📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཛིནཱལངྐཱར

པཎཱམདཱིཔནཱིགཱཐཱ

༡.

ཡོ ལོཀཏྠཱཡ བུདྡྷོ དྷནསུཏབྷརིཡཱཨངྒཛཱིཝེ ཙཛིཏྭཱ པཱུརེཏྭཱ ཨཱརམིཡོ ཏིདསམནུཔམེ བོདྷིཔཀྑཱིཡདྷམྨེ,

པཏྭཱ བོདྷིཾ ཝིསུདྡྷཾ སཀལགུཎདདཾ སེཊྛབྷཱུཏོ ཏིལོཀེ,

ཀཏྭཱ དུཀྑསྶ ཨནྟཾ ཀཏསུབྷཛནཏཾ དུཀྑཏོ མོཙཡིཏྠ.

༢.

ནཏྭཱནཱཧཾ ཛིནནྟཾ སམུཔཙིཏསུབྷཾ སབྦལོཀེཀབནྡྷུཾ,

ནཱཧུ ཡེནཔི ཏུལྱོ ཀུསལམཧིམཏོ ཨུཏྟམོ བྷཱུཏལོཀེ ཏསྶེཝཱཡཾ ཨུཝིམྷཾ སུཝིཔུལམམལཾ བོདྷིསམྦྷཱརབྷཱུཏཾ,

ཧེཏུཾ ཧེཏྭཱནུརཱུཔཾ སུགཏགཏཕལཾ བྷཱསཏོ མེ སུཎཱཐ.

ཡོགཱཝཙརསམྤཏྟིདཱིཔནཱིགཱཐཱ

༣.

ཛཱཏོ ཡོ ནཝམེ ཁཎེ སུཏདྷརོ སཱིལེན སུདྡྷིནྡྲིཡོ སཾསཱརཾ ཨཡཏོ བྷཝཀྐཡཀརཾ དིསྭཱ སིཝཾ ཁེམཏོ,

ཏཾ སམྤཱཔཀམགྒདེསཀམུནིཾ སམྤཱུཛཡནྟོ ཏཏོ ཨུདྡྷཱནུསྶཏིབྷཱཝནཱདིཀམཏོ སམྤཱདཡེ ཏཾ སིཝཾ.

ཝཏྠུཝིསོདྷནཱིགཱཐཱ

༤.

བུདྡྷོཏི ཀོ བུདྡྷགུཎོ ཏི ཀོ སོ,

ཨཙིནྟཡཱདིཏྟམུཔཱགཏོ ཡོ;

ཨནཉྙསཱདྷཱརཎབྷཱུཏམཏྠཾ,

ཨཀཱསི ཀིཾ སོ ཀིམཝོཙ བུདྡྷོ.

༥.

ཝིསུདྡྷཁནྡྷསནྟཱནོ བུདྡྷོཏི ནིཡམོ ཀཏོ,

ཁནྡྷསནྟཱནསུདྡྷཱི ཏུ གུཎོཏི ནིཡམོ ཀཏོ.

༦.

ཨཀཱསི ཀིཙྩཱནི དིནེསུ པཉྩ,

པསཱདཡཉྩིདྡྷིབལེན སེན;

ཛནཱནསེསཾ ཙརིཡཱནུཀཱུལཾ,

ཉཏྭཱནཝོཙཱནུསཡཔྤཧཱནཾ.

ཨནཉྙསཱདྷཱརཎདཱིཔནཱིགཱཐཱ

༧.

ཨབྦྷུགྒཏཱ ཡསྶ གུཎཱ ཨནནྟཱ,

ཏིབུདྡྷཁེཏྟེཀདིཝཱཀརོཏི;

ཛཱནཱཏི སོ ལོཀམིམཾ པརཉྩ,

སཙེཏནཉྩེཝ ཨཙེཏནཉྩ;

སཀསྶ སནྟཱནགཏཾ པརེསཾ,

བྱཏཱིཏམཔྤཏྟཀམཏྲབྷཱུཏཾ.

༨.

ཨནནྟསཏྟེསུ ཙ ལོཀདྷཱཏུསུ,

ཨེཀོཝ སབྦེཔི སམཱ ན ཏེན;

དིསཱསུ པུབྦཱདིསུ ཙཀྐཝཱལཱ༹,

སཧསྶསངྑཱཡཔི ཨཔྤམེཡྻཱ;

ཡེ ཏེསུ དེཝཱ མནུཛཱ ཙ བྲཧྨཱ,

ཨེཀཏྠ སངྒམྨ ཧི མནྟཡནྟཱ.

༩.

ཨནཱདིཀཱལཱགཏནཱམརཱུཔིནཾ,

ཡཐཱསཀཾ ཧེཏུཕལཏྟཝུཏྟིནཾ;

ཏབྦྷཱཝབྷཱཝིཏྟམསམྦྷུཎནྟཱ,

ནཱནཱཝིཔལླཱསམནུཔཝིཊྛཱ.

༡༠.

ཀམྨཔྤཝཏྟིཉྩ ཕལཔྤཝཏྟིཾ,

ཨེཀཏྟནཱནཏྟནིརཱིཧདྷམྨཏཾ;

ཝིཉྙཏྟིསནྟཱནགྷནེན ཚནྣཏོ,

སིཝཉྫསཾ ནོ བྷཎིཏུཾ སམཏྠཱ.

༡༡.

ཨེཀོ ཝ སོ སནྟིཀརོ པབྷངྐརོ,

སངྑཱཡ ཉེཡྻཱནི ཨསེསིཏཱནི;

ཏེསཉྷི མཛ྄ཛྷེ པརམཱསམྦྷཱིཝདཾ,

སིཝཉྫསཾ དཱིཔཡིཏུཾ སམཏྠོ.

༡༢.

སོ གོཏམོ སཀྱསུཏོ མུནིནྡོ,

སབྦསྶ ལོཀསྶ པདཱིཔབྷཱུཏོ;

ཨནནྟསཏྟེ བྷཝབནྡྷནམྷཱ,

མོཙེསི ཀཱརུཉྙཕལཱནུཔེཀྑཱི.

ཨབྷིནཱིཧཱརདཱིཔནཱིགཱཐཱ

༡༣.

ཝདེཐ ཏསྶཱིདྷ ཨནཔྤཀཾ གུཎཾ,

ན ཏེན ཏུལྱོ པརམོ ཙ ཝིཛྫཏི;

ཀིཾ ཏཾ གུཎཾ ཏཾ སདིསེན དིནྣཾ,

སཡཾཀཏཾ ཀིནྣུ ཨདྷིཙྩལདྡྷཾ.

༡༤.

ནཱདྷིཙྩལདྡྷཾ ན ཙ པུབྦབུདྡྷཱ,

བྲཧྨཱདིནཾ སམྨུཏིཡཱ བཧཱུནཾ;

སཡཾཀཏེནེཝ ཨནོཔམེན,

དཱནཱདིནཱ ལདྡྷམིདཾ ཝིཔཱཀཾ.

༡༥.

ཨིཏོ ཙཏུནྣཾ ཨསངྑིཡཱནཾ,

སཏཾསཧསྶཱནདྷིཀཱནམཏྠཀེ;

ཀཔྤེ ཨཏཱིཏམྷི སུམེདྷཏཱཔསོ,

ཝེཧཱཡསཾ གཙྪཏི ཨིདྡྷིཡཱ ཏདཱ.

༡༦.

དིཔངྐརོ ནཱམ ཛིནོ སསངྒྷོ,

རམྨཾ པུརཾ ཡཱཏི ཝིརོཙམཱནོ;

མནུསྶདེཝེཧིབྷིཔཱུཛིཡནྟོ,

སཧསྶརཾསི ཝིཡ བྷཱཎུམཱ ནབྷེ.

༡༧.

ཏསྶཉྫསཾ ཀཱཏུབཧུསྶཧཱནཾ,

བུདྡྷོཏི སུཏྭཱ སུམནོ པཏཱིཏོ;

མམཛྫ དེཧཾ པནིམསྶ དཏྭཱ,

བུདྡྷོ ཨཧཾ ཧེསྶམནཱགཏེདིསོ.

༡༨.

ཏསྨིཉྫསེ ཀནྡརཏམྷི པངྐེ,

ཀཏྭཱན སེཏུཾ སཡི སོ སདེཧཾ;

བུདྡྷོ ཨཡཾ གཙྪཏུ པིཊྛིཡཱ མམཾ,

བོདྷིསྶཙེ ཧེསྶཏི མེ ཨནཱགཏེ.

༡༩.

ཨུསྶཱིསཀཾ ཡཱཏི ཛིནོ ཧི ཏསྶ,

ཨཛ྄ཛྷཱསཡོ སིཛ྄ཛྷཏིམསྶནཱགཏེ;

ཉཏྭཱན བྱཱཀཱསི ཨསེསཏོ ཧི,

བུདྡྷོ ཨཡཾ ཧེསྶཏིནཱགཏེསུ.

༢༠.

སུཏྭཱན པཏྟོ ཝ མཧཱབྷིསེཀཾ,

ལདྡྷཾ ཝ བོདྷིཾ སམནུསྶརནྟོ;

པཱུཛེཏྭཱ ཡཱཏེ མུནིདེཝམཱནུསེ,

ཨུཊྛཱཡ སོ སམྨསི པཱརམཱི དས.

༢༡.

དལ༹ྷཾ གཧེཏྭཱ སམཏིཾསཔཱརམཱི,

སིཀྑཏྟཡཉྩསྶ ཛིནསྶ སནྟིཀེ;

ཀཱཏུཾ སམཏྠོ པི བྷཝསྶ པཱརཾ,

སཏྟེསུ ཀཱརུཉྙབལཱ བྷཝཾ གཏོ.

༢༢.

ཨུཔྤནྣུཔྤནྣཀེ སོ ཛིནཝརམཏུལེ པཱུཛཡིཏྭཱ ཨསེསཾ བུདྡྷོ ཨེསོ ཧི ཨོསོ བྷཝཏི ནིཡམཏོ བྱཱཀཏོ ཏེཧི ཏེཧི ཏེསཾ ཏེསཾ ཛིནཱནཾ ཨཙནམནུཔམཾ པཱུཛཡིཏྭཱ སིརེན,

ཏཾ ཏཾ དུཀྑཾ སཧིཏྭཱ སཀལགུཎདདཾ པཱརམཱི པཱུརཡིཏྠ.

བོདྷིསམྦྷཱརདཱིཔནཱིགཱཐཱ

༢༣.

སོ དུཀྑཁིནྣཛནདསྶནདུཀྑཁིནྣོ,

ཀཱརུཉྙམེཝ ཛནཏཱཡ ཨཀཱསི ནིཙྩཾ;

ཏེསཾ ཧི མོཙནམུཔཱཡམིདནྟི ཉཏྭཱ,

ཏཱདཱིཔརཱདྷམཔི ཨཏྟནི རོཔཡཱི སོ.

༢༤.

