📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

མཧཱཔཎཱམཔཱཋ

(བུདྡྷཝནྡནཱ)

༡.

སོ ¶ , ཀོ; ནེ, སཾ;

༢.

སཏྠཱ, ནེསཾ; ཁེམཾ, དཱཏཱ;

༣.

ཧེལཱ༹ཏ-ཀྐཱརོ སོ; ཛནྟཱུནཾ, ནོ མཱ ནུ;

༤.

སོ ལོཀནྡྷཾ, ཧནྟྭཱ ནཀྐོ;

སཏྟམྦོཛཾ, བོདྷེཏཱ ནུ.

༥.

ཛིནསཱུརིཡོ, ཏིབྷཝནབྷེ;

མུཧཏིམིརཾ, ཨབྷིཏཔཡེ.

༦.

ཛེནོ ཛིནམཱུལེ, དིསྭཱ ཛནཀཱཡཾ;

སཾསཱརནིམུགྒཾ, སབྦཉྙུཏ མིཙྪཾ.

༧.

ཧིཏྭཱ ཀརུཔེཏཾ, མོཀྑཾ པཎིདྷཱནཾ;

ཝཏྟེསི དཡཱཎཱ, ཡོ ཏཾ མུནི ཝནྡེ.

༨.

སུཏཱཡུབྷརིཡཱ མེ, དྷནངྒམཔི ཙཛྫཾ.

ཙིནཾ བུདྷིནིདཱནེ, ཨགཱ མུནིཡཾ མེཏཾ.

༩.

སོ སསཛཱཏིཡ དེཧཾ, ཙཛྫིཡ དཱནཝརཉྩ;

ནཱགུསབྷོ ཝརསཱིལཾ, པཱུརཡི སམྤརིཙཱགོ.

༡༠.

ནེཀྑམྨགྒཾ རཱཛཱ ཧུཏྭཱ, སེནབྦིདྭཱ པཉྙཱསེཊྛཾ;

ཝེདེཧིནྡོ ཝཱིརུཀྐཾསཾ, ཁནྟཱིཝཱདཱི ཁནྟཱིསེཊྛཾ.

༡༡.

སོ སུཏསོམོ ཏཐགཾ, ཏེམིཡ དྷིཊྛཱནཝརཾ;

ཨེཀབྷུགོ མེཏྟཝརཾ, ལོམཧསོཔེཀྑཏརཾ.

༡༢.

པཱརམཱི ¶ ཏིདུཀྐརཱཝ, པཱུརིཡཱན སེཊྛབོདྷི;

པཱཔུཎིཏྠ ཡོ ཨནནྟ-དྷམྨསཱརདཾ ནམཱམི.

༡༣.

པཧཱཡ ཙཀྐཝཏྟིཀཾ, ཀརོཔནཱིཏ མདྡིཡཾ;

བྷུསིདྷརེ སསེནཀཾ, ཨཛེནི པཱཔིམཾ ནམེ.

༡༤.

ཨཐུཏྟརཾ ཛཡཱཀརཾ, བཧཱུཔཀཱརཏཾ ཛིནོ;

པཊིཙྩ ནིམྨིསཀྑིབྷི, ཨུདིཀྑཏེ ནམཱམི ཏཾ.

༡༥.

ཙངྐམེ མརུཝིམཏི ཡོ, ཚིནྡཡཾ ཀམི རཏནིཡེ;

ཨིདྡྷིཔཱཊིཧིརཎཀརོ, ཙཀྑུམཾ ཏམབྷིཔཎམེ.

༡༦.

ཨཐ རཏནགྷརེ བུདྡྷོ, ཚདིདྷིཏི ཛནཡཾ སངྑྱཾ;

སཱིམཱིསཱ ཏམབྷིདྷམྨཾ ཡོ, སུརནརམཧིཏཾ ཝནྡེ.

༡༧.

ནིགྲོདྷནྟིཀ ནུབྦྷཝཱི སུཁཾ, དྷམྨཾ ཡོ ཝིཙིནཾ ནདྷཱིཝརོ;

ཀིཙྪཱལདྡྷ མནཉྙབོདྷིཡཾ, ཝནྡེ ཏཾ སུགཏཾ ནིགྲོཙརཾ.

༡༨.

སབྦྷོགེཧི ཐ མུཙལིནྡེན,

ནཱགིནྡེན རཧསི པཱཝུཏྟོ;

སོཁྱཾ ཡོ ནུབྷཝི ཝིམུཏྟིཾཏཾ,

ཝནྡེ མཱརཱཛི ཨཏུལཔྤཉྙོ.

༡༩.

ཀཱརུཎིཀོ རཱཛཱཡཏནེ ཡོ,

བྷོཛ མུལཱ༹རཾ བྷོཛྫརསེཀཾ;

ཝཱས མཀཱ ནནྟགྒུཎདྷཱརོ,

ཨེཀགཏོ ཝནྡཱམི མཧེསཱི.

༢༠.

ཀེཡྻཾ ཀེཡྻཾ ཨབྷིཛཡཀེཏུཾ,

ཛེཡྻཾ ཛེཡྻཾ ཝརཛཡཔཱནཾ;

པེཡྻཾ པེཡྻཾ སུཝིཙི ནམེ ཏཾ,

ནེཡྻཾ ནེཡྻཾ སམཏམུཔེཀྑིཾ.

༢༡.

སཏྟ ཙ སཏྟཱཧེ ཝིཛིཏཱཝཱི,

ཁེཔིཡ ནིགྲོདྷཾ པུན གནྟྭཱ;

དྷམྨསུདུདྡསྱཾ པཏི ཛཱཏོ,

དྷམྨཀཐཱ པྤོསུཀྐ ཝིཏཀྐོ.

༢༢.

མརུགཎེཧི ¶ བྲཧྨུནཱ སམཾ,

རཏནདཱམམེརུཎཱ དདཱ;

སམབྷིཡཱཙིཏོ པཊིསྶཝཾ,

དསབལོ ནམཱམི དེསིཏུཾ.

༢༣.

གནྟྭཱ ཨིསིཔྤཱཏཀྐཱནནཉྩ,

སཏྠཱ མིགདྡཱཡཾ དེསཡིཏྠ;

སཙྩཔྤཀཱརཾ ཡོ དྷམྨཙཀྐ-

སུཏྟཾ ནམེ ཚབྦཱིདྷཾསུ ཏཱཝ.

༢༤.

རཉྙོ མགདྷསྶ ཀཏཔྤཊིཉྙོ,

གནྟྭཱནཐ རཱཛགཧཾ ཝིནེཏི;

སཏྟེ མལརོགཡུཏེ གདགྒཾ,

པཱཡེཏུན ཏཾ པཎམེ བྷིསཀྐཾ.

༢༥.

སཀྱཱདྷིཝཱསེ ཀཔིལེ སཉྙཏིཾ,

མཱནདྡྷཛཾ བྷིནྡིཡ མིདྡྷིཝཱཏཱ;

དྷམྨཱམཏཾ པཱཡི པིཏུཔྤབྷུཏི,

ཝནྡཱམི སཀྱིནྡ མནོམདསྶིཾ.

༢༦.

ཨནཱཐཔིཎྜོཏི ཝ྄ཧཡེན ནནྟ-

དྡྷནཾ ཙཛིཏྭཱ སུཀཏེ ཝིཧཱརེ;

ཝིཧཱསི བྷིཡྻོ ཛནཏཱ ཧིཏཏྠཾ,

སུདྷམྨབྷེརིཾ ཝདཡཾ བྷིཝནྡེ.

༢༧.

ཨུཔེཏཔུཉྙཾ ཝརལཀྑཎོཀཾ-

ཎོཀཾ ཝིསུདྡྷཾ ཛལིཏཔྤདཱིམཾ;

དཱིཔཾ པཛཱནཾ ཨནིགྷཾ ནཝཛྫཾ-

ནཝཛྫཝཱཙཾ སུགཏཾ ནམཱམི.

༢༨.

མུནིབྷཱནུ དྷམྨཔབྷཱཧི ཛན-

མྦུཛ མུདྡྷཏནྡྷཏམོ སུཏཔོ;

ཀརུཎཱརུཎོ སམབོདྷཡི ཡོ,

བྷཝིསཱིཏལཏྟཔནོ པཎམེ.

༢༩.

ཨིནྡུ ཝིཡམྦརམཛ྄ཛྷཏལེ ཡོ,

རཱཛཏི ཏཱརགཎེན མུནིནྡོ;

ཨརིཡགཎཔྤརིཏོ ཏིབྷཝེ ཏཾ,

སཱདར མུགྒཏསོབྷ མཝནྡི.

༣༠.

མཱུལཱམཱུལཱ ¶ ཏིཾསཏིཔཱརམིཡོ,

སཱཁཱསཱཁཱ མཛ྄ཛྷིམཛ྄ཛྷཱནཀཱཡཱ;

པཏྟཱཔཏྟཱ བུདྡྷཙཀྑུནི ཡསྶ,

པུཔྥཱཔུཔྥཱ ཀཱརུཎཱ མགྒཁནྡྷོ.

༣༡.

སཱརཱསཱརཱ ཡམཀཱ ཕེགྒུབྷིཉྙཱ,

སབྦཱལམྦངྐུརཀཾ སཱིལཝཎྚཾ;

སེསཱདྷམྨཱ མདྷུཔཀྐཔྥལཱནི,

རཾསཱིཚལླཱི སུཏཙཱ ལཀྑཎཱནི.

༣༢.

ཚཱཡུཔགཱ སུཾ པུཐུནརདེཝཱ,

མཱརཛིདཱིཔངྐར མཧིཛཱཏཾ;

པཏྠཏནནྟཉྩ ཀུསལབཱིཛཾ,

ཨེཀརུཧཾ པཱདཔམུནི ཝནྡེ.

