📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

པཛྫམདྷུ

ཨཱནནྡ རཉྙ རཏནཱདི མཧཱ ཡཏིནྡ,

ནིཙྩཔྤབུདྡྷ པདུམཔྤིཡ སེཝིནངྒཱི;

བུདྡྷཔྤིཡེན གྷན བུདྡྷ གུཎཔྤིཡེན,

ཐེརཱལིནཱ རཙིཏ པཛྫམདྷུཾ པིབནྟུ.

༡.

ཨུཎྞཱཔཔུཎྞསསིམཎྡལཏོ གལིཏྭཱ,

པཱདམྦུཛངྒུལི དལཊྛ སུདྷཱ ལཝཱནཾ;

པནྟཱིཝ སཏྠུ ནཁཔནྟི པཛཱཝིསེསཾ,

པཱིཎེཏུ སུདྡྷ སུཁིཏམྨཎ ཏུཎྜཔཱིཏཱ.

༢.

ཁིཏྟཱཡ མཱརརིཔུནཱ པརིཝཏྱ སཏྠུ,

པཱདསྶཡཱ ཛིཏ དིསཱཡ སིཏཏྟལཱཡ;

ཡཱ ཛེཏི ཀཉྩན སརཱཝལིཡཱ སིརིཾ སཱ,

དེཏནྒིནཾ རཎཛཡངྒུལིཔནྟིཀནྟཱ.

༣.

སོཝཎྞ ཝཎྞ སུཁུམཙྪཝི སོམྨ ཀུམྨ,

པིཊྛཱིཝ པིཊྛི ཀམཏུནྣཏི བྷཱཏི ཡེསཾ;

ཏེསུཔྤཏིཊྛིཏསུཀོམལདཱིགྷཔཎྷི,

པཱདཱ ཛིནསྶ པདདནྟུ པདཾ ཛནསྶ.

༤.

ཨཙྪེར པངྐཛསིརཾ སིརིཡཱ སཀཱཡ,

ཡེ མདྡིནོ ཝིཡ ཙརནྟི སརོཛ སཱིསེ;

སཉྩུམྦིཏཱ ཝིཡ ཙ ཏཱནི པརཱག རཱགཱ,

ཏེ ནཱིརཛཱ མུནིཔདཱ པདདནྟུ ལཀྑིཾ.

༥.

ཨགཱམི ཀཱལ ཛན མངྒལ བྷཏྟུ བྷཱཝཾ,

ཝྱཱཀཏྟུམཏྲ ཀུསལེནིཝ ནིམྨིཏཱནི;

ཡཱཏྲཱསུམཊྛསཏམངྒལཀྑཎཱནི,

སཱདྷེཏུ ནཾ པདཡུགཾ ཛཡམངྒལཱནི.

༦.

སསྶེཝིཛནྟུཝརསནྟིཔུརཔྤཝེསེ,

ནིཙྩཾ སུསཛྫ ཋཔིཏཱནིཝ མངྒལཱཡ;

ཡེ ཏེ དདྷནྟི ཀལམངྒལལཀྑཎཱནི,

ཝཏྟནྟུ ཏེ ཛིནཔདཱ ཛཡམངྒལཱཡ.

༧.

སབྦེབྷིབྷཱུཡ སཔདེསུ ནིཔཱཏནསྶ,

སཉྙཱཎཀཾ ཝིཡ ཡདསྶིཏསབྦལོཀོ;

པཱདཱཏྱདྷོཀཏཏིལོཀསིརོཝརཱ པི,

ལོཀཾ པུཎནྟུ ཛཡམངྒལཀཱརཎཱནི.

༨.

ལོཀཏྟཡེཀསརཎཏྟཝིབྷཱཝནཱཡ,

སཛྫོ ཝ ཏིཊྛཏི ཡཧིཾ སུཝིབྷཏྟལོཀོ;

ཏཾ སབྦལོཀཔཊིབིམྦིཏདཔྤཎཱབྷཾ,

པཱདདྭཡཾ ཛནསུསཛྫནཧེཏུ ཧོཏུ.

༩.

ལོཀུཏྟརཱཡ སིརིཡཱདྷིགམཱཡ སུཊྛུ,

རཛནྟི ཡཏྠ དིགུཎཱནིཝ པཱཏུ བྷཱུཏཱ;

ཙཀྐཱསནཱབྷིསཧནེམིསཧསྶརཱནི,

ཏྱངྒྷཱི དིསནྟུ སཀལིསྶརིཡཾ ཛནསྶ.

༡༠.

ཡཏྲུལླསནྟི དུཝིདྷཱནིཝ པཱཏཱུ བྷཱུཏཱ,

དྷམྨསྶསབྦབྷུཝནསྶ ཙ ཨིསྶརཏྟེ;

ཙཀྐཱནི ཙཀྐསདིསཱནི སུདསྶནསྶ,

ཏཱནཛྫ ཛནྟུ སརཎཱ ཙརཎཱནི ཧོནྟུ.

༡༡.

སཏྟེསུ ཝཙྪཏུ སིརཱི སིརིཝཙྪཀེན,

སོཝཏྠི སོཏྠིམནུཏིཊྛཏུ པུགྒལེསུ;

ནནྡིཾ ཛནཱནམནུཝཏྟཏུ ནནྡིཝཏྟཱི,

སཱིསཱནལཾཀུརུཏུ པཱདཝཏཾསཀོ པི.

༡༢.

བྷདྡཱཡ པཱིཋམུཔགཙྪཏུ བྷདྡཔཱིཋཾ,

ཝུདྡྷིཾ ཛནཱནམནུཝཏྟཏུ ཝདྡྷམཱནཾ;

པུཎྞཏྟམངྒིམནུཀུབྦཏུ པུཎྞཀུམྦྷོ,

པཱཏི ཙ པཱཏུ སཏཏཾ ཛནཏཾ ཨཔཱཡཱ.

༡༣.

སེཏཱཏཔཏྟམཔནེཏམགྷཱཏཔེ ཏཾ,

ཁགྒོ ཝིཚིནྡཏུ སདཱ དུརིཏཱརིཝགྒེ;

སཾཀླེསདཱཧམཔནེཏུ སཏཱལཝཎྚ,

སཾཝཱིཛནཱི ཀུམཏིམཀྑིཀམོརཧཏྠོ.

