏྟེཏི ཝུཏྟཾ. སུཏྟཔདེསུ པན ཨཔརེཝཱ པརིཡཱཡེཏིཙ ཨཔརཱཔརེཝཱ པརིཡཱཡེཏིཙ དྭིདྷཱ པཱཋོ དིཊྛོ. ཏཏྠ པཙྪིམསྨིཾ པཱཋེསཏི ཨིདྷ མཛ྄ཛྷེ ཨེཀསྶ ཨཔརསདྡསྶ ལོཔོ དཊྛབྦོ. སངྒཧཔོཊྛཀེསུ པན མཛ྄ཛྷེ དཱིགྷོ ཡཱཀཱརནཊྛོཙ ཨཔརཱཔརིཡསདྡོ དིསྶཏི. སོ བཧཱུསུ ཨཊྛཀཐཱསུ ནཏྠི. པཱལི༹ཡཱཙ ན སམེཏི.

[༡༤༨] ཡཉྩ ཝིབྷཱཝནིཡཾ

‘‘ཨཔརེ ཨཔརེ དིཊྛདྷམྨཏོ ཨཉྙསྨིཾ ཡཏྠཀཏྠཙི ཨཏྟབྷཱཝེ ཝེདིཏབྦཾ ཀམྨཾ ཨཔརཱཔརིཡ ཝེདནཱིཡ’’ནྟི ཝུཏྟཾ. ཏཏྠ དིཊྛདྷམྨཏོཏི ཨིདཾ ཏཱཝ ནཡུཛྫཏི.

ན ཧི མཛ྄ཛྷེ ཨུཔཔཛྫབྷཝཾ ཝཛྫེཏྭཱ པཐམོ དིཊྛདྷམྨོཝ ཨིདྷ ཏཏཱིཡེ པདེ ཨདྷིཀཏོཏི ཡུཏྟོ.

[༡༤༩] ཨཏྠཏོ པན བྱཉྫནཏོཙ སབྦཾ པཱལི༹ཡཱ ན སམེཏི.

ཨཔརེཝཱ པརིཡཱཡེ ཝིཔཱཀཾ པཊིསཾཝེདེཏཱིཏི ཧི པཱལི༹ཡཾ ཝུཏྟཾ. ཨཔརཱཔརེཝཱ པརིཡཱཡེཏིཝཱ. ཨཧོསིནཱམཀཾ ཀམྨཾ ཨཧོསིཀམྨཾ. ཨཧོསིཀམྨཾ. བྷཝིསྶཏིཀམྨཾ. ཨཏྠིཀམྨཾ. ནཏསྶ ཝིཔཱཀོཏི ཨེཝཾ ཝུཏྟཔཱཋཝསེན ཨཱཙརིཡེཧི ཏཐཱགཧིཏནཱམ དྷེཡྻཾ སབྦསོ ཨལདྡྷཝིཔཱཀཝཱརཾ ཀམྨནྟི ཝུཏྟཾ ཧོཏི. ཏཏྠ སཏྟསུ ཀུསལཱཀུསལཛཝནེསུ པཐམཛཝནཙེཏནཱ དིཊྛདྷམྨཝེ དནཱིཡཾནཱམ. སཱ ཧི ཨལདྡྷཱསེཝནཏཱཡ སབྦདུབྦལཏྟཱ ཨཙིརཊྛི ཏིཀཱཙ ཧོཏི ཨཔྤཏརཝིཔཱཀཱཙཱཏི. པཙྩཡཾ ལདྡྷཱ དིཊྛདྷམྨེཨེཝ ཨཧེཏུཀམཏྟཾ ཕལཾ དཏྭཱ ཝིགཙྪཏི. ན ཨེཀཾཔི མརཎཀཱལཾ ཨཏིཀྐམྨ སནྟཱནཾ ཨནུབནྡྷིཏུཾ སཀྐོཏི. པཙྩཡཾ པན ཨལབྷམཱནཱ ཨཧོསིཀཾནཱམ ཧོཏི. པཙྩཡོཏིཙ ཨཏྟནོ ཕལུཔྤཏྟིཡཱ ཨོཀཱསདཱཡཀོ ¶ ནཱནཱ ཨིརིཡཱཔཐེསུ ཨིཊྛཱནིཊྛཱརམྨཎསམཱ གམཱདིཀོ ཡོཀོཙི པཙྩཡོཔི ཡུཛྫཏིཡེཝ. ཊཱིཀཱསུ པན པཊིཔཀྑེཧི ཨནབྷིབྷཱུཏཏཱཡཱཏིཨཱདིནཱ མཧནྟཾ ཀཏྭཱ པཙྩཡོ ཝུཏྟོ. སོ ཀཱཀཝལིཡཱདཱིནཾ ཝིཡ པཱཀཊཏརཕལདཱནཾ སནྡྷཱཡ ཝུཏྟོཏི ཝེདིཏབྦོ. ན ཧི ཀམྨཔཐཛཝནསནྟཱནེ པཝཏྟམཱནཱ ཨིཏརཱཔིཝཱ པཐམཛཝནཙེཏནཱ ཨིཊྛཱནིཊྛསམཱཡོགཝསེནཔི ལདྡྷ པཙྩཡཱ ཀཱཙི ཨཏྟནོ བལཱནུརཱུཔཾ ཕལཾ ན དེཏཱིཏི ཨཏྠི. ནཙཏཱཡ དིཡྻམཱནཾ སབྦཾཔི ཕལཾ མཧཱཛནསྶཝཱ ཀམྨཀཱརཀསྶེཝ ཝཱཔཱཀཊམེཝ སིཡཱཏི སཀྐཱ ཝཏྟུནྟི. ཡཾ པན ཉཱཎཝིབྷངྒཊྛ ཀཐཱཡཾ ཨེཀཾ དིཊྛདྷམྨཝེདནཱིཡཾ ཝིཔཱཀཾ དེཏི. སེསཱནི ཨཝིཔཱཀཱནཱིཏི ཝུཏྟཾ. ཏཾ ཨལདྡྷཔཙྩཡཱནི སེསཱནི སནྡྷཱཡ ཝུཏྟནྟི གཧེཏབྦཾ. ན ཧི ཨེཀོ དིཊྛདྷམྨོ ཨེཀསྶེཝ དིཊྛདྷམྨཝེདནཱི ཡསྶ ཨོཀཱསོཏི སཀྐཱ ཝིཉྙཱཏུནྟི. ཨཏྠསཱདྷིཀཱ པན སནྣིཊྛཱཔཀབྷཱུཏཱ སཏྠམཛཝནཙེཏནཱ ཨུཔཔཛྫ ཝེདནཱིཡཾནཱམ. སཱ ཧི ལདྡྷཱསེཝནཏཱཡ ཐོཀཾ སཱརབྷཱུཏཱ ཧོཏཱིཏི པཐམཙེཏནཱ ཝིཡ སཱིགྷཏརཾ ཝིཔཙྩིཏུཾ ནསཀྐོཏི. བལཝཏཱིཙ ཧོཏཱིཏི ཨེཀཾ བྷཝཾ ཛནེཏུཾ སཀྐོཏི. པཏིཏ ཛཝ ནེསུ པན ཨནྟིམཛཝནཏཱཡ མཛ྄ཛྷིམཙེཏནཱཡོ ཝིཡ ཙིརཊྛིཏིཀཱ ན ཧོཏཱིཏི པཙྩཡཾ ལདྡྷཱ ཨནནྟརེ ཨེཝ བྷཝེ པཊིསནྡྷིཾཝཱ པཝཏྟི ཕལམེཝཝཱ དཏྭཱ ཝིགཙྪཏི. ཨལདྡྷཱ པན ཨཧོསིཀམྨམེཝ ཧོཏི. ན དུཏཱིཡཾ མརཎཀཱལཾ ཨཏིཀྐམིཏུཾ སཀྐོཏི. ཡཾཔན ཉཱཎཝིབྷངྒཊྛཀཐཱཡཾ ཨེཀཾ ཨུཔཔཛྫཝེདནཱིཡཾ པཊིསནྡྷིཾ ཨཱཀཌྜྷཏི. སེསཱནི ཨཝིཔཱཀཱནཱིཏི ཝུཏྟཾ. ཏཾཔི པཊིསནྡྷིཝིཔཱཀཾ སནྡྷཱཡ ཝུཏྟནྟི གཧེཏབྦཾ. སེསཱནིཔི ཧི ཡཱཝ དུཏཱིཡཙུཏི ནཱགཙྪཏི. ཏཱཝ ལདྡྷཔཙྩཡཱནི པཝཏྟི ཝིཔཱཀཾ དེནྟིཡེཝ. ཨིདྷ མིསྶཀ ཀམྨཱནི ཀཏྭཱ ཨནནྟརབྷཝེ མིསྶཀཀམྨཕལཾ ཨནུབྷོནྟཱནི ཝེམཱནིཀ པེཏཝཏྠཱུནི ཨཉྙཱནིཙ ཏཾཏཾཀམྨཾ ཀཏྭཱ ཨནནྟརབྷཝེ ཨེཝ སུགཏི ཡཾ ཀབྦིཔཱཀབྷཱུཏཾ ཝིཔཏྟིཾ ཨནུབྷཝནྟཱནི དུགྒཏིཡཾཝཱ ཏབྦིཔཱཀབྷཱུཏཾ སམྤཏྟིཾ ཨནུབྷཝནྟཱནི ཨནེཀཱནི ཝཏྠུསཏཱནི ཨེཏྠ ཀཐེ ཏབྦཱནཱིཏི.

[༡༥༠] ཡཾ པན ཝིབྷཱཝནིཡཾ

‘‘སཱཙ ¶ པཊིསནྡྷིཾ དཏྭཱཝ པཝཏྟིཝིཔཱཀཾ དེཏི. པཊིསནྡྷིཡཱ པན ཨདིནྣཱཡ པཝཏྟིཝིཔཱཀཾ དེཏཱིཏི ནཏྠཱི’’ཏི ཝུཏྟཾ. ཏཾ ན ཡུཛྫཏི.

ཡཐཱཝུཏྟཝཏྠཱུཧི སདྡྷིཾ ཝིརུཛ྄ཛྷནཏོ.

[༡༥༡] ཡཉྩ ཏཏྠ

‘‘ཙུཏི ཨནནྟརཉྷི ཨུཔཔཛྫཝེདནཱིཡསྶ ཨོཀཱསོ’’ཏི ཀཱརཎཾ ཝུཏྟཾ. ཏཾཔི ཨཀཱརཎཾ.

པུཏིཨནནྟརཏོ པཊྛཱཡ ཡཱཝཛཱིཝཾཔི ཨོཀཱསསམྦྷཝཏོ.

[༡༥༢] ཡཉྩ ཏཏྠ

‘‘པཊིསནྡྷིཡཱ པན དིནྣཱཡ ཛཱཏིསཏེཔི པཝཏྟིཝིཔཱཀཾ དེཏཱིཏི ཝུཏྟཾ’’. ཏཾཔི ན གཧེཏབྦཾ.

ཀམྨསངྐརཱཔཏྟིཏོ. ཨངྒུཏྟརཊྛཀཐཱཡཉྩ དིཊྛདྷམྨཝེདནཱིཡཾ ཨུཔཔཛྫཝེདནཱིཡཾ ཨཔརཔརིཡཱཡ ཝེདནཱིཡནྟི ཏེསཾ སངྐམནཾ ནཏྠི. ཡཐཱཋཱནེཡེཝ པཏིཊྛནྟཱིཏི ཝུཏྟཾ. ན ཙེཏྠ པཊིསནྡྷིཝསེན ཨེཝཾ ཝུཏྟནྟི སཀྐཱ ཝཏྟུཾ. ཏདཏྠསཱདྷཀསྶ ཨཊྛཀཐཱཔདེསསྶཝཱ ཝཏྠུསྶཝཱ ཡུཏྟིཡཱཝཱ ཨབྷཱཝཏོཏི. མཛ྄ཛྷེ པན པཉྩཛཝན ཙེཏནཱ ཨཔརཔརིཡཱཡ ཝེདནཱིཡཾནཱམ. ཨེཏཱ ཧི སུཊྛུ བལཝནྟཱི སཱརབྷཱུཏཱཙ ཧོནྟཱིཏི ན སཱིགྷཾ ཝིཔཙྩིཏུཾ སཀྐོནྟི. ཙིརཊྛིཏིཀཱ པན ཧོནྟི. ཏསྨཱ ཏཏཱིཡབྷཝཏོ པཊྛཱཡ ཡདཱ ཨོཀཱསཾ ལབྷནྟི. ཏདཱ པཉྩཝཱརེ པཊིསནྡྷིཾ དཏྭཱ སཾསཱརཔཝཏྟིཡཱ སཏི ཀཔྤསཏསཧསྶེཔི པཝཏྟིཝིཔཱཀཾ དེནྟཱིཏི. ཨིམཱནིཡེཝ པན ཏཱིཎི ཀམྨཱནི ཨཏྟནོ ཨཏྟནོ ཁེཏྟེ སབྦསོ ཝིཔཱཀཝཱརཾ ཨལབྷམཱནཱནི ཨཧོསིཀམྨཾནཱམ. ཁེཏྟཉྩ ནེསཾ པཐམསྶ དིཊྛ དྷམྨཙུཏིཡཱ པརིཙྪིནྣཾ. དུཏཱིཡསྶ ཨནཱགཏཱནནྟརབྷཝཙུཏིཡཱ. ཏཏཱིཡསྶ པརིནིབྦཱནཙུཏིཡཱཏི དཊྛབྦཾ. [དིཊྛདྷམྨཙཏུཀྐཾ]

༡༤༨. པཱཀཊྛཱནཝསེནཱཏི ¶ ཨཔཱཡཱདིཀསྶ ཝིཔཙྩནཊྛཱནསྶ ཝསེན ཏཐཱ ཙཏྟཱརི ཀམྨཱནིནཱམ ཧོནྟཱིཏི ཡོཛནཱ. ཏཏྠཱཏི ཏེསུ ཨཀུསལཱདཱིསུ ཙཏཱུསུ ཀམྨེསུ. ཀམྨདྭཱརཝསེནཱཏི ཀམྨསིདྡྷིཡཱ ཨངྒབྷཱུཏཱནཾ ཀཱཡཱདི ཀམྨདྭཱརཱནཾ ཝསེན. པཱཎཾ ཨཏིཔཱཏེནྟི ཨེཏེནཱཏི པཱཎཱཏིཔཱཏོ. ཨཏིཔཱཏནཉྩེཏྠ སརསཏོ པཏིཏུཾ ཨདཏྭཱ ཨནྟརཱཨེཝ པཡོགབལེན པཱཏནཾ དཊྛབྦཾ. ཨདིནྣཾ ཨཱདིཡནྟི ཨེཏེནཱཏི ཨདིནྣཱདཱནཾ. ཨགམནཱི ཡཝཏྠུསངྑཱཏེསུ ཝཏྠུཀཱམེསུ མིཙྪཱ ཙརནྟི ཨེཏེནཱཏི ཀཱམེསུམིཙྪཱཙཱརོ. ཏཏྠ པརཔཱཎེ པཱཎསཉྙིནོ ཏསྶ ཛཱིཝིཏིནྡྲིཡསནྟཱནུཔཙྪེདཀསྶ ཀཱཡཝཙཱིཔཡོགསྶ སམུཊྛཱཔིཀཱ ཝདྷཀཙེཏནཱ པཱཎཱཏིཔཱཏོནཱམ. སཡམེཝ ཨཏྟནོ ཛཱིཝིཏིནྡྲིཡཾ པཱཏེནྟསྶ པཱཎཱཏིཔཱཏོནཱམ ནཏྠི. པརཔརིགྒཧིཏེ པརཔརིགྒཧིཏསཉྙིནོ ཏཏོ ཝིཡོགཀཱརཎསྶ ཀཱཡ ཝཙཱིཔཡོགསྶ སམུཊྛཱཔིཀཱ ཨཙྪིནྡཀཙེཏནཱ ཨདིནྣཱདཱནཾནཱམ. ཨགམནཱིཡཝཏྠཱུསུ མགྒེནམགྒཔཊིཔཱདཀསྶ ཀཱཡཔཡོགསྶ སམུཊྛཱཔིཀཱ ཨསྶཱདཙེཏནཱ ཀཱམེསུམིཙྪཱཙཱརོནཱམ. ཀེཙི པནཨེཏྠཔི ཨགམནཱིཡ ཝཏྠུསཉྙིནོཏི པདཾ ཨིཙྪནྟི. ཏཾ ཨཊྛཀཐཱཡ ན སམེཏི. ཨགམཡནཱིཝཏྠུ ཏསྨིཾ སེཝནཙིཏྟནྟི ཧི ཏཏྠ ཝུཏྟཾ. ཨེཏེན ཨགམནཱིཡཝཏྠུམྷི སཏི གམནཱིཡ སཉྙཱཡཝཱ ཨགམནཱིཡ སཉྙཱཡཝཱ སེཝནྟསྶ ཀམྨཔཐོ ཧོཏི ཡེཝཱཏི སིདྡྷཾ ཧོཏི. ཨིཏརཐཱ ཨགམནཱིཡཝཏྠུ ཏཐཱ སཉྙིཏཱ ཏསྨིཾ སེཝནཙིཏྟནྟི ཝུཏྟཾ སིཡཱཏི.

ཨཔརེ པན སཡཾ པཡོགཾ ཀཏྭཱ ཨཏྟནི པརེན ཀརཱིཡམཱནཾ མགྒེན མགྒཔཊིཔཱདནཾ ཨསྶཱདེནྟསྶ སེཝནཙིཏྟེ སཏིཔི ནཏྠི ཀམྨཔྤཐབྷེདོ. པཡོགསྶ ཨབྷཱཝཱཏི ཝདནྟི. སེཝནཙིཏྟེ པན སཏི པཡོགོ ཨཔྤམཱཎནྟི ཨེཀེ. ཨེཝཉྩ སཏི ཏིཡངྒིཀོཝ མིཙྪཱཙཱརོ, ན ཙཏུརངྒིཀོཏི ཨཱཔཛྫཏི. ཨཊྛཀཐཱཡཾ པན སེཝན པཡོགེན སཧ ཙཏུརངྒིཀོཝ ཝུཏྟོཏི ཨཉྙེ. སེཝནཔཡོགོ པན ཡེབྷུཡྻེན ལབྦྷམཱནཏྟཱཡེཝ ཝུཏྟོ. ན པན ཨེཀནྟཨངྒབྷཱཝཏོ. ཨིཏརཐཱ ཨིཏྠཱིནཾ ཡེབྷུཡྻེན པཡོགཀིཙྩཾ ¶ ནཏྠཱིཏི ཏཱསཾ མིཙྪཱཙཱརོ དུལླབྷོ སིཡཱཏི ཙ ཝདནྟི. བྷིཀྑུནིདཱུསནཾཔི ཨེཏྠེཝ སངྒཡ྄ཧཏི. སཱ ཧི རཀྑིཏཱསུ སངྒཧིཏཱཏི. ཊཱིཀཱསུ པན སཱ དྷམྨརཀྑིཏཱཔི ན ཧོཏི. ཀུཏོ མཱཏཱདིརཀྑིཏཱ. དྷམྨོཏི ཧི ཨིདྷ པཱསཎྜིཡདྷམྨོཝ ཨཊྛཀཐཱཡཾ ཝུཏྟོཏི ཝདནྟི. སཱསནདྷམྨོཔི ནན ཡུཏྟོ. སབྲཧྨཙཱརི ནིཡོཔི ཨུཔཛ྄ཛྷཱཡིནཱི ཨཱདིཀཱ ཏསྶཱ མཱཏཱདིཊྛཱནིཡཱཨེཝ ཧོནྟི. ཏཐཱ ཧི སིཀྑཱཔདཝིབྷངྒཊྛཀཐཱཡཾ མིཙྪཱཙཱརོཔི དུསྶཱིལཱཡ.ལ. སཱམཎེརིཡཱ, པུཐུཛྫནབྷིཀྑུནིཡཱ, སོཏཱཔནྣཱཡ, སཀདཱགཱམིནིཡཱ, ཏཏོ ཨནཱགཱམིནིཡཱ ཝཱིཏིཀྐམོ མཧཱསཱཝཛྫོ. ཁཱིཎཱསཝཱཡ པན ཨེཀནྟམཧཱསཱཝཛྫོཝཱཏི ཝུཏྟཾ.

ཀསྨཱཔནེཏྠ སུརཱཔཱནཾ ནགཧི ཏཾ. ཏཾཔིཧི ཨཔཱཡསཾཝཏྟནི ཀབྷཱཝེན ཝུཏྟཾ. ཡཐཱཧ-སུརཱམེརཡཔཱནཾ བྷིཀྑཝེ ཨཱསེཝིཏཾ བྷཱཝིཏཾ བཧུལཱིཀཏཾ ནིརཡསཾཝཏྟནིཀཾ ཏིརཙྪཱནཡོནིསཾཝཏྟནིཀཾ པེཏྟིཝིསཡསཾཝཏྟནིཀཾ. ཡོཙ སབྦལཧུཀོ སུརཱམེརཡ པཱནསྶ ཝིཔཱཀོ. སོ མནུསྶབྷཱུཏསྶ ཨུམྨཏྟཀསཾཝཏྟནིཀོ ཧོཏཱིཏི. ཨཊྛཀཐཱསུཔི ཀོཊྛཱསཏོ པཉྩཔི པཱཎཱཏིཔཱཏཱ དཡོ ཀམྨཔཐཱཨེཝཱཏི ཝུཏྟནྟི. ཝུཙྩཏེ, མཱུལཊཱིཀཱཡཾ ཏཱཝ ཏསྶ སབྷཱགཏྟེན མིཙྪཱཙཱརེ ཨུཔཀཱརཀཏྟེན དསསུཔི ཀམྨཔཐེསུ ཨནུཔཝེསོཏི ཝུཏྟཾ. ཏཏྠ སབྷཱགཏྟཾ གཧེཏྭཱ ཝིབྷཱཝནིཡཾ སུརཱཔཱནཾཔི ཨེཏྠེཝ སངྒཡ྄ཧཏཱིཏི ཝདནྟི རསསངྑཱཏེསུ ཀཱམེསུ མིཙྪཱཙཱརབྷཱཝཏོཏི ཝུཏྟཾ. ཨུཔཀཱརཀཏྟཾ གཧེཏྭཱ པཊིསམྦྷིདཱམགྒཊཱིཀཱཡཾ ཀུསལཱཀུསལཱཔིཙ པཊིསནྡྷིཛནཀཱཡེཝ ཀམྨཔཐཱཏི ཝུཏྟཱ. ཝུཏྟཱཝསེསཱ པཊིསནྡྷིཛནནེ ཨནེཀནྟི ཀཏྟཱ ཀམྨ པཐཱཏི ན ཝུཏྟཱཏི ཨིམསྶ ཝཱཀྱསྶ སཾཝཎྞནཱཡཾ ཝུཏྟཱཝསེ སཱཏི སུརཱཔཱནཱདཡོ ཏབྦིརམཎཱདཡོཙ. སུརཱཔཱནཉྷི མདསྶ པཙྩཡོ. མདོ ཨཔུཉྙཔཐསྶ. ཏབྦིརཏིཔི ནིམྨདཏཱཡ. སཱཙ པུཉྙཔཐསྶཱཏི ཀམྨཔཐཱུཔནིསྶཡཱནི ཏཱནི ཏདཱསནྣཀམྨཝསེན སནྡྷིཛནཀཱནིཔི ཧོནྟཱིཏི ཝུཏྟཾ. ཏཏྠ ཏདཱསནྣཀམྨཝསེནཱཏི ཏསྶ སུརཱཔཱནསྶཝཱ སུརཱཔཱནཝིརཏིཡཱཝཱ ཨཱསནྣེ པཝཏྟཱནཾ ཏམྨཱུལཀཱནཾ ཨཔུཉྙཀམྨཱནཾཝཱ པུཉྙཀམྨཱནཾཝཱ ཝསེནཱཏི ཨཏྠོ. ཨིདཾ ¶ ཝུཏྟཾ ཧོཏི-ཡོ སུརཾ པིཝིཏྭཱ སུརཱམདཧེཏུ པཱཎཱ པཱཏཱདཱིསུ ཡཾཀིཉྩི ཀམྨཾ ཀརོཏི, ཏསྶ སུརཱཔཱནཾ ཏསྶཏི ཀམྨསྶ བལཝཱུཔནིསྶཡོ ཧོཏི པུབྦཙེཏནཱཋཱནིཡཉྩ. ཏདེཝ ཝིསུཾ པཊིསནྡྷིཾ ཛནེཏི, ན ཨིཏརནྟི. ཡཐཱ ཧི པུབྦཱཔརཙེཏནཱ ཡོཔི ཀམྨཔཐཔཏྟསྶ ཀམྨསྶ པརིཝཱརབྷཱུཏཱཨེཝ པཊིསནྡྷིཾ ཛནེནྟི, ན ཨིཏརཱ. ཨེཝམིདཾཔཱིཏི. ན ཧི ཀམྨཔཐསུཏྟེསུ སརཱུཔཏོ ཨཱགཏཱནིཨེཝ པཊིསནྡྷིཾ ཛནེནྟི. ན ཨིཏརཱནཱིཏི སཀྐཱ ནིཡམེཏུཾ. ཡཱནི པན ཨེཀནྟེན པཊིསནྡྷིཛནནསཱམཏྠིཡ ཡུཏྟཱནི, ཏཱནེཝ ཏཏྠ སརཱུཔཏོ ཝུཏྟཱནི. ཡཱནིཔན པཊིསནྡྷིཛནནེ ཨནེཀནྟིཀཱནི ཧོནྟི. ཏཱནི ཏཏྠསརཱུཔཏོ ན ཝུཏྟཱནཱིཏི སཀྐཱ ཝིཉྙཱཏུཾ. ཏཐཱ ཧི པཊིསམྦྷིདཱ མགྒཊྛཀཐཱཡཾ ཀུསལཱཀུསལཱཔིཙ པཊིསནྡྷིཛནཀཱཡེཝ ཀམྨཔཐཱཏི ཝུཏྟཱ. ཝུཏྟཱཝསེསཱ པཊིསནྡྷིཛནནེ ཨནེཀནྟི ཀཏྟཱ ཀམྨཔཐཱཏི ན ཝུཏྟཱཏི ཝུཏྟཾ. ཏསྨཱ ཨིདཾཔི པཊིསནྡྷིཛནནེ ཨནེཀནྟིཀཏྟཱ ཏཏྠ སརཱུཔཏོ ན ཝུཏྟནྟིཙ. ཡཾ ཏདཱ སནྣཀམྨཝསེན པཊིསནྡྷིཛནཀནྟི པུབྦེ ཝུཏྟཾ. ཏཾ ཏཏྠ སརཱུཔཏོ ཝུཏྟེསུ ཏདཱ སནྣཀམྨེསུ ཨནུཔཝིཊྛནྟིཙ སཀྐཱ ཝཏྟུནྟི. ཏསྶ པན དུཝིདྷཾ ཀིཙྩཾ པཊིསནྡྷིཛནནཾ ཀམྨཛནནཉྩཱཏི. ཏཏྠ པཊིཛནནཏོ ཀམྨཛནནམེཝསྶ མཧནྟཾ མཧཱཝིཔྥཱརཉྩ ཧོཏཱིཏི ཀཏྭཱ སཀྐེན དེཝཱནམིནྡེན ཀུམྦྷཛཱཏཀེ –

ཡཾ ཝེ ཝིཝིཏྭཱ དུཙྩརིཏཾ ཙརནྟི,

ཀཱཡེན ཝཱཙཱཡ ཙེཏསཱཙ;

ནིརཡཾ ཝཛནྟི དུཙྩརིཏཾ ཙརིཏྭཱ,

ཏསྶཱ པུཎྞཾ ཀུམྦྷམིམཾ ཀིཎཱཐཱཏི.

ཨེཝཾ ཏདཱསནྣཀམྨཝསེནེཝ ཏསྶ ཨཔཱཡགཱམིཏཱ ཝུཏྟཱ. ཏདུབྷཡཾ པནསྶ ཀིཙྩཾ གཧེཏྭཱ སུརཱམེརཡཔཱནཾ བྷིཀྑཝེ ཨཱསེཝིཏཾ.ལ. སཾཝཏྟནིཀནྟི ཨངྒུཏྟརེ ཝུཏྟནྟི ཝེདིཏབྦཾ. ཨཡཉྷིསུཏྟཔདེསུ དྷམྨཏཱ. ཡདིདཾ སཾཝཏྟནིཀནྟི ཝུཏྟཊྛཱནེ ཡཐཱལཱབྷཡོཛནཱཏི. ཏཐཱཧི མཱུལཊཱིཀཱཡཾཔུནབྦྷཝཾདེཏིཔུནབྦྷཝཱཡ སཾཝཏྟེཏཱིཏི པཱཋེ ཀམྨསཧཛཱཏཱ པུནབྦྷཝཾདེཏི. ཀམྨསཧཱཡབྷཱུཏཱ ཨཀམྨསཧཛཱ ཏཱཔུནབྦྷཝཾ ¶ སཾཝཏྟེཏཱིཏི ཝུཏྟཾ. ཀེཙི པན ཨིམམཏྠཾ ཨནུཔདྷཱརེཏྭཱ ཨིམཱཡ པཱལི༹ཡཱ ཏསྶ ཝིསུཾ ཨེཀནྟཀམྨཔཐབྷཱཝཾ མཉྙནྟི. ཡཾ པན ཀོཊྛཱསཏོ པཉྩཔི ཀམྨཔཐཱཨེཝཱཏི ཨཊྛཀཐཱཝཱཀྱཾ. ཏཏྠ ཨེཝསདྡེན ཏེསཾ ཙེཏནཱདྷམྨཏྟཱ ཛྷཱནཱདིཀོཊྛཱསིཀཏྟཾ ནིཝཏྟེཏི. ཙེཏནཱ ཧི ཀམྨཔཐཾ པཏྟཱཔི ཨཔཏྟཱཔི ཀོཊྛཱསཏོ ཀམྨ པཐཀོཊྛཱསིཀཱཨེཝ ཧོཏཱིཏི. ཏེནེཝ མཱུལཊཱིཀཱཡཾ ཀམྨཔཐཱ ཨེཝཱཏི ཀམྨཔཐཀོཊྛཱསིཀཱཨེཝཱཏི ཝུཏྟཾ. ཨནུཊཱིཀཱཡཉྩ ཀམྨ པཐཀོཊྛཱསིཀཱཨེཝ. ན ཛྷཱནཱདིཀོཊྛཱསིཀཱཏི ཝུཏྟཾ. ཀེཙིཔན ཨིམམཏྠཾ ཨསལླཀྑེཏྭཱ ཨིམིནཱ ཝཱཀྱེན ཏསྶ ཝིསུཾ ཀམྨཔཐབྷཱཝཾ ཝདནྟི.

ཁུདྡཀཔཱཋཊྛཀཐཱཡཾ པན སབྦེནསབྦཾ ཏསྶ ཀམྨཔཐབྷཱཝོ པཊིཀྑིཏྟོཡེཝ, ཏཏྠ ཧི པུརིམཱནཾ ཙཏུནྣཾ ཀཱཡཀམྨཱདིབྷཱཝཉྩ ཀམྨཔཐབྷཱཝཉྩ ཝིསུཾ ཝཏྭཱ སུརཱཔཱནཾཔཏྭཱ ཀཱཡཀམྨམེཝཱཏི ཝུཏྟཾ. ཨེཏེན ཝཙཱིཀམྨབྷཱཝཉྩ ཀམྨཔཐབྷཱཝཉྩ པཊིཀྑིཔཏཱིཏི. དྷཱཏུསཾཡུཏྟཊྛཀཐཱ ཡཉྩ པཊིཀྑིཏྟོ. ཡཐཱཧ-ཏཏཱིཡཾཔཉྩཀམྨཝསེན བུཛ྄ཛྷནཀཱནཾ ཨཛ྄ཛྷཱསཡཝསེན ཝུཏྟཾ. ཙཏུཏྠཾ སཏྟཀམྨཔཐཝསེན པཉྩམཾ དས ཀམྨཔཐཝསེནཱཏི. ཏཏྠ ཧི ཏཏཱིཡེ སུརཱཔཱནམིསྶཀཏྟཱ པཉྩཀམྨཝསེན ཨིཙྩེཝ ཝུཏྟཾ. ན པཉྩཀམྨཔཐཝསེནཱཏི. ཨེཏཱསུཔིཙ པཊིསནྡྷིཛནནེ ཨནེཀནྟི ཀཏྟཱཨེཝ པཊིཀྑིཏྟོཏི ན ནསཀྐཱ ཝཏྟུཾ ཨེཝཉྷི སཏི སབྦཱ པཱལི༹ཊྛཀཐཱཊཱིཀཱཡོ སཾསནྡིཏཱ ཧོནྟཱིཏི. ཀཱཡཀམྨནྟི ཨེཏྠ ཀཱཡོ ཏིཝིདྷོ སསམྦྷཱརཀཱཡོ པསཱདཀཱཡོ ཙོཔནཀཱཡོཏི. ཨིདྷ ཀཱཡཝིཉྙཏྟིསངྑཱཏོ ཙོཔནཀཱཡོ ཨདྷིཔྤེཏོཏི ཝུཏྟཾ ཀཱཡཝིཉྙཏྟིསངྑཱཏེཏི. ཙོཔནཀཱཡོ ཧི ཀདཱཙི ཀཱཡངྒེན ཨཏྟནོཨདྷིཔྤཱཡཾ པརསྶ ཝིཉྙཱ པནཏྠཱཡཔི ཀརཱིཡཏཱིཏི ཀཱཡཝིཉྙཏྟཱིཏི ཝུཙྩཏཱིཏི. སོ ཡེཝཙ ཀམྨཱནཾ པཝཏྟིམུཁཏྟཱ དྭཱརནྟི ཀཱཡདྭཱརཾ. ཏསྨིཉྷི ཏེན ཏེན ཨུཔཀྐམ ཀིཙྩེན པཝཏྟམཱནེཨེཝ ཛཱིཝིཏིནྡྲིཡུཔཙྪེདཱདིཀིཙྩསིདྡྷིཏོ ཏཾཛན ཀསྶ ཙེཏནཱདྷམྨསྶ ཨཱཡཱུཧན ཀིཙྩནིབྦཏྟིཙ ཀཱཡཀམྨནཱམ ལཱབྷོཙ ཧོཏཱིཏི. ཏསྨིཾ ཀཱཡདྭཱརེ. ཨེཏྠཙ ཡསྨཱསབྦཱནིཔི ཀམྨཱནི པུབྦངྒམབྷཱུཏེན སམྤཡུཏྟམནེན ཝིནཱ ནསིཛ྄ཛྷནྟི. མནོཔུབྦངྒམཱ དྷམྨཱ. ¶ མནོསེཊྛཱ མནོམཡཱཏི ཧི ཝུཏྟཾ. དྷམྨཱཏི ཙེཏྠ སུཙརིཏདུཙྩརིཏདྷམྨཱ ཝུཙྩནྟི. ཏསྨཱ མནོདྭཱརཾ སབྦཀམྨསཱདྷཱརཎཏྟཱ ཀམྨཱནི ཝིསེསེཏུཾ ནསཀྐོཏི. ཨསཱདྷཱརཎབྷཱུཏཱ པན ཀཱཡཝཙཱིཡོ ཨེཝ སཀོནྟི. ཡསྨཱཙ པུརིམཱནི སཏྟཝིདྷཱནི ཀམྨཱནི ཀེཝལཾ མནོམཏྟེན ནསིཛ྄ཛྷནྟི. ཏཾསམུཊྛིཏེཧི པན ཀཱཡ ཝཙཱིཔཡོགེཧི ཨེཝ སིཛ྄ཛྷནྟི. ཏསྨཱ ཏེཨེཝ ཏེསཾ ཀམྨཱནཾ པཝཏྟིམུཁསངྑྱཾ གཙྪནྟཱིཏི ཝུཏྟཾ ཀཱཡདྭཱརེཏི. པརཏོ ཝཙཱིདྭཱརེཏི ཙ.

ཡསྨཱ པན ཀཱཡདྭཱརེ ཝུཏྟིཏོ ཀཱཡཀམྨཾ ནཱམ. ཝཙཱིདྭཱརེ ཝུཏྟིཏོ ཝཙཱིཀམྨཾནཱམཱཏི ཨེཏྟཀམཏྟེ ཝུཏྟེ པཱཎཱཏིཔཱཏཱདཱིནི ཏཱིཎི ཀཱཡཀམྨཾནཱམ. མུསཱཝཱདཱདཱིནི ཙཏྟཱརི ཝཙཱིཀམྨཾནཱམཱཏི ཨེཝཾ དྭཱརེན ཀམྨཱནཾ ནཱམཝཝཏྠཱནཾ ཨསིདྡྷཾ སིཡཱ. ཀཐཾ. ཡདཱ ཧི པུརིམཱནི དྭེ ཨཱཎཏྟིཝསེན ཨཔྤཀེན ཝཙཱིདྭཱརེ བྷིཛ྄ཛྷནྟི. ཏདཱ ཏཱནི ཀཱཡཀམྨནྟི ནཱམཾ ཛཧེཡྻུཾ. ཝཙཱིཀམྨནྟི སངྑྱཾ གཙྪེཡྻུཾ ཀསྨཱ ཝཙཱིདྭཱརེ ཝུཏྟིཏོ ཝཙཱིཀམྨཾནཱམཱཏི ཝུཏྟཏྟཱ. དྭེཝཱ ནེསཾ ནཱམཱནི བྷཝེཡྻུཾ. ཨུབྷཡདྭཱརེསུཔི སནྡིསྶནཏོ. ཡདཱཔན མཛ྄ཛྷིམཱནི ཙཏྟཱརི ཧཏྠམུཊྛཱདིཝསེན ཨཔྤཀེན ཀཱཡདྭཱརེ སིཛ྄ཛྷནྟི. ཏདཱ ཏཱནིཔི ཝཙཱིཀམྨནྟི ནཱམཾ ཛཧེཡྻུཾ. ཀཱཡཀམྨནྟི སངྑྱཾ གཙྪེཡྻུཾ. ཀསྨཱ ཀཱཡདྭཱརེ ཝུཏྟིཏོ ཀཱཡཀམྨཾནཱམཱཏི ཝུཏྟཏྟཱ. དྭེཝཱ ནེསཾ ནཱམཱནི བྷཝེཡྻུཾ. ཨུབྷཡདྭཱརེསུཔི སནྡིསྶནཏོ. ཨེཝཉྩསཏི པཱཎཱཏིཔཱཏོ.ལ. མིཙྪཱཙཱརོཙེཏི ཀཱཡཀམྨཾནཱམཱཏི ཨིདཾ ཝཝཏྠཱནམེཝ ནིརཏྠཀཾ སིཡཱ. ཏཐཱ པརཏོ མུསཱཝཱདོ.ལ. པྤལཱཔོཙེཏི ཝཙཱིཀམྨཾནཱམཱཏི. བཱཧུལླཝུཏྟིཏོཏི ཝུཏྟེཔན ཨེཀམེཀེན བཱཧུལླསདྡེན ཚབྦིདྷཱནི ཏཱནི ཝཛྫཱནི ཝཛྫེཏྭཱ ཝུཏྟཔྤཀཱརཾ དྭཱརེན ཀམྨཝཝཏྠཱནཾ སིདྡྷཾ བྷཝཏི. ཡཐཱ ཝནཙརཀོ སངྒཱམཱཝཙརོཏི.

མནོཀམྨཱནི པན དྭཱརནྟརེསུ ཙརནྟཱནིཔི ཙརཎམཏྟཱནི ཨེཝ ཧོནྟི. ན དྭཱརནྟརཱནི ཏེསཾ ཀམྨསིདྡྷིཡཱ ཨངྒཾ ཧོནྟི. ཏསྨཱ ཏཱནི ཝིསུཾ ཀཏཱནཱིཏི ཝེདིཏབྦཾ. ཡསྨཱ པན ཀཱཡདྭཱརསྶ ཀཱཡོཏི ནཱམཾ ཨནེཀེསུ སུཏྟསཧསྶེསུ སཡམེཝ སིདྡྷཾ པཱཀཊཉྩ. ¶ ཏཐཱ ཝཙཱིདྭཱརསྶ ཝཱཙཱཏི ནཱམཾ. ཀུསལཱཀུསལ ཛཝནཙིཏྟསངྑཱཀསྶ མནོདྭཱརསྶཙ མནོཏི ནཱམཾ. ཏསྨཱ སབྦཏྠ ཀཱཡདྭཱརཾ ཝཙཱིདྭཱརཾ མནོདྭཱརནྟི ཝུཏྟེ ཀམྨེན དྭཱརསྶ ཝཝཏྠཱན ཀིཙྩཾནཱམ ནཏྠི. ཡཏྠ པན ཀཱཡཀམྨདྭཱརཾ ཝཙཱིཀམྨདྭཱརཾ མནོཀམྨདྭཱརནྟི ཨཱགཏཾ. ཏཏྠེཝ དྭཱརཀཐཱདཱིསུ ཀམྨེན དྭཱརཝཝཏྠཱནཾཔི ཝིསུཾ ཝཏྟབྦཾ ཧོཏཱིཏི དཊྛབྦཾ.

[༡༥༣] ཨེཏེན ཡཾ ཝུཏྟཾ ཝིབྷཱཝནིཡཾ

‘‘ཀཱཡཀམྨསྶཙ པཝཏྟིམུཁབྷཱུཏཾ ཀཱཡདྭཱརནྟི ཝུཙྩཏཱིཏི’’. ཏཾ པཊིཀྑིཏྟཾ ཧོཏི.

[༡༥༤] ཡཉྩ ཏཏྠ

‘‘ཏཐཱ མུསཱཝཱདཱདིཾ ཀཱཡཝིཀཱརེན ཀརོནྟསྶ ཝཙཱིཀམྨཾ ཀཱཡདྭཱརེཔི པཝཏྟཏཱིཏི ཀམྨེན དྭཱརཝཝཏྠཱནཾཔི ནསིཡཱཏི’’ ཝུཏྟཾ. ཏཾཔི ན ཡུཛྫཏི.

ན ཧི ཀཱཡཝིཀཱརེན ཀརཱིཡམཱནཾ ཝཙཱིཀམྨཾ ཀཱཡདྭཱརེ པཝཏྟམཱནཾཔི ཏསྶ དྭཱརསྶ ནཱམཾ བྷིནྡིཏུཾཝཱ ཨཏྟནོ ནཱམཾ དཱཏུཾཝཱ སཀྐོཏི. སབྷཱཝ སིདྡྷཏྟཱ ཏསྶ ནཱམསྶཱཏི.

[༡༥༥] ཨེཏེནེཝ ཡཉྩ ཏཏྠ

ཝུཏྟཾ ‘‘ཏཐཱ ཀཱཡཀམྨམེཝ ཡེབྷུཡྻེན ཀཱཡདྭཱརེ པཝཏྟཏི. ན ཨིཏརཱནི. ཏསྨཱ ཀཱཡཀམྨསྶ ཡེབྷུཡྻེན ཨེཏྠེཝ པཝཏྟནཏོ ཀཱཡཀམྨདྭཱརབྷཱཝོ སིདྡྷོ. བྲཱཧྨཎགཱམཱདཱིནཾ བྲཱཧྨཎགཱམཱདི བྷཱཝོཝིཡཱཏི’’. ཏཾཔི པཊིཀྑིཏྟཾ ཧོཏི.

ན ཧི ཀཱཡཀམྨདྭཱརནྟི ནཱམཾ ཨིདྷ ཝུཏྟཾ ཨཏྠཱིཏི. [ཀཱཡཀམྨཾ]

༡༤༩. མུསཱཏི ཨབྷཱུཏཏྠེ ནིཔཱཏོ. མུསཱ ཝདནྟི ཨེཏེནཱཏི མུསཱཝཱདོ. ཝིསཏི པརེསཾ ཨཉྙམཉྙསམྨོདབྷཱཝསངྑཱཏཾ སཱམགྒིརསཾ སཾཙུཎྞེཏི པརིབྷིནྡཏི མིཐུ བྷེདཾ ཀརོཏི ཨེཏཱཡཱཏི པིསུཎཱ. ཨཏྟནོ པིཡབྷཱཝཾ པརེསཉྩ མིཏྟསུཉྙབྷཱཝཾ ཀརོཏི ཨེཏཱཡཱཏིཝཱ པིསུཎཱ. ནིརུཏྟིནཡེན. ཝདནྟི ཨེཏཱཡཱཏི ¶ ཝཱཙཱ. པིསུཎཱཙ སཱ ཝཱཙཱཙཱཏི པིསུཎཝཱཙཱ. ཡེན སུཡྻཏི, ཏསྶ ཧདཡཾ ཕརམཱནཱ ཨུསཏི དཧཏཱིཏི ཕརུསཱ. ཕརུསཱཙ སཱ ཝཱཙཱཙཱཏི ཕརུསཝཱཙཱ. སཱདྷུཛནེཧི ཨདྷིགནྟབྦཾ སཾསུཁཾ ཧིཏཉྩ ཕལཏི ཝིསརཏི ཝིནཱསེཏི ཧིཏསུཁམགྒཾ བྷིནྡཏཱིཏི སམྥཾ. ཏཾཝཱ ཕལཏི བྷིཛྫཏི ཨེཏེནཱཏི སམྥཾ. ཨཏྠདྷམྨཱཔགཏསྶ པཊིབྷཱཎཙིཏྟསྶ བྷཱརཏཡུདྡྷསཱིཏཱཧརཎཱ དིཀསྶ ཝཱཙཱ ཝཏྠུམཏྟསྶེཏཾ ནཱམཾ. ཡཏྠ དིཊྛདྷམྨཧིཏབུདྡྷིཡཱཝཱ སམྤརཱཡིཀ ཧིཏབུདྡྷིཡཱཝཱ ཨུཔཱཡདཱིཔཀཾ ཀིཉྩི ཨཏྠདྷམྨཝིནཡཔདཾ ནཏྠི. སམྥཾ པལཔནྟིཔཀཱརེན ཀཐཡནྟི ཨེཏེནཱཏི སཔྥཔྤལཱཔོ. ཏཏྠ པརསྶཝིསཾ ཝཱདནཔུརེཀྑཱརེན ཝིསཾ ཝཱདཀ ཀཱཡཝཙཱིཔཡོགསམུཊྛཱཔིཀཱ ཨཀུསལཙེཏནཱ མུསཱཝཱདོ. སོ པརསྶ ཨཏྠབྷཉྫནཀོཝ ཀམྨཔཐབྷེདོ. ཨིཏརོ ཀམྨམེཝ. ཨེཏྠ ཙ ཀམྨ པཐོཏི པཊིསནྡྷིཛནཀཱནཾ ཀམྨཱནཾ ཨུཊྛཱནམུཁམགྒོ ཝུཙྩཏི. ཡཐཱ ཧི རཛཱནཾ ཨུཊྛཱནཔདེསོ རཛཔཐོཏི ཝུཙྩཏི. ཏཐཱ ལོཀེ སནྡིསྶམཱནེསུ སཏྟཱནཾ ཀཱཡཝཙཱིཙིཏྟཱབྷིསངྑརཎཀིཙྩེསུཡེཧི ཀིཙྩེཧི པཊིསནྡྷིཛནཀཱནི ཀམྨཱནི ཨུཊྛཧནྟི. ཡེསུཝཱ ཀིཙྩེསུ ཏཱནི ཨུཊྛཧནྟི པཝཏྟནྟི. ཏཱནི ཀཱཡཝཙཱིཙིཏྟཱ བྷིསངྑརཎཀིཙྩཱནི པཊིསནྡྷིཛནཀཱནཾ ཀམྨཱནཾ ཨུཊྛཱནམུཁམགྒཏྟཱ ཀམྨཔཐོཏི ཝུཙྩནྟི. ཀཏམཱནི པན ཏཱནཱིཏི. ཨངྒསམྤནྣཱནི ཨཀུསལེསུ པཱཎགྷཱཏ ཀིཙྩཱདཱིནི ཀུསལེསུ ཏབྦིརམཎཀིཙྩཱདཱིནི དསཝིདྷཱནི ཀིཙྩཱནཱིཏི. ཀམྨཱནིཡེཝ སུགཏིདུགྒཏཱིནཾ ཏདུཔྤཛྫནཀསུཁདུཀྑཱནཉྩ པཐབྷཱུཏཏྟཱ ཀམྨཔཐོནཱམཱཏིཔི ཝདནྟི.

པརསྶ བྷེདཔུརེཀྑཱརེན བྷེདཀཀཱཡགཙཱིཔཡོགསམུཊྛཱ པིཀཱ སཾཀིལིཊྛཙེཏནཱ པིསུཎཱཝཱཙཱ. སཱཔི པརེ བྷིནྣེཡེཝ ཀམྨཔཐབྷེདོ. ཨབྷིནྣེ ཀམྨམེཝ. པརསྶ མམྨཙྪེདཀཀཱཡ ཝཙཱིཔཡོགསམུཊྛཱཔིཀཱ དུཊྛཙེཏནཱ ཕརུསཝཱཙཱ. ཨེཏྠཙ མརནྟི སཏྟཱ, མརཎམཏྟཾཝཱ དུཀྑཾ ནིགཙྪནྟི ཨེཏསྨིཾ གྷཊྚིཡམཱནེཏི མམྨཾ. དུཊྛཝཎོ. མམྨཾ ཚིནྡཏི བྷིནྡཏི གྷཊྚེཏཱིཏི མམྨཙྪེདཀོ. ཝཎགྷཊྚནཔཡོགོ. ཨིདྷ པན མམྨཾཝིཡཱཏི མམྨཾ. ཛཱཏིཨཱདཱིསུ དསསུ ཨཀྐོསཝཏྠཱུསུ ཡཾཀིཉྩི. མམྨཙྪེདཀོཏི ཛཱཏིཨཱདཱིསུ གྷཊྚན ཝསེན ¶ པཝཏྟོ ཕརུས ཀཱཡཝཙཱི པཡོགོ. ཨཡ མཏྠོ སཱིལཀྑནྡྷ ཊཱིཀཱ ཝསེན ཝེདིཏབྦོ. ཨཐཝཱ. མམཱཡཏཱིཏི མམོ. མིཏྟོ. མམསྶ བྷཱཝོ མམྨཾ. མེཏྟཱཙིཏྟཾ. མམྨཾ ཚིནྡཏཱིཏི མམྨཙྪེདཀོ. ཨཡཾཔི ཨཀྐོསིཏབྦསྶ སམྨུཁཱཨེཝ ཀམྨཔཐབྷེདོཏི ཀེཙི. པརམྨུཁཱཔཱིཏི ཨཔརེ. ཡཐཱ པན པརཾ ཨཀྐོསིཏྭཱ ཁམཱཔེནྟསྶ ཁམཱཔནཀམྨཾ པརསྶ དཱུརེ ཋིཏསྶཔི མཏསྶཔི སམྤཛྫཏི. ཨེཝཾ ཨཀྐོསནཀམྨཾཔཱིཏི དཱིགྷམཛ྄ཛྷིམཊཱིཀཱཀཱརཱ ཨིཙྪནྟི. ཨཀྐོསཱདྷིཔྤཱཡེན ཙཎྜཱ མཧིཾསཱི ཏཾ ཨནུབནྡྷཏཱུཏིཝཱ ཙོརཱ ཏཾ ཁཎྜཱ ཁཎྜིཀཾ ཀརོནྟཱུཏིཝཱ མུདྡྷཱ ཏེ ཕལཏུ སཏྟདྷཱཏིཝཱ ཨེཝམཱདིནཱ ནཡེན པརཾ ཨབྷིསཔནྟསྶཔི ཀམྨཔཐབྷེདོ ཧོཏིཡེཝཱཏིཙ ཝདནྟི.

ཨནཏྠཝིཉྙཱཔན ཀཱཡཝཙཱིཔཡོག སམུཊྛཱཔིཀཱ པཱཔཙེཏནཱ སམྥཔྤལཱཔོ. སོཔི བྷཱརཏཡུདྡྷ སཱིཏཱཧརཎཱདིཀེསུ པཊིབྷཱཎཙིཏྟེསུ ཝཱཙཱཝཏྠུམཏྟེསུཨེཝ ཀམྨཔཐབྷེདོ. སོཙཁོ པརེ ཏཾ ཨནཏྠཾ སཙྩཏོ གཎྷནྟེཡེཝ. ཨགཎྷནྟེ པན ཀམྨམེཝ. ཏཐཱ རཱཛཀཐཱདཱིསུ དྭཏྟིཾས ཏིརཙྪཱན ཀཐཱཔབྷེདེསུཔི ཀམྨམེཝ. ཏཉྩ ཁོ ཏདསྶཱདཝསེན ཀཐེནྟསྶེཝ. ཨཏྠདྷམྨཝིནཡནིསྶིཏཾ ཀཏྭཱ ཀཐེནྟསྶ པན སབྦཾཔི སཏྠཀམེཝ ཧོཏཱིཏི ཝེདིཏབྦཾ. ཝཙཱིཀམྨནྟི ཨེཏྠ ཝཙཱིཏི ཝཱཙཱཡེཝ. སཱ ཙཏུབྦིདྷཱ སདྡཝཱཙཱ ཝིརཏིཝཱཙཱ ཙེཏནཱཝཱཙཱ ཙོཔནཝཱཙཱཏི. ཨིདྷ པན སདྡསཧིཏཱ ཝཙཱིཝིཉྙཏྟིསངྑཱཏཱ ཙོཔན ཝཱཙཱ ཨདྷིཔྤེཏཱཏི ཝུཏྟཾ ཝཙཱིཝིཉྙཏྟིསངྑཱཏེཏི. ཙོཔནཝཱཙཱ ཧི ཀདཱཙི ཝཱཙངྒེན ཨཏྟནོ ཨདྷིཔྤཱཡཾ པརསྶ ཝིཉྙཱཔནཏྠཱཡཔི ཀརཱིཡཏཱིཏི ཝཙཱིཝིཉྙཏྟཱིཏི ཝུཙྩཏཱིཏི. སཱཡེཝཙ ཀམྨཱནཾ པཝཏྟི མུཁཏྟཱ དྭཱརནྟི ཝཙཱིདྭཱརཾ. ཏཱཡ ཧི ཏཾཏཾཝཙཱིཔཡོགཀིཙྩེན པཝཏྟམཱནཱཡ ཨེཝ ཝིསཾཝཱདནཱདིཀིཙྩསིདྡྷིཏོ ཏཾསམུཊྛཱཔཀསྶ ཙེཏནཱདྷམྨསྶ ཨཱཡཱུཧནཀྲིཡཱནིབྦཏྟིཙ ཝཙཱིཀམྨནཱམལཱབྷོཙ ཧོཏཱིཏི. ཏསྨིཾ ཝཙཱིདྭཱརེ. ཡམེཏྠ ཝཏྟབྦཾ, ཏཾ ཀཱཡཀམྨེ ཝུཏྟམེཝཱཏི. [ཝཙཱིཀམྨཾ]

༡༥༠. ཨབྷིཛ྄ཛྷཱཡནྟི ¶ ཨསྶཱདམཏྟེ ཨཊྛཏྭཱ པརབྷཎྜསྶ ཨཏྟནོ པརིཎཱམནཝསེན ཨཏིརེཀཏརཾ ཛྷཱཡནྟི ནིཛ྄ཛྷཱཡནྟི ཨེཏཱཡཱཏི ཨབྷིཛ྄ཛྷཱ. བྱཱཔཱདེནྟི པརསཏྟེ ཝིནཱསཾ ཨཱཔནྣེ ཀཏྭཱ ཙིནྟེནྟི ཨེཏེནཱཏི བྱཱཔཱདོ. མིཙྪཱདིཊྛཱིཏི ཨེཏྠ མིཙྪཱཏི ཝིཔརཱིཏཏྠེ ནིཔཱཏོ. ཨཏྠིདིནྣནྟིཨཱདིནཡཔཝཏྟཾ སབྦཾ སཔྤུརིས མགྒཾ སཔྤུརིསཔཉྙཏྟཾ བྷིནྡིཏྭཱ ནཏྠི དིནྣནྟིཨཱདིནཡེན ཏབྦིཔརཱི ཏཏོ པསྶནྟི ཨེཏཱཡཱཏི མིཙྪཱདིཊྛི. ཏཏྠ པརསནྟཀཾ དིསྭཱ ཀེཝལཾ ཨསྶཱདནཱབྷིནནྡནརཛྫནམཏྟེསུ ཨཊྛཏྭཱ ཨཧོཝཏ ཨིདཾ མམསྶཱཏི ཨེཝཾ ཨཏྟནོ ཀཏྭཱ ཙིཏྟེན པརིཎཱམེནྟསྶེཝ ཨབྷིཛ྄ཛྷཱཀམྨཔཐབྷེདོ ཧོཏི. པརསནྟཀབྷཱཝེཡེཝ ཐཔེཏྭཱ ལཱབྷཱཝཏིམེ. ཡེ ཨཱིདིསཾ པརིབྷུཉྫནྟི. ཨཧོཝཏཱཧཾཔི ཏཱཝཀཱལིཀཾ པརིབྷུཉྫེཡྻཾ. ཡཱཙིཏྭཱཝཱ ཀིཎིཏྭཱཝཱ ཨཏྟནོ ཀརེཡྻཾ. ཨཉྙཾཝཱ ཨཱིདིསཾ ལབྷེཡྻནྟི ཨེཝཾ ཨསྶཱདེནྟསྶ ཀམྨམེཝ. ཝུཏྟཉྷེཏཾ ཨཊྛཀཐཱསུ པརབྷཎྜཝཏྠུཀེ ཧི ལོབྷེ ཨུཔྤནྣེཔི ན ཏཱཝ ཀམྨཔཐབྷེདོ ཧོཏི. ཡཱཝ ན ཨཧོཝཏ ཨིདཾ མམསྶཱཏི ཨཏྟནོ པརིཎཱམེཏཱིཏི. ཨནྟམསོ ཌཾསམཀསཱདིཀེཔི ཨཱརབྦྷ ཨིམེ ནསྶནྟུ ཝིནསྶནྟུ. ཨཧོཝཏིམེ ནསྶེཡྻུཾ ཝིནསྶེཡྻུཾ. ཨཝཌྜྷིཏཱཝཱ བྷཝེཡྻུཾ ཙིརཾཝཱ ནཏིཊྛེཡྻུཾ. ཀདཱཝཱ ནསྶནྟི ཝིནསྶནྟཱིཏི ཨེཝཾ པར སཏྟསྶ ཁནྡྷཛཱིཝཝིནཱསཾ ཙིནྟེནྟསྶེཝ བྱཱཔཱདོ. ཨིཏརོ ཀམྨམེཝ. ཝུཏྟཉྷེཏཾ པརསཏྟཝཏྠུཀེ ཧི ཀོདྷེ ཨུཔྤནྣེཔི ན ཏཱཝ ཀམྨཔཐབྷེདོ ཧོཏི. ཡཱཝ ན ཨཧོཝཏཱཡཾ ཨུཙྪིཛྫེཡྻ ཝིནཱསེཡྻཱཏི ཏསྶ ཝིནཱསཾ ཙིནྟེཏཱིཏི. ཀམྨསྶཝཱ ཀམྨཝིཔཱཀསྶཝཱ སབྦསོ པཊིབཱཧིཀཱ ནཏྠིཀཱཧེ ཏུཀཱཀྲིཡཝསེན ཏིཝིདྷཱ ནིཡཏ མིཙྪཱདིཊྛིཨེཝ ཀམྨཔཐབྷེདོ. དསཝཏྠུཀམིཙྪཱདིཊྛི པན ནཏྠིཀདིཊྛིཔབྷེདཱཨེཝ. སབྦཉྙུདེསནཾ པཊིབཱཧིཏྭཱ པཝཏྟཱ ཨརིཊྛཀཎྚཀཱདཱིནཾ དིཊྛིཡོཔི ཀམྨཔཐཱཨེཝཱཏི ཝདནྟི. ཝཱིསཏིཝཏྠུཀཱ སཀྐཱཡདིཊྛིཝཱ དྭཱསཊྛིདིཊྛིགཏཱནིཝཱཀམྨམེཝཱཏི.

ནིཡཏཱཏི ¶ ཙེཏྠ ཡཐཱ ཏཱིཎི ལཀྑཎཱནི ཡཏྟཀཾ པསྶིཏྭཱ སདྡྷཱདྷིམོཀྑེན སནྣིཊྛཱནཾ གཙྪནྟསྶ ཙིཏྟུཔྤཱདོ ཨཏྟནོ ཨནནྟརཾ ཕལདཱནནིཡམེན ནིཡཏོ ཧོཏི. ཏཏྟཀཾ པསྶནྟོ ཀུསལེསུ དྷམྨེསུ ནིཡཱམཾ ཨོཀྐམཏཱིཏི ཝུཏྟོ. ཏཐཱདིཊྛིཊྛཱ ནཱནི ཀཱརཎ པཊིརཱུཔཀཱནི ཡཏྟཀཾ པསྶིཏྭཱ མིཙྪཱདྷིམོཀྑེན སནྣིཊྛཱནཾ གཙྪནྟསྶ ཙིཏྟུཔྤཱདོཙུཏིཨནནྟརེཕལདཱནནིཡམེན ནིཡཏོ ཧོཏི. ཏཏྟཀཾ པསྶིཏྭཱ སནྣིཊྛཱནཾ གཙྪནྟོ ཨཀུསལེསུ དྷམྨེསུ ནིཡཱམཾ ཨོཀྐམཏི, ཨཏེཀིཙྪོནཱམ ཧོཏི. ཏཐཱ པན ཨཔསྶིཏྭཱ ཀེཝལཾ མིཙྪཱདྷིམོཀྑམཏྟེན ཨེཝམེཝ བྷཝིསྶཏཱིཏི སནྣིཊྛཱནཾ གནྟྭཱ སཀཾ ཨཱཙརིཡཀཾ སམཡཾ པགྒཎྷིཏྭཱ ཋིཏོ ཨཏེཀིཙྪོནཱམ ནཧོཏི. ཀསྨཱ, ཕལདཱན ནིཡམཱབྷཱཝཱཏི. ཨཡཉྩ ཨཏྠོ མིཙྪཏྟཏྟིཀེན དཱིཔེཏབྦོ. ཏཏྠ ཧི ཕལདཱན ནིཡམཝསེནེཝ ཨུབྷིནྣཾཔི སམྨཏྟམིཙྪཏྟདྷམྨཱནཾ ནིཡཏསཉྙཱཔཊིལཱབྷོ ཨཊྛཀཐཱཡཾ ཝུཏྟོཏི. སུཏྟནྟསཾཝཎྞནཱསུ པན གཧཎནིཡམཝསེནཱཔི ཏསྶཱ ནིཡཏབྷཱཝོ ཝུཏྟོཏི.

ཨཉྙཏྲཱཔིཝིཉྙཏྟིཡཱཏི ཝིཉྙཏྟིདྭཡེན ཝིནཱཔི. ཝིཉྙཏྟིདྭཡཾ ཨསམུཊྛཱཔེཏྭཱཔཱིཏི ཨཏྠོ. ཨཔིསདྡེན པན ཝིཉྙཏྟིདྭཡེན སཧཱཔཱིཏི དསྶེཏི. ཨིམཱནི ཧི ཏཱིཎི ཀམྨཱནི ཡདཱ ཀཱཡངྒཝཱ ཙངྒཱནི ཨཙོཔེཏྭཱ མནསྨིཾཨེཝ སིཛ྄ཛྷནྟི. ཏདཱཝིཉྙཏྟིཡཱ ཝིནཱཝ པཝཏྟནྟི. ཡདཱ པན ཏཱནི ཙོཔེཏྭཱ ཀཱཡཝཙཱིདྭཱརེསུ སིཛ྄ཛྷནྟི, ཏདཱ ཝིཉྙཏྟིཡཱ སཧེཝ པཝཏྟནྟཱིཏི. ཨེཏེན ཨིམེསཾ ཏཱིསུཔི དྭཱརེསུ པཝཏྟིཾ དཱིཔེཏི. ཨེཝཾསནྟེཔི ཨིམཱནི མནོདྭཱརེཨེཝ བཧུལཾ པཝཏྟནྟི. ཀཱཡཝཙཱིདྭཱརེསུ པན ཨཔྤཀམེཝ པཝཏྟནྟཱིཏི ཝུཏྟཾ མནསྨིཾཡེཝབཱཧུལླཝུཏྟིཏོཏི. ཏཏྠ མནསྨིཾ ཡེཝཱཏི ཀུསལཱ ཀུསལཛཝནཙིཏྟསངྑཱཏེ མནོདྭཱརེཨེཝ. ཨེཏེན པུརིམེསུཔི ཀཱཡདྭཱརེ ཝཙཱིདྭཱརེཏི པདེསུ ཨེཝསདྡསམྦྷཝོ དཱིཔིཏོ ཧོཏི. ཨེཝཉྷི སཏི ཏཏྠཔི དྭཱརེན ཀམྨཝཝཏྠཱནཾ སུཊྛུཏརཾ ཨུཔཔནྣཾ ཧོཏཱིཏི. ཨིཏརཐཱ ཨུཔལཀྑཎཱདིཝསེན ཨཏྠནྟརཔསངྒོཔི སིཡཱཏི. ཨཔིཙ, ཨིདྷ ཨེཝསདྡེན ཨཡཾཔི ཝིསེསཏྠོ དཱིཔིཏོ ཧོཏི. པཱཎཝདྷཱདཱིསུ ཧི ཝདྷཱམི ནཾ ཨཝཧརཱམི ན ནྟིཨཱདིནཱ ¶ སཾཝིདྷཱནཱཀཱརེན པཝཏྟཱ ཙེཏཡིཏཀྲིཡཱཨེཝ པདྷཱནཾ ཧོཏི. སཱཙ ཀཱཡཝཙཱིཔཡོགེཧི ཝིནཱ ནསིཛ྄ཛྷཏི. ཏསྨཱ ཏེསུ ཀཱཡ ཝཙཱི པཡོགཱ ཀམྨསིདྡྷིཡཱ ཨེཀཾ ཨངྒཾ ཧོནྟི. ཏཾ སཧཛཱཏཱཙ ཨབྷིཛ྄ཛྷཱདཡོ ཙེཏནཱཔཀྑིཀཱཨེཝ ཧུཏྭཱ ཨབྦོཧཱརིཀཏྟཾ གཙྪནྟི. པརབྷཎྜཱ བྷིཛ྄ཛྷཱཡནཱདཱིསུ པན ཨབྷིཛ྄ཛྷཱདཱིནཾ ཨཏྟཔདྷཱནཱནཾ ཀཱཡཝཙཱིདྭཱརེསུ པཝཏྟཱནཾཔི ཀཱཡ ཝཙཱིཔཡོགཱཀམྨསིདྡྷིཡཱ ཨངྒམེཝ ནཧོནྟི. ཏཐཱ ཙིནྟཱཔཝཏྟི མཏྟེནེཝ ཏཏྠ ཀམྨསིདྡྷིཏོ. ཨིཏི ཨིམེསུ ཀམྨེསུ ཀཱཡ ཝཙཱིདྭཱརཱནཾ སབྦེནསབྦཾ ཨངྒབྷཱཝཔཊིཀྑིཔནཏྠཾ མནསྨིཾ ཡེཝཱཏི ཨེཝ གཧཎཾ ཨིདྷེཝ ཀཏནྟི དཊྛབྦཾ. ཏེསུ པན དྭཱརེསུ པཝཏྟིམཏྟ སབྦྷཱཝཾ སནྡྷཱཡ བཱཧུལླསདྡོཔི ཨིདྷ གཧིཏོཏི.

[༡༥༦] ཡཾ པན ཝིབྷཱཝནིཡཾ

‘‘ཝིཉྙཏྟིསམུཊྛཱཔཀ ཙིཏྟསམྤཡུཏྟཱཙེཏྠ ཨབྷིཛ྄ཛྷཱདཡོ ཙེཏནཱཔཀྑིཀཱཝ ཧོནྟཱིཏི’’ ཝུཏྟཾ. ཏཾ ཨིདྷ ན ཡུཛྫཏི.

ན ཧི ཝིཉྙཏྟིསམུཊྛཱཔཀཙིཏྟསམྤཡུཏྟཱཔི ཀེཝལཾ མནོཀམྨ ཀིཙྩཝིསེསེན པཝཏྟམཱནཱ ཨབྷིཛ྄ཛྷཱདཡོ ཙེཏནཱཔཀྑིཀཱ ཧོནྟི. ཙེཏནཱཨེཝ པན ཨབྷིཛ྄ཛྷཱདིཔཀྑིཀཱ ཧོཏཱིཏི. [མནོཀམྨཾ]

༡༥༡. ཨེཏྠ ཙ དསནྣཾཔི ཨིམེསཾ ཀམྨཔཐཱནཾ པུབྦཱཔརཙེཏནཱཡོ པཊིསནྡྷིཨཱཀཌྜྷནེ ཨནེཀནྟིཀཔཀྑཾ གཏཱཏི པཊིསམྦྷིདཱ མགྒཊཱིཀཱཡཾ ཝུཏྟཱ. ཏསྨཱ ཏཱཔི ཨིམཾ སཏྟཾ མཱརེསྶཱམི ཨིམཾ བྷཎྜཾ ཨདིནྣཾ ཨཱདིཡིསྶཱམཱིཏིཨཱདིནཱ ནཡེན ཨཱདིཏོ པཊྛཱཡ པཝཏྟཱ བལཝཔཙྩཡེ ལདྡྷཱ པཊིསནྡྷིཾ ཨཱཀཌྜྷནྟི. ཨལདྡྷཱ ནཱཀཌྜྷནྟཱིཏི ཡུཏྟཱ. ཡཱནི པན ཀུསལཱཀུསལཱནི ཀམྨཔཐབྷེདཾ ཨཔྤཏྟཱནི ཧོནྟི. ཏཱནི ཀཱཡདྭཱརེ དིསྶམཱནཱནི ཀཱཡཀམྨཱནིནཱམ ཧོནྟི. ཝཙཱིདྭཱརེ དིསྶམཱནཱནི ཝཙཱིཀམྨཱནིནཱམ. སུདྡྷེ མནོདྭཱརེ དིསྶམཱནཱནི མནོཀམྨཱནིནཱམཱཏི ཝེདིཏབྦཱནཱིཏི. དོསམཱུལེནཱཏི དོསསངྑཱཏམཱུལེན དོསམཱུལཀཙིཏྟེནཱཏི དྭིདྷཱ ཨཏྠོ. ཏཏྠ པུརིམོ བྱཱཔཱདཝཛྫེཧི དྭཱིཧི ཡུཛྫཏི, པཙྪིམོ ཏཱིཧིཔི. ¶ ལོབྷམཱུལེནཱཏི ཨེཏྠ ཨེསནཡོ. ཏཏྠཱཔིཏི པུརིམོ ཨབྷིཛ྄ཛྷཱཝཛྫེཧི དྭཱིཧི ཡུཛྫཏི. པཙྪིམོ ཏཱིཧཱིཏི. དྭཱིཧི མཱུལེཧཱིཏི ཀདཱཙི དོསམཱུལེན ཀདཱཙི ལོབྷམཱུལེནཱཏི ཨེཝཾ དྭཱིཧི མཱུལེཧི སམྦྷཝནྟི. མོཧོ པན སབྦསཱདྷཱརཎཏྟཱ ཝིསེསཀརོ ན ཧོཏཱིཏི ཨིདྷ ན གཧིཏོ.

[༡༥༧] ཡཾ པན ཝིབྷཱཝནིཡཾ

‘‘ནིདྷིཔཱཋཀཔམཱཎཏོ དུཊྛནིགྒཧཏྠཾ པརསནྟཀཾ ཧརནྟཱནཾ རཱཛཱུནཾ བྲཱཧྨཎཱནཉྩ སབྦམིདཾ བྲཱཧྨཎཱནཾ རཱཛཱུཧི དིནྣཾ. ཏེསཾ པན སབྦདུབྦལབྷཱཝེན ཨཉྙེ བྷུཉྫནྟི. ཨཏྟསནྟཀམེཝ བྲཱཧྨཎཱ པརིབྷུཉྫནྟཱིཏི ཨེཝམཱདཱིནི ཝཏྭཱ སཀསཉྙཱཡ ཨེཝ ཡཾཀིཉྩི ཧརནྟཱནཾ ཀམྨཕལསམྦནྡྷཱཔཝཱདཱིནཉྩ མོཧམཱུལེནཱ’’ཏི ཝུཏྟཾ. ཏཾ ཨིདྷ ན ཡུཛྫཏི.

སཧཛཱཏམཱུལཉྷི ཨིདྷ ཨདྷིཔྤེཏཾ ཨསཱདྷཱརཎབྷཱུཏཉྩ. ཏེསཉྩ ཏཐཱཧརནྟཱནཾ ཧརཎཾ ཧརཎཀཱལེ ཀདཱཙིདོསམཱུལེན ཀདཱཙི ལོབྷམཱུལེནཱཏི ཨེཝཾ དྭཱིཧི མཱུལེཧི ཨེཝ སམྦྷཝཏཱིཏི. ཡོ པན མོཧོ མཧཱསམྨཏཱདཱིནཾདྷམྨིཀརཱཛཱུནཾ ཀཱལེ པཝཏྟཾ པོརཱཎཀ ནིདྷིསཏྠཾ ཐཔེཏྭཱ པཙྪཱ ཨདྷམྨིཀཱནཾརཱཛཱུནཾ ཀཱལེ པཝཏྟེསུ ཡེབྷུཡྻེན ཨདྷམྨིཀེསུ དྷམྨསཏྠ རཱཛསཏྠ སངྑཱཏེསུ ནིདྷིཔཱཋེསུ དྷམྨིཀསཉྙཱིནཾ རཱཛཱུནཾ ཨུཔྤནྣོ. ཡོཙ རཱཛཱུནཾ ཨབྷིསེཀཀཱལེ དིནྣཉྙེཝསམཎབྲཱཧྨཎཱནཾཏིཎཀཊྛོདཀནྟི ཝཙནཾ ཨུཔཱདཱཡ སབྦམིདཾ བྲཱཧྨཎཱནཾ རཱཛཱུཧི དིནྣནྟི ཨེཝཾ སཉྙཱིནཾ བྲཱཧྨཎཱནཾ ཨུཔྤནྣོ. ཡོཙ ནཏྠི སུཀཏ དུཀྐཊཱནཾ ཀམྨཱནཾ ཕལཾ ཝིཔཱཀོཏི ཨེཝཾ དིཊྛིཀཱནཾ ཀམྨཕལསམྦནྡྷཱ པཝཱདཱིནཾ ཨུཔྤནྣོ. སོསབྦོཔི ཨུཔནིསྶཡམོཧོ ནཱམ ཧོཏི. སོ ཨིདྷ ནཱདྷིཔྤེཏོ. ཨིཏརཐཱ ལོབྷོ ནིདཱནཾ ཀམྨཱནཾ སམུདཡཱཡ. དོསོ ནིདཱནཾ ཀམྨཱནཾ སམུདཡཱཡ. མོཧོ ནིདཱནཾ ཀམྨཱནཾ སམུདཡཱཡཱཏི ཝཙནཏོ སབྦེཔི ཨཀུསལཀམྨ པཐཱཏི མཱུལཀཱཨེཝ ཨིདྷ ཝཏྟབྦཱ སིཡུནྟི. ཨེཝཾཔནེཏྠ ཝཏྟབྦཾ སིཡཱ, ཀམྨེསུཙ ཀམྨཕལེསུཙ སཉྫཱཏཀངྑཱནཾ ཛནཱནཾ ཀངྑཱ པརིཡུཊྛཱན ཙིཏྟེནསཧེཝཏདནུརཱུཔཱནིཨདིནྣཱདཱནཱདཱིནི ཙཏྟཱརིཀམྨཱནི ཀརོནྟཱནཾ ཏཱནི ¶ ཀམྨཱནི སུདྡྷེན མོཧམཱུལེན ཛཱཡནྟཱིཏི. ཨེཝཉྷི སཏི པརཏོ ཝིཙིཀིཙྪཱ ཙེཏནཱཡ པཊིསནྡྷིཛནཀེསུ གཧཎཾཔི ཨུཔཔནྣཾ ཧོཏཱིཏི. [ཨཀུསལཀམྨཾ].

༡༥༢. ཀཱམཱཝཙརཀུསལཾཔི ཀཱཡདྭཱརེ པཝཏྟཾ ཀཱཡ ཀམྨནྟི ཨེཏྠ དྭེ པརིཡཱཡཱ ཝེདིཏབྦཱ. ཀཐཾ, ཝཀྑམཱནེསུ ཧི པུཉྙཀྲིཡཝཏྠཱུསུ ཡཾཀིཉྩི པུཉྙཀྲིཡཝཏྠུཾ ཀཱཡངྒཾ ཙོཔེཏྭཱ པཝཏྟིཏཾ ཀཱཡཀམྨཾ ནཱམ. ཝཱཙངྒཾ ཙོཔེཏྭཱ པཝཏྟིཏཾ ཝཙཱིཀམྨཾ ནཱམ. ཀཱཡངྒ ཝཱཙངྒཱནི ཨཙོཔེཏྭཱ མནོདྭཱརེཨེཝ པཝཏྟིཏཾ མནོཀམྨཾ ནཱམཱཏི ཨཡམེཀོ པརིཡཱཡོ. ཨཡཾ པན མེཏྟཾ ཀཱཡཀམྨཾ པཙྩུཔཊྛིཏཾ ཧོཏི སབྲཧྨཙཱརཱིསུ ཨཱཝིཙེཝ རཧོ ཙ. མེཏྟཾ ཝཙཱིཀམྨཾ པཙྩུཔཊྛིཏཾ ཧོཏི སབྲཧྨཙཱརཱིསུ ཨཱཝིཙེཝ རཧོཙ. མེཏྟཾ མནོཀམྨཾ པཙྩུཔཊྛིཏཾ ཧོཏི སབྲཧྨཙཱརཱིསུ ཨཱཝིཙེཝ རཧོཙཱཏིཙ. སབྦཾ ཀཱཡཀམྨཾ ཉཱཎཔུབྦངྒམཾ ཉཱཎཱནུཔརིཝཏྟཾ. སབྦཾ ཝཙཱིཀམྨཾ ཉཱཎཔུབྦངྒམཾ ཉཱཎཱནུཔརིཝཏྟཾ. སབྦཾ མནོཀམྨཾ ཉཱཎཔུབྦངྒམཾ ཉཱཎཱནུཔརིཝཏྟནྟི ཙ.

པདཀྑིཎཾ ཀཱཡཀམྨཾ, ཝཱཙཱཀམྨཾ པདཀྑིཎཾ;

པདཀྑིཎཾ མནོཀམྨཾ, པཎཱིཧིཏེ པདཀྑིཎེ ཏིཙ.

ཨེཝམཱདཱིསུ སུཏྟཔདེསུ ཨཱགཏོ. ཨཔིཙ, ཨཊྛསཱལིནིཡཾ སཀལཱཡ ནཝཀམྨདྭཱརཀཐཱཡ ཨཡམཏྠོ དཱིཔེཏབྦོ. ཏཏྠ ཧི དཱནམཡཾཔི ཀཱཡཝཙཱི མནོཀམྨཝསེན ཏིདྷཱ ཝིབྷཏྟཾ. ཏཐཱ སཱིལམཡཾ བྷཱཝནཱམཡཉྩཱཏི. ཡསྨིཾ པན དུསྶིལྱེ པཝཏྟམཱནེ ཀཱཡོ ཨཔརིསུདྡྷོ ཧོཏི. ཀཱཡསཾཝརོ བྷིཛྫཏི. ཡཾ པན ཀུསལཾ པཝཏྟམཱནཾ ཏདངྒཔཧཱནཱདིཝསེན ཏཾ དུསྶིལྱཾ པཛཧིཏྭཱ ཀཱཡདྭཱརཾ སོདྷཡམཱནཾ ཀཱཡསཾཝརཾ པཱུརཡམཱནཾ པཝཏྟཏི. ཏཾ ཀཱཡཙོཔན རཧིཏཾཔི ཀཱཡངྒ སཾཝརཎ ཀིཙྩཏྟཱ ཀིཙྩསཱིསེན ཀཱཡདྭཱརེ པཝཏྟཾ ཀཱཡཀམྨཾནཱམ. ཀཱཡསུཙརིཏནྟིཔི ཝུཙྩཏི. ཨེཏྠཙ ཏཾ དུསྶིལྱཾ པཛཧིཏྭཱཏི ཡསྨིཾ ཙིཏྟེ ཨུཔྤཛྫམཱནེ པཱཎགྷཱཏཱདིཀཾ ཀཱཡདུསྶིལྱཾ ཨུཔྤཛྫེཡྻ. ཏསྶ ཙིཏྟསྶ ཨུཔྤཛྫིཏུཾ ཨཔྤདཱནཝསེན ཏཾ ཀཱཡདུསྶིལྱཾ པཛཧིཏྭཱ. ཀཱཡདྭཱརཾ སོདྷ ཡམཱནནྟི ¶ ཡསྨིཾ དུསྶིལྱེ ཨུཔྤཛྫམཱནེ ཀཱཡངྒཾ ཨསུདྡྷཾ ཧོཏི. ཏསྶ ཨུཔྤཛྫིཏུཾ ཨཔྤདཱནཝསེན ཀཱཡདྭཱརཾ སོདྷཡམཱནཾ. ཀཱཡསཾཝརཾ པཱུརཡམཱནནྟི སཡཾ ཀཱཡངྒསཾཝརཎཀིཙྩསམྤཱདནེན ཀཱཡསཾཝརཾ པཱུརེནྟནྟི ཨཏྠོ. ཝཙཱིཀམྨེཔི ཨེསེཝ ནཡོ. ཨཝཡེསཾ པན སབྦཾཔི ཀལྱཱཎཀམྨཾ ཏཱིསུ དྭཱརེསུ པཝཏྟཾཔི མནོདྭཱརཾཨེཝ སོདྷཡམཱནཾ མནོསཾཝརཾཨེཝ པཱུརཡམཱནཾ པཝཏྟཏཱིཏི མནོདྭཱརེ པཝཏྟཾ མནོཀམྨཾནཱམ. མནོསུཙརིཏནྟིཔི ཝུཙྩཏི. ཨཡམེཀོ པརིཡཱཡོ. ཨཡཾ པན ཨནེཀསཏེསུ ཀམྨཔཐསུཏྟེསུ ཨཱགཏོ. ཨཔིཙ, ཨཊྛསཱལིནིཡཾ སཀལཱཡ དྭཱརཀཐཱཀ ཨཡམཏྠོ དཱིཔེཏབྦོཏི. ཨིམེསུ པན དྭཱིསུ པརིཡཱཡེསུ སཏྟུསཱསནེ ཀལྱཱཎདྷམྨཔཱུརཎཾནཱམ ཡཱཝདེཝ པཱཔདྷམྨཔཧཱནཏྠཱཡ ཨེཝ ཧོཏཱིཏི པཙྪིམོཡེཝ པདྷཱནནྟི ཝེདིཏབྦོཏི. དིཡྻཏི ཨེཏེནཱཏི དཱནཾ. ཝཏྠུཔརིཙྩཱགཙེཏནཱ. སཱིལཡཏཱིཏི སཱིལཾ. ཀཱཡ ཝཙཱིཀམྨཱནི སཱཝཛྫཱནི ནཱིཝཱརེཏྭཱ ཨནཝཛྫཱནི སུསམཱཧིཏཱནི ཀཏྭཱ སམྨཱདཧཏི ཐཔེཏི, ཨུཔརིམེ ཀུསལདྷམྨེཙ ཨུཔདྷཱརེཏི. ཏེསཾ པཏིཊྛཱ ཧུཏྭཱ དྷཱརེཏཱིཏི ཨཏྠོ. བྷཱཝེནྟི ཨེཏཱཡཱཏི བྷཱཝནཱ. ཨདྷིཀུསལདྷམྨེ ཨནུཔྤནྣེཝཱ ཨུཔྤཱདེནྟི ཨུཔྤནྣེཝཱ ཝཌྜྷེནྟཱིཏི ཨཏྠོ. ཨཔཙཱཡནྟི ཨེཏེནཱཏི ཨཔཙཱཡནཾ. པཱུཛེནྟི ཀཱཡཝཱཙཱཧི ཨཏྟཱནཾ ནཱིཙཝུཏྟིཾ དསྶེནྟཱིཏི ཨཏྠོ.

ཝིསེསེན ཨཱཝརནྟི ཨུསྶུཀྐཾ ཨཱཔཛྫནྟཱིཏི བྱཱཝཊཱནཾ བྷཱཝོ ཀམྨཾཝཱ ཝེཡྻཱཝཙྩཾ. པཛྫིཏྠཱཏི པཏྟི. ཨཏྟནི ལདྡྷཔུཉྙཀོཊྛཱསསྶ ནཱམཾ. པཱཔཱིཡཏཱིཏིཝཱ པཏྟི. པརེཧི ཨནུམོདནྟེཧི ལདྡྷབྦསྶ པུཉྙཱནིསནྡསྶེཏཾ ནཱམཾ. པཏྟིཾ དདནྟི ཨེཏེནཱཏི པཏྟིདཱནཾ. ཏདེཝ པརེཧི དིནྣཾ ཨནུམོདནྟི. སཱདྷུཀཱརཾ དདནྟི ཨེཏེནཱཏི པཏྟཱནུམོདནཾ. དྷམྨཾ སུཎནྟི ཨེཏེནཱཏི དྷམྨསཝནཾ. དྷམྨཾ དེསེནྟི ཨེཏཱཡཱཏི དྷམྨདེསནཱ. ཨཏྠི དིནྣཾ, ཨཏྠི ཡིཊྛཾ, ཨཏྠི ཧུཏཾ, ཨཏྠི སུཀཏདུཀྐཊཱནཾ ཀམྨཱནཾ ཕལཾ ཝིཔཱཀོཏིཨཱདིནཱ དསཝཏྠུཀཾ སམྨཱདིཊྛིཾ ཨུཛུཾ ཀརོནྟི ཨེཏེནཱཏི དིཊྛིཛུཀམྨཾ. སབྦཱནི པན ཏཱནི པུནེནྟི ཙིཏྟསནྟཱནཾ སོདྷེནྟི ཨེཏེཧཱིཏི པུཉྙཱནི. པཱུཛནཱིཡབྷཱཝཾ ནིབྦཏྟེནྟཱིཏི པུཉྙཱནཱིཏིཔི ཝདནྟི. ཏཱནིཨེཝ ཨཝསྶཾ ཀཏྟབྦཊྛེན ཀྲིཡཱནིཙཱཏི ¶ པུཉྙཀྲིཡཱནི. ཏཱནིཡེཝ སུཁཝིསེསཱནཾ ཨདྷིཊྛཱནཊྛེན ཝཏྠཱུནིཙཱཏི པུཉྙཀྲིཡཝཏྠཱུནཱིཏི. ཨེཏྠ ཨེཀམེཀཾ ཏིཝིདྷཾ ཧོཏི པུརིམཾ མཛ྄ཛྷིམཾ པཙྪིམནྟི. ཏཏྠ དཱནེ ཏཱཝ པཊིགྒཱཧཀསྶ པརིཙྩཱགཀརཎཾ མཛ྄ཛྷིམཾནཱམ. ཏཏོ པུབྦེ ཨིམིནཱ པཙྩཡེན དཱནམཡཾ པུཉྙཾ པཝཏྟཡིསྶཱམཱིཏི ཨེཝཾ པཙྩཡུཔྤཱདནཏོ པཊྛཱཡ དཱནཾ ཨཱརབྦྷ དཱནཾ ཨུདྡིསྶ ཏཱིསུ དྭཱརེསུ པཝཏྟཱ ཀུསལཙེཏནཱ པུརིམཾནཱམ. པཙྪཱ བྷཱགེ པན ཨཏྟནཱ དིནྣདཱནཾ ཨཱརབྦྷ པུནཔྤུནཾ ཨཏྟམནཙིཏྟཾ ཨུཔྤཱདེནྟསྶ པཝཏྟཱ ཀུསལཙེཏནཱ པཙྪིམཾནཱམཾ. སབྦཾཔི ཙེཏཾ ཨཀུསལེ ཝུཏྟནཡེན བལཝཔཙྩཡེ ལདྡྷཱ པཊིསནྡྷིཾ དེཏི. ཨལདྡྷཱ ན དེཏཱིཏི ཝེདིཏབྦཾ.

པུན ཧཱིན མཛ྄ཛྷིམཔཎཱིཏཝསེན ཏིཝིདྷཾ ཧོཏི. ཏཏྠ ཧཱིནེན ཚནྡེན ཙིཏྟེན ཝཱིརིཡེན ཝཱིམཾསཱཡཝཱ པཝཏྟིཏཾ ཧཱིནཾ, མཛ྄ཛྷིམེན ཚནྡཱདིནཱ པཝཏྟིཏཾ མཛ྄ཛྷིམཾ, པཎཱིཏེན པཎཱིཏཾ. ཡསཀཱམཏཱཡཝཱ པཝཏྟིཏཾ ཧཱིནཾ. པུཉྙཕལཀཱམཏཱཡཝཱ པཝཏྟིཏཾ མཛ྄ཛྷིམཾ. ཀཏྟབྦམེ ཝིདནྟི ཨརིཡབྷཱཝཾ ནིསྶཱཡ པཝཏྟིཏཾ པཎཱིཏཾ. ཨཏྟུཀྐཾསན པརཝམྦྷནཱདཱིཧི ཨུཔཀྐིལིཊྛཾཝཱ ཧཱིནཾ. ཨནུཔཀྐིལིཊྛཾ ལོཀིཡསུཁབྷཱགིཏཱཡ པཝཏྟིཏཾ མཛ྄ཛྷིམཾ. མགྒཕལསུཁབྷཱགིཏཱཡ པཝཏྟིཏཾ པཎཱིཏཾ. ཏཎྷཱཝསེནཝཱ བྷཝབྷོགཏྠཱཡ པཝཏྟིཏཾ ཧཱིནཾ. ཨཏྟནོ ཝིམོཀྑཏྠཱཡ པཝཏྟིཏཾ མཛ྄ཛྷིམཾ. སབྦསཏྟཝིམོཀྑཏྠཱཡ པཝཏྟིཏཾ པཱརམིཏཱདཱནཾ པཎཱིཏནྟི ཨཡམཏྠོ ཝིསུདྡྷིམགྒེ སཱིལནིདྡེསཾ ནིསྶཱཡ ཝེདིཏབྦོཏི. ཡཐཱ ཙེཏྠ, ཨེཝཾ སེསེསུཔིཡཐཱ སམྦྷཝཾ ཏིཀདྭཡཾ ཝིབྷཛིཏྭཱ ཝཏྟབྦནྟི. ཏཏྠ སཱིལཾ ནཱམབྷིཀྑུསཱིལཾ, བྷིཀྑུནིསཱིལཾ, སཱམཎེརསཱིལཾ, གཧཊྛསཱིལནྟི ཙཏུབྦིདྷཾ ཧོཏི. ཏཏྠ པུརིམཱནཾ དྭིནྣཾ སམཱདཱནཀིཙྩཾ ཀམྨཝཱཙཱཡ སིདྡྷཾཧོཏི. ཨནྟིམཝཏྠུཨཛ྄ཛྷཱཔནྣེནཝཱ སིཀྑཱཔཙྩཀྑཱནེནཝཱ ཀམྨཝཱཙཱཡ བྷིནྣཱཡ སབྦཾ སམཱདཱནཾ བྷིནྣཾ ཧོཏི. སབྦཱནི ཨུཔསམྤནྣ སཱིལཱནི བྷིནྣཱནི ཧོནྟི. ཏདཱ བྷིཀྑུཔཊིཉྙཾ ཨཝིཛཧིཏྭཱ ཋིཏོ དུསྶཱིལོནཱམ ཧོཏི. ཐཔེཏྭཱཔན ཨནྟིམཝཏྠུཾ ཨཉྙསིཀྑཱ པདཱནི ཝཱིཏིཀྐམནྟསྶ ཡཾ ཝཱིཏིཀྐམཏི. ཏསྨིཾཡེཝ སཾཝརབྷེདོ ཧོཏི. ན སམཱདཱན བྷེདོ. ན ཧི ཏཾ པུན ཀམྨཝཱཙཱཡ སམཱདཱཏབྦནྟི ཨཏྠཱིཏི. པཊིཀམྨཾ ཀརོནྟསྶ ¶ པན སཾཝརོ པཱཀཏིཀོ ཧོཏི. སཉྩིཙྩ ཝཱིཏིཀྐམནྟོཝཱ པཊིཀམྨཾ ཨཀརོནྟོཝཱ ཨལཛྫཱིནཱམ ཧོཏི. ན དུསྶཱིལོཏི. ཨེསནཡོ སཱམཎེརསཱིལེཔི. ཏཏྠ པན སརཎགམནེནེཝ སམཱདཱནཾསིདྡྷཾ ཧོཏི. ལིངྒནཱསནངྒཾ ཀཏྭཱ སརཎགམནེ བྷིནྣེ སབྦཾ སམཱདཱནཾ བྷིཛྫཏི. ཨིཏརེསུ པན ཡཾ ཝཱིཏིཀྐམཏི, ཏསྨིཾཡེཝ སཾཝརབྷེདོ ཧོཏཱིཏི ཝེདིཏབྦཾ.

གཧཊྛསཱིལེ པན པཀཏི གཧཊྛཱནཾ གཧཎཝསེནེཝ སམཱདཱནཾ སིདྡྷཾ ཧོཏི. ཏསྨཱ ཨེཀཏོགཎྷནྟེ སབྦཱནི སམཱདིནྣཱནི ཧོནྟི. ཨེཀསྨིཾཙ བྷིནྣེ སབྦཱནི བྷིནྣཱནི ཧོནྟི. སབྦཱནི པུན སམཱདཱཏབྦཱནི. ཝིསུཾ ཝིསུཾ གཎྷནྟེ པན ཡཾ ཝཱིཏིཀྐམཏི, ཨེཏདེཝབྷིཛྫཏི. ཏདེཝ པུན སམཱདཱཏབྦཾ ཧོཏཱིཏི. པརིཙྪིནྣཀཱལཱ ཏིཀྐམནེ པན སབྦཾ སམཱདཱནཾ ཝཱུཔསམྨཏིཡེཝ. དུསྶཱིལབྷཱཝོ པནེཏྠ པཉྩནྣཾ ནིཙྩསཱིལཱནཾ བྷེདེན ཝེདིཏབྦོ. ནིཙྩཱནིཙྩེསུ པན ཡཾ ནིཙྩམེཝ ཝཊྚཏི. ཨནིཙྩཾ ནཝཊྚཏི སཱཝཛྫཾ ཧོཏི. ཏཾ ནིཙྩསཱིལཾ ནཱམ. ཡཾ པན ནིཙྩཾཔི ཝཊྚཏི. མཧནྟཾ པུཉྙཱབྷིསནྡཾ ཧོཏི. ཨནིཙྩཾཔི ཝཊྚཏི སཱཝཛྫཾ ན ཧོཏི. ཏཾ ཨནིཙྩསཱིལཾནཱམ. ཏཏྠ བྷིཀྑུ བྷཱཝེ ཋིཏསྶ བྷིཀྑུསཱིལཾ སཱམཎེརབྷཱཝེ ཋིཏསྶ སཱམཎེརསཱིལཾ པཀཏིགཧཊྛཱནཾཔཉྩསཱིལཾ པབྦཛིཏསངྑེཔགཏཱནཾ ཨུཔཱསཀཱནཾ ཏཱཔསཔརིབྦཱཛཀཱནཉྩ དསསཱིལཾ ནིཙྩསཱིལཾནཱམ. ཏེསཉྷི ཏཾ ཏཾ ཡཐཱསཀཾ སཱིལཾ ནིཙྩཾ སུདྡྷཾ ཀཏྭཱ རཀྑིཏུམེཝ ཝཊྚཏི. ཨརཀྑནྟཱནཾ བྷིཀྑུབྷཱཝཱདིཀོ སཱཝཛྫོ ཧོཏི ཨསུདྡྷོ. ཀསྨཱ, ཨཏྟནོ ཨནུརཱུཔསྶ ཨཱཙཱརསྶ ཝིཔཏྟིཏོ. པཀཏིགཧཊྛཱནཾ པན ཨཊྛངྒུཔོསཐསཱིལཾ ཨནིཙྩསཱིལཾནཱམ. ཏཉྷི ཏེསཾ ཝུཏྟནཡེན ནིཙྩཾཔི ཝཊྚཏི. ཨནིཙྩཾཔི ཝཊྚཏི. ཏཐཱ དསསཱིལཉྩ. ཏཉྷི པཀཏི གཧཊྛཱནཾ ཨནིཙྩསཱིལམེཝ ཧོཏི. གིཧིནིཝཏྠཾ པཧཱཡ ཀཱསཱཡཝཏྠདྷཱརཎེན པབྦཛིཏསངྑེཔགཏཱནཾ ཨེཝ ནིཙྩསཱིལཾ. ཡཐཱ ཧི པཀཏིམནུསྶཱནཾ པཉྩསཱིལཾ སམཱདིནྣཾཔི ཨསམཱདིནྣཾཔི ནིཙྩཾ རཀྑིཏུམེཝ ཝཊྚཏི. ཝཱིཏིཀྐམིཏུཾ ནཝཊྚཏི. ཏཐཱ པབྦཛིཏཝེསདྷཱརཱིནཾ དསསཱིལཾ སམཱདིནྣཾཔི ཨསམཱདིནྣཾཔི ནིཙྩཾ རཀྑིཏུམེཝ ཝཊྚཏི. ཝཱིཏིཀྐམིཏུཾ ནཝཊྚཏི. ཝེསདྷཱརཎེན སཧ སིདྡྷཏྟཱཏི.

ཨུཔརི ¶ ཝུཙྩམཱནཱ སམཐཝིཔསྶནཱཝསེན དུཝིདྷཱ བྷཱཝནཱ བྷཱཝནཱནཱམ. སཱ ཨིདྷ ཨཔྤནཾ ཨཔཏྟཱཝ ཨདྷིཔྤེཏཱ. དྷམྨཝིནཡཔརི ཡཏྟིཡཱ སཧ ཨནཝཛྫཀམྨསིཔྤཝིཛྫཱཋཱནེསུ པརིཙཡཀརཎ ཙེཏནཱཔི ཨེཏྠེཝ སངྒཡ྄ཧཏི. རཏནཏྟཡེ པན མཱཏཱཔིཏཱུསུ ཀུལེཛེཊྛེསུ ཨཱཙརིཡེསུ དྷམྨིཀསམཎབྲཱཧྨཎེསུ ཨཉྙེསུཙ གུཎཝཡཝུདྡྷེསུ ཡཐཱརཧཾ པཙྩུཊྛཱནཾ ཝནྡནཾ ཨཉྫལིཀརཎཾ སཱམིཙིཀརཎཾ ཝཏྟཔཊིཝཏྟཀརཎནྟི ཨེཝམཱདིསབྦཾ ཨཔཙཱཡནཾནཱམ. ཏེསཉྙེཝ ཨཉྙེསཉྩ ཨཱགནྟུཀགམིཀཨདྡྷིཀཱནཾ གིལཱནཱནཾ ཛིཎྞཱནཾ ཀིཙྩ ཀརཎཱིཡེསུ སབྲཧྨཙཱརཱིནཾ ཙཱིཝརཀམྨཱདཱིསུ པརེསཾ ཏཾཏཾཔུཉྙ ཀམྨེསུཙ པརིསུདྡྷེན ཧིཏཕརཎཙིཏྟེན ཨཏྟནོཀིཙྩེསུ ཝིཡ ཀཱཡཝཱཙཱཧི ཝཱཡཱམཀརཎཾ ཝེཡྻཱཝཙྩཾནཱམ. ཨཏྟནཱ ཀཏསྶ ཡསྶཀསྶཙི པུཉྙསྶ པརེཧི སཱདྷཱརཎཀརཎཾ པཏྟིདཱནཾནཱམ. པརེཧི དིནྣཱཡ པཏྟིཡཱ ཨནུམོདནཾ ཨཏྟམནཏཱཔཝེདནཾ པཏྟཱ ནུམོདནཾནཱམ. ཨདིནྣསྶ པུཉྙསྶ ཨནུམོདནཾ པན ཨནུམོདནམེཝ ཧོཏི. ན པཏྟཱནུམོདནཾ. པཏྟིཡཱཨེཝ ཨབྷཱཝཏོ. པཏྟིཙ དུཝིདྷཱ ཨུདྡིསིཀཱ ཨནུདྡིསིཀཱཏི. ཏཏྠ ཨཏྟཱནཾ ཨུདྡིསིཀཾ ཨནུམོདནྟསྶེཝ དིཊྛདྷམྨཝེདནཱིཡཾ ཛཱཏནྟི ཝེདིཏབྦཾ. ཨིདཾ པན དྭཡཾ དཱནཔུཉྙེསུཨེཝ ཝིསེསཏོ པཱཀཊཾ. ཏཉྷི ཨུདྡིསཀཾ ཀཏྭཱ དེཝཏཱནཾཝཱ པརདཏྟུཔཛཱིཝིཔེཏཱནཾཝཱ ཝེམཱནིཀཔེཏཱནཾཝཱ ཝིནིཔཱཏིཀཱསུརཱནཾཝཱ དིནྣཾ ཨནུམོདིཏཉྩ ཏེསཾ ཏངྑཎེཨེཝ དིཊྛདྷམྨ ཝེདནཱིཡཾ ཛཱཏནྟི. ཨཏྠཧིཏ པཊིསཾཡུཏྟཱཡ དྷམྨཀཐཱཡ ཡོནིསོ མནསིཀཱརེ ཋཏྭཱ སཝནཉྩ ཀཐནཉྩ དྷམྨསཝནཾ དྷམྨ དེསནཱཙནཱམ. ནིརཝཛྫཀམྨསིཔྤཝིཛྫཱཋཱནཱནཾ སཝནཀཐནཙེཏནཱཙ ཨེཏྠེཝསངྒཡ྄ཧནྟི.

ནཏྠི དིནྣཾ ནཏྠིཡིཊྛནྟིཨཱདིནཡཔཝཏྟཱཡ དསཝཏྠུཀཱཡ མིཙྪཱ དིཊྛིཡཱཝཱ ཨིསྶརནིམྨཱནཱདིདིཊྛིཡཱཝཱ དིཊྛམངྒལཱདིདིཊྛིཡཱཝཱ ཝིསུདྡྷཾ ཀཏྭཱ ཏེཧི ཏེཧི ཝཏྠཱུཧིཝཱ ཡུཏྟཱིཧིཝཱ ཀཱརཎེཧིཝཱ ཀམྨསཀཏཱ ཉཱཎསངྑཱཏཱཡ སམྨཱདིཊྛིཡཱ ཝོདཱནཀརཎཾ དིཊྛུཛུཀམྨཾནཱམཱཏི. ཡཏྠ པན ཏིཝིདྷམེཝ པུཉྙཀྲིཡཝཏྠུ ཨཱགཏཾ. ཏཏྠ པཏྟིདཱནཱནུམོདནཱནི དཱནེ སངྒཡ྄ཧནྟི. ཨིསྶཱམཙྪེརཱནཾ ¶ པཊིཔཀྑབྷཱཝེན ཏཾ སབྷཱཝཏྟཱ. ཨཔཙཱཡནཝེཡྻཱཝཙྩཱནི སཱིལེ སངྒཡ྄ཧནྟི. ཏེསཾ ཙཱརིཏྟ སཱིལཏྟཱ. སེསཱནི ཏཱིཎི བྷཱཝནཱམཡེ སངྒཡ྄ཧནྟི. ཏཾ སབྷཱཝཏྟཱ. ཀམྨཊྛཱནཝིནིམུཏྟོ དྷམྨོནཱམ ནཏྠཱིཏི ཧི ཝུཏྟཾ. དིཊྛུཛུཀམྨཉྩ ཉཱཎ ཝཌྜྷནམེཝཱཏི. ཏཱིསྭེཝཝཱ ཨེཏཾ སངྒཡ྄ཧཏི. དིཊྛུཛུཀམྨཾ སབྦེསཾ ནིཡམ ལཀྑཎནྟིཏི ཨཊྛཀཐཱཡཾ ཝུཏྟཾ. སཏིཡེཝ ཧི ཀམྨསཀཏཱཉཱཎེ དཱནཱདཱིནི ཏཱིཎི སམྤཛྫནྟཱིཏི. མནོཀམྨམེཝཱཏི མནསྨིཾཨེཝ ཀམྨཔཐ ཀིཙྩསིདྡྷིཏོ མནོཀམྨཾཨེཝ.

[༡༥༨] ཝིབྷཱཝནིཡཾ པན

‘‘ཝིཉྙཏྟིསམུཊྛཱཔཀཏྟཱ བྷཱཝེན ཀཱཡ དྭཱརཱདཱིསུ ཨཔྤཝཏྟནཏོཏི’’ ཝུཏྟཾ. ཏཾ ན སུནྡརཾ.

ན ཧི ཝིཉྙཏྟིསམུཊྛཱཔཀཾ ཨབྷིཉྙཱཀུསལཾ ཀཱཡདྭཱརཱདཱིསུ པཝཏྟམཱནཾཔི ཀཱཡཝཙཱིཀམྨསངྑྱཾ གཙྪཏི, ཀཱཡཝཱཙཱནཾ ཀམྨཔཐ ཨངྒབྷཱཝཱསམྦྷཝཏོཏི. ཏཉྩ བྷཱཝནཱམཡནྟི དཱནསཱིལཝསེན ཨཔྤཝཏྟནཏོ. ཀེཝལཾ བྷཱཝནཱཀམྨཝིསེསཏྟཱ ཏཉྩ མཧགྒཏ ཀུསལཾ བྷཱཝནཱཀམྨ མེཝ ཧོཏི. ཡཾ པན པཊིསམྦྷིདཱ མགྒེ པཐམཛ྄ཛྷཱནེན ནཱིཝརཎཱནཾ. དུཏཱིཡེན ཝིཏཀྐཝིཙཱརཱནཾ. ཏཏཱིཡེན པཱིཏིཡཱ. ཙཏུཏྠེན སུཁདུཀྑཱནཾ པཧཱནཾ སཱིལཾ. ཝེརམཎི སཱིལཾ. ཙེཏནཱ སཱིལཾ. སཾཝརོ སཱིལཾ. ཨཝཱིཏིཀྐམོ སཱིལནྟི ཝུཏྟཾ. ཏཾ པརིཡཱཡེན ཝུཏྟནྟི ཝེདིཏབྦཾ. ཨཔྤནཱཔཏྟནྟི བྷཱཝནཱ བལེན ཨཱརམྨཎེ ཨནུཔཝིསིཏྭཱ ཨཙལཊྛིཏིབྷཱཝེན པཝཏྟནཏོ ཨཔྤནཱཔཏྟཾ ཀམྨཾ ཧོཏི.

[༡༥༩] ཝིབྷཱཝནིཡཾ པན

‘‘པུབྦབྷཱགཔཝཏྟཱནཾ ཀཱམཱཝཙརབྷཱཝཏོཏི’’ ཀཱརཎཾ ཝུཏྟཾ. ཏཾ ན སུནྡརཾ.

ན ཧི ཏེསཾ ཀཱམཱཝཙརཏཱམཏྟཾ ཨཔྤནཱཔཏྟིཡཱ ཀཱརཎཾ ཧོཏཱིཏི. ཛྷཱནངྒབྷེདེནཱཏི ཝུཏྟཾ. ཛྷཱནབྷེདེནཱཏི པན ཝཏྟབྦཾ. ཛྷཱནངྒབྷེདེནཱཏིཝཱ ཛྷཱནངྒསམུདཱཡབྷེདེནཱཏི ཨཏྠོ, ཛྷཱནབྷེདེན ཨིཙྩེཝ ཝུཏྟཾ ཧོཏི. ཀུསལཀམྨཾ

༡༥༣. ཨེཏྠཱཏི ¶ ཨེཏསྨིཾ པཱཀཊྛཱནཙཏུཀྐེ. ཨུདྡྷཙྩརཧིཏནྟི ཨུདྡྷཙྩསཧགཏཙེཏནཱཝཛྫིཏཾ. ཀསྨཱ པན ཨུདྡྷཙྩཙེཏནཱ ཨིདྷ པཛྫིཏཱཏི. པཊིསནྡྷིཨནཱཀཌྜྷནཏོ. ཀཐཾ ཝིཉྙཱཡཏཱིཏི ཙེ. དྷམྨསངྒཧེ དསྶནེན པཧཱཏབྦེསུ ཏཾ ཨཝཏྭཱ བྷཱཝནཱཡ པཧཱཏབྦེསུ ཨེཝ ཝུཏྟཏྟཱ. ཡཐཱཧ-ཙཏྟཱརོ དིཊྛིགཏསམྤཡུཏྟཙིཏྟུཔྤཱདཱ ཝིཙིཀིཙྪཱསཧགཏོ ཙིཏྟུཔྤཱདོ, ཨིམེ དྷམྨཱ དསྶནེན པཧཱཏབྦཱཏིཙ, ཨུདྡྷཙྩསཧགཏོ ཙིཏྟུཔྤཱདོ, ཨིམེདྷམྨཱ བྷཱཝནཱཡཔཧཱ ཏབྦཱཏིཙ, སེསཱ པན ཙཏྟཱརོ དིཊྛིགཏཝིཔྤཡུཏྟཙིཏྟུཔྤཱདཱ དྭེ པཊིགྷསམྤཡུཏྟཙིཏྟུཔྤཱདཱཙ སིཡཱ དསྶནེནཔཧཱཏབྦཱ སིཡཱ བྷཱཝནཱཡ པཧཱཏབྦཱཏི ཏཏྠ ཝུཏྟཱ. ཀཐཉྩ ཝིཉྙཱཡཏི. ཡོ དསྶནེནཔཧཱཏབྦེསུ ན ཝུཏྟོ, སོ ཨཀུསལདྷམྨོ པཊིསནྡྷིཾ ནཱཀཌྜྷཏཱིཏི. པཊྛཱནེ དསྶནེནཔཧཱཏབྦདྷམྨེསུཨེཝ ནཱནཱཀྑཎིཀ ཀམྨཔཙྩཡསྶ ཨུདྡྷཊཏྟཱ ཨིཏརཏྠ ཏསྶ ཨནུདྡྷཊཏྟཱཏི. ཡཐཱཧ-སཧཛཱཏཱ དསྶནེནཔཧཱཏབྦཱ ཙེཏནཱ སམྤཡུཏྟཀཱནཾ དྷམྨཱནཾ ཙིཏྟསམུཊྛཱནཱནཉྩ རཱུཔཱནཾ ཀམྨཔཙྩཡེནཔཙྩཡོ. ནཱནཱཀྑཎིཀཱ དསྶནེན པཧཱཏབྦཱ ཙེཏནཱ ཝིཔཱཀཱནཾ ཁནྡྷཱནཾ ཀཊཏྟཱཙ རཱུཔཱནཾ ཀམྨཔཙྩཡེན པཙྩཡོཏིཙ སཧཛཱཏཱ བྷཱཝནཱཡ པཧཱཏབྦཱ ཙེཏནཱསམྤཡུཏྟཀཱནཾདྷམྨཱནཾ ཙིཏྟཱསམུཊྛཱནཱནཉྩརཱུཔཱནཾ ཀམྨཔཙྩཡེན པཙྩཡོཏིཙ. ནཙ ནཱནཱཀྑཎིཀ ཀམྨཔཙྩཡསཏྟིཡཱ ཝིནཱ ཝིཔཱཀུཔྤཱདནཾནཱམ ཨཏྠཱིཏི. ཡདིཨེཝཾ སཱ པཝཏྟིཝིཔཱཀཾཔི ནཛནེཏཱིཏི སཀྐཱ ཝཏྟུནྟིཙེ.ན. པཊིསམྦྷིདཱཝིབྷངྒེ ཏསྶཱ ཝིཔཱཀསྶ ཨུདྡྷཊཏྟཱ. ཡཐཱཧ-ཀཏམེ དྷམྨཱ ཨཀུསལཱ. ཡསྨིཾ སམཡེ ཨཀུསལཾ ཙིཏྟཾ ཨུཔྤནྣཾ ཧོཏི ཨུཔེཀྑཱསཧགཏཾ ཨུདྡྷཙྩསམྤཡུཏྟཾ རཱུཔཱརམྨཎཾཝཱ.ལ. ཨིམེ དྷམྨཱ ཨཀུསལཱ. ཨིམེསུ དྷམྨེསུ ཉཱཎཾ དྷམྨཔཊིསམྦྷིདཱ. ཏེསཾ ཝིཔཱཀེ ཉཱཎཾ ཨཏྠཔཊིསམྦྷིདཱཏི. ཏེནཱཧ པཝཏྟིཡཾ པན སབྦཾཔི དྭཱདསཝིདྷནྟིཨཱདི.

[༡༦༠] ཡཾ པན ཝིབྷཱཝནིཡཾ

‘‘ཨདྷིམོཀྑཝིརཧེན སབྦདུབྦལཾཔི ཝིཙིཀིཙྪཱསཧགཏཾ པཊིསནྡྷིཾ ཨཱཀཌྜྷཏི. ཨདྷིམོཀྑསམྤཡོགེན ཏཏོ བལཝནྟཾཔི ཨུདྡྷཙྩསཧགཏཾ ནཱཀཌྜྷཏཱིཏི’’ ཝུཏྟཾ. ཏཾ ན སུནྡརཾ.

ན ཧི ¶ ཨདྷིམོཀྑཝིརཧམཏྟེན ཝིཙིཀིཙྪཱསཧགཏཾ སབྦདུབྦལནྟིཙ ཨདྷིམོཀྑསམྤཡོགམཏྟེན ཨུདྡྷཙྩསཧགཏཾ ཏཏོ བལཝནྟནྟིཙ སཀྐཱ ཝཏྟུཾ. སཏྠརི ཀངྑཏི དྷམྨེ ཀངྑཏཱིཏི ཨེཝམཱདིནཱ ནཡེན ཝུཏྟཱཡ ཝིཙིཀིཙྪཱཡ ཨཏྟནོ ཝིསཡེ མཧཱཧཏྠིནཱགསྶ ཝིཡ བལཝཏརཏྟཱ ཨཏིཝིཡ ཀཱལ༹ཀདྷམྨཏྟཱཙཱཏི. ཏཐཱ ཧིསཱ ཨེཀནྟེན དསྶནེནཔཧཱཏབྦེསུ པདྷཱནབྷཱཝེན ཝུཏྟཱ. ཏཏོཡེཝཙ པཊིསནྡྷིཨཱཀཌྜྷནཾཔི ཏསྶཱ ཝིཉྙཱཏབྦཾ ཧོཏཱིཏི. སབྷཱཝཝིརུདྡྷཏྟཱཡེཝ པན ཝིཙིཀིཙྪཱསཧགཏཾ ཨདྷིམོཀྑརཧིཏཾ ཧོཏཱིཏི ཡུཏྟཾ. ཏསྨཱ ཨུདྡྷཙྩསཧགཏམེཝ སབྦདུབྦལནྟི ཝེདིཏབྦཾ. སབྦཏྠཱཔཱིཏི སུགཏིདུགྒཏིཝསེན སབྦསྨིཾཔི. ཡཐཱརཧནྟི ཏེསུ ལོཀེསུ ལདྡྷཝཏྠུདྭཱརཱནུརཱུཔཾ. ཝིཔཙྩཏཱིཏི ཝིཔཱཙེཏི ཝིཔཀྐབྷཱཝཾ ཨཱཔཱདེཏི. སབྦཾཔིཝཱདྭཱདསཝིདྷཾ ཨཀུསལཀམྨཾ སཏྟཱ ཀུསལཔཱཀཱནི ཧུཏྭཱ ཝིཔཙྩཏི, ཝིཔཀྐབྷཱཝཾ གཙྪཏཱིཏི ཨཏྠོ.

ཡསྨཱ ཀུསལཀམྨཱནི ཨཔཱཡབྷཱུམིཡཾཔི པཝཏྟིཡཾ མཧཱསམྤཏྟིཡོ སམུཊྛཱཔེཏྭཱ མཧིདྡྷིཀཱནཾ ནཱགསུཔཎྞཱདཱིནཾ སནྟཱནེ སཡམེཝ ཨཏྟནོཝིཔཱཀསྶ ཨོཀཱསཾ ཀཏྭཱ སུཁཝིཔཱཀཾ ཛནཡནྟི. ཨཉྙེསཾཔི ཨཱཔཱཡིཀཱནཾ ཏེན ཏེན ཀཱརཎེན ཨིཊྛཱརམྨཎ སམཱཡོགེ སཏི ཨཏྟནོ ཝིཔཱཀསྶ ཨོཀཱསཾ ལབྷིཏྭཱ སུཁཝིཔཱཀཾ ཛནཡནྟི. ཏསྨཱ ཏཐཱཔཝཏྟིཡཉྩཱཏིཨཱདི མཱཧ. ན ཧི ཏཱནི སུཁཝིཔཱཀཱནི ཨཀུསཀམྨསྶ ཝིཔཱཀཱནི བྷཝིཏུཾ ཨརཧནྟི. ཝུཏྟེཉྷེཏཾ ཝིབྷངྒེ ཨཊྛཱནམེཏཾ ཨནཝཀཱསོ, ཡཾ ཀཱཡདུཙྩརིཏསྶ ཨིཊྛོ ཀནྟོ མནཱཔོ ཝིཔཱཀོ ནིབྦཏྟེཡྻཱཏིཨཱདི. ཏཏྠ མཧཱཝིཔཱཀཱནི སུགཏི ཀཱམལོཀེ ཨཧེཏུཀཱནི ཨཊྛཔི སབྦསྨིཾ ཀཱམལོཀེ ཏེསུཙ པཉྩཙཀྑུཝིཉྙཱཎ སོཏཝིཉྙཱཎ སམྤཊིཙྪན སནྟཱིརཎ ཡུགལཱ༹ནི རཱུཔལོཀེ ཝིཔཙྩཏཱིཏི ཝུཏྟཾ ཡཐཱརཧཾ ཝིཔཙྩཏཱིཏི. རཱུཔཱཝཙར ཀུསལཉྷི ཀམྨསམུཊྛཱནརཱུཔཱནི ཛནཡནྟཾཔི སཡཾ ཝིཔཙྩམཱནཾ ཨཱརམྨཎནྟརེ ཨཉྙབྷཱུམིཀ ཝིཔཱཀབྷཱཝེན ནཝིཔཙྩཏི. ཀཱམཝིརཱགབྷཱཝནཱབྷཱཝེན པན ཨཔྤནཱཔཏྟ ཀམྨ ཝིསེསཏྟཱ ཀཱམཏཎྷཱཡ ཨཝིསཡབྷཱུཏེ ནིམིཏྟཱ རམྨཎེ ཨཏྟནཱ སབྦསོ སདིསེན མཧགྒཏབྷཱཝཔཏྟེན རཱུཔ ཝིཔཱཀབྷཱཝེནེཝ ¶ ཝིཔཙྩཏི. ཏསྨཱ རཱུཔལོཀེཔི ཏཱནི པཉྩཝིཔཱཀཱནི ཀཱམཱཝཙརཀུསལསྶེཝཱཏི ཝེདིཏབྦཱནཱིཏི. དྭཱིསུ ཀམྨསྶ ཝིཔཙྩནཊྛཱནེསུ པཊིསནྡྷིནཱམ མཧནྟཾཋཱནཾ ཧོཏི. ཏསྨཱ ཏདཱ ཝིཔཙྩནྟཾ ཀམྨཾ ཨཏྟནོ སཱམཏྠིཡཱནུརཱུཔཾ ནཱཏིཧཱིནཾ ཝིཔཱཀཾ ཛནེཏུཾ སཀྐོཏི. པཝཏྟིཡཾ པན ནཱནཱཋཱནེསུ ནཱནཱཀིཙྩེཧི ཝིཔཙྩཏི. ཏསྨཱ ཏདཱ ཝིཔཙྩནྟཾ ཀམྨཾ ཨཏྟནོ སཱམཏྠིཡཱནུརཱུཔཾ ཝིཔཙྩེཏུཾ ནསཀྐོཏི. པཉྩཝིཉྙཱཎཊྛཱནཱདཱིསུ པརིཏྟཀེསུ ཝིཔཙྩམཱནཾ ཋཱནཱ ནུརཱུཔཾ ཝིཔཙྩཏི. ཏདཱརམྨཎཊྛཱནེ ཝིཔཙྩམཱནཾ ཡེབྷུཡྻེན ཛཝནཱ ནུརཱུཔཾ ཝིཔཙྩཏི. ཏསྨཱ སོལ༹སཀམགྒོ དྭཱདསཀམགྒོ ཨཧེཏུ ཀཊྛཀནྟི ཨེཝཾཨེཀེཀསྶ ཀམྨསྶ ཝིཔཱཀཔྤབྷེདོ པཝཏྟོཏིཏཾ པབྷེདཾདསྶེཏུཾ ཏཏྠཱཔཱིཏིཨཱདིམཱཧ.

ཀུསལཾ དུཝིདྷཾ སམྤཛཱནཀཏཾ ཨསམྤཛཱནཀཏནྟི. ཏཏྠ ཀམྨཱ ཡཱུཧནཀཱལེ ཨནྟམསོ ཧེཊྛཱ ཝུཏྟཾ དིཊྛུཛུཀམྨཉཱཎཾཔི སུཊྛུ ཡོཛེཏྭཱ ཀཏཾ སམྤཛཱནཀཏཾནཱམ. ཡཐཱཧ-ཀམྨཉྩ ཀམྨཕལཉྩ སདྡཧིཏྭཱ ཀཏཾ སམྤཛཱནཀཏཾ ནཱམཱཏི. དིཊྛུཛུཀམྨཉཱཎ མཏྟཾཔི ཨཡོཛེཏྭཱ ཏཾ ཨསམྤཛཱནཀཏཾ ནཱམ. ཡཐཱཧ-ཀམྨཾཔི ཀམྨཕལམྤི ཨཛཱནིཏྭཱ ཀཏཾ ཨསམྤཛཱནཀཏཾ ནཱམཱཏི. ཏཏྠ སམྤཛཱནཀཏཾ ཏིཧེཏུཀཾ ཧོཏི. ཨསམྤཛཱནཀཏཾ དུཧེཏུཀཾ. ཡཐཱཧ-སམྤཛཱནཀརཎཾ པན ཙཏུཉཱཎསམྤཡུཏྟེཧི ཧོཏི. ཨསམྤཛཱན ཀརཎཾ ཙཏཱུཧི ཉཱཎཝིཔྤཡུཏྟེཧཱིཏི. ཏཏྠ ཨེཀམེཀཾ ཨུཀྐཊྛཾ ཨོམཀནྟི དུཝིདྷཾ ཧོཏི. ཏཏྠ ཀུསལསམཡེ པརིཡུཊྛིཏེ ནཱིཝརཎདྷམྨེཝཱ ཨཏྟུཀྐཾསན པརཝམྦྷནཱདིཀེ པཱཔདྷམྨེཝཱ སུཊྛུ སོདྷེཏྭཱ ཀཏཾ ཨུཀྐཊྛཾ ནཱམ. ཨསོདྷེཏྭཱ ཀཏཾ ཏེཧིཝོཀིཎྞཾ ཨོམཀཾནཱམ. ཨཔིཙ, ཡཾ ཀཏྭཱ པཙྪཱ ལཱབྷཱ ཝཏ མེ. ནཙ ཝཏ མེ ཨལཱབྷཱ. སུལདྡྷཾ ཝཏ མེ. ནཙ ཝཏ མེ དུལླདྡྷཾ. ཡསྶ མེ ཨཱིདིསཾ པུཉྙཾ པསུཏནྟི ཨེཝཾ པུནཔྤུནཾ ཨནུམོདིཏཾ. ཏཾ ཨུཀྐཊྛཾ. ཡཾ ཀཏྭཱ པཙྪཱ ཡེནཀེནཙི ཀཱརཎེན དུཊྛུཀཏཾ མཡཱཏི ཝིཔྤཊིསཱརོ ཨུཔྤཛྫཏི. ཏཾཨོམཀཾ. ཨེཝཾ ཙཏུབྦིདྷསྶ ཀམྨསྶ ཝསེན ཙཏུབྦིདྷཾ ཝིཔཱཀ ཀོཊྛཱསཾ ཝིབྷཛིཏྭཱ དསྶེཏུཾ ཏཐཱཔཱིཏིཨཱདི མཱཧ. ཏཏྠཱཔཱིཏི ¶ ཏསྨིཾ ཀཱམཱཝཙརཀུསལེཔི. ཏིཧེཏུཀམུཀྐཊྛནྟི ཨུཀྐཊྛབྷཱུཏཾ པཎཱིཏབྷཱུཏཾ ཙཏུབྦིདྷཾ ཏིཧེཏུཀཾ. ཏིཧེཏུཀཔཊིསནྡྷིནྟི ཙཏུབྦིདྷཾ ཏིཧེཏུཀ པཊིསནྡྷིཝིཔཱཀཾ. ཨེཏྠཙ ཨེཀཙེཏནཱ ཨེཀམེཝ པཊིསནྡྷིཾ དེཏི. པཝཏྟིཝིཔཱཀཾ པན ཨསངྑྱེཡྻེསུཔི བྷཝེསུ དེཏིཡེཝ. ཨེཏྠ སིཡཱ –

ཨེཀཔུཔྥཾ ཡཛིཏྭཱན, སཧསྶཀཔྤཀོཊིཡོ;

དེཝེསུཙ མནུསྶེསུ, སེསེན པརིནིབྦུཏོཏི ཧི ཝུཏྟཾ.

ཏསྨཱ ཨེཀཱ ཙེཏནཱ ཨེཀམེཝ པཊིསནྡྷིཾ དེཏཱིཏི ཨིདཾ ན ཡུཛྫཏཱིཏི. ན ན ཡུཛྫཏི. པུབྦཱཔརཙེཏནཱཧི སདྡྷིཾ སཧསྶཀཔྤ ཀོཊི པརིམཱཎསྶ ཝཏྟབྦཏྟཱ. ཙིཏྟཉྷིནཱམ ཨེཀཙྪརཀྑཎེཔི ཨནེཀསཏ སཧསྶ ཀོཊིསངྑཾ ཨུཔྤཛྫཏི. ཏཏོཙིརཏརེཀཱལེཝཏྟབྦམེཝ ནཏྠཱིཏི. སཧསྶ ཀཔྤཀོཊིཡོཏི ཙ སཧསྶཨཱཡུཀཔྤཀོཊིཡོ སཧསྶ ཨཏྟབྷཱཝཀོཊིཡོཏི ནེཏྟིཨཊྛཀཐཱཡཾ ཝུཏྟཾ. པུབྦཱཔརཙེཏནཱནཉྩ པཊིསནྡྷིདཱནབྷཱཝོ ཀོསལསཾཡུཏྟཀེན དཱིཔེཏབྦོ. ཨེཀཔིཎྜཔཱཏདཱནསྨིཾཧི ཨེཀཱཙེཏནཱདྭེ པཊིསནྡྷིཡོ ན དེཏི. པུབྦཔཙྪིམཙེཏནཱཝསེན སཏྟཀྑཏྟུཾ སགྒེ སཏྟཀྑཏྟུཾ སེཊྛིཀུལེ ནིབྦཏྟོཏི ཧི སཾཡུཏྟཊྛཀཐཱཡཾ ཝུཏྟཾ. ཏིཧེཏུ ཀཾཔི ཀམྨཾ པཊིཔཀྑེཧི ཨབྷིབྷུཡྻམཱནཾ ཝིཧཏསཱམཏྠིཡཾ ཧུཏྭཱ ཏིཧེཏུཀཝིཔཱཀཾ ཛནེཏུཾ ན སཀྐོཏི. ནཙ ཏཾ ཨཏིདུབྦལཾཔི སམཱནཾ ཀོསལླསངྑཱཏེན ཉཱཎེན ཡུཏྟཏྟཱ ཨཏིབྱཱམུལ༹ྷཔཙྩཡ བྷཱུཧཾ ཛཙྩནྡྷཱདིཝིཔཏྟིསཧིཏཾ ཨཧེཏུཀཝིཔཱཀཾ ཛནེཏཱིཏི ཝུཏྟཾ ཏིཧེཏུཀམོམཀནྟིཨཱདི. དྭཱདསཝིཔཱཀཱནིཝིཔཙྩཏི. ཨཡཾ དྭཱད སཀམགྒོནཱམ ཨཧེཏུཀཝིཔཱཀཱནེཝ ཝིཔཙྩཏི. ཨིདཾ ཨཧེཏུ ཀཊྛཀཾནཱམ. ཨེཝཾ ཏིཔིཊཀཙཱུལ༹ནཱགཏྠེརཝཱདཝསེན ཝིཔཱཀཔྤཝཏྟིཾ དསྶེཏྭཱ ཨིདཱནི མོརཝཱཔིཝཱསི མཧཱདཏྟཏྠེརཝཱདཾ དསྶེཏུཾ གཱཐམཱཧ. སོ ཧི ཐེརོཝིཔཱཀཱནཾ ཨསངྑཱརིཀཏཱ སསངྑཱརིཀཏཱཙ ཀམྨཝསེནེཝ སིདྡྷཱཔི ཀཏྭཱ ཨསངྑཱརཾ ཀམྨཾ སསངྑཱརཝིཔཱཀཱནི ན པཙྩཏི. སསངྑཱརཾཀམྨཾ ཨསངྑཱརཝིཔཱཀཱནི ནཝཙྩཏཱིཏི ཝདཏི.

ཡཐཱ ¶ མུཁནིམིཏྟཾ ནཱམ མུཁེ སནྣིསིནྣེ སནྣིསཱིདཏི. ཙལནྟེ ཙལཏི. ཨེཝཾ པཡོགེན ཨསཱདྷནཱིཡཱནཾ ཝིཔཱཀཱནཾ ཏིཀྑམནྡཏཱ ཝིསེསབྷཱུཏོ སངྑཱརབྷེདོ ཀམྨཝསེནེཝ ཝཏྟབྦོ. ན པཡོགཝསེན. ཨིཏརཐཱ ཀམྨཝིསེསེན ཏིཀྑམནྡཛཱཏཱནཾ ཏེསཾ སནྣིཧིཏཔཙྩཡམཏྟེན མནྡཏིཀྑཏཱཔཏྟིནཱམ སིཡཱཏི. ཨཧེཏུ ཀཝིཔཱཀཱནཾ པན པརིདུབྦལཏྟཱ ཨཔརིབྱཏྟོཝ ཏིཀྑམནྡཏཱ ཝིསེསོཏི ཨུབྷཡཀམྨནིབྦཏྟནྟི ཨདྷིཔྤཱཡོ. ཡསྨཱ པན ཏེསཾ སསངྑཱརཱསངྑཱརབྷཱཝོ པཊིསནྡྷིཝསེནཝཱ ཏདཱརམྨཎཝསེནཝཱ ཨུཔྤཏྟིཀཱལེ པུབྦཔཡོགསངྑཱཏསྶ པཙྩཡཝིསེསསྶ བྷཱཝཱབྷཱཝེན ཝཏྟུཾ ཡུཏྟོ. ན ཀམྨཱགམནཝསེན, ན ཧི ཀམྨབྷཝེ སངྑཱརོ བྷཝནྟརེ ཝིཔཱཀཱནི ཝིསེསེཏུཾ ཡུཏྟོ. ཏསྨཱ ཨིམཾ ཝཱདཾ ཀེཙིཝཱདཾནཱམ ཀརོནྟོ ཀེཙནཱཏི ཨཱཧ.

ཨིམསྨིཾ ཀེཙིཝཱདེ ཨསངྑཱརིཀཀམྨེ སསངྑཱརིཀ ཝིཔཱཀཱནི སསངྑཱརིཀཀམྨེཙ ཨསངྑཱརིཀཝིཔཱཀཱནི ཝཛྫེཏྭཱ ཙཏཱུསུ ཏིཧེ ཏུཀུཀྐཊྛེསུ ཀམྨེསུ ཨསངྑཱརིཀདྭཡེ ཝིཔཱཀཱནི པཊིསནྡྷིཡཾ དྭེ, པཝཏྟིཡཾ དྭཱདས. སསངྑཱརིཀདྭཡེ པཊིསནྡྷིཡཾ དྭེ, པཝཏྟིཡཾ དྭཱདས. ཙཏཱུསུ དྭིཧེཏུཀོམཀཀམྨེསུ ཨསངྑཱརིཀདྭཡེ པཊིསནྡྷིཡཾ དྭེ, པཝཏྟིཡཾ དས. སསངྑཱརིཀདྭཡེ པཊིསནྡྷིཡཾ དྭེ, པཝཏྟིཡཾ དས. ཏཐཱ ཙཏཱུསུ དྭིཧེཏུཀུཀྐཊྛེསུ. ཙཏཱུསུ དྭིཧེཏུཀོམཀེསུ པན པཊིསནྡྷིཡཾ ཨེཀཾ ཨཧེཏུཀཾ པཝཏྟིཡཾ ཨཊྛཨཧེཏུཀཱནཱིཏི ཨེཝཾ ཝིཔཱཀཱནཾ དྭེ དྭཱདསཀམགྒཱ ཙཏྟཱརོ དསཀམགྒཱ ཨེཀཾ ཨཧེཏུཀཊྛཀཉྩ ཧོནྟི, ཏཾསབྦཾ སངྒཧེཏྭཱ དསྶེཏུཾ ཏེསནྟི གཱཐམཱཧ.

ཏེསནྟི ཏེསཾ ཀེསཉྩི ཐེརཱནཾ ཝཱདེ. ཨཊྛསཱལིནིཡཾ པན ཏིཧེཏུཀེན ཀམྨེན པཊིསནྡྷིཏིཧེཏུཀཱཝ ཧོཏི. ན དུཧེཏུཀཱ ནཙཨཧེཏུཀཱ. དུཧེཏུཀེན ཀམྨེན པཊིསནྡྷི དུཧེཏུཀཱཔི ཧོཏི ཨཧེཏུཀཱཔི. ཏིཧེཏུཀཱ པན ནཧོཏཱིཏི ཨེཝཾ པཝཏྟོ མཧཱདྷམྨརཀྑིཏཏྠེརཝཱདོཔི ཨཱགཏོ. ཏཏྠ ཡཐཱ དུཧེཏུཀེན ཧཱིནེན ཀམྨེན ཨཧེཏུཀཱ པཊིསནྡྷི ཨཝསྶཾ ཨིཙྪིཏབྦཱ ཧོཏི. ཏཐཱ ཏིཧེཏུཀེནཔི ཧཱིནེན ཀམྨེན དུཧེཏུཀཱཔི ¶ པཊིསནྡྷི ཨཝསྶཾ ཨིཙྪིཏབྦཱཡེཝཱཏི ཀཏྭཱ ཨིདྷ ཨཡཾཝཱདོ ཐེརེན ན གཧིཏོཏི ཝེདིཏབྦོ. པཊིསམྦྷིདཱམགྒེ པན-གཏིསམྤཏྟིཡཱ ཉཱཎསམྤཡུཏྟེ ཨཊྛནྣཾ ཧེཏཱུནཾ པཙྩཡཱ ཨུཔཔཏྟི ཧོཏི. ཀུསལསྶ ཀམྨསྶ ཛཝནཀྑཎེ ཏཡོ ཧེཏཱུ ཀུསལཱ. ནིཀནྟིཀྑཎེ དྭེ ཧེཏཱུ ཀུསལཱ. པཊིསནྡྷིཀྑཎེ ཏཡོ ཧེཏཱུ ཨབྱཱཀཏཱཏིཙ གཏི སམྤཏྟིཡཱ ཉཱཎ ཝིཔྤཡུཏྟེ ཚནྣཾ ཧེཏཱུནཾ པཙྩཡཱ ཨུཔཔཏྟི ཧོཧི. ཀུསལསྶ ཀམྨསྶ ཛཝནཀྑཎེ དྭེ ཧེཏཱུ ཀུསལཱ. ནིཀནྟིཀྑཎེ དྭེ ཧེཏཱུ ཨཀུསལཱ. པཊིསནྡྷིཀྑཎེ དྭེ ཧེཏཱུ ཨབྱཱཀཏཱཏིཙ ཨེཝཾ ཏིཧེཏུཀེན ཀམྨེན པཊིསནྡྷི ཏིཧེཏུཀཱཝ ཝུཏྟཱ. དྭིཧེཏུཀེན ཀམྨེན དྭིཧེཏུཀཱཝ. ན པན གཏིསམྤཏྟིཡཱ ཉཱཎཝིཔྤཡུཏྟེ སཏྟནྣཾ ཧེཏཱུནཾ པཙྩཡཱཏིཨཱདིནཱ ཏིཧེཏུཀེན ཀམྨེན དྭིཧེཏུཀཱ པཊིསནྡྷི ཝུཏྟཱ. ནཙ ཙཏུནྣཾ ཧེཏཱུནཾ པཙྩཡཱཏིཨཱདིནཱ དྭིཧེཏུཀེན ཀམྨེན ཨཧེཏུཀཱ པཊིསནྡྷཱིཏི.

ཏཏྠ པན ཏཱིསུ ཁཎེསུ སཧཛཱཏ ཧེཏཱུནཾ ཝསེན ཧེཏུ མཱུལཀོཝ ཨཡཾ དེསནཱཝཱརོཏི ཀཏྭཱ ཨནོཀཱསཏཱཡ ཨཧེཏུཀཔཊིསནྡྷི ཏཏྠ ནཝུཏྟཱ. ན པན ཨལབྦྷམཱནཏཱཡ. དྭིཧེཏུཀ པཊིསནྡྷི པན ཨནོཀཱསཱཡེཝ ནཧོཏི. ཨལབྦྷ མཱནཏྟཱཡེཝ སཱ ནཝུཏྟཱཏི སཀྐཱ ཝིཉྙཱཏུཾ. ཏསྨཱ ཡུཏྟིཏོ པཱལི༹ཡེཝ བལཝཏརཱཏི ཀཏྭཱ མཧཱདྷམྨརཀྑིཏཏྠེརཝཱདོཝ པཱལི༹ཡཱ སམེཏཱིཏི པཊིསམྦྷིདཱམགྒཊྛཀཐཱཡཾ ཝུཏྟོ. ཊཱིཀཱཀཱརཱ པན ཀམྨསརིཀྑཀ ཝིཔཱཀདསྶནཏྠཾ སཱཝསེས པཱཋོཝ མཧཱཐེརེན ཝུཏྟོཏི ཨིཙྪནྟི. ཨེཝཉྩ ཀཏྭཱ ཨཊྛསཱལིནིཡཾཔི ཏིཔིཊཀཙཱུལ༹ནཱགཏྠེརཝཱདོཝ པམཱཎཾ ཀཏྭཱ ཝུཏྟོཏི.

ཝིབྷཱཝནིཡཾ ཨིདཱནི ཨེཀཱཡ ཙེཏནཱཡ དྭཱདསཝིཔཱཀཱནི ཨེཏྠེཝ དསཀམགྒོཔི ཨཧེཏུཀཊྛཀམྤིཏི ཨཱགཏསྶ མོརཝཱཔིཝཱསི མཧཱདྷམྨརཀྑིཏཏྠེརསྶཱཏི པཱཋོ.

མོརཝཱཔིཝཱསིམཧཱདཏྟཏྠེརསྶཱཏི པན ཝཏྟབྦོ. མཧཱདྷམྨ རཀྑིཏཏྠེརཝཱདོཔི པན ཨེཏྠ ཨེཀདེསེན སངྒཧིཏོཡེཝ. ཏསྨིཾཔི ཧི ཨསངྑཱརིཀཾ ཀམྨཾ ཨསངྑཱརིཀཝིཔཱཀམེཝ དེཏི. ནོ སསངྑཱརིཀཾ ¶ . སསངྑཱརིཀཾ ཀམྨཾ སསངྑཱརིཀཝིཔཱཀམེཝ དེཏི. ནོ ཨསངྑཱརིཀནྟི ཨཱགཏམེཝཱཏི. [ཀཱམཱཝཙརཀམྨཾ]

༡༥༤. རཱུཔཱཝཙརཀམྨེ པརིཏྟནྟི དུཝིདྷཾ པརིཏྟཾ ཨཔགུཎཏཱ ཡཝཱ ཧཱིནཏཱཡཝཱ. ཏཏྠ ཡཾ པཎཱིཏེཧི ཚནྡཱདཱིཧི ཡུཏྟཾཔི ཨབྷཱཝིཏཾ ཧོཏི པཊིལདྡྷམཏྟཾ, ཏཾ ཨཔགུཎཏཱཡ པརིཏྟཾནཱམ. ཡཾ སནྡྷཱཡ ཡཾ ཨཔགུཎཾ ཧོཏི, ཨུཔརི ཛྷཱནསྶ པཙྩཡོ བྷཝིཏུཾ ན སཀྐོཏི, ཨིདཾ པརིཏྟཾནཱམཱཏི ཨཊྛསཱལིནིཡཾ ཝུཏྟཾ. ཡཾ པན སུབྷཱཝིཏཾཔི སམཱནཾ ཧཱིནེཧི ཚནྡཱདཱིཧི ཡུཏྟཾ ཧོཏི. ཏཾ ཧཱིནཏཱཡ པརིཏྟཾནཱམ. ཡཾ སནྡྷཱཡ ཡསྶ ཨཱཡཱུཧནཀྑཎེ ཚནྡོཝཱ ཧཱིནོ ཧོཏི. ཝཱིརིཡཾཝཱ, ཙིཏྟཾཝཱ, ཝཱིམཾསཱཝཱ, ཏཾ ཧཱིནཾནཱམཱཏི ཏཏྠེཝ ཝུཏྟཾ. མཛ྄ཛྷིམཾཔི དུཝིདྷཾ. ཏཏྠ ནཱཏིཔགུཎ ཏཱཡ མཛ྄ཛྷིམཾ སནྡྷཱཡ ནཱཏིསུབྷཱཝིཏོ མཛ྄ཛྷིམོཏི ཝིསུདྡྷིམགྒེ ཝུཏྟཾ. མཛ྄ཛྷིམེཧི ཚནྡཱདཱིཧི ཡུཏྟཏཱཡ མཛ྄ཛྷིམཾ སནྡྷཱཡ ཡསྶ ཨཱཡཱུཧནཀྑཎེ ཏེ དྷམྨཱ མཛ྄ཛྷིམཱ ཧོནྟི. ཏཾ མཛ྄ཛྷིམནྟི ཨཊྛ སཱལིནིཡཾ ཝུཏྟཾ. པཎཱིཏཾཔི དུཝིདྷཾ. ཏཏྠ ཨཏིཔགུཎཏཱཡ པཎཱིཏཾ སནྡྷཱཡ སུབྷཱཝིཏོ ཝསིཔྤཏྟོ པཎཱིཏོཏི ཝིསུདྡྷིམགྒེ ཝུཏྟཾ. པཎཱིཏེཧི པན ཚནྡཱདཱིཧི ཡུཏྟཏཱཡ པཎཱིཏཾ སནྡྷཱཡ ཡསྶ ཨཱཡཱུཧནཀྑཎེ ཏེ དྷམྨཱ པཎཱིཏཱ ཧོནྟི. ཏཾ པཎཱིཏནྟི ཨཊྛསཱལིནིཡཾ ཝུཏྟཾ. ཏཏྠ ཡཱནི ཨཔགུཎཏཱདི ཝསེན པརིཏྟཱདཱིནི ཝུཏྟཱནི, ཏཱནི ཨིདྷ ནཱདྷིཔྤེཏཱནི. ཡཱནི པན ཧཱིནཱདཱིཧི ཚནྡཱདཱིཧི ཡུཏྟཏཱཡ པརིཏྟཱདཱིནི ཝུཏྟཱནི, ཏཱནེཝ ཨིདྷཱདྷིཔྤེཏཱནི. ཨིམཱནེཝ ཧི ཏིཝིདྷཱསུ བྷཱུམཱིསུ ཏིཝིདྷཾ བྲཧྨུཔཔཏྟིབྷེདཾ སཱདྷེནྟཱིཏི. ཨིཏྠཱིནཾ ཛྷཱནེསུ ཝསཱིཔཏྟཱནཾཔི ཚནྡཱདཱིནཾ ཨཔཎཱིཏཏཱཡ མཧཱབྲཧྨེསུ ཨནུཔྤཛྫནཉྩེཏྠ སཱདྷཀཾ. ཏེནེཝཙ ཨཊྛཀཐཱཡཾ ཚནྡཱདིཝསེན སིདྡྷཱནི ཧཱིན མཛ྄ཛྷིམ པཎཱིཏཱནི ཨཊྛཱརསཔབྷེདེན ཝིབྷཛིཏྭཱ ཨིམཱནི ཨཊྛཱརས ཀམྨདྭཱརཱནི ནཱམ ཨིམེཧི པབྷཱཝིཏཏྟཱ ཨིམེསཾ ཝསེན ཨཊྛཱརསཁཏྟིཡཱ ཨཊྛཱརས བྲཱཧྨཎཱ ཨཊྛཱརས ཝེསྶཱ ཨཊྛཱརས སུདྡཱ ཨཊྛཙཏྟཱ ལཱིས གོཏྟ ཙརཎཱནི ཝེདིཏབྦཱནཱིཏི ཝུཏྟཾ. ཨེཏེན ཧི དེཝཱནཾཔི བྲཧྨཱུནཾཔི ལབྦྷམཱནཾ ཨུཔཔཏྟིབྷེདཾ ཨུཔལཀྑེཏཱིཏི.

[༡༦༡] ཝིབྷཱཝནིཡཾ པན

‘‘པཊིལདྡྷམཏྟཾ ¶ ཨནཱསེཝིཏཾ པརིཏྟནྟི ཨཝིསེསཏོཝ ཨཊྛཀཐཱཡཾ ཝུཏྟཾ. ཏཐཱ ནཱཏི སུབྷཱཝིཏཾ ཨམརིཔུཎྞཝསཱིབྷཱཝཾ མཛ྄ཛྷིམཾ. ཨཏིཝིཡསུབྷཱཝིཏཾ པན སབྦསོ པརིཔུཎྞ ཝསཱིབྷཱཝཾ པཎཱིཏ’’ནྟི ཝུཏྟཾ. ཏཾ སབྦཾ ཨིདྷ ནཡུཛྫཏིཡེཝ.

ཏཉྷི ཨུཔརི ཛྷཱནསྶ པཙྩཡོ བྷཝིཏུཾ སམཏྠཱསམཏྠཾཝཱ ཧཱན བྷཱགིཡཏཱདི ཝིསེསཾ ཝཱ སནྡྷཱཡ ཝུཏྟཾ. ན པན ཨུཔཔཏྟི བྷེདཛནཀ ཝིསེསནྟི.

[༡༦༢] ཡཉྩ ཏཏྠ

‘‘ཨཱཙརིཡེན པནེཏྠ པརིཏྟཾཔི ཨཱིསཀཾ ལདྡྷཱསེཝནམེཝ ཨདྷིཔྤེཏནྟི དིསྶཏི. ཏཐཱ ཧཱནེན ནཱམརཱུཔཔརིཙྪེདེ-

སམཱནཱསེཝནེ ལདྡྷེ, ཝིཛྫམཱནེ མཧབྦལེ;

ཨལདྡྷཱ ཏཱདིསཾ ཧེཏུ, མབྷིཉྙཱ ན ཝིཔཙྩཏཱིཏི.

སམཱནབྷཱུམིཀཏོཝ ཨཱསེཝན ལཱབྷེན བལཝ བྷཱཝཏོ མཧགྒཏདྷམྨཱནཾ ཝིཔཱཀདཱནཾ ཝཏྭཱ ཏདབྷཱཝཏོ ཨབྷིཉྙཱཡ ཨཝིཔཙྩནཾ ཝུཏྟ’’ནྟི ཝུཏྟཾ. ཏཾཔི ཝིཙཱརེཏབྦམེཝ.

ཡཐཱ ཧི ཨརིཡམགྒཙེཏནཱ ཨཏྟནཱ སམཱནབྷཱུམཀཛཝནཏོ ཨལདྡྷཱསེཝནཱཔི སམཱནཱ ཝིཔཱཀཾ ན དེཏཱིཏི ནཏྠི. ཏཐཱ ཨཱདི ཀམྨིཀཝཱིཐིཡཾ ཨེཀཝཱརམཏྟབྷཱུཏཱ སབྦསམཱཔཏྟི ཝཱིཐཱིསུཙ སབྦཔཐ མབྷཱུཏཱ མཧགྒཏཙེཏནཱཔི སམཱནབྷཱུམཀདྷམྨཏོ ཨལདྡྷཱསེཝན ཏཱཡ དུབྦལཏྟཱ ཝིཔཱཀཾ ནདེཏཱིཏི ནཏྠཱིཏི ན ན སཀྐཱ ཝིཉྙཱཏུནྟི. ཨེཏྠ སིཡཱ- ཏསྶེཝ རཱུཔཱཝཙརསྶ ཀུསལསྶ ཀམྨསྶ ཀཏཏྟཱ ཨུཔཙིཏཏྟཱ ཝིཔཱཀཾ.ལ. པཐམཾ ཛྷཱནཾ ཨུཔསམྤཛྫ ཝིཧརཏཱིཏི ཝུཏྟཾ. ན ཙ སཱ ཙེཏནཱ ཨུཔཙིཏཱནཱམ ཧོཏི. སམཱནབྷཱུམཀ དྷམྨཏོ ཨལདྡྷཱསེཝནཏྟཱཏི.ན. མགྒཙེཏནཱཡཔི ཨཝིཔཱཀཏཱཔཏྟིཏོ. སཱཔིཧི ཏསྶེཝ ལོཀུཏྟརསྶ ཀུསལསྶ ཛྷཱནསྶ ཀཏཏྟཱ བྷཱཝིཏཏྟཱ ཝིཔཱཀཾ. ལ. པཐམཾ ཛྷཱནཾ ཨུཔསམྤཛྫ ཝིཧརཏཱིཏི ཝུཏྟཱ. ནཙ སཱཔི སམཱནབྷཱུམཀདྷམྨཏོ ལདྡྷཱསེཝནཱ ཧོཏཱིཏི. ཨུབྷཡཏྠ ¶ པན པཐམསམནྣཱཧཱརཏོ པཊྛཱཡ ཨུཔཙིནིཏྭཱ བྷཱཝེཏྭཱ ཨཱགཏཏྟཱ ཨསམཱནབྷཱུམིཀ ཛཝནེཧིཔི ལདྡྷཱསེཝན བྷཱཝཾ པཊིཙྩ ཨུཔཙིཏཏཱ བྷཱཝིཏཏཱཙ ཝུཏྟཱཏི སཀྐཱ ཝཏྟུནྟི. ཏསྨཱ ཨཱདི ཀམྨིཀབྷཱུཏཱཔི མཧགྒཏཙེཏནཱ མརཎཱ སནྣེ ལདྡྷཱ ཨབྦྷུཎྷཱ ཨཱསནྣཀམྨབྷཱུཏཱ ཝིཔཱཀཾ ནདེཏཱིཏི ན ཝཏྟབྦཱ. ཨབྷིཉྙཱཙེཏནཱ ཙ སམཱནབྷཱུམཀེཧིཔི ནཱནཱཝཛྫནཝཱིཐིཛཝནེཧི སུཊྛུཏརཾ ལདྡྷཱསེཝནཏྟཱ ཏིཀྑཏརབྷཱུཏཱ ཀཐཾ དུབྦལཱནཱམ སིཡཱ. ཏེནེཝ ཨཡཾ ཝཱདོ ཨནུཊཱིཀཱཡཾ པཊིཀྑིཏྟོ. ཝུཏྟཉྷི ཏཏྠ ཀེཙི པན སམཱན བྷཱུམཀཏོ ཨཱསེཝནལཱབྷེན བལཝནྟཱནི ཛྷཱནཱནཱིཏི ཏཱནི ཝིཔཱཀཾ དེནྟི. ཨབྷིཉྙཱ པན སཏིཔི ཛྷཱནབྷཱཝེ ཏདབྷཱཝཏོ ཏསྨིཾ ཏསྨིཾ ཨཱརམྨཎེ ཨཱགནྟུཀཏྟཱཝཱ དུབྦལཱ. ཏསྨཱ ཝིཔཱཀཾ ན དེནྟཱིཏི ཝདནྟི. ཏཾ ཨཀཱརཎཾ. པུནཔྤུནཾ པརིཀམྨཝསེན ཨབྷིཉྙཱ ཡཔི ཝསཱིབྷཱཝསམྦྷཝཏོཏི. ཙཏུཏྠཛ྄ཛྷཱནསམཱདྷིསྶ པན ཨཱནིསཾསབྷཱུཏཱ ཨབྷིཉྙཱཙེཏནཱ ཏསྶ ཕལསདིསཱ ཕལཊྛཱནེ ཋིཏཱ, ཏསྨཱ སཱ ཝིཔཱཀཾ ནདེཏཱིཏི ཨིཙྪནྟི ཊཱིཀཱཀཱརཱ. ཏསྶ པན ཨིདྡྷི ཝིཀུབྦནཱདིཀིཙྩཾ ཝིཔཙྩནཀིཙྩཏོཔི མཧནྟཏརཾ ཧོཏི. སབྦཐཱ མེནཙ ཝིཀུབྦནཱདིཀིཙྩཾ སཱདྷེནྟིཡཱ ཝིཔཙྩནཐཱམེཔི ཏེན ཐཱམེན སཧ པརིཀྑཡཾ གཙྪཏི. ཏསྨཱ སཱ པུན ཝིཔཱཀཾ ནདེཏཱིཏིཔི ཡུཛྫཏིཡེཝ. པཉྩམཛ྄ཛྷཱནནྟི ཨབྷིཉྙཱབྷཱཝཾ ཨཔཏྟཾ པརིཏྟཱདིབྷེདེན ཏིཝིདྷཾ པཉྩམཛ྄ཛྷཱནཾ. ཏདེཝཱཏི པཉྩམཛྷཱནམེཝ. སཉྙཱཝིརཱགཾ བྷཱཝེཏྭཱཏི ཙིཏྟེ སཏི རཛྫན དུསྶན མུཡ྄ཧནཱནི ཧོནྟི. ཏསྨིཾ ཨསཏི དིཊྛདྷམྨནིབྦཱནཔྤཏྟོནཱམ ཧོཏཱིཏི ཨེཝཾ ཙིཏྟེ ཨེཝ ཨཱདཱིནཝཾ དིསྭཱ ཨཙིཏྟཀབྷཝཔཏྠནཱ སཧིཏཾ ཝཱཡོཀསིཎེཝཱ ཀེསཉྩི མཏེན པརིཙྪིནྣཱཀཱས ཀསིཎེཝཱ སཉྙཱཝིརཱགཾ བྷཱཝེཏྭཱ. ཨསཉྙསཏྟེསུ ཨུཔྤཛྫནྟཱིཏི ཡེན ཡེན ཨིརིཡཱཔཐེན ཨིདྷ མརནྟི, ཏེནེཝ ཏཏྠ ཨུཔྤཛྫནྟི. ཀམྨཀིརིཡཝཱདིཏིཏྠིཡཱ ཨེཝཱཏི ཨདྷིཔྤཱཡོ. ན ཧི ཨཀམྨཀིརིཡཝཱདཱིནཾ ཛྷཱནབྷཱཝནཱ ནཱམ ཨཏྠཱིཏི. ཨནཱགཱམིནོ པན སུདྡྷཱཝཱསེསུ ཨུཔྤཛྫནྟཱིཏི སུདྡྷཱཝཱསེསུ པན ཨནཱགཱམིནོ ཨེཝ ཨུཔྤཛྫནྟི. ན ཨཉྙེ སཀདཱགཱམིཨཱདཡོཏི ཨཏྠོ. ཨེཏེན ཨནཱགཱམཱིནཾ ཨཉྙསྨིཾཔི བྲཧྨལོཀེ ཨུཔྤཏྟི ཨཔྤཊིསིདྡྷཱ ¶ ཧོཏི. ཨནཱགཱམཱིསུཙ སདྡྷཱདྷིཀོ ཨཝིཧེསུ ཨུཔྤཛྫཏི, ཝཱིརིཡཱདྷིཀོ ཨཏཔྤེསུ. སཏཱདྷིཀོ སུདསྶེསུ. སམཱདྷཱདྷིཀོ སུདསྶཱིསུ. པཉྙཱདྷིཀོ ཨཀནིཊྛེསཱུཏི. ཡཐཱཀྐམཾ བྷཱཝེཏྭཱ ཡཐཱཀྐམཾ ཨརཱུཔེསུ ཨུཔྤཛྫནྟཱིཏི ཡོཛནཱ. ཨེཏྠཙ པཐམཛ྄ཛྷཱནཾ པརིཏྟཾ བྷཱཝེཏྭཱཏིཨཱདི སབྦཾ པཐམཛ྄ཛྷཱནཱདཱིནཾ ཡཐཱ སཀཾ ཝིཔཙྩནབྷཱུམི ཝཝཏྠཱནཝསེན ཝུཏྟཾ. སམཱཔཏྟིལཱབྷིནོ པན པུཐུཛྫན སོཏཱཔནྣ སཀདཱགཱམིནོ ཨཏྟནཱ ལདྡྷསམཱཔཏྟཱིནཾ ཝིཔཙྩནབྷཱུམཱིསུ ཨིཙྪིཏབྷཱུམིཡཾ ནིབྦཏྟནྟི. ཏེསུ པུཐུཛྫནོ ནིཀནྟིཡཱ སཏི ཀཱམལོཀེཔི ནིབྦཏྟཏིཡེཝ. ཨིཏརེ པན ཛྷཱནེ ཨཔརི ཧཱིནེ སཏི ཀཱམལོཀེཔི ནིབྦཏྟཏིཡེཝ. ཨིཏརེ པན ཛྷཱནེ ཨཔརིཧཱིནེ སཏི ཀཱམབྷཝེ ནིཀནྟིནཱམ ཏེསཾ ན སམྦྷཝཏཱིཏི པརིཧཱིནཛ྄ཛྷཱནཱཨེཝ ཏཏྠ ནིབྦཏྟནྟི.