༣༣.

མཱརཏིཏྠིཡརིཔུཾ ཏམཉྩ ཡོ,

དྷཾསཡཾ ནགརདྷམྨ མཱཔཡཾ;

སཱིལནཱིཝརཎ དྭཱརཀོཊྛཀཾ,

ཨེསིཀཱཔརམསདྡྷ མུཏྟམཾ.

༣༤.

དྭཱརཔཱལསུཡཏཾ སཏིཊཱལཾ,

ཉཱཎཙཙྩར སིགྷཱཊཔདིདྡྷིཾ;

དྷམྨམགྒཀུཊིསཱལ སཧིཏྟཾ,

དྷམྨསེནཔཏིསཱརིཛབྷཱུཏཾ.

༣༥.

དུཏིཡསུཏཔརོཧིཏཾ མཧཱ-

དྷུཏགུཎདྷརམགྒྷ དསྶིཀཾ;

ཝིནཡཙིནཀ དྷམྨརཀྑཀཾ,

ཏིབྷཝཔཏིཀ དྷམྨརཱཛིཡཾ.

༣༦.

སུཏཾ སུཏཾ སབྦདྷི སཛྫནཾཛནཾ,

མིཏཾ མིཏཾ ནནྟགུཎཱལཡཾ ལཡཾ;

ཧུཏཾ ཧུཏཾ ཛནྟུནམཱནམཾ ནམཾ,

བྷཝེ བྷཝེ ཏེབྷཝམངྒལཾ གལཾ.

༣༧.

ལོཀཱབྷིརཱམཾ རམཎེཡྻཝེདུརཾ,

ལོཀནྟགུཾ ཨནྟུབྷཡཱནུཔཱགཏཾ;

ལོཀདྡྷཛཾ མཱནདྷཛཔྤཧཱརཀཾ,

ལོཀགྒརུཾ ཨགྒརུ པཙྩཡེ ནམེ.

༣༨.

མཀུཊགྒཕལཾ ¶ ནཡནཉྩནིཀཾ,

སཝནབྦྷུསནཾ ཝདནབྦྷུསནཾ;

གལམཎྜནམིདྡྷི མནཉྙུརསཾ,

ཀིརིཡཉྙུདརཾ དྭིཁཎཉྙུཀརཾ.

༣༩.

ཀཊིཝིབྷཱུསན མཛ྄ཛྷིམཉྙཎཀཾ,

དཡཝིལེཔན དྷཱརཎམཎྜནཾ;

པཊཁིལཉྙུནིཝཏྠ མནུཏྟརཾ,

མུནིམརུཏྟམ མེཀ མཧཾ ནམེ.

༤༠.

སཏིཝར སུཙཀཾ ཨིབྦྷགྒཔཉྙཾ,

སུཝཱིརིཡཝསུཝཱཧཾ པཱིཏིསེལཾ;

གཧཔཏིསམཐགྒཾ ཐཱིཔསདྡྷིཾ,

ཨསཎིཡསུནུཔེཀྑཾ སཏྟབྷོགཾ.

༤༡.

ཙཏུདིསིཀིདྡྷིཔྤད མསཧཱཡཾ,

སུཔརིཝུཏཾ ཁཏྟིཡཝིརཛཱནཾ;

སུཙིཔརིསཾ དེཝནར མནཱཔཾ,

དསབལཙཀྐཱདྷིཔཏི བྷིཝནྡེ.

༤༢.

སམཱདྷིབྦཧིདྡྷཾ སཏིཙྪཊྛསེལཾ,

ཝིརཔྤཉྩམཱ ཛཱིཝམཛ྄ཛྷཾ སུཀམྨ-

ཏྟཏིཡཾ སུཝཱཙཱདུཏིཡཾ བྷིསེཊྛཾ,

སམཱཏཀྐཔུབྦཉྩ སཏྟཔྤཝཱརཾ.

༤༣.

ཝིཝིདྷཉཱཎཔབྷུཏིབྦསཱཀརཾ,

བཧུམཧིདྡྷིཀ མརཱུན མཱསཡཾ;

དྷུཾཝཔབྷཱཛལིཏརཱམཎེཡྻཀཾ,

སུགཏནེརུནགརཱཛ མཱནམེ.

༤༤.

སཱིལཛྫལཾ རཏནདྷམྨ མཱཀརཾ,

བྷིཉྙཱཝིཙིཾ སཏིཀུལཊྛི གམྦྷིརཾ;

ཝིཏྠིཎྞཉཱཎ མརིཡོདཛཱསཡཾ,

ཨཊྛམྦཱིདྷཙྪརིཡཀཾ ཨསནྡནཾ.

༤༥.

བཧུནཛྫམོསརཎ མེཀརསཾ,

དུརུཔགྒམཾ ཨཙིཏསམྦྷརིནཾ;

པུཐུཔོཏཔུཉྙཝཏམེཝ ནམེ,

དྭཱིཔདུཏྟམཎྞཝ ནདིནྡཝརཾ.

༤༦.

ཨབྷིནིཧརདྷནུཾ ¶ གུཎཔཱརམིཾ,

ནལ༹མཏིམནབཱཛརཧམྨུཁཱ;

དྷིཏིསམིཏསརེན སུདྷཱརཡཾ,

མལམ གགཎ མེཀཔཝེདནཱ.

༤༧.

ཡོ པཱཝེདྷེསིཾ ཨགྒམགྒཉྩ ཏཱུཎིཾ,

དྷམྨཱལངྐཱརབྦམྨ མེཀབྦལཾ ཏཾ;

ནེཏྟིཾསཱནནྟཉཱཎ གཱིརེལླིམནྟཾ,

སབྦཉྙུསྶཱསཾ ཨིདྡྷིདཎྜཾ ནམཱམི.

༤༨.

ཝརཏཔཝུཊྛི སུབཱིཛཀསདྡྷཱ,

མཏིཡུགནངྒལ ཧཱིརུཏཔཱིསཱ;

སུསམཐརཛྫུ སཏིདྭིཛཏུཏྟཾ,

ཝཱིརིཡདུརཱཝཧ སཙྩནིདཱནཾ.

༤༩.

ཝཏིསཾཝརཾ སོརཏམོཙནཉྩཾ,

སརཎཱ ནིཝཏྟབྦཧནཏྠཾ ཡསྶ;

ཨམཏཔྥལཾ ནེཀརསེཧུཔེཏཾ,

སུགཏཾ མཧཱཀསྶཀ མཱབྷིཝནྡེ.

༥༠.

དེཝགྒོ ཏིདསཔུརེ ཝརཱསནེ ཡོ,

དེཝཱནཾ ཛནིཀཔབྷུཏིནཾ བྷིདྷམྨཾ;

བཱལཀྐོཝ ལལ༹ཡམཱཙལེ ཏིམཱསཾ,

དེསེསྱཱ པརཝིསཡཾ ནམེ ཨཛེཡྻོ.

༥༡.

མཧཱཡསོ ཝིཝིདྷསུབྷཔྤཀཱསཀཾ,

ཀུརཱུསུ ཡོ ཨམིཏགུཎོ ཏམོནུདོ;

པརཔྤཝཱདཧརི སུབྷཱནུཡོགིནཾ,

ནམཱམི ཏཾ ཀཐཡི སཏིཔྤཋཱནཀཾ.

༥༢.

སམཐཀཔལིཀོ སསྣེཧསམྨཱསཏི,

པརམམཏིགིནཱི སཝཊྚིཔརཀྐམོ;

སཀལཛུཏིཀརོ སུདྷམྨཔདཱིཔཀོ,

ཨིམ མུཔཛལིཏོ ཛིནེན ནམཱམཧཾ.

༥༣.

ཝིགཏགཏམལཾ མལགཏཝིགཏཾ,

མཧིཏ ཧིཏམནཾ མནཧིཏམཧིཏཾ;

ཝིབྷཝབྷཝཀརཾ ཀརབྷཝཝིབྷཝཾ,

སུཛན ཛནགུཎཾ གུཎཛནསུཛནཾ.

༥༤.

སཱིལགྒདཎྜཝིཙིཏཾ ¶ སུསམཱདྷིཔཏྟཾ,

སོབྷཱསམུཛྫལ མནནྟག ཉཱཎསཱིཁཾ;

སདྡྷམྨསེཊྛརཏནཉྩ ཏིལོཀཀེཏུཾ,

ཝནྡཱམི ལོཙནབྷིསེཀ སུསོབྷཡུཏྟཾ.

༥༥.

ཝིནཡནཡ མནཡཝིནཡ མནམིཏཾ,

ཝིཛཡཛཡ མཛཡཝིཛཡ མཏུལིཏཾ;

ཝིབྷཛབྷཛ མབྷཛཝིབྷཛ མནནཀཾ,

ཝིསམསམ མསམཝིསམ མབྷིནམེ.

༥༦.

པརམརམ མརམཔརམ མཏིགུཎཾ,

པགཧགཏི མགཏིཔགཏ མམམཀཾ;

པཙཡཙཡ མཙཡཔཔཡ མནཎཀཾ,

པཀཏཀཏ མཀཏཔཀཏ མཙལཀཾ.

༥༧.

ཨུཛུཀ མཡནམགྒེ མོཀྑདེསཾ ནིཡཱསི,

ཝརརཐཀུཛརེན ཙམྨཙཀྐེན སཏྠཱ;

ཧིརིཏཔདུཀཔཱལམྦེན དྷམྨསྶུཏེན,

སཏིནིཝརཡུཏེན པྤཱཊིཧིརདྡྷཛེན.