༡༤.

ཨཱཀཌྜྷནོ ཛནཝིལོཙནམཏྟནིནྣཾ,

ཝཱརེཏུ སབྦགཏིཝཱརནམངྐུསོ སོ;

པཱདམྦུཛསྶིརིཝིལཱསནིཀེཏནཾ ཝ,

པཱསཱདལཁཎམུཔེཏུ མནོཔསཱདཾ.

༡༥.

པཱཎཱིནམཏྟབྷཛཏཾ ཝརཔུཎྞཔཏྟཾ,

སམྨཱ དདཱཏུ པདནིསྶིཏཔུཎྞཔཏྟོ;

པཱདེསུ ཛནྟུ མནབནྡྷནདཱམབྷཱུཏཾ,

དཱམཾ དམེཏུ ཝིམལཾ ཛནཏམྨནཱནི.

༡༦.

ཨུཎྷཱིསཀུཔྤལམཎཱིཔདུམེཧི པཱདཱ,

སསྶེཝིཛནྟུཀརཎཱནི ཝིབྷཱུསཡནྟུ;

སནྣེཏྟནཱཝུཔགཏཱནམནགྒྷཀཱནི,

བོཛ྄ཛྷངྒསཏྟརཏནཱནི དདེ སམུདྡོ.

༡༧.

ཨུཏྟུངྒ ནིཙྩལགུངཱ ཛིཏཏཱཡ ནིཙྩཾ,

སེཝཱིཝ པཱདསིརི ནིཙྩ སམུབྦཧཾ ཝ;

ཨཏྲཱཔི སཀྐབྷཝནུབྦཧཎེ ནིཡུཏྟོ,

པཱདཊྛམེརུ བྷཝཏཾ བྷཝཏཾ ཝིབྷཱུཏྱཱ.

༡༨.

སོ ཙཀྐཝཱལ༹སིཁརཱི པྱཝཏཾ སམནྟཱ,

སབྦཱུཔསགྒཝིསརཱཛནཏཾ སམགྒཾ;

དཱིཔཱ པུཐཱུཔི ཙཏུརོ དྭིསཧསྶ ཁུདྡཱ,

དྷཱརེནྟྭཔཱཡཔཏམཱནམདཏྭ ཛནྟུཾ.

༡༩.

སཱུརོ པབོདྷཡཏུ ཛནྟུ སརོརུཧཱནི,

ཙནྡོ པསཱད ཀུམུདཱནི མནོདཧེསུ;

ནཀྑཏྟཛཱཏམཁིལཾ སུབྷཏཱཡ ཧོཏུ,

ཙཀྐཾ དྷཛཾ རིཔུཛཡཱཡ ཛཡདྡྷཛཱཡ.

༢༠.

ཛེཏུཾ སསཾསད-སུདསྶན-ཙཀྐཝཏྟི,

ཙཀྐཱནུགནྟལལིཏཾ ཡཧིམཱཝཧེཡྻ;

ཙཀྐཱཎུཝཏྟི པརིསཱཝཏ-ཙཀྐཝཏྟི,

ནཾཝཏྟཏཾ པདཡུགཾ ཛནཏཱ ཧིཏཱཡ.

༢༡.

པུཛེཏུམཱགཏ ཝཏཱ ཝཛིརཱསནཊྛ,

མིནྡེན ཚཌྜིཏ མཧཱཝིཛཡུཏྟརཱཁྱཾ;

སཾཁཾ པཝིཊྛམིཝ མཱརབྷཡཱ པདཱདྷོ,

པཱདཊྛསཾཁམིཧ ཝཏྟཏུ སནྟིཡཱ ཝོ.

༢༢.

སོཝཎྞམཙྪཡུགལཾ སིཝབྷཏྟ བྷོགེ,

ཨིཙྪཱ བཧཱུཔཀརཎཾ བྷཝཏཾ ཛནཱནཾ;

ཀུམྦྷཱིལདྷིགྒཧིཏཏོ ཝ པདུཏྠཙིཏྟཱ,

པཱདམྦུཛཱཀར ཝིགཱཧི ཏུ ནོཔཧོནྟུ.

༢༣.

སཏྟཱཔགཱ ཛནམནོཛ མལེ ཛཧནྟུ,

སཾཀླེསདཱཧམཔནེནྟུ དཧཱ ཙ སཏྟ;

སེལཱ ཙ སཏྟ ཝིདདྷནྟུ ཛནསྶ ཏཱནཾ,

ལོཀཔྤསིདྡྷིཛནནེ བྷཝཏཾ པཏཱཀཱ.

༢༤.

པཱཊངྐི སནྟི གམནེ བྷཝཏཱུཔཀཱརཱ,

དཱཧེཏྟནེསུ ཛཧཏཾ པདཙཱམརཾ ཏཾ;

སལློཀལོཙནམཧུསྶཝ-ཨུསྶིཏཾ ཝ,

ཝཏྟེཡྻ ཏོརཎམནུཏྟརམངྒལཱཡ.

༢༥.

ཡསྨིཾ མིགིནྡ གཏ བྷཱིཏི བལཱཝ དཌྜྷ,

དཱནཱ ནཏཱ སིརཝིདཱརཎ པཱིལི༹ཏཱཝ;

ནཱལཱགིརཱི ཀརིཝརོ གིརིམེཁལོ ཙ,

ཏཾ སཱིཧཝིཀྐམཔདཾ ཧནཏཱ གྷདནྟིཾ.

༢༦.

པཱཔཱཧིནོ ཧནཏུ པཱདསུཝཎྞརཱཛཱ,

ཝྱགྒྷཱདྷིཔོ ཀལིཛནེ ཨདཏཾ ཨསེསཾ;

ཝཱལཱཧ-ཨསྶཔཏི སམྤཏིཏུཾ ཨདཏྭཱ,

པཱཡེསུ པཱཔཡཏུ སནྟིཔུརམྤཛཱཡོ.

༢༧.

