📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

སུཏྟཝནྡནཱ

༡.

དྷམྨཏྠ ¶ དེསནཱ ཝེདྷ,

ཙཏུགམྦྷཱིར དུདྡསཾ;

དྷམྨཾ ལོཀསྶ དེསེནྟཾ,

དྷམྨརཱཛཾ ནམཱམཧཾ;

༢.

བུདྡྷོ ¶ པཙྩེཀབུདྡྷོ ཙ,

ཨརཧཱ ཙཀྐཝཏྟཱིཏི;

ཐཱུཔཱཐཱུཔཱརཧཾ ཝནྡེ,

ཙཏུཐཱུཔཱརཧེསུ ཏཾ;

༣.

པེཏསེཡྻོ ¶ ཀཱམབྷོགཱི,

སཱིཧསེཡྻོ ཏཐཱགཏོ;

སཡནྟཾ ཙཏུསེཡྻེསུ,

ཙཏུཏྠེན ནམེ ཛིནཾ;

༤.

ཨཎྜཛཱ ཛལཱབུཛཱ ཙ;

སཾསེདཛོ པཔཱཏིཀཱ;

ཙཏུཡོནི པརིཙྪེད,

ཉཱཎཝནྟཾ ནམེ ཛིནཾ;

༥.

སུཏབུདྡྷོནུབུདྡྷོ ¶ ཙ,

པཙྩེཀོ ཛིནབུདྡྷོཏི;

ཙཏུཏྠཾ ཙཏུབུདྡྷེསུ,

ཝནྡཱམི ལོཀནཱཡཀཾ;

༦.

རཱཧུགྒཾ ¶ ཨཏྟབྷཱགཱིནཾ,

མནྡྷཱཏཱ ཀཱམབྷོགཱིནཾ;

མཱརོ ཨདྷིཔཏེཡྻཱནཾ,

བུདྡྷོ ལོཀེ སདེཝཀེ;

ཙཏུཨགྒ པཉྙཏྟཱིནཾ,

ཨགྒཔཏྟཾ ནམེ ཛིནཾ.

༧.

དཱནཾ ¶ པིཡཀཐཱ ཨཏྠ,

ཙརིཡཱ སདིསཏྟཏཱ;

ཙཏུསངྒཧ ཝཏྠཱུཧི,

ཨསངྑིཡེསུ ཛཱཏིསུ;

ལོཀསྶ སངྒཧེཏཱརཾ,

ཝནྡཱམི ལོཀནཱཡཀཾ;

༨.

ལོབྷོ དོསོ ཙ མོཧོཏི,

ཨནྟོ པཙྩཏྠིཀེ ཏཡོ;

དུཛྫཡེ ¶ སབྦཝེརཱིཧི,

སཉྫིཏཾཔི སུདྷིཾ ནམེ;

༩.

ཛཱཏི པུཉྙ མཧཏྟཱནི,

གུཎམཧཏྟམུཏྟམཾ;

ཏིམཧཏྠེཧི སམྤནྣཾ,

ཝནྡཱམི ལོཀནཱཡཀཾ;

༡༠.

ཧེཏུ ¶ ཕལ སམྤདཱཡོ,

སཏྟུཔཀཱརསམྤདཱ;

ཏིསམྤདཱཧི སམྤནྣཾ,

ཝནྡཱམི ལོཀནཱཡཀཾ.

༡༡.

ཉཱཎཔྤཧཱནཱནུབྷཱཝ,

སུརཱུཔཀཱརསམྤདཱ;

ཙཏུཕལ སམྤདཱཧི,

ཏཾ སམྤནྣཾ ནམེ ཛིནཾ.

༡༢.

ཨཱསཡོ ¶ ཙ པཡོགོཏི,

སཏྟུཔཀཱར སམྤདཱ;

དུཝིདྷཱ ཡསྶ སམྤནྣཱ,

སམྨཱ མཾ པཱཏུ སོ ཛིནོ.

༡༣.

མཧོསདྷེ ཝེསྶནྟརེ,

པཙྪིམབྷཝིཀེ ཏཐཱ;

ཏིཛཱཏཱིསུ ནམེ ཝཱཙཾ,

བྷཱསེནྟཾ ཛཱཡནཀྑཎེ.

༡༤.

ནེམིམྷི ¶ སཱདྷིནེ ཙེཝ,

མནྡྷཱཏརི ཙ གུཏྟིལེ;

ཙཏཱུསུ མནུཛཏྟེན,

དེཝལོཀཾ གཏཾ ནམེ.

༡༥.