༥༨.

ཨཝིཧནནཀྑིནཱ སུཡམ ནེམུཔཀྑརཱ,

ཨུདརིཡམབྦྷིནཱ པརིཔུརངྒསཙྩིནཱ;

ཀུསལཝིབྷཱུསིནཱ ནིམདཀུཔྤརེན ཡོ,

ཨཁརནཏེསིནཱ གུཔིཏསིལནནྡནཱ.

༥༩.

ཨནུསནུགྷཱཏིནཱ མཏིཔུརེཛཝེན ཀཱལ-

ཉྙུཏམཏིསཱརིཀེ ན ཙ ཝིསཱརདཏྠིདཎྜཱ;

སཏིཏུད དྷཱིཏིརསྨི མནདམྨསིནྡྷཝེན,

ཝིནཡགཎེ ནམཱམི ཏ མཏུལྱསཏྠཝཱཧཾ.

༦༠.

ཡམཀྐགྒིཛཱལཾ པརཝིསཡ མཙྪེརསཧིཏཾ,

དུདིཊྛནྡྷུབྦཱཧཾ ཡུགགཧཎཏིཏྠཱིན མཀརཱི;

བཧཱུནཾ མཛ྄ཛྷེ ཡོ རཏནཀམནེ པཱཊིཧརིཡཾ,

ཛཡཀྐེཏུསྶཱཔི ཏ མབྷིནམི ཀཎྚམྦསམིཔེ.

༦༡.

ནཁཛུཏིརཛཾ ཙཀྐངྒོཔེཏ པཱདཝརམྦུཛཾ,

སུབྷསིརིམཏོ རཾསིཛཱལངྒུལིདསསཾསུབྷིཾ;

པཝརསིརསཱ དེཝཱདེཝཱ སདཱ ན པིལནྡྷཡུཾ,

ཏ མཏིཝ མནོརམྨཾ ཏིཏྟཱིཀརཱ ནམི ཡསྶ ཀེ.

༦༢.

བུདྡྷོཔྱེཀོ ¶ ནིདྷནགུཎིནོ ཝཎྞཡེ ཡཱཝཛཱིཝཾ,

ཀཱམཾ ཨཉྙཾ ཀཐམབྷཎ མཱསུཾ ཁིཡེཐཱ ཡུཀཔྤོ;

ན ཏྭེཝཱ ཡཾ ཁཡ མུཔཝཛྫེ ཡསྶ ཝཎྞོ ཨནནྟོ,

ཏཾ སབྦཉྙུཾ སཀལརིརཱི ནེཀནཱཐཾ ནམཱམི.

༦༣.

པཱདིདཱིཔཱདཾ དྭིནཡནདིཛཾ དྷམྨཀཱཡཾ དྷིསོཎྜཾ,

བྷཱཎཱིསོཎྜགྒཾ སརཎསིརསིཾ མགྒཱཝཱལཾ སུབྷངྒཾ;

སཱིལཱལངྐཱརཾ ཝིམལིབྷཝུ ཏཾ སཏྟཏིཊྛིདྷིདབྦཾ,

ནཱཐེབྷིནྡགྒཾ ཕལཀརིཎུཀཾ མོཀྑབྷོཛཾ ནམཱམི.

༦༤.

མལཱལོལུ༹ལློལཾ ཨཏིབྷཡཛནཾ དུགྒསཾསཱརསིནྡུཾ,

ཕིཡབྦྷཱནིགྒཱཧོ སིཝཏཊམུཁོ ནཱཝི ཀཛྫེཊྛནཱཐོ;

པདཔྤཱརཀྐཱམཾ བཧུཛནགཎཾ ཨེཀམགྒཏྟརམྷི,

སམཱརོཔེཏྭཱ མཏྟརི ཏ མཏུལསཱདརཉྩཱ བྷིཝནྡེ.

༦༥.

བྱཱམཾསུགྒྷནདྷཱར མཀྐུལུ༹སཏབྦྷཱཎུཛྫལནྟཏྟནཾ,

ཨུཀྐཾསཛྫུཏི ཀེཏུམཱལཝིཙིཏཾ སདྡྷམྨཛོཏིནྡྷརཾ;

བུནྡིནྣིགྒཏཔཛྫལནྟ དིདྷིཏིཾ ཨཛྫཏྠནཱ ཡཱཝ ཙ,

ཝནྡེཏཾ མུནི སཀྱཔུངྒཝ མཧཾ པུཎྞིནྡུཝཏྟམྤི ཙ.

༦༦.

སཏྟམཾཏམཾ ཝིནཱསཀཾསཀཾ དདཾ ཝིནེཡྻཀཱནམེཝ,

བྷཱཝནཾཝནཾ དྷུལཱིཀརཾ ཀརཾ ཏིདུཀྐརཾ པཛཱབྷིབྷུཉྫ;

གཱརཝཾརཝཾ མནོཧརཾཧརཾ ནརཱནརཱནཡཾ ནམཱམི,

སཱདརཾདརཾ ཝིནོདཀཾདཀཾ པཝསྶཀཾ པཛཱནམིཝ.

༦༧.

བུདྡྷོ ནིགྲོདྷབིམྦོ མུདུཀརཙརཎོ བྲཧྨགྷོསེཎིཛངྒྷོ,

ཀོསཙྪཱདངྒཛཱཏོ པུནརཔི སུགཏོ སུཔྤཏིཊྛིཏཔཱདོ;

མུདོདཱཏུཎྞལོམོ ཨཐམཔི སུགཏོ བྲཧྨུཛུགྒཏྟབྷཱཝོ,

ནཱིལཀྑཱི དཱིགྷཔཎྷཱི སུཁུམམལཚཝཱི ཐོམྱརསྶགྒསགྒཱི.

༦༨.

ཙཏྟཱལཱིསགྒདནྟོ སམཀལཔནཛོ ཨནྟརཾསཔྤཔཱིཎོ,

ཙཀྐེནངྐཱིཏཔཱདོ ཨཝིརལ༹དསནོ མཱརཛུསྶངྑཔཱདོ;

ཏིཊྛནྟོནོམེནྟོ བྷཡཀརམུདུནཱ ཛཎྞུཀཱནཱ མསནྟོ,

ཝཊྚཀྑནྡྷོ ཛིནོ གོཏརུཎཔཁུམཀོ སཱིཧཔུབྦཌྜྷུཀཱཡོ.

༦༩.

སཏྟཔྤཱིཎོ ཙ དཱིགྷངྒུལཾ མཐ སུགཏོ ལོམཀཱུཔེཀལོམོ,

སམྤནྣོདཱཏདཱཋོ ཀནཀསམཏཙོ ནཱིལམུདྡྷགྒལོམོ;

སམྦུདྡྷོ ཐཱུལཛིཝ྄ཧོ ཨཐ སཱིཧཧནུཀོ ཛཱལིཀཔྤཱདཧཏྠོ,

ནཱཐོ ཨུཎྷཱིསསཱིསོ ཨིཏི གུཎསཧིཏཾ ཏཾ མཧེསིཾ ནམཱམི.

༧༠.

ཝཊྚཙིཏཱནུཔུབྦཀསུབྷངྒུལཱི ¶ རུཧིརམཊྛཏུངྒནཁཀོ,

ནིགྒུལ༹གོཔྥཀོ སམཔདོ སཱིཧོསབྷིབྷ ཧཾསསནྣིབྷཀམོ;

དཀྑིཎཏཱཝཏཀྐམི སམནྟམཎྜལ ནིགཎྛི ཛཱཎུསུབྷཀོ,

བྱཉྫནཔུཎྞཔོསཏནུ ནཱབྷིགམྦྷཱིར ཨཚིདྡདཀྑིཎཝཊོ.

༧༡.

དྭིརདཀརཔྤཀཱསུརུབྷུཛོ སུཝིབྦྷཛནུཔུབྦམཊྛཨནུནཱ-

ནུནཨལིནཱནུཔུབྦརུཙིར ཏྟིལཱདིརཧིཏབྦིསུདྡྷཏནུཀོ;

དསསཏཀོཊི ཧཏྠིབལདྷཱརཎོ ཀནཀཏུངྒནཱསིཀསུབྷོ,

སུརུཧིརདནྟམཾསཐ སུཙིསིནིདྡྷདསནོ ཐ ལོཀསརཎོ.

༧༢.

སུདྡྷཔསཱདིནྡྲི ཙ ཝཊྚཏརདཱཋོ རུཧིརོཊྛ ཙ སུརནརནཱཐོ,

ཨཱཡཏསོབྷབྦདནོ ཐ མུནི གམྦྷཱིརུཛུཀཱཡཏསུརུཙིརལེཁོ;

བྱཱམཔབྷཱམཎྜལབུནྡི སུཔུརགྒཎྞི ཙ ཨཱཡཏཝིསཊསུབྷཀྑཱི,

པཉྩཔསཱདཀྑི ཙ ཀུཉྩིཀསུབྷགྒཔཁུམོ མུདུཏནུརུཎཛིཝ྄ཧོ.

༧༣.

སོམྨསིནིདྡྷ ཏྱུཛྫལཀོམལ ཝརུཎཝིམལཏནུ ཙ ཨམིཏགུཎོ,

ཀོམལ དཀྑིཎཱཝཊ ཨཉྫནབྷིདསརིསནིལཀ མུདུཏནུརུཧོ;

དཀྑིཎཝཊྚཀོམལ སཎུསམསུནིལ ཨལུལིཏ སིརརུཧི ཛིནོ,

སོབྷཎསཎྛཱནོ ཐ སིནིདྡྷསིརརུཧི ཙ སུཔཙིཏསཏཀུསལ ཛོ.

