ཨཉྙ > ཝཾས-གནྠ-སངྒཧོ > ཙཱུལ༹གནྠཝཾས

ཝིནཡཔིཊཀཾ, ཨབྷིདྷམྨཔིཊཀཾ སུཏྟནྟཔིཊཀནྟི. ཏཏྠ ཀཏམཾ ཝིནཡ པིཊཀཾ? པཱརཱཛིཀཀཎྜཾ, པཱཙིཏྟིཡཀཎྜཾ, མཧཱཝགྒཀཎྜཾ, ཙུལླཝགྒཀཎྜཾ, པརིཝཱརཀཎྜནྟི. ཨིམཱནི ཀཎྜཱནི ཝིནཡཔིཊཀཾ ནཱམ.

ཀཏམཾ ཨབྷིདྷམྨཔིཊཀཾ? དྷམྨསངྒཎཱི-པཀརཎཾ, ཝིབྷངྒ-པཀརཎཾ, དྷཱཏུཀཐཱ-པཀརཎཾ, པུགྒལཔཉྙཏྟི-པཀརཎཾ, ཀཐཱཝཏྠུ-པཀརཎཾ, ཡམཀ-པཀརཎཾ, པཊྛཱན-པཀརཎནྟི. ཨིམཱནི སཏྟ པཀརཎཱནི ཨབྷིདྷམྨཔིཊཀཾ ནཱམ. ཀཏམཾ སུཏྟནྟཔིཊཀཾ? སཱིལཀྑནྡྷཝགྒཱདིཀཾ, ཨཝསེསཾ བུདྡྷཝཙནཾ སུཏྟནྟཔིཊཀཾ ནཱམ.

ཀཐཾ ནིཀཱཡཏོ? ནིཀཱཡཱ པཉྩ ཝིདྷཱ ཧོནྟི. དཱིགྷནིཀཱཡོ, མཛ྄ཛྷིམནིཀཱཡོ, སཾཡུཏྟནིཀཱཡོ, ཨངྒུཏྟརནིཀཱཡོ, ཁུདྡཀནིཀཱཡོཏི.

ཏཏྠ ཀཏམོ དཱིགྷ-ནིཀཱཡོ? སཱིལཀྑནྡྷཝགྒོ, མཧཱཝགྒོ, པཱཐིཀཝགྒོཏི, ཨིམེ ཏཡོ ཝགྒཱ དཱིགྷནིཀཱཡོ ནཱམ. ཨིམེསུ ཏཱིསུ ཝགྒེསུ, ཙཏུཏིཾས ཝགྒཱནི ཙ ཧོནྟི. [ཙཏུཏིཾསེཝ སུཏྟནྟཱ, སཱིལཀྑནྡྷཝགྒཱདིཀཱ, ཡསྶ བྷཝནྟི སོ ཡེཝ དཱིགྷནིཀཱཡ ནཱམ ཧོཏི.]

ཀཏམོ མཛ྄ཛྷིམནིཀཱཡོ? མཱུལཔཎྞཱསོ, མཛ྄ཛྷིམཔཎྞཱསོ, ཨུཔརིཔཎྞཱསོཏི, ཨིམེ ཏཡོ པཎྞཱསཱ མཛ྄ཛྷིམནིཀཱཡོ ནཱམ. ཨིམེསུ ཏཱིསུ པཎྞཱསེསུ དྭེཔཉྙཱསཱདྷིཀ-སུཏྟ-སཏཱནི ཧོནྟི [དིཡཌྜྷསཏསུཏྟནྟཱ, དྭི སུཏྟཾ ཡསྶ སནྟིསོ, མཛ྄ཛྷིམནིཀཱཡོ ནཱམོ མཱུལཔཎྞཱསམཱདི ཧོཏི.]

ཀཏམོ སཾཡུཏྟནིཀཱཡོ? སགཱཐཱཝགྒོ, ནིདཱནཝགྒོ, ཁནྡྷཀཝགྒོ, སལཱ༹ཡཏནཝགྒོ, མཧཱཝགྒོཏི, ཨིམེ པཉྩ ཝགྒཱ སཾཡུཏྟནིཀཱཡོ ནཱམ. ཨིམེསུ པཉྩསུ ཝགྒེསུ དྭཱསཊྛིསུཏྟསཏྟསཏཱདྷིཀསཏྟ-སུཏྟསཧསྶཱནི ཧོནྟི. [དྭཱསཊྛི-སཏྟ-སཏཱནི, སཏྟསཧསྶཀཱནི ཙ.] སུཏྟཱནི ཡསྶ ཧོནྟི སོ, སགཱཐཱདིཀཝགྒཀོ, སཾཡུཏྟནིཀཱཡོ ནཱམོ ཝེདིཏབྦོ ཙ ཝིཉྙཱུནཱཏི.

ཀཏམོ ཨངྒུཏྟརནིཀཱཡོ? ཨེཀྐནིཔཱཏོ, དུཀྐནིཔཱཏོ, ཏིཀྐནིཔཱཏོ, ཙཏུཀྐནིཔཱཏོ, པཉྩཀནིཔཱཏོ, ཚཀྐནིཔཱཏོ, སཏྟཀནིཔཱཏོ, ཨཊྛཀནིཔཱཏོ, ནཝཀནིཔཱཏོ, དསཀནིཔཱཏོ, ཨེཀཱདསནིཔཱཏོཏི, ཨིམེ ཨེཀཱདས ནིཔཱཏཱ ཨངྒུཏྟརནིཀཱཡོ ནཱམ. ཨིམེསུ ཨེཀཱདས ནིཔཱཏེསུ སཏྟ-པཉྙཱས-པཉྩ-སཏཱདྷིཀནཝ-སུཏྟ-སཧསྶཱནི ཧོནྟི. [ནཝསུཏྟསཧསྶཱནི, པཉྩསཏམཏྟཱནི ཙ, སཏྟཔཉྙཱསཱདྷིཀཱནི, སུཏྟཱནི ཡསྶ ཧོནྟི སོ, ཨངྒུཏྟརནིཀཱཡོཏི, ཨེཀྐནིཔཱཏཀཱདིཀོཏི.]

ཀཏམོ ཁུདྡཀནིཀཱཡོ? ཁུདྡཀཔཱཋོ, དྷམྨཔདཾ, ཨུདཱནཾ, ཨིཏིཝུཏྟཀཾ, སུཏྟནིཔཱཏོ, ཝིམཱནཝཏྠུ, པེཏཝཏྠུ, ཐེརཀཐཱ, ཐེརཱིཀཐཱ, ཛཱཏཀཾ, མཧཱནིདྡེསོ, པཊིསམྦྷིདཱམགྒོ, ཨཔདཱནཾ, བུདྡྷཝཾསོ, ཙརིཡཱཔིཊཀཾ, ཝིནཡཔིཊཀཾ, ཨབྷིདྷམྨཔིཊཀནྟི. ཨིམེསུ སཏྟརསསུ གནྠེསུ ཨནེཀཱནི སུཏྟ-སཧསྶཱནི ཧོནྟི. [ཨནེཀཱནི སུཏྟ-སཧསྶཱནི, ནིདྡིཊྛཱནི མཧེསིནཱ, ནིཀཱཡེ པཉྩམེ ཨིམེ, ཁུདྡཀེ ཨིཏི ཝིསུཏེཏི.]

ཀཐཾ ཨངྒཏོ ཨངྒཧི ནཝ ཝིདྷཾ ཧོཏི? སུཏྟཾ, གེཡྻཾ, ཝེཡྻཱཀརཎཾ, གཱཐཱ, ཨུདཱནཾ, ཨིཏིཝུཏྟཀཾ, ཛཱཏཀཾ, ཨབྦྷུཏདྷམྨཾ, ཝེདལླནྟི, ནཝཔྤབྷེདཾ ཧོཏི. ཏཏྠ ཨུབྷཏོ ཝིབྷངྒནིདྡེསཁནྡྷཀཔརིཝཱརཱ, སུཏྟནིཔཱཏེ, མངྒལསུཏྟ, རཏནསུཏྟ, ཏུཝཊྚཀསུཏྟཱནི. ཨཉྙམྤི སུཏྟནཱམཀཾ ཏཐཱགཏཝཙནཾ, སུཏྟནྟི ཝེདིཏབྦཾ. སབྦཾ སགཱཐཀཾ གེཡྻནྟི ཝེདིཏབྦཾ. ཝིསེསནསཾཡུཏྟཀེ སཀལོཔི སགཱཐཀཝགྒོ, སཀལཾ ཨབྷིདྷམྨཔིཊཀཾ ནིགཱཐཀཉྩ སུཏྟཡཉྩ ཨཉྙམྤི ཨཊྛཧི ཨངྒེཧི ཨསངྒཧིཏཾ བུདྡྷཝཙནཾ ཏཾ ཝེཡྻཱཀརཎནྟི ཝེདིཏབྦཾ. དྷམྨཔདཾ, ཐེརཀཐཱ, ཐེརཱིཀཐཱ, སུཏྟནིཔཱཏེ, ནོ སུཏྟནཱམིཀཱ སུདྡྷིཀགཱཐཱ, གཱཐཱཏི ཝེདིཏབྦཱ. སོམནསྶ ཉཱཎམཡིཀགཱཐཱ པཊིཀ-སཾཡུཏྟཱ དྭེ ཨསཱིཏིསུཏྟནྟཱ ཨུདཱནནྟི ཝེདིཏབྦཱ. ཝུཏྟཉྷེཏཾ བྷགཝཏཱཏིཨཱདིནཡཔྤཝཏྟཱ དསུཏྟརསཏསུཏྟནྟཱ, ཨིཏིཝུཏྟཀནྟི ཝེདིཏབྦཱ. ཨཔཎྞཀཛཱཏཀཱདཱིནི པཉྙཱསཱདིཀཱནི. པཉྩཛཱཏཀསཏཱནི, ཛཱཏཀནྟི ཝེདིཏབྦཾ. ཙཏྟཱརོ མེ བྷིཀྑཝེ ཨཙྪརིཡཱ ཨབྷཱུཏདྷམྨཱ, ཨཱནནྡེཏིཨཱདིནཡཔྤཝཏྟཱ སབྦེཔི ཨཙྪརིཡ ཨབྷཱུཏདྷམྨཔཊིསཾཡུཏྟཱ སུཏྟནྟཱ ཨབྷཱུཏདྷམྨནྟི ཝེདིཏབྦཱ. ཙུལླཝེདལླ, མཧཱཝེདལླ, སམྨཱདིཊྛི, སཀྐཔཉྷ, སངྑཱརབྷཱཛནིཡ, མཧཱཔུཎྞམསུཏྟནྟཱདཡོ སབྦེཔི ཝེདཉྩ ཏུཊྛིཉྩ ལདྡྷཱ [པུཙྪ] ལདྡྷཱ པུཙྪིཏསུཏྟནྟཱ, ཝེདལླནྟི ཝེདིཏབྦཱ. ཀཏམཱནི ཙཏུརཱསཱིཏི དྷམྨཀྑནྡྷསཧསྶཱནི དུཛཱནཱནི, ཙཏུརཱསཱིཏི དྷམྨཀྑནྡྷསཧསྶཱནི སཙེ ཝིཏྠཱརེན ཀཐིསྶཾ ཨཏིཔཔཉྩོ བྷཝིསྶཏི. ཏསྨཱ ནཡ ཝསེན ཀཐིསྶཱམི. ཨེཀཾ ཝཏྠུ, ཨེཀོ དྷམྨཀྑནྡྷོ, ཨེཀཾ ནིདཱནཾ ཨེཀོ དྷམྨཀྑནྡྷོ, ཨེཀཾ པཉྷཱ པུཙྪནྟཾ ཨེཀོ དྷམྨཀྑནྡྷོ, ཨེཀཾ པཉྷཱ ཝིསཛྫནཾ ཨེཀོ དྷམྨཀྑནྡྷོ, ཙཏུརཱསཱིཏི དྷམྨཀྑནྡྷསཧསྶཱནི ཀེན བྷཱསིཏཱནི, ཀཏྠ བྷཱསིཏཱནི, ཀདཱ བྷཱསིཏཱནི, ཀམཱརབྦྷ བྷཱསིཏཱནི, ཀིམཏྠཾ བྷཱསིཏཱནི, ཀེན དྷཱརིཏཱནི, ཀེནཱབྷཏཱནི, ཀིམཏྠཾ པརིཡཱཔུཎིཏབྦཱནི. ཏཏྲཱཡཾ ཝིསཛྫནཱ, ཀེན བྷཱསིཏཱནཱིཏི? བུདྡྷཱནུ བུདྡྷེཧི བྷཱསིཏཱནི. ཀཏྠ བྷཱསིཏཱནཱིཏི? དེཝེསུ ཙ མཱནུསྶེསུ ཙ, བྷཱསིཏཱནི. ཀདཱ བྷཱསིཏཱནཱིཏི? བྷགཝཏོ དྷརམཱནཀཱལེ ཙེཝ པཙྪིམཀཱལེ ཙ བྷཱསིཏཱནི. ཀཏམཱརབྦྷ བྷཱསིཏཱནཱིཏི? པཉྩཝགྒིཡཱདིཀེ ཝེནེཡྻ བནྡྷཝེ ཨཱརབྦྷ བྷཱསིཏཱནཱིཏི. ཀིམཏྠཾ བྷཱསིཏཱནཱིཏི? ཏིཝཛྫཉྩ ཨཝཛྫཉྩ ཉཏྭཱ ཝཛྫཾ པཧཱཡ ཨཝཛྫེ པཊིཔཏྟིཏྭཱ ནིབྦཱནཔརིཡནྟེ. དིཊྛ-དྷམྨིཀསམྤརཱཡིཀཏྠེ སམྤཱཔུཎིཏུཾ.