སངྑཱརོ རཱུཔཝིཀཱརོ,

ལཀྑཎཾ ཝཱནནིསྶཊཾ;

ནིབྦཱནཾ ¶ པཉྙཏྟིཙེཏི,

པཉྩ ཉེཡྻནྟགུཾ ནམེ.

༡༦.

པུཏྟ དཱར པརིཙྩཱགཱ,

རཛྫངྒཾ ཛཱིཝ ཙཱགཱིཏི;

པཉྩ མཧཱཔརིཙྩཱགེ,

ཀརཾ སུདུཀྐརེ ནམེ.

༡༧.

རཱུཔཉྩ ¶ ཝེདནཱ སཉྙཱ,

སངྑཱརཱ ཝིཉྙཱཎནྟིམེ;

པཉྩཀྑནྡྷེ པརིཛཱནཾ,

ཏིཔརིཉྙཱཧི ཏཾ ནམེ.

༡༨.

མནུསྶ དེཝ གཏིཡོ,

པེཏོ ཙ ནིརཡོ ཏཐཱ;

ཏིརཙྪཱནོཏི པཉྩེཏཱ,

ཚིནྡནྟཾ གཏིཡོ ནམེ;

༡༩.

དེཝཔུཏྟོ ¶ ཀིལེསོ ཙ,

ཨབྷིསངྑཱར མཱརཀོ;

ཁནྡྷོ མཙྩཱུཏི པཉྩེཏེ,

མཱརེ ཝིཛིཏཝཾ ནམེ.

༢༠.

པུརེབྷཏྟཾ པཙྪཱབྷཏྟཾ,

པུརིམཉྩེཝ མཛ྄ཛྷིམཾ;

པཙྪིམནྟི སདཱ པཉྩ,

བུདྡྷཀིཙྩཾ ཀརཾ ནམེ.

༢༡.

རཱུཔཱ ¶ སདྡཱ གནྡྷཱ རསཱ,

ཕོཊྛབྦཱ ཙ མནོརམཱ;

པཉྩ ཀཱམགུཎེ ཧིཏྭཱ,

ཁེལ༹ཾཝ ནིགྒཏཾ ནམེ.

༢༢.

རཱགསལླཾ ¶ དོསསལླཾ,

མོཧཱ མཱནོ ཙ དིཊྛཱིཏི;

ཝནྡེ ཝཛྫཱཏིཝཛྫནྟཾ,

པཉྩསལླཔནཱུདནཾ.

༢༣.

དཱིགྷོ མཛ྄ཛྷིམ སཾཡུཏྟཱ,

ཨངྒུཏྟརོ ཙ ཁུདྡཀོ;

ཨིཏི པཉྩ ནིཀཱཡེཧི,

སུཝིནེནྟཾ པཛཾ ནམེ.

༢༤.

ཨིསྶརིཡཾ ¶ ཡསོ དྷམྨོ,

ཀཱམོ སིརཱི པཡཏྟཱིཏི;

བྷགྱེཧི ཚཧི སམྤནྣཾ,

ཝནྡཱམི ལོཀནཱཡཀཾ.

༢༥.

པིཡཱཔིཡཾ ¶ བྷཱུཏཱབྷཱུཏཾ,

ཨཏྠཱནཏྠཾ ཡཐཱརཧཾ;

མིསྶཱ ཚསུ སུཝཱཙཾཝ,

བྷཱསནྟཾ ཨཏྠཀཾ ནམེ.

༢༦.

ཨལསོ ཙ པམཱདོ ཙ,

ཨནུཊྛཱནཾ ཨསཾཡམོ;

ནིདྡཱ ཏནྟཱིཏི ཚིདྡེཧི,

ཚཧི མུཏྟཾ སདཱ ནམེ.

༢༧.

མཧཱཀརུཎཱསམཱཔཏྟི ¶ ,

ཡམཀཔྤཱཊིཧཱརིཡཾ;

ཨཱསཡཱནུསཡེ ཉཱཎཾ,

ཨིནྡྲིཡཱན པརོཔརེ;

སབྦཉྙུཏཱ ནཱཝརཎཾ,

ཚཱ སཱདྷཱརཎིཀཾ ནམེ.

༢༨.

ཀཱམཙྪནྡོ ¶ ཙ བྱཱཔཱདོ,

ཐིནམིདྡྷཉྩ སཾསཡོ;

ཨཝིཛྫུདྡྷཙྩ ཀུཀྐུཙྩཾ,

ཚཝིནཱིཝརཎཾ ནམེ.

༢༩.

ཨིདྡྷིཝིདྷཾ དིབྦསོཏཾ,

པརཙིཏྟ ཝིཛཱནནཱ;

པུབྦེནིཝཱསཱནུསྶཏི ¶ ,

དིབྦཙཀྑཱསཝཀྑཡོ;

ཚལ༹བྷིཉྙཱཧི སམྤནྣཾ,

ཝནྡཱམི པུརིསུཏྟམཾ.