༧༤.

ནིགྒུལོ༹ནིགྒནྟིཙྪཏྟསྶརིསཨཏིསུབྷགསིར ཙཱཡཏཱརུཙི ཀཎྞཀོ,

སོསཎྛཱནསྶཎྷཱཧཱརཱནུཀམཔཧུཏབྷམུཐ སུཨཱཡཏབྦྷམུཀོ ཙ སོ;

སུགྒནྡྷགྒཏྟོ མུདྡྷིཙཱཐ ཝདནི ཙ པུཐུལཀནལཱཊ ཨཱཡཏསོབྷཎོ,

ཨསྶཱསཔྤསྶཱསཱཏིསྶཎུ དྷརམསམསམ ནམི ཀེཏུམཱལཝིཙིཏྟཀཾ.

༧༥.

བུདྡྷུཔྤཱདོ ཀིམངྒཾ ཨཏིདུལབྷཏརཾ གྷོསམཏྟམྤི ལོཀེ,

ཏསྨཱ ནཱནཔྤཀཱརཾ སཔརཧིཏསུཁཾ ཝིདྡྷསཱུ པཏྠཡནྟཱ;

ཡཱཏིཊྛཏྠཱཝ ཧཾ ཏཾ སུརནརསརཎཾ ཨནྟརཱཡཔྤཧཱནཾ,

པུཉྙཀྑེཏྟེཀབྷཱུཏཾ སུགཏམཝིརཏཾ སཱདྷུ ཝནྡནྟུ སནྟོ.

༧༦.

ཁེཏྟཝརངྒཏཏྠུཏིཔུརེ ཛཝཔཎམ ཏེཛསཱ ཨིདྷ བྷཝེ,

རོགབྷཡཱདྱུཔདྡཝཧཏོ ཨནུནསུཁ བྷོགཔུཉྙམཏིཀོ;

དེཝམནུསྶབྷོགཔཝརཾ པརཏྠནུབྷཱཝཉྩ ཨནྟིམབྷཝེ,

ཨཉྙཏརོ ཏིབོདྷིཔཝརེ བྷཝིསྶཏི ཡཐཱསཡཾ ཀཏནཏོ.

༧༧.

པུཉྙེནཱནེན ¶ སོཧཾ ནིཔུཎཛཝམཏི པེམཝཱཙོ སཁཱིལོ,

སདྡྷོ ཀལྱཱཎམིཏྟོཏིསརཎགམནོ སཱིལཝཱ ཙཱགཡོགོ;

ཧིརོཏྟཔྤཱི སུདཀྑོ ཨཝིཏསུཙརིཏོ དྷིཏིམཱ སཙྩབྷཱཎཱི,

བཱཧུསྶཙྩི ཝིབྷཱགི སཔརཧིཏཀརོ ཝགྒུརཱཝོ བྷིརུཔོ.

༧༨.

དཱིགྷཛྫཱིཝི ནིརོགོ སུཙིཀུལཔསྶུཏོ དྷམྨརཏྟོ ཝིརཏྟོ,

ནིཙྩཱཔལྱོ ཀཏཉྙུ ཨཏིམུདུཛུམནོ སཱདྷུབྷཱཝཱདིཝིཉྙཱུ;

དྷམྨཱཛཱིཝོ བྷཝེཡྻཾ བཧུཀུསལརཏོ ཨཔྤཀོདྷོ ཨལུདྡྷོ,

ཨེཝཉྩཉྙཾ ཀརེཡྻཾ པཎིདྷི ཙརིམཀེ མོཀྑནིབྦཱནབྷཱགཱི.

༧༩.

(༡) མཧཱཀཐཾ བུདྡྷགྷོསོ, ཏནུམེཝ ཀརཾཨཔི;

ཙཛཾ ཧེཡྻཱ དིཡཱ དེཡྻཾ, ཨཀརིཏྠ ཡཐཱ ཏཐཱ.

༨༠.

(༢) མཧཱཔཎཱམཔོརཱཎཾ, ཀིཉྩི ཨེཝ པུནཔྤུནཾ;

ཀཱམོཀྐམཾ དུདྷཱརཉྩ, ཙཛཾ དེཡྻཱ དིཡཉྙཏྠ.

༨༡.

(༣) སུཏཛྫཡ ཨནུབྷཝ-ཊྛཔནཏྠེན ལཉྪིནཱ;

སུཏེན གརུནཱནེན, ཀཏོཡཾ པཎཱམོ ནཝོ.

༨༢.

(༤) ཨེཀཀྑརཱཡ གཱཐཱཡོ, ཡཱཝ ཚབྦིསཏཀྑརཱ;

ཛཱཏིཡ པཛྫསཏྟཏྱཱ, སངྑཏོ ཙཏུརཱདྷིཀཱ.

༨༣.

(༥) ཨཊྛཱདྷིཀཱ སཧེཝུཡྻོ- ཛནཱདཱིཧི མིདཾ ནཏཾ;

ཡཐཱཝུཏྟཏྠཀཱ ཀཱམཱ, ཡེ ནིཙྩཾ དྷཱརཡནྟུ ཏེ.

༨༤.

རཱཛཱཏིརཱཛཱཏིམནོཧརོ ཡོ,

དེཝཱཏིདེཝཱཏིགུཎོགྷདྷཱརཱི;

བྲཧྨཱཏིབྲཧྨཱཏིབྷཝནྟགཱུ ཏཾ,

སངྒྷཱཏིསངྒྷཱཏིཝིརཱཝ ཝནྡེ.

༨༥.

ཨནངྒནངྒཾ ནརདེཝདེཝཾ,

ཨནིཉྫནིཉྫཾ བྷཡཏཱཎཏཱཎཾ;

ཨནཎྜནཎྜཉྩ ཨནཱཐནཱཐཾ,

ཁཡནྟཡནྟཾ པཎམཱམི མཱམི.

༨༦.

ཏམྦསིནིདྡྷཏུངྒནཁཀོ ནུཾཝཊྚསུཙིཏུརངྒུལི ཙ མུནིསོ,

སཱིཧུསབྷོབྷཧཾསསམགོ ནིགཱུལ༹སམ གོཔྥཀཱཡཏམུཁོ;

ཀོམལདཀྑཱཎཱཝཊཏནུརུཧོ སུཙིམལུཛྫལཱབྷསརིརོ,

པཉྩཔསཱདཡུཏྟནཡནོ སུགནྡྷམུཁཏུངྒནཱསིཀཡུཏོ.

༨༧.

ཀོཊིསཧསྶནཱགབལིཀོ ¶ སུརཏྟམདྷརོ སུཝཊྚདསནོ,

ཨཱཡཏསཎུལོམབྷམཱུཀོ མུདུཏྟནུཀརཏྟ ཛིཝ྄ཧསཧིཏོ;

ཚཏྟསམཱནསོབྷཎསིརོ སུཀེསཝར ཀེཏུམཱལཝིཙིཏོ,

ཨིཙྩནུབྱཉྫནེབྷི སཧིཏཾ མུནིནྡཔཝརཾ ནམཱམི སིརསཱ.

༨༨.

སཀལམལེཧི སོ མུནི སུདཱུརཏཱཡ ཙ མལཱརིནིཾ ཧཏཏཡཱ,

ཏིབྷཝརཐེ སམཱནིཏམནཱརཀཱནི ཙ ནམཱལཡོ ནརཝརོ;

མལཀརཎེ རཧཱརཧ མནནྟཉེཡྻ མབྷིཛཱནནཱ མུནི ཏཐཱ,

ཙརཎཡུཏོ ཏིཝིཛྫི ཙ སུཝཱཙཏཱ སུགམནཱ ཛནེསུ སུགཏོ.

༨༩.

ལོཀཝིདཱུ སོ ནིཏལོཀཏཡཏཱ སཱཀལཏོ ཨསམནརདམཱ སོ,

སཱརཐི ཛིནོ ཨནུསཱསནཀརོ སཏྠཝཧོ དུཔཐཏརཎསཏྟཱ;

བུཛ྄ཛྷཏི སཱམཾ ཙཏུསཙྩམཁིལཾ བོདྷཡི ཛནྟུགཎམིཏི ཙ བུདྡྷོ,

བྷཱཀརཨཱབྷཱཕུཊཔངྐཛསམོ མགྒིཡཉཱཎཕུཝིཀསིཏོ ཙ.

༩༠.

བྷགྒཀིལེསོ སོ བྷགཝཱ ཏིབྷཝ ཝམིཏ གམན སུཛན བྷཛནཏོ,

སོ བྷཛི སདྡྷམྨེ པཝིབྷཏྟ སརས ཚབྷགཡུཏ གརུཀརཎིཡཏོ;

སཏྟནིཀཱཡེ ཀེནཔིཏུལྱགུཎམཔམིཏ སིརིགྷཾནཛུཏིསུསུབྷཾ,

དེཝནརཱནཾ ཨེཀཔཏིཊྛ མཝིཏཐུཏིཡས མསཀི མབྷཾནམེ.

༩༡.

བུདྡྷུཔྤཱདོ ཀིམྨངྒཾ བྷོ ཨཏིདུལབྷཏརམིདྷ བྷཝེ སུགྷོས མཔཱཔརོ,

ཏསྨཱ པཏྠེནྟཱ སབྦཉྙུཾ ཝིཝིདྷཧིཏསུཁ མནདྷིཀཾ ནམནྟུ ཙ སཱདྷཝོ;

པུཉྙེནཱནེནེཏེ དིཊྛེ བྷཡཨགྷཾཔཱིལ༹ནཊྛ ཝིརཧིཏཱ པརཏྠ ཙུབྷོ སུབྷེ,

བྷུཏྭཱནནྟེ ཝེ ཧེསྶནྟེ ཨཝིཀལསུཁསིརིམཏིཀཱ ཨནུཏྟར བྷཱགིནོ.