ཚདྡནྟ དནྟི ལལིཏཾ གལིཏཾ རུསམྷཱ,

ལུདྡེཏྟ དུབྦྷིནི དིསེ ཨཙལཾ དདྷཱནོ;

པཱདཊྛཧཏྠིཔཏི སམྤཏི ཛནྟུཏཱསེ,

ཏཱསེཏུ ཧཱསམཔརནྡིསཏཾ སཏཱནཾ.

༢༨.

སབྦངྒིནོ ཙརཎུཔོསཐ ཧཏྠིརཱཛཱ,

པཱཔེཏུ སབྦཙཏུདཱིཔིཀརཛྫལཀྑིཾ;

ཀིཏྟཱིཝ པཱདཔརིཙཱརིཀཏཱ ནིཡུཏྟཱ,

ཀེལསསེལཔཊིམཱ ཧིཏམཱཙརེཡྻ.

༢༩.

སཱམིསྶ ཧཾསསམཡེ དཧཔཱསབདྡྷ,

མཱསཱིན ཝེསགམཀོ ཝིཡ པཱདཧཾསོ;

ནིགྒྷོས གནྟིཛིཏཏོ ཝིཡ མཱུགཔཀྑོ,

ཡཱརེཏུ སབྦ ཛནཏཱ བྷཝགནྟུཀཏྟཾ.

༣༠.

ཨོཧཱཡ དིབྦསརསིཾ ཁིལལོཀ སབྦ,

རམྨངྒྷིཝཱཔིམཝགཱཧིཏཝཱཝ པཱདེ;

ཨེརཱཝཎོ ཀརིཝརོ མནསཱབྷིརུལ༹ྷེ,

ཛནྟུཾ པུརིནྡདཔུརཾ ནཡཏཾ ཝ སཱིགྷཾ.

༣༡.

ཧིཏྭཱ སཀམྦྷཝནམངྒྷིནིསེཝནཏྠ,

མཱགམྨ རམྨ ཏརཏཱཡིཧ ནིསྶིཏོ ཝ;

པཱལེཏྭ མཱུནི པདཝཱཔིཏརངྒབྷངྒི,

མནྒཱི ཀརོནྟཏནུཝཱསུཀི ནཱགརཱཛཱ.

༣༢.

ནཱཐསྶ ཀཉྩནསིཁཱཝལཛཱཏིལཱིལ,

མཱཝིཀརཾ ཝ པདནིསྶིཏམོརརཱཛཱ;

ཏཾ དྷམྨདེསནརཝེནིཝ ལུདྡཀསྶ,

ལོཀསྶ པཱཔཕཎིནོ ཧནཏཾ ཨསེསཾ.

༣༣.

སཾསཱརསཱགརགཏེ སདྷནེ ཛནེ ཏེ,

ནེཏམྤདེ ཀལཙཏུམྨུཁཧེམནཱཝཱ;

ནིབྦཱཎཔཊྚནཝརཾ བྷརུཀཙྪཀནྟཾ,

སུཔྤཱརཔཎྜིཏ གཏཱ ཝིཡ ཨཱསུནཱཝཱ.

༣༤.

སམྦོདྷི ཉཱཎ པརིཔཱཙཡཏོ མུནིསྶ,

བྷཏྟོ ཡཐཱ ཧིམཝཏདྡི སམཱདྷིཧེཏུ;

ཨེཝམྨནེན བྷཛཏཾ ཧིམཝདྡིཔཱདེ,

སམྦོདྷིཉཱཎ པརིཔཱཙནཧེཏུ ཧོཏུ.

༣༥.

དལ༹ྷཾ པརཱཛིཏཏཡཱ མུནིནཱ སརེན,

སུཉྙསྶརོཔགཏ པཉྫར བནྡྷནོཝ;

སོ པཱདཔཉྫརགཏོ ཀརཝཱིཀཔཀྑཱི,

སབྦེསམཔྤཱིཡཱཝཙཉྫཧཏཱ བྷཝནྟཾ.

༣༦.

ཏེ ཙཀྐཝཱཀ མཀརཱ ཨཔི ཀོཉྩ ཛཱིཝཾ,

ཛཱིཝཱདི པཀྑིཝིསརཱ སརསཱིཝ བྷུཏྟཾ;

ཝེསྶནྟརེན ཙརཎམྦུཛི ནིབྦྷཛནྟཱ,

ཛནྟུ ཏཧིཾ ཝིཡ པདེ སུརམེནྟུ ནིཙྩཾ.

༣༧.

ཏཾ ཙནྡཀིནྣརགཏིཾཝ གཏསྶ བོདྷི,

སཏྟསྶ ཏསྶ སཔཛཱཔཏིཀསྶ བྷཱཝཾ;

སཾསཱུཙཡནྟ པད ཀིནྣར ཀིནྣརཱི ཝེ,

སཱམགྒིམགྒ པཊི པཏྟིསུ པཱཔཡནྟུ.

༣༨.

སཾརཱཛདྷཱནིམུསབྷོ ཝཧཏགྒ བྷཱརཾ,

པཱིཏིཔྤཡོ པཛནཡེཡྻ སཝཙྪདྷེནུ;

སསྶེཝིནོ ཨབྷིརམེནྟུ ཚཀཱམསགྒཱ,

དྷཱརེནྟུ ཛྷཱཡིམིཧ སོལ༹ས དྷཱཏུདྷཱམཱ.

༣༩.

སུཏྭཱ ཛིནསྶ ཀརཝཱིཀ སརམྨནུཉྙཾ,

ཨཉྙོཉྙ བྷཱིཏིརཧིཏཱ ཨཔི པཙྩནཱིཀཱ;

ཧིཏྭཱ གཏིཾ ཝིཡ ཋིཏཱ པདསཏྟརཱུཔཱ,

སབྦཾ བྷཝསྶིཏ ཛནཱནགཏིཾ ཧནནྟུ.

༤༠.

སོཝཎྞ ཀཱཧལ༹ ཡུགོ པམམིནྡིརཱཡ,

སནྣཱིརཔུཔྥ མུཀུལོཔམམུསྶཝཱཡ;

ནིཙྩཾ སུསཛྫ ཋཔིཏཾ མུནི ཏིཊྛཏནྟེ,

ཛངྒྷཱདྭཡཾ ཛནཝིལོཙན མངྒལཱཡ.