༣༠.

ནཱིལ པཱིཏཱ ཙ ཨོདཱཏཱ,

མཉྫིཊྛཱ ཙ པབྷསྶརཱ;

ལོཧིཏཱཏི ཚ རཾསཱིཧཱི,

ཝིཛྫོཏནྟཾ སདཱ ནམེ.

༣༡.

ཨསྶཱདཱདཱིནཝོ ¶ ཙེཝ,

ནིསྶརཎཕལཾ ཏཐཱ;

ཨུཔཱཡཱཎཏྟཱིཏི ཚདྷཱ,

སདྡྷམྨདེསཀཾ ནམེ.

༣༢.

རཱགོ ¶ དོསོ ཙ མོཧོ ཙ,

ཝིཏཀྐཙརིཡཱ ཏཐཱ;

སདྡྷཱ བུདྡྷཱིཏི བྷཱཛེནྟཾ,

ཏཱ ཚལེ༹ཙརིཡཱ ནམེ.

༣༣.

རཛཏཾ ཀནཀཾ མུཏྟཱ,

མཎི ཝེལུ༹རིཡཱནི ཙ;

ཝཛིརཉྩ པཝཱལ༹ནྟི,

སེཊྛི སཏྟདྷནོ ཝིཡ.

༣༤.

སདྡྷཱསཱིལཾ སུཏཾཙཱགོ,

ཧིརཱི ཨོཏྟཔྤིཡཾ དྷནཾ,

པཉྙཱདྷནནྟི སམྦུདྡྷཾ,

ཝནྡེ སཏྟམཧཱདྷནཾ.

༣༥.

ཙཀྐཾ ¶ ཧཏྠི ཨསྶོ མཎི,

གཧཔཏིཏྠིཡོ ཏཐཱ;

སུཔརིཎཱཡཀོཙཱཏི,

སཏྟརཏནོ ཙཀྐཝཏྟཱིཝ.

༣༦.

སཏི དྷམྨཝིཙཡོ ཙ,

ཏཐེཝ ཝཱིརིཡཾ པཱིཏི;

པསྶདྡྷི ¶ སམཱདྷུཔེཀྑཱ,

སདྡྷམྨ ཙཀྐཝཏྟིཀཾ;

སཏྟ བོཛ྄ཛྷངྒརཏནཾ,

ནམཱམི པུརིསུཏྟམཾ.

༣༧.

ཡུགནྡྷརོ ¶ ཨཱིསདྷརོ,

ཀརཝཱིཀོ སུདསྶནོ;

ནེམིནྡྷརོ ཝིནཏཀོ,

ཨསྶཀཎྞོ མཧཱནགེ;

སཏྟེཏེ ཧཏྠརཱུཔཾཝ,

སམྤསྶནྟཾ ཛིནཾ ནམེ.

༣༨.

ཀཎྞམུཎྜོ ཨནོཏཏྟོ,

ཀུཎཱལོ རཐཀཱརཀོ;

སཱིཧཔྤཔཱཏ ཚདྡནྟཱ,

མནྡཱཀིནཱི མཧཱསརེ;

སཏྟེཏེ ¶ སབྦཐཱ པསྶཾ,

དིཊྛེཝ པཱཏིཀཾ ནམེ.

༣༩.

མནུསྶཏྟཾ ལིངྒསམྤཏྟི,

ཧེཏུ སཏྠཱརདསྶནཾ;

པབྦཛྫཱ གུཎསམྤཏྟི,

ཨདྷིཀཱརོ ཙ ཚནྡཏཱ;

ཨཊྛདྷམྨ སམོདྷཱནཱ,

བྷིནཱིཧཱརནྟགུཾ ནམེ.

༤༠.

ཝིསཊྛཾ ¶ མཉྫུ ཝིཉྙེཡྻཾ,

སཝནཱིཡཱཝིསཱརིཎཱ;

གམྦྷཱིརོ བིནྡུནིནྣཱདོ,

ཨཊྛངྒིཀསརཾ ནམེ.

༤༡.

ཙཏྟཱརི ¶ རཱུཔཛྷཱནཱནི,

ཏཐེཝཱརཱུཔཛྷཱནཱནི;

ཏཱ སམཱཔཏྟིཡོ ཨཊྛ,

སེཝནྟཾ རུཙིཡཱ ནམེ.

༤༢.