༩༢.

སོ ཙཀྐོཔེཏཔཱདོ མུདུབྷུཛཙརཎོ སུཔྤཏིཊྛིཏཔཱདོ,

ཨེཎཱིཛངྒྷོ ཙ བུདྡྷོ ཀནཀནིབྷཏཙོ ཨཱཡཏཔཎྷི ནཱཐོ;

ཀོསོནདྡྷངྒཛཱཏོ ཨཏིསུདྷུམཚཝཱི ཛཱལིཀཔྤཱནཧེཊྛཱ,

ཨུསྶངྑཔཱདཡུཏྟོ ཨབྷིནིལནཡནོ ཨཱཡཏངྒུལིཡོགོ.

༩༣.

ཋིཏོ ¶ ཁོ ནོ ནམནྟོ ཀིརུབྷཡཔུཐུནཱཛཱཎུཡོ ཨཱམསནྟོ,

ལོམཀཱུཔེཀེཀལོམོ སམཏལདསནོ ཨཉྫནུདྡྷགྒལོམོ;

བྲཧྨདྡེཧུཛྫུགཏྟོ ཨཝིརལ༹མུཁཏོ སཏྟཀངྒུསྶདོ སོ,

ནིགྲོདྷཔྤཱརིབིམྦོ མིགཔཏིཧནུཀོ སཱིཧཔུབྦཌྜྷཀཱཡོ.

༩༤.

པུཎྞཏྟཱལཱིསདནྟོ སུཔཧུཏརསནོ སོབྷཎོདཱཏདཱཋོ,

སཎྷོདཱཏུཎྞལོམོ སམཝཊལགལོ ཨནྟརཾསཔིཎོ སོ;

བྲཧྨགྒྷོསོ མུནིནྡོ པུནཔི གུཔཁུམོ ཨུཎྷིསསམྥུལླསཱིསོ,

བཱཏྟིཾསངྒོཔསོབྷཾ མུདུརསཧཎཱི ལོཀཛེཊྛཾ ནམེ ཏཾ.

མཧཱཔཎཱམ ནིཊྛིཏཱ.

ཏིགུམྦཙེཏིཡ ཐོམནཱ

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

༡.

ཡོ ¶ དཱིཔངྐརམཱུལམྷི, པདཾ ཧཏྟགཏཾ ཙཛི;

སམྨཱསམྦོདྷི མཱཀངྑཾ, ཝནྡེ ཏསྶ སིརོརུཧཾ.

(པཐྱཱཝཏྟགཱཐཱ).

༢.

པཱུརེཏྭཱ བོདྷིསམྦྷཱར-མཧེསཾ ཡོ ཨནུཏྟརཾ;

ཨལཏྠ བུདྡྷཏྟཾ ཏསྶ, ཀེསདྷཱཏུཝརཾ ནམེ.

(པཐྱཱཝཏྟགཱཐཱ).

༣.

ལདྡྷཱ བུདྡྷཏྟཾ ཚཋཱན-མཏིཀྐམྨ པཝེདཡི;

ཝིམུཏྟིཾ རཱཛཱཡཏནེ, ཏསྶ ཀེསཝརཾ ནམེ.

(རཀཱར བྷཀཱརཝིཔུལཱ པཐྱཱཝཏྟགཱཐཱ).

༤.

ཏཏྠ སཀྐདཏྟིཡམྤི, ནཱགལཏཾ ཧརཱིཏཀཾ;

ཨནོཏཏྟོདཀཾ བྷུཉྫི, ཝནྡེ ཏསྶ སིརོརུཧཾ.

(རཀཱརཝིཔུལཱ པཐྱཱཝཏྟགཱཐཱ).

༥.

ཏདཱ ¶ མུགྒསེལཔཏྟཾ, མཧཱརཱཛཱུཧི དིནྣཀཾ;

ཏཐཱགཏོ པཊིགྒཎྷི, ཝནྡཱམི ཏསྶ སཱིསཛཾ.

(རཀཱརཝིཔུལཱ པཐྱཱཝཏྟགཱཐཱ).

༦.

ཏདཱ དྭིནྣཾ དྭེབྷཱཏིཀ-ཛནེཧི མདྷུཔིཎྜིཀཾ;

པརིབྷུཉྫེསི མནྠམྤི, ཏསྶ སཱིསསིརིཾ ནམེ.

(ཏཀཱརཝིཔུལཱ པཐྱཱཝཏྟགཱཐཱ).

༧.

ཡོ ཏཔུསྶབྷལླིཀཱནཾ, ཏདཱ དྭིསརཎཾ ཨདཱ;

ལོཀམྷི སབྦཔཋམཾ, ཏསྶ སཱིརིཝཧཾ ནམེ.

(རཀཱར ནཀཱར ཝིཔུལཱཔཐྱཱཝཏྟགཱཐཱ).

༨.

ཏདཱ ¶ ཏཏྠུཔཊྛཀཱནཾ, ཏེསཾ ཀེསེ ཨདཱ ཨཋ;

ལོཀཧིཏ མཔེཀྑནྟོ, ནཱཐོ ཡོ ཏསྶ ཏེ ནམེ.

(རཀཱརཝིཔུལཱ པཐྱཱཝཏྟགཱཐཱ).

༩.

ཏེཔི ཏཾ ཨཱཧཱརིཏྭཱན, པོཀྑརབྦཏིཡཾ ཀརུཾ;

སཛཱིཝཀེས ཙེཏིཡཾ, ནམེཏཾ སབྦཔུབྦཀཾ.

(མཀཱརཝིཔུལཱ པཐྱཱཝཏྟགཱཐཱ).

༡༠.

ཨུཔོསཐུཔོསཐམྷི, མུཉྩནྟཾ ནཱིལརསྨིཡོ;

བྷགཝཱཝ ལོཀཨཏྠཾ, ཀརོནྟཾ ཏཾ སདཱ ནམེ.

(རཀཱརཝིཔུལཱ པཐྱཱཝཏྟགཱཐཱ).

༡༡.

ཙཱུལཱ༹མཎིདུསྶཙེཏྱཾ ¶ , ཀཱལམྷི བོདྷིསཏྟཀེ;

བུདྡྷཀཱལེ ཨིདཾ སབྦ-པཋམཾ ཏཾ ནམཱམཧཾ.

(རཀཱརཝིཔུལཱ པཐྱཱཝཏྟགཱཐཱ).

༡༢.

ནམཱམཧཾ ཝནྡཱམཧཾ, པཱུཛེམཧཾ སིརོརུཧཾ;

པུཉྙམིདཾ བྷཝཏུ མེ, པཙྩཡོ ཨཱསཝཀྑཡེ.

(ཏཀཱར ནཀཱརཝིཔུལཱ པཐྱཱཝཏྟགཱཐཱ).

ཏིགུམྦཙེཏིཡཐོམནཱ ནིཊྛིཏཱ.

ཝཱསམཱལིནཱིཀྱ

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

༡.

ཝུཌྜྷོཔི ¶ ཛིནཱནཾ, བུདྡྷོསི ཝིཛཱནཾ;

པུབྦོདིཏི མཱཧཾ, ཀུབྦོམི ཝིམཱནཾ.

(ཏནུམཛ྄ཛྷཱགཱཐཱ)

༢.

མཧཱསམཏཀཱུལཾ, ནརཱཔཝརཔཱུཛཾ;

ཛཧཱ ཨབྷཡཔཱུརཾ, ནམཱ ཀནཀརཱུཔཾ.

(ཀུམཱརལལིཏཱགཱཐཱ)

༣.

ནརཱསབྷསུབུདྡྷཾ ¶ , པཛཱམཏནུརུཏྟཾ;

དཡཱཀརམུདུཏྟཾ, ནམཱམ ཧ ཨུསུཀྐཾ.

(ཀུམཱརལལིཏཱགཱཐཱ)

༤.

ཧིཏཾ ཝཧསུསཱིལོ, པམོདཏི སུཁཏྟེ;

ནམེ ཏམཔབུདྡྷཾ, ཛིནཾ གཏསུཁནྟཾ.

(ཀུམཱརལལིཏཱགཱཐཱ)

༥.

བནྡྷུ ཙ སནྟཀིལེསོ, ཡོ པིཏཝཎྞཔབྷཱསོ;

གོཏམགོཏྟསུཉྙཏོ, ཏསྶ ནམོ ནརསཱིཧོ.

(ཙིཏྲཔདཱགཱཐཱ)

༦.

བུདྡྷཾ ¶ སུདྡྷཾ ལོཀེསཱིཏཾ, ཨུཀྐཾ ཡུཏྟཾ ཡོགེ ཧཾ;

ཝནྟཱཏཱིཏཾ ཨོགྷེ སཱིདཾ, ཝནྡཱཔཱིཧཾ སོཀེཧཱིཧཾ.

(ཝིཛྫུམྨཱལཱགཱཐཱ)

༧.

བྷོགཝཏཱི ཡོཔཁམཱི, སཱིཏདཡཱ ལོཀསཁཱ;

དྷཱཏུཏཡེ ཀིཏྟི ས ཝེ, དཱཏུ ཛཡེ-ཏསྶ ཙ མེ;

(མཱཎཝཀགཱཐཱ)

༨.

མཱནིཏོ ལུཁོ རུཏོཐ, སནྣིབྷོ སུབྷོ སུཁོ ཙ;

ཛཱནིཏོ དྷརོ ནམོ ཙ, ཏསྶ ཡོ ཐུཏོ གུཎོཝ.

