ཨཉྙ > ལེཌཱི སཡཱཌོ གནྠ-སངྒཧོ > པཊྛཱནུདྡེས དཱིཔནཱིཔཱཋ

ཀཏམེ དྷམྨཱ ཧེཏུཔཙྩཡསྶ པཙྩཡུཔྤནྣཱ. ལོབྷ སཧཛཱཏཱ ཙིཏྟཙེཏསིཀཱ དྷམྨཱ ཙ རཱུཔཀལཱཔཱདྷམྨཱ ཙ དོསསཧ ཛཱཏཱ མོཧསཧཛཱཏཱ ཨལོབྷསཧཛཱཏཱ ཨདོསསཧ ཛཱཏཱ ཨམོཧསཧཛཱཏཱ ཙིཏྟཙེཏསིཀཱ དྷམྨཱ ཙ རཱུཔཀལཱཔཱ དྷམྨཱ ཙ ཧེཏུཔཙྩཡཏོ ཨུཔྤནྣཱ ཧེཏུཔཙྩཡུཔྤནྣཱ དྷམྨཱ.

སཧཛཱཏརཱུཔཀལཱཔཱ ནཱམ སཧེཏུཀཔཊིསནྡྷིཀྑཎེ ཀམྨཛརཱུཔཱནི ཙ པཝཏྟིཀཱལེ སཧེཏུཀཙིཏྟཛརཱུཔཱནི ཙ. ཏཏྠ པཊིསནྡྷིཀྑཎོ ནཱམ པཊིསནྡྷིཙིཏྟསྶ ཨུཔྤཱདཀྑཎོ. པཝཏྟིཀཱལོ ནཱམ པཊིསནྡྷིཙིཏྟསྶ ཋིཏིཀྑཎཏོ པཊྛཱཡ ཡཱཝ ཙུཏིཀཱལཾ ཝུཙྩཏི.

ཀེནཊྛེན ཧེཏུ, ཀེནཊྛེན པཙྩཡོཏི. མཱུལཊྛེན ཧེཏུ, ཨུཔཀཱརཀཊྛེན པཙྩཡོཏི. ཏཏྠ མཱུལཡམཀེ ཝུཏྟཱནཾ ལོབྷཱདཱིནཾ མཱུལདྷམྨཱནཾ མཱུལབྷཱཝོ མཱུལཊྛོ ནཱམ. སོ མཱུལཊྛོ མཱུལཡམཀདཱིཔནིཡཾ ཨམྷེཧི རུཀྑོཔམཱཡ དཱིཔིཏོཡེཝ.

ཨཔི ཙ ཨེཀོ པུརིསོ ཨེཀིསྶཾ ཨིཏྠིཡཾ པཊིབདྡྷ ཙིཏྟོ ཧོཏི. སོ ཡཱཝ ཏཾ ཙིཏྟཾ ན ཛཧཏི, ཏཱཝ ཏཾ ཨིཏྠིཾ ཨཱརབྦྷ ཏསྶ པུརིསསྶ ལོབྷསཧཛཱཏཱནི ཀཱཡཝཙཱིམནོཀམྨཱནི ཙ ལོབྷསམུཊྛིཏཱནི ཙིཏྟཛརཱུཔཱནི ཙ ཙིརཀཱལཾཔི པཝཏྟནྟི. སབྦཱནི ཙ ཏཱནི ཙིཏྟཙེཏསིཀརཱུཔཱནི ཏསྶཾ ཨིཏྠིཡཾ རཛྫནལོབྷམཱུལཀཱནི ཧོནྟི. སོ ལོབྷོ ཏེསཾ མཱུལཊྛེན ཧེཏུ ཙ, ཨུཔཀཱརཀཊྛེན པཙྩཡོ ཙ. ཏསྨཱ ཧེཏུཔཙྩཡོ. ཨེས ནཡོ སེསཱནི རཛྫནཱིཡཝཏྠཱུནི ཨཱརབྦྷརཛྫནཝསེན ཨུཔྤནྣེསུ ལོབྷེསུ, དུསྶནཱིཡཝཏྠཱུནི ཨཱརབྦྷ དུསྶནཝསེན ཨུཔྤནྣེསུ དོསེསུ, མུཡ྄ཧནཱིཡཝཏྠཱུནི ཨཱརབྦྷ མུཡ྄ཧནཝསེན ཨུཔྤནྣེསུ མོཧེསུ ཙ.

ཏཏྠ ¶ ཡཐཱ རུཀྑསྶ མཱུལཱནི སཡཾ ཨནྟོཔཐཝིཡཾ སུཊྛུ པཏིཊྛཧིཏྭཱ པཐཝིརསཉྩ ཨཱཔོརསཉྩ གཧེཏྭཱ ཏཾ རུཀྑཾ ཡཱཝ ཨགྒཱ ཨབྷིཧརནྟི, ཏེན རུཀྑོ ཙིརཀཱལཾ ཝཌྜྷམཱནོ ཏིཊྛཏི. ཏཐཱ ལོབྷོ ཙ ཏསྨིཾ ཏསྨིཾ ཝཏྠུམྷི རཛྫནཝསེན སུཊྛུ པཏིཊྛཧིཏྭཱ ཏསྶ ཏསྶ ཝཏྠུསྶ པིཡརཱུཔརསཉྩ སཱཏརཱུཔརསཉྩ གཧེཏྭཱ སམྤཡུཏྟདྷམྨེ ཡཱཝ ཀཱཡཝཙཱིཝཱིཏིཀྐམཱ ཨབྷིཧརཏི, ཀཱཡ ཝཱིཏིཀྐམཾ ཝཱ ཝཙཱིཝཱིཏིཀྐམཾ ཝཱ པཱཔེཏི. ཏཐཱ དོསོ ཙ དུསྶན ཝསེན ཨཔྤིཡརཱུཔརསཉྩ ཨསཱཏརཱུཔརསཉྩ གཧེཏྭཱ, མོཧོ ཙ མུཡ྄ཧནཝསེན ནཱནཱརམྨཎེསུ ནིརཏྠཀཙིཏྟཱཙཱརརསཾ ཝཌྜྷེཏྭཱཏི ཝཏྟབྦཾ. ཨེཝཾ ཨབྷིཧརནྟཱ ཏཡོ དྷམྨཱ རཛྫནཱིཡཱདཱིསུ ཝཏྠཱུསུ སམྤཡུཏྟདྷམྨེ མོདམཱནེ པམོདམཱནེ ཀརོནྟོ ཝིཡ ཙིར ཀཱལཾ པཝཏྟེནྟི. སམྤཡུཏྟདྷམྨཱ ཙ ཏཐཱ པཝཏྟནྟི. སམྤཡུཏྟ དྷམྨེསུ ཙ ཏཐཱ པཝཏྟམཱནེསུ སཧཛཱཏརཱུཔཀལཱཔཱཔི ཏཐཱ པཝཏྟནྟིཡེཝ. ཏཏྠ སམྤཡུཏྟདྷམྨེ ཨབྷིཧརཏཱིཏི དྭེ པིཡརཱུཔ སཱཏརཱུཔརསེ སམྤཡུཏྟདྷམྨཱནཾ སནྟིཀཾ པཱཔེཏཱིཏི ཨཏྠོ.

སུཀྐཔཀྑེ སོ པུརིསོ ཡདཱཀཱམེསུ ཨཱདཱིནཝཾ པསྶཏི, ཏདཱ སོ ཏཾ ཙིཏྟཾཛཧཏི, ཏཾ ཨིཏྠིཾ ཨཱརབྦྷ ཨལོབྷོ སཉྫཱ ཡཏི. པུབྦེ ཡསྨིཾ ཀཱལེ ཏཾ ཨིཏྠིཾ ཨཱརབྦྷ ལོབྷམཱུལཀཱནི ཨསུདྡྷཱནི ཀཱཡཝཙཱིམནོཀམྨཱནི ཝཏྟནྟི. ཨིདཱནི ཏསྨིཾ ཀཱལེཔི ཨལོབྷམཱུལཀཱནི སུདྡྷཱནི ཀཱཡཝཙཱིམནོཀམྨཱནི ཝཏྟནྟི. པབྦཛིཏ སཱིལསཾཝརཱནི ཝཱ ཛྷཱནཔརིཀམྨཱནི ཝཱ ཨཔྤནཱཛྷཱནཱནི ཝཱ ཝཏྟནྟི. སོ ཨལོབྷོ ཏེསཾ མཱུལཊྛེན ཧེཏུ ཙ ཧོཏི, ཨུཔཀཱརཀཊྛེན པཙྩཡོཙ. ཏསྨཱ ཧེཏུཔཙྩཡོ. ཨེས ནཡོ སེསེསུ ལོབྷ པཊིཔཀྑེསུ ཨལོབྷེསུ, དོསཔཊིཔཀྑེསུ ཨདོསེསུ, མོཧ པཊིཔཀྑེསུ ཨམོཧེསུ ཙ.

ཏཏྠ རུཀྑམཱུལཱནི ཝིཡ ཨལོབྷོ ལོབྷནེཡྻཝཏྠཱུསུ ལོབྷཾ པཧཱཡ ལོབྷཝིཝེཀསུཁརསཾ ཝཌྜྷེཏྭཱ ཏེན སུཁེན སམྤཡུཏྟདྷམྨེ མོདམཱནེ པམོདམཱནེ ཀརོནྟོ ཝིཡ ཡཱཝ ཛྷཱནསམཱཔཏྟིསུཁཱ ཝཱ ཡཱཝ མགྒཕལསུཁཱ ཝཱ ཝཌྜྷཱཔེཏི. ཏཐཱ ཨདོསོ ཙ དོསནེཡྻཝཏྠཱུསུ དོསཝིཝེཀསུཁརསཾ ཝཌྜྷེཏྭཱ, ཨམོཧོ ཙ མོཧནེཡྻཝཏྠཱུསུ མོཧཝིཝེཀསུཁརསཾ ཝཌྜྷེཏྭཱཏི ཝཏྟབྦཾ. ཨེཝཾ ཝཌྜྷཱཔེནྟཱ ཏཡོ དྷམྨཱ ཀུསལེསུ དྷམྨེསུ སམྤཡུཏྟདྷམྨེ མོདམཱནེ པམོདམཱནེ ཀརོནྟོ ཝིཡ ཙིར ཀཱལཾཔི པཝཏྟེནྟི. སམྤཡུཏྟདྷམྨཱ ཙ ཏཐཱ པཝཏྟནྟི. སམྤཡུཏྟ དྷམྨེསུ ཙ ཏཐཱ པཝཏྟམཱནེསུ སཧཛཱཏརཱུཔཀལཱཔཱཔི ཏཐཱ པཝཏྟནྟིཡེཝ.

ཏཏྠ ¶ ལོབྷཝིཝེཀསུཁརསནྟི ཝིཝིཙྩནཾ ཝིགམནཾ ཝིཝེཀོ. ལོབྷསྶ ཝིཝེཀོ ལོབྷཝིཝེཀོ. ལོབྷཝིཝེཀེ སུཁཾ ལོབྷཝིཝེཀསུཁཾ. ལོབྷཝིཝེཀཾ པཊིཙྩ ཨུཔྤནྣསུཁནྟི ཝུཏྟཾ ཧོཏི. ཏདེཝ རསོ ལོབྷཝིཝེཀསུཁརསོཏི སམཱསོ. ཨཡཾ ཨབྷིདྷམྨེ པཊྛཱནནཡོ.

ཧཏྟནྟནཡོ པན ཨཝིཛྫཱསངྑཱཏོ མོཧོ ཙ ཏཎྷཱསངྑཱཏོ ལོབྷོ ཙཱཏི དྭེ དྷམྨཱ སབྦེསཾཔི ཝཊྚདུཀྑདྷམྨཱནཾ མཱུལཱནི ཧོནྟི. དོསོ པན ལོབྷསྶ ནིསྶནྡབྷཱུཏཾ པཱཔམཱུལཾ ཧོཏི. ཝིཛྫཱསངྑཱཏོ ཨམོཧོ ཙ ནིཀྑམདྷཱཏུསངྑཱཏོ ཨལོབྷོ ཙཱཏི དྭེ དྷམྨཱ ཝིཝཊྚདྷམྨཱནཾ མཱུལཱནི ཧོནྟི. ཨདོསོ པན ཨལོབྷསྶ ནིསྶནྡབྷཱུཏཾ ཀལྱཱཎམཱུལཾ ཧོཏི. ཨེཝཾ ཚབྦིདྷཱནི མཱུལཱནི སཧཛཱཏཱནཾཔི ཨསཧཛཱཏཱནཾཔི ནཱམརཱུཔདྷམྨཱནཾ པཙྩཡཱ ཧོནྟཱིཏི. ཨཡཾ སུཏྟནྟེསུ ནཡོ. ཧེཏུཔཙྩཡདཱིཔནཱ ནིཊྛིཏཱ.

ཀཏམོ ཨཱརམྨཎཔཙྩཡོ. སབྦེཔི ཙིཏྟཙེཏསིཀཱ དྷམྨཱ སབྦེཔི རཱུཔདྷམྨཱ སབྦཾཔི ནིབྦཱནཾ སབྦཱཔི པཉྙཏྟིཡོ ཨཱརམྨཎ པཙྩཡོ. ན ཧི སོ ནཱམ ཨེཀོཔི དྷམྨོ ཨཏྠི, ཡོ ཙིཏྟ ཙེཏསིཀཱནཾ ཨཱརམྨཎཾ ན ཧོཏི. སངྑེཔཏོ པན ཨཱརམྨཎཾ ཚབྦིདྷཾ ཧོཏི རཱུཔཱརམྨཎཾ སདྡཱརམྨཎཾ གནྡྷཱརམྨཎཾ རསཱརམྨཎཾ ཕོཊྛབྦཱརམྨཎཾ དྷམྨཱརམྨཎནྟི.

ཀཏམེ དྷམྨཱ ཨཱརམྨཎཔཙྩཡསྶ པཙྩཡུཔྤནྣཱ. སབྦེཔི ཙིཏྟ ཙེཏསིཀཱདྷམྨཱ ཨཱརམྨཎཔཙྩཡསྶ པཙྩཡུཔྤནྣཱ. ན ཧི ཀིཉྩི ཙིཏྟཾ ནཱམ ཨཏྠི, ཡཾ ཙིཏྟཾ བྷཱུཏེན ཝཱ ཨབྷཱུཏེན ཝཱ ཨཱརམྨཎེན ཝིནཱ པཝཏྟཏི.

ཏཏྠ པཙྩུཔྤནྣཾ རཱུཔཱརམྨཎཾ དུཝིདྷསྶ ཙཀྑུཝིཉྙཱཎཙིཏྟསྶ ཨཱརམྨཎཔཙྩཡོ. པཙྩུཔྤནྣཾ སདྡཱརམྨཎཾ དུཝིདྷསྶ སོཏཝིཉྙཱཎ ཙིཏྟསྶ. པཙྩུཔྤནྣཾ གནྡྷཱརམྨཎཾ དུཝིདྷསྶ གྷཱནཝིཉྙཱཎཙིཏྟསྶ. པཙྩུཔྤནྣཾ རསཱརམྨཎཾ དུཝིདྷསྶ ཛིཝ྄ཧཱཝིཉྙཱཎཙིཏྟསྶ. པཙྩུཔྤནྣཾ ཏིཝིདྷཾ ཕོཊྛབྦཱརམྨཎཾ དུཝིདྷསྶ ཀཱཡཝིཉྙཱཎཙིཏྟསྶ. པཙྩུཔྤནྣཱནི ཏཱནི པཉྩཱརམྨཎཱནི ཏིཝིདྷསྶ མནོདྷཱཏུཙིཏྟསྶ ཨཱརམྨཎཔཙྩཡོ. སབྦཱནི ཏཱནི ཨཏཱིཏཱནཱགཏཔཙྩུཔྤནྣཱནི པཉྩཱརམྨཎཱནི ཝཱ སབྦཱནི ཏེཀཱལིཀཱནི ཀཱལཝིམུཏྟཱནི དྷམྨཱརམྨཎཱནི ཝཱ ཚ སཏྟཏིཝིདྷཱནཾ མནོཝིཉྙཱཎཙིཏྟཱནཾ ཡཐཱརཧཾ ཨཱརམྨཎཔཙྩཡོ.

ཀེནཊྛེན ཨཱརམྨཎཾ, ཀེནཊྛེན པཙྩཡོཏི. ཙིཏྟ ཙེཏསིཀེཧི ཨཱལམྦིཏབྦཊྛེན ཨཱརམྨཎཾ, ཨུཔཀཱརཀཊྛེན པཙྩཡོཏི.

ཨཱལམྦིཏབྦཊྛེནཱཏི ¶ ཙེཏྠ ཨཱལམྦཎཀིརིཡཱ ནཱམ ཙིཏྟ ཙེཏསིཀཱནཾ ཨཱརམྨཎགྒཧཎཀིརིཡཱ, ཨཱརམྨཎུཔཱདཱན ཀིརིཡཱ.

ཡཐཱ ཧི ལོཀེ ཨཡོདྷཱཏུཾ ཀཱམེཏི ཨིཙྪཏཱིཏི ཨཏྠེན ཨཡོཀནྟཀོ ནཱམ ལོཧདྷཱཏུཝིསེསོ ཨཏྠི. སོ ཨཡོཁནྡྷསམཱིཔཾ སམྤཏྟོ ཏཾ ཨཡོཁནྡྷཾ ཀཱམེནྟོ ཝིཡ ཨིཙྪནྟོ ཝིཡ ཨཡོཁནྡྷཱབྷིམུཁོ ཙཉྩལཏི. སཡཾ ཝཱ ཏཾ ཨཡོཁནྡྷཾ ཨུཔགཙྪཏི. ཨཡོཁནྡྷཾ ཝཱ ཨཏྟཱབྷིམུཁཾ ཨཱཀཌྜྷཏི, ཨཡོཁནྡྷོ ཏདབྷིམུཁོ ཙཉྩལཏི, ཏཾ ཝཱ ཨུཔགཙྪཏི. ཨཡཾ ཨཡོཀནྟཀསྶ ཨཱལམྦཎཀིརིཡཱ ནཱམ. ཨེཝམེཝ ཙིཏྟཙེཏསིཀཱནཾ ཨཱརམྨཎེསུ ཨཱལམྦཎཀིརིཡཱ དཊྛབྦཱ. ན ཀེཝལཾ ཨཱརམྨཎེསུ ཨཱལམྦཎ མཏྟཾ ཧོཏི. ཨཐ ཁོ ཙིཏྟཙེཏསིཀཱ དྷམྨཱ སཏྟསནྟཱནེ ཨུཔྤཛྫམཱནཱ ཚསུ དྭཱརེསུ ཨཱརམྨཎཱནཾ ཨཱཔཱཏཱགམནེ ཨེཝ ཁཎེ ཁཎེ ཨུཔྤཛྫནྟི. ཨུཔྤཛྫིཏྭཱ ཙ ཁཎེ ཁཎེ ནིརུཛ྄ཛྷནྟི.

ཡཐཱ ཏཾ བྷེརིཏལེ བྷེརིསདྡཱ ཨུཔྤཛྫམཱནཱ ཏཏྠ ཏཏྠ ཧཏྠེན པཧརཎཀཱལེ ཨེཝ ཁཎེ ཁཎེ ཨུཔྤཛྫནྟི, ཨུཔྤཛྫིཏྭཱ ཙ ཁཎེ ཁཎེ ནིརུཛ྄ཛྷནྟི. ཝཱིཎཱསདྡཱ ཨུཔྤཛྫམཱནཱ ཝཱིཎཱཏནྟཱིསུ ཏཏྠ ཏཏྠ ཝཱིཎཱདནྟཀེན པཧརཎཀཱལེ ཨེཝ ཁཎེ ཁཎེ ཨུཔྤཛྫནྟི, ཨུཔྤཛྫིཏྭཱ ཙ ཁཎེ ཁཎེ ནིརུཛ྄ཛྷནྟཱིཏི. ནིདྡཱཡནྟསྶ བྷཝངྒཙིཏྟཔྤཝཏྟི ཀཱལེཔི པུབྦབྷཝེ མརཎཱསནྣཀཱལེ ཚསུ དྭཱརེསུ ཨཱཔཱཏ མཱགཏཱནི ཀམྨ ཀམྨནིམིཏྟ གཏིནིམིཏྟཱནི ཨེཝ བྷཝངྒཙིཏྟཱནཾ ཨཱརམྨཎཔཙྩཡོཏི. ཨཱརམྨཎཔཙྩཡདཱིཔནཱ ནིཊྛིཏཱ.

དུཝིདྷོ ཨདྷིཔཏིཔཙྩཡོ ཨཱརམྨཎཱདྷིཔཏིཔཙྩཡོ སཧ ཛཱཏཱདྷིཔཏིཔཙྩཡོ ཙ. ཏཏྠ ཀཏམོ ཨཱརམྨཎཱདྷིཔཏིཔཙྩཡོ. ཨཱརམྨཎཔཙྩཡེ ཝུཏྟེསུ ཨཱརམྨཎེསུ ཡཱནི ཨཱརམྨཎཱནི ཨཏིཨིཊྛཱནི ཧོནྟི ཨཏིཀནྟཱནི ཨཏིམནཱཔཱནི གརུཀཏཱནི. ཏཱནི ཨཱརམྨཎཱནི ཨཱརམྨཎཱདྷིཔཏིཔཙྩཡོ. ཏཏྠ ཨཏིཨིཊྛཱནཱིཏི སབྷཱཝཏོ ཨིཊྛཱནི ཝཱ ཧོནྟུ ཨནིཊྛཱནི ཝཱ, ཏེན ཏེན པུགྒལེན ཨཏིཨིཙྪིཏཱནི ཨཱརམྨཎཱནི ཨིདྷ ཨཏིཨིཊྛཱནི ནཱམ.

ཏཱནི པན དྷམྨཏོ དྭེ དོསམཱུལཙིཏྟུཔྤཱདེ ཙ དྭེ མོམཱུཧ ཙིཏྟུཔྤཱདེ ཙ དུཀྑསཧགཏཀཱཡཝིཉྙཱཎཙིཏྟུཔྤཱདེ ཙ ཋཔེཏྭཱ ཨཝསེསཱནི སབྦཱནི ཀཱམཱཝཙརཙིཏྟཙེཏསིཀཱནི ཙ རཱུཔཱརཱུཔ ལོཀུཏྟརཙིཏྟཙེཏསིཀཱནི ཙ སབྦཱནི ཨཏིཨིཊྛརཱུཔཱནི ཙ ཧོནྟི.

ཏེསུཔི ¶ ཀཱམཱརམྨཎཱནི གརུཾ ཀརོནྟསྶེཝ ཨཱརམྨཎཱ དྷིཔཏིཔཙྩཡོ. གརུཾ ཨཀརོནྟསྶ ཨཱརམྨཎཱདྷིཔཏིཔཙྩཡོ ན ཧོཏི. ཛྷཱནལཱབྷིནོ པན ཨཏྟནཱ པཊིལདྡྷཱནི མཧགྒཏཛྷཱནཱནི ཨརིཡསཱཝཀཱ ཙ ཨཏྟནཱ པཊིལདྡྷེ ལོཀུཏྟརདྷམྨེ གརུཾ ཨཀརོནྟཱ ནཱམ ནཏྠི.

ཀཏམེ དྷམྨཱ ཏསྶ པཙྩཡསྶ པཙྩཡུཔྤནྣཱ. ཨཊྛ ལོབྷ མཱུལཙིཏྟཱནི ཨཊྛ ཀཱམཱཝཙརཀུསལཙིཏྟཱནི ཙཏྟཱརི ཀཱམཱཝཙར ཉཱཎསམྤཡུཏྟཀིརིཡཙིཏྟཱནི ཨཊྛ ལོཀུཏྟརཙིཏྟཱནི ཏསྶ པཙྩཡསྶ པཙྩཡུཔྤནྣཱ.

ཏཏྠ ལོཀིཡཱནི ཚལཱ༹རམྨཎཱནི ལོབྷམཱུལཙིཏྟཱནཾ པཙྩཡོ. སཏྟརས ལོཀིཡཀུསལཱནི ཙཏུནྣཾ ཉཱཎཝིཔྤཡུཏྟ ཀུསལཱནཾ. ཏཱནི ཀུསལཱནིཙེཝ ཧེཊྛིམམགྒཕལཱནི ཙ ནིབྦཱནཉྩ ཙཏུནྣཾ ཉཱཎསམྤཡུཏྟཀུསལཱནཾ. ཨརཧཏྟམགྒཕལཱནི ཙ ནིབྦཱནཉྩ ཙཏུནྣཾ ཉཱཎསམྤཡུཏྟཀིརིཡཱནཾ. ནིབྦཱནཾ ཨཊྛནྣཾ ལོཀུཏྟར ཙིཏྟཱནནྟི.

ཀེནཊྛེན ཨཱརམྨཎཾ, ཀེནཊྛེན ཨདྷིཔཏི. ཨཱལམྦི ཏབྦཊྛེན ཨཱརམྨཎཾ, ཨཱདྷིཔཙྩཊྛེན ཨདྷིཔཏི. ཀོ ཨཱདྷིཔཙྩཊྛོ. ཨཏྟཱནཾ གརུཾ ཀཏྭཱ པཝཏྟེསུ ཙིཏྟཙེཏསིཀེསུ ཨིསྶརབྷཱཝོ ཨཱདྷིཔཙྩཊྛོ. ལོཀེ སཱམིཀཱ ཝིཡ ཨཱརམྨཎཱདྷིཔཏིཔཙྩཡ དྷམྨཱ དཊྛབྦཱ, དཱསཱ ཝིཡ པཙྩཡུཔྤནྣདྷམྨཱ དཊྛབྦཱ.

སུཏསོམཛཱཏཀེ རཱཛཱ པོརིསཱདོ མནུསྶམཾསཾ གརུཾ ཀརོནྟོ མནུསྶམཾསཧེཏུ རཛྫཾ པཧཱཡ ཨརཉྙེ ཝིཙརཏི. ཏཏྠ མནུསྶམཾསེ གནྡྷརས དྷམྨཱ ཨཱརམྨཎཱདྷིཔཏིཔཙྩཡོ. རཉྙོ པོརིསཱདསྶ ལོབྷམཱུལཙིཏྟཾ པཙྩཡུཔྤནྣདྷམྨོ. རཱཛཱ སུཏ སོམོ སཙྩདྷམྨཾ གརུཾ ཀཏྭཱ སཙྩདྷམྨཧེཏུ རཛྫསམྤཏྟིཉྩ ཉཱཏི སངྒྷཉྩ ཨཏྟནོ ཛཱིཝིཏཉྩ ཚཊྚེཏྭཱ པུན རཉྙོ པོརིསཱདསྶ ཧཏྠཾ ཨུཔགཏོ. ཏཏྠ སཙྩདྷམྨོ ཨཱརམྨཎཱདྷིཔཏིཔཙྩཡོ. རཉྙོ སུཏསོམསྶ ཀུསལཙིཏྟཾ པཙྩཡུཔྤནྣདྷམྨོ. ཨེསནཡོ སབྦེསུ གརུཀཏེསུ ཨཱརམྨཎེསུ.

ཀཏམོ སཧཛཱཏཱདྷིཔཏིཔཙྩཡོ. ཨདྷིཔཏིབྷཱཝཾ པཏྟཱ ཙཏྟཱརོ དྷམྨཱ ཨདྷིཔཏིཔཙྩཡོ, ཚནྡོ ཙིཏྟཾ ཝཱིརིཡཾ ཝཱིམཾསཱ.

ཀཏམེ དྷམྨཱ ཏསྶ པཙྩཡསྶ པཙྩཡུཔྤནྣཱ. ཨདྷིཔཏི སམྤཡུཏྟཱ ཙིཏྟཙེཏསིཀཱ ཙ ཨདྷིཔཏིསམུཊྛིཏཱ ཙིཏྟཛརཱུཔདྷམྨཱ ཙ ཏསྶ པཙྩཡསྶ པཙྩཡུཔྤནྣཱ.

ཀེནཊྛེན སཧཛཱཏོ, ཀེནཊྛེན ཨདྷིཔཏི.

སཧུཔྤཱདནཊྛེན སཧཛཱཏོ, སཧཛཱཏཱནཾ དྷམྨཱནཾ ཨབྷིབྷཝནཊྛེན ཨདྷིཔཏི. ཏཏྠ སཧུཔྤཱདནཊྛེནཱཏི ¶ ཡོ དྷམྨོ སཡཾ ཨུཔྤཛྫམཱནོ ཨཏྟནཱ སཧཛཱཏདྷམྨེ ཙ ཨཏྟནཱ སཧེཝ ཨུཔྤཱདེཏི, ཏསྶ ཨཏྟནཱ སཧཛཱཏདྷམྨཱནཾ སཧུཔྤཱདནཊྛེན.

ཨབྷིབྷཝནཊྛེནཱཏི ཨཛ྄ཛྷོཏྠརཎཊྛེན. ཡཐཱ རཱཛཱ ཙཀྐཝཏྟི ཨཏྟནོ པུཉྙིདྡྷིཡཱ སཀལདཱིཔཝཱསིནོ ཨབྷིབྷཝནྟོ ཨཛ྄ཛྷོཏྠརནྟོ ཨཏྟནོ ཝསེ ཝཏྟཱཔེཏི, སཀལདཱིཔཝཱསིནོ ཙ ཏསྶ ཝསེ ཝཏྟནྟི. ཏཐཱ ཨདྷིཔཏིཊྛཱནཔཏྟཱ ཨིམེ ཙཏྟཱརོ དྷམྨཱ ཨཏྟནོ ཨཏྟནོ ཝིསཡེ སཧཛཱཏདྷམྨེ ཨབྷིབྷཝནྟཱ ཨཛ྄ཛྷོཏྠརནྟཱ ཨཏྟནོ ཝསེ ཝཏྟཱཔེནྟི, སཧཛཱཏདྷམྨཱ ཙ ཏེསཾ ཝསེ ཝཏྟནྟི. ཡཐཱ ཝཱ སིལཱཐམྦྷེ པཐཝིདྷཱཏུ ཨུདཀཀྑནྡྷེ ཨཱཔོདྷཱཏུ ཨགྒིཀྑནྡྷེ ཏེཛོདྷཱཏུ ཝཱཏཀྑནྡྷེ ཝཱཡོདྷཱཏུ ཨཏྟནཱ སཧཛཱཏཱ ཏིསྶོ དྷཱཏུཡོ ཨབྷིབྷཝནྟཱ ཨཛ྄ཛྷོཏྠརནྟཱ ཨཏྟནོ གཏིཾ གམཱཔེནྟི, སཧཛཱཏདྷཱཏུཡོ ཙ ཏཱསཾ གཏིཾ གཙྪནྟི, ཨེཝམེཝ ཨདྷིཔཏིཊྛཱནཔཏྟཱ ཨིམེ ཙཏྟཱརོ དྷམྨཱ ཨཏྟནོ བལེན སཧཛཱཏདྷམྨེ ཨཏྟནོ གཏིཾ གམཱཔེནྟི, སཧཛཱཏདྷམྨཱ ཙ ཏེསཾ གཏིཾ གཙྪནྟི, ཨེཝཾ སཧཛཱཏདྷམྨཱནཾ ཨབྷིབྷཝནཊྛེན.