ཨཎིམཱ ལངྒྷིམཱ ཀམྨཾ,

མཧིམཱ པཏྟིམཱ ཏཐཱ;

ཨཱིསིཏཱ ¶ ཝསིཏཱ ཙེཝ,

ཡཏྠཀཱམཱཝསཱཡིཏཱ;

ཨཊྛིསྶརིཡ པུཎྞཏྟཱ,

ཨིསྶརཱཏིསྶརཾ ནམེ.

༤༣.

མནོམཡིདྡྷིཉཱཎཉྩ ¶ ,

ཚལ༹བྷིཉྙཱ ཝིཔསྶནཱ;

ཨཊྛཝིཛྫཱཧི སམྤནྣཾ,

ཝནྡེ ཏིལོཀཀེཏུཀཾ.

༤༤.

ཛཱཏི ཛརཱ རུཛཱ ཀཱལོ,

ཙཏུརཱཔཱཡདུཀྑཱཏི;

ཨཊྛ སཾཝེགཝཏྠཱུནི,

བྷཱསནྟཾ ཝིཝིདྷཾ ནམེ.

༤༥.

སུཏྟངྒཾ ¶ ཝེཡྻཱཀརཎཾ,

གེཡྻཾ གཱཐཱ ཙ ཛཱཏཀཾ;

ཨབྦྷཱུཏདྷམྨ ཝེདལླཱ,

ཨུདཱནམིཏི ཝུཏྟཀཾ;

ནཝངྒཾ སབྦལོཀསྶ,

དདནྟཾ སཱསནཾ ནམེ.

༤༦.

ཡཱ ¶ སམཱཔཏྟིཡོ ཨཊྛ,

ནིརོདྷོ ཙཱཏི ཏེ ནཝ,

ཨནུཔུབྦཝིཧཱརེ ཏཾ,

སེཝནྟཾ རུཙིཡཱ ནམེ.

༤༧.

ཨེཀཏྟཉྩེཝ ནཱནཏྟཾ,

ཀཱཡསཉྙཱིཧི ཡོགཏོ,

ཙཏྟཱརོ ཏཐཱརུཔྤཱ ཙ,

ཨསཉྙཱིཙཱཏི ཏེ ནཝ,

སཏྟཝཱསེ ཝིབྷཛིཏྭཱ,

པཀཱསེནྟཾ ནམེ ཛིནཾ.

༤༨.

སེཡྻསྶ ¶ སདིསོ སེཡྻོ,

ཧཱིནོཏི ཏིཝིདྷོ ཝིདྷོ,

ཏཐཱ སདིསཧཱིནཱནཾ,

ནཝཝིདྷེ ནུདཾ ནམེ.

༤༩.

ཨནཏྠཾ ¶ མེ ཙརཏི ཙ,

ཏཐཱ ཙརི ཙརིསྶཏི,

མིཏྟསྶ ཨརིནོཏྭཏྠཾ,

ནཝཱགྷཱཏེ ཛཧཾ ནམེ.

༥༠.

དཱནཾ སཱིལཉྩ ནིཀྑམཾ,

པཉྙཱ ཝཱིརིཡཔཉྩམཾ,

ཁནྟཱི ¶ སཙྩམདྷིཊྛཱནཾ,

མེཏྟུཔེཀྑཱཏི ཏཱདས,

པཱུརེཏྭཱ པཱརམཱི ཝནྡེ,

སམྨཱསམྦོདྷིམཛ྄ཛྷཝཾ;

༥༡.

ཀཱལཱ༹ཝཀཉྩ གངྒེཡྻཾ,

པཎྜརཾ ཏམྦ པིངྒལཾ,

གནྡྷ མངྒལ ཧེམཉྩ,

ཨུཔོསཐ ཚདྡནྟིམེ.

༥༢.

དྷཱརེཏི དསཔོསཱནཾ,

ནཱགོ ཀཱལཱ༹ཝཀོ བལཾ;

སཧསྶཀོཊིཔོསཱནཾ ¶ ;

ཚདྡནྟོཝཱརནུཏྟམོ.

༥༣.

དས སཧསྶཀོཊཱིནཾ,

པོསཱནཾ བལདྷཱརཎཾ;

ཚདྡནྟཱནཾ དསནྣཉྩ,

དསཀཱཡབལཾ ནམེ.

༥༤.

ཋཱནཱཋཱནེ ¶ ཝིཔཱཀེ ཙ,

མགྒེ སབྦཏྠགཱམིནཾ;

ནཱནཱདྷཱཏཱུསུ ལོཀེསུ,

ཨདྷིམུཏྟིམྷི པཱཎིནཾ;

༥༥.

པརོཔརིཡཏྟེ ཉཱཎཾ,

ཨིནྡྲིཡཱནཉྩ པཱཎིནཾ;

ཛྷཱནཱདཱིསུ ཉཱཎཾ པུབྦེ,

ནིཝཱསེ དིབྦཙཀྑུ ཙ;

ཨཱསཝཀྑཡཉཱཎནྟི,

དསབལཉཱཎཾ ནམེ.