(སམཱནིཀཱགཱཐཱ)

༩.

ཛཡཾ ¶ དྷཛཾ པཛཱཔུགེ, ཋིཏཾ ལིལཾ མཧཱསུཁེ;

སུབྷཾ ཕུཊཾ པབྷཾ ནམེ, ཧིཏཾ སུཁཾ དདཱཏུ མེ.

(པམཱཎིཀཱགཱཐཱ)

༡༠.

པུཎྞཔུཉྙཛནིཏསུབྷཾ, ཛཱཏིཉཱཏིཐུཏིཡགུཎཾ;

བྷེདཝེརཝིམལཛིནཾ, ཉཱཎཔཱདཙརཎ-མཧཾ.

(ཧལམུཁཱིགཱཐཱ)

༡༡.

སཏི མཏི སུཙི ཡོ-བྷཱསོ, ཐུཏི མུནི སུཁིཏོ ཀཱཡོ;

མནུཛཔུམསུཏོ ནཱཐོ, ཛཡཝར མུ-སབྷོ དཱཏོ.

(བྷུཛགསུསུགཱཐཱ)

༡༢.

ཡོ ¶ བུདྡྷོ པཝརོ ལིལོ པུགེ,

ལོཀུཏྟོ ཨབྷཡོ ཋིཏོ སུཁེ;

ཨུཏྟིཎྞཾ ནིསབྷཾ ཧིཏཾ ཝཧེ,

མོནིནྡཾ ཝིམལཾ ཛིནཾ ནམེ.

(སུདྡྷཝིརཱཛིཏགཱཐཱ)

༡༣.

དེཝིནྡཾ ཝརགཎཐེརིནྡཾ,

ནིཊྛཱནཾ བྷཝཛནནིབྦཱནཾ;

ནིདྡོསཾ རཎརཛནིཔྥོཊཾ,

ཝནྡེ-ཧཾ སུབྷམུཁསོཎྞེམཾ.

(པཎཝགཱཐཱ)

༡༤.

གོཏམགོཏྟེ ¶ ཀེཏུཝ ཉཱཏཾ,

ལོཀཛཁེཏྟེ མེརུཝ ཛཱཏཾ;

ཐནྡིལཛེཊྛེ བྷེདིཏམཱརཾ,

པཎྜིཏམཛ྄ཛྷེ མེདྷིཝ བྷཱཎཾ;

མནྟིཡ ཝནྡེ སེཝིཏནཱཐཾ.

(རུམྨཝཏཱིགཱཐཱ)

༡༥.

བུདྡྷོ སུཀྐོ ཨམིཏགུཎཱིསོ,

ཡུཏྟོ མུཏྟོ སསིཝ ཏིམཱིཏོ;

ཁེ ཡོ ཏེཛོ ཏཔསིཝ ཨཀྐོ,

ཕེལོ ཐེཏོ ཏཝ ནམཀཱརོ.

(མཏྟཱགཱཐཱ)

༡༦.

ཡོ ¶ ཛིཏམཱརེ ཝེ ཨཛི སབྦཾ,

ཐོ མིཏསཱརེ ཧེ-དྷིཏཔཏྟཾ;

སཾསིཏཔུཎྞོ སོ ནམི ཏསྶ,

པཎྜིཏཕུལློ སོ མཏིཀསྶ.

(ཙམྤཀམཱལཱགཱཐཱ)

༡༧.

ཀནཀརཱུཔ ¶ མཱུཔམེཡྻཀཾ,

པཝརསཱུར པཱུཛསེཝཏཾ;

ཀམལབྷཱུམ དྷཱུརདེསཀཾ,

ནརམརཱུཔ རཱུ ནམེ ཏ-ཧཾ.

(མནོརམཱགཱཐཱ)

༡༨.

དེཝེ གཏེ དྭེཝཱརཱ གམཱསི,

སེལེ ཙལེ ཡེ ཉཱཏཱ པཙཱཡི;

ཨུདྡྷཾ ཏལེ ཏེཝཱསཾ ཨཀཱསི,

བུདྡྷཾ མཏེ ཨེསཱཧཾ ནམཱམི.

(ཨུབྦྷཱསཀནྟགཱཐཱ)

༡༩.

ཨུཀྐེ སུནུཏཾ པུཐུཀཉྩ ཐེརཾ,

ཝུཏྟེ སུཁུམཾ ཨུཛུཀཾ ཏཐེཏཾ;

དིབྦེ པཊིམཾ ཀིརིཡཾ ཝདེཏཾ,

ཨིདྡྷེ མཧིཏཾ ཀཐིཏཾ ནམེཧཾ.

(ཨུཔཊྛིཏགཱཐཱ)

༢༠. དིབྦསྶ ¶ པཱུརེ པཝརེཧི གུཏྟོ,

སིདྡྷཏྠ བྷཱུཏེ ནགརེཧི ཝུཊྛོ;

སངྐསྶ པཱུརེ མ-གཎེཧི བུདྡྷོ,

ཨཉྙཏྠ པཱུཛེ པནམེ ནི ཀུབྦོ.

(ཨིནྡཝཛིརཱགཱཐཱ)

༢༡.

སུབྷཾ ཐུཏཾ ཡོ རཛཏཾ བལཏྠཾ,

ཡུགཾ ཧུཏཾ སོ ཀནཀཾ ཀམཏྠཾ;

ཙིཏཾ ཋིཏཾ ལོཧིཏཀཾ མནཱཔཾ,

ལིལཾ ཨིཏཾ སོརཙི ཏཾ ནམཱཧཾ.

(ཨུཔེནྡཝཛིརཱགཱཐཱ)

༢༢.

པིནིཏཾ ¶ ཝིཎཾ སཁིལཾ ཡཛི ཏཾ,

སུསུཁཾ དྷུཛཾ བིལུཝཾ ནིཡུཏཾ;

ཋཔིཡཾ སིམཾ ཐུནུཏཾ པུཐུལཾ,

ནམི ཧཾ ཁིཎཾ སུཁུམཾ མུདུཀཾ.

(སུམུཁཱིགཱཐཱ)

༢༣.

སོགཏི ¶ བོདྷཡིཾ གཱཧིཡ པཏྟཾ,

ཨོཏརི སོནམི ཛཱནིཏ ཨཏྠཾ;

བྷཱུཔཏི པཱུཛཡི སཱཀིཡ ཝཾསཾ,

སཱུཛདྷི ཨཱུཔདྷི བྷཱསིཏ དྷམྨཾ.

(དོདྷཀགཱཐཱ)

༢༤.

ཙཏྟཱརོ-མེ ཡཱཙིཏེ སོ པཝུཏྠེ,

ལདྡྷཱ བྷོགེ ཀཱམིཏེ ཨོགྷམུཏྟེ;

ཀཏྟཱ ཏོསེ-ཏཾ ནམེ ཙོལཡུཏྟེ,

ཏཏྠཱ-ལོཀེ ཏཾཔཏེ ཁོ པདུཀྐེ.

(སཱལིནཱིགཱཐཱ)

༢༥.

སཏྟཱ-ལོཀོ ¶ སརིཏོ ཡོ དྷཛུཀྐཾ,

ཏཏྠཱ-གོཔོ རཙིཡོ-ནོཛ-མུདྡྷཾ;

བྷདྡཱ-སོཀོ-པཙིཏོ-བྷོ པབུདྡྷཾ,

སདྡྷཱཡོགོ བྷཛི སོ-ཧོ-ནམུཙྩཾ.

(ཝཱཏོམྤཱིགཱཐཱ)

༢༦.

ཉཱཏམརཱུནཾ ཨུཔརི ཋིཏཱནཾ,

ཝཱལཔསཱུཀཾ ཧུཝཏི ཛིནཱནཾ;

དེཝསུཡཱམོ ཛིནམིཏི ཉཱཏོ,

ཏེན སུཁཱ-བྷོ ཝིནམི ཨིདཱ སོ.

(སིརཱིགཱཐཱ)

༢༧.

པུཎྞཀེན ¶ ཀུསུམེན སེཝཏཾ,

ཀུཉྫརེཝ ཐུནུཏེན ཁེ གཏཾ;

སུནྡརེན ནམི ཏེན མེ ཛཡཾ,

པུཉྙཏེཛཀརི-དྷེས ཝེ དདཾ.

(རཐོདྡྷཏཱགཱཐཱ)

༢༨.

མཱཏུ ཨཱཡུ ཁིཎུ-ཀེ ཨིཧ པུབྦེ,

ཏཱསུ སཱདྷུ ཝིསུཏེ-དིསཀུཙྩེ;

ཝཱཏ ཏཱལ ཁཙིཏེནི-དྷ སོཎྞེ,

‘‘ཏཱཏ ཏཱཏ’’ ཡཛི ཏེ-ཏིས ཝནྡེ.

(སྭཱགཏགཱཐཱ)

༢༩.

ཨུཔརི ¶ ཀམལཡོནི སོབྷིཏཾ,

ཛུཧཏི དྷཝལཛོཏི-དོསིཏཾ;

སུཀརི ཡ-མཏབོདྷི-མོཙིཏཾ,

སུནམི ཙརཎལོཀི-དྷོ-རིམཾ.

(བྷདྡིཀཱགཱཐཱ)

༣༠.

ཝནེ ¶ ཛིནོ ཡོ ཝིནཡཾ སུཔེཀྑི-མཾ,

མཏེ ཋིཏོ-བྷོ དིཛཀཾ དུབཛྫིཏཾ;

ཨགྷེ-ནིདྷོ ཁོབྷི-ཏརཾ མུནེ-ཙྪི-དཾ,

ནམེ-བྷིཏོ བོདྷིམཧཾ ལུཁ-ཛ྄ཛྷིཏཾ.