ཀེན དྷཱརིཏཱནཱིཏི? ཨནུབུདྡྷེཧི ཙེཝ སིསྶཱནུསིསྶེཧི ཙ དྷཱརིཏཱནི. ཀེནཱ བྷཏཱནཱིཏི? ཨཱཙརིཡ པརཾཔརེཧི ཨཱབྷཏཱནི. ཀིམཏྠཾ པརིཡཱཔུཎིཏབྦཱནཱིཏི? ཝཛྫཉྩ ཨཝཛྫཉྩ ཉཏྭཱ ཝཛྫཾ པཧཱཡ ཨཝཛྫེ པཊིཔཏྟིཏྭཱ ནིབྦཱནཔརིཡནྟེ དིཊྛདྷམྨིཀསམྤརཱཡིཀཏྠེ, སཾཔཱཔུཎིཏུཾ, ཡདེཝཾ ཏཱཡ ནིབྦཱནཔརིཡནྟེ དིཊྛདྷམྨིཀསམྤརཱཡིཀཏྠེ སཱདྷིཀཱནི ཧོནྟི. ཏེཝ ཏཏྠ ཀེཧི ཨཔྤམཏྟེན པརིཡཱཔུཎིཏབྦཱནི དྷཱརེཏབྦཱནི དྷཱརེཏབྦཱནི ཝཱཙེཏབྦཱནི སཛ྄ཛྷཱཡཾ ཀཱཏབྦཱནཱིཏི [ཨིཏི ཙུལླགནྠཝཾསེ པིཊཀཏྟཡ དཱིཔཀོ ནཱམ པཋམོ པརིཙྪེདོ.]

ཨཱཙརིཡོ པན ཨཏྠི. པོརཱཎཱཙརིཡཱ ཨཏྠི, ཨཊྛཀཐཱཙརིཡཱ ཨཏྠི, གནྠཀཱརཀཱཙརིཡཱ ཨཏྠི, ཏིཝིདྷནཱམིཀཱཙརིཡཱ. ཀཏམེ པོརཱཎཱཙརིཡཱ? པཋམསངྒཱཡནཱཡཾ པཉྩསཏཱ ཁཱིཎཱསཝཱ པཉྩནྣཾ ནིཀཱཡཱནཾ ནཱམཉྩ ཨཏྠཉྩ ཨདྷིཔྤཱཡཉྩ ཡདཉྩ བྱཉྫན སོདྷནཉྩ ཨཝསེསཾ ཀིཙྩཾ ཀརིཾསུ. དུཏིཡསངྒཱཡནཱཡཾ སཏྟསཏཱ ཁཱིཎཱསཝཱ ཏེསཾཡེཝ སདྡཏྠཱདིཀཾ ཀིཙྩཾ པུན ཀརིཾསུ. ཏཏིཡསངྒཱཡནཱཡཾ སཧསྶམཏྟཱ ཁཱིཎཱསཝཱ ཏེསཾཡེཝ སདྡཏྠཱདིཀཾ ཀིཙྩཾ པུན ཀརིཾསུ. ཨིཙྩེཝཾ དྭེསཏཱདྷིཀཱ དྭེསཧསྶ ཁཱིཎཱསཝཱ མཧཱཀཙྩཱཡནཾ ཋཔེཏྭཱ ཨཝསེསཱ པོརཱཎཱཙརིཡཱ ནཱམ. ཡེ པོརཱཎཱཙརིཡཱ ཏེཡེཝ ཨཊྛཀཐཱཙརིཡཱ ནཱམ. ཀཏམེ གནྠཀཱརཀཱཙརིཡཱ? མཧཱཨཊྛཀཐིཀཱཔེབྷདཨནེཀཱཙརིཡཱ གནྠཀཱརཀཱཙརིཡཱ ནཱམ. ཀཏམེ ཏིཝིདྷ ནཱམཱཙརིཡཱ མཧཱཀཙྩཱཡནོ ཏིཝིདྷནཱམཾ. ཀཏམེ གནྠཱ མཧཱཀཙྩཱཡནེན ཀཏཱ? ཀཙྩཱཡནགནྠོ, མཧཱནིརུཏྟིགནྠོ, ཙུལླནིརུཏྟིགནྠོ, ཡམཀགནྠོ, ནེཏྟིགནྠོ, པེཊཀོཔདེསགནྠོཏི, ཨིམེ ཚ གནྠཱ མཧཱཀཙྩཱཡནེན ཀཏཱ. ཀཏམེ ཨནེཀཱཙརིཡེན ཀཏཱ གནྠཱ? མཧཱཔཙྩརིཀཱཙརིཡོ མཧཱཔཙྩརིཡཾ ནཱམ གནྠཾ ཨཀཱསི. མཧཱཀུརུནྡིཀཱཙརིཡོ ཀུརུནྡི ནཱམ གནྠཾ ཨཀཱསི. ཨཉྙཏརོ ཨཱཙརིཡོ མཧཱཔཙྩརིཡ གནྠསྶ ཨཊྛཀཐཾ ཨཀཱསི. ཨཉྙཏརོ ཨཱཙརིཡོ ཀུརུནྡི གནྠསྶ ཨཊྛཀཐཾ ཨཀཱསི, མཧཱབུདྡྷགྷོསཱ ནཱམཙརིཡོ ཝིསུདྡྷིམགྒོ དཱིགྷནིཀཱཡསྶ སུམངྒལཝིལཱསནི ནཱམ ཨཊྛཀཐཱ, མཛ྄ཛྷིམནིཀཱཡསྶ པཔཉྩསཱུདནཱི ནཱམ ཨཊྛཀཐཱ, སཾཡུཏྟནིཀཱཡསྶ སཱརཏྠཔྤཀཱསིནཱི ནཱམ ཨཊྛཀཐཱ, ཨངྒུཏྟརནིཀཱཡསྶ མནོརཐཔཱུརཎཱི ནཱམ ཨཊྛཀཐཱ, པཉྩཝིནཡ གནྠཱནཾ སམནྟཔཱསཱདིཀཱ ནཱམ ཨཊྛཀཐཱ, སཏྟནྣཾ ཨབྷིདྷམྨགནྠཱནཾ པརམཏྠཀཐཱ ནཱམ ཨཊྛཀཐཱ, པཱཏིམོཀྑ སཾཁཱཏཱཡ མཱཏིཀཱཡ ཀངྑཱཝིཏརཎཱིཏི ཝིསུདྡྷི ནཱམ ཨཊྛཀཐཱ, དྷམྨཔདསྶ ཨཊྛཀཐཱ, ཛཱཏཀསྶ ཨཊྛཀཐཱ, ཁུདྡཀཔཱཋསྶ ཨཊྛཀཐཱ, སུཏྟནིཔཱཏསྶ ཨཊྛཀཐཱ, ཨཔདཱནསྶ ཨཊྛཀཐཱཏི, ཨིམེ ཏེརས གནྠེ ཨཀཱསི. བུདྡྷདཏྟོནཱམཱཙརིཡོ ཝིནཡ ཝིནིཙྪཡོ, ཨུཏྟརཝིནིཙྪཡོ, ཨབྷིདྷམྨཱཝཏཱརོ, བུདྡྷཝཾསསྶ མདྷུརཏྠཝིལཱསིནཱི ནཱམ ཨཊྛཀཐཱཏི, ཨིམེ ཙཏྟཱརོ གནྠེ ཨཀཱསི. ཨཱནནྡོནཱམཱཙརིཡཱ སཏྟཱབྷིདྷམྨགནྠཊྛཀཐཱཡ མཱུཊཱིཀཾ ནཱམ ཊཱིཀཾ ཨཀཱསི. དྷམྨཔཱལཱཙརིཡོ ནེཏྟིཔྤཀརཎཊྛཀཐཱ, ཨིཏིཝུཏྟཀཊྛཀཐཱ, ཨུདཱནཊྛཀཐཱ, ཙརིཡཱཔིཊཀཊྛཀཐཱ, ཐེརཀཐཊྛཀཐཱ, ཐེརཱིཀཐཊྛཀཐཱ, ཝིམཱནཝཏྠུསྶ ཝིམལཝིལཱསིནི ནཱམ ཨཊྛཀཐཱ, པེཏཝཏྠུསྶ ཝིམལཝིལཱསིནི ནཱམ ཨཊྛཀཐཱ, ཝིསུདྡྷིམགྒསྶ པརམཏྠམཉྫཱུསཱ ནཱམ ཊཱིཀཱ, དཱིགྷནིཀཱཡསྶ ཨཊྛཀཐཱདཱིནཾ ཙཏུནྣཾ ཨཊྛཀཐཱནཾ ལཱིནཏྠཔྤཀཱསནི ནཱམ ཊཱིཀཱ, ཛཱཏཀཊྛཀཐཱཡ ལཱིནཏྠཔྤཀཱསནི ནཱམ ཊཱིཀཱ, ནེཏྟིཔཀརཎཊྛཀཐཱཡ ཊཱིཀཱ, བུདྡྷཝཾསཊྛཀཐཱཡ པརམཏྠདཱིཔནཱི ནཱམ ཊཱིཀཱ, ཨབྷིདྷམྨཊྛཀཐཱཡཊཱིཀཱ ལཱིནཏྠཝཎྞནཱ ནཱམ ཨནུཊཱིཀཱཏི ཨིམེ ཙུདྡས མཏྟེ གནྠེ ཨཀཱསི.

དྭེ པུབྦཱཙརིཡཱནཱམཱ ཙརིཡཱནིརུཏྟི མཉྫཱུསཾ ནཱམ ཙུལླནིརུཏྟི ཊཱིཀཉྩ མཧཱནིརུཏྟི སངྑེཔཉྩ ཨཀཾསུ. མཧཱཝཛིརབུདྡྷིནཱམཱཙརིཡོ ཝིནཡགཎྛིནཱམ པཀརཎཾ ཨཀཱསི. དཱིཔངྐརསངྑཱཏོ ཝིམལབུདྡྷི ནཱམཱཙརིཡོ མུཁམཏྟདཱིཔནཱི ནཱམཀཾ ནྱཱསཔྤཀརཎཾ ཨཀཱསི. ཙུལླཝཛིརབུདྡྷི ནཱམཱཙརིཡོ ཨཏྠབྱཱཁྱཱནཾ ནཱམ པཀརཎཾ ཨཀཱསི.

དཱིཔངྐརོ ནཱམཱཙརིཡོ རཱུཔསིདྡྷི པཀརཎཾ, རཱུཔསིདྡྷི ཊཱིཀཾ, སམྤཔཉྩ སུཏྟཉྩེཏི ཏིཝིདྷཾ པཀརཎཾ ཨཀཱསི. ཨཱནནྡཱཙརིཡསྶ ཛེཊྛསིསྶོ དྷམྨཔཱལོ ནཱམཱཙརིཡོ སཙྩསངྑེཔཾ ནཱམ པཀརཎཾ ཨཀཱསི. ཀསྶཔོ ནཱམཱཙརིཡོ མོཧཝིཙྪེདནཱི, ཝིམཏིཙྪེདནཱི, དསབུདྡྷཝཾསོ, ཨནཱགཏཝཾསོཏི, ཙཏུཝིདྷཾ པཀརཎཾ ཨཀཱསི.

མཧཱནཱམོ ནཱམཱཙརིཡོ, སདྡྷམྨཔཀཱསནཱི ནཱམ པཊིསམྦྷིདཱམགྒསྶ ཨཊྛཀཐཾ ཨཀཱསི. དཱིཔཝཾསོ, ཐཱུཔཝཾསོ, བོདྷིཝཾསོ, ཙཱུལཝཾསོ, མཧཱཝཾསོ, པཊིསམྦྷིདཱམགྒཊྛཀཐཱ གཎྛི ཙེཏི ཨིམེ ཚ གནྠཱ མཧཱནཱམཱཙརི ཝིསུཾ ཝིསུཾ ཀཏཱ.

ནཝོ མཧཱནཱམོ ནཱམཱཙརིཡོ ནཝཾ མཧཱཝཾས ནཱམ པཀརཎཾ ཨཀཱསི. ཨུཔསེནོ ནཱམཱཙརིཡོ སདྡྷམྨཔཛྫོཏིཀཾ ནཱམ མཧཱནིདྡེསསྶ ཨཊྛཀཐཾ ཨཀཱསི. མོགྒལཱནོ ནཱམཱཙརིཡོ མོགྒལཱནབྱཱཀརཎཾ ནཱམ པཀརཎཾ ཨཀཱསི. སངྒྷརཀྑིཏོ ནཱམཱཙརིཡོ, སུབོདྷཱལངྐཱརཾ ནཱམ པཀརཎཾ ཨཀཱསི. ཝུཏྟོདཡཀཱརོ ནཱམཱཙརིཡོ ཝུཏྟོདཡཾ ནཱམ པཀརཎཾ ཨཀཱསི. དྷམྨསིརི ནཱམཱཙརིཡོ ཁུདྡཀསིཀྑཾ ནཱམ པཀརཎཾ ཨཀཱསི. པུརཱཎཁུདྡསིཀྑཱཡ ཊཱིཀཱ, མཱུལསིཀྑཱ ཙེཏི, ཨིམེ དྭེ གནྠཱ དྭེཧཱཙརིཡེཧི ཝིསུཾ ཝིསུཾ ཀཏཱ.