༥༦.

མཱུལགནྡྷོ ¶ སཱརོ ཕེགྒུ,

ཏཙོ པཔཊིཀོ རསོ;

པཏྟཾ པུཔྥཾ ཕལཉྩེཝ,

གནྡྷགནྡྷོཏི སཾཝརཾ;

སུགནྡྷཾ དསགནྡྷེཧི,

ཝིལིམྤནྟཾ སདཱ ནམེ.

༥༧.

སམཱདྷི ¶ ཉཱཎཝིཔྥཱརཱ,

ཨདྷིཊྛཱནཾ ཝིཀུབྦནཱ;

མནོམཡཱརིཡཱ ཨིདྡྷི,

ཏཐཱ ཀམྨཝིཔཱཀཛཱ.

༥༨.

ཝིཛྫཱམཡཱ པུཉྙཝཏོ;

པཡོག པཙྩཡིདྡྷིཏི;

ཨགྒཔཏྟ དསིདྡྷཱིནཾ,

པཱཊིཧེརཾ ཀརཾ ནམེ.

༥༩.

མུཏྟཱ ¶ མཎི ཝེལུ༹རིཡཾ,

སངྑོ སལློ པཝཱལ༹ཀཾ;

སུཝཎྞཾ རཛཏཾ ལོཧི,

ཏངྐོ མསཱརགལླནྟི;

དསདྷཱ ¶ རཏནེཧིགྒཾ,

བྷོགིཾ པཉྙཱམཎིཾ ནམེ.

༦༠.

སིཐིལཾ དྷནིཏཾ དཱིགྷཾ,

རསྶཉྩ གརུཀཾ ལཧུ;

ནིགྒཧིཏཾ ཝིམུཏྟཉྩ,

སམྦནྡྷཉྩ ཝཝཏྠིཏཾ;

ཝིཝརནྟཾ ནམེ དྷམྨཾ,

དསབྱཉྫནབྷེདིཏཾ.

༦༡.

པསཱདོཛོ ¶ མདྷུརཏཱ,

སམཏཱ སུཁུམཱལཏཱ;

སིལེསོདཱརཏཱ ཀནྟི,

ཨཏྠབྱཏྟི སམཱདྷཡོ;

དས སདྡགུཎོཔེཏཾ,

དྷམྨཾ པཱཏུ ཀརཾ ནམེ.

༦༢.

ལོབྷོ ¶ དོསོ མོཧོ མཱནོ,

ཨུདྡྷཙྩཾ དིཊྛི སཾསཡོ;

ཨཧིརིཀམནོཏྟཔྤཾ,

ཐིནནྟི སབྦ དཱཧཀེ;

ཀིལེསེ དས ཏེ སདྡྷིཾ,

ཝཱསནཱཡ ཛཧཾ ནམེ.

༦༣.

སཏེརཱ ¶ དཎྜམཎིཀཱ,

མཙྪཝིལོལགགྒརཱ;

སུཀྑཱསནི ཀཔིསིསཱ,

ཝིཙཀྐཱ སཉྙ ཀུཀྐུཊཱ;

ནཝཱསནཱིཧི ཕཱལེནྟཾ,

ཏིབྦཾ པཉྙཱསནིཾ ནམེ.

༦༤.

རོདནཱ ¶ ཀོདྷཱཝུདྷོ ཙ,

ཨུཛ྄ཛྷནྟིསྶརིཡཾ ཏཐཱ;

པཊིསངྑཱནཾ,

ཁནྟི ཨཊྛབལེསུ ཏཾ;

པཐཝཱིསདིསཾ ཝནྡེ,

ཨཊྛམེན ཝིནཱཡཀཾ.

༦༥.

ཀཱམརོགོ ¶ ཙ པཊིགྷོ,

མཱནོ དིཊྛི ཙ སཾསཡོ;

བྷཝརཱགོ ཨཝིཛྫཱཏི,

སཏྟཱནུསཡིནཾ ནམེ.

༦༦.

ཏིཏྠིཡཱཔཀཏིམཧཱསཱཝཀཱ,

ཨགྒསཱཝཀཱ པཙྩེཀབུདྡྷསམྦུདྡྷཱ;

ཝིསིཊྛཾ ¶ སབྦཐཱ ཚསུ,

པུབྦེ ནིཝཱས ཝིཉྙཱུསུ;

ཏིལོཀམཀུཊཾ ནམེ.

༦༧.