༤༡.

ལཁྱཱ ཝིལཱས མུཀུརདྭཡ སནྣིཀཱསཾ,

ཏཱཌངྐ མཎྜན ཝིཌམྦཀམཾསུ སཎྜཾ;

ཛཱནུདྭཡཾ ལལི༹ཏ སཱགར བུབྦལཱབྷཾ,

ཧོཏཾ ཛགཏྟཡ ནིཛཏྟ ཝིབྷཱུསིཏུནྟེ.

༤༢.

ཚདྡནྟི དིནྣ ཝརདནྟ ཡུགོཔམཱནཱ,

ཏཾ ཧཏྠི སོཎྜ ཀམ པུཎྞ གུཎཱ ཏཝོརཱུ;

ལཱིལ པཡོདྷི སིརི ཀེལི༹ སུཝཎྞརམྦྷཱ,

ཁནྡྷཱཝ དེནྟུ པརིཔུཎྞ གུནེ ཛནཱནཱཾ.

༤༣.

ཛངྒྷཀྑ ཀདྭྱ སམཔྤིཏ ཙིཏྟཔཱད,

ཙཀྐདྭཡཱི མནམནོཛཧཡོ མུནེ ཏེ;

སོནཱི རཐོ སིརིཝཧོ མནསཱ བྷིརུལ༹ྷཾ,

ལོཀཏྟཡཾ སིཝཔུརཾ ལཧུ པཱཔཡཱཏུ.

༤༤.

རམྨོར པཱཀཊ ཏཊཱཀ ཏཊཱ སཝནྟ,

རོམཱཝལཱི ཛལ པནཱལིཀ ཀོཊིཀཊྛཱ;

ནཱབྷཱི གབྷཱིར སརསཱི སིརི ཀེལི༹ཏཱ ཏེ,

སསྶེཝིནཾ ཝྱསན གྷམྨམལཾ སམེཏུ.

༤༥.

ཀནྟིཙྪཊཱ ལུལི༹ཏ རཱུཔ པཡོདྷི ནཱབྷི,

ཨཱཝཊྚ ཝཊྚིཏ ནིམུཛྫིཏ སབྦལོཀོ;

སོབྷགྒ ཏོཡ ནིཝཧཾ ཝིསསོ པིཝིཏྭཱ,

ལོཀུཏྟརཱདི སུཁ མུཙྪིཏཏཾ པཡཱཏུ.

༤༦.

གམྦྷཱིར ཙིཏྟརཧདཾ པརིཔཱུརཡིཏྭཱ,

ཏཾ སནྡམཱན ཀརུཎམྦུ པཝཱཧ ཏུལྱཱ;

རོམཱལིཝལླིཧརི ནཱབྷི སུབྷཱལཝཱལཱ,

དེཏཾ ལཧུཾ སིཝཕལཾ བྷཛཏཾ མུནེ ཏེ.

༤༧.

ཙཱརཱུར སཱརིཕལཀོ ཀུཊིལགྒ ལོམ,

པནྟཱི ཝིབྷཏྟི སཧིཏོ སིརི ཀེལི༹ སཛྫོ;

སགྒཱཔཝགྒ སུཁ ཛཱུཏཀ ཀེལི༹ ཧེཏུ,

ཧོཏཾ ཏིལོཀ སུཁ ཛཱུཏཀ སོཎྜཀཱནཾ.

༤༨.

གམྦྷཱིར ཙིཏྟ རཧདོ དར གཱཧམཱན,

མེཏྟཱདཡཱ ཀརི ཝདྷཱུ ཀར སནྣི ཀཱསཱ;

སབྦངྒིནཾ སིཝཕལཾ ཏནུ དེཝ རུཀྑེ,

སཱཁཱ སཁཱ ཏཝ བྷུཛཱ བྷཛཏཾ དདནྟུ.

༤༩.

ནིཧཱར བིནྡུ སཧིཏགྒདལོཔ སོབྷི,

བྱཱལམྦ རཏྟ པདུམདྭཡ བྷངྒི བྷཱཛཱ;

པཱཔཱརིསཱིསལུནཏེནིཝ རཏྟ རཏྟཱ,

རཏྟཱ ཀརཱ ཏཝ བྷཝུམྦྷུཝི མངྒལཱཡ.

༥༠.

རུཔསྶིརཱི ཙརིཏ ཙངྐམ ཝིབྦྷམཱ ཏེ,

པིཊྛཱི ཡཐཱ ཀལལ མུདྡྷནི སེཏུ བྷཱུཏཱ;

ཨེཝཾ བྷཝཎྞཝ སམུཏྟརཎཱཡ སེཏུ,

ཧོཏམྨཧཱཀནཀ སཾཀམ སནྣིཀཱསཱ.

༥༡.

སདྡྷམྨ དེསན མནོཧར བྷེརིནཱད,

སཾཙཱརཎེ སིཝཔུརཾ ཝིསིཏུཾ ཛནཱནཾ;

གཱིཝཱ སུཝཎྞམཡ ཙཱརུ མུཏིངྒ བྷེརི,

བྷཱཝམྦྷཛཱ བྷཝཏུ བྷཱུཏ ཝིབྷཱུཏིཡཱ ཏེ.

༥༢.

ལཁཱི ནིཝཱས ཝདནམྦུཛ མཏྟ ནིནྣ,

མཱཀཌྜྷཡཾ ཛན ཝིལོཙན ཙཉྩརཱིཀེ;

སོརབྦྷ དྷམྨ མཀརནྡ ནིསནྡམཱནཾ,

པིཎེཏུ ཏེན སརསེན སབྷཱ ཛནེ ཏེ.

༥༣.

ལཁཱི སམཱརུཧིཏ ཝཏྟརཐེ རཐངྒ,

དྭནྡཱནུ ཀཱརི མིག རཱཛ ཀཔོལ ལཱིལཾ;

ཏཱདངྐ མཎྜལཡུགཾ ཝིཡ ཀཎྞབྷཱཛཾ,

གཎྜཏྠལདྭྱམལཾཀུརུཏཾ ཛནཏྟེ.

༥༤.