ཨེཏྠ ཝདེཡྻུཾ, ཡདི སཧཛཱཏདྷམྨཱནཾ ཨབྷིབྷཝནཊྛེན ཨདྷིཔཏིནཱམ སིཡཱ. ཨེཝཾ སཏི ཏིཊྛཏུ ཚནྡོ, ལོབྷོ ཨེཝ ཨདྷིཔཏིནཱམ སིཡཱ, སོ ཧི ཚནྡཏོཔི བལཝཏརོ ཧུཏྭཱ སཧ ཛཱཏདྷམྨེ ཨབྷིབྷཝནྟོ པཝཏྟཏཱིཏི. ཝུཙྩཏེ, བཱལཔུཐུཛྫནེསུ ཨེཝ ལོབྷོ ཚནྡཏོ བལཝཏརོ ཧོཏི, པཎྜིཏེསུ པན ཚནྡོ ཨེཝ ལོབྷཏོ བལཝཏརོ ཧུཏྭཱ སཧཛཱཏདྷམྨེ ཨབྷི བྷཝནྟོ པཝཏྟཏི. སཙེ ཧི ལོབྷོ ཨེཝ ཚནྡཏོ བལཝཏརོ སིཡཱ, ཀཐཾ ཨིམེ སཏྟཱ ལོབྷསྶ ཧཏྠགཏཱ བྷཝསམྤཏྟི བྷོགསམྨཏྟིཡོ ཚཊྚེཏྭཱ ནེཀྑམྨདྷམྨེ པཱུརེཏྭཱ ཝཊྚདུཀྑཏོ ནིསྶརེཡྻུཾ. ཡསྨཱ པན ཚནྡོ ཨེཝ ལོབྷཏོ བལཝཏརོ ཧོཏི, ཏསྨཱ ཨིམེ སཏྟཱ ལོབྷསྶ ཧཏྠགཏཱ བྷཝསམྤཏྟི བྷོགསམྤཏྟིཡོ ཚཊྚེཏྭཱ ནེཀྑམྨདྷམྨེ པཱུརེཏྭཱ ཝཊྚདུཀྑཏོ ནིསྶརནྟི. ཏསྨཱ ཚནྡོ ཨེཝ ལོབྷཏོ བལཝཏརོ ཧོཏི, ཚནྡོ ཨེཝ ཨདྷིཔཏི, ན ལོབྷོཏི. ཨེས ནཡོ དོསཱདཱིསུཔཱིཏི.

ཏཏྠ ལོཀེ མཧནྟེསུ སུདུཀྐརེསུ པུརིསཀམྨེསུ པཙྩུཔཊྛིཏེསུ ཨིམེ ཙཏྟཱརོ དྷམྨཱ ཀམྨསིདྡྷིཡཱ སཾཝཏྟནྟི. ཀཐཾ.

ཧཱིནཙྪནྡཱ བཧུཛྫནཱ མཧནྟཱནི སུདུཀྐརཱནི པུརིསཀམྨཱནི དིསྭཱ ནིཝཏྟཙྪནྡཱ ཧོནྟི. ཀཱཏུཾ ན ཨིཙྪནྟི, ཨམྷཱཀཾ ཨཝིསཡོཏི ནིརཔེཀྑཱ ཋཔེནྟི. ཚནྡཱདྷིཀོ པན ཏཱདིསཱནི པུརིསཀམྨཱནི དིསྭཱ ཨུགྒཏཙྪནྡོ ཧོཏི, ཨཏིཝིཡ ¶ ཀཱཏུཾ ཨིཙྪཏི, མམ ཝིསཡོ ཨེསོཏི ཨདྷིཊྛཱནཾ གཙྪཏི. སོ ཚནྡེན ཨབྷིཀཌྜྷིཏོ ཡཱཝ ཏཾ ཀམྨཾ ན སིཛ྄ཛྷཏི, ཏཱཝ ཨནྟརཱ ཏཾ ཀམྨཾ ཚཊྚེཏུཾ ན སཀྐོཏི. ཨེཝཉྩ སཏི ཨཏིམཧནྟཾཔི ཏཾ ཀམྨཾ ཨེཀསྨིཾ ཀཱལེ སིདྡྷཾ བྷཝིསྶཏི.

ཧཱིནཝཱིརིཡཱ ཙ བཧུཛྫནཱ ཏཱདིསཱནི ཀམྨཱནི དིསྭཱ ནིཝཏྟ ཝཱིརིཡཱ ཧོནྟི, ཨིདཾ མེ ཀམྨཾ ཀརོནྟསྶ བཧུཾ ཀཱཡདུཀྑཾ ཝཱ ཙེཏོདུཀྑཾ ཝཱ བྷཝིསྶཏཱིཏི ནིཝཏྟནྟི. ཝཱིརིཡཱདྷིཀོ པན ཏཱདིསཱནི པུརིསཀམྨཱནི དིསྭཱ ཨུགྒཏཝཱིརིཡོ ཧོཏི, ཨིདཱནེཝ ཨུཊྛཧིཏྭཱ ཀཱཏུཾ ཨིཙྪཏི. སོ ཙིརཀཱལཾཔི ཏཾ ཀམྨཾ ཀརོནྟོ བཧུཾ ཀཱཡདུཀྑཾ ཝཱ ཙེཏོདུཀྑཾ ཝཱ ཨནུབྷཝནྟོཔི ཏསྨིཾ ཝཱིརིཡ ཀམྨེ ནནིབྦིནྡཏི, མཧནྟེན ཀམྨཝཱིརིཡེན ཝིནཱ བྷཝིཏུཾ ན སཀྐོཏི, ཏཱདིསེན ཝཱིརིཡེན རཏྟིདིཝཾ ཁེཔེནྟོ ཙིཏྟསུཁཾ ཝིནྡཏི. ཨེཝཉྩ སཏི ཨཏིམཧནྟཾཔི ཏཾ ཀམྨཾ ཨེཀསྨིཾ ཀཱལེ སིདྡྷཾ བྷཝིསྶཏི.

ཧཱིནཙིཏྟཱ ཙ བཧུཛྫནཱ ཏཱདིསཱནི ཀམྨཱནི དིསྭཱ ནིཝཏྟཙིཏྟཱ ཧོནྟི. པུན ཨཱརམྨཎཾཔི ན ཀརོནྟི. ཙིཏྟཱདྷིཀོ པན ཏཱདིསཱནི ཀམྨཱནི དིསྭཱ ཨུགྒཏཙིཏྟོ ཧོཏི, ཙིཏྟཾ ཝིནོདེཏུཾཔི ན སཀྐོཏི, ནིཙྩཀཱལཾ ཏཏྠ ནིབནྡྷཙིཏྟོ ཧོཏི. སོ ཙིཏྟཝསིཀོ ཧུཏྭཱ ཙིརཀཱལཾཔི ཏཾ ཀམྨཾ ཀརོནྟོ བཧུཾ ཀཱཡདུཀྑཾཝཱཔཱིཏིཨཱདིནཱ ཚནྡཱདྷིཔཏིནཡེན ཝཏྟབྦཾ.

མནྡཔཉྙཱ ཙ བཧུཛྫནཱ ཏཱདིསཱནི ཀམྨཱནི དིསྭཱ ནིཝཏྟཔཉྙཱ ཧོནྟི, ཀམྨཱནཾ ཨཱདིམྤི ན པསྶནྟི, ཨནྟཔི ན པསྶནྟི, ཨནྡྷཀཱརེ པཝིསནྟཱ ཝིཡ ཧོནྟི, ཏཱནི ཀམྨཱནི ཀཱཏུཾ ཙིཏྟཾཔི ན ནམཏི. པཉྙཱདྷིཀོ པན ཏཱདིསཱནི ཀམྨཱནི དིསྭཱ ཨུགྒཏཔཉྙོ ཧོཏི, ཀམྨཱནཾ ཨཱདིཾཔི པསྶཏི, ཨནྟཾཔི པསྶཏི, ཕལཾཔི པསྶཏི, ཨཱནིསཾསཾཔི པསྶཏི. སུཁེན ཀམྨསིདྡྷིཡཱ ནཱནཱཨུཔཱཡཾཔི པསྶཏི. སོ ཙིརཀཱལཾཔི ཏཾ ཀམྨཾ ཀརོནྟོཏིཨཱདིནཱ ཝཱིརིཡཱདྷིཔཏིནཡེན ཝཏྟབྦཾ. ཨིདྷ པན མཧཏིཡཱ ཀམྨཝཱིམཾསཱཡཱཏི ཙ ཏཱདིསིཡཱ ཀམྨ ཝཱིམཾསཱཡཱཏི ཙ ཝཏྟབྦཾ.

ཨེཝཾ ལོཀེ མཧནྟེསུ སུདུཀྐརེསུ པུརིསཀམྨེསུ པཙྩུཔཊྛིཏེསུ ཨིམེ ཙཏྟཱརོ དྷམྨཱ ཀམྨསིདྡྷིཡཱ སཾཝཏྟནྟི. ཨིམེསཉྩ ཙཏུནྣཾ ཨདྷིཔཏཱིནཾ ཝིཛྫམཱནཏྟཱ ལོཀེ པུརིསཝིསེསཱ ནཱམ དིསྶནྟི, སབྦཉྙུབུདྡྷཱ ནཱམ དིསྶནྟི, སབྦཉྙུབོདྷིསཏྟཱ ནཱམ དིསྶནྟི, པཙྩེཀབུདྡྷཱ ནཱམ དིསྶནྟི, པཙྩེཀབོདྷིསཏྟཱནཱམ དིསྶནྟི, ཨགྒསཱཝཀཱནཱམ མཧཱསཱཝཀཱ ནཱམ སཱཝཀབོདྷིསཏྟཱ ནཱམ དིསྶནྟི. ལོཀེཔི ཨེཝརཱུཔཱནཾ པུརིསཝིསེསཱནཾ ཝསེན སཏྟ ལོཀསྶ ཨཏྠཱཡ ཧིཏཱཡ སུཁཱཡ པཉྙཱསིཔྤཝིསེསཱ ཙ པརིབྷོགཝཏྠུཝིསེསཱ ཙ དིསྶནྟཱིཏི. ཨདྷིཔཏིཔཙྩཡདཱིཔནཱ ནིཊྛིཏཱ.

ཀཏམོ ¶ ཨནནྟརཔཙྩཡོ. ཨནནྟརེ ཁཎེ ནིརུདྡྷོ ཙིཏྟ ཙེཏསིཀདྷམྨསམཱུཧོ ཨནནྟརཔཙྩཡོ.

ཀཏམོ དྷམྨོ ཨནནྟརཔཙྩཡསྶ པཙྩཡུཔྤནྣོ. པཙྪིམེ ཨནནྟརེ ཨེཝ ཁཎེ ཨུཔྤནྣོ ཙིཏྟཙེཏསིཀདྷམྨསམཱུཧོ ཏསྶ པཙྩཡསྶ པཙྩཡུཔྤནྣོ.

ཨེཀསྨིཾ བྷཝེ པཊིསནྡྷིཙིཏྟཾ པཋམབྷཝངྒཙིཏྟསྶ ཨནནྟར པཙྩཡོ, པཋམ བྷཝངྒཙིཏྟཾ དུཏིཡབྷཝངྒཙིཏྟསྶ ཨནནྟརཔཙྩཡོཏིཨཱདིནཱ ཝཏྟབྦོ.

ཡདཱ པན དྷམྨཡམཀེ སུདྡྷཱཝཱསཱནཾ དུཏིཡེ ཨཀུསལེ ཙིཏྟེ ཝཏྟམཱནེཏི ཝུཏྟནཡེན ཏསྶ སཏྟསྶ ཨཏྟནོ ཨབྷིནཝཾ ཨཏྟབྷཱཝཾ ཨཱརབྦྷ ཨེཏཾ མམ ཨེསོཧམསྨི ཨེསོ མེ ཨཏྟཱཏི པཝཏྟཾ བྷཝནིཀནྟིཀ ཏཎྷཱསཧགཏཙིཏྟཾ ཨུཔྤཛྫཏི. ཏདཱ པཋམཾ དྭིཀྑཏྟུཾ བྷཝངྒཾ ཙལཏི. ཏཏོ མནོདྭཱརཱཝཛྫནཙིཏྟཾ ཨུཔྤཛྫཏི. ཏཏོ སཏྟ བྷཝནིཀནྟིཀཛཝནཱནི ཨུཔྤཛྫནྟི. ཏཏོ པརཾ བྷཝངྒཝཱརོ.

ཨཔི ཙ སོ སཏྟོ ཏདཱ པཙྩུཔྤནྣབྷཝེ ཀིཉྩི ན ཛཱནཱཏི, པུབྦབྷཝེ ཨཏྟནཱ ཨནུབྷཱུཏཾ ཨཱརམྨཎཾ ཨནུསྶརམཱནོ ཨཙྪཏི. ཝཏྠུསྶ པན ཨཏིདུབྦལཏྟཱ ཏཉྩ ཨཱརམྨཎཾ ཨཔརིབྱཏྟམེཝ ཧོཏི. ཏཾ ཨཱརབྦྷ ཨུདྡྷཙྩསཧགཏཙིཏྟམེཝ བཧུལཾ པཝཏྟཏི.

ཡདཱ གབྦྷོ ཐོཀཾ ཝཌྜྷམཱནོ ཧོཏི ཨཏིརེཀདྭེམཱསཾ གཏོ, ཏདཱ ཙཀྑཱདཱིནི ཨིནྡྲིཡཱནི པརིཔུཎྞཱནི ཧོནྟི. ཨེཝཾ སནྟེཔི མཱཏུགབྦྷེ ཨཱལོཀཱདཱིནཾ པཙྩཡཱནཾ ཨབྷཱཝཏོ ཙཀྑུཝིཉྙཱཎཱདཱིནི ཙཏྟཱརི ཝིཉྙཱཎཱནི ནུཔྤཛྫནྟི, ཀཱཡཝིཉྙཱཎམནོཝིཉྙཱཎཱནི ཨེཝ ཨུཔྤཛྫནྟི. སོ སཏྟོ མཱཏུཡཱ ཨིརིཡཱཔཐཔརིཝཏྟནཱདཱིསུ བཧཱུནི དུཀྑདོམནསྶཱནི པཙྩནུབྷོཏི. ཝིཛཱཡནཀཱལེ པན བྷུསཾ དུཀྑཾ ནིགཙྪཏིཡེཝ. ཝིཛཱཡིཏྭཱཔི ཡཱཝ ཝཏྠུརཱུཔཱནི མུདཱུནི ཧོནྟི, པརིཔཱཀཾ ན གཙྪནྟི, ཏཱཝ སོ ཨཏིམནྡརཱུཔོ ཨུཏྟཱནསེཡྻཀོ ཧུཏྭཱ ཨཙྪཏི. ན ཀིཉྩི པཙྩུཔྤནྣཾ ཨཱརམྨཎཾ སལླཀྑེཏི. ཡེབྷུཡྻེན པུརིམ བྷཝཱནུསཱརཱི ཨེཝ ཏསྶ ཝིཉྙཱཎཾ ཧོཏི. སཙེ སོ ནིརཡ བྷཝཏོ ཨཱགཏོ ཧོཏི, སོ ཝིརཱུཔམུཁབཧུལོ ཧོཏི. པུརིམཱནི ནིརཡཱརམྨཎཱནི ཨཱརབྦྷ ཁཎེ ཁཎེ ཝིརཱུཔམུཁམསྶ པཉྙཱཡཏི. ཨཐ དེཝལོཀཏོ ཨཱགཏོ ཧོཏི, དིབྦཱནི ཨཱརམྨཎཱནི ཨཱརབྦྷ ཝིཔྤསནྣམུཁབཧུལོ ཧོཏི, ཁཎེ ཁཎེ མིཧིཏམུཁམསྶ པཉྙཱཡཏི.

ཡདཱ པན ཝཏྠུརཱུཔཱནི ཏིཀྑཱནི ཧོནྟི, པརིཔཱཀཾ གཙྪནྟི. ཝིཉྙཱཎཱནི ཙསྶ སུཝིསདཱནི པཝཏྟནྟི. ཏདཱ ཨམནྡརཱུཔོ ཧུཏྭཱ ཀཱིལ༹ནྟོ ལཱིལ༹ནྟོ མོདནྟོ ¶ པམོདནྟོ ཨཙྪཏི. པཙྩུཔྤནྣེ ཨཱརམྨཎཱནི སལླཀྑེཏི. མཱཏུབྷཱསཾ སལླཀྑེཏི. ཨིདྷ ལོཀཱནུསཱརཱི ཝིཉྙཱཎམསྶ བཧུལཾ པཝཏྟཏི. པུརིམཛཱཏིཾ པམུསྶཏི.

ཀིཾ པན སབྦོཔི སཏྟོ ཨིམསྨིཾ ཋཱནེ ཨེཝ པུརིམཾ ཛཱཏིཾ པམུསྶཏཱིཏི ཙེ. ན སབྦོཔི སཏྟོ ཨིམསྨིཾ ཋཱནེ ཨེཝ པམུསྶཏི. ཀོཙི ཨཏིརེཀཏརཾ གམྦྷཝཱསདུཀྑེན པརིཔཱིལི༹ཏོ གབྦྷེ ཨེཝ པམུསྶཏི. ཀོཙི ཝིཛཱཡནཀཱལེ, ཀོཙི ཨིམསྨིཾ ཋཱནེ པམུསྶཏི. ཀོཙི ཨིཏོཔརམྤི དཧརཀཱལེ ན པམུསྶཏི. ཝུཌྜྷཀཱལེ ཨེཝ པམུསྶཏི. ཀོཙི ཡཱཝཛཱིཝཾཔི ན པམུསྶཏི. དྭེ ཏཡོ བྷཝེ ཨནུསྶརནྟོཔི ཨཏྠིཡེཝ. ཨིམེ ཛཱཏིསྶརསཏྟཱ ནཱམ ཧོནྟི.

ཏཏྠ ཝིཛཱཡནཀཱལཏོ པཊྛཱཡ ཚདྭཱརིཀཝཱིཐིཙིཏྟཱནི པཝཏྟནྟི. པཙྩུཔྤནྣཱརམྨཎཾ སལླཀྑཎཏོ པཊྛཱཡ ཚདྭཱརིཀཝཱིཐི ཙིཏྟཱནི པརིཔུཎྞཱནི པཝཏྟནྟི. སབྦཏྠཔི པུརིམཾ པུརིམཾ ཨནནྟརེ ནིརུདྡྷཾ ཙིཏྟཾ པཙྪིམསྶ པཙྪིམསྶ ཨནནྟརེ ཨུཔྤནྣསྶ ཙིཏྟསྶ ཨནནྟར པཙྩཡོ ཧོཏི. ཨཡཉྩ ཨནནྟརཔཙྩཡོ ནཱམ ཨནམཏགྒེ སཾསཱརེ ཨེཀསྶ སཏྟསྶ ཨེཀཔྤབནྡྷོ ཨེཝ ཧོཏི. ཡདཱ སཏྟོ ཨརཧཏྟ མགྒཾ ལབྷིཏྭཱ ཁནྡྷཔརིནིབྦཱནཾ པཱཔུཎཱཏི, ཏདཱ ཨེཝ སོ པབནྡྷོ ཚིཛྫཏི.

ཀེནཊྛེན ཨནནྟརོ, ཀེནཊྛེན པཙྩཡོཏི. ཨཏྟནོ ཨནནྟརེ ཨཏྟསདིསསྶ དྷམྨནྟརསྶ ཨུཔྤཱདནཊྛེན ཨནནྟརོ, ཨུཔཀཱརཀཊྛེན པཙྩཡོ. ཏཏྠ ཨཏྟསདིསསྶཱཏི སཱརམྨཎ བྷཱཝེན ཨཏྟནཱ སདིསསྶ. སཱརམྨཎབྷཱཝེནཱཏི ཙ ཡོ དྷམྨོ ཨཱརམྨཎེན ཝིནཱ ན པཝཏྟཏི, སོ སཱརམྨཎོ ནཱམ, ཨེཝཾ སཱརམྨཎབྷཱཝེན. དྷམྨནྟརསྶ ཨུཔྤཱདནཊྛེནཱཏི པུརིམསྨིཾ ཙིཏྟེ ནིརུདྡྷེཔི ཏསྶ ཙིནྟནཀིརིཡཱཝེགོ ན ཝཱུཔསམྨཏི, པཙྪིམཾ ཙིཏྟཾ ཨུཔྤཱདེཏྭཱ ཨེཝ ཝཱུཔསམྨཏི, ཨེཝཾ པཙྪིམསྶ དྷམྨནྟརསྶ ཨུཔྤཱདནཊྛེན.

ཏཏྠ པུརིམཱ པུརིམཱ མཱཏུཔརམྤརཱ ཝིཡ ཨནནྟརཔཙྩཡཔརམྤརཱ དཊྛབྦཱ. པཙྪིམཱ པཙྪིམཱ དྷཱིཏུཔརམྤརཱ ཝིཡ ཏསྶ པཙྩཡུཔྤནྣཔརམྤརཱ དཊྛབྦཱ. ཨེཝཾ སནྟེ ཨརཧནྟཱནཾ སབྦཔཙྪིམཾ པརིནིབྦཱནཙིཏྟམྤི པུན པཊིསནྡྷིཙིཏྟསངྑཱཏཾ དྷམྨནྟརཾ ཨུཔྤཱདེཡྻཱཏི. ན ཨུཔྤཱདེཡྻ. ཀསྨཱ, ཏདཱ ཀམྨཀིལེསཝེགཱནཾ སབྦསོ པཊིཔྤསྶདྡྷིབྷཱཝེན ཨཙྩནྟསནྟཏརཏྟཱ ཏསྶ ཙིཏྟསྶཱཏི. ཨནནྟརཔཙྩཡ དཱིཔནཱ ནིཊྛིཏཱ.

པཙྩཡདྷམྨཝིབྷཱགོ ¶ ཙ པཙྩཡུཔྤནྣདྷམྨཝིབྷཱགོ ཙ ཨནནྟཔཙྩཡ སདིསོ.

ཀེནཊྛེན སམནནྟརོཏི. སུཊྛུ ཨནནྟརཊྛེན སམནནྟརོ. ཡཐཱ སིལཱཐམྦྷཱདཱིསུ རཱུཔཀལཱཔཱ ཨེཀཱབདྡྷཱ སམཱནཱཔི རཱུཔ དྷམྨབྷཱཝེན སཎྛཱན ཛཱཏིཀཏྟཱ མཛ྄ཛྷེ པརིཙྪེདརཱུཔསཧིཏཱ ཨེཝ ཧོནྟི. དྭིནྣཾ རཱུཔཀལཱཔཱནཾ མཛ྄ཛྷེ ཨནྟརཾ ནཱམ ཝིཝརཾ ནཱམ ཨཏྠིཡེཝ. ན ཏཐཱ པུརིམཔཙྪིམཱནཾ དྭིནྣཾ ཙིཏྟཙེཏསིཀ ཀལཱཔཱནཾ མཛ྄ཛྷེ. ཏེ པན ཨརཱུཔདྷམྨབྷཱཝེན ཨསཎྛཱན ཛཱཏིཀཏྟཱ མཛ྄ཛྷེ པརིཙྪེདདྷམྨསྶ ནཱམ ཀསྶཙི ཨཱཀཱསཝིཝརསྶ ཨབྷཱཝཏོ སབྦསོ ཨནྟར རཧིཏཱ ཨེཝ ཧོནྟི. ལོཀསྶཔི དྭིནྣཾ ཀལཱཔཱནཾ ཨནྟརཾ ནཱམ ན དིསྶཏི. ཏཏོ ཨིམེ སཏྟཱ ཙིཏྟཾ ནཱམ ནིཙྩཾ དྷུཝཾ ཐཱཝརཾ ཨཝིཔརིཎཱམདྷམྨནྟི ཨེཝཾ ཙིཏྟེ ནིཙྩསཉྙིནོ ཧོནྟི. ཨེཝཾ སུཊྛུ ཨནནྟརཊྛེན སམནནྟརོ. ཨནནྟརཊྛེནཱཏི ཙ ཨཏྟནོ ཨནནྟརེ ཨཏྟསདིསསྶ དྷམྨནྟརསྶ ཨུཔྤཱདནཊྛེནཱཏི པུབྦེ ཝུཏྟམེཝ.

ཨེཝཾ སནྟེ ནིརོདྷསམཱཔཏྟིཀཱལེ པུརིམཙིཏྟཾ ནཱམ ནེཝ སཉྙཱནཱསཉྙཱཡཏནཙིཏྟཾ, པཙྪིམཙིཏྟཾ ནཱམ ཨརིཡཕལཙིཏྟཾ, དྭིནྣཾ ཙིཏྟཱནཾ ཨནྟརེ ཨེཀརཏྟིདིཝམྤི དྭེརཏྟིདིཝཱནིཔི.ལ. སཏྟརཏྟིདིཝཱནིཔི ཨཙིཏྟཀོ ཧོཏི. ཨསཉྙསཏྟབྷཱུམིཡཾཔི པུརིམེ ཀཱམབྷཝེ ཙུཏིཙིཏྟཾ པུརིམཙིཏྟཾ ནཱམ. པཙྪིམེ ཀཱམབྷཝེ པཊིསནྡྷིཙིཏྟཾ པཙྪིམཙིཏྟཾ ནཱམ, དྭིནྣཾ ཙིཏྟཱནཾ ཨནྟརེ ཨསཉྙསཏྟབྷཝེ པཉྩཀཔྤསཏཱནི པུགྒལོ ཨཙིཏྟཀོ ཏིཊྛཏི. ཏཏྠ དྭེ པུརིམཙིཏྟཱནི ཨཏྟནོ ཨནནྟརེ ཨཏྟསདིསསྶ དྷམྨནྟརསྶ ཨུཔྤཱདནཔཙྩཡསཏྟིརཧིཏཱནི ཧོནྟཱིཏི. ན ཧོནྟི. མཧནྟེཧི པན བྷཱཝནཱཔཎིདྷིབལེཧི པཊིབཱཧིཏཏྟཱ པུརིམཙིཏྟཱནི ཙ ནིརུཛ྄ཛྷམཱནཱནི ཨནནྟརེ དྷམྨནྟརསྶ ཨུཔྤཱདན སཏྟིསཧིཏཱནི ཨེཝ ནིརུཛ྄ཛྷནྟི. པཙྪིམཙིཏྟཱནི ཙ ཨུཔྤཛྫམཱནཱནི ཏསྨིཾ ཁཎེ ཨེཀཱབདྡྷབྷཱཝེན ཨནུཔྤཛྫིཏྭཱ ཙིརཀཱལེ ཨེཝ ཨུཔྤཛྫནྟི. ན ཙ ཨེཏྟཀམཏྟེན པུརིམཙིཏྟཱནཾ ཨནནྟརེ དྷམྨནྟརསྶ ཨུཔྤཱདན སཏྟིནཱམ ནཏྠཱིཏི ཙ, ཏེ ཨནནྟརཔཙྩཡདྷམྨཱ ནཱམ ན ཧོནྟཱིཏི ཙ སཀྐཱ ཝཏྟུཾ. ཡཐཱ ཏཾ རཉྙོ ཡོདྷཱ ནཱམ ཨཏྠི, ཀདཱཙི རཱཛཱ ཀཱལཾ ཉཏྭཱ ཏུམྷེ ཨིདཱནི མཱཡུཛ྄ཛྷཐ, ཡུདྡྷཀཱལོ ན ཧོཏི, ཨསུཀསྨིཾ ཀཱལེ ཨེཝ ཡུཛ྄ཛྷཐཱཏི ཝདེཡྻ. ཏེ ཙ ཏདཱ ཨཡུཛ྄ཛྷམཱནཱ ཝིཙརེཡྻུཾ. ཨེཝཾ སནྟེཔི ཏེསཾ ཡུཛ྄ཛྷནསཏྟི ནཱམ ནཏྠཱིཏི ཙ, ཏེ ཡོདྷཱ ནཱམ ན ཧོནྟཱིཏི ཙ ན སཀྐཱ ཝཏྟུནྟི.

ཨེཏྠ ཝདེཡྻུཾ, ཨིམསྨིཾ པཙྩཡེ ཏེ པན ཨརཱུཔདྷམྨབྷཱཝེན ཨསཎྛཱན ཛཱཏིཀཏྟཱ མཛ྄ཛྷེཔརིཙྪེདདྷམྨསྶ ནཱམ ཀསྶཙི ཨབྷཱཝཏོ སབྦསོ ཨནྟརརཧིཏཱ ¶ ཨེཝ ཧོནྟཱིཏི ཝུཏྟཾ. ཨེཝཾ སནྟེ པུབྦེ ཨཱརམྨཎ པཙྩཡེ བྷེརིསདྡཝཱིཎཱསདྡོཔམཱཧི ཡོ ཙིཏྟཱནཾ ཁཎེ ཁཎེ ཨུཔྤཱདོ ཙ ནིརོདྷོ ཙ ཝུཏྟོ, སོ ཨམྷེཧི ཀཐཾ པཙྩེཏབྦོཏི. ཨཉྙམཉྙཝིརུདྡྷཱནཾ ནཱནཱཙིཏྟཱནཾ ཁཎམཏྟེཔི པུབྦཱཔར པརིཝཏྟནསྶ ལོཀེ པཉྙཱཡནཏོ. ཨཡམཏྠོ པུབྦེ ཙིཏྟ ཡམཀདཱིཔནིཡཾ ཝིཏྠཱརཏོ ཝུཏྟོཡེཝཱཏི. སམནནྟརཔཙྩཡ དཱིཔནཱ ནིཊྛིཏཱ.

པཙྩཡདྷམྨཝིབྷཱགོ ཙ པཙྩཡུཔྤནྣདྷམྨཝིབྷཱགོཙ ཝུཙྩཏི. ཨེཀཏོ ཨུཔྤནྣཱ སབྦེཔི ཙིཏྟཙེཏསིཀཱ དྷམྨཱ ཨཉྙམཉྙཾ སཧཛཱཏ པཙྩཡཱ ཙ ཧོནྟི སཧཛཱཏཔཙྩཡུཔྤནྣཱ ཙ. པཊིསནྡྷིནཱམཀྑནྡྷཱ ཙ པཊིསནྡྷིསཧཛཱཏཾ ཧདཡཝཏྠུ ཙ ཨཉྙམཉྙཾ སཧཛཱཏཔཙྩཡཱ ཙ ཧོནྟི སཧཛཱཏཔཙྩཡུཔྤནྣཱ ཙ. སབྦཱནི མཧཱབྷཱུཏཱནིཔི ཨཉྙམཉྙཾ སཧཛཱཏཔཙྩཡཱ ཙ ཧོནྟི པཙྩཡུཔྤནྣདྷམྨཱ ཙ. པཊིསནྡྷིཙིཏྟསྶ ཨུཔྤཱདཀྑཎེ སབྦཱནི ཀམྨཛརཱུཔཱནི ཙ པཝཏྟིཀཱལེ ཏསྶ ཏསྶ ཙིཏྟསྶ ཨུཔྤཱདཀྑཎེ ཏེན ཏེན ཙིཏྟེན ཛཱཏཱནི སབྦཱནི ཙིཏྟཛརཱུཔཱནི ཙ སཧཛཱཏཙིཏྟསྶ པཙྩཡུཔྤནྣཱནི ནཱམ. སབྦཱནི ཨུཔཱདཱརཱུཔཱནི སཧཛཱཏམཧཱབྷཱུཏཱནཾ པཙྩཡུཔྤནྣཱནི ནཱམ.