དཱནཱདིནེཀཝརཔཱརམིསཱགརེསུ,

ཨོགཱལ༹ྷཏཱཡཔི པདུཊྛཛནེན དིནྣཾ;

དུཀྑཾ ཏཐཱ ཨཏིམཧནྟཏརམྤི ཀིཉྩི,

ནཱཉྙཱསི སཏྟཧིཏམེཝེཨ གཝེསཡནྟོ.

༢༥.

ཚེཏྭཱན སཱིསཾ ཧི སཀཾ དདནྟོ,

མཾསཾ པཙིཏྭཱན སཀཾ དདནྟོ;

སོ ཙཏྟགཏྟོ པཎིདྷཱནཀཱལེ,

དུཊྛསྶ ཀིཾ དུསྶཏི ཚེདནེན.

༢༦.

ཨེཝཾ ཨནནྟམཔི ཛཱཏིསཏེསུ དུཀྑཾ,

པཏྭཱན སཏྟཧིཏམེཝ གཝེསཡནྟོ;

དཱིཔངྐརེ གཧིཏསཱིལསམཱདྷིཔཉྙཾ,

པཱལེསི ཡཱཝ སཀབོདྷིཏལེ སུནིཊྛོ.

༢༧.

ཡདཱབྷིནཱིཧཱརམཀཱ སུམེདྷོ,

ཡདཱ ཙ མདྡིཾ ཨདདཱ སིཝིནྡོ;

ཨེཏྠནྟརེ ཛཱཏིསུ ཀིཉྩིཔེཀཾ,

ནིརཏྠཀཾ ནོ ཨགམཱསི ཏསྶ.

༢༨.

མཧཱསམུདྡེ ཛལབིནྡུཏོཔི,

ཏདནྟྲེ ཛཱཏི ཨནཔྤཀཱ ཝ;

ནིརནྟརཾ པཱུརིཏཔཱརམཱིནཾ,

ཀཐཾ པམཱཎཾ ཨུཔམཱ ཀུཧིཾ ཝཱ.

༢༩.

ཡོ མགྒཔསྶེ མདྷུརམྦབཱིཛཾ,

ཚཱཡཱཕལཏྠཱཡ མཧཱཛནཱནཾ;

རོཔེསི ཏསྨིཾ ཧི ཁཎེཝ ཏེན,

ཚཱཡཱཕལེ པུཉྙམལདྡྷམུདྡྷཾ.

༣༠.

ཏཐེཝ སཾསཱརཔཐེ ཛནཱནཾ,

ཧིཏཱཡ ཨཏྟནམབྷིརོཔིཏཀྑཎེ;

སིདྡྷཾ ཝ པུཉྙཱུཔརི ཏསྶ ཏསྨིཾ,

དྷནངྒཛཱིཝཾ པི ཧརནྟི ཡེ ཡེ.

༣༡.

སོ སཱགརེ ཛལདྷིཀཾ རུཧིརཾ ཨདཱསི,

བྷཱུམཱཔརཱཛིཡ སམཾསམདཱསི དཱནཾ;

མེརུཔྤམཱཎམདྷིཀཉྩ སམོལི༹སཱིསཾ,

ཁེ ཏཱརཀཱདྷིཀཏརཾ ནཡནཾ ཨདཱསི.

གབྦྷོཀྐནྟིདཱིཔནཱིགཱཐཱ

༣༢.

གམྦྷཱིརཔཱནདཱནཱདིསཱགརེསུ ཧི ཐཱམསཱ;

ཏརནྟོ མདྡིདཱནེན ནིཊྛཱཔེཏྭཱན པཱརམཱི.

༣༣.

ཝསནྟོ ཏུསཱིཏེ ཀཱཡེ བོདྷིཔརིཔཱཀམཱགམྨ;

ཨཱཡཱཙནཱཡ ཙ དེཝཱནཾ མཱཏུགབྦྷམུཔཱགམི.

༣༤.

སཏོ ཙ སམྤཛཱནོ ཙ མཱཏུཀུཙྪིམྷི ཨོཀྐམི;

ཏསྶ ཨོཀྐནྟིཡཾ སབྦཱ དསསཧསྶཱི པཀམྤིཏྠ.

༣༥.

ཏཏོ པུབྦནིམིཏྟཱནི དྭཏྟིཾསཱནི ཏདཱ སིཡུཾ;

ཏུཊྛཧཊྛཱ ཝ སཱ མཱཏཱ པུཏྟཾ པསྶཏི ཀུཙྪིཡཾ.

ཝིཛཱཡནམངྒལདཱིཔནཱིགཱཐཱ

༣༦.

སཱ པུཎྞགབྦྷཱ དསམཱསཏོ པརཾ,

གནྟྭཱན ཕུལླཾ ཝརལུམྦིནཱིཝནཾ;

ཋིཏཱ གཧེཏྭཱ ཝརསཱལསཱཁཾ,

ཝིཛཱཡི ཏཾ པུཏྟཝརཾ སུཁེན.

༣༧.

ཏདཱ སཧསྶཱིདསལོཀདྷཱཏུསུ,

དེཝཱ ཙ ནཱགཱ ཨསུརཱ ཙ ཡཀྑཱ;

ནཱནཱདིསཱ མངྒལཙཀྐཝཱལ༹ཾ,

སུམངྒལཾ མངྒལམཱགམིཾསུ.

༣༨.

ཨནེཀསཱཁཉྩ སཧསྶམཎྜལཾ,

ཚཏྟཾ མརཱུ དྷཱརཡུམནྟལིཀྑེ;

སུཝཎྞདཎྜཱ ཝིཔཏནྟི ཙཱམརཱ,

ཁཛྫིཾསུ བྷེརཱི ཙ ནདིཾསུ སངྑཱ.

༣༩.

མལེནཀེནཱཔི ཨནཱུཔལིཏྟོ,

ཋིཏོ ཝ པཱདཱནི པསཱརཡནྟོ;

ཀཐཱི ཝ དྷམྨཱསནཏོཏརནྟོ,

ཛཱཏོ ཡཐཱདིཙྩཝརོ ནབྷམྷཱ.

༤༠.

ཁཱིཎཱསཝཱ བྲཧྨགཎོཔགནྟྭཱ,

སུཝཎྞཛཱལེན པཊིགྒཧེསུཾ;

ཏཏོ ཙ དེཝཱཛིནཙམྨཀེན,

ཏཏོ དུཀཱུལེན ཙ ཏཾ མནུསྶཱ.

༤༡.

ཏེསཾ པི ཧཏྠཱ ཝརབྷཱུམིཡཾ ཋིཏོ,

དིསཱ ཝིལོཀེསི སབྦཱ སམནྟཏོ;

ཝདིཾསུ དེཝཱ པི ཙ བྲཧྨཀཱཡིཀཱ,

ཏཡཱ སམོ ཀཏྠཙི ནཏྠི ཨུཏྟརོ.

༤༢.

གནྟྭཱན ཨུཏྟརཾ སཏྟ པདཝཱརེཧི ཝིཀྐམོ,

སཱིཧནཱདཾ ནདཱི ཏེསཾ དེཝཏཱནཾ ཧི སཱཝཡཾ.

༤༣.

ཏཏོ པུཏྟཾ གཧེཏྭཱན གཏཱ མཱཏཱ སཀངྒྷརཾ,

མཱཏཱ སཏྟམིཡཾ གནྟྭཱ དེཨཔུཏྟཏྟམཱགམི.

༤༤.

ཏེ བྲཧྨཎཱ པཉྩམིཡཾ སུབྷུཏྟཱ,

ནཱམཾ གཧེཏུཾ ཝརལཀྑཎཱནི;

དིསྭཱན ཨེཀངྒུལིམུཀྑིཔིཾསུ,

བུདྡྷོ ཨཡཾ ཧེསྶཏི ཝཱིཏརཱགོ.

༤༥.

ཛིཎྞཉྩ དིསྭཱ བྱཱདྷིཀཾ མཏཉྩ,

ཨཝ྄ཧཱཡིཏཾ པབྦཛིཏཉྩ དིསྭཱ;

ཨོཧཱཡ པབྦཛྫམུཔེཏི ཀཱམེ,

བུདྡྷོ ཨཡཾ ཧེསྶཏི ཝཱིཏརཱགོ.

ཨགཱརིཡསམྤཏྟིདཱིཔནཱིགཱཐཱ

༤༦.

ཀཱལཀྐམེན ཙནྡོ ཝ ཝཌྜྷནྟོ ཝཌྜྷིཏེ ཀུལེ,

པུཉྙོདཡེནུདེནྟོ སོ བྷཱཎུམཱ ཝིཡ ཨམྦརེ.

༤༧.

སིདྡྷཐཀོ ཧི སིདྡྷཏྠོ ལདྡྷཱ དེཝིཾ ཡསོདྷརཾ,

ཙཏྟཱལཱིསསཧསྶེཧི པཱུརིཏྠཱིཧི པུརཀྑིཏོ.

༤༨.

རམྨསུརམྨསུབྷེསུ གྷརེསུ,

ཏིཎྞམུཏཱུནམནུཙྪཝིཀེསུ;

དིབྦསུཁཾ ཝིཡ བྷུཉྫི སུཁཾ སོ,

ཨཙྪརིཡབྦྷུཏརཱཛཝིབྷཱུཏིཾ.

ནེཀྑམྨཛ྄ཛྷཱསཡདཱིཔནཱིཡམཀགཱཐཱ

ནམོ ཏསྶ ཡཏོ མཧིམཏོ ཡསྶ ཏམོ ན

༤༩.

དིསྭཱ ནིམིཏྟཱནི མདཙྪིདཱནི,

ཐཱིནཾ ཝིརཱུཔཱནི རཏཙྪིདཱནི;

པཱཔཱནི ཀམྨཱནི སུཁཙྪིདཱནི,

ལདྡྷཱནི ཉཱཎཱནི བྷཝཙྪིདཱནི.

༥༠.

པདིཏྟགེཧཱ ཝིཡ བྷེརཝཾ རཝཾ,

རཝཾ སམྨུཊྛཱཡ གཏོ མཧེསི;

མཧེསིམོལོཀིཡཔུཏྟམཏྟནོ,

ཏནོསི ནོ པེམམཧོགྷམཏྟནོ.

༥༡.

ཨུམྨཱརཨུམྨཱརགཏུདྡྷརིཏྭཱ,

པདཾ པདཾ ཡཱཏནརཱསབྷསྶ;

ཨལཾ ཨལཾཀཱརཏརེན གནྟུཾ,

མཏཱི མཏཱིཝེཏིམནངྒབྷངྒེ.

༥༢.

ཨུམྨཱརཨུམྨཱརགཏོ མཧེསི,

ཨནངྒབྷངྒཾ སམཙིནྟཡིཏྠ;

ཀིཾ མེ ཛརཱམཙྩུམུཁེ ཋིཏསྶ,

ན མེ ཝསེ ཀཱམཝསེ ཋིཏསྶ.

༥༣.

ཀཱམེན ཀཱམེན ན སཱདྷྱམོཀྑཾ,

མཱནེན མཱནེན མམཏྠི ཀིཉྩི;

མཱརོ སསེནོ ཧི ཨཝཱརཎཱིཡོ,

ཡནྟེན ཨུཙྪུཾ ཝིཡ མདྡཏཱི མཾ.

༥༤.