ལཱཝཎྞ མཎྞཝ པཝཱལ༹ ལཏཱ དྭཡཱབྷཾ,

ཏནྡེཧ དེཝ ཏརུ པལླཝ ཀནྟེ མནྟཾ;

ཝཏྟཱརཝིནྡ མཀརནྡ པརཱཛིསོབྷཾ,

རཏྟཱདྷརདྭཡམདྷོ ཀུརུཏཾ ཛནཱགྷཾ.

༥༥.

ཨུཎྞཱ སཀུནྟིགཏ མཏྠཀ ནཏྠུ ཀཱུཔ,

སུབྦྷཱུ ལཀཱར སཧིཏོཊྛ པཝཱལ༹ ནཱཝཱ;

གཏྟུཏྟརརཎྞཝ གཏཱ ཏཝ ཛནྟུཀཱནཾ,

ཧོཏཾ བྷཝཎྞཝ སམུཏྟརནཡ ནཱཐ.

༥༦.

ཨིསཾ ཝིཀཱས པདུམོདར ཀེསརཱལི,

ལཱིལཱ ཝིནདྡྷ རུཙིརཱ ཏཝ དནྟ པནྟི;

ཝཱནཱི ཝདྷཱུ དྷརིཏ མཱལཏི མཱལྱ ཏུལྱཱ,

ཏསྶཾ ཛཱནསྶ མནརཉྫན མཱཙརེཡྻ.

༥༧.

སདྡྷམྨ ནིཛ྄ཛྷར སུརཏྟ སིལཱཏལཱབྷཱ,

ཛིཝ྄ཧཱ ཝཙཱི ནཊ ཝདྷཱུ ཀལ རངྒ བྷཱུཏཱ;

སདྡྷམྨ སེཊྛ ཏརཎཱི ནིཧིཏཔྤིཡཱ ཏེ,

སཾསཱར སཱགར སམུཏྟརཎཱཡ ཧོཏུ.

༥༨.

དནྟཾསུ ཀཉྩུཀཱིཏ རཏྟདྷརོ པདྷཱནེ,

ཛིཝ྄ཧཱ སུརཏྟ སཡནེ མུཁ མནྡིརཊྛེ;

ཨཱམོཀྑ མུཏྟི ཝདྷུཡཱ སཡིཏཱཡ ཏུཡ྄ཧཾ,

ཀུབྦནྟུ སཾགམ མལཾ ཛན སོཏུ ཀཱམི.

༥༩.

ཨུཎྞཱ ཏཐཱབྷིནཝ པཏྟ ཝརཱབྷི རཱམཱ,

ལཱིལོལླསནྟ བྷམུཀདྭཡ ནཱིལ པཏྟཱ;

གྷཱནོརུ ཙཱརུ ཀདལཱི ཝདནཱ ལཝཱལཱ,

ཏུཡ྄ཧཾ པཝཏྟཏུ ཙིརཾ ཛན མངྒལཱཡ.

༦༠.

བཱལཏྠལཱི ཧརི སིལཱཏལ པིཊྛིཀཊྛ,

བྷཱུཝལླརིདྭཡ མཡཱུར ཡུགསྶ ཏུཡ྄ཧཾ;

པཉྩཔྤབྷཱ རུཙིར པིཙྪ ཡུགསྶིརཱིཀཾ,

ནེཏྟདྭཡཾ མནསི པུཉྪཏུ པཱཔདྷཱུལིཾ.

༦༡.

ཨིནྡཱིཝརཱནྟགཏ བྷིངྒིཀ པནྟི བྷངྒི,

པཉམྦུཛསྶརཏཏེ ཝིཡ གཙྪཔནྟཱི;

ནེཏྟམྦུཛསྶིརི ཏིརོཀརཎཱིཝ ཏུཡ྄ཧཾ,

པམྷཱཝལཱི སིརིགཏེཧ ཏིརོ ཀརོནྟུ.

༦༢.

ཝཏྟུལླསམྦུཛ ཝིལོཙན ཧཾས ཏུཎྜ,

ཀཉྫཾསུ པིཉྫར མུལཱལ ལཏཱ དྭྱཱབྷཾ;

དོལཱདྭཡཾཝ སཝཎདྭྱམཏྟ ལཀྑྱཱ,

ཧོཏཾ ཏཝཛྫ ཛནཏཱ མཏིཙཱརཧེཏུ.

༦༣.

ཝམྨཱིཀ མཏྠཀ སཡཱནཀ བྷཱུརིདཏྟ,

བྷོགིནྡ བྷོགཝལི ཝིབྦྷམམཱ ཝཧནྟི;

གྷཱནོཔརིཊྛིཏམུནེ ཏཝ ཏུཎྞམུཎྞཱ,

ཏགྒཱཧིནོ ཝིཡ ཛནསྶ དདཱཏུ ཝིཏྟཾ.

༦༤.

རཱུཔིནྡིརཱཡ ཝིཛཡེ ཁིལ ལོཀ རཱུཔཾ,

གྷཱཎོརུ ཙཱརུ པརིགྷོཔརི བདྡྷ སིདྡྷཱ;

ནཱིལཱབྷ ཝཱཏ ཝིལུཐནྟ ཝཡདྡྷཛཱབྷཱ,

ཏིཊྛནྟུ སཛྫ དུརིཏཱརི ཛཡཱཡ ཏེ བྷཱུ.

༦༥.

ཨུཎྞསྶིཏོཔལ ནིཝེསིཏ བུནྡ སནྡྷི,

གྷཱཎོརུ པིཎྜཀམགྷཱ ཏཔ རུནྡྷིཏུནྟེ;

ཧོཏམྨུཁམྦུཛ སིརཱི སིརསུསྶིཏཱབྷཾ,

བྷཱུ ནཱིལ པཊྚིཀ ལལཱཏ སུཝཎྞ ཚཏྟཾ.

༦༦.

རུཔངྐ ཝེདན ཝིལོཙན བཱན དིཊྛཱི,

དྷཱརཱ ནིསཱན མཎིཝཊྚ སིརཱི སིརོ ཏེ;

སིདྡྷཱ མཏོསདྷ ཀཏཉྫན པུཉྫ ལཀྑཱི,

ཧོཏཾ ཛནསྶ ནཡནཱམཡ ནཱསནཱཡ.