ཀེནཊྛེན སཧཛཱཏོ, ཀེནཊྛེན པཙྩཡོ. སཧ ཛཱནནཊྛེན སཧཛཱཏོ, ཨུཔཀཱརཀཊྛེན པཙྩཡོ. ཏཏྠ སཧཛཱནནཊྛེནཱཏི ཡོ དྷམྨོ ཛཱཡམཱནོ ཨཏྟནོ པཙྩཡུཔྤནྣེཧི དྷམྨེཧི སཧེཝ སཡཉྩ ཛཱཡཏི ཨུཔྤཛྫཏི, ཨཏྟནོ པཙྩཡུཔྤནྣེ ཙ དྷམྨེ ཨཏྟནཱ སཧེཝ ཛནེཏི ཨུཔྤཱདེཏི, ཏསྶ སོ ཨཏྠོ སཧཛཱནནཊྛོ ནཱམ.

ཡཐཱ སཱུརིཡོ ནཱམ ཨུདཡནྟོ སཱུརིཡཱཏཔེ ཙ སཱུརིཡཱ ལོཀེ ཙ ཨཏྟནཱ སཧེཝ ཛནཡནྟོ ཨུདེཏི. ཡཐཱ ཙ པདཱིཔོ ནཱམ ཛལནྟོ པདཱིཔཱཏཔེ ཙ པདཱིཔཱལོཀེ ཙ ཨཏྟནཱ སཧེཝ ཛནཡནྟོ ཛལཏི. ཨེཝམེཝཾ ཨཡཾ པཙྩཡདྷམྨོ ཨུཔྤཛྫམཱནོ ཨཏྟནོ པཙྩཡུཔྤནྣདྷམྨེ ཨཏྟནཱ སཧེཝ ཨུཔྤཱདེཏི. ཏཏྠ སཱུརིཡོ ཝིཡ ཨེཀམེཀོ ནཱམ དྷམྨོ, སཱུརིཡཱཏཔཱ ཝིཡ ཏཾསམྤཡུཏྟདྷམྨཱ, སཱུརིཡཱལོཀཱ ཝིཡ སཧཛཱཏརཱུཔདྷམྨཱ. ཏཐཱ སཱུརིཡོ ཝིཡ ཨེཀམེཀོ མཧཱབྷཱུཏརཱུཔདྷམྨོ, སཱུརིཡཱཏཔཱ ཝིཡ སཧཛཱཏམཧཱབྷཱུཏདྷམྨཱ, སཱུརིཡཱལོཀཱ ཝིཡ སཧཛཱཏཨུཔཱདཱརཱུཔདྷམྨཱ, ཨེས ནཡོ པདཱིཔུཔམཱཡཔཱིཏི. སཧཛཱཏཔཙྩཡདཱིཔནཱ ནིཊྛིཏཱ.

སཧཛཱཏཔཙྩཡེ ¶ ཝིབྷཏྟེསུ དྷམྨེསུ ཡོ ཡོ པཙྩཡ དྷམྨོཏི ཝུཏྟོ, སོ སོ ཨེཝ ཨིདྷ པཙྩཡདྷམྨོ ཙེཝ པཙྩཡུཔྤནྣ དྷམྨོ ཙ ཧོཏི. སབྦེཔི ཙིཏྟཙེཏསིཀཱ དྷམྨཱ ཨཉྙམཉྙསྶ པཙྩཡདྷམྨཱ ཙ ཧོནྟི ཨཉྙམཉྙསྶ པཙྩཡུཔྤནྣདྷམྨཱ. སཧཛཱཏཱ ཙཏྟཱརོ མཧཱབྷཱུཏཱ ཨཉྙམཉྙསྶ པཙྩཡདྷམྨཱ ཙ ཧོནྟི ཨཉྙམཉྙསྶ པཙྩཡུཔྤནྣདྷམྨཱ ཙ. པཊིསནྡྷིནཱམཀྑནྡྷཱ ཙ པཊིསནྡྷི སཧཛཱཏཾ ཧདཡཝཏྠུརཱུཔཉྩ ཨཉྙམཉྙསྶ པཙྩཡདྷམྨཱ ཙ ཧོནྟི ཨཉྙམཉྙསྶ པཙྩཡུཔྤནྣདྷམྨཱ ཙ. ཨཏྠོ སུཝིཉྙེཡྻོཡེཝ.

ཡཐཱ ཨཉྙམཉྙཾ ནིསྶཱཡ ཨུསྶཱཔིཏཱ ཏཡོ དཎྜཱ ཨཉྙམཉྙསྶ ནིསྶཡཱ ཙ ཧོནྟི, ཨཉྙམཉྙཾ ནིསྶིཏཱ ཙ. ཏེསུ ཨེཀམེཀསྨིཾ ཨུསྶིཏེ སབྦེ ཨུསྶིཏཱ ཧོནྟི, ཨེཀམེཀསྨིཾ པཏནྟེ སབྦེ པཏནྟི. ཨེཝཾ ཨཉྙམཉྙདྷམྨཱ ཙ དཊྛབྦཱ.

ཨེཏྠ ཝདེཡྻུཾ, སབྦེ ཙེཏསིཀཱ དྷམྨཱ ཙིཏྟཔཙྩཡཾ ཨལབྷ མཱནཱ ཨུཔྤཛྫིཏུཾ ན སཀྐོནྟཱིཏི ཡུཏྟཾ. ཀསྨཱ. ཕུསནཱདཱིནཾ ཙེཏསིཀ ཀིཙྩཱནཾ ཝིཛཱནནཀིཙྩཔུབྦངྒམཏྟཱ, མནོཔུབྦངྒམཱཏི ཧི ཝུཏྟཾ. ཙིཏྟཾ པན ཙེཏསིཀཔཙྩཡཾ ཨལབྷམཱནཾ ཨུཔྤཛྫིཏུཾ ན སཀྐོཏཱིཏི ན ཡུཛྫེཡྻཱཏི. ཝུཙྩཏེ, ཙེཏསིཀདྷམྨཱ ནཱམ ཙིཏྟསྶ སཧཱཡངྒཱནི ཧོནྟི. ཏསྨཱ ཏེཧི ཝིནཱ ཙིཏྟམྤི ཨུཔྤཛྫིཏུཾ ན སཀྐོཏིཡེཝ. ཨེསེཝ ནཡོ ཙཏཱུསུ མཧཱབྷཱུཏེསུཔཱིཏི. ཨུཔཱདཱརཱུཔཱནི པན མཧཱབྷཱུཏཱནཾ ནིསྶནྡམཏྟཏྟཱ སཧཱཡངྒཱནི ན ཧོནྟཱིཏི. ནནུ ཨཱཧཱརརཱུཔཉྩ ཛཱིཝིཏརཱུཔཉྩ པཙྩཡཝིསེསཏྟཱ སཧཱཡངྒཾ ཧོཏཱིཏི. ཝུཙྩཏེ, ཋིཏིཡཱ ཨེཝ སཧཱཡངྒཾ ཧོཏི. ན ཨུཔྤཱདེ. ཨིདྷ པན ཨུཔྤཱདེ སཧཱཡངྒཾ ཨདྷིཔྤེཏནྟི. ཨཉྙམཉྙཔཙྩཡདཱིཔནཱ ནིཊྛིཏཱ.

ཏིཝིདྷོ ནིསྶཡཔཙྩཡོ, སཧཛཱཏནིསྶཡོ ཝཏྠུ པུརེཛཱཏནིསྶཡོ ཝཏྠཱརམྨཎཔུརེཛཱཏནིསྶཡོ.

ཏཏྠ ཀཏམོ སཧཛཱཏནིསྶཡོ. སབྦོ སཧཛཱཏ པཙྩཡོ སཧཛཱཏནིསྶཡོ. ཏསྨཱ ཏཏྠ པཙྩཡཝིབྷཱགོ ཙ པཙྩཡུཔྤནྣཝིབྷཱགོ ཙ སཧཛཱཏཔཙྩཡེ ཝུཏྟནཡེན ཝེདིཏབྦོ.

ཀཏམོ པན ཝཏྠུཔུརེཛཱཏནིསྶཡོ. ཚ ཝཏྠཱུནི ཙཀྑུ ཝཏྠུ སོཏཝཏྠུ གྷཱནཝཏྠུ ཛིཝ྄ཧཱཝཏྠུ ཀཱཡཝཏྠུ ཧདཡཝཏྠུ. ཨིམཱནི ཚཝཏྠཱུནི པཝཏྟིཀཱལེ སཏྟཱནཾ ཝིཉྙཱཎདྷཱཏཱུནཾ ཝཏྠུཔུརེ ཛཱཏནིསྶཡོ.

ཝཏྠུརཱུཔམེཝ ¶ པུརེཛཱཏཾ ཧུཏྭཱ ནིསྶཡོ ཝཏྠུཔུརེཛཱཏ ནིསྶཡོ. ཏཏྠ ཙིཏྟཙེཏསིཀཱནཾ ནིསྶཡཊྛཱནཊྛེན ཝཏྠུ ནཱམ. པུརེཛཱཏནྟི ཨཏྟནོ ཨཏྟནོ པཙྩཡུཔྤནྣསྶ དྷམྨསྶ ཨུཔྤཏྟིཀྑཎཏོ པུརིམེ ཁཎེ ཛཱཏཾ.

ཏཏྠ པཊིསནྡྷིཙིཏྟཾ ཏདཱ པུརེཛཱཏསྶ ཝཏྠུརཱུཔསྶ ཨབྷཱཝཏོ ཨཏྟནཱ སཧུཔྤནྣམེཝ ཧདཡཝཏྠུརཱུཔཾ ནིསྶཱཡ ཨུཔྤཛྫཏི. པཋམ བྷཝངྒཙིཏྟཾ པན པཊིསནྡྷིཙིཏྟེན སཧུཔྤནྣཧདཡ ཝཏྠུརཱུཔཾ ནིསྶཱཡ ཨུཔྤཛྫཏི. དུཏིཡབྷཝངྒཙིཏྟཾ པཋམབྷཝངྒཙིཏྟེན སཧུཔྤནྣཾ ནིསྶཱཡ ཨུཔྤཛྫཏི. ཨེཝཾ ཏཏིཡབྷཝངྒཙིཏྟཾ དུཏིཡ བྷཝངྒཙིཏྟེན སཧུཔྤནྣནྟིཨཱདིནཱ ཡཱཝམརཎཱསནྣཀཱལཱ དྭིནྣཾ མནོདྷཱཏུམནོཝིཉྙཱཎདྷཱཏཱུནཾ ཝཏྠུཔུརེཛཱཏནིསྶཡོ ཝེདིཏབྦོ.

ཡཐཱ ཝཱིཎཱསདྡཱ ནཱམ ཝཱིཎཱཏནྟཱིསུ ཝཱིཎཱདཎྜཀེཧི པཧརཎཝེགེན ཨེཝ ཛཱཡནྟི, ནོ ཨཉྙཐཱ. ཏཐཱ པཉྩཝིཉྙཱཎཱནི ནཱམ པཉྩཝཏྠུསངྑཱཏེསུ པཉྩདྭཱརེསུ པཉྩནྣཾ ཨཱརམྨཎཱནཾ ཨཱཔཱཏཱ གམནཝེགེན ཨེཝ ཛཱཡནྟི, ནོ ཨཉྙཐཱ.

ཨཱཔཱཏཱགམནཉྩ ཏེསཾ དྭཱརཱརམྨཎཱནཾ ཋིཏིཔཏྟཀཱལེ ཨེཝ ཧོཏི. ཨཱཔཱཏཱགམནཔཙྩཡཱ ཙ དྭིཀྑཏྟུཾ བྷཝངྒཾ ཙལཏི. བྷཝངྒཙལན པཙྩཡཱ ཙ ཨཱཝཛྫནཾ ཨུཔྤཛྫཏི. ཨཱཝཛྫནཔཙྩཡཱ ཙ ཏཱནི པཉྩཝིཉྙཱཎཱནི ཨུཔྤཛྫནྟི. ཏསྨཱ ཙཀྑཱདཱིནི པཉྩཝཏྠཱུནི པུརེ ཨཏཱིཏབྷཝངྒཙིཏྟསྶ ཨུཔྤཱདཀྑཎེ ཨུཔྤནྣཱནི ཨེཝ པཉྩཝིཉྙཱཎདྷཱཏཱུནཾ ཝཏྠུཔུརེཛཱཏཔཙྩཡཱ ཧོནྟི.

མརཎཱསནྣཀཱལེ པན སབྦཱནི ཚ ཝཏྠཱུནི ཙུཏིཙིཏྟཏོ པུརེ སཏྟརསམསྶ བྷཝངྒཙིཏྟསྶ ཨུཔྤཱདཀྑཎེ ཨེཝ ཨུཔྤཛྫནྟི, ཏཏོ པརཾ ན ཨུཔྤཛྫནྟི. ཏསྨཱ མརཎཱསནྣཀཱལེ བྷཝངྒཙིཏྟཱནི ཙ སབྦཱནི ཚདྭཱརིཀཝཱིཐིཙིཏྟཱནི ཙ ཙུཏིཙིཏྟཉྩ པུརེཏརཾ ཨུཔྤནྣཱནི ཏཱནིཡེཝ ཨཏྟནོ ཨཏྟནོ ཝཏྠཱུནི ནིསྶཱཡ ཨུཔྤཛྫནྟི. ཨཡཾ ཝཏྠུཔུརེཛཱཏ ནིསྶཡོ.

ཀཏམོ པན ཝཏྠཱརམྨཎཔུརེཛཱཏནིསྶཡོ. ཡདཱ ཨཏྟནོ ཨཛ྄ཛྷཏྟཾ ཝཏྠུརཱུཔཾ ཨཱརབྦྷ ཡཾ རཱུཔཾ ནིསྶཱཡ མམ མནོཝིཉྙཱཎཾ ཝཏྟཏི, ཨེཏཾ མམ ཨེསོ ཧམསྨི ཨེསོ མེ ཨཏྟཱཏི ཨེཝཾ ཏཎྷཱམཱན དིཊྛཱིཧི གཧཎཝསེན ཝཱ ཨེཏཾ ཨནིཙྩཾ ཨེཏཾ དུཀྑཾ ཨེཏཾ ཨནཏྟཱཏི ཨེཝཾ སམྨསནཝསེན ཝཱ ཨཱཝཛྫནཱདཱིནི མནོདྭཱརིཀཝཱིཐི ཙིཏྟཱནི པཝཏྟནྟི. ཏདཱ ཏཾ ཏཾ ཝཏྠུརཱུཔཾ པཙྩེཀཾ ཏེསཾ ནིསྶཡཝཏྠུ ཙ ཧོཏི ཏེསཾ ཨཱརམྨཎཉྩ. ཏསྨཱ ཏཾ ཏཾ ཧདཡརཱུཔཾ ཏསྶ ཏསྶ ཙིཏྟུཔྤཱདསྶ ཝཏྠཱརམྨཎཔུརེཛཱཏཔཙྩཡོ ཧོཏི. ཨཡཾ ཝཏྠཱརམྨཎ པུརེཛཱཏནིསྶཡོ. ཨེཝཾ ནིསྶཡཔཙྩཡོ ཏིཝིདྷོ ཧོཏི.

ཨིདྷ ¶ སུཏྟནྟནིསྶཡོཔི ཝཏྟབྦོ. ཨིམེ མནུསྶཱ ཝཱ ཏིརཙྪཱནགཏཱ ཝཱ རུཀྑཱདཡོ ཝཱ མཧཱཔཐཝིཡཾ པཏིཊྛིཏཱ, མཧཱ པཐཝཱི ཙ ཧེཊྛཱ མཧཱཨུདཀཀྑནྡྷེ, མཧཱཨུདཀཀྑནྡྷོ ཙ ཧེཊྛཱ མཧཱཝཱཏཀྑནྡྷེ, མཧཱཝཱཏཀྑནྡྷོ ཙ ཧེཊྛཱ ཨཛཊཱཀཱསེ, མནུསྶཱ གེཧེསུ, བྷིཀྑཱུ ཝིཧཱརེསུ, དེཝཱ དིབྦཝིམཱནེསཱུཏིཨཱདིནཱ སབྦཾ ལོཀཔྤཝཏྟིཾ ཉཏྭཱ ནིསྶཡཔཙྩཡོ ཝེདིཏབྦོ. ནིསྶཡཔཙྩཡདཱིཔནཱ ནིཊྛིཏཱ.

ཏིཝིདྷོ ཨུཔནིསྶཡཔཙྩཡོ, ཨཱརམྨཎཱུཔནིསྶཡོ ཨནནྟརཱུཔནིསྶཡོ པཀཏཱུཔནིསྶཡོ. ཏཏྠ ཨཱརམྨཎཱུཔ ནིསྶཡོ ཨཱརམྨཎཱདྷིཔཏིཔཙྩཡསདིསོ, ཨནནྟརཱུཔནིསྶཡོ ཨནནྟརཔཙྩཡསདིསོ.

ཀཏམོ པཀཏཱུཔནིསྶཡོ. སབྦེཔི ཨཏཱིཏཱནཱགཏ པཙྩུཔྤནྣཱ ཨཛ྄ཛྷཏྟབཧིདྡྷཱབྷཱུཏཱ ཙིཏྟཙེཏསིཀརཱུཔདྷམྨཱ ཙ ནིབྦཱནཉྩ པཉྙཏྟི ཙ སབྦེསཾ པཙྩུཔྤནྣཱནཾ ཙིཏྟཙེཏསིཀཱནཾ དྷམྨཱནཾ ཡཐཱརཧཾ པཀཏཱུཔནིསྶཡོ.

ཏཏྠ ཨཏཱིཏོ པརིནིབྦུཏོ ཨམྷཱཀཾ བུདྡྷོ ཙ དྷམྨོ ཙ ཨརིཡསཱཝཀསངྒྷོ ཙ སམྨུཏིསངྒྷཔརམྤརཱ ཙ ཨམྷཱཀཾ པཙྪིམ ཛནཱནཾ ཀུསལུཔྤཏྟིཡཱ པཀཏཱུཔནིསྶཡཔཙྩཡོ. ཏཐཱ ལོཀེ ཨཏཱིཏཱ ཀཱལངྐཏཱ མཱཏཱཔིཏརོ ཙ ཨཱཙརིཡཱ ཙ པཎྜིཏསམཎབྲཱཧྨཎཱ ཙ པཱཀཊཱ ནཱནཱཏིཏྠཱཙརིཡཱ ཙ མཧིདྡྷིཀཱ མཧཱནུབྷཱཝཱ པོརཱཎཀརཱཛཱནོ ཙ པཙྪིམཀཱནཾ ཛནཱནཾ ཀུསལུཔྤཏྟིཡཱ ཝཱ ཨཀུསལུཔྤཏྟིཡཱ ཝཱ སུཁདུཀྑུཔྤཏྟིཡཱ ཝཱ པཀཏཱུཔནིསྶཡོ. ཏཐཱ ཧི ཏེ པཙྪིམཀཱནཾ ཛནཱནཾ ཨཏྠཱཡ ནཱནཱསདྡྷམྨཔཉྙཏྟིཡོ ཝཱ ནཱནཱཨསདྡྷམྨཔཉྙཏྟིཡོ ཝཱ ནཱནཱལོཀཱུཔཀརཎཱནི ཝཱ པུརེ པཊྛཔེསུཾ. པཙྪིམཛནཱ ཙ ཏེཧི པཊྛཔིཏེསུ དཱནསཱིལཱདིདྷམྨེསུ ཝཱ ལོཀཙཱརིཏྟ ཀུལགོཏྟཙཱརིཏྟ དྷམྨེསུ ཝཱ ནཱནཱདིཊྛིཝཱདེསུ ཝཱ ནཱནཱཀམྨཱཡཏནསིཔྤཱཡཏན ཝིཛྫཱཋཱནེསུ ཝཱ ཡཐཱཔཊྛཔིཏེསུ གཱམནིགམནགརཁེཏྟཝཏྠུ ཏལཱ༹ཀཔོཀྑརཎིཨཱཝཱཊཱདཱིསུ ཝཱ གེཧརཐསཀཊནཱཝཱ སམྤོཏསམྦནྡྷཱདཱིསུ ཝཱ ཛཱཏརཱུཔརཛཏམཎིམུཏྟཱདཱིསུ ཝཱ དཱཡཛྫཾ པཊིཔཛྫནྟཱ ལོཀེ ཝཌྜྷནྟི.

ཨནཱགཏོཔི མེཏྟེཡྻོ ནཱམ བུདྡྷོ ཙ ཏསྶ དྷམྨོ ཙ ཏསྶ སངྒྷོ ཙ ཨེཏརཧི བཧུཛྫནཱནཾ པཱརམིཔུཉྙཔྤཝཏྟིཡཱ པཀཏཱུཔནིསྶཡཔཙྩཡོ. ཏཐཱ ཨིམསྨིཾ བྷཝེ ཙ པཙྪིམེ ཀཱལེ པཊིལབྷིསྶམཱནཱ ཨིསྶརིཡཊྛཱནདྷནདྷཉྙསམྤཏྟིཡོ པུརིམེ ཀཱལེ ཋིཏཱནཾ མཧཱཛནཱནཾ ནཱནཱབྷིསངྑཱརུཔྤཏྟིཡཱ པཀཏཱུཔནིསྶཡ པཙྩཡོ. ཨནཱགཏབྷཝེ ཙ ཨནུབྷཝིསྶམཱནཱ བྷཝསམྤཏྟི བྷོག སམྤཏྟིཡོ ¶ མགྒཕལནིབྦཱནསམྤཏྟིཡོ ཙ ཨེཏརཧི པཙྩུཔྤནྣབྷཝེ ཋིཏཱནཾ དཱནསཱིལཱདིཔུཉྙཀིརིཡུཔྤཏྟིཡཱ པཀཏཱུཔནིསྶཡཔཙྩཡོ. ཡཐཱ ཧི ལོཀེ ཧེམནྟེ ཀཱལེ དྷཉྙཔྥལཱནི ལབྷིསྶཱམཱཏི ཝསྶིཀེ ཀཱལེ ཀསྶནཝཔྤནཀམྨཱནི ཨཱརབྷནྟི, ཀམྨེ སིདྡྷེ ཏཾ ཏཾ དྷནཾ ལབྷིསྶཱམཱཏི པུབྦབྷཱགེ ཏཾ ཏཾ ཝཱིརིཡཀམྨཾ ཝཱ ཏཾ ཏཾ པཉྙཱཀམྨཾ ཝཱ ཨཱརབྷནྟི. ཏཏྠ དྷཉྙཔྥལཔྤཊིལཱབྷོ ཙ ཏཾ ཏཾ དྷནཔྤཊི ལཱབྷོཙ ཏཾ ཏཾ ཀམྨཱརམྦྷསྶ ཨནཱགཏཔཀཏཱུཔནིསྶཡཔཙྩཡོ ཏཾ ཏཾ ཀམྨཱརམྦྷོ ཙ དྷཉྙཔྥལཔྤཊིལཱབྷསྶ ཙ ཏཾ ཏཾ དྷནཔྤཊི ལཱབྷསྶ ཙ ཨཏཱིཏཔཀཏཱུཔནིསྶཡཔཙྩཡོ. ཨེཝམེཝ པཙྪིམེ ཨནཱགཏེ ཀཱལེ ནཱནཱཀམྨཔྥལཱནི སམྤསྶནྟཱ པཏྠཡནྟཱ མཧཱཛནཱ པུརིམེ པཙྩུཔྤནྣེ ཀཱལེ ནཱནཱཔུཉྙཀམྨཱནི ཨཱརབྷནྟི. ཏཏྠ པུཉྙཔྥལཱནི པུཉྙཀམྨཱནཾ ཨནཱགཏཔཀཏཱུཔནིསྶཡཔཙྩཡོ. པུཉྙཀམྨཱནི པུཉྙཔྥལཱནཾ ཨཏཱིཏཔཀཏཱུཔནིསྶཡཔཙྩཡོ. ཏསྨཱ ཨནཱགཏཔཀཏཱུཔནིསྶཡོཔི ཨཏཱིཏཔཀཏཱུཔནིསྶཡོ ཝིཡ ཨཏིམཧནྟོ པཙྩཡོ ཧོཏི.

པཙྩུཔྤནྣཱ བུདྡྷཱཡོ པཙྩཡཱ པཙྩུཔྤནྣཱནཾ མནུསྶདེཝབྲཧྨཱནཾ པཙྩུཔྤནྣཱ མཱཏཱཔིཏརོ པཙྩུཔྤནྣཱནཾ པུཏྟདྷཱིཏཱདཱིནཾ པཙྩུཔྤནྣཔཀཏཱུཔ ནིསྶཡོ ནཱམ. སོ སུཔཱཀཊོཡེཝ.

ཨཛ྄ཛྷཏྟབྷཱུཏཱ པཀཏཱུཔནིསྶཡདྷམྨཱ ནཱམ བུདྡྷཱདཱིསུ སཝིཉྙཱཎཀསནྟཱནེསུ ཨུཔྤནྣཱ པཙྩཡདྷམྨཱ. བཧིདྡྷཱབྷཱུཏཱ པཀཏཱུཔནིསྶཡདྷམྨཱ ནཱམ སཏྟཱནཾ པཏིཊྛཱནབྷཱུཏཱ པཐཝིཔབྦཏནདཱི སམུདྡཱདཡོ ཏེསཾ ཏེསཾ སཏྟཱནཾ བཧཱུཔཀཱརཱ ཨརཉྙཝནརུཀྑ ཏིཎཔུབྦཎྞཱཔརཎྞཱདཡོ ཙནྡསཱུརིཡགཧནཀྑཏྟཱདཡོ ཝསྶོདཀཨགྒིཝཱཏསཱིཏཨུཎྷཱདཡོ ཙ སབྦེཔི ཏེ སཏྟཱནཾ ཀུསལུཔྤཏྟིཡཱ ཝཱ ཨཀུསལུཔྤཏྟིཡཱ ཝཱ སུཁུཔྤཏྟིཡཱ ཝཱ དུཀྑུཔྤཏྟིཡཱ ཝཱ བལཝཔཙྩཡཱ ཧོནྟི.

ཨིམེ ཛནཱ དིཊྛེཝ དྷམྨེ པརིནིབྦཱཡིསྶཱམཱཏི བོདྷིཔཀྑིཡ དྷམྨེ ཝཱ བྷཱཝེནྟི, ཨནཱགཏེ བུདྡྷཀཱལེ པརིནིབྦཱཡིསྶཱམཱཏི པཱརམཱིདྷམྨེ ཝཱ པརིཔཱུརེནྟི. ཏཏྠ ནིབྦཱནཾ ཏེསཾ དྷམྨཱནཾ ཨུཔྤཏྟིཡཱ བལཝཔཙྩཡོ ཧོཏི.

ལོཀེ ནཱནཱཝོཧཱརབྷཱུཏཱ ནཱམཔཉྙཏྟིཡོ ཙ བུདྡྷ སཱསནེ ཏིཔིཊཀཔརིཡཏྟིདྷམྨབྷཱུཏཱ ནཱམཔཉྙཏྟིཡོ ཙ ཏེསཾ ཏེསཾ ཨཏྠཱནཾ ཛཱནནཏྠཱཡ བལཝཔཙྩཡོ.

ཏཏྠ སངྑཏདྷམྨཱ ནཱམ པཙྩཡེ སཏི ཨུཔྤཛྫནྟི, ཨསཏི ནུཔྤཛྫནྟི. ཨུཔྤཛྫིཏྭཱཔི པཙྩཡེ སཏི ཏིཊྛནྟི, ཨསཏི ན ཏིཊྛནྟི. ཏསྨཱ ཏེསཾ ཨུཔྤཏྟིཡཱ ཝཱ ཋིཏིཡཱ ཝཱ པཙྩཡོ ནཱམ ཨིཙྪིཏབྦོ. ནིབྦཱནཾ པན པཉྙཏྟི ཙ ཨསངྑཏདྷམྨཱ ཧོནྟི ¶ ཨཛཱཏིདྷམྨཱ ཨནུཔྤཱདདྷམྨཱ ནིཙྩ དྷམྨཱ དྷུཝདྷམྨཱ. ཏསྨཱ ཏེསཾ ཨུཔྤཱདཱཡ ཝཱ ཋིཏིཡཱ ཝཱ པཙྩཡོ ནཱམ ནཏྠཱིཏི.

ཀུསལོ ཀུསལསྶ ཨུཔནིསྶཡོ. སདྡྷཾ ཨུཔནིསྶཱཡ དཱནཾ དེཏི, སཱིལཾ སམཱདིཡཏཱིཏིཨཱདིནཱ སུཔཱཀཊོ. ཏཐཱ རཱགཾ ཨུཔནིསྶཱཡ པཱཎཾ ཧནཏི, ཨདིནྣཾ ཨཱདིཡཏཱིཏིཨཱདིནཱ སཔྤཱཡཾ ཨུཏུཾ སཔྤཱཡཾ བྷོཛནཾ ཨུཔནིསྶཱཡ ཀཱཡིཀཾ སུཁཾ པཙྩནུབྷོཏཱིཏིཨཱདིནཱ ཙ ཨཀུསལོ ཨཀུསལསྶ, ཨབྱཱཀཏོ ཨབྱཱཀཏསྶ ཨུཔནིསྶཡོཔི སུཔཱཀཊོ.

ཀུསལོ པན ཨཀུསལསྶཔི བལཝཱུཔནིསྶཡོ. དཱནཾ དཏྭཱ ཏེན དཱནེན ཨཏྟཱནཾ ཨུཀྐཾསེཏི, པརཾ ཝམྦྷེཏི. ཏཐཱ སཱིལ སམྤནྣོ ཧུཏྭཱ སམཱདྷིསམྤནྣོ ཧུཏྭཱ པཉྙཱསམྤནྣོ ཧུཏྭཱ ཨཏྟཱནཾ ཨུཀྐཾསེཏི, པརཾ ཝམྦྷེཏི.

ཀུསལོ ཨབྱཱཀཏསྶཔི བལཝཱུཔནིསྶཡོ. སབྦཱནི ཙཏུབྷཱུམིཀཀུསལཀམྨཱནི ཝཱ ཀམྨཔརིཝཱརཱནི ཀུསལཱནི ཝཱ ཀཱལནྟརེ ཙཏུབྷཱུམིཀཱནཾ ཝིཔཱཀཱབྱཱཀཏཱནཾ བལཝཱུཔནིསྶཡོ. དཱནཔཱརམིཾ པཱུརེནྟཱ པཱུརཎཀཱལེ བཧུཾ ཀཱཡིཀདུཀྑཾ པཙྩནུབྷཝནྟི. ཏཐཱ སཱིལཔཱརམིཾ ནིཀྑམཔཱརམིཾ པཉྙཱཔཱརམིཾ ཝཱིརིཡཔཱརམིཾ ཁནྟིཔཱརམིཾ སཙྩཔཱརམིཾ ཨདྷིཊྛཱནཔཱརམིཾ མེཏྟཱཔཱརམིཾ ཨུཔེཀྑཱ པཱརམིཾ. ཨེསེཝ ནཡོ ཛྷཱནབྷཱཝནཱ མགྒབྷཱཝནཱསུཔི.