ཨནུརུདྡྷོ ནཱམཱཙརིཡོ པརམཏྠཝིནིཙྪཡཾ, ནཱམརཱུཔཔརིཙྪེདཾ, ཨབྷིདྷམྨཏྠསངྒཧཾ ཙེཏི ཏིཝིདྷཾ པཀརཎཾ ཨཀཱསི. ཁེམོ ནཱམཱཙརིཡོ ཁེམཾ ནཱམ པཀརཎཾ ཨཀཱསི. སཱརིཔུཏྟོ ནཱམཱཙརིཡོ ཝིནཡཊྛཀཐཱཡ སཱརཏྠདཱིཔནཱི ནཱམ ཊཱིཀཾ; ཝིནཡསངྒཧཔཀརཎཾ, ཝིནཡསངྒཧསྶཊཱིཀཾ; ཨངྒུཏྟརཊྛཀཐཱཡ སཱརཏྠམཉྫཱུསཾ ནཱམ ནཝཾ ཊཱིཀཾ; པཉྩིཀཱ ཊཱིཀཉྩེཏི, ཨིམེ པཉྩ གནྠེ ཨཀཱསི. བུདྡྷནཱགོ ནཱམཱཙརིཡོ ཝིནཡཏྠམཉྫཱུསཾ ནཱམ ཀངྑཱཝིཏརཎཱིཡཱ ཊཱིཀཾ ཨཀཱསི. ནཝོ མོགྒལཱནོ ནཱམཱཙརིཡོ ཨབྷིདྷཱནཔྤདཱིཔིཀཾ ནཱམ པཀརཎཾ ཨཀཱསི. ཝཱཙིསྶརོ ནཱམཱཙརིཡོ མཧཱསཱམི ནཱམ སུབོདྷཱལངྐཱརསྶ ཊཱིཀཱ, ཝུཏྟོདཡ ཝིཝརཎཾ, སུམངྒལཔྤསཱདནི ནཱམ ཁུདྡསིཀྑཱཡ ཊཱིཀཱ; སམྦནྡྷཙིནྟཱ, སམྦནྡྷཙིནྟཱཡ ཊཱིཀཱ; བཱལཱཝཏཱརོ, མོགྒལཱནབྱཱཀརཎསྶ པཉྩིཀཱཡ ཊཱིཀཱ; ཡོགཝིནིཙྪཡོ, ཝིནཡཝིནིཙྪཡསྶ ཊཱིཀཱ, ཨུཏྟརཝིནིཙྪཡསྶ ཊཱིཀཱ, ནཱམརཱུཔ-པརིཙྪེདསྶ ཝིབྷཱགོ, སདྡཏྠསྶ པདརཱུཔཝིབྷཱཝནཾ; ཁེམསྶ པཀརཎསྶ ཊཱིཀཱ, སཱིམཱལངྐཱརོ, མཱུལསིཀྑཱཡ ཊཱིཀཱ, རཱུཔཝིབྷཱགོ, པཙྩཡསངྒཧོ, སཙྩསངྑེཔསྶ ཊཱིཀཱ ཙེཏི, ཨིམེ ཨཊྛཱརས གནྠེ ཨཀཱསི.

སུམངྒལོ ནཱམཱཙརིཡོ ཨབྷིདྷམྨཱཝཏཱརསྶཊཱིཀཾ, ཨབྷིདྷམྨཏྠསངྒཧསྶཊཱིཀཉྩ དུཝིདྷཾ པཀརཎཾ ཨཀཱསི. བུདྡྷཔིཡོ ནཱམཱཙརིཡོ སཱརཏྠསངྒཧཾ ནཱམ པཀརཎཾ ཨཀཱསི. དྷམྨཀིཏྟི ནཱམཱཙརིཡོ དནྟདྷཱཏུ པཀརཎཾ ཨཀཱསི. མེདྷངྐརོ ནཱམཱཙརིཡོ ཛིནཙརིཏཾ ནཱམ པཀརཎཾ ཨཀཱསི. བུདྡྷརཀྑིཏོ ནཱམཱཙརིཡོ ཛིནལངྐཱརཾ, ཛིནལངྐཱརསྶ ཊཱིཀཉྩཱཏི དུཝིདྷཾ པཀརཎཾ ཨཀཱསི. ཨུཔཏིསྶོ ནཱམཱཙརིཡོ ཨནཱགཏཝཾསསྶ ཨཊྛཀཐཾ ཨཀཱསི.

ཀངྑཱཝིཏརཎཱིཡཱ ལཱིནཏྠཔྤཀཱསིནི, ནིསནྡེཧོ, དྷམྨཱནུསཱརཎཱི, ཉེཡྻཱསནྟཏི, ཉེཡྻཱསནྟཏིཡཱ ཊཱིཀཱ, སུམཏཱདཱཝཏཱརོ, ལོཀཔཉྙཏྟི པཀརཎཾ, ཏཐཱགཏུཔྤཏྟི པཀརཎཾ, ནལཱཊདྷཱཏུ ཝཎྞནཱ, སཱིཧལ༹ཝཏྠུ, དྷམྨདཱིཔཀོ, པཊིཔཏྟིསངྒཧོ, ཝིསུདྡྷིམགྒཎྛི, ཨབྷིདྷམྨགཎྛི, ནེཏྟིཔཀརཎགཎྛི, ཝིསུདྡྷིམགྒཙུལླནཝཊཱིཀཱ, སོཏབྦམཱལིནཱི, པསཱདཛནནཱི, ཨོཀཱསལོཀོ, སུབོདྷཱལངྐཱརསྶ ནཝ ཊཱིཀཱ ཙེཏི, ཨིམེ ཝཱིསཏི གནྠཱ ཝཱིསཏཱཙརིཡེཧི ཝིསུཾ ཝིསུཾ ཀཏཱ.

སདྡྷམྨསིརི ནཱམཱཙརིཡོ སདྡཏྠབྷེདཙིནྟཱ ནཱམ པཀརཎཾ ཨཀཱསི. དེཝོ ནཱམཱཙརིཡོ སུམན ཀཱུཊཝཎྞནཾ ནཱམ པཀརཎཾ ཨཀཱསི. ཙུལླབུདྡྷགྷོསོ ནཱམཱཙརིཡོ སོཏཏྠཀིནིདཱནཾ ནཱམ པཀརཎཾ ཨཀཱསི. རཊྛཔཱལོ ནཱམཱཙརིཡོ མདྷུརསངྒཱཧཎཱིཀིཏྟི ནཱམ པཀརཎཾ ཨཀཱསི. སུབྷཱུཏཙནྡོ ནཱམཱཙརིཡོ ལིངྒཏྠཝིཝརཎ-པཀརཎཾ ཨཀཱསི. ཨགྒཝཾསོ ནཱམཱཙརིཡོ སདྡནཱིཏི པཀརཎཾ ནཱམ ཨཀཱསི. ཝཛིརབུདྡྷི ནཱམཱཙརིཡོ མཧཱཊཱིཀཾ ནཱམ ནྱཱསཔཀརཎཊཱིཀཾ ཨཀཱསི. གུཎསཱགརོ ནཱམཱཙརིཡོ མུཁམཏྟསཱརཾ, མུཁམཏྟསཱརསྶ ཊཱིཀཉྩ དུཝིདྷཾ པཀརཎཾ ཨཀཱསི. ཨབྷཡོ ནཱམཱཙརིཡོ སདྡཏྠབྷེདཙིནྟཱཡ མཧཱཊཱིཀཾ ཨཀཱསི. ཉཱཎསཱགརོ ནཱམཱཙརིཡོ ལིངྒཏྠཝིཝརཎཔྤཀཱསནཾ ནཱམ པཀརཎཾ ཨཀཱསི. ཨཉྙཏརོ ཨཱཙརིཡོ གཱུལ༹ཏྠཊཱིཀཾ, བཱལཔྤབོདྷནཉྩ དུཝིདྷཾ པཀརཎཾ ཨཀཱསི. ཨཉྙཏརོ ཨཱཙརིཡོ སདྡཏྠ-བྷེདཙིནྟཱཡ མཛ྄ཛྷིམཊཱིཀཾ ཨཀཱསི. ཨུཏྟམོ ནཱམཱཙརིཡོ བཱལཱཝཏཱརཊཱིཀཾ, ལིངྒཏྠཝིཝརཎཊཱིཀཉྩ དུཝིདྷཾ པཀརཎཾ ཨཀཱསི. ཨཉྙཏརོ ཨཱཙརིཡོ སདྡཏྠབྷེདཙིནྟཱཡ ནཝ-ཊཱིཀཾ ཨཀཱསི. ཨེཀོ ཨམཙྩོ ཨབྷིདྷཱནཔྤདཱིཔིཀཱཡཊཱིཀཾ, གཎྛིཔཀརཎསྶ དཎྜཱིཔྤཀརཎསྶ མཱགདྷབྷཱུཏཾ ཊཱིཀཾ, ཀོལདྡྷཛནསྶ སཀཊབྷཱསཱཡ ཀཏཊཱིཀཉྩ ཏིཝིདྷཾ པཀརཎཾ ཨཀཱསི. དྷམྨསེནཱཔཏི ནཱམཱཙརིཡོ ཀཱརིཀཾ, ཨེཏིམཱསཔིདཱིཔནཱི, མནོཧཱརཉྩ ཏིཝིདྷཾ པཀརཎཾ ཨཀཱསི. ཨཉྙཏརོ ཨཱཙརིཡོ ཀཱརིཀཱཡ ཊཱིཀཾ ཨཀཱསི. ཨཉྙཏརོ ཨཱཙརིཡོ ཨེཏིམཱསཔིདཱིཔིཀཱཡ ཊཱིཀཾ ཨཀཱསི.

ཨཉྙཏརོ ཨཱཙརིཡོ སདྡབིནྡུ ནཱམ པཀརཎཾ ཨཀཱསི. སདྡྷམྨགུརུ ནཱམཱཙརིཡོ སདྡཝུཏྟིཔྤཀཱསཀཾ ནཱམ པཀརཎཾ ཨཀཱསི. སཱརིཔུཏྟོ ནཱམཱཙརིཡོ སདྡཝུཏྟིཔྤཀཱསཀསྶ ཊཱིཀཾ ཨཀཱསི. ཨཉྙཏརོ ཨཱཙརིཡོ ཀཙྩཱཡནསཱརཾ ནཱམ པཀརཎཾ ཀཙྩཱཡནསཱརསྶ ཊཱིཀཉྩ དུཝིདྷཾ པཀརཎཾ ཨཀཱསི. ནཝོ མེདྷངྐརོ ནཱམཱཙརིཡོ ལོཀདཱིཔཀསཱརཾ ནཱམ པཀརཎཾ ཨཀཱསི. ཨགྒཔཎྜིཏོ ནཱམཱཙརིཡོ ལོཀུཔྤཏྟི ནཱམ པཀརཎཾ ཨཀཱསི. ཙཱིཝརོ ནཱམཱཙརིཡོ ཛངྒྷདཱསཀསྶ ཊཱིཀཾ ཨཀཱསི. མཱཏིཀཏྠདཱིཔནཱི, ཨབྷིདྷམྨཏྠསངྒཧཝཎྞནཱ, སཱིམཱལངྐཱརསྶཊཱིཀཱ, ཝིནཡསམུཊྛཱནདཱིཔནཱི ཊཱིཀཱ, གཎྛི སཱརོ, པཊྛཱནགཎནཱ ནཡོ, སུཏྟནིདྡེསོ, པཱཏིམོཀྑོ, ཙེཏི, ཨིམེ ཨཊྛ གནྠེ སདྡྷམྨཛོཏིཔཱལཱཙརིཡོ ཨཀཱསི. ཝིམལབུདྡྷི ནཱམཱཙརིཡོ ཨབྷིདྷམྨ-པནྣརསཊྛཱནཾ ནཱམ པཀརཎཾ ཨཀཱསི. ནཝོ ཝིམལབུདྡྷི ནཱམཱཙརིཡོ སདྡསཱརཏྠཛཱལིནཱི, སདྡསཱརཏྠཛཱལིནིཡཱ ཊཱིཀཱ, ཝུཏྟོདཡ ཊཱིཀཱ, པརམཏྠམཉྫཱུསཱ ནཱམ ཨབྷིདྷམྨསངྒཧཊཱིཀཱཡ ཨནུཊཱིཀཱ དསགཎྛིཝཎྞནཱ, མཱགདྷབྷཱུཏཱཝིདགྒམུཁམཎྜནཊཱིཀཱ ཙེཏི ཨིམེ ཚ གནྠེ ཨཀཱསི. ཨཉྙཏརོ ཨཱཙརིཡོ པཉྩཔཀརཎཊཱིཀཱཡ ནཝཱནུཊཱིཀཾ ཨཀཱསི. ཨརིཡཝཾསོ ནཱམཱཙརིཡོ ཨབྷིདྷམྨསངྒཧ-ཊཱིཀཱཡ [པརམཏྠ] མཎིསཱརམཉྫཱུསཾ ནཱམ ནཝཱནུཊཱིཀཾ ཨཀཱསི. ཨབྷིདྷམྨཏྠསངྒཧསྶ ཊཱིཀཱ, པེཊཀོཔདེསསྶ ཊཱིཀཱ, ཙཏུབྷཱཎཝཱརསྶ ཨཊྛཀཐཱ, མཧཱསཱརཔཀཱསནཱི, མཧཱདཱིཔནཱི, སཱརཏྠདཱིཔནཱི གཏི པཀརཎཾ, ཧཏྠསཱརོ, བྷུམྨསངྒཧོ, བྷུམྨནིདྡེསོ, དསཝཏྠུཀཱཡཝིརཏིཊཱིཀཱ, ཛོཏནཱ ནིརུཏྟི, ཝིབྷཏྟིཀཐཱ, ཀཙྩཱཡནཝིཝརཎཱ, སདྡྷམྨམཱལིནཱི, པཉྩགཏི ཝཎྞནཱ, བཱལཙིཏྟཔབོདྷནཾ, དྷམྨཙཀྐསུཏྟསྶ ནཝཊྛཀཐཱ, དནྟདྷཱཏུ པཀརཎསྶ ཊཱིཀཱ ཙེཏི, ཨིམེ ཝཱིསཏི གནྠཱ ནཱནཱཙརིཡེཧི ཀཏཱ, ཨཉྙཱནི པན པཀརཎཱནི ཨཏྠི.