ཨཱདིཏྟམུཡཱཏཔཡཱཏམཱུནཾ,

ཨཏཱཎཱལེཎཱསརཎེ ཛནེ ཏེ;

དིསྭཱན དིསྭཱན སིཝཾ མཡཱ ཏེ,

ཀཱམེན ཀཱམེན ཀཐཾ ཝིནེཡྻ.

༥༥.

ཝིཛྫཱཝིཛྫཱཡ ཙུཏཉྩུཔེཏཾ,

ཨསཱརསཱརཱུཔགཏཉྫནཾ ཛནཾ;

ཝིཛྫཱཡཝིཛྫཱཡ ཡུཏོ ཙུཏོཧཾ,

པཧོམི ཏཱརེཏུམསངྒཧོ གཏོ.

༥༦.

མགྒནྟི ནོ དིཊྛིགཏཱཔཝགྒཾ,

ཨགྒཱ ཏི ཏེཝཱཧུ ཛནཱ སམགྒཱ;

ནགྒཾ ཨཧོ མོཧཏམསྶ ཝགྒཾ,

ཝགྒཾ ཧནིསྶཱམི ཏམགྒམགྒཱ.

༥༧.

པསེཡ྄ཧཀཱརེན ཨསེཡ྄ཧདུཀྑཾ,

ཛནཱ ཛནེནྟཱིཧ ཛནཱནམེཝ;

པསེཡ྄ཧཀཱརེནཱ ཨསེཡ྄ཧདུཀྑཾ,

པཱཔཾ ན ཛཱནནྟི ཏཏོ ནིདཱནཾ.

༥༨.

ཏེ ཨོགྷཡོགཱསཝསཾཀིལེསཱ,

ཏམེཝ ནཱསེནྟི ཏཏོ སམུཊྛིཏཱ;

ཨེཀནྟིཀཾ ཛཱཏི ཛརཱ ཙ མཙྩུ,

ནིརནྟརཾ ཏཾ བྱསནཉྩནེཀཾ.

༥༩.

ཙཱིརཾ ཀིལེསཱནསམུཛྫལནྟཾ,

དིསྭཱན སཏྟཱནུསཡཾ སཡམྦྷཱུ;

སཱདྷེམི བོདྷིཾ ཝིནཡཱམི སཏྟེ,

པཙྪཱཔི པསྶཱམི སུཏཾ སུཏནྟཾ.

༦༠.

ཏཾ དིབྦཙཀྐཾ ཁུརཙཀྐམཱལཾ,

རཛྫཾ སསཱརཛྫསམཛྫམཛྫཾ;

ཏེ བནྡྷཝཱ བནྡྷནམཱགཏཱ པརེ,

སུཏོ པསཱུཏོཡམནངྒདཱུཏོ.

༦༡.

སམུཛྫལནྟཾ ཝསཏཱི སཏཱིསིརཱི,

སིརཱིསཔཱགཱརམིདཾ མཧཱཝིསཾ;

དདྡལླམཱནཱ ཡུཝཏཱི ཝཏཱིམཱ,

སཀཎྚཀཱཡེཝ སམཉྫསཉྫསེ.

༦༢.

ཡསྶཱ ཝིརཱཛིཏསིརཱི སིརིཡཱཔི ནཏྠི,

ཏསྶཱཝལོཀིཡ ན ཏིཏྟིཝསཱནམཏྠི;

གཙྪཱམི ཧནྡ ཏཝནངྒ སིརཔྤབྷེདཾ,

མཏྟེབྷཀུམྦྷུཔརི སཱིཧཝིལཱསགཱམིཾ.

༦༣.

བྷོ བྷོ ཨནངྒསུཙིར པི པནུཎྞབཱཎ,

བཱཎཱནི སཾཧར པནུཎྞམིཏོ ནིརོདྷ;

རོདྷེན ཙཱཔདགཏོ མནསོ ན སོཙ,

སོཙཾ ཏཝཔྤནཝལོཀིཡ ཡཱམི སནྟིཾ.

༦༤.

རཏཱི རཏཱི ཀཱམགུཎེ ཝིཝེཀེ,

ཨལཾ ཨལནྟེཝ ཝིཙིནྟཡནྟོ;

མནཾ མནངྒཱལཡསམྤདཱལཡཾ,

ཏཧིཾ ཏཧིཾ དིཊྛབཱལཱ ཝ པཀྐམི.

པཱདུདྡྷཱརཝིམྷཡདཱིཔནཱིགཱཐཱ

༦༥.

ཡཱཝཉྩཡཾ རཝི ཙརཏྱཙལེན རུདྡྷེ,

ཡཱཝཉྩ ཙཀྐརཏནཉྩ པཡཱཏི ལོཀེ;

ཏཱཝིསྶརོ ནབྷཙརོ ཛིཏཙཱཏུརནྟོ,

ཧིཏྭཱ ཀཐཾ ནུ པདམུདྡྷརི སོ ནིརཱསོ.

༦༦.

དཱིཔེ མཧཱ ཙ ཙཏུརཱདྷིཀདྭེསཧསྶེ,

ཏཏྲཱཔི སེཊྛབྷཛིཏཾ ཝརཛམྦུདཱིཔཾ;

བྷཱུནཱབྷིཀཾ ཀཔིལཝཏྠུཔུརཾ སུརམྨཾ,

ཧིཏྭཱ ཀཐཾ ནུ པདམུདྡྷརི སོ ནིརཱསོ.

༦༧.

ཉཱཏཱིནསཱིཏི ཀུལཏོ ཧི སཧསྶ སཱཀྱེ,

ཧཏྠིསྶདྷཉྙདྷནིནོ ཝིཛིཏཱརིསངྒྷེ;

གོཏྟེན གོཏམབྷཝཾ པིཏརཉྫནགྒཾ,

ཧིཏྭཱ ཀཐཾ ནུ པདམུདྡྷརི སོ ནིརཱསོ.

༦༨.

རམྨཾ སུརམྨཝསཏིཾ རཏནུཛྫལནྟཾ,

གིམྷེཔི ཝིམྷཡཀརཾ སུརམནྡིརཱབྷཾ;

ཨུསྶཱཔིཏདྡྷཛཔཊཱཀསིཏཱཏཔཏྟཾ,

ཧིཏྭཱ ཀཐཾ ནུ པདམུདྡྷརི སོ ནིརཱསོ.

༦༩.

སཔོཀྑརཱ པོཀྑརཎཱི ཙཏསྶོ,

སུཔུཔྥིཏཱ མནྡིརཏོ སམནྟཱ;

ཀོཀཱ ནདནྟཱུཔརི ཀོཀནཱདེ,

ཧིཏྭཱ ཀཐཾ ནུ པདམུདྡྷརི སོ ནིརཱསོ.

༧༠.

སརེ སརོཛེ རུདིཏཱལི༹པཱལི༹,

སམནྟཏོ པསྶཏི པཉྫརཉྫསཱ;

དིསྭཱརཝིནྡཱནི མུཁཱརཝིནྡཾ

ནཱཐསྶ ལཛྫཱ ཝིཡ སཾཀུཛནྟི.

༧༡.

མདྷུརཱ མདྷུརཱབྷིརུཏཱ,

ཙརིཏཱ པདུམེ པདུམེལི༹གཎཱ;

ཝསཏིཾ ཨདྷུནཱ མདྷུནཱ,

ཨཀརུཾ ཛཧིཏཾ ཀིམིདཾ པཏིནཱ.

༧༢.

ཏམྷཱ རསཾ མདྷུཀརཱ བྷཝནཾ ཧརིཏྭཱ,

ནིནྣཱདིནོ སམདྷུརཾ མདྷུརཾ ཀརོནྟི;

ནཱདེན ནཱདམཏིརིཙྩུཔཝཱིཎཡནྟི,

ནཙྩནྟི ཏཱ སུརཔུརེ ཝཎིཏཱ ཝ ཏཱཝ.

༧༣.

སཉྩོདིཏཱ པཱིཎཔཡོདྷརཱདྷརཱ,

ཝིརཱཛིཏཱནངྒཛམེཁལཱཁལཱ;

སུརངྒཎཱ ཝངྒཛཕསྶདཱ སདཱ,

རམཱ རམཱཔེནྟི ཝརངྒདཱགདཱ.

༧༤.

ཀརཱཏིརཏྟཱ རཏིརཏྟརཱམཱ,

ཏཱལེ༹ནྟི ཏཱལཱ༹ཝཙརེ སམནྟཱ;

ནཙྩུགྒཏཱནེཀསཧསྶཧཏྠཱ,

སཀྐོཔི ཀིཾ སཀྱསམོཏི ཙོདཡུཾ.

༧༥.

ཝིསཱལནེཏྟཱ ཧསུལཱ སུམཛ྄ཛྷཱ,

ནིམྦཏྠནཱི ཝིམྷཡགཱིཏསདྡཱ;

ཨལངྐཏཱ མལླདྷརཱ སུཝཏྠཱ,

ནཙྩནྟི ཏཱལཱ༹ཝཙརེཧི གྷུཊྛཱ.

༧༦.

ཡཱསཾ ཧི ལོཀེ ཨུཔམཱ ནཏྠི,

ཏཱསཾ ཧི ཕསྶེསུ ཀཐཱཝཀཱསཱ;

ཏཾ ཏཱདིསཾ ཀཱམརཏིཾནུབྷོནྟོ,

ཧིཏྭཱ ཀཐཾ ནུ པདམུདྡྷརི སོ ནིརཱསོ.

༧༧.

པཱདེཔཱདེ ཝལཡཝིརཝཱམེཁལཱཝཱིཎཱནཱདཱ,

གཱིཏཾགཱིཏཾ པཏིརཏིཀརཾ གཱཡཏཱི གཱཡཏཱི སཱ;

ཧཏྠེཧཏྠེ ཝལཡཙལིཏཱ སམྦྷམཾ སམྦྷམནྟི,

དིསྭཱདིསྭཱ ཨིཏི རཏིཀརཾ ཡཱཏི ཧཱཧཱ ཀིམཱིཧཱ.

ཨཔུནརཱཝཏྟིགམནདཱིཔནཱིཡམཀགཱཐཱ

༧༨.

ཨནནྟཀཱལོཔཙིཏེན ཏེན,

པུཉྙེན ནིབྦཏྟཝིམཱནཡཱནེ;

ཏསྨིཾ དིནེ ཛཱཏསུཏཾ པཛཱཔཏིཾ,

ཧིཏྭཱ གཏོ སོ སུགཏོ གཏོ ཝ.

༧༩.

ཏཾ ཛཱིཝམཱནཾ པིཏརཉྩ མཱཏརཾ,

ཏེ ཉཱཏཀེ ཏཱདིསིཡོ ཙ ཨིཏྠིཡོ;

ཏེ ཏཱདིསེ རམྨཀརེ ནིཀེཏེ,

ཧིཏྭཱ གཏོ སོ སུགཏོ གཏོ ཝ.

༨༠.