ཨཀུསལོ ཀུསལསྶཔི བལཝཱུཔནིསྶཡོ. ཨིདྷེཀཙྩོ པཱཔཾ ཀཏྭཱ པཙྪཱ ཝིཔྤཊིསཱརཱི ཧུཏྭཱ ཏསྶ པཱཔསྶ པཧཱནཱཡ དཱནསཱིལཛྷཱནམགྒཀུསལཱནི སམྤཱདེཏི. ཏཾ པཱཔཾ ཏེསཾ ཀུསལཱནཾ བལཝཱུཔནིསྶཡོ.

ཨཀུསལོ ཨབྱཱཀཏསྶཔི བལཝཱུཔནིསྶཡོ. ཨིདྷ བཧཱུ ཛནཱ དུཙྩརིཏཱནི ཀཏྭཱ ཙཏཱུསུ ཨཔཱཡེསུ པཏིཏྭཱ ཨཔཱཡདུཀྑཾ པཙྩནུབྷཝནྟི. དིཊྛདྷམྨེཔི ཀེཙི ཨཏྟནོ ཝཱ པརསྶ ཝཱ དུཙྩརིཏཀམྨ པཙྩཡཱ བཧུཾ དུཀྑཾ པཙྩནུབྷཝནྟི. ཀེཙི དུཙྩརིཏཀམྨེན དྷནཾ ལབྷིཏྭཱ སུཁཾ པཙྩནུབྷཝནྟི. བཧུཛྫནཱ རཱགམཱུལཀཾ བཧུཾ དུཀྑཾ པཙྩནུབྷཝནྟི, དོསམཱུལཀཾ དིཊྛིམཱུལཀཾ མཱནམཱུལཀནྟི.

ཨབྱཱཀཏོ ཀུསལསྶཔི བལཝཱུཔནིསྶཡོ. དྷན སམྤཏྟིཡཱ དཱནཾ དེཏི, སཱིལཾ པཱུརེཏི, པཉྙཾ པཱུརེཏི, བྷཱཝནཱསཔྤཱཡཾ ཨཱཝཱསཾ ཝཱ ལེཎཾ ཝཱ གུཧཾཝཱ རུཀྑཾ ཝཱ ཨརཉྙཾ ཝཱ པབྦཏཾ ཝཱ གོཙརགཱམཾ ཝཱ ཨུཏུསཔྤཱཡཾ ཝཱ ཨཱཧཱརསཔྤཱཡཾ ཝཱ ལབྷིཏྭཱ ཏཾ ཏཾ བྷཱཝནཾ བྷཱཝེཏི.

ཨབྱཱཀཏོ ཨཀུསལསྶཔི བལཝཱུཔནིསྶཡོ. ལོཀེ ཙཀྑུསམྤདཾ ནིསྶཱཡ བཧཱུནི དསྶནམཱུལཱནི ཨཀུསལཱནི ཨུཔྤཛྫནྟི. ཨེས ནཡོ སོཏསམྤདཱདཱིསུ ¶ . ཏཐཱ ཧཏྠསམྤདཾ པཱདསམྤདཾ སཏྠསམྤདཾ ཨཱཝུདྷསམྤདནྟིཨཱདིནཱཔི ཝཏྟབྦོ. ཨེཝཾ ཨུཔནིསྶཡོ ཏིཝིདྷོ ཧོཏི.

ཨིདྷ སུཏྟནྟཱུཔནིསྶཡོཔི ཝཏྟབྦོ. ཀལྱཱཎམིཏྟཾ ཨུཔ ནིསྶཱཡ པཱཔམིཏྟཾ ཨུཔནིསྶཱཡ གཱམཾ ཨུཔནིསྶཱཡ ཨརཉྙཾ ཨུཔནིསྶཱཡཱཏིཨཱདིནཱ བཧཱུསུ ཋཱནེསུ ཨཱགཏོ. ཨཔི ཙ པཉྩནིཡཱམདྷམྨཱ སཏྟལོཀ སངྑཱརལོཀ ཨོཀཱསལོཀ སངྑཱཏཱནཾ ཏིཎྞཾ ལོཀཱནཾ ཨཝིཙྪིནྣཔྤཝཏྟིཡཱ བལཝཔཙྩཡཱ ཧོནྟི. ཨཡཉྩ ཨཏྠོ ནིཡཱམདཱིཔནིཡཾ ཨམྷེཧི ཝིཏྠཱརཏོ དཱིཔིཏོཏི.

ཀེནཊྛེན ཨཱརམྨཎཱུཔནིསྶཡོཏི. ཨདྷིཔཏིབྷཱུཏཾ ཨཱརམྨཎམེཝ ཨཱརམྨཎིཀདྷམྨཱནཾ བལཝནིསྶཡཊྛེན ཨཱརམྨཎཱུཔ ནིསྶཡོ.

ཀེནཊྛེན ཨནནྟརཱུཔནིསྶཡོཏི. པུརིམཾ ཨནནྟརཙིཏྟམེཝ པཙྪིམསྶ ཨནནྟརཙིཏྟསྶ ཨུཔྤཛྫནཏྠཱཡ བལཝནིསྶཡཊྛེན ཨནནྟརཱུཔནིསྶཡོ. མཱཏཱ ཝིཡ པུརིམཙིཏྟཾ, པུཏྟོ ཝིཡ པཙྪིམཙིཏྟཾ. ཡཐཱ མཱཏཱ ཨཏྟནོ ཨནནྟརེ པུཏྟསྶ ཨུཔྤཛྫནཏྠཱཡ བལཝཱུཔ ནིསྶཡོ ཧོཏི, ཏཐཱ པུརིམཙིཏྟཾ པཙྪིམཙིཏྟསྶ ཨུཔྤཛྫནཏྠཱཡཱཏི.

ཀེནཊྛེན པཀཏཱུཔནིསྶཡོཏི. པཀཏིཡཱཝ ལོཀེ པཎྜིཏཱནཾ པཱཀཊོ ཨུཔནིསྶཡོ པཀཏཱུཔནིསྶཡོ.

ཨེཏྠ ཙ ཨནནྟརཱུཔནིསྶཡཱནུབྷཱཝོ ཨནནྟརཙིཏྟེ ཨེཝ ཕརཏི. པཀཏཱུཔནིསྶཡཱནུབྷཱཝོ པན དཱུརེཔི ཕརཏིཡེཝ. ཏཐཱ ཧི ཨིམསྨིཾ བྷཝེ པུརིམེསུ དིཝསེསུ ཝཱ མཱསེསུ ཝཱ སཾཝཙྪརེསུ ཝཱ དིཊྛསུཏགྷཱཡིཏསཱཡིཏཕུསིཏཝིཉྙཱཏཱནི ཨཱརམྨཎཱནི པཙྪཱཏཐཱརཱུཔེ པཙྩཡེ སཏི ཝསྶསཏེཔི མནོདྭཱརེ ཨཱཔཱཏཾ ཨཱགཙྪནྟི. ཨིདཾ ནཱམ པུབྦེ མཡཱ དིཊྛཾ སུཏནྟིཨཱདིནཱ སཏྟཱ ཨནུསྶརནྟི. ཨོཔཔཱཏིཀསཏྟཱ པན པུརིམབྷཝཾཔི ཨནུསྶརནྟི. ཏཐཱ མནུསྶེསུཔི ཨཔྤེཀཙྩེ ཛཱཏིསྶརསཉྙཱལཱབྷིནོ. ཏཐཱ པུབྦེ ཨནེཀསཏསཧསྶེསུ དིཊྛཱདཱིསུ ཝཏྠཱུསུ པཙྪཱ ཨེཀསྨིཾ ཁཎེ ཨེཀཾ ཝཏྠུཾ དིསྭཱ ཝཱ སུཏྭཱ ཝཱ ཏསྨིཾ ཨེཝ ཁཎེ བཧཱུསུཔི ཏེསུ མནོཝིཉྙཱཎསནྟཱནཾ ཕརམཱནཾ པཝཏྟཏཱིཏི. ཨུཔནིསྶཡཔཙྩཡ དཱིཔནཱ ནིཊྛིཏཱ.

ཏིཝིདྷོ པུརེཛཱཏཔཙྩཡོ. ཝཏྠུཔུརེཛཱཏཔཙྩཡོ ཙ ཨཱརམྨཎཔུརེཛཱཏཔཙྩཡོ ཙ ཝཏྠཱརམྨཎཔུརེཛཱཏཔཙྩཡོ ཙ.

ཏཏྠ ¶ ཝཏྠུཔུརེཛཱཏོ ཙ ཝཏྠཱརམྨཎཔུརེཛཱཏོ ཙ པུབྦེ ནིསྶཡཔཙྩཡེ ནིསྶཡནཱམེན ཝུཏྟཱ ཨེཝ.

ཨཱརམྨཎཔུརེཛཱཏོ ནཱམ པཙྩུཔྤནྣཱནི ཨཊྛཱརསནིཔྥནྣརཱུཔཱནི ཨེཝ. ཏེསུཔི པཙྩུཔྤནྣཱནི རཱུཔསདྡཱདཱིནི པཉྩཱརམྨཎཱནི པཉྩནྣཾ པཉྩཝིཉྙཱཎ ཝཱིཐིཙིཏྟཱནཾ ནིཡམཏོ ཨཱརམྨཎཔུརེཛཱཏཔཙྩཡཱ ཧོནྟི. ཡཐཱ ཧི ཝཱིཎཱསདྡཱ ནཱམ ཝཱིཎཱཏནྟཱིསུ ཝཱིཎཱདཎྜཀེན པཧརཎ པཙྩཡཱ ཨེཝ ཨུཔྤཛྫནྟི. ཨེཝཉྩ སཏི ཏེ སདྡཱ པུརེཛཱཏཱཧི ཝཱིཎཱཏནྟི ཝཱིཎཱདཎྜཀེཧི ཝིནཱ ཨུཔྤཛྫིཏུཾ ན སཀྐོནྟི. ཨེཝམེཝཾ པཉྩ ཝིཉྙཱཎ ཝཱིཐིཙིཏྟཱནིཔི པཉྩསུ ཝཏྠུདྭཱརེསུ པཉྩནྣཾ ཨཱརམྨཎཱནཾ ཨཱཔཱཏཱགམན པཙྩཡཱ ཨེཝ ཨུཔྤཛྫནྟི. ཨཱཔཱཏཱགམནཉྩ ཏེསཾ དྭིནྣཾ ཋིཏིཔཏྟཀཱལེ ཨེཝ ཧོཏི. ན ཀེཝལཉྩ ཏསྨིཾ ཀཱལེ ཏཱནི པཉྩཱརམྨཎཱནི ཏེསུ པཉྩཝཏྠཱུསུ ཨེཝ ཨཱཔཱཏམཱགཙྪནྟི. ཨཐ ཁོ བྷཝངྒམནོདྭཱརེཔི ཨཱཔཱཏཾ ཨཱགཙྪནྟིཡེཝ. ཏསྨིཾ ཨཱཔཱཏགམནཏྟཱ ཨེཝ ཏཾ བྷཝངྒམྤི དྭིཀྑཏྟུཾ ཙལིཏྭཱ ཨུཔཙྪིཛྫཏི, བྷཝངྒུཔཙྪེདེ ཨེཝ ཏཱནི ཝཱིཐིཙིཏྟཱནི ཨུཔྤཛྫནྟི. ཨེཝཉྩ སཏི ཏཱནི ཝཱིཐིཙིཏྟཱནི པུརེཛཱཏེཧི ཝཏྠུ དྭཱརཱརམྨཎེཧི ཝིནཱ ཨུཔྤཛྫིཏུཾ ན སཀྐོནྟཱིཏི. ཏཱནི པན སབྦཱནིཔི ཨཊྛཱརསནིཔྥནྣརཱུཔཱནི ནིརུདྡྷཱནི ཧུཏྭཱ ཨཏཱིཏཱནིཔི ཧོནྟི, ཨནུཔྤནྣཱནི ཧུཏྭཱ ཨནཱགཏཱནིཔི ཧོནྟི. ཨུཔྤནྣཱནི ཧུཏྭཱ པཙྩུཔྤནྣཱནིཔི ཧོནྟི. སབྦཱནིཔི མནོཝིཉྙཱཎཝཱིཐིཙིཏྟཱནཾ ཨཱརམྨཎཱནི ཧོནྟི. ཏེསུ པཙྩུཔྤནྣཱནི ཨེཝ ཏེསཾ ཨཱརམྨཎཔུརེཛཱཏཔཙྩཡཱ ཧོནྟི. ཡདཱ དཱུརེ ཝཱ པཊིཙྪནྣེ ཝཱ ཋིཏཾ ཏཾ ཏཾ ཨཱརམྨཎཝཏྠུཾ མནསཱ ཨེཝ ཨཱརམྨཎཾ ཀརོཏི, ཏདཱ ཏཾ ཏཾ ཝཏྠུ སཙེ ཏཏྠ ཏཏྠ ཝིཛྫམཱནཾ ཧོཏི, པཙྩུཔྤནྣཾ ནཱམ ཧོཏི. པུརེཛཱཏཔཙྩཡདཱིཔནཱ ནིཊྛིཏཱ.

པཙྪིམཾ པཙྪིམཾ པཙྩུཔྤནྣཾ ཙིཏྟཾ པུརེཛཱཏསྶ པཙྩུཔྤནྣསྶ ཙཏུ སམུཊྛཱནིཀསྶ རཱུཔཀཱཡསྶ ཝུཌྜྷིཝིརུལ༹ྷིཡཱ པཙྪཱཛཱཏཔཙྩཡོ. ཡཐཱ ཏཾ པཙྪིམཝསྶེསུ ཨནུཝསྶཾ ཝསྶམཱནཱནི ཝསྶོདཀཱནི པུརིམཝསྶེསུ ཛཱཏཱནཾ རུཀྑཔོཏཀཱནཾ ཝུཌྜྷིཝིརུལ༹ྷིཡཱ པཙྪཱཛཱཏ པཙྩཡཱ ཧོནྟཱིཏི.

ཏཏྠ པཙྪིམཾ པཙྪིམཾ ཙིཏྟནྟི པཋམབྷཝངྒཏོ པཊྛཱཡ ཡཱཝ ཙུཏི ཙིཏྟཱ སབྦཾ ཙིཏྟཾ ཝུཙྩཏི. པུརེཛཱཏསྶཱཏི པཊིསནྡྷིཙིཏྟེན སཧུཔྤནྣཾ ཀམྨཛརཱུཔཀཱཡཾ ཨཱདིཾ ཀཏྭཱ ཨཛ྄ཛྷཏྟསནྟཱནཔརིཡཱཔནྣོ སབྦོ ཙཏུསམུཊྛཱནིཀརཱུཔཀཱཡོ ཝུཙྩཏི.

པཊིསནྡྷིཙིཏྟེན སཧུཔྤནྣསྶ ཀམྨཛརཱུཔཀཱཡསྶ པཋམ བྷཝངྒཱདཱིནི པནྣརསབྷཝངྒཙིཏྟཱནི པཙྪཱཛཱཏཔཙྩཡཱ ཧོནྟི. པཊིསནྡྷི ཙིཏྟཾ པན ཏེན ཀཱཡེན སཧུཔྤནྣཏྟཱ ¶ པཙྪཛཱཏཾ ན ཧོཏི. སོལ༹སམབྷཝངྒཙིཏྟཉྩ ཏསྶ ཀཱཡསྶ བྷིཛྫནཀྑེཏྟེ ཨུཔྤནྣཏྟཱ པཙྩཡོ ན ཧོཏི. ཏསྨཱ པནྣརསབྷཝངྒཙིཏྟཱནཱིཏི ཝུཏྟཾ.

པཊིསནྡྷིཙིཏྟསྶ ཋིཏིཀྑཎེ པན དྭེ རཱུཔཀཱཡཱ ཨུཔྤཛྫནྟི ཀམྨཛརཱུཔཀཱཡོ ཙ ཨུཏུཛརཱུཔཀཱཡོཙ. ཏཐཱ བྷངྒཀྑཎེཔི. པཋམབྷཝངྒསྶ ཨུཔྤཱདཀྑཎེ པན ཏཡོ རཱུཔཀཱཡཱ ཨུཔྤཛྫནྟི ཀམྨཛརཱུཔཀཱཡོ ཙ ཨུཏུཛརཱུཔཀཱཡོ ཙ ཙིཏྟཛརཱུཔཀཱཡོ ཙ. ཡདཱ བཧིདྡྷཱཧཱརཔྥརཎཾ ལབྷིཏྭཱ ཨཛ྄ཛྷཏྟཱཧཱརོ ཨཱཧཱརཛརཱུཔཀཱཡཾ ཛནེཏི, ཏཏོ པཊྛཱཡ ཙཏུསམུཊྛཱནིཀཱ ཙཏྟཱརོ རཱུཔཀཱཡཱ དཱིཔ ཛཱལཱ ཝིཡ པཝཏྟནྟི. ཏེ ཨུཔྤཱདཀྑཎཾ ཨཏིཀྐམྨ ཡཱཝ ཋིཏིབྷཱཝེན དྷརནྟི, ཏཱཝ པནྣརསཙིཏྟཱནི ཏེསཾ ཀཱཡཱནཾ པཙྪཱཛཱཏཔཙྩཡཱ ཧོནྟིཡེཝ.

ཝུཌྜྷིཝིརུལ༹ྷིཡཱཏི ཙཏུསམུཊྛཱནིཀརཱུཔསནྟཏིཡཱ ཨུཔརཱུཔརི ཝུཌྜྷིཡཱ ཙ ཝིརུལ༹ྷིཡཱ ཙ. ཏཐཱཧི པུརིམཱ པུརིམཱ ཙཏྟཱརོ རཱུཔཀཱཡཱ སཙེ པཙྪཱཛཱཏ པཙྩཡཾ པུནཔྤུནཾ ལབྷནྟི, ཨེཝཾ སཏི ཏེ ནིརུཛ྄ཛྷནྟཱཔི པཙྪཱརཱུཔསནྟཏིཔརམྤརཱནཾ ཝུཌྜྷིཡཱ ཙ ཝིརུལ༹ྷིཡཱ ཙ ཝེཔུལླཱཡ ཙ བལཝ པཙྩཡཱ ཧུཏྭཱ ནིརུཛ྄ཛྷནྟཱིཏི. པཙྪཱཛཱཏཔཙྩཡདཱིཔནཱ ནིཊྛིཏཱ.

དྭཱདས ཨཀུསལཙིཏྟཱནི སཏྟརས ལོཀིཡཀུསལ ཙིཏྟཱནི ཨཱཝཛྫནདྭཡཝཛྫིཏཱནི ཨཊྛཱརསཀིརིཡཙིཏྟཱནཱིཏི སཏྟ ཙཏྟཱལཱིསཾ ལོཀིཡཛཝནཙིཏྟཱནི ཨཱསེཝནཔཙྩཡོ. ཏེསུ ནིརནྟརཔྤཝཏྟཾ ཛཝནསནྟཏིཾ པཏྭཱ པུརིམཾ པུརིམཾ ཛཝནཙིཏྟཾ ཨཱསེཝན པཙྩཡོ. ཙཏཱུཧི མགྒཙིཏྟེཧི པཙྪིམཾ པཙྪིམཾ ཙིཏྟཾ ཨཱསེཝནཔཙྩཡུཔྤནྣཾ.

ཀེནཊྛེན ཨཱསེཝནནྟི. ཨུཔརཱུཔརིཔགུཎབྷཱཝཝཌྜྷནཏྠཾཐཱམ བལཝཌྜྷནཏྠཉྩ པརིཝཱསགྒཱཧཱཔནཊྛེན.

ཏཏྠ པགུཎབྷཱཝོཏི པུནཔྤུནཾ སཛ྄ཛྷཱཡིཏསྶ པཱལི༹པཱཋསྶ སུཁེན པཝཏྟནཾ ཝིཡ ཛཝནཊྛཱནཛཝནཀིཙྩསངྑཱཏེ ཋཱནཀིཙྩཝིསེསེ པཙྪིམ པཙྪིམཙིཏྟསྶ སུཁེན པཝཏྟནཾ. པརིཝཱསོ ནཱམ ཀོསེཡྻཝཏྠཾ པུནཔྤུནཾ སུགནྡྷེན པརིཝཱསནཾ ཝིཡ ཙིཏྟསནྟཱནེ པུནཔྤུནྣཾ རཛྫནདུསྶནཱདིནཱ ཝཱ ཨརཛྫན ཨདུསྶནཱདིནཱ ཝཱ པརིཝཱསནཾ. པུརིམསྨིཾ ཛཝནཙིཏྟེ ནིརུདྡྷེཔི ཏསྶ ཛཝནཝེགོ ན ནིརུཛ྄ཛྷཏི, པཙྪིམཾ ཙིཏྟསནྟཱནཾ ཕརམཱནོ པཝཏྟཏིཡེཝ. ཏསྨཱ པཙྪིམཾ པཙྪིམཾ ཛཝནཙིཏྟཾ ཨུཔྤཛྫམཱནཾ ཏེན ཝེགེན པགྒཧིཏཾ བལཝཏརཾ ཧུཏྭཱ ཨུཔྤཛྫཏི. ཨེཝཾ ¶ པུརིམཙིཏྟཾ ཨཏྟནོ པརིཝཱསཾ པཙྪིམཙིཏྟཾ གཎྷཱཔེཏི. པཙྪིམཉྩ ཙིཏྟཾ པུརིམསྶ ཙིཏྟསྶ པརིཝཱསཾ གཧེཏྭཱ པཝཏྟཏི. ཨེཝཾ སནྟེཔི སོ ཨཱསེཝནཝེགོ པཀཏིཡཱ སཏྟཧི ཙིཏྟཝཱརེཧི པརིཀྑཡཾ གཙྪཏི, ཏཏོ པརཾ ཏདཱརམྨཎཝིཔཱཀ ཙིཏྟཾ ཝཱ ཨུཔྤཛྫཏི, བྷཝངྒ ཙིཏྟཝཱརོ ཝཱ པཝཏྟཏི.

ཨིདྷ སུཏྟནྟཱསེཝནཔཙྩཡོཔི ཝཏྟབྦོ. སཏིཔཊྛཱནཾ བྷཱཝེཏི, སམྨཔྤདྷཱནཾ བྷཱཝེཏི, སཏིསམྦོཛ྄ཛྷངྒཾ བྷཱཝེཏི, དྷམྨ ཝིཙཡསམྦོཛ྄ཛྷངྒཾ བྷཱཝེཏི, སམྨཱདིཊྛིཾ བྷཱཝེཏི, སམྨཱསངྐཔྤཾ བྷཱཝེཏཱིཏིཨཱདིནཱ བཧཱུསུ ཋཱནེསུ ཝུཏྟོ. ཏཏྠ བྷཱཝེཏཱིཏི ཨེཀཾཔི དིཝསཾ བྷཱཝེཏི, སཏྟཔི དིཝསཱནི བྷཱཝེཏི, ཨེཀཾཔི མཱསཾ བྷཱཝེཏི, སཏྟཔི མཱསཱནི བྷཱཝེཏི, ཨེཀཾཔི སཾཝཙྪརཾ བྷཱཝེཏི, སཏྟཔི སཾཝཙྪརཱནི བྷཱཝེཏཱིཏི ཨཏྠོ.

པུརིམཔུརིམེསུ བྷཝེསུ ཨཱསེཝིཏཱནི བྷཱཝིཏཱནི བཧུལཱི ཀཏཱནི ཀུསལཱནི ཝཱ ཨཀུསལཱནི ཝཱ པཙྪིམཔཙྪིམེསུ བྷཝེསུ བལཝཏརཱནཾ ཀུསལཱནཾ ཝཱ ཨཀུསལཱནཾ ཝཱ ཨུཔྤཏྟིཡཱ ཨཱསེཝན པཙྩཡོ.

ཀཱལནྟརེ ཝཱ བྷཝནྟརེ ཝཱ ཏཱདིསཱནཾ ཀུསལཱཀུསལཱནཾ ཨུཔྤཏྟིཡཱ པཙྩཡོ ཨུཔནིསྶཡཔཙྩཡོ ནཱམ. ཏེསཾཡེཝ བལཝཏརཏྠཱཡ པཙྩཡོ ཨཱསེཝནཔཙྩཡོ ནཱམ.

ལོཀེཔི མཧནྟེསུ ཙིཏྟབྷཱཝནཱཀམྨེསུ ཝཱཙཱ བྷཱཝནཱཀམྨེསུ ཀཱཡབྷཱཝནཱཀམྨེསུ ཨངྒཔཙྩངྒབྷཱཝནཱཀམྨེསུ ཀམྨཱཡཏནསིཔྤཱཡཏནཝིཛྫཱཋཱནེསུ ཙ ཨཱསེཝནཱ བྷཱཝནཱ བཧུལཱིཀམྨཱནཾ ནིསྶནྡགུཎཱ ནཱམ སནྡིསྶནྟིཡེཝ.

སབྦེསཾ ཁཎིཀདྷམྨཱནཾ མཛ྄ཛྷེ ཨེཝརཱུཔསྶ ཨཱསེཝན པཙྩཡསྶ ཝིཛྫམཱནཏྟཱ པུརིསབལཔུརིསཐཱམཱནཾ ཨུཔརཱུཔརི ཝཌྜྷན ཝསེན ཙིརཀཱལཾ པཝཏྟིཏཱནི པུརིསཀམྨཱནི ནིཔྥཏྟིཾ པཱཔུཎནྟི, སབྦཉྙུབུདྡྷབྷཱཝཾཔི གཙྪནྟི. ཨཱསེཝནཔཙྩཡདཱིཔནཱ ནིཊྛིཏཱ.

དུཝིདྷོ ཀམྨཔཙྩཡོ སཧཛཱཏཀམྨཔཙྩཡོ ནཱནཱཀྑཎིཀ ཀམྨཔཙྩཡོ.

ཏཏྠ ཁཎཏྟཡསམངྒི བྷཱུཏཱ སབྦཱཔི ཀུསལཱཀུསལཱ བྱཱཀཏཙེཏནཱ སཧཛཱཏཀམྨ པཙྩཡོ. ཙེཏནཱསམྤཡུཏྟཱ སབྦེཔི ཙིཏྟཙེཏསིཀཱ དྷམྨཱཙ པཊིསནྡྷིཙིཏྟེན སཧུཔྤནྣཱ ཀམྨཛརཱུཔདྷམྨཱ ཙ པཝཏྟིཀཱལེ སབྦེཔི ཙིཏྟཛརཱུཔདྷམྨཱ ཙ ཏསྶ པཙྩཡསྶ པཙྩཡུཔྤནྣཱ.

ཨཏཱིཏཱ ¶ ཀུསལཱཀུསལཙེཏནཱ ནཱནཱཀྑཎིཀཀམྨ པཙྩཡོ. བཱཏྟིཾསཝིདྷཱ ལོཀིཡཝིཔཱཀ ཙིཏྟཙེཏསིཀཱ དྷམྨཱ ཙ སབྦེ ཀམྨཛརཱུཔདྷམྨཱ ཙ ཏསྶ པཙྩཡསྶ པཙྩཡུཔྤནྣཱ.

ཀེནཊྛེན ཀམྨནྟི. ཀིརིཡཱཝིསེསཊྛེན ཀམྨཾ. ཙེཏནཱ ཧི ཀིརིཡཱ ཝིསེསོ ཧོཏི སབྦཀམྨེསུ ཛེཊྛཀཏྟཱ. ཏཱ ཧི སབྦེསུ ཀཱཡཝཙཱིམནོཀམྨེསུ པཙྩུཔཊྛིཏེསུ ཏསྶ ཏསྶ ཀམྨསྶ ནིཔྥཏྟཏྠཱཡ སམྤཡུཏྟདྷམྨེ ཙེཏེཏི ཀཔྤེཏི སཾཝིདཧཏི, ཨེཀཏོ ཨུཊྛཱཔེཏི, ཏསྨཱ སབྦཀམྨེསུ ཛེཊྛཀཱ ཧོཏི. ཨིཏི ཀིརིཡཱཝིསེསཊྛེན ཀམྨཾ ནཱམ. ཀརོནྟི ཨེཏེནཱཏི ཝཱ ཀམྨཾ. ཀིཾ ཀརོནྟི. ཀཱཡིཀཀིརིཡཾཔི ཀརོནྟི, ཝཱཙསིཀཀིརིཡཾཔི ཀརོནྟི, མཱནསིཀཀིརིཡཾཔི ཀརོནྟི. ཏཏྠ ཀཱཡིཀཀིརིཡཱ ནཱམ གམནཋཱན ནིསཛྫཱདཡོ ཨབྷིཀྐམནཔཊིཀྐམནཱདཡོ ཨནྟམསོ ཨཀྑིདལཱནཾ ཨུཀྑིཔནནིཀྑིཔནཱནིཔི. ཝཱཙསིཀཀིརིཡཱ ནཱམ ཝཱཙཱཔཝཏྟནཀིརིཡཱ. མཱནསིཀཀིརིཡཱ ནཱམ སུཙིནྟིཏ དུཙིནྟིཏཀིརིཡཱ, ཨནྟམསོ པཉྩ ཝིཉྙཱཎཱནཾ དསྶནཀིཙྩསཝནཀིཙྩཱདཱིནིཔི. སབྦཱཔི ཨིམཱ ཀིརིཡཱཡོ ཨེཏཱཡ ཙེཏནཱཡ སཏྟཱ ཀརོནྟི, སཾཝིདཧནྟི, ཏསྨཱ སཱ ཙེཏནཱ ཀམྨཾ ནཱམ.

ཨཏྟནོ པཙྩཡུཔྤནྣེན སཧ ཛཱཡཏཱིཏི སཧཛཱཏཾ. སཧཛཱཏཉྩ ཏཾ ཀམྨཉྩཱཏི སཧཛཱཏཀམྨཾ. སཧཛཱཏཀམྨཾ ཧུཏྭཱ པཙྩཡོ སཧཛཱཏཀམྨ པཙྩཡོ. སཧཛཱཏཀམྨབྷཱཝེན པཙྩཡོཏི ཝུཏྟཾ ཧོཏི.