ཀཏམཱནི སདྡྷམྨོ པཱཡནོ, བཱལཔྤབོདྷནཔཀརཎསྶ ཊཱིཀཱ ཙ, ཛིནཱལངྐཱརཔཀརཎསྶ ནཝཊཱིཀཱ ཙ, ལིངྒཏྠཝིཝརཎཾ, ལིངྒཝིནིཙྪཡོ; པཱཏིམོཀྑཝིཝརཎཾ, པརམཏྠཀཐཱཝིཝརཎཾ, སམནྟཔཱསཱདིཀཱ ཝིཝརཎཾ, ཙཏུབྷཱཎཝཱརཊྛཀཐཱ ཝིཝརཎཾ, ཨབྷིདྷམྨཏྠསངྒཧཝིཝརཎཾ, སཙྩསངྑེཔཝིཝརཎཾ, སདྡཏྠབྷེདཙིནྟཱཝིཝརཎཾ, སདྡཝུཏྟིཝིཝརཎཾ, ཀཙྩཱཡནསཱརཝིཝརཎཾ, ཨབྷིདྷམྨཏྠསངྒཧསྶ ཊཱིཀཱ ཝིཝརཎཾ, མཧཱཝེསྶནྟརཱཛཱཏཀསྶ ཝིཝརཎཾ, སཀྐཱབྷིམཏཾ, མཧཱཝེསྶནྟརཛཱཏཀསྶ ནཝཊྛཀཐཱ, པཋམ སཾབོདྷི, ལོཀནེཏྟི ཙ, བུདྡྷགྷོསཱཙརིཡནིདཱནཾ མིལིནྡཔཉྷཱ ཝཎྞནཱ, ཙཏུརཱ རཀྑཱ, ཙཏུརཀྑཱཡ ཨཊྛཀཐཱ, སདྡཝུཏྟིཔཀརཎསྶ ནཝཊཱིཀཱ, ཨིཙྩེཝཾ པཉྩཝཱིསཏི པམཱཎཱནི པཀརཎཱནི ལངྐོ དཱིཔཱདཱིསུཊྛཱནེསུ པཎྜིཏེཧི ཀཏཱནི ཨཧེསུཾ, སམྦུདྡྷེགཱཐཱ ཙ, ནརདེཝ ནཱམ གཱཐཱ ཙ, དཱཏཝེ ཙཱིརཏྟི གཱཐཱ ཙ, ཝཱིསཏི ཨོཝཱདགཱཐཱ ཙ, དཱནསཏྟརི, སཱིལསཏྟརི, སཔྤཱདཱནཝཎྞནཱ, ཨནནྟབུདྡྷཝནྡནགཱཐཱ ཙ, ཨཊྛཝཱིསཏི བུདྡྷཝནྡནགཱཐཱ ཙ, ཨཏཱིཏཱནཱགཏཔཙྩུཔྤནྣཝནྡནགཱཐཱ ཙ, ཨསཱིཏིམཧཱསཱཝཀཝནྡནགཱཐཱ ཙ, ནཝཧཱརགུཎཝཎྞནཱ ཙཱཏི, ཨིམེ བུདྡྷཔཎཱམ-གཱཐཱདིཀཱ གཱཐཱ ཡོ པཎྜིཏེཧི ལངྐཱདཱིཔཱདིསུཊྛཱནེསུ ཀཏཱ ཨཧེསུཾ [ཨིཏི ཙུལླགནྠཝཾསེ གནྠཀཱརཀཱཙརིཡ དཱིཔཀོ ནཱམ དུཏིཡོ པརིཙྪེདོ]

༣. ཨཱཙརིཡཱནཾ སཉྫཱཏཊྛཱནཔརིཙྪེདོ

ཨཱཙརིཡེསུ ཙ ཨཏྠི ཛམྦུདཱིཔིཀཱཙརིཡཱ ཨཏྠི, ལངྐཱདཱིཔིཀཱཙརིཡཱ. ཀཏམེ ཛམྦུདཱིཔིཀཱཙརིཡཱ? ཀཏམེ ལངྐཱདཱིཔིཀཱཙརིཡཱ? མཧཱཀཙྩཱཡནོ ཛམྦུདཱིཔིཀཱཙརིཡོ སོ ཧི ཨཝནྟིརཊྛེ ཨུཛྫེནཱི ནགརེ ཙནྡཔཛྫོཏསྶ ནཱམ རཉྙོ པུརོཧིཏོ ཧུཏྭཱ ཀཱམཱནཾ ཨཱདཱིནཝཾ དིསྭཱ, གྷརཱཝཱསཾ པཧཱཡ སཏྠུསཱསནེ པབྦཛྫིཏྭཱ ཧེཊྛཱ ཝུཏྟཔྤཀཱརེ གནྠེ ཨཀཱསི. མཧཱཨཊྛཀཐཱཙརིཡོ ཛམྦུདཱིཔིཀོ, མཧཱཔཙྩརིཀཱཙརིཡོ, མཧཱཀུརུནྡིཀཱཙརིཡོ, ཨཉྙཏརོ ཨཱཙརིཡཱ དྭེཏི ཨིམེ ཙ བྷཱུཝཱཙརིཡཱ. ལངྐཱདཱིཔིཀཱཙརིཡཱ ནཱམ ཏེ ཀིར བུདྡྷགྷོསཱཙརིཡསྶ པཱུརེ བྷཱུཏཱཙརིཡེ ཀཱལེ ཨཧེསུཾ. མཧཱབུདྡྷགྷོསཱཙརིཡོ ཛམྦུདཱིཔིཀོ. སོ ཀིར མགདྷརཊྛེ གྷོསཀགཱམེ རཉྙོ པུརོཧིཏསྶ ཀེསི ནཱམ བྲཱཧྨཎསྶ པུཏྟོ, སཏྠུསཱསནེ པབྦཛྫིཏྭཱ ལངྐཱདཱིཔཾ གཏོ ཧེཊྛཱ ཝུཏྟཔྤཀཱརེ གནྠེ ཨཀཱསི.

བུདྡྷདཏྟཱཙརིཡོ, ཨཱནནྡཱཙརིཡོ, དྷམྨཔཱལཱཙརིཡོ, དྭེ བུབྦཱཙརིཡོ, མཧཱཝཛིར-བུདྡྷཱཙརིཡོ, ཙུལླཝཛིར-བུདྡྷཱཙརིཡོ, ཝིམལབུདྡྷསངྑཱཏོ དཱིཔངྐརཱཙརིཡོ, ཙུལླདཱིཔངྐརཱཙརིཡོ, ཙུལླདྷམྨཔཱལཱཙརིཡོ, ཀསྶཔཱཙརིཡོཏི ཨིམེ ཨེཀཱདསཙརིཡཱ ཛམྦུདཱིཔིཀཱ ཧེཊྛཱ ཝུཏྟཔཀཱརེ གནྠེ ཨཀཾསུ. མཧཱནཱམཱཙརིཡོ, ཨཉྙཏརཱཙརིཡཱ, ཙུལླམཧཱནཱམཱཙརིཡོ, ཨུཔསེནཱཙརིཡོ, མོགྒལཱནཱཙརིཡོ, སངྒྷརཀྑིཏཱཙརིཡོ, ཝུཏྟོདཡཀཱརཱཙརིཡོ, དྷམྨསིརཱཙརིཡོ, ཨཉྙཏརཱ དྭཱཙརིཡཱ, ཨནུརུདྡྷཱཙརིཡོ, ཁེམཱཙརིཡོ, སཱརིཔུཏྟཱཙརིཡོ, བུདྡྷནཱགཱཙརིཡོ, ཙུལླམོགྒལཱནཱཙརིཡོ, ཝཱཙིསྶཝཱཙརིཡོ, སུམངྒལཱཙརིཡོ, བུདྡྷཔིཡཱཙརིཡོ, དྷམྨཀིཏྟི ཨཱཙརིཡོ མེདྷངྐརཱཙརིཡོ, བུདྡྷརཀྑིཏཱཙརིཡོ, ཨུཔཏིསྶཱ ཙརིཡོ, ཨཉྙཏརཱ ཝཱིསཏཱཙརིཡཱ, སདྡྷམྨསིརཱཙརིཡོ, དེཝཱཙརིཡོ, ཙུལླབུདྡྷགྷོསཱཙརིཡོ, སཱརིཔུཏྟཱཙརིཡོ, རཊྛཔཱལཱཙརིཡོཏི ཨིམེ དྭེ པཉྙཱསཱཙརིཡཱ ལངྐཱདཱིཔིཀཱཙརིཡཱ ནཱམ. སུབྷཱུཏཙནྡཱཙརིཡོ, ཨགྒཝཾསཱཙརིཡོ, ནཝོ ཝཛིརབུདྡྷཱཙརིཡོ, གུཎསཱགརཱཙརིཡོ, ཨབྷཡཱཙརིཡོ, ཉཱཎསཱགརཱཙརིཡོ, ཨཉྙཏརཱ དྭཱཙརིཡཱ, ཨུཏྟམཱཙརིཡོ, ཨཉྙཏརོ ཨཱཙརིཡོ, ཨཉྙཏརོ མཧཱམཙྩོ, དྷམྨསེནཱཔཏཱཙརིཡོ, ཨཉྙཏརཱ ཏཡོ ཨཱཙརིཡཱ, སདྡྷམྨགུརུ ཨཱཙརིཡོ, སཱརིཔུཏྟཱཙརིཡོ, ཨཉྙཏརོ ཨེཀཱ ཨཱཙརིཡོ, མེདྷངྐརཱཙརིཡོ, ཨགྒཔཎྜིཏཱཙརིཡོ, ཙཱིཝརཱཙརིཡོ, སདྡྷམྨཛོཏིཔཱལཱཙརིཡོ, ཝིམལབུདྡྷཱཙརིཡོཏི ཨིམེ ཏེཝཱིསཏི ཨཱཙརིཡཱ ཛམྦུདཱིཔིཀཱ ཧེཊྛཱ ཝུཏྟཔྤཀཱརེ གནྠེ པུཀྐཱམ སངྑཱཏེ ཨརིམདྡན ནགརེ ཨཀཾསུ.

ནཝོཝིམལབུདྡྷཱཙརིཡོ ཛམྦུདཱིཔིཀོ ཧེཊྛཱ ཝུཏྟཔྤཀཱརེ གནྠེ པཾཡནགརེ ཨཀཱསི. ཨཉྙཏརཱཙརིཡོ ཨརིཡཝཾསཱཙརིཡོཏི ཨིམེ དྭཱཙརིཡཱ ཛམྦུདཱིཔིཀཱ ཧེཊྛཱ ཝུཏྟཔྤཀཱརེ གནྠེ ཨཏི [ནཝི] པུརེ ཨཀཾསུ, ཨཉྙཏརཱ ཝཱིསཏཱཙརིཡཱ ཛམྦུདཱིཔིཀཱ ཧེཊྛཱ ཝུཏྟཔྤཀཱརེ གནྠེ ཀིཉྩི པུརཱདིགྷརེ ཨཀཾསུ.

[ཨིཏི ཙུལླགནྠཝཾསེ ཨཱཙརིཡཱནཾ སཉྫཱཏཊྛཱན དཱིཔཀོ ནཱམ ཏཏིཡོ པརིཙྪེདོ.]

གནྠཱ པན སིཡཱ ཨཱཡཱཙནེན ཨཱཙརིཡེཧི ཀཏཱ, སིཡཱ ཨནཱཡཱཙནེན ཨཱཙརིཡེཧི ཀཏཱ. ཀཏམེ གནྠཱ ཨཱཡཱཙནེན, ཀཏམེ ཨནཱཡཱཙནེན ཀཏཱ? མཧཱཀཙྩཱཡན གནྠོ, མཧཱཨཊྛཀཐཱ གནྠོ, མཧཱཔཙྩརིཡ གནྠོ, མཧཱཀུརུནྡི གནྠོ, མཧཱཔཙྩརིཡགནྠསྶ ཨཊྛཀཐཱ གནྠོ, མཧཱཀུརུནྡི གནྠསྶ ཨཊྛཀཐཱ གནྠོཏི. ཨིམེཧི ཚ གནྠེཧི ཨཏྟནོ མཏིཡཱ སཱསནུགྒཧནཏྠཱཡ སདྡྷམྨཋིཏིཡཱ ཀཏཱ.