ཁོམཉྩ པཏྟུཎྞདུཀཱུལཙཱིནཾ,

སཀཱསིཀཾ སཱདྷུསུགནྡྷཝཱསིཏཾ;

ནིཝཱསིཏོ སོབྷཏི ཝཱསཝོ ཝ,

ཧིཏྭཱ གཏོ སོ སུགཏོ གཏོ ཝ.

༨༡.

ཝིདྷིཔྤཀཱསཱ ནིདྷིཡོ ཙཏསྶོ,

སམུགྒཏཱ བྷཱུཏདྷརཱ ཝསུནྡྷརཱ;

སཏྟཱཝསཏྟཱཝསུདྷཱ སུདྷཱསཱ,

ཧིཏྭཱ གཏོ སོ སུགཏོ གཏོ ཝ.

༨༢.

སུཝཎྞཐཱལེ སཏརཱཛིཀེ སུབྷེ,

སཱདྷུཾ སུགནྡྷཾ སུཙིསཱལིབྷོཛནཾ;

བྷུཏྭཱ སཝཱསཱིཧི ཝིལཱསིནཱིཧི,

ཧིཏྭཱ གཏ སོ སུགཏོ གཏོ ཝ.

༨༣.

མནུཉྙགནྡྷེན ཨསུཉྙགནྡྷོ,

སུགནྡྷགནྡྷེན ཝིལིཏྟགཏྟོ;

སུགནྡྷཝཱཏེན སུཝིཛྫིཏངྒོ,

ཧིཏྭཱ གཏོ སོ སུགཏོ གཏོ ཝ.

༨༤.

སུལཀྑཎེ ཧེཝབྷིལཀྑིཏངྒོ,

པསཱདྷིཏོ དེཝཔསཱདྷནེན;

ཝིརོཙམཱནོ སམརཱཛིནཱིཧི,

ཧིཏྭཱ གཏོ སོ སུགཏོ གཏོ ཝ.

༨༥.

ནཱནཱསནཱནི སཡནཱནི ནིཝེསནཱནི,

བྷཱབྷཱནིབྷཱནི རཏནཱཀརསནྣིབྷཱནི;

ཏཏྲུསྶིཏཱནི རཏནདྡྷཛབྷཱུསིཏཱནི,

ཧིཏྭཱ ཝ ཏཱནི ཧིམབིནྡུསམཱནི ཏཱནི.

༨༦.

ནཱནཱཝིདྷེཧི རཏནེཧི སམུཛྫལེཧི,

ནཱརཱིཧི ནིཙྩམུཔགཱཡིཏཧམྨིཡེཧི;

རཛྫེཧི ཙཀྐརཏནཱདིཝིབྷཱུསིཏེཧི,

ཡཱཏོ ཏཏོ ཧི མཧིཏོ པུརིསསྶརེཧི.

དྭིཔཱདབྱཱསཡམཀགཱཐཱ

༨༧.

ཡསོདྷརཾ པཱིཎཔཡོདྷརཱདྷརཾ,

ཨནངྒརངྒདྡྷཛབྷཱུཏམངྒཾ;

དེཝཙྪརཱཝུཛྫལིཏཾ པཏིབྦཏཾ,

ཧིཏྭཱ གཏོ སོ སུགཏོ ཝ ནཱུན.

༨༨.

སབྷཱཝནིཙྪནྡམཏིཾ པབྷཱཝཏིཾ,

བྷཏྟོ ཀུསོ སཾཧརི བྷཏྟཀཱཛཾ;

ཏཱཡཱབྷིརཱུཔཾ པི ཡསོདྷརཾ ཝརཾ,

ཧིཏྭཱ གཏོ སོ སུགཏོ ཝ ནཱུན.

༨༩.

པུརེ པུརེ སཉྩརི ཁགྒཧཏྠོ,

ཝརཾ པརིཏྠཱིནཾ ཨནིཏྠིགནྡྷོ;

སིརིཉྩ རིཉྩཱཔི ན རིཉྩི ནཱརིཾ,

ཧིཏྭཱནིམནྡཱནི གཏོ ཏཐཱགཏོ.

༩༠.

ཧརིཏྟཙོ རཱགབལེན དེཝིཡཱ,

ཨཝཏྠལིངྒེན ན ལིངྒནུསྶརི;

ཨསེཝི ཀཱམཾ ཏམིདཱནི ཀཱམཾ,

ཧིཏྭཱ གཏོ སོ སུགཏོ ཝ ནཱུན.

༩༡.

ཨཔམེཡྻཀཔྤེསུ ཝིཝེཀསེཝཱི,

ཧིཏྭཱ གཏོ རཛྫསིརིཾ ཝརིཏྠིཾ;

ཨཎུཾ ཀལིཾ ཝཎྞཡི ཏཾ པུརཱཎཾ,

ཝཏྠམྷི ཚིདྡཾ ཝིཡ ཏུནྣཀཱརོ.

༩༢.

ཏཐཱཏི མནྟྭཱན ཨིདཱནིནངྒོ,

ཡསོདྷརཾ པགྒཧིཏོ དྷཛཾ ཝ;

མཏྟོ ཛིཏོམྷཱི ཏི པམཏྟབནྡྷུ,

ན པསྶི ཉཱཎཱསནིཔཱཏམནྟརཾ.

༩༣.

དིསྭཱན དུཀྑཱནལསམྦྷཝཾབྷཝཾ,

ཀཏྭཱ ཏདུཔྤཱདཀནངྒབྷངྒཾ;

ཡསོདྷརཾ པཱིཎཔཡོདྷརཱདྷརཾ,

ཧིཏྭཱ གཏོ བུདྡྷབལཔྤདཾ པདཾ.

༩༤.

ཨནནྟསཏྟཱནམནནྟཀཱལེ,

མནངྒཧེཏྭཱན ཛིཏོ ཨནངྒོ;

པརཱཛིཏོ ནཱུན ཧི ཨེཀཀསྶ,

ཏཐཱགཏོ སོ ན པུནཱགཏོ ཝ.

༩༥.

དིསྭཱན ཉཱཎཱསནིཔཱཏམནྟརཾ,

ཏཐཱགཏོ སོ ན པུནཱགཏོ ཝ;

ཏཐཱགཏོ སོ ན པུནཱགཏོ ཝ,

དིསྭཱནཉཱཎཱསནིཔཱཏམནྟརཾ.

ཏིཔཱདབྱཱསཡམཀགཱཐཱ

༩༦.

ཏཐཱགཏཙྪེརམཧོསི ཏསྶ,

ཏཐཱ ཧིམཱརོཔིཏདཱཧསནྟིཾ;

ཏཐཱ ཧི མཱརོ པི ཏདཱཧ སནྟིཾ,

ཏཐཱ ཧི མཱརོཔི ཏདཱ ཧསནྟིཾ.

པཱདབྱཱསམཧཱཡམཀགཱཐཱ

༩༧.

སཀཱམདཱཏཱ ཝིནཡཱམནཏགཱུ,

སཀཱམདཱཏཱ ཝིནཡཱམནནྟགཱུ;

སཀཱམདཱཏཱ ཝིནཡཱམནནྟགཱུ,

སཀཱམདཱཏཱ ཝིནཡཱམནནྟགཱུ.

ཨབྱཱཔེཏཱདྱནྟཡམཀགཱཐཱ

༩༨.

རཝེརཝེརོརབྷིམཱརབྷེརཝེ,

རཝེརཝེརིཝ བྷེརཝེ རཝེ;

རཝེ རཝེ སཱུདིཏགཱརཝེ རཝེ,

རཝེརཝེདེསི ཛིནོརཝེ རཝེ.

པཊིལོམཡམཀགཱཐཱ

༩༩.

ལོཀཱཡཱཏཏཡཱ ཀཱལོ ཝིསེསཾ ན ན སཾསེཝི,

ཝིསེསཾ ན ན སཾསེཝི ལོཀཱ ཡཱཏཏཡཱ ཀཱལོ.

༡༠༠.

རཱཛརཱཛཡསོཔེཏཝིསེསཾ རཙིཏཾ མཡཱ,

ཡཱམཏཾ ཙིརསཾསེཝིཏཔེསོ ཡཛརཱཛརཱ.

ཨེཀཋཱནིཀཱདིཡམཀགཱཐཱ

༡༠༡.

ཨཱཀངྑཀྑཱཀངྑངྒ ཀངྑཱགངྒཱཁཱགཧཀ,

ཀངྑཱགཱཧཀཀངྑཱགྷ ཧཱ ཧཱ ཀངྑཱ ཀཧཾ ཀཧཾ.

༡༠༢.

ཨཔྤགབྦྷོ ཨཔགབྦྷོ ཨམོཧོ མཱ པམོཧཀོ,

མགྒམུཁཾ མོཁམཱཧ མཱཧཱ མོཧམཱུཧཀྑམཾ.

༡༠༣.

པཱཔཱཔཱཔབྷཝཾ པསྶཾ པཱཔཱཔབྷཝུགྒཏོ,

པཱཔཱཔཱཔབྷཝཱསངྒཱ པཱཔཱཔཱཔབྷཝཱགཏོ.

༡༠༤.

ཀུསལཱཀུསལཾ པསྶཾ ཀུསལཱཀུསལཾ ཙཛི,

ཀུསལཱཀུསལཱསངྒ ཀུསལཱཀུསལཱ ཙུཏོ.

ཨཀྑརུཏྟརིཀཡམཀགཱཐཱ

༡༠༥.

ནོནཱནིནོ ནནཱུནཱནི ནནེནཱནི ནནཱནིནོ,

ནུནྣཱནེནཱནི ནཱུན ན ནཱནནཾ ནཱནནེན ནོ.

༡༠༦.

སཱརེ སུརཱསུརེ སཱརཱི རསསཱརསརིསྶརོ,

རསསཱརརསེ སཱརི སུརཱསུརསརསྶིརེ.

༡༠༧.

དེཝཱནཾ ནནྡནོ དེཝོ དེཝདེཝ ན ནནྡི ནོ,

ཝེདདཱིནེན ཝེདན ཝེདི ཝེདན ཝེདིནོ.

༡༠༨.

དེཝཱསནེ ནིསིནྣོ སོ དེཝདེཝོ སསཱསནེ,

ནིསིནྣཱནཾ སདེཝཱནཾ དེསེསི དསྶནཱསནཾ.

པཧེལི༹གཱཐཱ

༡༠༩.

དསནཱཝགཏོ སཉྙོ ཨནྡྷསྶ ཏམདོ རཝི,

ཨཊྛམཱཔུཎྞསངྐཔྤོ པཱཏྭནཉྙམནཉྙིཝ.

བྱཱཔེཏཱདིཡམཀགཱཐཱ

༡༡༠.

ཨེཀནྟམེཝ སཔརཏྠཔརོ མཧེསི,

ཨེཀནྟམེཝ དསཔཱརམིཏཱབལེན;

ཨེཀནྟམེཝ ཧཏམཱརབལེན ཏེན,

ཨེཀནྟམེཝ སུཝིསུདྡྷམལཏྠ བོདྷིཾ.

མཧཱཔདྷཱནདཱིཔནཱིགཱཐཱ

༡༡༡.