༦༧.

སཀྑནྡྷ བཱཧུཡུག ཏོརན མཛ྄ཛྷ གཱིཝཱ,

དྷརཔྤིཏསྶིརིགྷཏོ པརི མུསྶཝཱཡ;

ནཱིལུཔྤལཱཝ ཋཔིཏཱ སཝིབྷཏྟི ཀནྟེ,

ཀེསཱ བྷཝནྟུ བྷུཝནཏྟཡ མངྒལཱཡ.

༦༨.

ཧེམགྒྷིཡེ ཋཔིཏ ནཱིལ སིལཱ ཀཔཱལེ,

པཛྫོཏ ཛཱལ ལལིཏཾ མུནི སཱརཡནྟཱི;

རཱུཔསྶིརཱི སིརསི བྷཱུསིཏ ཧེམ མཱལཱ,

ཀཱརཱ ཀརོཏུ སུབྷགཾ ཏཝ ཀེཏུ མཱལཱ.

༦༩.

བྷྱཱམཔྤབྷཱལི ཏཝ ཀཉྩན མོར ཀཱལེ,

སུརོདཡེ ཝིཏཏ ཙནྡཀ ཙཀྐལཀྑཱི;

མེགྷཱཝནདྡྷ སིཁརུནྣཏ ཧེམ སེལཱ,

ཡནྟིནྡཙཱཔ ཝིཀཏཱིཝ དདཱཏུ སོབྷཾ.

༧༠.

པཊྛཱཡ ཏེ པཎིདྷིཏོ སུཙི དཱན སཱིལ,

ནེཀྑམྨ པཉྙ ཝིརིཡཀྑམ སཙྩདྷིཊྛཱ;

མེཏྟཱ ཨུཔེཀྑིཏི ཨིམེ དས པཱུརཏོཝ,

པཱུརེནྟུ པཱརམི གུཎཱ ཛནཏཱནམཏྟེ.

༧༡.

པཏྟུཏྟརུཏྟརདསཱ པཎིདྷཱན བཱིཛཱ,

ཙེཏོརདྷརཱཡ ཀརུཎཱ ཛལ སེཁ ཝུདྡྷཱ;

སབྦཉྙུ ཉཱཎ ཕལདཱ སཏི ཝཱཊ གུཏྟཱ,

ཏཾ སམྥལནྡིསཏུ པཱརམིཏཱ ལཏཱ ཏེ.

༧༢.

ཨཱབོདྷི པུཎྞམི པདིཊྛ དིནཱདིཏོ ཏེ,

སམྦྷཱར ཀཱལ སིཏ པཀྑ ཀམཱབྷི ཝུདྡྷོ;

སམྤུཎྞ པཱརམི གུཎཱམཏརཾསི ཏཾཝ,

སབྦངྒི ཀུནྡ ཀུམུདཱནི པབོདྷཡེཡྻ.

༧༣.

ཨཱཔཙྪིམབྦྷཝ སིཝཔྥལ ལཱབྷ དཱནཱ,

དཱནཔྤབནྡྷམཔིདཱན ཕལཔྤབྷནྡཾ;

སཾཝཌྜྷཡི ཏྭཾ ཨབྷིཔཏྠནཏོ ཡཐེཝཾ,

ཛནྟུཏྟརུཏྟར ཕལཾ ཁལུ སམྦྷུནནྟུ.

༧༤.

ཨཱརམྦྷཏོཔྤབྷུཏི ཡཱཝ ཏཝགྒམགྒཱ,

ཝིཀྑཱལིཏ གྷཀལུསཾ སུཙི སཱིལ ཏོཡཾ;

མེཏྟཱ དཡཱ མདྷུར སཱིཏལཏཱཡུཔེཏཾ,

སོདྷེཏུ ཏྭཾཝ བྷཝ ནིསྶིཏ ཛནྟུ མེཏཾ.

༧༥.

ཨཱཔཙྩིམཏྟམབྷིནིཀྑམནཱབྷིཡོགཱ,

པཊྛཱཡ ཏམྤབྷཝཏོ པརིཔུཎྞ གེཧཱ;

ཏྭཾ སབྦ ཛཱཏི གཧཏོ ཨཔི ནིཀྑམིཏྠོ,

ཨེཝཾ ཛནཱ བྷཝ དུཁཱ ཁལུ ནིཀྑམནྟུ.

༧༦.

ཨེཀགྒཏོ པལ ཏལེ ནིསིཏཱ ཙིརནྡྷི,

དྷཱརཱ སུཙིཏྟུ སུཏལེ སཏི དཎྜ བདྡྷེ;

ནིབྦིཛ྄ཛྷི ལཀྑཎ དྷནུཊྛིཏི སནྟི ལཀྑཾ,

ཁིཏྟཱ ཏཡོནམནུ ཝིཛ྄ཛྷཏུ ཛནྟུ ཁིཏྟཱ.

༧༧.

ཏྭཾ པཱརམཱི ཛལ ནིདྷིཾ ཙཏུརིཧ བཱཧུ,

སཏྟཱིཧི སུཏྟརི ཙིརཾ ཛནཀོཝ སིནྡྷུཾ;

སམྤནྣ ཝིཀྐམ ཕལོསི ཡཐཱ ཙསོཝ,

ཨེཝཾ ཛནཱ ཝིརིཡཏཔྥལམེ དྷཡནྟུ.

༧༨.

སཏྟ པརདྷ དཧནེསུ ཙིརཾ སུདྷནྟཾ,

ཁནྟཱི སུཝཎྞ ཀཏ རཱུཔ སམནྟིམཏྟཱ;

སབྦཱ པརཱདྷམསཧི ཏྭཾཨསཡ྄ཧམེཝཾ,

སབྦེ ཛནཱཔི ཁམནེན བྷཛནྟུ སནྟིཾ.

༧༩.

ལཀྑཱདྷིཀཾ ཙཏུར སཾཁིཡ ཀཔྤ ཀཱལཾ,

སཙྩེན སུཊྛུ པརིབྷཱཝིཏ ཝཱཙིནོ ཏེ;

ཝཱཙཱཡ སཙྩ ཕུསིཏཱཡ སམེནྟི ཛནྟུ,

ཨེཝཾ ཝིསུདྡྷ ཝཙནཱ ཛནཏཱ བྷཝནྟུ.