(ཝཾསཊྛགཱཐཱ)

༣༡.

ཡོ ཛཱཏི-དོམཱནཱི-མུཔཱསི ལམྦི ཏཾ,

ཀོདྷེཧི ལོཀེཧི དུབྷཱསི པཎྜིཏཾ;

པཱུརེཔི མཱུལེཔི པཧཱསི དིཊྛིཀཾ,

སབྦེཧི པཏྟེཧི ནམཱམི ཨིཙྪིཏཾ.

(ཨིནྡཝཾསཱགཱཐཱ)

༣༢.

ཝེརཉྫཀེ ¶ པཱུརཝརེ ཝིབྷཱུསིཏེ,

ནེལཉྫནེ དཱུམཝནེ ཝིཀཱུཛིཏེ;

ཁེམངྐརེ ཐཱུལཏརེ ཝིདཱུ སིཏེ,

ཨེཏ-ངྒམེ པཱུན ནམེ ཝིརཱུཔི ཝེ.

(ཨིནྡཝཾསཱགཱཐཱ)

༣༣.

ཨདྷུནཱཔི ས སཱརིསུཏོ ནིམལཾ,

ཏམུཔཱསི མཏཱཔི ཀུཏོ ཙི ནཡཾ;

ཀརུཎཱཡི དྷ ཡཱཙི བུདྷོ ཝིནཡཾ,

གརུཀཱཔི ནམཱམི སུ-ཡོ ཛིཏ-ཧཾ.

(ཏོཊཀགཱཐཱ)

༣༤.

ཛནཝརོ ¶ མུནི སོ སརིཏོ ཝནེ,

ཝསབྷཏོ ཨུདིཏོ-པརི གོཏམེ;

གམནསོ གུཎིཀོ གམི-ཏོ ནམེ,

ནགར-དོ ཛུཏི-མོ གྷཏིཏོ-སཐེ.

(དུཏཝིལམྦིཏགཱཐཱ)

༣༥.

བྷགཝཏི ¶ ཀུཊིགཱརེ ཡོ ནིསིནྣེ,

དྷནཝཏི སུཝིསཱལེ-ཀོ ཨིསིནྡེ;

ཡ-མལབྷི མུནི ལཱབྷེ མོལིཚིནྣེ,

ས པནམི ཛུཏི-མཱསེ-ཏོ ཀིལིནྣེ.

(པུཊགཱཐཱ)

༣༦.

པཋཔིཏ-མིཙྩསྶ སིདཏུ སབྦཾ,

པཋམི-དྷ སིཀྑསྶ ཧིཏསུཁཏྠཾ;

པཝདིཡ གིདྡྷསྶ ཁིཎལུཁཏྠཾ,

པནམི ཙ ཀིཙྩསྶ སིཁམུཀཔྤཾ.

(ཀུསུམཝིཙིཏྟཱགཱཐཱ)

༣༧.

ནིལོབྷཱསི ¶ དྷཱུམེཧི ཡུ-ཙྩོ ཝིལཱསེ,

ཋིཏོ ཙཱ-བྷི བྷཱུ ཏེཧི རུཀྑོ-དིགཱཧེ;

ཡི-ཏོ ཏཱནི པཱུརེཔི ལུདྡྷོ དྭིཝཱརེ,

ཛིནོ-ཀཱསི པཱུཛེམི བུདྡྷོ ཧིཏཱ-སེ.

(བྷུཛངྒཔྤཡཱཏགཱཐཱ)

༣༨.

ཛནརམེ ¶ དསསརེ ཝིསཱལཀེ,

མུནིཝརེ ཀུཊིགྷརེ-རིཡཱཔཐེ;

དྷུཏཏརེ-སུབྷཀཐེ ཙཛི ས ཝེ,

ཏཏིཡཀེ-ཏ-མིདྷ ཝེ ཋཔི ནམེ.

(པིཡཾཝདཱགཱཐཱ)

༣༩.

ཝེསཱལིཀེ ཏུ ཝསི ཀཱཏུ ཙཱཏུཀཾ,

ཏེ ཉཱཧི ཏེསུ ལབྷི-དྷཱ-མུཀཱ-མུཀཾ;

ནེགཱམིཀེསུ བྷཛི ཕཱསུ སཱ-ཡུཀཾ,

ཨེཏཱ-དྷིཀེསུ ནམི-ཀཱསུ-དཱ-ཏུལཾ.

(ལལིཏཱགཱཐཱ)

༤༠.

ཝདི ¶ སུཔྤིཡོ དུཝཙནཾ ཏམཏོ,

སཧི མུཏྟིཀོ གུཎཀཐཾ ཏཐཏོ;

གམི མཱཎཝོ དུརཔཐཾ ཙརཏོ,

ནམི སཱདྷཝོ བུདྷཝརཾ པརསོ.

(པམིཏཀྑརཱགཱཐཱ)

༤༡.

ཡུ-པགམི ཝིམལོ སཁིལོ ཏདཱ,

ཡུཝཝཏི-པིཝནོ རམི ཡོ བྲཧྨཱ;

ཨེཀསཡི ¶ ཋིཏཏོ ཀཐི ཁོ གུཎེ,

ཨེས ནམི ཛིན-མོ པདྷི-དོ-ཛུཀེ.

(ཨུཛྫལཱགཱཐཱ)

༤༢.

ཛཱནཾ སབྦེསཾ དེསི ཡོ ཁོ-དྷིམུཏྟཾ,

ཨཱནནྡཏྠེརཾ ཝེདིཏོ ཙོལི༹སུཏྟཾ;

ཀཱཡསྶམྨུཁེ ཀཱཏུནོ-ལོཀིཡཾ-སེ,

ཋཱན-སྶ-པྤུགེ ཀཱརུཎོ ཧོཏི ཝནྡེ.

(ཝེསྶདེཝཱི གཱཐཱ)

༤༣.

སུཀཐིཡ ¶ མཛ྄ཛྷིམསཱིལ-མཔརཾ,

ཡུ-པཙིཏ-མེཏྠི-དྷ ཙཱིར-མནཡཾ;

བུདྷཡི ཙ བྷཛྫིཏ-མཱིཎཝཏརཾ,

སུནམི པཝཛྫིཏ-མཱིཧ-མམལཾ.

(ཏཱམརསགཱཐཱ)

༤༤.

མཧཀཉྷི སཱིལམྤི ཨབྷཱསི ཀནྟེ,

བྲཧྨཐནྡིལཱི མམྷི མནཱཔི རམྨེ;

ཙལཀམྤི གཱིརམྤི ཀདཱཙི ཨམྦེ,

ཝརཔཎྜི ཁཱིཎམྤི ནམཱམི ཏཾ ཝེ.

(ཀམལཱགཱཐཱ)

༤༥.

མོཧནྟེ ¶ ཛིནི པཋམེ ཛཡེ ཛིཏཱཡཾ,

སོརམྨེ ཨིསིཔཏནེ ཝནེ ནིཝཱསཾ.

ཁོབྷནྟེ ཀིརི སཀལེ ཝདེ ཝིལཱསཾ,

གྷོརཾཝེ ཝིནིདམནེ ནམེ ཛིནཱ-ཧཾ.

(པཧཱསིནཱིགཱཐཱ)

༤༦.

དིཝཱརཀཾ བཛནགརཾ ཕིཏཾ ཝསེ,

ནིསཱཡ ཏཾ ཛནགཎནཾ ཋིཏཾ མཏེ;

ཝིཛཱནཀཾ ཏམཛཊཀཾ སིཏཾ ཝནེ,

ཧིཏཱཝཧཾ ནརཔཝརཾ ཨིམཾ ནམེ.

(རུཙིརགཱཐཱ)

༤༧.

རཙིཏ-མཝིརལཾ ¶ མནུསྶ མཐཱ པཎཾ,

པསིཡ ཏཏིཡཀཾ ཙཏུཏྠ མཀཱ སཡཾ;

ཀརིཏ-མདྷིཀཏཾ ཨཁུབྦྷམལཱ སབྷཾ,

ཛཧིཏགཏིཔརཾ པནུཛྫ ནམཱམ-ཧཾ.

(པརཱཛིཏཱགཱཐཱ)

༤༨.

ནགར-མཛཡ-མེས ནིཝསི ཐ པརེ,

མཧཏི ས མཎིཀེ སཀུཎཀུཛཝནེ;

ཡཔཏི ཝསཏི ཝེ ཧིཏསིཝཝཧནེ,

སུརཏ མུབྷཡམེ-སིཏ མིམ པནམེ.

(པཧརཎཀལིཀཱགཱཐཱ)

༤༩.

ཚཊྛཾ ¶ ཝསེ ཨཐུ-ད ཏཏྠ ཝནེ མུནེ སཾ,

སབྦཾ དྷརེ མཀུལཔབྦཏཀེ ཨུཔེདཾ;

ཙཏྟཾ མལེ མནུཛ མཏྠཝསེ སུདེསཾ,

བྷཏྟཾ ནམེ ལཧུཀ མཔྤ མརེ དྷུནེ ཏཾ.

(ཝསནྟཏིལཀགཱཐཱ)

༥༠.

ནུན ¶ ཨུཔཝསཏི ཨིདྷ ཐ པུན པརིམེ,

སུཁགུཎམཧཏི ཏིདསཔུར ཨཛིཏེ;

ཡུགནུཏ མཝདི ཝིཏཐ མུགྷཏརི ཝེ,

ཧུཏཐུན མནམི སིམད ཏུལ མརིཡེ.

(སསིཀལཱགཱཐཱ)

༥༡.