བུདྡྷགྷོསཱཙརིཡ གནྠེསུ པན ཝིསུདྡྷིམགྒོ, སངྒྷཔཱལེན ནཱམ སངྒྷཐེརེན ཨཱཡཱཙིཏེན བུདྡྷགྷོསཱཙརིཡེན ཀཏོ. དཱིགྷནིཀཱཡསྶ ཨཊྛཀཐཱ གནྠོ དཱཋཱ ནཱམེན སངྒྷཐེརེན ཨཱཡཱཙིཏེན བུདྡྷགྷོསཱཙརིཡེན ཀཏོ. མཛ྄ཛྷིམནིཀཱཡསྶ ཨཊྛཀཐཱ གནྠོ བུདྡྷམིཏྟནཱམེན ཐེརེན ཨཱཡཱཙིཏེན བུདྡྷགྷོསཱཙརིཡེན ཀཏོ. སཾཡུཏྟནིཀཱཡསྶ ཨཊྛཀཐཱ གནྠོ ཛོཏིཔཱལེན ནཱམ ཐེརེན ཨཱཡཱཙིཏེན བུདྡྷགྷོསཱཙརིཡེན ཀཏོ. ཨངྒུཏྟརནིཀཱཡསྶ ཨཊྛཀཐཱ གནྠོ བྷདྡནྟཱ ནཱམ ཐེརེན སཧཨཱཛཱིཝཀེན ཨུཔཱསཀེན ཙ ཨཱཡཱཙིཏེན བུདྡྷགྷོསཱཙརིཡེན ཀཏོ. སམནྟཔཱསཱདིཀཱ ནཱམ ཨཊྛཀཐཱ གནྠོ བུདྡྷསིརི ནཱམེན ཐེརེན ཨཱཡཱཙིཏེན བུདྡྷགྷོསཱཙརིཡེན ཀཏོ. སཏྟནྣཾ ཨབྷིདྷམྨ-གནྠཱནཾ ཨཊྛཀཐཱ གནྠོ ཙུལླབུདྡྷགྷོསེན བྷིཀྑུནཱ ཨཱཡཱཙིཏེན བུདྡྷགྷོསཱཙརིཡེན ཀཏོ. དྷམྨཔདསྶཨཊྛཀཐཱ གནྠོ ཀུམཱརཀསྶཔནཱམེན ཐེརེན ཨཱཡཱཙིཏེན བུདྡྷགྷོསཱཙརིཡེན ཀཏོ. ཛཱཏཀསྶཨཊྛཀཐཱ གནྠོ ཨཏྠདསྶཱི, བུདྡྷམིཏྟ, བུདྡྷཔིཡདེཝ སངྑཱཏེཧི ཏཱིཧི ཐེརེཧི ཨཱཡཱཙིཏེན བུདྡྷགྷོསཱཙརིཡེན ཀཏོ. ཁུདྡཀཔཱཋསྶ ཨཊྛཀཐཱ གནྠོ, སུཏྟནིཔཱཏསྶ ཨཊྛཀཐཱ གནྠོ ཨཏྟནོ མཏིཡཱ བུདྡྷགྷོསཱཙརིཡེན ཀཏོ. ཨཔདཱནསྶ ཨཊྛཀཐཱ གནྠོ པཉྩནིཀཱཡ ཝིཉྙཱུཧི པཉྩཧི ཐེརེཧི ཨཱཡཱཙིཏེན བུདྡྷགྷོསཱཙརིཡེན ཀཏོ.

བུདྡྷགྷོསཱཙརིཡ-གནྠདཱིཔནཱ ནིཊྛིཏཱ.

བུདྡྷཏྟཱཙརིཡ གནྠེསུ པན ཝིནཡ-ཝིནིཙྪཡགནྠོ ཨཏྟནོ སིསྶེན བུདྡྷསཱིཧེན ནཱམ ཐེརེན ཨཱཡཱཙིཏེན བུདྡྷཏྟཱཙརིཡཱ ཀཏོ. ཨུཏྟར-ཝིནིཙྪཡགནྠོ སངྒྷཔཱལེན ནཱམེན ཐེརེན ཨཱཡཱཙིཏེན བུདྡྷདཏྟཱཙརིཡེན ཀཏོ. ཨབྷིདྷམྨཱཝཏཱརོ ནཱམ གནྠོ ཨཏྟནོ སིསྶེན སུམཏི ཐེརེན ཨཱཡཱཙིཏེན བུདྡྷདཏྟཱཙརིཡེན ཀཏོ. བུདྡྷཝཾསསྶ ཨཊྛཀཐཱ གནྠོ ཏེནེཝ བུདྡྷསཱིཧནཱམ ཐེརེན ཨཱཡཱཙིཏེན བུདྡྷདཏྟཱཙརིཡེན ཀཏོ.

བུདྡྷདཏྟཱཙརིཡ-གནྠདཱིཔནཱ ནིཊྛིཏཱ.

ཨབྷིདྷམྨཀཐཱཡ མཱུལཊཱིཀཱ ནཱམ ཊཱིཀཱ གནྠོ བུདྡྷམིཏྟཱ ནཱམ ཐེརེན ཨཱཡཱཙིཏེན ཨཱནནྡཱཙརིཡེན ཀཏོ.

ནེཏྟིཔཀརཎསྶ ཨཊྛཀཐཱ གནྠོ དྷམྨརཀྑིཏ ནཱམ ཐེརེན ཨཱཡཱཙིཏེན དྷམྨཔཱལཱཙརིཡེན ཀཏོ. ཨིཏིཝུཏྟཀཨཊྛཀཐཱ གནྠོ, ཨུདཱནཨཊྛཀཐཱ གནྠོ, ཙརིཡཱཔིཊཀཨཊྛཀཐཱ གནྠོ, ཐེརཀཐཱཨཊྛཀཐཱ གནྠོ, ཐེརིཀཐཱཨཊྛཀཐཱ གནྠོ, ཝིམཱནཝཏྠུཨཊྛཀཐཱ གནྠོ, པེཏཝཏྠུཨཊྛཀཐཱ གནྠོ, ཨིམེ སཏྟ གནྠཱ ཨཏྟནོ མཏིཡཱ དྷམྨཔཱལཱཙརིཡེན ཀཏོ. ཝིསུདྡྷིམགྒཊཱིཀཱ གནྠོ དཱཋཱ ནཱམེན ནཱམ ཐེརེན ཨཱཡཱཙིཏེན དྷམྨཔཱལཱཙརིཡེན ཀཏོ, དཱིགྷནིཀཱཡ-ཨཊྛཀཐཱདཱིནཾ ཙཏུནྣཾ ཨཊྛཀཐཱནཾ ཊཱིཀཱ གནྠོ, ཨབྷིདྷམྨཊྛཀཐཱཡ ཨནུཊཱིཀཱ གནྠོ, ནེཏྟིཔཀརཎཊྛཀཐཱཡ ཊཱིཀཱ གནྠོ, བུདྡྷཝཾསཊྛཀཐཱཡ ཊཱིཀཱ གནྠོ, ཛཱཏཀཊྛཀཐཱཡ ཊཱིཀཱ གནྠོ ཙེཏི ཨིམེ པཉྩ གནྠཱ ཨཏྟནོ མཏིཡཱ དྷམྨཔཱལཱཙརིཡེན ཀཏོ.

དྷམྨཔཱལཱཙརིཡ-གནྠདཱིཔནཱ ནིཊྛིཏཱ.

ནིརུཏྟིམཉྫཱུསཱ ནཱམ ཙུལླནིརུཏྟིཊཱིཀཱ གནྠོ, མཧཱནིརུཏྟིསངྑེཔོ ནཱམ གནྠོ ཙ ཨཏྟནོ མཏིཡཱ པུབྦཱཙརིཡེཧི ཝིཾསུ ཀཏོ.

པཉྩ ཝིནཡཔཀརཎཱནཾ ཝིནཡགཎྛི ནཱམ གནྠོ ཨཏྟནོ མཏིཡཱ མཧཱཝཛིརབུདྡྷཱཙརིཡེན ཀཏོ. ནྱཱསསངྑཱཏོ མུཁམཏྟདཱིཔནཱི ནཱམ གནྠོ ཨཏྟནོ མཏིཡཱ ཝིམལབུདྡྷི ཨཱཙརིཡེན ཀཏོ. ཨཏྠབྱཀྑྱཱནོ ནཱམ གནྠོ ཨཏྟནོ མཏིཡཱ ཙུལླཝཛིརབུདྡྷཱཙརིཡེན ཀཏོ. རཱུཔསིདྡྷི ཏསྶ ཙ གནྠསྶ ཊཱིཀཱ གནྠོ སབྦ པཉྩསུཏྟཉྩ ཨཏྟནོ མཏིཡཱ དཱིཔངྐརཱཙརིཡེན ཀཏོ. སཙྩསངྑེཔོ ནཱམ གནྠོ ཨཏྟནོ མཏིཡཱ ཙུལླདྷམྨཔཱལཱཙརིཡེན ཀཏོ. མོཧཙྪེདནཱི གནྠོ, ཝིམཏིཙྪེདནཱི གནྠོ, དས བུདྡྷཝཾསོ, ཨནཱགཏཝཾསོ ཙ. ཨཏྟནོ མཏིཡཱ ཀསྶཔཱཙརིཡེན ཀཏོ. པཊིསམྦྷིདཱམགྒསྶ ཨཊྛཀཐཱ གནྠོ མཧཱནཱམེན ཨུཔཱསཀེན ཨཱཡཱཙིཏེན མཧཱནཱམཱཙརིཡེན ཀཏོ. དཱིཔཝཾསོ, ཐཱུཔཝཾསོ, བོདྷིཝཾསོ, ཙུལླཝཾསོ, པོརཱཎཝཾསོ, མཧཱཝཾསོ ཙཱཏི ཨིམེ ཚ གནྠཱ ཨཏྟནོ མཏིཡཱ མཧཱནཱམཱཙརིཡེཧི ཝིསུཾ ཀཏཱ. ནཝོ མཧཱཝཾསགནྠོ ཨཏྟནོ མཏིཡཱ ཙུལླམཧཱནཱམཱཙརིཡེན ཀཏོ. སདྡྷམྨཔཛྫོཏིཀཱ ནཱམ མཧཱནིདྡེསསྶ ཨཊྛཀཐཱ གནྠོ དེཝེན ཐེརེན ཨཱཡཱཙིཏེན ཨུཔསེནཱཙརིཡེན ཀཏོ. མོགྒལཱནབྱཱཀརཎགནྠེ ཨཏྟནོ མཏིཡཱ མོགྒལཱནཱཙརིཡེན ཀཏོ. སུབོདྷཱལངྐཱར ནཱམ གནྠོ ཨཏྟནོ མཏིཡཱ སངྒྷརཀྑིཏཱཙརིཡེན ཀཏོ. ཝུཏྟོདཡ གནྠོ ཨཏྟནོ མཏིཡཱ ཝུཏྟོདཡཀཱརཱཙརིཡེན ཀཏོ. ཁུདྡསིཀྑཱ ནཱམ གནྠོ ཨཏྟནོ མཏིཡཱ དྷམྨསིརཱཙརིཡེན ཀཏོ. པོརཱཎཁུདྡསིཀྑཱ ཊཱིཀཱ ཙ མཱུལསིཀྑཱ ཙཱཏི, ཨིམེ དྭེ གནྠེ ཨཏྟནོ མཏིཡཱ ཨཉྙཏརེཧི དྭིཧཱཙརིཡེཧི ཝིཾསུ ཀཏཱ.