[༡༦༣] ཝིབྷཱཝནིཡཾ པན

ཏེསཾཔི སོཏཱཔནྣསཀདཱགཱམཱིནཾ ནིཀནྟིཝསེན ཀཱམབྷཝེནིབྦཏྟིཾ ཨིཙྪནྟེན ‘‘ཏཐཱ ཀཱམབྷཝེཔི ཀཱམཱཝཙར ཀམྨབལེན. ཨིཛ྄ཛྷཏི བྷིཀྑཝེ སཱིལཝཏོ ཙེཏོཔཎིདྷི ཝིསུདྡྷཏྟཱཏི ཧི ཝུཏྟ’’ནྟི ཝུཏྟཾ. ཏཾ ན ཡུཛྫཏི.

ཏེཧི ཛྷཱནེ ཨཔརིཧཱིནེ ཨེཀནྟེན བྲཧྨལོཀགཱམིནོཨེཝ ཧོནྟི. ཡཏོ ཏེ ཛྷཱནཨནཱགཱམིནོནཱམཱཏི ཝུཙྩནྟི. ཛྷཱནཔརི ཧཱནིཙ ཏེསཾ ཏཾཏཾ པལིབོདྷ ཝསེནེཝ ཧོཏི. ན པན ཀཱམ རཱགཱདིཝསེན. ཀསྨཱ, མགྒསཧཱཡེན ཛྷཱནེན སུཊྛུ ཝིཀྑམྦྷིཏཏྟཱ. ཝུཏྟཉྷེཏཾ ཨངྒུཏྟརེ-སཧདསྶནུཔྤཱདཱ བྷིཀྑཝེ ཨརིཡསཱཝཀསྶ ཏཱིཎི སཾཡོཛནཱནི མཧཱིཡནྟི.ལ. སོ ཝིཝིཙྩེཝ.ལ. པཐམཾ ཛྷཱནཾ ཨུཔསམྤཛྫ ཝིཧརཏི. ཏསྨིཾ ཙེ སམཡེ བྷིཀྑཝེ ཨརིཡསཱཝཀོ ཀཱལངྐརེཡྻ. ནཏྠི ཏསྶ སཾཡོཛནཾ. ཡེན སཾཡོཛནེན སཾཡུཏྟོ ཨརིཡསཱཝཀོ པུན ཡིམཾ ལོཀཾ ཨཱགཙྪེཡྻཱཏི. ཨེཏྠཙ ཏསྨིཾ ཙེ སམཡེཏིཨཱདིནཱ སོ ལདྡྷཛ྄ཛྷཱནཾ ཨཔརིཧཱཔེཏྭཱ ཙེ ཀཱལངྐརོཏི. ཨེཀནྟེན བྲཧྨལོཀམེཝ གམིསྶཏི. པརིཧཱཔེནྟསྶ པན ཏཾ སཾཡོཛནཾ པཱཀཏིམེཝཱཏི དསྶེཏི. ¶ པཊིསམྦྷིདཱམགྒཊྛཀཐཱཡཉྩ ཛྷཱནལཱབྷཱིནཾ པན ཨནཱགཱམིསྶཙ བྲཧྨལོཀེཡེཝ པཊིསནྡྷིདཱནཏོ པཙྩཡོ ནཧོཏཱིཏི ཝུཏྟཾ. ཏཏྠ ཛྷཱནལཱབྷཱིནནྟི མཧགྒཏཛ྄ཛྷཱནལཱབྷཱིནཾ སོཏཱཔནྣ སཀདཱགཱམཱིནཾ. པཙྩཡོ ནཧོཏཱིཏི ཏེསཾ ཝིཔསྶནཱནིཀནྟི ཏཎྷཱ ཀཱམསུགཏིཔཊིསནྡྷིཡཱ ན ཧོཏཱིཏི ཨཏྠོ.

ཏསྨཱ ཏེསཾ དྭིནྣཾ སེཁཱནཾ ཀུཔྤདྷམྨཱནཾཔི སཏཾ ཛྷཱནེ ཝིཛྫམཱནེ ཀཱམབྷཝེ ནིཀནྟི ནཱམ ནཏྠཱིཏི ཝེདིཏབྦཾ. ཨནཱགཱམིསྶ པན ནིདྡཱཡནྟསྶེཝ སཏྠེན གཱིཝཾ ཚིནྡིཏྭཱ མཱརཱིཡམཱནསྶཔི ཛྷཱནཾ ཨལབྷིཏྭཱ ཙཝནཾནཱམ ནཏྠི. སོ ཧི སམཱདྷིསྨིཾ པརིཔཱུརཀཱརཱིཏི ཝུཏྟོ. ཨིཏྠིཡོ པན ཨཊྛསམཱཔཏྟིཡོ ལབྷིཏྭཱ ཨནནྟརེ བྷཝེ ཨཀནིཊྛེ ནིབྦཏྟམཱནཱཔི ཨདྷིཔཏིབྷཱུཏེསུ མཧཱབྲཧྨེསུ ན ནིབྦཏྟནྟི. ཧཱིནཛ྄ཛྷཱསཡཏྟཱ པུརོཧིཏ པཱརིསཛྫེསུཨེཝ ནིབྦཏྟནྟི. ཏཐཱཧི ཨཊྛཀཐཱསུ ཡཾ ཨིཏྠཱི བྲཧྨཏྟཾ ཀརེཡྻ, ནེཏཾ ཋཱནཾ ཝིཛྫཏཱིཏི སུཏྟཔདསྶ ཨཏྠཝཙནེ བྲཧྨཏྟནྟི མཧཱབྲཧྨཏྟཾ ཨདྷིཔྤེཏཾ. ཨིཏྠཱི ཙ ཨིདྷ ཛྷཱནཾ བྷཱཝེཏྭཱ ཀཱལཾ ཀཏྭཱ བྲཧྨཔཱརིསཛྫཱནཾ སཧབྱཏཾ ཨུཔཔཛྫཏི, ན མཧཱབྲཧྨཱནནྟི ཝུཏྟཾ. བྲཧྨཔཱརིསཛྫཱནནྟི ཙེཏྠ བྲཧྨཔུརོཧིཏཱནཾཔི སངྒཧཎཾ ཝེདིཏབྦཾ. ཏེ ཧི བྲཧྨཱནཾ པརིསབྷཱུཏཱ ཧོནྟཱིཏི. ཝུཏྟཉྷེཏཾ སཾཡུཏྟཀེ –

ཨཐཁོ བྷིཀྑཝེ སིཁཱིབྷགཝཱ ཨབྷིཏུཾ བྷིཀྑུཾ ཨཱམནྟེསི. པཊིབྷཱཏུ ཏཾ བྲཱཧྨཎ བྲཧྨུནོཙ བྲཧྨཔརིསཱཡཙ བྲཧྨཔཱརིསཛྫཱནཉྩ དྷམྨིཀཐཱཏི.

པརིསབྷཱཝེཙ སཏི པརིསཱསུ ཛཱཏཱཔིནཱམ ཧོནྟཱིཏི. ཏཏྠ བྲཧྨུནོཏི མཧཱབྲཧྨུནོ. བྲཧྨཔརིསཱཡཱཏི བྲཧྨཔུརོཧིཏ གཎསྶཱཏི ཨཏྠོ. ནནུ བྲཧྨཔཱརིསཛྫཱནནྟི ཝུཏྟཏྟཱ ན མཧཱབྲཧྨཱནནྟི ཨེཏྠེཝ ཏེསཾ སངྒཧཎཾ ཡུཏྟནྟི ཙེ. ན. ཡཾ ཨིཏྠཱི སཀྐཏྟཾ ཀརེཡྻ, མཱརཏྟཾ ཀརེཡྻ, བྲཧྨཏྟཾ ཀརེཡྻ, ནེཏཾཋཱནཾ ཝིཛྫཏཱིཏི ཨེཝཾ ཨདྷིཔཏི བྷཱུཏེཧི སཀྐཱདཱིཧི སཧ ཝུཏྟཏྟཱ ཨིདྷ ཨདྷིཔཏིཔཊིཀྑིཔནསྶེཝ སམྦྷཝཏོ. ཏེནེཝ ཧི ནེཏྟིཡཾ-ཨིཏྠཱི མཧཱབྲཧྨཱ སིཡཱཏི, ནེཏཾ ཋཱནཾ ཝིཛྫཏཱིཏི ཝུཏྟཾ. ཨེཏྟཱཝཏཱ ཝེཧཔྥལཱདཱིསུ ¶ ཨུཔརིབྲཧྨལོཀེསུཔི པུརོཧིཏཔཱརིསཛྫབྲཧྨཱནཾ ཨཏྠིཏཱ སིདྡྷཱ ཧོཏི. ཏེནེཝ སཾཡུཏྟཊྛཀཐཱཡཾ ཐེརཱནཉྷི བྷཎྜགཱཧཀདཧརཱ ཝིཡ བྲཧྨཱནཾཔི པཱརིསཛྫབྲཧྨཱནོ ནཱམ ཧོནྟཱིཏི ཝུཏྟཾ.

ཝིབྷཱཝནིཡཾ པན

‘‘ཨིཏྠིཡོཔི པན ཨརིཡཱཝཱ ཨནརིཡཱཝཱ ཨཊྛསམཱཔཏྟིལཱ བྷིནིཡོ བྲཧྨཔཱརིསཛྫེསུཡེཝ ནིབྦཏྟནྟཱིཏི ཨཊྛཀཐཱཡཾ ཝུཏྟ’’ནྟི ཝུཏྟཾ.

ཏཏྠ བྲཧྨཔཱརིསཛྫེསུཡེཝཱཏི ཨཀནིཊྛེ ནིབྦཏྟམཱནཱཔི བྲཧྨཱནཾ པརིཙཱརིཀ བྲཧྨེསུཨེཝ ནིབྦཏྟནྟི. ན མཧཱབྲཧྨེསཱུཏི ཨཏྠོ དཊྛབྦོ.

མཎིམཉྫཱུསཱཡཾ པན

བྲཧྨཔཱརིསཛྫེསུཡེཝ ནིབྦཏྟནྟི, ན བྲཧྨཔུརོཧིཏཱདཱིསཱུཏི ཝུཏྟཾ. ཏཾ ན གཧེཏབྦཾ.

ཡཉྩ ཏཏྠ

སཱམཱཝཏིཡཱདཱིནཾ པཐམཾ བྲཧྨཔཱརིསཛྫེསུ ནིབྦཏྟནཾ ཝུཏྟཾ. ཏཾཔི ཨཊྛཀཐཱཡ ན སམེཏི.

ཡསྨཱ པན ཏཱ ཨིམསྨིཾ ཨཏྟབྷཱཝེ ཨརིཡཕལཱནི སཙྪཱཀཾསུ. ཏསྨཱ ཏཏྠ ཨནཱགཱམིནིཡོ སུདྡྷཱཝཱསེསུ ཨུཔྤནྣཱ. ཨིཏརཱ ཀཱཙི ཏཱཝཏིཾསེསུ ཀཱཙི པརནིམྨིཏཝསཝཏྟཱིསུ ཨུཔྤནྣཱ ཨིཙྩེཝ ཨུདཱནཊྛཀཐཱཡཾ ཝུཏྟནྟི. ཨཔིཙེཏྠ ཝེཧཔྥལེ ཨཀནིཊྛེ ཙཏུཏྠཱརུཔྤེཏི ཏཱིསུ བྷཝགྒེསུ ནིབྦཏྟཱ ཨརིཡཱ ཨཉྙཏྠ ནུཔྤཛྫནྟི. སེསབྲཧྨལོཀེསུ ནིབྦཏྟཱ ཧེཊྛཱབྷཱུམཱིསུ ནུཔྤཛྫནྟཱིཏི. [ཀམྨཙཏུཀྐཾ].

༡༥༥. ཨཱཡུཀྑཡེན མརཎཾ ཀམྨཀྑཡེན མརཎནྟིཨཱདིནཱ ཡོཛེཏབྦཾ. ཏཏྠ ཨཔརིཀྑཱིཎེཡེཝ ཀམྨཱནུབྷཱཝེ ཏསྨིཾ ཏསྨིཾ ¶ སཏྟནིཀཱཡེ ཡཐཱནིཡམིཏསྶ ཨཱཡུཔརིམཱཎསྶ པརིཀྑཡེན པརིཔུཎྞེན མརཎཾ ཨཱཡུཀྑཡ མརཎཾནཱམ. ཏསྨིཾ ཏསྨིཾ བྷཝེ དུབྦལེན ཀམྨེན ནིབྦཏྟསྶ སཏྟསྶ ཨཔརིཀྑཱིཎེཡེཝ ཨཱཡུཔརིམཱཎེ ཀེཝལཾ ཀམྨསཏྟིཔརིཀྑཡེན ཨནྟརཱཝ མརཎཾ ཀམྨཀྑཡ མརཎཾནཱམ. ཏདུབྷཡསྶ སམཾ པརིཀྑཡེན མརཎཾ ཨུབྷཡཀྑཡ མརཎཾནཱམ. དྷརམཱནེཔི ཏདུབྷཡེ པུརིམབྷཝེསུཝཱ ཨིམསྨིཾཝཱབྷཝེ ཀཏེན ཨུཔགྷཱཏཀཀམྨེན ཨཛ྄ཛྷཏྟབཧིདྡྷཱབྷཱུཏེ ནཱནཱརོགཱབཱདྷ པཐཝཱིཔཝེས ཨསནིཔཱཏཱདིཀེ ཛཱིཝིཏནྟརཱཡེ སམུཊྛཱཔེཏྭཱ དུསྶིམཱརཀལཱབུརཱཛཱདཱིནཾཝིཡ ཨནྟརཱཝ ཨུཔརོདྷིཏ ཁནྡྷསནྟཱནསྶ སཏྟསྶ མརཎཾ ཨུཔཙྪེདཀ མརཎཾནཱམ. ནནུ ཙེཏྠ མརནྟཱནཾ ནཱམ སབྦེསཾཔི ཏཾཏཾབྷཝཾ ཛནེནྟཾ ཀམྨཾ ཁིཡྻཏིཡེཝ. ཨཐཀསྨཱ ཨིཏརེཔི ཝུཏྟཱཏི. ཝུཙྩཏེ, སརསཝསེནེཝ ཧི ཀམྨསཱམཏྠིཡསྶ ཁཡོ ཨིདྷ ཀམྨཀྑཡོཏི ཨདྷིཔྤེཏོ. ཡེ པན དསཝསྶ ཝཱིསཏིཝསྶ ཡཱཝ ཨསངྑྱེཡྻ ཝསྶཱདི ཝསེན ནཱནཱཨཱཡུཀཔྤཝིདྷཱཡཀཱ ཏསྨིཾ ཏསྨིཾ སཏྟནིཀཱཡེ སབྦཛན སཱདྷཱརཎཱ སཏྟཱནཾ ཨཛ྄ཛྷཏྟབཧིདྡྷསམྦྷཱུཏཱ ཨུཏུཨཱཧཱརཱནཱམ ཧོནྟི. ཏེ ཏསྶ ཏསྶ ཨཱཡུཀཔྤསྶ ཋིཏིཀརཱ ཝུདྡྷིཀརཱ ཧཱནིཀརཱཙཱཏི ཏིཝིདྷཱ ཧོནྟི. ཏཏྠ ཨཀུསལམཱུལེསུ ཝཌྜྷམཱནེསུ ཧཱནིཀརཱ ཝཌྜྷནྟི. ཀུསལམཱུལེསུ ཝཌྜྷམཱནེསུ བུདྡྷིཀརཱ ཝཌྜྷནྟི. ཨུབྷཡམཱུལེསུ སམཾ ཋིཏེསུ ཋིཏིཀརཱ སམཾ པཝཏྟནྟི. ཏེསཾ ཝསེན སཏྟཱནཾ ཨཱཡུཀཔྤོ ཀཏྠཙི སདཱ ཋིཏིབྷཱགོ ཧོཏི. ཀཏྠཙི ཀདཱཙི ཧཱནིབྷཱགོ ཀདཱཙི ཝུདྡྷིབྷཱགོ ཧོཏི. ཏཡོཔི ཙེཏེ ཋིཏིཀརཱདཡོ ཏཾཏཾསཏྟནིཀཱཡཾ ཨཛ྄ཛྷོཏྠརམཱནཱ ཨཱཡུཾ པརིཙྪིནྡནྟཱ པཝཏྟནྟཱིཏི ཨསངྑྱེཡྻཱཡུཀ སཾཝཏྟནིཀཾ ཙཀྐཝཏྟིསམྤཏྟི སཾཝཏྟནིཀཉྩ ཀམྨཾ དསཝསྶིཀེ ཀཱལེ ཝིཔཙྩམཱནཾ ཏདནུརཱུཔཾཨེཝ བྷོགཉྩ ཨིསྶརིཡཉྩ དཏྭཱ དསཝསེན ཁིཡྻཏི. ཏཾ ཏཾ སཏྟནིཀཱཡ པརིཡཱཔནྣཱ སཏྟཱ སནྟཱནབྷཱུཏཱ རཱུཔདྷམྨཱ སབྦཉྙུ བུདྡྷཱནཾ ཁནྡྷསནྟཱན བྷཱུཏཱཔི ཏགྒཏིཀཱ ཏདནཱུཝཏྟིཀཱ ཨེཝ ཧུཏྭཱ པརིཎམནྟི ཨཉྙཏྲ ཨིདྡྷིམཡ ཝིཛྫཱམཡ རསཱཡནཝིདྷི ཛཱིཝིཏ སངྑཱར ཝིདཱུཧཱིཏི. ཝུཏྟཉྷེཏཾ མཧཱཔདཱནསུཏྟཊྛཀཐཱཡཾ –

སབྦེཔི ¶ སབྦཉྙུབུདྡྷཱ ཨསངྑྱེཡྻཱཡུཀཱ. ཀསྨཱ ཏེ ཨསངྑྱེཡྻཾ ན ཨཊྛཾསཱུཏི. ཨུཏུབྷོཛནཝིཔཏྟིཡཱ. ཨུཏུབྷོཛནཝསེན ཧི ཨཱཡུ ཧཱཡཏིཔི ཝཌྜྷཏིཔཱིཏི.

ཏསྨཱ པདྷཱནནིསྶཡབྷཱུཏེསུ དྭིསམུཊྛཱནིཀ རཱུཔདྷམྨེསུ ཏཾ ཏཾ ཨཱཡུཀཔྤཝསེན པརིཎམནྟེསུ ཛིཡྻམཱནེསུ ཡཱཝམཧནྟཾཔི ཀམྨཾ ཨཏྟནོ ཝིཔཱཀཱདྷིཊྛཱནསྶ ཨབྷཱཝཱ ཁིཡྻཏིཡེཝ. སོཙསྶ ཁཡོ ན སརསེན ཧོཏི. ཨཐཁོ ཨཱཡུསངྑཱརཝིཔཏྟིཡཱ ཨེཝ ཧོཏཱིཏི ཨིདྷ ཨཱཡུཀྑཡོ ཝིསུཾ གཧིཏོཏི. ཨེསནཡོ ཨུཔཙྪེདཀམརཎེཔི ནེཏབྦོ. ཏཏྠ ཨུཔཙྪེདཀམརཎནྟི ཨཀཱལམརཎཾ ཝུཙྩཏི. ཏཉྷིཔཝཏྟམཱནཾ ཨུཔཙྪེདཀཀམྨུནཱཝཱ པཝཏྟཏི. ཨཉྙེཧིཝཱ ཨནེཀ སཧསྶེཧི ཀཱརཎེཧི. ཏཱནི པན པཱལི༹ཡཾ མཱུལབྷེདཏོ སཾཁིཔིཏྭཱ ཨཊྛདྷཱ ཝུཏྟཱནི. ཀཏམཱནི པན ཏཱནཱིཏི. ཨཏྠི ཝཱཏསམུཊྛཱནཱ ཨཱབཱདྷཱ. ཨཏྠི ཝིཏྟསམུཊྛཱནཱ. ཨཏྠི སེམྷ སམུཊྛཱནཱ. ཨཏྠི སནྣིཔཱཏིཀཱ. ཨཏྠི ཨུཏུསམུཊྛཱནཱ. ཨཏྠི ཝིསམཔརིཧཱརཛཱ. ཨཏྠི ཨོཔཀྐམིཀཱ. ཨཏྠི ཀམྨཝིཔཱཀཛཱ ཨཱབཱདྷཱཏི. ཏཏྠ ཀམྨཝིཔཱཀཛཱ ཀེཙི ཨུཔཔཱིལ༹ཀཀམྨཛཱཀེཙི ཨུཔཙྪེདཀཀམྨཛཱ. ཡསྨཱ པན ཝཱཏོ ཀུཔྤམཱནོ སཱིཏུཎྷཱདཱིཧི དསཧི ཀཱརཎེཧི ཀུཔྤཏི. ཏེསུཙ ཨེཀམེཝ ཀམྨ ཝིཔཱཀཛཾ ཧོཏི. སེསཱནི པན ཨཀམྨཝིཔཱཀཛཱནཱིཏི མིལིནྡ པཉྷེ ཝུཏྟཾ. ཡསྨཱཙ ཀམྨཝིཔཱཀཛཱཔི ཨཱབཱདྷཱ ཨུཔྤཛྫམཱནཱ ཝཱཏ ཀུཔྤནཱདཱིཧི ཝིནཱ ན ཨུཔྤཛྫནྟི. ཏསྨཱ ཀེཙི ཝཱཏསམུཊྛཱནཱདཡོཔི ཀམྨཝིཔཱཀཛཱ ཧོནྟིཡེཝཱཏི དཊྛབྦཱ.

ཏཏྠ སནྣིཔཱཏིཀཱཏི ཝཱཏཱདཱིནཾ དྭིནྣཾ ཏིཎྞཾཝཱ སནྣིཔཏིཏཱནཾ ཝསེན པཝཏྟཱ. ཡེ པན ལོཀེ སཏྟཱནཾ པཡོགམུཏྟཱ སཡཾ ཛཱཏཱ ནཱནཱབྷཡུཔདྡཝཱ. ཏེ ཨུཏུསམུཊྛཱནེསུ སངྒཧིཏཱཏི དཊྛབྦཱ. ཝིསམཔརིཧཱརཛཱཏི ཨནིསམྨཀཱརཱིནཾ ཨནེཀཝིདྷེ ཝིསམེ ཝིཔཏྟིམུཁེ ཨཏྟཱནཾ པཡོཛནྟཱནཾ ཏཏོ ཏཏོཝཱ ཏཏྠ ཏཏྠ ཝཱ པཏན པཀྑལནཱདིཝསེན པཝཏྟཱ. ཨོཔཀྐམིཀཱཏི ཨཏྟནཱཝཱ པརེཧི རཱཛཙོརཝེརཱིཧིཝཱ ཨམནུསྶཝཱལ༹ཡཀྑདེཝཏཱཧིཝཱ ཝཱལ༹མིགཱདཱིཧིཝཱ ཀཏཱནཾ པཡོགཱནཾ ཝསེན པཝཏྟཱ. ཀུཔྤིཏཱ ཧི དེཝཏཱ ¶ སཀལཾ རཛྫཾཝཱ རཊྛཾཝཱ དཱིཔཀཾཝཱ ཨེཀཔྤཧཱརེན ཨསེསཾ ཀཏྭཱ ཝིནཱསེནྟི དཎྜཀརཊྛ མཛ྄ཛྷརཊྛ ཀལིངྒརཊྛ མཱཏངྒརཊྛེསུ ཝིཡ. ཨནེཀསཧསྶེཝཱ ཝཱལ༹ཡཀྑེ ཝིསྶཛྫནྟི ཝེསཱལིཡཾ ཝིཡ. རཀྑསེཝཱ ཝིསྶཛྫནྟི སུཝཎྞབྷཱུམིཡཾཝིཡ. ཝུཏྟཉྷེཏཾ ཨངྒུཏྟརེ ཡཀྑཱ ཝཱལེ༹ ཨམནུསྶེ ཨོསྶཛྫནྟི. ཏེན བཧུམནུསྶཱ ཀཱལཾ ཀརོནྟཱིཏི. ཨཊྛཀཐཱཡཾཔི ཡཀྑཱཏི ཡཀྑཱདྷིཔཏིནོ. ཝཱལེ༹ ཨམནུསྶེ ཨོསྶཛྫནྟཱིཏི ཙཎྜེ ཡཀྑེ མནུསྶཔཐེ ཝིསྶཛྫནྟི. ཏེ ལདྡྷོཀཱསཱ མཧཱཛནཾ ཛཱིཝིཏཀྑཡཾ པཱཔེནྟཱིཏི ཝུཏྟཾ. ཏཏྠ ཝིསྶཛྫནྟཱིཏི ཝིསམཱཙཱར བཧུལེ མནུསྶེ དིསྭཱ བྷིནྣསདྡྷཱ ཡཀྑསེནཱཔཏིནོ མནུསྶཱནཾ ཨཏྠཱཡ པུབྦེཝིཡ ཨཱརཀྑཾན གཎྷནྟཱིཏི ཨཏྠོ. ཛནཔདནགརནིགམགཱམེསུཙེཝ ཏསྨིཾ ཏསྨིཾ པུགྒལེཙ ཝཏྟབྦམེཝ ནཏྠི. ཨངྒུཏྟརེ ཝུཏྟཱ སཏྠདུབྦྷིཀྑརོག ཀཔྤཱཔི ཨིདྷ ཝཏྟབྦཱཏི. ཀམྨཝིཔཱཀཛཱཏི ཨུཔཔཱིལ༹ཀོཔགྷཱཏཀཱནཾ ཀམྨཱནཾ ཝིཔཙྩནཝསེན པཝཏྟཱ ཨཱབཱདྷཱཏི ཨཏྠོ. ཨེཝཾ ཨཀཱལམརཎཾ ཨུཔཙྪེདཀམྨུནཱཝཱ ཨཉྙེཧིཝཱ ཨནེཀསཧསྶེཧི ཀཱརཎེཧི ཧོཏཱིཏི. ཡེཧི ཀེཙི ལོཀེ དིསྶནྟི. པཱཎཧརཱ ཛཱིཝིཏཝིནཱསཀཱ ནཱནཱརོགཱཝཱ ནཱནཱབཱདྷཱཝཱ ནཱནཱབྷཡཱ ནིཝཱ ནཱནཱ དཎྜཱཝཱ ནཱནཱ ཨུཔདྡཝུ པསགྒཱཝཱ. སབྦེ ཏེ སཀཀམྨ སམུཊྛིཏཱཨེཝ ཨཏྟནོ སཱདྷཱརཎཱཏི ནཏྠི. པརཀམྨསམུཊྛིཏཱཔི ཨཏྟནོ སཱདྷཱརཎཱཨེཝ. སཀཀམྨསམུཊྛིཏཱཔི པརེསཾ སཱདྷཱརཎཱཨེཝ. ཀམྨེན ཝིནཱ ཡཏོ ཀུཏོཙི སམུཊྛིཏཱཔི ཨཏྟནོ ཝཱ པརེསཾཝཱ སཱདྷཱརཎཱཨེཝ. སབྦསཱདྷཱརཎཀམྨསམུཊྛིཏེསུ ཝཏྟབྦམེཝ ནཏྠི. ཡཐཱཧ-ཝིསུདྡྷིམགྒེ.

ཡཐཱ ཙཏུམཧཱཔཐེ ཐཔིཏེ ལཀྑམྷི སབྦདིསཱཧི ཨཱགཏཱ སརསཏྟིཏོམརཔཱསཱཎཱདཡོ ནིཔཏནྟི. ཨེཝཾ ཀཱཡེཔི སབྦུཔདྡཝཱ ནིཔཏནྟཱིཏི.

ཡེསུཙ རཛྫརཊྛཱདཱིསུ ཏེ ཨུཔྤཛྫནྟི. ཏཏྠ ཡེཛནཱ ཨུཔཱཡ ཀུསལཱཝཱ ན ཧོནྟི. ནཙ པཊིཀཱརཀུསལཱ. ནཱཔི པརིཧཱར ཀུསལཱ. ཀམྨཉྩ ཡེསཾ དུབྦལཾ ཧོཏི. ཨུཔྤནྣོ ཨནཏྠོ བལ ཝཱ. ཏེཛནཱ ¶ ཝིནཱཔི ཨུཔཙྪེདཀཀམྨུནཱ ཏཏོ ན མུཙྩནྟི. མརཎཾ ཝཱ མརཎམཏྟཾཝཱ དུཀྑཾ པཱཔུཎནྟིཡེཝ. ཀལྱཱཎབྷཱུཏཾཔི ཧི ཀམྨཾ ཨཏྟནོ བལཝཏརཾ ཡཏོཀུཏོཙི སམུཊྛིཏཾ རོགཾཝཱ ཨཱབཱདྷཾ ཝཱ བྷཡཾཝཱ དཎྜཾཝཱ ཨུཔདྡཝུཔསགྒཾཝཱ པཊིབཱཧིཏུཾ ནསཀྐོཏི. རོགཱདཡོཨེཝ ཏཾཁེཔེནྟཱ པཝཏྟནྟི. ཡཐཱ ཧི ཨུདཀཾ ཨཏྟནོ བལཝཏརཾ ཨགྒིཾ པཊིབཱཧིཏུཾ ན སཀྐོཏི. ཨགྒིཨེཝ ཏཾ ཁེཔེནྟོ པཝཏྟཏཱིཏི ཨེཝཾ སམྤདམིདཾ དཊྛབྦཾ. ཨིམེསཉྩ སཏྟཱནཾ པཀཏིཡཱཔི ཀམྨསྶ དུབྦལབྷཱཝོ མཧཱནིདྡེསེ ཛརཱ སུཏྟནིདྡེསེན ཝིསུདྡྷི མགྒེཙ མརཎསྶཏི ནིདྡེསེ ཨཱཡུ དུབྦལཏོཏི པདསྶ ནིདྡེསེ ན དཱིཔེཏབྦོ. ཡཐཱཧ –

ཨཱཡུནཱམེཏཾ ཨབལཾ དུབྦལཾ. ཏཐཱ ཧི སཏྟཱནཾ ཛཱིཝིཏཾ ཨསྶཱསཔསྶཱསུཔནིབནྡྷཉྩེཝ ཨིརིཡཱཔཐུཔནིབནྡྷཉྩ སཱིཏུཎྷུ པནིབནྡྷཉྩ མཧཱབྷཱུཏུཔནིབནྡྷཉྩ ཨཱཧཱརུཔནིབནྡྷཉྩཱཏིཨཱདི.

ཏཐཱ ཀཱཡབཧུསཱདྷཱརཎཏོ ཨནིམིཏྟཏོཏི ཨིམེསཾ པདཱནཾ ནིདྡེསེནཔི པཱཀཊོཡེཝ. ཀམྨནིབྦཏྟསྶ ཧི ཨཱཡུནོ ཏིཎགྒེ ཨུསྶཱཝབིནྡུསྶེཝ པརིདུབྦལབྷཱཝེ པཱལི༹ཡཾ ཨཊྛཀཐཱ ཡཉྩ ཝུཏྟེ ཀམྨསཱཔི ཏཐེཝ པརིདུབྦལཏཱ སིདྡྷཱ ཧོཏཱིཏི. ཨེཝཉྩེཏཾ སམྤཊིཙྪིཏབྦཾ. ཨིཏརཐཱ སབྦཾ པུབྦེཀཏཧེཏུདིཊྛིནཱམ སིཡཱ. ཡཐཱཧ –

ཨིདྷེཀཙྩོ སམཎོཝཱ བྲཱཧྨཎོཝཱ ཨེཝཾཝཱདཱི ཧོཏི ཨེཝཾ དིཊྛཱི. ཡཾ ཀིཉྩཱཡཾཔུརིསཔུགྒལོ པཊིསཾཝེདེཏི སུཁཾཝཱ དུཀྑཾཝཱ ཨདུཀྑམསུཁཾཝཱ. སབྦཾ ཏཾ པུབྦེཀཏཧེཏཱུཏི.

ཨཡཉྩ ཨཏྠོ མིལིནྡཔཉྷེ ཏཱིསུ ཋཱནེསུ ཝིཏྠཱརཏོ ཨཱགཏོ. ཡཐཱཝུཏྟེཧི པན ཨནེཀསཧསྶེཧི ཀཱརཎེཧི པཝཏྟམརཎཾཔི ཨཀཱལམརཎཏཱསཱམཉྙེན ཨིདྷ ཨུཔཙྪེདཀམརཎེ སངྒཧིཏནྟི དཊྛབྦཾ.

ཝིབྷཱཝནིཡཾ

‘‘ཨིདཾ པན ནེརཡིཀཱནཾ ཨུཏྟརཀུརུཝཱསིནཾ ཀེསཉྩི དེཝཱནཉྩ ནཧོཏཱིཏི’’ ཝུཏྟཾ.

ཡཐཱ ¶ པན མཧཱཊཱིཀཱཡཾ ཀེསཉྩི པེཏཱནཾ ཨིཏོ ཉཱཏཀེ ཧི དིནྣཾ པུཉྙཔཏྟི ཨནུམོདིཏྭཱ ཏངྑཎེཡེཝ ཙཝིཏྭཱ སུགཏིཡཾ ནིབྦཏྟཱནཾ ཀུསལབྷཱུཏཾ ཨུཔཙྪེདཀཾ ཝུཏྟཾ. ཏཐཱ ཀེསཉྩི ནེརཡི ཀཱནཾཔི ཡམརཉྙོ སམནུཡུཉྫནཀཱལཱདཱིསུ ཨཏྟནཱ ཀཏཔུཉྙཾ ཨནུསྶརིཏྭཱ ཏངྑཎེཡེཝ ཙཝིཏྭཱ སུགཏིཡཾ ནིབྦཏྟཱནཾ ཨུཔཙྪེ དཀམརཎཾནཱམ ན ན སཀྐཱ ཝཏྟུཾ. ཀེསཉྩི ཏཱཝཏིཾསཱདཱིནཾ དེཝཱནཉྩ ཏཾ ཨུཔཙྪེདཀམརཎཾ ཧོཏིཡེཝ. ཏཐཱ ཧི སུབྲཧྨདེཝ པུཏྟ སཾཡུཏྟཊྛཀཐཱཡཾ ཨཐ རུཀྑཾ ཨབྷིརུལ༹ྷཱ ཨུཔཙྪེདཀཀམྨཱདི ཝསེནཨེཀཔྤཧཱརེནེཝ ཀཱལངྐཏྭཱ ཨཝཱིཙིམྷི ནིབྦཏྟཱཏི ཝུཏྟཾ. ཏཏྠ རུཀྑནྟི ཏཱཝཏིཾསེ པཱརིཙྪཏྟཀརུཀྑཾ. ཨབྷིརུལ༹ྷཱཏི ཨཱརུལ༹ྷཱ པཉྩ སཏདེཝཙྪརཱཡོ. མནོཔདོསིཀ ཁིཊྚཱཔདོསིཀ དེཝཱནཾ མརཎཾ མཧཱབོདྷིསཏྟཱནཾ དིགྷཱཡུཀེ དེཝལོཀེཝཱ བྲཧྨལོཀེཝཱ ནིབྦཏྟཱནཾ ཨདྷིམུཏྟི ཀཱལངྐིརིཡཱ ཚནྣཏྠེརགོདྷིཀཏྠེརཱདཱིནཾཝིཡ སཡམེཝ སཏྠཾ ཨཱཧརིཏྭཱ པརིནིབྦཱཡནྟཱནཾ མརཎཉྩ ཨེཏྠེཝ སངྒཡ྄ཧཏཱིཏི དཊྛབྦཾ. ཏཐཱཙཱཏི ཏེཧི པཀཱརེཧིཙ. མརནྟཱནཾ ཚནྣཾ དྭཱརཱནཾ ཨཉྙཏརསྨིཾ པཙྩུཔཊྛཱཏཱིཏི སམྦནྡྷོ. མརཎཀཱལེཏི མརཎཱསནྣཀཱལེ. ཡཐཱརཧནྟི སུགཏིདུགྒཏིགཱམཱིནཾ ཨརཧཱནུརཱུཔཾ. ཡེཔན ཁཱིཎཱསཝཱ ཀཏྠཙི ནུཔྤཛྫནྟི. ཏེསུ སུཀྑཝིཔསྶཀཱནཾ པཀཏིཡཱ ཡཐོ པཊྛིཏཾ ནཱམརཱུཔ མེཝ ཨནྟིམ ཛཝནཱནཾ ཨཱརམྨཎཾཧོཏི. སམཱཔཏྟིལཱབྷཱིནཾ པན ཛྷཱནསམནནྟརེ པརིནིབྦཱཡནྟཱནཾ ཀསིཎནིམིཏྟཱདིཀཾ. པཙྩཝེཀྑནསམནནྟརེ པརིནིབྦཱཡནྟཱནཾ ཛྷཱནངྒཱནི ཨབྷིཉྙཱསམནནྟརེ པརིནིབྦཱཡནྟཱནཾ ཨཏྟནོ ཀརཛརཱུཔཾ. ཛཱིཝིཏ སམསཱིསཱིནཾ པན ཨགྒམགྒསྶ པཙྩཝེཀྑནསམནནྟརེ པརིནིབྦཱཡནྟཱནཾ མགྒངྒཱདིནི ཨནྟིམཛཝནཱནཾ ཨཱརམྨཎཾ ཧོཏཱིཏི. པརིནིབྦཱནཙུཏིཙིཏྟསྶ པན སབྦེསཾཔི ཨཱདིཏོ ཨཏྟནོ ཨཏྟནོ པཊིསནྡྷིཡཱཡཐཱགཧིཏཾ ཀམྨཱདཱིསུ ཨཉྙཏརམེཝ ཨཱརམྨཎཾ ཧོཏཱིཏི དཊྛབྦཾ. ཡེཔན ཨནེཛོསནྟི མཱརབྦྷཡཾ ཀཱལམཀརཱིམུནཱིཏི ཨིམཾ སུཏྟཔདཾ དིསྭཱ ནིབྦཱནམེཝ བྷགཝཏོ པརིནིབྦཱནཙུཏིཡཱ ཨཱརམྨཎནྟི ཝདནྟི. ཏེ ཏེན སཡམེཝ ཨབྷིདྷམྨེ ཨཱརམྨཎཏྟིཀེསུ ཨཏྟནོ ཨཀོཝིདཏཾ དསྶེནྟི. ཡཐཱཧ –

ཀཏམེ ¶ དྷམྨཱ པརིཏྟཱརམྨཎཱ, སབྦོ ཀཱམཱཝཙརཝིཔཱཀོ ཀྲིཡམནོདྷཱཏུ ཀྲིཡཱཧེཏུཀ མནོཝིཉྙཱཎ དྷཱཏུ སོམནསྶསཧགཏཱ. ཨིམེ དྷམྨཱ པརིཏྟཱརམྨཎཱཏི.

ཡསྨཱ པན པརིནིབྦཱནཾནཱམ སནྟི ཨཏྠཱཡེཝ ཧོཏི. ཨཛ྄ཛྷཱསཡོ ཙསྶ ཨེཀནྟེན སནྟིནིནྣོཡེཝ ཧོཏི. ཏསྨཱ ཨནེཛོསནྟི མཱརབྦྷཱཏི སུཏྟཔདཾ ཝུཏྟཾ. ཏཐཱ ཧི ཨཊྛཀཐཱཡཾ སནྟིམཱརབྦྷཱཏི ཨནུཔཱདིསེསཾ ནིབྦཱནཾ ཨཱརབྦྷ པཊིཙྩ སནྡྷཱཡཱཏི ཝུཏྟཾ. ན པན ཝུཏྟཾ ཨཱརབྦྷ ཨཱལམྦིཏྭཱ ཨཱརམྨཎཾ ཀཏྭཱཏི. ཐེརགཱཐཊྛཀཐཱཡཾ པན སནྟིམཱརབྦྷཱཏི སནྟིཾ ཨནུཔཱདིསེསཾ ནིབྦཱནཾ ཨཱརམྨཎཾ ཀཏྭཱཏི ཝུཏྟཾ. ཏཾ མཧཱཔརིནིབྦཱནཔཱལི༹ཡཱ ཏདཊྛཀཐཱཡཙ ནསམེཏི. ཏཱསུ ཧི བྷགཝཏོ པརིནིབྦཱནཾ ཛྷཱནངྒ པཙྩཝེཀྑནསམནནྟརནྟི ཝུཏྟཾ. ཨེཏྠཙ པུརིམཱནི དྭེ སམནནྟརཱནི པརིནིབྦཱནསུཏྟཊྛཀཐཱསུ ཝུཏྟཱནི. ཨབྷིཉྙཱསམནནྟརཾ ཨུདཱནཊྛཀཐཱདིསུ ཨཱགཏཾ. ཡཐཱཧ-ཝུཊྛཧིཏྭཱ པརིནིབྦཱཡཱིཏི ཨིདྡྷིཙིཏྟཏོ ཝུཊྛཧིཏྭཱ བྷཝངྒཙིཏྟེན པརིནིབྦཱཡཱིཏི. ཨགྒམགྒསྶ པཙྩཝེཀྑནསམནནྟརཾ པུགྒལཔཉྙཏྟིཊྛཀཐཱདཱིསུ ཨཱགཏཾ. ཡཐཱཧ-ཨེཀཱུནཝཱིསཏི མེ པཙྩཝེཀྑནཉྙཱཎེ པཏིཊྛཱཡ བྷཝངྒཾ ཨོཏརིཏྭཱ པརིནིབྦཱཡཏཱིཏི. སཾཡུཏྟཊྛཀཐཱཡཾ པན ཨརཧཏྟམགྒཱནནྟརཾ ཕལཾ. ཕལཱནནྟརཾ བྷཝངྒཏོ ཝུཊྛཱཡ པཙྩཝེཀྑནཾ. ཏཾ པན པརིཔུཎྞཾཝཱ ཧོཏི ཨཔརིཔུཎྞཾཝཱ. ཏིཁིཎེན ཨསིནཱ སཱིསེ ཚིཛྫམཱནེཔི ཨེཀཾཝཱ དྭེཝཱ པཙྩཝེཀྑནཱནི ཨུཔྤཛྫནྟིཡེཝཱཏི ཝུཏྟཾ.

[༡༦༤] ཝིབྷཱཝནིཡཾ པན

ཨེཝཾ ཝཝཏྠཱནཾ ཨཀཏྭཱ ཡཾ ཝུཏྟཾ. ‘‘ཀཏྠཙི པན ཨནུཔྤཛྫམཱནསྶ ཁཱིཎཱསཝསྶ ཡཐོཔཊྛིཏཾ ནཱམརཱུཔདྷམྨཱདིཀམེཝ ཙུཏིཔརིཡོསཱནཱནཾ གོཙརབྷཱཝཾ གཙྪཏི. ན ཀམྨ ཀམྨནི མིཏྟཱདཡོཏི.’’ ཏཾ ན སུནྡརཾ.

ན ཧི ཏསྶ ཙུཏིཙིཏྟཾ ཀམྨཀམྨནིམིཏྟཱདཡོ ཨཱརམྨཎཾ ནཀརོཏི. ནཙ ཙུཏིཡཱ གཧིཏཱནི ཀམྨཱདཱིནིནཱམ སབྦསཏྟཱནཾཔི བྷཝནྟརསྶ ཨཏྠཱཡ བྷཝནྟཱིཏི. ཨབྷིམུཁཱིབྷཱུཏནྟི ཀམྨནྟརསྶ ཨོཀཱསཾ ཨདཏྭཱ ཨཏྟནོ ཨོཀཱསཾ ཀཏྭཱ པཙྩུཔཊྛིཏཾ. ཀམྨཾཝཱ པཙྩུཔཊྛཱཏཱིཏི ¶ སམྦནྡྷོ. ཨུཔལདྡྷཔུབྦནྟི ཏསྶ ཀམྨསྶ ཨཱརམྨཎ བྷཱུཏཱནི དེཡྻདྷམྨ ཝཏྠཱདཱིནི པརཔཱཎཱདཱིནིཙ སནྡྷཱཡ ཝུཏྟཾ. ཨུཔཀརཎབྷཱུཏནྟི ཀམྨསིདྡྷིཡཱ ཨུཔཀརཎབྷཱུཏཱནི པརིཝཱརབྷཱུཏཱནིཙ པཊིགྒཱཧཀཱདཱིནི ཨཱཝུདྷབྷཎྜཱདིནིཙ སནྡྷཱཡ ཝུཏྟཾ. ཡསྨཱཙ ལཀྑཎ སཾཡུཏྟེ གཝཱདཱིནི ཝདྷིཏྭཱ རཱསིཀཏཱནི ཨཊྛིཔུཉྫཱདཱིནི ཀམྨནིམིཏྟཱནི ཧུཏྭཱ ཨུཔཊྛཧནྟཱིཏི ཨཊྛཀཐཱཡཾ ཝུཏྟཾ. ཏསྨཱ ཀམྨསམྦནྡྷཱནི ཡཱནི ཀཱནིཙི ཝཏྠཱུནི ཝཱ ཨཱརམྨཎཱནིཝཱ ཨིདྷ ཨུཔཀརཎེ སངྒཧི ཏཱནཱིཏི དཊྛབྦཱནི. ཨུཔལབྷིཏབྦནྟི དུགྒཏིནིམིཏྟཾ སནྡྷཱཡ ཝུཏྟཾ. ཨུཔབྷོགབྷཱུཏནྟི སུགཏིནིམིཏྟཾ. ཨུབྷཡཾཔི ཝཱ ཡཾ ཀཱཡཔཊིབདྡྷཾ ཧུཏྭཱ ལབྷིཏབྦཾ ཧོཏི. ཏཾ ཨུཔལབྷིཏབྦཾནཱམ. ཨཔཊིབདྡྷཾ ཧུཏྭཱ ཀེཝལཾ སུཁདུཀྑཱནུབྷཝནཏྠཱཡ ལབྷིཏབྦཾ ཨུཔབྷོག བྷཱུཏཾནཱམ. ཨེཏྠཙ ཨགྒིཛཱལ ལོཧཀུམྦྷི ནིརཡཔཱལ ནིརཡསུནཁཱདཱིནི ནིརཡནིམིཏྟཾ. ཏཾ པན ཀེསཉྩི ཛནཱནཾ ཨཏྟནོ ཝསནཊྛཱནེཝིཡ ཨུཔཊྛཱཏི. ཀེསཉྩི ཏཏོ ཏཏོ ཨཱགནྟྭཱ ཨཏྟཱནཾ སཾཔརིཝཱརེནྟཾ ཝིཡ ཨུཔཊྛཱཏི. ཡཐཱཧ-ཏསྶ གིལཱནསེཡྻཱཡ ནིཔྤནྣསྶ ནིརཡོ ཨུཔཊྛཱཏི. སོཎགིརིཔཱདཏོ མཧནྟཱ མཧནྟཱ སུནཁཱ ཨཱགནྟྭཱ ཁཱདིཏུཀཱམཱཝིཡ སཾཔརིཝཱརེསུནྟི. ཏཐཱ དེཝ ནིམིཏྟེཔི. ཡཐཱཧ-ནནྡཝན ཙིཏྟལཏཱཝན མིསྶཀཝན ཕཱརུསཀཝན ཝིམཱནཱནིཙེཝ དེཝནཱཊཀཱནིཙ པརིཝཱརེཏྭཱ ཋིཏཱནིཝིཡ ཨཧེསུནྟི. ཀེསཉྩི པན སཡཾ ཏཏྠ ཏཏྠ པཏྭཱ དིཊྛཾཝིཡ ཨུཔཊྛཱཏི. ཀམྦལཡཱནསདིསོ མཱཏུཀུཙྪིཝཎྞོ མནུསྶནིམིཏྟཾ. པབྦཏཔཱད ཝནསཎྜ ནརཀཔཔཱཏཱདཱིནི ཏིརཙྪཱནགཏཱནཾ ནིམིཏྟཱནཱིཏི. ཀམྨབལེནཱཏི ཨིདཱནི པཊིསནྡྷིཾ ཛནེཏུཾ པཙྩུཔཊྛིཏསྶ ཀམྨསྶ ཨཱནུབྷཱཝེན. ཨིདཉྩ ཡེབྷུཡྻཝསེན ཝུཏྟཾ. པཀཏིཡཱ པན ཨཱཙིཎྞ བྷཱུཏཾཝཱ ཏངྑཎཀཏཾཝཱ པརེན སརཱཔིཏཾཝཱ སཡམེཝ ཨནུསྶརིཏཾཝཱ པཀཏིཡཱཝ ཀུཀྐུཙྩཾཝཱ སོམནསྶཾཝཱ ཛནེཏྭཱ ཋིཏཾཝཱ ཀམྨཾཝཱ ཏསྶནིམིཏྟཾཝཱ ཨཉྙེནཔི ཀཱརཎབལེན པཙྩུཔཊྛཱཏིཡེ ཝཱཏི དཊྛབྦཾ. ཏམེཝ ཏཏོཔཊྛིཏཾ ཨཱརམྨཎཾ ཨཱརབྦྷཱཏི ཨིདཉྩ ཡེབྷུཡྻཝསེན ཝུཏྟཾ. ཏཏོ ཧི ཀེསཉྩི པཐམཾ ཀམྨབལེནཝཱ ཀཱརཎནྟརེནཝཱ པཱཔཔཀྑིཡེསུ ཨུཔཊྛཧནྟེསུ པུན དུཊྛ གཱམཎི རཉྙོ ¶ ཝིཡ པུབྦཀཏཾ བལཝནྟཾ པུཉྙཾ ཨནུསྶརནྟཱནཾཝཱ སོཎཏྠེར ཝིཏུ ཝིཡ ཏངྑཎེཡེཝ པསཱདཛནཀཾ པུཉྙཾ ཀརོནྟཱནཾཝཱ པཙྪཱ ཀལྱཱཎཔཀྑིཡཱནི ཨུཔཊྛཧནྟི. ཏཐཱ ཀེསཉྩི པཐམཾ ཀལྱཱཎ པཀྑིཡེསུ ཨུཔཊྛཧནྟེསུ དྷམྨཱསོཀརཉྙོ ཝིཡ པཙྪཱ ཀེནཙི ཀཱརཎེན དོམནསྶཾ ཨུཔྤཱདེཏྭཱ པཱཔཀམྨསྶ ཨོཀཱསཾ ཀརོནྟཱནཾ པཱཔཔཀྑིཡཱནི ཨུཔཊྛཧནྟཱིཏི. ཝིཔཙྩམཱནཀ ཀམྨཱནུརཱུཔནྟི ཡསྶ ཝིཔཙྩམཱནཀཾ ཀམྨཾ ཀུསལཾ ཧོཏི. ཏསྶ པརིསུདྡྷཾ ཀུསལཙིཏྟསནྟཱནཾ ཨབྷིཎྷཾ པཝཏྟཏི. ཡསྶ ཏཾ ཨཀུསལཾ ཧོཏི. ཏསྶ ཨུཔཀིལིཊྛཾ ཨཀུསལ ཙིཏྟསནྟཱནཾ ཨབྷིཎྷཾ པཝཏྟཏཱིཏི ཨཏྠོ. ཏཐཱ ཧི ཨཊྛཀཐཱཡཾཔི སུགཏིགཱམཱིནཾ ཀུསལུཔྤཏྟི ཧེཏུབྷཱུཏཾ པཎཱིཏཾ ཨཱརམྨཎཾ ཨཱཔཱཏམཱགཙྪཏཱིཏིཙ དུགྒཏིགཱམཱིནཾ ཨཀུསལུཔྤཏྟི ཧེཏུབྷཱུཏཾ ཧཱིནཱརམྨཎཾ ཨཱཔཱཏ མཱགཙྪཏཱི ཏིཙ ཝུཏྟཾ. མཱུལཊཱིཀཱཡཾ མཧཱཊཱིཀཱཡཉྩ ཨཱསནྣེ ཨཀུསལཾ དུགྒཏིཡཾ ཀུསལཉྩ སུགཏིཡཾ པཊིསནྡྷིཡཱ ཨུཔནིསྶཡོ ཧོཏཱིཏི ཝུཏྟཾ. ཨེཏྠ སིཡཱ, ཡདཱ དེཝཙྪརཱདཱིནི སགྒནིམིཏྟཱནི ཨུཔཊྛཧནྟི. ཏདཱ ཏཱནི ཏཎྷཱཡ ཨསྶཱདེནྟསྶེཝ སཏོ ཙཝནྟསྶ ཀཐནྟི. ཝུཙྩཏེ. ཨུཔཀིལིཊྛཾཡེཝ ཏསྶ ཙིཏྟཾ. ཏསྨཱ དུགྒཏིཨེཝ ཏསྶ པཱཊིཀངྑིཏབྦཱཏི ཝདནྟི. ཡསྨཱ པན པཊིསམྦྷིདཱ མགྒེ ཏཱདིསིཡཱ ཏཎྷཱཡ ཀུསལཀམྨསྶ སཧཀཱརི ཀཱརཎ བྷཱཝོ ཝུཏྟོ. ཡཐཱཧ-ནིཀནྟིཀྑཎེ དྭེ ཧེཏཱུ ཨཀུསལཱཏི. ཏསྨཱ སུགཏིབྷཝནིབྦཏྟནེཔི ཨཡཾ ཏཎྷཱ ཨེཀནྟེན ཀུསལ ཀམྨསྶ ནིཡཱམཀསཧཀཱརིཔཙྩཡབྷཱུཏཱཏི ཀཏྭཱ ཏསྶ ཏཱནིཝཱ དེཝཙྪརཱདཱིནི ཀུསལཀམྨ ཀམྨནིམིཏྟཱནིཝཱ ཨསྶཱདེནྟསྶེཝ སཏོ ཙཝནྟསྶ སཱཏཎྷཱ ཏདུཔཏྠམྦྷིཀཱཨེཝ བྷཝིཏུཾ ཨརཧཏི. ན ཏཾ པཊིབཱཧིཀཱཏི སཀྐཱ ཝིཉྙཱཏུཾ. ཡཉྩ ནིམིཏྟསྶཱདགདྷིཏཾཝཱ བྷིཀྑཝེ ཝིཉྙཱཎཾ ཏིཊྛམཱནཾ ཏིཊྛཏི, ཨནུབྱཉྫནསྶཱདགདྷིཏཾ ཝཱ. ཏསྨིཾ ཙེ བྷིཀྑཝེ སམཡེ ཀཱལངྐརེཡྻ, ཋཱནམེཏཾ ཝིཛྫཏི. ཡཾ དྭིནྣཾགཏཱིནཾ ཨཉྙཏརགཏིཾ གཙྪེཡྻ, ནིརཡཾཝཱ ཏིརཙྪཱན ཡོནིཾཝཱཏིཨཱདིཏྟཔརིཡཱཡེ ཝུཏྟཾ. ཏཾཔི ཨཏྟནོ པརེསཾ ཝཱ ཧཏྠཔཱདཱདཱིསུ གདྷིཏཾ ཏཎྷཾ སནྡྷཱཡ ཝུཏྟཾ. ནཀམྨཱདཱིསཱུཏི སཀྐཱ ཝཏྟུནྟི. ¶ ཨུཔལབྷིཏབྦ བྷཝཱནུརཱུཔནྟི ཨུཔལབྷིཏབྦོ བྷཝོ ཡདི སུགཏིབྷཝོ ཧོཏི, ཏཾ ཨསྶཱདནཱཀཱརེན. ཡདི དུགྒཏིབྷཝོ ཧོཏི, ཏཾ ཨནསྶཱདནཱཀཱརེནཱཏི ཨེཝཾ ཨུཔལབྷི ཏབྦསྶ བྷཝསྶ ཨནུརཱུཔཾ. ཏཏྠོཎཏཾཝཱཏི ཏསྨིཾ ཡཐོ པཊྛིཏེ ཨཱརམྨཎེ ཨོཎམནྟཾཨེཝ. ཏཐཱ ཧི བཱལཔཎྜིཏསུཏྟེ ཏཱནིསྶ ཏསྨིཾ སམཡེ ཨོལམྦནྟི ཨཛ྄ཛྷོལམྦནྟི ཨབྷིཔྤལམྦནྟཱིཏི ཝུཏྟཾ. ཏཏྠ ཏཱནིསྶཱཏི ཨསྶ པུགྒལསྶ ཏཱནི པུཉྙཱཔུཉྙ ཀམྨཱནི. ཀམྨསཱིསེན ཝུཏྟཱནི ཀམྨནིམིཏྟ གཏིནིམིཏྟཱནིཙ. ཨོལམྦནྟཱིཏི ཏསྶ ཙིཏྟསནྟཱནཾ ཨཏྟནིཨེཝ ཨོཎམནྟཾ ཨཛ྄ཛྷོཎམནྟཾ ཨབྷིམུཁཱིབྷཱུཏཾ ཀཏྭཱ ལམྦནྟི པལམྦནྟི. བནྡྷིཏྭཱ ཨཱཀཌྜྷནྟཱནི ཝིཡ ཨུཔཊྛཧནྟཱིཏི ཨཏྠོ. ཨེཝཾ པན ཏེསུ ཏཐཱ ཨོལམྦནྟེསུ ཏཾཙིཏྟསནྟཱནཾ ཏེསུ ནིནྣཔོཎཔབྦྷཱརམེཝ ཧོཏཱིཏི ཝུཏྟཾ ཏཏྠོཎཏཾཝཱཏི. ཏཐཱ ཧི ཨཊྛཀཐཱཡཾ ཀིལེསབལཝིནཱམིཏཾ སུཏྭཱ ཏདེཝཾ པཝཏྟམཱནཾ ཏཎྷཱཨཝིཛྫཱནཾ ཨཔྤཧཱིནཏྟཱ ཨཝིཛྫཱཡ པཊིཙྪཱ དིཏཱདཱིནཝེ ཏསྨིཾ ཝིསཡེ ཏཎྷཱ ནཱམེཏི སཧཛཱཏ སངྑཱརཱ ཁིཔནྟཱིཏི ཝུཏྟཾ. ཏཏྠ ཏནྟི ཝིཉྙཱཎཾ. ཙིཏྟསནྟཱནཾ ཨིཙྩེཝ ཨཏྠོ. ཏསྨིཾཝིསཡེཏི ཀམྨཱདིཨཱརམྨཎེ. ཏཎྷཱནཱམེཏཱིཏི ཝཊྚམཱུལཀ ཏཎྷཱ ཏཾ ཏསྨིཾ ཨོཎམནྟཾ ཀཏྭཱ ནིཡོཛེཏཱིཏི ཨཏྠོ.

[༡༦༥] ཝིབྷཱཝནིཡཾ པན

‘‘ཏཏྠོཎཏཾཝཱཏི ཏསྨིཾ ཨུཔཔཛྫིཏབྦབྷཝེ ཨོཎཏཾ ཝིཡ ཨོཎཏཾཨེཝ ཝཱ’’ཏི ཝུཏྟཾ. ཏཾ ཨཊྛཀཐཱཡ ན སམེཏི.

ཨབྷིཎྷནྟི ནིརནྟརཾ. ཏཐཱཔཝཏྟི པན སཎིཀཾ མརནྟཱནཾ ཨེཝ ལབྦྷཏི. ལཧུཀ མརཎེན མརནྟཱནཾ པན ན ལབྦྷཏཱིཏི ཝུཏྟཾ. བཱཧུལླེནཱཏི

[༡༦༦] ཡཾ པན ཝིབྷཱཝནིཡཾ

‘‘བཱཧུལླེནཱཏིཨེཏྠ ཨདྷིཔྤཱཡོ ཡེབྷུཡྻེན བྷཝནྟརེཏི ཨེཏྠ ཝུཏྟནཡེན དཊྛབྦོ’’ཏི ཝུཏྟཾ. ཏཾ ན ཡུཛྫཏི.

ན ཧི ཏསྨིཾ ཝུཏྟཱནཾ ཨསཉྙིསཏྟཱནཾ ཙིཏྟསནྟཱནསྶ ཨབྷིཎྷཔྤགཏྟིཔསངྒོནཱམ ཨཏྠི. ཙིཏྟསནྟཱནསྶེཝ ཏེསཾ ཨབྷཱཝཏོཏི. ཨིདཱནི ¶ ཨཔརེན པཀཱརེན ཀམྨུ པཊྛཱནཾ དསྶེཏུཾ ཏམེཝཝཱ པན.ལ. དྭཱརཔཏྟཾ ཧོཏཱིཏི ཝུཏྟཾ. ཏཏྠ ཨབྷིནཝཀརཎཝསེན དྭཱརཔྤཏྟཾ ཧོཏཱིཏི པུབྦེ ཀཏསཉྙཾ ཨཛནེཏྭཱ ཏངྑཎེ ཨེཝ ཀརཎཱཀཱརཾ ཛནེཏྭཱ ཨཏྟཱནཾ ཨབྷིནཝཾ ཝིཡ ཀཏྭཱ མནོདྭཱརེ ཏཾསདིསཛཝནཔྤཝཏྟིཝསེན པཏྟཾ པཱཏུབྷཱུཏཾ ཧོཏཱིཏི ཨཏྠོ. ཡཐཱ ཧི ཨིམསྨིཾབྷཝེཔཝཏྟཾ ཀིཉྩི པཱཀཊཾ ཀམྨཾ ཨསུཀསྨིཾ ཀཱལེ ཨིདཾནཱམམཡཱཀཏནྟི ཨེཝཾ པུབྦེཀཏསཉྙཾ ཛནེཏྭཱཔི ཨུཔཊྛཱཏི. ན ཏཐཱ བྷཝནྟརེ པཝཏྟཾ བྷཝཔཊིཙྪནྣཾཉྩ ཨིམསྨིཾ བྷཝེ པཝཏྟཾ ཨཔཱཀཊཉྩཱཏི. ཨཔིཙ, ཨིདྷེཀཙྩེ བུདྡྷཱདཱིསུ ཏཱིསུ ཝཏྠུསུ དཱནཔཱུཛཱདིཝསེན ཨཱཙིཎྞབཧུལཱ ཧོནྟི. ཏེ མརཎནྟི ཀཱབཱདྷབལེན ཝིསཱིདཔྤཏྟཱ ཀིཉྩི དུཀྑཾཨཛཱནིཏྭཱ ཝིསཱིདནྟརེ པུབྦེ ཝིཡ བྷིཀྑུསངྒྷསྶ དཱནཾ དེནྟཱཙེཏིཡཾ ཝནྡནྟཱ པཱུཛཾ ཀརོནྟཱ ཝིཔྤསནྣཙིཏྟཱ པམོདཙིཏྟཱ ཨེཝ ཧོནྟི. ཏབྦིཔརཱིཏེན པཱཔཀམྨབཧུལཱཔི ཝཏྟབྦཱཏི. ཨིདཾཔི དྭཱརཔཏྟམེཝཱཏི. སབྦཉྩེཏཾ ལཀྑཎ སཾཡུཏྟཊྛཀཐཱཡ དཱིཔེཏབྦཾ. ཏཏྠ ཨསིལོམཔེཏཱདི པཏྠཱུསུ ཏསྶ ཨུཀྑིཏྟཱསིཀབྷཱཝོཝ ནིམིཏྟཾ ཨཧོསཱིཏི ཙ. ཏསྶ སཏྟིཡཱ ཝིཛ྄ཛྷནཀ བྷཱཝོཝ ནིམིཏྟཾ ཨཧོསཱིཏིཙ. ཏསྶ ཨུསུནཱ ཝིཛ྄ཛྷནཀབྷཱཝོཝ ནིམིཏྟཾ ཨཧོསཱིཏིཙ. ཏསྶ པཏོདསཱུཙིཡཱ ཝིཛ྄ཛྷནཀབྷཱཝོཝ ནིམིཏྟཾ ཨཧོསཱིཏིཙ. ཏསྶ སཱུཙཱིཧི པཏོདནདུཀྑཾ པཙྩནུབྷཝིཏུཾ ཀམྨམེཝ ནིམིཏྟཾ ཀཏྭཱ སཱུཙིལོམཔེཏོ ཛཱཏོཏིཙ ཨེཝཾ བཧུཾདྭཱར པཏྟཝསེན ཀམྨུཔཊྛཱནཾ ཝུཏྟནྟི. ཏཏྠ ཧི ཏསྶ ཨུཀྑིཏྟཱསིཀ བྷཱཝོཝ ནིམིཏྟཾ ཨཧོསཱིཏི ཏསྶ ནིརཡེ པཙིཏྭཱ པུན ཨཱསནྣ མརཎསྶ ཏཾཀམྨཾ ཏདཱ ཏསྶ ཨུཀྑིཏྟཱསིཀསཉྙཾ ཛནེཏྭཱ དྭཱར པཏྟཝསེན ནིམིཏྟཾ ཨཧོསཱིཏི ཨཏྠོ. ཨེསནཡོ སེསེསུཔཱིཏི. སོཙ དྭཱརཔྤཏྟཱཀཱརོ ཀམྨཀོཊྛཱསིཀོ ཨེཝ ཧོཏི. ཏསྶ སཏྟསྶཙ ཨཔཱཀཊོནཱམ ནཏྠཱིཏི ཏསྶ པཊིསནྡྷིཡཱ གཧཎཡོགྱཏཱ ཛཱཏཱཏི. པཙྩཱསནྣ མརཎསྶཱཏི ཨནྟིམ ཛཝནཔཝཏྟིཝསེན པུན ཨཱསནྣམརཎསྶ. ཝཱིཐིཙིཏྟཱ ཝསཱནེཝཱཏི ཀཱམབྷཝཏོ ཙཝིཏྭཱ ཀཱམབྷཝེཡེཝ ཨུཔྤཛྫམཱནཱནཾ ཛཝན པརིཡོསཱནཱནཾཝཱ ཏདཱརམྨཎ པརིཡོསཱནཱནཾཝཱ ཝཱིཐིཙིཏྟཱནཾ ཨཝསཱནེ. ¶ ཨིཏརེསཾ པན ཛཝནཔརིཡོསཱནཱནཾཨེཝ ཝཱིཐིཙིཏྟཱནཾ ཨཝསཱནེཏི ཨཏྠོ. ཨཡམཏྠོ ཨཊྛཀཐཱཡཾཔི ཝུཏྟོཡེཝ. ཡཐཱཧ-ཏཾ ཨཱརབྦྷ ཨུཔྤནྣཱཡ ཏདཱརམྨཎཔརིཡོསཱནཱཡ སུདྡྷཱཡཝཱ ཛཝནཝཱིཐིཡཱ ཨནནྟརཾ ཙུཏིཙིཏྟཾ ཨུཔྤཛྫཏཱིཏི.

[༡༦༧] ཝིབྷཱཝནིཡཾ པན

‘‘ཏཏྠ ཀཱམབྷཝཏོ ཙཝིཏྭཱ ཏཏྠེཝ ཨུཔྤཛྫམཱནཱནཾ ཏདཱརམྨཎཔརིཡོསཱནཱནི སེསཱནཾ ཛཝནཔརིཡོསཱནཱནཱིཏི དྷམྨཱནུསཱརཎིཡཾ ཝུཏྟ’’ནྟི ཝུཏྟཾ. ཏཾ ན སུནྡརཾ.

ཨཊྛཀཐཱཡཉྷི པརིཔུཎྞཾ ཀཏྭཱ ཝུཏྟེ ཀིཾཨཔརིཔུཎྞཱཡ དྷམྨཱ ནུསཱརཎིཡཱཏི. བྷཝངྒཀྑཡེཝཱཏི བྷཝངྒཱཝསཱནེཝཱ ཨིཙྩེཝཏྠོ. ཡདི དུཝིདྷཔཱིཐིཙིཏྟཏོ པརཾ པཉྩཝོཀཱརེ ཝཏྠུརཱུཔཾ ཙཏུཝོཀཱརེ ཙིཏྟསནྟཱནཾ དྭིཙིཏྟཀྑཎཱཡུསེསཾ ཧོཏི. ཏདཱ ཨེཀསྶ བྷཝངྒསྶ ཨཝསཱནེཏི ཝུཏྟཾ ཧོཏི. ཨེཏྠཙ སོམནསྶ པཊིསནྡྷིཀསྶ དོམནསྶཙིཏྟེན ཙཝནྟསྶ ཨཱགནྟུཀབྷཝངྒ སམྦྷཝོ. ཏཾ སམྦྷཝེཙ སཏི ཨཉྙབྷཝངྒསམྦྷཝོཔི ཨཝཱརི ཏོཏི སུཝུཏྟམེཏཾ བྷཝངྒཀྑཡེཝཱཏི. ཏསྨིཾནིརུདྡྷཱཝསཱནེཏི ཏསྨིཾ ནིརུདྡྷེ ཏསྶ ནིརུདྡྷསྶ ཨཝསཱནེ. ཡེ པན ལོཀེ ཙུཏི པཊིསནྡྷཱིནཾ ཨནྟརེ ཨེཀོ ཨནྟརཱབྷཝོནཱམ ཨཏྠི. ཡཏྠ ཨུཔྤནྣོ སཏྟོ དིབྦཙཀྑུཀོ ཝིཡ ཨིདྡྷིམཱ ཝིཡ ཙ ཁཎེན ཨིཙྪིཏཾ ཋཱནཾ གནྟུཾ སམཏྠོ. ཨིཏོ ཙུཏཱ ཀེཙི ཏཏྠ ཨུཔྤཛྫིཏྭཱ མཱཏཱཔིཏུ སམཱགམཱདཱིནི ཨཱགམེནྟཱ སཏྟཱཧཾཝཱ ཨཏིརེཀ སཏྟཱཧཾཝཱ ཏིཊྛནྟཱིཏི ལདྡྷིཾ གཎྷནྟི. ཏེསཾ ཏཾནིསེདྷེཏུཾ ཏསྶཱནནྟརམེཝཱཏི ཝུཏྟཾ. སཝཏྠུཀཾ པཉྩཝོཀཱརེ ཨཝཏྠུཀམེཝཝཱ ཙཏུཝོཀཱརེ. ཡཐཱརཧནྟི ཀུསལབྷཱུཏསྶཝཱ ཨཀུསལབྷཱུཏསྶ ཝཱ སངྑཱརསྶ ཨརཧཱནུརཱུཔཾ. ཨཝིཛྫཱཏཎྷཱནུསཡཱ ཀུསལབྷཱུཏསྶ ཨཔྤཧཱིནཊྛེན ཨཀུསལབྷཱུཏསྶ པན སཧཛཱཏབྷཱཝེནཱཔི པརིཝཱརབྷཱུཏཱ མཱུལབྷཱུཏཱཙ ཧོནྟཱིཏི ཨཏྠོ. པརིཡུཊྛཱནཱཝཏྠཾ ཨཔཏྭཱ ཀུསལཱབྱཱཀཏཙིཏྟསནྟཱནེནཔི ཨཝིརུདྡྷབྷཱཝེན ཨནུརཱུཔཾ. ཨནུབནྡྷམཱནོཝཱ སེཏི, ཨནུཨནུཝཱནིརནྟརཾ སེཏཱིཏི ཨནུསཡོ. ཨནུསཡབྷཱུཏཱཡ ¶ ཨཝིཛྫཱཡ པརིཀྑིཏྟོཏི ཨཝིཛྫཱནུསཡཔརིཀྑིཏྟོ. ཏཎྷཱནུསཡོ མཱུལཾ ཨེཏསྶཱཏི ཏཎྷཱནུསཡ མཱུལཀོ. ཨཝིཛྫཱནུསཡ མཱུལཀེན ཏཎྷཱནུསཡ པརིཀྑིཏྟེནཱཏི པན ཝུཏྟེ སུཊྛུཏརཾ ཡུཛྫཏི. ཨཝིཛྫཱ ཧི ཏཎྷཱཡཔི མཱུལབྷཱུཏཱ ཧོཏི. ཏཱཡ པཊིཙྪཱདིཏཱདཱིནཝེ ཨེཝ ཨཱརམྨཎེ ཏཎྷཱཔཝཏྟིསམྦྷཝཏོ. ཏཎྷཱ ཙ པན སཧཀཱརི ཀཱརཎ བྷཱཝེན ཏཾ ཏཾ སངྑཱརཾ ནིཡོཛེནྟཱི པཝཏྟཏཱིཏི སངྑཱརསྶ པརིཝཱརབྷཱུཏཱ བལཝཨཱསནྣ སཧཱཡབྷཱུཏཱ ཧོཏཱིཏི.

ཨེཏྠཙ ཨཀུསལཀམྨ སཧཛཱཏཱནཾཝཱ ཀམྨནིཀནྟི ནིམིཏྟནིཀནྟི སཧཛཱཏཱནཾཝཱ ཝིཔྤཊིསཱར སཧ ཛཱཏཱནཾཝཱ མརཎཱསནྣ ཛཝན སཧཛཱཏཱནཾཝཱ ཨཝིཛྫཱཏཎྷཱནཾཔི དྷམྨཏོ ཨནུསཡསདིསཏཱཡ ཨནུསཡ ཝོཧཱརསམྦྷཝོ ཝེདིཏབྦོ. ཨཔིཙ, ཨནུསཡཱནཱམ པཊིསནྡྷིཛནནེ ཀུསལསངྑཱརསྶཔི བལཝསཧཱཡབྷཱུཏཱ ཧོནྟི. ཏསྨཱ ཨིདྷ ཨེཀནྟཱནུསཡབྷཱུཏཱཨེཝ པརིཡཏྟཱཏི ཀིཾསཧཛཱཏཱནཾ གཧཎེནཱཏི. ཏེནེཝ ཨཊྛཀཐཱཡཾཔི ཏཎྷཱ ཨཝིཛྫཱནཾ ཨཔྤཧཱིནཏྟཱཏི ཨེཝཾ ཨཔྤཧཱིནསདྡེན ཨེཀནྟཱནུསཡཱཨེཝ གཧིཏཱཏི. སངྑཱརེནཱཏི པཊིསནྡྷིཛནཀཀམྨསངྑཱཏེན ཙེཏནཱསངྑཱརེན. ཏཾ སཧཛཱཏཕསྶཱདིདྷམྨསམཱུཧེནཔིཝཱ. སོཔི ཧི ཨུཔནིསྶཡབྷཱཝེ ན པཊིསནྡྷིཾ ཛནེཏིཡེཝཱཏི. ཨཐཝཱ, སངྑཱརེནཱཏི མརཎསནྣ ཛཝནཝིཉྙཱཎ སཧཛཱཏེན ཙེཏནཱསངྑཱརེན. ཏཾ སཧཛཱཏ ཕསྶཱདིདྷམྨསམཱུཧེནཔིཝཱ. ཏདུབྷཡཾཔི ཧི ཀམྨཱདིཝིསཡེ ཁིཔནཀ སངྑཱརབྷཱཝེན པཊིསནྡྷིཾ ཛནེཏཱིཏི. ཏཐཱ ཧི ཨཊྛཀཐཱཡཾ ཏཎྷཱ ཨཝིཛྫཱནཾ ཨཔྤཧཱིནཏྟཱ ཨཝིཛྫཱཡ པཊིཙྪཱདིཏཱདཱིནཝེ ཏསྨིཾ ཝིསཡེ ཏཎྷཱ ནཱམེཏི. སཧཛཱཏསངྑཱརཱ ཁིཔནྟཱིཏི ཝུཏྟཾ. མཱུལཊཱིཀཱཡཉྩ སཧཛཱཏསངྑཱརཱཏི ཙུཏིཨཱསནྣཛཝནཝིཉྙཱཎསཧཛཱཏཱ ཙེཏནཱ. སབྦེཔིཝཱ ཕསྶཱདཡོཏི ཝུཏྟཾ. སཀལེན པན ཝཙནེན ཨགྒམགྒེན ཨཔྤཧཱིནཱ ཨཝིཛྫཱཀམྨཱདིཝིསཡེཝཱ བྷཝནྟརེཝཱ ཨཱདཱིནཝཾ པཊིཙྪཱདེཏི, ཏཐཱ རཱུཔཱཡེཝ ཏཎྷཱ ཏདུབྷཡསྨིཾ ཙིཏྟསནྟཱནཾ ནཱམེཏི. ཡཐཱཝུཏྟསངྑཱརཱ ཏཾ ཏཏྠ ཁིཔནྟི. ཏསྨིཾ ཨབྷིནཝ ཝིཉྙཱཎཔཱཏུབྷཱཝཾ སཱདྷེནྟཱིཏི དསྶེཏཱིཏི.

སམྤཡུཏྟེཧི ¶ པརིགྒཡ྄ཧམཱནནྟི ཕསྶཱདཱིཧི སམྤཡུཏྟདྷམྨེཧི པརིཝཱརེཏྭཱ གཡ྄ཧམཱནཾ. སཧཛཱཏཱནནྟི ནཱམརཱུཔདྷམྨཱནཾ. ཨདྷིཊྛཱན བྷཱཝེནཱཏི ནིསྶཡབྷཱཝེན. པུབྦངྒམབྷཱུཏནྟི པདྷཱནབྷཱུཏཾ. པད དྭཡེན ཝིཛཱནནདྷཱཏུཡཱ ཨཏིཝིཡ མཧཱནུབྷཱཝབྷཱཝཾ དསྶེཏི. ཡཐཱ ཧི ལོཀེ ཨེཀསྨིཾ མཧཱནུབྷཱཝེ པུརིསཝིསེསེ ཛཱཡམཱནེ པརིཝཱརབྷཱུཏཱ སཧཛཱཏཛནཱཙ ཏསྶ ཨུཔབྷོག པརིབྷོགབྷཱུཏཱ པཱསཱདཀཔྤརུཀྑཱདཡོཝ ཏེན སཧ ཛཱཡནྟི. ཨེཝཾ སམྤདམིདཾ དཊྛབྦཾ. བྷཝནྟརཔཊིསནྡྷཱནཝསེནཱཏི ཨེཀསྨིཾབྷཝེ ནིརུདྡྷེ ཏེན སཧ ནིརནྟརཾ ཀཏྭཱ བྷཝནྟརསྶ པཊིསནྡཧན ཝསེན. ཨུཔྤཛྫམཱནམེཝ པཏིཊྛཱཏི ན པུརིམབྷཝེ ཨུཔྤཛྫིཏྭཱ ཨནིརུཛ྄ཛྷིཏྭཱ ཋིཏིབྷཱཝེན གནྟྭཱ བྷཝནྟརེ པཏིཊྛཱཏཱིཏི ཨདྷིཔྤཱཡོ. ན ཧི ཨུཔྤནྣུཔྤནྣཱ དྷམྨཱ པཀཏིཀཱལེཔི དེསནྟརཾཝཱ ཁཎནྟརཾཝཱསངྐནྟཱ ནཱམ ཨཏྠི. ཀུཏོ མརཎཀཱལེ བྷཝནྟརཾ. ཡཉྩ ཨནམཏགྒོ ཡཾ བྷིཀྑཝེ སཾསཱརོ. པུབྦཀོཊི ནཔཉྙཱཡཏི ཨཝིཛྫཱནཱིཝརཎཱནཾ སཏྟཱནཾ ཏཎྷཱསཾཡོཛནཱནཾ སནྡྷཱཝཏཾ སཾསརཏནྟི ཝུཏྟཾ, ཏཾཔི པརིཡཱཡེན ཝུཏྟཾ. ཡེསཉྷི ཨཝིཛྫཱ ཏཎྷཱསངྑཱརཱནཾ ཝསེན བྷཝནྟརེ པཊིསནྡྷི པཱཏུབྷཝཏི. ཏེཙ པུབྦེ ཡསྶ སནྟཱནེ པཝཏྟནྟི, སོ ཏེསཾ ཧེཏུཕལསམྦནྡྷེན བྷཝནྟརཾ སནྡྷཱཝཏི སཾསརཏཱིཏི ཝུཙྩཏཱིཏི. ཏཏོཡེཝཙ ཏསྶཱ པཊིསནྡྷིཡཱ པུརིམབྷཝཔརི ཡཱཔནྣེཧི ཧེཏཱུཧི ཝིནཱ ཨནུཔྤཛྫནཾཔི སིདྡྷཾ ཧོཏཱིཏི. པཊིགྷོས པདཱིཔམུདྡྷཱདཱིནི ཙེཏྠ ནིདསྶནཱནཱིཏི.

ཨེཏྠཱཏི མརཎུཔྤཏྟིཊྛཱནེ. མནྡཔྤཝཏྟཱནཱིཏི ཀམྨདུབྦལབྷཱཝེན ཝཏྠུདུབྦལབྷཱཝེནཙ མནྡཾ ཧུཏྭཱ པཝཏྟཱནི. ཏསྨཱ པཙྩུཔྤནྣཱ ལམྦཎཀཱ ལབྦྷཏཱིཏི སམྦནྡྷོ. དྷརནྟེསྭེཝཱཏི ཏིཊྛནྟེསུ ཨེཝ. པཊིསནྡྷི བྷཝངྒཱནཾཔཱིཏི པཊིསནྡྷིཡཱཔི ཀཏིཔཡབྷཝངྒཱནཾཔི. ཨིཏི ཀཏྭཱཏི ཨིམིནཱ ཀཱརཎེན. ཀཱམཉྩེཏྠ ཨཊྛཀཐཱཡཾ གཏིནིམིཏྟཾནཱམ ནིབྦཏྟནཀཨོཀཱསེ ཨེཀོ ཝཎྞོ ཨུཔཊྛཱཏཱིཏི ཝཏྭཱ སབྦེསུ གཏིནིམིཏྟཝཱརེསུ གབྷིནིམིཏྟཾ ཝཎྞཱཡཏནམེཝ མནོདྭཱར གཧིཏམེཝ པཙྩུཔྤནྣམེཝཙ དསྶིཏཾ. ཏཐཱཔི ཚདེཝལོཀཏོ ཨཏྟནོ སནྟིཀཾ ཨཱགཏེ དིབྦརཐེཡེཝ གཏིནིམིཏྟཾ ཀཏྭཱ ཙཝནྟཱནཾ ¶ དྷམྨིཀཨུཔཱསཀ དུཊྛགཱམཎི ཨབྷཡརཱཛཱདཱིནཾ ཝསེན ཏཾཔི ཀམྨནིམིཏྟཾཝིཡ ཚབྦིདྷཾཔི ཚདྭཱརགཧིཏཾཔི པཙྩུཔྤནྣམཏཱིཏཾཔི སམྦྷཝཏཱིཏི ཨདྷིཔྤཱཡེན ཏཾཀམྨནིམིཏྟེན ནིབྦིསེསཾ ཀཏྭཱ ཀཱམཱཝཙརཔཊིསནྡྷིཡཱ.ལ. ཨུཔལབྦྷཏཱིཏི ཝུཏྟཾ. ཏཐཱ ཙཝནྟཱ ཧི དིབྦཝཎྞོཔི དེཝཏཱནཾ ཨཱནུབྷཱཝེན ཙཀྑུནཱ དིཊྛོཡེཝ ཧོཏི. དིབྦོ རཐསདྡོཝཱ ཏཱུརིཡསདྡོཝཱ ཝཙནསདྡོཝཱ སོཏེན སུཏོཡེཝ. དིབྦགནྡྷོཔི གྷཱནེན གྷཱཡིཏོཡེཝ. ནིརཡཏོ ཨུགྒཏེན ཨགྒིཛཱལེན དཡ྄ཧམཱནཀཱཡེན ཙཝནྟཱནཾ དེཝདཏྟ ནནྡཡཀྑ ནནྡམཱཎ ཝཀཱདཱིནཾ ཁུརཙཀྐེ ཨཱསཛྫམཱནཱནཾ མིཏྟཝིནྡཀཱདཱིནཉྩ ཝསེན ཕོཊྛབྦཾཔི སམྦྷཝཏིཡེཝ. རསདྷམྨཱཔི ཡཐཱ སམྦྷཝཾ ཡོཛེཏབྦཱཏི. ཝུཏྟཉྩ སཙྩསངྑེཔེ –

པཉྩདྭཱརེ སིཡཱ སནྡྷི, ཝིནཱ ཀམྨཾ དྭིགོཙརེཏི.

མཧཱཊཱིཀཱཡཾཔི ཨཡམཏྠོ ཝུཏྟོཡེཝ. ཡདཱ པན ཨནྟིམ ཛཝནཝཱིཐིཏོ པུབྦབྷཱགེ ཡཐོཔཊྛིཏཾ གཏིནིམིཏྟཾ ཨནྟིམཛཝནསྶ ཨཱརམྨཎཾ ཧོཏི. ཏདཱ ཏཾ ཨཏཱིཏཾཔི ཧོཏིཡེཝཱཏི. ཨཊྛཀཐཱཡཾ པན སནྟཏིཝསེན ཏསྶ པཙྩུཔྤནྣཏཱཝ ཝུཏྟཱ. ཏཐཱ ཝཎྞཱརམྨཎབྷཱཝོ མནོདྭཱརེན གཧིཏབྷཱཝོཙ ཡེབྷུཡྻེན ཝུཏྟོཏི ཝེདིཏབྦོ. ཨིཏརཐཱ ཀམྨནིམིཏྟཾཔི པཙྩུཔྤནྣབྷཱུཏཾ པཉྩདྭཱརེཨེཝ ཨཊྛཀཐཱཡཾ དསྶིཏནྟི ཏཾཔི མནོདྭཱརགཧིཏཾ པཙྩུཔྤནྣབྷཱུཏཾ པཉྩཱརམྨཎཾཝཱ དྷམྨཱརམྨཎཾཝཱ ནསམྦྷཝཏཱིཏི ཝཏྟབྦཾ སིཡཱ. ནཙ སཀྐཱ ཏཐཱ ཝཏྟུཾ. ཀསྨཱ, ཙཀྑུཾ ཨནིཙྩཏོ དུཀྑཏོ ཨནཏྟཏོ ཝིཔསྶནྟཱིཏིཨཱདིནཱ པཊྛཱནེ ཝུཏྟསྶ ཚལཱ༹རམྨཎ བྷཱུཏསྶ པུརེཛཱཏཔཙྩཡསྶ མནོདྭཱརིཀ མརཎཱསནྣ ཛཝནཱནམྤི ཨིཙྪིཏབྦཏྟཱ. ཏཏོཡེཝཙ ཏདནུབནྡྷཱཡ པཊིསནྡྷིཡཱཔི སམྦྷཝ ཏོཏི.

[༡༦༨] ཝིབྷཱཝནིཡཾ པན

ཏཐཱ ཨཝིཙཱརེཏྭཱ ཡཾཝུཏྟཾ ‘‘པཙྩུཔྤནྣཱརམྨཎེསུ ཨཱཔཱཏམཱགཏེསུ མནོདྭཱརེ གཏིནིམིཏྟཝསེན པཉྩདྭཱརེ ཀམྨནིམིཏྟཝསེནཱ’’ཏི. ཏཾ ན སུནྡརཾ.

[༡༦༩] ཡཉྩ ཏཏྠ

‘‘ཚདྭཱརགཧིཏནྟི ཀམྨནིམིཏྟཾ ཚདྭཱརགཧིཏཾ གཏིནིམིཏྟཾ ཚཊྛདྭཱརགཧིཏནྟི ཡཐཱསམྦྷཝཾ ཡོཛེཏབྦ’’ནྟི ཝུཏྟཾ. ཏཾཔི ན ཡུཛྫཏི.

ཨེཝཉྷི སཏི ཀམྨཾ ཝིཡ གཏིནིམིཏྟཾཔི ཐེརེན བྷིནྡིཏྭཱ ཝུཏྟཾ སིཡཱ. ནཙ ཏཾ ཝུཏྟནཡེན པཉྩདྭཱརགཧིཏཾ ན སམྦྷཝཏཱིཏི.

[༡༧༠] ཡཉྩ ཏཏྠ

ཨཊྛཀཐཱཡཾ མཱུལ ཊཱིཀཱདཱིསུཙ ཡེབྷུཡྻཝསེན ཝུཏྟཾ སཱཝསེསཔཱཋཾ ཨཝིཙཱརེཏྭཱ ‘‘ཨཊྛཀཐཱཡཾ པན གཏིནིམིཏྟཾ མནོདྭཱརེ ཨཱཔཱཏམཱགཙྪཏཱིཏི ཝུཏྟཏྟཱ ཏདཱརམྨཎཱཡཙ པཉྩདྭཱརིཀཔཊིསནྡྷིཡཱ ཨདསྶིཏཏྟཱ མཱུལཊཱིཀཱདཱིསུཙ ཀམྨ བལེན ཨུཔཊྛཱཔིཏཾ ཝཎྞཱཡཏནཾ སུཔིནཾ པསྶནྟསྶཝིཡ དིབྦ ཙཀྑུསྶ ཝིཡཙ མནོདྭཱརེཡེཝ གོཙརབྷཱཝཾ གཙྪཏཱིཏི ནིཡམེཏྭཱ ཝུཏྟཏྟཱ ཏེསཾ ཝཙནཾ ནསམྤཊིཙྪནྟི ཨཱཙརིཡཱ’’ཏི ཝུཏྟཾ. ཏཏྠཔི ཨསམྤཊིཙྪནྟཱནཾ ཨཉྙཾ ཀཱརཎཾ ནཏྠི ཨཉྙཏྲ ཨཝིཙཱརཎཱཡཱཏི.

པཙྩུཔྤནྣམཏཱིཏནྟི ཨེཏྠ ཡསྶ ཛཝནཱཝསཱནཱཡ པཉྩདྭཱརིཀཝཱིཐིཡཱ ཙཝནཾ ཧོཏི. ཏསྶ པཊིསནྡྷིཡཱ དྭིནྣཉྩ བྷཝངྒཱནཾ པཙྩུཔྤནྣཱ རམྨཎཏཱ ཨུཔལབྦྷཏི. ཡསྶ ཏདཱརམྨཎཱཝསཱནཱཡ, ཏསྶ པཊིསནྡྷིཡཱ ཨེཝ. ཡསྶ པན ཛཝནཱཝསཱནཱཡ པཙྩུཔྤནྣཱརམྨཎཱཡ མནོདྭཱརིཀཝཱིཐིཡཱ ཙཝནཾ ཧོཏི, ཏསྶ པཊིསནྡྷིཡཱ ཚནྣཉྩ བྷཝངྒཱནཾ. ཡསྶ པན ཏདཱརཎཱཝསཱནཱཡ, ཏསྶ པཊིསནྡྷིཡཱ ཙཏུནྣཉྩ བྷཝངྒཱནནྟི. ཨེཏྠཙ ཨཱརམྨཎེ བཧུཏརཱཡུཀེ བལཝནྟེཔི ཝཏྠུདུབྦལབྷཱཝེ སཏི ཀཱམསཏྟཱནཾཔི ཛཝནཱཝསཱནཱ ཝཱིཐི ཧོཏིཡེཝཱཏི དཊྛབྦཾ. ཨཊྛཀཐཱཡཾ པན ཏདཱརམྨཎཱཝསཱནཱཡ ཨེཝ ཡོཛིཏཏྟཱ མནོདྭཱརེ པཊིསནྡྷིཏོ པརཾ ཙཏུནྣཾ བྷཝངྒཱནཾ པཉྩདྭཱརེ པཊིསནྡྷིཡཱཨེཝ པཙྩུཔྤནྣཱརམྨཎཏཱ ཝུཏྟཱ. ཏདཱརམྨཎ པརིཡོསཱནཱཡཝཱ སུདྡྷཱཡཝཱ ཛཝནཝཱིཐིཡཱཏི ཝུཏྟཏྟཱ པན ཨིདྷ ཛཝནཱཝསཱནཱཔི ཡོཛིཏཱཏི ཝེདིཏབྦཱ.

[༡༧༡] ཝིབྷཱཝནིཡཾ པན

ཨེཝཾ ¶ ཨཝིཙཱརེཏྭཱ ཡཾ ཝུཏྟཾ ‘‘མནོདྭཱརེ ཏཱཝ པཊིསནྡྷིཡཱ ཙཏུནྣཾ བྷཝངྒཱནཉྩ པཉྩདྭཱརེ པཊིསནྡྷིཡཱཨེཝ པཙྩུཔྤནྣཱརམྨཎཏཱ ལབྦྷཏཱི’’ཏིཨཱདི. ཏཾ ཨནུཔཔནྣཾ.

ཨེཏྠཙ ཡསྨཱ པཊིསནྡྷིཛནཀསྶེཝ ཀམྨསྶ ཨཱརམྨཎཾཝཱ ཨུཔཀརཎཾཝཱ ཀམྨནིམིཏྟནྟི ཨདྷིཔྤེཏཾ. པཉྩདྭཱརིཀཀམྨཉྩ པཊིསནྡྷིཛནཀམེཝ ན ཧོཏི. ཏསྨཱ ཏདཱ པཊིསནྡྷིཛནཀཾ ཀམྨཾ པུརིམབྷཱགེཨེཝ མནོདྭཱརཝསེན སིདྡྷཾ ཧོཏི. ཏསྶཙ ཨཱརམྨཎབྷཱུཏམེཝ ཨུཔཀརཎབྷཱུཏམེཝཝཱ ཨེཀནྟེན ཀམྨནིམིཏྟཾནཱམ ཧོཏི. ཡཾ པན པཉྩདྭཱརིཀསྶ ཨནྟིམཛཝནསྶ ཨཱརམྨཎཾ ཧོཏི. ཏཾ པུརིམེན ནིརུདྡྷེན ཨཱརམྨཎེན ཝཏྠུཏོ ཨབྷིནྣཏྟཱཝཱ ཏསྶདིསཏྟཱཝཱ ཀམྨནིམིཏྟནྟེཝ ཝུཙྩཏཱིཏི. ཏཐཱ ཧི ཝུཏྟཾ མཱུལཊཱིཀཱཡཾ པཉྩདྭཱརེ ཨཱཔཱཏཾ ཨཱགཙྪནྟཾ པཙྩུཔྤནྣཾ ཀམྨནིམིཏྟཾ ཨཱསནྣཀཏཀམྨཱརམྨཎ སནྟཏིཡཾ ཨུཔྤནྣཾ ཏཾསདིསཉྩ དཊྛབྦནྟི. ཏཏྠ ཡེསུ དེཡྻདྷམྨཝཏྠཱུསུ ཙེཏིཡཱདཱིསུཝཱ ཡེཧི སཏྠཱདཱིཧིཝཱ པུབྦེ ཀམྨཾ སིདྡྷཾ. ཏེསཾ པཙྩཀྑེ དྷརམཱནཏཾ སནྡྷཱཡ སནྟཏིཡཾ ཨུཔྤནྣནྟི ཝུཏྟཾ. ཏེཧི སདི སཝཏྠཱུནཾ དྷརམཱནཏཾ སནྡྷཱཡ ཏཾསདིསཉྩཱཏི ཝུཏྟཾ. སདིསཝཏྠཱུནིཔི ཧི ཀམྨསྶ ལདྡྷོཀཱསཀཱརཎཱནི ཧོནྟིཡེཝ. ཡཐཱ ཏཾ ཨིཏོ པརིཏྟཀེན པཱཔཀམྨེན ནིརཡེ ཨུསྶདསཱམནྟེ ནིབྦཏྟཱནཾ པུབྦེ པུཉྙཀརཎཀཱལེ ལདྡྷནིམིཏྟསདིསཾ ནིརཡགྒིཛཱལཱནཾ སདྡཾ སུཏྭཱཝཱ ཝཎྞཾ དིསྭཱཝཱ པུཉྙཾ སརིཏྭཱ ཙཝིཏྭཱ སགྒེ ནིབྦཏྟཱནཾ ཨགྒིཛཱལཱནི ཝིཡཱཏི.

[༡༧༢] ཝིབྷཱཝནིཡཾ པན

མཱུལཊཱིཀཱཔཱཋཾ ཨཝིཙཱརེཏྭཱ ཏཾསདིསཉྩཱཏིཨེཏྠ ནཊྛཙཀཱརཾ པཱཋཾ དིསྭཱ ‘‘མནོདྭཱརིཀ ཛཝནཱནཾ ཨཱརམྨཎབྷཱུཏེན སཧ སམཱནཏྟཱ ཏདེཀསནྟཏིཔཏིཏཾ ཙུཏིཨཱསནྣཛཝནགཧི ཏཾཔི པཙྩུཔྤནྣཾ ཝཎྞཱདིཀཾ ཀམྨནིམིཏྟ བྷཱཝེན ཝུཏྟ’’ནྟི ཝུཏྟཾ. ཏཾ ཨནུཔཔནྣམེཝ.

ཨཔིཙ, ¶ ཨཊྛཀཐཱཡཾ ཨཔརསྶ མརཎསམཡེ ཉཱཏཀཱ ཨཡཾ ཏཱཏ ཏཝཏྠཱཡ བུདྡྷཔཱུཛཱ ཀརཱིཡཏི. ཙིཏྟཾ པསཱདེཧཱིཏི ཝཏྭཱ པུཔྥདཱམདྷཛཔཊཱཀཱདིཝསེན རཱུཔཱརམྨཎཾཝཱ དྷམྨསཝནཏཱུརིཡཔཱུཛཱདི ཝསེན སདྡཱརམྨཎཾཝཱ དྷཱུམཝཱསགནྡྷཱདིཝསེན གནྡྷཱརམྨཎཾཝཱ ཨིདཾ ཏཱཝ སཱཡསྶུ, ཏཝཏྠཱཡ དཱཏབྦཾ དེཡྻདྷམྨནྟི ཝཏྭཱ མདྷུཕཱཎི ཏཱདིཝསེན རསཱརམྨཎཾཝཱ ཨིདཾ ཏཱཝ ཕུསསྶུ, ཏཝཏྠཱཡ དཱཏབྦཾ དེཡྻདྷམྨནྟི ཝཏྭཱ ཙཱིནཔཊ སོམཱརཔཊཱདིཝསེན ཕོཊྛབྦཱ རམྨཎཾཝཱ པཉྩདྭཱརེ ཨུཔསཾཧརནྟཱིཏི ཝུཏྟཾ. ཏཏྠ རཱུཔསདྡགནྡྷཱརམྨཎཱནི སནྡྷཱཡ ཊཱིཀཱཡཾ སནྟཏིཡཾ ཨུཔྤནྣནྟི ཝུཏྟཾ. རསཕོཊྛབྦཱ རམྨཎཱནི སནྡྷཱཡ ཏཾསདིསཉྩཱཏི ཝུཏྟཾ. ཏཱནི ཧི པཐམཾ སཱཡིཏ ཕུསིཏཱནི ཨཉྙཱནི ཧོནྟི. པཙྪཱ དིནྣཱནི ཨཉྙཱནཱིཏི ཨེཏྠཙ ཨེཝཾ ཨུཔསཾཧཊཱནི རཱུཔཱརམྨཎཱདཱིནི པཐམཾ པཉྩདྭཱརེན གཧེཏྭཱ ཨཙཝིཏྭཱ པཙྪཱ པུན ཨཏྠི དཱནི ཨེཝརཱུཔཱནཱིཏི སུདྡྷེན མནོདྭཱརེན གཧེཏྭཱ ཙཝནྟཱནཾ ཏཱནི མནོདྭཱརགཧིཏཱནི པཙྩུཔྤནྣབྷཱུཏཱནི ཀམྨནིམིཏྟཱནི ཧོནྟཱིཏི ཝེདིཏབྦཱནཱིཏི. པཐམཏཏཱིཡཱརུཔྤ པཊིསནྡྷཱིནཾ པཉྙཏྟི བྷཱུཏཾ དུཏཱིཡཙཏུཏྠཱརུཔྤཔཊིསནྡྷཱིནཾ མཧགྒཏབྷཱུཏནྟི ཝུཏྟཾ ཡཐཱརཧནྟི. ཨཱརུཔྤེསུ ཨུཔརིབྷཱུམིནིབྦཏྟཱནཾ ཨརཱུཔཱིནཾ ཧེཊྛིམཛ྄ཛྷཱནཱནི པཊིཔསྶམྦྷནྟི. ན ཙ ཏེ ཏཱནི པུན ཨཱཡཱུཧནྟཱིཏི ཝུཏྟཾ ཧེཊྛིམཱརུཔྤ ཝཛྫིཏཱཏི. པམཱདཔཀྑེ པཏིཏྭཱ ཝིསྶཊྛཛ྄ཛྷཱནཱནཾ ཏཏོཡེཝཙ ཨཔྤཧཱིནེཧི ཨོརམྦྷཱཝིཡ སཾཡོཛནེཧི ཧེཊྛབྷཱགཾ ཨཱཀཌྜྷིཏ མཱནསཱནཾ ཀཱམབྷཝེ ཨུཔྤཛྫམཱནཱནཾ ཏེསཾ ཐཔེཏྭཱ ཏིཧེཏུ ཀུཀྐཊྛབྷཱུཏཾ ཨུཔཙཱརཛ྄ཛྷཱནཙེཏནཾ ཨཉྙཾ དུབྦལཀམྨཾ ཨོཀཱསཾ ནལབྷཏཱིཏི ཝུཏྟཾ ཏཐཱ ཀཱམཏིཧེཏུཀཱཏི. ཏཐཱ ཧི ཨངྒུཏྟརཊྛ ཀཐཱཡཾ-ན ཧི ཏསྶ ཨུཔཙཱརཛ྄ཛྷཱནཏོ བལཝཏརཾནཱམ ཀམྨཾ ཨཏྠཱིཏི ཝུཏྟཾ. ཊཱིཀཱཡཉྩ ན ཧི ཏསྶ.ལ. ཨཏྠཱིཏི ཨིམིནཱ ཏཏོ ཙཝནྟཱནཾ ཨུཔཙཱརཛ྄ཛྷཱནམེཝ པཊིསནྡྷིཛནཀཾ ཀམྨནྟི དཱིཔེཏཱིཏི ཝུཏྟནྟི. རཱུཔཱཝཙརཔཊིསནྡྷི པན ཏེསཾ ནཏྠིཡེཝ. ཨེཝཉྩ ཀཏྭཱ ཡམཀེཨརཱུཔདྷཱཏུཡཱ ཙུཏསྶ ཨརཱུཔདྷཱཏུཾ ཨུཔཔཛྫནྟསྶཱཏིཝཱ ཨརཱུཔ དྷཱཏུཡཱ ཙུཏསྶ ཀཱམདྷཱཏུཾ ཨུཔཔཛྫནྟསྶཱཏིཝཱ ཝུཏྟཾ. ན པན ཝུཏྟཾ ཨརཱུཔདྷཱཏུཡཱ ཙུཏསྶ རཱུཔདྷཱཏུཾ ཨུཔཔཛྫནྟསྶཱཏི. རཱུཔ ལོཀཏོ ¶ ཙཝནྟཱནཾ པན ཨཉྙཾ དུབྦལཀམྨཾ ཨོཀཱསཾ ནལབྷཏཱིཏི ནཝཏྟབྦཾ. ཨེཝཾསནྟེཔི སུཊྛུ ཝིཀྑམྦྷིཏནཱིཝརཎཱནཾ ཏེསཾ ཨཔྤནཱ པཏྟཛ྄ཛྷཱནཝིསེསེན སུཔརིབྷཱཝིཏཙིཏྟསནྟཱནཏྟཱ ཛཙྩནྡྷཱདིཝིཔཏྟི ཛནཀཾ དྭིཧེཏུཀོམཀཀམྨཾཔི ཨོཀཱསཾ ན ལབྷཏི. ཀུཏོ ཨཔཱཡགཱམིཀམྨནྟི ཝུཏྟཾ ཨཧེཏུཀ རཧིཏཱ སིཡུནྟི.

[༡༧༣] ཝིབྷཱཝནིཡཾ པན

‘‘ཨུཔཙཱརཛ྄ཛྷཱནཱ ནུབྷཱཝེནེཝ དུཧེཏུཀ ཏིཧེཏུཀ པཊིསནྡྷིཡོ སིཡུ’’ནྟི ཝུཏྟཾ. ཏཾ ཝིཙཱརེཏབྦཾ.

ཡདི ཧི ཏཾ པཊིསནྡྷིདཱནཾ སནྡྷཱཡ ཝུཏྟཾ སིཡཱ. དུཧེཏུཀཔཊི སནྡྷི ན ཡུཛྫཏི. ན ཧི སུཊྛུ ཝིཀྑམྦྷིཏནཱིཝརཎཱནཾ ཨཔྤནཱཝཱིཐིཡཾ པཝཏྟཾ ཨུཔཙཱརཛ྄ཛྷཱནཾ ཏིཧེཏུཀོམཀཾནཱམ སམྦྷཝཏཱིཏི. ཨཐ ཀམྨནྟརསྶ ཨུཔཏྠམྦྷནཾ སནྡྷཱཡ ཝུཏྟཾ སིཡཱ. སཡཾ བལཝཏརསྶཔི སཏོ པཊིསནྡྷིཾ ཨདཏྭཱ དུབྦལསྶ ཀམྨནྟརསྶ ཨུཔཏྠམྦྷནེ ཀཱརཎཾ ནཏྠཱིཏི. ཡསྨཱ པན རཱུཔབྲཧྨཱནཾ ཨུཔཙཱརཛ྄ཛྷཱནཏོ ཨཉྙཱནིཔི ཀཱཡཝཙཱིམནོཀམྨཀུསལཱནི ཨུཔྤཛྫནྟིཡེཝ ཏཱནིཡེཝཙ ཀཱནིཙི ཏིཧེཏུཀོམཀཱནིཔི ཀཱནིཙི དྭིཧེཏུཀུཀྐཊྛཱནིཔི བྷཝནྟི. ཨོལཱ༹རིཀཱནཾ པན ནཱིཝརཎཱནཾ སུཊྛུ ཝིཀྑམྦྷིཏཏྟཱ སཝིཔཏྟིཀཔཊི སནྡྷིཛནཀཱནི དྭིཧེཏུཀོམཀཱནི ཏེསཾ ནུཔྤཛྫནྟི. ཨཔརཔརིཡཱཡ བྷཱུཏཱནིཙ ཏཱདིསཱནི ཏེསཾ ཨོཀཱསཾ ནལབྦྷནྟི. ནཱནཱརམྨཎེསུཙ ནེསཾ ཚནྡོཝཱ ནིཀནྟིཝཱ པཝཏྟཏིཡེཝ. ཡེན ནཱནཱཀམྨཱནིཔི ཝིཔཙྩིཏུཾ ཨོཀཱསཾ ལབྷནྟི. ཡེནཙ ཏེ ཙཀྑུ སོཏདྭཱརེཧིཔི ཏཏོ ཙཝནྟི. ཏསྨཱ ཨེཏྠ ཨུཔཙཱརཛ྄ཛྷཱནེན ཀཱརཎཾ ཨཝཏྭཱ ཝུཏྟནཡེནེཝ ཏཾཀཱརཎཾ ཝཏྟུཾ ཡུཏྟནྟི དཊྛབྦཾ. ཀཱམཏིཧེཏུམྷཱ ཙུཏིཡཱ པརཾ སབྦཱ ཝཱིསཏི པཊིསནྡྷིཡོ སིཡུཾ. ཨིཏརཱ དུཧེཏུཀཱཧེཏུཀཙུཏིཏོ པརཾ ཀཱམེསྭེཝ བྷཝེསུ དསཔཊིསནྡྷིཡོ སིཡུནྟི ཡོཛནཱ. ཨེཝཾ པཊིསནྡྷིཀྑཎེ ཝིསཡཔྤཝཏྟིཡཱ སཧ ཝཱིཐིམུཏྟཙིཏྟཱནཾ པཝཏྟཱཀཱརཾ དསྶེཏྭཱ ཨིདཱནི པཝཏྟིཀཱལེ པརཾཔརབྷཝེསུཙ དསྶེཏུཾ ཨིཙྩེཝནྟིཨཱདིམཱཧ. པཊིསནྡྷིནིརོདྷཱནནྟརཏོཏི པཊིསནྡྷིཡཱ ནིརོདྷསྶ བྷངྒསྶ ཨནནྟརཀཱལཏོ. ¶ ཏམེཝཙིཏྟནྟི ཏསྶདིསེ ཏབྦོཧཱརོ དཊྛབྦོ. ཡཐཱ ཏཱནིཡེཝ ཨོསདྷཱནཱིཏི. ཡཱཝ ཙུཏིཙིཏྟུཔྤཱདཱཏི ཨེཏྠ ཙུཏིགྒཧཎེན ཏདཱསནྣ ཝཱིཐིཙིཏྟཱནམྤི གཧཎཾ དཊྛབྦཾ. ཨསཏི ཝཱིཐིཙིཏྟུཔྤཱདེཏི ཨནྟརནྟརཱ ཝཱིཐིཙིཏྟཱནཾ ཨུཔྤཏྟིཡཱ ཨསཏི. བྷཝསྶཨངྒབྷཱཝེནཱཏི ཨུཔཔཏྟིབྷཝསྶ ཨཝིཙྪེད ཀཱརཎབྷཱཝེན. ཏསྨིཾཏི ཨཝཏྟམཱནེ པཙྪཱཛཱཏཔཙྩཡརཧིཏཱནཾ རཱུཔདྷམྨཱནཾ ཝསྶོདཀ རཧིཏཱནཾ ཏརུཎསསྶཱནཾ ཝིཡ མིལཱཏ བྷཱཝཔཏྟིཡཱ ཨུཔཔཏྟིབྷཝོ ཨོཙྪིཛྫཏཱིཏི. ཙུཏིཙིཏྟཾ ཧུཏྭཱ ནིརུཛ྄ཛྷཏི ཏམེཝ ཙིཏྟནྟི སམྦནྡྷོ. ཡཐཱཀྐམཾ ཨེཝ པརིཝཏྟནྟཱ པཝཏྟནྟཱིཏི ཡཱཝ པརིནིབྦཱནཙུཏིཡཱ ཡཐཱཀྐམཾ པརིཝཏྟནྟཱ པཝཏྟནྟིཨེཝ. ན པན པརསམཡེ ཝིཡ ཀདཱཙི ཀཏྠཙི ནིཝཏྟིཾ པཱཔུཎནྟཱིཏི ཨཏྠོ.

[༡༧༤] ཝིབྷཱཝནིཡཾ པན

‘‘ཡཱཝ ཝཊྚ མཱུལ སམུཙྪེདཱ’’ཏི ཝུཏྟཾ, ཝཊྚམཱུལསམུཙྪེདོ ཝུཙྩཏི ཨརཧཏྟམགྒོ. ཏཏོ པརཾཔི ཡཱཝཁནྡྷཔརིནིབྦཱནཱ པཝཏྟནྟིཡེཝ.

ཨིཧཱཏི ཨིམསྨིཾ བྷཝེ. ཨིཙྩཡནྟི ཨིཏི ཨཡཾ. ཨིཏིསདྡོ ཨཱདིཨཏྠོ. ཡཐཱ ཨིཧ པཊིསནྡྷིཙ བྷཝངྒཉྩ ཨཱཝཛྫནཱདི ཝཱིཐིཡོཙ ཙུཏིཙཱཏི ཨཡཾ ཙིཏྟསནྟཏི པཝཏྟཏི. ཏཐཱ པུན བྷཝནྟརེཔི སནྡྷིབྷཝངྒཱདིཀཱ ཨཡཾཙིཏྟསནྟཏི པརིཝཏྟཏི པརིཝཏྟམཱནཱ པཝཏྟཏཱིཏི ཨཏྠོ. ཨིདཱནི ཡསྶ ཝིཔསྶནཱ མགྒཕལནིབྦཱནསྶ ཨཏྠཱཡ ཙིཏྟཙེཏསིཀཱནཾ པབྷེདཔཝཏྟིསངྒཧཱ པཊྛཔིཡནྟི. ཏདཏྠཾ དསྶེནྟོ གཱཐམཱཧ. ཏཏྠ པཊིསངྑཱཡཱཏི པཊིསངྑཱན སངྑཱཏེན ཝིཔསྶནཱ ཉཱཎེན པུནཔྤུནཾ ཉཏྭཱ. ཨེཏནྟི ཡཐཱཝུཏྟཾ ཙིཏྟཙེཏསིཀཱནཾ པབྷེདཔཝཏྟིཝིདྷཱནཾ. ཨདྷུཝནྟི ཨནིཙྩཾ. ཨདྷིགནྟྭཱཏི ཨདྷིགམསངྑཱཏེན ཙཏུམགྒཉྙཱཎེན པཏིལབྷིཏྭཱ སཙྪིཀཏྭཱ. པདནྟི སཨུཔཱདིསེསཾ ནིབྦཱནཾ. བུདྷཱཏི པཎྜིཏཱ. སུཊྛུ ཨནུསཡ མཏྟཾཔི ཨསེསེཏྭཱ སེསཀིལེསེཧི སདྡྷིཾ ཨུཙྪིནྣཾ ཡཐཱ ཝུཏྟེསུ ཙིཏྟཙེཏསིཀེསུ ཨདྷིསཡིཏཾ ཏཎྷཱསིནེཧ སངྑཱཏཾ ¶ བནྡྷནཾ ཨེཏེཧཱིཏི སུསམུཙྪིནྣ སིནེཧ བནྡྷནཱ. སམནྟི ཝཱུཔསམནྟི ཝཊྚདུཀྑསནྟཱཔཱ ཨེཏསྨིནྟི སམོ. ཨནུཔཱདིསེསནིབྦཱནཾ. ཨེསྶནྟཱིཏི གམིསྶནྟི. ཙིརཱཡཱཏི ཙིརཀཱལཾ. སུནྡརཾ ཨདྷིགམཱཝཧཾ སཱིལ དྷུཏངྒསངྑཱཏཾ ཝཏཾ ཨེཏེསནྟི སུབྦཏཱ. སུཔརིསུདྡྷསཱིལསལླེཁ ཝུཏྟིནོཏི ཨཏྠོ. ཙིརཱཡ སུབྦཏཱ བུདྷཱ ཨེཏཾ ཨདྷུཝཾ པཊིསངྑཱཡ ཨཙྩུཏཾ པདཾ ཨདྷིགནྟྭཱ སུསམུཙྪིནྣསིནེཧབནྡྷནཱ སམཾ ཨེསྶནྟཱིཏི ཡོཛནཱ.

ཨིཏི པརམཏྠདཱིཔནིཡཱནཱམ ཨབྷིདྷམྨཏྠསངྒཧསྶ

ཙཏུཏྠཝཎྞནཱཡ ཝཱིཐིམུཏྟ སངྒཧསྶ

པརམཏྠདཱིཔནཱ ནིཊྛིཏཱ.

རཱུཔ སངྒཧ པརམཏྠདཱིཔནཱི

༡༥༦. ཨེཝཾ ¶ ཙིཏྟཙེཏསིཀེ དྭཱིཧི པབྷེདཔྤཝཏྟཱིཧི དསྶེཏྭཱ ཨིདཱནི ཡཐཱནུཔྤཏྟཾ རཱུཔཾ དསྶེནྟོ ཨཱདིགཱཐ མཱཧ. ཏཏྠ ཨེཏཾ པརིམཱཎཾ ཨསྶཱཏི ཨེཏྟཱཝཾ. ཏེན ཨེཏྟཝཏཱ. ནིཔཱཏཔདཾཝཱ ཨེཏཾ. ཧི སདྡོ པདཔཱུརཎེ. པབྷེདོཙ པཝཏྟིཙ པབྷེདཔྤཝཏྟིཡོ. ཏཱཧི སཧ ཡེ ཝཏྟནྟི ཏེ སཔྤབྷེདཔྤཝཏྟིཀཱ. ཨེཏྟཱཝཏཱ སཔྤབྷེདཔྤཝཏྟིཀཱ ཙིཏྟཙེཏསིཀཱ དྷམྨཱ མཡཱ ཝིབྷཏྟཱ. ཨིདཱནི རཱུཔཾ པཝུཙྩཏཱིཏི ཡོཛནཱ. སངྑེཔཏོ ཨུདྡིསནཾ ཀཐནཾ སམུདྡེསོ. སམུདྡིཊྛསྶ རཱུཔསྶ པུན ཝིབྷཛནཾ ཝིབྷཱགོ. སམུཊྛཱཏི རཱུཔཾ ཨེཏེནཱཏི སམུཊྛཱནཾ. ཀམྨཱདི. ཀལཱ ཝུཙྩནྟི ཨཝཡཝཱ. ཏཱ ཨཔྤེནྟི པཝིསནྟི ཨེཏྠཱཏི ཀལཱཔོ. པིཎྜཱིཏི ཨཏྠོ. པཝཏྟིཀྐམཏོཏི ཨུཔྤཏྟིཀྐམཏོ. སལཀྑཎཏོ སསམྦྷཱརཏོཙ མཧནྟཱནི ཧུཏྭཱ བྷཝནྟི པཱཏུབྷཝནྟཱིཏི མཧཱབྷཱུཏཱནི. ཏཱནི ཧི ཨཏྟནོ སབྷཱཝཏོཔི མཧནྟཱནིཨེཝ ཧུཏྭཱ པཱཏུབྷཝནྟི ཨུཔཱདཱརཱུཔཱནི ཨུཔཱདཱཡཱཏི.

[༡༧༥] ཝིབྷཱཝནིཡཾ པན མཧཱཊཱིཀཱཡཉྩ

‘‘སསམྦྷཱརདྷཱཏུཝསེནཱཏི’’ ཝུཏྟཾ. ཏཾ ཨནུཔཔནྣཾ.

ན ཧི སསམྦྷཱརཝཏྠུཝསེནེཝ ཏེསཾ ཨཡཾ ཝོཧཱརོ པཝཏྟོཏི སཀྐཱ ཝཏྟུཾ. ནཙ སལཀྑཎཏོ མཧཏྟེན ཝིནཱ ཏེསཾ སསམྦྷཱརཏོ མཧཏྟཾནཱམ སམྦྷཝཏཱིཏི. ཏསྨཱ ཡཾ ཏེསཾ ཨིནྡྲིཡཱནིནྡྲིཡབདྡྷསནྟཱནེསུ པཐཝིཔབྦཏཱདིཝསེན སམུདྡེ མཙྪཀཙྪཔཱདིཝསེན སསམྦྷཱརཏོ མཧཏྟཾ. ཏཾཔི སལཀྑཎམཧཏྟམཱུལཀམེཝཱཏི དཊྛབྦཾ. མཧཱབྷཱུཏཱཏིཝཱ ལོཀེ ཝིསཾཝཱད ཀཊྛེན མཱཡཱཀཱརཱཝཱ ཨཱཝིསནགཧཎེསུ ཨཙིནྟེཡྻཊྛཱནཊྛེན ཡཀྑཱདཡོཝཱ ཝཉྩཀཊྛེན ཡཀྑིནིཡོཝཱ ཝུཙྩནྟི. ཏེནེཝཊྛེན ཏེཧི སདིསཏྟཱ ཨིམཱནིཔི མཧཱབྷཱུཏཱཝིཡཱཏི མཧཱབྷཱུཏཱནི. ཨུབྷཡཏྠཔིཙ ¶ མཧནྟཱནི ཨབྷཱུཏཱནི ཨབྦྷུཏཱནིཝཱ ཨེཏེསཱུཏི ནིབྦཙནཾ ཡུཛྫཏིཡེཝ.

[༡༧༦] ཝིབྷཱཝནིཡཾ པན

ཡཀྑིནིཾ ཝིསུཾ ཨུཔམཱམཏྟཾ ཀཏྭཱ ‘‘མནཱཔཝཎྞསཎྛཱནཱ དཱིཧིཝཱ སཏྟཱནཾ ཝཉྩིཀཱ ཡཀྑིནཱིཨཱདཡོ ཝིཡ མནཱཔ ཨིཏྠིཔུརིསརཱུཔདསྶནཱདིནཱ སཏྟཱནཾ ཝཉྩཀཏྟཱ མཧནྟཱནི ཨབྷཱུཏཱནི ཨེཏེསཱུཏི མཧཱབྷཱུཏཱཏི’’ ཝུཏྟཾ. ཏཾ ཨཊྛཀཐཱ ཡ ན སམེཏི.

ཨཊྛཀཐཱཡཉྷི མཧཱབྷཱུཏསཱམཉྙཏོཏི པདསྶ ཝིཏྠཱརེ ཨེཝ མཱཡཱཀཱརོ ཡཀྑོ ཡཀྑིནཱིཏི ཏཡོ མཧཱབྷཱུཏཱ ཝུཏྟཱཏི. ཙཏུནྣཉྩམཧཱབྷཱུཏཱནནྟི ཨུཔཡོགཏྠེ སཱམིཝཙནཾ. ཨུཔཱདཱཡཱཏི དལ༹ྷཾ ནིསྶཱཡ. པཝཏྟནྟི པཱཋསེསོ. ཨུཔཱདཱཡ རཱུཔནྟིཝཱ སམཱསཔདཾ དཊྛབྦཾ.

[༡༧༧] ཝིབྷཱཝནིཡཾ པན

‘‘ཨུཔཱདཱཡ པཝཏྟཾ རཱུཔཾ ཨུཔཱདཱརཱུཔནྟི’’ ཝུཏྟཾ. ཏཾ ཨིདྷ ན ཡུཛྫཏི.

ན ཧི ཨིམསྨིཾ པཱཋེ ཀཏྠཙི ཡཀཱརཝིརཧོ དིཊྛོ. ཏཐཱ ཧི མཱུལཊཱིཀཱཡཾ ཨུཔཱདཱཡཏི ནིསྶཡཏཱིཏི ཨུཔཱདཱཡཾ. ཏམེཝ རཱུཔནྟིཔི ཝུཏྟཾ. པཐཡཏཱིཏི པཐཝཱི. སཧཛཱཏརཱུཔཱནཾ པཏིཊྛཱན བྷཱཝེན པཀྑཱཡཏི ཨུཔཊྛཱཏཱིཏི ཨཏྠོ. པུཐུ མཧནྟཱི ཧུཏྭཱ ཛཱཡཏཱིཏིཔི པཐཝཱི. པཀཱརེན ཐཝཱིཡཏི སབྦེསཾ རཱུཔསམྦྷཱརཱནཾ ཨདྷིཊྛཱནཏྟཱ. ཨཡཾ ཏེསཾ ཨདྷིཊྛཱནཱ པཏིཊྛཱནཱ ཝཏྠུབྷཱུཏཱ བྷཱུམི བྷཱུཏཱཏིཨཱདིནཱ ནཱནཱཔྤཀཱརེན གུཎཔདེན ཨབྷིཏྠཝཱིཡཏཱིཏི པཐཝཱི. སཱཨེཝ ནིསཏྟནིཛཱིཝཊྛེན དྷཱཏཱུཏི པཐཝཱིདྷཱཏུ. ཨཱཔེཏི སཧཛཱཏརཱུཔཱནི བྱཱཔེཏྭཱ ཏིཊྛཏི, ཨཔྤཱཡཏི ཝཱ ཏཱནི སུཊྛུ བྲཱུཧེཏི ཝཌྜྷེཏཱིཏི ཨཱཔོ. ཏཱནིཝཱ ཨཝིཔྤཀིཎྞཱནི ཀཏྭཱ བྷུསོ པཱཏི རཀྑཏི, པིཝཏིཝཱ ཝིཝནྟོ ཝིཡ ཏཱནི སངྒཎྷཏི སམྤིཎྜེཏཱིཏི ཨཱཔོ. སོཡེཝ དྷཱཏཱུཏི ཨཱཔོདྷཱཏུ. ཏེ ཛཏི ཏིཀྑབྷཱཝེན སམུཛྫལནྟོ ཝིཡ སཧཛཱཏདྷམྨཱནཾ མཛ྄ཛྷེ པཀཱསཏི, ¶ ཏེཛེཏིཝཱ ནིསེཏི སཧཛཱཏདྷམྨེ ཏིཀྑཐཱམ བལེ ཀརོཏི, པརིཔཱཙེཏིཝཱ ཨུསྨཱཔེཏཱིཏི ཏེཛོ, སོ ཨེཝ དྷཱཏཱུཏི ཏེཛོདྷཱཏུ. ཝཱཡཏི སམཱིརེཏི དེསནྟརུཔྤཏྟི ཧེཏུབྷཱཝེན བྷཱུཏསངྒྷཱཊཾ དེསནྟརཾ གམེཏཱིཏི ཝཱཡོ. ཝཱཡཏི ཝཱ སཧཛཱཏདྷམྨེ ཨཔཏམཱནེ ཀཏྭཱ ཝཧཏཱིཏི ཝཱཡོ. སོཨེཝ དྷཱཏཱུཏི ཝཱཡོདྷཱཏུ. ཏཏྠ ཀཀྑལ༹ལཀྑཎཱ པཐཝཱི. ཨཱབནྡྷནལཀྑཎོ ཨཱཔོ. ཨུཎྷཏྟལཀྑཎོ ཏེཛོ. ཝིཏྠམྦྷནལཀྑཎོ ཝཱཡོ. ཨེཏྠ སིཡཱ, ཀསྨཱ པཐཝཱི ཀཀྑལ༹ལཀྑཎཱཏི ཝུཏྟཱ. ནནུ སཱ མུདུབྷཱུཏཱཔི ཧོཏཱིཏི. སཙྩཾ, མུདུབྷཱུཏཱཔི པན སཱ སེསབྷཱུཏཏྟཡཾ ཨུཔཱདཱཡ ཀཀྑལཱ༹ ཏྭེཝ སངྑྱཾ གཙྪཏི. ཨཉྙམཉྙཾ ཨུཔཱདཱཡེཝ པན ཨཡཾམུདུ ཨཡཾ ཀཀྑལཱ༹ཏི བྷཝཏི. ཏེནེཝ མུདུཀཀྑལཱ༹ནཾ དཱིགྷརསྶཱནཾ ཝིཡ ཨནཝཊྛཱནཏཱ ཧོཏི. མུདུབྷཱུཏཱཔི ཧི ཏཏོ མུདུཏརཾ པཏྭཱ ཀཀྑལཱ༹ནཱམ ཛཱཏཱ. ཀཀྑལཱ༹པི ཀཀྑལ༹ཏརཾ པཏྭཱ མུདུབྷཱུཏཱནཱམ ཛཱཏཱཏི. ཨཱབནྡྷནལཀྑཎོ ཨཱཔོཏི ཝུཏྟོ. སོཙ པཀཏིཨུདཀེ ཨདྷིམཏྟོཏི པཀཏིཨུདཀཾ བདྡྷཾ གྷནཱིབྷཱུཏམེཝ སིཡཱཏི ཙེ. ན. ཨཱབནྡྷིཏབྦཱཡ པཐཝིཡཱ ཏཏྠ པརིདུབྦལཏྟཱཏི, ཡཏྠ པན པཐཝཱི བལཝཏཱི ཧོཏི ཏཏྠེཝ སོ བདྡྷཏརཾ ཨཱབནྡྷཏཱིཏི. ཨུཎྷཏྟ ལཀྑཎོ ཏེཛོཏི ཝུཏྟོ. ཨེཝཉྩསཏི སཱིཏབྷཱཝོ ཏེཛོཡེཝ ན སིཡཱཏི ཙེ. ན. ཨུསཏི དཧཏི པརིཔཱཙེཏི པརིཎ ཏབྷཱཝཾ གམེཏཱིཏི ཨུཎྷོནཱམ. སཱིཏབྷཱཝོཙ དཧཏི པརིཔཱཙེཏི ཏབྦྷཱཝཾ གམེཏིཡེཝཱཏི. ཝུཏྟཉྩ མཱུལཊཱིཀཱཡཾ ཏེཛོཨེཝ ཧི སཱིཏཾ. ཧིམཔཱཏསམཡཱདཱིསུ སཱིཏསྶ པརིཔཱཙཀཏཱདསྶན ཏོཏི. ཝིཏྠམྦྷན ལཀྑཎོ ཝཱཡོཏི ཝུཏྟོ. སོ པན གྷན ཐདྡྷེསུ སིལཱཐམྦྷཱདཱིསུ ནལབྦྷཏཱིཏི ཙེ. ན. ཏཏྠ ཧི པཐཝཱི ཨཏྟནཱ སཧཛཱཏཝཱཡུཝིཏྠམྦྷནཾ ལབྷིཏྭཱ ཐཱམཔྤཏྟཱ ཐིརཏརཔྤཏྟཱཙ ཧུཏྭཱ ཝཧཏཱིཏི. ཙཀྑཏཱིཏི ཙཀྑུ. སམཝིསམཾ ཨཱཙིཀྑཏི སམཝིསམཛཱནནསྶ ཏམྨཱུལཀཏྟཱ. རཱུཔཾཝཱ ཨསྶཱདེཏི ཨཱཔཱཏཾ ཨཱགཏཱགཏསྶ རཱུཔསྶ ཨནིརཱཀརཎཏོ. ཏཾཝཱ ཝིབྷཱཝེཏཱིཏི ཨཏྠོ. སུཎཱཏཱིཏི སོཏཾ. སུཎནྟི སུཡྻནྟིཝཱ ཨེཏེ ནཱཏི ¶ སོཏཾ. གྷཱཡཏཱིཏི གྷཱནཾ. གྷཱཡནྟི གྷཱཡིཡནྟིཝཱ ཨེཏེནཱཏི གྷཱནཾ. ཛཱིཝིཏནིམིཏྟཾ རསོ ཛཱིཝིཏནྟི ཝུཙྩཏི. ཏསྨིཾ ནིནྣཏཱཡ ཏཾ ཨཝ྄ཧཱཡཏཱིཏི ཛིཝ྄ཧཱ. ཨཐཝཱ. ཛཱིཝིཏཾ ཝཧཏི ཨེཏཱཡཝཱ ཏཾ ཝཧནྟི པཝཏྟེནྟི ཛཱིཝིཏཝུཏྟིསམྤཱདནཏྟཱཏི ཛིཝ྄ཧཱ. ཛཱིཏིཝཱ ཛཡོ པརཱཛཡོཝཱ ཝུཙྩཏི. ཏདུབྷཡཾ ཝཧཏི ཝཧནྟིཝཱ ཨེཏཱཡཱཏི ཛིཝ྄ཧཱ. སསམྦྷཱརཛིཝ྄ཧཱ. ཡཐཱཧ –

པུརིསསྶ ཧི ཛཱཏསྶ, ཀུདཱརཱི ཛཱཡཏེ མུཁེ;

ཡཱཡ ཚིནྡཏི ཨཏྟཱནཾ, ནརོ དུབྦྷཱསིཏཾ བྷཎནྟི.

ཨིདྷ པན ཏཾ སཧཙརིཏཏྟཱ ཛིཝ྄ཧཱཏི པསཱདརཱུཔམོ ཝུཙྩཏི. ཀུཙྪིཏཱནཾ ཀེསཱདཱིནཾ པཱཔདྷམྨཱནཉྩ ཨཱཡོ ཨུཔྤཏྟིཊྛཱནནྟི ཀཱཡོ. སསམྦྷཱརཀཱཡོ. ཨིདྷ པན ཏཾ སཧཙརིཏོ པསཱད ཀཱཡོཨེཝ ཨདྷིཔྤེཏོ. པསཱིདནྟཱིཏི པསཱདཱ. པསཱིདནྟི ཝཱ ཨེཏྠ ཙནྡམཎྜལཱདཱིནི ཨཱརམྨཎནིམིཏྟཱནི ཏཏྠ སཾསཱིདམཱནཱནི ཝིཡ སརཱུཔཏོ སནྡིསྶནྟཱིཏི པསཱདཱ, སུཔརིསུདྡྷཨཱདཱསམཎྜསདིསཱ ཀམྨཛམཎྜཱ. ཨིམེ པན པཉྩ དཊྛུཀཱམཏཱདི ནིདཱན ཀམྨསམུཊྛཱན བྷཱུཏཔསཱད ལཀྑཎཱ རཱུཔཱདི ཨབྷིགྷཱཏཱརཧ བྷཱུཏཔསཱདལཀྑཎཱ ཝཱ ཙཀྑུཔསཱདཱདཡོ དཊྛབྦཱ. ཏཏྠ ཙཀྑུ ཏཱཝ སེཏམཎྜལ པརིཀྑིཏྟསྶ ཀཎྷམཎྜལསྶ མཛ྄ཛྷེ ཨཱུཀཱསིརཔམཱཎེ ཨཏིམུཁེ ཋིཏཱནཾ སརཱིརསཎྛཱནུཔྤཏྟི པདེསབྷཱུཏེ དིཊྛམཎྜལེ ཏེལམིཝ སཏྟཔིཙུཔཊལཱནི སཏྟཨཀྑིཔཊལཱནི བྱཱཔེཏྭཱ ཏིཊྛཏི. སོཏཾ སོཏབིལབྦྷནྟརེ ཨངྒུལིཝེཋནཱཀཱརཾ ཨུཔཙིཏཏནུཏམྦལོམཾ པདེསཾ བྱཱཔེཏྭཱ ཏིཊྛཏི. གྷཱནཾ ནཱསིཀབྦྷནྟརེ ཨཛཔདསཎྛཱནཾ པདེསཾ བྱཱཔེཏྭཱ ཏིཊྛཏི. ཛིཝ྄ཧཱ སསམྦྷཱར ཛིཝ྄ཧཱམཛ྄ཛྷེ ཨུཔྤལ དལགྒ སཎྛཱནཾ པདེསཾ བྱཱཔེཏྭཱ ཏིཊྛཏི. ཀཱཡོ པན མཧནྟི ཡཱ ཀཔྤཱས པཊལཝཊྚིཡཾ ཨཱསིཏྟཏེལཾཝིཡ ཐཔེཏྭཱ པཱཙཀ ཏེཛསྶ པཏིཊྛཱནཊྛཱནཾ ཀེསགྒ ལོམགྒ ནཁགྒ སུཀྑཙམྨཱནིཙ ཨཝསེསཾ སཀལསརཱིརཾ བྱཱཔེཏྭཱ ཏིཊྛཏཱིཏི. ཏེ པན པཉྩ ཡཐཱརཧཾ པཉྩདྭཱརིཀཙིཏྟཱནཾ ཝཏྠུདྭཱརབྷཱཝཾ སཱདྷེནྟི. ཏེསུཙ ཨེཀེཀསྶ ཙཏསྶོ ཙཏསྶོ དྷཱཏུཡོ སནྡྷཱརཎཨཱབནྡྷན པརིཔཱཙན སམུདཱིརཎ ཀིཙྩེཧི ཨུཔཀཱརཾ ཀརོནྟི. ཡཐཱཁཏྟི ཡཀུམཱརསྶ ¶ ཙཏསྶོ དྷཱཏིཡོ དྷཱརཎ ནཧཱཔན མཎྜན བཱིཛན ཀིཙྩེཧཱིཏི. ཨུཏུཙིཏྟཱཧཱརཱཙ ནཾ ཨུཔཏྠམྦྷེནྟི. ཡཐཱ ཏཾ ཁཏྟིཡཀུམཱརཾ པིཏུ ཛེཊྛབྷཱཏུ ཛེཊྛབྷགིནིཡོཝིཡ. ཨཱཡུཙ ནཾ སུཊྛུ ཨནུཔཱལེཏི. ཡཐཱ ཏཾ ཁཏྟིཡཀུམཱརཾ དིསཱཔཱམོཀྑོ རཱཛསམྨཏོ མཧཱབྷིསཀྐོཝིཡ. ཝཎྞཱདཡོཙ ནཾ པརིཝཱརེནྟི. ཡཐཱ ཏཾ ཁཏྟིཡཀུམཱརཾ སཧཛཱཏཱ ཨམཙྩཔུཏྟཱ ཝིཡཱཏི. ཡསྨཱ པན སཏྟཱནཾ ཙིཏྟཾ ནཱམ ཝིཙིཏྟཾ ཧོཏི. ཙིཏྟཝིཙིཏྟཏཱཡ སཉྙཱཝིཙིཏྟཱ. སཉྙཱཝིཙིཏྟཏཱཡ ཏཎྷཱཝིཙིཏྟཱ. ཏཎྷཱཝིཙིཏྟ ཏཱཡ ཀམྨཱནི ཝིཙིཏྟཱནི. ཀམྨཝིཙིཏྟཏཱཡ ཀམྨསམུཊྛཱནཱནི བྷཱུཏཱནི ཝིཙིཏྟཱནི. བྷཱུཏཝིཙིཏྟཏཱཡ ཨིམེ པསཱདཱ ཝིཙིཏྟཱ. ཨཉྙམཉྙཾ ཨསདིསཱ ཧོནྟི. ཏེཧི པསཱདམཎྜབྷཱུཏཱཔི སམཱནཱ ཀེཙི རཱུཔསྶེཝ ཨབྷིགྷཱཏཱརཧཱ ཧོནྟི, ན སདྡཱདཱིནཾ. ཀེཙི སདྡཱདཱིནཾ ཨེཝ, ན རཱུཔསྶཱཏི. ཏསྨཱ ཏེསཾ ཨཉྙམཉྙཉྩ ཨཉྙརཱུཔེཧིཙ ལཀྑཎཏོ ཨསཾམིསྶཏཱ ཝེདིཏབྦཱཏི.

རཱུཔཡཏཱིཏི རཱུཔཾ. ཝཎྞཝིསེསཾ ཨཱཔཛྫིཏྭཱ ཧདཡངྒཏབྷཱཝཾ པཀཱསེཏི. པཀཏིཡཱཔི ཝཱ ཡཾཀིཉྩིདབྦཾ སམཝིསམཾཝཱ པཀཱསེ ཏཱིཏི ཨཏྠོ. སཔྤཏི སོཏཝིཉྙེཡྻབྷཱཝཾ གཙྪཏཱིཏི སདྡོ. སདྡཡཏཱིཏི སདྡོ. ཏཾ ཏཾ ཨཏྠཾཝཱ ཨཏྟནོ ཝཏྠུཾཝཱ ཨཱཙིཀྑཏཱིཏི ཨཏྠོ. སདཏིཝཱ ཏཾ ཏཾ དིསཾཝཱ དེསཾཝཱ ཁཎེན ཝིསྶརཏི ཝིཔྥརཏཱིཏི སདྡོ. གནྡྷཡཏཱིཏི གནྡྷོ. ཨཏྟནོ ཝཏྠུཾསཱུཙེཏཱིཏི ཨཏྠོ. གཙྪཏཱིཏི གོ. ཝཱཏོ. ཏེན དྷཱརཱིཡཏཱིཏི གནྡྷོ. རསཱིཡཏི ཨསྶཱདཱིཡཏཱིཏི རསོ. རསནྟིཝཱ ཏཾ ཨསྶཱདེནྟཱིཏི རསོ. ཕུསཱིཡཏཱིཏི ཕོཊྛབྦཾ. ཕུསནཉྩེཏྠ པསཱདེན སཧ གྷཊྚནཾ ཀལཱཔནྟརབྷཱུཏེཧི སདྡྷིཾ པཊིཧནནཉྩ ཝེདིཏབྦཾ. ཏདུབྷཡཾཔི ཨཱཔོ དྷཱཏུཡཱ ནཏྠཱིཏི ཝུཏྟཾ ཨཱཔོདྷཱཏུཝིཝཛྫིཏནྟི. ཀསྨཱ པན ཏཾ ཏསྶཱ ནཏྠི. ནནུ སཱིཏཏཱཝཱ དྲཝཏཱཝཱ ཕུསིཏྭཱ གཡ྄ཧཏཱིཏི. ཝུཙྩཏེ, སཱིཏཏཱ ཧི ཏེཛོཡེཝ, ན ཨཱཔོ. ཡདི ཧི སཱ ཨཱཔོཡེཝ སིཡཱ. པཀྐུམིཏེ སནྟཏྟེ ལོཧརསེཔིསྶ སཱིཏཏཱ ལབྦྷམཱནཱ སིཡཱ. སོ ཧི རསོ ཨཱཔཱདྷིཀོ ཧོཏཱིཏི. ཨེཝཾ པན ནལབྦྷཏི. ཏསྨཱ སཱ ཏེཛོཡེཝ, ན ཨཱཔོཏི. ¶ ཨཔིཙ, སཱིཏུཎྷཱནཾ ཨེཀསྨིཾ ཀལཱཔེ སཧ ཨཔྤཝཏྟནཏོ ཨོརཔཱརཱནཾ ཝིཡ ཏེསཾ ཨནཝཊྛཱནཏོཙ ཝིཉྙཱཡཏི. ན ཧི སཱིཏཀལཱཔེ ཨུཎྷཾ, ཨུཎྷཀལཱཔེཝཱ སཱིཏཾ སཧ པཝཏྟཏི. ཡསྨིཾཙ ཝཏྠུམྷི པུབྦེ སཱིཏསཉྙཱ སཎྛཱཏི. པཙྪཱ ཏཏོ སཱིཏཏརེ ཨཱགཏེ ཏསྨིཾཡེཝ པུན ཨུཎྷསཉྙཱ སཎྛཱཏི. པུབྦེ ཨུཎྷསཉྙཱཡཾཔི ཨེསེཝ ནཡོ. ཏཐཱ ཨུཎྷེ མནྡེ སཱིཏསཉྙཱ སཎྛཱཏི. སཱིཏེ མནྡེ ཨུཎྷསཉྙཱཏི.

ཨཐ པན དྲཝབྷཱཝབྷཱུཏོ ཨཱཔོ ཕུསིཏྭཱ གཡ྄ཧཏི. ཨཡོ པིཎྜཱདཱིསུ ཨཱབནྡྷནབྷཱུཏོཔི ཕུསིཏྭཱཝ གཡ྄ཧེཡྻ. ཨེཝཉྩ སཏི ཡཐཱ ཏེསུ ཨིཏརཱནི ཏཱིཎི བྷཱུཏཱནི ཝིནཱ ཨིཏརཱིཏརེན ཝིསུཾ ཝིསུཾ ཀཱཡིཀ སུཁདུཀྑཱནཾ ཨཱརམྨཎབྷཱུཏཱནི ཧོནྟི. ཏཐཱ སོཔི ཝིནཱ ཨིཏརེཧི ཝིསུཾ ཀཱཡིཀསུཁདུཀྑཱནཾ ཨཱརམྨཎབྷཱུཏོཨེཝ སིཡཱ. ན པན ཧོཏི. ཡཉྷི ཏཱནི ཨཡོཔིཎྜཱདཱིནི ཕུསནྟཱནཾ ཀཱཡིཀཾ སུཁཾཝཱ དུཀྑཾཝཱ ཨུཔྤཛྫཏི, ཏཾ སཎྷཐདྡྷཏཱ ཝསེནཝཱ ཨུཔྤཛྫཏི. སཱིཏུཎྷཏཱཝསེནཝཱ ཨབྦྷནྟརཐམྦྷནསྶ མནྡགཱལ༹ྷཏཱཝསེནཝཱ. ནོ ཨཉྙཐཱཏི. ཏསྨཱ པུརིམབྷཱགེ ཏཱིཎི བྷཱུཏཱནི ཕུསིཏྭཱཝཱ ཝཎྞཾ དིསྭཱཝཱ པཙྪཱ བྷཱགེ སུདྡྷེན མནོ ཝིཉྙཱཎསནྟཱནེན དཱིགྷརསྶཱདིསཎྛཱནཾཝཱ རཏྟིཡཾ ཨལཱཏཙཀྐཾ ཝཱ ཏཾཏཾཚིདྡཝིཝརཾཝཱ ཛཱནནྟཱ ཝིཡ པཐམཾ དྲཝཏཱསཧིཏཱནི ཝིལཱིནཱནི མུདཱུནི ཏཱིཎི བྷཱུཏཱནི པཐཝིཾ ཨེཝ ཝཱ ཕུསིཏྭཱ པཙྪཱ སུདྡྷེན མནོ ཝིཉྙཱཎསནྟཱནེན ཝིསུཾ དྲཝབྷཱཝཾ ཨདྡཏིནྟབྷཱཝཾ ཛཱནནྟི. ཨེཝཾ སནྟེཔི ཏཾ ཕུསིཏྭཱ ཛཱནནྟཱ ཨིཙྩེཝ མཉྙནྟི ཨཝིསེསཝིདུནོཏི. གུནྣཾ ཨབྷིཎྷཾ ཙརཎཊྛཱནཾ གོཙརོ. གོཙརསདིསཏྟཱ ཨིདྷ གོཙརོ. གོཏིཝཱ ཨིདྷ ཙཀྑཱདཱིནི ཨིནྡྲིཡཱནི ཝུཙྩནྟི. ཏཱནི ཝིཉྙཱཎཱདྷིཊྛིཏཱནི ཧུཏྭཱ ཨེཏེསུ ཙརནྟི. ཨེཏཱནིཝཱཏེསུ ཙརནྟི པཝཏྟནྟི གྷཊྚེནྟཱིཏི གོཙརཱ. ཏེཡེཝ ཨིདྷ ཨེཀཏྟཾ ཨུཔནེཏྭཱ གོཙརརཱུཔནྟི ཝུཏྟཾ. ཨིམཱནིཔན པཉྩ ཡཐཱཀྐམཾ ཙཀྑཱདཱིསུ པཊིཧནན ལཀྑཎཱནི རཱུཔཱདཱིནཱིཏི ཝེདིཏབྦཱནི.

ཨིཏྠཱི ཝུཙྩཏི ཨཝིསདཱཀཱརསཎྛིཏཾ ཁནྡྷཔཉྩཀཾ. ཡསྶ པན དྷམྨསྶ ཨཱནུབྷཱཝེན ཏཾ ཏཐཱ སཎྛཱཏི པཝཏྟཏི. སོ ཨིཏྠི ཡཱ ¶ བྷཱཝོཏི ཨིཏྠཏྟཾ. པུརིསོ ཝུཙྩཏི ཝིསདཱཀཱརསཎྛིཏཾ ཁནྡྷཔཉྩཀཾ. སེསཾ ཝུཏྟནཡམེཝ. ཏཏྠ ཨིཏྠིལིངྒ ཨིཏྠིནིམིཏྟ ཨིཏྠི ཀུཏྟ ཨིཏྠཱཀཔྤཱནཾ ཧེཏུབྷཱཝ ལཀྑཎཾ ཨིཏྠཏྟཾ. པུརིསལིངྒ པུརིསནིམིཏྟ པུརིསཀུཏྟ པུརིསཱཀཔྤཱནཾ ཧེཏུབྷཱཝ ལཀྑཎཾ པུརིསཏྟཾ. ཏཏྠ ལིངྒནྟི པདྷཱནངྒབྷཱུཏཾ མཧཱསཎྛཱནཾ. ནིམིཏྟནྟི པཙྩངྒབྷཱུཏཾ ཁུདྡཀསཎྛཱནཾ. ཀུཏྟནྟི ཀཱིལཱ༹ལིལཱདི ཀྲིཡཱཝིསེསོ. ཨཱཀཔྤོཏི གམནཱདིཀོ ཨཱཀཱརཝིཀཱརོ. སབྦེཔེཏེ ཁནྡྷཔཉྩཀསྶ པཝཏྟིཝིསེསཱཨེཝ. ཡེ སདྡསཏྠེསུ ལིངྒནྟི ཝུཙྩནྟི. ཡེསཉྩ ཝསེན ཨཡཾ ཨིཏྠཱིཨེཝ, ན པུརིསོ. ཨཡཾ པུརིསོཨེཝ, ན ཨིཏྠཱིཏི སཉྫཱནནྟི. ཡསྨཱ པནེཏྠ སཎྛཱནཱདཱིནཾ ཨཝིསདཱདིབྷཱཝོཨེཝ ཨཏྠཏོ ཨིཏྠིཔུརིསཏཱ ཧོཏི. ཏདུབྷཡམུཏྟབྷཱཝོཙ ནཔུཾསཀཏཱ. སོཙ ཨཀྑརཔད སངྑཱཏེསུ ཝཙནེསུ ཙ ཝཙནཏྠེསུཙ ཡཐཱརཧཾ སནྡིསྶཏིཡེཝ. ཏསྨཱ ཨིནྡྲིཡརཧིཏེསུཔི པདེསུཙ རུཀྑཱདཱིསུ པདཏྠེསུཙ པརིཡཱཡེན ཨིཏྠིཔུམནཔུཾསཀཏཱསིདྡྷི ཝེདིཏབྦཱཏི.

[༡༧༨] ཡཾ པན ཝིབྷཱཝནིཡཾ

‘‘ཨིཏྠཱིནཾ ཨངྒཛཱཏཾ ཨིཏྠིལིངྒ’’ནྟི ཝུཏྟཾ. ཏཾ ན སུནྡརཾ.

ན ཧི ཀཏྠཙི པཱལི༹ཡཾ ཨཊྛཀཐཱསུཙ ནིམིཏྟསདྡོཝིཡ ལིངྒསདྡོ ཨངྒཛཱཏེ པཱཀཊོ དིཊྛོཏི.

[༡༧༩] ཡཉྩ ཏཏྠ

‘‘ཨིཏྠིསཎྛཱནཾ ཨིཏྠཱཀཔྤོ’’ཏི ཝུཏྟཾ. ཏཾཔི ན སུནྡརཾ.

ན ཧི ལིངྒསདྡོ ཝིཡ ཨཱཀཔྤསདྡོ སཎྛཱནེ པཱཀཊོ དིཊྛོཏི. སེསཾཔན ཏཏྠ ཝུཏྟཾ ཡཾཀིཉྩི ཨཊྛཀཐཱཡ ཨསམེནྟཾཔི ཏེན པརིཡཱཡེན ཡུཛྫཏིཡེཝ. བྷཝནྟི པཝཏྟནྟི ཏཾསཧིཏེ ཁནྡྷསནྟཱནེ ཨེསཱ ཨིཏྠཱི, ཨེསོ པུརིསོཏི ཨེཝཾ པཝཏྟཱ སདྡ བུདྡྷིཡོ ཨེཏེནཱཏི བྷཱཝོ བྷཝནྟིཝཱ པཱཏུབྷཝནྟི ཏཾསཧིཏེ ཁནྡྷསནྟཱནེ ལིངྒཱདཱིནི ཨེཏསྨིཾ སཏཱིཏི བྷཱཝོ. སོ ཨེཝ རཱུཔནྟི བྷཱཝརཱུཔཾ. ཧདནྟི སཏྟཱ ཏཾཏཾཨཏྠཾཝཱ ཨནཏྠཾཝཱ པཱུརེནྟི ཨེཏེནཱཏི ཧདཡཾ. ཧདནྟིཝཱ སཏྟཱ ཨིཏོ ནཱནཱཝིཀཀྐེ ཨོསཛནྟི ¶ མུཉྩནྟཱིཏི ཧདཡཾ. ཧརནྟིཝཱ པརིཧརནྟི ཏཾ སཏྟཱ ཛཱིཝིཏཾཝིཡ དཡནྟི རཀྑནྟིཙཱཏི ཧདཡཾ. ཝསནྟི ནིཝསནྟི ཙིཏྟཙེཏ སིཀཱདྷམྨཱ ཨེཏྠཱཏི ཝཏྠུ. ཧདཡཉྩ ཏཾ ཝཏྠུཙཱཏི ཧདཡཝཏྠུ. དྷཱཏུདྭཡནིསྶཡལཀྑཎཾ ཝཏྠུརཱུཔཾ. ཏཾ པན ཧདཡཀོསབྦྷནྟརེ ཨཌྜྷཔསཏམཏྟཾ ལོཧིཏཾ བྱཱཔེཏྭཱ ཏིཊྛཏཱིཏི ཝེདིཏབྦཾ. དྷམྨསངྒཎིཡཾ པན དེསནཱབྷེདརཀྑནཏྠཾ ཨཝཏྭཱ པཊྛཱནེཨེཝ ཏཾ ཝུཏྟཾ. ཡཐཱཧ-ཝཏྠུ ཀུསལཱནཾ ཁནྡྷཱནཾ ནིསྶཡཔཙྩཡེན པཙྩཡོ. ཝཏྠུ ཨཀུསལཱནཾ ཁནྡྷཱནཾ ནིསྶཡཔཙྩཡེན པཙྩཡོཏིཨཱདི. ཨེཏྠཙ ཚཧི ཝཏྠཱུཧི ཨཉྙཾ ཝཏྠུནཱམ ནཏྠི. ཏེསུཙ པུརིམཱནི པཉྩ ཀུསལཱདཱིནཾ ནིསྶཡཱཨེཝ ན ཧོནྟི. ཏསྨཱ ཏེསཾ ནིསྶཡབྷཱཝེན ཏཏྠ ཝུཏྟཾ ཝཏྠུནཱམ ཝིསུཾ ཨེཀཾ ཝཏྠུརཱུཔམེཝཱཏི སིདྡྷནྟི.

[༡༨༠] ཝིབྷཱཝནིཡཾ པན

ཡཾ རཱུཔཾ ནིསྶཱཡཱཏི པཱཋསྶ ཨུདྡྷཊཏྟཱ རཱུཔསཱམཉྙཔསངྒོ ཧོཏཱིཏི ཏཾ ཝིསོདྷེཏུཾ ཡུཏྟིནཱམ ཝུཏྟཱ. པཊྛཱནེ པན བཧཱུསུ ཨནཉྙསཱདྷཱརཎེསུ ཋཱནེསུ ཝཏྠུནཱམེན ཝིསེསེཏྭཱ ཝུཏྟཏྟཱ སོཔསངྒོ ནཏྠིཡེཝཱཏི དཊྛབྦཾ.