ཛིནཔཏི སུསུམཱརཾ བྷེསཀལླཱཝནེ-སཾ,

ནིཝསཏི པུཐུཉཱཎཾ ཁྭེ-ས ནནྡཱལཡེ-ཏཾ;

ཝིམལ-མི དྷུ-ཛུཀཱཡཾ བྷེདསནྟཱཔ-སེསཾ,

ཝིཛཧ-པི སུཁུམཱལཾ ཨེསམནྟཱ ནམེ-ཧཾ.

(མཱལིནཱིགཱཐཱ)

༥༢.

མཧཏི ¶ སུཀནྟིཡེ ཨཐ ཙ ཏཏྠ སཱིཏལེ,

ཝསཏི ཀུསམྦིཡེ ནཝམཝསྶ-པཱི-ཏརེ;

ཨཝཧི སུཁ-ནྟིམེ པཛཧ-མཏྠ-མཱི-དྷ ཝེ,

པནམི ནུདཾ ཧིནེ སཀལསཏྠཝསཡེ.

(པབྷདྡཀགཱཐཱ)

༥༣.

ཡུདྷཝཏི པཱལིལེཡྻཀ ཝནེ པཧཱཡ ནཱགེ,

ཨུཔཋཧི ནཱགི-དྷེ-ས དསམེ ཛཧཱཡ བཱལེ;

སུཁཝསི ཀཱཡིཀེ ཙ མནཀེ ཏདཱས སཱཏེ,

ཡུཏ-མདྷི ཝཱཧིཏེ ཙ པནམེ པཡཱཏ མཱརེ.

(ཝཱཎིནཱིགཱཐཱ)

༥༤.

ཨིཏོ ¶ པཏྟེ ནཱལེ༹ ཝསཏི དིཛགཱམེཔི དསམེ,

ཧིཏོཔཏྠེནཱ-ཡེཀ ཨདྷིཀི-དྷ ཝཱདེཧི ཝདཀེ;

ཝིལོམཏྠེཧཱ-ནེཀ-སཧི ཋིཏ-མཱགྷེཔི སམཡེ,

ཝིཡོགཏྠེ-ཏཱ-ནེཛ-མཔི པིཧཝཱསེཧི པནམེ.

(སིཁརཎཱིགཱཐཱ)

༥༥.

དྭིཨདྷིཀི-ཏརེ ¶ ཝེརཉྫཱཡཾ ཏཏོ དསམཾ པརེ,

ནིཝསི ནིལཀེ ཁེདངྒྷཱཏཾ ཀརོ པརམཾ ཝནེ;

ཀིལམི ཨིདྷ ཝེ ཝེཧངྒཱནཾ མནོརམཀཾ ཝསེ,

ཝིརཛི-སིགཎེ མེདྷངྐཱརཾ ཨསོཀདདཾ ནམེ.

(ཧིརིཎཱིགཱཐཱ)

༥༦.

ཡོ སམྤུཎྞེ ཨུཔརི ཏིརསེ ཙཱལིཡེ པབྦཏེཔི,

སོབྷཾ ཕུལླེ སུཝསི ཨིཏརེ ཀཱམིཏེ ཨཔྤམེཧི;

སཱཝཏྠིཀྐེནུ-ད ཙཏུདསེ ཀཱརིཏེ ཨཱལཡེཔི,

ཀཱམོ-ཙྪིདྡེ ཏུ བྷཡ མུནམེ ཉཱཏིམེ དྭཱརཀེཧི.

(མནྡཀྐནྟཱགཱཐཱ)

༥༧.

སཀྐོ ¶ ཀཔྤིལེ ཀརིཡ མདཀེ ནིགྒཧོ ཡོཏི པཉྩེ,

དཀྑོ ཀཔྤིཡེ ཝསིདྷ ཡམཀེ ཨིདྡྷཀོ བྷོཧི ཨཉྙེ;

ཡཀྑོ དབྦིཀེ དམིཡ ནགརེ སོལ༹སེ-ཏོཔི ཝངྐེ,

ཨགྒོ-གྷཏྟིཏེ པཙིཡ པནམེ བོདྷཀེ མོནིཔཉྙེ.

(ཀུསུམིཏལཏཱཝེལླིཏགཱཐཱ)

༥༨.

དུལདྡྷེ ¶ པཱུརེ ཡོཔརི ཙ དསཏོ རཱཛགེཧཾ བྷཛནྟོ,

ཏུ སཏྟེ ཀཱུལེ ཁོ ཀརི དྷ ཡཔཏོ ཝཱསམེཛཾ ཛཧནྟོ;

དུམཊྛེ པཱུནེསོ རམིཏ-ཙལཏོ ཊྛཱརསེཏཾ དདཾ སོ,

གུཎསྶེ ཝཱུཔེཏོ ནམིདྷ ཀརབྷོ ཀཱཡཁེདཾ སཧནྟོ.

(མེགྷཝིཔྥུཛྫིཏགཱཐཱ)

༥༩.

ཙཱལཱིཡེ ¶ པརིམེ ཏཐེཝ ཨཙལེ-ཀཱུནེཔི ཝཱིསེ ལིལཾ,

བྷཱགཱི ཙེ ས ཧིཏེ པགེཝ པཝསེ སཱུརེཧི ནིསེཝིཏཾ;

ཀཱརིཏེ རམིཀེ པརེ ཙ ནགརེ པཱུརེཔི ཝཱིསེ ཨིམཾ,

ཧཱརིཏེ ཝསིམེ ཛཧེན པནམེ མཱུལེཔི ཁཱིཎེ ཛིཏཾ.

(སདྡཱུལཝིཀྐཱིལིཏགཱཐཱ)

༦༠.

པཉྩཔཉྩ-མཱཀརེ ཏཏོཔི པིཎྜཀེན ཛེཏཀཱནནེ ཙ,

ཨཉྙམཉྙ-མཱདརེན ཡོ ནིསིནྣཀེན ཏེ ཙ མཱཔཡེཝ;

པུབྦཔུབྦཨཱརཱམེ པཡོཛི-པཱསིཀཱཡ ཝཱརམཱཝསེདྷ,

སུདྡྷསུདྡྷ-མཱམལེན པོརིཡཱཏིམཱཡ མཱནསཱ ནམེས.

(ཝུཏྟགཱཐཱ)

པུཉྙེནཱ’ནེན ¶ སཾསཱརམུཔདྷི སུཙི སཔྤཱུརིསེ ཝོ པསེཝེ,

ཏེཧཱ དིནྣཾ སུགཱཧོ སུཙིཔརིསཨུཔེཏོ ཨརོགོ བྷཝེཡྻཾ;

དཱིགྷཱཡཱུཀོ མཧཱཔཉྙ ཡསདྷནསུལཱབྷོ ཙ ཀལྱཱཎམིཏྟོ,

ལོཀཱདིབྦོ ཙ མགྒོ སམམཏིཔརིཝཱརོཝ ནིབྦཱནཔཏྟོ.

(སདྡྷརཱགཱཐཱ)

ཀ.

ནསྶཏི ¶ སཱསནེ ཚནཝུཏཱདྷིཀེ ཙ ཏིཝིསེ སཏེ ཀལིཡུགེ,

དྭེསཏཙུདྡསཱདྷིཀསཧསྶཀེ སཀལརཊྛཀཾ ཁུབྷི གཏེ;

བྷཱཏིཀཡུདྡྷཀེན ནགརཾ ཏདཱ བྷཝཏི ཚཱརིཀཱ ཡཏིགཎོ,

དུཀྑགཏོ མཧཱཔཧརཎེཧི ཛིཝིཏཁཡམྤི ཨེཏི པིཊཀེ.

(བྷདྡཀགཱཐཱ)

ཁ.

ཨུདིསཀ ¶ ཙེཏྱཀེཔི ཝིཀིརིཡ ནཱསཏི དྷ སོ ཐིརོ སགཎཏོ,

ཝིཛཧིཡ པུརཏོ ཏྟརཝནེཀ ཀུམྦྷཀརགཱམཀཾ ནིཝསཡེ;

སཏགཎཀེཧི ཏཏྠ ཛནཀོཔི ‘‘བྷོཏ ཨིདྷ ཝཱས སབྦཡཏིནཾ,

ཨུཔཊྛཧམཱི’’ཏི ཏམྷི ཀཏིཔཱཧནཾ ཝསཏི ཁོ ཝིམཾསིཡ སུཁཾ.

(ལལིཏགཱཐཱ)

ག.

ཏཏྠ ཨརཉྙེ རམིཏོ སུཙརི སདྡྷམྨ-ཏིམཱནི སུཡཏཱིཧི ཏིཔཱིཀོ,

དྷཱུརསུཡུཏྟོ པརིགཱཧིཡ སུཛཱཏོ སུཔཊྛཱཏི ཀུནདིཏ-མུཡཱནཾ;

སོ སཏམཙྩེཧི ཀཏཾ ནགརི དཾ ཏསྶ ཙ པཱཙིན རཧ དྷིཀཀོསེ,

པཙྩཡནཱཡཱསུ ད ཚཱཡབཧུཀོ སུདྡྷཡཏིཔི ཨིདྷ ཝསནཀཱལེ.

(ཏནུགཱཐཱ)

གྷ.

ཕགྒུཎམཱསེ ཚདིནེ རཙིཡ ནིཊྛཾཝ གཏོ པརམརི ཨིམིནཱ-ཡཾ,

སིཛ྄ཛྷཏུ པེམཾ ཝཏ རཀྑཏུ སུདེཝོ ཨུད ཝཌྜྷཏུ ཛིནཝཙནེ ཏཾ;

ཝཱསམཱལིནཱི ནིཊྛིཏཱ.