པརམཏྠཝིནིཙྪཡཾ ནཱམ གནྠོ སངྒྷརཀྑིཏེན ཐེརེན ཨཱཡཱཙིཏེན ཨནུརུདྡྷཱཙརིཡེན ཀཏོ. ནཱམརཱུཔ-པརིཙྪེདོ ནཱམ གནྠོ ཨཏྟནོ མཏིཡཱ ཨནུརུདྡྷཱཙརིཡེན ཀཏོ. ཨབྷིདྷམྨཏྠསངྒཧཾ ནཱམ གནྠོ ནམྨ ནཱམེན ཨུཔཱསཀེན ཨཱཡཱཙིཏེན ཨནུརུདྡྷཱཙརིཡེན ཀཏོ. ཁེམོ ནཱམ གནྠོ ཨཏྟནོ མཏིཡཱ ཁེམཱཙརིཡེན ཀཏོ. སཱརཏྠདཱིཔནཱི ནཱམ ཝིནཡཊྛཀཐཱཡ ཊཱིཀཱ གནྠོ, ཝིནཡསངྒཧཾ, ཝིནཡསངྒཧསྶ ཊཱིཀཱ གནྠོ, ཨངྒུཏྟརཊྛཀཐཱཡ ནཝོ ཊཱིཀཱ གནྠོཏི ཨིམེ ཙཏྟཱརོ གནྠཱ པརཀྐམབཱཧུ ནཱམེན ལངྐཱདཱིཔིསྶརེན རཉྙཱ ཨཱཡཱཙིཏེན སཱརིཔུཏྟཱཙརིཡེན ཀཏོ. སཀཊསདྡསཏྠསྶ པཉྩིཀཱཡ ཊཱིཀཱ གནྠོ ཨཏྟནོ མཏིཡཱ སཱརིཔུཏྟཱཙརིཡེན ཀཏོ. ཀངྑཱཝིཏརཎིཡཱ ཝིནཡཏྠམཉྫཱུསཱ ནཱམ ཊཱིཀཱ གནྠོ སུམེདྷཱ ནཱམཐེརེན ཨཱཡཱཙིཏེན བུདྡྷནཱགཱཙརིཡེན ཀཏོ. ཨབྷིདྷཱནཔྤདཱིཔིཀོ ནཱམ གནྠོ ཨཏྟནོ མཏིཡཱ ཙཱུལམོགྒལཱནཱཙརིཡེན ཀཏོ. སུབོདྷཱལངྐཱརསྶ མཧཱསཱམི ནཱམ ཊཱིཀཱ, ཝུཏྟོདཡ ཝིཝརཎཉྩཱཏི ཨིམེ དྭེ གནྠཱ ཨཏྟནོ མཏིཡཱ ཝཱཙིསྶརེན ཀཏཱ. ཁུདྡསིཀྑཱཡ སུམངྒལཔྤསཱདནི ནཱམ ནཝོ ཊཱིཀཱ གནྠོ སུམངྒལེན ཨཱཡཱཙིཏེན ནཝཱཙིསྶརེན ཀཏོ. སམྦནྡྷཙིནྟཱཊཱིཀཱ བཱལཱཝཏཱརོ, མོགྒལཱནབྱཱཀརཎསྶ ཊཱིཀཱ ཙཱཏི ཨིམེ ཏཡོ གནྠཱ, སུམངྒལ, བུདྡྷམིཏྟ, མཧཱཀསྶཔ སངྑཱཏེཧི ཏཱིཧི ཐེརེཧི ཙ, དྷམྨཀིཏྟི ནཱམ ཨུཔཱསཀེན, ཝཱནིཛྫཱ བྷཱཏུ ཨུཔཱསཀེན ཙ ཨཱཡཱཙིཏེན ཝཱཙིསྶརེན ཀཏོ. ནཱམརཱུཔཔརིཙྪེདསྶ ཝིབྷཱགོ, སདྡཏྠསྶ པདརཱུཔ-ཝིབྷཱཝནཾ, ཁེམཔཀརཎསྶ ཊཱིཀཱ, སཱིམཱལངྐཱརོ, མཱུལསིཀྑཱཡ ཊཱིཀཱ, རཱུཔཝིབྷཱགོ, པཙྩཡསངྒཧོ ཙཱཏི ཨིམེ སཏྟ གནྠཱ ཨཏྟནོ མཏིཡཱ ཝཱཙིསྶརེན ཀཏཱ. སཙྩསངྑེཔསྶ ཊཱིཀཱ གནྠོ སཱརིཔུཏྟ-ནཱམེན ཐེརེན ཨཱཡཱཙིཏེན ཝཱཙིསྶརེན ཀཏོ. ཨབྷིདྷམྨཱཝཏཱརསྶ ཊཱིཀཱ, ཨབྷིདྷམྨཏྠསངྒཧསྶ ཊཱིཀཱ ཙཱཏི ཨིམེ དྭེ གནྠཱ ཨཏྟནོ མཏིཡཱ སུམངྒལཱཙརིཡེན ཀཏཱ. སཱརཏྠསངྒཧཾ ནཱམ གནྠོ ཨཏྟནོ མཏིཡཱ བུདྡྷཔྤིཡེན ཀཏོ དནྟདྷཱཏུཝཎྞནཱ ནཱམ པཀརཎཾ

ལངྐཱདཱིཔིསྶརསྶ རཉྙོ སེནཱཔཏིནཱ ཨཱཡཱཙིཏེན དྷམྨཀིཏྟིནཱམཱཙརིཡེན ཀཏཾ. ཛིནཙརིཏཾ ནཱམ པཀརཎཾ ཨཏྟནོ མཏིཡཱ མེདྷངྐརཱཙརིཡེན ཀཏཾ. ཛིནཱལངྐཱརོ, ཛིནཱལངྐཱརསྶ ཊཱིཀཱ ཨཏྟནོ མཏིཡཱ བུདྡྷརཀྑིཏཱཙརིཡེན ཀཏོ. ཨམཏདྷརསྶ ནཱམ ཨནཱགཏཝཾསསྶ ཨཏྟནོ མཏིཡཱ ཨཊྛཀཐཱ ཨུཔཏིསྶཱཙརིཡེན ཀཏཱ. ཀངྑཱཝིཏརཎཱིཡཱ ལཱིནཏྠཔཀཱསིནཱི, ནིསནྡེཧོ, དྷམྨཱནུསཱརཎཱི, ཉེཡྻཱ-སནྟཏི, ཉེཡྻཱ-སནྟཏིཡཱ ཊཱིཀཱ, སུམཏཱཝཏཱརོ, ལོཀཔཉྙཏྟི པཀརཎཾ, ཏཐཱགཏུཔྤཏྟི པཀརཎཾ, ནལཱཊདྷཱཏུཝཎྞནཱ, སཱིཧལ༹ཝཏྠུ, དྷམྨདཱིཔཀོ པཊིཔཏྟི སངྒཧོ, ཝིསུདྡྷིམགྒསྶ གཎྛི, ཨབྷིདྷམྨགཎྛི, ནེཏྟིཔཀརཎགཎྛི, ཝིསུདྡྷིམགྒཙཱུལ-ནཝཊཱིཀཱ, སོཏབྦམཱལིནཱི, པསཱདཛནནཱི, ཨོཀསྶལོཀོ, སུབོདྷཱལངྐཱརསྶ ནཝ ཊཱིཀཱ ཙེཏི, ཨིམེ ཝཱིསཏི གནྠཱ ཨཏྟནོ མཏིཡཱ ཝཱིསཏཱཙརིཡེཧི ཝིཾསུ ཝིཾསུ ཀཏཱ.

སདྡཏྠ བྷེདཙིནྟཱ ནཱམ པཀརཎཾ ཨཏྟནོ མཏིཡཱ སདྡྷམྨསིརིནཱམཱཙརིཡེན ཀཏཾ. སུམན-ཀཱུཊཝཎྞནཾ ནཱམ པཀརཎཾ, རཱཧུལཱ ནཱམ ཐེརེན ཨཱཡཱཙིཏེན ཝཱཙིསྶརེནདེཝཐེརེན ཀཏཾ. སོཏཏྠ ཀིཾ མཧཱནིདཱནཾ ནཱམ པཀརཎཾ ཨཏྟནོ མཏིཡཱ ཙུལླབུདྡྷགྷོསཱཙརིཡེན ཀཏཾ. མདྷུརསངྒཱཧནི ནཱམ པཀརཎཾ ཨཏྟནོ མཏིཡཱ རཊྛཔཱལཱཙརིཡེན ཀཏཾ. ལིངྒཏྠཝིཝརཎཾ ནཱམ པཀརཎཾ ཨཏྟནོ མཏིཡཱ སུབྷཱུཏཙནྡཱཙརིཡེན ཀཏཾ. སདྡནཱིཏིཔཀརཎཾ ཨཏྟནོ མཏིཡཱ ཨགྒཝཾསཱཙརིཡེན ཀཏཾ. ནྱཱསཔཀརཎསྶ མཧཱཊཱིཀཱ ནཱམ ཊཱིཀཱ ཨཏྟནོ མཏིཡཱ ཝཛིརབུདྡྷཱཙརིཡེན ཀཏཱ. མུཁམཏྟསཱརོ ཨཏྟནོ མཏིཡཱ གུཎསཱགརཱཙརིཡེན ཀཏོ. མུཁམཏྟསཱརསྶ ཊཱིཀཱ སུཏསམྤནྣ ནཱམེན དྷམྨརཱཛིནོ གུརུནཱ སངྒྷཐེརེན ཨཱཡཱཙིཏེན གུཎསཱགརཱཙརིཡེན ཀཏཱ. སདྡཏྠབྷེདཙིནྟཱཡ མཧཱཊཱིཀཱ ཨཏྟནོ མཏིཡཱ ཨབྷཡཱཙརིཡེན ཀཏཱ. ལིངྒཏྠཝིཝརཎཔྤཀཱསཀཾ ནཱམ པཀརཎཾ ཨཏྟནོ མཏིཡཱ ཉཱཎསཱགརཱཙརིཡེན ཀཏཾ. གུལ༹ྷཏྠསྶ ཊཱིཀཱ བཱལཔྤབོདྷནཉྩ དུཝིདྷཾ པཀརཎཾ ཨཏྟནོ མཏིཡཱ ཨཉྙཏརཱཙརིཡེན ཀཏཾ. སདྡཏྠབྷེདཙིནྟཱཡ མཛ྄ཛྷིམཊཱིཀཱ ཨཏྟནོ མཏིཡཱ ཨཉྙཏརཱཙརིཡེན ཀཏཱ. བཱལཱཝཏཱརསྶ ཊཱིཀཱ, ལིངྒཏྠཝིཝརཎཱ ཊཱིཀཱ ཙ ཨཏྟནོ མཏིཡཱ ཨུཏྟམཱཙརིཡེན ཀཏཱ. སདྡཏྠབྷེདཙིནྟཱཡ ནཝ ཊཱིཀཱ ཨཏྟནོ མཏིཡཱ ཨཉྙཏརཱཙརིཡེན ཀཏཱ. ཨབྷིདྷཱནཔྤདཱིཔིཀཱཡ ཊཱིཀཱ དཎྜཱིཔཀརཎསྶ མགགྷ-བྷཱུཏཱ ཊཱིཀཱ ཙཱཏི དུཝིདྷཱ ཊཱིཀཱཡོ ཨཏྟནོ མཏི, སཱིཧསཱུར ནཱམ རཉྙོ ཨེཀེན ཨམཙྩེན ཀཏཱ. ཀོལདྡྷཛནསྶཊཱིཀཱ པཱསཱདིཀེན ནཱམ ཐེརེན ཨཱཡཱཙིཏེན ཏེནེཝ མཧཱམཙྩེན ཀཏཱ. ཀཱརིཀཾ ནཱམ པཀརཎཾ ཉཱཎགམྦྷཱིརནཱམེན བྷིཀྑུནཱ ཨཱཡཱཙིཏེན དྷམྨསེནཱཔཏཱཙརིཡེན ཀཏཾ. ཨེཏིམཱསམིདཱིཔནཱི [ཝཱ ཨེཏིམཱསམིདཱིཔིཀཱ] ནཱམ པཀརཎཾ མནོཧཱརཉྩ ཨཏྟནོ མཏིཡཱ ཏེནེཝ དྷམྨསེནཱཔཏཱཙརིཡེན ཀཏཾ. ཀཱརིཀཱཡ ཊཱིཀཱ ཨཏྟནོ མཏིཡཱ ཨཉྙཏརཱཙརིཡེན ཀཏཱ. ཨེཏིམཱསམིདཱིཔིཀཱཡ ཊཱིཀཱ ཨཏྟནོ མཏིཡཱ ཨཉྙཏརཱཙརིཡེན ཀཏཱ.

སདྡབིནྡུཔཀརཎཾ ཨཏྟནོ མཏིཡཱ དྷམྨརཱཛསྶ གུརུནཱ ཨཉྙཏརཱཙརིཡེན ཀཏཾ. སདྡཝུཏྟིཔྤཀཱསཀཾ ནཱམ པཀརཎཾ ཨཉྙཏརེན བྷིཀྑུནཱ ཨཱཡཱཙིཏེན སདྡྷམྨགུརུ ནཱམཱཙརིཡེན ཀཏཾ. སདྡཝུཏྟིཔྤཀཱསཀསྶ ཊཱིཀཱ ཨཏྟནོ མཏིཡཱ སཱརིཔུཏྟཱཙརིཡེན ཀཏཱ.

ཀཙྩཱཡན སཱརོ ཙ ཀཙྩཱཡནསཱརསྶ ཊཱིཀཱ ཙཱཏི དུཝིདྷཾ པཀརཎཾ ཨཏྟནོ མཏིཡཱ ཨཉྙཏརཱཙརིཡེན ཀཏཾ. ལོཀདཱིཔཀསཱརཾ ནཱམ པཀརཎཾ ཨཏྟནོ མཏིཡཱ ནཝེནམེདྷངྐརཱཙརིཡེན ཀཏཾ. ལོཀུཔྤཏྟིཔཀརཎཾ ཨཏྟནོ མཏིཡཱ ཨགྒཔཎྜིཏཱཙརིཡེན ཀཏཾ. ཛངྒྷདཱསཀསྶ ཊཱིཀཱ བྷཱུཏཱ མགདྷཊཱིཀཱ ཨཏྟནོ མཏིཡཱ ཙཱིཝརཱཙརིཡེན ཀཏཱ. མཱཏིཀཏྠདཱིཔནཱི, ཨབྷིདྷམྨཏྠསངྒཧཝཎྞནཱ, སཱིམཱལངྐཱརསྶཊཱིཀཱ, གཎྛིསཱརོ, པཊྛཱནགཎནཱནཡོ ཙཱཏི ཨིམེ པཉྩ པཀརཎཱནི ཨཏྟནོ མཏིཡཱ སདྡྷམྨཛོཏིཔཱལཱཙརིཡེན ཀཏཱནི. སངྑེཔཝཎྞནཱ པརཀྐམབཱཧུ-ནཱམེན ཛམྦུདཱིཔིསྶརེན རཉྙོ ཨཱཡཱཙིཏེ ཏེནེཝ སདྡྷམྨཛོཏིཔཱལཱཙརིཡེན ཀཏཱ. ཀཙྩཱཡནསྶ སུཏྟནིདྡེསོ ཨཏྟནོ སིསྶེན དྷམྨཙཱརིནཱ ཐེརེན ཨཱཡཱཙིཏེན སདྡྷམྨཛོཏིཔཱལཱཙརིཡེན ཀཏོ. ཝིནཡསམུཊྛཱནདཱིཔནཱི ནཱམ པཀརཎཾ, ཨཏྟནོ གུརུནཱ སངྒྷཐེརེན ཨཱཡཱཙིཏེན སདྡྷམྨ-ཛོཏིཔཱལཱཙརིཡེན ཀཏཾ.