ཛཱིཝནྟི སཧཛཱཏདྷམྨཱ ཡེནཱཏི ཛཱིཝིཏཾ. ཏེསཾ ཛཱིཝནེ ཨཱདྷིཔཙྩཡོགེན ཏེསུ ཨིནྡཾ ཨིསྶརཾ ཨཏྟཱནཾ ཀརོཏཱིཏི ཨིནྡྲིཡཾ. ཛཱིཝིཏཉྩ ཏཾ ཨིནྡྲིཡཉྩཱཏི ཛཱིཝིཏིནྡྲིཡཾ. སཧཛཱཏཱ ནུཔཱལན ལཀྑཎཾ ཛཱིཝིཏིནྡྲིཡཾ. ཡཐཱ ཧི བཱིཛནིབྦཏྟཱནི ཨུཔྤལཱདཱིནི བཱིཛེཝིནཊྛེཔི ཨུདཀཱནུཔཱལིཏཱནི ཙིརཾཔི ཀཱལཾ ཛཱིཝནྟི. ཨེཝམེཝཾ ནིརུདྡྷ ཀམྨནིབྦཏྟཱནི ཀམྨཛརཱུཔཱནི ཀམྨེ ཨསནྟེཔི ཛཱིཝིཏཱནུཔཱལིཏཱནི སནྟཏིཝསེན ཝསྶསཏཾཔི ཝསྶསཧསྶཾཔི ཀཔྤཾཔི སོལ༹སཀཔྤསཧསྶཱནིཔི ཛཱིཝནྟིཡེཝ, ཏཐཱ ཧི ཛཱིཝིཏརཧིཏཱནི ཨིཏརརཱུཔཱནི ཛཱིཝནྟཱནིནཱམ ནཧོནྟི. ཏཱནི ཧི ཡེན ཨེཀེན ཙིཏྟེནཝཱ ཨུཏུནཱཝཱ ཨཱཧཱརེནཝཱ ཛཱཡནྟི. ཏསྨིཾ ནིརུདྡྷེ ནིརུཛ྄ཛྷནྟི, པརཾ མུཧུཏྟམཏྟཾཔི སནྟཱནཾ གྷཊེཏུཾ ནསཀྐོནྟི. ཏེསུ ཧི ཙིཏྟཛརཱུཔཱནཾ སནྟཏིཔཙྩུཔྤནྣཾ ཨེཀཝཱིཐི ཨེཀཛཝནཝཱར ཨེཀསམཱཔཏྟིཝཱརེན པརིཙྪིནྣཾ ཧོཏི. ཨུཏུཛཱཧཱརཛཱནཉྩ སབྷཱགེཀ ཨུཏུཨཱཧཱར ཝསེན ¶ པརིཙྪིནྣཾ ཧོཏི. ཀམྨཛརཱུཔཱནཾ པན ཝིསུཾ སནྟཏིཔཙྩུཔྤནྣཾནཱམ ནཏྠི. ཏེསཾ ཨེཀབྷཝཔརིཙྪིནྣཾ ཨདྡྷཱཔཙྩུཔྤནྣམེཝ ཧོཏཱིཏི. ཡདི ཨེཝཾ ཨརཱུཔདྷམྨཱནཾ ཀཐནྟི. ཏེཧི ཛཱིཝིཏཡོགེན ཛཱིཝནྟཱཨེཝ ཧོནྟི. ཨེཝཾསནྟེཔི ཏེསཾ སནྟཏིཔཙྩུཔྤནྣཾ དིསྶཏཱིཏི. ཝུཙྩཏེ, ཨརཱུཔདྷམྨེསུ ཝིཔཱཀཱནི ཏཱཝ ཀམྨཛརཱུཔསདིསཱནི. ཏཱནིཔི ཧི ཨསཏི ཝཱིཐིཙིཏྟུཔྤཱདེ ཡཱཝཛཱིཝཾཔི ཨེཀསནྟཏིཝསེན པཝཏྟིསྶནྟིཡེཝ. ཨིཏརཱནི པན ཡསྶ ཨཱརམྨཎསྶ ཨཱཔཱཏཱགཏཏྟཱ ཨུཔྤཛྫནྟི. ཏསྨིཾ ནིརུདྡྷེ ཏདབྷཱཝེཔི ཏདཱརམྨཎཱ བཧཱུ ཙིཏྟསནྟཏིཡོ ཛཱིཝིཏསྶཨདྡྷཱནཕརཎཱནུབྷཱཝེན པཝཏྟནྟིཡེཝ. ཨཔིཙ, ཡཱཝཁནྡྷཔརིནིབྦཱནཱ ཨནནྟརཔཙྩཡུཔནིབནྡྷེན ཨབྦོཙྪིནྣཾ པཝཏྟམཱནཱཡ ཙིཏྟསནྟཏིཡཱཝསེནཔི ཨཡམཏྠོ ཝཏྟབྦོ. ཏེནེཝ ཧི ཀིལེསསཱིསཾ ཨཝིཛྫཱ. པཝཏྟསཱིསཾ ཛཱིཝིཏིནྡྲིཡནྟི ཝུཏྟཾ.

[༡༨༡] ཝིབྷཱཝནིཡཾ པན

ཨཱཧཱརཛཱདཱིནཾ ཨཱཧཱརཱདིཡེཝ ཨུཔྤཏྟིཡཱཔི ཋིཏིཡཱཔི ཀཱརཎཾ ཧོཏི. ཀསྨཱ, ཏངྑཎེ དྷརམཱནཏྟཱ. ཀམྨ ཛཱནཾ པན ཀམྨཾ ཨུཔྤཏྟིཡཱཨེཝ ཀཱརཎཾ, ན ཋིཏིཡཱ. ཀསྨཱ, ཏངྑཎཱབྷཱཝཏོ. ཛཱིཝིཏེན པན ཨནུཔཱལིཏཏྟཱ ཨེཝ ཏེསཾ ཁཎཊྛིཏི སིདྡྷཱཏི ཨིམིནཱ དྷིཔྤཱཡེན ཡཾ ཝུཏྟཾ ‘‘ཡཐཱསཀཾ ཁཎམཏྟཊྛཱཡཱིནཾཔི ཧི སཧཛཱཏཱནཾ པཝཏྟིཧེཏུབྷཱཝེན ཨནུཔཱལཀཾ. ན ཧི ཏེསཾ ཀམྨཾཡེཝ ཋིཏིཀཱརཎཾ ཧོཏི. ཨཱཧཱརཛཱདཱིནཾ ཨཱཧཱརཱདི ཝིཡ ཀམྨསྶ ཏངྑཎཱབྷཱཝ ཏོཏི’’. ཏཾ ན ཡུཏྟཾ.

དྷམྨཱནཉྷི ཁཎཊྛིཏིནཱམ ཨེཀཀལཱཔགཏསཧཛཱཏཔཙྩཡཱ ཡཏྟཱཨེཝ ཧོཏི. ན ནཱནཱཀལཱཔགཏཛནཀཔཙྩཡཱཡཏྟཱ. ཨིཏརཐཱ ཨུཔྤཱདཀྑཎེ ལབྦྷམཱནཱནཾ ཨུཔཙཡསནྟཏཱིནཾ ཝིཡ ཋིཏིཀྑཎེ ལབྦྷམཱནཱཡ ཛརཏཱཡཔི ཀུཏོཙིསམུཊྛཱནཏཱ པཱལི༹ཡཾ ཝུཏྟཱ སིཡཱཏི. ཨཔིཙ, ཁཎཊྛིཏིནཱམ སབྷཱཝསིདྡྷཱཨེཝ. ན ཧི ཨུཔྤནྣཱ དྷམྨཱ པཙྩཡཝེཀལླེན ཨཏྟནོ ཁཎེསུ པརིཔུཎྞཾ ཨཊྛཏྭཱ ཨནྟརཱཝ བྷིཛྫནྟཱིཏི ཨཏྠི. ནཙ པཙྩཡཱདྷིམཏྟེན ཨཏིརེ ཀཏརཾ ¶ ཏིཊྛནྟཱིཏི ཨཏྠི. ཏསྨཱ ཁཎཊྛིཏིཡཾ ཨུཔཏྠམྦྷཡམཱནཱཔི ཨཱཧཱརཱདཡོ ཨནུཔཱལཡམཱནཉྩ ཛཱིཝིཏཾ པཙྪཱ བལཝརཱུཔསནྟཏི པཝཏྟིཨཏྠཱཡཨེཝ ཨུཔཏྠམྦྷེནྟི པཱལེཏིཙ. ན ཁཎཊྛིཏིཔཝཏྟིཡཱཏི. ཨེཏྟཱཝཏཱ སབྦེསཾཔི ཁཎཊྛིཏིནཱམ དྷརམཱནཛནཀཱཡཏྟཱ ཝཱ ཛཱིཝིཏཱཡཏྟཱཝཱ ནཧོཏཱིཏི སིདྡྷཾ ཧོཏི. ཡདི པན ཏཾ སནྟཏིཔཝཏྟིམེཝ སནྡྷཱཡ ཝུཏྟཾ སིཡཱ, ཨེཝཾསཏི ཡུཛྫེཡྻཱཏི. ཨཊྛ ཀཐཱཡཾཔི སནྟེཔིཙ ཨནུཔཱལན ལཀྑཎཱདིམྷི ཝིདྷཱནེ ཨཏྠིཀྑཎེཡེཝ ཏཾ ཏེདྷམྨེ པཱལེཏཱིཏིཨཱདིཝཙནེ ཡཐཱསནྟཏིཊྛིཏི ལབྦྷཏི. ཏཐཱ ཝིཙཱརེཏྭཱ གཧེཏབྦཱཏི. ཨིདཾ པན པཱཙཀགྒིནཱ སཧ སཀལཾ ཨུཔཱདིནྣཀསརཱིརཾ བྱཱཔེཏྭཱ ཏིཊྛཏཱིཏི. ཀབལ༹ཾ ཀརཱིཡཏཱིཏི ཀབལཱི༹ཀཱརོ. ཨཱཧརཱིཡཏི ཨཛ྄ཛྷོཧརཱིཡཏཱིཏི ཨཱཧཱརོ. ཀབལཱི༹ཀཱརོཙ སོ ཨཱཧཱརོཙཱཏི ཀབལཱི༹ཀཱརཱཧཱརོ. ཀབལཱི༹ཀཱརོ ཨཱཧཱརོཏིཔི པཱཋོ. ཨིདཉྩ སཝཏྠུཀ ཝཙནཾ དཊྛབྦཾ. ཨཐཝཱ, ཀབལཱི༹ཀཱརཱཧཱརབྷཀྑཱནཾ སཏྟཱནཾ ཨཏྟབྷཱཝཾ བྷུསོ ཧརཏི ཨདྡྷཱནཾ པཝཏྟེཏཱིཏི ཨཱཧཱརོ. ཁཛྫ བྷོཛྫཱདིཀེ ཀབལཱི༹ཀཱརེ ཨཱཧཱརོ ཏནྣིསྶིཏཏྟཱ ཏཔྤརིཡཱ པནྣཏྟཱཙཱཏི ཀབལཱི༹ཀཱརཱཧཱརོ. ཨིམསྨིཾཨཏྠེ སཏི ནིབྦཏྟིཏ ཨོཛཱ ཨེཝ ལབྦྷཏི. ཨཏྠཏོ པན ཨངྒམངྒཱནུསཱརིནོ རསསྶ སཱརབྷཱུཏོ ཨུཔཏྠམྦྷབལཀཱརོ བྷཱུཏནིསྶིཏོ པརམསིནིདྡྷསི ནེཧོ ཨིདྷ ཨཱཧཱརརཱུཔཾནཱམ. ཏཏྠ ཨངྒམངྒཱནུསཱརིནོ རསསྶཱཏི ཨཛ྄ཛྷོཧརིཏྭཱ ཨཱམཱསཡེ པཏིཊྛིཏཱནི ཨཱཧཱརཝཏྠཱུནི པཱཙཀཏེཛེན ཝིཝེཙིཏཱནི རསཱདིབྷཱཝེན པཉྩདྷཱ ཝིབྷཱགཾ གཙྪནྟི. ཏཏྠ པཎཱིཏ སིནིདྡྷ ལཧུཀ སིནེཧ ཀོཊྛཱསོ རསོནཱམ. ཡེ ལོཀེ རསདྷཱཏཱུཏི ཝུཙྩཏི. སོ པཱཙཀ ཏེཛབལེན ཏཏོ ཨུཏྟརིཏྭཱ རསཧརཎིདྷམནིཛཱལཱནུསཱརེན ཧེཊྛཱཙ ཨུདྡྷཉྩ སཀལསརཱིརེ ཨངྒམངྒཱནི ཨནུསརནྟོ ཨནུཕརནྟོ ཨངྒམངྒཱནུསཱརཱིཏི ཝུཙྩཏི. ཏསྶ སཱརབྷཱུཏོ ཨུཔཏྠམྦྷཾ བལཾ ཀརོཏཱིཏི ཨུཔཏྠམྦྷབལཀཱརོ. སོ ཧི ཨཱམཱསཡེ པཏིཊྛིཏ མཏྟོཝ སཀལསརཱིརེ བྷཱུཏེསུ ཨུཔཏྠམྦྷཀབལཾ ཛནེཏཱིཏི.

[༡༨༢] ཝིབྷཱཝནིཡཾ པན

‘‘ཨངྒམངྒཱ ནསཱརི རསཧར སངྑཱཏཱཏི’’ པཱཋོ. སོ དུཔྤཱཋོ.

ཏཾ པན སེནྡྲིཡཀཱཡོཔཏྠམྦྷནལཀྑཎཾ ཨཱཧཱརརཱུཔཾ. ཨོཛཱལཀྑཎཾ ཝཱ. ཏཏྠ ཨུདཡཏི པསཝཏཱིཏི ཨོཛཱ. ཨཝསདྡོཝཱ རཀྑཎེ. རཀྑཎཉྩེཏྠ ཨུཔཏྠམྦྷནམེཝ. ཨཝཏི ཛནེཏིཙཱཏི ཨོཛཱ. ཀིཾ ཨཝཏི. ཨཏྟནོ ནིསྶཡཝཏྠུཾ. ཀིཾཙ ཛནེཏི. ཨཱཧཱརསམུཊྛཱནརཱུཔཾ. ཨུདཡཱནནྟརཾ རཱུཔཾ ཛནེཏཱིཏི ཨོཛཱཏིཔི ཝདནྟི. ཨཉྙཱཔདེསརཧིཏེན ཀཀྑལ༹ཏྟཱདིནཱ ཨཏྟནོ བྷཱཝེན སིདྡྷཾ རཱུཔཾ སབྷཱཝརཱུཔཾ. ཨུཔྤཱདཱདིནཱ ཨནིཙྩཏཱདིནཱཙ སངྑཧལཀྑཎེན སཧིཏཾ རཱུཔཾ སལཀྑཎརཱུཔཾ. ཨུཛུཀཏོཝ ཀམྨཱདཱིཧི པཙྩཡེཧི ནིཔྥཱདིཏཾ རཱུཔཾ ནིཔྥནྣརཱུཔཾ. རུཔྤནལཀྑཎསམྤནྣཾ ནིཔྤརིཡཱཡརཱུཔཾ རཱུཔརཱུཔཾ. ཡཐཱ དུཀྑདུཀྑཾ ཨཛ྄ཛྷཏྟཨཛ྄ཛྷཏྟནྟི. སངྑཏལཀྑཎཡུཏྟ ཏཱཡ ཨནིཙྩཏཱདིཀཾ ལཀྑཎཏྟཡཾ ཨཱརོཔེཏྭཱ སམྨསནཱརཧཾ རཱུཔཾ སམྨསནརཱུཔཾ. ཏེ ཏེ དབྦསམྦྷཱརཱཝཱ རཱུཔཀལཱཔཱཝཱ ཝིསུཾཝིསུཾ བྷུསོ ཀཱསནྟི པཀཱསནྟི ཨེཏེནཱཏི ཨཱཀཱསོ. ནིསཏྟ ནིཛཱིཝཊྛེན དྷཱཏུ. ཨཱཀཱསསངྑཱཏཱ དྷཱཏཱུཏི ཨཱཀཱསདྷཱཏུ. པརིཏོ སམནྟཏོ ཚིནྡཏི ཀལཱཔནྟརབྷཱུཏཱནི ཀལཱཔནྟར བྷཱུཏེཧི སདྡྷིཾ ཨསཾམིསྶཾ ཨེཀཏྟཾ ཨནུཔགམནཾ ཀརོཏཱིཏི པརིཙྪེདོ. ཏེཧིཝཱ པརིཙྪིནྡཱིཡཏི ཨཏྟནོཝཱ པརེསཾཝཱ ཨཀཏྭཱམཛ྄ཛྷེ ཝིསུཾ ཐཔཱིཡཏི. ཏེསཾཝཱ ཚིདྡཝིཝརམཏྟབྷཱུཏོ. ན ཝིསུཾ ཨེཀོ ཨུཔྤཱདསཧིཏོ སབྷཱཝདྷམྨོ. ནཱཔི ཀསྶཙི རཱུཔཀལཱཔསྶ པཀྑབྷཱུཏོཏི པརིཙྪེདོ. ཝིཀཱརལཀྑཎརཱུཔཱནི ཧི ཨསབྷཱཝདྷམྨབྷཱུཏཱནིཔི ཏཾཏཾ རཱུཔཀལཱཔེསུ སནྡིསྶམཱནཏཱ ཏཾཏཾརཱུཔཀལཱཔཔཀྑིཀཱནིཨེཝ ཧོནྟི. ཨཡཾ པན ཏེཧི རཱུཔ ཀལཱཔེཧི སབྦསོ ཝིམུཏྟབྷཱཝེན བཧིབྷཱུཏཏྟཱ ཀསྶཙི རཱུཔ ཀལཱཔསྶ པཀྑབྷཱུཏོ ན ཧོཏཱིཏི. ཨསབྷཱཝདྷམྨཏྟཱཙ པན ཀེནཙི རཱུཔེན ཕུསན པརིཡཱཡོཔི ཏསྶ སབྦསོ ནཏྠཱིཏི ཀཏྭཱ སོ ཨསཾཕུཊྛཾ ཙཏཱུཧི མཧཱབྷཱུཏེཧཱིཏི པཱལི༹ཡཾ ཝུཏྟོ. ཨཊྛཀཐཱཡཾ པན གྷནཔིཎྜཝཏྠཱུསུ པཊིགྷཕོཊྛབྦསབྷཱཝཱནཾ ནཱནཱ ཀལཱཔགཏབྷཱུཏཱནཾ ¶ ཨཉྙམཉྙསཾཕུཊྛཏཱ ཨཏྠཱིཏི ཀཏྭཱ ཨསཾཕུཊྛཾ ཙཏཱུཧི མཧཱབྷཱུཏེཧཱིཏི ཨེཏེཧི ཨསཾཕུཊྛཾ ཨཛཊཱཀཱསཾ ཀཾཐིཏནྟི ཝུཏྟཾ. ཊཱིཀཱཡཾ པན ཨཡཾ ནིདྡེསོ ཨཛཊཱཀཱསནིདྡེསོ ནཧོཏི, པརིཙྪེདརཱུཔནིདྡེསོཡེཝ. སོཙ གྷནཔིཎྜ ཝཏྠཱུསུཨེཝ ཝེདིཏབྦོ. ཏེསུཙ བྷཱུཏཱནཾ ཨསཾཕུཊྛཏཱནཱམ ནཏྠི. ཏསྨཱ བྷཱུཏཱནཾ ཨཉྙམཉྙཨབྱཱཔིཏཱ ཨེཀཏྟཾ ཨནུཔགཏཏཱཨེཝ. ཏཏྠ ཨསཾཕུཊྛཏཱནཱམ ཡུཏྟཱ སིཡཱཏི ཨདྷིཔྤཱཡེན ཨབྱཱཔིཀཏཱ ཧི ཨསཾཕུཊྛཏཱཏི ཝུཏྟཾ. ཨཏྠཏོ པན ནཱནཱཀལཱཔགཏཱནཾ བྷཱུཏཱནཾ པརིཡནྟཏཱ སངྑཱཏོ ཨནྟརཱལ༹དྷམྨོ. རཱུཔཔརིཙྪེདལཀྑཎཾ པརིཙྪེདརཱུཔཾ. ཡཱ པན ཙལམཱནེན ཀཱཡངྒེན ཨཏྟཱནཉྩ ཨཏྟསམངྒིནོ པུགྒལསྶ ཨདྷིཔྤཱཡཉྩ པཙྩཀྑེ ཋིཏེ ཛནེ ཝིཉྙཱཔེཏི པཱཀཊཾ ཀཏྭཱ དསྶེཏི. སཡཉྩ ཏེན ཀཱཡངྒེན ཏེཧི ཛནེཧི ཝིཉྙཱཡཏི. སཱ ཀཱཡཝིཉྙཏྟིནཱམ. ཡཱ ཨུཙྩཱརཱིཡམཱནེན ཝཱཙངྒེན སདྡེན ཨཏྟཱནཉྩ ཨཏྟསམངྒིནོ པུགྒལསྶ ཨདྷིཔྤཱཡཉྩ སོཏཔཐེ ཋིཏེ ཛནེ ཝིཉྙཱཔེཏི. སཡཉྩ ཏེནཝཱཙངྒེན ཏེཧི ཛནེཧི ཝིཉྙཱཡཏི. སཱ ཝཙཱིཝིཉྙཏྟིནཱམ. ཨཐཝཱ, ཝིཉྙཱཔེནྟི ཛནཱ ཝིཉྙཱཡནྟིཝཱ ཛནེཧི ཨཉྙམཉྙསྶ ཙིཏྟཱནི ཨེཏཱཡཱཏི ཝིཉྙཏྟི. སསམྦྷཱརེ ཨངྒཔཙྩངྒབྷཱུཏེ ཀཱཡེ པཝཏྟཱ ཝིཉྙཏྟི ཀཱཡཝིཉྙཏྟི. ཙོཔན ཀཱཡསངྑཱཏོ ཀཱཡོ ཨེཝཝཱ ཝིཉྙཏྟི ཀཱཡཝིཉྙཏྟི. ཙིཏྟཛསདྡསངྑཱཏཱཡ ཝཱཙཱཡ པཝཏྟཱ ཝིཉྙཏྟི ཝཙཱིཝིཉྙཏྟི. ཙོཔནཝཱཙཱ སངྑཱཏཱ ཝཱཙཱ ཨེཝཝཱ ཝིཉྙཏྟི ཝཙཱིཝིཉྙཏྟི. ཏཏྠ ཙིཏྟཝསེན ཡཾཀིཉྩི ཀཱཡངྒཝིཀཱརཾ ཀརོནྟསྶ ཏཾཏཾཨངྒཾ སནྟམྦྷནྟཱ སནྡྷཱརེནྟཱ ཙཱལེནྟཱ ཨངྒམངྒཱནུསཱརིསངྑཱཏཱ ཙིཏྟཛཝཱཏཀལཱཔཱ ཏཾཏཾཨངྒཾ པཱུརེཏྭཱ ཨུཔྤཛྫནྟི. ཨུཔྤཛྫནྟཱཙ ཡཐཱཝཱ ཏཐཱཝཱ ཨནུཔྤཛྫིཏྭཱ ཡསྶ ཏེཧི ཙིཏྟཛཝཱཏཀལཱཔེཏི སཧཛཱཏསྶ ཙོཔནཀཱཡསྶ ཨཱནུབྷཱཝེན སབྦེ ཏེ ཀལཱཔཱ ཡཐཱདྷིཔྤེཏདིསཱབྷིམུཁཱཨེཝ ཨུཔྤཛྫནྟི. ཨཡཾ ཙོཔནཀཱཡསངྑཱཏོ ཨཱཀཱརཝིཀཱརོ ཀཱཡཝིཉྙཏྟི ནཱམ. ནིཡཱམཀསདིསཱི ཧི ཨཡཾ ཀཱཡཝིཉྙཏྟི. ཏེཙ ནཱཝཱསདི སཱཏི. ཡཐཱ ཧི ནིཡཱམཀོ ནཱཝཱཡ མཱུལབྷཱགེ ཋཏྭཱ ཨེཀཾ མཧཱཕིཡཾ ¶ དལ༹ྷཾ གཧེཏྭཱ ནདིསོཏེ ཙཱརེཏྭཱ སཀལཾ མཧཱནཱཝཾ ཨིཙྪིཏདིསཱབྷིམུཁཾ ནིཡོཛེཏི. ན ཡཾཝཱ ཏཾཝཱ དིསཾ གནྟུཾ དེཏི. ཨེཝཾ སམྤདམིདཾ དཊྛབྦཾ. ཨེཀཙིཏྟཀྑཎིཀཱ ཧི ཝིཉྙཏྟི ཏེསཾ མཱུལབྷཱགེཨེཝ ལབྦྷམཱནཱ ཏེ ཡཐཱདྷིཔྤེཏདིསཱབྷིམུཁེ ཨེཝཾ ཀཏྭཱ ནིཡོཛེཏཱིཏི སཱ ནིཡཱམཀསདིསཱི ཧོཏཱིཏི. ཨེཏྠཙ ཡདེཏཾ ཨཊྛཀཐཱཡཾ. ཨེཀཛཝནཝཱིཐིཡཾ སཏྟསུ ཛཝནེསུ པཐམ ཛཝནསམུཊྛིཏཱ ཝཱཡོདྷཱཏུ ཨཏྟནཱ སཧཛཱཏརཱུཔཀཱཡཾ སཾཐམྦྷེཏུཾ སནྡྷཱརེཏུཾ སཀྐོཏི. ཨཔརཱཔརཾ པན ཙཱལེཏུཾ ནསཀྐོཏི. དུཏཱིཡཱདཱིསུཔི ཨེསེཝ ནཡོ. སཏྟམཙིཏྟེན པན སམུཊྛིཏཱ ཝཱཡོདྷཱཏུ ཧེཊྛཱ ཚཧིཙིཏྟེཧི སམུཊྛིཏཾ ཝཱཡོདྷཱཏུཾ ཨུཔཏྠམྦྷནཔཙྩཡཾ ལབྷིཏྭཱཨཏྟནཱསཧཛཱཏཾ རཱུཔཀཱཡཾ སཾཐམྦྷེཏུཾ སནྡྷཱརེཏུཾ ཙཱལེཏུཾ ཨབྷིཀྐམཱཔེཏུཾ སཀྐོཏཱིཏི ཝུཏྟཾ. ཏཾ ཨབྷིཀྐམཱམཱིཏི ཀཱཡཾ པགྒཎྷནྟཱནཾ ཨནེཀསཧསྶེསུ ཛཝན ཝཱརེསུ པཝཏྟམཱནེསུ ཡསྨིཾཝཱརེ ཙལནསངྑཱཏཾ དེསནྟརཔཱཔནཾ ཛཱཡཏི, ཏཾ སནྡྷཱཡ ཝུཏྟཾ. ན ཧི ཀཏིཔཡཛཝནཝཱརེཧི ཙལནཾ ཛཱཡཏི. ཡདི ཛཱཡེཡྻ, ཨིདྡྷིམནྟཱནཾ ཨིདྡྷིཡཱགམནཾ ཝིཡ སབྦེསཾཔི སཱིགྷཏརཾ གམནཾ པཉྙཱཡེཡྻ. ཀསྨཱ, ཨེཀཙྪརཀྑཎེཔི ཨནེཀཀོཊིསཏསཧསྶཙིཀྐཔཝཏྟིཡཱ སམྦྷཝཏོ. ཨཡཉྩ ཨཏྠོ ཨུཔརི ཨཀྑརུཔྤཏྟིཝིཙཱརཎཱཡཾ པཱཀཊོ བྷཝིསྶཏཱིཏི. ཏསྨཱ ཏཏོ པུརིམཝཱརེསུ སཾཐམྦྷནསནྡྷཱརཎཱནིཨེཝ སམྤཛྫནྟཱིཏི ཝེདིཏབྦཾ. ཡཱ ཙེཏྠ སཏྟཡུགསཀཊོཔམཱ ཝུཏྟཱ, སཱཔི ནཱནཱཛཝནཝཱིཐཱིསུ སམུཊྛིཏཱནཾ ཝཱཡོདྷཱཏཱུནཾ ཨཔརཱཔརཾ ཨུཔཏྠམྦྷནེཙ ཡུཛྫཏིཡེཝ. ཏཐཱ ཧི ཙལནཙིཏྟཛརཱུཔསནྟཏིཡཾ པཝཏྟཱནི ཨུཏུཛརཱུཔསངྒྷཱཊཱནིཔི ཝིཉྙཏྟིསཧིཏཱནི ཝིཡ ཏདཱཀཱརཝནྟཱནི སཝེགཱནི སཝིཔྥཱརཱནིཨེཝ པཝཏྟནྟི. ཏསྨཱ པུབྦཱཔརཔཝཏྟཱནཾ ནཱནཱ ཛཝནཝཱིཐཱིནཾ ཨནྟརནྟརཱ བྷཝངྒསམཡེསུཔི ཨབྷིཀྐམནཱདིཀཾ ཙལནཾ སམྤཛྫཏིཡེཝ. ཨེཀཱབདྡྷཔཝཏྟཱནིཙ ཙཏུསམུཊྛཱནིཀརཱུཔཱནིནཱམ ཨེཀསྶ ཝིསཡེ ཨིཏརཱནི ཨེཀསམུཊྛཱནཱནི ཝིཡ སབྦསོ ཏདནུ པརིཝཏྟཱིནི ཧོནྟཱིཏི ཙིཏྟཛེ ཙལནྟེ ཨིཏརཱནིཔི ཙལནྟི ཡེཝཱཏི དཊྛབྦཾ. ཙལནཉྩེཏྠ པཙྪིམཔཙྪིམཱནཾ རཱུཔཀལཱཔསངྒྷཱཊཱནཾ པུརིམ པུརིམཱནཾ ¶ ཨུཔྤནྣདེསཏོ དེསནྟརེ ཡཐཱཔཝཏྟསནྣིཝེསཱཀཱརེན ཨཔརཱཔརཾ ཨུཔྤཛྫམཱནཾ ཝེདིཏབྦཾ. ན ཧི རཱུཔཱརཱུཔདྷམྨཱནཾ ཨུཔྤནྣ དེསེ ཨནིརུཛ྄ཛྷིཏྭཱ ཀེསགྒམཏྟཾཔི དེསནྟར སངྐམནཾནཱམ ཨཏྠི. ཨིཏརཐཱ ཁཎིཀདྷམྨཏཱ ཨབྱཱཔཱརདྷམྨཏཱ ཨཝསཝཏྟིཏཱཙ ཏེསཾ ནསིཡཱཏི. ཡཾཀིཉྩི ཝཙཱིབྷེདཾ ཀརོནྟསྶ ཀཎྛཊྛཱནཱདི གཏཨུཔཱདིནྣཀ པཐཝཱིདྷཱཏཱུསུ ཙལམཱནཀཎྛཔདེསཱདིགཏཙིཏྟཛ པཐཝཱིདྷཱཏཱུནཾ སངྒྷཊྚནསངྑཱཏེན ཋཱནཀརཎསནྣིཔཱཏེན སཧེཝཡོ ཝཙཱིགྷོསསངྑཱཏོ ཙིཏྟཛསདྡོ ཛཱཡཏི. སོ ཡེན ཨཏྟནཱ སཧ ཛཱཏེན ཨཱཀཱརཝིཀཱརེན ཡཐཱདྷིཔྤཱཡཾ ཏཾཏཾ ཝཎྞཝིསེསཏྟཾ ཨུཔགཙྪཏི. ཡེནཙ སུཎནྟཱནཾ ཏཾཏཾཨཏྠཛོཏཀོ ཨཀྑརསནྣིཔཱཏབྷཱུཏོ པདབྱཉྫནཝིསེསོ ཨུཔལབྦྷཏི. སོ ཙོཔནཝཱཙཱསངྑཱཏོ ཨཱཀཱརཝིཀཱརོ ཝཙཱིཝིཉྙཏྟིནཱམ. ཨཊྛཀཐཱཡཾ པན ཏསྶཱ པན ཙིཏྟསམུཊྛཱནཱཡ པཐཝཱིདྷཱཏུཡཱ ཨུཔཱདིནྣགྷཊྚནསྶ པཙྩཡབྷཱུཏོ ཨེཀོ ཨཱཀཱརཝིཀཱརོ ཝཙཱི ཝིཉྙཏྟིནཱམཱཏི ཝུཏྟཾ. ཏཏྠ ཨུཔཱདིནྣགྷཊྚནསྶ པཙྩཡབྷཱུཏོཏི ཀམྨཛབྷཱུཏཱཡ ཙཏུཛབྷཱུཏཱཡཨེཝཝཱ ཨུཔཱདིནྣཔཐཝཱིདྷཱཏུཡཱ སཧགྷཊྚནཾ པཊིཙྩ སདྡཝིསེསཔཝཏྟིཡཱ པཙྩཡབྷཱུཏོཏི ཨཏྠོ. གྷཊྚནསྶ པཙྩཡོ པན ཙལམཱནཀཎྛཔདེསཱདིཝིཀཱརབྷཱུཏོ ཀཱཡངྒཝིསེསོཨེཝ སིཡཱ. ཝིཀཱརདྭཡཉྩ ཨསཾམིསྶཾ ཀཏྭཱ ཝེདིཏབྦནྟི. ཨེཏྠཙ ཨུཔཱདིནྣཀཔཐཝཱིཧི སཧ གྷཊྚནཾ ཙིཏྟཛཔཐཝཱིནཾ ཀིཙྩཾ. ཡཾ པན ཏཱསཾ ཡཐཱཝཱ ཏཐཱཝཱ ཨགྷཊྚེཏྭཱ ཡཐཱ ཨིཙྪིཏཀྑརཾ སམྤཛྫཏི. ཏཐཱ གྷཊྚནཔཀཱརཝིདྷཱནཾ. ཨིདཾ ཀཱཡཝིཉྙཏྟིཡཱ ཀིཙྩཾ. གྷཊྚནེན སཧེཝ ཨུཔྤནྣསདྡཱནཾ ཏཾཏཾཝཎྞཏྟ པཏྟིཡཱ ཝིདཧནམེཝ ཝཙཱིཝིཉྙཏྟིཡཱ ཀིཙྩཾ. ཀུམྦྷཐུནཏལཾ ཝིཡཙ ཨུཔཱདིནྣཀཔཐཝཱི. པཧརཎཧཏྠོ ཝིཡ ཙིཏྟཛཔཐཝཱི. ཧཏྠཔརི ཝཏྟན ཝིཀཱརོ ཝིཡ ཀཱཡཝིཉྙཏྟི. སདྡཝིཀཱརོ ཝིཡ ཝཙཱིཝིཉྙཏྟི. ཀུམྦྷཐུནསྶ ནཱནཱསདྡཔབྷེདོཝིཡ ནཱནཱཝཎྞབྷེདོཏི. ཨེཏྠཙ ཡདེཏཾ ཨཊྛཀཐཱཡཾ ཨིདཾ ཝཀྑཱམི ཨེཏཾ ཝཀྑཱམཱིཏི ཨུཔྤཛྫམཱནཾ ཙིཏྟཾ ཨཊྛརཱུཔཱནི སམུཊྛཱཔེཏི. ཏེསཾ ཨབྦྷནྟརེ ཙིཏྟ སམུཊྛཱནཱ པཐཝཱིདྷཱཏུ ཨུཔཱདིནྣཀཾ གྷཊྚཡམཱནཱཝ ཨུཔྤཛྫཏི. ཏེན དྷཱཏུགྷཊྚནེན ¶ སཧེཝ སདྡོ ཨུཔྤཛྫཏཱིཏིཙ པུརིམཙིཏྟསམུཊྛཱ ནཱཡ ཨུཔཏྠམྦྷནཀིཙྩཾཔི ནཏྠཱིཏིཙ ཝུཏྟཾ. ཏཾཔི ཨནེཀསཏེསུ ཛཝནཝཱརེསུ པཝཏྟམཱནེསུ ཡསྨིཾཝཱརེ པརིབྱཏྟཾ ཨཀྑརཾ པཝཏྟཏི, ཏཾ སནྡྷཱཡ ཝུཏྟནྟི གཧེཏབྦཾ. ཏེནེཝ ཧི མཱུལ ཊཱིཀཱཡཾ ཨུཔཏྠམྦྷནཀིཙྩཾ ནཏྠི ལདྡྷཱསེཝནེན ཙིཏྟེནེཝ གྷཊྚནསྶ བལཝབྷཱཝཏོཏི ཝུཏྟཾ. ཨེཏྠཙ ལདྡྷཱསེཝནེནཱཏི ཨེཏེན པུབྦབྷཱགེ ནཱནཱཛཝནཝཱིཐཱིཧི ལདྡྷཱསེཝནབྷཱཝཾ དསྶེཏི. པཐམ ཛཝནཙིཏྟསྶཔི ལདྡྷཱསེཝནཏཱཡ ཨདྷིཔྤེཏཏྟཱ. ནཙ ཨེཀཛཝན ཝཱརམཏྟེན པརིབྱཏྟཾ ཨེཀཀྑརཾ སམྤཛྫཏཱིཏི སཀྐཱ ཝིཉྙཱཏུཾ. ཀསྨཱ, ཏསྶ ཨེཀདྭིཨཙྪརཀྑཎམཏྟེན ཀཱལེན ཝཏྟབྦཏྟཱ ཨེཀཙྪརཀྑཎེཙ ཨནེཀསཏསཧསྶཱནཾ ཛཝནཝཱིཐཱིནཾ པཝཏྟིསམྦྷཝཏོ. ཝུཏྟཉྩ –

ཨེཀམཏྟཱ ཏཡོ རསྶཱ, དྭིམཏྟཱ དཱིགྷམུཙྩརེ;

ཏིམཏྟོ ཏུ གཱིཏོ ཉེཡྻོ, བྱཉྫནཱ ཨཌྜྷམཏྟིཀཱཏི.

མིལིནྡཔཉྷེཙ སཱདྷིཀེ ཝཱིཧིཝཱཧསཏེ ཝཱིཧིབཱིཛཱནི ཨེཀཙྪརཀྑཎེ ཨུཔྤནྣསྶ ཙིཏྟསྶ ཀལཾཔི ནཨུཔེནྟི. ཀལབྷཱགཾཔི ནཨུཔེནྟཱིཏི དཱིཔིཏཾ. ཨེཀཀྑརཾ ཨུཙྩཱརེནྟསྶཙ ཏཏྟཀཾཔི ཀཱལཾ ཨུཙྩཱརཎཙིཏྟབྱཱཔཱརོ སནྡིསྶཏིཡེཝ. ནཙ པརམཏྠཏོ ཨེཀམེཝ སདྡཾ ཨུཙྩཱརེམཱིཏིཝཱ སུཎོམཱིཏིཝཱ སཀྐཱ ནིཡམེཏྭཱ ཨུཙྩཱརེཏུཾ སོཏུཉྩ. ཏཐཱ ནིཡམེནྟསྶཔི སདྡཱནཾ པུབྦཱཔརཏོ ཨནེཀསཏསཧསྶསྶེཝ ཨུཙྩཱརཎ སཝན སམྦྷཝཏོ. ཨེཀམེཝཱཏི ཨབྷིམཱནོ པན སམཱུཧགྷན སནྟཏིགྷནེཧི པཊིཙྪནྣཏྟཱཨེཝ ཧོཏཱིཏི དཊྛབྦཾ. སེསམེཏྠ ཀཱཡཝིཉྙཏྟིཡཾ ཝུཏྟན ཡེན ཡཐཱསམྦྷཝཾ ཝེདིཏབྦནྟི. ཨེཏྠཙ ཝིཉྙཏྟིསདྡོ ཀཱཡེན ཝིཉྙཱཔེཏི ཝཱཙཱཡ ཝིཉྙཱཔེཏཱིཏིཨཱདིསུ བོདྷནཏྠོ. སུདིནྣ ཀཎྜེ ཏིཀྑཏྟུཾ ཝིཉྙཱཔེཏཱིཏིཨཱདཱིསུ པཝཏྟནཏྠོ. ཨིདྷ པན དུཝིདྷོཔི ཡུཛྫཏི. ཨེཝཉྷི སཏི པརཾ བོདྷེཏུཀཱམཏཱརཧི ཏེསུ སབྦེསུ ཀཱཡངྒཝཱཙངྒཙོཔནེསུཔི པཝཏྟཀཝིཉྙཏྟིཡཱ ལབྦྷམཱནཏཱ ཝེདིཏབྦཱ ཧོཏཱིཏི. མཱུལཊཱིཀཱཡཾ པན པརཾ བོདྷེཏུཀཱམཏཱཡ ¶ ཝིནཱཔི ཨབྷིཀྐམནཱདིཔཝཏྟནེན སོ ཙིཏྟ སཧབྷཱུཝིཀཱརོ ཨདྷིཔྤཱཡཾ ཝིཉྙཱཔེཏི. སཡཉྩ ཝིཉྙཱཡཏཱིཏི དྭིདྷཱཔི ཝིཉྙཏྟིཡེཝཱཏི ཝུཏྟཾ, ཏཏྠ དྭཱིསུ བོདྷནཝིཉྙཏྟཱིསུ པུརིམཱ ཀཱཡཝིཉྙཏྟི ཨངྒཔཙྩངྒསྶ ཙལམཱནཝཎྞཾ ཙཀྑུཝིཉྙཱཎཝཱིཐིཡཱ ཙལམཱནངྒཔཙྩངྒཾ ཀཱཡཝིཉྙཱཎཝཱིཐིཡཱ གཧེཏྭཱ པཙྪཱ སུདྡྷེན མནོདྭཱརིཀཛཝནེནཨེཝ ཝིཉྙཱཡཏི པཙྪིམཱཙ ཝཙཱིཝིཉྙཏྟི ཨུཙྩཱརིཡམཱནཾ སདྡཾ སོཏཝིཉྙཱཎཝཱིཐིཡཱ གཧེཏྭཱ པཙྪཱ སུདྡྷེན མནོདྭཱརིཀཛཝནེནཨེཝ ཝིཉྙཱཡཏི, ན པཉྩདྭཱརིཀཛཝནེན. སཱ ཧི ཨཏྟཱནཾ ཛཱནནྟེཨེཝ པརསཏྟེ ཨཏྟནཱ སམངྒིནོ པུགྒལསྶ ཙིཏྟཾ ཝིཉྙཱཔེཏི, ན ཨཛཱནནྟེ. ཉཱཔཀ ཧེཏུ ཧི ནཱམ ཨཏྟཱནཾ ཛཱནནྟེཨེཝ ཉཱཔེཏབྦཾ ཉཱཔེཏི, ནོ ཨཛཱནནྟེ. ཨེཝཉྩ ཀཏྭཱ ཀཱཡངྒ ཙོཔནཾ དིསྭཱཝཱ པརཱམསིཏྭཱཝཱ སདྡཾ སུཏྭཱཝཱ པརསྶ ཏཾཏཾཨདྷིཔྤཱཡཾ ཛཱནནྟཱནཾ ཏིརཙྪཱན གཏཱནཾཔི པཐདྷཾ ཝིཉྙཏྟིཛཱནནཾ སིདྡྷཾ བྷཝཏི. ཏཾཛཱནནེན ཝིནཱ ཨདྷིཔྤཱཡཛཱནནསྶ ཨསམྦྷཝཏོ. ཝིཉྙཏྟིཾ ཛཱནནྟཱནཾཙ པུརིམསིདྡྷསངྐེཏ སམྦནྡྷ ཛཱནནེན ཝིནཱ ཨདྷིཔྤཱཡཛཱནནཾ ན སམྦྷཝཏཱིཏི མཛ྄ཛྷེ ཝིསུཾ པུབྦསངྐེཏ སམྦནྡྷགཧནཾཔི ཨིཙྪནྟི, དྭཱིསུ པན པཝཏྟཀཝིཉྙཏྟཱིསུ པརཾ ཨབྷིཀྐམནྟཾ ཙཀྑུཝིཉྙཱཎཝཱིཐིཡཱ དིསྭཱ ཨབྷིཀྐམནཝིཉྙཏྟིཉྩ ཨབྷིཀྐམནཙིཏྟཉྩ མནོཝིཉྙཱཎཝཱིཐིཡཱ ཛཱནནྟི. ཨེསནཡོ པཊིཀྐམནཱདཱིསུ. ཏཐཱ པརསྶ ཀཐཾ སོཏཝིཉྙཱཎཝཱིཐིཡཱ སུཏྭཱ ཀཐནཝིཉྙཏྟིཉྩ ཀཐནཙིཏྟཉྩ མནོཝིཉྙཱཎཝཱིཐིཡཱ ཛཱནནྟི. པརཾ རཏྟཙིཏྟེན ཀཱཡངྒཾ ཙཱལེནྟཾ དིསྭཱ ཙལནཝིཉྙཏྟིཉྩ རཱགཙིཏྟཉྩ ཛཱནནྟི. རཏྟསྶ ཀཐཾ སུཏྭཱ ཀཐན ཝིཉྙཏྟིཉྩ རཱགཙིཏྟཉྩ ཛཱནནྟི. ཨེསནཡོ སབྦཱསུ ཀཱཡིཀཝཱཙསིཀཀྲིཡཱསཱུཏི. ལཧུནོ བྷཱཝོ ལཧུཏཱ. མུདུནོ བྷཱཝོ མུདུཏཱ. ཀམྨནི སཱདྷུ ཀམྨཉྙཾ. ཀམྨཡོགྱནྟི ཨཏྠོ. ཀམྨཉྙསྶ བྷཱཝོ ཀམྨཉྙཏཱ.

ཨདནྡྷཏཱལཀྑཎཱ རཱུཔསྶ ལཧུཏཱ. ཨཐདྡྷཏཱ ལཀྑཎཱ རཱུཔསྶ མུདུཏཱ. སརཱིརཀྲིཡཱནུཀཱུལཀམྨཉྙབྷཱཝལཀྑཎཱ རཱུཔསྶ ཀམྨཉྙཏཱ. ཨཉྙམཉྙཾ ཨཝིཛཧནྟིཡོཔི ཨེཏཱ ཝིརུདྡྷཔཙྩཡསཔྤཱཡ པཙྩཡཱནཾ ཝསེན ཨསཾམིསྶཏོ ཝེདིཏབྦཱ. ཏཐཱ ཧི ཨཏྟནོ ཀཱཡཝིརུདྡྷཾ ¶ ཨུཏུཾཝཱ ཨཱཧཱརཾཝཱ ཙིཏྟཀྲིཡཾཝཱ སེཝནྟཱནཾ སརཱིརགཏཱ དྷཱཏུཡོ ཀདཱཙི སཀལསརཱིརཾཝཱ སརཱིརེཀདེསཾཝཱ ཁོབྷེཏྭཱ ཝིསེསཏོ པཱུཏིམུཁ སཔྤསངྑཱཏཨཱཔོ པརིཡུཊྛཱནཾ ཀཏྭཱ ཀཱཡཾ ཨསཡ྄ཧབྷཱརཾ ཝིཡ གརུཾ བྷཱརིཡཾ ཀརོནྟི. ཨིརིཡཱ པཐཔརིཝཏྟནེ ཀཱཡབྷཱརིཡནིམིཏྟཾ དུཀྑཾ ཨུཔྤཱདེནྟི. ཏདཱརཱུཔསྶ ལཧུཏཱ ནཔཝཏྟཏི. པུན ཨཏྟནོ སརཱིརསཔྤཱཡཾ ཨུཏུཾཝཱ ཨཱཧཱརཾཝཱ ཙིཏྟཀིརིཡཾཝཱ སེཝནྟཱནཾ སོ དྷཱཏུཀྑོབྷོ ཝཱུཔསམྨཏི. ཀཱཡོ སལླཧུཀོ ཧོཏི. ཨིརིཡཱཔཐཔརིཝཏྟནེ ཀཱཡ བྷཱརིཡནིམིཏྟཾ དུཀྑཾནཱམ ནཏྠི. ཏདཱ སཱ པཝཏྟཏི. ཨེསནཡོ སེསཱསུཔི. ཝིསེསནཏོ པནེཏྠ མུདུབྷཱཡཾ ཀཊྛམུཁསཔྤསངྑཱཏ པཐཝཱིཔརིཡུཊྛཱནཾ ཀཏྭཱ སུཀྑཀཊྛཾཝིཡ ཀཱཡཾ ཐདྡྷཾ ཀཀྑལ༹ཾཀརོནྟི. ཨིརིཡཱཔཐཔརིཝཏྟནེ ཨངྒམངྒཱནཾཚིཛྫནབྷིཛྫནཱཀཱརཔཏྟཾ ཐདྡྷཾ ཀཀྑལ༹ནིམིཏྟཾ དུཀྑཾ ཨུཔྤཱདེནྟཱིཏི ཝཏྟབྦཾ. ཀམྨཉྙཏཱཡཾ སཏྠམུཁསཔྤསངྑཱཏ ཝཱཡོ པརིཡུཊྛཱནཾ ཝཱཡོཝིསམཾ ཀཏྭཱ དཱམརིཀཙོརཔརིཡུཊྛིཏཾ པཙྩནྟརཊྛཾ ཝིཡ ཀཱཡཾ ཝིཝཊྚམཱནཾ ཀརོནྟི, སབྦཨིརིཡཱཔཐེསུ སུཁཾནཱམ ནཏྠཱིཏི ཝཏྟབྦཾ. ཏེཛོདྷཱཏུ པན ཏཱསཾ སབྦཱསཾཔི མཱུལབྷཱུཏཱ ཧོཏཱིཏི ཝེདིཏབྦཱ.

ཨིམཱ པན ཨརོགིནོ ཀལླབྷཱཝོཝིཡ སུཔརིམདྡིཏཙམྨསྶ མུདུབྷཱཝོཝིཡ སུདནྡྷསུཝཎྞསྶ ཀམྨཀྑམབྷཱཝོཝིཡ རཱུཔཀཱཡསྶ ཨིརིཡཱཔཐཔརིཝཏྟནེ སལླཧུཀཏཱདིཝསེན སནྡིསྶམཱནཱ ཝིསེསཱཀཱརཱ ཧོནྟཱིཏི ཀཏྭཱ ཝིཀཱརརཱུཔཾ ནཱམ. ཙཡནཾ ཙཡོ. པིཎྜཝསེན ཨབྷིནིབྦཏྟཱིཏི ཨཏྠོ. ཨཱདིཏོ ཨུཔརིཏོཙ ཙཡོ ཨུཔཙཡོ. པཐམཱབྷིནིབྦཏྟི ཨུཔརུཔརིཝཌྜྷིཙཱཏི ཨཏྠོ. ཨཡཉྷི ཨུཔསདྡོ ཨུཔཉྙཏྟནྟིཨཱདཱིསུ ཝིཡ པཐམཏྠོ ཨུཔསིཏྟནྟིཨཱདཱིསུ ཝིཡཙ ཨུཔརི ཨཏྠོཏི. ཝུཏྟཉྩ མཱུལཊཱིཀཱཡཾ ཨུཔསདྡོ པཐམཏྠོ ཨུཔརིཨཏྠོཙ ཧོཏཱིཏི. ཏེནེཝཧི པཱལི༹ཡཾ ཡོ ཨཱཡཏནཱནཾ ཨཱཙཡོ, སོ རཱུཔསྶ ཨུཔཙཡོ. ཡོརཱུཔསྶ ཨུཔཙཡོ, སཱ རཱུཔསྶ སནྟཏཱིཏི ཝུཏྟཾ. ཏནནཾ ཝིཏྠཱརཎཾ ཏཏི. སམྦནྡྷཱ ཏཏི པུནཔྤུནཾཝཱ ཏཏི སནྟཏི. ཡཐཱ པཝཏྟཱནཾ ཨཱཡཏནཱནཾ ཨདྡྷཱནཔཱུརཎཝསེན པཝཏྟཱིཏི ཨཏྠོ. ཏཏྠ གབྦྷསེཡྻཀཱནཾ ¶ སཏྟཱནཾ པཊིསནྡྷིཀྑཎེ རཱུཔཱནཾ ཨུཔྤཱདོ པཐམཱནིབྦཏྟིཨཏྠེན ཨུཔཙཡོནཱམ. ཏཏོ པརཾ ཡཱཝ སབྦཔཐམཾ ཨུཔྤནྣཱནཾ ཙཀྑུ སོཏ གྷཱནཛིཝ྄ཧཱནཾ ཨུཔྤཱདོ, ཨེཏྠནྟརེ རཱུཔཱནཾ ཨུཔྤཱདོ ཨུཔརི ཝཌྜྷིཨཏྠེན ཨུཔཙཡོནཱམ. ཏཏོ པརཾ ཡཱཝཛཱིཝཾ ཙཏུསནྟཏིརཱུཔཱནཾ ཨུཔྤཱདོ སནྟཏིནཱམ. ཝུཏྟཉྷེཏཾ ཨཊྛཀཐཱཡཾ ནདཱིཏཱིརེ ནིཁཱཏཀཱུཔསྨིཾ ཨུདཀུགྒམནཀཱལོཝིཡ ཨཱཙཡོ ནིབྦཏྟི. པརིཔུཎྞཀཱལོཝིཡ ཨུཔཙཡོ ཝཌྜྷི. ཨཛ྄ཛྷོཏྠརིཏྭཱ གམནཀཱལོ ཝིཡ སནྟཏི པཝཏྟཱིཏི.

ཝིབྷཱཝནིཡཾ པན

པཊིསནྡྷིཏོ པཊྛཱཡ ཡཱཝཙཀྑཱདི དསཀཱནཾ ཨུཔྤཏྟི. ཨེཏྠནྟརེ རཱུཔུཔྤཱདོ ཨུཔཙཡོནཱམ. ཏཏོ པརཾ སནྟཏི ནཱམཱཏི ཝུཏྟཾ. ཏཾཔི ཏེན པརིཡཱཡེན ཡུཛྫཏིཡེཝ.

སཾསེདཛོཔཝཱཏིཀཱནཾ པན པཊིསནྡྷིཀྑཎེ རཱུཔཱནཾ ཨུཔྤཱདོ པཐམཱ བྷིནིབྦཏྟི ཨཏྠེན པརིཔུཎྞ ཝཌྜྷི ཨཏྠེནཙ ཨུཔཙཡོ ནཱམ, ཏཏོ པརཾ རཱུཔཱནཾ ཨུཔྤཱདོ སནྟཏིནཱམ. ཨཔིཙ, ཏིསམུཊྛཱནིཀ རཱུཔཱནཾཔི ཝིསུཾ ཝིསུཾ སནྟཏིཔཙྩུཔྤནྣཾནཱམ ཨཏྠི. ཏསྶཙ ཨེཀེཀསྶ ནིབྦཏྟི ཝཌྜྷི པཝཏྟི ཝསེན ཏིསྶོ ཏིསྶོཨཝཏྠཱ ཧོནྟི. ཏཏྠ ཨེཀེཀསནྟཏིཡཾ ཨཱདིམྷི སནྟཏིསཱིསརཱུཔཱནཾ སབྦཔཐམཾ ཨུཔྤཱདོ ནིབྦཏྟིནཱམ. ཏཏོ ཝཌྜྷནརཱུཔཱནཾ ཨུཔྤཱདོ ཝཌྜྷཱིནཱམ. ཝཌྜྷནེ སམཏྟེ ཨཝཌྜྷིཏྭཱ པབནྡྷཊྛིཏིཝསེན ཝཏྟནཝསེནཨུཔྤཱདོཔཝཏྟིནཱམ. ཏཏྠ ཙ ནིབྦཏྟིཝཌྜྷིཡོ ཨུཔཙཡོནཱམ. པཝཏྟིསནྟཏི ནཱམ. སངྑེཔཏོ པན ལོཀེ སབྦཱསུ ཨིནྡྲིཡཱནིནྡྲིཡབདྡྷརཱུཔཔཝཏྟཱིསུ སནྡིསྶམཱནེ ཛཱཡན ཝཌྜྷན པཝཏྟནསངྑཱཏེ ཨཝཏྠཱབྷེདེ དིསྭཱ ཨུཔཙཡསནྟ ཏིཡོ ཝེདིཏབྦཱ. ཏཏྲཱཡཾ ནཡོ-རུཀྑཏིཎཱདཱིནིཝཱ སཱཁཱ པཏྟཔུཔྥཕལཱདཱིནིཝཱ ཨཱདིམྷི ཛཱཡནྟི. ཛཱཡིཏྭཱ ཝཌྜྷནྟི. ཝཌྜྷནེ སམཏྟེ ཨཝཌྜྷིཏྭཱ པབནྡྷཝསེན པཝཏྟིཏྭཱ བྷིཛྫནྟཱིཏི. ཛཱིརཎཾ ཛརཱ, ཛཱིརནྟི ཛིཎྞབྷཱཝཾ གཙྪནྟི ཨེཏཱཡཱཏི ཛརཱ. སཱཡེཝ ཛརཏཱ. ཨུཔྤཱདཛརཱབྷངྒེཧི ནིཙྩལཏི ནཀམྤཏཱིཏི ནིཙྩོ ཨསངྑཏ དྷམྨོ. ན ནིཙྩོ ཨནིཙྩོ, སངྑཏདྷམྨོ. ཨནིཙྩསྶ བྷཱཝོ ཨནིཙྩཏཱ, བྷངྒོ.

[༡༨༣] ཝིབྷཱཝནིཡཾ པན

‘‘ནིཙྩདྷུཝབྷཱཝེན ¶ ན ཨིཙྩཾ ཨནུགནྟབྦནྟི ཨནིཙྩ’’ནྟི ཝུཏྟཾ. ཏཾ ན སུནྡརཾ.

ནིཙྩསདྡོ ཧི སཱསནེ ལོཀེཙ པཱཀཊོ. སོ ཨེཝ ཨིདྷ ནཀཱརཡུཏྟོ ཨནིཙྩོཏི ཝུཏྟོཏི. ལཀྑཱིཡནྟི སལླཀྑཱིཡནྟི ཝིནིཙྪཱིཡནྟི དྷམྨཱ ཨིམེ སངྑཏཱཏི ཨེཏེནཱཏི ལཀྑཎཾ. སངྑཏ བྷཱཝཛཱནནནིམིཏནྟི ཨཏྠོ. ཡཐཱཧ- ཨངྒུཏྟརེ ཏཱིཎི མཱནི བྷིཀྑཝེ སངྑཏསྶ སངྑཏལཀྑཎཱནི. ཀཏམཱནི ཏཱིཎི, ཨུཔྤཱདོ པཉྙཱཡཏི, ཝཡོ པཉྙཱཡཏི, ཋིཏསྶ ཨཉྙཐཏྟཾ པཉྙཱཡཏཱིཏི. ནནུ པཱལི༹ཡཾ ཛཱཏིནཱམ ཨཱགཏཱ. ཏསྨཱ སཱཔི ཨིདྷ ཝཏྟབྦཱཏི ཝུཏྟཾ ཛཱཏིརཱུཔམེཝཱཏིཨཱདི. ཨེཏྠཱཏི རཱུཔསམུདྡེསེ. ཛནནཾ པཱཏུབྷཝནཾ ཛཱཏི. ཛཱཡནྟིཝཱ ཨེཏཱཡཱཏི ཛཱཏི, ཨུཔཙཡ སནྟཏི ནཱམེནཔཝུཙྩཏི ཏསྶཱཛཱཏིཡཱཏཐཱ ཨཝཏྠཱབྷེདཡོགཏོཏི ཨདྷིཔྤཱཡོ. སཱ ཧི ཨཱདིཏོ པཊིསནྡྷིརཱུཔཱནི པཱཏུབྷཝནྟཱནི ཀརོཏི. པུན ཨཔརིཔུཎྞཱནིཙ ཨཱཡཏནཱནི པཱུརེཏི. པཱུརིཏཱནི ཙ དཱིགྷཾཔི ཨདྡྷཱནཾ ཨབྦོཙྪིནྣཾ ཀཏྭཱ པཝཏྟེཏི པབནྡྷཡཏཱིཏི. ཨེཀཱ དསཝིདྷཾཔཱིཏི མཧཱབྷཱུཏཱདིབྷཱཝེན ཨེཀཏྟཾ ཨུཔནཡནཝསེན ཨེཀཱ དསཔབྷེདཾཔི. ཀཐཾ སརཱུཔཝསེན ཨཊྛཝཱིསཏིཝིདྷཾ ཧོཏཱིཏི པུཙྪིཏྭཱ བྷཱུཏཔྤསཱད ཝིསཡཱཏིཨཱདིནཱ ཨེཀཱདསཝིདྷསྶེཝ སརཱུཔཏོ དསྶནཾ ཨནྟོགདྷབྷེདཱནཾ པུབྦེ ཝུཏྟབྷཱཝེན སུཔཱཀཊཏྟཱཏི དཊྛབྦཾ. ཏེནཱཧ-ཨཊྛཱརསཝིདྷནྟི.

ཙཏྟཱརི བྷཱུཏཱནི པཉྩཔསཱདཱ ཨགཧིཏགཧཎེན ཙཏྟཱརོ ཝིསཡཱ གོཙརཱ. དུཝིདྷོ བྷཱཝོ. ཨེཀཾ ཧདཡཾ. ཨིཏི ཨིདཾ སོལ༹སཝིདྷཾ རཱུཔཾ ཛཱིཝིཏཱཧཱརརཱུཔེཧི སཧ ཨཊྛཱརསཝིདྷཾ ཧོཏི ཏཐཱ ཨེཀོ པརིཙྪེདོ. དུཝིདྷཱ ཝིཉྙཏྟི. ཨགཧིཏགཧཎེན ཏིཝིདྷོ ཝིཀཱརོ. ཙཏུབྦིདྷཾ ལཀྑཎནྟི དས ཨནིཔྥནྣཱཙཱཏི རཱུཔཾ སརཱུཔཏོ ཨཊྛཝཱིསཏིཝིདྷཾ བྷཝེཏི ཡོཛནཱ. ཨེཏྠཙ པཙྪིམཱནི དསརཱུཔཱནི སབྷཱཝཏོ ཨནུཔལབྦྷམཱནཏྟཱ པཙྩཡེཧི ནིཔྥཱདིཏཱནི རཱུཔཱནི ན ཧོནྟཱིཏི ཨནིཔྥནྣཱནི ནཱམ. ཨཔི ཙེཏྠ ཨབྷིདྷམྨེ ཝིསུཾ ¶ ཨུདྡིཊྛཱནི ནིདྡིཊྛཱནིཙ ཨེཏཱནི སབྷཱཝཏོ ཨནུཔལབྦྷམཱནཱནཱིཏི ཝཱ པརམཏྠཏོ ཨཝིཛྫམཱནཱནཱིཏིཝཱ ནསཀྐཱ ཝཏྟུཾ. ཝོཧཱརསིདྡྷ མཏྟབྷཱཝཾ ཨཏིཀྐམྨ ཏཱདིསེན སུདྡྷདྷམྨགཏིཡཱ སིདྡྷེན པརམཏྠ ལཀྑཎེན ཨུཔལདྡྷཏྟཱ. ཨིཏརཐཱ ནིབྦཏྟིལཀྑཎརཧིཏཾ ཨསངྑཏ ནིབྦཱནཾཔི སབྷཱཝཏོ ཨནུཔལབྦྷམཱནཾ པརམཏྠཏོ ཨཝིཛྫམཱནཉྩ ནཱམ སིཡཱཏི. ཏསྨཱ ནིབྦཏྟི ལཀྑཎརཧིཏཏྟཱཨེཝ ཨེཏཱནི ཨནིཔྥནྣཱནིནཱམ. ན སབྷཱཝཏོ ཨནུཔལབྦྷམཱནཏྟཱཏི ཡུཏྟཾ སིཡཱཏི. [རཱུཔསམུདྡེསོ]

༡༥༧. རཱུཔཝིབྷཱགེསབྦཉྩ པན ཨེཏཾ ཡཐཱསམུདྡིཊྛཾ ཨཊྛཝཱིསཏི ཝིདྷཾ རཱུཔཾ ཨཧེཏུཀཊྛེན ཨེཀཝིདྷམེཝ. ན སཧེཏུཀཱ ཧེཏུཀ ཝསེན དུཝིདྷཾ. ཏཐཱསཔྤཙྩཡཊྛེན ཨེཀཝིདྷམེཝ. ན སཔྤཙྩཡཱཔཙྩཡ ཝསེན དུཝིདྷནྟི ཨེཝཾ པཝཏྟཾ ཨེཀཝིདྷནཡཾ ཏཱཝ དསྶེཏུཾ སབྦཉྩཱཏིཨཱདིམཱརདྡྷཾ.

[༡༨༤] ཝིབྷཱཝནིཡཾ པན

ཨེཀཝིདྷནཡོཔི རཱུཔཝིབྷཱགོཨེཝཱཏི ཀཏྭཱ ‘‘ཡཐཱ ཨུདྡིཊྛ རཱུཔཱནཾ ཨེཀཝིདྷཱདིནཡཾ དསྶནཏྠཾ སབྦཉྩ པནེཏནྟིཨཱདི ཝུཏྟ’’ནྟི ཝུཏྟཾ. ཏཾ ན སམེཏི.

ཝཀྑཏི ཧི –

ཨཛ྄ཛྷཏྟིཀཱདིབྷེདེན, ཝིབྷཛནྟི ཡཐཱརཧནྟི.

ཨེཏེན ཨཛ྄ཛྷཏྟིཀཱདིབྷེདོ ཨེཝ རཱུཔཝིབྷཱགོནཱམཱཏི ཝིཉྙཱཡཏི.

ཏཏྠ སབྦཾཔི རཱུཔཾ ཧེཏུསམྤཡོགཱ བྷཱཝཏོ ཨཧེཏུཀ མེཝ, ན ཀིཉྩི སཧེཏུཀཾ. ཀིཉྩི ཨཧེཏུཀནྟི ཨེཝཾ ཝིབྷཱགོ ཨཏྠཱིཏི ཨདྷིཔྤཱཡོ. སཔྤཙྩཡཾ སཱསཝཾ སངྑཏཾ ལོཀིཡནྟི པཱཋོ. སཔྤཙྩཡཾ སངྑཏཾ ལོཀིཡཾ སཱསཝནྟི པན ཡུཏྟོ. པཱལི༹ཡཾཔི ཏཐཱ དིཊྛཏྟཱ སབྷཱགཡུགལ༹སམྦྷཝཏོཙཱཏི. ཨིཏརཱནི པན པཱལི༹ཀམེན ཨསམེནྟཱནིཔི སབྷཱག ཡུགལ༹ཏྟཱ བྷཱགཏོ ཡུཏྟཱནིཨེཝ. ཏཏྠ ཨཏྟནོ ཛནཀེན པཙྩཡེན སཧེཝ ཝཏྟཏཱིཏི སཔཙྩཡཾ. པཙྩཡེཧི སངྒམྨ ཀརཱིཡཏཱིཏི སངྑཏཾ. པཉྩུཔཱདཱ ནཀྑནྡྷསངྑཱཏེ ¶ ལོཀེཨེཝ པརིཡཱཔནྣནྟི ལོཀིཡཾ. ཨཏྟཱནཾ ཨཱརབྦྷ པཝཏྟེཧི ཨཱསཝེཧི སཧེཝ ཝཏྟཏཱིཏི སཱསཝཾ. ཨཀནིཊྛ བྲཧྨསནྟཱན བྷཱུཏཾཔི རཱུཔཾ ཀཱམཏཎྷཱ ཝིསཡབྷཱཝེན ཀཱམེཨེཝ པརིཡཱཔནྣཏྟཱ ཀཱམཱཝཙརཾ. ནཏྠི ཨཏྟནཱ གཧིཏཾ ཀིཉྩི ཨཱརམྨཎཾནཱམ ཨསྶཱཏི ཨནཱརམྨཎཾ. ཡོ དྷམྨོ ཨཉྙེན པཡོགེན པཧཱིནོཔི སམུདཡཔཧཱནེ ཨསཏི ཨཔཧཱིནོཝ ཧོཏི. པུན ཨཝསྶཾ ཨུཔྤཛྫམཱནཏྟཱ. ཨཔྤཧཱིནོཔི ཏསྨིཾ སཏི པཧཱིནོཝ ཧོཏི. པུན ཨནུཔྤཛྫམཱནཏྟཱ. ཏཱདིསོ དྷམྨོ པཧཱནཝཱཡཱམསྶ ཨཊྛཱནཏྟཱ ཨཔྤཧཱཏབྦོནཱམ. རཱུཔཾཔི ཨེདིསམེཝ ཧོཏཱིཏི ཝུཏྟཾ ཨཔྤཧཱཏབྦ མེཝཱཏི. ཨཊྛཱནཏྟཱ པཧཱན ཝཱཡཱམཾ ན ཨརཧཏཱིཏི ཨཏྠོ. ཨཐཝཱ, ཝིནཱ སམུདཡཔཧཱནེན པཧཱཏུཾ ཨསཀྐུཎེཡྻོཏི ཨཏྠོ. ཡདི ཨེཝཾ རཱུཔཾ བྷིཀྑཝེ ན ཏུམྷཱཀཾ. ཏཾ པཛཧཐ. ཏཾ ཝོ པཧཱིནཾ དཱིགྷརཏྟཾ ཨཏྠཱཡ ཧིཏཱཡ སུཁཱཡ བྷཝིསྶཏཱིཏི ཨིདཾ ཀཐནྟི. ཏཾཔི ཏབྦིསཡསྶ རཱགསྶ པཧཱནཾ སནྡྷཱཡ ཝུཏྟནྟི དཊྛབྦཾ. ཡཐཱཧ –

རཱུཔེ ཁོ རཱདྷ ཡོ ཚནྡོ, ཡོ རཱགོ, ཡཱནནྡཱི, ཡཱ ཏཎྷཱ, ཏཾ པཛཧཐ. ཨེཝཾ ཏཾརཱུཔཾ པཧཱིནཾ བྷཝིསྶཏི ཨུཙྪིནྣམཱུལཾ ཏཱལཱཝཏྠུཀཏཾ ཨནབྷཱཝཾཀཏཾ ཨཱཡཏིཾ ཨནུཔྤཱདདྷམྨནྟི.

ཨཡཾ ནཡོ ཨཉྙེསུཔི ཀུསལཱདཱིསུ ཨཔྤཧཱཏབྦེསུ ཝེདིཏབྦོཏི. ཨེཝསདྡོ ཙེཏྠ པུརིམཔདེསུཔི ཡོཛེཏབྦོ. ཨིཏིསདྡོ ཨཱདིཨཏྠོ, པཀཱརཏྠོཝཱ. ཏེན པཱལི༹ཡཾ ཨཱགཏཾ ན ཧེཏུ ཧེཏུཝིཔྤཡུཏྟནྟིཨཱདིཾ སངྒཎྷཱཏི. ཏསྶ ཏསྶ པུགྒལསྶ ཨཏྟབྷཱཝཔརིཡཱཔནྣོ དྷམྨསམཱུཧོ ཨཛ྄ཛྷཏྟཾནཱམ. ཏསྨིཾཔིཙ ཡཏྠ ཏཎྷཱཡ ཨཏིརེཀཏརཾ དལ༹ྷཔརིགྒཧོ ཧོཏི. སོ ཙཀྑཱདིཀོ ཙིཏྟེན སཧ ཚབྦིདྷོ དྷམྨོ ཨཛ྄ཛྷཏྟིཀོ ནཱམ. ཨཛ྄ཛྷཏྟེ ཝིདིཏོ པཱཀཊོཏི ཀཏྭཱ. ཏཐཱ ཧི སོ ཨཛ྄ཛྷཏྟཛ྄ཛྷཏྟནྟིཔི ཝུཏྟོ. ཨིཏརཱནི པན རཱུཔཱདིནི ཕསྶཱདཱིནིཙ ཏདུཔཱདཱཡ ཏཎྷཱཔརིགྒཧསྶ མནྡཏྟཱ བཱཧིརཱནི ནཱམ. ཡཐཱ ཧི ལོཀེ མཎིཝཱ སུཝཎྞཾཝཱ རཛཏཾཝཱ བཧིགེཧེ ནིདཧིཏྭཱ ཐཔིཏཾ ཧོཏི. པཙྪིཝཱ སུཔྤཾཝཱ གྷཊོཝཱ སརཱཝོཝཱ ཨནྟོ གེཧེ ཐཔིཏོ. ཏཏྠ པཙྪིམཱནི ཚཌྜེཏྭཱཔི པུརིམཱནི རཀྑནྟི. ཏསྨཱ ཏཱནེཝ ཏཎྷཱཔརིགྒཧདལ༹ྷཏཱཡ ཨནྟོཔརིབྷོགཱཏྭེཝ ཝུཙྩནྟི. པཙྪིམཱནི པན བཱཧིར པརིབྷོགཱཏྭེཝ. ཨེཝཾ སམྤདམིདཾ དཊྛབྦཾ. ཨིདྷཔི ཧི ཡདི སཀྐུཎེཡྻ. རཱུཔཱདཱིནི ཕསྶཱདིནིཙ སབྦཱནི ཚཌྜེཏྭཱཔི ཙཀྑཱདིཀཾ ཚབྦིདྷམེཝ ཨཝསྶཾ རཀྑིསྶནྟཱིཏི. ཨིཏི ཏཎྷཱ པརིགྒཧསྶ དལ༹ྷམནྡཏཱ ཝསེནེཝ ཏེསཾ དྭིནྣཾ ཨཛ྄ཛྷཏྟིཀ བཱཧིརཏཱ ཝུཏྟཱ. ན པཝཏྟིདེསཝསེནཱཏི ནིཊྛམེཏྠ གནྟབྦཾ.

[༡༨༥] ཡཾ པན ཝིབྷཱཝནིཡཾ

‘‘ཨཛ྄ཛྷཏྟིཀརཱུཔཾ ཨཏྠབྷཱཝསངྑཱཏཾ ཨཏྟཱནཾ ཨདྷིཀིཙྩ ཨུདྡིསྶ པཝཏྟཏྟཱ. ཀཱམཾ ཨཉྙེཔི ཨཛ྄ཛྷཏྟསམྦྷཱུཏཱ ཨཏྠི. རུལ༹ྷཱིཝསེན པན ཙཀྑཱདིཀམེཝ ཨཛ྄ཛྷཏྟིཀནྟི’’ ཝུཏྟཾ. ཏཾ ན སུནྡརཾ.

[༡༨༦] ཡཉྩ ཏཏྠ

‘‘ཨཏྟསངྑཱཏཾཔཱ ཙིཏྟཾ ཨདྷིཀིཙྩ ཏསྶ དྭཱརབྷཱཝེན པཝཏྟཏཱིཐི ཨཛ྄ཛྷཏྟཾ. ཏདེཝ ཨཛ྄ཛྷཏྟིཀནྟི’’ ཝུཏྟཾ. ཏཾཔི ན སུནྡརཾ.

ཏསྨིཾ ཨཏྠེ ཧི སཏི ཙིཏྟསྶ ཨཛ྄ཛྷཏྟཏཱ ན སམྤཛྫཏི. ཨཛ྄ཛྷཏྟདྷམྨ ཨཛ྄ཛྷཏྟིཀམྨོནཉྩ ཨཝིསེསོ ཨཱཔཛྫཏཱིཏི.

ཡཾ པན ཏཏྠ

ཨཐཝཱ ཡདི མཡཾ ན ཧོམ, ཏྭཾ ཀཊྛཀལིངྒརཱུཔམོ བྷཝིསྶཏཱིཏི ཝདནྟཱ ཝིཡ ཨཏྟབྷཱཝསྶ སཱཏིསཡཾ ཨུཔཀཱརཀཏྟཱ ཙཀྑཱདིནེཝ ཝིསེསཏོ ཨཛ྄ཛྷཏྟིཀཱནཱིཏི ཝུཏྟཾ. ཏཾ ཡུཏྟཏརཾ.

ཏཐཱ ཨུཔཀཱརཱཏིསཡཏྟཱཨེཝ ཧི ཏེསུ སཏྟཱནཾ པརིགྒཧ དལ༹ྷཏཱ ཧོཏཱིཏི. སཏྟཝིདྷཾཔི དྭཱརརཱུཔཾནཱམ. ཡཐཱཀྐམཾ ཝཱིཐི ཙིཏྟཱནཾ པཱཎཱཏིཔཱཏཱདིཀམྨཱནཉྩ པཝཏྟིམུཁཏྟཱ. ཏཏྠ པན པཉྩ ཝིདྷཾ པསཱདརཱུཔཾ ཨུཔཔཏྟིདྭཱརཾནཱམ. ཝིཉྙཏྟིདྭཡཾ ཀམྨདྭཱརཾནཱམཱཏི ཨོལཱ༹རིཀརཱུཔཾ པཀཏིཡཱ ཐཱུལསབྷཱཝཏྟཱ གྷཊྚནསངྑཱཏསྶཙ ཨཏྟནོ ཀིཙྩསྶ ཨོལཱ༹རིཀཏྟཱ. སནྟིཀེརཱུཔཾ དཱུརེ པཝཏྟསྶཔི སཱིགྷཏརཾ ཉཱཎེན གཧཎཡོགྱཏྟཱ. སཔྤཊིགྷརཱུཔཉྩཱཏི ཨེཏྠ པཊིཧནནཾ ¶ པཊིགྷོ. སོ དུཝིདྷོ ཝིསཡཝིསཡཱིནཾ པཊིགྷཊྚནཾ མཧཱ བྷཱུཏཱནཾ ཨཉྙམཉྙཔཊིགྷཊྚནནྟི. ཏཏྠ ཡེན པཊིགྷཊྚནེན པསཱད དྭཱརཱནཾ བྷཝངྒསྶཙ ཝིཀཱརཔྤཏྟི ཧོཏི. ཨིདཾ ཝིསཡཝིསཡཱིནཾ པཊིགྷཊྚནཾནཱམ. ཡེན རུཔྤནལཀྑཎཱནཾ རཱུཔདྷམྨཱནཾ རུཔྤན ཀུཔྤན གྷཊྚན པཱིལ༹ན བྷིཛྫནཱདཡོ པཝཏྟནྟི. ཨིདཾ མཧཱབྷཱུཏཱནཾ ཨཉྙམཉྙཔཊིགྷཊྚནཾ ནཱམ. པཊིགྷེན སཧ ཝཏྟཏཱིཏི སཔྤཊིགྷཾ.

[༡༨༧] ཝིབྷཱཝནིཡཾ པན

‘‘ཡོ སཡཾ ནིསྶཡཝསེནཙ སམྤཏྟཱནཾ ཨསམྤཏྟཱནཉྩ པཊིམུཁབྷཱཝོ ཨཉྙམཉྙཔཏནཾ. སོ པཊིགྷོ ཝིཡཱཏི པཊིགྷོ. ཡཐཱཧི པཊིགྷཱཏེ སཏི དུབྦལསྶ ཙལནཾ ཧོཏི. ཨེཝཾ ཨཉྙམཉྙཔཊིམུཁབྷཱཝེ སཏི ཨརཱུཔསབྷཱཝཏྟཱ དུབྦལསྶ བྷཝངྒསྶ ཙལནཾ ཧོཏཱིཏི’’ ཨེཝཾ མཧཱབྷཱུཏགྷཊྚནཾ ཨུཔམཱམཏྟཾ ཀཏྭཱ ཝིསཡཝིསཡིགྷཊྚནམེཝ གཧིཏཾ. ཏཾ ཨནུཔཔནྣཾ.

ཨེཝཉྷི སཏི ཡཱནི ལོཀེ ཨཛ྄ཛྷཏྟབཧིདྡྷཱསནྟཱནེསུ གྷཊྚནཱནི དིསྶནྟི. ཡེསཾ ཝསེན རཱུཔདྷམྨེསུ ཨཉྙམཉྙཾ ལགྒན བནྡྷན ཐམྦྷན དྷཱརཎ ཙལནཱདཱིནིཝཱ ཝཌྜྷན ཧཱཡན ཚེདན བྷེདན ཝིལཱིན ཝིཀིརཎཱདཱིནིཝཱ པཝཏྟནྟི. ཏཱནི ཨིདྷ ཨསངྒཧིཏཱནི སིཡུཾ. ནཙ ཏཱནི ཨནུགྒཧ ཨུཔགྷཱཏ ཝསེན པཝཏྟིབྷཱུཏ སནྣིཔཱཏ སངྑཱཏཾ གྷཊྚནཾཝིནཱ ཨཉྙཔཀཱརཱནིཨེཝ སཀྐཱ བྷཝིཏུནྟི. ཨིཏརཾ སོལ༹སཝིདྷཾ ཝུཏྟཔཊིཔཀྑཝསེན སུཁུམརཱུཔཾ དཱུརེརཱུཔཾ ཨཔཊིགྷརཱུཔཉྩ. ཨུཔཱདིནྣརཱུཔཾ ནཱམ ཀཏྠཙི ཡཾཀིཉྩི སརཱིརཊྛཀརཱུཔཾ ཝུཙྩཏི. ཀཏྠཙི ཀམྨསམུཊྛཱན མེཝ ཏདུབྷཡཾཔི ཏཎྷཱདིཊྛཱིཧི ཏུསཾ ཨཱདིནྣཔརཱམཊྛཏྟཱ ཨུཔཱདིནྣཾ ནཱམ ནིཔྤརིཡཱཡཏོ པན ཀམྨསམུཊྛཱནམེཝ ཨུཔཱདིནྣཾནཱམ. ཀསྨཱ ཏསྶེཝ སཏྟསནྟཱནེ ནིཙྩཀཱལཾ པཝཏྟིཝསེན སཱཏིསཡཾ བྷུསཾ ཨཱདིནྣགཧིཏཔརཱམཊྛཏཱསམྦྷཝཏོཏི ཝུཏྟཾ ཀམྨཛཾཨུཔཱདིནྣརཱུཔནྟི. ཨེཏཾ མམཱཏིཨཱདིནཱ ཏཎྷཱདིཊྛཱིཧི བྷུསཾ ཨཱདིཡཏཱིཏི ཨུཔཱདིནྣཾ. ཨཊྛཀཐཱཡཾ པན ཏཎྷཱདིཊྛཱིཧི ཨུཔེཏེན ཀམྨུནཱ ཨཏྟནོ ཕལབྷཱཝེན ཨཱདིནྣཾ གཧིཏནྟི ཨིམམཏྠཾ དསྶེཏི. སཧ ནིདསྶནེན ¶ སནིདསྶནཾ. ནིདསྶནནྟི ཙཀྑུཝིཉྙཱཎེན དཊྛབྦབྷཱཝོ ཝུཙྩཏི. སོ པན དྷམྨཏོ ཨནཉྙཏྟེཔི ཨཉྙེ ཝིཡ ཀཏྭཱ ཨུཔཙརཱིཡཏི. ཨེཝཉྷི སཏི ཨཏྠཝིསེསབོདྷོ ཧོཏཱིཏི. ནིདསྶནནྟིཝཱ ཙཀྑུཝིཉྙཱཎཀིཙྩཾ ཝུཙྩཏི. ཏེན སཧ ཝཏྟཏཱིཏི སནིདསྶནནྟིཔི ཡུཛྫཏིཡེཝ. ཙཀྑཱདིདྭཡཾ ཨསམྤཏྟཝསེན གོཙརགྒཱཧིཀཾ. གྷཱནཱདིཏྟཡཾ སམྤཏྟཝསེན གོཙརགྒཱཧིཀནྟི པཉྩཝིདྷཾཔི གོཙརགྒཱཧིཀརཱུཔནྟི ཡོཛནཱ. ཏཏྠ པསཱདེ ཨལླཱིཡིཏྭཱ ལགྒིཏྭཱ ཨུཔྤནྣཾ ཨཱརམྨཎཾ སམྤཏྟཾནཱམ. ཀེསགྒམཏྟཾཔི མུཉྩིཏྭཱ ཨུཔྤནྣཾ ཨསམྤཏྟཾནཱམ. ཀསྨཱ པནེཏྠ ཙཀྑཱདིདྭཡཾ ཨསམྤཏྟམེཝ གཎྷཱཏི. གྷཱནཱདིཏྟཡཾ སམྤཏྟམེཝཱཏི, པཙྩཡཝིསེསཏོ. ཨཱལོཀོ ཧི རཱུཔགཧཎེ ཙཀྑུསྶ པཙྩཡོ. ཨཱཀཱསོཙ སདྡགཧཎེ སོཏསྶཱཏི ཙཀྑུརཱུཔེསུཙ ཨཉྙམཉྙཾ ལགྒིཏྭཱ ཨུཔྤཛྫམཱནེསུ ཨཱལོཀཔརིཝཱརསྶ ཨོཀཱསོ ནཏྠི. ཏཐཱ སོཏསདྡེསུཙ ཨཱཀཱསཔརིཝཱརསྶཱཏི. ཝཱཡུཨཱཔཔཐཝིཡོ པན གྷཱནཱདིཏྟཡསྶ གནྡྷཱདིགཧཎེ པཙྩཡཱ ཧོནྟི. ཏཏྠ ཝཱཡུནཱམ གནྡྷཱཀཌྜྷནཀོ ནཱསཝཱཏོཡེཝ, སོཙ སམྤཏྟསྶེཝ པཙྩཡོ. ཨཱཔོནཱམ ཛིཝ྄ཧཱཏེམནཀོ ཨཱཔོ, སོཔི སམྤཏྟསྶེཝ པཙྩཡོ. ན ཧི རསོ སུཀྑཛིཝ྄ཧཱཡ ཕརཏཱིཏི. པཐཝཱིཙ གྷཊྚནཏྠཱཡ པཙྩཡོ. ན ཧི དུབྦལཔཐཝཱིསནྣིསྶཡོ ཨཱལོཀོཝཱ རཛོཝཱཀཱཡེ པཏམཱནོཔི པསཱདེ གྷཊྚེཏཱིཏི. ཨིཏི པཙྩཡཝིསེསཏོ ཏེསཾ སམྤཏྟཱསམྤཏྟཝསེན གཧཎ ཝིསེསོ ཧོཏཱིཏི. ཏཏྠ ཙཀྑུསྶ ཏཱཝ ཨསམྤཏྟགཧཎཾ པཱཀཊཾ. ཏཉྷི སམཱིཔེ ཨཀྑིཝཎྞཾཝཱ བྷམུཀམཱུལཾཝཱ ནཔསྶཏི. དཱུརེ པན མཧནྟཾ ཙནྡམཎྜལཱདིཀཾཝཱ ཕལིཀཱདིཏིརོཧིཏཾཝཱ ཝཎྞཾ པསྶཏི. དིསཱདེསཝཝཏྠཱནཉྩསྶ པཉྙཱཡཏཱིཏི. སོཏསྶ པན ཀཐནྟི, ཏཏྠ ཧི དཱུརེ སདྡོ ཙིརེན སུཡྻམཱནོ དིསྶཏི པཙྪིམདིསཱབྷཱགེ ཨུཔྤནྣོཔི སདྡོ ཨནྟརཱ མཧནྟེ ཙེཏིཡཱདིཀེ ཨནྟརིཏེ སཏི དཀྑིཎཔསྶཏོཝཱ སུཡྻཏི. ཨུཏྟརཔསྶཏོཝཱ. ཨསུཡྻམཱནོཝཱ ཧོཏཱིཏི. ཝུཙྩཏེ, ཨུཔྤནྣོ སདྡསངྒྷཱཊོ ཨཱསནྣེ ཋིཏཱནཾ ཨཱདིཏོ པཊྛཱཡ ཡཱཝ ཨཝསཱནཱ ཀམེན ¶ པཱཀཊཱིབྷཱུཏོ ཧོཏི. པཊིགྷཊྚནཱནིགྷཾསོཙ བལཝཱ ཧོཏི. ཨཧཾ སུཎོམཱིཏི པཝཏྟཱ སལླཀྑཎཝཱིཐིཡོ སཱིགྷཏརཾ ནིརནྟརཾ ཝིཡ པཝཏྟནྟི. དཱུརེ ཋིཏཱནཾ པན པཊིགྷཊྚནཱནིགྷཾསོ མནྡཏརོ ཧོཏི. ཨཱདིཏོ ཨཔཱཀཊོ. མཛ྄ཛྷེཝཱ ཨཝསཱནེཝཱ པིཎྜཝསེན པཱཀཊཱིབྷཱུཏོ. སལླཀྑཎཝཱིཐིཡོ ཙིརེན པརེན པཝཏྟནྟི. ཏསྨཱ ཏེསཾ ལཧུཾ སུཏོ. ཙིརེན སུཏོཏི ཨཏིམཱནོ ཧོཏཱིཏི. ཨཔིཙ, སདྡོནཱམ ནིསྶཡདྷཱཏུཔརཾཔརཱཡ པཝཏྟིཏྭཱ དཱུརཾཔི དེསཾ གཙྪཏིཡེཝ. ཨེཝཾ གཙྪནྟོཙ གཏགཏཊྛཱནེཨེཝ ཋཏྭཱ སཝནཱུཔཙཱརེ ཋིཏཱནཾ སོཏསཧསྶཾཔི གྷཊྚེཏི. མཧནྟེ པན ཙེཏིཡཱདིཀེ ཨནྟརིཏེ སཏི ཡཏོ ཨཱཀཱསོ ཨུཛུཾ ཝིཝཊོ ཧོཏི. ཏཏོ དཀྑིཎཔསྶཏོཝཱ ཨུཏྟརཔསྶཏོཝཱ གཏགཏཋཱནཏོཝསོཏཾ གྷཊྚེཏི. མནྡཏརོ པན སདྡོཨསུཡྻ མཱནོཔི ཧོཏི. ཨེཝཾ གཙྪནྟོཙ ཡཱཝ སོཏཔསཱདེ ཨལླཱིཡིཏྭཱ ནུཔྤཛྫཏི. ཏཱཝ ཨསམྤཏྟོཡེཝ ཧོཏི. ཡོ པན ཨལླཱི ཡིཏྭཱ ཨུཔྤཛྫཏི. སོ སམྤཏྟོནཱམ ཧོཏི. ན སོ སུཡྻཏཱིཏི. ཡདི པན སོཏཾ སམྤཏྟཝིསཡཾ སིཡཱ. ཡཐཱ ཨནྟོ ཀུཙྪིགཏོ གནྡྷོ བཧི ནགྷཱཡིཡཏི. ཏཐཱ ཨནྟོ ཀུཙྪིགཏོ སདྡོཔི བཧི ནསུཡེཡྻ. གནྡྷསྶ ཝིཡ དིསཱདེསཝཝཏྠཱནཾ ཝིསྶན སིཡཱཏི.

[༡༨༨] ཝིབྷཱཝནིཡཾ པན

‘‘གནྟྭཱ ཝིསཡདེསཾ ཏཾ, ཕརིཏྭཱ གཎྷཏཱིཏི ཙེ. ཨདྷིཊྛཱན ཝིདྷཱ ནེཔི, ཏསྶ སོ གོཙརོ སིཡཱ.’’ ཏིཔི ཝིཙཱརིཏཾ. ཏཾ ན སུནྡརཾ.

ན ཧི ཙཀྑཱདིདྭཡསྶ བཧིདྡྷཱ ཝིསཡདེསགམནསངྒོ ཨཏྠཱིཏི. གོཙརཾ གཎྷཱཏཱིཏི གོཙརགྒཱཧིཀཾ. པསཱད མཎྜབྷཱུཏཏྟཱ ཨཱཔཱཏམཱགཏཾ ཨཱརམྨཎནིམིཏྟཾ སམྤཊིཙྪཏཱིཏི ཨཏྠོ.

ཝིབྷཱཝནིཡཾ པན

ཝིཉྙཱཎཱདྷིཊྛིཏཾ ཧུཏྭཱ ཏཾཏཾ གོཙརགཧཎ སབྷཱཝཏྟཱཏི ཝུཏྟཾ.

ཝཎྞོཏི ¶ རཱུཔཱརམྨཎསྶེཏཾ ནཱམཾ. ཨོཛཱཏི ཨཱཧཱར རཱུཔ མཱཧ. ཝིནིབྷུཛྫཏཱིཏི ཝིནིབྦྷོགོ. ཋཱནཏོ དེསཏོ ཨུཔྤཏྟིཀཱརཎཏོ ཝིསུཾཝིསུཾ ཝཝཏྠཔཱིཡཏཱིཏི ཨཏྠོ. ནཝིནིབྦྷོ གོཏི ཨཝིནིབྦྷོགོ. སོ ཨེཝ རཱུཔནྟི ཨཝིནིབྦྷོགརཱུཔཾ. ཨཱཙརིཡཱནནྡཏྠེརེནཔནེཏྠ གནྡྷརསཨོཛཱ ཀཏྠཙི ཝིནཱིབྷུཏྟཱ དིསྶནྟཱིཏི པཉྩཝིདྷམེཝ ཨཝིནིབྦྷོགརཱུཔཾ ཨིཙྪིཏཾ. ཏཾ པརཏོ ཨཱགམིསྶཏཱིཏི. [རཱུཔཝིབྷཱགོ].

༡༥༨. ཀམྨནྟི ཨེཀཱ ཙེཏནཱཨེཝ. སཱཡེཝ ཧི པཊྛཱནེ ནཱནཱཀྑཎིཀ ཀམྨཔཙྩཡབྷཱཝེན ཝུཏྟཱ. ཡཐཱཧ-ནཱནཱཀྑཎིཀཱ ཀུསལཱཀུསལཱ ཙེཏནཱ ཝིཔཱཀཱནཾ ཁནྡྷཱནཾ ཀཊཏྟཱཙ རཱུཔཱནཾ ཀམྨཔཙྩཡེན པཙྩཡོཏི. ཙིཏྟནྟི པན སསམྤཡུཏྟདྷམྨཾ ཨདྷིཔྤེཏཾ. པཊྛཱནེ ཙེཏསིཀདྷམྨཱནཾཔི རཱུཔསམུཊྛཱཔནབྷཱཝེན ཝུཏྟཏྟཱ. ཡཐཱཧ-ཧེཏཱུ ཧེཏུསམྤཡུཏྟཀཱནཾ དྷམྨཱནཾ ཏཾ སམུཊྛཱནཱནཉྩ རཱུཔཱནཾ ཧེཏུ པཙྩཡེན པཙྩཡོཏིཨཱདི. ཨུཏཱུཏི ཏེཛོཡེཝ. སོ ཧི ཀཔྤསཎྛཱཔནཝསེན སཀལཾ ཨོཀཱས ལོཀཾཔི ནཱནཱསརཱིརསཎྛཱཔནཝསེན སཀ ལཾ རཱུཔམཡཾ ཀཱཡཾ སཏྟལོཀཾཔི ནཱནཱརུཀྑཏིཎཱདཱིནཾ ཨབྦྷཔཊལམེགྷཝུཊྛིཛལཨགྒི ཝཱཏཱདཱིནཉྩ སཎྛཱཔནཝསེན སཀལཾ སངྑཱརལོཀཾཔི ཨུདཡཏི པསཝཏི ཛནེཏི ཝཌྜྷེཏི. ཏསྨཱ ཨུཏཱུཏི ཝུཙྩཏཱིཏི. ཨརཏི གཙྪཏི པཝཏྟཏཱིཏི ཨུཏཱུཏིཔི ཝདནྟི. ཨཱཧཱརོཏི ཨོཛཱཨེཝ. རཱུཔཝིརཱགབྷཱཝནཱབྷཱུཏཾ ཨརཱུཔཀུསལཾ ཀམྨཛརཱུཔཾ ནཛནེཏཱིཏི ཝུཏྟཾ པཉྩཝཱིསཏིཝིདྷཾཔཱིཏི. ཨཏིསངྑཏནྟི ཨཏཱིཏཀཱལེ ཡཐཱཀཱ ལནྟརེ རཱུཔཾ ཛནེཏི, ཏཐཱ ཝིསེསེཏྭཱ སུཊྛུཀཏཾ. ཨཛ྄ཛྷཏྟི ཀསནྟཱནེཏི ཝུཏྟཾ, ཨཛ྄ཛྷཏྟསནྟཱནེཏི པན ཝཏྟབྦཾ. ཨཛ྄ཛྷཏྟ མེཝ ཨཛ྄ཛྷཏྟིཀནྟིཝཱ ཨིཀསདྡསྶ ཨཏྠོ དཊྛབྦོ. པཊིསནྡྷིམུཔཱདཱཡཱཏི པཊིསནྡྷིཙིཏྟསྶ ཨུཔྤཱདཀྑཎཾ ཨུཔཱདཱཡ. ཁཎེཁཎེཏི ཨེཀེཀསྶ ཙིཏྟསྶ ཏཱིསུ ཏཱིསུ ཁཎེསུ. ཨཱཙརིཡཱནནྡཏྠེརོ པན སབྦེསཾཔི ཙཏུསམུཊྛཱནིཀརཱུཔཱནཾ ཨེཀེཀསྶ ཙིཏྟསྶ ཨུཔྤཱདཀྑཎེཨེཝ ཨུཔྤཱདཾ བྷངྒཀྑཎེཨེཝ ནིརོདྷཉྩ ཨཱཧ. ཨཧཾ པནསྶཱ ¶ དྷིཔྤཱཡོ-སབྦཱནིཔི ཙཏུསམུཊྛཱནིཀརཱུཔཱནི ཙིཏྟསྶ ཨུཔྤཱདཀྑཎེཨེཝ ཨུཔྤཛྫནྟི, ན བྷངྒཀྑཎེ. ཡཐཱཧ –

ཡསྶཝཱ པན སམུདཡསཙྩཾ ནིརུཛ྄ཛྷཏི, ཏསྶ དུཀྑསཙྩཾ ཨུཔྤཛྫཏཱིཏི. ནོཏི.

ཏཐཱ ཏཱནི ཙིཏྟསྶ བྷངྒཀྑཎེཨེཝ ནིརུཛ྄ཛྷནྟི. ན ཨུཔྤཱདཀྑཎེ. ཡཐཱཧ –

ཡསྶ ཀུསལཱ དྷམྨཱ ཨཀུསལཱ དྷམྨཱ ཨུཔྤཛྫནྟི, ཏསྶ ཨབྱཱཀཏཱ དྷམྨཱ ནིརུཛ྄ཛྷནྟཱིཏི. ནོཏི.

ཨརཱུཔབྷཝཾ སནྡྷཱཡ ཨེཏཾ ཡམཀདྭཡཾ ཝུཏྟཾ. རཱུཔཱནི པན ཙིཏྟསྶ བྷངྒཀྑཎེཔི ཨུཔྤཛྫནྟི. ཨུཔྤཱདཀྑཎེཔི ནིརུཛ྄ཛྷནྟཱིཏི ཙེ. ན. ཨེཝཉྷི སཏི –

ཡསྶཝཱ པན སམུདཡསཙྩཾ ནིརུཛ྄ཛྷཏི, ཏསྶ དུཀྑསཙྩཾ ཨུཔྤཛྫཏཱིཏི. ཨརཱུཔེ ཏཎྷཱཡ བྷངྒཀྑཎེ ཏེསཾ སམུདཡསཙྩཾ ནིརུཛ྄ཛྷཏི. ནོཙ ཏེསཾ དུཀྑསཙྩཾ ཨུཔྤཛྫཏི. པཉྩཝོཀཱརེ ཏཎྷཱཡ བྷངྒཀྑཎེ ཏེསཾ སམུདཡསཙྩཉྩ ནིརུཛ྄ཛྷཏི, དུཀྑསཙྩཉྩ ཨུཔྤཛྫཏཱིཏིཙ.

ཨིཏརཏྠཙ

ཨརཱུཔེ ཀུསལཱནཾ ཨུཔྤཱདཀྑཎེ ཏེསཾ ཀུསལཱ དྷམྨཱ ཨུཔྤཛྫནྟི. ནོཙ ཏེསཾ ཨབྱཱཀཏཱ དྷམྨཱ ནིརུཛ྄ཛྷནྟི. པཉྩཝོཀཱརེ ཀུསལཱནཾ ཨུཔྤཱདཀྑཎེ ཏེསཾ ཀུསལཱ དྷམྨཱཙ ཨུཔྤཛྫནྟི. ཨབྱཱཀཏཱ དྷམྨཱཙ ནིརུཛ྄ཛྷནྟཱིཏིཙ.

ཨེཝཾ པརིཔུཎྞཔཉྷཱཨེཝ ཨུདྡྷཊཱ སིཡུཾ. ནོཏི པན པཊིསེདྷོཝ ཨུདྡྷཊོ. ཏསྨཱ ནཡིདཾ ཨརཱུཔབྷཝཾ སནྡྷཱཡ ཝུཏྟནྟི སཀྐཱ ཝཏྟུནྟི. ཙིཏྟཛརཱུཔཾ སནྡྷཱཡ ཝུཏྟནྟི ཙེ. ཏམྤི ན. ཀམྨཛརཱུཔསྶ ཝིགཧཎེ ཝིརོདྷསྶ ཡམཀཔཱཋནྟརསྶ ཨབྷཱཝཏོ. ཨནུལོམསྶེཝཙ བྷཱཝཏོ. ཡཐཱཧ –

ཡསྶཝཱཔན ཡཏྠ མནིནྡྲིཡཾ ན ཨུཔྤཛྫཏི. ཏསྶ ཏཏྠ ཛཱིཝིཏིནྡྲིཡཾ ནཨུཔྤཛྫཏཱིཏི. ཨསཉྙསཏྟཱནཾ ཏེསཾ ཏཏྠ མནིནྡྲིཡཾ ན ཨུཔྤཛྫཏི. ནོཙ ཏེསཾ ཏཏྠ ཛཱིཝིཏིནྡྲིཡཾ ན ཨུཔྤཛྫཏི.

སབྦེསཾ ¶ ཙཝནྟཱནཾ པཝཏྟེ ཙིཏྟསྶ བྷངྒཀྑཎེ ཏེསཾ ཏཏྠ མནིནྡྲིཡཉྩ ནཨུཔྤཛྫཏི. ཛཱིཝིཏིནྡྲིཡཉྩ ནཨུཔྤཛྫཏཱིཏི.

ཨེཏྠ ཧི ཨསཉྙསཏྟཱནནྟི ཨེཏེན རཱུཔཛཱིཝིཏིནྡྲིཡ མེཝ ཝུཏྟཾ. ཡདིཙ ཏཾ ཙིཏྟསྶ བྷངྒཀྑཎེཔི ཨུཔྤཛྫེཡྻ, པུརིམཀོཊྛཱསེ པཝཏྟེ ཙིཏྟསྶ བྷངྒཀྑཎེ ཨསཉྙསཏྟཱནཾ ཏེསཾ.ལ. ཛཱིཝིཏིནྡྲིཡཾ ནཨུཔྤཛྫཏཱིཏི ཝུཏྟཾ སིཡཱ, པཙྪིམཀོཊྛཱསེཙ སབྦེསཾ ཙཝནྟཱནཾ ཨིཙྩེཝ ཝུཏྟཾ སིཡཱཏི. པཙྪིམཀོཊྛཱསེ པན ཨརཱུཔ ཛཱིཝིཏིནྡྲིཡཾ སནྡྷཱཡ ཝུཏྟནྟི ཙེ. ན. ཏཐཱ གཧཎཏྠཾ ཡམཀ པཱཋནྟརཱབྷཱཝཏོ སབྦཉྙུཝིསཡེཙ ཋཱནེ པཱལི༹ཡོ སཾསནྡིཏྭཱ བལཝཏིཡཱ པཱལི༹ཡུཏྟིཡཱཨེཝ ཋཱཏབྦཏོཏི. ཡསྨཱཙ རཱུཔདྷམྨཱ ནཱམ དནྡྷཔཝཏྟིནོ ཧོནྟི. ཨརཱུཔདྷམྨཱ ལཧུཔཝཏྟིནོ ཋིཏིཀྑཎོཙ ཏེསཾ ཝིསུཾ གཎནཱུཔགོ ནཏྠི. ཏསྨཱ ཨཉྙོཡེཝ རཱུཔ དྷམྨཱནཾ ཁཎཔབནྡྷོ. ཨཉྙོ ཨརཱུཔདྷམྨཱནཾ. ཏཏྠ སབྦེཔི རཱུཔདྷམྨཱ ཨེཀཙིཏྟཀྑཎཔརིམཱཎེན ཨཏྟནོ ཨུཔྤཱདཀྑཎེན ཡུཏྟཱ ཁཎེ ཁཎེ ནིརནྟརམེཝ ཨུཔྤཛྫནྟི. པཊིསནྡྷིཏོ པཊྛཱཡ སཧུཔྤནྣཏྟཱཙ པན དྭིནྣཾ ཏེསཾ ཨུཔྤཱདཱདིཝཱ ནིརོདྷནྟོཝཱ ཡཱཝཛཱིཝཾཔིསཧེཝ ཧོཏཱིཏིཔི ཏསྶ ཨདྷིཔྤཱཡོཏི. ཡམཀ པཱལི༹ཡོ པན ནཱནཱཏྠཱ, ནཱནཱབྱཉྫནཱ, གམྦྷཱིརོཙ སཏྠུ ཨདྷིཔྤཱཡོ. ཏསྨཱ སུཊྛུ ཝིཙཱརེཏྭཱ སལླཀྑེཏབྦོ. ན པན དྷམྨཏཱ ཨེསཱ ཡམཀསྶ. ཡདིདཾ ཡཐཱལཱབྷཡོཛནཱཏི ཀཏྭཱ ཨཏྟནོ ཨདྷིཔྤཱཡེ ཋཏྭཱ དིཊྛཾ དིཊྛཾ ཡམཀཔཱཋཾ ཡཐཱལཱབྷཡོ ཛནཱཡཨེཝ སཀྐཱ ཡོཛེཏུནྟི. རཱུཔཝིརཱགབྷཱཝནཱཝིསེསབྷཱུཏཾ ཨརཱུཔཀུསལཾ ཏསྨིཾ ལོཀེ རཱུཔསཧིཏཾ པཊིསནྡྷིཾ ནཛནེཏི. སུདྡྷཨརཱུཔམེཝ ཛནེཏི. ཏསྨཱ རཱུཔསནྟཏིསཱིསསྶ སབྦསོ ཨབྷཱཝཱ ཏཏྲུཔྤནྣཱནི སབྦཱནི ཚཙཏྟཱལཱིསཙིཏྟཱནི རཱུཔཾ ཛནེཏུཾ ན ན སཀྐོནྟི. ཨརཱུཔཝིཔཱཀཱ པན ཏཏྠེཝ ནིཡམུཔྤནྣཱཏི ཨརཱུཔཔཱཀསྶེཝ གཧཎཾ ཀཏཾ, ཏེནེཝ ཨཊྛཀཐཱཡཾ, ཨཉྙཱནིཔི བཧཱུནི ཨཱརུཔྤེ ཨུཔྤནྣཱནི ཨནོཀཱསཏྠཱ རཱུཔཾ ནསམུཊྛཱཔེནྟཱིཏི ཝུཏྟཾ ཏཏྠ ཨནོཀཱསཏཱནཱམ ཨཱདིཏོ པཊྛཱཡ ཨུཔྤནྣསྶ རཱུཔསནྟཏིསཱིསསྶ ཨབྷཱཝོ ཨེཝ དཊྛབྦོཏི.

[༡༨༩] ཝིབྷཱཝནིཡཾ པན

‘‘རཱུཔཝིརཱགབྷཱཝནཱནིབྦཏྟཏྟཱ ¶ ཧེཏུནོ ཏབྦིདྷུརཏཱཡཱ’’ཏིཔི ཀཱརཎཾ ཝུཏྟཾ. ཏཾ ཨཀཱརཎཾ.

རཱུཔཱརཱུཔཝིརཱགབྷཱཝནཱབྷཱུཏམགྒནིབྦཏྟསྶ ལོཀུཏྟརཝིཔཱཀསྶ རཱུཔོཀཱསེ སཏི རཱུཔཛནཀཏཱདསྶནཏོཏི. ཛྷཱནངྒཝིརཧེན ཨངྒདུབྦལཱནིཔི རཱུཔཾ ན ཛནེནྟཱིཏི དྭིཔཉྩཝིཉྙཱཎགཧཎཾ ཀཏཾ. ཨིཏརཱ ནིཔི པན པནྣརསཀཱམརཱུཔ པཊིསནྡྷིཙིཏྟཱནི ཁཱིཎཱསཝཱནཾ པརིནིབྦཱནཙུཏི ཙིཏྟནྟི ཨིམཱནི ཙིཏྟཱནི རཱུཔཾ ན སམུཊྛཱཔེནྟིཡེཝ. ཨེཝཾསནྟེཔི ཏཱནི སབྦཱནིཔི བྷཝངྒཀཱལེ ཨཁཱིཎཱསཝཱནཉྩ ཙུཏིཀཱལེ སམུཊྛཱཔེནྟཱིཏི ཏེསཾ ཨིདྷ ཨགཧཎཾ དཊྛབྦཾ.

[༡༩༠] ཝིབྷཱཝནིཡཾ པན

པཊིསནྡྷིཙིཏྟཾ པན ཙུཏིཙིཏྟཉྩ ཨེཀཱུནཝཱིསཏི བྷཝངྒསྶེཝ ཨནྟོགདྷཏྟཱ ཙིཏྟནྟརཾ ན ཧོཏཱིཏི ན ཏསྶ ཝཛྫནཾ ཀཏ’’ནྟི ཝུཏྟཾ. ཏཏྠ ཨེཀཱུནཝཱིསཏི བྷཝངྒསྶེཝཱཏི ན ཝཏྟབྦཾ.

ཨརཱུཔཝིཔཱཀསྶ སརཱུཔཏོ ཝཛྫིཏཏྟཱཏི. ཀསྨཱ པན ཡཐཱ ཝུཏྟཱནི པནྣརས པཊིསནྡྷིཙིཏྟཱནི པཊིསནྡྷིཀྑཎེ རཱུཔཾ ན སམུཊྛཱཔེནྟཱིཏི, པརིདུབྦལཏྟཱ. ཙིཏྟཉྷིནཱམ ཨུཔྤཱདཀྑཎེཨེཝ པརིཔུཎྞཾ པཙྩཡཾ ལབྷིཏྭཱ བལཝཾ ཧོཏི. རཱུཔཉྩ ཋིཏིཀྑཎེཝ.

ཏསྨཱ ཨཏྟནོ བལཝནྟཀྑཎེ ཨུཔྤཛྫམཱནབྷཱཝེན དུབྦལཾ ཝཏྠུཾ ནིསྶཱཡ ཨུཔྤནྣཏྟཱ སཡཾཔི པརིདུབྦལཾ ཧོཏཱིཏི སབྦཱནིཔི ཏཱནི ཏདཱ རཱུཔཾ ནསམུཊྛཱ པེནྟཱིཏི. ཨེཏྠཙ ཀེཙི ཨནནྟརཱསེཝནཱདིཔཙྩཡཱ ཙིཏྟསྶ ཨུཔྤཱདཀྑཎེཨེཝ ཕརནྟི. རཱུཔསྶ པན ཨུཔཏྠམྦྷཀབྷཱུཏཱ ཨུཏུཨཱཧཱརཱ པཙྪཱཛཱཏཔཙྩཡདྷམྨཱཙ ཋིཏིཀྑཎེཨེཝཕརནྟཱིཏི ཏེསཾ ཡཐཱཀྐམཾ ཨུཔྤཱདཀྑཎེ ཋིཏིཀྑཎེཙ པརིཔུཎྞཔཙྩཡལཱབྷོ ཝེདིཏབྦོ.

[༡༩༡] ཝིབྷཱཝནིཡཾ པན

‘‘པཙྪཱཛཱཏ པཙྩཡརཧིཏཾ པན ཨཱཧཱརཱདཱིཧིཙ ཨནུཔཏྠདྡྷཾ དུབྦལཝཏྠུཾ ནིསྶཱཡ པཝཏྟཏྟཱ ཨཏྟནོཙ ཨཱགནྟུཀཏཱཡ ཀམྨཛརཱུཔེཧིཙ ཙིཏྟསམུཊྛཱནརཱུཔཱནཾ ཋཱནཾ གཧེཏྭཱ ཋིཏཏྟཱ’’ཏི ཀཱརཎཾ ཝུཏྟཾ. ཏཏྠ པཙྪཱཛཱཏ པཙྩཡ རཧིཏནྟི ཨིདཾ ཝིཙཱརེཏབྦཾ.

པཊིསནྡྷིཙིཏྟསྶ ¶ ཋིཏིཀྑཎེ པཙྪཱཛཱཏ པཙྩཡ རཧིཏསྶ པིཨུཏུསྶ རཱུཔཛནཀབྷཱཝསྶ ཝཀྑམཱནཏྟཱ. ན ཧི ཨཏྟནཱ ཨཝིཛྫམཱནཾ པཙྪིམཙིཏྟཾ པུརིམཙིཏྟཀྑཎེ ཋིཏསྶ ཀསྶཙི རཱུཔསྶ པཙྪཱཛཱཏ པཙྩཡོ ཧོཏི. ཨཏྠི པཙྩཡེཀདེསཏྟཱ ཏསྶ པཙྩཡསྶཱཏི. ཁཱིཎཱསཝཱནཾ ཙུཏིཙིཏྟཾ པན པཀཏིཡཱཝ ཝཱུཔསནྟཝཊྚམཱུལེ སནྟཱནེ པཝཏྟཏྟཱ སནྟཏརཾ ཧོཏི. པུན ཨཱཡུསངྑཱརཱནཾ པརིཀྑཡེན དུབྦལཏརེ པརིཡནྟགཏེ ཙ ཝཏྠུམྷི ནིསྶིཏཏྟཱ དུབྦལཏརཉྩ ཧོཏཱིཏི ཏཾ རཱུཔཾ ནསམུཊྛཱཔེཏཱིཏི, ཨཱཙརིཡཱནནྡཏྠེརོ པན སབྦསཏྟཱནཾཔི ཙུཏིཙིཏྟཾ རཱུཔཾ ནསམུཊྛཱཔེཏཱིཏི ཨིཙྪཏི. ཡཐཱཧ-ཁཱིཎཱསཝཱནཾ ཙུཏིཙིཏྟནྟི ཝིསེསེཏྭཱ ཝུཏྟཾ.

ཀཱམཱཝཙརཱནཾ པཙྪིམཙིཏྟསྶ ཨུཔྤཱདཀྑཎེ ཡསྶ ཙིཏྟསྶ ཨནནྟརཱ ཀཱམཱཝཙརཱནཾ པཙྪིམཙིཏྟཾ ཨུཔྤཛྫིསྶཏི. རཱུཔཱཝཙརེ ཨརཱུཔཱཝཙརེ པཙྪིམབྷཝིཀཱནཾ ཡེཙ རཱུཔཱཝཙརཾ ཨརཱུཔཱཝཙརཾ ཨུཔཔཛྫིཏྭཱ པརིནིབྦཱཡིསྶནྟི, ཏེསཾ, ཙཝནྟཱནཾ ཏེསཾ ཝཙཱི སངྑཱརོ ནིརུཛ྄ཛྷིསྶཏི, ནོཙ ཏེསཾ ཀཱཡསངྑཱརོ ནིརུཛ྄ཛྷཏཱིཏི –

པན ཝཙནཏོ ཨཉྙེསཾཔི ཙུཏིཙིཏྟཾ རཱུཔཾ ནསམུཊྛཱཔེཏཱིཏི ཝིཉྙཱཡཏི. ན ཧི རཱུཔསམུཊྛཱཔཀ ཙིཏྟསྶ གབྦྷགམནཱདི ཝིནིབདྡྷཱབྷཱཝེ ཀཱཡསངྑཱརཱསམུཊྛཱཔནཾ ཨཏྠི, ན ཙ ཡུཏྟཾ ཙུཏོཙ ཙིཏྟསམུཊྛཱནཉྩསྶ པཝཏྟཏཱིཏི. ནཱཔི ཙུཏིཙིཏྟཾ རཱུཔཾ སམུཊྛཱཔེཏཱིཏི པཱལི༹ ཨཏྠཱིཏི.

ཨནུཊཱིཀཱཡཾ པན

ཏསྨིཾ པཱཋེ ཏེསཾ ཙཝནྟཱནཾ ནོཙ ཀཱཡསངྑཱརོ ནིརུཛ྄ཛྷཏཱིཏི ཝཙནཾ ན ཀེཝལཾ ཙུཏིཙིཏྟསྶེཝ རཱུཔསམུཊྛཱཔནཱབྷཱཝཾ སཱདྷེཏི, ཨཐཁོ ཏཏོ པུརིམཱནཾ སབྦེསཾ མརཎཱསནྣ ཙིཏྟཱནཾ རཱུཔསམུཊྛཱཔནཱབྷཱཝཾཔི སཱདྷེཏིཡེཝཱཏི དཱིཔེཏི. ཙུཏི ཙིཏྟསྨིཾཧི ཀཱཡསངྑཱརསྶ ནིརོདྷེ པཊིསིདྡྷེ ཏཏོ པུབྦེ ཡཱཝ སཏྟརསམཙིཏྟཱ ཨེཏྠནྟརེ ཏསྶ ཨུཔྤཱདོཔི པཊིསིདྡྷོཨེཝ ཧོཏཱིཏི. སབྦཉྩེཏཾ ཝིཙཱརེཏབྦཾ.

ཀཱཡསངྑཱརོཏི ¶ ཧི ཨསྶཱསཔསྶཱསོ ཝུཙྩཏི. སོཙ སུཊྛུ ཨོལཱ༹རིཀོ རཱུཔདྷམྨོཏི ནཙུཏིཙིཏྟེ ཏནྣིརོདྷཱབྷཱཝ ཝཙནེན ཨིཏརཱནི སུཁུམཱནིཔི རཱུཔཱནི ཙུཏིཙིཏྟཾ ནཛནེཏཱིཏི སཀྐཱ ཝཏྟུཾ.

[༡༩༢] ཡཉྩ ཏཏྠ

ན ཧི རཱུཔསམུཊྛཱཔཀཙིཏྟསྶ གབྦྷགམནཱདི ཝིནིབདྡྷཱབྷཱཝེ ཀཱཡསངྑཱརཱསམུཊྛཱཔནཾ ཨཏྠཱིཏི ཝུཏྟཾ. ཏཾཔི ན ཡུཛྫཏི.

ཏཱནིཨེཝ ཧི གབྦྷགམནཱདཱིནི ཨིམསྶཏྠསྶ སཱདྷཀཱནི བྷཝིཏུཾ ཨརཧནྟི ཨོལཱ༹རིཀསྶ ཀཱཡསངྑཱརསྶ ཨསམུཊྛཱཔཀཾཔི ཙིཏྟཾ ཨིཏརཾ སུཁུམརཱུཔཾ པན སམུཊྛཱཔེཏིཡེཝཱཏི.

[༡༩༣] ཡཾཔི ཏཏྠ

ན ཙ ཡུཏྟཾ ཙུཏོཙ ཙིཏྟསམུཊྛཱནཉྩསྶ པཝཏྟཏཱིཏི ཝུཏྟཾ. ཏཾཔི ཨཀཱརཎཾ.

ན ཧི ཙུཏིཏོ པརཾ ཀཏིཔཡཁཎམཏྟཾ ཙིཏྟཛརཱུཔཔཝཏྟིཡཱ ཀོཙི ཝིརོདྷོ ཨཏྠཱིཏི.

ཡཉྩ ཏཏྠ

ནཱཔི ཙུཏིཙིཏྟཾ རཱུཔཾ སམུཊྛཱཔེཏཱིཏི པཱལི༹ ཨཏྠཱིཏི ཝུཏྟཾ. ཏཏྠཔི ཙུཏིཙིཏྟཾ རཱུཔཾ ནསམུཊྛཱཔེཏཱིཏིཔི ནཏྠི, ཨཉྙཏྲ ཀཱཡསངྑཱརཱཏི ན ན སཀྐཱ ཝཏྟུནྟི.

ཨེཝཾ པན ཡུཏྟཾ སིཡཱ, ཡཐཱ རཱུཔདྷམྨཱ ཨཱདིཏོ པཊིསནྡྷིཀཱལེ ཨེཀཙིཏྟཀྑཎམཏྟེ པཙྩཡཔརིཏྟཏཱཡཝཱ ཨཏྟནོ དནྡྷཝུཏྟི ཏཱཡཝཱ དུབྦལཱ ཧོནྟི, ཏཐཱ པརིཡོསཱནེཔི མརཎཀཱལེ པརིཀྑཱིཡམཱནཔཙྩཡཏཱཡཝཱ ནིརོདྷཱསནྣཏཱཡཝཱ པརིདུབྦལཱཨེཝ ཧོནྟཱིཏི སཀྐཱ ཝཏྟུཾ. ཏསྨཱ ཝཏྠུསྶ ཨཱདིཨནྟནིསྶིཏཱནི པཊིསནྡྷིཙུཏིཙིཏྟཱནི སམདུབྦལཱནིཨེཝ ཧོནྟཱིཏི སཀྐཱ ཝིཉྙཱཏུནྟི.

ཝིབྷཱཝནིཡཾ པན

ཨབྷིདྷམྨཏྠཝིཀཱསནིཡཉྩ པཱལི༹ཝིརོདྷཾ མཉྙམཱནོ ཀིཉྩིམཏྟམྤི ཨཝིཙཱརེཏྭཱ ཊཱིཀཱསུ ཝུཏྟནཡམེཝ སུཊྛུ ཝིཀཱསཡིཏྭཱ གཏོཏི.

པཐམབྷཝངྒམུཔཱདཱཡཱཏི ¶ པཐམ བྷཝངྒཙིཏྟསྶ ཨུཔྤཱདཀྑཎཏོ པཊྛཱཡ. ཛཱཡནྟམེཝཱཏི ཨུཔྤཱདཀྑཎེ ཨུཔྤཱདཀྑཎེ ཨུཔྤཛྫ མཱནམེཝ, ན ཏིཊྛནྟཾ. ནཙ བྷིཛྫམཱནནྟི ཨཏྠོ. ཀཱརཎཾ ཝུཏྟམེཝ. ཏཏྠཱཏི ཏསྨིཾ པཉྩསཏྟཏིཝིདྷེ ཙིཏྟེ. ཨཔྤནཱཛཝནནྟི ཨབྷིཉྙཱདྭཡཝཛྫིཏཾ ཚབྦཱིསཏིཝིདྷཾ ཨཔྤནཱཛཝནཙིཏྟཾ. ཨིརིཡཱཔཐནྟི གམནཝཛྫིཏཾ ཏིཝིདྷཾཔི ཨིརིཡཱཔཐཾ.

[༡༩༤] ཝིབྷཱཝནིཡཾ པན

‘‘གམནཱདཱི’’ཏི ཝུཏྟཾ. ཏཾ ན ཡུཛྫཏི.

ན ཧི ཨངྒཔཙྩངྒཱནཾ ཙལནཕནྡནམཏྟཾཔི ཝིཉྙཏྟིཡཱ ཝིནཱ སིཛ྄ཛྷཏི. ཀུཏོ གམནཾ. ནཙ ཡཐཱཝུཏྟཾ ཨཔྤནཱཛཝནཾ ཝིཉྙཏྟིཾ སམུཊྛཱཔེཏུཾ སཀྐོཏཱིཏི. པི སདྡེན ཏཾ ནཀེཝལཾ རཱུཔསམུཊྛཱཔཀམཏྟཾཏི དསྶེཏི. སནྣཱམེཏཱིཏི སནྡྷཱརེཏི ཨཡམེཝཝཱ པཱཋོ སིཡཱ, ཝཀྑམཱནེཧི ཙིཏྟེཧི ཨབྷིསངྑཏཾ ཡཐཱཔཝཏྟཾ ཨིརིཡཱཔཐཾ ཨཔཏམཱནཾ ཨཙལམཱནཾ དྷཱརེཏི ཨུཔཏྠམྦྷེཏཱིཏི ཨཏྠོ. ཨུཔཏྠམྦྷནཉྩེཏྠ ཡཐཱཔཝཏྟསྶ ཨིརིཡཱཔཐསྶ རཀྑནམཏྟཾ དཊྛབྦཾ. ནཨུཀྑིཔིཏྭཱ ཝིཡ ཨབྷིནཱིཧརཎཾ. ཨིཏརཐཱ ཐམྦྷནཝིཉྙཏྟིཡཱ པསངྒོ སིཡཱཏི. ཨེཏྠཙ ཡཐཱནིསིནྣསྶཝཱ ཋིཏསྶཝཱ བྷཝངྒ ཙིཏྟེ ཨབྦོཀིཎྞེ པཝཏྟམཱནེ ཨངྒཱནི ཨོསཱིདནྟི པཏནྟི. ན ཏཐཱ ཨིམསྨིཾ ཚབྦཱིསཏིཝིདྷེ ཛཱགརཎཙིཏྟེ ཝཀྑམཱནེསུཙདྭཏྟིཾས ཝིདྷེསུ ཛཱགརཎཙིཏྟེསུཔཝཏྟམཱནེསུ. ཏེསུ པན པཝཏྟམཱནེསུ ཨངྒཱནི ཨུཔཏྠདྡྷཱནི ཧོནྟི. ན ཨོསཱིདནྟི ན པཏནྟི. པུབྦེ ཡཐཱ ཐཔིཏཱནེཝ པཝཏྟནྟཱིཏི ཝེདིཏབྦཾ.

[༡༩༥] ཝིབྷཱཝནིཡཾ པན

‘‘ན ཨེཝ མེཏེསུ དྭཏྟིཾསཝིདྷེསུ ཝཀྑམཱནེསུ ཙ ཚབྦཱིསཏི ཡཱ ཛཱགརཎཙིཏྟེསུ པཝཏྟམཱནེསཱུ’’ཏི པཱཋོ.

ན ཨེཝམེཏེསུ ཚབྦཱིསཏིཡཱ ཛཱགརཎཙིཏྟེསུ ཝཀྑམཱནེ སུཙ དྭཏྟིཾས ཝིདྷེསུ པཝཏྟམཱནེསཱུཏི པན པཱཋོ ཡུཏྟོ. ཝོཊྛབྦནནྟི མནོདྭཱརེ ཨཱཝཛྫནམཱཧ. ན ཧི པཉྩདྭཱརིཀཱནི ཛཝན ཙིཏྟཱནིཔི ¶ ཝིཉྙཏྟིཾ སམུཊྛཱཔེནྟི. ཨིརིཡཱཔཐུཔཏྠམྦྷན མཏྟཾ ཝཱ པིསདྡེན གཧིཐཾ སནྡྷཱཡ ཝོཊྛབྦནཱདཱིནི པཉྩདྭཱརིཀཱནིཔི གཧིཏཱནིཏི དཊྛབྦཾ. ཨེཏྠཙ ཨིརིཡཱཔཐོནཱམ གམནཱདིནཱ ཏེན ཏེན ཨཝཏྠཱཝིསེསེན པཝཏྟཱ རཱུཔདྷམྨཱཨེཝ. ཨེཝཾ སནྟེཔི ཀིཉྩིཙིཏྟཾ རཱུཔ སཱམཉྙམེཝ ཛནེཏི ན ཏཏོཔརཾ. ཀིཉྩི ཨཉྙཙིཏྟསྶ ཝསེན ཡཐཱཔཝཏྟཾ ཨིརིཡཱཔཐཾ རཀྑིཏུཾཨེཝ སཀྐོཏི, ན ཨཔྤཝཏྟཾ ཨིརིཡཱཔཐཾ པཝཏྟེཏུཾ. ཀིཉྩི ཝིཉྙཏྟིཾ སམུཊྛཱཔེཏྭཱ ཨཔྤཝཏྟཉྩ ཨིརིཡཱཔཐཾ པཝཏྟེཏུཾ སཀྐོཏི. ཨཉྙཱནིཙ ཀཱཡིཀ ཝཱཙསིཀ ཝིཀཱརཱནི ཛནེཏུཾ སཀྐོཏི. ཡཱནིཙ ཙིཏྟཱནི ཨུཏྟརཀིཙྩཾ ཛནེཏུཾ སཀྐོནྟི. ཏཱནི ཧེཊྛིམཧེཊྛིམཾ ཀིཙྩཾ ཛནེཏུཾ སཀྐོནྟིཡེཝཱཏི དསྶནཏྠཾ ཨཡཾ ཝིབྷཱགོ ཀཏོཏི ཝེདིཏབྦོ.

[༡༩༦] ཡཾ པན ཝིབྷཱཝནིཡཾ

‘‘ཡཾཔན ཙིཏྟཾ ཝིཉྙཏྟིཛནཀཾ, ཏཾ ཨེཀཾསཏོ ཨིརིཡཱཔཐུ པཏྠམྦྷཀཾ. ཨིརིཡཱ པཐསྶ ཝིཉྙཏྟིཡཱ སཧ ཨཝིནཱབྷཱཝཏོ’’ཏི ཝུཏྟཾ. ཏཾ ན ཡུཛྫཏི.

ཨིདྷ ཧི ཨིརིཡཱཔཐུཔཏྠམྦྷནཾནཱམ ཝིཉྙཏྟིརཧིཏམེཝཱ དྷིཔྤེཏཾ, ན ཝིཉྙཏྟིསཧིཏཾ. ཨིཏརཐཱ ཨཔྤནཱཛཝནཱནཾཔི ཝིཉྙཏྟིཛནཀཏཱ ཨཱཔཛྫེཡྻཱཏི. སོམནསྶཛཝནཱནི ཏེརསཱཏི ཧསིཏུཔྤཱདེན སདྡྷིཾ ལོབྷམཱུལཏོ མཧཱ ཀུསལཏོ མཧཱ ཀྲིཡཏོ ཙ ཙཏྟཱརིཙཏྟཱརཱིཏི ཏེརས སོམནསྶཛཝནཱནི. ཏེསུཔན ཀུསལཱ ཀུསལཏོ ཨཊྛཔུཐུཛྫནཱནཾ. དིཊྛིཝིཔྤཡུཏྟཱ ཀུསལཀུསལཏོ ཚསེཀྑཱནཾ. ཀྲིཡཏོ པཉྩཁཱིཎཱསཝཱནནྟི དཊྛབྦཾ. སབྦཾ ཀཱཡཝཙཱིམནོཀམྨཾ ཉཱཎཔུབྦངྒམཾ ཉཱཎཱནུཔརིཝཏྟནྟི ཝཙནཏོ ཝིཙཱརཎཀིཙྩརཧིཏོ ཧསིཏུཔྤཱདོ སབྦཉྙུབུདྡྷཱནཾ ནསམྦྷཝཏཱིཏི ཨེཝཾ པཝཏྟོ ཝཱདོ ཨཊྛཀཐཱཡཾ པཊིཀྑིཏྟོཡེཝ. ཏསྨིཾཝཱདེ ཧི སཏི ཨིཏརེསཾཔི ཨཧེཏུཀཙིཏྟཱནཾ ཉཱཎཝིཔྤཡུཏྟམཧཱ ཀྲིཡཛཝནཱནཉྩ བུདྡྷཱནཾ ཨསམྦྷཝོ ཨཱཔཛྫཏི. ཏསྨཱ ཏེསཾ ཧསིཏུཔྤཱདཙིཏྟེན པཝཏྟསྶ སིཏཀམྨསྶ པུབྦཱཔརཔཝཏྟཱནཾ ཉཱཎཱནཾ ཝསེན ཉཱཎཔུབྦངྒམཏཱ ཉཱཎཱནུཔརིཝཏྟཏཱ ཙ ཝེདིཏབྦཱཏི. སཱིཏུཎྷོཏུ ¶ སམཉྙཱཏཱཏི ཨིདཾ སཱིཏཾ ཨིདཾ ཨུཎྷནྟི ཨེཝཾ སབྦ ལོཀིཡམཧཱཛནེཧི སུཊྛུ པརིཙྪིནྡིཏྭཱ ཉཱཏཱ. ཋིཏིཔྤཏྟཱཝཱཏི ཨཏྟནོ ཋིཏིབྷཱཝཾ ཋིཏིཀྑཎཾཝཱ པཏྟཱཨེཝ. ན པན ཙིཏྟམིཝ ཛཱཡནྟ མཏྟཱཏི ཨཏྠོ. ཀཱརཎཾ ཝུཏྟམེཝ.

[༡༩༧] ཡཾ པན ཝིབྷཱཝནིཡཾ

‘‘པཙྪཱཛཱཏཱདིཔཙྩཡུཔཏྠམྦྷལཱབྷེན ཋིཏིཀྑཎེཨེཝ ཨུཏུཨོཛཱནཾ བལཝབྷཱཝོཏི ཝུཏྟཾ ཏེཛོདྷཱཏུ ཋིཏིཔྤཏྟཱཏིཨཱདི’’. ཏཏྠ པཙྪཱཛཱཏཔཙྩཡཝཙནཾ ཧེཊྛཱ ཝིཙཱརིཏམེཝ.

ཨཔིཙ, ཡདི ཨུཏུནོ བལཝབྷཱཝོ རཱུཔུཔྤཱདནཉྩ པཙྪཱཛཱཏཔཙྩཡཱཡཏྟཾ སིཡཱ. ཨེཝཾ སཏི སོ པཊིསནྡྷིཙིཏྟསྶ ཋིཏིཀྑཎེ རཱུཔཾ ན སམུཊྛཱཔེཡྻ, ཏདཱ པཙྪཱཛཱཏཔཙྩཡསྶེཝ ཨབྷཱཝཏོ. ཝཀྑཏིཙ ཋིཏིཀཱལམུཔཱདཱཡ ཨུཏུསམུཊྛཱནཱཏི. ཨེཏྠཙ ཋིཏིཀཱལནྟི པཊིསནྡྷིཙིཏྟསྶ ཋཱིཏིཀཱལོ ཝུཏྟོཏི. ཏསྨཱ པཙྪཱཛཱཏཔཙྩཡཝཙནཾ ཝིཙཱརེཏྭཱ སམྤཊིཙྪིཏབྦནྟི. ཨོཛཱསངྑཱཏོ ཨཱཧཱརོཏི ཀམྨསམུཊྛཱནཱདིཝསེན ཙཏུབྦིདྷོ ཨཛ྄ཛྷཏྟསནྟཱན གཏོཨསིཏཔཱིཏཁཱཡིཏསཱཡིཏཝསེན ཙཏུབྦིདྷོ, བཧིདྡྷསནྟཱ ནགཏོཙ ཨོཛཱསངྑཱཏོ དུཝིདྷཱཧཱརོ. ཏདུབྷཡཱཔིཙ སཾསགྒ ཝསེན ལདྡྷུཔཏྠམྦྷཱ ཨེཝརཱུཔཾ སམུཊྛཱཔེནྟཱིཏི ཝུཏྟཾ ཨཛ྄ཛྷོཧརཎ ཀཱལེཏི. ཨེཏྠཙ བཧིདྡྷཱསམྦྷཱུཏེན ཨུཏུནཱ སཧ ཨཛ྄ཛྷཏྟ སམྦྷཱུཏཱནཾ ཙཏུསམུཊྛཱནཱནཾ ཨུཏུཨོཛཱནཾ ཝིཡ བཧིདྡྷཱསམྦྷཱུཏཱཡ ཨོཛཱཡཔི ཨཛ྄ཛྷཏྟཾ རཱུཔསམུཊྛཱནཾ སབྦཨཊྛཀཐཱསུ ཝུཏྟཾ.

ཡཐཱཧ-མཛ྄ཛྷིམཊྛཀཐཱཡཾ

ཀབལཱི༹ཀཱརཱཧཱརོ ཏཱཝ མུཁེ ཐཔིཏམཏྟོ ཨེཝ ཨཊྛརཱུཔཱནི སམུཊྛཱཔེཏི. དནྟཝིཙུཎྞིཏཾ པན ཨཛ྄ཛྷོཧརཱིཡམཱནཾ ཨེཀེཀཾ སིཏྠཾ ཨཊྛ ཨཊྛ རཱུཔཱནི སམུཊྛཱཔེཏཱིཏི.

ཨཱཙརིཡདྷམྨཔཱལཏྠེརེན པན ཡདི བཧིདྡྷསམྦྷཱུཏཱ ཨོཛཱ རཱུཔཾ སམུཊྛཱཔེཡྻ, ཨེཝཾ སཏི ཡཐཱ བཧིདྡྷསམྦྷཱུཏོ ཨུཏུ ཨཛ྄ཛྷཏྟཉྩ བཧིདྡྷཱཙ རཱུཔཾ སམུཊྛཱཔེཏི. ཏཐཱ སཱ བཧིདྡྷཱཔི རཱུཔཾ སམུཊྛཱཔེཡྻ. ན པན སམུཊྛཱཔེཏི. ཏསྨཱ སཱ ཨཛ྄ཛྷཏྟཾ པཏྭཱཔི རཱུཔཾ ན སམུཊྛཱ པེཏིཡེཝ. ¶ ཨེཀནྟེན པན ཨཛ྄ཛྷཏྟཨོཛཱཨེཝ སམུཊྛཱཔེཏི. སཱ པན ཏསྶཱ ཨུཔཏྠམྦྷནཔཙྩཡོཨེཝ ཧོཏཱིཏི ཨདྷིཔྤཱཡེན མུཁེ ཐཔིཏམཏྟོཨེཝ. ན སངྑཱདིཏོ. ཏཏྟཀེནཔི ཨབྦྷནྟརསྶ པཙྩཡོ ཧོཏིཡེཝ, ཀེནཱཧ ཨཊྛ ཨཊྛ རཱུཔཱནི སམུཊྛཱཔེཏཱིཏི མཛ྄ཛྷིམཊཱིཀཱཡཾ ཝུཏྟཾ. ཡསྨཱ པན ཨུཔཱདིནྣཀཱ ཨུཏུ ཨོཛཱནཱམ སུཊྛུ པཎཱིཏརཱུཔཱ ཧོནྟི, ཏསྨཱ བཧིདྡྷཱ ཨོཛཱཔི ཨཛ྄ཛྷཏྟཾ པཏྭཱ ཏེན ཨུཏུནཱ སུཊྛུ སེདིཡམཱནཱ ཏཱཡཙ ཨོཛཱཡ སུཊྛུ ཨུཔཏྠམྦྷཱིཡ མཱནཱ སརཱིརེ མེདསིནེཧུཔཙཡཝསེན རཱུཔཾ སམུཊྛཱཔེཏིཡེཝཱཏི ཡུཏྟཾ. ཨཛ྄ཛྷོཧརཎཀཱལེཏི ཨིདཉྩ སུཊྛུ བལཝབྷཱཝཔྤཏྟ ཀཱལཾ སནྡྷཱཡ ཝུཏྟཾ. ཝིསུདྡྷིམགྒེ པན མཱཏརཱ པརིབྷུཏྟཱཧཱརོཔི དཱརཀསྶ སརརཾ ཕརིཏྭཱ རཱུཔཾ སམུཊྛཱཔེཏི. སརཱིརེ མཀྑིཏཱཧཱ རོཔི རཱུཔཾ སམུཊྛཱཔེཏཱིཏི ཝུཏྟཾ. མུཁེ ཐཔིཏམཏྟོཨེཝ ཨཊྛརཱུཔཱནི སམུཊྛཱཔེཏཱིཏིཙ པུབྦེ ཝུཏྟནྟི. ཋཱན པཏྟོཝཱཏི ཨཏྟནོ ཋིཏིཀྑཎཾ པཏྟོཨེཝ. ཨེཏྠཙ ཙཏཱུསུ སམུཊྛཱནེསུ ཨུཏུཨེཝ མཧནྟོ མཧཱཐཱམོ མཧཱཝིཔྥཱརོཙ ཧོཏི. སོ ཧི སཀལསྶཔི ཨོཀཱསལོཀསྶ བཧིདྡྷཱ སངྑཱརལོཀསྶཙ སམུཊྛཱ པཀོ ཝིནཱསཀོ ཙ ཧོཏི. སཏྟལོཀསྶཙ སོཨེཝ མཧནྟོ ཨཛ྄ཛྷཏྟསམྦྷཱརབྷཱུཏོ ཧོཏི. ཨིཏརཱནི པན ཏཱིཎི ཏསྶ པརིཝཱརམཏྟཱནིཨེཝ སམྤཛྫནྟཱིཏི.

ཧདཡ ཨིནྡྲིཡ རཱུཔཱནི ཀམྨཛཱནེཝ, ན ཙིཏྟཛཱདིནི. ཡདིཨེཝཾ ཝིཔྤསནྣཱནི ཁོ ཏེ ཨཱཝུསོ སཱརིཔུཏྟ ཨིནྡྲིཡཱནི. ཀཏརེན ཏྭཾ ཨེཏརཧི ཝིཧཱརེན ཝིཧརསཱིཏི ཀསྨཱ ཝུཏྟནྟི. ཨིནྡྲིཡསམྦྷཱརཱནཾ ཝཎྞཱནཾ སམཱཔཏྟི ཙིཏྟསམུཊྛིཏཱནཾ ཝིསདཝིཔྤསནྣཏཱཝསེན ཨུཔཙརི ཏཏྟཱཏི. ཏཐཱ ཧི ཨེཀཱབདྡྷཔཝཏྟཱནི ཙཏུཛརཱུཔཱནི ཨེཀསྨིཾ ཝིཔྤསནྣེ སབྦཱནི ཝིཔྤསནྣཱནེཝ ཧོནྟི. མིལཱཏེཙ མིལཱཏཱནེཝཱཏི. ཨུཏུཙིཏྟཱཧཱརཱ པན ཏེསཾ ནཝནྣཾ ཨུཔཏྠམྦྷནཔཙྩཡཱ ཧོནྟཱིཏི ཝེདིཏབྦཾ. ཨེཏྠ ཙ ཨུཔྤལཔདུམཱནི ཝིཡ ཀམྨཛརཱུཔཱནི དཊྛབྦཱནི. ཏེསཾ བཱིཛཾ ཝིཡ ཀམྨཾ. ཀདྡམོདཀཱནི ཝིཡ ཨུཏུཨཱཧཱརཱདཱིནི. ཝིཉྙཏྟི དྭཡཾ ཙིཏྟཛམེཝ. ཏཐཱ ཧི ཏཾ ཙིཏྟསཧབྷཱུ ཙིཏྟཱནུཔརིཝཏྟིདྷམྨེསུ བྷགཝཏཱ ནིདྡིཊྛནྟི. སདྡོཙིཏྟོཏུཛོཏི ཀསྨཱ ཝུཏྟཾ. ནནུནིདྷིཀཎྜསུཏྟེ ¶ སུཝཎྞཏཱ སུསརཏཱ སུསཎྛཱནཾ སུརཱུཔཏཱཏིཨཱདིནཱ ཏཱདིསེན ཀམྨཝིསེསེན སདྡསམྤཏྟིནཱམ ཝུཏྟཱཏི. སཙྩཾ, ཀམྨཝིསེསེན པན ཡཐཱ སུཝིསདོ སུམདྷུརོ སདྡོ པཝཏྟཏི, ཏཐཱ ཋཱནཀརཎགཏཱནཾ ཨུཔཱདིནྣཀསརཱིརཱནཾ སུསཎྛིཏཏཱ ཝཱཏ སེམྷཱདཱིཧི ཨཔལིབུདྡྷཏཱཙ ཧོཏི. ཏསྨཱ ཏམྨཱུལིཀཱསདྡསམྤཏྟི ཀམྨཕལེསུ པཀྑིཔིཏྭཱ སུསརཏཱཏི ཝུཏྟཱ. ན ཨེཀནྟེན སདྡསྶ ཀམྨཛནིཏཏྟཱཏི ཝེདིཏབྦཱ.

ལཧུཏཱདིཏྟཡཾ ཨུཏུཙིཏྟཱཧཱརེཧི སམྦྷོཏཱིཏི ཀསྨཱ ཝུཏྟཾ. ནནུ ཨཔྤཱབཱདྷསཾཝཏྟནིཀཱ ཨེསཱ མཱཎཝ པཊིཔདཱ, ཡདིདཾ ཨཝིཧིཾསཱཏི ཝུཏྟཾ. ཨཔྤཱབཱདྷ པཙྩཡསམུཊྛིཏཉྩ ཨེཏཾ རཱུཔཏྟཡཾ. ཏཐཱ ཧི དནྡྷཏྟཱདི ཀར དྷཱཏུཀྑོཏ པཊིཔཀྑཔཙྩཡ སམུཊྛཱནཏཱ ཨེཏསྶ ཝུཏྟཱཏི. ཝུཙྩཏེ, ཀམྨཛརཱུཔཱནིནཱམ ཨུདཀེ པཀྑིཏྟཱནི སཏཔཱཀཏེལཱནི ཝིཡ པཀཏིཡཱཝ ཀམྨཱནུརཱུཔཾ ལཧུ མུདུ ཀམྨཉྙ བྷཱུཏཱནི ཧོནྟི. ཏསྨཱ ཏེསཾ ཝིསུཾ ལཧུཏཱདི ཝིཀཱརོནཱམ ནཏྠི. ཡཏོ ཏེསཾ ཨེཀསྨིཾབྷཝེ ཨེཀཱཨདྡྷཱ པཙྩུཔྤནྣཏཱཝ ལབྦྷཏཱིཏི. ཨེཝཉྩ ཀཏྭཱ ཡམཀེསུཔི ཏེསཾ ཀཱལབྷེདོ པཊིསནྡྷིཝུཏིཔརིཙྪིནྣེན ཨདྡྷཱ པཙྩུཔྤནྣེནེཝ གཧིཏོཏི. ཡསྨཱ པན ཙིཏྟཾནཱམ ནཱནཱནཱིཝརཎབྷེདཝསེནཝཱ སུཁ དུཀྑ པཱིཏི པསྶདྡྷི སདྡྷཱ པཉྙཱདི ཝསེནཝཱ ནཱནཱ ཁཎེསུ ནཱནཱ ཨཝཏྠཱ ཡུཏྟཾ ཧོཏི. ཏཐཱ ཨུཏུཨཱཧཱརཱཙ སཔྤཱཡཱ སཔྤཱཡབྷེདཝསེན. ཏསྨཱ ཏེཧི ཏཱིཧི སམུཊྛིཏ རཱུཔཱནིཨེཝ ནཱནཱཁཎེསུ གརུཀལཧུཀཱདི ཝསེན ནཱནཱཝིཀཱརཡུཏྟཱནི ཧོནྟི. ཡཏོ ཏེསཾ སནྟཏི སམཡ ཝསེན ཀཱལབྷེདོ ལབྦྷཏི. ཨེཝཉྩ ཀཏྭཱ ཡམཀེསུཔི ཨཀམྨཛཱནཾ པཝཏྟིཀཱལེ ཁཎསནྟཏིཝསེནཔི ཀཱལབྷེདོ གཧིཏོཏི. ནནུ ཀམྨཝིཔཱཀཛཱ ཨཱབཱདྷཱཏི ཝུཏྟཾ. སཏིཙ ཀམྨ སམུཊྛཱནེ ཨཱབཱདྷརཱུཔེ ཏཏོཝུཊྛཱནབྷཱུཏོ ཀམྨཛོ ལཧུཏཱདི གུཎོཔི ཝིསུཾ ལབྦྷམཱནོ སིཡཱཏི. ན. ཡེསཉྷི ཝསེན ཨིམསྨིཾ སརཱིརེ ཀམྨཝིཔཱཀཛཱནཱམ ཨཱབཱདྷཱ ཨུཔྤཛྫནྟི. ཏཱནི ཨུཔཔཱིལ༹ཀུཔ གྷཱཏཀཀམྨཱནིཔི གཏིཀཱལཔཡོག ཝིཔཏྟིཡོ ལབྷམཱནཱནི ཨེཝ སརཱིརཊྛཀཱ པཐཝཱདཡོ ཝཱཏཔིཏྟཱདཡོཙ ཨུཏུསམུཊྛཱནཱ དྷཱཏུཡོ ¶ ཁོབྷེཏྭཱ ནཱནཱབཱདྷེ ཨུཔྤཱདེནྟི. ཨུཏུསམུཊྛཱནཱསུ པན ཁུབྦྷིཏཱསུ ཨིཏརཱནི ཏདནུགཏིཀཱནི ཨེཝ ཧོནྟི. ཏེནེཝ ཧི སཱིཏེནཔི རུཔྤཏི, ཨུཎྷེནཔི རུཔྤཏི, ཛིགཙྪཱཡཔི རུཔྤཏི, ཝིཔཱསཱཡཔི རུཔྤཏཱིཏིཨཱདིནཱ ཨུཏུཔདྷཱནོཝ རཱུཔདྷམྨཱནཾ རུཔྤནཔཙྩཡོ ཝུཏྟོཏི. ཏསྨཱ ཀེཝལཾ ཀམྨསམུཊྛཱནོ ཨཱབཱདྷོནཱམ ནཏྠི. ཡཏོ ཡཐཱཝུཏྟོ ཀམྨཛོ ལཧུཏཱདིགུཎོནཱམ ཝིསུཾ ལབྦྷམཱནོ སིཡཱཏི.

ཡསྨཱ པན ཨཝིཧིཾསཱ ཀམྨནིབྦཏྟཱ སཏྟཱ ཏེསཾ ཨུཔཔཱིལ༹ཀཱདཱིནཾ ཀམྨཱནཾ སུཝིདཱུརཏཱཡཙེཝ སརཱིརཀོཊྛཱསཱནཾ གྷནསིནིདྡྷསཎྛིཏིཡཱ དུཀྑོབྷནིཡཏཱཡཙ ནིབྦཏྟབྷཝེ ནིརཱབཱདྷཱ ཧོནྟི. ཏསྨཱ ཏདཏྠཾ སནྡྷཱཡ ཨཔྤཱབཱདྷསཾཝཏྟནིཀཱ ཨེསཱ མཱཎཝཔཊིཔདཱ. ཡདིདཾ ཨཝིཧིཾསཱཏི ཝུཏྟཾ, ན པན ཨཔྤཱབཱདྷནིམིཏྟསྶ ལཧུཏཱདིཏྟཡསྶ ཀམྨསམུཊྛཱནཏཱཡ. ཨེཝཉྩ ཀཏྭཱ རཱུཔཀཎྜེན ཀམྨསྶཀཊཏྟཱརཱུཔེསུ ཨེཝ ཨེཏཾ རཱུཔཏྟཡཾ ནིདྡིཊྛནྟི དཊྛབྦཾ. རཱུཔཀལཱཔཱནཱམ ཨེཀསྨིཾ པརམཱཎུསྨིཾཔི བཧུཝིདྷཱ ཧུཏྭཱ པཝཏྟནྟི. ཏསྨཱ ཙཏུཛརཱུཔ ཀལཱཔེསུ གྷནབྷཱཝེན པཝཏྟམཱནེསུ ཀལཱཔནྟརབྷཱུཏཱ ཨཱཀཱསདྷཱཏུཔི དིསྶམཱནཱཨེཝ ཧོཏཱིཏི ཀཏྭཱ ཙཏུཛེསུ ཏསྶཱ གཧཎཾ ཀཏཾ. ཀཱམཾ སབྦཱནིཔི ཨནིཔྥནྣརཱུཔཱནི ཀེནཙི པཙྩཡེན ཨནིཔྥཱདིཏཱནི ཧོནྟི. ཏེསུ པན ན ཏཐཱ ལཀྑཎརཱུཔཱནི. ཡཐཱ ཨིཏརཱནི ཙིཏྟཱདི པཙྩཡ ཝིསེསེན དིསྶམཱན ཝིསེསཱནི ཧོནྟཱིཏི ཝུཏྟཾ ལཀྑཎརཱུཔཱནི ན ཀུཏོཙི ཛཱཡནྟཱིཏི. ཛཱཡམཱནཱདི རཱུཔཱནནྟི ཛཱཡམཱན ཛིཡྻམཱན མིཡྻམཱནཱནཾ རཱུཔཀལཱཔཱནཾ. སབྷཱཝཏྟཱཏི ཛཱཏིཛརཱམརཎསངྑཱཏལཀྑཎསབྷཱཝམཏྟཏྟཱ. ཨེཏྠཙ རཱུཔཀཎྜེ ཨུཏུསམུཊྛཱནནྟི ཙ ཨཱཧཱརསམུཊྛཱནནྟི ཙ ཝུཏྟཾ ནཏྠི. པཊྛཱནེ ཨེཝ ཝུཏྟཾ.

ཨེཏྠ སིཡཱ, ཛརཏཱ ཨནིཙྩཏཱ པཱལི༹ཡམེཝ ན ཀུཏོཙི སམུཊྛཱནཱཏི ཝུཏྟཱ. ཏསྨཱ ཨིདྷཔི ཏཱསཾ ནཀུཏོཙི སམུཊྛཱནེསུ གཧཎཾ ཡུཏྟཾ. ཨུཔཙཡསནྟཏིཡོ པན པཱལི༹ཡཾཔི ཀུཏོཙི སམུཊྛཱནེསུ ཝུཏྟཱ. ཨཊྛཀཐཱཡཾཔི ཏཱཧི སདྡྷིཾ ཝིསཏི ཀམྨཛརཱུཔཱནི སཏྟརས ཙིཏྟཛརཱུཔཱནི ཙུདྡས ཨུཏུཛརཱུཔཱནི ཏེརས ཨཱཧཱརཛ རཱུཔཱནི ¶ ཝུཏྟཱནི. ཏསྨཱ ཨིདྷ ཏཱསཾ ནཀུཏོཙིསམུཊྛཱནཏཱ ནཝཏྟབྦཱཏི. ཝུཙྩཏེ, རཱུཔཛནཀཱནཾ ཛནནབྱཱཔཱརོནཱམ ཨཏྟནཱ ཛནིཏརཱུཔཱནཾ ཨུཔྤཱདཀྑཎེ ཨེཝ ཕརཏི. ན-ཏཏོ པརཾ, ཏསྨཱ ཏསྨིཾ ཁཎེ ལབྦྷམཱནཱ ཨུཔཙཡསནྟཏིཡོཡེཝ ཀུཏོཙི ཛཱཏཔརིཡཱཡཾ ཨརཧནྟི, ན ཛརཏཱ ཨནིཙྩཏཱཡོཏི ཀཏྭཱ པཱལི༹ཡཾ ཨཊྛཀཐཱ ཡཾཙ ཏཱསཾཨེཝ ཀུཏོཙི སམུཊྛཱནེསུ གཧཎཾ ཀཏཾ. ཨཔིཙ, པུབྦེ ཨཛཱཏཱ དྷམྨཱ པཙྩཡེ སཏི ཛཱཡནྟི. ཨསཏི ན ཛཱཡནྟཱིཏི ཨཏྠི. ཛཱཏཱ པན དྷམྨཱ པཙྩཡེ སཏི ཛིཡྻནྟི, མིཡྻནྟི. ཨསཏི ནཛིཡྻནྟི ནམིཡྻནྟཱིཏི ནཏྠི, ཏསྨཱ པུརིམཱནཾ དྭིནྣཾ པཝཏྟི ཨེཀནྟེན པཙྩཡཱཡཏྟཱ ཧོཏི. པཙྪིམཱནཾ དྭིནྣཾ པཝཏྟི པན ཨེཀནྟེན པཙྩཡ ནིརཔེཀྑཱ ཧོཏཱིཏི ཨིམིནཱ པརིཡཱཡེན ཏཱསཾ ཏེསུ གཧཎཾ ཨགཧཎཉྩ ཝེདིཏབྦཾ. ཡཾ པན སུཏྟཔདེསུ ཛརཱམརཎཾ བྷིཀྑཝེ སངྑཏཾ པཊིཙྩ སམུཔྤནྣནྟི ཝུཏྟཾ. ཏཾ ཛཱཏིཡཱ སཏིཨེཝ ཏདུབྷཡཾ པཉྙཱཡཏི. ཨསཏི ན པཉྙཱཡཏཱིཏི ཨིམིནཱ པརིཡཱཡེན ཝུཏྟནྟི ཝེདིཏབྦཾ. ཨིདྷ པན པུབྦེ ཝུཏྟནཡེན ཨིཏར ཨནིཔྥནྣརཱུཔཱནི ཝིཡ ཙཏྟཱརིཔི ཨེཏཱནི ཙིཏྟཱདིཔཙྩཡཝིསེསེན དིསྶམཱནཝིསེསཱནི ན ཧོནྟཱིཏི ཙཏུནྣཾཔི ན ཀུཏོཙི ཛཱཏཏཱ ཝུཏྟཱ. ཨེཝཾསནྟེཔི སཱརཏརཾ པཱལི༹ནཡཾ ཨཏིདྷཱཝནྟོ ཝིཡ ཧོཏཱིཏི ཨུཔཙཡསནྟ ཏཱིནཾ ཀུཏོཙི སམུཊྛཱནེསུ སངྒཧོཨེཝ སེཡྻོཏི. [རཱུཔསམུཊྛཱནནཡོ]

༡༥༩. ཨེཀོ ཨེཝ ཛཱཏི སངྑཱཏོ ཨུཔྤཱདོ ཨེཏེསནྟི ཨེཀུཔྤཱདཱ. ཨེཀོཨེཝ ཨནིཙྩཏཱསངྑཱཏོ ནིརོདྷོ ཨེཏེསནྟི ཨེཀནིརོདྷཱ. ཨེཀསདྡོ ཙེཏྠ སངྑཱནེ པཝཏྟོ. ཏསྨཱ ཏེན ཡཱནི རཱུཔཱནི ཨེཀཱཡཨེཝ ཛཱཏིཡཱ ཛཱཡནྟི. ཨེཀཱཡ ཨེཝ ཨནིཙྩཏཱཡ ནིརུཛ྄ཛྷནྟི. ཏེསཾ པིཎྜི ཨིདྷ རཱུཔཀལཱཔོནཱམཱཏི དསྶེཏི. ཡེ པན ཀལཱཔགཏ རཱུཔགཎནཱཡ ཨེཀསྨིཾ ཀལཱཔེཔི ཨནེཀཱནི ཛཱཏིཨཱདཱིནི ཀཔྤེནྟི, ཏེསཾ མཱུལཊཱིཀཱཡ ནསམེཏི. ཡུཏྟིཙ ནཏྠི. ཝུཏྟཉྷི ཏཏྠ ཨེཀེཀཀལཱཔ པརིཡཱཔནྣཱནཾ རཱུཔཱནཾ སཧེཝ ཨུཔྤཱདཱདིཔཝཏྟིཏོ ཨེཀེཀཀལཱཔསྶ ཨུཔྤཱདཱདཡོ ཨེཀེཀཱཝ ཧོནྟཱིཏི ཡཐཱ ཨེཀེཀསྶ ཀལཱཔསྶ ཛཱིཝིཏིནྡྲིཡཾ ཀལཱཔཱ ནུཔཱལཀཾ ¶ ཨུཔཱདཱཡ རཱུཔནྟི ཝུཙྩཏི. ཨེཝཾ ཀལཱཔུཔྤཱདཱདི སབྷཱཝཱ ཛཱཏིཨཱདཡོ ཨུཔཱདཱཡརཱུཔཱནིཙྩེཝ ཝུཙྩནྟི. ཨེཝཾ ཝིཀཱརཔརིཙྪེད རཱུཔཱནིཙ ཡོཛེཏབྦཱནཱིཏི. ཡདིཙ ཡོ ཨཱཡཏནཱནཾ ཨཱཙཡོ. སོ རཱུཔསྶ ཨུཔཙཡོཏིཙ ཡོ རཱུཔསྶ ཨུཔཙཡོ. སཱརཱུཔསྶ སནྟཏཱིཏིཙ ཝུཏྟཏྟཱ ཏཱནི ཛཱཏིཨཱདཱིནི ལཀྑཎརཱུཔཱནི ཝིསུཾཝིསུཾ རཱུཔཱནཾཨེཝ, ནཀལཱཔསྶཱཏི ཝུཙྩེཡྻུཾ. ཙཏུནྣཾ མཧཱབྷཱུཏཱནཾ ཨུཔཱདཱཡ པསཱདོ རཱུཔཱིནཾ དྷམྨཱནཾ ཨཱཡཱུཏིཨཱདིནཱ ཝུཏྟཏྟཱ ཙཀྑཱདི ཛཱིཝིཏཱདཱིནིཔི ཨེཀསྨིཾ ཀལཱཔེ ཨནེཀཱནིཨེཝ ཨཱཔཛྫེཡྻུཾ. ཏསྨཱ ཏཐཱ ཀཔྤནཾ ཨཀཏྭཱ ཨེཀསྨིཾ ཀལཱཔེ ཨཉྙཱནི ཨུཔཱདཱརཱུཔཱནི ཝིཡ ལཀྑཎརཱུཔཱནིཔི ཨེཀེཀཱནིཨེཝཱཏི ནིཊྛཾ གནྟབྦནྟི.