ཨོརོཧིཏོཏོཧིཏཔཱཔདྷམྨོ,

ཚནྣེན ས ཚནྣཧཡེན གནྟྭཱ;

ཨནོམཏཱིརམྷི ཨནོམསཏྟོ,

ཨནོམཔབྦཛྫམུཔཱགཏོ སོ.

༡༡༢.

ནིརཱམིསཾ པཱིཏིསུཁཾ ཨནཱུཔམཾ,

ཨནཱུཔིཡེ ཨམྦཝནེ ཨལཏྠ;

སརཱུཔསོབྷཱཡ ཝིརཱུཔསོབྷཾ,

སརཱཛིཀཾ རཱཛགཧཾ ཀརིཏྠ.

༡༡༣.

ཏཏོ ཨལཱ༹ར ཨཱུདཀཏཱཔསཱནཾ,

ཛྷཱནེནསནྟུཊྛམནོ ཝིཧཱཡ;

མཧཱཔདྷཱནཱཡ ཨུརུཝེལབྷཱུམིཾ,

གཏོ སིཁཔྤཏྟམཀཱསི དུཀྐརཾ.

༡༡༤.

ན ཀཱམཏོ ནེཝཏིདུཀྐརམྷི,

སབྦཉྙུཏཱ སིཛ྄ཛྷཏི མཛ྄ཛྷིམཱཡ;

ཉཏྭཱན ཏཾ པུབྦགུཎོཔལདྡྷཾ,

དྷམྨཾ སམཱནེཏུམགཱ སུབོདྷིཾ.

མཱརཔརཱཛཡདཱིཔནཱིགཱཐཱ

༡༡༥.

ཏིབུདྡྷཁེཏྟམྷི ཏིསེཏཚཏྟཾ,

ལདྡྷཱན ལོཀཱདྷིཔཏཱི བྷཝེཡྻ;

གནྟྭཱན བོདྷིམྷིཔརཱཛིཏཱསནེ,

ཡུདྡྷཱཡ མཱརེནཙལོ ནིསཱིདི.

༡༡༦.

དཏྭཱན མཾསཾ རཛྫཾ པིཏཱ སུདྡྷོདནོ ཏདཱ,

ནམསྶམཱནོ སིརསཱ སེཏཚཏྟེན པཱུཛཡི.

༡༡༨.

སཡཾ ནཱརཱཡནབལོ ཨབྷིཉྙཱབལཔཱརགཱུ,

ཛེཏུཾ སབྦསྶ ལོཀསྶ བོདྷིམཎྜཾཨུཔཱགམི.

༡༡༩.

ཏདཱ ཝསཝཏྟཱིརཱཛཱ ཚཀཱམཝཙརིསྶརོ,

སསེནཱཝཱཧནོ བོདྷིམཎྜཾ ཡུདྡྷཱཡུཔཱགམི.

༡༢༠.

ཨེཐ གཎྷཐ བནྡྷཐ ཚཊྚེཐ ཙེཊཀཾ ཨིམཾ,

མནུསྶཀལལེ ཛཱཏོ ཀིམིཧནྟི ན མཉྙཏི.

༡༢༡.

ཛལནྟཾ ནཝཝིདྷཾ ཝསྶཾ ཝསྶཱཔེཏི ཨནཔྤཀཾ,

དྷཱུམནྡྷཀཱརཾ ཀཏྭཱན པཱཏེསི ཨསིནཾ བཧུཾ.

༡༢༢.

ཙཀྐཱཝུདྷཾ ཁིཔེནྟོ པི ནཱསཀྑི ཀིཉྩི ཀཱཏཝེ,

གཧེཏབྦཾ ཧི གཧཎཾ ཨཔསྶནྟོ ཨིཏིབྲཝི.

༡༢༣.

སིདྡྷཏྠ ཀསྨཱ ཨཱསི ནུ ཨཱསནེ མམ སནྟཀེ,

ཨུཊྛེཧི ཨཱསནཱ ནོ ཙེ ཕཱལེམི ཧདཡཾ ཏཝ.

༡༢༤.

སཔཱདམཱུལེ ཀཱིལ༹ནྟཾ པསྶནྟོ ཏརུཎཾ སུཏཾ,

པིཏཱ ཝུདིཀྑི ཏཾ མཱརཾ མེཏྟཱཡནྟོ དཡཔརོ.

༡༢༥.

ཏདཱ སོ ཨསམྦྷིཝཱཙཾ སཱིཧནཱདཾ ནདཱི མུནི,

ན ཛཱནཱཏི སཡཾ མཡ྄ཧཾ དཱསབྷཱཝཔིཡཾ ཁལོ༹.

༡༢༦.

ཡེན ཀེནཙི ཀམྨེན ཛཱཏོ དེཝཔུརེ ཝརེ,

སཀཾ གཏིཾ ཨཛཱནནྟོ ལོཀཛེཊྛོཏི མཉྙཏི.

༡༢༧.

ཨནནྟལོཀཁཱཏུམྷི སཏྟཱནཾ ཧི ཀཏཾ སུབྷཾ,

མཡ྄ཧེཀཔཱརམིཡཱ པི ཀལཾ ནགྒྷཏི སོལ༹སིཾ.

༡༢༨.

ཏིརཙྪཱནོ སསོ ཧུཏྭཱ དིསྭཱ ཡཱཙཀམཱགཏཾ,

པཙིཏྭཱན སཀཾ མཾསཾ པཏིཨིཨོགྒིམྷི དཱཏཝེ.

༡༢༩.

ཨེཝཾ ཨནནྟཀཱལེསུ ཀཏཾ དུཀྐརཀཱརིཀཾ,

ཀོ ཧི ནཱམ ཀརེཡྻཉྙོ ཨནུམྨཏྟོ སཙེཏནོ.

༡༣༠.

ཨེཝཾ ཨནནྟཔུཉྙེཧི སིདྡྷཾ དེཧམིམཾ པན,

ཡཐཱབྷུཏཾ ཨཛཱནནྟོ མནུསྶོསཱི ཏི མཉྙཏི.

༡༣༡.

ནཱཧཾ མནུསྶོམནུསྶོ ན བྲཧྨཱ ན ཙ དེཝཏཱ,

ཛརཱམརཎཾ ལོཀསྶ དསྶེཏུཾ པནིདྷཱགཏོ.

༡༣༢.

ཨནུཔལིཏྟོ ལོཀེན ཛཱཏོནནྟཛིནོ ཨཧཾ,

བུདྡྷོ བོདྷིཏལེ ཧུཏྭཱ ཏཱརེམི ཛནཏཾ བཧུཾ.

༡༣༣.

སམནྟཱ དྷཛིནཾ དིསྭཱ ཡུདྡྷཾ མཱརཾ སཝཱཧནཾ,

ཡུདྡྷཱཡ པཙྩུགཙྪཱམི མཱ མཾ ཋཱནཱ ཨཙཱཝཡི.

༡༣༤.

ཡནྟེ ཏཾ ནཔྤསཧཏི སེནཾ ལོཀོ སདེཝཀོ,

ཏནྟེ པཉྙཱཡ གཙྪཱམི ཨཱམཾ པཏྟཾ ཝ ཨསྨནཱ.

༡༣༥.

ཨིཙྪནྟོ སཱསཔེ གབྦྷེ ཙངྐམཱམི ཨིཏོ ཙིཏོ,

ཨིཙྪནྟོ ལོཀདྷཱཏུམྷི ཨཏྟབྷཱཝེན ཚཱདཡི.

༡༣༦.

ཨེཏེ སབྦེ གཧེཏྭཱན ཙུཎྞེཏུཾ ཨཙྪརཱཡཔི,

ཨཏྠི ཐཱམཾ བལཾ མཡ྄ཧཾ པཱཎགྷཱཏོ ན ཝཊྚཏི.

༡༣༧.

ཨིམསྶ གཎྜུཔྤཱདསྶ ཨཱཡུདྷེན བལེན ཀིཾ,

མཡ྄ཧཾ ཧི ཏེན པཱཔེན སལླཱཔོ པི ན ཡུཛྫཏི.

༡༣༨.

པལླངྐཾ མམ བྷཱཝཱཡ ཀིམཏྠཉྙེན སཀྑིནཱ,

ཀམྤིཏཱ མདྡིཡཱ དཱནཱ སཀྑི ཧོཏི ཨཡཾ མཧཱི.

༡༣༩.

ཨིཏི ཝཏྭཱ དཀྑིཎཾ བཱཧུཾ པཐཝིཡཱ པཎམཡི,

ཏདཱ ཀམྤིཏྠ པཐཝཱི མཧཱགྷོསོ ཨཛཱཡཐ.

༡༤༠.

པཐཝཱིགྷོསེན ཨཱཀཱསེ གཛྫནྟོ ཨསནི ཕལི,

ཏསྨིཾ མཛ྄ཛྷེ གཏོ མཱརོ སཔརིསོ བྷཡཏཛྫིཏོ.

༡༤༡.

མཧཱཝཱཏསམུདྡྷཏབྷསྨཾ ཝ ཝིཀིརིཡྻཐ,

མཧཱགྷོསོ ཨཛཱཡིཏྠ སིདྡྷཏསྶ ཛཡོ ཨིཏི.

ཨབྷིསམྦོདྷིདཱིཔནཱིགཱཐཱ

༡༤༢.

པུརཏོ གཙྪཏི ཙནྡོ རཛཏཙཀྐཾ ཝ ཨམྦརེ,

སཧསྶརཾསི སུརིཡོ པཙྪིམེནུཔགཙྪཏི.

༡༤༣.

མཛ྄ཛྷེ བོདྷིདུམཙྪཏྟེ པལླངྐེ ཨཔྤརཱཛིཏེ,

པལླངྐེན ནིསཱིདིཏྭཱ དྷམྨཾ སམྨསཏེ མུནི.

༡༤༤.

སཀྐོ ཏསྨིཾ ཁཎེ སངྑཾ དྷམནྟོ ཨབྷིདྷཱཝཏི,

བྲཧྨཱ ཏིཡོཛནཾ ཚཏྟཾ དྷཱརེཏི མུནིམུདྡྷནི.

༡༤༥.

མཎིཏཱལཝཎྚཾ ཏུསཱིཏོ སུཡཱམོ ཝཱལ༹བཱིཛནིཾ,

ནཱནཱམངྒལབྷཎྜཱནི གཧིཏོ སེསདེཝཏཱ.

༡༤༦.

ཨེཝཾ དསསཧསྶམྷི སཀྐོ བྲཧྨཱ ཙ དེཝཏཱ,

སངྑཱདཱིནཱི དྷམནྟཱ ཙ ཙཀྐཝཱལ༹མྷི པཱུརཡུཾ.

༡༤༧.

མངྒལཱནི གཧེཏྭཱན ཏིཊྛནྟི ཀཱཙི དེཝཏཱ,

དྷཛམཱལ གཧེཏྭཱན ཏཐཱ པུཎྞགྷཊཱདཡོ.

༡༤༨.

ཏཏྠ ནཙྩནྟི གཱཡནྟི སེལེ༹ནྟི ཝཱདཡནྟི ཙ,

དེཝཱ དསསཧསྶམྷི ཏུཊྛཧཊྛཱ པམོདིཏཱ.

༡༤༩.