༨༠.

ཨཱདིནྣ དྷམྨ མཧིཡཏྠིར སུཔྤཏིཊྛཱ,

དྷིཊྛཱན པཱརམི མཧཱ ཝཛིརདྡི ཏུཡ྄ཧཾ;

སཏྟེན ཀེན པི ཡཐཱཧི ཨབྷེཛྫ ནེཛྫོ,

ཨེཝཾ ཛནཱཔི ཀུསལེསུ ཨདྷིཊྛ ཧནྟུ.

༨༡.

ཏྭཾ སབྦ སཏྟ ཙིརབྷཱཝིཏ མེཏྟ ཙིཏྟ,

ཏོཡེཧི སཾསམིཏ ཀོདྷ མཧཱ ཧུཏཱསོ;

ལོཀུཏྟརཾ ཏདིཏརཾ ཧིཏམཱཝཧིཏྠོ,

ཨེཝཾ ཛནེསུ ཛནཏཱ ཧིཏམཱཝཧནྟཱུ.

༨༢.

མིཏྟོཔཀཱར པཊིཔཀྑ ཛནཱཔཀཱརེ,

ཏྭཾ ནིབྦིཀཱར མནསོ ཙིརབྷཱཝནཱཡ;

པཏྟོསིལཱབྷ པབྷུཏཊྚུསུ ནིབྦིཀཱརཾ,

ཨེཝཾ ཛནཱནུནཡ ཀོཔ ནུདཱ བྷཝནྟུ.

༨༣.

སམྤནྣ ཧེཏུ ཝིབྷཝོ ཏུསིཏེ ཝིམཱནཾ,

ཡུཏྟཾ གུཎེཧི ནཝབྷིཔྤདཝཱི ཝིམཱནཾ;

ཏྭཾ ཝཱདྷིཔརམིདྷིརོཧིནིཡཱ ཏིལོཀོ,

ཨཱརོཧཏུ བྷཡ སུཁཾ པདཝཱི ཝིམཱནཾ.

༨༤.

ཏྭཾཝེརཧཾསི སམབུཛ྄ཛྷི ཡཐཱཙ སམྨཱ,

སམྤནྣ ཝིཛྫ ཙརཎོ སུགཏོསི ཧོནྟུ;

ལོཀཾ ཝིདོ པུརིསདམྨསུསཱརཐཱི སི,

སཏྠཱསི བུཛ྄ཛྷི བྷགཝཱ སི ཏཐེཝ ཛནྟུ.

༨༥.

སཙྩིཏྟ བྷཱུ ནིདཧིཏཾ ཛནཏཱཡ ཏུཡ྄ཧཾ,

ཀལྱཱཎཝཎྞརཏནཎྞཝཛཱཏིབྷིནྣཾ;

དུཀྑགྒི ཙོར ཛལུཔདྡུཏཛཱཏི གེཧེ,

ཏསྶཱ སུཁཾ བྷཝཏུ ཛཱིཝིཏུམཱཔདཱཡ.

༨༦.

ཝཱཙཱ ཝིཙིཏྟ ཝར ཏནྟུ གཏངྒི ཀཎྛེ,

སྭཱ མུཏྟ སགྒུཎ མཧཱ རཏནཱ ཝལཱི ཏེ;

ཝེཝཎྞི ཡཏྟནི བྷཝཾ སཀལམྤཧཱཡ,

ཧོཏཉྫནསྶ སིརི སངྒམ མངྒལཱཡ.

༨༧.

ཏཾ སགྒུཎཏྠཝ དཧཊྛ སུཏིཔྤནཱལི,

ནིསྶནྡམཱན གུཎནཱིར ནིཔཱན ཏིནྟེ;

ཁེཏྟེཏྟ སཉྙིནི ཛནཱ ཀཏ ལོམ ཧཾས,

བཱིཛངྐུརཱི ཀུསལ སསྶ ཕལཾ ལབྷནྟུ.

༨༨.

ཨཱཔཱཡིཀཔྤབྷུཏི དུཀྑ ནིདཱགྷ ཀཱལ,

སནྟཱཔིཏཱ ནིཁིལ ལོཀ མནོ ཀདམྦཱ;

ཏཾ ཝངྞ མེགྷ ཕུསནཱ ཧསནངྐུརེཧི,

ཨིདྡྷཱ བྷཝནྟུ མཏི ཝལླརི ཝེལླཱིཏཱ ཏེ.

༨༩.

ཧེཏུདྡསཱ ཕལདསཱ སམཝཊྛིཏཾ ཏཾ,

སབྦཏྠ སཏྟ ཧིཏམཱཝཧཎེན སིདྡྷཾ;

ཙིནྟཱཔཐཱཏིགནུབྷཱཝ ཝིབྷཱཝནནྟེ,

བྷཱུཏཱནམཏྠུ ཙརིཏབྦྷུཏམཏྠ སིདྷྱཱ.

༩༠.

ཨངྒཱརཀཱསུམབྷིལངྒྷིཡ དཱན ཀཱལེ,

བྷཏྟཏྟནོ པད པཊིཙྪཀ པངྐཛཱ ཙ;

ཡཱཏཀྑཎེ ཏཝ པདེ དྷཊམུཊྛཧིཏྭཱ,

པངྐེརུཧཱཾ སིཝ མདྷུཾ སརཏཾ དདནྟུ.

༩༡.

སཙྩེན མཙྪ པཏི ཝསྶིཏ ཝསྶདྷཱརཱ,

སཏྟེ དཡཱཡ ཏཝ ཝསྶིཏ ཝསྶདྷཱརཱ;

གིམྷེ ཛནསྶ སམཡིཾསུ ཡཐཱ ཏཐཱཏཱ,

དྷམམྦུཝུཊྛིཝ སམེནྟུ ཀིལེས དཱཧེ.

༩༢.