ཨེཀོ སམཱནོ མཧཱབྷཱུཏསངྑཱཏོ ནིསྶཡོ ཨེཏེསནྟི ཨེཀནིསྶཡཱ. ཨེཏྠ པན སམཱནཏྠེ ཨེཀསདྡོ ཡུཏྟོ. ཙཏུནྣཾ བྷཱུཏཱནཾ ནིསྶཡཏཱསམྦྷཝཏོ. ཡཱནིཙཨེཀུཔྤཱདཏཱདཱིཧིཏཱིཧིལཀྑཎེཧི ཡུཏྟཱནི. ཏཱནི ཨེཀནྟེན སཧཝུཏྟཱིནི ནཱམ ཧོནྟཱིཏི ཝུཏྟཾ སཧཝུཏྟིནོཏི. དསཔརིམཱཎཱནིཨསྶཱཏིདསཀཾ. དསནྣཾ སམཱུཧོ ཝཱ དསཀཾ. ཙཀྑུནཱ ཨུཔལཀྑིཏཾ དསཀནྟི ཙཀྑུདསཀཾ. ཙཀྑུཔདྷཱནཾཝཱ དསཀཾ ཙཀྑུདསཀཾ. ཨེསནཡོ སེསེསུཔི. ཡསྨཱ པན ཙིཏྟཛོ སདྡོ ཝིཉྙཏྟིཝིཀཱརེན ཝིནཱ ནཔཝཏྟཏི. ཝིཉྙཏྟིཝིཀཱརོཙ ཏེན སདྡེན ཝིནཱ ནཔཝཏྟཏི. ཏསྨཱ ཙིཏྟཛཾ སདྡནཝཀཾཝཱ ཝཙཱིཝིཉྙཏྟིནཝཀཾཝཱ ནསམྦྷཝཏཱིཏི ཨདྷིཔྤཱཡེན ཝཙཱིཝིཉྙཏྟི སདྡེ ཧི ཙ སཧཝཙཱིཝིཉྙཏྟི དསཀནྟི ཝུཏྟཾ. ཨེཏྠ པན ཝིཉྙཏྟི ཝིཀཱརོ སདྡེན ཝིནཱ ནཔཝཏྟཏཱིཏི ཨིདཾ ཏཱཝ ཡུཛྫཏི. ཡཱ ཏཱཡ ཝཱཙཱཡ ཝིཉྙཏྟི ཝིཉྙཱཔནཱ ཝིཉྙཱཔིཏཏྟཾ. ཨིདཾ ཏཾརཱུཔཾ ཝཙཱིཝིཉྙཏྟཱིཏི ཧི ཝུཏྟཾ. ཝིཉྙཏྟིཝིཀཱརརཧིཏཾ པན ཙིཏྟཛཾ སདྡནཝཀཾ. ཨཊྛཀཐཱསུ ཨཱགཏམེཝ. ཡཐཱཧ-པཊིཙྩསམུཔྤཱད ནིདྡེསེསུ པཊིསནྡྷིཀྑཎཏོ ཨུདྡྷཾ པཝཏྟཨུཏུཏོཙེཝ ཙིཏྟཏོཙ སདྡནཝཀནྟི.

མཧཱཨཊྛཀཐཱ ནཡེན ཝིཉྙཏྟི རཧིཏོ ཝིཏཀྐ ཝིཔྥཱར སདྡོནཱམ ཨསོཏ ཝིཉྙེཡྻོ ཙིཏྟཛོ སདྡོ ལབྦྷཏི. སོ པན སངྒཧཀཱརེན པཊིསིདྡྷོ. ཡཐཱཧ-པཊྛཱནེཔི ཙིཏྟསམུཊྛཱནཾ སདྡཱཡཏནཾ སོཏཝིཉྙཱཎསྶ ཨཱརམྨཎཔཙྩཡེན པཙྩཡོཏི ཨཱཝཏཾ. ¶ ཏསྨཱ ཝིནཱ ཝིཉྙཏྟིགྷཊྚནཱཡ ཨུཔྤཛྫམཱནོ ཨསོཏ ཝིཉྙེཡྻོ ཝིཏཀྐཝིཔྥཱརསདྡོནཱམ ནཏྠཱིཏི. ཝིསུདྡྷིམགྒེ ཨསྶཱས པསྶཱསེ ཙིཏྟཛཾ སདྡནཝཀཾ ཝུཏྟཾ. ཡཐཱཧ-ཙིཏྟཛེ ཨསྶཱས པསྶཱས ཀོཊྛཱསེཔི ཨོཛཊྛམཀཉྩེཝ སདྡོཙཱཏི ནཝཱཏི, སདྡནཝཀེཙ ཨཱགཏེ སདྡལཧུཏཱདི དྭཱདསཀཾཔི ཨཱགཏམེཝ ཧོཏི. ཏསྨཱ སུདྡྷཊྛཀཾ, སདྡནཝཀཾ, ཀཱཡཝིཉྙཏྟི ནཱཀཾ, ཝཙཱིཝིཉྙཏྟི དསཀཾ, ལཧུཏཱདེཀཱ དསཀཾ, སདྡལཧུཏཱདིདྭཱདསཀཾ, ཀཱཡཝིཉྙཏྟི ལཧུཏཱདི དྭཱདསཀཾ, ཝཙཱིཝིཉྙཏྟིསདྡལཧུཏཱདི ཏེ རསཀནྟི ཨཊྛཙིཏྟཛཀལཱཔཱ པཙྩེཏབྦཱཏི. སཙྩསངྑེཔེ པན སདྡ ལཧུཏཱདི དྭཱདསཀཾ ཝིསུཾ ཨགཧེཏྭཱ ཙིཏྟཛ ཀལཱཔཱ སཏྟེཝ ཝུཏྟཱ.

ཊཱིཀཱསུ པནསྶ པོརཱཎཊཱིཀཱཡཾ

མཧཱཊྛཀཐཱནཡེན ཝིཉྙཏྟིརཧིཏེ ཨསོཏ ཝིཉྙེཡྻེ ཝིཏཀྐ ཝིཔྥཱརསདྡེ སདྡནཝཀཾ དསྶེཏྭཱ པུན ཝཱདནྟརཾ དསྶེནྟེན. ཨཔིཙ, མཧཱཛནསནྣིཔཱཏསྶ དཱུརཏོ ཨཔཉྙཱཡམཱནཀྑརཔདབྱཉྫནཏྠོ ཙིཏྟསམུཊྛཱནནིགྷོསསདྡོ ཨཝིཉྙཏྟིཀོ ཨེཝཱཏི ཝདནྟི. ཏཐཱ མིགཔཀྑཱིནཾཙ ཨཉྙམཉྙཾ བྷཱསཾ ཨཛཱནནྟཱནཾ ཨནྡྷདམིལཱ༹དིནཾ ཨཝིཉྙཏྟིཀོ ཙིཏྟསམུཊྛཱནསདྡོ ཨཏྠཱིཏི ཝུཏྟཾ.

ཏཏྠ ཝིཉྙཏྟིརཧིཏོ ཨསོཏཝིཉྙེཡྻོ ཝིཏཀྐཝིཔྥཱར སདྡོ ཨཊྛསཱལིནིཡཾ པཊིཀྑིཏྟོ. མཧཱཛནསནྣིཔཱཏསྶ ཙིཏྟ སམུཊྛཱན ནིགྷོསསདྡོཔི ཨཱསནྣེ ཋིཏཱནཾ པཉྙཱཡམཱནཀྑརཔད བྱཉྫནཏྠོ སཝིཉྙཏྟིཀོཨེཝ ཧོཏི. ཨིཏརཐཱ སབྦེཔི ཙིཏྟ ཛསདྡཱ དཱུརཏརེ ཋིཏཱནཾ ཨཔཉྙཱཡམཱན པདབྱཉྫནཱཨེཝ ཧོནྟཱིཏི སབྦེཔི ཝིཉྙཏྟིརཧིཏཱ སིཡུནྟི. ནཙ མིགཔཀྑིཨཱདཱིནཾ ཙིཏྟཛོ སདྡོ ཝིཉྙཏྟིརཧིཏོ ཧོཏི. སམཱནཛཱཏིཡཱནཾ པརེསཾ ཨདྷིཔྤཱཡཏྠ ཝིཉྙཱཔནཏོཏི.

པཙྪིམ ཊཱིཀཱཡཾ པནསྶ

སདྡནཝཀཾ པནེཏྠ ཨཙྪརཱ སངྒྷཱཏ པཱཎིཔྤཧཱརཱདི སདྡ སཧིཏཾ ཨཊྛཀམེཝཱཏི ཝུཏྟཾ. ཏཾཔི ན ཡུཏྟཾ.

ཏཱདིསོ ཧི སདྡོ ཙིཏྟཔཙྩཡོ ཨུཏུསམུཊྛཱནོཨེཝ. ཏསྨཱ ཝིསུདྡྷིམགྒེ ཝུཏྟནཡེན ཨསྶཱསཔསྶཱསེཝཱ ཨཝཙཱིགྷོསེསུ ཀདཱཙི ཙིཏྟསཧིཏེསུ ཨུཀྐཱསིཏ ཁིཔིཏ ཝམིཏ ཚཌྜིཏསདྡཱདཱིསུ པིཝཱ ཨེཏཾ སདྡནཝཀཾ ཝེདིཏབྦནྟི. ཨུཏུཛཀལཱཔེསུ པཙྪིམཱ དྭེཔི ཀསྨཱ བཧིདྡྷཱ ནལབྦྷནྟི. ནནུ བཧིདྡྷཱཔི རཱུཔཱནཾ ལཧུ གརུ མུདུ ཐདྡྷ ཀམྨཉྙཏཱ དིསྶནྟཱིཏི. སཙྩཾ, ཏཱ པན བྷཱུཏཱནཾ ཨོམཏྟཱདྷིམཏྟ ཝསེན ཧོནྟི, ན པན ལཧུཏཱདིཏྟཡཝསེནཱཏི དཊྛབྦཾ. ཀསྨཱ པན ཨཱཀཱསདྷཱཏུཙ ལཀྑཎརཱུཔཱནིཙ རཱུཔཀལཱཔེསུ ནགཧིཏཱནཱིཏི ཝུཏྟཾ ཀལཱཔཱནནྟིཨཱདི. ཨཱཀཱསདྷཱཏུཀལཱཔཱནཾ པརིཙྪེད མཏྟཏྟཱ ཀསྶཙི རཱུཔཀལཱཔསྶ ཨངྒབྷཱུཏཱ ཨཝཡཝབྷཱུཏཱ ན ཧོཏི, ལཀྑཎརཱུཔཱནིཙ སབྦེསཾཔི ཀལཱཔཱནཾ ཨུཔྤཱདཱདི ལཀྑཎ མཏྟཏྟཱ ཝིཀཱརརཱུཔཱནི ཝིཡ ཀལཱཔཱནཾ བྷེདཀརཱནི ཨངྒབྷཱུཏཱནི ཀལཱཔཝིསེསཔཉྙཱཔནསྶ ཀཱརཎབྷཱུཏཱནི ན ཧོནྟི. ཏསྨཱ ཏཱནི ཏེསུ ནགཧིཏཱནཱིཏི དསྶེཏི. ཨེཏེན ཨེཀུཔྤཱདཱཏིཨཱདིནཱ པུབྦེ ཝུཏྟནིཡམོ ནིཔྥནྣརཱུཔཱནཉྙེཝ, ན ཨནིཔྥནྣརཱུཔཱནཾ. ཏེསཾ པན ཀལཱཔ བྷེད ཀརཎ མེཝ ཀལཱཔངྒནྟི ཙ དཱིཔེཏི. ཨེཝཉྩ ཀཏྭཱ ཨེཀནིརོདྷངྒརཧིཏསྶཔི ཝིཉྙཏྟིདྭཡསྶ ཀལཱཔབྷེད ཀརཏྟཱཨེཝ ཏེསུ གཧཎཾ སུཊྛུ ཨུཔཔནྣཾ ཧོཏཱིཏི ཝེདིཏབྦནྟི. [ཀལཱཔཡོཛནཱ]

༡༦༠. ཡཐཱརཧནྟི སབྷཱཝཀཱ བྷཱཝཀཱནཾ པརིཔུཎྞཱཔརི པུཎྞིནྡྲིཡཱནཉྩ ཨརཧཱནུརཱུཔཏོ. ཨནཱུནཱནཱིཏི པརིཔུཎྞཱནི. ནཉྷི ཨིདཾ ནཱམརཱུཔཾ ཀཱམལོཀེ པཝཏྟིཡཾ ན ལབྦྷཏཱིཏི ཨཏྠཱིཏི.

[༡༩༨] ཝིབྷཱཝནིཡཾ པན

‘‘ཡཐཱརཧནྟི སབྷཱཝཀཔརིཔུཎྞཱཡཏནཱནཾ ཨནུརཱུཔཏོ’’ཏི ཝུཏྟཾ, ཏཾ ན སུནྡརཾ.

ན ཧི ཨནཱུནཱནཱིཏི ཨིདཾ པུགྒལཝསེན ཝིསེསནཾ ཧོཏཱིཏི. སཾསེདཛཱནཉྩེཝཨོཔཔཱཏིཀཱནཉྩཱཏི ཨེཏྠ མཧཱསཱིཧནཱདསུཏྟེ-

ཙཏསྶོ ཁོ ཨིམཱ སཱརིཔུཏྟ ཡོནིཡོ. ཀཏམཱ ཙཏསྶོ, ཨཎྜཛཱ ཡོནི ཛལཱབུཛཱ ཡོནི སཾསེདཛཱཡོནི ¶ ཨོཔཔཱཏིཀཱ ཡོནཱིཏི. ཡེ ཁོ ཏེ སཱརིཔུཏྟ སཏྟཱ ཨཎྜཀོསཾ ཨབྷིནིབྦྷིཛྫ ཨབྷིནིབྦྷིཛྫ ཛཱཡནྟི, ཨཡཾ ཝུཙྩཏི སཱརིཔུཏྟ ཨཎྜཛཱ ཡོནི. ཡེ ཁོ ཏེ སཱརིཔུཏྟ སཏྟཱ ཝཏྠིཀོསཾ ཨབྷིནིབྦྷིཛྫ ཨབྷིནིབྦྷིཛྫ ཛཱཡནྟི. ཨཡཾ ཝུཙྩཏི སཱརིཔུཏྟ ཛལཱབུཛཱ ཡོནི. ཡེ ཁོ ཏེསཱརི པུཏྟསཏྟཱཔཱུཏིམཙྪེཝཱ ཛཱཡནྟི. པཱུཏིཀུཎཔེཝཱ པཱུཏིཀུམྨཱསེཝཱ ཙནྡནིཀཱཡཝཱ ཨོལི༹གལླེཝཱ ཛཱཡནྟི, ཨཡཾ ཝུཙྩཏི སཱརིཔུཏྟ སཾསེདཛཱ ཡོནི. དེཝཱ ནེརཀཱ ཨེཀཙྩེ ཙ མནུསྶཱ ཨེཀཙྩེཙ ཝིནིཔཱཏིཀཱ ཨཡཾ ཝུཙྩཏི སཱརིཔུཏྟ ཨོཔཔཱཏིཀཱ ཡོནཱིཏི ཝུཏྟཾ.

ཨཊྛཀཐཱཡཉྩ ཨཎྜེ ཛཱཏཱ ཨཎྜཛཱ. ཛལཱབུམྷི ཛཱཏཱ ཛལཱབུཛཱ. སཾསེདེ ཛཱཏཱ སཾསེདཛཱ. ཝིནཱ ཨེཏེཧི ཀཱརཎེཧི ཨུཔྤཏྟིཏྭཱ ཝིཡ ནིབྦཏྟཱ ཨབྷིནིབྦཏྟཱཏི ཨོཔཔཱཏིཀཱ. ཨབྷིནིབྦྷིཛྫ ཛཱཡནྟཱིཏི བྷིནྡིཏྭཱ ནིཀྑམནཝསེན ཛཱཡནྟི. པཱུཏི ཀུཎཔེཏིཨཱདཱིཧི ཨནིཊྛཊྛཱནཱནེཝ དསྶིཏཱནི. ཨིཊྛེསུ སཔྤི ཏེལམདྷུཕཱཎིཏཱདཱིསུ སཏྟཱ ཛཱཡནྟིཨེཝཱཏི ཝུཏྟཾ. ཨེཏྠཙ པུརིམེསུ དྭཱིསུ པཱལི༹ནཡེན ཨཎྜཾ ཝུཙྩཏི ཨཎྜཀོསོ. ཛལཱབུཝུཙྩཏི ཝཏྠིཀོསོ, ཏཏོ ཛཱཏཱ ཝིཛཱཏཱ ནིཀྑནྟཱཏི ཨཎྜཛཱ ཛལཱབུཛཱཏིཙ ཝུཙྩནྟཱིཏི ཝེདིཏབྦཱ. ཏཏྠ ཛརཾ ཛཱིརཎཾ བྷེདཾ ཡཱཏི ཨུཔེཏཱིཏི ཛལཱབཱུཏི སདྡནཱིཏིཡཾ ཝུཏྟཾ. ཛལཾ ཝུཙྩཏི ཀལལཾ. ཏཾ ཨཱཝུནཱཏི པཊིཙྪཱདེཏི ཨཝཏིཝཱ རཀྑཏཱིཏི ཛལཱབུ, གབྦྷཔལིཝེཋནཱསཡོ. སཾསཱིདནྟི ཨེཏྠཱཏི སཾསེདོ. པཱུཏིམཙྪཱ དིཀོ སཔྤིཏེལཱདིཀོ པདུམགབྦྷཝེལུ༹གབྦྷརུཀྑསུསིརཔུཔྥཕལཱདི ཀོཙ ཨལླཀིལིནྣཔདེསོ. ཨུཔཔཏྟིཀྑཎེཨེཝ པརིཔུཎྞཨངྒཔཙྩངྒཏྟཱ ཏཏོ ཏཏོ ཨུཔྤཏིཏྭཱ ཝིཡ ཛཱཡནྟཱིཏི ཨོཔཔཱཏིཀཱ.

ཝིབྷཱཝནིཡཾ པན

ཨཎྜཛཱདཡོཔི ཨཎྜཀོསཱདིམྷི ཨོཀྐམནྟཱ ཨུཔྤཏནྟཱ ཨེཝ ནཱམ ཧོནྟཱིཏི ཏེསཾཔི ཨོཔཔཱཏིཀཏྟཔསངྒཾ མཉྙམཱནོ ཨུཔཔཱཏོ ནེསཾ ཨཏྠཱིཏི ཨོཔཔཱཏིཀཱཏི ཝཏྭཱ ཨུཀྐཾསགཏི ¶ པརིཙྪེདཝསེན ཙེཏྠ ཝིསིཊྛཨོཔཔཱཏོ གཧིཏོ. ཡཐཱ ཨབྷིརཱུཔསྶ ཀཉྙཱ དཱཏབྦཱཏི ཝདཏི.

ཨུཀྐཊྛཝསེནཱཏི པརིཔུཎྞཱཡཏནབྷཱཝསངྑཱཏེན ཨུཀྐཾསཏཱཝེན, ཏཏྠ ཨོཔཔཱཏིཀཱ ཨངྒཔཙྩངྒེཧི སཧ སབྦསོ པརིཔུཎྞེན ཨཏྟབྷཱཝེན ཛཱཡནྟི. པུན ཏེསཾ ཝཌྜྷནཀིཙྩཾ ནཏྠི. སཾསེདཛཱནཾ པན ཨཱཡཏནཱནི ཨེཝ པརིཔུཎྞཱནི ཧོནྟི. ཨངྒཔཙྩངྒཱནི པན པུན ཝཌྜྷིཏྭཱཨེཝ པརིཔུཎྞཱནི ཛཱཏཱནཱིཏི ཝེདིཏབྦཾ. ཨོམཀཝསེནཱཏི ཨཝཀཾསཝསེན. ཙཀྑུསོཏགྷཱནབྷཱཝསེཀཱནིཀདཱཙིཔི ན ལབྦྷནྟི ཛཱཏིབདྷིར ཛཙྩགྷཱནཀཱནཾ ཨབྷཱཝཀཱནཉྩ སམྦྷཝཏོཏི ཨཔྤོཡོ. ཏཏྠ ཏཱནི སབྦཱནིཔི སུགཏི དུགྒཏི ཛཱཏིཡཱནཾ ཨཧེཏུཀསཾསེདཛཱནཾ ཀདཱཙི ནལབྦྷནྟི. སུགཏིཡཾ པན ཨོཔཔཱཏིཀབྷཱཝོནཱམ སེཊྛོ ཨཏྟབྷཱཝ པཊིལཱབྷོཏི ནཡེན ཀེནཙི ཨོམཀེན ཀམྨེན ལབྦྷཏི. ཏསྨཱ སུགཏིཛཱཏི ཡཱནཾ ཨོཔཔཱཏིཀཱནཾ ཨཔརིཔུཎྞིནྡྲིཡཏཱནཱམ ནཏྠི ཨཉྙཏྲ ཨབྷཱཝཀེཧི ཨཱདིཀཔྤིཀེཧིཏི. དུགྒཏིཛཱཏིཡཱནཾཔི པན ཏེསཾ ཀདཱཙི ཙཀྑུ སོཏ བྷཱཝ ཝེཀལླཏཱཨེཝ ཝཏྟབྦཱ. ན གྷཱནཝེཀལླཏཱ. ཀཱམདྷཱཏུཡཾ པན ཨགྷཱནཀོ ཨོཔཔཱཏིཀོ ནཏྠཱིཏི ཧི ཨཊྛ ཀཐཱཡཾ ཝུཏྟཾ. ཛིཝ྄ཧཱཝེཀལླཏཱནཱམ སབྦེསཾཔི ནཏྠི ཡེཝཱཏི ཝེདིཏབྦཾ. ཏཐཱ ཧི དྷམྨཧདཡཝིབྷངྒེ –

ཀཱམདྷཱཏུཡཱ ཨུཔཔཏྟིཀྑཎེ ཀསྶཙི ཨེཀཱདསཱ ཡཏནཱནི པཱཏུབྷཝནྟི. ཀསྶཙི དས. ཀསྶཙིཨཔརཱནི དས. ཀསྶཙི ནཝ. ཀསྶཙི སཏྟཱཡཏནཱནི པཱཏུབྷཝནྟཱིཏི ཝུཏྟཾ.

ཏཏྠ ཀཱམདྷཱཏུཡནྟི ཀཱམལོཀེ. ཨུཔཔཏྟིཀྑཎེཏི པཊིསནྡྷིཙིཏྟསྶ ཨུཔྤཱདཀྑཎེ. ཀསྶཙི ཨེཀཱདསཱ ཡཏནཱནཱིཏིཨཱདིསུ ཙཏཱུསུ ཝཱཀྱེསུ སཾསེདཛོཔཔཱཏིཀཱ ཝུཏྟཱ. ཀསྶཙི སཏྟཱཡཏནཱནཱིཏི ཨེཏྠ པན གབྦྷསེཡྻཀོཝ ཝུཏྟོ. ཏཏྠ ཡསྨཱ སཏྟཱཡཏནཾ ནཱམ པཊིསནྡྷིཀྑཎེ ན ལབྦྷཏི. པཝཏྟི ཀཱལེཡེཝ ལབྦྷཏི. ཏསྨཱ ཨེཀཱདསཡཏནཱནཱིཏི ཝུཏྟཾ. ཀསྶཙི དསཱཏི ཙཀྑུཝེཀལླཝསེན. ཀསྶཙི ཨཔརཱནི དསཱཏི སོཏ ཝེཀལླཝསེན. ¶ ཀསྶཙི ནཝཱཏི ཙཀྑུསོཏ དྭཡ ཝེཀལླ ཝསེན ཝུཏྟཾ. ཡདིཙ ཨགྷཱནཀོ ཨོཔཔཱཏིཀོནཱམ སིཡཱ. ཏདཱ སུདྡྷཛཙྩགྷཱནཀེན སདྡྷིཾ ཏཡོ དསཀཝཱརཱ ཝུཏྟཱ སིཡུཾ. ཏཐཱ ཛཙྩནྡྷགྷཱནཀ ཛཙྩབདྷིརགྷཱནཀེཧི སདྡྷིཾ ཏཡོ ནཝཀཝཱརཱ ཨེཀོཙ ཨཊྛཀཝཱརོ ཝུཏྟོ སིཡཱ ཏིཎྞཾ ཝིཔནྣཱནཾ ཝསེན. ཏཐཱ ཨཝུཏྟཏྟཱ པན ནཏྠི ཨགྷཱནཀོ ཨོཔཔཱཏི ཀོཏི ཝིཉྙཱཡཏཱིཏི. ཏསྨིཾ པན ཝིབྷངྒེ ཨིནྡྲིཡཝཱརེ ནཔུཾསཀཱནཾ ཨོཔཔཱཏིཀཱནནྟི ཨཝུཏྟཏྟཱ ཐཔེཏྭཱ ཨཱདིཀཔྤིཀེ ཨབྷཱཝཀོཔི ཨོཔཔཱཏིཀོ ནཏྠིཡེཝཱཏི. པཱལི༹ཡཾ ཨཝུཏྟཾཔི པན སཾསེདཛཱནཾ ཝུཏྟཔཀཱརཾ ཙཀྑཱདིཝེཀལླཾ ཨཊྛཀཐཱཝསེན ཝེདིཏབྦཾ. ཡཐཱཧ-སཏྟཏི ཨུཀྐཾསཏོཝ རཱུཔཱནི སཾསེདཛོཔཔཱཏ ཡོནཱིསུ. ཨཐཝཱ, ཨཝཀཾསཏོ ཏིཾསཱཏི. ཏཏྠ ཏིཾསཱཏི ཛིཝ྄ཧཱཀཱཡ ཝཏྠུ དསཀཱནཾ ཝསེན ཏིཾསརཱུཔཱནཱིཏི ཙ ཝུཏྟཾ. ཨིདཉྷི ཝཙནཾ སཾསེདཛཱནཾ ཝསེན ཝུཏྟནྟི མཧཱཊཱིཀཱཡཾ ཝུཏྟཾ. ཨཱཙརིཡཱ ནནྡཏྠེརེན པན ཡམཀེ གྷཱནཛིཝ྄ཧཱནཾ ཨཉྙམཉྙཾ ཨཝིནཱབྷཱཝ ཝུཏྟིཏཱ ཝུཏྟཱཏི ཛིཝ྄ཧཱ ཝེཀལླཏཱ ཝིཡ གྷཱནཝེཀལླཏཱཔི ནཏྠཱིཏི ཨིཙྪིཏཾ. ཨིནྡྲིཡ ཡམཀེ པན –

ཡསྶཝཱ པན ཨིཏྠིནྡྲིཡཾ ཨུཔྤཛྫཏི, ཏསྶ གྷཱནིནྡྲིཡཾ ཨུཔྤཛྫཏཱིཏི. ཨགྷཱནཀཱནཾ ཨིཏྠཱིནཾ ཨུཔཔཛྫནྟཱིནཾ ཏཱསཾ ཨིཏྠིནྡྲིཡཾ ཨུཔྤཛྫཏི, ནོཙ ཏཱསངྒྷཱནིནྡྲིཡཾ ཨུཔྤཛྫཏཱིཏིཙ. ཡསྶཝཱ པན པུརིསིནྡྲིཡཾ ཨུཔྤཛྫཏི, ཏསྶ གྷཱནིནྡྲིཡཾ ཨུཔྤཛྫཏཱིཏི. ཨགྷཱནཀཱནཾ པུརིསཱནཾ ཨུཔཔཛྫནྟཱནཾ ཏེསཾ པུརིསིནྡྲིཡཾ ཨུཔྤཛྫཏི, ནོཙ ཏེསཾ གྷཱནིནྡྲིཡཾ ཨུཔྤཛྫཏཱིཏིཙ ཝུཏྟཾ.

ཏསྨཱ ཨཊྛཀཐཱཡཾ ཝུཏྟནཡེན གྷཱནཝེཀལླཏཱཔི ཨཏྠཱིཏི ཡུཏྟཾ.

ཝིབྷཱཝནིཡཾ པན

ཨཔརེ པན ཡམཀེ གྷཱནཛིཝ྄ཧཱནཾ སཧཙཱརིཏཱ ཝུཏྟཱཏི ཨཛིཝ྄ཧསྶ ཨསམྦྷཝཏོ ཨགྷཱནཀསྶཔི ཨབྷཱཝམེཝ ཝཎྞེནྟི. ཏཏྠཱཔི ཡཐཱ ཙཀྑུསོཏཱནི རཱུཔབྷཝེ གྷཱན ཛིཝ྄ཧཱཧི ཝིནཱ པཝཏྟནྟི. ན ཨེཝཾ གྷཱནཛིཝ྄ཧཱ ཨཉྙམཉྙཾ ཝིནཱ པཝཏྟནྟི. ¶ དྭིནྣཾཔི རཱུཔབྷཝེ ཨནུཔྤཛྫནཏོཏི ཨེཝཾ ཝིསུཾ ཝིསུཾ ཀཱམབྷཝེ ཨཔཝཏྟི ཝསེན ཏེསཾ སཧཙཱརིཏཱ ཝུཏྟཱཏི ན ན སཀྐཱ ཝཏྟུནྟི ཝུཏྟཾ. ཏཾ ཡུཏྟཾ.

ཨོཀཱསཝཱརེ ཧི ཨེཀནྟསཧཙཱརིཏཱ ཝུཏྟམཏྟེན པུགྒལེསུ ཨེཀནྟསཧཙཱརིཏཱ ན སཀྐཱ ཝཏྟུནྟི. གབྦྷེ མཱཏུཀུཙྪིམྷི སེནྟཱིཏི གབྦྷསེཡྻཀཱ. རཱུཔཱདཱིསུ ཁནྡྷེསུ སཉྫནྟི ལགྒནྟཱིཏི སཏྟཱ. ཡཐཱཧ-རཱུཔེ ཁོ རཱདྷ ཡོ ཚནྡོ, ཡོ རཱགོ, ཡཱ ནནྡི, ཡཱ ཏཎྷཱ, ཏཏྲ སཏྟོ, ཏཏྲ ཝིསཏྟོ, ཏེན སཏྟོཏི ཝུཙྩཏཱིཏིཨཱདི. གབྦྷསེཡྻཱཙ ཏེ སཏྟཱཙཱཏི སམཱསོ. ཨཎྜཛཱཙེཝ ཛལཱབུཛཱཙ. ཏཱིཎིདསཀཱནི པཱཏུ བྷཝནྟི. ཡཱནི ཀལལནྟི ཝུཙྩནྟི. བྷཱཝདསཀཾ ཀདཱཙི ནལབྦྷཏི ནཔུཾསཀསྶཱཏི ཨདྷིཔྤཱཡོ. ཨེཝཉྩཀཏྭཱ དྷམྨཧདཡཝིབྷངྒེ གབྦྷསེཡྻཀཱནཾ སཏྟཱནཾ ཨཧེཏུཀཱནཾ ནཔུཾསཀཱནཾ ཨུཔཔཏྟིཀྑཎེ ཙཏྟཱརིནྡྲིཡཱནི པཱཏུབྷཝནྟི ཀཱཡིནྡྲིཡཾ མནིནྡྲིཡཾ ཛཱིཝིཏིནྡྲིཡཾ ཨུཔེཀྑིནྡྲིཡནྟི ཝུཏྟཾ. ཏཏོཔརནྟི གབྦྷསེཡྻཀཱནཾ པཊིསནྡྷིཀྑཎཏོ པརཾ. པཝཏྟིཀཱལེཏི ཨེཀདསམེ སཏྟཱཧེ. ཏཐཱ ཧི ཀཐཱཝཏྠུཨཊྛཀཐཱཡཾ སེསཱནི ཙཏྟཱརི སཏྟསཏྟཏི རཏྟིམྷི ཛཱཡནྟཱིཏི ཝུཏྟཾ. ཏཏྠ སེསཱནཱིཏི ཀཱཡཱཡཏན མནཱཡཏནཏོ ཨཝསེསཱནི ཙཏྟཱརི ཙཀྑུསོཏགྷཱནཛིཝ྄ཧཱ ཡཏནཱནི. སཏྟསཏྟཏིརཏྟིམྷཱིཏི ཨེཀཱདསམསཏྟཱཧསྶ པརིཡོསཱནརཏྟིམྷི. ཨཡཉྩ ཨཏྠོ ཡམཀཊཱིཀཱཡ དཱིཔེཏབྦོ. ཝུཏྟཉྷི ཏཏྠ –

གབྦྷསེཡྻཀསྶ པཙྪིམབྷཝིཀསྶ ཨུཔཔཛྫནྟསྶ ཨེཀདས མསཏྟཱཧཱ ཨོརཏོ ཋིཏསྶ རཱུཔཱཡཏནཾ ནུཔྤཛྫིསྶཏི, ནོཙ ཙཀྑཱཡཏནཾ ནུཔྤཛྫིསྶཏཱིཏི.

ཡཾ པན ཡསྶཝཱ པན ཡཏྠ རཱུཔཱཡཏནཾ ཨུཔྤཛྫིཏྠ, ཏསྶ ཏཏྠ གྷཱནཱཡཏནཾ ཨུཔྤཛྫཏཱིཏི. ཀཱམཱཝཙརཱ ཙཝནྟཱནཾ ཨགྷཱནཀཱནཾ ཀཱམཱཝཙརཾ ཨུཔཔཛྫནྟཱནཾ རཱུཔཱཝཙརཱནཾ ཏེསཾ ཏཏྠ རཱུཔཱཡཏནཾ ཨུཔྤཛྫིཏྠ. ནོཙ ཏེསཾ ཏཏྠ གྷཱནཱཡཏནཾ ཨུཔྤཛྫཏཱིཏི ཨེཏྠ ཨགྷཱནཀཱནཾ ཀཱམཱཝཙརཾ ཨུཔཔཛྫནྟཱནནྟི ཝུཏྟཾ.

ཏཾ ¶ ཡེ ཨེཀཱདསམསཏྟཱཧཱ ཨོརཏོ ཀཱལངྐརིསྶནྟི. ཏེསཾ གྷཱནཱཡཏནཱནིབྦཏྟཀཀམྨེན གཧིཏཔཊིསནྡྷིཀཱནཾ ཝསེན ཝུཏྟནྟིཙ ཝུཏྟཾ. ཨེཏྠཙ ཙཀྑུགྷཱནེསུ ཝུཏྟེསུ སོཏཛིཝ྄ཧཱ ཨཝུཏྟཱཔི ཨཏྠཏོ སིདྡྷཱཨེཝ ཧོནྟཱིཏི.

[༡༩༩] ཡཾ པན ཝིབྷཱཝནིཡཾ

‘‘པཝཏྟིཀཱལེཏི སཏྟམེ སཏྟཱཧེཏི’’ ཝུཏྟཾ. ཏཾ ན གཧེཏབྦཾ.

ཨཊྛཀཐཱ ཝིརོདྷཏོ ཨཱིདིསེསུ ཙ ཋཱནེསུ ཨཊྛཀཐཱ པམཱཎཏོཏི.

[༢༠༠] ཡཉྩ ཏཏྠ

‘‘ཊཱིཀཱཀཱརམཏེན ཨེཀཱདསམེ སཏྟཱཧེ ཝཱཏི’’ ཝུཏྟཾ. ཏམྤི ན སུནྡརཾ.

ནཧི ཨཊྛཀཐཱཡཾ ནིདྡིཊྛཏོ ཝུཏྟོ ཝིནིཙྪཡོ ཊཱིཀཱཀཱར མཏོནཱམ སཀྐཱ ཝཏྟུནྟི.

[༢༠༡] ཡཉྩ ཏཏྠ

‘‘ཀམེནཱཏི ཙཀྑུདསཀཔཱཏུབྷཱཝཏོ སཏྟཱཧཱཏིཀྐམེན སོཏདསཀཾ. ཏཏོ སཏྟཱཧཱཏིཀྐམེན གྷཱན དསཀཾ. ཏཏོ སཏྟཱཧཱ ཏིཀྐམེན ཛིཝ྄ཧཱདསཀནྟི ཨེཝཾ ཨནུཀྐམེནཱཏི ཝུཏྟཾ’’. ཏཾཔི ན དཊྛབྦ.

ཡཐཱཝུཏྟ ཨཊྛཀཐཱཝིརོདྷཏྟཱ ཨེཝ.

[༢༠༢] ཡཾཔི ཏཏྠ

‘‘ཨཊྛཀཐཱཡཾཔི ཧི ཨཡམཏྠོ དསྶིཏོ ཝཱ’’ཏི ཝུཏྟཾ. ཏཾཔི ན ཡུཏྟཾ.

ན ཧི སཱནཱམ ཨཊྛཀཐཱ ཨཏྠི. ཡཏྠ ཨཱིདིསོ ཨུཔྤཏྟིཀྐམོ དསྶིཏོ སིཡཱ. ནནུ པཊིཙྩསམུཔྤཱདཊྛཀཐཱསུ གབྦྷལེཡྻཀཝསེནཝཱ པུརིམཾབྷཝཙཀྐཾ ཝུཏྟཾ. ཨནུཔུབྦཔཝཏྟིདཱིཔནཏོཏི ཝུཏྟནྟི ཙེ.ན. ཏཉྷི ཝིཉྙཱཎཱདཱིནཾ པཉྩནྣཾ ཨངྒཱནཾ པཙྩཡཔཙྩཡུཔྤནྣབྷཱཝཔཝཏྟིཀྐམེན པཱལི༹ཡཾ ཨཱགཏཾ པཉྩཔདཾ སནྡྷཱཡ ཝུཏྟནྟི. ཨཱཡཏནནིདྡེསཊྛཀཐཱསུ ¶ པན སོ པཊིཀྑིཏྟོཡེཝ. ནཙ ཨཊྛཀཐཱསུ པཊིཀྑིཏྟོ ཨུཔྤཏྟིཀྐམོ ཐེརེན ཨིདྷ ཀམེནཱཏི ཨིམིནཱ པཱཋེན དསྶིཏོཏི སཀྐཱ ཝཏྟུནྟི. ཏསྨཱ ཀམེནཱཏི ཨིདྷཔི དེསནཀྐམེནཱཏི ཨཏྠོ. དེསིཏཱནཱིཏི སམྦནྡྷོཙ ཝེདིཏབྦོ.

སཙྩསངྑེཔ ཊཱིཀཱཡཾ པན

སཱཁཱཝཏྠཾ ཨཏིཀྐམྨ པཙྪཱ སཏྟམེ སཏྟཱཧེ ཙཀྑུ སོཏགྷཱནཛིཝ྄ཧཱདསཀཱཙ ཨུཔྤཛྫནྟི. ཊཱིཀཱཀཱརོཔན ཨེཀཱདསམེ སཏྟཱཧེཏི ཨཱཧཱཏི ཝུཏྟཾ. ཏཾཔི ནཡུཛྫཏི ཡེཝཱཏི.

ཨེཏྠ ཙ ཀལལཱདཱིནཾ ཨུཔྤཏྟིཀྐམོ སཾཡུཏྟཀེ ཝུཏྟོ. ཡཐཱཧ –

པཐམཾ ཀལལཾ ཧོཏི, ཀལལཱ ཧོཏི ཨབྦུདཾ;

ཨབྦུདཱ ཛཱཡཏེ པེསི, པེསིཡཱ ནིབྦཏྟཏེ གྷནོ;

གྷནཱ པསཱཁཱ ཛཱཡནྟི, ཀེསཱ ལོམཱ ནཁཱཔིཙཱཏི.

ཨཊྛཀཐཱཡཉྩ ཝུཏྟཾ. ཏཏྠ པཐམནྟི པཐམེན པཊིསནྡྷིཝིཉྙཱཎེན ཏིསྶོཏི ཝཱ ཕུསྶོཏིཝཱ ནཱམཾ ནཏྠི. ཨཐཁོ ཏཱིཧི ཛཱཏིཨུཎྞཾསཱུཧི ཀཏསུཏྟགྒེ སཎྛིཏཏེལབིནྡུཔམཱཎཾ ཀལལཾ ཧོཏི. ཡཾ སནྡྷཱཡ ཝུཏྟཾ –

ཏིལཏེལསྶ ཡཐཱ བིནྡུ, སཔྤིམཎྜོ ཨནཱཝིལོ;

ཨེཝཾ ཝཎྞཔཊིབྷཱགཾ, ཀལལཾ སཾཔཝུཙྩཏཱིཏི.

ཀལལཱ ཧོཏི ཨབྦུདནྟི ཏསྨཱ ཀལལཱ སཏྟཱཧཙྩཡེན མཾསདྷོཝནཨུདཀཝཎྞཾ ཨབྦུདཾནཱམ ཧོཏི, ཀལལནྟི ནཱམཾ ཨནྟ རདྷཱཡཏི. ཝུཏྟཾཔི ཙེཏཾ –

སཏྟཱཧཾ ཀལལཾ ཧོཏི, པརིཔཀྐསམཱུཧཀཾ;

ཝིཝཏྟམཱནཾ ཏབྦྷཱཝཾ, ཨབྦུདཾནཱམ ཛཱཡཏཱིཏི.

ཨབྦུདཱ ཛཱཡཏེ པེསཱིཏི ཏསྨཱཔི ཨབྦུདཱ སཏྟཱཧཙྩཡེན ཝིལཱིན ཏིཔུསདིསཱ པེསིནཱམ སཉྫཱཡཏི. སཱ མརིཙཕཱཎིཏེན དཱིཔེཏབྦཱ. གཱམདཱརཀཱ ཧི སུཔཀྐཱནི མརིཙཱནི གཧེཏྭཱ སཱཊཀནྟརེ ¶ བྷཎྜིཀཾ ཀཏྭཱ པཱིལེ༹ཏྭཱ མཎྜཾ ཨཱདཱཡ ཀཔཱལེ པཀྑིཔིཏྭཱ ཨཱཏཔེ ཐཔེནྟི. ཏཾ སུཀྑམཱནཾ སུཀྑམཱནཾ སབྦབྷཱགེཧི མུཙྩཏི. ཨེཝརཱུཔཱ པེསི ཧོཏི. ཨབྦུདནྟི ནཱམཾ ཨནྟརདྷཱཡཏི. ཝུཏྟཾཔི ཙེཏཾ –

སཏྟཱཧཾ ཨབྦུདཾ ཧོཏི, པརིཔཀྐསམཱུཧཀཾ;

ཝིཝཏྟམཱནཾ ཏབྦྷཱཝཾ, པེསིནཱམ པཛཱཡཏཱིཏི.

པེསིཡཱ ནིབྦཏྟཏེ གྷནོཏི ཏཏོ པེསིཏོ སཏྟཱཧཙྩ ཡེན ཀུཀྐུཊཎྜསཎྛཱནོ གྷནོནཱམ མཾསཔེསི པིཎྜོ ནིབྦཏྟཏི. པེསཱིཏིནཱམཾ ཨནྟརདྷཱཡཏི. ཝུཏྟཾཔི ཙེཏཾ –

སཏྟཱཧཾ པེསི བྷཝཏི, པརིཔཀྐཾ སམཱུཧཀཾ;

ཝིཝཏྟམཱནཾ ཏབྦྷཱཝཾ, གྷནོཏིནཱམ ཛཱཡཏཱིཏི;

ཡཐཱ ཀུཀྐུཊིཡཱ ཨཎྜཾ, སམནྟཾ པརིམཎྜལཾ;

ཨེཝཾ གྷནསྶ སཎྛཱནཾ, ནིབྦཏྟཾ ཀམྨཔཙྩཡཱཏིཙ.

གྷནཱ པསཱཁཱ ཛཱཡནྟཱིཏི པཉྩམེ སཏྟཱཧེ དྭིནྣཾ ཧཏྠཔཱདཱནཾ སཱིསསྶཙ ཨཏྠཱཡ པཉྩཔཱིལ༹ཀཱ ཛཱཡནྟི. ཡཾ སནྡྷཱཡེཏཾ ཝུཏྟཾཔཉྩམེ ཁོ བྷིཀྑཝེ སཏྟཱཧེ པཉྩཔཱིལ༹ཀཱ ཛཱཡནྟི. སཎྛནྟི ཀམྨ ཏོཏི. ཀེསཱ ལོམཱ ནཁཱཔིཙཱཏི དྭཱཙཏྟཱལཱིསམེ སཏྟཱཧེ ཨེཏཱནི ཛཱཡནྟཱིཏི. ཨེཏྠ ཙ ཚཊྛསཏྟཱཧཱདཡོ ཚསཏྟཱཧཱ པསཱདནིསྶཡཱནཾ ཨངྒཔཙྩངྒཱནཾ ཨནུཀྐམེན ཝཌྜྷིཏྭཱ པརིཎཏཀཱལཱ ཧོནྟི. ཙཀྑཱདཱིནི པན ཨེཀཱདསམ སཏྟཱཧསྶ པརིཡོ སཱནདིཝསེ ཨེཀཏོ ཛཱཡནྟཱིཏི ནིཊྛམེཏྠ གནྟབྦཾ. ཡཾ པནེཏྠ ཏིལཏེལསྶ ཡཐཱབིནྡཱུཏིཨཱདིནཱ ཀལལསྶ ཝཎྞསཎྛཱནཾ ཝུཏྟཾ. ཏཾ ཐོཀཾ ཝཌྜྷིཏཾ སནྡྷཱཡ ཝུཏྟཾ. ན པཊིསནྡྷིཀྑཎེ པཝཏྟམཱནཾ. ན ཧི ཏདཱ ཏཱདིསཾ པཀཏིཙཀྑུནཱ དིཊྛཾ ཝཎྞཛཱཏཾཝཱ སཎྛཱནཾཝཱ ཏསྶ པཉྙཱཡེཡྻཱཏི. ཨནུམཱནཏོ པན ཨེཝཾ ཝེདིཏབྦཾ. ཨེཀཱཡ ཨཱུཀཱཡ སཏྟམོ བྷཱགོ ལིཀྑཱནཱམ. ལིཀྑཱཡ ཚཏྟིཾསཏིམོ བྷཱགོ རཐརེཎུནཱམ. རཐརེཎུསྶ ཚཏྟིཾསཏིམོ. ཏཛྫཱརཱི ནཱམ. ཏཛྫཱརིཡཱ ཚཏྟིཾསཏིམོ ཨཎུནཱམ. ཨཎུསྶ ཚཏྟིཾསཏིམོ བྷཱགོ པརམཱཎུནཱམ. སོ པན ཨཱཀཱསཀོཊྛཱསིཀོ ¶ མཾསཙཀྑུསྶ ཨཱཔཱཏཾ ནཱགཙྪཏི. དིབྦཙཀྑུསྶེཝ ཨཱགཙྪཏཱིཏི ཨཊྛཀཐཱཡཾ ཝུཏྟཾ. ཏེསཾ ཚཏྟིཾས པརིམཱནོ ཨཎུ པན ཏིཏྟིཙྪིདྡ ཏཱལཙྪིདྡེཧི པཝིཊྛསཱུརིཡརསྨཱིསུ ཝཊྚིཝཊྚི ཧུཏྭཱ པརིབྦྷམནྟོ པཉྙཱཡཏཱིཏི ཝུཏྟཾ. སཀལཾ པན ཀལཱཔཏྟཡཔརིམཱཎམཏྟབྷཱུཏཾ པཊིསནྡྷིཀྑཎེ པརམཱཎུཏོཔི པརིཏྟཀམེཝ སིཡཱ. སོ ཧི སནྟཱནཱནུབནྡྷཝསེན པཝཏྟཏྟཱ ཁཎེ ཁཎེ ཨུཔཙིཏརཱུཔཀལཱཔསམཱུཧོཨེཝ ཧོཏཱིཏི ཧེཊྛིམ ཀོཊིཡཱ ཨེཀཱུནཔཉྙཱསཀལཱཔཔརིམཱཎོཨེཝ སིཡཱ. ཏཏོ པརིཏྟཀེ སཏི སནྟཱན གྷཊནསྶེཝ ཨསམྦྷཝཏོཏི. ཡཾ པན མཧཱཊཱིཀཱཡཾ ཏེ པན ཀལཱཔཱ པརམཱཎུཔརིམཱཎཱ ཧོནྟཱིཏི ཝུཏྟཾ. ཏཾ དྷཱཏཱུནཾ ཙུཎྞམནསིཀཱརཱནུརཱུཔམཏྟཝསེན ཝུཏྟནྟི གཧེཏབྦཾ. དུཏཱིཡཙིཏྟནྟི པཐམ བྷཝངྒཙིཏྟཾ. ཋིཏིཀཱལནྟི པཊིསནྡྷི ཙིཏྟསྶ ཋིཏིཀཱལཾ. ཨོཛཱཕརཎམུཔཱདཱཡཱཏི གབྦྷསེཡྻཀཱནཾ ཏཱཝ ཨབྦུདབྷཱཝ པེསིབྷཱཝ གྷནབྷཱཝཱདི པཏྟཀཱལེ མཱཏུཡཱ ཨཱམཱསཡགཏཱཡ ཨཛ྄ཛྷོཧཊཱཧཱར སིནེཧབྷཱུཏཱཡ ཨོཛཱཡ ཛལཱབུམཱུལཱ ནུསཱརེན ཝཏྠུསྨིཾ ཕརཎཀཱལཾ ཨུཔཱདཱཡ, ཡཐཱཧ –

ཡཉྩསྶ བྷུཉྫཏི མཱཏཱ, ཨནྣཾ པཱནཉྩ བྷོཛནཾ;

ཏེན སོ ཏཏྠ ཡཱཔེཏི, མཱཏུཀུཙྪིགཏོ ཏིརོཏི.

ཨཊྛཀཐཱཡཉྩ ཏེན སོ ཏཏྠ ཡཱཔེཏཱིཏི ཏསྶ ཧི ནཱཏིཏོ ཨུཊྛིཏོ ནཱལོ༹ མཱཏུཨུདར པཊལེན ཨེཀཱབདྡྷོ ཧོཏི. སོ ཨུཔྤལདཎྜཀོ ཝིཡ ཚིདྡོ. ཏེན ཨཱཧཱརརསོ སཾསརིཏྭཱ ཨཱཧཱརསམུཊྛཱནརཱུཔཾ སམུཊྛཱཔེཏི. ཨེཝཾ སོ དསམཱསེ ཡཱཔེཏི. མཱཏུཀུཙྪིགཏོ ཏིརོཏི མཱཏུཡཱ ཏིརོ ཀུཙྪིགཏོ. མཱཏུཀུཙྪིཡཱ ཨབྦྷནྟརགཏོཏི ཨཏྠོཏི ཝུཏྟཾ. ཏཏྠ པན ནཱབྷིནཱལ༹སྶ ཨུཊྛིཏཀཱལཾ སནྡྷཱཡ ནཱཏིཏོ ཨུཊྛིཏོ ནཱལོ༹ཏི ཝུཏྟནྟི གཧེཏབྦཾ. ན ཧི ཨབྦུདཱདིཀཱལེ ཏསྶ ནཱཏིནཱལོ༹ནཱམ ཨུཊྛིཏོ སིཡཱཏི. སཾསེདཛོཔཔཱཏིཀཱནཾ པན ཡཾཀིཉྩི ལདྡྷཾཝཱ ཨཏྟནོ ཁེལ༹ཾཝཱ ཨཛ྄ཛྷོཧརཎཀཱལེ ཨོཛཱཕརཎཾ ཨུཔཱདཱཡ. ཏེན ཝུཏྟཾ ཨོཛཱཕརཎམུཔཱདཱཡཨཱཧཱརསམུཊྛཱནཱཏི ¶ . ཙུཏིཙིཏྟོཔརི སཏྟརསམཙིཏྟསྶཱཏི ཙུཏིཙིཏྟཏོ ཨུཔརི པུབྦཀཱལེ སཏྟརསམསྶ བྷཝངྒཙིཏྟསྶ. ཀམྨཛརཱུཔཱནི ན ཨུཔྤཛྫནྟི ཏེསཾ ཏཏོ པཊྛཱཡ ཨནུཔྤནྣཏྟཱཡེཝ ཏཏོ སཏྟ རསམཾ ཙུཏིཙིཏྟཾནཱམ ཧོཏི. ནོ ཨཉྙཐཱཏི. པུརེཏརནྟི ཏསྶ སཏྟརསམསྶ ཙིཏྟསྶ ཨུཔྤཱདཀྑཎཾཨེཝ སནྡྷཱཡ ཝུཏྟཾ. ཏཏོཔརནྟི ཙུཏིཙིཏྟཏོ པརསྨིཾ སོལ༹སཙིཏྟཀྑཎཔརིམཱཎེ ཁཎེ. ཙིཏྟཛཱཧཱརཛརཱུཔཉྩཱཏི ཙིཏྟཛརཱུཔསནྟཱནཾ ཨཱཧཱརཛ རཱུཔསནྟཱནཉྩ ཝོཙྪིཛྫཏི ཨནུཔཱདིནྣཀསནྟཱནེ ཏེསཾ ཨུཔྤཏྟིཡཱ ཨསམྦྷཝཏོ. ཡམེཏྠ ཝཏྟབྦཾ ཏཾ རཱུཔསམུཊྛཱནེ ཝུཏྟམེཝ. བྷཱཝདསཀཾནཱམ ཀཱམརཱགནིདཱནཀམྨསམུཊྛཱནཾ ཧོཏཱིཏི ཏབྦིརཱག བྷཱཝནཱཀམྨནིབྦཏྟེ རཱུཔལོཀེ ཏསྶ ཨལཱབྷོ ཝུཏྟོ. ཨཱཧཱརཛཀལཱཔཱནིཙ ན ལབྦྷནྟི ཨཛ྄ཛྷོཧཊཱ ཧཱརཱ བྷཱཝཏོ, ཏཏོཡེཝཙ སརཱིརགཏསྶ ཨཛ྄ཛྷཏྟཱཧཱརསྶཔི རཱུཔསམུཊྛཱནཱ བྷཱཝཏོ. ཨཱཙརིཡཱནནྡཏྠེརོ པན ཏཏྠ ལབྦྷམཱན རཱུཔཀལཱཔེསུཔི གནྡྷརསཱནཾ ཨོཛཱཡཙ ཨབྷཱཝཾ ཝཎྞེཏི. རཱུཔདྷཱཏུཡཱ ཨུཔཔཏྟིཀྑཎེ པཉྩཱཡཏནཱནི པཱཏུབྷཝནྟི ཙཀྑཱཡཏནཾ རཱུཔཱཡཏནཾ, སོཏཱ ཡཏནཾ, མནཱ ཡཏནཾ, དྷམྨཱཡཏནནྟི ཙ, པཉྩདྷཱཏུཡོ པཱཏུབྷཝནྟི ཙཀྑུདྷཱཏུ, རཱུཔདྷཱཏུ, སོཏདྷཱཏུ, མནོཝིཉྙཱཎ དྷཱཏུ, དྷམྨདྷཱཏཱུཏིཙ, ཏཡོ ཨཱཧཱརཱ པཱཏུབྷཝནྟི ཕསྶཱཧཱརོ, མནོསཉྩེཏནཱ ཧཱརོ, ཝིཉྙཱཎཱ ཧཱརོཏི ཙ ཝིབྷངྒེཝུཏྟཏྟཱ. ཨེཏྠཙ པཱལི༹ཡཾ རཱུཔལོཀེ ཕོཊྛབྦེ པཊིཀྑིཏྟེཔི ཀིཙྩནྟརསབྦྷཱཝཱ མཧཱབྷཱུཏཱནཾ ཏཏྠ པཊིལཱབྷོ ཨཝཱརིཏོ ཨེཝ ཧོཏི. གནྡྷཱདཱིནཾ པན ཀིཙྩནྟརམེཝ ནཏྠི. ཡེན ཏེ དྷམྨམཏྟབྷཱཝེཔི ཏིཊྛེཡྻཾ ཏསྨཱ ཏེསཾ ཨཝཙནཾ ཏཏྠ ཨབྷཱཝམེཝ དཱིཔེཏཱིཏི ཨཱཙརིཡསྶ ཨདྷིཔྤཱཡོ. ཏཐཱ པན བྷཱུཏཙཏུཀྐཾ ཏཏྠ ཨཏྠིཡེཝ, ཡཐཱཧ-ཨསཉྙསཏྟཱནཾ ཨེཀཾ མཧཱབྷཱུཏཾ པཊིཙྩ ཏཡོ མཧཱབྷཱུཏཱཏིཨཱདི. ཕོཊྛབྦཱཡཏནཾ པན ཕོཊྛབྦ དྷཱཏུཙ ཏཏྠ པཊིཀྑིཏྟཱ. ཏསྨཱ སབྦེསཾ སབྷཱཝདྷམྨཱནཾ དྷམྨབྷཱཝེ སམཱནེཔི ཡེན ཀིཙྩཝིསེསེན གནྡྷོ རསོ ཕོཊྛབྦཾ ཀབལཱི༹ཀཱརཱཧཱརོཏིཙ ཝུཙྩཏི. ཏསྶ ནཏྠིཏཱཡ ཏེསཾ ཏེན ནཱམེ ན ཏཏྠ ¶ ཨནུཔལབྦྷམཱནཏཾ སནྡྷཱཡ ཝིབྷངྒེ ཀཐཱཝཏྠུམྷི ཡམཀེ སཱུཏི སབྦཏྠ ཏེསཾ ཏཏྠ པཊིཀྑེཔོ. མཧཱབྷཱུཏཱནཾ པན ནིསནྡ དྷམྨམཏྟབྷཱཝེན ཝིཛྫམཱནཱནཾ ཏེསཾ དྷམྨཱཡཏནདྷམྨདྷཱཏཱུསུ ཨནུཔཝེསོཏི ཡུཏྟོ སིཡཱཏི ཝདནྟི. ཏཱིཎིདསཀཱནི ཛཱིཝིཏནཝཀཉྩཱཏི ཨེཏྠ ཨཱཙརིཡཱནནྡ མཏིཡཱ ཙཀྑུསཏྟཀཾ སོཏསཏྟཀཾ ཝཏྠུསཏྟཀནྟི ཨེཝཾ ཏཱིཎི སཏྟཀཱནི ཛཱིཝིཏཚཀྐཉྩཱཏི ཝཏྟབྦཾ. ཨབྷིརིཙྪཏཱིཏི ཨལབྦྷམཱནེ པཐམཾ ཝཛྫིཏེ ཏཏྠ ལབྦྷམཱནཏཱཝསེན ཨཝསིསྶཏི. ཨཏིརེཀཾཝཱ ཧོཏཱིཏི ཨཏྠོ. ཨེཏྠཙ རཱུཔལོཀེ ཝིཡ ཀཱམལོཀེ ཛཱིཝིཏནཝཀཾ ཀསྨཱ ཝིསུཾ ན ཝུཏྟནྟི. རཱུཔལོཀེ པན ཨཱཧཱརུཔཏྠམྦྷཀསྶ ཨཉྙསྶཙ སཀལསརཱིརབྱཱཔིནོ ཨནུཔཱལཀ ཛཱིཝིཏསྶ ཨབྷཱཝཱ ཨེཏདེཝ ཏདུབྷཡཊྛཱནེ ཋཏྭཱ སཀལསརཱིརཾ ཨནུཔཱལེཏཱིཏི པཱཀཊཾ ཏཏྠ ཛཱིཝིཏནཝཀནྟི ཝིསུཾ ཝུཏྟཾ. ཀཱམལོཀེ པན ཨཉྙཱནི ཨུཔཏྠམྦྷཀཱ ནུཔཱལཀཱནི བཧཱུནི པཱཀཊཱནིཙ ཧོནྟི. ཏསྨཱ ཛཱིཝིཏནཝཀཾ ཨཔཱཀཊནྟི ཀཏྭཱ ཝིསུཾ ན ཝུཏྟཾ སིཡཱ. ཀཱམལོཀེཔི པན ཨེཏཾ ཨསིཏཱདིཔཱཙཀགྒིཝསེན ཏསྶེཝཙ ཨུདཡབྷཱུཏསྶ སཀལསརཱི རཱནུཔཱལཀསྶ ཨུསྨཱསངྑཱཏསྶ ཀཱཡགྒིནོ ཝསེན པཱཀཊམེཝ. ཡཾ སནྡྷཱཡ –

ཨཱཡུ ཨུསྨཱཙ ཝིཉྙཱཎཾ, ཡདཱ ཀཱཡཾ ཛཧནྟིམཾ;

ཨཔཝིདྡྷོ ཏདཱ སེཏི, ནིརཏྠཾཝ ཀལིངྒརནྟི ཝུཏྟཾ.

ཏཏྠ ཨཱཡཱུཏི ཏེསུ དྭཱིསུ ཨགྒཱིསུ པཏིཊྛིཏཾ ཛཱིཝིཏམེཝ ཝུཙྩཏི. ཨུསྨཱཏི ཏེ དྭེ ཨགྒཡོ ཝུཙྩནྟི. ཡེསུ ཏིཀྑམནྡཝསེན ཝིསམ བྷཱུཏེསུ ཀཱཡེ ནཱནཱབཱདྷཱ ཨུཔྤཛྫནྟི. ཡཐཱཧ-བཧྭཱབཱདྷོ ཧོཏི བཧྭཱཏངྐོ. ཝིསམཝེཔཱཀིནིཡཱ གཧཎིཡཱ སམནྣཱ གཏོ ཧོཏི ཨཏིཨུཎྷཱཡཨཏིསཱིཏལཱཡཱཏི. སམབྷཱུཏེསུ པན སཏྟཱ ནིརཱབཱདྷཱ ཧོནྟི. ཡཐཱཧ-ཨཔྤཱབཱདྷོ ཧོཏི. ཨཔྤཱཏངྐོ. སམཝེཔཱཀིནིཡཱགཧཎིཡཱ སམནྣཱགཏོཧོཏི. ནཱཏིསཱིཏཱཡ ནཙྩུཎྷཱཡ མཛ྄ཛྷིམཱཡ པདྷཱནཀྑམཱཡཱཏི. ཀེཙི པན ཨསིཏཱདིཔཱཙཀགྒིསྨིཾ ཨེཝ ཨེཏཾམཉྙནྟི. ཐེརེནཙནཱམརཱུཔཔརིཙྪེདེཛཱིཝིཏནཝཀཾ ནཱམ, རཱུཔལོཀེ ཝིསུཾ སིཡཱཏི ཝུཏྟཾ.

ཝིསུདྡྷིམགྒེ ¶ པན སེསེསུ ཙཏུསམུཊྛཱནེསུ ཨཊྛསུ ཛཱིཝིཏནཝ ཀཉྩེཝ ཏཱིཎི ཨོཛཊྛམཀཱནི ཙཱཏི ཏེཏྟིཾས ཏེཏྟིཾས རཱུཔཱནི པཱཀཊཱནི ཧོནྟཱིཏི ཝུཏྟཾ. ཏཏྠ ཨཊྛསཱུཏི པཱཙཀགྒིཨསྶཱས པསྶཱསཝཛྫིཏེསུ ཏཱིསུ ཏེཛོཀོཊྛཱསེསུ པཉྩསུ ཝཱཡོ ཀོཊྛཱསེསཱུཏི ཨཊྛསུ. ཨིཏི ཀཱམལོཀེཔི སཀལསརཱིརབྱཱཔཱིསུ ཏེཛོཝཱཡོ ཀོཊྛཱསེསུ ལབྦྷམཱནཏྟཱ ཨེཏཾ སཀལ སརཱིརེཨེཝ དཊྛབྦནྟི. ཨེཏྠ སིཡཱ, ཀསྨཱ པནེཏྠ ཀཱམལོཀེ ཝིཡ རཱུཔལོཀེ རཱུཔཀལཱཔཱནཾ ནིརོདྷཀྐམོ ན ཝུཏྟོཏི. ཝིསེསཱབྷཱཝཏོ, རཱུཔལོཀེཔི ཧི མརཎཀཱལེ པན ཙུཏིཙིཏྟོ པརི སཏྟརསམཙིཏྟསྶ ཋིཏིཀཱལ མུཔཱདཱཡ ཀམྨཛརཱུཔཱནི ནུཔྤཛྫནྟཱིཏིཨཱདིཀོ ནིརོདྷཀྐམོ ཀཱམལོཀསདིསོཡེཝ. ཀེཝལཾ པནེཏྠ ཨཱཧཱརཛརཱུཔ ནིརོདྷོནཱམ ནཏྠི, ཏཐཱ ཀལེ༹ཝར ནིཀྑེཔོཙ. ཏསྨཱ ཏཏྠཔི ཙུཏིཙིཏྟཏོ པརཾ སོལ༹སཙིཏྟཀྑཎ པརིམཱཎེ ཨེཀསྨིཾ ཁཎེ ཙིཏྟཛརཱུཔསནྟཱནཾ ཝོཙྪིཛྫཏི. ཏཏོ པརཾ ཨུཏུསམུཊྛཱནརཱུཔཔརཾཔརཱ ཨེཀདྭིཏི ཨཙྪརཱཀཱལམཏྟཾཔི པཝཏྟིཏྭཱ ཝོཙྪིཛྫཏཱིཏི ཡུཏྟཾ. ནཙ ཨེཏྟཀམཏྟེན ཀཱལེན པཝཏྟམཱནཱཡཔི རཱུཔསནྟཏིཡཱ མཏཀལེ༹ཝརཾནཱམ སཀྐཱ ལདྡྷུཾ. པསྶནྟཱནཾ ཨེཀཀྑཎེན ཝིཡ སརཱིརསྶ ཨནྟརདྷཱནསྶ པཉྙཱཡནཏོཏི. ཡཐཱཙ རཱུཔལོཀེ, ཏཐཱ ཀཱམལོཀེཔི ཨུཔཔཏྟིདེཝཱནཾ ཨཉྙེསཉྩ ཨོཔཔཱཏིཀཱནནྟི. ཏེསཉྷི སརཱིརཱནི པཊིསནྡྷིཀྑཎེཡེཝ སབྦསོ པརིཔུཎྞེན ཀམྨཛཀཱཡེན ནིབྦཏྟཏྟཱ ཀམྨཛརཱུཔེཧི གྷནཔཱུརིཏཱནི སལླཧུཀབྷརཱནི ཙ ཧོནྟི. ཨིཏརརཱུཔཱནི ཀམྨཛརཱུཔེསུ པཏིཊྛཱཡ པཝཏྟནྟི. ཏསྨཱ ཏེསཾ ཙུཏིཀཱལེ ཀམྨཛརཱུཔེསུ ནིརུདྡྷེསུ ཏཱནི ཏིནྣ པཏིཊྛཱནི ཧུཏྭཱ ཙིརཾ སནྟཱནཾ གྷཊྚེཏུཾ ནསཀྐོནྟི. ཐོཀཾ པཝཏྟིཏྭཱ སབྦསོ ནིརུཛ྄ཛྷནྟི. སརཱིརནིཀྑེཔོནཱམ ཏེསཾ ནཏྠཱིཏི དཊྛབྦཾ.

[༢༠༣] ཡཾ པན ཝིབྷཱཝནིཡཾ

‘‘མརཎཀཱལེ པན བྲཧྨཱནཾ སརཱིརནིཀྑེཔཱབྷཱཝཏོ སབྦེསཾཔི ཏིསམུཊྛཱནཱནི དྭིསམུཊྛཱནཱནིཙ སཧེཝ ནིརུཛ྄ཛྷནྟཱི’’ཏི ཝུཏྟཾ. ཏཾ ན སུནྡརཾ.

ཨེཝཉྷི ¶ སཏི སབྦེསཾ རཱུཔབྲཧྨཱནཾ མརཎཱསནྣཙིཏྟཱནི རཱུཔཾ ནསམུཊྛཱཔེནྟཱིཏི ཨཱཔཛྫཏི. ན ཧི མརཎཱསནྣ ཙིཏྟ སམུཊྛིཏཱནི རཱུཔཱནི ཀམྨཛརཱུཔེཧི སཧེཝ ནིརུཛ྄ཛྷནྟཱིཏི སཀྐཱ ཝཏྟུནྟི. ཡཐཱཙཏཱནི ཀམྨཛརཱུཔནིརོདྷཏོ ཐོཀཾ པཝཏྟིཏྭཱ ནིརུཛ྄ཛྷནྟི. ཏཐཱ ཨུཏུཛརཱུཔཱནིཔི ཙིཏྟཛརཱུཔནིརོདྷཏོ ཐོཀཾ པཝཏྟིཏྭཱ ནིརུཛ྄ཛྷནྟཱིཏི ན ན སཀྐཱ ཝིཉྙཱཏུཾ. ནཙ ཏཱཝཏྟཀེན ཀཱལེན ཏེསུ པཝཏྟ མཱནེསུཔི སརཱིརནིཀྑེཔོནཱམ སཀྐཱ བྷཝིཏུནྟི. བྲཧྨཱནཾ པན ཐིན མིདྡྷཱདཱིནཾ ནཱིཝརཎཛཱཏིཡཱནཾ ཨཏྠིཏཱཡ ཏདནུརཱུཔཾ ཙིཏྟཛརཱུཔཱནཾ ཏདནུགཏིཀཱནཉྩ ཨུཏུཛརཱུཔཱནཾ ལཧུཀགརུཀཏཱདིཝིཀཱརོ ན ན སམྦྷཝཏཱིཏི ལཧུཏཱདིཏྟཡཾཔི གཧེཏྭཱ ཝུཏྟཾ ཏེཝཱིསརཱུཔེསཱུཏི. གྷཱནཱདིཏྟཡབྷཱཝདྭཡཝཛྫཱནི ཏེཝཱིསརཱུཔཱནི ཧོནྟི. ཏཱནིཡེཝ ཙཀྑུ སོཏཝཏྠུ ཝིཉྙཏྟིདྭཡཝཛྫཱནི ཨསཉྙཱིནཾ སཏྟརསེཝ རཱུཔཱནི ཧོནྟཱིཏི ཡོཛནཱ. ཨསཉྙཱིནཾ པན གརུལཧུཏཱདིཔཀཱརོ ཙིནྟེ ཏབྦོ. ན ཝཱ ཙིནྟེཏབྦོ རཱུཔདྷམྨཱནཾ རུཔྤནཝིཀཱརསྶ བཧུཀཱརཎཏྟཱཏི. ཨུཔཔཏྟིཡནྟི ཀཱམརཱུཔཱསཉྙཱིནཾ པཊིསནྡྷིཡཱ ཨུཔྤཱདཀྑཎེ. ཨུཔྤཱདཀྑཎོཨེཝ ཧི ཨེཀནྟེན ཨུཔཔཏྟིཁཎོནཱམ ཧོཏཱིཏི. པཝཏྟེཏཱུཏི པཊིསནྡྷིཡཱ ཋིཏིཀྑཎཏོ པཊྛཱཡ སཀལེ པཝཏྟིཀཱལེ པན ནཀིཉྩིཔི ནལབྦྷཏི. ལབྦྷཏིཡེཝཱཏི ཨདྷིཔྤཱཡོ. ན ཧི ཨིདཾནཱམ རཱུཔཾ པཝཏྟེ ནལབྦྷཏི. པཊིསནྡྷིཡཾཨེཝ ལབྦྷཏཱིཏི ཨཏྠཱིཏི. [རཱུཔཔཝཏྟིཀྐམོ]

༡༦༡. ཨེཝཾ ཙིཏྟཙེཏསིཀ རཱུཔསངྒཧཾ ཀཏྭཱ ཨིདཱནི ཡཐཱ ནུཔྤཏྟཾ ནིབྦཱནསངྒཧཾ ཀརོནྟོ ནིབྦཱནཾཔནཱཏིཨཱདི མཱཧ. ནིབྦཱནཾ པན ནིབྦཱནནྟི པཝུཙྩཏཱིཏི སམྦནྡྷོ. ལོཀུཏྟརསངྑཱཏནྟི ལོཀུཏྟརནྟི བྷགཝཏཱ ཀཐིཏཾ, ཡཐཱཧ-ཀཏམེ དྷམྨཱ ལོཀུཏྟརཱ. ཙཏྟཱརོཙ ཨརིཡམགྒཱ ཙཏྟཱརིཙ སཱམཉྙཕལཱནི ཨསངྑཏཱཙ དྷཱཏུ, ཨིམེ དྷམྨཱ ལོཀུཏྟརཱཏི. ཨེཏེན ནིབྦཱནསྶ པཉྙཏྟིམཏྟབྷཱཝཾ ནིཝཏྟེཏི. ན ཧི ལོཀཝོཧཱརསིདྡྷཱ པཉྙཏྟི ལོཀུཏྟརཱནཱམ སཀྐཱ བྷཝིཏུནྟི. ཙཏུམགྒཉཱཎེན སཙྪིཀཱཏབྦནྟི ཙཀྑུམནྟེན ཙནྡམཎྜལཾཝིཡ ཙཀྑུནཱ པཊིལདྡྷམགྒཉཱཎེཧི ཨརིཡཛནེཧི ཙཏཱུཧི ཨརིཡམགྒཉཱཎེཧི པཙྩཀྑཏོ དཊྛབྦཾ. པཊིཝིཛ྄ཛྷིཏབྦནྟི ¶ ཨཏྠོ. ཏཏྠ ཙཏུམགྒཉཱཎེནཱཏི ཨེཏེན ཏཱདི སམྷཱ པཊིཔཏྟིམགྒཏོ ཝིམུཁཱནཾ ཨནྡྷཔུཐུཛྫནཱནཾ ཛཙྩནྡྷཱནཾ ཝིཡ ཙནྡ མཎྜལསྶ ཏསྶ ཨཝིསཡབྷཱཝཾ དསྶེཏི. ན ཙ ཛཙྩནྡྷཱནཾ ཙཀྑུམྷི ཨནུཔལདྡྷམཏྟེན ཙནྡམཎྜལཾ ནཏྠིནཱམ ཧོཏཱིཏི. སཙྪིཀཱཏབྦནྟི ཨེཏེན པརམཏྠཏོ ཝིཛྫམཱནབྷཱཝཾ དསྶེཏི. ཡཉྷི ཀིཉྩི པརམཏྠཏོ ཝིཛྫམཱནཾ ནཧོཏི. ཏཾ སརཱུཔཏོ ཀསྶ པཙྩཀྑཾནཱམ བྷཝིསྶཏཱིཏི. ཏདུབྷཡེན པནསྶ པཉྙཝནྟཱནཾ ཀལྱཱཎཀཔུཐུཛྫནཱནཾ ཨནུམཱནཏོ སིདྡྷཏཾ དཱིཔེཏི, ན ཧི ཨནུམཱནཏོཔི ཨཏྟནོ བུདྡྷིཡཾ ཨསིདྡྷསྶ ཨཔཱཀཊསྶ སཙྪིཀིརིཡཱཡ ཝཱཡཱམོཔིནཱམ ཨཏྠི. ཡེན སཙྪིཀིརིཡཱ སིདྡྷིཡཱཏི. ཨེཝཾ ནིབྦཱནསྶ པརམཏྠཏོ ཝིཛྫམཱནཏཾ དསྶེཏྭཱ ཨིདཱནི ཀེཝལཾ ཝིཛྫམཱནམཏྟམེཝ ན ཧོཏི. ཨཐཁོ མཧཱཏེཛཝནྟཾ མཧོཛཝནྟཉྩ ཏཾ ཧོཏཱིཏི དསྶེཏུཾ མགྒཕལཱནམཱལམྦཎབྷཱུཏནྟི ཝུཏྟཾ. ཨེཏེན ནིབྦཱནེན ཝིནཱམགྒ ཕལཱནཾ ཨཀིཙྩསིདྡྷིཾ དསྶེཏི. ཏཏོ ཏསྶ མཧཱཏེཛཝནྟ ཏཾ མཧོཛཝནྟཏཉྩ དཱིཔེཏི. ཡཐཱ ཧི མཧིདྡྷིཀོ ཨེཀོ རཱཛཱ ཧོཏི. ཏསྶ རཊྛེ ཨེཀསྨིཾ མཧཱགཱམེ ཨེཀོ གཱམབྷོཛཀོ ཨེཀོཙ ཙོརཛེཊྛཀོ མཧཱཔརིཝཱརོ ཝསཏི. ཏེཙ ཨཉྙམཉྙཾ ཝདྷཱཡ པརིསཀྐནྟཱ ཝིཙརནྟི. ཏཏྠ གཱམབྷོཛཀོ ནགརཾ གནྟྭཱ རཱཛཱནཾ ཨུཔཊྛཧི. སོ ན ཙིརསྶེཝ རཱཛཝལླབྷོ ཧོཏི. རཱཛཏོ མཧཏིཾ ཨཱཎཾ ལབྷཏི. ཏཾ སུཏྭཱ ཙོརཛེཊྛཀོ ཨིདཱནི ཨིདྷཝསནྟསྶ མམཛཱིཝིཏཾ ནཏྠཱིཏི ཨཏྟནོ པརིཝཱརེན སདྡྷིཾ ཨཊྚཝིཾ པཝིཊྛོ. གཱམབྷོཛཀོཙ ཏཾཨཊྚཝིཾ པཝིཊྛཾཔི མུཉྩིཏུཾ ཨདཏྭཱ གཧེཏྭཱ ཝདྷི. ཨེཝཾ སམྤདམིདཾ དཊྛབྦཾ. མཧིདྡྷིཀརཱཛཱ ཝིཡ ཧི ནིབྦཱནཾ. གཱམ བྷོཛཀོ ཝིཡ ཉཱཎཾ. ཙོརཛེཊྛཀོ ཝིཡ མོཧོ. པརིཝཱར ཙོརཱ ཝིཡ སེསཀིལེསཱ. པུབྦེ རཉྙོ ཨནུཔཊྛཱ ནཀཱལེ གཱམབྷོཛཀོ ཝིཡ པུཐུཛྫནཉཱཎཾ. ཨུཔཊྛཱནཀཱལེ གཱམ བྷོཛཀོ ཝིཡ མགྒཉཱཎནྟི. ཏཎྷཱ པཝཏྟམཱནཱ ཨཛ྄ཛྷཏྟབཧིདྡྷཱདི བྷེདེསུ ཁནྡྷཱདིདྷམྨེསུ ཝིནནྡྷམཱནཱཝ པཝཏྟཏི. ཡཐཱཧ –

ཨནྟོཛཊཱ བཧིཛཊཱ, ཛཊཱཡ ཛཊིཏཱ པཛཱཏི.

ཏསྨཱ ¶ སཱ ཝེལུ༹གུམྦེ ཝེལུ༹སཱཁཱ ཝིཡ ཝིནནཊྛེན སཾསིབྦནཊྛེན ཝཱནསམཉྙཾ ལབྷཏཱིཏི ཝུཏྟཾ ཝཱནསངྑཱཏཱཡཏཎྷཱཡཱཏི. ནིཀྑནྟཏྟཱཏི ནིསྶཊཏྟཱ. ཏསྶཱ ཝིསཡབྷཱཝཾ ཨཏིཀྐམིཏྭཱ ཋིཏཏྟཱཏི ཨཏྠོ. ཨེཏེན ཝཱནཏོ ནིཀྑནྟནྟི ནིབྦཱནནྟི ཨིམམཏྠཾ དསྶེཏི. སབྷཱཝཏོཏི སནྟིལཀྑཎེན. ཨཛ྄ཛྷཏྟསམྦྷཱུཏཱནཾ ཏིཝིདྷཝཊྚསནྟཱཔཱནཾ ནིབྦུཏིཨཏྠེན. ཏེསཾ སབྦསོ ཨབྷཱཝཊྛེནཱཏི ཨཏྠོ. ཨེཀཝིདྷཾཔཱིཏི ཡཐཱ ཙིཏྟཾ སབྷཱཝཏོ ཨེཀཝིདྷཾཔི ཛཱཏིདྷམྨཏྟཱ ཛཱཏིབྷཱུམིསམྤཡོགཱདི བྷེདེན ཀཱལ དིསཱདེསཔུགྒལབྷེདེནཙ ཝཏྠུཏོ བྷིནྣམེཝ ཧོཏི. ན ཏཐཱ ཨིདཾ ནིབྦཱནཾ. ཨིདཾ པན སབྷཱཝཏོཔི ཝཏྠུཏོཔི ཨབྷིནྣམེཝ ཧུཏྭཱ ཨེཀཝིདྷཾ ཧོཏི. ཨིདཉྷི ཨནམཏགྒེ སཾསཱརེ ཨཏཱིཏེ ཨེཏརཧི ཨནཱགཏེཙ པརིནིབྦུཏཱནཾ བུདྡྷཱནཾཝཱ པཙྩེཀབུདྡྷཱནཾཝཱ བུདྡྷསཱཝཀཱནཾཝཱ སབྦེསཾཔི ཨེཀམེཝ ཧོཏི. ཀསྨཱ, ཨནིདྡིསིཏབྦདྷམྨཏྟཱ. ཝིཉྙཱཎཾ ཨནིདསྶནཾ ཨནནྟཾ སབྦཏོཔབྷནྟི ཧི བྷགཝཏཱ ཝུཏྟཾ. ཏཏྠ ཝིཉྙཱཎནྟི སངྑཏདྷམྨཱནཾ ཁཡནིརོདྷབྷཱཝེན སིདྡྷཏྟཱ ཨེཏཾ ཏབྦྷཱཝེནཨེཝ སུཊྛུ ཨབྷིབྱཏྟཾ ཀཏྭཱ ཉཱཏབྦཾ. ཨནིདསྶནནྟི ཨནིམིཏྟདྷམྨཏྟཱ བཱལཔུཐུཛྫནཱནཾ དསྶནཝིསཡབྷཱུཏེན ཀེནཙིནིམིཏྟེན ནིདསྶིཏུཾཝཱ ཀཱལབྷེདེན དིསཱདེསཔུགྒལསནྟཱན བྷེདེན ཧཱིནཔཎཱིཏཱདིབྷེདེན ཙ བྷིནྣཾ ཀཏྭཱ ནིདསྶིཏུཾཝཱ ནཱརཧཏཱིཏི ཨཏྠོ. ཨནནྟནྟི པུབྦནྟཱཔརནྟཝིརཧིཏཾ. སབྦཏོཔབྷནྟི ཝཊྚདུཀྑཔཊིཔཀྑསིདྡྷེཧི ཨནནྟེཧི གུཎོབྷཱསེཧི སབྦཏོ པབྷཱཝནྟནྟི ཨཏྠོ. ཏཐཱ ཨནིདྡིསིཏབྦདྷམྨཏྟཱཙ པན ཨནམཏགྒེ སཾསཱརེ སབྦཱསུཙ དིསཱསུ ཨསུཀསྨིཾ ནཱམ ཀཱལེ ཨསུཀཱཡནཱམ དིསཱཡ ནཏྠཱིཏི ནཝཏྟབྦཾ. ཀསྨཱ, ཨརིཡམགྒཾ བྷཱཝེནྟེན ཡདཱ ཀདཱཙི ཡཏྠ ཀཏྠཙི ཨཝསྶཾ ཨདྷིགནྟབྦཏཱཝསེན སབྦདཱ སབྦཏྠ ཙ ལབྦྷམཱནཏྟཱ. ཝུཏྟཉྷེཏཾ ཝིནཡེ, ཨངྒུཏྟརེ, ཨུདཱནེཙ –

སེཡྻཐཱཔི བྷིཀྑཝེ ཡཱཀཱཙི ལོཀེ སཝནྟིཡོ མཧཱསམུདྡཾ ཨཔྤེནྟི. ཡཱཙ ཨནྟལིཀྑཱ དྷཱརཱ པཔཏནྟི. ན ཏེན མཧཱསམུདྡསྶ ཨཱུནཏྟཾཝཱ པཱུརཏྟཾཝཱ པཉྙཱཡཏི. ཨེཝ མེཝ ཁོ ¶ བྷིཀྑཝེ བཧཱུཙེཔི བྷིཀྑཱུ ཨནུཔཱདིསེསཱཡ ནིབྦཱན དྷཱཏུཡཱ པརིནིབྦཱཡནྟི. ན ཏེན ནིབྦཱནདྷཱཏུཡཱ ཨཱུནཏྟཾ ཝཱ པཱུརཏྟཾཝཱ པཉྙཱཡཏཱིཏི.

ཨཊྛཀཐཱསུཙ ན ཏེན ནིབྦཱནདྷཱཏུཡཱ ཨཱུནཏྟཾཝཱ པཱུརཏྟཾཝཱ པཉྙཱཡཏཱིཏི ཨསངྑྱེཡྻེཔི མཧཱཀཔྤེ བུདྡྷེསུ ཨནུཔྤཛྫནྟེསུ ཨེཀསཏྟོཔི པརིནིབྦཱཏུཾ ནསཀྐོཏི. ཏདཱཔི ཏུཙྪཱ ནིབྦཱན དྷཱཏཱུཏི ནསཀྐཱ ཝཏྟུཾ. བུདྡྷཀཱལེ པན ཨེཀེཀསྨིཾ སམཱགམེ ཨསངྑྱེཡྻཱཔི སཏྟཱ ཨམཏཾ ཨཱརཱདྷེནྟི. ཏདཱཔི ནསཀྐཱ ཝཏྟུཾ པཱུརཱ ནིབྦཱནདྷཱཏཱུཏི ཝུཏྟཾ. བྲཧྨནིམནྟནསུཏྟེཙ ཝིཉྙཱཎཾ ཨནིདསྶནཾ ཨནནྟཾ སབྦཏོཔབྷནྟི ཝུཏྟཾ. ཨཊྛཀཐཱཡཉྩ སབྦཏོཔབྷནྟི སབྦཏོ པབྷཱསམྤནྣཾ. ནིབྦཱནཏོ ཧི ཨཉྙོ ཀོཙི དྷམྨོ པབྷསྶརཏརོཝཱ ཛོཏིཝནྟཏརོཝཱ པརིསུདྡྷཏརོཝཱ པཎྜར ཏརོཝཱ ནཏྠི. སབྦཏོཝཱ པབྷཱུཏམེཝ ཧོཏི. ནཀཏྠཙི ནཏྠཱིཏི སབྦཏོཔཏཾ. པུརཏྠིམདིསཱདཱིསུ ཧི ཨསུཀདིསཱཡཾནཱམ ནིབྦཱནཾ ནཏྠཱིཏི ནཝཏྟབྦནྟི ཝུཏྟཾ.

ཨེཝཾསནྟེཔི ཨེཏཾ ནིརུདྡྷཏེཀཱལིཀདྷམྨ སནྣིསྶཡེན ཝིཉྙཱཡ མཱནཏྟཱ ནིརུདྡྷདྷམྨབྷེདེན བྷིནྣཾ ཀཏྭཱ ཨུཔཙརིཏུཾ ལབྦྷཏཱིཏི ཝུཏྟཾ སཨུཔཱདིསེསཱཏིཨཱདི. ཏཏྠ ཨུཔཱདཱིཡཏི ཏཎྷཱདིཊྛཱིཧི བྷུསཾ གཎྷཱིཡཏཱིཏི ཨུཔཱདི. ཨུཔཱདིནྣཁནྡྷཔཉྩཀཾ. སོཡེཝ ཨེཀདེསེནཝཱ ཨནཝསེསེནཝཱ པཧཱིནེཧི ཀམྨཀིལེསེཧི སེསོཏི ཨུཔཱདིསེསོ. སཾཝིཛྫཏི ཏསྨིཾ སནྟཱནེ ཨུཔཱདིསེསོ ཡསྶཱ ཨདྷིགཏཀཱལེཏི སཨུཔཱདིསེསཱ. ནིབྦཱནདྷཱཏཱུཏི ནིབྦཱུཏིས བྷཱཝོ. སཨུཔཱདིསེསཱཙ སཱ ནིབྦཱནདྷཱཏུཙཱཏི སམཱསོ. ནཏྠི ཏསྨིཾ སནྟཱནེ ཨུཔཱདིསེསོ ཡསྶཱ ཨདྷིགཏཀཱལེཏི ཨནུཔཱདིསེསཱ, ཨནུཔཱདིསེསཱཙ སཱ ནིབྦཱནདྷཱཏུཙཱཏི ཝིགྒཧོ. ཝུཏྟཉྷེཏཾ ཨིཏི ཝུཏྟཀེ-དྭེ མཱ བྷིཀྑཝེ ནིབྦཱནདྷཱཏུཡོ. ཀཏམཱ དྭེ, སཨུཔཱདིསེསཱཙ ནིབྦཱནདྷཱཏུ, ཨནུཔཱདིསེསཱཙ ནིབྦཱནདྷཱཏཱུཏིཨཱདི. ཏཏྠ པུརིམཱ ཀིལེསནིབྦཱནཾནཱམ. པཙྪིམཱ ཁནྡྷནིབྦཱནཾནཱམ. པུརིམཱཝཱ དིཊྛདྷམྨིཀ ནིབྦཱནཾནཱམ. པཙྪིམཱ སམྤརཱཡིཀ ནིབྦཱནཾནཱམ. ¶ ཡཐཱཧ-ཨེཀཱ ཧི དྷཱཏུ ཨིདྷ དིཊྛདྷམྨིཀཱ སཨུཔཱདིསེསཱ བྷཝནེཏྟི སངྑཡཱ. ཨནུཔཱདིསེསཱ པན སམྤརཱཡིཀཱཏི. ཨངྒུཏྟརེ པན སཏྟནིཔཱཏེ ཨུབྷཏོབྷཱགཝིམུཏྟ པཉྙཱཔི མུཏྟཱནཾ དྭིནྣཾ ཁཱིཎཱསཝཱནཾ ཁནྡྷུཔཱདིསེསཝསེན ཀཱཡསཀྑིདིཊྛིཔཏྟ སདྡྷཱཝིམུཏྟདྷམྨཱནུསཱརཱིསངྑཱཏཱནཾ ཙཏུནྣཾ སེཀྑཱནཾ ཨཱརདྡྷཝིཔསྶ ཀསྶཙ ཡོགཱིཀལྱཱཎཔུཐུཛྫནསྶ ཀིལེསུ པཱདིསེསཝསེན སཨུཔཱདིསེསཏཱ ཨནུཔཱདིསེསཏཱཙ ཝུཏྟཱ. ཏཏྠེཝ ནཝནིཔཱཏེ ཨནྟརཱཔརིནིབྦཱཡཱི, ཨུཔཧཙྩཔརིནིབྦཱཡཱི, ཨསངྑཱརཔརིནིབྦཱཡཱི, སསངྑཱརཔརིནིབྦཱཡཱི, ཨུདྡྷཾ སོཏཨཀནིཊྛགཱམཱིཏི པཉྩནྣཾ ཨནཱགཱམཱིནཾ སཀདཱགཱམིསྶ ཏིཎྞཾ སོཏཱཔནྣཱནནྟི ནཝནྣཾ སེཀྑཔུགྒལཱནཾ ཀིལེསུཔཱདིསེསཝསེན སཨུཔཱདིསེསཏཱ ཝུཏྟཱ.

ནེཏྟིཡཾ པན ཨརཧཏྟཕལཾཔི སཨུཔཱདིསེསནིབྦཱནནྟི ཝུཏྟཾ. ཏཾ ཨིདྷ ནཱདྷིཔྤེཏཾ. ཨེཏྠཙ མགྒཀྑཎེ ཀིལེསཱནཾ ཁཡོ སཨུཔཱདི སེསཾནཱམ. ཙུཏི ཨནནྟརེ ཁནྡྷཱནཾ ཨནུཔྤཱདོ ཨནུཔཱདིསེསཾནཱམ. ཡསྨཱ པན པཊིསནྡྷིཝནྡྷཱནཱམ ཀིལེསེསུ སཏིཨེཝ ཛཱཡནྟི. ཨསཏི ནཛཱཡནྟི, ཏསྨཱ ཏེཔི ཀིལེསཀྑཡེན སཧེཝ ཁིཡྻནྟི. ཡཱཝཙུཏིཡཱ པཝཏྟམཱནཾ པཙྩུཔྤནྣཁནྡྷསནྟཱནཾ པན ཁཱིཎཱསཝསྶཔི པུརིམབྷཝེ པཝཏྟཀམྨཀིལེསཱནཾ ཕལནིསནྡབྷཱུཏཾ སབྦསཏྟཱནཾ དྷམྨ ཏཱསིདྡྷཾ. ཏསྨཱ ཏཾ ཁཱིཎེསུཔི ཀིལེསེསུ ཡཱཝཙུཏིཡཱ པཝཏྟ ཏིཡེཝ. ཙུཏིཀྑཎེ ཏསྶ ནིརོདྷོཔི དྷམྨཏཱནིརོདྷོ ཨེཝ. ཡོ པན ཏདནནྟརེ པུནབྷཝསྶ ཨནུཔྤཱདོ. སོ ཀིལེསཀྑཡེན སཧེཝ སིདྡྷོ. ན ཀེཝལཾ ཏདནནྟརེ པུན བྷཝསྶེཝ. ཏཏོ པརཾཔི ཨནམཏགྒ སཾསཱརེ བྷཝཔརཾཔརཱཡ ཨནུཔྤཱདོཔི ཏེན སཧེཝ སིདྡྷོ. སབྦཉྩེཏཾ ཨེཀམེཝ ནིབྦཱནཾ. ཨེཝཾསནྟེཔི ཁནྡྷཱཝསེསསྶ བྷཱཝཱ བྷཱཝལེསཾ ཨུཔཱདཱཡ ཨཡཾ བྷེདོ ཝུཏྟོཏི ཝུཏྟཾ དུཝིདྷཾ ཧོཏི ཀཱརཎཔརིཡཱཡེནཱཏི དུཝིདྷ པཉྙཱཔནསྶ ཀཱརཎལེསེནཱཏི ཨཏྠོ.

ཡསྨཱ པན སངྑཏདྷམྨཱནཱམ སཔལིབོདྷདྷམྨཏྟཱ ནཱནཱཔལིབོདྷེཧི ནིཙྩཀཱལཾ ཛནཾ པཱིལེ༹ནྟི. སནྟསུཁཾནཱམ ལདྡྷུཾ ནདེནྟི. སནིམིཏྟ དྷམྨཏྟཱཙ ཀིལེསཱནཾ ཛརཱམརཎཱདཱིནཉྩ སབྦེསཾ ཨནཏྠཱནཾ ཝཏྠུ བྷཱུཏཱ ¶ བྷཱུམིབྷཱུཏཱ ཧོནྟི. སཔཎིཧིཏདྷམྨཏྟཱཙ སབྦདུཀྑཱནཾ མཱུལབྷཱུཏཾ ཨཱསཱདུཀྑཾནཱམ ནིཙྩཀཱལཾཔི ཛནེནྟི. ཏསྨཱ ཏཔྤཊིཔཀྑསིདྡྷེན གུཎབྷེདེན ཏིཝིདྷཾབྷེདཾ དསྶེཏུཾ སུཉྙཏནྟིཨཱདི མཱཧ. ཏཏྠ སབྦཔལིབོདྷ ཝིཝིཏྟཏྟཱ སུཉྙཏཾ. སཀྐཱཡདིཊྛིཡཱ ཧི སཏི བཱལཱནཾ ཡཏྟཀཱ པཱཔཀམྨཔལིབོདྷཱ ཨཔཱཡ དུཀྑཔལིབོདྷཱཙ སནྡིསྶནྟི. པཎྜིཏཱནཾཙ ཏཏོ ཨཏྟཱནཾ རཀྑནཏྠཾ ཡཏྟཀཱ ཀལྱཱཎཀམྨཔལིབོདྷཱ སནྡིསྶནྟི. སཀྐཱཡདིཊྛིནིརོདྷོཡེཝ སབྦེ ཏེ སཀྐཱཡདིཊྛིམཱུལཀེ པལིབོདྷེ ནིརོདྷེཏུཾ སཀྐོཏི. ན ཝིནཱ ཏེན ཨཉྙོ ཀོཙི. ཏསྨཱ སོནིརོདྷོ ཏེཧི པལིབོདྷེཧི ཝིཝིཏྟོ ཧོཏི, ཏཐཱ རཱགཀྑཡོཡེཝ རཱགམཱུལཀེ པལིབོདྷེ ནིརོདྷེཏུཾ སཀྐོཏི. ན ཝིནཱ ཏེན ཨཉྙོ ཀོཙི. དོསཀྑཡོཡེཝ དོསམཱུལཀེ. མོཧཀྑཡོཡེཝ མོཧམཱུལཀེཏིཨཱདི ཝཏྟབྦཾ. ཨིཏི ནིབྦཱནཾ སབྦཔལི བོདྷེཧི ཝིཝིཏྟཏྟཱ སུཉྙཏཾནཱམ.

ནིམིཏྟཾ ཝུཙྩཏི ཨུཔྤཱདཔཝཏྟམཱུལཀོ ཨོལཱ༹རིཀཱཀཱརོ. ཡེན སམནྣཱགཏཱ སངྑཏདྷམྨཱ སབྦེསཾ ཀིལེསཱནཾ ཛརཱམརཎཱནཉྩ ཝཏྠུབྷཱུཏཱ བྷཱུམིབྷཱུཏཱ ཧོནྟི. ཏཐཱ སབྦེསཾ མཱརཱནཾ སབྦེསཾ ཝེརཱནཾ སབྦེསཾ རོགཱདི ཨནཏྠཱནཾ ཝཏྠུབྷཱུཏཱ བྷཱུམིབྷཱུཏཱ ཧོནྟི. ཡཏོ ཏེ མཱརདྷེཡྻཱཏིཔི མཙྩུདྷེཡྻཱཏིཔི ཝུཙྩནྟི. ཀཱལ དིསཱ དེས སནྟཱནཱདི བྷེདེན ཧཱིནཔཎཱིཏཱདི བྷེདེནཙ བྷེདཾ གཙྪནྟི. ནིབྦཱནཾ པན སབྦེསཾ ནིམིཏྟདྷམྨཱནཾ ཁཡནིརོདྷབྷཱཝེན སིདྡྷཏྟཱ ནཏྠི. ཏསྨིཾ ནིམིཏྟནྟི ཨནིམིཏྟཾ. ཏཉྷི སབྦེསཾ ཀིལེ སཱདཱིནཾ ཨནཏྠཱནཾ ཝཏྠུབྷཱུཏེ ནིམིཏྟདྷམྨེ ཝིདྡྷཾསེཏྭཱ ཏེསཾ ཨནཏྠཱནཾ ཨབྷཱཝཾ སཱདྷེནྟཾ ནིཙྩཾ ཏིཊྛཏི. ནཙ ཏཾ ཀཱལབྷེདེན བྷིནྣཾ ཧོཏི. ཨིདཾ ཨཏཱིཏེ ཨསུཀཀཔྤེ ཨསུཀབུདྡྷསྶ ནིབྦཱནཾ, ཨིདཾ ཨནཱགཏེ, ཨིདཾ ཨེཏརཧཱིཏི. ནཱཔི དིསཱབྷེདེན བྷིནྣཾ. ཨིདཾ དསསུ དིསཱསུ ཨསུཀཱཡནཱམ དིསཱཡ ནིབྦཱནཾ, ཨིདཾ ཨསུཀཱཡ ནཱམཱཏི. ནཙཱཔི དེསབྷེདེནཝཱ སནྟཱནབྷེདེནཝཱ བྷིནྣཾ. ཨིདཾ མནུསྶལོཀེ ཨིདཾ དེཝལོཀེ ཨིདཾ བྲཧྨལོཀེཏི ཝཱ ཨིདཾ མནུསྶཱནཾ ཨིདཾ དེཝཱནཾ ཨིདཾ བྲཧྨཱནནྟིཝཱཏི. ཏཐཱ པཎཱིཏཱདི བྷེདེན ¶ བྷིནྣཾ ན ཧོཏི. ཨིདཾ སབྦཉྙུབུདྡྷཱནཾ. ཨིདཾ པཙྩེཀབུདྡྷཱནཾ. ཨིདཾ བུདྡྷསཱཝཀཱནནྟི.

པཎིཧིཏཾ, པཎིདྷཱནཾ, པཎིདྷི, པཏྠནཱ, ཨཱསཱ, ཛཱིགྷཙྪཱ, པིཔཱསཱཏི ཨཏྠཏོ ཨེཀཾ. སངྑཏདྷམྨཱཙ ལབྦྷམཱནཱཔི བྷིཛྫནདྷམྨཏྟཱ པུནཔྤུནཾ ལདྡྷུཾ ཨཱསཱ དུཀྑཾནཱམ ཝཌྜྷེནྟི. ཨཱསཱདུཀྑསྶ པརིཡནྟོནཱམ ནཏྠི. སབྦཉྩ དུཀྑཾ ཨཱསཱམཱུལཀཾ ཧོཏི. ཨཱསཱསདིསཾ དུཀྑནིདཱནཾནཱམ ནཏྠི, ནིབྦཱནཾ པན སཡཾ པིཔཱསཝིནཡདྷམྨཏྟཱ ཨཱསཱསངྑཱཏཾ སབྦཾ ཏཎྷཱཔཎིདྷིཾཝཱ ཚནྡཔཎིདྷིཾཝཱ ཝིནེནྟཾ ཝིདྷམེནྟཾ ཝཏྟཏཱིཏི ནཏྠི. ཏསྨིཾ པཎིཧིཏནྟི ཨཔྤཎཱིཧིཏཾ. ཨེཏྠཙ དུཝིདྷཾ སུཁཾ ཝེདཡིཏསུཁཾ སནྟིསུཁནྟི. ཏཏྠ མནུསྶ དིབྦ བྲཧྨ སམྤཏྟིཡོ ལབྷིཏྭཱ ཨནུབྷཝནཝསེན པཝཏྟཾ པཱིཏིསོམནསྶ སུཁཾ ཝེདཡིཏསུཁཾནཱམ. ཏཾ པན ཁཎེཁཎེ ཝིཛྫུཝིཡ བྷིཛྫནདྷམྨཾ. སམྤཏྟིཡོཙ ཨནིཙྩདྷམྨཱ. སབྦེ ཏེ ཨཔརིཡནྟཾ ཨཱསཱདུཀྑཾ བྷིཡྻོ ཝཌྜྷེནྟིཡེཝ. ཏསྨཱ སབྦཾ ཝེདཡིཏསུཁཾནཱམ ཨཱསཱ དུཀྑཛནཀཏྟཱ ཨེཀནྟེན དུཀྑམེཝ ཧོཏི. ཡཐཱཧ-ཡཾཀིཉྩི ཝེདཡིཏཾ, སབྦཾ ཏཾ དུཀྑསྨིནྟི. དྷམྨསེནཱཔཏིནཱཙ ཀཏམཾ ཏཾ ཨཱཝུསོ སཱརིཔུཏྟ ནིབྦཱནེ སུཁཾ, ཡདེཏྠ ཝེདཡིཏཾ ནཏྠཱིཏི པུཊྛེན ཨེཏདེཝེཏྠ ཨཱཝུསོ ནིབྦཱནེ སུཁཾ, ཡདེཏྠ ཝེདཡིཏཾ ནཏྠཱིཏི ཝུཏྟཾ. སནྟིསུཁཾནཱམ ཨཏྟནི ཨུཔྤནྣཱནཾཝཱ ཨུཔྤཛྫིཏུཾ པཙྩུཔཊྛི ཏཱནཾཝཱ ཀིལེསཱདཱིནཾ ཨཔཱཡདུཀྑཱདཱིནཉྩ ཨཏྟནོ སམྨཱཔཡོགཾ པཊིཙྩ ཝིམུཙྩནསུཁཾ. ཨེཏདེཝེཏྠ ཨེཀནྟསུཁཾ ཨཙལསུཁཾ. ཨེཏསྨིཉྷི ཨསཏི པུཐུཛྫནཱནཾ མནུསྶ དིབྦབྲཧྨསམྤཏྟིཡོ ཨནུབྷཝནྟཱནཾཔི ཨཝསྶཾ པཏྟབྦཊྛེན པཙྩུཔཊྛིཏཱནེཝ ཧོནྟི ཨཝིཙིནིརཡ བྷཡཱདཱིནཱིཏི. ཏསྨཱ སབྦསྶ ཝེདཡིཏསུཁམཱུལཀསྶ ཨཱསཱདུཀྑསྶ སནྟིསུཁདཱིཔཀཾ ཨིདཾ ཨཔྤཎིཧིཏཔདཾ ནིབྦཱནསྶ ཨེཀཾ མཧནྟཾ གུཎཔདཾ ཧོཏཱིཏི.

ཨཱཀཱར བྷེདེནཱཏི ཏིཝིདྷསྶ སུཉྙཏཱདིཀསྶ གུཎཀོཊྛཱསསྶ བྷེདེན. ཨེཏྠཙ ཡདེཏཾ ཨནམཏགྒེ སཾསཱརེ ཨཛ྄ཛྷཏྟཾ ཨནུསཡིཏྭཱ ཨཱགཏཱནཾ ཀིལེསཱནཾ མགྒཀྑཎེ ཨཛ྄ཛྷཏྟམེཝ ནིརུཛ྄ཛྷནཾ ཁིཡྻནཾ. ཏཾ ཁཡདྷཱཏུ ནིརོདྷདྷཱཏུ སངྑཱཏཾ ཨེཀཾ དྷམྨཱཡཏནཾ ཧོཏི. ¶ ཨེཀཱ དྷམྨདྷཱཏུ ཧོཏི. ཨེཀོ པརམཏྠདྷམྨོ ཧོཏི. ཁཡཊྛེན ནིརོདྷཊྛེན སབྷཱཝཏོ ཝིཛྫམཱནཏྟཱ, ན ཧི ཏཾ པཉྙཏྟིརཱུཔཾ ཧོཏི. ཀཱཡེ ཉཱཎེཙ སརཱུཔཏོ ཨུཔལདྡྷཏྟཱ, དུཝིདྷཉྷི ནིབྦཱནསྶ སཙྪིཀརཎཾ ཀཱཡསཙྪིཀརཎཾ ཉཱཎསཙྪིཀརཎཉྩ. ཡཐཱཧ-ཚནྡཛཱཏོ ཨུསྶཧཏི. ཨུསྶཧིཏྭཱ ཏུལེཏི. ཏུལཡིཏྭཱ པདཧཏི. པཧིཏཏྟོ སམཱནོ ཀཱཡེནཙེཝ པརམཏྠསཙྩཾ སཙྪིཀརོཏི. པཉྙཱཡཙ ཏཾ པཊིཝིཛ྄ཛྷ པསྶཏཱིཏི. ཏཏྠ ཨནམཏགྒེ སཾསཱརེ ཨཛ྄ཛྷཏྟཾ ནིཙྩཾ སནྟཱཔེཏྭཱ པརིདཡ྄ཧིཏྭཱ ཨཱགཏཱནཾ ཀིལེསཱནཾ མགྒཀྑཎེ ཨཛ྄ཛྷཏྟམེཝ ནིརུཛ྄ཛྷནཾ ནིབྦཱཡནཾ ཀཱཡསཙྪིཀརཎཾནཱམ. ཨེཝཾ ཀཱཡེན སཙྪིཀཏྭཱ པུན པཙྩཝེཀྑནྟོ ཨཛ྄ཛྷཏྟཾ ཏཾ ནིརུཛ྄ཛྷནཾ ཉཱཎེན པཙྩཀྑཏོ པསྶཏི. ནིརུདྡྷཱ མེ ཀིལེསཱཏི ཛཱནཱཏི, ཨིདཾ ཉཱཎསཙྪིཀརཎཾནཱམ. ཏེསུ ཀཱཡ སཙྪིཀརཎཾ ཨནནྟཾ ཨཔརིམཱཎཾ ཝཊྚདུཀྑཾ ཁེཔེཏི. ཉཱཎསཙྪིཀརཎཾ ཨནཔྤཀཾ པཱིཏིསོམནསྶཾ ཨུཔྤཱདེཏི. པཉྙཏྟིདྷམྨེསུ ཨེཝ རཱུཔཾ སཙྪིཀརཎཾནཱམ ནཏྠཱིཏི. ཏསྶ པན ནིརུཛ྄ཛྷནསྶ སུཉྙཏདྷམྨཏྟཱ མནྡབུདྡྷཱིནཾ ཏསྨིཾ ཏུཙྪསཉྙཱ ནིརཏྠཀསཉྙཱ སཎྛཱཏི. ཨནིམིཏྟ དྷམྨཏྟཱ ཏསྨིཾ ཨབྷཱཝམཏྟསཉྙཱ པརམཏྠཏོ ཨཝིཛྫམཱནསཉྙཱ སཎྛཱཏི. ཨཔྤཎིཧིཏདྷམྨཏྟཱ ཏཎྷཱཝསིཀཱ ཛནཱ ཏསྨིཾ སུཁཾ ནཱམ ཀིཉྩི ནཏྠཱིཏི མཉྙནྟི.

ཡེ པན ཡཐཱཝུཏྟཾ ཁཡནིརོདྷམཏྟཾ ནིབྦཱནཾནཱམ ནཧོཏི. ཏཉྷི ཨབྷཱཝམཏྟཾ པཉྙཏྟིརཱུཔཾ ཧོཏི. ནིབྦཱནཉྩནཱམ གམྦྷཱིརཱདཱིནཾ ཨནནྟགུཎཱནཾ ཝཏྠུ ཧོཏི, ནཙ ཨབྷཱཝམཏྟཾ ཏེསཾ ཝཏྠུ བྷཝིཏུཾ ཨརཧཏི. ནིབྦཱནཾ པརམཾ སུཁནྟི ཝུཏྟཾ. ནཙ ཨབྷཱཝམཏྟེ ཀིཉྩི སུཁཾནཱམ སཀྐཱལདྡྷུཾ. ཏསྨཱ ཡོ ཏསྶ ཁཡནིརོདྷསྶ པཙྩཡོ ཨཏྠི. ཡསྶཙ ཨཱནུབྷཱཝེན སོ ཁཡནིརོདྷོ སིཛ྄ཛྷཏི. ཨེཏ དེཝ ནིབྦཱནཾ ནཱམཱཏི ཨིཙྪནྟི. ཏེསཾཔི ཝཊྚདུཀྑ སནྟིཏོ ཨཏིརེཀཔཡོཛནཾནཱམ ནལབྦྷཏི. ནིབྦཱནསྶཙ གུཎཔདཱནི ནཱམ ཨནནྟཱནཾ ཝཊྚདྷམྨཱནཾ པཊིཔཀྑཝསེན སིཛ྄ཛྷནྟི, ནོ ཨཉྙཐཱ. ཏསྨཱ ཡཏྟཀཱནི ཨགུཎཔདཱནི ཝཊྚདྷམྨེསུ ལབྦྷནྟི, ཏཏྟཀཱནི ཏེསཾ ཁཡ ནིརོདྷེ ཨནནྟཱནི གུཎཔདཱནི ཧུཏྭཱ སིཛ྄ཛྷནྟི. ཡོ ཁཡནིརོདྷོཔི ¶ ཏཱཝ ཝིསུཾ དྷམྨབྷཱཝེནཝིཉྙཱཏུཾ དུཀྐརོགམྦྷཱིརོ ཧོཏི. ཡཏོ ཏཾ ཨབྷཱཝམཏྟཾ པཉྙཏྟིརཱུཔཾ མཉྙནྟི. གུཎཔདཱནཾ པནསྶ གམྦྷཱིརབྷཱཝེ ཝཏྟབྦམེཝནཏྠི. སནྟིསུཁཉྩ ནཱམ ཝཊྚདུཀྑཱནཾ ཝཱུཔསནྟཏཱཨེཝ. ཏེསཾ ཝཱུཔསམོ སུཁོཏི ཧི ཝུཏྟཾ. ཝཱུཔསནྟཏཱཏིཙ ཏེསཾ སབྦསོ ཁཡནིརོདྷོཨེཝཱཏི ཝཊྚདུཀྑཔརིཡཱཔནྣཱནཾ སབྦ ཝེདཡཱིཏསུཁཱནཾ ཨུཀྐཾསགཏཱ ཏསྶ ཁཡནིརོདྷསྶ པརམསུཁཏཱ སིདྡྷཱ ཧོཏཱིཏི. ཏསྶ པན པརམཏྠཏོ ཝིཛྫམཱནབྷཱཝེ ཏཱཝ ཨིདཾ སུཏྟཾ.

ཨཏྠི བྷིཀྑཝེ ཨཛཱཏཾ ཨབྷཱུཏཾ ཨཀཏཾ ཨསངྑཏཾ. ནོ ཙེ ཏཾ བྷིཀྑཝེ ཨབྷཝིསྶ ཨཛཱཏཾ ཨབྷཱུཏཾ ཨཀཏཾ ཨསངྑཏཾ, ན ཡིམསྶ ཛཱཏསྶ བྷཱུཏསྶ ཀཏསྶ སངྑཏསྶ ནིསྶརཎཾ པཉྙཱཡེཐ. ཡསྨཱཙ ཁོ བྷིཀྑཝེ ཨཏྠི ཨཛཱཏཾ ཨབྷཱུཏཾ ཨཀཏཾ ཨསངྑཏཾ, ཏསྨཱ ཛཱཏསྶ བྷཱུཏསྶ ཀཏསྶ སངྑཏསྶ ནིསྶརཎཾ པཉྙཱཡཏཱིཏི.

ཏཏྠ ཨཛཱནནཾ ཨཛཱཏཾ. ཛཱཏིཀྑཡོཏི ཨཏྠོ. ཨབྷཝནཾ ཨབྷཱུཏཾ. ཨབྷཱཝོཏི ཨཏྠོ. ཨཀརཎཾ ཨཀཏཾ. ཨསངྑརཎཾ ཨསངྑཏཾ. ཨུཔྤཱདེཏུཾཝཱ པཝཏྟེཏུཾཝཱ སངྑཱརདུཀྑསྶ ཨབྷཱཝོཏི ཨཏྠོ. ཛཱཏིཀྑཡོཏིཝཱ ཝིསུཾ ཨེཀཱ དྷམྨདྷཱཏུ ཧོཏི. ཏསྨཱ ཝིསུཾ དྷམྨབྷཱཝཾ སནྡྷཱཡ ནཏྠི ཛཱཏཾ ཨེཏྠཱཏི ཨཛཱཏནྟཱིཔི ཡུཛྫཏིཡེཝ. ཨིདཾ ཝུཏྟཾ ཧོཏི, སངྑཏདྷམྨཱནཱམ པཙྩཡེ སཏི ཛཱཡནྟི. ཨསཏི ན ཛཱཡནྟཱིཏི ཛཱཏཾ ཝིཡ ཨཛཱཏཾཔི ཏེསཾ ཨཏྠི. པརམཏྠཏོ ཝིཛྫམཱནཾ ཧོཏཱིཏི ཨཏྠོ. ཡདིཙ ཨཛཱཏཾནཱམ ནཏྠི, ཛཱཏམེཝ ཨཏྠི. ཨེཝཾསཏི ཨཏྟནི ཀིལེསཱནཾ ཨཛཱཏཏྠཱཡ སམྨཱ པཊིཔཛྫནྟཱནཾཔི སབྦེ ཀིལེསདྷམྨཱ ཛཱཏཱཡེཝ སིཡུཾ. ནོ ཨཛཱཏཱ. ཀསྨཱ, ཨཛཱཏསྶནཱམ ནཏྠིཏཱཡཱཏི. ཨེསནཡོ སབྦེསུ དུཙྩརིཏདྷམྨེསུ ཨཔཱཡདུཀྑཝཊྚདུཀྑེསུ, དིཊྛདྷམྨེཙ སབྦེསུ རོགཱབཱདྷབྷཡུཔདྡཝེསུ. ཨེཝཉྩ སཏི ལོཀེ སབྦེ པུརིསཀཱརཱ པུརིསཐཱམཱ པུརིསཔརཀྐམཱ ནིརཏྠཀཱ ཨེཝ སིཡུནྟི ཨིམམཏྠཾ སནྡྷཱཡ ནོ ཙེཏཾ བྷིཀྑཝེ.ལ. པཉྙཱཡེཐཱཏི ཝུཏྟཾ. ཡསྨཱ པན ¶ ཨཛཱཏཾནཱམ ཨེཀནྟེན ཨཏྠིཡེཝ. ཏསྨཱ ཨཏྟནི ཨཛཱཏཏྠཱཡ སམྨཱཔཊིཔཛྫནྟཱནཾ ཏེ ཨེཀནྟེན ནཛཱཡནྟི. ཨེཝཾ སཏི སབྦེ པུརིསཀཱརཱ པུརིསཐཱམཱ པུརིསཔརཀྐམཱ སཏྠཀཱ ཨེཝ ཧོནྟཱིཏི ཨིམམཏྠཾ སནྡྷཱཡ ཡསྨཱཙ ཁོ བྷིཀྑཝེཏིཨཱདི ཝུཏྟཾ. ཨེཏྟཱཝཏཱ ཨཝིཛྫཱནིརོདྷཱ སངྑཱར ནིརོདྷོ. སངྑཱརནིརོདྷཱ ཝིཉྙཱཎནིརོདྷོ.ལ. དུཀྑཀྑནྡྷསྶ ནིརོདྷོ ཧོཏཱིཏི ཨེཝཾ ཝུཏྟསྶ ནིརོདྷསྶ པརམཏྠཏོ ཝིཛྫམཱནབྷཱཝཾ དསྶེཏི. ཨཏྠི སདྡསྶ ཝིཛྫམཱནཏྠཝཙནཏྟཱ. ཏཏྠ ནིརོདྷོ དུཝིདྷོ ཛཱཏནིརོདྷོ ཨཛཱཏནིརོདྷོཏི. ཏཏྠ ཨུཔྤཛྫིཏྭཱ ནིརོདྷོ ཛཱཏནིརོདྷོནཱམ. མཙྩཱུཏིཙ མརཎནྟིཙ ཨེཏསྶེཝནཱམཾ. ཨཛ྄ཛྷཏྟཔརིཡཱ པནྣཱནཾ ཀིལེསཱདཱིནཾ ཨུཔྤཱདསྶཔི སབྦསོ ཨབྷཱཝོ ཨཛཱཏ ནིརོནཱམ. ཡོ སབྦསངྑཱརསམཐོ སབྦུཔདྷིནིསྶགྒོ ཏཎྷཀྑཡོ ཝིརཱགོ ནིརོདྷོ ནིབྦཱནནྟི ཝུཙྩཏི. ཨཡམིདྷཱདྷིཔྤེཏོ, ཨཡམེཝ ཧི སབྦཔལིབོདྷེཧི སུཉྙཏྟཱ སུཉྙཏོནཱམ. ཀིལེསཱནཾ ཛཱརཱམརཎཱདཱིནཉྩ ཝཏྠུབྷཱུཏསྶ ནིམིཏྟསྶ ཨབྷཱཝཱ ཨནིམིཏྟོནཱམ. སབྦདུཀྑཱནཾ ནིདཱནབྷཱུཏསྶ ཨཱསཱདུཀྑསྶ ཨབྷཱཝཱ ཨཔྤཎིཧིཏོནཱམ. ཏེན ཝུཏྟཾ སུཉྙཏཾཨནིམིཏྟཾ ཨཔྤཎིཧིཏཉྩེཏི ཏིཝིདྷཾ ཧོཏཱིཏི. པདནྟིཨཱདི ནིབྦཱནསྶ ཝེཝཙནཱནི. ཏཉྷི ཝིསུཾ ཨསཾམིསྶོ ཀེཝལོ ཨུཔལབྦྷམཱནོ ཨེཀོ པརམཏྠ དྷམྨོཏི པདཾ ནཱམ. ཀོཊྛཱསཏྠོ ཧི པདསདྡོ. ཡཐཱ པདསོ དྷམྨཾ ཝཱཙེཡྻཱཏི. ཙཝནཱབྷཱཝེན ཨཙྩུཏཾ. པུབྦནྟཱཔརནྟེ ཨཏིཀྐམྨ པཝཏྟཏྟཱ ཨཙྩནྟཾ. སངྑརཎཀིཙྩརཧིཏཏྟཱ ཨསངྑཏཾ. ཨཏྟནོ ཨུཏྟརིཏརསྶ ཀསྶཙི དྷམྨསྶ ཨབྷཱཝཏོ ཨནུཏྟརནྟི. ཝཱནམུཏྟཱ ཏཎྷཱ ཝིམུཏྟཱ, མཧནྟེ སཱིལཀྑནྡྷཱདིཀེ དྷམྨེ ཨེསིཾསུ ཨདྷིགཙྪིཾསཱུཏི མཧེསཡོ, བུདྡྷཱ.

ཨིཏི པརམཏྠདཱིཔནིཡཱནཱམ ཨབྷིདྷམྨཏྠསངྒཧསྶ

ཙཏུཏྠཝཎྞནཱཡ རཱུཔནིབྦཱན སངྒཧསྶ

པརམཏྠདཱིཔནཱ ནིཊྛིཏཱ.

སམུཙྩཡ སངྒཧ པརམཏྠདཱིཔནཱི

༡༦༢. ཨེཝཾ ¶ ཚཧི པརིཙྪེདེཧི ཙཏྟཱརོ པརམཏྠེ དསྶེཏྭཱ ཨིདཱནི ཏེསཾ ཏཾཏཾརཱསིསངྑཱཏཾ སམུཙྩཡཾ དསྶེནྟོ ཨཱདིགཱཐ མཱཧ. ཡེ སལཀྑཎཱ དྭཱསཏྟཏིཝིདྷཱ ཝཏྠུདྷམྨཱ མཡཱ ཝུཏྟཱ. ཨིདཱནི ཏེསཾ སམུཙྩཡཾ ཡཐཱཡོགཾ པཝཀྑཱམཱིཏི ཡོཛནཱ. ཏཏྠ སལཀྑཎཱཝཏྠུདྷམྨཱཏི པདེཧི དསཝིདྷཱནི ཨནིཔྥནྣརཱུཔཱནི པཊིཀྑིཔཏི. ན ཧི ཏཱནི ཨཏྟནོ ཨཱཝེནིཀབྷཱུཏེན སབྷཱཝ ལཀྑཎེན ཨནིཙྩཏཱདི སཱམཉྙལཀྑཎེནཙ སལཀྑཎཱནི ཧོནྟི. ཨེཀནྟཔརམཏྠཏཱཡ ཨབྷཱཝཏོ. ཏཏོཡེཝཙ ཝཏྠུདྷམྨཱཙ ནཧོནྟི. སརཱུཔཏོ ཨནུཔལབྦྷམཱནཏྟཱ. དབྦཝཱཙཀོ ཧི ཨིདྷ ཝཏྠུསདྡོ. དབྦཉྩནཱམ ཨིདྷ སརཱུཔཏོ ལབྦྷམཱནོ སབྷཱཝོ ཨེཝ. ཨེཏེན ནིབྦཱནསྶཔི མགྒཕལ པཙྩཝེཀྑནཉཱཎེསུ སརཱུཔཏོ ལབྦྷམཱན སབྷཱཝཏཱ ཝུཏྟཱ ཧོཏི. ཨནིཔྥནྣརཱུཔཱནཾ ཝིཡ ཙ ཝཏྠུདྷམྨ སནྣིསྶཡེན དིསྶམཱནདྷམྨམཏྟབྷཱཝཾ ཝཱ པཉྙཏྟིདྷམྨཱནཾ ཝིཡ པརིཀཔྤིཏཱཀཱརམཏྟབྷཱཝཾཝཱ སསཝིསཱཎ ཀཙྪཔལོམཱདཱིནཾ ཝིཡ སབྦསོ ཨབྷཱུཏ པརིཀཔྤིཏ མཏྟབྷཱཝཾཝཱ ནིཝཱརེཏཱིཏི ཝེདིཏབྦཾ. ཨེཏྠཙ དྭཱསཏྟཏིཝིདྷཱསལཀྑཎཱཝཏྠུདྷམྨཱཏི ཝཙནེ པཡོཛནཾ ནདིསྶཏི. ཏེསུ ཧི དྭཱསཏྟཏིཝིདྷེསུ ཨེཀཙྩེ ཨེཝ དྷམྨཱ པུརིམེསུ ཏཱིསུ སངྒཧེསུ ཨཱགཏཱ. པཙྪིམེཙ སབྦསངྒཧེ ཨནིཔྥནྣརཱུཔཱནིཔི ཨདྷིཔྤེཏཱནིཨེཝཱཏི. ཨེཏྠཙ ཝཏྠུདྷམྨཱསལཀྑཎཱཏི པདེཧི ཨནིཔྥནྣརཱུཔཱནཾ སལཀྑཎཏཱ པཊིཀྑིཔནེ ཡཾ ཝཏྟབྦཾ. ཏཾ རཱུཔསམུདྡེས དཱིཔནིཡཾ ཝུཏྟམེཝཱཏི. ཨེཀནྟཱཀུསལཛཱཏིཡཱནཾ ཨཱསཝ ཙཏུཀྐཱདཱིནཾ སངྒཧོ ཨཀུསལསངྒཧོ, ན ཨཀུསལ སམྤཡུཏྟཏྟཱཡེཝ ཨཀུསལབྷཱུཏཱནཾ ཙིཏྟཕསྶཱདཱིནནྟི. ཀུསལཱ ཀུསལཱབྱཱཀཏམིསྶཀཱནཾ སངྒཧོ མིསྶཀསངྒཧོ.

བོདྷི ཝུཙྩཏི ཙཏཱུསུ མགྒེསུ ཉཱཎཾ, བུཛ྄ཛྷནྟི ཨེཏཱཡཱཏི ཀཏྭཱ. བོདྷིཡཱ པཀྑཱ བོདྷིཔཀྑཱ. བོདྷིསམྦྷཱརཱཏི ཨཏྠོ. བོདྷི པཀྑེསུ བྷཝཱ ¶ ཨནྟོགདྷཱཏི བོདྷིཔཀྑིཡཱ. ཏེསཾ སངྒཧོཏི བོདྷིཔཀྑིཡསངྒཧོ. སབྦེསཾ ཨནཝསེསཱནཾ པརམཏྠདྷམྨཱནཾ སངྒཧོ སབྦསངྒཧོ. ཙིརཔཱརིཝཱསིཡཊྛེན མདནིཡཊྛེནཙ ཨཱསཝ སདིསཏྟཱ ཨཱསཝཱ. ཡདིཙ ཏདུབྷཡཊྛེན ཨཱསཝཱནཱམ སིཡུཾ. ཨིམེ ལོབྷཱདཡོ ཨེཝ ཨཱསཝཱནཱམ སིཡུཾ. པུཔྥཱསཝཱདཡོ ཧི ལོཀེ ཚ པཉྩ རཏྟིམཏྟཾ ཝཱ སཏྟཊྛརཏྟིམཏྟཾ ཝཱ སཡཾཔི ཀུམྦྷེསུ པརིཝཱསཾ གཎྷནྟི. ཀུམྦྷེཙ པརིཝཱསཾ གཱཧཱཔེནྟི. ཨིམེ པན ཨནམཏགྒེ སཾསཱརེ སཡཾཔི སཏྟསནྟཱནེ པརིཝཱསཾ གཎྷནྟི. སཏྟསནྟཱནཉྩ པརིཝཱསཾ གཱཧཱཔེནྟི. སཀལཾ སཏྟསནྟཱནཾ སདཱ ཨཱསཝཔཱུརིཏམེཝ ཧོཏི. ཡཐཱཧ-ཙཀྑུཾ ལོཀེ པིཡརཱུཔཾ སཱཏརཱུཔཾ ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི. ཨེཏྠ ནིཝཱིསམཱནཱ ནིཝཱིསཏཱིཏིཨཱདི. ཏཏྠ ཨེསཱ ཏཎྷཱ པརིཡུཊྛཱནཝསེན ཨུཔྤཛྫམཱནཱ ཨེཏྠེཝ ཨུཔྤཛྫཏི. ཨུཔྤཛྫིཏྭཱཙ པུན ཨནུསཡབྷཱཝེན པརིཝཱསཾ ཀཏྭཱ ནིཝཱིསམཱནཱ ཨེཏྠེཝ ནིཝཱིསཏཱིཏི ཨཏྠོ. ཡཱཝཙ ཨརིཡམགྒདྷོཝནཾ ནལབྦྷཏི. ཏཱཝ སནྟཱནཾ གཱུཐཔཱུརིཏཀཱུཔཾ ཝིཡ དུབྦིསོདྷཾ ཀཏྭཱ པཝཏྟཏི. པུཔྥཱསཝཱདཡོཙ མདཾ ཛནེནྟཱ མུཧུཏྟམེཝ ཛནེནྟི. ཨིམེ པན ཡཱཝ ཨརིཡམགྒཾ ནལབྷཏི. ཏཱཝ ནིཙྩམདཾ ཛནེནྟི. ཏསྨཱ ཨེཀནྟེན ཨིམེཡེཝ ཙིརཔཱརིཝཱསིཡཊྛེན མདནི ཡཊྛེནཙ ཨཱསཝཱནཱམ བྷཝིཏུཾ ཨརཧནྟཱིཏི.

ཝིསནྡནཊྛེནཝཱ ཨཱསཝསདིསཏྟཱ ཨཱསཝཱ, ཡཐཱ ཧི ཀུདྷིཏ ཀུཊྛིནོ མཧཱཝཎམུཁེཧི ཡཱུསསངྑཱཏོ ཨཱསཝོ ཝིསནྡིཏྭཱ པིལོཏིཀཁཎྜཱནི དཱུསེཏི, ཨེཝཾ ཨིམེཔི ཚཧིདྭཱརེཧི ཝིསནྡིཏྭཱ ཚལཱ༹རམྨཎཱནིདཱུསེནྟཱིཏི. ཨཱཡཏཾཝཱ སཾསཱརདུཀྑཾ སཝནྟིཔསཝནྟི ཝཌྜྷེནྟཱིཏི ཨཱསཝཱ. ཨཐཝཱ, བྷཝཏོ ཨཱབྷཝགྒཱ དྷམྨཏོ ཨཱགོཏྲཏུམྷཱ སཝནྟི ཨཱརམྨཎཀརཎཝསེན པཝཏྟནྟཱིཏི ཨཱསཝཱ. ཨཱསདྡསྶ ཨཝདྷིཨཏྠཛོཏཀཏྟཱ. ཨཝདྷིཙ དུཝིདྷོ མརིཡཱདཝིསཡོ ཨབྷིཝིདྷིཝིསཡོཙཱཏི ཏཏྠ ཡསྶ སམྦནྡྷིནཱིཀྲིཡཱ ཨཝདྷིབྷཱུཏཾ ཨཏྟཱནཾ བཧིཀཏྭཱ པཝཏྟཏི. སོ མརིཡཱདཝིསཡོ ནཱམ. ཡཐཱ ཨཱཔཱཏལིཔུཏྟཱ དེཝོ ཝུཊྛོཏི. ཡསྶ སམྦནྡྷིནཱིཀྲིཡཱ ཨཝདྷིབྷཱུཏཾ ཨཏྟཱནཾ བྱཱཔེཏྭཱ ཨནྟོ ཀཏྭཱ པཝཏྟཏི, སོ ¶ ཨབྷིཝིདྷིཝིསཡོནཱམ. ཡཐཱ ཨཱབྲཧྨལོཀཱ བྷགཝཏོ ཀིཏྟིསདྡོ ཨབྦྷུགྒཏོཏི. ཨིདྷ པན ཨབྷིཝིདྷིཝིསཡོ དཊྛབྦོ. ཏསྨཱ བྷཝགྒཉྩ གོཏྲབྷུཉྩ བྱཱཔེཏྭཱ ཨནྟོ ཀཏྭཱ སཝནྟཱིཏི ཨཏྠོ ཝེདིཏབྦོ.

[༢༠༤] ཝིབྷཱཝནིཡཾ པན

ཨཝདྷིཙ མརིཡཱདཨབྷིཝིདྷིཝསེན དུཝིདྷོཏི ཝཏྭཱ པུན ཏཾ ཝིབྷཱཝེནྟོ ‘‘ཏཏྠ ཨཱཔཱཏལིཔུཏྟཱ དེཝོ ཝུཊྛོཏིཨཱདཱིསུཝིཡ ཀྲིཡཾ བཧིཀཏྭཱ པཝཏྟོ མརིཡཱདོ. ཨཱབྷཝགྒཱསདྡོ ཨབྦྷུགྒཏོཏིཨཱདཱིསུཝིཡ ཀྲིཡཾ བྱཱཔེཏྭཱ པཝཏྟོ ཨབྷིཝིདྷཱི’’ཏི ཝདཏི. ཏཾ ན ཡུཛྫཏི.

ན ཧི ཨཝཝིདྷིཝིསཡབྷཱུཏོ བྷཝགྒོ ལོཀཏྟཡབྱཱཔཀཾ སདྡསྶ ཨབྦྷུགྒམནཀྲིཡཾ བྱཱཔེཏྭཱ པཝཏྟཏི. ནཙ ཨཝདྷིབྷཱུཏོ ཨཏྠོ ཀྲིཡཾ བཧིཝཱ ཨནྟོཝཱ ཀཏྭཱ པཝཏྟཏཱིཏི ཡུཏྟོ. ཀྲིཡཱཨེཝ པན ཏཾ བཧིཝཱ ཨནྟོཝཱ ཀཏྭཱ པཝཏྟཏཱིཏི ཡུཏྟོ. ཨེཝཉྩ ཀཏྭཱ མཱུལཊཱིཀཱཡཾ-དུཝིདྷོཧི ཨཝདྷི ཨབྷིཝིདྷིཝིསཡོ ཨནབྷིཝིདྷིཝིསཡོཙ. ཨབྷིཝིདྷིཝིསཡཾ ཀྲིཡཱབྱཱཔེཏྭཱ པཝཏྟཏི, ཨཱབྷཝགྒཱ བྷགཝཏོ ཡསོ གཏོཏི. ཨིཏརཾ བཧིཀཏྭཱ, ཨཱཔཱཏལིཔུཏྟཱ ཝུཊྛོ དེཝོཏི. ཀཱམེཏི ཨིཙྪཏཱིཏི ཀཱམོ. སོཨེཝ ཨཱསཝོཏི ཀཱམཱསཝོ. ཀཱམཱིཡཏིཝཱ ཨོལཱ༹རིཀེན ཀཱམེན ཨིཙྪཱིཡཏཱིཏི ཀཱམོ. པཉྩཀཱམགུཎམུཁེན དེསིཏོ སབྦོ ཀཱམཱཝཙརདྷམྨོ. ཨིདྷ པན ཏཾ ནཱམེན ཏདཱརམྨཎཱ ཏཎྷཱཨེཝ ཨདྷིཔྤེཏཱ, ཀཱམོཨེཝ ཨཱསཝོཏི ཀཱམཱསཝོ. ཀཱམཱཝཙརདྷམྨེསུ ཨསྶཱདནཱབྷིནནྡན ཝསེན པཝཏྟོ ཀཱམརཱགོ. ཐེརེན པན ཨཡམཏྠོཝ ཨིཙྪིཏོ. ཝཀྑཏི ཧི ཀཱམབྷཝ ནཱམེན ཏབྦཏྠུཀཱ ཏཎྷཱ ཨདྷིཔྤེཏཱཏི.

[༢༠༥] ཝིབྷཱཝནིཡཾ པན

པུརིམཏྠོཝ ཝུཏྟོ. སོ ཨནུཔཔནྣོ, ཐེརམཏཱནུགཏསྶ ཨིདྷཱདྷིཔྤེཏསྶ ཨཏྠསྶ ཨཝུཏྟཏྟཱ.

བྷཝཱསཝོཏི ¶ ཨེཏྠ དུཝིདྷོ བྷཝོ ཀམྨབྷཝོ ཨུཔཔཏྟིབྷཝོ ཙ. ཏཏྠ མཧགྒཏཀུསལདྷམྨཱ ཀམྨབྷཝོ. ཏཾནིབྦཏྟཱ ཝིཔཱཀ དྷམྨཱ ཨུཔཔཏྟིབྷཝོ. ཨིདྷཔི བྷཝསདྡེན ཏདཱརམྨཎཱ ཏཎྷཱཨེཝ ཨདྷིཔྤེཏཱ. བྷཝོཨེཝ ཨཱསཝོཏི བྷཝཱསཝོ. ཏསྨིཾ དུཝིདྷེ བྷཝེ ནིཀནྟིཝསེན པཝཏྟོ རཱུཔཱརཱུཔརཱགོ.

[༢༠༦] ཡཾ པན ཝིབྷཱཝནིཡཾ

‘‘སསྶཏ དིཊྛིསཧགཏོཙ རཱགོ ཨེཏྠེཝ སངྒཡ྄ཧཏཱི’’ཏི ཝུཏྟཾ. ཏཾ ན ཡུཏྟཾ.

བྷཝཱསཝོ ཙཏཱུསུ དིཊྛིགཏ ཝིཔྤཡུཏྟ ལོབྷསཧགཏེསུ ཙིཏྟུཔྤཱདེསུ ཨུཔྤཛྫཏཱིཏི ཧི ཨཊྛཀཐཱཀཎྜེ ཝུཏྟཾ. ཡཏྠ པན ཀཱམཏཎྷཱ བྷཝཏཎྷཱ ཝིབྷཝཏཎྷཱཏི ཨཱགཏཾ. ཏཏྠེཝ སསྶཏདིཊྛི སཧགཏོ རཱགོ ཡཱཀཱཙི ཀུསལཱཀུསལ ཀམྨབྷཝནིཀནྟི ཡཱཀཱཙི ཨུཔཔཏྟིབྷཝཔཏྠནཱ. སབྦཱ བྷཝཏཎྷཱཡཾ སངྒཧིཏཱཏི ཡུཏྟཱ. ཨིདྷ པན ཡཐཱཝུཏྟཾ བྷཝཱསཝཾ ཐཔེཏྭཱ སབྦོ ལོབྷོ ཀཱམཱསཝེ ཨེཝ སངྒཧིཏོཏི ཡུཏྟོཏི.

[༢༠༧] ཨེཏེནེཝ ཡཉྩ ཏཏྠ ཝུཏྟཾ.

‘‘ཏཏིཡོ བྷཱདིཊྛིསཧགཏོ’’ཏི. ཏཾཔི པཊིཀྑིཏྟཾ ཧོཏི.

ཡཱཀཱཙི དིཊྛི དིཊྛཱསཝོ. ཡོཀོཙི མོཧོ ཨཝིཛྫཱསཝོ. ཨེཏྠ སིཡཱ, ཀསྨཱ ཨིམེ ཨེཝ ཨཱསཝཱཏི ཝུཏྟཱ. ནནུ ཨཉྙེཔི མཱནཱདཡོ ཙིརཔཱརིཝཱསིཡཊྛཱདིཡུཏྟཱ ཨེཝ ཧོནྟཱིཏི. སཙྩཾ. ཨིམེསུ པན ཀཱམཱསཝེ པརིཝུཊྛེ སཏི སབྦེཀཱམཝིསཡཱ མཱནཱདཡོ པརིཝུཊྛཱཨེཝ ཧོནྟི. ཏསྨིཾ ཝིམུཏྟེ ཝིམུཏྟཱཨེཝ, ཏཐཱ བྷཝཱསཝེ པརིཝུཊྛེ སཏི བྷཝཝིསཡཱ. དིཊྛཱསཝེཙ པརིཝུཊྛེ སཏི དིཊྛིཝིསཡཱཏི. ཨཝིཛྫཱཔན ཏེསཾ ཏིཎྞཾཔི མཱུལབྷཱུཏཱཏི. ཨིཏི ཨིམེ ཨེཝ པཱརིཝཱསིཡཊྛཱདཱིསུ པདྷཱནབྷཱུཏཱ ཧོནྟི. ཨིཏརེ པན ཏདནུབནྡྷམཏྟཱཨེཝ སམྤཛྫནྟཱིཏི ན ཏེ ཨཱསཝཱཏི ཝིསུཾ ཝཏྟུཾ ཨརཧནྟཱིཏི. ཨཏྟནི པཏིཏཾ ཛནཾ ཨནསྶཱསིཀཾ ཀཏྭཱ ཨཛ྄ཛྷོཏྠ རནྟོ ¶ ཧནཏི མཱརེཏཱིཏི ཨོགྷོ. པཀཏིམཧོགྷོ. ཏཐཱ ཨཝཧནནཊྛེན དུཏྟརཊྛེནཙ ཨོགྷསདིསཱཏི ཨོགྷཱ. ཡདིཙ ཨཝཧཉྙནཊྛེཙ དུཏྟརཊྛེནཙ ཨོགྷཱནཱམ སིཡུནྟིཨཱདིཀོ པསངྒོ མཱནཱདཱིནཉྩ ཨོགྷབྷཱཝ པརིཧཱརོ ཝུཏྟ ནཡེན ཝེདིཏབྦོ.

ཝཊྚསྨིཾཝཱ བྷཝཡནྟཀེཝཱ སཏྟེ ཡོཛེནྟཱིཏི ཡོགཱ. བྷཝནྟརཙུཏིཡཱ སཧ བྷཝནྟརཔཊིསནྡྷིཾ གནྟེནྟི གྷཊེནྟཱིཏི གནྠཱ. ཨབྷིཛ྄ཛྷཱཏི སབྦསྶ རཱགསྶེཏཾ ནཱམཾ. ཏསྨཱ རཱུཔཱརཱུཔ རཱགཱཔི ཨེཏྠ སངྒཧིཏཱཏི དཊྛབྦཱ. བྱཱཔཱདོཏིཔི སབྦོ དོསོ ཨེཝ. ཨིདཾ སཙྩཱཏི ནིཝེསོཏི ཨིདམེཝ སཙྩཾ, མོགྷམཉྙནྟི པཝཏྟོ མིཙྪཱབྷིནིཝེསོ. ཝཊྚདུཀྑཏོ ཝིམུཏྟིཡཱ ཨམགྒབྷཱུཏཾཡེཝ གོསཱིལགོཝཏཱདིཀཾ པརཏོ ཨཱམསནཾ ཏཐཱ ཏཐཱ ཀཔྤེཏྭཱ གཧཎཾ སཱིལབྦཏཔརཱམཱསོ. ཨེཏྠཙ པརཏོཏི བྷཱུཏསབྷཱཝཔཙྩནིཀཏོཏི ཨཏྠོ. ཀཱཡསདྡོ པན སབྦཏྠ རཱུཔཀཱཡེ ནཱམཀཱཡེཙ པཝཏྟོཏི ཨཏིཏཀཱཡེན པཙྩུཔྤནྣ ཀཱཡཾ པཙྩུཔྤནྣཀཱཡེནཙ ཨནཱགཏཀཱཡཾ གནྠེཏི གྷཊེཏཱིཏི ཀཱཡགནྠོ. ཨཐཝཱ, ཀཱཡེ གཎྛོཏི ཀཱཡགཎྛོ. ཨཛ྄ཛྷཏྟ གཎྛོཏི ཨཏྠོ. ནིགཎྛོནཱཊཔུཏྟོཏིཨཱདཱིསུཝིཡ གཎྛསདྡོ གཎྛིཡཾ པཝཏྟོ. བྷུསཾ ཨཱདིཡནྟི ཨམུཉྩནགཱཧཾ གཎྷནྟཱིཏི ཨུཔཱདཱནཱནི. ཀིལེསབྷཱུཏོ ཀཱམོཨེཝ ཨུཔཱདཱནཾ ཀཱམུ པཱདཱནཾ. ཝཏྠུབྷཱུཏཾཝཱ ཀཱམཾ ཨུཔཱདིཡཏཱིཏི ཀཱམུཔཱདཱནཾ.

དྭཱསཊྛིདིཊྛིཡོ ཏིཝིདྷ མཧཱདིཊྛིཡོ ཨཉྙཱཔིཝཱ སཱསནེ ལོཀེཙ སནྡིསྶམཱནཱ ཝིཔརཱིཏགཱཧབྷཱུཏཱ དིཊྛིཡོ དིཊྛུཔཱདཱནཾ. ཡཐཱགཧིཏཾཝཱ པུརིམདིཊྛིཾ ཨིདམེཝ སཙྩཾ མོགྷམཉྙནྟི ཨུཔཱདིཡཏཱིཏི དིཊྛུཔཱདཱནཾ. གོཎཀུཀྐུརཱདཱིནཾ ཏཾཏཾཔཀཏིཙཱརིཏྟཾ སཱིལཾ ནཱམ. ཏམེཝ སུཊྛུཾ སམཱདིནྣཾ ཝཏཾནཱམ. ཏདུབྷཡཾ སཾསཱརམུཏྟིཡཱ མགྒོཏི དལ༹ྷགཧཎཾ སཱིལབྦཏུ པཱདཱནཾ ནཱམ. ཨཏྟཝཱདུཔཱདཱནནྟི ཨེཏྠ ཨཏྟཱ ཝུཙྩཏི པརིཀཔྤབུདྡྷིཡཱ གཧིཏོ ཨེཀེཀསྨིཾ སཏྟ སནྟཱནེ པདྷཱནིསྶརོ. ཡཾ ལོཀིཡམཧཱཛནཱ སཏྟོཏིཝཱ པུགྒལོཏིཝཱ ཛཱིཝོཏིཝཱ ཏཐཱགཏོཏིཝཱ ལོཀོཏིཝཱ སཉྫཱནནྟི. ཡཉྩ ནཱནཱཏིཏྠིཡཱ ཨིསྶརནིམྨིཏཾཝཱ ཨདྷིཙྩསམུཔྤནྣཾཝཱ ཨཙྩནྟསསྶཏཾཝཱ ¶ ཨེཀཙྩསསྶཏཾཝཱ ཨུཙྪེདཾཝཱ པཉྙཔེནྟཱིཏི. ཏཾ ཨཏྟཱནཾ ཨབྷིཝདནྟིཙེཝ ཨུཔཱདིཡནྟིཙ སཏྟཱ ཨེཏེནཱཏི ཨཏྟཝཱ དུཔཱདཱནཾ. ཝཱིསཏིཝིདྷཱ སཀྐཱཡདིཊྛི. ཏཏྠ ཨབྷིཝདནྟཱིཏི ཝིསིཊྛཾ པདྷཱནཾ ཀཏྭཱ ཝདནྟི. ཨུཔཱདིཡནྟཱིཏི དལ༹ྷཾ ཨཱདིཡནྟི. ཡཐཱཧ –

ཏཏྠ ཀཏམཱ སཀྐཱཡདིཊྛི. ཨིདྷ ཨསྶུཏཝཱ པུཐུཛྫནོ རཱུཔཾ ཨཏྟཏོ སམནུཔསྶཏི. རཱུཔཝནྟཾཝཱ ཨཏྟཱནཾ. ཨཏྟནི ཝཱ རཱུཔཾ. རཱུཔསྨིཾཝཱ ཨཏྟཱནཾ. ཝེདནཾ ཨཏྟཏོ སམནུཔསྶཏི. ཝེདནཱཝནྟཾཝཱ ཨཏྟཱནཾ. ཨཏྟནིཝཱ ཝེདནཾ. ཝེདནཱཔཝཱ ཨཏྟཱནཾ. སཉྙཾ. སངྑཱརེ. ཝིཉྙཱཎནྟི.

ཏཏྠ རཱུཔཾ ཨཏྟཏོ སམནུཔསྶཏཱིཏི རཱུཔམེཝ ཨཏྟཱཏི གཎྷཱཏི. རཱུཔཝནྟཾཝཱ ཨཏྟཱནནྟི ཨཏྟཱ མེ རཱུཔཝཱཏི གཎྷཱཏི. ཨཏྟནི ཝཱ རཱུཔནྟི ཨཏྟཱནཾ པཊིཙྩ རཱུཔཾ ཏིཊྛཏཱིཏི གཎྷཱཏི. རཱུཔསྨིཾཝཱ ཨཏྟཱནནྟི རཱུཔཾ པཊིཙྩ ཨཏྟཱ ཏིཊྛཏཱིཏི གཎྷཱཏི. ཀཐཾ རཱུཔཀཱཡཾ ཨུདྡིསྶ ཨཛྫ ཨཧཾ ཐདྡྷོམྷཱིཏི ཝཱ ཨཛྫ ཨཧཾ མུདུཀོམྷཱིཏིཝཱ ཝདནྟོ པཐཝི སངྑཱཏཾ རཱུཔཾ ཨཏྟཏོ སམནུཔསྶཏིནཱམ. ཨཛྫ མམ ཀཱཡོ ཐདྡྷོཏིཝཱ མུདཱུཏིཝཱ ཝདནྟོ སེསདྷམྨེཝཱ དྷམྨམུཏྟཀཾཝཱ ཨཏྟཱནཾ གཧེཏྭཱ ཏཾ ཨཏྟཱནཾ པཐཝཱིཝནྟཾ སམནུཔསྶཏིནཱམ. ཨཛྫ ཐདྡྷབྷཱཝོཝཱ མུདུབྷཱཝོཝཱ མཡི ཛཱཏོཏི ཝདནྟོ ཨཏྟནི པཐཝིཾས མནུཔསྶཏིནཱམ. ཨཛྫཱཧཾ ཐདྡྷབྷཱཝེ ཋིཏོམྷི མུདུབྷཱཝེ ཋིཏོ མྷཱིཏི ཝདནྟོཔཐཝིམྷི ཨཏྟཱནཾ སམནུསྶཏིནཱམ. ཨཡཾ པཐཝིམྷི ཙཏུརཱཝཏྠིཀཱཡ སཾཀྐཱཡདིཊྛིཡཱ པཝཏྟཱཀཱརོ. སེསེསུ སཏྟཝཱིསཏིརཱུཔེསུ ཡཐཱསམྦྷཝཾ ཝཏྟབྦོ. ཨཧཾ མརཱམི མརིསྶཱམཱིཏིཨཱདིནཱ ཧི ཨནིཙྩཏཱཡཾཔི སཱདིཊྛི པཝཏྟཏིཡེཝ. སེསརཱུཔེསུ ཝཏྟབྦཾ ནཏྠི. ཨིདཾ ནཱམ ཨཧཾ པུབྦེ སཾབྷུཉྫིཾ. ཨཛྫ སཾབྷུཉྫཱམི. པརཏོ སཾབྷུཉྫིསྶཱམཱིཏིཝཱ སུཁིཏོམྷི དུཀྑིཏོམྷཱིཏིཝཱ ཝེདནཾ ཨཏྟཏོ སམནུཔསྶཏི. ཨཛྫ མམ ཀཱཡོ སུཁིཏོ དུཀྑིཏོཏིཝཱ མམཙིཏྟཾ སུཁིཏཾ དུཀྑིཏནྟིཝཱ ཨཏྟཱནཾ ཝེདནཱཝནྟཾ སམནུཔསྶཏི. ཨཛྫསུཁཾཝཱ དུཀྑཾཝཱ མཡིཛཱཏནྟི ཨཏྟནི ཝེདནཾ སམནུཔསྶཏི. ཨཛྫཱཧཾ སུཁིཏ བྷཱཝེ ཋིཏོམྷི དུཀྑིཏབྷཱཝེ ཋིཏོམྷཱིཏི ཝེདནཱཡ ཨཏྟཱནཾ སམནུཔསྶཏཱིཏི.

སཉྙཱཡ ¶ སབྦེསུཙ པཉྙཱསམཏྟེསུ སངྑཱརེསུ ཝིསུཾ ཝིསུཾ ཝིཏྠཱརེཏྭཱ ཝཏྟབྦོ. ཨཧཾ པསྶཱམཱིཏི ཙཀྑུཝིཉྙཱཎཾ ཨཏྟཏོ སམནུཔསྶཏི. དསྶནཾ མེཏི ཨཏྟཱནཾ ཝིཉྙཱཎཝནྟཾ སམནུཔསྶཏི. མཡིདསྶནཾནཱམ ཨཏྠཱིཏི ཨཏྟནི ཝིཉྙཱཎཾ སམནུཔསྶཏི, ཨཧཾ དསྶནེ སམཏྠོམྷཱིཏི ཝིཉྙཱཎསྨིཾ ཨཏྟཱནཾ སམནུཔསྶཏི. ཨེསེ ཝནཡོ སེསེསུ པཉྩསུ ཝིཉྙཱཎེསཱུཏི. ཨཧ མསྨི ཨཧཾ ཨེཀོ སཏྟོ ཨེཀོཔུགྒལོ ཨེཀོ ཛཱིཝོ ཨེཀོ ལོཀོ ཨེཀོ ནརོ མནུསྶོ དེཝོསཀྐོ བྲཧྨཱཏིཝཱ ཨཧཾགཙྪཱམི ཨཧཾ ཏིཊྛཱམི ཨཧཾ ནིསཱིདཱམི ཨཧཾ ནིཔྤཛྫཱམི ཨཧཾ སམིཉྫེམི པསཱརེམཱིཏིཨཱདིནཱ ཝཱ ཁནྡྷཔཉྩཀཾཝཱ ཨེཀམེཀཾཝཱ ཁནྡྷཾ སམཱུཧཏོ གཧེཏྭཱ པཝཏྟིཔི ཝཏྟབྦཱ. ཨཔརིཉྙཱཏཝཏྠུཀཱནཉྷི ཨེཀམུཧུཏྟ མཏྟེཔི ཡཾཀིཉྩི ཨཏྟནོཝཱ པརསྶཝཱ ཨཏྟཔཊིསཾཡུཏྟཝཙནཾ ཀཐེནྟཱནཾ ཙིཏྟཾཝཱ ཝཙནཾཝཱ ཡཐཱཝུཏྟེ རཱུཔཱརཱུཔདྷམྨེ ཀདཱཙི ཨཏྟཏོ ཨུཔཱདིཡིཏྭཱ པཝཏྟཏི. ཀདཱཙི ཨཏྟཔརིཝཱར བྷཱཝེན. ཀདཱཙི ཨཏྟནིསྶིཏབྷཱཝེན. ཀདཱཙི ཨཏྟནིསྶཡབྷཱཝེན. ཀདཱཙི ཨེཀེཀདྷམྨཝསེན. ཀདཱཙི སམཱུཧདྷམྨཝསེནཱཏི.