ཨཉྙོ ཀམྨསྶ ཨུཔྤཏྟིཀྑཎོ ཨཉྙོ ཝིཔཱཀསྶ ཨུཔྤཏྟིཀྑཎོཏི ཨེཝཾ ཝིསུཾ ཝིསུཾ ཨུཔྤཏྟིཀྑཎོ ཨེཏསྶཱཏི ནཱནཱཀྑཎིཀཾ. ནཱནཱཀྑཎིཀཉྩ ཏཾ ཀམྨཉྩཱཏི ནཱནཱཀྑཎིཀཀམྨཾ. ནཱནཱཀྑཎིཀཀམྨཾ ཧུཏྭཱ པཙྩཡོ ནཱནཱཀྑཎིཀཀམྨཔཙྩཡོ. ནཱནཱཀྑཎིཀཀམྨཔཙྩཡབྷཱཝེན པཙྩཡོཏི ཝུཏྟཾ ཧོཏི. ཨརིཡམགྒསམྤཡུཏྟཱ ཙེཏནཱ ཨཏྟནོ ནིརུདྡྷཱནནྟརེ ཨེཝ ཨརིཡཕལཝིཔཱཀཾ ཛནེཏི, སཱཔི ནཱནཱཀྑཎིཀཱ ཨེཝ ཧོཏི.

ཨེཏྠ ཙ ཨེཀཱ དཱནཀུསལཙེཏནཱ ཨཏྟནཱ སཧཛཱཏཱནཾ ཙིཏྟཙེཏསིཀཱནཉྩ ཀཱཡིཀཝཱཙསིཀཀིརིཡཱབྷཱུཏཱནཾ ཙིཏྟཛརཱུཔཱནཉྩ སཧཛཱཏཀམྨཔཙྩཡོ. ཏཱཡ ཙེཏནཱཡ ཨཱཡཏིཾ ཀཱལནྟརེ ཨུཔྤཛྫམཱནསྶ ཝིཔཱཀཀྑནྡྷསྶ ཙ ཀམྨཛརཱུཔཀྑནྡྷསྶ ཙ ནཱནཱཀྑཎིཀ ཀམྨཔཙྩཡོ. ཨེཝཾ ཨེཀཱ ཀམྨཔཐཔཏྟཱ སུཙརིཏདུཙྩརིཏཙེཏནཱ དྭཱིསུ ཀཱལེསུདྭིནྣཾ པཙྩཡུཔྤནྣཱནཾ དྭཱིཧི པཙྩཡསཏྟཱིཧི པཙྩཡོ ཧོཏཱིཏི.

ཨེཏྠ ཙ ནཱནཱཀྑཎིཀཀམྨཔཙྩཡེ ཀམྨནྟི ཀིརིཡཱཝིསེསོ. སོ པན ཙེཏནཱཡ ནིརུདྡྷཱཡཔི ཨནིརུཛ྄ཛྷིཏྭཱ ཏཾ ཙིཏྟསནྟཱནཾ ཨནུགཙྪཏིཡེཝ. ཡདཱ ¶ ཝིཔཙྩིཏུཾ ཨོཀཱསཾ ལབྷཏི, ཏདཱ སོ ཀིརིཡཱ ཝིསེསོ ཙུཏིནནྟརེ ཨེཀོ ཨཏྟབྷཱཝོ ཧུཏྭཱ ཝིཔཙྩཏི པཱཏུབྷཝཏི. ཨོཀཱསཾ པན ཨལབྷམཱནཱ བྷཝསཏཾཔི བྷཝསཧསྶཾཔི བྷཝསཏསཧསྶཾཔི ཏཾ སནྟཱནཾ ཨནུགཙྪཏིཡེཝ. མཧགྒཏཀམྨཾ པན ལདྡྷོཀཱསེ སཏི དུཏིཡབྷཝེ བྲཧྨལོཀེ ཨེཀོ བྲཧྨཏྟབྷཱཝོ ཧུཏྭཱ ཝིཔཙྩཏི པཱཏུབྷཝཏི. སུཔརིཔཀྐཀམྨཏྟཱ པན དུཏིཡབྷཝེཡེཝ ཁཱིཡཏི, ཏཏོ པརཾ ནཱནུགཙྪཏཱིཏི. ཀམྨཔཙྩཡདཱིཔནཱ ནིཊྛིཏཱ.

ཚཏྟིཾསཝིདྷཱ ཝིཔཱཀབྷཱུཏཱ སཧཛཱཏཙིཏྟཙེཏསིཀཱ དྷམྨཱ ཝིཔཱཀ པཙྩཡོ. ཏེཡེཝ ཨཉྙམཉྙཉྩ པཊིསནྡྷིཀྑཎེ ཀམྨཛརཱུཔཱནི ཙ པཝཏྟིཀྑཎེ ཝིཔཱཀ ཙིཏྟཛཱཏཱནི ཙིཏྟཛརཱུཔཱནི ཙ ཝིཔཱཀཔཙྩཡུཔྤནྣཱ.

ཀེནཊྛེན ཝིཔཱཀོཏི. ཝིཔཙྩནཊྛེན ཝིཔཱཀོ. ཝིཔཙྩནཾ ནཱམ མུདུཏརུཎབྷཱཝཾ ཨཏིཀྐམྨ ཝིཔཀྐབྷཱཝཾ ཨཱཔཛྫནཾ. ཀསྶ པན དྷམྨསྶ མུདུཏརུཎབྷཱཝོ, ཀསྶ ཝིཔཀྐབྷཱཝོཏི. ནཱནཱཀྑཎིཀཀམྨཔཙྩཡ སངྑཱཏསྶ ཨཏཱིཏཀམྨསྶ མུདུཏརུཎབྷཱཝོ, ཏསྶེཝ ཀམྨསྶ ཝིཔཀྐབྷཱཝོ.

ཏཏྠ ཨེཀསྶ ཀམྨསྶ ཙཏསྶོ ཨཝཏྠཱཡོ ཧོནྟི ཙེཏནཱ ཝཏྠཱ ཀམྨཱཝཏྠཱ ནིམིཏྟཱཝཏྠཱ ཝིཔཱཀཱཝཏྠཱཏི.

ཏཏྠ ཏཱཡ ཙེཏནཱཡ ནིརུདྡྷཱཡཔི ཏསྶཱ ཀིརིཡཱ ཝིསེསོ ན ནིརུཛ྄ཛྷཏི, ཏཾ ཙིཏྟསནྟཱནཾ ཨནུགཙྪཏིཡེཝ. ཨཡཾ ཀམྨཱཝཏྠཱ ནཱམ.

ནིམིཏྟཱཝཏྠཱཏི ཏཾ ཀམྨཾ ཡདཱ ཝིཔཙྩིཏུཾ ཨོཀཱསཾ ལབྷཏི, ཏདཱ མརཎཱསནྣཀཱལེ ཏསྶ པུགྒལསྶ ཏམེཝ ཀམྨཾ ཝཱ པཙྩུཔཊྛཱཏི, སོ པུགྒལོ ཏདཱ དཱནཾ དེནྟོ ཝིཡ སཱིལཾ རཀྑནྟོ ཝིཡ པཱཎགྷཱཏཾ ཝཱ ཀརོནྟོ ཝིཡ ཧོཏི. ཀམྨནིམིཏྟཾ ཝཱ པཙྩུཔཊྛཱཏི, དཱན ཝཏྠུཨཱདིཀཾ ཝཱ སཏྠཱདིཀཾ ཝཱ ཨཉྙཾ ཝཱཔི པུབྦེ ཏསྶ ཀམྨསྶ ཨུཔཀརཎབྷཱུཏཾ ཨཱརམྨཎཾ ཏདཱ ཏསྶ པུགྒལསྶ ཧཏྠགཏཾ ཝིཡ ཧོཏི. གཏིནིམིཏྟཾ ཝཱ པཙྩུཔཊྛཱཏི, དིབྦཝིམཱནཱདིཀཾ ཝཱ ནིརཡགྒིཛཱལཱདིཀཾ ཝཱ ཨུཔྤཛྫམཱནབྷཝེ ཨུཔལབྷིཏབྦཾ ཝཱ ཨནུབྷཝིཏབྦཾ ཝཱ ཨཱརམྨཎཾ ཏདཱ དིསྶམཱནཾ ཧོཏི. ཨཡཾ ནིམིཏྟཱ ཝཏྠཱ ནཱམ.

ཝིཔཱཀཱཝཏྠཱཏི སཙེ སོ པུགྒལོ ཏཐཱ པཙྩུཔཊྛིཏཾ ཏཾ ཀམྨཾ ཝཱ ཀམྨནིམིཏྟཾ ཝཱ གཏིནིམིཏྟཾ ཝཱ ཨེཀཾ ཨཱརམྨཎཾ ཨམུཉྩམཱནོ མརཏི, ཏདཱ ཏཾ ཀམྨཾ ཏསྨིཾབྷཝེ ཝིཔཙྩཏི, ཏཾ ཀམྨཾ ཏསྨིཾབྷཝེ ཨེཀོ ཨཏྟབྷཱཝོ ཧུཏྭཱ པཱཏུབྷཝཏི ¶ . ཏཏྠ པུརིམཱསུ ཏཱིསུ ཨཝཏྠཱསུ ཏཾ ཀམྨཾ མུདུཏརུཎབྷཱུཏཾ ཧོཏི, པཙྪིམཾ པན ཝིཔཱཀཱཝཏྠཾ པཏྭཱ ཝིཔཀྐབྷཱུཏཾ ཧོཏི. ཏེན ཝུཏྟཾ ཝིཔཙྩནཾ ནཱམ མུདུཏརུཎབྷཱཝཾ ཨཏིཀྐམྨ ཝིཔཀྐབྷཱཝཾ ཨཱཔཛྫནནྟི. ཨེཝཾ ཝིཔཀྐབྷཱཝཾ ཨཱཔནྣོ ཙིཏྟ ཙེཏསིཀདྷམྨསམཱུཧོ ཝིཔཱཀོ ནཱམ.

ཏཏྠ ཡཐཱ ཨམྦཔྥལཱནི ནཱམ ཡདཱ ཝིཔཀྐབྷཱཝཾ ཨཱཔཛྫནྟི, ཏདཱ སབྦསོ སིནིདྡྷརཱུཔཱནི ཧོནྟི. ཨེཝམེཝཾ ཝིཔཱཀདྷམྨཱ ནཱམ ནིརུསྶཱཧཱ ནིབྱཱཔཱརཱ ཧུཏྭཱ སབྦསོ སནྟརཱུཔཱ ཧོནྟི. ཏེསཾ སནྟརཱུཔཏྟཱཡེཝ བྷཝངྒཙིཏྟཱནཾ ཨཱརམྨཎཾ ཨཝིབྷཱུཏཾ ཧོཏི, བྷཝངྒཏོ ཝུཊྛཱནཀཱལེ ཏཾ ཨཱརམྨཎཾ ན ཛཱནཱཏི. ཏཐཱཧི རཏྟིཡཾ ནིདྡཱཡནྟསྶ པུརིམབྷཝེ མརཎཱསནྣཀཱལེ ཡཐཱགཧིཏཾ ཀམྨཱདིཀཾ ཨཱརམྨཎཾ ཨཱརབྦྷ བྷཝངྒསོཏཾ པཝཏྟམཱནཾཔི ཏསྶ བྷཝངྒསོཏསྶ ཏཾ ཨཱརམྨཎཾ ཨཱརབྦྷ ཨིདཾ ནཱམ མེ པུརིམབྷཝེ ཨཱརམྨཎཾ དིཊྛནྟི ཀསྶཙི ཛཱནནཝཱིཐིཙིཏྟསྶ ཨུཔྤཏྟིཡཱ པཙྩཡོ ན ཧོཏི. སོ པུགྒལོ ནིདྡཱཡནཀཱལེཔི ཨུཊྛཱནཀཱལེཔི པུརིམབྷཝསིདྡྷཾ ཏཾ ནིམིཏྟཾ ན ཛཱནཱཏི. ཨེཝཾ ནིརུསྶཱཧནིབྱཱཔཱརསནྟརཱུཔ བྷཱཝེན ཨུཔཀཱརཀཏཱ ཝིཔཱཀཔཙྩཡཏཱ ནཱམཱཏི. ཝིཔཱཀ པཙྩཡདཱིཔནཱ ནིཊྛིཏཱ.

དུཝིདྷོ ཨཱཧཱརཔཙྩཡོ རཱུཔཱཧཱརཔཙྩཡོ ཨརཱུཔཱཧཱར པཙྩཡོ.

ཏཏྠ རཱུཔཱཧཱརཔཙྩཡོ ནཱམ ཀབལཱི༹ཀཱརཱཧཱརསངྑཱཏཾ ཨོཛ རཱུཔཾ ཝུཙྩཏི. སོ ཙ ཨཛ྄ཛྷཏྟཱཧཱརོ བཧིདྡྷཱཧཱརོཏི དུཝིདྷོ. ཀབལཱི༹ཀཱརཱཧཱརབྷཀྑཱནཾ སཏྟཱནཾ སབྦེཔི ཙཏུསམུཊྛཱནིཀརཱུཔདྷམྨཱ ཏསྶ དུཝིདྷསྶ རཱུཔཱཧཱརསྶ པཙྩཡུཔྤནྣཱ.

ཨརཱུཔཱཧཱརོ པན ཏིཝིདྷོ ཕསྶཱཧཱརོ མནོསཉྩེཏནཱ ཧཱརོ ཝིཉྙཱཎཱཧཱརོ ཙ. ཏཡོཔེཏེ དྷམྨཱ སཧཛཱཏཱནཾ ནཱམརཱུཔདྷམྨཱནཾ ཨཱཧཱརཔཙྩཡོ ཧོནྟི. སཧཛཱཏཱ ཙ ནཱམརཱུཔ དྷམྨཱ ཏེསཾ པཙྩཡུཔྤནྣཱ.

ཀེནཊྛེན ཨཱཧཱརོཏི. བྷུསཾ ཧརཎཊྛེན ཨཱཧཱརོ. བྷུསཾ ཧརཎཊྛེནཱཏིཙ དལ༹ྷཾ པཝཏྟཱཔནཊྛེན, ཙིརཀཱལཾ ཋིཏིཡཱ ཝུཌྜྷིཡཱ ཝིརུལ༹ྷིཡཱ ཝེཔུལླཱཡ ཨུཔཏྠམྦྷནཊྛེནཱཏི ཝུཏྟཾ ཧོཏི. ཛནནཀིཙྩཡུཏྟོཔི ཨཱཧཱརོ ཨུཔཏྠམྦྷནཀིཙྩཔྤདྷཱནོ ཧོཏཱིཏི.

ཏཏྠ དུཝིདྷོ རཱུཔཱཧཱརོ ཨཛ྄ཛྷཏྟསནྟཱནེ ཙཏུསམུཊྛཱནིཀཾ རཱུཔཀཱཡཾ ཨུཔབྲཱུཧཡནྟོ བྷུསཾ ཧརཏི, དལ༹ྷཾ པཝཏྟེཏི, ཙིརཾ ཨདྡྷཱནཾ གམེཏི, ཏཾ ཏཾ ཨཱཡུཀཔྤཔརིཡོསཱནཾ པཱཔེཏཱིཏི ཨཱཧཱརོ.

ཕསྶཱཧཱརོ ¶ ཨཱརམྨཎེསུ ཨིཊྛཱནིཊྛརསཾ ནཱིཧརནྟོ སམྤཡུཏྟདྷམྨེ བྷུསཾ ཧརཏི. མནོསཉྩེཏནཱཧཱརོ ཀཱཡཝཙཱི མནོཀམྨེསུ ཨུསྶཱཧཾ ཛནེནྟོ སམྤཡུཏྟདྷམྨེ བྷུསཾ ཧརཏི. ཝིཉྙཱཎཱཧཱརོ ཨཱརམྨཎཝིཛཱནནཊྛེན པུབྦངྒམཀིཙྩཾ ཝཧནྟོ སམྤཡུཏྟདྷམྨེ བྷུསཾ ཧརཏི, དལ༹ྷཾ པཝཏྟེཏི, ཙིརཾ ཨདྡྷཱནཾ གམེཏཱིཏི ཨཱཧཱརོ. སམྤཡུཏྟདྷམྨེ བྷུསཾ ཧརནྟོ སཧཛཱཏརཱུཔདྷམྨེཔི བྷུསཾ ཧརཏིཡེཝ.

ཨིདྷ སུཏྟནྟནཡོཔི ཝཏྟབྦོ. ཡཐཱ སཀུཎཱ ནཱམ ཙཀྑཱུཧི དིསཱཝིདིསཾ ཝིབྷཱཝེཏྭཱ པཏྟེཧི རུཀྑཏོ རུཀྑཾ ཝནཏོ ཝནཾ ཨཱཀཱསེན པཀྑནྡིཏྭཱ ཏུཎྜཀེཧི ཕལཱཕལཱནི ཏུདིཏྭཱ ཡཱཝཛཱིཝཾ ཨཏྟཱནཾ ཡཱཔེནྟི. ཏཐཱ ཨིམེ སཏྟཱ ཚཧི ཝིཉྙཱཎེཧི ཨཱརམྨཎཱནི ཝིབྷཱཝེཏྭཱ ཚཧི མནོསཉྩེཏནཱཧཱརེཧི ཨཱརམྨཎཝཏྠུཔྤཊིལཱབྷཏྠཱཡ ཨུསྶུཀྐནཾ ཀཏྭཱ ཚཧི ཕསྶཱཧཱརེཧི ཨཱརམྨཎེསུ རསཾ པཱཏུབྷཝནྟཾ ཀཏྭཱ སུཁདུཀྑཾ ཨནུབྷཝནྟི. ཝིཉྙཱཎེཧི ཝཱ ཨཱརམྨཎཱནི ཝིབྷཱཝེཏྭཱ ནཱམརཱུཔ སམྤཏྟིཾ སཱདྷེནྟི. ཕསྶེཧི ཨཱརམྨཎེསུ རསཾ པཱཏུབྷཝནྟཾ ཀཏྭཱ ཨཱརམྨཎརསཱནུབྷཝནཾ ཝེདནཾ སམྤཱདེཏྭཱ ཏཎྷཱཝེཔུལླཾ ཨཱཔཛྫནྟི. ཙེཏནཱཧི ཏཎྷཱམཱུལཀཱནི ནཱནཱཀམྨཱནི པསཝེཏྭཱ བྷཝཏོ བྷཝཾ སཾསརནྟི. ཨེཝཾ ཨཱཧཱརདྷམྨཱནཾ མཧནྟཾ ཨཱཧཱརཀིཙྩཾ ཝེདིཏབྦནྟི. ཨཱཧཱརཔཙྩཡདཱིཔནཱ ནིཊྛིཏཱ.

ཏིཝིདྷོ ཨིནྡྲིཡཔཙྩཡོ སཧཛཱཏིནྡྲིཡཔཙྩཡོ པུརེ ཛཱཏིནྡྲིཡཔཙྩཡོ རཱུཔཛཱིཝིཏིནྡྲིཡཔཙྩཡོ.

ཏཏྠ པནྣརསིནྡྲིཡདྷམྨཱ སཧཛཱཏིནྡྲིཡཔཙྩཡོ ནཱམ, ཛཱིཝིཏིནྡྲིཡཾ མནིནྡྲིཡཾ སུཁིནྡྲིཡཾ དུཀྑིནྡྲིཡཾ སོམནསྶིནྡྲིཡཾ དོམནསྶིནྡྲིཡཾ ཨུཔེཀྑིནྡྲིཡཾ སདྡྷིནྡྲིཡཾ ཝཱིརིཡིནྡྲིཡཾ སཏིནྡྲིཡཾ སམཱདྷིནྡྲིཡཾ པཉྙིནྡྲིཡཾ ཨནཉྙཱཏཉྙསྶཱམཱིཏིནྡྲིཡཾ ཨཉྙིནྡྲིཡཾ ཨཉྙཱཏཱཝིནྡྲིཡནྟི. ཏེཧི སཧཛཱཏཱ ཙིཏྟཙེཏསིཀདྷམྨཱ ཙ རཱུཔདྷམྨཱ ཙ ཏསྶ པཙྩཡུཔྤནྣཱ.

པཉྩིནྡྲིཡརཱུཔཱནི པུརེཛཱཏིནྡྲིཡཔཙྩཡོ, ཙཀྑུནྡྲིཡཾ སོཏིནྡྲིཡཾ གྷཱནིནྡྲིཡཾ ཛིཝ྄ཧིནྡྲིཡཾ ཀཱཡིནྡྲིཡཾ. པཉྩཝིཉྙཱཎཙིཏྟ ཙེཏསིཀ དྷམྨཱ ཏསྶ པཙྩཡུཔྤནྣཱ.

ཨེཀཾ རཱུཔཛཱིཝིཏིནྡྲིཡཾ རཱུཔཛཱིཝིཏིནྡྲིཡཔཙྩཡོ. སབྦཱནི ཀམྨཛ རཱུཔཱནི ཛཱིཝིཏརཱུཔཝཛྫིཏཱནི ཏསྶ པཙྩཡུཔྤནྣཱནི.

ཀེནཊྛེན ཨིནྡྲིཡནྟི. ཨིསྶརིཡཊྛེན ཨིནྡྲིཡཾ. ཏཏྠ ཀཏྠ ཨིསྶརིཡནྟི. ཨཏྟནོ ཨཏྟནོ པཙྩཡུཔྤནྣེསུ དྷམྨེསུ ཨིསྶརིཡཾ. ཀསྨིཾ ཀསྨིཾ ཀིཙྩེ ཨིསྶརིཡནྟི ¶ . ཨཏྟནོ ཨཏྟནོ ཀིཙྩེ ཨིསྶརིཡཾ. ནཱམཛཱིཝིཏཾ སམྤཡུཏྟདྷམྨཱནཾ ཛཱིཝནཀིཙྩེ ཨིསྶརིཡཾ. ཛཱིཝནཀིཙྩེཏི ཨཱཡུཝཌྜྷནཀིཙྩེ, སནྟཏིཋིཏིཡཱ ཙིརཀཱལཋིཏིཀིཙྩེཏི ཨཏྠོ. མནིནྡྲིཡཾ ཨཱརམྨཎགྒཧཎཀིཙྩེ སམྤཡུཏྟདྷམྨཱནཾ ཨིསྶརིཡཾ. ཨཝསེསོ ཨིནྡྲིཡཊྛོ པུབྦེ ཨིནྡྲིཡཡམཀདཱིཔནིཡཾ ཝུཏྟོཡེཝ.

ཨེཏྠ ཝདེཡྻ, དྭེ ཨིཏྠིནྡྲིཡཔུརིསིནྡྲིཡདྷམྨཱ ཨིནྡྲིཡབྷཱུཏཱ སམཱནཱཔི ཀསྨཱ ཨིནྡྲིཡཔཙྩཡེ ཝིསུཾ ན གཧིཏཱཏི. པཙྩཡཀིཙྩསྶ ཨབྷཱཝཏོ. ཏིཝིདྷཉྷི པཙྩཡཀིཙྩཾ ཛནནཀིཙྩཉྩ ཨུཔཏྠམྦྷནཀིཙྩཉྩ ཨནུཔཱལནཀིཙྩཉྩ. ཏཏྠ ཡོ པཙྩཡོ པཙྩཡུཔྤནྣདྷམྨསྶ ཨུཔྤཱདཱཡ པཙྩཡོ ཧོཏི, ཡསྨིཾ ཨསཏི པཙྩཡུཔྤནྣོ དྷམྨོ ན ཨུཔྤཛྫཏི, ཏསྶ པཙྩཡཀིཙྩཾ ཛནནཀིཙྩཾ ནཱམ. ཡཐཱ ཨནནྟརཔཙྩཡོ. ཡོ པཙྩཡོ པཙྩཡུཔྤནྣདྷམྨསྶ ཋིཏིཡཱ ཙ ཝུཌྜྷིཡཱ ཙ ཝིརུལ༹ྷིཡཱ ཙ པཙྩཡོ ཧོཏི, ཡསྨིཾ ཨསཏི པཙྩཡུཔྤནྣོ དྷམྨོ ན ཏིཊྛཏི ན ཝཌྜྷཏི ན ཝིརཱུཧཏི, ཏསྶ པཙྩཡཀིཙྩཾ ཨུཔཏྠམྦྷནཀིཙྩཾ ནཱམ. ཡཐཱ པཙྪཱཛཱཏཔཙྩཡོ. ཡོ པཙྩཡོ པཙྩཡུཔྤནྣསྶ དྷམྨསྶ པཝཏྟིཡཱ པཙྩཡོ ཧོཏི, ཡེན ཝིནཱ པཙྩཡུཔྤནྣོ དྷམྨོ ཙིརཀཱལཾ ན པཝཏྟཏི, སནྟཏི གམནཾ ཚིཛྫཏི, ཏསྶ པཙྩཡ ཀིཙྩཾ ཨནུཔཱལནཀིཙྩཾ ནཱམ. ཡཐཱ རཱུཔ ཛཱིཝིཏིནྡྲིཡཔཙྩཡོ. ཨེཏེ པན དྭེ ཨིནྡྲིཡདྷམྨཱ ཏེསུ ཏཱིསུ པཙྩཡ ཀིཙྩེསུ ཨེཀཀིཙྩཾཔི ནསཱདྷེནྟི, ཏསྨཱ ཨེཏེ དྭེ དྷམྨཱ ཨིནྡྲིཡ པཙྩཡེ ཝིསུཾ ན གཧིཏཱཏི.

ཨེཏཾ སནྟེ ཨེཏེ དྭེ དྷམྨཱ ཨིནྡྲིཡཱཏིཔི ན ཝཏྟབྦཱཏི. ནོ ན ཝཏྟབྦཱ. ཀསྨཱ. ཨིནྡྲིཡཀིཙྩསབྦྷཱཝཏོཏི. ཀིཾ པན ཨེཏེསཾ ཨིནྡྲིཡཀིཙྩནྟི. ལིངྒནིམིཏྟཀུཏྟཨཱཀཔྤེསུ ཨིསྶརཏཱ ཨིནྡྲིཡ ཀིཙྩཾ. ཏཐཱ ཧི ཡསྶ པུགྒལསྶ པཊིསནྡྷིཀྑཎེ ཨིཏྠིནྡྲིཡརཱུཔཾ ཨུཔྤཛྫཏི, ཏསྶ སནྟཱནེ ཙཏཱུཧི ཀམྨཱདཱིཧི པཙྩཡེཧི ཨུཔྤནྣཱ པཉྩཀྑནྡྷ དྷམྨཱ ཨིཏྠིབྷཱཝཱཡ པརིཎམནྟི, སོ ཨཏྟབྷཱཝོ ཨེཀནྟེན ཨིཏྠིལིངྒ ཨིཏྠིནིམིཏྟ ཨིཏྠིཀུཏྟ ཨིཏྠཱཀཔྤཡུཏྟོ ཧོཏི, ནོ ཨཉྙཐཱ. ན ཙ ཨིཏྠིནྡྲིཡརཱུཔཾ ཏེ པཉྩཀྑནྡྷདྷམྨེ ཛནེཏི, ན ཙ ཨུཔཏྠམྦྷཏི, ནཱཔི ཨནུཔཱལེཏི, ཨཐ ཁོ ཏེ དྷམྨཱ ཨཏྟནོ ཨཏྟནོ པཙྩཡེཧི ཨུཔྤཛྫམཱནཱ ཨེཝཉྩེཝཉྩ ཨུཔྤཛྫནྟཱུཏི ཨཱཎཾ ཋཔེནྟཾ ཝིཡ ཏེསུ ཨཏྟནོ ཨནུབྷཱཝཾ པཝཏྟེཏི. ཏེ ཙ དྷམྨཱ ཏཐེཝ ཨུཔྤཛྫནྟི, ནོ ཨཉྙཐཱཏི. ཨཡཾ ཨིཏྠིནྡྲིཡརཱུཔསྶ ཨིཏྠིལིངྒཱདཱིསུ ཨིསྶརཏཱ. ཨེས ནཡོ པུརིསིནྡྲིཡརཱུཔསྶ པུརིསལིངྒཱདཱིསུ ཨིསྶརཏཱཡཾ. ཨེཝཾ ཨེཏེ དྭེ དྷམྨཱ ལིངྒཱདཱིསུ ཨིནྡྲིཡཀིཙྩ སབྦྷཱཝཏོ ཨིནྡྲིཡཱ ནཱམ ཧོནྟཱིཏི.

ཧདཡཝཏྠུརཱུཔཾ པན དྭིནྣཾ ཝིཉྙཱཎདྷཱཏཱུནཾ ནིསྶཡཝཏྠུཀིཙྩཾ སཱདྷཡམཱནཾཔི ཏཱསུ ཨིནྡྲིཡཀིཙྩཾ ན སཱདྷེཏི. ན ཧི བྷཱཝིཏ ཙིཏྟསྶ པུགྒལསྶ ཧདཡརཱུཔེ པསནྣེཝཱ ¶ ཨཔྤསནྣེ ཝཱ ཛཱཏེཔི མནོཝིཉྙཱཎདྷཱཏུཡོ ཏདནུཝཏྟིཀཱ ཧོནྟཱིཏི. ཨིནྡྲིཡ པཙྩཡདཱིཔནཱ ནིཊྛིཏཱ.

སཏྟ ཛྷཱནངྒཱནི ཛྷཱནཔཙྩཡོ, ཝིཏཀྐོ ཝིཙཱརོ པཱིཏི སོམནསྶཾ དོམནསྶཾ ཨུཔེཀྑཱ ཨེཀགྒཏཱ. ཏེཧི སཧཛཱཏཱ པཉྩཝིཉྙཱཎཝཛྫིཏཱ ཙིཏྟཙེཏསིཀདྷམྨཱ ཙ རཱུཔདྷམྨཱ ཙ ཏསྶ པཙྩཡུཔྤནྣཱ.

ཀེནཊྛེན ཛྷཱནནྟི. ཨུཔནིཛ྄ཛྷཱཡནཊྛེན ཛྷཱནཾ. ཨུཔནིཛ྄ཛྷཱཡ ནཊྛེནཱཏི ཙ མནསཱ ཨཱརམྨཎཾ ཨུཔགནྟྭཱ ནིཛ྄ཛྷཱཡནཊྛེན པེཀྑནཊྛེན. ཡཐཱ ཧི ཨིསྶཱསོ དཱུརེ ཋཏྭཱ ཁུདྡཀེ ལཀྑམཎྜལེ སརཾ པཝེསེནྟོ ཧཏྠེཧི སརཾ ཨུཛུཀཉྩ ནིཙྩལཉྩ ཀཏྭཱ མཎྜལཉྩ ཝིབྷཱུཏཾ ཀཏྭཱ ཙཀྑུནཱ ནིཛ྄ཛྷཱཡནྟོ པཝེསེཏི. ཨེཝམེཝ ཨིམེཧི ཨངྒེཧི ཙིཏྟཾ ཨུཛུཀཉྩ ནིཙྩལཉྩ ཀཏྭཱ ཨཱརམྨཎཉྩ ཝིབྷཱུཏཾ ཀཏྭཱ ནིཛ྄ཛྷཱཡནྟོ པུགྒལོ ཨུཔནིཛ྄ཛྷཱཡཏཱིཏི ཝུཙྩཏི. ཨེཝཾ ཨུཔནིཛ྄ཛྷཱཡིཏྭཱ ཡཾཀིཉྩི ཀཱཡཀམྨཾ ཝཱ ཝཙཱིཀམྨཾ ཝཱ མནོཀམྨཾ ཝཱ ཀརོནྟོ ཨཝིརཛ྄ཛྷམཱནོ ཀརོཏི.