སཏྟཔཀརཎཱནི པན ཏེན པུཀྐཱམནགརེ ཀཏཱནི. སངྑེཔཝཎྞནཱཝ ལངྐཱདཱིཔེ ཀཏཱ. ཨབྷིདྷམྨ-པནྣརསཊྛཱནཝཎྞཱནཾ ནཱམ པཀརཎཾ ཨཏྟནོ མཏིཡཱ ནཝེན-ཝིམལབུདྡྷཱཙརིཡེན ཀཏཱ. སདྡསཱརཏྠཛཱལིནཱི ནཱམ པཀརཎཾ ཨཏྟནོ མཏིཡཱ ནཝེན-ཝིམལབུདྡྷཱཙརིཡེན ཀཏཾ. སདྡསཱརཏྠ-ཛཱལིནིཡཱ ཊཱིཀཱ, པཾཡནགརེ རཉྙོ གུརུནཱ སངྒྷརཱཛེན ཨཱཡཱཙིཏེན ཏེནེཝ ནཝེན ཝིམལབུདྡྷཱཙརིཡེན ཀཏཱ. ཝུཏྟོདཡསྶ ཊཱིཀཱ, ཨབྷིདྷམྨསངྒཧསྶ ཊཱིཀཱཡ པརམཏྠམཉྫཱུསཱ ནཱམ ཨནུཊཱིཀཱ, དསགཎྛིཝཎྞནཾ ནཱམ པཀརཎཾ, མགདྷབྷཱུཏཝིདགྒམུཁམཎྜནིཡཱཊཱིཀཱ ཙཱཏི ཨིམཱནི ཙཏྟཱརི པཀརཎཱནི ཨཏྟནོ མཏིཡཱ ཏེནེཝ ནཝེན ཝིམལབུདྡྷཱཙརིཡེན ཀཏཱནི.

པཉྩཔཀརཎཊཱིཀཱཡ ནཝཱནུཊཱིཀཱ ཨཏྟནོ མཏིཡཱ ཨཉྙཏརོ ཙརིཡེན ཀཏཱ. ཨབྷིདྷམྨསངྒཧསྶ ནཝཊཱིཀཱ ཨཏྟནོ མཏིཡཱ ཨཉྙཏརཱཙརིཡེན ཀཏཱ. ཨབྷིདྷམྨཏྠསངྒཧཊཱིཀཱཡ [མཎི] མཉྫཱུསཱ [མཎིསཱརམཉྫཱུསཱ] ནཱམ ནཝཱནུཊཱིཀཱ ཨཏྟནོ མཏིཡཱ ཨརིཡཝཾསཱཙརིཡེན ཀཏཱ.

པེཊཀོཔདེསསྶ ཊཱིཀཱ ཨཏྟནོ མཏིཡཱ ཨུདུམྦརིནཱམཱཙརིཡེན པུཀྐཱམནགརེ ཀཏཱ. ཙཏུབྷཱཎཝཱརསྶ ཨཊྛཀཐཱ, མཧཱསཱརཔཀཱསིནི, མཧཱདཱིཔནཱི, སཱརཏྠདཱིཔནཱི, གཏིཔཀརཎཾ, ཧཏྠཱསཱརོ, བྷུམྨསངྒཧོ, བྷུམྨནིདྡེསོ, དསཝཏྠུཀཱཡཝིརཏིཊཱིཀཱ, ཙོདནཱནིརུཏྟི, ཝིབྷཏྟིཀཐཱ, སདྡྷམྨམཱལིནི, པཉྩགཏིཝཎྞནཱ, བཱལཙིཏྟ-པབོདྷནཾ, དྷམྨཙཀྐསུཏྟསྶ ནཝཊྛཀཐཱ, དནྟདྷཱཏུ-པཀརཎསྶ ཊཱིཀཱ ཙ སདྡྷམྨོཔཱཡནོ བཱལཔྤབོདྷནཊཱིཀཱ ཙ, ཛིནཱལངྐཱརསྶ ནཝཊཱིཀཱ ཙ, ལིངྒཏྠ-ཝིཝརཎཾ, ལིངྒཏྠ-ཝིནིཙྪཡོ, པཱཏིམོཀྑཝིཝརཎཾ, པརམཏྠཀཐཱཝིཝརཎཾ, སམནྟཔཱསཱདིཀཝིཝརཎཾ, ཙཏུབྷཱཎཝཱརཊྛཀཐཱ ཝིཝརཎཾ, ཨབྷིདྷམྨསངྒཧཝིཝརཎཾ, སཙྩསངྑེཔཝིཝརཎཾ, སདྡཏྠབྷེདཙིནྟཱཝིཝརཎཾ, སདྡཝུཏྟིཝིཝརཎཾ, ཀཙྩཱཡནསཱརཝིཝརཎཾ, ཀཙྩཱཡནཝིཝརཎཾ, ཨབྷིདྷམྨསངྒཧསྶཊཱིཀཱཝིཝརཎཾ, མཧཱཝེསྶནྟརཛཱཏཀསྶ ཝིཝརཎཾ, སཀྐཱབྷིམཏཾ, མཧཱཝེསྶནྟརཛཱཏཀསྶ ནཝཊྛཀཐཱ, པཋམ-སམྦོདྷི ཙ ལོཀནེཏྟི, བུདྡྷགྷོསཱཙརིཡནིདཱནཾ, མིལིནྡ-པཉྷོ ཝཎྞནཱ, ཙཏུརཱརཀྑཱ, ཙཏུརཱརཀྑཱཡཨཊྛཀཐཱ, སདྡཝུཏྟིཔྤཀརཎསྶ ནཝཊཱིཀཱ ཙཱཏི ཨིམཱནི, ཏིཙཏྟཱལཱིས པཀརཎཱནི ཨཏྟནོ མཏིཡཱ སཱསནསྶ ཛཱཏིཡཱ སདྡྷམྨསྶ ཋིཏིཡཱ ཙ ལངྐཱདཱིཔཱདཱིསུ ཝིཾསུ ཝིཾསུ ཀཏཱནི.

སམྦུདྡྷེ གཱཐཱ ཙ…པེ… ནཝཧཱརགུཎཝཎྞནཱ ཙཱཏི ཨིམེ བུདྡྷཔཎཱམཱདིཀཱ གཱཐཱཡོ. ཨཏྟནོ ཨཏྟནོ བུདྡྷགུཎཔཀཱསནཏྠཱཡ ཨཏྟནོ ཙ པརེ ཙ ཨནནྟཔཉྙཱཔཝཏྟནཏྠཱཡ ཙ པཎྜིཏེཧི ལངྐཱདཱིཔཱདཱིསུ ཝིཾསུ ཝིཾསུ ཀཏཱ.

[ཨིཏི ཙུལླ-གནྠཝཾསེ ཨཱཡཱཙཀཱཙརིཡདཱིཔཀོ ནཱམ ཙཏུཏྠོ པརིཙྪེདོ.]

ནཱམཾ ཨཱརོཔནཾ པོཏྠཀཾ གནྠཀཱརསྶ ཙ. ལེཁཾལེཁཱཔནཉྩེཝ, ཝདཱམི ཏདནནྟརནྟི. ཏཏྠ ཙཏུརཱསཱིཏིཡཱ དྷམྨཀྑནྡྷསཧསྶཱནི པིཊཀ, ནིཀཱཡངྒ, ཝགྒ, ནིཔཱཏཱདིཀཾ ནཱམཾ, ཀེནཱརོཔིཏཾ, ཀཏྠ ཨཱརོཔིཏཾ, ཀདཱ ཨཱརོཔིཏཾ, ཀིམཏྠཾ ཨཱརོཔིཏནྟི? ཏཏྲཱཡཾ པིཝིསཛྫནཱཀེན ཨཱརོཔིཏནྟི པཉྩསཏཁཱིཎཱསཝེཧི ཨཱརོཔིཏཾ. ཏེཧི སབྦབུདྡྷཝཙནཾ སངྒཱཡནྟི, ཨིདཾ པིཊཀཾ, ཨཡཾ ནིཀཱཡོ, ཨིདཾ ཨངྒཾ, ཨཡཾ ཝགྒོ, ཨཡཾ ནིཔཱཏོཏི. ཨེཝམཱདིཀཾ ནཱམཾ ཨཱརོཔེནྟི. ཀཏྠ ཨཱརོཔིཏནྟི? རཱཛགཧེ ཝེབྷཱརཔབྦཏསྶ པཱདེ དྷམྨམཎྜཔྤེ ཨཱརོཔིཏཾ. ཀདཱ ཨཱརོཔིཏནྟི? བྷགཝཏོ པརིནིབྦུཏེ པཋམསངྒཱཡནཀཱལེ ཨཱརོཔིཏཾ. ཀིམཏྠཾ ཨཱརོཔིཏནྟི? དྷམྨཀྑནྡྷཱནཾ ཝོཧཱརསུཁཏྠཱཡ སུཁདྷཱརཎཏྠཱཡ ཙ ཨཱརོཔིཏཾ. སངྒཱིཏིཀཱལེ པཉྩསཏཱ ཁཱིཎཱསཝཱ ཏེསཉྩ དྷམྨཀྑནྡྷཱནཾ ནཱམ ཝགྒནིཔཱཏཏོ. ཨིམསྶ དྷམྨཀྑནྡྷསྶ ཨཡཾ ནཱམོ ཧོཏུ, ཨིམསྶ ཙ པཀརཎསྶ ཨཡཾ ནཱམོཏི, ཨབྲཝུཾ སབྦཾ ནཱམཱདིཀཾ ཀིཙྩཾ ཨཀཾསུ. ཏེ ཁཱིཎཱསཝཱ, ཡདི ནཱམཱདིཀཾ ཀིཙྩཾ ཨཀཏཾ ན སུཔཱཀཏཾ ཏསྨཱ ཝོཧཱརསུཁཏྠཱཡནཱམཱདིཀཾ ཀིཙྩཾ ཀཏཾ ཨནཱགཏེ པནཏྠཱཡ ནཱམཱདིཀཾ པཝཏྟིཏཾ ཨསཉྫཱཏནཱམོ ན སུཊྛུ པཱཀཏོ སབྦསོ བྷཝེཏི. དྷམྨཀྑནྡྷཱནཾ ནཱམ དཱིཔནཱ ནིཊྛིཏཱ.

ཙཏུརཱསཱིཏི དྷམྨཀྑནྡྷསཧསྶཱནི ཀེན པོཏྠཀེ ཨཱརོཔིཏཱནི, ཀདཱ ཨཱརོཔིཏཱནི, ཀིམཏྠཾ ཨཱརོཔིཏཱནཱིཏི. ཏཏྲཱཡཾ ཝིསཛྫནཱ ཀེནཱརོཔིཏཱནིཏི? ཁཱིཎཱསཝམཧཱནཱགེཧི ཨཱརོཔིཏཱནི. ཀཏྠ ཨཱརོཔིཏཱནཱིཏི? ལངྐཱདཱིཔེ ཨཱརོཔིཏཱནི. ཀདཱ ཨཱརོཔིཏཱནཱིཏི? སདྡྷཱཏིསྶསྶརཱཛིནོ པུཏྟསྶ ཝཊྚགཱམནི རཱཛསྶ ཀཱལེ ཨཱརོཔིཏཱནི. ཀིམཏྠཾ ཨཱརོཔིཏཱནཱིཏི? དྷམྨཀྑནྡྷཱནཾ ཨཝིདྷཾསནཏྠཱཡ སདྡྷམྨཊྛིཏིཡཱ ཙ ཨཱརོཔིཏཱནི.

དྷརམཱནོ ཧི བྷགཝཱ, ཨམྷཱཀཾ སུགཏོདྷཱིརོ;

ནིཀཱཡེ པཉྩདེསེཏི, ཡཱཝ ནིབྦཱནགམནཱ.

སབྦེཔི ཏེ བྷིཀྑུ ཨཱདི, མནསཱ ཝཙསཱཧཱརོ;

སབྦེ ཙ ཝཱཙུགྒཏཱ ཧོནྟི, མཧཱཔཉྙཱསཏིཝརཱ.

ནིབྦཱུཏེ ལོཀནཱཐམྷི, ཏཏོ ཝསྶསཏཾ བྷཝེ;

ཨརིཡཱནརིཡཱ ཙཱཔི ཙ, སབྦེ ཝཱཙུགྒཏཱ དྷུཝཾ.

ཏཏོ པརཾ ཨཊྛརསཾ, དྭིསཏཾཝསྶ གཎནཾ;

སབྦེ པུཐུཛྫནཱ ཙེཝ, ཨརིཡཱ ཙ སབྦེཔིཏེ.

དུཊྛགཱམཎིརཉྙོ ཙ, ཀཱལེ ཝཱཙུགྒཏཱ དྷུཝཾ.

ཨརིཡཱནརིཡཱཔི ཙ, ནིཀཱཡེ དྷཱརཎཱསདཱ;

ཏཏོ པརམྷི རཱཛཱ ཙ, ཏཏོ ཙུཏོ ཙ ཏུསིཏེ.