ཡསྨཱ པན ཨཏྟནིམིཏྟཾནཱམ ཝསཝཏྟནཱཀཱརཾ པཊིཙྩ ཨུཔཊྛཱཏི. ཝསཝཏྟནཱ ཀཱརོཙ རཱུཔཱརཱུཔདྷམྨཱནཾ པཙྩཡཱཡཏྟ ཝུཏྟིཀཏྟཾ ཁཎི ཀཏྟཉྩ སུཊྛུ པསྶནྟཱནཾ ནཏྠི. ཏསྨཱ པརིཉྙཱཏཝཏྟུཀཱནཾ ཨཏྟ པཊིསཾཡུཏྟཝཙནཾ ཀཐེནྟཱནཾཔི ཙིཏྟཾ པདུམིནིཔཏྟེ ཨུདཀབིནྡུ ཝིཡ ཏེསུ དྷམྨེསུ ཨལགྒིཏྭཱཨེཝ པཝཏྟཏཱིཏི ཝེདིཏབྦཾ. སཏྟཱནཾ ཙིཏྟསནྟཱནེ ཀུསལེ དྷམྨེ ཨནུཔྤནྣེཝཱ ཨུཔྤཱདེཏུཾ ཨུཔྤནྣེཝཱ ཝཱ སེཏུཾ ཨདཏྭཱ ནཱིཝཱརེནྟཱིཏི ནཱིཝརཎཱནི. ཀཱམནཊྛེན ཀཱམོ, ཚནྡནཊྛེནཚནྡོཏི ཀཱམཙྪནྡོ. བལཝརཱགོ. སོཨེཝནཱིཝརཎནྟི ཀཱམཙྪནྡནཱིཝརཎཾ. པཊྛཱནེཨཱརུཔྤེཀཱམཙྪནྡཾ ནཱིཝརཎཾ པཊིཙྩཨུདྡྷཙྩནཱིཝརཎནྟི ཝུཏྟཏྟཱ པན ཐཔེཏྭཱ རཱུཔཱརཱུཔརཱགེ ཨཝསེསོ སབྦོལོབྷོ ཀཱམཙྪནྡེ ཨསངྒཧིཏོནཱམ ནཏྠི. ཛྷཱནཔཊིཔཀྑབྷཱཝོཔན པཉྩཀཱམགུཎིཀརཱགསྶེཝ ཧོཏཱིཏི ཝེདིཏབྦོ. བྱཱཔཛྫནཾ བྱཱཔཱདོ. ཙིཏྟསྶ པཱུཏིབྷཱཝོཏི ཨཏྠོ. ཡོཀོཙིདོསོ. ཀསྨཱ པནེཏྠ ཐིནམིདྡྷ ནཱིཝརཎནྟི ཙ ཨུདྡྷཙྩ ཀུཀྐུཙྩ ནཱིཝརཎནྟི ¶ ཙ དྭེ དྭེ དྷམྨཱ ཨེཀཾ ནཱིཝརཎཾ ཀཏྭཱ ཝུཏྟཱཏི. ཀིཙྩཏོ པཙྩཡཏོ པཊིཔཀྑཏོཙ སདིསཏྟཱ. ཏཐཱ ཧི ཀིཙྩཏོ ཏཱཝ ཐིནམིདྡྷདྭཡཾ ཙིཏྟུཔྤཱདཱནཾ ལཱིནབྷཱཝཱ པཱདནཀིཙྩཾ. ཨུདྡྷཙྩཀུཀྐུཙྩདྭཡཾ ཨཝཱུཔསནྟབྷཱཝཱཔཱདནཀིཙྩཾ. པཙྩཡཏོ པུརིམདྭཡཾ ཏནྡིཝིཛམྦྷི ཏཏཱཔཙྩཡཾ. པཙྪིམདྭཡཾ ཉཱཏིབྱསནཱདིཝིཏཀྐཔཙྩཡཾ. པཊིཔཀྑཏོ པུརིམདྭཡཾ ཝཱིརིཡཔཊིཔཀྑཾ. པཙྪིམདྭཡཾ སམཐཔཊིཔཀྑནྟི.

ཨནུསེནྟཱིཏི ཨནུསཡཱ. ཨནུརཱུཔཾ ཀཱརཎཾ ལབྷིཏྭཱ ཨུཔྤཛྫནྟཱིཏི ཨཏྠོ. ཨནུཨནུ སེནྟཱིཏིཝཱ ཨནུསཡཱ. ཡཱཝ མགྒཾ ནཔཊིལབྷཏི. ཏཱཝ ཨནྟརཱ ཨཔརིཀྑིཡྻམཱནཱ ཧུཏྭཱ ཀཱརཎལཱབྷེ སཏི པུནཔྤུནཾ ཨུཔྤཛྫནྟཱིཏི ཨཏྠོ. ཨུཔྤཛྫནཉྩེཏྠ ཨཔྤཧཱིནཊྛེན ཨུཔྤཛྫནཱ རཧབྷཱཝོ ཝེདིཏབྦོ. ན པན སརཱུཔཏོ ཨུཔྤཏྟི, ཀཐཾ ཝིཉྙཱ ཡཏཱིཏི ཙེ. ཡསྶ ཀཱམརཱགཱནུསཡོ ཨུཔྤཛྫཏི, ཏསྶེཝ པཊིགྷཱནུསཡོ ཨུཔྤཛྫཏཱིཏི ཝུཏྟཏྟཱ. ཨེཝཉྩ ཀཏྭཱ པཱལི༹ཡཾ པུཐུཛྫནསྶ སཏྟཔི ཨནུསཡཱ ཨནུསཡཝཱརེ སཧ ཨནུསེནྟཱིཏི ཨུཔྤཛྫནཝཱརེ སཧ ཨུཔྤཛྫནྟཱིཏི ཝུཏྟཱ. ཡཐཱཧ པུཐུཛྫནསྶ ཨཝིཛྫཱནུསཡོཙ ཨནུསེཏི. ཀཱམརཱག. པཊིགྷ. མཱན. དིཊྛི. ཝིཙིཀིཙྪཱ. བྷཝརཱགནུསཡོཙ ཨནུསེཏཱིཏི. ཏཐཱ ཨུཔྤཛྫནཝཱརེཔཱིཏི.

ཨཔིཙ, སརཱུཔཏོ པརིཡུཊྛཱནཾ ཨཔཏྭཱ སནྟཱནེ པཝཏྟམཱནེཧི ཀུསལཱཀུསལཱ བྱཱཀཏཙིཏྟུཔྤཱདེཧི སཧ ཨནུརཱུཔཱ ཨཝིརུདྡྷཱ ཧུཏྭཱ སེནྟི. ཝིསུཾ སམྤཡུཏྟདྷམྨབྷཱཝེན ཨཝུཊྛིཏཱ ཧུཏྭཱ སཡིཏཱ ཧོནྟཱིཏི ཨནུསཡཱ. ཨནུ ཨནུ སེནྟཱིཏིཝཱ ཨནུསཡཱ. པཀཏིཡཱ ཡཐཱནུསཡིཏེསུཨེཝ ཀཱམརཱགཱདཱིསུ པུནཔྤུནཾ ཨུཔྤཛྫིཏྭཱ དིགུཎ ཏིགུཎཱདི ཝསེན པུནཔྤུནཾ སེནྟི. སཡནཱཀཱརེན ཨུཔརུཔརི པལིཝེཋེནྟཱིཏི ཨཏྠོ.

ཏཱིསུ རཱགཱདཱིནཾ ཨཝཏྠཱསུ པཐམཱཝཏྠཱཡ ཋིཏཱནཾ ཀཱམརཱགཱ དཱིནམེཏཾ ཨདྷིཝཙནཾ. ཏིསྶོ ཧི ཨཝཏྠཱ ཨནུསཡཱཝཏྠཱ པརིཡུཊྛཱནཱཝཏྠཱ ཝཱིཏིཀྐམཱཝཏྠཱཏི. ཏཏྠ ཡེ ཀཱམརཱགཱདཡོ ཨུཔྤཛྫིཏྭཱ ཀཱཡངྒཝཱཙངྒཾ ཙཱལེནྟི, ཏེསཾ ཏཐཱཔཝཏྟཱ ཨཝཏྠཱ ཝཱིཏིཀྐམཱཝཏྠཱནཱམ. ཡེ མནསྨིཾ ཨེཝ ཛཝནཙིཏྟསཧཛཱཏཱ ཧུཏྭཱ པཝཏྟནྟི, ཏེསཾ ཏཐཱཔཝཏྟཱ ཨཝཏྠཱ པརིཡུཊྛཱནཱཝཏྠཱནཱམ. ཡེ ¶ པན ཛཝནསཧཛཱཏབྷཱཝཾཔི ཨཔཏྭཱ ཝཱསནཱདྷཱཏུཡོ ཝིཡ ཙིཀྐསནྟཱནཱ ནུསཡིཏཱ ཧུཏྭཱ པརིཡུཊྛཱནཔྤཏྟིཡཱ བཱིཛབྷཱཝེན ཏིཊྛནྟི, སུབྷནིམིཏྟཱདིཀེཙ ཨཱརམྨཎེ ཨཱཔཱཏམཱགཏེ ཡེསཾ ཝསེན ཨཱཝཛྫནཾ རཱགཱདིཔཱཏུབྷཱཝཏྠཱཡ ཨཡོནིསོ བྷཝངྒཾ ཨཱཝཊྚེཏི, ཨབྷཱཝིཏཉྩ ཙིཏྟཾ ཡེསཾ ཝསེན དམཐཾ ནཨུཔེཏི, ཏེསཾ ཏཐཱ པཝཏྟཱ ཨཝཏྠཱ ཨནུསཡཱཝཏྠཱནཱམ. ཏདཝཏྠིཀཱ ཀཱམརཱགཱདཡོ ཨནུསཡཱནཱམ. ཏེ པན ཨཔརམཏྠབྷཱུཏཱཔི ན ཧོནྟི. ཨེཀནྟཔརམཏྠཛཱཏིཀཏྟཱ. ནཙ ཀུསལཱབྱཱཀཏབྷཱུཏཱ ཨེཀནྟཱཀུསལཛཱཏིཀཏྟཱ. ནཱཔི ཀུསལཱབྱཱཀཏཝིརུདྡྷཱ, ཝིསུཾ སམྤཡུཏྟདྷམྨབྷཱཝེན ཨནུཔལདྡྷཏྟཱ. ནཱཔི ཀཱལཏྟཡཝིནིམུཏྟཱ, ཏེཀཱལིཀདྷམྨསནྣིསྶཡེན པཝཏྟནཏོ. ཡདཱ པན ཏེ སམུཊྛ ཧིཏྭཱ པརིཡུཊྛཱནབྷཱཝཾ གཙྪནྟི, ཏདཱ ཝིསུཾ སམྤཡུཏྟདྷམྨ བྷཱཝཉྩ གཙྪནྟི. སཱརམྨཎཱདིབྷཱཝོཙ ཏེསཾ པརིབྱཏྟོ ཧོཏི. ཨེཏདཏྠཾ སནྡྷཱཡ ཀཐཱཝཏྠུམྷི ཏེསཾ སཱརམྨཎདྷམྨབྷཱཝོ སངྑཱརཀྑནྡྷབྷཱཝོཙ པཏིཊྛཱཔིཏོ ཧོཏཱིཏི.

ཡཐཱ པན ཕལདྷཱརིམྷི རུཀྑམྷི ཝིསཀཎྚཀེ དིནྣེ རུཀྑཱནུསཡིཏོ ཕལུཔྤཏྟིཡཱ པཙྩཡབྷཱུཏོ སིནེཧོ པརིཀྑཡཾ གཙྪཏི. སམཡེ ཨུཔྤཛྫིསྶམཱནཱནི ཕལཱནི ནུཔྤཛྫནྟི. ཨེཝཾ སཱནུསཡེ ཙིཏྟ སནྟཱནེ ཡསྨིཾ ཁཎེ མགྒོ པཱཏུབྷཝཏི, ཏསྨིཾ སཧམགྒུཔྤཱདཱ སོ སོ ཨནུསཡོ པརིཀྑཡཾ གཙྪཏི. པརིཀྑཱིཎསྶ པན པུན པརིཡུཊྛཱནཾནཱམ ནཏྠི, ཀུཏོ ཝཱིཏིཀྐམོཏི ཨིམམཏྠཾ སནྡྷཱཡ མགྒོ ཨནཱགཏསཱམཉྙཾ ཀིལེསཛཱཏཾ པཛཧཏཱིཏི ཏཏྠ ཏཏྠ ཝུཏྟོ. ཏཏྠ ཨནཱགཏསཱམཉྙནྟི ཨནཱགཏསམྨཏཾ, ན ཨེཀནྟ ཨནཱགཏཾ. ཏེནེཝ ཧི ཨཊྛཀཐཱཡཾ མགྒོ ཡེཀིལེསེ པཛཧཏི, ཏེ ཨཏཱིཏཱཀིཝཱ ཨནཱགཏཱཏིཝཱ པཙྩུཔྤནྣཱཏིཝཱ ནཝཏྟབྦཱཏི ཝུཏྟཾ. ཨེཏེནཙ མགྒོ ཀིལེསམུཁེན ཡཱནི ཀུསལཱཀུསལཀམྨཱནིཙ ཨུཔཱདིནྣཀཁནྡྷཔཉྩཀེཙ པཛཧཏི, ཏེ ཨཏཱིཏཱཏིཝཱཨནཱགཏཱཏིཝཱ པཙྩུཔྤནྣཱཏིཝཱ ནཝཏྟབྦཱཏི དཱིཔེཏི. ཡདི ཨེཝཾ མགྒེན པཧཱིནཱ སབྦེ ཏེབྷཱུམཀདྷམྨཱ ཀཱལཝིམུཏྟཱནཱམ ཨཏངྑཏཱ ནཱམ ཨཔཙྩཡཱནཱམ སིཡུནྟི.ན. ཏེཀཱལིཀཛཱཏིཀཏྟཱ སངྑཏ སཔཙྩཡཛཱཏིཀཏྟཱ ¶ ཙ. ཏེ ཧི མགྒེ ཨནུཔྤནྣེ ཨིམེ ནཱམདྷམྨཱ ཨུཔྤཛྫིསྶནྟི ནིརུཛ྄ཛྷིསྶནྟཱིཏི ཨེཝཾ སངྑཏལཀྑཎཾ ཨཱཧཙྩ ཉཱཎེན གཧིཏཏྟཱ ལཀྑཎཝསེན ཏེབྷཱུམཀཱདིབྷཱཝཾ བྷཛནྟཱིཏི. ཨེཝཉྩ ཀཏྭཱ ཝིསུཾ སམྤཡུཏྟདྷམྨབྷཱཝཾ ཨཔཏྟཱནཾ ཨནུསཡཱཝཏྠཱཡ ཝཱ ཝཱསནཱཝཏྠཱཡཝཱ ཀམྨསམངྒཱིཏཱཝཏྠཱཡཝཱ ཨཱསཡཛ྄ཛྷཱསཡཱ དྷིམུཏྟིཙརིཏཝཏྠཱསུཝཱ ཋིཏཱནཾ སབྷཱཝཱནཾ ཛཱཏིཝསེན པརམཏྠ དྷམྨཏཱ ཨཀུསལཱདིཏཱཙ པཙྩེཏབྦཱ ཧོཏཱིཏི.

[༢༠༨] ཝིབྷཱཝནིཡཾ པན

‘‘ཨཔྤཧཱིནཱ ཧི ཀིལེསཱ ཀཱརཎལཱབྷེ སཏི ཨུཔྤཛྫནཱ རཧཱ སནྟཱནེ ཨནུཨནུསཡིཏཱ ཝིཡ ཧོནྟཱིཏི ཏདཝཏྠཱ ཨནུསཡཱཏི ཝུཙྩནྟི. ཏེ པན ནིཔྤརིཡཱཡཏོ ཨནཱགཏ ཀིལེསཱ. ཨཏཱིཏཔཙྩུཔྤནྣཱཔི ཏཾསབྷཱཝཏྟཱ ཏཐཱ ཝུཙྩནྟཱི’’ཏི ཝུཏྟཾ. ཏཏྠ ཨནུསཡཱནཱམ སནྟཱནེ ཀདཱཙིཔི ཨནུཔྤནྣ པུབྦཱ ཨནཱགཏ ཀིལེསཱ ཨེཝཱཏི ཀཏྭཱ སནྟཱནེ ཨནུ ཨནུསཡིཏཱ ཝིཡ ཧོནྟཱིཏི ཝུཏྟཾ. ཏཾ ན ཡུཛྫཏི.

ན ཧི ཏེ ཨནུཨནུསཡིཏཱ ཝིཡ ཧོནྟི. ཨེཀནྟེན ཨནུསཡིཏཱཨེཝ ཧོནྟཱིཏི.

[༢༠༩] ཡཉྩ ཏཏྠ

‘‘ཏེ པན ནིཔྤརིཡཱཡཏོ ཨནཱགཏཀིལེསཱ’’ཏི ཝུཏྟཾ. ཏཾཔི ན ཡུཏྟཾ.

ན ཧི མགྒེན ཨཔྤཧཱིནཱ ཨནུསཡཱ ཨནཱགཏཱནཱམ ཧོནྟི. པཧཱིནཱཔིཙ ནིཔྤརིཡཱཡཏོ ཨནཱགཏཱཏི ནསཀྐཱ ཝཏྟུཾ. ཨནཱགཏ སཱམཉྙསྶ ཨདྷིཔྤེཏཏྟཱཏི. ཨེཏེན ཨཏཱིཏཔཙྩུཔྤནྣཱཔི ཏཾསབྷཱཝཏྟཱཏཐཱ ཝུཙྩནྟཱིཏི ཨིདཾཝིཔཊིཀྑིཏྟཾ ཧོཏི. ཨཔིཙ, ཨུཔྤཱདཊྛིཏིབྷངྒ པཏྟཱནཾཨེཝ ཨེཀནྟེན ཏེཀཱལིཀཏཱ ཧོཏཱིཏི ཏདཔཏྟཱནཾ ཨནུསཡཱནཾ པཙྩུཔྤནྣཏཱ པརིཡཱཡོཝ ཝཏྟུཾ ཡུཏྟོ. ཨེཝཉྩ ཀཏྭཱ པཱལི༹ཡཾ ཡསྶ ཀཱམརཱགནུསཡོ ཨུཔྤཛྫཏི, ཏསྶ པཊིགྷཱནུསཡོ ཨུཔྤཛྫཏཱིཏིཨཱདིནཱ པཙྩུཔྤནྣཀཱལིཀོ ཨུཔྤཱདཝཱརོ ཨེཝ ཝུཏྟོ, ན ནིརོདྷཝཱརོ, ནཙ ཨཏཱིཏཱནཱགཏ ཝཱརཱཏི. ཡཾ པན ¶ པཊིསམྦྷིདཱམགྒེ ཧཉྩི པཙྩུཔྤནྣེ ཀིལེསེ པཛཧཏི. ཏེན ཧི རཏྟོ རཱགཾ པཛཧཏི, དུཊྛོ དོསཾ, མུལ༹ྷོ མོཧནྟི ཝུཏྟཾ. ཏཾ པརིཡུཊྛཱནཔཏྟཱནཾ ཨེཀནྟཔཙྩུཔྤནྣཀྑཎཾ སནྡྷཱཡ ཝུཏྟནྟི དཊྛབྦཾ. ཏེནེཝ ཧི ཨཊྛཀཐཱཡཾ ཝཏྟམཱནུཔྤནྣཾ བྷུཏྭཱ ཝིགཏུཔྤནྣཾ ཨོཀཱསཀཏུཔྤནྣཾ སམུདཱཙཱརུཔྤནྣནྟི ཙཏུབྦིདྷཾ ཨུཔྤནྣཾ ན མགྒཝཛ྄ཛྷཾ. བྷཱུམིལདྡྷུཔྤནྣཾ ཨཱརམྨཎཱ དྷིགྒཧི ཏུཔྤནྣཾ ཨཝིཀྑམྦྷིཏུཔྤནྣཾ ཨསམུགྒྷཱཊིཏུཔྤནྣནྟི ཙཏུབྦིདྷཾ མགྒཝཛ྄ཛྷནྟི ཝུཏྟཾ. ཏཏྠ ཝཏྟམཱནུཔྤནྣཾ སམུདཱ ཙཱརུཔྤནྣནྟི ཨིདཾ དྭཡཾ ཁཎཔཙྩུཔྤནྣམེཝ. བྷུཏྭཱཝིགཏུཔྤནྣཾ ཨཏཱིཏམེཝ. ཨོཀཱས ཀཏུཔྤནྣཾ ཨནཱགཏམེཝ. ཏདུབྷཡཾ པན པཙྩུཔྤནྣསམཱིཔཏྟཱ ཨུཔྤནྣནྟི ཝུཏྟཾ. སམཱིཔཔཙྩུཔྤནྣནྟི ཝུཏྟཾ ཧོཏི.

བྷཱུམིལདྡྷུཔྤནྣཾནཱམ ཨཏྟནོ ཁནྡྷེསུ ཨནུསཡིཏཱནཾ མགྒེན ཨཔྤཧཱིནཱནཾ ཨནུསཡཱནཾཨེཝ ནཱམཾ. ཨཱརམྨཎཱདྷིགྒཧིཏུཔྤནྣཾ ནཱམ སུབྷནིམིཏྟཱདིཀེ ཨཱརམྨཎེ སཀིཾ ཛཝིཏྭཱ ཡཱཝ ཏམྨཱུལཀོ པརིཡུཊྛཱནཝེགོ ན ཝཱུཔསམྨཏི, ཏཱཝ ཨདྷིམཏྟཐཱམགཏ བྷཱཝེན ཋིཏཱནཾ ཏེསཉྙེཝ ནཱམཾ. ཨནུསཡཱ ཧི ནཱམ ཨནམཏགྒེ སཾསཱརེ པུནཔྤུནཾ པརིཡུཊྛཱནཔཏྟཱནཾ ཀིལེསཱནཾ ཝསེན ཨུཔརུཔརི ཐིར ཏར དལ༹ྷཏར པཏྟིཡཱ པཀཏིཡཱཔི ཐཱམགཏཱཨེཝནཱམ ཧོནྟི. ན ཡེནཝཱ ཏེནཝཱ ཝཱཡཱམེན པཛཧིཏུཾ སཀྐུཎེཡྻཱ. ཨེཝཾ སནྟེཔི ཡདཱ ཡོ ཡོ ཨནུསཡོ པཙྩཡལཱབྷེན པརིཡུཊྛཱན བཧུལོ ཧོཏི, ཏདཱ སོ སོ ཝིསེསེན ཨདྷིམཏྟཐཱམ གཏབྷཱཝཾ པཏྭཱ ཋིཏོ ཧོཏི. ཡདཱ ཡོ ཡོ པཊིཔཀྑདྷམྨ སམཱདཱནེན ནིགྒཧཔཏྟོ ཧོཏི, ཏདཱ སོ སོ མནྡཐཱམ གཏབྷཱཝཾ པཏྭཱ ཋིཏོ ཧོཏཱིཏི. ཨཝིཀྑམྦྷིཏུཔྤནྣཾནཱམ སམཐ ཝིཔསྶནཱཧི སུཊྛུཨནིགྒཧིཏཱནཾ ཏེསཉྙེཝ ནཱམཾ. ཨསམུགྒྷཱཊི ཏུཔྤནྣཾནཱམ མགྒེན ཨཔྤཧཱིནཱནཾ བྷཱུམིལདྡྷཱནཾ ཏེསཾཨེཝ ནཱམནྟི. ཡསྨཱ པན ལོཀུཏྟརདྷམྨཱནཱམ ཀིལེསཱནཾ ཨཙྩནྟཔཊིཔཀྑཱ ཧོནྟཱིཏི ཧེཊྛིམཱ མགྒཊྛཕལཊྛཱ སེཀྑཱ ཨཏྟནོ མགྒཕལཀྑཎེསུ ཨུཔརི མགྒཱཛ྄ཛྷེཧིཔི ཨནུསཡེཧི སཱནུསཡཱཏིཝཱ ནིརཱནུསཡཱཏིཝཱ ཐཱམཝཏཱཏིཝཱ ཨཐཱམགཏཱཏིཝཱ ནཝཏྟབྦཱ. ཏསྨཱ ཨནུསཡཱནཾ ཏཱདིསེ པཙྩུཔྤནྣ བྷཱཝེ སཏིཔི ཧཉྩི པཙྩུཔྤནྣེ ཀིལེསེ པཛཧཏི. ¶ ཏེནཧི ཐཱམགཏོ ཨནུསཡཾ པཛཧཏཱིཏི ཝུཏྟ དོསོ ནཏྠཱིཏི ཝེདིཏབྦོཏི. ཀཱམརཱགོཨེཝ ཨནུསཡོ ཀཱམརཱགཱནུསཡོ.

སཾཡོཛེནྟི བནྡྷནྟཱིཏི སཾཡོཛནཱནི, ཏཱནི པན སཀྐཱཡདིཊྛི ཝིཙིཀིཙྪཱ སཱིལབྦཏཔརཱམཱསོ ཀཱམཙྪནྡོ བྱཱཔཱདོཏི པཉྩ ཨོརམྦྷཱགིཡཱནི. རཱུཔརཱགོ ཨརཱུཔརཱགོ མཱནོ ཨུདྡྷཙྩཾ ཨཝིཛྫཱཏི པཉྩ ཨུདྡྷཾབྷཱགིཡཱནཱིཏི སུཏྟནྟེ ཨབྷིདྷམྨེཙ དསསཾཡོཛནཱནི ཨཱགཏཱནི. ཨིཏརཱནི པན ཨབྷིདྷམྨེཨེཝ ཨཱགཏཱནཱིཏི ཏཏོ ཝིསེསཀརཎཏྠཾ སུཏྟནྟེཏི ཝུཏྟཾ. ཀམོ པན དྭིནྣཾཔི པཱལི༹ཡཱ ནསམེཏི. སབྷཱག དྷམྨསངྒཧཝསེན པན ཨིདྷ ཨཉྙཐཱ ཀམོ ཝུཏྟོ སིཡཱཏི. ཙིཏྟཾ ཀིལིསྶནྟི ཝིབཱདྷེནྟི ཨུཔཏཱཔེནྟིཙཱཏི ཀིལེསཱ. ཀིལིསྶནྟིཝཱ མལཱིནབྷཱཝཾ ནིཧཱིནབྷཱཝཉྩ གཙྪནྟི སཏྟཱ ཨེཏེཧཱིཏི ཀིལེསཱ. ཀཱམབྷཝནཱམེནཱཏི ཝཏྠུཀཱམདཱིཔཀེན ཀཱམནཱམེན རཱུཔཱརཱུཔབྷཝདཱིཔཀེན ཙ བྷཝནཱམེན. ཏཱདིསཾ ཀཱམ བྷཝསངྑཱཏཾ ཨཱརམྨཎབྷཱུཏཾ ཝཏྠུ ཨེཏིསྶཱཏི ཏབྦཏྠུཀཱ. ཏཐཱ པཝཏྟནྟི སཱིལབྦཏཱནི པརཏོ ཨཱམསནཱཀཱརེན ཨིདཾ མེ སཙྩཾ མོགྷམཉྙནྟི ཨབྷིནིཝིསནཱཀཱརེན ཁནྡྷེསུ ཨཏྟཱབྷིནིཝེསཱཀཱརེནཙ པཝཏྟཾ. ཝཏྠུཏོཏི སབྷཱཝདྷམྨཏོ. ཨཡཾ པཱཔསངྒཧོ ཨཀུསལངྒཧོ ནཝདྷཱ ཝུཏྟོཏི ཡོཛནཱ. [ཨཀུསལསངྒཧོ]

༡༦༣. མིསྶཀ སངྒཧེ པཱཎཱཏིཔཱཏཱདཱིནི པཱཔཀམྨཱནི ཀརོནྟཱནཾཔི ཙིཏྟསྶ ཨཱརམྨཎེ ཨུཛུཀརཎཾནཱམ ཛྷཱནེན ཝིནཱ ན སིཛ྄ཛྷཏཱིཏི ཝུཏྟཾ སཏྟཛྷཱནངྒཱནཱིཏི. ཀལྱཱཎེཝཱ པཱཔཀེཝཱ ཨཱརམྨཎེ ཨུཛུཀཾ ཙིཏྟཔཊིཔཱདནསངྑཱཏསྶ ཨུཔནིཛ྄ཛྷཱཡན ཀིཙྩསྶ ཨངྒཱནཱིཏི ཨཏྠོ. ཏཏྠ དོམནསྶཾ ཨཀུསལཛ྄ཛྷཱནངྒཾ. སེསཱནི ཀུསལཱཀུསལཱབྱཱཀཏཱནཱིཏི. ཀལྱཱཎཀམྨ པཱཔཀམྨསངྑཱཏཱསུ སུགཏི དུགྒཏི ཝིཝཊྚསངྑཱཏཱསུཙ ནཱནཱདིསཱསུ ཏཾཏཾདིསཱཏི མུཁཔྤཝཏྟིསངྑཱཏཱ ཙིཏྟསྶ གཏིནཱམ སམྨཱཝཱ མིཙྪཱཝཱ པཝཏྟེཧི དསྶནཱདཱིཧི ཨེཝ སིཛ྄ཛྷཏཱིཏི ཝུཏྟཾ དྭཱདསམགྒངྒཱནཱིཏི. ཙིཏྟསྶ ཨུཛུགཏིཡཱཝཱ ཝངྐགཏིཡཱཝཱ གམནསྶ པཐངྒཱནི ཨུཔཱཡངྒཱནཱིཏི ཨཏྠོ. ¶ ཏཏྠ མིཙྪཱདིཊྛི མིཙྪཱསངྐཔྤ མིཙྪཱཝཱཡཱམ མིཙྪཱསམཱདྷཡོ པཱཔཀམྨ དུགྒཏིབྷཝ སངྑཱཏཱསུ ཨཧིཏདིསཱསུ ཙིཏྟསྶ ཝངྐགཏིཡཱ གམནསྶ ཨུཔཱཡངྒཱནི, ཨིཏརཱནི ཀལྱཱཎཀམྨ སུགཏིབྷཝ ཝིཝཊྚདྷམྨསངྑཱཏཱསུ ཧིཏདིསཱསུ ཨུཛུགཏིཡཱཏི དཊྛབྦཾ. ཏཏྠ པཱཎཱཏིཔཱཏཀམྨེ ཝིཏཀྐ ཝིཙཱར དོམནསྶེཀགྒཏཱ སངྑཱཏཾ ཙཏུརངྒིཀཛ྄ཛྷཱནཾ མིཙྪཱསངྐཔྤ མིཙྪཱཝཱཡཱམ མིཙྪཱསམཱདྷི སངྑཱཏོ ཏིཡངྒཱིཀམགྒོཙ ཝེདིཏབྦོ. ཨེཝཾ སེསེསུ སུཙརིཏདུཙྩརིཏཀམྨེསུ ཛྷཱནམགྒཱ ཨུདྡྷརིཏབྦཱ. ཝིབྷངྒེ པན སུཏྟནྟེསུཙ མིཙྪཱཝཱཙཱ མིཙྪཱཀམྨནྟོ མིཙྪཱཨཱཛཱིཝོ མིཙྪཱསཏཱིཏི ཨིམེཔི ཙཏྟཱརོ ཨཱགཏཱ. ཨིམེ པན ཝིསུཾ ཙེཏསིཀདྷམྨཱ ནཧོནྟི. ཏཐཱ ཏཐཱ པཝཏྟཱནཾ ཙཏུནྣཾ ཁནྡྷཱནཾ ཨདྷིཝཙནནྟི ཀཏྭཱ ཨིདྷ ནགཧིཏཱ.

[༢༡༠] ཡཾ པན ཝིབྷཱཝནིཡཾ

‘‘སུགཏི དུགྒཏཱིནཾ ནིབྦཱནསྶ ཙ ཨབྷིམུཁཾ པཱཔནཏོ མགྒཱ; ཏེསཾ པཐབྷཱུཏཱནི ཨངྒཱནི མངྒཱནཱི’’ཏི ཝུཏྟཾ; ཏཾ ན སུནྡརཾ;

ན ཧི ཨངྒཱནི མགྒཱནཾ པཐབྷཱུཏཱནིནཱམ ཧོནྟི; མགྒསདྡོཡེཝ པཐཔརིཡཱཡོ ཨཊྛཀཐཱསུ ཝུཏྟོ ན ཨངྒསདྡོཏི;

[༢༡༡] ཡཉྩ ཏཏྠ

‘‘མགྒསྶཝཱ ཨཊྛངྒིཀསྶ ཨངྒཱནི མགྒངྒཱནཱི’’ཏི ཝུཏྟཾ. ཏཾཔི ཨནུཔཔནྣཾ.

ཨིདྷ ཧི ཀཏྠཙི ཙིཏྟེ ཏིཡངྒིཀོ ཀཏྠཙི ཙཏུརངྒིཀོཏིཨཱདིནཱ ནཱནཱམགྒོཝ ཨདྷིཔྤེཏོཏི. ཨཱདྷིཔཙྩཊྛེན ཨིནྡྲིཡཱནི. ཀིཉྩ ཨཱདྷིཔཙྩཾ. ཨཏྟཱདྷཱིནཝུཏྟིཀེ དྷམྨེ ཨཏྟནོ གཏིཡཾ སབྦསོ ཝཏྟེཏུཾ སམཏྠབྷཱཝོ. ཨིཏི ཏེསུ ཏེསུ ཀིཙྩེསུ ཨཏྟནོ ཨཱདྷིཔཙྩསངྑཱཏཾ ཨིནྡཊྛཾ ཀརོནྟི སཱདྷེནྟཱིཏི ཨིནྡྲིཡཱནི. ཨིནྡཊྛཾ ཀཱརེནྟཱིཏིཔི ཨིནྡྲིཡཱནི. ཨིསྶརཱ ཨདྷིཔཏིནོཏི ཝུཏྟཾ ཧོཏི. ཏཏྠ པཉྩཙཀྑཱདཱིནི དསྶནཱདིཀིཙྩེསུ ཙཀྑུཝིཉྙཱཎཱདཱིནཾ ཨིསྶརཱཧོནྟི. བལཝདུབྦལམནྡ ཏིཀྑཱདཱིསུ ཨཏྟཱཀཱརཱནུཝཏྟཱཔནཏོ. བྷཱཝདྭཡཾ ཨིཏྠཱཀཱརཱདིཝསེན པཝཏྟིཡཾ ཙཏུསམུཊྛཱནིཀ རཱུཔཱནཾ སཀལཁནྡྷཔཉྩཀསྶེཝ ཝཱ ཨིསྶརོ ཧོཏི. ཨཉྙཐཱ ཨཔྤཝཏྟིཏོ. ¶ ཏཐཱ ཧི ཡསྨིཾ སནྟཱནེ པཊིསནྡྷིཡཾ ཨིཏྠིབྷཱཝོ པཝཏྟཏི. ཏསྨིཾ སབྦེ ཀམྨཱདིཔཙྩཡཱ ཙཏུསམུཊྛཱནརཱུཔསནྟཏིཾ སམུཊྛཱཔེནྟཱ ཨིཏྠཱཀཱརསཧིཏམེཝ སམུཊྛཱཔེནྟི, ནོ ཨཉྙཐཱ. ཚནྡཙིཏྟཱདྷིཔྤཱཡཱཔི ཏསྨིཾ མནྡཱཀཱརསཧིཏཱཝ པཝཏྟནྟི. ཏབྦིཔརཱིཏེན པུརིསསནྟཱནཾ ཝེདིཏབྦཾ. ཛཱིཝིཏདྭཡཾ རཱུཔཱ རཱུཔསནྟཏཱིནཾ རཏྟི དིཝ མཱས སཾཝཙྪརཱནུཀྐམེན ཨདྡྷཱནཕརཎེ སཧཛཱཏདྷམྨཱནཾ ཨིསྶརོ ཧོཏི. ཏེསཾ ཏདཱཡཏྟཝུཏྟི ཀཏྟཱ. མནོ ཝིཛཱནནཀིཙྩེ. ཝེདནཱཔཉྩཀཾ ཏཐཱ ཏཐཱ ཨཱརམྨཎརསཱནུབྷཝནེ. སདྡྷཱ ཨཱརམྨཎཱཝཱིམུཙྩནེ. ཝཱིརིཡཾ ཀམྨནི ཨལཱིན ཝུཏྟིབྷཱཝེ. སཏི ཨཱརམྨཎུཔཊྛཱནེ. སམཱདྷི ཨཱརམྨཎེ ནིཙྩལཊྛི ཏིཡཾ. པཉྙཱ ཨསམྨོཧཀིཙྩེ སམྤཡུཏྟདྷམྨཱནཾ ཨིསྶརོ ཧོཏི. ཨནཉྙཱབྷིབྷཝནཱིཡབྷཱཝེན པཝཏྟནཏོ. ཡཐཱ ཧི སིལཱཡཾ པཐཝཱི སཧཛཱཏེཧི ཨནབྷིབྷཝནཱིཡཱ ཧོཏི. ཨཏྟནཱཝཏེ ཨབྷིབྷཝིཏྭཱ ཝིསུཾ ཨཝིཛྫམཱནེཝིཡ ཀཏྭཱ པཝཏྟཏི. ཡཐཱ ཙ ཨུདཀེ ཨཱཔོ ཨགྒིམྷི ཏེཛོ ཝཱཏེ ཝཱཡོ. ཨེཝཾ སམྤདམིདཾ དཊྛབྦཾ.

ཨཉྙཱཡིཏྠ པཊིཝིཛ྄ཛྷིཏྠཱཏི ཨཉྙཱཏཾ. ན ཨཉྙཱཏཾ ཨནཉྙཱཏཾ. ཙཏུསཙྩདྷམྨོ. ཨམཏཾཝཱ པདཾ. ཨནཉྙཱཏཾ ཉསྶཱམི ཛཱནིསྶཱམཱིཏི ཨནཉྙཱཏཉྙསྶཱམི. ཨཱཁྱཱཏིཀཾཔི ཧི པདཾ སཉྙཱསདྡབྷཱཝེ ཋིཏཾ ནཱམིཀཊྛཱནེ ཏིཊྛཏི. ཡཐཱ མཀྑལིགོསཱལོ ཨེཧིཔསྶི ཀོཏི. ཨེཝཉྷི སཏི ཏསྶ པདནྟརེན སཧ སམཱསབྷཱཝོ ནཝིརུཛ྄ཛྷཏཱིཏི. ཨནཉྙཱཏཉྙསྶཱམཱིཏི ཨེཝཾ པཊིཔནྣསྶ ཨིནྡྲིཡཾ ཨནཉྙཱ ཏཉྙསྶཱམཱིཏིནྡྲིཡཾ. ཨཱདིམནསིཀཱརཏོ པཊྛཱཡ ཏཱདིསེན ཨུསྶཱཧེན སཧ ཝིཔསྶནཾ ཨཱརབྷནྟསྶ ཏསྨིཾ ཨུསྶཱཧེ ཨཔཊིཔསྶདྡྷེཡེཝ སོཏཱམཏྟིམགྒཾ པཊིལབྷནྟསྶ ཨིནྡྲིཡནྟི ཝུཏྟཾ ཧོཏི. ཨཱཛཱནཱཏཱིཏི ཨཉྙཾ. ཏམེཝ ཨིནྡྲིཡནྟི ཨཉྙིནྡྲིཡཾ, པཐམམགྒེན ཨནཉྙཱཏཾ ཉཏྭཱཔི ཀིལེསཔྤཧཱནཀིཙྩསྶ ཨཔརིནིཊྛིཏཏྟཱ ཏསྶ ཛཱནནཀིཙྩསྶ ཝིཔྤཀཏབྷཱཝེན ཡཐཱ དིཊྛེ ཏསྨིཾ ཙཏུསཙྩདྷམྨེ ཨམཏཔདེཨེཝ ཝཱ པུནཔྤུནཾ ཛཱནནཀིཙྩ ཡུཏྟཱནཾ ཨིནྡྲིཡནྟི ཝུཏྟཾ ཧོཏི. ཨཉྙཱཏཱཝིནྡྲིཡནྟི ཨཉྙཱ ཏཱཝིནོ ¶ པརིནིཊྛིཏ ཨཱཛཱནན ཀིཙྩསྶ ཁཱིཎཱསཝསྶ ཨིནྡྲིཡནྟི ཨཉྙཱཏཱཝིནྡྲིཡཾ. ཏིཝིདྷཾ པེཏཾ ཏཐཱརཱུཔེ ཛཱནནེ སམྤཡུཏྟ དྷམྨཱནཾ ཨིསྶརོ ཧོཏཱིཏི ཝེདིཏབྦཾ.

ཏཏྠ ཨིམེསཾ སཏྟཱནཾ པཱཀཊེ རཱུཔཀཱཡེ ཨཏྟགཱཧདལ༹ྷཏྟཾ ཏབྦིམུཏྟིཙ ཨིམེསཾ ཨཔརིཉྙཱཡ པརིཉྙཱཡཙ ཧོཏཱིཏི དཱིཔེཏུཾ ཨཱདིཏོ པཉྩ པསཱདིནྡྲིཡཱནི ཝུཏྟཱནི. ཏསྶ ཨཏྟསྶ ཨིཏྠིཔུམ ཏཱབྷེདོ ཨིམེསཾ ཝསེན ཧོཏི. ཏསྨིཾ ཝཱ ཨིཏྠིཔུརིས གཱཧོ ཏབྦིམུཏྟིཙ ཨིམེསཾ ཨཔརིཉྙཱཡ པརིཉྙཱཡཙ ཧོཏཱིཏི དཱིཔེཏུཾ ཀདནནྟརཾ བྷཱཝིནྡྲིཡདྭཡཾ ཝུཏྟཾ. སོཙ ཨཏྟཱ ཨིམསྶ ཝསེན ཛཱིཝསཉྙཾ ལབྷཏི. ཏསྨིཾཝཱ ཛཱིཝགཱཧོ ཏབྦིམུཏྟིཙ ཨིམསྶ ཨཔརིཉྙཱཡ པརིཉྙཱཡཙ ཧོཏཱིཏི དཱིཔེཏུཾ ཏདནནྟརཾ ཛཱིཝིཏིནྡྲིཡཾ ཝུཏྟཾ. ཨིདཾ པན བྷཱཝིནྡྲིཡཏོ པུརེ ཝཏྟབྦཾཔི རཱུཔཱརཱུཔ མིསྶཀཏྟཱ ཨིདྷ ཝུཏྟནྟི དཊྛབྦཾ. ནཱམཀཱཡེ ཨཏྟགཱཧདལ༹ྷཏྟཾ ཏབྦིམུཏྟིཙ ཨིམསྶ ཨཔརིཉྙཱཡ པརིཉྙཱཡཙ ཧོཏཱིཏི དཱིཔེཏུཾ ནཱམིནྡྲིཡེསུ མནིནྡྲིཡཾ ཨཱདིཏོ ཝུཏྟཾ. སོཙ ཨརཱུཔཱི ཨཏྟཱ ཨིམེསཾ ཝསེན སཾཀིལིཊྛོ ཝིཔྥནྡིཏོཙ ཧོཏི. ཏསྨིཾཝཱ སུཁིཏདུཀྑིཏགཱཧོ ཏབྦིམུཏྟིཙ ཨིམེསཾ ཨཔརིཉྙཱཡ པརིཉྙཱཡཙ ཧོཏཱིཏི དཱིཔེཏུཾ ཏདནནྟརཾ པེདནིནྡྲིཡཔཉྩཀཾ ཝུཏྟཾ. ཏསྶ སཾཀིལིཊྛསྶ ཝོདཱནཔྤཏྟིཡཱ ཏཾཏཾགཱཧཝིམུཏྟིཡཱཝཱ པཊིཔཏྟིདསྶནཏྠཾ ཏདནནྟརཾ སདྡྷཱདིཔཉྩིནྡྲིཡཾ ཝུཏྟཾ. ཏཱཡ པཊིཔཏྟིཡཱ ཝོདཱནཔྤཏྟི ཡཱ ཨཱདི མཛ྄ཛྷ པརིཡོསཱན དསྶནཏྠཾ ཨནྟེ ཏཱིཎི ལོཀུཏྟརིནྡྲིཡཱནི ཝུཏྟཱནཱིཏི.

[༢༡༢] ཝིབྷཱཝནིཡཾ པན

‘‘ཨེཏྟཱཝཏཱ ཨདྷིཔྤེཏཏྠསིདྡྷཱིཏི ཨཉྙེསཾ ཨགཧཎནྟི’’ ཝུཏྟཾ. ཏཾ ན ཡུཛྫཏི.

ནཧི སནྟེསུཔི ཨཉྙེསུ ཨིནྡྲིཡབྷཱཝཱརཧེསུ དྷམྨེསུ ཨེཏྟཱཝཏཱ ཨདྷིཔྤེཏཏྠསིདྡྷིཡཱ ཏེསཾ ཨཉྙེསཾ བྷགཝཏོ ཐེརསྶཙ ཨགཧཎནྟི ཡུཏྟཾ ཝཏྟུཾ. ཨིནྡྲིཡབྷཱཝཱརཧསྶ ཨཉྙསྶ ཨསམྦྷཝཏོ. ཡདི ཧི སམྦྷཝེཡྻ, སཏཾཔི སཧསྶཾཔི གཎྷིསྶཏིཡེཝཱཏི. ¶ བལིཡནྟི ཨུཔྤནྣུཔྤནྣེ པཊིཔཀྑདྷམྨེ སཧནྟི མདྡནྟཱིཏི བལཱནི. ཡཐཱ ཨབལཱནཾ བལིཡནྟི. མདྡནྟེནཾ པརིསྶཡཱཏི. ཨེཏྠཙ ཨབལཱཏི དུབྦལཱ. ནནྟི ཧཱིནཝཱིརིཡཾ ཛནཾ. བལིཡནྟཱིཏི བལསཱ ཀརོནྟི ཨཛ྄ཛྷོཏྠརནྟི. པརིསྶཡཱཏི ཨབལཱ རཱགཱདི པརིསྶཡཱཏི ཨཏྠོ. ཨཔིཙ, པཊིཔཀྑདྷམྨེཧི ཨཀམྤིཡཊྛེན ཨཀྑོ བྷཎིཡཊྛེན བལཱནིནཱམ. ཏསྨཱ ཨསྶདྡྷིཡསངྑཱཏེན པཊིཔཀྑདྷམྨེན ཀམྤེཏུཾ ཨསཀྐུཎེཡྻཏཱ སདྡྷཱབལཾནཱམ. ཀོསཛྫསངྑཱཏེན ཀམྤེཏུཾ ཨསཀྐུཎེཡྻཏཱ ཝཱིརིཡབལཾནཱམ. མུཊྛསཙྩེན ཀམྤེཏུཾ ཨསཀྐུཎེཡྻཏཱསཏིབལཾནཱམ. ཨུདྡྷཙྩེན ཀམྤེཏུཾ ཨསཀྐུཎེཡྻཏཱསམཱདྷིབལཾནཱམ. ཨཝིཛྫཱཡཀམྤེཏུཾ ཨསཀྐུཎེཡྻཏཱ པཉྙཱབལཾ ནཱམ. སེསདུཀདྭཡཾ པན ཨཉྙམཉྙཾ པཊིཔཀྑེནཡོཛེཏབྦཾ.

[༢༡༣] ཝིབྷཱཝནིཡཾ པན

པཱཔབལདུཀཾ པཊིཔཀྑེན ཡོཛེཏུཾ ནལབྦྷཏཱིཏི ཀཏྭཱ ‘‘ཨཧིརིཀཱནོཏྟཔྤདྭཡཾ པན སམྤཡུཏྟདྷམྨེསུ ཐིརབྷཱཝེ ནེཝཱཏི’’ ཝུཏྟཾ. ཏཾ ན སུནྡརཾ.

སམྤཡུཏྟདྷམྨེསུ ཐིརབྷཱཝོཏིཙ པཊིཔཀྑེཧི ཨཀམྤིཡཏཱ ཏིཙ ཨཏྠཏོ ནཱནཏྟཱབྷཱཝཏོཏི. ཝཱིརིཡསམཱདྷིབལཱནི ཀུསལཱཀུསལཱབྱཱཀཏཱནི. ཨཧིརིཀཱནོཏྟཔྤཱནི ཨཀུསལབལཱནི. སེསཱནི ཀུསལཱབྱཱཀཏཱནཱིཏི. ཨདྷིཔཏཱིཏི ཨེཏྠ པཏཱིཏི སཱམི ཨིསྶརོ. སོ པན པདེས ཨིསྶརོ སཀལིསྶརོཏི དུཝིདྷོ. ཏཏྠ ཨིནྡྲིཡཱནི པརེསཾ ཝིསཡེ སཡཾ པརཝསེ ཝཏྟིཏྭཱ ཨཏྟནོ ཝིསཡེཨེཝ པརེཧི ཨཏྟནོ ཝསེ ཝཏྟཱཔེནྟཱིཏི པདེསིསྶརཱ ནཱམ. པུབྦཱཏི སངྑཱརཝསེན པུབྦཱགམནཝསེན ཝཱ ཝིསེསེཏྭཱ པཝཏྟཾ ཨདྷིཔཏིཊྛཱནཾ པཏྭཱ པན ཨཉྙོ དུཏིཡོ ཨིསྶརོནཱམ ནཏྠི. ཏསྨཱ ཨདྷིཀོ པཏཱིཏི ཨདྷིཔཏི. ཨཏྟཱ དྷཱིནཝུཏྟཱིནཾ པཏཱིཏི ཨདྷིཔཏཱིཏིཙ ཝདནྟི.

ཚནྡོཨེཝ ཨདྷིཔཏཱིཏི ཚནྡཱདྷིཔཏི. ཚནྡཝཏོ ཀིཾནཱམ ཀམྨཾ ནསིཛ྄ཛྷཏཱིཏི ཨེཝཾ པུབྦཱབྷིསངྑཱརཝསེནཝཱ པུབྦེ ཨཏཱིཏབྷཝེསུ སུཊྛུ ཨཱསེཝིཏཚནྡཱགམནཝསེནཝཱ ཏེསུ ཏེསུ ཀལྱཱཎ པཱཔཀམྨེསུ སམྤཡུཏྟདྷམྨེ མཧོགྷོཝིཡ ཏིཎཔཎྞཀསཊེ ཨཏྟཔརཱདྷཱིནེ ¶ ནིཙྩཾ པགྒཧིཏདྷུརེ ཀཏྭཱ པཝཏྟོ ཀཏྟུཀམྱཏཱ ཚནྡོ. ཨེས ནཡོ སེསེསུཔི. ནནུ ཙེཏྠ པཙྪིམཱ ཏཡོ དྷམྨཱ ཨདྷིཔཏིབྷཱཝཾ གཎྷནྟཱ ཨིནྡྲིཡབྷཱཝཾ ཨཝིཛཧིཏྭཱཝ གཎྷནྟཱིཏི ཨདྷིཔཏིབྷཱུཏཱཝ སམཱནཱ ཨིནྡྲིཡཀིཙྩཝསེན པརཝསེཔི ཝཏྟནྟཱིཏི. སཙྩཾ, ཨཉྙཾ པན ཨདྷིཔཏིཀིཙྩཾ, ཨཉྙཾ ཨིནྡྲིཡཀིཙྩནྟི ནཏྠེཏྠ དོསོཏི. ཡཐཱ ཧི རཱཛཱ ཙཀྐཝཏྟཱི ཨེཀསྶ ཨཏྟནོ པུརོཧིཏསྶ སནྟིཀེ ཨེཀཾ དིབྦཝིཛྫཾ གཎྷཱཏི. ན ཨེཏྟཱཝཏཱ རཱཛཱ ཙཀྐཝཏྟིནཱམ ནཧོཏི. ནཙ ཝིཛྫཱཧེཏུ ཨཉྙསྶ ཝསེན ཝཏྟཏི. ཨཉྙཉྷི ཙཀྐཝཏྟི རཛྫཀིཙྩཾ, ཨཉྙཾ ཝིཛྫཱགཧཎ ཀིཙྩནྟི. ཨེཝཾ སམྤདམིདཾ དཊྛབྦཾ. ཏཏྠ ཨདྷིཔཏིཀིཙྩཾནཱམ ཏཾཏཾཀིཙྩ ཝིསེསཾ ཨནཔེཀྑིཏྭཱ ཨཏུལྱབལེན ཨབྷིབྷཝིཏྭཱ སཧཛཱཏ དྷམྨེ ཨཏྟནོ ཨཏྟནོ ཀིཙྩེསུ ཨནིཝཏྟམཱནེ ཀཏྭཱ དྷུར ཝཱཧིཏཱ. ཨིནྡྲིཡཀིཙྩཾ པན ཝིཛཱནནཱདིཀིཙྩཾ ཨཱརབྦྷ པཝུཙྩཏཱིཏི.

ཨཱཧརནྟི སཧཛཱཏཱདིཔཙྩཡསཱམཉྙཏོ ཨཏིརེཀེན ཨསཱདྷཱརཎཔཙྩཡསཏྟིཝིསེསེན ཧརནྟི པཝཏྟེནྟཱིཏི ཨཱཧཱརཱ. ཨཱཧརནྟིཝཱ ཨཛ྄ཛྷཏྟསམྦྷཱུཏཱ ཏེ ཏེ པཙྩཡདྷམྨཱ པཙྩཡུཔྤནྣདྷམྨཱཙ ཨཏྟཱནཉྩེཝ ཨཏྟནོ ཨཏྟནོ པཙྩཡཀིཙྩཾ པཙྩཡུཔྤནྣཀིཙྩཉྩ སུཊྛུ ཧརནྟི ཝཧནྟི ཨེཏེཧཱིཏི ཨཱཧཱརཱ. ཡཐཱཧསབྦེ སཏྟཱ ཨཱཧཱརཊྛིཏིཀཱཏི. ཨེཏྠཙ སབྦེ སཏྟཱཏི ཨེཏེན སབྦེ ཨཛ྄ཛྷཏྟསམྦྷཱུཏཱ པཙྩཡཔཙྩཡུཔྤནྣདྷམྨཱ ཝུཏྟཱ. ཨཱཧཱརཊྛིཏིཀཱཏི པཙྩཡཊྛིཏིཀཱ. ཡཐཱརཧཾ ཙཏུཝཱིསཏིཔཙྩཡེཧི ཋིཏིསབྷཱཝཱཏི ཨཏྠོ. ནནུཙེཏྠ པཙྩཡཱཧཱརོཝ ཝུཏྟོ. ན ཨཱཧཱརཔཙྩཡོ. ཨིདྷ པན ཙཏུབྦིདྷོ ཨཱཧཱརཔཙྩཡདྷམྨོཝ ཝུཏྟོཏི. སཙྩཾ, པཙྩཡཊྛེན པན ཨཱཧཱརནཱམཀཱནཾ སབྦེསཾ ཙཏུཝཱིསཏིཔཙྩཡདྷམྨཱནཾ མཛ྄ཛྷེ ཡེདྷམྨཱ ཙཏྟཱརོ ཨཱཧཱརཱཏི ཝིསེསེཏྭཱ ཝུཏྟཱ. ཏེ ཏེསཾ པཙྩཡཱཧཱརཱནཾཔི ཨཱཧཱརབྷཱུཏཱཏི སིདྡྷཱ ཧོནྟཱིཏི. ཨིམསྨིཾ ཨཏྠེ ཙཏུནྣཾ ཨཱཧཱརཱནཾ མཧནྟ བྷཱཝོ པཱཀཊོ ཧོཏཱིཏི.

ཏཏྠ ཡཐཱ ཡཝབཱིཛཱནཾཝཱ སཱལིབཱིཛཱནཾཝཱ ཨཱནུབྷཱཝོ ནཱམ ཀལི༹རངྐུརཱནཾ ཨུཔྤཱདཱན པདྷཱནཾ ཧོཏི. ཏཏོཔརཾ པན སསྶབྷཱཝཾ ¶ པཏྭཱ ཚ པཉྩ མཱསེ ཝཌྜྷིཡཱཝཱ ཋིཏིཡཱཝཱ པཐཝི རསཨཱཔོརསཱནཾ ཨཱནུབྷཱཝོ པདྷཱནཾ ཧོཏི. ཨེཝམེཝཾ ཀབལཱི༹ ཀཱརཱཧཱརཱུཔཛཱིཝཱིནཾ ཀཱམསཏྟཱནཾ ཀམྨསྶ ཨཱནུབྷཱཝོནཱམ པཊིསནྡྷིརཱུཔུཔྤཱདནེ པདྷཱནཾ ཧོཏི. ཏཏོཔརཾ པན ཡཱཝཏཱཡུཀཾ ཝཌྜྷཱིཡཱཝཱཋིཏིཡཱཝཱ ཨུཏུཨཱཧཱརཱནཾ ཨཱནུབྷཱཝོ པདྷཱནཾ ཧོཏི. ཀམྨཛརཱུཔཱནི ཧི ཡཱཝ ཨཱསནྣམརཎཱ པཝཏྟམཱནཱནིཔི ཨུཏུཨཱཧཱརེཧི ཨནུགྒཧིཏཱནིཨེཝ པཝཏྟནྟི. ཨུཏུཙ ཨཱཧཱརུ པཏྠམྦྷིཏོཡེཝ ཨཏྟནོ ཀིཙྩཾ ཀརོཏི. ཏསྨཱ ཏེསཾ སཏྟཱནཾ ཙཏུསནྟཏིརཱུཔཾ ཀབལཱི༹ཀཱརཱཧཱརེན ཨནུཔཏྠམྦྷཱིཡམཱནཾ ཙིརཾ ནཔཝཏྟཏི. ཨུཔཏྠམྦྷཱིཡམཱནཾཨེཝ ཡཱཝཏཱཡུཀཾ པཝཏྟཏི. ཡཐཱཙ སཀུཎཱཝཱ ཌཾསམཀསཱ དཡོཝཱ ཏུཎྜེན ཨཱཧཱརཾ གཧེཏྭཱ ཨཏྟབྷཱཝཾ པོསེནྟི. ཏུཎྜེ ཨསནྟེ ཨཱཧཱརཾ ཨལབྷནྟཱ མརནྟི. ཨེཝམེཝ ཨིམེ སཏྟཱ ཕསྶེན ཨཱརམྨཎེསུ རསཾ གཧེཏྭཱ ཝེདནཱསངྑཱཏཾ ཨུཔབྷོགཔརིབྷོགཾ སམྤཱདེཏྭཱ ཏཎྷཱཝེཔུལླཾ པཏྭཱ ཏིཝིདྷཾ ཝཊྚཾ པཱུརེཏྭཱ ཡཱཝཛྫཏནཱཔི ཝཊྚེ ཨནུཀཎྛམཱནཱ པཝཏྟནྟི.

ཡདི ཧི ཕསྶོནཱམ ན སིཡཱ, ཨཱརམྨཎརསཾ ཨལབྷིཏྭཱ ཝེདནཱ པརིབྷོགརཧིཏེན ཏཎྷུཔྤཏྟིཡཱ ཨོཀཱསོ ནཏྠཱིཏི ཏིཝིདྷཝཊྚམེཝ ནསིཡཱཏི. ཡཐཱཙ ཏེ སཀུཎཱདཡོ པཀྑེ ཝིཡཱུཧིཏྭཱ ཨནྟརཱ ཨཔཏམཱནཱ རུཀྑཏོ རུཀྑཾ ཝནཏོ ཝནཾ ཝིཙརིཏྭཱ ཨཏྟཱནཾ ཡཱཔེནྟི. པཀྑེསུ ཨསནྟེསུ གམནཾ ཨསམྤཱདེནྟཱ པཏིཏྭཱ མརནྟི. ཨེཝམེཝཾ ཨིམེ སཏྟཱ ཨཱཡཱུཧནལཀྑཎཱཡ ཙེཏནཱཡ ཙེཏཡིཏྭཱ ཀམྨསམངྒིཏཾ སམྤཱདེཏྭཱ བྷཝཏོ བྷཝཾ ཝིཙརིཏྭཱ ཡཱཝཛྫཏནཱ ཝཊྚེ སཾསརནྟི. ཡདི ཧི ཙེཏནཱནཱམ ན སིཡཱ, ཀམྨཝཊྚསྶ ཨབྷཱཝོ. ཏདབྷཱཝེཙ ཝིཔཱཀཝཊྚསྶ ཨབྷཱཝོ. ཏདབྷཱཝེཙ ཏདནུསཡིཏསྶ ཀིལེསཝཊྚསྶ ཨབྷཱཝོཏི ཝཊྚཾནཱམ ན སིཡཱཏི. ཡཐཱཙ ཏེ སཀུཎཱདཡོ ཙཀྑུནཱ གོཙརཊྛཱནཾཝཱ ཏཾཏཾདིསཱབྷཱགཾཝཱ ཝིབྷཱཝེཏྭཱ ཡཱཝཛཱིཝཾ ཨཏྟཱནཾ ཡཱཔེནྟི. ཙཀྑུསྨིཾ ཨསནྟེ ཀིཉྩིགཧེཏབྦཝཏྠུཾཝཱ གནྟབྦཊྛཱནཾཝཱ ཨལབྷིཏྭཱ ཏཏྠེཝ མརནྟི. ཨེཝམེཝཾ ¶ སམྤཡུཏྟཱ དྷམྨཱ ཨཱརམྨཎཝིཛཱནལཀྑཎེན ཝིཉྙཱཎེན ཏཾཏཾཨཱརམྨཎཾ ལབྷིཏྭཱ ཏསྨིཾ ཏསྨིཾ ཕསྶཱདཡོ ཨུཔྤཱདེཏྭཱ ཏིཝིདྷཾ ཝཊྚཾ ཝཊྚེནྟི. ཡདི ཧི ཝིཉྙཱཎཾནཱམ ན སིཡཱ, ཕསྶཱདཱིནཾ ཨཱརམྨཎལཱབྷོཡེཝ ནཏྠཱིཏི ཝཊྚམེཝ ན སིཡཱཏི. ཏེནཱཧ ཙཏྟཱརོ ཨཱཧཱརཱ.ལ. ཝིཉྙཱཎཾ ཙཏུཏྠནྟི. སཾཡུཏྟཀེཙ –

ཙཏྟཱརོམེ བྷིཀྑཝེ ཨཱཧཱརཱ བྷཱུཏཱནཾ ཝཱ སཏྟཱནཾ ཋིཏིཡཱ སམྦྷཝེསཱིནཾཝཱ སཏྟཱནཾ ཨནུགྒཧཱཡ ཀབལཱི༹ཀཱརོ ཨཱཧཱརོ ཨོལཱ༹རིཀོཝཱ སུཁུམོཝཱ, ཕསྶོ དུཏཱིཡོ, མནོསཉྩེཏནཱ ཏཏཱིཡཱ, ཝིཉྙཱཎཾ ཙཏུཏྠནྟི ཝུཏྟཾ.

ཏཏྠ བྷཱུཏཱནནྟི ཝུདྡྷིཔྤཏྟཱནཾ. སམྦྷཝེསཱིནནྟི ཀལལཱདི ཀཱལེ ཋིཏཱནཾ. ཙཏུནྣཾཔན ཨཱཧཱརཱནཾ ཡཐཱསམྦྷཝཾ ཨནམཏགྒེ སཾསཱརཝཊྚེཝཱ ཏསྨིཾ ཏསྨིཾ བྷཝེཝཱ ཋིཏིཡཱཝཱ ཨནུགྒཧཱཡཝཱ པཝཏྟི ཨཱཀཱརོ ཝུཏྟནཡེན ཝེདིཏབྦོ. ཨཊྛཀཐཱཡཾ པན ཀོཔནེཏྠ ཨཱཧཱརོ. ཀིཾ ཨཱཧཱརེཏཱིཏི. ཀབལཱི༹ཀཱརཱ ཧཱརོ ཨོཛཊྛམཀརཱུཔཱནི ཨཱཧཱརེཏི. ཕསྶཱཧཱརོ ཏིསྶོ ཝེདནཱ. མནོསཉྩེཏནཱཧཱརོ ཏཡོ བྷཝེ. ཝིཉྙཱཎཱ ཧཱརོ པཊིསནྡྷིནཱམརཱུཔནྟི ཝུཏྟཾ. ཏཾ པཱཀཊཕལཝསེན ཝུཏྟནྟི དཊྛབྦཾ. ཨོཛཊྛམཀརཱུཔུཔྤཱདནཾ པན ཀབལཱི༹ཀཱརཱཧཱརསྶ མཧནྟཾ ཀིཙྩཾ ནཧོཏི. ཙཏུསནྟཏིརཱུཔུཔཏྠམྦྷནམེཝ མཧནྟཾ. ཏེནེཝ ཧི པཱལི༹ཡཾ ཋིཏིཡཱཏིཙ ཨནུགྒཧཱཡཱཏིཙ ཝུཏྟཾ.

ཨཔིཙ ཡཐཱ ཨུཔནིསྶཡཱསེཝནཔཙྩཡཱ སུཏྟནྟི ཀཔརིཡཱཡཱ ཨབྷིདྷམྨཔརིཡཱཡཱཏིཙ དུཝིདྷཱ ཧོནྟི. ཏཐཱ ཨཱཧཱརཔཙྩཡོཔི དུཝིདྷོ. ཏཏྠ ཡཾ ཝུཏྟཾ མནོསཉྩེཏནཱཧཱརོ ཏཡོབྷཝེཏི. ཏཾ སུཏྟནྟིཀཔརིཡཱཡཾ སནྡྷཱཡ ཝུཏྟཾ. ནཧི པཊྛཱནེ ཨརཱུཔཱ ཧཱརཱ ཨསཧཛཱཏཱནཾ དྷམྨཱནཾ ཨཱཧཱརཊྛེན པཙྩཡཱནཱམ ཧོནྟཱིཏི. པཉྩཝིཉྙཱཎེསུ ཛྷཱནངྒཱནི ནལབྦྷནྟི. ཏཱནི ཧི དུབྦལཀིཙྩཊྛཱནཝཏྠུཀཏྟཱ རཱུཔཱདཱིསུ ཨབྷིནིཔཱཏམཏྟཱནི ཧོནྟཱིཏི ན ཏེསུ ཝིཛྫམཱནཱ ཝེདནཱ ཨེཀགྒཏཱ ཛྷཱནཀིཙྩཾ སཱདྷེནྟཱིཏི. ཝིཏཀྐཔཙྪིམཀཾ ཛྷཱནནྟིཙ ¶ ཝུཏྟཾ. ཛྷཱནངྒཱནཾ ནཱཡཀབྷཱུཏོཙ ཝིཏཀྐོ ཏེསུ ནཏྠཱིཏི ཏཏྠ ཏཱཝེདནཱ ཨེཀགྒཏཱཡོ ཏཾ ན སཱདྷེནྟཱིཏི. ཝཱིརིཡུཔཏྠམྦྷརཧིཏཱ དྷམྨཱ སམྤཡུཏྟདྷམྨེསུ ཐིརབྷཱཝཔྤཏྟཱ ནཧོནྟཱིཏི ཨཝཱིརིཡེསུ སོལ༹སཱཧེཏུཀཙིཏྟེསུ སམཱདྷིབལཀིཙྩཾ ན སཱདྷེཏི. ཝཱིརིཡཔཙྪིམཀཾ བལནྟི ཧི ཝུཏྟནྟི ཨཱཧ ཨཝཱིརིཡེསུ བལཱནི ནལབྦྷནྟཱིཏི. ཧེཏུརཧིཏཱ ཙ དྷམྨཱ ཝཊྚསྶ ཝིཝཊྚསྶཙ པཏྟིཡཱ པཐབྷཱཝཾ ནགཙྪནྟི. ཧེཏུཔཙྪིམཀོ མགྒོཏི ཧི ཝུཏྟནྟི ཨཱཧ ཨཧེཏུཀེསུ མགྒངྒཱནི ན ལབྦྷནྟཱིཏི. ཝིཙིཀིཙྪཱསམྤཡུཏྟེཙིཏྟེ ཨེཀགྒཏཱ ཨདྷིམོཀྑརཧི ཏཏྟཱ ཨེཀནྟེན སཾསཔྤནསབྷཱཝཱཡ ཝིཙིཀིཙྪཱཡ ཨབྷིབྷཱུཏཏྟཱ ཙ མགྒིནྡྲིཡབལབྷཱཝཱཡ བལཝཏཱི ནཧོཏཱིཏི ཝུཏྟཾ ཝིཙིཀིཙྪཱ ཙིཏྟེ ཨེཀགྒཏཱ མགྒིནྡྲིཡབལབྷཱཝཾ ན གཙྪཏཱིཏི. དྭིཧེཏུཀ ཏིཧེཏུཀ ཛཝནེསྭེཝཱཏི ཨེཏྠ དྭིཧེཏུཀ ཏིཧེཏུཀསདྡེན མོམཱུཧདྭཡཧསནཛཝནཱནི ནིཝཏྟེཏི. ཛཝནསདྡེན ཏིབྷཱུམཀཱནི དྭིཧེཏུཀཏིཧེཏུཀཝིཔཱཀཱནི ནིཝཏྟེཏི.

[༢༡༤] ཝིབྷཱཝནིཡཾ པན

‘‘དྭིཧེཏུཀཏིཧེཏུཀགཧཎེན ཨེཀཧེཏུཀེསུ ཨདྷིཔཏཱིནཾ ཨབྷཱཝཾ དསྶེཏཱི’’ཏི ཝུཏྟཾ, ཛཝནབྷཱཝསཱམཉྙཏྟཱ པན ཧསནཙིཏྟེཔི ཏེསཾ ཨབྷཱཝོ དསྶེཏབྦོཡེཝ ཧོཏཱིཏི.

ཡཐཱསམྦྷཝནྟི ལདྡྷཔུབྦཱཏི སངྑཱརསྶ ལདྡྷཔུབྦཱགམསྶ ཙ ཨེཀེཀསྶ ཨདྷིཔཏིནོ སམྦྷཝཱནུརཱུཔཾ ཨེཀོཝ ལབྦྷཏི. ན དུཏིཡོ. ཨིཏརཐཱ ཨདྷིཔཏིཨེཝ ནསིཡཱཏི. ཨེཝཉྩ ཀཏྭཱ པཊྛཱནེ ཡཐཱ ཨིནྡྲིཡཔཙྩཡཝིབྷངྒེ ཨརཱུཔིནོཨིནྡྲིཡཱ སམྤཡུཏྟཀཱནཾདྷམྨཱནཾ ཏཾསམུཊྛཱནཱནཉྩ རཱུཔཱནཾ ཨིནྡྲིཡཔཙྩཡེན པཙྩཡོཏི ཝུཏྟཾ. ན ཏཐཱ ཨདྷིཔཏིཔཙྩཡཝིབྷངྒེ. ཏཏྠ པན ཚནྡཱདྷིཔཏི ཚནྡསམྤཡུཏྟཀཱནནྟིཨཱདིནཱ ཨེཀེཀཱདྷིཔཏི ཝིབྷཱགཝསེནེཝ ཝུཏྟནྟི. ཨེཝཉྷི སཏི ཨདྷིཔཏི ཨིནྡྲིཡཱནཾ ཝིསེསོ པཱཀཊོ ཧོཏཱིཏི. ནཝེརིཏཱཏི ནཝ ཨཱིརིཏཱ ཀཐིཏཱ. ཀུསལཱ ཀུསལཱ བྱཱཀཏེཧི སམཱཀིཎྞོ ཀུསལཱདི སམཱཀིཎྞོ. [མིསྶཀསངྒཧོ]

༡༦༤. ཙཏྟཱརི ¶ སཙྩཱནི བུཛ྄ཛྷཏཱིཏི བོདྷི. བུཛ྄ཛྷནྟིཝཱ ཏཱནི ཏཾ སམངྒིནོ ཨེཏཱཡཱཏི བོདྷི. ཙཏུམགྒཉཱཎཾ. ཝུཏྟཉྷེཏཾ མཧཱ ནིདྡེསེ བོདྷི ཝུཙྩཏི ཙཏཱུསུ མགྒེསུ-ཉཱཎནྟི. པཀྑོཏི ཀོཊྛཱསོ སམྦྷཱརོ. བོདྷིཡཱ པཀྑེ བྷཝཱཏི བོདྷིཔཀྑིཡཱ. ཨདྷིསཱིལཱ དྷིཙིཏྟཱ དྷིཔཉྙཱ སངྑཱཏཱསུ ཏཱིསུ སིཀྑཱསུ པརིཡཱཔནྣཱནཾ སཏྠུསཱསནདྷམྨཱནཾ ཨེཏཾནཱམཾ. ཏེ པན ཀོཊྛཱསཏོ སཏྟ ཝིདྷཱ ཧོནྟཱིཏི ཨཱཧ ཙཏྟཱརོསཏིཔཊྛཱནཱཏིཨཱདི. སམྤཡུཏྟ དྷམྨེསུ པམུཁཱ པདྷཱནཱ ཧུཏྭཱ ཀཱཡཱདཱིསུ ཨཱརམྨཎེསུ ཏིཊྛནྟི ནཱནཱརམྨཎེསུ ཙིཏྟགམནཾ ནིཝཏྟེཏྭཱ ཏེསྭེཝ ཀཱཡཱདཱིསུ ཙིཏྟ ནིབནྡྷནཝསེན པཝཏྟནྟཱིཏི པཊྛཱནཱནི. སཏིཨེཝ པཊྛཱནཱནཱིཏི སཏི པཊྛཱནཱནི. ཙཏྟཱརིསཏིཔཊྛཱནཱནཱིཏི ཝཏྟབྦེ དྷམྨབྷཱཝཾ ཨཔེཀྑིཏྭཱ ཙཏྟཱརོསཏིཔཊྛཱནཱ ཏིཝུཏྟནྟི དཊྛབྦཾ. ཀཱཡེཨནུཔསྶནཱ ཀཱཡཱ ནུཔསྶནཱ. རཱུཔཀཱཡེ རཱུཔསམཱུཧེ ཨསྶཱསཔསྶཱསཱདིཀསྶ ཨཝཡཝཀཱཡསྶ ཏཾཏཾཀཱཡབྷཱཝེནཝཱ ཨནིཙྩཱདིབྷཱཝེནཝཱ ཡཱཝ ཏསྨིཾ ཏསྨིཾ ཀཱཡེ སམྨོཧོ པཧིཡྻཏི. ཏཱཝ པུནཔྤུནཾ ནིརནྟརཾ སམནུཔསྶནཱཏི ཨཏྠོ. ནཝཔྤབྷེདཱསུ ཝེདནཱསུ སུཁཝེདནཱདི ཀཱཡཨཝཡཝཝེདནཱཡ ཏཾཏཾ ཝེདནཱབྷཱཝེན ཨུདཡབྦཡཝསེན ཙ ཨནུཔསྶནཱ ཝེདནཱནུཔསྶནཱ. སོལ༹ས པབྷེདེསུ སརཱགཱ དཱིསུ ཙིཏྟེསུ སརཱགཱདིཀསྶ ཨཝཡཝཙིཏྟསྶ ཏཾཏཾ ཙིཏྟབྷཱཝེན ཨུདཡབྦཡཝསེནཙ ཨནུཔསྶནཱ ཙིཏྟཱནུཔསྶནཱ. པཉྩཔབྷེདེསུ ནཱིཝརཎཱདཱིསུ དྷམྨེསུ ཀཱམཙྪནྡཱདིཀསྶ ཨཝཡཝདྷམྨསྶ ཏཾ ཏཾ དྷམྨབྷཱཝེན ཨུདཡབྦཡཝསེནཙ ཨནུཔསྶནཱ དྷམྨཱནུཔསྶནཱ.

[༢༡༥] ཡཾ པན ཝིབྷཱཝནིཡཾ

‘‘ཀུཙྪིཏཱནཾ ཀེསཱདཱིནཾ ཨཱཡོཏི ཀཱཡོ. ཨསྶཱས པསྶཱསཱནཾཝཱ སམཱུཧོ ཀཱཡོ’’ཏི ཝུཏྟཾ. ཏཾ ན སུནྡར མེཝ.

[༢༡༦] ཡཉྩ ཏཏྠ

‘‘ཀཱཡསྶ ཨནུཔསྶནཱ ཀཱཡཱནུཔསྶནཱ’’ཏི ཝུཏྟཾ. ཏཾཔི ན སུནྡརཾ.

ཀཱཡེ ¶ ཀཱཡཱནུཔསྶཱི ཝིཧརཏཱིཏི ཧི ཝུཏྟཾ. ཨེཏེན ཧི ཀཱཡེ ཨནུཔསྶནཱ ཀཱཡཱནུཔསྶནཱཏི ཨཡམཏྠོཝ པདྷཱནཏོ དསྶིཏོཏི.

[༢༡༧] ཡཉྩ ཏཏྠ

‘‘ཝེདནཱནཾ ཝསེན ཨནུཔསྶནཱ’’ཏི ཝུཏྟཾ. ཏཾཔི ན སུནྡརཾ. ཝེདནཱསུ ཝེདནཱནུཔསྶཱིཏི ཧི ཝུཏྟཾ. ཏཐཱ ཙིཏྟཱནུཔསྶནཱ པདེཔི.

[༢༡༨] ཡཾཔི ཏཏྠ

‘‘སཉྙཱསངྑཱརཱནཾ དྷམྨཱནཾ བྷིནྣལཀྑཎཱནམེཝ ཨནུཔསྶནཱ དྷམྨཱནུཔསྶནཱ’’ཏི ཝུཏྟཾ. ཏཾཔི ན སུནྡརམེཝ.

ན ཧི ཀཏྠཙི པཱལི༹ཡཾ སཉྙཱསངྑཱརཱཝ ཝིསེསེཏྭཱ དྷམྨཱཏི ཝུཏྟཱ ཨཏྠཱིཏི. པཱལི༹ཡཉྷི ཚནཱིཝརཎཱ པཐམཾ དྷམྨཱཏི ཝུཏྟཱ. ཏཏོ པཉྩུཔཱདཱནཀྑནྡྷཱ. ཏཏོ དྭཱདསཱཡཏནཱནི. ཏཏོ སཏྟབོཛ྄ཛྷངྒཱ. ཏཏོ ཙཏྟཱརི སཙྩཱནཱིཏི. ཡདིཨེཝཾ ཨེཀཱཡ དྷམྨཱནུཔསྶནཱཡ ཝུཏྟཱཡ ཨིཏརཱཔི སིདྡྷཱཏི སཏིཔཊྛཱནཾ ཨེཀམེཝ ཝཏྟབྦཾ, ན ཙཏྟཱརོཏི.ན. ཡོ ཧི དྷམྨཱནུཔསྶནཱཡཾ རཱུཔཀྑནྡྷོ ཝུཏྟོ. སོ རུཔྤནལཀྑཎཱནུཔསྶནཝསེན ཝུཏྟོ. རུཔྤནལཀྑཎཉྷི ནིབྦཏྟིཏཔར མཏྠདྷམྨོ. སོཙ ཏཐཱ ཨནུཔསྶནྟསྶ ཝིསེསཏོ སུཁུམསྶ ཨཏྟཝིཔལླཱསསྶ པཧཱནཱཡ ཧོཏཱིཏི. ཀཱཡོཏི པན ཏཾཏཾ སམཱུཧབྷཱུཏརཱུཔདྷམྨཝསེན ཝེདིཏབྦོ. ནརུཔྤནལཀྑཎཝསེན. ནཙ ཏཾཏཾ ཀཱཡབྷཱཝེན གཧིཏོ ཏཾཏཾ རཱུཔདྷམྨསམཱུཧོ ནིབྦཏྟིཏ པརམཏྠདྷམྨོནཱམ ཧོཏི. པཉྙཏྟིམིསྶཀཏྟཱ. སོཙ ཏཐཱ ཨནུཔསྶནྟསྶ ཝིསེསཏོ ཨོལཱ༹རིཀསྶ སུབྷཱདི ཝིཔལླཱསསྶ པཧཱནཱཡ ཧོཏཱིཏི. ཏཐཱ ཝེདནཱཙིཏྟེསུཔི ཨོལཱ༹རིཀཝིཔལླཱསོ སུཁུམཝིཔལླཱསོཏི དྭེ དྭེ ཝིཔལླཱསཱ ཧོནྟི. ཏཏྠ ཨཏྟུཔནིབནྡྷཱ ནིཙྩསུཁ ཝིཔལླཱསཱ ཨོལཱ༹རིཀཱ. ཨཏྟཝིཔལླཱསོ སུཁུམོ. ཏཏྠ ཝེདནཱ ཙིཏྟཱ ནུཔསྶནཱ ཨོལཱ༹རིཀཝིཔལླཱསཱནཾ པཧཱནཱཡ ཝིསུཾ ཝུཏྟཱ. དྷམྨེསུ ཝེདནཱཀྑནྡྷཝིཉྙཱཎཀྑནྡྷཱ སུཁུམ ཝིཔལླཱས པཧཱནཱཡཱཏི. ཏསྨཱ ཙཏྟཱརོཝ སཏིཔཊྛཱནཱ ཝཏྟབྦཱཏི. སམྨཱ པདཧནྟི ཨེཏེཧཱིཏི སམྨཔྤདྷཱནཱནི. ཀཱམཾ ཏཙོཙ ¶ ནྷཱརུཙ, ཨཊྛིཙ ཨཝསིསྶཏུ. ཨུཔསྶུསྶཏུ མེ སརཱིརེ མཾསལོཧིཏཾ. ཡནྟཾ པུརིསཐཱམེན པུརིསཔརཀྐམེན པཏྟབྦཾ. ན ཏཾ ཨཔཏྭཱ ཝཱིརིཡསྶ སཎྛཱནཾ བྷཝིསྶཏཱིཏི ཨེཝཾ ཨནིཝཏྟནཝུཏྟི ཝསེན པཝཏྟསྶ སམྨཱཝཱཡཱམསྶ ཨེཏཾ ནཱམཾ. སོ པན ཏཐཱ པཝཏྟོ ཨེཀོཔི སམཱནོ ཀིཙྩསིདྡྷིཝསེན ཙཏུདྷཱ ཧོཏཱིཏི. ཝུཏྟཾ ཨུཔྤནྣཱནནྟིཨཱདི.

ཏཏྠ ཨུཔྤནྣཱནཾཔཱཔཀཱནནྟི ཨསུཀསྨིཾ ཀཱལེ དེསེ ཋཱནེ ཝཱ ཨཧཾ ཨིདཉྩིདཉྩ ནཱམ པཱཔཾ ཨཀཱསིཾ, ཨིདཉྩིདཉྩནཱམ མཡ྄ཧཾ ཨུཔྤནྣནྟི ཨེཝཾ ཨཏྟནོ སནྟཱནེ ཨུཔྤནྣབྷཱཝེན ཝིདིཏཱནཾ ཨཀུསལཱནཾ. པཧཱནཱཡཱཏི ཏེསཾ ཨཏྟནོ སནྟཱནེ ཨཛྫཏགྒེ ཡཱཝཔརིནིབྦཱནཱཔུན ཨནུཔྤཱདདྷམྨཏཱཔཱདནཀརཎཏྠཾ. ཝཱཡཱམོཏི སཱིལ པཱུརཎ སམཐ ཝིཔསྶནཱབྷཱཝནཱཀམྨེསུ དལ༹ྷཾ ཝཱཡཱམོ. ཨནུཔྤནྣཱནནྟི ཨཏྟནོ སནྟཱནེ ཨུཔྤནྣཔུབྦནྟི ཨཝིདིཏཱནཾ པརསནྟཱནེསུཝཱ སུཏྟནྟེསུཝཱ དིསྭཱཝཱ སུཏྭཱཝཱ ཝིདིཏཱནཾ. ཨནུཔྤཱདཱཡཱཏི ཡེསཾ ཨཀུསལ མཱུལཱནཾ ཨཏྠིཏཱཡ ཨིམེསཾ སཏྟཱནཾ ཨཱིདིསཱནི ཀིལེསཛཱཏཱནི ཝཱ པཱཔཀམྨཱནིཝཱ ཨུཔྤཛྫནྟི. ཏཱནི མཡི ཝིཛྫནྟིཨེཝ. ཨཧཾཔི ཏེཧི ཀིལེསེཧིཝཱ ཀམྨེཧིཝཱ ཨཔརིམུཏྟོཡེཝ. ཨཧཾཔི སྭེཝཱ པརསུཝེཝཱ བྷཝནྟརེསུཝཱ ཏཱནི ཨཏྟནོ སནྟཱནེ ཨུཔྤཱདེསྶཱ མིཡེཝཱཏི ཨེཝཾ པཙྩཝེཀྑིཏྭཱ ཏེསཾ ཨཀུསལམཱུལཱནཾ ཨཏྟནོ སནྟཱནེ ཨུཔྤཏྟིཡཱ པཙྩཡསམུཙྪིནྡནཏྠཾ. ཨནུཔྤནྣཱནཾཀུསལཱནནྟི ཙཏུབྷཱུམཀེསུ ཀུསལདྷམྨེསུ སཏྟཝིསུདྡྷིཔབྷེདེསུ ཨིམེནཱམ ཝིསུདྡྷིདྷམྨཱ མཡཱ ཨཔྤཏྟཱ ཨནདྷིགཏཱཨེཝ ཧོནྟཱིཏི ཨེཝཾ ཉཏྭཱ སམཡེ ཨནཏིཀྐནྟེཨེཝ ཨཔྤཏྟཱནཾ ཨནདྷིགཏཱནཾ ཨུཔརི ཝིསུདྡྷིདྷམྨཱནཾ ཨདྷིགམནཏྠཱཡ.

ཨུཔྤནྣཱནཾ ཀུསལཱནཾ བྷིཡྻོ བྷཱཝཱཡཱཏི ཡཱནི སཱིལཱདཱིནི ཀུསལཱནི མཡི ཨུཔྤནྣཱནི. ཏཱནི ཡཱཝ ནིཡཱམཾ ནཨོཀྐམནྟི, ཏཱཝ མཡ྄ཧཾ ཨེཏཱནཱིཏི ཝཏྟུཾ ནཱརཧནྟི. སྭེཝཱ པརསུཝེཝཱ བྷཝནྟརཾ པཏྭཱཝཱ བྷིཛྫིསྶནྟི ཡེཝཱཏི ཨེཝཾ པཙྩཝེཀྑིཏྭཱ ཨཏྟནོ སནྟཱནེ ཨུཔྤནྣཱནཾ ཏེསཾ སབྦསོ ཨཀུཔྤདྷམྨཏཱཔཱདནཝསེན སུཊྛུཏརཾ ཝཌྜྷནཏྠཱཡ. ཨེཏེསུ པན ཙཏཱུསུ མུཁེསུ ཡེན ཀེནཙི ཨེཀེན མུཁེན ¶ ཨུཔྤནྣོ ཝཱཡཱམོ ཙཏུཀིཙྩསཱདྷཀོཨེཝ ཧོཏཱིཏི ཝེདིཏབྦོ. ཨཊྛཀཐཱཡཾ པན མགྒཀྑཎེ ཨེཝ ཨེཀསྶ ཏསྶ ཙཏུཀིཙྩསཱདྷཀཏཱ ཝུཏྟཱཏི.

ཨིཛ྄ཛྷནཾ ཨིདྡྷི, ཏསྶ ཏསྶ ཡོགཀམྨསྶ སིདྡྷི སམིདྡྷི ནིབྦཏྟཱིཏི ཨཏྠོ. སཱ པན སངྑེཔཏོ ཨབྷིཉྙེཡྻཱནཾ དྷམྨཱནཾ ཨབྷིཉྙཱསིདྡྷི, པརིཉྙེཡྻཱནཾ པརིཉྙཱསིདྡྷི, པཧཱཏབྦཱནཾ པཧཱནསིདྡྷི, སཙྪིཀཱ ཏབྦཱནཾ སཙྪིཀརཎསིདྡྷི, བྷཱཝེཏབྦཱནཾ བྷཱཝནཱསིདྡྷཱིཏི པཉྩཝིདྷཱ ཧོཏི. ཨིཛ྄ཛྷཏཱིཏིཝཱ ཨིདྡྷི སཏྠུསཱསནེ ཡོགཀམྨེན ཨིཛ྄ཛྷནྟཱནཾ སབྦེསཾ མཧགྒཏ ལོཀུཏྟརདྷམྨཱནཾ ནཱམཾ. པཛྫཏི ཨེཏེནཱཏི པཱདོ. ཨིདྡྷིཡཱ པཱདོཏི ཨིདྡྷིཔཱདོ. ཨིདྡྷིཔཏྟིཡཱ བལཝུཔཱཡོ པདྷཱནཀཱརཎནྟི ཝུཏྟཾ ཧོཏི. སོ པན ཙཏུནྣཾ ཨདྷིཔཏིདྷམྨཱནཾ ཝསེན ཙཏུདྷཱ ཧོཏཱིཏི ཝུཏྟཾ ཙཏྟཱརོ ཨིདྡྷིཔཱདཱཏིཨཱདི. ཨདྷིཔཏིབྷཱུཏོ ཚནྡོཝ ཨིདྡྷིཔཱདོཏི ཚནྡིདྡྷིཔཱདོ. ཨེསནཡོ སེསེསུཔཱིཏི. ཨེཏྠཙ སབྦེ མཧགྒཏཱནུཏྟརབྷཱུཏཱ ཨུཏྟརིམནུསྶ དྷམྨཱནཱམ ནཔཱཀཏིཀེན ཚནྡེནཝཱ ཝཱིརིཡེནཝཱ ཙིཏྟེནཝཱ པཉྙཱཡ ཝཱ ཨདྷིགནྟབྦཱ ཧོནྟི. ཡེན ཀེནཙི པལིབོདྷེན པཊིབཱཧིཏུཾ ཨསཀྐུཎེཡྻེན ཨདྷིཔཏིབྷཱཝཔཏྟེན ཚནྡཱདིནཱཨེཝ ཨདྷིགནྟབྦཱ. ཏསྨཱ ཨིམེ ཙཏྟཱརོ དྷམྨཱ ཨདྷིཔཏིབྷཱུཏཱཝ ཨིདྷ ཨདྷིཔྤེཏཱཏི དཊྛབྦཱཏི.

[༢༡༩] ཡཾཔན ཝིབྷཱཝནིཡཾ

‘‘ཨིཛ྄ཛྷཏི ཨདྷིཊྛཱནཱདིཀཾ ཨེཏཱཡཱཏི ཨིདྡྷི, ཨིདྡྷིཝིདྷཉྙཱཎཾ. ཨིདྡྷིཡཱ པཱདོ ཨིདྡྷིཔཱདོ’’ཏི ཝུཏྟཾ. ཏཾ སཾཡུཏྟཀེ ཀཏམཱཙ བྷིཀྑཝེ ཨིདྡྷི. ཨིདྷ བྷིཀྑཝེ བྷིཀྑུ ཨནེཀཝིཧིཏཾ ཨིདྡྷིཝིདྷཾ པཙྩནུབྷོཏི. ཨེཀོཔི ཧུཏྭཱ བཧུདྷཱ ཧོཏི.ལ. ཡཱཝ བྲཧྨལོཀཱཔི ཀཱཡེན ཝསཾ ཝཏྟེཏི. ཨཡཾ ཝུཙྩཏི བྷིཀྑཝེ ཨིདྡྷཱིཏི ཨིམཱཡ པཱལི༹ཡཱ སམེཏི. ཨེཝཾསནྟེཔི ཨིདྷ ཨབྷིདྷམྨཔརིཡཱཡོཝ ཨདྷིཔྤེཏོཏི ཏཾ ན ཡུཛྫཏིཡེཝ.

ཝིབྷངྒེ པན པཐམཝཱརེ ལོཀིཡ ལོཀུཏྟརམིསྶཀཱ ཙིཏྟ ཙེཏསིཀརཱསཱིཨེཝ ཨིདྡྷིཔཱདཱཏི ཝུཏྟཱ. ཨཊྛཀཐཱཡཉྩ-པཐམཛ྄ཛྷཱན པརིཀམྨཾཧི ¶ ཨིདྡྷིཔཱདོནཱམ. པཐམཛ྄ཛྷཱནཾ ཨིདྡྷིནཱམ.ལ. ནེཝསཉྙཱ ནཱསཉྙཱཡཏནཛ྄ཛྷཱནཔརིཀམྨཾ ཨིདྡྷིཔཱདོནཱམ. ནེཝསཉྙཱནཱསཉྙཱ ཡཏནཛ྄ཛྷཱནཾ ཨིདྡྷིནཱམ. སོཏཱཔཏྟིམགྒསྶ ཝིཔསྶནཱ ཨིདྡྷིཔཱདོ ནཱམ. སོཏཱཔཏྟིམགྒོ ཨིདྡྷིནཱམ.ལ. ཨརཧཏྟམགྒསྶ ཝིཔསྶནཱ ཨིདྡྷིཔཱདོནཱམ. ཨརཧཏྟམགྒོ ཨིདྡྷིནཱམཱཏིཙ. པཐམཛ྄ཛྷཱནཾ ཨིདྡྷིཔཱདོནཱམ. དུཏིཡཛ྄ཛྷཱནཾ ཨིདྡྷིནཱམ. ལ. ཨཱཀིཉྩཉྙཱཡཏནཛ྄ཛྷཱནཾ ཨིདྡྷི པཱདོནཱམ. ནེཝསཉྙཱ ནཱསཉྙཱ ཡཏནཛ྄ཛྷཱནཾ ཨིདྡྷིནཱམ. སོཏཱ པཏྟིམགྒོ ཨིདྡྷིཔཱདོནཱམ. སཀདཱགཱམིམགྒོ ཨིདྡྷིནཱམ.ལ. ཨརཧཏྟམགྒོ ཨིདྡྷིནཱམཱཏི ཙ ཝུཏྟཾ. ཏཾཏཾ པཱདཀཛ྄ཛྷཱནཾ ཨིདྡྷིཔཱདོནཱམ. ཏཏོ ཏཏོ ཝུཊྛཧིཏྭཱ ཨུཔྤཱདིཏམགྒོ ཨིདྡྷིནཱམཱཏིཔི ཝཏྟུཾ ཝཊྚཏིཡེཝ. ཨིདྷ པན ཨུཏྟརཙཱུལ༹བྷཱཛནིཡེ ཨཱགཏནཡེན ཙཏྟཱརོ ཨདྷིཔཏིདྷམྨཱཨེཝ ཨིདྡྷིཔཱདཱཏི ཝུཏྟཱ.

ཏཏྠ པན ལོཀུཏྟརབྷཱུཏཱཨེཝ ཨདྷིཔྤེཏཱ. ཨིདྷ ལོཀིཡ ལོཀུཏྟར མིསྶཀབྷཱུཏཱཏི. ཨིནྡྲིཡབལཱནི ཨཏྠཏོ ཧེཊྛཱ ཝུཏྟཱནེཝ. པཱཀཊཊྛཱནཏོ པན ཙཏཱུསུ སོཏཱཔཏྟིཡངྒེསུ སདྡྷཱཡ ཐཱམོ ཝེདིཏབྦོ. ཡཐཱཧ-ཀཏྠ བྷིཀྑཝེ སདྡྷིནྡྲིཡཾ དཊྛབྦཾ. ཙཏཱུསུ སོཏཱཔཏྟིཡངྒེསུ ཨེཏྠ སདྡྷིནྡྲིཡཾ དཊྛབྦནྟི. ཙཏཱུསུ སམྨཔྤདྷཱནེསུ ཝཱིརིཡསྶ. ཡཐཱཧ-ཀཏྠ བྷིཀྑཝེ ཝཱིརིཡིནྡྲིཡཾ དཊྛབྦཾ. ཙཏཱུསུ སམྨཔྤདྷཱནེསུ ཨེཏྠ ཝཱིརིཡིནྡྲིཡཾ དཊྛབྦནྟི. ཙཏཱུསུ སཏིཔཊྛཱནེསུ སཏིཡཱ. ཡཐཱཧ-ཀཏྠ བྷིཀྑཝེསཏིནྡྲིཡཾ དཊྛབྦཾ. ཙཏཱུསུ སཏིཔཊྛཱནེསུཨེཏྠ སཏིནྡྲིཡཾ དཊྛབྦནྟི. ཙཏཱུསུ ཛྷཱནེསུ སམཱདྷིསྶ. ཡཐཱཧ-ཀཏྠ བྷིཀྑཝེ སམཱདྷིནྡྲིཡཾ དཊྛབྦཾ. ཙཏཱུསུ ཛྷཱནེསུ ཨེཏྠ སམཱདྷིནྡྲིཡཾ དཊྛབྦནྟི. ཙཏཱུསུ ཨརིཡསཙྩེསུ པཉྙཱཡ ཐཱམོ ཝེདིཏབྦོ. ཡཐཱཧ-ཀཏྠ བྷིཀྑཝེ པཉྙིནྡྲིཡཾ དཊྛབྦཾ. ཙཏཱུསུ ཨརིཡསཙྩེསུ ཨེཏྠ པཉྙིནྡྲིཡཾ དཊྛབྦནྟི. སམྦོདྷི ཝུཙྩཏི ཙཏཱུསུ མགྒེསུ ཉཱཎཾ, སམནྟཏོ བུཛ྄ཛྷཏི པཊིཝིཛ྄ཛྷཏི བུཛ྄ཛྷནྟི ཝཱ ཨེཏཱཡཱཏི ཀཏྭཱ. སཱ ཧི ཙཏུསཙྩདྷམྨཾ བུཛ྄ཛྷམཱནཱ ཨེཀཀྑཎེ སོལ༹སཧི ཨཏྠེཧི སདྡྷིཾ སམནྟཏོ བུཛ྄ཛྷཏི, ན ཨེཀདེས ཏོཏི ཏསྶཱ སམྦོདྷིཡཱ སམུཊྛཱཔནཊྛེན སམྦོདྷིཡཱ ཨངྒོ སཧཀཱརཱིབལཝཔཙྩཡོཏི སམྦོཛ྄ཛྷངྒོ. སཏིཨེཝ སམྦོཛ྄ཛྷངྒོ སཏིསམྦོཛ྄ཛྷངྒོ. ¶ སཱ ཧི ཀཱཡཱདཱིསུ ཙཏཱུསུ ཨཏྟནོ གོཙརེསུ བྷཱཝནཱཝསེན སུཊྛུསཾཝཌྜྷམཱནཱ ཨནུཔུབྦེན སབྦཔམཱད པཀྑཾ ཝིདྷམེཏྭཱ སབྦཾ ཨཔྤམཱདཔཀྑཉྩ པཱུརེཏྭཱ ཙཏུམགྒཉྙཱཎ སངྑཱཏཾ སམྦོདྷིཾ སམུཊྛཱཔེཏཱིཏི. ཝིཔསྶནཱཡ བྷཱུམིབྷཱུཏེ ཨཛ྄ཛྷཏྟ བཧིདྡྷཱདྷམྨེ ཝིཙིནཱཏི ཀཀྑལ༹ཏྟཕུསནཱདཱིཧི ཨནིཙྩཏཱདཱིཧིཙ ཝིཝིདྷཱ ཀཱརེཧི ཙུཎྞཝིཙུཎྞཾ ཀུརུམཱནོཝིཡ ཏེསུ དཊྛབྦཱཀཱརཾ ཨསེསཾ ཨུཔདྷཱརེཏཱིཏི དྷམྨཝིཙཡོ. སོཨེཝ སམྦོཛ྄ཛྷངྒོཏི དྷམྨཝིཙཡ སམྦོཛ྄ཛྷངྒོ. སོཔི ཧི ཨཏྟནོ གོཙརབྷཱུཏེསུ ཏེསུ དྷམྨེསུ བྷཱཝནཱཝསེན སུཊྛུསཾཝཌྜྷམཱནོ ཨནུཔུབྦེན སབྦཾསམྨོཧ པཀྑཾ ཝིདྷམེཏྭཱ སབྦཾ ཨསམྨོཧཔཀྑཾ པཱུརེཏྭཱ སཡཾ ཙཏུམགྒཉཱཎ སམྦོདྷི ཧུཏྭཱ སམུཊྛཧཏཱིཏི. སམྨཔྤདྷཱནཝཱིརིཡམེཝ སམྦོཛ྄ཛྷངྒོཏི ཝཱིརིཡསམྦོཛ྄ཛྷངྒོ. ཏམྤི ཧི ཙཏུབྦིདྷེསུ ཨཏྟནོ གོཙརེསུ བྷཱཝནཱཝསེན སུཊྛུ སཾཝཌྜྷམཱནཾ ཨནུཔུབྦེན སབྦཾ ཀུསལེསུ དྷམྨེསུ ལཱིནསངྐོཙ ཀོསཛྫཔཀྑཾ ཀིལེསཛཱཏཾ ཝིདྷམེཏྭཱ སབྦཾ དྷུརསཾཔགྒཧཔཀྑཾ པཱུརེཏྭཱ ཝུཏྟཔྤཀཱརཾ སམྦོདྷིཾ སམུཊྛཱ པེཏཱིཏི.

པཱིཏིཡེཝ སམྦོཛ྄ཛྷངྒོ པཱིཏི སམྦོཛ྄ཛྷངྒོ. སཱཔི ཧི ཝུཏྟཔྤཀཱརེསུ གོཙརེསུ སུཊྛུ སཾཝཌྜྷམཱནཱ ཀུསལེསུ དྷམྨེསུ སབྦཾ ཙིཏྟསྶ ཨརཏིཨུཀྐཎྛཔཀྑཾ ཝིདྷམེཏྭཱ སབྦཾ དྷམྨརཏི དྷམྨནནྡིདྷམྨཱརཱམ པཀྑཾ པཱུརེཏྭཱ ཝུཏྟཔྤཀཱརཾ སམྦོདྷིཾ སམུཊྛཱཔེཏི. པསྶདྡྷིཨེཝ སམྦོཛ྄ཛྷངྒོ པསྶདྡྷི སམྦོཛ྄ཛྷངྒོ. སཱཔི ཧི ཝུཏྟཔཀཱརེསུ གོཙརེསུ བྷཱཝནཱཝསེན སུཊྛུ སཾཝཌྜྷམཱནཱ སབྦཾ ཙིཏྟསྶ སཱརམྦྷ དརཐཔཀྑཾ ཝིདྷམེཏྭཱ སབྦཾ ཝཱུཔསནྟསཱིཏལཔཀྑཾ པཱུརེཏྭཱ ཝུཏྟཔྤཀཱརཾ སམྦོདྷིཾ སམུཊྛཱཔེཏི. སམཱདྷིཨེཝ སམྦོཛ྄ཛྷངྒོཏི སམཱདྷི སམྦོཛ྄ཛྷངྒོ. ཏསྶ སམྦོདྷིསམུཊྛཱཔནཏཱ པཱཀཊཱ. ཏཏྲམཛ྄ཛྷཏྟཏཱ སངྑཱཏཱ ཨུཔེཀྑཱཨེཝ སམྦོཛ྄ཛྷངྒོཏི ཨུཔེཀྑཱ སམྦོཛ྄ཛྷངྒོ. སཱཔིཧི ཝུཏྟཔྤཀཱརེསུ སཏིཨཱདཱིནཾ གོཙརེསུ བྷཱཝནཱཝསེན སུཊྛུ སཾཝཌྜྷམཱནཱ སབྦཾ ཙིཏྟསྶ ལཱིནུདྡྷཙྩཔཀྑཾ ཝིདྷམེཏྭཱ སམཝཱཧིཏཔཀྑཾ པཱུརེཏྭཱ ཝུཏྟཔྤཀཱརཾ སམྦོདྷིཾ སམུཊྛཱཔེཏཱིཏི. སམྨཱ ཨཝིཔརཱིཏཏོ དསྶནཾ སམྨཱདིཊྛི. སཱ པན དུཀྑེ ¶ ཉཱཎཾ, དུཀྑསམུདཡེ ཉཱཎཾ, དུཀྑནིརོདྷེ ཉཱཎཾ, དུཀྑནིརོ དྷགཱམིནིཔཊིཔདཱཡ ཉཱཎནྟི ཙཏུབྦིདྷཱ ཧོཏི. སམྨཱ ཨཝིཔརཱིཏཏོ སཾཀཔྤནཾ སམྨཱསངྐཔྤོ. ཡཐཱ སམྨཱདིཊྛི དཊྛབྦསབྷཱཝེསུ ཕརམཱནཱ པཝཏྟཏི ཏཐཱ ཏསྶཱ སཾཝིདྷཱནནྟི ཨཏྠོ. ཏེནེཝ ཧི སོ པཉྙཱཀྑནྡྷེ སངྒཧིཏོཏི. ཡཐཱཧ-ཡཱཙཱཝུསོ ཝིསཱཁ སམྨཱདིཊྛི, ཡོཙ སམྨཱསངྐཔྤོ, ཨིམེ དྷམྨཱ པཉྙཱཀྑནྡྷེ སངྒཧིཏཱཏི. སམྨཱཝཱཙཱ དཡོ པུབྦེ ཝུཏྟཏྠཱཡེཝ. སམྨཱ ཝཱཡམནྟི ཨེཀེནཱཏི སམྨཱཝཱཡཱམོ. ཙཏུཀིཙྩསཱདྷཀཾ སམྨཔྤདྷཱན ཝཱིརིཡཾ. པསྶདྡྷིདྭཡཾ པསྶདྡྷིསཱམཉྙེན ཨེཀཾ ཀཏྭཱ ཙུདྡསེཏེ སབྷཱཝཏོཏི ཝུཏྟཾ. སཏྟདྷཱཏི ཝུཏྟཔྤཀཱརཱནཾ སཏིཔཊྛཱནཙཏུཀྐ སམྨཔྤདྷཱནཙཏུཀྐཱདཱིནཾ ཝསེན སཏྟདྷཱ. ཨིདཱནི ཏེསཾ ཙུདྡསནྣཾ ཀིཙྩཱནཾ ཋཱནབྷེདཾ དསྶེཏུཾ སངྐཔྤཔསྶདྡྷིཙཱཏིཨཱདིམཱཧ.

[༢༢༠] ཡཾཔན ཝིབྷཱཝནིཡཾ

‘‘སཏྟདྷཱ ཏཏྠ སངྒཧོཏི ཝཏྭཱ པུན ཏཾ དསྶེཏུཾ སངྐཔྤཔསྶདྡྷིཙཱཏིཨཱདིམཱཧཱ’’ཏི ཝུཏྟཾ. ཏཾ ན ཡུཛྫཏི.

ན ཧི ཏཏྠ སཏྟ སརཱུཔཾ ལབྦྷཏཱིཏི. སངྐཔྤོ ཝིརཏིཏྟཡཉྩ ཨེཀཾ མགྒངྒཊྛཱནཾ པཱཔུཎཱཏི. པསྶདྡྷིཙ པཱིཏིཙ ཨུཔེཀྑཱཙ ཨེཀཾ བོཛ྄ཛྷངྒཊྛཱནཾ. ཚནྡོཙ ཙིཏྟཉྩ ཨེཀཾ ཨིདྡྷིཔཱདཊྛཱནནྟི ཨེཝཾ ནཝདྷམྨཱ ཨེཀཊྛཱནིཀཱ ཧོནྟི. ཨེཀཾ ཝཱིརིཡཾ ཙཏུསམྨཔྤདྷཱན ཨིདྡྷི པཱདིནྡྲིཡ བལབོཛ྄ཛྷངྒ མགྒངྒ ཝསེན ནཝཊྛཱནིཀཾ. ཨེཀཱ སཏི ཙཏུསཏིཔཊྛཱན ཨིནྡྲིཡ བལ བོཛ྄ཛྷངྒ མགྒངྒ ཝསེན ཨཊྛཊྛཱནིཀཱ. ཨེཀོ སམཱདྷི ཨིནྡྲིཡ བལ བོཛ྄ཛྷངྒ མགྒངྒ ཝསེན ཙཏུཊྛཱནིཀོ. ཨེཀཱཔཉྙཱ ཨིདྡྷིཔཱདིནྡྲིཡ བལ བོཛ྄ཛྷངྒ མགྒངྒ ཝསེན པཉྩཊྛཱནིཀཱ. ཨེཀཱ སདྡྷཱ ཨིནྡྲིཡ བལ ཝསེན དུཊྛཱནིཀཱཏི. ཏེ པན སཏྟཏིཾས པབྷེདཱ དྷམྨཱ པུབྦབྷཱགེ ནཱནཱརམྨཎཱ ནཱནཱཁཎིཀཱཙ ཧོནྟི. མགྒཕལེསུ པན ནཝཊྛཱནིཀཾ ཝཱིརིཡཾ ཨེཀམེཝ ནིབྦཱནཾ ཨཱརམྨཎཾཀཏྭཱ ནཝསུཋཱནེསུ ཨཏྟ པཊིཔཀྑཱནཾ པཱཔ དྷམྨཱནཾ པཙྩཡ ཡམུགྒྷཱཏཝསེན ནཝ ཀིཙྩཱནི སཱདྷཡམཱནཾ ཨེཀམེཝ པཝཏྟཏི. ཨེས ནཡོ ཨཊྛཊྛཱནིཀཱདཱིསུ. ཏསྨཱ ཏེ ཨེཀཀྑཎེ ཨེཀཙིཏྟེ སབྦེ ཨེཀཏོ ཨུཔལབྦྷནྟཱིཏི ¶ ཝུཏྟཾ སབྦེ ལོཀུཏྟརེ ཧོནྟཱིཏི. ནཝཱསངྐཔྤ པཱིཏིཡོཏི ཨེཏྠ ཝཱསདྡོ ཀྭཙི སདྡཏྠོ. སངྐཔྤོ ཀྭཙི དུཏཱིཡཛ྄ཛྷཱནིཀཱ དིཀེཔཱིཏིཙ ཀྭཙི ཙཏུཏྠཛ྄ཛྷཱནིཀཱདིཀེ ལོཀུཏྟརེ ནཧོནྟཱིཏི ཨཏྠོ.

ལོཀིཡེཔཱིཏི སཱིལཝིསོདྷནཱདིཝསེན པཝཏྟེ ཀཱམཱ ཝཙརཀུསལཱདིཀེ ལོཀིཡཀུསལ ཀྲིཡཙིཏྟུཔྤཱདེཔི. ཡཐཱ ཡོགནྟི སཱིལཝིསོདྷནཀམྨ སམཐཀམྨནཱམརཱུཔཔརིགྒཧཱདིཀམྨེསུ ཡུཛྫིཏབྦཱནཾ ཝིརཏིཏྟཡཱདཱིནཾ ཨནུརཱུཔཾ. ཚབྦིསུདྡྷིཔཝཏྟིཡནྟི སཱིལ ཝིསུདྡྷཱདཱིནཾ ཚནྣཾ ཝིསུདྡྷཱིནཾ ཨནུཀྐམེན པཝཏྟིཀཱལེ. ཨེཏེན དིཊྛེཝ དྷམྨེ མགྒཕལཔཏིཊྛཱབྷཱཝཏྠཱཡ པཱུརིཏེ ཙཏུཔཱརིསུདྡྷི སཱིལེཔི སདྡྷཱསཏིཨཱདཡོ བོདྷིཔཀྑིཡེསུ སངྒཧིཏཱ ཨེཝ ཧོནྟི. ཏཐཱ མགྒཔཱདཀཏྠཱཡ ཨུཔྤཱདིཏེསུ མཧགྒཏཛ྄ཛྷཱནེསུ མཱིཏི དསྶེཏི. ཏཐཱ ཧི བོཛ྄ཛྷངྒསཾཡུཏྟཀེ –

ཨེཝཾ བྷཱཝིཏོ ཁོ ཀུཎྜལིཡ ཨིནྡྲིཡསཾཝརོ ཏཱིཎི སུཙརིཏཱནི པརིཔཱུརེཏི. ཨེཝཾ བྷཱཝིཏཱནི ཏཱིཎི སུཙརིཏཱནི ཙཏྟཱརོ སཏིཔཊྛཱནེ པརིཔཱུརེནྟི. ཨེཝཾ བྷཱཝིཏཱ ཙཏྟཱརོ སཏིཔཊྛཱནཱ སཏྟ བོཛ྄ཛྷངྒེ པརིཔཱུརེནྟི. ཨེཝཾ བྷཱཝིཏཱ སཏྟ བོཛ྄ཛྷངྒེ ཝིཛྫཱཝིམུཏྟིཡོ པརིཔཱུརེནྟཱིཏི ཝུཏྟཾ.

ཨཊྛཀཐཱཡཾཔི ནཀེཝལཾ བལཝཝིཔསྶནཱ མགྒཕལེསུཨེཝ བོཛ྄ཛྷངྒེ ཨུདྡྷརནྟི. ཝིཔསྶནཱཔཱདཀ ཀསིཎཛ྄ཛྷཱན ཨཱནཱཔཱཎཱ སུཀ བྲཧྨཝིཧཱརཛ྄ཛྷཱནེསུཔི ཨུདྡྷརནྟཱིཏི ཝུཏྟཾ. [བོདྷིཔཀྑིཡསངྒཧོ]

༡༦༥. སབྦསངྒཧེ པཉྩཀྑནྡྷཱཏི པཉྩ རཱསཡོ. ཨཏཱིཏཱདི བྷེད བྷིནྣཱནཾ རཱུཔཱནཾ ཁནྡྷོ རཱསཱིཏི རཱུཔཀྑནྡྷོ. ཨེཀསྨིཾ རུཔྤན ལཀྑཎེ རཱསིཾ ཀཏྭཱ ཉཱཎེན པརིགྒཧིཏཱ རཱུཔདྷམྨཱཨེཝ. ཏཐཱ ཨེཀསྨིཾ ཝེདཡིཏལཀྑཎེ སཉྫཱནན ལཀྑཎེ རཱསིཾ ཀཏྭཱ པརིགྒཧིཏཱ ཨཏཱིཏཱདིབྷེདབྷིནྣཱ ཝེདནཱསཉྙཱཡོ ཝེདནཱཀྑནྡྷོ སཉྙཱཀྑནྡྷོ ཙནཱམ. སངྑརོནྟཱིཏི སངྑཱརཱ. ཕསྶ ཙེཏནཱ དཡོ. ཏེཧི ཚསུཝཱ ཨུཔཔཏྟིདྭཱརེསུ ཏཱིསུཝཱ ཀམྨདྭཱརེསུ ཨེཀཏོ སངྒམྨ སམཱགམྨ ཕུསནཙེཏཡིཏཱདཱིཧི ཨཏྟནོ ཨཏྟནོ ¶ ཀིཙྩེཧི དསྶནསཝནཱདཱིནི སཱདྷཱརཎཀིཙྩཱནིཝཱ ཀཱཡིཀ ཝཱཙསིཀམཱནསིཀཱནིཝཱ སཡན ནིསཛྫཊྛཱན གམན ཀཐན ཙིནྟནཱདཱིནི སབྦཱནི ཀིཙྩཱནི ཀརོནྟི ཝིདཧནྟཱིཏི. ཝུཏྟཉྷེཏཾ སཾཡུཏྟཀེ –

ཀིཉྩ བྷིཀྑཝེ སངྑཱརེ ཝདེཐ. སངྑཏཾ ཨབྷིསངྑརོནྟཱིཏི ཁོ བྷིཀྑཝེ ཏསྨཱ སངྑཱརཱཏི ཝུཙྩནྟི. ཀིཉྩ སངྑཏཾ ཨབྷི སངྑརོནྟི, རཱུཔཾ རཱུཔཏྠཱཡ སངྑཏཾ ཨབྷིསངྑརོནྟི. ཝེདནཾ ཝེདནཏྠཱཡ སངྑཏཾ ཨབྷིསངྑརོནྟི. སཉྙཾ སཉྙཏྠཱཡ སངྑཏ ཨབྷིསངྑརོནྟི. སངྑཱརེ སངྑཱརཏྠཱཡ སངྑཏ མབྷིསངྑརོནྟི. ཝིཉྙཱཎཾ ཝིཉྙཱཎཏྠཱཡ སངྑཏ མབྷི སངྑརོནྟཱིཏི. སངྑཏ མབྷིསངྑརོནྟཱིཏི ཁོ བྷིཀྑཝེ ཏསྨཱ སངྑཱརཱཏི ཝུཙྩནྟཱིཏི.

ཏཏྠ རཱུཔཾ རཱུཔཏྠཱཡ སངྑཏམབྷིསངྑརོནྟཱིཏི ཡསྨིཾ ཡསྨིཾ ཀཱལེ སཡན ནིསཛྫཱདིཝསེན པཝཏྟཱ ཡཱ ཡཱ རཱུཔཝིཀཏི ཨིཙྪཱིཡཏི, ཏསྨིཾཏསྨིཾ ཀཱལེ ཏསྶཱ ཏསྶཱ རཱུཔཝིཀཏིཡཱ ཛཱཏཏྠཱཡ ཨིརིཡཱཔཐ པརིཝཏྟནཱདི ཝསེན ཏཾ ཏཾ རཱུཔཝིཀཏིཾ སངྑཏཾ ཨབྷིསངྑརོནྟཱིཏི ཨཏྠོ. ཁཛྫབྷོཛྫཱདིཀཾ ཝཏྠཱལངྐཱརཱདིཀཾ མཉྩ པཱིཋ གེཧ རཐཱདིཀཾ སབྦཾ ཨུཔབྷོག པརིབྷོགབྷཱུཏཾ བཱཧིར རཱུཔཾཔི གཧེཏྭཱ ཡོཛེཏུཾ ཝཊྚཏིཡེཝ. ཝེདནནྟི དིཊྛདྷམྨིཀཾ སམྤརཱཡིཀཉྩ སབྦཾཔི ཝེདནཾ. ཏཏྠ དིཊྛདྷམྨིཀཾ ཝེདནཾ སངྑཏཾ ཨབྷིསངྑརོནྟཱ ཙིཏྟཀམྨནཙྩགཱིཏཱདཱིནི ཏཾ ཏཾ ཝེདནུཔཀརཎཱནི སམྤཱདན ཝསེན སམྤརཱཡིཀཉྩ ཨབྷིསངྑརོནྟཱ མཱནུསཀཾཝཱ དིབྦཾཝཱ ཏཾཏཾ ཝེདནཾ པཏྠེཏྭཱ དཱན སཱིལཱདི སམྤཱདན ཝསེན ཨབྷིསངྑརོནྟི. ཨེསནཡོ སེསེསུཔི. སངྑཱརེསུ པན ཕསྶཾ ཕསྶཏྠཱཡ ཙེཏནཾ ཙེཏནཏྠཱཡཱཏིཨཱདིནཱ དཱནཾ དཱནཏྠཱཡ སཱིལཾ སཱིལཏྠཱཡ པཱཎཱཏིཔཱཏཾ པཱཎཱཏིཔཱཏཏྠཱཡཱཏིཨཱདིནཱ ཝཱ སབྦཾ ལོཀཔཝཏྟིཾ ཉཏྭཱ ཝིཏྠཱརེཏབྦཱཏི. ཨེཏྠ སིཡཱ, ཀསྨཱ སངྑཱརེསུ པཱཀཊཱ ཙེཏནཱདཡོ ཝིཏཀྐཱདཡོ ལོབྷཱདཡོ སདྡྷཱསཏིཔཉྙཱདཡོཙ དྷམྨེ ཝིསུཾ ཝིསུཾ ཁནྡྷབྷཱཝེན ཨཝཏྭཱ ཝེདནཱསཉྙཱཝ ཝུཏྟཱཏི. ཝུཙྩཏེ.

ཡཐཱ ¶ ཧི ཚེཀོ མཧཱབྷིསཀྐོ བྷེསཛྫམཱུལཱནི གཧེཏྭཱ ཙུཎྞཾ ཀརོནྟོ ཏེསུ མཱུལེསུ ཨིམཱནི ཐཱུལཱནིཔི མུདཱུནི ཧོནྟི. ཨིམཱནི ཁུདྡཀཱནིཔི ཀཀྑལཱ༹ནི ཧོནྟཱིཏི ཉཏྭཱ ཏཏོ པཐམཏརཾ ཀཀྑལཱ༹ནི ཝིསུཾ ཨུདྡྷརིཏྭཱ སུཊྛུ ཀོཊྚེཏྭཱ ཙུཎྞཾ ཀརོཏི. སེསཱནི པན སབྦཱནི མུདཱུནི ཨེཀཏོ ཀཏྭཱ ཀོཊྚེཏྭཱ ཙུཎྞཾ ཀརོཏི. ཏཏོ ཨུབྷཡཱནི མིསྶེཏྭཱ སིལཱཡཾ པིསེཏྭཱ བྷེསཛྫཀམྨེ ཨུཔནེཏི. ཨེཝཾ ཀརོནྟོ ནཀིལམཏི. ཨེཝམེཝཾ བྷགཝཱཔི ནཱམརཱུཔདྷམྨེསུ ཏིལཀྑཎཾ ཨཱརོཔེཏྭཱ ནིཙྩསུཁཨཏྟ ཝིཔལླཱསཱནཾ པཧཱནཏྠཱཡ ཨནུཡུཉྫནྟཱ དེཝམནུསྶཱ ཝིབྷཱགེ ཨཀཏེ ཏཱིསུ དྷམྨེསུ ཀིལམིསྶནྟཱིཏི ཉཏྭཱ ནཱམདྷམྨེསུ ཝེདནཱསཉྙཱཙིཏྟསངྑཱཏེ ཏཡོ དྷམྨེ ཝིསུཾ ཨུདྡྷརིཏྭཱ ཨེཀམེཀཾ ཁནྡྷཾ ནཱམ ཀཏྭཱ དེསེསི. ཏཐཱ ཧི ཡཐཱ མཙྪཱནཱམ ཨུདཀེ སཏི ཨུཀྐཎྛིཏཱ ནཱམ ནཏྠི. ཨསཏི པན ཨེཀནྟེན ཨུཀྐཎྛིཏཱཡེཝ ཧོནྟི. ཡཐཱཝཱ མདྷུཀརཱཝཱ བྷམརཱཝཱ ཡསྨིཾ ཝནེ པུཔྥརས ཕལརསེ ལབྷནྟི, ཏཏྠ ཨུཀྐཎྛིཏཱནཱམ ནཏྠི. ཨལབྷམཱནཱ པན ཨེཀནྟེན ཨུཀྐཎྛིཏཱཨེཝ ཧོནྟི. ཨེཝམེཝ ཨིམེསཾ སཏྟཱནཾ སུཁ སཉྙིཏེསུ པཏིསརཎེསུ ཝེདནཱསདིསཾ པཏིསརཎཾནཱམ ནཏྠི. མནུསྶདེཝབྲཧྨསམྤཏྟིཡོ ཨསྶཱདེནྟཱཔི སུཁཝེདནཏྠཱཡཨེཝ ཨསྶཱདེནྟི. ཡདིཙ ཏཱཧི ཝིནཱ ཡཐིཙྪིཏཾ སུཁཝེདནཾ ལབྷེཡྻུཾ. ཀོནཱམ ཏཱ སཱདིཡིསྶཏི. ཏཐཱ ཕསྶཙེཏནཱདཱིཧི ཝིཏཀྐཝིཙཱརཝཱིརིཡཱདཱིཧི ལོབྷདོསཱདཱིཧི སདྡྷཱསཏིཔཉྙཱདཱིཧི ཙ སངྑཱརཀྑནྡྷདྷམྨེཧི དིཊྛདྷམྨིཀཾ སམྤརཱཡིཀཉྩ ཡཾཀིཉྩི སངྑཏཾ ཨབྷིསངྑརོནྟཱཔི སུཁཝེདནཏྠཱཡཨེཝ ཨབྷིསངྑརོནྟི. ཡདིཙ ཏཱདིསེན ཨབྷིསངྑརཎེན ཝིནཱཔི ཡཐིཙྪིཏཾ སུཁཾ ལབྷེཡྻུཾ, ཏེཧི དྷམྨེཧི ཨཏྠོ ནཏྠཱིཏི ཀོནཱམ ཏེ དྷམྨེ ཨབྷིསངྑརིསྶཏཱིཏི.

ཨིཏི སུཁསཉྙིཏེསུ དྷམྨེསུ ཝེདནཱནཱམ ཨིམེསཾ སཏྟཱནཾ པརམུཀྐཾསགཏཾ སུཁསཉྙིཏཊྛཱནཾ ཧོཏི. ཏསྨཱ བྷགཝཱ ཏཾ ཝིསུཾ ཨེཀཾ ཁནྡྷཾ ཀཏྭཱ ཁནྡྷདེསནཾ དེསེཏཱིཏི. ཏཐཱ ཨིམེསཾ སཏྟཱནཾ ཨཏྟསཉྙིཏེསུ པཏིསརཎེསུ སཉྙཱསདིསཾ པཏིསརཎཾ ནཱམ ནཏྠི. ཏཐཱ ཧི ཏསྨིཾ ཏསྨིཾ སཏྟནིཀཱཡེ ཨུཔྤནྣཱ ཏེ ཏེ སཏྟཱ ¶ ཨཏྟཱནོ ཨཏྟནོ ཝིསཡེསུ སབྦཾ ཛཱནིཏབྦཾ སཉྙཱཡ སཉྫཱནིཏྭཱ ཝིཉྙུཏྟཾ ཨཱཔཛྫནྟི. ཏཐཱ ཝིཉྙུཏྟཾ ཨཱཔཛྫནྟཱ ཡཏྟཀཾ པརེ ཛཱནནྟི. ཏཏྟཀཾ མཡཾཔི ཛཱནཱམ. ཀོ ཨམྷཱཀཾ ཨུཏྟརིཏརོཏི ཨེཝཾ ལོཀེ ཉཱཎསམྨབྷཾ སཉྙཾ པརམཾ ཨཏྟཱནཾ ཀཏྭཱ ཝིཙརནྟི. ཨིཏི ཨཏྟསཉྙིཏེསུ དྷམྨེསུ སཉྙཱནཱམ ཨིམེསཾ སཏྟཱནཾ པརམུཀྐཾ སགཏཾ ཨཏྟསཉྙིཏཊྛཱནཾ ཧོཏི. ཏསྨཱ བྷགཝཱཏཾཔི ཝིསུཾ ཨེཀཾ ཁནྡྷཾ ཀཏྭཱ ཁནྡྷདེསནཾ དེསེཏཱིཏི. ཏཐཱ ཨིམེསཾ སཏྟཱནཾ ནིཙྩསཉྙིཏེསུ པཏིསརཎེསུ ཙིཏྟསདིསཾ པཏིསཾརཎཾ ནཱམ ནཏྠི. ཏཐཱ ཧི སཏྟཱ སུཁཾ དུཀྑཾནཱམ ཨནིཙྩཾ སུཁཔཏྟཱནཾ དུཀྑཾ ནཏྠི. དུཀྑ པཏྟཱནཾ སུཁཾ ནཏྠཱིཏིཝཱ. སཉྙཱནཱམ ཨནིཙྩཱ, ཀདཱཙི པམུསྶཏི ཀདཱཙི ནཔམུསྶཏཱིཏིཝཱ. ཝཱིརིཡཾནཱམ ཨནིཙྩཾ. ཀདཱཙི ཨཱརབྷཏི, ཀདཱཙི ན ཨཱརབྷཏཱིཏིཝཱ. ལོབྷོནཱམ ཨནིཙྩོ. ཀདཱཙི ཨུཔྤཛྫཏི, ཀདཱཙི ནཨུཔྤཛྫཏཱིཏིཝཱ. དོསོནཱམ ཨནིཙྩོ. ཀདཱཙི ཨུཔྤཛྫཏི, ཀདཱཙི ན ཨུཔྤཛྫཏཱིཏིཝཱ. སདྡྷཱནཱམ ཨནིཙྩཱ. ཀདཱཙི པསནྣཙིཏྟོ ཧོཏི, ཀདཱཙི ཨཔྤསནྣཙིཏྟོ ཧོཏཱིཏིཝཱ. པཉྙཱནཱམ ཨནིཙྩཱ. ཛཱནིཏབྦཾཔི ཀདཱཙི ཛཱནཱཏི, ཀདཱཙི ན ཛཱནཱཏཱིཏིཝཱ ཨེཝཾ ཙེཏསིཀདྷམྨཱནཾ ཨནིཙྩ བྷཱཝོནཱམ ཀེསཉྩི ལོཀིཡཛནཱནཾཔི པཱཀཊོ ཧོཏི. ན པན ཙིཏྟསྶ. ན ཧི སཏྟཱ ཙིཏྟཾནཱམ ཨནིཙྩཾ. ཀདཱཙི ཨུཔྤཛྫཏི, ཀདཱཙི ན ཨུཔྤཛྫཏཱིཏི གཎྷནྟི. ཏཾ པན སཡཾ ནིཙྩཾ པཝཏྟམཱནཾ ཧུཏྭཱ ཀདཱཙི སུཁེན ཡུཏྟཾ ཧོཏི, ཀདཱཙི དུཀྑེནཱཏིཨཱདིནཱ ཏསྨིཾ ནིཙྩསཉྙམེཝ ཨུཔྤཱདེནྟཱིཏི. ཨིཏི ཙིཏྟཾནཱམ ནིཙྩསཉྙིཏེསུ དྷམྨེསུ པརམུཀྐཾ སགཏཾ ནིཙྩསཉྙིཏཊྛཱནཾ ཧོཏི. ཏསྨཱ བྷགཝཱ ཏཾཔི ཝིསུཾ ཨེཀཾ ཁནྡྷཾ ཀཏྭཱ ཁནྡྷདེསནཾ དེསེཏཱིཏི.

[༢༢༡] ཡཾཔན ཝིབྷཱཝནིཡཾ

‘‘བྷཱཛན བྷོཛན བྱཉྫན བྷཏྟཀཱརཀ བྷུཉྫཀ ཝིཀཔྤཝསེན པཉྩེཝ ཝུཏྟཱ’’ཏི ཝཏྭཱ ཏཾ ཝིབྷཱཝནྟེན ‘‘རཱུཔཉྷི ཝེདནཱ ནིསྶཡཏྟཱ བྷཱཛནཊྛཱནིཡཾ. ཝེདནཱ བྷུཉྫིཏབྦཏྟཱ བྷོཛནཊྛཱནིཡཱ. སཉྙཱ ཝེདནསྶཱད ལཱབྷ ཧེཏུཏྟཱ བྱཉྫནཊྛཱནིཡཱ. སངྑཱརཱ ཨབྷིསངྑརཎཏོ བྷཏྟཀཱརཀཊྛཱནིཡཱ. ཝིཉྙཱཎཾ ཨུཔབྷུཉྫཀཏྟཱ བྷུཉྫཀཊྛཱནིཡཾ. ཨེཏྟཱཝཏཱཙ ཨདྷིཔྤེ ཏཏྠསིདྡྷཱིཏི པཉྩེཝ ཝུཏྟཱ’’ཏི ཝུཏྟཾ. ཏཾ སཱརཏོ ནདཊྛབྦཾ.

ན ཧི ཏཾ ཨཊྛཀཐཱཡཾ ཨེཏཔྤརམཝིནིཙྪཡེ ཨཱགཏཾ. ཨུཔམཱདཱིཔནེཨེཝ ཨཱགཏཾ. ན ཙ བྷགཝཏཱ བྷཱཛནཱདིཝིཀཔྤསིདྡྷིམཏྟཾ ཨུདྡིསྶ པཉྩེཝ ཁནྡྷཱ ཝུཏྟཱཏི སཀྐཱ ཝཏྟུཾ. ཏཐཱསིདྡྷསྶ ཨཏྠསྶ པཡོཛནཱབྷཱཝཏོཏི.

[༢༢༢] ཡཉྩ ཏཏྠ

‘‘དེསནཱཀྐམེཔི ཨིདམེཝ ཀཱརཎཾ. ཡཏྠ བྷུཉྫཏི, ཡཉྩ བྷུཉྫཏི, ཡེནཙ བྷུཉྫཏི, ཡོཙ བྷོཛཀོ, ཡོཙ བྷུཉྫིཏཱ. ཏེསཾ ཨནུཀྐམེན དསྶེཏུཀཱམཏྟཱ’’ཏི ཝུཏྟཾ. ཏཾཔི ཨསཱརཾ.

ཙཏུནྣཾ ཨུཔཱདཱནཱནཾ ཝིསཡབྷཱུཏཱ ཁནྡྷཱ ཨུཔཱདཱནཀྑནྡྷཱ. སབྦ སབྷཱགདྷམྨ པརིཡཱདཱནཝསེན སཱསཝཱ ཨནཱསཝཱཙ དྷམྨཱ པཉྩཀྑནྡྷཱཏི ཝུཏྟཱ, ཝིཔསྶནཱ བྷཱུམིཔརིགྒཧཝསེན སཱསཝཱཨེཝ པཉྩུཔཱདཱནཀྑནྡྷཱཏི ཝུཏྟཱ. ཨཱཡཏནྟི ཨཏྟནོ ཕལུཔྤཏྟིཡཱ བྷུསཾ ཨུསྶཧནྟཱ ཝིཡ ཧོནྟཱིཏི ཨཱཡཏནཱནི. ཨཱཡཏནསདྡོ པན ཚསུ ཨཛ྄ཛྷཏྟིཀེསུ དྭཱརདྷམྨེསུ པཝཏྟམཱནོ སཉྫཱཏིདེསཊྛེན ནིཝཱསཊྛཱནཊྛེན ཨཱཀརཊྛེན, ཚསུ བཱཧིརེསུ ཨཱརམྨཎདྷམྨེསུ པཝཏྟམཱནོ སམོསརཎཊྛེན, ཨུབྷཡཏྠཔི ཀཱརཎཊྛེན པཝཏྟཏི. ཏཏྠ ཙིཏྟ ཙེཏསིཀཱ དྷམྨཱ ཨེཀསྨིཾཝཱ བྷཝེ ཨནམཏགྒེཝཱ སཾསཱརེ པུནཔྤུནཾ སཧ ཛཱཡམཱནཱ ཙཀྑཱདཱིསུ ཚསུ དྭཱརཔདེསེསུཨེཝ ཛཱཡནྟི, ན ཨཉྙཏྠ. སནྟཱནཱནུབནྡྷཝསེན ནིཝསནྟཱཔི ཏེསྭེཝ ནིཝསནྟི, ན ཨཉྙཏྠ. ཨཱཀིརིཏྭཱ ཐཔིཏཱ ཝིཡ པཝཏྟམཱནཱཔི ཏེསྭེཝ པཝཏྟནྟི, ན ཨཉྙཏྠ. ཏསྨཱ ཙཀྑཱདཱིནི ཚསཉྫཱཏིདེསཊྛེན ནིཝཱསཊྛཱནཊྛེན ཨཱཀརཊྛེནཙ ཨཱཡཏནཱནིནཱམ. དེཝཱཡཏནཾ ཝིཡ ཨདྷིཊྛཱནཊྛེནཱཏིཔི ཝཏྟུཾ ཝཊྚཏིཡེཝ.

ཡཐཱཙ སམྤནྣཔུཔྥཕལེསུ ཁེམེསུ རུཀྑེསུ ཏཏོ ཏཏོ པཀྑིནོ ནིལིནཏྠཱཡ ཨཱཧཱརཏྠཱཡཙ ནིཙྩཾ སམོསརནྟི. ཨེཝཾ རཱུཔཱདཱིསུ ¶ ཚསུཋཱནེསུ ཏཏོ ཏཏོ ཙིཏྟཙེཏསིཀཱ དྷམྨཱ ཨཱརམྨཎཀརཎཏྠཱཡ ནིཙྩཾ སམོསརནྟི. ཏསྨཱ རཱུཔཱདཱིནི ཚ སམོསརཎཊྛེན ཨཱཡཏནཱནིནཱམ. ཏདུབྷཡཱནི པན ཏེསཾ ཙིཏྟ ཙེཏསིཀཱནཾ ཀཱརཎཊྛེན ཨཱཡཏནཱནིནཱམ. ཙཀྑུཙ ཏཾ ཨཱཡཏནཉྩཱཏི ཙཀྑཱཡཏནཾ. ཨེཝཾ སེསཱནི. ཏཏྠ ཙཀྑུསོཏཱནི སཏྟཱནཾ ཧིཏཀྲིཡཱསུ བཧུཔཀཱརཏྟཱ ཀཱམརཱུཔ བྱཱཔིཏཏྟཱ ཙ པཱཀཊཱནཱིཏིཨཱདིམྷི ཝུཏྟཱནི. ཏེཧི ཨཱསནྣཏྟཱ ཏདནནྟརཾ གྷཱནཾ. ཏཏོ ཛིཝ྄ཧཱཏི ཨིམཱནི ཙཏྟཱརི པདེསཱཡཏནཱནིནཱམ. ཏཏོ སཀལཀཱཡབྱཱཔཀོ ཀཱཡོ. ཏཏོ ཏེསཾ སབྦེསཾ གོཙརཝིསཡགྒཱཧཀཾ མནོཏི. སེསཱནི པན ཏེསཾ ཝིསཡཏྟཱ ཏདནུཀྐམེནེཝ ཝུཏྟཱནཱིཏི.

ཀསྶཙི པན པུགྒལསྶཝཱ སཏྟསྶཝཱ མནུསྶསྶཝཱ དེཝསྶཝཱ བྲཧྨུནོཝཱ ཝསེ ཨཝཏྟིཏྭཱ ཨཏྟནོཨེཝ སབྷཱཝཾ དྷཱརེནྟཱིཏི དྷཱཏུཡོ. ཝིསུཾ ཝིསུཾ ཝཝཏྠིཏསབྷཱཝཏྟཱཝཱ ཡཐཱསབྷཱཝཾ དྷཱརཱིཡནྟི སལླཀྑཱིཡནྟི ཝཝཏྠཔཱིཡནྟཱིཏི དྷཱཏུཡོ. ཨཔིཙ, ནིསྶཏྟ ནིཛྫཱིཝཊྛེན དྷཱཏུཡོ. ཏཏྠ ནིསྶཏྟཊྛེནཱཏི སཏྟཱཀཱརཱ བྷཱཝཊྛེན སཏྟཀིཙྩཱབྷཱཝཊྛེན. ཀོ པནེཏྠ སཏྟཱཀཱརོ ཀིཾ སཏྟཀིཙྩནྟི. ཛཱིཝཡོགོ སཏྟཱཀཱརོ. ཨཱིཧཱཙ བྱཱཔཱརོ ཙ སཏྟཀིཙྩཾ. ནིཛྫཱིཝཊྛེནཱཏི ཨེཀསྨིཾ བྷཝེ ཡཱཝ ནམརཏི. བྷཝཔརཾཔརཱཡཝཱ ཡཱཝ སཾསཱརོ ན ནིཝཏྟཏི. ཏཱཝ ཨབྷིཛྫམཱནོ ཨཙྪིཛྫམཱནོ ཨེཀོཝ ཝཏྟཏཱིཏི ཨེཝཾ གཧིཏསྶ ཛཱིཝསྶ ཨབྷཱཝཊྛེན. ཙཀྑཱདཡོཙ དྷམྨཱ སབྦསོ སཏྟཱཀཱརརཧིཏཱ སཏྟ ཀིཙྩརཧིཏཱཙ ཧོནྟི. ནཙ སཡཾ ཛཱིཝཱནཱམ ཧོནྟི. ནཱཔི ཛཱིཝཡོགཱཏི. ཨིཏི ནིསྶཏྟཊྛེན ནིཛྫཱིཝཊྛེནཙཏེདྷཱཏུཡོནཱམཱཏི. ཏེསཾ པན དཊྛབྦཱཀཱརོ ཨཊྛཀཐཱཡཾ ཝུཏྟོ. ཡཐཱཧ-བྷེརིཏལཾ ཝིཡ ཙཀྑུདྷཱཏུ དཊྛབྦཱ. དཎྜོ ཝིཡ རཱུཔདྷཱཏུ. སདྡོཝིཡ ཙཀྑུཝིཉྙཱཎདྷཱཏུ. ཏཐཱ ཨཱདཱསཏལཾ ཝིཡ ཙཀྑུདྷཱཏུ. མུཁཾ ཝིཡ རཱུཔདྷཱཏུ. མུཁནིམིཏྟཾ ཝིཡ ཙཀྑུཝིཉྙཱཎདྷཱཏུ. ཨཐཝཱ, ཨུཙྪུཡནྟ ཀིལཡནྟཾ ཝིཡ ཙཀྑུདྷཱཏུ. ཡནྟཙཀྐཡཊྛི ཝིཡ རཱུཔདྷཱཏུ. ཨུཙྪུརས ཏེལཱནི ཝིཡ ཙཀྑུཝིཉྙཱཎདྷཱཏུ. ཏཐཱ ཨདྷརཱརཎི ཝིཡ ¶ ཙཀྑུདྷཱཏུ. ཨུཏྟརཱརཎི ཝིཡ རཱུཔདྷཱཏུ. ཨགྒི ཝིཡ ཙཀྑུཝིཉྙཱཎདྷཱཏུ. ཨེསནཡོ སོཏཝིཉྙཱཎདྷཱཏུཨཱདཱིསུ. མནོདྷཱཏུ པན ཡཐཱསམྦྷཝཏོ ཙཀྑུཝིཉྙཱཎདྷཱཏུཨཱདཱིནཾ པུརེཙརཱནུཙརཱ ཝིཡ དཊྛབྦཱ.

དྷམྨདྷཱཏུཡཱ ཝེདནཱཀྑནྡྷོ སལླམིཝ སཱུལམིཝཙ དཊྛབྦོ. སཉྙཱ སངྑཱརཀྑནྡྷཱ ཝེདནཱསལླ སཱུལཡོགཱ ཨཱཏུརཱ ཝིཡ དཊྛབྦཱ. པུཐུཛྫནཱནཾཝཱ སཉྙཱ ཨཱསཱ དུཀྑཛནནཏོ རིཏྟམུཊྛི ཝིཡ ཨཡཐཱབྷུཙྩནིམིཏྟགཱཧཏོ ཝནམིགོཝིཡ. སངྑཱརཱ པཊིསནྡྷིཡཾ པཀྑིཔནཏོ ཨངྒཱརཀཱསུཡཾ ཁིཔནཔུརིསཱ ཝིཡ. ཛཱཏིདུཀྑཱནུབནྡྷཏོ རཱཛཔུརིསཱནུབནྡྷཙོརོ ཝིཡ. སབྦཱནཏྠཱཝཧསྶ ཁནྡྷསནྟཱནསྶ ཧེཏུཏོ ཝིསརུཀྑབཱིཛཱནི ཝིཡ. རཱུཔཾ ནཱནཱཝིདྷུཔདྡཝནིམིཏྟཏོ ཁུར ཙཀྐཾཝིཡ དཊྛབྦཾ. ཨསངྑཏཱཔིདྷཱཏུ ཨམཏཏོ སནྟཏོ ཁེམཏོ ཙ དཊྛབྦཱ. ཀསྨཱ, སབྦཱནཏྠཔཊིཔཀྑབྷཱུཏཏྟཱ. མནོཝིཉྙཱཎདྷཱཏུ གཧིཏཱརམྨཎཾ མུཉྩིཏྭཱཔི ཨཉྙཾ གཧེཏྭཱ པཝཏྟནཏོ ཝནམཀྐཊོ ཝིཡ, དུདྡམནཏོ ཨསྶཁལུངྒོ ཝིཡ, ཡཏྠ ཀཱམནིཔཱཏིཏོ ཝེཧཱསཾ ཁིཏྟདཎྜོ ཝིཡ, ལོབྷདོསཱདི ནཱནཱཔྤཀཱར ཀིལེསཡོགཏོ རངྒནཊོ ཝིཡ དཊྛབྦཱཏི. ཨརིཡསཙྩཱནཱིཏི ཨེཏྠ སནྟསྶ དྷམྨསྶ བྷཱཝོ སཙྩཾ. སནྟསྶཱཏི བྷཱུཏསྶ ཏཐསྶ ཨཝིཔརཱིཏསྶ. ཨཔིཙ, ཀེནཊྛེན སཙྩནྟི. ཏཐཊྛེན ཨཝིཏཐཊྛེན ཨནཉྙཐཊྛེན. ཡཉྷི ཙཀྑུསྶ དུཀྑཏྟཾ, ཏཾ ཏཐཾ ཧོཏི ཨཝིཏཐཾ ཨནཉྙཐཾ. དུཀྑདུཀྑ སངྑཱརདུཀྑ ཝིཔརིཎཱམདུཀྑ སངྑཱཏེཧི ཏཱིཧི དུཀྑེཧི ཏཾ སམངྒིཔུགྒལསྶ ཨབྷིཎྷཔཱིལ༹ནཏོ. ཏཏྠ སངྑཱརདུཀྑཾ ནཱམ ཀམྨཛཱནཾ ཨུཔྤཏྟིཡཱ པགེཝ ཏཾཏཾཀམྨཱ བྷིསངྑརཎདུཀྑཾ. ཏཐཱ ཨུཏུཛཱདཱིནཾ ཨུཔྤཏྟིཡཱ པགེཝ ཏཾཏཾ ཨུཏུཙིཏྟཱཧཱརཱནཾ ཨབྷིསངྑརཎདུཀྑཾ.

ཙཀྑུ ཧི ནཱམ རཱུཔིབྲཧྨཱནཾཔི པུརིམབྷཝེ ཛྷཱནབྷཱཝནཱ སངྑཱཏཾ མཧནྟཾ ཀམྨཱབྷིསངྑརཎ དུཀྑཾ ཨནུབྷཝནྟཱནཾཡེཝ ཨུཔྤཛྫཏི. ནོ ཨཉྙཐཱ. ཀཱམསཏྟཱནཾ པན པུརིམབྷཝེ ཀམྨསངྑཱརདུཀྑཾ ཨནུབྷཝིཏྭཱ ཨུཔྤནྣཾཔི ཡཱཝཛཱིཝཾ པཝཏྟིཡཱ ཨཱཧཱརཱདིསངྑཱརདུཀྑཉྩ པཊིཛགྒན དུཀྑཉྩ ¶ ཨནུབྷཝནྟཱནཉྙེཝ པཝཏྟཏི, ནོ ཨཉྙཐཱ. པཝཏྟམཱནཉྩ པཙྩཡཝེཀལླེཝཱ ཛཱཏེ ཨནྟརཱཡེཝཱ ཨཱགཏེ ཡདཱཀདཱཙི བྷིཛྫཏི. མརཎཀཱལཾ པཏྭཱ པན ཨེཀནྟེན བྷིཛྫཏིཡེཝ. ཏསྨཱ ཏཾ ཨསྶཱདེཏྭཱ ཏདཏྠཱཡ ཀམྨཾཝཱ ཨཱཧཱརཱདིཔཙྩཡཾཝཱ པཊིཛགྒནཾ ཝཱ སངྑརོནྟཱནཾ ཨནམཏགྒེ སཾསཱརེ སངྑཱརདུཀྑསྶ པརིཡནྟོནཱམ ནཏྠི. ཨིཏི སབྦཾ ཙཀྑུ ཨཔརིཡནྟེན སངྑཱརདུཀྑེན པུགྒལཾ ཨབྷིཎྷཾ པཱིལེ༹ཏིཡེཝ. ཨིདམསྶ སངྑཱརདུཀྑཾ. ཨིདཾ ཙཀྑུ ནཱམ པཙྩཡཝེཀལླེཝཱ ཛཱཏེ ཨནྟརཱཡེཝཱ ཨཱགཏེ ཡདཱ ཀདཱཙི བྷིཛྫནཛཱཏིཀཾ. ཏསྨཱ ཏསྶ བྷིཛྫནབྷཡེན པགེཝ པཙྩཡ སམྤཱདནདུཀྑཾ རཀྑཱཝརཎགུཏྟིསཾཝིདྷཱནདུཀྑཾ བྷིཛྫནནིམིཏྟཱནི དིསྭཱ ཝཱ བྷིཛྫམཱནེཝཱ བྷིནྣེཝཱ སོཙནཔརིདེཝནཱདིདུཀྑཉྩ ཝིཔརིཎཱམ དུཀྑཾནཱམ. ཨིཏི སབྦཾ ཙཀྑུ ཨཔརིཡནྟེན ཝིཔརིཎཱམདུཀྑེན པུགྒལཾ ཨབྷིཎྷཾ པཱིལེ༹ཏིཡེཝ. ཨིདམསྶ ཝིཔརིཎཱམདུཀྑཾ. དུཀྑདུཀྑཾ པན ཏདུབྷཡེན དུཀྑེན སཧེཝ སིཛ྄ཛྷཏི. ཨེཝཾ ཙཀྑུ དུཀྑདུཀྑ སངྑཱར དུཀྑ ཝིཔརིཎཱམ དུཀྑསངྑཱཏེཧི ཏཱིཧི དུཀྑེཧི ཏཾ སམངྒིཔུགྒལཾ ཨབྷིཎྷཾ པཱིལེ༹ཏིཡེཝ. ཡཉྩ ཏསྶ ཏཐཱཔཱིལ༹ནཾ, ཏཾ ཏཐཾ ཧོཏི, ཨཝིཏཐཾ, ཨནཉྙཐཾ. ཏསྨཱ ཙཀྑུ དུཀྑསཙྩཾནཱམ. ཨེས ནཡོ སོཏཱདཱིསུ ཏེབྷཱུམཀདྷམྨེསུ.

སེསསཙྩེསུཔི ཡཾ ལོབྷསྶེཝ དུཀྑསམུདཡཏྟཾ. ཡཾ ནིབྦཱནསྶེཝ དུཀྑནིརོདྷཏྟཾ. ཡཾ ཨཊྛངྒིཀམགྒསྶེཝ དུཀྑནིརོདྷམགྒཏྟཾ ཏཾ ཀཐཾ ཧོཏཱིཏིཨཱདིནཱ ཝཏྟབྦཾ. ཡཱཝཙ ལོབྷོ ན པཧིཡྻཏི. ཏཱཝ ཙཀྑཱདཱིནི ཨསྶཱདེཏིཡེཝ. ཡཱཝཙ ཏཱནི ཨསྶཱདེཏི. ཏཱཝ ཏེསཾ པཝཏྟིཡཱ ཀམྨཱདཱིནི སངྑརོནྟིཡེཝ. ཡཱཝཙ ཀམྨཱདཱིནི སངྑརོནྟི. ཏཱཝ ཙཀྑཱདཱིནི པཝཏྟནྟིཡེཝ. ཡཱཝཙཏཱནི པཝཏྟནྟི. ཏཱཝ ཏེསཾ ཝུཏྟཔྤཀཱརེཧི སངྑཱར དུཀྑཱདཱིཧི ནམུཙྩཏིཡེཝ. ཏསྨཱ ལོབྷསྶ དུཀྑསམུདཡཏྟཾ ཏཐཾ ཧོཏི. ཙཀྑཱདཱིསུཙ པཝཏྟམཱནེསུ ཝུཏྟཔྤཀཱརཾ སབྦཾ དུཀྑཾ ཨཱགཙྪཏིཡེཝ. ཨཔཝཏྟམཱནེསུ ནཱགཙྪཏི. ཏསྨཱ ཏེསཾ པཝཏྟིནིརོདྷབྷཱུཏསྶ ནིབྦཱནསྶེཝ དུཀྑནིརོདྷཏྟཾ ཏཐཾ ཧོཏི. ཏཐཱ ལོབྷཔཧཱནཏོ ཨཉྙོ དུཀྑམུཏྟིམགྒོནཱམ ནཏྠི. ཨཊྛངྒིཀམགྒོཙ ཨུཔྤཛྫ མཱནོ ¶ ཨེཀནྟེན ཏཾ པཛཧཏི. ཏསྨཱ ཨཊྛངྒིཀམགྒསྶེཝ དུཀྑནིརོདྷམགྒཏྟཾ ཏཐཾ ཧོཏི, ཨཝིཏཐཾ, ཨནཉྙཐནྟི.

ཨེཝཾསནྟེཔི སཙྩསདྡོ པརིཡཱཡ སཙྩེསུཔི ཝཏྟཏཱིཏི ཝུཏྟཾ ཙཏྟཱརིཨརིཡསཙྩཱནཱིཏི. ཏཏྠ དུཀྑསཙྩེ ཏཱཝ སཀྐཱཡཔརིཡཱ པནྣཱ ཨཛ྄ཛྷཏྟདྷམྨཱཨེཝ ཨརིཡསཙྩཾནཱམ. ཏེཡེཝ ཧི ཨསྨིམཱནསྶ ཨདྷིཊྛཱནབྷཱུཏཱ ཧུཏྭཱ ཡཱཝཏཾ མཱནཾ ན སམཱུཧནཏི. ཏཱཝ དུཀྑཀིཙྩཾ ཀརོནྟི. དུཀྑཔརིཉྙཱཙནཱམ ཡཱཝདེཝ ཨསྨིམཱནསམུགྒྷཱཏཱཡ ཧོཏི. ཨསྨིམཱནོཙ ཏེསྭེཝ ཨཛ྄ཛྷཏྟདྷམྨེསུ ནིཝིསཏཱིཏི ཏེསུ པརིཉྙཱཏེསུ པརིཉྙཱཀིཙྩཾ སིདྡྷམེཝ ཧོཏཱིཏི. ཏབྦིཔརཱི ཏེན པན ཨནིནྡྲིཡ བདྡྷདྷམྨཱ མགྒཕལདྷམྨཱཙ ཨཊྛངྒིཀཝཛྫཱ ཨུདཡབྦཡ པཱིལ༹ནཏོ སངྑཱརདུཀྑཝིཔརིཎཱམདུཀྑེཧིཙ ཨཔརིམུཏྟཏྟཱ དུཀྑསཙྩཾ ནཱམ. སམུདཡསཙྩེ ཨེཀོ ལོབྷོཡེཝ ཨརིཡསཙྩཾནཱམ. སོཧི ཨཏྟསམངྒིནོ སཏྟེ ཨཏྟནིཙ ཨཱརམྨཎདྷམྨེསུཙ ཨསྶཱདཾ ཛནཡིཏྭཱ ནིཙྩཾ ཝཊྚདུཀྑཏོ ཨནུཀྐཎྛམཱནེ ཀརོཏཱིཏི ཏེསཾ ལོབྷསདིསོ ཨཉྙོ ཉཱཏིཝཱ མིཏྟོཝཱ སཧཱཡོཝཱ ཨཏྟཱཝཱ ཨཏྟནིཡཾཝཱ ནཏྠིཝིཡ ཁཱཡཏི. ཏསྨཱ ཏཾསདིསོ ཨཉྙོ ཀོཙི ཝཊྚདུཀྑསཾཝིདྷཱཡཀོནཱམ ནཏྠི. ཏཉྩ པཛཧིཏུཾ སཀྐོནྟསྶ ཨཉྙོ དུཛྫཧོནཱམ ནཏྠི. ཨཝསེསཱཔན སབྦེཔི སཱསཝཱ ཀུསལཱཀུསལདྷམྨཱ སམུདཡསཙྩཾནཱམ.

ཨེཏྠ སིཡཱ, ནནུ ཨཝིཛྫཱཔི སབྦསྶ ཝཊྚདུཀྑསྶ མཱུལབྷཱཝེན ཝུཏྟཱཏི སཱཔི སམུདཡེ ཨརིཡསཙྩེཨེཝ ཝཏྟབྦཱཏི. ཝུཙྩཏེ, ཡཐཱཧི ཨེཀོ ཚེཀོ ཨུཡྻཱནཔཱལོ སམྤཏྟིཡུཏྟཾ བྷཱུམི བྷཱགཾ ལབྷིཏྭཱ ཨཏྟནོ ཉཱཎབལེན བྷཱུམིབྷཱགཉྩ ནཱནཱབཱིཛཱནིཙ ཨབྷིསངྑརིཏྭཱ ནནྡནསདིསཾ ཨུཡྻཱནཾ མཱཔེསི. ཏཏྠ བྷཱུམི ཨུཡྻཱན པཱལསྶ བཱིཛཱནཾ རུཀྑཱནཉྩ པཏིཊྛཱནཀིཙྩཾ སཱདྷེཏི. བཱིཛཱནིཙ ཨངྐུརུཔྤཱདནཀིཙྩཾ སཱདྷེནྟི, ཨུཡྻཱནཔཱལོཡེཝ པན སབྦཀིཙྩཱནི སཱདྷེཏི. སོ ཧི བྷཱུམིཡཾ བཱིཛེསུ རུཀྑེསུཙ ཡཾཡཾ ཀཏྟབྦཾ ཧོཏི. ཏཾ སབྦཾ ཀརོཏི. མམེཏནྟི པརིགྒཎྷཱཏི རཀྑཏི. ཏཏོ ཨུཔྤནྣེ བྷོགེ བྷུཉྫཏི. ཏསྨཱ ཀོ ཨིདཾ མཱཔེསི, ཀསྶེདཾ ཨུཡྻཱནནྟི ཝུཏྟེ ཨུཡྻཱནཔཱལོཡེཝ མཱཔེསི. ཏསྶེདཾ ཨུཡྻཱནཾ ཨིཙྩེཝ ཝུཙྩཏི. ¶ ན བྷཱུམིཾ མཱཔེསི. བཱིཛཱནི མཱཔེནྟི. ཏེསཾ ཨིདཾ ཨུཡྻཱནནྟི ཝུཙྩཏི. ཀཱ པན ཨུཡྻཱནསམྤཏྟིཡཱ པཙྩཡཔརཾཔརཱཏི ཝུཏྟེ པན བྷཱུམིཨེཝ ཨཱདིཏོ ཝཏྟབྦཱ. ན ཨུཡྻཱནཔཱལོ. ནཙ བཱིཛཱནཱིཏི. ཨེཝཾ སམྤདམིདཾ དཊྛབྦཾ. པཊིཙྩསམུཔྤཱད ནཡཉྷི པཏྭཱ པཙྩཡཔརཾ པརཝསེན དུཀྑ དྷམྨཱནཾ པཝཏྟི ནིཝཏྟིཝིདྷཱནེ ཨཝིཛྫཱཨེཝ ཨཱདི པབྷཝཔདྷཱནབྷཱུཏཱ ཧོཏི, ན ཏཎྷཱ. སཙྩདེསནཱཡཾ པན ཏེསཾ ནིབྦཏྟཀདྷམྨཝིདྷཱནེ ཏཎྷཱཨེཝ སཱམིཛེཊྛཀ པདྷཱནབྷཱུཏཱ ཧོཏི. ན ཨཝིཛྫཱཏི ནཏྠི སམུདཡཱརིཡསཙྩབྷཱཝེ ཨཝིཛྫཱཡ ཨོཀཱསོཏི དཊྛབྦོ. ཀིལེསཱནཾ ཏདངྒནིརོདྷཝིཀྑམྦྷན ནིརོདྷཱ ནིརོདྷསཙྩཾནཱམ. ནིབྦཱནཾ ནིརོདྷཱརིཡསཙྩཾནཱམ. ཚསུ ལོཀིཡཝིསུདྡྷཱིསུ མགྒངྒཱནི མགྒསཙྩཾ ནཱམ. ཨཊྛངྒིཀོ ལོཀུཏྟརམགྒོཨེཝ མགྒཨརིཡསཙྩཾནཱམཱཏི.