ཏཏྠ ཀཱཡཀམྨཾ ནཱམ ཨབྷིཀྐམཔྤཊིཀྐམཱདིཀཾ ཝུཙྩཏི. ཝཙཱིཀམྨཾ ནཱམ ཨཀྑརཝཎྞཔརིཔུཎྞཾ ཝཙཱིབྷེདཀརཎཾ ཝུཙྩཏི. མནོཀམྨཾ ནཱམ ཡཾཀིཉྩི མནསཱ ཨཱརམྨཎཝིབྷཱཝནཾ ཝུཙྩཏི. དཱནཀམྨཾ ཝཱ པཱཎཱཏིཔཱཏ ཀམྨཾ ཝཱ ཨནུརཱུཔེཧི ཛྷཱནངྒེཧི ཝིནཱ དུབྦལེན ཙིཏྟེན ཀཱཏུཾ ན སཀྐཱ ཧོཏི. ཨེས ནཡོ སེསེསུ ཀུསལཱཀུསལ ཀམྨེསཱུཏི.

ཨཡཉྩ ཨཏྠོ ཝིཏཀྐཱདཱིནཾ ཛྷཱནངྒདྷམྨཱནཾ ཝིསུཾ ཝིསུཾ སབྷཱཝ ལཀྑཎེཧི དཱིཔེཏབྦོ. སམྤཡུཏྟདྷམྨེ ཨཱརམྨཎཱབྷིནིརོཔན ལཀྑཎོ ཝིཏཀྐོ, སོ ཙིཏྟཾ ཨཱརམྨཎེ དལ༹ྷཾ ནིཡོཛེཏི. ཨཱརམྨཎཱནུམཛྫནལཀྑཎོ ཝིཙཱརོ, སོ ཙིཏྟཾ ཨཱརམྨཎེ དལ༹ྷཾ སཾཡོཛེཏི. ཨཱརམྨཎསམྤིཡཱཡནལཀྑཎཱཔཱིཏི, སཱ ཙིཏྟཾ ཨཱརམྨཎེ པརིཏུཊྛཾ ཀརོཏི. ཏིསྶོཔི ཝེདནཱ ཨཱརམྨཎརསཱནུ བྷཝནལཀྑཎཱ, ཏཱཔི ཙིཏྟཾ ཨཱརམྨཎེ ཨིཊྛཱནིཊྛམཛ྄ཛྷཏྟརསཱནུབྷཝན ཀིཙྩེན དལ༹ྷཔྤཊིབདྡྷཾ ཀརོནྟི. སམཱདྷཱནལཀྑཎཱ ཨེཀགྒཏཱ, སཱཔི ཙིཏྟཾ ཨཱརམྨཎེ ནིཙྩལཾ ཀཏྭཱ ཋཔེཏཱིཏི. ཛྷཱནཔཙྩཡདཱིཔནཱ ནིཊྛིཏཱ.

དྭཱདས མགྒངྒཱནི མགྒཔཙྩཡོ སམྨཱདིཊྛི སམྨཱསངྐཔྤོ སམྨཱ ཝཱཙཱ སམྨཱཀམྨནྟོ སམྨཱཨཱཛཱིཝོ སམྨཱཝཱཡཱམོ སམྨཱསཏི སམྨཱསམཱདྷི མིཙྪཱདིཊྛི ¶ མིཙྪཱསངྐཔྤོ མིཙྪཱཝཱཡཱམོ མིཙྪཱསམཱདྷི. སེསཱ མིཙྪཱཝཱཙཱ མིཙྪཱཀམྨནྟོ མིཙྪཱཨཱཛཱིཝོཏི ཏཡོ དྷམྨཱ ཝིསུཾ ཙེཏསིཀདྷམྨཱ ན ཧོནྟི. མུསཱཝཱདཱདིཝསེན པཝཏྟཱནཾ ཙཏུནྣཾ ཨཀུསལཁནྡྷཱནཾ ནཱམཾ. ཏསྨཱ ཏེ མགྒཔཙྩཡེ ཝིསུཾ ན གཧིཏཱཏི. སབྦེ སཧེཏུཀཱ ཙིཏྟ ཙེཏསིཀདྷམྨཱ ཙ སཧེཏུཀཙིཏྟསཧ ཛཱཏཱ རཱུཔདྷམྨཱ ཙ ཏསྶ པཙྩཡུཔྤནྣཱ.

ཀེནཊྛེན མགྒོཏི. སུགཏིདུགྒཏིནིབྦཱན དིསཱདེསསམྤཱ པནཊྛེན མགྒོ. སམྨཱདིཊྛིཨཱདིཀཱནི ཧི ཨཊྛ སམྨཱམགྒངྒཱནི སུགཏི དིསཱདེསཉྩ ནིབྦཱནདིསཱདེསཉྩ སམྤཱཔནཏྠཱཡ སཾཝཏྟནྟི. ཙཏྟཱརི མིཙྪཱམགྒངྒཱནི དུགྒཏིདིསཱདེསཾ སམྤཱཔནཏྠཱཡ སཾཝཏྟནྟཱིཏི.

ཏཏྠ ཛྷཱནཔཙྩཡོ ཨཱརམྨཎེ ཙིཏྟཾ ཨུཛུཾ ཀརོཏི, ཐིརཾ ཀརོཏི, ཨཔྤནཱཔཏྟཾ ཀརོཏི. ཨཔྤནཱཔཏྟཾ ནཱམ གམྦྷཱིརེ ཨུདཀེ པཀྑིཏྟོ མཙྪོཝིཡ ཀསིཎནིམིཏྟཱདིཀེ ནིམིཏྟཱརམྨཎེ ཨནུཔཝིཊྛཾ ཙིཏྟཾ པཝུཙྩཏི. མགྒཔཙྩཡོ ཝཊྚཔཐེ ཙེཏནཱཀམྨཾ ཝིཝཊྚཔཐེ བྷཱཝནཱཀམྨཾ ཨུཛུཾ ཀརོཏི, ཐིརཾ ཀརོཏི, ཀམྨཔཐཔཏྟཾ ཀརོཏི, ཝུདྡྷིཾ ཝིརུལ༹ྷིཾ ཝེཔུལླཾ ཀརོཏི, བྷཱུམནྟརཔཏྟཾ ཀརོཏི. ཨཡ མེཏེསཾ དྭིནྣཾ པཙྩཡཱནཾ ཝིསེསོ.

ཏཏྠ ཀམྨཔཐཔཏྟཾ ནཱམ པཱཎཱཏིཔཱཏཱདཱིནཾ ཀུསལཱཀུསལ ཀམྨཱནཾ ཨངྒཔཱརིཔཱུརིཡཱ པཊིསནྡྷིཛནནེ སམཏྠབྷཱཝསངྑཱཏཾ ཀམྨགཏིཾ པཏྟཾ ཙེཏནཱཀམྨཾ. བྷཱུམནྟརཔཏྟཾ ནཱམ བྷཱཝནཱནུཀྐམེན ཀཱམ བྷཱུམིཏོ པཊྛཱཡ ཡཱཝ ལོཀུཏྟརབྷཱུམིཡཱ ཨེཀསྨིཾཨིརིཡཱཔཐེཔི ཨུཔརཱུཔརིབྷཱུམིཾ པཏྟཾ བྷཱཝནཱཀམྨཾ. ཨཡཉྩ ཨཏྠོ ཛྷཱནཔཙྩཡེ ཝུཏྟནཡེན སམྨཱདིཊྛིཨཱདིཀཱནཾ མགྒངྒདྷམྨཱནཾ ཝིསུཾ ཝིསུཾ སབྷཱཝ ལཀྑཎེཧི དཱིཔེཏབྦོཏི. མགྒཔཙྩཡདཱིཔནཱ ནིཊྛིཏཱ.

སམྤཡུཏྟཔཙྩཡོ ཝིཔྤཡུཏྟཔཙྩཡོཏི ཨེཀཾ དུཀྐཾ. ཨཏྠི པཙྩཡོ ནཏྠི པཙྩཡོཏི ཨེཀཾ དུཀྐཾ. ཝིགཏཔཙྩཡོ ཨཝིགཏ པཙྩཡོཏི ཨེཀཾ དུཀྐཾ. ཨིམཱནི ཏཱིཎི པཙྩཡདུཀྐཱནི ཝིསུཾ པཙྩཡ ཝིསེསཱནི ན ཧོནྟི. པུབྦེ ཨཱགཏེསུ པཙྩཡེསུ ཀེཙི པཙྩཡཱ ཨཏྟནོ པཙྩཡུཔྤནྣེཧི སམྤཡུཏྟཱ ཧུཏྭཱ པཙྩཡཏྟཾ གཙྪནྟི, ཀེཙི ཝིཔྤཡུཏྟཱ ཧུཏྭཱ, ཀེཙི ཝིཛྫམཱནཱ ཧུཏྭཱ, ཀེཙི ཨཝིཛྫམཱནཱ ཧུཏྭཱ, ཀེཙི ཝིགཏཱ ཧུཏྭཱ, ཀེཙི ཨཝིགཏཱ ཧུཏྭཱ པཙྩཡཏྟཾ གཙྪནྟཱིཏི དསྶནཏྠཾ ཨིམཱནི ཏཱིཎི པཙྩཡདུཀྐཱནི ཝུཏྟཱནི.

ཨེཏྠ ¶ ཙ ཨཏྠཱིཏི ཁོ ཀཙྩཱན ཨཡམེཀོ ཨནྟོ, ནཏྠཱིཏི ཁོ དུཏིཡོ ཨནྟོཏི ཨེཝརཱུཔེསུ ཋཱནེསུ ཨཏྠིནཏྠིསདྡཱ སསྶཏུཙྪེདེསུཔཝཏྟནྟི, ཏསྨཱ ཨེཝརཱུཔཱནཾ ཨཏྠཱནཾ ནིཝཏྟནཏྠཾ པུན ཝིགཏདུཀྐཾ ཝུཏྟཾ.

སབྦེཔི སཧཛཱཏཱ ཙིཏྟཙེཏསིཀཱ དྷམྨཱ ཨཉྙམཉྙསྶ པཙྩཡཱ ཙེཝ ཧོནྟི པཙྩཡུཔྤནྣཱ ཙ.

ཀེནཊྛེན སམྤཡུཏྟོ. ཨེཀུཔྤཱདཏཱ ཨེཀནིརོདྷཏཱ ཨེཀཝཏྠུཀཏཱ ཨེཀཱརམྨཎཏཱཏི ཨིམེཧི ཙཏཱུཧི སམྤཡོགངྒེཧི སམནྣཱགཏོ ཧུཏྭཱ སཾཡུཏྟོ ཨེཀཱིབྷཱཝཾ གཏོཏི སམྤཡུཏྟོ.

ཏཏྠ ཨེཀཱིབྷཱཝཾ གཏོཏི ཙཀྑུཝིཉྙཱཎཾ ཕསྶཱདཱིཧི སཏྟཧི ཙེཏསིཀེཧི སཧ ཨེཀཱིབྷཱཝཾ གཏཾ ཧོཏི, དསྶནནྟི ཨེཀཾ ཝོཧཱརཾ གཙྪཏི. ཨཊྛ དྷམྨཱ ཝིསུཾ ཝིསུཾ ཝོཧཱརཾ ན གཙྪནྟི, ཝིནིབྦྷུཛྫིཏྭཱ ཝིཉྙཱཏུཾ ན སཀྐོཏི. ཨེས ནཡོ སེསེསུ སབྦཙིཏྟུཔྤཱདེསཱུཏི. སམྤཡུཏྟཔཙྩཡདཱིཔནཱ ནིཊྛིཏཱ.

ཙཏུབྦིདྷོ ཝིཔྤཡུཏྟཔཙྩཡོ, སཧཛཱཏོ ཝཏྠུཔུརེ ཛཱཏོ ཝཏྠཱརམྨཎཔུརེཛཱཏོ པཙྪཱཛཱཏོཏི.

ཏཏྠ སཧཛཱཏཝིཔྤཡུཏྟོ ནཱམ དྭིསུ སཧཛཱཏཔཙྩཡ པཙྩཡུཔྤནྣེསུ ནཱམརཱུཔེསུ ནཱམཾ ཝཱ རཱུཔསྶ རཱུཔཾ ཝཱ ནཱམསྶ ཝིཔྤཡུཏྟཾ ཧུཏྭཱ པཙྩཡོ. ཏཏྠ ནཱམནྟི པཝཏྟིཀཱལེ ཙཏུཀྑནྡྷནཱམཾ, རཱུཔསྶཱཏི ཙིཏྟཛརཱུཔསྶ, རཱུཔནྟི པཊིསནྡྷིཀྑཎེ ཧདཡཝཏྠུརཱུཔཾ, ནཱམསྶཱཏི པཊིསནྡྷིཙཏུཀྑནྡྷནཱམསྶ. སེསཱ ཏཡོཔི ཝིཔྤཡུཏྟཔཙྩཡཱ པུབྦེ ཝིབྷཏྟཱ ཨེཝཱཏི. ཝིཔྤཡུཏྟཔཙྩཡདཱིཔནཱ ནིཊྛིཏཱ.

སཏྟཝིདྷོ ཨཏྠིཔཙྩཡོ, སཧཛཱཏཏྠིཔཙྩཡོ ཝཏྠུཔུརེ ཛཱཏཏྠི པཙྩཡོ ཨཱརམྨཎཔུརེཛཱཏཏྠིཔཙྩཡོ ཝཏྠཱརམྨཎཔུརེ ཛཱཏཏྠིཔཙྩཡོ པཙྪཱཛཱཏཏྠིཔཙྩཡོ རཱུཔཱཧཱརཏྠིཔཙྩཡོ རཱུཔ ཛཱིཝིཏིནྡྲིཡཏྠིཔཙྩཡོཏི.

ཏཏྠ སཧཛཱཏཔཙྩཡོ ཨེཝ སཧཛཱཏཏྠིཔཙྩཡོ ནཱམ. ཨེས ནཡོ སེསེསུ ཚསུ. པཙྩཡཔཙྩཡུཔྤནྣཝིབྷཱགོཔི ཧེཊྛཱ ཏཏྠ ཏཏྠ ཝུཏྟོཡེཝ.

ཀེནཊྛེན ¶ ཨཏྠིཔཙྩཡོ. སཡཾ ཁཎིཀཔཙྩུཔྤནྣཏཱ སངྑཱཏེན ཨཏྠིབྷཱཝེན པཙྩུཔྤནྣསྶ དྷམྨསྶ པཙྩཡོ ཨཏྠིཔཙྩཡོ. ཨཏྠིཔཙྩཡདཱིཔནཱ ནིཊྛིཏཱ.

སབྦོ ཨནནྟརཔཙྩཡོ ནཏྠི པཙྩཡོ ནཱམ. ཏཐཱ ཝིགཏ པཙྩཡོ. ཨཝིགཏཔཙྩཡོཔི ཨཏྠིཔཙྩཡེན སབྦསདིསོ. ཨཏྠཱིཏིཙ ཨཝིགཏོཏི ཙ ཨཏྠཏོ ཨེཀམེཝ. ཏཐཱ ནཏྠཱིཏི ཙ ཝིགཏོཏིཙ. ནཏྠིཝིགཏཨཝིགཏཔཙྩཡདཱིཔནཱ ནིཊྛིཏཱ.

པཙྩཡསབྷཱགོ ཝུཙྩཏེ. པཉྩདས སཧཛཱཏཛཱཏིཀཱ ཧོནྟི, ཙཏྟཱརོ མཧཱསཧཛཱཏཱ ཙཏྟཱརོ མཛ྄ཛྷིམསཧཛཱཏཱ སཏྟ ཁུདྡཀསཧཛཱཏཱ. ཏཏྠ ཙཏྟཱརོ མཧཱསཧཛཱཏཱ ནཱམ སཧཛཱཏོ སཧཛཱཏནིསྶཡོ སཧཛཱཏཏྠི སཧཛཱཏ ཨཝིགཏོ. ཙཏྟཱརོ མཛ྄ཛྷིམསཧཛཱཏཱ ནཱམ ཨཉྙམཉྙོ ཝིཔཱཀོ སམྤཡུཏྟོ སཧཛཱཏཝིཔྤཡུཏྟོ. སཏྟ ཁུདྡཀསཧ ཛཱཏཱ ནཱམ ཧེཏུ སཧཛཱཏཱདྷིཔཏི སཧཛཱཏཀམྨཾ སཧ ཛཱཏཱཧཱརོ སཧཛཱཏིནྡྲིཡཾ ཛྷཱནཾ མགྒོ.

ཏཡོ རཱུཔཱཧཱརཱ, རཱུཔཱཧཱརོ རཱུཔཱཧཱརཏྠི རཱུཔཱཧཱརཱ ཝིགཏོ.

ཏཱིཎི རཱུཔཛཱིཝིཏིནྡྲིཡཱནི, རཱུཔཛཱིཝིཏིནྡྲིཡཾ རཱུཔཛཱིཝིཏིནྡྲིཡཏྠི རཱུཔཛཱིཝིཏིནྡྲིཡཱཝིགཏཾ.

སཏྟརས པུརེཛཱཏཛཱཏིཀཱ ཧོནྟི, ཚ ཝཏྠུཔུརེཛཱཏཱ ཚ ཨཱརམྨཎཔུརེཛཱཏཱ པཉྩ ཝཏྠཱརམྨཎཔུརེཛཱཏཱ. ཏཏྠ ཚ ཝཏྠུཔུརེཛཱཏཱ ནཱམ ཝཏྠུཔུརེཛཱཏོ ཝཏྠུཔུརེཛཱཏནིསྶཡོ ཝཏྠུཔུརེཛཱཏིནྡྲིཡཾ ཝཏྠུཔུརེཛཱཏཝིཔྤཡུཏྟཾ ཝཏྠུཔུརེཛཱཏཏྠི ཝཏྠུ པུརེཛཱཏཨཝིགཏོ. ཚ ཨཱརམྨཎཔུརེཛཱཏཱ ནཱམ ཨཱརམྨཎ པུརེཛཱཏོ ཀིཉྩིཨཱརམྨཎཾ ཀོཙི ཨཱརམྨཎཱདྷིཔཏི ཀོཙི ཨཱརམྨཎཱུཔནིསྶསོ ཨཱརམྨཎཔུརེཛཱཏཏྠི ¶ ཨཱརམྨཎཔུརེཛཱཏ ཨཝིགཏོ. ཀིཉྩི ཨཱརམྨཎནྟིཨཱདཱིསུ ཀིཉྩིཀོཙིཝཙནེཧི པཙྩུཔྤནྣཾ ནིཔྥནྣརཱུཔཾ གཡ྄ཧཏི. པཉྩ ཝཏྠཱརམྨཎཔུརེཛཱཏཱ ནཱམ ཝཏྠཱརམྨཎ པུརེཛཱཏོ ཝཏྠཱརམྨཎཔུརེཛཱཏནིསྶཡོ ཝཏྠཱརམྨཎཔུརེ ཛཱཏ ཝིཔྤཡུཏྟོ ཝཏྠཱརམྨཎཔུརེཛཱཏཏྠི ཝཏྠཱརམྨཎཔུརེཛཱཏ ཨཝིགཏོ.

ཙཏྟཱརོ པཙྪཱཛཱཏཛཱཏིཀཱ ཧོནྟི, པཙྪཱཛཱཏོ པཙྪཱཛཱཏཝིཔྤཡུཏྟོ པཙྪཱཛཱཏཏྠི པཙྪཱཛཱཏཨཝིགཏོ.

སཏྟ ཨནནྟརཱ ཧོནྟི, ཨནནྟརོ སམནནྟརོ ཨནནྟརཱུཔ ནིསྶཡོ ཨཱསེཝནཾ ཨནནྟརཀམྨཾ ནཏྠི ཝིགཏོ. ཨེཏྠ ཙ ཨནནྟར ཀམྨཾ ནཱམ ཨརིཡམགྒཙེཏནཱ, སཱ ཨཏྟནོ ཨནནྟརེ ཨརིཡཕལཾ ཛནེཏི.

པཉྩ ཝིསུཾ པཙྩཡཱ ཧོནྟི, ཨཝསེསཾ ཨཱརམྨཎཾ ཨཝསེསོ ཨཱརམྨཎཱདྷིཔཏི ཨཝསེསོ ཨཱརམྨཎཱུཔ ནིསྶཡོ སབྦོ པཀཏཱུཔནིསྶཡོ ཨཝསེསཾ ནཱནཱཀྑཎིཀ ཀམྨཾ. ཨིཏི ཝིཏྠཱརཏོ པཊྛཱནཔཙྩཡཱ ཙཏུཔཉྙཱསཔྤབྷེདཱ ཧོནྟཱིཏི.

ཏཏྠ སབྦེ སཧཛཱཏཛཱཏིཀཱ ཙ སབྦེ པུརེཛཱཏ ཛཱཏིཀཱ སབྦེ པཙྪཱཛཱཏཛཱཏིཀཱ རཱུཔཱཧཱརོ རཱུཔཛཱིཝིཏིནྡྲིཡནྟི ཨིམེ པཙྩུཔྤནྣཔཙྩཡཱ ནཱམ. སབྦེ ཨནནྟརཛཱཏིཀཱ སབྦཾ ནཱནཱཀྑཎིཀ ཀམྨནྟི ཨིམེ ཨཏཱིཏཔཙྩཡཱ ནཱམ. ཨཱརམྨཎཾ པཀཏཱུཔནིསྶཡོཏི ཨིམེ ཏེཀཱལིཀཱ ཙ ནིབྦཱནཔཉྙཏྟཱིནཾ ཝསེན ཀཱལཝིམུཏྟཱ ཙ ཧོནྟི.

ནིབྦཱནཉྩ པཉྙཏྟི ཙཱཏི ཨིམེ དྭེ དྷམྨཱ ཨཔྤཙྩཡཱ ནཱམ ཨསངྑཏཱ ནཱམ. ཀསྨཱ. ཨཛཱཏིཀཏྟཱ. ཡེསཉྷི ཛཱཏི ནཱམ ཨཏྠི, ཨུཔྤཱདོ ནཱམ ཨཏྠི. ཏེ སཔྤཙྩཡཱནཱམ སངྑཏཱ ནཱམ པཊིཙྩསམུཔྤནྣཱ ནཱམ. ཨིམེ དྭེ དྷམྨཱ ཨཛཱཏིཀཏྟཱ ཨནུཔྤཱདཏྟཱ ཨཛཱཏིཔཙྩཡཏྟཱཙ ཨཔྤཙྩཡཱ ནཱམ ཨསངྑཏཱ ནཱམཱཏི.

སཔྤཙྩཡེསུ ཙ དྷམྨེསུ སངྑཏེསུ ཨེཀོཔི དྷམྨོ ནིཙྩོ དྷུཝོ སསྶཏོ ཨཝིཔརཱིཏདྷམྨོ ནཱམ ནཏྠི. ཨཐ ཁོ སབྦེ ཏེ ཁཡཊྛེན ཨནིཙྩཱ ཨེཝ ཧོནྟི. ཀསྨཱ. སཡཉྩ པཙྩཡཱཡཏྟཝུཏྟི ཀཏྟཱ པཙྩཡཱནཉྩ ཨནིཙྩདྷམྨཏྟཱ. ནནུ ནིབྦཱནཉྩ པཉྙཏྟི ཙ པཙྩཡཱ ཧོནྟི. ཏེ ཙ ནིཙྩཱ དྷུཝཱཏི. སཙྩཾ. ཀེཝལེན པན ནིབྦཱནཔཙྩཡེན ཝཱ པཉྙཏྟིཔཙྩཡེན ཝཱ ཨུཔྤནྣོ ནཱམ ནཏྠི, བཧཱུཧི པཙྩཡེཧི ཨེཝ ཨུཔྤནྣོ, ཏེ པན པཙྩཡཱ ཨནིཙྩཱ ཨེཝ ཨདྷུཝཱཏི.

ཡེ ¶ ཙ དྷམྨཱ ཨནིཙྩཱ ཧོནྟི, ཏེ ནིཙྩཀཱལཾ སཏྟེ ཏིཝིདྷེཧི དུཀྑདཎྜེཧི པཊིཔྤཱིལེ༹ནྟི བཱདྷེནྟི, ཏསྨཱ ཏེ དྷམྨཱ བྷཡཊྛེན དུཀྑཱ ཨེཝ ཧོནྟི. ཏཏྠ ཏིཝིདྷཱ དུཀྑདཎྜཱ ནཱམ དུཀྑདུཀྑཏཱ སངྑཱར དུཀྑཏཱ ཝིཔརིཎཱམདུཀྑཏཱ.

ཡེ ཀེཙི ཨནིཙྩཱ ཨེཝ ཧོནྟི, ཨེཀསྨིཾ ཨིརིཡཱཔཐེཔི པུནཔྤུནཾ བྷིཛྫནྟི, ཏེ ཀཐཾ ཡཱཝཛཱིཝཾ ནིཙྩསཉྙིཏཱནཾ སཏྟཔུགྒལཱནཾ ཨཏྟཱ ནཱམ བྷཝེཡྻུཾ, སཱརཱ ནཱམ བྷཝེཡྻུཾ. ཡེ ཙ དུཀྑཱ ཨེཝ ཧོནྟི, ཏེ ཀཐཾ དུཀྑཔྤཊིཀུལཱནཾ སུཁཀཱམཱནཾ སཏྟཱནཾ ཨཏྟཱ ནཱམ བྷཝེཡྻུཾ, སཱརཱ ནཱམ བྷཝེཡྻུཾ. ཏསྨཱ ཏེ དྷམྨཱ ཨསཱརཀཊྛེན ཨནཏྟཱ ཨེཝ ཧོནྟི.

ཨཔི ཙ ཡསྨཱ ཨིམཱཡ ཙཏུཝཱིསཏིཡཱ པཙྩཡདེསནཱཡ ཨིམམཏྠཾ དསྶེཏི. སབྦེཔི སངྑཏདྷམྨཱ ནཱམ པཙྩཡཱཡཏྟཝུཏྟིཀཱ ཨེཝ ཧོནྟི, སཏྟཱནཾ ཝསཱཡཏྟཝུཏྟིཀཱ ན ཧོནྟི. པཙྩཡཱཡཏྟ ཝུཏྟིཀེསུ ཙ ཏེསུ ན ཨེཀོཔི དྷམྨོ ཨཔྤཀེན པཙྩཡེན ཨུཔྤཛྫཏི. ཨཐ ཁོ བཧཱུཧི ཨེཝ པཙྩཡེཧི ཨུཔྤཛྫཏཱིཏི, ཏསྨཱ ཨཡཾ དེསནཱ དྷམྨཱནཾ ཨནཏྟལཀྑཎདཱིཔནེ མཏྠཀཔཏྟཱ ཧོཏཱིཏི.

པཙྩཡགྷཊནཱནཡོ ཝུཙྩཏེ. ཨེཀེཀསྨིཾ པཙྩཡུཔྤནྣེ བཧུནྣཾ པཙྩཡཱནཾ སམོདྷཱནཾ པཙྩཡགྷཊནཱ ནཱམ. ཡེན པན དྷམྨཱ སཔྤཙྩཡཱ སངྑཏཱ པཊིཙྩསམུཔྤནྣཱཏི ཝུཙྩནྟི, སབྦེ ཏེ དྷམྨཱ ཨུཔྤཱདེ ཙ ཋིཏིཡཉྩ ཨིམེཧི ཙཏུཝཱིསཏིཡཱ པཙྩཡེཧི སཧིཏཏྟཱ སཔྤཙྩཡཱ ནཱམ, སཔྤཙྩཡཏྟཱ སངྑཏཱ ནཱམ, སངྑཏཏྟཱ པཊིཙྩསམུཔྤནྣཱ ནཱམ. ཀཏམེ པན ཏེ དྷམྨཱཏི. ཨེཀཝཱིསསཏཙིཏྟཱནི ཙ དྭིཔཉྙཱསཙེཏསིཀཱནི ཙ ཨཊྛཝཱིསཏི རཱུཔཱནི ཙ.

ཏཏྠ ཨེཀཝཱིསསཏཙིཏྟཱནི དྷཱཏུཝསེན སཏྟཝིདྷཱནི བྷཝནྟི, ཙཀྑུ ཝིཉྙཱཎདྷཱཏུ སོཏཝིཉྙཱཎདྷཱཏུ གྷཱནཝིཉྙཱཎདྷཱཏུ ཛིཝ྄ཧཱ ཝིཉྙཱཎདྷཱཏུ ཀཱཡཝིཉྙཱཎདྷཱཏུ མནོདྷཱཏུ མནོཝིཉྙཱཎ དྷཱཏཱུཏི. ཏཏྠ ཙཀྑུཝིཉྙཱཎདྭཡཾ ཙཀྑུཝིཉྙཱཎདྷཱཏུ ནཱམ. སོཏཝིཉྙཱཎདྭཡཾ སོཏཝིཉྙཱཎདྷཱཏུ ནཱམ. གྷཱནཝིཉྙཱཎདྭཡཾ གྷཱནཝིཉྙཱཎདྷཱཏུ ནཱམ. ཛིཝ྄ཧཱཝིཉྙཱཎདྭཡཾ ཛིཝ྄ཧཱཝིཉྙཱཎདྷཱཏུ ནཱམ. ཀཱཡཝིཉྙཱཎདྭཡཾ ཀཱཡཝིཉྙཱཎདྷཱཏུ ¶ ནཱམ. པཉྩདྭཱརཱཝཛྫན ཙིཏྟཉྩ སམྤཊིཙྪནཙིཏྟདྭཡཉྩ མནོདྷཱཏུ ནཱམ. སེསཱནི ཨཊྛསཏཾ ཙིཏྟཱནི མནོཝིཉྙཱཎདྷཱཏུ ནཱམ.

དྭིཔཉྙཱསཙེཏསིཀཱནི ཙ རཱསིཝསེན ཙཏུབྦིདྷཱནི བྷཝནྟི, སཏྟ སབྦཙིཏྟིཀཱནི ཙ ཚ པཀིཎྞཀཱནི ཙ ཙུདྡས པཱཔཱནིཙ པཉྩཝཱིསཏི ཀལྱཱཎཱནི ཙ.