དྷམྨཱམཏརསསྶཱདཾ ལབྷིསྶཱམསྶ སནྟིཀེ,

ནཡནཱམཏརསསྶཱདཾ པཱཊིཧཱརིཡཉྩ པསྶིཏུཾ.

༡༥༠.

ཛཱརམརཎཀནྟཱརཱ སོཀོཔཱཡཱསསལླཏོ,

མོཙེསི ཀཱམཔཱསམྷཱ དེསེནྟོ ཨམཏཾ པདཾ.

༡༥༡.

ཨིཏི ཏུཊྛེཧི དེཝེཧི པཱུཛིཡནྟོ ནརཱསབྷོ,

ཀིཉྩི པཱུཛཾ ཨཙིནྟེནྟོ ཙིནྟེནྟོ དྷམྨམུཏྟམཾ.

༡༥༢.

སབྦཏྠསཱདྷིཏོ སནྟོ སིདྡྷཏྠོ ཨཔྤརཱཛིཏོ,

ཙཀྐཝཱལ༹སིལཱསཱཎིཔཱཀཱརེཧི མནོརམེ.

༡༥༣.

ཏཱརཱམཎིཁཙིཏཱཀཱསཝིཏཱནེ ཙནྡདཱིཔཀེ,

མཱནཱརཏམཔཛྫོཏེ མཱལཱགནྡྷཱདིཔཱུཛིཏེ.

༡༥༤.

དིབྦེཧི ཚཎབྷེརཱིཧི གྷུཊྛེ མངྒལགཱིཏིཡཱ,

ཙཀྐཝཱལེ༹ སུཔྤཱསཱདེ བོདྷིམཎྜམཧཱཏལེ.

༡༥༥.

བོདྷིརུཀྑམཎིཙྪཏྟེ པལླངྐེ ཨཔྤརཱཛིཏེ,

ནིསྶིནྣོ པཋམེ ཡཱམེ པུརིམཾ ཛཱཏིམནུསྶརི.

༡༥༦.

ནམརཱུཔཱམནུཔྤཏྟི སུདིཊྛཱ ཧོཏི ཏེནིདྷཱ,

སཀྐཱཏདིཊྛི ཏེནསྶ པཧཱིནཱ ཧོཏི སབྦསོ.

༡༥༧.

ཏཏོ ཧི དུཏིཡེ ཡཱམེ ཡཐཱཡམྨུཔགེ སརི,

སུདིཊྛཾ ཧོཏི ཏེནསྶ ཀམྨཀླེསེཧི སམྦྷཝཾ.

༡༥༨.

ཀངྑཱཝིཏརཎཱི ནཱམ ཉཱཎནྟཾ སམུཔཱགཏཾ,

ཏེནསེས པཧཱིཡིཏྠ ཀངྑཱ སོལ༹སདྷཱ ཋིཏཱ.

༡༥༩.

ཏཏོ སོ ཏཏིཡེ ཡཱམེ དྭཱདསངྒེ ཨསེསཏོ,

སོ པཊིཙྩསམུཔྤཱདེ ཉཱཎམོཏཱརཡཱི མུནི.

༡༦༠.

ཨཝིཛྫཝཱདྱཱནུལོམེན ཛརཱདིཔཊིལོམཏོ,

སམྨསནྟོ ཡཐཱབྷཱུཏཾ ཉཱཎདསྶནམཱགམི.

༡༦༡.

ཀཔྤཀོཊིསཏེནཱཔི ཨཔྤམེཡྻེསུ ཛཱཏིསུ,

ལོབྷཾ ཨསེསདཱནེན ཝིནཱསེནྟོ པུནཔྤུནཾ.

༡༦༢.

སཱིལེན ཁནྟིམེཏྟཱཡ ཀོཁདོསཾ ནིཝཱརེསི,

པཉྙཱཡ མོཧཾ ཚེཏྭཱན མིཙྪཱདིཊྛི ཏཐེཝ ཙ.

༡༦༣.

གརཱུཔསེཝནཱདཱིཧི ཝིཙིཀིཙྪཾ ཝིནོདཡཾ,

མཱནུདྡྷཙྩཾ ཝིནོདེནྟོ ཀུལེ ཛེཊྛོཔཙཱཡིནཱ.

༡༦༤.

ནེཀྑམྨེན ཝིནཱསེནྟོ ཀཱམརཱགཾ པུནཔྤུནཾ,

སཙྩེན ཝིསཾཝཱདཾ ཀོསཛྫཾ ཝཱིརིཡེན ཙ.

༡༦༥.

ཨེཝཾ དཱནཱདིནཱ ཏཾ ཏཾ ཀིལེསངྒཾ ཝིནོདཡཾ,

སུཝཌྜྷིཏཱ མཧཱཔཉྙཱ ཀཐཾ སནྟིཾ ན རཱུཧཏི.

༡༦༦.

སུདུཀྐརཾ ཀརིཏྭཱན དཱནཱདིཔཙྩཡཾ པུརེ,

ན ཀིཉྩི བྷཝསམྤཏྟིཾ པཏྠེསི བོདྷིམུཏྟམཾ.

༡༦༧.

པཎིདྷཱནམྷཱ པཊྛཱཡ ཀཏཾ པུཉྙཉྩ པཏྠནཾ,

ཨེཀྐཏྠ དཱནི སམྤཏྟིཾ དེཏི བོདྷིཾ ཨསཾསཡཾ.

༡༦༨.

ཏཏོ སོ སབྦསངྑཱརེ ཨནིཙྩདུཀྑནཏྟཏོ,

སམྨསནྟོནུལོམེན ནིབྦཱནཾ སམུཔཱགམི.

༡༦༩.

སཝཱསནེ ཀིལེསེ སོ ཛྷཱཔེནྟོནུམཏྟཾ པི ཙ,

ཨརཧཏྟཔྤཏྟིཡཱ སུདྡྷོ བུདྡྷོ བོདྷིཏལེ ཨཧུ.

༡༧༠.

པཏྟོ ཝིམེཏྟིཾ ཝརསེཏཚཏྟཾ,

སོ པཱིཏིཝེགེན ཨུདཱནུདཱིརཡི;

ཚེཏྭཱན མཱརེ ཝིཛིཏཱརིསངྒྷོ,

ཏིབུདྡྷཁེཏྟེཀདིཝཱཀརོ ཨཧུ.

༡༧༡.

རཱཛཱདྷིརཱཛཱ ཝརམེཝམཱསི,

ཏིཚཏྟདྷཱརི ཝརདྷམྨརཱཛཱ;

མཧཱསཧསྶཾ པི ཙ ལོཀདྷཱཏུཾ,

སརེན ཝིཉྙཱཔཡིཏུཾ སམཏྠོ.

༡༧༢.

བུདྡྷོ ལོཀཱལོཀེ ལོཀེ,

ཛཱཏོ སཏྟོ ཀོནུམྨཏྟོ;

སུདྡྷཾ བུདྡྷཾ ཨོགྷཱ ཏིཎྞཾ,

སདྡྷོ པཉྙོ ཀོ ནོ ཝནྡེ.

༡༧༣.

བྷཛིཏཾ ཙཛིཏཾ པཝནཾ བྷཝནཾ,

ཛཧིཏཾ གཧིཏཾ སམལཾ ཨམལཾ;

སུགཏཾ ཨགཏཾ སུགཏིཾ ཨགཏིཾ,

ནམིཏཾ ཨམིཏཾ ནམཏིཾ སུམཏིཾ.

དྷམྨཙཀྐཔཝཏྟནདཱིཔནཱིགཱཐཱ

༡༧༤.

སམྨཱསམྦོདྷིཉཱནཾ ཧཏསཀལམལཾ སུདྡྷཏོ ཙཱཏིསུདྡྷཾ,

ཨདྡྷཱ ལདྡྷཱ སུལདྡྷཾ ཝཏམིཏི སཏཏཾ ཙིནྟཡནྟོ སུབོདྷིཾ;

སཏྟཱཧཾ སཏྟམེཝཾ ཝིཝིདྷཕལསུཁཾ ཝིཏིནཱམེསི ཀཱལཾ,

བྲཧྨེནཱཡཱཙིཏོ སོ ཨིསིཔཏནཝནེ ཝཏྟཡཱི དྷམྨཙཀྐཾ.

པཱཊིཧཱརིཡདཱིཔནཱིགཱཐཱ

༡༧༥.

བྲཧྨསྶ སདྡཾ ཀརཝཱིཀབྷཱཎིཾ,

ཡཐིཙྪིཏཾ སཱཝཡིཏུཾ སམཏྠཾ;

སཙྩཾ པིཡཾ བྷཱུཏཧིཏཾ ཝདནྟཾ,

ན པཱུཛཡེ ཀོ ཧི ནརོ སཙེཏནོ.

༡༧༦.

ཨིདྡྷི ཙ ཨཱདེསནཱནུསཱསནཱི,

པཱཊིཧཱིརེ བྷགཝཱ ཝསཱི ཨཧུ;

ཀཏྭཱན ཨཙྪེརསུཔཱཊིཧཱིརཾ,

དེསེསི དྷམྨཾ ཨནུཀམྤིམཾ པཛཾ.

ནཝགུཎདཱིཔནཱིགཱཐཱ

༡༧༧.

ཨེཝཾ ཧི བུདྡྷཏྟམུཔཱགཏོ སོ,

དེསེསི དྷམྨཾ སནརཱམརཱནཾ;

ནཱནཱནཡེཧཱིབྷིསམེསི སཏྟེ,

ཏསྨཱ ཧི ཛྷཱཏོ ཏིབྷཝེསུ ནཱཐོ.

༡༧༨.

ཨདྡྷཱ ལདྡྷཱ དྷམྨཱལོཀཾ,

དིཊྛཱ པཏྟཱ ཉཱཏཱ སཙྩཾ;

ཏིཉྙཱརཱགཱདོསམོཧཱ,

ཐོམེསུཾ ཏེ དེཝཱ བྲཧྨཱ.

༡༧༩.

མུནིརཱཛཝརོ ནརརཱཛཝརོ,

དིཝིདེཝཝརོ སུཙིབྲཧྨཝརོ;

སཀཔཱཔཧརོ པརཔཱཔཧརོ,

སཀཝུཌྜྷིཀརོ པརཝུཌྜྷིཀརོ.

༡༨༠.

སནརཱམརུབྲཧྨགཎེབྷི རུཏཱ,

ཨརཧཱདིགུཎཱ ཝིཔུལཱ ཝིམལཱ;

ནཝདྷཱ ཝསུདྷཱགགཎེ,

སཀལེ ཏིདིཝེ ཏིབྷཝེ ཝིསཊཱ.

༡༨༡.

ཡེ པིསྶ ཏེ བྷགཝཏོ ཙ ཨཙིནྟིཡཱདཱི,

སུདྡྷཱཏིསུདྡྷཏརབུདྡྷགུཎཱ ཧི སབྦེ;

སངྑེཔཏོ ནཝཝིདྷེསུ པདེསུ ཁིཏྟཱ,

ཝཀྑཱམི དཱནི ཨརཧཱདིགུཎེ ཨཧཾ པི.

༡༨༢.