ཨརིཡསདྡོ ཙེཏྠ ཀཏྠཙི ཀདཱཙི ཀེསཉྩི ཀུཏོཙི ཀཐཉྩི ཨཝིཏཐབྷཱཝེན ཨུཏྟམཏྠཝཱཙཀོཏི. ཝིབྷཱཝནིཡཾ པན ཨཊྛཀཐཱཡཾ ཝུཏྟནཡེན སཙྩསདྡསྶ ཨཏྠོ ཝིབྷཱཝིཏོ དུཀྑཾཨརིཡ སཙྩནྟི ཨེཏྠ པཱིལ༹ནཊྛོ, སངྑཏཊྛོ, སནྟཱཔཊྛོ, ཝིཔརིཎཱམཊྛོཏི ཨིམེཧི ཙཏཱུཧི ཨཏྠེཧི ཙཀྑཱདིཀསྶ ཨེཀེཀསྶ ཏེབྷཱུམཀདྷམྨསྶ དུཀྑསཙྩཏཱ ཝེདིཏབྦཱ. ཏཏྠ སངྑཏཊྛ ཝིཔརིཎཱམཊྛཱ པུབྦེ སངྑཱར དུཀྑཝིཔརིཎཱམདུཀྑེསུ ཝུཏྟནཡཱཨེཝ. པདཏྠཏོཔན པཙྩཡེཧི སངྑརཱིཡཏཱིཏི སངྑཏོ. པགེཝ ཀམྨཱདིཔཙྩཡཱབྷིསངྑརཎདུཀྑེན ཝིནཱ ན ཨུཔྤཛྫཏི, ནཔཝཏྟཏཱིཏི ཝུཏྟཾ ཧོཏི. ཝིརཱུཔོ ཧུཏྭཱ པརིཎཱམོ ཝིཔརིཎཱམོ. པརིཧཱནིཙེཝ པརིབྷེདོཙ. པཱིལ༹ནཊྛོཏི ཨེཏྠ པཱིལི༹ཏབྦནྟི པཱིལ༹ནཾ. པཱིལེ༹ཏཱིཏི པཱིལ༹ནཾ. པཱིལཱི༹ཡཏེ པཱིལ༹ནཾ. ཨཏྠོཏི སབྷཱཝོ. པཱིལ༹ནཾ ཨཏྠོ ཡསྶཱཏི ཝིགྒཧོ. ཏཏྠ ཡཐཱ ཨེཀིསྶཱ དུགྒཏིཏྠིཡཱ ཀུཙྪིམྷི པུཏྟོ ཨུཔྤཛྫཏི. སོཙ ནཱནཱརོགེཧི སཡཾ ནིཙྩཾ པཱིལི༹ཏོ ཧུཏྭཱ པཊིཛགྒནདུཀྑེཧི མཱཏརཉྩ ནིཙྩཾ པཱིལེ༹ཏིཡེཝ. ཡཉྩ ཏསྶཱ ཀུཙྪིམྷི ཏཱདིསསྶ པུཏྟསྶ ཨུཔྤཛྫནཾ, ཏཉྩ ཏསྶཱ ཨིཏྠིཡཱ པཱིལ༹ནཀིཙྩམེཝ ཧོཏི. ཨེཝམེཝཾ ཡེ ཙཀྑཱདཡོ དྷམྨཱ ཛརཱམརཎེཧི ནིཙྩཾ པཱིལཱི༹ཡནྟི, ཏེ པཊིཛགྒནདུཀྑེཧི ཏཾ སམངྒཱིནཾ པུགྒལཾ ནིཙྩཾ པཱིལེ༹ནྟིཡེཝ. ཡཉྩ ཏསྶ སནྟཱནེ ཏེསཾ ཨུཔྤཛྫནཾ, ཏཉྩ ཏསྶ པཱིལ༹ནཀིཙྩམེཝཱཏི. ཡཐཱཧཡོ ¶ བྷིཀྑཝེ ཙཀྑུསྶ ཨུཔྤཱདོ ཋིཏི ཨབྷིནིབྦཏྟི པཱཏུབྷཱཝོ. དུཀྑསྶེསོ ཨུཔྤཱདོ. རོགཱནཾ ཋིཏི ཛརཱམརཎསྶ པཱཏུབྷཱཝོ. ཡོ བྷིཀྑཝེ སོཏསྶ གྷཱནསྶ ཛིཝ྄ཧཱཡ ཀཱཡསྶ མནསྶ ཨུཔྤཱདོཏིཨཱདི.

སནྟཱཔཊྛོཏི རཱགགྒིཨཱདཱིཧི ཨེཀཱདསཧི ཨགྒཱིཧི བྷུསཾ པརིདཡ྄ཧནཊྛོ. ཡཐཱཧ –

ཙཀྑུཾ ཨཱདིཏྟཾ. ཀེན ཨཱདིཏྟཾ. རཱགགྒིནཱ ཨཱདིཏྟཾ. དོསགྒིནཱ. མོཧགྒིནཱ. ཛཱཏིཡཱ. ཛརཱཡ. མརཎེན. སོཀེན. པརིདེཝེན. དུཀྑེན. དོམནསྶེན. ཨུཔཱཡཱསེན ཨཱདིཏྟནྟི ཝདཱམི. སོཏཾ ཨཱདིཏྟཾ. གྷཱནཾ ཨཱདིཏྟཾ. ཛིཝ྄ཧཱ ཨཱདིཏྟཱ. ཀཱཡོ ཨཱདིཏྟོ. མནོ ཨཱདིཏྟོཏི.

ཨཱདིཔནཾ སནྟཱཔནཾ པརིདཡ྄ཧནནྟི ཨིདྷ ཨཏྠཏོ ཨེཀནྟི. ཨེཏྠ སིཡཱ, ཨརིཡམགྒོཔི ཙིརཀཱལཾ པཱརམིཏཱབྷིསངྑརཎདུཀྑེན ཨནྟིམབྷཝེཙ སཱིལཱདིཝིསུདྡྷིབྷཱཝནཱབྷིསངྑརཎདུཀྑེན པུགྒལཾ སུསཾ པཱིལེ༹ཏིཡེཝ. ཏཐཱ ཝིཔརིཎཱམདྷམྨོཙ. ཏསྨཱ སོཔི པིལ༹ནཱདིཨཏྠེན དུཀྑསཙྩསངྒཧོ སིཡཱཏི.ན. སབྦདུཀྑསནྟི ཝཾཧཏྟཱ. སོ ཧི ཝུཏྟཔྤཀཱརཾ ཨབྷིསངྑརཎདུཀྑཾ པརིཔུཎྞཾ ཨནུབྷཱུཏསྶ པུགྒལསྶ སཀིཾ ཨུཔྤཛྫམཱནོ སབྦཾ ཀིལེསཛཱཏཾ ཁེཔེནྟོ ཨུཔྤཛྫཏི. ནིརུཛ྄ཛྷམཱནོཙ སབྦཾ ཨཱཡཏིཾ ཨནམཏགྒེ སཾསཱརེ ཝཊྚདུཀྑཾ ཝཱུཔསམེནྟོ ནིརུཛ྄ཛྷཏི. ཝཱུཔསནྟཾཙ ཨནཱགཏ དུཀྑཾ ཨུཔཱདཱཡ ཝུཏྟཔྤཀཱརཾ ཨབྷིསངྑརཎདུཀྑཾ གཎནུཔགཾ ནཧོཏི. བྷིཛྫནྟོཙ ཨནུཏྟརཾ ཝིམུཏྟིསུཁཾ དཏྭཱཝ བྷིཛྫཏི. ཏསྨཱ ཏསྶ ཝིཔརིཎཱམཔཙྩཡཱཔི པུགྒལསྶ ཀཱཙི ཧཱནིནཱམ ནཏྠཱིཏི ན སོ དུཀྑསཙྩསངྒཧོཏི. ལོཀིཡདྷམྨཱ པན ཨུཔྤཛྫམཱནཱ པཝཏྟ མཱནཱཙ པུབྦེ ཝུཏྟཔཀཱརེཧི སངྑཱརདུཀྑེཧི བྷུསཾ པཱིལེ༹ཏྭཱ ཨེཝ ཨུཔྤཛྫནྟི པཝཏྟནྟིཙ. ནིརུཛ྄ཛྷམཱནཱ མཧནྟཾ པརིལཱ༹ཧདུཀྑཾ ཛནེཏྭཱ ཨཔརིཡནྟེ ཁུརཙཀྐསདིསེ ཝཊྚདུཀྑཡནྟེ པུགྒལཾ ཡོཛེནྟཱཝ ནིརུཛ྄ཛྷནྟི. ཏསྨཱ ཏེཨེཝ པཱིལ༹ནཱདིཨཏྠེཧི ཨེཀནྟདུཀྑཱ ཧོནྟཱིཏི. ཨེཏེན ནིབྦཱནསྶཔི སམྤཱཔཀཔཙྩཡཱབྷིསངྑརཎལེསཾ གཧེཏྭཱ དུཀྑསཙྩཏྟཔསངྒོ ནིཝཏྟིཏོ ཧོཏཱིཏི.

དུཀྑསམུདཡོ ¶ ཨརིཡསཙྩནྟི ཨེཏྠ བྷཝཱབྷཝསངྑཱཏཾ དུཀྑཀྑནྡྷཾ སམུདེཏི. པུནཔྤུནཾ ཨབྦོཙྪིནྣཾ ཀཏྭཱ ཨུདཡཏི ཨུཊྛཱཔེཏི ཝཌྜྷེཏིཝཱཏི དུཀྑསམུདཡོ, ཨཱཡཱུཧནཊྛོ, ནིདཱནཊྛོ, སཾཡོགཊྛོ, པལིབོདྷཊྛོཏི ཙཏཱུཧི ཨཏྠེཧི ལོབྷསྶ དུཀྑསམུདཡཏཱ ཝེདིཏབྦཱ. ཏཏྠ ཨཱཡཱུཧནཊྛོཏི བྷཝཱབྷཝ སངྑཱཏསྶ ཨེཀེཀསྨིཾ བྷཝེཔི ཝཏྠུཀཱམཔཊིསཾཡུཏྟསྶ དུཀྑཀྑནྡྷསྶ བྷིཡྻོ པརིབྱཱུཧནཊྛོ རཱསིཀརཎཊྛོ ནིདཱནཊྛོཏི ཏདེཝ ནིརནྟརཾ ཀཏྭཱ ཨནུཔྤདཱནཊྛོ ནིཡྻཱཏནཊྛོཏི ཝུཏྟཾ ཧོཏི. སཾཡོགཊྛོཏི དུཀྑཀྑནྡྷསྨིཾཨེཝ དལ༹ྷཾ བནྡྷནཊྛོ. པལིབོདྷཊྛོཏི ཏཏོ ཏསྶ ཏསྶ མུཙྩནུཔཱཡསྶ ནཱིཝཱརཎ ཝསེན པལིབུནྡྷནཊྛོ ཨུཔརུནྡྷནཊྛོཏི ཨཏྠོ. དུཀྑནིརོདྷོ ཨརིཡསཙྩནྟི ཨེཏྠ ཝཊྚདུཀྑསྶ ནིརུཛ྄ཛྷནཾ ཨནུཔྤཱད དྷམྨཏཱཔཏྟི ཝསེན ཁིཡྻཱནཾ དུཀྑནིརོདྷོ. དུཀྑཾ ཝཱ ནིརུཛ྄ཛྷཏི ནཔཝཏྟཏི ཨེཏསྨིནྟི དུཀྑནིརོདྷོ. ནིསྶརཎཊྛོ ཝིཝེཀཊྛོ, ཨསངྑཏཊྛོ, ཨམཏཊྛོཏི ཙཏཱུཧི ཨཏྠེཧི ནིབྦཱནསྶ དུཀྑནིརོདྷཏཱ ཝེདིཏབྦཱ. ཏཏྠ ནིསྶརཎཊྛོཏི ནིསྶརཎ ཝིམུཏྟིཡཱ ཝིམུཙྩནཊྛོ. ཝིཝེཀཊྛོཏི ཝཊྚདུཀྑཔལིབོདྷཏོ ཝིཝིཙྩནཊྛོ. ཨསངྑཏཊྛོཏི སངྑཱརདུཀྑསྶ ཨབྷཱཝཊྛོ. ཨམཏཊྛོཏི མརཎདུཀྑསྶ ཨབྷཱཝཊྛོཏི.

དུཀྑནིརོདྷགཱམིནིཔཊིཔདཱཏི ཨེཏྠ དུཀྑནིརོདྷཾ གམེཏི སམྤཱཔེཏཱིཏི དུཀྑནིརོདྷགཱམིནཱི. ཨཏྟནོ སནྟཱནེ པཊིལཱབྷཀརཎ ཝསེན པཊིཔཛྫིཏབྦཱཏི པཊིཔདཱ. དུཀྑནིརོདྷགཱམིནཱིཙ སཱ པཊིཔདཱ ཙཱཏི ཝིགྒཧོ. ནིཡྻཱནཊྛོ, ཧེཏྭཊྛོ, དསྶནཊྛོ, ཨདྷིཔཏེཡྻཊྛོཏི ཙཏཱུཧི ཨཏྠེཧི ཨཊྛངྒིཀམགྒསྶ དུཀྑནིརོདྷམགྒཏཱ ཝེདིཏབྦཱ. ཏཏྠ ནིཡྻཱནཊྛོཏི ཨཝིཛྫཱཔཙྩཡཱ སངྑཱརཱཏིཨཱདིཀཾ ཝཊྚསོཏཾ པཊིནིཝཏྟེཏྭཱ ཨཝིཛྫཱནིརོདྷཱ སངྑཱརནིརོདྷོཏིཨཱདིཀཾ ཝཊྚཔཊིསོཏཾ ཨབྷིམུཁཾ ནིགྒམནཊྛོ. ཧེཏྭཊྛོཏི སབྦེསཾ ཨརིཡགུཎཱནཾ སུཔྤཏིཊྛིཏབྷཱཝ སཱདྷནཊྛོ. དསྶནཊྛོཏི ཨཉྙཱཎཨདསྶནསངྑཱཏསྶ སམྨོཧསྶ པཧཱན ཝསེན ཙཏུསཙྩདྷམྨསྶ པཊིཝིཛ྄ཛྷནཊྛོ. ཨདྷིཔཏེཡྻཊྛོཏི ཏཎྷཱ དཱསབྱཝིམུཏྟིཡཱ ¶ བྷཱུཛིསྶབྷཱཝཔཏྟིཝསེན སཡམེཝ ཨཏྟནོ ཨདྷིཔཏི ཧུཏྭཱ ཝིརོཙནཊྛོ. ལོཀིཡམགྒཱ ཧི ཏཎྷཱཡ ཨཱརམྨཎབྷཱཝེ ཋིཏཱ ཏཎྷཱདཱསབྱཾ ནཱཏིཝཏྟནྟཱིཏི. ཨེཏྠཙ ཨིམེ སཏྟཱནཱམ ཨེཀནྟེན དུཀྑཔཊིཀཱུལཱ ཧོནྟི དུཀྑབྷཱིརུཀཱ. ཡེཙ ཨཏྟནི དུཀྑཾ ཛནེནྟི. ཏེསུ ཝེརིསཉྙཾ ཨུཔྤཱདེནྟི. ཨཏྟནོ པན ཨེཀནྟདུཀྑཾཝཱ ཨེཀནྟདུཀྑཛནཀཾཝཱ ཏེ ནཛཱནནྟི. ཏསྨཱ ཏེ ཨཏྟནོ དུཀྑམུཏྟིཡཱ ཡཾ ཡཾ ཀམྨཾ ཨཱཡཱུཧནྟི. ཏཾ ཏཾ ཨཏྟནོ དུཀྑཝཌྜྷིཡཱཨེཝ སམྤཛྫཏི. ཀིཾ པན ཨེཀནྟདུཀྑཾ, ཀིཾཙ ཨེཀནྟ དུཀྑཛནཀནྟི. ཨཏཱིཏཱནཱགཏཔཙྩུཔྤནྣབྷཱུཏཱ ཨཏྟནོ ཨཏྟནོ ཨཏྟཧཱཝཔརིཡཱཔནྣཱ ཏེབྷཱུམཀདྷམྨཱཨེཝ ཨཏྟནོ ཨཏྟནོ ཨེཀནྟདུཀྑཱནཱམ. ཀསྨཱ, ཏེཧི མུཏྟེཨེཝ སབྦདུཀྑེཧི མུཙྩནཏོ, ཨམུཏྟེཙ ཨམུཙྩནཏོཏི. ཨཏྟནོ ཏཎྷཱཨེཝ ཨཏྟནོ ཨེཀནྟདུཀྑཛནཀཾནཱམ. ཀསྨཱ, ཏཱཡ པཧཱིནཱཡཨེཝ ཨེཀནྟ དུཀྑེཧི མུཙྩནཏོ, ཨཔཧཱིནཱཡཙ ཨམུཙྩནཏོཏི.

ཏཐཱ ཨིམེ སཏྟཱ ཨེཀནྟེན སུཁཀཱམཱ ཧོནྟི སུཁཱབྷིནནྡིནོ. ཡེཙ ཨཏྟནི སུཁཾ ཛནེནྟི. ཏེསུ པིཡམིཏྟསཉྙཾ ཨུཔྤཱདེནྟི. ཨཏྟནོཔན ཨེཀནྟསུཁཾཝཱ ཨེཀནྟསུཁམགྒཾཝཱཏེ ནཛཱནནྟི. ཏསྨཱ ཏེ ཨཏྟནོ སུཁཝཌྜྷིཡཱ ཡཾ ཡཾ ཀམྨཾ ཨཱཡཱུཧནྟི. ཏཾ ཏཾ ཨཏྟནོ དུཀྑཝཌྜྷིཡཱཨེཝ སམྤཛྫཏི. ཀིཾ པན ཨེཀནྟསུཁཾ ཀོཙ ཨེཀནྟ སུཁམགྒོཏི. ཨེཀནྟདུཀྑདྷམྨསྶ ཨབྷཱཝོཨེཝ ཨཏྟནོ ཨེཀནྟ སུཁཾནཱམ. ཨེཀནྟདུཀྑཛནཀསྶ པཧཱནམགྒོཨེཝ ཨཏྟནོ ཨེཀནྟ སུཁམགྒོནཱམཱཏི ཨིམམཏྠཾ དསྶེནྟོ ཨིམཱནི ཙཏུསཙྩཔདཱནི ཀཐེསཱིཏི ཝེདིཏབྦཾ.

[༢༢༣] ཡཾ པན ཝིབྷཱཝནིཡཾ

‘‘དུཀྑསྶ ཨནུཔྤཱདནིརོདྷོ ཨེཏྠ ཨེཏེནཱཏིཝཱ དུཀྑནིརོདྷོ’’ཏི ཝུཏྟཾ. ཏཏྠ ཨེཏེནཱཏི ཨིདཾ ནཡུཛྫཏི.

ན ཧི ནིབྦཱནཾ དུཀྑསྶ ཨནུཔྤཱདནིརོདྷ ཀྲིཡཱསཱདྷནེ དུཀྑེན སཧཀཱརཱི ཀཱརཎཾ ཧོཏཱིཏི. སེསཙེཏསིཀཱཏི ཝེདནཱ སཉྙཱཧི སེསཱ པཉྙཱས ཙེཏསིཀཱ. ཨཏཱིཏཱདིཝསེན ཏིཝིདྷ བྷིནྣཱནཾ ¶ ཨཛ྄ཛྷཏྟཱདི ཨོལཱ༹རིཀཱདི ཧཱིནཱདི དཱུརཱདིཝསེན དུཝིདྷབྷིནྣཱནཉྩ དྷམྨཱནཾ རཱསཊྛེན ཁནྡྷཝོཧཱརོ ཧོཏི. ནིབྦཱནསྶ པན ཏཱདི སོ བྷེདོ ནཏྠཱིཏི ཝུཏྟཾ བྷེདཱབྷཱཝེནཱཏིཨཱདི. ཏཉྷི ཨཏཱིཏཱདིཀེ ཏིཝིདྷབྷེདེ ཨེཀཾཔི ན ཧོཏི. ཀསྨཱ. ཨནིདྡིསིཏབྦ དྷམྨཏྟཱ. ཏཉྷི ཏེཀཱལིཀདྷམྨཱནཾ ཁཡཝིརཱགནིརོདྷབྷཱུཏོ ཨནིམིཏྟ དྷམྨོཡེཝ ཧོཏི. ཏསྨཱ ཨིདཾ ཨཏཱིཏེ ཨསུཀབུདྡྷཀཱལེ ནིབྦཱནཾ. ཨིདཾ ཨནཱགཏེ. ཨིདཾ ཨེཏརཧཱིཏི ཨེཝཾ ཀཱལབྷེདེན ནིདྡིསིཏབྦཾ ནཧོཏི. ཏཐཱ དིསཱ དེསཋཱནབྷེདེན པརིནིབྦུཏཔུགྒལབྷེདེན ཙ. ཀེཝལཾ པན ཨནམཏགྒེ སཾསཱརཝཊྚེ ཡཏྟཀཱནི ཨནཏྠ པདཱནི དིསྶནྟི. ཏཔྤཊིཔཀྑསིདྡྷེཧི གུཎཔདེཧིཨེཝ ཏཾ ཀཐེ ཏབྦནྟི. དུཀེསུ པན ཨཛ྄ཛྷཏྟདུཀཾ པཏྭཱ ཏཾ བཧིདྡྷཱཨེཝ ཧོཏི. ན ཨཛ྄ཛྷཏྟཾ. ཨོལཱ༹རིཀདུཀཾ པཏྭཱ སུཁུམམེཝ ཧོཏི, ན ཨོལཱ༹རིཀཾ. ཧཱིནདུཀཾ པཏྭཱ པཎཱིཏམེཝ ཧོཏི, ན ཧཱིནཾ. དཱུརེ དུཀཾ པཏྭཱ དཱུརེཨེཝ ཧོཏི, ན སནྟིཀེཏི. ཁནྡྷསངྒཧནིསྶཊནྟི ཁནྡྷསངྒཧཏོ ཝིམུཏྟཾ.

དྭཱརཱལམྦཎབྷེདེནཱཏི དྭཱརཚཀྐ ཨཱརམྨཎཚཀྐཱནཾ བྷེདེན. ཨཱཡཏནཱནི དྭཱདས བྷཝནྟཱིཏི ཡོཛནཱ. ཨེཏྠཙ དྭཱརཚཀྐཾ དྷམྨཱརམྨཎཾཨེཝཱཏི སེསདྷམྨཱལམྦཎཾ སནྡྷཱཡ ཨཱརམྨཎཚཀྐཾ ཝུཏྟནྟི དཊྛབྦཾ. དྭཱརཱ.ལ. པརིཡཱཡེནཱཏི ཚནྣཾ དྭཱརཱནཾ ཚནྣཾ ཨཱལམྦཎཱནཾ ཏེསུ དྭཱརཱལམྦཎེསུ ཨུཔྤནྣཱནཾ ཝིཉྙཱཎཱནཉྩ ཀམེན དྷཱཏུཡོ ཨཊྛཱརས བྷཝནྟཱིཏི ཡོཛནཱ. ཨེཏྠཔི དྭཱརཚཀྐེ མནོདྭཱརཾ ཝིཉྙཱཎེཀདེསམེཝ ཧོཏི. དྭཱརཚཀྐཾ ཝིཉྙཱཎསཏྟཀཉྩ དྷམྨཱ ལམྦཎེཀདེསམེཝཱཏི. མགྒོ ལོཀུཏྟརོ མགྒོནཱམ མཏོཏི ཡོཛནཱ. མགྒཡུཏྟཱ ཨེཀཱུནཏིཾསདྷམྨཱ ཕལབྷཱུཏཱཙ སཏྟཏིཾས དྷམྨཱ ཙཏུསཙྩ ཝིནིསྶཊཱ ཙཏཱུཧི ཨརིཡསཙྩེཧི ཝིནིསྶཊཱ ཝིམུཏྟཱ. ཡམེཏྠ ཝཏྟབྦཾ, ཏཾ ཧེཊྛཱ ཝུཏྟམེཝཱཏི.

ཨིཏི པརམཏྠདཱིཔནིཡཱནཱམ ཨབྷིདྷམྨཏྠསངྒཧསྶ

ཙཏུཏྠཝཎྞནཱཡ སམུཙྩཡ སངྒཧསྶ

པརམཏྠདཱིཔནཱ ནིཊྛིཏཱ.

པཙྩཡ སངྒཧ པརམཏྠདཱིཔནཱི

༡༦༦. ཨེཝཾ ¶ སཏྟཧི པརིཙྪེདེཧི པཐམསྶ ནཱམརཱུཔཔརིཙྪེད ཉཱཎསྶ ཝིདྷཱནཾ དསྶེཏྭཱ ཨིདཱནི དུཏཱིཡསྶ པཙྩཡཔརིགྒཧཉཱཎསྶ ཝིདྷཱནཾ དསྶེནྟོ ཡེསཾསངྑཏདྷམྨཱནནྟིཨཱདི མཱཧ. ཨིདཱནི ཡེསཾ སངྑཏདྷམྨཱནཾ སངྑཏཱསངྑཏབྷཱུཏཱ ཡེདྷམྨཱ ཡཐཱ ཡེཧི ཧེཏཱདཱིཧི པཙྩཡཱཀཱརེཧི པཙྩཡཱ ཨུཔཀཱརཀཱ ཧོནྟི. ཏཾ ཝིབྷཱགཾ ཏེསཾ སངྑཏདྷམྨཱནཾ པཙྩཡུཔྤནྣབྷཱུཏཱནཾ ཝིབྷཱགཉྩ ཏེསཾ པཙྩཡདྷམྨཱནཾ ཝིབྷཱགཉྩ ཏེསཾཔཙྩཡཱཀཱརཱནཾ ཨིཧ ཝིབྷཱགཉྩ ཨིམསྨིཾ ཝུཙྩམཱནེ པཙྩཡསངྒཧེ ཡཐཱརཧཾ པཝཀྑཱམཱིཏི ཡོཛནཱ.

[༢༢༤] ཝིབྷཱཝནིཡཾ པན

‘‘པཙྩཡེ དསྶེཏུ’’ནྟི ཝུཏྟཾ. ཏཾ ཏཾ ཝིབྷཱགནྟི ཨིམིནཱ ན སམེཏི.

[༢༢༥] ཡཉྩ ཏཏྠ

‘‘ཨིཧ ཨིམསྨིཾ སམུཙྩཡ སངྒཧཱནནྟརེ ཋཱནེ’’ཏི ཨིཧ སདྡསྶ ཨཏྠཝིབྷཱཝནཾ ཝུཏྟཾ. ཏཾཔི ན ཡུཛྫཏི.

ཨེཏསྨིཉྷི ཨཏྠེ སཏི ཨིདཱནི སདྡོ ནིརཏྠཀོ ཧོཏཱིཏི, པཊིཙྩ ཕལཾ སམུཔྤཛྫཏི ཨེཏསྨཱཏི པཊིཙྩསམུཔྤཱདོ. ཏཏྠ པཊིཙྩཱཏི ཨཝིནཱ, ཨམུཉྩིཏྭཱཏི ཨཏྠོ. ཨཝིཛྫཱདིཀོ པཙྩཡདྷམྨོཏི ཝཎྞེནྟི. ཨཐཝཱ, སམུཔྤཛྫནཾ སམུཔྤཱདོ. སཧཛཱཏདྷམྨེཧི སཧེཝ ཀལཱཔཝསེན ཨབྷིནིབྦཏྟི པཱཏུབྷཱཝོཏི ཨཏྠོ. ཡཐཱསཀཾ པཙྩཡཾ པཊིཙྩ ཏེན ཨཝིནཱབྷཱཝཱིཧུཏྭཱ སམུཔྤཱདོ པཊིཙྩ སམུཔྤཱདོ, ཨཏྠཏོ པན སབྦེསཾ པཙྩཡཔཙྩཡུཔྤནྣབྷཱུཏཱནཾ སངྑཏ དྷམྨཱནཾ པཙྩཡཱཡཏྟཝུཏྟིཏཱསངྑཱཏཾ སབྦསངྑཏསཱདྷཱརཎཾ ཨེཀཾ སཱམཉྙལཀྑཎཾ. ཡཾ ཨིདཔྤཙྩཡཏཱཏིཙ ཝུཙྩཏི. ཏཏྠཙ ཨིདཔྤཙྩཡ ཏཱཏི ཨཡཾ ཨིམསྶ པཙྩཡོ ཨཡཾ ཨིམསྶ པཙྩཡོཏི ཨེཝཾ ནིདྡིསིཏབྦོ ཨཡཾ པཙྩཡོ ཨེཏེསནྟི ཨིདཔྤཙྩཡཱ. སངྑཏདྷམྨཱ. ཨིདཔྤཙྩཡཱནཾ བྷཱཝོ ཨིདཔྤཙྩཡཏཱ. ཡཐཱཝུཏྟ སཱམཉྙལཀྑཎཾ ཨེཝཱཏི ¶ ཨཏྠོ ཝེདིཏབྦོ, ན པཊིཙྩ ཕལཾ སམུཔྤཛྫཏི ཨེཏསྨཱཏི པཊིཙྩསམུཔྤཱདོ. ཨཝིཛྫཱདིཀོ པཙྩཡདྷམྨོཏིཙ ཨིམེསཾ པཙྩཡཱ ཨིདཔྤཙྩཡཱ. ཨིདཔྤཙྩཡཱཨེཝ ཨིདཔྤཙྩཡཏཱཏིཙ. ཝིསུདྡྷིམགྒེ པན སམུཔྤཛྫནཾ སམུཔྤཱདོཏི ཨཡམཏྠོ པཊིཀྑིཏྟོ. པཱལི༹ཡཾ པན ཨཡམེཝ ཨདྷིཔྤེཏོ ཝིཡ དིསྶཏི. ཡཐཱཧ –

ཀཏམོཙ བྷིཀྑཝེ པཊིཙྩསམུཔྤཱདོ. ཛཱཏིཔཙྩཡཱ བྷིཀྑཝེ ཛརཱམརཎཾ, ཨུཔྤཱདཱཝཱ ཏཐཱགཏཱནཾ ཨནུཔྤཱདཱཝཱ ཏཐཱགཏཱནཾ ཋིཏཱཝ སཱ དྷཱཏུ, དྷམྨཊྛིཏཏཱ དྷམྨནིཡཱམཏཱ ཨིདཔྤཙྩཡཏཱཏི.ལ. ཨཝིཛྫཱཔཙྩཡཱ སངྑཱརཱ ཨུཔྤཱདཱཝཱ.ལ. ཨིདཔྤཙྩཡཏཱ. ཨིཏི ཁོ བྷིཀྑཝེ ཏཏྲ ཏཐཏཱ ཨཝིཏཐཏཱ ཨནཉྙཐཏཱ ཨིདཔྤཙྩཡཏཱ. ཨཡཾ ཝུཙྩཏི བྷིཀྑཝེ པཊིཙྩསམུཔྤཱདོཏི.

ཨེཏྠ ཧི ཋིཏཱཝ སཱ དྷཱཏཱུཏིཨཱདིནཱ ཏཏྲ ཏཐཏཱ ཨཝིཏཐཏཱཏིཨཱདིནཱཙ ཡཐཱཝུཏྟཾ ཨིདཔྤཙྩཡཏཱ སངྑཱཏཾ སཱམཉྙ ལཀྑཎམེཝ པཊིཙྩསམུཔྤཱདོནཱམཱཏི དསྶེཏི. ན ཙེཏྠ བྷཱཝསཱདྷནེ ཀཏེ སཏི པཊིཙྩསདྡེན སཧ སམུཔྤཱདསདྡསྶ ཨསམཱནཀཏྟུཏཱསངྑཱཏོ བྱཉྫནཡུཏྟིཝིརོདྷོ ཨཏྠི. ཡོ པཊིཙྩ ཀྲིཡཱཡ ཀཏྟཱ, ཏསྶེཝ སམུཔྤཱདཀྲིཡཱཡཔི ཀཏྟུཏཱ སམྦྷཝཏོ. ན ཧི ཀྲིཡཱནཱམ ཀཏྟུརཧིཏཱསམྦྷཝཏཱིཏི. སངྑཏདྷམྨེསུཙ གམྦྷཱིརེསུ སཏི ཨནིཙྩཏཱདིལཀྑཎཾ ཝིཡ ཨིདཾཔི སངྑཏལཀྑཎཾ གམྦྷཱིརམེཝ ཧོཏཱིཏི ནཡིདྷ གམྦྷཱིརཝཙནཝིརོདྷོ སམྦྷཝཏི. ཨཐཁོ སངྑཏདྷམྨཏོ སངྑཏལཀྑཎམེཝ གམྦྷཱིརཏརཾ ཧོཏཱིཏི. ཏཱདིསེན པན སཱམཉྙལཀྑཎེན སམྤནྣཱ ཡཐཱཝུཏྟཱ ཨཝིཛྫཱདཡོ སངྑཏདྷམྨཱ པཊིཙྩསམུཔྤནྣཱནཱམ. ཡཐཱཧ-ཀཏམེཙ བྷིཀྑཝེ པཊིཙྩསམུཔྤནྣཱདྷམྨཱ ཛརཱམརཎཾ བྷིཀྑཝེ པཊིཙྩསམུཔྤནྣཾ.ལ. ཨཝིཛྫཱ བྷིཀྑཝེ པཊིཙྩསམུཔྤནྣཱཏི. ཨིཏི སབྦེསཾ པཙྩཡཔཙྩཡུཔྤནྣ བྷཱུཏཱནཾ སངྑཏདྷམྨཱནཾ པཙྩཡཱ སཏྟ ཝུཏྟིཏཱསངྑཱཏོ པཊིཙྩསམུཔྤཱདོཙ སོ ནཱིཡཏི ཉཱཡཏི པཊིཝིཛ྄ཛྷཱིཡཏཱིཏི ཀཏྭཱ ནཡོཙཱཏི པཊིཙྩསམུཔྤཱདནཡོ. པཋཔེཏི སངྑཏདྷམྨེ ནཱནཱཔཀཱརེཧི པཙྩཡབྷེདེཧི ¶ པཝཏྟེཏི དེསེཏི ཨེཏྠཱཏི པཊྛཱནཾ. མཧཱཔཀརཎཾ. པཊྛཱནེ དེསིཏོ ནཡོ པཊྛཱནནཡོ.

ཏསྨིཾ ཏསྨིཾ པཙྩཡདྷམྨེ བྷཱཝེ ཝིཛྫམཱནེ སཏི ཏེ ཏེ བྷཝནྟི སཱིལེནཱཏི ཏབྦྷཱཝབྷཱཝིནོ. སངྑཏདྷམྨཱ. ཏེསཾ བྷཱཝོ ཏབྦྷཱཝབྷཱཝིབྷཱཝོ, ཨིམསྨིཾ སཏི ཨིདཾ ཧོཏི. ཨིམསྶ ཨུཔྤཱདཱ ཨིདཾ ཨུཔྤཛྫཏཱིཏི ཨེཝཾ པཝཏྟོ སངྑཏདྷམྨནིཡཱམོ. ཏབྦྷཱཝབྷཱཝིབྷཱཝོཨེཝ ཨཱཀཱརོ ཏབྦྷཱཝབྷཱཝིབྷཱཝཱཀཱརོ. སོ ཨེཝ ཏབྦྷཱཝབྷཱཝིབྷཱཝཱཀཱརམཏྟཾ. མཏྟསདྡེན ཧེཏཱདིཔཙྩཡ སཏྟིནིཡམཾ ནིཝཏྟེཏི. ཏེན ཨུཔལཀྑིཏོ ནཡོ པཊིཙྩསམུཔྤཱད ནཡོ. ཨཱཧཙྩཔཙྩཡཊྛིཏིཾ ཨཱརབྦྷཱཏི ཨེཏྠ ཧེཏུ ཨཱརམྨཎཱ དིཝསེན ཏཐཱཏཐཱ ཨུཔཀཱརཀཏཱསངྑཱཏོ པཙྩཡསཏྟི ཝིསེསོ ཨཱཧཙྩཔཙྩཡཊྛིཏིནཱམ. སོ ཧི ཨཝིཛྫཱཔཙྩཡཱ སངྑཱརཱཏིཨཱདཱིསུ ཝིཡ པཙྩཡདྷམྨུདྡྷཱརམཏྟེ ཨཊྛཏྭཱ ཧེཏུཔཙྩཡོ ཨཱརམྨཎཔཙྩཧོཏིཨཱདིནཱ པཙྩཡསཏྟི ཝིསེསུདྡྷཱརཝསེན ཨཱཧཙྩ མཏྠཀཾ པཱཔེཏྭཱ དེསིཏཏྟཱ ཨཱཧཙྩཔཙྩཡཊྛིཏཱིཏི ཝུཙྩཏི. པཙྩཡདྷམྨཱ ཏིཊྛནྟི ཨཏྟནོ པཙྩཡུཔྤནྣཱབྷིསངྑརཎ ཀིཙྩཾ པཏྭཱ ཨནོསཀྐམཱནཱ ཧུཏྭཱ པཝཏྟནྟི ཨེཏཱཡཱཏི ཀཏྭཱ. ཨཱརབྦྷཱཏི པཊིཙྩ. ཝུཙྩཏཱིཏི བྷགཝཏཱ ཀཐཱིཡཏི.

ཨུབྷཡཾ པན ཝོམིསྶིཏྭཱ པཔཉྩེནྟི ཨཱཙརིཡཱཏི ཨིདཾ པཊིཙྩ སམུཔྤཱདཾ པཔཉྩེནྟེ སནྡྷཱཡ ཝུཏྟཾ. ཏེཧི ཏཾ པཔཉྩཡནྟཱ པཊྛཱན ནཡཾཔི ཨཱཧརིཏྭཱ པཔཉྩེནྟཱིཏི. ཡཐཱ སཱུརིཡོ ཨུདཡནྟོ ཨནྡྷཀཱརེ ཝིདྷམེཏྭཱ དབྦསམྦྷཱརེ མཧཱཛནསྶ པཱཀཊེ ཀརོཏི. ཨེཝམེཝཾ ཨུཔྤནྣཾ ཙཏུསཙྩཉཱཎཾ ཨཝིཛྫནྡྷཀཱརཾ ཝིདྷམིཏྭཱ ཙཏུསཙྩ དྷམྨཾ ཝིདཏི པཱཀཊཾ ཀརོཏཱིཏི ཝིཛྫཱ. ཏཔྤཊིཔཀྑཏྟཱ མོཧོ ཨཝིཛྫཱནཱམ. སོ ཧི ཨུཔྤཛྫམཱནོ དྷམྨེསུ ཨཉྙཱཎཨདསྶན སངྑཱཏཾ ཨནྡྷཀཱརཾ ཛནེཏྭཱཝ ཨུཔྤཛྫཏི. པཊིཙྩ ཕལཾ ཨེཏི ཨཱགཙྪཏི ཨེཏསྨཱ ཨེཏེནཱཏི ཝཱ པཙྩཡོ. ཨཝིཛྫཱཙ སཱ པཙྩཡོ ཙཱཏི ཨཝིཛྫཱཔཙྩཡོ. ཏསྨཱ ཨཝིཛྫཱཔཙྩཡཱ སངྑཱརཱ སམྦྷཝནྟཱིཏི སམྦནྡྷོ. སངྑཏཾ ཀཱཡཝཙཱིམནོཀམྨཾ ཨབྷིསངྑརོནྟི སཏྟཱ ཨེཏེཧཱིཏི སངྑཱརཱ. ཝིཛཱནཱཏཱིཏི ཝིཉྙཱཎཾ. ཝིཛཱནནྟི སཏྟཱ ཨེཏེནཱཏི ¶ ཝཱ ཝིཉྙཱཎཾ. ཨཱརམྨཎེ ནམཏཱིཏི ནཱམཾ. རུཔྤཏི ཝིཀཱརཾ ཨཱཔཛྫཏཱིཏི རཱུཔཾ. ཨདྷིཊྛཱནཊྛེན ཨཱཡཏནཾ. དེཝཱནཾ དེཝཱཡཏནམིཝ. ཕུསཏཱིཏི ཕསྶོ. ཕུསནྟི སམྤཡུཏྟཀཱ དྷམྨཱ ཨེཏེནཱཏི ཝཱ ཕསྶོ. ཝེདཡཏཱིཏི ཝེདནཱ. ཝེདཡནྟི པཙྩནུབྷཝནྟི སཏྟཱ ཨེཏཱཡཱཏིཝཱ ཝེདནཱ. ཏསྶཏི པརིཏསྶཏཱིཏི ཏཎྷཱ. ནིཙྩཔིཔཱསཝསེན ཨཱརམྨཎཧེཏུ ནིཙྩཾ ཙཉྩལཏི པཏྠེཏི ཝཱཏི ཨཏྠོ. ཏསྶནྟི པརིཏསྶནྟི ཙཉྩལནྟི སཏྟཱ ཨེཏཱཡཱཏི ཝཱ ཏཎྷཱ. ཨུཔཱདིཡཏཱིཏི ཨུཔཱདཱནཾ. ཨམུཉྩགཱཧཾ གཎྷཱཏཱིཏི ཨཏྠོ. ཨུཔཱདིཡནྟི སཏྟཱ ཨེཏེནཱཏི ཝཱ ཨུཔཱདཱནཾ.

བྷཝཏི ཝཌྜྷཏཱིཏི བྷཝོ. བྷཝནྟི ཛཱཡནྟི ཝཌྜྷནྟི སུཁདུཀྑཱནི ཨེཏེནཱཏི ཝཱ བྷཝོ. ཛནནཾ ཛཱཏི. ཛཱཡནྟི པཱཏུབྷཝནྟི སངྑཏ དྷམྨཱ ཨེཏཱཡཱཏི ཝཱ ཛཱཏི. ཛཱིརཎཾ ཛརཱ. ཛཱིརནྟི ཛིཎྞབྷཱཝཾ གཙྪནྟི ཨེཏཱཡཱཏི ཝཱ ཛརཱ. སོཙནཾ སོཀོ. སོཙནྟི ཙིཏྟཔརིལཱ༹ཧཾ གཙྪནྟི ཨེཏེནཱཏི ཝཱ སོཀོ. པརིདེཝནཾ པརིདེཝོ. ཏཾ ཏཾ པཝཏྟིཾ པརིཀིཏྟེཏྭཱ དེཝནྟི ཀནྡནྟི ཨེཏེནཱཏི ཝཱ པརིདེཝོ. ཁམིཏུཾ སཧིཏུཾ དུཀྐརནྟི དུཀྑཾ. དུམྨནསྶ ཝིརཱུཔཙིཏྟསྶ བྷཱཝོ དོམནསྶཾ. བྷུསོ ཨཱཡཱསནཾ ཨུཔཱཡཱསོ. ཨཱཡཱསནནྟི ཨནསྶཱསནཾ. ཝིསཱིདནནྟི ཨཏྠོ. ཨེཝནྟི ཨིམིནཱ ཡཐཱཝུཏྟེན. ཨཝིཛྫཱདི སངྑཱརཱདིཔཙྩཡཔཙྩཡུཔྤནྣ པརཾཔརཝིདྷིནཱ སམུདཡོ ཧོཏཱིཏི སམྦནྡྷོ. ཨེཏསྶཀེཝལསྶདུཀྑཀྑནྡྷསྶཱཏི ཨཝིཛྫཱདིཀསྶ ཨེཏསྶ སཀལསྶ དུཀྑརཱསིསྶ ཀེནཙི སུཁེན ཨསཾམིསྶསྶ ཝཱ དུཀྑརཱསིསྶ ཨབྷིནིབྦཏྟི ཧོཏཱིཏི ཨཏྠོ. ཨེཏྠཙ དུཝིདྷོ པཊིཙྩསམུཔྤཱདནཡོ སུཏྟནྟིཀནཡོ ཨབྷིདྷམྨནཡོཏི. ཏཏྠ སུཏྟནྟིཀནཡེན ཏཱཝ ཨཝིཛྫཱ ཙཏུབྦིདྷཱ དུཀྑཔཊིཙྪཱདིཀཱ སམུདཡཔཊིཙྪཱདིཀཱ ནིརོདྷཔཊིཙྪཱདིཀཱ མགྒཔཊིཙྪཱདིཀཱཙཱཏི. ཨབྷིདྷམྨནཡེན པན པུབྦནྟཔཊིཙྪཱདིཀཱ ཨཔརནྟ པཊིཙྪཱདིཀཱ པུབྦནྟཱཔརནྟཔཊིཙྪཱདིཀཱ པཊིཙྩསམུཔྤཱདཔཊིཙྪཱདིཀཱཏི ཙཏཱུཧི སདྡྷིཾ ཨཊྛ ཝིདྷཱཏི ཝེདིཏབྦཱ.

སངྑཱརཱ སུཏྟནྟིཀནཡེན སཱསཝཱ ཀུསལཱཀུསལཙེཏནཱ ཨཔུཉྙཱབྷིསངྑཱརོ པུཉྙཱབྷིསངྑཱརོ ཨཱནེཉྫཱ བྷིསངྑཱརོཏི པན ¶ ཏིཝིདྷཱ ཧོནྟི. ཏཏྠ དྭཱདས ཨཀུསལཙེཏནཱ ཨཔུཉྙཱཏི སངྑཱརོནཱམ. ཀཱམརཱུཔ ཀུསལཙེཏནཱ པུཉྙཱབྷིསངྑཱརོནཱམ. ཨརཱུཔཀུསལཙེཏནཱ ཨཱནེཉྫཱཏིསངྑཱརོནཱམ. ཨབྷིདྷམྨནཡེན པན སབྦཱཔི ལོཀིཡལོཀུཏྟརབྷཱུཏཱ ཀུསལཱཀུསལཙེཏནཱ སངྑཱརཱནཱམ. ཀིརིཡཙེཏནཱ པན སབྦཱཔི ཝིབྷངྒེ ནགཧིཏཱ. ཨཊྛཀཐཱཡཉྩ ཀིརིཡདྷམྨཱནཾ པན ཡསྨཱ ནེཝ ཨཝིཛྫཱ ན ཀུསལཱ ཀུསལམཱུལཱནི ཨུཔནིསྶཡཔཙྩཡཏྟཾ ལབྷནྟི. ཏསྨཱ ཀིརིཡཝསེན པཙྩཡཱཀཱརོ ནཝུཏྟོཏི ཝུཏྟཾ. ཨཝིཛྫཱཙ ཀུསལཱཀུསལམཱུལཱ ནིཙ ཀིརིཡདྷམྨཱནཾ ཨུཔནིསྶཡ པཙྩཡཱ ན ཧོནྟི. ཏསྨཱ ཀིརིཡདྷམྨཱ པཊིཙྩསམུཔྤཱདདེསནཱཡཾ ནགཧིཏཱཏི ཝུཏྟཾ ཧོཏི. སཾཡུཏྟེཔི ཡཏོ ཁོ བྷིཀྑཝེ བྷིཀྑུནོ ཨཝིཛྫཱ པཧཱིནཱ ཧོཏི. ཝིཛྫཱཨུཔྤནྣཱ. སོ ཨཝིཛྫཱ ཝིརཱགཱ ཝིཛྫུཔྤཱདཱ ནེཝ པུཉྙཱབྷིསངྑཱརཾ ཨབྷིསངྑརོཏི. ན ཨཔུཉྙཱབྷིསངྑཱརཾ. ན ཨཱནེཉྫཱབྷིསངྑཱརཾ ཨབྷིསངྑརོཏཱིཏི ཝུཏྟཾ. ཨཏྟནོ ཨནུརཱུཔཔཙྩཡཝསེན པན ཏེསཾཔི པཊིཙྩ སམུཔྤཱདོ ཨཝཱརིཏོཡེཝ. ནཧི ཀོཙི པཊིཙྩསམུཔྤཱདརཧིཏོ སངྑཏདྷམྨོནཱམ ཨཏྠཱིཏི. ཨེས ནཡོ ཝིཉྙཱཎཱདཱིསུཔཱིཏི. ཝིཉྙཱཎནྟི བཱཏྟིཾསཝིདྷཾ ལོཀིཡཝིཔཱཀཝིཉྙཱཎཾ སུཏྟནྟིཀནཡེན. ཨབྷིདྷམྨནཡེན པན ཀིརིཡཙིཏྟཝཛྫིཏཾ ཨེཀཱུནསཏྟཏིཝིདྷཾ ལོཀིཡལོཀུཏྟརཝིཉྙཱཎཾ. ནཱམརཱུཔནྟི ལོཀིཡ ཝིཉྙཱཎ སཧཛཱཏཾ ཝེདནཱདིཁནྡྷཏྟཡཾ པཊིསནྡྷིཡཾ ཀམྨཛརཱུཔཾ པཝཏྟིཡཾ ཙིཏྟཛ རཱུཔཉྩ སུཏྟནྟིཀནཡེན. ཨབྷིདྷམྨནཡེན པན སབྦཾ ཀུསལཱཀུསལ ཝིཔཱཀསམྤཡུཏྟཾ ཁནྡྷཏྟཡཾ ཝུཏྟཔྤཀཱརརཱུཔཉྩ. ཨཊྛཀཐཱཡཾ པན ལདྡྷཔཙྪཱཛཱཏཔཙྩཡཾ སབྦཾཔི ཙཏུསམུཊྛཱནརཱུཔཾ གཧིཏམེཝ.

[༢༢༦] ཝིབྷཱཝནིཡཾ པན

‘‘ཏདུབྷཡཾཔི ཨིདྷ པཊིསནྡྷིཝིཉྙཱཎསཧགཏ’’ནྟི ཝུཏྟཾ. ཏཾ ཨནུཔཔནྣཾ.

སལཱ༹ཡཏནནྟི ཚ ཨཛ྄ཛྷཏྟིཀཱཡཏནཱནི ཨེཝ སབྦཏྠ པཱལི༹ཡཾ ཝིབྷཏྟཱནི. ཨེཀཙྩེ པན ཨཱཙརིཡཱ བཱཧིརཱཡཏནཱནི ཕསྶསྶ པཙྩཡཱ ཧོནྟཱིཏི ཀཏྭཱ ཏཱནིཔི ཨིདྷ གཎྷནྟི. ཏཾཔི ནིདཱནཝགྒ པཱལི༹ཡཱ སམེཏིཡེཝ. ཡཐཱཧ –

ཀཏམོཙ ¶ བྷིཀྑཝེ ལོཀསྶ སམུདཡོ. ཙཀྑུཉྩ པཊིཙྩ རཱུཔེཙ ཨུཔྤཛྫཏི ཙཀྑུཝིཉྙཱཎཾ. ཏིཎྞཾ སངྒཏི ཕསྶོ. ཕསྶཔཙྩཡཱ ཝེདནཱ. ཝེདནཱཔཙྩཡཱ ཏཎྷཱ.ལ. དོམནསྶུཔཱཡཱསཱ སམྦྷཝནྟཱིཏི ཨཡཾ ལོཀསྶ སམུདཡོ. སོཏཉྩ.ལ. མནཉྩ པཊིཙྩ དྷམྨེཙ ཨུཔྤཛྫཏི མནོཝིཉྙཱཎཾ. ཏིཎྞཾ སངྒཏི ཕསྶོ.ལ. ལོཀསྶ སམུདཡོཏི.

ཕསྶཝེདནཱདཡོཔི ནཡདྭཡེ ཏཾ ཏཾ ཝིཉྙཱཎསམྤཡུཏྟཱ ཝེདིཏབྦཱ. ཏཎྷུཔཱདཱནཱནི པཱཀཊཱནི. བྷཝོ དུཝིདྷོ ཀམྨབྷཝོ ཨུཔཔཏྟིབྷཝོཙ. ལོཀིཡཀུསལཱཀུསལབྷཱུཏཱ ཙེཏནཱཙ. ཙེཏནཱསམྤཡུཏྟཱ ཨབྷིཛ྄ཛྷཱདཡོ ཨནབྷིཛ྄ཛྷཱདཡོཙ ཀམྨབྷཝོ. ཡཐཱཧ-སབྦཾཔི བྷཝགཱམིཀམྨཾ ཀམྨབྷཝོཏི. ཀམྨནིབྦཏྟཱ པན སབྦེཔི ལོཀིཡཝིཔཱཀཀྑནྡྷཱ སབྦཱནིཙ ཀམྨཛརཱུཔཱནི ཨུཔཔཏྟིབྷཝོ སུཏྟནྟིཀནཡེན. ཨབྷིདྷམྨནཡེན པན ལོཀུཏྟར ཁནྡྷཱཔི ཝིབྷངྒེ ཨཱགཏཱཨེཝ. ཛཱཏིཛརཱམརཎཱནི སབྦེསཾ སངྑཏ དྷམྨཱནཾ ལཀྑཎཔཏྟཱནི. སོཀཱདཱིསུ ཉཱཏིབྱསནཱདཱིཧི ཕུཊྛསྶ སོཙནཱཀཱརེན པཝཏྟཱ དོམནསྶཝེདནཱ སོཀོནཱམ. རོདནཱཀཱརེན པཝཏྟོ ཨནིཊྛོ ཙིཏྟཛསདྡོ པརིདེཝོནཱམ. ཀཱཡིཀཱ དུཀྑཝེདནཱ དུཀྑཾནཱམ. ཙེཏསིཀཱ དུཀྑཝེདནཱ དོམནསྶཾནཱམ. ཉཱཏིབྱསནཱདིནིམིཏྟཾ སཾསཱིདནཝིསཱིདནཱཀཱརཔཝཏྟོ དོསོ ཨུཔཱཡཱསོནཱམ. ཨཡམེཏྠ ཝིབྷཱགོ. ཡེསཾ པན ཁནྡྷདུཀྑེ ཨཝིཛྫཱ ཨཔྤཧཱིནཱ ཧོཏི. ཏེསཾ ཨིཏརསཙྩེསུཔི སཱ ཨཔྤཧཱིནཱཨེཝ ཧོཏཱིཏི ཏེ ཁནྡྷཔཝཏྟིཡཾཨེཝ སུཁསཉྙཾ ལབྷནྟི. ཁནྡྷནིརོདྷེ དུཀྑསཉྙཾ. ཁནྡྷཔཝཏྟིམགྒེཨེཝ སུཁམགྒསཉྙཾ ལབྷནྟི. ཁནྡྷནིརོདྷམགྒེ དུཀྑམགྒསཉྙཾ. ཏསྨཱ ཁནྡྷཔཝཏྟིཔཙྩཡབྷཱུཏཱ པུཉྙཱ པུཉྙཱནེཉྫཱབྷིསངྑཱརདྷམྨཱཨེཝ ཏེསཾ ཨཝིཛྫཱནིཝུཊཱནཾ སུཁཀཱམཱནཾ དུཀྑཔཊིཀཱུལཱནཾ སཏྟཱནཾ པཊིསརཎཱ ཧོནྟཱིཏི ཝུཏྟཾ ཨཝིཛྫཱཔཙྩ ཡཱསངྑཱརཱཏི. ཨེཏྠཙ ཝིསེསཏོ པཙྩུཔྤནྣཁནྡྷཔཊིཙྪཱདིཀཱཡ ཨཝིཛྫཱཡ དུཙྩརིཏབྷཱུཏཱ ཨཔུཉྙཱབྷིསངྑཱརཱ སམྦྷཝནྟི. ཨནཱགཏ ཁནྡྷཔཊིཙྪཱདིཀཱཡ ཨཝིཛྫཱཡ སུཙརིཏབྷཱུཏཱ པུཉྙཱནེཉྫཱབྷིསངྑཱརཱ སམྦྷཝནྟཱིཏི ¶ ཝེདིཏབྦཱ. སངྑཱརེསུ སཏི ཨཔྤཧཱིནབྷཝཏཎྷཱནཾ སཏྟཱནཾ ཙུཏིཨནནྟརཾ པུནབྷཝཱབྷིནིབྦཏྟིཡཱ ཀོཙི ཝིབནྡྷོ ནཱམ ནཏྠི. ཏསྨཱ སངྑཱརཔཙྩཡཱ ཝིཉྙཱཎཾ ནཱམརཱུཔཾ སལཱ༹ཡཏནཾ ཕསྶོ ཝེདནཱཏི ཨིམེ ཨཏྟབྷཱཝསཉྙིཏཱ པཉྩདྷམྨཱ བྷཝནྟརེ པཱཏུ བྷཝནྟི. ཏཏྠ པན ཝིཉྙཱཎམེཝ པདྷཱནཾ ཛེཊྛཀཾ ཧོཏཱིཏི ཝུཏྟཾ. སངྑཱརཔཙྩཡཱཝིཉྙཱཎནྟི ཝིཉྙཱཎེཙ སཏི ཏསྶ ཨུདཡབྷཱུཏཱནཾ ནཱམརཱུཔཱནཾ ཨུཔྤཏྟིཡཱ ཝིབནྡྷོནཱམ ནཏྠཱིཏི ཝུཏྟཾ. ཝིཉྙཱཎཔཙྩཡཱནཱམ རཱུཔནྟི. ཨེཏྟཱཝཏཱ སཱམཉྙཏོ པརིཔུཎྞོནཱམ ཀཱཡོ རཱུཔ ཀཱཡོཙ ཝུཏྟོ ཧོཏི. ཨེཝཾསནྟེཔི ཏེསུ དྭཱིསུ ཀཱཡེསུ ཡེདྷམྨཱ སཏྟཔཉྙཏྟིཡཱ པདྷཱནངྒབྷཱུཏཱ ཧོནྟི. ཡེཧིཙ ཕསྶཱ དཱིནི ཨུཔརི ཨངྒཱནི ཨཱགཏཱནི ཧོནྟི. ཡེསུཙ སཏྟཱ ཨཏྟགཱཧཾ དལ༹ྷཏརཾ གཎྷནྟི. ཏེ ཝིསུཾ ནཱིཧརིཏྭཱ དསྶེཏུཾ ནཱམརཱུཔཔཙྩཡཱ སལཱ༹ཡཏནནྟི ཝུཏྟཾ. ནཱམརཱུཔེ སཏི ཏེསཾཔི ཨུཔྤཏྟིཡཱ ཝིབནྡྷོ ནཏྠིཡེཝ. སལཱ༹ཡཏནསམུཊྛིཏོཙ ཕསྶོ སལཱ༹ཡཏནེ སཏི ཨེཀནྟེན སམྦྷཝཏཱིཏི ཝུཏྟཾ སལཱ༹ཡཏནཔཙྩཡཱཕསྶོཏི. ཕསྶསམུཊྛིཏཱཙ ཝེདནཱ ཕསྶེ སཏི ཨེཀནྟེན སམྦྷཝཏིཡེཝཱཏི ཝུཏྟཾ ཕསྶཔཙྩཡཱཝེདནཱཏི. སུཁཝེདནཱསདིསོ ཏཎྷཱཡ ཨཝསྶཡོནཱམ ནཏྠཱིཏི ཝུཏྟཾ ཝེདནཱཔཙྩཡཱཏཎྷཱཏི. ཀཱམུཔཱདཱནཉྩནཱམ ཨེཀསྨིཾ ཨཱརམྨཎེ པུནཔྤུནཾ སམུདཱཙརིཏྭཱ དལ༹ྷཏྟཔྤཏྟཱ ཏཎྷཱཨེཝ, དིཊྛིཡོཙ ཨཏྟནིཙ ཨཏྟནོ ཨཱརམྨཎེསུཙ ཨསྶཱདན ཁམན རོཙན བྷཱུཏཱཡ ཏཎྷཱཡ ཝསེན དལ༹ྷཏྟཾ ཨཱཔཛྫནྟཱིཏི ཝུཏྟཾ ཏཎྷཱཔཙྩཡཱཨུཔཱདཱནནྟི. ཨུཔཱདིཡནྟཱཙ ཏསྶ ཏསྶ ཨུཔཱདཱནིཡསྶ ཨཏྠསྶ ཧིཏཝུཌྜྷིསཉྙིཏཾ ཏཾཏཾ ཀམྨབྷཝཾ ཨཱཡཱུཧནྟིཡེཝཱཏི ཝུཏྟཾ ཨུཔཱདཱནཔཙྩཡཱབྷཝོཏི. བྷཝསདྡོ ཧེཏྠ ཝཌྜྷིཔརིཡཱཡོ. ཡཐཱ –

སུཝིཛཱནོ བྷཝཾ ཧོཏི, དུཝིཛཱནོ པརཱབྷཝོཏི.

ཀམྨབྷཝེ སཏི ཨེཀནྟེན པུནབྷཝོཔི སམྦྷཝཏཱིཏི ཝུཏྟཾ བྷཝཔཙྩཡཱཛཱཏཱིཏི. ཛཱཏིཡཱཙ སཏི ཨེཀནྟེན ཛརཱམརཎཾ ཧོཏིཡེཝཱཏི ཝུཏྟཾ ཛཱཏིཔཙྩཡཱཛརཱམརཎནྟི. ཨཡམེཏྠ ཏབྦྷཱཝབྷཱཝིབྷཱཝཝིདྷི. ¶ སོཀཱདིཝཙནཉྩེཏྠ ཨཱིདིསེན ཏབྦྷཱཝ བྷཱཝིབྷཱཝེན པཝཏྟསྶ སཀལསྶ ཝཊྚདྷམྨསྶ ཨཱདཱིནཝརཱསིདསྶ ནཏྠཾ ཝུཏྟནྟི. ཨེཏྠཱཏི ཨིམསྨིཾ པཙྩཡསངྒཧེ. ཏཏྠཱཏི ཏསྨིཾ པཊིཙྩསམུཔྤཱདནཡེ. ཨདྡྷཱནཝནྟེ དྷམྨེ བྷུསོ དྷཱརེཏཱིཏི ཨདྡྷཱ. ཀཱལོ. སོ ཧི ཏེཀཱལིཀེ དྷམྨེ སནྟཱནཱནུཔབནྡྷཝསེན ཀཔྤཔརཾཔརཱ ཝསྶ ཨུཏུ མཱས པཀྑ རཏྟི དིཝ པརཾཔརཱཙ ཧུཏྭཱ ཨཔཏམཱནེ དྷཱརེནྟོ ཝིཡ ཨུཔཊྛཱཏཱིཏི. ཨཐཝཱ, བྷུསོ དཧནྟི ཏིཊྛནྟི པཝཏྟནྟི ཏེཀཱལིཀཱ དྷམྨཱ ཨེཏྠཱཏི ཨདྡྷཱ. ཀཱལོཡེཝ. སོ པན སཡཾ ཨབྷིནྣོཔི བྷེདཝནྟེ དྷམྨེ ཨུཔཱདཱཡ བྷིནྣོ ཝིཡ ཨུཔཙརིཏུཾ ཡུཏྟོཏི ཝུཏྟཾ ཏཡོཨདྡྷཱཏི.

[༢༢༧] ཡཾ པན ཝིབྷཱཝནིཡཾ

‘‘ཨཏཏི སཏཏཾ གཙྪཏི པཝཏྟཏཱིཏི ཨདྡྷཱཏི ཝུཏྟཾ’’. ཏཾ ན སུནྡརཾ.

ཨེཝཉྷི སཏི ཨདྡྷཱནནྟི ནསིཛ྄ཛྷཏི. ཡཐཱ ཨདྡྷཱནམགྒཔཊིཔནྣོཏི. ཨངྒཱནཱིཏི ཨཝཡཝཔདྷཱནངྒཱནི. པདྷཱནསམྦྷཱརཱཏི ཝུཏྟཾ ཧོཏི. ཨཱཀཱརཱཏི ཨཝཡཝཀོཊྛཱསཱ. ཀོཊྛཱསཏྠོ ཧེཏྠ ཨཱཀཱརསདྡོ. ཡཐཱ དྭཏྟིཾསཱཀཱརཱཏི. ཨཱཀིརནྟི ཏཏྠ ཏཏྠ པཀིརིཏྭཱ ཐཔིཏཱ ཝིཡ ཧོནྟཱིཏི ཨཱཀཱརཱཏིཔི ཝདནྟི. སནྡྷཱིཏི དྭིནྣཾ དྭིནྣཾ སངྑེཔཱནཾ སངྒྷཊནཊྛཱནཾ. སངྑེཔཱཏི པདྷཱནདྷམྨསངྒཧཱ. ཝཊྚནྟི པུནཔྤུནཾ ཨཱཝཊྚནྟཱིཏི ཝཊྚཱནི. མཱུལཡནྟི སབྦེཔི ཝཊྚདྷམྨཱ ཨེཏྠ ཏིཊྛནྟི ཏདཱཡཏྟཝུཏྟིཏཱཡཱཏི མཱུལཱནི. པཏིཊྛཱ. པབྷཝཱཏི ཨཏྠོ. ཡསྨཱ ཨེཀོ པུརིསོ ཨེཀཱཡ ཨངྒུལིཡཱ སམུདྡོ དཀཾ གཧེཏྭཱ མཧཱཛནསྶ མུཁེ པཀྑིཔིཏྭཱ ཙཏཱུསུ མཧཱསམུདྡེསུ ཨུདཀསྶ ལོཎབྷཱཝཾ སཉྙཱཔེནྟོ ཝིཡ བྷགཝཱཔི ཨཝིཛྫཱ པཙྩཡཱ སངྑཱརཱཏིཨཱདིནཱ ཨེཀམེཝ པཙྩུཔྤནྣབྷཝཾ པརིཔུཎྞཾ དེསེཏྭཱ ཨནམཏགྒསྶ སཀལསྶ སཾསཱརཝཊྚསྶ པཝཏྟིཾ ཉཱཔེསི. པརིཔུཎྞཾ དེསེནྟེནཙ ནཱམ ཏསྶ ཨེཀསྶ བྷཝསྶ ཧེཏུཙ དེསེཏབྦོ ཧོཏི. ཕལཉྩ དེསེཏབྦཾ ཧོཏི. ཏཏྠ ཧེཏཱུ ནཱམ པུརིམབྷཝེ སིདྡྷཱ ཨཝིཛྫཱ སངྑཱརཱ. ཕལཾནཱམ ཨནཱགཏབྷཝེ ཛཱཏི. ¶ ཨིཏི ཨེཀབྷཝཝིསཡཱཔི ཨཡཾ དེསནཱ ཨེཀདེསེན ཨཏཱིཏཱནཱགཏ སཱདྷཱརཎཱཙ ཧོཏཱིཏི ཝུཏྟཾ ཨཝིཛྫཱསངྑཱརཱཨཏཱིཏོཨདྡྷཱཏིཨཱདི. ཨེཏྠཙ ཨདྡྷུནོ ཨདྡྷཱཝནྟཱནཉྩ ཨབྷེདཾ ཝིཡ ཀཏྭཱ ཝཙནཾ དྷམྨཏོ ཝིསུཾ ཨདྡྷཱསངྑཱཏསྶ ཀཱལསྶ ཨབྷཱཝཾ དསྶེཏི. ཀཱལོཡེཝ ལོཀཾ པཝཏྟེཏི ནིཝཏྟེཏཱིཏི པཝཏྟཾ མིཙྪཱཝཱདཉྩ ནཱིཝཱརེཏི. ན ཧི སཡཾ ཨབྷཱཝབྷཱུཏོ ཀཱལོ ཀསྶཙི པཝཏྟཀོ ནིཝཏྟཀོཙ བྷཝིཏུཾ ཡུཏྟོཏི. ཀསྨཱ པནེཏྠ ཨེཀམེཀསྶ པཙྩུཔྤནྣསྶ ཨཏྟབྷཱཝསྶ པཝཏྟིཾ དསྶེནྟོ བྷགཝཱ ཨཏཱིཏབྷཝེ ཧེཏུཉྩ ཨནཱགཏབྷཝེ ཕལཉྩ དསྶེཏཱིཏི. ཨཧེཏུཝིསམཧེཏུདིཊྛཱིནཾ ནཱིཝཱརཎཏྠཾ ཨཏཱིཏཧེཏུ དསྶནཾ. ཨུཙྪེདདིཊྛི ནཱིཝཱརཎཏྠཾ ཨནཱགཏཕལདསྶནཾ. སསྶཏ དིཊྛིནཱིཝཱརཎཏྠཾ ཨུབྷཡདསྶནནྟི དཊྛབྦཾ. ཏཏྠ ཨཧེཏུ ཨཔཙྩཡཱ སཏྟཱ པཝཏྟནྟི ནིཝཏྟནྟི སཾཀིལིསྶནྟི ཝིསུཛ྄ཛྷནྟཱིཏི པཝཏྟཱ དིཊྛི ཨཧེཏུདིཊྛིནཱམ. བྲཧྨཱ པཛཱཔཏི ཨིསྶརནིམྨཱནཱདིཝསེན ཨབྷཱུཏ ཧེཏུདསྶནཾ ཝིསམཧེཏུདིཊྛིནཱམ. སཏྟཱ མརཎེ ཨུཙྪིཛྫནྟི, ཨནཱགཏེ ཛཱཏིནཱམ ནཏྠཱིཏི པཝཏྟཱ དིཊྛི ཨུཙྪེདདིཊྛིནཱམ. ཨཏྟཱནིཙྩོ དྷུཝོ, སོཝ བྷཝཏོ བྷཝཾ སནྡྷཱཝཏི སཾསརཏཱིཏི པཝཏྟཱ དིཊྛི སསྶཏདིཊྛིནཱམ. ཨེཝཾ ནིཙྩོ ཧུཏྭཱ སནྡྷཱཝནྟོཔན ཨཝིཛྫཱདཱིཧི སཱདྷེཏབྦོ ནཧོཏི. ཏསྨཱ ཨཝིཛྫཱསངྑཱརེཧི བྷཝནྟརེ པུན ཝིཉྙཱཎུཔྤཏྟིཾ ཝདནྟེན སསྶཏདིཊྛི ནཱིཝཱརིཏཱ ཧོཏཱིཏི.

ཀསྨཱ པནེཏྠ སོཀཱདཡོ ཨངྒེསུ ནགཧིཏཱཏི. ཛཱཏིཡཱ སཏི སོཀཱདཡོ ཨེཀནྟེན སམྦྷཝནྟཱིཏི ཨེཝཾ ཏབྦྷཱཝ བྷཱཝིབྷཱཝ ལཀྑཎསྶ ཨབྷཱཝཏོ. སཏིཔི ཧི ཛཱཏིཡཱ རཱུཔ ལོཀེ ཨརཱུཔལོཀེཙ ཏེ ན སམྦྷཝནྟི. ཀཱམལོཀེཔི ཀེསཉྩི ན སམྦྷཝནྟིཡེཝཱཏི. ཡདིཨེཝཾ ཀིམཏྠཾ ཏེསཾ ཝཙནནྟི. ཛཱཏིཡཱཝཱ ཨཝིཛྫཱདིཀསྶཝཱ ཝུཏྟཔྤཀཱརསྶ སཀལསྶ ཝཊྚཔཝཏྟསྶ མཧཱཨཱདཱིནཝརཱསིདསྶནཏྠནྟི དསྶེཏུཾ སོཀཱདིཝཙནཾ པནེཏྠ ནིསྶནྡ ཕལནིདསྶནནྟི ཝུཏྟཾ. ཏཏྠ ནིསྶནྡཕལནིདསྶནནྟི ཛཱཏིཡཱ མཧཱཨཱདཱིནཝ རཱསིསངྑཱཏསྶ ཨུདཡཕལསྶ ནིདསྶནནྟི ཨཏྠོ. ¶ ཀསྨཱ པན ཨིམསྶ པཙྩུཔྤནྣ བྷཝསྶ ཨཏཱིཏཔཙྩཡཱ དྭེ ཨཝིཛྫཱ སངྑཱརཱ ཨེཝ པཱལི༹ཡཾ ཝུཏྟཱ. ཀིཾ པན ཏེ ཨེཝ དྭེ ཨིམསྶ པཙྩཡཱ ཧོནྟཱིཏི. ཨཉྙེཔི ཧོནྟིཡེཝ. ཨཐ ཀསྨཱ ཏེ པཱལི༹ཡཾ ན ཝུཏྟཱཏི. ཨཝུཏྟཱནཾཔི ཏེསཾ ཨཏྠཏོ ལདྡྷཏྟཱཏི. ཀཐཉྩ ཏེ ཨཝུཏྟཱཔི ལདྡྷཱཏི. ཏབྦྷཱཝ བྷཱཝིབྷཱཝལཀྑཎེན ཏདཝིནཱབྷཱཝིབྷཱཝལཀྑཎེནཙ ལདྡྷཱཏི དསྶེནྟོ ཨཝིཛྫཱསངྑཱརགྒཧཎེནཱཏིཨཱདི མཱཧ. ཨེས ནཡོ པརཏྠཔི. ཏཏྠ ཨཝིཛྫཱ སངྑཱརགྒཧཎེནཱཏི པཱལི༹ཡཾ ཨཱདིཏོ ཝུཏྟེན ཨཝིཛྫཱསངྑཱར ཝཙནེན. ཏཎྷུཔཱདཱནབྷཝཱཔི གཧིཏཱ བྷཝནྟཱིཏི ཨཝིཛྫཱབྷཱཝེ བྷཱཝཏོ, ཨབྷཱཝེཙ ཨབྷཱཝཏོ ཨཝིཛྫཱགཧཎེན ཏཎྷུཔཱདཱནཱནིཔི གཧིཏཱནི བྷཝནྟི. སངྑཱརབྷཱཝེཙ བྷཱཝཏོ, ཨབྷཱཝེཙ ཨབྷཱཝཏོ སངྑཱརགྒཧཎེན ཀམྨབྷཝོཔི གཧིཏོ བྷཝཏཱིཏི ཨཏྠོ.

ཝིབྷཱཝནིཡཾ པན

ཀིལེསབྷཱཝསཱམཉྙཏོ ཨཝིཛྫཱགཧཎེན ཏཎྷུཔཱདཱནཱནི. ཀམྨབྷཱཝ སཱམཉྙཏོ སངྑཱརགྒཧཎེན ཀམྨབྷཝོ གཧིཏོཏི ཝུཏྟཾ. ཏཾཔི ཡུཛྫཏི.

ཏཐཱ ཨཝིཛྫཱ སངྑཱརཱ གཧིཏཱ བྷཝནྟཱིཏི སམྦནྡྷོ. ཏདཝིནཱ བྷཱཝིབྷཱཝེན ཏཎྷུཔཱདཱནཝཙནེན ཨཝིཛྫཱཙ བྷཝཝཙནེན སངྑཱརཱཙ གཧིཏཱཏི ཨཏྠོ. ལཀྑཎདྷམྨཱནཾ ལཀྑིཏབྦདྷམྨེཧི ཨཝིནཱབྷཱཝིབྷཱཝཏོ ཏདཝིནཱབྷཱཝིབྷཱཝེན ཛཱཏིཛརཱ.ལ. གཧིཏནྟི ཝུཏྟཾ. ཨིཏིཀཏྭཱཏི ཨིམིནཱ ཀཱརཎེན. ཝཱིསཏཱཀཱརཱ བྷཝནྟཱིཏི སམྦནྡྷོ. པཐམཾ ཧེཏུཔཉྩཀཾ ཨེཀོ སངྑེཔོ. དུཏཱིཡཾ ཕལཔཉྩཀཾ ཨེཀོ. ཏཏཱིཡཾ ཧེཏུཔཉྩཀཾ ཨེཀོ. ཙཏུཏྠཾ ཕལཔཉྩཀཾ ཨེཀོ སངྑེཔོཏི ཙཏུསངྑེཔཱ ཧོནྟི. ཙཏྟཱརོ སངྒཧཱ ཧོནྟཱིཏི ཨཏྠོ. ཙཏཱུསུ པན སངྑེཔེསུ སིདྡྷེསུ པཐམེན དུཏཱིཡསྶ དུཏཱིཡེན ཏཏཱིཡསྶ ཏཏཱིཡེན ཙཏུཏྠསྶཱཏི ཨེཝཾ ཏིསྶོ སནྡྷིཡོཔི སིཛ྄ཛྷནྟིཡེཝཱཏི ཝུཏྟཾ ཏིསནྡྷི ཙཏུསངྑེཔཱཙ བྷཝནྟཱིཏི. ཨེཏྠཙ ཧེཏུཔཉྩཀཾ ཕལཔཉྩཀནྟི ཨེཏཾ ལོཀསྶ ¶ པཱཀཊཝོཧཱརཝསེན ཝུཏྟཾ. ཧེཏུཕལ སདྡཱ པན པཙྩཡཔཙྩཡུཔྤནྣཔརིཡཱཡཱ ཨེཝ ཧོནྟཱིཏི དུཏཱིཡཔཉྩཀསྶ པཐམཾ ཨུཔཱདཱཡ ཕལཔཉྩཀཏཱ ཏཏཱིཡཾ ཨུཔཱདཱཡ ཧེཏུཔཉྩཀཏཱཙ ན ན སམྦྷཝཏི. ཏཐཱ ཏཏཱིཡསྶཔི ཙཏུཏྠཾ ཨུཔཱདཱཡ ཧེཏུཔཉྩཀཏཱ དུཏཱིཡཾ ཨུཔཱདཱཡ ཕལཔཉྩཀཏཱཙཱཏི. ཨེཝཉྷི སཏི ཧེཏུཏོ ཕལམེཝ སིཡཱ. ན ཕལཏོ ཧེཏཱུཏི ཙོདནཱ ཨནོཀཱསཱཨེཝ ཧོཏཱིཏི. དྭཱིསུ པན ཧེཏུཔཉྩཀེསུ སངྑཱརཀམྨབྷཝཱནཾ ཝིསེསོ ཨཊྛཀཐཱཡཾ ཝུཏྟོཡེཝ. ཡཐཱཧ-དཱནཾ དསྶཱམཱིཏི ཙིཏྟཾ ཨུཔྤཱདེཏྭཱ མཱསཾཔི སཾཝཙྪརཾཔི དཱནུཔཀརཎཱནི སཛྫནྟསྶ ཨུཔྤནྣཱ པུརིམཙེཏནཱཡོ ཨཱཡཱུཧནསངྑཱརཱནཱམ. པཊིགྒཱཧཀཱནཾ པན ཧཏྠེ དཀྑིཎཾ པཏིཊྛཱཔཡཏོ ཨུཔྤནྣཱ ཙེཏནཱ བྷཝོཏི ཝུཙྩཏི. ཨེཀཱཝཛྫནེསུཝཱ ཚསུ ཛཝནེསུ ཙེཏནཱ ཨཱཡཱུཧན སངྑཱརཱནཱམ. སཏྟམཛཝནཙེཏནཱ བྷཝོ. ཡཱཀཱཙིཝཱ པན ཙེཏནཱ བྷཝོ. ཏཾསམྤཡུཏྟཱ ཨཱཡཱུཧན སངྑཱརཱནཱམཱཏི. ཀམྨབྷཝོ ཨུཔཔཏྟིབྷཝོཏི དྭེ བྷཝཱ དྭཱདསསུ ཨངྒེསུ ཨེཀསྶེཝ བྷཝ ཨངྒསྶ ཨཝཡཝཱནཱམ ཧོནྟཱིཏི ཝུཏྟཾ ཀམྨབྷཝསངྑཱཏོབྷཝེ ཀདེསོཏིཨཱདི. ཨེཏྠཙ སངྑཱརཀམྨབྷཝཱནཾ ཝིསེསོ ཝུཏྟ ནཡེནེཝ ཝེདིཏབྦོ.

[༢༢༨] ཡཾ པན ཝིབྷཱཝནིཡཾ

‘‘ཀམྨབྷཝསངྑཱཏོ བྷཝེཀདེསོཏི ཨེཏྠ ཨཱཡཏིཾ པཊིསནྡྷིཡཱ པཙྩཡཙེཏནཱ སངྑཱརཱཏི ཝེདིཏབྦཱ’’ཏི ཝུཏྟཾ. ཏཾ ཨིདྷ ན ཡུཛྫཏི.

ཏེསཾ དྭིནྣཾཔི དྭཱིསུ ཧེཏུཔཉྩཀེསུ སངྒཧིཏཏྟཱཏི. ཡཐཱ རུཏཔཱལི༹ནཡེནཝཱ ཨེཏཾ ཝུཏྟནྟི དཊྛབྦཾ. ཨཝསེསཱཙཱཏི ཨིདཾ ཛཱཏིཛརཱམརཎེཧི སདྡྷིཾ ཝིཉྙཱཎཱདིཕལཔཉྩཀཾ སནྡྷཱཡ ཝུཏྟཾ. ཨེཏྠཙ ཡདེཏཾ པུབྦེ ཛཱཏིཛརཱམརཎགྒཧཎེན ཝིཉྙཱཎཱདི ཕལ པཉྩཀཾ གཧིཏཾ. ཏཾ ཨཏྠཏོ ཨུཔཔཏྟིབྷཝོཨེཝ. ནཧི ཕལཔཉྩཀཏོ ཨཉྙོ ཨུཔཔཏྟིབྷཝོནཱམ ཨཏྠཱིཏི. ཨེཝཾ སནྟེཔི དྷམྨཝིབྷཱག རཀྑཎཏྠཾ ཨུཔཔཏྟིབྷཝསདྡེན ཙཏུཏྠཔཉྩཀཾ གཧིཏནྟི ཡུཏྟཾ. དྭཱདསསུ ¶ ཨངྒེསུ ཨཝིཛྫཱནཱམ མོཧོ. སོཙ ཨཀུསལམཱུལཾ. ཏཎྷཱནཱམ ལོབྷོ. སོཙ ཨཀུསལ མཱུལནྟི ཝུཏྟཾ ཨཝིཛྫཱ ཏཎྷཱཝསེན དྭེ མཱུལཱནཱིཏི. ཨཐཝཱ, མཱུལནྟི སཱིསཾ. དྭེ ཝཊྚསཱིསཱནཱིཏི ཨཏྠོ. ཨཊྛཀཐཱཡཾ པན པུརིམཾ པཉྩཀདྭཡཾ ཨེཀཾ བྷཝཙཀྐཾ པཙྪིམཾ པཉྩཀདྭཡཾ ཨེཀཾ བྷཝཙཀྐནྟི ཀཏྭཱ པུརིམཾ ཨཝིཛྫཱམཱུལཾ. ཏཉྩ དིཊྛིཙརིཏཱནཾཝཱ ཨཔཱཡགཱམཱིནཾཝཱ ཙཀྐཾ. པཙྪིམཾ ཏཎྷཱམཱུལཾ. ཏཉྩ རཱགཙརིཏཱནཾཝཱ སུགཏིགཱམཱིནཾཝཱ ཙཀྐནྟི དསྶིཏཾ. ཙཀྐནྟི པན ཡཏོ པཊྛཱཡ ཝཊྚསནྟཱནསྶ ཨཱརབྦྷོ ཧོཏི. ཏསྨིཾ པུན ཨཱགཏེཨེཝ ཙཀྐཾནཱམ སིཡཱ. ཏསྨཱ ཨིདྷ དུཏཱིཡེན ཧེཏུཕལ ཡུགལེ༹ན སདྡྷིཾ སབྦཾ ཨེཀམེཝ ཙཀྐནྟི ཡུཏྟཾ.

ཀསྨཱ པནེཏྠ ཨཱགམནསམྦྷཱརེསུ ཨཝིཛྫཱཨེཝ སཱིསཾ ཀཏྭཱ ཝུཏྟཱ. གམནསམྦྷཱརེསུཙ ཏཎྷཱཨེཝ. ནནུ ཨུབྷཡཏྠ ཨུབྷཡཾཔི སཱིསཾ ཀཏྭཱ ཝཏྟབྦནྟི. ཝུཙྩཏེ, སུཁཝེདནཱསདིསོ ཧི ཏཎྷཱཡ ཨཱཧཱརོནཱམ ནཏྠི. ཏསྨཱ ཝེདནངྒཏོ པརཾ ཝཊྚངྒཾ གྷཊེནྟེན ཝེདནཱ ནུརཱུཔཱཏཎྷཱཨེཝ ཝཏྟབྦཱ. ན ཨཝིཛྫཱཏི གམནསམྦྷཱརེསུ ཏཱཝ ཨཝིཛྫཱཡ ཨོཀཱསོ ནཏྠི. སབྦཔཐམཾ ཨཱརབྦྷཊྛཱནེཙ སབྦཔདྷཱནཱ ཨཝིཛྫཱཨེཝ ཝཏྟབྦཱ ཧོཏི. སཱཙ སངྑཱརུཔྤཱདནེ ཨཝིརཛ྄ཛྷནཀངྒབྷཱུཏཱཏི ན ཏེསཾ ཨནྟརེ ཨེཀསྶ ཨངྒསྶ ཨཏྠཱཡ ཀིཉྩི ཝཏྟབྦཾ ཨཏྠཱིཏི ཨཱགམནསམྦྷཱརེསུ ཏཎྷཱཡ ཨོཀཱསོ ནཏྠཱིཏི. ཨཡཉྷི པཊིཙྩསམུཔྤཱདདེསནཱནཱམ པདྷཱནངྒཔརིགྒཧ ཝསེན པཝཏྟཱ. ན ལབྦྷམཱན སབྦདྷམྨ པརིགྒཧ ཝསེནཱཏི.

ཡཾ པན ཝིབྷཱཝནིཡཾ

པུབྦནྟསྶ ཨཝིཛྫཱམཱུལཾ. ཨཔརནྟསྶ ཏཎྷཱམཱུལནྟི ཝུཏྟཾ.

ཏཏྠ པུབྦནྟསྶཱཏི པུབྦསྶ ཧེཏུཕལཀོཊྛཱསསྶ. ཨཔརནྟསྶཱཏི པཙྪིམསྶ ཧེཏུཕལ ཀོཊྛཱསསྶཱཏི ཨཏྠོཏི. ཀསྨཱ པནེཏཱནི དྭེམཱུལཱནིནཱམ ཧོནྟཱིཏི ཨཱཧ –

ཏེསམེཝཙ མཱུལཱནཾ, ནིརོདྷེན ནིརུཛ྄ཛྷཏཱིཏི.

ཏེསཾ སམུདཡེན སཀལཝཊྚཾ སམུདེཏི. ནིརོདྷེནཙ ནིརུཛ྄ཛྷཏི. ཏསྨཱ ཏཱནི དྭེམཱུལཱནིནཱམཱཏི ཝུཏྟཾ ཧོཏི. ཀེཙི པན པཊིལོམ ¶ པཊིཙྩསམུཔྤཱད དསྶནམེཏནྟི ཝདནྟི. པཊིལོམ པཊིཙྩ སམུཔྤཱདོནཱམ ཨཝིཛྫཱནིརོདྷཱ སངྑཱརནིརོདྷོ སངྑཱརནིརོདྷཱ ཝིཉྙཱཎནིརོདྷོཏིཨཱདིཀོ ནིརོདྷཝཱརོ. ཨིདཱནི སོཀཱདི ཝཙནཾ ན ཀེཝལཾ ནིསྶནྡཕལ ནིདསྶནཏྠམེཝ ཧོཏི. ཨཐཁོ ཛརཱམརཎེན སདྡྷིཾ ཨེཀཾ ཨངྒཾ ཧུཏྭཱ ཨུཔརི ཝཊྚམཱུལདྷམྨཔཊིཔཱདཀཱནཾ དུཀྑདྷམྨཱནཾ ནིདསྶནཏྠཾཔི ཧོཏཱིཏི དསྶེནྟོ ཛརཱམརཎ མུཙྪཱཡཱཏིཨཱདི མཱཧ. ཏཏྠ མུཙྪཱསདྡེན སོཀཱདཱིནཾ གཧཎཾ. ཏེཔི ཧི སཡཾ ཨཱསཝསམྦྷཱུཏཱ ཧུཏྭཱ པུན ཨཱསཝུཔྤཱདཱཡ པཙྩཡཱ ཧོནྟཱིཏི ཨེཏེན ཏེསཾ ཛརཱམརཎངྒེ གཧཎཾ སིདྡྷཾ བྷཝཏི. ཛརཱམརཎམུཙྪཱཡ ཨབྷིཎྷསོ པཱིལི༹ཏཱནཾ བཱལཱནཾ ཨཱསཝཱ ཨབྷིཎྷསོ སམུཔྤཛྫནྟི. ཨཱསཝཱནཾསམུཔྤཱདཱཨཝིཛྫཱཙ པཝཌྜྷཏི. ཨཱསཝསམུདཡཱ ཨཝིཛྫཱསམུདཡོཏི ཧི ཝུཏྟཾ. ཨེཝཉྩ སཏི ཨཝིཛྫཱཔཙྩཡཱ སངྑཱརཱཏི པུན ཨཱབནྡྷམེཝ ཝཊྚནྟི ཨཏྠོ. ཨེཏྠཙ –

ནཱནཱ བྱསནཕུཊྛསྶ, སོཀཱདཱིནཾ པཝཏྟིཏོ;

ཨཝིཛྫཱ ཏཎྷཱ ཝཌྜྷནྟི, ཡཏོ ཝཊྚཾ པཝཏྟཏཱི ཏིཔི.

ཝཏྟབྦཾ. ཡཐཱཧ-ཀཏམོཙ བྷིཀྑཝེ དུཀྑསྶ ཝིཔཱཀོ. སམྨོཧཝེཔཀྐཾ ཝཱཧཾ བྷིཀྑཝེ དུཀྑཾ ཝདཱམི. པརིཡེཊྛིཝེཔཀྐཾཝཱཏི ཏཏྠ སམྨོཧོ ཨཝིཛྫཱ. པརིཡེཊྛི ཏཎྷཱ. ཏདུབྷཡཾ ཝིཔཱཀཾ ཨེཏསྶཱཏི ཀཏྭཱཛརཱམརཎསོཀཱདིཀཾ དུཀྑཾ སམྨོཧཝེཔཀྐཾ པརིཡེཊྛིཝེཔཀྐནྟིཙ ཝུཙྩཏཱིཏི. ཏཏྠ སམྨོཧོནཱམ ཉཱཏིབྱསནཱ དིནཱ ཕུཊྛོསོཙཏི པརིདེཝཏི ཨུརཏཱལི༹ ཀནྡཏི, སམྨོཧཾ ཨཱཔཛྫཏཱིཏི ཨེཝཾ ཨཱགཏོ སམྨོཧོ. པརིཡིཊྛིནཱམ ཡཐཱ ཛིགཙྪཱཏི པཱིལི༹ཏོ. བྷོཛནཾ པཏྠེཏི པརིཡེསཏི པིཔཱསཱབྷིཔཱིལི༹ཏོ. པཱཎིཡཾ པཏྠེཏི པརིཡེསཏི, ཨེཝཾ ཀེནཙི དུཀྑེན ཕུཊྛོ སུཁཾ པཏྠེཏི པརིཡེསཏཱིཏི ཨེཝཾ པཝཏྟཱ པརིཡིཊྛིཏཎྷཱ. ཨེཏྠ པན ཡསྨཱ ཛརཱམརཎསདིསཾ མཧནྟཾ ཝིསཊཾ ནིཡཏཉྩ ཨིམསྶ ལོཀསྶ དུཀྑཊྛཱནཾནཱམ ནཏྠི. དུཀྑནིསྶརཎཏྠཉྩ སཏྠུསཱསནཾ. ཏསྨཱ ཨཡཾ པཊིཙྩསམུཔྤཱདདེསནཱ ཛརཱམརཎནིདཱནཱ ཧོཏི. ཡཐཱཧ-ཀིཙྪཾ ཝཏཱཡཾ ལོཀོ ཨཱཔནྣོ ཛཱཡཏིཙ ཛིཡྻཏིཙ ¶ མིཡྻཏིཙ ཙཝཏིཙ ཨུཔཔཛྫཏིཙ. ཨཐཙ པནིམསྶཾ དུཀྑསྶ ནིསྶརཎཾ ནཔྤཛཱནཱཏི ཛརཱམརཎསྶཱཏིཨཱདི. ཡེསུ པན ཨངྒེསུ ཨཱདིཏོ པཊྛཱཡ ཉཱཏེསུ ཛརཱམརཎཾ སམཱུལཾ ཁནིཏྭཱ ཏཏོ ཨཏྟཱནཾ མོཙེཏུཾ སཀྐོཏི. ཏཱནི དསྶེཏུཾ ཛཱཏིཨཱདཱིནི པུརིམཱནི ཨངྒཱནི དེསིཏཱནི. ཨཔིཙ. ཨེཀསྨིཾ བྷཝེ ཋཏྭཱ ཨཱགམནསམྦྷཱརེཧིཙ གམནསམྦྷཱརེཧིཙ ཨཱགཏིཡཱཙ གཏིཡཱཙ སདྡྷིཾ ཨཏྟབྷཱཝནིབྦཏྟིཡཱ དསྶིཏཱཡ ཨཏཱིཏེ ཨནཱགཏེཙ སཀལསཾསཱརེ ཏསྨིཾ ཏསྨིཾ བྷཝེ ཏསྶ ཏསྶ ཨཏྟབྷཱཝསྶ ནིབྦཏྟི དསྶིཏཱཨེཝ ཧོཏི. སབྦཱནིཙ དིཊྛིགཏཱནི ནིཝཏྟིཏཱནི. བྷཝཙཀྐཉྩ ཨནཱདིམནྟཾ ཧུཏྭཱ ཨཱབནྡྷཏིཡེཝ. ཏསྨཱ ཛརཱམརཎཝཙནེནཝཱ སོཀཱདིཝཙནེནཝཱ ཨཝིཛྫཾ ཨཙིནྟེཏྭཱ ཝཊྚཔཝཏྟསྶ མཧཱཨཱདཱིནཝརཱསིདསྶནམེཝ པཙྩེཏབྦནྟི. ཨིཙྩེཝནྟིཨཱདི ནིགམནཾ. ཨིཙྩེཝཾ ཨཝིཛྫཱཔཙྩཡཱ སངྑཱརཱཏིཨཱདིནཱ ནཡེན པཋཔེསཱིཏི སམྦནྡྷོ. ཨིཙྩེཝཾ ཨཱབནྡྷཾ ཨནཱདིཀཾ ཏེབྷཱུམཀཾ ཝཊྚནྟིཔི ཡོཛེནྟི.

ཏཏྠ ཨིཙྩེཝཾ ཨཱབནྡྷནྟི ཛརཱམརཎམུཙྪཱཡཱཏིཨཱདིནཱ ཝུཏྟ ནཡེན པུནཔྤུནཾ ཨཱབནྡྷཾ. ཨནཱདིཀནྟི ཀསྨཱ ཝུཏྟཾ. ནནུ ཨཝིཛྫཱ ཨཱདིམྷི ཝུཏྟཱཏི. ཝུཙྩཏེ, ཝཊྚསྶ ཨཱདིབྷཱུཏཏྟཱ སཱ ཨཱདིམྷི ཝུཏྟཱ ན ཧོཏི. ཝཊྚཀཐཱཡ སཱིས བྷཱུཏཏྟཱཨེཝ སཱ ཨཱདིམྷི ཝུཏྟཱ. ཨེཝཾ ཝུཏྟཱཡ པན ཏཱཡ ཝཊྚསྶ ཨནཱདིཀབྷཱཝོཔི དསྶིཏོ. ཨཝིཛྫཱ ཧི ནཱམ བཧིདྡྷཱ ན ལབྦྷཏི. སཏྟསནྟཱནེ ཨེཝ ལབྦྷཏཱིཏི པཙྩཀྑཏོཝ སིདྡྷམེཏཾ. ཏསྨཱ ཨིདྷ ཨཏཱིཏབྷཝེ ཨཝིཛྫཱཡ སིདྡྷཱཡ ཏསྶཱཨདྷིཊྛཱནབྷཱུཏོ ཨཏྟབྷཱཝོཔི ཏསྨིཾ བྷཝེ སིཛ྄ཛྷཏིཡེཝ. སིཛ྄ཛྷནྟོ ཙ ཨིམསྶཾ དསནོཡཾ ཝུཏྟ ནཡེན ཨཉྙཱཡ ཨཝིཛྫཱཡ ཨེཝ སིཛ྄ཛྷཏི, ན ཨཉྙཐཱ. ཨེཝཉྩ སབྷི པུན ཏསྶཔི ཨདྷིཊྛཱནབྷཱུཏོ ཨཏྟབྷཱཝོ སིཛ྄ཛྷཏིཡེཝཱཏི ཨཝིཛྫཱ ཨཏྟབྷཱཝོཙཱཏི ཨུབྷཡཾ པེཏཾ ཨནཝཊྛིཏཾ ཨནཱདིཀམེཝ ཧོཏཱིཏི. ཝཊྚསྶ པན ཏིཝིདྷསྶཔི པདྷཱནཔཙྩཡབྷཱུཏཏྟཱ སཱ ཝཊྚཀཐཱཡ སཱིསབྷཱུཏཱ ཧོཏི. ཡདི སཱ ཝཊྚསྶ ཨཱདིབྷཱུཏཱ ན ཧོཏི. ཨཐ ཏསྶཱཔི པཙྩཡོ ཝཏྟབྦོཏི. སཙྩཾ. ཏསྶཱ པན ¶ པཙྩཡེ ཝུཏྟེཔི ཏསྶ པཙྩཡསྶཔི པཙྩཡོ ཝཏྟབྦོཏི ཨཱགཙྪཏིཡེཝ. ཨེཝཉྩ སཏི ཏསྶ ཏསྶཱཏི ནིཊྛཱནམེཝ ནཔཉྙཱ ཡེཡྻཱཏི. ཨཉྙཏྠ པན ཝུཏྟོཡེཝ. ཡཐཱཧ-ཨཱསཝསམུདཡཱ ཨཝིཛྫཱསམུདཡོཏི. ཡཐཱཙཱཧ-ཨཝིཛྫཾ པཱཧཾ བྷིཀྑཝེ སཱཧཱརཾ སནིདཱནཾ ཝདཱམི. ཀོཙསྶཱ ཨཱཧཱརོ. པཉྩནཱིཝརཎཱ ཏིསྶ ཝཙནཱིཡནྟི. ཡཐཱཙཱཧ-ཨཝིཛྫཱ པཙྩཡོ, སངྑཱརཱ པཙྩཡུཔྤནྣཱ. ཨུབྷཡམེཏཾ པཊིཙྩ སམུཔྤནྣནྟི. པཋཔེསཱིཏི པཉྙཱཔེསི དེསེསཱིཏི ཨཏྠོ. [པཊིཙྩསམུཔྤཱདནཡོ.]

༡༦༧. ཨིདཱནི པཊྛཱནནཡཾ དསྶེཏུཾ ཧེཏུཔཙྩཡོཏིཨཱདི ཨཱརདྡྷཾ. ཏཏྠཧེཏུཙ སོ པཙྩཡོཙཱཏི ཧེཏུཔཙྩཡོ, ཧེཏུ ཧུཏྭཱ པཙྩཡོ ཧེཏུབྷཱཝེན པཙྩཡོཏི ཝུཏྟཾ ཧོཏི. ཏཏྠ ཀེནཊྛེན ཧེཏཱུཏི མཱུལཊྛེན, ཀོཙ མཱུལཊྛོཏི. རུཀྑཱནཾ རུཀྑམཱུལསྶ ཝིཡ བྷཱུམིཡཾ སཧཛཱཏདྷམྨཱནཾ ཨཱརམྨཎེསུ སུཔྤཏིཊྛི ཏབྷཱཝསཱདྷནཊྛོ མཱུལཊྛོནཱམ. སཧཛཱཏདྷམྨཱནཾ ཀུསལཱདི བྷཱཝསཱདྷནཊྛོ མཱུལཊྛོནཱམཱཏིཔི ཝདནྟི. ཡཾ པནེཏྠ ཝཏྟབྦཾ. ཏཾ ཧེཊྛཱ ཝུཏྟམེཝ. སདྡཏྠཏོ པན ཧིནོནྟི ཝུདྡྷིཝིརུལ༹ྷིཝེཔུལླཔཏྟིཝསེན སུཊྛུ པཏིཊྛཧནྟི སཧཛཱཏདྷམྨཱ ཨེཏྠ ཨེཏེནཝཱ ཨཱརམྨཎེ དལ༹ྷནིཔཱཏིནཱ ཐཱམབལསམྤནྣེནཱཏི ཧེཏུ. པཙྩཡ སདྡོ པན ཨུཔཀཱརཀཊྛོ. ཨུཔཀཱརཀོཏིཙ སཡཾ ཡཱདིསེན སབྷཱཝེན ཨུཔལབྦྷམཱནེ ཨནུཔྤནྣཱཝཱ དྷམྨཱ ཨུཔྤཛྫནྟི. ཨུཔྤནྣཱཝཱ ཏིཊྛནྟི ཋིཏཱཝཱ ཨུཔརུཔརིཝུདྡྷིཝིརུལ༹ྷིཡཱ པཙྩཡཏྟཾ ཨུཔགཙྪནྟི. ཏཱདི སེནསབྷཱཝེན ཨུཔལདྡྷིཡེཝ. ནཧི སབྷཱཝདྷམྨེསུ ཨཱིཧཱཝཱ བྱཱཔཱརོཝཱ ཨུཔལབྦྷཏི. ཡེན ཀཏྟཱཝཱ ཀཱརེཏཱཝཱ ཨུཔལབྦྷེཡྻཱཏི. ཏཐཱ ཨུཔལདྡྷིཡཾ པན སཏི ཨནུརཱུཔཱནཾ པཙྩཡུཔྤནྣདྷམྨཱནཾ ཨནུཔྤནྣཱནཾཝཱ ཨུཔྤཛྫནཏོ ཨུཔྤནྣཱནཾཝཱ ཋིཏིབྷཱཝཔཏྟིཏོ ཋིཏཱནཾ ཝཱ ཨུཔརུཔརིཝུདྡྷིཝིརུལ༹ྷིཡཱ པཙྩཡཏྟུཔགམནཏོ སུཊྛུ ཀརཱནྟོ ཝིཡ སཱདྷེནྟོ ཝིཡ ཧོཏཱིཏི ཀཏྭཱ ཨུཔཀཱརཀོ ཏྭེཝ ཝུཙྩཏཱིཏི. ཨིཏི ཨཱརམྨཎེ ཐིརབྷཱཝཝུདྡྷི ཝིརུལ༹ྷིབྷཱཝསཱདྷན སངྑཱཏེན མཱུལབྷཱཝེན ཨུཔཀཱརཀཱ ཚཧེཏུདྷམྨཱ ཧེཏུཔཙྩཡོ ནཱམ.

ཨཱརམནྟི ¶ ཙིཏྟཙེཏསིཀཱ དྷམྨཱ སུཊྛུ རཏིཾ ཨནུབྷཝནྟཱ ཝིཡ ཨཛ྄ཛྷོལམྦམཱནཱ པཝཏྟནྟི ཨེཏྠཱཏི ཨཱརམྨཎཾ. ཨཱརམྨཎབྷཱནེཝ ཨུཔཀཱརཀཱ ཚལཱ༹རམྨཎདྷམྨཱ ཨཱརམྨཎཔཙྩཡོ. ཨདྷིཔཏི སདྡཏྠོ ཧེཊྛཱ ཝུཏྟོཡེཝ. ཨདྷིཔཏི བྷཱཝེན ཨུཔཀཱརཀོ དྷམྨོ ཨདྷིཔཏིཔཙྩཡོ. སོ དུཝིདྷོ ཨཱརམྨཎཱདྷིཔཏི སཧཱཛཱཏཱདྷིཔཏིཝསེན. ཨཱརམྨཎདྷམྨཱཔི ཧི ཀེཙི གརུཀཏཱ ཨཏྟནོ ཨཱརམྨཎིཀདྷམྨེ སཱམིནོ ཝིཡ དཱསེ ཨཏྟནོ ཝསེཝཏྟཡམཱནཱ ཨཏྟནི ནིཙྩཾ ནིནྣཔོཎཔབྦྷཱརེཨེཝ ཀརོནྟཱིཏི. ནཏྠི ཨནྟརཾ ཨེཏསྶཱཏི ཨནནྟརོ, ཨནནྟརབྷཱཝེན ཨུཔཀཱརཀོ དྷམྨོ ཨནནྟརཔཙྩཡོ. སུཊྛུ ཨནནྟརབྷཱཝེན ཨུཔཀཱརཀོ དྷམྨོ སམནནྟརཔཙྩཡོ. ཨིམེསཾ དྭིནྣཾ པཙྩཡཱནཾ དྷམྨཏོ ཝིསེསོ ནཏྠི. ཨཏྠཏོ པན པུརིམཙིཏྟེ ནིརུདྡྷེཔི པཙྪཱ སནྟཱནཾ ཨུཙྪིཛྫིཏུཾ ཨདཏྭཱ སནྟཱནཱནུབནྡྷཝསེན སཱརམྨཎདྷམྨ བྷཱཝེན ཨཏྟསདིསསྶ དྷམྨནྟརསྶ ཨུཔྤཱདནཾ ཨནནྟརཔཙྩཡཏཱ. དྷམྨནྟརེ ཨུཔྤཱདིཡམཱནེཔི ཡཾཀིཉྩི དྷམྨཾ ཨནུཔྤཱདེཏྭཱ པཊིསནྡྷཱདཱིནཾ ཀིཙྩཊྛཱནཱནཾ པཊིཔཱཊིཡཱ ཙིཏྟནིཡཱམཾ ནཱམ སཱདྷེཏྭཱ ཨནུརཱུཔསྶེཝ དྷམྨནྟརསྶ ཨུཔྤཱདནཾ སམནནྟརཔཙྩཡཏཱཏི. ཨེཝཉྷི སཏི ནིརོདྷཱ ཝུཊྛཧནྟསྶ ཨསཉྙསཏྟཱ ཙཝནྟསྶཙ པུརིམཔཙྪིམབྷཱགཔཝཏྟཱནཾ ཙིཏྟུཔྤཱདཱནཾཔི ཨནནྟརཏཱ སམནནྟརཏཱཙ ཨུཔཔནྣཱ ཧོཏཱིཏི. ནཧི ཨབྷཱཝ བྷཱུཏོ ཨནྟརེ ཀཱལོ ཏེསཾ ཨནྟརཾ ཀརོཏིནཱམ. ནཙ ཨཉྙསནྟཱནབྷཱུཏོ ཨནྟརེ རཱུཔདྷམྨོ. ཨཉྙཉྷི རཱུཔསནྟཱནཾ, ཨཉྙཾ ཨརཱུཔསནྟཱནཾ. ཨཊྛཀཐཱཡཾ པན ཀཱལཱནནྟརཏཱ སམནནྟརཔཙྩཡོཏི ཝཱདཾ པཊིཀྑིཔིཏྭཱ སཎྛཱནཱབྷཱཝཏོ སུཊྛུ ཨནནྟརཱཏི སམནནྟརཱཏི ཝུཏྟཾ. ཨེཏེན ཡཐཱསཎྛཱནཝནྟཱནཾ རཱུཔདྷམྨཱནཾ ཨནནྟརཏཱནཱམ མཛ྄ཛྷེ པརིཙྪེདསཧིཏཱཡེཝ ཧོཏི. ན ཏཐཱ སཎྛཱནརཧིཏཱནཾ ཨརཱུཔདྷམྨཱནཾ. ཏསྨཱ པུརིམཔཙྪིམཱནཾ ཏེསཾ ཨེཀཱིབྷཱུཏཱནཾ ཝིཡ པཝཏྟིསམནནྟརཏཱནཱམ. ཏཐཱ པཝཏྟན སམཏྠཏཱ སམནནྟརཔཙྩཡཏཱཏི དསྶེཏི.

ཡེ པན དྷམྨཱ ཨཏྟནི ཛཱཏེ ཨེཝ ཛཱཡནྟི, ནོ ཨཛཱཏེ. ཨཏྟནཱ སཧེཝཙ ཛཱཡནྟི, ནོ པུརེ པཙྪཱཙ, ཏེསཾ ཛཱཏཏྠཱཡ ཝིཡ ¶ སཡཾ ཏེཧི སཧ ཛཱཏབྷཱཝེན ཨུཔཀཱརཀོ དྷམྨོ སཧཛཱཏཔཙྩཡོ. པཀཱསསྶ པདཱིཔོ ཝིཡ. པདཱིཔཛཱལཉྷི ཨུཔྤཛྫམཱནཾ པཀཱསསངྑཱཏེན ཨཱལོཀེན སཧེཝ ཨུཔྤཛྫཏཱིཏི. ཨཉྙམཉྙཾ ཨུཔཏྠམྦྷནྟཾ ཏིདཎྜཾ ཝིཡ ཨཉྙམཉྙཾ ཨུཔཏྠམྦྷནཝསེན ཨུཔཀཱརཀོ དྷམྨོ ཨཉྙམཉྙཔཙྩཡོ. ཨེཝཉྩ སཏི ཨིམསྶ པཙྩཡསྶ པུརིམེན སཧ ཝིསེསོ པཱཀཊོ ཧོཏི. ནཧི སཧ ཛཱཏསདྡོ ཨེཝརཱུཔཾ ཨཉྙམཉྙོཔཏྠམྦྷནཾ བོདྷེཏཱིཏི. ནིསྶཡནྟི ཨེཏྠཱཏི ནིསྶཡོ. ནིསྶཡབྷཱཝེན ཨུཔཀཱརཀོ དྷམྨོ ནིསྶཡཔཙྩཡོ. སོ པན སཧཛཱཏནིསྶཡོ ཝཏྠུཔུརེཛཱཏ ནིསྶཡོཏི དུཝིདྷོ ཧོཏི. ཏཏྠ སཧཛཱཏོཝ སམཱནོ པཊཀོཊྛཀོ ཝིཡ ཙིཏྟཀམྨཱནཾ པཏིཊྛཱབྷཱཝེན ཨུཔཀཱརཀོ དྷམྨོ སཧཛཱཏནིསྶཡོ. པཐཝཱི ཝིཡ ཏིཎརུཀྑཱདཱིནཾ པུརེ ཛཱཏོ ཧུཏྭཱ ཨདྷིཊྛཱནབྷཱཝེན ཨུཔཀཱརཀོ ཝཏྠུཔུརེཛཱཏ ནིསྶཡོ. བལཝཏརོ པན ནིསྶཡོ ཨུཔནིསྶཡོ. ཡཐཱ ཧི སཱལིབྷཏྟསྶ ཨུཔྤཏྟིཡཱ སཱུདོཝཱ ཨུཀྑལིཝཱཀཊྛཾཝཱ ཨགྒིཝཱནིསྶཡོ ཨེཝ ཧོཏི, ན ཨུཔནིསྶཡོ. སཱལིཁེཏྟཝུཊྛིདྷཱརཱ ཨེཝ པན ཨུཔནིསྶཡོ, ན ཧི ཏཱསུཨསཏི བྷཏྟུཔྤཏྟིཡཱ སཱུདཱདཱིནཾཔི ཐཱམོནཱམ ཨཏྠཱིཏི. ཏཐཱ ཡཧིཾ པཙྩཡེ ཨསཏི ནིསྶཡདྷམྨཱཔི ནཏྠི. ཀུཏོ ནིསྶིཏདྷམྨཱ. སོ པཙྩཡོ ནིསྶཡཏོཔི བལཝཏརཊྛེན ཨུཔནིསྶཡོཏི ཝུཙྩཏཱིཏི.

སོ པན ཨཱརམྨཎཱུཔནིསྶཡོ ཨནནྟརཱུཔནིསྶཡོ པཀཏཱུཔནིསྶཡོཏི ཏིཝིདྷོ ཧོཏི. ཏཏྠ གརུཀཏཱ ཨཱརམྨཎ དྷམྨཱ གརུཀཏཏྟཱཨེཝ ཨདྷིཔཏིབྷཱུཏཱ བལཝ ནིསྶཡབྷཱུཏཱཙ ཧོནྟི. ཨནནྟརཔཙྩཡདྷམྨཱཙ ཏེཧི ཝིནཱ ཙིཏྟསནྟཱནཔཝཏྟིཡཱ ཨེཝ ཨབྷཱཝཏོ བལཝནིསྶཡཱཨེཝ ཧོནྟི. པཀཏཱུཔནིསྶཡོཏི ཨེཏྠ པན པཀཏོ ཨུཔནིསྶཡོཏི པཀཏཱུཔནིསྶཡོ. པཀཏོཏིཙ ཡཐཱ ཀཏེ སཏི ཨནུརཱུཔེ ཀཱལེ ཏསྨིཾསནྟཱནེ ཨེཀནྟེན པཙྩཡུཔྤནྣདྷམྨཱ པཱཏུབྷཝནྟི, ཏཐཱ སུཊྛུ ཀཏོཏི ཨཏྠོ. ཀརཎཉྩེཏྠ སདྡྷཱ སཱིལཾ སུཏཾ ཙཱགོ པཉྙཱཏིཙ རཱགོ དོསོ མོཧོ མཱནོ དིཊྛི པཏྠནཱཏིཙ ཝུཏྟཱནཾ དྷམྨཱནཾ ཨཏྟནོ ¶ སནྟཱནེ པུབྦབྷཱགེ ཝུཏྟཔྤཀཱརེན སུཊྛུ ཨུཔྤཱདནཾ. ཀཱཡིཀཾ སུཁཾ ཀཱཡིཀཾ དུཀྑཾ པུགྒལོ ཨུཏུ བྷོཛནཾ སེནཱསནནྟི ཨེཝཾ ཝུཏྟཱནཾ དྷམྨཱནཾ སུཊྛུ ཨུཔསེཝནཉྩ ཝེདིཏབྦཾ.

པུརེཏརཾ ཨུཔྤཛྫིཏྭཱ ཝཏྟམཱནབྷཱཝེན ཨུཔཀཱརཀོ དྷམྨོ པུརེཛཱཏཔཙྩཡོ. སོ དུཝིདྷོ ཨཱརམྨཎཔུརེཛཱཏ ནིསྶཡ པུརེཛཱཏ ཝསེན. ནིསྶཡཱརམྨཎདྷམྨཱ ཨེཝ ཧི ཀེཙི པུརེཛཱཏ ཏཱམཏྟཝིསིཊྛཱ པུརེཛཱཏཔཙྩཡོཏི ཝུཏྟཱཏི. ཨཱཙརིཡཱནནྡཏྠེརེན པན ནིསྶཡཱརམྨཎཱཀཱརཱདཱིཧི ཝིསིཊྛཱ པུརེཛཱཏཱཀཱརེན ཨུཔཀཱརཀཏཱ པུརེཛཱཏཔཙྩཡཏཱཏི ཝུཏྟཾ. ཨེཝཾ སནྟེཔི པུརེ ཛཱཏཏཱཝིསིཊྛེཧི ནིསྶཡཱརམྨཎསཏྟིཝིསེསེཧི ཨཉྙོ ཝིསུཾ པུརེཛཱཏསཏྟིཝིསེསོནཱམ ནདིསྶཏིཡེཝ. པུརེ རོཔེཏྭཱ ཛཱཏཱནཾ རུཀྑཔོཏཀཱནཾ ཝིཡ པཙྪཱ ཨཱསིཉྩིཡམཱནཾ ཨུདཀཾ པུརེ ཛཱཏཱནཾ ཙཏུསམུཊྛཱནིཀརཱུཔདྷམྨཱནཾ ཝུདྡྷཝིརུལ༹ྷབྷཱཝཉྩ པཙྪཱཔི ཨཏྟནཱ སདིསསྶ རཱུཔསནྟཱནསྶ པཝཏྟིཡཱ པཙྩཡབྷཱཝཉྩ པཱཔེཏྭཱ ཨུཔཏྠམྦྷནཝསེན ཨུཔཀཱརཀོ པཙྪཱཛཱཏོ ཨརཱུཔདྷམྨོ པཙྪཱ ཛཱཏཔཙྩཡོ. ཨཊྛཀཐཱཡཾ པན གིཛ྄ཛྷཔོཏཀསརཱིརཱནཾ ཨཱཧཱརཱསཱ ཙེཏནཱཝིཡཱཏི ཝུཏྟཾ. མཱུལཊཱིཀཱཡཉྩ ཨེཏེན མནོསཉྩེ ཏནཱཧཱརཝསེན པཝཏྟམཱནེཧི ཨརཱུཔདྷམྨེཧི རཱུཔཀཱཡསྶ ཨུཔཏྠམྦྷིཏ བྷཱཝཾ དསྶེཏི, ཏེནེཝ ཨཱཧཱརཱསཱ ཝིཡཱཏི ཨཝཏྭཱ ཙེཏནཱགཧཎཾ ཀརོཏཱིཏི ཝུཏྟཾ. སཱ པན པཙྪཱཛཱཏཱ སསམྤཡུཏྟཱ ཨཱཧཱརཱསཱ ཙེཏནཱ པུརེཛཱཏཱནཾ ཏེསཾ གིཛ྄ཛྷསརཱིརརཱུཔཱནཾ ཙིརཀཱལཾ ཀབལཱི༹ཀཱརཱཧཱརེན ཝིནཱཔི ཨམིལཱཏ བྷཱཝཾ ཨུཔརཱུཔརིཙ ཝུདྡྷཝིརུལ༹ྷརཱུཔསནྟཱནུཔྤཏྟིཡཱ པཙྩཡབྷཱཝཾ པཱཔེཏྭཱ ཨུཔཏྠམྦྷཏིཡེཝ. ཡསྨཱ སུཔཱཀཊེན པཙྪཱཛཱཏཔཙྩཡེཀ དེསེན སཀལསྶ པཙྪཱཛཱཏཔཙྩཡསྶ སཱདྷནཏྠཱཡ ཨཡཾ ཨུཔམཱ ཨིདྷ ཝུཏྟཱ ཝིཡ དིསྶཏི. ཙེཏནཱ གཧཎཉྩ པཙྪཱཛཱཏ པཙྩཡཾ པཏྭཱཔི ཙེཏནཱཨེཝ པདྷཱནཱ ཛཱཏཱཏི དསྶནཏྠཾ གཧིཏནྟི ན ན སཀྐཱ ཝཏྟུཾ. ཨེཝཉྷི སཏི པཙྪཱཛཱཏསྶ ཨཏྠསྶ པཙྪཱ ཛཱཏཱཡ ཨེཝ ཨུཔམཱཡ སཱདྷནཾ ཨུཔཔནྣཾ ཧོཏཱིཏི. ཡཐཱཝུཏྟ ཊཱིཀཱཔཱཋེཔི ཨཡམཏྠོ ལབྦྷཏིཡེཝ.

ཨཱསེཝནྟི ¶ ཏཾ སུཊྛུ བྷཛནྟི ཨཔརཱཔརཾ ཨུཔྤཛྫམཱནཱ དྷམྨཱ སུཊྛུ སེཝམཱནཱ ཝིཡ བྷཛམཱནཱ ཝིཡ ཏསྶ པུརིམསྶ སབྦཔཱརིཔཱུརཾ ཨཱཀཱརཾ གཧེཏྭཱ ཨེཝ པུནཔྤུནཾ པཝཏྟནྟཱིཏི ཨཱསེཝནཾ. ཨཱསེཝེཏིཝཱ ཏེ དྷམྨེ ཨཏྟནོ པརིཝཱསཾ སུཊྛུ གཱཧཱཔེཏི. ཝཌྜྷེཏཱིཏིཝཱ ཨཱསེཝནཾ. ཨཔིཙ ཀུསལཱདིབྷཱཝེན ཨཏྟནཱ སདིསསྶ པཡོགེན ཀརཎཱིཡསྶ ཨནནྟརདྷམྨསྶ པུནཔྤུནཾ ཀརཎཾ པཝཏྟནཾ ཨཏྟསདིསསྶཝཱ ཨཏྟསདིསབྷཱཝཱཔཱདནཾ ཝཱསནཾ ཨཱསེཝནཊྛོཏི མཱུལཊཱིཀཱཡཾ ཝུཏྟཾ. ཏཏྠ པཡོགེན ཀརཎཱིཡསྶཱཏི ཨེཏེན ཨཱཝཛྫནདྭཡཉྩ སབྦཝིཔཱཀདྷམྨེཙ ནིཝཏྟེཏི. ནཧི ཨཱཝཛྫན དྭཡསྶ དྭཏྟིཀྑཏྟུཾ པཝཏྟམཱནསྶཔི ཝཌྜྷེཏུཾཝཱ ཧཱཔེཏུཾཝཱ པཡོགེན ཀརཎཱིཡཏཱནཱམ ཨཏྠི པརིདུབྦལཏྟཱ. ཝིཔཱཀེསུཙ ཨརིཡཕལཱནི པརིཀམྨཔཡོགེན ཀརཎཱིཡཱནིཔི མགྒཙེཏནཱནུབྷཱཝེན ཝིནཱ ཀེཝལེན ཏེན པཡོགེནེཝ སཱདྷེཏབྦཱནི ན ཧོནྟི. ཀེཝལཾ ཀམྨཝེགེན སནྟཱནེ པཱཏིཏེསུ ལོཀིཡཝིཔཱཀེསུ ཝཏྟབྦམེཝ ནཏྠཱིཏི. པུནཔྤུནཾ ཀརཎཾ པཝཏྟནནྟི ཨུཔརུཔརི པགུཎ བལཝབྷཱཝཱཔཱདནེན སཧ པཝཏྟནཾ སནྡྷཱཡ ཝུཏྟཾ. ཨེཝཉྷི སཏི པརིཡཏྟིདྷམྨ ཝིཛྫཱསིཔྤུགྒཧཎེསུ པུརིམཱབྷིཡོགོ ཝིཡ ཨཱསེཝནཊྛེན ཨནནྟརེ པཝཏྟཱནཾ སཛཱཏིཡཱནཾ དྷམྨཱནཾ པགུཎབལཝབྷཱཝཱཡ ཨུཔཀཱརཀོ དྷམྨོ ཨཱསེཝནཔཙྩཡོ ནཱམཱཏི སིདྡྷཾ ཧོཏཱིཏི.

ཀཱཡངྒཝཱཙངྒཙིཏྟངྒཱབྷིསངྑརཎབྷཱུཏེན ཙིཏྟཔྤཡོགསངྑཱཏེ ན ཀིརིཡཱབྷཱཝེན ཨུཔཀཱརཀོ དྷམྨོ ཀམྨཔཙྩཡོ. སོ དུཝིདྷོ སཧཛཱཏནཱནཱཀྑཎིཀཝསེན. ཏཏྠ ཛེཊྛསིསྶ མཧཱ ཝཌྜྷཀིཨཱདཡོ ཝིཡ སཀིཙྩཔརཀིཙྩསཱདྷནཝསེན པཝཏྟཱ སབྦཱཔི སཧཛཱཏཙེཏནཱ སཧཛཱཏཔཙྩཡོ. ཡཐཱ པན ཨིཏྠིཔུརིསཱནཾ སཀིཾ སནྣིཔཱཏཔྤཡོགོ ཀཱམསུཁཱནུབྷཝནཀིཙྩཉྩ ཀཱལནྟརེ པུཏྟཔཱཏུབྷཱཝཏྠཱཡཝཏྠུམྷི བཱིཛནིདྷཱན ཀིཙྩཉྩ སམྤཱདེཏི. ཨེཝམེཝཾ ཡཐཱཝུཏྟཱབྷིསངྑརཎཀིཙྩཉྩ ཏདབྷིསངྑརཎཝེགཛནིཏཾ ཀཱལནྟརེ ཝིཔཱཀཀཊཏྟཱརཱུཔཱནཾ པཱཏུབྷཱཝཏྠཱཡ སནྟཱནེ ཀིརིཡཱ ཝིསེསནིདྷཱན ཀིཙྩཉྩ སམྤཱདེཏྭཱ ནིརུདྡྷཱ ཀུསལཱཀུསལ ཙེཏནཱ ནཱནཱཀྑཎིཀཀམྨཔཙྩཡོནཱམ. ¶ ཝིཔཙྩནམཏྟབྷཱཝེན ཨུཔཀཱརཀོ དྷམྨོ ཝིཔཱཀཔཙྩཡོ. ཝིཔཙྩན བྷཱཝོཙ ནཱམ ལོཀེ སབྦེསཾ པུཔྥཕལཱདཱིནཾ སུཊྛུ ཝིཔཀྐབྷཱཝཾ པཏྟཀཱལེ སབྦཱཀཱརེན མནྡབྷཱཝོ ཧོཏི. ཨེཝཾ ནིརུསྶཱཧསནྟ བྷཱཝསངྑཱཀེན མནྡམནྡཱཀཱརེན སནྟཱནེ པཱཏུབྷཱཝོ. ཏཏོཡེཝཙ ཝིཔཱཀཱནཾ པཝཏྟི ཨཝིབྷཱུཏཱ ཧོཏི. སབྦརཏྟིཾ ནིདྡཱཡནྟསྶ པུརིམབྷཝསིདྡྷེ ཀམྨཱདི ཨཱརམྨཎེ པཝཏྟཱནིཔི ཏཱནི ཝུཊྛིཏཀཱལེ ཀིཉྩིཛཱནནཙིཏྟ པཝཏྟིཡཱ པཙྩཡཱ ནཧོནྟཱིཏི. པཉྩཝིཉྙཱཎཱདཱིནི པན པཙྪཱཛཱནནཙིཏྟ པཝཏྟིཡཱ པཙྩཡཱ ཧོནྟཱནིཔི ཝཏྠཱརམྨཎ གྷཊྚནཱནུབྷཱཝ བལེན སཧེཝ ཧོནྟི. ན ཏེསཾ ཨུསྶཱཧབྱཱཔཱརམཏྟ ཝསེནཱཏི དཊྛབྦཾ.

ཨརཱུཔིནོ ཏཡོ ཨཱཧཱརཱ སཧཛཱཏདྷམྨཱནཾ ཛནནཊྛེན ཨུཔཏྠམྦྷནཊྛེནཙ, ཀབལཱི༹ཀཱརཱཧཱརོ པན ཨིམསྶ ཙཏུསམུཊྛཱནི ཀསྶ ཀཱཡསྶ ཨུཔཏྠམྦྷནཊྛེནེཝ ཨུཔཀཱརཀཏཱ ཨཱཧཱརཔཙྩཡོ. ཨཔིཙ, ཨཱཧཱརཊྛོནཱམ ཨུཔཏྠམྦྷནཔྤདྷཱནོ ཧོཏི. ཏེནེཝ ཧི པཱལི༹ཡཾ ཀབལཱི༹ཀཱརོ ཨཱཧཱརོ ཨཱཧཱརསམུཊྛཱནསྶ རཱུཔསྶ ཨཱཧཱརཔཙྩཡེན པཙྩཡོཏི ཨཝཏྭཱ ཨིམསྶ ཀཱཡསྶ ཨཱཧཱརཔཙྩཡེན པཙྩཡོཏྭེཝ ཝུཏྟཾ. ཏསྨཱ ཨརཱུཔཱཧཱརཱནཾཔི ཨཱཧཱརཊྛོ ཨུཔཏྠམྦྷནཝསེནེཝ ཝེདིཏབྦོ. ཛནཡནྟཱཔི ཧི ཨཱཧཱརཱ ཨཏྟནཱ ཛནིཏཱནཉྩ ཏདཉྙེསཉྩསནྟཱནཊྛིཏིཡཱ པཙྩཡབྷཱཝཏྠཱཡ ཨུཔཏྠམྦྷནེན སཧེཝ ཛནེནྟཱིཏི.

ཨིསྶརིཡཊྛེན ཨུཔཀཱརཀོ དྷམྨོ ཨིནྡྲིཡཔཙྩཡོ. སོ ཏིཝིདྷོ སཧཛཱཏཱདིཝསེན. ཏཏྠ སཧཛཱཏདྷམྨཱནཾ ཨཏྟནོ ཨཏྟནོ ཀིཙྩེསུ ཨིསྶརབྷཱུཏཱ ཨརཱུཔིནྡྲིཡདྷམྨཱ སཧཛཱཏིནྡྲིཡཔཙྩཡོ. པཙྪཱ ཛཱཏཱནཾ པཉྩཝིཉྙཱཎ དྷམྨཱནཾ དསྶནཱདི ཀིཙྩེསུ ཨིསྶརབྷཱུཏཱ པུརེ ཛཱཏཱ པཉྩཔསཱདིནྡྲིཡདྷམྨཱ པུརེ ཛཱཏིནྡྲིཡཔཙྩཡོ. སཧཛཱཏཱནཾ ཀཊཏྟཱརཱུཔཱནཾ ཙིརཏརཔཝཏྟིཡཾ ཨིསྶརབྷཱུཏཾ རཱུཔཛཱིཝིཏཾ རཱུཔཛཱིཝིཏིནྡྲིཡཔཙྩཡོ. ཀསྨཱ པནེཏྠ བྷཱཝིནྡྲིཡདྭཡཾ ཨིདྷ ན གཧིཏནྟི. ཝུཙྩཏེ, ཡསྶ ཛནཀཏྟཾཝཱ ཨུཔཏྠམྦྷཀཏྟཾཝཱ ཨནུཔཱལཀཏྟཾཝཱ ཨཏྠི. སོ པཙྩཡདྷམྨོནཱམ. བྷཱཝདྭཡསྶ ¶ པན སཧཛཱཏ དྷམྨཱནཾ ཨཏྠཱཡ ཨེཏཾ ཏཡཾཔི ནཏྠི. ཀེཝལཾ པན ཏཾསཧིཏེ སནྟཱནེ ཀམྨཱདཱིཧི ཨཏྟནོ ཨཏྟནོ པཙྩཡེཧི པཝཏྟམཱནཱནཾ ཙཏུསམུཊྛཱནིཀདྷམྨཱནཾ ཨིཏྠཱཀཱརཱདིཝསེནེཝ ཡོ པཝཏྟིནིཡམོ ཨཏྠི, སོ བྷཱཝརཱུཔཱ ནུབྷཱཝེན སིདྡྷོ. ཏསྨཱ ཏེསཾ དྷམྨཱནཾ ཏཱདིསེ ནིཡཱམཀིཙྩེ ཨིསྶརཏྟཱཡེཝ དྭཡཾ ཨིནྡྲིཡཾནཱམ ཧོཏི. ན ཨིནྡྲིཡཔཙྩཡཏྟེ ནཱཏི ཏཾ ཨིདྷ ནགཧིཏནྟི དཊྛབྦཾ. ཨཱརམྨཎཾ ཨུཔགནྟྭཱ ཏསྨིཾ བྷུསཾ དལ༹ྷཾ ནིཔཏིཏྭཱ ཝིཡ ཛྷཱཡནཊྛེན ཨོལོཀནཊྛེན ཨུཔཀཱརཀོ དྷམྨོ ཛྷཱནཔཙྩཡོ. དུགྒཏི སུགཏི ནིབྦཱན སམྤཱཔཀཊྛེན ཨུཔཀཱརཀོ དྷམྨོ མགྒཔཙྩཡོ. ཨེཏྠཙ ཡེནཡེན སམྨཱདསྶནཱདིནཱ ལཀྑཎཝིསེསེན སམྤནྣཏྟཱ ཀུསལབྷཱུཏཱ སམྨཱདིཊྛཱདཡོ སུགཏི ནིབྦཱན སམྤཱཔཀཊྛེན མགྒཔཙྩཡཱནཱམ ཧོནྟི. ཨབྱཱཀཏབྷཱུཏཱནཾཔི ཏེསཾ སོ སོ ལཀྑཎཝིསེསོ ཨཏྠིཡེཝཱཏི ཏེསམྤི ཏེནེཝཊྛེན མགྒཔཙྩཡཏཱ ཝུཏྟཱཏི དཊྛབྦཱ. སཏིཔི མགྒངྒཱནཾ ཏཾཏཾ སམྤཱཔཀཊྛེནཙ ཨུཔཀཱརཀཏྟེ ཏཾསམུཊྛིཏཱནཾ རཱུཔདྷམྨཱནཾ སོ ཨཏྠོ ན པཱཔུཎཱཏི. ཏེསཾ པན མགྒཔཙྩཡདྷམྨེཧི སམུཊྛིཏཏྟཱཡེཝ མགྒཔཙྩཡུཔྤནྣཏཱ པཙྩེཏབྦཱ. ཨེསནཡོ ཧེཏུཀམྨིནྡྲིཡཛྷཱན པཙྩཡེསུཔཱིཏི.

ཨེཀུཔྤཱདཏཱདཱིཧི པཀཱརེཧི སམཾ ཨེཀཱིབྷཱུཏོ ཝིཡ ཧུཏྭཱ ཨཉྙམཉྙཡུཏྟབྷཱཝེན ཨུཔཀཱརཀོ དྷམྨོ སམྤཡུཏྟཔཙྩཡོ. སམཱནེཔི སཧཛཱཏབྷཱཝེན ནིསྶཡ ནིསྶིཏ བྷཱཝེནཙ ཡུཏྟབྷཱཝེ ཨེཀུཔྤཱདཏཱདིཀསྶ སམྤཡོགལཀྑཎསྶ ཝིརཧཏོ ཝིཔྤཡུཏྟབྷཱཝེན ཨུཔཀཱརཀོ དྷམྨོ ཝིཔྤཡུཏྟཔཙྩཡོ. ཡཏྠ སམྤཡུཏྟཱ སངྐཱ སམྦྷཝཏི, ཏཏྠེཝ ཏདཱསངྐཱ ཝིགམནཏྠཾ ཨཡཾ ཝིཔྤཡུཏྟཔཙྩཡོནཱམ ཝུཏྟོཏི ཏདཱསངྑཱ རཧིཏེསུ ཨཱརམྨཎཱནནྟརཱདཱིསུ ཝིཔྤཡུཏྟཔཙྩཡཔསངྒོ ནཏྠཱིཏི ཝེདིཏབྦོ. ཧེཊྛཱཝུཏྟཔྤཀཱརེསུ ཨེཝ པཙྩཡདྷམྨེསུ ཡོ ཡོ ཨཏྠིཏཱ སངྑཱཏེན ཁཎཔཙྩུཔྤནྣ སམངྒིབྷཱཝེན ཏཱདིསསྶེཝ ཁཎཔཙྩུཔྤནྣ སམངྒིནོ དྷམྨསྶ སཧཛཱཏཱདིཝསེན ཨུཔཀཱརཀོ སོ སོ ཨཏྠིཔཙྩཡོ. ཡསྨིཾ ཝིཛྫཱམཱནེ སཏི ཨཉྙོ ཨུཔྤཛྫིཏུཾ ཨོཀཱསཾ ¶ ནལབྷཏི. སོ ཏསྶ ཨཉྙསྶ ཨོཀཱསདཱན སངྑཱཏེན སཡཾ ཨནྟརཧིཏབྷཱཝེན ཨུཔཀཱརཀོ དྷམྨོ ནཏྠིཔཙྩཡོ. ཨཡཾཔི ཝིསུཾ སཏྟིཝིསེསོ ན ཧོཏི. ཏེནེཝ ཙིཏྟེན གཙྪཏི ནིསཱིདཏི ཏིཊྛཏཱིཏིཨཱདིནཱ པཙྪིམཙིཏྟེ ཋིཏཱནཾཔི པུརིམཙིཏྟཾ ཝཏྟཏིཡེཝཱཏི ལོཀསྶ ཨབྷིམཱནོ ཧོཏི. ཏསྨཱ ཡཏྠ ཨཏྠིཏཱསངྐཱ སམྦྷཝཏི. ཏཏྠ ཏདཱསངྐཱ ནིཝཏྟནཏྠཾ ཨཡཾ པཙྩཡོ ཝུཏྟོཏི ཝེདིཏབྦོ.

ཝིནཱསཾ གཏོ ཝིགཏོ. ཡསྨིཾ ཨཝིགཏེ ཨཉྙོ ཨུཔྤཛྫིཏུཾ ཨོཀཱསཾ ནལབྷཏི, སོ ཏསྶ ཨོཀཱསདཱནསངྑཱཏེན སཡཾ ཝིགཏབྷཱཝེན ཨུཔཀཱརཀོ དྷམྨོ ཝིགཏཔཙྩཡོ. ཝཏྟམཱནཏཱ སངྑཱཏེན ཨཝིགཏབྷཱཝེན ཏཱདིསསྶེཝ དྷམྨསྶ ཨུཔཀཱརཀོ དྷམྨོ ཨཝིགཏཔཙྩཡོ. པུརིམཔཙྩཡ དུཀམེཝ ཙེཏྠ ནཱནཏྠ པསངྒནིཝཏྟནཏྠཾ ཉཱཎཝིསདཏྠཉྩ པརིཡཱཡནྟརེན ཝིགཏདུཀཾནཱམ ཀཏྭཱ དེསིཏནྟི ཝེདིཏབྦཾ. ཏཐཱ ཧི ཨཏྠཱིཏི ཁོ ཀཙྩཱན ཨཡམེཀོ ཨནྟོ. ནཏྠཱིཏི ཨཡཾ དུཏཱིཡོ ཨནྟོཏིཨཱདིནཱ ནཱནཱཨཏྠདཱིཔཀཱ ཨཏྠི ནཏྠི སདྡཱ སཱསནེ ལོཀེཙ དིསྶནྟི. པུབྦེ ཝུཏྟསྶེཝ ཙ ཨཏྠསྶ པུན པརིཡཱཡནྟརེན ཝཙནཾ སོཏཱུནཾ ཉཱཎཝིསདཏྠཱཡ ཧོཏཱིཏི. ཊཱིཀཱཀཱརཱ པན བཧུཾ ཏེསཾ པཙྩཡ དུཀཱནཾ ནཱནཏྠསམྦྷཝཾ ཝཎྞེནྟིཡེཝཱཏི. [པཙྩཡུདྡེསོ]

༡༦༨. ཨིདཱནི ཡཐཱ ཨུདྡིཊྛེ ཙཏུཝཱིསཏིཔཙྩཡེ པཐམཾ ཚཧི རཱསཱིཧི སངྒཧེཏྭཱ པུན རཱསཱིནཾ ཨནུཀྐམེན ཏེསཾ པཙྩཡཱནཾ ནིདྡེསཾ དསྶེནྟོ ཚདྷཱནཱམནྟུནཱམསྶཱཏི གཱཐཱདྭཡ མཱཧ. ནཱམཾ ནཱམསྶ ཚདྷཱ ཚབྦིདྷེཧི པཙྩཡེཧི པཙྩཡོ ཧོཏི. ནཱམཾ ནཱམརཱུཔཱིནཾ པཉྩདྷཱ. པུན ནཱམཾ རཱུཔསྶ ཨེཀདྷཱ, རཱུཔཾ ནཱམསྶ ཨེཀདྷཱཨེཝ. པཉྙཏྟིནཱམརཱུཔཱནི ནཱམསྶ དུཝིདྷཱ, དྭཡཾ ནཱམརཱུཔཾ དྭཡསྶེཝ ནཱམརཱུཔསྶ ནཝདྷཱཏི ཨེཝཾ ཚཀྐཔཉྩཀཱདིཝསེན པཙྩཡཱ ཚབྦིདྷཱ ཧོནྟི. ཀཐཾ ཧོནྟཱིཏི ཡོཛནཱ.

[༢༢༩] ཡཾཔན ཝིབྷཱཝནིཡཾ

‘‘པཉྙཏྟིནཱམརཱུཔཱནི ནཱམསྶ དྭིདྷཱ དྭིཔཀཱརཱ པཙྩཡཱ ཧོནྟཱིཏི ཝུཏྟཾ’’. ཏཾ ན སུནྡརཾ.

པཙྩཡཀཐཱ ¶ ཧི ནཱམ པཙྩཡཏོ པཙྩཡུཔྤནྣཏོ པཙྩཡསཏྟིཏོཏི ཏཱིཧི པཀཱརེཧི ཝུཏྟཱཡེཝ སུཝུཏྟཱ ཧོཏཱིཏི. ཡསྨཱ པན ཨནནྟརཱདིཔཙྩཡཱནཱམ ཙིཏྟསནྟཱནསྶ ཨཝིཙྪེདཱཡ ཀིཙྩཊྛཱནཱནུཀྐམཔཊིཔཱདནཱཡ ཨེཝ ཙ ཧོནྟི. ཏསྨཱ ཀུསལཱདཱིསུ ཨརཱུཔདྷམྨེསུ ཡོཀོཙི དྷམྨོ ཡསྶ ཀསྶཙི ཨཝིརུདྡྷསྶ དྷམྨསྶ པཙྩཡོ ན ན ཧོཏཱིཏི ཝུཏྟཾ ཨནནྟརནིརུདྡྷཱཙིཏྟཙེཏསིཀཱདྷམྨཱཏིཨཱདི. ཏཏྠ ཨཝིརུདྡྷསྶཱཏིཨེཏེན ཨཉྙམཉྙཝིརུདྡྷཱནཾ ཀུསལཱཀུསལཱནཾ སོམནསྶདོམནསྶཱནཉྩ ཨཉྙམཉྙཾ ཨནནྟར པཙྩཡཔཊིཀྑེཔོ ཝེདིཏབྦོ. པཊུཔྤནྣཱནནྟི པུནུཔྤནྣཱནཾ པཊིཔཱཊིཡཱ ཨུཔྤནྣཱནཾཝཱ. པུནཔྤུནཾ སནྟཱནཔརིབྷཱཝནཱཝསེན པཝཏྟོ ཨཱསེཝནཔཙྩཡོནཱམ, ཀེཝལཾ པཡོགསཱདྷནཱིཡེསུ ཛཝཝེག སཧིཏེསུ ཙིཏྟུཔྤཱདེསུ ཨེཝ ལབྦྷཏཱིཏི ཝུཏྟཾ པུརིམཱནི ཛཝནཱནཱིཏིཨཱདི. ཏཏྠ ཛཝནཱནཱིཏི མགྒཕལཛཝནཝཛྫཱནི ལོཀིཡ ཀུསལཱ ཀུསལཀྲིཡཛཝནཱནི པཙྪིམཱནཾཛཝནཱནནྟི ཕལཛཝནཝཛྫཱནཾ ཀུསལཱཀུསལཀྲིཡཛཝནཱནཾ. བྷིནྣཛཱཏིཀཱ ཧི དྷམྨཱ ཨཉྙམཉྙཾ སབྦཱཀཱརཔཱརིཔཱུརཾ པརིཝཱསཾནཱམ གཧེཏུཾཝཱ གཱཧཱཔེཏུཾཔཱ ན སཀྐོནྟི. ཡདི སཀྐུཎེཡྻུཾ, ཛཱཏིམཏྟེནཔི དྷམྨཱ པུབྦཱཔརཾ ཨབྷིནྣཱཨེཝ སིཡུནྟི. ཏསྨཱ བྷིནྣཛཱཏིཀཾ ཕལཛཝནཾ མགྒཏོ པརིཝཱསཾ གཧེཏུཾ ན སཀྐོཏི. མགྒོཔི ཨཏྟནོ པརིཝཱསཾ ཕལསྶ དཱཏུཾ ན སཀྐོཏི. ཕལཙིཏྟཱནིཙ པརིཀམྨཔཡོགབལེན ཛཝན ཀིཙྩཱནི ཧོནྟི, ན ཨཉྙམཉྙཾ པརིཝཱསདཱན གཧཎ བལེནཱཏི. ཡསྨཱ ཀཱམཱཝཙརབྷཱཝཏོ མཧགྒཏཱ ནུཏྟར བྷཱཝཔྤཏྟིནཱམ ཨཱསེཝནབལེན ཧོཏི, ཏསྨཱ གོཏྲབྷུ ཛྷཱན མགྒཱནཾ བྷཱུམི བྷེདོ ཨིདྷ ཨཔྤམཱཎནྟི དཊྛབྦཾ.

ཧེཏུ.ལ. ནཱམརཱུཔཱནནྟི ཨེཏྠ ཧེཏུམགྒངྒཱནི ཨཧེཏུཀཝཛྫིཏཱནཾ, ཛྷཱནངྒཱནི པཉྩཝིཉྙཱཎཝཛྫིཏཱནཾ སཧཛཱཏཱནཾ ནཱམརཱུཔཱནཾ. སཧཛཱཏརཱུཔལཀྑཎཾ པན སཡམེཝ ཝཀྑཏི. ཙེཏནཱནཱམ པཝཏྟམཱནཱ དྭེ ཀིཙྩཱནི སཱདྷེཏི སཧཛཱཏཱནཾ སཾཝིདྷཱནཉྩ ཨཱཡཏིཾ ཝིཔཱཀཔཱཏུ བྷཱཝཏྠཱཡ ཏསྨིཾ སནྟཱནེ ཨཏྟནོ པཝཏྟཱ ཀཱརསངྑཱཏ བཱིཛནིདྷཱནཉྩཱཏི. ཏཏྠ སཾཝིདྷཱནཀིཙྩཾ སབྦཙེཏནཱ སཱདྷཱརཎཾ ¶ ཧོཏི. བཱིཛནིདྷཱནཀིཙྩཾ པན ཀུསལཱཀུསལབྷཱཝཔྤཏྟཱཡཨེཝ ཙེཏནཱཡ ཧོཏཱིཏི ཝུཏྟཾ སཧཛཱཏཱཙེཏནཱཏིཨཱདི. ཏཏྠ སཧཛཱཏཱཙེཏནཱཏི ཨནྟམསོ པཉྩཝིཉྙཱཎ སཧཛཱཏཱཔི ཙེཏནཱ. སཱཔི ཧི སཧཛཱཏཱནཾ སཾཝིདཧནསངྑཱཏེན ཀམྨབྷཱཝེན པཝཏྟཏྟཱ ཀམྨཾཨེཝནཱམ ཧོཏཱིཏི. ཡསྨཱ ཨཏྟནོ པཝཏྟཱཀཱརསངྑཱཏསྶ ཝིཔཱཀབཱིཛསྶ ནིདཧནཾནཱམ, ན ཏཱཝདེཝ བཱིཛཀིཙྩཾ སམྤཱདེཏི. ཨམྦབཱིཛཱདཱིནི ཝིཡ པརིཎཏབྷཱཝཾ པཏྭཱ ཁཎནྟརེཨེཝ སམྤཱདེཏཱིཏི ཝུཏྟཾ ནཱནཱཀྑཎིཀཱ ཙེཏནཱཏིཨཱདི. ཏཏྠ ནཱནཱཀྑཎིཀཱཙེཏནཱཏི ཨཏྟནོ པཙྩཡུཔྤནྣདྷམྨ པཝཏྟིཀྑཎཏོ ཝིསུཾ བྷཱུཏེ ཨཏཱིཏཀཱལེ སིདྡྷཱ ཀུསལཱ ཀུསལཙེཏནཱ. ཀུསལཱཀུསལཙེཏནཱཏིཝཱ པཱཋོ སིཡཱ.

ཝིཔཱཀཀྑནྡྷཱཨཉྙམཉྙཾསཧཛཱཏཱནཾརཱུཔཱནནྟི ཨེཏྠ ཨཉྙམཉྙསྶཙ སཧཛཱཏརཱུཔཱནཉྩཱཏི ཨཏྠོ. ཡཐཱནཱམ པུརེ ཛཱཏཱ སཱལརུཀྑཔོཏཀཱ པཙྪཱ ཨནུཝསྶཾ ཝསྶནྟཱནཾ ཝུཊྛིདྷཱརཱནཾ ཝསེན ཝུདྡྷིཾ ཝིརུལ༹ྷིཾ ཝེཔུལླཾ པཏྭཱ ཏསྨིཾ ཋཱནེ ཡཱཝཀཔྤཱཝསཱནཱཔི མཧནྟསྶ སཱལཝནསཎྜསྶ པཝཏྟིཡཱ པཙྩཡཱ ཧོནྟི. ཨེཝཾ པཊིསནྡྷིཀྑཎཏོ པཊྛཱཡ པུརིམཙིཏྟཀྑཎེསུ ཨུཔྤནྣཱ སཀལསརཱིརེ ཀམྨཛཀཱཡོ ཙིཏྟཛཀཱཡོ ཨུཏུཛཀཱཡོ ཨཱཧཱརཛ ཀཱཡོཏི སབྦེ སཀལསརཱིརཊྛཀཱ ཙཏུསམུཊྛཱནིཀ རཱུཔདྷམྨཱ པཙྪཱཛཱཏཱནཾ པཐམབྷཝངྒཱདཱིནཾ ཙིཏྟཙེཏསིཀཱནཾ ཝསེན ཝུདྡྷིཾ ཝིརུལ༹ྷིཾ ཝེཔུལླཾ པཏྭཱ ཨུཔརུཔརི ཙཏུསམུཊྛཱནིཀ རཱུཔཔརཾཔརཱཔཝཏྟིཡཱ པཙྩཡཏྟཾ ཨུཔགཙྪནྟཱིཏི ཝུཏྟཾ པཙྪཱཛཱཏཱ ཙིཏྟཙེཏསིཀཱ དྷམྨཱཏིཨཱདི. ཏཏྠ པུརེཛཱཏསྶཱཏི ཨཱཏཱིཏཱནནྟརཙིཏྟེ ཛཱཏསྶཱཏི ཝདནྟི. ཡཱཝ ཨཊྛམཙིཏྟཱཝཱ པུརེཛཱཏསྶ. ཨེཏྟཀོ ཧི ཀཱལོ རཱུཔདྷམྨཱནཾ ཝཌྜྷནཀཱལོནཱམ. ཏཏོཔརཾ ཧཱཡནཀཱལེ པཙྪཱཛཱཏེན པཡོཛནཾ ནཏྠཱིཏི. ཡཱཝ སོལ༹སམཙིཏྟཱ ཨེཝ ཝཱ པུརེཛཱཏསྶ. ཡདགྒེན ཧི མརཎཱསནྣཀཱལེ ཝཏྠུརཱུཔཾ ཙུཏིཙིཏྟསྶ པུརེཛཱཏཔཙྩཡཏཾ ཨུཔགཙྪཏི. ཏདགྒེན ཙུཏིཙིཏྟཾཔི ཏསྶ ཝཏྠུརཱུཔསྶ པཙྪཱཛཱཏཔཙྩཡོ ན ཧོཏཱིཏི ནཝཏྟབྦོ. ཏཐཱ སེསརཱུཔཱནཉྩ. ཡཐཱ ཧི ཨུཔཏྠམྦྷནྟོ ཨཱཧཱརོ ¶ ཝཌྜྷནཔཀྑེ ཋིཏམེཝ ཨུཔཏྠམྦྷཏི. ཧཱཡནཔཀྑེ ཋིཏཾ ནུཔཏྠམྦྷཏཱིཏི ནཏྠི. ཏདཱཔི ཏདནུརཱུཔསྶ ཨུཔཏྠམྦྷནསྶ ཨིཙྪིཏབྦཏྟཱ. ཨེཝམཡཾཔཱིཏི.

ཨརཱུཔདྷམྨཱནཾ ཨཱནུབྷཱཝོནཱམ མཧཱཝིཔྥཱརོ ཧོཏི. ཏསྨཱ ཏེ ཀཱཡེཀདེསེ ཝཏྠུམྷི ཨུཔྤནྣཱཔི སཀལཾ ཨིམཾ ཙཏུཛཀཱཡཾ ཨུཔཏྠམྦྷེཏུཾ སཀྐོནྟིཡེཝཱཏི ཝུཏྟཾ ཨིམསྶཀཱཡསྶཱཏི. ཙཀྑཱདཱིནི པསཱདཝཏྠཱུནི རཱུཔཱདཱིཧི སཧལདྡྷགྷཊྚནཱནིཨེཝ ཝིཉྙཱཎསྶ ཨཱདྷཱརབྷཱཝཾ གཙྪནྟི. གྷཊྚནཉྩ ཋིཏིཔཏྟཀཱལེཨེཝཱཏི ཏེསཾ ནིཙྩཀཱལཾཔི ཨཏྟནོ ཝིཉྙཱཎསྶ པུརེཛཱཏཔཙྩཡཏཱ སིདྡྷི ཧོཏི. ཝིཉྙཱཎཉྩནཱམ པཉྩཝོཀཱརབྷཝེ ཝཏྠུནིསྶཡེན ཝིནཱ ཨུཔྤཛྫིཏུཾ ནསཀྐོཏཱིཏི, ཡདཱ པུརེཛཱཏཾཝཱ ཝཌྜྷནཔཀྑེ ཋིཏཾཝཱ ཝཏྠུཾ ན ལབྷཏི, ཏདཱ པཊིསནྡྷིཀཱལེཝཱ མརཎཱསནྣཀཱལེཝཱ ཡཾ ཡཾ ལབྷཏི, ཏཾ ཏཾ ནིསྶཱཡ ཨུཔྤཛྫཏིཡེཝ. ཡདཱ པན པུརེ ཛཱཏཾ སུཊྛུ བལཝནྟཉྩ ཝཏྠུཾ ལབྷཏི, ཏདཱ ཏདེཝ ནིསྶཱཡ པཝཏྟཏི. ཏཉྩ ནིཡམཏོ པཝཏྟིཀཱལེཨེཝ ལབྦྷཏི, ནོ པཊིསནྡྷིཀཱལེ. ནཧི ཏདཱ ཝིཉྙཱཎཔཙྩཡེན ཨུཔྤནྣཾ ཝཏྠུཔུརེཛཱཏཾ བྷཝིཏུཾ སཀྐོཏཱིཏི ཝུཏྟཾ ཚཝཏྠཱུནི པཝཏྟིཡནྟི.