ཙཏུཝཱིསཏིཔཙྩཡེསུ ཙ པནྣརསཔཙྩཡཱ སབྦཙིཏྟུཔྤཱད སཱདྷཱརཎཱ ཧོནྟི, ཨཱརམྨཎཉྩ ཨནནྟརཉྩ སམནནྟརཉྩ སཧ ཛཱཏོ ཙ ཨཉྙམཉྙཉྩ ནིསྶཡོ ཙ ཨུཔནིསྶཡོ ཙ ཀམྨཉྩ ཨཱཧཱརོ ཙ ཨིནྡྲིཡཉྩ སམྤཡུཏྟོ ཙ ཨཏྠི ཙ ནཏྠི ཙ ཝིགཏོ ཙ ཨཝིགཏོ ཙ. ན ཧི ཀིཉྩི ཙིཏྟཾ ཝཱ ཙེཏསིཀཾ ཝཱ ཨཱརམྨཎེན ཝིནཱ ཨུཔྤནྣཾ ནཱམ ཨཏྠི. ཏཐཱ ཨནནྟརཱདཱིཧི ཙ. ཨཊྛཔཙྩཡཱ ཀེསཉྩི ཙིཏྟུཔྤཱདཱནཾ པཙྩཡཱ སཱདྷཱརཎཱ ཧོནྟི, ཧེཏུ ཙ ཨདྷིཔཏི ཙ པུརེ ཛཱཏོ ཙ ཨཱསེཝནཉྩ ཝིཔཱཀོ ཙ ཛྷཱནཉྩ མགྒོ ཙ ཝིཔྤཡུཏྟོ ཙ. ཏཏྠ ཧེཏུ སཧེཏུཀཙིཏྟུཔྤཱདཱནཾ ཨེཝ སཱདྷཱརཎཱ, ཨདྷིཔཏི ཙ སཱདྷིཔཏིཛཝནཱནཾ ཨེཝ, པུརེཛཱཏོ ཙ ཀེསཉྩི ཙིཏྟུཔྤཱདཱནཾ ཨེཝ, ཨཱསེཝནཉྩ ཀུསལཱཀུསལཀིརིཡཛཝནཱནཾ ཨེཝ, ཝིཔཱཀོ ཙ ཝིཔཱཀཙིཏྟུཔྤཱདཱནཾ ཨེཝ, ཛྷཱནཉྩ མནོདྷཱཏུ མནོཝིཉྙཱཎདྷཱཏུ ཙིཏྟུཔྤཱདཱནཾ ཨེཝ, མགྒོ ཙ སཧེཏུཀཙིཏྟུཔྤཱདཱནཾ ཨེཝ, ཝིཔྤཡུཏྟོ ཙ ཨརཱུཔལོཀེ ཙིཏྟུཔྤཱདཱནཾ ནཏྠི, ཨེཀོ པཙྪཱཛཱཏོ རཱུཔདྷམྨཱནཾ ཨེཝ ཝིསུཾབྷཱུཏོ ཧོཏི.

ཏཏྲཱཡཾ དཱིཔནཱ. སཏྟ སབྦཙིཏྟིཀཱནི ཙེཏསིཀཱནི ནཱམ, ཕསྶོ ཝེདནཱ སཉྙཱ ཙེཏནཱ ཨེཀགྒཏཱ ཛཱིཝིཏཾ མནསིཀཱརོ. ཏཏྠ ཙིཏྟཾ ཨདྷིཔཏིཛཱཏིཀཉྩ ཨཱཧཱརཔཙྩཡོ ཙ ཨིནྡྲིཡཔཙྩཡོ ཙ. ཕསྶོ ཨཱཧཱརཔཙྩཡོ. ཝེདནཱ ཨིནྡྲིཡཔཙྩཡོ ཙ ཛྷཱན པཙྩཡོ ཙ. ཙེཏནཱ ཀམྨཔཙྩཡོ ཙ ཨཱཧཱརཔཙྩཡོ ཙ. ཨེཀགྒཏཱ ཨིནྡྲིཡཔཙྩཡོ ཙ ཛྷཱན པཙྩཡོ ཙ མགྒཔཙྩཡོ ཙ. ཛཱིཝིཏཾ ཨིནྡྲིཡཔཙྩཡོ. སེསཱ དྭེ དྷམྨཱ ཝིསེསཔཙྩཡཱ ན ཧོནྟི.

ཙཀྑུཝིཉྙཱཎེ སཏྟ སབྦཙིཏྟིཀཱནི ཙེཏསིཀཱནི ལབྦྷནྟི, ཝིཉྙཱཎེན སདྡྷིཾ ཨཊྛ ནཱམདྷམྨཱ ཧོནྟི. སབྦེ ཏེ དྷམྨཱ སཏྟཧི པཙྩཡེཧི ཨཉྙམཉྙསྶ པཙྩཡཱ ཧོནྟི ཙཏཱུཧི མཧཱསཧཛཱཏེཧི ཙ ཝིཔྤཡུཏྟཝཛྫིཏེཧི ཏཱིཧི མཛ྄ཛྷིམསཧཛཱཏེཧི ཙ. ཏེསྭེཝ ཨཊྛསུ དྷམྨེསུ ཝིཉྙཱཎཾ སེསཱནཾ སཏྟནྣཾ དྷམྨཱནཾ ཨཱཧཱརཔཙྩཡེན ཙ ཨིནྡྲིཡཔཙྩཡེན ཙ པཙྩཡོ ཧོཏི. ཕསྶོ ཨཱཧཱརཔཙྩཡེན, ཝེདནཱ ཨིནྡྲིཡཔཙྩཡམཏྟེན, ཙེཏནཱ ཀམྨཔཙྩཡེན ཙ ཨཱཧཱར པཙྩཡེན ཙ, ཨེཀགྒཏཱ ཨིནྡྲིཡཔཙྩཡམཏྟེན ¶ , ཛཱིཝིཏཾ སེསཱནཾ སཏྟནྣཾ དྷམྨཱནཾ ཨིནྡྲིཡཔཙྩཡེན པཙྩཡོ ཧོཏི. ཙཀྑུཝཏྠུརཱུཔཾ པན ཏེསཾ ཨཊྛནྣཾ དྷམྨཱནཾ ཚཧི ཝཏྠུཔུརེཛཱཏེཧི ཏསྨིཾ ཙཀྑུཝཏྠུམྷི ཨཱཔཱཏམཱགཏཱནི པཙྩུཔྤནྣཱནི རཱུཔཱརམྨཎཱནི ཏེསཾ ཙཏཱུཧི ཨཱརམྨཎ པུརེཛཱཏེཧི, ཨནནྟརནིརུདྡྷཾ པཉྩདྭཱརཱཝཛྫནཙིཏྟཉྩ པཉྩཧི ཨནནྟརེཧི, པུབྦེ ཀཏཾ ཀུསལཀམྨཾ ཝཱ ཨཀུསལཀམྨཾ ཝཱ ཀུསལཝིཔཱཀཱནཾ ཝཱ ཨཀུསལཝིཔཱཀཱནཾ ཝཱ ཏེསཾ ནཱནཱཀྑཎིཀཀམྨཔཙྩཡེན, ཀམྨ སཧཱཡབྷཱུཏཱནི པུརིམབྷཝེ ཨཝིཛྫཱཏཎྷཱུཔཱདཱནཱནི ཙ ཨིམསྨིཾ བྷཝེ ཨཱཝཱསཔུགྒལཨུཏུབྷོཛནཱདཡོ ཙ ཏེསཾ ཨཊྛནྣཾ དྷམྨཱནཾ པཀཏཱུཔནིསྶཡཔཙྩཡེན པཙྩཡཱ ཧོནྟི. ཨིམསྨིཾ ཙིཏྟེ ཧེཏུ ཙ ཨདྷིཔཏི ཙ པཙྪཱཛཱཏོ ཙ ཨཱསེཝནཉྩ ཛྷཱནཉྩ མགྒོཙཱཏི ཚཔཙྩཡཱ ན ལབྦྷནྟི, ཨཊྛཱརསཔཙྩཡཱ ལབྦྷནྟི. ཡཐཱ ཙ ཨིམསྨིཾ ཙིཏྟེ, ཏཐཱ སོཏཝིཉྙཱཎཱདཱིསུཔི ཚ པཙྩཡཱ ན ལབྦྷནྟི, ཨཊྛཱརསཔཙྩཡཱ ལབྦྷནྟཱིཏི.

པཉྩཝིཉྙཱཎེསུ པཙྩཡགྷཊནཱནཡོ ནིཊྛིཏོ.

ཨཧེཏུཀ ཙིཏྟུཔྤཱདེསུ པཙྩཡགྷཊནཱནཡོ

ཚ པཀིཎྞཀཱནི ཙེཏསིཀཱནི ནཱམ, ཝིཏཀྐོ ཝིཙཱརོ ཨདྷིམོཀྑོ ཝཱིརིཡཾ པཱིཏི ཚནྡོ. ཏཏྠ ཝིཏཀྐོ ཛྷཱནཔཙྩཡོ ཙ མགྒཔཙྩཡོ ཙ. ཝིཙཱརོ ཛྷཱནཔཙྩཡོ. ཝཱིརིཡཾ ཨདྷིཔཏིཛཱཏིཀཉྩ ཨིནྡྲིཡཔཙྩཡོ ཙ མགྒཔཙྩཡོ ཙ. པཱིཏི ཛྷཱནཔཙྩཡོ. ཚནྡོ ཨདྷིཔཏིཛཱཏིཀོ. ཨདྷིམོཀྑོ པན ཝིསེསཔཙྩཡོ ན ཧོཏི.

པཉྩདྭཱརཱཝཛྫནཙིཏྟཉྩ སམྤཊིཙྪནཙིཏྟདྭཡཉྩ ཨུཔེཀྑཱསནྟཱིརཎ དྭཡཉྩཱཏི པཉྩསུ ཙིཏྟེསུ དས ཙེཏསིཀཱནི ལབྦྷནྟི, སཏྟ སབྦ ཙིཏྟིཀཱནི ཙ པཀིཎྞཀེསུ ཝིཏཀྐོ ཙ ཝིཙཱརོ ཙ ཨདྷིམོཀྑོ ཙ. ཝིཉྙཱཎེན སདྡྷིཾ པཙྩེཀཾ ཨེཀཱདས ནཱམདྷམྨཱ ཧོནྟི. ཨིམེསུ ཙིཏྟེསུ ཛྷཱནཀིཙྩཾ ལབྦྷཏི. ཝེདནཱ ཙ ཨེཀགྒཏཱ ཙ ཝིཏཀྐོ ཙ ཝིཙཱརོ ཙ ཛྷཱནཔཙྩཡཾ སཱདྷེནྟི. པཉྩདྭཱརཱཝཛྫནཙིཏྟཾ པན ཀིརིཡཙིཏྟཾ ཧོཏི, ཝིཔཱཀཔཙྩཡོ ནཏྠི. ནཱནཱཀྑཎིཀཀམྨཉྩ ཨུཔནིསྶཡཊྛཱནེ ཏིཊྛཏི. ཝིཔཱཀཔཙྩཡེན སདྡྷིཾ ཚ པཙྩཡཱ ན ལབྦྷནྟི. ཛྷཱནཔཙྩཡེན སདྡྷིཾ ཨཊྛཱརསཔཙྩཡཱ ལབྦྷནྟི. སེསེསུ ཙཏཱུསུ ཝིཔཱཀཙིཏྟེསུ པཉྩ པཙྩཡཱ ན ལབྦྷནྟི. ཝིཔཱཀཔཙྩཡེན ཙ ཛྷཱནཔཙྩཡེན ཙ སདྡྷིཾ ཨེཀཱུནཝཱིསཏི པཙྩཡཱ ལབྦྷནྟི.

སོམནསྶསནྟཱིརཎེ པཱིཏིཡཱ སདྡྷིཾ ཨེཀཱདསཙེཏསིཀཱ ཡུཛྫནྟི, མནོདྭཱརཱཝཛྫནཙིཏྟེ ཙ ཝཱིརིཡེན སདྡྷིཾ ཨེཀཱདསཱཏི ཝིཉྙཱཎེན སདྡྷིཾ དྭཱདས ¶ ནཱམདྷམྨཱ ཧོནྟི. ཧསིཏུཔྤཱདཙིཏྟེ པན པཱིཏིཡཱ ཙ ཝཱིརིཡེན ཙ སདྡྷིཾ དྭཱདས ཙེཏསིཀཱནི ཡུཛྫནྟི. ཝིཉྙཱཎེན སདྡྷིཾ ཏེརས ནཱམདྷམྨཱ ཧོནྟི. ཏཏྠ སོམནསྶསནྟཱིརཎེ ཛྷཱནངྒེསུ པཱིཏིམཏྟཾ ཨདྷིཀཾ ཧོཏི, པུབྦེ ཨུཔེཀྑཱསནྟཱིརཎདྭཡེ ཝིཡ པཉྩཔཙྩཡཱ ན ལབྦྷནྟི. ཨེཀཱུནཝཱིསཏིཔཙྩཡཱ ལབྦྷནྟི. མནོདྭཱརཱ ཝཛྫནཙིཏྟེ ཙ ཝཱིརིཡམཏྟཾ ཨདྷིཀཾ ཧོཏི, ཏཉྩ ཨིནྡྲིཡཀིཙྩ ཛྷཱན ཀིཙྩཱནིསཱདྷེཏི. ཨདྷིཔཏིཀིཙྩཉྩ མགྒཀིཙྩཉྩ ན སཱདྷེཏི. ཀིརིཡ ཙིཏྟཏྟཱཝིཔཱཀཔཙྩཡོ ཙ ནཏྠི. པུབྦེ པཉྩདྭཱརཱཝཛྫནཙིཏྟེ ཝིཡ ཝིཔཱཀ པཙྩཡེན སདྡྷིཾ ཚ པཙྩཡཱ ན ལབྦྷནྟི. ཛྷཱནཔཙྩཡེན སདྡྷིཾ ཨཊྛརས པཙྩཡཱ ལབྦྷནྟི. ཧསིཏུཔྤཱདཙིཏྟེཔི ཀིརིཡཙིཏྟཏྟཱ ཝིཔཱཀཔཙྩཡོ ནཏྠི, ཛཝནཙིཏྟཏྟཱ པན ཨཱསེཝནཾ ཨཏྠི, ཝིཔཱཀཔཙྩཡེན སདྡྷིཾ པཉྩ པཙྩཡཱ ན ལབྦྷནྟི. ཨཱསེཝནཔཙྩཡེན སདྡྷིཾ ཨེཀཱུནཝཱིསཏི པཙྩཡཱ ལབྦྷནྟི.

ཨཧེཏུཀཙིཏྟུཔྤཱདེསུ པཙྩཡགྷཊནཱནཡོ ནིཊྛིཏོ.

ཨཀུསལཙིཏྟུཔྤཱདེསུ པཙྩཡགྷཊནཱནཡོ

དྭཱདས ཨཀུསལཙིཏྟཱནི, དྭེ མོཧམཱུལིཀཱནི ཨཊྛ ལོབྷ མཱུལིཀཱནི དྭེ དོསམཱུལིཀཱནི. ཙུདྡས པཱཔཙེཏསིཀཱནི ནཱམ མོཧོ ཨཧིརིཀཾ ཨནོཏྟཔྤཾ ཨུདྡྷཙྩནྟི ཨིདཾ མོཧཙཏུཀྐཾ ནཱམ. ལོབྷོ དིཊྛི མཱནོཏི ཨིདཾ ལོབྷཏིཀྐཾ ནཱམ. དོསོ ཨིསྶཱ མཙྪརིཡཾ ཀུཀྐུཙྩནྟི ཨིདཾ དོསཙཏུཀྐཾ ནཱམ. ཐིནཾ མིདྡྷཾ ཝིཙིཀིཙྪཱཏི ཨིདཾ ཝིསུཾ ཏིཀྐཾ ནཱམ.

ཏཏྠ ལོབྷོ དོསོ མོཧོཏི ཏཡོ མཱུལདྷམྨཱ ཧེཏུཔཙྩཡཱ, དིཊྛི མགྒཔཙྩཡོ, སེསཱ དསདྷམྨཱ ཝིསེསཔཙྩཡཱ ན ཧོནྟི.

ཏཏྠ དྭེ མོཧམཱུལིཀཱནི ནཱམ ཝིཙིཀིཙྪཱསམྤཡུཏྟཙིཏྟཾ ཨུདྡྷཙྩ སམྤཡུཏྟཙིཏྟཾ. ཏཏྠ ཝིཙིཀིཙྪཱསམྤཡུཏྟཙིཏྟེ པནྣརས ཙེཏསིཀཱནི ཨུཔྤཛྫནྟི སཏྟ སབྦཙིཏྟིཀཱནི ཙ ཝིཏཀྐོ ཝིཙཱརོ ཝཱིརིཡནྟི ཏཱིཎི པཀིཎྞཀཱནི ཙ པཱཔཙེཏསིཀེསུ མོཧཙཏུཀྐཉྩ ཝིཙིཀིཙྪཱ ཙཱཏི, ཙིཏྟེན སདྡྷིཾ སོལ༹ས ནཱམདྷམྨཱ ཧོནྟི. ཨིམསྨིཾ ཙིཏྟེ ཧེཏུ པཙྩཡོཔི མགྒཔཙྩཡོཔི ལབྦྷནྟི. ཏཏྠ མོཧོ ཧེཏུཔཙྩཡོ, ཝིཏཀྐོ ཙ ཝཱིརིཡཉྩ མགྒཔཙྩཡོ, ཨེཀགྒཏཱ པན ཝིཙིཀིཙྪཱཡ དུཊྛཏྟཱ ཨིམསྨིཾ ཙིཏྟེ ཨིནྡྲིཡཀིཙྩཉྩ མགྒཀིཙྩཉྩ ན སཱདྷེཏི, ཛྷཱནཀིཙྩམཏྟཾ སཱདྷེཏི. ཨདྷིཔཏི ཙ པཙྪཱཛཱཏོ ཝིཔཱཀོ ཙཱཏི ཏཡོ པཙྩཡཱན ལབྦྷནྟི, སེསཱ ཨེཀཝཱིསཏིཔཙྩཡཱ ལབྦྷནྟི. ཨུདྡྷཙྩསམྤཡུཏྟཙིཏྟེཔི ཝིཙིཀིཙྪཾ པཧཱཡ ཨདྷིམོཀྑེན སདྡྷིཾ པནྣརསེཝ ཙེཏསིཀཱནི, སོལ༹སེཝ ནཱམདྷམྨཱ ཧོནྟི ¶ . ཨིམསྨིཾ ཙིཏྟེ ཨེཀགྒཏཱ ཨིནྡྲིཡ ཀིཙྩཉྩ ཛྷཱནཀིཙྩཉྩ མགྒཀིཙྩཉྩ སཱདྷེཏི, ཏཡོ པཙྩཡཱ ན ལབྦྷནྟི, ཨེཀཝཱིསཏི པཙྩཡཱ ལབྦྷནྟི.

ཨཊྛསུ ལོབྷམཱུལིཀཙིཏྟེསུ པན སཏྟ སབྦཙིཏྟིཀཱནི ཙ ཚ པཀིཎྞཀཱནི ཙ པཱཔེསུ མོཧཙཏུཀྐཉྩ ལོབྷཏིཀྐཉྩ ཐིནམིདྡྷཉྩཱཏི དྭཱཝཱིསཏི ཙེཏསིཀཱནི ཨུཔྤཛྫནྟི. ཏེསུ ལོབྷོ ཙ མོཧོཙཱཏི དྭེ མཱུལཱནི ཧེཏུཔཙྩཡོ. ཚནྡོ ཙ ཙིཏྟཉྩ ཝཱིརིཡཉྩཱཏི ཏཡོ ཨདྷིཔཏིཛཱཏིཀཱ ཀདཱཙི ཨདྷིཔཏིཀིཙྩཾ སཱདྷེནྟི, ཨཱརམྨཎཱདྷིཔཏིཔི ཨེཏྠ ལབྦྷཏི. ཙེཏནཱ ཀམྨཔཙྩཡོ. ཏཡོ ཨཱཧཱརཱ ཨཱཧཱརཔཙྩཡོ. ཙིཏྟཉྩ ཝེདནཱ ཙ ཨེཀགྒཏཱ ཙ ཛཱིཝིཏཉྩ ཝཱིརིཡཉྩཱཏི པཉྩ ཨིནྡྲིཡདྷམྨཱ ཨིནྡྲིཡཔཙྩཡོ. ཝིཏཀྐོ ཙ ཝིཙཱརོ ཙ པཱིཏི ཙ ཝེདནཱ ཙ ཨེཀགྒཏཱཙཱཏི པཉྩ ཛྷཱནངྒཱནི ཛྷཱནཔཙྩཡོ. ཝིཏཀྐོ ཙ ཨེཀགྒཏཱ ཙ དིཊྛི ཙ ཝཱིརིཡཉྩཱཏི ཙཏྟཱརི མགྒངྒཱནི མགྒཔཙྩཡོ. པཙྪཱཛཱཏོ ཙ ཝིཔཱཀོ ཙཱཏི དྭེ པཙྩཡཱ ན ལབྦྷནྟི. སེསཱ དྭཱཝཱིསཏི པཙྩཡཱ ལབྦྷནྟི.

དྭཱིསུ དོསམཱུལིཀཙིཏྟེསུ པཱིཏིཉྩ ལོབྷཏིཀྐཉྩ པཧཱཡ དོསཙཏུཀྐེན སདྡྷིཾ དྭཱཝཱིསཏི ཨེཝ ཙེཏསིཀཱནི, དོསོ ཙ མོཧོ ཙ དྭེ མཱུལཱནི, ཏཡོ ཨདྷིཔཏི ཛཱཏིཀཱ, ཏཡོ ཨཱཧཱརཱ, པཉྩ ཨིནྡྲིཡཱནི, ཙཏྟཱརི ཛྷཱནངྒཱནི, ཏཱིཎི མགྒངྒཱནི. ཨེཏྠཱཔི དྭེ པཙྩཡཱ ན ལབྦྷནྟི, དྭཱཝཱིསཏི པཙྩཡཱ ལབྦྷནྟི.

ཨཀུསལཙིཏྟུཔྤཱདེསུ པཙྩཡགྷཊནཱནཡོ ནིཊྛིཏོ.

ཨེཀནཝུཏི སོབྷཎཙིཏྟཱནི ནཱམ, ཙཏུཝཱིསཏི ཀཱམ སོབྷཎཙིཏྟཱནི པནྣརས རཱུཔཙིཏྟཱནི དྭཱདས ཨརཱུཔཙིཏྟཱནི ཙཏྟཱལཱིས ལོཀུཏྟརཙིཏྟཱནི. ཏཏྠ ཙཏུཝཱིསཏི ཀཱམསོབྷཎ ཙིཏྟཱནི ནཱམ ཨཊྛ ཀཱམཀུསལཙིཏྟཱནི ཨཊྛ ཀཱམསོབྷཎཝིཔཱཀ ཙིཏྟཱནི ཨཊྛ ཀཱམསོབྷཎཀིརིཡཙིཏྟཱནི.

པཉྩ ཝཱིསཏི ཀལྱཱཎཙེཏསིཀཱནི ནཱམ, ཨལོབྷོ ཨདོསོ ཨམོཧོཙེཏི ཏཱིཎི ཀལྱཱཎམཱུལིཀཱནི ཙ སདྡྷཱ ཙ སཏི ཙ ཧིརཱི ཙ ཨོཏྟཔྤཉྩ ཏཏྲམཛ྄ཛྷཏྟཏཱ ཙ ཀཱཡཔསྶདྡྷི ཙ ཙིཏྟ པསྶདྡྷི ཙ ཀཱཡལཧུཏཱ ཙ ཙིཏྟལཧུཏཱ ཙ ཀཱཡམུདུཏཱ ཙ ཙིཏྟ མུདུཏཱ ཙ ཀཱཡཀམྨཉྙཏཱ ཙ ཙིཏྟ ཀམྨཉྙཏཱ ཙ ཀཱཡཔཱགུཉྙཏཱ ཙ ཙིཏྟཔཱགུཉྙཏཱ ཙ ཀཱཡུཛུཀཏཱ ཙ ཙིཏྟུཛུཀཏཱ ¶ ཙ སམྨཱཝཱཙཱ སམྨཱཀམྨནྟོ སམྨཱཨཱཛཱིཝོཏི ཏིསྶོ ཝིརཏིཡོ ཙ ཀརུཎཱ མུདིཏཱཏི དྭེ ཨཔྤམཉྙཱཡོ ཙ.

ཏཏྠ ཏཱིཎི ཀལྱཱཎམཱུལཱནི ཧེཏུཔཙྩཡོ, ཨམོཧོ པན ཨདྷིཔཏིཔཙྩཡེ ཝཱིམཾསཱདྷིཔཏིནཱམ, ཨིནྡྲིཡཔཙྩཡེ པཉྙིནྡྲིཡཾ ནཱམ, མགྒཔཙྩཡེ སམྨཱདིཊྛི ནཱམ. སདྡྷཱ ཨིནྡྲིཡཔཙྩཡེ སདྡྷིནྡྲིཡཾ ནཱམ. སཏི ཨིནྡྲིཡཔཙྩཡེ སཏིནྡྲིཡཾ ནཱམ, མགྒཔཙྩཡེ སམྨཱསཏི ནཱམ. ཏིསྶོ ཝིརཏིཡོ མགྒཔཙྩཡོ, སེསཱ སཏྟརས དྷམྨཱ ཝིསེསཔཙྩཡཱ ན ཧོནྟི.

ཨཊྛསུ ཀཱམཀུསལཙིཏྟེསུ ཨཊྛཏིཾས ཙེཏསིཀཱནི སངྒཡ྄ཧནྟི, སཏྟ སབྦཙིཏྟིཀཱནི ཚ པཀིཎྞཀཱནི པཉྩཝཱིསཏི ཀལྱཱཎཱནི. ཏེསུ ཙ པཱིཏི ཙཏཱུསུ སོམནསྶིཀེསུ ཨེཝ, ཨམོཧོ ཙཏཱུསུ ཉཱཎསམྤཡུཏྟེསུ ཨེཝ, ཏིསྶོ ཝིརཏིཡོ སིཀྑཱཔདསཱིལཔཱུརཎ ཀཱལེ ཨེཝ, དྭེ ཨཔྤམཉྙཱཡོ སཏྟེསུ ཀཱརུཉྙམོདནཱཀཱརེསུ ཨེཝཱཏི. ཨིམེསུཔི ཨཊྛསུ ཙིཏྟེསུ དྭེ ཝཱ ཏཱིཎི ཝཱ ཀལྱཱཎམཱུལཱནི ཧེཏུཔཙྩཡོ, ཚནྡོ ཙ ཙིཏྟཉྩ ཝཱིརིཡཉྩ ཝཱིམཾསཱཙཱཏི ཙཏཱུསུ ཨདྷིཔཏིཛཱཏིཀེསུ ཨེཀམེཀོཝ ཀདཱཙི ཨདྷིཔཏིཔཙྩཡོ. ཙེཏནཱ ཀམྨཔཙྩཡོ. ཏཡོ ཨཱཧཱརཱ ཨཱཧཱརཔཙྩཡོ. ཙིཏྟཉྩ ཝེདནཱ ཙ ཨེཀགྒཏཱ ཙ ཛཱིཝིཏཉྩ སདྡྷཱ ཙ སཏི ཙ ཝཱིརིཡཉྩ པཉྙཱཙཱཏི ཨཊྛ ཨིནྡྲིཡཱནི ཨིནྡྲིཡཔཙྩཡོ. ཝིཏཀྐོ ཙ ཝིཙཱརོ ཙ པཱིཏི ཙ ཝེདནཱ ཙ ཨེཀགྒཏཱཙཱཏི པཉྩཛྷཱནངྒཱནི ཛྷཱནཔཙྩཡོ. པཉྙཱ ཙ ཝིཏཀྐོ ཙ ཏིསྶོ ཝིརཏིཡོ ཙ སཏི ཙ ཝཱིརིཡཉྩ ཨེཀགྒཏཱཙཱཏི ཨཊྛ མགྒངྒཱནི མགྒཔཙྩཡོ. ཨིམེསུཔི ཨཊྛསུ ཙིཏྟེསུ པཙྪཱཛཱཏོ ཙ ཝིཔཱཀོཙཱཏི དྭེ པཙྩཡཱ ན ལབྦྷནྟི, སེསཱ དྭཱཝཱིསཏིཔཙྩཡཱ ལབྦྷནྟི.

ཨཊྛསུ ཀཱམསོབྷཎཀིརིཡཙིཏྟེསུ ཏིསྶོ ཝིརཏིཡོ ན ལབྦྷནྟི, ཀུསལེསུ ཝིཡ དྭེ པཙྩཡཱ ན ལབྦྷནྟི, དྭཱཝཱིསཏི པཙྩཡཱ ལབྦྷནྟི.

ཨཊྛསུ ཀཱམསོབྷཎཝིཔཱཀེསུ ཏིསྶོ ཝིརཏིཡོ ཙ དྭེ ཨཔྤམཉྙཱཡོ ཙ ན ལབྦྷནྟི. ཨདྷིཔཏིཔཙྩཡོ ཙ པཙྪཱཛཱཏོ ཙ ཨཱསེཝནཉྩཱཏི ཏཡོ པཙྩཡཱ ན ལབྦྷནྟི, ཨེཀཝཱིསཏི པཙྩཡཱ ལབྦྷནྟི.

ཨུཔརི རཱུཔཱརཱུཔལོཀུཏྟརཙིཏྟེསུཔི དྭཱཝཱིསཏིཔཙྩཡཏོ ཨཏིརེཀཾ ནཏྠི. ཏསྨཱ ཙཏཱུསུ ཉཱཎསམྤཡུཏྟཀཱམཀུསལ ཙིཏྟེསུ ཝིཡ ཨིམེསུ པཙྩཡགྷཊནཱ ཝེདིཏབྦཱ.

ཨེཝཾ སནྟེ ཀསྨཱ ཏཱནི ཙིཏྟཱནི ཀཱམཙིཏྟཏོ མཧནྟ ཏརཱནི ཙ པཎཱིཏཏརཱནི ཙ ཧོནྟཱིཏི. ཨཱསེཝནམཧནྟཏྟཱ. ཏཱནི ཧི ཙིཏྟཱནི བྷཱཝནཱཀམྨཝིསེསེཧི ¶ སིདྡྷཱནི ཧོནྟི, ཏསྨཱ ཏེསུ ཨཱསེཝནཔཙྩཡོ མཧནྟོ ཧོཏི. ཨཱསེཝན མཧནྟཏྟཱ ཙ ཨིནྡྲིཡཔཙྩཡོཔི ཛྷཱནཔཙྩཡོཔི མགྒཔཙྩཡོཔི ཨཉྙེཔི ཝཱ ཏེསཾ པཙྩཡཱ མཧནྟཱ ཧོནྟི. པཙྩཡཱནཾ ཨུཔརཱུཔརི མཧནྟཏྟཱ ཏཱནི ཙིཏྟཱནི ཨུཔརཱུཔརི ཙ ཀཱམཙིཏྟཏོ མཧནྟཏརཱནི ཙ པཎཱིཏཏརཱནི ཙ ཧོནྟཱིཏི.

ཙིཏྟུཔྤཱདེསུ པཙྩཡགྷཊནཱནཡོ ནིཊྛིཏོ.