ཡོ ཙཱིདྷ ཛཱཏོ ཨརཧཾ ནིརཱསོ,

སམྨཱབྷིསམྦུདྡྷསམནྟཙཀྑུ;

སམྤནྣཝིཛྫཱཙརཎོགྷཏིཎྞོ,

སམྨཱགཏོ སོ སུགཏོ གཏོ ཝ.

༡༨༣.

ཨཝེདི སོ ལོཀམིམཾ པརཉྩ,

ཨམུཏྟརོ སཱརཐིདམྨསཏྟེ;

སདེཝཀཱནཾ ཝརསཏྠུཀིཙྩཾ,

ཨཀཱསི བུདྡྷོ བྷགཝཱ ཝིསུདྡྷོ.

གུཎདཱིཔནཱིགཱཐཱ

༡༨༤.

ན ཏསྶ ཨདིཊྛནམིདྷཏྠི ཀིཉྩི,

ཨཏོ ཨཝིཉྙཱཏམཛཱནིཏབྦཾ;

སབྦཾ ཨབྷིཉྙཱསི ཡདཏྠི ཉེཡྻཾ,

ཏཐཱགཏོ ཏེན སམནྟཙཀྑུ.

༡༨༥.

ཨིཏི མཧིཏམནནྟཱཀིཏྟིསམྦྷཱརསཱརཾ,

སཀལདསསཧསྶཱིལོཀདྷཱཏུམྷི ནིཙྩཾ;

ཨུཔཙིཏསུབྷཧེཏུཔཡུཏཱནནྟཀཱལཾ,

ཏདིཧ སུགཏབོདྷིསཱདྷུཀཾ ཙིནྟནཱིཡཾ;

༡༨༦.

ཏཀྐབྱཱཀརཎཉྩ དྷམྨཝིནཡཾ སུཏྭཱ པི ཡོ པཉྙཝཱ,

ཏེནཱཡཾ སུཙིསཱརབྷཱུཏཝཙནཾ ཝིཉྙཱཡཏེ ཀེཝལཾ;

ཧེཏུཉྩཱཔི ཕལེན ཏེན སཕལཾ སམྤསྶམཱནོ ཏཏོ བོདྷིཾ སདྡཧཏེཝ ཏསྶ མཧཏཱཝཱཡམཏོ སམྦྷཝཾ.

༡༨༧.

ཡོ སདྡཧནྟོ པན ཏསྶ བོདྷིཾ,

ཝུཏྟཱནུསཱརེན གུཎེརཧཱདཱི;

ཀཐེཏི ཙིནྟེནྟི ཙ སོ མུཧུཏྟཾ,

ཨོཧཱཡ པཱཔཱནི ཨུཔེཏི སནྟིཾ.

༡༨༨.

སདྡྷེཡྻཱ ཏེ ཙིནྟེཡྻཱ ཏེ,

ཝནྡེཡྻཱ ཏེ པཱུཛེཡྻཱཏེ;

བུདྡྷོལོཀཱལོཀེ ལོཀེ,

ཛཱཏེ ནེཏཾ པཏྠེནྟེན.

པཱུཛཱནིདྷཱནདཱིཔནཱིགཱཐཱ

༡༨༩.

ཏསམཱ ཧི ཛཱཏོཝརཀམྷི ཏསྶ,

ཨཱཡཏྟཀེ མངྒལཙཀྐཝཱལེ༹;

བྷཱུཏེཧི ཝཏྠཱུཧི མནོརམེཧི,

པཱུཛེམི ཏཾ པཱུཛིཏྤཱུཛིཏཾ པུརེ.

༡༩༠.

སོཧཾ ཨཛྫ པནེཏསྨིཾ ཙཀྐཝཱལ༹མྷི པུཔྥིཏེ,

ཐལཛེ ཛལཛེ ཝཱཔི སུགནྡྷེ ཙ ཨགནྡྷཀེ.

༡༩༡.

མནུསྶེསུ ཨནེཀཏྠ ཏལཱ༹ཀུཡྻཱནཝཱཔིསུ,

པཝནེ ཧིམཝནྟསྨིཾ ཏཏྠ སཏྟ མཧཱསརེ.

༡༩༢.

པརིཏྟདཱིཔེ དྭིསཧསྶེ མཧཱདཱིཔེ སུཔུཔྥིཏེ,

སཏྟཔརིབྷཎྜསེལེསུ སིནེརུཔབྦཏུཏྟམེ.

༡༩༣.

ཀུམུདུཔྤལཀཱདཱིནི ནཱགཱནཾ བྷཝནེསུཔི,

པཱཊལཱདཱིནི པུཔྥཱནི ཨསུརཱནཾ ཧི ཨཱལཡེ.

༡༩༤.

ཀོཝིལཱ༹རཱདིཀཱནི ཏུ དེཝཏཱནཾ ཧི ཨཱལཡེ,

ཨེཝམཱདཱི ཨནེཀཏྠ པུཔྥིཏེ དྷརཎཱིརུཧེ.

༡༩༥.

ཙམྤཀཱ སལལཱ ནིམྦཱ ནཱགཔུནྣཱགཀེཏཀཱ,

ཝསྶིཀཱ མལླིཀཱ སཱལཱ ཀོཝིལཱ༹རཱ ཙ པཱཊལི.

༡༩༦.

ཨིནྡཱིཝརཱ ཨསོཀཱ ཙ ཀཎིཀཱརཱ ཙ མཀུལཱ,

པདུམཱ པུཎྜརིཀཱ ཙ སོགནྡྷིཀུམུདུཔྤལཱ.

༡༩༧.

ཨེཏེ ཙཉྙེ ཙ རུཀྑཱ ཙ ཝལླིཡོ ཙཱཔི པུཔྥིཏཱ,

སུགནྡྷཱ སུཁསམྥསྶཱ ནཱནཱཝཎྞནིབྷཱ སུབྷཱ.

༡༩༨.

ཝིཙིཏྲཱ ནཱིལཱནེཀཱནི པཱིཏཱ ལོཧིཏཀཱནི ཙ,

ཀཱལཱ༹ སེཏཱ ཙ མཉྫཊྛ ནེཀཝཎྞཱ སུཔུཔྥིཏཱ.

༡༩༩.

སོབྷཏེ པབྦཏེ ཧེཊྛཱ སརེཧི ཝནརཱཛིཧི,

སནྡམཱནཱཧི གངྒཱཧི ཧིམཝཱ རཏནཱཀརོ.

༢༠༠.

པཏྟཀིཉྫཀྑརེཎཱུཧི ཨོཀིཎྞཾ ཧོཏི ཏཾ ཝནཾ,

བྷམརཱ པུཔྥགནྡྷེཧི སམནྟཱ ཨབྷིནཱདིཏཱ.

༢༠༡.

ཨཐེཏྟ སཀུཎཱ སནྟི དིཛཱ མཉྫུསྶརཱ སུབྷཱ,

ཀཱུཛནྟམུཔཀཱུཛནྟི ཨུཏུསམྤུཔྥིཏེ དུམེ.

༢༠༢.

ནིཙྪརཱནཾ ནིཔཱཏེན པབྦཏཱ ཨབྷིནཱདིཏཱ,

པཉྩངྒིཀཱནི ཏཱུརིཡཱནི དིབྦཱནི ཝིཡ སུཡྻརེ.

༢༠༣.

ཏཏྠ ནཙྩནྟི ཏསྨིཾ ཛལནྟགྒིསིཁཱུཔམཱ,

ཏསྨིཾ ཧི ཀིནྣརཱ ཀིཙྩཾ པདཱིཔེན ཀརཱིཡཏི.

༢༠༥.

མུཏྟཱཛཱལཱཝ དིསྶནྟི ནིཙྪརཱནཾ ཧི པཱཏཀཱ,

པཛྫལནྟཱ ཝ ཏིཊྛནྟི མཎིཝེལུ༹རིཡཱདཡོ.

༢༠༦.

ཀཱལཱ༹ནུསཱརི ཏགྒརཾ ཀཔྤཱུརཾ ཧརིཙནྡནཾ,

སཀུཎཱནཾ ཧི སདྡེན མཡཱུརཱནཾ ཧི ཀེཀཡཱ.

༢༠༧.

བྷམརཱནཾ ཧི ནིནྣཱདཱ ཀོཉྩནཱདེན ཧཏྠིནཾ,

ཝིཛམྦྷིཏེན ཝཱལཱ༹ནཾ ཀིནྣརཱནཾ ཧི གཱིཏིཡཱ;

༢༠༨.

པབྦཏཱནཾ ཧི ཨོབྷཱསཱ མཎཱིནཾ ཛོཏིཡཱཔི ཙ,

ཝིཙིཏྲབྦྷཝིཏཱནེཧི དུམཱནཾ པུཔྥདྷཱུཔིཡཱ;

ཨེཝཾ སབྦངྒསམྤནྣཾ ཀིཾ སིཡཱ ནནྡནཾ ཝནཾ.

༢༠༩.

ཨེཝཾ སུསམྥུལླཝནཾ ཧི ཡཾ ཡཾ,

ཏཧིཾ ཏཧིཾ པུཔྥིཏཔུཔྥིཏཾ སུབྷཾ;

མཱལཾ སུསདྡཉྩ མནུཉྙགནྡྷཾ,

པཱུཛེམི ཏཾ པཱུཛིཏཔཱུཛིཏཾ པུརཱ.

༢༡༠.

ནཱགལོཀེ མནུསྶེ ཙ དེཝེ བྲཧྨེ ཙ ཡཾ སིཡཱ,

སཱམུདྡིཀཾ བྷཱུམིགཏཾ ཨཱཀཱསཊྛཉྩ ཡཾ དྷམཾ.

༢༡༡.

རཛཏཾ ཛཱཏརཱུཔཉྩ མུཏྟཱ ཝེལུ༹རིཡཱ མཎི,

མསཱརགལླཾ ཕལིཀཾ ལོཧིཏངྒཾ པཝཱལ༹ཀཾ.

༢༡༢.

ཡོ སོ ཨནནྟཀཔྤེསུ པཱུརེཏྭཱ དསཔཱརམཱི,

བུདྡྷོ བོདྷེསི སཏྟཱནཾ ཏསྶ པཱུཛེམི ཏཾ དྷནཾ.

༢༡༣.

ཁོམཾ ཀོསེཡྻཾ ཀཔྤཱསཾ སཱཎཾ བྷངྒཉྩ ཀམྦལཾ,

དུཀཱུལཱནི ཙ དིབྦཱནི དུསྶཱནི ཝིཝིདྷཱནི ཏེ.

༢༡༤.

ཨནནྟཝཏྠདཱནེན ཧིརོཏྟཔྤཱདིསཾཝརཾ,

ཡསྶ སིདྡྷཾ སིཡཱ ཏསྶ དུསྶཱནི པུཛཡཱམཧཾ.

༢༡༥.

པཝནེ ཛཱཏརུཀྑཱནཾ ནཱནཱཕལརསུཏྟམཾ,

ཨམྦཱ ཀཔིཊྛཱ པནྶཱ ཙོཙམོཙཱདིནཔྤཀཱ.

༢༡༦.