པཉྩཱལམྦཎཱནིཙ པཉྩཝིཉྙཱཎཝཱིཐིཡཱཏི ཨིདཾ ནིཡམསིདྡྷིགཧཎ ཝསེན ཝུཏྟཾ. སབྦཱནི པན པཙྩུཔྤནྣབྷཱུཏཱནི ནིཔྥནྣརཱུཔཱནི མནོཝིཉྙཱཎ ཝཱིཐིཡཱ པུརེཛཱཏཔཙྩཡཱ ཧོནྟིཡེཝ. ཨེཝཉྩ ཀཏྭཱ པཊྛཱནེ པཙྩུཔྤནྣོ དྷམྨོ པཙྩུཔྤནྣསྶ དྷམྨསྶ པུརེཛཱཏཔཙྩཡེན པཙྩཡོ. ཨཱརམྨཎཔུརེཛཱཏཾ ཙཀྑུཾ ཨནིཙྩཏོ དུཀྑཏོ ཨནཏྟཏོ ཝིཔསྶཏི. སོཏཾ, གྷཱནཾ, ཛིཝ྄ཧཾ, ཀཱཡཾ, རཱུཔེ, སདྡེ, གནྡྷེ, རསེ, ཕོཊྛབྦེ, ཝཏྠུཾ, པཙྩུཔྤནྣེ ཁནྡྷེ ཨནིཙྩཏོ དུཀྑཏོ ཨནཏྟཏོ ཝིཔསྶཏི, པཙྩུཔྤནྣཾ ཙཀྑུཾ ཨསྶཱདེཏི ཨབྷིནནྡཏཱིཏིཨཱདི ཝུཏྟཾ. ཨཊྛཀཐཱཡཉྩ ཨུཔྤཱདཀྑཎཾ ཨཏིཀྐམིཏྭཱ ཋིཏིཔཏྟཾ ཨཊྛཱརསཝིདྷཾ རཱུཔམེཝ པུརེཛཱཏཔཙྩཡོཏི ཝུཏྟནྟི. ཨེཏྠཙ ཀིཉྩཱཔི པཊྛཱནེ པཙྩུཔྤནྣཱརམྨཎཾ པཊིསནྡྷིཙིཏྟཾ པཙྩུཔྤནྣཱརམྨཎསྶ བྷཝངྒསྶཨནནྟརཔཙྩཡེན པཙྩཡོཏི ཨེཝཾ པཊིསནྡྷིབྷཝངྒཱནཾཔི པཙྩུཔྤནྣཱརམྨཎཏཱཡ ཝུཏྟཏྟཱ ¶ པཙྩུཔྤནྣབྷཱུཏཱནི ཀམྨནིམིཏྟ གཏིནིམིཏྟཱནི ཨཱརབྦྷ པཝཏྟི ཀཱལེ པཊིསནྡྷིཙིཏྟཱནཾཔི ཨཱརམྨཎཔུརེཛཱཏཾ ལབྦྷམཱནཾ ཝིཡ དིསྶཏི. ཨེཝཾསནྟེཔི པུརེཛཱཏཔཙྩཡསྶ པཙྩནིཡེ པཊིསནྡྷིཀྑཎེ ཝིཔཱཀཱ བྱཱཀཏོ ཨེཀོ ཁནྡྷོཏིཨཱདིནཱ པཱལི༹ཡཾཨེཝ ཏཾ པཊིཀྑིཏྟནྟི. ཨེཏྠཙ ཨཱརུཔྤེ ཝིཡ པཊིསནྡྷིཀྑཎེཔི ཝཏྠུཔུརེ ཛཱཏསྶ ཨབྷཱཝཱ ཨཔརིབྱཏྟཏྟཱཝཱ ཏསྶ ཨཱརམྨཎསྶ ཨཱརམྨཎམཏྟབྷཱཝེཨེཝ ཋིཏཏྟཱ པཊིཀྑིཏྟནྟི ཀཱརཎཾ ཝདནྟི. ཨཱརམྨཎམེཝགརུཀཏནྟི པཙྩཝེཀྑནཝསེན ཨསྶཱདནཱདིཝསེནཙ གརུཀཏཾ ཨིཊྛཱརམྨཎ མཱཧ. ཏཉྩ ཁོ ཏསྶཏསྶ པུགྒལསྶ ཨིཙྪཱཝསེན ཝེདིཏབྦཾ. གཱུཐཀུཎཔཱདཱིནིཔི ཧི ཏདབྷིནནྡནྟཱནཾ ཀིམིམཀྑིཀ སུནཁ གིཛ྄ཛྷ ཀཱཀཱདཱིནཾ གརུཀཏཱནིཨེཝ ཨཱརམྨཎཱནི ཧོནྟཱིཏི.

[༢༣༠] ཡཾ པན ཝིབྷཱཝནིཡཾ

‘‘གརུཀཏནྟི གརུཾ ཀཏྭཱ པཙྩཝེཀྑིཏ’’ནྟིཨཱདི ཝུཏྟཾ. ཏཾ ཨནུཔཔནྣཾ.

ཙཀྑུཾ གརུཾ ཀཏྭཱ ཨསྶཱདེཏི ཨབྷིནནྡཏཱིཏིཨཱདིནཱ ཨསྶཱ དནཱདིཝསེནཔི ཨསྶ ནིདྡེསསྶ པཝཏྟཏྟཱཏི. རཱགཱདཡོ པན དྷམྨཱཏི ཨེཏེན རཱགོ དོསོ མོཧོ མཱནོ དིཊྛི པཏྠནཱཏི ཨེཝཾ ཝུཏྟེཧི དྷམྨེཧི སཧ དས ཨཀུསལཀམྨཔཐཱ པཉྩཨནནྟརིཡ ཀམྨཱནིཙ གཧིཏཱནི ཧོནྟི. ཏཏྠ ཨནནྟརིཡཝཛྫཱནི ཏཱནི སམཏིཀྐམམུཁེན ཡཐཱརཧཾ ཨཛ྄ཛྷཏྟཾ སབྦེསཾ ཙཏུབྷཱུམཀ ཀུསལཱནཾ ཨནནྟརིཡཀམྨཱནི པན ཀཱམཱཝཙརཀུསལཱནམེཝ ཨུཔྤཏྟིཡཱ བལཝནིསྶཡཱ ཧོནྟི. ཏཱནིཡེཝཙ སབྦཱནི ཡཐཱརཧཾ ཨཛ྄ཛྷཏྟཉྩ བཧིདྡྷཱཙ རཱགཱདཱིནཾ པཱཎཱཏིཔཱཏཱདཱིནཉྩ སབྦེསཾ ཨཀུསལཱནཾ ཀཱཡིཀསུཁདུཀྑཱདཱིནཉྩ ཨབྱཱཀཏདྷམྨཱནཾ ཨུཔྤཏྟིཡཱ བལཝ ནིསྶཡཱ ཧོནྟི. སདྡྷཱདཡོཏི ཨེཏེན སདྡྷཱ སཱིལཾ སུཏཾ ཙཱགོ པཉྙཱཏི ཨེཝཾ ཝུཏྟེཧི དྷམྨེཧི སཧ སབྦེ དཱནསཱིལཱདཡོ ཙཏུབྷཱུམཀཀུ སལཱནཾ རཱགཱདི ཨཀུསལཱནཾ སུཁདུཀྑཱདིཙཏུབྷཱུམཀ ཨབྱཱཀཏཱ ནཉྩ ཨུཔྤཏྟིཡཱ བལཝནིསྶཡཱ ཧོནྟཱིཏི. སུཁཾ དུཀྑཾ པུགྒལོ བྷོཛནཾ ཨུཏུསེནཱསནནྟི ཨེཏེན ནིབྦཱནཝཛྫཱ སབྦེ ཙཏུབྷཱུམཀཱ བྱཱཀཏཱ ¶ གཧིཏཱ, ཏེཔི ཧི ཡཐཱརཧཾ ཨཛ྄ཛྷཏྟཉྩ བཧིདྡྷཱཙ ཀུསལཱཀུསལཱ བྱཱཀཏདྷམྨཱནཾ ཨུཔྤཏྟིཡཱ བལཝནིསྶཡཱ ཧོནྟཱིཏི. ཀམྨཾཝིཔཱཀཱནནྟི ཨེཏྠ སུཊྛུ བལཝཾ ཀམྨཾ ཨདྷིཔྤེཏཾ, ན དུབྦལནྟི. ཀསྨཱ པནེཏྠ རཱུཔདྷམྨཱ པཙྩཡུཔྤནྣེསུ ན གཧིཏཱ. ནནུ ཏེསཾཔི བཧིདྡྷཱ རུཀྑཏིཎཱདཱིནཾ ཝུདྡྷིཝིརུལ༹ྷི ཝེཔུལླཏྠཱཡ ཨཛ྄ཛྷཏྟཉྩ ཨཱརོགྱཱདིཨཏྠཱཡ པཐཝིརས ཨཱཔོརས ཝསྶོདཀ བིཛམཱུལབྷེསཛྫཱདཡོ བལཝནིསྶཡཱ ཧོནྟཱིཏི. ཨཡཾ པནཏྠོ མཱུལཊཱིཀཱཡཾ ཀཐིཏོཡེཝ. ཝུཏྟཉྷི ཏཏྠ –

ནཧི རཱུཔཱབྱཱཀཏཾ པཀཏཱུཔནིསྶཡཾ ལབྷཏི. ཨཙེཏནེན རཱུཔསནྟཱནེན པཀཏསྶེཝ ཨབྷཱཝཏོ. ཡཐཱ ཧི ཨརཱུཔསནྟཱནེན ཀཏྟུབྷཱུཏེན སདྡྷཱདཡོ ནིཔྥཱདིཏཱ ཨུཏུབྷོཛནཱདཡོཙ ཨུཔསེཝིཏཱ. ན ཨེཝཾ རཱུཔསནྟཱནེན. ཡསྨིཉྩ ཨུཏུབཱིཛཱདིཀེ ཀམྨཱདིཀེཙ སཏི རཱུཔཾ པཝཏྟཏི. ན ཏཾ ཏེན རཱུཔེན པཀཏཾ ཧོཏི. སཙེཏནསྶེཝ ཧི ཨུཔྤཱདནུཔསེཝནཔཡོགཝསེན ཙེཏནཾ པཀཔྤནཾ པཀརཎཾ. རཱུཔཉྩ ཨཙེཏནནྟི.

ཨིདཾ ཝུཏྟཾ ཧོཏི, དུཝིདྷཾ སནྟཱནཾ རཱུཔསནྟཱནཾ ཨརཱུཔསནྟཱནནྟི. ཏཏྠ ཡེན སནྟཱནེན པུབྦེ ཀིཉྩི སུཊྛུཨུཔྤཱདིཏཾཝཱ ཧོཏི ཨུཔསེཝིཏཾཝཱ, ཏསྶེཝ པུབྦེ ཨཏྟནཱ ཨུཔྤཱདིཏུཔསེཝིཏཱ དྷམྨཱ ཀཱལནྟརེ ཨཏྟནོ ཨུཔནིསྶཡཔཙྩཡཱ ཧོནྟི. པཀརཎསངྑཱཏཉྩ ཏཐཱ ཨུཔྤཱདནུཔསེཝནཾནཱམ སཙེཏནེ ཨརཱུཔསནྟཱནེཨེཝ ལབྦྷཏི, ན ཨཙེཏནེ རཱུཔསནྟཱནེཏི. ཏསྨཱ རཱུཔདྷམྨཱ ཨུཔནིསྶཡཾནཱམ ནལབྦྷནྟཱིཏི. ཨིམསྨིཾ སཏི ཨིདཾ ཧོཏི, ཨསཏི ན ཧོཏཱིཏི ཨེཝཾ ཝུཏྟེན སུཏྟནྟིཀཔརིཡཱཡེན པན ཨུཔནིསྶཡོ ནཱམ རཱུཔདྷམྨཱནཾ མཛ྄ཛྷེཔི ཝཏྟབྦོཡེཝཱཏི.

[༢༣༡] ཝིབྷཱཝནིཡཾ པན

‘‘ཡཐཱརཧཾ ཨཛ྄ཛྷཏྟཉྩ བཧིདྡྷཱཙ རཱགཱདཡོ.ལ. སེནཱསནཉྩཱཏི’’ ཝིཡོཛེཏྭཱ ‘‘རཱགཱདཡོ ཧི ཨཛ྄ཛྷཏྟཾ ནིཔྥཱདིཀཱ. པུགྒལཱདཡོ བཧིདྡྷཱ སེཝིཏཱཏི’’ ཝུཏྟཾ. ཏཾ ནསུནྡརཾ.

ན ¶ ཧི ཨཏྟནོ པརསྶཙ ཨུཔྤནྣཱ རཱགཱདཡོ པརསྶ ཨཏྟནོ ཙ སནྟཱནེ རཱགཱདཱིནཾ བལཝནིསྶཡཱ ན ཧོནྟི. སམཱནཙྪནྡཱནཾ ཨིཏྠི པུརིསཱདཱིནཾ མནོཔདོསིཀ དེཝཱདཱིནཉྩེཏྠ རཱགཱདཡོ ནིདསྶནཾ.

[༢༣༢] ཡཱཙ ཏཏྠ

‘‘ཡཐཱཋིཏཝསེན ཡོཛནཾ’’ ཀཏྭཱ ‘‘ཨཏྟནོཧི རཱགཱདཡོ’’ཏིཨཱདིནཱ ཨཏྠཝིབྷཱཝནཱ ཀཏཱ. སཱཔི ཨནུཔཔནྣཱཡེཝ.

ཏཱཡ ཧི ཨཏྟནོ རཱགཱདཡོ སདྡྷཱདཡོཙ ཨཛ྄ཛྷཏྟཾ ཀུསལཱདཱིནཾ ཨཏྟནོ སདྡྷཱཡོ པན བཧིདྡྷཱ ཀུསལསྶཱཏི ཨེཝཾ ཨཔརིཔུཎྞསྶ ཨཏྠསྶ ཝིབྷཱཝིཏཏྟཱཏི.

[༢༣༣] ཡཉྩ

‘ཏཏྠཱ’ཏིཨཱདིནཱ ཨཏྟནོརཱགཱདཡོནིསྶཱཡཨཛ྄ཛྷཏྟཾ ཀུསལཱཀུསལཱནམེཝ ཨུཔྤཏྟིཝིདྷཱནཾ ཝུཏྟཾ. ཏཾཔི ཨནུཔཔནྣམེཝ.

ནཡདསྶནམཏྟབྷཱུཏཾཔི ཧི སཾཝཎྞནཱཝཱཀྱཾནཱམ ནཡམུཁཾ པརིཔུཎྞཾ ཀཏྭཱ ཝཏྟབྦཾ ཧོཏཱིཏི. གརུཀཏཾཨཱརམྨཎནྟི ཨེཏྠ སབྦཾ ལོཀིཡཀུསལཾ ཧེཊྛིམམགྒཕལནིབྦཱནཱནི ཙ ཀཱམཱཝཙར ཀུསལསྶ ཨརཧཏྟམགྒཕལནིབྦཱནཱནི ཙཏུནྣཾ ཉཱཎསམྤཡུཏྟ མཧཱཀྲིཡཛཝནཱནཾ. ནིབྦཱནཾ ཨཊྛཝིདྷལོཀུཏྟརསྶ ཐཔེཏྭཱ པཊིགྷདྭཡ མོམཱུཧ དྭཡ དུཀྑསཧགཏ ཀཱཡཝིཉྙཱཎཱནི ཨཝསེསཾ སབྦཾ ལོཀིཡ ཀུསལཱཀུསལཱབྱཱཀཏདྷམྨཛཱཏཾ ལོབྷསཧགཏཙིཏྟསྶཱཏི ཨེཝཾ པཙྩཡ པཙྩཡུཔྤནྣ ཝིབྷཱགོ ཝེདིཏབྦོ.

[༢༣༤] ཡཾ པན ཝིབྷཱཝནིཡཾ

‘‘གརུཀ ཏཾཨཱལམྦཎནྟི པཙྩཝེཀྑནཨསྶཱདཱདིནཱ གརུཀཏཾ ཨཱརམྨཎ’’ནྟི ཝཏྭཱ ཏཾ ཝིབྷཱཝེནྟེན ‘‘ཏཉྷི ཛྷཱནམགྒ ཕལཝིཔསྶནཱ ནིབྦཱནཱདིབྷེདཾ པཙྩཝེཀྑན ཨསྶཱདཱདིམགྒཕལཱདིདྷམྨེ ཨཏྟཱདྷཱིནེ ཀརོཏཱིཏི ཨཱརམྨཎཱདྷིཔཏིནཱམཱ’’ཏི ཝུཏྟཾ. ཏཾ ན སུནྡརཾ.

དཱན ¶ སཱིལ ཨུཔོསཐཀམྨ པུབྦེ སུཙིཎྞགོཏྲབྷུ ཝོདཱན མགྒཕལ ནིབྦཱནཱནིཙེཝ རཱགདིཊྛིཙཀྑུསོཏཱདཱིནིཙཱཏི པན ཝཏྟབྦཾ. ཝིཔསྶནཱཏིཙ ཨིདཾ གོཏྲབྷུཝོདཱནཱནིཡེཝ སནྡྷཱཡ ཝུཏྟཾ སིཡཱ. ནཙ ཏཱནི ནིབྦཱནཱརམྨཎཱནི ཝིཔསྶནཱནཱམ ཧོནྟཱིཏི. སཧཛཱཏཱནཾནཱམརཱུཔཱནནྟི དྭིཧེཏུཀ ཏིཧེཏུཀ ཛཝནསཧ ཛཱཏཱནནྟི ཨདྷིཔྤཱཡོ. ཨཉྙམཉྙཾ སཧཛཱཏ རཱུཔཱནཉྩཱཏི ཨཉྙམཉྙསྶཙ པཊིསནྡྷིཀྑཎེ ཀམྨསམུཊྛཱནརཱུཔཱནཾ པཝཏྟིཡཾ ཙིཏྟ སམུཊྛཱནརཱུཔཱནཉྩ. ཨེས ནཡོ པརཏྠཔི. པཉྩཝོཀཱརབྷཝེ པཊིསནྡྷིཀྑཎེ ཝིཉྙཱཎཾ ཝཏྠུནཱ ཝིནཱ པཏིཊྛཾ ནལབྷཏི. ཝཏྠུཙཏེན ཝིནཱ པཏིཊྛཾ ནལབྷཏཱིཏི ཝུཏྟཾ པཊིསནྡྷིཀྑཎེ ཝཏྠུཝིཔཱཀཱ ཨཉྙམཉྙནྟི. ཨཉྙམཉྙཔཙྩཡེ ཡོ ཨཏྟནོ ཨུཔཏྠམྦྷཀཾ པཙྩུཔཏྠམྦྷཏི. སོཨེཝ པཙྩཡུཔྤནྣབྷཱཝཾ གཙྪཏི. ཙིཏྟསམུཊྛཱན རཱུཔཱནིཙ ཙིཏྟཾ ཀིཉྩི ཨུཔཏྠམྦྷེཏུཾ ནསཀྐོནྟི. ཏཐཱ ཨུཔཱདཱརཱུཔཱནིཙ མཧཱབྷཱུཏེཏི ཝུཏྟཾ ཙིཏྟཙེཏསིཀཱདྷམྨཱཨཉྙམཉྙནྟིཨཱདི.

[༢༣༥] ཝིབྷཱཝནིཡཾ པན

‘‘ཡསྨཱ པན ཨཉྙམཉྙུཝཏྠམྦྷནཝསེནེཝ ཨཉྙམཉྙཔཙྩཡཏཱ. ན སཧཛཱཏམཏྟཏོཏི པཝཏྟིཡཾ རཱུཔཾ ནཱམཱནཾ ཨཉྙམཉྙཔཙྩཡོ ན ཧོཏི. ཏསྨཱ ཝུཏྟཾ ཙིཏྟཙེཏསིཀཱ དྷམྨཱ ཨཉྙམཉྙནྟི’’ ཝུཏྟཾ. ཏཏྠ ན སཧཛཱཏམཏྟཏོཏི ཨེཏེན ཡདི སཧཛཱཏམཏྟཏོ ཨཉྙམཉྙཔཙྩཡཏཱསིཡཱ. ཨེཝཾསཏི པཝཏྟིཡཾ རཱུཔཾ ནཱམཱནཾ ཨཉྙམཉྙཔཙྩཡོ སིཡཱཏི ཨནུཉྙཱཏཾ ཧོཏི. སཧཛཱཏཔཙྩཡེཔི པན པཝཏྟིཡཾ རཱུཔཾ ནཱམཱནཾ པཙྩཡོ ནཧོཏིཡེཝ. ཏསྨཱ ན སུནྡརམེཏནྟི.

ཚཝཏྠཱུནི སཏྟནྣཾ ཝིཉྙཱཎདྷཱཏཱུནནྟི ཨེཏྠ ཝཏྠུསཧཛཱཏ ནིསྶཡོ ཝཏྠུཔུརེཛཱཏནིསྶཡོ ཝཏྠཱརམྨཎཔུརེཛཱཏནིསྶཡོཏི ཏིཝིདྷོ ཝཏྠུནིསྶཡོ. ཏཏྠ པཊིསནྡྷིཀྑཎེ ཝཏྠུ ཝིཔཱཀཱནཾ ཁནྡྷཱནཾ ཝཏྠུསཧཛཱཏནིསྶཡོ. ཡཾ པན པཝཏྟིཡཾ པུརེཛཱཏཾ, ཝཏྠུཾ ནིསྶཱཡ ཙིཏྟཾ ཨུཔྤཛྫཏི, ཏཾ ཏསྶ ཙིཏྟསྶ ཝཏྠུཔུརེཛཱཏནིསྶཡོནཱམ. ཡཾ པན པུརེཛཱཏཾ ཝཏྠུ ཡསྶ ཙིཏྟསྶ ¶ ནིསྶཡོཙེཝ ཧོཏི ཨཱརམྨཎཉྩ, ཏཾ ཏསྶ ཝཏྠཱརམྨཎ པུརེཛཱཏནིསྶཡོནཱམ. ཝུཏྟཉྷེཏཾ པཊྛཱནེ ཨཱརམྨཎ ནིསྶཡ པུརེཛཱཏཝིཔྤཡུཏྟ ཨཏྠིཨཝིགཏནྟི ཏཱིཎཱིཏི. ཀཐཉྩ ཏཾ ཙིཏྟསྶ ནིསྶཡོཙ ཨཱརམྨཎཉྩ ཧོཏཱིཏི. པཙྩུཔྤནྣཾ ཝཏྠུཾ ཨཱརབྦྷ སམྨསནཝསེནཝཱ ཨསྶཱདནཱདིཝསེནཝཱ ཨིདྡྷིཝིདྷཀིཙྩཱདྷིཊྛཱནཝསེནཝཱ ཙིཏྟཾ ཨུཔྤཛྫཏི, ཨེཝཾ ཏཾ ཙིཏྟསྶ ནིསྶཡོཙ ཨཱརམྨཎཉྩ ཧོཏཱིཏི. ཝུཏྟཉྷེཏཾ པཊྛཱནེ-ཨཛ྄ཛྷཏྟཾ ཝཏྠུཾ ཨནིཙྩཏོ དུཀྑཏོ ཝིཔསྶཏི, ཨསྶཱདེཏི. ཨབྷིནནྡཏི. ཏཾ ཨཱརབྦྷ རཱགོ ཨུཔྤཛྫཏི, དིཊྛི ཨུཔྤཛྫཏི, ཝིཙིཀིཙྪཱ ཨུཔྤཛྫཏི, ཨུདྡྷཙྩཾ ཨུཔྤཛྫཏི. དོམནསྶཾ ཨུཔྤཛྫཏཱིཏི.

ཨེཏྠ པན ཨཱཙརིཡཱ ཨིམཾ ཝཏྠཱརམྨཎཔུརེཛཱཏནིསྶཡཾནཱམ མརཎཱསནྣཀཱལེཨེཝ ཝཱཙནཱམགྒཾ ཨཱརོཔཡིཾསུ. ཨཡཾཔནེཏྠ ཏེསཾ ཨདྷིཔྤཱཡོ. ཨཊྛཀཐཱཡཾ ཏཱཝ ཨནིཊྛེ ཋཱནེ ཨཱཝཛྫནེན ཝིནཱ ཝཱིཐིཙིཏྟཱནཾ པཝཏྟི པཊིསིདྡྷཱ ཧོཏི. ཏཐཱ ཨེཀཱཝཛྫནཝཱིཐི ཡཉྩ ཙིཏྟཱནཾ ཨཱརམྨཎཾནཱམ དྷམྨཏོཙ ཀཱལཏོཙ ཨབྷིནྣམེཝ ཨིཙྪནྟི ཨཊྛཀཐཱཙརིཡཱ. པཀཏིཀཱལེཙ ཙིཏྟཱནིནཱམ པཙྩེཀ ཝཏྠུནིསྶཡཱནི ཧོནྟི. ཏསྨཱ ཡདཱ པཙྩུཔྤནྣཾ ཨཛ྄ཛྷཏྟཾ ཝཏྠུཾ ཨཱརབྦྷཨནིཙྩཱདིཝསེན སམྨསནྟི, ཨེཏཾ མམཱཏིཝཱ ཨསྶཱདེནྟི, ཏདཱཡཾ ཝཏྠུ ཨཱཝཛྫིཏཾ ཧོཏི. ཛཝནཱནིཔི ཏདེཝ གཎྷནྟི. ན ཨཏྟནོ ཨཏྟནོ ནིསྶཡཝཏྠཱུནི. ཡདི ཧི ཏཱནིཝཱ ཨཉྙཾཝཱ ཨཱརམྨཎཾ གཎྷེཡྻུཾ. ནིརཱཝཛྫནཱནིནཱམ ཛཝནཱནི ཧོནྟི. ཀསྨཱ, ཨཱཝཛྫནེན ཨཱཝཛྫིཏཾ ཨགཧེཏྭཱ ཨཉྙཾ གཧེཏྭཱ པཝཏྟནཏོཏི. བྷིནྣཱ རམྨཎཱནིཙནཱམ ཧོནྟི. པཙྪཱ ཨུཔྤནྣཱནི པཙྩེཀཝཏྠཱུནིཝཱ ཨཉྙཾཝཱ གཧེཏྭཱ པཝཏྟནཏོཏི. ནཙ ཏཐཱ སཀྐཱ བྷཝིཏུཾ ཨཊྛཀཐཱ ཝིརོདྷཏོ. ཏསྨཱ སོ ཝཏྠཱརམྨཎ པུརེཛཱཏཔཙྩཡོ པཀཏི ཀཱལེ ན སཀྐཱ ལདྡྷུནྟི. མརཎཱསནྣཀཱལེ པན སབྦཱནི ཨཱཝཛྫནཱདཱིནི ཙིཏྟཱནི ཨེཀམེཝ ཝཏྠུཾ ནིསྶཱཡ པཝཏྟནྟཱིཏི ཏཾ ཨཱརབྦྷ པཝཏྟཱནཾ ཨཱཝཛྫནཱདཱིནཾ ཏེསཾ ཏདེཝ ཝཏྠུཙ ཨཱརམྨཎཉྩ ཧོཏི. ཨེཝཉྷི སཏི ཏེསཾ ནིརཱཝཛྫནཏཱཝཱ བྷིནྣཱརམྨཎཏཱཝཱ ནཏྠཱིཏི ཨཡཾ ཏེསཾ ཨདྷིཔྤཱཡོཏི.

ཏཏྠ ¶ པན ཡདི ཨཱཝཛྫནེན ཨཱཝཛྫིཏཾ ཝཏྠུཾ ཨགཧེཏྭཱ ཨཏྟནོ ཨཏྟནོ ནིསྶཡཝཏྠཱུནི གཎྷེཡྻུཾ. ནིརཱཝཛྫནཱནིནཱམ ཛཝནཱནི བྷཝེཡྻུནྟི ཨིདཾ ཏཱཝ ན ཡུཛྫཏི. ཨཱཝཛྫནེན ཨཱཝཛྫི ཏཔྤཀཱརསྶེཝ གཧཎཏོ. ཡཐཱ ཧི ཨཱཝཛྫནཾཔི ཝཏྠུནྟྭེཝ ཨཱཝཛྫཏི. ཏཐཱ ཛཝནཱནིཙ ཝཏྠུནྟྭེཝ ཛཝནྟི. ནོ ཨཉྙཐཱཏི ནཏྠི ཛཝནཱནཾ ནིརཱཝཛྫནཏཱཏི. ཡཐཱ ཙ ནིརཱཝཛྫནཏཱ ནཏྠི, ཏཐཱ བྷིནྣཱརམྨཎཏཱཔི ཏེསཾ ནཏྠིཡེཝ. ཀསྨཱ, ཝིབྷཱགསྶ ཨསམྦྷཝཏོ. ནཧི སནྟཏིགྷནཝསེན ཨེཀཱིབྷཱུཏམིཝ པུབྦཱཔརཾ པཝཏྟ མཱནེསུ བཧཱུསུ ཝཏྠུསུ ཨེཀམེཀཾ ཝཏྠུཾ ཨིདམེཝཱཏི ཝིསུཾ ཀཏྭཱ ཨཱཝཛྫནཾཝཱཛཝནཱནིཝཱ གཧེཏུཾ སཀྐོནྟི. ནཙ ཏཐཱ ཨསཀྐུཎེཡྻེསུ ཋཱནེསུ ཨེཀནྟེན དྷམྨཏོཝཱ ཀཱལཏོཝཱ བྷིནྣཱ རམྨཎཏཱནཱམ སཀྐཱ ལདྡྷུནྟི ཨིཏི བྷིནྣཱརམྨཎཏཱཔི ཏེསཾ ནཏྠི ཡེཝཱཏི. ཨེཏྟཱཝཏཱ ཨིམསྶ ཝཏྠཱརམྨཎཔུརེཛཱཏནིསྶཡ ཝིདྷཱནསྶ པཀཏིཀཱལེཔི ལབྦྷམཱནཏཱ སཱདྷིཏཱ ཧོཏཱིཏི.

ཨཔིཙ, སབྦཾ པཙྩུཔྤནྣཾ ཨཏྟནོ རཱུཔཀཱཡཾ ཨཱརབྦྷ རཱུཔཾ མེ ཨནིཙྩནྟིཝཱ ཨེཏཾ མམཱཏིཝཱ སམནུཔསྶནྟཱནཾ ཨཛ྄ཛྷཏྟརཱུཔེསུ ཨིདཾ ནཱམརཱུཔཾ ཏསྶཙིཏྟསྶ ཨཱརམྨཎཾ ནཧོཏཱིཏི ནཝཏྟབྦཾ. ཨཱརམྨཎ བྷཱུཏེསུ པན ཏེསུ ཀིཉྩི ཨཱརམྨཎམཏྟཾ ཀིཉྩི ཨཱརམྨཎཔུརེཛཱཏཾ ཀིཉྩི ཝཏྠཱརམྨཎཔུརེཛཱཏཾ ཧོཏཱིཏི སཀྐཱ ཝཏྟུནྟི. ཀབལཱི༹ ཀཱརོ ཨཱཧཱརོཏི ཀཱམཱཝཙརསཏྟཱནཾ པཊིསནྡྷིཏོ པཊྛཱཡ ཨུཔྤནྣོ ཙཏུསམུཊྛཱནིཀ རཱུཔཱཧཱརོཙེཝ བཧིདྡྷཱཧཱརོཙ. གབྦྷསེཡྻཀཱནཉྷི ཡཱཝ མཱཏུཡཱ ཨཱཧཱརཕརཎཾ ནལབྦྷཏི, ཏཱཝ ཀལལཱདིཀཱལེསུ ཏིསམུཊྛཱནིཀོ ཨཛ྄ཛྷཏྟཱཧཱརོཡེཝ ཨུཔཏྠམྦྷནཀིཙྩཾ སཱདྷེཏི. ཝུཏྟཉྷེཏཾ པཊྛཱནེ-པཊིསནྡྷིཀྑཎེ ཀབལཱི༹ཀཱརོ ཨཱཧཱརོ ཨིམསྶ ཀཱཡསྶ ཨཱཧཱརཔཙྩཡེན པཙྩཡོཏི, ཨོཛཊྛམཀརཱུཔསམུཊྛཱཔནཾ པནསྶ བཧིདྡྷཱཧཱརུཔཏྠམྦྷནཾ ལདྡྷཀཱལེཡེཝཱཏི དཊྛབྦཾ. ཡདིཨེཝཾ –

ཡཉྩསྶ བྷུཉྫཏི མཱཏཱ, ཨནྣཾ པཱནཉྩ བྷོཛནཾ. ཏེན སོ ཏཏྠ ཡཱཔེཏི, མཱཏུཀུཙྪིགཏོ ཏིརོཏི

ཀསྨཱ ¶ ཝུཏྟནྟི. པཱཀཊཱཧཱརེན ཏསྶ ཡཀྑསྶ བོདྷནཏྠནྟི. ཨིམསྶཀཱཡསྶཱཏི གབྦྷསེཡྻཀཱནཾ ཏཱཝ པཊིསནྡྷིཙིཏྟསྶ ཨུཔྤཱདཀྑཎེ ཨེཀསམུཊྛཱནིཀསྶ ཋིཏིབྷངྒཀྑཎེསུ དྭིསམུཊྛཱནི ཀསྶ ཏཏོཔརཾ ཏིསམུཊྛཱནིཀསྶ ཨོཛཱཕརཎཀཱལེ ཙཏུསམུཊྛཱནིཀསྶཙ ཀཱཡསྶ. ཨིཏརེསཾཔི ཡཐཱསམྦྷཝཾ ཝཏྟབྦཾ. རཱུཔལོཀེ པན ཝིནཱཔི དུཝིདྷེན ཨོཛཱཧཱརཀིཙྩེན ཨཔྤནཱཔཏྟ ཀམྨཝིསེསེན སིདྡྷསྶ སུཙིརཾཔི ཨདྡྷཱནཾ ཕརིཏུཾ སམཏྠསྶ རཱུཔ ཛཱིཝིཏིནྡྲིཡསྶ ཏཐཱརཱུཔཱནཉྩ བྷཝངྒཔརིཡཱཔནྣཱནཾ ཨརཱུཔཱཧཱརཱནཾ ཝསེན ཨནེཀཀཔྤཱནིཔི ཨཏྟབྷཱཝསྶ པཝཏྟི ཝེདིཏབྦཱ. ཨེཏེནུཔཱཡེན ཀམྨཛཀཱཡབཧུཏརེསུ དེཝེསུ པེཏནིརཡེསུཙ སུཙིརཾཔི ཀཱལཾ བཧིདྡྷཱཧཱརེན ཝིནཱ ཨཏྟབྷཱཝསྶ པཝཏྟི ཝཏྟབྦཱ. ཏེསུ པན ཨཛ྄ཛྷཏྟཱཧཱརོཔི ལབྦྷཏིཡེཝཱཏི ཀིཉྩཱཔི ཨོཀྐནྟིཀྑཎེ ཝིཔཱཀཀྑནྡྷཱཔི ཝཏྠུསྶ ཝིཔྤཡུཏྟཔཙྩཡཱ ཧོནྟི. ཏེ པན ཙིཏྟཙེཏསིཀཱདྷམྨཱ སཧཛཱཏརཱུཔཱནནྟི ཨེཏྠ སངྒཡ྄ཧིསྶནྟཱིཏི ཀཏྭཱ ཨོཀྐནྟིཀྑཎེཝཏྠུཝིཔཱཀཱནནྟི ཝུཏྟཾ.

སབྦཐཱཏི སབྦཔཀཱརཾ སཧཛཱཏནྟིཨཱདིནཱ ཡོཛེཏབྦཾ. པཀཱརོཙ ཏིཝིདྷོ ཧོཏི སཧཛཱཏཔཙྩཡོཏིཨཱདིཝསེན ཝེདིཏབྦོ. རཱུཔཛཱིཝིཏམིཙྩཡནྟི ཨེཝཾ པོརཱཎེཧི ཝུཏྟོ ཨཡཾ ཨཏྠིཔཙྩཡོ ཨཝིགཏཔཙྩཡོཙཱཏི ཡོཛེཏབྦཾ. ནནུ ཀབལཱི༹ཀཱརཱཧཱརོ རཱུཔཛཱིཝིཏིནྡྲིཡཉྩ སཧཛཱཏེ སངྒཧེཏབྦཾ. ཨེཝཉྷི སཏི ཏིཝིདྷོཝ ཨཏྠིཔཙྩཡོ སིཡཱཏི.ན. སཧཛནནསངྑཱཏསྶ སཧུཔྤཱདནལཀྑཎསྶ ཨབྷཱཝཱ. སཧུཔྤཱདནལཀྑཎོ ཧི སཧཛཱཏཔཙྩཡོ. ཀབལཱི༹ཀཱརཱཧཱརོཙ ཨོཛཊྛམཀརཱུཔཱནི ཨུཔྤཱདེནྟོཔི ཨཏྟནོ ཋིཏིཀྑཎེཨེཝ ཨུཔྤཱདེཏི, ནོ ཨུཔྤཱདཀྑཎེ. ཡཐཱཙ མཧཱབྷཱུཏཱ སཧཛཱཏརཱུཔཱནི ཨུཔཏྠམྦྷནྟཱ ཨཏྟནཱ སཧ ཨུཔྤཱདནཔུབྦཀཱཨེཝ ཨུཔཏྠམྦྷནྟི, ན ཏཐཱ སོ ཨཱཧཱརོ. སོ པན ཝིནཱཝ སཧུཔྤཱདནཀིཙྩེན སཧཛཱཏཱནིཔི ཨསཧཛཱཏཱནིཔི ཨུཔཏྠམྦྷཏཱིཏི རཱུཔཛཱིཝིཏཾཔི སཧ ཨུཔྤཱདནཀིཙྩེན ཝིནཱཝ སཧ ཛཱཏརཱུཔཱནི ཨནུཔཱལེཏི. ཨིཏི ཨིམེ དྭེཔི དྷམྨཱ སཧཛཱཏ ལཀྑཎཱབྷཱཝཱཨེཝ སཧཛཱཏཔཙྩཡེ ཨསངྒཧིཏཱ. ཨིདཱནི སབྦེཔི ¶ ཙཏུཝཱིསཏིཔཙྩཡཱ སངྒཡ྄ཧམཱནཱ ཙཏྟཱརོཔཙྩཡཱ ཧོནྟཱིཏི དསྶེཏུཾ ཨཱརམྨཎཱུཔནིསྶཡ.ལ. སམོདྷཱནཾ གཙྪནྟཱིཏི ཝུཏྟཾ. ཏཏྲཱཡཾ སམོདྷཱནཝིདྷི, ཙཏུཝཱིསཏིཡཱ པཙྩཡེསུ ཨདྷིཔཏི པཙྩཡོ ཏཱཝ དུཝིདྷོ ཨཱརམྨཎསཧཛཱཏཝསེན. ཏཏྠ ཨཱརམྨཎཱདྷིཔཏི ཏཱིསུ ཀམྨཝཛྫེསུ སམོདྷཱནཾ གཙྪཏི. ཨཱརམྨཎ མཏྟཾཔི ཧི ཀམྨེན སཧ སམོདྷཱནཾ ནགཙྪཏི. ཀུཏོ ཨདྷིཔཏི བྷཱུཏནྟི.

ཨེཏྠ སིཡཱ, ཀསྨཱ ཨཱརམྨཎམཏྟཾཔི.ལ. ན གཙྪཏཱིཏི ཝུཏྟཾ. ནནུ ཀམྨཱརམྨཎཱཔི པཊིསནྡྷིབྷཝངྒཙུཏིཡོ ཧོནྟཱིཏི. སཙྩཾ. ཨེཏྠ པན མཱུལཊཱིཀཱཡཾ ཀམྨཾ པན ཏསྨིཾ ཀཏེ པཝཏྟམཱནཱནཾ ཀཏཱུཔཙིཏ བྷཱཝེན ཀམྨཔཙྩཡོ ཧོཏི. ན ཨཱརམྨཎཱཀཱརེན. ཝིསཡ མཏྟཏཱཝསེནཙ ཨཱརམྨཎཔཙྩཡོ ཧོཏི. ན སནྟཱནཝིསེསནཾ ཀཏྭཱ ཕལུཔྤཱདནསངྑཱཏེན ཀམྨཔཙྩཡཱཀཱརེན. ཏསྨཱ ཏེ པཙྩཡཱཀཱརཝིསབྷཱགཏྟཱ སཧ གྷཊནཾ ནགཙྪནྟཱིཏི ཝིསཛྫིཏནྟི. སཧཛཱཏཱདྷིཔཏི པན ཨཏྠིཔཙྩཡེ. ནིསྶཡཔཙྩཡོ ཏིཝིདྷོ སཧཛཱཏོ ཝཏྠུཔུརེཛཱཏོ ཝཏྠཱརམྨཎཔུརེཛཱཏོཏི. ཏཏྠ པུརིམཱ དྭེ ཨཏྠིཔཙྩཡེ, པཙྪིམོ པན དྭཱིསུ ཨཱརམྨཎཏྠི པཙྩཡེསུ. སོ ཙེ གརུཀཏོ ཧོཏི ཨུཔནིསྶཡེཔཱིཏི. པུརེཛཱཏཔཙྩཡོ ཏིཝིདྷོ ཨཱརམྨཎཔུརེཛཱཏོ ཝཏྠུཔུརེ ཛཱཏོ ཝཏྠཱརམྨཎཔུརེཛཱཏོཏི. ཏཏྠ ཝཏྠུཔུརེཛཱཏོ ཨཏྠིཔཙྩཡེ. ཨིཏརེ དྭེ དྭཱིསུ ཨཱརམྨཎཏྠིཔཙྩཡེསུ. ཏེཙེ གརུཀཏཱ ཧོནྟི. ཨུཔནིསྶཡེཔཱིཏི. ཀམྨཔཙྩཡོ དུཝིདྷོ སཧཛཱཏོ ནཱནཱཀྑཎིཀོཏི. ཏཏྠ སཧཛཱཏོ ཨཏྠིཔཙྩཡེ. ནཱནཱཀྑཎིཀོ པན དུཝིདྷོ བལཝཱ དུབྦལོཙ. ཏཏྠཙ བལཝཱ དུཝིདྷོ ཨཀཱལིཀོ ཀཱལིཀོཙ, ཏདུབྷཡཱཔི ཨུཔནིསྶཡེ. དུབྦལོ པན ཝིསུཾ ཀམྨཔཙྩཡོཡེཝ. སབྦོ ཨཱཧཱརཔཙྩཡོ སབྦོཙ ཨིནྡྲིཡཔཙྩཡོ ཨཏྠིཔཙྩཡེ.

ཝིཔྤཡུཏྟཔཙྩཡོ ཙཏུབྦིདྷོ སཧཛཱཏོ ཝཏྠུཔུརེཛཱཏོ ཝཏྠཱརམྨཎཔུརེཛཱཏོ པཙྪཱཛཱཏོཏི. ཏཏྠ པུརིམཱ དྭེ པཙྪིམོཙ ཨཏྠིཔཙྩཡེ. ཏཏཱིཡོ པན དྭཱིསུ ཨཱརམྨཎཏྠི པཙྩཡེསུ. ¶ སོ ཙེ གརུཀཏོ ཧོཏི, ཨུཔནིསྶཡེཔཱིཏི. སེསེསུ པན སཏྟརསཔཙྩཡེསུ ཧེཏུ, སཧཛཱཏ, ཨཉྙམཉྙ, ཝིཔཱཀ, ཛྷཱན, མགྒ, སམྤཡུཏྟ, ཨཝིགཏཝསེན ཨཊྛཔཙྩཡཱ པཙྪཱ ཛཱཏོཙ ཨཏྠིཔཙྩཡེ. ཨནནྟར སམནནྟར ཨཱསེཝན ནཏྠི ཝིགཏ ཝསེན པཉྩཔཙྩཡཱ ཨུཔནིསྶཡེཏི. ཨིཏི སབྦེཔི ཙཏུཝཱིསཏིཔཙྩཡཱ སབྷཱགསངྒཧཝསེན སཾཁིཔྤམཱནཱ ཨཱརམྨཎཱདཱིསུ ཙཏཱུསུ པཙྩཡེསུ སམོདྷཱནཾ གཙྪནྟཱིཏི.

[༢༣༦] ཝིབྷཱཝནིཡཾ པན

ཏེསུ ཙཏཱུསུ ཨེཀེཀསྨིཾཔི སབྦེ ཙཏུཝཱིསཏིཔཙྩཡཱ སམོདྷཱནཾ གཙྪནྟཱིཏི ཨིམིནཱ ཨདྷིཔྤཱཡེན ཡཾ ཝུཏྟཾ ‘‘ནཧི སོ ཀོཙིཔཙྩཡོཏི’’ཨཱདི. ཏཾ སབྦཾཔི ཨཱཙརིཡསྶ མཏིམཏྟམེཝ.

[༢༣༧] ཡཉྷི ཏཏྠ

‘‘ནཧི སོ ཀོཙིཔཙྩཡོ ཨཏྠི. ཡོ ཙིཏྟཙེཏསི ཀཱནཾ ཨཱརམྨཎབྷཱཝཾ ནགཙྪེཡྻཱཏི’’ ཝུཏྟཾ, ཏཾ ཏཱཝ ན ཡུཛྫཏི. ནཧི ཨིདྷ དྷམྨསརཱུཔམཏྟེན སམོདྷཱནཾ ཨདྷིཔྤེཏཾ. པཙྩཡཊྛེན སཧེཝ ཨདྷིཔྤེཏཾ. ནཙ ཧེཏཱདིཔཙྩཡཊྛོ ཨཱརམྨཎཱདིཔཙྩཡཊྛོ ཧོཏཱིཏི. ཨེསནཡོ ‘‘སཀ སཀཔཙྩཡུཔྤནྣསྶཙ ཨུཔནིསྶཡབྷཱཝཾ ནགཙྪཏཱིཏི’’ ཨེཏྠཱཔི.

ཨེཏྠ པན ཡོ སཀསཀཔཙྩཡུཔྤནྣསྶ ཨུཔནིསྶཡབྷཱཝཾ ནགཙྪཏི. ནཧི སོ ཀོཙི པཙྩཡོ ཨཏྠཱིཏི ཡོཛནཱ.

[༢༣༨] ཡཉྩ ཏཏྠ

‘‘ཀམྨཧེཏུཀཏྟཱཙ ལོཀཔྤཝཏྟིཡཱ ཕལཧེཏཱུཔཙཱར ཝསེན སབྦེཔི ཀམྨསབྷཱཝཾ ནཱཏིཝཏྟནྟཱིཏི’’ ཝུཏྟཾ.

[༢༣༩] ཡཉྩ

‘‘ཏེཙ པརམཏྠཏོ ལོཀསམྨུཏིཝསེནཙ ཝིཛྫམཱནཱ ཡེཝཱཏི’’ ཝུཏྟཾ. ཏདུབྷཡཾ པན སབྦསོ སཱསནཡུཏྟི ཡཱཔི ཝིརུདྡྷམེཝཱཏི.

ཨེཏྠཱཏི ¶ ཨེཏསྨིཾ པཊྛཱནནཡེ. སབྦཏྠཱཔཱིཏི སབྦེསུ སཧ ཛཱཏསབྷཱགེསུ པཙྩཡེསུ. ཡསྨཱ པན པཊིསནྡྷིཝིཉྙཱཎཾནཱམ ནཱམརཱུཔཱནཾ ཨཉྙམཉྙཔཊིབདྡྷཨོཀཱསེ ཙུཏིཔརིཙྪིནྣསྶ སཀལསྶ ཏསྶ ཏསྶ བྷཝསྶ སཱིསབྷཱུཏཾ བཱིཛབྷཱུཏཉྩ ཧོཏི. ཡཏོ སཀལཀཱཡབྷཱུཏསྶ ནཱནཱརཱུཔཱརཱུཔསནྟཱནསྶ ནིབྦཏྟི ཧོཏི. བཱིཛཏོ ཝིཡ མཧཱརུཀྑསྶ. ཡཐཱཧ –

ཝིཉྙཱཎཉྩ ཧི ཨཱནནྡ མཱཏུཀུཙྪིསྨིཾ ན ཨོཀྐམིསྶཐ. ཨཔིནུཁོ ནཱམརཱུཔཾ མཱཏུཀུཙྪིསྨིཾ སམུཙྩིསྶཐཱཏི. ནོ ཧེཏཾ བྷནྟེ. ཝིཉྙཱཎཉྩ ཧི ཨཱནནྡ མཱཏུཀུཙྪིསྨིཾ ཨོཀྐམིཏྭཱ ཝོཀྐམིསྶཐ. ཨཔིནུཁོ ནཱམརཱུཔཾ ཨིཏྠཏྟཱཡ ཨབྷིནིབྦཏྟིསྶཐཱཏི. ནོཧེཏཾ བྷནྟེ. ཝིཉྙཱཎཉྩ ཧི ཨཱནནྡ དཧརསྶེཝ སཏོ ཝོཙྪིཛྫིསྶཐ ཀུམཱརསྶཝཱ ཀུམཱརིཀཱཡཝཱ. ཨཔིནུཁོ ནཱམརཱུཔཾ ཝུདྡྷིཾ ཝིརུལ༹ྷིཾ ཝེཔུལླཾ ཨཱཔཛྫིསྶཐཱཏི. ནོཧེཏཾ བྷནྟེ. ཏསྨཱ ཧི ཨཱནནྡ ཨེསེཝ ཧེཏུ ཨེས ནིདཱནཾ ཨེས སམུདཡོ ཨེས པཙྩཡོ ནཱམརཱུཔསྶ. ཡདིདཾ ཝིཉྙཱཎནྟི.

ཏཏྠ སམུཙྩིསྶཐཱཏི ཝཌྜྷིསྶཐ. ནཱམརཱུཔཉྷི ཝིཉྙཱཎསྶ ཝཌྜྷིཡེཝཱཏི. ཝོཀྐམིསྶཐཱཏི བྷིཛྫིསྶཐ. ཨིཏྠཏྠཱཡཱཏི ཨཱིདིསསྶ ཨཏྟབྷཱཝསྶ ཨཏྠཱཡཱཏི ཨཏྠོ. ཝུདྡྷིཾ ཝིརུལ༹ྷིཾ ཝེཔུལླནྟི པཐམཝཡཝསེན ཝུདྡྷིཾ. མཛ྄ཛྷིམཝཡཝསེན ཝིརུལ༹ྷིཾ. པཙྪིམཝཡཝསེན ཝེཔུལླནྟི ཨཊྛཀཐཱཡཾ ཝུཏྟཾ. ཏསྨཱ པཊིསནྡྷིཀྑཎེ རཱུཔུཔྤཏྟིཡཱ ཨེཀནྟེན ཝིཉྙཱཎཔཙྩཡཏཱ ཝེདིཏབྦཱ. ཨེཝཾ ཨུཔྤནྣཉྩ པནེཏཾ པཊིསནྡྷིརཱུཔཾ པུན སཡཾ ཏསྨིཾ བྷཝེ ཡཱཝ ཙུཏིཡཱ པཝཏྟམཱནཱནཾ སབྦཱསཾ ཙཏུསམུཊྛཱནིཀརཱུཔསནྟཏཱིནཾ སིཏ བྷཱུཏཾ བཱིཛབྷཱུཏཉྩ ཧོཏི. ཨཏིབལཝནྟཾཔི ཧི ཙིཏྟཾ པུརིམུཔྤནྣཱཡ རཱུཔཔཝེཎིཡཱ ཨསཏི རཱུཔཾ ཛནེཏུཾ ནསཀྐོཏི. ཨེཝཾ ཨུཏུ ཨཱཧཱརཱཔཱིཏི. ཏཏོཡེཝ ཧི ཨརཱུཔབྷཝེ ཀཱམཱཝཙརཱདཱིནི རཱུཔཛནཀཙིཏྟཱནིཔི ཏཏྠ རཱུཔཾ ནཛནེནྟཱིཏི. ཨསཉྙསཏྟེཔི ཨུཏུ སམུཊྛཱནརཱུཔསནྟཏིཡོ པཐམུཔྤནྣཱཡ ཀམྨཛརཱུཔསནྟཏིཡཱ ཝིཛྫ མཱནཏྟཱཨེཝ ཨུཔྤཛྫནྟཱིཏི. ཝུཏྟཉྷི ཝིབྷངྒཊཱིཀཱཡཾ ཨརཱུཔཾ པན རཱུཔསྶ ཨོཀཱསོ ¶ ན ཧོཏཱིཏི ཡསྨིཾ རཱུཔེ སཏི ཙིཏྟཾ ཨཉྙཾ རཱུཔཾ ཨུཔྤཱདེཡྻ. ཏདེཝ ཏཏྠ ནཏྠཱིཏི ཨཏྠོ. པུརིམརཱུཔསྶཱཔི ཧི པཙྩཡབྷཱཝོ ཨཏྠི པུཏྟསྶ པིཏིསདིསཏཱདསྶནཏོཏི. ཨེཏྠཙ པུཏྟསྶ པིཏིསདིསཏཱདསྶནཏོཏི ཨེཏེན ཨིམམཏྠཾ དསྶེཏི. ཡཐཱ ཏིཎརུཀྑཱནཾ བཱིཛབྷཱཝསངྑཱཏཾ ནིཡཱམརཱུཔཾནཱམ ཨཏྠི. ཡསྶ ཨཱནུབྷཱཝེན ཏནྣིབྦཏྟཱཏིཎརུཀྑཱ ཝཌྜྷནྟཱ ཡཐཱཝཱ ཏཐཱཝཱ ཨཝཌྜྷིཏྭཱཨཏྟནཱ སམཱནབཱིཛེཧིཨེཝ ཏིཎརུཀྑེཧི སབྦསོ སདིསཱ ཀཱརཾ གཧེཏྭཱ ཝཌྜྷནྟི. ཨེཝམེཝཾ གབྦྷསེཡྻཀཱནཾ སཏྟཱནཾ ཡོནི བྷཱཝསངྑཱཏཾ ནིཡཱམ རཱུཔཾནཱམ ཨཏྠི. ཡསྶཱནུབྷཱཝེན ཏེ སམཱན ཛཱཏིཀེཧིཨེཝ ཀུལེཧི ཝིསེསཏོ མཱཏཱཔིཏཱུཧི ཨེཝ སབྦསོ སདིསརཱུཔསཎྛཱནཱ ཧོནྟི. ཨིཏི བཱིཛནིཡཱམོ ཝིཡ ཡོནིནིཡཱམོཔི ཧོཏི. སོཙ པཊིསནྡྷིརཱུཔསྶེཝ ཨཱནུབྷཱཝོཏི ཝེདིཏབྦོ.

ཨཔིཙ, ཨཡཾ ཡོནིནིཡཱམོནཱམ ཀལལཀཱལཱདཱིསུ པུཏྟཱནཾ སརཱིརེསུ མཱཏཱཔིཏཱུཧི སམུདཱགཏཾ ཨུཏུཛརཱུཔསནྟཱནཾཨེཝ. ཡསྶ ཨཱནུབྷཱཝེན ཏཾསནྟཱནཾ སམཱནཛཱཏིཀསཏྟསཎྛཱནསདིསཾ ཨཏྟནོ ཉཱཏིཀུལསདིསཉྩ ཧོཏི. ཡཐཱཧིཨིཏྠིབྷཱཝཱདིརཱུཔཾ སཏྟཱནཾ ཨིཏྠིལིངྒཱདཱིནི བཱིཛརཱུཔཉྩ ཏིཎརུཀྑཱནཾ ཏཾཏཾཝཎྞསཎྛཱནཱ དཱིནི ནིཡཱམེཏི. ཨེཝཾ ཡོནིརཱུཔཾ ནཱནཱཛཱཏིཝསེན སཏྟཱནཾ ནིཡཱམཀཾ ཝཝཏྠཱཔཀཾ ཧོཏཱིཏི. ཨེཏྟཱཝཏཱ པཝཏྟིཡཾ ཐཔེཏྭཱ ཙིཏྟཛརཱུཔཾ སབྦེསཾ ཏིསམུཊྛཱནིཀརཱུཔཱནཾ ཨུཔྤཏྟིཡཱ ཙིཏྟནིརཔེཀྑཏཱ པུརིམུཔྤནྣ རཱུཔཔཝེཎི པཊིབདྡྷཏཱཙ སཱདྷིཏཱ ཧོཏི. ཏེནེཝཙ ཏེསཾ ཙིཏྟསྶ ཋིཏིབྷངྒཀྑཎེསུཔི ཙིཏྟརཧིཏེ ནིརོདྷསམཱཔཏྟི ཀཱལེཔི ཨུཔྤཏྟི ཧོཏཱིཏི. ཏེན ཝུཏྟཾ སཧཛཱཏརཱུཔནྟི པནེཏྠཱཏིཨཱདི. ཨིཏཱིཏིཨཱདི ནིགམནཾ. ཏཏྠ སམྦྷཝཾཏི ཡཐཱ སམྦྷཝཾ. སམྦྷཝཱཏིཝཱ སམྦྷཱུཏཱ. ཨཛ྄ཛྷཏྟཉྩཱཏི ཨཛ྄ཛྷཏྟབྷཱུཏཱཙ. བཧིདྡྷཱཙཱཏི བཧིདྡྷཱབྷཱུཏཱཙ. སངྑཏཱཏི སངྑཏབྷཱུཏཱ. ཨསངྑཏཱཏི ཨསངྑཏབྷཱུཏཱ. ཨེཝཾ ཏེཀཱལིཀཱཙ ཀཱལམུཏྟཱཙ ཨཛ྄ཛྷཏྟབཧིདྡྷཱ སམྦྷཱུཏཱཙ. ཏཐཱ སངྑཏཱསངྑཏབྷཱུཏཱཙ པཉྙཏྟི ནཱམརཱུཔཱནཾ ཝསེན ཏིཝིདྷཱ ཋིཏཱ དྷམྨཱ པཊྛཱནེ སབྦཐཱ ཙཏུཝཱིསཏི པཙྩཡཱནཱམ ¶ ཧོནྟཱིཏི ཡོཛནཱ. ཨེཏྠཙ ཏིཝིདྷཱ ཋིཏཱནཾ དྷམྨཱནཾ ཏེཀཱལིཀཱདིབྷཱཝེ སཏི ཙཏུཝཱིསཏིཔཙྩཡཱནཾཔི ཡཐཱསམྦྷཝཾ ཏེཀཱལིཀཱདིབྷེདོ སིདྡྷོ ཧོཏི. ཏཏྠ ཨཱརམྨཎཨདྷིཔཏི ཨུཔནིསྶཡཔཙྩཡཱ ཏེཀཱལིཀཱ ཀཱལམུཏྟཱཙ ཧོནྟི.

[༢༤༠] ཝིབྷཱཝནིཡཾ པན

‘‘ཨཱརམྨཎཨདྷིཔཏིཨུཔནིསྶཡཔཙྩཡཱནཾ ཏིཀཱལིཀཱནནྟི’’ ཝུཏྟཾ. ཏཾ ན ཡུཛྫཏི.

པཉྙཏྟིནིབྦཱནཱནཾཔི ཀཱལམུཏྟཱནཾ ཏེསུ པཝིཊྛཏྟཱཏི. ཏཏྠ ཨིམསྨིཾ བྷཝེ ཨབྷིནཝཱནཾ དྷནདྷཉྙབྷོགཱནཾཝཱ ཝིཛྫཱསིཔྤསུཏཔརི ཡཏྟཱིནཾཝཱ སཱིལསམཱདྷིཔཉྙཱནཾཝཱ བྷཝནྟརེ བྷཝསམྤཏྟིབྷོག སམྤཏྟི མགྒཕལསམྤཏྟཱིནཾཝཱ པཊིལཱབྷཏྠཱཡ པུབྦཡོགཾ ཀརོནྟསྶ ཨནཱགཏཱནཾ ཏཱསཾ ཨུཔནིསྶཡཔཙྩཡཏཱ ཝེདིཏབྦཱ. པཊྛཱནེ པན ཨནཱགཏཾ ཙཀྑུསམྤདཾ པཏྠཡམཱནོ སོཏ, གྷཱན, ཛིཝ྄ཧཱ, ཀཱཡསམྤདཾ, ཝཎྞསམྤདཾ, སདྡ, གནྡྷ, རས, ཕོཊྛབྦསམྤདཾ པཏྠཡམཱནོ ཨནཱགཏེ ཁནྡྷེ པཏྠཡམཱནོ དཱནཾ དེཏི སཱིལཾ སམཱདིཡཏཱིཏིཨཱདིནཱ བྷཝནྟརཔརིཡཱཔནྣཱཨེཝ སམྤཏྟིཡོ ཝུཏྟཱ. ཏཱ པན དཱནཱདཱིནཾ ཀམྨཱནཾ ཨནུརཱུཔཝསེན ཝུཏྟཱཏི དཊྛབྦཱ. ཀམྨཔཙྩཡོ པན པཙྩུཔྤནྣཱཏཱིཏཝསེན དྭིཀཱལིཀོ. ཨནནྟར སམནནྟར ཨཱསེཝན ནཏྠི ཝིགཏ པཙྩཡཱ ཨཏཱིཏཀཱལིཀཱ. སེསཱ པནྣརས པཙྩཡཱ པཙྩུཔྤནྣཀཱལིཀཱཏི. ཨཛ྄ཛྷཏྟབཧིདྡྷཱདུཀེ ཨཱརམྨཎཱ དྷིཔཏི སཧཛཱཏ ཨཉྙམཉྙ ནིསྶཡ ཨུཔནིསྶཡ པུརེཛཱཏ ཨཱཧཱར ཨཏྠི ཨཝིགཏཱ ཨཛ྄ཛྷཏྟབཧིདྡྷཱ ཧོནྟི. སེསཱ ཙུདྡས པཙྩཡཱ ཨཛ྄ཛྷཏྟཱཝ. ཨཱརམྨཎ ཨདྷིཔཏི ཨུཔནིསྶཡཱ སངྑཏཱ ཨསངྑཏཱཙ ཧོནྟི. སེསཱ སངྑཏཱཝཱཏི. པཉྩཝིདྷཾཔིཨརཱུཔནྟི པཝུཙྩཏི. ཀསྨཱ, ཀདཱཙིཔི རཱུཔསངྑཱཏཾ སཎྛཱནཏྠཾ ཨནུཔགམནཏོ ནཱམནྟིཙ པཝུཙྩཏི. ཀསྨཱ, ཨདྷིཝཙནསངྑཱཏནཱམཱབྷིདྷཱནཝསེནེཝ སུཎནྟེཧི གཧེཏབྦབྷཱཝུཔགམནཏོཏི.

༡༦༩. པཉྙཔཱིཡཏཱིཏི པཉྙཏྟི. ཨཡཾཔི ཨེཀོ ཝཙནཏྠོཏི ལོཀིཡམཧཱཛནེཧི ཐཔཱིཡཏི. ཝོཧརཱིཡཏི ཙེཝ སམྤཊིཙྪཱི ཡཏིཙཱཏི ¶ ཨཏྠོ. ཡོཀོཙི སམྨུཏིསཙྩབྷཱུཏོ བྱཉྫནཏྠོ. ཏཐཱ པཉྙཱཔེཏབྦཱ ཨཏྠཱ པཉྙཔཱིཡནྟི ཨེཏཱཡཱཏི པཉྙཏྟི. བྱཉྫནཏྠཛོཏཀོ པཉྙཏྟིསདྡོཏི ཨེཝཾ དུཝིདྷཱ པཉྙཏྟཱིཏི ཝུཏྟཾ ཏཏོཨཝསེསཱ.ལ. དུཝིདྷཱཧོཏཱིཏི. ཏཏྠ པཉྙཱཔཱིཡཏྟཱ པཉྙཏྟཱིཏི ཨཏྠ པཉྙཏྟིམཱཧ. པཉྙཱཔནཏོཔཉྙཏྟཱིཏི སདྡཔཉྙཏྟིཾ. ཏཾཏཾབྷཱུཏཝིཔརིཎཱམཱཀཱརནྟི པཐཝིཡཱདཱིནཾ ཏེསཾ ཏེསཾ མཧཱབྷཱུཏཱནཾ ཨདྷིམཏྟབྷཱཝཔྤཀཱརསངྑཱཏཾ ཏཐཱ ཏཐཱ པརིཎཱ མཱཀཱརཾ. པཝཏྟིཝིསེསཱཀཱརནྟི ཨཏྠོ. ཨུཔཱདཱཡཱཏི པཊིཙྩ. ནིསྶཱཡ. པཐམཾ ཙིཏྟེན གཧེཏྭཱཏི ཨཏྠོ. ཏཐཱཏཐཱ པཉྙཏྟཱཏི ཨཡཾ པཐཝཱིནཱམ ཨཡཾ པབྦཏོནཱམཱཏི ཨེཝམཱདི ནཡེན མཧཱཛནེན པཉྙཏྟཱ, ཀཐིཏཱ, ཝོཧརིཏཱཏི ཨཏྠོ. པཐཝིཔབྦཏཱདིཀཱཏིཨཱདིསདྡེན ནདི སམུདྡཱདིཀཱཡོ སངྒཎྷཏི. ཨཡཾ སམཱུཧཔཉྙཏྟིནཱམ.

[༢༤༡] ཝིབྷཱཝནིཡཾ པན

‘‘སཎྛཱནཔཉྙཏྟཱིཏི’’ ཝུཏྟཱ. སཱ ཡུཏྟཱ ཝིཡ ནདིསྶཏི.

ནཧི ཨིདྷ སཎྛཱནཾ པདྷཱནཾ ཧོཏཱིཏི. སམྦྷཱརསནྣིཝེསཱཀཱརནྟི ཀཊྛཱདཱིནཾ སམྦྷཱརཱནཾ ཏཐཱ ཏཐཱ སནྣིཝེསཱཀཱརཾ. ཨེཏྠཱཔི ཨཱདིསདྡེན ནཱཝཱདཡོ སངྒཎྷཏི. ཨཡཾ སཎྛཱན པཉྙཏྟི. ཀཊྛཱདཡོ ཨེཝ ཧི གེཧཱཀཱརེན སཎྛིཏཱ གེཧནྟི རཐཱཀཱརེན སཎྛིཏཱ རཐོཏི ཝུཙྩནྟཱིཏི.

[༢༤༢] ཝིབྷཱཝནིཡཾ པན

‘‘སམཱུཧཔཉྙཏྟཱིཏི’’ ཝུཏྟཾ. ཏཾ ན ཡུཛྫཏི.

ནཧི ཨིདྷ སམཱུཧོ པདྷཱནནྟི. པུརིསཔུགྒལཱདིཀཱ སཏྟཔཉྙཏྟི ཨུཔཱདཱཔཉྙཏྟཱིཏིཔི ཝུཙྩཏི. ཙནྡཱཝཊྚནཱདིཀནྟི ཙནྡསཱུརིཡཱདཱིནཾ སིནེརུཾ པདཀྑིཎཾ ཀཏྭཱ ཨཱཝཊྚནཱདིཀཾ. ཡཏོ ཙནྡིམསཱུརིཡཱ ཨུདེནྟི, སཱ པུབྦདིསཱནཱམ. པུབྦཏརཾ ལདྡྷཔྤཀཱསཏྟཱ. ཡཏྠ པན ཨཏྠཾ གཙྪནྟི, སཱ པཙྪིམདིསཱནཱམ. པཙྪཱལདྡྷཔཀཱསཏྟཱ. ཏཱསཾ དཀྑིཎཔསྶཱ དིསཱ ཝུཌྜྷིཨཏྠེན དཀྑིཎདིསཱནཱམ. ཨིཏརཱ པན ཨུཙྩཏརཊྛེན ཨུཏྟརཱདིསཱཏི ཝུཙྩཏི. ཡདཱ སཱུརིཡོ ཨུདེཏི, ཏདཱ སཀལསྶ ¶ ཨཧསྶ པུབྦབྷཱགཏྟཱ པུབྦནྷོཏི ཝུཙྩཏཱིཏི. ཨེཝམཱདིཀཱ དིསཱ པཉྙཏྟི ཀཱལཔཉྙཏྟིཡོནཱམ. ཨཱདིསདྡེན ཐལནིནྣཱདིཀཱ དེསཔཉྙཏྟི སངྒཧིཏཱཏི. ཨསམྥུཊྛཱཀཱརནྟི མཧཱབྷཱུཏཱནཾ ཨཉྙམཉྙཾ ཨསམྥུསནཱཀཱརཾ. ཨཡཾ ཨཱཀཱསཔཉྙཏྟིནཱམ. ཏཾ ཏཾ བྷཱུཏནིམིཏྟནྟི པཐཝཱིཀསིཎཱདིཀཾ ཨུདྡྷུམཱཏཀཱདིཀཉྩ བྷཱུཏནིམིཏྟཾ. ནཱིལཀསིཎཱདིཀཾ ཝཎྞནིམིཏྟཉྩ ཨེཏྠེཝ སངྒཡ྄ཧཏི. བྷཱཝནཱ ཝིསེསནྟི པརིཀམྨཱདིཀཾ བྷཱཝནཱཝིསེསཾཙ. ཨེཏེན པརིཀམྨནིམིཏྟ ཨུགྒཧནིམིཏྟ པཊིབྷཱགནིམིཏྟཱནཾ སིདྡྷཀཱརཎཾ ཝདཏི. ཨཡཾ ནིམིཏྟཔཉྙཏྟིནཱམ.

ཨེཝམཱདིབྷེདཱཏི ཨེཏྠ ཨཱདིསདྡེན ཨཊྛཀཐཱཡཾ ཨཱགཏཱ ཨུཔཱདཱཔཉྙཏྟི ཨུཔནིདྷཱཔཉྙཏྟིཨཱདཡོ སངྒཧིཏཱ. པརམཏྠཏོ ཨཝིཛྫམཱནཱཔཱིཏི ཨེཏེན སམྨུཏིཏོ ལདྡྷབྷཱཝཾ དསྶེཏི. ཏེནེཝ ཧི ཏཱསཾ ཝིཛྫམཱནབྷཱཝཾ གཧེཏྭཱ ཏཐཱ ཏཐཱ ཝོཧརནྟཱནཾ མུསཱཝཱདོནཱམ ནཧོཏཱིཏི. ཨཏྠཙྪཱཡཱཀཱརེནཱཏི ཏཾ ཏཾ བྷཱུཏཱདཱིནཾ པརམཏྠཱནཾ སམཱུཧསཎྛཱནཱདིཚཱཡཱཀཱརེན. ཨཏྠཙྪཱ ཡཱཀཱརེནཱཏིཝཱ སདྡཱབྷིདྷེཡྻསངྑཱཏེན དབྦཔཊིབིམྦཱཀཱརེན སཝིགྒཧཱཀཱརེནཱཏི ཨཏྠོ, ཏཾཏཾཨུཔཱདཱཡཱཏི པརམཏྠདྷམྨཱནཾ ཏཾཏཾཔཝཏྟིཝིསེསཾ ཨུཔཱདཱཡ. ཨུཔནིདྷཱཡཱཏི ཨོལུམྦིཡ. པརིཀཔྤིཡམཱནཱཏི པརིཀཔྤབུདྡྷིཡཱ པརིཀཔྤེཏྭཱ གཡ྄ཧམཱནཱ. ཨེཏྠ པན ཨེཝམཱདིཔབྷེདཱ ཨཱལམྦཎབྷཱུཏཱ པརིཀཔྤིཡམཱནཱ སབྦཱ པཉྙཏྟི པཉྙཱཔཱིཡཏཱིཏི ཨཏྠེན པཉྙཏྟཱིཏི ཡོཛནཱ. སངྑཱཡཏཱིཏི གཎཱིཡཏི. གཎནུཔགཾ ཀཏྭཱ ཐཔཱིཡཏཱིཏི ཨཏྠོ. སམཉྙཱཡཏཱིཏི སམྨནྣཱིཡཏི. ནཱམཾ, ནཱམཀམྨཾ, ནཱམདྷེཡྻཾ, ནིརུཏྟི, བྱཉྫནཾ, ཨབྷིལཱཔོཏི ཨིམེ ཚ ནཱམ ནཱམཀམྨཱ. ཏཏྠ ཨཏྠེ ནམཏཱིཏི ནཱམཾ. ཨཏྠཝིསཡཾ ཨེཝ ཧུཏྭཱ པཝཏྟཏཱིཏི ཨཏྠོ. ཨཏྟནིཙ ཨཏྠཾ ནཱམེཏཱིཏི ནཱམཾ. པིཊཀཏྟཡསངྑཱཏེ ཧི ནཱམེ སཏི ཏདུགྒཎྷནྟཱནཾ སབྦེ ཏདཏྠཱ པདེཔདེ ཝཱཀྱེཝཱཀྱེ ཨཱགཙྪནྟི ཡེཝཱཏི.

ཨཔིཙ སུཎནྟཱནཾ ཉཱཎཾ ཏཾཏཾཨཏྠཱབྷིམུཁཾ ནཱམེཏཱིཏི ནཱམཾ ནཱམགཧཎཝསེན ཀཏྟབྦཏྟཱ ནཱམམེཝ ཀམྨནྟི ནཱམཀམྨཾ. དྷཱིཡཏི དྷཱརཱིཡཏཱིཏི ¶ དྷེཡྻཾ. ནཱམམེཝ དྷེཡྻནྟི ནཱམདྷེཡྻཾ. ཨཝིདིཏཔཀྑེ ཋིཏོ ཨཏྠོ ཨེཏཱཡ ཏཏོ ནཱིཧརིཏྭཱ ཝུཙྩཏི ཀཐཱིཡཏཱིཏི ནིརུཏྟི. ཨཏྠསྶ བྱཉྫནཏོ པཱཀཊཀརཎཏོ བྱཉྫནཾ. ཨབྷིབྱཏྟཾ ཀཏྭཱ ལཔཱིཡཏི ཀཐཱིཡཏི ཨཏྠོ ཨེཏེནཱཏི ཨབྷིལཱཔོ. ཨེཏྠཙ ཝཎྞཔཉྙཏྟི, ཨཀྑརཔཉྙཏྟི, སརཔཉྙཏྟི, དཱིགྷཔཉྙཏྟི, རསྶ པཉྙཏྟི. བྱཉྫནཝགྒགྷོསཱགྷོསཔཉྙཏྟི, ལིངྒཔཉྙཏྟི. པདཔཉྙཏྟི, ཝཱཀྱཔཉྙཏྟིཡོཔི ཨེཏསྶེཝ པབྷེདཱཏི དཊྛབྦཱ. པརམཏྠཏོ ཝིཛྫམཱནེསུ ཨཏྠེསུ པཝཏྟཱ པཉྙཏྟི ཝིཛྫམཱནཔཉྙཏྟི ནཱམ. ཨཝིཛྫ མཱནེསུ བྷཱུམིཔབྦཏཱདཱིསུ པཝཏྟཱ པཉྙཏྟི ཨཝིཛྫམཱནཔཉྙཏྟི ནཱམ. ཨེཏཱ ཨེཝ སམཱསཊྛཱནཾ པཏྭཱ དྭིཔདསཾཡོགཝསེན ཨིཏརཱ ཙཏསྶོཔི ཧོནྟཱིཏི དསྶེཏུཾ ཏཏྠཱཏིཨཱདི ཝུཏྟཾ. ཨེཏཱཡ པཉྙཱཔེནྟཱིཏི ཨེཏེན ཝིཛྫམཱནཾ ཨཏྠཾ པཉྙཔེནྟི ཨེཏཱཡཱཏི ཝིཛྫམཱནཔཉྙཏྟཱིཏི ཨིམམཏྠཾ ཝདཏི. ཨེསནཡོ པརཏྠཔི. ཚ ཨབྷིཉྙཱ ཨསྶཱཏི ཚལ༹བྷིཉྙོཏི ཀཏྭཱ ཝིསེསནབྷཱུཏཱནཾ ཚནྣཾ ཨབྷིཉྙཱནཾ ཝིཛྫམཱནཏྟཱ ཝིསེསིཏབྦབྷཱུཏསྶ པུགྒལསྶ ཨཝིཛྫམཱནཏྟཱ ཚལ༹ བྷིཉྙོཏི ཝིཛྫམཱནེནཨཝིཛྫམཱནཔཉྙཏྟི ནཱམ. ཨིཏྠཱི ཨཝིཛྫམཱནཱ སདྡོ ཝིཛྫམཱནོཏི ཨིཏྠིཡཱསདྡོ ཨིཏྠིསདྡོཏི ཨཝིཛྫམཱནེན ཝིཛྫམཱན པཉྙཏྟི ནཱམ. ཙཀྑུཙ ཙཀྑུཝིཉྙཱཎཉྩ ཨུབྷཡཾཔི ཝིཛྫཱམཱནནྟི ཙཀྑུསྨིཾ ཝིཉྙཱཎཾ ཙཀྑུཝིཉྙཱཎནྟི ཝིཛྫམཱནེནཝིཛྫམཱནཔཉྙཏྟི ནཱམ. རཱཛཱཙ པུཏྟོཙ དྭེཔི ཨཝིཛྫམཱནཱཨེཝཱཏི རཉྙོ པུཏྟོ རཱཛཔུཏྟོཏི ཨཝིཛྫམཱནེནཨཝིཛྫམཱནཔཉྙཏྟིནཱམཱཏི ཨིམམཏྠཾ དསྶེནྟོ ཨུབྷིནྣནྟིཨཱདིམཱཧ.

ཨེཏྠ པན ཝཙནཏོ ཙ ཝཙནཏྠཏོཙ ཝིནིམུཏྟཱ སདྡསབྷཱཝཱ ནཱམཔཉྙཏྟིནཱམ ཝིསུཾ ནཏྠཱིཏི ཝདནྟི. ཏཾ ན ཡུཛྫཏི. ཨཏྠཛོཏཀ བྷཱཝེན ཝིསུཾ སིདྡྷཏྟཱ. སདྡོ ཧི ནཱམ ཨཀྑརཔདབྱཉྫནབྷཱཝཾ ཨུཔགཏོཡེཝ ཨཏྠཛོཏནེ སམཏྠོ ཧོཏི. པརམཏྠ སདྡོཙ ཁཎིཀོ ཙུཎྞཝིཙུཎྞབྷཱུཏོ ཏབྦྷཱཝཾ ཨུཔགཏོ ནཧོཏཱིཏི. ཏསྨཱ སདྡསབྷཱཝཱནཱམ པཉྙཏྟིནཱམ ཝིསུཾ ཨཏྠིཡེཝ. ཨཏྠིབྷཱཝོཙསྶཱ ཝཙནསདྡཾ སུཏྭཱ ཨནནྟརེ ཨཀྑར པད བྱཉྫནགོཙརཙིཏྟསྶ ཏདནནྟརེཙ ཏདཏྠཝིཛཱནནཙིཏྟསྶ པཝཏྟིཡཱ པཱཀཊོཏི ¶ དསྶེནྟོ གཱཐཱདྭཡཾ ཨཱཧ. ཏཏྠ ཝཙཱིགྷོསཱ ནུསཱརེནཱཏི ཨུཙྩཱརིཡམཱནསདྡསངྑཱཏསྶ ཝཙཱིགྷོསསྶ ཨཱརམྨཎཀརཎསངྑཱཏེན ཨནུསཱརེན ཨུཔྤནྣཱཡ སོཏཝིཉྙཱཎ ཝཱིཐིཡཱ པཝཏྟིཡཱ ཨནནྟརེ ཨུཔྤནྣསྶ མནོདྭཱརསྶ གོཙར བྷཱུཏཱ སཱཡཾ པཉྙཏྟཱིཏི སམྦནྡྷོ. ཀཱིདིསཱི པན སཱཡཾ པཉྙཏྟཱིཏི ཨཱཧ ཨཏྠཱཡསྶཱ.ལ. ཏཏོཔརནྟི. ཏཏྠ ཏཏོཔརནྟི ཏཏོ ནཱམཔཉྙཏྟཱརམྨཎསྶ མནོདྭཱརསྶ ཨུཔྤཏྟིཏོ པརཾ ཨཏྠཱ ཝིཉྙཱཡནྟཱིཏི སམྦནྡྷོ. ཡསྶཱ ནཱམཔཉྙཏྟིཡཱ ཨནུསཱརེན པརམཏྠཔཉྙཏྟིབྷཱུཏཱ ཨཏྠཱ ཝིཉྙཱཡནྟི. སཱ ཨཡཾ པཉྙཏྟི ལོཀསངྐེཏནིམྨིཏཱཏི ཝིཉྙེཡྻཱཏི ཡོཛནཱ.

ཨེཏྠཙ སོཏཝིཉྙཱཎཝཱིཐིཡཱཏི ཨེཏྠ ཨཏཱིཏསདྡམཏྟཱ རམྨཎཱ ཏདནུཝཏྟིཀཱནཱམ མནོཝིཉྙཱཎཝཱིཐིཔི སངྒཧིཏཱཏི དཊྛབྦཱ. ཝུཏྟཉྷི སཱརཏྠདཱིཔནིཡཾ-ཏེན ཝུཏྟཝཙནེ ཡཏྟཀཱནི ཨཀྑརཱནི ཧོནྟི. ཏེསུ ཨེཀམེཀཾ པཙྩུཔྤནྣཾ ཨཏཱིཏཉྩ གཧེཏྭཱ སོཏ ཝིཉྙཱཎཝཱིཐིཡཱ མནོཝིཉྙཱཎཝཱིཐིཡཱཙ ཨུཔྤཛྫིཏྭཱ ནིརུདྡྷཱཡ ཨཝསཱནེ ཏཱནི ཨཀྑརཱནི སམྤིཎྜེཏྭཱ ཨཀྑརསམཱུཧཾ གཧེཏྭཱ ཨེཀཱ མནོཝིཉྙཱཎཝཱིཐི ཨུཔྤཛྫིཏྭཱ ནིརུཛ྄ཛྷཏི. ཏདནནྟརཾ ཨཡཾ ཨཀྑརསམཱུཧོ ཨེཏསྶ ནཱམནྟི ནཱམཔཉྙཏྟིགཧཎཝསེན ཨཔརཱཡ མནོཝིཉྙཱཎ ཝཱིཐིཡཱ ཨུཔྤཛྫིཏྭཱ ནིརུདྡྷཱཡ ཏདནནྟརཾ ཨུཔྤནྣཱཡ མནོཝིཉྙཱཎ ཝཱིཐིཡཱ ཨཡམེཏསྶ ཨཏྠོཏི པཀཏིཡཱ ཏདཏྠཝིཛཱནནཾ སམྦྷཝཏཱིཏི. མཎིསཱརམཉྫཱུསཱཡཾ པན ཏདནུཝཏྟིཀཝཱིཐིཏོ པརཾ ཨེཀཾ ཝིནིཙྪཡཝཱིཐིཾ ཝིཉྙཏྟིགཧཎཝཱིཐིཉྩ ཝདཏི. ཏཏོ པརཾ ཨེཀཀྑརེ སདྡེ ཨེཀཏྠཛོཏིཀཱཡ ནཱམཔཉྙཏྟིཡཱ གཧཎཾ ཧོཏི. ཡཱ ཝདནྟསྶ པུབྦབྷཱགེ མནསཱ ཝཝཏྠཱཔིཏོ པཉྙཏྟིསདྡོནཱམ ཝུཙྩཏི. ཏཏོཔརཾ ཏདཏྠགཧཎནྟི. ཨཱིདིསེསུ པན ཋཱནེསུ ཏཏྠ ཏཏྠ ཛཝནཝཱིཐིཝཱརཱནཾ པཊིཔཱཊིཀཐནཾནཱམ པདྷཱནཔཱཀཊགཧཎཝསེནེཝཱཏི དཊྛབྦཾ. ཨེཀཙྪརཀྑཎེ ཨནེཀ ཀོཊིསཏསཧསྶཱནི ཙིཏྟཱནི ཨུཔྤཛྫནྟཱིཏི ཧི ཝུཏྟཾ. ཏཐཱ –

ཨེཀམཏྟོ བྷཝེ རསྶོ, དྭིམཏྟོ དཱིགྷམུཙྩཏེ;

ཏིམཏྟོཏུཔླུཏོ ཉེཡྻོ, བྱཉྫནཾ ཨདྡྷམཏྟིཀནྟིཙཾ.

ན ཙ པརམཏྠསདྡསངྒྷཱཊཱནཾ སཏསཧསྶཾཔི ཨེཀཀྑརཾནཱམ བྷཝིཏུཾ པཧོཏི. ཏསྨཱ ཨིདྷ བཧུཾ ཝིཙཱརཎཱ ཨམྷེཧི ནཀཏཱཏི.

ཨིཏི པརམཏྠདཱིཔནིཡཱནཱམ ཨབྷིདྷམྨཏྠསངྒཧསྶ

ཙཏུཏྠཝཎྞནཱཡ ཨཊྛམསྶ པཙྩཡསངྒཧསྶ

པརམཏྠདཱིཔནཱ ནིཊྛིཏཱ.

ཀམྨཊྛཱན སངྒཧ པརམཏྠདཱིཔནཱི

༡༧༠. ཨེཝཾ ¶ ཨཊྛཧི པརིཙྪེདེཧི སཔཙྩཡཔབྷེདཾ ནཱམརཱུཔ ཝིབྷཱགཾ དསྶེཏྭཱ ཨིདཱནི ཝིདིཏནཱམརཱུཔ ཝིབྷཱགསྶ ཀམྨཊྛཱནཝིདྷཱནཾ དསྶེནྟོ སམཐཝིཔསྶནཱནནྟིཨཱདི མཱཧ. ཨིཏོ པཙྩཡ སངྒཧཏོ པརཾ སམཐཝིཔསྶནཱནཾ བྷཱཝནཱནཾ དུཝིདྷཾཔི ཀམྨཊྛཱནཾ ཡཐཱཀྐམཾ པཝཀྑཱམཱིཏི ཡོཛནཱ. ཏཏྠ ཀིལེསེ ཨཉྙེཔིཝཱ ཝིཏཀྐཱདཡོ ཨོལཱ༹རིཀདྷམྨེ སམེཏཱིཏི སམཐོ. ཏཐཱ པཝཏྟོ ཨེཀགྒཏཱསངྑཱཏོ སམཱདྷི. ཝིསེསེན པསྶནྟི ཨེཏཱཡཱཏི ཝིཔསྶནཱ. ཨནིཙྩཱནུཔསྶནཱདིཀཱ བྷཱཝནཱཔཉྙཱ. ཏཱཡ ཧི ཡོགིནོ ཁནྡྷེསུ ལོཀིཡམཧཱཛནེན པསྶིཏཾ ཨིཏྠིཔུརིསཱདིཀཾ ནིཙྩསུཁཱདིཀཉྩ ཨཏིཀྐམིཏྭཱ ཝིསེསེན ཨནིཙྩཱདིཀམེཝ པསྶནྟཱིཏི. བྷཱཝེཏབྦཱཏི བྷཱཝནཱ. བྷཱཝེནྟིཝཱ ཙིཏྟསནྟཱནཾ ཨེཏཱཧཱིཏི བྷཱཝནཱ. ཀིརིཡཱ ཀམྨཾ. ཏིཊྛཏི ཨེཏྠཱཏི ཋཱནཾ. ཀམྨསྶ ཋཱནནྟི ཀམྨཊྛཱནཾ. ཝཱིརིཡཱརབྦྷསངྑཱཏསྶ ཡོགཀམྨསྶ པཝཏྟིཊྛཱནནྟི ཨཏྠོ. ཀསིཎམཎྜལཱདིཀཾ ཀསིཎབྷཱཝནཱདིཀཉྩ. ཨཱདིམཛ྄ཛྷ པརིཡོསཱནཱནཉྷི སམུདཱཡབྷཱུཀཾ ཨེཀམེཏཾ པཐཝཱིཀསིཎ བྷཱཝནཱདིཀཾ བྷཱཝནཱཀམྨཾཔི ཨཏྟནོ ཨཝཡཝབྷཱུཏསྶ ཡོག ཀམྨསྶ པཝཏྟིཊྛཱནཾ སམྦྷཝཏཱིཏི.

ཝིབྷཱཝནིཡཾ པན

ཨུཏྟརུཏྟར ཡོགཀམྨསྶ པདཊྛཱནཏཱཡ ཀམྨཊྛཱནབྷཱུཏཾ བྷཱཝནཱཝིདྷིཉྩཱཏིཔི ཝུཏྟཾ. ཏམྤི ཡུཛྫཏིཡེཝ.

ཡོགཀམྨམེཝཝཱ སུཁཝིསེསཱནཾ ཨདྷིཊྛཱནཊྛེནཋཱནནྟི ཀམྨཊྛཱནཾ. ཏཏྠཱཏི ཏསྨིཾ དུཝིདྷེཔི ཀམྨཊྛཱནེ. སམཐསངྒཧེཏི སམཐ ཀམྨཊྛཱནསངྒཧེ. དསཀསིཎཱནཱིཏི དསཀསིཎམཎྜལཱནི ཀསིཎཛ྄ཛྷཱནཱནིཙ. ཏདུབྷཡཱནིཔི ཧི ཡོགཱནུཡོགསངྑཱཏསྶ སམཐ ཀམྨསྶ པཝཏྟིཊྛཱནཏྟཱ སམཐཀམྨཊྛཱནཱནིནཱམ ཧོནྟཱིཏི. དསཨསུབྷཱཏི དསཨསུབྷཝཏྠཱུནི ཨསུབྷཛ྄ཛྷཱནཱནིཙ. དསཨནུསྶཏི ཡོཏི ¶ བུདྡྷགུཎཱདཱིནི དསཨནུསྶཏིཊྛཱནཱནི ཨནུསྶརཎསཏི ཡོཙ. སེསཱནིཔི ཡཐཱནུརཱུཔཾ ཝཏྟབྦཱནཱིཏི. ཙརཎཾ ཙརིཡཱ. སམུདཱཙརཎནྟི ཨཏྠོ. པཝཏྟིབཧུལཏཱཏི ཝུཏྟཾ ཧོཏི. རཱགསྶ ཙརིཡཱ རཱགཙརིཡཱ. རཱགཙརིཏཱཏི པཱཋོ, སོ ཨཊྛཀཐཱཡཾ ནཏྠི, པུགྒལཊྛཱནེཨེཝ སོ ཡུཏྟོཏི. ཨེསནཡོ སེསེསུཔི.

[༢༤༣] ཡོ པན ཝིབྷཱཝནིཡཾ

ཙརིཡཱནཾ སཾསགྒབྷེདོ ཝུཏྟོ. སོ ཨིདྷ ནཱདྷིཔྤེཏོ.

ནཧི ཀམྨཊྛཱནཱནཾནཱམ སཾསགྒཙརིཏསྶཔི ཨེཀསྶ དྭེ ཏཱིཎི དཱཏབྦཱནི ཧོཏཱིཏི. ཏེནེཝ ཧི སོ བྷེདོ ཨཊྛཀཐཱཡཾ ནགརུཀཏོཏི. སབྦཱཔི ཨཔྤནཱཡ པུབྦབྷཱགཔཝཏྟཱ ཀཱམཱཝཙར བྷཱཝནཱ པརིཀམྨབྷཱཝནཱནཱམ. སཱ པན ཨཔྤནཱཡ ཨཱསནྣེ དཱུརེཏི དུཝིདྷཱ ཧོཏི. ཏཏྠ ཡཱ ཨཱསནྣེ, སཱ ཨཔྤནཾ ཨུཔེཙྩ སམཱིཔེ ཋཏྭཱ པཝཏྟཏྟཱ ཨུཔཙཱརབྷཱཝནཱཏི ཝུཙྩཏི. ཨིཏརཱ པན པརིཀམྨ བྷཱཝནཱཨེཝནཱམ. ཨིཏི པརིཀམྨབྷཱཝནཱཔི སམཱནཱ པུབྦཱཔརཝིསེས པཱཀཊབྷཱཝཏྠཾ ཨཊྛཀཐཱསུ དྭཱིཧི ནཱམེཧི གཧིཏཱཏི ཝུཏྟཾ པརིཀམྨབྷཱཝནཱ.ལ. ཏིསྶོབྷཱཝནཱཏི ཏཱསཾ པན ཝིསེསོ པརཏོ ཨཱགམིསྶཏི. པརིཀམྨནིམིཏྟནྟི པརིཀམྨབྷཱཝནཱཡ ཨཱརམྨཎབྷཱུཏཾ ཀསིཎམཎྜལཱདིནིམིཏྟཾ. ཏཉྩ ཏསྶཱ ཨཱརམྨཎ བྷཱཝེན ཨེཀཾཔི སམཱནཾ པུབྦཱཔརཝིསེསཔཱཀཊབྷཱཝཏྠཾ པརིཀམྨནིམིཏྟཾ ཨུགྒཧནིམིཏྟནྟི དྭིདྷཱ བྷིནྡིཏྭཱ ཝུཏྟཾ. ཏེསཾཔི ཝིསེསོ ཨཱགམིསྶཏི. ཝིདཏྠིཙཏུརངྒུལསངྑཱཏེན པརིཏྟཔམཱཎེནཝཱ ཁལ མཎྜལཱདིསངྑཱཏེན མཧནྟཔམཱཎེནཝཱ ཀཏཾ ཨཀཏཾཝཱ པཐཝཱི མཎྜལཏལམེཝ ཨསེསཕརིཏབྦཊྛེན ཀསིཎནྟི པཐཝཱིཀསིཎཾ. སཀལསདྡཔརིཡཱཡོ ཧི ཀསིཎསདྡོ. ཡཐཱ ཀསིཎེན ཛམྦུདཱིཔསྶཱཏི. ཏསྨཱ ཡཏྟཀེ པཐཝཱིཏལེ ནིམིཏྟཾ གཎྷཱཏི, ཏཏྟཀཾ ཙིཏྟེན ཨསེསཾ ཕརིཏྭཱ ཨེཝ གཧེཏབྦཾ ཧོཏི. ན པན ཏསྶ ཨེཀདེསེ ཋཏྭཱཏི, ཏེན ཝུཏྟཾ པཐཝཱིམཎྜལཏལམེཝ ཨསེསཕརིཏབྦཊྛེན ཀསིཎནྟི པཐཝཱིཀསིཎནྟི. ཨེསནཡོ སེསཀསིཎེསུཔཱིཏི. ཨེཏྠཙ, ཨཝིབྷཱུཏཝཎྞཱཡ པཐཝིཡཱ ཨེཀ ཏལབྷཱཝེནསནྣིཝིཊྛཱསཎྛཱནཔཉྙཏྟིཨིདྷཔཐཝཱིཀསིཎཾནཱམ ¶ . ཏཐཱ ཨཱཔོཀསིཎཾ ཏེཛོཀསིཎཉྩ. ཕུཊྛཊྛཱནེ ཙིཏྟེན སཎྛཱནཾ ཀཏྭཱ གཧིཏཱ ཝཱཡུཝཊྚི ཝཱཡོཀསིཎཾནཱམ. ནཱིལཝཎྞཝིསིཊྛཱཨེཀཱ སཎྛཱནཔཉྙཏྟི ནཱིལཀསིཎཾནཱམ. ཏཐཱ པཱིཏལོཧིཏོ དཱཏཀསིཎཱནིཔི. ཙནྡསཱུརིཡཨགྒོབྷཱསཝིསིཊྛཱ ཀཏྠཙི དིསྶམཱནཱ སཎྛཱནཔཉྙཏྟི ཨཱལོཀཀསིཎཾནཱམ. ཏིཏྟིཚིདྡཝཱཏ པཱནཚིདྡཱདཱིསུ དིསྶམཱནཱ ཨཱཀཱསཝིསིཊྛཱ སཎྛཱནཔཉྙཏྟི ཨཱཀཱསཀསིཎཾནཱམཱཏི. ཨཏིཝིཡ དྷུམཱཏཾ སུནབྷཱཝཾ གཏནྟི ཨུདྡྷུམཱཏཾ. ཏདེཝ ཀུཙྪིཏཏྟཱ ཨུདྡྷུམཱཏཀཾ. ཏཐཱབྷཱུཏསྶ ཚཝསརཱིརསྶེཏཾ ནཱམཾ. ཏདེཝ པཱུཏིབྷཱཝཾ གཏཀཱལེ པུརིམཝཎྞཾ ཝིཛཧིཏྭཱ པུན ནཱིལབྷཱཝཾ པཏྟཾ ཝིནཱིལཀཾ. ཏདེཝ པུན པཙྩིཏྭཱ ཏཏོ ཏཏོ ཝིསནྡམཱནཔུབྦཡུཏྟཾ ཝིཔུབྦཀཾ. ཡུདྡྷབྷཱུམིཡཱདཱིསུ སཏྠེན མཛ྄ཛྷེ ཚིནྡིཏྭཱ ཐཔིཏཾ ཝིརཱུཔཚིནྣསརཱིརཾ ཝིཙྪིནྣཀཾནཱམ. སོཎ སིངྒཱལཱདཱིཧི ཝིཝིདྷཱཀཱརེན ཁཱཡིཏཔདེསཡུཏྟཾ སརཱིརཾ ཝིཀྑཱཡིཏཀཾནཱམ. སོཎསིངྒཱལཱདཱིཧི ཨེཝ ཁཎྜཱཁཎྜིཀཾ ཀཏྭཱ ཨཔཀཌྜྷིཏྭཱ ཏཏོ ཏཏོ ཁིཏྟཨངྒཔཙྩངྒཡུཏྟཾ སརཱིརཾ ཝིཏྟཀྑིཀཾ ནཱམ. ཨངྒཔཙྩངྒེསུ སཏྠེན ཧནིཏྭཱ ཁཎྜཱཁཎྜིཀཾ ཀཏྭཱ ཏཏོ ཏཏོ ཁིཏྟཨངྒཔཙྩངྒཡུཏྟཾ སརཱིརཾ ཧཏཝིཀྑིཏྟཀཾནཱམ. པགྒྷརིཏ ལོཧིཏསརཱིརཾ ལོཧིཏཀཾ ནཱམ. པུལུ༹ཝཔརིཔཱུརཾ སརཱིརཾ པུལུ༹ཝཀཾ. སཀལོ ཨཊྛིསངྒྷཱཊོཝཱ ཨེཀམེཀཾཝཱ ཨཊྛི ཨཊྛིཀཾ ནཱམ. པུནཔྤུནཾ ནིརནྟརཾ སརཎཾ ཨནུསྶཏི. བུདྡྷགུཎསྶ ཨནུསྶཏི བུདྡྷཱནུསྶཏི. ཨེས ནཡོ སེསཱསུཔཱིཏི. ཏཏྠ ཨརཧཏཱདིགུཎོ བུདྡྷགུཎོནཱམ. སྭཀྑཱཏཏཱདིགུཎོ དྷམྨགུཎོནཱམ. སུཔྤཊིཔནྣཏཱདིགུཎོ སངྒྷགུཎོ ནཱམ. ཨཏྟནོ སཱིལསྶ ཨཁཎྜཏཱདི གུཎོ སཱིལགུཎོནཱམ. ཨཏྟནོ དཱནསྶ ཝིགཏམལམཙྪེརཏཱདི གུཎོ ཙཱགགུཎོནཱམ. ཨཏྟཱནཾ དེཝཏྟཾཝཱ སཀྐཏྟཾཝཱ བྲཧྨཏྟཾཝཱ ཝཧིཏུཾ སམཏྠཱ ཨཏྟནོ སདྡྷཱདིགུཎཱ དེཝཏཱགུཎཱནཱམ. ཝཏྟ པཊིཔཏྟིཝསེནཝཱ དྷུཏངྒསམཱདཱནཝསེནཝཱ ཛྷཱནསམཱཔཏྟིཝསེནཝཱ ཝིཔསྶནཱཝསེནཝཱ ཨཏྟནོ སནྟཱནེ ཙིརཾཝིཀཱལཾ ཝིཀྑམྦྷིཏཱནཾ ཀཱམརཱགཱདཱིནཾ ཝཱུཔསམོ ཨཏྟནཱཨདྷིགཏནིབྦཱནཉྩ ཨུཔསམོནཱམ. ཨེཀབྷཝཔརིཡཱཔནྣསྶ ¶ ཨཏྟནོ ཁནྡྷསནྟཱནསྶ བྷེདོ མརཎཾ ནཱམ. ཀེསཀཱཡཱདཱིནཾ ནཱནཱཀཱཡཱནཾ སམཱུཧབྷཱུཏོ ཨཡཾ ཀཱཡོ ཀཱཡོནཱམ. ཨཏྟནི ནིརནྟརཾ པཝཏྟམཱནཱ ཨསྶཱས པསྶཱསཱ ཨཱནཱཔཱཎཾནཱམ. མིཛྫཏི སིནིཡ྄ཧཏཱིཏི མེཏྟཱ. ཡཾ ཨཱརབྦྷ ཨུཔྤཛྫཏི. ཏསྶ ཧིཏསུཁཾ ཨཝིཔྤཀིཎྞཾ ཀཏྭཱ སངྒཎྷཏཱིཏི ཨཏྠོ. མིཏྟསྶཝཱ ཨེསཱ མིཏྟེསུཝཱ བྷཝཱཏི མེཏྟཱ. ཨཏྠཏོ པན པརསཏྟཱནཾ ཧིཏཱུཔསཾཧཱརཝསེན པཝཏྟོ ཨདོསོཨེཝ. པརསཏྟཱནཾ ཧིཏཱུཔསཾཧཱར ཧིཏམོདན ཨཧིཏཱཔནཡནསངྑཱཏཾ བྱཱཔཱརཏྟཡཾ པཧཱཡ ཏེསཾ ཀམྨསཀཏཱནུབྲཱུཧནཝསེན ཨུཔཔཏྟིཏོ ཡུཏྟིཏོ པེཀྑཏཱིཏི ཨུཔེཀྑཱ. ཏཐཱ པཝཏྟཱ ཏཏྲམཛ྄ཛྷཏྟཏཱཨེཝ. ཨཔྤམཱཎེསུསཏྟེསུ བྷཝཱཏི ཨཔྤམཉྙཱ. ན ཧི ཨེཏྟཀེསུ ཨེཝ སཏྟེསུ ཨེཏཱ པཝཏྟེཏབྦཱ. ན ཏཏོ ཨཉྙེསཱུཏི ཨེཝཾ ཨེཏཱསཾ ཝིསཡཔརིཙྪེདོནཱམ ཨཏྠཱིཏི. ཨེཝཾསནྟེཔི ཨཱདིཀམྨི ཀེན ཨཱདིཏོ ཨེཀསྨིཾ པུགྒལེ ཨཏྟནོ བྷཱཝནཱཙིཏྟཾ ལདྡྷཱསེཝནཾ ལདྡྷཝིསེསཉྩ ཀཏྭཱ པཙྪཱ དྭཱིསུ ཏཱིསཱུཏིཨཱདིནཱ ཝཌྜྷིཏྭཱ སཱིམསམྦྷེདོཙ ཨོདྷིསོཕརཎ ཨནོདྷིསོཕརཎ དིསཱཕརཎཱནིཝ ཀཏྟབྦཱནཱིཏི. ཡཾ པན ཝིབྷངྒེ མེཏྟཱསཧགཏེན ཙེཏསཱ ཨེཀཾ དིསཾ ཕརིཏྭཱ ཝིཧརཏཱིཏིཨཱདིནཱ པཊིསམྦྷིདཱམགྒེཙ སབྦེསཏྟཱ ཨཝེརཱ ཧོནྟཱུཏིཨཱདིནཱ མེཏྟཱཝིདྷཱནཾ ནཱམ ཝུཏྟཾ. ཏཾ མེཏྟཱཛྷཱནེ ཝསཱིབྷཱཝཔྤཏྟཱནཾ ཝསེན ཝུཏྟནྟི དཊྛབྦཾ. ཨེཏཱ པན ཝིསེསེན དོསཔཀྑིཀཱནཾ ཀིལེསཱནཾ ཨུཛུཔཊིཔཀྑབྷཱུཏཱ ཧོནྟཱིཏི ཏཾསམངྒིནོཙ ནིཙྩཾ སོམྨཧདཡབྷཱཝེན བྲཧྨསདི སཏྟཱ བྲཧྨཱནོནཱམ. ཏེསཾ ཝིཧཱརོཏི བྲཧྨཝིཧཱརོ. སེཊྛཱནཾཝཱ སེཊྛབྷཱུཏོཝཱ ཝིཧཱརོཏི བྲཧྨཝིཧཱརོཏི. ཨཱཧཱརེཏི ཨསིཏ པཱིཏ ཁཱཡིཏ སཱཡིཏ ཝསེན ཙཏུཔྤབྷེདེ ཨཛ྄ཛྷོཧཊཱཧཱརེ. པཊིཀཱུལསཉྙཱཏི ཨཱཧཱརཧེཏུ ཨནུབྷཝིཏབྦཱནཾ དུཀྑདྷམྨཱནཾ པཙྩཝེཀྑནཝསེན སརསཔཊིཀཱུལཏཱ པཙྩཝེཀྑནཝསེན ཨཱསཡནིདྷཱན པཀྐཱཔཀྐཕལནིསྶནྡཔཙྩཝེཀྑན ཝསེན ཙ ཏཏྠ ནིཀནྟི པཧཱནསཉྙཱ. ཙཏུདྷཱཏུཝཝཏྠཱནནྟི སརཱིརགཏཱནཾ པཐཝིཨཱདཱིནཾ ཙཏུནྣཾ མཧཱདྷཱཏཱུནཾ སལཀྑཎཱ དིཝསེན ¶ ཝིསུཾ ཝིསུཾ པརིཙྪིནྡིཏྭཱ སམནུཔསྶནཾ. ཏཉྷི ཙཏསྶོ དྷཱཏུཡོ ཝཝཏྠཔིཡནྟི ཝིནིཙྪིཡནྟི སལླཀྑིཡནྟི ཨེཏེནཱཏི ཙཏུདྷཱཏུཝཝཏྠཱནནྟི ཝུཙྩཏཱིཏི. ཨསུབྷསཉྙཱ བྷཱཝེཏབྦཱ རཱགསྶཔཧཱནཱཡཱཏི ཝཙནཏོ དསཨསུབྷཱ.ལ. རཱགཙརིཏསྶ སཔྤཱཡཱཏི ཝུཏྟཾ. ཏཏྠ རཱགེན ཙརཏཱིཏི རཱགཙརིཏོ. སོ ཧི ཀཱམཾ ཀདཱཙི དོསེན ཙརཏི. ཀདཱཙི མོཧེན. ཀདཱཙི སདྡྷཱདཱིསུཔི ཨཉྙཏརེན. རཱགོ པནསྶ ཨུསྶནྣོ. ཏསྨཱ ཨུསྶནྣེན རཱགེན སོ རཱགཙརིཏོཏི སངྑྱཾ གཙྪཏཱིཏི. ཨེསནཡོ སེསེསུཔི. མེཏྟཱ བྷཱཝེཏབྦཱ བྱཱཔཱདསྶ པཧཱནཱཡཱཏི ཝཙནཏོ མེཏྟཱདཱིནཾ ཏིཎྞཾ བྲཧྨཝིཧཱརཱནཾ ཡཐཱཀྐམཾ བྱཱཔཱདཝིཧིཾསཱ ཨརཏཱིནཾ ནིསྶརཎཏཱཝཙནཏོ སུཔརིསུདྡྷཱནཉྩ ཝཎྞཀསིཎཱནཾ དོསཝཏྠུཏྟཱབྷཱཝཏོ ཙཏསྶོཨཔྤམཉྙཱཡོ.ལ. དོསཙརིཏསྶཱཏི ཝུཏྟཾ. ཨེཏྠཙ ཨཱདིཀམྨིཀསྶེཝཱཡཾ ཙརིཡཝིབྷཱགོ. ཨུཔེཀྑཱཙ ཨཱདིཀམྨིཀསྶ ནསམྦྷཝཏི. ཝཀྑཏིཧི ཨུཔེཀྑཱཔཉྩམཛ྄ཛྷཱནིཀཱཏི. ཏསྨཱ ཡསྶ པུརིམཱ ཏིསྶོ སཔྤཱཡཱ. ཏསྶ ཏདནུགཏིཀཱ ཨུཔེཀྑཱཔི སཔྤཱཡཱནཱམ ཧོཏཱིཏི ཀཏྭཱ ཙཏསྶོ ཨཔྤམཉྙཱཡོཏི ཝུཏྟནྟི དཊྛབྦཾ. ཨིཏརཐཱ ནིསྶརཎཉྷེཏཾ རཱགསྶ. ཡདིདཾ ཨུཔེཀྑཱ ཙེཏོ ཝིམུཏྟཱིཏི ཝཙནཏོ ཨུཔེཀྑཱ རཱགཙརིཏསྶཱཏི ཝཏྟབྦཾ སིཡཱཏི. ནཱིལཱདཱིནིཙ ཙཏྟཱརི ཀསིཎཱནཱིཏི ཨིདཉྩ མནཱཔིཡརཱུཔཱནི ནཱིལཱདཱིནི སནྡྷཱཡ ཝུཏྟཾ. ཨམནཱཔིཡཱནི པན ཏཱནི རཱགཙརིཏསྶེཝ སཔྤཱཡཱནཱིཏི. ཨཱནཱཔཱཎསཏི བྷཱཝེཏབྦཱ ཝིཏཀྐུཔཙྪེདཱཡཱཏི ཝཙནཏོ ཨཱནཱཔཱཎཾཝིཏཀྐཙརིཏསྶཱཏི ཝུཏྟཾ. མོཧཙརིཏོ པན པཀཏིཡཱ པམཱདབཧུལོ ཧོཏི ཝིཀྑིཏྟཙིཏྟོཙ. ཨཱནཱཔཱཎཉྩནཱམ ནིརནྟརཾ པཝཏྟམཱནཾ ཏསྶ སཏིཾ ཨུཔྤཱདེནྟཾ ཝིཡ པཝཏྟཏཱིཏི ཏཾ མོཧཙརིཏསྶསཔྤཱཡནྟི ཝུཏྟཾ སིཡཱ.

[༢༤༤] ཝིབྷཱཝནིཡཾ པན

བུདྡྷིཝིསཡབྷཱཝེན མོཧཔཊིཔཀྑཏྟཱཏི ཀཱརཎཾ ཝུཏྟཾ. ཏཾ ཡུཏྟཾ ཝིཡ ན དིསྶཏི.

ཨེཝཉྷི ¶ སཏི སོ བུདྡྷིཙརིཏེན སཧ ཝཏྟབྦོ སིཡཱཏི. ཀཱམཉྩ བུདྡྷགུཎཱདཡོཔི ཨེཀནྟེན བུདྡྷིཝིསཡཱཨེཝ ཧོནྟི. ཏེ པན ཝིསེསཏོ སདྡྷཾ ཨུཔབྲཱུཧཡནྟཱིཏི ཝུཏྟཾ བུདྡྷཱནུསྶཏི ཨཱདཡོ.ལ. སདྡྷཱཙརིཏསྶཱཏི. པརམཏྠཏོ སུཁུམཏརཱནི མརཎཱདཱིནི ཝིཔུལབུདྡྷཱིནཾ ཨེཝ ཝིསཡཱནཱམ ཧོནྟཱིཏི ཝུཏྟཾ མརཎ. ལ. བུདྡྷིཙརིཏསྶཱཏི. སེསཱནིཔནསབྦཱནིཔཱིཏི ཙཏྟཱརི བྷཱུཏ ཀསིཎཱནི དྭེ ཨཱལོཀཱཀཱསཀསིཎཱནི ཙཏྟཱརོ ཨཱརུཔྤཱཙཱཏི དསཝིདྷཱནི ཀམྨཊྛཱནཱནི. ཏཏྠཱཔཱིཏི ཏེསུ དསསུ སེས ཀམྨཊྛཱནེསུཔི. པུཐུལཾ ཁལམཎྜལཱདིཔམཱཎཾ མོཧཙརིཏསྶ སཔྤཱཡཾ. སམྦཱདྷསྨིཉྷི ཨོཀཱསེ ཙིཏྟཾ བྷིཡྻོ སཾམོཧཾ ཨཱཔཛྫཏཱིཏི. ཁུདྡཀཾ ཝིདཏྠིཙཏུརངྒུལཔམཱཎཾ ཝིཏཀྐཙརིཏསྶེཝ སཔྤཱཡཾ. མཧནྟཉྷི ཝིཏཀྐསནྡྷཱཝནསྶ པཙྩཡོ ཧོཏཱིཏི. ཏཏྠཙ ཝིཏཀྐཙརིཏསྶེཝཱཏི ཨེཏྠ ཨེཝསདྡོ ཁུདྡཀནྟིཔདེ ཡུཛྫཏི. ཝིཏཀྐཙརིཏསྶ ཁུདྡཀམེཝ སཔྤཱཡཾ. ན པུཐུལནྟི. སབྦཉྩེཏཾ ཨུཛུཝིཔཙྩནིཀཝསེནཙེཝ ཨཏིསཔྤཱཡཏཱཡཙ ཝུཏྟཾ. རཱགཱདཱིནཾ པན ཨཝིཀྑམྦྷིཀཱ སདྡྷཱདཱིནཉྩ ཨནུཔཀཱརིཀཱ ཀུསལབྷཱཝནཱནཱམ ནཏྠཱིཏིཔི ཨཊྛཀཐཱཡཾ ཝུཏྟཾ. སབྦཏྠཱཔཱིཏི སབྦེསུཔི ཙཏྟཱལཱིས ཀམྨཊྛཱནེསུ. པརིཀམྨབྷཱཝནཱ ལབྦྷཏེཝ པརིཀམྨེན ཝིནཱ ཨེཀསྶཔི ཀམྨཊྛཱནསྶ ཨསམྤཛྫནཏོ. དསསུཀམྨཊྛཱནེསུཨུཔཙཱརབྷཱཝནཱཝ སམྤཛྫཏི ནཏྠི ཨཔྤནཱ. ཀསྨཱ ཨིཏི ཙེ. བུདྡྷ དྷམྨ སངྒྷ སཱིལ ཙཱག དེཝཏཱ ཨུཔསམ གུཎཱནཾ ཏཱཝ གམྦྷཱིརཏཱཡ ནཱནཱཔྤཀཱརགུཎཱ ནུསྶརཎཱདྷིམུཏྟཏཱཡགཱཏི ཧི ཨཊྛཀཐཱཡཾ ཝུཏྟཾ. ཏཏྠ གམྦྷཱིར ཏཱཡཱཏི ཨེཏེན ཨེཀེཀསྶཔི གུཎཔདསྶ གམྦྷཱིརཏྟཱ ཏབྦིསཡོ སམཱདྷི མཧཱསམུདྡེ སསཀོ ཝིཡ ཏཏྠ ཨཔྤནཾ པཏྭཱ ནིཙྩལབྷཱཝེན པཏིཊྛཱཏུཾ ནསཀྐོཏཱིཏི དསྶེཏི. ནཱནཱཔྤཀཱར གུཎཱནུསྶརཎཱདྷིམུཏྟཏཱཡཝཱཏི ཨེཏེན ཏེསཾ གུཎཱནཾ ཨཏཔྤ ནིཡསབྷཱཝཏྟཱ ཨེཏྟཀེཨེཝ གུཎཔདེ ཋཏྭཱ ཨཔྤནཾ པཱཔེསྶཱམཱིཏི ཨཏྟནོ ཙིཏྟཾ སནྡྷཱརེཏུཾཔི ནསཀྐོཏཱིཏི དསྶེཏཱིཏི. སེསེསུ པན མརཎསཉྙཱཝཝཏྠཱནེསུ མརཎཾ ཏཱཝ སབྷཱཝ དྷམྨཏྟཱ སཾཝེཛནཱིཡདྷམྨཏྟཱཙ ཨིཏརཱནིཙ དྭེ སབྷཱཝདྷམྨཏཱཡ གམྦྷཱིརཏྟཱ ¶ ཨཔྤནཱཡ པཏིཊྛཱ ནཧོནྟཱིཏི. ཡདིཨེཝཾ ཀསྨཱ ལོཀུཏྟརཛ྄ཛྷཱནཱནི ཨཏིགམྦྷཱིརེ ནིབྦཱནསངྑཱཏེ སབྷཱཝདྷམྨེ ཨཔྤནཾ པཱཔུཎནྟི. དུཏཱིཡཙཏུཏྠཱརུཔྤཛ྄ཛྷཱནཱནིཙ པཐམཏཏཱིཡཱརུཔྤ སངྑཱཏེ སབྷཱཝདྷམྨེཏི. ཝུཙྩཏེ, ལོཀུཏྟརཛ྄ཛྷཱནཱནི ཏཱཝ ཝིསུདྡྷིཏོ སམྨསནཉཱཎཏོཙ པཊྛཱཡ ཨནུཀྐམེན ཨུཔརུཔརིཔཝཏྟཱནཾ ཝིསུདྡྷིབྷཱཝནཱནཾ བལེན ཨཏིགམྦྷཱིརེཔི ནིབྦཱནསངྑཱཏེ སབྷཱཝདྷམྨེ ཨཔྤནཱབྷཱཝེན པཏིཊྛཱཏུཾ སཀྐོནྟི. ཨཱརུཔྤཛ྄ཛྷཱནཱནིཙ ཨཔྤནཱཔཏྟསྶེཝ པཉྩམཛ྄ཛྷཱནསམཱདྷིསྶ ཨུདཡམཏྟཱནི ཧོནྟཱིཏི ཨཱརམྨཎསམཏིཀྐམནམཏྟཀརཎེན སབྷཱཝདྷམྨེཔི ཨཱརམྨཎེ ཨཔྤནཱབྷཱཝེན པཏིཊྛཱཏུཾ སཀྐོནྟཱིཏི. ཏཏྠཱཔཱིཏི ཏེསུ སམཏིཾསཨཔྤནཱཀམྨཊྛཱནེསུཔི. པཉྩཀཛ྄ཛྷཱནེ ནིཡུཏྟཱནི པཉྩཀཛ྄ཛྷཱནི ཀཱནི. ཛྷཱནཔཉྩཀསྶ ཨཱརམྨཎབྷཱཝཡོགྱཱནཱིཏི ཝུཏྟཾཧོཏི. པཊིཀཱུལཱརམྨཎཱནིནཱམ ཨཏིཨནིཊྛཱནི ལཱུཁཱནི ཙིཏྟརབྷིཛནནེ པརིདུབྦལཱནི ཧོནྟཱིཏི ན ཏཱནི ཨཏྟནི ཙིཏྟཾ རོཙེཏྭཱ ཐཔེཏུཾ སཀྐོནྟི. ཏསྨཱ ཝིཏཀྐེན ཝིནཱ ཙིཏྟཾ ཏཏྠ ཨེཀགྒཾ ཧུཏྭཱ ན ཏིཊྛཏི. ཝིཏཀྐབལེནེཝ ཏིཊྛཏཱིཏི ཝུཏྟཾ དསཨསུབྷཱ.ལ. པཐམཛ྄ཛྷཱནིཀཱཏི. ཡདིཨེཝཾ ཀཐཾ ཏེསུ སོམནསྶཛ྄ཛྷཱནཾ ཧོཏཱིཏི ནཱིཝརཎསནྟཱཔཾ པཧཱནབལེནཙེཝ ཏཾ ཏཾ ཨཱནིསཾསདསྶན ཉཱཎབལེནཙ. བྱཱདྷིདུཀྑཔཱིལི༹ཏསྶ རོགིནོ ཝམནཝིརེཙནཔཝཏྟིཡཾ ཝིཡ བཧུཾ དཱནི ཝེཏྟནཾ ལབྷིསྶཱམཱིཏི ཨཱནིསཾསདསྶཱཝིནོ པུཔྥཙྪཊྚཀསྶ གཱུཐརཱསིདསྶནེ ཝིཡ ཙཱཏི དཊྛབྦཾ. མེཏྟཱདཡོ ཏཡོ བྲཧྨཝིཧཱརཱ དོམནསྶསམུཊྛིཏཱནཾ བྱཱཔཱདཝིཧིཾ སཱཨརཏཱིནཾ ནིསྶརཎབྷཱུཏཱ ཧོནྟཱིཏི ན ཏེ ཀདཱཙི སོམནསྶེན ཝིནཱ ཨཔྤནཾ པཱཔུཎནྟཱིཏི ཝུཏྟཾ མེཏྟཱདཡོ ཏཡོ ཙཏུཀྐཛ྄ཛྷཱནིཀཱཏི. ཨུཔེཀྑཱ པན སཏྟེསུ སབྦསོ ཨུདཱསིནཔཀྑེ ཋཏྭཱ བྷཱཝིཏབྦཏྟཱ ཀདཱཙིཔི ཨུཔེཀྑཱཝེདནཱཡ ཝིནཱ ཨཔྤནཾ ནཔཱཔུཎཱཏཱིཏི ཝུཏྟཾ ཨུཔེཀྑཱཔཉྩམཛ྄ཛྷཱནིཀཱཏི. ཙཏྟཱརོཔནཨཱརུཔྤཱཏི ཀསིཎུགྒྷཱཊིམཱཀཱསཱདཱིནི ཙཏྟཱརི ཨཱརུཔྤཱརམྨཎཱནི. སབྦཏྠཱཔཱིཏི སབྦེསུཔི ཙཏྟཱལཱིསཀམྨཊྛཱནེསུ. ཡཐཱརཧནྟི ཏཾཏཾཨཱརམྨཎཱནུརཱུཔཾ. ཨཱརམྨཎེན ཝིནཱ པརིཀམྨཾནཱམ ན སིཛ྄ཛྷཏི. ཨཱརམྨཎསྶ སུཊྛུ ¶ དལ༹ྷཝིབྷཱུཏགཧཎསངྑཱཏེན ཨུགྒཧེན ཝིནཱ ཨཱརམྨཎསམྤཏྟི ནཱམ ནཏྠི. ཨསཏིཙ ཨཱརམྨཎསམྤཏྟིཡཱ ཨུཔཙཱརཛ྄ཛྷཱནཾཔི ཏཱཝ ན སམྤཛྫཏི. པགེཝ ཨཔྤནཱཛྷཱནནྟི ཝུཏྟཾ པརིཀམྨནིམིཏྟཾ.ལ. ལབྦྷནྟེཝཱཏི. ཏཏྠ སབྦཏྠཱཔཱིཏི སབྦེསུཔི ཙཏྟཱལཱིསཀམྨཊྛཱནེསུ. ཡཐཱརཧནྟི ཏཾཏཾཀམྨཊྛཱནཱནུརཱུཔཾ. པརིཡཱཡེནཱཏི ཨིདཾ པན ཀསྶཙི ཨཱརམྨཎསྶ ཙཀྑུནཱ པསྶནྟསྶེཝ ཨཝིབྷཱུཏཏརཏྟཱ ཝུཏྟཾ. ཡཏྠ པན པཐམཾ སབྷཱཝདྷམྨཾ གཎྷིཏྭཱ པཙྪཱ ཏཱདིསེ ཏདཱཀཱརེ ཏཾསཎྛཱནེ པཉྙཏྟཱརམྨཎེ ཨུཔཙཱརོཝཱ ཨཔྤནཱཝཱ པཝཏྟཏི. ཏཏྠེཝ པཊིབྷཱགནིམིཏྟཾནཱམ ལབྦྷཏཱིཏི ཝུཏྟཾ པཊིབྷཱག ནིམིཏྟཾཔནཱཏིཨཱདི. ཝུཏྟམེཝཏྠཾ དལ༹ྷཾ ཀརོནྟོ ཏཏྠཧཱིཏིཨཱདིམཱཧ. ཨེཝཾ སམཐཀམྨེ པཐམཾ ཨུགྒཧཀོསལླཾ དསྶེཏྭཱ ཨིདཱནི ཨཱདིཏོ པཊྛཱཡ བྷཱཝནཱཝིདྷཱནཾ དསྶེནྟོ ཀཐནྟིཨཱདི མཱཧ. ནིམིཏྟཾ ཨུགྒཎྷནྟསྶཱཏི ཨཱརམྨཎསྶ ཡཐཱ སཎྛིཏཾ ཨཱཀཱརཾ ཙིཏྟེ ཨུཔརུཔརི ཝིབྷཱུཏཾ ཀཏྭཱ གཎྷནྟསྶ སམནུཔསྶནྟསྶ. སཱཙབྷཱཝནཱཏི ཨུགྒཧཎཱཀཱརེན པཝཏྟ ཛཝནཝཱིཐིཔརཾཔརསངྑཱཏཱ སཱ ཙིཏྟབྷཱཝནཱ པརིཀམྨབྷཱཝནཱ ནཱམ. པུནཔྤུནཾ ཀརཎཝསེན ཝཌྜྷནཱཀཱརསཎྛིཏཏྟཱ. སམུགྒཧིཏཾ ཧོཏཱིཏི ཝཏྭཱ ཡཐཱ སུཊྛུ ཨུགྒཧིཏཾ སམུགྒཧིཏཾནཱམ ཧོཏི ཏཾ དསྶེཏུཾ ཙཀྑུནཱཔསྶནྟསྶེཝམནོདྭཱརསྶ ཨཱཔཱཏམཱགཏནྟི ཝུཏྟཾ. ཏཏྠ མནོདྭཱརསྶཨཱཔཱཏམཱགཏནྟི ཙཀྑཱུནི ནིམྨིལིཏྭཱཝཱ ཨཉྙསྨིཾ ཋཱནེ ཋཏྭཱཝཱ ཨཱཝཛྫནྟསྶ ཙཀྑུནཱ དིཊྛསདིསཾ མནོདྭཱརེ པཙྩུཔཊྛིཏཾ ཧོཏི. ཨུགྒཧནིམིཏྟཾནཱམ. སུཊྛུ ཨཝིནསྶམཱནཾ ཀཏྭཱ གཧིཏཏྟཱ. སཱཙ བྷཱཝནཱ སམཱདྷིཡཏི. ན ཏཱཝ བྷཱཝནནྟརབྷཱཝཾ པཱཔུཎཱཏཱིཏི ཨདྷིཔྤཱཡོ. ཏཐཱ སམཱཧིཏསྶཱཏི ཏེན མཏྠཀཔཏྟེན པརིཀམྨསམཱདྷིནཱ སམཱཧིཏསྶ ཨེཏསྶ ཡོགིནོ. ཏཏོཔརནྟི ཨུགྒཧནིམིཏྟུཔྤཏྟི ཏོ པརཾ. བྷཱཝནམནུཡུཉྫནྟསྶ ཙིཏྟེ སནྣིསིནྣནྟི སམྦནྡྷོ. ཏཏྠ ཨནུཡུཉྫནྠསྶཱཏི ནིརནྟརཾ པདཧནྟསྶ. ཏཔྤཊིབྷཱགནྟི སབྷཱཝ དྷམྨབྷཱུཏེན ཏེན ཨུགྒཧནིམིཏྟེན སདིསཾ. ཝཏྠུདྷམྨཝིམུཙྩིཏནྟི མེགྷཝལཱཧཀནྟརཏོཝཱ རཱཧུམུཁཏོཝཱ ནིཀྑནྟཙནྡམཎྜལཾ ཝིཡ ¶ སབྷཱཝདྷམྨབྷཱུཏཱ ཨུགྒཧནིམིཏྟཏོ ཝིམུཙྩིཏྭཱ ཝིསུཾ ཨུཔཊྛིཏཾ. ཏཏོཡེཝ པཉྙཏྟིསངྑཱཏཾ ནིམིཏྟཔཉྙཏྟིཨིཏི ཀཐིཏཾ. བྷཱཝནཱ མཡནྟི ཀེཝལཾ བྷཱཝནཱཙིཏྟབལེན པསིདྡྷཾ. ཨཱལམྦཎནྟི ཏདེཝ སམུགྒཧིཏཾ ནིམིཏྟཱལམྦཎཾ ཙིཏྟེསནྣིསནྣཾསམཔྤིཏཾཧོཏཱིཏི མནོདྭཱརིཀཙིཏྟསནྟཱནེ སནྣིསིནྣཾ ནིཙྩལབྷཱཝེན སཎྛིཏཾ ཧུཏྭཱ སུཊྛུ ཨཔྤིཏཾ པཝེསིཏཾ ཧོཏི. ཏནྟི ནིམིཏྟཱལམྦཎཾ པཝུཙྩཏཱིཏི སམྦནྡྷོ. ཡསྨཱ ཙནྡམཎྜལཱདིཀསྶ ཝིཡ ཏསྶ ནིམིཏྟཱལམྦཎསྶ པརིསུདྡྷཔརིཡོདཱཏབྷཱཝེན ཨུཔཊྛིཏཏཱནཱམ ཀིལེསམལཝིཀྑམྦྷནེན པརིསུདྡྷཔརིཡོདཱཏབྷཱཝཾ པཏྭཱ ཨོབྷཱསཛཱཏསྶ ཙིཏྟསྶ ཝསེནེཝ ཧོཏི. ན ཏསྶ ཨཱལམྦཎསྶ ཝསེན. ནཧི པཉྙཏྟི དྷམྨེ ཏཱདིསོ གུཎོནཱམ ཨུཔལབྦྷཏཱིཏི. ཏསྨཱ པཊིབྷཱག ནིམིཏྟེ སམུཔྤནྣེ ནཱིཝརཎསངྑཱཏཱནཾ པཊིབནྡྷཀདྷམྨཱནཾ ཝིཀྑམྦྷིཏཏཱ སིདྡྷཱ ཧོཏཱིཏི ཝུཏྟཾ ཏཏོཔཊྛཱཡཱཏིཨཱདི. པཊིབནྡྷནྟི ནཱིཝཱརེནྟི ནིསྶརཎཔཀྑིཀཾ ཙིཏྟཾ པཱཏེནྟཱིཏི པཊིབནྡྷཱ. ནཱིཝརཎ དྷམྨཱ. ཝིསེསེན པཧཱིནཱ པཊིབནྡྷཱ ཨེཏཱཡཱཏི པཊིབནྡྷཝིཔྤཧཱིནཱ. སམཱསེཝནྟསྶཱཏི སུཊྛུ ཨཱསེཝནྟསྶ. སཏྟཝིདྷཾ ནིམིཏྟ རཀྑཎཝིདྷཱནཾ སམྤཱདེཏྭཱ ཙཀྐཝཏྟིགབྦྷཾ ཝིཡ སུཊྛུ རཀྑིཏྭཱ པུནཔྤུནཾ བྷཱཝནཱཝསེན སེཝནྟསྶཱཏི ཨཏྠོ.

ཨཱཝཱསོ གོཙརོ བྷསྶཾ, པུགྒལོ བྷོཛནཾ ཨུཏུ;

ཨིརིཡཱཔཐོཏི སཏྟེ ཏེ, ཨསཔྤཱཡེ ཝིཝཛྫཡེ.

སཔྤཱཡེ སཏྟ སེཝེཐ, ཨེཝཉྷི པཊིཔཛྫཏོ;

ནཙིརེནེཝ ཀཱལེན, ཧོཏི ཀསྶཙི ཨཔྤནཱཏི ཧི ཝུཏྟཾ.

རཱུཔཱཝཙརཔཐམཛ྄ཛྷཱནཾཨཔྤེཏཱིཏི ཀཱམཏཎྷཱཡ ཝིསཡབྷཱཝཾ ཨཏིཀྐམིཏྭཱ སཱཏིསཡཾ སཎྷསུཁུམབྷཱཝཔྤཏྟཾ ཨུཔཙཱརཛ྄ཛྷཱནཏོ སཏགུཎེནཝཱ སཧསྶགུཎེནཝཱ ཐིརཏརཛ྄ཛྷཱནངྒཡུཏྟཾ རཱུཔཱཝཙར སངྑཱཏཾ པཐམཛ྄ཛྷཱནཾ ཏསྨིཾ ནིམིཏྟེ ཨནུཔཝིསིཏྭཱ ཝིཡ ཝཏྟཏཱིཏི ཨཏྠོ. ཏམེཝ པཐམཛ྄ཛྷཱནཾ ཝསཱིབྷཱུཏཾ ཀཏྭཱཏི སམྦནྡྷོ. པཉྩསུ ཝསཱིཏཱསུ པན པཐམཛ྄ཛྷཱནཏོ ཝུཊྛཱཡ པཐམཾ ཝིཏཀྐཾ ཨཱཝཛྫཏི. ཏཏོ ཝིཙཱརཾ. ཏཏོ པཱིཏིཾ. ཏཏོ སུཁཾ. ཏཏོ སམཱདྷིཾ. ཏཏོ ¶ པུན ཝིཏཀྐཾ. ཏཏོ ཝིཙཱརནྟི ཨེཝཾ པུནཔྤུནཾ ཛྷཱནངྒཱནི ཨཱཝཛྫནྟསྶ ཡདཱ ཏཾཏཾཛྷཱནངྒཱལམྦཎཱ ཙིཏྟཝཱརཱ ཨནྟརནྟརཱ ཀཏིཔཡབྷཝངྒེཧི ཨནྟརིཏཱ ཧུཏྭཱ ནིརནྟརབྷཱུཏཱ ཝིཡ པཝཏྟནྟི. ཏདཱ ཨཱཝཛྫན པཙྩཝེཀྑན ཝསིཏཱཡོ ཝསཱིབྷཱུཏཱནཱམ ཧོནྟི. ཨེཏཱ པན སབྦཉྙུབུདྡྷཱནཾ མཏྠཀཔྤཏྟཱ ཧོནྟི. ཏེསཉྷི ཡམཀཔཱཊི ཧཱརིཡཱདིཀཱལེསུ ལཧུཀཔཝཏྟིཾ ཨིཙྪནྟཱནཾ ཏཾཏཾཛྷཱནངྒཱ རམྨཎཱཙིཏྟཝཱརཱཔི ཙཏུཔཉྩཛཝནིཀཱཨེཝ པཝཏྟནྟི. ཨནྟརབྷཝངྒཱནིཔི པཙྪིམཝཱརསྶ ཨུཔཙཱར བྷཱུཏཱནི བྷཝངྒ ཙལན སངྑཱཏཱནི དྭེཨེཝ པཝཏྟནྟི. ཡཏྠ ཨཔརཾ ཛྷཱནངྒཾ ཨཱཔཱཏ མཱགཙྪཏི. ནཧི ཨཱརམྨཎེ ཨཱཔཱཏཾ ཨནཱགཏེ བྷཝངྒཾ ཙལཏི. ནཙ ཝིནཱ བྷཝངྒཙལནེན ཨཱཝཛྫནུཔྤཏྟིནཱམ ཨཏྠཱིཏི. ཐཔེཏྭཱ སབྦཉྙུབུདྡྷེ ཨཉྙེསཾ ཝསིབྷཱཝཔཏྟཱནཾཔི ཨནྟརནྟརཱ བྷཝངྒཙཱརེ གཎནཱནཱམ ནཏྠཱིཏི པཊིསམྦྷིདཱམགྒཊྛཀཐཱཡཾ ཝུཏྟཾ. ཝིསུདྡྷིམགྒེ པན ཨཡཾ པན མཏྠཀཔྤཏྟཱཝསཱི བྷགཝཏོ ཡམཀཔཱཊིཧཱརིཡཀཱལེ ལབྦྷཏི. ཨཉྙེསཾཝཱ ཨེཝརཱུཔེ ཀཱལེཏི ཝུཏྟཾ. ཛྷཱནསྶ སཱིགྷཏརཾ སམཱཔཛྫནསམཏྠཏཱ སམཱཔཛྫནཝསཱིནཱམ. ཏེནེཝ ཧི པཱལི༹ཡཾ སམཱཔཛྫནེ དནྡྷཱཡིཏཏྟཾ ནཏྠཱིཏི ཝུཏྟཾ. ཨེསནཡོ སེསཱསུཔཱིཏི. ཏཐཱ སམཱཔཛྫིཏཾ ཛྷཱནཾ ཨཙྪརཱམཏྟཱདིཝསེན ཨཏིཔརིཏྟཀཾཔི ཁཎཾ ཐཔེཏུཾ སམཏྠཏཱ ཨདྷིཊྛཱནཝསཱིནཱམ. སམཱཔཛྫིཏཛ྄ཛྷཱནཏོ སཱིགྷཏརཾ ཝུཊྛཱཏུཾ སམཏྠཏཱ ཝུཊྛཱནཝསཱིནཱམ. པཙྩཝེཀྑནཝསཱི པན ཨཱཝཛྫནཝསིཡཱ སིདྡྷཱཡ སིདྡྷཱཨེཝ ཧོཏཱིཏི.

ཝིབྷཱཝནིཡཾ པན

ཡཏྟཀཾ ཀཱལཾ ཨིཙྪཏི. ཏཏྟཀཾ ཙིརཏརཾ ཛྷཱནཾ ཐཔེཏུཾ སམཏྠཏཱ ཨདྷིཊྛཱནཝསིཏཱནཱམཱཏིཔི ཝུཏྟཾ. ཏཐཱ པརིཙྪིནྣ ཀཱལཏོ ཨནྟོ ཨཝུཊྛཧིཏྭཱ ཡཐཱཔརིཙྪིནྣཀཱལཝསེནེཝ ཝུཊྛཱནསམཏྠཏཱ ཝུཊྛཱནཝསིཏཱནཱམཱཏི. ཏཾཔི ཡུཛྫཏིཡེཝ.

པཱལི༹ཡཉྷི པཐམཛ྄ཛྷཱནཾ ཡཏྠིཙྪཀཾ ཡདིཙྪཀཾ ཡཱཝཏིཙྪཀཾ ཨདྷིཊྛཱཏི. ཨདྷིཊྛཱནཱཡ དནྡྷཱཡིཏཏྟཾ ནཏྠཱིཏིཨཱདིནཱ སཱིགྷཏརཾཝཱ ཧོཏུ. ¶ ཙིརཏརཾཝཱ. ཡཏྟཀཾ ཀཱལཾ ཛྷཱནཾ ཐཔེཏུཾཝཱ ཡཏྟཀེ ཀཱལེ ཏཏོ ཨུཊྛཱཏུཾཝཱ ཨིཙྪཏི. ཏཏྟཀཾ ཀཱལཾ ཨནཱུནཾཝཱ ཨནདྷིཀཾཝཱ ཀཏྭཱ ཨདྷིཊྛཱཏུཾཝཱ ཝུཊྛཱཏུཾཝཱ སམཏྠཏཱཔི དསྶིཏཱཡེཝ ཧོཏཱིཏི. ཨེཝཉྩསཏི ཝུཊྛཱནཝསིཏཱཔི ཨདྷིཊྛཱནཝསིཏཱཡ སིདྡྷཱཡ སིདྡྷཱཨེཝཱཏི ཏཱསཾ དྭིནྣཾ ཝིསེསཀཔྤནཱཔི ནིཔྤཡོཛནཱ ཧོཏཱིཏི དཊྛབྦཱ. ཝསནཾ ཝསཱི. སམཏྠཏཱཏི ཨཏྠོ. ཨིསྶར བྷཱཝོཏི ཝུཏྟཾ ཧོཏི. ཝསཱིཨེཝ ཝསིཏཱ. ཡཐཱ དེཝོཨེཝ དེཝཏཱཏི. ཀཏྭཱ པདཧཏོཏི སམྦནྡྷོ. ཝིཏཀྐཱདིཀཾ ཨོལཱ༹རིཀངྒཾ པཧཱནཱཡཱཏི ཨེཏྠ པཐམཛ྄ཛྷཱནཾ ཏཱཝ ཝསཱིབྷཱུཏཾ ཀཏྭཱ ཋིཏསྶ ཝིཏཀྐོ ཨོལཱ༹རིཀཏོ ཨུཔཊྛཱཏི. ཏདཱ ཨཧོཝཏམེ ཨཝིཏཀྐཾ ཛྷཱནཾ ཨསྶཱཏི ཨེཝམསྶ ཨཛ྄ཛྷཱསཡོ སཎྛཱཏི. ཏདཱ ཨཝིཏཀྐཾ ཛྷཱནཾ སམཱཔཛྫིསྶཱམཱིཏི པུན ཏསྨིཾ པཊིབྷཱགནིམིཏྟེ པརིཀམྨཾ ཀརོནྟསྶ སཱ བྷཱཝནཱ ཝིཏཀྐཝིརཱགབྷཱཝནཱནཱམ ཧོཏི. སཱཔི ཡཱཝ ཝིཏཀྐེ ནིཀནྟི ན པརིཡཱདིཡཏི, ཏཱཝ པརིཀམྨབྷཱཝནཱནཱམ. པརིཡཱདིནྣཱཡ པན ཝིཏཀྐནིཀནྟིཡཱ ཨུཔཙཱར བྷཱཝནཱནཱམ ཧོཏི. ཨེསནཡོ སེསཛ྄ཛྷཱནུཔཙཱརེསུཔི. ཨེཝཾ ཏཾཏཾཛྷཱནངྒཝིརཱགབྷཱཝནཱབལེན ཝིཏཀྐཱདིཀསྶ ཨོལཱ༹རིཀསྶ ཏསྶ ཏསྶ ཛྷཱནངྒསྶ པཛཧནཏྠཱཡ. ཝིཙཱརཱདིསུཁུམངྒུཔྤཏྟིཡཱཏི ཝིཙཱརཱདཱིནཾ སུཁུམཱནཾ ཙཏུནྣཾ ཏིཎྞཾ དྭིནྣཾ པུན དྭིནྣཾཝཱ ཛྷཱནངྒཱནཾ ཏེན ཏེན ཝིཏཀྐཱདིནཱ ཨོལཱ༹རིཀེན ཨངྒེན ཝིནཱ པུན ཨུཔྤཏྟིཡཱ. པཱཧཏོཏི པདཧནྟསྶ. པདྷཱནནཱམཀཾ ཨཱཏཱཔཝཱིརིཡཾ ཀརོནྟསྶཱཏི ཨཏྠོ. དུཏཱིཡཛ྄ཛྷཱནཱདཡོཏི དུཏཱིཡཛ྄ཛྷཱནཱདཱིནི སེསརཱུཔཱཝཙརཛ྄ཛྷཱནཱནི. ཡཐཱརཧནྟི ཨིདཾ དྭཱཝཱིསཀམྨཊྛཱནེསུ དུཏཱིཡཛ྄ཛྷཱནཱདཱིནཾ ཨནུརཱུཔཱནི ཀསིཎཨཱནཱཔཱཎཱནི སནྡྷཱཡ ཝུཏྟཾ. ཨཝསེསེསུ པན ཨཊྛཱརསཀམྨཊྛཱནེསུ ཡསྨཱ ཨརཱུཔཛ྄ཛྷཱནཱནི ནཱམ ཨཱརམྨཎཱཏིཀྐམནཝསེནེཝ པཝཏྟནྟི. ཏདཏིཀྐམནཏྠཉྩ ཀསིཎུགྒྷཱཊནཾནཱམ ཧོཏི. ཏསྨཱ ཡེསུ ཏདུགྒྷཱཊནཾ སམྦྷཝཏི. ཏཱནིཡེཝ ཀསིཎཱནི དསྶེཏུཾ ཨཱཀཱསཝཛྫིཏཀསིཎེསཱུཏི ཝུཏྟཾ. ཨཱཀཱསཀསིཎཉྷི ཨུགྒྷཱཊཱིཡམཱནཾཔི ཨཱཀཱས མེཝ ཧོཏཱིཏི ནཏྠི ཏཏྠ ཏདཏིཀྐམནསམྦྷཝོཏི. ཨུགྒྷཱཊེཏྭཱཏི ཡཐཱདིཊྛེ ¶ ཀསིཎནིམིཏྟེ ཀསིཎནིམིཏྟསཉྙཾ ཨཀཏྭཱ ཏཏྠ ཨཱཀཱསཾ ཨནནྟཾ ཨཱཀཱསཾ ཨནནྟནྟི ཨཱཀཱསསཉྙཾ པཝཏྟེནྟསྶ ཙིཏྟེ ཏཾཀསིཎནིམིཏྟཾ ཨནྟརདྷཱཡཏི. ཏཔྤམཱཎཾ ཨཱཀཱསམེཝ ཨུཔཊྛཱཏི. ཨེཝཾ ཀསིཎསཉྙཱཝིདྷམནེན ཨཱཀཱསསཉྙཱཔཝཏྟནེནཙ ཡཾཀིཉྩི ཀསིཎཾ ཨུགྒྷཱཊེཏྭཱ ཝིཡོཛེཏྭཱཏི ཨཏྠོ. ལདྡྷཾ ཨཱཀཱསཾ ཨཱརབྦྷཱཏི པཱཊྛསེསེན སམྦནྡྷོ. ཨེསནཡོ པཐམཱ རུཔྤཝིཉྙཱཎནྟིཨཱདཱིསུཔི. ཨནནྟཝསེནཱཏི ཨནནྟཾ ཨཱཀཱསནྟི ཨེཝཾ པཝཏྟམནསིཀཱརཝསེན. སནྟམེཏཾ པཎཱིཏམེཏནྟི པརིཀམྨཾ ཀརོནྟསྶཱཏི ཨེཏྠ ཏཐཱ སམྦྷཱཝེཏྭཱ པརིཀམྨཾ ཀརོནྟསྶཔི ཨཱརམྨཎསྶ སམཏིཀྐནྟཏྟཱ ཨུཔརི ཛྷཱནཾ ཧོཏིཡེཝཱཏི ཝུཏྟཾ ཙཏུཏྠཱརུཔྤམཔྤེཏཱིཏི. པརིཀམྨཾཀཏྭཱཏི སོ བྷགཝཱ ཨིཏིཔི ཨརཧནྟིཨཱདིནཱ སམནུསྶརཎཔརིཀམྨཾ ཀཏྭཱ. ཏསྨིནྟི ཏསྨིཾ བུདྡྷགུཎཱདིཀེ ཨཱལམྦཎེ. བྷཱུམཏྠེ ཙེཏཾ བྷུམྨཝཙནཾ. ནིམིཏྟེཏི ཏསྶ ཨཱརམྨཎསྶ ཨཱཀཱརསངྑཱཏེ ནིམིཏྟེ. བྷཱཝལཀྑཎེ ཙེཏཾ བྷུམྨཝཙནཾ. སཱདྷུཀམུགྒཧིཏེཏི ཨཱརམྨཎསྶ ཝིབྷཱུཏཏར ཝསེནཝཱ ཙིཏྟསྶ ཏསྨིཾ ནིནྣཔོཎཔབྦྷཱརཝསེནཝཱ སུཊྛུ ཨུགྒཧིཏེ. ཨུཔཙཱརོཙ སམྤཛྫཏི ཨརིཡསཱཝཀཱནཾ དིཊྛསཙྩཱནནྟི ཨདྷིཔྤཱཡོ. ཨིཏརེསཾཔི ཝཱ མརཎསཉྙཱཝཝཏྠཱནེསཱུཏི. ཨེཏྠཙ ནཱིཝརཎཝིཀྑམྦྷནེན ཛྷཱནངྒཔཱཏུབྷཱཝེནཙཨུཔཙཱརསམྤདཱ ཝེདིཏབྦཱ. ཨེཝཾ ཙཏྟཱལཱིསཀམྨཊྛཱནེསུཡཐཱརཧཾསམཐཛ྄ཛྷཱནཱནཾ པཝཏྟིཾ དསྶེཏྭཱཨིདཱནིཏེསུསམཐཛ྄ཛྷཱནེསུཀསིཎཛ྄ཛྷཱནཱནཾ ནིསནྡབྷཱུཏཾཨབྷིཉྙཱ པཝཏྟིཾ དསྶེཏུཾ ཨབྷིཉྙཱཝསེནཔཝཏྟམཱནནྟིཨཱདི ཝུཏྟཾ. ཏཏྠ ཡོ ཀཏཱདྷིཀཱརོ ཧོཏི. ཨཱསནྣབྷཝེ སམཐཛ྄ཛྷཱནེསུ ཀཏཱབྷིཡོགོཝཱ ཧོཏི, པཱུརིཏབོདྷིསམྦྷཱརོ མཧཱཔུརིས ཛཱཏིཀོཝཱ. ཏསྶ ཨཊྛཝིདྷེསུ ནཝཝིདྷེསུཝཱ སམཐཛ྄ཛྷཱནེསུསིཛ྄ཛྷ མཱནེསུ ཨབྷིཉྙཱཔི སིཛ྄ཛྷཏིཡེཝ. རཱུཔཛ྄ཛྷཱནམཏྟེསུཔི སིཛ྄ཛྷནྟེསུ སིཛ྄ཛྷཏི ཡེཝཱཏིཔི ཝདནྟི. ཏེནེཝ ཧི ཨཊྛསཱལིནིཡཾ ཝིསུདྡྷིམགྒེཙ ཨཱརུཔྤཛ྄ཛྷཱནཱནཾཔཙྩཡབྷཱཝཾཨནུཔགཏསྶཔིཨཱཀཱསཀསིཎཛ྄ཛྷཱནསྶ ཨབྷིཉྙཱཔཱདཀཏཱསམྦྷཝོ ཝུཏྟོཏི. དཱིགྷནིཀཱཡཊྛཀཐཱཡཾ པན ནཧི ཨཊྛསུ སམཱཔཏྟཱིསུ ཙུདྡསཧཱཀཱརེཧི ཙིཎྞཝསཱིབྷཱཝཾ ཝིནཱ ཨུཔརི ¶ ཨབྷིཉྙཱདྷིགམོ ཧོཏཱིཏི ཝུཏྟཾ. ཏཾ པན ཐཔེཏྭཱ པུརིས ཝིསེསེ ཨཝསེསཱནཾ བཧཱུནཾ ཨཱདིཀམྨིཀཀུལཔུཏྟཱནཾ སཱདྷཱརཎཝསེན ཝུཏྟནྟི ཡུཏྟཾ. ཏེནེཝ ཧི ཝིསུདྡྷིམགྒེ ཨིམེཧི པན ཙུདྡསཧི ཨཱཀཱརེཧི ཙིཏྟཾ ཨཔརིདམེཏྭཱ པུབྦེ ཨབྷཱཝིཏབྷཱཝནོ ཨཱདིཀམྨིཀོ ཡོགཱཝཙརོ ཨིདྡྷིཝིཀུབྦནཾ སམྤཱདེསྶཏཱིཏི ནེཏཾ ཋཱནཾ ཝིཛྫཏཱིཏི ཝུཏྟཾ. ཏསྨཱ ཏཱདིསཱནཾ ཨཊྛསུ སམཱཔཏྟཱིསུ ཙིཎྞཝསཱིབྷཱཝཱནཾ ཨབྷིཉྙཱཀམྨེ ཨཱདིཀམྨིཀཀུལཔུཏྟཱནཾ ཀསིཎཱ ནུལོམཏོ ཀསིཎཔཊིལོམཏོཏིཨཱདིནཱ ནཡེན ཝུཏྟེཧི ཙུདྡསཧི ཨཱཀཱརེཧི ཨཏྟནོ རཱུཔཔཉྩམཛ྄ཛྷཱནཙིཏྟཾ པརིདམེཏྭཱ ཏིཀྑཾ སཱུརཾ ཨབྷིནཱིཧཱརཀྑམཾ ཀཏྭཱ ཨིདཱནི ཨིདྡྷིཝིཀུབྦནཾ ཀརིསྶཱ མཱིཏི ཨཱརབྷནྟཱནཾ ཨབྷིཉྙཱཝསེན པཝཏྟམཱནཾ པན རཱུཔཱཝཙརཔཉྩ མཛ྄ཛྷཱནཾ རཱུཔཱདཱིསུ ཚསུ ཨཱལམྦཎེསུ ཡཐཱརཧཾ ཨཔྤེཏཱིཏི ཡོཛནཱ ཝེདིཏབྦཱ. ཨབྷིཉྙཱཔཱདཀཔཉྩམཛ྄ཛྷཱནཱ ཝུཊྛཧིཏྭཱཏི ཨབྷིཉྙཱཡ པཱདཀཏྠཱཡ ཡཾཨབྷིཉྙཱཛཱཏིཀཾ རཱུཔཱཝཙརཔཉྩམཛ྄ཛྷཱནཾ སབྦཔཐམཾ སམཱཔཛྫིཡཏི. ཏཏོ བྷཝངྒཔཝཏྟིཝསེན ཝུཊྛཧིཏྭཱ. ཨདྷིཊྛཱཏབྦནྟི ཨདྷིཊྛེཡྻཾ. སཝཏྠུཀཾ སཏརཱུཔསཧསྶརཱུཔཱདིཀཾ ནིམྨིཏརཱུཔཾ. ཏཾ ཨདྷིཊྛེཡྻཾ ཨཱདི ཡསྶ ཨཝཏྠུཀསྶ ཨཱཝིབྷཱཝཏིརོབྷཱཝཱདིཀསྶ ཀམྨསྶཱཏི ཨདྷིཊྛེཡྻཱདིཀཾ. ཨཱཝཛྫིཏྭཱ པརིཀམྨཾཀརོནྟསྶཱཏི ཨེཏྠ ཨིདྡྷིཝིདྷེ ཏཱཝ ཡཾཡཾསཏཱདིཀཾ ནིམྨིཏརཱུཔཾཝཱ ཨཱཝིབྷཱཝཱདིཀཾ ནིམྨིཏཀམྨཾཝཱ ནིཔྥཱདེཏུཾ ཨིཙྪཏི. ཏཾ ཏཾ ཨཝཛྫིཏྭཱ སལླཀྑེཏྭཱ སཏཾ ཧོམི སཧསྶཾ ཧོམཱིཏིཝཱ སཏཾ ཧོཏུ སཧསྶཾ ཧོཏཱུཏིཝཱ ཨིདཉྩིདཉྩ ཧོཏུ ཨེཝཉྩེཝཉྩ ཧོཏཱུཏིཝཱ པརིཀམྨཾ ཀརོནྟསྶ. དིབྦསོཏཱདཱིསུ པན ཡཾ ཡཾ ཨཱརམྨཎཾ སོཏུཾཝཱ པསྶིཏུཾཝཱ ཛཱནིཏུཾཝཱ ཨནུསྶརིཏུཾཝཱ ཨིཙྪཏི. ཏཾ ཏཾ སལླཀྑེཏྭཱ ཨསུཀསྶ ཨསུཀཱནཾཝཱ སདྡཾ སུཎོམཱིཏིཨཱདིནཱ པརིཀམྨཾ ཀརོནྟསྶ. ཨཊྛཀཐཱཡཾ པན པརིཀམྨཾ ཀཏྭཱ པུན པཱདཀཛ྄ཛྷཱནསམཱཔཛྫནཾ ཨཱགཏམེཝ. ཡཐཱཧ ཨབྷིཉྙཱཔཱདཀཛ྄ཛྷཱནཾ སམཱཔཛྫིཏྭཱ ཝུཊྛཱཡ སཙེ སཏཾ ཨིཙྪཏི. སཏཾ ཧོམཱིཏི པརིཀམྨཾ ཀཏྭཱ པུན ཨབྷིཉྙཱཔཱདཀཾ ཛྷཱནཾ སམཱཔཛྫིཏྭཱ ཝུཊྛཱཡ ཨདྷིཊྛཱཏི. ཨདྷིཊྛཱནཙིཏྟེན སཧེཝ སཏཾ ཧོཏཱིཏི. ¶ ཏཏྠཙ ཨཱདིཏོ པཱདཀཛ྄ཛྷཱནསམཱཔཛྫནཾ པརིཀམྨ ཙིཏྟསྶ སམཱདཱནཏྠཱཡ ཧོཏི. པཙྪིམཾ པན ཨབྷིཉྙཱཡ ཨནུ བལཔྤདཱནཏྠཱཡཱཏི. ཏཐཱ ཧི པཱདཀཛ྄ཛྷཱནབལེན སུཊྛུ སམཱཧིཏཾ པརིཀམྨཙིཏྟཾནཱམ ཨཏྟནོ ཝིསཡེ ཨབྷིཉྙཱཙིཏྟགཏིཀཾ ཧོཏི. པུབྦེནིཝཱསཱནུསྶརཎཀཱལེ ཏེནེཝ ཙིཏྟེན ཏསྨིཾ བྷཝེ ཨཏཱིཏཾ དྷམྨཛཱཏཾ ཡཱཝ པཊིསནྡྷིཡཱ ཛཱནཱཏི. ཏེནེཝ ཧི ཨཊྛཀཐཱཡཾ ཏཾསམྤཡུཏྟཾ ཉཱཎཾ པརིཀམྨསམཱདྷིཉཱཎནྟི ཝུཏྟཾ. ཨཏཱིཏཾསཉཱཎནྟིཔི ཝུཙྩཏཱིཏི. སེསཱབྷིཉྙཱསུཔི ཏསྶ ཉཱཎསྶ ཝིསཡཝིསེསོ ཡཐཱརཧཾ ཝཏྟབྦོཏི. ཐེརེན པན པཙྪིམཾ པཱདཀཛ྄ཛྷཱནསམཱཔཛྫནཾནཱམ ན སབྦེསཾ ཧོཏི. ན ཧི ཨབྷིཉྙཱསུ ཝསཱིབྷཱཝཔཏྟཱནཾ པུན པཱདཀཛ྄ཛྷཱནེན ཀིཙྩཾ ཨཏྠཱིཏི ཀཏྭཱ ཏཾ ཨིདྷ ནགཧིཏནྟི དཊྛབྦཾ. རཱུཔཱདཱིསུཨཱལམྦཎེསུཡཐཱརཧམཔྤེཏཱིཏི ཨེཏྠ ཨིདྡྷིཝིདྷཉཱཎཾ ཏཱཝ ཏེཀཱལིཀབྷཱུཏེསུ ཚསུ ཨཱརམྨཎེསུ པཝཏྟཏི. ཏཉྷི རཱུཔཱདཱིསུ ཚསུ ཨཱརམྨཎདྷམྨེསུ ཡཾ ཡཾ ནིཔྥཱདེཏི. ཏཾ ཏཾ ཨཱརམྨཎཾ ཀཏྭཱ པཝཏྟཏི. པཱདཀཛ྄ཛྷཱནཙིཏྟཾ པན ཀཱཡགཏིཀཾ ཨདྷིཊྛཧིཏྭཱ དིསྶམཱནེནཀཱཡེན ཨཱཀཱསེགམནཀཱལེ ཨཏཱིཏཾ པཱདཀཛ྄ཛྷཱནཙིཏྟཾ ཨཱརབྦྷ པཝཏྟཏི. ཀཱཡཾ ཙིཏྟགཏིཀཾ ཨདྷིཊྛཧིཏྭཱ ཨདིསྶམཱནེན ཀཱཡེན གམནཀཱལེ པཙྩུཔྤནྣཾ རཱུཔཀཱཡཾ ཨཱརབྦྷ པཝཏྟཏི. ཏཐཱཔཝཏྟམཱནསྶ པན ཏསྶ ཉཱཎསྶ ཀིཉྩིརཱུཔཾ ཨཱརམྨཎ མཏྟཾ ཧོཏི. ཀིཉྩི ཨཱརམྨཎཔུརེཛཱཏཾ. ཀིཉྩི ཝཏྠཱརམྨཎ པུརེཛཱཏཾ ཧོཏཱིཏི དཊྛབྦཾ. ཨནཱགཏེ ཨིདཾནཱམ ཧོཏཱུཏི ཨདྷིཊྛཱན ཀཱལེ ཨནཱགཏཾ ཏཾཏཾརཱུཔདྷམྨཾ ཨཱརབྦྷ པཝཏྟཏཱིཏི. པཙྩུཔྤནྣོ སདྡོ དིབྦསོཏསྶ ཨཱརམྨཎཾ ཧོཏི. ཨཏཱིཏེ སཏྟདིཝསཱནི ཨནཱགཏེ སཏྟདིཝསཱནཱིཏི ཨེཏྠནྟརེ ཀཱལེ ཨཏཱིཏཱ ནཱགཏཔཙྩུཔྤནྣབྷཱུཏཾ པརསྶཙིཏྟཾ ཙཏྟཱརོཝཱ ཁནྡྷཱ ཙེཏོཔརིཡ ཉཱཎསྶ. ཙིཏྟཉྷི ཛཱནནྟོ ཏཾ སམྤཡུཏྟདྷམྨཾཔི ཨིཙྪནྟོ ཛཱནིསྶཏིཡེཝ. ཨེཝཉྩ ཀཏྭཱ པཊྛཱནེ ཀུསལཱ ཁནྡྷཱ ཙེཏོ པརིཡཉཱཎསྶ ཡཐཱཀམྨུཔགཉཱཎསྶ ཨཱརམྨཎཔཙྩཡེན པཙྩཡོཏི ཉཱཎདྭཡཾ ཨེཀཏོ ཀཏྭཱ ཝུཏྟཾ. ཨེཏྠཙ ཨཊྛཀཐཱཡཾ ཏཱཝ པརཙིཏྟསྶ པཙྩུཔྤནྣཱལམྦཎཏཱནཱམ སནྟཏིཝསེནཝཱ ཨདྡྷཱ ཝསེནཝཱ ¶ ཡོཛིཏཱ. ཡདི ཧི ཁཎིཀཝསེན ཡོཛེཡྻ. ཨཱཝཛྫནེ པཙྩུཔྤནྣཾ ཡཾཀིཉྩི ཨེཀཾ ཙིཏྟཾ ཨཱཝཛྫེཏྭཱ ནིརུདྡྷེ ཛཝནཱནིཔི ཏདེཝ ཨཱཝཛྫནེན སདྡྷིཾ ནིརུདྡྷཾ ཨཏཱིཏཾ གཎྷནྟཱིཏི ཏཱནི ཀཱལཏོ ཨཱཝཛྫནེན སཧ བྷིནྣཱལམྦཎཱནི ནཱམ ཧོནྟི. ནཙ ཨནིཊྛེ མགྒཕལཝཱིཐིཏོ ཨཉྙསྨིཾ ཋཱནེ ཀཱལམཏྟེནཱཔི ཏེསཾ ཏེན སཧ བྷིནྣཱལམྦཎཏཱ ཨཊྛཀཐཱཙརིཡེཧི ཨནུ མཏཱཏི. ཏསྨཱ ཨཱིདིསེསུ ཋཱནེསུ པཙྩུཔྤནྣཾནཱམ སནྟཏིཝསེན ཨདྡྷཱཝསེནཙ གཧེཏུཾ ཡུཏྟནྟི. མཱུལཊཱིཀཱཡཾ པན ཁཎིཀཔཙྩུཔྤནྣ ཝསེནེཝ ཡོཛིཏཾ. ནཧི ཨབྷིདྷམྨེ ཨཏཱིཏཱརམྨཎཏྟིཀཾ སནྟཏི ཨདྡྷཱནཝསེནེཝ ཝུཏྟནྟི སཀྐཱ ཝཏྟུཾ. ཨིཏརཐཱ པཙྩུཔྤནྣོ དྷམྨོ པཙྩུཔྤནྣསྶ དྷམྨསྶ ཨནནྟརཔཙྩཡེན པཙྩཡོ ཨཱསེཝནཔཙྩཡེན པཙྩཡོཏི ཝཏྟབྦོ སིཡཱ. ན ཏུ ཝུཏྟོ. ཨཏཱིཏོ དྷམྨོ པཙྩུཔྤནྣསྶ དྷམྨསྶ ཨནནྟརཔཙྩཡེན པཙྩཡོ ཨཱསེཝནཔཙྩཡེན པཙྩཡོཏིཙྩེཝ པན ཝུཏྟོ, ཏསྨཱ ཨཱཝཛྫནཱདཱིནི སབྦཱནི ཙིཏྟཱནི པཙྩེཀཾ ཨཏྟནཱ ཁཎཝསེན སཧུཔྤནྣཱནི པརསྶ ཙིཏྟཱནིགཎྷནྟཱིཏི ཡུཏྟཾ, ནཙ ཏཱནི དྷམྨཏོ བྷིནྣཱ ལམྦཎཱནིནཱམ ཧོནྟི. གཧཎཱ ཀཱརསྶ ཨབྷིནྣཏྟཱ. ཨཱཝཛྫནཾཔི ཧི ཙིཏྟནྟེཝ ཨཱཝཛྫཏི. ཛཝནཱནིཙ ཙིཏྟཾ ཙིཏྟནྟེཝ ཛཝནྟི. ཏཱནིཙ སབྦཱནི ཙིཏྟཱནིཨེཝ ཧོནྟཱིཏི. ཨཏཱིཏཱནནྟར ཙུཏིཏོ པན པཊྛཱཡ ཨཏཱིཏཱ ཁནྡྷཱ ཁནྡྷུཔནི བནྡྷཱ ནཱམ གོཏྟཀསིཎ ནིམིཏྟཱདིཀཱ པཉྙཏྟིཡོ ནིབྦཱནཉྩ པུབྦེནིཝཱསཉཱཎསྶ ཨཱརམྨཎཾ ཧོཏི. པཙྩུཔྤནྣཾ རཱུཔཱརམྨཎཾ དིབྦཙཀྑུསྶཱཏི ཨེཝཾ རཱུཔཱདཱིསུ ཚསུ ཨཱལམྦཎེསུ ཡཐཱརཧ མཔྤེཏཱིཏི. ཨིདཱནི ཨབྷིཉྙཱཝསེན པཝཀྑསྶ ཏསྶ པཉྩམཛ྄ཛྷཱནསྶ ཀིཙྩབྷེདེན པབྷེདཾ དསྶེཏུཾ ཨིདྡྷིཝིདྷནྟིཨཱདིགཱཐ མཱཧ. ཏཏྠ ཡཾ ཡཾ ཨདྷིཊྛཱཏི. ཡཐཱ ཡཐཱཙ ཨདྷིཊྛཱཏི. ཏསྶ ཏསྶ ཏཐཱ ཏཐཱཝཱ ཨིཛ྄ཛྷན སངྑཱཏོ ཝིདྷོ ཀོཊྛཱསོ པཀཱརོཝཱ ཨེཏསྶཱཏི ཨིདྡྷིཝིདྷཾ. ཏཾ པན ཏིཝིདྷཾ ཨདྷིཊྛཱ ནིདྡྷི ཝིཀུབྦནིདྡྷི མནོམཡིདྡྷི ཝསེན. ཏཏྠ ཨཏྟནོ པཀཏིཝཎྞཾ ཨཝིཛཧིཏྭཱ ཏསྶེཝ སཏ སཧསྶཱདི བཧུབྷཱཝ ཀརཎ ཝསེནཝཱ ཨཱཀཱསགམནཱདིཝསེན ཝཱ བཧིདྡྷཱ ནཱནཱཝཎྞ པཱཊིཧཱརིཡ ¶ དསྶན ཝསེནཝཱ པཝཏྟིཏཱ ཨིདྡྷི ཨདྷིཊྛཱནིདྡྷིནཱམ. པཀཏིཝཎྞཾ པན ཝིཛཧིཏྭཱ ཨཏྟཱནམེཝ ཀུམཱརཝཎྞནཱགཝཎྞཱདིཀཾ ཀཏྭཱ དསྶནཝསེན པཝཏྟིཏཱ ཨིདྡྷི ཝིཀུབྦནིདྡྷིནཱམ. ཨཏྟནོ སརཱིརབྦྷནྟརེ ཨཉྙཾ སབྦསོ ཨཏྟནཱ སདིསཾ སརཱིརཾ ནིམྨིནིཏྭཱ ནཱིཧརིཏྭཱ དསྶནཝསེན པཝཏྟིཏཱ ཨིདྡྷི མནོམཡིདྡྷིནཱམ. དིཝེ བྷཝཾ དིབྦཾ. དེཝལོཀེ ཛཱཏནྟི ཨཏྠོ. དིབྦཉྩ ཏཾ སོཏཉྩཱཏི དིབྦསོཏཾ. དེཝཱནཾ ཨུལཱ༹རཀམྨནིབྦཏྟཱ དཱུརེཔི པཊིཙྪནྣེཔི ཨཱརམྨཎསམྤཊིཙྪནསམཏྠཾ པསཱདསོཏཾ. དིབྦསོཏསདིསཏྟཱ པན ཨིདཾ ཨབྷིཉྙཱཉཱཎཾཔི དིབྦསོཏནྟི ཝུཙྩཏི. ཀསིཎཛ྄ཛྷཱན སངྑཱཏེནཝཱ དིབྦཝིཧཱརེན པཊིལདྡྷཏྟཱ སཡཉྩ ཏསྨིཾ དིབྦཝིཧཱརེ པརིཡཱཔནྣཏྟཱ དིབྦཉྩ ཏཾ སོཏཉྩཱཏི དིབྦསོཏཾ. པརསྶ ཙིཏྟཾ ཝིཛཱནནྟི ཨེཏེནཱཏི པརཙིཏྟཝིཛཱནནཾ. ཏདེཝ ཙེཏོཔརིཡཱཡནྟི པརིཙྪིཛྫ ཛཱནནྟི ཨེཏེནཱཏི ཀཏྭཱ ཙེཏོཔརིཡཉཱཎནྟིཔི ཝུཙྩཏི. པུབྦེ ནིཝཱསོ ཝུཙྩཏི ཨཏཱིཏབྷཝེསུ ཨཏྟནོ ཚསུ དྭཱརེསུ ཨཱཔཱཏཾ ཨཱགཏཱ སུཊྛུ ཝིདིཏཱ དྷམྨཱ. པུབྦེ ཨཏཱིཏཛཱཏཱིསུ གོཙར ནིཝཱསཝསེན ནིཝསིཾསུ ཨཏྟནོ ཚདྭཱརིཀཱནི ཙིཏྟཱནི ཨེཏྠཱཏི ཀཏྭཱ. སབྦཉྙུབུདྡྷཱནཾ པན པརེསཾ ཚདྭཱརགཧིཏཱཔི དྷམྨཱ པུབྦེ ནིཝཱསོ ཧོཏིཡེཝ, པུབྦེ ནིཝཱསསྶ ཨནུསྶརཎཾ པུབྦེནིཝཱསཱནུསྶཏི. ཨིདྷ པན ཏཾ སམྤཡུཏྟཉཱཎཾ ཨདྷིཔྤེཏཾ. པུབྦེ ཝུཏྟནཡེན དིབྦཉྩ ཏཾ ཙཀྑུཙཱཏི དིབྦཙཀྑུ. ཏཾ སདིསཏྟཱ ཨིདཾ ཨབྷིཉྙཱཉཱཎཾཔི དིབྦཙཀྑཱུཏི ཝུཙྩཏི. དིབྦཝིཧཱར ཝསེན པཊིལདྡྷཏྟཱ སཡཉྩ དིབྦཝིཧཱརསནྣིསྶིཏཏྟཱ དིབྦཉྩ ཏཾ ཙཀྑུཙཱཏི དིབྦཙཀྑུ. ཡཐཱཀམྨུཔགཉཱཎཾ ཨནཱགཏཾསཉཱཎནྟི ཨིམཱནི དྭེ ཉཱཎཱནི ཨིམསྶེཝ པརིབྷཎྜཉཱཎཱནིནཱམ. ནཧི ཏེསཾ པཊིལཱབྷཏྠཱཡ ཝིསུཾ ཙིཏྟཔརིདམནཔརིཀམྨཾནཱམ ཨཏྠི. དིབྦཙཀྑུཉཱཎེ པཊིལདྡྷེ ཏེསཾཔི པཊིལདྡྷཏྟཱཏི. ཏཏྠ དིབྦཙཀྑུནཱ ནིརཡེསུ དུཀྑཾ དེཝེསུཝཱ སུཁཾ ཨནུབྷཝནྟེ སཏྟེ དིསྭཱ ཏེསཾ ཨཏཱིཏཾ ཀམྨཾ ཛཱནིསྶཱམཱིཏི པརིཀམྨཾ ཀརོནྟསྶ ཏཾ ཀམྨཱརམྨཎཾ ཡཐཱཀམྨུཔགཉཱཎཾ པཝཏྟཏི. ཏཏོ ཙཝིཏྭཱ ཀཏྠ བྷཝིསྶནྟཱིཏི ཏེསཾ ཨནཱགཏེ པཝཏྟིཾ པསྶིསྶཱམཱིཏི པརིཀམྨཾ ¶ ཀརོནྟསྶ ཏེསཾ ཨནཱགཏཁནྡྷཱརམྨཎཾ ཨནཱགཏཾསཉཱཎཾ པཝཏྟཏི. པུབྦེ ནིཝཱསཱནུསྶཏི ཉཱཎཾ ཝིཡཙ སབྦཾཔི ཨནཱགཏདྷམྨཛཱཏཾ ཨེཏསྶ ཨཱརམྨཎཾ ཧོཏིཡེཝ. ཨེཏཉྷི ཨཏྟནོ ཝིསཡེ སབྦཉྙུཏཉཱཎགཏིཀནྟི ཨཊྛཀཐཱཡཾ ཝུཏྟཾ.