བུདྡྷཙཀྑུ སམནྟཱ ཙ,

ཉཱཎཾ ཡཾ དིབྦཙཀྑུ ཙ;

དྷམྨོཏི པཉྩ ཙཀྑཱུཧི,

དསྶཱཝིཾ མཱརཛིཾ ནམེ.

༦༨.

ཁུདྡཀཱ ¶ ཁཎིཀཱ ཨོཀྐནྟིཀཱ ཙ,

ཕརཎཱ ཏཐཱ ཨུབྦེགཱ;

པཉྩ པཱིཏཱིཧི པིནེནྟཾ,

རུཙིཡཱ ཙ ནམཱམཧཾ.

༦༩.

དུཀྑཾ སམུདཡསཙྩཾ,

ནིརོདྷོ མགྒསཙྩཀཾ;

ཙཏུསཙྩམབྷིཛཱནཾ ¶ ,

ཙཏུཀིཙྩེཧི ཏཾ ནམེ.

༧༠.

པཱིལ༹ནཱ སངྑཏཏྠོ ཙ,

ཏཔོ ཝིཔརིཎཱམནཱ;

དུཀྑསཙྩཾ ཙཏུཀྐེཧི,

ཝིབྷཏྟཱཝིཾ མུནིཾ ནམེ.

༧༡.

ཨཱཡཱུཧནཾ ¶ ནིདཱནཉྩ,

སཾཡོགོ པལིབོདྷནཾ;

ཙཏུཀྐེཧི སམུདཡཾ,

ཝིབྷཏྟཱཝིཾ མུནིཾ ནམེ.

༧༢.

ནིསྶརཎཉྩ ཝིཝེཀོ,

ཨསངྑཏཱམཏཾ ཏཐཱ;

ནིརོདྷཉྩ ཙཏུཀྐེཧི,

ཝིབྷཏྟཱཝིཾ མུནིཾ ནམེ.

༧༣.

ནིཡྻཱནིཀོ ¶ ཙ ཧེཏྭཏྠོ,

དསྶནཱདྷིཔཏེཡྻཀཾ;

མགྒསཙྩཾ ཙཏུཀྐེཧི,

ཝིབྷཏྟཱཝིཾ མུནིཾ ནམེ.

༧༤.

སཏྠཀོ ¶ ཙ ཨསམྨོཧོ,

སཔྤཱཡོ ཙེཝ གོཙརོ;

ཙཏུསམྤཛཉྙཱ ཝིནཱ,

བྷཱཝིཾ ནམེ ཏཐཱགཏཾ.

༧༥.

པཧིནཱཁིལ དུཀྑཱཧཾ,

བྷཝསཱགར པཱརགུཾ;

ཝནྡེ སཱརགུཎོཔེཏཾ,

ཏེནམྷི བྷཝཔཱརགོ.

༧༦.

རཱུཔཱརཱུཔཝིལཱསགྒ ¶ ,

རཱུཔཱཙིནྟེཡྻ སཾཡུཏྟཾ;

ཝནྡེ སཱརགུཎོཔེཏཾ,

ཏེནམྷཱཏུལརཱུཔཝཱ.

༧༧.

ཨིདྡྷི ¶ ཨིདྡྷི ཝིལཱསགྒ,

ཨིདྡྷི ཙིནྟེཡྻ སཾཡུཏྟཾ;

ཝནྡེ སཱརགུཎེཔེཏཾ,

ཏེནམྷཱ ཏུལཨིདྡྷིམཱ.

༧༨.

ཝཱཙཱ ཝཱཙཱ ཝིལཱསགྒ,

ཝཱཙཱ ཙིནྟེཡྻ སཾཡུཏྟཾ;

ཝནྡེ སཱརགུཎོཔེཏཾ,

ཏེནམྷཱ ཏུལཝཱཙཀོ.

༧༩.

ཉཱཎ ¶ ཉཱཎ ཝིལཱསགྒ,

ཉཱཎཱཙིནྟེཡྻ སཾཡུཏྟཾ;

ཝནྡེ སཱརགུཎོཔེཏཾ,

ཏེནམྷཱ ཏུལཉཱཎཝཱ.

༨༠.

སཛ྄ཛྷཾ ཧེམཉྩ རཏནཾ,

གེཧཾ ཝཏྠཉྩ བྷོཛནཾ;

ཏདཉྙེཔི ¶ ཡཐཱཙིཏྟཾ,

མཱཔེཡྻཱཧཾ ནམེ ཛིནཾ.

༨༡.

སཛ྄ཛྷཾ ཧེམཉྩ རཏནཾ,

གེཧཾ ཝཏྠཉྩ བྷོཛནཾ;

ཏདཉྙེཔི ཡཐཱཙིཏྟཾ,

མཱཔེཡྻཾ ཀམྨཛིདྡྷིཡཱ.