རཱུཔཀལཱཔེསུ པཙྩཡགྷཊནཱནཡོ ཝུཙྩཏེ. ཨཊྛཝཱིསཏི རཱུཔཱནི ནཱམ, ཙཏྟཱརི མཧཱབྷཱུཏཱནི པཐཝཱི ཨཱཔོ ཏེཛོ ཝཱཡོ. པཉྩ པསཱདརཱུཔཱནི ཙཀྑུ སོཏཾ གྷཱནཾ ཛིཝ྄ཧཱ ཀཱཡོ. པཉྩ གོཙརརཱུཔཱནི རཱུཔཾ སདྡོ གནྡྷོ རསོ ཕོཊྛབྦཾ. ཏཏྠ ཕོཊྛབྦཾ ཏིཝིདྷཾ པཐཝཱིཕོཊྛབྦཾ ཏེཛོཕོཊྛབྦཾ ཝཱཡོཕོཊྛབྦཾ. དྭེ བྷཱཝརཱུཔཱནི ཨིཏྠིབྷཱཝརཱུཔཾ པུམྦྷཱཝརཱུཔཾ. ཨེཀཾ ཛཱིཝིཏརཱུཔཾ, ཨེཀཾ ཧདཡརཱུཔཾ. ཨེཀཾ ཨཱཧཱརརཱུཔཾ. ཨེཀཾ ཨཱཀཱསདྷཱཏུརཱུཔཾ. དྭེ ཝིཉྙཏྟིརཱུཔཱནི ཀཱཡཝིཉྙཏྟིརཱུཔཾ ཝཙཱིཝིཉྙཏྟི རཱུཔཾ. ཏཱིཎི ཝིཀཱརརཱུཔཱནི ལཧུཏཱ མུདུཏཱ ཀམྨཉྙཏཱ. ཙཏྟཱརི ལཀྑཎརཱུཔཱནི ཨུཔཙཡོ སནྟཏི ཛརཏཱ ཨནིཙྩཏཱ.

ཏཏྠ ཚ རཱུཔདྷམྨཱ རཱུཔདྷམྨཱནཾ པཙྩཡཱ ཧོནྟི ཙཏྟཱརི མཧཱབྷཱུཏཱནི ཙ ཛཱིཝིཏརཱུཔཉྩ ཨཱཧཱརརཱུཔཉྩ. ཏཏྠ ཙཏྟཱརི མཧཱ བྷཱུཏཱནི ཨཉྙམཉྙསྶ པཉྩཧི པཙྩཡེཧི པཙྩཡཱ ཧོནྟི སཧཛཱཏེན ཙ ཨཉྙམཉྙེན ཙ ནིསྶཡེན ཙ ཨཏྠིཡཱ ཙ ཨཝིགཏེནཙ. སཧཛཱཏཱནཾ ཨུཔཱདཱརཱུཔཱནཾ ཨཉྙམཉྙཝཛྫིཏེཧི ཙཏཱུཧི པཙྩཡེཧི པཙྩཡཱ ཧོནྟི. ཛཱིཝིཏརཱུཔཾ སཧཛཱཏཱནཾ ཀམྨཛརཱུཔཱནཾ ཨིནྡྲིཡཔཙྩཡེན པཙྩཡོ. ཨཱཧཱརརཱུཔཾ སཧཛཱཏཱནཉྩ ཨསཧཛཱཏཱནཉྩ སབྦེསཾ ཨཛ྄ཛྷཏྟརཱུཔདྷམྨཱནཾ ཨཱཧཱརཔཙྩཡེན པཙྩཡོ.

ཏཏྠེཝ ཏེརས རཱུཔདྷམྨཱ ནཱམདྷམྨཱནཾ ཝིསེསཔཙྩཡཱ ཧོནྟི, པཉྩཔསཱདརཱུཔཱནི ཙ སཏྟ གོཙརརཱུཔཱནི ཙ ཧདཡཝཏྠུརཱུཔཉྩ. ཏཏྠ པཉྩ པསཱདརཱུཔཱནི པཉྩནྣཾ ཝིཉྙཱཎདྷཱཏཱུནཾ མཱཏརོ ཝིཡ པུཏྟཀཱནཾ ཝཏྠུཔུརེཛཱཏེན ཙ ཝཏྠུཔུརེཛཱཏིནྡྲིཡེན ཙ ཝཏྠུ པུརེཛཱཏཝིཔྤཡུཏྟེན ཙ པཙྩཡཱ ཧོནྟི. སཏྟ གོཙརརཱུཔཱནི པཉྩནྣཾ ཝིཉྙཱཎདྷཱཏཱུནཾ ཏིསྶནྣཾ མནོདྷཱཏཱུནཉྩ པིཏརོ ཝིཡ པུཏྟཀཱནཾ ཨཱརམྨཎཔུརེཛཱཏེན པཙྩཡཱ ཧོནྟི. ཧདཡཝཏྠུརཱུཔཾ དྭིནྣཾ མནོདྷཱཏུ མནོཝིཉྙཱཎདྷཱཏཱུནཾ རུཀྑོ ཝིཡ རུཀྑདེཝཏཱནཾ ཡཐཱརཧཾ ¶ པཊིསནྡྷིཀྑཎེ སཧཛཱཏནིསྶཡེན པཝཏྟིཀཱལེ ཝཏྠུཔུརེཛཱཏེན ཙ ཝཏྠུཔུརེཛཱཏཝིཔྤཡུཏྟེན ཙ པཙྩཡོ ཧོཏི.

ཏེཝཱིསཏི རཱུཔཀལཱཔཱ. ཏཏྠ ཨེཀཱཡ རཛྫུཡཱ བནྡྷིཏཱནཾ ཀེསཱནཾ ཀེསཀལཱཔོ ཝིཡ ཏིཎཱནཾ ཏིཎཀལཱཔོ ཝིཡ ཨེཀེན ཛཱཏིརཱུཔེན བནྡྷིཏཱནཾ རཱུཔདྷམྨཱནཾ ཀལཱཔོ པརིཔིཎྜིརཱུཔ ཀལཱཔོ ནཱམ.

ཏཏྠ ཙཏྟཱརི མཧཱབྷཱུཏཱནི ཝཎྞོ གནྡྷོ རསོ ཨོཛཱཏི ཨིམེ ཨཊྛ དྷམྨཱ ཨེཀོ སབྦམཱུལཀལཱཔོ ནཱམ, སབྦམཱུལཊྛཀནྟི ཙ ཝུཙྩཏི.

ནཝ ཀམྨཛརཱུཔཀལཱཔཱ, – ཛཱིཝིཏནཝཀཾ ཝཏྠུདསཀཾ ཀཱཡ དསཀཾ ཨིཏྠིབྷཱཝདསཀཾ པུམྦྷཱཝདསཀཾ ཙཀྑུདསཀཾ སོཏདསཀཾ གྷཱནདསཀཾ ཛིཝ྄ཧཱདསཀཾ. ཏཏྠ སབྦམཱུལཊྛཀམེཝཛཱིཝིཏརཱུཔེན སཧ ཛཱིཝིཏནཝཀཾ ནཱམ. ཨེཏདེཝ ཀམྨཛཀལཱཔེསུ མཱུལནཝཀཾ ཧོཏི. མཱུལནཝཀམེཝ ཡཐཱཀྐམཾ ཧདཡཝཏྠུརཱུཔཱདཱིཧི ཨཊྛརཱུཔེཧི སཧ ཝཏྠུདསཀཱདཱིནི ཨཊྛདསཀཱནི བྷཝཏི. ཏཏྠ ཛཱིཝིཏནཝཀཉྩ ཀཱཡདསཀཉྩ བྷཱཝདསཀཱནིཙཱཏི ཙཏྟཱརོ ཀལཱཔཱ སཀལ ཀཱཡེ པཝཏྟནྟི. ཏཏྠ ཛཱིཝིཏནཝཀནྟི པཱཙཀགྒི ཙ ཀཱཡགྒི ཙ ཝུཙྩཏི. པཱཙཀགྒི ནཱམ པཱཙཀཏེཛོ ཀོཊྛཱསོ, སོ ཨཱམཱསཡེ པཝཏྟིཏྭཱ ཨསིཏཔཱིཏཁཱཡིཏསཱཡིཏཱནི པརིཔཱཙེཏི. ཀཱཡགྒི ནཱམ སཀལཀཱཡབྱཱཔཀོ ཨུསྨཱཏེཛོ ཀོཊྛཱསོ, སོ སཀལ ཀཱཡེ པཝཏྟིཏྭཱ པིཏྟསེམྷལོཧིཏཱནི ཨཔཱུཏཱིནི ཝིཔྤསནྣཱནི ཀརོཏི. ཏེསཾ དྭིནྣཾ ཝིསམཝུཏྟིཡཱ སཏི སཏྟཱ བཧྭཱབཱདྷཱ ཧོནྟི, སམཝུཏྟིཡཱ སཏི ཨཔྤཱབཱདྷཱ. ཏདུབྷཡཾ ཛཱིཝིཏནཝཀཾ སཏྟཱནཾ ཨཱཡུཾ སམྤཱདེཏི. ཝཎྞཾ སམྤཱདེཏི. ཀཱཡདསཀཾ སཀལཀཱཡེ སུཁསམྥསྶ དུཀྑསམྥསྶཱནི སམྤཱདེཏི. བྷཱཝ དསཀཱནི ཨིཏྠཱིནཾ སབྦེ ཨིཏྠཱཀཱརེ སམྤཱདེཏི. པུརིསཱནཾ སབྦེ པུརིསཱཀཱརེ སམྤཱདེཧི. སེསཱནི ཝཏྠུདསཀཱདཱིནི པཉྩདསཀཱནི པདེསདསཀཱནི ནཱམ. ཏཏྠ ཝཏྠུདསཀཾ ཧདཡཀོསབྦྷནྟརེ པཝཏྟིཏྭཱ སཏྟཱནཾ ནཱནཱཔཀཱརཱནི སུཙིནྟིཏདུཙིནྟིཏཱནི སམྤཱདེཏི. ཙཀྑུདསཀཱདཱིནི ཙཏྟཱརི དསཀཱནི ཙཀྑུགུལ༹ ཀཎྞབིལ ནཱསབིལ ཛིཝ྄ཧཱཏལེསུ པཝཏྟིཏྭཱ དསྶན སཝན གྷཱཡན སཱཡནཱནི སམྤཱདེཏི.

ཨཊྛ ཙིཏྟཛརཱུཔཀལཱཔཱ, སབྦམཱུལཊྛཀཾ སདྡནཝཀཾ ཀཱཡ ཝིཉྙཏྟིནཝཀཾ སདྡཝཙཱིཝིཉྙཏྟིདསཀནྟི ཙཏྟཱརོ མཱུལཀལཱཔཱ ཙ ཏེཡེཝ ལཧུཏཱ མུདུཏཱ ཀམྨཉྙཏཱསངྑཱཏེཧི ཏཱིཧི ཝིཀཱར རཱུཔེཧི སཧ ཙཏྟཱརོ སཝིཀཱརཀལཱཔཱ ཙ.

ཏཏྠ ¶ སརཱིརདྷཱཏཱུནཾ ཝིསམཔྤཝཏྟིཀཱལེ གིལཱནསྶ མཱུལ ཀལཱཔཱནི ཨེཝ པཝཏྟནྟི. ཏདཱ ཧི ཏསྶ སརཱིརརཱུཔཱནི གརཱུནི ཝཱ ཐདྡྷཱནི ཝཱ ཨཀམྨཉྙཱནི ཝཱ ཧོནྟི, ཡཐཱརུཙི ཨིརིཡཔཐཾཔི པཝཏྟེཏུཾ ཨངྒ པཙྩངྒཱནིཔི ཙཱལེཏུཾ ཝཙནཾཔི ཀཐེཏུཾ དུཀྑོ ཧོཏི. སརཱིརདྷཱཏཱུནཾ སམཔྤཝཏྟིཀཱལེ པན ཨགིལཱནསྶ གརུཐདྡྷཱདཱིནཾ སརཱིརདོསཱནཾ ཨབྷཱཝཏོ སཝིཀཱརཱ པཝཏྟནྟི. ཏེསུ ཙ ཙིཏྟངྒཝསེན ཀཱཡངྒ ཙལནེ དྭེ ཀཱཡཝིཉྙཏྟིཀལཱཔཱ པཝཏྟནྟི. ཙིཏྟཝསེནེཝ མུཁཏོ ཝཙནསདྡཔྤཝཏྟིཀཱལེ དྭེ ཝཙཱིཝིཉྙཏྟིཀལཱཔཱ, ཙིཏྟཝསེནེཝ ཨཀྑརཝཎྞརཧིཏཱནཾ ཧསནརོདནཱདཱིནཾ ཨཝཙནསདྡཱནཾ མུཁཏོ པཝཏྟིཀཱལེ དྭེ སདྡཀལཱཔཱ, སེསཀཱལེསུ དྭེ ཨཱདི ཀལཱཔཱ པཝཏྟནྟི.

ཙཏྟཱརོ ཨུཏུཛརཱུཔཀལཱཔཱ, སབྦམཱུལཊྛཀཾ སདྡནཝཀནྟི དྭེ མཱུལཀལཱཔཱ ཙ དྭེ སཝིཀཱརཀལཱཔཱ ཙ. ཏཏྠ ཨཡཾ ཀཱཡོ ཡཱཝཛཱིཝཾ ཨིརིཡཱཔཐསོཏཾ ཨནུགཙྪནྟོ ཡཱཔེཏི, ཏསྨཱ ཨིརིཡཱཔཐནཱནཏྟཾ པཊིཙྩ ཨིམསྨིཾ ཀཱཡེ ཁཎེ ཁཎེ དྷཱཏཱུནཾ སམཔྤཝཏྟིཝིསམཔྤཝཏྟིཡོ པཉྙཱཡནྟི. ཏཐཱ ཨུཏུནཱནཏྟཾ པཊིཙྩ ཨཱཧཱརནཱནཏྟཾ པཊིཙྩ ཝཱཏཱཏཔསཔྥསྶནཱནཏྟཾ པཊིཙྩ ཀཱཡངྒ པརིཧཱརནཱནཏྟཾ པཊིཙྩ ཨཏྟཱུཔཀྐམཔརཱུཔཀྐམནཱནཏྟཾ པཊིཙྩ. ཏཏྠ ཝིསམཔྤཝཏྟིཀཱལེ དྭེ མཱུལཀལཱཔཱ ཨེཝ པཝཏྟནྟི, སམཔྤཝཏྟིཀཱལེ དྭེ སཝིཀཱརཱ. ཏེསུ ཙ དྭེ སདྡཀལཱཔཱ ཙིཏྟཛསདྡཏོ པརམྤརསདྡེསུ ཙ ཨཉྙེསུ ལོཀེ ནཱནཔྤཀཱརསདྡེསུ ཙ པཝཏྟནྟི.

དྭེ ཨཱཧཱརཛརཱུཔཀལཱཔཱ, – སབྦམཱུལཊྛཀཾ སཝིཀཱརནྟི. ཨིམེ དྭེ ཀལཱཔཱ སཔྤཱཡེན ཝཱ ཨསཔྤཱཡེན ཝཱ ཨཱཧཱརེན ཛཱཏཱནཾ སམརཱུཔཝིསམརཱུཔཱནཾ ཝསེན ཝེདིཏབྦཱ.

ཨཱཀཱསདྷཱཏུ ཙ ལཀྑཎརཱུཔཱནིཙཱཏི པཉྩརཱུཔཱནི ཀལཱཔ མུཏྟཱནི ཧོནྟི. ཏེསུ ཨཱཀཱསདྷཱཏུ ཀལཱཔཱནཾ ཨནྟརཱ པརིཙྪེད མཏྟཏྟཱ ཀལཱཔམུཏྟཱ ཧོཏི. ལཀྑཎརཱུཔཱནི སངྑཏབྷཱུཏཱནཾ རཱུཔ ཀལཱཔཱནཾ སངྑཏབྷཱཝཛཱནནཏྠཱཡ ལཀྑཎམཏྟཏྟཱ ཀལཱཔ མུཏྟཱནི.

ཨིམེ ཏེཝཱིསཏི ཀལཱཔཱ ཨཛ྄ཛྷཏྟསནྟཱནེ ལབྦྷནྟི. བཧིདྡྷཱ སནྟཱནེ པན དྭེ ཨུཏུཛམཱུལཀལཱཔཱ ཨེཝ ལབྦྷནྟི. ཏཏྠ དྭེ རཱུཔ སནྟཱནཱནི ཨཛ྄ཛྷཏྟསནྟཱནཉྩ བཧིདྡྷཱསནྟཱནཉྩ. ཏཏྠ ཨཛ྄ཛྷཏྟསནྟཱནཾ ནཱམ སཏྟསནྟཱནཾ ཝུཙྩཏི. བཧིདྡྷཱསནྟཱནཾ ནཱམ པཐཝཱིཔབྦཏནདཱིསམུདྡ རུཀྑཏིཎཱདཱིནི ཝུཙྩཏི. ཏཏྠ ཨཛ྄ཛྷཏྟསནྟཱནེ ཨཊྛཝཱིསཏི རཱུཔཱནི ཏེཝཱིསཏི རཱུཔཀལཱཔཱནི ལབྦྷནྟི.

ཏཏྠ ¶ པཊིསནྡྷིནཱམདྷམྨཱ པཊིསནྡྷིཀྑཎེ ཀམྨཛརཱུཔཀལཱཔཱནཾ ཚདྷཱ པཙྩཡཱ ཧོནྟི ཙཏཱུཧི མཧཱསཧཛཱཏེཧི ཙ ཝིཔཱཀེན ཙ ཝིཔྤཡུཏྟེན ཙ. ཧདཡཝཏྠུརཱུཔསྶ པན ཨཉྙམཉྙེན སཧ སཏྟདྷཱ པཙྩཡཱ ཧོནྟི. ཏེསྭེཝ ནཱམདྷམྨེསུ ཧེཏུདྷམྨཱ ཧེཏུབྷཱཝེན, ཙེཏནཱ ཀམྨབྷཱཝེན, ཨཱཧཱརདྷམྨཱ ཨཱཧཱརབྷཱཝེན, ཨིནྡྲིཡ དྷམྨཱ ཨིནྡྲིཡབྷཱཝེན, ཛྷཱནདྷམྨཱ ཛྷཱན བྷཱཝེན, མགྒདྷམྨཱ མགྒ བྷཱཝེནཱཏི ཡཐཱརཧཾ ཚདྷཱ པཙྩཡཱ ཧོནྟི. ཨཏཱིཏཱནི པན ཀུསལཱཀུསལཀམྨཱནི ཨེཀདྷཱཝ པཙྩཡཱ ཧོནྟི ཀམྨཔཙྩཡེན, པཋམབྷཝངྒཱདིཀཱ པཙྪཱཛཱཏཱ པཝཏྟནཱམདྷམྨཱ པུརེཛཱཏཱནཾ ཀམྨཛརཱུཔ ཀལཱཔཱནཾ ཨེཀདྷཱ པཙྩཡཱ ཧོནྟི པཙྪཱཛཱཏེན. ཨེཏྠ ཙ པཙྪཱཛཱཏ ཝཙནེན ཙཏྟཱརོ པཙྪཱཛཱཏཛཱཏིཀཱ པཙྩཡཱ གཧིཏཱ ཧོནྟི. ཨཏཱིཏཱནི ཙ ཀམྨཱནི ཨེཀདྷཱཝ པཙྩཡཱ ཧོནྟི. ཨེཝཾ ནཱམདྷམྨཱ ཀམྨཛརཱུཔཀལཱཔཱནཾ ཡཐཱརཧཾ ཙུདྡསཧི པཙྩཡེཧི པཙྩཡཱ ཧོནྟི. ཨིདྷ དསཔཙྩཡཱ ན ལབྦྷནྟི ཨཱརམྨཎཉྩ ཨདྷིཔཏི ཙ ཨནནྟརཉྩ སམནནྟརཉྩ ཨུཔནིསྶཡོ ཙ པུརེཛཱཏོ ཙ ཨཱསེཝནཉྩ སམྤཡུཏྟོ ཙ ནཏྠི ཙ ཝིགཏོ ཙ.

པཝཏྟིཀཱལེ རཱུཔཛནཀཱ ནཱམདྷམྨཱ ཨཏྟནཱ སཧཛཱཏཱནཾ ཙིཏྟཛརཱུཔཀལཱཔཱནཾ པཉྩདྷཱ པཙྩཡཱ ཧོནྟི ཙཏཱུཧི མཧཱསཧ ཛཱཏེཧི ཙ ཝིཔྤཡུཏྟེན ཙ. ཏེསྭེཝ ནཱམདྷམྨེསུ ཧེཏུདྷམྨཱ ཧེཏུབྷཱཝེན, ཨདྷིཔཏིདྷམྨཱ ཨདྷིཔཏིབྷཱཝེན, ཙེཏནཱ ཀམྨབྷཱཝེན, ཝིཔཱཀདྷམྨཱ ཝིཔཱཀབྷཱཝེན, ཨཱཧཱརདྷམྨཱ ཨཱཧཱར བྷཱཝེན, ཨིནྡྲིཡདྷམྨཱ ཨིནྡྲིཡབྷཱཝེན, ཛྷཱནདྷམྨཱ ཛྷཱནབྷཱཝེན, མགྒདྷམྨཱ མགྒབྷཱཝེནཱཏི ཡཐཱརཧཾ ཨཊྛདྷཱ པཙྩཡཱ ཧོནྟི. པཙྪཱཛཱཏཱ སབྦེ ནཱམདྷམྨཱ པུརེཛཱཏཱནཾ ཙིཏྟཛརཱུཔཀལཱཔཱནཾ ཨེཀདྷཱ པཙྩཡཱ ཧོནྟི པཙྪཱཛཱཏེན. ཨེཝཾ ནཱམདྷམྨཱ ཙིཏྟཛརཱུཔ ཀལཱཔཱནཾ ཡཐཱརཧཾ ཙུདྡསཧི པཙྩཡེཧི པཙྩཡཱ ཧོནྟི. ཨིདྷཔི དས པཙྩཡཱ ན ལབྦྷནྟི ཨཱརམྨཎཉྩ ཨནནྟརཉྩ སམནནྟརཉྩ ཨཉྙམཉྙཉྩ ཨུཔནིསྶཡོ ཙ པུརེཛཱཏོ ཙ ཨཱསེཝནཉྩ སམྤཡུཏྟོ ཙ ནཏྠི ཙ ཝིགཏོ ཙ.

པཊིསནྡྷིཙིཏྟསྶ ཋིཏིཀཱལཏོ པཊྛཱཡ པཝཏྟིཀཱལེ སབྦེཔི ནཱམདྷམྨཱ སབྦེསཾ ཨུཏུཛརཱུཔཀལཱཔཱནཉྩ ཨཱཧཱརཛརཱུཔ ཀལཱཔཱནཉྩ ཨེཀདྷཱ པཙྩཡཱ ཧོནྟི པཙྪཱཛཱཏཝསེན. ཨེཏྠཔི པཙྪཱཛཱཏཝཙནེན ཙཏྟཱརོ པཙྪཱཛཱཏཛཱཏིཀཱ གཧིཏཱ ཧོནྟི, སེསཱ ཝཱིསཏི པཙྩཡཱ ན ལབྦྷནྟི.

སབྦེསུ པན ཏེཝཱིསཏིཡཱ རཱུཔཀལཱཔེསུཙཏྟཱརོམཧཱ བྷཱུཏཱ ཨཉྙམཉྙསྶ པཉྩདྷཱ པཙྩཡཱ ཧོནྟི ཙཏཱུཧི མཧཱསཧ ཛཱཏེཧི ཙ ཨཉྙམཉྙེན ཙ, སཧཛཱཏཱནཾ ཨུཔཱདཱརཱུཔཱནཾ ཙཏུདྷཱ པཙྩཡཱ ཧོནྟི ཙཏཱུཧི མཧཱསཧཛཱཏེཧི ¶ . ཨཱཧཱརརཱུཔཾ སཧཛཱཏཱནཉྩ ཨསཧཛཱཏཱནཉྩ སབྦེསཾ ཨཛ྄ཛྷཏྟརཱུཔཀལཱཔཱནཾ ཨཱཧཱར པཙྩཡེན པཙྩཡོ ཧོཏི. ནཝསུ ཀམྨཛརཱུཔཀལཱཔེསུ ཛཱིཝིཏརཱུཔཾ སཧཛཱཏཱནམེཝ རཱུཔཱནཾ ཨིནྡྲིཡཔཙྩཡེན པཙྩཡོ ཧོཏི. ཨེཝཾ ཨཛ྄ཛྷཏྟརཱུཔདྷམྨཱ ཨཛ྄ཛྷཏྟརཱུཔདྷམྨཱནཾ སཏྟདྷཱ པཙྩཡཱ ཧོནྟི. བཧིདྡྷཱ རཱུཔདྷམྨཱ པན བཧིདྡྷཱབྷཱུཏཱནཾ དྭིནྣཾ ཨུཏུཛརཱུཔཀལཱཔཱནཾ པཉྩདྷཱ པཙྩཡཱ ཧོནྟཱིཏི.

རཱུཔཀལཱཔེསུ པཙྩཡགྷཊནཱནཡོ ནིཊྛིཏོ.

ཨེཏྠ ཙ པཊྛཱནསདྡསྶ ཨཏྠོ ཝཏྟབྦོ. པདྷཱནཾ ཋཱནནྟི པཊྛཱནཾ. ཏཏྠ པདྷཱནནྟི པམུཁཾ, ཋཱནནྟི པཙྩཡོ, པམུཁཔཙྩཡོ མུཁྱཔཙྩཡོ ཨེཀནྟཔཙྩཡོཏི ཝུཏྟཾ ཧོཏི. སོ ཙ ཨེཀནྟ པཙྩཡོ ཨེཀནྟཔཙྩཡུཔྤནྣཾ པཊིཙྩ ཝཏྟབྦོ.

དུཝིདྷཉྷི པཙྩཡུཔྤནྣཾ མུཁྱཔཙྩཡུཔྤནྣཾ ནིསྶནྡཔཙྩཡུཔྤནྣནྟི. ཏཏྠ མུཁྱཔཙྩཡུཔྤནྣཾ ནཱམ མཱུལཔཙྩཡུཔྤནྣཾ, ནིསྶནྡཔཙྩཡུཔྤནྣཾ ནཱམ པརམྤར པཙྩཡུཔྤནྣཾ. ཏཏྠ མཱུལཔཙྩཡུཔྤནྣམེཝ ཨེཀནྟཔཙྩཡུཔྤནྣཾ ནཱམ. ཏཉྷི ཨཏྟནོ པཙྩཡེ སཏི ཨེཀནྟེན ཨུཔྤཛྫཏིཡེཝ, ནོ ནུཔྤཛྫཏི. པརམྤརཔཙྩཡུཔྤནྣཾ པན ཨནེཀནྟཔཙྩཡུཔྤནྣཾནཱམ, ཏཉྷི ཏསྨིཾ པཙྩཡེ སཏིཔི ཨུཔྤཛྫཏི ཝཱ, ན ཝཱ ཨུཔྤཛྫཏི. ཏཏྠ ཨེཀནྟཔཙྩཡུཔྤནྣཾ པཊིཙྩ སོ པཙྩཡོ ཨེཀནྟཔཙྩཡོ ནཱམ. སོ ཨེཝ ཨིམསྨིཾ མཧཱཔཀརཎེ ཝུཏྟོ. ཏཏོ ཨེཝ ཨཡཾ ཙཏུཝཱིསཏིཔཙྩཡགཎོ ཙ ཨིམཾ མཧཱ པཀརཎཉྩ པཊྛཱནནྟི ཝུཙྩཏི.

ཏཏྠ ཨེཀསྶ པུརིསསྶ དྷནདྷཉྙཏྠཱཡ ལོབྷོ ཨུཔྤཛྫཏི. སོ ལོབྷཝསེན ཨུཊྛཱཡ ཨརཉྙཾ གནྟྭཱ ཨེཀསྨིཾ པདེསེ ཁེཏྟཱནི ཀརོཏི, ཝཏྠཱུནི ཀརོཏི, ཨུཡྻཱནཱནི ཀརོཏི. ཏེསུ སམྤཛྫམཱནེསུ སོ པུརིསོ བཧཱུནི དྷནདྷཉྙཱནི ལབྷིཏྭཱ ཨཏྟནཱ ཙ པརིབྷུཉྫཏི, པུཏྟདཱརེ ཙ པོསེཏི, པུཉྙཱནི ཙ ཀརོཏི, པུཉྙཕལཱནི ཙ ཨཱཡཏིཾ པཙྩནུབྷཝིསྶཏི. ཏཏྠ ལོབྷསཧ ཛཱཏཱནི ནཱམརཱུཔཱནི མུཁྱཔཙྩཡུཔྤནྣཱནི ནཱམ. ཏཏོ པརཾ ཡཱཝ ཨཱཡཏིཾ བྷཝེསུ པུཉྙཕལཱནི པཙྩནུབྷོཏི, ཏཱཝ ཨུཔྤནྣཱནི པརམྤརཕལཱནི ཏསྶ ལོབྷསྶ ནིསྶནྡཔཙྩཡུཔྤནྣཱནི ནཱམ. ཏེསུ དྭཱིསུ པཙྩཡུཔྤནྣེསུ མུཁྱཔཙྩཡུཔྤནྣམེཝ པཊྛཱནེ ཝུཏྟཾ. ནིསྶནྡཔཙྩཡུཔྤནྣཾ པན སུཏྟནྟནཡེན ཀཐེཏབྦཾ. ཏཏྠ སུཏྟནྟནཡོ ནཱམ ཨིམསྨིཾ སཏི ཨིདཾ ཧོཏི, ཨིམསྶ ཨུཔྤཱདཱ ཨིདཾ ཨུཔྤཛྫཏཱིཏི ཨེཝརཱུཔོ པཙྩཡནཡོ. ཨཔི ཙ ལོབྷོ དོསོ མོཧོཏི ཏཡོ དྷམྨཱ སཀལསྶ སཏྟལོཀསྶཔི སངྑཱརལོཀསྶཔི ཨོཀཱས ལོཀསྶཔི ཝིཔཏྟིཡཱ མཱུལཊྛེན ཧེཏཱུ ནཱམ. ཨལོབྷོ ཨདོསོ ཨམོཧོཏི ¶ ཏཡོ དྷམྨཱ སམྤཏྟིཡཱ མཱུལཊྛེན ཧེཏཱུནཱམཱཏི ཀཐེཏབྦཾ. ཨེས ནཡོ སབྦེསུ པཊྛཱནཔཙྩཡེསུ ཡཐཱརཧཾ ཝེདིཏབྦོ. ཨེཝཉྩ སཏི ལོཀེ སབྦཱ ལོཀཔྤཝཏྟིཡོ ཨིམེསཾ ཙཏུཝཱིསཏིཡཱ པཙྩཡཱནཾ མུཁྱ པཙྩཡུཔྤནྣེན སདྡྷིཾ ནིསྶནྡཔཙྩཡུཔྤནྣཱ ཨེཝ ཧོནྟཱིཏི ཝེདིཏབྦོཏི.

ཨེཏྟཱཝཏཱ པཙྩཡཱནཾ ཨཏྠདཱིཔནཱ པཙྩཡཱནཾ སབྷཱགསངྒཧོ པཙྩཡཱནཾ གྷཊནཱནཡོཏི ཏཱིཧི ཀཎྜེཧི པརིཙྪིནྣཱ པཊྛཱནུདྡེས དཱིཔནཱི ནིཊྛིཏཱ ཧོཏི.

མྲམྨརཊྛེ མ྄ौཾཛྭཱནགརེ ལེཌཱིཏཱིཨརཉྙཝིཧཱརཝཱསིནཱ མཧཱ ཐེརེན ཀཏཱཡཾ པཙྩཡུདྡེསདཱིཔནཱི.