ཏསྨིཾ གནྡྷརསཾ ཨོཛཾ བུདྡྷསེཊྛསྶ པཱུཛིཏཾ,

ཝནྡཱམི སིརསཱ ནིཙྩཾ ཝིཔྤསནྣེན ཙེཏསཱ.

༢༡༧.

པཱུཛེམི པཋམཾ ཏསྶ པཎིདྷཱནཾ ཨཙིནྟིཡཾ,

ཙཀྐཝཱལ༹མྷི སབྦེཧི ཝིཛྫམཱནེཧི ཝཏྠུཧི.

༢༡༨.

དསནྣཾ པཱརམཱིནནྟུ པཱུརིཏཊྛཱནམུཏྟམཾ,

ཏཏོ སཱལཝནེ རམྨེ ཛཱཏཊྛཱནཾ ཙརིམཀཾ.

༢༡༩.

ཚབྦསཱནི པདྷཱནསྨིཾ ཀརཎཾ དུཀྐརཀཱརིཀཾ,

ཨཔྤརཱཛིཏཔལླངྐཾ བུདྡྷཾ བུདྡྷགུཎཾ ནམེ.

༢༢༠.

ཙུདྡས བུདྡྷཉཱཎཱནི ཨཊྛརྶ ཨཱཝེཎིཀཾ,

པཱུཛེམི དསབལཉཱཎཾ ཙཏུཝེསཱརཛྫམུཏྟམཾ.

༢༢༡.

ཨཱསཡཱནུསཡཉཱཎཾ ཨིནྡྲིཡཱནཾ པརོཔརཾ,

ཡམཀཔཱཊིཧཱིརཉྩ ཉཱཎཾ སབྦཉྙུཏཾ པི ཙ.

༢༢༢.

མཧཱཀརུཎཱཔཏྟིཉཱཎཾ ཨནཱཝརཎྨིཏི ཙ,

ཚ ཨསཱདྷཱརཎཱནེཏེ ཉཏྭཱན པཱུཛཡཱམཧཾ.

༢༢༣.

ཏཏོ ཙ སཏྟསཏྟཱཧེ དྷམྨསམྨསིཏཾ ནམེ,

བྲཧྨུནཱ ཡཱཙིཏཊྛཱནཾ དྷམྨཾ དེསཡིཏུཾ ཝརཾ.

༢༢༤.

ཨིསིཔཏནེ མིགདཱཡེ དྷམྨཙཀྐཔཝཏྟནཾ,

ཏཏོ ཝེལུ༹ཝནཱརཱམེ ཝསིཏཋཱནཉྩ པཱུཛཡེ.

༢༢༥.

ཏཏོ ཛེཏཝནཾ རམྨཾ ཙིརཝུཏྠཾ མཧེསིནཱ,

ཨསཱདྷཱརཎམཉྙེསཾ ཡམཀཔཱཊིཧརིཡཾ.

༢༢༦.

པཱརིཙྪཏྟཀམཱུལམྷི ཨབྷིདྷམྨཉྩ དེསནཾ,

སངྐསྶནགརདྭཱརེ དེཝོརོཧཎཀཾ པི ཙ.

༢༢༧.

ཏཏོ ཙ ཧིམཝནྟསྨིཾ མཧཱསམཡདེསནཾ,

ཝུཏྟཱནེཏཱནི ཋཱནཱནི ནཏྭཱན པུཛཡཱམཧཾ.

༢༢༨.

ཙཏུརཱསཱིཏིསཧསྶེཧི དྷམྨཀྑནྡྷེཧི སངྒཧཾ,

པིཊཀཏྟཡཾ ཡཐཱཝུཏྟཝིདྷིནཱ པཱུཛཡཱམཧཾ.

༢༢༩.

མཱརསྶ ཨཏྟནོ ཨཱཡུསངྑཱརོསཛྫནཾ ནམེ,

ཀུསིནཱརཱཡ མལླཱནཾ ཡམཀསཱལམནྟརེ.

༢༣༠.

པཎིདྷཱནམྷི པཊྛཱཡ ཀཏཾ ཀིཙྩཾ ཨསེསཏོ,

ནིཊྛཔེཏྭཱན སོ སབྦཾ པརིནིབྦཱཡིནཱསཝོ.

༢༣༡.

ཨེཝཾ ནིབྦཱཡམཱནསྶ ཀཏཀིཙྩསྶ ཏཱདིནོ,

ཙིརགཏཱ མཧཱཀརུཎཱ ན ནིབྦཱཡིཏྠ ཀིཉྩིཔི.

༢༣༢.

སྭཱཡཾ དྷམྨོ ཝིནཡོ ཙ དེསིཏོ སཱདྷུཀཾ མཡཱ,

མམཙྩཡེན སོ སཏྠཱ དྷཱཏུ ཙཱཔི སརཱིརཛཱ.

༢༣༣.

ཨཔྤརཱཛིཏཔལླངྐཾ བོདྷིརུཀྑཉྩ ཨུཏྟམཾ,

མམཙྩཡེན སཏྠཱ ཏི ཨནུཛཱནི མཧཱམུནི.

༢༣༤.

མམ ཋནེ ཋཔེཏྭཱན དྷཱཏུབོདྷིཉྩ པཱུཛིཏཾ,

ཨནུཛཱནཱམི ཏུམྷཱཀཾ སཱདྷནཏྠཾ སིཝཉྫསཾ.

༢༣༥.

ཏསྨཱ ཧི ཏསྶ སདྡྷམྨཾ ཨུགྒཎྷིཏྭཱ ཡཐཱཏཐཾ,

ཡོ དེསེཏི སམྦུདྡྷོ ཏི ནཏྭཱན པཱུཛཡཱམཧཾ.

༢༣༦.

ཏསྨཱ སཱསཔམཏྟཾ པི ཛིནདྷཱཏུཾ ཨསེསིཡ,

ཝིཏྠིནྣཙཀྐཝཱལ༹མྷི ནཏྭཱན པཱུཛཡཱམཧཾ.

༢༣༧.

པརམྤརཱབྷཏཱནཾ ཧི ཨིམམྷཱ བོདྡྷིརུཀྑཏོ,

སབྦེསཾ བོདྷིརུཀྑཱནཾ ནཏྭཱན པཱུཛཡཱམཧཾ.

༢༣༨.

ཡཾ ཡཾ པརིབྷུཉྫི བྷགཝཱ པཏྟཙཱིཝརམཱདིཀཾ,

སབྦཾ པརིབྷོགདྷཱཏུཾ ནཏྭཱན པཱུཛཡཱམཧཾ.

༢༣༩.

ཡཏྠ ཀཏྠཙི སཡིཏོ ཨཱསིནྣོ ཙངྐམེཔི ཝཱ,

པཱདལཉྪནྐཾ ཀཏྭཱ ཋིཏོ ནཏྭཱན པཱུཛཡེ.

༢༤༠.

ན སཉྫཱནནྟི ཡེ བུདྡྷཾ ཨེཝརཱུཔོ ཏི ཉཱཏྭེ,

ཀཏཾ ཏཾ པཊིམཾ སབྦཾ ནཏྭཱན པཱུཛཡཱམཧཾ.

༢༤༡.

ཨེཝཾ བུདྡྷཉྩ དྷམྨཉྩ སངྒྷཉྩ ཨནུཏྟརཾ,

ཙཀྐཝཱལ༹མྷི སབྦེཧི ཝཏྠཱུཧི པཱུཛཡཱམཧཾ.

པཏྠནཱདཱིཔནཱིགཱཐཱ

༢༤༢.

ཨསྨིཾ ཙ པུབྦེཔི ཙ ཨཏྟབྷཱཝེ,

སབྦེཧི པུཉྙེཧི མཡཱ ཀཏེཧི;

པཱུཛཱཝིདྷཱནེཧི ཙ སཉྙམེཧི,

བྷཝེ བྷཝེ པེམནིཡོ བྷཝེཡྻཾ.

༢༤༣.

སདྡྷཱ ཧིརོཏྟཔྤབཧུསྶུཏཏྟཾ,

པརཀྐམོ ཙེཝ སཏིསྶམཱདྷི;

ནིབྦེདྷབྷཱགཱི ཝཛིརཱུཔམཱཏི,

པཉྙཱ ཙ མེ སིཛ྄ཛྷཏུ ཡཱཝ བོདྷིཾ.

༢༤༤.

རཱགཉྩ དོསཉྩ པཧཱཡ མོཧཾ,

དིཊྛིཉྩ མཱནཾ ཝིཙིཀིཙྪིཏཉྩ;

མཙྪེརེཨིསྶཱམལཝིཔྤཧཱིནོ,

ཨནུདྡྷཏོ ཨཙྩཔལོ བྷཝེཡྻཾ.

༢༤༥.

བྷཝེཡྻཧཾ ཀེནཙི ནཔྤསེཡ྄ཧོ,

བྷོགོ ཙ དིནྣེཧི པཊེཧི;

བྷོགོ ཙ ཀཱཡོ ཙ མམེས ལདྡྷོ,

པརཱུཔཀཱརཱཡ བྷཝེཡྻཾ ནཱུན.

༢༤༦.

དྷམྨེནཱ མཱལཱཔིཏརོ བྷརེཡྻཾ,

ཝུཌྜྷཔཙཱཡཱི ཙ བཧཱུཔཀཱརཱི;

ཉཱཏཱིསུ མིཏྟེསུ སཔཏྟཀེསུ,

ཝུཌྜྷིཾ ཀརེཡྻཾ ཧིཏམཏྟནོ ཙ.

༢༤༧.

མེཏྟེཡྻནཱཐཾ ཨུཔསངྐམིཏྭཱ,

ཏསྶཏྟབྷཱཝཾ ཨབྷིཔཱུཛཡིཏྭཱ;

ལདྡྷཱན ཝེཡྻཱཀརཎཾ ཨནཱུནཾ,

བུདྡྷོ ཨཡཾ ཧེསྶཏིནཱགཏེསུ.

༢༤༨.

ལོཀེན ཀེནཱཔི ཨནུཔལིཏྟོ,

དཱནེ རཏོ སཱིལགུཎེ སུསཱཎྛིཏོ;

ནེཀྑམྨབྷཱགི ཝརཉཱཎལཱབྷཱི,

བྷཝེཡྻཧཾ ཐཱམབལུཔཔནྣོ.

༢༤༩.

སཱིསཾ སམཾསམཾ མམ ཧཏྠཔཱདེ,

སཾཚིནདམཱནེཔི ཀརེཡྻཁནྟིཾ;

སཙྩེ ཋིཏོ ཀཱལུམདྷིཊྛིཏེ ཝ,

མེཏྟཱཡུཔེཀྑཱཡ ཡུཏོ བྷཝེཡྻཾ.

༢༥༠.

མཧཱཔརིཙྩཱགཾ ཀཏྭཱ པཉྩ,

སམྦོདྷིམགྒཾ ཨཝིརཱདྷཡནྟོ;

ཚེཏྭཱ ཀིལེསེ ཙིཏཔཉྩམཱརོ,

བུདྡྷོ བྷཝིསྶཱམི ཨནཱགཏེསུ.