༨༢.

སཏྟབོཛ྄ཛྷངྒ ¶ རཏནོ,

སདྡྷཱདིརཏནོ མུནི;

སཏིཔྤབྷུཏིརཏནོ,

ཝནྡེ ཏཾ པུརིསུཏྟམཾ.

༨༣.

ཙཀྐཱདིསཏྟརཏནཾ,

མུཏྟཱདིརཏནཾ སུབྷཾ;

ཝཏྠཔྤབྷུཏིརཏནཾ,

ཚནྡཀྑཎེ ལབྷཱམཧཾ.

༨༤.

སམྤུཎྞཙིཏྟསངྐཔྤོ ¶ ,

ཡཐཱཀངྑིཏམཱཔཀོ,

ཀེནཙིནབྷིབྷཱུཏོ ཡོ,

སབྦཱབྷིབྷཱུ ནམེ ཛིནཾ.

༨༥.

སམྤུཎྞཙིཏྟསངྐཔྤོ ¶ ,

ཡཐཱཀངྑིཏམཱཔཀོ,

ཀེནཙིནབྷིབྷཱུཏམྷི,

སབྦཱབྷིབྷཱུ བྷཝེ བྷཝེ.

༨༦.

དས ཚདྡནྟརཱཛཱཝ,

དས ཀཱཡབལོ མུནི;

དས ཉཱཎབྦལོཏུལྱོ,

ཝནྡེ ཏཾ སམཎུཏྟམཾ.

༨༧.

ཨཏིཀཱཡཛཝོ ¶ བུདྡྷོ,

རཉྙཱཛཝནཧཾསཏོ;

ཀཱ ཀཐཱ ཉཱཎཝེགསྶ,

ཝནྡེ ཏཾ སམཎུཏྟམཾ.

༨༨.

ཚདྡནྟནཱགརཱཛཱཝ,

བྷཝེ བྷཝེ མཧབྦལོ;

རཱཛཱཛཝནཧཾསོཝ,

པརམགྒཛཝོ བྷཝེ.

༨༩.

ཨུདཀཱ ¶ ཀཱསཙཱརཱི ཙ,

མཧིནིམུཛྫཀོ ཛིནོ;

མཱཔཀོ ཙ ཡཐཱ ཙིཏྟཾ,

ཝནྡེ ཏཾ ཉེཡྻཔཱརགུཾ.

༩༠.

ཨུདཀཱ ཀཱསཙཱརཱི ཙ,

མཧིནིམུཛྫཀོ བྷཝེ;

མཱཔཀོ ཙ ཡཐཱཙིཏྟཾ,

བྷཝསོ ཀམྨཛིདྡྷིཡཱ.

༩༡.

གཱམེ ¶ ཝནེ ཙ སབྦཏྠ,

དེཝེཧི མནུསྶེཧི ཙ;

ཨཱབྷཏཱནནྟལཱབྷསྶ,

སདཱ ཡསྶ མཧེསིནོ;

པཏྟལཱབྷགྒཏཾ ལོཀཾ,

ཏཾ ཝནྡེ མུནིཔུངྒཝཾ.

༩༢.

གཱམེ ¶ ཝནེ ཙ སབྦཏྠ,

དེཝེཧི མནུསྶེཧི ཙ;

ཨཱབྷཏཱ ནནྟལཱབྷོ མེ,

སདཱ ཧོཏུ བྷཝཱབྷཝེ.

༩༣.

པུཉྙསྶིམསྶ ཏེཛེན,

ཡཐཱ ཙིཏྟཾ སམིཛ྄ཛྷཏུ;

སབྦིཙྪཱ ¶ སབྦཙིནྟཱ ཙ,

ཁིཔྤཾ མེ ཛཱཏིཛཱཏིཡཾ.

༩༤.

ནཏྠཱིཏི ཝཙནཾ དུཀྑཾ,

དེཧཱིཏི ཝཙནཾ ཏཐཱ;

ཏསྨཱ ནཏྠཱིཏི དེཧཱིཏི,

མཱ མེ ཧོཏུ བྷཝཱབྷཝེ.

༩༥.

སབྦཾ ¶ པརཝསཾ དུཀྑཾ,

སབྦམིསྶརིཡཾ སུཁཾ;

སབྦཾ པརཝསམཏྠུ,

སབྦམིསྶརིཡཾ བྷཝེ.

༩༦.

ཝིཏཀྐེནྟོ བྷཛྫཀཱཡོ,

སབྦཱཝུདྷ ཝཱརཎོ ཙ;

ཚདྡནྟ ཝཱརཎབལོ,

བྷཝེཡྻཾ ཛཱཏིཛཱ ཏིཡཾ.