ཝིབྷཱཝནིཡཾ པན

ཨནཱགཏེ སཏྟདིཝསཏོ པཊྛཱཡ ཙིཏྟཙེཏསིཀདྷམྨཱ དུཏཱིཡདིཝསཏོ པཊྛཱཡ ཡཾཀིཉྩི ཨཱརམྨཎཾ ཨེཏསྶ ཝིསཡོཏི ཨདྷིཔྤེཏཾ. ཏམྤི ཡུཏྟཾཝིཡ དིསྶཏི.

ནཧི བྷཝནྟརེཔི ཨནཱཝཏདྷམྨེ ཛཱནིཏུཾ སམཏྠཾ ཨེཏཾ ཨིམསྨིཾ བྷཝེ ཨནཱགཏདྷམྨེ ནཛཱནཱཏཱིཏི སཀྐཱ བྷཝིཏུཾ. ཡཐཱ ཙེཏཾ, ཏཐཱ པུབྦེནིཝཱསཉཱཎཾཔི ཨིམསྨིཾ བྷཝེ པརསནྟཱནགཏེ ཨཏཱིཏདྷམྨེཏི. པཱལི༹ཡཾ པན ཨཊྛཀཐཱསུཙ བྷཝནྟརགཏདྷམྨེཧི ཨེཝ ཉཱཎདྭཡཾ ཡོཛིཏཾ. ཏཾ པན ཨསཱདྷཱརཎཀཱལཝསེན ཨཱནུབྷཱཝཝིསེསཔཱཀཊཏྠཾ ཡོཛིཏནྟི ཡུཏྟཾ སིཡཱཏི. གོཙརབྷེདོཏི དསཀསིཎཱདཱིསུ གོཙརེསུ སམཐཛ྄ཛྷཱནཱནཾ པཝཏྟིབྷེདོ.

སམཐཀམྨཊྛཱནནཡོ.

༡༧༡. སབྦལོཀིཡམཧཱཛནེཧི ཡཐཱདིཊྛཾ པུགྒལསཏྟཨིཏྠི པུརིསཱདིཀཾ ནིཙྩ དྷུཝ སུཁ ཨཏྟ ནིམིཏྟཉྩ ཨཏིཀྐམིཏྭཱ ཝིསེསེན པསྶནྟི ཨེཏཱཡཱཏི ཝིཔསྶནཱ. ཀིརིཡཱ ཀམྨཾ. བྷཱཝནཱཔཡོགོ. ཝིཔསྶནཱཡ ཀམྨཾ ཝིཔསྶནཱཀམྨཾ. ཝིཔསྶནཱ ཨེཝ ཝཱ ཀམྨནྟི ཝིཔསྶནཱ ཀམྨཾ. ཝིཔསྶནཱཀམྨསྶ ཋཱནཾ ཨདྷིཊྛཱནཾ བྷུམཱིཏི ཝིཔསྶནཱཀམྨཊྛཱནཾ. ཁནྡྷཱདིདྷམྨཛཱཏཾ. ཝིཔསྶནཱ ཀམྨམེཝ ཝཱ ཨུཏྟརུཏྟརསྶ བྷཱཝནཱ ཝིསེསསྶ ཨཱནིསཾསཝིསེསསྶཝཱ ཋཱནཾ ཨཱསནྣཀཱརཎནྟི ཝིཔསྶནཱཀམྨཊྛཱནཾ. ཏསྨིཾ ཝིཔསྶནཱཀམྨཊྛཱནེ སཏྟཝིདྷེན ཝིསུདྡྷི སངྒཧོ ཏཱིཎི ལཀྑཎཱནཱིཏིཨཱདིནཱ སམྦནྡྷོ. ནིཙྩསཱིལམེཝ སཡཉྩ དུསྶིལྱམལཏོ ཝིསུདྡྷཏྟཱ ཀཱཡཾ ཝཱཙཉྩ ཏཏོ ཝིསོདྷནཏོ ཝིསུདྡྷཱིཏི སཱིལཝིསུདྡྷི. སུབྷཱཝིཏ ཙིཏྟསནྟཱནམེཝ སཡཉྩ ¶ ནཱིཝརཎམལཏོ ཝིསུདྡྷཏྟཱ ཏཾསམངྒིཔུགྒལཉྩ ཏཏོ ཝིསོདྷནཏོ ཝིསུདྡྷཱིཏི ཙིཏྟཝིསུདྡྷི. ཙིཏྟསཱིསེན ཙེཏྠ སམཱདྷི ཨདྷིཔྤེཏོ. དྷམྨཝཝཏྠཱནཉཱཎསངྑཱཏཱ དིཊྛིཨེཝ ཏཾ སམངྒིཔུགྒལཾ སཀྐཱཡདིཊྛིམལཏོ ཝིསོདྷནཏོ ཝིསུདྡྷཱིཏི དིཊྛིཝིསུདྡྷི. སོལ༹སཝིདྷཾ ཨཊྛཝིདྷཾ ཀངྑཾ ཝིཏརནྟི ཨཏིཀྐམནྟི ཨེཏཱཡཱཏི ཀངྑཱཝིཏརཎཱ. པཙྩཡཔརིགྒཧཉཱཎཾ. སཱ ཨེཝ ཏཾསམངྒིཔུགྒལཾ ཨཧེཏུ དིཊྛི ཝིསམཧེཏུདིཊྛཱིཧི སདྡྷིཾ ཡཐཱཝུཏྟཱཧི དུཝིདྷཱཧི ཀངྑཱཧི ཝིསོདྷནཏོ ཝིསུདྡྷཱིཏི ཀངྑཱཝིཏརཎཝིསུདྡྷི. མགྒོཙ ཨམགྒོཙ མགྒཱམགྒཱ. ཏཏྠ ཉཱཎདསྶནཝིསུདྡྷཱདྷིགམནསྶ ཨུཔཱཡབྷཱུཏོ མནསིཀཱརཝིདྷིཝཱ ཨརིཡམགྒོཝཱ མགྒོནཱམ. ཏསྶ ཨནུཔཱཡབྷཱུཏོ མནསིཀཱརོཝཱ ཨདྷིམཱནཝཏྠཱུནིཝཱ ཨམགྒོནཱམ. མགྒསྶ མགྒཏོ ཨམགྒསྶཙ ཨམགྒཏོ ཛཱནནཾ དསྶནཉྩ མགྒཱམགྒཉཱཎདསྶནཾ. ཏམེཝ ཏཾསམངྒཱིཔུགྒལཾ ཨམགྒེ མགྒསཉྙཱཡ ཝིསོདྷནཏོ ཝིསུདྡྷཱིཏི མགྒཱམགྒཉཱཎདསྶནཝིསུདྡྷི ནཱམ. ཨུཔརི ཝིསེསཾ པཊིཔཛྫནྟི ཨེཏཱཡཱཏི པཊིཔདཱ. ཝིཔསྶནཱཔརཾཔརསངྑཱཏོ པུབྦབྷཱགམགྒོ. པཊིཔདཱབྷཱུཏཾ ཉཱཎདསྶནནྟི པཊིཔདཱཉཱཎདསྶནཾ. ཏམེཝ ནིཙྩསཉྙཱདིཏོ ཝིསུདྡྷཏྟཱ ཝིསུདྡྷཱིཏི པཊིཔདཱཉཱཎདསྶནཝིསུདྡྷིནཱམ, ཨརིཡམགྒཉཱཎསངྑཱཏ ཉཱཎདསྶནམེཝ སམྨོཧམལཏོ ཝིསུདྡྷཏྟཱ ཝིསུདྡྷཱིཏི ཉཱཎདསྶནཝིསུདྡྷིནཱམ. ཨེཏྠཙ སུཏམཡཱདིཝསེན སིདྡྷཾ ཨནུམཱན ཉཱཎཾཔི ཉཱཎམེཝཱཏི ཏཾ པཊིཀྑིཔིཏྭཱ ཨཏྠཔཙྩཀྑཉཱཎམེཝ གཧེཏུཾ སབྦཏྠ དསྶནགཧཎཾ ཀཏནྟི ཝེདིཏབྦཾ. ལཀྑཱིཡནྟི སལླཀྑཱིཡནྟི ཨིམེ ཨནིཙྩཱཨེཝཱཏི ཨེཀནྟེན ཝིནིཙྪཱིཡནྟི དྷམྨཱ ཨེཏེནཱཏི ལཀྑཎཾ ཨནིཙྩཏཱ ཨེཝ ལཀྑཎནྟི ཨནིཙྩལཀྑཎཾ. པུབྦཔདེ བྷཱཝཔཙྩཡལོཔོ. ཨཉྙོཧི ཨནིཙྩོ, ཨཉྙཱ ཨནིཙྩཏཱཏི. ཏཏྠ ཡཐཱགམནཀྲིཡཱཡོགེན པུརིསོ གཏོཏི ཝུཙྩཏི. ན པན གམན ཀྲིཡཱ པུརིསོ. ནཙ པུརིསོ གམནཀྲིཡཱ. ཨཉྙཱ ཧི ཀྲིཡཱ, ཨཉྙོ པུརིསོ. ཏཐཱ ཨནིཙྩཏཱཡོགེན སབྦོ སངྑཏདྷམྨོ ཨནིཙྩོཏི ཝུཙྩཏི. ན པན ཨནིཙྩཏཱ སོ དྷམྨོ, ནཙ སོ དྷམྨོ ཨནིཙྩཏཱ. ཨཉྙཱ ཧི ཨནིཙྩཏཱ, ཨཉྙོ སོ དྷམྨོཏི. ཀཏམཱ པན སཱ ཨནིཙྩཏཱཏི. ཝིཔརིཎཱམཱ ཀཱརོ. ཛཱིརཎཱཀཱརོ ¶ བྷིཛྫནཱཀཱརོཏི ཝུཏྟཾ ཧོཏི. ཏཾ པན ཨཱཀཱརཾ དིསྭཱ ཏདཱཀཱརཝནྟེ དྷམྨེ ཉཱཎཾ པཝཏྟཏི ཨཡཾ དྷམྨོ ཨནིཙྩོཏི. ཏསྨཱ སཱ ཨནིཙྩཏཱཡེཝ ཨིདྷ ལཀྑཎནྟིཔི ཝུཙྩཏཱིཏི. ཨེསནཡོ སེསེསུཔི དྭཱིསུ. ཏཏྠ པན ཨབྷིཎྷསཾཔཊིཔཱིལ༹ནཱཀཱརོ དུཀྑཏཱནཱམ. ཨཝསཝཏྟནཱཀཱརོ ཨནཏྟཏཱནཱམཱཏི. ཡཐཱཝུཏྟཱཡ པན ཨནིཙྩཏཱཡ སཧ ཨནིཙྩསྶ དྷམྨསྶ ཨནིཙྩེན ཝཱ དྷམྨེན སཧ ཨནིཙྩཏཱཡ ཨནུཨནུཔསྶནཱ ཨནིཙྩཱནུཔསྶནཱ. ཨེས ནཡོ སེསཱསུཔི དྭཱིསུ. ཡཱཝ སརཱིརེ དྷམྨཱནཾ ཏིཝིདྷལཀྑཎཡུཏྟཏཱ ཨཏྟནོ ཉཱཎེན པཉྙཱཡཏི. ཏཱཝ ཏེསུ ཏིཝིདྷལཀྑཎཝིབྷཱཝནཝསེན པུནཔྤུནཾ མསནཾ ཨཱམསནཾ སམྨསནཾ. སམྨསནཱཀཱརེན པཝཏྟཾ ཉཱཎཾ སམྨསནཉཱཎཾ. ཨུདཡོ ཝུཙྩཏི ཏཾཏཾ ཁཎཱནུརཱུཔཾ ཏཾཏཾ པཙྩཡཱནུརཱུཔཉྩ ནཝནཝཱནཾ དྷམྨཱནཾ པཱཏུ བྷཱཝོ ཙེཝ ཨུཔརུཔརི ཝཌྜྷནཉྩ. ཝཡོ ཝུཙྩཏི ཡཏྠ ཡཏྠ ལདྡྷཔཙྩཡཱ ནཝནཝཱ དྷམྨཱ པཱཏུབྷཝནྟི ཙེཝ ཝཌྜྷནྟིཙ. ཏཏྠ ཏཏྠ ཨལདྡྷཔཙྩཡཱནཾ པུརཱཎདྷམྨཱནཾ ཨནྟརདྷཱནཾ. སམཱུཧ སནྟཏིཝསེན པན ཨུདཡཔཀྑསྶཝཱ ཝཡཔཀྑསྶཝཱ སམནུཔསྶནཉཱཎཾ ཨུདཡབྦཡཉཱཎཾ. ཏེསུ པན དྭཱིསུ པཀྑེསུ ཨུདཡཀོཊྛཱསོནཱམ ཨུཔརུཔརི པཱཀཊོ ཧུཏྭཱ ཨཱགཙྪཏི. ཝཡཀོཊྛཱསོ པན ཨཔཱཀཊོ. སོ ཨེཝ ཙ ཨནིཙྩཏཱཡ པརམཱ ཀོཊཱིཏི ཏསྶེཝ སུཊྛུཏརཾ སམནུཔསྶནཉཱཎཾ བྷངྒཉཱཎཾ. བྷངྒེ དིཊྛེ ཨེཝཾ བྷིཛྫནསབྷཱཝཱནཾ དྷམྨཱནཾ ཨནེཀསཧསྶསོཀ དུཀྑཝཏྠུབྷཱཝེན ཏཐཱ ཏཐཱ བྷཱཡིཏབྦཔཀཱརསམནུཔསྶནཉཱཎཾ བྷཡཉཱཎཾ ནཱམ. ལོཀེ པན ཀིཉྩི བྷཡཝཏྠུཾ པསྶནྟཱཔི ཨཱསནྣེ ཨཉྙསྨིཾ པཊིསརཎེ སཏི ན བྷཱཡནྟི. ཨསཏི ཨེཝ བྷཱཡནྟི. ཨེཝཾ བྷཱཡིཏབྦཱནཾ ཏེསཾ སབྦསོ ཨཉྙཔཊིསརཎཱབྷཱཝདསྶནཾ ཨཱདཱིནཝཉཱཎཾ ནཱམ. ཀུཏོཙི པཊིསརཎཱབྷཱཝེན ཏེཧི ཨུཀྐཎྛཏཱཀཱར སཧིཏཾ ཝིཔསྶནཱཉཱཎཾ ནིབྦིདཱཉཱཎཾནཱམ. ནིབྦིནྡཱིཡམཱནེཧི ཏེཧི ཨཏྟཱནཾ ཝིམུཙྩིཏུཾ ཨཛ྄ཛྷཱསཡསཧིཏཾ ཝིཔསྶནཱཉཱཎཾ མུཙྩིཏུཀམྱཏཱཉཱཎཾ ནཱམ. སུཊྛུ མུཙྩིཏུཾ ཨིཙྪནྟསྶ སཱིགྷཾ མུཙྩནཏྠཾ ཏེསཾ དྷམྨཱནཾ ཙཏྟཱལཱིསཱཡ ཨཱཀཱརེཧི ཨནེཀཱདཱིནཝརཱསི བྷཱཝ ¶ པཊིསངྑཱནཝསེན སུཊྛུཝིཔྥཱརཏརཾ པཝཏྟམཱནཾ ཝིཔསྶནཱ ཉཱཎཾ པཊིསངྑཱཉཱཎཾ ནཱམ. ཏེསཾ པན ཨནེཀཱདཱིནཝརཱསིབྷཱཝེ སུཊྛུ དིཊྛེ སངྑཱརེསུ ནིཀནྟིཡཱ པརིཡཱདིནྣཱཡ ཨིདཱནི མུཙྩནུཔཱཡོ ལདྡྷོཏི ཨདྷིམཏྟབྱཱཔཱརཾ ཨཀཏྭཱ སམེན ཝཱཡཱམེན སངྑཱརེ པརིགྒཎྷནྟསྶ སངྑཱརཔརིགྒཧེ མཛ྄ཛྷཏྟཱཀཱརསཧིཏཾ སངྑཱརེསུཝཱ བྷཡཉྩ ནནྡིཉྩ པཧཱཡ ཨུདཱསིནབྷཱཝསཧིཏཾ ཝིཔསྶནཱཉཱཎཾ སངྑཱརུཔེཀྑཱཉཱཎཾནཱམ. ཨུཔརི མགྒཔྤཝཏྟིཾ ཝཧིཏུཾ སམཏྠབྷཱཝེན མགྒུཔྤཏྟིཡཱ ཨནུལོམེཧི ཐཱམབལེཧི སམྤནྣཾ ཝིཔསྶནཱཉཱཎཾ ཨནུལོམཉཱཎཾ ནཱམ. ཧེཊྛིམཱནཾཝཱ ཉཱཎཱནཾཏཾ ཨནུལོམཾ ཧོཏི ལཀྑཎཏྟཡསྶ སུཊྛུཏརཾ ཝིབྷཱཝནཏོ. ཨུཔརིམགྒསྶཝཱ ཨནུལོམཾ ཧོཏི ཏསྶ པརིཀམྨབྷཱཝཏོ, པདཊྛཱནཏྟཱཙཱཏིཔི ཨནུལོམཉཱཎཾ ནཱམཱཏི. ཨཏྟ ཛཱིཝསུཉྙཏཱདསྶན བལེན ཁནྡྷེསུ ཀིལེསབནྡྷནཏོ ཝིམུཙྩམཱནོ མགྒོ སུཉྙཏཱཝིམོཀྑོ ནཱམ. སངྑཱརཱནཾ ཡཱནི ནིམིཏྟཱནི ཀིལེསཱནཾ ཨཝསྶཡོ ཧོཏི. ཏཱནི ཝིདྷམིཏྭཱ སབྦསོ དྷམྨཱནཾ ཨནཱཐ བྷཱཝ དསྶན བལེན ཝིམུཙྩམཱནོ མགྒོ ཨནིམིཏྟོཝིམོཀྑོ ནཱམ. སངྑཱརེསུ སབྦསོ ཨསྶཱསཱབྷཱཝ དསྶནབལེན ཝིམུཙྩམཱནོ མགྒོ ཨཔྤཎིཧིཏོཝིམོཀྑོནཱམ. སུཉྙཏཱནུཔསྶནཱཏི ཨནཏྟཱནུཔསྶནཱ. སཱ ཧི དྷམྨཱནཾ སམཱུཧགྷན སནྟཏིགྷན ཀིཙྩགྷན ཨཱརམྨཎགྷནེསུ ཏཾཏཾགྷན ཝིནིབྦྷུཛྫན ཝསེན པཝཏྟཏྟཱ ཨཏྟཱ ཨིཏི གཧེཏབྦསྶ ཀསྶཙི སཱརསྶ ཨབྷཱཝཱནུཔསྶནཏོ སུཉྙཏཱནུཔསྶནཱཏི ཝུཙྩཏི. ཨནིམིཏྟཱ ནུཔསྶནཱཏི ཨནིཙྩཱནུཔསྶནཱ. སཱཔི ཧི སནྟཏི ཝིཙྪེདན ཝསེན པཝཏྟཏྟཱ ཨཧནྟི གཧིཏསྶ ནིམིཏྟསྶ ཝིདྷམནཏོ ཨནིམིཏྟཱནུཔསྶནཱཏི ཝུཙྩཏི. ཨཔཎིཧིཏཱནུཔསྶནཱཏི དུཀྑཱ ནུཔསྶནཱ. སཱཔི ཧི མཧཱཨཱདཱིནཝརཱསི བྷཱཝ ཝིབྷཱཝནཝསེན པཝཏྟཏྟཱ ཨིདཾ མམ ཨེཏཾ མམཱཏི གཧེཏབྦསྶ ཀསྶཙི པཎིཧིཏ གུཎསྶ ཨབྷཱཝཱནུཔསྶནཏོ ཨཔྤཎིཧིཏཱནུཔསྶནཱཏི ཝུཙྩཏཱིཏི. པཱཏིམོཀྑསཾཝརསཱིལནྟི ཝིནཡཔཉྙཏྟིསཱིལཾ. ཏཉྷི སབྦལོ ཀིཡསཱིལཱནཾ ཛེཊྛཀཏྟཱ པཏིཙ ཧོཏི. ཙཏུབྷཱུམཀཀུསལཱནཾ ཨཱདིཔབྷཝབྷཱུཏཏྟཱ ¶ མུཁཉྩ. ཨིཏི པཏིམུཁཊྛེན པཱཏིམོཀྑནྟི ཝུཙྩཏི. ཏམེཝཙ དུསྶིལྱམགྒསྶ སཾཝརཎཏོ པིདཧནཏོ སཾཝརོཏི ཝུཙྩཏཱིཏི. ཡེསཾ དྷམྨཱནཾ ཨུཔྤཏྟིཡཱ ཙཀྑཱདཱིནི ཨིནྡྲིཡཱནི ཝིཕནྡིཏཱནི ཧོནྟི. ལོལཱནི ཧོནྟི. ཏདནུབནྡྷཱཙ ཨཀུསལདྷམྨཱ ཨུཔྤཛྫནྟི. ཏེསཾ ཨུཔྤཏྟི མགྒསྶ སཾཝརཎཝསེན པཝཏྟམཱནཱ སཏི ཨིནྡྲིཡ སཾཝརོནཱམ. སོ ཨེཝ སཱིལནྟི ཨིནྡྲིཡསཾཝརསཱིལཾ. ཨཱཛཱིཝནྟི ཛཱིཝིཏཾ ཀཔྤེནྟི ཨེཏེནཱཏི ཨཱཛཱིཝོ. པཙྩཡཔརིཡེསནཝཱཡཱམོ. སོཡེཝ བུདྡྷཔཊིཀུཊྛེཧི པུཔྥདཱནཱདཱིཧི མིཙྪཱཔཡོགེཧི ཏིཝིདྷཀུཧནཝཏྠུཧིཙ པརིསུདྡྷཏྟཱ ཨཱཛཱིཝཔཱརིསུདྡྷིནཱམ. སཱ ཨེཝ སཱིལནྟི སམཱསོ. ཏཐཱརཱུཔེན པརིསུདྡྷེན བྷིཀྑཱཙཱརཱདིནཱ པཡོགེན པཊིལདྡྷཱནཾ པཙྩཡཱནཾ པཊིགྒཧཎ པརིབྷུཉྫནཀཱལེསུ སམྨོཧསྶ གེདྷསྶ མདསྶ པམཱདསྶཙ པཧཱནཏྠཾ ཏཾཏཾཔཡོཛནམརིཡཱདཾཝཱ པཊིཀཱུལལཀྑཎཾཝཱ དྷཱཏུམཏྟལཀྑཎཾཝཱ པརིགྒཧཎ པཙྩཝེཀྑནཝསེན པཝཏྟཾ པཙྩཡསེཝནེ པཊིསངྑཱཉཱཎཾ པཙྩཡ སནྣིསྶིཏསཱིལཾནཱམ. པརིསུཛ྄ཛྷཏཱིཏི པརིསུདྡྷི. པརིསུདྡྷིཨེཝ པཱརིསུདྡྷི. སཱ ཨེཝ སཱིལནྟི སམཱསོ. ཙཏྟཱརི པཱརིསུདྡྷིསཱིལཱནཱིཏི ཙཏུཔཱརི སུདྡྷིསཱིལཾ. ཙིཏྟཝིསུདྡྷཱིཏི ཨེཏྠ ཙིཏྟསདྡེན སམཱདྷི ནིདྡིཊྛོཏི ཝུཏྟཾ དུཝིདྷོཔིསམཱདྷི ཙིཏྟཝིསུདྡྷིནཱམཱཏི. ལཀྑཎརསཔཙྩུཔཊྛཱནཔདཊྛཱན ཝསེནཱཏི ཨེཏྠ དྷམྨཱནཾ པཙྩཏྟསབྷཱཝོ ལཀྑཎཾནཱམ. ཨགྒིསྶ ཨུཎྷཏྟཾ ཝིཡ. ཏེན སབྷཱཝེན སཱདྷེཏབྦཾ ཀིཙྩཾཝཱ སཱདྷནཔཙྩཡཱ པཊིལདྡྷགུཎསངྑཱཏཱ སམྤཏྟིཝཱ རསོནཱམ. ཨགྒིསྶ པརིཝཱཙན ཛོཏནཱནི ཝིཡ. སཱ ཨེཝ སམྤཏྟིཝཱ ཀཱརིཡསངྑཱཏཾ ཕལཾཝཱ པཙྩུཔཊྛཱནཾནཱམ. ཨགྒིསྶ དྷཱུམོ ཝིཡ. ཨཏྟནོ ཨུཔྤཏྟིཡཱ ཨསཱདྷཱརཎཔཙྩཡསངྑཱཏཾ ཨཱསནྣཀཱརཎཾ པདཊྛཱནཾནཱམ. ཏེསཾ ཝསེན ནཱམསྶཙ རཱུཔསྶཙ པརིགྒཧོ ཉཱཎེན པརིཙྪིནྡིཏྭཱ གཧཎཾ ནཱམརཱུཔཝཝཏྠཱནཾ དིཊྛིཝིསུདྡྷིནཱམ. ཨེཏྠཙ པརིགྒཧོ དུཝིདྷོ སངྑེཔ པརིགྒཧོ ཝིཏྠཱརཔརིགྒཧོཏི. ཏཏྠ ཨཛ྄ཛྷཏྟདྷམྨེ དྭིདྷཱ ཀཏྭཱ ཨིདཾ ནཱམམེཝ, ན རཱུཔཾ. ཨིདཾ རཱུཔམེཝ, ན ནཱམཾ. ཨཉྙཾ ནཱམཾ ཨཉྙཾ རཱུཔཾ. ཏདུབྷཡཏོཙ ཨཉྙོ ཨཏྟཱཝཱ ཛཱིཝོཝཱ སཏྟོཝཱ པུགྒལོཝཱ མནུསྶོཝཱ དེཝོཝཱ བྲཧྨཱཝཱ ནཏྠཱིཏི ཨེཝཾ པཙྩཀྑཏོ སུདིཊྛཾ ཀཏྭཱ ¶ པརིགྒཎྷནཾ སངྑེཔཔརིགྒཧོནཱམ. ཉཱཎུཏྟརིཀོཧི པུགྒལོ ཨེཏྟཀམཏྟེནཔི སཀྐཱཡདིཊྛིཾ ཝིཀྑམྦྷེཏུཾ སཀྐོཏི སདྡྷིཾ སཉྙཱ ཙིཏྟཝིཔལླཱསེཧཱིཏི. ཏཡོ ཧི ཝིཔལླཱསཱ. ཡཐཱཧ-ཨནཏྟནི ཨཏྟཱཏི སཉྙཱཝིཔལླཱསོ ཙིཏྟཝིཔལླཱསོ དིཊྛིཝིཔལླཱསོཏི. ཏཏྠ སཏྠུསཱསནདྷམྨེ སུཊྛུ པཏིཊྛིཏེན སདྡྷཱམཏྟེནཔི དིཊྛི ཝིཔལླཱསོ ཝིཀྑམྦྷིཏོ ཧོཏི. ཨིཏརེ པན ནཱམརཱུཔཔརིགྒཧེ ཀཏེཡེཝ ཝིཀྑམྦྷིཏཱ ཧོནྟི. ཡཱཝཙ ཨེཏེ དྭེ ཨཝིཀྑམྦྷིཏཱ ཧོནྟི. ཏཱཝ ནཱམརཱུཔཔརིགྒཧོཙ ཨཔརིསུདྡྷོཡེཝ ཧོཏི. ཏཾམཱུལིཀཱཙ ཀིལེསདྷམྨཱ ཨཝིཀྑམྦྷིཏཱ ཨེཝ ཧོནྟཱིཏི ཨཔིཙ. ཙཏུནྣཾ ཨཱཧཱརཱནཾ ཝསེན ཙཏུདྷཱ, པཉྩནྣཾ ཁནྡྷཱནཾ ཝསེན པཉྩདྷཱ, ཚནྣཾ དྷཱཏཱུནཾ ཝསེན ཚདྷཱཏིཨཱདིནཱ ནཡེན ནཱམརཱུཔཾ པརིགྒཧེ ཏབྦམེཝ. ཏཏྠ ཚ དྷཱཏུཡོནཱམ པཐཝིདྷཱཏུ ཨཱཔོདྷཱཏུ ཏེཛོདྷཱཏུ ཝཱཡོདྷཱཏུ ཨཱཀཱསདྷཱཏུ ཝིཉྙཱཎདྷཱཏུཡོ. པཀྐུསཱཏི ཀུལཔུཏྟོ ཧི ཨིམཱ ཚ དྷཱཏུཡོ པརིགྒཎྷིཏྭཱ ཨནཱགཱམིཕལཾ པཏྭཱ ཙཔིཏྭཱ སུདྡྷཱཝཱསེསུ ནིབྦཏྟོཏི. ཡཏྟཀེ ཝཱ པན དྷམྨེ པརིགྒཎྷནྟོ ཨཏྟཱ མེཏི པཝཏྟམཱནེ སཉྙཱཙིཏྟདིཊྛི ཝིཔལླཱསེ ཝིཀྑམྦྷེཏུཾ སཀྐོཏི. ཏཏྟཀཱཔི པརིགྒཧེཏབྦཱ ཡེཝཱཏི. ཨིམསྨིཾ པན སངྒཧཔཀརཎེ ཡོ ཡོ ཙིཏྟཙེཏསིཀ ཝིབྷཱགོ རཱུཔཝིབྷཱགོཙ ཧེཊྛཱ ཝུཏྟོ. ཏསྶ སབྦསྶ ཝསེན ནཱམརཱུཔསྶ པརིགྒཎྷནཾ ཝིཏྠཱརཔརིགྒཧོནཱམ. ཨཡཾཔན ཨཱདིཀམྨིཀཱནཾ ཨཝིསཡོ. པཊིཝིདྡྷཙཏུསཙྩཱནཾ པན ཨཱབྷིདྷམྨིཀཏྠེརཱནཾ ཨེཝ ཝིསཡོཏི ཝེདིཏབྦོ. ནཱམརཱུཔཾ པརིགྒཎྷནྟསྶ པན ནཱམརཱུཔ མཏྟཏོ ཨུདྡྷཾ ཨཉྙསྶ ཀསྶཙི ཨབྷཱཝདསྶནཏོཙ སརཱིརབྦྷནྟརེ ཛཱིཝསཉྙིཏོ ཨཏྟཱ ཨཏྠི. སོ ཀརོཏི, སོ པཊིསཾཝེདེཏི, སཾསརཏི, སནྡྷཱཝཏཱིཏི ཨེཝཾ པཝཏྟཱ དིཊྛི པཧཱིཡཏི. སུདྡྷེ ནཱམེ ཨེཝཝཱརཱུཔེ ཨེཝཝཱ པུགྒལསཏྟཀྲིཡསཉྙིཏཱནཾ ཨཱིཧཱབྱཱཔཱརཱནཾ སབྦསོ ཨབྷཱཝདསྶནཏོ ཏདུབྷཡསཾཡོགེཨེཝ ཏེསཾ ལབྦྷམཱནཏཱ དསྶནཏོཙ ཏདུབྷཡཾཝཱ ཨེཀམེཀཾཝཱ ཨུདྡིསྶ ཨཏྟཱཏི པཝཏྟཱ དིཊྛི པཧཱིཡཏི. ཨཏྟཱ ཛཱིཝོ སཏྟོ པུགྒལོ མནུསྶོ དེཝོ བྲཧྨཱཏི ཨེཝམཱདཱིསུ ཝོཧཱརེསུཙ ཝོཧཱར མཏྟེ ¶ ཨཊྛཏྭཱ ཨཏྟཱནཱམ ཨེཀནྟཏོ ཨཏྠི ཛཱིཝོནཱམ ཨེཀནྟཏོ ཨཏྠཱིཏིཨཱདིནཱ ཏདཏྠཱབྷིནིཝེསཝསེན ཨཏིདྷཱཝནཉྩ པཧཱིཡཏཱིཏི དཊྛབྦཾ. ཏདཏྠཱབྷིནིཝེསོཏིཙ ཨཏྟཱནཱམ ཨཏྠི ཛཱིཝོནཱམ ཨཏྠཱིཏིཨཱདིནཱ དལ༹ྷཏརཾ ཨབྷིནིཝེསོ. ཨཏིདྷཱཝནནྟི ནཱམརཱུཔཾ ཨཏྟཱཏིཨཱདིནཱ གཧཎཾ. པཙྩཡཔརིགྒཧོཏི ཨེཏྠཔི དུཝིདྷོ པཙྩཡཔརིགྒཧོ སངྑེཔཏོ ཝིཏྠཱརཏོ ཙཱཏི. ཏཏྠ ཝཏྠཱརམྨཎཝསེན ནཱམསྶ ཙིཏྟོཏུཀཱཧཱརཝསེན རཱུཔསྶ ཨཝིཛྫཱཏཎྷུཔཱདཱནཀམྨཝསེན ཏདུབྷཡསྶཙ པཙྩཡཾ པརིགྒཎྷནྟོ སངྑེཔཏོ པརིགྒཎྷཱཏིནཱམ. ཧེཊྛཱ པཙྩཡསངྒཧེ ཝིབྷཏྟེཧི པཊིཙྩསམུཔྤཱདནཡ པཊྛཱནནཡེཧི པརིགྒཎྷནྟོ ཝིཏྠཱརཏོ པརིགྒཎྷཱཏིནཱམ. ཨེཏྠཔི པཊྛཱནནཡེན པརིགྒཧོ ཨཱདིཀམྨིཀཱནཾ ཨཝིསཡོཨེཝ. པཙྩཡཾ པརིགྒཎྷནྟསྶཔན ཡཐཱཝཝཏྠིཏསྶ སབྦསྶ ནཱམརཱུཔསྶ སབྦསོ པཙྩཡཱཡཏྟཝུཏྟིཀཏཱདསྶནཏོ ཨཧེཏུཀདིཊྛི པཧཱིཡཏི. ཨཏྟནོ ཨནུརཱུཔཔཙྩཡསཱམགྒིཡཱ ཝིནཱ ཨཉྙཐཱ པཝཏྟིཡཱ ཨདསྶནཏོ ཨིསྶརནིམྨཱན ཀཱལནིམྨཱནཱདིཀཱ ཝིསམཧེཏུདིཊྛིཙ པཧཱིཡཏི. ཧེཏུསམྦྷཱརཔཙྩཡེཧི ཀམྨཔྤཝཏྟིཡཱ ཝིཔཱཀཔྤཝཏྟིཡཱཙ ཨཉྙསྶ ཀམྨཀཱརཀསྶཝཱ ཝིཔཱཀ ཝེདཀསྶཝཱ ཀཏྟུནོ ཨབྷཱཝདསྶནཏོ ཀཱརཀ ཝེདཀ དིཊྛི པཧཱིཡཏི. ཨནམཏགྒེཙ སཾསཱརེ ཏཱིསུ ཨདྡྷཱསུ ཧེཏུཕལ པརཾཔརཱཝསེན ཀེཝལསྶ ནཱམརཱུཔམཏྟསྶེཝ པཝཏྟིདསྶནཏོ ཨཧོསིཾ ནུཁོ ཨཧམཏཱིཏམདྡྷཱནནྟི ཨེཝམཱདིཀཱཡ པུགྒལསཏྟ ཝིསཡཱཡ སོལ༹སཝིདྷཱཡ ཀངྑཱཡཙ ཨཏིཀྐམོ ཧོཏི. སབྷཱཝདྷམྨཔཝཏྟིཡཱཙ སུཊྛུ དིཊྛཱཡ དེསནཱདྷམྨསྶ སུདྷམྨཏཱ དསྶནཏོ བུདྡྷསུབུདྡྷཏཉྩ དིསྭཱ སཏྠརི ཀངྑཏི དྷམྨེ ཀངྑཏཱིཏིཨཱདིནཡཔཝཏྟཱ ཨཊྛཝིདྷཱཔི ཀངྑཱ པཧཱིཡཏཱིཏི. ལོཀུཏྟརདྷམྨཱནཾ སངྑཏཱནཾཔི སཏཾ ཨསམྨསནུཔགཏྟཱ ཏེབྷཱུམཀསངྑཱརེསཱུཏི ཝུཏྟཾ. ཨནུསཡསམཱུཧནཏྠཉྩ སམྨསནནྟི ཀཏྭཱ ཡཏྠ ཀཱམརཱགཱདཡོ ཨནུསཡཱ ཨནུསེནྟི. ཏེཡེཝ དྷམྨཱ སམྨསནཱརཧཱ ཧོནྟཱིཏི ཝུཏྟཾ ཏེབྷཱུམཀསངྑཱརེསཱུཏི. ཨིམསྶ ཙ པདསྶ ལཀྑཎཏྟཡཾ སམྨསནྟསྶཱཏི ཨིམིནཱ སམྦནྡྷོ. ཨཏཱིཏཱདིབྷེདབྷིནྣེསཱུཏི ཨཏཱིཏཱནཱགཏཔཙྩུཔྤནྣཛ྄ཛྷཏྟབཧིདྡྷཱདཱིཧི ¶ ཨེཀཱདསཧི བྷེདེཧི བྷིནྣེསུ. ཁནྡྷཱདིནཡཾཨཱརབྦྷཱཏི པཊིསམྦྷིདཱམགྒེ ཝིབྷཏྟཾ ཁནྡྷཔཉྩཀཾ དྭཱརཚཀྐཾ ཨཱརམྨཎཚཀྐཾ ཝིཉྙཱཎཚཀྐཾ ཕསྶཚཀྐཾ ཝེདནཱཚཀྐཾ སཉྙཱཚཀྐནྟི ཨེཝམཱདིཀཾ སམྨསནབྷཱུམིཝིབྷཱགནཡཾ ཨཱརབྦྷ ཨནུགནྟྭཱ ཏཾནཡཱནུསཱརེནཱཏི ཨཏྠོ. ཏཏྠ པན ཏེཝཱིསཏིཡཱ དྷམྨཀོཊྛཱསེསུ ཡསྶ ཡོ ཀོཊྛཱསོ པཱཀཊོ ཧོཏི. ཏེན ཏཾ གཧེཏྭཱ སམྨསནཾ ཨཱརབྷིཏབྦཾ. སཀྐོནྟེན པན སབྦམྤི གཧེཏྭཱ ཨཱརབྷིཏབྦམེཝ. ཀལཱཔཝསེནསཾཁིཔིཏྭཱཏི ཁནྡྷཔཉྩཀེན ཡེ རཱུཔཾ ཏཱཝ ཨཏཱིཏཱནཱགཏཔཙྩུཔྤནྣཱདིབྷེདབྷིནྣཾཔི སམཱནཾ སབྦཾ ཨེཀརཱུཔཔིཎྜབྷཱཝེན སཾཁིཔིཏྭཱ ཨེས ནཡོ ཝེདནཱ དཱིསུཔཱིཏི. ཏཏྲཱཡཾ ནཡོ. ཡཾཀིཉྩི རཱུཔཾ ཨཏཱིཏཱནཱགཏཔཙྩུཔྤནྣཾ ཨཛ྄ཛྷཏྟཾཝཱ བཧིདྡྷཱཝཱ ཨོལཱ༹རིཏཾཝཱ སུཁུམཾཝཱ ཧཱིནཾཝཱ པཎཱིཏཾཝཱ ཡཾ དཱུརེ སནྟིཀེཝཱ. སབྦཾ རཱུཔཾ ཨནིཙྩཾ ཁཡཊྛེན དུཀྑཾ བྷཡཊྛེན ཨནཏྟཱ ཨསཱརཀཊྛེན. ཡཱཀཱཙི ཝེདནཱ.ལ. ཡཱཀཱཙི སཉྙཱ.ལ. ཡེཀེཙི སངྑཱརཱ.ལ. ཡཾཀིཉྩི ཝིཉྙཱཎཾ.ལ. སབྦཾ ཝིཉྙཱཎཾ ཨནིཙྩཾ ཁཡཊྛེན. དུཀྑཾ བྷཡཊྛེན ཨནཏྟཱ ཨསཱརཀཊྛེནཱཏི. ཨེཏྠཙ སབྦཾ རཱུཔཾ.ལ. སབྦཾ ཝིཉྙཱཎནྟི གཧཎམེཝ ཀལཱཔཝསེན སངྑིཔནནྟི དཊྛབྦཾ. ཨནིཙྩཾཁཡཊྛེནཱཏི ཨེཏྠ རཱུཔཾ ཨནིཙྩཾ ཁཡཊྛེན. ཝེདནཱ ཨནིཙྩཱ. སཉྙཱ ཨནིཙྩཱ. སངྑཱརཱ ཨནིཙྩཱ. ཝིཉྙཱཎཾ ཨནིཙྩཾ ཁཡཊྛེནཱཏིཨཱདིནཱ ནཡེན སམྨསིཏབྦདྷམྨཔརིགྒཧེན སཧེཝ སམྨསནཾ ཀཱཏབྦཾ. ཨིཏརཐཱ སམྨསནཾ ན རུཧཏི. ཏདཏྠསྶ པན པཱཀཊཏྟཱ ཨིདྷ ཨནིཙྩཾ ཁཡཊྛེནཱཏིཨཱདིནཱ སམྨསནཔདམེཝ ཐེརེན གཧིཏནྟི དཊྛབྦཾ. ཏཏྠ རཱུཔཾ ཨནིཙྩཾ ཁཡཊྛེནཱཏི ཏཾཏཾརཱུཔཾ ཉཱཎེན དལ༹ྷཾ གཧེཏྭཱ ཨཡཾ པཐཝིདྷཱཏུ ཨནིཙྩཱ ཁཡཊྛེན. ཨཡཾ ཨཱཔོདྷཱཏུ ཨནིཙྩཱ ཁཡཊྛེནཱཏིཨཱདིནཱ སམྨསནཾ ཀཱཏབྦཾ. ཏཏྠ ཨིམསྨིཾ ཀཱཡེ སབྦཾ ཐདྡྷཀྲིཡཱམཏྟཾ པཐཝཱིནཱམ. སཱཙ ཀྲིཡཱ སཱིཏུཎྷཔརིཝཏྟིཡཱཝཱ པརིཝཏྟཏི. ནཱནཱཧཱརཔརིཝཏྟིཡཱ ཝཱ ནཱནཱཙིཏྟཔརིཝཏྟིཡཱཝཱ ནཱནིརིཡཱཔཐཔརིཝཏྟིཡཱཝཱ ནཱནཱ ཀཱཡིཀཀྲིཡཱ པརིཝཏྟིཡཱཝཱ པརིཝཏྟཏི. ནཱནཱསནྟཏི སངྐནྟི ཧོཏཱིཏི ཨཏྠོ. ཏཏྠ ནཝནཝཱསུ ཀྲིཡཱསནྟཏཱིསུ པཱཏུབྷོནྟཱིསུ ¶ པུབྦཔུབྦཀྲིཡཱསནྟཏིཡོ ནསྶནྟི. ཡསྨཱཙ སནྟཏི ནཱམ དྷམྨཏོ ཝིསུཾ ནཏྠི, ཏསྨཱ ནཝནཝསནྟཏཱིནཾ པཱཏུབྷཱཝོནཱམ ནཝནཝཀྲིཡཱནཾ ཨུཔྤཏྟིཨེཝ. པུབྦཔུབྦསནྟཏཱིནཾ ནསྶནཾནཱམ པུབྦཔུབྦ ཀྲིཡཱནཾ བྷིཛྫནམེཝཱཏི. ཨེཝཾ ཨཏྟནོ ཀཱཡེ ནཱནཱཐདྡྷཀྲིཡཱནཾ པརིཝཏྟིཾ པསྶནྟོ པཐཝིདྷཱཏུཡཱ ཁཡཝཡཾ པསྶཏི. ཏཉྩ པསྶནྟོ ཏཾསཧཛཱཏཱནཾ རཱུཔཱནཾ ཁཡཝཡཾ པསྶཏིཡེཝ. ཨཱཔོ ནཱམ ཨཱབནྡྷནཀྲིཡཱམཏྟཾ. ཏེཛོནཱམ སཱིཏཀྲིཡཱམཏྟཾ ཨུཎྷ ཀྲིཡཱམཏྟཉྩ. ཝཱཡོནཱམ ཝིཏྠམྦྷནཀྲིཡཱམཏྟཾ. ཨིམཱཙ ཀྲིཡཱ ཁཎེ ཁཎེ པརིཝཏྟནྟིཡེཝ. ཨིམཱསཉྩ, ཝིསུཾ ཝིསུཾ སནྟཏིཔརིཝཏྟིཾ པསྶནྟོ ཨཱཔཱདཱིནཾ ཏཾསཧཛཱཏརཱུཔཱནཉྩ ཁཡཝཡཾ པསྶཏི. སནྟཏིཔརིཝཏྟིཾ པན བཧིདྡྷཱ ཙཀྑུནཱ དིསྭཱ ཛཱནཱཏི, སརཱིརབྦྷནྟརེ པན ཀཱཡསཾཕསྶེན ཛཱནཱཏི. སནྟཏིསརཱིརབྷཱུཏཱནཾ པན དྷཱཏཱུནཾ ཁཡཝཡཾ ཉཱཎེནཨེཝ པསྶཏི. ཏསྨཱ ཨཏྟནོ སརཱིརབྦྷནྟརེ ཏཾཏཾསནྟཏི པརིཝཏྟིཾ ཉཏྭཱཝཱ ཏཐཱ ཏཐཱ ཀཔྤེཏྭཱ ཝཱ རཱུཔདྷཱཏཱུནཾ ཨནིཙྩཏྟཾ ཉཱཎེན སུདིཊྛཾ ཀཏྭཱ པུནཔྤུནཾ སམྨསིཏབྦཾ. སེསཁནྡྷེསུཔི ཏཾཏཾསནྟཏིནཱནཱཏྟཾ ཉཏྭཱ ཝེདནཱདཱིནཾ ཁཡཝཡཾ སུདིཊྛཾ ཀཏྭཱ སམྨསནཾ ཀཱཏབྦནྟི. བྷཡཊྛེནཱཏི བྷཱཡིཏབྦཊྛེན. ཡཉྷི ཨནིཙྩཾ ཧོཏི. ཁཎམཏྟེཔི ཝིཔརིཎཱམདྷམྨཾ. ཏཾ ཨེཀནྟེན བྷཱཡིཏབྦམེཝ. ཀསྨཱ, ཏཉྷི ཡོ ཨབྷཱཡིཏྭཱ ཝིསྶཱསཾ ཀརོཏི. ཨེཏཾ མེཏི ཨཏྟནོ ཨངྒཾ ཀཏྭཱ པརིཧརཏི. ཏཾ ཨཔརིཡནྟེཧི ཨནེཀསཧསྶེཧི ཨབྷིསངྑརཎདུཀྑེཧིཝཱ ཝིཔརིཎཱམདུཀྑེཧིཝཱ ཨབྷིཎྷཾ པཱིལེ༹ཏི. བཱདྷཏི. ཨིཏི ནཱནཱདུཀྑདྷམྨེཧི ཨབྷིཎྷཾ སམྤཊིཔཱིལ༹ནསབྷཱཝཏྟཱ ཨེཀནྟེན བྷཱཡིཏབྦཊྛེན དུཀྑཾནཱམཱཏི. ཨཏྟཔཊིཔཀྑཏྟཱ ཨནཏྟཱ. ཡོ ཧི ཨིཏོ ཨུདྡྷཾ མཡ྄ཧཾ ཨབྦྷནྟརིམཏརོནཱམ ནཏྠཱིཏི ཨེཝཾ པརམཛ྄ཛྷཏྟབྷཱཝེན པརིགྒཧིཏོ ཧོཏི. སོ ཨཏྟཱཏི ཝུཙྩཏི. ཀཏམོ པན ཏཐཱཔརིགྒཧི ཏབྦོཏི. ཡོ ཨཏྟནོ ཝསེ སབྦསོ ཝཏྟཏི. ཡཐཱ ཝུཏྟེཧི ཨབྷིསངྑརཎཀིཙྩེཧི ཝིནཱ ཀེཝལཾ ཨཏྟནོ ཚནྡེནཝཱ ཝསེནཝཱ ཨཛ྄ཛྷཱསཡེནཝཱ ཨཱཎཱཝིདྷཱནེནཝཱ ནིཙྩཾ ཨཝིརཛ྄ཛྷམཱནོ པཝཏྟཏི. སོ ཏཐཱ པརིགྒཧེཏབྦོཏི. ཏཐཱརཱུཔོ ཨེཝ ཧི དྷམྨོ ¶ ནིཙྩཾ སུཁཀཱམཱནཾ དུཀྑཔཊིཀཱུལཱནཾ སཏྟཱནཾ ཨཏྟཀིཙྩཾ ཀརོཏི ནཱམཱཏི. ཡོ པན ནིཙྩཾ སུཁཀཱམཱནཾ ཏེསཾ ཡཐཱཔཝཏྟཾ སུཁཾ ཝིདྡྷཾསེཏི ཝིཀིརེཏི. དུཀྑཔཊིཀཱུལཱནཾ ཏེསཾ ཨབྷིསངྑརཎཱདི མཱུལཀཾ ནཱནཱདུཀྑཾ ཛནེཏི ཝཌྜྷེཏི. སོ ཨཏྟཔཊིཔཀྑོཨེཝ ཧོཏི. ཨིདཉྩ རཱུཔཾ ཨེདིསམེཝ ཧོཏི. ཨིཏི ཨཏྟཀིཙྩསྶ ཨཀརཎཏོ ཨཏྟཔཊིཔཀྑཀིཙྩསྶ ཀརཎཏོཙ རཱུཔཾ ཨནཏྟཱནཱམཱཏི. ཀསྨཱ པནེཏཾ ཨཏྟནོ ཝསེ ནཝཏྟཏི ཨཏྟཀིཙྩཾ ན ཀརོཏི ཨཏྟཔཊིཔཀྑཀིཙྩཾ ཀརོཏཱིཏི ཨཱཧ ཨསཱརཀཊྛེནཱཏི. ཏཏྠ སཱརོནཱམ པཙྩཡསཱམགྒིཡཱ ཝིནཱ ཀེཝལཾ ཨཛ྄ཛྷཱསཡམཏྟེན ཨུཔྤཛྫིཏུཾཝཱ ཨུཔྤཛྫིཏྭཱཙ པཙྩཡུཔཏྠམྦྷེན ཝིནཱ ཡདིཙྪཀཾ པཏིཊྛཱཏུཾ ཝཱ སམཏྠབྷཱཝསངྑཱཏོ ཐཱམབལཝིསེསོ ཝུཙྩཏི. རཱུཔཾ པན སཡཾཔི ཨེཝརཱུཔོ སཱརོནཱམ ན ཧོཏི. ནཙ ཨེཝརཱུཔེན སཱརེན ཡུཏྟནྟི. ནཧི ཏསྶ པཙྩཡསཱམགྒིཡཱ ཝིནཱ ཨུཔྤཛྫིཏུཾཝཱ ཨུཔྤཛྫིཏྭཱཔི པཙྩཡུཔཏྠམྦྷེན ཝིནཱ ཁཎམཏྟཾཔི པཏིཊྛཱཏུཾཝཱ ཐཱམོཝཱ བལཾཝཱ ཨཏྠི. ཡཉྩ ཨཏྟནོ ཐཱམེན བལེན ཝིནཱ ཀེཝལཾ པཙྩཡསཱམགྒི བལེནེཝ ཨུཔྤཛྫཏི. པཙྩཡུཔཏྠམྦྷེནེཝ པཏིཊྛཱཏི. ཏཾ ཨནེཀ སཧསྶཱནི པཙྩཡཱབྷིསངྑརཎདུཀྑཱནི ཛནེཏྭཱ ཨེཀནྟེན ནིཙྩཾ ཨཏྟཔཊིཔཀྑཀིཙྩཾ ཀརོཏི, པཱིལེ༹ཏི, བཱདྷཏིཡེཝཱཏི. ཨེསནཡོ ཝེདནཱ ཨནིཙྩཱ ཁཡཊྛེནཱཏིཨཱདཱིསུ. ཨིཏི ལཀྑཎཏྟཡཾ སམྨ སནྟསྶཱཏི སམྦནྡྷོ. ཨདྡྷཱནཝསེནཱཏི ཨེཀེཀབྷཝཔརིཙྪིནྣསྶ པཝཏྟཀཱལསྶ ཝསེན. ནཧི བྷཝནྟརེ ཨུཔྤནྣཾ ཁནྡྷཔཉྩཀཾ ཨཉྙཾ བྷཝནྟརཾ གཙྪཏི. ཏསྨིཾ ཏསྨིཾ བྷཝེཨེཝ ཨསེསཾ ནིརུཛ྄ཛྷཏཱིཏི. ཨཔིཙ, ཨེཀསྨིཾ བྷཝེཔི ཏིཎྞཾ ཝཡཱནཾ མནྡཱདཱིནཾ དསནྣཾ དསཀཱནཾ སཾཝཙྪརཨུཏུ མཱས པཀྑཏིཐི ཨཧོརཏྟི ཡཱམ པཧཱརཱདཱིནཉྩ ཝསེན ཨདྡྷཱནབྷེདོ ཡོཛེཏབྦོ. སནྟཏིཝསེནཱཏི སབྷཱགེཀསནྟཱནཝསེན པཝཏྟམཱནཱཡ རཱུཔསནྟཏིཡཱཝཱ ཨརཱུཔ སནྟཏིཡཱཝཱ ཝསེན. ཁཎཝསེནཱཏི རཱུཔཱརཱུཔདྷམྨཱནཾ ཨཱཡུ པརིམཱཎསངྑཱཏསྶ ཁཎསྶ ཝསེན. ཨེཏྠཙ ཁཎཝསེན སམྨསནཾནཱམ སབྦཉྙུབུདྡྷཱནཾ ཨེཝ ཝིསཡོ སིཡཱ, ན སཱཝཀཱནཾ. ནཧི ཏེ ཨེཝཾ པརིཏྟཀེ ཁཎེ ཨུཔྤཱདཾཝཱ ནིརོདྷཾཝཱ སམྤཱཔུཎིཏུཾ སཀྐོནྟཱིཏི. ¶ ཏསྨཱ ཨདྡྷཱསནྟཏིཝསེན སམྨསནམེཝ ཨིདྷཱ དྷིཔྤེཏནྟི དཊྛབྦཾ. ལཀྑཎཏྟཡཾསམྨསནྟསྶཱཏི ཏེསུ ཏེབྷཱུམཀ སངྑཱརེསུ དྷམྨེསུ ཏིལཀྑཎཱནི ཨཱརོཔེཏྭཱ ཏེ དྷམྨེ པུནཔྤུནཾ ཨཱམསནྟསྶ པརིམཛྫནྟསྶ. ཏེསཾ དྷམྨཱནཾ ཨནིཙྩ ཛཱཏིཀཏཾཝཱ དུཀྑཛཱཏིཀཏཾཝཱ ཨནཏྟཛཱཏིཀཏཾཝཱ ཉཱཎེ སུཊྛུ པཱཀཊཾ ཀརོནྟསྶཱཏི ཨཏྠོ. ཝིསེསཏོ པན ཨིམསྨིཾ ཉཱཎེ ཨནིཙྩལཀྑཎདསྶནམེཝ པདྷཱནཾ. ཏསྨིཾ དིཊྛེཡེཝ ཨིཏརཱནི ཀམེན དིཊྛཱནི ཧོནྟི. ཨདིཊྛེཙ ཨདིཊྛཱནཱིཏི. ཏསྨཱ ཨཱདིཏོ ཨནིཙྩལཀྑཎསྶེཝ སུཊྛུ པཱཀཊབྷཱཝོ ཨདྷིཔྤེཏོཏི. ཏེསྭེཝཱཏི ཏེབྷཱུམཀསངྑཱརེསུ ཨེཝ. པཙྩཡཝསེནཱཏི རཱུཔཀྑནྡྷེ ཏཱཝ ཨཝིཛྫཱཏཎྷུཔཱདཱནཀམྨཱཧཱརསངྑཱཏཱནཾ པཙྩཡཱནཾ ཝསེན. ཝེདནཱསཉྙཱསངྑཱརེསུ པན ཨཱཧཱརཊྛཱནེ ཕསྶོ ཝཏྟབྦོ. ཝིཉྙཱཎེཙ ནཱམརཱུཔཾ. ཏཏྲཱཡཾ ནཡོ. ཨཏཱིཏཱནནྟརབྷཝེ ཨཝིཛྫཱཏཎྷུཔཱདཱན ཀམྨེསུ ཨཔྤཧཱིནཝསེན སམུདིཏེསུ ཨིམསྨིཾ བྷཝེ པཊིསནྡྷིཏོ པཊྛཱཡ རཱུཔསནྟཏིཡོ ཝེདནཱསཉྙཱསངྑཱར ཝིཉྙཱཎསནྟཏིཡོཙ སམུདེནྟི. ཡཱཝ མརཎཀཱལཱ ཁཎེ ཁཎེ ནཱནཱཀལཱཔཝསེན ཨུདེནྟི པསཝནྟི. ཏེསུ པན ཏསྨིཾ བྷཝེ ཨེཝ པཧཱིནཝསེན ནིརུདྡྷེསུ ཏཱ རཱུཔཱརཱུཔསནྟཏིཡོ ནིརུཛ྄ཛྷནྟི. བྷཝནྟརེ པུན ཨནུཔྤཱདསངྑཱཏཾ ནིརོདྷཾ པཱཔུཎནྟི. ཨེཏྠ པན ཡཐཱ ཨུདཀེ སཏི མཙྪཱནཱམ ཧོནྟི, ཨསཏི ན ཧོནྟི. ཨེཝཾ ཀམྨཛེསུ ནཱམརཱུཔེསུ སཏི ཨིཏརཱནི ནཱམརཱུཔཱནི ཧོནྟི. ཨསཏི ན ཧོནྟཱིཏི ཨིཏརཱནི སབྦཱནི ཀམྨཛེསུ སངྒཧེཏྭཱ ཀམྨཝསེན ཨུདཡབྦཡཝིདྷཱནཾ གཧིཏནྟི དཊྛབྦཾ. ཨེཝཾ ཨཝིཛྫཱཏཎྷུཔཱདཱནཀམྨཔཙྩཡཱནཾ ཝསེན པཉྩཀྑནྡྷསྶ ཨུདཡབྦཡཔཝཏྟི ཧོཏཱིཏི. ཀམྨཝསེན པན ཨིམསྨིཾ བྷཝེ སམུདེནྟཱནིཔི པཊིསནྡྷིཏོ པཊྛཱཡ ཁཎེ ཁཎེ ཀབལཱི༹ཀཱརཱཧཱརཱུཔཏྠམྦྷནཾ ལདྡྷཱ ཨེཝ ཡཐཱ པཝཏྟརཱུཔསནྟཏིཡོ ཨནུབནྡྷ མཱནཱ ནཝནཝཱ རཱུཔསནྟཏིཡོ སམུདེནྟི. ཨལདྡྷཱ པན ནིརུཛ྄ཛྷནྟི. ཏཾ སནྟཏིཡཾ པུན ཨནུཔྤཱདསངྑཱཏཾ ཨེཀབྷཝནིརོདྷཾ པཱཔུཎནྟི, ཡཐཱ པཝཏྟསནྟཏིཡོ ཝཱ ཚིཛྫནྟི བྷིཛྫནྟི ཨནྟརདྷཱཡནྟཱིཏི.

ཝེདནཱསཉྙཱསངྑཱརཱ ¶ པན བཧིདྡྷཱ ཨཱརམྨཎེསུ ཨཱཔཱཏཱགཏེསུ ཨཱརམྨཎསམྥསྶཾ ལདྡྷཱཨེཝ ཚདྭཱརིཀཱ ཀུསལཱཀུསལཝིཔཱཀ ཀྲིཡབྷཱུཏཱ སམུདེནྟི. ནཝནཝཱ སནྟཏིཡོ པཱཏུབྷཝནྟི. ཨལདྡྷཱ པན ནིརུཛ྄ཛྷནྟི. སནྟཏིཾ ན གྷཊེནྟི. ཝིཉྙཱཎཾཙ སཧཛཱཏ ནཱམེཙ ཝཏྠུརཱུཔེཙ པཝཏྟམཱནེཨེཝ པཝཏྟཏི. ནིཝཏྟམཱནེ ནིཝཏྟཏཱིཏི. ཁཎཝསེནཱཏི ཝུཏྟཔྤཀཱརེ པཙྩཡེ ཨནཔེཀྑིཏྭཱ ཀེཝལཾ ནཱམརཱུཔཱནཾ པཝཏྟིཀྑཎཝསེན. ཁཎསདྡེན ཙེཏྠ སམྨསནཉཱཎེ ཝུཏྟརཱུཔསནྟཏི ནཱམསནྟཏིཡོཔི གཧེཏབྦཱ. ནཧི སཱཝཀཱནཾ ཉཱཎཾ ཁཎཝསེན ནཱམརཱུཔཱནཾ ཨུདཡཾཝཱ ཝཡཾ ཝཱ སམྤཱཔུཎིཏུཾ སཀྐོཏཱིཏི. ཡཐཱ པན རཏྟནྡྷཀཱརེ ཨནྟོ ལེཎེ མཧནྟོ ཏམོཁནྡྷོ ཛཱཡཏི. དཱིཔཾ ཛཱལེནྟསྶ པན དཱིཔོབྷཱསོ ཨེཀཀྑཎེ ཨེཝ སཀལཾ ཨནྟོལེཎཾ ཕརམཱནོ ཨུདེཏི. ཏམོཁནྡྷོ ཝེཏི. ཨཱལོཀསྶ ཨུདཡོ ཧོཏི. ཏམོཁནྡྷསྶ ཝཡོ. པུན དཱིཔེ ནིབྦཱཔཱིཡམཱནེ ཏམོཁནྡྷསྶ ཨུདཡོ ཧོཏི. ཨཱལོཀསྶ ཝཡོ. ཨེཝ མེཝཾ སརཱིརེ ནཱནཱཨུཏུཝསེནཝཱ ནཱནཱཧཱརཝསེནཝཱ ནཱནཱཙིཏྟ ཝསེནཝཱ ནཱནིརིཡཱཔཐཝསེནཝཱ ནཱནཱཔཡོགཝསེནཝཱ ཨུདཡཔཀྑཱནཾ ཝཡཔཀྑཱནཉྩ ནཱནཱསནྟཏཱིནཾ ཨུདཡཉྩ ཨུདཡཏོ ཝཡཉྩ ཝཡཏོ སུདིཊྛཾ ཀཏྭཱ སམནུཔསྶནྟསྶཱཏི ཨཏྠོ. ཨེཝཾ སམནུཔསྶནྟསྶ པན ཨཱརདྡྷཝིཔསྶཀབྷཱཝཾ པཏྟསྶ ཨུདཡབྦཡ ཉཱཎེ ཏིཀྑེ སཱུརེ ཝཧནྟེ དསཝིདྷཱ ཝིཔསྶནུཔཀྐིལེསསངྑཱཏཱ པཱརིཔནྠཀདྷམྨཱ ཨུཔྤཛྫནྟི. ཏེ དསྶེཏུཾ ཨོབྷཱསོཏིཨཱདིགཱཐ མཱཧ. ཏཏྠ ཨོབྷཱསོཏི ཝིཔསྶནཱ ཙིཏྟསམུཊྛིཏོ སརཱིརོབྷཱསོ. པཱིཏཱིཏི ཝིཔསྶནཱཙིཏྟསམྤཡུཏྟཱ པཉྩཝིདྷཱ པཱིཏི. པསྶདྡྷཱིཏི དུཝིདྷཱཔསྶདྡྷི. ཨདྷིམོཀྑོཏི སདྡྷཱདྷིམོཀྑོ. པགྒཧོཏི ཝཱིརིཡཾ. སུཁནྟི སོམནསྶཾ. ཉཱཎནྟི ཝིཔསྶནཱ ཉཱཎཾ. ཨུཔཊྛཱནནྟི སཏི. ཨུཔེཀྑཱཏི ཏཏྲམཛ྄ཛྷཏྟུཔེཀྑཱ ཙེཝ ཨཱཝཛྫནུཔེཀྑཱ ཙ. ནིཀནྟཱིཏི ཨོབྷཱསཱདཱིཧི སཧ ཝིཔསྶནཱཡ ཨཱལཡཾ ཀུརུམཱནཱ སུཁུམཱ ཏཎྷཱ. ཨཡམེཝ པན ཨེཀནྟཏོ ཝིཔསྶནུཔཀྐིལེསོ ཧོཏི. ཨོབྷཱསཱདཡོ པན ཏསྶཱ ཝཏྠུབྷཱུཏཏྟཱ ¶ ཨུཔཀྐིལེསཱཏི ཝུཏྟཱ. ཏེསུ ཧི ཨུཔྤཛྫམཱནེསུ ན ཝཏ མེ ཨིཏོ པུབྦེ ཨེཝརཱུཔོ ཨོབྷཱསོ ཨུཔྤནྣཔུབྦོ. ཨེཝརཱུཔཱ པཱིཏི.ལ. ཨུཔེཀྑཱ ཨུཔྤནྣཔུབྦཱ ཨདྡྷཱ མགྒཾ པཏྟོསྨི. ཕལཾ པཏྟོསྨཱིཏི ཨེཝཾ ཨསྶཱདསཧིཏཱ ཨམགྒེ མགྒསཉྙཱ ཨཕལེ ཕལསཉྙཱ ཨུཔྤཛྫཏི. ཏདཱ ཀོཙི ཨབྱཏྟོ ཡོགཱཝཙརོ ཀམྨཊྛཱནཾ ཝིསྶཛྫེཏྭཱ ཨདྷིམཱནཝསེན ཝིཀྑིཔནྟོ ཝིཙརཏཱིཏི. བྱཏྟོ པན ཏཱཝདེཝ སབྷིཾ པཊིལབྷིཏྭཱ ཨིདཱནི མམ ཨེཏེསུ ཨོབྷཱསཱདཱིསུ ཨེཏཾ མམ ཨེསོ ཧ མསྨི ཨེསོ མེ ཨཏྟཱཏི ཙིཏྟསྶ ནིཀཱམནཱཀཱརོ པཉྙཱཡཏི. ནཙ ལོཀུཏྟརདྷམྨོནཱམ ཨཱིདིསསྶ ནིཀཱམནསྶ ཝཏྠུ. ཨདྡྷཱ མམ སཾཀིལེསདྷམྨོ ཨུཔྤནྣོ. སོ ཝཌྜྷམཱནོ མཾ ནིཡྻཱནམུཁཏོ པཱཏེཏྭཱ ཝཊྚམུཁེ ཡོཛེསྶཏི. ཧནྡ ཏེསྭེཝ ལཀྑཎཏྟཡཾ ཨཱརོཔེཏྭཱ ནིཀནྟིཾ སོདྷེཏྭཱ ཡཐཱཔཝཏྟཾ ཝིཔསྶནཱཝཱིཐིཾ པཊིཔཱདེསྶཱམཱིཏི ཏེ ཨོབྷཱསཱདཡོ ཨེཝ ཏཱཝ པརིགྒཎྷཱཏི. ཨཡཾ མེ ཨོབྷཱསོ ཨནིཙྩོ ཁཡཊྛེན དུཀྑོ བྷཡཊྛེན ཨནཏྟཱ ཨསཱརཀཊྛེནཱཏིཨཱདིནཱ སམྨསཏཱིཏི ཨཏྠོ. ཨེཝཾ ཏེ ཨོབྷཱསཱདིཀེ ཝིཔསྶནཱཡ ཨུཔཀྐིལེསབྷཱུཏེ པརིཔནྠ དྷམྨེ པརིགྒཎྷིཏྭཱ ཏཔྤརིགྒཧཝསེན ཏེསུ ནིཀནྟིཾ པརིཡཱདི ཡིཏྭཱ ཋིཏསྶ ཨུཔྤནྣཾ མགྒཱམགྒལཀྑཎཝཝཏྠཱནཉཱཎཾ མགྒཱམགྒཉཱཎ དསྶནཝིསུདྡྷིནཱམ. ཨམགྒེསུ ཨོབྷཱསཱདཱིསུ མགྒསཉྙཱམལཏོ ཡཐཱ ཝུཏྟནིཀནྟིམལཏོཙ ཝིསུདྡྷཏྟཱ. ཏཉྷི ཉཱཎཾ ཏེསུ ནིཀནྟིཡཱཔི ཝིཀྑམྦྷིཏཱཡ ཨེཝ ཨོབྷཱསཱདིཔཊིབནྡྷཏོ སུཊྛུ པརིསུདྡྷཾནཱམ ཧོཏཱིཏི.

[༢༤༥] ཝིབྷཱཝནིཡཾ པན

ཨནིཙྩཱདིཝསེན ཨོབྷཱསཱདི པཊིབནྡྷཔརིགྒཧཾ ཝིསུཾ ཨཝཏྭཱ མགྒཱམགྒཛཱནནམཏྟེནེཝ མགྒཱམགྒཉཱཎདསྶནཝིསུདྡྷིནཱམ ཝུཏྟཱ. སཱ ཨཊྛཀཐཱཡ ན སམེཏི.

ཏཐཱ པརིཔནྠཝིམུཏྟསྶཱཏི ཏཐཱ པརིགྒཧེཏྭཱ ཏཏོ ཝིཔསྶནུཔཀྐིལེསཔརིཔནྠཏོ ཝིམུཏྟསྶ ཡཱཝཱནུལོམཱཏི ཡཱཝཨནུལོམཉཱཎཱ. ¶ ཏིལཀྑཎཾ ཨཱརོཔེཏྭཱཏི སམྦནྡྷོ. ཝིཔསྶནཱཔརིཔཱཀཾཨཱགམྨཱཏི སངྑཱརུཔེཀྑཱབྷཱཝཾ པཏྭཱ ཏིཝིདྷ ཝིམོཀྑམུཁབྷཱཝཔྤཏྟིཡཱཙེཝ སཏྟཨརིཡཔུགྒལཝིབྷཱགསྶ པཙྩཡ བྷཱཝཔྤཏྟིཡཱཙ ཝིཔསྶནཱཉཱཎསྶ པརིཔཱཀཾ ཨཱགམྨ པཊིཙྩ. ཨིདཱནི ཨཔྤནཱ ཨུཔྤཛྫིསྶཏཱིཏི ཝཏྟབྦཀྑཎེཏི སམྦནྡྷོ. ཨཔྤནཱ ཏིཙ སོཏཱཔཏྟིམགྒཨཔྤནཱ. དྭེཏཱིཎིཝིཔསྶནཱཙིཏྟཱནཱིཏི ཏིཀྑཔཉྙསྶ དྭེ ཝིཔསྶནཱཙིཏྟཱནི. མནྡཔཉྙསྶ ཏཱིཎི ཝིཔསྶནཱཙིཏྟཱནི. ཡཾཀིཉྩཱིཏི ཏཱིསུ ལཀྑཎེསུ ཨཉྙཏརཾ ཡཾཀིཉྩི. ཡཱསིཁཱཔཏྟཱསཱནུལོམཱསངྑཱརུཔེཀྑཱཏི མཏྠཀཔཏྟཱ ཨནུལོམཉཱཎསཧིཏཱ ཡཱ སངྑཱརུཔེཀྑཱ ཨཏྠི. སཱ ཝུཊྛཱནགཱམིནིཝིཔསྶནཱཏིཙ ཝུཙྩཏཱིཏི ཡོཛནཱ. སངྑཱརུཔེཀྑཱཉཱཎཾ ཨནུལོམཉཱཎནྟི ཨིམཱནི དྭེ ཉཱཎཱནི ཝུཊྛཱནགཱམིནི ཝིཔསྶནཱནཱམཱཏི ཝུཙྩནྟཱིཏི ཝུཏྟཾ ཧོཏི. ཨིདཾ པན པརིཔཱཀགཏཝིཔསྶནཱ དསྶནཝཙནཾ. ཨེཏྠཙ ཝུཊྛཱནནྟི མགྒོ ཝུཙྩཏི. སོ ཧི ཝིཔསྶནཱཉཱཎསྶ ཨཱརམྨཎབྷཱུཏ སངྑཱརནིམིཏྟཏོཝཱ སཡཾ སཾཡོཛནཝཏྠུབྷཱཝཏོཝཱ ཝུཊྛཱཏི. ཏཾ སམངྒིཔུགྒལཾཝཱ པུཐུཛྫནབྷཱཝཏོ སམུདཡཔཧཱནཝསེན ཝཊྚ པཝཏྟཏོཙ ཝུཊྛཱཔེཏི. ཏསྨཱ ཝུཊྛཱནནྟི ཝུཙྩཏི. ཨཝསྶཾ ཝུཊྛཱནཾ གཙྪནྟི ཨེཏཱཡཱཏི ཝུཊྛཱནགཱམིནཱིཏི ཨེཝཾ དྭིནྣཾ ཉཱཎཱནཾ ཝུཊྛཱན གཱམིནིབྷཱཝོ ཝེདིཏབྦོ. ཏཏོཔརནྟི དྭིནྣཾཝཱ ཏིཎྞཾཝཱ ཝིཔསྶནཱ ཙིཏྟཱནཾ པཝཏྟིཡཱ པརཾ ནིབྦཱནཾ ཨཱལམྦིཏྭཱཏི མགྒསྶ ཨཱཝཛྫནཊྛཱནིཡཾ ཧུཏྭཱ ཏསྶ པུརེཙརབྷཱཝེན ནིབྦཱནམེཝ ཨཱརམྨཎཾ ཀཏྭཱ. ཏཏོ ཡེཝཙ ཏཾ ཝིཔསྶནཱནཱམཾ ནལབྷཏཱིཏི. པུཐུཛྫན གོཏྟམབྷིབྷཝནྟནྟི ཨེཏེན གོཏྟཾ བྷཝཏི ཨབྷིབྷཝཏཱིཏི གོཏྲབྷུ. གོཏྟནྟི ཙེཏྠ པརིཔུཎྞཀིལེས སམཱཡོགེན ཨནརིཡབྷཱཝསངྑཱཏཱ པུཐུཛྫནཛཱཏི ཝུཙྩཏཱིཏི ཨིམམཏྠཾ དསྶེཏི. ཨརིཡགོཏྟམབྷིསམྦྷོནྟཉྩཱཏི ཨེཏེན གོཏྟཾ བྷཝཏི པཱཔུཎཱཏཱིཏི གོཏྲབྷུ. གོཏྟནྟིཙ ཏཾཏཾ ཀིལེས ཝིསུདྡྷབྷཱཝ སངྑཱཏཱ ཨརིཡཛཱཏི ཝུཙྩཏཱིཏི ཨིམམཏྠཾ དསྶེཏི. མགྒོ ཨཔྤནཱ ཝཱིཐིཾ ཨོཏརཏཱིཏི སམྦནྡྷོ. དུཀྑསཙྩཾཔརིཛཱནནྟོཏི ཏེབྷཱུམཀ དྷམྨཱནཾ ཨེཀནྟདུཀྑབྷཱཝཾ པརིཙྪིཛྫ ཛཱནནྟོ. པརིཛཱནནཉྩེཏྠ ཏེསཾ དུཀྑབྷཱཝ ¶ པཊིཙྪཱདཀསྶ སམྨོཧསྶ པཧཱནམེཝ དཊྛབྦཾ. སམུདཡ སཙྩཾཔཛཧནྟོཏི ཨཏྟནོ ཙིཏྟསནྟཱནེ ཨནུསཡབྷཱཝེན པཝཏྟམཱནཾ ཏཎྷཱསངྑཱཏཾ སམུདཡསཙྩཾ ཨེཀདེསེནཝཱ ཨནཝསེསེནཝཱ ཨཔཙྪཱཝཏྟིཀཾ ཀཏྭཱ པཛཧནྟོ. ནིརོདྷསཙྩཾསཙྪིཀརོནྟོཏི ཙཀྑུམཱ ཝིཡ ནབྷམཛ྄ཛྷེ ཝིརོཙམཱནཾ ཙནྡམཎྜལཾ ཨཏྟནོ སནྟཱནེ ཨེཀདེསསྶཝཱ སཀལསྶཝཱ ཀིལེས ཝཊྚསྶཝཱ ཨཱཡཏིཾ བྷཱཝིནོ ཝིཔཱཀཝཊྚསྶཾཝཱ ཨཏྟནོ སནྟཱནེ པུན ཨནུཔྤཱདདྷམྨབྷཱཔཏྟིཝསེན ནིརོདྷསངྑཱཏཾ ནིབྦཱནཾ པཙྩཀྑཾ ཀརོནྟོ. མགྒསཙྩཾབྷཱཝནཱཝསེནཱཏི ཨིཏོ པུབྦེ ཨནམཏགྒེ སཾསཱརེ ཨནུཔྤནྣཔུབྦསྶ ཨཊྛངྒིཀསྶ མགྒསཙྩསྶ ཨུཔྤཱདནསངྑཱཏཱཡ བྷཱཝནཱཡ ཝསེན. མགྒཙེཏནཱཡ པན ཨཱནནྟརིཀཕལཏྟཱ ཏངྑཎེ ཨཔནཱིཏགྒིཀེ པདེསེ པུན ཨུདཀཾ ཨཱསིཉྩིཏྭཱ ནིབྦཱཔེནྟོ ཝིཡ མགྒཱནུཀཱུལཔཝཏྟིཝསེན དུཀྑཔརིཛཱནནཱདཱིནི ཙཏྟཱརི ཀིཙྩཱནི ཨནུཀུབྦནྟཱནི ཏཏོཔརཾ དྭེཝཱ ཏཱིཎིཝཱ ཕལཙིཏྟཱནི པཝཏྟནྟི. ཏཏོཔརཾ བྷཝངྒཔཱཏོ ཧོཏཱིཏི དསྶེཏུཾ ཏཏོཔརནྟིཨཱདིམཱཧ. ཡཐཱ པན པསཱདཙཀྑུནཱཝཱ དིབྦཙཀྑུནཱཝཱ ཀིཉྩིརཱུཔཾ པསྶནྟསྶ ཏཱནི ཙཀྑཱུནི ཏཾ རཱུཔཾ པཙྩཀྑཾ ཀཏྭཱ པཙྪཱ ཏསྶ པུགྒལསྶཔི པཙྩཀྑཏོ པཱཏུབྷཱུཏཾ ཀཏྭཱ ནིརུཛ྄ཛྷནྟི. ན ཏཱཝ ཏེསཾ ཨུཔྤཏྟིཀྑཎེ ཏཾ རཱུཔཾ ཏསྶ ཨཧཾ ཨིདཾནཱམ པསྶཱམཱིཏི པཱཀཊཾ ཧོཏི. པཙྪཱ པན པཙྩཝེཀྑན ཝཱརེསུ པཝཏྟམཱནེསུཨེཝ ཏཾརཱུཔཾ ཏདནུབནྡྷཱཙ ནཱནཱཀཱརཱ ཏསྶ པཱཏུབྷཱུཏཱ ཧོནྟི. ཨེཝམེཝཾ ཨིདྷཔི པཙྩཝེཀྑནཝཱརེསུ པཝཏྟམཱནེསུཨེཝ ནིབྦཱནཉྩ ཏདནུབནྡྷཱནི མགྒཕལཱདཱིནིཙ པཱཏུབྷཝནྟཱིཏི ཝུཏྟཾ པུནབྷཝངྒཾ.ལ. པཝཏྟནྟཱིཏི. ཨིདཱནི པཙྩཝེཀྑནཉཱཎསྶ བྷཱུམིཾ དསྶེཏུཾ མགྒཾཕལཉྩནིབྦཱནནྟིཨཱདིགཱཐ མཱཧ. ཏཏྠ པཎྜིཏོཏི ཨརིཡཱཡ པཉྙཱཡ སམནྣཱགཏོ ཕལཊྛོ. ཧཱིནེཏི པཧཱིནེ. སེསེཏི ཨཔཧཱིནེ ཨུཔརིམགྒཝཛ྄ཛྷེ. ཨིམཱནི པན དྭེ པཧཱིནཱཝསིཊྛཀིལེསཔཙྩཝེཀྑནཱནི ཀེསཉྩི ཛཱིཝིཏསམསཱིསིཔུགྒལཱནཾ ཀིལེས ཝིབྷཱགེསུ ཨཀོཝིདཱནཉྩ ནལབྦྷནྟཱིཏི ཝུཏྟཾ པཙྩཝེཀྑཏིཝཱནཝཱཏི. ཨེཏྠཙ ཝིསུདྡྷིམགྒེ ཏཱཝ སབྦཔཐམཾ མགྒཔཙྩཝེཀྑནཾ ཝུཏྟཾ. ཏཏོ ཕལཔཙྩཝེཀྑནཾ. ¶ ཏཏོ པཧཱིནཀིལེསཔཙྩཝེཀྑནཾ. ཏཏོ ཨཝསིཊྛཀིལེསཔཙྩཝེཀྑནཾ. ཨཝསཱནེ ནིབྦཱནཔཙྩཝེཀྑནཾ ཝུཏྟཾ. པཊིསམྦྷིདཱམགྒཊྛཀཐཱཡཾ པན སབྦཔཐམཾ ཀིལེསཔཙྩཝེཀྑནཾ ཨདྷིཔྤེཏཾ. ཝུཏྟཉྷི ཏཏྠ པཙྩཝེཀྑནེསུ པཐམཾ ཀིལེསཔཙྩཝེཀྑནཾ ཧོཏི. ཏཏོ མགྒཕལནིབྦཱནཔཙྩཝེཀྑནཱནཱིཏི. ཏཾ པན པཱལི༹ཡཾ པཙྩཝེཀྑན ཉཱཎསྶ ནིདྡེསཏོ པུབྦེ པཐམཾ ཚིནྣམནུཔསྶནེ པཉྙཱཝིམུཏྟི ཉཱཎནྟི ཨེཝཾ ཝིསུཾ ཝིམུཏྟིཉཱཎསྶ ཨཱགཏཏྟཱ ཝུཏྟཾ. ཏཏྠ ཚིནྣནྟི ཏེན ཏེན མགྒེན སམུཙྪིནྣཾ ཀིལེསཛཱཏནྟི ཨཏྠོ. པཱལི༹ ཨནུ སཱརེན ཝུཙྩམཱནེ པན པཐམཾ པཧཱིནཾ ཀིལེསཱནཾ པཙྩཝེཀྑནཾ. ཏཏོ པཙྩེཀཾ མགྒངྒབོཛ྄ཛྷངྒཱདཱིནཾ པཙྩཝེཀྑནཾ. ཏཏོ ཏེསཾ ཨཱརམྨཎབྷཱུཏསྶ ནིབྦཱནསྶ པཙྩཝེཀྑནཾ. ཏཏོ ཕལདྷམྨཱནཾ པཙྩཝེཀྑནཾ. ཏཏོ ཏེསཾ ཨཱརམྨཎབྷཱུཏསྶ ནིབྦཱནསྶ པཙྩཝེཀྑནནྟི ཝཏྟབྦཾ ཧོཏི. པཱལི༹ཡཉྷི པཙྩཝེཀྑནཉཱཎནིདྡེསེ ནིབྦཱནཾ མགྒཝཱརེཔི ཕལཝཱརེཔི དྭིཀྑཏྟུཾ ཨཱགཏནྟི. ཨིཏི ནིབྦཱནཔཙྩཝེཀྑནཾ ནཱམ ཨིཏརེསཾ པཙྩཝེཀྑནཱནཾ ཨཱདིམྷིཝཱ མཛ྄ཛྷེ ཨནྟརནྟརཱཝཱ ཨཝསཱནེཝཱ ཡཏྠཀཏྠཙི པཝཏྟཏཱིཏི སིདྡྷཾ ཧོཏི. ཏཐཱ ཀིལེསཔཙྩཝེཀྑནཾཔི མགྒཕལཔཙྩཝེཀྑནཱནཾ ཨཱདིམྷིཝཱ པཙྪཱཝཱཏི. ཨེཝཉྷི སཏི མགྒཾ ཕལཉྩ ནིབྦཱནནྟི ཨཡཾ གཱཐཱཔི ཨཝིརུདྡྷཱ ཧོཏཱིཏི. ཨེཝཉྩ ཀཏྭཱ ཨདྷིམཱནནིདྡེསཊྛཀཐཱསུ སོ ཧི མགྒཕལནིབྦཱན པཧཱིན ཀིལེསཱ ཝསིཊྛཀིལེས པཙྩཝེཀྑནེན སཉྫཱཏསོམནསྶོ ཨརིཡགུཎཔཊིཝེདྷེ ནིཀྐངྑོཏི ཝུཏྟཾ. ཨེཏྠཙ སོཏཱཔནྣསྶ པཉྩ པཙྩཝེཀྑནཱནི ཧོནྟི. ཏཐཱ སཀདཱགཱམིསྶ པཉྩ. ཨནཱགཱམིསྶ པཉྩ. ཨརཧཏོ པན ཨཝསིཊྛཀིལེསོནཱམ ནཏྠཱིཏི ཙཏྟཱརཱིཏི ཨེཀཱུནཝཱིསཏི པཙྩཝེཀྑནཱནི ཧོནྟཱིཏི. ཨིདཉྩ པརིཔུཎྞ ཝསེན ལབྦྷམཱནཾ སནྡྷཱཡ ཝུཏྟཾ. ཨཔརིཔུཎྞཾཔི པན ཧོཏིཡེཝ. ཏཐཱ ཧི ཙཱུལ༹དུཀྑཀྑནྡྷསུཏྟཨཊྛཀཐཱཡཾ སཱ པན ན སབྦེསཾ པརིཔུཎྞཱ ཧོཏི. ཨེཀོ ཧི པཧཱིནཀིལེསམེཝ པཙྩཝེཀྑཏི. ཨེཀོ ཨཝསིཊྛཀིལེསམེཝ. ཨེཀོ མགྒམེཝ. ཨེཀོ ཕལམེཝ. ཨེཀོནིབྦཱནམེཝ. ཨིམཱསུ པན པཉྩསུཔཙྩཝེཀྑནཱསུ ཨེཀཾཝཱདྭེཝཱ ནོ ལདྡྷུཾ ནཝཊྚཏཱིཏི ཝུཏྟཾ. ཨེཝཾ ཚབྦིསུདྡྷིཀམེན བྷཱཝེཏབྦོ ཙཏུབྦིདྷོ མགྒོ ¶ ཉཱཎདསྶནཝིསུདྡྷིནཱམ ཝུཙྩཏཱིཏི སམྦནྡྷོ. མགྒསདྡེན ཙེཏྠ ཙཏུབྦིདྷཾ མགྒཉཱཎཾ ཏདནུཀཱུལཔཝཏྟིཝསེན ཕལཉཱཎཉྩ གཧིཏནྟི དཊྛབྦཾ. ཨེཏྠཱཏི ཝིཔསྶནཱཀམྨཊྛཱནེ. ཏཏྠཱཏི ཏེསུ ཨནུཔསྶནཱ མགྒཕལེསུ. ཨབྷིནིཝིསནཾ ཨབྷིནིཝེསོ. ཧེཊྛཱ སིལཱཔཐཝིཡཾ ནིཁཱཏསིནེརུཔཱདསྶ ཝིཡ ཨཛ྄ཛྷཏྟཁནྡྷེསུ དལ༹ྷཾ གཧེཏྭཱ པཝཏྟཱིཏི ཨཏྠོ. ཨཏྟཱ ཨིཏི ཨབྷིནིཝེསོ ཨཏྟཱབྷིནིཝེསོ. ཏཾ ཨཏྟཱབྷིནིཝེསཾ. མུཉྩནྟཱིཏི ཨཛ྄ཛྷཏྟདྷམྨཱནཾ ཀེཝལཾ པཙྩཡཱཡཏྟ ཝུཏྟིཏཱཡ ཁཎབྷངྒསྶཙ ཨདིཊྛཏྟཱ སོ ཨབྷིནིཝེསོ པཝཏྟཏི. ཏསྨཱ ཏཾ དྭཡཾ སུདིཊྛཾ ཀཏྭཱ རཱུཔཾ ཨནཏྟཱ ཝེདནཱ ཨནཏྟཱཏིཨཱདིནཱ པུནཔྤུནཾ སམནུཔསྶནཱཝསེན ཏཾ ཨབྷིནིཝེསཾ ཝིམོཙཡམཱནཱཏི ཨཏྠོ. ཝིམོཀྑམུཁཾ ཧོཏི, སུཉྙཏཝིམོཀྑ སངྑཱཏསྶ མགྒསྶ ཕལསྶཙ པཝེསནདྭཱརབྷཱུཏཏྟཱ, ཝིཔལླཱས ནིམིཏྟནྟི ཝིཔརཱིཏཝསེན ཨཱསནཾ ཨུཔགམནཾ པཝཏྟནཾཝཱ ཝིཔལླཱསོ. ཨནིཙྩེ ནིཙྩནྟི ཨུཔགམནཾ པཝཏྟནཾཝཱཏི ཨཏྠོ. སོ ཨེཝ ཀིལེ སུཔྤཏྟིཡཱ ཨཱསནྣཀཱརཎཏྟཱ ནིམིཏྟནྟི ཝིཔལླཱསནིམིཏྟཾ. མུཉྩནྟཱིཏི ཨཛ྄ཛྷཏྟདྷམྨཱནཾ ཁཎབྷངྒསྶ ཨདིཊྛཏྟཱ ཏཾནིམིཏྟཾ ཧོཏཱིཏི ཏེསཾ ཁཎབྷངྒཾ སུདིཊྛཾ ཀཏྭཱ རཱུཔཾ ཨནིཙྩཾ ཝེདནཱ ཨནིཙྩཱཏིཨཱདིནཱ པུནཔྤུནཾ སམནུཔསྶནཱཝསེན ཏཾནིམིཏྟཾ ཝིམོཙཡམཱནཱཏི ཨཏྠོ. ཏཎྷཱཔཎིདྷིནྟི ཏཎྷཱཨེཝ ཨབྷིསངྒཝསེན ཨཱརམྨཎེ ཙིཏྟསྶ པཎིདཧནཏོ དལ༹ྷཾ ཐཔནཏོ པཎིདྷཱིཏི ཏཎྷཱཔཎིདྷི. ཏཾཏཎྷཱ པཎིདྷིཾ. མུཉྩནྟཱིཏི ཨཛ྄ཛྷཏྟདྷམྨཱནཾ མཧཱཨཱདཱིནཝརཱསིབྷཱཝསྶ ཨདིཊྛཏྟཱ སོཔཎིདྷི ཧོཏཱིཏི ཏེསཾ མཧཱཨཱདཱིནཝརཱསིབྷཱཝཾ སུདིཊྛཾ ཀཏྭཱ རཱུཔཾདུཀྑཾ ཝེདནཱདུཀྑཱཏིཨཱདིནཱ པུནཔྤུནཾ སམནུཔསྶནཱཝསེན ཏཾཔཎིདྷིཾ ཝིམོཙཡམཱནཱཏི ཨཏྠོ. ཏསྨཱཏི ཡསྨཱ ཨེཏཱ ཝིམོཀྑམུཁབྷཱུཏཱ ཏིསྶོ ཨནུཔསྶནཱ ཨེཝཾ ཝིསེས ནཱམིཀཱ ཧོནྟི. ཏསྨཱ. ཡསྨཱ སངྑཱརེསུ སུཉྙཏདསྶནཝསེན ཨཏྠསིདྡྷིནཱམ ཀེཝལཾ ཨཏྟཱཀིནིཝེསབྷཱུཏསྶ དིཊྛིགཱཧསྶ པཊིཔཀྑབྷཱུཏསྶ ཉཱཎསྶེཝ ཨཱནུབྷཱཝོ ཧོཏི, ཏསྨཱ ཏཐཱ སམནུཔསྶིཏྭཱ ཝིམུཉྩནྟསྶ ཝིཔསྶནཱཔི མགྒོཔི སཧཛཱཏཉཱཎ ཀིཙྩེན ནཱམཾ ལབྷཏཱིཏི ཝུཏྟཾ ཡདིཝུཊྛཱན.ལ. སུཉྙཏོཝིམོཀྑོ ནཱམཧོཏིམགྒོཏི. ¶ ཨནིཙྩདསྶནཝསེན ཨཏྠསིདྡྷིནཱམ ནིམིཏྟཱཏི ནིཝེསབྷཱུཏསྶ མཱནགཱཧསྶ པཊིཔཀྑབྷཱུཏཱཡ སདྡྷཱཡཔི ཨཱནུབྷཱཝོ. ཏསྨཱ ཏཐཱ སམནུཔསྶིཏྭཱ ཝིམུཙྩནྟསྶ ཝིཔསྶནཱཔི མགྒོཔི སཧཛཱཏསདྡྷཱ ཀིཙྩེན ནཱམཾ ལབྷཏཱིཏི ཝུཏྟཾ ཡདིཨནིཙྩཏོ.ལ. ཨནིམིཏྟོ ཝིམོཀྑོནཱམཱཏི. དུཀྑདསྶནཝསེན ཨཏྠསིདྡྷིནཱམ པཎིདྷིསངྑཱཏ ཏཎྷཱགཱཧཔཊིཔཀྑབྷཱུཏསྶ སམཱདྷིསྶཔི ཨཱནུབྷཱཝོ. ཏསྨཱ ཏཐཱ སམནུཔསྶིཏྭཱ ཝིམུཙྩནྟསྶ ཝིཔསྶནཱཔི མགྒོཔི སཧཛཱཏསམཱདྷིཀིཙྩེན ནཱམཾ ལབྷཏཱིཏི ཝུཏྟཾ. ཡདི དུཀྑཏོ. ལ. ཨཔྤཎིཧིཏོ ཝིམོཀྑོནཱམཱཏི. ཝུཏྟཉྷེཏཾ པཊིསམྦྷིདཱམགྒེ ཨནིཙྩཏོ མནསིཀརོཏོ སདྡྷིནྡྲིཡཾ ཨདྷིམཏྟཾ ཧོཏི. དུཀྑཏོ མནསིཀརོཏོ སམཱདྷིནྡྲིཡཾ ཨདྷིམཏྟཾ ཧོཏི. ཨནཏྟཏོ མནསིཀརོཏོ པཉྙིནྡྲིཡཾ ཨདྷིམཏྟཾ ཧོཏཱིཏི. མགྒེ པན ཏིཎྞཾ དྷམྨཱནཾ ཀིཙྩཝིསེསོནཱམ ཝིཔསྶནཱགམནཝསེནེཝ སིདྡྷོཏི ཝུཏྟཾ མགྒོ. ལ. ནཱམཱནི ལབྷཏཱིཏི. ཏཏྠ སུཉྙཏཝིམོཀྑེན ཝིམུཏྟོ ཨརིཡསཱཝཀོ སོཏཱཔཏྟིམགྒཀྑཎེ དྷམྨཱནུསཱརཱིནཱམ ཧོཏི. མཛ྄ཛྷེ ཚསུ མགྒཕལཀྑཎེསུ དིཊྛིཔྤཏྟོ ནཱམ. ཨརཧཏྟཕལཀྑཎེ པཉྙཱཝིམུཏྟོནཱམ. ཨནིམིཏྟཝིམོཀྑེན ཝིམུཏྟོ སོཏཱཔཏྟིམགྒཀྑཎེ སདྡྷཱནུསཱརཱིནཱམ. ཨུཔརི སཏྟསུ ཋཱནེསུ སདྡྷཱཝིམུཏྟོནཱམ. ཨཔཎིཧིཏཝིམོཀྑེན ཝིམུཏྟོ པན ཨཊྛསུཔི ཋཱནེསུ ཀཱཡསཀྑིནཱམ. སོཡེཝ ཨརཱུཔཛ྄ཛྷཱནཾ པཱདཀཾ ཀཏྭཱ ཝིམུཏྟོ ཨརཧཏྟཕལེ ཋིཏོ ཨུབྷཏོབྷཱགཝིམུཏྟོ ནཱམཱཏི ཨེཏྟཱཝཏཱ ཡཾ ཧེཊྛཱ ཝུཏྟཾ ཝིཔསྶནཱཔརིཔཱཀམཱགམྨཱཏི སངྑཱརུཔེཀྑཱབྷཱཝཾ པཏྭཱ ཏིཝིདྷཝིམོཀྑམུཁབྷཱཝཔྤཏྟིཡཱཙེཝ སཏྟཨརིཡཔུགྒལཝིབྷཱགསྶ པཙྩཡབྷཱཝཔྤཏྟིཡཱཙ ཝིཔསྶནཱཉཱཎསྶ པརིཔཱཀཾ ཨཱགམྨ པཊིཙྩཱཏི. ཏཾ སརཱུཔཏོ ནིདྡིཊྛཾ ཧོཏཱིཏི. མགྒཝཱིཐིཡཾ ཕལཉྩ མགྒཱགམན ཝསེན ཏཐཱ ཏཱིཎི ནཱམཱནི ལབྷཏཱིཏི ཡོཛནཱ. ཡཐཱཝུཏྟནཡེན ཝིཔསྶནྟཱནནྟི ཡདི ཨནཏྟཏོ ཝིཔསྶཏཱིཏིཨཱདིནཱ ཝུཏྟཔྤཀཱརནཡེན ཝིཔསྶནྟཱནཾ ཙཏུནྣཾ ཕལཊྛཱནཾ པུགྒལཱནཾ. ཡཐཱསཀཾཕལནྟི སོཏཱཔནྣསྶ སོཏཱཔཏྟིཕལཾ. སཀདཱགཱམིསྶ སཀདཱགཱམིཕལནྟིཨཱདིནཱ ནཡེན ¶ ཨཏྟནོ ཨཏྟནོ སནྟཀབྷཱུཏཾ ཡཾ ཡཾ ཕལཾ ཝིཔསྶནཱགམན ཝསེནེཝ སུཉྙཏཱདིཝིམོཀྑོཏིཙ ཝུཙྩཏི. ནམགྒཱགམནཝསེནཱཏི ཨདྷིཔྤཱཡོ. ཨེཏྠཙ ཝིཔསྶནཱགམན ཝསེན མགྒསྶ ཨནིམིཏྟ ནཱམལཱབྷོནཱམ སུཏྟནྟིཀཔརིཡཱཡེན ཝུཏྟོ. ཨབྷིདྷམྨེ པན ཨནིམིཏྟོ ནཱམམགྒོ ནཨཱགཏོ. ནཧི སོ ནིཔྤརིཡཱཡཏོ ཨནིམིཏྟོནཱམ ཧོཏི. ཧཱིནཔཎཱིཏཱདིཝསེན ཝིབྷཱགཱརཧསྶ སངྑཱརནིམིཏྟསྶ སབྦྷཱཝཏོ. ཏེནེཝ ཧིསྶ དུཀྑཔཊིཔདཱ དནྡྷཱ བྷིཉྙཱདིཝསེནཝཱ པཱརམིདྷམྨཱནཾ པརིཏྟམཧནྟཱདིཝསེནཝཱ ཧཱིན པཎཱིཏ པཎཱིཏཏར པཎཱིཏཏམ ཝིབྷཱགོ སནྡིསྶཏཱིཏི. ཨཊྛཀཐཱཡཾ པན ཨནིཙྩཱནུཔསྶནཱ སངྑཱརེསུ ནིཙྩནིམིཏྟཾ ཝིདྷམནཝསེན པཝཏྟཏྟཱ ཨནིམིཏྟཱནུཔསྶནཱནཱམ སམཱནཱཔི སཡཾ སངྑཱརནིམིཏྟེ པརིཡཱཔནྣཏྟཱ ཨེཀནྟེན ཨཏྟནོནཱམཾ མགྒསྶ དཱཏུཾ ནསཀྐོཏི. ཏསྨཱ མགྒོ ཨབྷིདྷམྨ པརིཡཱཡེན ཨནིམིཏྟནཱམཾ ནལབྷཏཱིཏི ཝུཏྟཾ. སུཏྟནྟིཀཔརིཡཱཡེན པན ཡཐཱ པཐཝིཀསིཎཱརམྨཎཾ ཛྷཱནཾ པཐཝིཀསིཎནྟི ཝུཙྩཏི. ཨེཝཾ སུཉྙཏཱདིནཱམཾ ནིབྦཱནཾ ཨཱརམྨཎཾ ཀཏྭཱ པཝཏྟཱནི མགྒཕལཱནིཔི ཨཱརམྨཎཝསེནཔི སུཉྙཏཱདིནཱམཾ ལབྷནྟི. ཨཱརམྨཎཀརཎཝསེན པན སམྤཡོགཝསེནཝཱ པལིབོདྷཀརཱཙ ནིམིཏྟཀརཱཙ པཎིདྷིཀརཱཙ རཱགཱདཡོ ཀིལེསདྷམྨཱ ཏེསུ ནཏྠི. ཏསྨཱ ཏཱནི ཨཉྙཾ ཨཱགམནཾཝཱ ཨཱརམྨཎཾཝཱ ཨནཔེཀྑིཏྭཱ ཨཏྟནོ སབྷཱཝེནཔི སུཉྙཏཱདིནཱམཾ ལབྷནྟཱིཏི དསྶེཏུཾ ཨཱརམྨཎཝསེནཱཏིཨཱདི ཝུཏྟཾ. ཏཏྠ སརསཝསེནཱཏི ཨཏྟནོ སབྷཱཝེན. ནཱམཏྟཡནྟི སུཉྙཏཱདི ནཱམཏྟིཀཾ. སབྦཏྠཱཏི སབྦཱསུ མགྒཝཱིཐི ཕལསམཱཔཏྟིཝཱིཐཱིསུ. སབྦེསཾཔཱིཏི སབྦེསཾཔི མགྒཕལཱནཾ. སམམེཝཱཏི སམཱནམེཝ. སདིསམེཝ. ཨེཏྠཔནཱཏི ཨེཏེསུ པན ཡཐཱཝུཏྟེསུ མགྒཕལེསུ. ཡསྨཱ སབྦཱདིཊྛིཡོཙ སོལ༹སཝིདྷཱ ཝིཙིཀིཙྪཱཙ ཨཏྟདིཊྛིམཱུལིཀཱ ཨེཝ ཧོནྟི. ཨཏྟདིཊྛིཡཱ ནིརུདྡྷཱཡ ནིརུཛ྄ཛྷནྟི སབྦཱནིཙ ཨཔཱཡགཱམི ཀམྨཱནིནཱམ ཨཏྟདིཊྛིཡཱ སཏིཡཱཨེཝ ཝིཔཙྩནྟི. ཨསཏིཡཱ ན ཝིཔཙྩནྟི. དིཊྛསཙྩཱནཉྩ སཱ དིཊྛི སབྦསོ པཧཱིནཱ ཧོཏི. ཏསྨཱ སོཏཱཔཏྟིམགྒཾ.ལ. པཧཱིནཱཔཱཡ གམནོཏི ཝུཏྟཾ. ཨཔཱཡཾ གཙྪནྟི ¶ ཨེཏེཧཱིཏི ཨཔཱཡགམནཱནི. དིཊྛིཝིཙིཀིཙྪཱཝིཔྤཡུཏྟཱ ཨཀུསལདྷམྨཱཙེཝ པུབྦེཀཏདུཙྩརིཏཀམྨཱནིཙ. པཧཱིནཱནི ཨཔཱཡགམནཱནི ཨེཏསྶཱཏི པཧཱིནཱཔཱཡགམནོ. པཊིཝིདྡྷཙཏུསཙྩཱནཾ པཧཱིནཨཏྟདིཊྛཱིནཾ བོདྷིཔཀྑིཡདྷམྨཱ ཨེཀནྟེན ཨུཔརཱུཔརི ཝཌྜྷནཔཀྑེ ཋིཏཱ ཧོནྟི. ཀིལེསདྷམྨཱ པན ཧཱཡནཔཀྑེ. ཏསྨཱ ཏེ ཨནུཀྐམེན པརིཧཱཡིཏྭཱ གཙྪནྟཱ ཨུཔརིམ ཀོཊིཡཱ སཏྟཧི བྷཝེཧི སབྦསོ པརིཀྑཡཾ གཙྪནྟཱིཏི ཝུཏྟཾ སཏྟཀྑཏྟུཔརམོསོཏཱཔནྣོནཱམ ཧོཏཱིཏི, ཏཏྠ སཏྟཀྑཏྟུསདྡེན སཏྟཔཊིསནྡྷིགཧཎཝཱརཱ ཝུཙྩནྟི. པརམོཏི ཨུཀྐཾསཔརིཙྪེདོ. ཨིཏི སཏྟཀྑཏྟུཾ པརམོ ཨེཏསྶཱཏི. སཏྟཀྑཏྟུཔརམོ. སོ པན དེཝེསུ སཏྟཀྑཏྟུ པརམོ, མནུསྶེསུ སཏྟཀྑཏྟུ པརམོ, ཨུབྷཡཏྠ སཏྟཀྑཏྟུ པརམོཏི ཏིཝིདྷོ ཧོཏི. ཡཐཱཧ –

ཀཏམོཙ པུགྒལོ སཏྟཀྑཏྟུཔརམོ ཨིདྷེཀཙྩོ པུགྒལོ ཏིཎྞཾ སཾཡོཛནཱནཾ པརིཀྑཡཱ སོཏཱཔནྣོ ཧོཏི, ཨཝིནིཔཱཏདྷམྨོ ནིཡཏོ, སམྦོདྷིཔརཱཡནོ, སོ སཏྟཀྑཏྟུཾ དེཝེཙ མནུསྶེཙ སནྡྷཱཝིཏྭཱ སཾསརིཏྭཱ དུཀྑསྶནྟཾ ཀརོཏི. ཨཡཾ ཝུཙྩཏི པུགྒལོ སཏྟཀྑཏྟུ པརམོཏི.

ཨེཏྠ ཧི ཙ སདྡོ ཨནིཡམཏྠོ. ཨེཏེན ཡོཙ དེཝེཨེཝ སཏྟཀྑཏྟུཾ སཾསརཏི. ཡོཙ མནུསྶེཨེཝ སཏྟཀྑཏྟུཾ སཾསརཏི. ཡོཙ དེཝེཙ མནུསྶེཙ མིསྶཀབྷཝ ཝསེན སཏྟཀྑཏྟུཾ སཾསརཏི. ཏིཝིདྷོ པེསོ སཏྟཀྑཏྟུ པརམོནཱམཱཏི དསྶེཏི. ཨཊྛཀཐཱཡཾ པན མིསྶཀབྷཝ ཝསེནསྶ ཨཏྠོ ཝུཏྟོ. ཨེཏྠཙ ཡསྨཱ མཧགྒཏཛ྄ཛྷཱནསྶཙ ཨུཔརིམགྒ ཝིཔསྶནཱ ཡཙ ཨཱནུབྷཱཝཾ ཨནཔེཀྑིཏྭཱ ཀེཝལཾ ཨིམསྶ མགྒསྶ ཨཱནུབྷཱཝགཏིཡཱ ཨེཝ སཏྟཀྑཏྟུཔརམོནཱམ ཝུཏྟོ. སོཙ པཱལི༹ཡཾ ཀཏམེསཾ པཉྩནྣཾ ཨིདྷ ནིཊྛཱ. སཏྟཀྑཏྟུཔརམསྶ ཀོལཾ ཀོལསྶ ཨེཀབཱིཛིསྶ སཀདཱགཱམིསྶ ཡོཙ དིཊྛེཝདྷམྨེ ཨརཧཱཏི ཝུཏྟཏྟཱ ཀཱམབྷཝེཨེཝ ཛྷཱནརཧིཏོ སུཀྑཝིཔསྶཀོཝཱ ¶ པརིཧཱིནཛ྄ཛྷཱནོཝཱ དཊྛབྦོ. ཏེནེཝཙ པཊིསམྦྷིདཱམགྒཊྛ ཀཐཱཡཾ ཏཡོཔི ཨིམེ སོཏཱཔནྣཱ ཀཱམབྷཝཝསེན ཝུཏྟཱ. རཱུཔཱརཱུཔབྷཝེ པན བཧུཀཱཔི པཊིསནྡྷིཡོ གཎྷནྟཱིཏི ཝུཏྟཾ. ཨངྒུཏྟརཊྛཀཐཱཡཉྩ ཨཊྛམཾ བྷཝནྟི ཀཱམབྷཝེ ཨཊྛམཾ པཊིསནྡྷིནྟི ཝུཏྟཾ. ཏསྨཱ ཡེ ཀཱམབྷཝེཡེཝ སཏྟཝཱརཏོ ཨོརཾཝཱ དིཊྛདྷམྨེ ཡེཝཝཱ ཨུཔརིམགྒཾ གཎྷནྟི. ཏེསཾ ཏཐཱརཱུཔོ པཝཏྟིཝིསེསོ ཨུཔརི མགྒཝིཔསྶནཱབལེན སིདྡྷོཏི ཝེདིཏབྦོ. ཏཐཱ ཧི ཨཊྛཀཐཱསུ ཨུཔརི ཏིཎྞཾ མགྒཱནཾ ཝིཔསྶནཱ ནིཡཱམེཏཱིཏི ཝུཏྟཾ. ཡེ པན དིཊྛདྷམྨེཝཱ སཀྐཨནཱཐཔིཎྜིཀཝིསཱཁཱདཡོ ཝིཡ སཏྟསུ བྷཝེསུ ཡཏྠཀཏྠཙི བྷཝེཝཱ ཛྷཱནཾ ཨུཔྤཱདེཏྭཱ བྲཧྨལོཀཾ གཙྪནྟི. ཡེཙ བྲཧྨལོཀེཡེཝ སོཏཱཔཏྟིམགྒཾ ལབྷིཏྭཱ ཏཏྠེཝ པརིནིབྦཱཡནྟི. ཏེསཾ ཏཐཱརཱུཔོ པཝཏྟི ཝིསེསོ མཧགྒཏཛ྄ཛྷཱནབལེན སིདྡྷོཏི. ཡསྨཱཙ པཱལི༹ཡཾ སཏྟཀྑཏྟུཾ དེཝེཙཱཏི ཨེཏེན ཀཱམབྷཝེ སཏྟ ཨོཔཔཱཏིཀ པཊིསནྡྷིཡོ དསྶེཏི. སཏྟཀྑཏྟུཾ མནུསྶེཙཱཏི ཨེཏེན སཏྟ གབྦྷསེཡྻཀཔཊིསནྡྷིཡོ དསྶེཏཱིཏི ཨུབྷཡེན ཙུདྡས པཊིསནྡྷིཡོ དསྶིཏཱ ཧོནྟི. ཏསྨཱ ཏེན པརིཡཱཡེན ལབྦྷམཱནེ ཙུདྡསབྷཝེ སནྡྷཱཡ སཀྐཔཉྷསུཏྟེ –

ཨིཏོ སཏྟ ཏཏོ སཏྟ, སཾསརཱནི ཙཏུདྡསཱཏི ཝུཏྟཾ. ཏཐཱ ཨངྒུཏྟརེཙ ཏིཀནིཔཱཏེ སཙེ ཨུདཱཡི ཨཱནནྡོ ཨཝིཏརཱགོ ཀཱལཾ ཀརེཡྻ, ཏེན ཙིཏྟཔསཱདེན སཏྟཀྑཏྟུཾ དེཝེསུ དེཝརཛྫཾ ཀརེཡྻ. སཏྟཀྑཏྟུཾ ཨིམསྨིཾཡེཝ ཛམྦུདཱིཔེ མཧཱརཛྫཾ ཀརེཡྻ. ཨཔིཙ ཨུདཱཡི ཨཱནནྡོ དིཊྛེཝདྷམྨེ པརིནིབྦཱ ཡིསྶཏཱིཏི ཝུཏྟཾ. ཀེཙི པན ཨིམེཧི སུཏྟཔདེཧི སཏྟཀྑཏྟུ པརམསྶ སོཏཱཔནྣསྶ ཀཱམབྷཝེ ཙུདྡས པཊིསནྡྷིཡོ ཨིཙྪནྟི. མཧཱཝགྒསཾཡུཏྟཊཱིཀཱཡཉྩ ཀེཙི པན ཀཱམབྷཝེ སཏྟཀྑཏྟུཾཨེཝ ཨུཔྤཛྫཏི, ན ཏཏོ ཨུདྡྷནྟི ཝདནྟི. ཏཾ ཝཱིམཾསིཏབྦནྟི ཝུཏྟཾ. ཝིབྷངྒེ པན ཏཏྠ ཏཏྠ ཨཊྛཱནསུཏྟེསུཙ ཨཊྛཱནམེཏཾ ཨནཝཀཱསོ ཡཾ དིཊྛིསམྤནྣོ པུགྒལོ ཨཊྛམཾ བྷཝཾ ནིབྦཏྟེཡྻ, ནེཏཾ ཋཱནཾ ཝིཛྫཏཱིཏིཙ, ཨངྒུཏྟརེ ཚཀྐནིཔཱཏེ ཨབྷབྦོ དིཊྛསམྤནྣོ པུགྒལོ ཨཊྛམཾ བྷཝཾ ནིབྦཏྟེཏུནྟི ¶ ཙ, མཧཱནིདྡེསེ ཨཛིཏཔཉྷེ སོཧཱཔཏྟིམགྒཉཱཎེན ཨབྷིསངྑཱརཝིཉྙཱཎསྶ, ནིརོདྷེན སཏྟབྷཝེ ཐཔེཏྭཱ ཨནམ ཏགྒེསཾསཱརེ ཡེ ཨུཔྤཛྫེཡྻུཾ ནཱམཉྩ རཱུཔཉྩ, ཨེཏྠེཏེ ནིརུཛ྄ཛྷནྟི. ཝཱུཔསམནྟི. ཨཏྠཾ གཙྪནྟི. པཊིཔསྶམྦྷནྟཱིཏིཙ, ཨེཝཾ དལ༹ྷཾ ཀཏྭཱ ཝུཏྟཏྟཱ ཡཐཱཝུཏྟནཡེནེཝ ཏེསཾ སུཏྟཔདཱནཾ ཨཏྠོ ཝེདིཏབྦོཏི. རཱགདོསམོཧཱནནྟི ཀཱམརཱགསྶ དོསསྶ ཏདེཀཊྛམོཧསྶཙ. ཏནུཀརཏྟཱཏི ཡཐཱ སོཏཱཔནྣསནྟཱནེ ཨུཔྤཛྫནྟཱ དྷམྨིཀེསུ ཀཱམཝཏྠཱུསུ བལཝནྟཱ ཧུཏྭཱ ཨུཔྤཛྫནྟི. ཡཏོ ཏེསཾ མེཐུནཝཏྠུསམཱཡོགོཔི པཝཏྟཏི, ཏཐཱ ཨུཔྤཛྫིཏུཾ ཨསམཏྠེ ཀཏྭཱ སཾལིཁནཝསེན ཏནུཀརཎཏོ. ཨདྷིཙྩུཔྤཏྟིཝསེནཙ པརིཡུཊྛཱནམནྡཏཱཝསེནཙ ཏནུཀབྷཱཝཾ སཱདྷནཏོཏི ཨཏྠོ. ཏཏྠ ཨདྷིཙྩུཔྤཏྟིཝསེནཱཏི ཀདཱཙི ཙིརེན ཨུཔྤཏྟིཝསེན. པརིཡུཊྛཱནམནྡཏཱཡཱཏི ཙིརེན ཨུཔྤཛྫནྟཱནཾཔི མནྡཏརཾ པརིཡུཊྛཱནཝསེན. མཧཱསིཝཏྠེརེན པན ཏེསཾཔི མེཐུནཝཏྠུ སམཱཡོགོ ཨིཙྪིཏོ. སོ མཧཱཊྛཀཐཱཡཾ པཊིཀྑིཏྟོ. ཡཉྩ ཚཀྐནིཔཱཏེ མིགཱསཱལཝཏྠུམྷི ཨབྲཧྨཙཱརིནོཔི ཨིསིདཏྟསྶ བྲཱཧྨཎསྶ སཀདཱགཱམིཏྟཾ བྷགཝཏཱ བྱཱཀཏཾ, ཏཾཔི ཏསྶ ཨཱསནྣམརཎཀཱལེ ཨདྷིགམཝསེན བྱཱཀཏནྟི ཝེདིཏབྦཾ. སཀིཾདེཝ ཨིམཾ ལོཀཾ ཨཱགནྟྭཱ ཨཱགམནཏོ སཀདཱགཱམཱིནཱམ ཧོཏཱིཏི ཡོཛནཱ. ཡམེཏྠ ཝཏྟབྦཾ, ཏཾ ཧེཊྛཱ པཐམཔརིཙྪེདེ ཝུཏྟམེཝ. ཨརཧཏྟཾབྷཱཝེཏྭཱཏི ཨརཧཏྟམགྒཾ བྷཱཝེཏྭཱཁཱིཎཱ ཙཏྟཱརོ ཨཱསཝཱ ཡསྶཱཏི ཁཱིཎཱསཝོ. དཀྑིཎཱ ཝུཙྩཏི ཀམྨཉྩ ཀམྨཕལཉྩ སདྡཧིཏྭཱ ཨཱཡཏིཾ ཕལཔཊིལཱབྷཏྠཱཡ དིནྣདཱནཾ. དཀྑནྟི ཝཌྜྷནྟི སཏྟཱ ཨེཏཱཡཱཏི ཀཏྭཱ. ཏཱཡ པན དཀྑིཎཱཡ ཝིཔཏྟིཀརཱནཾ ཀིལེསཱནཾ སབྦསོ ཨབྷཱཝཏོ སམྤཏྟིཀརཱནཉྩ སཱིལཀྑནྡྷཱདིགུཎཱནཾ སབྦསོ པརིཔུཎྞཏྟཱ དཀྑིཎེཡྻེསུ ཨགྒོ ཛེཊྛཀོ ཧུཏྭཱ ཏཾདཀྑིཎཾ པཊིགྒཧིཏུཾ ཨརཧཏཱིཏི ཨགྒདཀྑིཎེཡྻོ. པུགྒལབྷེདོཏི ཙཏུནྣཾ ཕལཊྛཔུགྒལཱནཾ སངྑེཔབྷེདོ. ཝིཏྠཱརབྷེདོ པན ཨེཝཾ ཝེདིཏབྦོ, ཨཊྛཀཐཱསུ ཏཱཝ ཙཏུཝཱིསཏི སོཏཱཔནྣཱ, དྭཱདས སཀདཱགཱམིནོ, ཨཊྛཙཏྟཱལཱིས ཨནཱགཱམིནོ, དྭཱདས ¶ ཨརཧནྟོཏི ཕལཊྛཱནཾ ཚནྣཝུཏིབྷེདོ ཝུཏྟོ. ཏཏྠ སདྡྷཱདྷིམུཏྟོ པཉྙཱདྷིམུཏྟོཏི དྭེ སོཏཱཔནྣཱ ཧོནྟི. ཏེ ཨེཀབཱིཛཱི ཀོལཾཀོལོ སཏྟཀྑཏྟུཔརམོཙཱཏི ཏཱིཧི གུཎིཏཱ ཚ. པུན ཙཏཱུཧི པཊིཔདཱཧི གུཎིཏཱ ཙཏུཝཱིསཏི ཧོནྟི. ཏིཝིདྷ ཝིམོཀྑཙཏུཔཊིཔདཱནཾ པན བྷེདེན དྭཱདས སཀདཱགཱམིནོ དྭཱདས ཨརཧནྟོཙ ཧོནྟི. ཨནཱགཱམིནོ པན ཨཝིཧེསུ ཏཱཝ ཏཡོ ཨནྟརཱཔརིནིབྦཱཡིནོ, ཨེཀོ ཨུཔཧཙྩ པརིནིབྦཱཡཱི, ཨེཀོ ཨུདྡྷཾ སོཏོ ཨཀནིཊྛགཱམཱིཏི པཉྩ. ཏེཡེཝ སསངྑཱརཔརིནིབྦཱཡཱི ཨསངྑཱརཔརིནིབྦཱཡཱིཙཱཏི དྭཱིཧི གུཎིཏཱ དས. ཏཐཱ ཨཏཔྤསུ དསྶསུདསྶཱིསུ ཏིཙཏྟཱལཱིས ཧོནྟི. ཨཀནིཊྛེ པན ཨུདྡྷཾསོཏོ ཨཀནིཊྛགཱམཱིནཱམ ནཏྠཱིཏི ཙཏྟཱརོ སསངྑཱརཔརིནིབྦཱཡིནོ ཙཏྟཱརོ ཨསངྑཱརཔརིནིབྦཱཡིནོཏི ཨཊྛཱཏི. སབྦེ ཨཊྛཙཏྟཱལཱིས ཧོནྟཱིཏི. སུཏྟནིཔཱཏཊྛཀཐཱཡཾ པན དྭཱདས སོཏཱཔནྣཱ, དྭཱདས སཀདཱགཱམིནོ, ཙཏུཝཱིསཏི ཨནཱགཱམིནོ, དྭེ ཨརཧནྟོ, ཙཏྟཱརོ མགྒཊྛཱཏི ཙཏུཔཉྙཱས ཧོནྟི. ཏེཡེཝ སདྡྷཱདྷུར པཉྙཱདྷུར ཝསེན དྭཱིཧི གུཎིཏཱ ཨཊྛསཏཾ པུགྒལཱ ཧོནྟཱིཏི ཨཱགཏོ. ཨེཏྠཱཏི ཨེཏསྨིཾ པུགྒལབྷེདེ. སབྦེསཾཔཱིཏི ཙཏུནྣཾ ཕལཊྛཱནཾཔི སཱདྷཱརཎཱཝ. ན ནིརོདྷསམཱཔཏྟི ཝིཡ ཨེཀཙྩཱནཾཨེཝ སཱདྷཱརཎཱཏི ཨདྷིཔྤཱཡོ. ཨཏིཝིཡ མམཱཡིཏསྶ ཨབྷིནིནྡི ཏསྶ ཨཛ྄ཛྷོསིཏསྶ ཨཏྟནོ ཙིཏྟསནྟཱནསྶ ཨཔཝཏྟིཀརཎཾ ནཱམ བཧལརཱགཝིམུཏྟཱནཾཨེཝ སིཛ྄ཛྷཏཱིཏི ཝུཏྟཾ, ཨནཱགཱམཱིནཉྩེཝ ཨརཧནྟཱནཉྩལབྦྷཏཱིཏི. ཏེསཾཔི ཨཊྛསམཱཔཏྟིལཱབྷཱིནཾ ཀཱམརཱུཔབྷཝགཏཱནཉྙེཝ ཨིདྷ གཧཎཾ དཊྛབྦཾ. ཀསྨཱ, ཨཱདིཏོ པཊྛཱཡ ཨནུཔུབྦནིརོདྷབལེནེཝ གནྟབྦཏྟཱ. ཏེནཱཧ ཏཏྠཱཏིཨཱདི. ཏཏྲཱཡཾ ཝིདྷི, པཐམཛ྄ཛྷཱནཾ སམཱཔཛྫིཏྭཱ ཝུཊྛཱཡ ཏཏྠ གཏེ སངྑཱརེ ཨནིཙྩཏོ དུཀྑཏོ ཨནཏྟཏོ ཝིཔསྶཏི. ཏཏོ དུཏཱིཡཛ྄ཛྷཱནཾ སམཱཔཛྫིཏྭཱ ཝུཊྛཱཡ ཏཏྠགཏེ སངྑཱརེ ཏཐེཝ ཝིཔསྶཏི. ཏཏོ ཏཏཱིཡཾ ཛྷཱནཾ. ཏཏོ ཙཏུཏྠཾ ཛྷཱནཾ. ཏཏོ པཉྩམཾ ཛྷཱནཾ. ཏཏོ ཨཱཀཱསཱནཉྩཱཡཏནཾ. ཏཏོ ཝིཉྙཱཎཉྩཱ ཡཏནཾ སམཱཔཛྫིཏྭཱ ཝུཊྛཱཡ ཏཏྠགཏེ སངྑཱརེ ཏཐེཝ ཝིཔསྶཏི. ¶ ཏཏོ ཨཱཀིཉྩཉྙཱཡཏནཾ སམཱཔཛྫིཏྭཱ ཝུཊྛཱཡ ནཱནཱབདྡྷཨཝིཀོཔནཾ སངྒྷཔཏིམཱནནཾ སཏྠུཔཀྐོསནཾ ཨདྡྷཱན པརིཙྪེདོཏི ཨིམཾ ཙཏུབྦིདྷཾ པུབྦཀིཙྩཾ ཀརོཏི. ཏཏོ ནེཝསཉྙཱ ནཱསཉྙཱཡཏནཾ སམཱཔཛྫཏི. ཨེཀཾཝཱ དྭེཝཱ ཙིཏྟཝཱརེ ཨཏིཀྐམིཏྭཱ ཨཙིཏྟཀོ ཧོཏི ནིརོདྷཾ ཕུསཏཱིཏི. ཏཏྠཏཏྠེཝཱཏི ཏཏོ ཏཏོ ཛྷཱནཏོ ཏསྨིཾ ཏསྨིཾ ཝུཊྛིཏཀཱལེཨེཝ. ཝིཔསྶནྟོཏི ནིརོདྷསྶ སམཐ ཝིཔསྶནཱ ཡུགནནྡྷབལེནེཝ པཏྟབྦཏྟཱ ཝིཔསྶནཱབལེནཔི ཙིཏྟསནྟཱནསྶ སཎྷསུཁུམབྷཱཝཱ པཱདནཏྠཾ ཨིདཾ པཐམཛ྄ཛྷཱནཾ ཨནིཙྩནྟིཨཱདིནཱ ནཡེན ཝིཔསྶནྟོ. ཡཱཝཨཱཀིཉྩཉྙཱཡཏནཾགནྟྭཱཏི ཡཱཝ ཨཱཀིཉྩཉྙཱཡཏནཛ྄ཛྷཱནཾ, ཏཱཝ སམཱཔཛྫནཝུཊྛཱནཝིཔསྶནཱཝསེན གནྟྭཱ. ཨཱཝཛྫནཱདྷིཊྛཱན པཙྩཝེཀྑནཱནིཔེཏྠ ཨིཙྪིཏབྦཱནིཡེཝ. ཏེནེཝ ཧི པཊིསམྦྷིདཱམགྒེ པཉྩཝིདྷཱ ཝསིཡོ ནིརོདྷཔརིཀམྨེསུ ཝུཏྟཱཏི. ཏཏོཔརནྟི ཨཱཀིཉྩཉྙཱཡཏནཛ྄ཛྷཱནགཏེ སངྑཱརེཝིཔསྶནཱནནྟརཾ, ཨདྷིཊྛཱཏབྦནྟི ཨདྷིཊྛེཡྻཾ. ཨཏྟནོ སརཱིརཱབནྡྷེ པརིཀྑཱརེ ཐཔེཏྭཱ ནཱནཱབནྡྷཱནི ཙིཝརཱདཱིནི པརིཀྑཱརཱནི ཨགྒིཨཱདིནཱ པརིསྶཡེན མཱཝིནསྶནྟཱུཏིཝཱ, ཨེཀསཱིམཱཡཾ སངྒྷཀམྨེ ཀརཱིཡམཱནེ སངྒྷོ མཾ པབྷིམཱནེསྶཏི, ཏདཱ ཝུཊྛཧཱམཱིཏིཝཱ, སཏྠཱ མཾ ཀེནཙིཀཱརཎེན པཀྐོསཱ པེསྶཏི, ཏདཱ ཝུཊྛཧཱམཱིཏིཝཱ ཨདྷིཊྛཱནཀིཙྩཾ. ཨཱདིསདྡེན ནིརོདྷབྦྷནྟརེཨེཝ མརཎཾ ནུཁོ མེ བྷཝིསྶཏཱིཏི ཨེཝཾ པཝཏྟོ ཨདྡྷཱན པརིཙྪེདོ གཧིཏོ. དྭིནྣཾ.ལ. ཝོཙྪིཛྫཏིཙིཏྟསནྟཏི ཏདཏྠཱཡ ཨཱདིཏོ པཊྛཱཡ ཏཐཱརཱུཔསྶ པཡོགཝིསེསསྶ སུཊྛུ ཀཏཏྟཱ. ཏཏོཏི ཏསྨིཾ ཀཱལེ. ཨནཱགཱམིནོ ཨནཱགཱམི ཕལཙིཏྟཾ ནིརཱཝཛྫནཾཔི ནིཔྤརིཀམྨཾཔཱིཏི ཨདྷིཔྤཱཡོ. ཏཐཱཧི ཨཱདིཏོ པཊྛཱཡ པུནཔྤུནཾ པཝཏྟིཏཾ ཝིཔསྶནཱཔརིཀམྨམེཝ ཏསྶ པརིཀམྨཊྛཱནེ ཏིཊྛཏི. ན ཝིསུཾ ཨཱསནྣཔརིཀམྨཾ ནཱམ ཨཏྠཱིཏི. པཙྩཝེཀྑནནྟི ཕལཔཙྩཝེཀྑནཾ. ཨེཝཾ དུཝིདྷཾ ཀམྨཊྛཱནནཡཾ ནིདྡིསིཏྭཱ ཨིདཱནི ཡདཏྠཾ སོ ནིདྡིསཱིཡཏི, ཏདཏྠེ སོཏུཛནེ ནིཡོཛེནྟོ བྷཱཝེ ཏབྦནྟི གཱཐམཱཧ. ཏཏྠ པཊིཔཛྫིཏབྦཱཏི པཊིཔཏྟི. པཊིཔཛྫནྟིཝཱ ཨེཏཱཡ ཨུཔརུཔརི ཝིསེསནྟི པཊིཔཏྟི. སཱིལཱདིདྷམྨོ. རསཱིཡཏི ¶ ནིརཱམིསསུཁཱནུབྷཝནཝསེན ཨནུབྷཝཱིཡཏཱིཏི རསོ. ཛྷཱནམགྒ ཕལབྷཱུཏོ ཨདྷིགམདྷམྨོ. ཨརཧཏྟ ཕལམེཝཝཱ. ཏདུབྷཡཾ པཊིཙྩ ཨུཔྤནྣཔཱིཏིསོམནསྶམེཝཝཱ. པཊིཔཏྟིཡཱ རསོ པཊིཔཏྟི རསོ. སོཨེཝ ཨསྶཱདིཏབྦཊྛེན ཨསྶཱདོ ཙཱཏི པཊིཔཏྟི རསསྶཱདོ. སཱསནེ པཊིཔཏྟིརསསྶཱདཾ པཏྠཡནྟེན བྷིཀྑུནཱ ཨིཙྩེཝཾ མཡཱ ནིདྡིཊྛཾ ཨུཏྟམཾ བྷཱཝནཱདྭཡཾ བྷཱཝེཏབྦནྟི སམྦནྡྷོ.

ཨིཏི པརམཏྠདཱིཔནིཡཱནཱམ ཨབྷིདྷམྨཏྠསངྒཧསྶ

ཙཏུཏྠཝཎྞནཱཡ ཀམྨཊྛཱནསངྒཧསྶ

པརམཏྠདིཔནཱ ནིཊྛིཏཱ.

ནིགམ པརམཏྠདཱིཔནཱི

༡༧༢. ཙཱརིཏྟེན ཀུལཱཙཱརེན སོབྷིཏེ ཉཱཏི མིཏྟ དྷན བྷོགསམྤཏྟིཡཱ ཝིསཱལེ ཀུལེ ཨུདཡོ ཝཌྜྷི ཡསྶ སོཏི ཙཱརིཏྟསོབྷིཏཝིསཱལཀུལོདཡོ. ཏེན. སདྡྷཱཡ ཨབྷིཝུཌྜྷཱནཾ པརིསུདྡྷཱནཉྩ ཨཏྟནོ སཱིལསུཏཙཱགཱདིགུཎཱནཾ ཨུདཡོ ཝཌྜྷི ཨེཏསྨིནྟི སདྡྷཱཏིཝུཌྜྷཔརིསུདྡྷགུཎོདཡོ. ཏེན. ནམྤཝ྄ཧཡེནཱཏི ནམྤནཱམཀེན ཨུཔཱསཀེན. པཎིདྷཱཡཱཏི བྷུསཾ ནིདྷཱཡ ཧདཡེ ཐཔེཏྭཱ ཨུཔཱདཱཡ པཊིཙྩ. པརཱནུཀམྤནྟི པརེསཾ ཨཏྟནོ མནྡབུདྡྷཱིནཾ པཙྪིམཛནཱནཾ ཨནུཀམྤཾ ཨནུདཡཾ ཀཱརུཉྙཾ པཎིདྷཱཡཱཏི སམྦནྡྷོ. པཏྠིཏནྟི ཨབྷིཡཱཙིཏཾ. པུཉྙེན ཏེན ཝིཔུལེནཱཏི ཏེན ཝིཔུལེན ཨབྷིདྷམྨཏྠ སངྒཧཔཀརཎསྶ ཀརཎཔུཉྙེན. ཏུམཱུལསོམནྟི ཨེཝཾ ནཱམཀཾ ཝིཧཱརཾ. ཝུཏྟཉྷི ཁུདྡསིཀྑཱཊཱིཀཱཡཾསཱིཧལ༹དཱིཔེ ཏུམཱུལསོམཝིཧཱརེ སངྒྷསྶ པཱཀཝཏྟཾཔི ཏཱལ པཎྞཾ ཝིཀྐིཎིཏྭཱ ཀརཱིཡཏི. ན ཧི ཏཏྠ པཎྞེན ཨཏྠོ ཨཏྠི. སབྦེཔི ཨིཊྛཀཙྪནྣཱ པཱསཱདཱདཡོཏི. ཨེསོ ཀིར ཝིཧཱརོ ཨཱདིཏོ ཨབྷཡགིརིརཉྙོ ཨགྒམཧེསིབྷཱུཏཱཡ སོམདེཝིཡཱ ཀཱརཱཔིཏཏྟཱ ཡཱཝཛྫཏནཱཔི སོམཝིཧཱརོཏྭེཝ པཉྙཱཡིཏྠ. ཏུམཱུལསདྡོ པན ཝིཔུལསདྡཔརིཡཱཡོ.

ཨཐེཏྠ ¶ ཝཏྟཏི སདྡོ, ཏུམཱུལོ བྷེརཝོ མཧཱ;

ཧཏྠིནཱགེ པདིནྣམྷི, སིཝཱིནཾ རཊྛཝཌྜྷནེཏི.

ཨཱདཱིསུ

ཝིཡ. སོཙ ཝིཧཱརོ སཊྛིམཏྟེཧི མཧཱཔརིཝེཎེཧི སཎྛིཏོ ཧོཏཱིཏི ཨཏིཝིཡ ཝིཔུལོ མཧནྟོ ཝིཏྠིཎྞོ ཧོཏི. ཏསྨཱ སོ ཝིཔུལཏྟཱ མཧནྟཏྟཱ ཝིཏྠིཎྞཏྟཱ ཏུམཱུལ སོམོཏི ཝུཙྩཏི. ཏཾ ཏུམཱུལསོམཾ. ཨཏྠཏོ མཧཱསོམ ཝིཧཱརནྟི ཝུཏྟཾ ཧོཏི. ཨེཏེན ཐེརོ ཨཏྟནོ ཨཱཙརིཡཝཾསསྶ ཝསན ཝིཧཱརཾ ཀིཏྟེཏི. ཨཏྟནོ ཝསནཊྛཱནཾ པན ནཱམརཱུཔཔརིཙྪེདེ ཀིཏྟིཏཾ. དྷཉྙཱདྷིཝཱསནྟི ཏསྨིཾ ཝིཧཱརེ ཨཱདིཀམྨིཀབྷཱུཏ མཧིནྡཏྠེརཱདཱིནཾ པུཉྙཝནྟཏྠེརཱནཾ ཨཛ྄ཛྷཱཝུཊྛབྷཱུཏཾ. དཱིཔཔསཱདཀ མཧཱམཧིནྡཏྠེརསྶ ཧི ཝཾསེ ཛཱཏཏྟཱ ཏསྨིཾ ཝིཧཱརེ ཨཱདིཀམྨིཀབྷཱུཏོ མཧཱཐེརོཔི མཧིནྡཏྠེརོནཱམཱཏི དྷཱཏུཝཾསེ ཝུཏྟོ. ཨུདིཏོདིཏནྟི ཨཏིཝིཡ ཨུདིཏཾ. ནབྷམཛ྄ཛྷེ པུཎྞཙནྡམཎྜལཾ ཝིཡ སཀལསཱིཧལ༹དཱིཔེ ཨཏིཝིཡ ཨུགྒཏནྟི ཨཏྠོ. ཨརིཡམགྒཔཉྙཱཝསེན པརིཡཏྟིཝེསཱརཛྫཱདི པཉྙཱཝསེནཝཱ ཨཝདཱཏེཧི པརིཡོདཱཏེཧི གུཎེཧི སོཏིཏཱཏི པཉྙཱཝདཱཏགུཎསོཏིཏཱ. ཏེ ཨེཝ ལཛྫཱིཔཱཔགརཧིནོ. མཉྙནྟཱུཏི ཨནུསྶརནྟུ. པུཉྙཝིབྷཱཝོདཡ མངྒལཱཡཱཏི ཝིཔུལཱནཾ པུཉྙཱནཾ ཝཌྜྷིསངྑཱཏ མངྒལཏྠཱཡ. ཏཏྲཱཡཾ ཡོཛནཱ, པུཉྙེན ཏེན ཝིཔུལེན དྷཉྙཱདྷིཝཱསཾ ཨུདིཏོདིཏཾ ཏུམཱུལསོམ ཝིཧཱརཉྩ ཏཏྠ ནིཔཱསིནོ མཧིནྡཏྠེརཱདིཀེ པཉྙཱཝདཱཏ གུཎསོབྷིཏེ ལཛྫིབྷཱུཏེ བྷིཀྑཱུཙ པུཉྙཝིབྷཝོདཡམངྒལཱཡ ཨཱཡུཀནྟཾ མཉྙནྟུ པཙྪིམཱ ཛནཱཏི. ཨཐཝཱ, ཏཾཝིཧཱརཾ ཨཉྙེ པཉྙཱཝདཱཏ གུཎསོབྷིཏ ལཛྫཱི བྷིཀྑཱུ མཉྙནྟཱུཏི ཡོཛནཱ. ཨེཏེན ཐེརོ པཙྪིམཛནཱནཾ ཚསུ ཨནུཏྟརིཡདྷམྨེསུ ཨནུསྶཏཱནུཏྟརིཡསངྑཱཏཾ པུཉྙཝིསེསཉྩ མཡཾཔི ཏཱདིསགུཎབྷཱགིནོ བྷཝིསྶཱམཱཏི ཨུསྶཱཧནུཔཱཡཉྩ པཊིཔཱདེསཱིཏི.

པརམཏྠདཱིཔནཱི ནིགམཀཐཱ

ཨེཏྟཱཝཏཱཙ –

ནགརེ དཱིཔརངྒམྷི, གཱམེ ཏི ནཱམཀེ;

ཨཊྛསུཉྙདྭཡེཀམྷི, སཱཀེ ཛཱཏེན ཡཱ མཡཱ.

མུཾརྭཱགཱམེ ཨརཉྙམྷི, ལངྒྷཏཱིཏི ཝིསྶུཏཱལཡེ;

ཝསཏཱ མཧཏོ བྷིཀྑུ, གཎསྶ ཧིཏཀཱརིནཱ.

པརམཏྠདཱིཔནཱིནཱམ, སངྑཏཱ སཱརདསྶིནཱ;

སཱརེསཱིནཾ ཧིཏཏྠཱཡ, སཱརཱསཱརཝིཝེཀིནཾ.

སུནིཊྛིཏཱ ཨཡཾ ཊཱིཀཱ, ནིབྦྷཡཱ ནིརུཔདྡཝཱ;

ནཝཔཉྩདྭཡེཀམྷི, སཱཀེ ཀོམུདསཱརདེ.

ཏཐཱ ཀལྱཱཎསངྐཔྤཱ, སཱདྷཱུནཾ ཨམཏཔྥལཱ;

ནིཊྛཾ གཙྪནྟུ སབྦེཔི, ནིབྦྷཡཱ ནིརུཔདྡཝཱ.

ཡཐཱ ལོཀམྷི ཛོཏནྟི, ཨུབྷོ ཙནྡིམསཱུརིཡཱ;

ཏཐེཝ པརམཏྠེསུ, ཨཡཾ པརམཏྠདཱིཔནཱི.

པཱལི༹ཡཏྟེསུ སཱ སུབྷཱ, སདྡནིརུཏྟིདཱིཔནཱི;

ཨུབྷོ ལོཀམྷི ཛོཏནྟུ, སདྡྷམྨོ ཡཱཝ ཏིཊྛཏཱིཏི.

ཏཏྠ ནགརེ དཱིཔརངྒམྷཱིཏི དཱིཔཝཱསིམཧཱཛནཾ རཉྫེཏཱིཏི དཱིཔརངྒནྟི ལདྡྷནཱམེ ནགརེ. གཱམེ ནཱམཀེཏི རོཧིཏམིགཱནཾ ནིཝཱསབྷཱུམིཏལེ པཏིཊྛིཏཏྟཱ ཨེཝཾནཱམཀེ མཧཱགཱམེ. སཱཀེཏི ཀལིཡུགེ. ཡཱ མཡཱཏི པརམཏྠདཱིཔནཱིནཱམ ཡཱཊཱིཀཱ མཡཱ སངྑཏཱཏི སམྦནྡྷོ. ལངྒྷཏཱིཏི ཝིསྶུཏཱལཡེཏི ཨེཝཾཝིསྶུཏེ ཨརཉྙཝིཧཱརེ. སཱརེསཱིནནྟི སཱརགཝེསཱིནཾ. སཱརཱསཱརཝིཝེཀིནནྟི ཨཡཾ སཱརོ ཨཡཾ ཨསཱརོཏི ཨེཝཾ སཱརཉྩ ཨསཱརཉྩཝིཝེ ཙེཏྭཱ ཛཱནིཏུཾ སམཏྠཱནཾ. སཱཀེཏི ཀལིཡུགེ. ཀོམུདསཱར དེཏི ཀུམུདཔུཔྥཡུཏྟེ སརདཨུཏུ པརིཡཱཔནྣེཔཙྪི མཀཏྟིཀམཱསེ. ཨམཏཔྥལཱཏི ནིབྦཱནཔཡོཛནཱ. སུབྷཱཏི ཨཏྠབྱཉྫནསམྤཏྟིཡཱ སོབྷཎཱ. སདྡྷམྨོཏི ཏིཝིདྷཾ སཏྠུསཱསནཾ ཝུཙྩཏཱིཏི.

ཨིཏི ཨབྷིདྷམྨཏྠསངྒཧཔཀརཎསྶ ཙཏུཏྠསཾཝཎྞནཱ

བྷཱུཏཱ པརམཏྠདཱིཔནཱིནཱམཱ ཡཾཊཱིཀཱ

སབྦཱཀཱརེན ནིཊྛིཏཱ.