ཚདྡནྟ ནཱག པཏིནཱ ཁམཏཱ པརཱདྷཾ,

ཚེཏྭཱ ཀརེ ཋཔིཏ དནྟཝརཱཝ ལུདྡཾ;

ལོཀེ ཧིཏཱཡ ཋཔིཏཱ ཏཝ དནྟ དྷཱཏུ,

སེཊྛཱ ཛནཾ སིཝ པུརཾ ལཧུ པཱཔཡནྟུ.

༩༣.

ཏཾ ཏེམིཡཱཁྱ ཡཏིནོསྶམ མཱལཀམྷི,

ཨོཀིཎྞ མུཏྟ ཀནཀཱ ཝུཛ ཝིཔྤཀིཎྞཱ;

ཀཱརུཉྙ ཝཱརིད ཙུཏོ དཀ བིནྡུ བནྡྷཱུ,

དྷཱཏུ སམེནྟུ ཏཝ ཛནྟུསུ དུཀྑདཱཧེ.

༩༤.

རཊྛསྶ ཨཏྠ ཙརཎཱཡ ཨསམྨུཁསྶ,

རཱམེན དིནྣ ཏིཎ སཾཁཏ པཱདུཀཱཝ;

བྷུཏྟཱ ཏཡཱ ཙིརམསམྨུཁ ནཱགཏསྶ,

ལོཀསྶ ཨཏྠམནུ ཏིཊྛཏུ པཏྟ དྷཱཏུ.

༩༥.

ཝུཏྟོ ཛནཱནམུཔདིསྶ ཝརཱཧ རཉྙཱ,

སཏྠིཾ སཧསྶ སརདཾ ཝིཡ ཉཱཡ དྷམྨོ;

ཨཱདེཡྻ ཧེཡྻམུཔདིསྶ ཏཡཱ པཝུཏྟོ,

དྷམྨོ པཝཏྟཏུ ཙིརཾ ཛནཏཱ ཧིཏཱཡ.

༩༦.

མཱརཱརི མདྡན ཧིཏཱདྷིགམཾ ཀརོཏཱ,

བྷཏྟོ ཏཡཱ ཝར མཧཱ ཛཡ བོདྷི རཱཛཱ;

སགྒཱ པཝཝགྒ ཧིཏཧེཏུ ཛནསྶ ཧནྟྭཱ,

སབྦནྟརཱཡམིཧ ཏིཊྛཏུ སུཊྛུ སཛྫོ.

༩༧.

སཱམོད ཝཎྞ བྷཛནཱི གུཎ མཉྫརཱིཡཾ,

ཙརིཡཱ ལཏཱ ཝིཀསིཏཱ ཏཝ སཔྥལངྒཾ;

ཨོཀིཎྞ ཙིཏྟ མདྷུཔེ རས པཱིཎཡནྟི,

སམྦྷཱཝིཏཱ བྷུཝི པཝཏྟཏུ མཏྠཀེཧི.

༩༨.

སམྦུདྡྷ སེལཝལཡནྟར ཛཱནནཝ྄ཧཱ,

ནོཏྟཏྟཏོ ཏིཔཐགཱ ཡཏི སཱགརཊྛཱ;

དྷམྨཱ པགཱ སུཏི ཝསེ ཏརིཏེ པུཎནྟི,

སམྦྷཱར སསྶམིཧ ཝཏྟཏུ པཙཡནྟི.

༩༩.

པཉྙཱཎ ཀཱུཔ སིཏ པགྒཧ ཝཱཡུ གཱཧཱི,

སདྡྷཱ ལཀཱར སཧིཏཱ སཏི པོཏ ཝཱཧཱ;

སམྤཱཔཡཱཏུ བྷཝ སཱགར པཱར ཏཱིར,

སཔྤཏྟནཾ ཝརདྷནེ པཏི པཏྟི ནཱཝཱ.

༡༠༠.

བོཛ྄ཛྷངྒ སཏྟ རཏནཱཀར དྷམྨ ཁནྡྷ,

གམྦྷཱིར ནཱིར ཙཡ སཱསན སཱགརོ སཾ;

སོ སཱིལྱནནྟ ཏནུ ཝེཊིཐ ཉཱཎ མནྠ,

སེལེན མནྠིཏཝཏཾ དིསཏཱ མཏཾ ཝེ.

༡༠༡.

ཝུཏྟེན ཏེན ཝིདྷིནཱ ཝིདྷིནཱ ཏཏོ ཏཾ,

ལདྡྷཱ ནུབྷཱུཏམམཏཾ ཁིལ དོས ནཱསཾ;

ཨཙྩནྟ རོག ཛརཏཱ མརཎཱ བྷི བྷཱུཏཾ,

བྷཱུཏཾ ཀརོཏུ ཨམརཾ ཨཛརཾ ཨརོགཾ.

༡༠༢.

སདྡྷམྨ རཱཛ རཝིནིགྒཏ དྷམྨརཾསི,

ཕུལློ དྷུཏངྒདལ སཾཝར ཀེསརཱལི;

སངྒྷཱརཝིནྡ ནིཀརོ སམདྷུཾ སམཱདྷི,

སཀྐིཎྞིཀོ དིསཏུ སཱསན ཝཱཔི ཛཏོ.

༡༠༣.

ཨཱནནྡ རཉྙ རཏནཱདི མཧཱ ཡཏིནྡ,

ནིཙྩཔྤབུདྡྷ པདུམཔྤིཡ སེཝིནངྒཱི;

བུདྡྷཔྤིཡེན གྷན བུདྡྷ གུཎཔྤིཡེན,

ཐེརཱལིནཱ རཙིཏ པཛྫམདྷུཾ པིབནྟུ.

༡༠༤.

ཨིཏྠཾ རཱུཔ གུཎཱནུཀིཏྟནཝསཱ ཏཾ ཏཾ ཧིཏཱ སིཾ སཏོ,

ཝཏྠཱནུསྶཏི ཝཏྟིཏ ཨིཧ ཡཐཱ སཏྟེསུ མེཏྟཱ ཙ མེ;

ཨེཝཾ ཏཱབྷི བྷཝནྟ རུཏྟར ཏརཱ ཝཏྟནྟུ ཏཱ བོདྷི མེ,

སཾཡོགོཙ དྷནེཧི སནྟིཧི བྷཝེ ཀལྱཱན མིཏྟེཧི ཙ.