༩༧.

སུབྷལཀྑཎསམྤནྣོ ¶ ,

སུཝཎྞཝཎྞཝཱ བྷཝེ;

བྲཧྨསྶརོ ཀརཝིཀ,

བྷཱཎཱི ཙ ཛཱཏིཛཱཏིཡཾ.

༩༨.

བྷཱུརིམཔཉྙོ སིཔྤཱནཾ,

སབྦེསཾ ཀུསལོ བྷཝེ;

ཝིསཛྫེཏུཾ སམཏྠོཝ,

སབྦཔུཙྪཱནཾ ཋཱནསོ.

༩༩.

ཝེརཱདྷཾསཱིཡ ¶ བྷོགཱ ཙ,

ཨནནྟཱཁཱིཎ བྷོགཝཱ;

ཨནནྟཱབྷཛྫ པརིསོ,

བྷཝསོ པཱཔུཎེ སིཝཾ.

༡༠༠.

མཱ ¶ ནསྶེཡྻཾ པསཡ྄ཧེཡྻཾ,

ཨུསྶུཀྐེཧི པྱཧཾ སཧ;

པཉྩཝེརེཧི ཀོཊཱིཧི,

བྷཎྜཾ ཝཱ ཨཀཱཏུཀཱམིཏཾ.

༡༠༡.

མེགྷཾ ཝཱཏཉྩ རཏནཾ,

དྷཉྙཾ ཝཏྠཉྩ བྷོཛནཾ;

སབྦིཙྪིཏཾ ཏདཉྙམྤི,

མཱཔེཡྻཾ ཀམྨཛིདྡྷིཡཱ.

༡༠༢.

པུཉྙེནེཏེན ¶ ནིབྦཱནཾ,

སནྟཾ པཔྤོམི ཏཱཝཏཱ;

བྷཝེཡྻཾ སབྦཛཱཏཱིསུ,

ཙཏུསམྤཏྟིཡཱ སདཱ;

ཙཏུཙཀྐེན སམྤནྣོ,

སདྡྷམྨེཧི ཙ སཏྟཧི.

༡༠༣.

སམྨཱདིཊྛི ¶ ཝསུཔེཏེ,

ཀུལམྷི སེཊྛསམྨཏེ,

སབྦསཀྐཏ སཾསུདྡྷེ;

བྷཝེ ཏིཧེཏུསནྡྷིཀོ.

༡༠༤.

གྷཱསཙྪཱདནཾ བྷོགཉྩ,

ནེཝ ཧཏྠེན ཀཱཏུན,

བྷུཉྫེཡྻམིདྡྷིཡཱཏྭེཝ,

མཱཔེཏྭཱ ཡཱཝདཏྠཀཾ.

༡༠༥.

མནུསྶཱནཾ ¶ ཨཏིཀྐམྨ,

དེཝཱནཾ ཝིཡ བྷོཛནཾ,

ཝཏྠཾ བྷོགོ ཙ མེ ཧོནྟུ,

པརིཝཱརཱཏིསུནྡརཱ.

༡༠༦.

དསཱསུཏྟཾཔི མེ བྷོགཾ,

པཉྩཝེརཱ བྷཝེ བྷཝེ;

མཱགཎྷེཡྻུཉྩ ནསྶེཡྻུཾ,

ཨསོཀོ བྷོགཧེཏུམེ.

༡༠༧.

སབྦངྒསུབྷ ¶ སམྤནྣོ,

སིངྒཱིནིཀྑ སཝཎྞ ཝཱ;

བཱཏྟིཾས ལཀྑཎཱུཔེཏོ,

ཨཏཔྤན རཱུཔ ཝཱ བྷཝེ.

༡༠༨.

ཀཱཡོ ཙནྡནགནྡྷོ ཙ,

མུཁཾ ཨུཔྤལགནྡྷིཀཾ;

ཨཊྛངྒིཀོ ¶ ཀརཝིཀ,

མཉྫཱུགྷོསོ ཙ མེ ཧོཏུ.

༡༠༩.

ཏིཀྑ གམྦྷཱིར པཉྙོ ཙ,

ཧཱསཱཏིཛཝཔཉྙཝཱ,

བྷཱུརི ནིབྦེདྷ པཉྙོ ཙ;

སབྦཔཉྷཝིསཛྫནོ.

༡༡༡.

ཨནྟོ ¶ སོལ༹སཝསྶསྶ,

ཏིཔེཊཀདྷརོ བྷཝེ;

སབྦཀམྨེསུ སིཔྤེསུ,

ཝིཛྫཱཋཱནེསུ པཱརགཱུ.