ཨུཔྤཛྫི དེཝ ལོཀེ སོ, དེཝེཧི པརིཝཱརིཏོ;

སདྡྷཱ ཏིསྶོཏི ནཱམེན, ཏསྶ ཀནིཊྛཀོ ཧིཏོ.

ཏཏོ ལདྡྷརཊྛོ ཧོཏི, བུདྡྷསཱསནཔཱལཀོ.

ཏདཱ ཀཱལེ བྷིཀྑཱུ ཨཱསུཾ, སབྦེ ཝཱཙུགྒཏཱ སདཱ;

ནིཀཱཡེ པཉྩཝེདྷེཝ, ཡཱཝ རཉྙོ ཙ དྷཱརཎཱ;

ཏཏོ ཙུཏོ སོ རཱཛཱ ཙ, ཏུསྶཱིཏེ ཨུཔཔཛྫཏི;

དེཝལོཀེཊྛིཏོ སནྟོ, ཏདཱ ཝཱཙུགྒཏཱ ཏཏོ.

ཏསྶ པུཏྟཱཔི ཨཧེསུཾ, ཨནེཀཱ ཝརཛྫཾ གཏཱ;

ཨནུཀྐམེན ཙུཏཏེ, དེཝལོཀཾ གཏཱ དྷུཝཾ;

ཏདཱཔིཏེ སབྦེ བྷིཀྑཱུ, ཝཱཙུགྒཏཱཝ སབྦདཱ;

ནིཀཱཡེ པཉྩཝིདྷེཝ, དྷཱརཎཱཝསཏིམཏཱ.

ཏཏོ པརཾ པོཏྠཀེསུ, ནིཀཱཡཱ པཉྩ པིཊྛིཏཱ;

ཏདཱ ཨཊྛཀཐཱ ཊཱིཀཱ, སབྦེ གནྠཱ པོཏྠཀེ གཏཱ;

སབྦེ པོཏྠེསུ ཡེ གནྠཱ, པཱལི༹ ཨཊྛཀཐཱ ཊཱིཀཱ;

སཾཊྛིཏཱསཾ ཋིཏཱ ཧོནྟི, སབྦེཔི ནོ ན སནྟིཏེ.

ཏདཱ ཏེ པོཏྠཀེཡེཝ, ནིཀཱཡཱ པིཋིཏཱ ཁིལཱ;

ཏདཱ ཨཊྛཀཐཱདཱིནི, བྷཝནྟཱིཏི ཝདནྟི ཙ.

ལངྐཱདཱིཔསྶ རཉྙོཝ, སདྡྷཱ ཏིསྶསྶ རཱཛིནོ.

པུཏྟཀོ ལངྐཱདཱིཔསྶ, ཨིསྶརོ དྷམྨིཀོ ཝརོ;

ཏདཱ ཁཱིཎཱསཝཱ སབྦེ, ཨོལོཀེནྟི ཨནགཏེ.

ཁཱིཎཱསཝཱ པསྶནྟི ཏེ, དུཔཉྙེཝ པུཐུཛྫནེ;

སབྦེཔི ཏེ བྷིཀྑཱུ ཨཱསུཾ, བཧུཾཏརཱ པུཐུཛྫནཱ;

ན སཀྑིསྶནྟི ཏེ པཉྩ, ནིཀཱཡེ ཝཱཙུགྒཏཾ ཨིཏི;

པོཏྠཀེསུ སབྦེ པཉྩ, ཨཱརོཔེནྟི ཁཱིཎཱསཝཱ.

སདྡྷམྨཊྛིཏི ཙིརཏྟཱཡ, ཛནཱནཾ པུཉྙཏྠཱཡ ཙ;

ཏཏོ པཊྛཱཡཏེ སབྦེ, ནིཀཱཡཱ ཧོནྟི པོཏྠཀེ;

ཨཊྛཀཐཱ ཊཱིཀཱ སབྦེ, ཏེ ཧོནྟི པོཏྠཀེཊྛིཏཱ.

ཏཏོ པཊྛཱཡཏེ སབྦེ, བྷིཀྑུ ཨཱདི མཧཱགཎཱ;

པོཏྠཀེསུ ཋིཏེཡེཝ, སབྦེ པསྶནྟི སབྦདཱ.

[པོཏྠཀེ ཨཱརོཔན དཱིཔཀཱ ནིཊྛིཏཱ.]

ཡོ ཀོཙི པཎྜིཏོ དྷཱིརོ, ཨཊྛཀཐཱདིཀཾ གནྠཾ ཀརོཏི ཝཱ ཀཱརཱཔེཏི ཝཱ, ཏསྶ ཨནནྟཀོ ཧོཏི པུཉྙསཾཙཡོ, ཨནནྟཀོ ཧོཏི པུཉྙཱནིསཾསོ. ཙཏུརཱསཱིཏི ཙེཏིཡསཧསྶ ཀརཎསདིསོ, ཙཏུརཱསཱིཏི བུདྡྷརཱུཔསཧསྶ ཀརཎསདིསོ, ཙཏུརཱསཱིཏི བོདྷིརུཀྑསཧསྶརོཔནསདིསོ, ཙཏུརཱསཱིཏི ཝིཧཱརསཧསྶ ཀརཎསདིསོ, ཡོ ཙ བུདྡྷཝཙནམཉྫཱུསཾ ཀརོཏི ཝཱ ཀཱརཱཔེཏི ཝཱ, ཡོ ཙ བུདྡྷཝཙནཾ མཎྜནཾ ཀརོཏི ཝཱ ཀཱརཱཔེཏི ཝཱ, ཡོ ཙ བུདྡྷཝཙནཾ ལེཁཾ ཀརོཏི ཝཱ ཀཱརཱཔེཏི ཝཱ, ཡོ ཙ པོཏྠཀཾ ཝཱ, ཡོ ཙ པོཏྠཀམཱུལཾ ཝཱ, དེཏི ཝཱ དཱཔེཏི ཝཱ, ཡོ ཙ ཏེལཾ ཝཱ ཙུཎྞཾ ཝཱ, དྷཉྙཾ ཝཱ པོཏྠཀབྷཉྫནཏྠཱཡ ཡཾ ཀིཉྩི ནིཏྠཾ ཝཱ པོཏྠཀཚིདྡེ ཨཱཝུནཏྠཱཡ, ཡཾ ཀིཉྩི སུཏྟཾ ཝཱ ཀཊྛཕལཀདྭཡཾ ཝཱ པོཏྠཀཾ པུཊནཏྠཱཡ ཡཾ ཀིཉྩི ཝཏྠཾ ཝཱ, པོཏྠཀ-བནྡྷནཏྠཱཡ, ཡཾ ཀིཉྩི ཡོཏྟཾ ཝཱ པོཏྠཀལཱཔ པཱུཊནཏྠཱཡ ཡཾ ཀིཉྩི ཐཝིཀཾ དེཏི ཝཱ དཱཔེཏི ཝཱ.

ཡོ ཙ ཧརིཏཱལེན ཝཱ མནོསིལཱཡ ཝཱ, སུཝཎྞེན ཝཱ རཛཏེན ཝཱ པོཏྠཀམཎྜནཾ ཝཱ ཀཊྛཕལཀམཎྜནཾ ཝཱ ཀརོཏི ཝཱ ཀཱརཱཔེཏི ཝཱ, ཏསྶ ཨནནྟཀོ ཧོཏི པུཉྙསཾཙཡོ, ཨནནྟཀོ ཧོཏི པུཉྙཱནིསཾསོ. ཙཏུརཱསཱིཏི ཙེཏིཡསཧསྶ ཀརཎསདིསོ, ཙཏུརཱསཱིཏི ཝིཧཱརསཧསྶ ཀརཎསདིསོ.

བྷཝེ ནིབྦཏྟམཱནོ སོ, སཱིལགུཎམུཔཱགཏཱ;

མཧཱ ཏེཛོ སདཱ ཧོཏི, སཱིཧནཱདོ ཝིསཱརདོ.

ཨཱཡུཝཎྞབལུཔྤེཏོ, དྷམྨཀཱམོ བྷཝེ སདྡཱ;

དེཝམནུསྶལོཀེསུ, མཧེསཀྑོ ཨནཱམཡོ.

བྷཝེ ནིབྦཏྟམཱནོ སོ, པཉྙཝཱ སུསམཱཧིཏོ;

ཨདྷིཔཙྩ པརིཝཱརོ, སབྦསུཁཱདྷི གཙྪཏི.

སདྡོཧཱིརིམཱ ཝདཉྙཱུ, སཾཝིགྒ མཱནསོ བྷཝེ;

ཨངྒཔཙྩངྒ སམྤནྣོ, ཨཱརོཧ པརིཎཱཧཝཱ.

སབྦེ སཏྟཱཔི ཡོ ལོཀེ, སབྦཏྠ པཱུཛིཏཱབྷཝེ;

དེཝམནུསྶ སཉྩརོ, མིཏྟསཧཱཡ པཱལིཏོ.

དེཝམནུསྶ སམྤཏྟིཾ, ཨནུབྷོཏི པུནཔྤུནཾ;

ཨརཧཏྟ ཕལཾ པཏྟོ, ནིབྦཱནཾ པཱཔུཎིསྶཏི.

པཊིསམྦྷིདཱ ཙཏསྶོ, ཨབྷིཉྙཱ ཚབྦིདྷེ ཝརེ;

ཝིམོཀྑེ ཨཊྛཀེ སེཊྛེ, གམིསྶཏི ཨནཱགཏེ.

ཏསྨཱཧི པཎྜིཏོ པོསོ, སཾཔསྶཾ ཧིཏ མཏྟནོ;

ཀཱརེཡྻ སཱམ གནྠེ ཙ, ཨཉྙེ ཙཱཔི ཀཱརཱཔཡེ.

པོཏྠཀེ ཙ ཋིཏེ གནྠེ, པཱལི༹ ཨཊྛཀཐཱདིཀེ;

དྷམྨམཉྫཱུསཱ གནྠེ ཙ, ལེཁཾ ཀརེ ཀཱརཱཔཡེ.

པོཏྠཀཾ པོཏྠཀམཱུལཉྩ, ཏེསཾ ཙུལླཐཱུསམྤི ཙ;

པིལོཏིཀཱདིཀཾ སུཏྟཾ, ཀཊྛཕལདྭཡམྷི ཙ.

དྷམྨབནྡྷནཏྠཱཡ ཙ, ཡཾ ཀིཉྩི མཧགྒྷཾ ཝཏྠཾ;

དྷམྨབནྡྷནཡོཏྟཉྩ, ཡཾ ཀིཉྩི ཐཝིཀམྤི ཙ.

དདེཡྻ དྷམྨཁེཏྟམྷི, ཝིཔྤསྶནྣེན ཙེཏསཱ;

ཨཉྙོ ཙཱཔི དཛྫཱཔེཡྻ, མིཏྟསཧཱཡབནྡྷཝེཏི.

གནྠཱཀརལེཁལེཁཱཔནཱནིསཾས དཱིཔནཱ ནིཊྛིཏཱ.

[ཨིཏི ཙཱུལགནྠཝཾསེ པཀིཎྞཀདཱིཔཀོ ནཱམ པཉྩམོ པརིཙྪེདོ.]

སོཧཾ ཧཾསཱརཊྛ ཛཱཏོ, ནནྟཔཉྙོཏི ཝིསྶུཏོ

སདྡྷཱ སཱིལ ཝཱིརཔྤེཏོ, དྷམྨརསཾ གཝེསནོ.

སོཧཾ ཏཏོ གནྟྭཱ ཙིམཾ, ཛིན ནཝཾ ཡཾ པཱུརཾ;

སབྦ དྷམྨཾ ཝིཙིནནྟོ, ཝཱིསཏི ཝསྶམཱགཏོ.

སབྦ དྷམྨཾ ཝིསྶེཛྫེནྟོ, ཀིཀཱརེ ནེཝ བྷིཀྑུནོ;

ཚ ཝསྶཱནཾ གཎཾ བྷིཏྭཱ, ཀཱམཱནཾ ཨབྷིམདྡནཾ.

སནྟི སབྷཱ ཙ ནིབྦཱནཾ, གཝེསིཉྩ པུནཔྤུནཾ;

ཝསནྟོཧཾ, ཝནཱརམྨཾ, པིཊཀཏྟཡ སངྒཧཾ;

གནྠཝཾསཾ ཨིམཾ ཁུདྡཾ, ཨརིཡསངྒྷདཱསཀནྟི.

ཨིཏི པཱམོཛྫཏྠཱཡ ཨརཉྙཝཱསིནཱ, ནནྡཔཉྙཱཙརིཡེན ཀཏོ ཙཱུལ༹གནྠཝཾསོ ནིཊྛིཏོ.

དྷམྨཝཊཾསཀནཱམེན ཝིསུཏོ ཐེརོ, ཡཾ པཀརཎཾ ལིཀྑིཏཾ ཏཾ པརིཔུཎྞཾ ཏེན པུཉྙེན ཏཾ པིཊཀཾ པརིསིཔྤཾ པརིནིཊྛིཏཾ.

མམེཝ སིསྶསམཱུཧཱནཉྩ པརིསིཔྤཾ པརིནིཊྛིཏཾ. ཏཝེ སིསྶཱནཱུ སིསྶཱནི ཙ, པརིསིཔྤཾ པརིནིཊྛིཏཾ.